📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀦𑁂𑀢𑁆𑀢𑀺𑀧𑁆𑀧𑀓𑀭𑀡-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀫𑀳𑀸𑀓𑀸𑀭𑀼𑀡𑀺𑀓𑀁 ¶ ¶ 𑀦𑀸𑀣𑀁, 𑀜𑁂𑀬𑁆𑀬𑀲𑀸𑀕𑀭𑀧𑀸𑀭𑀕𑀼𑀁;

𑀯𑀦𑁆𑀤𑁂 𑀦𑀺𑀧𑀼𑀡𑀕𑀫𑁆𑀪𑀻𑀭-𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀁.

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀸, 𑀬𑁂𑀦 𑀦𑀺𑀬𑁆𑀬𑀦𑁆𑀢𑀺 𑀮𑁄𑀓𑀢𑁄;

𑀯𑀦𑁆𑀤𑁂 𑀢𑀫𑀼𑀢𑁆𑀢𑀫𑀁 𑀥𑀫𑁆𑀫𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀽𑀚𑀺𑀢𑀁.

𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄, 𑀞𑀺𑀢𑁄 𑀫𑀕𑁆𑀕𑀨𑀮𑁂𑀲𑀼 𑀬𑁄;

𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀁 𑀢𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑀯𑀦𑁆𑀤𑀦𑀸𑀚𑀦𑀺𑀢𑀁 𑀧𑀼𑀜𑁆𑀜𑀁, 𑀇𑀢𑀺 𑀬𑀁 𑀭𑀢𑀦𑀢𑁆𑀢𑀬𑁂;

𑀳𑀢𑀦𑁆𑀢𑀭𑀸𑀬𑁄 𑀲𑀩𑁆𑀩𑀢𑁆𑀣, 𑀳𑀼𑀢𑁆𑀯𑀸𑀳𑀁 𑀢𑀲𑁆𑀲 𑀢𑁂𑀚𑀲𑀸.

𑀞𑀺𑀢𑀺𑀁 ¶ 𑀆𑀓𑀗𑁆𑀔𑀫𑀸𑀦𑁂𑀦, 𑀘𑀺𑀭𑀁 𑀲𑀤𑁆𑀥𑀫𑁆𑀫𑀦𑁂𑀢𑁆𑀢𑀺𑀬𑀸;

𑀥𑀫𑁆𑀫𑀭𑀓𑁆𑀔𑀺𑀢𑀦𑀸𑀫𑁂𑀦, 𑀣𑁂𑀭𑁂𑀦 𑀅𑀪𑀺𑀬𑀸𑀘𑀺𑀢𑁄.

𑀧𑀤𑀼𑀫𑀼𑀢𑁆𑀢𑀭𑀦𑀸𑀣𑀲𑁆𑀲, 𑀧𑀸𑀤𑀫𑀽𑀮𑁂 𑀧𑀯𑀢𑁆𑀢𑀺𑀢𑀁;

𑀧𑀲𑁆𑀲𑀢𑀸 𑀅𑀪𑀺𑀦𑀻𑀳𑀸𑀭𑀁, 𑀲𑀫𑁆𑀧𑀢𑁆𑀢𑀁 𑀬𑀲𑁆𑀲 𑀫𑀢𑁆𑀣𑀓𑀁.

𑀲𑀁𑀔𑀺𑀢𑁆𑀢𑀁 𑀯𑀺𑀪𑀚𑀦𑁆𑀢𑀸𑀦𑀁, 𑀏𑀲𑁄 𑀅𑀕𑁆𑀕𑁄𑀢𑀺 𑀢𑀸𑀤𑀺𑀦𑀸;

𑀞𑀧𑀺𑀢𑁄 𑀏𑀢𑀤𑀕𑁆𑀕𑀲𑁆𑀫𑀺𑀁, 𑀬𑁄 𑀫𑀳𑀸𑀲𑀸𑀯𑀓𑀼𑀢𑁆𑀢𑀫𑁄.

𑀙𑀴𑀪𑀺𑀜𑁆𑀜𑁄 𑀯𑀲𑀺𑀧𑁆𑀧𑀢𑁆𑀢𑁄, 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄;

𑀫𑀳𑀸𑀓𑀘𑁆𑀘𑀸𑀬𑀦𑁄 𑀣𑁂𑀭𑁄, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀲𑀁𑀲𑀺𑀢𑁄.

𑀢𑁂𑀦 ¶ 𑀬𑀸 𑀪𑀸𑀲𑀺𑀢𑀸 𑀦𑁂𑀢𑁆𑀢𑀺, 𑀲𑀢𑁆𑀣𑀸𑀭𑀸 𑀅𑀦𑀼𑀫𑁄𑀤𑀺𑀢𑀸;

𑀲𑀸𑀲𑀦𑀲𑁆𑀲 𑀲𑀤𑀸𑀬𑀢𑁆𑀢𑀸, 𑀦𑀯𑀗𑁆𑀕𑀲𑁆𑀲𑀢𑁆𑀣𑀯𑀡𑁆𑀡𑀦𑀸.

𑀢𑀲𑁆𑀲𑀸 𑀕𑀫𑁆𑀪𑀻𑀭𑀜𑀸𑀡𑁂𑀳𑀺, 𑀑𑀕𑀸𑀳𑁂𑀢𑀩𑁆𑀩𑀪𑀸𑀯𑀢𑁄;

𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀭𑀸 𑀓𑀸𑀢𑀼𑀁, 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀫𑀬𑀸.

𑀲𑀳 𑀲𑀁𑀯𑀡𑁆𑀡𑀦𑀁 𑀬𑀲𑁆𑀫𑀸, 𑀥𑀭𑀢𑁂 𑀲𑀢𑁆𑀣𑀼𑀲𑀸𑀲𑀦𑀁;

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀢𑀺𑀝𑁆𑀞𑀢𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀢𑀲𑁆𑀫𑀸 𑀢𑀫𑀼𑀧𑀦𑀺𑀲𑁆𑀲𑀸𑀬, 𑀑𑀕𑀸𑀳𑁂𑀢𑁆𑀯𑀸𑀦 𑀧𑀜𑁆𑀘𑀧𑀺;

𑀦𑀺𑀓𑀸𑀬𑁂 𑀧𑁂𑀝𑀓𑁂𑀦𑀸𑀧𑀺, 𑀲𑀁𑀲𑀦𑁆𑀤𑀺𑀢𑁆𑀯𑀸 𑀬𑀣𑀸𑀩𑀮𑀁.

𑀲𑀼𑀯𑀺𑀲𑀼𑀤𑁆𑀥𑀫𑀲𑀁𑀓𑀺𑀡𑁆𑀡𑀁, 𑀦𑀺𑀧𑀼𑀡𑀢𑁆𑀣𑀯𑀺𑀦𑀺𑀘𑁆𑀙𑀬𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀲𑀫𑀬𑀁 𑀅𑀯𑀺𑀮𑁄𑀫𑀬𑀁.

𑀧𑀫𑀸𑀤𑀮𑁂𑀔𑀁 𑀯𑀚𑁆𑀚𑁂𑀢𑁆𑀯𑀸, 𑀧𑀸𑀴𑀺𑀁 𑀲𑀫𑁆𑀫𑀸 𑀦𑀺𑀬𑁄𑀚𑀬𑀁;

𑀉𑀧𑀤𑁂𑀲𑀁 𑀯𑀺𑀪𑀸𑀯𑁂𑀦𑁆𑀢𑁄, 𑀓𑀭𑀺𑀲𑁆𑀲𑀸𑀫𑀢𑁆𑀣𑀯𑀡𑁆𑀡𑀦𑀁.

𑀇𑀢𑀺 ¶ 𑀅𑀢𑁆𑀣𑀁 𑀅𑀲𑀗𑁆𑀓𑀺𑀡𑁆𑀡𑀁, 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀫𑁂;

𑀯𑀺𑀪𑀚𑀦𑁆𑀢𑀲𑁆𑀲 𑀲𑀓𑁆𑀓𑀘𑁆𑀘𑀁, 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄𑀢𑀺.

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀦𑁂𑀢𑁆𑀢𑀺? 𑀲𑀤𑁆𑀥𑀫𑁆𑀫𑀦𑀬𑀦𑀝𑁆𑀞𑁂𑀦 𑀦𑁂𑀢𑁆𑀢𑀺. 𑀬𑀣𑀸 𑀳𑀺 𑀢𑀡𑁆𑀳𑀸 𑀲𑀢𑁆𑀢𑁂 𑀓𑀸𑀫𑀸𑀤𑀺𑀪𑀯𑀁 𑀦𑀬𑀢𑀻𑀢𑀺 ‘‘𑀪𑀯𑀦𑁂𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀬𑀫𑁆𑀧𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀅𑀭𑀺𑀬𑀥𑀫𑁆𑀫𑀁 𑀦𑀬𑀢𑀻𑀢𑀺 𑀲𑀤𑁆𑀥𑀫𑁆𑀫𑀦𑀬𑀦𑀝𑁆𑀞𑁂𑀦 ‘‘𑀦𑁂𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀦𑀬𑀦𑁆𑀢𑀺 𑀢𑀸𑀬𑀸𑀢𑀺 𑀦𑁂𑀢𑁆𑀢𑀺. 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑁂𑀦 𑀳𑀺 𑀓𑀭𑀡𑀪𑀽𑀢𑁂𑀦 𑀥𑀫𑁆𑀫𑀓𑀣𑀺𑀓𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀤𑀲𑁆𑀲𑀦𑀫𑀕𑁆𑀕𑀁 𑀦𑀬𑀦𑁆𑀢𑀺 𑀲𑀫𑁆𑀧𑀸𑀧𑁂𑀦𑁆𑀢𑀻𑀢𑀺, 𑀦𑀻𑀬𑀦𑁆𑀢𑀺 𑀯𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀅𑀥𑀺𑀝𑁆𑀞𑀸𑀦𑀪𑀽𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑁂𑀦𑁂𑀬𑁆𑀬𑀸 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑀺𑀬𑀦𑁆𑀢𑀻𑀢𑀺 𑀦𑁂𑀢𑁆𑀢𑀺. 𑀦 𑀳𑀺 𑀦𑁂𑀢𑁆𑀢𑀺𑀉𑀧𑀤𑁂𑀲𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀅𑀯𑀺𑀧𑀭𑀻𑀢𑀲𑀼𑀢𑁆𑀢𑀢𑁆𑀣𑀸𑀯𑀩𑁄𑀥𑁄 𑀲𑀫𑁆𑀪𑀯𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀫𑀸 𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑁂𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀸𑀧𑀺 𑀳𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀦𑁂𑀢𑁆𑀢𑀺𑀉𑀧𑀤𑁂𑀲𑀸𑀬𑀢𑁆𑀢𑀸, 𑀦𑁂𑀢𑁆𑀢𑀺 𑀘 𑀲𑀼𑀢𑁆𑀢𑀧𑁆𑀧𑀪𑀯𑀸, 𑀲𑀼𑀢𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀪𑀯𑀦𑁆𑀢𑀺.

𑀲𑀸 𑀧𑀦𑀸𑀬𑀁 𑀦𑁂𑀢𑁆𑀢𑀺 𑀧𑀓𑀭𑀡𑀧𑀭𑀺𑀘𑁆𑀙𑁂𑀤𑀢𑁄 𑀢𑀺𑀧𑁆𑀧𑀪𑁂𑀤𑀸 𑀳𑀸𑀭𑀦𑀬𑀧𑀝𑁆𑀞𑀸𑀦𑀸𑀦𑀁 𑀯𑀲𑁂𑀦. 𑀧𑀞𑀫𑀜𑁆𑀳𑀺 𑀳𑀸𑀭𑀯𑀺𑀘𑀸𑀭𑁄, 𑀢𑀢𑁄 𑀦𑀬𑀯𑀺𑀘𑀸𑀭𑁄, 𑀧𑀘𑁆𑀙𑀸 𑀧𑀝𑁆𑀞𑀸𑀦𑀯𑀺𑀘𑀸𑀭𑁄𑀢𑀺. 𑀧𑀸𑀴𑀺𑀯𑀯𑀢𑁆𑀣𑀸𑀦𑀢𑁄 𑀧𑀦 𑀲𑀗𑁆𑀕𑀳𑀯𑀸𑀭𑀯𑀺𑀪𑀸𑀕𑀯𑀸𑀭𑀯𑀲𑁂𑀦 𑀤𑀼𑀯𑀺𑀥𑀸. 𑀲𑀩𑁆𑀩𑀸𑀧𑀺 𑀳𑀺 𑀦𑁂𑀢𑁆𑀢𑀺 𑀲𑀗𑁆𑀕𑀳𑀯𑀸𑀭𑁄 𑀯𑀺𑀪𑀸𑀕𑀯𑀸𑀭𑁄𑀢𑀺 𑀯𑀸𑀭𑀤𑁆𑀯𑀬𑀫𑁂𑀯 𑀳𑁄𑀢𑀺.

𑀢𑀢𑁆𑀣 ¶ 𑀲𑀗𑁆𑀕𑀳𑀯𑀸𑀭𑁄 𑀆𑀤𑀺𑀢𑁄 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀲𑀩𑁆𑀩𑁄 𑀳𑀺 𑀧𑀓𑀭𑀡𑀢𑁆𑀣𑁄 ‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂’’𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀅𑀧𑀭𑀺𑀕𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀦𑀦𑀼 𑀘𑁂𑀢𑁆𑀣 𑀧𑀝𑁆𑀞𑀸𑀦𑀁 𑀅𑀲𑀗𑁆𑀕𑀳𑀺𑀢𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀝𑁆𑀞𑀩𑁆𑀩𑀁, 𑀫𑀽𑀮𑀧𑀤𑀕𑁆𑀕𑀳𑀡𑁂𑀦 𑀧𑀝𑁆𑀞𑀸𑀦𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸 𑀲𑀸𑀲𑀦𑀧𑀝𑁆𑀞𑀸𑀦𑁂’’𑀢𑀺. 𑀫𑀽𑀮𑀧𑀤𑀧𑀝𑁆𑀞𑀸𑀦𑀸𑀦𑀺 𑀳𑀺 𑀅𑀢𑁆𑀣𑀦𑀬𑀲𑀗𑁆𑀔𑀸𑀭𑀢𑁆𑀢𑀺𑀓𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀕𑀳𑀺𑀢𑀸𑀦𑀺.

𑀯𑀺𑀪𑀸𑀕𑀯𑀸𑀭𑁄 𑀧𑀦 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀢𑀺𑀯𑀺𑀥𑁄. 𑀢𑁂𑀲𑀼 ‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀪𑀯𑀦𑁆𑀢𑀺 𑀅𑀝𑁆𑀞𑀸𑀭𑀲 𑀧𑀤𑀸𑀦𑀻’’𑀢𑀺 𑀅𑀬𑀁 𑀉𑀤𑁆𑀤𑁂𑀲𑀯𑀸𑀭𑁄. ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀢𑁂𑀢𑁆𑀢𑀺𑀁𑀲𑀸 𑀏𑀢𑁆𑀢𑀺𑀓𑀸 𑀦𑁂𑀢𑁆𑀢𑀻’’𑀢𑀺 𑀅𑀬𑀁 𑀦𑀺𑀤𑁆𑀤𑁂𑀲𑀯𑀸𑀭𑁄. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑁄 𑀧𑀦 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀦𑀬𑀲𑀫𑀼𑀝𑁆𑀞𑀸𑀦𑀯𑀸𑀭𑁄 𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑁂𑀲𑀼 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀅𑀬𑀁 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸’’𑀢𑀺 𑀅𑀬𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄. 𑀢𑀢𑁆𑀣 ‘‘𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀅𑀬𑀁 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄. 𑀏𑀢𑁆𑀣𑀸𑀳 𑁋 𑀳𑀸𑀭𑀯𑀺𑀪𑀗𑁆𑀕𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀢𑁆𑀣 𑀅𑀦𑁂𑀓𑁂𑀳𑀺𑀧𑀺 𑀉𑀤𑀸𑀳𑀭𑀡𑀲𑀼𑀢𑁆𑀢𑁂𑀳𑀺 𑀏𑀓𑁄 ¶ 𑀳𑀸𑀭𑁄 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀅𑀬𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄. 𑀬𑀢𑁆𑀣 𑀧𑀦 𑀏𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑁂𑀓𑁂 𑀳𑀸𑀭𑀸 𑀲𑀫𑁆𑀧𑀢𑀦𑁆𑀢𑀺, 𑀅𑀬𑀁 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁂𑀝𑀓𑁂 𑁋

‘‘𑀬𑀢𑁆𑀣 𑀘 𑀲𑀩𑁆𑀩𑁂 𑀳𑀸𑀭𑀸, 𑀲𑀫𑁆𑀧𑀢𑀫𑀸𑀦𑀸 𑀦𑀬𑀦𑁆𑀢𑀺 𑀲𑀼𑀢𑁆𑀢𑀢𑁆𑀣𑀁;

𑀩𑁆𑀬𑀜𑁆𑀚𑀦𑀯𑀺𑀥𑀺𑀧𑀼𑀣𑀼𑀢𑁆𑀢𑀸, 𑀲𑀸 𑀪𑀽𑀫𑀻 𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺.

𑀦𑀬𑀲𑀫𑀼𑀝𑁆𑀞𑀸𑀦𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑀯𑀺𑀪𑀸𑀕𑁄 𑀧𑀸𑀓𑀝𑁄 𑀏𑀯. 𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑁄 𑀧𑀦 𑀲𑀗𑁆𑀕𑀳𑀯𑀸𑀭𑁂 𑀯𑀺𑀬 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀸𑀭𑁂𑀲𑀼𑀧𑀺 𑀦 𑀲𑀭𑀽𑀧𑀢𑁄 𑀉𑀤𑁆𑀥𑀝𑁄𑀢𑀺. 𑀏𑀢𑁆𑀣𑀸𑀳 𑁋 ‘‘𑀇𑀤𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀫𑀳𑀸𑀲𑀸𑀯𑀓𑀪𑀸𑀲𑀺𑀢𑀁, 𑀪𑀕𑀯𑀢𑀸 𑀅𑀦𑀼𑀫𑁄𑀤𑀺𑀢’’𑀦𑁆𑀢𑀺 𑀘 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀧𑀸𑀴𑀺𑀢𑁄 𑀏𑀯. 𑀦 𑀳𑀺 𑀧𑀸𑀴𑀺𑀢𑁄 𑀅𑀜𑁆𑀜𑀁 𑀧𑀫𑀸𑀡𑀢𑀭𑀁 𑀅𑀢𑁆𑀣𑀺. 𑀬𑀸 𑀳𑀺 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀅𑀯𑀺𑀭𑀼𑀤𑁆𑀥𑀸 𑀧𑀸𑀴𑀺, 𑀲𑀸 𑀧𑀫𑀸𑀡𑀁. 𑀢𑀣𑀸 𑀳𑀺 𑀅𑀕𑀭𑀳𑀺𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀧𑁂𑀝𑀓𑁄𑀧𑀤𑁂𑀲𑁄 𑀯𑀺𑀬 𑀇𑀤𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀆𑀪𑀢𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸𑀲𑁆𑀲 𑀦𑀺𑀤𑀸𑀦𑀁 𑀦 𑀯𑀼𑀢𑁆𑀢𑀁. 𑀲𑀸𑀯𑀓𑀪𑀸𑀲𑀺𑀢𑀸𑀦𑀫𑁆𑀧𑀺 𑀳𑀺 𑀲𑀼𑀪𑀲𑀼𑀢𑁆𑀢- (𑀤𑀻. 𑀦𑀺. 𑁧.𑁪𑁪𑁪 𑀆𑀤𑀬𑁄) 𑀅𑀦𑀗𑁆𑀕𑀡𑀲𑀼𑀢𑁆𑀢- (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀓𑀘𑁆𑀘𑀸𑀬𑀦𑀲𑀁𑀬𑀼𑀢𑁆𑀢𑀸𑀤𑀻𑀦𑀁 ¶ 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺? 𑀦𑀬𑀺𑀤𑀁 𑀏𑀓𑀦𑁆𑀢𑀺𑀓𑀁. 𑀲𑀸𑀯𑀓𑀪𑀸𑀲𑀺𑀢𑀸𑀦𑀁 𑀩𑀼𑀤𑁆𑀥𑀪𑀸𑀲𑀺𑀢𑀸𑀦𑀫𑁆𑀧𑀺 𑀳𑀺 𑀏𑀓𑀘𑁆𑀘𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀦𑀺𑀤𑁆𑀤𑁂𑀲𑀸𑀤𑀻𑀦𑀁 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀻𑀦𑀜𑁆𑀘 𑀦𑀺𑀤𑀸𑀦𑀁 𑀦 𑀪𑀸𑀲𑀺𑀢𑀁, 𑀦 𑀘 𑀢𑀸𑀯𑀢𑀸 𑀢𑀸𑀦𑀺 𑀅𑀧𑁆𑀧𑀫𑀸𑀡𑀁, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀤𑀸𑀦𑀜𑁆𑀘 𑀦𑀸𑀫 𑀲𑀼𑀢𑁆𑀢𑀯𑀺𑀦𑀬𑀸𑀦𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀻𑀳𑀺 𑀫𑀳𑀸𑀲𑀸𑀯𑀓𑁂𑀳𑁂𑀯 𑀪𑀸𑀲𑀺𑀢𑀁, 𑀇𑀤𑀜𑁆𑀘 𑀫𑀳𑀸𑀲𑀸𑀯𑀓𑀪𑀸𑀲𑀺𑀢𑀁, 𑀣𑁂𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸 𑀇𑀫𑀺𑀲𑁆𑀲𑀸 𑀯𑀺𑀘𑀸𑀭𑀡𑀸𑀬𑀸𑀢𑀺 𑀓𑀺𑀫𑁂𑀢𑁂𑀦 𑀦𑀺𑀤𑀸𑀦𑀕𑀯𑁂𑀲𑀦𑁂𑀦, 𑀅𑀢𑁆𑀣𑁄𑀬𑁂𑀯𑁂𑀢𑁆𑀣 𑀕𑀯𑁂𑀲𑀺𑀢𑀩𑁆𑀩𑁄, 𑀬𑁄 𑀧𑀸𑀴𑀺𑀬𑀸 𑀅𑀯𑀺𑀭𑀼𑀤𑁆𑀥𑁄𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄 𑀦 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀯𑀺𑀲𑀼𑀁 𑀦𑀺𑀤𑀸𑀦𑀯𑀘𑀦𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀦𑀺𑀤𑁆𑀤𑁂𑀲𑀸𑀤𑀻𑀦𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀧𑀓𑀭𑀡𑀁 𑀲𑀸𑀲𑀦𑀧𑀭𑀺𑀬𑁂𑀝𑁆𑀞𑀺𑀪𑀸𑀯𑀢𑁄 𑀏𑀓𑀯𑀺𑀥𑀁, 𑀢𑀣𑀸 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀸𑀤𑀦𑀢𑁄 𑀯𑀺𑀫𑀼𑀢𑁆𑀢𑀺𑀭𑀲𑀢𑁄 𑀘. 𑀩𑁆𑀬𑀜𑁆𑀚𑀦𑀢𑁆𑀣𑀯𑀺𑀘𑀸𑀭𑀪𑀸𑀯𑀢𑁄 𑀤𑀼𑀯𑀺𑀥𑀁, 𑀢𑀣𑀸 𑀲𑀗𑁆𑀕𑀳𑀯𑀺𑀪𑀸𑀕𑀪𑀸𑀯𑀢𑁄 𑀥𑀫𑁆𑀫𑀯𑀺𑀦𑀬𑀢𑁆𑀣𑀲𑀁𑀯𑀡𑁆𑀡𑀦𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁆𑀣𑀲𑀗𑁆𑀕𑀳𑀡𑀢𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀢𑁄 𑀮𑀓𑁆𑀔𑀡𑀮𑀓𑁆𑀔𑀺𑀬𑀪𑀸𑀯𑀢𑁄 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀘𑀦𑀢𑁄 𑀲𑀪𑀸𑀕𑀯𑀺𑀲𑀪𑀸𑀕𑀦𑀺𑀤𑁆𑀤𑁂𑀲𑀢𑁄 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀥𑀫𑁆𑀫𑀯𑀺𑀪𑀸𑀕𑀢𑁄 𑀘.

𑀢𑀺𑀯𑀺𑀥𑀁 𑀧𑀼𑀕𑁆𑀕𑀮𑀢𑁆𑀢𑀬𑀦𑀺𑀤𑁆𑀤𑁂𑀲𑀢𑁄 𑀢𑀺𑀯𑀺𑀥𑀓𑀮𑁆𑀬𑀸𑀡𑀯𑀺𑀪𑀸𑀕𑀢𑁄 𑀧𑀭𑀺𑀜𑁆𑀜𑀢𑁆𑀢𑀬𑀓𑀣𑀦𑀢𑁄 𑀧𑀳𑀸𑀦𑀢𑁆𑀢𑀬𑀽𑀧𑀤𑁂𑀲𑀢𑁄 ¶ 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀡𑀢𑁄 𑀢𑀺𑀯𑀺𑀥𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀢𑁄 𑀫𑀽𑀮𑀕𑀻𑀢𑀺𑀅𑀦𑀼𑀕𑀻𑀢𑀺𑀲𑀗𑁆𑀕𑀻𑀢𑀺𑀪𑁂𑀤𑀢𑁄 𑀧𑀺𑀝𑀓𑀢𑁆𑀢𑀬𑀢𑁆𑀣𑀲𑀁𑀯𑀡𑁆𑀡𑀦𑀢𑁄 𑀳𑀸𑀭𑀦𑀬𑀧𑀝𑁆𑀞𑀸𑀦𑀧𑁆𑀧𑀪𑁂𑀤𑀢𑁄 𑀘.

𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀘𑀢𑀼𑀦𑀬𑀤𑁂𑀲𑀦𑀢𑁄 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀪𑀸𑀯𑀢𑁄 𑀘. 𑀧𑀜𑁆𑀘𑀯𑀺𑀥𑀁 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀥𑀫𑁆𑀫𑀯𑀺𑀪𑀸𑀕𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀢𑁄 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀢𑁄 𑀧𑀜𑁆𑀘𑀦𑀺𑀓𑀸𑀬𑀢𑁆𑀣𑀯𑀺𑀯𑀭𑀡𑀢𑁄 𑀘. 𑀙𑀩𑁆𑀩𑀺𑀥𑀁 𑀙𑀴𑀸𑀭𑀫𑁆𑀫𑀡𑀯𑀺𑀪𑀸𑀕𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀯𑀺𑀪𑀸𑀕𑀢𑁄 𑀘. 𑀲𑀢𑁆𑀢𑀯𑀺𑀥𑀁 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀧𑀭𑀺𑀘𑁆𑀙𑁂𑀤𑀢𑁄. 𑀦𑀯𑀯𑀺𑀥𑀁 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀦𑀺𑀤𑁆𑀤𑁂𑀲𑀢𑁄. 𑀘𑀼𑀤𑁆𑀤𑀲𑀯𑀺𑀥𑀁 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀯𑀺𑀪𑀸𑀕𑀢𑁄. 𑀲𑁄𑀴𑀲𑀯𑀺𑀥𑀁 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀜𑁆𑀘 𑀲𑀸𑀲𑀦𑀧𑀝𑁆𑀞𑀸𑀦𑀧𑁆𑀧𑀪𑁂𑀤𑀢𑁄. 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀥𑀫𑁆𑀫𑀓𑁆𑀔𑀦𑁆𑀥𑀯𑀺𑀘𑀸𑀭𑀪𑀸𑀯𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀓𑀭𑀡𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀸𑀲𑀦𑀧𑀭𑀺𑀬𑁂𑀝𑁆𑀞𑀺𑀪𑀸𑀯𑀢𑁄𑀢𑀺 𑀲𑀓𑀮𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀦𑀯𑀗𑁆𑀕𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀸𑀤𑀦𑀢𑁄𑀢𑀺 ¶ 𑀤𑀲𑁆𑀲𑀦𑀪𑀽𑀫𑀺𑀪𑀸𑀯𑀦𑀸𑀪𑀽𑀫𑀺𑀲𑀫𑁆𑀧𑀸𑀤𑀦𑀢𑁄. 𑀯𑀺𑀫𑀼𑀢𑁆𑀢𑀺𑀭𑀲𑀢𑁄𑀢𑀺 𑀲𑀸𑀲𑀦𑀲𑁆𑀲 𑀅𑀫𑀢𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀢𑁆𑀣𑀯𑀺𑀘𑀸𑀭𑀪𑀸𑀯𑀢𑁄𑀢𑀺 𑀳𑀸𑀭𑀩𑁆𑀬𑀜𑁆𑀚𑀦𑀧𑀤𑀓𑀫𑁆𑀫𑀦𑀬𑀸𑀦𑀁 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀢𑁆𑀢𑀸 𑀅𑀢𑁆𑀣𑀧𑀤𑀅𑀢𑁆𑀣𑀦𑀬𑀸𑀦𑀁 𑀅𑀢𑁆𑀣𑀯𑀺𑀘𑀸𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀯𑀺𑀪𑀸𑀕𑀪𑀸𑀯𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀥𑀫𑁆𑀫𑀯𑀺𑀦𑀬𑀢𑁆𑀣𑀲𑀁𑀯𑀡𑁆𑀡𑀦𑀢𑁄𑀢𑀺 𑀲𑀓𑀮𑀲𑁆𑀲𑀸𑀧𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀥𑀫𑁆𑀫𑀯𑀺𑀦𑀬𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀮𑀓𑁆𑀔𑀺𑀬𑀪𑀸𑀯𑀢𑁄𑀢𑀺 𑀦𑁂𑀢𑁆𑀢𑀺𑀯𑀘𑀦𑀲𑁆𑀲 𑀮𑀓𑁆𑀔𑀡𑀢𑁆𑀢𑀸 𑀉𑀤𑀸𑀳𑀭𑀡𑀲𑀼𑀢𑁆𑀢𑀸𑀦𑀜𑁆𑀘 𑀮𑀓𑁆𑀔𑀺𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀪𑀸𑀕𑀯𑀺𑀲𑀪𑀸𑀕𑀦𑀺𑀤𑁆𑀤𑁂𑀲𑀢𑁄𑀢𑀺 𑀲𑀫𑀸𑀦𑀚𑀸𑀢𑀺𑀬𑀸 𑀥𑀫𑁆𑀫𑀸 𑀲𑀪𑀸𑀕𑀸, 𑀧𑀝𑀺𑀧𑀓𑁆𑀔𑀸 𑀯𑀺𑀲𑀪𑀸𑀕𑀸, 𑀢𑀁𑀯𑀺𑀘𑀸𑀭𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀥𑀫𑁆𑀫𑀯𑀺𑀪𑀸𑀕𑀢𑁄𑀢𑀺 𑀧𑀳𑀸𑀦𑁂𑀓𑀝𑁆𑀞𑀲𑀳𑀚𑁂𑀓𑀝𑁆𑀞𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦𑀸𑀫𑀯𑀢𑁆𑀣𑀸𑀤𑀺𑀦𑀸 𑀲𑀸𑀥𑀸𑀭𑀡𑀸 𑀢𑀩𑁆𑀩𑀺𑀥𑀼𑀭𑀢𑀸𑀬 𑀅𑀲𑀸𑀥𑀸𑀭𑀡𑀸 𑀘, 𑀢𑀁𑀯𑀺𑀪𑀸𑀕𑀢𑁄 𑀤𑀼𑀯𑀺𑀥𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀕𑁆𑀕𑀮𑀢𑁆𑀢𑀬𑀦𑀺𑀤𑁆𑀤𑁂𑀲𑀢𑁄𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺 𑀧𑀼𑀕𑁆𑀕𑀮𑀢𑁆𑀢𑀬𑀦𑀺𑀤𑁆𑀤𑁂𑀲𑀢𑁄. 𑀢𑀺𑀯𑀺𑀥𑀓𑀮𑁆𑀬𑀸𑀡𑀯𑀺𑀪𑀸𑀕𑀢𑁄𑀢𑀺 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀯𑀺𑀪𑀸𑀕𑀢𑁄. 𑀫𑀽𑀮𑀕𑀻𑀢𑀺𑀅𑀦𑀼𑀕𑀻𑀢𑀺𑀲𑀗𑁆𑀕𑀻𑀢𑀺𑀪𑁂𑀤𑀢𑁄𑀢𑀺 𑀧𑀞𑀫𑀁 𑀯𑀘𑀦𑀁 𑀫𑀽𑀮𑀕𑀻𑀢𑀺, 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀗𑁆𑀕𑀳𑀕𑀸𑀣𑀸 𑀅𑀦𑀼𑀕𑀻𑀢𑀺, 𑀢𑀁𑀢𑀁𑀲𑀼𑀢𑁆𑀢𑀢𑁆𑀣𑀬𑁄𑀚𑀦𑀯𑀲𑁂𑀦 𑀯𑀺𑀧𑁆𑀧𑀓𑀺𑀡𑁆𑀡𑀲𑁆𑀲 𑀧𑀓𑀭𑀡𑀲𑁆𑀲 𑀲𑀗𑁆𑀕𑀸𑀬𑀦𑀁 𑀲𑀗𑁆𑀕𑀻𑀢𑀺, 𑀲𑀸 𑀣𑁂𑀭𑀲𑁆𑀲 𑀧𑀭𑀢𑁄 𑀧𑀯𑀢𑁆𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀏𑀢𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀪𑁂𑀤𑀢𑁄 𑀢𑀺𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀢𑁄𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀓𑁆𑀔𑀦𑁆𑀥𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀢𑁄 𑀧𑀜𑁆𑀘𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀯𑀺𑀪𑀸𑀕𑀢𑁄𑀢𑀺 𑀮𑁄𑀪𑀤𑁄𑀲𑀫𑁄𑀳𑀸𑀦𑀁 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀁 𑀲𑀤𑁆𑀥𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀯𑀲𑁂𑀦 𑀘𑀼𑀤𑁆𑀤𑀲𑀯𑀺𑀥𑀲𑁆𑀲 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀲𑁆𑀲 𑀯𑀺𑀪𑀸𑀕𑀯𑀘𑀦𑀢𑁄 𑀘𑀼𑀤𑁆𑀤𑀲𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀦 𑀧𑀧𑀜𑁆𑀘𑀺𑀢𑀁.

𑁧. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸

𑀏𑀯𑀁 ¶ 𑀅𑀦𑁂𑀓𑀪𑁂𑀤𑀯𑀺𑀪𑀢𑁆𑀢𑁂 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑁂 𑀬𑀤𑀺𑀤𑀁 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀳𑀯𑀺𑀪𑀸𑀕𑀯𑀸𑀭𑀯𑀲𑁂𑀦 𑀤𑀼𑀯𑀺𑀥’’𑀦𑁆𑀢𑀺, 𑀢𑀢𑁆𑀣 𑀲𑀗𑁆𑀕𑀳𑀯𑀸𑀭𑁄 𑀆𑀤𑀺. 𑀢𑀲𑁆𑀲𑀸𑀧𑀺 ‘‘𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂’’𑀢𑀺 𑀅𑀬𑀁 𑀕𑀸𑀣𑀸 𑀆𑀤𑀺. 𑀢𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀧𑀽𑀚𑀬𑀢𑁂𑀢𑀺 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀲𑀮𑁄𑀓𑀧𑀸𑀮𑁄𑀢𑀺 𑀓𑀢𑁆𑀢𑀼𑀯𑀺𑀲𑁂𑀲𑀦𑀁. 𑀲𑀤𑀸𑀢𑀺 𑀓𑀸𑀮𑀦𑀺𑀤𑁆𑀤𑁂𑀲𑁄. 𑀦𑀫𑀲𑁆𑀲𑀢𑀺 𑀘𑀸𑀢𑀺 𑀉𑀧𑀘𑀬𑁂𑀦 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄 ¶ . 𑀢𑀲𑁆𑀲𑀸𑀢𑀺 𑀲𑀸𑀫𑀺𑀦𑀺𑀤𑁆𑀤𑁂𑀲𑁄. 𑀏𑀢𑀦𑁆𑀢𑀺 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑁄. 𑀲𑀸𑀲𑀦𑀯𑀭𑀦𑁆𑀢𑀺 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀯𑀺𑀤𑀽𑀳𑀻𑀢𑀺 𑀓𑀭𑀡𑀯𑀘𑀦𑁂𑀦 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀜𑁂𑀬𑁆𑀬𑀦𑁆𑀢𑀺 𑀓𑀫𑁆𑀫𑀯𑀸𑀘𑀓𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀦𑀭𑀯𑀭𑀲𑁆𑀲𑀸𑀢𑀺 ‘‘𑀢𑀲𑁆𑀲𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑀺𑀢𑀲𑁆𑀲 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁.

𑀢𑀢𑁆𑀣 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀧𑀚𑀸, 𑀲𑀢𑁆𑀢𑀦𑀺𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀮𑁄𑀓-𑀲𑀤𑁆𑀤𑁄 𑀳𑀺 𑀚𑀸𑀢𑀺𑀲𑀤𑁆𑀤𑀢𑀸𑀬 𑀲𑀸𑀫𑀜𑁆𑀜𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀲𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀮𑁄𑀓𑀲𑀤𑁆𑀤𑁄 𑀲𑀗𑁆𑀔𑀸𑀭𑀪𑀸𑀚𑀦𑁂𑀲𑀼𑀧𑀺 𑀤𑀺𑀝𑁆𑀞𑀧𑁆𑀧𑀬𑁄𑀕𑁄, 𑀧𑀽𑀚𑀦𑀓𑀺𑀭𑀺𑀬𑀸𑀬𑁄𑀕𑁆𑀬𑀪𑀽𑀢𑀢𑀸𑀯𑀲𑁂𑀦 𑀧𑀦 𑀲𑀢𑁆𑀢𑀮𑁄𑀓𑀯𑀘𑀦𑁄 𑀏𑀯 𑀇𑀥 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀽𑀚𑀬𑀢𑁂𑀢𑀺 𑀫𑀸𑀦𑀬𑀢𑀺, 𑀅𑀧𑀘𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀮𑁄𑀓𑀁 𑀧𑀸𑀮𑁂𑀦𑁆𑀢𑀻𑀢𑀺 𑀮𑁄𑀓𑀧𑀸𑀮𑀸, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄. 𑀮𑁄𑀓𑀺𑀬𑀸 𑀧𑀦 𑀇𑀦𑁆𑀤𑀬𑀫𑀯𑀭𑀼𑀡𑀓𑀼𑀯𑁂𑀭𑀸 𑀮𑁄𑀓𑀧𑀸𑀮𑀸𑀢𑀺 𑀯𑀤𑀦𑁆𑀢𑀺. 𑀲𑀳 𑀮𑁄𑀓𑀧𑀸𑀮𑁂𑀳𑀻𑀢𑀺 𑀲𑀮𑁄𑀓𑀧𑀸𑀮𑁄, ‘‘𑀮𑁄𑀓𑁄’’𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀅𑀣 𑀯𑀸 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑁂𑀦 𑀢𑀁𑀢𑀁𑀲𑀢𑁆𑀢𑀮𑁄𑀓𑀲𑁆𑀲 𑀧𑀸𑀮𑀦𑀢𑁄 𑀭𑀓𑁆𑀔𑀡𑀢𑁄 𑀔𑀢𑁆𑀢𑀺𑀬𑀘𑀢𑀼𑀫𑀳𑀸𑀭𑀸𑀚𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀤𑀬𑁄 𑀮𑁄𑀓𑀧𑀸𑀮𑀸. 𑀢𑁂𑀳𑀺 𑀲𑀳 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑁄 𑀲𑀮𑁄𑀓𑀧𑀸𑀮𑁄 𑀮𑁄𑀓𑁄𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁨.𑁯; 𑀇𑀢𑀺𑀯𑀼. 𑁪𑁨) 𑀯𑀘𑀦𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀥𑀫𑁆𑀫𑀸 𑀮𑁄𑀓𑀧𑀸𑀮𑀸. 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀮𑁄𑀓𑁄 𑀲𑀮𑁄𑀓𑀧𑀸𑀮𑁄. 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀺 𑀧𑀸𑀧𑀕𑀭𑀳𑀺𑀦𑁄 𑀲𑀧𑁆𑀧𑀼𑀭𑀺𑀲𑀸 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑀢𑀸𑀬 𑀪𑀕𑀯𑀢𑀺 𑀧𑀽𑀚𑀸𑀦𑀫𑀓𑁆𑀓𑀸𑀭𑀧𑀭𑀸 𑀳𑁄𑀦𑁆𑀢𑀻𑀢𑀺.

𑀲𑀤𑀸𑀢𑀺 ¶ 𑀲𑀩𑁆𑀩𑀓𑀸𑀮𑀁 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘, 𑀲𑀤𑀸𑀢𑀺 𑀯𑀸 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀢𑀢𑁄 𑀧𑀭𑀜𑁆𑀘. 𑀅𑀣 𑀯𑀸 𑀲𑀤𑀸𑀢𑀺 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸, 𑀢𑀢𑁄 𑀧𑀭𑀫𑁆𑀧𑀺 𑀯𑀸. 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀩𑁄𑀥𑀺𑀬𑀸 𑀦𑀺𑀬𑀢𑀢𑀸𑀬 𑀩𑀼𑀤𑁆𑀥𑀗𑁆𑀓𑀼𑀭𑀪𑀽𑀢𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀽𑀚𑀦𑀻𑀬𑀸 𑀘𑁂𑀯 𑀯𑀦𑁆𑀤𑀦𑀻𑀬𑀸 𑀘 𑀳𑁄𑀦𑁆𑀢𑀺. 𑀬𑀣𑀸𑀳 𑀪𑀕𑀯𑀸 𑀲𑀼𑀫𑁂𑀥𑀪𑀽𑀢𑁄 𑁋

‘‘𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀤𑀓𑁆𑀔𑀺𑀡𑀁 𑀧𑀸𑀤𑀫𑀼𑀤𑁆𑀥𑀭𑀺.

‘‘𑀬𑁂 ¶ 𑀢𑀢𑁆𑀣𑀸𑀲𑀼𑀁 𑀚𑀺𑀦𑀧𑀼𑀢𑁆𑀢𑀸, 𑀧𑀤𑀓𑁆𑀔𑀺𑀡𑀫𑀓𑀁𑀲𑀼 𑀫𑀁;

𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀘, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼’’𑀦𑁆𑀢𑀺. (𑀩𑀼. 𑀯𑀁. 𑁨.𑁭𑁫-𑁭𑁬);

𑀦𑀫𑀲𑁆𑀲𑀢𑀺 𑀘𑀸𑀢𑀺 𑀓𑁂𑀘𑀺 𑀓𑁂𑀲𑀜𑁆𑀘𑀺 𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀧𑀺 𑀢𑁂𑀲𑀁 𑀅𑀧𑀸𑀓𑀝𑀕𑀼𑀡𑀢𑀸𑀬 𑀦𑀫𑀓𑁆𑀓𑀸𑀭𑀁 𑀦 𑀓𑀭𑁄𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀢𑁄, 𑀬𑀣𑀸𑀪𑀽𑀢𑀅𑀩𑁆𑀪𑀼𑀕𑁆𑀕𑀢𑀓𑀺𑀢𑁆𑀢𑀺𑀲𑀤𑁆𑀤𑀢𑀸𑀬 𑀧𑀦 𑀪𑀕𑀯𑀦𑁆𑀢𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀧𑀽𑀚𑀬𑀢𑀺 𑀘𑁂𑀯 𑀦𑀫𑀲𑁆𑀲𑀢𑀺 𑀘𑀸𑀢𑀺 𑀅𑀢𑁆𑀣𑁄. ‘‘𑀲𑀤𑀸 𑀦𑀭𑀫𑀦𑀼𑀲𑁆𑀲𑁄’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀢𑀲𑁆𑀲𑀸𑀢𑀺 𑀬𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀧𑀽𑀚𑀬𑀢𑀺 𑀘𑁂𑀯 𑀦𑀫𑀲𑁆𑀲𑀢𑀺 𑀘, 𑀢𑀲𑁆𑀲. 𑀏𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀁 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑁂𑀢𑀺. 𑀲𑀸𑀲𑀦𑀯𑀭𑀦𑁆𑀢𑀺 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀲𑀸𑀲𑀢𑀺 𑀯𑀺𑀦𑁂𑀢𑀺 𑀏𑀢𑁂𑀦𑀸𑀢𑀺 𑀲𑀸𑀲𑀦𑀁, 𑀢𑀤𑁂𑀯 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀢𑀸𑀬 𑀘 𑀉𑀢𑁆𑀢𑀫𑀝𑁆𑀞𑁂𑀦 𑀢𑀁𑀢𑀁𑀅𑀪𑀺𑀧𑀢𑁆𑀣𑀺𑀢𑀲𑀫𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀧𑀡𑁆𑀟𑀺𑀢𑁂𑀳𑀺 𑀯𑀭𑀺𑀢𑀩𑁆𑀩𑀢𑁄 𑀯𑀸 𑀯𑀭𑀁, 𑀲𑀸𑀲𑀦𑀫𑁂𑀯 𑀯𑀭𑀦𑁆𑀢𑀺 𑀲𑀸𑀲𑀦𑀯𑀭𑀁. 𑀯𑀺𑀤𑀽𑀳𑀻𑀢𑀺 𑀬𑀣𑀸𑀲𑀪𑀸𑀯𑀢𑁄 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀺 𑀓𑀼𑀲𑀮𑀸𑀤𑀺𑀪𑁂𑀤𑁂 𑀘 𑀥𑀫𑁆𑀫𑁂 𑀯𑀺𑀤𑀦𑁆𑀢𑀻𑀢𑀺 𑀯𑀺𑀤𑀽, 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑁂𑀳𑀺. 𑀜𑀸𑀢𑀩𑁆𑀩𑀁, 𑀜𑀸𑀡𑀫𑀭𑀳𑀢𑀻𑀢𑀺 𑀯𑀸 𑀜𑁂𑀬𑁆𑀬𑀁. 𑀦𑀭𑀯𑀭𑀲𑁆𑀲𑀸𑀢𑀺 𑀧𑀼𑀭𑀺𑀲𑀯𑀭𑀲𑁆𑀲, 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀧𑀽𑀚𑀦𑀻𑀬𑁄 𑀦𑀫𑀲𑁆𑀲𑀦𑀻𑀬𑁄 𑀘 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀲 𑀮𑁄𑀓𑁂 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲 𑀏𑀢𑀁 𑀇𑀤𑀸𑀦𑀺 𑀅𑀫𑁆𑀳𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑀳𑀸𑀭𑀦𑀬𑀧𑀝𑁆𑀞𑀸𑀦𑀯𑀺𑀘𑀸𑀭𑀡𑀯𑀺𑀲𑀬𑀪𑀽𑀢𑀁 𑀲𑀸𑀲𑀦𑀁 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀭𑀁 𑀅𑀕𑁆𑀕𑀁 𑀉𑀢𑁆𑀢𑀫𑀁 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀢𑀸𑀬 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀫𑁂𑀯𑀸𑀢𑀺. 𑀪𑀕𑀯𑀢𑁄 𑀳𑀺 𑀯𑀘𑀦𑀁 𑀏𑀓𑀕𑀸𑀣𑀸𑀫𑀢𑁆𑀢𑀫𑁆𑀧𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀔𑀦𑁆𑀥𑀸𑀬𑀢𑀦𑀥𑀸𑀢𑀺𑀦𑁆𑀤𑁆𑀭𑀺𑀬𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀓𑁆𑀔𑀫𑀢𑀸𑀬 ¶ 𑀲𑁄𑀴𑀲𑀳𑀸𑀭𑀧𑀜𑁆𑀘𑀦𑀬𑀲𑁄𑀴𑀲𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀧𑀝𑁆𑀞𑀸𑀦𑀯𑀺𑀘𑀸𑀭𑀬𑁄𑀕𑁆𑀬𑀪𑀸𑀯𑁂𑀦 𑀘 𑀧𑀭𑀫𑀕𑀫𑁆𑀪𑀻𑀭𑀁 𑀅𑀢𑁆𑀣𑀢𑁄 𑀅𑀕𑀸𑀥𑀧𑀸𑀭𑀁 𑀲𑀡𑁆𑀳𑀲𑀼𑀔𑀼𑀫𑀜𑀸𑀡𑀯𑀺𑀲𑀬𑀫𑁂𑀯𑀸𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀧𑀜𑁆𑀜𑀯𑀦𑁆𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀤𑀼𑀧𑁆𑀧𑀜𑁆𑀜𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁩.𑁩𑁫𑁮; 𑀅. 𑀦𑀺. 𑁮.𑁩𑁦). 𑀅𑀣 𑀯𑀸 𑀪𑀕𑀯𑀢𑁄 𑀲𑀸𑀲𑀦𑀁 𑀧𑀭𑀺𑀜𑁆𑀜𑀸𑀓𑁆𑀓𑀫𑁂𑀦 𑀮𑀓𑁆𑀔𑀡𑀸𑀯𑀩𑁄𑀥𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀼𑀜𑁆𑀜𑀢𑀫𑀼𑀔𑀸𑀤𑀻𑀳𑀺 𑀑𑀕𑀸𑀳𑀺𑀢𑀩𑁆𑀩𑀢𑁆𑀢𑀸 𑀅𑀯𑀺𑀜𑁆𑀜𑀽𑀦𑀁 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀯𑀺𑀤𑀽𑀳𑀺 𑀜𑁂𑀬𑁆𑀬’’𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑁋 ‘‘𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄’’𑀢𑀺𑀆𑀤𑀺.

𑀅𑀧𑀭𑁂 ¶ 𑀧𑀦 ‘‘𑀢𑀁 𑀢𑀲𑁆𑀲 𑀲𑀸𑀲𑀦𑀯𑀭’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀬𑀁-𑀲𑀤𑁆𑀤𑁄 𑀲𑀸𑀲𑀦-𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀬𑀁 𑀲𑀸𑀲𑀦𑀯𑀭𑀁 𑀲𑀮𑁄𑀓𑀧𑀸𑀮𑁄 𑀮𑁄𑀓𑁄 𑀧𑀽𑀚𑀬𑀢𑀺 𑀦𑀫𑀲𑁆𑀲𑀢𑀺 𑀘, 𑀢𑀁 𑀲𑀸𑀲𑀦𑀯𑀭𑀁 𑀯𑀺𑀤𑀽𑀳𑀺 𑀜𑀸𑀢𑀩𑁆𑀩𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀦𑀬𑁂 𑀮𑁄𑀓𑀧𑀸𑀮-𑀲𑀤𑁆𑀤𑁂𑀦 𑀪𑀕𑀯𑀸𑀧𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀳𑀺 𑀮𑁄𑀓𑀕𑁆𑀕𑀢𑀸𑀬𑀓𑀢𑁆𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀮𑁄𑀓𑀧𑀸𑀮𑁄, 𑀢𑀲𑁆𑀫𑀸 ‘‘𑀢𑀲𑁆𑀲𑀸’’𑀢𑀺 𑀮𑁄𑀓𑀧𑀸𑀮𑀲𑁆𑀲 𑀲𑀢𑁆𑀣𑀼𑀦𑁄𑀢𑀺 𑀅𑀢𑁆𑀣𑁄. 𑀲𑀮𑁄𑀓𑀧𑀸𑀮𑁄𑀢𑀺 𑀘𑁂𑀢𑁆𑀣 𑀮𑁄𑀓𑀧𑀸𑀮-𑀲𑀤𑁆𑀤𑁄 𑀕𑀼𑀡𑀻𑀪𑀽𑀢𑁄𑀧𑀺 𑀲𑀢𑁆𑀣𑀼𑀯𑀺𑀲𑀬𑀢𑁆𑀢𑀸 𑀲𑀸𑀲𑀦-𑀲𑀤𑁆𑀤𑀸𑀧𑁂𑀓𑁆𑀔𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀻𑀯𑀺𑀲𑁂𑀲𑀪𑀽𑀢𑁄 𑀧𑀥𑀸𑀦𑀪𑀽𑀢𑁄 𑀯𑀺𑀬 𑀧𑀝𑀺𑀦𑀺𑀤𑁆𑀤𑁂𑀲𑀁 𑀅𑀭𑀳𑀢𑀻𑀢𑀺.

𑀓𑀣𑀁 𑀧𑀦 𑀲𑀬𑀁 𑀥𑀫𑁆𑀫𑀲𑁆𑀲𑀸𑀫𑀻 𑀪𑀕𑀯𑀸 𑀥𑀫𑁆𑀫𑀁 𑀧𑀽𑀚𑀬𑀢𑀻𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. 𑀥𑀫𑁆𑀫𑀕𑀭𑀼𑀦𑁄 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂 𑀲𑀩𑁆𑀩𑀓𑀸𑀮𑀁 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑀸𑀯 𑀯𑀺𑀳𑀭𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀁𑀦𑀽𑀦𑀸𑀳𑀁 𑀬𑁆𑀯𑀸𑀬𑀁 𑀥𑀫𑁆𑀫𑁄 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁭𑁩; 𑀅. 𑀦𑀺. 𑁪.𑁨𑁧).

𑀅𑀧𑀺 𑀘 𑀪𑀕𑀯𑀢𑁄 𑀥𑀫𑁆𑀫𑀧𑀽𑀚𑀦𑀸 𑀲𑀢𑁆𑀢𑀲𑀢𑁆𑀢𑀸𑀳𑀧𑁆𑀧𑀝𑀺𑀧𑀢𑁆𑀢𑀺𑀆𑀤𑀻𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀥𑀫𑁆𑀫𑀲𑁆𑀲𑀸𑀫𑀻𑀢𑀺 𑀘 𑀥𑀫𑁆𑀫𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀫𑀻𑀢𑀺 𑀅𑀢𑁆𑀣𑁄, 𑀦 𑀥𑀫𑁆𑀫𑀲𑁆𑀲 𑀲𑀸𑀫𑀻𑀢𑀺. 𑀏𑀯𑀫𑁆𑀧𑀺 𑀦𑀫𑀲𑁆𑀲𑀢𑀻𑀢𑀺 𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀪𑀕𑀯𑀸 𑀓𑀜𑁆𑀘𑀺 𑀦𑀫𑀲𑁆𑀲𑀢𑀻𑀢𑀺, 𑀏𑀲𑁄𑀧𑀺 𑀦𑀺𑀤𑁆𑀤𑁄𑀲𑁄. 𑀦 𑀳𑀺 𑀦𑀫𑀲𑁆𑀲𑀢𑀻𑀢𑀺 𑀧𑀤𑀲𑁆𑀲 𑀦𑀫𑀓𑁆𑀓𑀸𑀭𑀁 𑀓𑀭𑁄𑀢𑀻𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄, 𑀅𑀣 𑀔𑁄 𑀕𑀭𑀼𑀓𑀭𑀡𑁂𑀦 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺. 𑀪𑀕𑀯𑀸 𑀘 𑀥𑀫𑁆𑀫𑀕𑀭𑀼𑀢𑀸𑀬 𑀲𑀩𑁆𑀩𑀓𑀸𑀮𑀁 𑀥𑀫𑁆𑀫𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀯𑀺𑀳𑀭𑀢𑀻𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀬𑁂𑀦 𑀲𑀼𑀤𑀁 𑀲𑁆𑀯𑀸𑀳𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀫𑀸𑀤𑀻𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑁄. ‘‘𑀯𑀺𑀤𑀽𑀳𑀺 𑀦𑁂𑀬𑁆𑀬’’𑀦𑁆𑀢𑀺𑀧𑀺 ¶ 𑀧𑀸𑀞𑁄, 𑀢𑀲𑁆𑀲 𑀧𑀡𑁆𑀟𑀺𑀢𑁂𑀳𑀺 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀦𑁂𑀢𑀩𑁆𑀩𑀁 𑀧𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀢𑁆𑀢𑀲𑀦𑁆𑀢𑀸𑀦𑁂 𑀧𑀸𑀧𑀦𑀁 𑀩𑀼𑀚𑁆𑀛𑀦𑀁, 𑀧𑀭𑀲𑀦𑁆𑀢𑀸𑀦𑁂 𑀩𑁄𑀥𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀪𑀕𑀯𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀽𑀚𑀦𑀻𑀬𑀯𑀦𑁆𑀤𑀦𑀻𑀬𑀪𑀸𑀯𑁄 𑀅𑀕𑁆𑀕𑀧𑀼𑀕𑁆𑀕𑀮𑀪𑀸𑀯𑁄 𑀘 𑀯𑀼𑀘𑁆𑀘𑀫𑀸𑀦𑁄 𑀕𑀼𑀡𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀺, 𑀲𑀸 𑀘 𑀕𑀼𑀡𑀯𑀺𑀲𑀺𑀝𑁆𑀞𑀢𑀸 𑀫𑀳𑀸𑀩𑁄𑀥𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀯𑀓𑁆𑀔𑀬𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀆𑀲𑀯𑀓𑁆𑀔𑀬𑀜𑀸𑀡𑀁 ‘‘𑀫𑀳𑀸𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁄 𑀢𑀣𑀸𑀕𑀢𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 ¶ . 𑀦 𑀳𑀺 𑀲𑀯𑀸𑀲𑀦𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀦𑀸𑀯𑀭𑀡𑀜𑀸𑀡𑀜𑁆𑀘 𑀯𑀺𑀦𑀸 𑀢𑀸𑀤𑀺𑀲𑀻 𑀥𑀫𑁆𑀫𑀤𑁂𑀲𑀦𑀸 𑀲𑀫𑁆𑀪𑀯𑀢𑀺. 𑀇𑀘𑁆𑀘𑀲𑁆𑀲 𑀘𑀢𑀼𑀯𑁂𑀲𑀸𑀭𑀚𑁆𑀚𑀬𑁄𑀕𑁄. 𑀢𑁂𑀦 𑀤𑀲𑀩𑀮𑀙𑀅𑀲𑀸𑀥𑀸𑀭𑀡𑀜𑀸𑀡𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸𑀤𑀺𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀸𑀭𑀺𑀧𑀽𑀭𑀻 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀏𑀢𑀸𑀤𑀺𑀲𑀻 𑀘 𑀕𑀼𑀡𑀯𑀺𑀪𑀽𑀢𑀺 𑀫𑀳𑀸𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀼𑀭𑀲𑁆𑀲𑀭𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑀺𑀢𑀁 𑀲𑀫𑀢𑁆𑀢𑀺𑀁𑀲𑀧𑀸𑀭𑀫𑀺𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀫𑀦𑁆𑀢𑀭𑁂𑀦 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀳𑁂𑀢𑀼𑀲𑀫𑁆𑀧𑀤𑀸𑀧𑀺 𑀅𑀢𑁆𑀣𑀢𑁄 𑀯𑀺𑀪𑀸𑀯𑀺𑀢𑀸 𑀳𑁄𑀢𑀻𑀢𑀺 𑀏𑀯𑀁 𑀪𑀕𑀯𑀢𑁄 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀲𑀩𑁆𑀩𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀸 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀦𑀺𑀭𑀯𑀲𑁂𑀲𑀸 𑀩𑀼𑀤𑁆𑀥𑀕𑀼𑀡𑀸 𑀇𑀫𑀸𑀬 𑀕𑀸𑀣𑀸𑀬 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀦𑀬𑁂 𑀧𑀦 𑀬𑀲𑁆𑀫𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀨𑀮𑀁 𑀅𑀭𑀺𑀬𑀫𑀕𑁆𑀕𑀲𑀸𑀲𑀦𑀁 𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀜𑁆𑀘 𑀅𑀫𑀢𑀥𑀸𑀢𑀼𑀁 𑀢𑀤𑀥𑀺𑀕𑀫𑀽𑀧𑀸𑀬𑀜𑁆𑀘 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀜𑁆𑀘 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀬𑀣𑀸𑀭𑀳𑀁 𑀲𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀦𑁆𑀢𑁄 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀲𑀯𑀦𑀥𑀸𑀭𑀡𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑁄 𑀘 𑀲𑀤𑁂𑀯𑀓𑁄 𑀮𑁄𑀓𑁄 𑀧𑀽𑀚𑀬𑀢𑀺 𑀦𑀸𑀫. 𑀮𑁄𑀓𑀦𑀸𑀣𑁄 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀺𑀬𑀸 𑀯𑁂𑀦𑁂𑀬𑁆𑀬𑀸𑀦𑀁 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀤𑁂𑀲𑀦𑁂𑀦 ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀺’’ (𑀫. 𑀦𑀺. 𑁩.𑁧𑁩𑁬; 𑀲𑀁. 𑀦𑀺. 𑁫.𑁨𑁮; 𑀧𑁂𑀝𑀓𑁄. 𑁨𑁪), ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄’’ (𑀥. 𑀧. 𑁨𑁭𑁩; 𑀓𑀣𑀸. 𑁮𑁭𑁨; 𑀦𑁂𑀢𑁆𑀢𑀺. 𑁧𑁨𑁫; 𑀧𑁂𑀝𑀓𑁄. 𑁩𑁦), ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺’’ (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪), ‘‘𑀔𑀬𑀁 𑀯𑀺𑀭𑀸𑀕𑀁 𑀅𑀫𑀢𑀁 𑀧𑀡𑀻𑀢𑀁’’ (𑀔𑀼. 𑀧𑀸. 𑁬.𑁪; 𑀲𑀼. 𑀦𑀺. 𑁨𑁨𑁭), ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’ (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁫.𑁩𑁬𑁭), ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀻𑀳𑀺 (𑀫. 𑀦𑀺. 𑁩.𑁪𑁨𑁦; 𑀦𑁂𑀢𑁆𑀢𑀺. 𑁫) 𑀯𑀘𑀦𑁂𑀳𑀺 𑀣𑁄𑀫𑀦𑁂𑀦 𑀘 𑀧𑀽𑀚𑀬𑀢𑀺 𑀦𑀸𑀫. 𑀢𑀲𑁆𑀫𑀸 𑀲𑀸𑀲𑀦𑀯𑀭𑀲𑁆𑀲 𑀧𑀽𑀚𑀦𑀻𑀬𑀪𑀸𑀯𑁄 𑀇𑀥 𑀯𑀼𑀘𑁆𑀘𑀫𑀸𑀦𑁄 𑀅𑀦𑀯𑀲𑁂𑀲𑀢𑁄 𑀥𑀫𑁆𑀫𑀕𑀼𑀡𑁂 𑀤𑀻𑀧𑁂𑀢𑀻𑀢𑀺 𑀬𑁂 𑀅𑀭𑀺𑀬𑀪𑀸𑀯𑀸𑀤𑀬𑁄 𑀦𑀺𑀬𑁆𑀬𑀸𑀦𑀸𑀤𑀬𑁄 𑀔𑀬𑀯𑀺𑀭𑀸𑀕𑀸𑀤𑀬𑁄 𑀫𑀤𑀦𑀺𑀫𑁆𑀫𑀤𑀦𑀸𑀤𑀬𑁄 𑀅𑀲𑀗𑁆𑀔𑀢𑀸𑀤𑀬𑁄 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀬𑁄 ¶ 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀬𑁄 𑀘 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀧𑀯𑁂𑀤𑀺𑀢𑀸 𑀅𑀦𑁂𑀓𑁂 𑀥𑀫𑁆𑀫𑀕𑀼𑀡𑀸, 𑀢𑁂 𑀦𑀺𑀭𑀯𑀲𑁂𑀲𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 ¶ 𑀧𑀦 𑀅𑀭𑀺𑀬𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑀲𑀫𑁆𑀫𑁄𑀳𑀸𑀬𑁂𑀯 𑀧𑀭𑀫𑀢𑁆𑀣𑀢𑁄 𑀧𑀡𑁆𑀟𑀺𑀢𑀸 𑀩𑀸𑀮𑁆𑀬𑀸𑀤𑀺𑀲𑀫𑀢𑀺𑀓𑁆𑀓𑀫𑀦𑀢𑁄, 𑀢𑀲𑁆𑀫𑀸 𑀪𑀸𑀯𑀺𑀢𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀸 𑀲𑀘𑁆𑀙𑀺𑀓𑀢𑀲𑀸𑀫𑀜𑁆𑀜𑀨𑀮𑀸 𑀘 𑀅𑀭𑀺𑀬𑀧𑀼𑀕𑁆𑀕𑀮𑀸 𑀯𑀺𑀲𑁂𑀲𑀢𑁄 𑀯𑀺𑀤𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀬𑀣𑀸𑀯𑀼𑀢𑁆𑀢𑀲𑀸𑀲𑀦𑀯𑀭𑀁 𑀅𑀯𑀺𑀧𑀭𑀻𑀢𑀢𑁄 𑀜𑀸𑀢𑀼𑀁 𑀦𑁂𑀢𑀼𑀜𑁆𑀘 𑀲𑀧𑀭𑀲𑀦𑁆𑀢𑀸𑀦𑁂 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑀲𑁆𑀲 𑀧𑀭𑀫𑀢𑁆𑀣𑀲𑀗𑁆𑀖𑀲𑁆𑀲𑀸𑀧𑀺 𑀇𑀥 𑀕𑀳𑀺𑀢𑀢𑁆𑀢𑀸 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀬𑁄 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀁𑀯𑀡𑁆𑀡𑀺𑀢𑀸 𑀅𑀭𑀺𑀬𑀲𑀗𑁆𑀖𑀕𑀼𑀡𑀸, 𑀢𑁂𑀧𑀺 𑀦𑀺𑀭𑀯𑀲𑁂𑀲𑀢𑁄 𑀇𑀥 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀧𑀞𑀫𑀕𑀸𑀣𑀸𑀬 𑀲𑀸𑀢𑀺𑀲𑀬𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪) 𑁋

𑀯𑀘𑀦𑀢𑁄 𑀲𑀗𑁆𑀔𑁂𑀧𑀢𑁄 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀁, 𑀢𑀁 𑀧𑀦 𑀲𑀺𑀓𑁆𑀔𑀢𑁆𑀢𑀬𑀁 𑀜𑀸𑀡𑀯𑀺𑀲𑁂𑀲𑀯𑀺𑀲𑀬𑀪𑀸𑀯𑀪𑁂𑀤𑀢𑁄 𑀅𑀯𑀢𑁆𑀣𑀸𑀪𑁂𑀤𑀢𑁄 𑀘 𑀢𑀺𑀯𑀺𑀥𑀁 𑀳𑁄𑀢𑀺. 𑀓𑀣𑀁? 𑀲𑀼𑀢𑀫𑀬𑀜𑀸𑀡𑀕𑁄𑀘𑀭𑁄 𑀘 𑀬𑁄 ‘‘𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀦𑁆𑀢𑀸𑀫𑀬𑀜𑀸𑀡𑀕𑁄𑀘𑀭𑁄 𑀘 𑀬𑁄 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻𑀳𑀺 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀯𑀺𑀲𑁂𑀲𑁄 ‘‘𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀤𑀺𑀲𑀳𑀕𑀢𑁄 𑀪𑀸𑀯𑀦𑀸𑀫𑀬𑀜𑀸𑀡𑀕𑁄𑀘𑀭𑁄 𑀘 𑀬𑁄 ‘‘𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀺𑀯𑀺𑀥𑀫𑁆𑀧𑀺 𑀲𑀸𑀲𑀦𑀁 𑀲𑀸𑀲𑀦𑀯𑀭𑀦𑁆𑀢𑀺 𑀧𑀤𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀢𑁆𑀣 𑀬𑀁 𑀧𑀞𑀫𑀁, 𑀢𑀁 𑀇𑀢𑀭𑁂𑀲𑀁 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀲𑀩𑁆𑀩𑀲𑀸𑀲𑀦𑀫𑀽𑀮𑀪𑀽𑀢𑀁 𑀅𑀢𑁆𑀢𑀦𑁄 𑀧𑀓𑀭𑀡𑀲𑁆𑀲 𑀘 𑀯𑀺𑀲𑀬𑀪𑀽𑀢𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁂𑀯 𑀢𑀸𑀯 𑀲𑀗𑁆𑀔𑁂𑀧𑀢𑁄 𑀯𑀺𑀪𑀚𑀦𑁆𑀢𑁄 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀻’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀤𑁆𑀯𑀸𑀤𑀲𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀤𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑁂𑀲𑀼 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀳𑀻𑀢𑀺 𑀧𑀤𑀸𑀦𑀺. 𑀅𑀢𑁆𑀣𑀧𑀤𑀸𑀦𑀺 𑀧𑀦 𑀧𑀚𑁆𑀚𑀦𑁆𑀢𑀺 𑀜𑀸𑀬𑀦𑁆𑀢𑀻𑀢𑀺 𑀧𑀤𑀸𑀦𑀺. 𑀉𑀪𑀬𑀫𑁆𑀧𑀺 𑀯𑀸 𑀉𑀪𑀬𑀣𑀸 𑀬𑁄𑀚𑁂𑀢𑀩𑁆𑀩𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀫𑁆𑀧𑀺 𑀅𑀯𑀺𑀧𑀭𑀻𑀢𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀅𑀢𑁆𑀣𑀧𑀤𑀸𑀦𑀁 𑀉𑀢𑁆𑀢𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 ¶ 𑀓𑀸𑀭𑀡𑀪𑀸𑀯𑀢𑁄, 𑀢𑀸𑀦𑀺 𑀧𑀤𑀸𑀦𑀺 𑀧𑀭𑀢𑁄 𑀧𑀸𑀴𑀺𑀬𑀜𑁆𑀜𑁂𑀯 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀢𑀢𑁆𑀣𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀢𑁆𑀣𑀲𑀽𑀘𑀦𑀸𑀤𑀺𑀅𑀢𑁆𑀣𑀢𑁄 𑀲𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀗𑁆𑀕𑀳𑁂𑀲𑀼 𑁋

‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘, ‘𑀲𑀼𑀢𑁆𑀢’𑀦𑁆𑀢𑀺 𑀅𑀓𑁆𑀔𑀸𑀢’’𑀦𑁆𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀢𑀤𑁂𑀢𑀁 ¶ 𑀢𑀢𑁆𑀣 𑀲𑀼𑀢𑁆𑀢𑀧𑀺𑀝𑀓𑀯𑀲𑁂𑀦 𑀆𑀕𑀢𑀁, 𑀇𑀥 𑀧𑀦 𑀧𑀺𑀝𑀓𑀢𑁆𑀢𑀬𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀲𑀩𑁆𑀩𑀦𑁆𑀢𑀺 𑀢𑀁 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁. 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸𑀢𑀺 𑀩𑁆𑀬𑀜𑁆𑀚𑀦𑀜𑁆𑀘𑁂𑀯 𑀢𑀤𑀢𑁆𑀣𑁄 𑀘. 𑀬𑀢𑁄 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀣𑀲𑀽𑀘𑀦𑀸𑀤𑀺𑀢𑁄 𑀲𑀼𑀢𑁆𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀢𑀜𑁆𑀘 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀤𑁆𑀯𑀸𑀤𑀲 𑀧𑀤𑀸𑀦𑀺 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀘𑁂𑀯 𑀙 𑀅𑀢𑁆𑀣𑀧𑀤𑀸𑀦𑀺 𑀘𑀸𑀢𑀺. 𑀅𑀣 𑀯𑀸 𑀬𑀤𑁂𑀢𑀁 ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀲𑀼𑀢𑁆𑀢𑀁, 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀢𑁆𑀣𑀢𑁄 𑀧𑀦 𑀤𑁆𑀯𑀸𑀤𑀲 𑀧𑀤𑀸𑀦𑀺, 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀲𑀫𑀼𑀤𑀸𑀬𑀪𑀸𑀯𑀢𑁄. 𑀬𑀣𑀸𑀳 𑁋 ‘‘𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺. 𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀉𑀪𑀬𑀦𑁆𑀢𑀺 𑀬𑀲𑁆𑀫𑀺𑀁 𑀩𑁆𑀬𑀜𑁆𑀚𑀦𑁂 𑀅𑀢𑁆𑀣𑁂 𑀘 𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁂 𑀲𑀼𑀢𑁆𑀢𑀯𑁄𑀳𑀸𑀭𑁄, 𑀢𑀤𑀼𑀪𑀬𑀁 𑀲𑀭𑀽𑀧𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑀁 𑀢𑀢𑁆𑀣 𑀓𑀢𑀫𑀁 𑀩𑁆𑀬𑀜𑁆𑀚𑀦𑀁 𑀓𑀢𑀫𑁄 𑀅𑀢𑁆𑀣𑁄𑀢𑀺? 𑀢𑁂𑀦𑁂𑀯𑀸𑀳 𑁋 ‘‘𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀁 𑀓𑀢𑀫’’𑀦𑁆𑀢𑀺.

𑀏𑀯𑀁 ‘‘𑀲𑀸𑀲𑀦𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀪𑀸𑀯𑀁 𑀢𑀲𑁆𑀲 𑀘 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀤𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀯𑀺𑀘𑀬𑀼𑀧𑀸𑀬𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀧𑀤𑀢𑁆𑀣𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀴𑀲𑀳𑀸𑀭𑀸’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀲𑁄𑀴𑀲 𑀳𑀸𑀭𑀸 𑀏𑀢𑀺𑀲𑁆𑀲𑀸𑀢𑀺 𑀲𑁄𑀴𑀲𑀳𑀸𑀭𑀸. 𑀧𑀜𑁆𑀘𑀦𑀬𑀸 𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀯𑀸 𑀲𑁄𑀴𑀲 𑀳𑀸𑀭𑀸 𑀲𑁄𑀴𑀲𑀳𑀸𑀭𑀸. 𑀏𑀯𑀁 𑀇𑀢𑀭𑀢𑁆𑀣𑀸𑀧𑀺. 𑀳𑀸𑀭𑀦𑀬𑀫𑀽𑀮𑀧𑀤𑀸𑀦𑀺 𑀏𑀯 𑀳𑀺 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀪𑀸𑀲𑀺𑀢𑀸𑀦𑀺 𑀦𑁂𑀢𑁆𑀢𑀻𑀢𑀺. 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀻𑀢𑀺 𑀲𑀸𑀲𑀦𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄, 𑀲𑀓𑀮𑀲𑁆𑀲𑁂𑀯 𑀯𑀸 𑀲𑀸𑀲𑀦𑀲𑁆𑀲 𑀅𑀢𑁆𑀣𑀯𑀺𑀘𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑁂𑀧𑀺 𑀳𑀺 𑀦𑁂𑀢𑁆𑀢𑀺𑀦𑀬𑀸𑀦𑀼𑀲𑀸𑀭𑁂𑀦 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺. 𑀫𑀳𑀓𑀘𑁆𑀘𑀸𑀦𑁂𑀦𑀸𑀢𑀺 𑀓𑀘𑁆𑀘𑁄𑀢𑀺 𑀧𑀼𑀭𑀸𑀢𑀦𑁄 𑀇𑀲𑀺, 𑀢𑀲𑁆𑀲 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁄𑀬𑀁 𑀫𑀳𑀸𑀣𑁂𑀭𑁄 ‘‘𑀓𑀘𑁆𑀘𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀳𑀓𑀘𑁆𑀘𑀸𑀦𑁄𑀢𑀺 𑀧𑀦 ¶ 𑀧𑀽𑀚𑀸𑀯𑀘𑀦𑀁, 𑀬𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺, ‘‘𑀓𑀘𑁆𑀘𑀸𑀬𑀦𑀕𑁄𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺𑀧𑀺 𑀧𑀸𑀞𑁄. 𑀅𑀬𑀜𑁆𑀘 𑀕𑀸𑀣𑀸 𑀦𑁂𑀢𑁆𑀢𑀺𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀧𑀓𑀭𑀡𑀢𑁆𑀣𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀞𑀧𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀘𑀸𑀬𑀁, 𑀏𑀯𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁂 𑀢𑀁𑀢𑀁𑀳𑀸𑀭𑀦𑀺𑀤𑁆𑀤𑁂𑀲𑀦𑀺𑀕𑀫𑀦𑁂 ‘‘𑀢𑁂𑀦𑀸𑀳 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁, 𑀳𑀸𑀭𑀸𑀤𑀺𑀲𑀫𑀼𑀤𑀸𑀬𑀪𑀽𑀢𑀸𑀬𑀁 𑀦𑁂𑀢𑁆𑀢𑀺𑀬𑀁 𑀩𑁆𑀬𑀜𑁆𑀚𑀦𑀢𑁆𑀣𑀲𑀫𑀼𑀤𑀸𑀬𑁂 𑀘 𑀲𑀼𑀢𑁆𑀢𑁂 𑀓𑀺𑀁 𑀓𑁂𑀦 𑀯𑀺𑀘𑀺𑀬𑀢𑀻𑀢𑀺 𑀯𑀺𑀘𑀸𑀭𑀡𑀸𑀬𑀁 𑀆𑀳 𑁋 ‘‘𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑁄’’𑀢𑀺𑀆𑀤𑀺.

𑀢𑀢𑁆𑀣 ¶ 𑀲𑁄𑀴𑀲𑀧𑀺 𑀳𑀸𑀭𑀸 𑀫𑀽𑀮𑀧𑀤𑀦𑀺𑀤𑁆𑀥𑀸𑀭𑀡𑀫𑀦𑁆𑀢𑀭𑁂𑀦 𑀩𑁆𑀬𑀜𑁆𑀚𑀦𑀫𑀼𑀔𑁂𑀦𑁂𑀯 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸 𑀳𑁄𑀦𑁆𑀢𑀺, 𑀦 𑀦𑀬𑀸 𑀯𑀺𑀬 𑀫𑀽𑀮𑀧𑀤𑀲𑀗𑁆𑀔𑀸𑀢𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦𑀸𑀢𑀺 𑀢𑁂 ‘‘𑀩𑁆𑀬𑀜𑁆𑀚𑀦𑀯𑀺𑀘𑀬𑁄 𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸. 𑀅𑀢𑁆𑀣𑀦𑀬𑀸 𑀧𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀫𑀼𑀔𑁂𑀦𑁂𑀯 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀦𑀬𑀸 𑀢𑀬𑁄 𑀘 𑀲𑀼𑀢𑁆𑀢𑀢𑁆𑀣𑁄’’𑀢𑀺. 𑀅𑀬𑀜𑁆𑀘 𑀯𑀺𑀘𑀸𑀭𑀡𑀸 𑀧𑀭𑀢𑁄𑀧𑀺 𑀆𑀕𑀫𑀺𑀲𑁆𑀲𑀢𑀺. 𑀓𑁂𑀘𑀺 ‘‘𑀦𑀬𑁄 𑀘𑀸’’𑀢𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀉𑀪𑀬𑀁 𑀧𑀭𑀺𑀕𑁆𑀕𑀳𑀻𑀢𑀦𑁆𑀢𑀺 𑀳𑀸𑀭𑀸 𑀦𑀬𑀸 𑀘𑀸𑀢𑀺 𑀏𑀢𑀁 𑀉𑀪𑀬𑀁 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀧𑀭𑀺𑀲𑀫𑀦𑁆𑀢𑀢𑁄 𑀕𑀳𑀺𑀢𑀁 𑀲𑀩𑁆𑀩𑀣𑀸 𑀲𑀼𑀢𑁆𑀢𑁂 𑀬𑁄𑀚𑀺𑀢𑀁. 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁 𑀯𑀤𑀢𑀺 𑀲𑀁𑀯𑀡𑁆𑀡𑁂𑀢𑀺. 𑀓𑀣𑀁? 𑀬𑀣𑀸𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀭𑀽𑀧𑀁, 𑀬𑀁 𑀲𑀼𑀢𑁆𑀢𑀁 𑀬𑀣𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀁, 𑀢𑀣𑀸 𑀲𑀁𑀯𑀡𑁆𑀡𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀬𑀁 𑀲𑀼𑀢𑁆𑀢𑀦𑁆𑀢𑀺 𑀯𑀸 𑀬𑀣𑀸𑀲𑀼𑀢𑁆𑀢𑀁, 𑀲𑀩𑁆𑀩𑀁 𑀲𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦𑁂𑀢𑁆𑀢𑀺𑀦𑀬𑁂𑀦 𑀳𑀺 𑀲𑀁𑀯𑀡𑁆𑀡𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀦𑀢𑁆𑀣𑀻𑀢𑀺.

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑁋 ‘‘𑀲𑀸𑀲𑀦𑀯𑀭𑀁 𑀯𑀺𑀤𑀽𑀳𑀺 𑀜𑁂𑀬𑁆𑀬’’𑀦𑁆𑀢𑀺, 𑀢𑀢𑁆𑀣 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬 𑀯𑀺𑀲𑀬𑀪𑀽𑀢𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑁂𑀯 𑀧𑀓𑀸𑀭𑀦𑁆𑀢𑀭𑁂𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀸 𑀘𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀢𑁆𑀣𑁂𑀲𑀼 𑀓𑀢𑀧𑀭𑀺𑀘𑁆𑀙𑁂𑀤𑁄 𑀩𑁆𑀬𑀜𑁆𑀚𑀦𑀧𑁆𑀧𑀩𑀦𑁆𑀥𑁄 𑀤𑁂𑀲𑀦𑀸, 𑀬𑁄 𑀧𑀸𑀞𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀢𑁆𑀣𑁄 𑀤𑁂𑀲𑀺𑀢𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀩𑁄𑀥𑀺𑀢𑀢𑁆𑀢𑀸. 𑀢𑀤𑀼𑀪𑀬𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀲𑀫𑁆𑀧𑀢𑁆𑀢𑀻𑀦𑀁 𑀳𑁂𑀢𑀼𑀪𑀸𑀯𑀢𑁄 𑀏𑀓𑀦𑁆𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀯𑀸 𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀢𑀤𑁂𑀯 𑀤𑁆𑀯𑀬𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑀬𑀸 𑀘𑁂𑀯…𑀧𑁂… 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀺𑀚𑀸𑀦𑀦𑁂 𑀲𑀸𑀥𑁂𑀢𑀩𑁆𑀩𑁂, 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀢𑀺 𑀅𑀬𑀁 𑀯𑀓𑁆𑀔𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀺 𑀳𑀸𑀭𑀦𑀬𑀸𑀦𑀁 𑀅𑀦𑀼𑀓𑁆𑀓𑀫𑁄, 𑀅𑀦𑀼𑀓𑁆𑀓𑀫𑁂𑀦 𑀯𑀓𑁆𑀔𑀫𑀸𑀦𑀸 𑀳𑀸𑀭𑀦𑀬𑀸𑀢𑀺 𑀅𑀢𑁆𑀣𑁄. 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻𑀢𑀺 𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀲𑀦𑀸, 𑀅𑀢𑁆𑀣𑀯𑀺𑀘𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀁 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀺𑀬𑀸 𑀅𑀦𑀼𑀧𑀼𑀩𑁆𑀩𑀻𑀢𑀺. 𑀅𑀣 𑀯𑀸 𑀅𑀦𑀼𑀧𑀼𑀩𑁆𑀩𑀻𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀯𑀼𑀢𑁆𑀢𑀯𑀺𑀚𑀸𑀦𑀦𑁂 𑀲𑀸𑀥𑁂𑀢𑀩𑁆𑀩𑁂 𑀯𑀓𑁆𑀔𑀫𑀸𑀦𑀸𑀬 𑀳𑀸𑀭𑀦𑀬𑀸𑀦𑀼𑀧𑀼𑀩𑁆𑀩𑀺𑀬𑀸 𑀅𑀬𑀁 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀲𑀦𑀸𑀢𑀺.

𑀏𑀢𑁆𑀣𑀸𑀳 ¶ 𑁋 𑀓𑀣𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄, 𑀲𑀼𑀢𑁆𑀢𑀪𑀸𑀯𑁂 𑀘 𑀢𑁂𑀲𑀁 𑀓𑀣𑀁 𑀲𑀸𑀲𑀦𑀲𑁆𑀲 𑀦𑀯𑀗𑁆𑀕𑀪𑀸𑀯𑁄. 𑀬𑀜𑁆𑀘 𑀲𑀗𑁆𑀕𑀳𑁂𑀲𑀼 𑀯𑀼𑀘𑁆𑀘𑀢𑀺 ‘‘𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺, 𑀢𑀣𑀸 𑀘 𑀲𑀢𑀺 𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 ¶ 𑀲𑀺𑀬𑀸. 𑀅𑀣𑀸𑀧𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁬𑁧 𑀆𑀤𑀬𑁄) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸, 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬, 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸, 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀯𑀺𑀬, 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺. 𑀯𑀼𑀘𑁆𑀘𑀢𑁂 𑁋

𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄.

𑀲𑀩𑁆𑀩𑀲𑁆𑀲𑀸𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑀣𑀸 𑀳𑀺 ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 (𑀧𑀸𑀘𑀺. 𑁧𑁨𑁪𑁨), 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂, 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀭𑀺𑀬𑀢𑁆𑀢𑀺𑀯𑀺𑀲𑁂𑀲𑁂𑀧𑀺 𑀲𑀼𑀢𑁆𑀢𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. 𑀢𑀤𑁂𑀓𑀤𑁂𑀲𑁂𑀲𑀼 𑀧𑀦 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 𑀕𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄 ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀬𑀼𑀢𑁆𑀢𑁂𑀲𑀼 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸. 𑀲𑀢𑀺𑀧𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀗𑁆𑀕𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄.

𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁 𑀲𑀼𑀢𑁆𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄𑀢𑀺. 𑀦𑀦𑀼 𑀘 𑀲𑀕𑀸𑀣𑀓𑀁 ¶ 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸 𑀏𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸, 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 ¶ 𑀧𑀼𑀩𑁆𑀩𑁂 𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 𑁋 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀲𑀼𑀢𑁆𑀢𑀪𑀸𑀯𑁄, 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀓𑀺𑀦𑁆𑀢𑀼 𑀲𑀼𑀢𑁆𑀢𑀪𑀸𑀯𑁂𑀦𑁂𑀯. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑁆𑀢𑀦𑀸𑀫𑀓’’𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺, 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳 𑀕𑀸𑀣𑀸𑀳𑀻𑀢𑀺 𑀳𑀺 𑀲𑀕𑀸𑀣𑀓𑀁. 𑀲𑀳𑀪𑀸𑀯𑁄 𑀘 𑀦𑀸𑀫 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁄 𑀅𑀢𑁆𑀣𑀺. 𑀬𑁄 𑀲𑀳 𑀕𑀸𑀣𑀸𑀳𑀻𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀬𑀤𑀧𑀺 𑀯𑀼𑀢𑁆𑀢𑀁 𑁋 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦 𑀅𑀜𑁆𑀜𑀢𑁄. 𑀅𑀜𑁆𑀜𑀸 𑀏𑀯 𑀳𑀺 𑀢𑀸 𑀕𑀸𑀣𑀸, 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀸𑀦𑀁 𑀲𑀽𑀘𑀦𑀸𑀤𑀺𑀅𑀢𑁆𑀣𑁂𑀦 𑀲𑀼𑀢𑁆𑀢𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺.

𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀏𑀯𑀁 ¶ 𑀲𑀗𑁆𑀕𑀳𑀯𑀸𑀭𑁂𑀦 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑁂 𑀳𑀸𑀭𑀸𑀤𑀬𑁄 𑀇𑀤𑀸𑀦𑀺 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸’’𑀢𑀺𑀆𑀤𑀺𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 𑁋 ‘‘𑀲𑁄𑀴𑀲𑀳𑀸𑀭𑀸 𑀦𑁂𑀢𑁆𑀢𑀻’’𑀢𑀺, 𑀢𑀲𑁆𑀫𑀺𑀁 𑀯𑀘𑀦𑁂, 𑀢𑀺𑀲𑁆𑀲𑀁 𑀯𑀸 𑀕𑀸𑀣𑀸𑀬𑀁, 𑀬𑀸𑀦𑀺 𑀳𑀸𑀭𑀦𑀬𑀫𑀽𑀮𑀧𑀤𑀸𑀦𑀺 𑀉𑀤𑁆𑀥𑀝𑀸𑀦𑀺, 𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸 𑀧𑀜𑁆𑀘𑀯𑀺𑀥𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺. 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀲𑁄𑀴𑀲𑀸𑀢𑀺 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀦𑁂𑀲𑀁 𑀦 𑀢𑀢𑁄 𑀉𑀤𑁆𑀥𑀁 𑀅𑀥𑁄 𑀘𑀸𑀢𑀺 𑀏𑀢𑀧𑀭𑀫𑀢𑀁 ¶ 𑀤𑀲𑁆𑀲𑁂𑀢𑀺. 𑀲𑀸 𑀘𑁂𑀢𑀧𑀭𑀫𑀢𑀸 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀳𑀸𑀭𑀸𑀢𑀺 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑀦𑀁. 𑀤𑁂𑀲𑀦𑀸 𑀯𑀺𑀘𑀬𑁄𑀢𑀺𑀆𑀤𑀺 𑀲𑀭𑀽𑀧𑀤𑀲𑁆𑀲𑀦𑀁.

𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀳𑀸𑀭𑀸? 𑀳𑀭𑀻𑀬𑀦𑁆𑀢𑀺 𑀏𑀢𑁂𑀳𑀺, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀯𑀺𑀲𑀬𑀸 𑀅𑀜𑁆𑀜𑀸𑀡𑀲𑀁𑀲𑀬𑀯𑀺𑀧𑀮𑁆𑀮𑀸𑀲𑀸𑀢𑀺 𑀳𑀸𑀭𑀸, 𑀳𑀭𑀦𑁆𑀢𑀺 𑀯𑀸 𑀲𑀬𑀁 𑀢𑀸𑀦𑀺, 𑀳𑀭𑀡𑀫𑀢𑁆𑀢𑀫𑁂𑀯 𑀯𑀸𑀢𑀺 𑀳𑀸𑀭𑀸 𑀨𑀮𑀽𑀧𑀘𑀸𑀭𑁂𑀦. 𑀅𑀣 𑀯𑀸 𑀳𑀭𑀻𑀬𑀦𑁆𑀢𑀺 𑀯𑁄𑀳𑀭𑀻𑀬𑀦𑁆𑀢𑀺 𑀥𑀫𑁆𑀫𑀲𑀁𑀯𑀡𑁆𑀡𑀓𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂𑀳𑀺 𑀥𑀫𑁆𑀫𑀲𑁆𑀲 𑀤𑀸𑀦𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀳𑀸𑀭𑀸. 𑀅𑀣 𑀯𑀸 𑀳𑀸𑀭𑀸 𑀯𑀺𑀬𑀸𑀢𑀺 𑀳𑀸𑀭𑀸. 𑀬𑀣𑀸 𑀳𑀺 𑀅𑀦𑁂𑀓𑀭𑀢𑀦𑀸𑀯𑀮𑀺𑀲𑀫𑀽𑀳𑁄 𑀳𑀸𑀭𑀲𑀗𑁆𑀔𑀸𑀢𑁄 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀭𑀢𑀦𑀲𑀫𑁆𑀨𑀲𑁆𑀲𑁂𑀳𑀺 𑀲𑀫𑀼𑀧𑁆𑀧𑀚𑁆𑀚𑀦𑀻𑀬𑀫𑀸𑀦𑀳𑀺𑀮𑀸𑀤𑀲𑀼𑀔𑁄 𑀳𑀼𑀢𑁆𑀯𑀸 𑀢𑀤𑀼𑀧𑀪𑁄𑀕𑀻𑀚𑀦𑀲𑀭𑀻𑀭𑀲𑀦𑁆𑀢𑀸𑀧𑀁 𑀦𑀺𑀤𑀸𑀖𑀧𑀭𑀺𑀴𑀸𑀳𑀼𑀧𑀚𑀦𑀺𑀢𑀁 𑀯𑀽𑀧𑀲𑀫𑁂𑀢𑀺, 𑀏𑀯𑀫𑁂𑀢𑁂𑀧𑀺 𑀦𑀸𑀦𑀸𑀯𑀺𑀥𑀧𑀭𑀫𑀢𑁆𑀣𑀭𑀢𑀦𑀧𑁆𑀧𑀩𑀦𑁆𑀥𑀸 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀧𑀭𑀫𑀢𑁆𑀣𑀭𑀢𑀦𑀸𑀥𑀺𑀕𑀫𑁂𑀦 𑀲𑀫𑀼𑀧𑁆𑀧𑀸𑀤𑀺𑀬𑀫𑀸𑀦𑀦𑀺𑀩𑁆𑀩𑀼𑀢𑀺𑀲𑀼𑀔𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀚𑀦𑀳𑀤𑀬𑀧𑀭𑀺𑀢𑀸𑀧𑀁 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀳𑁂𑀢𑀼𑀓𑀁 𑀯𑀽𑀧𑀲𑀫𑁂𑀦𑁆𑀢𑀻𑀢𑀺. 𑀅𑀣 𑀯𑀸 𑀳𑀸𑀭𑀬𑀦𑁆𑀢𑀺 𑀅𑀜𑁆𑀜𑀸𑀡𑀸𑀤𑀻𑀦𑀁 𑀳𑀸𑀭𑀁 𑀅𑀧𑀕𑀫𑀁 𑀓𑀭𑁄𑀦𑁆𑀢𑀺 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀯𑀸 𑀳𑀸𑀭𑀸. 𑀅𑀣 𑀯𑀸 𑀲𑁄𑀢𑀼𑀚𑀦𑀘𑀺𑀢𑁆𑀢𑀲𑁆𑀲 𑀳𑀭𑀡𑀢𑁄 𑀭𑀫𑀡𑀢𑁄 𑀘 𑀳𑀸𑀭𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀬𑀣𑀸 𑁋 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄 𑀪𑀕𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪; 𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸). 𑀅𑀬𑀁 𑀢𑀸𑀯 𑀳𑀸𑀭𑀸𑀦𑀁 𑀲𑀸𑀥𑀸𑀭𑀡𑀢𑁄 𑀅𑀢𑁆𑀣𑁄.

𑀅𑀲𑀸𑀥𑀸𑀭𑀡𑀢𑁄 𑀧𑀦 𑀤𑁂𑀲𑀻𑀬𑀢𑀺 𑀲𑀁𑀯𑀡𑁆𑀡𑀻𑀬𑀢𑀺 𑀏𑀢𑀸𑀬 𑀲𑀼𑀢𑁆𑀢𑀢𑁆𑀣𑁄𑀢𑀺 𑀤𑁂𑀲𑀦𑀸, 𑀤𑁂𑀲𑀦𑀸𑀲𑀳𑀘𑀭𑀡𑀢𑁄 𑀯𑀸 ¶ 𑀤𑁂𑀲𑀦𑀸. 𑀦𑀦𑀼 𑀘 𑀅𑀜𑁆𑀜𑁂𑀧𑀺 𑀳𑀸𑀭𑀸 𑀤𑁂𑀲𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀢𑁄 𑀤𑁂𑀲𑀦𑀸𑀲𑀳𑀘𑀸𑀭𑀺𑀦𑁄𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀳𑀸𑀭𑁄 𑀬𑁂𑀪𑀼𑀬𑁆𑀬𑁂𑀦 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀫𑀸𑀦𑁄 𑀤𑁂𑀲𑀦𑀸𑀬 𑀲𑀳 𑀘𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀢𑀣𑀸 𑀧𑀭𑁂. 𑀦 𑀳𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀤𑀺𑀲𑀦𑁆𑀤𑀲𑁆𑀲𑀦𑀭𑀳𑀺𑀢𑀸 𑀲𑀼𑀢𑁆𑀢𑀤𑁂𑀲𑀦𑀸 𑀅𑀢𑁆𑀣𑀺. 𑀅𑀲𑁆𑀲𑀸𑀤𑀸𑀤𑀺𑀲𑀦𑁆𑀤𑀲𑁆𑀲𑀦𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀘𑀸𑀬𑀁 𑀳𑀸𑀭𑁄𑀢𑀺.

𑀯𑀺𑀘𑀺𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀧𑀤𑀧𑀜𑁆𑀳𑀸𑀤𑀬𑁄, 𑀯𑀺𑀘𑀺𑀢𑀺 𑀏𑀯 𑀯𑀸 𑀢𑁂𑀲𑀦𑁆𑀢𑀺 𑀯𑀺𑀘𑀬𑁄. 𑀧𑀸𑀴𑀺𑀬𑀁 𑀧𑀦 𑀯𑀺𑀘𑀺𑀦𑀢𑀻𑀢𑀺 𑀯𑀺𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄.

𑀬𑀼𑀢𑁆𑀢𑀻𑀢𑀺 𑀉𑀧𑀧𑀢𑁆𑀢𑀺𑀲𑀸𑀥𑀦𑀬𑀼𑀢𑁆𑀢𑀺, 𑀇𑀥 𑀧𑀦 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀬𑀼𑀢𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺 𑀬𑀣𑀸, 𑀬𑀼𑀢𑁆𑀢𑀺𑀲𑀳𑀘𑀭𑀡𑀢𑁄 𑀯𑀸. 𑀇𑀥𑀸𑀧𑀺 𑀤𑁂𑀲𑀦𑀸𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀧𑀤𑀝𑁆𑀞𑀸𑀦𑀦𑁆𑀢𑀺 ¶ 𑀆𑀲𑀦𑁆𑀦𑀓𑀸𑀭𑀡𑀁, 𑀇𑀥𑀸𑀧𑀺 𑀧𑀤𑀝𑁆𑀞𑀸𑀦𑀯𑀺𑀘𑀸𑀭𑀡𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀮𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀏𑀓𑀮𑀓𑁆𑀔𑀡𑀸 𑀥𑀫𑁆𑀫𑀸 𑀅𑀯𑀼𑀢𑁆𑀢𑀸𑀧𑀺 𑀏𑀓𑀯𑀘𑀦𑁂𑀦𑀸𑀢𑀺 𑀮𑀓𑁆𑀔𑀡𑀁.

𑀯𑀺𑀬𑀽𑀳𑀻𑀬𑀦𑁆𑀢𑀺 𑀯𑀺𑀪𑀸𑀕𑁂𑀦 𑀧𑀺𑀡𑁆𑀟𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀩𑁆𑀬𑀽𑀳𑁄. 𑀦𑀺𑀩𑁆𑀩𑀘𑀦𑀸𑀤𑀻𑀦𑀁 𑀲𑀼𑀢𑁆𑀢𑁂 𑀤𑀲𑁆𑀲𑀺𑀬𑀫𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀩𑁆𑀬𑀽𑀳𑁄𑀢𑀺 𑀘𑀢𑀼𑀩𑁆𑀬𑀽𑀳𑁄, 𑀘𑀢𑀼𑀦𑁆𑀦𑀁 𑀯𑀸 𑀩𑁆𑀬𑀽𑀳𑁄 𑀏𑀢𑁆𑀣𑀸𑀢𑀺 𑀘𑀢𑀼𑀩𑁆𑀬𑀽𑀳𑁄.

𑀆𑀯𑀝𑁆𑀝𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀪𑀸𑀕𑀸 𑀯𑀺𑀲𑀪𑀸𑀕𑀸 𑀘 𑀥𑀫𑁆𑀫𑀸, 𑀢𑁂𑀲𑀁 𑀯𑀸 𑀆𑀯𑀝𑁆𑀝𑀦𑀦𑁆𑀢𑀺 𑀆𑀯𑀝𑁆𑀝𑁄.

𑀯𑀺𑀪𑀚𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀪𑀽𑀫𑀺𑀬𑁄𑀢𑀺 𑀯𑀺𑀪𑀢𑁆𑀢𑀺, 𑀯𑀺𑀪𑀚𑀦𑀁 𑀯𑀸 𑀏𑀢𑁂𑀲𑀁 𑀪𑀽𑀫𑀺𑀬𑀸𑀢𑀺 𑀯𑀺𑀪𑀢𑁆𑀢𑀺.

𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀭𑀺𑀯𑀢𑁆𑀢𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀥𑀫𑁆𑀫𑀸, 𑀧𑀭𑀺𑀯𑀢𑁆𑀢𑀦𑀁 𑀯𑀸 𑀢𑁂𑀲𑀦𑁆𑀢𑀺 𑀧𑀭𑀺𑀯𑀢𑁆𑀢𑀦𑁄.

𑀯𑀺𑀯𑀺𑀥𑀁 ¶ 𑀯𑀘𑀦𑀁 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀸𑀘𑀓𑀫𑁂𑀢𑁆𑀣𑀸𑀢𑀺 𑀯𑀺𑀯𑀘𑀦𑀁, 𑀯𑀺𑀯𑀘𑀦𑀫𑁂𑀯 𑀯𑁂𑀯𑀘𑀦𑀁, 𑀯𑀺𑀯𑀺𑀥𑀁 𑀯𑀼𑀘𑁆𑀘𑀢𑀺 𑀏𑀢𑁂𑀦 𑀅𑀢𑁆𑀣𑁄𑀢𑀺 𑀯𑀸 𑀯𑀺𑀯𑀘𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀓𑀸𑀭𑁂𑀳𑀺 𑀧𑀪𑁂𑀤𑀢𑁄 𑀯𑀸 𑀜𑀸𑀧𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸 𑀅𑀢𑁆𑀣𑀸𑀢𑀺 𑀧𑀜𑁆𑀜𑀢𑁆𑀢𑀺.

𑀑𑀢𑀸𑀭𑀻𑀬𑀦𑁆𑀢𑀺 𑀅𑀦𑀼𑀧𑁆𑀧𑀯𑁂𑀲𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑀸𑀕𑀢𑀸 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀲𑀽𑀢𑀺 𑀑𑀢𑀭𑀡𑁄.

𑀲𑁄𑀥𑀻𑀬𑀦𑁆𑀢𑀺 𑀲𑀫𑀸𑀥𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸𑀢𑀺 𑀲𑁄𑀥𑀦𑁄.

𑀅𑀥𑀺𑀝𑁆𑀞𑀻𑀬𑀦𑁆𑀢𑀺 𑀅𑀦𑀼𑀧𑀯𑀢𑁆𑀢𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀽𑀢𑀸 𑀥𑀫𑁆𑀫𑀸 𑀯𑀺𑀦𑀸 𑀯𑀺𑀓𑀧𑁆𑀧𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑁄.

𑀧𑀭𑀺𑀓𑀭𑁄𑀢𑀺 𑀅𑀪𑀺𑀲𑀗𑁆𑀔𑀭𑁄𑀢𑀺 𑀨𑀮𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀳𑁂𑀢𑀼 𑀧𑀘𑁆𑀘𑀬𑁄 𑀘, 𑀧𑀭𑀺𑀓𑁆𑀔𑀸𑀭𑀁 𑀆𑀘𑀺𑀓𑁆𑀔𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀳𑀸𑀭𑁄, 𑀧𑀭𑀺𑀓𑁆𑀔𑀸𑀭𑀯𑀺𑀲𑀬𑀢𑁆𑀢𑀸 𑀧𑀭𑀺𑀓𑁆𑀔𑀸𑀭𑀲𑀳𑀘𑀭𑀡𑀢𑁄 𑀯𑀸 𑀧𑀭𑀺𑀓𑁆𑀔𑀸𑀭𑁄.

𑀲𑀫𑀸𑀭𑁄𑀧𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀧𑀤𑀝𑁆𑀞𑀸𑀦𑀸𑀤𑀺𑀫𑀼𑀔𑁂𑀦 𑀥𑀫𑁆𑀫𑀸𑀢𑀺 𑀲𑀫𑀸𑀭𑁄𑀧𑀦𑁄. 𑀲𑀩𑁆𑀩𑀢𑁆𑀣 𑀘 𑀪𑀸𑀯𑀲𑀸𑀥𑀦𑀯𑀲𑁂𑀦𑀸𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀢𑀲𑁆𑀲𑀸𑀧𑀺 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀢𑀲𑁆𑀲𑀸𑀢𑀺 ¶ 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑀸𑀭𑀼𑀤𑁆𑀤𑁂𑀲𑀲𑁆𑀲. 𑀅𑀦𑀼𑀕𑀻𑀢𑀻𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀅𑀦𑀼𑀧𑀘𑁆𑀙𑀸 𑀕𑀸𑀬𑀦𑀕𑀸𑀣𑀸, 𑀢𑀸𑀲𑀼 𑀑𑀲𑀸𑀦𑀕𑀸𑀣𑀸𑀬 𑀅𑀢𑁆𑀣𑀢𑁄 𑀅𑀲𑀁𑀓𑀺𑀡𑁆𑀡𑀸𑀢𑀺 𑀧𑀤𑀢𑁆𑀣𑁂𑀦 𑀲𑀗𑁆𑀓𑀭𑀭𑀳𑀺𑀢𑀸, 𑀢𑁂𑀦 𑀬𑀤𑀺𑀧𑀺 𑀓𑁂𑀘𑀺 𑀳𑀸𑀭𑀸 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀲𑀺𑀝𑁆𑀞𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸𑀧𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀲𑀗𑁆𑀓𑀭𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘 𑀦𑁂𑀲𑀁 𑀅𑀲𑀗𑁆𑀓𑀭𑁄 𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁂 𑀲𑀼𑀧𑀸𑀓𑀝𑁄 𑀳𑁄𑀢𑀺. 𑀏𑀢𑁂𑀲𑀜𑁆𑀘𑁂𑀯𑀸𑀢𑀺 𑀏𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀳𑀸𑀭𑀸𑀦𑀁. 𑀬𑀣𑀸 𑀅𑀲𑀗𑁆𑀓𑀭𑁄, 𑀢𑀣𑀸 𑀘𑁂𑀯 𑀪𑀯𑀢𑀺. 𑀓𑀺𑀁 𑀪𑀯𑀢𑀺? 𑀯𑀺𑀢𑁆𑀣𑀸𑀭𑀢𑀬𑀸 𑀯𑀺𑀢𑁆𑀣𑀸𑀭𑁂𑀦. 𑀦𑀬𑀯𑀺𑀪𑀢𑁆𑀢𑀺 𑀦𑀬𑁂𑀦 𑀉𑀧𑀸𑀬𑁂𑀦 𑀜𑀸𑀬𑁂𑀦 𑀯𑀺𑀪𑀸𑀕𑁄. 𑀏𑀢𑁂𑀦 𑀢𑀁 𑀏𑀯 𑀅𑀲𑀗𑁆𑀓𑀺𑀡𑁆𑀡𑀢𑀁 𑀯𑀺𑀪𑀸𑀯𑁂𑀢𑀺. 𑀓𑁂𑀘𑀺 ‘‘𑀯𑀺𑀢𑁆𑀣𑀸𑀭𑀦𑀬𑀸’’𑀢𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁, 𑀅𑀬𑀜𑁆𑀘 𑀕𑀸𑀣𑀸 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺.

𑁨. 𑀏𑀯𑀁 𑀳𑀸𑀭𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑁂 𑀉𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑁂 𑀯𑁄𑀤𑀸𑀦𑀸𑀦𑀺 𑀘 𑀯𑀺𑀪𑀸𑀕𑀢𑁄 𑀜𑀸𑀧𑁂𑀦𑁆𑀢𑀻𑀢𑀺 𑀦𑀬𑀸, 𑀦𑀻𑀬𑀦𑁆𑀢𑀺 𑀯𑀸 𑀢𑀸𑀦𑀺 𑀏𑀢𑁂𑀳𑀺 ¶ , 𑀏𑀢𑁆𑀣 𑀯𑀸𑀢𑀺 𑀦𑀬𑀸, 𑀦𑀬𑀦𑀫𑀢𑁆𑀢𑀫𑁂𑀯 𑀯𑀸𑀢𑀺 𑀦𑀬𑀸, 𑀦𑀻𑀬𑀦𑁆𑀢𑀺 𑀯𑀸 𑀲𑀬𑀁 𑀥𑀫𑁆𑀫𑀓𑀣𑀺𑀓𑁂𑀳𑀺 𑀉𑀧𑀦𑀻𑀬𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀧𑀯𑀺𑀘𑀬𑀢𑁆𑀣𑀦𑁆𑀢𑀺 𑀦𑀬𑀸. 𑀅𑀣 𑀯𑀸 𑀦𑀬𑀸 𑀯𑀺𑀬𑀸𑀢𑀺 𑀦𑀬𑀸. 𑀬𑀣𑀸 𑀳𑀺 𑀏𑀓𑀢𑁆𑀢𑀸𑀤𑀬𑁄 𑀦𑀬𑀸 𑀲𑀫𑁆𑀫𑀸 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑀸 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀬𑀣𑀸𑀓𑁆𑀓𑀫𑀁 𑀲𑀫𑁆𑀩𑀦𑁆𑀥𑀯𑀺𑀪𑀸𑀕𑀩𑁆𑀬𑀸𑀧𑀸𑀭𑀯𑀺𑀭𑀳𑀸𑀦𑀼𑀭𑀽𑀧𑀨𑀮𑀪𑀸𑀯𑀤𑀲𑁆𑀲𑀦𑁂𑀦 𑀅𑀲𑀗𑁆𑀓𑀭𑀢𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀁 𑀲𑀪𑀸𑀯𑀁 𑀧𑀯𑁂𑀤𑀬𑀦𑁆𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀯𑀺𑀪𑀸𑀕𑀤𑀲𑁆𑀲𑀦𑁂𑀦 𑀅𑀯𑀺𑀧𑀭𑀻𑀢𑀲𑀼𑀢𑁆𑀢𑀢𑁆𑀣𑀸𑀯𑀩𑁄𑀥𑀸𑀬 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀸 𑀯𑁂𑀦𑁂𑀬𑁆𑀬𑀸𑀦𑀁 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀅𑀣 𑀯𑀸 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀲𑁆𑀲 𑀦𑀬𑀦𑀢𑁄 𑀲𑀁𑀓𑀺𑀮𑁂𑀲𑀢𑁄 𑀬𑀫𑀦𑀢𑁄 𑀘 𑀦𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦.

𑀦𑀦𑁆𑀤𑀺𑀬𑀸𑀯𑀝𑁆𑀝𑁄𑀢𑀺𑀆𑀤𑀻𑀲𑀼 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀯𑀺𑀬 𑀆𑀯𑀝𑁆𑀝𑁄 𑀏𑀢𑀲𑁆𑀲𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀬𑀣𑀸 𑀳𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀅𑀦𑁆𑀢𑁄𑀞𑀺𑀢𑁂𑀦 𑀧𑀥𑀸𑀦𑀸𑀯𑀬𑀯𑁂𑀦 𑀩𑀳𑀺𑀤𑁆𑀥𑀸 𑀆𑀯𑀝𑁆𑀝𑀢𑀺, 𑀏𑀯𑀫𑀬𑀫𑁆𑀧𑀺 𑀦𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀦𑁆𑀤𑀺𑀬𑀸 𑀢𑀡𑁆𑀳𑀸𑀬 𑀧𑀫𑁄𑀤𑀲𑁆𑀲 𑀯𑀸 𑀆𑀯𑀝𑁆𑀝𑁄 𑀏𑀢𑁆𑀣𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄. 𑀢𑀻𑀳𑀺 𑀅𑀯𑀬𑀯𑁂𑀳𑀺 𑀮𑁄𑀪𑀸𑀤𑀻𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀅𑀮𑁄𑀪𑀸𑀤𑀻𑀳𑀺 𑀘 𑀯𑁄𑀤𑀸𑀦𑀧𑀓𑁆𑀔𑁂 𑀧𑀼𑀓𑁆𑀔𑀮𑁄 𑀲𑁄𑀪𑀦𑁄𑀢𑀺 𑀢𑀺𑀧𑀼𑀓𑁆𑀔𑀮𑁄. 𑀅𑀲𑀦𑁆𑀢𑀸𑀲𑀦𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀺𑀲𑁂𑀲𑀬𑁄𑀕𑁂𑀦 𑀲𑀻𑀳𑁄 𑀪𑀕𑀯𑀸, 𑀢𑀲𑁆𑀲 𑀯𑀺𑀓𑁆𑀓𑀻𑀴𑀺𑀢𑀁 𑀤𑁂𑀲𑀦𑀸𑀯𑀘𑀻𑀓𑀫𑁆𑀫𑀪𑀽𑀢𑁄 𑀯𑀺𑀳𑀸𑀭𑁄𑀢𑀺 𑀓𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀢𑀧𑁆𑀧𑀝𑀺𑀧𑀓𑁆𑀔𑀧𑀭𑀺𑀤𑀻𑀧𑀦𑀢𑁄 𑀲𑀻𑀳𑀲𑁆𑀲 𑀯𑀺𑀓𑁆𑀓𑀻𑀴𑀺𑀢𑀁 𑀏𑀢𑁆𑀣𑀸𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄, ¶ 𑀦𑀬𑁄. 𑀩𑀮𑀯𑀺𑀲𑁂𑀲𑀬𑁄𑀕𑀤𑀻𑀧𑀦𑀢𑁄 𑀯𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑀤𑀺𑀲𑀢𑁆𑀢𑀸 𑀦𑀬𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄. 𑀩𑀮𑀯𑀺𑀲𑁂𑀲𑁄 𑀘𑁂𑀢𑁆𑀣 𑀲𑀤𑁆𑀥𑀸𑀤𑀺𑀩𑀮𑀁, 𑀤𑀲𑀩𑀮𑀸𑀦𑀺 𑀏𑀯 𑀯𑀸. 𑀅𑀢𑁆𑀣𑀦𑀬𑀢𑁆𑀢𑀬𑀤𑀺𑀲𑀸𑀪𑀸𑀯𑁂𑀦 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀆𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁. 𑀢𑀣𑀸 𑀆𑀮𑁄𑀘𑀺𑀢𑀸𑀦𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀦𑀬𑀢𑁆𑀢𑀬𑀬𑁄𑀚𑀦𑁂 𑀲𑀫𑀸𑀦𑀬𑀦𑀢𑁄 𑀅𑀗𑁆𑀓𑀼𑀲𑁄 𑀯𑀺𑀬 𑀅𑀗𑁆𑀓𑀼𑀲𑁄. 𑀕𑀸𑀣𑀸𑀲𑀼 𑀮𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺 𑀲𑀼𑀢𑁆𑀢𑀢𑁆𑀣𑀦𑁆𑀢𑀺 𑀮𑀜𑁆𑀚𑀓𑁄, 𑀦𑀬𑁄 𑀘 𑀲𑁄 𑀮𑀜𑁆𑀚𑀓𑁄 𑀘𑀸𑀢𑀺 𑀦𑀬𑀮𑀜𑁆𑀚𑀓𑁄. 𑀕𑀢𑀸𑀢𑀺 𑀜𑀸𑀢𑀸, 𑀫𑀢𑀸𑀢𑀺 𑀅𑀢𑁆𑀣𑁄. 𑀲𑁄 𑀏𑀯 𑀯𑀸 𑀧𑀸𑀞𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁩. 𑀏𑀯𑀁 𑀦𑀬𑁂𑀧𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀫𑀽𑀮𑀧𑀤𑀸𑀦𑀺 𑀉𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀽𑀮𑀸𑀦𑀺 𑀘 𑀢𑀸𑀦𑀺 𑀦𑀬𑀸𑀦𑀁 𑀧𑀝𑁆𑀞𑀸𑀦𑀪𑀸𑀕𑀸𑀦𑀜𑁆𑀘 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀧𑀤𑀸𑀦𑀺 𑀘 𑀅𑀥𑀺𑀕𑀫𑀽𑀧𑀸𑀬𑀪𑀸𑀯𑀢𑁄 𑀓𑁄𑀝𑁆𑀞𑀸𑀲𑀪𑀸𑀯𑀢𑁄 𑀘𑀸𑀢𑀺 𑀫𑀽𑀮𑀧𑀤𑀸𑀦𑀺. 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦, 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀧𑀸𑀧𑀥𑀫𑁆𑀫𑀸𑀦𑀁 𑀲𑀮𑀦𑀢𑁄 𑀯𑀺𑀤𑁆𑀥𑀁𑀲𑀦𑀢𑁄, 𑀓𑀼𑀲𑀸𑀦𑀁 𑀯𑀸 𑀭𑀸𑀕𑀸𑀤𑀻𑀦𑀁 𑀮𑀯𑀦𑀢𑁄, 𑀓𑀼𑀲𑀸 𑀯𑀺𑀬 𑀯𑀸 𑀮𑀯𑀦𑀢𑁄, 𑀓𑀼𑀲𑁂𑀦 𑀯𑀸 𑀜𑀸𑀡𑁂𑀦 𑀮𑀸𑀢𑀩𑁆𑀩𑀢𑁄 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀓𑀼𑀲𑀮𑀸𑀦𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀸𑀦𑀻𑀢𑀺 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄 𑀚𑀸𑀢𑀺𑀪𑁂𑀤𑀢𑁄 𑀘 𑀫𑀽𑀮𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀁𑀬𑁂𑀯 ¶ 𑀧𑀞𑀫𑀁 𑀉𑀤𑁆𑀤𑀺𑀲𑀢𑀺 ‘‘𑀢𑀡𑁆𑀳𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀲𑀢𑀺 𑀧𑀭𑀺𑀢𑀲𑀢𑀻𑀢𑀺 𑀢𑀡𑁆𑀳𑀸. 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀺, 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸𑀢𑀺 𑀯𑀸 𑀅𑀯𑀺𑀚𑁆𑀚𑀸. 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀲𑁄𑀢𑀺 𑀮𑁄𑀪𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀲𑀼𑀪𑀲𑀜𑁆𑀜𑀸. 𑀲𑀼𑀔𑀲𑀜𑁆𑀜𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀕𑀳𑀦𑁆𑀢𑀺 𑀕𑀡𑀦𑀁. 𑀲𑀫𑁄𑀲𑀭𑀡𑀦𑁆𑀢𑀺 𑀲𑀫𑁄𑀭𑁄𑀧𑀦𑀁.

𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄. 𑀅𑀦𑀺𑀘𑁆𑀘𑀸𑀤𑀻𑀳𑀺 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀅𑀮𑁄𑀪𑀸𑀤𑀬𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀲𑀼𑀪𑁂 ‘‘𑀅𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀅𑀲𑀼𑀪𑀲𑀜𑁆𑀜𑀸, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀳𑀺 𑀤𑁂𑀲𑀦𑀸. 𑀤𑀼𑀓𑁆𑀔𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀁 𑀉𑀤𑁆𑀤𑀸𑀦𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑁂𑀦 𑀦𑀲𑁆𑀲𑀺𑀢𑀼𑀁 𑀅𑀤𑀢𑁆𑀯𑀸 𑀉𑀤𑁆𑀥𑀁 𑀤𑀸𑀦𑀁 𑀭𑀓𑁆𑀔𑀡𑀁 𑀉𑀤𑁆𑀤𑀸𑀦𑀁, 𑀲𑀗𑁆𑀕𑀳𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸’’𑀢𑀺𑀧𑀺 ¶ 𑀧𑀸𑀞𑁄. 𑀓𑀺𑀮𑁂𑀲𑀪𑀽𑀫𑀻𑀢𑀺 𑀲𑀁𑀓𑀺𑀮𑁂𑀲𑀪𑀽𑀫𑀺 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁆𑀢𑀸. 𑀓𑀼𑀲𑀮𑀸𑀦𑀁 𑀬𑀸𑀦𑀺 𑀢𑀻𑀡𑀺 𑀫𑀽𑀮𑀸𑀦𑀺. ‘‘𑀓𑀼𑀲𑀮𑀸𑀦𑀻’’𑀢𑀺𑀧𑀺 𑀧𑀞𑀦𑁆𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀅𑀲𑀼𑀪𑀲𑀜𑁆𑀜𑀸𑀤𑀬𑁄 𑀲𑀦𑁆𑀥𑀸𑀬𑀸𑀳. 𑀇𑀦𑁆𑀤𑁆𑀭𑀺𑀬𑀪𑀽𑀫𑀻𑀢𑀺 𑀲𑀤𑁆𑀥𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀼𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀻𑀬𑀦𑁆𑀢𑀺. 𑀔𑁄𑀢𑀺 𑀧𑀤𑀧𑀽𑀭𑀡𑁂, 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀢𑁂𑀦 𑀏𑀢𑁂 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀸𑀭𑀲𑁂𑀯𑀸𑀢𑀺 𑀯𑀸. 𑀫𑀽𑀮𑀧𑀤𑀸𑀢𑀺 𑀫𑀽𑀮𑀧𑀤𑀸𑀦𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁪. 𑀏𑀯𑀁 ¶ 𑀉𑀤𑁆𑀤𑀺𑀝𑁆𑀞𑁂 𑀳𑀸𑀭𑀸𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀲𑀗𑁆𑀔𑁂𑀧𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀤𑁆𑀤𑁂𑀲𑀧𑀸𑀞𑁂. 𑀲𑀗𑁆𑀔𑁂𑀧𑀢𑁄 𑀦𑁂𑀢𑁆𑀢𑀺 𑀓𑀺𑀢𑁆𑀢𑀺𑀢𑀸𑀢𑀺 𑀲𑀫𑀸𑀲𑀢𑁄 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀓𑀣𑀺𑀢𑀁. 𑀳𑀸𑀭𑀦𑀬𑀫𑀽𑀮𑀧𑀤𑀸𑀦𑀜𑁆𑀳𑀺 𑀲𑀭𑀽𑀧𑀤𑀲𑁆𑀲𑀦𑀁 𑀉𑀤𑁆𑀤𑁂𑀲𑀧𑀸𑀞𑁂𑀦 𑀓𑀢𑀦𑁆𑀢𑀺. 𑀏𑀢𑁆𑀣 𑀘 𑀳𑀸𑀭𑀦𑀬𑀸𑀦𑀁 𑁋

𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑁂𑀦, 𑀧𑀤𑀢𑁆𑀣𑁄 𑀮𑀓𑁆𑀔𑀡𑀁 𑀓𑀫𑁄;

𑀏𑀢𑁆𑀢𑀸𑀯𑀢𑀸 𑀘 𑀳𑁂𑀢𑁆𑀯𑀸𑀤𑀻, 𑀯𑁂𑀤𑀺𑀢𑀩𑁆𑀩𑀸 𑀳𑀺 𑀯𑀺𑀜𑁆𑀜𑀼𑀦𑀸.

𑀢𑁂𑀲𑀼 𑀅𑀯𑀺𑀲𑁂𑀲𑀢𑁄 𑀯𑀺𑀲𑁂𑀲𑀢𑁄 𑀘 𑀳𑀸𑀭𑀦𑀬𑀸𑀦𑀁 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀮𑀓𑁆𑀔𑀡𑀸𑀤𑀻𑀲𑀼 𑀧𑀦 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑁂𑀧𑀺 𑀳𑀸𑀭𑀸 𑀦𑀬𑀸 𑀘 𑀬𑀣𑀸𑀓𑁆𑀓𑀫𑀁 𑀩𑁆𑀬𑀜𑁆𑀚𑀦𑀢𑁆𑀣𑀫𑀼𑀔𑁂𑀦 𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀮𑀓𑁆𑀔𑀡𑀸. 𑀯𑀺𑀲𑁂𑀲𑀢𑁄 𑀧𑀦 𑀢𑀲𑁆𑀲 𑀢𑀲𑁆𑀲 𑀳𑀸𑀭𑀲𑁆𑀲 𑀦𑀬𑀲𑁆𑀲 𑀘 𑀮𑀓𑁆𑀔𑀡𑀁 𑀦𑀺𑀤𑁆𑀤𑁂𑀲𑁂 𑀏𑀯 𑀓𑀣𑀬𑀺𑀲𑁆𑀲𑀸𑀫. 𑀓𑀫𑀸𑀤𑀻𑀦𑀺 𑀘 𑀬𑀲𑁆𑀫𑀸 𑀦𑁂𑀲𑀁 𑀮𑀓𑁆𑀔𑀡𑁂𑀲𑀼 𑀜𑀸𑀢𑁂𑀲𑀼 𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀦𑀺𑀤𑁆𑀤𑁂𑀲𑀢𑁄 𑀧𑀭𑀢𑁄 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀳𑀸𑀭𑀲𑀗𑁆𑀔𑁂𑀧𑁄

𑁧. 𑀬𑀸 𑀧𑀦 𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸𑀢𑀺𑀆𑀤𑀺𑀓𑀸 𑀦𑀺𑀤𑁆𑀤𑁂𑀲𑀕𑀸𑀣𑀸, 𑀢𑀸𑀲𑀼 𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸𑀢𑀺 𑀅𑀲𑁆𑀲𑀸𑀤𑁄 𑀆𑀤𑀻𑀦𑀯𑀢𑀸𑀢𑀺 𑀧𑀤𑀯𑀺𑀪𑀸𑀕𑁄. 𑀆𑀤𑀻𑀦𑀯𑀢𑀸𑀢𑀺 𑀘 𑀆𑀤𑀻𑀦𑀯𑁄 𑀏𑀯. 𑀓𑁂𑀘𑀺 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑁄’’𑀢𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀢𑀢𑁆𑀣 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀁 𑀲𑁄𑀫𑀦𑀲𑁆𑀲𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ¶ 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬; 𑀲𑀁. 𑀦𑀺. 𑁩.𑁨𑁬). 𑀬𑀣𑀸 𑀘𑁂𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀏𑀯𑀁 𑀇𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁄 𑀢𑀤𑀲𑁆𑀲𑀸𑀤𑁂𑀢𑀺 𑀢𑀁 𑀦𑀺𑀓𑀸𑀫𑁂𑀢𑀻’’𑀢𑀺 ‘‘𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁪), ‘‘𑀲𑀁𑀬𑁄𑀚𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄’’𑀢𑀺 (𑀲𑀁. 𑀦𑀺. 𑁨.𑁫𑁩) 𑀘 ¶ . 𑀅𑀲𑁆𑀲𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀅𑀲𑁆𑀲𑀸𑀤𑁄, 𑀢𑀡𑁆𑀳𑀸. 𑀢𑀡𑁆𑀳𑀸𑀬 𑀳𑀺 𑀓𑀸𑀭𑀡𑀪𑀽𑀢𑀸𑀬 𑀧𑀼𑀕𑁆𑀕𑀮𑁄 𑀲𑀼𑀔𑀫𑁆𑀧𑀺 𑀲𑀼𑀔𑀸𑀭𑀫𑁆𑀫𑀡𑀫𑁆𑀧𑀺 𑀅𑀲𑁆𑀲𑀸𑀤𑁂𑀢𑀺. 𑀬𑀣𑀸 𑀘 𑀢𑀡𑁆𑀳𑀸, 𑀏𑀯𑀁 𑀯𑀺𑀧𑀮𑁆𑀮𑀸𑀲𑀸𑀧𑀺. 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀳𑀺 𑀲𑀢𑁆𑀢𑀸 𑀅𑀦𑀺𑀝𑁆𑀞𑀫𑁆𑀧𑀺 𑀆𑀭𑀫𑁆𑀫𑀡𑀁 𑀇𑀝𑁆𑀞𑀸𑀓𑀸𑀭𑁂𑀦 𑀅𑀲𑁆𑀲𑀸𑀤𑁂𑀦𑁆𑀢𑀺, 𑀏𑀯𑀁 𑀯𑁂𑀤𑀦𑀸𑀬 𑀲𑀩𑁆𑀩𑁂𑀲𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸𑀦𑀁 𑀢𑀡𑁆𑀳𑀸𑀬 𑀯𑀺𑀧𑀮𑁆𑀮𑀸𑀲𑀸𑀦𑀜𑁆𑀘 𑀅𑀲𑁆𑀲𑀸𑀤𑀯𑀺𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 𑀧𑀦 𑀤𑀼𑀓𑁆𑀔𑀸𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀦𑀁 𑀅𑀲𑁆𑀲𑀸𑀤𑀦𑀻𑀬𑀢𑀸𑀢𑀺? 𑀯𑀺𑀧𑀮𑁆𑀮𑀸𑀲𑀢𑁄 𑀲𑀼𑀔𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄 𑀘. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀲𑀼𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀞𑀺𑀢𑀺𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸 𑀅𑀜𑁆𑀜𑀸𑀡𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀢𑀢𑁆𑀣 𑀯𑁂𑀤𑀦𑀸𑀬 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀯𑀲𑁂𑀦, 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸𑀦𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑀭𑀽𑀧𑀓𑀡𑁆𑀟𑀯𑀲𑁂𑀦, 𑀢𑀡𑁆𑀳𑀸𑀬 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀘 𑀢𑀡𑁆𑀳𑀸𑀦𑀺𑀤𑁆𑀤𑁂𑀲𑀯𑀲𑁂𑀦, 𑀯𑀺𑀧𑀮𑁆𑀮𑀸𑀲𑀸𑀦𑀁 𑀲𑀼𑀔𑀲𑀜𑁆𑀜𑀸𑀤𑀺𑀯𑀲𑁂𑀦 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀘 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀤𑀻𑀦𑀯𑁄 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀢𑀺𑀲𑁆𑀲𑁄𑀧𑀺 𑀯𑀸 𑀤𑀼𑀓𑁆𑀔𑀢𑀸. 𑀅𑀣 𑀯𑀸 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀲𑀗𑁆𑀔𑀸𑀭𑀸 𑀆𑀤𑀻𑀦𑀯𑁄. 𑀆𑀤𑀻𑀦𑀁 𑀅𑀢𑀺𑀯𑀺𑀬 𑀓𑀧𑀡𑀁 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑀺 𑀆𑀤𑀻𑀦𑀯𑁄, 𑀓𑀧𑀡𑀫𑀦𑀼𑀲𑁆𑀲𑁄, 𑀏𑀯𑀁𑀲𑀪𑀸𑀯𑀸 𑀘 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀤𑀺𑀬𑁄𑀕𑁂𑀦. 𑀬𑀢𑁄 𑀢𑀢𑁆𑀣 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀁 𑀬𑀣𑀸𑀪𑀽𑀢𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀆𑀤𑀻𑀦𑀯𑁄’’𑀢𑀺. 𑀢𑀲𑁆𑀫𑀸 𑀆𑀤𑀻𑀦𑀯𑁄 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀪𑀽𑀢𑀸𑀦𑀁 𑀚𑀸𑀢𑀺𑀬𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑀸𑀦𑀜𑁆𑀘 𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄.

𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀅𑀭𑀺𑀬𑀫𑀕𑁆𑀕𑁄. 𑀦𑀺𑀲𑁆𑀲𑀭𑀢𑀻𑀢𑀺 𑀯𑀸 𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁. 𑀉𑀪𑀬𑀫𑁆𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀏𑀓𑀲𑁂𑀲𑁂𑀦 𑀯𑀸 ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀧𑀺-𑀲𑀤𑁆𑀤𑁄 𑀧𑀼𑀭𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀜𑁆𑀘 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑀧𑀓𑁆𑀔𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀜𑁆𑀘 𑀢𑀤𑀦𑁆𑀢𑁄𑀕𑀥𑀪𑁂𑀤𑀸𑀦𑀁 𑀯𑀲𑁂𑀦 𑀦𑀺𑀲𑁆𑀲𑀭𑀡𑀁 𑀯𑀺𑀪𑀚𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀦𑀺𑀩𑁆𑀩𑀸𑀦𑀧𑀓𑁆𑀔𑁂 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀪𑀸𑀕𑁄 𑀦𑀢𑁆𑀣𑀺. 𑀧𑀭𑀺𑀬𑀸𑀬𑁂𑀦 𑀧𑀦 𑀲𑁄𑀧𑀸𑀤𑀺𑀲𑁂𑀲𑀦𑀺𑀭𑀼𑀧𑀸𑀤𑀺𑀲𑁂𑀲𑀪𑁂𑀤𑁂𑀦. 𑀬𑀢𑁄 𑀯𑀸 𑀢𑀁 𑀦𑀺𑀲𑁆𑀲𑀝𑀁, 𑀢𑁂𑀲𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁩) 𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀭𑀽𑀧𑀸𑀤𑀻𑀦𑀁 𑀙𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀢𑀁𑀢𑀁𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑀁 ¶ 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀢𑀡𑁆𑀳𑀸𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀸𑀬𑀢𑀦𑀸𑀦𑀁 𑀅𑀲𑀼𑀪𑀸𑀦𑀁 𑀓𑁂𑀲𑀸𑀤𑀻𑀦𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀆𑀓𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀮𑁄𑀓𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀓𑀸𑀫𑀪𑀯𑀸𑀤𑀻𑀦𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀪𑀯𑀸𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀆𑀭𑀼𑀧𑁆𑀧𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀭𑀡𑀪𑀸𑀯𑁂𑀦 𑀘 𑀯𑀺𑀪𑀚𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀨𑀮𑀦𑁆𑀢𑀺 𑀤𑁂𑀲𑀦𑀸𑀨𑀮𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀬𑀁 𑀤𑁂𑀲𑀦𑀸𑀬 𑀦𑀺𑀧𑁆𑀨𑀸𑀤𑀻𑀬𑀢𑀺. 𑀦𑀦𑀼 𑀘 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀦𑀺𑀧𑁆𑀨𑀸𑀤𑀻𑀬𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀫𑁂𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀜𑁆𑀘 𑀔𑁄 𑀧𑀭𑀫𑁆𑀧𑀭𑀸𑀬. 𑀇𑀥 𑀧𑀦 𑀧𑀘𑁆𑀘𑀓𑁆𑀔𑀢𑁄 𑀤𑁂𑀲𑀦𑀸𑀨𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀦 𑀲𑀼𑀢𑀫𑀬𑀜𑀸𑀡𑀁. 𑀅𑀢𑁆𑀣𑀥𑀫𑁆𑀫𑀯𑁂𑀤𑀸𑀤𑀺𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀢𑁆𑀢𑀺𑀪𑀽𑀢𑀸 𑀙𑀩𑁆𑀩𑀺𑀲𑀼𑀤𑁆𑀥𑀺𑀬𑁄. 𑀬𑀜𑁆𑀘 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑀲𑁆𑀲 𑀓𑀸𑀮𑀦𑁆𑀢𑀭𑁂 𑀢𑀤𑀥𑀺𑀕𑀫𑀓𑀸𑀭𑀡𑀪𑀽𑀢𑀁 𑀲𑀫𑁆𑀧𑀢𑁆𑀢𑀺𑀪𑀯𑀳𑁂𑀢𑀼 𑀘 𑀲𑀺𑀬𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸𑀢𑀺 (𑀲𑀼. 𑀦𑀺. 𑁧𑁧𑁨𑁫; 𑀓𑀣𑀸. 𑁨𑁨𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁪, 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮; 𑀦𑁂𑀢𑁆𑀢𑀺. 𑁫; 𑀧𑁂𑀝𑀓𑁄. 𑁨𑁨) 𑀇𑀤𑀁 𑀨𑀮’’𑀦𑁆𑀢𑀺, ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 𑀇𑀤𑀁 𑀨𑀮’’𑀦𑁆𑀢𑀺 (𑀚𑀸. 𑁧.𑁧𑁦.𑁧𑁦𑁨-𑁧𑁦𑁩; 𑁧.𑁧𑁫.𑁩𑁮𑁫) 𑀘. 𑀏𑀢𑁂𑀦 𑀦𑀬𑁂𑀦 𑀤𑁂𑀯𑁂𑀲𑀼 𑀘 𑀫𑀸𑀦𑀼𑀲𑁂𑀲𑀼 𑀘 𑀆𑀬𑀼𑀯𑀡𑁆𑀡𑀩𑀮𑀲𑀼𑀔𑀬𑀲𑀧𑀭𑀺𑀯𑀸𑀭𑀆𑀥𑀺𑀧𑀢𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑁄 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀬𑁄 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀻 𑀤𑁂𑀯𑀭𑀚𑁆𑀚𑀲𑀺𑀭𑀻 𑀘𑀢𑁆𑀢𑀸𑀭𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀲𑀻𑀮𑀲𑀫𑁆𑀧𑀤𑀸 𑀲𑀫𑀸𑀥𑀺𑀲𑀫𑁆𑀧𑀤𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀩𑁄𑀥𑀺 𑀧𑀘𑁆𑀘𑁂𑀓𑀩𑁄𑀥𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀲𑀩𑁆𑀩𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀳𑁂𑀢𑀼𑀓𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀢𑀸𑀬 𑀨𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀧𑀸𑀬𑁄𑀢𑀺 ¶ 𑀅𑀭𑀺𑀬𑀫𑀕𑁆𑀕𑀧𑀤𑀝𑁆𑀞𑀸𑀦𑀪𑀽𑀢𑀸 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸. 𑀲𑀸 𑀳𑀺 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬 𑀅𑀥𑀺𑀕𑀫𑀽𑀧𑀸𑀬𑀪𑀸𑀯𑀢𑁄 𑀧𑀭𑀫𑁆𑀧𑀭𑀸𑀬 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀘 𑀳𑁂𑀢𑀼𑀪𑀸𑀯𑀢𑁄 𑀉𑀧𑀸𑀬𑁄. 𑀬𑀸 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀨𑀮𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀧𑀝𑀺𑀧𑀢𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀉𑀧𑀸𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸. 𑀨𑀮𑀁 𑀯𑀺𑀬 𑀉𑀧𑀸𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁄𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸…𑀧𑁂… 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 (𑀥. 𑀧. 𑁨𑁭𑁯; 𑀣𑁂𑀭𑀕𑀸. 𑁬𑁭𑁮) 𑀅𑀬𑀁 𑀉𑀧𑀸𑀬𑁄’’𑀢𑀺. 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸 𑀏𑀯 𑀉𑀤𑀸𑀳𑀝𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀬𑀲𑁆𑀫𑀸 𑀧𑀦 ‘‘𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀲𑁆𑀲𑀭𑀡𑀪𑀸𑀯𑀁 𑀯𑀓𑁆𑀔𑀢𑀺. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀑𑀖𑀢𑀭𑀡𑀦𑁆𑀢𑀺.

𑀆𑀡𑀢𑁆𑀢𑀻𑀢𑀺 ¶ 𑀆𑀡𑀸𑀭𑀳𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀚𑀦𑀲𑁆𑀲 𑀳𑀺𑀢𑀲𑀺𑀤𑁆𑀥𑀺𑀬𑀸 ‘‘𑀏𑀯𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀺𑀥𑀸𑀦𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚𑀸𑀢𑀺 (𑀲𑀼. 𑀦𑀺. 𑁧𑁧𑁨𑁫; 𑀓𑀣𑀸. 𑁨𑁨𑁬; 𑀦𑁂𑀢𑁆𑀢𑀺. 𑁫; 𑀧𑁂𑀝𑀓𑁄. 𑁨𑁨; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸 𑁧𑁪𑁪, 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁮) 𑀆𑀡𑀢𑁆𑀢𑀻’’𑀢𑀺.

𑀬𑁄𑀕𑀻𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁, 𑀅𑀢𑁆𑀣𑀸𑀬𑀸𑀢𑀺 𑀯𑀘𑀦𑀲𑁂𑀲𑁄. 𑀤𑁂𑀲𑀦𑀸𑀳𑀸𑀭𑁄𑀢𑀺 𑀏𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀯𑀺𑀪𑀚𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀤𑁂𑀲𑀦𑀸𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑁂𑀢𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀅𑀦𑀯𑀲𑁂𑀲𑀸𑀦𑀁 𑀯𑀘𑀦𑀁 𑀤𑁂𑀲𑀦𑀸𑀳𑀸𑀭𑁄, 𑀉𑀤𑀸𑀳𑀼 𑀏𑀓𑀘𑁆𑀘𑀸𑀦𑀦𑁆𑀢𑀺? 𑀦𑀺𑀭𑀯𑀲𑁂𑀲𑀸𑀦𑀁𑀬𑁂𑀯. 𑀬𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺 𑀲𑀭𑀽𑀧𑀢𑁄 𑀆𑀕𑀢𑀸𑀦𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀏𑀓𑀤𑁂𑀲𑁂𑀦 𑀆𑀕𑀢𑀸𑀦𑀺, 𑀦 𑀯𑀸 𑀲𑀭𑀽𑀧𑁂𑀦. 𑀢𑀢𑁆𑀣 𑀅𑀦𑀸𑀕𑀢𑀁 𑀅𑀢𑁆𑀣𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀳𑀸𑀭𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂 𑀆𑀕𑀫𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀧𑀧𑀜𑁆𑀘𑀺𑀢𑁄.

𑁨. 𑀬𑀁 𑀧𑀼𑀘𑁆𑀙𑀺𑀢𑀦𑁆𑀢𑀺 𑀬𑀸 𑀧𑀼𑀘𑁆𑀙𑀸, 𑀯𑀺𑀘𑀺𑀬𑀫𑀸𑀦𑀸𑀢𑀺 𑀯𑀘𑀦𑀲𑁂𑀲𑁄. 𑀯𑀺𑀲𑁆𑀲𑀚𑁆𑀚𑀺𑀢𑀁 𑀅𑀦𑀼𑀕𑀻𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀸, 𑀲𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀩𑁆𑀬𑀸𑀓𑀭𑀡𑀁. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀕𑀸𑀣𑀸𑀬𑀁 𑀅𑀯𑀼𑀢𑁆𑀢𑀁 𑀧𑀤𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀸 𑀧𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸 𑀓𑀲𑁆𑀲𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺. 𑀏𑀢𑁂𑀦 𑀲𑀼𑀢𑁆𑀢𑁂 𑀆𑀕𑀢𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀘𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀸 𑀘 𑀅𑀦𑀼𑀕𑀻𑀢𑀺𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀬𑀸 𑀅𑀦𑀼 𑀧𑀘𑁆𑀙𑀸 𑀕𑀻𑀢𑀺 𑀅𑀦𑀼𑀕𑀻𑀢𑀺, 𑀲𑀗𑁆𑀕𑀳𑀕𑀸𑀣𑀸, 𑀧𑀼𑀘𑁆𑀙𑀸𑀬 𑀯𑀸 𑀅𑀦𑀼𑀭𑀽𑀧𑀸 𑀕𑀻𑀢𑀺. 𑀏𑀢𑁂𑀦 𑀧𑀼𑀩𑁆𑀩𑀸𑀧𑀭𑀁 ¶ 𑀕𑀳𑀺𑀢𑀁. 𑀩𑁆𑀬𑀸𑀓𑀭𑀡𑀲𑁆𑀲 𑀳𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑀢𑀸 𑀇𑀥 𑀧𑀼𑀩𑁆𑀩𑀸𑀧𑀭𑀁 𑀅𑀥𑀺𑀧𑁆𑀧𑁂𑀢𑀁. 𑀬𑀸 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀭𑀺𑀫𑀁 ‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀧𑀤𑀁 𑀧𑀼𑀩𑁆𑀩𑀸𑀧𑁂𑀓𑁆𑀔𑀦𑁆𑀢𑀺 𑀧𑀼𑀦 ‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀼𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂 𑀅𑀲𑁆𑀲𑀸𑀤𑀸𑀤𑀺𑀓𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀺𑀘𑀬𑀳𑀸𑀭𑀲𑁆𑀲 𑀯𑀺𑀲𑀬𑁄 𑀦𑀺𑀭𑀯𑀲𑁂𑀲𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁂 ‘‘𑀧𑀤𑀁 𑀯𑀺𑀘𑀺𑀦𑀢𑀺…𑀧𑁂… 𑀅𑀦𑀼𑀕𑀻𑀢𑀺𑀁 𑀯𑀺𑀘𑀺𑀦𑀢𑀻’’𑀢𑀺.

𑀢𑀢𑁆𑀣 𑀲𑀼𑀢𑁆𑀢𑁂 𑀲𑀩𑁆𑀩𑁂𑀲𑀁 𑀧𑀤𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀅𑀢𑁆𑀣𑀲𑁄 𑀩𑁆𑀬𑀜𑁆𑀚𑀦𑀲𑁄 𑀘 𑀯𑀺𑀘𑀬𑁄 𑀧𑀤𑀯𑀺𑀘𑀬𑁄. ‘‘𑀅𑀬𑀁 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀏𑀓𑀸𑀥𑀺𑀝𑁆𑀞𑀸𑀦𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀲𑀫𑁆𑀫𑀼𑀢𑀺𑀯𑀺𑀲𑀬𑀸 𑀧𑀭𑀫𑀢𑁆𑀣𑀯𑀺𑀲𑀬𑀸 𑀅𑀢𑀻𑀢𑀯𑀺𑀲𑀬𑀸 𑀅𑀦𑀸𑀕𑀢𑀯𑀺𑀲𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 ¶ 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁 𑀞𑀧𑀦𑀁 𑀲𑀸𑀯𑀲𑁂𑀲𑀁 𑀦𑀺𑀭𑀯𑀲𑁂𑀲𑀁 𑀲𑀉𑀢𑁆𑀢𑀭𑀁 𑀅𑀦𑀼𑀢𑁆𑀢𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄.

‘‘𑀅𑀬𑀁 𑀧𑀼𑀘𑁆𑀙𑀸 𑀇𑀫𑀺𑀦𑀸 𑀲𑀫𑁂𑀢𑀺, 𑀏𑀢𑁂𑀦 𑀦 𑀲𑀫𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀁 𑀆𑀦𑁂𑀢𑁆𑀯𑀸 𑀯𑀺𑀘𑀬𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀘 𑀯𑀺𑀘𑀬𑁄 𑀧𑀼𑀩𑁆𑀩𑀸𑀧𑀭𑀯𑀺𑀘𑀬𑁄. ‘‘𑀅𑀬𑀁 𑀅𑀦𑀼𑀕𑀻𑀢𑀺 𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀅𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀸 𑀢𑀤𑀼𑀪𑀬𑀢𑁆𑀣𑀲𑀗𑁆𑀕𑀳𑀸 𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸 𑀅𑀓𑀼𑀲𑀮𑀢𑁆𑀣𑀲𑀗𑁆𑀕𑀳𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀕𑀻𑀢𑀺𑀯𑀺𑀘𑀬𑁄. 𑀅𑀲𑁆𑀲𑀸𑀤𑀸𑀤𑀻𑀲𑀼 𑀲𑀼𑀔𑀯𑁂𑀤𑀦𑀸𑀬 ‘‘𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀢𑀡𑁆𑀳𑀸𑀬 ‘‘𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀯𑀺𑀧𑀮𑁆𑀮𑀸𑀲𑀸𑀦𑀁 ‘‘𑀯𑀺𑀧𑀭𑀻𑀢𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀯𑀲𑀺𑀝𑁆𑀞𑀸𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 ‘‘𑀬𑀣𑀸𑀲𑀓𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑁂 𑀘 𑀤𑀼𑀓𑀲𑀢𑁂 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀢𑀁𑀢𑀁𑀅𑀲𑁆𑀲𑀸𑀤𑀢𑁆𑀣𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀅𑀲𑁆𑀲𑀸𑀤𑀯𑀺𑀘𑀬𑁄.

𑀤𑀼𑀓𑁆𑀔𑀯𑁂𑀤𑀦𑀸𑀬 ‘‘𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀤𑀼𑀓𑁆𑀔𑀲𑀘𑁆𑀘𑀸𑀦𑀁 ‘‘𑀧𑀝𑀺𑀲𑀦𑁆𑀥𑀺𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸, 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀘 ‘‘𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀜𑁆𑀘 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀳𑀸𑀦𑀪𑀸𑀕𑀺𑀬𑀢𑀸𑀤𑀺𑀯𑀲𑁂𑀦 𑀆𑀤𑀻𑀦𑀯𑀯𑀼𑀢𑁆𑀢𑀺𑀬𑀸 𑀑𑀓𑀸𑀭𑀦𑀺𑀤𑁆𑀥𑀸𑀭𑀡𑁂𑀦 𑀆𑀤𑀻𑀦𑀯𑀯𑀺𑀘𑀬𑁄. 𑀦𑀺𑀲𑁆𑀲𑀭𑀡𑀧𑀤𑁂 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀕𑀫𑀦𑀢𑁄 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑀯𑀺𑀪𑀸𑀕𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀁 𑀦𑀺𑀲𑁆𑀲𑀭𑀡𑀯𑀺𑀘𑀬𑁄. 𑀨𑀮𑀸𑀤𑀻𑀦𑀁 𑀢𑀁𑀢𑀁𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀨𑀮𑀲𑁆𑀲 𑀢𑀤𑀼𑀧𑀸𑀬𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑀯𑀺𑀥𑀺𑀯𑀘𑀦𑀲𑁆𑀲 𑀘 𑀯𑀺𑀪𑀸𑀕𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀤𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑀻𑀢𑀻𑀦𑀁 𑀅𑀲𑁆𑀲𑀸𑀤𑀸𑀤𑀻𑀦𑀜𑁆𑀘 𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦𑁂𑀯 𑀯𑀺𑀘𑀬𑀮𑀓𑁆𑀔𑀡𑁄 ‘‘𑀯𑀺𑀘𑀬𑁄 𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩. 𑀲𑀩𑁆𑀩𑁂𑀲𑀦𑁆𑀢𑀺 𑀲𑁄𑀴𑀲𑀦𑁆𑀦𑀁. 𑀪𑀽𑀫𑀻𑀢𑀺 𑀩𑁆𑀬𑀜𑁆𑀚𑀦𑀁 𑀲𑀦𑁆𑀥𑀸𑀬𑀸𑀳. 𑀩𑁆𑀬𑀜𑁆𑀚𑀦𑀜𑁆𑀳𑀺 𑀫𑀽𑀮𑀧𑀤𑀸𑀦𑀺 𑀯𑀺𑀬 𑀦𑀬𑀸𑀦𑀁 𑀳𑀸𑀭𑀸𑀦𑀁 𑀪𑀽𑀫𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀢𑁂𑀲𑀁 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 𑁋 ‘‘𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑁄’’𑀢𑀺, 𑀧𑁂𑀝𑀓𑁂𑀧𑀺 𑀳𑀺 𑀯𑀼𑀢𑁆𑀢𑀁 𑁋 ‘‘𑀬𑀢𑁆𑀣 𑀘 𑀲𑀩𑁆𑀩𑁂 𑀳𑀸𑀭𑀸, 𑀲𑀫𑁆𑀧𑀢𑀫𑀸𑀦𑀸 𑀦𑀬𑀦𑁆𑀢𑀺 𑀲𑀼𑀢𑁆𑀢𑀢𑁆𑀣𑀁. 𑀩𑁆𑀬𑀜𑁆𑀚𑀦𑀯𑀺𑀥𑀺𑀧𑀼𑀣𑀼𑀢𑁆𑀢𑀸’’𑀢𑀺. 𑀕𑁄𑀘𑀭𑁄𑀢𑀺 𑀲𑀼𑀢𑁆𑀢𑀢𑁆𑀣𑁄. 𑀲𑀼𑀢𑁆𑀢𑀲𑁆𑀲 𑀳𑀺 𑀧𑀤𑀢𑁆𑀣𑀼𑀤𑁆𑀥𑀸𑀭𑀡𑀫𑀼𑀔𑁂𑀦 𑀳𑀸𑀭𑀬𑁄𑀚𑀦𑀸. 𑀢𑁂𑀲𑀁 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁. 𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸𑀢𑀺 𑀬𑀼𑀢𑁆𑀢𑀲𑁆𑀲 𑀘 𑀅𑀬𑀼𑀢𑁆𑀢𑀲𑁆𑀲 𑀘 𑀉𑀧𑀧𑀭𑀺𑀓𑁆𑀔𑀸. ‘‘𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀧𑀭𑀺𑀓𑁆𑀔𑀸’’𑀢𑀺𑀧𑀺 𑀧𑀸𑀞𑁄, 𑀬𑀼𑀢𑁆𑀢𑀺𑀅𑀬𑀼𑀢𑁆𑀢𑀻𑀦𑀁 𑀯𑀺𑀘𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀢𑁂𑀲𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀚𑀸𑀦𑀦𑀸? 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀅𑀯𑀺𑀭𑀼𑀚𑁆𑀛𑀦𑁂𑀦. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀲𑁆𑀲 𑀢𑀸𑀯 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑀢𑁆𑀣𑀯𑀸𑀘𑀓𑀪𑀸𑀯𑁄 𑀘 𑀬𑀼𑀢𑁆𑀢𑀪𑀸𑀯𑁄. 𑀅𑀢𑁆𑀣𑀲𑁆𑀲 𑀧𑀦 𑀲𑀼𑀢𑁆𑀢𑀯𑀺𑀦𑀬𑀥𑀫𑁆𑀫𑀢𑀸𑀳𑀺 𑀅𑀯𑀺𑀮𑁄𑀫𑀦𑀁 ¶ . 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀏𑀯𑀁 𑀲𑀼𑀢𑁆𑀢𑁂 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀪𑀸𑀯𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀬𑀼𑀢𑁆𑀢𑀺𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪. 𑀥𑀫𑁆𑀫𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀼𑀢𑁆𑀢𑀸𑀕𑀢𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀫𑀸𑀳. 𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀼𑀲𑀮𑀸𑀤𑀺𑀥𑀫𑁆𑀫𑀲𑁆𑀲. 𑀬𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀬𑀁 𑀓𑀸𑀭𑀡𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺 𑀲𑀼𑀢𑁆𑀢𑁂 𑀆𑀕𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀲𑀫𑁆𑀪𑀯𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀏𑀯𑀁, 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸𑀢𑀺 𑀬𑀢𑁆𑀢𑀓𑀸 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀸 𑀥𑀫𑁆𑀫𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀦𑀼𑀭𑀽𑀧𑀁 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸𑀢𑀺 𑀲𑀼𑀢𑁆𑀢𑀸𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁, 𑀢𑀲𑁆𑀲𑀧𑀺 𑀬𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀲𑀫𑁆𑀪𑀯𑀢𑁄 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄𑀢𑀺 𑀏𑀯𑀁 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀪𑀽𑀢𑀸 𑀥𑀫𑁆𑀫𑀸 𑀢𑁂𑀲𑀜𑁆𑀘 𑀧𑀤𑀝𑁆𑀞𑀸𑀦𑀪𑀽𑀢𑀸𑀢𑀺 𑀲𑀫𑁆𑀪𑀯𑀢𑁄 𑀧𑀤𑀝𑁆𑀞𑀸𑀦𑀪𑀽𑀢𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀧𑀤𑀝𑁆𑀞𑀸𑀦𑁄 𑀦𑀸𑀫 𑀳𑀸𑀭𑁄𑀢𑀺 𑀅𑀢𑁆𑀣𑁄.

𑁫. 𑀯𑀼𑀢𑁆𑀢𑀫𑁆𑀳𑀺 ¶ 𑀏𑀓𑀥𑀫𑁆𑀫𑁂𑀢𑀺 𑀓𑀼𑀲𑀮𑀸𑀤𑀻𑀲𑀼 𑀔𑀦𑁆𑀥𑀸𑀤𑀻𑀲𑀼 𑀯𑀸 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀥𑀫𑁆𑀫𑁂, 𑀲𑀼𑀢𑁆𑀢𑁂 𑀲𑀭𑀽𑀧𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀓𑀣𑀺𑀢𑁂. 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀻𑀢𑀺 𑀬𑁂 𑀓𑁂𑀘𑀺 𑀥𑀫𑁆𑀫𑀸 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁂𑀦 𑀯𑀸 𑀢𑁂𑀦 𑀥𑀫𑁆𑀫𑁂𑀦 𑀲𑀫𑀸𑀦𑀮𑀓𑁆𑀔𑀡𑀸. 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀤𑀺𑀲𑀪𑀸𑀯𑀸, 𑀔𑀦𑁆𑀥𑀸𑀤𑀺𑀲𑀪𑀸𑀯𑀸 𑀯𑀸 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀧𑀺 𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀏𑀓𑀮𑀓𑁆𑀔𑀡𑀸𑀢𑀺 𑀲𑀫𑀸𑀦𑀮𑀓𑁆𑀔𑀡𑀸 𑀯𑀼𑀢𑁆𑀢𑀸. 𑀢𑁂𑀦 𑀲𑀳𑀘𑀸𑀭𑀺𑀢𑀸 𑀲𑀫𑀸𑀦𑀓𑀺𑀘𑁆𑀘𑀢𑀸 𑀲𑀫𑀸𑀦𑀳𑁂𑀢𑀼𑀢𑀸 𑀲𑀫𑀸𑀦𑀨𑀮𑀢𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀢𑀺 𑀏𑀯𑀫𑀸𑀤𑀻𑀳𑀺 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀯𑀼𑀢𑁆𑀢𑀸𑀦𑀁 𑀯𑀺𑀬 𑀦𑀺𑀤𑁆𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸𑀢𑀺 𑀏𑀯𑀁 𑀲𑀼𑀢𑁆𑀢𑁂 𑀅𑀦𑀸𑀕𑀢𑁂𑀧𑀺 𑀥𑀫𑁆𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀆𑀕𑀢𑁂 𑀯𑀺𑀬 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀸 𑀲𑀁𑀯𑀡𑁆𑀡𑀦𑀸, 𑀲𑁄 𑀮𑀓𑁆𑀔𑀡𑁄 𑀦𑀸𑀫 𑀳𑀸𑀭𑁄𑀢𑀺 𑀅𑀢𑁆𑀣𑁄.

𑁬. 𑀦𑁂𑀭𑀼𑀢𑁆𑀢𑀦𑁆𑀢𑀺 𑀦𑀺𑀭𑀼𑀢𑁆𑀢𑀁, 𑀧𑀤𑀦𑀺𑀩𑁆𑀩𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀯𑀸 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀤𑁂𑀲𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑁂𑀦, 𑀓𑀭𑀡𑁂 𑀳𑀺 𑀏𑀢𑀁 𑀧𑀘𑁆𑀘𑀢𑁆𑀢𑀁. 𑀓𑀸𑀫𑀜𑁆𑀘 𑀲𑀩𑁆𑀩𑁂 𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑀸, 𑀅𑀬𑀁 𑀧𑀦 𑀯𑀺𑀲𑁂𑀲𑀢𑁄 𑀩𑁆𑀬𑀜𑁆𑀚𑀦𑀤𑁆𑀯𑀸𑀭𑁂𑀦𑁂𑀯 𑀅𑀢𑁆𑀣𑀧𑀭𑀺𑀬𑁂𑀲𑀦𑀸𑀢𑀺 𑀓𑀢𑁆𑀯𑀸 ‘‘𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀩𑁆𑀬𑀜𑁆𑀚𑀦𑁂𑀦 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀜𑁆𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀦𑀺𑀤𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺 𑀘 𑀕𑀯𑁂𑀲𑀺𑀢𑀩𑁆𑀩𑀸’’𑀢𑀺. 𑀅𑀣𑀸𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀤𑁂𑀲𑀦𑀸𑀦𑀺𑀤𑀸𑀦𑀦𑁆𑀢𑀺 𑀦𑀺𑀤𑀤𑀸𑀢𑀺 𑀨𑀮𑀦𑁆𑀢𑀺 𑀦𑀺𑀤𑀸𑀦𑀁, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀢𑀁 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀻𑀢𑀺 𑀧𑀼𑀩𑁆𑀩𑁂𑀦 𑀘 𑀅𑀧𑀭𑁂𑀦 𑀘 𑀅𑀦𑀼𑀲𑀦𑁆𑀥𑀺. ‘‘𑀧𑀼𑀩𑁆𑀩𑀸𑀧𑀭𑁂𑀦 𑀲𑀦𑁆𑀥𑀻’’𑀢𑀺𑀧𑀺 ¶ 𑀧𑀸𑀞𑁄, 𑀲𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂𑀦 𑀅𑀧𑀭𑀪𑀸𑀕𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀻𑀢𑀺𑀯𑀲𑁂𑀦 𑀯𑀸 𑀧𑀼𑀩𑁆𑀩𑀸𑀧𑀭𑀪𑀽𑀢𑁂𑀳𑀺 𑀲𑀼𑀢𑁆𑀢𑀦𑁆𑀢𑀭𑁂𑀳𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀁𑀲𑀦𑁆𑀤𑀦𑀁 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺. 𑀬𑀜𑁆𑀘 𑀧𑀼𑀩𑁆𑀩𑀧𑀤𑁂𑀦 𑀧𑀭𑀧𑀤𑀲𑁆𑀲 𑀲𑀫𑁆𑀩𑀦𑁆𑀥𑀦𑀁, 𑀅𑀬𑀫𑁆𑀧𑀺 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺. 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄𑀢𑀺 𑀏𑀯𑀁 𑀦𑀺𑀩𑁆𑀩𑀘𑀦𑀸𑀥𑀺𑀧𑁆𑀧𑀸𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁭. 𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂𑀢𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀓𑁂 𑀧𑀭𑀓𑁆𑀓𑀫𑀥𑀸𑀢𑀼𑀆𑀤𑀻𑀦𑀁 𑀧𑀤𑀝𑁆𑀞𑀸𑀦𑀪𑀽𑀢𑁂 𑀥𑀫𑁆𑀫𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀲𑀢𑀺. 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀢𑀲𑁆𑀲 𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀡𑁂𑀦 𑀯𑀸 𑀲𑁂𑀲𑀓𑀁 𑀧𑀫𑀸𑀤𑀸𑀤𑀻𑀦𑀁 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀧𑀤𑀝𑁆𑀞𑀸𑀦𑀪𑀽𑀢𑀁 𑀓𑁄𑀲𑀚𑁆𑀚𑀸𑀤𑀺𑀓𑀁 𑀥𑀫𑁆𑀫𑀦𑁆𑀢𑀭𑀁 𑀧𑀭𑀺𑀬𑁂𑀲𑀢𑀺 𑀧𑀜𑁆𑀜𑀸𑀬 𑀕𑀯𑁂𑀲𑀢𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀘 𑀲𑀁𑀯𑀡𑁆𑀡𑀦𑀸𑀬 𑀬𑁄𑀚𑁂𑀦𑁆𑀢𑁄 𑀤𑁂𑀲𑀦𑀁 ¶ 𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂𑀢𑀺 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀫𑀼𑀔𑁂𑀦 𑀆𑀭𑀤𑁆𑀥𑀲𑀼𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦 𑀧𑀫𑀸𑀤𑀸𑀤𑀺𑀯𑀲𑁂𑀦 𑀦𑀺𑀤𑁆𑀤𑀺𑀲𑀦𑁆𑀢𑁄 𑀤𑁂𑀲𑀦𑀁 𑀧𑀝𑀺𑀧𑀓𑁆𑀔𑀢𑁄 𑀆𑀯𑀝𑁆𑀝𑁂𑀢𑀺 𑀦𑀸𑀫. 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄𑀢𑀺 𑀤𑁂𑀲𑀦𑀸𑀬 𑀕𑀳𑀺𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀮𑀓𑁆𑀔𑀡𑁄 𑀆𑀯𑀝𑁆𑀝𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁮. 𑀥𑀫𑁆𑀫𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀁, 𑀢𑀁 𑀓𑀼𑀲𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀧𑀤𑀝𑁆𑀞𑀸𑀦𑀦𑁆𑀢𑀺 𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀉𑀢𑁆𑀢𑀭𑀺 𑀕𑀼𑀡𑀯𑀺𑀲𑁂𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀢𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀓𑀸𑀭𑀡𑀁. 𑀪𑀽𑀫𑀺𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀤𑀲𑁆𑀲𑀦𑀪𑀽𑀫𑀻𑀢𑀺 𑀏𑀯𑀫𑀸𑀤𑀺𑀓𑀁 𑀪𑀽𑀫𑀺𑀁. 𑀯𑀺𑀪𑀚𑁆𑀚𑀢𑁂𑀢𑀺 𑀯𑀺𑀪𑀸𑀕𑁂𑀦 𑀓𑀣𑁂𑀢𑀺. 𑀲𑀸𑀥𑀸𑀭𑀡𑁂𑀢𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀤𑀺𑀦𑀸𑀫𑀯𑀲𑁂𑀦 𑀯𑀸 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀸𑀤𑀺𑀯𑀢𑁆𑀣𑀼𑀯𑀲𑁂𑀦 𑀯𑀸 𑀲𑀸𑀥𑀸𑀭𑀡𑁂 𑀅𑀯𑀺𑀲𑀺𑀝𑁆𑀞𑁂 𑀲𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀲𑀸𑀥𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀦𑁂𑀬𑁆𑀬𑁄 𑀯𑀺𑀪𑀢𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀤𑀻𑀦𑀁 𑀯𑀺𑀪𑀚𑀦𑁄 𑀅𑀬𑀁 𑀳𑀸𑀭𑁄 𑀯𑀺𑀪𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀯𑁄𑀤𑀸𑀦𑀥𑀫𑁆𑀫𑁂 𑀘 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄 𑀧𑀤𑀝𑁆𑀞𑀸𑀦𑀢𑁄 𑀪𑀽𑀫𑀺𑀢𑁄 𑀘 𑀯𑀺𑀪𑀚𑀦𑀮𑀓𑁆𑀔𑀡𑁄 ‘‘𑀯𑀺𑀪𑀢𑁆𑀢𑀺𑀳𑀸𑀭𑁄’’𑀢𑀺 𑀤𑀝𑁆𑀞𑀩𑁆𑀩𑀁.

𑁯. 𑀦𑀺𑀤𑁆𑀤𑀺𑀝𑁆𑀞𑁂𑀢𑀺 𑀓𑀣𑀺𑀢𑁂 𑀲𑀼𑀢𑁆𑀢𑁂 𑀆𑀕𑀢𑁂, 𑀲𑀁𑀯𑀡𑁆𑀡𑀺𑀢𑁂 𑀯𑀸. 𑀪𑀸𑀯𑀺𑀢𑁂𑀢𑀺 𑀬𑀣𑀸 𑀉𑀧𑁆𑀧𑀦𑁆𑀦𑀲𑀤𑀺𑀲𑀸 𑀉𑀧𑁆𑀧𑀦𑁆𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀪𑀸𑀯𑀺𑀢𑀲𑀤𑀺𑀲𑁂 𑀪𑀸𑀯𑁂𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀧𑀳𑀻𑀦𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂𑀢𑀺 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀬𑁂 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀦𑀮𑀓𑁆𑀔𑀡𑁄 ‘‘𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀯𑀺𑀯𑀺𑀥𑀸𑀦𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀯𑀘𑀦𑀸𑀦𑀺 𑀯𑀺𑀯𑀘𑀦𑀸𑀦𑀺, 𑀯𑀺𑀯𑀘𑀦𑀸𑀦𑀺 𑀏𑀯 𑀯𑁂𑀯𑀘𑀦𑀸𑀦𑀺, 𑀧𑀭𑀺𑀬𑀸𑀬𑀲𑀤𑁆𑀤𑀸𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀯𑁂𑀯𑀘𑀦𑀸𑀦𑀺. 𑀩𑀳𑀽𑀦𑀻𑀢𑀺 𑀅𑀦𑁂𑀓𑀸𑀦𑀺. 𑀢𑀼-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀢𑁂𑀦 𑀩𑀳𑀽 𑀏𑀯 𑀧𑀭𑀺𑀬𑀸𑀬𑀲𑀤𑁆𑀤𑀸 𑀯𑁂𑀯𑀘𑀦𑀳𑀸𑀭𑀬𑁄𑀚𑀦𑀸𑀬𑀁 𑀓𑀣𑁂𑀢𑀩𑁆𑀩𑀸, 𑀦 𑀓𑀢𑀺𑀧𑀬𑀸𑀢𑀺 𑀤𑀲𑁆𑀲𑁂𑀢𑀺 ¶ . 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀻𑀢𑀺 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀲𑀗𑁆𑀔𑀸𑀢𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀪𑀸𑀲𑀺𑀢𑀸𑀦𑀺. 𑀏𑀢𑁆𑀣𑀸𑀧𑀺 𑀢𑀼-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄, 𑀢𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺𑀬𑁂𑀯 𑀯𑁂𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀥𑀫𑁆𑀫𑀲𑁆𑀲𑀸𑀢𑀺 𑀏𑀓𑀲𑁆𑀲 𑀧𑀤𑀢𑁆𑀣𑀲𑁆𑀲. 𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽𑀢𑀺 𑀬𑀣𑀸 ‘‘𑀲𑀧𑁆𑀧𑀺𑀲𑁆𑀲 𑀚𑀸𑀦𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀧𑁆𑀧𑀺𑀦𑀸 𑀯𑀺𑀘𑀸𑀭𑁂𑀳𑀺, 𑀲𑀧𑁆𑀧𑀺𑀁 𑀤𑁂𑀳𑀺, 𑀤𑁂𑀣𑀸’’𑀢𑀺 𑀯𑀸 𑀆𑀡𑀸𑀧𑁂𑀢𑀻𑀢𑀺 𑀅𑀢𑁆𑀣𑁄, 𑀏𑀯𑀁 𑀬𑁄 𑀲𑀼𑀢𑁆𑀢𑀓𑁄𑀯𑀺𑀤𑁄 𑀥𑀫𑁆𑀫𑀓𑀣𑀺𑀓𑁄 𑀏𑀓𑀲𑁆𑀲 ¶ 𑀅𑀢𑁆𑀣𑀲𑁆𑀲 𑀩𑀳𑀽𑀧𑀺 𑀧𑀭𑀺𑀬𑀸𑀬𑀲𑀤𑁆𑀤𑁂 𑀯𑀺𑀘𑀸𑀭𑁂𑀢𑀺 𑀯𑀺𑀪𑀸𑀯𑁂𑀢𑀺 𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄𑀢𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀺𑀬𑀸𑀬𑀲𑀤𑁆𑀤𑀬𑁄𑀚𑀦𑀸𑀮𑀓𑁆𑀔𑀡𑁄 𑀯𑁂𑀯𑀘𑀦𑀳𑀸𑀭𑁄 𑀦𑀸𑀫. 𑀢𑀲𑁆𑀫𑀸 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀅𑀦𑁂𑀓𑀧𑀭𑀺𑀬𑀸𑀬𑀲𑀤𑁆𑀤𑀬𑁄𑀚𑀦𑀸𑀮𑀓𑁆𑀔𑀡𑁄 ‘‘𑀯𑁂𑀯𑀘𑀦𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧. 𑀥𑀫𑁆𑀫𑀦𑁆𑀢𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀁. 𑀧𑀜𑁆𑀜𑀢𑁆𑀢𑀻𑀳𑀻𑀢𑀺 𑀧𑀜𑁆𑀜𑀸𑀧𑀦𑁂𑀳𑀺 𑀧𑀓𑀸𑀭𑁂𑀳𑀺 𑀜𑀸𑀧𑀦𑁂𑀳𑀺, 𑀅𑀲𑀗𑁆𑀓𑀭𑀢𑁄 𑀯𑀸 𑀞𑀧𑀦𑁂𑀳𑀺. 𑀯𑀺𑀯𑀺𑀥𑀸𑀳𑀻𑀢𑀺 𑀦𑀺𑀓𑁆𑀔𑁂𑀧𑀧𑁆𑀧𑀪𑀯𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀸𑀳𑀺. 𑀲𑁄 𑀆𑀓𑀸𑀭𑁄𑀢𑀺 𑀬𑁄 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀓𑁆𑀔𑁂𑀧𑀧𑁆𑀧𑀪𑀯𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦 𑀅𑀦𑁂𑀓𑀸𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀧𑀜𑁆𑀜𑀸𑀧𑀦𑀸𑀓𑀸𑀭𑁄. 𑀜𑁂𑀬𑁆𑀬𑁄 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀳𑀸𑀭𑁄𑀢𑀺 𑀧𑀜𑁆𑀜𑀢𑁆𑀢𑀺𑀳𑀸𑀭𑁄 𑀦𑀸𑀫𑀸𑀢𑀺 𑀜𑀸𑀢𑀩𑁆𑀩𑁄. 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑁂𑀓𑀸𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑀯𑀺𑀪𑀸𑀯𑀦𑀮𑀓𑁆𑀔𑀡𑁄 ‘‘𑀧𑀜𑁆𑀜𑀢𑁆𑀢𑀺𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁨. 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀔𑀦𑁆𑀥𑀸 𑀘. 𑀥𑀸𑀢𑀼𑀆𑀬𑀢𑀦𑀸𑀢𑀺 𑀥𑀸𑀢𑀼𑀬𑁄 𑀘 𑀆𑀬𑀢𑀦𑀸𑀦𑀺 𑀘. 𑀏𑀢𑁂𑀳𑀻𑀢𑀺 𑀬𑁄 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄 𑀬𑀸𑀦𑀺 𑀘 𑀤𑁆𑀯𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀬𑁂 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 𑀬𑀸 𑀘 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀬𑀸𑀦𑀺 𑀘 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀏𑀢𑁂𑀳𑀺 𑀲𑀼𑀢𑁆𑀢𑁂 𑀆𑀕𑀢𑀧𑀤𑀢𑁆𑀣𑀫𑀼𑀔𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁂𑀳𑀺. 𑀑𑀢𑀭𑀢𑀺 𑀬𑁄𑀢𑀺 𑀬𑁄 𑀲𑀁𑀯𑀡𑁆𑀡𑀦𑀸𑀦𑀬𑁄 𑀑𑀕𑀸𑀳𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀓𑁂 𑀅𑀦𑀼𑀧𑀯𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀑𑀢𑀭𑀡𑁄 𑀦𑀸𑀫 𑀲𑁄 𑀳𑀸𑀭𑁄𑀢𑀺 𑀬𑁄 𑀬𑀣𑀸𑀯𑀼𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀲𑁄 𑀑𑀢𑀭𑀡𑀳𑀸𑀭𑁄 𑀦𑀸𑀫. 𑀘-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀼𑀜𑁆𑀜𑀢𑀫𑀼𑀔𑀸𑀤𑀻𑀦𑀁 𑀕𑀸𑀣𑀸𑀬𑀁 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀫𑀼𑀔𑁂𑀳𑀺 𑀲𑀼𑀢𑁆𑀢𑀢𑁆𑀣𑀲𑁆𑀲 𑀑𑀢𑀭𑀡𑀮𑀓𑁆𑀔𑀡𑁄 𑀑𑀢𑀭𑀡𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀩𑁆𑀬𑀸𑀓𑀢𑁂. 𑀧𑀜𑁆𑀳𑁂𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀅𑀢𑁆𑀣𑁂. 𑀕𑀸𑀣𑀸𑀬𑀦𑁆𑀢𑀺 𑀕𑀸𑀣𑀸𑀭𑀼𑀴𑁆𑀳𑁂. 𑀇𑀤𑀜𑁆𑀘 𑀧𑀼𑀘𑁆𑀙𑀦𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀫𑀸𑀭𑀩𑁆𑀪𑀸𑀢𑀺 𑀲𑀸 𑀧𑀦 𑀕𑀸𑀣𑀸 𑀬𑀁 𑀅𑀢𑁆𑀣𑀁 𑀆𑀭𑀩𑁆𑀪 𑀅𑀥𑀺𑀓𑀺𑀘𑁆𑀘 𑀧𑀼𑀘𑁆𑀙𑀺𑀢𑀸, 𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸𑀢𑀺 𑀧𑀤𑀁 𑀲𑁄𑀥𑀺𑀢𑀁, 𑀆𑀭𑀫𑁆𑀪𑁄 𑀦 𑀲𑁄𑀥𑀺𑀢𑁄, 𑀧𑀤𑀜𑁆𑀘 𑀲𑁄𑀥𑀺𑀢𑀁 𑀆𑀭𑀫𑁆𑀪𑁄 𑀘 𑀲𑁄𑀥𑀺𑀢𑁄𑀢𑀺 𑀏𑀯𑀁 𑀧𑀤𑀸𑀤𑀻𑀦𑀁 𑀲𑁄𑀥𑀺𑀢𑀸𑀲𑁄𑀥𑀺𑀢𑀪𑀸𑀯𑀯𑀺𑀘𑀸𑀭𑁄 ¶ . 𑀳𑀸𑀭𑁄 𑀲𑁄 𑀲𑁄𑀥𑀦𑁄 𑀦𑀸𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀘𑀸𑀭𑁄 𑀲𑁄𑀥𑀦𑁄 𑀳𑀸𑀭𑁄 𑀦𑀸𑀫. 𑀏𑀯𑀁 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸𑀦𑀁 𑀲𑁄𑀥𑀦𑀮𑀓𑁆𑀔𑀡𑁄 ‘‘𑀲𑁄𑀥𑀦𑁄 𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪. 𑀏𑀓𑀢𑁆𑀢𑀢𑀸𑀬𑀸𑀢𑀺 ¶ 𑀏𑀓𑀲𑁆𑀲 𑀪𑀸𑀯𑁄 𑀏𑀓𑀢𑁆𑀢𑀁, 𑀏𑀓𑀢𑁆𑀢𑀫𑁂𑀯 𑀏𑀓𑀢𑁆𑀢𑀢𑀸, 𑀢𑀸𑀬 𑀏𑀓𑀢𑁆𑀢𑀢𑀸𑀬. 𑀏𑀓-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑀸𑀦𑀲𑀤𑁆𑀤𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀺𑀝𑁆𑀞𑀸 𑀫𑀢𑁆𑀢𑀸 𑀯𑀺𑀫𑀢𑁆𑀢𑀸, 𑀯𑀺𑀫𑀢𑁆𑀢𑀸𑀯 𑀯𑁂𑀫𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀯𑁂𑀫𑀢𑁆𑀢𑀢𑀸, 𑀢𑀸𑀬 𑀯𑁂𑀫𑀢𑁆𑀢𑀢𑀸𑀬, 𑀯𑀺𑀲𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸𑀢𑀺 𑀬𑁂 𑀥𑀫𑁆𑀫𑀸 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑁂𑀦, ‘‘𑀚𑀸𑀢𑀺 𑀚𑀭𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑁂𑀦 𑀘 𑀲𑀼𑀢𑁆𑀢𑁂 𑀤𑁂𑀲𑀺𑀢𑀸, 𑀢𑁂 ‘‘𑀓𑀺𑀫𑁂𑀢𑁆𑀣 𑀲𑀸𑀫𑀜𑁆𑀜𑀁, 𑀓𑁄 𑀯𑀸 𑀯𑀺𑀲𑁂𑀲𑁄’’𑀢𑀺 𑀏𑀯𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀺𑀓𑀧𑁆𑀧𑀦𑀯𑀲𑁂𑀦 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀲𑀸𑀫𑀜𑁆𑀜𑀯𑀺𑀲𑁂𑀲𑀓𑀧𑁆𑀧𑀦𑀸𑀬 𑀯𑁄𑀳𑀸𑀭𑀪𑀸𑀯𑁂𑀦 𑀅𑀦𑀯𑀝𑁆𑀞𑀸𑀦𑀢𑁄 𑀓𑀸𑀮𑀤𑀺𑀲𑀸𑀯𑀺𑀲𑁂𑀲𑀸𑀤𑀻𑀦𑀁 𑀯𑀺𑀬 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺𑀢𑁄 𑀘. 𑀬𑀣𑀸 𑀳𑀺 ‘‘𑀅𑀚𑁆𑀚 𑀳𑀺𑀬𑁆𑀬𑁄 𑀲𑁆𑀯𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀓𑀸𑀮𑀯𑀺𑀲𑁂𑀲𑀸 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀸 ‘‘𑀧𑀼𑀭𑀺𑀫𑀸 𑀤𑀺𑀲𑀸 𑀧𑀘𑁆𑀙𑀺𑀫𑀸 𑀤𑀺𑀲𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀤𑀺𑀲𑀸𑀯𑀺𑀲𑁂𑀲𑀸 𑀘, 𑀏𑀯𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀸𑀧𑀺. 𑀢𑀣𑀸 𑀳𑀺 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀚𑀸𑀢𑀺𑀆𑀤𑀺𑀅𑀧𑁂𑀓𑁆𑀔𑀸𑀬 𑀲𑀸𑀫𑀜𑁆𑀜𑀫𑁆𑀧𑀺 𑀲𑀫𑀸𑀦𑀁 𑀲𑀘𑁆𑀘𑀸𑀧𑁂𑀓𑁆𑀔𑀸𑀬 𑀯𑀺𑀲𑁂𑀲𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀫𑀼𑀤𑀬𑀸𑀤𑀻𑀲𑀼𑀧𑀺. 𑀏𑀲𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑁄𑀢𑀺 𑀏𑀯𑀁 𑀲𑀼𑀢𑁆𑀢𑀸𑀕𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁧𑁫. 𑀬𑁂 𑀥𑀫𑁆𑀫𑀸𑀢𑀺 𑀬𑁂 𑀅𑀯𑀺𑀚𑁆𑀚𑀸𑀤𑀺𑀓𑀸 𑀧𑀘𑁆𑀘𑀬𑀥𑀫𑁆𑀫𑀸. 𑀬𑀁 𑀥𑀫𑁆𑀫𑀦𑁆𑀢𑀺 𑀬𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀁. 𑀚𑀦𑀬𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀧𑀘𑁆𑀘𑀬𑀸𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑁂𑀦. 𑀧𑀭𑀫𑁆𑀧𑀭𑀢𑁄𑀢𑀺 𑀧𑀭𑀫𑁆𑀧𑀭𑀧𑀘𑁆𑀘𑀬𑀪𑀸𑀯𑁂𑀦, 𑀅𑀦𑀼𑀭𑀽𑀧𑀲𑀦𑁆𑀢𑀸𑀦𑀖𑀝𑀦𑀯𑀲𑁂𑀦 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑁄 𑀧𑀘𑁆𑀘𑀬𑀪𑀸𑀯𑁄. 𑀳𑁂𑀢𑀼𑀫𑀯𑀓𑀟𑁆𑀠𑀬𑀺𑀢𑁆𑀯𑀸𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀚𑀦𑀓𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀳𑁂𑀢𑀼𑀁 𑀆𑀓𑀟𑁆𑀠𑀺𑀢𑁆𑀯𑀸 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄 𑀲𑀁𑀯𑀡𑁆𑀡𑀦𑀸𑀲𑀗𑁆𑀔𑀸𑀢𑁄, 𑀏𑀲𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑁄𑀢𑀺 𑀏𑀯𑀁 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑁂 𑀳𑁂𑀢𑀼𑀧𑀘𑁆𑀘𑀬𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀮𑀓𑁆𑀔𑀡𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄𑀢𑀺 𑀅𑀢𑁆𑀣𑁄.

𑁧𑁬. 𑀬𑁂 𑀥𑀫𑁆𑀫𑀸𑀢𑀺 𑀬𑁂 𑀲𑀻𑀮𑀸𑀤𑀺𑀥𑀫𑁆𑀫𑀸. 𑀬𑀁𑀫𑀽𑀮𑀸𑀢𑀺 𑀬𑁂𑀲𑀁 𑀲𑀫𑀸𑀥𑀺𑀆𑀤𑀻𑀦𑀁 𑀫𑀽𑀮𑀪𑀽𑀢𑀸, 𑀢𑁂 𑀢𑁂𑀲𑀁 𑀲𑀫𑀸𑀥𑀺𑀆𑀤𑀻𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸𑀢𑀺 𑀬𑁂 𑀘 𑀭𑀸𑀕𑀯𑀺𑀭𑀸𑀕𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑁂𑀓𑁆𑀔𑀨𑀮𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀲𑀤𑁆𑀤𑀸 𑀅𑀦𑀸𑀕𑀸𑀫𑀺𑀨𑀮𑀢𑁆𑀣𑀢𑀸𑀬 𑀏𑀓𑀢𑁆𑀣𑀸 𑀩𑀼𑀤𑁆𑀥𑀫𑀼𑀦𑀺𑀦𑀸 𑀧𑀭𑀺𑀤𑀻𑀧𑀺𑀢𑀸, 𑀢𑁂 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀪𑀸𑀯𑁂𑀦 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀭𑁄𑀧𑀦𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑁂 𑀬𑀣𑀸𑀭𑀼𑀢𑀯𑀲𑁂𑀦 ¶ 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀕𑀬𑁆𑀳𑀫𑀸𑀦𑀲𑁆𑀲 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 ¶ 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑀯𑀺𑀪𑀸𑀯𑀦𑀫𑀼𑀔𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀓𑀣𑀦𑀁, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀘 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑁂𑀦𑀸𑀢𑀺 𑀧𑀳𑀸𑀦𑀲𑀫𑀸𑀭𑁄𑀧𑀦𑀸𑀧𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸 𑀏𑀯 𑀳𑁄𑀢𑀺. 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄𑀢𑀺 𑀏𑀲 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀪𑀸𑀯𑀦𑀸𑀧𑀳𑀸𑀦𑀲𑀫𑀸𑀭𑁄𑀧𑀦𑀯𑀺𑀘𑀸𑀭𑀡𑀮𑀓𑁆𑀔𑀡𑁄 𑀲𑀫𑀸𑀭𑁄𑀧𑀦𑁄 𑀦𑀸𑀫 𑀳𑀸𑀭𑁄𑀢𑀺 𑀅𑀢𑁆𑀣𑁄.

𑀦𑀬𑀲𑀗𑁆𑀔𑁂𑀧𑁄

𑁧𑁭. 𑀏𑀯𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑁄𑀴𑀲𑀧𑀺 𑀳𑀸𑀭𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑁂 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀡𑁆𑀳𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘𑀸𑀢𑀺 𑀲𑀼𑀢𑁆𑀢𑁂 𑀆𑀕𑀢𑀁 𑀅𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀕𑀳𑀺𑀢𑀁 𑀢𑀡𑁆𑀳𑀁 𑀅𑀯𑀺𑀚𑁆𑀚𑀜𑁆𑀘 𑀬𑁄 𑀦𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀢𑀁 𑀦𑁂𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀧𑀸𑀧𑁂𑀢𑀺 𑀲𑀁𑀓𑀺𑀮𑁂𑀲𑀯𑀲𑁂𑀦 𑀲𑀼𑀢𑁆𑀢𑀢𑁆𑀣𑀁 𑀬𑁄𑀚𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀣𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀧𑀜𑁆𑀜𑀸𑀬, 𑀬𑁄 𑀦𑁂𑀢𑀺 𑀯𑁄𑀤𑀸𑀦𑀧𑀓𑁆𑀔𑀁 𑀧𑀸𑀧𑁂𑀢𑀺, 𑀢𑀣𑀸 𑀲𑀼𑀢𑁆𑀢𑀢𑁆𑀣𑀁 𑀬𑁄𑀚𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁆𑀘𑁂𑀳𑀺 𑀬𑁄𑀚𑀬𑀺𑀢𑁆𑀯𑀸𑀢𑀺 𑀦𑀬𑀦𑁆𑀢𑁄 𑀘 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑀪𑀯𑀫𑀽𑀮𑀓𑀢𑁆𑀢𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑀘𑁆𑀘𑀁, 𑀢𑁂𑀦 𑀧𑀢𑁆𑀢𑀩𑁆𑀩𑀸 𑀅𑀲𑀗𑁆𑀔𑀢𑀥𑀸𑀢𑀼 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀏𑀯𑀁 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀅𑀬𑀁 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄𑀢𑀺 𑀬𑁄 𑀢𑀡𑁆𑀳𑀸𑀯𑀺𑀚𑁆𑀚𑀸𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀦𑀬𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀦𑀬𑀲𑁆𑀲 𑀪𑀽𑀫𑀺 𑀕𑀸𑀣𑀸𑀬𑀁 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀢𑁆𑀣𑀦𑀬𑁄 𑀲𑀁𑀯𑀡𑁆𑀡𑀦𑀸, 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀭𑀽𑀧𑁄 𑀧𑀼𑀩𑁆𑀩𑀪𑀸𑀕𑁂 𑀅𑀦𑀼𑀕𑀸𑀳𑀡𑀦𑀬𑁄 𑀅𑀢𑁆𑀣𑀦𑀬𑁄. 𑀢𑀲𑁆𑀲 𑀧𑀦 𑀬𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀯𑀲𑁂𑀦 𑀢𑀡𑁆𑀳𑀸𑀤𑀺𑀫𑀼𑀔𑁂𑀦 𑀦𑀬𑀪𑀽𑀫𑀺𑀭𑀘𑀦𑀸, 𑀢𑀢𑁆𑀣 𑀦𑀬𑀯𑁄𑀳𑀸𑀭𑁄.

𑁧𑁮. 𑀅𑀓𑀼𑀲𑀮𑁂𑀢𑀺 𑀤𑁆𑀯𑀸𑀤𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀕𑀳𑀺𑀢𑁂 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑁂 𑀥𑀫𑁆𑀫𑁂. 𑀲𑀫𑀽𑀮𑁂𑀳𑀻𑀢𑀺 𑀅𑀢𑁆𑀢𑀦𑁄 𑀫𑀽𑀮𑁂𑀳𑀺, 𑀮𑁄𑀪𑀤𑁄𑀲𑀫𑁄𑀳𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂𑀢𑀺 𑀲𑀩𑁆𑀩𑁂𑀧𑀺 𑀘𑀢𑀼𑀪𑀽𑀫𑀓𑁂 𑀓𑀼𑀲𑀮𑁂 𑀥𑀫𑁆𑀫𑁂. 𑀓𑀼𑀲𑀮𑀫𑀽𑀮𑁂𑀳𑀻𑀢𑀺 𑀓𑀼𑀲𑀮𑁂𑀳𑀺 𑀅𑀮𑁄𑀪𑀸𑀤𑀺𑀫𑀽𑀮𑁂𑀳𑀺 𑀬𑁄 𑀦𑁂𑀢𑀺. 𑀦𑀬𑀦𑁆𑀢𑁄 𑀘 𑀓𑀼𑀲𑀮𑀸𑀓𑀼𑀲𑀮𑀁 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀁 𑀦 𑀳𑁄𑀢𑀻𑀢𑀺 𑀪𑀽𑀢𑀁. 𑀧𑀝𑀖𑀝𑀸𑀤𑀬𑁄 ¶ 𑀯𑀺𑀬 𑀦 𑀲𑀫𑁆𑀫𑀼𑀢𑀺𑀲𑀘𑁆𑀘𑀫𑀢𑁆𑀢𑀦𑁆𑀢𑀺 𑀢𑀣𑀁. 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀢𑀸𑀪𑀸𑀯𑀢𑁄 𑀓𑀼𑀲𑀮𑀲𑁆𑀲 𑀘 𑀅𑀦𑀺𑀝𑁆𑀞𑀯𑀺𑀧𑀸𑀓𑀢𑀸𑀪𑀸𑀯𑀢𑁄 𑀯𑀺𑀧𑀸𑀓𑁂 𑀲𑀢𑀺 𑀅𑀯𑀺𑀲𑀁𑀯𑀸𑀤𑀓𑀢𑁆𑀢𑀸 𑀅𑀯𑀺𑀢𑀣𑀁 𑀦𑁂𑀢𑀺. 𑀏𑀯𑀫𑁂𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀧𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀲𑁂𑀲𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀅𑀓𑀼𑀲𑀮𑀫𑀽𑀮𑁂𑀳𑀺 𑀅𑀓𑀼𑀲𑀮𑀸𑀦𑀺 𑀓𑀼𑀲𑀮𑀫𑀽𑀮𑁂𑀳𑀺 𑀘 𑀓𑀼𑀲𑀮𑀸𑀦𑀺 𑀦𑀬𑀦𑁆𑀢𑁄 𑀅𑀬𑀁 𑀦𑀬𑁄 𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁 𑀦𑁂𑀢𑀺, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀸𑀤𑀻𑀦𑀺 𑀳𑀺 𑀩𑀸𑀥𑀓𑀸𑀤𑀺𑀪𑀸𑀯𑀢𑁄 ¶ 𑀅𑀜𑁆𑀜𑀣𑀸𑀪𑀸𑀯𑀸𑀪𑀸𑀯𑁂𑀦 𑀪𑀽𑀢𑀸𑀦𑀺, 𑀲𑀘𑁆𑀘𑀲𑀪𑀸𑀯𑀢𑁆𑀢𑀸 𑀢𑀣𑀸𑀦𑀺, 𑀅𑀯𑀺𑀲𑀁𑀯𑀸𑀤𑀦𑀢𑁄 𑀅𑀯𑀺𑀢𑀣𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦). 𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀽𑀢𑀺 𑀬𑁄 𑀅𑀓𑀼𑀲𑀮𑀫𑀽𑀮𑁂𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀓𑀼𑀲𑀮𑀫𑀽𑀮𑁂𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀢𑀁 𑀢𑀺𑀧𑀼𑀓𑁆𑀔𑀮𑀁 𑀦𑀬𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁯. 𑀯𑀺𑀧𑀮𑁆𑀮𑀸𑀲𑁂𑀳𑀻𑀢𑀺 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀳𑀺 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺. 𑀓𑀺𑀮𑁂𑀲𑁂𑀢𑀺 𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀺𑀩𑀸𑀥𑀺𑀬𑀦𑁆𑀢𑀻𑀢𑀺 𑀓𑀺𑀮𑁂𑀲𑀸, 𑀲𑀁𑀓𑀺𑀮𑀺𑀝𑁆𑀞𑀥𑀫𑁆𑀫𑀸, 𑀲𑀁𑀓𑀺𑀮𑁂𑀲𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀲𑀁𑀓𑀺𑀮𑁂𑀲𑁂’’𑀢𑀺𑀧𑀺 𑀧𑀞𑀦𑁆𑀢𑀺, 𑀓𑀺𑀮𑁂𑀲𑀲𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺. 𑀲𑀤𑁆𑀥𑀫𑁆𑀫𑁂𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁂, 𑀯𑁄𑀤𑀸𑀦𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀁 𑀦𑀬𑀦𑁆𑀢𑀺 𑀬𑁄 𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀓𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀯𑀲𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀏𑀢𑀁 𑀦𑀬𑀁 𑀦𑀬𑀯𑀺𑀤𑀽 𑀲𑀤𑁆𑀥𑀫𑁆𑀫𑀦𑀬𑀓𑁄𑀯𑀺𑀤𑀸, 𑀅𑀢𑁆𑀣𑀦𑀬𑀓𑀼𑀲𑀮𑀸 𑀏𑀯 𑀯𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀦𑀬𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁦. 𑀯𑁂𑀬𑁆𑀬𑀸𑀓𑀭𑀡𑁂𑀲𑀽𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀬𑁄𑀚𑀦𑀢𑁆𑀣𑀁 𑀓𑀢𑁂𑀲𑀼 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑀳𑀺𑀁 𑀢𑀳𑀺’’𑀦𑁆𑀢𑀺. 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀯𑁄𑀤𑀸𑀦𑀺𑀬𑀸 𑀲𑀁𑀓𑀺𑀮𑁂𑀲𑀺𑀓𑀸 𑀘 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀥𑀫𑁆𑀫𑀸. 𑀯𑀼𑀢𑁆𑀢𑀸𑀢𑀺 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑀺𑀢𑀸. 𑀫𑀦𑀲𑀸 𑀯𑁄𑀮𑁄𑀓𑀬𑀢𑁂𑀢𑀺 𑀢𑁂 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑁂 𑀘𑀺𑀢𑁆𑀢𑁂𑀦𑁂𑀯 ‘‘𑀅𑀬𑀁 𑀧𑀞𑀫𑀸 𑀤𑀺𑀲𑀸 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀤𑀺𑀲𑀸𑀪𑀸𑀯𑁂𑀦 𑀉𑀧𑀧𑀭𑀺𑀓𑁆𑀔𑀢𑀺, 𑀯𑀺𑀘𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀑𑀮𑁄𑀓𑀬𑀢𑁂 𑀢𑁂 𑀅𑀩𑀳𑀻’’𑀢𑀺𑀧𑀺 ¶ 𑀧𑀸𑀞𑁄. 𑀢𑀢𑁆𑀣 𑀢𑁂𑀢𑀺 𑀢𑁂 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑁂. 𑀅𑀩𑀳𑀻𑀢𑀺 𑀅𑀩𑁆𑀪𑀦𑁆𑀢𑀭𑀁, 𑀘𑀺𑀢𑁆𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀔𑀼 𑀤𑀺𑀲𑀸𑀮𑁄𑀘𑀦𑀁 𑀆𑀳𑀽𑀢𑀺 𑀑𑀮𑁄𑀓𑀬𑀢𑁂𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀑𑀮𑁄𑀓𑀦𑀁, 𑀢𑀁 𑀤𑀺𑀲𑀸𑀮𑁄𑀘𑀦𑀁 𑀦𑀸𑀫 𑀦𑀬𑀁 𑀯𑀤𑀦𑁆𑀢𑀺. 𑀔𑀼-𑀢𑀺 𑀘 𑀦𑀺𑀧𑀸𑀢𑁄 𑀅𑀯𑀥𑀸𑀭𑀡𑁂. 𑀢𑁂𑀦 𑀑𑀮𑁄𑀓𑀦𑀫𑁂𑀯 𑀅𑀬𑀁 𑀦𑀬𑁄, 𑀦 𑀓𑁄𑀘𑀺 𑀅𑀢𑁆𑀣𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺.

𑁨𑁧. 𑀑𑀮𑁄𑀓𑁂𑀢𑁆𑀯𑀸𑀢𑀺 𑀧𑀞𑀫𑀸𑀤𑀺𑀤𑀺𑀲𑀸𑀪𑀸𑀯𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀤𑀺𑀲𑀸𑀮𑁄𑀘𑀦𑁂𑀦𑀸𑀢𑀺 𑀤𑀺𑀲𑀸𑀮𑁄𑀘𑀦𑀦𑀬𑁂𑀦 𑀓𑀭𑀡𑀪𑀽𑀢𑁂𑀦. 𑀬𑁂𑀦 𑀳𑀺 𑀯𑀺𑀥𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀬𑁄𑀚𑀦𑀸𑀬 𑀤𑀺𑀲𑀸 𑀑𑀮𑁄𑀓𑀻𑀬𑀦𑁆𑀢𑀺, 𑀲𑁄 𑀯𑀺𑀥𑀺 𑀤𑀺𑀲𑀸𑀮𑁄𑀘𑀦𑀦𑁆𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀓𑁆𑀔𑀺𑀧𑀺𑀬𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸, 𑀤𑀺𑀲𑀸𑀪𑀽𑀢𑀥𑀫𑁆𑀫𑁂 𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀉𑀓𑁆𑀔𑀺𑀧𑀺𑀬 𑀬𑁄 𑀲𑀫𑀸𑀦𑁂𑀢𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀲𑁆𑀲𑀢𑁆𑀣𑁄 𑁋 ‘‘𑀬𑁄 𑀢𑁂𑀲𑀁 𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀲𑀫𑀸𑀦𑀬𑀦𑀁 𑀓𑀭𑁄𑀢𑀻’’𑀢𑀺. 𑀬𑀦𑁆𑀢𑀺 𑀯𑀸 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 ¶ . 𑀲𑀫𑀸𑀦𑁂𑀢𑀻𑀢𑀺 𑀲𑀫𑀁, 𑀲𑀫𑁆𑀫𑀸 𑀯𑀸 𑀆𑀦𑁂𑀢𑀺 𑀢𑀲𑁆𑀲 𑀢𑀲𑁆𑀲 𑀦𑀬𑀲𑁆𑀲 𑀬𑁄𑀚𑀦𑀸𑀯𑀲𑁂𑀦. 𑀓𑁂 𑀧𑀦 𑀆𑀦𑁂𑀢𑀺? 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂 𑀢𑀁𑀢𑀁𑀦𑀬𑀤𑀺𑀲𑀸𑀪𑀽𑀢𑁂. 𑀅𑀬𑀁 𑀦𑀬𑁄𑀢𑀺 𑀲𑀫𑀸𑀦𑁂𑀢𑀻𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀢𑀁𑀢𑀁𑀦𑀬𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀲𑀫𑀸𑀦𑀬𑀦𑀁, 𑀅𑀬𑀁 𑀅𑀗𑁆𑀓𑀼𑀲𑁄 𑀦𑀸𑀫 𑀦𑀬𑁄𑀢𑀺 𑀅𑀢𑁆𑀣𑁄. 𑀏𑀢𑀜𑁆𑀘 𑀤𑁆𑀯𑀬𑀁 ‘‘𑀯𑁄𑀳𑀸𑀭𑀦𑀬𑁄, 𑀓𑀫𑁆𑀫𑀦𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺.

𑁨𑁨. 𑀏𑀯𑀁 𑀳𑀸𑀭𑁂 𑀦𑀬𑁂 𑀘 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑁂𑀲𑀁 𑀬𑁄𑀚𑀦𑀓𑁆𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀁 𑀲𑁄𑀴𑀲 𑀳𑀸𑀭𑀸 ‘‘𑀬𑁄𑀚𑁂𑀢𑀩𑁆𑀩𑀸’’𑀢𑀺 𑀯𑀘𑀦𑀲𑁂𑀲𑁄. 𑀳𑀸𑀭𑀲𑀁𑀯𑀡𑁆𑀡𑀦𑀸 𑀧𑀞𑀫𑀁 𑀓𑀸𑀢𑀩𑁆𑀩𑀸 𑀩𑁆𑀬𑀜𑁆𑀚𑀦𑀧𑀭𑀺𑀬𑁂𑀝𑁆𑀞𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀲𑀮𑁄𑀘𑀦𑀢𑁄𑀢𑀺 𑀤𑀺𑀲𑀸𑀮𑁄𑀘𑀦𑁂𑀦, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀗𑁆𑀓𑀼𑀲𑁂𑀦 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀤𑁆𑀯𑀸𑀤𑀲𑀧𑀤𑀁

𑁨𑁩. 𑀇𑀤𑀸𑀦𑀺 𑀬𑁂𑀲𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀅𑀢𑁆𑀣𑀧𑀤𑀸𑀦𑀜𑁆𑀘 𑀯𑀲𑁂𑀦 𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀧𑀤𑀸𑀦𑀺 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀅𑀓𑁆𑀔𑀭𑀁 𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂 𑀯𑀡𑁆𑀡𑁄 𑀅𑀓𑁆𑀔𑀭𑀁 𑀧𑀭𑀺𑀬𑀸𑀬𑀯𑀲𑁂𑀦 𑀅𑀓𑁆𑀔𑀭𑀡𑀢𑁄 𑀅𑀲𑀜𑁆𑀘𑀭𑀡𑀢𑁄. 𑀦 𑀳𑀺 𑀯𑀡𑁆𑀡𑀲𑁆𑀲 𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀺, 𑀅𑀣 𑀯𑀡𑁆𑀡𑁄𑀢𑀺 𑀓𑁂𑀦𑀝𑁆𑀞𑁂𑀦 𑀯𑀡𑁆𑀡𑁄? 𑀅𑀢𑁆𑀣𑀲𑀁𑀯𑀡𑁆𑀡𑀦𑀝𑁆𑀞𑁂𑀦. 𑀯𑀡𑁆𑀡𑁄 𑀏𑀯 𑀳𑀺 𑀇𑀢𑁆𑀢𑀭𑀔𑀡𑀢𑀸𑀬 𑀅𑀧𑀭𑀸𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑁄 𑀧𑀤𑀸𑀤𑀺𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑁄 𑀬𑀣𑀸𑀲𑀫𑁆𑀩𑀦𑁆𑀥𑀁 𑀢𑀁 𑀢𑀁 𑀅𑀢𑁆𑀣𑀁 𑀯𑀤𑀢𑀺 ¶ . 𑀏𑀓𑀓𑁆𑀔𑀭𑀁 𑀯𑀸 𑀧𑀤𑀁 𑀅𑀓𑁆𑀔𑀭𑀁, 𑀓𑁂𑀘𑀺 𑀧𑀦 ‘‘𑀫𑀦𑀲𑀸 𑀤𑁂𑀲𑀦𑀸𑀯𑀸𑀘𑀸𑀬 𑀅𑀓𑁆𑀔𑀭𑀡𑀢𑁄 𑀅𑀓𑁆𑀔𑀭’’𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀤𑀦𑁆𑀢𑀺 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀢𑀁 𑀦𑀸𑀫𑀧𑀤𑀁 𑀆𑀔𑁆𑀬𑀸𑀢𑀧𑀤𑀁 𑀉𑀧𑀲𑀕𑁆𑀕𑀧𑀤𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 ‘‘𑀨𑀲𑁆𑀲𑁄 𑀯𑁂𑀤𑀦𑀸 𑀘𑀺𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀲𑀢𑁆𑀯𑀧𑁆𑀧𑀥𑀸𑀦𑀁 𑀦𑀸𑀫𑀧𑀤𑀁. ‘‘𑀨𑀼𑀲𑀢𑀺 𑀯𑁂𑀤𑀬𑀢𑀺 𑀯𑀺𑀚𑀸𑀦𑀸𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀓𑀺𑀭𑀺𑀬𑀸𑀧𑀥𑀸𑀦𑀁 𑀆𑀔𑁆𑀬𑀸𑀢𑀧𑀤𑀁. 𑀓𑀺𑀭𑀺𑀬𑀸𑀯𑀺𑀲𑁂𑀲𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀁 ‘‘𑀧’’ 𑀇𑀢𑀺 𑀏𑀯𑀫𑀸𑀤𑀺𑀓𑀁 𑀉𑀧𑀲𑀕𑁆𑀕𑀧𑀤𑀁. 𑀓𑀺𑀭𑀺𑀬𑀸𑀬 𑀲𑀢𑁆𑀯𑀲𑁆𑀲 𑀘 𑀲𑀭𑀽𑀧𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀳𑁂𑀢𑀼𑀪𑀽𑀢𑀁 ‘‘𑀏𑀯’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀦𑀺𑀧𑀸𑀢𑀧𑀤𑀁.

𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀧𑀤𑀸𑀪𑀺𑀳𑀺𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀧𑀤𑀲𑀫𑀼𑀤𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀤𑀫𑀢𑁆𑀢𑀲𑀯𑀦𑁂𑀧𑀺 𑀳𑀺 𑀅𑀥𑀺𑀓𑀸𑀭𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑁂𑀳𑀺 𑀧𑀤𑀦𑁆𑀢𑀭𑁂𑀳𑀺 𑀅𑀦𑀼𑀲𑀦𑁆𑀥𑀸𑀦𑀁 𑀓𑀢𑁆𑀯𑀸𑀯 𑀅𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀸𑀓𑁆𑀬𑀫𑁂𑀯 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀺. 𑀦𑀺𑀭𑀼𑀢𑁆𑀢𑀻𑀢𑀺 𑀆𑀓𑀸𑀭𑀸𑀪𑀺𑀳𑀺𑀢𑀁 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺.

𑀦𑀺𑀤𑁆𑀤𑁂𑀲𑁄𑀢𑀺 ¶ 𑀦𑀺𑀩𑁆𑀩𑀘𑀦𑀯𑀺𑀢𑁆𑀣𑀸𑀭𑁄 𑀦𑀺𑀭𑀯𑀲𑁂𑀲𑀤𑁂𑀲𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑁄. 𑀧𑀤𑁂𑀳𑀺 𑀯𑀸𑀓𑁆𑀬𑀲𑁆𑀲 𑀯𑀺𑀪𑀸𑀕𑁄 𑀆𑀓𑀸𑀭𑁄. 𑀬𑀤𑀺 𑀏𑀯𑀁 𑀧𑀤𑀢𑁄 𑀆𑀓𑀸𑀭𑀲𑁆𑀲 𑀓𑁄 𑀯𑀺𑀲𑁂𑀲𑁄𑀢𑀺? 𑀅𑀧𑀭𑀺𑀬𑁄𑀲𑀺𑀢𑁂 𑀯𑀸𑀓𑁆𑀬𑁂 𑀅𑀯𑀺𑀪𑀚𑁆𑀚𑀫𑀸𑀦𑁂 𑀯𑀸 𑀢𑀤𑀯𑀬𑀯𑁄 𑀧𑀤𑀁. 𑀉𑀘𑁆𑀘𑀸𑀭𑀡𑀯𑀲𑁂𑀦 𑀧𑀭𑀺𑀬𑁄𑀲𑀺𑀢𑁂 𑀯𑀸𑀓𑁆𑀬𑁂 𑀯𑀺𑀪𑀚𑁆𑀚𑀫𑀸𑀦𑁂 𑀯𑀸 𑀢𑀤𑀯𑀬𑀯𑁄 𑀆𑀓𑀸𑀭𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀙𑀝𑁆𑀞𑀁 𑀯𑀘𑀦𑀁 𑀙𑀝𑁆𑀞𑀯𑀘𑀦𑀁. 𑀆𑀓𑀸𑀭𑁄 𑀙𑀝𑁆𑀞𑀯𑀘𑀦𑀁 𑀏𑀢𑀲𑁆𑀲𑀸𑀢𑀺 𑀆𑀓𑀸𑀭𑀙𑀝𑁆𑀞𑀯𑀘𑀦𑀁, 𑀩𑁆𑀬𑀜𑁆𑀚𑀦𑀧𑀤𑀁. 𑀏𑀢𑁆𑀣 𑀘 𑀩𑁆𑀬𑀜𑁆𑀚𑀦𑀦𑁆𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀦𑀦𑁆𑀢𑀭𑀁 𑀯𑀢𑁆𑀢𑀩𑁆𑀩𑀁 𑀆𑀓𑀸𑀭𑀧𑀤𑀁 𑀦𑀺𑀤𑁆𑀤𑁂𑀲𑀧𑀤𑀸𑀦𑀦𑁆𑀢𑀭𑀁 𑀯𑀤𑀦𑁆𑀢𑁂𑀦 ‘‘𑀆𑀓𑀸𑀭𑀙𑀝𑁆𑀞𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀤𑀸𑀦𑀼𑀧𑀼𑀩𑁆𑀩𑀺𑀓𑀁 𑀧𑀦 𑀇𑀘𑁆𑀙𑀦𑁆𑀢𑁂𑀳𑀺 𑀢𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀦𑁆𑀢𑀭𑀫𑁂𑀯 𑀓𑀸𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸 𑀅𑀧𑀭𑀺𑀫𑀸𑀡𑀸 𑀆𑀓𑀸𑀭𑀸𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀻’’𑀢𑀺 𑀘. 𑀓𑁂𑀘𑀺 𑀧𑀦 ‘‘𑀆𑀓𑀸𑀭𑀧𑀤𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑁄 𑀘 𑀦𑀺𑀤𑁆𑀤𑁂𑀲𑁄’’𑀢𑀺 𑀧𑀞𑀦𑁆𑀢𑀺. 𑀏𑀢𑁆𑀢𑀸𑀯 𑀩𑁆𑀬𑀜𑁆𑀚𑀦𑀁 𑀲𑀩𑁆𑀩𑀦𑁆𑀢𑀺 𑀬𑀸𑀦𑀺𑀫𑀸𑀦𑀺 𑀅𑀓𑁆𑀔𑀭𑀸𑀤𑀻𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀏𑀢𑁆𑀢𑀓𑀫𑁂𑀯 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀁, 𑀏𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑁆𑀬𑀜𑁆𑀚𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁨𑁪. 𑀲𑀗𑁆𑀓𑀸𑀲𑀦𑀸𑀢𑀺 𑀲𑀁𑀔𑀺𑀢𑁆𑀢𑁂𑀦 𑀓𑀸𑀲𑀦𑀸. 𑀧𑀓𑀸𑀲𑀦𑀸𑀢𑀺 𑀧𑀞𑀫𑀁 𑀓𑀸𑀲𑀦𑀸, 𑀓𑀸𑀲𑀻𑀬𑀢𑀺 𑀤𑀻𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀳𑀺 𑀅𑀢𑁆𑀣𑀧𑀤𑀤𑁆𑀯𑀬𑁂𑀦 𑀅𑀓𑁆𑀔𑀭𑀧𑀤𑁂𑀳𑀺 𑀯𑀺𑀪𑀸𑀯𑀺𑀬𑀫𑀸𑀦𑁄 𑀅𑀢𑁆𑀣𑀸𑀓𑀸𑀭𑁄 𑀕𑀳𑀺𑀢𑁄. 𑀬𑀲𑁆𑀫𑀸 𑀅𑀓𑁆𑀔𑀭𑁂𑀳𑀺 𑀲𑀼𑀬𑁆𑀬𑀫𑀸𑀦𑁂𑀳𑀺 𑀲𑀼𑀡𑀦𑁆𑀢𑀸𑀦𑀁 𑀯𑀺𑀲𑁂𑀲𑀯𑀺𑀥𑀸𑀦𑀲𑁆𑀲 𑀓𑀢𑀢𑁆𑀢𑀸 𑀧𑀤𑀧𑀭𑀺𑀬𑁄𑀲𑀸𑀦𑁂 ¶ 𑀧𑀤𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀺 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺 𑀧𑀤𑁂𑀳𑀺 𑀧𑀓𑀸𑀲𑁂𑀢𑀻𑀢𑀺, 𑀅𑀓𑁆𑀔𑀭𑁂𑀳𑀺 𑀧𑀤𑁂𑀳𑀺 𑀘 𑀉𑀕𑁆𑀖𑀸𑀝𑁂𑀢𑀻’’𑀢𑀺 𑀘.

𑀯𑀺𑀯𑀭𑀡𑀸𑀢𑀺 𑀯𑀺𑀢𑁆𑀣𑀸𑀭𑀡𑀸. 𑀯𑀺𑀪𑀚𑀦𑀸 𑀘 𑀉𑀢𑁆𑀢𑀸𑀦𑀻𑀓𑀫𑁆𑀫𑀜𑁆𑀘 𑀧𑀜𑁆𑀜𑀢𑁆𑀢𑀺 𑀘 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀺. 𑀢𑀢𑁆𑀣 𑀯𑀺𑀪𑀚𑀦𑀸𑀢𑀺 𑀯𑀺𑀪𑀸𑀕𑀓𑀭𑀡𑀁, 𑀉𑀪𑀬𑁂𑀦𑀸𑀧𑀺 𑀦𑀺𑀤𑁆𑀤𑀺𑀲𑀦𑀫𑀸𑀳. 𑀇𑀥 𑀧𑀼𑀭𑀺𑀫𑀦𑀬𑁂𑀦𑁂𑀯 𑀩𑁆𑀬𑀜𑁆𑀚𑀦𑀸𑀓𑀸𑀭𑁂𑀳𑀺 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀅𑀢𑁆𑀣𑀸𑀓𑀸𑀭𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 𑀧𑀸𑀓𑀝𑀓𑀭𑀡𑀁. 𑀧𑀓𑀸𑀭𑁂𑀳𑀺 𑀜𑀸𑀧𑀦𑀁 𑀧𑀜𑁆𑀜𑀢𑁆𑀢𑀺. 𑀤𑁆𑀯𑀬𑁂𑀦𑀸𑀧𑀺 𑀧𑀝𑀺𑀦𑀺𑀤𑁆𑀤𑀺𑀲𑀦𑀁 𑀓𑀣𑁂𑀢𑀺. 𑀏𑀢𑁆𑀣𑀸𑀧𑀺 𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀗𑁆𑀔𑀸𑀢𑁂𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀅𑀢𑁆𑀣𑀸𑀓𑀸𑀭𑁄 𑀯𑀼𑀢𑁆𑀢𑁄, 𑀬𑁄 𑀧𑀝𑀺𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂𑀳𑀻𑀢𑀺 𑀏𑀢𑁂𑀳𑀺 𑀏𑀯 𑀲𑀗𑁆𑀓𑀸𑀲𑀦𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀤𑁂𑀲𑀦𑀸𑀢𑁆𑀣𑀲𑁆𑀲 𑀅𑀪𑀸𑀯𑀢𑁄. 𑀅𑀢𑁆𑀣𑁄𑀢𑀺 𑀲𑀼𑀢𑁆𑀢𑀢𑁆𑀣𑁄. 𑀓𑀫𑁆𑀫𑀦𑁆𑀢𑀺 𑀉𑀕𑁆𑀖𑀝𑀦𑀸𑀤𑀺𑀓𑀫𑁆𑀫𑀁. 𑀲𑀼𑀢𑁆𑀢𑀢𑁆𑀣𑁂𑀦 𑀳𑀺 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀬𑀫𑀸𑀦𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀩𑁄𑀥𑀦𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀘 𑀲𑀼𑀢𑁆𑀢𑀢𑁆𑀣𑁄 𑀲𑀗𑁆𑀓𑀸𑀲𑀦𑀸𑀤𑀺𑀆𑀓𑀸𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀣𑁄 𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺.

𑁨𑁫. 𑀢𑀻𑀡𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀢𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀯𑀳𑀺 𑀧𑀤𑁂𑀳𑀻𑀢𑀺 𑀦𑀯𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 ¶ . 𑀅𑀢𑁆𑀣𑁄 𑀲𑀫𑀸𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄 𑀲𑀫𑁆𑀫𑀸 𑀬𑀼𑀢𑁆𑀢𑁄 𑀦 𑀯𑀺𑀦𑀸 𑀯𑀢𑁆𑀢𑀢𑀺. 𑀲𑀩𑁆𑀩𑀲𑁆𑀲 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀢𑁄 𑀅𑀢𑁆𑀣𑀦𑀬𑀸𑀦𑀜𑁆𑀘 𑀘𑀢𑀼𑀲𑀘𑁆𑀘𑀬𑁄𑀚𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀲𑀩𑁆𑀩𑁄 𑀧𑀸𑀴𑀺𑀅𑀢𑁆𑀣𑁄 𑀅𑀢𑁆𑀣𑀦𑀬𑀢𑁆𑀢𑀬𑀲𑀗𑁆𑀕𑀳𑀺𑀢𑁄 𑀲𑀗𑁆𑀓𑀸𑀲𑀦𑀸𑀤𑀺𑀆𑀓𑀸𑀭𑀯𑀺𑀲𑁂𑀲𑀯𑀼𑀢𑁆𑀢𑀺 𑀘𑀸𑀢𑀺.

𑁨𑁬. 𑀇𑀤𑀸𑀦𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑁂 𑀤𑁂𑀲𑀦𑀸𑀳𑀸𑀭𑀸𑀤𑀺𑀓𑁂 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀧𑀤𑀢𑁆𑀣𑁂 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀩𑁆𑀩𑀻𑀲𑀸𑀢𑀺 𑀲𑁄𑀴𑀲 𑀳𑀸𑀭𑀸 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀤𑁆𑀯𑁂 𑀓𑀫𑁆𑀫𑀦𑀬𑀸𑀢𑀺 𑀏𑀯𑀁 𑀘𑀢𑀼𑀩𑁆𑀩𑀻𑀲. 𑀉𑀪𑀬𑀦𑁆𑀢𑀺 𑀙 𑀅𑀢𑁆𑀣𑀧𑀤𑀸𑀦𑀺 𑀢𑀬𑁄 𑀅𑀢𑁆𑀣𑀦𑀬𑀸𑀢𑀺 𑀇𑀤𑀁 𑀦𑀯𑀯𑀺𑀥𑀁 𑀬𑀣𑀸𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀻𑀲𑀯𑀺𑀥𑀜𑁆𑀘𑀸𑀢𑀺 𑀏𑀢𑀁 𑀉𑀪𑀬𑀁. 𑀲𑀗𑁆𑀓𑀮𑀬𑀺𑀢𑁆𑀯𑀸𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸. ‘‘𑀲𑀗𑁆𑀔𑁂𑀧𑀬𑀢𑁄’’𑀢𑀺𑀧𑀺 𑀧𑀸𑀞𑁄, 𑀏𑀓𑀢𑁄 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀺𑀓𑀸𑀢𑀺 𑀏𑀢𑀧𑁆𑀧𑀫𑀸𑀡𑀸, 𑀇𑀢𑁄 𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀦𑁂𑀢𑁆𑀢𑀺𑀧𑀤𑀢𑁆𑀣𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑁂𑀢𑁆𑀢𑀺𑀁𑀲𑀧𑀤𑀢𑁆𑀣𑀸𑀬 𑀦𑁂𑀢𑁆𑀢𑀺𑀬𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀧𑀭𑀺𑀬𑁂𑀲𑀦𑀸𑀬 𑀬𑁄 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺 𑀦𑀬𑁂𑀳𑀺 𑀧𑀞𑀫𑀁 𑀳𑀸𑀭𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀸𑀢𑀺 𑀳𑀸𑀭𑀦𑀬𑀸𑀦𑀁 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀤𑀲𑁆𑀲𑀺𑀢𑁄, 𑀲𑁆𑀯𑀸𑀬𑀁 𑀳𑀸𑀭𑀦𑀬𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 ¶ 𑀲𑀺𑀤𑁆𑀥𑁄. 𑀏𑀯𑀁 𑀲𑀺𑀤𑁆𑀥𑁂 𑀲𑀢𑀺 𑀅𑀬𑀁 𑀆𑀭𑀫𑁆𑀪𑁄 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀲𑀩𑁆𑀩𑁂𑀧𑀺𑀫𑁂 𑀳𑀸𑀭𑀸 𑀦𑀬𑀸 𑀘 𑀇𑀫𑀺𑀦𑀸 𑀤𑀲𑁆𑀲𑀺𑀢𑀓𑁆𑀓𑀫𑁂𑀦𑁂𑀯 𑀲𑀼𑀢𑁆𑀢𑁂𑀲𑀼 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀢𑀺.

𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁, 𑀬𑀤𑁂𑀢𑁂 𑀳𑀸𑀭𑀸 𑀦𑀬𑀸 𑀘 𑀇𑀫𑀺𑀦𑀸𑀯 𑀓𑀫𑁂𑀦 𑀤𑁂𑀲𑀺𑀢𑀸𑀢𑀺? 𑀬𑀤𑀺𑀧𑀺 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺 𑀅𑀦𑀼𑀓𑁆𑀓𑀫𑁂 𑀦𑀺𑀯𑀺𑀲𑀢𑀺, 𑀅𑀧𑀺 𑀘 𑀥𑀫𑁆𑀫𑀤𑁂𑀲𑀦𑀸𑀬 𑀦𑀺𑀲𑁆𑀲𑀬𑀨𑀮𑀢𑀤𑀼𑀧𑀸𑀬𑀲𑀭𑀻𑀭𑀪𑀽𑀢𑀸𑀦𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀯𑀺𑀪𑀸𑀯𑀦𑀲𑀪𑀸𑀯𑀢𑁆𑀢𑀸 𑀧𑀓𑀢𑀺𑀬𑀸 𑀲𑀩𑁆𑀩𑀲𑀼𑀢𑁆𑀢𑀸𑀦𑀼𑀭𑀽𑀧𑀸𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀧𑀭𑁂𑀲𑀜𑁆𑀘 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸𑀦𑀁 𑀯𑀺𑀘𑀬𑀳𑀸𑀭𑀸𑀤𑀻𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀧𑀞𑀫𑀁 𑀤𑁂𑀲𑀦𑀸𑀳𑀸𑀭𑁄 𑀤𑀲𑁆𑀲𑀺𑀢𑁄.

𑀧𑀤𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑀻𑀢𑀻𑀳𑀺 𑀲𑀤𑁆𑀥𑀺𑀁 𑀤𑁂𑀲𑀦𑀸𑀳𑀸𑀭𑀧𑀤𑀢𑁆𑀣𑀸𑀦𑀁 𑀧𑀯𑀺𑀘𑀬𑀲𑀪𑀸𑀯𑀢𑀸𑀬 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀯𑀺𑀘𑀬𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀤𑀁 𑀯𑀺𑀘𑀺𑀦𑀢𑀺…𑀧𑁂… 𑀆𑀡𑀢𑁆𑀢𑀺𑀁 𑀯𑀺𑀘𑀺𑀦𑀢𑀺 𑀅𑀦𑀼𑀕𑀻𑀢𑀺𑀁 𑀯𑀺𑀘𑀺𑀦𑀢𑀻’’𑀢𑀺.

𑀯𑀺𑀘𑀬𑁂𑀦 𑀳𑀸𑀭𑁂𑀦 𑀧𑀯𑀺𑀘𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀬𑀼𑀢𑁆𑀢𑀸𑀢𑀺 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀪𑀸𑀯𑀢𑁄 𑀯𑀺𑀘𑀬𑀸𑀦𑀦𑁆𑀢𑀭𑀁 𑀬𑀼𑀢𑁆𑀢𑀺𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀬𑀼𑀢𑁆𑀢𑀸𑀬𑀼𑀢𑁆𑀢𑀸𑀦𑀁𑀬𑁂𑀯 ¶ 𑀅𑀢𑁆𑀣𑀸𑀦𑀁 𑀉𑀧𑀧𑀢𑁆𑀢𑀺𑀅𑀦𑀼𑀭𑀽𑀧𑀁 𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀁 𑀧𑀤𑀝𑁆𑀞𑀸𑀦𑀘𑀺𑀦𑁆𑀢𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀬𑀼𑀢𑁆𑀢𑀺𑀳𑀸𑀭𑀸𑀦𑀦𑁆𑀢𑀭𑀁 𑀧𑀤𑀝𑁆𑀞𑀸𑀦𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀬𑁄 𑀓𑁄𑀘𑀺 𑀧𑀘𑁆𑀘𑀬𑁄 𑀘, 𑀲𑀩𑁆𑀩𑁄 𑀲𑁄 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀬𑀼𑀢𑁆𑀢𑀸𑀬𑀼𑀢𑁆𑀢𑀸𑀦𑀁 𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀧𑀭𑀺𑀕𑁆𑀕𑀳𑀺𑀢𑀲𑀪𑀸𑀯𑀸𑀦𑀁𑀬𑁂𑀯 𑀘 𑀥𑀫𑁆𑀫𑀸𑀦𑀁 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀏𑀓𑀮𑀓𑁆𑀔𑀡𑀢𑀸𑀬 𑀕𑀳𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀤𑀝𑁆𑀞𑀸𑀦𑀸𑀦𑀦𑁆𑀢𑀭𑀁 𑀮𑀓𑁆𑀔𑀡𑁄 𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁂 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀁 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀺𑀢𑀸𑀦𑀫𑁆𑀧𑀺 𑀥𑀫𑁆𑀫𑀸𑀦𑀁 𑀦𑀺𑀩𑁆𑀩𑀘𑀦𑀸𑀤𑀻𑀦𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀦 𑀲𑀼𑀢𑁆𑀢𑁂 𑀲𑀭𑀽𑀧𑀢𑁄 𑀆𑀕𑀢𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀮𑀓𑁆𑀔𑀡𑀸𑀦𑀦𑁆𑀢𑀭𑀁 𑀘𑀢𑀼𑀩𑁆𑀬𑀽𑀳𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀦𑀺𑀭𑀯𑀲𑁂𑀲𑀢𑁄 𑀅𑀢𑁆𑀣𑀸𑀯𑀩𑁄𑀥𑁄 𑀳𑁄𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀬𑀤𑀸 𑀳𑀺 𑀪𑀺𑀓𑁆𑀔𑀼 𑀅𑀢𑁆𑀣𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺 𑀥𑀫𑁆𑀫𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺 𑀢𑀣𑀸 𑀢𑀣𑀸 𑀦𑀁 𑀅𑀪𑀺𑀦𑀺𑀭𑁄𑀧𑁂𑀢𑀻’’𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑀓𑁆𑀔𑀢𑀺. 𑀢𑀣𑀸 ‘‘𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀻’’𑀢𑀺 𑀏𑀢𑁆𑀣 ‘‘𑀬𑁂 𑀚𑀭𑀸𑀫𑀭𑀡𑁂𑀦 𑀅𑀝𑁆𑀝𑀺𑀬𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 ¶ , 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀥𑀺𑀧𑁆𑀧𑀸𑀬𑀪𑀸𑀯𑁂𑀦 𑀯𑀓𑁆𑀔𑀢𑀺.

𑀦𑀺𑀩𑁆𑀩𑀘𑀦𑀸𑀥𑀺𑀧𑁆𑀧𑀸𑀬𑀦𑀺𑀤𑀸𑀦𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀲𑀼𑀢𑁆𑀢𑁂 𑀧𑀤𑀢𑁆𑀣𑀸𑀦𑀁 𑀲𑀼𑀢𑁆𑀢𑀦𑁆𑀢𑀭𑀲𑀁𑀲𑀦𑁆𑀤𑀦𑀲𑀗𑁆𑀔𑀸𑀢𑁂 𑀧𑀼𑀩𑁆𑀩𑀸𑀧𑀭𑀯𑀺𑀘𑀸𑀭𑁂 𑀤𑀲𑁆𑀲𑀺𑀢𑁂 𑀢𑁂𑀲𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀦𑁆𑀢𑀭𑀸𑀯𑀝𑁆𑀝𑀦𑀁 𑀲𑀼𑀔𑁂𑀦 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀘𑀢𑀼𑀩𑁆𑀬𑀽𑀳𑀸𑀦𑀦𑁆𑀢𑀭𑀁 𑀆𑀯𑀝𑁆𑀝𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀳𑀺 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺 𑀕𑀸𑀣𑀸𑀬𑀁 𑀆𑀭𑀫𑁆𑀪𑀦𑀺𑀓𑁆𑀓𑀫𑀦𑀩𑀼𑀤𑁆𑀥𑀲𑀸𑀲𑀦𑀬𑁄𑀕𑀥𑀼𑀦𑀦𑁂𑀳𑀺 𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀤𑀦𑀼𑀬𑁄𑀕𑀲𑁆𑀲 𑀫𑀽𑀮𑀁 ‘‘𑀧𑀫𑀸𑀤𑁄’’𑀢𑀺 𑀲𑀼𑀢𑁆𑀢𑀦𑁆𑀢𑀭𑁂 𑀤𑀲𑁆𑀲𑀺𑀢𑁄 𑀧𑀫𑀸𑀤𑁄 𑀆𑀯𑀝𑁆𑀝𑀺𑀢𑁄.

𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑁂 𑀦𑀺𑀬𑁄𑀚𑀺𑀢𑁂 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀲𑁂𑀦 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀢𑁄 𑀪𑀽𑀫𑀺𑀢𑁄 𑀘 𑀯𑀺𑀪𑀸𑀕𑁄 𑀲𑀓𑁆𑀓𑀸 𑀲𑀼𑀔𑁂𑀦 𑀬𑁄𑀚𑀺𑀢𑀼𑀦𑁆𑀢𑀺 𑀆𑀯𑀝𑁆𑀝𑀸𑀦𑀦𑁆𑀢𑀭𑀁 𑀯𑀺𑀪𑀢𑁆𑀢𑀺𑀳𑀸𑀭𑁄 𑀯𑀼𑀢𑁆𑀢𑁄. 𑀬𑀢𑁄 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸? 𑀤𑁆𑀯𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸, 𑀦𑀸𑀫𑀲𑀸𑀥𑀸𑀭𑀡𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀘𑀸’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑀺𑀬𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀲𑀸𑀥𑀸𑀭𑀡𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺𑀦𑀸 𑀲𑀪𑀸𑀕𑀯𑀺𑀲𑀪𑀸𑀕𑀧𑀭𑀺𑀬𑀸𑀬𑀯𑀦𑁆𑀢𑁂𑀬𑁂𑀯 𑀥𑀫𑁆𑀫𑁂 𑀯𑀺𑀪𑀚𑀺𑀲𑁆𑀲𑀢𑀺.

𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀥𑀫𑁆𑀫𑀸𑀦𑀁 ¶ 𑀲𑀧𑁆𑀧𑀝𑀺𑀪𑀸𑀕𑀸𑀪𑀸𑀯𑀢𑁄 𑀢𑁂𑀲𑀁 𑀯𑀺𑀪𑀸𑀕𑁂 𑀓𑀢𑁂 𑀲𑀼𑀢𑁆𑀢𑀸𑀕𑀢𑁂 𑀥𑀫𑁆𑀫𑁂 𑀅𑀓𑀲𑀺𑀭𑁂𑀦 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸𑀢𑀺 𑀯𑀺𑀪𑀢𑁆𑀢𑀺𑀅𑀦𑀦𑁆𑀢𑀭𑀁 𑀧𑀭𑀺𑀯𑀢𑁆𑀢𑀦𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀪𑀯𑀢𑀻’’𑀢𑀺 𑀧𑀝𑀺𑀯𑀺𑀪𑀢𑁆𑀢𑀲𑀪𑀸𑀯𑁂 𑀏𑀯 𑀥𑀫𑁆𑀫𑁂 𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑁂 𑀉𑀤𑀸𑀳𑀭𑀺𑀲𑁆𑀲𑀢𑀺.

𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀺𑀢𑀸𑀧𑀺 𑀥𑀫𑁆𑀫𑀸 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀩𑁄𑀥𑁂𑀢𑀩𑁆𑀩𑀸, 𑀦 𑀲𑀼𑀢𑁆𑀢𑁂 𑀆𑀕𑀢𑀸𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀯𑀢𑁆𑀢𑀦𑀸𑀦𑀦𑁆𑀢𑀭𑀁 𑀯𑁂𑀯𑀘𑀦𑀳𑀸𑀭𑁄 𑀯𑀼𑀢𑁆𑀢𑁄.

𑀏𑀯𑀁 𑀢𑁂 𑀥𑀫𑁆𑀫𑀸 𑀧𑀭𑀺𑀬𑀸𑀬𑀲𑀤𑁆𑀤𑀢𑁄𑀧𑀺 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑀢𑁄 𑀧𑀓𑀸𑀲𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀪𑁂𑀤𑀢𑁄 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀯𑀺𑀪𑀚𑀦𑀁 𑀲𑀼𑀔𑁂𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀯𑁂𑀯𑀘𑀦𑀳𑀸𑀭𑀸𑀦𑀦𑁆𑀢𑀭𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀭𑀺𑀬𑀸𑀬𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑀁 𑀲𑀼𑀩𑁄𑀥𑀦𑀜𑁆𑀘 𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁂 𑀯𑀓𑁆𑀔𑀢𑀺.

𑀧𑀪𑀸𑀯𑀧𑀭𑀺𑀜𑁆𑀜𑀸𑀤𑀺𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑀫𑀼𑀔𑁂𑀦 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀘𑁆𑀘𑀸𑀤𑀺𑀥𑀫𑁆𑀫𑀯𑀺𑀪𑀸𑀕𑁂 𑀓𑀢𑁂 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀫𑀼𑀔𑁂𑀦 𑀅𑀯𑀥𑀸𑀭𑀡𑀁 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀅𑀦𑀦𑁆𑀢𑀭𑀁 𑀑𑀢𑀭𑀡𑁄 𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 ‘‘𑀉𑀤𑁆𑀥𑀁 𑀅𑀥𑁄’’𑀢𑀺 𑀕𑀸𑀣𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺 𑀧𑀤𑁂𑀦 𑀅𑀲𑁂𑀓𑁆𑀔𑀁 𑀯𑀺𑀚𑁆𑀚𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 ‘‘𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀉𑀤𑀸𑀳𑀭𑀺𑀲𑁆𑀲𑀢𑀺.

𑀥𑀸𑀢𑀸𑀬𑀢𑀦𑀸𑀤𑀻𑀲𑀼 𑀑𑀢𑀸𑀭𑀺𑀢𑀸𑀦𑀁 𑀲𑀼𑀢𑁆𑀢𑁂 𑀧𑀤𑀢𑁆𑀣𑀸𑀦𑀁 𑀧𑀼𑀘𑁆𑀙𑀸𑀭𑀫𑁆𑀪𑀯𑀺𑀲𑁄𑀥𑀦𑀁 𑀲𑀓𑁆𑀓𑀸 𑀲𑀼𑀔𑁂𑀦 𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀑𑀢𑀭𑀡𑀸𑀦𑀦𑁆𑀢𑀭𑀁 𑀲𑁄𑀥𑀦𑁄 𑀳𑀸𑀭𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀬𑀢𑁆𑀣 𑀏𑀯𑀁 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄, 𑀲𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀪𑀯𑀢𑀻’’𑀢𑀺𑀆𑀤𑀺.

𑀯𑀺𑀲𑁄𑀥𑀺𑀢𑁂𑀲𑀼 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑁂𑀲𑀼 𑀢𑀢𑁆𑀣 𑀮𑀩𑁆𑀪𑀫𑀸𑀦𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀸𑀯𑁄 𑀲𑀼𑀓𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑁄𑀥𑀦𑀸𑀦𑀦𑁆𑀢𑀭𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀲𑁄𑀥𑀦𑁄 𑀳𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀩𑀳𑀽𑀧𑀓𑀸𑀭𑁄, 𑀢𑀢𑁄 𑀏𑀯 𑀳𑀺 ‘‘𑀬𑀣𑀸 𑀬𑀣𑀸 𑀯𑀸 𑀧𑀦 𑀧𑀼𑀘𑁆𑀙𑀺𑀢𑀁, 𑀢𑀣𑀸 𑀢𑀣𑀸 𑀯𑀺𑀲𑁆𑀲𑀚𑁆𑀚𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀓𑁆𑀔𑀢𑀺.

𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀽𑀢𑁂𑀲𑀼 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑁂𑀲𑀼 𑀥𑀫𑁆𑀫𑁂𑀲𑀼 𑀧𑀯𑁂𑀤𑀺𑀢𑁂𑀲𑀼 𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑀲𑁆𑀲 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀭𑀽𑀧𑀲𑁆𑀲 𑀧𑀘𑁆𑀘𑀬𑀳𑁂𑀢𑀼𑀭𑀸𑀲𑀺𑀲𑁆𑀲 𑀧𑀪𑁂𑀤𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀥𑀺𑀝𑁆𑀞𑀸𑀦𑀸𑀦𑀦𑁆𑀢𑀭𑀁 𑀧𑀭𑀺𑀓𑁆𑀔𑀸𑀭𑁄 𑀯𑀼𑀢𑁆𑀢𑁄 ¶ . 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀧𑀘𑁆𑀘𑀬𑁄. 𑀬𑀣𑀸 𑀓𑀺𑀁 𑀪𑀯𑁂, 𑀬𑀣𑀸 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀻𑀚𑀁 𑀅𑀲𑀸𑀥𑀸𑀭𑀡𑀁, 𑀧𑀣𑀯𑀻 𑀆𑀧𑁄 𑀘 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺.

𑀅𑀲𑀸𑀥𑀸𑀭𑀡𑁂 𑀲𑀸𑀥𑀸𑀭𑀡𑁂 𑀘 𑀓𑀸𑀭𑀡𑁂 𑀤𑀲𑁆𑀲𑀺𑀢𑁂 𑀢𑀲𑁆𑀲 𑀅𑀢𑁆𑀢𑀦𑁄 𑀨𑀮𑁂𑀲𑀼 𑀓𑀸𑀭𑀡𑀸𑀓𑀸𑀭𑁄 𑀢𑁂𑀲𑀁 𑀳𑁂𑀢𑀼𑀨𑀮𑀸𑀦𑀁 𑀧𑀪𑁂𑀤𑀢𑁄 𑀤𑁂𑀲𑀦𑀸𑀓𑀸𑀭𑁄 𑀪𑀸𑀯𑁂𑀢𑀩𑁆𑀩𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀧𑀳𑀸𑀦𑀸𑀦𑀺 𑀘 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸𑀦𑀺 𑀲𑀫𑁆𑀫𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀢𑀣𑀢𑁆𑀢𑀸𑀯𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀭𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄 𑀤𑀲𑁆𑀲𑀺𑀢𑁄𑀢𑀺. 𑀇𑀤𑀁 𑀳𑀸𑀭𑀸𑀦𑀁 𑀅𑀦𑀼𑀓𑁆𑀓𑀫𑀓𑀸𑀭𑀡𑀁.

𑀦𑀬𑀸𑀦𑀁 𑀧𑀦 𑀯𑁂𑀦𑁂𑀬𑁆𑀬𑀢𑁆𑀢𑀬𑀧𑁆𑀧𑀬𑁄𑀚𑀺𑀢𑀢𑁆𑀢𑀸 𑀅𑀢𑁆𑀣𑀦𑀬𑀢𑁆𑀢𑀬𑀽𑀧𑀤𑁂𑀲𑀲𑁆𑀲 𑀢𑀤𑀦𑀼𑀓𑁆𑀓𑀫𑁂𑀦𑁂𑀯 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀻𑀦𑀁 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀬𑁄 𑀳𑀺 𑀢𑀬𑁄 𑀯𑁂𑀦𑁂𑀬𑁆𑀬𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀬𑁄 𑀧𑀬𑁄𑀚𑁂𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸 𑀯𑀺𑀬 𑀬𑀣𑀸𑀓𑁆𑀓𑀫𑀁 𑀢𑁂𑀲𑀁 𑀉𑀧𑀓𑀸𑀭𑀸𑀬 ¶ 𑀲𑀯𑀁𑀢𑁆𑀢𑀦𑁆𑀢𑀻𑀢𑀺. 𑀢𑀣𑀸 𑀳𑀺 𑀦𑁂𑀲𑀁 𑀘𑀢𑁆𑀢𑀸𑀭𑁄 𑀙 𑀅𑀝𑁆𑀞 𑀘 𑀫𑀽𑀮𑀧𑀤𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀇𑀢𑀭𑀲𑁆𑀲 𑀧𑀦 𑀦𑀬𑀤𑁆𑀯𑀬𑀲𑁆𑀲 𑀅𑀢𑁆𑀣𑀦𑀬𑀢𑁆𑀢𑀬𑀲𑁆𑀲 𑀪𑀽𑀫𑀺𑀬𑀸 𑀆𑀮𑁄𑀘𑀦𑀁 𑀢𑀲𑁆𑀲 𑀢𑀢𑁆𑀣 𑀲𑀫𑀸𑀦𑀬𑀦𑀜𑁆𑀘𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀉𑀤𑁆𑀤𑁂𑀲𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀫𑀸𑀦𑁂𑀢𑀼𑀦𑁆𑀢𑀺.

𑀏𑀢𑀧𑀭𑀫𑀢𑀸 𑀘 𑀳𑀸𑀭𑀸𑀦𑀁 𑀏𑀢𑁆𑀢𑀓𑁂𑀳𑀺 𑀧𑀓𑀸𑀭𑀯𑀺𑀲𑁂𑀲𑁂𑀳𑀺 𑀅𑀢𑁆𑀣𑀦𑀬𑀢𑁆𑀢𑀬𑀲𑀳𑀺𑀢𑁂𑀳𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁄 𑀯𑁂𑀦𑁂𑀬𑁆𑀬𑀸𑀦𑀁 𑀅𑀮𑀫𑀦𑀼𑀢𑁆𑀢𑀭𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀲𑀫𑀥𑀺𑀕𑀫𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀲𑁆𑀲𑀦𑀪𑀽𑀫𑀺𑀲𑀫𑀦𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑀸 𑀳𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀤𑁂𑀲𑀦𑀸𑀢𑀺. 𑀅𑀣 𑀯𑀸 𑀏𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀲𑀩𑁆𑀩𑁂𑀲𑀁 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸𑀦𑀁 𑀏𑀢𑁆𑀢𑀸𑀯𑀢𑀸 𑀳𑀸𑀭𑀸𑀦𑀁 𑀤𑀝𑁆𑀞𑀩𑁆𑀩𑀸. 𑀬𑀢𑁆𑀢𑀓𑀸 𑀳𑀺 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸, 𑀲𑀩𑁆𑀩𑁂 𑀢𑁂 𑀦𑁂𑀢𑁆𑀢𑀺𑀉𑀧𑀤𑁂𑀲𑀸𑀬𑀢𑁆𑀢𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀢𑀣𑀸 𑀳𑀺 𑀬𑁂 𑀓𑁂𑀘𑀺 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀧𑀓𑀸𑀭𑀸 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀼𑀢𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀯𑀢𑁆𑀢𑀩𑁆𑀩𑀁, 𑀅𑀥𑀺𑀧𑁆𑀧𑀸𑀬𑁄 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀅𑀦𑁂𑀓𑀥𑀸 𑀧𑀤𑀢𑁆𑀣𑁄 𑀲𑀁𑀯𑀡𑁆𑀡𑁂𑀢𑀩𑁆𑀩𑁄, 𑀯𑀺𑀥𑀺 𑀅𑀦𑀼𑀯𑀸𑀤𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀭𑁄𑀥𑁄 𑀲𑀫𑀸𑀥𑀸𑀢𑀩𑁆𑀩𑁄, 𑀅𑀦𑀼𑀲𑀦𑁆𑀥𑀺𑀬𑀸 𑀅𑀦𑀼𑀭𑀽𑀧𑀁 𑀦𑀺𑀕𑀫𑁂𑀢𑀩𑁆𑀩𑀦𑁆𑀢𑀺. 𑀢𑀣𑀸 𑀲𑀼𑀢𑁆𑀢𑀲𑁆𑀲 𑀧𑀬𑁄𑀚𑀦𑀁 𑀧𑀺𑀡𑁆𑀟𑀢𑁆𑀣𑁄 𑀧𑀤𑀢𑁆𑀣𑁄 𑀅𑀦𑀼𑀲𑀦𑁆𑀥𑀺 𑀘𑁄𑀤𑀦𑀸 𑀧𑀭𑀺𑀳𑀸𑀭𑁄 𑀘 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀸𑀢𑀺. 𑀢𑀣𑀸 𑀉𑀧𑁄𑀕𑁆𑀖𑀸𑀝𑀧𑀤𑀯𑀺𑀕𑁆𑀕𑀳𑀧𑀤𑀢𑁆𑀣𑀘𑀸𑀮𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺.

𑀢𑀣𑀸 𑀢𑀺𑀲𑁆𑀲𑁄 𑀓𑀣𑀸 𑀏𑀓𑀦𑀸𑀴𑀺𑀓𑀸 𑀘𑀢𑀼𑀭𑀲𑁆𑀲𑀸 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸. 𑀢𑀢𑁆𑀣 𑀧𑀸𑀴𑀺𑀁 𑀯𑀢𑁆𑀯𑀸 𑀏𑀓𑁂𑀓𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀏𑀓𑀦𑀸𑀴𑀺𑀓𑀸 𑀦𑀸𑀫.

𑀧𑀝𑀺𑀧𑀓𑁆𑀔𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀧𑀓𑁆𑀔𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀲𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀧𑀓𑁆𑀔𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑀦𑀁 𑀘𑀢𑀼𑀭𑀲𑁆𑀲𑀸 𑀦𑀸𑀫.

𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀕𑀫𑀦𑀁 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀦𑀸𑀫.

𑀪𑁂𑀤𑀓𑀣𑀸𑀬 𑀢𑀢𑁆𑀯𑀓𑀣𑀸𑀬 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀘 𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀦𑁆𑀢𑀺 𑀘 𑀏𑀯𑀫𑀸𑀤𑀬𑁄. 𑀢𑁂𑀲𑀫𑁆𑀧𑀺 𑀏𑀢𑁆𑀣𑁂𑀯 𑀅𑀯𑀭𑁄𑀥𑁄, 𑀬𑀲𑁆𑀫𑀸 𑀢𑁂 𑀇𑀥 𑀓𑀢𑀺𑀧𑀬𑀳𑀸𑀭𑀲𑀗𑁆𑀕𑀳𑀺𑀢𑀸𑀢𑀺.

𑀦𑀬𑀸𑀦𑀁 𑀧𑀦 𑀬𑀲𑁆𑀫𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀬𑁄 𑀢𑀬𑁄 𑀏𑀯 𑀯𑁂𑀦𑁂𑀬𑁆𑀬𑀸 𑀲𑀘𑁆𑀘𑀸𑀪𑀺𑀲𑀫𑀬𑀪𑀸𑀕𑀺𑀦𑁄 𑀢𑀤𑀢𑁆𑀣𑀸𑀬 𑀘 𑀅𑀢𑁆𑀣𑀦𑀬𑀤𑁂𑀲𑀦𑀸, 𑀢𑀲𑁆𑀫𑀸 𑀲𑀢𑀺𑀧𑀺 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀦𑀁 ¶ 𑀬𑀣𑀸𑀯𑀼𑀢𑁆𑀢𑀫𑀽𑀮𑀧𑀤𑀪𑁂𑀤𑀢𑁄 𑀯𑀟𑁆𑀠𑁂𑀢𑁆𑀯𑀸 𑀯𑀺𑀪𑀚𑀺𑀢𑀩𑁆𑀩𑀧𑁆𑀧𑀓𑀸𑀭𑁂 𑀢𑀣𑀸 𑀫𑀽𑀮𑀧𑀤𑀸𑀦𑀺 𑀅𑀯𑀟𑁆𑀠𑁂𑀢𑁆𑀯𑀸 𑀯𑁂𑀦𑁂𑀬𑁆𑀬𑀢𑁆𑀢𑀬𑀯𑀲𑁂𑀦𑁂𑀯 𑀏𑀢𑀧𑀭𑀫𑀢𑀸 𑀯𑀼𑀢𑁆𑀢𑀸. 𑀦𑀯𑀲𑀼 𑀦𑀯𑀲𑀼 𑀏𑀯 𑀳𑀺 𑀫𑀽𑀮𑀧𑀤𑁂𑀲𑀼 𑀲𑀩𑁆𑀩𑁂𑀲𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀅𑀦𑁆𑀢𑁄𑀕𑀥𑀪𑀸𑀯𑀢𑁄 𑀦 𑀢𑀸𑀦𑀺 𑀯𑀟𑁆𑀠𑁂𑀢𑀩𑁆𑀩𑀸𑀦𑀺 𑀯𑁂𑀦𑁂𑀬𑁆𑀬𑀢𑁆𑀢𑀬𑀸𑀥𑀺𑀓𑀸𑀭𑀢𑁄 𑀦 𑀳𑀸𑀧𑁂𑀢𑀩𑁆𑀩𑀸𑀦𑀻𑀢𑀺 𑀦𑀬𑀸𑀦𑀁 𑀏𑀢𑀧𑀭𑀫𑀢𑀸 𑀤𑀝𑁆𑀞𑀩𑁆𑀩𑀸.

𑀓𑀫𑁆𑀫𑀦𑀬𑀸𑀦𑀁 𑀧𑀦 𑀆𑀮𑁄𑀘𑀦𑀲𑀫𑀸𑀦𑀬𑀦𑀢𑁄 𑀅𑀜𑁆𑀜𑀲𑁆𑀲 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀏𑀢𑀧𑀭𑀫𑀢𑀸. 𑀳𑁂𑀢𑁆𑀯𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀨𑀮𑀪𑀽𑀫𑀺𑀉𑀧𑀦𑀺𑀲𑀸𑀲𑀪𑀸𑀕𑀯𑀺𑀲𑀪𑀸𑀕𑀮𑀓𑁆𑀔𑀡𑀦𑀬𑀸𑀤𑀬𑁄 𑀧𑀭𑀺𑀕𑁆𑀕𑀳𑀺𑀢𑀸. 𑀢𑁂𑀲𑀼 𑀳𑁂𑀢𑀽𑀢𑀺 𑀓𑀸𑀭𑀡𑀁, 𑀬𑁄 𑀥𑀫𑁆𑀫𑁄𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑁄 𑀧𑀦 𑀧𑀘𑁆𑀘𑀬𑀪𑀸𑀯𑁂𑀦 𑀏𑀓𑀯𑀺𑀥𑁄. 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄𑀢𑀺 𑀤𑀼𑀯𑀺𑀥𑁄. 𑀧𑀼𑀦 𑀓𑀸𑀭𑀓𑁄 𑀜𑀸𑀧𑀓𑁄 𑀲𑀫𑁆𑀧𑀸𑀧𑀓𑁄𑀢𑀺 𑀢𑀺𑀯𑀺𑀥𑁄. 𑀳𑁂𑀢𑀼𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀼 𑀉𑀢𑁆𑀢𑀫𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀽𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀧𑀘𑁆𑀘𑀬𑀥𑀫𑁆𑀫𑁄 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀲𑀤𑁆𑀤𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀢𑀣𑀸 𑀲𑀪𑀸𑀕𑀳𑁂𑀢𑀼 𑀅𑀲𑀪𑀸𑀕𑀳𑁂𑀢𑀼 𑀅𑀚𑁆𑀛𑀢𑁆𑀢𑀺𑀓𑀳𑁂𑀢𑀼 𑀩𑀸𑀳𑀺𑀭𑀳𑁂𑀢𑀼 𑀚𑀦𑀓𑀳𑁂𑀢𑀼 𑀧𑀭𑀺𑀕𑁆𑀕𑀸𑀳𑀓𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀼 𑀅𑀲𑀸𑀥𑀸𑀭𑀡𑀳𑁂𑀢𑀼 𑀲𑀫𑀦𑀦𑁆𑀢𑀭𑀳𑁂𑀢𑀼 𑀧𑀭𑀫𑁆𑀧𑀭𑀳𑁂𑀢𑀼 𑀲𑀳𑀚𑀸𑀢𑀳𑁂𑀢𑀼 𑀅𑀲𑀳𑀚𑀸𑀢𑀳𑁂𑀢𑀼 𑀲𑀸𑀲𑀯𑀳𑁂𑀢𑀼 𑀅𑀦𑀸𑀲𑀯𑀳𑁂𑀢𑀽𑀢𑀺𑀆𑀤𑀺𑀦𑀸 𑀅𑀦𑁂𑀓𑀯𑀺𑀥𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀨𑀮𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀏𑀓𑀯𑀺𑀥𑀁. 𑀅𑀥𑀺𑀕𑀦𑁆𑀢𑀩𑁆𑀩𑀢𑁄𑀧𑀺 𑀲𑀫𑁆𑀧𑀸𑀧𑀓𑀳𑁂𑀢𑀼𑀯𑀲𑁂𑀦 𑀨𑀮𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀅𑀥𑀺𑀕𑀦𑁆𑀢𑀩𑁆𑀩𑀪𑀸𑀯𑀢𑁄 𑀤𑀼𑀯𑀺𑀥𑀁. 𑀜𑀸𑀧𑁂𑀢𑀩𑁆𑀩𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀧𑀢𑁆𑀢𑀩𑁆𑀩𑀢𑁄 𑀢𑀺𑀯𑀺𑀥𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀘𑀦𑀢𑁆𑀣𑀦𑀺𑀩𑁆𑀩𑀸𑀦𑀯𑀲𑁂𑀦 𑀧𑀜𑁆𑀘𑀯𑀺𑀥𑀁. 𑀲𑀪𑀸𑀕𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀁 𑀅𑀲𑀪𑀸𑀕𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀮𑁄𑀓𑀺𑀬𑀨𑀮𑀁 𑀤𑀼𑀯𑀺𑀥𑀁 𑀓𑀸𑀬𑀺𑀓𑀁 𑀫𑀸𑀦𑀲𑀜𑁆𑀘 ¶ . 𑀢𑀢𑁆𑀣 𑀓𑀸𑀬𑀺𑀓𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀁, 𑀅𑀯𑀲𑀺𑀝𑁆𑀞𑀁 𑀫𑀸𑀦𑀲𑀁. 𑀬𑀜𑁆𑀘 𑀢𑀸𑀬 𑀢𑀸𑀬 𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁, 𑀢𑀤𑀧𑀺 𑀨𑀮𑀦𑁆𑀢𑀺.

𑀪𑀽𑀫𑀻𑀢𑀺 𑀲𑀸𑀲𑀯𑀪𑀽𑀫𑀺 𑀅𑀦𑀸𑀲𑀯𑀪𑀽𑀫𑀺 𑀲𑀗𑁆𑀔𑀢𑀪𑀽𑀫𑀺 𑀅𑀲𑀗𑁆𑀔𑀢𑀪𑀽𑀫𑀺 𑀤𑀲𑁆𑀲𑀦𑀪𑀽𑀫𑀺 𑀪𑀸𑀯𑀦𑀸𑀪𑀽𑀫𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀲𑁂𑀓𑁆𑀔𑀪𑀽𑀫𑀺 𑀅𑀲𑁂𑀓𑁆𑀔𑀪𑀽𑀫𑀺 𑀲𑀸𑀯𑀓𑀪𑀽𑀫𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀽𑀫𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀽𑀫𑀺 𑀛𑀸𑀦𑀪𑀽𑀫𑀺 𑀅𑀲𑀫𑀸𑀳𑀺𑀢𑀪𑀽𑀫𑀺 𑀧𑀝𑀺𑀧𑀚𑁆𑀚𑀫𑀸𑀦𑀪𑀽𑀫𑀺 𑀧𑀝𑀺𑀧𑀦𑁆𑀦𑀪𑀽𑀫𑀺 𑀧𑀞𑀫𑀸𑀪𑀽𑀫𑀺 𑀬𑀸𑀯 𑀘𑀢𑀼𑀢𑁆𑀣𑀻𑀪𑀽𑀫𑀺 𑀓𑀸𑀫𑀸𑀯𑀘𑀭𑀪𑀽𑀫𑀺 𑀬𑀸𑀯 𑀮𑁄𑀓𑀼𑀢𑁆𑀢𑀭𑀪𑀽𑀫𑀻𑀢𑀺 𑀩𑀳𑀼𑀯𑀺𑀥𑀸. 𑀢𑀢𑁆𑀣 𑀲𑀸𑀲𑀯𑀪𑀽𑀫𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸 𑀥𑀫𑁆𑀫𑀸. 𑀅𑀦𑀸𑀲𑀯𑀪𑀽𑀫𑀺 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸. 𑀲𑀗𑁆𑀔𑀢𑀪𑀽𑀫𑀺 𑀦𑀺𑀩𑁆𑀩𑀸𑀦𑀯𑀚𑁆𑀚𑀸 𑀲𑀩𑁆𑀩𑁂 𑀲𑀪𑀸𑀯𑀥𑀫𑁆𑀫𑀸. 𑀅𑀲𑀗𑁆𑀔𑀢𑀪𑀽𑀫𑀺 𑀅𑀧𑁆𑀧𑀘𑁆𑀘𑀬𑀸 ¶ 𑀥𑀫𑁆𑀫𑀸. 𑀤𑀲𑁆𑀲𑀦𑀪𑀽𑀫𑀺 𑀧𑀞𑀫𑀫𑀕𑁆𑀕𑀨𑀮𑀥𑀫𑁆𑀫𑀸. 𑀪𑀸𑀯𑀦𑀸𑀪𑀽𑀫𑀺 𑀅𑀯𑀲𑀺𑀝𑁆𑀞𑀫𑀕𑁆𑀕𑀨𑀮𑀥𑀫𑁆𑀫𑀸. 𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀳𑀻𑀦𑀫𑀚𑁆𑀛𑀺𑀫𑀸 𑀥𑀫𑁆𑀫𑀸. 𑀲𑁂𑀓𑁆𑀔𑀪𑀽𑀫𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀳𑁂𑀝𑁆𑀞𑀺𑀫𑀸 𑀘 𑀢𑀬𑁄 𑀨𑀮𑀥𑀫𑁆𑀫𑀸. 𑀅𑀲𑁂𑀓𑁆𑀔𑀪𑀽𑀫𑀺 𑀅𑀕𑁆𑀕𑀨𑀮𑀥𑀫𑁆𑀫𑀸. 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀥𑀫𑁆𑀫𑀸 𑀲𑀸𑀯𑀓𑀸𑀤𑀺𑀪𑀽𑀫𑀺𑀬𑁄. 𑀛𑀸𑀦𑀪𑀽𑀫𑀺 𑀛𑀸𑀦𑀥𑀫𑁆𑀫𑀸. 𑀅𑀲𑀫𑀸𑀳𑀺𑀢𑀪𑀽𑀫𑀺 𑀛𑀸𑀦𑀯𑀚𑁆𑀚𑀺𑀢𑀸 𑀥𑀫𑁆𑀫𑀸. 𑀧𑀝𑀺𑀧𑀚𑁆𑀚𑀫𑀸𑀦𑀪𑀽𑀫𑀺 𑀫𑀕𑁆𑀕𑀥𑀫𑁆𑀫𑀸. 𑀧𑀝𑀺𑀧𑀦𑁆𑀦𑀪𑀽𑀫𑀺 𑀨𑀮𑀥𑀫𑁆𑀫𑀸. 𑀧𑀞𑀫𑀸𑀤𑀺𑀪𑀽𑀫𑀺𑀬𑁄 𑀲𑀳 𑀨𑀮𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 ‘‘𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄. 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀬𑁄 𑀓𑀸𑀫𑀸𑀯𑀘𑀭𑀸𑀤𑀺𑀥𑀫𑁆𑀫𑀸. 𑀬𑁂 𑀘 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀳𑀸𑀭𑀦𑀬𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀲𑀼𑀢𑁆𑀢𑁂𑀲𑀼 𑀦𑀺𑀤𑁆𑀥𑀸𑀭𑀻𑀬𑀦𑁆𑀢𑀺, 𑀢𑁂𑀧𑀺 𑀪𑀽𑀫𑀺𑀬𑁄𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀸.

𑀉𑀧𑀦𑀺𑀲𑀸𑀢𑀺 𑀩𑀮𑀯𑀓𑀸𑀭𑀡𑀁, 𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀲𑀦𑁆𑀥𑀸𑀬 𑀲𑀼𑀢𑁆𑀢𑁂 ‘‘𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸 𑀲𑀤𑁆𑀥𑀽𑀧𑀦𑀺𑀲𑀁 ‘𑀲𑀻𑀮’𑀦𑁆𑀢𑀺 𑀬𑀸𑀯 𑀯𑀺𑀫𑀼𑀢𑁆𑀢𑀽𑀧𑀦𑀺𑀲𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑀺 𑀘 𑀉𑀧𑀦𑀺𑀲𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀺𑀤𑁆𑀥𑀦𑁆𑀢𑁂 𑀳𑀤𑀬𑀪𑀽𑀢𑀁 𑀅𑀩𑁆𑀪𑀦𑁆𑀢𑀭𑀁 𑀯𑀼𑀘𑁆𑀘𑀢𑀺. 𑀇𑀥𑀸𑀧𑀺 𑀦𑁂𑀢𑁆𑀢𑀺𑀳𑀤𑀬𑀁, 𑀬𑀁 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀥𑀫𑁆𑀫𑀓𑀣𑀺𑀓𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀫𑀼𑀔𑁂𑀦 𑀲𑀩𑁆𑀩𑀳𑀸𑀭𑀦𑀬𑀬𑁄𑀚𑀦𑀸𑀬 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀓𑀺𑀁 𑀧𑀦𑁂𑀢𑀁 𑀦𑁂𑀢𑁆𑀢𑀺𑀳𑀤𑀬𑀁? 𑀬𑀤𑀺𑀤𑀁 𑀏𑀢𑀲𑁆𑀲𑁂𑀯 𑀢𑁂𑀢𑁆𑀢𑀺𑀁𑀲𑀯𑀺𑀥𑀲𑁆𑀲 𑀧𑀓𑀭𑀡𑀧𑀤𑀢𑁆𑀣𑀲𑁄𑀴𑀲𑀲𑁆𑀲 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀲𑀳𑀺𑀢𑀲𑁆𑀲 𑀯𑀺𑀲𑀬𑁄 𑀲𑀳 𑀦𑀺𑀫𑀺𑀢𑁆𑀢𑀯𑀺𑀪𑀸𑀕𑁂𑀦 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀺𑀢𑁄.

𑀲𑁂𑀬𑁆𑀬𑀣𑀺𑀤𑀁 𑁋 𑀤𑁂𑀲𑀦𑀸𑀳𑀸𑀭𑀲𑁆𑀲 𑀅𑀲𑁆𑀲𑀸𑀤𑀸𑀤𑀬𑁄 𑀯𑀺𑀲𑀬𑁄, 𑀢𑀲𑁆𑀲 𑀅𑀲𑁆𑀲𑀸𑀤𑀸𑀤𑀺𑀯𑀺𑀪𑀸𑀯𑀦𑀮𑀓𑁆𑀔𑀡𑀢𑁆𑀢𑀸. 𑀢𑀲𑁆𑀲 𑀅𑀲𑁆𑀲𑀸𑀤𑁄 𑀲𑀼𑀔𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑁄, 𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀺, 𑀅𑀬𑀜𑁆𑀘 𑀅𑀢𑁆𑀣𑁄 𑀤𑁂𑀲𑀦𑀸𑀳𑀸𑀭𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀧𑀓𑀸𑀲𑀺𑀢𑁄 𑀏𑀯. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀺𑀲𑀬𑁄 𑀆𑀯𑀝𑁆𑀝𑀳𑀸𑀭𑁄, 𑀢𑀤𑀼𑀪𑀬𑀆𑀯𑀝𑁆𑀝𑀦𑀮𑀓𑁆𑀔𑀡𑀢𑁆𑀢𑀸. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀯𑀺𑀲𑀬𑁄 ¶ 𑀧𑀭𑀺𑀯𑀢𑁆𑀢𑀦𑀳𑀸𑀭𑁄, 𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑀭𑀺𑀯𑀢𑁆𑀢𑀦𑀮𑀓𑁆𑀔𑀡𑀢𑁆𑀢𑀸. 𑀧𑀤𑀝𑁆𑀞𑀸𑀦𑀧𑀭𑀺𑀓𑁆𑀔𑀸𑀭𑁂𑀲𑀼 𑀆𑀲𑀦𑁆𑀦𑀓𑀸𑀭𑀡𑀁 𑀉𑀧𑀦𑀺𑀲𑁆𑀲𑀬𑀓𑀸𑀭𑀡𑀜𑁆𑀘 𑀧𑀤𑀝𑁆𑀞𑀸𑀦𑀁, 𑀳𑁂𑀢𑀼 𑀧𑀭𑀺𑀓𑁆𑀔𑀸𑀭𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸 𑀘 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀓𑀽𑀮𑀧𑀝𑀺𑀓𑀽𑀮𑀥𑀫𑁆𑀫𑀸 𑀬𑀣𑀸𑀓𑁆𑀓𑀫𑀁 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀪𑀸𑀕𑁄, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀯𑀺𑀲𑀪𑀸𑀕𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀮𑀓𑁆𑀔𑀡𑀦𑁆𑀢𑀺 ¶ 𑀲𑀪𑀸𑀯𑁄. 𑀲𑁄 𑀳𑀸𑀭𑀦𑀬𑀸𑀦𑀁 𑀦𑀺𑀤𑁆𑀤𑁂𑀲𑁂 𑀯𑀺𑀪𑀸𑀯𑀺𑀢𑁄 𑀏𑀯.

𑀬𑀁 𑀧𑀦𑁂𑀢𑀁 𑀳𑁂𑀢𑀼𑀆𑀤𑀺𑀯𑀺𑀲𑁂𑀲𑀯𑀺𑀦𑀺𑀫𑀼𑀢𑁆𑀢𑀁 𑀳𑀸𑀭𑀦𑀬𑀸𑀦𑀁 𑀬𑁄𑀚𑀦𑀸𑀦𑀺𑀩𑀦𑁆𑀥𑀦𑀁, 𑀲𑁄 𑀦𑀬𑁄. 𑀬𑀣𑀸𑀳 𑁋 𑀮𑀓𑁆𑀔𑀡𑀳𑀸𑀭𑁂 ‘‘𑀏𑀯𑀁 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑀺𑀘𑁆𑀘𑀢𑁄 𑀘 𑀮𑀓𑁆𑀔𑀡𑀢𑁄 𑀘 𑀲𑀸𑀫𑀜𑁆𑀜𑀢𑁄 𑀘𑀸’’𑀢𑀺𑀆𑀤𑀺. 𑀢𑀣𑀸 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀢𑀣𑀸 𑀲𑁄𑀥𑀦𑀳𑀸𑀭𑀸𑀤𑀻𑀲𑀼 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄 𑀳𑁄𑀢𑀺, 𑀲𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀪𑀯𑀢𑀻𑀢𑀺 𑀏𑀯𑀫𑀸𑀤𑀺. 𑀏𑀓𑀢𑁆𑀢𑀸𑀤𑀬𑁄𑀧𑀺 𑀦𑀬𑀸 𑀇𑀥 𑀦𑀬𑁄𑀢𑀺 𑀕𑀳𑁂𑀢𑀩𑁆𑀩𑀸.

𑀏𑀯𑀁 𑀳𑁂𑀢𑀼𑀨𑀮𑀸𑀤𑀻𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 𑀦𑁂𑀲𑀁 𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀮𑀩𑁆𑀪𑀫𑀸𑀦𑀧𑀤𑀢𑁆𑀣𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀬𑀣𑀸𑀮𑀓𑁆𑀔𑀡𑀁 𑀏𑀢𑁂 𑀳𑀸𑀭𑀸 𑀦𑀬𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦 𑀧𑀤𑀝𑁆𑀞𑀸𑀦𑀧𑀭𑀺𑀓𑁆𑀔𑀸𑀭𑀸 𑀳𑁂𑀢𑀼𑀯𑀲𑁂𑀦. 𑀤𑁂𑀲𑀦𑀸𑀯𑀺𑀘𑀬𑀘𑀢𑀼𑀩𑁆𑀬𑀽𑀳𑀲𑀫𑀸𑀭𑁄𑀧𑀦𑀸 𑀳𑁂𑀢𑀼𑀨𑀮𑀯𑀲𑁂𑀦. 𑀢𑀣𑀸 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺𑀑𑀢𑀭𑀡𑀲𑁄𑀥𑀦𑀸 𑀨𑀮𑀯𑀲𑁂𑀦𑁂𑀯𑀸𑀢𑀺 𑀓𑁂𑀘𑀺. 𑀯𑀺𑀪𑀢𑁆𑀢𑀺 𑀳𑁂𑀢𑀼𑀪𑀽𑀫𑀺𑀯𑀲𑁂𑀦. 𑀧𑀭𑀺𑀯𑀢𑁆𑀢𑁄 𑀯𑀺𑀲𑀪𑀸𑀕𑀯𑀲𑁂𑀦. 𑀆𑀯𑀝𑁆𑀝𑁄 𑀲𑀪𑀸𑀕𑀯𑀺𑀲𑀪𑀸𑀕𑀯𑀲𑁂𑀦. 𑀮𑀓𑁆𑀔𑀡𑀬𑀼𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀸 𑀦𑀬𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀯𑀼𑀢𑁆𑀢𑀁 𑁋

‘‘𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑁂𑀦, 𑀧𑀤𑀢𑁆𑀣𑁄 𑀮𑀓𑁆𑀔𑀡𑀁 𑀓𑀫𑁄;

𑀏𑀢𑁆𑀢𑀸𑀯𑀢𑀸 𑀘 𑀳𑁂𑀢𑁆𑀯𑀸𑀤𑀻, 𑀯𑁂𑀤𑀺𑀢𑀩𑁆𑀩𑀸 𑀳𑀺 𑀯𑀺𑀜𑁆𑀜𑀼𑀦𑀸’’𑀢𑀺.

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁫. 𑀏𑀯𑀁 ¶ 𑀳𑀸𑀭𑀸𑀤𑀬𑁄 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀳𑀸𑀭𑁂 𑀢𑀸𑀯 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀢𑀫𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀤𑁂𑀲𑀦𑀸𑀳𑀸𑀭𑁄𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀳𑀸𑀭𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑁄, 𑀧𑀝𑀺𑀦𑀺𑀤𑁆𑀤𑁂𑀲𑀲𑁆𑀲 𑀧𑀦 𑀯𑀺𑀲𑀬𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀕𑀸𑀣𑀁 𑀏𑀓𑀤𑁂𑀲𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑁄. 𑀢𑀢𑁆𑀣 𑀧𑀼𑀩𑁆𑀩𑀸𑀧𑁂𑀓𑁆𑀔𑀢𑁆𑀢𑁂 ‘‘𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀲𑁆𑀲 𑀦𑀺𑀕𑀫𑀦𑀁 𑀳𑁄𑀢𑀺. 𑀧𑀭𑀸𑀧𑁂𑀓𑁆𑀔𑀢𑁆𑀢𑁂 𑀧𑀦 ‘‘𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀻’’𑀢𑀺 𑀤𑁂𑀲𑀦𑀸𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀳𑁄𑀢𑀺. 𑀢𑁂𑀦 𑀤𑁂𑀲𑀦𑀸𑀳𑀸𑀭𑀲𑁆𑀲 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀁 𑀤𑀲𑁆𑀲𑁂𑀢𑀺. 𑀤𑁂𑀲𑀬𑀢𑀻𑀢𑀺 𑀲𑀁𑀯𑀡𑁆𑀡𑁂𑀢𑀺, 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀦𑁂𑀦 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀲𑀸𑀤’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯. 𑀢𑀲𑁆𑀫𑀸 𑀇𑀢𑁄 𑀧𑀭𑀫𑁆𑀧𑀺 𑀅𑀯𑀼𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. ‘‘𑀓𑀢𑁆𑀣 𑀧𑀦 𑀆𑀕𑀢𑁂 𑀅𑀲𑁆𑀲𑀸𑀤𑀸𑀤𑀺𑀓𑁂 𑀅𑀬𑀁 𑀳𑀸𑀭𑁄 𑀲𑀁𑀯𑀡𑁆𑀡𑁂𑀢𑀻’’𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺𑀓𑀢𑁆𑀯𑀸 𑀤𑁂𑀲𑀦𑀸𑀳𑀸𑀭𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀕𑀸𑀳𑀓𑀁 𑀪𑀕𑀯𑀢𑁄 𑀙𑀙𑀓𑁆𑀓𑀤𑁂𑀲𑀦𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀲𑀘𑁆𑀘𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀧𑀼𑀜𑁆𑀜𑀸𑀧𑀢𑁆𑀢𑀺𑀜𑁂𑀬𑁆𑀬𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄. 𑀢𑀣𑀸 𑀳𑀺 ‘‘𑀇𑀥, 𑀪𑀺𑀓𑁆𑀔𑀼, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁭𑁩) 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀤𑀺𑀲𑁆𑀲𑀢𑀺. ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁯𑁯; 𑀫𑀳𑀸𑀯. 𑁧𑁮) 𑀲𑀘𑁆𑀘𑁂. ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩, 𑁧𑁪𑁫) 𑀲𑀫𑀸𑀥𑀺𑀫𑁆𑀳𑀺. ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁧.𑁧.𑁫𑁭; 𑁧.𑁨.𑁧𑁪𑁭-𑁧𑁪𑁮) 𑀧𑀜𑁆𑀜𑀸𑀬𑀁. ‘‘𑀚𑀸𑀢𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁯𑁮; 𑀫. 𑀦𑀺. 𑁧.𑁧𑁩𑁧) 𑀧𑀓𑀢𑀺𑀬𑀁 ¶ . ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫) 𑀧𑀼𑀜𑁆𑀜𑁂. ‘‘𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁨𑁩𑁩) 𑀆𑀧𑀢𑁆𑀢𑀺𑀬𑀁. ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧) 𑀜𑁂𑀬𑁆𑀬𑁂. 𑀇𑀥 𑀧𑀦 𑀧𑀭𑀺𑀬𑀢𑁆𑀢𑀺𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀥. 𑀲. 𑀅𑀝𑁆𑀞. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟 𑁧; 𑀩𑀼. 𑀯𑀁. 𑀅𑀝𑁆𑀞. 𑁧.𑁧).

𑀯𑁄𑀢𑀺 𑀧𑀦 𑀅𑀬𑀁 𑀯𑁄-𑀲𑀤𑁆𑀤𑁄 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄’’𑀢𑀺 (𑀲𑀁. 𑀦𑀺. 𑁧.𑁨𑁧𑁫) 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀆𑀕𑀢𑁄. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁩) 𑀓𑀭𑀡𑀢𑁆𑀣𑁂. ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 𑀧𑀤𑀧𑀽𑀭𑀡𑁂. ‘‘𑀆𑀭𑁄𑀘𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁭𑁨) 𑀲𑀫𑁆𑀧𑀤𑀸𑀦𑀢𑁆𑀣𑁂. 𑀇𑀥𑀸𑀧𑀺 𑀲𑀫𑁆𑀧𑀤𑀸𑀦𑀢𑁆𑀣𑁂 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑁂𑀦 ¶ 𑀪𑀺𑀓𑁆𑀔𑀽, 𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀤𑀺𑀕𑀼𑀡𑀬𑁄𑀕𑁂𑀦 𑀯𑀸. 𑀅𑀣 𑀯𑀸 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑁆𑀢𑀻𑀢𑀺 𑀪𑀺𑀓𑁆𑀔𑀽. 𑀪𑀺𑀓𑁆𑀔𑀯𑁂𑀢𑀺 𑀢𑁂𑀲𑀁 𑀆𑀮𑀧𑀦𑀁. 𑀢𑁂𑀦 𑀢𑁂 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑀁 𑀓𑀭𑁄𑀢𑀺. 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀓𑀣𑁂𑀲𑁆𑀲𑀸𑀫𑀺. 𑀢𑁂𑀦 𑀦𑀸𑀳𑀁 𑀥𑀫𑁆𑀫𑀺𑀲𑁆𑀲𑀭𑀢𑀸𑀬 𑀢𑀼𑀫𑁆𑀳𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀭𑁂𑀬𑁆𑀬𑀸𑀫𑀺, 𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀇𑀤𑀸𑀦𑀺 𑀧𑀯𑀢𑁆𑀢𑀺𑀬𑀫𑀸𑀦𑀁 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺𑀆𑀤𑀻𑀲𑀼 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀆𑀤𑀺𑀓𑀮𑁆𑀬𑀸𑀡𑀁, 𑀆𑀤𑀺𑀓𑀮𑁆𑀬𑀸𑀡𑀫𑁂𑀢𑀲𑁆𑀲𑀸𑀢𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑀁. 𑀲𑀫𑀸𑀥𑀺𑀦𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀧𑀜𑁆𑀜𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑀁. 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀅𑀣 𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀦𑀬𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁. 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀯𑀺𑀦𑀬𑀦𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀦𑀬𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀗𑁆𑀓𑀸𑀲𑀦𑀸𑀤𑀺𑀙𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀯𑀸 𑀲𑀸𑀢𑁆𑀣𑀁. 𑀅𑀓𑁆𑀔𑀭𑀸𑀤𑀺𑀙𑀩𑁆𑀬𑀜𑁆𑀚𑀦𑀧𑀤𑀲𑀫𑀸𑀬𑁄𑀕𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀏𑀓𑀦𑁆𑀢𑁂𑀦 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁. 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀧𑀭𑀺𑀲𑀼𑀤𑁆𑀥𑀁. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸 𑀯𑀸 𑀧𑀭𑀺𑀧𑀼𑀡𑁆𑀡𑀁. 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀸𑀬 𑀧𑀯𑀢𑁆𑀢𑀺𑀬𑀸 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑀸𑀬 𑀘 𑀧𑀭𑀺𑀲𑀼𑀤𑁆𑀥𑀁. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀩𑁆𑀭𑀳𑁆𑀫𑀽𑀦𑀁 𑀯𑀸 𑀲𑁂𑀝𑁆𑀞𑀸𑀦𑀁 𑀅𑀭𑀺𑀬𑀸𑀦𑀁 𑀘𑀭𑀺𑀬𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀺 𑀧𑀭𑀺𑀤𑀻𑀧𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀪𑀕𑀯𑀢𑀸 𑀤𑁂𑀲𑀺𑀢𑁄 𑀧𑀓𑀸𑀲𑀺𑀢𑁄 𑀘 𑀲𑀸𑀲𑀦𑀥𑀫𑁆𑀫𑁄 𑀬𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀢𑁂 𑀅𑀲𑁆𑀲𑀸𑀤𑀸𑀤𑀬𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀽𑀢𑀸 𑀬𑀢𑁆𑀣 𑀬𑀢𑁆𑀣 𑀧𑀸𑀞𑁂 𑀲𑀯𑀺𑀲𑁂𑀲𑀁 𑀯𑀼𑀢𑁆𑀢𑀸, 𑀢𑀢𑁄 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀉𑀤𑀸𑀳𑀭𑀡𑀯𑀲𑁂𑀦 𑀇𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀸𑀫𑀦𑁆𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀁 𑀢𑁂𑀪𑀽𑀫𑀓𑀥𑀫𑁆𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀓𑀸𑀫𑀁. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀇𑀘𑁆𑀙𑀦𑁆𑀢𑀲𑁆𑀲. 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀻𑀢𑀺 𑀢𑀲𑁆𑀲 𑀓𑀸𑀫𑀬𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲 𑀢𑀁 𑀓𑀸𑀫𑀲𑀗𑁆𑀔𑀸𑀢𑀁 𑀯𑀢𑁆𑀣𑀼 𑀲𑀫𑀺𑀚𑁆𑀛𑀢𑀺 𑀘𑁂, 𑀲𑀘𑁂 𑀲𑁄 𑀢𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 ¶ 𑀳𑁄𑀢𑀻𑀢𑀺 𑀏𑀓𑀁𑀲𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀫𑀘𑁆𑀘𑁄𑀢𑀺 𑀲𑀢𑁆𑀢𑁄. 𑀬𑀤𑀺𑀘𑁆𑀙𑀢𑀻𑀢𑀺 𑀬𑀁 𑀇𑀘𑁆𑀙𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀅𑀲𑁆𑀲𑀸𑀤𑁄𑀢𑀺 𑀬𑀸𑀬𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀸 𑀇𑀘𑁆𑀙𑀺𑀢𑀮𑀸𑀪𑁂 𑀧𑀻𑀢𑀺𑀫𑀦𑀢𑀸 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁄 𑀅𑀲𑁆𑀲𑀸𑀤𑁄.

𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑁂 𑀇𑀘𑁆𑀙𑀫𑀸𑀦𑀲𑁆𑀲, 𑀓𑀸𑀫𑁂𑀦 𑀯𑀸 𑀬𑀸𑀬𑀫𑀸𑀦𑀲𑁆𑀲. 𑀙𑀦𑁆𑀤𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀢𑀡𑁆𑀳𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲. 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀢𑁂 𑀯𑀢𑁆𑀣𑀼𑀓𑀸𑀫𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀯𑀺𑀦𑀲𑁆𑀲𑀦𑁆𑀢𑀺 𑀘𑁂. 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺 𑀅𑀣 𑀅𑀬𑁄𑀫𑀬𑀸𑀤𑀺𑀦𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬 𑀧𑀻𑀴𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀆𑀤𑀻𑀦𑀯𑁄𑀢𑀺 𑀬𑀸𑀬𑀁 𑀓𑀸𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀓𑀸𑀫𑀬𑀸𑀦𑀲𑁆𑀲 𑀲𑀢𑁆𑀢𑀲𑁆𑀲 𑀭𑀼𑀧𑁆𑀧𑀦𑀸 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺, 𑀅𑀬𑀁 𑀆𑀤𑀻𑀦𑀯𑁄.

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀬𑀣𑀸𑀯𑀼𑀢𑁆𑀢𑁂 𑀓𑀸𑀫𑁂 𑀢𑀢𑁆𑀣 𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀸 𑀲𑀩𑁆𑀩𑀪𑀸𑀕𑁂𑀦 𑀯𑀚𑁆𑀚𑁂𑀢𑀺. 𑀬𑀣𑀸 𑀓𑀺𑀁? 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄𑀢𑀺, 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀚𑀻𑀯𑀺𑀢𑀼𑀓𑀸𑀫𑁄 𑀓𑀡𑁆𑀳𑀲𑀧𑁆𑀧𑀁 𑀧𑀝𑀺𑀧𑀣𑁂 𑀧𑀲𑁆𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂𑀦 𑀢𑀲𑁆𑀲 𑀲𑀺𑀭𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀲𑁄𑀫𑀁…𑀧𑁂… 𑀲𑀫𑀢𑀺𑀯𑀢𑁆𑀢𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀲𑀩𑁆𑀩𑀁 𑀮𑁄𑀓𑀁 𑀯𑀺𑀲𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀁 𑀇𑀫𑀁 𑀢𑀡𑁆𑀳𑀁 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀢𑀻𑀢𑀺. 𑀇𑀤𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀬𑀤𑀺𑀤𑀁 𑀯𑀺𑀲𑀢𑁆𑀢𑀺𑀓𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀢𑀺𑀯𑀢𑁆𑀢𑀦𑀁, 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀔𑁂𑀢𑁆𑀢𑀦𑁆𑀢𑀺 𑀓𑁂𑀤𑀸𑀭𑀸𑀤𑀺𑀔𑁂𑀢𑁆𑀢𑀁. 𑀯𑀢𑁆𑀣𑀼𑀦𑁆𑀢𑀺 𑀖𑀭𑀯𑀢𑁆𑀣𑀼𑀆𑀤𑀺𑀯𑀢𑁆𑀣𑀼𑀁. 𑀳𑀺𑀭𑀜𑁆𑀜𑀁 𑀯𑀸𑀢𑀺 𑀓𑀳𑀸𑀧𑀡𑀲𑀗𑁆𑀔𑀸𑀢𑀁 𑀲𑀼𑀯𑀡𑁆𑀡𑀲𑀗𑁆𑀔𑀸𑀢𑀜𑁆𑀘 𑀳𑀺𑀭𑀜𑁆𑀜𑀁. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄, 𑀲𑁄 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀕𑀯𑀸𑀲𑁆𑀲𑀦𑁆𑀢𑀺 𑀕𑀸𑀯𑁄 𑀘 𑀅𑀲𑁆𑀲𑁂 𑀘𑀸𑀢𑀺 𑀕𑀯𑀸𑀲𑁆𑀲𑀁. 𑀤𑀸𑀲𑀧𑁄𑀭𑀺𑀲𑀦𑁆𑀢𑀺 𑀤𑀸𑀲𑁂 𑀘 𑀧𑁄𑀭𑀺𑀲𑁂 𑀘𑀸𑀢𑀺 𑀤𑀸𑀲𑀧𑁄𑀭𑀺𑀲𑀁. 𑀣𑀺𑀬𑁄𑀢𑀺 𑀇𑀢𑁆𑀣𑀺𑀬𑁄. 𑀩𑀦𑁆𑀥𑀽𑀢𑀺 𑀜𑀸𑀢𑀺𑀩𑀦𑁆𑀥𑀯𑁄. 𑀧𑀼𑀣𑀽 𑀓𑀸𑀫𑁂𑀢𑀺 𑀅𑀜𑁆𑀜𑁂𑀧𑀺 𑀯𑀸 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀓𑁂 𑀩𑀳𑀽 𑀓𑀸𑀫𑀕𑀼𑀡𑁂. 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻𑀢𑀺 𑀬𑁄 𑀲𑀢𑁆𑀢𑁄 𑀅𑀦𑀼 𑀅𑀦𑀼 𑀅𑀪𑀺𑀓𑀗𑁆𑀔𑀢𑀺 𑀧𑀢𑁆𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀅𑀲𑁆𑀲𑀸𑀤𑁄𑀢𑀺 𑀬𑀤𑀺𑀤𑀁 𑀔𑁂𑀢𑁆𑀢𑀸𑀤𑀻𑀦𑀁 𑀅𑀦𑀼𑀕𑀺𑀚𑁆𑀛𑀦𑀁, 𑀅𑀬𑀁 𑀅𑀲𑁆𑀲𑀸𑀤𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀏𑀢𑁂𑀦𑀸𑀢𑀺 𑀅𑀲𑁆𑀲𑀸𑀤𑁄.

𑀅𑀩𑀮𑀸 ¶ ¶ 𑀦𑀁 𑀩𑀮𑀻𑀬𑀦𑁆𑀢𑀻𑀢𑀺 𑀔𑁂𑀢𑁆𑀢𑀸𑀤𑀺𑀪𑁂𑀤𑁂 𑀓𑀸𑀫𑁂 𑀅𑀦𑀼𑀕𑀺𑀚𑁆𑀛𑀦𑁆𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀢𑁆𑀢𑀸 𑀅𑀩𑀮𑀲𑀗𑁆𑀔𑀸𑀢𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺, 𑀲𑀤𑁆𑀥𑀸𑀩𑀮𑀸𑀤𑀺𑀯𑀺𑀭𑀳𑁂𑀦 𑀯𑀸 𑀅𑀩𑀮𑀁 𑀢𑀁 𑀧𑀼𑀕𑁆𑀕𑀮𑀁 𑀅𑀩𑀮𑀸 𑀓𑀺𑀮𑁂𑀲𑀸 𑀩𑀮𑀻𑀬𑀦𑁆𑀢𑀺, 𑀅𑀩𑀮𑀢𑁆𑀢𑀸 𑀅𑀪𑀺𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸𑀢𑀺 𑀏𑀦𑀁 𑀓𑀸𑀫𑀕𑀺𑀤𑁆𑀥𑀁 𑀓𑀸𑀫𑁂 𑀧𑀭𑀺𑀬𑁂𑀲𑀦𑁆𑀢𑀁 𑀭𑀓𑁆𑀔𑀦𑁆𑀢𑀜𑁆𑀘 𑀲𑀻𑀳𑀸𑀤𑀬𑁄 𑀘 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀅𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀫𑀤𑁆𑀤𑀦𑁆𑀢𑀺. 𑀢𑀢𑁄 𑀦𑀁…𑀧𑁂… 𑀤𑀓𑀦𑁆𑀢𑀺 𑀢𑀢𑁄 𑀢𑁂𑀳𑀺 𑀧𑀸𑀓𑀝𑀸𑀧𑀸𑀓𑀝𑀧𑀭𑀺𑀲𑁆𑀲𑀬𑁂𑀳𑀺 𑀅𑀪𑀺𑀪𑀽𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀦𑀸𑀯𑀁 𑀉𑀤𑀓𑀁 𑀯𑀺𑀬 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀆𑀤𑀻𑀦𑀯𑁄𑀢𑀺 𑀬𑁆𑀯𑀸𑀬𑀁 𑀢𑀡𑁆𑀳𑀸𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀳𑁂𑀢𑀼𑀓𑁄 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑁄, 𑀅𑀬𑀁 𑀆𑀤𑀻𑀦𑀯𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀸𑀫𑀕𑀺𑀤𑁆𑀥𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑁄 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄. 𑀲𑀤𑀸 𑀲𑀢𑁄𑀢𑀺 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁂𑀦 𑀲𑀢𑁄 𑀳𑀼𑀢𑁆𑀯𑀸. 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀭𑀽𑀧𑀸𑀤𑀻𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀲𑀩𑁆𑀩𑀧𑁆𑀧𑀓𑀸𑀭𑀁 𑀓𑀺𑀮𑁂𑀲𑀓𑀸𑀫𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂 𑀧𑀚𑀳𑁂𑀬𑁆𑀬. 𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺 𑀏𑀯𑀁 𑀢𑁂 𑀓𑀸𑀫𑁂 𑀧𑀳𑀸𑀬 𑀢𑀧𑁆𑀧𑀳𑀸𑀦𑀓𑀭𑀅𑀭𑀺𑀬𑀫𑀕𑁆𑀕𑁂𑀦𑁂𑀯 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑁂𑀬𑁆𑀬, 𑀢𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽𑀢𑀺 𑀬𑀣𑀸 𑀧𑀼𑀭𑀺𑀲𑁄 𑀉𑀤𑀓𑀕𑁆𑀕𑀳𑀡𑁂𑀦 𑀕𑀭𑀼𑀪𑀸𑀭𑀁 𑀦𑀸𑀯𑀁 𑀉𑀤𑀓𑀁 𑀩𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀮𑀳𑀼𑀓𑀸𑀬 𑀦𑀸𑀯𑀸𑀬 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀸𑀭𑀕𑀽 𑀪𑀯𑁂𑀬𑁆𑀬, 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀯𑀫𑁂𑀯 𑀅𑀢𑁆𑀢𑀪𑀸𑀯𑀦𑀸𑀯𑀁 𑀓𑀺𑀮𑁂𑀲𑀽𑀤𑀓𑀕𑀭𑀼𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀮𑀳𑀼𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀸𑀭𑀕𑀽 𑀪𑀯𑁂𑀬𑁆𑀬, 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀕𑀘𑁆𑀙𑁂𑀬𑁆𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀬𑀁 𑀓𑀸𑀫𑀧𑁆𑀧𑀳𑀸𑀦𑀫𑀼𑀔𑁂𑀦 𑀘𑀢𑀼𑀭𑁄𑀖𑀁 𑀢𑀭𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀸𑀦𑀁, 𑀇𑀤𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀢𑁄 𑀦𑀺𑀲𑁆𑀲𑀭𑀡𑀦𑁆𑀢𑀺.

𑀥𑀫𑁆𑀫𑁄𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀥𑀫𑁆𑀫𑁄. 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 𑀬𑁄 𑀢𑀁 𑀥𑀫𑁆𑀫𑀁 𑀅𑀧𑁆𑀧𑀫𑀢𑁆𑀢𑁄 𑀘𑀭𑀢𑀺, 𑀢𑀁 𑀥𑀫𑁆𑀫𑀘𑀸𑀭𑀺𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑁂𑀤𑁂𑀦 𑀤𑀼𑀯𑀺𑀥𑀢𑁄𑀧𑀺 𑀅𑀦𑀢𑁆𑀣𑀢𑁄 𑀭𑀓𑁆𑀔𑀢𑀺 𑀧𑀸𑀮𑁂𑀢𑀺. 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂𑀢𑀺 𑀯𑀲𑁆𑀲𑀓𑀸𑀮𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀬𑀣𑀸 𑀫𑀳𑀦𑁆𑀢𑀁 𑀙𑀢𑁆𑀢𑀁 𑀓𑀼𑀲𑀮𑁂𑀦 𑀧𑀼𑀭𑀺𑀲𑁂𑀦 𑀥𑀸𑀭𑀺𑀢𑀁 𑀢𑀁 𑀯𑀲𑁆𑀲𑀢𑁂𑀫𑀦𑀢𑁄 𑀭𑀓𑁆𑀔𑀢𑀺. 𑀢𑀢𑁆𑀣 𑀬𑀣𑀸 𑀢𑀁 𑀙𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀙𑀸𑀤𑁂𑀦𑁆𑀢𑀜𑁆𑀘 𑀯𑀲𑁆𑀲𑀸𑀤𑀺𑀢𑁄 𑀭𑀓𑁆𑀔𑀢𑀺, 𑀏𑀯𑀁 𑀥𑀫𑁆𑀫𑁄𑀧𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑁂𑀦 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫𑀘𑀭𑀺𑀬𑀸𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁𑀬𑁂𑀯 ¶ 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑀸…𑀧𑁂… 𑀘𑀸𑀭𑀻𑀢𑀺 𑀏𑀢𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀤𑀁 𑀨𑀮𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀳𑀺 𑀲𑀫𑁆𑀧𑀭𑀸𑀬𑀺𑀓𑁂𑀳𑀺 𑀘 ¶ 𑀅𑀦𑀢𑁆𑀣𑁂𑀳𑀺 𑀬𑀤𑀺𑀤𑀁 𑀥𑀫𑁆𑀫𑀲𑁆𑀲 𑀭𑀓𑁆𑀔𑀡𑀁 𑀯𑀼𑀢𑁆𑀢𑀁 𑀭𑀓𑁆𑀔𑀸𑀯𑀲𑀸𑀦𑀲𑁆𑀲 𑀘 𑀅𑀩𑁆𑀪𑀼𑀤𑀬𑀲𑁆𑀲 𑀦𑀺𑀧𑁆𑀨𑀸𑀤𑀦𑀁, 𑀇𑀤𑀁 𑀦𑀺𑀲𑁆𑀲𑀭𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀤𑁂𑀲𑀦𑀸𑀬 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸𑀬 𑀨𑀮𑀦𑁆𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀲𑀩𑁆𑀩𑁂 𑀲𑀗𑁆𑀔𑀢𑀸 𑀥𑀫𑁆𑀫𑀸. 𑀅𑀦𑀢𑁆𑀢𑀸𑀢𑀺 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀢𑁆𑀢𑀸 𑀓𑀸𑀭𑀓𑀯𑁂𑀤𑀓𑀲𑀪𑀸𑀯𑁄, 𑀲𑀬𑀁 𑀯𑀸 𑀦 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀸𑀢𑀺. 𑀇𑀢𑀻𑀢𑀺 𑀏𑀯𑀁. 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂𑀢𑀺 𑀅𑀣 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑁂 𑀏𑀯 𑀅𑀦𑀺𑀘𑁆𑀘𑀢𑀸𑀤𑀼𑀓𑁆𑀔𑀢𑀸𑀦𑀁 𑀲𑀼𑀧𑀭𑀺𑀤𑀺𑀝𑁆𑀞𑀢𑁆𑀢𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀕𑁄𑀘𑀭𑀪𑀽𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑀺𑀩𑁆𑀩𑁂𑀤𑀁 𑀆𑀧𑀚𑁆𑀚𑀢𑀺. 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀬𑀸 𑀯𑀼𑀢𑁆𑀢𑀮𑀓𑁆𑀔𑀡𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀲𑀩𑁆𑀩𑀓𑀺𑀮𑁂𑀲𑀯𑀺𑀲𑀼𑀚𑁆𑀛𑀦𑀢𑁄 𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀯𑀸 𑀅𑀫𑀢𑀥𑀸𑀢𑀼𑀬𑀸 𑀫𑀕𑁆𑀕𑁄 𑀉𑀧𑀸𑀬𑁄. 𑀅𑀬𑀁 𑀉𑀧𑀸𑀬𑁄𑀢𑀺 𑀬𑀤𑀺𑀤𑀁 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀲𑀩𑁆𑀩𑀲𑁆𑀫𑀺𑀁 𑀯𑀝𑁆𑀝𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑀁 𑀯𑀼𑀢𑁆𑀢𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄 𑀉𑀧𑀸𑀬𑁄.

‘‘𑀘𑀓𑁆𑀔𑀼𑀫𑀸…𑀧𑁂… 𑀧𑀭𑀺𑀯𑀚𑁆𑀚𑀬𑁂’’𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀭𑀻𑀭𑁂 𑀯𑀳𑀦𑁆𑀢𑁂 𑀯𑀺𑀲𑀫𑀸𑀦𑀺 𑀪𑀽𑀫𑀺𑀧𑁆𑀧𑀤𑁂𑀲𑀸𑀦𑀺 𑀘𑀡𑁆𑀟𑀢𑀸𑀬 𑀯𑀸 𑀯𑀺𑀲𑀫𑁂 𑀳𑀢𑁆𑀣𑀺𑀆𑀤𑀬𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀏𑀯𑀁 𑀮𑁄𑀓𑁂 𑀲𑀧𑁆𑀧𑀜𑁆𑀜𑁄 𑀧𑀼𑀭𑀺𑀲𑁄 𑀲𑀧𑁆𑀧𑀜𑁆𑀜𑀢𑀸𑀬 𑀳𑀺𑀢𑀸𑀳𑀺𑀢𑀁 𑀚𑀸𑀦𑀦𑁆𑀢𑁄 𑀧𑀸𑀧𑀸𑀦𑀺 𑀮𑀸𑀫𑀓𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺. 𑀅𑀬𑀁 𑀆𑀡𑀢𑁆𑀢𑀻𑀢𑀺 𑀬𑀸 𑀅𑀬𑀁 ‘‘𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀆𑀡𑀸, 𑀅𑀬𑀁 𑀆𑀡𑀢𑁆𑀢𑀻𑀢𑀺.

𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀼𑀢𑁆𑀢𑁂𑀲𑀼 𑀆𑀕𑀢𑀸 𑀨𑀮𑀽𑀧𑀸𑀬𑀸𑀡𑀢𑁆𑀢𑀺𑀬𑁄 𑀉𑀤𑀸𑀳𑀭𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀸 𑀏𑀓𑀢𑁄 𑀆𑀕𑀢𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀜𑁆𑀜𑀢𑁄’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚𑀸𑀢𑀺 𑀆𑀡𑀢𑁆𑀢𑀻𑀢𑀺 ‘‘𑀫𑁄𑀖𑀭𑀸𑀚, 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀮𑁄𑀓𑀁 𑀅𑀯𑀲𑀯𑀢𑁆𑀢𑀺𑀢𑀸𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀯𑀸 𑀢𑀼𑀘𑁆𑀙𑀪𑀸𑀯𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 𑀯𑀸 𑀲𑀼𑀜𑁆𑀜𑁄𑀢𑀺 𑀧𑀲𑁆𑀲𑀸’’𑀢𑀺 𑀇𑀤𑀁 𑀥𑀫𑁆𑀫𑀭𑀸𑀚𑀲𑁆𑀲 𑀯𑀘𑀦𑀁 𑀯𑀺𑀥𑀸𑀦𑀪𑀸𑀯𑀢𑁄 𑀆𑀡𑀢𑁆𑀢𑀺. 𑀲𑀩𑁆𑀩𑀤𑀸 𑀲𑀢𑀺𑀓𑀺𑀭𑀺𑀬𑀸𑀬 𑀢𑀁𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 ‘‘𑀲𑀤𑀸 𑀲𑀢𑁄𑀢𑀺 𑀉𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘𑀸𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀁 ¶ 𑀲𑀓𑁆𑀓𑀸𑀬𑀤𑀲𑁆𑀲𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸𑀢𑀺. 𑀇𑀤𑀁 𑀨𑀮𑀦𑁆𑀢𑀺 𑀬𑀁 𑀏𑀯𑀁 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀫𑀘𑁆𑀘𑀼𑀢𑀭𑀡𑀁 𑀫𑀘𑁆𑀘𑀼𑀦𑁄 𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀁 𑀢𑀲𑁆𑀲 𑀬𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀧𑀝𑀺𑀧𑀚𑁆𑀚𑀦𑀁, 𑀇𑀤𑀁 𑀤𑁂𑀲𑀦𑀸𑀬 𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀅𑀲𑁆𑀲𑀸𑀤𑀸𑀤𑀬𑁄 𑀲𑀼𑀢𑁆𑀢𑁂 𑀓𑀢𑁆𑀣𑀘𑀺 ¶ 𑀲𑀭𑀽𑀧𑀢𑁄 𑀓𑀢𑁆𑀣𑀘𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀢𑀸𑀬 𑀓𑀢𑁆𑀣𑀘𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀣𑀘𑀺 𑀏𑀓𑀢𑁄 𑀤𑀲𑁆𑀲𑀺𑀢𑀸, 𑀦 𑀏𑀯𑀁 𑀨𑀮𑀸𑀤𑀬𑁄. 𑀨𑀮𑀸𑀤𑀬𑁄 𑀧𑀦 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑁂 𑀕𑀸𑀣𑀸𑀲𑀼 𑀯𑀸 𑀏𑀓𑀢𑁄 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀇𑀫𑀲𑁆𑀲 𑀦𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀤𑀸𑀳𑀭𑀺𑀢𑁆𑀯𑀸𑀧𑀺 𑀧𑀼𑀦 ‘‘𑀲𑀼𑀜𑁆𑀜𑀢𑁄 𑀮𑁄𑀓’’𑀦𑁆𑀢𑀺𑀆𑀤𑀺𑀦𑀸 𑀏𑀓𑀢𑁄 𑀉𑀤𑀸𑀳𑀭𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁬. 𑀏𑀯𑀁 𑀅𑀲𑁆𑀲𑀸𑀤𑀸𑀤𑀬𑁄 𑀉𑀤𑀸𑀳𑀭𑀡𑀯𑀲𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀼𑀕𑁆𑀕𑀮𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀕𑁆𑀖𑀝𑀺𑀢𑀁 𑀖𑀝𑀺𑀢𑀫𑀢𑁆𑀢𑀁 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑀁 𑀬𑀲𑁆𑀲 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸 𑀦 𑀓𑀢𑀸, 𑀢𑀁 𑀚𑀸𑀦𑀸𑀢𑀻𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀉𑀤𑁆𑀤𑁂𑀲𑀫𑀢𑁆𑀢𑁂𑀦 𑀲𑀧𑁆𑀧𑀪𑁂𑀤𑀁 𑀲𑀯𑀺𑀢𑁆𑀣𑀸𑀭𑀫𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄, 𑀉𑀕𑁆𑀖𑀝𑀺𑀢𑀁 𑀯𑀸 𑀉𑀘𑁆𑀘𑀮𑀺𑀢𑀁 𑀉𑀝𑁆𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀢𑀁 𑀚𑀸𑀦𑀸𑀢𑀻𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀥𑀫𑁆𑀫𑁄 𑀳𑀺 𑀤𑁂𑀲𑀺𑀬𑀫𑀸𑀦𑁄 𑀤𑁂𑀲𑀓𑀢𑁄 𑀤𑁂𑀲𑀦𑀸𑀪𑀸𑀚𑀦𑀁 𑀲𑀗𑁆𑀓𑀫𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀢𑀫𑁂𑀲 𑀉𑀘𑁆𑀘𑀮𑀺𑀢𑀫𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄, 𑀘𑀮𑀺𑀢𑀫𑁂𑀯 𑀯𑀸 𑀉𑀕𑁆𑀖𑀝𑀺𑀢𑀁. 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑀲𑁆𑀲 𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀆𑀲𑀬𑀲𑁆𑀲 𑀩𑀼𑀤𑁆𑀥𑀸𑀯𑁂𑀡𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀗𑁆𑀔𑀡𑀧𑀢𑀺𑀢𑀸 𑀏𑀯 𑀘𑀮𑀦𑀸𑀬 𑀳𑁄𑀢𑀺, 𑀢𑀢𑁄 𑀧𑀭𑀫𑁆𑀧𑀭𑀸𑀦𑀼𑀯𑀢𑁆𑀢𑀺𑀬𑀸, 𑀢𑀢𑁆𑀣𑀸𑀬𑀁 𑀉𑀕𑁆𑀖𑀝𑀺𑀢𑁂 𑀘𑀮𑀺𑀢𑀫𑀢𑁆𑀢𑁂𑀬𑁂𑀯 𑀆𑀲𑀬𑁂 𑀥𑀫𑁆𑀫𑀁 𑀚𑀸𑀦𑀸𑀢𑀺 𑀅𑀯𑀩𑀼𑀚𑁆𑀛𑀢𑀻𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀢𑀲𑁆𑀲 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀺, 𑀢𑀢𑁆𑀢𑀓𑁂𑀦𑁂𑀯 𑀢𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀢𑁄. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀯𑀺𑀧𑀜𑁆𑀘𑀺𑀢𑀁 𑀯𑀸 𑀫𑀦𑁆𑀤𑀁 𑀲𑀡𑀺𑀓𑀁 𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀢𑀲𑁆𑀲 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺, 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀬 𑀤𑁂𑀲𑀦𑀸𑀬 𑀢𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀢𑁄. 𑀦𑁂𑀢𑀩𑁆𑀩𑁄 𑀥𑀫𑁆𑀫𑀲𑁆𑀲 𑀧𑀝𑀺𑀦𑀺𑀤𑁆𑀤𑀺𑀲𑁂𑀦 𑀅𑀢𑁆𑀣𑀁 𑀧𑀸𑀧𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄, 𑀫𑀼𑀤𑀺𑀦𑁆𑀤𑁆𑀭𑀺𑀬𑀢𑀸𑀬 𑀯𑀸 𑀧𑀝𑀺𑀮𑁄𑀫𑀕𑁆𑀕𑀳𑀡𑀢𑁄 𑀦𑁂𑀢𑀩𑁆𑀩𑁄 𑀅𑀦𑀼𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄, 𑀢𑀲𑁆𑀲 𑀦𑁂𑀬𑁆𑀬𑀲𑁆𑀲 𑀅𑀲𑁆𑀲𑀸𑀤𑀁 𑀆𑀤𑀻𑀦𑀯𑀁 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺, 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀤𑁂𑀲𑀦𑁂𑀦 𑀢𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀢𑁆𑀣𑀸𑀬𑀁 𑀧𑀸𑀴𑀺 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽.

‘‘𑀓𑀢𑀫𑁄 ¶ 𑀘 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽.

‘‘𑀓𑀢𑀫𑁄 ¶ 𑀘 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄’’𑀢𑀺 (𑀧𑀼. 𑀧. 𑁧𑁪𑁮-𑁧𑁫𑁦).

𑀧𑀤𑀧𑀭𑀫𑁄 𑀧𑀦𑁂𑀢𑁆𑀣 𑀦𑁂𑀢𑁆𑀢𑀺𑀬𑀁 𑀧𑀝𑀺𑀯𑁂𑀥𑀲𑁆𑀲 𑀅𑀪𑀸𑀚𑀦𑀦𑁆𑀢𑀺 𑀦 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀅𑀲𑁆𑀲𑀸𑀤𑁄, 𑀆𑀤𑀻𑀦𑀯𑁄, 𑀦𑀺𑀲𑁆𑀲𑀭𑀡𑀁, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘, 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘𑀸𑀢𑀺 𑀏𑀢𑁂 𑀲𑀢𑁆𑀢 𑀧𑀝𑁆𑀞𑀸𑀦𑀦𑀬𑀸.

𑀢𑁂𑀲𑀼 𑀢𑀢𑀺𑀬𑀙𑀝𑁆𑀞𑀲𑀢𑁆𑀢𑀫𑀸 𑀯𑁂𑀦𑁂𑀬𑁆𑀬𑀢𑁆𑀢𑀬𑀯𑀺𑀦𑀬𑀦𑁂 𑀲𑀫𑀢𑁆𑀣𑀢𑀸𑀬 𑀕𑀳𑀺𑀢𑀸, 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀦 𑀕𑀳𑀺𑀢𑀸. 𑀦 𑀳𑀺 𑀓𑁂𑀯𑀮𑁂𑀦 𑀅𑀲𑁆𑀲𑀸𑀤𑁂𑀦 𑀆𑀤𑀻𑀦𑀯𑁂𑀦 𑀢𑀤𑀼𑀪𑀬𑁂𑀦 𑀯𑀸 𑀓𑀣𑀺𑀢𑁂𑀦 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀁 𑀲𑀫𑁆𑀪𑀯𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀯𑀘𑀦𑀢𑁄. 𑀧𑀜𑁆𑀘𑀫𑁄𑀧𑀺 𑀆𑀤𑀻𑀦𑀯𑀸𑀯𑀘𑀦𑀢𑁄 𑀦𑀺𑀲𑁆𑀲𑀭𑀡𑀲𑁆𑀲 𑀅𑀦𑀼𑀧𑀸𑀬𑁄 𑀏𑀯. 𑀦 𑀳𑀺 𑀯𑀺𑀫𑀼𑀢𑁆𑀢𑀺𑀭𑀲𑀸 𑀪𑀕𑀯𑀢𑁄 𑀤𑁂𑀲𑀦𑀸 𑀯𑀺𑀫𑀼𑀢𑁆𑀢𑀺𑀁 𑀢𑀤𑀼𑀧𑀸𑀬𑀜𑁆𑀘 𑀅𑀦𑀸𑀫𑀲𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀏𑀢𑁂 𑀘𑀢𑁆𑀢𑀸𑀭𑁄 𑀦𑀬𑀸 𑀅𑀦𑀼𑀤𑁆𑀥𑀝𑀸. 𑀲𑀘𑁂 𑀧𑀦 𑀧𑀤𑀧𑀭𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀢𑀤𑀼𑀪𑀬𑀪𑀸𑀕𑁂 𑀞𑀺𑀢𑀁 𑀤𑁂𑀲𑀦𑀁 𑀲𑀼𑀢𑁆𑀢𑁂𑀓𑀤𑁂𑀲𑀁 𑀕𑀸𑀣𑀁 𑀯𑀸 𑀢𑀸𑀤𑀺𑀲𑀁 𑀏𑀢𑁂𑀲𑀁 𑀦𑀬𑀸𑀦𑀁 𑀉𑀤𑀸𑀳𑀭𑀡𑀪𑀸𑀯𑁂𑀦 𑀉𑀤𑁆𑀥𑀭𑀢𑀺, 𑀏𑀯𑀁 𑀲𑀢𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀦𑀬𑀸𑀦𑀁 𑀕𑀳𑀡𑀁 𑀪𑀯𑁂𑀬𑁆𑀬. 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀁 𑀧𑀦 𑀢𑁂𑀲𑀁 𑀲𑀦𑁆𑀢𑀸𑀦𑁂 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀦𑀁. 𑀢𑀁 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀯 𑀦𑀬𑁂𑀢𑀺, 𑀦𑀸𑀯𑀲𑁂𑀲𑁂𑀳𑀻𑀢𑀺 𑀇𑀢𑀭𑁂 𑀇𑀥 𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀧𑁂𑀝𑀓𑁂 (𑀧𑁂𑀝𑀓𑁄. 𑁨𑁩) 𑁋

‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘?

𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺.

𑀢𑀢𑁆𑀣 𑀬𑀁 𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 𑀧𑀸𑀧𑀓𑀸𑀭𑀻 𑀧𑀸𑀧𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀅𑀬𑀁 𑀆𑀤𑀻𑀦𑀯𑁄.

𑀅𑀝𑁆𑀞𑀺𑀫𑁂 ¶ , 𑀪𑀺𑀓𑁆𑀔𑀯𑁂, 𑀮𑁄𑀓𑀥𑀫𑁆𑀫𑀸. 𑀓𑀢𑀫𑁂 𑀅𑀝𑁆𑀞? 𑀮𑀸𑀪𑁄𑀢𑀺𑀆𑀤𑀺 (𑀅. 𑀦𑀺. 𑁮.𑁬). 𑀢𑀢𑁆𑀣 ¶ 𑀮𑀸𑀪𑁄 𑀬𑀲𑁄 𑀲𑀼𑀔𑀁 𑀧𑀲𑀁𑀲𑀸, 𑀅𑀬𑀁 𑀅𑀲𑁆𑀲𑀸𑀤𑁄. 𑀅𑀮𑀸𑀪𑁄 𑀅𑀬𑀲𑁄 𑀤𑀼𑀓𑁆𑀔𑀁 𑀦𑀺𑀦𑁆𑀤𑀸, 𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘‘𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀅𑀥𑀺𑀧𑁆𑀧𑀸𑀬𑁄 𑀘 𑀇𑀚𑁆𑀛𑀢𑀺;

𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀻’’𑀢𑀺. (𑀧𑁂𑀝𑀓𑁄. 𑁨𑁩);

𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀤𑁆𑀯𑀢𑁆𑀢𑀺𑀁𑀲𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸…𑀧𑁂… 𑀯𑀺𑀯𑀝𑀘𑁆𑀙𑀤𑁄𑀢𑀺 𑀲𑀩𑁆𑀩𑀁 𑀮𑀓𑁆𑀔𑀡𑀲𑀼𑀢𑁆𑀢𑀁, (𑀤𑀻. 𑀦𑀺. 𑁩.𑁧𑁯𑁯) 𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔𑀁.

‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁, 𑀅𑀜𑁆𑀜𑀁 𑀪𑀸𑀭𑀁 𑀅𑀦𑀸𑀤𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. (𑀲𑀁. 𑀦𑀺. 𑁩.𑁨𑁨);

𑀅𑀬𑀁 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄𑀢𑀺. (𑀫. 𑀦𑀺. 𑁨.𑁩𑁦𑁭; 𑀣𑁂𑀭𑀕𑀸. 𑁭𑁮𑁭-𑁭𑁮𑁮; 𑀧𑁂𑀝𑀓𑁄. 𑁨𑁩);

𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂𑀧𑀺 𑀦𑀬𑀸 𑀇𑀥 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀸𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺 𑀏𑀯. 𑀬𑀲𑁆𑀫𑀸 𑀧𑁂𑀝𑀓𑁂 (𑀧𑁂𑀝𑀓𑁄. 𑁨𑁨) ‘‘𑀢𑀢𑁆𑀣 ¶ 𑀓𑀢𑀫𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘? 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺 𑀕𑀸𑀣𑀸 (𑀲𑀁. 𑀦𑀺. 𑁧.𑁨𑁩), 𑀇𑀤𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘.

𑀢𑀢𑁆𑀣 ¶ 𑀓𑀢𑀫𑀁 𑀨𑀮𑀜𑁆𑀘 𑀆𑀡𑀢𑁆𑀢𑀺 𑀘?

‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄𑀢𑀺. (𑀉𑀤𑀸. 𑁪𑁪);

𑀇𑀤𑀁 𑀨𑀮𑀜𑁆𑀘 𑀆𑀡𑀢𑁆𑀢𑀺 𑀘.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄 𑀘 𑀆𑀡𑀢𑁆𑀢𑀺 𑀘?

‘‘𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸, 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸;

𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦, 𑀚𑀺𑀢𑀜𑁆𑀘 𑀭𑀓𑁆𑀔𑁂 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸’’𑀢𑀺. (𑀥. 𑀧. 𑁪𑁦);

𑀅𑀬𑀁 𑀉𑀧𑀸𑀬𑁄 𑀘 𑀆𑀡𑀢𑁆𑀢𑀺 𑀘. 𑀏𑀯𑀁 𑀨𑀮𑀸𑀤𑀻𑀦𑀁 𑀤𑀼𑀓𑀯𑀲𑁂𑀦𑀧𑀺 𑀉𑀤𑀸𑀳𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀬𑁄 𑀦𑀺𑀲𑁆𑀲𑀭𑀡𑀤𑁂𑀲𑀦𑀸𑀬 𑀯𑀺𑀦𑁂𑀢𑀩𑁆𑀩𑁄, 𑀲𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺𑀆𑀤𑀺𑀦𑀸 𑀬𑀣𑀸 𑀤𑁂𑀲𑀦𑀸𑀯𑀺𑀪𑀸𑀕𑁂𑀦 𑀧𑀼𑀕𑁆𑀕𑀮𑀯𑀺𑀪𑀸𑀕𑀲𑀺𑀤𑁆𑀥𑀺 𑀳𑁄𑀢𑀺, 𑀏𑀯𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀪𑀕𑀯𑀸 𑀦𑀺𑀲𑁆𑀲𑀭𑀡𑀁 𑀤𑁂𑀲𑁂𑀢𑀻𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑁄 𑀲𑀫𑁆𑀪𑀯𑀢𑀻𑀢𑀺 𑀲𑁄 𑀢𑀣𑀸 𑀤𑀲𑁆𑀲𑀺𑀢𑁄.

𑀏𑀯𑀁 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀢𑁂 𑀧𑀼𑀕𑁆𑀕𑀮𑁂 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀓𑀢𑁄 𑀯𑀺𑀪𑀸𑀕𑁄 𑀧𑀝𑀺𑀧𑀤𑀸𑀓𑀢𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺. 𑀢𑀸 𑀧𑀦𑁂𑀢𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁? 𑀲𑀫𑀣𑀧𑀓𑁆𑀔𑁂 𑀢𑀸𑀯 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀲𑀫𑀣𑀪𑀸𑀯𑀦𑀸 ‘‘𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘‘𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀸 ¶ 𑀧𑀦𑀸𑀬𑀁 𑀧𑀝𑀺𑀧𑀤𑀸 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀸 𑀳𑁄𑀢𑀺 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑀳𑀡𑀢𑀸𑀬 𑀓𑀺𑀘𑁆𑀙𑀸 𑀅𑀲𑀼𑀔𑀲𑁂𑀯𑀦𑀸𑀢𑀺 𑀅𑀢𑁆𑀣𑁄, 𑀏𑀓𑀘𑁆𑀘𑀲𑁆𑀲 𑀢𑀤𑀪𑀸𑀯𑁂𑀦 𑀲𑀼𑀔𑀸. 𑀅𑀪𑀺𑀜𑁆𑀜𑀸𑀧𑀺 𑀏𑀓𑀘𑁆𑀘𑀲𑁆𑀲 𑀤𑀦𑁆𑀥𑀸 𑀳𑁄𑀢𑀺 𑀫𑀦𑁆𑀤𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀔𑀺𑀧𑁆𑀧𑀸 𑀅𑀫𑀦𑁆𑀤𑀸 𑀲𑀻𑀖𑀧𑁆𑀧𑀯𑀢𑁆𑀢𑀺. 𑀢𑀲𑁆𑀫𑀸 𑀬𑁄 𑀆𑀤𑀺𑀢𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀬𑁄 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁄 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀁 ¶ 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀬𑁄 𑀔𑀺𑀧𑁆𑀧𑀁 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀬𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀼𑀔𑁂𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺.

𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑁂 𑀧𑀦 𑀬𑁄 𑀭𑀽𑀧𑀸𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀸𑀤𑀸𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀭𑀽𑀧𑀸𑀭𑀽𑀧𑀁 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀦𑀸𑀫 𑀳𑁄𑀢𑀺. 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀽𑀧𑀲𑁆𑀲 𑀧𑀦 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑁂 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀬𑁄𑀧𑀺 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀯𑀯𑀢𑁆𑀣𑀧𑀺𑀢𑁂 𑀘 𑀦𑀸𑀫𑀭𑀽𑀧𑁂 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀲𑀸𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀦𑀸𑀫𑀭𑀽𑀧𑀫𑁆𑀧𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀧𑀘𑁆𑀘𑀬𑁂 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 ¶ 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀧𑀘𑁆𑀘𑀬𑁂𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀧𑀝𑀺𑀯𑀺𑀤𑁆𑀥𑀮𑀓𑁆𑀔𑀡𑁄 𑀘 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺.

𑀅𑀧𑀭𑁄 𑀮𑀓𑁆𑀔𑀡𑀸𑀦𑀺𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀢𑀺𑀓𑁆𑀔𑁂 𑀲𑀽𑀭𑁂 𑀲𑀼𑀧𑁆𑀧𑀲𑀦𑁆𑀦𑁂 𑀯𑀳𑀦𑁆𑀢𑁂 𑀉𑀧𑁆𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀫𑀸𑀦𑁄 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀓𑀺𑀮𑀫𑀦𑁆𑀢𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀦𑀺𑀓𑀦𑁆𑀢𑀺𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀯𑀫𑁆𑀧𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀇𑀢𑀭𑀸𑀧𑀺 𑀢𑀺𑀲𑁆𑀲𑁄 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀓𑀸 𑀏𑀯 𑀧𑀦𑁂𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀤𑀝𑁆𑀞𑀩𑁆𑀩𑀸.

𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀘𑀢𑁆𑀢𑀸𑀭𑁄 𑀧𑀝𑀺𑀧𑀦𑁆𑀦𑀓𑀧𑀼𑀕𑁆𑀕𑀮𑀸. 𑀢𑀁 𑀧𑀦 𑀧𑀝𑀺𑀧𑀤𑀸𑀯𑀺𑀪𑀸𑀕𑀁 𑀲𑀤𑁆𑀥𑀺𑀁 𑀳𑁂𑀢𑀼𑀧𑀸𑀬𑀨𑀮𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀘𑀭𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸, 𑀯𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀁 𑀘𑀭𑀺𑀢𑀁 𑀏𑀢𑀲𑁆𑀲𑀸𑀢𑀺 𑀢𑀡𑁆𑀳𑀸𑀘𑀭𑀺𑀢𑁄, 𑀢𑀡𑁆𑀳𑀸𑀬 𑀯𑀸 𑀧𑀯𑀢𑁆𑀢𑀺𑀢𑁄 𑀘𑀭𑀺𑀢𑁄 𑀢𑀡𑁆𑀳𑀸𑀘𑀭𑀺𑀢𑁄, ¶ 𑀮𑁄𑀪𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀘𑀭𑀺𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁆𑀤𑁄𑀢𑀺 𑀫𑀦𑁆𑀤𑀺𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀫𑀦𑁆𑀤𑁄, 𑀫𑁄𑀳𑀸𑀥𑀺𑀓𑁄𑀢𑀺 𑀅𑀢𑁆𑀣𑁄.

𑀲𑀢𑀺𑀦𑁆𑀤𑁆𑀭𑀺𑀬𑁂𑀦𑀸𑀢𑀺 𑀲𑀢𑀺𑀬𑀸 𑀆𑀥𑀺𑀧𑀘𑁆𑀘𑀁 𑀓𑀼𑀭𑀼𑀫𑀸𑀦𑀸𑀬. 𑀲𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀳𑀺𑀲𑁆𑀲 𑀯𑀺𑀲𑀤𑀁 𑀳𑁄𑀢𑀺. 𑀬𑀲𑁆𑀫𑀸 𑀢𑀡𑁆𑀳𑀸𑀘𑀭𑀺𑀢𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀓𑁄𑀲𑀚𑁆𑀚𑀸𑀪𑀺𑀪𑀯𑁂𑀦 𑀦 𑀯𑀻𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀫𑁄𑀳𑀸𑀥𑀺𑀓𑀢𑀸𑀬 𑀦 𑀧𑀜𑁆𑀜𑀸 𑀩𑀮𑀯𑀢𑀻. 𑀢𑀤𑀼𑀪𑀬𑁂𑀦𑀸𑀧𑀺 𑀦 𑀲𑀫𑀸𑀥𑀺 𑀩𑀮𑀯𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀳𑀺𑀲𑁆𑀲 𑀯𑀺𑀲𑀤𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀻’’𑀢𑀺. 𑀢𑀡𑁆𑀳𑀸𑀘𑀭𑀺𑀢𑀢𑀸𑀬 𑀘𑀲𑁆𑀲 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁 𑀦 𑀲𑀼𑀓𑀭𑀦𑁆𑀢𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀅𑀯𑀺𑀲𑀤𑀜𑀸𑀡𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀬𑁆𑀬𑀸𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀕𑁆𑀕𑀘𑁆𑀙𑀢𑀺.

𑀉𑀤𑀢𑁆𑀣𑁄𑀢𑀺 𑀉𑀤𑀅𑀢𑁆𑀣𑁄, 𑀉𑀴𑀸𑀭𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀲𑀳𑀸𑀬𑀧𑀝𑀺𑀮𑀸𑀪𑁂𑀦 𑀘𑀲𑁆𑀲 𑀲𑀫𑀸𑀥𑀺 𑀢𑀺𑀓𑁆𑀔𑁄 𑀳𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀥𑀺𑀧𑀘𑁆𑀘𑀁 𑀧𑀯𑀢𑁆𑀢𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦𑀸’’𑀢𑀺. 𑀯𑀺𑀲𑀤𑀜𑀸𑀡𑀢𑁆𑀢𑀸 ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀧𑀥𑀸𑀦𑀢𑁆𑀢𑀸 𑀛𑀸𑀦𑀸𑀦𑀁 𑀛𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀫𑀕𑁆𑀕𑀫𑁆𑀧𑀺 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀢𑀢𑁆𑀣 𑀉𑀲𑁆𑀲𑀸𑀳𑀩𑀳𑀼𑀮𑀢𑁆𑀢𑀸 𑀯𑀻𑀭𑀺𑀬𑀸𑀥𑀺𑀓𑁄 𑀳𑁄𑀢𑀺. 𑀯𑀻𑀭𑀺𑀬𑀸𑀥𑀺𑀓𑀢𑀸𑀬𑁂𑀯 𑀘𑀲𑁆𑀲 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁 𑀲𑀼𑀓𑀭𑀦𑁆𑀢𑀺 𑀲𑀼𑀔𑀸 𑀧𑀝𑀺𑀧𑀤𑀸, 𑀅𑀯𑀺𑀲𑀤𑀜𑀸𑀡𑀢𑀸𑀬 𑀧𑀦 𑀤𑀦𑁆𑀥𑀸𑀪𑀺𑀜𑁆𑀜𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄’’𑀢𑀺𑀆𑀤𑀺𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀘𑁆𑀘𑁂𑀳𑀻𑀢𑀺 𑀅𑀭𑀺𑀬𑀲𑀘𑁆𑀘𑁂𑀳𑀺. 𑀅𑀭𑀺𑀬𑀲𑀘𑁆𑀘𑀸𑀦𑀺 𑀳𑀺 𑀮𑁄𑀓𑀺𑀬𑀸𑀦𑀺 𑀧𑀼𑀩𑁆𑀩𑀪𑀸𑀕𑀜𑀸𑀡𑀲𑁆𑀲 𑀲𑀫𑁆𑀫𑀲𑀦𑀝𑁆𑀞𑀸𑀦𑀢𑀸𑀬 𑀮𑁄𑀓𑀼𑀢𑁆𑀢𑀭𑀸𑀦𑀺 𑀅𑀥𑀺𑀫𑀼𑀘𑁆𑀘𑀦𑀢𑀸𑀬 𑀫𑀕𑁆𑀕𑀜𑀸𑀡𑀲𑁆𑀲 𑀅𑀪𑀺𑀲𑀫𑀬𑀝𑁆𑀞𑀸𑀦𑀢𑀸𑀬 𑀘 𑀦𑀺𑀲𑁆𑀲𑀬𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀣𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 ¶ 𑀦𑁂𑀬𑁆𑀬𑁄. 𑀇𑀢𑀭𑁂 𑀤𑁆𑀯𑁂𑀧𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀢𑀺 𑀏𑀯𑀁 𑀬𑁂𑀦 𑀯𑁂𑀦𑁂𑀬𑁆𑀬𑀢𑁆𑀢𑀬𑁂𑀦 𑀧𑀼𑀩𑁆𑀩𑁂 𑀤𑁂𑀲𑀦𑀸𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀢𑀤𑁂𑀯 𑀯𑁂𑀦𑁂𑀬𑁆𑀬𑀢𑁆𑀢𑀬𑀁 𑀇𑀫𑀺𑀦𑀸 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀢𑀁 𑀯𑁂𑀦𑁂𑀬𑁆𑀬𑀼𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀅𑀢𑁆𑀣𑀦𑀬𑀬𑁄𑀚𑀦𑀸𑀬 𑀯𑀺𑀲𑀬𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀬 𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑀡𑁆𑀳𑀸𑀘𑀭𑀺𑀢𑁄 𑀯𑀺𑀲𑀼𑀚𑁆𑀛𑀫𑀸𑀦𑁄 𑀲𑀫𑀸𑀥𑀺𑀫𑀼𑀔𑁂𑀦 𑀯𑀺𑀲𑀼𑀚𑁆𑀛𑀢𑀻𑀢𑀺 𑀆𑀳 ¶ 𑁋 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺. ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦; 𑀧𑀝𑀺. 𑀫. 𑁨.𑁧, 𑁩) 𑀯𑀘𑀦𑀢𑁄 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀺𑀢𑁂𑀦𑁂𑀯 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀦𑀺𑀬𑁆𑀬𑀸𑀦𑀁, 𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀏𑀯𑀸𑀢𑀺 𑀆𑀳 𑁋 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺. ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀻’’𑀢𑀺 𑀲𑀗𑁆𑀕𑀳𑁂𑀲𑀼 𑀯𑀼𑀢𑁆𑀢𑀁. 𑀇𑀥 𑀧𑀦 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀥𑀻𑀢𑀺 𑀯𑀓𑁆𑀔𑀢𑀺. 𑀲𑁄 𑀳𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻𑀢𑀺. 𑀢𑀢𑁆𑀣 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀲𑁄 𑀯𑀺𑀭𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀭𑀸𑀕𑀯𑀺𑀭𑀸𑀕𑀸, 𑀢𑀸𑀬 𑀭𑀸𑀕𑀯𑀺𑀭𑀸𑀕𑀸𑀬, 𑀭𑀸𑀕𑀧𑁆𑀧𑀳𑀸𑀬𑀺𑀓𑀸𑀬𑀸𑀢𑀺 𑀅𑀢𑁆𑀣𑁄.

𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀘𑁂𑀢𑁄𑀢𑀺 𑀘𑀺𑀢𑁆𑀢𑀁, 𑀢𑀤𑀧𑀤𑁂𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀯𑀼𑀘𑁆𑀘𑀢𑀺 ‘‘𑀬𑀣𑀸 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩). 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀢𑁂𑀦 𑀯𑀸 𑀯𑀺𑀫𑀼𑀢𑁆𑀢𑁄, 𑀢𑀢𑁄 𑀯𑀺𑀫𑀼𑀘𑁆𑀘𑀦𑀦𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺, 𑀲𑀫𑀸𑀥𑀺𑀬𑁂𑀯. 𑀬𑀣𑀸 𑀳𑀺 𑀮𑁄𑀓𑀺𑀬𑀓𑀣𑀸𑀬𑀁 𑀲𑀜𑁆𑀜𑀸 𑀘𑀺𑀢𑁆𑀢𑀜𑁆𑀘 𑀤𑁂𑀲𑀦𑀸𑀲𑀻𑀲𑀁. 𑀬𑀣𑀸𑀳 𑁋 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 (𑀤𑀻. 𑀦𑀺. 𑁩.𑁩𑁩𑁨, 𑁩𑁪𑁧, 𑁩𑁫𑁭; 𑀅. 𑀦𑀺. 𑁭.𑁪𑁪; 𑁯.𑁨𑁪) ‘‘𑀓𑀺𑀁 𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺 (𑀧𑀸𑀭𑀸. 𑁧𑁩𑁫) 𑀘, 𑀏𑀯𑀁 𑀮𑁄𑀓𑀼𑀢𑁆𑀢𑀭𑀓𑀣𑀸𑀬𑀁 𑀧𑀜𑁆𑀜𑀸 𑀲𑀫𑀸𑀥𑀺 𑀘. 𑀬𑀣𑀸𑀳 𑁋 ‘‘𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 (𑀯𑀺𑀪. 𑁮𑁦𑁪) 𑀘 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 𑀘. 𑀢𑁂𑀲𑀼 𑀇𑀥 𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁄 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀢𑀸𑀯𑀘𑀦𑀢𑁄 𑀘 𑀘𑁂𑀢𑁄𑀕𑁆𑀕𑀳𑀡𑁂𑀦 𑀲𑀫𑀸𑀥𑀺 𑀯𑀼𑀢𑁆𑀢𑁄. 𑀢𑀣𑀸 𑀯𑀺𑀫𑀼𑀢𑁆𑀢𑀺𑀯𑀘𑀦𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀬𑁂𑀯𑀸’’𑀢𑀺. 𑀘𑁂𑀢𑁄 𑀘 𑀢𑀁 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀣 𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲𑁂𑀯 𑀘𑁂𑀢𑀲𑁄 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀺 𑀯𑀺𑀫𑁄𑀓𑁆𑀔𑁄𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀘𑁂𑀢𑀲𑀺 𑀯𑀸 𑀨𑀮𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀯𑀺𑀫𑀼𑀢𑁆𑀢𑀻𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀘𑁂𑀢𑀲𑁄 𑀯𑀸 𑀨𑀮𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀺 𑀯𑀺𑀫𑁄𑀓𑁆𑀔𑁄 𑀏𑀢𑀲𑁆𑀫𑀺𑀦𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀲𑀫𑀸𑀥𑀺𑀬𑁂𑀯. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁 𑀦𑀬𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄.

𑀤𑀺𑀝𑁆𑀞𑀺𑀬𑀸 𑀲𑀯𑀺𑀲𑀬𑁂 𑀧𑀜𑁆𑀜𑀸𑀲𑀤𑀺𑀲𑀻 𑀧𑀯𑀢𑁆𑀢𑀻𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑁄 𑀯𑀺𑀲𑀼𑀚𑁆𑀛𑀫𑀸𑀦𑁄 𑀧𑀜𑁆𑀜𑀸𑀫𑀼𑀔𑁂𑀦 𑀯𑀺𑀲𑀼𑀚𑁆𑀛𑀢𑀻𑀢𑀺 𑀆𑀳 𑁋 ‘‘𑀉𑀪𑁄 𑀤𑀺𑀝𑁆𑀞𑀺𑀘𑀭𑀺𑀢𑀸 𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸 ¶ . 𑀲𑀫𑀣𑀕𑁆𑀕𑀳𑀡𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀢𑀡𑁆𑀳𑀁 𑀯𑀺𑀧𑀲𑁆𑀲𑀦𑀸𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀞𑀫𑀦𑀬𑀲𑁆𑀲 𑀪𑀽𑀫𑀺𑀁 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀲𑁆𑀲𑁂𑀢𑀼𑀦𑁆𑀢𑀺 𑀆𑀳 𑁋 ‘‘𑀬𑁂 𑀲𑀫𑀣…𑀧𑁂… 𑀳𑀸𑀢𑀩𑁆𑀩𑀸’’𑀢𑀺.

𑀢𑀢𑁆𑀣 ¶ 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸 𑀧𑀝𑀺𑀧𑀤𑀸𑀢𑀺 𑀧𑀼𑀭𑀺𑀫𑀸 𑀤𑁆𑀯𑁂 𑀧𑀝𑀺𑀧𑀤𑀸, 𑀇𑀢𑀭𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀳𑀸𑀢𑀩𑁆𑀩𑀸𑀢𑀺 𑀕𑀫𑁂𑀢𑀩𑁆𑀩𑀸, 𑀦𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀲𑀜𑁆𑀜𑀸𑀪𑀸𑀯𑀢𑁄 𑀤𑀼𑀓𑁆𑀔𑀲𑀜𑁆𑀜𑀸𑀧𑀭𑀺𑀯𑀸𑀭𑀢𑁆𑀢𑀸 𑀘 𑀅𑀲𑀼𑀪𑀲𑀜𑁆𑀜𑀸𑀬 𑀇𑀫𑀸 𑀘𑀢𑀲𑁆𑀲𑁄 𑀲𑀜𑁆𑀜𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀘 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸𑀢𑀺 𑀲𑀓𑀮𑀲𑁆𑀲 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑁆𑀲 𑀪𑀽𑀫𑀺𑀁 𑀲𑀼𑀔𑁂𑀦 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀆𑀳 𑁋 ‘‘𑀬𑁂 𑀯𑀺𑀧𑀲𑁆𑀲𑀦𑀸…𑀧𑁂… 𑀳𑀸𑀢𑀩𑁆𑀩𑀸’’𑀢𑀺.

𑁭. 𑀏𑀯𑀁 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀜𑀸𑀡𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀸 𑀪𑀕𑀯𑀢𑁄 𑀤𑁂𑀲𑀦𑀸 𑀬𑀸𑀯𑀤𑁂𑀯 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀢𑁆𑀣𑀸, 𑀯𑀺𑀦𑀬𑀦𑀜𑁆𑀘 𑀦𑁂𑀲𑀁 𑀲𑀼𑀢𑀫𑀬𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀧𑀜𑁆𑀜𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀦𑀁, 𑀬𑀣𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀪𑀸𑀯𑀯𑀺𑀪𑀸𑀯𑀦𑀜𑁆𑀘 𑀳𑀸𑀭𑀦𑀬𑀩𑁆𑀬𑀸𑀧𑀸𑀭𑁄, 𑀢𑀲𑁆𑀫𑀸 𑀇𑀫𑀲𑁆𑀲 𑀳𑀸𑀭𑀲𑁆𑀲 𑀲𑀫𑀼𑀝𑁆𑀞𑀺𑀢𑀧𑁆𑀧𑀓𑀸𑀭𑀁 𑀢𑀸𑀯 𑀧𑀼𑀘𑁆𑀙𑀺𑀢𑁆𑀯𑀸 𑀬𑁂𑀦 𑀧𑀼𑀕𑁆𑀕𑀮𑀯𑀺𑀪𑀸𑀕𑀤𑀲𑁆𑀲𑀦𑁂𑀦 𑀤𑁂𑀲𑀦𑀸𑀪𑀸𑀚𑀦𑀁 𑀯𑀺𑀪𑀚𑀺𑀢𑁆𑀯𑀸 𑀢𑀢𑁆𑀣 𑀤𑁂𑀲𑀦𑀸𑀬𑀁 𑀤𑁂𑀲𑀦𑀸𑀳𑀸𑀭𑀁 𑀦𑀺𑀬𑁄𑀚𑁂𑀢𑀼𑀓𑀸𑀫𑁄 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁆𑀯𑀸𑀬𑀁 𑀳𑀸𑀭𑁄 𑀓𑀢𑁆𑀣 𑀲𑀫𑁆𑀪𑀯𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀲𑁆𑀲𑀸𑀢𑀺 𑀬𑁄 𑀲𑁄 𑀅𑀝𑁆𑀞𑀳𑀺 𑀅𑀓𑁆𑀔𑀡𑁂𑀳𑀺 𑀯𑀺𑀫𑀼𑀢𑁆𑀢𑁄 𑀲𑁄𑀢𑀸𑀯𑀥𑀸𑀦𑀧𑀭𑀺𑀬𑁄𑀲𑀸𑀦𑀸𑀳𑀺 𑀘 𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑀦𑁆𑀦𑀸𑀕𑀢𑁄 𑀬𑀲𑁆𑀲. 𑀲𑀢𑁆𑀣𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀢𑀁 𑀥𑀫𑁆𑀫𑀁. 𑀤𑁂𑀲𑀬𑀢𑀻𑀢𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀳𑀺 𑀪𑀸𑀲𑀢𑀺 𑀓𑀣𑁂𑀢𑀺. 𑀅𑀜𑁆𑀜𑀢𑀭𑁄𑀢𑀺 𑀪𑀕𑀯𑀢𑁄 𑀲𑀸𑀯𑀓𑁂𑀲𑀼 𑀅𑀜𑁆𑀜𑀢𑀭𑁄. 𑀕𑀭𑀼𑀝𑁆𑀞𑀸𑀦𑀻𑀬𑁄𑀢𑀺 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀕𑀭𑀼𑀓𑀭𑀡𑀻𑀬𑁄. 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀩𑁆𑀭𑀳𑁆𑀫𑀁 𑀯𑀼𑀘𑁆𑀘𑀢𑀺 𑀲𑁂𑀝𑁆𑀞𑀝𑁆𑀞𑁂𑀦 𑀲𑀓𑀮𑀁 𑀲𑀢𑁆𑀣𑀼𑀲𑀸𑀲𑀦𑀁. 𑀲𑀫𑀁 𑀲𑀳 𑀯𑀸 𑀩𑁆𑀭𑀳𑁆𑀫𑀁 𑀘𑀭𑀢𑀺 𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻. 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸 𑀬𑁄 𑀏𑀯𑀭𑀽𑀧𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸’’𑀢𑀺 𑀢𑀣𑀸𑀕𑀢𑁂, ‘‘𑀲𑁆𑀯𑀸𑀓𑁆𑀔𑀸𑀢𑁄 𑀯𑀢𑀸𑀬𑀁 𑀥𑀫𑁆𑀫𑁄 𑀬𑁄 𑀏𑀯𑀁 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑁄 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑁂 𑀘 𑀲𑀤𑁆𑀥𑀁 𑀮𑀪𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀲𑀼𑀢𑁂 𑀬𑀣𑀸𑀧𑀭𑀺𑀬𑀢𑁆𑀢𑁂 𑀥𑀫𑁆𑀫𑁂. 𑀯𑀻𑀫𑀁𑀲𑀸𑀢𑀺 𑀧𑀸𑀴𑀺𑀬𑀸 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀯𑀻𑀫𑀁𑀲𑀦𑀧𑀜𑁆𑀜𑀸 ¶ . 𑀲𑁂𑀲𑀁 𑀢𑀲𑁆𑀲𑀸 𑀏𑀯 𑀯𑁂𑀯𑀘𑀦𑀁. 𑀲𑀸 𑀳𑀺 𑀬𑀣𑀸𑀯𑀼𑀢𑁆𑀢𑀯𑀻𑀫𑀁𑀲𑀦𑁂 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀉𑀲𑁆𑀲𑀳𑀦𑀯𑀲𑁂𑀦 𑀉𑀲𑁆𑀲𑀸𑀳𑀦𑀸, 𑀢𑀼𑀮𑀦𑀯𑀲𑁂𑀦 𑀢𑀼𑀮𑀦𑀸, 𑀉𑀧𑀧𑀭𑀺𑀓𑁆𑀔𑀡𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀸𑀢𑀺 𑀘 𑀯𑀼𑀢𑁆𑀢𑀸. 𑀅𑀣 𑀯𑀸 ¶ 𑀯𑀻𑀫𑀁𑀲𑀢𑀻𑀢𑀺 𑀯𑀻𑀫𑀁𑀲𑀸, 𑀲𑀸 𑀧𑀤𑀧𑀤𑀢𑁆𑀣𑀯𑀺𑀘𑀸𑀭𑀡𑀸 𑀧𑀜𑁆𑀜𑀸. 𑀉𑀲𑁆𑀲𑀸𑀳𑀦𑀸𑀢𑀺 𑀯𑀻𑀭𑀺𑀬𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀸 𑀥𑀫𑁆𑀫𑀲𑁆𑀲 𑀥𑀸𑀭𑀡𑀧𑀭𑀺𑀘𑀬𑀲𑀸𑀥𑀺𑀓𑀸 𑀧𑀜𑁆𑀜𑀸. 𑀢𑀼𑀮𑀦𑀸𑀢𑀺 𑀧𑀤𑁂𑀦 𑀧𑀤𑀦𑁆𑀢𑀭𑀁, 𑀤𑁂𑀲𑀦𑀸𑀬 𑀯𑀸 𑀤𑁂𑀲𑀦𑀦𑁆𑀢𑀭𑀁 𑀢𑀼𑀮𑀬𑀺𑀢𑁆𑀯𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀕𑀳𑀡𑀧𑀜𑁆𑀜𑀸. 𑀉𑀧𑀧𑀭𑀺𑀓𑁆𑀔𑀸𑀢𑀺 𑀫𑀳𑀸𑀧𑀤𑁂𑀲𑁂 𑀑𑀢𑀸𑀭𑁂𑀢𑁆𑀯𑀸 𑀧𑀸𑀴𑀺𑀬𑀸 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀉𑀧𑀧𑀭𑀺𑀓𑁆𑀔𑀡𑀧𑀜𑁆𑀜𑀸. 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀜𑁆𑀘 𑀆𑀓𑀗𑁆𑀔𑀦𑁆𑀢𑁂𑀳𑀺 𑀲𑀼𑀬𑁆𑀬𑀢𑀻𑀢𑀺 𑀲𑀼𑀢𑀁, 𑀓𑀸𑀮𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄, 𑀬𑀣𑀸 𑀤𑀼𑀤𑁆𑀥𑀦𑁆𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀥𑀺𑀓𑀸𑀭𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 𑀲𑀯𑀦𑀁 𑀲𑀼𑀢𑀁, 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀉𑀧𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀢𑁂𑀦 𑀳𑁂𑀢𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀲𑀼𑀢𑀫𑀬𑀻. 𑀧𑀓𑀸𑀭𑁂𑀦 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀬𑀸 𑀯𑀻𑀫𑀁𑀲𑀸, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸𑀢𑀺 𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸𑀢𑀺 𑀬𑀣𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀯𑀻𑀫𑀁𑀲𑀸𑀤𑀺𑀧𑀭𑀺𑀬𑀸𑀬𑀯𑀢𑀻 𑀯𑀻𑀫𑀁𑀲𑀸𑀤𑀺𑀯𑀺𑀪𑀸𑀕𑀯𑀢𑀻 𑀘, 𑀢𑀣𑀸 𑀘𑀺𑀦𑁆𑀢𑀸𑀫𑀬𑀻 𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀲𑀼𑀢𑀫𑀬𑀻 𑀑𑀭𑀫𑀢𑁆𑀢𑀺𑀓𑀸 𑀅𑀦𑀯𑀝𑁆𑀞𑀺𑀢𑀸 𑀘, 𑀏𑀯𑀁 𑀘𑀺𑀦𑁆𑀢𑀸𑀫𑀬𑀻 𑀘𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀢𑁂𑀦 𑀦𑀺𑀲𑁆𑀲𑀬𑁂𑀦𑀸𑀢𑀺 𑀲𑀼𑀢𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀸 𑀉𑀧𑀦𑀺𑀲𑁆𑀲𑀬𑁂𑀦 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁, 𑀬𑀣𑀸𑀯𑀼𑀢𑁆𑀢𑀁 𑀲𑀼𑀢𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀸𑀢𑀺𑀆𑀤𑀻𑀲𑀼 ‘‘𑀇𑀤𑀁 𑀲𑀻𑀮𑀁, 𑀅𑀬𑀁 𑀲𑀫𑀸𑀥𑀺, 𑀇𑀫𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸, 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀻𑀫𑀁𑀲𑀦𑀪𑀽𑀢𑀸 𑀧𑀜𑁆𑀜𑀸 𑀯𑀻𑀫𑀁𑀲𑀸. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀯𑀘𑀦𑀢𑁆𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀲𑁆𑀲 𑀢𑀼𑀮𑀬𑀺𑀢𑁆𑀯𑀸 𑀯𑀺𑀬 𑀕𑀳𑀡𑀧𑀜𑁆𑀜𑀸 𑀢𑀼𑀮𑀦𑀸. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀤𑀺𑀭𑀼𑀧𑁆𑀧𑀦𑀲𑀧𑁆𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂 𑀘 𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸 𑀘 𑀉𑀧𑀧𑀭𑀺𑀓𑁆𑀔𑀡𑀧𑀜𑁆𑀜𑀸 𑀉𑀧𑀧𑀭𑀺𑀓𑁆𑀔𑀸, 𑀢𑀣𑀸 𑀉𑀧𑀧𑀭𑀺𑀓𑁆𑀔𑀺𑀢𑁂 𑀥𑀫𑁆𑀫𑁂 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑁂 𑀏𑀯𑀫𑁂𑀢𑁂𑀳𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑁂 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀡𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀡𑀸. 𑀏𑀢𑁆𑀣 𑀘 𑀬𑀣𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀬𑀣𑀸𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀸𑀭𑀡𑀧𑀭𑀺𑀘𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀉𑀲𑁆𑀲𑀸𑀳𑀚𑀸𑀢𑀸 ‘‘𑀉𑀲𑁆𑀲𑀸𑀳𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀏𑀯𑀁 𑀘𑀺𑀦𑁆𑀢𑀸𑀫𑀬𑀻𑀢𑀺 𑀇𑀥 ‘‘𑀉𑀲𑁆𑀲𑀸𑀳𑀦𑀸’’𑀢𑀺 𑀧𑀤𑀁 𑀦 𑀯𑀼𑀢𑁆𑀢𑀁. 𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑀸, 𑀦𑀺𑀚𑁆𑀛𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀫𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀺 𑀓𑀸𑀭𑀡𑀪𑀽𑀢𑀸𑀳𑀺. 𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀲𑀼 𑀳𑀺 𑀧𑀢𑀺𑀝𑁆𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀻𑀢𑀺. ‘‘𑀇𑀫𑀸𑀲𑀼 𑀤𑁆𑀯𑀻𑀲𑀼 𑀧𑀜𑁆𑀜𑀸𑀲𑀽’’𑀢𑀺𑀧𑀺 𑀧𑀞𑀦𑁆𑀢𑀺. ‘‘𑀢𑁂𑀳𑀺 𑀚𑀸𑀢𑀸𑀲𑀼 𑀉𑀧𑁆𑀧𑀦𑁆𑀦𑀸𑀲𑀽’’𑀢𑀺 𑀯𑀸 𑀯𑀘𑀦𑀲𑁂𑀲𑁄 ¶ 𑀬𑁄𑀚𑁂𑀢𑀩𑁆𑀩𑁄. 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸𑀢𑀺 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀫𑀦𑀲𑀺𑀓𑀸𑀭𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲. 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀫𑀦𑀲𑀺𑀓𑀸𑀭𑀧𑁆𑀧𑀬𑁄𑀕𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀦𑀁 ¶ 𑀲𑀫𑁆𑀧 𑀆𑀤𑀦𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀦𑁆𑀢𑀲𑁆𑀲 𑀬𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀦 𑀤𑀲𑁆𑀲𑀦𑀁 𑀪𑀸𑀯𑀦𑀸𑀢𑀺 𑀤𑀼𑀯𑀺𑀥𑀦𑁆𑀢𑀺 𑀆𑀳 𑁋 ‘‘𑀤𑀲𑁆𑀲𑀦𑀪𑀽𑀫𑀺𑀬𑀁 𑀯𑀸 𑀪𑀸𑀯𑀦𑀸𑀪𑀽𑀫𑀺𑀬𑀁 𑀯𑀸’’𑀢𑀺. 𑀬𑀤𑀺 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀣𑀁 𑀢𑀢𑁆𑀣 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀻𑀢𑀺? 𑀪𑀸𑀯𑀦𑀸𑀫𑀬𑀫𑁂𑀯 𑀳𑀺 𑀢𑀁 𑀜𑀸𑀡𑀁, 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 𑀧𑀦 ‘‘𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀨𑀮𑁄 𑀧𑀞𑀫𑀫𑀕𑁆𑀕𑁄 𑀤𑀲𑁆𑀲𑀦𑀪𑀽𑀫𑀺. 𑀲𑁂𑀲𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑀸 𑀪𑀸𑀯𑀦𑀸𑀪𑀽𑀫𑀺.

𑁮. 𑀇𑀤𑀸𑀦𑀺 𑀇𑀫𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀢𑁄𑀖𑁄𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀢𑁄𑀢𑀺 𑀦 𑀅𑀢𑁆𑀢𑀢𑁄, 𑀅𑀜𑁆𑀜𑀢𑁄 𑀲𑀢𑁆𑀣𑀼𑀢𑁄 𑀲𑀸𑀯𑀓𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀖𑁄𑀲𑀸𑀢𑀺 𑀢𑁂𑀲𑀁 𑀤𑁂𑀲𑀦𑀸𑀖𑁄𑀲𑀢𑁄, 𑀤𑁂𑀲𑀦𑀸𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀭𑀢𑁄 𑀖𑁄𑀲𑁄 𑀏𑀢𑀺𑀲𑁆𑀲𑀸𑀢𑀺 𑀧𑀭𑀢𑁄𑀖𑁄𑀲𑀸, 𑀬𑀸 𑀧𑀜𑁆𑀜𑀸, 𑀲𑀸 𑀲𑀼𑀢𑀫𑀬𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀢𑀺 𑀧𑀘𑁆𑀘𑀢𑁆𑀢𑀁 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀧𑀭𑀺𑀕𑁆𑀕𑀡𑁆𑀳𑀦𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀉𑀧𑀸𑀬𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀸. 𑀧𑀭𑀢𑁄 𑀘 𑀖𑁄𑀲𑁂𑀦𑀸𑀢𑀺 𑀧𑀭𑀢𑁄𑀖𑁄𑀲𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀇𑀫𑀸 𑀧𑀜𑁆𑀜𑀸 𑀉𑀤𑁆𑀥𑀝𑀸, 𑀢𑀫𑁂𑀯 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀸 𑀤𑁆𑀯𑁂𑀢𑀺 𑀕𑀡𑀦𑀯𑀲𑁂𑀦 𑀯𑀢𑁆𑀯𑀸 𑀧𑀼𑀦 𑀢𑀸 𑀲𑀼𑀢𑀫𑀬𑀻 𑀘𑀺𑀦𑁆𑀢𑀸𑀫𑀬𑀻 𑀘𑀸𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀅𑀬𑀁 𑀲𑀼𑀢𑀫𑀬𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀳𑀺 𑀆𑀲𑀬𑀧𑀬𑁄𑀕𑀧𑀩𑁄𑀥𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀚𑀸𑀦𑀦𑀢𑁄 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀢𑀺 𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀦 𑀆𑀲𑀬𑀲𑁆𑀲 𑀅𑀧𑀭𑀺𑀓𑁆𑀔𑀢𑀢𑁆𑀢𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂𑀳𑀺 𑀚𑀸𑀦𑀦𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀅𑀬𑀁 𑀦𑁂𑀬𑁆𑀬𑁄𑀢𑀺 𑀲𑀼𑀢𑀫𑀬𑀜𑀸𑀡𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀦𑀺𑀭𑀯𑀲𑁂𑀲𑀁 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 𑀦𑁂𑀢𑀩𑁆𑀩𑀢𑁄 𑀦𑁂𑀬𑁆𑀬𑁄.

𑁯. 𑀏𑀯𑀁 𑀤𑁂𑀲𑀦𑀸𑀧𑀝𑀺𑀧𑀤𑀸𑀜𑀸𑀡𑀯𑀺𑀪𑀸𑀕𑁂𑀳𑀺 𑀤𑁂𑀲𑀦𑀸𑀪𑀸𑀚𑀦𑀁 𑀯𑁂𑀦𑁂𑀬𑁆𑀬𑀢𑁆𑀢𑀬𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀯𑀢𑁆𑀢𑀺𑀢𑀸𑀬 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀤𑁂𑀲𑀦𑀸𑀳𑀸𑀭𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀼𑀁 ‘‘𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 ¶ 𑀲𑀸𑀬𑀦𑁆𑀢𑀺 𑀲𑀸 𑀅𑀬𑀁. 𑀬𑀸 𑀧𑀼𑀩𑁆𑀩𑁂 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁫) 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑀲𑁆𑀲 𑀆𑀤𑀺𑀢𑁄 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀦𑀺𑀓𑁆𑀔𑀺𑀢𑁆𑀢𑀸 𑀧𑀸𑀴𑀺, 𑀢𑀫𑁂𑀯𑁂𑀢𑁆𑀣 𑀤𑁂𑀲𑀦𑀸𑀳𑀸𑀭𑀁 𑀦𑀺𑀬𑁄𑀚𑁂𑀢𑀼𑀁 ‘‘𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀧𑀘𑁆𑀘𑀸𑀫𑀲𑀢𑀺. 𑀓𑀺𑀁 𑀤𑁂𑀲𑀬𑀢𑀻𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 ¶ 𑀤𑁂𑀲𑀦𑀸𑀬 𑀧𑀺𑀡𑁆𑀟𑀢𑁆𑀣𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀕𑀡𑀦𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀢𑀺 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺. 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀦𑀢𑁆𑀣𑀻𑀢𑀺. 𑀢𑀲𑁆𑀲𑀸 𑀘 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀺𑀡𑁆𑀟𑀢𑁆𑀣𑁄. 𑀧𑀯𑀢𑁆𑀢𑀺𑀧𑀯𑀢𑁆𑀢𑀓𑀦𑀺𑀯𑀢𑁆𑀢𑀺𑀢𑀤𑀼𑀧𑀸𑀬𑀯𑀺𑀫𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀘𑀢𑁆𑀢𑀸𑀭𑀺 𑀅𑀯𑀺𑀧𑀭𑀻𑀢𑀪𑀸𑀯𑁂𑀦 𑀲𑀘𑁆𑀘𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀦𑀺 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕’’𑀦𑁆𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀅𑀦𑁂𑀓𑀼𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀓𑀼𑀘𑁆𑀙𑀺𑀢𑀢𑁆𑀢𑀸 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀪𑀸𑀯𑀯𑀺𑀭𑀳𑁂𑀦 𑀢𑀼𑀘𑁆𑀙𑀢𑁆𑀢𑀸 𑀘 𑀤𑀼𑀓𑁆𑀔𑀁. 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀲𑀫𑀼𑀤𑀬𑁄. 𑀲𑀩𑁆𑀩𑀕𑀢𑀺𑀲𑀼𑀜𑁆𑀜𑀢𑁆𑀢𑀸 𑀦𑀢𑁆𑀣𑀺 𑀏𑀢𑁆𑀣 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑁄 𑀤𑀼𑀓𑁆𑀔𑀭𑁄𑀥𑁄, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀲𑀁𑀲𑀸𑀭𑀘𑀸𑀭𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀭𑁄𑀥𑀲𑁆𑀲 𑀅𑀪𑀸𑀯𑁄𑀢𑀺𑀧𑀺 𑀦𑀺𑀭𑁄𑀥𑁄, 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀯𑀸. 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀬𑀢𑀻𑀢𑀺 𑀯𑀸 𑀫𑀕𑁆𑀕𑁄. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁. 𑀏𑀯𑀁 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀭𑀽𑀧𑀢𑁄 𑀆𑀕𑀢𑀸𑀦𑀺, 𑀢𑀢𑁆𑀣 𑀬𑀣𑀸𑀭𑀼𑀢𑀯𑀲𑁂𑀦. 𑀬𑀢𑁆𑀣 𑀧𑀦 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀭𑀽𑀧𑀢𑁄 𑀦 𑀆𑀕𑀢𑀸𑀦𑀺, 𑀢𑀢𑁆𑀣 𑀅𑀢𑁆𑀣𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀅𑀲𑁆𑀲𑀸𑀤𑀸𑀤𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀬𑀢𑁆𑀣 𑀘 𑀅𑀲𑁆𑀲𑀸𑀤𑀸𑀤𑀬𑁄 𑀲𑀭𑀽𑀧𑀢𑁄 𑀆𑀕𑀢𑀸, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀦 𑀆𑀕𑀢𑀸, 𑀢𑀢𑁆𑀣 𑀅𑀢𑁆𑀣𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺. 𑀇𑀥 𑀧𑀦 𑀅𑀲𑁆𑀲𑀸𑀤𑀸𑀤𑀬𑁄 𑀉𑀤𑀸𑀳𑀭𑀡𑀯𑀲𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀸𑀢𑀺 𑀢𑁂𑀳𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀆𑀤𑀻𑀦𑀯𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁨𑁦; 𑁩.𑁩𑁭𑁩; 𑀯𑀺𑀪. 𑁨𑁦𑁨) 𑀯𑀘𑀦𑀢𑁄 𑀢𑀡𑁆𑀳𑀸𑀯𑀚𑁆𑀚𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂 𑀘 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀢𑁆𑀢𑀸 𑀆𑀤𑀻𑀦𑀯𑁄, 𑀨𑀮𑀜𑁆𑀘 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀮𑁄𑀓𑀺𑀬𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀨𑀮𑀜𑁆𑀘 𑀤𑀼𑀓𑁆𑀔’’𑀦𑁆𑀢𑀺. 𑀅𑀲𑁆𑀲𑀸𑀤𑁄𑀢𑀺 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑀸𑀦𑀫𑁆𑀧𑀺 𑀇𑀘𑁆𑀙𑀺𑀢𑀢𑁆𑀢𑀸 𑀢𑁂 𑀲𑀦𑁆𑀥𑀸𑀬 ‘‘𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑁄’’𑀢𑀺 𑀯𑀼𑀢𑁆𑀢𑀁. 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄 𑀤𑁂𑀲𑀦𑀸 𑀘 ¶ 𑀤𑁂𑀲𑀦𑀸𑀨𑀮𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑁄𑀢𑀺 𑀓𑀢𑁆𑀯𑀸 ‘‘𑀉𑀧𑀸𑀬𑁄 𑀆𑀡𑀢𑁆𑀢𑀺 𑀘 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀭𑀡𑀧𑀤𑁂 𑀘𑀸𑀧𑀺 𑀅𑀭𑀺𑀬𑀫𑀕𑁆𑀕𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄, 𑀦 𑀘𑀸𑀬𑀁 𑀲𑀘𑁆𑀘𑀯𑀺𑀪𑀸𑀕𑁄 𑀆𑀓𑀼𑀮𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀳𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁦𑁮) ‘‘𑀢𑀡𑁆𑀳𑀸 𑀅𑀯𑀲𑀺𑀝𑁆𑀞𑀸 𑀓𑀺𑀮𑁂𑀲𑀸 𑀅𑀯𑀲𑀺𑀝𑁆𑀞𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀲𑀯𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀯𑀺𑀪𑀢𑁆𑀢𑀸’’𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀬𑁂 𑀢𑀁𑀢𑀁𑀅𑀯𑀲𑀺𑀝𑁆𑀞𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑁂𑀦 𑀯𑀺𑀪𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀦𑀺𑀕𑀫𑀦𑀁 ¶ . 𑀇𑀤𑀁 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀬𑀸𑀬𑀁 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀯𑀲𑁂𑀦 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀇𑀤𑀁 𑀥𑀫𑁆𑀫𑀘𑀓𑁆𑀓𑀁.

𑀇𑀤𑀸𑀦𑀺 𑀢𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀥𑀫𑁆𑀫𑀘𑀓𑁆𑀓𑀪𑀸𑀯𑀁 𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀲𑁂𑀦 (𑀫. 𑀦𑀺. 𑁩.𑁩𑁭𑁧 𑀆𑀤𑀬𑁄) 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀇𑀤𑀁 𑀚𑀸𑀢𑀺𑀆𑀤𑀺𑀯𑀺𑀪𑀸𑀕𑀁 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀕𑀳𑀁 𑀢𑀡𑁆𑀳𑀸𑀯𑀚𑁆𑀚𑀁 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀸𑀯𑁂𑀦 𑀘 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀢𑀺 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀩𑀸𑀭𑀸𑀡𑀲𑀺𑀬𑀦𑁆𑀢𑀺 𑀩𑀸𑀭𑀸𑀡𑀲𑀻𑀦𑀸𑀫𑀓𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂. 𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀻𑀦𑀁 𑀆𑀓𑀸𑀲𑀢𑁄 𑀑𑀢𑀭𑀡𑀝𑁆𑀞𑀸𑀦𑀢𑀸𑀬 𑀇𑀲𑀺𑀧𑀢𑀦𑀁. 𑀫𑀺𑀕𑀸𑀦𑀁 𑀢𑀢𑁆𑀣 𑀅𑀪𑀬𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑁂 𑀅𑀲𑁆𑀲𑀫𑁂. 𑀉𑀢𑁆𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀺, 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀉𑀢𑁆𑀢𑀭𑀁, 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁. 𑀅𑀦𑀢𑀺𑀲𑀬𑀁 𑀅𑀧𑁆𑀧𑀝𑀺𑀪𑀸𑀕𑀁 𑀯𑀸. 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀅𑀦𑁂𑀓𑀸𑀲𑀼 𑀤𑁂𑀯𑀫𑀦𑀼𑀲𑁆𑀲𑀧𑀭𑀺𑀲𑀸𑀲𑀼 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀢𑁂𑀲𑀁 𑀅𑀭𑀺𑀬𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑀣𑀸𑀧𑀺 𑀲𑀩𑁆𑀩𑀧𑀞𑀫𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸𑀬 𑀅𑀝𑁆𑀞𑀸𑀭𑀲𑀧𑀭𑀺𑀫𑀸𑀡𑀸𑀬 𑀩𑁆𑀭𑀳𑁆𑀫𑀓𑁄𑀝𑀺𑀬𑀸 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀯𑀺𑀪𑀸𑀯𑀦𑀻𑀬𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀲𑁆𑀲𑀸 𑀲𑀸𑀢𑀺𑀲𑀬𑀸 𑀥𑀫𑁆𑀫𑀘𑀓𑁆𑀓𑀲𑀫𑀜𑁆𑀜𑀸𑀢𑀺 ‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑁄 𑀏𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀦𑁆𑀢𑀺 𑀯𑀸 𑀆𑀡𑀸. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 𑁋 ‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁧-𑁪𑁨). 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀢𑁄 𑀥𑀫𑁆𑀫𑀘𑀓𑁆𑀓𑀲𑁆𑀲 𑀘 𑀅𑀦𑀼𑀢𑁆𑀢𑀭𑀪𑀸𑀯𑀢𑁄 𑀅𑀧𑁆𑀧𑀝𑀺𑀲𑁂𑀥𑀦𑀻𑀬𑀁. 𑀓𑁂𑀦 𑀧𑀦 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀆𑀳 ‘‘𑀲𑀫𑀡𑁂𑀦 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀫𑀡𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁂𑀦. 𑀩𑁆𑀭𑀸𑀳𑁆𑀫𑀡𑁂𑀦𑀸𑀢𑀺 ¶ 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂𑀦. 𑀧𑀭𑀫𑀢𑁆𑀣𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀳𑀺 𑀧𑀝𑀺𑀮𑁄𑀫𑀦𑀘𑀺𑀢𑁆𑀢𑀁𑀬𑁂𑀯 𑀦𑀢𑁆𑀣𑀺. 𑀤𑁂𑀯𑁂𑀦𑀸𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑁂𑀦. 𑀓𑁂𑀦𑀘𑀻𑀢𑀺 𑀬𑁂𑀦 𑀓𑁂𑀦𑀘𑀺 𑀅𑀯𑀲𑀺𑀝𑁆𑀞𑀧𑀸𑀭𑀺𑀲𑀚𑁆𑀚𑁂𑀦. 𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂.

𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀸𑀬𑀁. 𑀅𑀧𑀭𑀺𑀫𑀸𑀡𑀸 𑀧𑀤𑀸, 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀤𑀲𑀗𑁆𑀕𑀳𑀺𑀢𑀸𑀦𑀺 𑀅𑀓𑁆𑀔𑀭𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀧𑀤𑀸 𑀅𑀓𑁆𑀔𑀭𑀸 𑀩𑁆𑀬𑀜𑁆𑀚𑀦𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀣𑀲𑁆𑀲𑀸𑀢𑀺 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀲𑀗𑁆𑀓𑀸𑀲𑀦𑀸𑀢𑀺 𑀲𑀗𑁆𑀓𑀸𑀲𑀺𑀢𑀩𑁆𑀩𑀸𑀓𑀸𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀢𑁆𑀣𑀲𑁆𑀲𑀸𑀢𑀺 𑀘 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀇𑀢𑀺𑀧𑀺𑀤𑀦𑁆𑀢𑀺 ¶ 𑀇𑀢𑀻𑀢𑀺 𑀧𑀓𑀸𑀭𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀇𑀫𑀺𑀦𑀸𑀧𑀺 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀚𑀸𑀢𑀺𑀆𑀤𑀺𑀪𑁂𑀤𑁂𑀦 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀅𑀦𑁂𑀓𑀪𑁂𑀤𑀢𑀁 𑀢𑀁𑀤𑀻𑀧𑀓𑀸𑀦𑀁 𑀅𑀓𑁆𑀔𑀭𑀧𑀤𑀸𑀤𑀻𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀧𑀭𑀺𑀫𑀸𑀡𑀢𑀜𑁆𑀘 𑀲𑀫𑀢𑁆𑀣𑁂𑀢𑀺.

𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀅𑀬𑀁 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀡𑁆𑀳𑀸𑀯𑀝𑁆𑀝𑀲𑁆𑀲 𑀫𑀽𑀮𑀪𑀽𑀢𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀅𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀸 𑀅𑀲𑀗𑁆𑀔𑀢𑀥𑀸𑀢𑀼 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀅𑀝𑁆𑀞𑀗𑁆𑀕𑀲𑀫𑀽𑀳𑁄 𑀤𑀼𑀓𑁆𑀔𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀪𑀺𑀫𑀼𑀔𑀻𑀪𑀽𑀢𑀢𑁆𑀢𑀸 𑀧𑀝𑀺𑀧𑀤𑀸 𑀘 𑀳𑁄𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀧𑁆𑀧𑀢𑁆𑀢𑀺𑀬𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀇𑀢𑀺𑀧𑀺𑀤𑀦𑁆𑀢𑀺 𑀧𑀤𑀲𑁆𑀲 𑀧𑀦 𑀲𑀫𑀼𑀤𑀬𑀲𑀘𑁆𑀘𑁂 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀳𑀺, 𑀦𑀺𑀭𑁄𑀥𑀲𑀘𑁆𑀘𑁂 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀳𑀺, 𑀫𑀕𑁆𑀕𑀲𑀘𑁆𑀘𑁂 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀅𑀢𑁆𑀣𑁄 𑀯𑀺𑀪𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢’’𑀦𑁆𑀢𑀺 𑀕𑀸𑀣𑀸𑀬 𑀲𑀓𑀮𑀲𑁆𑀲 𑀲𑀸𑀲𑀦𑀲𑁆𑀲 𑀙𑀦𑁆𑀦𑀁 𑀅𑀢𑁆𑀣𑀧𑀤𑀸𑀦𑀁 𑀙𑀦𑁆𑀦𑀜𑁆𑀘 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀯𑀲𑁂𑀦 𑀬𑀸 𑀤𑁆𑀯𑀸𑀤𑀲𑀧𑀤𑀢𑀸 𑀯𑀼𑀢𑁆𑀢𑀸, 𑀢𑀫𑁂𑀯 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀯𑀲𑁂𑀦 𑀙𑀙𑀓𑁆𑀓𑀧𑀭𑀺𑀬𑀸𑀬𑀁 (𑀫. 𑀦𑀺. 𑁩.𑁪𑁨𑁦 𑀆𑀤𑀬𑁄) 𑀏𑀓𑀤𑁂𑀲𑁂𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀢𑀤𑀢𑁆𑀣𑀲𑁆𑀲 𑀲𑀗𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀲𑀩𑁆𑀩𑀲𑁆𑀲𑀸𑀧𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀪𑀸𑀯𑀁 𑀢𑀤𑀢𑁆𑀣𑀲𑁆𑀲 𑀘 𑀘𑀢𑀼𑀲𑀘𑁆𑀘𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 ¶ 𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁭𑁧 𑀆𑀤𑀬𑁄) 𑀉𑀤𑁆𑀤𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸’’𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀸𑀦𑀺 𑀯𑀺𑀪𑀚𑀦𑁆𑀢𑁄 𑀤𑁆𑀯𑀸𑀤𑀲𑀧𑀤𑀪𑀸𑀯𑀁 𑀤𑀻𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀧𑀤𑀸𑀯𑀬𑀯𑀕𑁆𑀕𑀳𑀡𑀫𑀼𑀔𑁂𑀦 𑀧𑀤𑀕𑁆𑀕𑀳𑀡𑀁, 𑀕𑀳𑀺𑀢𑁂 𑀘 𑀧𑀤𑁂 𑀧𑀤𑀢𑁆𑀣𑀸𑀯𑀩𑁄𑀥𑁄 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑀲𑁆𑀲 𑀳𑁄𑀢𑀺. 𑀢𑀢𑁆𑀣 𑀘 𑀧𑀤𑀸𑀯𑀬𑀯𑀕𑁆𑀕𑀳𑀡𑁂𑀦 𑀯𑀺𑀬 𑀧𑀤𑀕𑁆𑀕𑀳𑀡𑀲𑁆𑀲, 𑀧𑀤𑀢𑁆𑀣𑀸𑀯𑀬𑀯𑀕𑁆𑀕𑀳𑀡𑁂𑀦𑀸𑀧𑀺 𑀧𑀤𑀢𑁆𑀣𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀸𑀥𑀸𑀦𑀁 𑀚𑀸𑀬𑀢𑀻𑀢𑀺 𑀆𑀳 𑁋 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀅𑀓𑁆𑀔𑀭𑁂𑀳𑀺 𑀲𑀁𑀔𑀺𑀢𑁆𑀢𑁂𑀦 𑀤𑀻𑀧𑀺𑀬𑀫𑀸𑀦𑁄 𑀅𑀢𑁆𑀣𑁄 𑀧𑀤𑀧𑀭𑀺𑀬𑁄𑀲𑀸𑀦𑁂 𑀯𑀸𑀓𑁆𑀬𑀲𑁆𑀲 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀧𑀤𑁂𑀦𑁂𑀯 𑀧𑀓𑀸𑀲𑀺𑀢𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀤𑁂𑀳𑀺 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀓𑁆𑀬𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑁄 𑀅𑀢𑁆𑀣𑁄 𑀯𑀺𑀯𑀭𑀺𑀢𑁄 𑀯𑀺𑀯𑀝𑁄 ¶ 𑀓𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀻’’𑀢𑀺. 𑀬𑀲𑁆𑀫𑀸 𑀘 𑀧𑀓𑀸𑀭𑁂𑀳𑀺 𑀯𑀸𑀓𑁆𑀬𑀪𑁂𑀤𑁂 𑀓𑀢𑁂 𑀢𑀤𑀢𑁆𑀣𑁄 𑀯𑀺𑀪𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑀸𑀓𑁆𑀬𑀸𑀯𑀬𑀯𑀸𑀦𑀁 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑁂 𑀓𑀢𑁂 𑀲𑁄 𑀅𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀻’’𑀢𑀺. 𑀓𑀢𑀦𑀺𑀩𑁆𑀩𑀘𑀦𑁂𑀳𑀺 𑀯𑀸𑀓𑁆𑀬𑀸𑀯𑀬𑀯𑁂𑀳𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀤𑁂𑀲𑀺𑀢𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀩𑀼𑀤𑁆𑀥𑀺𑀦𑀺𑀲𑀸𑀦𑀜𑁆𑀘 𑀓𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀻’’𑀢𑀺. 𑀏𑀢𑁆𑀣 𑀘 𑀅𑀓𑁆𑀔𑀭𑁂𑀳𑀺 𑀏𑀯 𑀲𑀗𑁆𑀓𑀸𑀲𑁂𑀢𑀻𑀢𑀺 𑀅𑀯𑀥𑀸𑀭𑀡𑀁 𑀅𑀓𑀢𑁆𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺𑀬𑁂𑀯𑀸𑀢𑀺 𑀏𑀯𑀁 𑀅𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀢𑁆𑀣𑀧𑀤𑀸𑀦𑀁 𑀦𑀸𑀦𑀸𑀯𑀸𑀓𑁆𑀬𑀯𑀺𑀲𑀬𑀢𑀸𑀧𑀺 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑁂𑀦 𑀏𑀓𑀸𑀦𑀼𑀲𑀦𑁆𑀥𑀺𑀓𑁂 𑀲𑀼𑀢𑁆𑀢𑁂 𑀙𑀴𑁂𑀯 𑀅𑀢𑁆𑀣𑀧𑀤𑀸𑀦𑀺, 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑁂 𑀧𑀦 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀙 𑀙 𑀅𑀢𑁆𑀣𑀧𑀤𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺.

‘‘𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀻’’𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀓𑀺𑀘𑁆𑀘𑀲𑀸𑀥𑀦𑀁 𑀤𑀲𑁆𑀲𑁂𑀢𑀺. 𑀯𑁂𑀦𑁂𑀬𑁆𑀬𑀢𑁆𑀢𑀬𑀯𑀺𑀦𑀬𑀫𑁂𑀯 𑀳𑀺 𑀢𑁂𑀲𑀁 𑀩𑁆𑀬𑀸𑀧𑀸𑀭𑁄. 𑀅𑀝𑁆𑀞𑀸𑀦𑀪𑀸𑀯𑀢𑁄 𑀧𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀤𑀧𑀭𑀫𑁄 𑀦 𑀇𑀥 𑀯𑀼𑀢𑁆𑀢𑁄. 𑀦𑁂𑀬𑁆𑀬𑀕𑁆𑀕𑀳𑀡𑁂𑀦𑁂𑀯 𑀯𑀸 𑀢𑀲𑁆𑀲𑀸𑀧𑀺 𑀇𑀥 𑀕𑀳𑀡𑀁 𑀲𑁂𑀓𑁆𑀔𑀕𑁆𑀕𑀳𑀡𑁂𑀦 𑀯𑀺𑀬 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀓𑁆𑀔𑀭𑁂𑀳𑀻𑀢𑀺𑀆𑀤𑀻𑀲𑀼 𑀓𑀭𑀡𑀲𑀸𑀥𑀦𑁂 𑀓𑀭𑀡𑀯𑀘𑀦𑀁, 𑀦 𑀳𑁂𑀢𑀼𑀫𑁆𑀳𑀺. 𑀅𑀓𑁆𑀔𑀭𑀸𑀤𑀻𑀦𑀺 𑀳𑀺 𑀉𑀕𑁆𑀖𑀝𑀦𑀸𑀤𑀺𑀅𑀢𑁆𑀣𑀸𑀦𑀺, 𑀦 𑀉𑀕𑁆𑀖𑀝𑀦𑀸𑀤𑀺𑀅𑀓𑁆𑀔𑀭𑀸𑀤𑀺𑀅𑀢𑁆𑀣𑀁. 𑀬𑀤𑀢𑁆𑀣𑀸 𑀘 𑀓𑀺𑀭𑀺𑀬𑀸 ¶ 𑀲𑁄 𑀳𑁂𑀢𑀼, 𑀬𑀣𑀸 ‘‘𑀅𑀦𑁆𑀦𑁂𑀦𑀯𑀲𑀢𑀻’’𑀢𑀺. 𑀉𑀕𑁆𑀖𑀝𑁂𑀢𑀻𑀢𑀺 𑀲𑁄𑀢𑀸𑀯𑀥𑀸𑀦𑀁 𑀓𑀢𑁆𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀲𑀗𑁆𑀓𑀸𑀲𑀦𑀯𑀲𑁂𑀦 𑀅𑀓𑁆𑀔𑀭𑁂𑀳𑀺 𑀯𑀺𑀲𑁂𑀲𑀁 𑀆𑀤𑀳𑀦𑁆𑀢𑁄 𑀬𑀣𑀸 𑀧𑀤𑀧𑀭𑀺𑀬𑁄𑀲𑀸𑀦𑁂 𑀆𑀲𑀬𑀧𑁆𑀧𑀝𑀺𑀩𑁄𑀥𑁄 𑀳𑁄𑀢𑀺, 𑀢𑀣𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀓𑀣𑁂𑀢𑀺 𑀉𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀜𑁆𑀘𑀬𑀢𑀻𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀁 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀢𑀺. 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀯𑀺𑀢𑁆𑀣𑀸𑀭𑀁 𑀓𑀭𑁄𑀢𑀺, 𑀯𑀺𑀢𑁆𑀣𑀸𑀭𑀁 𑀓𑀢𑁆𑀯𑀸 𑀆𑀘𑀺𑀓𑁆𑀔𑀢𑀺 𑀯𑀸, 𑀧𑀝𑀺𑀦𑀺𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀘𑁂𑀢𑁆𑀣 𑀉𑀕𑁆𑀖𑀝𑁂𑀢𑀻𑀢𑀺 𑀉𑀤𑁆𑀤𑀺𑀲𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀤𑁆𑀤𑁂𑀲𑁄 𑀘 𑀤𑁂𑀲𑀦𑀸𑀬 𑀆𑀤𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀉𑀕𑁆𑀖𑀝𑀦𑀸 𑀆𑀤𑀻’’𑀢𑀺. 𑀢𑀣𑀸 𑀯𑀺𑀧𑀜𑁆𑀘𑀦𑀁 𑀦𑀺𑀤𑁆𑀤𑀺𑀲𑀦𑀁, 𑀯𑀺𑀢𑁆𑀣𑀭𑀡𑀁 𑀧𑀝𑀺𑀦𑀺𑀤𑁆𑀤𑀺𑀲𑀦𑀁, 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸 𑀘 𑀤𑁂𑀲𑀦𑀸𑀬 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀧𑀜𑁆𑀘𑀦𑀸 𑀫𑀚𑁆𑀛𑁂, 𑀯𑀺𑀢𑁆𑀣𑀸𑀭𑀡𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀏𑀯𑀁 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀙𑀦𑁆𑀦𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀧𑀤𑀸𑀦𑀁 𑀩𑁆𑀬𑀸𑀧𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀻𑀮𑀸𑀤𑀺𑀥𑀫𑁆𑀫𑁄 𑀏𑀯 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀪𑀽𑀢𑁄 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀢𑁄 𑀥𑀫𑁆𑀫𑀯𑀺𑀦𑀬𑁄. 𑀉𑀕𑁆𑀖𑀝𑀻𑀬𑀦𑁆𑀢𑁄𑀢𑀺 𑀉𑀤𑁆𑀤𑀺𑀲𑀺𑀬𑀫𑀸𑀦𑁄. 𑀢𑁂𑀦𑀸𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀯𑀺𑀦𑀬𑀦𑁂𑀦. 𑀯𑀺𑀧𑀜𑁆𑀘𑀻𑀬𑀦𑁆𑀢𑁄𑀢𑀺 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄. 𑀯𑀺𑀢𑁆𑀣𑀸𑀭𑀻𑀬𑀦𑁆𑀢𑁄𑀢𑀺 𑀧𑀝𑀺𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄.

𑁧𑁦. 𑀏𑀢𑁆𑀢𑀸𑀯𑀢𑀸 ¶ ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀤𑁆𑀤𑀺𑀝𑁆𑀞𑀸𑀬 𑀧𑀸𑀴𑀺𑀬𑀸 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀙 𑀧𑀤𑀸𑀦𑀺 𑀅𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀳𑀸𑀭𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀉𑀤𑁆𑀤𑀺𑀝𑁆𑀞𑀁 𑀧𑀸𑀴𑀺𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀦𑁆𑀢𑀺𑀆𑀤𑀺 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺 𑀧𑀤𑀸𑀦𑀁 𑀅𑀢𑁆𑀣𑀯𑀺𑀯𑀭𑀡𑀁. 𑀢𑀢𑁆𑀣 𑀉𑀧𑀝𑁆𑀞𑀺𑀢𑀁 𑀲𑀩𑁆𑀩𑀯𑀺𑀲𑁂𑀲𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀗𑁆𑀔𑀸𑀢𑀸𑀦𑀁 𑀯𑀺𑀲𑁂𑀲𑀸𑀦𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀯𑀺𑀲𑁂𑀲𑀸𑀦𑀁 𑀯𑀸 𑀉𑀧𑀢𑀺𑀝𑁆𑀞𑀦𑀝𑁆𑀞𑀸𑀦𑀁. ‘‘𑀇𑀤𑀁 𑀦𑁂𑀲𑀁 𑀧𑀤𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀦𑀁 𑀯𑀺𑀬 𑀏𑀢𑀲𑁆𑀲 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀇𑀤𑀁 𑀯𑀼𑀘𑁆𑀘𑀢𑀺 𑀢𑀣𑀸𑀕𑀢𑀧𑀤𑀁 𑀇𑀢𑀺𑀧𑀻’’𑀢𑀺𑀆𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀣𑀸𑀕𑀢𑀕𑀦𑁆𑀥𑀳𑀢𑁆𑀣𑀺𑀦𑁄 𑀧𑀝𑀺𑀧𑀢𑁆𑀢𑀺𑀤𑁂𑀲𑀦𑀸𑀕𑀫𑀦𑁂𑀳𑀺 𑀓𑀺𑀮𑁂𑀲𑀕𑀳𑀦𑀁 𑀑𑀢𑁆𑀣𑀭𑀺𑀢𑁆𑀯𑀸 𑀕𑀢𑀫𑀕𑁆𑀕𑁄𑀢𑀺𑀧𑀺. 𑀢𑁂𑀦 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀳𑀺 𑀦𑀺𑀲𑁂𑀯𑀺𑀢𑀁 𑀪𑀚𑀺𑀢𑀦𑁆𑀢𑀺𑀧𑀺. 𑀢𑀲𑁆𑀲 𑀫𑀳𑀸𑀯𑀚𑀺𑀭𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀤𑀦𑁆𑀢𑁂𑀳𑀺 𑀆𑀭𑀜𑁆𑀚𑀺𑀢𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀆𑀭𑀜𑁆𑀚𑀦𑀝𑁆𑀞𑀸𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁄 𑀘𑁂𑀢𑀦𑁆𑀢𑀺 𑀬𑀢𑁄 𑀢𑀣𑀸𑀕𑀢𑀧𑀤𑀸𑀤𑀺𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀅𑀢𑁄 𑀅𑀦𑁂𑀦𑁂𑀯 𑀓𑀸𑀭𑀡𑁂𑀦 𑀩𑁆𑀭𑀳𑁆𑀫𑀼𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀪𑀕𑀯𑀢𑁄, 𑀩𑁆𑀭𑀳𑁆𑀫𑀁 𑀯𑀸 𑀲𑀩𑁆𑀩𑀲𑁂𑀝𑁆𑀞𑀁 𑀘𑀭𑀺𑀬𑀦𑁆𑀢𑀺 𑀧𑀜𑁆𑀜𑀸𑀬𑀢𑀺 𑀬𑀸𑀯𑀤𑁂𑀯 ¶ 𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀜𑀸𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀢𑁆𑀣𑀁 𑀧𑀸𑀴𑀺𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀢𑀸𑀬 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀬𑀸𑀯𑀤𑁂𑀯 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀸𑀧𑀦𑀢𑁆𑀣𑁄 𑀤𑁂𑀲𑀦𑀸𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀲𑀁 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁄𑀕𑀻𑀦’’𑀦𑁆𑀢𑀺 𑀆𑀳. 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀢𑀺 𑀬𑁄𑀕𑀺𑀦𑁄. 𑀢𑁂 𑀳𑀺 𑀇𑀫𑀁 𑀤𑁂𑀲𑀦𑀸𑀳𑀸𑀭𑀁 𑀧𑀬𑁄𑀚𑁂𑀦𑁆𑀢𑀻𑀢𑀺. 𑀇𑀤𑀁 𑀯𑀘𑀦𑀁 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀲𑁆𑀲 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀲𑀫𑁆𑀫𑀸 𑀞𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀓𑀭𑀡𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀞𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄’’𑀢𑀺. 𑀦𑀺𑀬𑀼𑀢𑁆𑀢𑁄𑀢𑀺 𑀧𑀸𑀴𑀺𑀢𑁄 𑀅𑀲𑁆𑀲𑀸𑀤𑀸𑀤𑀺𑀧𑀤𑀢𑁆𑀣𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧𑁧. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄𑀢𑀺𑀆𑀤𑀺 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀓𑀺𑀁 𑀯𑀺𑀘𑀺𑀦𑀢𑀻𑀢𑀺 𑀏𑀢𑁆𑀣 ‘‘𑀯𑀺𑀘𑀺𑀦𑀢𑀻’’𑀢𑀺 𑀏𑀢𑁂𑀦 𑀯𑀺𑀘𑀬𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀢𑀁 𑀤𑀲𑁆𑀲𑁂𑀢𑀺. 𑀓𑀺𑀦𑁆𑀢𑀺 𑀧𑀦𑀢𑁆𑀣𑀲𑁆𑀲 𑀳𑀸𑀭𑀲𑁆𑀲 𑀯𑀺𑀲𑀬𑁄 𑀧𑀼𑀘𑁆𑀙𑀺𑀢𑁄𑀢𑀺 𑀢𑀁 𑀢𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀤𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀤𑀁 𑀯𑀺𑀘𑀺𑀦𑀢𑀻𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀺𑀕𑀫𑀦𑀸 𑀲𑀼𑀢𑁆𑀢𑀲𑁆𑀲 𑀲𑀩𑁆𑀩𑀁 ¶ 𑀧𑀤𑀁 𑀯𑀺𑀘𑀺𑀦𑀢𑀺. 𑀅𑀬𑀜𑁆𑀘 𑀯𑀺𑀘𑀬𑁄 𑀤𑀼𑀯𑀺𑀥𑁄 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘. 𑀢𑁂𑀲𑀼 ‘‘𑀇𑀤𑀁 𑀦𑀸𑀫𑀧𑀤𑀁, 𑀇𑀤𑀁 𑀆𑀔𑁆𑀬𑀸𑀢𑀧𑀤𑀁, 𑀇𑀤𑀁 𑀉𑀧𑀲𑀕𑁆𑀕𑀧𑀤𑀁, 𑀇𑀤𑀁 𑀦𑀺𑀧𑀸𑀢𑀧𑀤𑀁, 𑀇𑀤𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀇𑀤𑀁 𑀧𑀼𑀭𑀺𑀲𑀮𑀺𑀗𑁆𑀕𑀁, 𑀇𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀇𑀤𑀁 𑀅𑀢𑀻𑀢𑀓𑀸𑀮𑀁, 𑀇𑀤𑀁 𑀅𑀦𑀸𑀕𑀢𑀓𑀸𑀮𑀁, 𑀇𑀤𑀁 𑀯𑀢𑁆𑀢𑀫𑀸𑀦𑀓𑀸𑀮𑀁, 𑀇𑀤𑀁 𑀓𑀢𑁆𑀢𑀼𑀲𑀸𑀥𑀦𑀁, 𑀇𑀤𑀁 𑀓𑀭𑀡𑀲𑀸𑀥𑀦𑀁, 𑀇𑀤𑀁 𑀓𑀫𑁆𑀫𑀲𑀸𑀥𑀦𑀁, 𑀇𑀤𑀁 𑀅𑀥𑀺𑀓𑀭𑀡𑀲𑀸𑀥𑀦𑀁, 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁, 𑀬𑀸𑀯 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁, 𑀇𑀤𑀁 𑀏𑀓𑀯𑀘𑀦𑀁, 𑀇𑀤𑀁 𑀅𑀦𑁂𑀓𑀯𑀘𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑀯𑀘𑀦𑀁, 𑀅𑀬𑀁 𑀲𑀤𑁆𑀤𑀢𑁄 𑀧𑀤𑀯𑀺𑀘𑀬𑁄. 𑀲𑁄 𑀧𑀦𑀸𑀬𑀁 𑀧𑀤𑀯𑀺𑀘𑀬𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀮𑁆𑀮𑀓𑁆𑀔𑀡𑁂𑀦𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀣𑀢𑁄 𑀧𑀦 𑀯𑀺𑀘𑀬𑁄 𑀢𑁂𑀦 𑀢𑁂𑀦 𑀧𑀤𑁂𑀦 𑀯𑀢𑁆𑀢𑀩𑁆𑀩𑀅𑀢𑁆𑀣𑀲𑀁𑀯𑀡𑁆𑀡𑀦𑀸. 𑀲𑀘𑁂 𑀧𑀦 𑀧𑀤𑀁 𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀲𑁆𑀲 𑀢𑀤𑀢𑁆𑀣𑀲𑁆𑀲 𑀘 𑀧𑀼𑀘𑁆𑀙𑀸𑀤𑀺𑀪𑀸𑀯𑁄 𑀯𑀺𑀘𑁂𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀳𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺𑀫𑀸𑀳.

𑀬𑀲𑁆𑀫𑀸 ¶ 𑀘 𑀲𑀩𑁆𑀩𑁄 𑀤𑁂𑀲𑀦𑀸𑀳𑀸𑀭𑁄 𑀯𑀺𑀘𑀬𑀳𑀸𑀭𑀲𑁆𑀲 𑀯𑀺𑀲𑀬𑁄 𑀲𑀼𑀢𑁆𑀢𑀲𑁆𑀲 𑀯𑀺𑀘𑀬𑁄𑀢𑀺 𑀓𑀢𑁆𑀯𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀅𑀲𑁆𑀲𑀸𑀤𑀁 𑀯𑀺𑀘𑀺𑀦𑀢𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀦 𑀅𑀦𑀼𑀕𑀻𑀢𑀻𑀢𑀺 𑀏𑀢𑁆𑀣 𑀅𑀦𑀼𑀭𑀽𑀧𑀸 𑀕𑀻𑀢𑀺 𑀅𑀦𑀼𑀕𑀻𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀯𑀺𑀘𑀺𑀬𑀫𑀸𑀦𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀦𑀼𑀭𑀽𑀧𑀢𑁄 𑀲𑀼𑀢𑁆𑀢𑀦𑁆𑀢𑀭𑀧𑀤𑀸𑀦𑀺𑀧𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀸 𑀧𑀤𑀼𑀤𑁆𑀥𑀸𑀭𑀯𑀲𑁂𑀦 𑀯𑀸 𑀆𑀦𑁂𑀢𑁆𑀯𑀸 𑀯𑀺𑀘𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁂 𑀦𑀯 𑀲𑀼𑀢𑁆𑀢𑀦𑁆𑀢𑁂 𑀯𑀺𑀘𑀺𑀦𑀢𑀻’’𑀢𑀺 𑀆𑀳. 𑀦𑀯 𑀲𑀼𑀢𑁆𑀢𑀦𑁆𑀢𑁂𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑁂 𑀦𑀯 𑀲𑀼𑀢𑁆𑀢𑁂, 𑀬𑀣𑀸𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀯𑀺𑀘𑀬𑀳𑀸𑀭𑀲𑁆𑀲 𑀧𑀤𑀢𑁆𑀣𑀦𑀺𑀤𑁆𑀤𑁂𑀲𑁄.

𑀏𑀯𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀘𑀬𑀳𑀸𑀭𑁄 𑀲𑀗𑁆𑀔𑁂𑀧𑀢𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑀁 𑀯𑀺𑀪𑀸𑀕𑁂𑀦 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀚𑀦𑁆𑀢𑁄 𑀬𑀲𑁆𑀫𑀸 𑀧𑀤𑀯𑀺𑀘𑀬𑁄 𑀲𑀼𑀢𑁆𑀢𑀲𑁆𑀲 𑀅𑀦𑀼𑀧𑀤𑀁 𑀧𑀯𑀢𑁆𑀢𑁂𑀢𑀩𑁆𑀩𑀢𑀸𑀬 𑀅𑀢𑀺𑀪𑀸𑀭𑀺𑀓𑁄 𑀦 𑀲𑀼𑀓𑀭𑁄 𑀘𑀸𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁂 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀓𑀺𑀁 𑀪𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀓𑀺𑀁 𑀪𑀯𑁂𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀲𑁄 𑀯𑀺𑀘𑀬𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀢𑀁 𑀧𑀓𑀸𑀭𑀚𑀸𑀢𑀁 𑀓𑀺𑀁 𑀪𑀯𑁂, 𑀓𑀻𑀤𑀺𑀲𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀬𑀣𑀸 𑀓𑀺𑀁 𑀪𑀯𑁂𑀬𑁆𑀬𑀸’’𑀢𑀺𑀧𑀺 𑀧𑀸𑀞𑁄. 𑀧𑀼𑀦 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀅𑀚𑀺𑀢𑁄𑀢𑀺 𑀩𑀸𑀯𑀭𑀻𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀘𑀸𑀭𑀓𑀪𑀽𑀢𑀸𑀦𑀁 𑀲𑁄𑀴𑀲𑀦𑁆𑀦𑀁 𑀅𑀜𑁆𑀜𑀢𑀭𑁄. 𑀧𑀸𑀭𑀸𑀬𑀦𑁂𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀅𑀥𑀺𑀕𑀫𑀽𑀧𑀸𑀬𑀤𑁂𑀲𑀦𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑀁 𑀪𑀕𑀯𑀢𑁄 𑀯𑀘𑀦𑀁 ‘‘𑀧𑀸𑀭𑀸𑀬𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀧𑀦 𑀯𑀢𑁆𑀣𑀼𑀕𑀸𑀣𑀸𑀦𑀼𑀕𑀻𑀢𑀺𑀕𑀸𑀣𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀚𑀺𑀢𑀲𑀼𑀢𑁆𑀢𑀸𑀤𑀻𑀦𑀁 (𑀲𑀼. 𑀦𑀺. 𑁧𑁦𑁩𑁮 𑀆𑀤𑀬𑁄; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁭 𑀆𑀤𑀬𑁄, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧 𑀆𑀤𑀬𑁄) 𑀲𑁄𑀴𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀇𑀤𑀁 𑀦𑀸𑀫𑀁 𑀓𑀢𑀦𑁆𑀢𑀺 𑀢𑁂𑀲𑀜𑁆𑀜𑁂𑀯 𑀧𑀸𑀭𑀸𑀬𑀦𑀲𑀫𑀜𑁆𑀜𑀸𑀢𑀺 𑀆𑀳 ‘‘𑀧𑀸𑀭𑀸𑀬𑀦𑁂’’𑀢𑀺. 𑀓𑁂𑀘𑀺 ‘‘𑀧𑀸𑀭𑀸𑀬𑀦𑀺𑀓𑁄’’𑀢𑀺 𑀧𑀞𑀦𑁆𑀢𑀺. 𑀢𑁂 𑀓𑀺𑀭 𑀢𑀸𑀧𑀲𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑀢𑁄 𑀧𑀼𑀩𑁆𑀩𑁂 𑀧𑀸𑀭𑀸𑀬𑀦𑀁 𑀅𑀥𑀻𑀬𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑀲𑁆𑀫𑀸 𑀅𑀬𑀫𑁆𑀧𑀺 ¶ 𑀧𑀸𑀭𑀸𑀬𑀦𑀁 𑀯𑀢𑁆𑀢𑁂𑀢𑀻𑀢𑀺 𑀧𑀸𑀭𑀸𑀬𑀦𑀺𑀓𑁄𑀢𑀺 𑀯𑀼𑀢𑁆𑀢𑁄. 𑀧𑀼𑀘𑁆𑀙𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀼𑀘𑁆𑀙𑀸𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀢𑀻𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀼𑀘𑁆𑀙𑀦𑀸𑀓𑀸𑀭𑀁 𑀧𑀦 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀁 𑀓𑀢𑁆𑀯𑀸 𑀏𑀯𑀫𑀸𑀳.

𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀸 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑀸 𑀞𑀧𑀦𑀻𑀬𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸𑀢𑀺 𑀅𑀦𑁂𑀓𑀯𑀺𑀥𑀸. 𑀢𑀲𑁆𑀫𑀸 ‘‘𑀓𑀺𑀫𑀬𑀁 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀧𑀼𑀘𑁆𑀙𑀸 𑀯𑀺𑀘𑁂𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁆𑀣 𑀧𑀼𑀘𑁆𑀙𑀸𑀯𑀺𑀪𑀸𑀕𑁄, 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀯𑀺𑀪𑀸𑀕𑁄𑀧𑀺 ¶ 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁂 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑁄. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺. 𑀇𑀥 𑀧𑀦 𑀯𑀺𑀫𑀢𑀺𑀘𑁆𑀙𑁂𑀤𑀦𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀁 𑀉𑀤𑀸𑀳𑀭𑀺𑀢𑁆𑀯𑀸 𑀢𑀢𑁆𑀣 𑀯𑀺𑀘𑀬𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑁂𑀦𑀸𑀢𑀺 𑀓𑀢𑁆𑀢𑀭𑀺 𑀓𑀭𑀡𑀯𑀘𑀦𑀁. 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀽𑀢𑀺 𑀯𑀸 𑀲𑀁𑀲𑀬𑁂 𑀦𑀺𑀧𑀸𑀢𑁄, 𑀢𑁂𑀦𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀫𑀢𑀺𑀘𑁆𑀙𑁂𑀤𑀦𑀧𑀼𑀘𑁆𑀙𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀼𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑁄. 𑀮𑁄𑀓𑁄𑀢𑀺 𑀲𑀢𑁆𑀢𑀮𑁄𑀓𑁄. 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀯𑀘𑀦𑀁. 𑀦𑀧𑁆𑀧𑀓𑀸𑀲𑀢𑀻𑀢𑀺 𑀦 𑀧𑀜𑁆𑀜𑀸𑀬𑀢𑀺. 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀓𑀺𑀁 𑀅𑀲𑁆𑀲 𑀮𑁄𑀓𑀲𑁆𑀲 𑀅𑀪𑀺𑀮𑁂𑀧𑀦𑀁 𑀯𑀤𑀲𑀺. ‘‘𑀓𑀺𑀁 𑀲𑁆𑀯𑀸𑀪𑀺𑀮𑁂𑀧𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀓𑀺𑀁 𑀲𑀼 𑀅𑀪𑀺𑀮𑁂𑀧𑀦𑀦𑁆𑀢𑀺 𑀧𑀤𑀯𑀺𑀪𑀸𑀕𑁄.

𑀧𑀤𑀸𑀦𑀻𑀢𑀺 𑀧𑀚𑁆𑀚𑀢𑀺 𑀏𑀢𑁂𑀳𑀺 𑀅𑀢𑁆𑀣𑁄𑀢𑀺 𑀧𑀤𑀸𑀦𑀺, 𑀯𑀸𑀓𑁆𑀬𑀸𑀦𑀺. 𑀧𑀼𑀘𑁆𑀙𑀺𑀢𑀸𑀦𑀻𑀢𑀺 𑀧𑀼𑀘𑁆𑀙𑀸𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀓𑁄 𑀧𑀜𑁆𑀳𑁄𑀢𑀺 𑀬𑀤𑀺𑀧𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀧𑀦 𑀅𑀢𑁆𑀣𑁄 𑀏𑀓𑁄 𑀏𑀯𑀸𑀢𑀺 ‘‘𑀏𑀓𑁄 𑀧𑀜𑁆𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀜𑁆𑀘𑀸𑀧𑀺 𑀦𑀺𑀯𑀸𑀭𑀡𑀅𑀧𑁆𑀧𑀓𑀸𑀲𑀦𑀅𑀪𑀺𑀮𑁂𑀧𑀦𑀫𑀳𑀸𑀪𑀬𑀲𑀗𑁆𑀔𑀸𑀢𑀸 𑀧𑀼𑀘𑁆𑀙𑀸𑀬 𑀕𑀳𑀺𑀢𑀸 𑀘𑀢𑁆𑀢𑀸𑀭𑁄 𑀏𑀢𑁂 𑀅𑀢𑁆𑀣𑀸, 𑀢𑁂 𑀧𑀦𑁂𑀓𑀁 𑀮𑁄𑀓𑀁 𑀧𑀢𑀺𑀕𑀼𑀡𑀪𑀽𑀢𑀸, 𑀮𑁄𑀓𑁄 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑁄𑀢𑀺 𑀢𑀩𑁆𑀩𑀲𑁂𑀦 𑀏𑀓𑁄𑀯𑀸𑀬𑀁 𑀧𑀜𑁆𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀮𑁄𑀓𑀸𑀥𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀓𑁄 𑀧𑀦 𑀲𑁄 𑀮𑁄𑀓𑁄𑀢𑀺? 𑀆𑀳 ‘‘𑀮𑁄𑀓𑁄 𑀢𑀺𑀯𑀺𑀥𑁄’’𑀢𑀺𑀆𑀤𑀺.

𑀢𑀢𑁆𑀣 𑀭𑀸𑀕𑀸𑀤𑀺𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀓𑀸𑀫𑀸𑀯𑀘𑀭𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀛𑀸𑀦𑀸𑀪𑀺𑀜𑁆𑀜𑀸𑀧𑀭𑀺𑀩𑀼𑀤𑁆𑀥𑀺𑀬𑀸 𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀪𑀯𑀮𑁄𑀓𑁄. 𑀆𑀦𑁂𑀜𑁆𑀚𑀲𑀫𑀸𑀥𑀺𑀩𑀳𑀼𑀮𑀢𑀸𑀬 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀮𑁄𑀓𑁄. 𑀅𑀣 𑀯𑀸 𑀓𑀺𑀮𑀺𑀲𑁆𑀲𑀦𑀁 𑀓𑀺𑀮𑁂𑀲𑁄, 𑀯𑀺𑀧𑀸𑀓𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀢𑀤𑀜𑁆𑀜𑁂 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑀪𑀸𑀯𑀢𑁄 𑀪𑀯𑀮𑁄𑀓𑁄. 𑀢𑀢𑁆𑀣 𑀬𑁂 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑁂𑀳𑀺 ¶ 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀲𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀯𑀲𑁂𑀦 𑀮𑁄𑀓𑀲𑀫𑀜𑁆𑀜𑀸𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀇𑀥 𑀦 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀅𑀦𑁆𑀥𑀓𑀸𑀭𑁂𑀦 𑀯𑀺𑀬 𑀭𑀣𑀖𑀝𑀸𑀤𑀺𑀥𑀫𑁆𑀫𑀲𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀧𑀝𑀺𑀘𑁆𑀙𑀸𑀤𑀺𑀢𑁄 ¶ 𑀮𑁄𑀓𑁄. 𑀯𑀺𑀯𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀳𑁂𑀢𑀼. ‘‘𑀯𑀺𑀯𑀺𑀘𑁆𑀙𑀸 𑀫𑀘𑁆𑀙𑀭𑀺𑀬’’𑀦𑁆𑀢𑀺 𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀧𑀫𑀸𑀤𑀸𑀢𑀺 𑀧𑀫𑀸𑀤𑀳𑁂𑀢𑀼. 𑀚𑀧𑁆𑀧𑀸𑀪𑀺𑀮𑁂𑀧𑀦𑀦𑁆𑀢𑀺 𑀚𑀧𑁆𑀧𑀸 𑀢𑀡𑁆𑀳𑀸 𑀅𑀲𑁆𑀲 𑀮𑁄𑀓𑀲𑁆𑀲 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬 𑀫𑀓𑁆𑀓𑀝𑀲𑁆𑀲 𑀅𑀪𑀺𑀮𑁂𑀧𑀦𑀁 𑀲𑀺𑀮𑁂𑀲𑁄𑀢𑀺 𑀩𑁆𑀭𑀽𑀫𑀺. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀆𑀤𑀺𑀓𑀁 𑀯𑀝𑁆𑀝𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀧𑀤𑀢𑁆𑀣𑁄. 𑀲𑁂𑀲𑀁 𑀧𑀸𑀴𑀺𑀬𑀸 𑀏𑀯 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀸𑀕𑀸𑀣𑀸𑀬𑀁 𑀯𑀼𑀢𑁆𑀢𑀸𑀦𑀺 ‘‘𑀇𑀫𑁂𑀳𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺. 𑀓𑀣𑀦𑁆𑀢𑀺 𑀆𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺𑀁. 𑀢𑁂𑀦 𑀬𑀣𑀸𑀓𑁆𑀓𑀫𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑀁 𑀬𑀣𑀸𑀓𑁆𑀓𑀫𑀁 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑀕𑀸𑀣𑀸𑀬 𑀘 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀓𑁂𑀦𑀲𑁆𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀦𑀻𑀯𑀭𑀡𑁂𑀳𑀻’’𑀢𑀺 𑀧𑀤𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑁆𑀢𑀭𑀤𑀲𑁆𑀲𑀦𑁂𑀦 𑀇𑀫𑀲𑁆𑀫𑀺𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁂 𑀅𑀦𑀼𑀕𑀻𑀢𑀺𑀯𑀺𑀘𑀬𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀭𑀺𑀬𑀸𑀬𑀢𑁄𑀢𑀺 𑀓𑀸𑀭𑀡𑀢𑁄. 𑀦𑀻𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀫𑁆𑀧𑀺 𑀓𑀸𑀭𑀡𑀪𑀸𑀯𑀢𑁄 𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑀢𑁄 𑀘 𑀏𑀓𑀁𑀬𑁂𑀯 𑀦𑀻𑀯𑀭𑀡𑀁 𑀯𑀤𑀸𑀫𑀺, 𑀦 𑀧𑀦 𑀅𑀜𑁆𑀜𑁂𑀲𑀁 𑀦𑀻𑀯𑀭𑀡𑀲𑀪𑀸𑀯𑀸𑀦𑀁 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀦𑀻𑀯𑀭𑀡𑀸𑀦𑀁 𑀪𑀸𑀯𑁄, 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀅𑀲𑀢𑀺 𑀦 𑀲𑀦𑁆𑀢𑀺 𑀦𑀻𑀯𑀭𑀡𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑁂𑀦𑀸𑀢𑀺 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑁂𑀦. 𑀧𑀞𑀫𑀲𑁆𑀲 𑀧𑀤𑀲𑁆𑀲𑀸𑀢𑀺 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀤𑀲𑁆𑀲. 𑀬𑀼𑀢𑁆𑀢𑀸𑀢𑀺 𑀬𑁄𑀚𑀺𑀢𑀸, 𑀅𑀦𑀼𑀭𑀽𑀧𑀸𑀢𑀺 𑀯𑀸 𑀅𑀢𑁆𑀣𑁄. 𑀏𑀢𑁂𑀦 𑀧𑀼𑀘𑁆𑀙𑀸𑀦𑀼𑀭𑀽𑀧𑀢𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀤𑀲𑁆𑀲𑀺𑀢𑀸𑀢𑀺 𑀧𑀼𑀩𑁆𑀩𑀸𑀧𑀭𑀯𑀺𑀘𑀬𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀬𑁄 𑀧𑀼𑀕𑁆𑀕𑀮𑁄 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀺𑀘𑁆𑀙𑀸𑀧𑀫𑀸𑀤𑀸𑀦𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀼𑀢𑁄 𑀏𑀯 𑀳𑀺 𑀦𑀧𑁆𑀧𑀓𑀸𑀲𑀢𑀺. 𑀯𑀺𑀯𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀯𑀺𑀘𑁆𑀙𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺. 𑀢𑀢𑁆𑀭𑀸𑀬𑀁 𑀧𑀤𑀲𑀺𑀤𑁆𑀥𑀺 𑁋 𑀬𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄 ‘‘𑀦𑀺𑀘𑁆𑀘𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀏𑀓𑀁𑀲𑀕𑁆𑀕𑀸𑀳𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀅𑀦𑁂𑀓𑀁𑀲𑀕𑁆𑀕𑀸𑀳𑀪𑀸𑀯𑀢𑁄 ‘‘𑀦𑀺𑀘𑁆𑀘𑀁 𑀦𑀼 𑀔𑁄 𑀅𑀦𑀺𑀘𑁆𑀘𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀺𑀥𑀁 𑀯𑀺𑀭𑀼𑀤𑁆𑀥𑀁 𑀯𑀸 𑀇𑀘𑁆𑀙𑀢𑀺 𑀏𑀲𑀢𑀻𑀢𑀺 𑀯𑀺𑀯𑀺𑀘𑁆𑀙𑀸𑀢𑀺 ¶ . ‘‘𑀲𑁄 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀓𑀸𑀲𑀦𑀲𑁆𑀲 𑀯𑀺𑀯𑀺𑀘𑁆𑀙𑀸𑀧𑀫𑀸𑀤𑀸𑀦𑀁 𑀓𑀸𑀭𑀡𑀪𑀸𑀯𑀁 𑀯𑀺𑀯𑀭𑀢𑀺. 𑀲𑀼𑀓𑁆𑀓𑁂 𑀥𑀫𑁆𑀫𑁂 𑀦 𑀉𑀧𑁆𑀧𑀸𑀤𑀺𑀬𑀢𑀻𑀢𑀺 𑀦 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀦𑀧𑁆𑀧𑀓𑀸𑀲𑀦𑁆𑀢𑀻𑀢𑀺 𑀢𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀸𑀤𑀺𑀬𑀫𑀸𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀢𑀁 𑀧𑀼𑀕𑁆𑀕𑀮𑀁 𑀧𑀓𑀸𑀲𑀁 ¶ 𑀮𑁄𑀓𑁂 𑀅𑀪𑀺𑀜𑁆𑀜𑀸𑀢𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀮𑀺𑀫𑁆𑀧𑀢𑀻𑀢𑀺 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬 𑀫𑀓𑁆𑀓𑀝𑀁 𑀤𑀸𑀭𑀼𑀲𑀺𑀮𑀸𑀤𑀻𑀲𑀼 𑀧𑀼𑀭𑀺𑀲𑀁 𑀭𑀽𑀧𑀸𑀤𑀺𑀯𑀺𑀲𑀬𑁂 𑀅𑀮𑁆𑀮𑀻𑀬𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀢𑁆𑀢𑀺𑀩𑀳𑀼𑀮𑀲𑁆𑀲𑀸𑀢𑀺 𑀆𑀲𑀗𑁆𑀕𑀩𑀳𑀼𑀮𑀲𑁆𑀲. 𑀏𑀯𑀁 𑀅𑀪𑀺𑀚𑀧𑁆𑀧𑀸𑀢𑀺 𑀓𑀭𑀺𑀢𑁆𑀯𑀸𑀢𑀺 𑀏𑀯𑀁 𑀧𑀭𑀺𑀬𑀼𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀢𑀢𑁆𑀣𑀸𑀢𑀺 𑀢𑀸𑀬 𑀢𑀡𑁆𑀳𑀸𑀬. 𑀮𑁄𑀓𑁄 𑀅𑀪𑀺𑀮𑀺𑀢𑁆𑀢𑁄 𑀲𑀺𑀮𑁂𑀲𑁂𑀦 𑀫𑀓𑁆𑀔𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀫𑀳𑀦𑁆𑀢𑀁 𑀪𑀬𑀁 𑀫𑀳𑀩𑁆𑀪𑀬𑀁. 𑀢𑁂𑀦𑁂𑀯𑀸𑀳 𑁋 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀫𑁂𑀯 𑀯𑀺𑀪𑀢𑁆𑀢𑀦𑁆𑀢𑀺 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀥𑀲𑁄𑀢𑀺 𑀓𑀤𑀸𑀘𑀺 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀸𑀬 𑀓𑀤𑀸𑀘𑀺 𑀧𑀭𑀽𑀧𑀓𑁆𑀓𑀫𑀫𑀽𑀮𑀸𑀬𑀸𑀢𑀺𑀆𑀤𑀺𑀦𑀸 𑀯𑀺𑀪𑀸𑀕𑁂𑀦 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑀓𑀸 𑀯𑀺𑀲𑁂𑀲𑁂𑀦 𑀭𑀽𑀧𑀸𑀯𑀘𑀭𑀸. 𑀢𑀣𑀸𑀢𑀺 𑀑𑀥𑀲𑁄 𑀓𑀤𑀸𑀘𑀺 𑀓𑀭𑀳𑀘𑀻𑀢𑀺 𑀏𑀯𑀁 𑀆𑀓𑀟𑁆𑀠𑀢𑀺. 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑀓𑀸 𑀉𑀧𑁂𑀓𑁆𑀔𑀸𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀸 𑀯𑀺𑀲𑁂𑀲𑁂𑀦 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀅𑀧𑁆𑀧𑀸𑀩𑀸𑀥𑀸𑀢𑀺 𑀧𑀤𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀤𑀻𑀖𑀸𑀬𑀼𑀓𑀸𑀢𑀺 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬. 𑀅𑀭𑀽𑀧𑀤𑁂𑀯𑀸 𑀳𑀺 𑀮𑁄𑀓𑁂 𑀯𑀺𑀲𑁂𑀲𑀢𑁄 𑀤𑀻𑀖𑀸𑀬𑀼𑀓𑀸𑀢𑀺. 𑀇𑀤𑀜𑁆𑀘 𑀫𑀼𑀘𑁆𑀘𑀦𑀫𑀘𑁆𑀘𑀦𑁆𑀢𑀺𑀓𑀁. 𑀬𑀲𑁆𑀫𑀸 𑀘 𑀤𑀼𑀓𑁆𑀔𑀸 𑀯𑁂𑀤𑀦𑀸𑀧𑀺 𑀲𑀗𑁆𑀔𑀢𑀢𑁆𑀢𑀸 𑀅𑀦𑀺𑀘𑁆𑀘𑀢𑀸𑀤𑀺𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑀪𑀸𑀯𑀸 𑀏𑀯, 𑀢𑀲𑁆𑀫𑀸 𑀬𑀢𑁄 𑀫𑀼𑀘𑁆𑀘𑀦𑀫𑀘𑁆𑀘𑀦𑁆𑀢𑀺𑀓𑀁, 𑀢𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀺, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀉𑀧𑀸𑀤𑀺𑀲𑁆𑀲 𑀲𑁂𑀲𑀁 𑀉𑀧𑀸𑀤𑀺𑀲𑁂𑀲𑀁, 𑀢𑀁 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸, 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀢𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘 𑀦𑀺𑀩𑁆𑀩𑀸𑀬𑀦𑀫𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀓𑀮𑀮𑁄𑀓𑀩𑁆𑀬𑀸𑀧𑀺𑀦𑀻 𑀲𑀩𑁆𑀩𑀲𑀗𑁆𑀕𑀸𑀳𑀺𑀦𑀻 𑀘 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸, 𑀢𑀲𑁆𑀫𑀸. 𑀮𑁄𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦 ‘‘𑀤𑀼𑀓𑁆𑀔𑀫𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀯𑀫𑁂𑀢𑁆𑀣 𑀮𑁄𑀓𑀲𑁆𑀲 𑀦𑀻𑀯𑀭𑀡𑀸𑀤𑀻𑀦𑀺 𑀅𑀚𑀸𑀦𑀦𑁆𑀢𑁂𑀦, 𑀲𑀫𑀬𑀦𑁆𑀢𑀭𑀧𑀭𑀺𑀘𑀬𑁂𑀦 𑀯𑀸 𑀢𑀢𑁆𑀣 𑀲𑀁𑀲𑀬𑀧𑀓𑁆𑀔𑀦𑁆𑀤𑁂𑀦 𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩𑀢𑁆𑀢𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀓𑀢𑀸, 𑀲𑀸 𑀘 𑀅𑀚𑀸𑀦𑀦𑀲𑁆𑀲, 𑀲𑀁𑀲𑀬𑀲𑁆𑀲 𑀯𑀸 𑀦𑀻𑀯𑀭𑀡𑀸𑀤𑀺𑀯𑀺𑀲𑀬𑀢𑀸𑀬 𑀘𑀢𑀼𑀩𑁆𑀩𑀺𑀥𑀸. 𑀧𑀸𑀴𑀺𑀬𑀁 𑀧𑀦 𑀦𑀻𑀯𑀭𑀡𑀸𑀤𑀻𑀦𑀁 𑀮𑁄𑀓𑁄 𑀆𑀥𑀸𑀭𑀪𑀸𑀯𑁂𑀦 𑀕𑀸𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀏𑀓𑁄 𑀧𑀜𑁆𑀳𑁄𑀢𑀺 𑀤𑀲𑁆𑀲𑀺𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀧𑀼𑀘𑁆𑀙𑀸𑀯𑀺𑀘𑀬𑁄. 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄𑀧𑀺 𑀅𑀤𑀺𑀝𑁆𑀞𑀚𑁄𑀢𑀺𑀦𑀻 𑀯𑀺𑀲𑁆𑀲𑀚𑁆𑀚𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀺𑀦𑀻 𑀘𑀸𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ ¶ 𑀏𑀓𑀸𑀥𑀸𑀭𑀁 𑀧𑀼𑀘𑁆𑀙𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁂𑀓𑀸𑀥𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀯𑀦𑁆𑀢𑀻𑀢𑀺 𑀲𑀦𑁆𑀤𑀦𑁆𑀢𑀺. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀬𑀢𑀦𑁂𑀲𑀼. 𑀲𑁄𑀢𑀸𑀢𑀺 𑀢𑀡𑁆𑀳𑀸𑀤𑀺𑀲𑁄𑀢𑀸. 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀢𑁂𑀲𑀁 𑀓𑀺𑀁 𑀆𑀯𑀭𑀡𑀁 𑀓𑀸 𑀭𑀓𑁆𑀔𑀸. 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀢𑀁 𑀦𑁂𑀲𑀁 𑀦𑀻𑀯𑀭𑀡𑀲𑀗𑁆𑀔𑀸𑀢𑀁 𑀲𑀁𑀯𑀭𑀁 𑀓𑀣𑁂𑀳𑀺. 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂𑀢𑀺 𑀓𑁂𑀦 𑀥𑀫𑁆𑀫𑁂𑀦 𑀢𑀡𑁆𑀳𑀸𑀤𑀺𑀲𑁄𑀢𑀸 𑀧𑀺𑀥𑀺𑀬𑁆𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀤𑀢𑁆𑀣𑁄. 𑀲𑁂𑀲𑀁 𑀧𑀸𑀴𑀺𑀯𑀲𑁂𑀦𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀢𑁂 𑀤𑁆𑀯𑁂 𑀧𑀜𑁆𑀳𑀸𑀢𑀺 𑀬𑀤𑀺𑀧𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸𑀬 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀘𑀢𑁆𑀢𑀸𑀭𑀺 𑀯𑀸𑀓𑁆𑀬𑀸𑀦𑀺. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀧𑀦 𑀅𑀢𑁆𑀣𑀲𑁆𑀲 𑀤𑀼𑀯𑀺𑀥𑀢𑁆𑀢𑀸 𑀢𑁂 𑀤𑁆𑀯𑁂 𑀧𑀜𑁆𑀳𑀸. 𑀓𑀲𑁆𑀫𑀸𑀢𑀺 𑀘𑁂? ‘‘𑀇𑀫𑁂𑀳𑀺 𑀩𑀳𑁆𑀯𑀸𑀥𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸’’𑀢𑀺 𑀆𑀳. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀫𑁂 𑀏𑀢𑀸𑀬 𑀕𑀸𑀣𑀸𑀬 𑀕𑀳𑀺𑀢𑀸 𑀅𑀢𑁆𑀣𑀸 𑀬𑀲𑁆𑀫𑀸 𑀩𑀳𑀽𑀦𑀺 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸, 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀧𑀜𑁆𑀳𑀸𑀢𑀺. 𑀏𑀓𑀢𑁄 𑀉𑀧𑀭𑀺 𑀩𑀳𑀽𑀢𑀺 𑀳𑀺 𑀲𑀸𑀲𑀦𑀯𑁄𑀳𑀸𑀭𑁄, 𑀢𑀫𑁂𑀯 𑀧𑀼𑀘𑁆𑀙𑀸𑀬 𑀤𑀼𑀯𑀺𑀥𑀢𑁆𑀣𑀯𑀺𑀲𑀬𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀸𑀳𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀳𑀺 𑀧𑀸𑀡𑀯𑀥𑀸𑀤𑀻𑀳𑀺 𑀏𑀯 𑀯𑀸 𑀤𑀼𑀕𑁆𑀕𑀢𑀺𑀳𑁂𑀢𑀼𑀪𑀽𑀢𑀸𑀳𑀺 𑀆𑀧𑀤𑀸𑀳𑀺 𑀲𑀫𑀁 𑀲𑀳, 𑀲𑀩𑁆𑀩𑀣𑀸 𑀯𑀸 𑀅𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀅𑀚𑁆𑀛𑁄𑀢𑁆𑀣𑀝𑁄. 𑀢𑀁𑀦𑀺𑀫𑀺𑀢𑁆𑀢𑁂𑀳𑀺 𑀤𑀲𑀳𑀺 𑀓𑀺𑀮𑁂𑀲𑀯𑀢𑁆𑀣𑀽𑀳𑀺 𑀲𑀁𑀓𑀺𑀮𑀺𑀝𑁆𑀞𑁄 𑀘, 𑀢𑀲𑁆𑀲 𑀢𑀁 𑀆𑀧𑀦𑁆𑀦𑀸𑀓𑀸𑀭𑀁 𑀲𑀁𑀓𑀺𑀮𑀺𑀝𑁆𑀞𑀸𑀓𑀸𑀭𑀜𑁆𑀘 𑀩𑀼𑀤𑁆𑀥𑀺𑀬𑀁 𑀓𑀢𑁆𑀯𑀸 𑀆𑀳 𑁋 ‘‘𑀏𑀯𑀁 𑀲𑀫𑀸𑀧𑀦𑁆𑀦𑀲𑁆𑀲 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀲𑁆𑀲𑀸’’𑀢𑀺. 𑀯𑁄𑀤𑀸𑀬𑀢𑀺 𑀲𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑁄𑀤𑀸𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸. 𑀯𑀼𑀝𑁆𑀞𑀸𑀢𑀺 𑀏𑀢𑁂𑀦 𑀦𑀺𑀫𑀺𑀢𑁆𑀢𑀢𑁄 𑀧𑀯𑀢𑁆𑀢𑀢𑁄 𑀘𑀸𑀢𑀺 𑀯𑀼𑀝𑁆𑀞𑀸𑀦𑀁, 𑀅𑀭𑀺𑀬𑀫𑀕𑁆𑀕𑁄.

𑀅𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲. 𑀲𑀯𑀦𑁆𑀢𑀻𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀅𑀪𑀺𑀚𑁆𑀛𑀸𑀢𑀺𑀆𑀤𑀺 𑀅𑀲𑀫𑀸𑀥𑀸𑀦𑀳𑁂𑀢𑀼𑀤𑀲𑁆𑀲𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀏𑀯𑀁 𑀅𑀲𑀫𑀸𑀳𑀺𑀢𑀲𑁆𑀲𑀸’’𑀢𑀺. ‘‘𑀬𑀣𑀸𑀳 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀇𑀥𑀸𑀧𑀺 𑀅𑀦𑀼𑀕𑀻𑀢𑀺𑀯𑀺𑀘𑀬𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀸𑀦𑀁 𑀲𑀯𑀦𑀁 𑀬𑁂𑀪𑀼𑀬𑁆𑀬𑁂𑀦 𑀅𑀦𑀼𑀭𑁄𑀥𑀯𑀲𑁂𑀦𑁂𑀯𑀸𑀢𑀺 𑀆𑀳 𑁋 ‘‘𑀲𑀯𑀢𑀺 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀽’’𑀢𑀺. 𑀏𑀢𑁆𑀣 𑀘 𑀘𑀓𑁆𑀔𑀸𑀤𑀬𑁄 𑀲𑁄𑀢𑀸𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀉𑀧𑀘𑀸𑀭𑀯𑀲𑁂𑀦 𑀲𑀬𑀁 𑀲𑀯𑀦𑁆𑀢𑀸 𑀯𑀺𑀬 𑀯𑀼𑀢𑁆𑀢𑀸. 𑀇𑀢𑀻𑀢𑀺 𑀏𑀯𑀁. 𑀲𑀩𑁆𑀩𑀸𑀢𑀺 𑀲𑀩𑁆𑀩𑀲𑁆𑀫𑀸. 𑀲𑀩𑁆𑀩𑀣𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀇𑀤𑀁 𑀯𑁄𑀤𑀸𑀦𑀦𑁆𑀢𑀺 𑀇𑀤𑀁 ‘‘𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀯𑁄𑀤𑀸𑀦𑀁.

𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬 ¶ 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸 𑀢𑁂𑀲𑀁 𑀲𑁄𑀢𑀸𑀦𑀁 𑀦𑀺𑀯𑀸𑀭𑀡𑀦𑁆𑀢𑀺. 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀢𑀫𑁂𑀯 𑀲𑀢𑀺𑀁 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺. 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂𑀢𑀺 𑀭𑀽𑀧𑀸𑀤𑀻𑀲𑀼 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀯𑁂𑀥𑀲𑀸𑀥𑀺𑀓𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 ¶ 𑀏𑀢𑁂 𑀲𑁄𑀢𑀸 𑀲𑀩𑁆𑀩𑀲𑁄 𑀧𑀺𑀥𑀺𑀬𑁆𑀬𑀦𑁆𑀢𑀺, 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀸𑀯𑀺𑀜𑁆𑀙𑀢𑀻𑀢𑀺 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀯𑀢𑁆𑀢𑀺𑀤𑁆𑀯𑀸𑀭𑀪𑀸𑀯𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀁, 𑀧𑀼𑀕𑁆𑀕𑀮𑀁 𑀯𑀸 𑀦𑀸𑀓𑀟𑁆𑀠𑀢𑀺. 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀇𑀥 𑀧𑀺𑀥𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 𑁋 ‘‘𑀧𑀜𑁆𑀜𑀸𑀬 𑀅𑀦𑀼𑀲𑀬𑀸 𑀧𑀳𑀻𑀬𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀅𑀦𑀼𑀲𑀬𑀦𑀺𑀫𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀦𑀼𑀲𑀬𑀸𑀪𑀸𑀯𑁂 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀲𑀬𑁂𑀲𑀽’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀁 𑀬𑀣𑀸 𑀔𑀦𑁆𑀥𑀯𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀧𑀺 𑀲𑁄𑀢𑀸𑀦𑀁 𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑀁 𑀲𑀁𑀯𑀭𑀁 𑀧𑀺𑀥𑀸𑀦𑀜𑁆𑀘 𑀅𑀚𑀸𑀦𑀦𑁆𑀢𑁂𑀦 𑀢𑀢𑁆𑀣 𑀯𑀸 𑀲𑀁𑀲𑀬𑀺𑀢𑁂𑀦 𑀏𑀓𑀁𑀲𑀺𑀓𑀢𑁆𑀢𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀓𑀢𑀸𑀢𑀺 𑀇𑀥 𑀧𑀼𑀘𑁆𑀙𑀸𑀯𑀺𑀘𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀕𑀸𑀣𑀸𑀬 (𑀲𑀼. 𑀦𑀺. 𑁧𑁦𑁩𑁮; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁭, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧; 𑀦𑁂𑀢𑁆𑀢𑀺. 𑁪𑁫) 𑀲𑀢𑀺𑀧𑀺 𑀦𑀺𑀯𑀸𑀭𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑁂 𑀏𑀓𑁄 𑀧𑀜𑁆𑀳𑁄𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀸𑀯 𑀲𑁄𑀢𑀸𑀦𑀁𑀬𑁂𑀯 𑀲𑀁𑀯𑀭𑁄 𑀧𑀺𑀥𑀸𑀦𑀜𑁆𑀘 𑀧𑀼𑀘𑁆𑀙𑀺𑀢𑀦𑁆𑀢𑀺 𑀲𑁄𑀢𑁂 𑀏𑀓𑀢𑁆𑀣𑀯𑀲𑁂𑀦 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀸𑀬 𑀏𑀓𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀏𑀓𑁄 𑀧𑀜𑁆𑀳𑁄𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀲𑁄𑀢𑀸𑀦𑀁 𑀯𑀸 𑀩𑀳𑀼𑀪𑀸𑀯𑀢𑁄 𑀩𑀳𑀽𑀢𑀺 𑀬𑀢𑁆𑀢𑀓𑀸 𑀲𑁄𑀢𑀸, 𑀢𑀢𑁆𑀢𑀓𑀸 𑀧𑀜𑁆𑀳𑀸𑀢𑀺. 𑀬𑁂𑀦 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺 𑀕𑀸𑀣𑀸𑀬𑀁 (𑀲𑀼. 𑀦𑀺. 𑁧𑁦𑁪𑁦; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁯, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩; 𑀦𑁂𑀢𑁆𑀢𑀺. 𑁪𑁫) 𑀲𑁄𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀲𑀁𑀯𑀭𑀧𑀺𑀥𑀸𑀦𑀸𑀦𑀁 𑀯𑀲𑁂𑀦 ‘‘𑀤𑁆𑀯𑁂 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀞𑀫𑀕𑀸𑀣𑀸𑀬𑀁 𑀲𑀢𑀺𑀧𑀺 𑀦𑀺𑀯𑀸𑀭𑀡𑀸𑀤𑀻𑀦𑀁 𑀮𑁄𑀓𑀸𑀥𑀸𑀭𑀪𑀸𑀯𑁂 𑀮𑁄𑀓𑀁 𑀅𑀦𑀸𑀫𑀲𑀺𑀢𑁆𑀯𑀸 𑀦𑀺𑀯𑀸𑀭𑀡𑀸𑀤𑀻𑀦𑀁 𑀯𑀺𑀪𑀸𑀕𑁂𑀦 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀬𑀲𑁆𑀫𑀸 𑀧𑀼𑀘𑁆𑀙𑀦𑁆𑀢𑁄 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀭𑀘𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀼𑀘𑁆𑀙𑀢𑀺, 𑀅𑀣 𑀔𑁄 𑀤𑁂𑀲𑀦𑀸𑀓𑀸𑀮𑁂 𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀧𑀺 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀸𑀬 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀦𑀺 𑀲𑁄𑀢𑀸𑀦𑀻’’𑀢𑀺 𑀕𑀸𑀣𑀸𑀬 𑀅𑀦𑀦𑁆𑀢𑀭𑀁 ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀧𑀜𑁆𑀜𑀸, 𑀬𑀸 𑀘 ¶ 𑀲𑀢𑀺 𑀬𑀜𑁆𑀘 𑀢𑀤𑀯𑀲𑁂𑀲𑀁 𑀦𑀸𑀫𑀭𑀽𑀧𑀁, 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀓𑀢𑁆𑀣 𑀦𑀺𑀭𑀼𑀚𑁆𑀛𑀢𑀺, 𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺.

𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀧𑀦𑀲𑁆𑀲 𑀬𑀲𑁆𑀫𑀸 𑀧𑀜𑁆𑀜𑀸𑀲𑀢𑀺𑀬𑁄 𑀦𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. 𑀅𑀬𑀜𑁆𑀘𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀫𑀁 𑀢𑁆𑀯𑀁, 𑀅𑀚𑀺𑀢, 𑀏𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺 ¶ 𑀅𑀦𑀦𑁆𑀢𑀭𑀕𑀸𑀣𑀸𑀬𑀁 (𑀲𑀼. 𑀦𑀺. 𑁧𑁦𑁪𑁨; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁬𑁧, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁫; 𑀦𑁂𑀢𑁆𑀢𑀺. 𑁧𑁧, 𑁪𑁫), 𑀬𑀢𑁆𑀣 𑀢𑀁 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺, 𑀢𑀁 𑀢𑁂 𑀯𑀤𑀸𑀫𑀺. 𑀢𑀲𑁆𑀲 𑀢𑀲𑁆𑀲 𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀳𑁂𑀯 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺, 𑀏𑀢𑁆𑀣𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺, 𑀏𑀢𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀢𑀲𑁆𑀲 𑀦𑀺𑀭𑁄𑀥𑁄 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀅𑀬𑀁 𑀧𑀜𑁆𑀳𑁂 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀻𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬𑀁 𑀲𑁄𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀼𑀲𑀬𑀧𑁆𑀧𑀳𑀸𑀦𑀓𑀺𑀘𑁆𑀘𑁂𑀦 𑀲𑀤𑁆𑀥𑀺𑀁 𑀲𑀢𑀺 𑀧𑀜𑁆𑀜𑀸 𑀘 𑀯𑀼𑀢𑁆𑀢𑀸, 𑀢𑀁 𑀲𑀼𑀢𑁆𑀯𑀸 𑀢𑀧𑁆𑀧𑀳𑀸𑀦𑁂 𑀧𑀜𑁆𑀜𑀸𑀲𑀢𑀻𑀲𑀼 𑀢𑀺𑀝𑁆𑀞𑀦𑁆𑀢𑀻𑀲𑀼 𑀢𑀸𑀲𑀁 𑀲𑀦𑁆𑀦𑀺𑀲𑁆𑀲𑀬𑁂𑀦 𑀦𑀸𑀫𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀯𑀝𑁆𑀝𑀢𑀺 𑀏𑀯. 𑀓𑀢𑁆𑀣 𑀦𑀼 𑀔𑁄 𑀇𑀫𑀸𑀲𑀁 𑀲𑀦𑀺𑀲𑁆𑀲𑀬𑀸𑀦𑀁 𑀧𑀜𑁆𑀜𑀸𑀲𑀢𑀻𑀦𑀁 𑀅𑀲𑁂𑀲𑀦𑀺𑀭𑁄𑀥𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀬𑀁 𑀧𑀼𑀘𑁆𑀙𑀸 𑀓𑀢𑀸𑀢𑀺 𑀆𑀳 𑁋 ‘‘𑀅𑀬𑀁 𑀧𑀜𑁆𑀳𑁂…𑀧𑁂… 𑀥𑀸𑀢𑀼’’𑀦𑁆𑀢𑀺. 𑀢𑀢𑁆𑀣 𑀅𑀦𑀼𑀲𑀦𑁆𑀥𑀻𑀬𑀢𑀺 𑀤𑁂𑀲𑀦𑀸 𑀏𑀢𑀸𑀬𑀸𑀢𑀺 𑀅𑀦𑀼𑀲𑀦𑁆𑀥𑀺.

𑀬𑀸𑀬 𑀧𑀝𑀺𑀧𑀤𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀤𑀁 𑀲𑀳 𑀯𑀺𑀲𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀡𑀺 𑀘 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑀢𑀸𑀦𑀻𑀢𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀸𑀦𑀻𑀢𑀺 𑀲𑀗𑁆𑀔𑀢𑀸𑀦𑀺. 𑀦𑀺𑀭𑁄𑀥𑀥𑀫𑁆𑀫𑀸𑀦𑀻𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸𑀦𑀺. 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄𑀢𑀺 𑀢𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀦𑀺𑀭𑁄𑀥𑁄 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀦𑀺𑀭𑁄𑀥𑁄 𑀅𑀲𑀗𑁆𑀔𑀢𑁄’’𑀢𑀺. 𑀲𑁄 𑀳𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀦 𑀲𑀗𑁆𑀔𑀢𑁄𑀢𑀺 𑀅𑀲𑀗𑁆𑀔𑀢𑁄. 𑀲𑀳 𑀯𑀺𑀲𑀬𑁂𑀦 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀲𑀪𑀸𑀯𑁂𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀳𑀸𑀬𑀓𑀯𑀺𑀪𑀸𑀕𑀫𑀼𑀔𑁂𑀦 𑀧𑀳𑀸𑀢𑀩𑁆𑀩𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀫𑀼𑀤𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀯𑀺𑀚𑁆𑀚𑀸𑀯𑀲𑁂𑀲𑀸𑀢𑀺 𑀤𑀲𑁆𑀲𑀦𑀫𑀕𑁆𑀕𑁂𑀦 𑀧𑀳𑀻𑀦𑀸𑀯𑀲𑁂𑀲𑀸 𑀅𑀯𑀺𑀚𑁆𑀚𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀲𑁂𑀲-𑀲𑀤𑁆𑀤𑁄 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀬𑀣𑀸 𑀳𑀺 𑀅𑀯𑀺𑀚𑁆𑀚𑀸, 𑀏𑀯𑀁 𑀏𑀢𑁂𑀧𑀺 𑀥𑀫𑁆𑀫𑀸 𑀅𑀧𑀸𑀬𑀕𑀫𑀦𑀻𑀬𑀲𑀪𑀸𑀯𑀸 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺 𑀏𑀯𑀸𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑀯𑀲𑁂𑀲𑀸’’𑀢𑀺𑀧𑀺 𑀧𑀸𑀞𑁄, 𑀏𑀢𑁆𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀤𑁂𑀲𑀼𑀧𑀺 𑀦𑀺𑀭𑀯𑀲𑁂𑀲-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄 ¶ . 𑀲𑀸𑀯𑀲𑁂𑀲𑀜𑁆𑀳𑀺 𑀧𑀼𑀭𑀺𑀫𑀫𑀕𑁆𑀕𑀤𑁆𑀯𑀬𑁂𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀳𑀻𑀬𑀦𑁆𑀢𑀺, 𑀇𑀢𑀭𑁂𑀳𑀺 𑀧𑀦 𑀦𑀺𑀭𑀯𑀲𑁂𑀲𑀦𑁆𑀢𑀺. 𑀢𑁂𑀥𑀸𑀢𑀼𑀓𑁂 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀻𑀢𑀺 𑀏𑀢𑁆𑀣 𑀢𑁂𑀥𑀸𑀢𑀼𑀓𑁂𑀢𑀺 𑀲𑀁𑀬𑁄𑀚𑀦𑀸𑀦𑀁 𑀯𑀺𑀲𑀬𑀤𑀲𑁆𑀲𑀦𑀁. 𑀢𑀢𑁆𑀣 𑀳𑀺 𑀢𑀸𑀦𑀺 𑀲𑀁𑀬𑁄𑀚𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺.

𑁧𑁨. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 𑀢𑀁 𑀧𑀳𑀸𑀬𑀓𑀁 𑀧𑀢𑁆𑀯𑀸. 𑀬𑀁 𑀧𑀦𑀸𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀤𑀁 𑀔𑀬𑁂 𑀜𑀸𑀡𑀦𑁆𑀢𑀺 𑀬𑁂𑀦 𑀜𑀸𑀡𑁂𑀦 𑀳𑁂𑀢𑀼𑀪𑀽𑀢𑁂𑀦 ‘‘𑀔𑀻𑀡𑀸 𑀫𑁂 𑀚𑀸𑀢𑀻’’𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸 𑀔𑀻𑀡𑀪𑀸𑀯𑀁 𑀚𑀸𑀦𑀸𑀢𑀺, 𑀇𑀤𑀁 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀜𑀸𑀡𑀁 𑀔𑀬𑁂 ¶ 𑀜𑀸𑀡𑀁 𑀦𑀸𑀫. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣𑀸𑀧𑀺 𑀬𑀦𑁆𑀢𑀺 𑀆𑀦𑁂𑀢𑀩𑁆𑀩𑀁 ‘‘𑀬𑀁 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀇𑀤𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀭𑀳𑀢𑁆𑀢𑀨𑀮𑀜𑀸𑀡𑀯𑀲𑁂𑀦 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀓𑀡𑁆𑀟 𑁧𑁩𑁫-𑁧𑁪𑁨) 𑀧𑀦 ‘‘𑀔𑀬𑁂 𑀜𑀸𑀡𑀁 𑀓𑀺𑀮𑁂𑀲𑀓𑁆𑀔𑀬𑀓𑀭𑁂 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀪𑀽𑀢𑁂 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑁂 𑀅𑀭𑀺𑀬𑀨𑀮𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀉𑀪𑀬𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀜𑀸𑀡𑀯𑀲𑁂𑀦𑁂𑀯 𑀯𑀺𑀪𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺, ‘‘𑀆𑀭𑀫𑁆𑀫𑀡𑀲𑀗𑁆𑀓𑁂𑀢𑁂𑀦 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀻’’𑀢𑀺 𑀘.

𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀳𑁂𑀝𑁆𑀞𑀺𑀫𑁂𑀲𑀼 𑀢𑀻𑀲𑀼 𑀨𑀮𑁂𑀲𑀼, 𑀉𑀧𑀭𑀺𑀫𑁂𑀲𑀼 𑀘 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀧𑀞𑀫𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀅𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 𑁋 ‘‘𑀬𑀜𑁆𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺. 𑀏𑀢𑁂𑀦 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀯𑀺𑀬 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀅𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀢𑀤𑀯𑀲𑁂𑀲𑀨𑀮𑀥𑀫𑁆𑀫𑀸𑀧𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀓𑁄 𑀧𑀦 𑀯𑀸𑀤𑁄 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀏𑀓𑀸 𑀧𑀜𑁆𑀜𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀢𑁆𑀢𑀸. 𑀬𑀤𑀺 𑀏𑀓𑀸, 𑀓𑀣𑀁 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀆𑀭𑀫𑁆𑀫𑀡𑀲𑀗𑁆𑀓𑁂𑀢𑁂𑀦𑀸𑀢𑀺 𑀔𑀬𑁂 𑀅𑀦𑀼𑀧𑁆𑀧𑀸𑀤𑁂𑀢𑀺 𑀇𑀫𑀸𑀬 𑀆𑀭𑀫𑁆𑀫𑀡𑀲𑀫𑀜𑁆𑀜𑀸𑀬. 𑀲𑀸 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸𑀢𑀺 𑀬𑀸 𑀧𑀼𑀩𑁆𑀩𑁂 𑀲𑁄𑀢𑀸𑀦𑀁 𑀧𑀺𑀥𑀸𑀦𑀓𑀺𑀘𑁆𑀘𑀸 𑀯𑀼𑀢𑁆𑀢𑀸 𑀧𑀜𑁆𑀜𑀸, 𑀲𑀸 𑀧𑀚𑀸𑀦𑀦𑀲𑀪𑀸𑀯𑁂𑀦 𑀧𑀜𑁆𑀜𑀸. 𑀇𑀢𑀭𑀸 𑀧𑀦 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀑𑀕𑀸𑀳𑀦𑀝𑁆𑀞𑁂𑀦 𑀲𑀢𑀻𑀢𑀺.

𑁧𑁩. 𑀏𑀯𑀁 ¶ ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀇𑀤𑀸𑀦𑀺 ‘‘𑀦𑀸𑀫𑀭𑀽𑀧’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀣 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀇𑀤𑀁 𑀦𑀸𑀫𑀭𑀽𑀧’’𑀦𑁆𑀢𑀺 𑀆𑀳. 𑀦𑀸𑀫𑀭𑀽𑀧𑀜𑁆𑀘 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀸𑀓𑀝𑀦𑀸𑀫𑀭𑀽𑀧𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀬𑁂’’𑀢𑀺𑀆𑀤𑀺𑀫𑀸𑀳. 𑀢𑀕𑁆𑀕𑀳𑀡𑁂𑀦𑁂𑀯 𑀳𑀺 𑀲𑀳𑀘𑀭𑀡𑀸𑀤𑀺𑀦𑀸 𑀢𑀤𑀜𑁆𑀜𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀭𑀽𑀧𑀥𑀫𑁆𑀫𑀸 𑀘 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀦𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀔𑀦𑁆𑀥𑀢𑁆𑀢𑀬𑀫𑁂𑀯 𑀕𑀳𑀺𑀢𑀦𑁆𑀢𑀺 ‘‘𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀭𑀽𑀧𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺? 𑀦𑀬𑀺𑀤𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀘𑀼𑀭𑀚𑀦𑀲𑁆𑀲 𑀧𑀦 𑀅𑀯𑀺𑀪𑀸𑀕𑁂𑀦 𑀕𑀳𑀡𑀻𑀬𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀸𑀣𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀧𑀼𑀘𑁆𑀙𑀺𑀢𑀸𑀢𑀺 𑀢𑀁 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀫𑀼𑀔𑁂𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀧𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀫𑀽𑀮𑀪𑀽𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀧𑀜𑁆𑀜𑀸𑀳𑀺 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀲𑀢𑀺 𑀘 𑀧𑀜𑁆𑀜𑀸 𑀘 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀆𑀳. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 ¶ 𑀲𑀫𑀦𑁆𑀯𑁂𑀲𑀫𑀸𑀦𑀸 𑀲𑀢𑀺 𑀲𑀺𑀚𑁆𑀛𑀦𑁆𑀢𑀻 𑀏𑀓𑀦𑁆𑀢𑁂𑀦 𑀲𑀫𑀸𑀥𑀺𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀲𑀢𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 𑁋 ‘‘𑀲𑀢𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘𑀸’’𑀢𑀺. 𑀢𑀣𑀸 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀯𑀺𑀥𑀸𑀬𑀺𑀦𑀻 𑀧𑀜𑁆𑀜𑀸 𑀲𑀺𑀚𑁆𑀛𑀫𑀸𑀦𑀸 𑀦 𑀯𑀺𑀦𑀸 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘𑀸’’𑀢𑀺.

𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀽𑀢𑀺 𑀇𑀫𑁂𑀲𑀼 𑀲𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀲𑀼 𑀢𑀁𑀲𑀳𑀚𑀸𑀢𑀸 𑀏𑀯 𑀬𑀸 𑀲𑀤𑁆𑀤𑀳𑀦𑀸. ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀻’’𑀢𑀺𑀧𑀺 𑀧𑀸𑀴𑀺, 𑀢𑀲𑁆𑀲𑀸 𑀇𑀫𑁂𑀳𑀺 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀯𑀘𑀦𑀲𑁂𑀲𑁄, 𑀆𑀭𑀫𑁆𑀫𑀡𑁂 𑀅𑀪𑀺𑀧𑁆𑀧𑀲𑀸𑀤𑀮𑀓𑁆𑀔𑀡𑀸 𑀲𑀤𑁆𑀥𑀸 𑀓𑀢𑁆𑀢𑀼𑀓𑀸𑀫𑀢𑀸𑀲𑀪𑀸𑀯𑀲𑁆𑀲 𑀙𑀦𑁆𑀤𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀬𑀸 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀙𑀦𑁆𑀤𑀲𑀫𑀸𑀥𑀻’’𑀢𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂. 𑀇𑀤𑀁 𑀧𑀳𑀸𑀦𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀲𑀸𑀥𑀓𑁄 𑀲𑀫𑀸𑀥𑀺 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑁄 𑀧𑀚𑀳𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. ‘‘𑀧𑀥𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀲𑀫𑀸𑀥𑀺 𑀏𑀓𑁄𑀤𑀻’’𑀢𑀺 𑀯𑀼𑀘𑁆𑀘𑀢𑀺.

‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸’’𑀢𑀺𑀆𑀤𑀺𑀦𑀸 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑀻𑀲𑁂𑀦 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀯𑀻𑀭𑀺𑀬𑀲𑀗𑁆𑀔𑀸𑀭𑀸𑀯 𑀕𑀳𑀺𑀢𑀸. 𑀢𑁂 𑀳𑀺 𑀬𑀸𑀯 𑀪𑀸𑀯𑀦𑀸𑀦𑀺𑀧𑁆𑀨𑀢𑁆𑀢𑀺 𑀢𑀸𑀯 𑀏𑀓𑀭𑀲𑁂𑀦 𑀲𑀭𑀡𑀢𑁄 𑀲𑀗𑁆𑀓𑀧𑁆𑀧𑁂𑀢𑀩𑁆𑀩𑀢𑁄 𑀘 𑀲𑀭𑀲𑀗𑁆𑀓𑀧𑁆𑀧𑀸’’𑀢𑀺 𑀯𑀼𑀢𑁆𑀢𑀸 ‘‘𑀏𑀯𑀁 ¶ 𑀫𑁂 𑀪𑀸𑀯𑀦𑀸 𑀳𑁄𑀢𑀽’’𑀢𑀺 𑀬𑀣𑀸 𑀇𑀘𑁆𑀙𑀺𑀢𑀸, 𑀢𑀣𑀸 𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑀢𑁄. 𑀢𑀤𑀼𑀪𑀬𑀦𑁆𑀢𑀺 𑀙𑀦𑁆𑀤𑀲𑀫𑀸𑀥𑀺𑀲𑀗𑁆𑀔𑀸𑀢𑀜𑁆𑀘 𑀧𑀥𑀸𑀦𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀜𑁆𑀘 𑀯𑀻𑀭𑀺𑀬𑀦𑁆𑀢𑀺 𑀢𑀁 𑀉𑀪𑀬𑀁. 𑀉𑀪𑀬𑀫𑁂𑀯 𑀳𑀺 𑀉𑀧𑀘𑀸𑀭𑀯𑀲𑁂𑀦 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 ‘‘𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀫𑁆𑀧𑀺 𑀳𑀺 𑀉𑀧𑀘𑀸𑀭𑀯𑀲𑁂𑀦 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀺, 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺.

𑀢𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺, 𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄, 𑀧𑀞𑀫𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀧𑀢𑀺𑀝𑁆𑀞𑀸 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀢𑁂𑀦 𑀳𑀺 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀜𑁆𑀘 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀅𑀬𑀁 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀬𑁄𑀕𑀻 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀓𑀺𑀘𑁆𑀘𑀢𑁄 ¶ 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻𑀢𑀺. 𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼.

𑀯𑀺𑀯𑁂𑀓𑀢𑁆𑀢𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄, 𑀓𑁂𑀯𑀮𑀜𑁆𑀘𑁂𑀢𑁆𑀣 𑀯𑁄𑀲𑁆𑀲𑀕𑁆𑀕𑁄 𑀤𑀼𑀯𑀺𑀥𑁄 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀘𑀸𑀢𑀺. 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁂 𑀬𑀼𑀚𑁆𑀚𑀢𑀺. 𑀢𑀣𑀸 𑀳𑀺 𑀅𑀬𑀁 𑀧𑀞𑀫𑀺𑀤𑁆𑀥𑀺𑀧𑀸𑀤𑁄 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀢𑀺. 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀧𑀭𑀺𑀡𑀫𑀦𑁆𑀢𑀁 𑀧𑀭𑀺𑀡𑀢𑀜𑁆𑀘 𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀬𑁄𑀕𑀻 𑀬𑀣𑀸 𑀧𑀞𑀫𑁄 𑀇𑀤𑁆𑀥𑀺𑀧𑀸𑀤𑁄 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑀜𑁆𑀘 𑀧𑀭𑀺𑀧𑀘𑁆𑀘𑀢𑀺, 𑀬𑀣𑀸 𑀘 𑀧𑀭𑀺𑀧𑀓𑁆𑀓𑁄 𑀳𑁄𑀢𑀺, 𑀢𑀣𑀸 𑀦𑀁 𑀪𑀸𑀯𑁂𑀢𑀻𑀢𑀺. 𑀲𑁂𑀲𑀺𑀤𑁆𑀥𑀺𑀧𑀸𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀏𑀯𑀁 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺.

𑁧𑁪. 𑀦 ¶ 𑀓𑁂𑀯𑀮𑀁 𑀘𑀢𑀼𑀢𑁆𑀣𑀇𑀤𑁆𑀥𑀺𑀧𑀸𑀤𑁄 𑀏𑀯 𑀲𑀫𑀸𑀥𑀺𑀜𑀸𑀡𑀫𑀽𑀮𑀓𑁄, 𑀅𑀣 𑀔𑁄 𑀲𑀩𑁆𑀩𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁄 𑀲𑀫𑀸𑀥𑀺 𑀜𑀸𑀡𑀫𑀽𑀮𑀓𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀲𑁄 𑀏𑀯 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑁄𑀢𑀺? 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀜𑀸𑀡𑀫𑀽𑀮𑀓𑁄. 𑀅𑀥𑀺𑀕𑀫𑀧𑀜𑁆𑀜𑀸𑀬 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄. 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸𑀬 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀣 𑀯𑀸 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀜𑀸𑀡𑀫𑀽𑀮𑀓𑁄. 𑀉𑀧𑀘𑀸𑀭𑀧𑀜𑁆𑀜𑀸𑀬 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄. 𑀅𑀧𑁆𑀧𑀦𑀸𑀧𑀜𑁆𑀜𑀸𑀬 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀉𑀧𑀘𑀸𑀭𑀧𑀜𑁆𑀜𑀸𑀬 𑀯𑀸 𑀜𑀸𑀡𑀫𑀽𑀮𑀓𑁄. 𑀅𑀧𑁆𑀧𑀦𑀸𑀧𑀜𑁆𑀜𑀸𑀬 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄. 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀬 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 ¶ 𑀧𑀼𑀭𑁂𑀢𑀺 𑀬𑀣𑀸 𑀲𑀫𑀸𑀥𑀺𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀧𑀼𑀭𑁂 𑀧𑀼𑀩𑁆𑀩𑁂 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀔𑀦𑁆𑀥𑀁 𑀔𑀦𑁆𑀥𑀽𑀧𑀦𑀺𑀩𑀤𑁆𑀥𑀜𑁆𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀧𑀘𑁆𑀙𑀸 𑀲𑀫𑀸𑀥𑀺𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀅𑀦𑀸𑀕𑀢𑀸𑀲𑀼 𑀚𑀸𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀔𑀦𑁆𑀥𑀁 𑀔𑀦𑁆𑀥𑀽𑀧𑀦𑀺𑀩𑀤𑁆𑀥𑀜𑁆𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀬𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀲𑀫𑀸𑀥𑀺𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦 𑀅𑀦𑀸𑀕𑀢𑁂𑀲𑀼 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀧𑀼𑀭𑁂 𑀅𑀢𑀻𑀢𑁂𑀲𑀼 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀤𑀺𑀯𑀲𑀪𑀸𑀕𑁂 𑀲𑀽𑀭𑀺𑀬𑀸𑀮𑁄𑀓𑁂𑀦 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀘𑀓𑁆𑀔𑀼𑀫𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀧𑀸𑀣𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀢𑀣𑀸 𑀭𑀢𑁆𑀢𑀺𑀪𑀸𑀕𑁂 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀯𑀢𑁆𑀢𑀫𑀸𑀦𑁂 𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀭𑀽𑀧𑀸𑀬𑀢𑀦𑀁 𑀦𑀢𑁆𑀣𑀺.

𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸𑀢𑀺 𑀬𑀣𑀸 𑀘 𑀭𑀢𑁆𑀢𑀺𑀬𑀁 𑀢𑀣𑀸 𑀤𑀺𑀯𑀸𑀧𑀺 𑀅𑀢𑀺𑀲𑀼𑀔𑀼𑀫𑀁 𑀓𑁂𑀦𑀘𑀺 𑀢𑀺𑀭𑁄𑀳𑀺𑀢𑀁 𑀬𑀜𑁆𑀘 𑀅𑀢𑀺𑀤𑀽𑀭𑁂, 𑀢𑀁 𑀲𑀩𑁆𑀩𑀭𑀽𑀧𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘 𑀭𑀽𑀧𑀸𑀬𑀢𑀦𑁂 𑀯𑀼𑀢𑁆𑀢𑀁, 𑀢𑀣𑀸 𑀲𑀫𑀸𑀥𑀺𑀲𑁆𑀲 𑀤𑀺𑀩𑁆𑀩𑀲𑁄𑀢𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀲𑀤𑁆𑀤𑀸𑀬𑀢𑀦𑁂 𑀘 𑀦𑁂𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑀭𑀺𑀬𑁄𑀦𑀤𑁆𑀥𑁂𑀦𑀸𑀢𑀺 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀧𑀸𑀭𑀺𑀩𑀦𑁆𑀥𑀓𑀓𑀺𑀮𑁂𑀲𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀝𑁂𑀦, 𑀅𑀧𑀭𑀺𑀬𑁄𑀦𑀤𑁆𑀥𑀢𑁆𑀢𑀸 𑀏𑀯 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁. 𑀏𑀢𑁂𑀦𑁂𑀯 𑀲𑀫𑀸𑀥𑀺𑀲𑁆𑀲 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀇𑀤𑁆𑀥𑀺𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀲𑁂𑀓𑁆𑀔𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀆𑀳 ¶ ‘‘𑀓𑀼𑀲𑀮𑀸𑀦𑀻’’𑀢𑀺. 𑀘𑀺𑀢𑁆𑀢𑀲𑀳𑀪𑀽𑀦𑀻𑀢𑀺𑀆𑀤𑀺 𑀢𑁂𑀲𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀦𑀺𑀭𑁄𑀥𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀣𑀸 ‘‘𑀦𑀸𑀫𑀭𑀽𑀧𑀜𑁆𑀘𑀸’’𑀢𑀺𑀆𑀤𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀦 𑀓𑁂𑀯𑀮𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀏𑀯, 𑀅𑀣 𑀔𑁄 𑀦𑀸𑀫𑀭𑀽𑀧𑀜𑁆𑀘 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀲𑁆𑀲. 𑀳𑁂𑀢𑀽𑀢𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀤𑀺𑀓𑁄. 𑀅𑀦𑀸𑀳𑀸𑀭𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁. 𑀅𑀦𑀪𑀺𑀦𑀦𑁆𑀤𑀺𑀢𑀦𑁆𑀢𑀺 𑀅𑀪𑀺𑀦𑀦𑁆𑀤𑀦𑀪𑀽𑀢𑀸𑀬 𑀢𑀡𑁆𑀳𑀸𑀬 𑀧𑀳𑀻𑀦𑀢𑁆𑀢𑀸 𑀏𑀯 𑀅𑀧𑀢𑁆𑀣𑀺𑀢𑀁. 𑀢𑀢𑁄 𑀏𑀯 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀯𑀺𑀜𑁆𑀜𑀸𑀡𑀁 𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀬𑀣𑀸 𑀘 𑀯𑀺𑀜𑁆𑀜𑀸𑀡𑀁, 𑀏𑀯𑀁 𑀦𑀸𑀫𑀭𑀽𑀧𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀳𑁂𑀢𑀼𑀦𑁄 𑀧𑀘𑁆𑀘𑀬𑀲𑁆𑀲 𑀘 𑀅𑀪𑀸𑀯𑀸 𑀢𑀧𑁆𑀧𑀘𑁆𑀘𑀬𑀸𑀦𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀪𑀸𑀯𑀸 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀘 𑀧𑀼𑀘𑁆𑀙𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑀺𑀢𑀸𑀢𑀺 𑀇𑀤𑀸𑀦𑀺 𑀢𑀸 𑀲𑀳 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀸𑀬𑀁 𑀧𑀤𑀢𑁆𑀣𑁄 𑁋 𑀲𑀗𑁆𑀔𑀸𑀢𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀯𑀻𑀫𑀁𑀲𑀺𑀢𑀥𑀫𑁆𑀫𑀸, 𑀅𑀭𑀳𑀢𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀓𑁆𑀔𑀸𑀢𑀺 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀫𑀸𑀦𑀸 𑀅𑀯𑀲𑁂𑀲𑀸 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀧𑀼𑀣𑀽𑀢𑀺 𑀩𑀳𑀽 𑀲𑀢𑁆𑀢𑀚𑀦𑀸. 𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺 𑀢𑁂𑀲𑀁 𑀲𑁂𑀔𑀸𑀲𑁂𑀔𑀸𑀦𑀁 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀢𑁆𑀯𑀁 𑀪𑀕𑀯𑀸 𑀧𑀝𑀺𑀧𑀢𑁆𑀢𑀺𑀁 𑀧𑀼𑀝𑁆𑀞𑁄 𑀫𑁂 𑀩𑁆𑀭𑀽𑀳𑀻𑀢𑀺. 𑀲𑁂𑀲𑀁 𑀧𑀸𑀴𑀺𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀺.

𑁧𑁫. 𑀓𑀺𑀲𑁆𑀲𑀸𑀢𑀺 ¶ 𑀓𑀺𑀲𑁆𑀲 𑀳𑁂𑀢𑀼, 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀔𑀸𑀲𑁂𑀔𑀯𑀺𑀧𑀲𑁆𑀲𑀦𑀸 𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑀬𑁄𑀕𑁂𑀦𑀸𑀢𑀺 𑀲𑁂𑀔𑁂 𑀅𑀲𑁂𑀔𑁂 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑁂 𑀘 𑀧𑀼𑀘𑁆𑀙𑀦𑀬𑁄𑀕𑁂𑀦, 𑀧𑀼𑀘𑁆𑀙𑀸𑀯𑀺𑀥𑀺𑀦𑀸𑀢𑀺 𑀅𑀢𑁆𑀣𑁄.

𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀦 𑀅𑀪𑀺𑀕𑀺𑀚𑁆𑀛𑁂𑀬𑁆𑀬. 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀤𑀬𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀫𑀦𑀲𑁄 𑀆𑀯𑀺𑀮𑀪𑀸𑀯𑀓𑀭𑁂 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄 𑀘𑀺𑀢𑁆𑀢𑁂𑀦 𑀅𑀦𑀸𑀯𑀺𑀮𑁄 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀅𑀲𑁂𑀓𑁆𑀔𑁄 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀭𑀺𑀢𑀼𑀮𑀺𑀢𑀢𑁆𑀢𑀸 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀆𑀤𑀻𑀳𑀺 𑀘 𑀲𑀢𑁄 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀉𑀢𑁆𑀢𑀫𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀢𑁄 𑀘 𑀳𑀼𑀢𑁆𑀯𑀸 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀓𑀼𑀲𑀮𑁄…𑀧𑁂… 𑀧𑀭𑀺𑀩𑁆𑀩𑀚𑁂’’𑀢𑀺 𑀆𑀳𑀸𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀢𑀢𑁆𑀣 ¶ 𑀬𑀁 𑀧𑀼𑀘𑁆𑀙𑀸𑀕𑀸𑀣𑀸𑀬𑀁 ‘‘𑀦𑀺𑀧𑀓𑁄’’𑀢𑀺 𑀧𑀤𑀁 𑀯𑀼𑀢𑁆𑀢𑀁, 𑀢𑀁 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀪𑀕𑀯𑀢𑁄 𑀘 𑀦𑁂𑀧𑀓𑁆𑀓𑀁 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀦𑀸𑀯𑀭𑀡𑀜𑀸𑀡𑀤𑀲𑁆𑀲𑀦𑁂𑀦 𑀤𑀻𑀧𑁂𑀢𑀩𑁆𑀩𑀦𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀁 𑀢𑀸𑀯 𑀓𑀫𑁆𑀫𑀤𑁆𑀯𑀸𑀭𑀪𑁂𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀲𑁂𑀔𑀸𑀲𑁂𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑁂𑀦 𑀢𑀣𑀸𑀕𑀢𑀲𑁆𑀲 𑀲𑁂𑀔𑀸𑀲𑁂𑀔𑀧𑀝𑀺𑀧𑀢𑁆𑀢𑀺𑀤𑁂𑀲𑀦𑀸𑀓𑁄𑀲𑀮𑁆𑀮𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀓𑁄 𑀘𑀸𑀢𑀺 𑀓𑁆𑀯 𑀘, 𑀓𑀲𑁆𑀫𑀺𑀁 𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺 ‘‘𑀬𑀁 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀦𑀺 𑀘𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀲𑀩𑁆𑀩𑀁 𑀲𑀗𑁆𑀔𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀬𑁂𑀦 𑀅𑀧𑁆𑀧𑀯𑀢𑁆𑀢𑀺, 𑀲𑁄 𑀧𑀝𑀺𑀖𑀸𑀢𑁄𑀢𑀺, 𑀏𑀢𑁂𑀦 𑀮𑀓𑁆𑀔𑀡𑀢𑁆𑀢𑀬𑀧𑁆𑀧𑀝𑀺𑀯𑁂𑀥𑀲𑁆𑀲 𑀤𑀼𑀭𑀪𑀺𑀲𑀫𑁆𑀪𑀯𑀢𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑁂𑀦 𑀳𑀺 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀜𑁆𑀘 𑀧𑀡𑁆𑀟𑀺𑀢𑀸 𑀧𑀝𑀺𑀚𑀸𑀦𑀦𑁆𑀢𑀺.

𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀦𑁆𑀢𑀺 𑀢𑀁 𑀧𑀝𑀺𑀖𑀸𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀙𑀴𑀸𑀭𑀫𑁆𑀫𑀡𑀲𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀓𑁄 𑀳𑀺 𑀲𑀫𑁆𑀫𑁄𑀳𑁄 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄𑀢𑀺. 𑀬𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀤𑀲𑁆𑀲𑀦𑀁 𑀉𑀧𑁆𑀧𑀢𑁆𑀢𑀺𑀭𑀳𑀁, 𑀢𑀢𑁆𑀣𑁂𑀯 𑀢𑀲𑁆𑀲 𑀧𑀝𑀺𑀖𑀸𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀬𑀁 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀦𑀺 𑀘𑀸’’𑀢𑀺. 𑀬𑀣𑀸 𑀇𑀥 𑀧𑀼𑀭𑀺𑀲𑁄𑀢𑀺𑀆𑀤𑀺 𑀉𑀧𑀫𑀸𑀤𑀲𑁆𑀲𑀦𑀁. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀧𑀼𑀭𑀺𑀲𑁄 𑀯𑀺𑀬 𑀲𑀩𑁆𑀩𑁄 𑀮𑁄𑀓𑁄, 𑀢𑀸𑀭𑀓𑀭𑀽𑀧𑀸𑀦𑀺 𑀯𑀺𑀬 𑀙 𑀆𑀭𑀫𑁆𑀫𑀡𑀸𑀦𑀺, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀸𑀭𑀓𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀯𑀺𑀬 𑀮𑁄𑀓𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀬𑀣𑀸𑀭𑀳𑀁 𑀙𑀴𑀸𑀭𑀫𑁆𑀫𑀡𑀚𑀸𑀦𑀦𑀁, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀸𑀭𑀓𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑀺 ‘‘𑀏𑀢𑁆𑀢𑀓𑀸𑀦𑀺 ¶ 𑀲𑀢𑀸𑀦𑀺, 𑀏𑀢𑁆𑀢𑀓𑀸𑀦𑀺 𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 𑀕𑀡𑀦𑀲𑀗𑁆𑀓𑁂𑀢𑁂𑀦 𑀅𑀚𑀸𑀦𑀦𑀁 𑀯𑀺𑀬 𑀮𑁄𑀓𑀲𑁆𑀲 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀓𑀣𑀜𑁆𑀘𑀺 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀸𑀦𑀯𑀩𑁄𑀥𑁄𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀇𑀤𑀸𑀦𑀺 𑀬𑁂𑀳𑀺 𑀧𑀤𑁂𑀳𑀺 𑀪𑀕𑀯𑀢𑀸 𑀆𑀬𑀲𑁆𑀫𑀢𑁄 𑀅𑀚𑀺𑀢𑀲𑁆𑀲 𑀲𑁂𑀔𑀸𑀲𑁂𑀔𑀧𑀝𑀺𑀧𑀤𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀲𑁂𑀔𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀸 𑀯𑀺𑀲𑁆𑀲𑀚𑁆𑀚𑀦𑁂. 𑀲𑁂𑀔𑁂𑀦𑀸𑀢𑀺 𑀲𑀺𑀓𑁆𑀔𑀸 𑀏𑀢𑀲𑁆𑀲 𑀲𑀻𑀮𑀦𑁆𑀢𑀺 𑀲𑁂𑀔𑁄, 𑀢𑁂𑀦 𑀲𑁂𑀔𑁂𑀦. 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀽𑀢𑀺 𑀤𑀼𑀯𑀺𑀥𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀼𑀝𑁆𑀞𑀸𑀦𑀻𑀬𑁂𑀲𑀽𑀢𑀺 𑀤𑁄𑀲𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀬𑀢𑁆𑀣 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀁, 𑀢𑁂𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀽𑀢𑀺 𑀅𑀢𑁆𑀣𑁄. ‘‘𑀧𑀝𑀺𑀖𑀝𑁆𑀞𑀸𑀦𑀻𑀬𑁂𑀲𑀽’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄.

𑀏𑀢𑁆𑀣 ¶ 𑀘 𑀕𑁂𑀥𑀧𑀝𑀺𑀲𑁂𑀥𑀘𑁄𑀤𑀦𑀸𑀬𑀁 𑀕𑁂𑀥𑀦𑀺𑀫𑀺𑀢𑁆𑀢𑁄 𑀤𑁄𑀲𑁄 𑀕𑁂𑀥𑁂 𑀲𑀢𑀺 𑀳𑁄𑀢𑀻𑀢𑀺 𑀢𑀢𑁄𑀧𑀺 𑀘𑀺𑀢𑁆𑀢𑀲𑁆𑀲 𑀭𑀓𑁆𑀔𑀺𑀢𑀩𑁆𑀩𑀢𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑀸 ‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸’’𑀢𑀺 (𑀲𑀼. 𑀦𑀺. 𑁧𑁦𑁪𑁫; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁬𑁪, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮; 𑀦𑁂𑀢𑁆𑀢𑀺. 𑁧𑁫-𑁧𑁭) 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀢𑀢𑁆𑀣 𑀬𑀸 𑀇𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀕𑁂𑀥𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀣 𑀯𑀸 𑀤𑁄𑀲𑀢𑁄 𑀘𑀺𑀢𑁆𑀢𑀲𑁆𑀲 𑀭𑀓𑁆𑀔𑀺𑀢𑀩𑁆𑀩𑀢𑀸 𑀕𑀸𑀣𑀸𑀬 𑀤𑀼𑀢𑀺𑀬𑀧𑀸𑀤𑁂𑀦 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀤𑀼𑀢𑀺𑀬𑀧𑀸𑀤𑁂𑀦 𑀳𑀺 𑀲𑁂𑀲𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀢𑀣𑀸 𑀳𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑁂𑀤𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀲𑀩𑁆𑀩𑁂 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑁂 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀲𑀫𑁆𑀫𑀧𑁆𑀧𑀥𑀸𑀦𑀫𑀼𑀔𑁂𑀦 𑀲𑁂𑀔𑀧𑀝𑀺𑀧𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀔𑁄 𑀅𑀪𑀺𑀕𑀺𑀚𑁆𑀛𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄𑀢𑀺 𑀆𑀯𑀺𑀮𑀸𑀦𑀁 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄. 𑀢𑀢𑁄 𑀏𑀯 𑀘 𑀅𑀦𑀪𑀺𑀕𑀺𑀚𑁆𑀛𑀦𑁆𑀢𑁄 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀓𑀣𑀁 𑀯𑀸𑀬𑀫𑀢𑀻𑀢𑀺 𑀆𑀳 𑁋 ‘‘𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀲𑁄𑀢𑀺 𑀉𑀢𑁆𑀢𑀭𑀺𑀯𑀺𑀲𑁂𑀲𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑁂𑀓𑁆𑀔𑁄. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀦 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑁆𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀧𑀬𑁄𑀕𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑁂𑀦𑁂𑀯 𑀲𑀳𑀚𑀸𑀢𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀯𑀸𑀬𑀫𑀢𑀻𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀆𑀲𑁂𑀯𑀦𑀸𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀸𑀬. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀉𑀧𑁆𑀧𑀸𑀤𑀸𑀬𑀸𑀢𑀺 𑀉𑀧𑁆𑀧𑀸𑀤𑀦𑀢𑁆𑀣𑀸𑀬. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀦𑀲𑁆𑀲𑀦𑀢𑁆𑀣𑀁 ¶ . 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀯𑀟𑁆𑀠𑀺𑀬𑀸. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀧𑀽𑀭𑀡𑀢𑁆𑀣𑀸𑀬𑀸𑀢𑀺 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄.

𑁧𑁬. ‘‘𑀓𑀢𑀫𑁂 𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺 𑀅𑀓𑀼𑀲𑀮𑀥𑀫𑁆𑀫𑀸 𑀓𑀼𑀲𑀮𑀥𑀫𑁆𑀫𑀸 𑀘 𑀬𑀸𑀤𑀺𑀲𑀸 𑀅𑀦𑀼𑀧𑁆𑀧𑀦𑁆𑀦𑀸 𑀬𑀸𑀤𑀺𑀲𑀸 𑀘 𑀉𑀧𑁆𑀧𑀦𑁆𑀦𑀸, 𑀢𑁂 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀇𑀫𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 ¶ 𑀯𑀸 𑀅𑀦𑀼𑀧𑁆𑀧𑀦𑁆𑀦𑀸 𑀦𑀸𑀫. 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀦𑀸𑀫 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀢𑁆𑀣𑀺. 𑀯𑀺𑀢𑀓𑁆𑀓𑀢𑁆𑀢𑀬𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀦𑀼𑀲𑀬𑀸 𑀏𑀯 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀸𑀦𑀁 𑀫𑀽𑀮𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑀸, 𑀦 𑀮𑁄𑀪𑀸𑀤𑀬𑁄 𑀏𑀯. 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑀬𑀸 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸 𑀅𑀲𑀫𑀼𑀕𑁆𑀖𑀸𑀝𑀺𑀢𑀼𑀧𑁆𑀧𑀦𑁆𑀦𑀸𑀢𑀺𑀆𑀤𑀺𑀉𑀧𑁆𑀧𑀦𑁆𑀦𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄 𑀦𑀸𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀦𑀸𑀫, 𑀦 𑀯𑀢𑁆𑀢𑀫𑀸𑀦𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀇𑀫𑁂 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀸𑀤𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫, 𑀓𑁄 𑀧𑀦 𑀯𑀸𑀤𑁄 𑀧𑀼𑀣𑀼𑀚𑁆𑀚𑀦𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀲𑀮𑀲𑀤𑁆𑀤𑁄 𑀘𑁂𑀢𑁆𑀣 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁫𑁮 𑀆𑀤𑀬𑁄) 𑀯𑀺𑀬 𑀅𑀦𑀯𑀚𑁆𑀚𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀇𑀫𑁂 𑀧𑀞𑀫𑀫𑀕𑁆𑀕𑁂 𑀲𑀤𑁆𑀥𑀸𑀤𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫.

𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀼𑀦𑀺𑀕𑁆𑀕𑀳𑀺𑀢𑁄 𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀆𑀳 𑁋 ‘‘𑀬𑁂𑀦 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀅𑀦𑀯𑀚𑁆𑀚𑀲𑀼𑀔𑀧𑀤𑀝𑁆𑀞𑀸𑀦𑁂𑀦 𑀅𑀯𑀺𑀓𑁆𑀔𑁂𑀧𑁂𑀦 𑀘𑁂𑀢𑁄𑀤𑀼𑀓𑁆𑀔𑀲𑀦𑁆𑀦𑀺𑀲𑁆𑀲𑀬𑁄 𑀯𑀺𑀓𑁆𑀔𑁂𑀧𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀲𑀼𑀦𑀺𑀕𑁆𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀭𑀸𑀧𑀭𑀸𑀥𑀁 𑀲𑀼𑀔𑁂𑀦 𑀲𑀳𑀢𑀻𑀢𑀺 𑀯𑀻𑀭𑀺𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀼𑀦𑀺𑀕𑁆𑀕𑀳𑀺𑀢𑁄𑀢𑀺 𑀆𑀳 𑁋 ‘‘𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀲𑀫𑀸𑀥𑀺𑀆𑀤𑀻𑀦𑀫𑁆𑀧𑀺 𑀬𑀣𑀸𑀲𑀓𑀁𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀁 𑀧𑀜𑁆𑀜𑀯𑀦𑁆𑀢𑀲𑁆𑀲𑁂𑀯 𑀇𑀚𑁆𑀛𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀬𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂’’𑀢𑀺𑀆𑀤𑀺.

𑀏𑀢𑁂𑀲𑀁 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀯𑀺𑀲𑀬𑁂 𑀚𑁂𑀝𑁆𑀞𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀫𑁂𑀲𑀜𑁆𑀘 𑀲𑀤𑁆𑀥𑀸𑀤𑀻𑀦𑀁 𑀲𑁂𑀔𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀩𑁆𑀩𑁂𑀧𑀺 𑀲𑁂𑀔𑀸 𑀥𑀫𑁆𑀫𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀲𑁂𑀔𑁄’’𑀢𑀺𑀆𑀤𑀺𑀦𑀸 𑀲𑁂𑀔𑀧𑀝𑀺𑀧𑀤𑀁 𑀦𑀺𑀕𑀫𑁂𑀢𑀺.

𑁧𑁭. 𑀏𑀯𑀁 𑀲𑁂𑀔𑀧𑀝𑀺𑀧𑀤𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀲𑁂𑀔𑀧𑀝𑀺𑀧𑀤𑀁 𑀯𑀺𑀪𑀚𑀺𑀢𑀼𑀁 ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀯𑀼𑀢𑁆𑀢𑀥𑀫𑁆𑀫𑁂 𑀢𑀸𑀯 𑀯𑀺𑀪𑀚𑀺𑀢𑁆𑀯𑀸 𑀢𑀢𑁆𑀣 𑀅𑀲𑁂𑀓𑁆𑀔𑀲𑁆𑀲 𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑁄 𑀦𑀸𑀫𑀸’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀺𑀮𑁂𑀲𑀮𑁄𑀓𑁂𑀦 𑀪𑀯𑀮𑁄𑀓𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀲𑀫𑀼𑀤𑀸𑀕𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀲𑁄 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼, 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀯𑀸 𑀞𑀺𑀢𑁄. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀲𑀻𑀮𑀲𑀫𑀸𑀥𑀬𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑁆𑀧𑀸𑀤𑁂𑀢𑀺. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀇𑀦𑁆𑀤𑁆𑀭𑀺𑀬𑁂𑀲𑀼 𑀯𑀟𑁆𑀠𑀺𑀬𑀫𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀯𑀲𑁂𑀦 𑀦𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀸 𑀪𑀯𑀢𑀺.

𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸. 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀘. ‘‘𑀲𑀸 𑀤𑀼𑀯𑀺𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀬𑀤𑀸 𑀳𑀺 𑀲𑁂𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀢𑁆𑀣 ‘‘𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑁂𑀳𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀳𑀻’’𑀢𑀺 𑀇𑀫𑀺𑀦𑀸 𑀩𑀮𑀯𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀬𑀤𑀸 𑀳𑀺 𑀲𑁂𑀔𑁄𑀢𑀺 𑀘𑁂𑀢𑁆𑀣 𑀲𑀺𑀓𑁆𑀔𑀦𑀲𑀻𑀮𑀢𑀸𑀬 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 𑀲𑁂𑀔𑀧𑀤𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀓𑀢𑁆𑀯𑀸 ‘‘𑀤𑁆𑀯𑁂 𑀥𑀫𑁆𑀫𑀸 𑀓𑁄𑀲𑀮𑁆𑀮𑀁 𑀕𑀘𑁆𑀙𑀦𑁆𑀢𑀺 𑀤𑀲𑁆𑀲𑀦𑀓𑁄𑀲𑀮𑁆𑀮𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀧𑀼𑀩𑁆𑀩𑀪𑀸𑀕𑀲𑀺𑀓𑁆𑀔𑀁 𑀲𑀺𑀓𑁆𑀔𑀦𑁆𑀢𑁄 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑁂𑀳𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀳𑀺 𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀢𑀤𑀸 𑀢𑀲𑁆𑀲 𑀢𑁂 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 𑀤𑀲𑁆𑀲𑀦𑀓𑁄𑀲𑀮𑁆𑀮𑀁 𑀧𑀞𑀫𑀫𑀕𑁆𑀕𑀜𑀸𑀡𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀧𑀸𑀧𑀼𑀡𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀖𑀝𑁂𑀦𑁆𑀢𑀺. 𑀬𑀤𑀸 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀺𑀲𑁂𑀔𑁄 𑀯𑀼𑀢𑁆𑀢𑀦𑀬𑁂𑀦 𑀦𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀢𑀤𑀸 𑀢𑀲𑁆𑀲 𑀢𑁂 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 𑀪𑀸𑀯𑀦𑀸𑀓𑁄𑀲𑀮𑁆𑀮𑀁 𑀕𑀘𑁆𑀙𑀦𑁆𑀢𑀻𑀢𑀺.

𑀢𑀁 𑀜𑀸𑀡𑀦𑁆𑀢𑀺 𑀬𑀸 𑀧𑀼𑀩𑁆𑀩𑁂 𑀦𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀢𑀁 𑀦𑁂𑀬𑁆𑀬𑀧𑀭𑀺𑀚𑀸𑀦𑀦𑀜𑀸𑀡𑀁. 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀺𑀲𑀬𑀪𑁂𑀤𑁂𑀦 𑀢𑀲𑁆𑀲 𑀪𑁂𑀤𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑁂 𑀜𑀸𑀡𑀦𑁆𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀮𑀓𑁆𑀔𑀡𑁂 𑀜𑀸𑀡𑀁. 𑀢𑀁 𑀧𑀦 𑀬𑀲𑁆𑀫𑀸 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀳𑁂𑀢𑀼𑀳𑁂𑀢𑀼𑀨𑀮𑀪𑁂𑀤𑀢𑁄 𑀤𑀼𑀯𑀺𑀥𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀘 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀘𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀁.

𑀧𑀭𑀺𑀜𑁆𑀜𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀲𑁆𑀫𑀸 𑀧𑀦𑀲𑁆𑀲 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀲𑀮𑀓𑁆𑀔𑀡𑀢𑁄 𑀧𑀘𑁆𑀘𑀬𑀢𑁄 𑀘 𑀅𑀪𑀺𑀚𑀸𑀦𑀺𑀢𑁆𑀯𑀸 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑁂𑀳𑀺 𑀢𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀚𑀸𑀦𑀦𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀯𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀬𑀸 𑀧𑀭𑀺𑀚𑀸𑀦𑀦𑀸, 𑀇𑀤𑀁 𑀓𑀼𑀲𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁𑀕𑀳𑀺𑀢𑀸𑀢𑀺 𑀏𑀯𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀕𑀳𑀺𑀢𑀸 𑀲𑀫𑁆𑀫𑀲𑀺𑀢𑀸. 𑀇𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀇𑀤𑀁 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀓𑀁 𑀨𑀮𑀁 𑀧𑀝𑀺𑀧𑀸𑀝𑀺𑀬𑀸 𑀉𑀧𑁆𑀧𑀸𑀤𑁂𑀦𑁆𑀢𑀺 ¶ , 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀪𑀸𑀯𑁂𑀦 𑀉𑀧𑀘𑀭𑀡𑀢𑁄 𑀬𑀣𑀸 𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺. 𑀢𑁂𑀲𑀦𑁆𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 ¶ . 𑀏𑀯𑀁𑀕𑀳𑀺𑀢𑀸𑀦𑀦𑁆𑀢𑀺 𑀏𑀯𑀁𑀧𑀯𑀢𑁆𑀢𑀺𑀢𑀸𑀦𑀁. 𑀅𑀬𑀁 𑀅𑀢𑁆𑀣𑁄𑀢𑀺 𑀅𑀬𑀁 𑀲𑀘𑁆𑀘𑀸𑀦𑀁 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑁄 𑀅𑀢𑁆𑀣𑁄. 𑀬𑀣𑀸 𑀳𑀺 𑀧𑀭𑀺𑀜𑁆𑀜𑀸𑀧𑀜𑁆𑀜𑀸 𑀲𑀫𑁆𑀫𑀲𑀺𑀢𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀲𑀦𑀥𑀫𑁆𑀫𑁂 𑀢𑀢𑁆𑀣 𑀲𑀫𑁆𑀫𑀲𑀦𑀸𑀓𑀸𑀭𑀁 𑀧𑀭𑀺𑀚𑀸𑀦𑀸𑀢𑀺, 𑀏𑀯𑀁 𑀲𑀫𑁆𑀫𑀲𑀦𑀨𑀮𑀫𑁆𑀧𑀺 𑀧𑀭𑀺𑀚𑀸𑀦𑀸𑀢𑀻𑀢𑀺 𑀓𑀢𑁆𑀯𑀸 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄.

𑀬𑁂 𑀅𑀓𑀼𑀲𑀮𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀫𑀸𑀳. 𑀲𑀩𑁆𑀩𑁂 𑀳𑀺 𑀅𑀓𑀼𑀲𑀮𑀸 𑀲𑀫𑀼𑀤𑀬𑀧𑀓𑁆𑀔𑀺𑀬𑀸𑀢𑀺. 𑀬𑁂 𑀓𑀼𑀲𑀮𑀸𑀢𑀺 𑀫𑀕𑁆𑀕𑀥𑀫𑁆𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄. 𑀬𑀤𑀺𑀧𑀺 𑀨𑀮𑀥𑀫𑁆𑀫𑀸𑀧𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀓𑀢𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀬𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀓𑀼𑀲𑀮𑁄𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀅𑀢𑁆𑀣𑁂𑀲𑀼 𑀓𑀼𑀲𑀮𑁄. 𑀥𑀫𑁆𑀫𑀓𑀼𑀲𑀮𑁄𑀢𑀺 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑁄. 𑀧𑀸𑀴𑀺𑀅𑀢𑁆𑀣𑀧𑀸𑀴𑀺𑀥𑀫𑁆𑀫𑀸 𑀯𑀸 𑀅𑀢𑁆𑀣𑀥𑀫𑁆𑀫𑀸. 𑀓𑀮𑁆𑀬𑀸𑀡𑀢𑀸𑀓𑀼𑀲𑀮𑁄𑀢𑀺 𑀬𑀼𑀢𑁆𑀢𑀢𑀸𑀓𑀼𑀲𑀮𑁄, 𑀘𑀢𑀼𑀦𑀬𑀓𑁄𑀯𑀺𑀤𑁄𑀢𑀺 𑀅𑀢𑁆𑀣𑁄, 𑀤𑁂𑀲𑀦𑀸𑀬𑀼𑀢𑁆𑀢𑀺𑀓𑀼𑀲𑀮𑁄 𑀯𑀸. 𑀨𑀮𑀢𑀸𑀓𑀼𑀲𑀮𑁄𑀢𑀺 𑀔𑀻𑀡𑀸𑀲𑀯𑀨𑀮𑀓𑀼𑀲𑀮𑁄. ‘‘𑀆𑀬𑀓𑀼𑀲𑀮𑁄’’𑀢𑀺𑀆𑀤𑀻𑀲𑀼 𑀆𑀬𑁄𑀢𑀺 𑀯𑀟𑁆𑀠𑀺. 𑀲𑀸 𑀅𑀦𑀢𑁆𑀣𑀳𑀸𑀦𑀺𑀢𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸. 𑀅𑀧𑀸𑀬𑀸𑀢𑀺 𑀅𑀯𑀟𑁆𑀠𑀺. 𑀲𑀸𑀧𑀺 𑀅𑀢𑁆𑀣𑀳𑀸𑀦𑀺𑀢𑁄 𑀅𑀦𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑀸. 𑀉𑀧𑀸𑀬𑁄𑀢𑀺 𑀲𑀢𑁆𑀢𑀸𑀦𑀁 𑀅𑀘𑁆𑀘𑀸𑀬𑀺𑀓𑁂 𑀓𑀺𑀘𑁆𑀘𑁂 𑀯𑀸 𑀪𑀬𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀢𑀺𑀓𑀺𑀘𑁆𑀙𑀦𑀲𑀫𑀢𑁆𑀣𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁, 𑀢𑀢𑁆𑀣 𑀓𑀼𑀲𑀮𑁄𑀢𑀺 𑀅𑀢𑁆𑀣𑁄. 𑀔𑀻𑀡𑀸𑀲𑀯𑁄 𑀳𑀺 𑀲𑀩𑁆𑀩𑀲𑁄 𑀅𑀯𑀺𑀚𑁆𑀚𑀸𑀬 𑀧𑀳𑀻𑀦𑀢𑁆𑀢𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀏𑀢𑁂𑀲𑀼 𑀆𑀬𑀸𑀤𑀻𑀲𑀼 𑀓𑀼𑀲𑀮𑁄𑀢𑀺. 𑀏𑀯𑀁 𑀅𑀲𑁂𑀔𑀲𑁆𑀲 𑀓𑁄𑀲𑀮𑁆𑀮𑀁 𑀏𑀓𑀤𑁂𑀲𑁂𑀦 𑀯𑀺𑀪𑀸𑀯𑁂𑀢𑁆𑀯𑀸 𑀧𑀼𑀦 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀢𑀸 𑀓𑁄𑀲𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳.

𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀲𑁆𑀲 𑀅𑀲𑁂𑀔𑀲𑁆𑀲 𑀲𑀢𑁄𑀓𑀸𑀭𑀺𑀢𑀸𑀬 𑀅𑀜𑁆𑀜𑀁 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣’’𑀦𑁆𑀢𑀺. 𑀇𑀤𑀸𑀦𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀁 𑀲𑁂𑀔𑀸𑀲𑁂𑀔𑀧𑀝𑀺𑀧𑀤𑀁 𑀦𑀺𑀕𑀫𑁂𑀦𑁆𑀢𑁄 ‘‘𑀇𑀫𑀸 𑀤𑁆𑀯𑁂 𑀘𑀭𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁄𑀚𑁆𑀛𑀦𑁆𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑀁. 𑀢𑀁 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀢𑀁 𑀩𑁄𑀚𑁆𑀛𑀁 𑀘𑀢𑀼𑀩𑁆𑀩𑀺𑀥𑀁, 𑀘𑀢𑀼𑀲𑀘𑁆𑀘𑀪𑀸𑀯𑀢𑁄. 𑀏𑀯𑀁 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀬𑁄 𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀅𑀲𑁂𑀔𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀲𑀢𑁄 𑀅𑀪𑀺𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀥𑀸𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 ¶ 𑀘 𑀫𑀳𑀸𑀣𑁂𑀭𑁄 𑀯𑀺𑀘𑀬𑀳𑀸𑀭𑀁 𑀯𑀺𑀪𑀚𑀦𑁆𑀢𑁄 𑀅𑀚𑀺𑀢𑀲𑀼𑀢𑁆𑀢𑀯𑀲𑁂𑀦 (𑀲𑀼. 𑀦𑀺. 𑁧𑁦𑁩 𑀆𑀤𑀬𑁄; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁭 𑀆𑀤𑀬𑁄, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧 𑀆𑀤𑀬𑁄) 𑀧𑀼𑀘𑁆𑀙𑀸𑀯𑀺𑀘𑀬𑀁 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑀸𑀦𑀁 𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸 𑀓𑀸𑀢𑀩𑁆𑀩𑀸, 𑀆𑀘𑀺𑀓𑁆𑀔𑀺𑀢𑀩𑁆𑀩𑀸 𑀯𑀸, 𑀯𑀺𑀯𑁂𑀘𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀢𑁆𑀢𑀲𑁆𑀲 𑀘𑀸𑀢𑀺𑀆𑀤𑀺 𑀅𑀦𑀼𑀕𑀻𑀢𑀺𑀯𑀺𑀘𑀬𑀦𑀺𑀤𑀲𑁆𑀲𑀦𑀁. 𑀅𑀦𑀼𑀕𑀻𑀢𑀺 𑀅𑀢𑁆𑀣𑀢𑁄 ¶ 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀫𑀸𑀦𑁂𑀢𑀩𑁆𑀩𑀸𑀢𑀺 𑀲𑀼𑀢𑁆𑀢𑀦𑁆𑀢𑀭𑀤𑁂𑀲𑀦𑀸𑀲𑀗𑁆𑀔𑀸𑀢𑀸 𑀅𑀦𑀼𑀕𑀻𑀢𑀺 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀺𑀬𑀫𑀸𑀦𑁂𑀦 𑀲𑀼𑀢𑁆𑀢𑁂𑀦 𑀲𑀫𑀸𑀦𑀸 𑀲𑀤𑀺𑀲𑀻 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀺𑀁 𑀯𑀸 𑀲𑀼𑀢𑁆𑀢𑁂 𑀲𑀫𑁆𑀫𑀸 𑀆𑀦𑁂𑀢𑀩𑁆𑀩𑀸. 𑀅𑀢𑁆𑀣𑀸𑀧𑀕𑀢𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑁂𑀢𑀁, 𑀅𑀲𑀫𑁆𑀩𑀦𑁆𑀥𑀢𑁆𑀣𑀁 𑀯𑀸 𑀤𑀲𑀤𑀸𑀴𑀺𑀫𑀸𑀤𑀺𑀯𑀘𑀦𑀁 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀯𑀢𑀻’’𑀢𑀺. 𑀏𑀢𑁂𑀦 𑀅𑀢𑁆𑀣𑀲𑁆𑀲 𑀲𑀫𑀸𑀦𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀫𑀸𑀳. 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀅𑀲𑀫𑁆𑀫𑀸𑀯𑀼𑀢𑁆𑀢𑀲𑁆𑀲. 𑀤𑀼𑀦𑁆𑀦𑀬𑁄𑀢𑀺 𑀤𑀼𑀓𑁆𑀔𑁂𑀦 𑀦𑁂𑀢𑀩𑁆𑀩𑁄, 𑀦𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀩𑁆𑀬𑀜𑁆𑀚𑀦𑀼𑀧𑁂𑀢𑀦𑁆𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀫𑀼𑀧𑁂𑀢𑀁.

𑀏𑀯𑀁 𑀅𑀦𑀼𑀕𑀻𑀢𑀺𑀯𑀺𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑀯𑀸𑀭𑁂 ‘‘𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄’’𑀢𑀺 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀚𑀺𑀢𑀼𑀁 ‘‘𑀲𑀼𑀢𑁆𑀢𑀜𑁆𑀘 𑀧𑀯𑀺𑀘𑀺𑀦𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀘𑀺𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀘𑁆𑀘𑀯𑀘𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀳𑀘𑁆𑀘𑀯𑀘𑀦𑀦𑁆𑀢𑀺 𑀪𑀕𑀯𑀢𑁄 𑀞𑀸𑀦𑀓𑀭𑀡𑀸𑀦𑀺 𑀆𑀳𑀘𑁆𑀘 𑀅𑀪𑀺𑀳𑀦𑁆𑀢𑁆𑀯𑀸 𑀧𑀯𑀢𑁆𑀢𑀯𑀘𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀫𑀁 𑀤𑁂𑀲𑀺𑀢𑀲𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀦𑁆𑀥𑀺𑀯𑀘𑀦𑀦𑁆𑀢𑀺 𑀲𑀸𑀯𑀓𑀪𑀸𑀲𑀺𑀢𑀁. 𑀢𑀜𑁆𑀳𑀺 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀼𑀲𑀦𑁆𑀥𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 ‘‘𑀅𑀦𑀼𑀲𑀦𑁆𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀦𑀻𑀢𑀢𑁆𑀣𑀦𑁆𑀢𑀺 𑀬𑀣𑀸𑀭𑀼𑀢𑀯𑀲𑁂𑀦 𑀜𑀸𑀢𑀩𑁆𑀩𑀢𑁆𑀣𑀁. 𑀦𑁂𑀬𑁆𑀬𑀢𑁆𑀣𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀣𑀁. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀧𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑁄 𑀤𑁂𑀲𑀦𑀸 𑀲𑁄𑀴𑀲𑀯𑀺𑀥𑁂 𑀲𑀸𑀲𑀦𑀧𑀝𑁆𑀞𑀸𑀦𑁂 𑀏𑀓𑀁 𑀪𑀸𑀕𑀁 𑀅𑀪𑀚𑀦𑁆𑀢𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄𑀧𑀺 𑀦𑀬𑁄 𑀯𑀺𑀘𑁂𑀢𑀩𑁆𑀩𑀪𑀸𑀯𑁂𑀦 𑀇𑀥 𑀦𑀺𑀓𑁆𑀔𑀺𑀢𑁆𑀢𑁄.

𑀓𑀼𑀳𑀺𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲𑀸𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀓𑀲𑁆𑀫𑀺𑀁 𑀧𑀤𑁂𑀲𑁂 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼. 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑀩𑁆𑀩𑀸𑀦𑀻𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀼𑀢𑁆𑀢𑀲𑁆𑀲 ‘‘𑀓𑀼𑀳𑀺𑀁 𑀓𑀲𑁆𑀫𑀺𑀁 𑀧𑀤𑁂𑀲𑁂 𑀓𑀲𑁆𑀫𑀺𑀁 𑀯𑀸 𑀧𑀤𑁂 𑀧𑀲𑁆𑀲𑀺𑀢𑀩𑁆𑀩𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀘𑁂𑀢𑀼𑀁, 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑁄𑀥𑀲𑀘𑁆𑀘𑀁 𑀫𑀕𑁆𑀕𑀲𑀘𑁆𑀘𑀁 𑀓𑀼𑀳𑀺𑀁 𑀧𑀲𑁆𑀲𑀺𑀢𑀩𑁆𑀩𑀁 𑀤𑀝𑁆𑀞𑀩𑁆𑀩𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀘𑁂𑀢𑀼’’𑀦𑁆𑀢𑀺 𑀏𑀯𑀁 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀘𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀢𑀺 𑀏𑀯𑀁 𑀲𑀼𑀢𑁆𑀢𑀁 𑀧𑀯𑀺𑀘𑁂𑀢𑀩𑁆𑀩𑀦𑁆𑀢𑀺 𑀆𑀤𑀺𑀢𑁄 𑀫𑀚𑁆𑀛𑀢𑁄 𑀧𑀭𑀺𑀬𑁄𑀲𑀸𑀦𑀢𑁄 ¶ 𑀘 𑀏𑀯𑀁 𑀇𑀫𑀺𑀦𑀸 𑀧𑀼𑀘𑁆𑀙𑀸𑀯𑀺𑀘𑀬𑀸𑀤𑀺𑀦𑀬𑁂𑀦 𑀲𑀼𑀢𑁆𑀢𑀁 𑀧𑀯𑀺𑀘𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑀻𑀢𑀺𑀯𑀺𑀘𑀬𑀸 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸. 𑀅𑀲𑁆𑀲𑀸𑀤𑀸𑀤𑀺𑀯𑀺𑀘𑀬𑁄 𑀧𑀦 𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀦𑀬𑀢𑁄 𑀤𑀲𑁆𑀲𑀺𑀢𑁄, 𑀲𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀩𑁆𑀩𑀺𑀘𑀬𑁂𑀦𑁂𑀯 𑀘 𑀧𑀤𑀯𑀺𑀘𑀬𑁄 𑀲𑀺𑀤𑁆𑀥𑁄𑀢𑀺.

𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧𑁮. 𑀢𑀢𑁆𑀣 ¶ 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄𑀢𑀺𑀆𑀤𑀺 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀓𑀺𑀁 𑀬𑁄𑀚𑀬𑀢𑀻𑀢𑀺 𑀬𑀼𑀢𑁆𑀢𑀺𑀳𑀸𑀭𑀲𑁆𑀲 𑀯𑀺𑀲𑀬𑀁 𑀧𑀼𑀘𑁆𑀙𑀢𑀺. 𑀓𑁄 𑀧𑀦𑁂𑀢𑀲𑁆𑀲 𑀯𑀺𑀲𑀬𑁄? 𑀅𑀢𑀣𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑀸 𑀲𑀼𑀢𑁆𑀢𑀢𑁆𑀣𑀸 𑀯𑀺𑀲𑀬𑁄, 𑀢𑁂 𑀳𑀺 𑀢𑁂𑀦 𑀲𑀸𑀢𑀺𑀲𑀬𑀁 𑀬𑀸𑀣𑀸𑀯𑀢𑁄 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀇𑀢𑀭𑁂𑀲𑀼𑀧𑀺 𑀅𑀬𑀁 𑀳𑀸𑀭𑁄 𑀇𑀘𑁆𑀙𑀺𑀢𑁄 𑀏𑀯. 𑀢𑀁 𑀧𑀦 𑀪𑀽𑀢𑀓𑀣𑀦𑀫𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦𑀸𑀬𑀁 𑀬𑀼𑀢𑁆𑀢𑀺𑀕𑀯𑁂𑀲𑀦𑀸 𑀦𑀸𑀫 𑀦 𑀫𑀳𑀸𑀧𑀤𑁂𑀲𑁂𑀦 𑀯𑀺𑀦𑀸, 𑀢𑀲𑁆𑀫𑀸 𑀬𑀼𑀢𑁆𑀢𑀺𑀳𑀸𑀭𑀁 𑀯𑀺𑀪𑀚𑀦𑁆𑀢𑁄 𑀢𑀲𑁆𑀲 𑀮𑀓𑁆𑀔𑀡𑀁 𑀢𑀸𑀯 𑀉𑀧𑀤𑀺𑀲𑀺𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀳𑀸𑀧𑀤𑁂𑀲𑀸𑀢𑀺 𑀫𑀳𑀸𑀅𑀧𑀤𑁂𑀲𑀸, 𑀩𑀼𑀤𑁆𑀥𑀸𑀤𑀬𑁄 𑀫𑀳𑀦𑁆𑀢𑁂 𑀅𑀧𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀫𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀳𑀸𑀧𑀤𑁂𑀲𑀸𑀢𑀺 𑀫𑀳𑀸𑀑𑀓𑀸𑀲𑀸, 𑀫𑀳𑀦𑁆𑀢𑀸𑀦𑀺 𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀅𑀧𑀤𑀺𑀲𑁆𑀲𑀢𑀻𑀢𑀺 𑀅𑀧𑀤𑁂𑀲𑁄, 𑀩𑀼𑀤𑁆𑀥𑁄 𑀅𑀧𑀤𑁂𑀲𑁄 𑀏𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀧𑀤𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁 𑀪𑀕𑀯𑀢𑁄 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀓𑁂𑀦𑀘𑀺 𑀆𑀪𑀢𑀲𑁆𑀲 𑀕𑀦𑁆𑀣𑀲𑁆𑀲 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸 𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀢𑀲𑁆𑀲 𑀢𑀣𑀸 𑀆𑀪𑀢𑀲𑁆𑀲 𑀲𑀼𑀢𑁆𑀢𑁄𑀢𑀭𑀡𑀸𑀤𑀺 𑀏𑀯. 𑀬𑀤𑀺 𑀏𑀯𑀁 𑀓𑀣𑀁 𑀘𑀢𑁆𑀢𑀸𑀭𑁄𑀢𑀺? 𑀅𑀧𑀤𑀺𑀲𑀺𑀢𑀧𑁆𑀧𑀪𑁂𑀤𑀢𑁄. 𑀥𑀫𑁆𑀫𑀲𑁆𑀲 𑀳𑀺 𑀤𑁆𑀯𑁂 𑀲𑀫𑁆𑀧𑀤𑀸𑀬𑁄 𑀪𑀕𑀯𑀸 𑀲𑀸𑀯𑀓𑀸 𑀘. 𑀢𑁂𑀲𑀼 𑀲𑀸𑀯𑀓𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀯𑀲𑁂𑀦 𑀢𑀺𑀯𑀺𑀥𑀸. ‘‘𑀏𑀯𑀫𑀫𑀼𑀫𑁆𑀳𑀸 𑀫𑀬𑀸𑀬𑀁 𑀥𑀫𑁆𑀫𑁄 𑀧𑀝𑀺𑀕𑁆𑀕𑀳𑀺𑀢𑁄’’𑀢𑀺 𑀅𑀧𑀤𑀺𑀲𑀺𑀢𑀩𑁆𑀩𑀸𑀦𑀁 𑀪𑁂𑀤𑁂𑀦 𑀘𑀢𑁆𑀢𑀸𑀭𑁄. 𑀢𑁂𑀦𑀸𑀳 𑁋 ‘‘𑀩𑀼𑀤𑁆𑀥𑀸𑀧𑀤𑁂𑀲𑁄…𑀧𑁂… 𑀏𑀓𑀢𑁆𑀣𑁂𑀭𑀸𑀧𑀤𑁂𑀲𑁄’’𑀢𑀺. 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀓𑁂𑀦𑀘𑀺 𑀆𑀪𑀢𑀲𑀼𑀢𑁆𑀢𑀲𑁆𑀲 𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀘, 𑀅𑀢𑁆𑀣𑀧𑀤𑀸𑀦𑀺 𑀘𑁂𑀯 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀲𑀁𑀯𑀡𑁆𑀡𑀓𑁂𑀦 𑀯𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀆𑀳𑀭𑀺𑀬𑀫𑀸𑀦𑀸𑀦𑀺 ¶ 𑀧𑀤𑀩𑁆𑀬𑀜𑁆𑀚𑀦𑀸𑀦𑀺. 𑀲𑀼𑀢𑁆𑀢𑁂 𑀑𑀢𑀸𑀭𑀬𑀺𑀢𑀩𑁆𑀩𑀸𑀦𑀻𑀢𑀺 𑀲𑀼𑀢𑁆𑀢𑁂 𑀅𑀦𑀼𑀧𑁆𑀧𑀯𑁂𑀲𑀺𑀢𑀩𑁆𑀩𑀸𑀦𑀺. 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀻𑀢𑀺 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀺. 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀻𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺.

𑀲𑀼𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀪𑀕𑀯𑀢𑁄 𑀯𑀘𑀦𑀁 𑀏𑀓𑀕𑀸𑀣𑀸𑀫𑀢𑁆𑀢𑀫𑁆𑀧𑀺 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀼𑀢𑁆𑀢𑁂𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀦𑁂𑀢𑁆𑀢𑀺𑀯𑀘𑀦𑁂𑀦 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸 𑀪𑀕𑀯𑀢𑁄 ¶ 𑀤𑁂𑀲𑀦𑀸, 𑀲𑀸 𑀏𑀓𑀦𑁆𑀢𑁂𑀦 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀽𑀧𑀲𑀫𑀁 𑀯𑀤𑀢𑀻𑀢𑀺 𑀯𑀺𑀦𑀬𑁂𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀕𑀯𑀺𑀦𑀬𑁂’’𑀢𑀺𑀆𑀤𑀺𑀫𑀸𑀳. 𑀯𑀺𑀦𑀬𑁄𑀢𑀺 𑀳𑀺 𑀓𑀸𑀭𑀡𑀁 𑀭𑀸𑀕𑀸𑀤𑀺𑀯𑀽𑀧𑀲𑀫𑀦𑀺𑀫𑀺𑀢𑁆𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀬𑀣𑀸𑀳 𑁋

‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀜𑁆𑀜𑁄𑀕𑀸𑀬, 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑀘𑀬𑀸𑀬, 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸, 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀯𑀺𑀯𑁂𑀓𑀸𑀬, 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬, 𑀤𑀼𑀩𑁆𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀼𑀪𑀭𑀢𑀸𑀬, 𑀏𑀓𑀁𑀲𑁂𑀦 𑀕𑁄𑀢𑀫𑀺 𑀥𑀸𑀭𑁂𑀬𑁆𑀬𑀸𑀲𑀺 ‘𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬, 𑀯𑀺𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀜𑁆𑀜𑁄𑀕𑀸𑀬, 𑀅𑀧𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀆𑀘𑀬𑀸𑀬, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀫𑀳𑀺𑀘𑁆𑀙𑀢𑀸𑀬, 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀧𑀯𑀺𑀯𑁂𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀗𑁆𑀕𑀡𑀺𑀓𑀸𑀬, 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀓𑁄𑀲𑀚𑁆𑀚𑀸𑀬, 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀤𑀼𑀩𑁆𑀪𑀭𑀢𑀸𑀬, 𑀏𑀓𑀁𑀲𑁂𑀦 𑀕𑁄𑀢𑀫𑀺 𑀥𑀸𑀭𑁂𑀬𑁆𑀬𑀸𑀲𑀺 ‘𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’’’𑀦𑁆𑀢𑀺 (𑀘𑀽𑀴𑀯. 𑁪𑁦𑁬).

𑀥𑀫𑁆𑀫𑀢𑀸𑀬𑀦𑁆𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀳𑀺 𑀞𑀺𑀢𑀸𑀯 𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 (𑀅. 𑀦𑀺. 𑁩.𑁧𑁩𑁭) 𑀯𑀼𑀢𑁆𑀢𑁄. ‘‘𑀥𑀫𑁆𑀫𑀢𑀸𑀬𑀁 ¶ 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀻’’𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀧𑀦 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀁 𑀢𑀤𑀼𑀧𑀸𑀬𑀜𑁆𑀘 𑀩𑀸𑀥𑀓𑀸𑀤𑀺𑀪𑀸𑀯𑁂 𑀦𑀺𑀬𑀢𑀁 𑀧𑀭𑀺𑀤𑀻𑀧𑁂𑀦𑁆𑀢𑁄 𑀲𑀼𑀢𑁆𑀢𑁂 𑀑𑀢𑀭𑀢𑀺 𑀦𑀸𑀫. 𑀏𑀓𑀦𑁆𑀢𑁂𑀦 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀦𑀬𑀁 𑀯𑀤𑀦𑁆𑀢𑁄 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀢𑀺 𑀦𑀸𑀫. 𑀢𑀣𑀸 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀏𑀓𑀢𑁆𑀢𑀦𑀬𑀸𑀤𑀺𑀧𑀭𑀺𑀤𑀻𑀧𑀦𑁂𑀦 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀥𑀫𑁆𑀫𑀢𑀁 𑀦 𑀯𑀺𑀮𑁄𑀫𑁂𑀢𑀺 𑀦𑀸𑀫.

𑀏𑀯𑀁𑀯𑀺𑀥𑁄 𑀘 𑀓𑀸𑀫𑀸𑀲𑀯𑀸𑀤𑀺𑀓𑀁 𑀆𑀲𑀯𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀅𑀦𑀼𑀮𑁄𑀫𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀧𑀯𑀢𑁆𑀢𑀺, 𑀧𑀝𑀺𑀮𑁄𑀫𑀢𑁄 𑀦𑀺𑀯𑀢𑁆𑀢𑀻𑀢𑀺 𑀲𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀦𑀼𑀧𑀯𑀺𑀝𑁆𑀞𑁄 𑀓𑀲𑁆𑀫𑀸 𑀇𑀥 𑀯𑀺𑀲𑀼𑀁 𑀕𑀳𑀺𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁. 𑀇𑀥 𑀧𑀦 𑀯𑀺𑀲𑀼𑀁 𑀕𑀳𑀡𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀧𑀘𑁆𑀘𑀬𑀮𑀓𑁆𑀔𑀡𑀁 𑀅𑀲𑀫𑀢𑁆𑀣𑀧𑀘𑁆𑀘𑀬𑀮𑀓𑁆𑀔𑀡𑀁 𑀦𑀺𑀭𑀻𑀳𑀧𑀘𑁆𑀘𑀬𑀮𑀓𑁆𑀔𑀡𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸 𑀢𑁂𑀲𑀁 𑀉𑀤𑀬𑀯𑀦𑁆𑀢𑀢𑀸 𑀢𑀢𑁄 𑀏𑀯 𑀯𑀬𑀯𑀦𑁆𑀢𑀢𑀸 𑀢𑀤𑀼𑀪𑀬𑁂𑀦 ¶ 𑀅𑀦𑀺𑀘𑁆𑀘𑀢𑀸 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑁂𑀦 𑀤𑀼𑀓𑁆𑀔𑀢𑀸 𑀅𑀦𑀢𑁆𑀢𑀢𑀸𑀢𑀺 𑀢𑀺𑀮𑀓𑁆𑀔𑀡𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀻 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀓𑀼𑀫𑀢𑀺𑀯𑀺𑀤𑁆𑀥𑀁𑀲𑀦𑀻 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁.

𑀏𑀢𑁆𑀣 𑀘 𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀆𑀘𑀭𑀺𑀬𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀻𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀢𑁆𑀣 𑀲𑀼𑀢𑁆𑀢𑀁 𑀦𑀸𑀫 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀫𑀳𑀸𑀧𑀤𑁂𑀲𑀸, 𑀬𑀁 ‘‘𑀅𑀦𑀼𑀮𑁄𑀫𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀅𑀝𑁆𑀞𑀓𑀣𑀸. 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀦𑀬𑀕𑁆𑀕𑀸𑀳𑁂𑀦 𑀅𑀦𑀼𑀩𑀼𑀤𑁆𑀥𑀺𑀬𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀬𑀁, 𑀢𑀁 𑀧𑀝𑀺𑀩𑀸𑀳𑀦𑁆𑀢𑁂𑀦 𑀲𑀢𑁆𑀣𑀸𑀯 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺. 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀁 𑀧𑀦 𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑀭𑀁. 𑀆𑀘𑀭𑀺𑀬𑀯𑀸𑀤𑁄𑀧𑀺 𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑁄 𑀏𑀯 𑀕𑀳𑁂𑀢𑀩𑁆𑀩𑁄, 𑀦 𑀇𑀢𑀭𑁄. 𑀢𑀣𑀸 𑀅𑀢𑁆𑀢𑀦𑁄𑀫𑀢𑀺, 𑀲𑀸 𑀧𑀦 𑀲𑀩𑁆𑀩𑀤𑀼𑀩𑁆𑀩𑀮𑀸𑀢𑀺.

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀇𑀥 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀆𑀪𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀬𑀦𑁆𑀢𑀺 𑀬𑀁 𑀬𑀁 𑀅𑀢𑁆𑀣𑀚𑀸𑀢𑀜𑁆𑀘 𑀥𑀫𑁆𑀫𑀚𑀸𑀢𑀜𑁆𑀘. 𑀬𑀼𑀚𑁆𑀚𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀚𑁆𑀚𑀢𑀺. 𑀬𑁂𑀦 𑀬𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦. 𑀬𑀣𑀸 𑀬𑀣𑀸𑀢𑀺 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦. 𑀢𑀁 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀆𑀪𑀢𑁂𑀦 𑀓𑀸𑀭𑀡𑁂𑀦 𑀧𑀲𑀗𑁆𑀕𑁂𑀦 𑀧𑀓𑀸𑀭𑁂𑀦 𑀘 𑀲𑀼𑀢𑁆𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑁂𑀦 𑀘𑀢𑀼𑀫𑀳𑀸𑀧𑀤𑁂𑀲𑀸𑀯𑀺𑀭𑀼𑀤𑁆𑀥𑀸𑀬 𑀬𑀼𑀢𑁆𑀢𑀺𑀬𑀸 𑀲𑀼𑀢𑁆𑀢𑀢𑁄 𑀅𑀢𑁆𑀣𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁯. 𑀇𑀤𑀸𑀦𑀺 𑀢𑀁 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀢𑀺 𑀧𑀤𑀸𑀦𑀻𑀢𑀺 𑀓𑀺𑀢𑁆𑀢𑀓𑀸𑀦𑀺 𑀧𑀤𑀸𑀦𑀺. 𑀧𑀭𑀺𑀬𑁄𑀕𑀸𑀳𑀺𑀢𑀩𑁆𑀩𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀘𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀢𑀤𑀢𑁆𑀣𑀲𑁆𑀲𑁂𑀓𑀲𑁆𑀲 𑀜𑀸𑀢𑀼𑀁 𑀇𑀘𑁆𑀙𑀺𑀢𑀢𑁆𑀢𑀸 ‘‘𑀏𑀓𑁄 𑀧𑀜𑁆𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀦𑀺 𑀧𑀦 𑀏𑀓𑀕𑀸𑀣𑀸𑀬𑀁 𑀬𑀤𑀺 𑀯𑀸 𑀲𑀩𑁆𑀩𑀸𑀦𑀺 𑀧𑀤𑀸𑀦𑀺 𑀬𑀸𑀯 𑀬𑀤𑀺 𑀯𑀸 𑀏𑀓𑀁 𑀧𑀤𑀁 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀢𑀺, 𑀏𑀓𑁄𑀬𑁂𑀯 𑀲𑁄 𑀧𑀜𑁆𑀳𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀤𑀺 𑀲𑀩𑁆𑀩𑀸𑀦𑀻’’𑀢𑀺𑀆𑀤𑀺𑀦𑀸. 𑀢𑀦𑁆𑀢𑀺 𑀢𑀁 𑀧𑀜𑁆𑀳𑀁. 𑀅𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀆𑀚𑀸𑀦𑀺𑀢𑀩𑁆𑀩𑀁. 𑀓𑀺𑀁 𑀇𑀫𑁂 𑀥𑀫𑁆𑀫𑀸𑀢𑀺𑀆𑀤𑀺 𑀆𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀦𑀸𑀦𑀢𑁆𑀣𑀸𑀢𑀺 𑀦𑀸𑀦𑀸 𑀅𑀢𑁆𑀣𑀸.

𑀧𑀼𑀘𑁆𑀙𑀸𑀕𑀸𑀣𑀸𑀬𑀁 𑀅𑀬𑀁 𑀧𑀤𑀢𑁆𑀣𑁄 𑁋 𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 𑀮𑁄𑀓𑁄𑀢𑀺 𑀅𑀬𑀁 𑀲𑀢𑁆𑀢𑀮𑁄𑀓𑁄 𑀘𑁄𑀭𑁄 𑀯𑀺𑀬 𑀘𑁄𑀭𑀖𑀸𑀢𑀓𑁂𑀦 ¶ 𑀓𑁂𑀦 𑀅𑀪𑀺𑀳𑀢𑁄 𑀯𑀥𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄𑀢𑀺 𑀫𑀸𑀮𑀼𑀯𑀮𑀢𑀸𑀬 𑀯𑀺𑀬 𑀦𑀺𑀲𑁆𑀲𑀺𑀢𑀭𑀼𑀓𑁆𑀔𑁄 𑀓𑁂𑀦 𑀮𑁄𑀓𑁄 𑀅𑀚𑁆𑀛𑁄𑀢𑁆𑀣𑀝𑁄. 𑀓𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀓𑁂𑀦 𑀯𑀺𑀲𑀧𑀻𑀢𑀔𑀼𑀭𑀧𑁆𑀧𑁂𑀦 𑀯𑀺𑀬 𑀲𑀭𑀻𑀭𑀩𑁆𑀪𑀦𑁆𑀢𑀭𑀦𑀺𑀫𑀼𑀕𑁆𑀕𑁂𑀦 𑀲𑀮𑁆𑀮𑁂𑀦 𑀅𑀦𑀼𑀧𑀯𑀺𑀝𑁆𑀞𑁄. 𑀓𑀺𑀲𑁆𑀲 𑀥𑀽𑀧𑀸𑀬𑀺𑀢𑁄𑀢𑀺 𑀓𑀺𑀲𑁆𑀲 𑀓𑁂𑀦 𑀓𑀸𑀭𑀡𑁂𑀦 𑀥𑀽𑀧𑀸𑀬𑀺𑀢𑁄 𑀲𑀦𑁆𑀢𑀸𑀧𑀺𑀢𑁄 𑀮𑁄𑀓𑁄. 𑀲𑀤𑀸𑀢𑀺 𑀧𑀤𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺. 𑀧𑀜𑁆𑀳𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. ‘‘𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 𑀏𑀢𑁂𑀦 𑀯𑀺𑀲𑁆𑀲𑀚𑁆𑀚𑀦𑀢𑁄 𑀢𑀬𑁄 𑀧𑀜𑁆𑀳𑀸𑀢𑀺 𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁦. 𑀢𑀢𑁆𑀣𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀤𑀼𑀢𑀺𑀬𑀧𑀸𑀤𑁂 𑀯𑀼𑀢𑁆𑀢𑀸 𑀚𑀭𑀸 𑀘 𑀧𑀞𑀫𑀧𑀸𑀤𑁂 𑀯𑀼𑀢𑁆𑀢𑀁 𑀫𑀭𑀡𑀜𑁆𑀘𑀸𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀗𑁆𑀔𑀢𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑀲𑁆𑀲 ‘‘𑀲𑀗𑁆𑀔𑀢𑁄’’𑀢𑀺 𑀮𑀓𑁆𑀔𑀻𑀬𑀢𑀺 𑀏𑀢𑁂𑀳𑀻𑀢𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 (𑀅. 𑀦𑀺. 𑁩.𑁪𑁭; 𑀓𑀣𑀸. 𑁨𑁧𑁪). 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀚𑀭𑀸𑀬𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀫𑀭𑀡𑀁 𑀯𑀬𑁄’’𑀢𑀺. 𑀏𑀢𑁆𑀣 𑀘 ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺 𑀏𑀢𑁂𑀦 𑀔𑀦𑁆𑀥𑀧𑁆𑀧𑀩𑀦𑁆𑀥𑀲𑁆𑀲 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲𑁄 𑀇𑀥 𑀚𑀭𑀸, 𑀦 𑀔𑀡𑀝𑁆𑀞𑀺𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀭𑀡𑀁 𑀯𑀬𑁄’’𑀢𑀺 𑀇𑀫𑀺𑀦𑀸 𑀘 ‘‘𑀢𑀺𑀲𑁆𑀲𑁄 𑀫𑀢𑁄, 𑀨𑀼𑀲𑁆𑀲𑁄 ¶ 𑀫𑀢𑁄’’𑀢𑀺 𑀏𑀯𑀁 𑀮𑁄𑀓𑁂 𑀯𑀼𑀢𑁆𑀢𑀁 𑀲𑀫𑁆𑀫𑀼𑀢𑀺𑀫𑀭𑀡𑀁 𑀤𑀲𑁆𑀲𑁂𑀢𑀺, 𑀦 𑀔𑀡𑀺𑀓𑀫𑀭𑀡𑀁, 𑀲𑀫𑀼𑀘𑁆𑀙𑁂𑀤𑀫𑀭𑀡𑀁 𑀯𑀸.

𑀇𑀤𑀸𑀦𑀺 ‘‘𑀢𑁂 𑀢𑀬𑁄 𑀧𑀜𑁆𑀳𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀬𑀼𑀢𑁆𑀢𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀚𑀭𑀸𑀬 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀚𑀺𑀡𑁆𑀡𑀲𑁆𑀲 𑀫𑀭𑀡𑀤𑀲𑁆𑀲𑀦𑀢𑁄 𑀚𑀭𑀸𑀫𑀭𑀡𑀸𑀦𑀁 𑀦𑀸𑀦𑀢𑁆𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀁 𑀧𑀢𑀺 𑀢𑁂𑀲𑀁 𑀦𑀸𑀦𑀢𑁆𑀢𑀤𑀲𑁆𑀲𑀦𑀢𑁆𑀣𑀁 ‘‘𑀕𑀩𑁆𑀪𑀕𑀢𑀸𑀧𑀺 𑀳𑀺 𑀫𑀻𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀥𑀺𑀧𑁆𑀧𑁂𑀢𑀚𑀭𑀸𑀯𑀺𑀭𑀳𑀺𑀢𑀲𑁆𑀲 𑀫𑀭𑀡𑀲𑁆𑀲 𑀤𑀲𑁆𑀲𑀦𑀢𑁄 𑀅𑀜𑁆𑀜𑀸 𑀚𑀭𑀸 𑀅𑀜𑁆𑀜𑀁 𑀫𑀭𑀡𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦 𑀘 𑀢𑁂 𑀚𑀺𑀡𑁆𑀡𑀸 𑀪𑀯𑀦𑁆𑀢𑀻’’𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀓𑁂𑀯𑀮𑀲𑁆𑀲 𑀫𑀭𑀡𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀅𑀜𑁆𑀜𑀸𑀯 𑀚𑀭𑀸 𑀅𑀜𑁆𑀜𑀁 𑀫𑀭𑀡𑀁, 𑀬𑀣𑀸 𑀢𑀁 𑀤𑁂𑀯𑀸𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀣𑀺 𑀘 𑀤𑁂𑀯𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀅𑀦𑀼𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀦 𑀘 𑀢𑀺𑀓𑀺𑀘𑁆𑀙𑀦𑁂𑀦 𑀲𑀓𑁆𑀓𑀸 𑀚𑀭𑀸𑀬 𑀧𑀝𑀺𑀓𑀸𑀭𑀁 𑀓𑀸𑀢𑀼𑀁, 𑀦 𑀢𑀣𑀸 𑀫𑀭𑀡𑀲𑁆𑀲𑀸𑀢𑀺 𑀏𑀯𑀫𑁆𑀧𑀺 𑀚𑀭𑀸𑀫𑀭𑀡𑀸𑀦𑀁 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀢𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑁆𑀓𑀢𑁂𑀢𑀺 𑀲𑀓𑁆𑀬𑀢𑁂, 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀓𑀫𑁆𑀫𑀦𑁆𑀢𑀺 𑀧𑀝𑀺𑀓𑀭𑀡𑀁. 𑀦𑀦𑀼 𑀘 𑀫𑀭𑀡𑀲𑁆𑀲𑀸𑀧𑀺 𑀧𑀝𑀺𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬 𑀯𑀲𑀺𑀪𑀸𑀯𑁂 𑀲𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 𑁋 ‘‘𑀅𑀜𑁆𑀜𑀢𑁆𑀭𑁂𑀯 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 ¶ 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺 (𑀤𑀻. 𑀦𑀺. 𑁨.𑁧𑁬𑁬, 𑁧𑁮𑁨; 𑀲𑀁. 𑀦𑀺. 𑁫.𑁮𑁨𑁨; 𑀓𑀣𑀸. 𑁬𑁨𑁩; 𑀉𑀤𑀸. 𑁫𑁧).

𑀓𑁄 𑀧𑀦𑁂𑀢𑁆𑀣 𑀓𑀧𑁆𑀧𑁄, 𑀓𑁄 𑀯𑀸 𑀓𑀧𑁆𑀧𑀸𑀯𑀲𑁂𑀲𑁄𑀢𑀺? 𑀓𑀧𑁆𑀧𑁄𑀢𑀺 𑀆𑀬𑀼𑀓𑀧𑁆𑀧𑁄, 𑀬𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀓𑀧𑁆𑀧𑀁 𑀢𑀺𑀝𑁆𑀞𑀢𑀺 𑀦𑀸𑀫. ‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 (𑀤𑀻. 𑀦𑀺. 𑁨.𑁭; 𑀅. 𑀦𑀺. 𑁭.𑁭𑁪) 𑀯𑀼𑀢𑁆𑀢𑀁 𑀧𑀦 𑀯𑀲𑁆𑀲𑀲𑀢𑀸𑀤𑀺𑀢𑁄 𑀅𑀢𑀺𑀭𑁂𑀓𑀁 𑀢𑀺𑀝𑁆𑀞𑀦𑁆𑀢𑁄 𑀓𑀧𑁆𑀧𑀸𑀯𑀲𑁂𑀲𑀁 𑀢𑀺𑀝𑁆𑀞𑀢𑀺 𑀦𑀸𑀫. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀇𑀤𑁆𑀥𑀺𑀫𑀦𑁆𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸 𑀔𑀻𑀡𑀸𑀲𑀯𑀸 𑀮𑁄𑀓𑀳𑀺𑀢𑀢𑁆𑀣𑀁 𑀢𑀣𑀸 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺? 𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀪𑀸𑀭𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀅𑀦𑀼𑀲𑁆𑀲𑀼𑀓𑁆𑀓𑀢𑀸𑀬 𑀘. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀸 𑀳𑀺 𑀢𑁂 𑀉𑀢𑁆𑀢𑀫𑀧𑀼𑀭𑀺𑀲𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀯𑁂𑀢𑀦𑀁 𑀪𑀢𑀓𑁄 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁬𑁫𑁪; 𑀫𑀺. 𑀧. 𑁨.𑁨.𑁪);

𑀬𑀣𑀸 ¶ 𑀚𑀭𑀸𑀫𑀭𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁, 𑀏𑀯𑀁 𑀢𑁂𑀳𑀺 𑀢𑀡𑁆𑀳𑀸𑀬 𑀘 𑀦𑀸𑀦𑀢𑁆𑀢𑁂 𑀤𑀲𑁆𑀲𑀺𑀢𑁂 ‘‘𑀢𑀬𑁄 𑀧𑀜𑁆𑀳𑀸’’𑀢𑀺 𑀇𑀤𑀁 𑀲𑀺𑀚𑁆𑀛𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀲𑁆𑀫𑀸 𑀢𑀡𑁆𑀳𑀸𑀬 𑀅𑀪𑀸𑀯𑁂𑀧𑀺 𑀲𑀢𑀺 𑀚𑀭𑀸𑀫𑀭𑀡𑀁 𑀮𑀩𑁆𑀪𑀢𑀺 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁂, 𑀢𑀲𑁆𑀫𑀸 𑀅𑀜𑁆𑀜𑀁 𑀚𑀭𑀸𑀫𑀭𑀡𑀁 𑀅𑀜𑁆𑀜𑀸 𑀢𑀡𑁆𑀳𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀤𑀺𑀲𑁆𑀲𑀦𑁆𑀢𑀺 𑀯𑀻𑀢𑀭𑀸𑀕𑀸 𑀚𑀻𑀭𑀦𑁆𑀢𑀸𑀧𑀺 𑀫𑀻𑀬𑀦𑁆𑀢𑀸𑀧𑀻’’𑀢𑀺. 𑀦𑀦𑀼 𑀘 𑀢𑀡𑁆𑀳𑀸𑀧𑀺 𑀚𑀻𑀭𑀡𑀪𑀺𑀚𑁆𑀚𑀦𑀲𑀪𑀸𑀯𑀸𑀢𑀺? 𑀲𑀘𑁆𑀘𑀁, 𑀦 𑀇𑀤𑀁 𑀚𑀭𑀸𑀫𑀭𑀡𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀦𑀸 𑀚𑀭𑀸𑀫𑀭𑀡𑀢𑁄 𑀢𑀡𑁆𑀳𑀸𑀬 𑀅𑀦𑀜𑁆𑀜𑀢𑁆𑀢𑁂 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀬𑁄𑀩𑁆𑀩𑀦𑀝𑁆𑀞𑀸𑀧𑀺 𑀯𑀺𑀕𑀢𑀢𑀡𑁆𑀳𑀸 𑀲𑀺𑀬𑀼𑀁, 𑀦 𑀇𑀤𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀭𑀸𑀫𑀭𑀡𑀫𑁆𑀧𑀺 𑀲𑀺𑀬𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄 𑀢𑀡𑁆𑀳𑀸𑀬 𑀅𑀦𑀜𑁆𑀜𑀢𑁆𑀢𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀘 𑀲𑀺𑀬𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄 𑀚𑀭𑀸𑀫𑀭𑀡𑀢𑁄 𑀅𑀦𑀜𑁆𑀜𑀢𑁆𑀢𑁂 𑀲𑀢𑀻𑀢𑀺 𑀪𑀸𑀯𑁄. 𑀦 𑀳𑀺 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀁 𑀏𑀢𑁂𑀲𑀫𑀢𑁆𑀣𑀢𑁄 𑀦𑀸𑀦𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀢𑀡𑁆𑀳𑀸 𑀫𑀕𑁆𑀕𑀯𑀚𑁆𑀛𑀸, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀲𑀺𑀬𑀸 𑀫𑀕𑁆𑀕𑀯𑀚𑁆𑀛𑀁 𑀢𑀡𑁆𑀳𑀸𑀬 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺. 𑀬𑀣𑀸 𑀘 𑀚𑀭𑀸𑀫𑀭𑀡𑀁 𑀦 𑀫𑀕𑁆𑀕𑀯𑀚𑁆𑀛𑀁, 𑀢𑀣𑀸 𑀢𑀡𑁆𑀳𑀸𑀧𑀺 𑀲𑀺𑀬𑀸𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸𑀢𑀺 ¶ 𑀇𑀫𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀉𑀧𑀧𑀢𑁆𑀢𑀺𑀬𑀸. 𑀅𑀜𑁆𑀜𑀫𑀜𑁆𑀜𑁂𑀳𑀻𑀢𑀺 𑀅𑀜𑁆𑀜𑀸𑀳𑀺 𑀅𑀜𑁆𑀜𑀸𑀳𑀺 𑀓𑀸𑀭𑀡𑀽𑀧𑀧𑀢𑁆𑀢𑀻𑀳𑀺 𑀅𑀢𑁆𑀣𑀢𑁄 𑀘𑁂 𑀅𑀜𑁆𑀜𑀢𑁆𑀢𑀁, 𑀢𑀤𑀜𑁆𑀜𑀫𑁆𑀧𑀺 𑀩𑁆𑀬𑀜𑁆𑀚𑀦𑀢𑁄 𑀕𑀯𑁂𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀦𑁆𑀢𑀺 𑀇𑀫𑀫𑁂𑀯𑀢𑁆𑀣𑀁 ‘‘𑀦 𑀳𑀺 𑀬𑀼𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀡𑁆𑀳𑀸𑀬 𑀅𑀥𑀺𑀧𑁆𑀧𑀸𑀬𑁂 𑀅𑀧𑀭𑀺𑀧𑀽𑀭𑀫𑀸𑀦𑁂𑀢𑀺 𑀇𑀘𑁆𑀙𑀺𑀢𑀸𑀮𑀸𑀪𑀫𑀸𑀳. 𑀢𑁂𑀦 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀏𑀢𑁂𑀦 𑀦 𑀳𑀺 𑀬𑀼𑀚𑁆𑀚𑀢𑀺 𑀇𑀘𑁆𑀙𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀦𑁆𑀢𑀺. 𑀬𑀣𑀸 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀦𑀁 𑀳𑁄𑀢𑀺, 𑀏𑀯𑀁 𑀇𑀘𑁆𑀙𑀸𑀯𑀺𑀧𑀭𑀺𑀬𑀸𑀬𑁂 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀫𑁆𑀧𑀺 𑀲𑀫𑀢𑁆𑀣𑀦𑀁 𑀳𑁄𑀢𑀺, 𑀦 𑀢𑀣𑀸 𑀚𑀭𑀸𑀫𑀭𑀡𑀯𑀺𑀧𑀭𑀺𑀬𑀸𑀬𑁂𑀢𑀺 𑀚𑀭𑀸𑀫𑀭𑀡𑀢𑀡𑁆𑀳𑀸𑀦𑀁 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀇𑀫𑀸𑀬 𑀬𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸.

𑀬𑀤𑀺 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀅𑀢𑁆𑀣𑀢𑁄 𑀅𑀦𑀜𑁆𑀜𑀢𑁆𑀢𑀁, 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀢𑀺? 𑀢𑀢𑁆𑀣 𑀧𑀭𑀺𑀳𑀸𑀭𑀫𑀸𑀳 ‘‘𑀬𑀁 𑀧𑀦𑀺𑀤’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀅𑀪𑀺𑀮𑀧𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀬𑀁 𑀇𑀤𑀁 𑀅𑀪𑀺𑀮𑀧𑀦𑀁 ¶ , 𑀇𑀤𑀁 𑀩𑀸𑀳𑀺𑀭𑀸𑀦𑀁 𑀭𑀽𑀧𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀆𑀭𑀫𑁆𑀫𑀡𑀯𑀲𑁂𑀦, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀻𑀢𑀺 𑀤𑁆𑀯𑀻𑀳𑀺 𑀧𑀓𑀢𑀻𑀳𑀺. 𑀓𑀸 𑀧𑀦 𑀢𑀸 𑀧𑀓𑀢𑀺𑀬𑁄𑀢𑀺? 𑀅𑀧𑁆𑀧𑀢𑁆𑀢𑀲𑁆𑀲 𑀯𑀺𑀲𑀬𑀲𑁆𑀲 𑀏𑀲𑀦𑀯𑀲𑁂𑀦 𑀇𑀘𑁆𑀙𑀸, 𑀧𑀢𑁆𑀢𑀲𑁆𑀲 𑀅𑀧𑁆𑀧𑀢𑁆𑀢𑀲𑁆𑀲 𑀯𑀸 𑀧𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀢𑀡𑁆𑀳𑀸, 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄. 𑀬𑀤𑀺𑀧𑀺 𑀏𑀯𑀁, 𑀢𑀣𑀸𑀧𑀺 𑀲𑀩𑁆𑀩𑀸 𑀢𑀡𑁆𑀳𑀸 𑀭𑀽𑀧𑀸𑀤𑀺𑀯𑀺𑀲𑀬𑀁 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑁂𑀦 𑀏𑀓𑀲𑀪𑀸𑀯𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀸 𑀳𑀺 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸’’𑀢𑀺 𑀆𑀳. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 ‘‘𑀲𑀩𑁆𑀩𑁄 𑀅𑀕𑁆𑀕𑀻’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀬𑀁 𑀧𑀦 𑀦 𑀓𑁂𑀯𑀮𑀁 𑀢𑀡𑁆𑀳𑀸 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀤𑁆𑀯𑀻𑀳𑀺 𑀏𑀯 𑀦𑀸𑀫𑁂𑀳𑀺 𑀯𑀼𑀢𑁆𑀢𑀸, 𑀅𑀣 𑀔𑁄 𑀅𑀦𑁂𑀓𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀇𑀘𑁆𑀙𑀸𑀇𑀢𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀇𑀘𑁆𑀙𑀦𑁆𑀢𑀺 𑀢𑀸𑀬 𑀆𑀭𑀫𑁆𑀫𑀡𑀸𑀦𑀻𑀢𑀺 𑀇𑀘𑁆𑀙𑀸. 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸. 𑀧𑀻𑀴𑀸𑀚𑀦𑀦𑀢𑁄 𑀤𑀼𑀭𑀼𑀤𑁆𑀥𑀸𑀭𑀡𑀢𑁄 𑀘 𑀯𑀺𑀲𑀧𑀻𑀢𑀁 𑀲𑀮𑁆𑀮𑀁 𑀯𑀺𑀬𑀸𑀢𑀺 𑀲𑀮𑁆𑀮𑀁. 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀥𑀽𑀧𑀸𑀬𑀦𑀸. 𑀆𑀓𑀟𑁆𑀠𑀦𑀝𑁆𑀞𑁂𑀦 𑀲𑀻𑀖𑀲𑁄𑀢𑀸 𑀲𑀭𑀺𑀢𑀸 𑀯𑀺𑀬𑀸𑀢𑀺 𑀲𑀭𑀺𑀢𑀸, 𑀅𑀮𑁆𑀮𑀝𑁆𑀞𑁂𑀦 𑀯𑀸 𑀲𑀭𑀺𑀢𑀸, ‘‘𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘, 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺 𑀚𑀦𑁆𑀢𑀼𑀦𑁄’’𑀢𑀺 (𑀥. 𑀧. 𑁩𑁪𑁧) 𑀳𑀺 𑀯𑀼𑀢𑁆𑀢𑀁. 𑀅𑀮𑁆𑀮𑀸𑀦𑀺 𑀘𑁂𑀯 𑀲𑀺𑀦𑀺𑀤𑁆𑀥𑀸𑀦𑀺 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸 ¶ . 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀢𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂 𑀓𑀼𑀮𑁂 𑀕𑀡𑁂 𑀯𑀺𑀲𑀢𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸.

𑀲𑀺𑀦𑁂𑀳𑀦𑀯𑀲𑁂𑀦 𑀲𑀺𑀦𑁂𑀳𑁄. 𑀦𑀸𑀦𑀸𑀕𑀢𑀻𑀲𑀼 𑀓𑀺𑀮𑀫𑀣𑀼𑀧𑁆𑀧𑀸𑀤𑀦𑁂𑀦 𑀓𑀺𑀮𑀫𑀣𑁄. 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀮𑀢𑀸 𑀯𑀺𑀬𑀸𑀢𑀺 𑀮𑀢𑀸. ‘‘𑀮𑀢𑀸 𑀉𑀧𑁆𑀧𑀚𑁆𑀚 𑀢𑀺𑀝𑁆𑀞𑀢𑀻’’𑀢𑀺 (𑀥. 𑀧. 𑁩𑁪𑁦) 𑀳𑀺 𑀯𑀼𑀢𑁆𑀢𑀁. 𑀫𑀫𑀦𑁆𑀢𑀺 𑀫𑀜𑁆𑀜𑀦𑀯𑀲𑁂𑀦 𑀫𑀜𑁆𑀜𑀦𑀸. 𑀤𑀽𑀭𑀕𑀢𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀩𑀦𑁆𑀥𑀦𑀝𑁆𑀞𑁂𑀦 𑀩𑀦𑁆𑀥𑁄. 𑀆𑀲𑀻𑀲𑀦𑀝𑁆𑀞𑁂𑀦 𑀆𑀲𑀸. 𑀆𑀭𑀫𑁆𑀫𑀡𑀭𑀲𑀁 𑀧𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀺𑀧𑀸𑀲𑀸. 𑀅𑀪𑀺𑀦𑀦𑁆𑀤𑀦𑀝𑁆𑀞𑁂𑀦 𑀅𑀪𑀺𑀦𑀦𑁆𑀤𑀦𑀸. 𑀇𑀢𑀻𑀢𑀺 𑀏𑀯𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀕𑀬𑁆𑀳𑀫𑀸𑀦𑀸𑀧𑀺 𑀲𑀩𑁆𑀩𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀢𑀺.

𑀧𑀼𑀦 ¶ 𑀢𑀡𑁆𑀳𑀸𑀬 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀕𑀳𑀺𑀢𑀪𑀸𑀯𑀫𑁂𑀯 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀦𑀸 𑀉𑀧𑀘𑀬𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀯𑁂𑀯𑀘𑀦𑁂𑀢𑀺 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁂. ‘‘𑀆𑀲𑀸 𑀘 𑀧𑀺𑀳𑀸’’𑀢𑀺 𑀕𑀸𑀣𑀸𑀬 (𑀦𑁂𑀢𑁆𑀢𑀺. 𑁩𑁭; 𑀧𑁂𑀝𑀓𑁄. 𑁧𑁧) 𑀅𑀢𑁆𑀣𑀁 𑀢𑀢𑁆𑀣𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀯𑀺𑀕𑀢𑀭𑀸𑀕𑀲𑁆𑀲𑀸𑀢𑀺𑀆𑀤𑀻𑀲𑀼 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄, 𑀧𑀺𑀬𑀸𑀬𑀦𑀝𑁆𑀞𑁂𑀦 𑀧𑁂𑀫𑀁, 𑀧𑀭𑀺𑀤𑀳𑀦𑀝𑁆𑀞𑁂𑀦 𑀧𑀭𑀺𑀤𑀸𑀳𑁄𑀢𑀺 𑀢𑀡𑁆𑀳𑀸𑀯 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋 ‘‘𑀢𑀡𑁆𑀳𑀸𑀬𑁂𑀢𑀁 𑀯𑁂𑀯𑀘𑀦’’𑀦𑁆𑀢𑀺. 𑀏𑀯𑀁 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀅𑀢𑁆𑀣𑀢𑁄 𑀅𑀦𑀜𑁆𑀜𑀢𑁆𑀢𑀸 ‘‘𑀢𑀬𑁄 𑀧𑀜𑁆𑀳𑀸’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀚𑁆𑀚𑀢𑀺 𑀬𑀼𑀢𑁆𑀢𑀺𑀬𑀸 𑀲𑀗𑁆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑁨𑁧. 𑀏𑀯𑀁 ‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 𑀮𑁄𑀓𑁄’’𑀢𑀺 (𑀲𑀁. 𑀦𑀺. 𑁧.𑁬𑁬) 𑀕𑀸𑀣𑀸𑀬 ‘‘𑀢𑀬𑁄 𑀧𑀜𑁆𑀳𑀸’’𑀢𑀺 𑀧𑀜𑁆𑀳𑀢𑁆𑀢𑀬𑀪𑀸𑀯𑁂 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑁂𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁄 𑀤𑀼𑀓𑁆𑀔𑀽𑀧𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀔𑀽𑀧𑀘𑀸𑀭𑁄𑀢𑀺 𑀤𑀼𑀓𑁆𑀔𑀧𑁆𑀧𑀯𑀢𑁆𑀢𑀺. 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀭𑀫𑀽𑀮𑀓𑁄𑀢𑀺 𑀓𑀸𑀫𑀢𑀡𑁆𑀳𑀸𑀧𑀘𑁆𑀘𑀬𑀲𑀗𑁆𑀔𑀸𑀭𑀳𑁂𑀢𑀼𑀓𑁄𑀢𑀺 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄𑀢𑀺 𑀦𑀺𑀩𑁆𑀩𑀺𑀤𑀸𑀧𑀯𑀢𑁆𑀢𑀺 𑀓𑀸𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀪𑀺𑀭𑀢𑀺 𑀜𑀸𑀡𑀦𑀺𑀩𑁆𑀩𑀺𑀤𑀸 𑀘. 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄𑀢𑀺 𑀓𑀸𑀫𑀢𑀡𑁆𑀳𑀸𑀬 𑀧𑀭𑀺𑀓𑁆𑀔𑀸𑀭𑀪𑀽𑀢𑀯𑀢𑁆𑀣𑀼𑀓𑀸𑀫𑀳𑁂𑀢𑀼𑀓𑁄. 𑀢𑀢𑁆𑀣 𑀅𑀦𑀪𑀺𑀭𑀢𑀺𑀲𑀗𑁆𑀔𑀸𑀢𑀸 𑀦𑀺𑀩𑁆𑀩𑀺𑀤𑀸 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀺𑀓𑀸, 𑀦 𑀜𑀸𑀡𑀦𑀺𑀩𑁆𑀩𑀺𑀤𑀸𑀢𑀺 𑀲𑀩𑁆𑀩𑁄 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄𑀢𑀺 𑀦 𑀧𑀦 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸𑀢𑀺 𑀦𑀬𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀜𑁆𑀳𑀢𑁆𑀢𑀬𑀪𑀸𑀯𑁂 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀬𑀣𑀸 𑀘 𑀤𑀼𑀓𑁆𑀔𑀽𑀧𑀘𑀸𑀭𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁂𑀲𑀼, 𑀏𑀯𑀁 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀇𑀫𑀺𑀦𑀸 𑀬𑁄𑀕𑁂𑀦 𑀦𑀬𑁂𑀦 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀢𑀁𑀢𑀁𑀧𑀸𑀴𑀺𑀧𑁆𑀧𑀤𑁂𑀲𑁂 𑀅𑀦𑀼𑀭𑀽𑀧𑁂𑀳𑀺 𑀅𑀜𑁆𑀜𑀣𑀸 𑀅𑀜𑁆𑀜𑁂𑀳𑀺 𑀳𑁂𑀢𑀽𑀳𑀺 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺.

𑀇𑀤𑀸𑀦𑀺 ¶ 𑀢𑀁 𑀦𑀬𑀤𑀲𑁆𑀲𑀦𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀺 𑀪𑀕𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀭𑀸𑀕𑀤𑁄𑀲𑀫𑁄𑀳𑀘𑀭𑀺𑀢𑀸𑀦𑀁 𑀬𑀣𑀸𑀓𑁆𑀓𑀫𑀁 𑀅𑀲𑀼𑀪𑀫𑁂𑀢𑁆𑀢𑀸𑀧𑀘𑁆𑀘𑀬𑀸𑀓𑀸𑀭𑀓𑀣𑀸 𑀭𑀸𑀕𑀸𑀤𑀺𑀯𑀺𑀦𑀬𑀦𑀢𑁄 𑀲𑀧𑁆𑀧𑀸𑀬𑀸𑀢𑀺 𑀅𑀬𑀁 𑀲𑀸𑀲𑀦𑀬𑀼𑀢𑁆𑀢𑀺. 𑀏𑀯𑀫𑀯𑀝𑁆𑀞𑀺𑀢𑁂 𑀬𑀤𑀺 𑀭𑀸𑀕𑀘𑀭𑀺𑀢𑀲𑁆𑀲 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀤𑁂𑀲𑁂𑀬𑁆𑀬, 𑀲𑀸 𑀤𑁂𑀲𑀦𑀸 𑀦 𑀬𑀼𑀚𑁆𑀚𑀢𑀺 𑀅𑀲𑀧𑁆𑀧𑀸𑀬𑀪𑀸𑀯𑀢𑁄. 𑀢𑀣𑀸 𑀲𑀼𑀔𑀸𑀧𑀝𑀺𑀧𑀤𑀸𑀤𑀬𑁄𑀢𑀺. 𑀦𑀦𑀼 𑀘 𑀲𑀼𑀔𑀸𑀧𑀝𑀺𑀧𑀤𑀸𑀤𑀬𑁄 𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑀦𑁆𑀢𑀺, 𑀦 𑀤𑁂𑀲𑀦𑀸𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀭𑀸𑀕𑀘𑀭𑀺𑀢𑁄𑀢𑀺 𑀢𑀺𑀩𑁆𑀩𑀓𑀺𑀮𑁂𑀲𑁄 𑀭𑀸𑀕𑀘𑀭𑀺𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀪𑀸𑀯𑀦𑀸 ¶ 𑀲𑀫𑀺𑀚𑁆𑀛𑀢𑀺. 𑀬𑀲𑁆𑀲 𑀘 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀪𑀸𑀯𑀦𑀸 𑀲𑀫𑀺𑀚𑁆𑀛𑀢𑀺, 𑀢𑀲𑁆𑀲 𑀕𑀭𑀼𑀢𑀭𑀸 𑀅𑀲𑀼𑀪𑀤𑁂𑀲𑀦𑀸 𑀲𑀧𑁆𑀧𑀸𑀬𑀸, 𑀬𑀲𑁆𑀲 𑀕𑀭𑀼𑀢𑀭𑀸 𑀅𑀲𑀼𑀪𑀤𑁂𑀲𑀦𑀸 𑀲𑀧𑁆𑀧𑀸𑀬𑀸, 𑀦 𑀢𑀲𑁆𑀲 𑀫𑀦𑁆𑀤𑀓𑀺𑀮𑁂𑀲𑀲𑁆𑀲 𑀯𑀺𑀬 𑀮𑀳𑀼𑀓𑀢𑀭𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀔𑀁 𑀯𑀸 𑀧𑀝𑀺𑀧𑀤𑀁…𑀧𑁂… 𑀤𑁂𑀲𑁂𑀬𑁆𑀬 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀬𑀼𑀢𑁆𑀢𑀧𑀭𑀺𑀳𑀸𑀭𑁂𑀦 𑀬𑀼𑀢𑁆𑀢𑀺𑀲𑀫𑀥𑀺𑀕𑀫𑁄𑀢𑀺 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸𑀬 𑀅𑀬𑀼𑀢𑁆𑀢𑀺𑀧𑀺 𑀕𑀯𑁂𑀲𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀤𑀺 𑀳𑀺…𑀧𑁂… 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸’’𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀬𑀁 𑀓𑀺𑀜𑁆𑀘𑀻𑀢𑀺𑀆𑀤𑀺 𑀬𑀼𑀢𑁆𑀢𑀺𑀳𑀸𑀭𑀬𑁄𑀚𑀦𑀸𑀬 𑀦𑀬𑀤𑀲𑁆𑀲𑀦𑀫𑁂𑀯.

𑀢𑀢𑁆𑀣 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺. 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀦𑁆𑀢𑀺 𑀧𑀳𑀸𑀦𑀲𑁆𑀲 𑀅𑀦𑀼𑀭𑀽𑀧𑀁, 𑀧𑀳𑀸𑀦𑀲𑀫𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂 𑀅𑀦𑀯𑀲𑁂𑀲𑀸𑀦𑀁 𑀧𑀤𑀢𑁆𑀣𑀸𑀦𑀁 𑀅𑀦𑀼𑀧𑀤𑀯𑀺𑀘𑀸𑀭𑀡𑀸 𑀯𑀺𑀘𑀬𑁄 𑀳𑀸𑀭𑁄, 𑀯𑀺𑀘𑀬𑀳𑀸𑀭𑀲𑀁𑀯𑀡𑁆𑀡𑀦𑀸𑀬 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀅𑀢𑁆𑀣𑁂𑀲𑀼 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀲𑀼𑀓𑀭𑀦𑁆𑀢𑀺 𑀆𑀳 𑁋 ‘‘𑀲𑀩𑁆𑀩𑀁 𑀢𑀁 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀻𑀢𑀺 𑀲𑀁𑀯𑀡𑁆𑀡𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀬𑀁 𑀜𑀸𑀡𑀁 𑀬𑀁 𑀧𑀝𑀺𑀪𑀸𑀦𑀁, 𑀢𑀲𑁆𑀲 𑀬𑀢𑁆𑀢𑀓𑁄 𑀯𑀺𑀲𑀬𑁄, 𑀢𑀢𑁆𑀢𑀓𑁄 𑀬𑀼𑀢𑁆𑀢𑀺𑀳𑀸𑀭𑀯𑀺𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀦𑁆𑀢𑀦𑀬𑁄 𑀲𑀫𑀦𑁆𑀢𑀪𑀤𑁆𑀤𑀓𑁄 𑀯𑀺𑀫𑀤𑁆𑀤𑀓𑁆𑀔𑀫𑁄 𑀯𑀺𑀘𑀺𑀢𑁆𑀢𑀤𑁂𑀲𑀦𑁄 𑀘 𑀲𑀤𑁆𑀥𑀫𑁆𑀫𑁄𑀢𑀺.

𑀏𑀯𑀁 𑀦𑀬𑀤𑀲𑁆𑀲𑀦𑀯𑀲𑁂𑀦𑁂𑀯 𑀬𑀼𑀢𑁆𑀢𑀺𑀳𑀸𑀭𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀨𑀮𑀲𑀫𑀸𑀧𑀢𑁆𑀢𑀺𑀦𑀯𑀸𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀯𑀲𑀺𑀪𑀸𑀯𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲𑀸𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀮𑀸𑀪𑀺𑀦𑁄. 𑀲𑀢𑁄𑀢𑀺 𑀲𑀫𑀸𑀦𑀲𑁆𑀲, 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀤𑁄𑀢𑀺 𑀧𑀤𑁄𑀲𑁄. 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀘𑀺𑀢𑁆𑀢𑀁 𑀅𑀪𑀺𑀪𑀯𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀧𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑁆𑀲 𑀅𑀧𑀭𑀪𑀸𑀕𑁂𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀞𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸𑀢𑀺 𑀩𑁆𑀬𑀸𑀧𑀸𑀤𑀧𑀝𑀺𑀧𑀓𑁆𑀔𑀢𑁆𑀢𑀸 𑀫𑁂𑀢𑁆𑀢𑀸𑀬 𑀢𑀸𑀤𑀺𑀲𑀻 𑀓𑀣𑀸 𑀦 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀤𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 ¶ 𑀏𑀯 𑀅𑀬𑀁 𑀓𑀣𑀸 𑀬𑀼𑀢𑁆𑀢𑀸𑀢𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀢𑁆𑀢𑀸𑀦𑀁 𑀏𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀧𑀝𑀺𑀮𑀤𑁆𑀥𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀲𑁆𑀲. 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻𑀢𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻. 𑀢𑁂𑀦 𑀢𑁂𑀦𑁂𑀯𑀸𑀢𑀺 𑀦𑀺𑀘𑁆𑀘𑀸𑀤𑀻𑀲𑀼 ¶ 𑀬𑀁 𑀬𑀁 𑀧𑀳𑀻𑀦𑀁, 𑀢𑁂𑀦 𑀢𑁂𑀦𑁂𑀯 𑀦𑀺𑀫𑀺𑀢𑁆𑀢𑁂𑀦. 𑀅𑀲𑁆𑀫𑀻𑀢𑀺 𑀯𑀺𑀕𑀢𑀦𑁆𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀤𑀺𑀝𑁆𑀞𑀺𑀫𑀸𑀦𑀯𑀲𑁂𑀦 𑀬𑀁 𑀅𑀲𑁆𑀫𑀻𑀢𑀺 𑀫𑀜𑁆𑀜𑀺𑀢𑀁, 𑀢𑀁 𑀯𑀺𑀕𑀢𑀁. 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀅𑀬𑀫𑀳𑀫𑀲𑁆𑀫𑀻𑀢𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀦𑁆𑀢𑀺 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀸𑀧𑀺 𑀓𑀣𑀁 𑀓𑀣𑀦𑁆𑀢𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀧𑀤𑁂𑀦 𑀯𑀺𑀲𑁂𑀲𑀺𑀢𑀁. 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀢𑁄 𑀦 𑀬𑀼𑀢𑁆𑀢𑀸𑀬𑀁 𑀓𑀣𑀸.

𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀬𑀲𑁆𑀫𑀸 𑀦𑀻𑀯𑀭𑀡𑁂𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀫𑁆𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀛𑀸𑀦𑀁, 𑀢𑀲𑁆𑀫𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀯𑀺𑀲𑁂𑀲𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀢𑁆𑀢𑀸𑀬𑀁 𑀓𑀣𑀸. 𑀬𑀣𑀸𑀮𑀤𑁆𑀥𑀲𑁆𑀲 𑀧𑀦 𑀧𑀞𑀫𑀚𑁆𑀛𑀸𑀦𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸 𑀬𑀼𑀢𑁆𑀢𑀸 𑀓𑀣𑀸𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀦𑀸𑀫 𑀲𑀳 𑀉𑀧𑀘𑀸𑀭𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸, 𑀆𑀭𑀫𑁆𑀫𑀡𑀓𑀭𑀡𑀢𑁆𑀣𑁄 𑀳𑁂𑀢𑁆𑀣 𑀲𑀳𑀕𑀢-𑀲𑀤𑁆𑀤𑁄. 𑀳𑀸𑀦𑀸𑀬𑀸𑀢𑀺 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑀺𑀳𑀸𑀦𑀸𑀬. 𑀯𑀺𑀲𑁂𑀲𑀸𑀬𑀸𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀬. 𑀇𑀫𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀳𑀸𑀦𑀦𑁆𑀢𑀺, 𑀯𑀺𑀲𑁂𑀲𑁄𑀢𑀺 𑀘 𑀯𑀼𑀢𑁆𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀳𑀕𑀢𑀸𑀢𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸, 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀏𑀯 𑀯𑀸. 𑀉𑀧𑁂𑀓𑁆𑀔𑀸𑀲𑀼𑀔𑀲𑀳𑀕𑀢𑀸𑀢𑀺 𑀉𑀧𑀘𑀸𑀭𑁂𑀦 𑀲𑀤𑁆𑀥𑀺𑀁 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀳𑀺 𑀇𑀥 𑀉𑀧𑁂𑀓𑁆𑀔𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀻𑀢𑀺𑀲𑀼𑀔𑀲𑀳𑀕𑀢𑀸𑀢𑀺 𑀲𑀳 𑀉𑀧𑀘𑀸𑀭𑁂𑀦 𑀢𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸. 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀳𑀕𑀢𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀥𑀫𑁆𑀫𑀸.

𑀲𑀜𑁆𑀜𑀽𑀧𑀘𑀸𑀭𑀸𑀢𑀺 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸 𑀏𑀯 𑀬𑁂 𑀓𑁂𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸, ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀥𑀫𑁆𑀫𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀳𑀕𑀢𑀸𑀢𑀺 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀭𑀺𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀸. 𑀢𑁂 𑀧𑀦 𑀬𑀲𑁆𑀫𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀞𑀺𑀢𑁂𑀦𑁂𑀯 𑀲𑀓𑁆𑀓𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁, 𑀦 𑀢𑀢𑁄 𑀧𑀭𑀺𑀳𑀻𑀦𑁂𑀦, 𑀢𑀲𑁆𑀫𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀢𑁆𑀢𑀸 𑀓𑀣𑀸. 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀦 𑀬𑀼𑀢𑁆𑀢𑀸 𑀓𑀣𑀸𑀢𑀺 𑀆𑀳 𑁋 ‘‘𑀳𑀸𑀦𑀸𑀬…𑀧𑁂… 𑀤𑁂𑀲𑀦𑀸’’𑀢𑀺. 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀦𑁆𑀢𑀺 ¶ 𑀲𑀫𑀢𑁆𑀣𑀪𑀸𑀯𑁂𑀦 𑀧𑀭𑀺𑀘𑀺𑀢𑀁, 𑀬𑀣𑀸𑀯𑀼𑀢𑁆𑀢𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀺𑀪𑀸𑀯𑁂𑀦 𑀧𑀭𑀺𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀪𑀺𑀦𑀻𑀳𑀸𑀭𑀁 𑀔𑀫𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀧𑀺 ¶ 𑀘𑁂𑀢𑁆𑀣 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀫𑀼𑀔𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀧𑀢𑀺𑀭𑀽𑀧𑀢𑀸𑀬 𑀩𑁆𑀬𑀸𑀧𑀸𑀤𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀫𑀸𑀥𑀺𑀫𑀼𑀔𑁂𑀦 𑀣𑀺𑀦𑀫𑀺𑀤𑁆𑀥𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀯𑀻𑀭𑀺𑀬𑀸𑀭𑀫𑁆𑀪𑀫𑀼𑀔𑁂𑀦 𑀉𑀤𑁆𑀥𑀘𑁆𑀘𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀺𑀓𑁆𑀔𑀸𑀓𑀸𑀫𑀢𑀸𑀫𑀼𑀔𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀉𑀪𑀬𑀧𑀓𑁆𑀔𑀲𑀦𑁆𑀢𑀻𑀭𑀡𑀫𑀼𑀔𑁂𑀦 𑀯𑀺𑀘𑀺𑀓𑀺𑀘𑁆𑀙𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀇𑀝𑁆𑀞𑀸𑀦𑀺𑀝𑁆𑀞𑀲𑀫𑀼𑀧𑁂𑀓𑁆𑀔𑀦𑀫𑀼𑀔𑁂𑀦 𑀲𑀫𑁆𑀫𑁄𑀳𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦 𑀅𑀢𑁆𑀢𑀦𑀺 𑀅𑀧𑀭𑀺𑀪𑀯𑀦𑁂 𑀫𑀸𑀦𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀯𑀻𑀫𑀁𑀲𑀸𑀫𑀼𑀔𑁂𑀦 𑀳𑁂𑀢𑀼𑀧𑀢𑀺𑀭𑀽𑀧𑀓𑀧𑀭𑀺𑀕𑁆𑀕𑀳𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀯𑀺𑀭𑀢𑁆𑀢𑀢𑀸𑀧𑀢𑀺𑀭𑀽𑀧𑀓𑁂𑀦 𑀲𑀢𑁆𑀢𑁂𑀲𑀼 𑀅𑀤𑀬𑀸𑀧𑀦𑁆𑀦𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀦𑀼𑀜𑁆𑀜𑀸𑀢𑀧𑀝𑀺𑀲𑁂𑀯𑀦𑀧𑀢𑀺𑀭𑀽𑀧𑀢𑀸𑀬 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀢𑀺𑀭𑀽𑀧𑀢𑀸𑀬 𑀅𑀲𑀁𑀯𑀺𑀪𑀸𑀕𑀲𑀻𑀮𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀁𑀯𑀺𑀪𑀸𑀕𑀲𑀻𑀮𑀢𑀸𑀧𑀢𑀺𑀭𑀽𑀧𑀢𑀸𑀬 𑀫𑀺𑀘𑁆𑀙𑀸𑀚𑀻𑀯𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀲𑀁𑀲𑀕𑁆𑀕𑀯𑀺𑀳𑀸𑀭𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀅𑀲𑀗𑁆𑀕𑀳𑀲𑀻𑀮𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀗𑁆𑀕𑀳𑀲𑀻𑀮𑀢𑀸𑀧𑀢𑀺𑀭𑀽𑀧𑀢𑀸𑀬 𑀅𑀦𑀦𑀼𑀮𑁄𑀫𑀺𑀓𑀲𑀁𑀲𑀕𑁆𑀕𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀘𑁆𑀘𑀯𑀸𑀤𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀧𑀺𑀲𑀼𑀡𑀯𑀸𑀘𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀧𑀺𑀲𑀼𑀡𑀯𑀸𑀤𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀅𑀦𑀢𑁆𑀣𑀓𑀸𑀫𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀧𑀺𑀬𑀯𑀸𑀤𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀘𑀸𑀝𑀼𑀓𑀫𑁆𑀬𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀫𑀺𑀢𑀪𑀸𑀡𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀅𑀲𑀫𑁆𑀫𑁄𑀤𑀦𑀲𑀻𑀮𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀫𑁆𑀫𑁄𑀤𑀦𑀲𑀻𑀮𑀢𑀸𑀧𑀢𑀺𑀭𑀽𑀧𑀢𑀸𑀬 𑀫𑀸𑀬𑀸 𑀲𑀸𑀞𑁂𑀬𑁆𑀬𑀜𑁆𑀘 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀨𑀭𑀼𑀲𑀯𑀸𑀘𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀧𑀸𑀧𑀕𑀭𑀳𑀺𑀢𑀸𑀧𑀢𑀺𑀭𑀽𑀧𑀢𑀸𑀬 𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀓𑀼𑀮𑀸𑀦𑀼𑀤𑁆𑀥𑀬𑀢𑀸𑀧𑀢𑀺𑀭𑀽𑀧𑀢𑀸𑀬 𑀓𑀼𑀮𑀫𑀘𑁆𑀙𑀭𑀺𑀬𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀆𑀯𑀸𑀲𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑀢𑀸𑀫𑀼𑀔𑁂𑀦 𑀆𑀯𑀸𑀲𑀫𑀘𑁆𑀙𑀭𑀺𑀬𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀥𑀫𑁆𑀫𑀧𑀭𑀺𑀩𑀦𑁆𑀥𑀧𑀭𑀺𑀳𑀭𑀡𑀫𑀼𑀔𑁂𑀦 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀥𑀫𑁆𑀫𑀤𑁂𑀲𑀦𑀸𑀪𑀺𑀭𑀢𑀺𑀫𑀼𑀔𑁂𑀦 𑀪𑀲𑁆𑀲𑀸𑀭𑀸𑀫𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀨𑀭𑀼𑀲𑀯𑀸𑀘𑀢𑀸𑀕𑀡𑀸𑀦𑀼𑀕𑁆𑀕𑀳𑀓𑀭𑀡𑀫𑀼𑀔𑁂𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀧𑀼𑀜𑁆𑀜𑀓𑀸𑀫𑀢𑀸𑀧𑀢𑀺𑀭𑀽𑀧𑀢𑀸𑀬 𑀓𑀫𑁆𑀫𑀸𑀭𑀸𑀫𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀁𑀯𑁂𑀕𑀧𑀢𑀺𑀭𑀽𑀧𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀧𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀤𑁆𑀥𑀸𑀮𑀼𑀢𑀸𑀧𑀢𑀺𑀭𑀽𑀧𑀢𑀸𑀬 𑀅𑀧𑀭𑀺𑀓𑁆𑀔𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀯𑀻𑀫𑀁𑀲𑀦𑀸𑀧𑀢𑀺𑀭𑀽𑀧𑁂𑀦 𑀅𑀲𑁆𑀲𑀤𑁆𑀥𑀺𑀬𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀧𑀢𑀺𑀭𑀽𑀧𑁂𑀦 𑀕𑀭𑀽𑀦𑀁 𑀅𑀦𑀼𑀲𑀸𑀲𑀦𑀺𑀬𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀧𑀢𑀺𑀭𑀽𑀧𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀅𑀕𑀸𑀭𑀯𑀁 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀧𑀢𑀺𑀭𑀽𑀧𑁂𑀦 𑀅𑀢𑁆𑀢𑀦𑀺 𑀥𑀫𑁆𑀫𑁂 𑀘 𑀧𑀭𑀺𑀪𑀯𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀫𑁂𑀢𑁆𑀢𑀸𑀬𑀦𑀸𑀫𑀼𑀔𑁂𑀦 𑀭𑀸𑀕𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀓𑀭𑀼𑀡𑀸𑀬𑀦𑀸𑀧𑀢𑀺𑀭𑀽𑀧𑁂𑀦 𑀲𑁄𑀓𑁄 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀫𑀼𑀤𑀺𑀢𑀸𑀯𑀺𑀳𑀸𑀭𑀧𑀢𑀺𑀭𑀽𑀧𑁂𑀦 ¶ 𑀧𑀳𑀸𑀲𑁄 ¶ 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀧𑀢𑀺𑀭𑀽𑀧𑁂𑀦 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀯𑀜𑁆𑀘𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀏𑀯𑀁 𑀆𑀕𑀫𑀧𑀢𑀺𑀭𑀽𑀧𑀓𑀅𑀥𑀺𑀕𑀫𑀧𑀢𑀺𑀭𑀽𑀧𑀓𑀸𑀤𑀻𑀦𑀫𑁆𑀧𑀺 𑀢𑀣𑀸 𑀢𑀣𑀸 𑀯𑀜𑁆𑀘𑀦𑀲𑀪𑀸𑀯𑁄 𑀬𑀼𑀢𑁆𑀢𑀺𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀆𑀕𑀫𑀸𑀦𑀼𑀲𑀸𑀭𑁂𑀦 𑀬𑀼𑀢𑁆𑀢𑀺𑀕𑀯𑁂𑀲𑀦𑀸 𑀓𑀸𑀢𑀩𑁆𑀩𑀸𑀢𑀺.

𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁨. 𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄𑀢𑀺𑀆𑀤𑀺 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀬𑀲𑁆𑀫𑀸 ‘‘𑀇𑀤𑀁 𑀇𑀫𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀇𑀤𑀁 𑀇𑀫𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀪𑀽𑀢𑀥𑀫𑁆𑀫𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄, 𑀢𑀲𑁆𑀫𑀸 𑀧𑀯𑀢𑁆𑀢𑀺𑀬𑀸 𑀫𑀽𑀮𑀪𑀽𑀢𑀁 𑀅𑀯𑀺𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀪𑀸𑀯𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀅𑀯𑀺𑀚𑁆𑀚𑀸𑀬 𑀲𑀪𑀸𑀯𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀲𑀩𑁆𑀩𑀥𑀫𑁆𑀫𑀬𑀸𑀣𑀸𑀯𑀅𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀦 𑀲𑀫𑁆𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀲𑀩𑁆𑀩𑀥𑀫𑁆𑀫𑀬𑀸𑀣𑀸𑀯𑀅𑀲𑀫𑁆𑀧𑀝𑀺𑀯𑁂𑀥𑁄. 𑀲𑁄 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀸 𑀢𑀣𑀸 𑀯𑀼𑀢𑁆𑀢𑀸. 𑀏𑀢𑁂𑀦 𑀥𑀫𑁆𑀫𑀲𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀲𑀫𑁆𑀫𑀸 𑀧𑀝𑀺𑀯𑁂𑀥𑁄 𑀲𑀫𑁆𑀧𑀝𑀺𑀯𑁂𑀥𑁄. 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀲𑀫𑁆𑀧𑀝𑀺𑀯𑁂𑀥𑁄. 𑀓𑀢𑁆𑀣 𑀧𑀦 𑀲𑁄 𑀲𑀫𑁆𑀧𑀝𑀺𑀯𑁂𑀥𑀲𑁆𑀲 𑀧𑀝𑀺𑀧𑀓𑁆𑀔𑁄𑀢𑀺 𑀆𑀳 𑁋 ‘‘𑀲𑀩𑁆𑀩…𑀧𑁂… 𑀮𑀓𑁆𑀔𑀡𑀸’’𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺𑀆𑀤𑀺𑀯𑀺𑀧𑀮𑁆𑀮𑀸𑀲𑁂 𑀲𑀢𑀺 𑀢𑀢𑁆𑀣 𑀲𑀫𑁆𑀫𑁄𑀳𑁄 𑀉𑀧𑀭𑀽𑀧𑀭𑀺 𑀚𑀸𑀬𑀢𑀺𑀬𑁂𑀯 𑀦 𑀳𑀸𑀬𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀚𑀸𑀢𑀺𑀬𑀁 𑀇𑀝𑁆𑀞𑀚𑀸𑀢𑀺𑀬𑀜𑁆𑀘 𑀧𑀤𑀝𑁆𑀞𑀸𑀦𑀁. ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩) 𑀳𑀺 𑀯𑀼𑀢𑁆𑀢𑀁. 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀘𑁂𑀢𑀦𑀸. 𑀲𑀸 𑀳𑀺 𑀏𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀸𑀧𑀺 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀮𑁄𑀪𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀧𑀤𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀤𑁄𑀲𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀧𑀤𑀝𑁆𑀞𑀸𑀦𑀁, 𑀫𑁄𑀳𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀤𑀸 𑀧𑀤𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀡𑁆𑀡𑀲𑀡𑁆𑀞𑀸𑀦𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀮𑀓𑁆𑀔𑀡𑀸𑀢𑀺 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀮𑀓𑁆𑀔𑀡𑀸. 𑀲𑀼𑀔𑀲𑀜𑁆𑀜𑀸𑀬 𑀨𑀲𑁆𑀲𑀲𑁆𑀲 𑀉𑀧𑀕𑀫𑀦𑀮𑀓𑁆𑀔𑀡𑀢𑀸 𑀨𑀲𑁆𑀲𑀧𑀘𑁆𑀘𑀬𑀢𑀸𑀯 𑀯𑀼𑀢𑁆𑀢𑀸. ‘‘𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀳𑀺 𑀯𑀼𑀢𑁆𑀢𑀁 ¶ . 𑀅𑀲𑁆𑀲𑀸𑀤𑁄𑀢𑀺 𑀢𑀡𑁆𑀳𑀸. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀸𑀦𑀺. 𑀬𑁂𑀪𑀼𑀬𑁆𑀬𑁂𑀦 𑀦𑀺𑀘𑁆𑀘𑀕𑁆𑀕𑀳𑀡𑀁 𑀯𑀺𑀜𑁆𑀜𑀸𑀡𑀸𑀥𑀻𑀦𑀦𑁆𑀢𑀺 𑀦𑀺𑀘𑁆𑀘𑀲𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀲𑁄 𑀪𑀺𑀓𑁆𑀔𑀼 𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑀯𑀺𑀜𑁆𑀜𑀸𑀡𑀯𑀺𑀲𑀬𑀫𑁂𑀯 𑀅𑀢𑁆𑀢𑀦𑁄 𑀦𑀺𑀘𑁆𑀘𑀕𑁆𑀕𑀸𑀳𑀁 𑀧𑀯𑁂𑀤𑁂𑀲𑀺. 𑀧𑀜𑁆𑀘𑀦𑁆𑀦𑀁 ¶ 𑀔𑀦𑁆𑀥𑀸𑀦𑀁 𑀬𑀤𑀺 𑀅𑀦𑀺𑀘𑁆𑀘𑀢𑀸 𑀤𑀼𑀓𑁆𑀔𑀢𑀸 𑀘 𑀲𑀼𑀤𑀺𑀝𑁆𑀞𑀸, 𑀅𑀢𑁆𑀢𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀅𑀦𑀯𑀓𑀸𑀲𑀸𑀢𑀺 𑀆𑀳 𑁋 ‘‘𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀼𑀓𑁆𑀔𑀲𑀜𑁆𑀜𑀸𑀅𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀸 𑀅𑀢𑁆𑀢𑀲𑀜𑁆𑀜𑀸’’𑀢𑀺. ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀳𑀺 𑀯𑀼𑀢𑁆𑀢𑀁.

𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀅𑀭𑀽𑀧𑀥𑀫𑁆𑀫𑁂𑀲𑀽𑀢𑀺 𑀆𑀳 𑁋 ‘‘𑀢𑀲𑁆𑀲𑀸 𑀦𑀸𑀫𑀓𑀸𑀬𑁄 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀲𑀩𑁆𑀩𑀁 𑀦𑁂𑀬𑁆𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀘𑀢𑀼𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄. 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀧𑀝𑀺𑀲𑀁𑀳𑀭𑀡𑀁 𑀉𑀤𑁆𑀥𑀘𑁆𑀘𑀯𑀺𑀓𑁆𑀔𑀫𑁆𑀪𑀦𑀁. 𑀅𑀲𑀼𑀪𑀸𑀢𑀺 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀸 𑀅𑀲𑀼𑀪𑀸 𑀏𑀯 𑀯𑀸, 𑀢𑀡𑁆𑀳𑀸𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀣𑀲𑁆𑀲 𑀅𑀲𑀼𑀪𑀸 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀚𑁆𑀛𑀸𑀬 𑀢𑀦𑀼𑀓𑀭𑀡𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀯𑁂𑀭𑀫𑀡𑀻 𑀅𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀩𑁆𑀬𑀸𑀧𑀸𑀤𑀲𑁆𑀲 𑀢𑀦𑀼𑀓𑀭𑀡𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻 𑀅𑀤𑁄𑀲𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀯𑀢𑁆𑀣𑀼𑀅𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀯𑀺𑀲𑀬𑀲𑀪𑀸𑀯𑀧𑀝𑀺𑀯𑁂𑀥𑁄, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀤𑀸𑀦𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑁂𑀦 𑀅𑀦𑀪𑀺𑀭𑀢𑀺𑀜𑀸𑀡𑀫𑁂𑀯 𑀯𑀸 𑀢𑀣𑀸 𑀧𑀯𑀢𑁆𑀢𑀁. 𑀲𑀩𑁆𑀩𑀸𑀧𑀺 𑀯𑁂𑀤𑀦𑀸 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀪𑀸𑀯𑀢𑁄 𑀤𑀼𑀓𑁆𑀔𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀤𑀼𑀓𑁆𑀔𑀲𑀜𑁆𑀜𑀸𑀬 𑀯𑁂𑀤𑀦𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀥𑀫𑁆𑀫𑀲𑀜𑁆𑀜𑀸𑀢𑀺 𑀥𑀫𑁆𑀫𑀫𑀢𑁆𑀢𑀦𑁆𑀢𑀺 𑀲𑀜𑁆𑀜𑀸.

𑀲𑀢𑁆𑀢𑀸𑀦𑀁 𑀓𑀸𑀬𑁂 𑀅𑀯𑀻𑀢𑀭𑀸𑀕𑀢𑀸 𑀧𑀜𑁆𑀘𑀦𑁆𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀁 𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀓𑀸𑀬𑁄 𑀳𑀺 𑀇𑀥 𑀭𑀽𑀧𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀺𑀲𑁂𑀲𑀢𑁄 𑀛𑀸𑀦𑀦𑀺𑀲𑁆𑀲𑀬𑀪𑀽𑀢𑁂 𑀫𑀦𑀸𑀬𑀢𑀦𑁂 𑀘 𑀦𑀺𑀓𑀦𑁆𑀢𑀺 𑀳𑁄𑀢𑀻𑀢𑀺 𑀆𑀳 𑁋 ‘‘𑀙𑀝𑁆𑀞𑀸𑀬𑀢𑀦𑀁 𑀪𑀯𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀏𑀤𑀺𑀲𑀁 𑀫𑀸 𑀭𑀽𑀧𑀁 𑀦𑀺𑀩𑁆𑀩𑀢𑁆𑀢𑀢𑀼, 𑀫𑀸 𑀏𑀤𑀺𑀲𑀻 𑀯𑁂𑀤𑀦𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀭𑀽𑀧𑀸𑀤𑀺𑀅𑀪𑀺𑀦𑀦𑁆𑀤𑀦𑀸 𑀦𑀺𑀩𑁆𑀩𑀢𑁆𑀢𑀪𑀯𑀸𑀦𑀼𑀧𑀲𑁆𑀲𑀺𑀢𑀸. 𑀜𑀸𑀡𑀤𑀲𑁆𑀲𑀦𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀤𑀲𑁆𑀲𑀦𑀲𑁆𑀲. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀢𑁄 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀦 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲. 𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁧𑁫𑁩 𑀆𑀤𑀬𑁄), 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁩𑁮 𑀆𑀤𑀬𑁄) 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀘 𑀉𑀤𑀸𑀳𑀭𑀺𑀢𑀩𑁆𑀩𑁄. ‘‘𑀑𑀓𑀧𑁆𑀧𑀦𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀥𑀸𑀧𑀲𑀸𑀤𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀲𑁄 𑀧𑀦 𑀲𑀤𑁆𑀥𑀸𑀬𑀬𑁂𑀯 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀑𑀓𑀧𑁆𑀧𑀦𑀁 𑀲𑀤𑁆𑀤𑀳𑀦𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀑𑀕𑀸𑀳𑀡𑀁 𑀦𑀺𑀘𑁆𑀙𑀬𑁄. 𑀅𑀦𑀸𑀯𑀺𑀮𑀢𑀸 ¶ 𑀅𑀲𑁆𑀲𑀤𑁆𑀥𑀺𑀬𑀸𑀧𑀕𑀫𑁂𑀦 𑀘𑀺𑀢𑁆𑀢𑀲𑁆𑀲 𑀅𑀓𑀸𑀮𑀼𑀲𑁆𑀲𑀺𑀬𑀢𑀸. 𑀅𑀪𑀺𑀧𑀢𑁆𑀣𑀺𑀬𑀦𑀸 𑀲𑀤𑁆𑀤𑀳𑀦𑀫𑁂𑀯. 𑀅𑀯𑁂𑀘𑁆𑀘𑀧𑀲𑀸𑀤𑁄 𑀧𑀜𑁆𑀜𑀸𑀲𑀳𑀺𑀢𑁄 𑀆𑀬𑀢𑀦𑀕𑀢𑁄 𑀅𑀪𑀺𑀧𑁆𑀧𑀲𑀸𑀤𑁄. 𑀅𑀧𑀺𑀮𑀸𑀧𑀦𑀁 𑀅𑀲𑀫𑁆𑀫𑁄𑀲𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀑𑀕𑀸𑀳𑀡𑀁 𑀯𑀸, 𑀏𑀢𑁆𑀣 𑀘 𑀲𑀤𑁆𑀥𑀸𑀤𑀻𑀦𑀁 𑀧𑀲𑀸𑀤𑀲𑀤𑁆𑀥𑀸𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀛𑀸𑀦𑀗𑁆𑀕𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀲𑁂𑀦 𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀢𑀺𑀲𑀫𑀸𑀥𑀻𑀦𑀁 𑀯𑀸 𑀓𑀸𑀬𑀸𑀤𑀬𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺. 𑀯𑀺𑀢𑀓𑁆𑀓𑀸𑀤𑀬𑁄 𑀘 𑀛𑀸𑀦𑀸𑀦𑀻𑀢𑀺 𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸.

𑀅𑀲𑁆𑀲𑀸𑀤𑀫𑀦𑀲𑀺𑀓𑀸𑀭𑁄 ¶ 𑀲𑀁𑀬𑁄𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸. 𑀧𑀼𑀦𑀩𑁆𑀪𑀯𑀯𑀺𑀭𑁄𑀳𑀡𑀸𑀢𑀺 𑀧𑀼𑀦𑀩𑁆𑀪𑀯𑀸𑀬 𑀯𑀺𑀭𑁄𑀳𑀡𑀸, 𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑀸𑀢𑀺 𑀅𑀢𑁆𑀣𑁄. 𑀑𑀧𑀧𑀘𑁆𑀘𑀬𑀺𑀓𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀦𑁆𑀢𑀺 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑀲𑀪𑀸𑀯𑀁. 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀗𑁆𑀖𑀸𑀢𑀮𑀓𑁆𑀔𑀡𑀦𑁆𑀢𑀺 𑀅𑀭𑀽𑀧𑀭𑀽𑀧𑀓𑀸𑀬𑀸𑀦𑀁 𑀲𑀫𑀽𑀳𑀺𑀬𑀪𑀸𑀯𑀁. 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀯𑀢𑁆𑀣𑀺𑀢𑀪𑀸𑀯𑁄. 𑀑𑀧𑀧𑀘𑁆𑀘𑀬𑀺𑀓𑀦𑁆𑀢𑀺 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀦𑀺𑀩𑁆𑀩𑀢𑁆𑀢𑀓𑀁. 𑀉𑀧𑀥𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀦𑁄 𑀧𑀺𑀬𑀲𑁆𑀲 𑀫𑀭𑀡𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀩𑀸𑀮𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀭𑀡𑀁 𑀲𑁄𑀓𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀲𑁆𑀲𑀼𑀓𑁆𑀓𑀁 𑀘𑁂𑀢𑀲𑁄 𑀲𑀦𑁆𑀢𑀸𑀧𑁄. 𑀑𑀤𑀳𑀦𑀦𑁆𑀢𑀺 𑀅𑀯𑀤𑀳𑀦𑀁. 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑁆𑀲 𑀲𑀦𑁆𑀢𑀧𑀦𑀫𑁂𑀯 𑀪𑀯𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀯𑀲𑁆𑀲 𑀅𑀗𑁆𑀕𑀸𑀦𑀺 𑀪𑀯𑀲𑀗𑁆𑀔𑀸𑀢𑀸𑀦𑀺 𑀘 𑀅𑀗𑁆𑀕𑀸𑀦𑀺 𑀪𑀯𑀗𑁆𑀕𑀸𑀦𑀺. 𑀢𑁂𑀲𑀼 𑀓𑀺𑀮𑁂𑀲𑀸 𑀪𑀯𑀲𑁆𑀲 𑀅𑀗𑁆𑀕𑀸𑀦𑀺. 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀁 𑀪𑀯𑀲𑀗𑁆𑀔𑀸𑀢𑀸𑀦𑀺 𑀅𑀗𑁆𑀕𑀸𑀦𑀺. 𑀲𑀫𑀕𑁆𑀕𑀸𑀦𑀻𑀢𑀺 𑀲𑀩𑁆𑀩𑀸𑀦𑀺. 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀲𑀁𑀲𑀭𑀡𑀁 𑀲𑀁𑀲𑀸𑀭𑁄. 𑀢𑀲𑁆𑀲 𑀧𑀼𑀭𑀺𑀫𑀧𑀼𑀭𑀺𑀫𑀚𑀸𑀢𑀺𑀦𑀺𑀧𑁆𑀨𑀦𑁆𑀦𑀁 𑀓𑀺𑀮𑁂𑀲𑀸𑀤𑀺𑀯𑀝𑁆𑀝𑀁 𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀪𑀯𑁄 𑀲𑀁𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀫𑀕𑁆𑀕𑁄 𑀦𑀺𑀭𑁄𑀥𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀫𑁆𑀫𑀝𑁆𑀞𑀸𑀦𑁄𑀕𑀸𑀳𑀓𑀲𑁆𑀲 𑀑𑀢𑀭𑀡𑀝𑁆𑀞𑀸𑀦𑀢𑀸𑀬 𑀩𑀳𑀼𑀲𑁆𑀲𑀼𑀢𑁄 𑀢𑀺𑀢𑁆𑀣𑀁 𑀦𑀸𑀫, 𑀢𑀲𑁆𑀲 𑀲𑀫𑁆𑀫𑀸𑀧𑀬𑀺𑀭𑀼𑀧𑀸𑀲𑀦𑀸 𑀢𑀺𑀢𑁆𑀣𑀜𑁆𑀜𑀼𑀢𑀸. 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀸𑀫𑁄𑀚𑁆𑀚𑀁 𑀧𑀻𑀢𑀁 𑀦𑀸𑀫, 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑁂𑀦 𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀩𑁆𑀭𑀽𑀳𑀦𑀸 𑀧𑀻𑀢𑀜𑁆𑀜𑀼𑀢𑀸, 𑀪𑀸𑀯𑀦𑀸𑀬 𑀣𑁄𑀓𑀫𑁆𑀧𑀺 𑀮𑀬𑀸𑀧𑀢𑁆𑀢𑀺𑀬𑀸 𑀉𑀤𑁆𑀥𑀁𑀧𑀢𑁆𑀢𑀺𑀬𑀸 𑀘 𑀚𑀸𑀦𑀦𑀸 𑀧𑀢𑁆𑀢𑀜𑁆𑀜𑀼𑀢𑀸. 𑀅𑀢𑁆𑀢𑀦𑁄 𑀧𑀜𑁆𑀘𑀳𑀺 𑀧𑀥𑀸𑀦𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀚𑀸𑀦𑀦𑀸 𑀅𑀢𑁆𑀢𑀜𑁆𑀜𑀼𑀢𑀸, 𑀢𑁂𑀲𑀼 𑀧𑀼𑀭𑀺𑀫𑀸𑀦𑀁 𑀧𑀼𑀭𑀺𑀫𑀸𑀦𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀏𑀯. 𑀓𑀢𑀧𑀼𑀜𑁆𑀜𑀲𑁆𑀲𑁂𑀯 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀲𑀫𑁆𑀪𑀯𑀢𑀺 ¶ , 𑀦 𑀇𑀢𑀭𑀲𑁆𑀲𑀸𑀢𑀺 ‘‘𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦 𑀢𑀭𑀼𑀡𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀺𑀤𑀸𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸. 𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀁. 𑀏𑀯𑀦𑁆𑀢𑀺 𑀬𑀤𑀺𑀤𑀁 ‘‘𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁, 𑀇𑀫𑀺𑀦𑀸 𑀦𑀬𑁂𑀦 𑀅𑀣𑀸𑀧𑀺 𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀩𑀮𑀯𑀧𑀘𑁆𑀘𑀬𑁄𑀢𑀺 𑀬𑁄 𑀓𑁄𑀘𑀺 𑀅𑀯𑀲𑁂𑀲𑀧𑀘𑁆𑀘𑀬𑁄, 𑀲𑀩𑁆𑀩𑁄 𑀲𑁄 𑀧𑀤𑀝𑁆𑀞𑀸𑀦𑀁 𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀯𑀁 𑀬𑀸 𑀓𑀸𑀘𑀺 𑀉𑀧𑀦𑀺𑀲𑀸 𑀬𑁄𑀕𑀢𑁄 𑀘 𑀧𑀘𑁆𑀘𑀬𑀢𑁄 𑀘𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀢𑁆𑀣 𑀉𑀧𑀦𑀺𑀲𑀸𑀢𑀺 𑀓𑀸𑀭𑀡𑀁, 𑀬𑁄𑀕𑀢𑁄𑀢𑀺 𑀬𑀼𑀢𑁆𑀢𑀺𑀢𑁄, 𑀧𑀘𑁆𑀘𑀬𑀢𑁄𑀢𑀺 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀢𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁩. 𑀢𑀢𑁆𑀣 ¶ 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄𑀢𑀺𑀆𑀤𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀓𑀺𑀁 𑀮𑀓𑁆𑀔𑀬𑀢𑀻𑀢𑀺 𑀮𑀓𑁆𑀔𑀡𑀳𑀸𑀭𑀲𑁆𑀲 𑀯𑀺𑀲𑀬𑀁 𑀧𑀼𑀘𑁆𑀙𑀢𑀺. ‘‘𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀳𑀸𑀭𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀉𑀤𑀸𑀳𑀭𑀡𑁂𑀳𑀺 𑀯𑀺𑀪𑀚𑀺𑀢𑀼𑀁 ‘‘𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀯𑀥𑀓𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀦𑀯𑀝𑁆𑀞𑀺𑀢𑀪𑀸𑀯𑀸𑀤𑀺𑀦𑀸𑀧𑀺 𑀏𑀓𑀮𑀓𑁆𑀔𑀡𑀢𑀸 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀆𑀬𑀢𑀦𑀯𑀲𑁂𑀦 𑀏𑀓𑀮𑀓𑁆𑀔𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀢𑀻’’𑀢𑀺𑀆𑀤𑀺 𑀲𑀼𑀢𑁆𑀢𑀁 𑀆𑀪𑀢𑀁. 𑀬𑀫𑀓𑁄𑀯𑀸𑀤𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁮𑁫) 𑀯𑀥𑀓𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸 𑀯𑀼𑀢𑁆𑀢𑀸𑀢𑀺 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀯𑀥𑀓𑀁 𑀭𑀽𑀧𑀁 𑀯𑀥𑀓𑀁 𑀭𑀽𑀧𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀢𑀻𑀢𑀺 𑀏𑀯𑀁, 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀼𑀢𑁆𑀢𑀸𑀬 𑀲𑀢𑀺 𑀯𑁂𑀤𑀦𑀸𑀕𑀢𑀸 𑀲𑀢𑀺 𑀘𑀺𑀢𑁆𑀢𑀕𑀢𑀸 𑀲𑀢𑀺 𑀥𑀫𑁆𑀫𑀕𑀢𑀸 𑀘 𑀲𑀢𑀺 𑀯𑀼𑀢𑁆𑀢𑀸 𑀪𑀯𑀢𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀦𑁆𑀢𑀺𑀆𑀤𑀻𑀦𑀁 𑀅𑀢𑁆𑀣𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀓𑀸𑀬𑁂 ¶ 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀻𑀢𑀺 𑀏𑀢𑁆𑀣 𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀭𑀽𑀧𑀓𑀸𑀬𑁄 𑀳𑀺 𑀇𑀥 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘 𑀲𑀫𑀽𑀳𑀝𑁆𑀞𑁂𑀦 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀘 𑀲𑀫𑀽𑀳𑀝𑁆𑀞𑁂𑀦, 𑀏𑀯𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀝𑁆𑀞𑁂𑀦. 𑀓𑀼𑀘𑁆𑀙𑀺𑀢𑀸𑀦𑀜𑁆𑀳𑀺 𑀧𑀭𑀫𑀚𑁂𑀕𑀼𑀘𑁆𑀙𑀸𑀦𑀁 𑀲𑁄 𑀆𑀬𑁄𑀢𑀺𑀧𑀺 𑀓𑀸𑀬𑁄, 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄. 𑀓𑁂 𑀆𑀬𑀦𑁆𑀢𑀺? 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄, 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄.

𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑁄, 𑀓𑀸𑀬𑀁 𑀯𑀸 𑀅𑀦𑀼𑀧𑀲𑁆𑀲𑀫𑀸𑀦𑁄. ‘‘𑀓𑀸𑀬𑁂’’𑀢𑀺 𑀘 𑀯𑀢𑁆𑀯𑀸 𑀧𑀼𑀦 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀤𑀼𑀢𑀺𑀬𑀁 𑀓𑀸𑀬𑀕𑁆𑀕𑀳𑀡𑀁 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦 𑀦 𑀓𑀸𑀬𑁂 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸, 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀏𑀯𑀸𑀢𑀺 𑀓𑀸𑀬𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀻.

𑀬𑁄𑀧𑀺 𑀘𑁂𑀢𑁆𑀣 𑀓𑁂𑀲𑀮𑁄𑀫𑀸𑀤𑀺𑀓𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀸𑀬𑁄, 𑀢𑀢𑁆𑀣𑀧𑀺 𑀦 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻 ¶ , 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀦𑀕𑀭𑀸𑀯𑀬𑀯𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀓𑀤𑀮𑀺𑀓𑁆𑀔𑀦𑁆𑀥𑀧𑀢𑁆𑀢𑀯𑀝𑁆𑀝𑀺𑀯𑀺𑀦𑀺𑀩𑁆𑀪𑀼𑀚𑁆𑀚𑀓𑁄 𑀯𑀺𑀬 𑀭𑀺𑀢𑁆𑀢𑀫𑀼𑀝𑁆𑀞𑀺𑀯𑀺𑀦𑀺𑀯𑁂𑀞𑀓𑁄 𑀯𑀺𑀬 𑀘 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀻 𑀏𑀯𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑀽𑀳𑀯𑀲𑁂𑀦𑁂𑀯 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀦 𑀳𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀤𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂 𑀏𑀯 𑀧𑀦 𑀢𑀣𑀸 𑀢𑀣𑀸 𑀲𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀤𑀺𑀝𑁆𑀞𑀁, 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀁 𑀩𑀚𑁆𑀛𑀢𑁂 𑀫𑀽𑀴𑁆𑀳𑁄, 𑀩𑀚𑁆𑀛𑀫𑀸𑀦𑁄 𑀦 𑀫𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩𑁬; 𑀫𑀳𑀸𑀦𑀺. 𑀅𑀝𑁆𑀞. 𑁩);

𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀏𑀢𑀲𑁆𑀫𑀺𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀬𑁂𑀯, 𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀦𑀼𑀤𑀓𑀪𑀽𑀢𑀸𑀬𑀧𑀺 𑀫𑀭𑀻𑀘𑀺𑀬𑀸 𑀉𑀤𑀓𑀸𑀦𑀼𑀧𑀲𑁆𑀲𑀺𑀦𑁄 𑀳𑁄𑀦𑁆𑀢𑀺, 𑀦 𑀏𑀯𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀅𑀲𑀼𑀪𑀪𑀽𑀢𑁂 𑀏𑀯 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀲𑀼𑀪𑀪𑀸𑀯𑀸𑀦𑀼𑀧𑀲𑁆𑀲𑀻 ¶ , 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀅𑀲𑀼𑀪𑀸𑀓𑀸𑀭𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁆𑀯𑀸𑀬𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁪 𑀆𑀤𑀬𑁄) 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀘𑀼𑀡𑁆𑀡𑀺𑀓𑀚𑀸𑀢𑀅𑀝𑁆𑀞𑀺𑀓𑀧𑀭𑀺𑀬𑁄𑀲𑀸𑀦𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀬𑁄 𑀘 ‘‘𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀆𑀧𑁄𑀓𑀸𑀬𑀁 𑀢𑁂𑀚𑁄𑀓𑀸𑀬𑀁 𑀯𑀸𑀬𑁄𑀓𑀸𑀬𑀁 𑀓𑁂𑀲𑀓𑀸𑀬𑀁…𑀧𑁂… 𑀅𑀝𑁆𑀞𑀺𑀫𑀺𑀜𑁆𑀚𑀓𑀸𑀬’’𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁩.𑁩𑁪 𑀆𑀤𑀬𑁄) 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀣 𑀯𑀸 𑀓𑀸𑀬𑁂 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀅𑀦𑀦𑀼𑀧𑀲𑁆𑀲𑀦𑀢𑁄, 𑀢𑀲𑁆𑀲 𑀧𑀦 𑀓𑁂𑀲𑀮𑁄𑀫𑀸𑀤𑀺𑀓𑀲𑁆𑀲 𑀦𑀸𑀦𑀸𑀥𑀫𑁆𑀫𑀲𑀫𑀽𑀳𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑁂𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀲𑀗𑁆𑀔𑀸𑀢𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀺 𑀘 ‘‘𑀇𑀫𑀲𑁆𑀫𑀺𑀁 𑀓𑀸𑀬𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺 𑀦𑁄 𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁩.𑁩𑁪 𑀆𑀤𑀬𑁄) 𑀆𑀕𑀢𑀦𑀬𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 ¶ 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀓𑀲𑁆𑀲 𑀆𑀓𑀸𑀭𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀅𑀢𑁆𑀣𑁄.

𑀯𑀺𑀳𑀭𑀸𑀳𑀻𑀢𑀺 𑀯𑀢𑁆𑀢𑀸𑀳𑀺. 𑀆𑀢𑀸𑀧𑀻𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑁂 𑀆𑀢𑀸𑀧𑁂𑀢𑀻𑀢𑀺 𑀆𑀢𑀸𑀧𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀢𑀸𑀧𑀻. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀺𑀫𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀦 𑀳𑀺 𑀲𑀢𑀺𑀯𑀺𑀭𑀳𑀺𑀢𑀸 𑀅𑀦𑀼𑀧𑀲𑁆𑀲𑀦𑀸 𑀅𑀢𑁆𑀣𑀺, 𑀢𑁂𑀦𑁂𑀯𑀸𑀳 𑁋 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀅𑀦𑀸𑀢𑀸𑀧𑀺𑀦𑁄 𑀘 𑀅𑀦𑁆𑀢𑁄 𑀲𑀗𑁆𑀓𑁄𑀘𑁄 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀫𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀢𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸 𑀯𑀺𑀦𑀬𑀺𑀢𑁆𑀯𑀸. 𑀮𑁄𑀓𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑀸𑀬𑁂. 𑀓𑀸𑀬𑁄 𑀳𑀺 𑀇𑀥 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀪𑀺𑀚𑁆𑀛𑀸𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀩𑁆𑀬𑀸𑀧𑀸𑀤𑁄 𑀕𑀳𑀺𑀢𑁄𑀢𑀺 𑀦𑀻𑀯𑀭𑀡𑁂𑀲𑀼 𑀩𑀮𑀯𑀥𑀫𑁆𑀫𑀤𑁆𑀯𑀬𑀧𑁆𑀧𑀳𑀸𑀦𑀤𑀲𑁆𑀲𑀦𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 ¶ 𑀤𑀲𑁆𑀲𑀺𑀢𑀁. ‘‘𑀆𑀢𑀸𑀧𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀢𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 𑀲𑀫𑀣𑁄 𑀉𑀚𑀼𑀧𑀝𑀺𑀧𑀓𑁆𑀔𑁄𑀢𑀺 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑁄 𑀯𑀼𑀘𑁆𑀘𑀫𑀸𑀦𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀤𑀻𑀧𑁂𑀢𑀻𑀢𑀺 𑀆𑀳 𑁋 ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁬𑁭). 𑀏𑀓𑀮𑀓𑁆𑀔𑀡𑀢𑁆𑀢𑀸 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀬𑀣𑀸 𑀯𑀻𑀭𑀺𑀬𑀧𑀜𑁆𑀜𑀸𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀇𑀚𑁆𑀛𑀢𑀺, 𑀏𑀯𑀁 𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸𑀦𑀺𑀧𑀺 𑀢𑁂𑀳𑀺 𑀇𑀚𑁆𑀛𑀦𑁆𑀢𑀻𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀲𑀸𑀥𑀦𑁂 𑀇𑀫𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀪𑀸𑀯𑀪𑁂𑀤𑀸𑀪𑀸𑀯𑀢𑁄 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀇𑀢𑀭𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁪. 𑀇𑀤𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀕𑀳𑀺𑀢𑁂𑀲𑀼 𑀲𑀩𑁆𑀩𑁂𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁄𑀥𑀗𑁆𑀕𑀫𑀸𑀢𑀺 𑀩𑁄𑀥𑀁 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀕𑀘𑁆𑀙𑀦𑁆𑀢𑀻𑀢𑀺 𑀩𑁄𑀥𑀗𑁆𑀕𑀫𑀸. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀩𑁄𑀥𑀲𑁆𑀲 𑀧𑀓𑁆𑀔𑁂 𑀪𑀯𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸. 𑀦𑁂𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦𑀸𑀢𑀺 𑀏𑀢𑁆𑀣 𑀦𑀺𑀫𑀺𑀢𑁆𑀢𑀢𑁄 𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀸𑀦𑀁 𑀦𑀺𑀬𑁆𑀬𑀸𑀦𑀁, 𑀦𑀺𑀬𑁆𑀬𑀸𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀦𑁂𑀬𑁆𑀬𑀸𑀦𑀺𑀓𑀸, 𑀬𑀣𑀸 𑀤𑁄𑀯𑀸𑀭𑀺𑀓𑁄𑀢𑀺. 𑀦𑀺𑀬𑁆𑀬𑀸𑀦𑀲𑀗𑁆𑀔𑀸𑀢𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀻𑀢𑀺 𑀦𑁂𑀬𑁆𑀬𑀸𑀦𑀺𑀓𑀸. 𑀦𑀺𑀬𑁆𑀬𑀸𑀦𑀁 𑀧𑀬𑁄𑀚𑀦𑀁 𑀏𑀢𑁂𑀲𑀦𑁆𑀢𑀺 𑀯𑀸 𑀦𑁂𑀬𑁆𑀬𑀸𑀦𑀺𑀓𑀸. ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀦𑀺𑀬𑁆𑀬𑀸𑀦𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸𑀢𑀺 ¶ 𑀅𑀢𑁆𑀣𑁄. ‘‘𑀦𑀺𑀬𑁆𑀬𑀸𑀦𑀺𑀬𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀬𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑁂𑀦.

𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸𑀢𑀺 𑀬𑀣𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, 𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀝𑁆𑀞𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀓𑀣𑀁? 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀳. 𑀇𑀤𑀸𑀦𑀺 𑀢𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀬𑀦𑁆𑀢𑀺, 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀧𑀭𑀺𑀚𑀸𑀦𑀦𑀲𑁆𑀲 𑀧𑀭𑀺𑀩𑀦𑁆𑀥𑀺𑀦𑁄 𑀓𑀸𑀫𑀭𑀸𑀕𑀸𑀤𑀬𑁄 𑀩𑁆𑀬𑀦𑁆𑀢𑀻𑀓𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀓𑀲𑁆𑀫𑀸? 𑀢𑁂𑀳𑀺 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 𑁋 ‘‘𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺.

𑀇𑀤𑀸𑀦𑀺 ¶ 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀮𑀓𑁆𑀔𑀡𑀳𑀸𑀭𑀲𑁆𑀲 𑀉𑀤𑀸𑀳𑀭𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁆𑀣 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀤𑁂𑀲𑀦𑀸𑀬𑀁. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄. 𑀧𑀦𑀸𑀢𑀺 𑀧𑀤𑀧𑀽𑀭𑀡𑁄. 𑀭𑀽𑀧𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀁 𑀅𑀝𑁆𑀞𑀯𑀺𑀥𑀁 𑀇𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀤𑁂𑀲𑀦𑀸𑀬𑀁. 𑀭𑀽𑀧𑀥𑀸𑀢𑀽𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀸 𑀤𑀲 𑀥𑀸𑀢𑀼𑀬𑁄. 𑀭𑀽𑀧𑀸𑀬𑀢𑀦𑀦𑁆𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀁 𑀤𑀲𑀸𑀬𑀢𑀦𑀁, 𑀭𑀽𑀧𑀻𑀦𑀺 𑀤𑀲𑀸𑀬𑀢𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀭𑀼𑀧𑁆𑀧𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀇𑀫𑀸𑀦𑀺 𑀤𑁂𑀲𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀲𑀺𑀢𑀁 𑀢𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀯𑁂𑀤𑀦𑀸𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀓𑁆𑀔𑀲𑀫𑀼𑀤𑀬𑁄 𑀘 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀇𑀤𑀁 𑀅𑀓𑀼𑀲𑀮𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀸𑀲𑀯𑀓𑀼𑀲𑀮𑀲𑁆𑀲𑀸𑀧𑀺 𑀯𑀲𑁂𑀦 𑀬𑀼𑀚𑁆𑀚𑀢𑀺 𑀏𑀯. 𑀲𑀩𑁆𑀩𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀺𑀚𑁆𑀚𑀸𑀦𑀼𑀲𑀬𑀺𑀢𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀳𑀺 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸 𑀅𑀦𑀼𑀲𑁂𑀢𑀻’’𑀢𑀺. 𑀏𑀢𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀸𑀯𑁂𑀤𑀦𑀸𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀢𑀺 𑀘 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁂𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀲𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀇𑀫𑀁 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀢𑁂𑀲𑀼 𑀅𑀦𑀼𑀮𑁄𑀫𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀬𑀣𑀸𑀤𑀲𑁆𑀲𑀺𑀢𑁄 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑀁𑀓𑀺𑀮𑁂𑀲𑀧𑀓𑁆𑀔𑁂𑀦 𑀳𑀸𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄, 𑀧𑀝𑀺𑀮𑁄𑀫𑀢𑁄 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀬𑁄 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 ¶ (𑀫. 𑀦𑀺. 𑁩.𑁧𑁨𑁬; 𑀫𑀳𑀸𑀯. 𑁧) 𑀯𑀼𑀢𑁆𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀯𑀻𑀢𑀭𑀸𑀕𑀯𑀻𑀢𑀤𑁄𑀲𑀯𑀻𑀢𑀫𑁄𑀳𑀅𑀭𑀺𑀬𑀥𑀫𑁆𑀫𑁂𑀳𑀺 𑀳𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀏𑀓𑀮𑀓𑁆𑀔𑀡𑀢𑀸𑀯𑀺𑀪𑀸𑀯𑀦𑁂𑀦 𑀮𑀓𑁆𑀔𑀡𑀳𑀸𑀭𑀬𑁄𑀚𑀦𑀸𑀬 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀘𑁆𑀘𑀢𑁄𑀢𑀺 𑀧𑀣𑀯𑀻𑀆𑀤𑀻𑀦𑀁 𑀨𑀲𑁆𑀲𑀸𑀤𑀻𑀦𑀜𑁆𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀦𑁆𑀥𑀸𑀭𑀡𑀲𑀗𑁆𑀖𑀝𑁆𑀝𑀦𑀸𑀤𑀺𑀓𑀺𑀘𑁆𑀘𑀢𑁄, 𑀢𑁂𑀲𑀁 𑀢𑁂𑀲𑀁 𑀯𑀸 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀓𑀺𑀘𑁆𑀘𑀢𑁄. 𑀮𑀓𑁆𑀔𑀡𑀢𑁄𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀢𑁄. 𑀲𑀸𑀫𑀜𑁆𑀜𑀢𑁄𑀢𑀺 𑀭𑀼𑀧𑁆𑀧𑀦𑀦𑀫𑀦𑀸𑀤𑀺𑀢𑁄 𑀅𑀦𑀺𑀘𑁆𑀘𑀢𑀸𑀤𑀺𑀢𑁄 𑀔𑀦𑁆𑀥𑀸𑀬𑀢𑀦𑀸𑀤𑀺𑀢𑁄 𑀘. 𑀘𑀼𑀢𑀽𑀧𑀧𑀸𑀢𑀢𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀪𑀗𑁆𑀕𑀢𑁄 𑀉𑀧𑁆𑀧𑀸𑀤𑀢𑁄 𑀘, 𑀲𑀫𑀸𑀦𑀦𑀺𑀭𑁄𑀥𑀢𑁄 𑀲𑀫𑀸𑀦𑀼𑀧𑁆𑀧𑀸𑀤𑀢𑁄 𑀘𑀸𑀢𑀺 ¶ 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀳𑀘𑀭𑀡𑀁 𑀲𑀫𑀸𑀦𑀳𑁂𑀢𑀼𑀢𑀸 𑀲𑀫𑀸𑀦𑀨𑀮𑀢𑀸 𑀲𑀫𑀸𑀦𑀪𑀽𑀫𑀺𑀢𑀸 𑀲𑀫𑀸𑀦𑀯𑀺𑀲𑀬𑀢𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀢𑀺 𑀏𑀯𑀫𑀸𑀤𑀬𑁄𑀧𑀺 𑀘-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁫. 𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄𑀢𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀩𑁆𑀬𑀜𑁆𑀚𑀦𑁂𑀦 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀜𑁆𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀦𑀺𑀤𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀘 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀲𑀗𑁆𑀔𑁂𑀧𑁂𑀦 𑀢𑀸𑀯 𑀘𑀢𑀼𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀺. ‘‘𑀩𑁆𑀬𑀜𑁆𑀚𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀳𑀸𑀭𑀸𑀦𑀁 𑀲𑀼𑀢𑁆𑀢𑀲𑁆𑀲 𑀩𑁆𑀬𑀜𑁆𑀚𑀦𑀯𑀺𑀘𑀬𑀪𑀸𑀯𑀢𑁄 𑀩𑁆𑀬𑀜𑁆𑀚𑀦𑀫𑀼𑀔𑁂𑀦𑁂𑀯 𑀏𑀢𑁂 𑀘𑀢𑀼𑀩𑁆𑀬𑀽𑀳𑀳𑀸𑀭𑀧𑀤𑀢𑁆𑀣𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀦𑁂𑀭𑀼𑀢𑁆𑀢𑀦𑁆𑀢𑀺 𑀦𑀺𑀭𑀼𑀢𑁆𑀢𑀁 𑀦𑀺𑀩𑁆𑀩𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀭𑀼𑀢𑁆𑀢𑀫𑁂𑀯 𑀦𑁂𑀭𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀬𑀸 𑀦𑀺𑀭𑀼𑀢𑁆𑀢𑀺𑀧𑀤𑀲𑀁𑀳𑀺𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀸 𑀦𑀺𑀭𑀼𑀢𑁆𑀢𑀺, 𑀇𑀤𑀁 𑀦𑁂𑀭𑀼𑀢𑁆𑀢𑀁. 𑀓𑀸 𑀧𑀦 𑀲𑀸 𑀦𑀺𑀭𑀼𑀢𑁆𑀢𑀺? 𑀧𑀤𑀲𑀁𑀳𑀺𑀢𑀸𑀢𑀺 𑀧𑀤𑁂𑀲𑀼 𑀲𑀁𑀳𑀺𑀢𑀸 𑀬𑀼𑀢𑁆𑀢𑀸, 𑀮𑀺𑀗𑁆𑀕𑀯𑀘𑀦𑀓𑀸𑀮𑀲𑀸𑀥𑀦𑀧𑀼𑀭𑀺𑀲𑀸𑀤𑀺𑀯𑀺𑀲𑁂𑀲𑀬𑁄𑀕𑁂𑀦 𑀬𑁄 𑀬𑁄 𑀅𑀢𑁆𑀣𑁄 𑀬𑀣𑀸 𑀬𑀣𑀸 𑀯𑀢𑁆𑀢𑀩𑁆𑀩𑁄, 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀬𑀁 𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡’’𑀦𑁆𑀢𑀺.

𑀢𑀢𑁆𑀣 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀸𑀬 𑀓𑀸𑀭𑀡𑀪𑀽𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀦𑁆𑀢𑀺 𑀜𑁂𑀬𑁆𑀬𑀥𑀫𑁆𑀫𑀸𑀦𑀁. 𑀦𑀸𑀫𑀲𑁄𑀢𑀺 𑀧𑀣𑀯𑀻 𑀨𑀲𑁆𑀲𑁄 𑀔𑀦𑁆𑀥𑀸 𑀥𑀸𑀢𑀼 𑀢𑀺𑀲𑁆𑀲𑁄 𑀨𑀼𑀲𑁆𑀲𑁄𑀢𑀺 𑀏𑀯𑀫𑀸𑀤𑀺𑀦𑀸𑀫𑀯𑀺𑀲𑁂𑀲𑁂𑀦 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀦𑀸𑀫. 𑀧𑀣𑀯𑀻𑀢𑀺 𑀳𑀺 𑀏𑀯𑀫𑀸𑀤𑀺𑀓𑀁 𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀗𑁆𑀓𑁂𑀢𑀤𑁆𑀯𑀸𑀭𑁂𑀦 𑀢𑀤𑀢𑁆𑀣𑀧𑀝𑀺𑀧𑀢𑁆𑀢𑀺 𑀢𑀁𑀢𑀁𑀅𑀦𑀺𑀬𑀢𑀦𑀸𑀫𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀯𑀲𑁂𑀦𑁂𑀯 𑀳𑁄𑀢𑀻𑀢𑀺. 𑀅𑀣 𑀯𑀸 𑀧𑀤𑀲𑀁𑀳𑀺𑀢𑀸𑀢𑀺 𑀧𑀤𑁂𑀦 𑀲𑀁𑀳𑀺𑀢𑀸 ¶ . 𑀧𑀤𑀢𑁄 𑀳𑀺 𑀧𑀤𑀢𑁆𑀣𑀸𑀯𑀩𑁄𑀥𑁄. 𑀲𑁄 𑀧𑀦𑀲𑁆𑀲 𑀅𑀢𑁆𑀣𑁂 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀺𑀢𑀸𑀬 𑀏𑀯 𑀳𑁄𑀢𑀻𑀢𑀺 𑀲𑀸 𑀧𑀦 𑀧𑀜𑁆𑀜𑀢𑁆𑀢𑀺 𑀦𑀺𑀭𑀼𑀢𑁆𑀢𑀺𑀲𑀗𑁆𑀔𑀸𑀢𑀧𑀤𑁂𑀦 𑀲𑀁𑀳𑀺𑀢𑀸 𑀧𑀤𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀧𑀤𑀲𑀁𑀳𑀺𑀢𑀸𑀢𑀺 𑀯𑀼𑀢𑁆𑀢𑀸. ‘‘𑀬𑀤𑀸 𑀳𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 ‘‘𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺.

𑀢𑀢𑁆𑀣 𑀅𑀢𑁆𑀣𑀲𑁆𑀲𑀸𑀢𑀺 𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲. 𑀦𑀸𑀫𑀁 𑀚𑀸𑀦𑀸𑀢𑀻𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀅𑀬𑀁 𑀦𑀸𑀫𑀸𑀢𑀺 𑀦𑀸𑀫𑀁 𑀚𑀸𑀦𑀸𑀢𑀺. 𑀥𑀫𑁆𑀫𑀲𑁆𑀲𑀸𑀢𑀺 𑀲𑀪𑀸𑀯𑀥𑀫𑁆𑀫𑀲𑁆𑀲. 𑀢𑀣𑀸 ¶ 𑀢𑀣𑀸 𑀦𑀁 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀬𑁄 𑀬𑁄 𑀅𑀢𑁆𑀣𑁄 𑀥𑀫𑁆𑀫𑁄 𑀘 𑀬𑀣𑀸 𑀬𑀣𑀸 𑀘 𑀯𑁄𑀳𑀭𑀺𑀢𑀩𑁆𑀩𑁄, 𑀢𑀣𑀸 𑀢𑀣𑀸 𑀦𑀁 𑀦𑀸𑀫𑀁 𑀯𑁄𑀳𑀸𑀭𑀁 𑀅𑀪𑀺𑀦𑀺𑀭𑁄𑀧𑁂𑀢𑀺 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀘 𑀅𑀬𑀁 𑀪𑀺𑀓𑁆𑀔𑀼 𑀅𑀢𑁆𑀣𑀓𑀼𑀲𑀮𑁄 𑀬𑀸𑀯 𑀅𑀦𑁂𑀓𑀸𑀥𑀺𑀯𑀘𑀦𑀓𑀼𑀲𑀮𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀢𑀢𑁆𑀣 𑀅𑀢𑁆𑀣𑀓𑀼𑀲𑀮𑁄𑀢𑀺 𑀧𑀸𑀴𑀺𑀅𑀢𑁆𑀣𑁂 𑀓𑀼𑀲𑀮𑁄. 𑀥𑀫𑁆𑀫𑀓𑀼𑀲𑀮𑁄𑀢𑀺 𑀧𑀸𑀴𑀺𑀬𑀁 𑀓𑀼𑀲𑀮𑁄. 𑀩𑁆𑀬𑀜𑁆𑀚𑀦𑀓𑀼𑀲𑀮𑁄𑀢𑀺 𑀅𑀓𑁆𑀔𑀭𑁂𑀲𑀼 𑀘 𑀯𑀸𑀓𑁆𑀬𑁂𑀲𑀼 𑀘 𑀓𑀼𑀲𑀮𑁄. 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄𑀢𑀺 𑀦𑀺𑀩𑁆𑀩𑀘𑀦𑁂 𑀓𑀼𑀲𑀮𑁄. 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄𑀢𑀺 𑀤𑁂𑀲𑀦𑀸𑀬 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄. 𑀤𑁂𑀲𑀦𑀸𑀓𑀼𑀲𑀮𑁄𑀢𑀺 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀬 𑀓𑀼𑀲𑀮𑁄. 𑀅𑀢𑀻𑀢𑀸𑀥𑀺𑀯𑀘𑀦𑀓𑀼𑀲𑀮𑁄𑀢𑀺 𑀅𑀢𑀻𑀢𑀧𑀜𑁆𑀜𑀢𑁆𑀢𑀺𑀓𑀼𑀲𑀮𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀁 𑀲𑀩𑁆𑀩𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀚𑀦𑀧𑀤𑀦𑀺𑀭𑀼𑀢𑁆𑀢𑀸𑀦𑀻𑀢𑀺 𑀬𑀢𑁆𑀢𑀓𑀸𑀦𑀺 𑀲𑀢𑁆𑀢𑀯𑁄𑀳𑀸𑀭𑀧𑀤𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀲𑀼𑀢𑁆𑀢𑁂 𑀦𑀺𑀩𑁆𑀩𑀘𑀦𑀯𑀲𑁂𑀦 𑀓𑀸𑀢𑀩𑁆𑀩𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸 𑀘 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑁄𑀢𑀺 𑀲𑀩𑁆𑀩𑀸 𑀘 𑀮𑁄𑀓𑀲𑀫𑀜𑁆𑀜𑀸𑀬𑁄 𑀬𑀣𑀸𑀭𑀳𑀁 𑀓𑀸𑀢𑀩𑁆𑀩𑀸. ‘‘𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀫𑀼𑀔𑁂𑀦𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀸𑀥𑀺𑀕𑀫𑁄 𑀳𑁄𑀢𑀻𑀢𑀺.

𑁨𑁬. 𑀅𑀥𑀺𑀧𑁆𑀧𑀸𑀬𑀓𑀡𑁆𑀟𑁂 𑀅𑀦𑀼𑀢𑁆𑀢𑀸𑀦𑀁 𑀦𑀸𑀫 𑀦𑀢𑁆𑀣𑀺.

𑁨𑁭. 𑀦𑀺𑀤𑀸𑀦𑀓𑀡𑁆𑀟𑁂 𑀇𑀫𑀺𑀦𑀸 𑀯𑀢𑁆𑀣𑀼𑀦𑀸𑀢𑀺 𑀇𑀫𑀺𑀦𑀸 𑀧𑀼𑀢𑁆𑀢𑀕𑀯𑀸𑀤𑀺𑀓𑀺𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦. 𑀓𑀸𑀭𑀡𑀜𑁆𑀳𑁂𑀢𑁆𑀣 𑀯𑀢𑁆𑀣𑀼 𑀦𑀺𑀤𑀸𑀦𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀦𑀺𑀤𑀸𑀦𑀦𑀺𑀤𑁆𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀫𑀦𑁆𑀥𑀸𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀅𑀦𑁆𑀥𑀸. 𑀚𑀸𑀮𑀲𑀜𑁆𑀙𑀦𑁆𑀦𑀸𑀢𑀺 𑀢𑀡𑁆𑀳𑀸𑀚𑀸𑀮𑀧𑀮𑀺𑀕𑀼𑀡𑁆𑀞𑀺𑀢𑀸. 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀅𑀦𑁆𑀥𑀓𑀸𑀭𑁂𑀦 𑀧𑀺𑀳𑀺𑀢𑀸. 𑀩𑀦𑁆𑀥𑀦𑀸𑀩𑀤𑁆𑀥𑀸𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂𑀦 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸. ‘‘𑀧𑀫𑀢𑁆𑀢𑀩𑀦𑁆𑀥𑀦𑀸’’𑀢𑀺𑀧𑀺 𑀧𑀸𑀞𑁄, 𑀧𑀫𑀸𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀭𑁂𑀦𑀸𑀢𑀺 𑀧𑀼𑀩𑁆𑀩𑁂𑀦 𑀯𑀸 𑀅𑀧𑀭𑁂𑀦 𑀯𑀸 𑀤𑁂𑀲𑀦𑀦𑁆𑀢𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀼𑀚𑁆𑀚𑀢𑀻𑀢𑀺 𑀬𑁄𑀕𑀁 𑀉𑀧𑁂𑀢𑀺, 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀧𑀤𑁂𑀳𑀺 ¶ 𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀻𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀕𑀸𑀣𑀸𑀧𑀤𑁂𑀳𑀺 𑀢𑀡𑁆𑀳𑀸𑀧𑀭𑀺𑀬𑀼𑀝𑁆𑀞𑀸𑀦𑀤𑀻𑀧𑀓𑁂𑀳𑀺. 𑀲𑀸𑀬𑁂𑀯 𑀢𑀡𑁆𑀳𑀸𑀢𑀺 𑀬𑀸 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀸, 𑀲𑀸𑀬𑁂𑀯 𑀢𑀡𑁆𑀳𑀸. ‘‘𑀬𑀜𑁆𑀘𑀸𑀳𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀸𑀣𑀸𑀦𑀁 𑀅𑀢𑁆𑀣𑀲𑀁𑀲𑀦𑁆𑀤𑀦𑁂𑀦 𑀧𑀼𑀩𑁆𑀩𑀸𑀧𑀭𑀁 𑀯𑀺𑀪𑀸𑀯𑁂𑀢𑀺. 𑀧𑀬𑁄𑀕𑁂𑀦𑀸𑀢𑀺 𑀲𑀫𑀼𑀤𑀸𑀘𑀸𑀭𑁂𑀦. 𑀢𑀲𑁆𑀫𑀸𑀢𑀺 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑀁 𑀲𑀦𑁆𑀢𑀸𑀦𑀁 𑀦𑀺𑀲𑁆𑀲𑀭𑀺𑀢𑀼𑀁 𑀅𑀤𑁂𑀦𑁆𑀢𑀻 𑀦𑀸𑀦𑀸𑀭𑀫𑁆𑀫𑀡𑁂𑀳𑀺 ¶ 𑀧𑀮𑁄𑀪𑀬𑀫𑀸𑀦𑀸 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀓𑀺𑀮𑁂𑀲𑀯𑀲𑁂𑀦 𑀘 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀘 𑀢𑀡𑁆𑀳𑀸𑀩𑀦𑁆𑀥𑀦𑀁 𑀯𑀼𑀢𑁆𑀢𑀸.

𑀧𑀧𑀜𑁆𑀘𑁂𑀦𑁆𑀢𑀺 𑀲𑀁𑀲𑀸𑀭𑁂 𑀘𑀺𑀭𑀁 𑀞𑀧𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀢𑀺𑀝𑁆𑀞𑀦𑁆𑀢𑀺 𑀏𑀢𑀸𑀳𑀻𑀢𑀺 𑀞𑀺𑀢𑀻. 𑀩𑀦𑁆𑀥𑀦𑀝𑁆𑀞𑁂𑀦 𑀲𑀦𑁆𑀤𑀸𑀦𑀁 𑀯𑀺𑀬𑀸𑀢𑀺 𑀲𑀦𑁆𑀤𑀸𑀦𑀁. 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀲𑁆𑀲 𑀧𑀝𑀺𑀲𑁂𑀥𑀦𑀢𑁄 𑀧𑀮𑀺𑀖𑀁 𑀯𑀺𑀬𑀸𑀢𑀺 𑀧𑀮𑀺𑀖𑀁. 𑀅𑀦𑀯𑀲𑁂𑀲𑀢𑀡𑁆𑀳𑀸𑀧𑀳𑀸𑀦𑁂𑀦 𑀦𑀺𑀢𑁆𑀢𑀡𑁆𑀳𑁄. 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀦𑀁 𑀇𑀥𑀮𑁄𑀓𑀧𑀭𑀮𑁄𑀓𑀸𑀦𑀜𑁆𑀘 𑀫𑀼𑀦𑀦𑀢𑁄 𑀫𑀼𑀦𑀻𑀢𑀺 𑀏𑀯𑀁 𑀕𑀸𑀣𑀸𑀬 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀧𑀜𑁆𑀘𑀸𑀤𑀺𑀅𑀢𑁆𑀣𑀸 𑀧𑀦 𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑀸 𑀏𑀯𑀸𑀢𑀺. 𑀢𑀢𑁆𑀣 𑀬𑀲𑁆𑀲𑁂𑀢𑁂 𑀧𑀧𑀜𑁆𑀘𑀸𑀤𑀬𑁄 𑀅𑀩𑁆𑀪𑀢𑁆𑀣𑀁 𑀕𑀢𑀸, 𑀢𑀲𑁆𑀲 𑀢𑀡𑁆𑀳𑀸𑀬 𑀮𑁂𑀲𑁄𑀧𑀺 𑀦 𑀪𑀯𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁄 𑀏𑀢𑀁 𑀲𑀩𑁆𑀩𑀁 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀢𑁆𑀢𑀡𑁆𑀳𑁄’’𑀢𑀺.

𑁨𑁮. 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 ‘‘𑀢𑀡𑁆𑀳𑀸𑀬 𑀧𑀭𑀺𑀬𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀲𑀗𑁆𑀔𑀸𑀭𑀸𑀢𑀺 ‘‘𑀢𑀤𑀪𑀺𑀲𑀗𑁆𑀔𑀢𑀸 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀳𑁂𑀢𑀼𑀓𑀸 𑀲𑀗𑁆𑀔𑀸𑀭𑀸. 𑀢𑁂 𑀧𑀦 𑀬𑀲𑁆𑀫𑀸 𑀲𑀢𑁆𑀢𑀲𑀼 𑀚𑀯𑀦𑀘𑁂𑀢𑀦𑀸𑀲𑀼 𑀧𑀞𑀫𑀘𑁂𑀢𑀦𑀸 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀁 𑀤𑁂𑀢𑀺. 𑀧𑀘𑁆𑀙𑀺𑀫𑀘𑁂𑀢𑀦𑀸 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂. 𑀉𑀪𑀺𑀦𑁆𑀦𑀁 𑀯𑁂𑀫𑀚𑁆𑀛𑀘𑁂𑀢𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀨𑀮𑀁 𑀤𑁂𑀢𑀺, 𑀢𑀲𑁆𑀫𑀸 𑀯𑀺𑀧𑀘𑁆𑀘𑀦𑁄𑀓𑀸𑀲𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁𑀢𑀁𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀢𑀡𑁆𑀳𑀸𑀧𑀺 𑀘𑁂𑀢𑀦𑀸 𑀯𑀺𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀯𑀲𑁂𑀦 𑀢𑀺𑀥𑀸 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀢𑀡𑁆𑀳𑀸 𑀢𑀺𑀯𑀺𑀥𑀁 𑀨𑀮𑀁 𑀤𑁂𑀢𑀻’’𑀢𑀺. 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀻𑀢𑀺 𑀬𑀁 𑀧𑀼𑀩𑁆𑀩𑀁 𑀧𑀼𑀭𑀺𑀫𑀁 𑀲𑀗𑁆𑀔𑀸𑀭𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀢𑀸𑀤𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀅𑀧𑀭𑁂𑀦 𑀓𑀫𑁆𑀫𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀢𑀸𑀤𑀺𑀯𑀘𑀦𑁂𑀦 𑀬𑀼𑀚𑁆𑀚𑀢𑀺 𑀕𑀗𑁆𑀕𑁄𑀤𑀓𑀁 𑀯𑀺𑀬 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀔𑀸𑀭𑀸 𑀤𑀲𑁆𑀲𑀦𑀩𑀮𑁂𑀦𑀸𑀢𑀺 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂 𑀘𑀸𑀢𑀺 𑀧𑀜𑁆𑀘𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀗𑁆𑀔𑀸𑀭𑀸 𑀧𑀞𑀫𑀫𑀕𑁆𑀕𑀧𑀜𑁆𑀜𑀸𑀩𑀮𑁂𑀦. 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀪𑀸𑀯𑀦𑀸𑀩𑀮𑁂𑀦𑀸𑀢𑀺 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀦𑀸𑀯𑀲𑁂𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀲𑀁 𑀯𑀲𑁂𑀦.

𑀅𑀦𑀼𑀩𑀦𑁆𑀥𑁄𑀢𑀺 𑀢𑀡𑁆𑀳𑀸𑀤𑀻𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺. 𑀬𑁄 𑀘𑀸𑀧𑀺 𑀧𑀧𑀜𑁆𑀘𑁄𑀢𑀺𑀆𑀤𑀺𑀦𑀸 ‘‘𑀧𑀧𑀜𑁆𑀘𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀭𑀸𑀥𑀲𑀼𑀢𑁆𑀢𑀜𑁆𑀘𑀲𑀁𑀲𑀦𑁆𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀤𑀁 𑀏𑀓𑀢𑁆𑀣’’𑀦𑁆𑀢𑀺. 𑀬𑀤𑀺𑀧𑀺 𑀅𑀢𑁆𑀣𑀢𑁄 ¶ 𑀏𑀓𑀁, 𑀤𑁂𑀲𑀦𑀸𑀬 𑀧𑀦 𑀯𑀺𑀲𑁂𑀲𑁄 ¶ 𑀯𑀺𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀼𑀢𑁆𑀢𑁂𑀦𑀸𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑁂𑀦 𑀲𑀼𑀢𑁆𑀢𑁂𑀦. 𑀲𑀼𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀭𑀁. 𑀲𑀁𑀲𑀦𑁆𑀤𑀬𑀺𑀢𑁆𑀯𑀸𑀢𑀺 𑀯𑀺𑀫𑀺𑀲𑁆𑀲𑀺𑀢𑁆𑀯𑀸 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸. 𑀧𑀼𑀩𑁆𑀩𑀸𑀧𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑀬𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂𑀦 𑀯𑀸 𑀅𑀧𑀭𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀲𑀫𑁆𑀩𑀦𑁆𑀥𑀁 𑀬𑁄𑀚𑁂𑀢𑁆𑀯𑀸. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺 𑀢𑁂𑀦 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺 𑀯𑀺𑀢𑁆𑀣𑀸𑀭𑀺𑀢𑁄 𑀲𑀼𑀢𑁆𑀢𑀦𑁆𑀢𑀭𑀤𑀲𑁆𑀲𑀦𑁂𑀦.

𑀦 𑀓𑁂𑀯𑀮𑀁 𑀲𑀼𑀢𑁆𑀢𑀦𑁆𑀢𑀭𑀲𑀁𑀲𑀦𑁆𑀤𑀦𑀫𑁂𑀯 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺, 𑀅𑀣 𑀔𑁄 𑀅𑀜𑁆𑀜𑁄𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀘𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀣𑀲𑀦𑁆𑀥𑀻𑀢𑀺 𑀓𑀺𑀭𑀺𑀬𑀸𑀓𑀸𑀭𑀓𑀸𑀤𑀺𑀯𑀲𑁂𑀦 𑀅𑀢𑁆𑀣𑀲𑁆𑀲 𑀲𑀫𑁆𑀩𑀦𑁆𑀥𑁄. 𑀲𑁄 𑀧𑀦 𑀬𑀲𑁆𑀫𑀸 𑀲𑀗𑁆𑀓𑀸𑀲𑀦𑀸𑀤𑀻𑀦𑀁 𑀙𑀦𑁆𑀦𑀁 𑀅𑀢𑁆𑀣𑀧𑀤𑀸𑀦𑀁𑀬𑁂𑀯 𑀳𑁄𑀢𑀺, 𑀲𑀩𑁆𑀩𑀲𑁆𑀲𑀸𑀧𑀺 𑀧𑀤𑀢𑁆𑀣𑀲𑁆𑀲 𑀢𑀤𑀯𑀭𑁄𑀥𑀢𑁄.

𑀲𑀫𑁆𑀩𑀦𑁆𑀥𑁄 𑀘 𑀦𑀸𑀫 𑀦 𑀓𑁄𑀘𑀺 𑀅𑀢𑁆𑀣𑁄. 𑀢𑀲𑁆𑀫𑀸 ‘‘𑀅𑀢𑁆𑀣𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀲𑀦𑁆𑀥𑀻𑀢𑀺 𑀧𑀤𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑀫𑁆𑀧𑀺 𑀦𑀸𑀫𑀸𑀤𑀺𑀧𑀤𑀁 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁂𑀲𑀦𑀸𑀲𑀦𑁆𑀥𑀻𑀢𑀺 𑀬𑀣𑀸𑀯𑀼𑀢𑁆𑀢𑀤𑁂𑀲𑀦𑀦𑁆𑀢𑀭𑁂𑀦 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀦𑀁. 𑀦 𑀘 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬𑀸𑀢𑀺 𑀧𑀣𑀯𑀺𑀁 𑀯𑀺𑀲𑀬𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸, 𑀧𑀣𑀯𑀺𑀁 𑀆𑀮𑀫𑁆𑀩𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀛𑀸𑀬𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀦 𑀛𑀸𑀬𑀻. 𑀲𑁄 𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁 𑀆𑀮𑀫𑁆𑀩𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀛𑀸𑀬𑀢𑀺, 𑀦 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀻𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀭𑀽𑀧𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀲𑀩𑁆𑀩𑁄 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀘 𑀕𑀳𑀺𑀢𑀸. 𑀅𑀭𑀽𑀧𑀪𑀯𑁄 𑀧𑀦 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑁄𑀢𑀺 𑀲𑀩𑁆𑀩𑀁 𑀮𑁄𑀓𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀘 𑀇𑀫𑀁 𑀮𑁄𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑁄 𑀳𑀺 𑀮𑁄𑀓𑁄 𑀇𑀥𑀮𑁄𑀓𑁄 𑀧𑀭𑀮𑁄𑀓𑁄 𑀘𑀸𑀢𑀺 𑀤𑁆𑀯𑁂𑀯 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀇𑀥𑀮𑁄𑀓𑁄’’𑀢𑀺 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑀥𑀫𑁆𑀫𑀪𑀽𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁄 𑀯𑀼𑀘𑁆𑀘𑀢𑀺. ‘‘𑀧𑀭𑀮𑁄𑀓𑁄’’𑀢𑀺 𑀪𑀯𑀦𑁆𑀢𑀭𑀲𑀗𑁆𑀔𑁂𑀧𑀕𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁄 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁄 𑀭𑀽𑀧𑀲𑀦𑁆𑀢𑀸𑀦𑁄. 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 ‘‘𑀬𑀫𑀺𑀤𑀁 𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑁂 𑀧𑀦 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀺𑀘𑁆𑀙𑀸. 𑀅𑀦𑁆𑀢𑀭𑀸𑀪𑀯𑁄 𑀳𑀺 𑀅𑀪𑀺𑀥𑀫𑁆𑀫𑁂 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁 ¶ . 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁. 𑀫𑀼𑀢𑀦𑁆𑀢𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀜𑁆𑀘. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀅𑀯𑀲𑀺𑀝𑁆𑀞𑀁 𑀥𑀫𑁆𑀫𑀸𑀭𑀫𑁆𑀫𑀡𑀧𑀭𑀺𑀬𑀸𑀧𑀦𑁆𑀦𑀭𑀽𑀧𑀁. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁 ¶ 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀯𑀺𑀢𑀓𑁆𑀓𑀺𑀢𑀁 𑀯𑀺𑀘𑀸𑀭𑀺𑀢𑀦𑁆𑀢𑀺 𑀯𑀺𑀢𑀓𑁆𑀓𑀦𑀯𑀲𑁂𑀦 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀘 𑀆𑀮𑀫𑁆𑀩𑀺𑀢𑀁. 𑀫𑀦𑀲𑀸𑀦𑀼𑀘𑀺𑀦𑁆𑀢𑀺𑀢𑀦𑁆𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼 𑀅𑀦𑀼 𑀘𑀺𑀦𑁆𑀢𑀺𑀢𑀁. 𑀅𑀬𑀁 𑀲𑀤𑁂𑀯𑀓𑁂…𑀧𑁂… 𑀅𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀦 𑀜𑀸𑀬𑀢𑀺 𑀛𑀸𑀬𑀦𑁆𑀢𑁄𑀢𑀺 𑀅𑀬𑀁 𑀔𑀻𑀡𑀸𑀲𑀯𑁄 𑀨𑀮𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀦 𑀛𑀸𑀬𑀦𑁆𑀢𑁄 𑀧𑀼𑀩𑁆𑀩𑁂𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀫𑀦𑀼𑀲𑁆𑀲𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀅𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀛𑀸𑀬𑀢𑀺 𑀦𑀸𑀫. 𑀢𑀢𑁄 𑀏𑀯 𑀮𑁄𑀓𑁂 𑀓𑁂𑀦𑀘𑀺𑀧𑀺 𑀦 𑀜𑀸𑀬𑀢𑀺 ‘‘𑀅𑀬𑀁 𑀇𑀤𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀛𑀸𑀬𑀢𑀻’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀓𑀺𑀁 𑀢𑁆𑀯𑀁 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺. (𑀦𑁂𑀢𑁆𑀢𑀺. 𑁧𑁦𑁪);

𑀇𑀤𑀸𑀦𑀺 𑀔𑀻𑀡𑀸𑀲𑀯𑀘𑀺𑀢𑁆𑀢𑀲𑁆𑀲 𑀓𑀢𑁆𑀣𑀘𑀺𑀧𑀺 𑀅𑀦𑀺𑀲𑁆𑀲𑀺𑀢𑀪𑀸𑀯𑀁 𑀕𑁄𑀥𑀺𑀓𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁧.𑁧𑁫𑁯) 𑀯𑀓𑁆𑀓𑀮𑀺𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁩.𑁮𑁭) 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀫𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀦𑁆𑀢𑁄𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀁 𑀯𑀺𑀜𑁆𑀜𑀸𑀡𑀁 𑀧𑀭𑀺𑀬𑁂𑀲𑀦𑁆𑀢𑁄. ‘‘𑀧𑀧𑀜𑁆𑀘𑀸𑀢𑀻𑀢𑁄’’𑀢𑀺𑀆𑀤𑀺𑀦𑀸 𑀅𑀤𑀲𑁆𑀲𑀦𑀲𑁆𑀲 𑀓𑀸𑀭𑀡𑀫𑀸𑀳. 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦 𑀜𑀸𑀬𑀦𑁆𑀢𑀺 𑀛𑀸𑀬𑀫𑀸𑀦𑀸𑀢𑀺 𑀦 𑀓𑁂𑀯𑀮𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀕𑀢𑀺𑀁 𑀫𑀸𑀭𑀸𑀤𑀬𑁄 𑀦 𑀚𑀸𑀦𑀦𑁆𑀢𑀺, 𑀅𑀧𑀺 𑀘 𑀔𑁄 𑀲𑀉𑀧𑀸𑀤𑀺𑀲𑁂𑀲𑀸𑀬𑀧𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀢𑀲𑁆𑀲 𑀢𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀤𑁂𑀲𑀦𑀸𑀲𑀦𑁆𑀥𑀻𑀢𑀺 𑀕𑁄𑀥𑀺𑀓𑀲𑀼𑀢𑁆𑀢𑀯𑀓𑁆𑀓𑀮𑀺𑀲𑀼𑀢𑁆𑀢𑀸𑀦𑀁 𑀯𑀺𑀬 𑀲𑀼𑀢𑁆𑀢𑀦𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀢𑁆𑀣𑀲𑀁𑀲𑀦𑁆𑀤𑀦𑀸 𑀤𑁂𑀲𑀦𑀸𑀲𑀦𑁆𑀥𑀺 𑀦𑀸𑀫.

𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀲𑀦𑁆𑀥𑀺 𑀦𑀺𑀤𑁆𑀤𑁂𑀲𑀲𑀦𑁆𑀥𑀺, 𑀦𑀺𑀤𑁆𑀤𑁂𑀲𑁂𑀦 𑀯𑀸 𑀲𑀦𑁆𑀥𑀺 𑀦𑀺𑀤𑁆𑀤𑁂𑀲𑀲𑀦𑁆𑀥𑀺. 𑀧𑀼𑀭𑀺𑀫𑁂𑀦 𑀲𑀼𑀢𑁆𑀢𑀲𑁆𑀲 𑀦𑀺𑀤𑁆𑀤𑁂𑀲𑁂𑀦 𑀢𑀲𑁆𑀲𑁂𑀯 𑀧𑀘𑁆𑀙𑀺𑀫𑀲𑁆𑀲 𑀦𑀺𑀤𑁆𑀤𑁂𑀲𑀲𑁆𑀲, 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀲𑁆𑀲 𑀲𑀫𑁆𑀩𑀦𑁆𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀤𑀲𑁆𑀲𑁂𑀢𑀼𑀁 𑀬𑀲𑁆𑀫𑀸 𑀪𑀕𑀯𑀸 𑀬𑁂𑀪𑀼𑀬𑁆𑀬𑁂𑀦 𑀧𑀞𑀫𑀁 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 ‘‘𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸, 𑀧𑀼𑀕𑁆𑀕𑀮𑀸, 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀧𑀦 𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀏𑀢𑁆𑀣𑀸𑀢𑀺 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸, 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀯𑀦𑁆𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀯𑀲𑁂𑀦 𑀧𑀯𑀢𑁆𑀢𑀸 𑀲𑀼𑀢𑁆𑀢𑀧𑀤𑁂𑀲𑀸. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀧𑀸𑀓𑀝𑀫𑁂𑀯.

𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁯. 𑀢𑀢𑁆𑀣 ¶ ¶ 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄𑀢𑀺 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀆𑀭𑀫𑁆𑀪𑀣𑀸𑀢𑀺 𑀆𑀭𑀫𑁆𑀪𑀥𑀸𑀢𑀼𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀓𑀭𑁄𑀣. 𑀦𑀺𑀓𑁆𑀓𑀫𑀣𑀸𑀢𑀺 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀁 𑀢𑀤𑀼𑀢𑁆𑀢𑀭𑀺𑀯𑀻𑀭𑀺𑀬𑀁 𑀓𑀭𑁄𑀣. 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂𑀢𑀺 𑀬𑀲𑁆𑀫𑀸 𑀲𑀻𑀮𑀲𑀁𑀯𑀭𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀯𑀲𑁂𑀦 𑀆𑀭𑀫𑁆𑀪𑀦𑀺𑀓𑁆𑀓𑀫𑀥𑀸𑀢𑀼𑀬𑁄 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑀣𑀸𑀪𑀽𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂 𑀪𑀕𑀯𑀢𑁄 𑀲𑀸𑀲𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀳𑁄𑀣. 𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀸 𑀘 𑀢𑁂𑀥𑀸𑀢𑀼𑀇𑀲𑁆𑀲𑀭𑀲𑁆𑀲 𑀫𑀘𑁆𑀘𑀼𑀭𑀸𑀚𑀲𑁆𑀲 𑀯𑀲𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀢𑀲𑁆𑀲 𑀲𑁂𑀦𑀸𑀲𑀗𑁆𑀔𑀸𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀬𑀣𑀸 𑀦𑀸𑀫 𑀩𑀮𑀽𑀧𑀧𑀦𑁆𑀦𑁄 𑀓𑀼𑀜𑁆𑀚𑀭𑁄 𑀦𑀴𑁂𑀳𑀺 𑀓𑀢𑀁 𑀅𑀕𑀸𑀭𑀁 𑀔𑀡𑁂𑀦𑁂𑀯 𑀯𑀺𑀤𑁆𑀥𑀁𑀲𑁂𑀢𑀺, 𑀏𑀯𑀫𑁂𑀯 𑀓𑀺𑀮𑁂𑀲𑀕𑀡𑀁 𑀥𑀼𑀦𑀸𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣𑀸𑀢𑀺 𑀅𑀢𑁆𑀣𑁄 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧𑁮𑁫).

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀅𑀬𑀁 𑀕𑀸𑀣𑀸 𑀦𑀺𑀓𑁆𑀔𑀺𑀢𑁆𑀢𑀸, 𑀢𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀇𑀤𑀁 𑀯𑀘𑀦𑀁 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁 𑀯𑀻𑀭𑀺𑀬𑀧𑀬𑁄𑀕𑀲𑁆𑀲 𑀓𑀸𑀭𑀡𑀁 𑀯𑀻𑀭𑀺𑀬𑀸𑀭𑀫𑁆𑀪𑁂 𑀦𑀺𑀬𑁄𑀚𑀦𑀢𑁄, ‘‘𑀬𑁄𑀕𑀸 𑀯𑁂 𑀚𑀸𑀬𑀢𑀻 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨) 𑀯𑀘𑀦𑀢𑁄 𑀬𑁄𑀕𑁄 𑀪𑀸𑀯𑀦𑀸. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀯𑀓𑁆𑀔𑀫𑀸𑀦𑀢𑁆𑀢𑀸 𑀲𑀫𑀸𑀥𑀺𑀪𑀸𑀯𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂𑀢𑀺 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. ‘‘𑀫𑀘𑁆𑀘𑀼𑀦𑁄 𑀲𑁂𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀬 𑀓𑀺𑀮𑁂𑀲𑀲𑁂𑀦𑀸𑀬 𑀲𑀫𑁆𑀫𑀸 𑀥𑀼𑀦𑀦𑀁 𑀜𑀸𑀡𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀥𑀼𑀦𑀸𑀣…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀧𑀼𑀦 𑀬𑀣𑀸𑀯𑀼𑀢𑁆𑀢𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀥𑀺𑀧𑀘𑁆𑀘𑀓𑀺𑀘𑁆𑀘𑀢𑀸𑀬 𑀧𑀧𑀜𑁆𑀘𑀧𑁆𑀧𑀳𑀸𑀦𑀲𑀫𑀢𑁆𑀣𑀸 𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀯𑀝𑁆𑀝𑀁 𑀧𑀸𑀧𑁂𑀦𑁆𑀢𑀺 𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀤𑁂𑀲𑀦𑀸𑀢𑀺 ‘‘𑀬𑀸𑀦𑀺𑀫𑀸𑀦𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀻𑀭𑀺𑀬𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀲𑀸 𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀆𑀤𑀺𑀤𑁂𑀲𑀦𑀸, 𑀦 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀆𑀤𑀻𑀦𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁.

𑀏𑀯𑀁 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀬 𑀤𑁂𑀲𑀦𑀸𑀬 𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑁂𑀢𑀼𑀓𑀸𑀫𑁄 𑀢𑀲𑁆𑀲 𑀪𑀽𑀫𑀺𑀁 𑀤𑀲𑁆𑀲𑁂𑀢𑀼𑀁 ¶ ‘‘𑀅𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀬𑁄𑀕𑁂 𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀆𑀭𑀫𑁆𑀪𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄𑀕𑁂 𑀪𑀸𑀯𑀦𑀸𑀬𑀁 𑀢𑀁 𑀅𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 ¶ 𑀅𑀧𑀭𑀺𑀧𑀓𑁆𑀓𑀜𑀸𑀡𑀸𑀦𑀁 𑀯𑀸𑀲𑀦𑀸𑀪𑀸𑀕𑁂𑀦 𑀆𑀬𑀢𑀺𑀁 𑀯𑀺𑀚𑀸𑀦𑀦𑀢𑁆𑀣𑀁 𑀅𑀬𑀁 𑀤𑁂𑀲𑀦𑀸𑀭𑀫𑁆𑀪𑁄 𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀧𑀭𑀺𑀧𑀓𑁆𑀓𑀜𑀸𑀡𑀸𑀦𑀦𑁆𑀢𑀺.

𑀲𑁄 𑀧𑀫𑀸𑀤𑁄 𑀤𑀼𑀯𑀺𑀥𑁄𑀢𑀺 𑀬𑁂𑀦 𑀧𑀫𑀸𑀤𑁂𑀦 𑀪𑀸𑀯𑀦𑀁 𑀦𑀸𑀦𑀼𑀬𑀼𑀜𑁆𑀚𑀦𑁆𑀢𑀺, 𑀲𑁄 𑀧𑀫𑀸𑀤𑁄 𑀅𑀢𑁆𑀢𑀦𑁄 𑀓𑀸𑀭𑀡𑀪𑁂𑀤𑁂𑀦 𑀤𑀼𑀯𑀺𑀥𑁄. 𑀅𑀜𑁆𑀜𑀸𑀡𑁂𑀦𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀘𑁆𑀙𑀸𑀤𑀓𑁂𑀦 𑀲𑀫𑁆𑀫𑁄𑀳𑁂𑀦. 𑀦𑀺𑀯𑀼𑀢𑁄𑀢𑀺 𑀙𑀸𑀤𑀺𑀢𑁄. 𑀜𑁂𑀬𑁆𑀬𑀝𑁆𑀞𑀸𑀦𑀦𑁆𑀢𑀺 𑀜𑁂𑀬𑁆𑀬𑀜𑁆𑀘 𑀢𑀁 ‘‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀝𑁆𑀞𑀸𑀦𑀜𑁆𑀘𑀸𑀢𑀺 𑀜𑁂𑀬𑁆𑀬𑀝𑁆𑀞𑀸𑀦𑀁. 𑀅𑀦𑁂𑀓𑀪𑁂𑀤𑀢𑁆𑀢𑀸 𑀧𑀸𑀧𑀥𑀫𑁆𑀫𑀸𑀦𑀁 𑀢𑀩𑁆𑀩𑀲𑁂𑀦 𑀅𑀦𑁂𑀓𑀪𑁂𑀤𑁄𑀧𑀺 𑀧𑀫𑀸𑀤𑁄 𑀫𑀽𑀮𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀯𑀲𑁂𑀦 𑀏𑀓𑁄 𑀏𑀯𑀸𑀢𑀺 𑀆𑀳 𑁋 ‘‘𑀏𑀓𑀯𑀺𑀥𑁄 𑀅𑀯𑀺𑀚𑁆𑀚𑀸𑀬𑀸’’𑀢𑀺. 𑀮𑀸𑀪𑀯𑀺𑀦𑀺𑀘𑁆𑀙𑀬𑀧𑀭𑀺𑀕𑁆𑀕𑀳𑀫𑀘𑁆𑀙𑀭𑀺𑀬𑀸𑀦𑀺 𑀧𑀭𑀺𑀬𑁂𑀲𑀦𑀸𑀆𑀭𑀓𑁆𑀔𑀸𑀧𑀭𑀺𑀪𑁄𑀕𑁂𑀲𑀼 𑀅𑀦𑁆𑀢𑁄𑀕𑀥𑀸𑀦𑀺. 𑀙𑀦𑁆𑀤𑀭𑀸𑀕𑀚𑁆𑀛𑁄𑀲𑀸𑀦𑀸 𑀢𑀡𑁆𑀳𑀸 𑀏𑀯𑀸𑀢𑀺 𑀢𑀡𑁆𑀳𑀸𑀫𑀽𑀮𑀓𑁂𑀧𑀺 𑀥𑀫𑁆𑀫𑁂 𑀏𑀢𑁆𑀣𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀢𑀺𑀯𑀺𑀥𑁄 𑀢𑀡𑁆𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀭𑀽𑀧𑀻𑀲𑀼 𑀪𑀯𑁂𑀲𑀽𑀢𑀺 𑀭𑀽𑀧𑀥𑀫𑁆𑀫𑁂𑀲𑀼. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁄. 𑀏𑀢𑁂𑀦 ‘‘𑀢𑀡𑁆𑀳𑀸𑀬 𑀭𑀽𑀧𑀓𑀸𑀬𑁄 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀅𑀦𑀸𑀤𑀺𑀫𑀢𑀺 𑀳𑀺 𑀲𑀁𑀲𑀸𑀭𑁂 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀜𑁆𑀜𑀫𑀜𑁆𑀜𑀭𑀽𑀧𑀸𑀪𑀺𑀭𑀸𑀫𑀸, 𑀅𑀬𑀜𑁆𑀘𑀢𑁆𑀣𑁄 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑁂𑀦 (𑀅. 𑀦𑀺. 𑁧.𑁧-𑁧𑁦) 𑀤𑀻𑀧𑁂𑀢𑀩𑁆𑀩𑁄. 𑀅𑀭𑀽𑀧𑀻𑀲𑀼 𑀲𑀫𑁆𑀫𑁄𑀳𑁄𑀢𑀺 𑀨𑀲𑁆𑀲𑀸𑀤𑀻𑀦𑀁 𑀅𑀢𑀺𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀘 𑀅𑀭𑀽𑀧𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑁄, 𑀲𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀢𑀺 𑀯𑀘𑀦𑀲𑁂𑀲𑁄. 𑀏𑀯𑀁 𑀦𑀺𑀤𑁆𑀥𑀸𑀭𑀺𑀢𑁂 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑀲𑀗𑁆𑀔𑀸𑀢𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀜𑁆𑀘 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀦𑀸𑀦𑀜𑁆𑀘 𑀤𑀼𑀓𑁆𑀔𑀲𑀫𑀼𑀤𑀬𑀪𑀸𑀯𑁂𑀦 𑀲𑀳𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺 ‘‘𑀢𑀢𑁆𑀣 𑀭𑀽𑀧𑀓𑀸𑀬𑁄’’𑀢𑀺𑀆𑀤𑀺𑀦𑀸.

𑁩𑁦. 𑀏𑀯𑀁 𑀧𑀫𑀸𑀤𑀫𑀼𑀔𑁂𑀦 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀫𑀸𑀤𑀫𑀼𑀔𑁂𑀦𑁂𑀯 𑀅𑀧𑀭𑀫𑁆𑀧𑀺 𑀲𑀘𑁆𑀘𑀤𑁆𑀯𑀬𑀁 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀫𑀸𑀤𑀲𑁆𑀲. 𑀲𑀫𑁆𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀫𑁆𑀫𑀸 𑀧𑀭𑀺𑀚𑀸𑀦𑀦𑁂𑀦 𑀅𑀲𑁆𑀲𑀸𑀤𑀸𑀤𑀻𑀦𑀁 𑀚𑀸𑀦𑀦𑁂𑀦. 𑀭𑀓𑁆𑀔𑀡𑀸 𑀧𑀝𑀺𑀲𑀁𑀳𑀭𑀡𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀭𑀓𑁆𑀔𑀡𑀲𑀗𑁆𑀔𑀸𑀢𑀸 𑀧𑀫𑀸𑀤𑀲𑁆𑀲 𑀧𑀝𑀺𑀲𑀁𑀳𑀭𑀡𑀸, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀲𑀗𑁆𑀓𑁄𑀘𑀦𑀸 𑀅𑀧𑁆𑀧𑀫𑀸𑀤𑀸𑀦𑀼𑀬𑁄𑀕𑁂𑀦 𑀬𑀸 ¶ 𑀔𑁂𑀧𑀦𑀸. 𑀅𑀬𑀁 𑀲𑀫𑀣𑁄𑀢𑀺 𑀓𑀺𑀘𑁆𑀘𑁂𑀦 𑀲𑀫𑀸𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀯𑁄𑀤𑀸𑀦𑀧𑀓𑁆𑀔𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀸. ‘‘𑀬𑀤𑀸 𑀚𑀸𑀦𑀸𑀢𑀺 𑀓𑀸𑀫𑀸𑀦𑀁…𑀧𑁂… 𑀆𑀦𑀺𑀲𑀁𑀲’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀣𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀣 ¶ 𑀓𑀸𑀫𑀸𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸𑀦𑀜𑁆𑀘 𑀓𑀺𑀮𑁂𑀲𑀓𑀸𑀫𑀸𑀦𑀜𑁆𑀘. 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄𑀢𑀺 𑀓𑀸𑀫𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀼𑀔𑀲𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀁 𑀅𑀲𑁆𑀲𑀸𑀤𑀁 𑀅𑀲𑁆𑀲𑀸𑀤𑀢𑀸𑀬 𑀅𑀲𑁆𑀲𑀸𑀤𑀫𑀢𑁆𑀢𑀢𑁄. 𑀆𑀤𑀻𑀦𑀯𑀦𑁆𑀢𑀺 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁬) 𑀯𑀼𑀢𑁆𑀢𑀁 𑀆𑀤𑀻𑀦𑀯𑀁 𑀤𑁄𑀲𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨). 𑀑𑀓𑀸𑀭𑀦𑁆𑀢𑀺 𑀮𑀸𑀫𑀓𑀪𑀸𑀯𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀁. 𑀓𑀸𑀫𑀳𑁂𑀢𑀼 𑀳𑀺 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑀁. 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀦𑁆𑀢𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀲𑀫𑀣𑁂 𑀲𑀢𑀺. 𑀬𑀸 𑀯𑀻𑀫𑀁𑀲𑀸𑀢𑀺 𑀬𑀸 𑀧𑀜𑁆𑀜𑀸. ‘‘𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁭𑁧) 𑀳𑀺 𑀯𑀼𑀢𑁆𑀢𑀁. 𑀬𑀣𑀸 𑀢𑀡𑁆𑀳𑀸𑀲𑀳𑀺𑀢𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀏𑀯𑀁 𑀅𑀯𑀺𑀚𑁆𑀚𑀸𑀲𑀳𑀺𑀢𑀸𑀯 𑀢𑀡𑁆𑀳𑀸 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑁄. 𑀢𑀸𑀲𑀼 𑀦𑀺𑀭𑀼𑀤𑁆𑀥𑀸𑀲𑀼 𑀉𑀧𑀸𑀤𑀸𑀦𑀸𑀤𑀻𑀦𑀁 𑀅𑀪𑀸𑀯𑁄 𑀏𑀯𑀸𑀢𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀧𑀳𑀸𑀦𑁂𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀳𑀻𑀦𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀯𑁄𑀤𑀸𑀦𑀧𑀓𑁆𑀔𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀘 𑀆𑀯𑀝𑁆𑀝𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀘 𑀆𑀯𑀝𑁆𑀝𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀧𑀺 𑀫𑀽𑀮𑁂’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀦𑀸𑀫 𑀧𑀢𑀺𑀝𑁆𑀞𑀸𑀳𑁂𑀢𑀼𑀪𑀸𑀯𑁂𑀦 𑀫𑀽𑀮𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀪𑀽𑀫𑀺𑀕𑀢𑁂 𑀭𑀼𑀓𑁆𑀔𑀲𑁆𑀲 𑀅𑀯𑀬𑀯𑁂 𑀨𑀭𑀲𑀼𑀙𑁂𑀤𑀸𑀤𑀺𑀅𑀦𑁆𑀢𑀭𑀸𑀬𑀸𑀪𑀸𑀯𑁂𑀦 𑀅𑀦𑀼𑀧𑀤𑁆𑀤𑀯𑁂 𑀢𑀢𑁄 𑀏𑀯 𑀤𑀴𑁆𑀳𑁂 𑀣𑀺𑀭𑁂 𑀲𑀢𑀺 𑀔𑀦𑁆𑀥𑁂 𑀙𑀺𑀦𑁆𑀦𑁂𑀧𑀺 𑀅𑀲𑁆𑀲𑀢𑁆𑀣𑀸𑀤𑀺𑀭𑀼𑀓𑁆𑀔𑁄 𑀭𑀼𑀳𑀢𑀺, 𑀏𑀯𑀫𑁂𑀯 𑀢𑀡𑁆𑀳𑀸𑀦𑀼𑀲𑀬𑀲𑀗𑁆𑀔𑀸𑀢𑁂 𑀅𑀢𑁆𑀢𑀪𑀸𑀯𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀫𑀕𑁆𑀕𑀜𑀸𑀡𑀨𑀭𑀲𑀼𑀦𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑁂 𑀢𑀬𑀺𑀤𑀁 𑀤𑀼𑀓𑁆𑀔𑀁 𑀧𑀼𑀦𑀧𑁆𑀧𑀼𑀦𑀁 𑀅𑀧𑀭𑀸𑀧𑀭𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀓𑀸𑀫𑀢𑀡𑁆𑀳𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀪𑀯𑀢𑀡𑁆𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀏𑀢𑀲𑁆𑀲 𑀪𑀯𑀢𑀡𑁆𑀳𑀸𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀪𑀯𑁂𑀲𑀼 𑀆𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀸𑀤𑀺𑀯𑀲𑁂𑀦 𑀅𑀲𑁆𑀲𑀸𑀤𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀁𑀬𑁄𑀚𑀦𑀻𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 ¶ 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁭). 𑀢𑁂𑀦𑁂𑀯𑀸𑀳 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑀺 𑀪𑀯𑀢𑀡𑁆𑀳𑀸’’𑀢𑀺. 𑀇𑀥 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑀲𑀫𑀸𑀥𑀺 𑀫𑀕𑁆𑀕𑀧𑀜𑁆𑀜𑀸 𑀘 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 𑁋 ‘‘𑀬𑁂𑀦 𑀢𑀡𑁆𑀳𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀻’’𑀢𑀺𑀆𑀤𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀤𑀸𑀦𑀺 𑀦 𑀓𑁂𑀯𑀮𑀁 𑀦𑀺𑀤𑁆𑀥𑀸𑀭𑀺𑀢𑁂𑀳𑁂𑀯 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑁂𑀳𑀺 𑀆𑀯𑀝𑁆𑀝𑀦𑀁, 𑀅𑀣 𑀔𑁄 𑀧𑀸𑀴𑀺𑀆𑀕𑀢𑁂𑀳𑀺𑀧𑀺 𑀢𑁂𑀳𑀺 𑀆𑀯𑀝𑁆𑀝𑀦𑀁 𑀆𑀯𑀝𑁆𑀝𑀳𑀸𑀭𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲. 𑀉𑀧𑀲𑀫𑁆𑀧𑀤𑀸𑀢𑀺 𑀧𑀝𑀺𑀮𑀸𑀪𑁄. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀯𑁄𑀤𑀸𑀦𑀁, 𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀺. 𑀇𑀢𑀺 𑀲𑀻𑀮𑀲𑀁𑀯𑀭𑁂𑀦 𑀲𑀩𑁆𑀩𑀧𑀸𑀧𑀁 𑀧𑀳𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀓𑀼𑀲𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀢𑁆𑀣𑁄 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺.

𑀢𑀢𑁆𑀣 ‘‘𑀲𑀩𑁆𑀩𑀧𑀸𑀧𑀁 𑀦𑀸𑀫𑀸’’𑀢𑀺𑀆𑀤𑀻𑀲𑀼 𑀤𑁄𑀲𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀤𑁄𑀲𑁄 𑀲𑀫𑀼𑀝𑁆𑀞𑀸𑀦𑀫𑁂𑀯 𑀏𑀢𑀲𑁆𑀲𑀸𑀢𑀺 𑀤𑁄𑀲𑀲𑀫𑀼𑀝𑁆𑀞𑀸𑀦𑀁, 𑀦 𑀤𑁄𑀲𑁄 𑀏𑀯 𑀲𑀫𑀼𑀝𑁆𑀞𑀸𑀦𑀦𑁆𑀢𑀺. 𑀮𑁄𑀪𑀲𑀫𑀼𑀝𑁆𑀞𑀸𑀦𑀸𑀬𑀧𑀺 𑀧𑀺𑀲𑀼𑀡𑀯𑀸𑀘𑀸𑀬 𑀲𑀫𑁆𑀪𑀯𑀢𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀤𑁄𑀲𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀮𑁄𑀪𑀲𑀫𑀼𑀝𑁆𑀞𑀸𑀦𑀁 𑀫𑁄𑀳𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀉𑀤𑁆𑀥𑀘𑁆𑀘𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀲 𑀫𑁄𑀳𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸.

𑀏𑀯𑀁 𑀤𑀼𑀘𑁆𑀘𑀭𑀺𑀢𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀯𑀺𑀪𑀸𑀕𑁂𑀦 ‘‘𑀲𑀩𑁆𑀩𑀧𑀸𑀧’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀸𑀧𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀅𑀓𑀼𑀲𑀮𑀫𑀽𑀮𑀯𑀲𑁂𑀦 𑀅𑀕𑀢𑀺𑀕𑀫𑀦𑀯𑀺𑀪𑀸𑀕𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀓𑀼𑀲𑀮𑀫𑀽𑀮𑀁 𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀦𑁆𑀢𑀺 𑀮𑁄𑀪𑀸𑀤𑀺𑀅𑀓𑀼𑀲𑀮𑀸𑀦𑀺 𑀓𑀸𑀬𑀯𑀘𑀻𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀸𑀦𑀺, 𑀓𑀸𑀬𑀯𑀘𑀻𑀧𑀬𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀸𑀢𑀺 𑀙𑀦𑁆𑀤𑀳𑁂𑀢𑀼. 𑀬𑀁 𑀙𑀦𑁆𑀤𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀤𑀁 𑀮𑁄𑀪𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀙𑀦𑁆𑀤𑀸 𑀅𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀬𑀤𑁂𑀢𑀁 𑀅𑀕𑀢𑀺𑀕𑀫𑀦𑀁, 𑀇𑀤𑀁 𑀮𑁄𑀪𑀲𑀫𑀼𑀝𑁆𑀞𑀸𑀦𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀏𑀢𑁆𑀣 𑀧𑀸𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀅𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀪𑁄…𑀧𑁂… 𑀧𑀜𑁆𑀜𑀸𑀬𑀸’’𑀢𑀺 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 ¶ 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁 𑀅𑀦𑀼𑀧𑁆𑀧𑀸𑀤𑀦𑀫𑀸𑀳. 𑀢𑀣𑀸 𑀮𑁄𑀪𑁄 𑀉𑀧𑁂𑀓𑁆𑀔𑀸𑀬𑀸𑀢𑀺𑀆𑀤𑀺𑀦𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀳𑀺. 𑀢𑀢𑁆𑀣 𑀅𑀭𑀢𑀺𑀁 𑀯𑀽𑀧𑀲𑀫𑁂𑀦𑁆𑀢𑀻 𑀫𑀼𑀤𑀺𑀢𑀸 𑀢𑀲𑁆𑀲𑀸 𑀫𑀽𑀮𑀪𑀽𑀢𑀁 𑀫𑁄𑀳𑀁 𑀧𑀚𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀫𑁄𑀳𑁄 𑀫𑀼𑀤𑀺𑀢𑀸𑀬 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺.

𑁩𑁧. 𑀇𑀤𑀸𑀦𑀺 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀧𑀸𑀧𑀁 𑀢𑀲𑁆𑀲 𑀅𑀓𑀭𑀡𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀧𑀤𑀸𑀦𑀜𑁆𑀘 𑀅𑀢𑁆𑀣𑀯𑀺𑀪𑀸𑀯𑀦𑀫𑀼𑀔𑁂𑀦 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀧𑀸𑀧𑀁 𑀦𑀸𑀫 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀘𑀸𑀭𑁄𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀫𑀺𑀘𑁆𑀙𑀢𑁆𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀫𑁂𑀯 𑀯𑀤𑀢𑀺. 𑀢𑀣𑀸 𑀓𑀺𑀭𑀺𑀬𑀸 𑀓𑀭𑀡𑀁 𑀅𑀚𑁆𑀛𑀸𑀘𑀸𑀭𑁄𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀉𑀧𑁆𑀧𑀸𑀤𑀦𑀫𑁂𑀯 𑀯𑀤𑀢𑀺. 𑀅𑀚𑁆𑀛𑀸𑀘𑀸𑀭𑁄𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀘𑀭𑀡𑀁. 𑀅𑀢𑀻𑀢𑀲𑁆𑀲𑀸𑀢𑀺 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀧𑀼𑀭𑀸𑀡𑀲𑁆𑀲. 𑀫𑀕𑁆𑀕𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀼𑀭𑀸𑀡𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀦𑁆𑀢𑀺 𑀔𑁄 𑀅𑀭𑀺𑀬𑀲𑁆𑀲𑁂𑀢𑀁 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 ¶ 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁬𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁). 𑀅𑀢𑀻𑀢𑁂𑀦 𑀯𑀸 𑀯𑀺𑀧𑀲𑁆𑀲𑀺𑀦𑀸 𑀪𑀕𑀯𑀢𑀸 𑀬𑀣𑀸𑀥𑀺𑀕𑀢𑀁 𑀤𑁂𑀲𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀢𑀻𑀢𑀲𑁆𑀲 𑀫𑀕𑁆𑀕𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀺𑀦𑁄 𑀳𑀺 𑀅𑀬𑀁 𑀪𑀕𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸𑀢𑀺.

𑀬𑀁 𑀧𑀝𑀺𑀯𑁂𑀥𑁂𑀦𑀸𑀢𑀺 𑀬𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦. 𑀬𑀁 𑀧𑀭𑀺𑀬𑁄𑀤𑀸𑀧𑀺𑀢𑀁, 𑀅𑀬𑀁 𑀦𑀺𑀭𑁄𑀥𑁄𑀢𑀺 𑀬𑀤𑀺𑀧𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀓𑁂𑀦𑀘𑀺 𑀲𑀁𑀓𑀺𑀮𑁂𑀲𑁂𑀦 𑀦 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀅𑀥𑀺𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀬𑀸𑀯 𑀲𑀁𑀓𑀺𑀮𑁂𑀲𑀸 𑀦 𑀯𑀺𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀅𑀧𑀭𑀺𑀬𑁄𑀤𑀧𑀺𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁂𑀦 𑀬𑁂 𑀔𑀦𑁆𑀥𑀸 𑀯𑀽𑀧𑀲𑀫𑁂𑀢𑀩𑁆𑀩𑀸, 𑀢𑁂𑀲𑀁 𑀲𑁂𑀲𑀪𑀸𑀯𑁂𑀦 𑀅𑀲𑁂𑀲𑀪𑀸𑀯𑁂𑀦 𑀘 ‘‘𑀲𑀉𑀧𑀸𑀤𑀺𑀲𑁂𑀲𑀸’’𑀢𑀺 𑀘, ‘‘𑀅𑀦𑀼𑀧𑀸𑀤𑀺𑀲𑁂𑀲𑀸’’𑀢𑀺 𑀘 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀇𑀫𑀸𑀦𑀺 𑀧𑀸𑀴𑀺𑀆𑀕𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀼𑀦𑀧𑀺 𑀧𑀸𑀴𑀺𑀆𑀕𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑁂𑀦 𑀆𑀯𑀝𑁆𑀝𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀸 𑀧𑀤𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀏𑀯. 𑀥𑀫𑁆𑀫𑁄𑀢𑀺 𑀧𑀼𑀜𑁆𑀜𑀥𑀫𑁆𑀫𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑁄 𑀦𑀸𑀫 𑀤𑀼𑀯𑀺𑀥𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀫𑀕𑁆𑀕𑁄 𑀘𑀸’’𑀢𑀺 𑀆𑀳. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀲𑀻𑀮𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀲𑀩𑁆𑀩𑀸 𑀉𑀧𑀧𑀢𑁆𑀢𑀺𑀬𑁄 𑀤𑀼𑀕𑁆𑀕𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀬𑁄𑀕𑁂𑀦 𑀤𑀼𑀓𑁆𑀔𑀸 𑀕𑀢𑀺𑀬𑁄𑀢𑀺 𑀓𑀢𑁆𑀯𑀸. 𑀬𑀣𑀸𑀯𑀼𑀢𑁆𑀢𑁂 𑀤𑀼𑀯𑀺𑀥𑁂 𑀥𑀫𑁆𑀫𑁂 𑀧𑀞𑀫𑁄 𑀥𑀫𑁆𑀫𑁄 𑀬𑀣𑀸 𑀲𑀼𑀘𑀺𑀡𑁆𑀡𑁄 𑀳𑁄𑀢𑀺, 𑀬𑀢𑁄 𑀘 𑀲𑁄 𑀭𑀓𑁆𑀔𑀢𑀺, 𑀬𑀢𑁆𑀣 𑀘 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀸 𑀲𑀁𑀯𑀭𑀲𑀻𑀮𑁂 𑀅𑀔𑀡𑁆𑀟𑀓𑀸𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀧𑀸𑀬𑀢𑁄 𑀭𑀓𑁆𑀔𑀡𑁂 𑀏𑀓𑀦𑁆𑀢𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁪.𑁩𑁫𑁮) 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀲𑀼𑀢𑁆𑀢𑀁 𑀆𑀪𑀢𑀁.

𑀢𑀢𑁆𑀣 𑀏𑀯𑀦𑁆𑀢𑀺 𑀧𑀓𑀸𑀭𑁂𑀦. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑁂, 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄𑀢𑀺 𑀅𑀲𑀺𑀩𑀦𑁆𑀥𑀓𑀲𑁆𑀲 𑀦𑀸𑀫 𑀧𑀼𑀢𑁆𑀢𑁄. 𑀕𑀸𑀫𑁂 𑀚𑁂𑀝𑁆𑀞𑀓𑀢𑀸𑀬 𑀕𑀸𑀫𑀡𑀻. 𑀧𑀘𑁆𑀙𑀸𑀪𑀽𑀫𑀓𑀸𑀢𑀺 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀦𑁄. 𑀓𑀸𑀫𑀡𑁆𑀟𑀮𑀼𑀓𑀸𑀢𑀺 𑀲𑀓𑀫𑀡𑁆𑀟𑀮𑀼𑀦𑁄. 𑀲𑁂𑀯𑀸𑀮𑀫𑀸𑀮𑀺𑀓𑀸𑀢𑀺 𑀧𑀸𑀢𑁄𑀯 𑀉𑀤𑀓𑀢𑁄 𑀲𑁂𑀯𑀸𑀮𑀜𑁆𑀘𑁂𑀯 𑀉𑀧𑁆𑀧𑀮𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀉𑀤𑀓𑀲𑀼𑀤𑁆𑀥𑀺𑀪𑀸𑀯𑀚𑀸𑀦𑀦𑀢𑁆𑀣𑀁 𑀫𑀸𑀮𑀁 𑀓𑀢𑁆𑀯𑀸 𑀧𑀺𑀴𑀦𑁆𑀥𑀦𑀓𑀸. 𑀉𑀤𑀓𑁄𑀭𑁄𑀳𑀓𑀸𑀢𑀺 𑀲𑀸𑀬𑀁 𑀧𑀸𑀢𑀁 𑀉𑀤𑀓𑀁 𑀑𑀭𑁄𑀳𑀡𑀓𑀸. 𑀉𑀬𑁆𑀬𑀸𑀧𑁂𑀦𑁆𑀢𑀻𑀢𑀺 𑀉𑀧𑀭𑀺𑀬𑀸𑀧𑁂𑀦𑁆𑀢𑀺. 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸 𑀬𑀸𑀧𑁂𑀦𑁆𑀢𑀺. 𑀲𑀕𑁆𑀕𑀁 𑀦𑀸𑀫 𑀑𑀓𑁆𑀓𑀸𑀫𑁂𑀦𑁆𑀢𑀻𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸𑀯 ‘‘𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓𑀁, 𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺 𑀯𑀤𑀦𑁆𑀢𑀸 𑀲𑀕𑁆𑀕𑀁 𑀧𑀯𑁂𑀲𑁂𑀦𑁆𑀢𑀺.

𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬𑀸𑀢𑀺 ¶ 𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬. 𑀉𑀫𑁆𑀫𑀼𑀚𑁆𑀚𑀸𑀢𑀺 𑀉𑀝𑁆𑀞𑀳. 𑀉𑀧𑁆𑀮𑀯𑀸𑀢𑀺 𑀚𑀮𑀲𑁆𑀲 𑀉𑀧𑀭𑀺𑀧𑁆𑀮𑀯. 𑀣𑀮𑀫𑀼𑀧𑁆𑀮𑀯𑀸𑀢𑀺 𑀣𑀮𑀁 𑀅𑀪𑀺𑀭𑀼𑀳. 𑀢𑀢𑁆𑀭 𑀬𑀸𑀲𑁆𑀲𑀸𑀢𑀺 𑀢𑀢𑁆𑀭 𑀬𑀁 𑀅𑀲𑁆𑀲, 𑀬𑀁 𑀪𑀯𑁂𑀬𑁆𑀬. 𑀲𑀓𑁆𑀔𑀭𑀓𑀞𑀮𑀦𑁆𑀢𑀺 𑀲𑀓𑁆𑀔𑀭𑀸 𑀯𑀸 𑀓𑀞𑀮𑀸 𑀯𑀸. 𑀲𑀸 𑀅𑀥𑁄𑀕𑀸𑀫𑀻 𑀅𑀲𑁆𑀲𑀸𑀢𑀺 𑀲𑀸 𑀅𑀥𑁄 𑀕𑀘𑁆𑀙𑁂𑀬𑁆𑀬, 𑀳𑁂𑀝𑁆𑀞𑀸𑀕𑀸𑀫𑀻 𑀪𑀯𑁂𑀬𑁆𑀬. 𑀅𑀥𑁄 𑀕𑀘𑁆𑀙𑁂𑀬𑁆𑀬𑀸𑀢𑀺 𑀳𑁂𑀝𑁆𑀞𑀸 𑀕𑀘𑁆𑀙𑁂𑀬𑁆𑀬. 𑀫𑀕𑁆𑀕𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲. 𑀢𑀺𑀓𑁆𑀔𑀢𑀸𑀢𑀺 𑀢𑀺𑀔𑀺𑀡𑀢𑀸. 𑀲𑀸 𑀘 𑀔𑁄 𑀦 𑀲𑀢𑁆𑀣𑀓𑀲𑁆𑀲 𑀯𑀺𑀬 𑀦𑀺𑀲𑀺𑀢𑀓𑀭𑀡𑀢𑀸, 𑀅𑀣 𑀔𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀝𑀼𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀫𑀢𑁆𑀢𑀢𑀸’’𑀢𑀺 𑀆𑀳. 𑀦𑀦𑀼 𑀘 𑀅𑀭𑀺𑀬𑀫𑀕𑁆𑀕𑁄 𑀅𑀢𑁆𑀢𑀦𑀸 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑁂 𑀅𑀦𑀯𑀲𑁂𑀲𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑀺𑀔𑀺𑀡𑁄 𑀦𑀸𑀫 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀦𑁄 𑀘 𑀔𑁄 ‘‘𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀢𑀺 𑀅𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀫𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀦 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀲𑀩𑁆𑀩𑀼𑀧𑀧𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀅𑀭𑀺𑀬𑀫𑀕𑁆𑀕𑁂𑀦 𑀑𑀥𑀺𑀲𑁄 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀜𑁆𑀘 𑀦𑁂𑀲𑀁 𑀢𑀣𑀸𑀧𑀳𑀸𑀦𑀁 𑀫𑀕𑁆𑀕𑀥𑀫𑁆𑀫𑁂𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀁 ¶ 𑀅𑀧𑀸𑀝𑀯𑀧𑀸𑀝𑀯𑀢𑀭𑀧𑀸𑀝𑀯𑀢𑀫𑀪𑀸𑀯𑁂𑀦 𑀳𑁄𑀢𑀻𑀢𑀺 𑀬𑁄 𑀯𑀚𑀺𑀭𑀽𑀧𑀫𑀥𑀫𑁆𑀫𑁂𑀲𑀼 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀫𑀕𑁆𑀕𑀥𑀫𑁆𑀫𑀸𑀦𑀁 𑀧𑀝𑀼𑀢𑀫𑀪𑀸𑀯𑁄. 𑀅𑀬𑀁 𑀇𑀥 𑀫𑀕𑁆𑀕𑀲𑁆𑀲 𑀢𑀺𑀓𑁆𑀔𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑁂𑀯𑀸𑀳 𑁋 ‘‘𑀅𑀬𑀁 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀩𑁆𑀩𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 𑀭𑀓𑁆𑀔𑀢𑀻’’𑀢𑀺. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑁆𑀢𑀭𑁂𑀦 (𑀉𑀤𑀸. 𑁩𑁨) 𑀲𑀼𑀕𑀢𑀺𑀲𑀜𑁆𑀜𑀺𑀢𑀸𑀦𑀫𑁆𑀧𑀺 𑀉𑀧𑀧𑀢𑁆𑀢𑀻𑀦𑀁 𑀤𑀼𑀕𑁆𑀕𑀢𑀺𑀪𑀸𑀯𑀁 𑀲𑀸𑀥𑁂𑀢𑀺.

𑁩𑁨. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀕𑀥𑀫𑁆𑀫𑀸𑀦𑀜𑁆𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀆𑀯𑀝𑁆𑀝𑀳𑀸𑀭𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀤𑀼𑀕𑁆𑀕𑀢𑀻𑀦𑀁 𑀳𑁂𑀢𑀼 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀤𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀇𑀤𑀁 𑀅𑀭𑀺𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀭𑀓𑁆𑀔𑀢𑀻𑀢𑀺 𑀲𑀩𑁆𑀩𑀸𑀳𑀺 𑀤𑀼𑀕𑁆𑀕𑀢𑀻𑀳𑀺 𑀭𑀓𑁆𑀔𑀦𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑁄 𑀦𑀺𑀭𑁄𑀥𑁄 𑀭𑀓𑁆𑀔𑀦𑁆𑀢𑁄 𑀯𑀺𑀬 𑀯𑀼𑀢𑁆𑀢𑁄, 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀪𑀸𑀯𑁂𑀦 𑀉𑀧𑀘𑀭𑀺𑀢𑀢𑁆𑀢𑀸. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁩. 𑀢𑀢𑁆𑀣 ¶ 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑁄𑀢𑀺 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀥𑀫𑁆𑀫𑀯𑀺𑀪𑀢𑁆𑀢𑀺𑀪𑀽𑀫𑀺𑀯𑀺𑀪𑀢𑁆𑀢𑀺𑀧𑀤𑀝𑁆𑀞𑀸𑀦𑀯𑀺𑀪𑀢𑁆𑀢𑀻𑀢𑀺 𑀢𑀺𑀯𑀺𑀥𑀸 𑀯𑀺𑀪𑀢𑁆𑀢𑀺. 𑀢𑀸𑀲𑀼 𑀬𑀲𑁆𑀫𑀸 𑀥𑀫𑁆𑀫𑁂𑀲𑀼 𑀯𑀺𑀪𑀸𑀕𑀢𑁄 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀢𑀢𑁆𑀣 𑀮𑀩𑁆𑀪𑀫𑀸𑀦𑁄 𑀪𑀽𑀫𑀺𑀯𑀺𑀪𑀸𑀕𑁄 𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑁄 𑀘 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀪𑀢𑁆𑀢𑀺𑀁 𑀢𑀸𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 𑀲𑁄𑀴𑀲𑀯𑀺𑀥𑁂 𑀧𑀝𑁆𑀞𑀸𑀦𑁂 𑀬𑁂𑀲𑀁 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑀺𑀲𑁂𑀲𑀢𑁄 𑀯𑀺𑀪𑀚𑀺𑀢𑀩𑁆𑀩𑀸, 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀲𑀦𑀸 𑀧𑀼𑀜𑁆𑀜𑀪𑀸𑀯𑀦𑀸, 𑀢𑀲𑁆𑀲𑀸 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀯𑀸𑀲𑀦𑀸𑀪𑀸𑀕𑁄, 𑀢𑀲𑁆𑀲 𑀳𑀺𑀢𑀦𑁆𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀁, 𑀲𑀼𑀢𑁆𑀢𑀁. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀤𑀸𑀮𑀦𑀁 𑀦𑀺𑀩𑁆𑀩𑁂𑀥𑁄, 𑀢𑀲𑁆𑀲 𑀪𑀸𑀕𑁄𑀢𑀺 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀡𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀤𑁂𑀲𑀺𑀢𑀸𑀦𑀺, 𑀢𑀁 𑀲𑀼𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀬𑀲𑁆𑀫𑀺𑀁 𑀧𑀦 𑀲𑁂𑀓𑁆𑀔𑀸𑀲𑁂𑀓𑁆𑀔𑀸 𑀤𑁂𑀲𑀺𑀢𑀸, 𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀧𑀸𑀴𑀺𑀬𑀁𑀬𑁂𑀯 𑀆𑀕𑀫𑀺𑀲𑁆𑀲𑀢𑀺.

𑀧𑀼𑀜𑁆𑀜𑀪𑀸𑀕𑀺𑀬𑀸𑀢𑀺 ¶ 𑀧𑀼𑀜𑁆𑀜𑀪𑀸𑀕𑁂 𑀪𑀯𑀸. 𑀢𑀣𑀸 𑀨𑀮𑀪𑀸𑀕𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀦𑁆𑀢𑀺 𑀧𑀦 𑀲𑀸𑀫𑀜𑁆𑀜𑀨𑀮𑀁. 𑀲𑀁𑀯𑀭𑀲𑀻𑀮𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺𑀲𑀁𑀯𑀭𑁄, 𑀜𑀸𑀡𑀲𑀁𑀯𑀭𑁄, 𑀔𑀦𑁆𑀢𑀺𑀲𑀁𑀯𑀭𑁄, 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘 𑀲𑀁𑀯𑀭𑀸 𑀲𑀁𑀯𑀭𑀲𑀻𑀮𑀁. 𑀧𑀳𑀸𑀦𑀲𑀻𑀮𑀦𑁆𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀧𑁆𑀧𑀳𑀸𑀦𑀸𑀦𑀺. 𑀢𑁂𑀲𑀼 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀯𑀚𑁆𑀚𑀸𑀦𑀁 𑀧𑀳𑀸𑀦𑀸𑀦𑀁 𑀯𑀲𑁂𑀦 𑀧𑀳𑀸𑀦𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀢𑀺 𑀬𑁄 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑁄, 𑀲𑁄. 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀢𑁂𑀦 𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑁂𑀦 𑀲𑁂𑀝𑁆𑀞𑀘𑀭𑀺𑀬𑁂𑀦 𑀓𑀸𑀭𑀡𑀪𑀽𑀢𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀺. 𑀏𑀢𑁆𑀣 𑀘 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦 𑀧𑀝𑀺𑀓𑁆𑀔𑁂𑀧𑁄, 𑀓𑁂𑀘𑀺 𑀧𑀦 ‘‘𑀢𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀲𑀺𑀬𑀸 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄.

𑀧𑀳𑀸𑀦𑀲𑀻𑀮𑁂 𑀞𑀺𑀢𑁄𑀢𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀸𑀦𑀁 𑀯𑀲𑁂𑀦 𑀧𑀳𑀸𑀦𑀲𑀻𑀮𑁂 𑀞𑀺𑀢𑁄. 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀢𑁂𑀦 𑀧𑀳𑀸𑀦𑀲𑀻𑀮𑁂𑀦 𑀯𑀺𑀲𑁂𑀲𑀪𑀽𑀢𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂𑀦. 𑀬𑁂 𑀧𑀦 ‘‘𑀢𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀅𑀬𑀁 𑀧𑀸𑀞𑁄 ‘‘𑀯𑀸𑀲𑀦𑀸𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀤𑀸𑀦𑀓𑀣𑀸, 𑀲𑀻𑀮𑀓𑀣𑀸, 𑀲𑀕𑁆𑀕𑀓𑀣𑀸, 𑀧𑀼𑀜𑁆𑀜𑀯𑀺𑀧𑀸𑀓𑀓𑀣𑀸’’𑀢𑀺. 𑀬𑁂 𑀧𑀦 ‘‘𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀅𑀬𑀁 𑀧𑀸𑀞𑁄 𑁋 ‘‘𑀯𑀸𑀲𑀦𑀸𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀤𑀸𑀦𑀓𑀣𑀸, 𑀲𑀻𑀮𑀓𑀣𑀸, 𑀲𑀕𑁆𑀕𑀓𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀦𑁂𑀓𑁆𑀔𑀫𑁆𑀫𑁂 ¶ 𑀆𑀦𑀺𑀲𑀁𑀲𑁄’’𑀢𑀺. 𑀢𑀢𑁆𑀣 𑀓𑀢𑀫𑁄 𑀧𑀸𑀞𑁄 𑀬𑀼𑀢𑁆𑀢𑀢𑀭𑁄𑀢𑀺? 𑀧𑀘𑁆𑀙𑀺𑀫𑁄 𑀧𑀸𑀞𑁄𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑀩𑁆𑀩𑀁. 𑀬𑀲𑁆𑀫𑀸 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀬𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸’’𑀢𑀺 𑀯𑀓𑁆𑀔𑀢𑀺, 𑀦 𑀳𑀺 𑀫𑀳𑀸𑀣𑁂𑀭𑁄 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺.

‘‘𑀦𑀢𑁆𑀣𑀺 𑀧𑀚𑀸𑀦𑀦𑀸’’𑀢𑀺𑀆𑀤𑀺𑀦𑀸 𑀉𑀪𑀺𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀲𑀸𑀢𑀺𑀲𑀬𑀁 𑀅𑀲𑀗𑁆𑀓𑀭𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀚𑀸𑀦𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻𑀢𑀺 𑀇𑀫𑁂𑀲𑀁 𑀲𑀼𑀢𑁆𑀢𑀸𑀦𑀁 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀦𑀁 𑀯𑀓𑁆𑀔𑀫𑀸𑀦𑀸𑀦𑀜𑁆𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺. 𑀤𑁂𑀲𑀦𑀸𑀬𑀸𑀢𑀺 𑀤𑁂𑀲𑀦𑀸𑀦𑀬𑁂𑀦. 𑀲𑀩𑁆𑀩𑀢𑁄 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸. ‘‘𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀏𑀢𑁂𑀦 𑀯𑀺𑀘𑀬𑀳𑀸𑀭𑀬𑀼𑀢𑁆𑀢𑀺𑀳𑀸𑀭𑀸 𑀯𑀺𑀪𑀢𑁆𑀢𑀺𑀳𑀸𑀭𑀲𑁆𑀲 𑀧𑀭𑀺𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀻’’𑀢𑀺 𑀇𑀫𑀺𑀦𑀸 𑀯𑀺𑀪𑀢𑁆𑀢𑀺𑀳𑀸𑀭𑀲𑁆𑀲 𑀫𑀳𑀸𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀺.

𑁩𑁪. 𑀏𑀯𑀁 ¶ 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑁂𑀳𑀺 𑀥𑀫𑁆𑀫𑁂 𑀏𑀓𑀤𑁂𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀪𑀸𑀯𑁂𑀳𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑀸𑀯𑁂𑀳𑀺 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸𑀢𑀺 𑀓𑀢𑀫𑁂 𑀲𑀪𑀸𑀯𑀥𑀫𑁆𑀫𑀸. 𑀲𑀸𑀥𑀸𑀭𑀡𑀸𑀢𑀺 𑀅𑀯𑀺𑀲𑀺𑀝𑁆𑀞𑀸, 𑀲𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀤𑀼𑀯𑁂 𑀧𑀓𑀢𑀺𑀬𑁄. 𑀧𑀓𑀢𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄 ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁩𑁩) 𑀯𑀺𑀬. 𑀦𑀸𑀫𑀲𑀸𑀥𑀸𑀭𑀡𑀸𑀢𑀺 𑀦𑀸𑀫𑁂𑀦 𑀲𑀸𑀥𑀸𑀭𑀡𑀸, 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀲𑀫𑀸𑀦𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀲𑀸𑀥𑀸𑀭𑀡𑀸𑀢𑀺 𑀯𑀢𑁆𑀣𑀼𑀦𑀸 𑀦𑀺𑀲𑁆𑀲𑀬𑁂𑀦 𑀲𑀸𑀥𑀸𑀭𑀡𑀸, 𑀏𑀓𑀲𑀦𑁆𑀢𑀢𑀺𑀧𑀢𑀺𑀢𑀢𑀸𑀬 𑀲𑀫𑀸𑀦𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀢𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀳𑀸𑀦𑁂𑀓𑀝𑁆𑀞𑀸 𑀦𑀸𑀫𑀲𑀸𑀥𑀸𑀭𑀡𑀸, 𑀲𑀳𑀚𑁂𑀓𑀝𑁆𑀞𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸. 𑀅𑀜𑁆𑀜𑀫𑁆𑀧𑀺 𑀏𑀯𑀁 𑀚𑀸𑀢𑀺𑀬𑀦𑁆𑀢𑀺 𑀓𑀺𑀘𑁆𑀘𑀧𑀘𑁆𑀘𑀬𑀧𑀝𑀺𑀧𑀓𑁆𑀔𑀸𑀤𑀻𑀳𑀺 𑀲𑀫𑀸𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸𑀦𑀦𑁆𑀢𑀺 𑀇𑀤𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀲𑀲𑁆𑀲𑀢𑀯𑀸𑀤𑀸 𑀉𑀘𑁆𑀙𑁂𑀤𑀯𑀸𑀤𑀸𑀢𑀺 𑀆𑀤𑀺𑀓𑁄 𑀲𑀩𑁆𑀩𑁄 𑀧𑀼𑀣𑀼𑀚𑁆𑀚𑀦𑀪𑁂𑀤𑁄 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀤𑀲𑀦𑀧𑁆𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀲𑀸𑀥𑀸𑀭𑀡𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸𑀦𑀁 𑀏𑀯 𑀘 𑀲𑀫𑁆𑀪𑀯𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀦𑀁 𑀅𑀲𑀫𑁆𑀪𑀯𑀢𑁄 𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀲𑀸𑀯𑀓𑁄𑀢𑀺 𑀲𑁂𑀓𑁆𑀔𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀩𑁆𑀩𑀸 𑀲𑀸 𑀅𑀯𑀻𑀢𑀭𑀸𑀕𑁂𑀳𑀺 𑀲𑀸𑀥𑀸𑀭𑀡𑀸𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀻𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀸𑀥𑀸𑀭𑀡𑀸. 𑀓𑀼𑀲𑀮𑀲𑀫𑀸𑀧𑀢𑁆𑀢𑀺 𑀧𑀦 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸 𑀅𑀲𑀸𑀥𑀸𑀭𑀡𑀸 ¶ , 𑀇𑀫𑀁 𑀧𑀦 𑀤𑁄𑀲𑀁 𑀧𑀲𑁆𑀲𑀦𑁆𑀢𑀸 𑀓𑁂𑀘𑀺 ‘‘𑀬𑀁 𑀓𑀺𑀜𑁆𑀘𑀺…𑀧𑁂… 𑀲𑀩𑁆𑀩𑀸 𑀲𑀸 𑀅𑀯𑀻𑀢𑀭𑀸𑀕𑁂𑀳𑀺 𑀲𑀸𑀥𑀸𑀭𑀡𑀸’’𑀢𑀺 𑀧𑀞𑀦𑁆𑀢𑀺. 𑀓𑀣𑀁 𑀢𑁂 𑀑𑀥𑀺𑀲𑁄 𑀕𑀳𑀺𑀢𑀸, 𑀅𑀣 𑀑𑀥𑀺𑀲𑁄 𑀕𑀳𑁂𑀢𑀩𑁆𑀩𑀸, 𑀓𑀣𑀁 𑀲𑀸𑀥𑀸𑀭𑀡𑀸𑀢𑀺? 𑀅𑀦𑀼𑀬𑁄𑀕𑀁 𑀫𑀦𑀲𑀺𑀓𑀢𑁆𑀯𑀸 𑀢𑀁 𑀯𑀺𑀲𑁄𑀥𑁂𑀦𑁆𑀢𑁄 𑀆𑀳 𑁋 ‘‘𑀲𑀸𑀥𑀸𑀭𑀡𑀸 𑀳𑀺 𑀥𑀫𑁆𑀫𑀸 𑀏𑀯𑀁 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸𑀦𑀜𑁆𑀘 𑀲𑀸𑀥𑀸𑀭𑀡𑀸𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀸𑀥𑀸𑀭𑀡𑀸 𑀥𑀫𑁆𑀫𑀸 𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀢𑀸𑀬 𑀲𑀸𑀥𑀸𑀭𑀡𑀸, 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀧𑀭𑀁 𑀧𑀭𑀁 𑀲𑀓𑀁 𑀲𑀓𑀁 𑀯𑀺𑀲𑀬𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀧𑀝𑀺𑀦𑀺𑀬𑀢𑀜𑁆𑀳𑀺 𑀢𑁂𑀲𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀇𑀢𑀭𑀣𑀸 𑀢𑀣𑀸 𑀯𑁄𑀳𑀸𑀭𑁄 𑀏𑀯 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀘 𑀏𑀢𑁂 𑀏𑀯 𑀥𑀫𑁆𑀫𑀸 𑀏𑀯𑀁 ¶ 𑀦𑀺𑀬𑀢𑀸 𑀯𑀺𑀲𑀬𑀸, 𑀢𑀲𑁆𑀫𑀸 ‘‘𑀬𑁄𑀧𑀺 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄 𑀢𑀁 𑀥𑀫𑁆𑀫𑀁 𑀉𑀧𑀸𑀢𑀺𑀯𑀢𑁆𑀢𑀢𑀻’’𑀢𑀺 𑀆𑀳. 𑀦 𑀳𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸𑀦𑀜𑁆𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀯𑀸 𑀲𑀦𑁆𑀢𑀻𑀢𑀺 𑀏𑀯𑀁 𑀲𑁂𑀲𑁂𑀧𑀺 𑀯𑀢𑁆𑀢𑀩𑁆𑀩𑀁.

𑀅𑀲𑀸𑀥𑀸𑀭𑀡𑁄 𑀦𑀸𑀫 𑀥𑀫𑁆𑀫𑁄 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀘𑁆𑀘𑀢𑁆𑀢𑀦𑀺𑀬𑀢𑁄 𑀅𑀭𑀺𑀬𑁂𑀲𑀼 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑀯𑀲𑁂𑀦 𑀅𑀦𑀭𑀺𑀬𑁂𑀲𑀼 𑀲𑀩𑁆𑀩𑀸𑀪𑀩𑁆𑀩𑀧𑀳𑀸𑀢𑀩𑁆𑀩𑀯𑀲𑁂𑀦 𑀕𑀯𑁂𑀲𑀺𑀢𑀩𑁆𑀩𑁄, 𑀇𑀢𑀭𑀲𑁆𑀲 𑀢𑀣𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀪𑀸𑀯𑀸𑀪𑀸𑀯𑀢𑁄. 𑀲𑁄 𑀘 𑀔𑁄 𑀲𑀸𑀥𑀸𑀭𑀡𑀸𑀯𑀺𑀥𑀼𑀭𑀢𑀸𑀬 𑀢𑀁 𑀢𑀁 𑀉𑀧𑀸𑀤𑀸𑀬 𑀢𑀣𑀸𑀯𑀼𑀢𑁆𑀢𑀤𑁂𑀲𑀦𑀸𑀦𑀼𑀲𑀸𑀭𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸 𑀬𑀸𑀯 𑀤𑁂𑀲𑀦𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸 𑀪𑀩𑁆𑀩𑀸𑀪𑀩𑁆𑀩𑀸’’𑀢𑀺 𑀇𑀫𑀺𑀦𑀸. 𑀅𑀝𑁆𑀞𑀫𑀓𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲. 𑀥𑀫𑁆𑀫𑀢𑀸𑀢𑀺 𑀥𑀫𑁆𑀫𑀲𑀪𑀸𑀯𑁄 𑀧𑀞𑀫𑀲𑁆𑀲 𑀫𑀕𑁆𑀕𑀝𑁆𑀞𑀢𑀸 𑀤𑀼𑀢𑀺𑀬𑀲𑁆𑀲 𑀨𑀮𑀝𑁆𑀞𑀢𑀸. 𑀧𑀞𑀫𑀲𑁆𑀲 𑀯𑀸 𑀧𑀳𑀻𑀬𑀫𑀸𑀦𑀓𑀺𑀮𑁂𑀲𑀢𑀸. 𑀤𑀼𑀢𑀺𑀬𑀲𑁆𑀲 𑀧𑀳𑀻𑀦𑀓𑀺𑀮𑁂𑀲𑀢𑀸. 𑀧𑀼𑀦 𑀅𑀝𑁆𑀞𑀫𑀓𑀲𑁆𑀲𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀲𑁆𑀲. 𑀦𑀸𑀫𑀦𑁆𑀢𑀺 𑀲𑁂𑀓𑁆𑀔𑀸𑀢𑀺 𑀦𑀸𑀫𑀁. 𑀥𑀫𑁆𑀫𑀢𑀸𑀢𑀺 𑀢𑀁𑀢𑀁𑀫𑀕𑁆𑀕𑀝𑁆𑀞𑀢𑀸 𑀳𑁂𑀝𑁆𑀞𑀺𑀫𑀨𑀮𑀝𑁆𑀞𑀢𑀸 𑀘. 𑀧𑀝𑀺𑀧𑀦𑁆𑀦𑀓𑀸𑀦𑀦𑁆𑀢𑀺 𑀫𑀕𑁆𑀕𑀲𑀫𑀗𑁆𑀕𑀻𑀦𑀁. 𑀦𑀸𑀫𑀦𑁆𑀢𑀺 𑀧𑀝𑀺𑀧𑀦𑁆𑀦𑀓𑀸𑀢𑀺 𑀦𑀸𑀫𑀁. 𑀏𑀯𑀁 ‘‘𑀅𑀝𑁆𑀞𑀫𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 𑀅𑀲𑀸𑀥𑀸𑀭𑀡𑀥𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀼 𑀦𑀬𑀤𑀲𑁆𑀲𑀦𑀢𑁆𑀣𑀁 ‘‘𑀏𑀯𑀁 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀏𑀯 𑀳𑀺 𑀳𑀻𑀦𑀸𑀤𑀺𑀪𑀸𑀯𑁄. 𑀢𑀢𑁆𑀣 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸𑀢𑀺 𑀅𑀲𑀸𑀥𑀸𑀭𑀡𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀦𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀅𑀦𑀺𑀬𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀲𑀸𑀥𑀸𑀭𑀡𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀥𑀫𑁆𑀫𑀯𑀺𑀪𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀽𑀫𑀺𑀯𑀺𑀪𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀯𑀺𑀪𑀢𑁆𑀢𑀺𑀜𑁆𑀘 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀲𑁆𑀲𑀦𑀪𑀽𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀲𑁆𑀲𑀦𑀪𑀽𑀫𑀻𑀢𑀺 𑀧𑀞𑀫𑀫𑀕𑁆𑀕𑁄. 𑀬𑀲𑁆𑀫𑀸 𑀧𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀢𑁄 𑀧𑀭𑀁 𑀑𑀓𑁆𑀓𑀦𑁆𑀢𑁄 ¶ , 𑀢𑀲𑁆𑀫𑀸 ‘‘𑀤𑀲𑁆𑀲𑀦𑀪𑀽𑀫𑀺 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀬𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀺𑀫𑁄 𑀳𑁂𑀝𑁆𑀞𑀺𑀫𑁄 𑀫𑀕𑁆𑀕𑁄 𑀉𑀧𑀭𑀺𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀧𑁆𑀧𑀳𑀸𑀬 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀺𑀧𑁆𑀧𑀳𑀸𑀦𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀢𑀣𑀸𑀧𑀺 𑀅𑀭𑀺𑀬𑀫𑀕𑁆𑀕𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁 𑀆𑀲𑀦𑁆𑀦𑀓𑀸𑀭𑀡𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀸𑀯𑀦𑀸𑀪𑀽𑀫𑀺 ¶ 𑀉𑀢𑁆𑀢𑀭𑀺𑀓𑀸𑀦𑀁 𑀨𑀮𑀸𑀦𑀁 𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀜𑀸𑀡𑀼𑀢𑁆𑀢𑀭𑀲𑁆𑀲 𑀢𑀣𑀸𑀯𑀺𑀥𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀘 𑀳𑁄𑀢𑀻𑀢𑀺 𑀲𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀇𑀢𑀭𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀧𑀝𑀺𑀧𑀤𑀸 𑀲𑀫𑀣𑀁 𑀆𑀯𑀳𑀦𑁆𑀢𑀺 𑀏𑀯. 𑀢𑀸𑀲𑀼 𑀲𑀩𑁆𑀩𑀫𑀼𑀤𑀼𑀢𑀸𑀬 𑀤𑀲𑁆𑀲𑀺𑀢𑀸𑀬 𑀲𑁂𑀲𑀸𑀧𑀺 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀆𑀳 𑁋 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀢𑀺 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁, 𑀧𑀼𑀚𑁆𑀚𑀨𑀮𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀧𑀼𑀜𑁆𑀜𑀁, 𑀢𑀤𑁂𑀯 𑀓𑀢𑁆𑀢𑀩𑁆𑀩𑀢𑁄 𑀓𑀺𑀭𑀺𑀬𑀸, 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀢𑁆𑀣𑀼 𑀘𑀸𑀢𑀺 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀧𑀭𑀢𑁄𑀖𑁄𑀲𑀲𑁆𑀲𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲. 𑀲𑀸𑀥𑀸𑀭𑀡𑀦𑁆𑀢𑀺 𑀦 𑀩𑀻𑀚𑀁 𑀯𑀺𑀬 𑀅𑀗𑁆𑀓𑀼𑀭𑀲𑁆𑀲, 𑀤𑀲𑁆𑀲𑀦𑀪𑀽𑀫𑀺𑀆𑀤𑀬𑁄 𑀯𑀺𑀬 𑀯𑀸 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀆𑀤𑀻𑀦𑀁 𑀆𑀯𑁂𑀡𑀺𑀓𑀁, 𑀅𑀣 𑀔𑁄 𑀲𑀸𑀥𑀸𑀭𑀡𑀁, 𑀢𑀤𑀜𑁆𑀜𑀓𑀸𑀭𑀡𑁂𑀳𑀺𑀧𑀺 𑀧𑀭𑀢𑁄𑀖𑁄𑀲𑀲𑁆𑀲 𑀧𑀯𑀢𑁆𑀢𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑁂𑀘𑀺 𑀤𑀸𑀬𑀓𑀲𑁆𑀲 𑀤𑀸𑀦𑀸𑀦𑀼𑀫𑁄𑀤𑀦𑀁 𑀆𑀘𑀺𑀡𑁆𑀡𑀦𑁆𑀢𑀺 𑀤𑀸𑀦𑀁 𑀧𑀭𑀢𑁄𑀖𑁄𑀲𑀲𑁆𑀲 𑀓𑀸𑀭𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀸𑀬𑀓𑁄 𑀧𑀦 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀁 𑀆𑀓𑀗𑁆𑀔𑀦𑁆𑀢𑁄 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀸𑀦𑀁 𑀲𑀯𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀤𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑀲𑀻𑀮𑀲𑀫𑁆𑀧𑀦𑁆𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑁂𑀦 𑀲𑀫𑀸𑀳𑀺𑀢𑁄 𑀥𑀫𑁆𑀫𑀘𑀺𑀦𑁆𑀢𑀸𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀲𑀻𑀮𑀁 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑁆𑀲 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀻𑀮𑀫𑀬’’𑀦𑁆𑀢𑀺𑀆𑀤𑀺. 𑀪𑀸𑀯𑀦𑀸𑀫𑀬𑀦𑁆𑀢𑀺 𑀲𑀫𑀣𑀲𑀗𑁆𑀔𑀸𑀢𑀁 𑀪𑀸𑀯𑀦𑀸𑀫𑀬𑀁. 𑀪𑀸𑀯𑀦𑀸𑀫𑀬𑀺𑀬𑀸𑀢𑀺 𑀉𑀧𑀭𑀺𑀛𑀸𑀦𑀲𑀗𑁆𑀔𑀸𑀢𑀸𑀬 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀘 𑀪𑀸𑀯𑀦𑀸𑀫𑀬𑀺𑀬𑀸. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀜𑁆𑀳𑀺 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀤𑀸𑀦𑀺 𑀬𑀲𑁆𑀫𑀸 𑀤𑀸𑀦𑀁 𑀲𑀻𑀮𑀁 𑀮𑁄𑀓𑀺𑀬𑀪𑀸𑀯𑀦𑀸 𑀘 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀧𑀭𑀢𑁄𑀖𑁄𑀲𑀸𑀤𑀻𑀦𑀁𑀬𑁂𑀯, 𑀅𑀣 𑀔𑁄 𑀬𑀣𑀸𑀓𑁆𑀓𑀫𑀁 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀫𑁆𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀤𑀸𑀦𑀫𑀬’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀯𑀟𑁆𑀠𑁂𑀲𑀺. 𑀢𑀣𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀻𑀦𑀁 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀇𑀫𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀲𑀮𑀯𑀻𑀫𑀁𑀲𑀸𑀬𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬. 𑀅𑀓𑀼𑀲𑀮𑀧𑀭𑀺𑀘𑁆𑀘𑀸𑀕𑁄𑀢𑀺 𑀇𑀫𑀺𑀦𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀢𑀺 𑀫𑀕𑁆𑀕𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁫. 𑀢𑀢𑁆𑀣 ¶ ¶ 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄𑀢𑀺 𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀬𑀲𑁆𑀫𑀸 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁂 𑀅𑀓𑀼𑀲𑀮𑀓𑀼𑀲𑀮𑀥𑀫𑁆𑀫𑁂 𑀧𑀳𑀸𑀢𑀩𑁆𑀩𑀪𑀸𑀯𑀸𑀤𑀺𑀯𑀲𑁂𑀦 𑀦𑀺𑀤𑁆𑀥𑀸𑀭𑀡𑀁 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀦𑀁, 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀪𑀯𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀫𑁆𑀫𑀸 𑀧𑀲𑀢𑁆𑀣𑀸, 𑀲𑀼𑀦𑁆𑀤𑀭𑀸 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀲𑁆𑀲. 𑀲𑀸 𑀧𑀦𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑀸 𑀧𑀼𑀩𑁆𑀩𑀪𑀸𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀸 𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀪𑀯𑀢𑀻𑀢𑀺 𑀧𑀼𑀭𑀺𑀫𑀦𑀬𑁂 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀸 𑀳𑁄𑀢𑀺, 𑀯𑀺𑀓𑁆𑀔𑀫𑁆𑀪𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀺𑀫𑀦𑀬𑁂 𑀧𑀞𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀅𑀢𑁆𑀣𑁄.

𑀬𑁂 𑀘𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀳𑁂𑀢𑀼 𑀬𑁂 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀬𑁄 𑀮𑁄𑀪𑀸𑀤𑀬𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀘 𑀅𑀦𑁂𑀓𑁂 𑀮𑀸𑀫𑀓𑀝𑁆𑀞𑁂𑀦 𑀧𑀸𑀧𑀓𑀸 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁. 𑀇𑀫𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀅𑀭𑀺𑀬𑀲𑁆𑀲 𑀘. 𑀥𑀫𑁆𑀫𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸, 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀯𑀸 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀲𑀫𑁆𑀪𑀯𑀦𑁆𑀢𑀺 𑀉𑀧𑁆𑀧𑀦𑁆𑀦𑀸, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲𑀸𑀢𑀺𑀆𑀤𑀻𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀆𑀤𑀻𑀦𑀁 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀅𑀯𑀺𑀫𑀼𑀢𑁆𑀢𑀸𑀯 𑀲𑀫𑀸𑀦𑀸 ‘‘𑀯𑀺𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀅𑀯𑀺𑀫𑀼𑀢𑁆𑀢𑀺𑀬𑀁 𑀯𑀸 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀫𑀺𑀘𑁆𑀙𑀸 𑀧𑀸𑀧𑀺𑀓𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑁄𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺. 𑀅𑀝𑁆𑀞𑀗𑁆𑀕𑀸 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑀸𑀓𑀸𑀭𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀅𑀦𑁆𑀢𑀤𑁆𑀯𑀬𑀮𑀓𑁆𑀔𑀡𑀸. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀦 𑀨𑀮𑀥𑀫𑁆𑀫𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂 𑀲𑀫𑀸𑀲𑁂𑀯𑀢𑁄 𑀫𑀺𑀘𑁆𑀙𑀸𑀯𑀺𑀫𑁄𑀓𑁆𑀔𑁄 𑀯𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀦 𑀫𑀺𑀘𑁆𑀙𑀸𑀯𑀺𑀫𑁄𑀓𑁆𑀔𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀘 𑀲𑀸𑀭𑀦𑁆𑀢𑀺 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀦𑁆𑀢𑀫𑀲𑁄 𑀧𑀸𑀧𑀁 𑀓𑀢𑁆𑀯𑀸 ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀉𑀧𑁆𑀧𑀦𑁆𑀦𑀫𑁄𑀳𑁄 𑀘. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲𑀸𑀢𑀺 𑀏𑀢𑁆𑀣 𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀉𑀢𑁆𑀢𑀭𑀺𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺.

𑁩𑁬. 𑀏𑀯𑀁 ¶ 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀫𑀼𑀔𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸𑀤𑀺𑀢𑁄 𑀯𑁂𑀭𑀫𑀡𑀺𑀬𑀸𑀤𑀻𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀸𑀮𑀯𑀸𑀤𑀺𑀲𑁆𑀲𑀸𑀢𑀺 ¶ 𑀮𑀓𑁆𑀔𑀡𑀯𑀘𑀦𑀁. 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀧𑀼𑀦 ‘‘𑀬𑁂 𑀘 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀫𑀼𑀔𑁂𑀦𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀏𑀯 𑀧𑀭𑀺𑀯𑀢𑁆𑀢𑀦𑀁 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀸𑀢𑀺 𑀧𑀘𑁆𑀘𑀓𑁆𑀔𑀸. 𑀲𑀳𑀥𑀫𑁆𑀫𑀺𑀓𑀸𑀢𑀺 𑀲𑀓𑀸𑀭𑀡𑀸. 𑀕𑀸𑀭𑀬𑁆𑀳𑀸𑀢𑀺 𑀕𑀭𑀳𑀺𑀢𑀩𑁆𑀩𑀬𑀼𑀢𑁆𑀢𑀸. 𑀯𑀸𑀤𑀸𑀦𑀼𑀯𑀸𑀤𑀸𑀢𑀺 𑀯𑀸𑀤𑀸 𑀘𑁂𑀯 𑀅𑀦𑀼𑀯𑀸𑀤𑀸 𑀘. ‘‘𑀯𑀸𑀤𑀸𑀦𑀼𑀧𑀸𑀢𑀸’’𑀢𑀺𑀧𑀺 𑀧𑀸𑀞𑁄, 𑀯𑀸𑀤𑀸𑀦𑀼𑀧𑀯𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀧𑀼𑀚𑁆𑀚𑀸𑀢𑀺 𑀧𑀽𑀚𑀦𑀻𑀬𑀸. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀺𑀢𑀩𑁆𑀩𑀸.

𑀧𑀼𑀦 ‘‘𑀬𑁂 𑀘 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀤𑁆𑀯𑀬𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀸𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀢𑁆𑀣𑀼𑀓𑀸𑀫𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀪𑀸𑀯𑀬𑀺𑀢𑀩𑁆𑀩𑀸 𑀩𑀳𑀼𑀮𑀻𑀓𑀸𑀢𑀩𑁆𑀩𑀸𑀢𑀺 𑀧𑀤𑀤𑁆𑀯𑀬𑀁 𑀓𑀺𑀮𑁂𑀲𑀓𑀸𑀫𑀯𑀲𑁂𑀦. 𑀢𑁂𑀲𑀁 𑀅𑀥𑀫𑁆𑀫𑁄𑀢𑀺 𑀪𑀸𑀯𑁂𑀢𑀩𑁆𑀩𑁄 𑀦𑀸𑀫 𑀥𑀫𑁆𑀫𑁄 𑀲𑀺𑀬𑀸, 𑀓𑀸𑀫𑀸 𑀘 𑀢𑁂𑀲𑀁 𑀪𑀸𑀯𑁂𑀢𑀩𑁆𑀩𑀸 𑀇𑀘𑁆𑀙𑀺𑀢𑀸, 𑀓𑀸𑀫𑁂𑀳𑀺 𑀘 𑀯𑁂𑀭𑀫𑀡𑀻 𑀓𑀸𑀫𑀸𑀦𑀁 𑀧𑀝𑀺𑀧𑀓𑁆𑀔𑁄, 𑀇𑀢𑀺 𑀲𑀸 𑀢𑁂𑀲𑀁 𑀅𑀥𑀫𑁆𑀫𑁄 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀬𑁆𑀬𑀸𑀦𑀺𑀓𑁄 𑀥𑀫𑁆𑀫𑁄𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄. 𑀤𑀼𑀓𑁆𑀔𑁄𑀢𑀺 𑀧𑀸𑀧𑀁 𑀦𑀺𑀚𑁆𑀚𑀭𑀸𑀧𑁂𑀲𑁆𑀲𑀸𑀫𑀸𑀢𑀺 𑀧𑀯𑀢𑁆𑀢𑀺𑀢𑀁 𑀲𑀭𑀻𑀭𑀢𑀸𑀧𑀦𑀁 𑀯𑀤𑀢𑀺. 𑀲𑀼𑀔𑁄𑀢𑀺 𑀅𑀦𑀯𑀚𑁆𑀚𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀼𑀔𑀁. 𑀏𑀢𑁂𑀲𑀼𑀧𑀺 𑀯𑀸𑀭𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀫𑁆𑀫𑀪𑀸𑀯𑀸𑀧𑀢𑁆𑀢𑀺 𑀯𑀢𑁆𑀢𑀩𑁆𑀩𑀸. 𑀇𑀤𑀸𑀦𑀺 𑀅𑀲𑀼𑀪𑀲𑀜𑁆𑀜𑀸𑀤𑀺𑀫𑀼𑀔𑁂𑀦 𑀲𑀼𑀪𑀲𑀜𑁆𑀜𑀸𑀤𑀺𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀯𑀲𑁂𑀦 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸 𑀅𑀲𑀼𑀪𑀢𑁄 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄’’𑀢𑀺. ‘‘𑀬𑀁 𑀬𑀁 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀓𑁆𑀔𑀲𑁆𑀲 𑀮𑀓𑁆𑀔𑀡𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀅𑀥𑀺𑀆𑀧𑀦𑁆𑀦𑁄, 𑀅𑀪𑀺𑀉𑀧𑀕𑀢𑁄 𑀧𑀭𑀺𑀜𑁆𑀜𑀸𑀢𑁄𑀢𑀺 𑀅𑀢𑁆𑀣𑁄.

𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁭. 𑀢𑀢𑁆𑀣 ¶ ¶ 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄𑀢𑀺 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀬𑀣𑀸 𑀯𑁂𑀯𑀘𑀦𑀦𑀺𑀤𑁆𑀤𑁂𑀲𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀯𑁂𑀯𑀘𑀦𑁂𑀳𑀺 𑀦𑀺𑀤𑁆𑀤𑀺𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑁂𑀯𑀘𑀦𑁂𑀳𑀻𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀧𑀤𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀏𑀯. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀓𑀁 𑀥𑀫𑁆𑀫𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀳𑀺 𑀦𑀺𑀤𑁆𑀤𑀺𑀲𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀓𑀸𑀮𑁂 𑀆𑀬𑀢𑀺𑀜𑁆𑀘 𑀓𑀲𑁆𑀲𑀘𑀺 𑀓𑀣𑀜𑁆𑀘𑀺 𑀢𑀤𑀢𑁆𑀣𑀧𑀝𑀺𑀩𑁄𑀥𑁄 𑀲𑀺𑀬𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀯𑀺𑀳𑀺𑀢𑀸𑀦𑀁 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀢𑀤𑀢𑁆𑀣𑀸𑀯𑀩𑁄𑀥𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀢𑁂𑀦𑁂𑀯 𑀧𑀤𑁂𑀦 𑀧𑀼𑀦 𑀯𑀘𑀦𑁂 𑀢𑀤𑀜𑁆𑀜𑁂𑀲𑀁 𑀢𑀢𑁆𑀣 𑀅𑀥𑀺𑀕𑀢𑀢𑀸 𑀲𑀺𑀬𑀸𑀢𑀺 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀧𑀼𑀦𑀧𑁆𑀧𑀼𑀦𑀁 𑀢𑀤𑀢𑁆𑀣𑀲𑀮𑁆𑀮𑀓𑁆𑀔𑀡𑁂 𑀅𑀲𑀫𑁆𑀫𑁄𑀲𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀦𑁂𑀓𑁂𑀧𑀺 𑀅𑀢𑁆𑀣𑀸 𑀲𑀫𑀸𑀦𑀩𑁆𑀬𑀜𑁆𑀚𑀦𑀸 𑀳𑁄𑀦𑁆𑀢𑀻𑀢𑀺 𑀬𑀸 𑀅𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸 𑀲𑀺𑀬𑀸, 𑀢𑀲𑁆𑀲𑀸 𑀧𑀭𑀺𑀯𑀚𑁆𑀚𑀦𑀢𑁆𑀣𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀅𑀦𑀜𑁆𑀜𑀲𑁆𑀲 𑀯𑀘𑀦𑁂 𑀅𑀦𑁂𑀓𑀸𑀳𑀺 𑀢𑀸𑀳𑀺 𑀢𑀸𑀳𑀺 𑀲𑀜𑁆𑀜𑀸𑀳𑀺 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀜𑀸𑀧𑀦𑀢𑁆𑀣𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀲𑁂𑀬𑁆𑀬𑀣𑀸𑀧𑀺 𑀦𑀺𑀖𑀡𑁆𑀝𑀼𑀲𑀢𑁆𑀣𑁂. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀢𑀦𑁆𑀢𑀺𑀅𑀢𑁆𑀣𑀼𑀧𑀦𑀺𑀩𑀦𑁆𑀥𑀦𑀧𑀭𑀸𑀯𑀩𑁄𑀥𑀦𑀸𑀦𑀁 𑀲𑀼𑀔𑀲𑀺𑀤𑁆𑀥𑀺𑀬𑀸𑀧𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀢𑁆𑀢𑀦𑁄 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀢𑁆𑀣𑀁, 𑀯𑁂𑀦𑁂𑀬𑁆𑀬𑀸𑀦𑀁 𑀢𑀢𑁆𑀣 𑀩𑀻𑀚𑀸𑀯𑀸𑀧𑀦𑀢𑁆𑀣𑀁 𑀯𑀸 𑀧𑀭𑀺𑀬𑀸𑀬𑀯𑀘𑀦𑀁 𑀪𑀕𑀯𑀸 𑀦𑀺𑀤𑁆𑀤𑀺𑀲𑀢𑀺.

𑀓𑀺𑀁 𑀩𑀳𑀼𑀦𑀸 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀬𑀣𑀸 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀣𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀘𑀸𑀭𑀸, 𑀢𑀣𑀸 𑀲𑀩𑁆𑀩𑀲𑁆𑀫𑀺𑀁 𑀲𑀤𑁆𑀤𑀯𑁄𑀳𑀸𑀭𑁂𑀢𑀺 𑀏𑀓𑀫𑁆𑀧𑀺 𑀅𑀢𑁆𑀣𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀩𑁄𑀥𑁂𑀢𑀺, 𑀦 𑀢𑀢𑁆𑀣 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀅𑀢𑁆𑀣𑀲𑁆𑀲. 𑀦𑀸𑀧𑀺 𑀥𑀫𑁆𑀫𑀤𑁂𑀲𑀦𑀸𑀳𑀸𑀦𑀺, 𑀆𑀯𑁂𑀡𑀺𑀓𑁄𑀯𑀸𑀬𑀁 𑀩𑀼𑀤𑁆𑀥𑀥𑀫𑁆𑀫𑁄𑀢𑀺 𑀧𑀭𑀺𑀬𑀸𑀬𑀤𑁂𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀲𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀬𑀸 𑀪𑀯𑀺𑀲𑁆𑀲𑀲𑁆𑀲 𑀅𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀯𑀺𑀲𑁆𑀲𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀅𑀦𑀸𑀕𑀢𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲. ‘‘𑀅𑀯𑀲𑁆𑀲𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀧𑀯𑀢𑁆𑀢𑀺𑀬𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀕𑀢𑀢𑁆𑀣𑀯𑀺𑀲𑀬𑀸 𑀢𑀡𑁆𑀳𑀸 𑀆𑀲𑀸. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑀯𑀺𑀲𑀬𑀸 𑀢𑀡𑁆𑀳𑀸 𑀧𑀺𑀳𑀸𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄.

𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀮𑀦𑀸𑀢𑀺 𑀬𑀸𑀬 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁 𑀧𑀝𑀺𑀧𑀸𑀮𑁂𑀢𑀺 𑀆𑀕𑀫𑁂𑀢𑀺, 𑀬𑀸𑀬 𑀯𑀸 𑀦𑀺𑀧𑁆𑀨𑀦𑁆𑀦𑀁 𑀅𑀢𑁆𑀣𑀁 𑀧𑀝𑀺𑀧𑀸𑀮𑁂𑀢𑀺 𑀭𑀓𑁆𑀔𑀢𑀺. 𑀅𑀬𑀁 𑀅𑀪𑀺𑀦𑀦𑁆𑀤𑀦𑀸 ¶ 𑀦𑀸𑀫, 𑀬𑀣𑀸𑀮𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀓𑁂𑀮𑀸𑀬𑀦𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀁 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀺𑀬𑀁 𑀯𑀸 𑀜𑀸𑀢𑀺’’𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀥𑀫𑁆𑀫𑀦𑁆𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀥𑀫𑁆𑀫𑀁, 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀳𑀺𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀝𑀺𑀓𑁆𑀓𑀽𑀮𑀢𑁄 𑀯𑀸 𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀓𑀽𑀮𑁂𑀧𑀺 𑀳𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀲𑀢𑁆𑀢𑀁, 𑀲𑀗𑁆𑀔𑀸𑀭𑀁 𑀯𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀢𑁄 𑀅𑀪𑀺𑀦𑀦𑁆𑀤𑀢𑀺.

𑀬𑀸𑀲𑀼 𑀅𑀦𑁂𑀓𑀥𑀸𑀢𑀽𑀲𑀼 𑀧𑀯𑀢𑁆𑀢𑀺𑀬𑀸 𑀢𑀡𑁆𑀳𑀸 ‘‘𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸’’𑀢𑀺 𑀯𑀼𑀢𑁆𑀢𑀸, 𑀢𑀸 𑀥𑀸𑀢𑀼𑀬𑁄 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁧𑁭𑁨 𑀆𑀤𑀬𑁄) 𑀓𑀸𑀫𑀥𑀸𑀢𑀼𑀆𑀤𑀬𑁄 𑀅𑀜𑁆𑀜𑀸𑀧𑀺 𑀅𑀦𑁂𑀓𑀥𑀸𑀢𑀼𑀬𑁄 𑀆𑀕𑀢𑀸, 𑀢𑀸𑀲𑀫𑁆𑀧𑀺 𑀏𑀢𑁆𑀣𑁂𑀯 𑀲𑀫𑀯𑀭𑁄𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀸𑀭𑀲𑁂𑀯𑁂𑀢𑁆𑀣 𑀤𑀲𑁆𑀲𑀺𑀢𑀸. 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸𑀢𑀺𑀆𑀤𑀺 𑀢𑀸𑀲𑀼 𑀥𑀸𑀢𑀽𑀲𑀼 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀘 𑀅𑀚𑁆𑀛𑀢𑁆𑀢𑀺𑀓𑀸 𑀥𑀸𑀢𑀼𑀬𑁄 𑀲𑀢𑁆𑀢 𑀘 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼 𑀘 𑀥𑀫𑁆𑀫𑀸𑀭𑀫𑁆𑀫𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀙𑀴𑁂𑀯 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀡𑁆𑀳𑀸𑀧𑀓𑁆𑀔𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀧𑀺 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸 𑀢𑀲𑁆𑀲 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀧𑀺𑀳𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀘𑀦𑀢𑁄, 𑀓𑁄 𑀧𑀦 𑀯𑀸𑀤𑁄 𑀕𑁂𑀳𑀲𑁆𑀲𑀺𑀢𑁂𑀲𑀼 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑁂𑀲𑀽𑀢𑀺 𑀇𑀫𑀸𑀦𑀺 𑀘𑀢𑀼𑀯𑀻𑀲𑀢𑀺 𑀧𑀤𑀸𑀦𑀺 ‘‘𑀢𑀡𑁆𑀳𑀸𑀧𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁. 𑀕𑁂𑀳𑀲𑁆𑀲𑀺𑀢𑀸 𑀧𑀦 𑀉𑀧𑁂𑀓𑁆𑀔𑀸 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀢𑀸𑀬 𑀬𑀣𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀬𑀸 𑀙 𑀉𑀧𑁂𑀓𑁆𑀔𑀸 𑀕𑁂𑀳𑀲𑁆𑀲𑀺𑀢𑀸, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁.

𑁩𑁮. 𑀇𑀤𑀸𑀦𑀺 𑀢𑁂𑀲𑀁 𑀉𑀧𑀯𑀺𑀘𑀸𑀭𑀸𑀦𑀁 𑀢𑀡𑁆𑀳𑀸𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀬𑁂𑀯 𑀧𑀢𑁆𑀣𑀦𑀸𑀓𑀸𑀭𑁂𑀦 𑀥𑀫𑁆𑀫𑀦𑀦𑁆𑀤𑀻’’𑀢𑀺𑀆𑀤𑀺𑀫𑀸𑀳. 𑀧𑀼𑀦 𑀘𑀺𑀢𑁆𑀢𑀁 𑀧𑀜𑁆𑀜𑀸 𑀪𑀕𑀯𑀸 𑀥𑀫𑁆𑀫𑁄 𑀲𑀗𑁆𑀖𑁄 𑀲𑀻𑀮𑀁 𑀘𑀸𑀕𑁄𑀢𑀺 𑀇𑀫𑁂𑀲𑀁 𑀧𑀭𑀺𑀬𑀸𑀬𑀯𑀘𑀦𑀦𑀺𑀤𑁆𑀥𑀸𑀭𑀡𑁂𑀦 𑀯𑁂𑀯𑀘𑀦𑀳𑀸𑀭𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀁 𑀫𑀦𑁄 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀅𑀜𑁆𑀜𑀫𑁆𑀧𑀺 𑀏𑀯𑀁 𑀚𑀸𑀢𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄𑀢𑀺 (𑀫𑀳𑀸𑀦𑀺. 𑁧𑁪𑁯) 𑀏𑀯𑀫𑀸𑀤𑀻𑀦𑀫𑁆𑀧𑀺 𑀧𑀜𑁆𑀜𑀸𑀬 𑀧𑀭𑀺𑀬𑀸𑀬𑀲𑀤𑁆𑀤𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ¶ 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀔𑀬𑁂 𑀜𑀸𑀡𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀯𑁂𑀯𑀘𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸 𑀧𑀜𑁆𑀜𑀸𑀢𑀺 𑀇𑀢𑀭𑁂𑀳𑀺 𑀯𑁂𑀯𑀘𑀦𑁂𑀳𑀺 𑀯𑀼𑀢𑁆𑀢𑀸 𑀲𑀩𑁆𑀩𑀸 𑀧𑀜𑁆𑀜𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀺𑀓𑀸𑀢𑀺 𑀅𑀢𑁆𑀣𑁄. ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀦𑀸 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀯𑁂𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦𑀸𑀢𑀺 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦. 𑀬𑀣𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 ¶ 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩) ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀸 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺 𑀅𑀦𑁂𑀓𑁂𑀳𑀺 𑀯𑁂𑀯𑀘𑀦𑁂𑀳𑀺 𑀪𑀕𑀯𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀩𑀮𑀦𑀺𑀧𑁆𑀨𑀢𑁆𑀢𑀺𑀕𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀬𑀸𑀯 𑀥𑀫𑁆𑀫𑁄𑀪𑀸𑀲𑀧𑀚𑁆𑀚𑁄𑀢𑀓𑀭𑁄𑀢𑀺, 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁂𑀯𑀘𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀸𑀦𑀺𑀧𑀺 𑀓𑀢𑀺𑀧𑀬𑀸𑀦𑀺 𑀏𑀯 𑀪𑀕𑀯𑀢𑁄 𑀯𑁂𑀯𑀘𑀦𑀸𑀦𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀳𑀺 𑀩𑀼𑀤𑁆𑀥𑀕𑀼𑀡𑀸 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑀺 𑀘 𑀪𑀕𑀯𑀢𑁄 𑀦𑀸𑀫𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫 𑀲𑀳𑀲𑁆𑀲𑀢𑁄’’𑀢𑀺. (𑀉𑀤𑀸. 𑀅𑀝𑁆𑀞. 𑁫𑁩);

𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀁 ‘‘𑀅𑀲𑀗𑁆𑀔𑀢’’𑀦𑁆𑀢𑀺𑀆𑀤𑀻𑀲𑀼 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀦𑁆𑀢𑁄 𑀯𑀺𑀦𑀸𑀲𑁄𑀢𑀺 𑀅𑀦𑀦𑁆𑀢𑀁. 𑀆𑀲𑀯𑀸𑀦𑀁 𑀅𑀦𑀸𑀭𑀫𑁆𑀫𑀡𑀢𑁄 𑀅𑀦𑀸𑀲𑀯𑀁. 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸 𑀲𑀘𑁆𑀘𑀁. 𑀲𑀁𑀲𑀸𑀭𑀲𑁆𑀲 𑀧𑀭𑀢𑀻𑀭𑀪𑀸𑀯𑀢𑁄 𑀧𑀸𑀭𑀁. 𑀦𑀺𑀧𑀼𑀡𑀜𑀸𑀡𑀯𑀺𑀲𑀬𑀢𑁆𑀢𑀸 𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸 𑀘 𑀦𑀺𑀧𑀼𑀡. 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸𑀢𑀺 𑀲𑀼𑀤𑀼𑀤𑁆𑀤𑀲𑀁. 𑀉𑀧𑁆𑀧𑀸𑀤𑀚𑀭𑀸𑀳𑀺 𑀅𑀦𑀩𑁆𑀪𑀸𑀳𑀢𑀢𑁆𑀢𑀸 𑀅𑀚𑀚𑁆𑀚𑀭𑀁. 𑀣𑀺𑀭𑀪𑀸𑀯𑁂𑀦 𑀥𑀼𑀯𑀁. 𑀚𑀭𑀸𑀫𑀭𑀡𑁂𑀳𑀺 𑀅𑀧𑀮𑀼𑀚𑁆𑀚𑀦𑀢𑁄 𑀅𑀧𑀮𑁄𑀓𑀺𑀢𑀁. 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀘 𑀅𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀅𑀦𑀺𑀤𑀲𑁆𑀲𑀦𑀁. 𑀭𑀸𑀕𑀸𑀤𑀺𑀧𑀧𑀜𑁆𑀘𑀸𑀪𑀸𑀯𑁂𑀦 𑀦𑀺𑀧𑁆𑀧𑀧𑀜𑁆𑀘𑀁. 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑀳𑁂𑀢𑀼𑀢𑀸𑀬 𑀲𑀦𑁆𑀢𑀁.

𑀅𑀫𑀢𑀳𑁂𑀢𑀼𑀢𑀸𑀬 𑀪𑀗𑁆𑀕𑀸𑀪𑀸𑀯𑀢𑁄 𑀘 𑀅𑀫𑀢𑀁. 𑀉𑀢𑁆𑀢𑀫𑀝𑁆𑀞𑁂𑀦 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀁. 𑀅𑀲𑀺𑀯𑀸𑀦𑀁 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀅𑀪𑀸𑀯𑁂𑀦 𑀲𑀺𑀯𑀁. 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀯𑀪𑀸𑀯𑁂𑀦 𑀔𑁂𑀫𑀁. 𑀢𑀡𑁆𑀳𑀸 𑀔𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀓𑁆𑀔𑀬𑁄. 𑀓𑀢𑀧𑀼𑀜𑁆𑀜𑁂𑀳𑀺𑀧𑀺 𑀓𑀤𑀸𑀘𑀺𑀤𑁂𑀯 𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀅𑀘𑁆𑀙𑀭𑀺𑀬𑀁. 𑀅𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀅𑀩𑁆𑀪𑀼𑀢𑀁 ¶ . 𑀅𑀦𑀦𑁆𑀢𑀭𑀸𑀬𑀢𑁆𑀢𑀸 𑀅𑀦𑀻𑀢𑀺𑀓𑀁. 𑀅𑀦𑀦𑁆𑀢𑀭𑀸𑀬𑀪𑀸𑀯𑀳𑁂𑀢𑀼𑀢𑁄 𑀅𑀦𑀻𑀢𑀺𑀓𑀥𑀫𑁆𑀫𑀁 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁭𑁭-𑁪𑁦𑁯).

𑀅𑀦𑀺𑀩𑁆𑀩𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀅𑀚𑀸𑀢𑀁. 𑀢𑀢𑁄 𑀏𑀯 𑀅𑀪𑀽𑀢𑀁. 𑀉𑀪𑀬𑁂𑀦𑀸𑀧𑀺 𑀉𑀧𑁆𑀧𑀸𑀤𑀭𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀦𑀘𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀅𑀦𑀼𑀧𑀤𑁆𑀤𑀯𑀁. 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀓𑀢𑀦𑁆𑀢𑀺 𑀅𑀓𑀢𑀁. 𑀦𑀢𑁆𑀣𑀺 𑀏𑀢𑁆𑀣 𑀲𑁄𑀓𑁄𑀢𑀺 𑀅𑀲𑁄𑀓𑀁. 𑀲𑁄𑀓𑀳𑁂𑀢𑀼𑀯𑀺𑀕𑀫𑁂𑀦 𑀯𑀺𑀲𑁄𑀓𑀁. 𑀓𑁂𑀦𑀘𑀺 𑀅𑀦𑀼𑀧𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀅𑀦𑀼𑀧𑀲𑀕𑁆𑀕𑀁. 𑀅𑀦𑀼𑀧𑀲𑀕𑁆𑀕𑀪𑀸𑀯𑀳𑁂𑀢𑀼𑀢𑁄 𑀅𑀦𑀼𑀧𑀲𑀕𑁆𑀕𑀥𑀫𑁆𑀫𑀁.

𑀕𑀫𑁆𑀪𑀻𑀭𑀜𑀸𑀡𑀕𑁄𑀘𑀭𑀢𑁄 ¶ 𑀕𑀫𑁆𑀪𑀻𑀭𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀺𑀦𑀸 𑀧𑀲𑁆𑀲𑀺𑀢𑀼𑀁 𑀧𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀧𑁆𑀧𑀲𑁆𑀲𑀁. 𑀲𑀩𑁆𑀩𑀮𑁄𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀉𑀢𑁆𑀢𑀭𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁. 𑀲𑀫𑀲𑁆𑀲 𑀲𑀤𑀺𑀲𑀲𑁆𑀲 𑀅𑀪𑀸𑀯𑁂𑀦 𑀅𑀲𑀫𑀁. 𑀧𑀝𑀺𑀪𑀸𑀕𑀸𑀪𑀸𑀯𑁂𑀦 𑀅𑀧𑁆𑀧𑀝𑀺𑀲𑀫𑀁. 𑀉𑀢𑁆𑀢𑀫𑀝𑁆𑀞𑁂𑀦 𑀚𑁂𑀝𑁆𑀞𑀁, 𑀧𑀸𑀲𑀁𑀲𑀢𑀫𑀢𑁆𑀢𑀸 𑀯𑀸 𑀚𑁂𑀝𑁆𑀞𑀁. 𑀲𑀁𑀲𑀸𑀭𑀤𑀼𑀓𑁆𑀔𑀝𑁆𑀝𑀺𑀢𑁂𑀳𑀺 𑀮𑁂𑀢𑀩𑁆𑀩𑀢𑁄 𑀮𑁂𑀡𑀁. 𑀢𑀢𑁄 𑀭𑀓𑁆𑀔𑀡𑀢𑁄 𑀢𑀸𑀡𑀁. 𑀭𑀡𑀸𑀪𑀸𑀯𑁂𑀦 𑀅𑀭𑀡𑀁. 𑀅𑀗𑁆𑀕𑀡𑀸𑀪𑀸𑀯𑁂𑀦 𑀅𑀦𑀗𑁆𑀕𑀡𑀁. 𑀦𑀺𑀤𑁆𑀤𑁄𑀲𑀢𑀸𑀬 𑀅𑀓𑀸𑀘𑀁. 𑀭𑀸𑀕𑀸𑀤𑀺𑀫𑀮𑀸𑀧𑀕𑀫𑁂𑀦 𑀯𑀺𑀫𑀮𑀁. 𑀘𑀢𑀽𑀳𑀺 𑀑𑀖𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀢𑁄 𑀤𑀻𑀧𑁄. 𑀲𑀁𑀲𑀸𑀭𑀯𑀽𑀧𑀲𑀫𑀲𑀼𑀔𑀢𑀸𑀬 𑀲𑀼𑀔𑀁. 𑀧𑀫𑀸𑀡𑀓𑀭𑀥𑀫𑁆𑀫𑀸𑀪𑀸𑀯𑀢𑁄 𑀅𑀧𑁆𑀧𑀫𑀸𑀡𑀁, 𑀕𑀡𑁂𑀢𑀼𑀁 𑀏𑀢𑀲𑁆𑀲 𑀦 𑀲𑀓𑁆𑀓𑀸𑀢𑀺 𑀘 𑀅𑀧𑁆𑀧𑀫𑀸𑀡𑀁. 𑀲𑀁𑀲𑀸𑀭𑀲𑀫𑀼𑀤𑁆𑀤𑁂 𑀅𑀦𑁄𑀲𑀻𑀤𑀦𑀝𑁆𑀞𑀸𑀦𑀢𑀸𑀬 𑀧𑀢𑀺𑀝𑁆𑀞𑀸. 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀘 𑀅𑀓𑀺𑀜𑁆𑀘𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀁 𑀲𑀢𑁆𑀢𑀸𑀦𑀁 𑀲𑀸𑀭𑁄𑀢𑀺 𑀲𑀻𑀮𑀲𑀸𑀭𑀸𑀤𑀺𑀲𑀸𑀭𑀕𑀼𑀡𑀬𑁄𑀕𑀢𑁄 𑀲𑀢𑁆𑀢𑁂𑀲𑀼 𑀲𑀸𑀭𑀪𑀽𑀢𑁄. 𑀲𑀢𑁆𑀢𑀸𑀦𑀁 𑀫𑀡𑁆𑀟𑁄𑀢𑀺 𑀕𑁄𑀭𑀲𑁂𑀲𑀼 𑀲𑀧𑁆𑀧𑀺𑀫𑀡𑁆𑀟𑁄 𑀯𑀺𑀬 𑀲𑀢𑁆𑀢𑁂𑀲𑀼 𑀫𑀡𑁆𑀟𑀪𑀽𑀢𑁄. 𑀲𑀸𑀭𑀕𑀼𑀡𑀯𑀲𑁂𑀦𑁂𑀯 𑀲𑀢𑁆𑀢𑁂𑀲𑀼 𑀉𑀤𑁆𑀥𑀭𑀺𑀢𑀩𑁆𑀩𑀢𑁄 𑀲𑀢𑁆𑀢𑀸𑀦𑀁 𑀉𑀤𑁆𑀥𑀸𑀭𑁄. 𑀦𑀺𑀘𑁆𑀘𑀮𑀕𑀼𑀡𑀢𑀸𑀬 𑀲𑀢𑁆𑀢𑀸𑀦𑀁 𑀏𑀲𑀺𑀓𑀸. 𑀕𑀼𑀡𑀲𑁄𑀪𑀸𑀲𑀼𑀭𑀪𑀺𑀪𑀸𑀯𑁂𑀦 𑀲𑀢𑁆𑀢𑀸𑀦𑀁 𑀧𑀲𑀽𑀦𑀁 𑀲𑀼𑀭𑀪𑀺 𑀓𑀼𑀲𑀼𑀫𑀦𑁆𑀢𑀺 𑀅𑀢𑁆𑀣𑁄.

𑀕𑀼𑀡𑁂𑀲𑀼 𑀉𑀢𑁆𑀢𑀫𑀗𑁆𑀕𑀁 𑀧𑀜𑁆𑀜𑀸 𑀢𑀲𑁆𑀲𑀸 𑀉𑀧𑀲𑁄𑀪𑀸𑀳𑁂𑀢𑀼𑀢𑀸𑀬 𑀲𑀻𑀮𑀁 𑀉𑀢𑁆𑀢𑀫𑀗𑁆𑀕𑁄𑀧𑀲𑁄𑀪𑀦𑀁 𑀯𑀼𑀢𑁆𑀢𑀁. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀦𑀺𑀚𑁆𑀛𑀦𑁆𑀢𑀸 𑀦𑀸𑀫 𑀕𑀼𑀡𑀸 𑀦𑀢𑁆𑀣𑀻𑀢𑀺 ‘‘𑀦𑀺𑀥𑀸𑀦𑀜𑁆𑀘 𑀲𑀻𑀮𑀁 𑀲𑀩𑁆𑀩𑀤𑁄𑀪𑀕𑁆𑀕𑀲𑀫𑀢𑀺𑀓𑁆𑀓𑀫𑀦𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁬𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀇𑀚𑁆𑀛𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁩.𑁩𑁩𑁭; 𑀲𑀁. 𑀦𑀺. 𑁪.𑁩𑁫𑁨; 𑀅. 𑀦𑀺. 𑁮.𑁩𑁫). 𑀲𑀺𑀧𑁆𑀧𑀦𑁆𑀢𑀺 𑀥𑀦𑀼𑀲𑀺𑀧𑁆𑀧𑀁. 𑀥𑀜𑁆𑀜𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀁. 𑀥𑀫𑁆𑀫𑀯𑁄𑀮𑁄𑀓𑀦𑀢𑀸𑀬𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀥𑀫𑁆𑀫𑀲𑁆𑀲 𑀯𑁄𑀮𑁄𑀓𑀦𑀪𑀸𑀯𑁂𑀦 ¶ . 𑀯𑁄𑀮𑁄𑀓𑀦𑀝𑁆𑀞𑁂𑀦𑀸𑀢𑀺 𑀲𑀢𑁆𑀢𑀪𑀽𑀫𑀓𑀸𑀤𑀺𑀧𑀸𑀲𑀸𑀤𑁂 𑀯𑀺𑀬 𑀲𑀻𑀮𑁂 𑀞𑀢𑁆𑀯𑀸 𑀅𑀪𑀺𑀜𑁆𑀜𑀸𑀘𑀓𑁆𑀔𑀼𑀦𑀸 𑀮𑁄𑀓𑀲𑁆𑀲 𑀯𑁄𑀮𑁄𑀓𑁂𑀢𑀼𑀁 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀪𑀽𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀘 𑀲𑀻𑀮𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲𑀸𑀧𑀺 𑀢𑀤𑀦𑀼𑀯𑀢𑁆𑀢𑀦𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁯. 𑀢𑀢𑁆𑀣 ¶ 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑁄𑀢𑀺 𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀓𑀸 𑀧𑀦𑀸𑀬𑀁 𑀧𑀜𑁆𑀜𑀢𑁆𑀢𑀻𑀢𑀺? 𑀆𑀳 ‘‘𑀬𑀸 𑀧𑀓𑀢𑀺𑀓𑀣𑀸𑀬 𑀤𑁂𑀲𑀦𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀤𑁂𑀲𑀦𑀸𑀳𑀸𑀭𑀸𑀤𑀬𑁄 𑀯𑀺𑀬 𑀅𑀲𑁆𑀲𑀸𑀤𑀸𑀤𑀺𑀧𑀤𑀢𑁆𑀣𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀅𑀓𑀢𑁆𑀯𑀸 𑀪𑀕𑀯𑀢𑁄 𑀲𑀸𑀪𑀸𑀯𑀺𑀓𑀥𑀫𑁆𑀫𑀓𑀣𑀸𑀬 𑀤𑁂𑀲𑀦𑀸. 𑀬𑀸 𑀢𑀲𑁆𑀲𑀸 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑁄. 𑀬𑀲𑁆𑀫𑀸 𑀧𑀦 𑀲𑀸 𑀪𑀕𑀯𑀢𑁄 𑀢𑀣𑀸 𑀢𑀣𑀸 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀦𑀺𑀓𑁆𑀔𑁂𑀧𑁄. 𑀢𑀲𑁆𑀲 𑀘𑀸𑀬𑀁 𑀳𑀸𑀭𑁄 𑀤𑀼𑀓𑁆𑀔𑀸𑀤𑀺𑀲𑀗𑁆𑀔𑀸𑀢𑁂 𑀪𑀸𑀕𑁂 𑀧𑀓𑀸𑀭𑁂𑀳𑀺 𑀜𑀸𑀧𑁂𑀢𑀺, 𑀅𑀲𑀗𑁆𑀓𑀭𑀢𑁄 𑀯𑀸 𑀞𑀧𑁂𑀢𑀺, 𑀢𑀲𑁆𑀫𑀸 ‘‘𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀧𑀓𑀢𑀺𑀓𑀣𑀸𑀬 𑀤𑁂𑀲𑀦𑀸𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀓𑀸 𑀘 𑀧𑀓𑀢𑀺𑀓𑀣𑀸𑀬 𑀤𑁂𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀅𑀢𑀻𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀅𑀪𑀺𑀦𑁆𑀤𑀺𑀢𑁆𑀯𑀸 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑀢𑀸𑀲𑀸𑀫𑀜𑁆𑀜𑁂𑀦 𑀬𑀸 𑀓𑀼𑀘𑁆𑀙𑀺𑀢𑀪𑀸𑀯𑀸𑀤𑀺𑀫𑀼𑀔𑁂𑀦 𑀏𑀓𑀚𑁆𑀛𑀁 𑀕𑀳𑀡𑀲𑁆𑀲 𑀓𑀸𑀭𑀡𑀪𑀽𑀢𑀸 𑀧𑀜𑁆𑀜𑀢𑁆𑀢𑀺, 𑀓𑀸 𑀧𑀦 𑀲𑀸𑀢𑀺? 𑀦𑀸𑀫𑀧𑀜𑁆𑀜𑀢𑁆𑀢𑀺𑀦𑀺𑀩𑀦𑁆𑀥𑀦𑀸 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺. ‘‘𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑁄 𑀲𑀤𑁆𑀤𑁄 𑀏𑀯𑀸’’𑀢𑀺 𑀅𑀧𑀭𑁂. 𑀇𑀫𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀁 𑀤𑀲𑁆𑀲𑁂𑀢𑀺. 𑀤𑀲𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀅𑀝𑁆𑀞 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀯𑀁 𑀤𑀲𑀦𑁆𑀦𑀁. 𑀅𑀦𑀼𑀪𑀯𑀦𑀲𑀸𑀫𑀜𑁆𑀜𑁂𑀦 𑀳𑀺 𑀯𑁂𑀤𑀦𑀸 𑀏𑀓𑀫𑀺𑀦𑁆𑀤𑁆𑀭𑀺𑀬𑀁 𑀓𑀢𑀸, 𑀢𑀣𑀸 𑀲𑀤𑁆𑀥𑀸𑀤𑀬𑁄 𑀘 𑀫𑀕𑁆𑀕𑀧𑀓𑁆𑀔𑀺𑀬𑀸𑀢𑀺.

𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀬𑀸𑀬 𑀑𑀚𑀸𑀬 𑀲𑀢𑁆𑀢𑀸 𑀬𑀸𑀧𑁂𑀦𑁆𑀢𑀺, 𑀢𑀲𑁆𑀲𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀳𑀺 𑀑𑀚𑀝𑁆𑀞𑀫𑀓𑀲𑁆𑀲 ¶ 𑀭𑀽𑀧𑀲𑁆𑀲 𑀆𑀳𑀭𑀡𑀢𑁄 𑀆𑀳𑀸𑀭𑁄. 𑀅𑀢𑁆𑀣𑀻𑀢𑀺 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀯𑀺𑀚𑁆𑀚𑀢𑀺. 𑀭𑀸𑀕𑁄𑀢𑀺 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻. 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀮𑁄𑀪𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀦𑁆𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀧𑀢𑀺𑀝𑁆𑀞𑀺𑀢𑀜𑁆𑀘𑁂𑀯 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳𑀜𑁆𑀘. 𑀬𑀢𑁆𑀣𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂 𑀪𑀼𑀫𑁆𑀫𑀁, 𑀲𑀩𑁆𑀩𑀢𑁆𑀣 𑀯𑀸 𑀧𑀼𑀭𑀺𑀫𑀧𑀼𑀭𑀺𑀫𑀧𑀤𑁂 𑀏𑀢𑀁 𑀪𑀼𑀫𑁆𑀫𑀁. 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀻𑀢𑀺 𑀬𑁂 𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀯𑀝𑁆𑀝𑁂 𑀞𑀺𑀢𑀲𑁆𑀲 𑀆𑀬𑀢𑀺𑀁 𑀯𑀟𑁆𑀠𑀦𑀳𑁂𑀢𑀼𑀓𑀸 𑀲𑀗𑁆𑀔𑀸𑀭𑀸, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑀺. 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 ¶ 𑀚𑀸𑀢𑀺𑀚𑀭𑀸𑀫𑀭𑀡𑀦𑁆𑀢𑀺 𑀬𑀢𑁆𑀣 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁, 𑀢𑀢𑁆𑀣 𑀔𑀦𑁆𑀥𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸 𑀚𑀸𑀢𑀺, 𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀪𑁂𑀤𑀦𑀮𑀓𑁆𑀔𑀡𑀁 𑀫𑀭𑀡𑀜𑁆𑀘 𑀅𑀢𑁆𑀣𑀺. 𑀅𑀬𑀁 𑀧𑀪𑀸𑀯𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲 𑀘 𑀲𑀫𑀼𑀤𑀬𑀲𑁆𑀲 𑀘𑀸𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸 𑀤𑁂𑀲𑀦𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀘 𑀲𑀫𑀼𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀲𑀗𑁆𑀔𑀸𑀭𑀸𑀦𑀜𑁆𑀘 𑀢𑀡𑁆𑀳𑀸𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀢𑁆𑀣𑀺 𑀭𑀸𑀕𑁄𑀢𑀺 𑀅𑀕𑁆𑀕𑀫𑀕𑁆𑀕𑀪𑀸𑀯𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀦𑀢𑁆𑀣𑀺 𑀘𑁂 𑀭𑀸𑀕𑁄. 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀼𑀴𑁆𑀳𑀦𑁆𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬𑀸𑀪𑀸𑀯𑁂𑀦 𑀅𑀧𑁆𑀧𑀢𑀺𑀝𑁆𑀞𑀺𑀢𑀜𑁆𑀘𑁂𑀯 𑀅𑀯𑀺𑀭𑀼𑀴𑁆𑀳𑀜𑁆𑀘𑀸𑀢𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀬𑀁 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀏𑀓𑀸𑀪𑀺𑀲𑀫𑀬𑀯𑀲𑁂𑀦𑁂𑀯 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀻𑀢𑀺 𑀅𑀬𑀁 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀦𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺. 𑀦𑀺𑀭𑁄𑀥𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲𑀸𑀢𑀺 𑀭𑁄𑀥𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀦𑀺𑀭𑁄𑀥𑀧𑀜𑁆𑀜𑀢𑁆𑀢𑀺. 𑀉𑀧𑁆𑀧𑀸𑀤𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑁆𑀧𑀦𑁆𑀦𑀲𑁆𑀲 𑀧𑀜𑁆𑀜𑀸𑀧𑀦𑀸. 𑀑𑀓𑀸𑀲𑀧𑀜𑁆𑀜𑀢𑁆𑀢𑀻𑀢𑀺 𑀞𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀸. 𑀆𑀳𑀝𑀦𑀸𑀧𑀜𑁆𑀜𑀢𑁆𑀢𑀻𑀢𑀺 𑀦𑀻𑀳𑀭𑀡𑀧𑀜𑁆𑀜𑀢𑁆𑀢𑀺. 𑀆𑀲𑀸𑀝𑀺𑀓𑀸𑀦𑀦𑁆𑀢𑀺 𑀕𑀼𑀦𑁆𑀦𑀁 𑀯𑀡𑁂𑀲𑀼 𑀦𑀻𑀮𑀫𑀓𑁆𑀔𑀺𑀓𑀸𑀳𑀺 𑀞𑀧𑀺𑀢𑀅𑀡𑁆𑀟𑀓𑀸 𑀆𑀲𑀸𑀝𑀺𑀓𑀸 𑀦𑀸𑀫. 𑀏𑀢𑁆𑀣 𑀬𑀲𑁆𑀲 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀅𑀦𑀬𑀩𑁆𑀬𑀲𑀦𑀳𑁂𑀢𑀼𑀢𑀸𑀬 𑀆𑀲𑀸𑀝𑀺𑀓𑀸 𑀯𑀺𑀬𑀸𑀢𑀺 𑀆𑀲𑀸𑀝𑀺𑀓𑀸, 𑀓𑀺𑀮𑁂𑀲𑀸, 𑀢𑁂𑀲𑀁 𑀆𑀲𑀸𑀝𑀺𑀓𑀸𑀦𑀁. 𑀅𑀪𑀺𑀦𑀺𑀖𑀸𑀢𑀧𑀜𑁆𑀜𑀢𑁆𑀢𑀻𑀢𑀺 𑀲𑀫𑀼𑀕𑁆𑀖𑀸𑀢𑀧𑀜𑁆𑀜𑀢𑁆𑀢𑀺.

𑁪𑁧. 𑀏𑀯𑀁 𑀯𑀝𑁆𑀝𑀯𑀺𑀯𑀝𑁆𑀝𑀫𑀼𑀔𑁂𑀦 𑀲𑀫𑁆𑀫𑀲𑀦𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀫𑀼𑀔𑁂𑀦𑁂𑀯 𑀲𑀘𑁆𑀘𑁂𑀲𑀼 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀧𑀭𑀺𑀯𑀝𑁆𑀝𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 ‘𑀤𑀼𑀓𑁆𑀔’𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 ¶ 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁. 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. 𑀑𑀪𑀸𑀲𑀦𑀝𑁆𑀞𑁂𑀦 𑀆𑀮𑁄𑀓𑁄. 𑀲𑀩𑁆𑀩𑀁 𑀧𑀜𑁆𑀜𑀸𑀯𑁂𑀯𑀘𑀦𑀫𑁂𑀯. 𑀅𑀬𑀁 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺. 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀻𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀧𑀜𑁆𑀜𑀢𑁆𑀢𑀺.

𑀢𑀼𑀮𑀫𑀢𑀼𑀮𑀜𑁆𑀘𑀸𑀢𑀺 𑀕𑀸𑀣𑀸𑀬 𑀧𑀘𑀼𑀭𑀚𑀦𑀸𑀦𑀁 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀢𑀼𑀮𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀼𑀮𑀁, 𑀓𑀸𑀫𑀸𑀯𑀘𑀭𑀁. 𑀦 𑀢𑀼𑀮𑀦𑁆𑀢𑀺 𑀅𑀢𑀼𑀮𑀁, 𑀢𑀼𑀮𑀁 𑀯𑀸 𑀲𑀤𑀺𑀲𑀫𑀲𑁆𑀲 𑀅𑀜𑁆𑀜𑀁 𑀮𑁄𑀓𑀺𑀬𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀅𑀢𑀼𑀮𑀁, 𑀫𑀳𑀕𑁆𑀕𑀢𑀓𑀫𑁆𑀫𑀁. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀯𑀸 𑀢𑀼𑀮𑀁, 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀁, 𑀅𑀧𑁆𑀧𑀯𑀺𑀧𑀸𑀓𑀁 𑀯𑀸 𑀢𑀼𑀮𑀁. 𑀩𑀳𑀼𑀯𑀺𑀧𑀸𑀓𑀁 𑀅𑀢𑀼𑀮𑀁. 𑀲𑀫𑁆𑀪𑀯𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀪𑀯𑀁, 𑀲𑀫𑁆𑀪𑀯𑀳𑁂𑀢𑀼𑀪𑀽𑀢𑀁. 𑀪𑀯𑀲𑀗𑁆𑀔𑀸𑀭𑀁 𑀧𑀼𑀦𑀩𑁆𑀪𑀯𑀲𑀗𑁆𑀔𑀭𑀡𑀓𑀁. 𑀅𑀯𑀲𑁆𑀲𑀚𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄 ¶ . 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑁄. 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀸𑀢𑀺 𑀓𑀯𑀘𑀁 𑀯𑀺𑀬 𑀪𑀺𑀦𑁆𑀤𑀺. 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀅𑀢𑁆𑀢𑀦𑀺 𑀲𑀜𑁆𑀚𑀸𑀢𑀁 𑀓𑀺𑀮𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁 𑀪𑀯𑀸𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀢𑀼𑀮𑀸𑀢𑀼𑀮𑀲𑀗𑁆𑀔𑀸𑀢𑀁 𑀮𑁄𑀓𑀺𑀬𑀓𑀫𑁆𑀫𑀜𑁆𑀘 𑀑𑀲𑁆𑀲𑀚𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀫𑀳𑀸𑀬𑁄𑀥𑁄 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑁆𑀤𑀻𑀢𑀺.

𑀅𑀣 𑀯𑀸 𑀢𑀼𑀮𑀦𑁆𑀢𑀺 𑀢𑀼𑀮𑀬𑀦𑁆𑀢𑁄 𑀢𑀻𑀭𑁂𑀦𑁆𑀢𑁄. 𑀅𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀲𑀫𑁆𑀪𑀯𑀜𑁆𑀘. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀪𑀯𑀕𑀸𑀫𑀺𑀓𑀫𑁆𑀫𑀁. 𑀅𑀯𑀲𑁆𑀲𑀚𑀺 𑀫𑀼𑀦𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀢𑁂𑀲𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀦𑀬𑁂𑀦 𑀢𑀼𑀮𑀬𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀪𑀯𑁂 𑀆𑀤𑀻𑀦𑀯𑀁 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀜𑁆𑀘 𑀤𑀺𑀲𑁆𑀯𑀸 𑀢𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀁 𑀪𑀯𑀲𑀗𑁆𑀔𑀸𑀭𑀁 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀢𑁄. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀣𑀯𑀲𑁂𑀦 𑀲𑀫𑀸𑀳𑀺𑀢𑁄 𑀓𑀯𑀘𑀫𑀺𑀯 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀪𑀯𑀢𑁆𑀢𑀸 ‘‘𑀅𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀁 𑀓𑀺𑀮𑁂𑀲𑀚𑀸𑀢𑀁 𑀅𑀪𑀺𑀦𑁆𑀤𑀺, 𑀓𑀺𑀮𑁂𑀲𑀸𑀪𑀸𑀯𑁂 𑀓𑀫𑁆𑀫𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀯𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀓𑀺𑀮𑁂𑀲𑀸𑀪𑀸𑀯𑁂𑀦 𑀓𑀫𑁆𑀫𑀁 𑀚𑀳𑀻𑀢𑀺 𑀅𑀢𑁆𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁬𑁯; 𑀉𑀤𑀸. 𑀅𑀝𑁆𑀞. 𑁫𑁧).

𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀸𑀢𑀼𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀢𑀼𑀮…𑀧𑁂… 𑀥𑀫𑁆𑀫𑀸𑀦’’𑀦𑁆𑀢𑀺. 𑀢𑁂𑀦 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀆𑀳 𑁋 ‘‘𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬𑀸’’𑀢𑀺. 𑀪𑀯𑀲𑀗𑁆𑀔𑀸𑀭𑁂 𑀲𑀫𑀼𑀤𑀬𑀧𑀓𑁆𑀔𑀺𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀭𑀺𑀘𑁆𑀘𑀸𑀕𑀧𑀜𑁆𑀜𑀢𑁆𑀢𑀻’’𑀢𑀺. 𑀤𑀼𑀓𑁆𑀔𑀲𑀘𑁆𑀘𑀧𑀓𑁆𑀔𑀺𑀬𑀯𑀲𑁂𑀦 ‘‘𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀻’’𑀢𑀺. 𑀲𑀫𑀸𑀥𑀸𑀦𑀯𑀺𑀲𑀺𑀝𑁆𑀞𑀲𑁆𑀲 ¶ 𑀅𑀚𑁆𑀛𑀢𑁆𑀢𑀭𑀢𑀪𑀸𑀯𑀲𑁆𑀲 𑀯𑀲𑁂𑀦 ‘‘𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀭𑀢𑀢𑀸𑀯𑀺𑀲𑀺𑀝𑁆𑀞𑀲𑁆𑀲 𑀧𑀦 𑀲𑀫𑀸𑀥𑀸𑀦𑀲𑁆𑀲 𑀯𑀲𑁂𑀦 ‘‘𑀞𑀺𑀢𑀺𑀧𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀺𑀩𑁆𑀩𑀺𑀤𑀸𑀧𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑀲𑁆𑀲𑀸𑀢𑀺 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀭𑀡𑀧𑀜𑁆𑀜𑀢𑁆𑀢𑀺. 𑀉𑀧𑀸𑀤𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀕𑀳𑀡𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀜𑁆𑀜𑀼𑀢𑀸𑀬𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑁆𑀲. 𑀏𑀢𑁂𑀦 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀮𑁂𑀲𑀸𑀪𑀸𑀯𑁂𑀦 𑀪𑀕𑀯𑀸 𑀓𑀫𑁆𑀫𑀁 𑀚𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀤𑀸𑀮𑀦𑀸𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀸𑀦’’𑀦𑁆𑀢𑀺 𑀆𑀳.

𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀬𑁄 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀲𑀩𑁆𑀩𑀁 𑀢𑁂𑀪𑀽𑀫𑀓𑀁 𑀤𑀼𑀓𑁆𑀔𑀁 𑀅𑀤𑀓𑁆𑀔𑀺 𑀧𑀲𑁆𑀲𑀺, 𑀢𑀜𑁆𑀘 𑀬𑀢𑁄𑀦𑀺𑀤𑀸𑀦𑀁 𑀬𑀁 𑀳𑁂𑀢𑀼𑀓𑀁, 𑀢𑀫𑁆𑀧𑀺𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀢𑀡𑁆𑀳𑀁 𑀧𑀲𑁆𑀲𑀺. 𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 ¶ 𑀦𑀫𑁂𑀬𑁆𑀬𑀸𑀢𑀺 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀧𑀼𑀭𑀺𑀲𑁄 𑀲𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀲𑀼 𑀬𑁂𑀦 𑀧𑀓𑀸𑀭𑁂𑀦 𑀦𑀫𑁂𑀬𑁆𑀬 𑀅𑀪𑀺𑀦𑀫𑁂𑀬𑁆𑀬, 𑀲𑁄 𑀧𑀓𑀸𑀭𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀓𑀸𑀫𑀸 𑀳𑀺 𑀮𑁄𑀓𑁂 𑀲𑀗𑁆𑀕𑁄𑀢𑀺 𑀜𑀢𑁆𑀯𑀸. 𑀬𑀲𑁆𑀫𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀓𑀸𑀫𑀲𑀤𑀺𑀲𑀁 𑀩𑀦𑁆𑀥𑀦𑀁 𑀦𑀢𑁆𑀣𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 ‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸’’𑀢𑀺𑀆𑀤𑀺 (𑀥. 𑀧. 𑁩𑁪𑁫; 𑀲𑀁. 𑀦𑀺. 𑁧.𑁧𑁨𑁧; 𑀦𑁂𑀢𑁆𑀢𑀺. 𑁧𑁦𑁬; 𑀧𑁂𑀝𑀓𑁄 𑁧𑁫), 𑀢𑀲𑁆𑀫𑀸 𑀲𑀗𑁆𑀔𑀸𑀭𑁂 𑀆𑀲𑀚𑁆𑀚𑀦𑀝𑁆𑀞𑁂𑀦 𑀲𑀗𑁆𑀕𑁄𑀢𑀺 𑀯𑀺𑀤𑀺𑀢𑁆𑀯𑀸. 𑀢𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺 𑀓𑀸𑀬𑀕𑀢𑀸𑀲𑀢𑀺𑀬𑁄𑀕𑁂𑀦 𑀲𑀢𑀺𑀫𑀸 𑀢𑁂𑀲𑀁 𑀓𑀸𑀫𑀸𑀦𑀁 𑀯𑀽𑀧𑀲𑀫𑀸𑀬 𑀢𑀻𑀲𑀼𑀧𑀺 𑀲𑀺𑀓𑁆𑀔𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀻𑀢𑀺 𑀔𑀦𑁆𑀥𑀸𑀤𑀻𑀦𑀁 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺. 𑀅𑀤𑀓𑁆𑀔𑀻𑀢𑀺 𑀧𑀦 𑀧𑀤𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀘𑀸’’𑀢𑀺. 𑀧𑀘𑁆𑀘𑀢𑁆𑀣𑀺𑀓𑀢𑁄 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀻𑀢𑀺 𑀅𑀦𑀢𑁆𑀣𑀚𑀦𑀦𑀢𑁄 𑀧𑀘𑁆𑀘𑀢𑁆𑀣𑀺𑀓𑀢𑁄 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀺. 𑀧𑀸𑀯𑀓𑀓𑀧𑁆𑀧𑀸𑀢𑀺 𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑀤𑀺𑀲𑀸. 𑀧𑀧𑀸𑀢𑀉𑀭𑀕𑁄𑀧𑀫𑀸𑀢𑀺 𑀧𑀧𑀸𑀢𑀽𑀧𑀫𑀸𑀉𑀭𑀕𑁄𑀧𑀫𑀸 𑀘.

𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄𑀢𑀺 𑀅𑀬𑀁 𑀮𑁄𑀓𑁄 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀩𑀦𑁆𑀥𑁄. 𑀪𑀩𑁆𑀩𑀭𑀽𑀧𑁄𑀯 𑀤𑀺𑀲𑁆𑀲𑀢𑀻𑀢𑀺 𑀯𑀺𑀧𑀦𑁆𑀦𑀚𑁆𑀛𑀸𑀲𑀬𑁄𑀧𑀺 𑀫𑀸𑀬𑀸𑀬 𑀲𑀸𑀞𑁂𑀬𑁆𑀬𑁂𑀦 𑀘 𑀧𑀝𑀺𑀘𑁆𑀙𑀸𑀤𑀺𑀢𑀲𑀪𑀸𑀯𑁄 𑀪𑀩𑁆𑀩𑀚𑀸𑀢𑀺𑀓𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀉𑀧𑀥𑀺𑀩𑀦𑁆𑀥𑀦𑁄 𑀩𑀸𑀮𑁄, 𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄𑀢𑀺 𑀢𑀲𑁆𑀲 𑀧𑀦 𑀩𑀸𑀮𑀲𑁆𑀲 𑀢𑀣𑀸 𑀤𑀲𑁆𑀲𑀦𑁂 𑀲𑀫𑁆𑀫𑁄𑀳𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑀢𑁆𑀢𑀸 𑀓𑀸𑀫𑀕𑀼𑀡𑁂𑀲𑀼 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀩𑀦𑁆𑀥𑀢𑁆𑀢𑀸. 𑀢𑀣𑀸 𑀪𑀽𑀢𑁄 𑀘𑀸𑀬𑀁 ¶ 𑀩𑀸𑀮𑁄 𑀧𑀡𑁆𑀟𑀺𑀢𑀸𑀦𑀁 𑀅𑀲𑁆𑀲𑀺𑀭𑀻 𑀯𑀺𑀬 𑀔𑀸𑀬𑀢𑀺 𑀅𑀮𑀓𑁆𑀔𑀺𑀓𑁄 𑀏𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑀬𑀺𑀤𑀁 𑀲𑀩𑁆𑀩𑀁 𑀩𑀸𑀮𑀲𑁆𑀲 𑀲𑀢𑁄 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀢𑁄. 𑀧𑀡𑁆𑀟𑀺𑀢𑀲𑁆𑀲 𑀧𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄. 𑀫𑁄𑀳𑀲𑀻𑀲𑁂𑀦 𑀯𑀺𑀧𑀮𑁆𑀮𑀸𑀲𑀸 𑀕𑀳𑀺𑀢𑀸𑀢𑀺 𑀆𑀳 𑁋 ‘‘𑀤𑁂𑀲𑀦𑀸𑀧𑀜𑁆𑀜𑀢𑁆𑀢𑀺 𑀯𑀺𑀧𑀮𑁆𑀮𑀸𑀲𑀸𑀦’’𑀦𑁆𑀢𑀺. 𑀯𑀺𑀧𑀭𑀻𑀢𑀧𑀜𑁆𑀜𑀢𑁆𑀢𑀻𑀢𑀺 𑀯𑀺𑀧𑀭𑀻𑀢𑀸𑀓𑀸𑀭𑁂𑀦 𑀉𑀧𑀝𑁆𑀞𑀳𑀫𑀸𑀦𑀲𑁆𑀲 𑀧𑀜𑁆𑀜𑀸𑀧𑀦𑀸.

𑀅𑀢𑁆𑀣𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯. 𑀦𑀢𑁆𑀣𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀅𑀮𑀩𑁆𑀪𑀫𑀸𑀦𑀲𑀪𑀸𑀯𑀢𑁆𑀢𑀸𑀢𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀫𑀺𑀘𑁆𑀙𑀸𑀯𑀸𑀤𑀁 𑀪𑀜𑁆𑀚𑀺𑀢𑀼𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺. 𑀢𑀢𑁆𑀣 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀬𑀤𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀦 𑀅𑀪𑀯𑀺𑀲𑁆𑀲, 𑀦 𑀇𑀥 𑀲𑀩𑁆𑀩𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀲𑀺𑀬𑀸. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀫𑀕𑁆𑀕𑀥𑀫𑁆𑀫𑀸 𑀅𑀦𑀯𑀲𑁂𑀲𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀢𑀢𑁄 𑀢𑀺𑀯𑀺𑀥𑀲𑁆𑀲𑀧𑀺 𑀯𑀝𑁆𑀝𑀲𑁆𑀲 𑀅𑀧𑁆𑀧𑀯𑀢𑁆𑀢𑀻𑀢𑀺.

𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ¶ 𑁋 𑀬𑀣𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀲𑀉𑀢𑁆𑀢𑀭𑀸𑀦𑀁 𑀓𑀸𑀫𑀸𑀦𑀁 𑀭𑀽𑀧𑀸𑀦𑀜𑁆𑀘 𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀁 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀢𑀁𑀲𑀪𑀸𑀯𑀸𑀦𑀁 𑀲𑀗𑁆𑀔𑀪𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀢𑀩𑁆𑀩𑀺𑀥𑀼𑀭𑀢𑀸𑀲𑀪𑀸𑀯𑁂𑀦 𑀦𑀺𑀲𑁆𑀲𑀭𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀜𑁆𑀘 𑀢𑀁 𑀦𑀺𑀲𑁆𑀲𑀭𑀡𑀁. 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀅𑀧𑀺 𑀘 𑀅𑀦𑀼𑀮𑁄𑀫𑀜𑀸𑀡𑀁 𑀓𑀺𑀮𑁂𑀲𑁂 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀜𑀸𑀡𑀁 𑀯𑀺𑀓𑁆𑀔𑀫𑁆𑀪𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀺, 𑀓𑀺𑀮𑁂𑀲𑀸𑀦𑀁 𑀦 𑀲𑀫𑀼𑀘𑁆𑀙𑁂𑀤𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀭𑀜𑁆𑀘 𑀅𑀭𑀺𑀬𑀫𑀕𑁆𑀕𑀜𑀸𑀡𑀁, 𑀢𑀲𑁆𑀲 𑀲𑀗𑁆𑀔𑀢𑀥𑀫𑁆𑀫𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀺𑀧𑀭𑀻𑀢𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀢𑀣𑀸 𑀦𑀺𑀩𑁆𑀩𑀸𑀦-𑀲𑀤𑁆𑀤𑁄 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀅𑀯𑀺𑀧𑀭𑀻𑀢𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀉𑀧𑀘𑀸𑀭𑀯𑀼𑀢𑁆𑀢𑀺𑀲𑀩𑁆𑀪𑀸𑀯𑀢𑁄, 𑀬𑀣𑀸 𑀢𑀁 ‘‘𑀲𑀻𑀳𑀲𑀤𑁆𑀤𑁄’’𑀢𑀺.

𑀅𑀣 𑀯𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 (𑀉𑀤𑀸. 𑁭𑁩) 𑀯𑀘𑀦𑀁 𑀅𑀯𑀺𑀧𑀭𑀻𑀢𑀢𑁆𑀣𑀁, 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸. 𑀬𑀜𑁆𑀳𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀅𑀯𑀺𑀧𑀭𑀻𑀢𑀢𑁆𑀣𑀁. 𑀬𑀣𑀸 𑀢𑀁 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀫. 𑀦𑀺. 𑁧.𑁩𑁫𑁩, 𑁩𑁫𑁬; 𑀓𑀣𑀸. 𑁭𑁫𑁩; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪; 𑀧𑀝𑀺. 𑀫. 𑁧.𑁩𑁧; 𑀦𑁂𑀢𑁆𑀢𑀺. 𑁫; 𑀥. 𑀧. 𑁨𑁭𑁭-𑁨𑁭𑁯), 𑀏𑀯𑀫𑁆𑀧𑀺 𑀬𑀼𑀢𑁆𑀢𑀺𑀯𑀲𑁂𑀦 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀲𑀩𑁆𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬? 𑀬𑀲𑁆𑀫𑀸 𑀪𑀕𑀯𑀢𑀸 ¶ ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀦𑁆𑀢𑀺 (𑀉𑀤𑀸. 𑁭𑁩), 𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁭-𑁮) 𑀘, 𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁬𑁬-𑁩𑁬𑁭, 𑁩𑁭𑁭) 𑀘 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀫𑀢𑁆𑀣𑀢𑁄 𑀲𑀩𑁆𑀪𑀸𑀯𑁄 𑀤𑁂𑀲𑀺𑀢𑁄𑀢𑀺. 𑀢𑀢𑁆𑀣 𑀉𑀧𑀦𑀬𑀦𑀧𑀜𑁆𑀜𑀢𑁆𑀢𑀻𑀢𑀺 𑀧𑀝𑀺𑀧𑀓𑁆𑀔𑀢𑁄 𑀳𑁂𑀢𑀼𑀉𑀧𑀦𑀬𑀦𑀲𑁆𑀲 𑀧𑀜𑁆𑀜𑀸𑀧𑀦𑀸. 𑀚𑁄𑀢𑀦𑀸𑀧𑀜𑁆𑀜𑀢𑁆𑀢𑀻𑀢𑀺 𑀧𑀝𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀬𑀸 𑀧𑀓𑀸𑀲𑀦𑀸𑀧𑀜𑁆𑀜𑀢𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁨. 𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑁄𑀢𑀺 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀅𑀲𑁂𑀓𑁆𑀔𑀸 𑀯𑀺𑀫𑀼𑀢𑁆𑀢𑀻𑀢𑀺 𑀅𑀬𑀁 𑀢𑁂𑀥𑀸𑀢𑀼𑀓𑁂 𑀯𑀻𑀢𑀭𑀸𑀕𑀢𑀸 𑀅𑀲𑁂𑀓𑁆𑀔𑀸 𑀨𑀮𑀯𑀺𑀫𑀼𑀢𑁆𑀢𑀺. 𑀢𑀸𑀦𑀺𑀬𑁂𑀯𑀸𑀢𑀺 𑀢𑀸𑀦𑀺 𑀅𑀲𑁂𑀓𑁆𑀔𑀸𑀬𑀁 𑀯𑀺𑀫𑀼𑀢𑁆𑀢𑀺𑀬𑀁 𑀲𑀤𑁆𑀥𑀸𑀤𑀻𑀦𑀺 ¶ . 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸𑀢𑀺 𑀅𑀲𑁂𑀓𑁆𑀔𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀤𑁆𑀥𑀸𑀭𑀺𑀢𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀦𑀸𑀬 𑀑𑀢𑀭𑀡𑀸.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀯𑀺𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑀓𑀸𑀭𑀓𑀢𑁆𑀢𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀤𑁆𑀥𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸𑀬 𑀉𑀧𑀓𑀸𑀭𑀓𑀢𑁆𑀢𑀸 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀻𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀅𑀦𑁆𑀢𑁄𑀕𑀥𑀸𑀦𑀺. 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸𑀢𑀺 𑀢𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀯𑀺𑀲𑁂𑀲𑁂𑀢𑀺, 𑀅𑀕𑁆𑀕𑀨𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀢𑁄 𑀏𑀯 𑀘 𑀦𑁄 𑀪𑀯𑀗𑁆𑀕𑀸. 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸𑀢𑀺 𑀅𑀝𑁆𑀞𑀸𑀭𑀲𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀯𑀻𑀢𑀭𑀸𑀕𑀢𑀸 𑀅𑀲𑁂𑀓𑁆𑀔𑀸 𑀯𑀺𑀫𑀼𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀲𑁆𑀲𑀸 𑀧𑀦 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀅𑀬𑀁 𑀅𑀳𑀫𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻’’𑀢𑀺 𑀤𑀲𑁆𑀲𑀦𑀫𑀕𑁆𑀕𑁄 𑀇𑀥 𑀯𑀼𑀢𑁆𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀅𑀳𑀫𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁪𑁩. 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀫𑁆𑀫𑀁 𑀅𑀦𑀯𑀝𑁆𑀞𑀸𑀦𑀁. 𑀘𑀼𑀢𑀽𑀧𑀧𑀸𑀢𑁄𑀢𑀺 𑀅𑀧𑀭𑀸𑀧𑀭𑀁 𑀘𑀯𑀦𑀁 𑀉𑀧𑀧𑀢𑀦𑀜𑁆𑀘. 𑀦𑀺𑀲𑁆𑀲𑀺𑀢𑀧𑀤𑁂 𑀮𑀩𑁆𑀪𑀫𑀸𑀦𑀁 𑀦𑀺𑀲𑁆𑀲𑀬𑀦𑀁 𑀉𑀤𑁆𑀥𑀭𑀦𑁆𑀢𑁄 𑀆𑀳 𑁋 ‘‘𑀦𑀺𑀲𑁆𑀲𑀬𑁄 𑀦𑀸𑀫𑀸’’𑀢𑀺. 𑀢𑀡𑁆𑀳𑀸𑀦𑀺𑀲𑁆𑀲𑀬𑁄𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁄. 𑀲𑁄 𑀳𑀺 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀢𑀣𑀸 𑀯𑀼𑀢𑁆𑀢𑁄. 𑀏𑀯𑀁 ¶ 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀭𑀢𑁆𑀢𑀲𑁆𑀲 𑀘𑁂𑀢𑀦𑀸𑀢𑀺 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀲𑀻𑀲𑁂𑀦 𑀢𑀡𑁆𑀳𑀁 𑀏𑀯 𑀯𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁄 𑀫𑁄𑀳𑀲𑁆𑀲 𑀩𑀮𑀯𑀪𑀸𑀯𑁂 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀸 𑀫𑀽𑀴𑁆𑀳𑀲𑁆𑀲 𑀘𑁂𑀢𑀦𑀸, 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀘𑁂𑀢𑀦𑀸𑀲𑀻𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘𑁂𑀢𑀦𑀁𑀬𑁂𑀯 𑀕𑀡𑁆𑀳𑀦𑁆𑀢𑁄 ‘‘𑀘𑁂𑀢𑀦𑀸 𑀧𑀦 𑀲𑀗𑁆𑀔𑀸𑀭𑀸’’𑀢𑀺 𑀆𑀳. 𑀬𑀸 𑀭𑀢𑁆𑀢𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸𑀢𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑁄 𑀅𑀦𑀼𑀲𑁂𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸 𑀅𑀦𑀼𑀲𑁂𑀢𑀻𑀢𑀺 𑀆𑀳 𑁋 ‘‘𑀬𑀸 𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺. 𑀇𑀥 𑀯𑁂𑀤𑀦𑀸𑀲𑀻𑀲𑁂𑀦 𑀘𑁂𑀢𑀦𑀸 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀬𑀸𑀢𑀺 𑀢𑀡𑁆𑀳𑀁. 𑀤𑀺𑀝𑁆𑀞𑀺𑀬𑀸𑀢𑀺 𑀤𑀺𑀝𑁆𑀞𑀺𑀁. 𑀬𑀣𑀸 𑀯𑀸 𑀲𑁂𑀲𑀥𑀫𑁆𑀫𑀸𑀦𑀁 𑀢𑀡𑁆𑀳𑀸𑀬 𑀦𑀺𑀲𑁆𑀲𑀬𑀪𑀸𑀯𑁂 𑀧𑀼𑀕𑁆𑀕𑀮𑁄 𑀢𑀡𑁆𑀳𑀸𑀬 𑀦𑀺𑀲𑁆𑀲𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀡𑁆𑀳𑀸𑀬 𑀲𑁂𑀲𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁂 𑀧𑀼𑀕𑁆𑀕𑀮𑁄 𑀢𑀡𑁆𑀳𑀸𑀬 𑀦𑀺𑀲𑁆𑀲𑀺𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀢𑀡𑁆𑀳𑀸𑀬 𑀅𑀦𑀺𑀲𑁆𑀲𑀺𑀢𑁄’’𑀢𑀺.

𑀧𑀲𑁆𑀲𑀤𑁆𑀥𑀻𑀢𑀺 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀸. 𑀓𑀸𑀬𑀺𑀓𑀸𑀢𑀺 𑀓𑀭𑀚𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀸. 𑀘𑁂𑀢𑀲𑀺𑀓𑀸𑀢𑀺 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀸. 𑀬𑀲𑁆𑀫𑀸 𑀧𑀦 𑀲𑀸 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀼𑀔𑁂 𑀲𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 ¶ ‘‘𑀬𑀁 𑀓𑀸𑀬𑀺𑀓𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀦𑀸 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸𑀬 𑀧𑀲𑁆𑀲𑀤𑁆𑀥𑀺𑀬𑀸 𑀦𑀢𑀺𑀅𑀪𑀸𑀯𑀲𑁆𑀲 𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀲𑁆𑀲𑀤𑁆𑀥𑀓𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀺 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀔𑀻𑀡𑀸𑀲𑀯𑁄. 𑀭𑀽𑀧𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀭𑀽𑀧𑀸𑀦𑀁 𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑁄. 𑀅𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀻𑀢𑀺 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑁂𑀦 𑀦 𑀉𑀧𑁂𑀢𑀺 𑀦 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀻𑀢𑀺 𑀅𑀲𑀲𑁆𑀲𑀢𑁄𑀢𑀺. 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀦𑁆𑀢𑀺. 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀲𑁂𑀦. 𑀕𑀫𑁆𑀪𑀻𑀭𑁄𑀢𑀺 𑀉𑀢𑁆𑀢𑀸𑀦𑀪𑀸𑀯𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀕𑀫𑁆𑀪𑀻𑀭𑁄. 𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑀻𑀢𑀺𑀆𑀤𑀺𑀦𑀸 𑀉𑀧𑀕𑀫𑀦𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄.

𑀇𑀥𑀸𑀕𑀢𑀻𑀢𑀺 𑀧𑀭𑀮𑁄𑀓𑀢𑁄 𑀇𑀥 𑀆𑀕𑀢𑀺. 𑀕𑀢𑀻𑀢𑀺 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑀕𑀫𑀦𑀁. 𑀢𑀁 𑀧𑀦 𑀧𑀼𑀦𑀩𑁆𑀪𑀯𑁄𑀢𑀺 𑀆𑀳 ‘‘𑀧𑁂𑀘𑁆𑀘𑀪𑀯𑁄’’𑀢𑀺. 𑀇𑀥 𑀳𑀼𑀭𑀦𑁆𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑀥𑀫𑁆𑀫𑀸 𑀤𑀲𑁆𑀲𑀺𑀢𑀸𑀢𑀺 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀧𑀤𑁂𑀦 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀲𑁆𑀲𑀲𑀫𑀼𑀤𑀺𑀢𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀨𑀲𑁆𑀲𑁂𑀦 ¶ 𑀲𑀤𑁆𑀥𑀺𑀁 𑀨𑀲𑁆𑀲𑁂𑀦 𑀓𑀸𑀭𑀡𑀪𑀽𑀢𑁂𑀦 𑀘 𑀲𑀫𑀼𑀤𑀺𑀢𑁂𑀲𑀼 𑀲𑀫𑁆𑀪𑀽𑀢𑁂𑀲𑀼 𑀯𑀺𑀜𑁆𑀜𑀸𑀡𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀺𑀥𑀫𑁆𑀫𑁂𑀲𑀼. 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀻𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀢𑁆𑀢𑀪𑀸𑀯𑁂𑀦𑁂𑀯 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺. 𑀯𑀺𑀭𑀚𑁆𑀚𑀢𑀺 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀤𑁂𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀢𑀤𑀢𑁆𑀣𑀢𑀸𑀬 𑀲𑀻𑀮𑀸𑀤𑀻𑀦𑀫𑁆𑀧𑀺 𑀧𑀭𑀺𑀬𑀸𑀬𑁂𑀦 𑀢𑀩𑁆𑀪𑀸𑀯𑀫𑀸𑀳 ‘‘𑀮𑁄𑀓𑀼𑀢𑁆𑀢𑀭𑁄’’𑀢𑀺𑀆𑀤𑀺𑀦𑀸.

𑁪𑁪. 𑀦𑀸𑀫𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀦𑀸𑀫𑁂𑀦 𑀫𑀺𑀲𑁆𑀲𑀺𑀢𑁄. 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀅𑀭𑀳𑀢𑁆𑀢𑀨𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀘 𑀧𑀜𑁆𑀜𑀸𑀧𑀥𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀯𑀺𑀚𑁆𑀚𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁫. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄𑀢𑀺 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀻𑀢𑀺 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 (𑀲𑀼. 𑀦𑀺. 𑁧𑁦𑁩𑁯; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁮, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨) 𑀯𑀤𑀦𑁆𑀢𑁄 𑀪𑀕𑀯𑀸 𑁋 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 (𑀲𑀼. 𑀦𑀺. 𑁧𑁦𑁩𑁮; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑁫𑁭, 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧) 𑀆𑀬𑀲𑁆𑀫𑀢𑀸 𑀅𑀚𑀺𑀢𑁂𑀦 ¶ 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁 𑀧𑀤𑀁 𑀲𑁄𑀥𑁂𑀢𑀺 𑀦𑀸𑀫, 𑀢𑀤𑀢𑁆𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁄. 𑀦𑁄 𑀘 𑀆𑀭𑀫𑁆𑀪𑀦𑁆𑀢𑀺 𑀦 𑀢𑀸𑀯 𑀆𑀭𑀫𑁆𑀪𑀁 𑀲𑁄𑀥𑁂𑀢𑀺, 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸. 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀩𑁄𑀥𑀺𑀢𑀢𑁆𑀢𑀸 𑀲𑁄𑀥𑀺𑀢𑁄 𑀆𑀭𑀫𑁆𑀪𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀡𑀧𑀓𑁆𑀔𑀦𑁆𑀤𑀸𑀦𑀁 𑀤𑁆𑀯𑁂𑀴𑁆𑀳𑀓𑀚𑀸𑀢𑀸𑀦𑀁 𑀯𑀸 𑀧𑀼𑀘𑁆𑀙𑀦𑀓𑀸𑀮𑁂 𑀧𑀼𑀘𑁆𑀙𑀺𑀢𑀸𑀦𑀁 𑀧𑀼𑀘𑁆𑀙𑀸𑀯𑀺𑀲𑀬𑁄 𑀅𑀯𑀺𑀚𑀝𑀁 𑀫𑀳𑀸𑀕𑀳𑀦𑀁 𑀯𑀺𑀬 𑀫𑀳𑀸𑀤𑀼𑀕𑁆𑀕𑀁 𑀯𑀺𑀬 𑀘 𑀅𑀦𑁆𑀥𑀓𑀸𑀭𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀬𑀤𑀸 𑀘 𑀪𑀕𑀯𑀢𑀸 𑀧𑀡𑁆𑀟𑀺𑀢𑁂𑀳𑀺 𑀯𑀸 𑀪𑀕𑀯𑀢𑁄 𑀲𑀸𑀯𑀓𑁂𑀳𑀺 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀦𑀺𑀚𑁆𑀚𑀝𑀁 𑀦𑀺𑀕𑀼𑀫𑁆𑀩𑀁 𑀓𑀢𑁆𑀯𑀸 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀫𑀳𑀢𑀸 𑀕𑀦𑁆𑀥𑀳𑀢𑁆𑀣𑀺𑀦𑀸 𑀅𑀪𑀺𑀪𑀯𑀺𑀢𑁆𑀯𑀸 𑀑𑀪𑀕𑁆𑀕𑀧𑀤𑀸𑀮𑀺𑀢𑁄 𑀕𑀳𑀦𑀧𑁆𑀧𑀤𑁂𑀲𑁄 𑀯𑀺𑀬 𑀯𑀺𑀕𑀢𑀦𑁆𑀥𑀓𑀸𑀭𑁄 𑀯𑀺𑀪𑀽𑀢𑁄 𑀉𑀧𑀝𑁆𑀞𑀳𑀫𑀸𑀦𑁄 𑀯𑀺𑀲𑁄𑀥𑀺𑀢𑁄 𑀦𑀸𑀫 𑀳𑁄𑀢𑀺.

𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁬. 𑀢𑀢𑁆𑀣 ¶ 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄𑀢𑀺 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀢𑀣𑀸 𑀥𑀸𑀭𑀬𑀺𑀢𑀩𑁆𑀩𑀸𑀢𑀺 𑀏𑀓𑀢𑁆𑀢𑀯𑁂𑀫𑀢𑁆𑀢𑀢𑀸𑀲𑀗𑁆𑀔𑀸𑀢𑀲𑀸𑀫𑀜𑁆𑀜𑀯𑀺𑀲𑁂𑀲𑀫𑀢𑁆𑀢𑀢𑁄 𑀥𑀸𑀭𑀬𑀺𑀢𑀩𑁆𑀩𑀸, 𑀦 𑀧𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀁 𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀢𑀁 𑀢𑀁 𑀨𑀮𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀻𑀢𑀺 𑀫𑀕𑁆𑀕𑁄, 𑀢𑀤𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑀺 𑀕𑀯𑁂𑀲𑀻𑀬𑀢𑀻𑀢𑀺 𑀯𑀸 𑀫𑀕𑁆𑀕𑁄. 𑀦𑀺𑀭𑀢𑀺𑀬𑀝𑁆𑀞𑁂𑀦 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀘 𑀦𑀺𑀭𑀬𑁄. 𑀉𑀤𑁆𑀥𑀁 𑀅𑀦𑀼𑀕𑀦𑁆𑀢𑁆𑀯𑀸 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸. 𑀢𑀺𑀭𑀘𑁆𑀙𑀸𑀦𑀸𑀯 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀧𑁂𑀢𑀢𑀸𑀬 𑀧𑁂𑀢𑁆𑀢𑀺, 𑀇𑀢𑁄 𑀧𑁂𑀘𑁆𑀘 𑀕𑀢𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑁂𑀢𑁆𑀢𑀺 𑀏𑀯 𑀧𑁂𑀢𑁆𑀢𑀺𑀯𑀺𑀲𑀬𑁄. 𑀦 𑀲𑀼𑀭𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀤𑀺𑀩𑁆𑀩𑀦𑁆𑀢𑀻𑀢𑀺 𑀅𑀲𑀼𑀭𑀸. 𑀅𑀲𑀼𑀭𑀸 𑀏𑀯 𑀅𑀲𑀼𑀭𑀬𑁄𑀦𑀺. 𑀤𑀺𑀩𑁆𑀩𑁂𑀳𑀺 𑀭𑀽𑀧𑀸𑀤𑀻𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑀸𑀢𑀺 𑀲𑀕𑁆𑀕𑀸. 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀢𑀁 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀺𑀭𑀬𑀁 𑀕𑀘𑁆𑀙𑀢𑀻𑀢𑀺 𑀦𑀺𑀭𑀬𑀕𑀸𑀫𑀻. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀼𑀭𑀬𑁄𑀦𑀺𑀬𑁄𑀢𑀺 𑀅𑀲𑀼𑀭𑀬𑁄𑀦𑀺𑀬𑀸 𑀳𑀺𑀢𑁄, 𑀅𑀲𑀼𑀭𑀚𑀸𑀢𑀺𑀦𑀺𑀩𑁆𑀩𑀢𑁆𑀢𑀦𑀓𑁄𑀢𑀺 𑀅𑀢𑁆𑀣𑁄. 𑀲𑀕𑁆𑀕𑀁 𑀕𑀫𑁂𑀢𑀻𑀢𑀺 𑀲𑀕𑁆𑀕𑀕𑀸𑀫𑀺𑀬𑁄. 𑀫𑀦𑀼𑀲𑁆𑀲𑀕𑀸𑀫𑀻𑀢𑀺 𑀫𑀦𑀼𑀲𑁆𑀲𑀮𑁄𑀓𑀕𑀸𑀫𑀻. 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄𑀢𑀺 𑀧𑀝𑀺𑀲𑀗𑁆𑀔𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬 𑀦𑀺𑀭𑁄𑀥𑁄, 𑀧𑀝𑀺𑀧𑀓𑁆𑀔𑁂 𑀯𑀸 𑀢𑀣𑀸 𑀅𑀧𑁆𑀧𑀯𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀧𑀝𑀺𑀧𑀓𑁆𑀔𑀯𑀼𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀸𑀤𑁄. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀭𑀲𑀦𑀺𑀭𑁄𑀥𑁄, 𑀔𑀡𑀺𑀓𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑁄.

𑁪𑁭. 𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀯𑁂𑀫𑀢𑁆𑀢𑀢𑀸. 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀯𑁂𑀫𑀢𑁆𑀢𑀢𑀸. 𑀢𑀣𑀸 𑀪𑀽𑀢𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀧𑀣𑀯𑀻𑀥𑀸𑀢𑀼 ¶ …𑀧𑁂… 𑀯𑀸𑀬𑁄𑀥𑀸𑀢𑀽𑀢𑀺 𑀯𑁂𑀫𑀢𑁆𑀢𑀢𑀸. 𑀧𑀣𑀯𑀻𑀥𑀸𑀢𑀽𑀢𑀺 𑀏𑀓𑀢𑁆𑀢𑀢𑀸. 𑀯𑀻𑀲𑀢𑀺 𑀆𑀓𑀸𑀭𑀸 𑀯𑁂𑀫𑀢𑁆𑀢𑀢𑀸. 𑀆𑀧𑁄𑀥𑀸𑀢𑀽𑀢𑀺 𑀏𑀓𑀢𑁆𑀢𑀢𑀸. 𑀤𑁆𑀯𑀸𑀤𑀲 𑀆𑀓𑀸𑀭𑀸 𑀯𑁂𑀫𑀢𑁆𑀢𑀢𑀸. 𑀢𑁂𑀚𑁄𑀥𑀸𑀢𑀽𑀢𑀺 𑀏𑀓𑀢𑁆𑀢𑀢𑀸. 𑀘𑀢𑁆𑀢𑀸𑀭𑁄 𑀆𑀓𑀸𑀭𑀸 𑀯𑁂𑀫𑀢𑁆𑀢𑀢𑀸. 𑀯𑀸𑀬𑁄𑀥𑀸𑀢𑀽𑀢𑀺 𑀏𑀓𑀢𑁆𑀢𑀢𑀸. 𑀙 𑀆𑀓𑀸𑀭𑀸 𑀯𑁂𑀫𑀢𑁆𑀢𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑁂𑀲𑀸𑀢𑀺 𑀓𑁂𑀲𑀸 𑀦𑀸𑀫 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀝𑁆𑀞𑀓𑀸 𑀓𑀓𑁆𑀔𑀴𑀮𑀓𑁆𑀔𑀡𑀸 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀧𑀣𑀯𑀻𑀥𑀸𑀢𑀼𑀓𑁄𑀝𑁆𑀞𑀸𑀲𑁄. 𑀮𑁄𑀫𑀸 𑀦𑀸𑀫…𑀧𑁂… 𑀫𑀢𑁆𑀣𑀮𑀼𑀗𑁆𑀕𑀁 𑀦𑀸𑀫 𑀲𑀭𑀻𑀭𑀝𑁆𑀞𑀓𑀁 𑀓𑀓𑁆𑀔𑀴𑀮𑀓𑁆𑀔𑀡𑀁 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀆𑀧𑁄𑀥𑀸𑀢𑀽𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀧𑀺𑀢𑁆𑀢𑀸𑀤𑀻𑀲𑀼 ¶ 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑁂𑀦 𑀘𑀸𑀢𑀺 𑀬𑁂𑀦 𑀢𑁂𑀚𑁄𑀥𑀸𑀢𑀼𑀦𑀸 𑀓𑀼𑀧𑀺𑀢𑁂𑀦. 𑀲𑀦𑁆𑀢𑀧𑁆𑀧𑀢𑀻𑀢𑀺 𑀅𑀬𑀁 𑀓𑀸𑀬𑁄 𑀲𑀦𑁆𑀢𑀧𑁆𑀧𑀢𑀺 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦 𑀉𑀲𑀼𑀫𑀚𑀸𑀢𑁄 𑀳𑁄𑀢𑀺. 𑀬𑁂𑀦 𑀘 𑀚𑀻𑀭𑀻𑀬𑀢𑀻𑀢𑀺 𑀬𑁂𑀦 𑀅𑀬𑀁 𑀓𑀸𑀬𑁄 𑀚𑀭𑀻𑀬𑀢𑀺. 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑀁 𑀩𑀮𑀓𑁆𑀔𑀬𑀁 𑀯𑀮𑀺𑀢𑁆𑀢𑀘𑀧𑀮𑀺𑀢𑀸𑀤𑀺𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀻𑀢𑀺 𑀬𑁂𑀦 𑀓𑀼𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀟𑀬𑁆𑀳𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 ‘‘𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻’’𑀢𑀺 𑀓𑀦𑁆𑀤𑀦𑁆𑀢𑁄 𑀲𑀢𑀥𑁄𑀢𑀲𑀧𑁆𑀧𑀺𑀕𑁄𑀲𑀻𑀢𑀘𑀦𑁆𑀤𑀦𑀸𑀤𑀺𑀮𑁂𑀧𑀦𑀁 𑀢𑀸𑀮𑀯𑀡𑁆𑀝𑀯𑀸𑀢𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺. 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀅𑀲𑀺𑀢𑀁 𑀯𑀸 𑀑𑀤𑀦𑀸𑀤𑀺, 𑀧𑀻𑀢𑀁 𑀯𑀸 𑀧𑀸𑀦𑀓𑀸𑀤𑀺, 𑀔𑀸𑀬𑀺𑀢𑀁 𑀯𑀸 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺, 𑀲𑀸𑀬𑀺𑀢𑀁 𑀯𑀸 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀭𑀲𑀸𑀤𑀺𑀪𑀸𑀯𑁂𑀦 𑀯𑀺𑀯𑁂𑀓𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀢𑀬𑁄 𑀢𑁂𑀚𑁄𑀥𑀸𑀢𑀽 𑀘𑀢𑀼𑀲𑀫𑀼𑀝𑁆𑀞𑀸𑀦𑀸. 𑀧𑀘𑁆𑀙𑀺𑀫𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄𑀯.

𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀢𑀺 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀭𑀸𑀤𑀺𑀧𑀯𑀢𑁆𑀢𑀓𑀸 𑀉𑀤𑁆𑀥𑀁 𑀆𑀭𑁄𑀳𑀦𑀯𑀸𑀢𑀸. 𑀅𑀥𑁄𑀕𑀫𑀸 𑀯𑀸𑀢𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀦𑀻𑀳𑀭𑀡𑀓𑀸 𑀅𑀥𑁄 𑀑𑀭𑁄𑀳𑀦𑀯𑀸𑀢𑀸. 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸. 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄𑀯𑀸𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸𑀢𑀺 𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀝𑀸 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀸 𑀯𑀸𑀢𑀸. 𑀅𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀦𑀸𑀲𑀺𑀓𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀯𑀸𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀲𑀩𑁆𑀩𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀸. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀏𑀯. 𑀏𑀯𑀁 𑀯𑁂𑀫𑀢𑁆𑀢𑀢𑀸𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀸𑀕𑁂𑀦 𑀉𑀤𑀸𑀳𑀝𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀉𑀧𑀲𑀁𑀳𑀭𑀦𑁆𑀢𑁄 ‘‘𑀇𑀫𑁂𑀳𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀕𑀬𑁆𑀳𑀽𑀧𑀕𑀦𑁆𑀢𑀺 𑀦 𑀕𑀳𑀡𑀬𑁄𑀕𑁆𑀕𑀁. 𑀲𑀪𑀸𑀯𑀪𑀸𑀯𑀢𑁄𑀢𑀺 𑀲𑀪𑀸𑀯𑀮𑀓𑁆𑀔𑀡𑀢𑁄.

𑀏𑀯𑀁 ¶ 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀲𑀫𑁆𑀫𑀲𑀦𑀘𑀸𑀭𑀁 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀳 𑀪𑀕𑀯𑀸 𑀬𑀸 𑀘𑁂𑀯 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁪𑁮. 𑀏𑀯𑀁 𑀲𑀘𑁆𑀘𑀫𑀕𑁆𑀕𑀭𑀽𑀧𑀥𑀫𑁆𑀫𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀚𑁆𑀚𑀸𑀯𑀺𑀚𑁆𑀚𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀚𑁆𑀚𑀸𑀢𑀺 𑀏𑀓𑀢𑁆𑀢𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 ¶ 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀬𑀲𑁆𑀫𑀸 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑀦𑁆𑀢𑁄 𑀅𑀢𑀻𑀢𑀤𑁆𑀥𑀪𑀽𑀢𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄. 𑀅𑀧𑀭𑀦𑁆𑀢𑁄 𑀅𑀦𑀸𑀕𑀢𑀤𑁆𑀥𑀪𑀽𑀢𑀸. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄 𑀢𑀤𑀼𑀪𑀬𑀁. 𑀇𑀤𑀧𑁆𑀧𑀘𑁆𑀘𑀬𑀢𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀓𑀸𑀭𑀡𑀸𑀦𑀺 𑀅𑀯𑀺𑀚𑁆𑀚𑀸𑀤𑀻𑀦𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀅𑀯𑀺𑀚𑁆𑀚𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸 𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑀸.

𑀢𑀢𑁆𑀣𑀸𑀬𑀁 𑀅𑀯𑀺𑀚𑁆𑀚𑀸 𑀬𑀲𑁆𑀫𑀸 𑀅𑀢𑀻𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀬𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁 𑀬𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀸𑀬𑀁 𑀅𑀯𑀺𑀚𑁆𑀚𑀸 𑀓𑀺𑀘𑁆𑀘𑀢𑁄 𑀚𑀸𑀢𑀺𑀢𑁄𑀧𑀺 𑀓𑀣𑀺𑀢𑀸. 𑀅𑀬𑀜𑁆𑀳𑀺 𑀇𑀫𑀸𑀦𑀺 𑀅𑀝𑁆𑀞 𑀞𑀸𑀦𑀸𑀦𑀺 𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀓𑀺𑀘𑁆𑀘𑀢𑁄 𑀓𑀣𑀺𑀢𑀸. 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀚𑀸𑀢𑀺𑀢𑁄 𑀓𑀣𑀺𑀢𑀸. 𑀏𑀯𑀁 𑀓𑀺𑀘𑁆𑀘𑀢𑁄 𑀚𑀸𑀢𑀺𑀢𑁄 𑀘 𑀓𑀣𑀺𑀢𑀸𑀧𑀺 𑀮𑀓𑁆𑀔𑀡𑀢𑁄 𑀓𑀣𑀺𑀢𑁂 𑀏𑀯 𑀲𑀼𑀓𑀣𑀺𑀢𑀸 𑀳𑁄𑀢𑀻𑀢𑀺 𑀮𑀓𑁆𑀔𑀡𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀜𑀸𑀡𑀁 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀅𑀬𑀁 𑀧𑀦 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀜𑀸𑀡𑀧𑀘𑁆𑀘𑀦𑀻𑀓𑀢𑁄 𑀅𑀜𑁆𑀜𑀸𑀡𑀁. 𑀤𑀲𑁆𑀲𑀦𑀦𑁆𑀢𑀺𑀧𑀺 𑀧𑀜𑁆𑀜𑀸, 𑀲𑀸 𑀳𑀺 𑀢𑀁 𑀆𑀓𑀸𑀭𑀁 𑀧𑀲𑁆𑀲𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀤𑀲𑁆𑀲𑀦𑀁. 𑀅𑀪𑀺𑀲𑀫𑀬𑁄𑀢𑀺𑀧𑀺 𑀧𑀜𑁆𑀜𑀸, 𑀲𑀸 𑀢𑀁 𑀆𑀓𑀸𑀭𑀁 𑀅𑀪𑀺𑀲𑀫𑁂𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀅𑀪𑀺𑀲𑀫𑁂𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀪𑀺𑀲𑀫𑀬𑁄. 𑀅𑀦𑀼𑀩𑁄𑀥𑁄 𑀲𑀫𑁆𑀩𑁄𑀥𑁄 𑀧𑀝𑀺𑀯𑁂𑀥𑁄𑀢𑀺𑀧𑀺 𑀧𑀜𑁆𑀜𑀸, 𑀲𑀸 𑀢𑀁 𑀆𑀓𑀸𑀭𑀁 𑀅𑀦𑀼𑀩𑀼𑀚𑁆𑀛𑀢𑀺 𑀲𑀫𑁆𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀅𑀦𑀼𑀩𑀼𑀚𑁆𑀛𑀺𑀢𑀼𑀁 𑀲𑀫𑁆𑀩𑀼𑀚𑁆𑀛𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄. 𑀢𑀣𑀸 𑀲𑀮𑁆𑀮𑀓𑁆𑀔𑀡𑀁 𑀉𑀧𑀮𑀓𑁆𑀔𑀡𑀁 𑀧𑀘𑁆𑀘𑀼𑀧𑀮𑀓𑁆𑀔𑀡𑀁 𑀲𑀫𑀧𑁂𑀓𑁆𑀔𑀡𑀦𑁆𑀢𑀺𑀧𑀺 𑀧𑀜𑁆𑀜𑀸, 𑀲𑀸 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑀢𑀺 ¶ 𑀉𑀧𑀮𑀓𑁆𑀔𑀢𑀺 𑀧𑀘𑁆𑀘𑀼𑀧𑀮𑀓𑁆𑀔𑀢𑀺 𑀲𑀫𑀁 𑀲𑀫𑁆𑀫𑀸 𑀘 𑀅𑀧𑁂𑀓𑁆𑀔𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀢𑀣𑀸 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀲𑀮𑁆𑀮𑀓𑁆𑀔𑀡𑀁 𑀅𑀦𑀼𑀧𑀮𑀓𑁆𑀔𑀡𑀁 𑀅𑀧𑀘𑁆𑀘𑀼𑀧𑀮𑀓𑁆𑀔𑀡𑀁 𑀅𑀲𑀫𑀧𑁂𑀓𑁆𑀔𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀦𑀸𑀲𑁆𑀲 ¶ 𑀓𑀺𑀜𑁆𑀘𑀺 𑀧𑀘𑁆𑀘𑀓𑁆𑀔𑀓𑀫𑁆𑀫𑀁 𑀅𑀢𑁆𑀣𑀺, 𑀲𑀬𑀜𑁆𑀘 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀢𑀓𑀫𑁆𑀫𑀦𑁆𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀓𑀫𑁆𑀫𑀁. 𑀤𑀼𑀫𑁆𑀫𑁂𑀥𑀸𑀦𑀁 𑀪𑀸𑀯𑁄 𑀤𑀼𑀫𑁆𑀫𑁂𑀚𑁆𑀛𑀁. 𑀩𑀸𑀮𑀸𑀦𑀁 𑀪𑀸𑀯𑁄 𑀩𑀸𑀮𑁆𑀬𑀁. 𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀧𑀜𑁆𑀜𑀸, 𑀲𑀸 𑀅𑀢𑁆𑀣𑀸𑀦𑀢𑁆𑀣𑀁 𑀓𑀸𑀭𑀡𑀸𑀓𑀸𑀭𑀡𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑁆𑀧𑀚𑀸𑀦𑀸𑀢𑀺. 𑀅𑀯𑀺𑀚𑁆𑀚𑀸 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀧𑀚𑀸𑀦𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀲𑀫𑁆𑀧𑀚𑀜𑁆𑀜𑀁. 𑀫𑁄𑀳𑀦𑀯𑀲𑁂𑀦 𑀫𑁄𑀳𑁄. 𑀧𑀫𑁄𑀳𑀦𑀯𑀲𑁂𑀦 𑀧𑀫𑁄𑀳𑁄. 𑀲𑀫𑁆𑀫𑁄𑀳𑀦𑀯𑀲𑁂𑀦 𑀲𑀫𑁆𑀫𑁄𑀳𑁄. 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀺, 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀢𑀺 𑀑𑀢𑀭𑀢𑀻𑀢𑀺 𑀅𑀯𑀺𑀚𑁆𑀚𑁄𑀖𑁄. 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀢𑀻𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑁄. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀘𑁂𑀯 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀘 𑀅𑀯𑀺𑀚𑁆𑀚𑀸𑀦𑀼𑀲𑀬𑁄. 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀢𑀘𑁄𑀭𑀸 𑀯𑀺𑀬 𑀅𑀤𑁆𑀥𑀺𑀓𑁂 𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺 𑀯𑀺𑀮𑀼𑀧𑁆𑀧𑀢𑀻𑀢𑀺 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁. 𑀬𑀣𑀸 𑀦𑀕𑀭𑀤𑁆𑀯𑀸𑀭𑁂 𑀧𑀮𑀺𑀖𑀲𑀗𑁆𑀔𑀸𑀢𑀸𑀬 𑀮𑀗𑁆𑀕𑀺𑀬𑀸 𑀧𑀢𑀺𑀢𑀸𑀬 𑀫𑀦𑀼𑀲𑁆𑀲𑀸𑀦𑀁 𑀦𑀕𑀭𑀧𑁆𑀧𑀯𑁂𑀲𑁄 𑀧𑀘𑁆𑀙𑀺𑀚𑁆𑀚𑀢𑀺, 𑀏𑀯𑀫𑁂𑀯 𑀬𑀲𑁆𑀲 𑀲𑀓𑁆𑀓𑀸𑀬𑀦𑀕𑀭𑁂 𑀅𑀬𑀁 𑀧𑀢𑀺𑀢𑀸, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀁 𑀜𑀸𑀡𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀻𑀢𑀺 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀦𑀸𑀫 𑀳𑁄𑀢𑀺. 𑀅𑀓𑀼𑀲𑀮𑀜𑁆𑀘 𑀢𑀁 𑀫𑀽𑀮𑀜𑁆𑀘, 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀁. 𑀢𑀁 𑀧𑀦 𑀦 𑀅𑀜𑁆𑀜𑀁, 𑀇𑀥𑀸𑀥𑀺𑀧𑁆𑀧𑁂𑀢𑁄 𑀫𑁄𑀳𑁄𑀢𑀺 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑀅𑀬𑀁 𑀏𑀓𑀧𑀤𑀺𑀓𑁄 𑀅𑀯𑀺𑀚𑁆𑀚𑀸𑀬 𑀅𑀢𑁆𑀣𑀼𑀤𑁆𑀥𑀸𑀭𑁄. 𑀅𑀬𑀁 𑀯𑁂𑀫𑀢𑁆𑀢𑀢𑀸𑀢𑀺 𑀅𑀬𑀁 𑀅𑀯𑀺𑀚𑁆𑀚𑀸𑀬 𑀯𑁂𑀫𑀢𑁆𑀢𑀢𑀸.

𑀯𑀺𑀚𑁆𑀚𑀸𑀢𑀺 𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀤𑀼𑀓𑁆𑀔𑁂 𑀅𑀭𑀺𑀬𑀲𑀘𑁆𑀘𑁂 𑀯𑀺𑀲𑀬𑀪𑀽𑀢𑁂 𑀜𑀸𑀡𑀁 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀜𑁆𑀜𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀢𑁂𑀦 𑀢𑁂𑀦 𑀯𑀸 𑀅𑀦𑀺𑀘𑁆𑀘𑀸𑀤𑀺𑀦𑀸 𑀧𑀓𑀸𑀭𑁂𑀦 𑀥𑀫𑁆𑀫𑁂 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀧𑀚𑀸𑀦𑀦𑀸𑀓𑀸𑀭𑁄 𑀧𑀚𑀸𑀦𑀦𑀸. 𑀅𑀦𑀺𑀘𑁆𑀘𑀸𑀤𑀻𑀦𑀺 𑀯𑀺𑀘𑀺𑀦𑀢𑀻𑀢𑀺 𑀯𑀺𑀘𑀬𑁄. 𑀧𑀓𑀸𑀭𑁂𑀳𑀺 𑀯𑀺𑀘𑀺𑀦𑀢𑀻𑀢𑀺 𑀧𑀯𑀺𑀘𑀬𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀺𑀘𑀺𑀦𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀅𑀦𑀺𑀘𑁆𑀘𑀸𑀤𑀻𑀦𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀮𑁆𑀮𑀓𑁆𑀔𑀡𑀸. 𑀢𑁂𑀲𑀁𑀬𑁂𑀯 𑀧𑀢𑀺 𑀧𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀧𑀘𑁆𑀘𑀼𑀧𑀮𑀓𑁆𑀔𑀡𑀸. 𑀧𑀡𑁆𑀟𑀺𑀢𑀪𑀸𑀯𑁄 𑀧𑀡𑁆𑀟𑀺𑀘𑁆𑀘𑀁. 𑀓𑀼𑀲𑀮𑀪𑀸𑀯𑁄 𑀓𑁄𑀲𑀮𑁆𑀮𑀁. 𑀦𑀺𑀧𑀼𑀡𑀪𑀸𑀯𑁄 𑀦𑁂𑀧𑀼𑀜𑁆𑀜𑀁. 𑀅𑀦𑀺𑀘𑁆𑀘𑀸𑀤𑀻𑀦𑀁 𑀯𑀺𑀪𑀸𑀯𑀦𑀯𑀲𑁂𑀦 𑀯𑁂𑀪𑀩𑁆𑀬𑀸. 𑀢𑁂𑀲𑀁𑀬𑁂𑀯 𑀘𑀺𑀦𑁆𑀢𑀦𑀯𑀲𑁂𑀦 𑀘𑀺𑀦𑁆𑀢𑀸. 𑀅𑀦𑀺𑀘𑁆𑀘𑀸𑀤𑀻𑀦𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑀉𑀧𑀧𑀭𑀺𑀓𑁆𑀔𑀸. 𑀪𑀽𑀭𑀻𑀢𑀺 𑀧𑀣𑀯𑀺𑀬𑀸 𑀦𑀸𑀫𑀁, 𑀅𑀬𑀫𑁆𑀧𑀺 𑀲𑀡𑁆𑀳𑀝𑁆𑀞𑁂𑀦 𑀯𑀺𑀢𑁆𑀣𑀢𑀝𑁆𑀞𑁂𑀦 𑀘 𑀪𑀽𑀭𑀻 𑀯𑀺𑀬𑀸𑀢𑀺 𑀪𑀽𑀭𑀻. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀽𑀭𑀻 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀯𑀺𑀢𑁆𑀣𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 ¶ 𑀪𑀽𑀭𑀺𑀧𑀜𑁆𑀜𑁄’’𑀢𑀺 ¶ (𑀫𑀳𑀸𑀦𑀺. 𑁨𑁭). 𑀅𑀧𑀺 𑀘 𑀪𑀽𑀭𑀻𑀢𑀺 𑀧𑀜𑁆𑀜𑀸𑀬𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀽𑀢𑁂 𑀅𑀢𑁆𑀣𑁂 𑀭𑀫𑀢𑀻𑀢𑀺 𑀪𑀽𑀭𑀻.

𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸, 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀝𑁆𑀞𑁂𑀦 𑀯𑀸 𑀫𑁂𑀥𑀸. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀢𑁆𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑁂 𑀧𑀭𑀺𑀡𑁂𑀢𑀻𑀢𑀺 𑀧𑀭𑀺𑀡𑀸𑀬𑀺𑀓𑀸. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀥𑀫𑁆𑀫𑁂 𑀯𑀺𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀫𑁆𑀫𑀸 𑀧𑀓𑀸𑀭𑁂𑀳𑀺 𑀅𑀦𑀺𑀘𑁆𑀘𑀸𑀤𑀻𑀦𑀺 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑀁. 𑀉𑀧𑁆𑀧𑀣𑀧𑀝𑀺𑀧𑀦𑁆𑀦𑁂 𑀲𑀺𑀦𑁆𑀥𑀯𑁂 𑀯𑀻𑀣𑀺𑀆𑀭𑁄𑀧𑀦𑀢𑁆𑀣𑀁 𑀧𑀢𑁄𑀤𑁄 𑀯𑀺𑀬 𑀉𑀧𑁆𑀧𑀣𑁂 𑀥𑀸𑀯𑀦𑀓𑀽𑀝𑀘𑀺𑀢𑁆𑀢𑀁 𑀯𑀻𑀣𑀺𑀆𑀭𑁄𑀧𑀦𑀢𑁆𑀣𑀁 𑀯𑀺𑀚𑁆𑀛𑀢𑀻𑀢𑀺 𑀧𑀢𑁄𑀤𑁄 𑀯𑀺𑀬𑀸𑀢𑀺 𑀧𑀢𑁄𑀤𑁄. 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀓𑀺𑀮𑁂𑀲𑀘𑁆𑀙𑁂𑀤𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀲𑀢𑁆𑀣𑀁 𑀧𑀜𑁆𑀜𑀸𑀲𑀢𑁆𑀣𑀁. 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀧𑀜𑁆𑀜𑀸𑀯 𑀧𑀸𑀲𑀸𑀤𑁄 𑀧𑀜𑁆𑀜𑀸𑀧𑀸𑀲𑀸𑀤𑁄. 𑀆𑀮𑁄𑀓𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀆𑀮𑁄𑀓𑁄 𑀧𑀜𑁆𑀜𑀸𑀆𑀮𑁄𑀓𑁄.

𑀑𑀪𑀸𑀲𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀑𑀪𑀸𑀲𑁄 𑀧𑀜𑁆𑀜𑀸𑀑𑀪𑀸𑀲𑁄. 𑀧𑀚𑁆𑀚𑁄𑀢𑀦𑀝𑁆𑀞𑁂𑀦 𑀧𑀜𑁆𑀜𑀸𑀯 𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀭𑀢𑀺𑀓𑀭𑀡𑀝𑁆𑀞𑁂𑀦 𑀭𑀢𑀺𑀤𑀸𑀬𑀓𑀝𑁆𑀞𑁂𑀦 𑀭𑀢𑀺𑀚𑀦𑀓𑀝𑁆𑀞𑁂𑀦 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀝𑁆𑀞𑁂𑀦 𑀅𑀢𑀼𑀮𑀝𑁆𑀞𑁂𑀦 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦 𑀘 𑀧𑀜𑁆𑀜𑀸𑀯 𑀭𑀢𑀦𑀁 𑀧𑀜𑁆𑀜𑀸𑀭𑀢𑀦𑀁. 𑀦 𑀢𑁂𑀦 𑀲𑀢𑁆𑀢𑀸 𑀫𑀼𑀬𑁆𑀳𑀦𑁆𑀢𑀺, 𑀲𑀬𑀁 𑀯𑀸 𑀆𑀭𑀫𑁆𑀫𑀡𑁂 𑀦 𑀫𑀼𑀬𑁆𑀳𑀢𑀻𑀢𑀺 𑀅𑀫𑁄𑀳𑁄. 𑀥𑀫𑁆𑀫𑀯𑀺𑀘𑀬𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀓𑀲𑁆𑀫𑀸 𑀧𑀦𑁂𑀢𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀫𑁄𑀳𑀲𑁆𑀲 𑀫𑁄𑀳𑀧𑀝𑀺𑀧𑀓𑁆𑀔𑀪𑀸𑀯𑀤𑀻𑀧𑀦𑀢𑁆𑀣𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀬𑁆𑀯𑀸𑀬𑀁 𑀅𑀫𑁄𑀳𑁄, 𑀲𑁄 𑀦 𑀓𑁂𑀯𑀮𑀁 𑀫𑁄𑀳𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄, 𑀫𑁄𑀳𑀲𑁆𑀲 𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑀯𑀺𑀘𑀬𑀲𑀗𑁆𑀔𑀸𑀢𑁄 𑀅𑀫𑁄𑀳𑁄𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀬𑀸𑀣𑀸𑀯𑀦𑀺𑀬𑁆𑀬𑀸𑀦𑀺𑀓𑀓𑀼𑀲𑀮𑀤𑀺𑀝𑁆𑀞𑀺. 𑀥𑀫𑁆𑀫𑀯𑀺𑀘𑀬𑀲𑀗𑁆𑀔𑀸𑀢𑁄 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀯𑀸 𑀩𑁄𑀚𑁆𑀛𑀗𑁆𑀕𑁄𑀢𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀫𑀕𑁆𑀕𑀗𑁆𑀕𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀗𑁆𑀕𑀁 𑀓𑀸𑀭𑀡𑀦𑁆𑀢𑀺 𑀫𑀕𑁆𑀕𑀗𑁆𑀕𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑁆𑀢𑁄𑀕𑀥𑀢𑁆𑀢𑀸 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺.

𑀅𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀢𑀺 𑀲𑀜𑁆𑀜𑀸𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀸 𑀅𑀲𑀜𑁆𑀜𑀪𑀯𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀲𑀫𑀸𑀧𑀢𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂 𑀏𑀓𑀘𑁆𑀘𑁂 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀲𑀜𑁆𑀜𑀸𑀬 𑀤𑁄𑀲𑀁 𑀧𑀲𑁆𑀲𑀦𑁆𑀢𑀺, 𑀲𑀜𑁆𑀜𑀸𑀬 𑀲𑀢𑀺 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀤𑀼𑀓𑁆𑀔𑀜𑁆𑀘𑁂𑀯 𑀲𑀩𑁆𑀩𑀪𑀬𑀸𑀦𑀺 ¶ 𑀘 𑀳𑁄𑀦𑁆𑀢𑀺, ‘‘𑀅𑀮𑀁 𑀇𑀫𑀸𑀬 𑀲𑀜𑁆𑀜𑀸𑀬, 𑀲𑀜𑁆𑀜𑀸𑀪𑀸𑀯𑁄 𑀲𑀦𑁆𑀢𑁄’’𑀢𑀺 𑀏𑀯𑀁 𑀲𑀜𑁆𑀜𑀸𑀬 𑀤𑁄𑀲𑀁 𑀧𑀲𑁆𑀲𑀺𑀢𑁆𑀯𑀸 𑀲𑀜𑁆𑀜𑀸𑀯𑀺𑀭𑀸𑀕𑀯𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀅𑀲𑀜𑁆𑀜𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀁 𑀦𑁂𑀲𑀁 𑀘𑀼𑀢𑀺𑀘𑀺𑀢𑁆𑀢𑀦𑀺𑀭𑁄𑀥𑁂𑀦𑁂𑀯 𑀇𑀥 𑀦𑀺𑀯𑀢𑁆𑀢𑀢𑀺, 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀺.

𑀢𑁂 ¶ 𑀬𑀣𑀸 𑀦𑀸𑀫 𑀚𑀺𑀬𑀸𑀯𑁂𑀕𑀼𑀓𑁆𑀔𑀺𑀢𑁆𑀢𑁄 𑀲𑀭𑁄 𑀬𑀢𑁆𑀢𑀓𑁄 𑀚𑀺𑀬𑀸𑀯𑁂𑀕𑁄, 𑀢𑀢𑁆𑀢𑀓𑀫𑁂𑀯 𑀆𑀓𑀸𑀲𑁂 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀛𑀸𑀦𑀯𑁂𑀕𑀼𑀓𑁆𑀔𑀺𑀢𑁆𑀢𑀸 𑀉𑀧𑀧𑀚𑁆𑀚𑀺𑀢𑁆𑀯𑀸 𑀬𑀢𑁆𑀢𑀓𑁄 𑀛𑀸𑀦𑀯𑁂𑀕𑁄, 𑀢𑀢𑁆𑀢𑀓𑀫𑁂𑀯 𑀓𑀸𑀮𑀁 𑀢𑀺𑀝𑁆𑀞𑀦𑁆𑀢𑀺. 𑀛𑀸𑀦𑀯𑁂𑀕𑁂 𑀧𑀦 𑀧𑀭𑀺𑀓𑁆𑀔𑀻𑀡𑁂 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀥 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀲𑀜𑁆𑀜𑀪𑀯𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀲𑀫𑀸𑀧𑀢𑁆𑀢𑀻’’𑀢𑀺. 𑀯𑀺𑀪𑀽𑀢𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺. 𑀲𑀸 𑀳𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀲𑀜𑁆𑀜𑀸𑀬𑀧𑀺 𑀯𑀺𑀪𑀸𑀯𑀦𑀢𑁄 ‘‘𑀯𑀺𑀪𑀽𑀢𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 ‘‘𑀯𑀺𑀪𑀽𑀢𑀭𑀽𑀧𑀲𑀜𑁆𑀜𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀯𑀺𑀪𑀽𑀢𑀭𑀽𑀧𑀲𑀫𑀸𑀧𑀢𑁆𑀢𑀺 𑀦𑀸𑀫 𑀲𑁂𑀲𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄. 𑀲𑁂𑀲𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑁄 𑀛𑀸𑀬𑀻𑀢𑀺 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄. 𑀆𑀚𑀸𑀦𑀺𑀬𑁄 𑀛𑀸𑀬𑀻𑀢𑀺 𑀅𑀭𑀳𑀸, 𑀲𑀩𑁆𑀩𑁂𑀧𑀺 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀅𑀲𑁆𑀲𑀔𑀮𑀼𑀗𑁆𑀓𑁄 𑀛𑀸𑀬𑀻𑀢𑀺 𑀔𑀮𑀼𑀗𑁆𑀓𑀲𑁆𑀲𑀲𑀤𑀺𑀲𑁄 𑀛𑀸𑀬𑀻. 𑀢𑀣𑀸 𑀳𑀺 𑀔𑀮𑀼𑀗𑁆𑀓𑁄 𑀅𑀲𑁆𑀲𑁄 𑀤𑀫𑀣𑀁 𑀦 𑀉𑀧𑁂𑀢𑀺 𑀇𑀢𑁄 𑀘𑀺𑀢𑁄 𑀘 𑀬𑀣𑀸𑀭𑀼𑀘𑀺 𑀥𑀸𑀯𑀢𑀺, 𑀏𑀯𑀫𑁂𑀯𑀁 𑀬𑁄 𑀧𑀼𑀣𑀼𑀚𑁆𑀚𑀦𑁄 𑀅𑀪𑀺𑀜𑁆𑀜𑀸𑀮𑀸𑀪𑀻, 𑀲𑁄 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀓𑀢𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀉𑀢𑁆𑀢𑀭𑀺𑀤𑀫𑀣𑀸𑀬 𑀅𑀧𑀭𑀺𑀲𑀓𑁆𑀓𑀦𑁆𑀢𑁄 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀢𑀺 𑀧𑀯𑀢𑁆𑀢𑀢𑀺, 𑀲𑁄 ‘‘𑀅𑀲𑁆𑀲𑀔𑀮𑀼𑀗𑁆𑀓𑁄 𑀛𑀸𑀬𑀻’’𑀢𑀺 𑀯𑀼𑀢𑁆𑀢𑁄. 𑀤𑀺𑀝𑁆𑀞𑀼𑀢𑁆𑀢𑀭𑁄 𑀛𑀸𑀬𑀻𑀢𑀺 𑀛𑀸𑀦𑀮𑀸𑀪𑀻 𑀤𑀺𑀝𑁆𑀞𑀺𑀕𑀢𑀺𑀓𑁄. 𑀧𑀜𑁆𑀜𑀼𑀢𑁆𑀢𑀭𑁄 𑀛𑀸𑀬𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀻, 𑀲𑀩𑁆𑀩𑁄 𑀏𑀯 𑀯𑀸 𑀧𑀜𑁆𑀜𑀸𑀥𑀺𑀓𑁄 𑀛𑀸𑀬𑀻.

𑀲𑀭𑀡𑁄 𑀲𑀫𑀸𑀥𑀻𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀲𑀩𑁆𑀩𑁄𑀧𑀺 𑀯𑀸 𑀲𑀸𑀲𑀯𑁄 𑀲𑀫𑀸𑀥𑀺. 𑀅𑀭𑀡𑁄 𑀲𑀫𑀸𑀥𑀻𑀢𑀺 𑀲𑀩𑁆𑀩𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀲𑀫𑀸𑀥𑀺, 𑀮𑁄𑀓𑀼𑀢𑁆𑀢𑀭𑁄 𑀏𑀯 𑀯𑀸. 𑀲𑀯𑁂𑀭𑁄 𑀲𑀫𑀸𑀥𑀻𑀢𑀺 𑀧𑀝𑀺𑀖𑀘𑀺𑀢𑁆𑀢𑁂𑀲𑀼 𑀏𑀓𑀕𑁆𑀕𑀢𑀸. 𑀅𑀯𑁂𑀭𑁄 𑀲𑀫𑀸𑀥𑀻𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀦𑀦𑁆𑀢𑀭𑀤𑀼𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀫𑀺𑀲𑁄 𑀲𑀫𑀸𑀥𑀻𑀢𑀺 𑀮𑁄𑀓𑀺𑀬𑀲𑀫𑀸𑀥𑀺. 𑀲𑁄 𑀳𑀺 𑀅𑀦𑀢𑀺𑀓𑁆𑀓𑀦𑁆𑀢𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀢𑀸𑀬 𑀲𑀸𑀫𑀺𑀲𑁄. 𑀦𑀺𑀭𑀸𑀫𑀺𑀲𑁄 𑀲𑀫𑀸𑀥𑀻𑀢𑀺 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺. 𑀲𑀲𑀗𑁆𑀔𑀸𑀭𑁄 𑀲𑀫𑀸𑀥𑀻𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄 𑀲𑀼𑀔𑀸𑀧𑀝𑀺𑀧𑀤𑁄 𑀘 𑀤𑀦𑁆𑀥𑀸𑀪𑀺𑀜𑁆𑀜𑁄. 𑀲𑁄 𑀳𑀺 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀓𑀺𑀘𑁆𑀙𑁂𑀦 ¶ 𑀓𑀲𑀺𑀭𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑁄. 𑀇𑀢𑀭𑁄 𑀅𑀲𑀗𑁆𑀔𑀸𑀭𑁄 𑀲𑀫𑀸𑀥𑀺. 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀻𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀲𑀫𑀸𑀥𑀺. 𑀉𑀪𑀬𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀻𑀢𑀺 𑀲𑀫𑀣𑀬𑀸𑀦𑀺𑀓𑀲𑁆𑀲 𑀲𑀫𑀸𑀥𑀺. 𑀉𑀪𑀬𑀢𑁄 𑀪𑀸𑀯𑀺𑀢𑀪𑀸𑀯𑀦𑁄 𑀲𑀫𑀸𑀥𑀻𑀢𑀺 𑀓𑀸𑀬𑀲𑀓𑁆𑀔𑀺𑀦𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲 𑀘 𑀲𑀫𑀸𑀥𑀺. 𑀲𑁄 𑀳𑀺 𑀉𑀪𑀬𑀢𑁄 𑀪𑀸𑀕𑁂𑀳𑀺 𑀉𑀪𑀬𑀢𑁄 𑀪𑀸𑀯𑀺𑀢𑀪𑀸𑀯𑀦𑁄.

𑀆𑀕𑀸𑀴𑁆𑀳𑀧𑀝𑀺𑀧𑀤𑀸𑀢𑀺 𑀓𑀸𑀫𑀸𑀦𑀁 𑀑𑀭𑁄𑀳𑀦𑀧𑀝𑀺𑀧𑀢𑁆𑀢𑀺, 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀦𑀺𑀚𑁆𑀛𑀸𑀫𑀧𑀝𑀺𑀧𑀤𑀸𑀢𑀺 𑀓𑀸𑀫𑀲𑁆𑀲 𑀦𑀺𑀚𑁆𑀛𑀸𑀧𑀦𑀯𑀲𑁂𑀦 𑀔𑁂𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀧𑀝𑀺𑀧𑀢𑁆𑀢𑀺, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄𑀢𑀺 ¶ 𑀅𑀢𑁆𑀣𑁄. 𑀅𑀓𑁆𑀔𑀫𑀸 𑀧𑀝𑀺𑀧𑀤𑀸𑀢𑀺𑀆𑀤𑀻𑀲𑀼 𑀧𑀥𑀸𑀦𑀓𑀭𑀡𑀓𑀸𑀮𑁂 𑀲𑀻𑀢𑀸𑀤𑀻𑀦𑀺 𑀅𑀲𑀳𑀦𑁆𑀢𑀲𑁆𑀲 𑀧𑀝𑀺𑀧𑀤𑀸, 𑀢𑀸𑀦𑀺 𑀦𑀓𑁆𑀔𑀫𑀢𑀻𑀢𑀺 𑀅𑀓𑁆𑀔𑀫𑀸. 𑀲𑀳𑀦𑁆𑀢𑀲𑁆𑀲 𑀧𑀦 𑀢𑀸𑀦𑀺 𑀔𑀫𑀢𑀻𑀢𑀺 𑀔𑀫𑀸. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁪; 𑁬.𑁫𑁮) 𑀦𑀬𑁂𑀦 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂 𑀲𑀫𑁂𑀢𑀻𑀢𑀺 𑀲𑀫𑀸. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀫𑁂𑀢𑀻𑀢𑀺 𑀤𑀫𑀸 𑀧𑀝𑀺𑀧𑀤𑀸.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀬𑁄 𑀥𑀫𑁆𑀫𑁄𑀢𑀺 𑀬𑁄 𑀓𑁄𑀘𑀺 𑀚𑀸𑀢𑀺𑀆𑀤𑀺𑀥𑀫𑁆𑀫𑁄. 𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀚𑀭𑀸𑀤𑀺𑀥𑀫𑁆𑀫𑀲𑁆𑀲. 𑀲𑀫𑀸𑀦𑀪𑀸𑀯𑁄𑀢𑀺 𑀤𑀼𑀓𑁆𑀔𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑀪𑀸𑀯𑁄. 𑀏𑀓𑀢𑁆𑀢𑀢𑀸𑀬𑀸𑀢𑀺 𑀲𑀫𑀸𑀦𑀢𑀸𑀬 𑀤𑀼𑀓𑁆𑀔𑀸𑀤𑀺𑀪𑀸𑀯𑀸𑀦𑀁 𑀏𑀓𑀻𑀪𑀸𑀯𑁂𑀦. 𑀏𑀓𑀻 𑀪𑀯𑀢𑀻𑀢𑀺 𑀅𑀦𑁂𑀓𑁄𑀧𑀺 ‘‘𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀏𑀓𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀬 𑀏𑀓𑀻 𑀪𑀯𑀢𑀺. 𑀏𑀢𑁂𑀦 𑀏𑀓𑀢𑁆𑀢𑀢𑀸𑀬 𑀮𑀓𑁆𑀔𑀡𑀫𑀸𑀳. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀺𑀮𑀓𑁆𑀔𑀡𑁄𑀢𑀺 𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀬𑁂𑀦 𑀬𑁂𑀦 𑀪𑀸𑀯𑁂𑀦 𑀯𑀺𑀲𑀤𑀺𑀲𑁄. 𑀢𑁂𑀦 𑀢𑁂𑀦 𑀯𑁂𑀫𑀢𑁆𑀢𑀁 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀢𑁂𑀦 𑀪𑀸𑀯𑁂𑀦 𑀲𑁄 𑀥𑀫𑁆𑀫𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀯𑁂𑀫𑀢𑁆𑀢𑀢𑀁 𑀯𑀺𑀲𑀤𑀺𑀲𑀢𑁆𑀢𑀁 𑀕𑀘𑁆𑀙𑀢𑀺, 𑀤𑀼𑀓𑁆𑀔𑀪𑀸𑀯𑁂𑀦 𑀲𑀫𑀸𑀦𑁄𑀧𑀺 𑀚𑀸𑀢𑀺𑀆𑀤𑀺𑀓𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑁂𑀦 𑀚𑀭𑀸𑀤𑀺𑀓𑀲𑁆𑀲 𑀯𑀺𑀲𑀺𑀝𑁆𑀞𑀢𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀯𑁂𑀫𑀢𑁆𑀢𑀢𑀸𑀬 𑀮𑀓𑁆𑀔𑀡𑀫𑀸𑀳.

𑀇𑀤𑀸𑀦𑀺 𑀢𑀸𑀯 𑀏𑀓𑀢𑁆𑀢𑀯𑁂𑀫𑀢𑁆𑀢𑀢𑀸𑀯𑀺𑀲𑀬𑁂 𑀦𑀺𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑁂 𑀯𑀸 𑀯𑁂𑀬𑁆𑀬𑀸𑀓𑀭𑀡𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀘𑁆𑀙𑀺𑀢𑀦𑁆𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑀲𑀼𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑀬𑀢𑀸𑀬. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁯. 𑀢𑀢𑁆𑀣 ¶ 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄𑀢𑀺 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀬𑁄 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀚𑀦𑀬𑀢𑀺, 𑀢𑀲𑁆𑀲 𑀲𑁄 𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀗𑁆𑀔𑁂𑀧𑀢𑁄 𑀧𑀭𑀺𑀓𑁆𑀔𑀸𑀭𑀮𑀓𑁆𑀔𑀡𑀁 𑀯𑀢𑁆𑀯𑀸 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁𑀮𑀓𑁆𑀔𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺𑀦𑁄𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀝𑀺𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀳𑁂𑀢𑀼. 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀨𑀮𑀁 𑀏𑀢𑀻𑀢𑀺 𑀧𑀘𑁆𑀘𑀬𑁄. 𑀓𑀺𑀜𑁆𑀘𑀸𑀧𑀺 𑀳𑁂𑀢𑀼𑀧𑀘𑁆𑀘𑀬𑀲𑀤𑁆𑀤𑁂𑀳𑀺 𑀓𑀸𑀭𑀡𑀫𑁂𑀯 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀢𑀢𑁆𑀣 𑀯𑀺𑀲𑁂𑀲𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀪𑀸𑀯𑁄 𑀳𑁂𑀢𑀽𑀢𑀺 𑀲𑀫𑀸𑀦𑀪𑀸𑀯𑁄 ¶ 𑀩𑀻𑀚𑀁 𑀳𑁂𑀢𑀼. 𑀦𑀦𑀼 𑀘 𑀩𑀻𑀚𑀁 𑀅𑀗𑁆𑀓𑀼𑀭𑀸𑀤𑀺𑀲𑀤𑀺𑀲𑀁 𑀦 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺, 𑀅𑀜𑁆𑀜𑀢𑁄 𑀳𑀺 𑀢𑀸𑀤𑀺𑀲𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄.

‘‘𑀬𑀣𑀸 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸𑀧𑀺 𑀉𑀤𑀸𑀳𑀭𑀡𑀦𑁆𑀢𑀭𑀤𑀲𑁆𑀲𑀦𑁂𑀦 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀤𑀼𑀤𑁆𑀥𑀦𑁆𑀢𑀺 𑀔𑀻𑀭𑀁. 𑀤𑀥𑀺 𑀪𑀯𑀢𑀻𑀢𑀺 𑀏𑀓𑀢𑁆𑀢𑀦𑀬𑁂𑀦 𑀅𑀪𑁂𑀤𑁄𑀧𑀘𑀸𑀭𑁂𑀦 𑀯𑀸 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀔𑀻𑀭𑀁 𑀤𑀥𑀺 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦 𑀘𑀢𑁆𑀣𑀺 𑀏𑀓𑀓𑀸𑀮𑀲𑀫𑀯𑀥𑀸𑀦𑀁 𑀤𑀼𑀤𑁆𑀥𑀲𑁆𑀲 𑀘 𑀤𑀥𑀺𑀲𑁆𑀲 𑀘𑀸’’𑀢𑀺. 𑀅𑀣 𑀯𑀸 𑀖𑀝𑁂 𑀤𑀼𑀤𑁆𑀥𑀁 𑀧𑀓𑁆𑀔𑀺𑀢𑁆𑀢𑀁 𑀤𑀥𑀺 𑀪𑀯𑀢𑀺, 𑀤𑀥𑀺 𑀢𑀢𑁆𑀣 𑀓𑀸𑀮𑀦𑁆𑀢𑀭𑁂 𑀚𑀸𑀬𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀬𑁄𑀕𑁂𑀦, 𑀢𑀲𑁆𑀫𑀸 𑀦 𑀘𑀢𑁆𑀣𑀺 𑀏𑀓𑀓𑀸𑀮𑀲𑀫𑀯𑀥𑀸𑀦𑀁 𑀤𑀼𑀤𑁆𑀥𑀲𑁆𑀲 𑀘 𑀤𑀥𑀺𑀲𑁆𑀲 𑀘 𑀭𑀲𑀔𑀻𑀭𑀯𑀺𑀧𑀸𑀓𑀸𑀤𑀻𑀳𑀺 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀳𑁂𑀢𑀼𑀪𑀽𑀢𑀲𑁆𑀲 𑀔𑀻𑀭𑀲𑁆𑀲 𑀨𑀮𑀪𑀽𑀢𑁂𑀦 𑀤𑀥𑀺𑀦𑀸 𑀦 𑀏𑀓𑀓𑀸𑀮𑀲𑀫𑀯𑀥𑀸𑀦𑀁, 𑀏𑀯𑀫𑀜𑁆𑀜𑀲𑁆𑀲𑀸𑀧𑀺 𑀳𑁂𑀢𑀼𑀲𑁆𑀲 𑀨𑀮𑁂𑀦 𑀦 𑀏𑀓𑀓𑀸𑀮𑀲𑀫𑀯𑀥𑀸𑀦𑀁, 𑀦 𑀢𑀣𑀸 𑀧𑀘𑁆𑀘𑀬𑀲𑁆𑀲, 𑀦 𑀳𑀺 𑀧𑀘𑁆𑀘𑀬𑁄 𑀏𑀓𑀦𑁆𑀢𑁂𑀦 𑀨𑀮𑁂𑀦 𑀪𑀺𑀦𑁆𑀦𑀓𑀸𑀮𑁄 𑀏𑀯𑀸𑀢𑀺. 𑀏𑀯𑀫𑁆𑀧𑀺 𑀳𑁂𑀢𑀼𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀩𑀸𑀳𑀺𑀭𑀁 𑀳𑁂𑀢𑀼𑀧𑀘𑁆𑀘𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀺 𑀲𑀁𑀲𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀦𑁂𑀓𑀸 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀦𑁆𑀢𑀻𑀢𑀺? 𑀆𑀳 ‘‘𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀧𑀘𑁆𑀙𑀺𑀫𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀢𑀽’’𑀢𑀺. 𑀢𑁂𑀦 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀳𑁂𑀢𑀼𑀨𑀮𑀸𑀦𑀁 𑀲𑀫𑀯𑀥𑀸𑀦𑀁 𑀦𑀢𑁆𑀣𑀻𑀢𑀺 𑀏𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 ‘‘𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀨𑀮𑀪𑀽𑀢𑀸𑀦𑀁 𑀅𑀯𑀺𑀚𑁆𑀚𑀸𑀦𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. ‘‘𑀩𑀻𑀚𑀗𑁆𑀓𑀼𑀭𑁄 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀩𑀻𑀚𑀁 𑀅𑀗𑁆𑀓𑀼𑀭𑀲𑁆𑀲 𑀳𑁂𑀢𑀼 𑀳𑁄𑀦𑁆𑀢𑀁 𑀲𑀫𑀦𑀦𑁆𑀢𑀭𑀳𑁂𑀢𑀼𑀢𑀸𑀬 𑀳𑁂𑀢𑀼 𑀳𑁄𑀢𑀺. 𑀬𑀁 𑀧𑀦 𑀩𑀻𑀚𑀢𑁄 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀲 𑀩𑀻𑀚𑀁 𑀧𑀭𑀫𑁆𑀧𑀭𑀳𑁂𑀢𑀼𑀢𑀸𑀬 𑀳𑁂𑀢𑀼 𑀳𑁄𑀢𑀺. 𑀏𑀯𑀁 𑀅𑀯𑀺𑀚𑁆𑀚𑀸𑀬𑀧𑀺 𑀳𑁂𑀢𑀼𑀪𑀸𑀯𑁂 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀧𑀼𑀦 ¶ ‘‘𑀬𑀣𑀸 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸𑀧𑀺 𑀳𑁂𑀢𑀼𑀧𑀘𑁆𑀘𑀬𑀯𑀺𑀪𑀸𑀕𑀫𑁂𑀯 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀣𑀸𑀮𑀓𑀦𑁆𑀢𑀺 𑀤𑀻𑀧𑀓𑀧𑀮𑁆𑀮𑀺𑀓𑀸. 𑀅𑀦𑀕𑁆𑀕𑀺𑀓𑀦𑁆𑀢𑀺 𑀅𑀕𑁆𑀕𑀺𑀁 𑀯𑀺𑀦𑀸. 𑀤𑀻𑀧𑁂𑀢𑀼𑀦𑁆𑀢𑀺 𑀚𑀸𑀮𑁂𑀢𑀼𑀁. 𑀇𑀢𑀺 𑀲𑀪𑀸𑀯𑁄 𑀳𑁂𑀢𑀽𑀢𑀺 𑀏𑀯𑀁 𑀧𑀤𑀻𑀧𑀼𑀚𑁆𑀚𑀸𑀮𑀦𑀸𑀤𑀻𑀲𑀼 𑀅𑀕𑁆𑀕𑀺𑀆𑀤𑀺𑀧𑀤𑀻𑀧𑀲𑀤𑀺𑀲𑀁 𑀓𑀸𑀭𑀡𑀁 𑀲𑀪𑀸𑀯𑁄 𑀳𑁂𑀢𑀼. 𑀧𑀭𑀪𑀸𑀯𑁄 𑀧𑀘𑁆𑀘𑀬𑁄𑀢𑀺 𑀢𑀢𑁆𑀣𑁂𑀯 𑀓𑀧𑀮𑁆𑀮𑀺𑀓𑀸𑀯𑀝𑁆𑀝𑀺𑀢𑁂𑀮𑀸𑀤𑀺𑀲𑀤𑀺𑀲𑁄 𑀅𑀕𑁆𑀕𑀺𑀢𑁄 𑀅𑀜𑁆𑀜𑁄 𑀲𑀪𑀸𑀯𑁄 𑀧𑀘𑁆𑀘𑀬𑁄. 𑀅𑀚𑁆𑀛𑀢𑁆𑀢𑀺𑀓𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀺𑀓𑁄 𑀦𑀺𑀬𑀓𑀚𑁆𑀛𑀢𑁆𑀢𑁂 𑀪𑀯𑁄. 𑀩𑀸𑀳𑀺𑀭𑁄𑀢𑀺 𑀢𑀢𑁄 𑀩𑀳𑀺𑀪𑀽𑀢𑁄. 𑀚𑀦𑀓𑁄𑀢𑀺 𑀦𑀺𑀩𑁆𑀩𑀢𑁆𑀢𑀓𑁄. 𑀧𑀭𑀺𑀕𑁆𑀕𑀸𑀳𑀓𑁄𑀢𑀺 𑀉𑀧𑀢𑁆𑀣𑀫𑁆𑀪𑀓𑁄. 𑀅𑀲𑀸𑀥𑀸𑀭𑀡𑁄𑀢𑀺 𑀆𑀯𑁂𑀡𑀺𑀓𑁄. 𑀲𑀸𑀥𑀸𑀭𑀡𑁄𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀫𑀸𑀦𑁄.

𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀓𑀸𑀭𑀡𑀁 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀓𑀸𑀭𑀡𑀪𑀸𑀯𑁄 𑀘 𑀨𑀮𑀸𑀧𑁂𑀓𑁆𑀔𑀸𑀬, 𑀢𑀲𑁆𑀫𑀸 𑀓𑀸𑀭𑀡𑀲𑁆𑀲 𑀬𑁄 𑀓𑀸𑀭𑀡𑀪𑀸𑀯𑁄 𑀬𑀣𑀸 𑀘 𑀲𑁄 𑀳𑁄𑀢𑀺, 𑀬𑀜𑁆𑀘 𑀨𑀮𑀁 𑀬𑁄 𑀘 𑀢𑀲𑁆𑀲 𑀯𑀺𑀲𑁂𑀲𑁄, 𑀬𑁄 𑀘 𑀓𑀸𑀭𑀡𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑁄, 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑀸 𑀲𑀦𑁆𑀢𑀢𑀺. 𑀓𑁄 𑀘 𑀢𑀢𑁆𑀣 𑀲𑀫𑁆𑀩𑀦𑁆𑀥𑁄, 𑀓𑁄 𑀓𑀸𑀭𑀡𑀨𑀮𑀪𑀸𑀯𑁄 𑀘? 𑀲𑁄 𑀏𑀯 𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄. 𑀬𑁄 𑀨𑀮𑀪𑀽𑀢𑁄 𑀅𑀜𑁆𑀜𑀲𑁆𑀲 𑀅𑀓𑀸𑀭𑀡𑀁 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀲𑁄 𑀯𑀼𑀧𑀘𑁆𑀙𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀬𑀣𑀸 𑀢𑀁 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀁. 𑀬𑁄 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀲𑁆𑀲 𑀨𑀮𑀲𑁆𑀲 𑀳𑁂𑀢𑀼 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀲𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑁄 𑀏𑀯 𑀦𑀸𑀫 𑀳𑁄𑀢𑀺, 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀆𑀳 𑁋 ‘‘𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄 𑀲𑀦𑁆𑀢𑀢𑀺𑀅𑀢𑁆𑀣𑁄’’𑀢𑀺.

𑀬𑀲𑁆𑀫𑀸 𑀘 𑀓𑀸𑀭𑀡𑀢𑁄 𑀦𑀺𑀩𑁆𑀩𑀢𑁆𑀢𑀁 𑀨𑀮𑀁 𑀦𑀸𑀫, 𑀦 𑀅𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁄 𑀨𑀮𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀧𑀼𑀭𑀺𑀫𑀪𑀯𑁂𑀦 𑀅𑀦𑀦𑁆𑀢𑀭𑀪𑀯𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀼𑀦𑀩𑁆𑀪𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀲𑀦𑁆𑀥𑀺𑀅𑀢𑁆𑀣𑁄 𑀧𑀼𑀦𑀩𑁆𑀪𑀯𑀢𑁆𑀣𑁄’’𑀢𑀺. 𑀢𑀣𑀸 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀧𑀮𑀺𑀩𑀼𑀦𑁆𑀥𑁂𑀦𑁆𑀢𑀺 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀬𑀸𑀯 𑀘 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀸, 𑀢𑀸𑀯 𑀅𑀦𑀼𑀲𑁂𑀦𑁆𑀢𑀺 𑀦𑀸𑀫, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀮𑀺𑀩𑁄𑀥𑀢𑁆𑀣𑁄 𑀧𑀭𑀺𑀬𑀼𑀝𑁆𑀞𑀸𑀦𑀢𑁆𑀣𑁄, 𑀅𑀲𑀫𑀼𑀕𑁆𑀖𑀸𑀢𑀢𑁆𑀣𑁄 𑀅𑀦𑀼𑀲𑀬𑀢𑁆𑀣𑁄’’𑀢𑀺. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀜𑁆𑀜𑀸𑀢𑁂 𑀦 𑀓𑀤𑀸𑀘𑀺 𑀢𑀁 𑀦𑀸𑀫𑀭𑀽𑀧𑀗𑁆𑀓𑀼𑀭𑀲𑁆𑀲 𑀓𑀸𑀭𑀡𑀁 𑀳𑁂𑀲𑁆𑀲𑀢𑀻𑀢𑀺 𑀆𑀳 𑁋 ‘‘𑀅𑀧𑀭𑀺𑀜𑁆𑀜𑀸𑀢𑀢𑁆𑀣𑁄 𑀯𑀺𑀜𑁆𑀜𑀸𑀡𑀲𑁆𑀲 𑀩𑀻𑀚𑀢𑁆𑀣𑁄’’𑀢𑀺. 𑀬𑀢𑁆𑀣 𑀅𑀯𑀼𑀧𑀘𑁆𑀙𑁂𑀤𑁄 𑀢𑀢𑁆𑀣 𑀲𑀦𑁆𑀢𑀢𑀻𑀢𑀺 𑀬𑀢𑁆𑀣 𑀭𑀽𑀧𑀸𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀁 𑀬𑀣𑀸𑀯𑀼𑀢𑁆𑀢𑁄 𑀅𑀯𑀼𑀧𑀘𑁆𑀙𑁂𑀤𑁄, 𑀢𑀢𑁆𑀣 𑀲𑀦𑁆𑀢𑀢𑀺𑀯𑁄𑀳𑀸𑀭𑁄 ¶ . 𑀬𑀢𑁆𑀣 𑀲𑀦𑁆𑀢𑀢𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀻𑀢𑀺𑀆𑀤𑀺 𑀧𑀘𑁆𑀘𑀬𑀧𑀭𑀫𑁆𑀧𑀭𑀤𑀲𑁆𑀲𑀦𑀁 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀺𑀪𑀸𑀯𑀦𑀫𑁂𑀯.

‘‘𑀬𑀣𑀸 𑀯𑀸 𑀧𑀦 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 ‘‘𑀲𑀪𑀸𑀯𑁄 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀦𑁆𑀦𑀺𑀲𑁆𑀲𑀬𑀢𑀸𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬. 𑀫𑀦𑀲𑀺𑀓𑀸𑀭𑁄𑀢𑀺 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼. 𑀲𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀯𑁂𑀦 𑀲𑀫𑀸𑀦𑀚𑀸𑀢𑀺𑀢𑀸𑀬 𑀲𑀪𑀸𑀯𑁄 𑀳𑁂𑀢𑀼. 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀲𑀪𑀸𑀯𑁄 𑀳𑁂𑀢𑀽𑀢𑀺 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀢𑀢𑁆𑀣 𑀬𑁄 𑀲𑀪𑀸𑀯𑁄, 𑀲𑁄 𑀳𑁂𑀢𑀽𑀢𑀺. 𑀲𑀗𑁆𑀔𑀸𑀭𑀸𑀢𑀺 𑀘𑁂𑀢𑁆𑀣 𑀲𑀩𑁆𑀩𑁄 𑀮𑁄𑀓𑀺𑀬𑁄 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀲𑀩𑁆𑀩𑁄 𑀲𑁄 𑀧𑀭𑀺𑀓𑁆𑀔𑀸𑀭𑁄𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀬𑁄 𑀓𑁄𑀘𑀺 𑀧𑀘𑁆𑀘𑀬𑁄, 𑀲𑁄 𑀲𑀩𑁆𑀩𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀭𑀺𑀓𑁆𑀔𑀭𑀡𑀢𑁄 𑀅𑀪𑀺𑀲𑀗𑁆𑀔𑀭𑀡𑀢𑁄 𑀧𑀭𑀺𑀓𑁆𑀔𑀸𑀭𑁄. 𑀢𑀲𑁆𑀲 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑀦𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄𑀢𑀺.

𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁫𑁦. 𑀢𑀢𑁆𑀣 ¶ 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄𑀢𑀺 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀲𑁆𑀫𑀺𑀁 𑀓𑀸𑀭𑀡𑀪𑀽𑀢𑁂 𑀥𑀫𑁆𑀫𑁂 𑀲𑀼𑀢𑁆𑀢𑁂𑀦 𑀕𑀳𑀺𑀢𑁂. 𑀬𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑀸𑀦𑀺 𑀅𑀜𑁆𑀜𑁂𑀲𑀁 𑀓𑀸𑀭𑀡𑀪𑀽𑀢𑀸𑀦𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀲𑀫𑁄𑀲𑀭𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀧𑀤𑀝𑁆𑀞𑀸𑀦𑀪𑀽𑀢𑀸 𑀥𑀫𑁆𑀫𑀸 𑀲𑀫𑁆𑀫𑀸 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀆𑀦𑁂𑀢𑁆𑀯𑀸 𑀤𑁂𑀲𑀦𑀸𑀬 𑀆𑀭𑁄𑀧𑁂𑀢𑀩𑁆𑀩𑀸, 𑀤𑁂𑀲𑀦𑀸𑀭𑀼𑀴𑁆𑀳𑁂 𑀯𑀺𑀬 𑀓𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀆𑀯𑀝𑁆𑀝𑁂 𑀳𑀸𑀭𑁂 ‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦’’𑀦𑁆𑀢𑀺 (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭) 𑀯𑀘𑀦𑀢𑁄 𑀅𑀦𑁂𑀓𑁂𑀲𑀁 𑀧𑀤𑀝𑁆𑀞𑀸𑀦𑀸𑀦𑀁 𑀧𑀭𑀺𑀬𑁂𑀲𑀦𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀩𑀳𑀽𑀦𑀁 𑀧𑀤𑀝𑁆𑀞𑀸𑀦𑀸𑀦𑀁 𑀲𑀫𑀸𑀭𑁄𑀧𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀆𑀯𑀝𑁆𑀝𑁂 𑀳𑀸𑀭𑁂’’𑀢𑀺 𑀆𑀳. 𑀦 𑀓𑁂𑀯𑀮𑀁 𑀧𑀤𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀸𑀭𑁄𑀧𑀦𑀸, 𑀅𑀣 𑀔𑁄 𑀯𑁂𑀯𑀘𑀦𑀪𑀸𑀯𑀦𑀸𑀧𑀳𑀸𑀦𑀯𑀲𑁂𑀦𑀧𑀺 𑀲𑀫𑀸𑀭𑁄𑀧𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸’’𑀢𑀺𑀆𑀤𑀺𑀫𑀸𑀳.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀸𑀦𑀺 𑀕𑀳𑀺𑀢𑀸𑀦𑀺, 𑀦𑀦𑀼 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀳𑀸𑀭𑁂 𑀏𑀯 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀕𑁆𑀕𑀳𑀡𑀁 𑀪𑀸𑀯𑀦𑀸𑀧𑀳𑀸𑀦𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀢𑁂𑀲𑀁 𑀅𑀥𑀺𑀯𑀘𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀜𑁆𑀘. 𑀏𑀯𑀜𑁆𑀳𑀺 𑀪𑀸𑀯𑀦𑀸𑀧𑀳𑀸𑀦𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀳𑁄𑀦𑁆𑀢𑀺 𑀲𑀼𑀓𑀭𑀸𑀦𑀺 𑀘 𑀧𑀜𑁆𑀜𑀸𑀧𑁂𑀢𑀼𑀁. 𑀇𑀤𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀢𑀺𑀯𑀺𑀥𑀁 𑀲𑀼𑀘𑀭𑀺𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀲𑁆𑀲 𑀑𑀯𑀸𑀤𑀲𑁆𑀲 𑀯𑀺𑀲𑀬𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 ‘‘𑀓𑀸𑀬𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀢𑀻𑀳𑀺 𑀲𑀼𑀘𑀭𑀺𑀢𑁂𑀳𑀺 𑀲𑀻𑀮𑀸𑀤𑀬𑁄 𑀢𑀬𑁄 𑀔𑀦𑁆𑀥𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀢𑀺𑀬𑀘𑀢𑀼𑀢𑁆𑀣𑀨𑀮𑀸𑀦𑀺 𑀘 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀯𑀦𑀻𑀬𑀢𑀻𑀢𑀺 𑀯𑀦𑀁, 𑀯𑀦𑀢𑀺, 𑀯𑀦𑀼𑀢𑁂 𑀇𑀢𑀺 𑀯𑀸 𑀯𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀫𑀢𑀡𑁆𑀳𑀸𑀬, 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀲𑁆𑀲, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀢𑀧𑁆𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀸𑀤𑀻𑀦𑀁, 𑀅𑀦𑀼𑀲𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀁 𑀓𑀸𑀭𑀡𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁧. 𑀅𑀬𑀁 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸𑀢𑀺 𑀬𑁄 ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮𑀁, 𑀅𑀦𑀸𑀕𑀸𑀫𑀺𑀨𑀮𑀁, 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦’’𑀦𑁆𑀢𑀺 𑀏𑀢𑁂𑀳𑀺 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀢𑀢𑀺𑀬𑀨𑀮𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀢𑀣𑀸 𑀬𑁄 ‘‘𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀨𑀮𑀁, 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁, 𑀢𑁂𑀥𑀸𑀢𑀼𑀓𑀲𑀫𑀢𑀺𑀓𑁆𑀓𑀫𑀦’’𑀦𑁆𑀢𑀺 ¶ 𑀏𑀢𑁂𑀳𑀺 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀘𑀢𑀼𑀢𑁆𑀣𑀨𑀮𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀬𑁄 𑀘 ‘‘𑀧𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀻𑀳𑀺 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀧𑀜𑁆𑀜𑀸𑀬 𑀦𑀺𑀤𑁆𑀤𑁂𑀲𑁄, 𑀅𑀬𑀁 𑀯𑁂𑀯𑀘𑀦𑁂𑀳𑀺 𑀘 𑀲𑀫𑀸𑀭𑁄𑀧𑀦𑀸.

𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀻𑀢𑀺𑀆𑀤𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀁 𑀢𑀢𑁆𑀣 𑀏𑀓𑀮𑀓𑁆𑀔𑀡𑀢𑁆𑀢𑀸 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀯𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑁂𑀯 𑀆𑀕𑀢𑀁, 𑀇𑀥 𑀪𑀸𑀯𑀦𑀸𑀲𑀫𑀸𑀭𑁄𑀧𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸 𑀏𑀯 𑀓𑀸𑀫𑀭𑀸𑀕𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀏𑀓𑀦𑁆𑀢𑀧𑀝𑀺𑀧𑀓𑁆𑀔𑀸𑀢𑀺 𑀅𑀲𑀼𑀪𑀲𑀜𑁆𑀜𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀸 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀬𑁄𑀕𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀓𑀸𑀫𑀸𑀲𑀯𑁄 𑀓𑀸𑀫𑁄𑀖𑁄 𑀭𑀸𑀕𑀲𑀮𑁆𑀮𑀁 𑀭𑀽𑀧𑀥𑀫𑁆𑀫𑀧𑀭𑀺𑀜𑁆𑀜𑀸𑀬 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑀸 𑀭𑀽𑀧𑀥𑀫𑁆𑀫𑁂𑀲𑀼 𑀭𑀸𑀕𑁄 𑀙𑀦𑁆𑀤𑀸𑀕𑀢𑀺𑀕𑀫𑀦𑀦𑁆𑀢𑀺 𑀏𑀢𑁂𑀲𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀺𑀦𑀸.

𑀢𑀣𑀸 ¶ 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀢𑀺, 𑀲𑀸 𑁋

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄’’𑀢𑀺. (𑀲𑀁. 𑀦𑀺. 𑁪.𑁨𑁫𑁩; 𑀇𑀢𑀺𑀯𑀼. 𑁫𑁩) 𑁋

𑀆𑀤𑀺𑀯𑀘𑀦𑀢𑁄 𑀲𑀩𑁆𑀩𑀁 𑀯𑁂𑀤𑀦𑀁 ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀻 𑀲𑀼𑀔𑀲𑀜𑁆𑀜𑀸𑀬 𑀯𑁂𑀤𑀦𑀸𑀳𑁂𑀢𑀼𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀸𑀦𑀁 𑀕𑁄𑀲𑀻𑀮𑀸𑀤𑀻𑀳𑀺 𑀪𑀯𑀲𑀼𑀤𑁆𑀥𑀺 𑀳𑁄𑀢𑀻𑀢𑀺 𑀯𑁂𑀤𑀦𑀸𑀲𑁆𑀲𑀸𑀤𑁂𑀦 𑀧𑀯𑀢𑁆𑀢𑀲𑁆𑀲 𑀪𑀯𑀼𑀧𑀸𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 (𑀤𑀻. 𑀦𑀺. 𑁩.𑁩𑁪𑁦; 𑀅. 𑀦𑀺. 𑁯.𑁨𑁯; 𑁧𑁦.𑁭𑁯; 𑀥. 𑀲. 𑁧𑁨𑁩𑁭; 𑀯𑀺𑀪. 𑁯𑁦𑁯, 𑁯𑁬𑁦) 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀤𑁄𑀲𑀲𑀮𑁆𑀮𑀲𑁆𑀲 𑀯𑁂𑀤𑀦𑀸𑀲𑁆𑀲𑀸𑀤𑀯𑀲𑁂𑀦𑁂𑀯 𑀧𑀯𑀢𑁆𑀢𑀲𑁆𑀲 𑀪𑀯𑀬𑁄𑀕𑀪𑀯𑀸𑀪𑀯𑀪𑀯𑁄𑀖𑀲𑀗𑁆𑀔𑀸𑀢𑀲𑁆𑀲 𑀪𑀯𑀭𑀸𑀕𑀲𑁆𑀲 𑀪𑀯𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀓𑀺𑀮𑁂𑀲𑀸𑀦𑀁 𑀯𑁂𑀤𑀦𑀸𑀯𑀺𑀲𑀬𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀸𑀕𑀢𑀺𑀕𑀫𑀦𑀲𑁆𑀲 𑀘 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺𑀦𑀸.

𑀢𑀣𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀢𑀺, 𑀲𑀸 𑀘𑀺𑀢𑁆𑀢𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀻 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀦𑀺𑀘𑁆𑀘𑀲𑀜𑁆𑀜𑀺𑀦𑁄𑀢𑀺 𑀦𑀺𑀘𑁆𑀘𑀲𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀸𑀦𑀁 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀧𑀝𑀺𑀧𑀓𑁆𑀔𑀢𑁄 𑀏𑀯 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀺𑀬𑁄𑀕𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑀤𑀺𑀝𑁆𑀞𑀸𑀲𑀯𑀤𑀺𑀝𑁆𑀞𑁄𑀖𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀘𑁆𑀘𑀲𑀜𑁆𑀜𑀸𑀦𑀺𑀫𑀺𑀢𑁆𑀢𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 ¶ (𑀥. 𑀲. 𑁧𑁨𑁩𑁯; 𑀯𑀺𑀪. 𑁮𑁩𑁨, 𑁮𑁬𑁬, 𑁯𑁬𑁨) 𑀫𑀸𑀦𑀲𑀮𑁆𑀮𑀲𑁆𑀲 𑀲𑀜𑁆𑀜𑀸𑀧𑀭𑀺𑀜𑁆𑀜𑀸𑀬 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑀸𑀦𑀁 𑀲𑀜𑁆𑀜𑀸𑀬 𑀭𑀸𑀕𑀲𑁆𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀪𑀬𑀸𑀕𑀢𑀺𑀕𑀫𑀦𑀲𑁆𑀲 𑀘 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺𑀦𑀸.

𑀢𑀣𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀅𑀦𑀢𑁆𑀢𑀲𑀜𑁆𑀜𑀸𑀢𑀺, 𑀲𑀸 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀲𑀜𑁆𑀜𑀸𑀬 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀧𑀭𑀺𑀜𑁆𑀜𑀸𑀬 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁨-𑁨𑁦𑁩; 𑁩.𑁨𑁭) 𑀧𑀯𑀢𑁆𑀢𑀲𑁆𑀲 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀳𑁂𑀢𑀼𑀓𑀸𑀬 𑀅𑀯𑀺𑀚𑁆𑀚𑀸𑀬𑁄𑀕𑀅𑀯𑀺𑀚𑁆𑀚𑀸𑀲𑀯𑀅𑀯𑀺𑀚𑁆𑀚𑁄𑀖𑀫𑁄𑀳𑀲𑀮𑁆𑀮𑀲𑀗𑁆𑀔𑀸𑀢𑀸𑀬 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀧𑀭𑀺𑀜𑁆𑀜𑀸𑀬 𑀧𑀭𑀺𑀩𑀦𑁆𑀥𑀓𑀺𑀮𑁂𑀲𑀸𑀦𑀁 𑀲𑀗𑁆𑀔𑀸𑀭𑁂𑀲𑀼 𑀭𑀸𑀕𑀲𑁆𑀲 𑀫𑁄𑀳𑀸𑀕𑀢𑀺𑀕𑀫𑀦𑀲𑁆𑀲 ¶ 𑀘 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄’’𑀢𑀺𑀆𑀤𑀺𑀦𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸.

𑁧. 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑀏𑀯𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀸𑀦𑀸𑀯𑀡𑁆𑀡𑀸𑀦𑀺 𑀫𑀼𑀢𑁆𑀢𑀧𑀼𑀧𑁆𑀨𑀸𑀦𑀺 𑀧𑀓𑀺𑀭𑀦𑁆𑀢𑁄 𑀯𑀺𑀬 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑀯𑀺𑀘𑀸𑀭𑀺𑀢𑁂𑀲𑀼 𑀲𑀼𑀭𑀢𑁆𑀢𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀲𑀼 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀸𑀦𑀺 𑀯𑀺𑀯𑀺𑀥𑀸𑀦𑀺 𑀫𑀡𑀺𑀭𑀢𑀦𑀸𑀦𑀺 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀫𑀳𑀸𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀁 𑀔𑀸𑀤𑀸𑀧𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀺𑀓𑀫𑀥𑀼𑀕𑀡𑁆𑀟𑀁 𑀧𑀻𑀴𑁂𑀢𑁆𑀯𑀸 𑀲𑀼𑀫𑀥𑀼𑀭𑀲𑀁 𑀧𑀸𑀬𑁂𑀦𑁆𑀢𑁄 𑀯𑀺𑀬 𑀘 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑀸𑀦𑀸𑀲𑀼𑀢𑁆𑀢𑀧𑀤𑁂𑀲𑁂 𑀉𑀤𑀸𑀳𑀭𑀦𑁆𑀢𑁄 𑀲𑁄𑀴𑀲 𑀳𑀸𑀭𑁂 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀁 𑀆𑀭𑀪𑀺. 𑀆𑀭𑀪𑀦𑁆𑀢𑁄 𑀘 𑀬𑀸𑀬𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑁋

𑁫𑁨.

‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀢𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄 𑀦𑀧𑁆𑀧𑀬𑁄𑀚𑁂𑀢𑀺, 𑀯𑀺𑀧𑁆𑀧𑀓𑀺𑀡𑁆𑀡𑀯𑀺𑀲𑀬𑀢𑁆𑀢𑀸, 𑀦𑀬𑀯𑀺𑀘𑀸𑀭𑀲𑁆𑀲 𑀘 𑀅𑀦𑁆𑀢𑀭𑀺𑀢𑀢𑁆𑀢𑀸 ¶ . 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀲𑁂𑀳𑀺 𑀳𑀸𑀭𑀸𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑁂𑀯 𑀳𑀺 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄. 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀧𑀦 𑀢𑀁 𑀧𑀬𑁄𑀚𑁂𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑀧𑀤𑁂𑀲𑁂 𑀲𑁄𑀴𑀲 𑀳𑀸𑀭𑁂 𑀬𑁄𑀚𑁂𑀢𑁆𑀯𑀸𑀯 𑀢𑀤𑀦𑀦𑁆𑀢𑀭𑀁 𑀦𑀬𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺 𑀕𑀸𑀣𑀁 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 ‘‘𑀢𑀲𑁆𑀲𑀸 𑀦𑀺𑀤𑁆𑀤𑁂𑀲𑁄 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑁄, 𑀳𑀸𑀭𑀲𑀫𑁆𑀧𑀸𑀢𑁂’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 ‘‘𑀢𑀲𑁆𑀲𑀸 𑀕𑀸𑀣𑀸𑀬 𑀦𑀺𑀤𑁆𑀤𑁂𑀲𑁄 𑀓𑀢𑁆𑀣 𑀤𑀝𑁆𑀞𑀩𑁆𑀩𑁄’’𑀢𑀺. 𑀏𑀢𑁂𑀦 𑀲𑀼𑀢𑁆𑀢𑁂𑀲𑀼 𑀳𑀸𑀭𑀸𑀦𑀁 𑀬𑁄𑀚𑀦𑀸𑀦𑀬𑀤𑀲𑁆𑀲𑀦𑀁 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀳𑀸𑀭𑀲𑀫𑁆𑀧𑀸𑀢𑀧𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯.

𑀅𑀭𑀓𑁆𑀔𑀺𑀢𑁂𑀦 ¶ 𑀘𑀺𑀢𑁆𑀢𑁂𑀦𑀸𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀲𑀢𑀺𑀆𑀭𑀓𑁆𑀔𑀸𑀪𑀸𑀯𑁂𑀦 𑀅𑀕𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦𑀸𑀢𑀺 𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀤𑀽𑀲𑀺𑀢𑁂𑀦. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑁆𑀲 𑀘 𑀅𑀓𑀮𑁆𑀬𑀢𑀸𑀮𑀓𑁆𑀔𑀡𑁂𑀳𑀺 𑀣𑀺𑀦𑀫𑀺𑀤𑁆𑀥𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑁂𑀦. 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻𑀢𑀺 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯 𑀕𑀸𑀣𑀸𑀬 𑀧𑀤𑀢𑁆𑀣𑁄.

𑀧𑀫𑀸𑀤𑀦𑁆𑀢𑀺 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀤𑀁 𑀧𑀤𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀺𑀯𑁄𑀲𑀕𑁆𑀕𑀮𑀓𑁆𑀔𑀡𑀁 𑀧𑀫𑀸𑀤𑀁 𑀓𑀣𑁂𑀢𑀺. 𑀢𑀁 𑀫𑀘𑁆𑀘𑀼𑀦𑁄 𑀧𑀤𑀦𑁆𑀢𑀺 𑀢𑀁 𑀧𑀫𑀚𑁆𑀚𑀦𑀁 𑀕𑀼𑀡𑀫𑀸𑀭𑀡𑀢𑁄 𑀫𑀘𑁆𑀘𑀼𑀲𑀗𑁆𑀔𑀸𑀢𑀲𑁆𑀲 𑀫𑀸𑀭𑀲𑁆𑀲 𑀯𑀲𑀯𑀢𑁆𑀢𑀦𑀝𑁆𑀞𑀸𑀦𑀁, 𑀢𑁂𑀦 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺 𑀧𑀞𑀫𑀧𑀸𑀤𑀁 𑀘𑀢𑀼𑀢𑁆𑀣𑀧𑀸𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑁄 𑀯𑀺𑀧𑀮𑁆𑀮𑀸𑀲𑁄𑀢𑀺 𑀬𑀁 𑀅𑀦𑀺𑀘𑁆𑀘𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 ‘‘𑀦𑀺𑀘𑁆𑀘’’𑀦𑁆𑀢𑀺 𑀤𑀲𑁆𑀲𑀦𑀁, 𑀲𑁄 𑀯𑀺𑀧𑀮𑁆𑀮𑀸𑀲𑁄 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄 𑀯𑀺𑀧𑀮𑁆𑀮𑀸𑀲𑁄’’𑀢𑀺. 𑀲𑀩𑁆𑀩𑀁 𑀯𑀺𑀧𑀮𑁆𑀮𑀸𑀲𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀯𑀺𑀧𑀮𑁆𑀮𑀸𑀲𑀬𑀢𑀻’’𑀢𑀺. 𑀲𑀸𑀫𑀜𑁆𑀜𑀲𑁆𑀲 𑀘 𑀯𑀺𑀲𑁂𑀲𑁄 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀻𑀢𑀺 𑀆𑀳 𑁋 ‘‘𑀲𑀜𑁆𑀜𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀫𑀺𑀢𑀻’’𑀢𑀺. 𑀢𑀁 ‘‘𑀯𑀺𑀧𑀮𑁆𑀮𑀸𑀲𑀬𑀢𑀻’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀲𑀼 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀲𑀩𑁆𑀩𑀫𑀼𑀤𑀼𑀓𑁄, 𑀅𑀦𑀺𑀘𑁆𑀘𑀸𑀤𑀺𑀓𑀲𑁆𑀲 𑀯𑀺𑀲𑀬𑀲𑁆𑀲 𑀫𑀺𑀘𑁆𑀙𑀸𑀯𑀲𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀕𑁆𑀕𑀳𑀡𑀫𑀢𑁆𑀢𑀁 𑀫𑀺𑀕𑀧𑁄𑀢𑀓𑀸𑀦𑀁 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀧𑀼𑀭𑀺𑀲𑁄𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬. 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀢𑀢𑁄 𑀩𑀮𑀯𑀢𑀭𑁄, 𑀅𑀫𑀡𑀺𑀆𑀤𑀺𑀓𑁂 𑀯𑀺𑀲𑀬𑁂 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀳𑀦𑁆𑀢𑁂 𑀢𑀣𑀸 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀺𑀬 𑀦𑀺𑀘𑁆𑀘𑀸𑀤𑀺𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀫𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀧𑀦 𑀲𑀩𑁆𑀩𑀩𑀮𑀯𑀢𑀭𑁄 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀬𑀣𑀸 𑀬𑀣𑀸 𑀉𑀧𑀝𑁆𑀞𑀸𑀢𑀺, 𑀢𑀣𑀸 𑀢𑀣𑀸 𑀦𑀁 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀲𑁆𑀲 𑀓𑀸𑀭𑀡𑀁, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺.

𑀇𑀤𑀸𑀦𑀺 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀼𑀳𑀺𑀁 𑀯𑀺𑀧𑀮𑁆𑀮𑀸𑀲𑀬𑀢𑀺, 𑀘𑀢𑀽𑀲𑀼 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀲𑀽’’𑀢𑀺 𑀆𑀳. 𑀢𑀢𑁆𑀣 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀲𑀽𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀢𑁂 𑀳𑀺 𑀆𑀳𑀺𑀢𑁄 𑀅𑀳𑀁 ¶ 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, ‘‘𑀅𑀢𑁆𑀢𑀸’’𑀢𑀺 𑀪𑀯𑀢𑀺 𑀏𑀢𑁆𑀣 𑀩𑀼𑀤𑁆𑀥𑀺 𑀯𑁄𑀳𑀸𑀭𑁄 𑀘𑀸𑀢𑀺 𑀅𑀢𑁆𑀢𑀪𑀸𑀯𑁄, 𑀲𑁄 𑀏𑀯 𑀲𑀼𑀪𑀸𑀤𑀻𑀦𑀁 𑀯𑀺𑀧𑀮𑁆𑀮𑀸𑀲𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀢𑁆𑀣𑀼 𑀘𑀸𑀢𑀺 ‘‘𑀅𑀢𑁆𑀢𑀪𑀸𑀯𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀲𑀩𑁆𑀩𑀯𑀺𑀧𑀮𑁆𑀮𑀸𑀲𑀫𑀽𑀮𑀪𑀽𑀢𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀅𑀢𑁆𑀢𑀪𑀸𑀯𑀯𑀢𑁆𑀣𑀼𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑁂𑀦 𑀲𑀤𑁆𑀥𑀺𑀁 ¶ 𑀯𑀺𑀲𑀬𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀧𑀞𑀫𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀧𑀼𑀦 𑀫𑀽𑀮𑀓𑀸𑀭𑀡𑀯𑀲𑁂𑀦 𑀯𑀺𑀧𑀮𑁆𑀮𑀸𑀲𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀯𑀺𑀚𑁆𑀚𑀸𑀭𑀳𑀺𑀢𑀸 𑀢𑀡𑁆𑀳𑀸 𑀦𑀢𑁆𑀣𑀺, 𑀅𑀯𑀺𑀚𑁆𑀚𑀸 𑀘 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀫𑁆𑀧𑀺 𑀧𑀘𑁆𑀘𑀬𑁄 𑀏𑀯, 𑀢𑀣𑀸𑀧𑀺 𑀢𑀡𑁆𑀳𑀸 𑀏𑀢𑀸𑀲𑀁 𑀲𑀸𑀢𑀺𑀲𑀬𑀁 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀦𑀺𑀯𑀼𑀢𑀁…𑀧𑁂… 𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀦𑀺𑀯𑀼𑀢𑀦𑁆𑀢𑀺 𑀤𑀺𑀝𑁆𑀞𑀺𑀲𑀻𑀲𑁂𑀦 𑀅𑀯𑀺𑀚𑁆𑀚𑀸 𑀯𑀼𑀢𑁆𑀢𑀸𑀢𑀺 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀢𑀡𑁆𑀳𑀸𑀭𑀳𑀺𑀢𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺, 𑀢𑀡𑁆𑀳𑀸𑀧𑀺 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄 𑀏𑀯. 𑀢𑀡𑁆𑀳𑀸𑀧𑀺 ‘‘𑀦𑀺𑀘𑁆𑀘𑀁 𑀅𑀢𑁆𑀢𑀸’’𑀢𑀺 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀸𑀦𑀁 𑀢𑀣𑀸𑀧𑀯𑀢𑁆𑀢𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀫𑁄𑀳𑁄 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀺𑀦𑀺𑀯𑀼𑀢𑀁…𑀧𑁂… 𑀅𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀬𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀁, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀫𑁆𑀧𑀺 𑀯𑀺𑀧𑀮𑁆𑀮𑀸𑀲𑀤𑁆𑀯𑀬𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀲𑁄 𑀅𑀢𑀻𑀢𑀁 𑀭𑀽𑀧𑀁…𑀧𑁂… 𑀅𑀢𑀻𑀢𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺. 𑀏𑀢𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑁄𑀧𑀺 𑀧𑀼𑀩𑁆𑀩𑀦𑁆𑀢𑀸𑀦𑀼𑀓𑀧𑁆𑀧𑀺𑀓𑀯𑀸𑀤𑁄 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄𑀢𑀺 𑀢𑀡𑁆𑀳𑀸𑀫𑀽𑀮𑀓𑁄 𑀯𑀺𑀧𑀮𑁆𑀮𑀸𑀲𑁄. ‘‘𑀅𑀲𑀼𑀪𑁂 𑀲𑀼𑀪𑀁, 𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀏𑀢𑀁 𑀯𑀺𑀧𑀮𑁆𑀮𑀸𑀲𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑀸𑀕𑀢𑀁 𑀭𑀽𑀧𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀅𑀦𑀸𑀕𑀢𑀁 𑀭𑀽𑀧𑀁 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀺. 𑀅𑀦𑀸𑀕𑀢𑀁 𑀯𑁂𑀤𑀦𑀁, 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲𑀯𑀺𑀥𑁄𑀧𑀺 𑀅𑀧𑀭𑀦𑁆𑀢𑀸𑀦𑀼𑀓𑀧𑁆𑀧𑀺𑀓𑀯𑀸𑀤𑁄 𑀬𑁂𑀪𑀼𑀬𑁆𑀬𑁂𑀦 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑁆𑀯𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀏𑀯𑀁 𑀧𑀭𑀫𑀲𑀸𑀯𑀚𑁆𑀚𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀫𑀽𑀮𑀓𑀸𑀭𑀡𑀦𑁆𑀢𑀺 𑀯𑀺𑀲𑁂𑀲𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸𑀢𑀺 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀢𑀸𑀳𑀺 𑀯𑀺𑀲𑀼𑀚𑁆𑀛𑀦𑁆𑀢𑀁 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀻𑀢𑀺 𑀧𑀝𑀺𑀧𑀓𑁆𑀔𑀯𑀲𑁂𑀦𑀧𑀺 𑀢𑀸𑀲𑀁 𑀉𑀧𑀓𑁆𑀓𑀺𑀮𑁂𑀲𑀪𑀸𑀯𑀁𑀬𑁂𑀯 𑀯𑀺𑀪𑀸𑀯𑁂𑀢𑀺, 𑀦 𑀳𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀲𑀼 𑀧𑀳𑀻𑀦𑀸𑀲𑀼 𑀓𑁄𑀘𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑁄 𑀦 𑀧𑀳𑀻𑀬𑀢𑀻𑀢𑀺. 𑀬𑀣𑀸 𑀘 𑀯𑀺𑀧𑀮𑁆𑀮𑀸𑀲𑀸𑀦𑀁 𑀫𑀽𑀮𑀓𑀸𑀭𑀡𑀁 𑀢𑀡𑁆𑀳𑀸𑀯𑀺𑀚𑁆𑀚𑀸, 𑀏𑀯𑀁 𑀲𑀓𑀮𑀲𑁆𑀲𑀸𑀧𑀺 𑀯𑀝𑁆𑀝𑀲𑁆𑀲 𑀫𑀽𑀮𑀓𑀸𑀭𑀡𑀦𑁆𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀸𑀣𑀁 𑀦𑀺𑀝𑁆𑀞𑀧𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀬𑁂𑀲𑀁 𑀅𑀭𑀓𑁆𑀔𑀺𑀢𑀁 𑀘𑀺𑀢𑁆𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀜𑁆𑀘, 𑀢𑁂𑀲𑀁. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀫𑀸𑀭𑀲𑁆𑀲 𑀯𑀲𑀕𑀫𑀦𑁂𑀦 𑀅𑀦𑀸𑀤𑀺𑀫𑀢𑀺𑀲𑀁𑀲𑀸𑀭𑁂 𑀲𑀁𑀲𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺 ¶ 𑀏𑀢𑁆𑀣 ‘‘𑀣𑀺𑀦𑀁 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀣𑀺𑀦𑀫𑀺𑀤𑁆𑀥𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀢𑁂𑀳𑀺 𑀘𑀺𑀢𑁆𑀢𑀲𑁆𑀲 𑀅𑀪𑀺𑀪𑀽𑀢𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑀺𑀮𑁂𑀲𑀫𑀸𑀭𑀕𑁆𑀕𑀳𑀡𑁂𑀦𑁂𑀯 ¶ 𑀢𑀁𑀦𑀺𑀫𑀺𑀢𑁆𑀢𑀸 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀔𑀦𑁆𑀥𑀫𑀸𑀭𑀫𑀘𑁆𑀘𑀼𑀫𑀸𑀭𑀸 𑀕𑀳𑀺𑀢𑀸 𑀏𑀯𑀸𑀢𑀺 ‘‘𑀓𑀺𑀮𑁂𑀲𑀫𑀸𑀭𑀲𑁆𑀲 𑀘 𑀲𑀢𑁆𑀢𑀫𑀸𑀭𑀲𑁆𑀲 𑀘𑀸’’𑀢𑀺 𑀘-𑀲𑀤𑁆𑀤𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄 𑀳𑀺 𑀦𑀺𑀯𑀼𑀢𑁄 𑀲𑀁𑀲𑀸𑀭𑀸𑀪𑀺𑀫𑀼𑀔𑁄𑀢𑀺 𑀲𑁄 𑀫𑀸𑀭𑀯𑀲𑀁 𑀕𑀢𑁄, 𑀢𑀢𑁄 𑀏𑀯 𑀦𑀺𑀯𑀼𑀢𑁄 𑀓𑀺𑀮𑁂𑀲𑁂𑀳𑀺 𑀬𑀸𑀯 𑀦 𑀫𑀸𑀭𑀩𑀦𑁆𑀥𑀦𑀁 𑀙𑀺𑀚𑁆𑀚𑀢𑀺, 𑀢𑀸𑀯 𑀲𑀁𑀲𑀸𑀭𑀸𑀪𑀺𑀫𑀼𑀔𑁄𑀯 𑀳𑁄𑀢𑀺, 𑀦 𑀯𑀺𑀲𑀗𑁆𑀔𑀸𑀭𑀸𑀪𑀺𑀫𑀼𑀔𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀸𑀦𑀺 𑀪𑀕𑀯𑀢𑀸 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀓𑀣𑀁 𑀤𑁂𑀲𑀺𑀢𑀸𑀦𑀺?

𑀢𑀢𑁆𑀣 𑀤𑀼𑀯𑀺𑀥𑀸 𑀓𑀣𑀸 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸 𑀘 𑀲𑀼𑀢𑁆𑀢𑀦𑁆𑀢𑀦𑀺𑀲𑁆𑀲𑀺𑀢𑀸 𑀘. 𑀢𑀸𑀲𑀼 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸 𑀦𑀸𑀫 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀅𑀭𑀓𑁆𑀔𑀺𑀢𑀁, 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀅𑀭𑀓𑁆𑀔𑀺𑀢𑀁, 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀅𑀭𑀓𑁆𑀔𑀺𑀢𑀁. 𑀢𑀢𑁆𑀣 𑀭𑀢𑁆𑀢𑀁 𑀘𑀺𑀢𑁆𑀢𑀁 𑀅𑀝𑁆𑀞𑀦𑁆𑀦𑀁 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀝𑁆𑀞𑀁 𑀘𑀺𑀢𑁆𑀢𑀁 𑀤𑁆𑀯𑀺𑀦𑁆𑀦𑀁 𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀫𑀽𑀴𑁆𑀳𑀁 𑀘𑀺𑀢𑁆𑀢𑀁 𑀤𑁆𑀯𑀺𑀦𑁆𑀦𑀁 𑀫𑁄𑀫𑀽𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀸𑀯 𑀇𑀫𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀕𑀼𑀢𑁆𑀢𑀺 𑀅𑀕𑁄𑀧𑀸𑀬𑀦𑀸 𑀅𑀧𑀸𑀮𑀦𑀸 𑀅𑀦𑀸𑀭𑀓𑁆𑀔𑀸 𑀲𑀢𑀺𑀯𑁄𑀲𑀕𑁆𑀕𑁄 𑀧𑀫𑀸𑀤𑁄 𑀘𑀺𑀢𑁆𑀢𑀲𑁆𑀲 𑀅𑀲𑀁𑀯𑀭𑁄, 𑀏𑀯𑀁 𑀅𑀭𑀓𑁆𑀔𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁 𑀦𑀸𑀫 𑀘𑀺𑀢𑁆𑀢𑀁 𑀘𑀢𑀼𑀦𑁆𑀦𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀦𑀸𑀫 𑀘𑀺𑀢𑁆𑀢𑀁 𑀧𑀜𑁆𑀘𑀦𑁆𑀦𑀁 𑀲𑀲𑀗𑁆𑀔𑀸𑀭𑀺𑀓𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀩𑁆𑀩𑁂𑀧𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀳𑁄𑀦𑁆𑀢𑀺. 𑀢𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 (𑀥. 𑀲. 𑁩𑁬𑁫) 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀤𑁂𑀲𑀦𑀸𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸. 𑀫𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 𑀧𑀜𑁆𑀘 𑀫𑀸𑀭𑀸. 𑀢𑁂𑀲𑀼 𑀓𑀺𑀮𑁂𑀲𑀫𑀸𑀭𑀲𑁆𑀲 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁 𑀘𑀢𑀼𑀦𑁆𑀦𑀁 𑀬𑁄𑀕𑀸𑀦𑀁 𑀘𑀢𑀼𑀦𑁆𑀦𑀁 𑀕𑀦𑁆𑀣𑀸𑀦𑀁 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀅𑀝𑁆𑀞𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀤𑀲𑀦𑁆𑀦𑀁 𑀓𑀺𑀮𑁂𑀲𑀯𑀢𑁆𑀣𑀽𑀦𑀁 𑀯𑀲𑁂𑀦 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪-𑁧𑁯, 𑁧𑁧𑁦𑁨) 𑀯𑀼𑀢𑁆𑀢𑀦𑀬𑁂𑀦, 𑀢𑀣𑀸 ‘‘𑀚𑀸𑀢𑀺𑀫𑀤𑁄 𑀕𑁄𑀢𑁆𑀢𑀫𑀤𑁄 𑀆𑀭𑁄𑀕𑁆𑀬𑀫𑀤𑁄’’𑀢𑀺𑀆𑀤𑀺𑀦𑀸 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁩𑁨) 𑀆𑀕𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀯𑀲𑁂𑀦 𑀯𑀺𑀪𑀸𑀕𑁄 𑀯𑀢𑁆𑀢𑀩𑁆𑀩𑁄. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀪𑀺𑀥𑀫𑁆𑀫𑀦𑀺𑀲𑁆𑀲𑀺𑀢𑀸 𑀓𑀣𑀸.

𑀲𑀼𑀢𑁆𑀢𑀦𑁆𑀢𑀦𑀺𑀲𑁆𑀲𑀺𑀢𑀸 (𑀫. 𑀦𑀺. 𑁧.𑁩𑁪𑁭; 𑀅. 𑀦𑀺. 𑁧𑁧.𑁧𑁭) 𑀧𑀦 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 ¶ 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 ¶ …𑀧𑁂… 𑀖𑀸𑀦𑁂𑀦… 𑀚𑀺𑀯𑁆𑀳𑀸𑀬… 𑀓𑀸𑀬𑁂𑀦… 𑀫𑀦𑀲𑀸…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑁂𑀦 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺 (𑀫. 𑀦𑀺. 𑁧.𑁩𑁪𑁭, 𑁪𑁧𑁧, 𑁪𑁨𑁧; 𑁨.𑁪𑁧𑁯; 𑁩.𑁧𑁫, 𑁭𑁫). 𑀏𑀯𑀁 𑀅𑀭𑀓𑁆𑀔𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁 𑀦𑀸𑀫 𑀘𑀺𑀢𑁆𑀢𑀁 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀯𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 (𑀯𑀺𑀪. 𑁯𑁩𑁭; 𑀧𑀝𑀺. 𑀫. 𑁧.𑁧𑁪𑁦) 𑀯𑀸 𑀬𑀸 𑀤𑀺𑀝𑁆𑀞𑀺, 𑀢𑀸𑀬 𑀳𑀢𑀁 𑀉𑀧𑀳𑀢𑀁. 𑀬𑀸 𑀘 𑀔𑁄 ‘‘𑀇𑀫𑀸 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸…𑀧𑁂… 𑀧𑀜𑁆𑀘 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸’’𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁩𑁦 𑀆𑀤𑀬𑁄) 𑀧𑀜𑁆𑀘𑀢𑁆𑀢𑀬𑁂 (𑀫. 𑀦𑀺. 𑁩.𑁨𑁧 𑀆𑀤𑀬𑁄) 𑀘 𑀆𑀕𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄, 𑀢𑀸𑀲𑀁 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀪𑀸𑀯𑁄 𑀓𑀣𑁂𑀢𑀩𑁆𑀩𑁄.

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺 𑀣𑀺𑀦𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸. 𑀫𑀺𑀤𑁆𑀥𑀁 𑀦𑀸𑀫 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸. 𑀢𑀣𑀸 𑀣𑀺𑀦𑀁 𑀅𑀦𑀼𑀲𑁆𑀲𑀸𑀳𑀲𑀁𑀳𑀦𑀦𑀁. 𑀫𑀺𑀤𑁆𑀥𑀁 𑀅𑀲𑀢𑁆𑀢𑀺𑀯𑀺𑀖𑀸𑀢𑁄. 𑀇𑀢𑀺 𑀣𑀺𑀦𑁂𑀦 𑀫𑀺𑀤𑁆𑀥𑁂𑀦 𑀘 𑀘𑀺𑀢𑁆𑀢𑀁 𑀅𑀪𑀺𑀪𑀽𑀢𑀁 𑀅𑀚𑁆𑀛𑁄𑀢𑁆𑀣𑀝𑀁 𑀉𑀧𑀤𑁆𑀤𑀼𑀢𑀁 𑀲𑀗𑁆𑀓𑁄𑀘𑀦𑀧𑁆𑀧𑀢𑁆𑀢𑀁 𑀮𑀬𑀸𑀧𑀦𑁆𑀦𑀁. 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻𑀢𑀺 𑀯𑀲𑁄 𑀦𑀸𑀫 𑀇𑀘𑁆𑀙𑀸 𑀮𑁄𑀪𑁄 𑀅𑀥𑀺𑀧𑁆𑀧𑀸𑀬𑁄 𑀭𑀼𑀘𑀺 𑀆𑀓𑀗𑁆𑀔𑀸 𑀆𑀡𑀸 𑀆𑀡𑀢𑁆𑀢𑀺. 𑀫𑀸𑀭𑁄𑀢𑀺 𑀧𑀜𑁆𑀘 𑀫𑀸𑀭𑀸 𑁋 𑀔𑀦𑁆𑀥𑀫𑀸𑀭𑁄 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄 𑀫𑀘𑁆𑀘𑀼𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀓𑀺𑀮𑁂𑀲𑀫𑀸𑀭𑁄𑀢𑀺. 𑀕𑀘𑁆𑀙𑀢𑀻𑀢𑀺 𑀢𑁂𑀲𑀁 𑀯𑀲𑀁 𑀇𑀘𑁆𑀙𑀁…𑀧𑁂… 𑀆𑀡𑀢𑁆𑀢𑀺𑀁 𑀕𑀘𑁆𑀙𑀢𑀺 𑀉𑀧𑀕𑀘𑁆𑀙𑀢𑀺 𑀉𑀧𑁂𑀢𑀺 𑀯𑀢𑁆𑀢𑀢𑀺 𑀅𑀦𑀼𑀯𑀢𑁆𑀢𑀢𑀺 𑀦𑀸𑀢𑀺𑀓𑁆𑀓𑀫𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀺𑀚𑁆𑀚𑀸 𑀏𑀯 𑀯𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀬𑁄 𑀲𑁄 ‘‘𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄, 𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀏𑀯𑀁 𑀪𑀕𑀯𑀢𑀸 𑀇𑀥 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀢𑁂𑀦𑁂𑀯𑀸𑀳 𑁋 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘𑀸’’𑀢𑀺. 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀤𑁂𑀲𑁂𑀢𑀻𑀢𑀺 𑀘𑁂 𑁋

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺. (𑀉𑀤𑀸. 𑁩𑁨) 𑁋

𑀕𑀸𑀣𑀸𑀬 ¶ . 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀢𑀺𑀲𑀁𑀯𑀭𑁂𑀦 𑀫𑀦𑀘𑁆𑀙𑀝𑁆𑀞𑀸𑀦𑀁 ¶ 𑀇𑀦𑁆𑀤𑁆𑀭𑀺𑀬𑀸𑀦𑀁 𑀭𑀓𑁆𑀔𑀡𑁂𑀦 𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀅𑀲𑁆𑀲. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀬𑀲𑁆𑀫𑀸 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀢𑀣𑀸 𑀢𑀣𑀸 𑀅𑀬𑁄𑀦𑀺𑀲𑁄 𑀯𑀺𑀓𑀧𑁆𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀦𑀺 𑀕𑀡𑁆𑀳𑀸𑀢𑀺. 𑀢𑀢𑁄 𑀏𑀯 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀺𑀢𑁆𑀢𑁂𑀦 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀅𑀲𑁆𑀲. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀢𑀸𑀬 𑀯𑀺𑀥𑀼𑀢𑀫𑀺𑀘𑁆𑀙𑀸𑀤𑀲𑁆𑀲𑀦𑁄 𑀓𑀫𑁆𑀫𑀲𑁆𑀲𑀓𑀢𑀸𑀮𑀓𑁆𑀔𑀡𑀁 𑀬𑀣𑀸𑀪𑀽𑀢𑀜𑀸𑀡𑀮𑀓𑁆𑀔𑀡𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀲𑀻𑀮𑀲𑀫𑀸𑀥𑀻𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄. 𑀢𑀢𑁄 𑀏𑀯 𑀘 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀫𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀉𑀧𑁆𑀧𑀸𑀤𑀁 𑀦𑀺𑀭𑁄𑀥𑀜𑁆𑀘 𑀜𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀺𑀬𑀫𑀕𑁆𑀕𑁂 𑀕𑀡𑁆𑀳𑀦𑁆𑀢𑁄 𑀅𑀕𑁆𑀕𑀫𑀕𑁆𑀕𑁂𑀦 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂𑀢𑀺 𑀏𑀯𑀁 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀬𑀣𑀸𑀲𑀫𑁆𑀪𑀯𑀁 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀬𑁄𑀕𑁂𑀦 𑀤𑀼𑀕𑁆𑀕𑀢𑀺𑀲𑀗𑁆𑀔𑀸𑀢𑀸 𑀲𑀩𑁆𑀩𑀸𑀧𑀺 𑀕𑀢𑀺𑀬𑁄 𑀚𑀳𑁂𑀬𑁆𑀬, 𑀢𑀸𑀲𑀁 𑀧𑀭𑀪𑀸𑀕𑁂 𑀦𑀺𑀩𑁆𑀩𑀸𑀦𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀬𑀁 𑀢𑀡𑁆𑀳𑀸𑀬 𑀅𑀯𑀺𑀚𑁆𑀚𑀸𑀬 𑀘 𑀧𑀳𑀸𑀦𑀁, 𑀅𑀬𑀁 𑀦𑀺𑀭𑁄𑀥𑁄𑀢𑀺 𑀧𑀳𑀸𑀦𑀲𑁆𑀲 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀅𑀲𑀗𑁆𑀔𑀢𑀥𑀸𑀢𑀼 𑀧𑀳𑀸𑀦𑀁 𑀦𑀺𑀭𑁄𑀥𑁄𑀢𑀺 𑀘 𑀯𑀼𑀢𑁆𑀢𑀸. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀧𑀼𑀭𑀺𑀫𑀕𑀸𑀣𑀸𑀬 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂, 𑀧𑀘𑁆𑀙𑀺𑀫𑀕𑀸𑀣𑀸𑀬 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂𑀢𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀪𑀸𑀲𑀺𑀢𑀸𑀦𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀢𑁂𑀲𑀼 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁, 𑀲𑀩𑁆𑀩𑀕𑀢𑀺𑀚𑀳𑀦𑀁 𑀨𑀮𑀁, 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀓𑁄 𑀉𑀧𑀸𑀬𑁄, 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀺𑀦𑀺𑀲𑁂𑀥𑀦𑀫𑀼𑀔𑁂𑀦 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀤𑀻𑀲𑀼 𑀦𑀺𑀬𑁄𑀚𑀦𑀁 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺. 𑀏𑀯𑀁 𑀤𑁂𑀲𑀦𑀸𑀳𑀸𑀭𑀧𑀤𑀢𑁆𑀣𑀸 𑀅𑀲𑁆𑀲𑀸𑀤𑀸𑀤𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 𑁋 ‘‘𑀦𑀺𑀬𑀼𑀢𑁆𑀢𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺.

𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁫𑁩. 𑀏𑀯𑀁 ¶ 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀸 𑀤𑁂𑀲𑀦𑀸𑀳𑀸𑀭𑀧𑀤𑀢𑁆𑀣𑀯𑀺𑀘𑀬𑁄 𑀯𑀺𑀘𑀬𑀳𑀸𑀭𑁄, 𑀢𑀲𑁆𑀫𑀸 𑀤𑁂𑀲𑀦𑀸𑀳𑀸𑀭𑁂 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀬 𑀢𑀡𑁆𑀳𑀸𑀬 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀧𑀯𑀺𑀘𑀬𑀫𑀼𑀔𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀢𑀡𑁆𑀳𑀸 𑀤𑀼𑀯𑀺𑀥𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀼𑀲𑀮𑀸𑀢𑀺 𑀓𑀼𑀲𑀮𑀥𑀫𑁆𑀫𑀸𑀭𑀫𑁆𑀫𑀡𑀸. 𑀓𑀼𑀲𑀮-𑀲𑀤𑁆𑀤𑁄 𑀘𑁂𑀢𑁆𑀣 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁫𑁮 𑀆𑀤𑀬𑁄) 𑀯𑀺𑀬 𑀅𑀦𑀯𑀚𑁆𑀚𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀢𑀡𑁆𑀳𑀸 𑀓𑀼𑀲𑀮𑀧𑀭𑀺𑀬𑀸𑀬𑁂𑀦 𑀉𑀤𑁆𑀥𑀝𑀸? 𑀳𑁂𑀝𑁆𑀞𑀸 𑀤𑁂𑀲𑀦𑀸𑀳𑀸𑀭𑁂 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁂𑀦 𑀢𑀡𑁆𑀳𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲𑀸 𑀯𑀲𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁄 ¶ 𑀤𑀲𑁆𑀲𑀺𑀢𑁄. 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀢𑀸𑀬 𑀧𑀦 𑀇𑀥𑀸𑀧𑀺 𑀢𑀡𑁆𑀳𑀸𑀫𑀼𑀔𑁂𑀦𑁂𑀯 𑀯𑁄𑀤𑀸𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀁 𑀓𑀼𑀲𑀮𑀧𑀭𑀺𑀬𑀸𑀬𑁂𑀦 𑀢𑀡𑁆𑀳𑀸 𑀉𑀤𑁆𑀥𑀝𑀸. 𑀢𑀢𑁆𑀣 𑀲𑀁𑀲𑀸𑀭𑀁 𑀕𑀫𑁂𑀢𑀻𑀢𑀺 𑀲𑀁𑀲𑀸𑀭𑀕𑀸𑀫𑀺𑀦𑀻, 𑀲𑀁𑀲𑀸𑀭𑀦𑀸𑀬𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀧𑀘𑀬𑀁 𑀦𑀺𑀩𑁆𑀩𑀸𑀦𑀁 𑀕𑀫𑁂𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑀻. 𑀓𑀣𑀁 𑀧𑀦 𑀢𑀡𑁆𑀳𑀸 𑀅𑀧𑀘𑀬𑀕𑀸𑀫𑀺𑀦𑀻𑀢𑀺? 𑀆𑀳 ‘‘𑀧𑀳𑀸𑀦𑀢𑀡𑁆𑀳𑀸’’𑀢𑀺. 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀲𑁆𑀲 𑀳𑁂𑀢𑀼𑀪𑀽𑀢𑀸 𑀢𑀡𑁆𑀳𑀸. 𑀓𑀣𑀁 𑀧𑀦 𑀏𑀓𑀦𑁆𑀢𑀲𑀸𑀯𑀚𑁆𑀚𑀸𑀬 𑀢𑀡𑁆𑀳𑀸𑀬 𑀓𑀼𑀲𑀮𑀪𑀸𑀯𑁄𑀢𑀺? 𑀲𑁂𑀯𑀺𑀢𑀩𑁆𑀩𑀪𑀸𑀯𑀢𑁄. 𑀬𑀣𑀸 𑀢𑀡𑁆𑀳𑀸, 𑀏𑀯𑀁 𑀫𑀸𑀦𑁄𑀧𑀺 𑀤𑀼𑀯𑀺𑀥𑁄 𑀓𑀼𑀲𑀮𑁄𑀧𑀺 𑀅𑀓𑀼𑀲𑀮𑁄𑀧𑀺, 𑀦 𑀢𑀡𑁆𑀳𑀸 𑀏𑀯𑀸𑀢𑀺 𑀢𑀡𑁆𑀳𑀸𑀬 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀫𑀸𑀦𑁄 𑀯𑀼𑀢𑁆𑀢𑁄.

𑀢𑀢𑁆𑀣 𑀫𑀸𑀦𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀫𑀸𑀦𑀫𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺𑀆𑀤𑀺. 𑀬𑀁 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀦𑁆𑀢𑀺𑀆𑀤𑀺 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀢𑀡𑁆𑀳𑀸𑀬 𑀲𑀭𑀽𑀧𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀦𑀸𑀫 𑁋

‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀭𑀽𑀧𑀸𑀦𑀁𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘, 𑀲𑀩𑁆𑀩𑁂𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺. 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 ¶ 𑀧𑀺𑀳𑀸, 𑀧𑀺𑀳𑀸𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁭) 𑁋

𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀅𑀭𑀺𑀬𑀨𑀮𑀥𑀫𑁆𑀫𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀇𑀫𑀫𑁆𑀧𑀺 𑀧𑀓𑁆𑀔𑀁 𑀇𑀫𑀫𑁆𑀧𑀺 𑀫𑀸𑀲𑀁, 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁, 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀉𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀢𑀺𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀝𑀺𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀦𑀸𑀫. 𑀅𑀬𑀁 𑀢𑀡𑁆𑀳𑀸 𑀓𑀼𑀲𑀮𑀸𑀢𑀺 𑀅𑀬𑀁 ‘‘𑀧𑀺𑀳𑀸’’𑀢𑀺 𑀯𑀼𑀢𑁆𑀢𑀸 𑀢𑀡𑁆𑀳𑀸 𑀓𑀼𑀲𑀮𑀸. 𑀓𑀣𑀁? 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀢𑀤𑀸𑀭𑀫𑁆𑀫𑀡𑀸 𑀓𑀼𑀲𑀮𑀸𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀦 𑀲𑀪𑀸𑀯𑁂𑀦 𑀓𑀼𑀲𑀮𑀸, 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀸. 𑀢𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀬𑀸 𑀢𑀤𑀸𑀭𑀫𑁆𑀫𑀡𑀸 𑀧𑀦 𑀢𑀡𑁆𑀳𑀸 𑀓𑀼𑀲𑀮𑀸𑀭𑀫𑁆𑀫𑀡𑀢𑀸𑀬 𑀓𑀼𑀲𑀮𑀸𑀢𑀺. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀸. 𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 ¶ . 𑀬𑀸𑀬 𑀯𑀲𑁂𑀦 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀸𑀬𑀁 ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀯𑀼𑀢𑁆𑀢𑀁.

𑀇𑀢𑀺 𑀘𑀺𑀭𑀢𑀭𑀁 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀺𑀢𑁆𑀯𑀸 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀅𑀥𑀺𑀕𑀢𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀯𑀲𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲𑀸 𑀓𑁄 𑀧𑀯𑀺𑀘𑀬𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑀽𑀮𑀺𑀓𑀸, 𑀢𑀲𑁆𑀫𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁂 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀢𑁆𑀣 𑀤𑀝𑁆𑀞𑀩𑁆𑀩𑁄, 𑀘𑀢𑀼𑀢𑁆𑀣𑁂 𑀛𑀸𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀭𑀫𑀺𑀢𑀸𑀬𑀸𑀢𑀺 𑀉𑀓𑁆𑀓𑀁𑀲𑀕𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀸𑀯𑀦𑀸𑀬. 𑀬𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀏𑀯 𑀧𑀭𑀺𑀬𑁄𑀤𑀸𑀢𑀁, 𑀧𑀪𑀲𑁆𑀲𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀖𑀸𑀢𑁂𑀦 𑀯𑀻𑀢𑀭𑀸𑀕𑀸𑀤𑀺𑀅𑀗𑁆𑀕𑀡𑀢𑁆𑀢𑀸 𑀅𑀦𑀗𑁆𑀕𑀡𑀁. 𑀅𑀦𑀗𑁆𑀕𑀡𑀢𑁆𑀢𑀸 𑀏𑀯 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀅𑀗𑁆𑀕𑀡𑁂𑀦 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺, 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑀁 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀲𑁂 𑀯𑀢𑁆𑀢𑀫𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 ‘‘𑀫𑀼𑀤𑀽’’𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀢𑁆𑀢𑀸 𑀏𑀯 𑀘 𑀓𑀫𑁆𑀫𑀦𑀺𑀬𑀁, 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀜𑁆𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 ¶ , 𑀏𑀯𑀁 𑀪𑀸𑀯𑀺𑀢𑀁 𑀫𑀼𑀤𑀼𑀜𑁆𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁨𑁨). 𑀏𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑀁. 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀅𑀘𑀮𑀁 𑀦𑀺𑀭𑀺𑀜𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑀁. 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂𑀦 𑀦 𑀇𑀜𑁆𑀚𑀢𑀺, 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀁 𑀓𑁄𑀲𑀚𑁆𑀚𑁂𑀦 𑀦 𑀇𑀜𑁆𑀚𑀢𑀺, 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀁 𑀧𑀫𑀸𑀤𑁂𑀦 𑀦 𑀇𑀜𑁆𑀚𑀢𑀺, 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑁆𑀥𑀘𑁆𑀘𑁂𑀦 𑀦 𑀇𑀜𑁆𑀚𑀢𑀺, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺, 𑀑𑀪𑀸𑀲𑀕𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀺. 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺. 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀅𑀧𑀭𑁄 𑀦𑀬𑁄 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁. 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀸𑀢𑀁. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑀁. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀧𑀯𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀘𑀺𑀢𑁆𑀢𑀼𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀢𑁆𑀣𑀲𑀼𑀢𑁆𑀢𑀸𑀦𑀁 (𑀫. 𑀦𑀺. 𑁧.𑁫𑁭 𑀆𑀤𑀬𑁄; 𑁭𑁦 𑀆𑀤𑀬𑁄) 𑀯𑀲𑁂𑀦 ¶ 𑀯𑁂𑀤𑀺𑀢𑀩𑁆𑀩𑀁. 𑀯𑀲𑀺𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀪𑀽𑀢𑀁. 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑁂𑀦 𑀓𑀫𑁆𑀫𑀦𑀺𑀬𑀁. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀬𑀣𑀸 𑀆𑀦𑁂𑀜𑁆𑀚𑀪𑀸𑀯𑀧𑁆𑀧𑀢𑁆𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺. 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑁄 𑀢𑀢𑁆𑀣 𑀅𑀝𑁆𑀞𑀯𑀺𑀥𑀁 𑀅𑀥𑀺𑀕𑀘𑁆𑀙𑀢𑀺 𑀙 𑀅𑀪𑀺𑀜𑁆𑀜𑀸 𑀤𑁆𑀯𑁂 𑀘 𑀯𑀺𑀲𑁂𑀲𑁂’’𑀢𑀺.

𑀢𑀢𑁆𑀣 𑀲𑁄𑀢𑀺 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁄 𑀬𑁄𑀕𑀻. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀅𑀥𑀺𑀝𑁆𑀞𑀸𑀦𑀪𑀽𑀢𑁂. 𑀅𑀝𑁆𑀞𑀯𑀺𑀥𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀅𑀝𑁆𑀞𑀯𑀺𑀥𑀁 𑀕𑀼𑀡𑀁 𑀅𑀥𑀺𑀕𑀘𑁆𑀙𑀢𑀺. 𑀓𑁄 𑀧𑀦 𑀲𑁄 𑀅𑀝𑁆𑀞𑀯𑀺𑀥𑁄 𑀕𑀼𑀡𑁄𑀢𑀺? 𑀆𑀳 ‘‘𑀙 𑀅𑀪𑀺𑀜𑁆𑀜𑀸 𑀤𑁆𑀯𑁂 𑀘 𑀯𑀺𑀲𑁂𑀲𑁂’’𑀢𑀺. 𑀫𑀦𑁄𑀫𑀬𑀺𑀤𑁆𑀥𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘. 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁. ‘‘𑀬𑀢𑁄 𑀧𑀭𑀺𑀲𑀼𑀤𑁆𑀥𑀁, 𑀢𑀢𑁄 𑀧𑀭𑀺𑀬𑁄𑀤𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀬𑁂𑀲𑀁 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀦𑀁 𑀅𑀪𑀺𑀚𑁆𑀛𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀦𑀜𑁆𑀘 𑀅𑀪𑀸𑀯𑁂𑀦 ‘‘𑀅𑀦𑀗𑁆𑀕𑀡𑀁 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲’’𑀦𑁆𑀢𑀺 ¶ 𑀘 𑀯𑀼𑀢𑁆𑀢𑀁. 𑀢𑀸𑀦𑀺 𑀅𑀗𑁆𑀕𑀡𑀸𑀦𑀺 𑀉𑀧𑀓𑁆𑀓𑀺𑀮𑁂𑀲𑀸 𑀘𑀸𑀢𑀺 𑀢𑀁 𑀉𑀪𑀬𑀁. 𑀢𑀤𑀼𑀪𑀬𑀁 𑀢𑀡𑁆𑀳𑀸𑀲𑀪𑀸𑀯𑀢𑁆𑀢𑀸 𑀢𑀡𑁆𑀳𑀸𑀬 𑀅𑀦𑀼𑀮𑁄𑀫𑀦𑀢𑁄 𑀘 𑀢𑀡𑁆𑀳𑀸𑀧𑀓𑁆𑀔𑁄. 𑀬𑀸 𑀘 𑀇𑀜𑁆𑀚𑀦𑀸𑀢𑀺 𑀬𑀸 𑀘 𑀘𑀺𑀢𑁆𑀢𑀲𑁆𑀲 𑀅𑀲𑀫𑀸𑀤𑀸𑀦𑁂𑀦 𑀨𑀦𑁆𑀤𑀦𑀸. 𑀅𑀝𑁆𑀞𑀺𑀢𑀻𑀢𑀺 𑀅𑀦𑀯𑀝𑁆𑀞𑀸𑀦𑀁. 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄𑀢𑀺 𑀬𑀸 𑀇𑀜𑁆𑀚𑀦𑀸 𑀅𑀝𑁆𑀞𑀺𑀢𑀺 𑀘, 𑀅𑀬𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀳𑁂𑀢𑀼𑀢𑀸𑀬 𑀤𑀺𑀝𑁆𑀞𑀺𑀧𑀓𑁆𑀔𑁄.

‘‘𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀢𑁄𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀺𑀪𑀸𑀯𑁂𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀉𑀧𑀭𑀺 𑀅𑀪𑀺𑀜𑁆𑀜𑀸𑀥𑀺𑀕𑀫𑀸𑀬 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺. 𑀲𑀸 𑀘 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀢𑀸 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀡𑁆𑀡𑀯𑀲𑀺𑀪𑀸𑀯𑀲𑁆𑀲𑁂𑀯 𑀳𑁄𑀢𑀺. 𑀲𑁄 𑀘 𑀯𑀲𑀺𑀪𑀸𑀯𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄, 𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑀢𑁆𑀢𑀮𑀸𑀪𑀺𑀦𑁄𑀢𑀺 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑀸 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁. 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀻𑀢𑀺 𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 ‘‘𑀲𑀦𑁆𑀢𑀸’’𑀢𑀺 𑀫𑀦𑀲𑀺𑀓𑀭𑁄𑀢𑀺. 𑀬𑀢𑁄 𑀬𑀢𑁄 𑀳𑀺 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀢𑀢𑁄 𑀢𑀢𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀅𑀯𑀽𑀧𑀲𑀦𑁆𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀲𑁆𑀲 𑀉𑀧𑀭𑀺𑀫𑀁…𑀧𑁂… 𑀲𑀡𑁆𑀞𑀳𑀢𑀻’’𑀢𑀺. 𑀉𑀓𑁆𑀓𑀡𑁆𑀞𑀸 𑀘 𑀧𑀝𑀺𑀖𑀲𑀜𑁆𑀜𑀸𑀢𑀺 𑀧𑀝𑀺𑀖𑀲𑀜𑁆𑀜𑀸𑀲𑀗𑁆𑀔𑀸𑀢𑀸𑀲𑀼 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀜𑁆𑀜𑀸𑀲𑀼 𑀅𑀦𑀪𑀺𑀭𑀢𑀺 𑀲𑀡𑁆𑀞𑀳𑀢𑀺. ‘‘𑀲𑁄 𑀲𑀩𑁆𑀩𑀲𑁄’’𑀢𑀺𑀆𑀤𑀺𑀦𑀸 𑀏𑀓𑀤𑁂𑀲𑁂𑀦 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑁄 𑀭𑀽𑀧𑀲𑀜𑁆𑀜𑀸𑀢𑀺 𑀭𑀽𑀧𑀸𑀯𑀘𑀭𑀲𑀜𑁆𑀜𑀸 𑀦𑀸𑀫𑁂𑀢𑀸 𑀬𑀸𑀯𑀤𑁂𑀯 𑀅𑀪𑀺𑀜𑁆𑀜𑀢𑁆𑀣𑀸𑀪𑀺𑀦𑀻𑀳𑀸𑀭𑀫𑀢𑁆𑀢𑀁, 𑀦 𑀧𑀦 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀬 𑀲𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀓𑀸𑀭𑁄 𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 ¶ 𑀦𑀸𑀦𑀢𑁆𑀢𑀲𑀜𑁆𑀜𑀸 𑀦𑀸𑀫𑁂𑀢𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑁄𑀓𑀸𑀭𑁄, 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀆𑀓𑀼𑀮𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀏𑀯𑀁 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀻 𑀳𑀼𑀢𑁆𑀯𑀸 𑀢𑀸 𑀲𑀫𑀢𑀺𑀓𑁆𑀓𑀫𑀢𑀺. 𑀧𑀝𑀺𑀖𑀲𑀜𑁆𑀜𑀸 𑀘𑀲𑁆𑀲 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀅𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀲𑁆𑀲 𑀬𑁄𑀕𑀺𑀦𑁄 𑀤𑀲𑀧𑀺 𑀧𑀝𑀺𑀖𑀲𑀜𑁆𑀜𑀸 𑀯𑀺𑀕𑀘𑁆𑀙𑀦𑁆𑀢𑀺. 𑀇𑀫𑀺𑀦𑀸 𑀧𑀞𑀫𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀫𑀸𑀳.

𑀏𑀯𑀁 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀧𑀺 𑀲𑀫𑀢𑀺𑀓𑁆𑀓𑀫𑁂𑀦 𑀲𑀫𑀸𑀳𑀺𑀢𑀲𑁆𑀲. 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀆𑀭𑀼𑀧𑁆𑀧𑀲𑀫𑀸𑀥𑀺𑀦𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑀸 𑀲𑀫𑀸𑀳𑀺𑀢𑀲𑁆𑀲. 𑀑𑀪𑀸𑀲𑁄𑀢𑀺 𑀬𑁄 𑀧𑀼𑀭𑁂 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀪𑀸𑀲𑁄. 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀲𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀪𑀸𑀲𑁄 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀓𑀸𑀮𑁂 𑀯𑀺𑀕𑀘𑁆𑀙𑀢𑀺. 𑀤𑀲𑁆𑀲𑀦𑀜𑁆𑀘𑀸𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀘𑀓𑁆𑀔𑀼𑀦𑀸 ¶ 𑀤𑀲𑁆𑀲𑀦𑀜𑁆𑀘 𑀅𑀦𑁆𑀢𑀭𑀥𑀸𑀬𑀢𑀺. 𑀲𑁄 𑀲𑀫𑀸𑀥𑀻𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑁄 𑀭𑀽𑀧𑀸𑀭𑀽𑀧𑀲𑀫𑀸𑀥𑀺. 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀉𑀧𑀓𑀸𑀭𑀓𑀧𑀭𑀺𑀓𑁆𑀔𑀸𑀭𑀲𑀪𑀸𑀯𑀪𑀽𑀢𑁂𑀳𑀺 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄𑀢𑀺 𑀧𑀢𑀺 𑀅𑀯𑁂𑀓𑁆𑀔𑀺𑀢𑀩𑁆𑀩𑁄, 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑀁 𑀲𑀳 𑀯𑀺𑀲𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀪𑀺𑀚𑁆𑀛𑀸𑀲𑀳𑀕𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀮𑁄𑀓𑁂𑀢𑀺 𑀲𑀩𑁆𑀩𑀲𑁆𑀫𑀺𑀁 𑀧𑀺𑀬𑀭𑀽𑀧𑁂 𑀲𑀸𑀢𑀭𑀽𑀧𑁂 𑀲𑀢𑁆𑀢𑀮𑁄𑀓𑁂 𑀲𑀗𑁆𑀔𑀸𑀭𑀮𑁄𑀓𑁂 𑀘. 𑀢𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀫𑀸𑀳. 𑀢𑀣𑀸 ‘‘𑀅𑀩𑁆𑀬𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀩𑁆𑀬𑀸𑀧𑀸𑀤𑀓𑁄𑀲𑀚𑁆𑀚𑀲𑀸𑀭𑀫𑁆𑀪𑀲𑀸𑀞𑁂𑀬𑁆𑀬𑀯𑀺𑀓𑁆𑀔𑁂𑀧𑀲𑀫𑁆𑀫𑁄𑀲𑀸𑀦𑀁 𑀧𑀳𑀸𑀦𑀁. 𑀧𑀼𑀦 𑀢𑀸𑀦𑀺 𑀙 𑀅𑀗𑁆𑀕𑀸𑀦𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀘 𑀅𑀦𑀪𑀺𑀚𑁆𑀛𑀸𑀲𑀳𑀕𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁫𑁪. 𑀏𑀢𑁆𑀢𑀸𑀯𑀢𑀸 ‘‘𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑁆𑀲 𑀲𑀫𑀸𑀥𑀺𑀫𑀼𑀔𑁂𑀦 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀲𑀫𑀸𑀥𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄 𑀲𑀫𑀸𑀥𑀻𑀢𑀺 𑀬𑁄 𑀲𑁄 𑀲𑀫𑁆𑀫𑀸𑀲𑀫𑀸𑀥𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀨𑀮𑀪𑀽𑀢𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀲𑀫𑀸𑀥𑀺𑀲𑀼𑀔𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄. 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄. 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀸 𑀦𑀺𑀭𑀸𑀫𑀺𑀲𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀅𑀗𑁆𑀕𑀲𑀦𑁆𑀢𑀢𑀸𑀬 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁄. 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀧𑀡𑀻𑀢𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸, 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑁂𑀦 𑀯𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄. 𑀧𑀲𑁆𑀲𑀤𑁆𑀥𑀁 𑀧𑀲𑁆𑀲𑀤𑁆𑀥𑀻𑀢𑀺 𑀳𑀺 𑀇𑀤𑀁 𑀅𑀢𑁆𑀣𑀢𑁄 𑀏𑀓𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀺𑀮𑁂𑀲𑁂𑀦 𑀯𑀸 𑀅𑀭𑀳𑀢𑀸 𑀮𑀤𑁆𑀥𑀢𑁆𑀢𑀸𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 ¶ . 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸, 𑀏𑀓𑁄𑀤𑀺𑀪𑀸𑀯𑀫𑁂𑀯 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄. 𑀅𑀧𑁆𑀧𑀕𑀼𑀡𑀲𑀸𑀲𑀯𑀲𑀫𑀸𑀥𑀺 𑀯𑀺𑀬 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄𑀢𑀺.

𑀬𑀢𑁄 𑀬𑀢𑁄 𑀪𑀸𑀕𑀢𑁄 𑀢𑀜𑁆𑀘 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄, 𑀢𑀢𑁄 𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀲𑀢𑁄𑀯 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄𑀯 𑀯𑀼𑀝𑁆𑀞𑀳𑀢𑀺, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀸 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄 𑀯𑀼𑀝𑁆𑀞𑀳𑀢𑀺. 𑀢𑀲𑁆𑀫𑀸 ¶ 𑀬𑀤𑁂𑀢𑁆𑀣 ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀅𑀧𑀭𑀧𑁆𑀧𑀘𑁆𑀘𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁂𑀓𑁄 𑀆𑀓𑀸𑀭𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀫𑁂𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑀸𑀦𑀁 𑀯𑀲𑁂𑀦 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀦 ‘‘𑀬𑁄 𑀘 𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀅𑀭𑀳𑀢𑁆𑀢𑀨𑀮𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀫𑀸𑀥𑀺𑀲𑀼𑀔𑀲𑁆𑀲 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀬𑁄 𑀘 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄, 𑀬𑁄 𑀘 𑀲𑀫𑀸𑀥𑀺 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄, 𑀅𑀬𑀁 𑀲𑀫𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀦𑀺𑀭𑀸𑀫𑀺𑀲𑀸𑀤𑀺𑀪𑀸𑀯𑁄 𑀧𑀦 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀆𑀳 𑁋 ‘‘𑀬𑁄 𑀘 𑀲𑀫𑀸𑀥𑀺 𑀅𑀭𑀺𑀬𑁄…𑀧𑁂… 𑀅𑀬𑀁 𑀯𑀺𑀧𑀲𑁆𑀲𑀦𑀸’’𑀢𑀺.

𑀏𑀯𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀲𑀫𑀸𑀥𑀺𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄 𑀲𑀫𑀸𑀥𑀻𑀢𑀺 𑀬𑁄 𑀲𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀁 𑀯𑀼𑀢𑁆𑀢𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺, 𑀲𑁄 𑀲𑀫𑀸𑀥𑀺. 𑀧𑀜𑁆𑀘𑀯𑀺𑀥𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀻𑀢𑀺𑀨𑀭𑀡𑀢𑀸’’𑀢𑀺𑀆𑀤𑀻𑀲𑀼 𑀧𑀻𑀢𑀺𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸 𑀦𑀸𑀫. 𑀲𑀼𑀔𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸 𑀦𑀸𑀫. 𑀧𑀭𑁂𑀲𑀁 𑀘𑁂𑀢𑁄 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂𑀢𑁄𑀧𑀭𑀺𑀬𑀧𑀜𑁆𑀜𑀸 𑀘𑁂𑀢𑁄𑀨𑀭𑀡𑀢𑀸 𑀦𑀸𑀫. 𑀆𑀮𑁄𑀓𑀨𑀭𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸 𑀆𑀮𑁄𑀓𑀨𑀭𑀡𑀢𑀸 𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸, 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸, 𑀧𑀭𑀘𑀺𑀢𑁆𑀢𑁂 𑀜𑀸𑀡𑀁 𑀘𑁂𑀢𑁄𑀨𑀭𑀡𑀢𑀸, 𑀤𑀺𑀩𑁆𑀩𑀘𑀓𑁆𑀔𑀼 𑀆𑀮𑁄𑀓𑀨𑀭𑀡𑀢𑀸, 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢’’𑀦𑁆𑀢𑀺 (𑀯𑀺𑀪. 𑁮𑁦𑁪).

𑀇𑀥 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘 𑀧𑀻𑀢𑀺𑀨𑀭𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀜𑁆𑀜𑀸𑀲𑀻𑀲𑁂𑀦 ¶ 𑀤𑁂𑀲𑀦𑀸 𑀓𑀢𑀸𑀢𑀺 𑀧𑀜𑁆𑀜𑀸𑀯𑀲𑁂𑀦 𑀲𑀁𑀯𑀡𑁆𑀡𑀦𑀸 𑀓𑀢𑀸. 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸𑀢𑀺𑀆𑀤𑀻𑀲𑀼 𑀲𑀫𑀸𑀥𑀺𑀲𑀳𑀕𑀢𑀸 𑀏𑀯𑀸𑀢𑀺 𑀢𑀢𑁆𑀣 𑀲𑀫𑀸𑀥𑀺𑀯𑀲𑁂𑀦 𑀲𑀫𑀣𑁄 𑀉𑀤𑁆𑀥𑀝𑁄. 𑀢𑀲𑁆𑀫𑀸 𑀧𑀻𑀢𑀺𑀲𑀼𑀔𑀘𑁂𑀢𑁄𑀨𑀭𑀡𑀢𑀸 𑀯𑀺𑀲𑁂𑀲𑀢𑁄 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀯𑀲𑁂𑀦 𑀇𑀚𑁆𑀛𑀦𑁆𑀢𑀻𑀢𑀺 𑀢𑀸 ‘‘𑀲𑀫𑀣𑁄’’𑀢𑀺 𑀯𑀼𑀢𑁆𑀢𑀸. 𑀇𑀢𑀭𑀸𑀦𑀺 𑀜𑀸𑀡𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀢𑀸𑀦𑀺 ‘‘𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀸𑀦𑀺.

𑁫𑁫. 𑀇𑀤𑀸𑀦𑀺 ¶ 𑀢𑀁 𑀲𑀫𑀸𑀥𑀺𑀁 𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀲𑀺𑀡𑀚𑁆𑀛𑀸𑀦𑀲𑀗𑁆𑀔𑀸𑀢𑀸𑀦𑀺 𑀓𑀲𑀺𑀡𑀸𑀦𑀺 𑀘 𑀢𑀸𑀦𑀺 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘 𑀆𑀬𑀢𑀦𑀸𑀦𑀺 𑀘𑀸𑀢𑀺 𑀓𑀲𑀺𑀡𑀸𑀬𑀢𑀦𑀸𑀦𑀺. 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀓𑀢𑀧𑀭𑀺𑀓𑀫𑁆𑀫𑀁 𑀧𑀣𑀯𑀻𑀫𑀡𑁆𑀟𑀮𑀫𑁆𑀧𑀺, 𑀢𑀢𑁆𑀣 𑀧𑀯𑀢𑁆𑀢𑀁 𑀉𑀕𑁆𑀕𑀳𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺, 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀛𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀆𑀓𑀸𑀲𑀓𑀲𑀺𑀡𑀦𑁆𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀯𑀺𑀜𑁆𑀜𑀸𑀡𑀓𑀲𑀺𑀡𑀦𑁆𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑁂 𑀲𑀼𑀤𑁆𑀥𑀲𑀫𑀣𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑁂 𑀲𑀦𑁆𑀥𑀸𑀬 ‘‘𑀇𑀫𑀸𑀦𑀺 𑀅𑀝𑁆𑀞 𑀓𑀲𑀺𑀡𑀸𑀦𑀺 𑀲𑀫𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀓𑀲𑀺𑀡𑀤𑁆𑀯𑀬𑀁 𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀲𑀩𑁆𑀩𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀪𑀸𑀯𑁂𑀦 𑀅𑀪𑀺𑀦𑁆𑀦𑁄𑀧𑀺 𑀅𑀭𑀺𑀬𑀫𑀕𑁆𑀕𑁄 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁄 𑀦𑀺𑀭𑀯𑀲𑁂𑀲𑁄 𑀅𑀭𑀺𑀬𑀫𑀕𑁆𑀕𑁄. 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦𑀸𑀢𑀺 𑀅𑀦𑀪𑀺𑀚𑁆𑀛𑀸𑀤𑀻𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀢𑀸𑀤𑀻𑀲𑀼 𑀘 𑀆𑀓𑀸𑀭𑁂𑀲𑀼 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀯𑀼𑀢𑁆𑀢𑁄. 𑀢𑁂𑀦 𑀢𑁂𑀦𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀆𑀓𑀸𑀭𑁂𑀲𑀼 𑀬𑁂 𑀬𑁂 𑀲𑀫𑀣𑀯𑀲𑁂𑀦, 𑀬𑁂 𑀘 𑀬𑁂 𑀘 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀬𑁄𑀚𑁂𑀢𑀼𑀁 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀅𑀭𑀺𑀬𑀫𑀕𑁆𑀕𑁄 𑀯𑀺𑀘𑀺𑀦𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀢𑀺 𑀲𑀫𑀣𑀸𑀥𑀺𑀝𑁆𑀞𑀸𑀦𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸. 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 𑀢𑀻𑀳𑀺 𑀅𑀦𑀼𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸, 𑀕𑀡𑀦𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀳𑀺 𑀢𑀻𑀳𑀻𑀢𑀺? 𑀆𑀳 ‘‘𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬𑀸’’𑀢𑀺. 𑀅𑀦𑀺𑀘𑁆𑀘𑀢𑀸𑀬 𑀲𑀳𑀘𑀭𑀡𑀢𑁄 𑀯𑀺𑀧𑀲𑁆𑀲𑀦𑀸 ‘‘𑀅𑀦𑀺𑀘𑁆𑀘𑀢𑀸’’𑀢𑀺 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀢𑀻𑀢𑀺 𑀲𑁄 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀬𑁄𑀕𑀻 𑀓𑀸𑀮𑁂𑀦 𑀲𑀫𑀣𑀁 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀓𑀸𑀮𑁂𑀦 𑀯𑀺𑀧𑀲𑁆𑀲𑀦𑀁 𑀲𑀫𑁆𑀫𑀲𑀦𑀯𑀲𑁂𑀦 𑀯𑀟𑁆𑀠𑀬𑀫𑀸𑀦𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀸𑀤𑀺𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀩𑁆𑀭𑀽𑀳𑁂𑀢𑀺. 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀻𑀢𑀺 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀁 𑀧𑀸𑀧𑁂𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 ¶ 𑀏𑀢𑁂 𑀢𑀬𑁄 𑀔𑀦𑁆𑀥𑁂 𑀯𑀟𑁆𑀠𑁂𑀢𑀺. 𑀬𑀲𑁆𑀫𑀸 𑀧𑀦 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄, 𑀢𑀲𑁆𑀫𑀸 ‘‘𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 ¶ 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀬𑀢𑁆𑀣 𑀲𑀺𑀓𑁆𑀔𑀦𑁆𑀢𑀸𑀦𑀁 𑀯𑀺𑀲𑁂𑀲𑀢𑁄 𑀦𑀺𑀬𑁆𑀬𑀸𑀦𑀫𑀼𑀔𑀸𑀦𑀺 𑀬𑁂𑀲𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀕𑀘𑀭𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬. 𑀲𑀸 𑀳𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀲𑀫𑀼𑀕𑁆𑀖𑀸𑀝𑀦𑁂𑀦 𑀅𑀦𑀺𑀫𑀺𑀢𑁆𑀢𑁄, 𑀭𑀸𑀕𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑁄𑀓𑁆𑀔𑁄𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀫𑀼𑀔𑀪𑀸𑀯𑀢𑁄 𑀤𑁆𑀯𑀸𑀭𑀪𑀸𑀯𑀢𑁄 ‘‘𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬𑀸𑀢𑀺 𑀲𑀫𑀸𑀥𑀺𑀲𑁆𑀫𑀺𑀁. 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄𑀢𑀺 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑀁 𑀲𑀼𑀔𑀯𑁂𑀤𑀦𑀸𑀓𑀸𑀭𑀡𑀢𑁄 𑀨𑀲𑁆𑀲𑀁 𑀢𑀡𑁆𑀳𑀸𑀬 𑀅𑀦𑀼𑀧𑀕𑀘𑁆𑀙𑀦𑁆𑀢𑁄. 𑀲𑀼𑀔𑀁 𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄𑀢𑀺 ‘‘𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑀸𑀤𑀺𑀦𑀸 𑀤𑀼𑀓𑁆𑀔𑀸’’𑀢𑀺 𑀧𑀭𑀺𑀚𑀸𑀦𑀦𑁆𑀢𑁄, 𑀲𑀯𑀺𑀲𑀬𑀁 𑀭𑀸𑀕𑀁 𑀲𑀫𑀢𑀺𑀓𑁆𑀓𑀦𑁆𑀢𑁄. ‘‘𑀭𑀸𑀕𑀫𑀮𑀁 𑀧𑀯𑀸𑀳𑁂𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀭𑀸𑀕𑀲𑁆𑀲𑁂𑀯 𑀧𑀳𑀸𑀦𑀫𑀸𑀳. ‘‘𑀤𑁄𑀲𑀘𑀭𑀺𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀜𑀸𑀥𑀺𑀓𑀲𑁆𑀲 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀤𑀺𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀲𑀼𑀜𑁆𑀜𑀢𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑀺𑀲𑁂𑀲𑀢𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀧𑀜𑁆𑀜𑀸𑀧𑀥𑀸𑀦𑀸𑀢𑀺 𑀆𑀳 𑁋 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄’’𑀢𑀺. 𑀢𑀣𑀸 𑀲𑀗𑁆𑀔𑀸𑀭𑀸𑀦𑀁 𑀲𑀭𑀲𑀧𑀪𑀗𑁆𑀕𑀼𑀢𑀸𑀬 𑀇𑀢𑁆𑀢𑀭𑀔𑀡𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀁 𑀲𑀫𑁆𑀫𑀸 𑀲𑀫𑀸𑀳𑀺𑀢𑀲𑁆𑀲𑁂𑀯 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀯𑀺𑀲𑁂𑀲𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀲𑀫𑀸𑀥𑀺𑀧𑁆𑀧𑀥𑀸𑀦𑀸𑀢𑀺 𑀆𑀳 𑁋 ‘‘𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺. 𑀢𑀣𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀔𑀦𑁆𑀢𑀺𑀩𑀳𑀼𑀮𑀲𑁆𑀲 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀭𑀢𑀺𑀜𑁆𑀘 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑁄 𑀲𑀗𑁆𑀔𑀸𑀭𑀸𑀦𑀁 𑀤𑀼𑀓𑁆𑀔𑀢𑀸 𑀯𑀺𑀪𑀽𑀢𑀸 𑀳𑁄𑀢𑀻𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀲𑀻𑀮𑀧𑁆𑀧𑀥𑀸𑀦𑀸𑀢𑀺 𑀆𑀳 𑁋 ‘‘𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀻𑀮𑀓𑁆𑀔𑀦𑁆𑀥𑁄’’𑀢𑀺. 𑀇𑀢𑀺 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀲𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀻’’𑀢𑀺. 𑀬𑀲𑁆𑀫𑀸 𑀘 𑀢𑀻𑀳𑀺 𑀘 𑀔𑀦𑁆𑀥𑁂𑀳𑀺 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 ‘‘𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂𑀳𑀺 𑀢𑀲𑁆𑀲 𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸’’𑀢𑀺𑀆𑀤𑀺𑀫𑀸𑀳.

𑀧𑀼𑀦 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀔𑀦𑁆𑀢𑀺𑀧𑀥𑀸𑀦𑀢𑁆𑀢𑀸, 𑀲𑀫𑀸𑀥𑀺𑀲𑁆𑀲 𑀩𑀳𑀽𑀧𑀓𑀸𑀭𑀢𑁆𑀢𑀸 𑀘 𑀲𑀫𑀣𑀧𑀓𑁆𑀔𑀪𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀪𑀯𑀗𑁆𑀕𑀸𑀦𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀅𑀗𑁆𑀕𑀸𑀦𑀺. 𑀤𑁆𑀯𑁂 𑀧𑀤𑀸𑀦𑀻𑀢𑀺 𑀤𑁆𑀯𑁂 𑀧𑀸𑀤𑀸. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀧𑀜𑁆𑀘𑀤𑀲 𑀘𑀭𑀡𑀥𑀫𑁆𑀫𑀸 ¶ 𑀲𑀻𑀮𑀲𑀫𑀸𑀥𑀺𑀲𑀗𑁆𑀕𑀳𑀺𑀢𑀸𑀢𑀺. 𑀪𑀸𑀯𑀺𑀢𑀓𑀸𑀬𑁄𑀢𑀺 ¶ 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀪𑀸𑀯𑀺𑀢𑀓𑀸𑀬𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑀻𑀮𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀪𑀸𑀯𑀺𑀢𑀲𑀻𑀮𑁄. 𑀅𑀣 𑀯𑀸 𑀪𑀸𑀯𑀺𑀢𑀓𑀸𑀬𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀪𑀸𑀯𑀺𑀢𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄. 𑀪𑀸𑀯𑀺𑀢𑀲𑀻𑀮𑁄𑀢𑀺 𑀅𑀯𑀲𑀺𑀝𑁆𑀞𑀲𑀻𑀮𑀯𑀲𑁂𑀦 𑀪𑀸𑀯𑀺𑀢𑀲𑀻𑀮𑁄. 𑀲𑀫𑁆𑀫𑀸 𑀓𑀸𑀬𑀪𑀸𑀯𑀦𑀸𑀬 𑀲𑀢𑀺 𑀅𑀘𑁆𑀘𑀦𑁆𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀧𑁆𑀧𑀳𑀸𑀦𑀁 𑀅𑀦𑀯𑀚𑁆𑀚𑀜𑁆𑀘 𑀉𑀝𑁆𑀞𑀸𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀅𑀦𑀼𑀢𑁆𑀢𑀭𑁂 𑀲𑀻𑀮𑁂 𑀲𑀺𑀚𑁆𑀛𑀫𑀸𑀦𑁂 𑀅𑀦𑀯𑀲𑁂𑀲𑀢𑁄 𑀫𑀺𑀘𑁆𑀙𑀸𑀯𑀸𑀘𑀸𑀬 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀘 𑀧𑀳𑀸𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑀧𑀜𑁆𑀜𑀸𑀲𑀼 𑀘 𑀪𑀸𑀯𑀺𑀢𑀸𑀲𑀼 𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑀸 𑀏𑀯 𑀳𑁄𑀦𑁆𑀢𑀺 𑀢𑀁𑀲𑀪𑀸𑀯𑀢𑁆𑀢𑀸 𑀢𑀤𑀼𑀪𑀬𑀓𑀸𑀭𑀡𑀢𑁆𑀢𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀓𑀸𑀬𑁂 𑀪𑀸𑀯𑀺𑀬𑀫𑀸𑀦𑁂’’𑀢𑀺𑀆𑀤𑀺𑀦𑀸.

𑀧𑀜𑁆𑀘𑀯𑀺𑀥𑀁 𑀅𑀥𑀺𑀕𑀫𑀁 𑀕𑀘𑁆𑀙𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀫𑁂𑀯 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀲𑁂𑀦 𑀧𑀜𑁆𑀘𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀔𑀺𑀧𑁆𑀧𑀁 𑀲𑀓𑀺𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀢𑁆𑀢𑀦𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀦 𑀢𑀲𑁆𑀲 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀬 𑀯𑀲𑀺𑀪𑀸𑀯𑀦𑀸𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺 𑀔𑀺𑀧𑁆𑀧𑀸𑀥𑀺𑀕𑀫𑁄 𑀘 𑀳𑁄𑀢𑀺. 𑀧𑀚𑀳𑀺𑀢𑀩𑁆𑀩𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀚𑀳𑀦𑀢𑁄 𑀯𑀺𑀫𑀼𑀢𑁆𑀢𑀸𑀥𑀺𑀕𑀫𑁄 𑀘. 𑀮𑁄𑀓𑀺𑀬𑁂𑀳𑀺 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀥𑀺𑀕𑀫𑀦𑀪𑀸𑀯𑀢𑁄 𑀫𑀳𑀸𑀥𑀺𑀕𑀫𑁄 𑀘. 𑀢𑁂𑀲𑀁𑀬𑁂𑀯 𑀯𑀺𑀧𑀼𑀮𑀨𑀮𑀸𑀦𑀁 𑀅𑀥𑀺𑀕𑀫𑀦𑀢𑁄 𑀯𑀺𑀧𑀼𑀮𑀸𑀥𑀺𑀕𑀫𑁄 𑀘. 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀅𑀦𑀯𑀲𑁂𑀲𑀢𑁄 𑀅𑀦𑀯𑀲𑁂𑀲𑀸𑀥𑀺𑀕𑀫𑁄 𑀘 𑀳𑁄𑀢𑀻𑀢𑀺. 𑀓𑁂 𑀧𑀦𑁂𑀢𑁂 𑀅𑀥𑀺𑀕𑀫𑀸? 𑀓𑁂𑀘𑀺 𑀲𑀫𑀣𑀸𑀦𑀼𑀪𑀸𑀯𑁂𑀦, 𑀓𑁂𑀘𑀺 𑀯𑀺𑀧𑀲𑁆𑀲𑀦𑀸𑀦𑀼𑀪𑀸𑀯𑁂𑀦𑀸𑀢𑀺 𑀇𑀫𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀫𑀣𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁬. 𑀇𑀢𑀺 𑀫𑀳𑀸𑀣𑁂𑀭𑁄 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀸𑀬 𑀯𑀲𑁂𑀦 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀫𑀼𑀔𑁂𑀦 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀳𑀺 𑀢𑀲𑁆𑀲𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀸𑀯𑀦𑀸𑀯𑀺𑀲𑁂𑀲𑀸𑀦𑀁 𑀪𑀸𑀯𑀦𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀺𑀪𑀚𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀘𑀬𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀫𑁆𑀧𑀺 𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑁄 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀫𑀸𑀳. 𑀑𑀯𑀸𑀤𑁂𑀦 𑀲𑀸𑀯𑀓𑁂 𑀦 𑀯𑀺𑀲𑀁𑀯𑀸𑀤𑀬𑀢𑀻𑀢𑀺 𑀅𑀢𑁆𑀢𑀦𑁄 𑀅𑀦𑀼𑀲𑀺𑀝𑁆𑀞𑀺𑀬𑀸 𑀥𑀫𑁆𑀫𑀲𑁆𑀲 𑀲𑀯𑀦𑀢𑁄 ‘‘𑀲𑀸𑀯𑀓𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀯𑁂𑀦𑁂𑀬𑁆𑀬𑁂 𑀦 𑀯𑀺𑀧𑁆𑀧𑀮𑀫𑁆𑀪𑁂𑀢𑀺 𑀦 𑀯𑀜𑁆𑀘𑁂𑀢𑀺, 𑀯𑀺𑀲𑀁𑀯𑀸𑀤𑀦𑀳𑁂𑀢𑀽𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀭𑀺𑀬𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀢𑀺𑀯𑀺𑀥𑀦𑁆𑀢𑀺 𑀢𑀺𑀧𑁆𑀧𑀓𑀸𑀭𑀁, 𑀢𑀻𑀳𑀺 𑀆𑀓𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀭𑁄𑀣𑀸𑀢𑀺 𑀇𑀫𑀁 𑀲𑀭𑀡𑀕𑀫𑀦𑀁 𑀲𑀻𑀮𑀸𑀤𑀺𑀜𑁆𑀘 𑀉𑀧𑀲𑀫𑁆𑀧𑀚𑁆𑀚 ¶ 𑀯𑀺𑀳𑀭𑀣. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀭𑁄𑀣𑀸𑀢𑀺 𑀅𑀦𑁂𑀦𑀧𑀺 𑀯𑀺𑀥𑀺𑀦𑀸 𑀲𑀭𑀡𑀸𑀦𑀺 𑀲𑁄𑀥𑁂𑀦𑁆𑀢𑀸 𑀲𑀻𑀮𑀸𑀤𑀻𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀸 𑀲𑀫𑁆𑀧𑀸𑀤𑁂𑀣. 𑀇𑀤𑀁 𑀯𑁄 𑀓𑀼𑀭𑀼𑀫𑀸𑀦𑀸𑀦𑀦𑁆𑀢𑀺 𑀇𑀤𑀁 𑀲𑀭𑀡𑀕𑀫𑀦𑀁 𑀲𑀻𑀮𑀸𑀤𑀺𑀜𑁆𑀘 𑀢𑀼𑀫𑁆𑀳𑀸𑀓𑀁 𑀅𑀦𑀼𑀢𑀺𑀝𑁆𑀞𑀦𑁆𑀢𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀦𑀺𑀩𑁆𑀩𑀸𑀦𑀸𑀦𑀁 𑀯𑀲𑁂𑀦 𑀳𑀺𑀢𑀸𑀬 𑀲𑀼𑀔𑀸𑀬 𑀘 𑀪𑀯𑀺𑀲𑁆𑀲𑀢𑀺, 𑀢𑀸𑀦𑀺 𑀲𑀫𑁆𑀧𑀸𑀤𑁂𑀣𑀸𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀑𑀯𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 𑁋 ‘‘𑀑𑀯𑀸𑀤𑁂𑀦 𑀲𑀸𑀯𑀓𑁂 𑀦 𑀯𑀺𑀲𑀁𑀯𑀸𑀤𑀬𑀢𑀻’’𑀢𑀺, 𑀢𑀁 𑀢𑀣𑀸𑀕𑀢𑀩𑀮𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀢𑀣𑀸 𑀑𑀯𑀤𑀺𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀢𑀺 𑀢𑁂𑀦 𑀧𑀓𑀸𑀭𑁂𑀦 ‘‘𑀇𑀤𑀁 𑀓𑀭𑁄𑀣, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀭𑁄𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀑𑀯𑀤𑀺𑀢𑁄𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀲𑀺𑀢𑁄. 𑀅𑀦𑀼𑀲𑀺𑀝𑁆𑀞𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀣𑀸 𑀓𑀭𑁄𑀦𑁆𑀢𑁄𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀓𑀭𑁄𑀦𑁆𑀢𑁄. 𑀢𑀁 𑀪𑀽𑀫𑀺𑀦𑁆𑀢𑀺 𑀬𑀲𑁆𑀲𑀸 𑀪𑀽𑀫𑀺𑀬𑀸 𑀅𑀥𑀺𑀕𑀫𑀢𑁆𑀣𑀸𑀬 𑀑𑀯𑀤𑀺𑀢𑁄, 𑀢𑀁 𑀤𑀲𑁆𑀲𑀦𑀪𑀽𑀫𑀺𑀜𑁆𑀘 𑀪𑀸𑀯𑀦𑀸𑀪𑀽𑀫𑀺𑀜𑁆𑀘. 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦 𑀯𑀺𑀚𑁆𑀚𑀢𑀺. 𑀓𑀸𑀭𑀡𑀜𑁆𑀳𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀪𑀽𑀫𑀺𑀦𑁆𑀢𑀺 𑀲𑀻𑀮𑀓𑁆𑀔𑀦𑁆𑀥𑁂𑀦 𑀧𑀢𑁆𑀢𑀩𑁆𑀩𑀁 𑀲𑀫𑁆𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑀁 𑀪𑀽𑀫𑀺𑀁.

𑀇𑀤𑀸𑀦𑀺 𑀬𑀲𑁆𑀫𑀸 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀦𑀺𑀧𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑀸𑀬 𑀧𑀞𑀫𑀨𑀮𑀜𑀸𑀡𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀢𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀲𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀲𑀢𑁄𑀢𑀺 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀫𑀬𑀸 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀧𑀝𑀺𑀚𑀸𑀦𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀲𑀢𑁄. 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 ‘‘𑀇𑀫𑁂 𑀦𑀸𑀫 𑀢𑀬𑀸 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀓𑁄𑀘𑀺 𑀲𑀳𑀥𑀫𑁆𑀫𑁂𑀦 𑀲𑀳𑁂𑀢𑀼𑀦𑀸 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦, 𑀲𑀼𑀦𑀓𑁆𑀔𑀢𑁆𑀢𑁄 (𑀤𑀻. 𑀦𑀺. 𑁩.𑁧 𑀆𑀤𑀬𑁄; 𑀫. 𑀦𑀺. 𑁧.𑁧𑁪𑁬 𑀆𑀤𑀬𑁄) 𑀯𑀺𑀬 𑀯𑀺𑀧𑁆𑀧𑀮𑀧𑀦𑁆𑀢𑀸 𑀧𑀦 𑀅𑀧𑁆𑀧𑀫𑀸𑀡𑀁. 𑀢𑀲𑁆𑀫𑀸 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦 𑀯𑀺𑀚𑁆𑀚𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀬𑀲𑁆𑀲 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀭𑀸𑀕𑀸𑀤𑀻𑀲𑀼 𑀬𑀲𑁆𑀲 𑀬𑀲𑁆𑀲 𑀧𑀳𑀸𑀦𑀢𑁆𑀣𑀸𑀬 𑀅𑀲𑀼𑀪𑀪𑀸𑀯𑀦𑀸𑀤𑀺𑀥𑀫𑁆𑀫𑁄 𑀓𑀣𑀺𑀢𑁄. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀢𑀣𑀸 𑀧𑀝𑀺𑀧𑀦𑁆𑀦𑀲𑁆𑀲. 𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀯𑀺𑀲𑁂𑀲𑀸𑀥𑀺𑀕𑀫𑀁.

𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀅𑀦𑁆𑀢𑀭𑀸𑀬𑀓𑀭𑀡𑀁 𑀅𑀦𑁆𑀢𑀭𑀸𑀬𑁄, 𑀲𑁄 𑀲𑀻𑀮𑀁 𑀏𑀢𑁂𑀲𑀦𑁆𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀅𑀦𑁆𑀢𑀭𑀸𑀬𑁂 𑀦𑀺𑀬𑀼𑀢𑁆𑀢𑀸, 𑀅𑀦𑁆𑀢𑀭𑀸𑀬𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀺, 𑀅𑀦𑁆𑀢𑀭𑀸𑀬𑀧𑁆𑀧𑀬𑁄𑀚𑀦𑀸𑀢𑀺 ¶ 𑀯𑀸 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂 𑀧𑀦 𑀓𑀫𑁆𑀫𑀓𑀺𑀮𑁂𑀲𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀸. 𑀅𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀅𑀭𑀺𑀬𑀫𑀕𑁆𑀕𑀯𑀚𑁆𑀚𑀸 𑀲𑀩𑁆𑀩𑁂 𑀥𑀫𑁆𑀫𑀸.

𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄. 𑀲𑀼𑀳𑀢𑀦𑁆𑀢𑀺 𑀅𑀢𑀺𑀯𑀥𑀺𑀢𑀁. 𑀇𑀤𑀫𑁆𑀧𑀺 𑀏𑀓𑀤𑁂𑀲𑀓𑀣𑀦𑀫𑁂𑀯. 𑀫𑀢𑀓𑀧𑁂𑀢𑀸𑀤𑀺𑀤𑀸𑀦𑀫𑁆𑀧𑀺 𑀲𑁄 𑀦 𑀓𑀭𑁄𑀢𑀺 𑀏𑀯. 𑀧𑀼𑀣𑀼𑀚𑁆𑀚𑀦𑁄𑀢𑀺 𑀧𑀼𑀣𑀽𑀦𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀼𑀣𑀽𑀦𑀁 ¶ 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧; 𑀥. 𑀲. 𑀅𑀝𑁆𑀞. 𑁧𑁦𑁦𑁭; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁩𑁦);

‘‘𑀫𑀸𑀢𑀭’’𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸 𑀫𑀸𑀢𑀸. 𑀚𑀦𑀓𑁄 𑀘 𑀧𑀺𑀢𑀸. 𑀫𑀦𑀼𑀲𑁆𑀲𑀪𑀽𑀢𑁄 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁. 𑀲𑀘𑁂𑀧𑀺 𑀪𑀯𑀦𑁆𑀢𑀭𑀕𑀢𑀁 𑀅𑀭𑀺𑀬𑀲𑀸𑀯𑀓𑀁 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀫𑁆𑀧𑀺 𑀓𑁄𑀘𑀺 𑀏𑀯𑀁 𑀯𑀤𑁂𑀬𑁆𑀬 ‘‘𑀇𑀤𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺, 𑀦𑁂𑀯 𑀲𑁄 𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀘𑁂 𑀇𑀫𑀁 𑀦 𑀖𑀸𑀢𑁂𑀲𑁆𑀲𑀲𑀺, 𑀲𑀻𑀲𑀁 𑀢𑁂 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺, 𑀲𑀻𑀲𑀫𑁂𑀯𑀲𑁆𑀲 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀦𑁂𑀯 𑀲𑁄 𑀢𑀁 𑀖𑀸𑀢𑁂𑀬𑁆𑀬. 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀩𑀮𑀤𑀻𑀧𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀸𑀯𑀚𑁆𑀚𑁄 𑀯𑀢 𑀧𑀼𑀣𑀼𑀚𑁆𑀚𑀦𑀪𑀸𑀯𑁄. 𑀬𑀢𑁆𑀭 𑀳𑀺 𑀦𑀸𑀫 𑀫𑀸𑀢𑀼𑀖𑀸𑀓𑀸𑀤𑀻𑀦𑀺𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀫𑀳𑀸𑀩𑀮𑁄𑀯 𑀘 𑀅𑀭𑀺𑀬𑀪𑀸𑀯𑁄, 𑀬𑁄 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑁄𑀢𑀻𑀢𑀺.

𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮).

𑀢𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 ¶ 𑀓𑀣𑀬𑀦𑁆𑀢𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑀬𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀬𑀼𑀢𑁆𑀢𑀁, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀁 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸𑀧𑀦𑀁 𑀧𑀦 𑀧𑀼𑀩𑁆𑀩𑀪𑀸𑀕𑁄 ¶ . 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀸𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄 𑀏𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬 𑀲𑀗𑁆𑀖𑀭𑀸𑀚𑀺𑀁 𑀯𑀸 𑀚𑀦𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺.

𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀳𑀺 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀸𑀦𑀺 𑀧𑀼𑀣𑀼𑀚𑁆𑀚𑀦𑁄 𑀓𑀭𑁄𑀢𑀺, 𑀦 𑀅𑀭𑀺𑀬𑀲𑀸𑀯𑀓𑁄. 𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀺𑀦𑀸𑀲𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀣𑀽𑀧𑀦𑁆𑀢𑀺 𑀘𑁂𑀢𑀺𑀬𑀁. 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑀸𑀲𑁂𑀬𑁆𑀬.

𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 ‘‘𑀅𑀬𑀁 𑀫𑁂 𑀲𑀢𑁆𑀣𑀸 𑀲𑀢𑁆𑀣𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁. 𑀅𑀧𑀤𑀺𑀲𑁂𑀬𑁆𑀬𑀸𑀢𑀺 ‘‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀩𑀸𑀳𑀺𑀭𑀓𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 ‘‘𑀅𑀬𑀁 𑀤𑀓𑁆𑀔𑀺𑀡𑀸𑀭𑀳𑁄, 𑀇𑀫𑀲𑁆𑀫𑀺𑀁 𑀓𑀢𑀸 𑀓𑀸𑀭𑀸 𑀫𑀳𑀧𑁆𑀨𑀮𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀫𑀺𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀬𑁆𑀬𑀸𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀢𑁆𑀢𑀸 𑀓𑀼𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀅𑀢𑁆𑀢𑀦𑁄 𑀲𑀼𑀤𑁆𑀥𑀺𑀁 𑀯𑁄𑀤𑀸𑀦𑀁 𑀲𑀤𑁆𑀤𑀳𑁂𑀬𑁆𑀬.

𑁫𑁭. 𑀇𑀢𑁆𑀣𑀻 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀬𑀲𑁆𑀫𑀸 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀸𑀤𑀻𑀦𑀁 𑀅𑀪𑀸𑀯𑁂𑀦 𑀮𑀓𑁆𑀔𑀡𑀸𑀦𑀺 𑀦 𑀧𑀭𑀺𑀧𑀽𑀭𑀦𑁆𑀢𑀺, 𑀇𑀢𑁆𑀣𑀺𑀭𑀢𑀦𑀸𑀪𑀸𑀯𑁂𑀦 ¶ 𑀘 𑀲𑀢𑁆𑀢𑀭𑀢𑀦𑀲𑀫𑀗𑁆𑀕𑀺𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺. 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀘 𑀦 𑀅𑀥𑀺𑀓𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀇𑀢𑁆𑀣𑀻…𑀧𑁂… 𑀯𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀲𑀓𑁆𑀓𑀢𑁆𑀢𑀸𑀤𑀻𑀦𑀺 𑀢𑀻𑀡𑀺 𑀞𑀸𑀦𑀸𑀦𑀺 𑀉𑀢𑁆𑀢𑀫𑀸𑀦𑀺, 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘 𑀳𑀻𑀦𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀓𑁆𑀓𑀢𑁆𑀢𑀸𑀤𑀻𑀦𑀺𑀧𑀺 𑀧𑀝𑀺𑀲𑀺𑀤𑁆𑀥𑀸𑀦𑀻𑀢𑀺. 𑀦𑀦𑀼 𑀘 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀏𑀯𑀁 𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀼𑀭𑀺𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀺𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦𑁄 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀇𑀢𑁆𑀣𑀺𑀬𑁄 𑀳𑀺 𑀇𑀥 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁. 𑀧𑀼𑀭𑀺𑀲𑁄 𑀧𑀦 𑀓𑀢𑁆𑀣𑀘𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀫𑀸𑀦𑁂𑀧𑀺 𑀢𑀢𑁆𑀣 𑀉𑀪𑀬𑀮𑀺𑀗𑁆𑀕𑀸𑀪𑀸𑀯𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀯 𑀢𑀢𑁆𑀣 𑀩𑁆𑀭𑀳𑁆𑀫𑀸𑀦𑁄, 𑀦 𑀇𑀢𑁆𑀣𑀺𑀲𑀡𑁆𑀞𑀸𑀦𑀸, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁. 𑀇𑀢𑁆𑀣𑀻 𑀢𑀣𑀸𑀕𑀢𑁄𑀢𑀺 𑀏𑀢𑁆𑀣 𑀢𑀺𑀝𑁆𑀞𑀢𑀼 𑀢𑀸𑀯 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀮𑁄𑀓𑀸𑀦𑀁 𑀢𑀸𑀭𑀡𑀲𑀫𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑁄, 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀬𑀸 𑀦 𑀲𑀫𑁆𑀧𑀚𑁆𑀚𑀢𑀺.

‘‘𑀫𑀦𑀼𑀲𑁆𑀲𑀢𑁆𑀢𑀁 ¶ 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑀸𑀦𑀺 𑀳𑀺 𑀧𑀡𑀺𑀥𑀸𑀦𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀇𑀢𑀺 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀓𑀼𑀢𑁄 𑀩𑀼𑀤𑁆𑀥𑀪𑀸𑀯𑁄𑀢𑀺 ‘‘𑀇𑀢𑁆𑀣𑀻 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀧𑀼𑀜𑁆𑀜𑀼𑀲𑁆𑀲𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀭𑀺𑀲𑁄𑀯 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸, 𑀬𑀸 𑀚𑀸𑀢𑀺𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀓𑀸𑀮𑀸𑀤𑀻𑀲𑀼 𑀓𑀫𑁆𑀧𑀢𑀺. 𑀆𑀡𑀸𑀔𑁂𑀢𑁆𑀢𑀁 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁. 𑀬𑀸 𑀏𑀓𑀢𑁄 𑀲𑀁𑀯𑀝𑁆𑀝𑀢𑀺 𑀘 𑀯𑀺𑀯𑀝𑁆𑀝𑀢𑀺 𑀘, 𑀬𑀢𑁆𑀣 𑀘 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀸𑀤𑀻𑀦𑀁 (𑀤𑀻. 𑀦𑀺. 𑁩.𑁨𑁭𑁭 𑀆𑀤𑀬𑁄) 𑀆𑀡𑀸 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀲𑁆𑀲 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 ‘‘𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 ‘‘𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺.

𑀅𑀧𑀼𑀩𑁆𑀩𑀁 ¶ 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀢𑁄 𑀧𑀼𑀩𑁆𑀩𑁂 𑀧𑀼𑀭𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑁂𑀦 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄 𑀦𑀸𑀫 𑀳𑁄𑀢𑀺, 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀭𑀁 𑀧𑀦 𑀧𑀘𑁆𑀙𑀸, 𑀢𑀢𑁄 𑀳𑁂𑀝𑁆𑀞𑀸𑀧𑀺 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺, 𑀉𑀤𑁆𑀥𑀁 𑀦 𑀯𑀸𑀭𑀺𑀢𑀸.

𑀓𑀲𑁆𑀫𑀸 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀬𑀣𑀸𑀳 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺 (𑀅. 𑀦𑀺. 𑁧.𑁧𑁭𑁧). 𑀬𑀤𑀺 𑀘 𑀅𑀦𑁂𑀓𑁂 𑀩𑀼𑀤𑁆𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀏𑀓𑁄 ¶ 𑀤𑁂𑀲𑁂𑀢𑀺, 𑀅𑀜𑁆𑀜𑁂𑀦𑀧𑀺 𑀲𑁄 𑀏𑀯 𑀤𑁂𑀲𑁂𑀢𑀩𑁆𑀩𑁄 𑀲𑀺𑀬𑀸, 𑀯𑀺𑀯𑀸𑀤𑀪𑀸𑀯𑀢𑁄 𑀘. 𑀩𑀳𑀽𑀲𑀼 𑀳𑀺 𑀩𑀼𑀤𑁆𑀥𑁂𑀲𑀼 𑀏𑀓𑀢𑁄 𑀉𑀧𑁆𑀧𑀦𑁆𑀦𑁂𑀲𑀼 𑀩𑀳𑀽𑀦𑀁 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀧𑀸𑀲𑀸𑀤𑀺𑀓𑁄’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀲𑀸𑀯𑀓𑀸 𑀯𑀺𑀯𑀤𑁂𑀬𑁆𑀬𑀼𑀁. 𑀓𑀺𑀁 𑀯𑀸 𑀏𑀢𑁂𑀦 𑀓𑀸𑀭𑀡𑀕𑀯𑁂𑀲𑀦𑁂𑀦, 𑀥𑀫𑁆𑀫𑀢𑀸𑀯𑁂𑀲𑀸 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 (𑀫𑀺. 𑀧. 𑁫.𑁧.𑁧).

𑀬𑀣𑀸 𑀦𑀺𑀫𑁆𑀩𑀩𑀻𑀚𑀓𑁄𑀲𑀸𑀢𑀓𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀨𑀮𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀲𑀸𑀢𑀁 𑀅𑀫𑀥𑀼𑀭𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀯𑀺𑀧𑀸𑀓𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀬𑀣𑀸 𑀘 𑀉𑀘𑁆𑀙𑀼𑀩𑀻𑀚𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀲𑀸𑀢𑀁 𑀓𑀝𑀼𑀓𑀁. 𑀏𑀯𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀫𑁂𑀯 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀫𑀥𑀼𑀭𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬; 𑀦𑁂𑀢𑁆𑀢𑀺. 𑁧𑁨𑁨);

𑀢𑀲𑁆𑀫𑀸 ‘‘𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸𑀢𑀺 𑀬𑁄 𑀓𑁄𑀘𑀺 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦 𑀲𑀫𑀡𑁄 𑀯𑀸 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀯𑀸. 𑀧𑀸𑀧𑀺𑀘𑁆𑀙𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀫𑁆𑀳𑀸𑀧𑀦𑀢𑁄 𑀓𑀼𑀳𑀓𑁄. 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀸𑀬 𑀧𑀬𑀼𑀢𑁆𑀢𑀯𑀸𑀘𑀸𑀬 𑀯𑀲𑁂𑀦 𑀮𑀧𑀓𑁄. 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀓𑀦𑀺𑀫𑀺𑀢𑁆𑀢𑀸𑀯𑀘𑀭𑀢𑁄 𑀦𑁂𑀫𑀺𑀢𑁆𑀢𑀓𑁄. 𑀓𑀼𑀳𑀦𑀮𑀧𑀦𑀦𑁂𑀫𑀺𑀢𑁆𑀢𑀓𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸𑀢𑀺 𑀓𑀼𑀳𑀦𑀸𑀤𑀺𑀪𑀸𑀯𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 ¶ 𑀲𑀦𑁆𑀢𑀫𑀸𑀦𑀲𑁄 𑀯𑀺𑀬 𑀘𑀭𑀦𑁆𑀢𑁄. 𑀧𑀜𑁆𑀘 𑀦𑀻𑀯𑀭𑀡𑁂𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀓𑁂 𑀧𑀜𑁆𑀘 𑀦𑀻𑀯𑀭𑀡𑁂. 𑀅𑀧𑁆𑀧𑀳𑀸𑀬 𑀅𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀦𑀻𑀯𑀭𑀡𑁂. 𑀦𑀻𑀯𑀭𑀡𑀸 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑁂𑀲𑁂𑀦𑁆𑀢𑀺 𑀓𑀺𑀮𑀺𑀝𑁆𑀞𑀁 𑀓𑀭𑁄𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀺 𑀘. 𑀢𑀲𑁆𑀫𑀸 ‘‘𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀦𑀻𑀯𑀭𑀡𑁂. 𑀦𑀻𑀯𑀭𑀡𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀦 𑀉𑀧𑀝𑁆𑀞𑀺𑀢𑀲𑁆𑀲𑀢𑀺. 𑀅𑀪𑀸𑀯𑀬𑀺𑀢𑁆𑀯𑀸𑀢𑀺 𑀅𑀯𑀟𑁆𑀠𑀬𑀺𑀢𑁆𑀯𑀸. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀧𑀤𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁.

𑀧𑀘𑁆𑀙𑀺𑀫𑀯𑀸𑀭𑁂 𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸𑀢𑀺 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀲𑀩𑁆𑀩𑀤𑁄𑀲𑀸𑀧𑀕𑀢𑁄𑀢𑀺 𑀲𑀩𑁆𑀩𑁂𑀳𑀺 𑀧𑀸𑀭𑀫𑀺𑀢𑀸𑀧𑀝𑀺𑀧𑀓𑁆𑀔𑀪𑀽𑀢𑁂𑀳𑀺 𑀤𑁄𑀲𑁂𑀳𑀺 𑀅𑀧𑀕𑀢𑁄. 𑀏𑀢𑁂𑀦 𑀧𑀭𑀺𑀧𑀽𑀭𑀺𑀢𑀧𑀸𑀭𑀫𑀺𑀪𑀸𑀯𑀁 ¶ 𑀤𑀲𑁆𑀲𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀯𑀺𑀧𑀲𑁆𑀲𑀦𑀸, 𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑁄, 𑀅𑀦𑀼𑀢𑁆𑀢𑀭𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀁. 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀯𑀸 𑀯𑀺𑀧𑀲𑁆𑀲𑀦𑀸, 𑀩𑁄𑀚𑁆𑀛𑀗𑁆𑀕𑀸 𑀫𑀺𑀲𑁆𑀲𑀓𑀸, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀫𑁂𑀯. 𑀲𑁂𑀲𑀁 𑀅𑀦𑀦𑁆𑀢𑀭𑀯𑀸𑀭𑁂 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀏𑀢𑁆𑀣 𑀜𑀸𑀡𑀦𑁆𑀢𑀺 𑀬𑀁 𑀏𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀞𑀸𑀦𑁂 𑀘 𑀞𑀸𑀦𑀁, 𑀅𑀝𑁆𑀞𑀸𑀦𑁂 𑀘 𑀅𑀝𑁆𑀞𑀸𑀦𑀦𑁆𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁. 𑀳𑁂𑀢𑀼𑀲𑁄𑀢𑀺 𑀢𑀲𑁆𑀲 𑀞𑀸𑀦𑀲𑁆𑀲 𑀅𑀝𑁆𑀞𑀸𑀦𑀲𑁆𑀲 𑀘 𑀳𑁂𑀢𑀼𑀢𑁄. 𑀞𑀸𑀦𑀲𑁄𑀢𑀺 𑀢𑀗𑁆𑀔𑀡𑁂 𑀏𑀯 𑀆𑀯𑀚𑁆𑀚𑀦𑀲𑀫𑀦𑀦𑁆𑀢𑀭𑀁. 𑀅𑀦𑁄𑀥𑀺𑀲𑁄𑀢𑀺 𑀑𑀥𑀺𑀅𑀪𑀸𑀯𑁂𑀦, 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀞𑀸𑀦𑀸𑀝𑁆𑀞𑀸𑀦𑀕𑀢𑀸𑀢𑀺𑀆𑀤𑀻𑀲𑀼 𑀏𑀯𑀁 𑀞𑀸𑀦𑀸𑀝𑁆𑀞𑀸𑀦𑀪𑀸𑀯𑀁 𑀕𑀢𑀸. 𑀲𑀩𑁆𑀩𑁂𑀢𑀺 𑀔𑀬𑀯𑀬𑀯𑀺𑀭𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸 𑀲𑀗𑁆𑀔𑀢𑀥𑀫𑁆𑀫𑀸, 𑀢𑁂 𑀏𑀯 𑀘 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀸 𑀓𑁂𑀘𑀺 𑀲𑀕𑁆𑀕𑀽𑀧𑀕𑀸 𑀬𑁂 𑀥𑀫𑁆𑀫𑀘𑀸𑀭𑀺𑀦𑁄, 𑀓𑁂𑀘𑀺 𑀅𑀧𑀸𑀬𑀽𑀧𑀕𑀸 𑀬𑁂 𑀅𑀥𑀫𑁆𑀫𑀘𑀸𑀭𑀺𑀦𑁄, 𑀓𑁂𑀘𑀺 𑀦𑀺𑀩𑁆𑀩𑀸𑀦𑀽𑀧𑀕𑀸 𑀬𑁂 𑀓𑀫𑁆𑀫𑀓𑁆𑀔𑀬𑀓𑀭𑀁 𑀅𑀭𑀺𑀬𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸.

𑁫𑁮. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀲𑁆𑀲 𑀅𑀢𑁆𑀣𑀁 ‘‘𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀅𑀭𑀺𑀬𑀸 𑀘 𑀅𑀦𑀭𑀺𑀬𑀸 𑀘𑀸’’𑀢𑀺𑀆𑀤𑀺𑀦𑀸 𑀲𑀬𑀫𑁂𑀯 𑀦𑀺𑀤𑁆𑀤𑀺𑀲𑀢𑀺. 𑀢𑀢𑁆𑀣 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑁄 𑀫𑀭𑀡𑀧𑀭𑀺𑀬𑀦𑁆𑀢𑁄𑀢𑀺 𑀚𑀻𑀯𑀺𑀢𑀲𑁆𑀲 𑀧𑀭𑀺𑀬𑀦𑁆𑀢𑁄 𑀦𑀸𑀫 𑀫𑀭𑀡𑀲𑀗𑁆𑀔𑀸𑀢𑁄 𑀅𑀦𑁆𑀢𑁄. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀲𑀢𑁆𑀢𑀸𑀦𑀁 𑀬𑀣𑀸𑀓𑀫𑁆𑀫𑀁 𑀕𑀫𑀦𑀁, 𑀅𑀬𑀁 𑀓𑀫𑁆𑀫𑀲𑁆𑀲𑀓𑀢𑀸𑀢𑀺 𑀅𑀢𑁆𑀣𑁄 ¶ . 𑀓𑀫𑁆𑀫𑀸𑀦𑀁 𑀨𑀮𑀤𑀲𑁆𑀲𑀸𑀯𑀺𑀢𑀸 𑀘 𑀅𑀯𑀺𑀧𑁆𑀧𑀯𑀸𑀲𑁄 𑀘𑀸𑀢𑀺 ‘‘𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀓𑀫𑁆𑀫𑀸𑀦𑀁 𑀨𑀮𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸, 𑀓𑀢𑀽𑀧𑀘𑀺𑀢𑀸𑀦𑀁 𑀓𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀅𑀧𑁆𑀧𑀤𑀸𑀦𑀸𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀫𑁂𑀯 𑀓𑀫𑁆𑀫𑀦𑁆𑀢𑀁, 𑀧𑀸𑀧𑀁 𑀓𑀫𑁆𑀫𑀦𑁆𑀢𑀁 𑀏𑀢𑁂𑀲𑀦𑁆𑀢𑀺 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑀼𑀜𑁆𑀜𑁄 𑀲𑀗𑁆𑀔𑀸𑀭𑁄 𑀏𑀢𑁂𑀲𑀦𑁆𑀢𑀺 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑀸. 𑀧𑀸𑀧𑀓𑀫𑁆𑀫𑀦𑁆𑀢𑀸𑀢𑀺 𑀯𑀸 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀧𑀸𑀧𑀓𑀫𑁆𑀫𑀦𑁆𑀢𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀢𑀣𑀸 𑀧𑀼𑀜𑁆𑀜𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼𑀧𑀺. 𑀧𑀼𑀦 ‘‘𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀦𑁆𑀢𑀤𑁆𑀯𑀬𑁂𑀦 𑀲𑀤𑁆𑀥𑀺𑀁 𑀫𑀚𑁆𑀛𑀺𑀫𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀢𑀣𑀸 ‘‘𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺𑀦𑀸 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀆𑀤𑀻𑀦𑀯𑀲𑁆𑀲𑀸𑀤𑀦𑀺𑀲𑁆𑀲𑀭𑀡𑀯𑀲𑁂𑀦 𑀳𑁂𑀢𑀼𑀨𑀮𑀯𑀲𑁂𑀦 𑀘 𑀕𑀸𑀣𑀸𑀬𑀁 𑀢𑀬𑁄 𑀅𑀢𑁆𑀣𑀯𑀺𑀓𑀧𑁆𑀧𑀸 𑀤𑀲𑁆𑀲𑀺𑀢𑀸. 𑀧𑀼𑀦 ‘‘𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀯𑀲𑁂𑀦 𑀕𑀸𑀣𑀸𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁫𑁯. 𑀢𑁂𑀦 ¶ 𑀢𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀅𑀚𑁆𑀛𑁄𑀲𑀺𑀢𑀯𑀢𑁆𑀣𑀼𑀦𑀸 𑀭𑀽𑀧𑀪𑀯𑀅𑀭𑀽𑀧𑀪𑀯𑀸𑀤𑀺𑀦𑀸. 𑀙𑀢𑁆𑀢𑀺𑀁𑀲𑀸𑀢𑀺 𑀓𑀸𑀫𑀢𑀡𑁆𑀳𑀸 𑀢𑀸𑀯 𑀭𑀽𑀧𑀸𑀤𑀺𑀯𑀺𑀲𑀬𑀪𑁂𑀤𑁂𑀦 𑀙, 𑀢𑀣𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀘𑀸𑀢𑀺 𑀅𑀝𑁆𑀞𑀸𑀭𑀲. 𑀢𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀸𑀳𑀺𑀭𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀸𑀢𑀺 𑀏𑀯𑀁 𑀙𑀢𑁆𑀢𑀺𑀁𑀲. 𑀬𑁂𑀦 𑀬𑁂𑀦𑀸𑀢𑀺 ‘‘𑀲𑀼𑀪𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀦𑀸.

𑀯𑁄𑀤𑀸𑀦𑀁 𑀢𑀺𑀯𑀺𑀥𑀁 𑀔𑀦𑁆𑀥𑀢𑁆𑀢𑀬𑀯𑀲𑁂𑀦𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀦 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀕𑀸𑀣𑀸𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻𑀢𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀩𑁆𑀩𑀸𑀦𑁂 𑀕𑀸𑀫𑀺𑀦𑀻, 𑀦𑀺𑀩𑁆𑀩𑀸𑀦𑀲𑁆𑀲 𑀕𑀫𑀦𑀲𑀻𑀮𑀸𑀢𑀺 𑀅𑀢𑁆𑀣𑁄.

𑀧𑀼𑀦 𑀢𑀢𑁆𑀣𑀢𑀢𑁆𑀣𑀕𑀸𑀫𑀺𑀦𑀻𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻𑀦𑀁 𑀧𑀝𑀺𑀧𑀤𑀸𑀦𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀭𑀸𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀦𑁆𑀢𑀺 𑀬𑀁 𑀦𑀺𑀭𑀬𑀸𑀤𑀺. 𑀢𑀁 𑀢𑀁 𑀞𑀸𑀦𑀁 𑀬𑀣𑀸𑀭𑀳𑀁 𑀕𑀫𑁂𑀢𑀻𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻. 𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑁂 𑀅𑀧𑀼𑀜𑁆𑀜𑀓𑀫𑁆𑀫𑁂 𑀧𑀼𑀜𑁆𑀜𑀓𑀫𑁆𑀫𑁂 𑀘 𑀓𑀫𑁆𑀫𑀓𑁆𑀔𑀬𑀓𑀭𑀡𑀓𑀫𑁆𑀫𑁂 𑀘 𑀯𑀺𑀪𑀸𑀕𑀲𑁄 𑀪𑀕𑀯𑀢𑁄 𑀧𑀯𑀢𑁆𑀢𑀦𑀜𑀸𑀡𑀁. 𑀇𑀤𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀜𑀸𑀡𑀁 𑀦𑀸𑀫 𑀢𑀣𑀸𑀕𑀢𑀩𑀮𑀁. 𑀇𑀫𑀺𑀦𑀸 𑀳𑀺 𑀜𑀸𑀡𑁂𑀦 𑀪𑀕𑀯𑀸 𑀲𑀩𑁆𑀩𑀫𑁆𑀧𑀺 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀓𑀣𑀁? 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼𑀧𑀺 𑀏𑀓𑀁 𑀲𑀽𑀓𑀭𑀁 𑀯𑀸 𑀫𑀺𑀕𑀁 𑀯𑀸 𑀫𑀸𑀭𑁂𑀦𑁆𑀢𑁂𑀲𑀼 𑀲𑀩𑁆𑀩𑁂𑀲𑀁 𑀘𑁂𑀢𑀦𑀸 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸𑀯 𑀳𑁄𑀢𑀺, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀦𑀸𑀦𑀸 𑀳𑁄𑀢𑀺. 𑀢𑁂𑀲𑀼 𑀳𑀺 𑀏𑀓𑁄 𑀆𑀤𑀭𑁂𑀦 𑀓𑀭𑁄𑀢𑀺, 𑀏𑀓𑁄 ‘‘𑀢𑁆𑀯𑀫𑁆𑀧𑀺 𑀓𑀭𑁄𑀳𑀻’’𑀢𑀺 𑀧𑀭𑁂𑀳𑀺 𑀦𑀺𑀧𑁆𑀧𑀻𑀴𑀺𑀢𑁄 𑀓𑀭𑁄𑀢𑀺 ¶ , 𑀏𑀓𑁄 𑀲𑀫𑀸𑀦𑀘𑁆𑀙𑀦𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀧𑁆𑀧𑀝𑀺𑀩𑀸𑀳𑀫𑀸𑀦𑁄 𑀯𑀺𑀘𑀭𑀢𑀺. 𑀢𑁂𑀲𑀼 𑀏𑀓𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑁂, 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂 𑀏𑀯 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀲 𑀧𑁂𑀢𑁆𑀢𑀺𑀯𑀺𑀲𑀬𑁂’’𑀢𑀺 𑀚𑀸𑀦𑀸𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀧𑀺 ‘‘𑀏𑀲 𑀅𑀝𑁆𑀞𑀲𑀼 𑀫𑀳𑀸𑀦𑀺𑀭𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀲𑁄𑀴𑀲𑀲𑀼 𑀉𑀲𑁆𑀲𑀤𑁂𑀲𑀽’’𑀢𑀺 𑀚𑀸𑀦𑀸𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀧𑀺 ‘‘𑀏𑀲 𑀅𑀧𑀸𑀤𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀤𑁆𑀯𑀺𑀧𑀸𑀤𑀓𑁄, 𑀏𑀲 𑀘𑀢𑀼𑀧𑁆𑀧𑀸𑀤𑀓𑁄, 𑀏𑀲 𑀩𑀳𑀼𑀧𑁆𑀧𑀸𑀤𑀓𑁄’’𑀢𑀺 𑀚𑀸𑀦𑀸𑀢𑀺. 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑀫𑁆𑀧𑀺 ‘‘𑀏𑀲 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀔𑀼𑀧𑁆𑀧𑀺𑀧𑀸𑀲𑀺𑀓𑁄, 𑀏𑀲 𑀧𑀭𑀤𑀢𑁆𑀢𑀽𑀧𑀚𑀻𑀯𑀻’’𑀢𑀺 𑀚𑀸𑀦𑀸𑀢𑀺.

‘‘𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 𑀇𑀤𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀲𑁆𑀲𑀢𑀺, 𑀇𑀤𑀁 𑀦𑀸𑀓𑀟𑁆𑀠𑀺𑀲𑁆𑀲𑀢𑀺 𑀤𑀼𑀩𑁆𑀩𑀮𑀁 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀢𑀣𑀸 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼 𑀏𑀓𑀢𑁄 ¶ 𑀤𑀸𑀦𑀁 𑀤𑀤𑀫𑀸𑀦𑁂𑀲𑀼 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀤𑁂𑀬𑁆𑀬𑀥𑀫𑁆𑀫𑀸𑀭𑀫𑁆𑀫𑀡𑀸𑀯 𑀳𑁄𑀢𑀺, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂 𑀏𑀯 𑀦𑀸𑀦𑀁 𑀳𑁄𑀢𑀺. 𑀢𑁂𑀲𑀼 𑀳𑀺 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂 𑀏𑀯 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀤𑁂𑀯𑀮𑁄𑀓𑁂’’𑀢𑀺 𑀚𑀸𑀦𑀸𑀢𑀺. 𑀢𑀢𑁆𑀣𑀧𑀺 ‘‘𑀏𑀲 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀪𑀼𑀫𑁆𑀫𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀚𑁂𑀝𑁆𑀞𑀓𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸, 𑀏𑀲 𑀢𑀲𑁆𑀲 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀯𑀸 𑀞𑀸𑀦𑀦𑁆𑀢𑀭𑀁 𑀓𑀭𑁄𑀦𑁆𑀢𑁄 𑀧𑀭𑀺𑀘𑀸𑀭𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺.

‘‘𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 𑀇𑀤𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀇𑀤𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀤𑀼𑀩𑁆𑀩𑀮𑀁 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀢𑀣𑀸 ‘‘𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀲𑀼 𑀘 𑀏𑀲 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀅𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀏𑀲 𑀅𑀦𑀸𑀕𑀸𑀫𑀻, 𑀏𑀲 𑀲𑀓𑀤𑀸𑀕𑀸𑀫𑀻, 𑀏𑀲 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄, 𑀏𑀲 𑀫𑀕𑁆𑀕𑀁 𑀧𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬𑀫𑁂𑀯 𑀞𑀲𑁆𑀲𑀢𑀺, 𑀏𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂, 𑀏𑀲 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂, 𑀅𑀭𑀽𑀧𑀧𑀭𑀺𑀕𑁆𑀕𑀳𑁂 𑀘 𑀞𑀲𑁆𑀲𑀢𑀺, 𑀏𑀲 𑀫𑀳𑀸𑀪𑀽𑀢𑀫𑀢𑁆𑀢𑀫𑁂𑀯 𑀯𑀯𑀢𑁆𑀣𑀧𑁂𑀲𑁆𑀲𑀢𑀺, 𑀏𑀲 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. ‘‘𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 𑀏𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑁂 𑀏𑀯 𑀞𑀲𑁆𑀲𑀢𑀺, 𑀏𑀲 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀅𑀧𑁆𑀧𑀦𑀁. 𑀏𑀲 𑀅𑀧𑁆𑀧𑀦𑀫𑁆𑀧𑀺 𑀉𑀧𑁆𑀧𑀸𑀤𑁂𑀲𑁆𑀲𑀢𑀺, 𑀏𑀲 ¶ 𑀛𑀸𑀦𑀁 𑀅𑀥𑀺𑀕𑀫𑀺𑀲𑁆𑀲𑀢𑀺, 𑀦 𑀉𑀧𑀭𑀺𑀯𑀺𑀲𑁂𑀲𑀁. 𑀏𑀲 𑀉𑀧𑀭𑀺𑀯𑀺𑀲𑁂𑀲𑀫𑁆𑀧𑀺 𑀅𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺.

𑀅𑀦𑁂𑀓𑀥𑀸𑀢𑀽𑀢𑀺 𑀅𑀦𑁂𑀓𑀸 𑀘𑀓𑁆𑀔𑀸𑀤𑀬𑁄 𑀧𑀣𑀯𑀸𑀤𑀬𑁄 𑀘 𑀥𑀸𑀢𑀼𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀥𑀸𑀢𑀼, 𑀩𑀳𑀼𑀥𑀸𑀢𑀽𑀢𑀺 𑀅𑀢𑁆𑀣𑁄. 𑀮𑁄𑀓𑁄𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀮𑁄𑀓𑁄. 𑀘𑀓𑁆𑀔𑀼𑀥𑀸𑀢𑀽𑀢𑀺𑀆𑀤𑀺 𑀬𑀸𑀳𑀺 𑀥𑀸𑀢𑀽𑀳𑀺 ‘‘𑀅𑀦𑁂𑀓𑀥𑀸𑀢𑀽’’𑀢𑀺 𑀮𑁄𑀓𑁄 𑀯𑀼𑀢𑁆𑀢𑁄, 𑀢𑀸𑀲𑀁 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀪𑀸𑀯𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀘 𑀥𑀸𑀢𑀼. 𑀘𑀓𑁆𑀔𑀼 𑀏𑀯 𑀥𑀸𑀢𑀼 𑀘𑀓𑁆𑀔𑀼𑀥𑀸𑀢𑀼. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀥𑀸𑀢𑀽𑀢𑀺 𑀏𑀢𑁆𑀣 𑀤𑁆𑀯𑁂 𑀓𑀸𑀫𑀸 𑀓𑀺𑀮𑁂𑀲𑀓𑀸𑀫𑁄 𑀘 𑀯𑀢𑁆𑀣𑀼𑀓𑀸𑀫𑁄 𑀘. 𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀥𑀸𑀢𑀼 𑀓𑀸𑀫𑀥𑀸𑀢𑀼, 𑀓𑀸𑀫𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂 𑀧𑀦 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀓𑀸𑀫𑁄 𑀘 𑀲𑁄 𑀥𑀸𑀢𑀼 𑀘𑀸𑀢𑀺 𑀓𑀸𑀫𑀥𑀸𑀢𑀼. 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀥𑀸𑀢𑀼 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀩𑁆𑀬𑀸𑀧𑀸𑀤𑁄𑀯 𑀥𑀸𑀢𑀼 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀤𑀲𑀆𑀖𑀸𑀢𑀯𑀢𑁆𑀣𑀼𑀯𑀺𑀲𑀬𑀲𑁆𑀲 𑀧𑀝𑀺𑀖𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀥𑀸𑀢𑀼 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀯𑀺𑀳𑀺𑀁𑀲𑀸 𑀏𑀯 𑀯𑀸 𑀥𑀸𑀢𑀼 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀧𑀭𑀲𑀢𑁆𑀢𑀯𑀺𑀳𑁂𑀲𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀦𑁂𑀓𑁆𑀔𑀫𑁆𑀫𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑀸 𑀫𑁂𑀢𑁆𑀢𑀸𑀓𑀭𑀼𑀡𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀪𑀯𑁄, 𑀲𑀩𑁆𑀩𑁂 𑀯𑀸 𑀭𑀽𑀧𑀥𑀫𑁆𑀫𑀸. 𑀅𑀭𑀽𑀧𑀥𑀸𑀢𑀽𑀢𑀺 ¶ 𑀅𑀭𑀽𑀧𑀪𑀯𑁄, 𑀅𑀭𑀽𑀧𑀥𑀫𑁆𑀫𑀸 𑀯𑀸. 𑀦𑀺𑀭𑁄𑀥𑀥𑀸𑀢𑀽𑀢𑀺 𑀦𑀺𑀭𑁄𑀥𑀢𑀡𑁆𑀳𑀸. 𑀲𑀗𑁆𑀔𑀸𑀭𑀥𑀸𑀢𑀽𑀢𑀺 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀅𑀜𑁆𑀜𑀫𑀜𑁆𑀜𑀯𑀺𑀮𑀓𑁆𑀔𑀡𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀸 𑀥𑀸𑀢𑀼𑀬𑁄 𑀏𑀢𑀲𑁆𑀫𑀺𑀦𑁆𑀢𑀺 𑀦𑀸𑀦𑀸𑀥𑀸𑀢𑀼, 𑀮𑁄𑀓𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀜𑁆𑀜𑀸 𑀘𑀓𑁆𑀔𑀼𑀥𑀸𑀢𑀼 𑀬𑀸𑀯 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺, 𑀬𑀣𑀸 𑀘 𑀇𑀤𑀁 𑀜𑀸𑀡𑀁 𑀘𑀓𑁆𑀔𑀼𑀥𑀸𑀢𑀼𑀆𑀤𑀺𑀪𑁂𑀤𑁂𑀦 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀯𑀲𑁂𑀦 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀧𑀺 𑀯𑀲𑁂𑀦 𑀢𑀁 𑀧𑀚𑀸𑀦𑀸𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀺 𑀤𑁆𑀯𑁂 𑀘 𑀅𑀕𑁆𑀕𑀲𑀸𑀯𑀓𑀸 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑁂𑀯 𑀦𑀸𑀦𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀢𑀫𑁆𑀧𑀺 𑀏𑀓𑀤𑁂𑀲𑁂𑀦𑁂𑀯, 𑀦 𑀦𑀺𑀧𑁆𑀧𑀤𑁂𑀲𑀢𑁄. 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀧𑀦 𑀦𑀸𑀦𑀢𑁆𑀢𑀁 𑀦 𑀚𑀸𑀦𑀦𑁆𑀢𑀺. 𑀪𑀕𑀯𑀸 𑀧𑀦 ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 𑀨𑀭𑀼𑀲𑁄, 𑀇𑀫𑀲𑁆𑀲 𑀩𑀳𑀮𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄. 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁 𑀦𑀸𑀫 𑀳𑁄𑀢𑀺, 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁 𑀳𑁄𑀢𑀺 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 ¶ 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁, 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀨𑀮𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀤𑀻𑀖𑀁 𑀯𑀝𑁆𑀝𑀁 𑀲𑀼𑀲𑀡𑁆𑀞𑀸𑀦𑀁 𑀤𑀼𑀲𑁆𑀲𑀡𑁆𑀞𑀸𑀦𑀁 𑀫𑀝𑁆𑀞𑀁 𑀨𑀭𑀼𑀲𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁 𑀢𑀺𑀢𑁆𑀢𑀁 𑀫𑀥𑀼𑀭𑀁 𑀓𑀝𑀼𑀓𑀁 𑀅𑀫𑁆𑀩𑀺𑀮𑀁 𑀓𑀲𑀸𑀯𑀁 𑀳𑁄𑀢𑀺, 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀳𑁄𑀢𑀺, 𑀅𑀢𑀺𑀔𑀺𑀡𑁄 𑀉𑀚𑀼𑀓𑁄 𑀓𑀼𑀝𑀺𑀮𑁄 𑀓𑀡𑁆𑀳𑁄 𑀦𑀻𑀮𑁄 𑀑𑀤𑀸𑀢𑁄 𑀳𑁄𑀢𑀻’’𑀢𑀺 𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀸𑀧𑀺 𑀯𑀲𑁂𑀦 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀪𑀸𑀯𑀁 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀏𑀯 𑀳𑀺 𑀏𑀢𑀁 𑀩𑀮𑀁, 𑀦 𑀅𑀜𑁆𑀜𑁂𑀲𑀁.

𑁬𑁦. 𑀬𑀁 𑀬𑀤𑁂𑀯 𑀥𑀸𑀢𑀼𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀳𑀻𑀦𑀸𑀤𑀺𑀲𑀪𑀸𑀯𑀁. 𑀬𑀲𑁆𑀫𑀸 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀅𑀚𑁆𑀛𑀸𑀲𑀬𑀥𑀸𑀢𑀼, 𑀢𑀲𑁆𑀫𑀸 𑀅𑀥𑀺𑀫𑀼𑀘𑁆𑀘𑀦𑀁 𑀅𑀚𑁆𑀛𑀸𑀲𑀬𑀲𑁆𑀲 𑀳𑀻𑀦𑀸𑀤𑀺𑀲𑀪𑀸𑀯𑁂𑀦 𑀧𑀯𑀢𑁆𑀢𑀦𑀁. 𑀢𑀁 𑀧𑀦 𑀢𑀲𑁆𑀲 𑀢𑀁 𑀢𑀁 𑀅𑀥𑀺𑀝𑁆𑀞𑀳𑀦𑀁 𑀅𑀪𑀺𑀦𑀺𑀯𑀺𑀲𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀥𑀺𑀫𑀼𑀘𑁆𑀘𑀦𑁆𑀢𑀺, 𑀢𑀁 𑀢𑀤𑁂𑀯 𑀅𑀥𑀺𑀝𑁆𑀞𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀻’’𑀢𑀺. 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀯𑀺𑀲𑀬𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀦𑁆𑀢𑀺 𑀳𑀻𑀦𑀸𑀤𑀺𑀯𑀲𑁂𑀦 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀬 𑀜𑀸𑀡𑀁.

𑀢𑁂 𑀬𑀣𑀸𑀥𑀺𑀫𑀼𑀢𑁆𑀢𑀸 𑀘 𑀪𑀯𑀦𑁆𑀢𑀻𑀢𑀺 𑀢𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀬𑀣𑀸 𑀬𑀣𑀸 𑀅𑀥𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀁 𑀢𑀁 𑀓𑀫𑁆𑀫𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀻𑀢𑀺 𑀅𑀥𑀺𑀫𑀼𑀢𑁆𑀢𑀺𑀅𑀦𑀼𑀭𑀽𑀧𑀁 𑀢𑀁 𑀢𑀁 𑀅𑀢𑁆𑀢𑀦𑀸 𑀲𑀫𑀸𑀤𑀺𑀬𑀺𑀢𑀩𑁆𑀩𑀁 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀯𑀺𑀪𑀚𑀦𑁆𑀢𑁄 ‘‘𑀢𑁂 𑀙𑀩𑁆𑀩𑀺𑀥𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁂𑀘𑀺 𑀮𑁄𑀪𑀯𑀲𑁂𑀦 𑀓𑀫𑁆𑀫𑀁 𑀲𑀫𑀸𑀤𑀺𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀲 𑀦𑀬𑁄 ¶ 𑀲𑁂𑀲𑁂𑀲𑀼𑀧𑀺. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀦𑁆𑀢𑀺 𑀢𑀁 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀙𑀩𑁆𑀩𑀺𑀥𑀁 𑀧𑀼𑀦 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀲𑁂𑀦 𑀯𑀺𑀪𑀚𑁆𑀚𑀫𑀸𑀦𑀁 𑀤𑀼𑀯𑀺𑀥𑀁.

𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀓𑀸𑀴𑀓𑀦𑁆𑀢𑀺 𑀓𑀡𑁆𑀳𑀁. 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄 𑀓𑀸𑀴𑀓𑀯𑀺𑀧𑀸𑀓𑀦𑁆𑀢𑀺 𑀓𑀡𑁆𑀳𑀯𑀺𑀧𑀸𑀓𑀁. 𑀬𑀁 𑀲𑀤𑁆𑀥𑀸𑀯𑀲𑁂𑀦 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀁. 𑀢𑀜𑁆𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸 𑀧𑀡𑁆𑀟𑀭𑀦𑁆𑀢𑀺 𑀲𑀼𑀓𑁆𑀓𑀁. 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄 𑀧𑀡𑁆𑀟𑀭𑀯𑀺𑀧𑀸𑀓𑀢𑁆𑀢𑀸 𑀲𑀼𑀓𑁆𑀓𑀯𑀺𑀧𑀸𑀓𑀁. 𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀲𑀤𑁆𑀥𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀦𑁆𑀢𑀺 𑀯𑁄𑀫𑀺𑀲𑁆𑀲𑀓𑀓𑀫𑁆𑀫𑀁. 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀁. 𑀫𑀺𑀲𑁆𑀲𑀓𑀓𑀫𑁆𑀫𑀜𑁆𑀳𑀺 𑀓𑀢𑁆𑀯𑀸 𑀅𑀓𑀼𑀲𑀮𑀯𑀮𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀫𑀗𑁆𑀕𑀮𑀳𑀢𑁆𑀣𑀺𑀪𑀸𑀯𑀁 𑀉𑀧𑀧𑀦𑁆𑀦𑁄 𑀓𑀼𑀲𑀮𑁂𑀦 𑀧𑀯𑀢𑁆𑀢𑁂 𑀲𑀼𑀔𑀁 𑀅𑀦𑀼𑀪𑀯𑀢𑀺, 𑀓𑀼𑀲𑀮𑁂𑀦 𑀭𑀸𑀚𑀓𑀼𑀮𑁂 ¶ 𑀦𑀺𑀩𑁆𑀩𑀢𑁆𑀢𑁄𑀧𑀺 𑀅𑀓𑀼𑀲𑀮𑁂𑀦 𑀤𑀼𑀓𑁆𑀔𑀁 𑀯𑁂𑀤𑀬𑀢𑀺. 𑀬𑀁 𑀯𑀻𑀭𑀺𑀬𑀯𑀲𑁂𑀦 𑀧𑀜𑁆𑀜𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀓𑀫𑁆𑀫𑀓𑁆𑀔𑀬𑀓𑀭𑀸 𑀘𑀢𑀼𑀫𑀕𑁆𑀕𑀘𑁂𑀢𑀦𑀸. 𑀢𑀜𑁆𑀳𑀺 𑀬𑀤𑀺 𑀓𑀡𑁆𑀳𑀁 𑀪𑀯𑁂𑀬𑁆𑀬, 𑀓𑀡𑁆𑀳𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀬𑀤𑀺 𑀲𑀼𑀓𑁆𑀓𑀁 𑀪𑀯𑁂𑀬𑁆𑀬, 𑀲𑀼𑀓𑁆𑀓𑀉𑀧𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀉𑀪𑀬𑀯𑀺𑀧𑀸𑀓𑀲𑁆𑀲 𑀧𑀦 𑀅𑀧𑁆𑀧𑀤𑀸𑀦𑀢𑁄 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀓𑀫𑁆𑀫𑀲𑀫𑀸𑀤𑀸𑀦𑁂 𑀧𑀞𑀫𑀁 𑀅𑀘𑁂𑀮𑀓𑀧𑀝𑀺𑀧𑀤𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸, 𑀤𑀼𑀢𑀺𑀬𑀁 𑀢𑀺𑀩𑁆𑀩𑀓𑀺𑀮𑁂𑀲𑀲𑁆𑀲 𑀅𑀲𑁆𑀲𑀼𑀫𑀼𑀔𑀲𑁆𑀲𑀸𑀧𑀺 𑀭𑀼𑀤𑀢𑁄 𑀧𑀭𑀺𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀁, 𑀢𑀢𑀺𑀬𑀁 𑀓𑀸𑀫𑁂𑀲𑀼 𑀅𑀧𑀸𑀢𑀩𑁆𑀬𑀢𑀸 𑀅𑀘𑁂𑀮𑀓𑀧𑀝𑀺𑀧𑀤𑀸, 𑀘𑀢𑀼𑀢𑁆𑀣𑀁 𑀧𑀘𑁆𑀘𑀬𑁂 𑀅𑀮𑀪𑀫𑀸𑀦𑀲𑁆𑀲𑀸𑀧𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑀫𑀗𑁆𑀕𑀺𑀦𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀁. 𑀬𑀁 𑀏𑀯𑀁 𑀚𑀸𑀢𑀺𑀬𑀁 𑀓𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀬𑀁 𑀅𑀜𑁆𑀜𑀫𑁆𑀧𑀺 𑀏𑀯𑀁𑀧𑀓𑀸𑀭𑀁 𑀓𑀫𑁆𑀫𑀁. 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦𑀸𑀢𑀺𑀆𑀤𑀺 𑀢𑀲𑁆𑀫𑀺𑀁 𑀓𑀫𑁆𑀫𑀯𑀺𑀧𑀸𑀓𑁂 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀉𑀧𑀘𑀺𑀢𑀦𑁆𑀢𑀺 𑀬𑀣𑀸 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀁. 𑀅𑀯𑀺𑀧𑀓𑁆𑀓𑀦𑁆𑀢𑀺 𑀦 𑀯𑀺𑀧𑀓𑁆𑀓𑀯𑀺𑀧𑀸𑀓𑀁. 𑀯𑀺𑀧𑀸𑀓𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀦𑁆𑀢𑀺 𑀯𑀺𑀧𑀸𑀓𑀤𑀸𑀦𑀸𑀬 𑀓𑀢𑁄𑀓𑀸𑀲𑀁. 𑀦 𑀘 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀥𑀸 𑀕𑀦𑁆𑀢𑀼𑀦𑁆𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀦𑀺𑀩𑁆𑀩𑀺𑀚𑁆𑀛𑀦𑀢𑁄 𑀅𑀪𑀺𑀦𑀺𑀩𑁆𑀩𑀺𑀥𑀸𑀲𑀗𑁆𑀔𑀸𑀢𑀁 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀕𑀦𑁆𑀢𑀼𑀁 𑀦 𑀘 𑀪𑀩𑁆𑀩𑁄. 𑀢𑀁 𑀪𑀕𑀯𑀸 𑀦 𑀑𑀯𑀤𑀢𑀻𑀢𑀺 𑀢𑀁 𑀯𑀺𑀧𑀸𑀓𑀸𑀯𑀭𑀡𑁂𑀦 𑀦𑀺𑀯𑀼𑀢𑀁 𑀧𑀼𑀕𑁆𑀕𑀮𑀁 𑀪𑀕𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑀁 𑀧𑀼𑀭𑀓𑁆𑀔𑀢𑁆𑀯𑀸 𑀦 𑀑𑀯𑀤𑀢𑀺, 𑀯𑀸𑀲𑀦𑀢𑁆𑀣𑀁 𑀧𑀦 𑀢𑀸𑀤𑀺𑀲𑀸𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀏𑀯, 𑀅𑀚𑀸𑀢𑀲𑀢𑁆𑀢𑀼𑀆𑀤𑀻𑀦𑀁 𑀯𑀺𑀬.

𑀉𑀧𑀘𑀺𑀢𑀦𑁆𑀢𑀺 𑀓𑀸𑀢𑀼𑀁 𑀆𑀭𑀤𑁆𑀥𑀁. 𑀢𑁂𑀦𑁂𑀯𑀸𑀳 𑁋 ‘‘𑀦 𑀘 𑀢𑀸𑀯 𑀧𑀸𑀭𑀺𑀧𑀽𑀭𑀺𑀁 𑀕𑀢’’𑀦𑁆𑀢𑀺. 𑀢𑁂𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀲𑁆𑀲 𑀅𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀺𑀧𑀽𑀭𑀺𑀁 𑀨𑀮𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀁 𑀕𑀘𑁆𑀙𑀢𑀺 𑀧𑀼𑀭𑀸 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀢𑀸𑀬 𑀲𑀚𑁆𑀚𑀼𑀓𑀁 𑀨𑀮𑀥𑀫𑁆𑀫𑀲𑁆𑀲 𑀅𑀪𑀸𑀚𑀦𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑀬𑀢𑀺 ¶ 𑀧𑀼𑀭𑀸. 𑀢𑁂𑀦𑁂𑀯𑀸𑀳 𑁋 ‘‘𑀧𑀼𑀭𑀸 𑀯𑁂𑀦𑁂𑀬𑁆𑀬𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀢𑀻’’𑀢𑀺. ‘‘𑀧𑀼𑀭𑀸 𑀅𑀦𑀺𑀬𑀢𑀁 𑀲𑀫𑀢𑀺𑀓𑁆𑀓𑀫𑀢𑀻’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀅𑀲𑀫𑀢𑁆𑀢𑁂𑀢𑀺 𑀓𑀫𑁆𑀫𑁂 𑀅𑀲𑀫𑁆𑀧𑀼𑀡𑁆𑀡𑁂, 𑀢𑁂 𑀅𑀲𑀫𑁆𑀧𑀼𑀡𑁆𑀡𑁂 𑀯𑀸.

𑁬𑁧. 𑀏𑀯𑀁 𑀓𑀺𑀮𑁂𑀲𑀦𑁆𑀢𑀭𑀸𑀬𑀫𑀺𑀲𑁆𑀲𑀓𑀁 𑀓𑀫𑁆𑀫𑀦𑁆𑀢𑀭𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀫𑀺𑀲𑁆𑀲𑀓𑀁 𑀓𑀫𑁆𑀫𑀦𑁆𑀢𑀭𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀩𑁆𑀩𑁂𑀲𑀦𑁆𑀢𑀺 𑀇𑀫𑀲𑁆𑀫𑀺𑀁 𑀩𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀓𑀫𑁆𑀫𑀸𑀦𑀁. 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀢𑀺 𑀫𑀼𑀤𑀼𑀫𑀚𑁆𑀛𑀢𑀺𑀩𑁆𑀩𑀪𑀸𑀯𑁄. 𑀓𑀫𑁆𑀫𑀸𑀦𑀜𑁆𑀳𑀺 𑀫𑀼𑀤𑀼𑀆𑀤𑀺𑀪𑀸𑀯𑁂𑀦 𑀢𑀁𑀯𑀺𑀧𑀸𑀓𑀸𑀦𑀁 𑀫𑀼𑀤𑀼𑀫𑀚𑁆𑀛𑀢𑀺𑀓𑁆𑀔𑀪𑀸𑀯𑁄 ¶ 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀦𑁆𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀉𑀧𑀧𑀚𑁆𑀚𑁂 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀢𑁄 𑀅𑀜𑁆𑀜𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁. 𑀏𑀓𑀚𑀯𑀦𑀯𑀸𑀭𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀲𑀼 𑀘𑁂𑀢𑀦𑀸𑀲𑀼 𑀧𑀞𑀫𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀦𑀸𑀫. 𑀧𑀭𑀺𑀬𑁄𑀲𑀸𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀦𑀸𑀫. 𑀫𑀚𑁆𑀛𑁂 𑀧𑀜𑁆𑀘 𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀦𑀸𑀫. 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀜𑀸𑀡𑀦𑁆𑀢𑀺 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸𑀬 𑀯𑀺𑀧𑀸𑀓𑀯𑀺𑀲𑁂𑀲𑁂 𑀜𑀸𑀡𑀁. 𑀇𑀫𑀲𑁆𑀲 𑀧𑀦 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀕𑀢𑀺𑀲𑀫𑁆𑀧𑀢𑁆𑀢𑀺 𑀕𑀢𑀺𑀯𑀺𑀧𑀢𑁆𑀢𑀺, 𑀉𑀧𑀥𑀺𑀲𑀫𑁆𑀧𑀢𑁆𑀢𑀺 𑀉𑀧𑀥𑀺𑀯𑀺𑀧𑀢𑁆𑀢𑀺, 𑀓𑀸𑀮𑀲𑀫𑁆𑀧𑀢𑁆𑀢𑀺 𑀓𑀸𑀮𑀯𑀺𑀧𑀢𑁆𑀢𑀺, 𑀧𑀬𑁄𑀕𑀲𑀫𑁆𑀧𑀢𑁆𑀢𑀺 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑁄 𑀓𑀸𑀭𑀡𑀁. 𑀲𑁄 𑀘 𑀦𑁂𑀲𑀁 𑀓𑀸𑀭𑀡𑀪𑀸𑀯𑁄 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺𑀧𑀸𑀴𑀺𑀯𑀲𑁂𑀦 (𑀯𑀺𑀪. 𑁮𑁧𑁦) 𑀯𑁂𑀤𑀺𑀢𑀩𑁆𑀩𑁄.

𑁬𑁨. 𑀅𑀦𑀦𑁆𑀢𑀭𑀩𑀮𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀓𑀫𑁆𑀫𑀲𑀫𑀸𑀤𑀸𑀦𑀧𑀤𑁂𑀦𑁂𑀯 𑀛𑀸𑀦𑀸𑀤𑀻𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀲𑀫𑀸𑀤𑀺𑀦𑁆𑀦𑀸𑀦𑀁 𑀓𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂𑀲𑀼 𑀧𑀯𑀢𑁆𑀢𑀸𑀦𑀺 𑀛𑀸𑀦𑀸𑀤𑀻𑀦𑀺 𑀓𑀫𑁆𑀫𑀁 𑀳𑁄𑀦𑁆𑀢𑀺. 𑀢𑀢𑁆𑀣 𑀢𑀣𑀸 𑀲𑀫𑀸𑀤𑀺𑀦𑁆𑀦𑀸𑀦𑀦𑁆𑀢𑀺 ‘‘𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁, 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓’’𑀦𑁆𑀢𑀺 𑀏𑀯𑀫𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀲𑀫𑀸𑀤𑀺𑀦𑁆𑀦𑁂𑀲𑀼 𑀓𑀫𑁆𑀫𑁂𑀲𑀼. 𑀲𑀁𑀓𑀺𑀮𑁂𑀲𑁄𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑀯𑀲𑁂𑀦 𑀓𑀺𑀮𑀺𑀝𑁆𑀞𑀪𑀸𑀯𑁄. 𑀯𑁄𑀤𑀸𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀯𑀺𑀲𑀼𑀚𑁆𑀛𑀦𑀁. 𑀯𑀼𑀝𑁆𑀞𑀸𑀦𑀁 𑀧𑀕𑀼𑀡𑀯𑁄𑀤𑀸𑀦𑀁 𑀪𑀯𑀗𑁆𑀕𑀯𑀼𑀝𑁆𑀞𑀸𑀦𑀜𑁆𑀘. 𑀏𑀯𑀁 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀅𑀬𑀫𑁂𑀯𑀢𑁆𑀣𑁄 𑁋 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀛𑀸𑀦𑀸𑀤𑀺 𑀲𑀁𑀓𑀺𑀮𑀺𑀲𑁆𑀲𑀢𑀺 𑀯𑁄𑀤𑀸𑀬𑀢𑀺 𑀯𑀼𑀝𑁆𑀞𑀳𑀢𑀻𑀢𑀺 𑀚𑀸𑀦𑀦𑀜𑀸𑀡𑀁 𑀪𑀕𑀯𑀢𑁄 𑀅𑀦𑀸𑀯𑀭𑀡𑀜𑀸𑀡𑀁, 𑀦 𑀢𑀲𑁆𑀲 𑀆𑀯𑀭𑀡𑀁 𑀅𑀢𑁆𑀣𑀻𑀢𑀺.

𑀓𑀢𑀺 𑀛𑀸𑀦𑀸𑀦𑀻𑀢𑀺𑀆𑀤𑀺 𑀛𑀸𑀦𑀸𑀤𑀬𑁄 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀲𑀦𑁆𑀥𑀸𑀬𑀸𑀳. 𑀏𑀓𑀸𑀤𑀲𑀸𑀢𑀺 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 ¶ (𑀤𑀻. 𑀦𑀺. 𑁨.𑁧𑁨𑁯, 𑁧𑁭𑁪; 𑁩.𑁩𑁩𑁯, 𑁩𑁫𑁮; 𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨) 𑀅𑀝𑁆𑀞𑀦𑁆𑀦𑀁 𑀢𑀺𑀡𑁆𑀡𑀜𑁆𑀘 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀝𑁆𑀞𑀸𑀢𑀺 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑁂 𑀯𑀺𑀫𑁄𑀓𑁆𑀔𑁂 𑀅𑀝𑁆𑀞. 𑀲𑀢𑁆𑀢𑀸𑀢𑀺 𑀢𑁂𑀲𑀼 𑀏𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀲𑀢𑁆𑀢. 𑀢𑀬𑁄𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀸𑀤𑀬𑁄 𑀢𑀬𑁄. 𑀤𑁆𑀯𑁂𑀢𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲𑀸𑀲𑀫𑁆𑀪𑀯𑀢𑁄 𑀅𑀯𑀲𑁂𑀲𑀸 𑀤𑁆𑀯𑁂. 𑀏𑀢𑁆𑀣 𑀘 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 ¶ , 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀢𑁄 𑀘 𑀯𑀺𑀫𑁄𑀓𑁆𑀔𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀧𑀦 𑀲𑀩𑁆𑀩𑀲𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀧𑀕𑀫𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀮𑁄𑀓𑀼𑀢𑁆𑀢𑀭𑀸 𑀘 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑁂𑀳𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑁄𑀓𑁆𑀔𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀸𑀥𑀻𑀲𑀼 𑀘𑀢𑀼𑀓𑁆𑀓𑀦𑀬𑀧𑀜𑁆𑀘𑀓𑀦𑀬𑁂𑀲𑀼 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀦𑀸𑀫. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀦𑀸𑀫. 𑀘𑀢𑀼𑀓𑁆𑀓𑀦𑀬𑁂 𑀧𑀜𑁆𑀘𑀓𑀦𑀬𑁂𑀧𑀺 𑀲𑁂𑀲𑀛𑀸𑀦𑁂𑀲𑀼 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀦𑀸𑀫.

𑀲𑀫𑀸𑀧𑀢𑁆𑀢𑀻𑀲𑀼 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 ‘‘𑀲𑀫𑀸𑀥𑀻’’𑀢𑀺𑀧𑀺 𑀦𑀸𑀫𑀁 ‘‘𑀲𑀫𑀸𑀧𑀢𑁆𑀢𑀻’’𑀢𑀺𑀧𑀺. 𑀓𑀲𑁆𑀫𑀸? 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀩𑁆𑀪𑀸𑀯𑀢𑁄. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄 𑀦 ‘‘𑀲𑀫𑀸𑀥𑀻’’𑀢𑀺 𑀦𑀸𑀫𑀁. 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀻𑀢𑀺 𑀅𑀧𑁆𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀲𑁆𑀲 𑀳𑀸𑀦𑀪𑀸𑀕𑀺𑀬𑀢𑀸. ‘‘𑀧𑀞𑀫𑀚𑁆𑀛𑀸𑀦𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀁𑀓𑀺𑀮𑁂𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀓𑁆𑀓𑀼𑀝𑀁 𑀯𑀼𑀘𑁆𑀘𑀢𑀺 𑀅𑀚𑀜𑁆𑀜𑀸𑀚𑀺𑀕𑀼𑀘𑁆𑀙𑀦𑀫𑀼𑀔𑁂𑀦 𑀢𑀧𑁆𑀧𑀭𑀫𑀢𑀸. 𑀓𑀼𑀓𑁆𑀓𑀼𑀝𑀛𑀸𑀬𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀤𑁆𑀯𑁂 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀧𑀞𑀫𑀁 𑀤𑀼𑀢𑀺𑀬𑀁 𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀉𑀢𑁆𑀢𑀭𑀺 𑀦 𑀯𑀸𑀬𑀫𑀢𑀺, 𑀢𑀲𑁆𑀲 𑀢𑀸𑀦𑀺 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 ‘‘𑀓𑀼𑀓𑁆𑀓𑀼𑀝𑀛𑀸𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀓𑀼𑀓𑁆𑀓𑀼𑀝𑀛𑀸𑀬𑀻. 𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀆𑀲𑀦𑁆𑀦𑀩𑀮𑀯𑀧𑀘𑁆𑀘𑀢𑁆𑀣𑀺𑀓𑀢𑁆𑀢𑀸 𑀯𑀺𑀲𑁂𑀲𑀪𑀸𑀕𑀺𑀬𑀢𑀸𑀪𑀸𑀯𑀢𑁄 𑀘 𑀲𑀁𑀓𑀺𑀮𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀇𑀢𑀭𑀸𑀦𑀺 𑀧𑀦 𑀯𑀺𑀲𑁂𑀲𑀪𑀸𑀕𑀺𑀬𑀢𑀸𑀪𑀸𑀯𑁂𑀧𑀺 𑀫𑀦𑁆𑀤𑀧𑀘𑁆𑀘𑀢𑁆𑀣𑀺𑀓𑀢𑁆𑀢𑀸 𑀯𑁄𑀤𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀻𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀁, 𑀧𑀕𑀼𑀡𑀯𑁄𑀤𑀸𑀦𑀁 𑀪𑀯𑀗𑁆𑀕𑀯𑀼𑀝𑁆𑀞𑀸𑀦𑀜𑁆𑀘 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 ¶ 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀯𑁄𑀤𑀸𑀦𑀫𑁆𑀧𑀺 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑀯𑀲𑁂𑀦 𑀲𑀩𑁆𑀩𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀪𑀯𑀗𑁆𑀕𑀜𑁆𑀘 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀧𑀦 𑀯𑀼𑀝𑁆𑀞𑀸𑀦𑀯𑀲𑀺𑀪𑀸𑀯𑁂𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀁 𑀇𑀥 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁬𑁩. 𑀢𑀲𑁆𑀲𑁂𑀯 ¶ 𑀲𑀫𑀸𑀥𑀺𑀲𑁆𑀲𑀸𑀢𑀺 𑀢𑀲𑁆𑀲 𑀅𑀦𑀦𑁆𑀢𑀭𑀩𑀮𑀦𑀺𑀤𑁆𑀤𑁂𑀲𑁂 𑀛𑀸𑀦𑀸𑀤𑀺𑀧𑀭𑀺𑀬𑀸𑀬𑁂𑀳𑀺 𑀯𑀼𑀢𑁆𑀢𑀲𑀫𑀸𑀥𑀺𑀲𑁆𑀲. 𑀧𑀭𑀺𑀯𑀸𑀭𑀸𑀢𑀺 𑀧𑀭𑀺𑀓𑁆𑀔𑀸𑀭𑀸. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺. 𑀩𑀮𑀸𑀦𑀻𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑁂𑀳𑀺 𑀲𑀤𑁆𑀥𑀺𑀁 𑀢𑀸𑀦𑀺𑀬𑁂𑀯. 𑀯𑀻𑀭𑀺𑀬𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀩𑀮𑀸𑀦𑀁 𑀩𑀳𑀽𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁. 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑁂𑀦 𑀳𑀺 𑀲𑀤𑁆𑀥𑀸𑀤𑀬𑁄 𑀧𑀝𑀺𑀧𑀓𑁆𑀔𑁂𑀦 𑀅𑀓𑀫𑁆𑀧𑀦𑀻𑀬𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀯𑀻𑀭𑀺𑀬𑀯𑀲𑁂𑀦 𑀩𑀮𑀸𑀦𑀺 𑀪𑀯𑀦𑁆𑀢𑀻’’𑀢𑀺. 𑀢𑁂𑀲𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀢𑀺 𑀅𑀯𑀺𑀲𑀤𑀁 𑀫𑀼𑀤𑀼. 𑀦𑀸𑀢𑀺𑀯𑀺𑀲𑀤𑀁 𑀫𑀚𑁆𑀛𑀁. 𑀅𑀢𑀺𑀯𑀺𑀲𑀤𑀁 𑀅𑀥𑀺𑀫𑀢𑁆𑀢𑀁 𑀩𑀮𑀯𑀁 ‘‘𑀢𑀺𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀯𑁂𑀦𑁂𑀬𑁆𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀤𑁂𑀲𑀦𑀸𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀲𑀁𑀔𑀺𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦. 𑀅𑀣 𑀯𑀸 𑀲𑀁𑀔𑀺𑀢𑁆𑀢𑁂𑀦𑀸𑀢𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀦. 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀉𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑁂𑀲𑁂𑀦 𑀘. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑁂𑀳𑀺. 𑀫𑀼𑀤𑀼𑀓𑀦𑁆𑀢𑀺 𑀮𑀳𑀼𑀓𑀁 𑀅𑀧𑀸𑀬𑀪𑀬𑀯𑀝𑁆𑀝𑀪𑀬𑀸𑀤𑀻𑀳𑀺 𑀲𑀦𑁆𑀢𑀚𑁆𑀚𑀦𑀯𑀲𑁂𑀦 𑀪𑀸𑀭𑀺𑀬𑀁 𑀅𑀓𑀢𑁆𑀯𑀸. 𑀫𑀼𑀤𑀼𑀢𑀺𑀓𑁆𑀔𑀦𑁆𑀢𑀺 𑀦𑀸𑀢𑀺𑀢𑀺𑀓𑁆𑀔𑀁. 𑀲𑀁𑀯𑁂𑀕𑀯𑀢𑁆𑀣𑀽𑀳𑀺 𑀲𑀁𑀯𑁂𑀕𑀚𑀦𑀦𑀸𑀤𑀺𑀯𑀲𑁂𑀦 𑀪𑀸𑀭𑀺𑀬𑀁 𑀓𑀢𑁆𑀯𑀸. 𑀲𑀫𑀣𑀁 𑀉𑀧𑀤𑀺𑀲𑀢𑀻𑀢𑀺 𑀲𑀫𑀣𑀁 𑀅𑀥𑀺𑀓𑀁 𑀓𑀢𑁆𑀯𑀸 𑀉𑀧𑀤𑀺𑀲𑀢𑀺, 𑀦 𑀢𑀣𑀸 𑀯𑀺𑀧𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀓𑁂𑀯𑀮𑁂𑀦 𑀲𑀫𑀣𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀦𑁆𑀢𑀺 𑀲𑀫𑀥𑀼𑀭𑀁 𑀲𑀫𑀣𑀯𑀺𑀧𑀲𑁆𑀲𑀦𑀁. 𑀯𑀺𑀧𑀲𑁆𑀲𑀦𑀦𑁆𑀢𑀺 𑀲𑀸𑀢𑀺𑀲𑀬𑀁 𑀯𑀺𑀧𑀲𑁆𑀲𑀦𑀁 𑀉𑀧𑀤𑀺𑀲𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀬𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀬𑁄𑀯, 𑀢𑀲𑁆𑀫𑀸 ‘‘𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀭𑀡𑀁 𑀉𑀧𑀤𑀺𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬𑀸𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁.

𑀬𑀁 𑀏𑀢𑁆𑀣 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀬 𑀬𑀁 𑀜𑀸𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀲𑁆𑀲 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀇𑀫𑀁 𑀪𑀽𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀇𑀫𑀁 𑀪𑀽𑀫𑀺𑀁 𑀪𑀸𑀯𑀦𑀜𑁆𑀘 𑀕𑀢𑁄𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀏𑀯𑀫𑀺𑀫𑀁 𑀲𑀁𑀓𑀺𑀮𑁂𑀲𑀯𑀸𑀲𑀦𑀁 𑀯𑁄𑀤𑀸𑀦𑀁 𑀪𑀯𑀗𑁆𑀕𑀜𑁆𑀘 𑀕𑀢𑁄 𑀕𑀘𑁆𑀙𑀢𑀺 𑀕𑀫𑀺𑀲𑁆𑀲𑀢𑀺 𑀘, 𑀓𑀸𑀮𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄, 𑀬𑀣𑀸 𑀤𑀼𑀤𑁆𑀥𑀦𑁆𑀢𑀺. 𑀇𑀫𑀸𑀬 𑀯𑁂𑀮𑀸𑀬 𑀇𑀫𑀲𑁆𑀫𑀺𑀁 𑀲𑀫𑀬𑁂 𑀇𑀫𑀸𑀬 𑀫𑀼𑀤𑀼𑀫𑀚𑁆𑀛𑀢𑀺𑀓𑁆𑀔𑀪𑁂𑀤𑀸𑀬 𑀅𑀦𑀼𑀲𑀸𑀲𑀦𑀺𑀬𑀸. 𑀏𑀯𑀁𑀥𑀸𑀢𑀼𑀓𑁄𑀢𑀺 𑀳𑀻𑀦𑀸𑀤𑀺𑀯𑀲𑁂𑀦 𑀏𑀯𑀁𑀅𑀚𑁆𑀛𑀸𑀲𑀬𑁄 𑀏𑀯𑀁𑀅𑀥𑀺𑀫𑀼𑀢𑁆𑀢𑀺𑀓𑁄. 𑀅𑀬𑀜𑁆𑀘𑀲𑁆𑀲 𑀆𑀲𑀬𑁄𑀢𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀬𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀧𑁆𑀧𑀓𑀸𑀭𑁄, 𑀬𑀣𑀸𑀪𑀽𑀢𑀜𑀸𑀡𑀸𑀦𑀼𑀮𑁄𑀫𑀔𑀦𑁆𑀢𑀺𑀧𑁆𑀧𑀓𑀸𑀭𑁄 ¶ 𑀯𑀸 𑀆𑀲𑀬𑁄. 𑀇𑀤𑀜𑁆𑀳𑀺 𑀘𑀢𑀼𑀩𑁆𑀩𑀺𑀥𑀁 𑀆𑀲𑀬𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀯𑀲𑀦𑁆𑀢𑀻𑀢𑀺 𑀆𑀲𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀁 𑀧𑀦 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀆𑀲𑀬𑀁 ¶ 𑀚𑀸𑀦𑀦𑁆𑀢𑁄 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀸𑀦𑀜𑁆𑀘 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺 𑀏𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺… 𑀩𑁆𑀬𑀸𑀧𑀸𑀤𑀁… 𑀅𑀩𑁆𑀬𑀸𑀧𑀸𑀤𑀁… 𑀣𑀺𑀦𑀫𑀺𑀤𑁆𑀥𑀁… 𑀆𑀮𑁄𑀓𑀲𑀜𑁆𑀜𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀣𑀺𑀦𑀫𑀺𑀤𑁆𑀥𑀕𑀭𑀼𑀓𑁄 𑀣𑀺𑀦𑀫𑀺𑀤𑁆𑀥𑀸𑀲𑀬𑁄 𑀣𑀺𑀦𑀫𑀺𑀤𑁆𑀥𑀸𑀥𑀺𑀫𑀼𑀢𑁆𑀢𑁄’’’𑀢𑀺 (𑀧𑀝𑀺. 𑀫. 𑁧.𑁧𑁧𑁩).

𑀅𑀬𑀁 𑀅𑀦𑀼𑀲𑀬𑁄𑀢𑀺 𑀅𑀬𑀁 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀸𑀫𑀭𑀸𑀕𑀸𑀤𑀺𑀓𑁄 𑀅𑀧𑁆𑀧𑀳𑀻𑀦𑁄𑀬𑁂𑀯 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑁄. 𑀅𑀧𑁆𑀧𑀳𑀻𑀦𑁄𑀬𑁂𑀯 𑀳𑀺 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄 𑀅𑀦𑀼𑀲𑀬𑁄. 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀲𑀢𑁆𑀢𑀸𑀦𑀁, 𑀳𑀻𑀦𑀲𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀦𑁆𑀢𑀺 𑀧𑀭𑀪𑀸𑀯𑁄 𑀘 𑀅𑀧𑀭𑀪𑀸𑀯𑁄 𑀘 𑀧𑀭𑁄𑀧𑀭𑀺𑀬𑀢𑁆𑀢𑀁 𑀅-𑀓𑀸𑀭𑀲𑁆𑀲 𑀑𑀓𑀸𑀭𑀁 𑀓𑀢𑁆𑀯𑀸, 𑀢𑀲𑁆𑀲 𑀯𑁂𑀫𑀢𑁆𑀢𑀢𑀸 𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸. 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀬 𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸𑀜𑀸𑀡𑀦𑁆𑀢𑀺 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀬𑀦𑁆𑀢𑀺 𑀬𑀁 𑀅𑀦𑁂𑀓𑀯𑀺𑀳𑀺𑀢𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀪𑀕𑀯𑀢𑁄 𑀜𑀸𑀡𑀁, 𑀇𑀤𑀁 𑀅𑀝𑁆𑀞𑀫𑀁 𑀢𑀣𑀸𑀕𑀢𑀩𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁, 𑀅𑀦𑁂𑀓𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀅𑀦𑀼𑀲𑁆𑀲𑀭𑀺𑀢𑀼𑀁 𑀇𑀘𑁆𑀙𑀺𑀢𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀲𑀫𑀦𑀦𑁆𑀢𑀭𑀸𑀢𑀻𑀢𑀁 𑀪𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦𑀁. 𑀅𑀦𑀼𑀲𑁆𑀲𑀭𑀢𑀻𑀢𑀺 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 𑀏𑀯𑀁 𑀚𑀸𑀢𑀺𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀢𑀺, 𑀅𑀦𑀼𑀤𑁂𑀯 𑀯𑀸 𑀲𑀭𑀢𑀺, 𑀘𑀺𑀢𑁆𑀢𑁂 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀲𑀭𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀳𑀺 𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀆𑀯𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀆𑀭𑀤𑁆𑀥𑀧𑁆𑀧𑀓𑀸𑀭𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼𑀧𑀺.

𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 ¶ 𑀕𑀳𑀺𑀢𑁄 𑀢𑀁𑀫𑀽𑀮𑀢𑁆𑀢𑀸, 𑀯𑀺𑀯𑀝𑁆𑀝𑁂𑀦 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 (𑀅. 𑀦𑀺. 𑁪.𑁧𑁫𑁬) 𑀯𑀼𑀢𑁆𑀢𑀸𑀦𑀺 ¶ , 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺𑀆𑀤𑀺 𑀲𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂, 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀁 𑀯𑀸 𑀕𑀢𑀺𑀬𑀁 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸. 𑀏𑀯𑀁𑀦𑀸𑀫𑁄𑀢𑀺 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀪𑀕𑁆𑀕𑀯𑁄 𑀯𑀸 𑀕𑁄𑀢𑀫𑁄 𑀯𑀸. 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀧𑁆𑀧𑀪𑁂𑀤𑀸𑀦𑀁 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄 𑀢𑀢𑁄 𑀪𑀯𑀢𑁄, 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄 𑀧𑀼𑀦 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀲𑀢𑁆𑀢𑀦𑀺𑀓𑀸𑀬𑁂 𑀉𑀤𑀧𑀸𑀤𑀺𑀁. 𑀅𑀣 𑀯𑀸 𑀢𑀢𑁆𑀭𑀸𑀧𑀺 𑀪𑀯𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁬𑁪. 𑀤𑀺𑀩𑁆𑀩𑁂𑀦𑀸𑀢𑀺𑀆𑀤𑀻𑀲𑀼 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀫𑁆𑀧𑀺 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑁆𑀢𑀸 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀫𑁆𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀯𑀸 𑀧𑀝𑀺𑀮𑀤𑁆𑀥𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼. 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀁. 𑀬𑁄 𑀳𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸𑀲𑁆𑀲 𑀢𑀁 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺. 𑀢𑀤𑀼𑀪𑀬𑀜𑁆𑀘 𑀪𑀕𑀯𑀸 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺.

𑀏𑀓𑀸𑀤𑀲𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 ¶ 𑀯𑀸 𑀯𑀺𑀲𑀼𑀤𑁆𑀥𑀁. 𑀬𑀣𑀸𑀳 𑁋

‘‘𑀲𑁄 𑀔𑁄 𑀅𑀳𑀁 𑀅𑀦𑀼𑀭𑀼𑀤𑁆𑀥𑀸 ‘𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁. ‘𑀅𑀫𑀦𑀲𑀺𑀓𑀸𑀭𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄… 𑀣𑀺𑀦𑀫𑀺𑀤𑁆𑀥𑀁… 𑀙𑀫𑁆𑀪𑀺𑀢𑀢𑁆𑀢𑀁… 𑀉𑀧𑁆𑀧𑀺𑀮𑀁… 𑀤𑀼𑀝𑁆𑀞𑀼𑀮𑁆𑀮𑀁… 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁… 𑀅𑀢𑀺𑀮𑀻𑀦𑀯𑀻𑀭𑀺𑀬𑀁… 𑀅𑀪𑀺𑀚𑀧𑁆𑀧𑀸… 𑀦𑀸𑀦𑀢𑁆𑀢𑀲𑀜𑁆𑀜𑀸… 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 ¶ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺’’𑀦𑁆𑀢𑀺 (𑀫. 𑀦𑀺. 𑁩.𑁨𑁪𑁨) 𑀏𑀯𑀫𑀸𑀤𑀺.

𑀢𑀤𑁂𑀯𑀁 𑀏𑀓𑀸𑀤𑀲𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 𑀯𑀸 𑀯𑀺𑀲𑀼𑀤𑁆𑀥𑀁. 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁, 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀯𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁. 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦.

𑀲𑀢𑁆𑀢𑁂 𑀧𑀲𑁆𑀲𑀢𑀻𑀢𑀺 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀁 𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀑𑀮𑁄𑀓𑁂𑀢𑀺. 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸. 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺, 𑀬𑁂 𑀘 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺 𑀦𑀺𑀩𑁆𑀩𑀢𑁆𑀢𑀸, 𑀢𑁂 ‘‘𑀘𑀯𑀫𑀸𑀦𑀸 𑀉𑀧𑀧𑀚𑁆𑀚𑀫𑀸𑀦𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂. 𑀳𑀻𑀦𑁂𑀢𑀺 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀺𑀯𑀲𑁂𑀦 𑀳𑀻𑀴𑀺𑀢𑁂 𑀧𑀭𑀺𑀪𑀽𑀢𑁂. 𑀧𑀡𑀻𑀢𑁂𑀢𑀺 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀧𑀭𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀸𑀓𑀦𑁆𑀢𑀸𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂 𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂, 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂, 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂. 𑀬𑀣𑀸𑀓𑀫𑁆𑀫𑀽𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀓𑀺𑀘𑁆𑀘𑀁. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀺 𑀘 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀤𑀼𑀝𑁆𑀞𑀁 𑀯𑀸 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀤𑀼𑀘𑁆𑀘𑀭𑀺𑀢𑀁. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀧𑀯𑀢𑁆𑀢𑀁 𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀏𑀯𑀁 𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸. 𑀅𑀭𑀺𑀬𑀸𑀦𑀁 ¶ 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁, 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸 𑀅𑀓𑁆𑀓𑁄𑀲𑀓𑀸 𑀕𑀭𑀳𑀓𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑁂𑀢𑀼𑀪𑀽𑀢𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸. 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 𑀲𑀫𑀸𑀤𑀧𑁂𑀦𑁆𑀢𑀺. 𑀢𑀢𑁆𑀣 𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦 𑀅𑀭𑀺𑀬𑀽𑀧𑀯𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀕𑀳𑀺𑀢𑀸𑀲𑀼𑀧𑀺 𑀢𑁂𑀲𑀁 𑀧𑀼𑀦 𑀯𑀘𑀦𑀁 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀫𑀳𑀸𑀲𑀸𑀯𑀚𑁆𑀚𑁄 𑀳𑀺 𑀅𑀭𑀺𑀬𑀽𑀧𑀯𑀸𑀤𑁄 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑁄. 𑀬𑀣𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺 ¶ , 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺 (𑀫. 𑀦𑀺. 𑁧.𑁧𑁪𑁯).

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 𑀘 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀣𑀸𑀳 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀢𑀭𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂. 𑀅𑀣 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀁. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀢𑀢𑁆𑀣 𑀤𑀼𑀓𑁆𑀓𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄, 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸. 𑀦 𑀤𑀼𑀕𑁆𑀕𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁 𑀤𑀻𑀧𑁂𑀢𑀺, 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸. 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀧𑁂𑀢𑀫𑀳𑀺𑀤𑁆𑀥𑀺𑀓𑀸𑀦𑀜𑁆𑀳𑀺 ¶ 𑀯𑀺𑀫𑀸𑀦𑀸𑀦𑀺𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁 𑀤𑀻𑀧𑁂𑀢𑀺, 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀔𑀲𑀫𑀼𑀲𑁆𑀲𑀬𑁂𑀳𑀺 𑀯𑀺𑀦𑀺𑀧𑀸𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺𑀆𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯 𑀤𑀻𑀧𑁂𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀏𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀁 𑀏𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀻𑀳𑀺 𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 ¶ 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀅𑀫𑀼𑀓𑀸𑀬 𑀓𑀧𑁆𑀧𑀓𑁄𑀝𑀺𑀬𑀁 𑀉𑀧𑀘𑀺𑀢𑀁 𑀢𑁂𑀦𑀸𑀬𑀁 𑀏𑀢𑀭𑀳𑀺, 𑀅𑀦𑀸𑀕𑀢𑁂 𑀯𑀸 𑀲𑀕𑁆𑀕𑀽𑀧𑀕𑁄 𑀅𑀧𑀸𑀬𑀽𑀧𑀕𑁄 𑀘𑀸𑀢𑀺 𑀅𑀝𑁆𑀞𑀫𑀦𑀯𑀫𑀩𑀮𑀜𑀸𑀡𑀓𑀺𑀘𑁆𑀘𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀢𑀣𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀯𑀸𑀢𑀺𑀆𑀤𑀻𑀲𑀼𑀧𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀫𑀸𑀦𑀺 𑀪𑀕𑀯𑀢𑁄 𑀤𑁆𑀯𑁂 𑀜𑀸𑀡𑀸𑀦𑀻’’𑀢𑀺.

𑀦𑀺𑀳𑀢𑁄 𑀫𑀸𑀭𑁄 𑀩𑁄𑀥𑀺𑀫𑀽𑀮𑁂𑀢𑀺 𑀦𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀓𑀺𑀮𑁂𑀲𑀫𑀸𑀭𑁄 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂. 𑀇𑀤𑀁 𑀪𑀕𑀯𑀢𑁄 𑀤𑀲𑀫𑀁 𑀩𑀮𑀦𑁆𑀢𑀺 𑀇𑀤𑀁 𑀓𑀺𑀮𑁂𑀲𑀫𑀸𑀭𑀲𑁆𑀲 𑀳𑀦𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁 𑀪𑀕𑀯𑀢𑁄 𑀤𑀲𑀫𑀁 𑀩𑀮𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀬𑀁 𑀜𑀸𑀡’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀬𑀤𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀯𑀸𑀲𑀦𑀸 𑀲𑀩𑁆𑀩𑁂 𑀆𑀲𑀯𑀸 𑀔𑁂𑀧𑀺𑀢𑀸, 𑀢𑀤𑀸 𑀪𑀕𑀯𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀥𑀺𑀕𑀢𑀁 𑀦𑀸𑀫, 𑀢𑀲𑁆𑀫𑀸 ‘‘𑀬𑀁 𑀲𑀩𑁆𑀩𑀜𑁆𑀜𑀼𑀢𑀸 𑀧𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀬𑀁 𑀢𑀸𑀯𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀢𑁆𑀣𑀓𑀣𑀸. 𑀧𑀭𑀯𑀸𑀤𑀻 𑀧𑀦𑀸𑀳 𑁋 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀏𑀓𑁆𑀓𑀁 𑀦𑀢𑁆𑀣𑀺, 𑀬𑀲𑁆𑀫𑀸 ‘𑀲𑀩𑁆𑀩𑀜𑁆𑀜𑀼𑀢𑀸 𑀧𑀢𑁆𑀢𑀸 𑀯𑀺𑀤𑀺𑀢𑀸 𑀲𑀩𑁆𑀩𑀥𑀫𑁆𑀫𑀸’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄’’𑀢𑀺, 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺. 𑀤𑀼𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯, 𑀢𑀢𑀺𑀬𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯, 𑀘𑀢𑀼𑀢𑁆𑀣𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯, 𑀧𑀜𑁆𑀘𑀫𑀁 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀭𑀫𑁂𑀯, 𑀙𑀝𑁆𑀞𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯, 𑀲𑀢𑁆𑀢𑀫𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯, 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀫𑁂𑀯, 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀲𑀩𑁆𑀩𑀁 𑀦 𑀓𑀭𑁄𑀢𑀺 ¶ . 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫𑁂𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺. 𑀚𑀸𑀦𑀦𑁆𑀢𑁄 ‘‘𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺, 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀻𑀢𑀺, 𑀆𑀲𑀯𑀓𑁆𑀔𑀬𑀜𑀸𑀡𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑁆𑀢𑀺. 𑀢𑀣𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 ¶ 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀓𑁆𑀔𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯 𑀓𑀸𑀫𑀸𑀯𑀘𑀭𑀫𑁂𑀯 𑀮𑁄𑀓𑀺𑀬𑀫𑁂𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁬𑁫. 𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀸𑀬 𑀧𑀤𑀢𑁆𑀣𑁄 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀻𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀺 𑀤𑁆𑀯𑀸𑀭𑀸𑀦𑀺 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀦𑀁 𑀅𑀯𑀲𑀭𑁄 𑀏𑀯 𑀦𑀢𑁆𑀣𑀻𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀺𑀓𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀏𑀯 𑀢𑀲𑁆𑀲 𑀕𑁄𑀘𑀭𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀬𑀼𑀢𑁆𑀢𑀺𑀬𑀸 𑀖𑀝𑁂𑀢𑀺 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀯𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀧𑀼𑀕𑁆𑀕𑀮𑁄 𑀅𑀯𑀺𑀧𑀭𑀻𑀢𑀫𑁂𑀯 𑀯𑀺𑀢𑀓𑁆𑀓𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀯𑀺𑀲𑁆𑀲𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀫𑀕𑁆𑀕𑀜𑀸𑀡𑁂𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺. 𑀢𑀣𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀘 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 𑀤𑀼𑀕𑁆𑀕𑀢𑀺𑀲𑀗𑁆𑀔𑀸𑀢𑀸 𑀲𑀩𑁆𑀩𑀸 𑀪𑀯𑀕𑀢𑀺𑀬𑁄 𑀚𑀳𑀺𑀲𑁆𑀲𑀢𑀺, 𑀢𑀢𑁄 𑀏𑀯 𑀲𑀩𑁆𑀩𑀁 𑀯𑀺𑀦𑀺𑀧𑀸𑀢𑀪𑀬𑀁 𑀲𑀁𑀲𑀸𑀭𑀪𑀬𑀜𑁆𑀘 𑀲𑀫𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀲𑀩𑁆𑀩𑁄𑀧𑀺 𑀘𑀸𑀬𑀫𑀢𑁆𑀣𑁄 𑀬𑀼𑀢𑁆𑀢𑁄 𑀏𑀯𑀸𑀢𑀺.

𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁬𑁬. 𑀲𑀓𑀲𑀫𑁆𑀧𑀢𑁆𑀢𑀺𑀬𑀸 ¶ 𑀯𑀺𑀬 𑀲𑀼𑀲𑀁𑀯𑀺𑀳𑀺𑀢𑀲𑀗𑁆𑀓𑀧𑁆𑀧𑁄 𑀪𑀯𑀢𑀺. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀇𑀤𑀁 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀯𑀘𑀦𑀦𑁆𑀢𑀺. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀩𑀳𑀼𑀮𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀲𑀼𑀓𑀭𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀲𑀫𑀣𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀜𑁆𑀘 𑀞𑀺𑀢𑁄 𑀅𑀢𑁆𑀢𑀸𑀥𑀻𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀧𑀲𑁆𑀲𑀦𑁆𑀢𑁄 𑀢𑀤𑀢𑀺𑀓𑁆𑀓𑀫𑀦𑀼𑀧𑀸𑀬𑀁 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 ¶ 𑀑𑀓𑁆𑀓𑀫𑀢𑀻𑀢𑀺 𑀢𑀁 𑀧𑀞𑀫𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀦𑁆𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀤𑀻𑀳𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀪𑀺𑀪𑀯𑀦𑀁 𑀯𑀻𑀭𑀺𑀬𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽𑀢𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀬𑀤𑀺𑀧𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀧𑀳𑀸𑀦𑀪𑀸𑀯𑀦𑀸 𑀲𑀫𑀸𑀦𑀓𑀸𑀮𑀸 𑀏𑀓𑀸𑀪𑀺𑀲𑀫𑀬𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀢𑀣𑀸𑀧𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑀸𑀪𑀸𑀯𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀦𑀢𑁆𑀣𑀻𑀢𑀺 𑀧𑀳𑀸𑀦𑀦𑀺𑀫𑀺𑀢𑁆𑀢𑀸 𑀯𑀺𑀬 𑀓𑀢𑁆𑀯𑀸 𑀪𑀸𑀯𑀦𑀸 𑀯𑀼𑀢𑁆𑀢𑀸 ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂𑀢𑀺 𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀅𑀣 𑀯𑀸 ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀇𑀤𑀁 𑀪𑀕𑀯𑀢𑁄 𑀯𑀘𑀦𑀁 𑀬𑁄𑀕𑀻𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀆𑀦𑀺𑀲𑀁𑀲𑀓𑀺𑀢𑁆𑀢𑀦𑀁 𑀳𑁄𑀢𑀻𑀢𑀺 𑀪𑀸𑀯𑀦𑀸𑀬 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁬𑁭. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀲𑀢𑀺𑀲𑀁𑀯𑀭𑁄, 𑀲𑀢𑀺𑀩𑀮𑁂𑀦 𑀘 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀏𑀢𑁆𑀣 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀬 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 ¶ 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀮𑀓𑁆𑀔𑀡𑁂𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀪𑀸𑀯𑁂𑀦 𑀯𑀸 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀳𑀺𑀢𑁄 𑀪𑀯𑀢𑀻𑀢𑀺 𑀏𑀢𑁆𑀣 𑀫𑀕𑁆𑀕𑀮𑀓𑁆𑀔𑀡𑁂𑀦 𑀕𑀳𑀡𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀓𑀸𑀭𑀡𑀢𑁄 𑀕𑀳𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑁄 𑀳𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀪𑀯𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀏𑀯 𑀕𑀳𑀺𑀢𑁄 𑀪𑀯𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀯𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑀺.

𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁬𑁮. 𑀭𑀓𑁆𑀔𑀻𑀬𑀢𑀻𑀢𑀺 𑀭𑀓𑁆𑀔𑀺𑀢𑀁. 𑀇𑀤𑀁 𑀧𑀤𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀬𑀲𑁆𑀫𑀸 𑀧𑀦 𑀅𑀢𑁆𑀣𑀯𑀲𑁂𑀦 𑀦𑀺𑀩𑁆𑀩𑀘𑀦𑁂 𑀯𑀼𑀢𑁆𑀢𑁂 𑀧𑀤𑀯𑀲𑁂𑀦 𑀦𑀺𑀩𑁆𑀩𑀘𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀭𑀓𑁆𑀔𑀺𑀢𑀁 𑀧𑀭𑀺𑀧𑀸𑀮𑀻𑀬𑀢𑀻𑀢𑀺 𑀏𑀲𑀸 𑀦𑀺𑀭𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀧𑀓𑀸𑀭𑁂 𑀯𑀸. 𑀢𑁂𑀦 𑀏𑀯𑀫𑀸𑀤𑀺𑀓𑀸 𑀏𑀯𑀁𑀧𑀓𑀸𑀭𑀸 𑀯𑀸 𑀏𑀲𑀸 𑀦𑀺𑀭𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺 𑀘𑀺𑀢𑁆𑀢𑀁, 𑀧𑀘𑁆𑀘𑀬𑁂𑀳𑀺 ¶ 𑀘𑀺𑀢𑀦𑁆𑀢𑀺 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀓𑀭𑀡𑀝𑁆𑀞𑁂𑀦 𑀘𑀺𑀢𑁆𑀢𑀁. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀢𑀻𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺𑀆𑀤𑀺𑀦𑀸 𑀦𑀺𑀭𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀅𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄 𑀤𑀼𑀕𑁆𑀕𑀢𑀺𑀧𑀳𑀸𑀦𑀜𑁆𑀘 𑀯𑀤𑀢𑁄 𑀪𑀕𑀯𑀢𑁄 𑀏𑀢𑁆𑀣 𑀕𑀸𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀓𑁄𑀓𑀸𑀮𑀺𑀓𑁄 𑀳𑀻𑀢𑀺𑀆𑀤𑀺 𑀦𑀺𑀤𑀸𑀦𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣 𑀳𑀺-𑀲𑀤𑁆𑀤𑁄 𑀓𑀸𑀭𑀡𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀓𑁄𑀓𑀸𑀮𑀺𑀓𑁄 (𑀲𑀁. 𑀦𑀺. 𑁧.𑁧𑁮𑁧; 𑀅. 𑀦𑀺. 𑁧𑁦.𑁮𑁯; 𑀲𑀼. 𑀦𑀺. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢) 𑀅𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸𑀬 𑀅𑀕𑁆𑀕𑀲𑀸𑀯𑀓𑁂𑀲𑀼 𑀘𑀺𑀢𑁆𑀢𑀁 𑀧𑀤𑁄𑀲𑁂𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑀁 𑀉𑀧𑀧𑀦𑁆𑀦𑁄, 𑀢𑀲𑁆𑀫𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑀺𑀢𑀼𑀓𑀸𑀫𑁄 𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀅𑀲𑁆𑀲𑀸𑀢𑀺 𑀪𑀕𑀯𑀸 𑀲𑀢𑀺𑀆𑀭𑀓𑁆𑀔𑁂𑀦 𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀫𑁆𑀳𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀬𑀸 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀁.

𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁬𑁯. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀩𑀳𑀼𑀮𑁄 ¶ 𑀓𑀲𑀺𑀡𑀯𑀲𑁂𑀦 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀯𑀸 𑀮𑀤𑁆𑀥𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀸𑀬 𑀘𑀺𑀢𑁆𑀢𑀫𑀜𑁆𑀚𑀽𑀲𑀸𑀬 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀫𑀸𑀥𑀺𑀁𑀬𑁂𑀯 𑀯𑀸 𑀬𑀣𑀸𑀮𑀤𑁆𑀥𑀁 𑀲𑀁𑀓𑀺𑀮𑁂𑀲𑀢𑁄 𑀭𑀓𑁆𑀔𑀺𑀢𑀘𑀺𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀅𑀬𑀁 𑀲𑀫𑀣𑁄’’𑀢𑀺. 𑀧𑀜𑁆𑀜𑀸𑀧𑀥𑀸𑀦𑀸 𑀯𑀺𑀧𑀲𑁆𑀲𑀦𑀸𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀬𑀁 𑀯𑀺𑀧𑀲𑁆𑀲𑀦𑀸’’𑀢𑀺. 𑀅𑀭𑀺𑀬𑀫𑀕𑁆𑀕𑁂𑀦 𑀤𑀼𑀓𑁆𑀔𑀲𑀘𑁆𑀘𑁂 𑀧𑀭𑀺𑀜𑁆𑀜𑀸𑀢𑁂 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀦𑁆𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸’’𑀢𑀺. ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀳𑀺 𑀫𑀕𑁆𑀕𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀸𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀁 𑀦𑀺𑀝𑁆𑀞𑀧𑁂𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀲𑀘𑁆𑀘𑀤𑁆𑀯𑀬𑀝𑁆𑀞𑀧𑀦𑁂𑀦 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦, 𑀧𑀘𑁆𑀙𑀺𑀫𑁂𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁭𑁦. 𑀓𑀼𑀲𑀮𑀧𑀓𑁆𑀔𑁄 ¶ 𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀲𑀢𑀺𑀲𑀁𑀯𑀭𑁄, 𑀲𑁄 𑀙𑀩𑁆𑀩𑀺𑀥𑁄 𑀤𑁆𑀯𑀸𑀭𑀯𑀲𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑀲𑀁𑀯𑀭𑁄 𑀬𑀸𑀯 𑀫𑀦𑁄𑀤𑁆𑀯𑀸𑀭𑀲𑀁𑀯𑀭𑁄𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀢𑀺𑀯𑀺𑀥𑁄 𑁋 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄, 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀝𑁆𑀞𑀯𑀺𑀥𑀸 𑀤𑀼𑀓𑁆𑀔𑁂 𑀜𑀸𑀡𑀁…𑀧𑁂… 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀦𑁆𑀢𑀺. 𑀉𑀤𑀬𑀩𑁆𑀩𑀬𑀜𑀸𑀡𑀁 𑀧𑀜𑁆𑀜𑀸𑀲𑀯𑀺𑀥𑀁 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄…𑀧𑁂… 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀦𑀁 𑀘𑀢𑀼𑀩𑁆𑀩𑀺𑀥𑀁 𑀘𑀢𑀼𑀫𑀕𑁆𑀕𑀯𑀲𑁂𑀦. 𑀢𑀢𑁆𑀣 𑀲𑀢𑀺𑀲𑀁𑀯𑀭𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄. 𑀢𑁂𑀲𑀼 𑀮𑁄𑀓𑀺𑀬𑁄 𑀓𑀸𑀫𑀸𑀯𑀘𑀭𑁄𑀯, 𑀮𑁄𑀓𑀼𑀢𑁆𑀢𑀭𑁄 𑀤𑀲𑁆𑀲𑀦𑀪𑀸𑀯𑀦𑀸𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀏𑀲 𑀦𑀬𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀭𑀽𑀧𑀸𑀯𑀘𑀭𑁄𑀢𑀺𑀧𑀺 𑀦𑀻𑀳𑀭𑀺𑀢𑀩𑁆𑀩𑁄. 𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑁄 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀩𑁆𑀩𑁄 ¶ . 𑀅𑀓𑀼𑀲𑀮𑀧𑀓𑁆𑀔𑁂 𑀅𑀲𑀁𑀯𑀭𑁄 𑀘𑀓𑁆𑀔𑀼𑀅𑀲𑀁𑀯𑀭𑁄…𑀧𑁂… 𑀓𑀸𑀬𑀅𑀲𑀁𑀯𑀭𑁄, 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄, 𑀯𑀸𑀘𑀸𑀅𑀲𑀁𑀯𑀭𑁄, 𑀫𑀦𑁄𑀅𑀲𑀁𑀯𑀭𑁄𑀢𑀺 𑀅𑀝𑁆𑀞𑀯𑀺𑀥𑁄. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀅𑀜𑁆𑀜𑀸𑀡𑀁 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀝𑁆𑀞𑀯𑀺𑀥𑀸 𑀯𑀺𑀪𑀢𑁆𑀢𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀝𑀺𑀧𑀓𑁆𑀔𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀢𑁄 𑀧𑀜𑁆𑀘𑀯𑀺𑀥𑀦𑁆𑀢𑀺 𑀏𑀯𑀁 𑀅𑀓𑀼𑀲𑀮𑀧𑀓𑁆𑀔𑁂 𑀯𑀺𑀪𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀯𑀢𑁆𑀢𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁭𑁧. 𑀧𑀭𑀺𑀯𑀢𑁆𑀢𑀦𑀳𑀸𑀭𑁂 𑀆𑀯𑀝𑁆𑀝𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀺𑀤𑁆𑀥𑀸𑀭𑀡𑀁 𑀅𑀓𑀢𑁆𑀯𑀸 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀪𑀸𑀯𑀺𑀢𑀸𑀬𑀸’’𑀢𑀺 𑀆𑀳. 𑀮𑁄𑀓𑀺𑀬𑀸 𑀘𑁂𑀢𑁆𑀣 𑀲𑀫𑀣𑀯𑀺𑀧𑀲𑁆𑀲𑀦𑀸 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀧𑀓𑁆𑀔𑁂𑀦𑀸𑀢𑀺 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀕𑀸𑀣𑀸𑀬 𑀧𑀝𑀺𑀧𑀓𑁆𑀔𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀯𑀺𑀪𑀢𑁆𑀢𑀺𑀳𑀸𑀭𑁂 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀝𑀺𑀧𑀓𑁆𑀔𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀯𑀢𑁆𑀢𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁭𑁨. ‘‘𑀫𑀸𑀦𑀲𑀁 ¶ 𑀳𑀤𑀬𑀁 𑀧𑀡𑁆𑀟𑀭𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 (𑀥. 𑀲. 𑁬) 𑀘 𑀘𑀺𑀢𑁆𑀢𑀲𑁆𑀲 𑀯𑁂𑀯𑀘𑀦𑀁. ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸’’𑀢𑀺 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲. ‘‘𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬) 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. ‘‘𑀣𑀺𑀦𑀁 𑀣𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀦𑀸𑀳𑁄 𑀅𑀦𑁆𑀢𑁄𑀲𑀗𑁆𑀓𑁄𑀘𑁄’’𑀢𑀺 𑀣𑀺𑀦𑀲𑁆𑀲. ‘‘𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀸𑀮𑀲𑀺𑀬𑀁 𑀲𑀼𑀧𑁆𑀬𑀁 𑀲𑀼𑀧𑁆𑀬𑀦𑀸 𑀲𑀼𑀧𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁧𑁬𑁩) 𑀫𑀺𑀤𑁆𑀥𑀲𑁆𑀲. ‘‘𑀪𑀺𑀓𑁆𑀔𑀓𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁫) 𑀪𑀺𑀓𑁆𑀔𑀼𑀧𑀤𑀲𑁆𑀲. ‘‘𑀤𑀼𑀕𑁆𑀕𑀢𑀺 𑀅𑀧𑀸𑀬𑁄 𑀯𑀺𑀦𑀺𑀧𑀸𑀢𑁄 𑀯𑀝𑁆𑀝𑀤𑀼𑀓𑁆𑀔𑀁 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀦𑀸 𑀤𑀼𑀕𑁆𑀕𑀢𑀺𑀬𑀸 𑀯𑁂𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁭𑁩. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ¶ 𑀭𑀓𑁆𑀔𑀦𑁆𑀢𑀺𑀬𑀸 𑀲𑀢𑀺𑀬𑀸 𑀭𑀓𑁆𑀔𑀺𑀬𑀫𑀸𑀦𑀁 𑀘𑀺𑀢𑁆𑀢𑀁 𑀢𑀲𑁆𑀲𑀸 𑀅𑀥𑀺𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀧𑀤𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀲𑀢𑀺𑀬𑀸’’𑀢𑀺. 𑀲𑁂𑀲𑀁 𑀇𑀫𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁂 𑀇𑀢𑁄 𑀧𑀭𑁂𑀲𑀼 𑀑𑀢𑀭𑀡𑀲𑁄𑀥𑀦𑀳𑀸𑀭𑀲𑀫𑁆𑀧𑀸𑀢𑁂𑀲𑀼𑀧𑀺 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑁭𑁬. 𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀬𑀁 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀲𑀘𑁆𑀘𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑀬𑀲𑁆𑀲 𑀯𑀲𑁂𑀦 𑀯𑁂𑀫𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀬𑀁 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀸𑀴𑀺𑀧𑀸𑀴𑀺𑀅𑀢𑁆𑀣𑀸𑀦𑀁 𑀅𑀯𑀲𑀺𑀝𑁆𑀞𑀯𑀺𑀲𑀬𑀯𑀲𑁂𑀦𑁂𑀯 𑀯𑁂𑀫𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀢𑀢𑁆𑀣 𑀬𑀁 𑀲𑀘𑁆𑀘𑀸𑀕𑀫𑀦𑀦𑁆𑀢𑀺 𑀬𑀁 𑀲𑀘𑁆𑀘𑀢𑁄 𑀅𑀯𑀺𑀧𑀭𑀻𑀢𑀢𑁄 𑀯𑀺𑀲𑀬𑀲𑁆𑀲 𑀆𑀕𑀫𑀦𑀁, 𑀅𑀥𑀺𑀕𑀫𑁄𑀢𑀺 𑀅𑀢𑁆𑀣𑁄. ‘‘𑀬𑀁 𑀧𑀘𑁆𑀘𑀸𑀕𑀫𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀬𑀁 𑀧𑀝𑀺𑀧𑀸𑀝𑀺𑀯𑀺𑀲𑀬𑀲𑁆𑀲 𑀆𑀕𑀫𑀦𑀁, 𑀢𑀁𑀢𑀁𑀯𑀺𑀲𑀬𑀸𑀥𑀺𑀕𑀫𑁄𑀢𑀺 𑀅𑀢𑁆𑀣𑁄 ¶ . 𑀲𑁂𑀲𑀫𑁂𑀢𑁆𑀣 𑀧𑀭𑀺𑀓𑁆𑀔𑀸𑀭𑀲𑀫𑀸𑀭𑁄𑀧𑀦𑀳𑀸𑀭𑀲𑀫𑁆𑀧𑀸𑀢𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑀅𑀧𑀺 𑀘𑁂𑀢𑁆𑀣 𑀳𑀸𑀭𑀲𑀫𑁆𑀧𑀸𑀢𑀦𑀺𑀤𑁆𑀤𑁂𑀲𑁄 𑀇𑀫𑀺𑀦𑀸𑀧𑀺 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺. (𑀥. 𑀧. 𑁨);

𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀫𑀦𑁄𑀢𑀺 𑀔𑀦𑁆𑀥𑀯𑀯𑀢𑁆𑀣𑀸𑀦𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑀤𑁂𑀲𑁂𑀢𑀺. 𑀆𑀬𑀢𑀦𑀯𑀯𑀢𑁆𑀣𑀸𑀦𑁂𑀦 𑀫𑀦𑀸𑀬𑀢𑀦𑀁 ¶ , 𑀥𑀸𑀢𑀼𑀯𑀯𑀢𑁆𑀣𑀸𑀦𑁂𑀦 𑀯𑀺𑀜𑁆𑀜𑀸𑀡𑀥𑀸𑀢𑀼𑀁, 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀓𑀢𑀫𑁂 𑀥𑀫𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀸? 𑀙 𑀥𑀫𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀸, 𑀓𑀼𑀲𑀮𑀸𑀦𑀁 𑀓𑀼𑀲𑀮𑀫𑀽𑀮𑀸𑀦𑀺, 𑀅𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀲𑀸𑀥𑀺𑀧𑀢𑀺𑀓𑀸𑀦𑀁 𑀅𑀥𑀺𑀧𑀢𑀺, 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀧𑀺 𑀘 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀦𑁄 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀩𑀮𑀕𑁆𑀕𑀲𑁆𑀲 𑀭𑀸𑀚𑀸 𑀧𑀼𑀩𑁆𑀩𑀗𑁆𑀕𑀫𑁄, 𑀏𑀯𑀫𑁂𑀯𑀁 𑀥𑀫𑁆𑀫𑀸𑀦𑀁 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄. 𑀢𑀢𑁆𑀣 𑀢𑀺𑀯𑀺𑀥𑁂𑀦 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀦𑁂𑀓𑁆𑀔𑀫𑁆𑀫𑀙𑀦𑁆𑀤𑁂𑀦 𑀅𑀩𑁆𑀬𑀸𑀧𑀸𑀤𑀙𑀦𑁆𑀤𑁂𑀦 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁂𑀦. 𑀢𑀢𑁆𑀣 𑀅𑀮𑁄𑀪𑀲𑁆𑀲 𑀦𑁂𑀓𑁆𑀔𑀫𑁆𑀫𑀙𑀦𑁆𑀤𑁂𑀦 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀁, 𑀅𑀤𑁄𑀲𑀲𑁆𑀲 𑀅𑀩𑁆𑀬𑀸𑀧𑀸𑀤𑀙𑀦𑁆𑀤𑁂𑀦 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀁, 𑀅𑀫𑁄𑀳𑀲𑁆𑀲 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁂𑀦 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀁.

𑀫𑀦𑁄𑀲𑁂𑀝𑁆𑀞𑀸𑀢𑀺 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀫𑀽𑀮𑀁 𑀧𑀫𑀼𑀔𑀁 𑀧𑀸𑀫𑁄𑀓𑁆𑀔𑀁, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀫𑀦𑁄𑀲𑁂𑀝𑁆𑀞𑀸’’𑀢𑀺. 𑀫𑀦𑁄𑀫𑀬𑀸𑀢𑀺 𑀫𑀦𑁂𑀦 𑀓𑀢𑀸, 𑀫𑀦𑁂𑀦 𑀦𑀺𑀫𑁆𑀫𑀺𑀢𑀸, 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀸, 𑀫𑀦𑁄 𑀢𑁂𑀲𑀁 𑀧𑀘𑁆𑀘𑀬𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀫𑀦𑁄𑀫𑀬𑀸’’𑀢𑀺. 𑀢𑁂 𑀧𑀦 𑀥𑀫𑁆𑀫𑀸 𑀙𑀦𑁆𑀤𑀲𑀫𑀼𑀤𑀸𑀦𑀺𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀲𑀫𑀼𑀝𑁆𑀞𑀸𑀦𑀸 𑀨𑀲𑁆𑀲𑀲𑀫𑁄𑀥𑀸𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄. 𑀇𑀢𑀺 𑀇𑀫𑀺𑀦𑀸 𑀧𑀲𑀸𑀤𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀧𑀲𑀦𑁆𑀦𑁂𑀦𑀸’’𑀢𑀺 𑀇𑀤𑀁 𑀫𑀦𑁄𑀓𑀫𑁆𑀫𑀁 ¶ . 𑀪𑀸𑀲𑀢𑀺 𑀯𑀸𑀢𑀺 𑀯𑀘𑀻𑀓𑀫𑁆𑀫𑀁. 𑀓𑀭𑁄𑀢𑀺 𑀯𑀸𑀢𑀺 𑀓𑀸𑀬𑀓𑀫𑁆𑀫𑀁. 𑀇𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀲𑁆𑀲𑀺𑀢𑀸.

𑀢𑀢𑁄𑀢𑀺 𑀤𑀲𑀯𑀺𑀥𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸. 𑀦𑀦𑁆𑀢𑀺 𑀬𑁄 𑀲𑁄 𑀓𑀢𑀧𑀼𑀜𑁆𑀜𑁄 𑀓𑀢𑀓𑀼𑀲𑀮𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄, 𑀢𑀁 𑀧𑀼𑀕𑁆𑀕𑀮𑀁. 𑀲𑀼𑀔𑀦𑁆𑀢𑀺 𑀤𑀼𑀯𑀺𑀥𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘. 𑀅𑀦𑁆𑀯𑁂𑀢𑀻𑀢𑀺 𑀅𑀦𑀼𑀕𑀘𑁆𑀙𑀢𑀺.

𑀇𑀥𑀲𑁆𑀲𑀼 𑀧𑀼𑀭𑀺𑀲𑁄 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑁄 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀁 𑀅𑀦𑀼𑀧𑀲𑁆𑀲𑀢𑀺, 𑀲𑁄 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀁 𑀅𑀦𑀼𑀧𑀲𑁆𑀲𑀦𑁆𑀢𑁄 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀲𑀼𑀢𑀁 𑀲𑀫𑁆𑀧𑀢𑁆𑀢𑀺𑀪𑀯𑀁 𑀧𑀢𑁆𑀣𑁂𑀢𑀺. 𑀇𑀘𑁆𑀘𑀲𑁆𑀲 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘 𑀅𑀦𑀼𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀲𑁄 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀲𑀼𑀢𑀁 𑀲𑀫𑁆𑀧𑀢𑁆𑀢𑀺𑀪𑀯𑀁 𑀧𑀢𑁆𑀣𑁂𑀦𑁆𑀢𑁄 𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺 𑀲𑀤𑁆𑀤𑀳𑀢𑀺 𑀑𑀓𑀧𑁆𑀧𑁂𑀢𑀺. 𑀲𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀢𑀺𑀯𑀺𑀥𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀅𑀦𑀼𑀢𑀺𑀝𑁆𑀞𑀢𑀺 𑀤𑀸𑀦𑀫𑀬𑀁 𑀲𑀻𑀮𑀫𑀬𑀁 𑀪𑀸𑀯𑀦𑀸𑀫𑀬𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀲𑁄 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑀸𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀇𑀢𑀺 𑀔𑁄 𑀧𑀦𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸𑀢𑀺 𑀏𑀯𑀁 𑀲𑀦𑁆𑀢𑀁 𑀢𑀁 𑀲𑀼𑀔𑀫𑀦𑁆𑀯𑁂𑀢𑀺. 𑀢𑀲𑁆𑀲𑁂𑀯𑀁 𑀯𑁂𑀤𑀦𑀸𑀬 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀉𑀧𑁆𑀧𑀚𑁆𑀚𑀢𑀺 𑀢𑀡𑁆𑀳𑀸. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀬𑀁 𑀫𑀦𑁄, 𑀬𑁂 𑀘 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀬𑀜𑁆𑀘 𑀲𑀼𑀔𑀁, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑁂 𑀤𑀼𑀓𑁆𑀔𑀲𑀘𑁆𑀘𑀁. 𑀢𑁂𑀲𑀁 𑀧𑀼𑀭𑀺𑀫𑀓𑀸𑀭𑀡𑀪𑀽𑀢𑀸 𑀅𑀯𑀺𑀚𑁆𑀚𑀸 𑀪𑀯𑀢𑀡𑁆𑀳𑀸 𑀘 𑀲𑀫𑀼𑀤𑀬𑀲𑀘𑁆𑀘𑀁. 𑀢𑁂𑀲𑀁 𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀸𑀬 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬. 𑀬𑁂𑀦 𑀧𑀭𑀺𑀚𑀸𑀦𑀸𑀢𑀺, 𑀬𑁂𑀦 𑀧𑀚𑀳𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀢𑁆𑀣 𑀘 𑀫𑀕𑁆𑀕𑁄 𑀧𑀯𑀢𑁆𑀢𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀯𑀁 𑀆𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀫𑀼𑀔𑁂𑀦𑀸𑀧𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁, 𑀲𑀼𑀔𑀲𑁆𑀲 𑀅𑀦𑁆𑀯𑀬𑁄 𑀨𑀮𑀁, 𑀫𑀦𑀲𑀸 𑀧𑀲𑀦𑁆𑀦𑁂𑀦 𑀓𑀸𑀬𑀯𑀘𑀻𑀲𑀫𑀻𑀳𑀸 𑀉𑀧𑀸𑀬𑁄, 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀲𑀼𑀔𑀓𑀸𑀫𑁂𑀦 𑀧𑀲𑀦𑁆𑀦𑁂𑀦 𑀫𑀦𑀲𑀸 𑀯𑀘𑀻𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀪𑀕𑀯𑀢𑁄 𑀆𑀡𑀢𑁆𑀢𑀺. 𑀅𑀬𑀁 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑀦𑀢𑁄 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀢𑁄 𑀫𑀦𑁄. 𑀫𑀦𑀦𑀮𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀥𑀺𑀧𑀘𑁆𑀘𑀓𑀭𑀡𑀢𑁄 𑀧𑀼𑀩𑁆𑀩𑀗𑁆𑀕𑀫𑁄 𑀈𑀳𑀸𑀪𑀸𑀯𑀢𑁄 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀫𑁆𑀫𑀸. 𑀕𑀸𑀫𑁂𑀲𑀼 𑀕𑀸𑀫𑀡𑀺 ¶ 𑀯𑀺𑀬 𑀧𑀥𑀸𑀦𑀝𑁆𑀞𑁂𑀦 𑀫𑀦𑁄 𑀲𑁂𑀝𑁆𑀞𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀲𑁂𑀝𑁆𑀞𑀸. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀦 𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀸𑀢𑀺 𑀫𑀦𑁄𑀫𑀬𑀸. 𑀅𑀓𑀸𑀮𑀼𑀲𑁆𑀲𑀺𑀬𑀢𑁄, 𑀆𑀭𑀫𑁆𑀫𑀡𑀲𑁆𑀲 𑀑𑀓𑀧𑁆𑀧𑀦𑀢𑁄 𑀘 𑀧𑀲𑀦𑁆𑀦𑁂𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑀢𑁄 𑀢𑀣𑀸 𑀲𑀸𑀤𑀺𑀬𑀦𑀢𑁄 𑀘 𑀪𑀸𑀲𑀢𑀺. 𑀘𑁄𑀧𑀦𑀓𑀸𑀬𑀯𑀺𑀧𑁆𑀨𑀸𑀭𑀢𑁄 𑀢𑀣𑀸 𑀲𑀸𑀤𑀺𑀬𑀦𑀢𑁄 𑀘 𑀓𑀭𑁄𑀢𑀺. 𑀢𑀣𑀸 𑀧𑀲𑀼𑀢𑀢𑁆𑀢𑀸 𑀅𑀦𑀜𑁆𑀜𑀢𑁆𑀢𑀸 𑀘 ‘‘𑀢𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀦𑀢𑁄 𑀲𑀸𑀢𑀪𑀸𑀯𑀢𑁄 𑀇𑀝𑁆𑀞𑀪𑀸𑀯𑀢𑁄 𑀘 ‘‘𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀢𑀽𑀧𑀘𑀺𑀢𑀢𑁆𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀢𑁆𑀢𑀸 𑀘 ‘‘𑀅𑀦𑁆𑀯𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀭𑀡𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀅𑀲𑀗𑁆𑀓𑀦𑁆𑀢𑀺𑀢𑁄 𑀘 ‘‘𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀅𑀦𑀼𑀧𑀤𑀯𑀺𑀘𑀬𑀢𑁄 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑀲𑁆𑀲 𑀥𑀫𑁆𑀫𑀸𑀦𑀁 𑀆𑀥𑀺𑀧𑀘𑁆𑀘𑀬𑁄𑀕𑀢𑁄 𑀧𑀼𑀩𑁆𑀩𑀗𑁆𑀕𑀫𑀢𑀸 𑀬𑀼𑀚𑁆𑀚𑀢𑀺. 𑀢𑀢𑁄 𑀏𑀯 𑀢𑁂𑀲𑀁 𑀫𑀦𑀲𑁆𑀲 𑀅𑀦𑀼𑀯𑀢𑁆𑀢𑀦𑀢𑁄 𑀥𑀫𑁆𑀫𑀸𑀦𑀁 𑀫𑀦𑁄𑀲𑁂𑀝𑁆𑀞𑀢𑀸 𑀬𑀼𑀚𑁆𑀚𑀢𑀺. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀥𑀫𑁆𑀫𑀸𑀦𑀁 𑀫𑀦𑁄𑀫𑀬𑀢𑀸 𑀬𑀼𑀚𑁆𑀚𑀢𑀺. 𑀫𑀦𑀲𑀸 𑀧𑀲𑀦𑁆𑀦𑁂𑀦 𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀓𑀼𑀲𑀮𑀪𑀸𑀯𑁄 𑀬𑀼𑀚𑁆𑀚𑀢𑀺. 𑀬𑁂𑀦 𑀓𑀼𑀲𑀮𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀢𑀁 𑀙𑀸𑀬𑀸 𑀯𑀺𑀬 𑀲𑀼𑀔𑀁 𑀅𑀦𑁆𑀯𑁂𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 ¶ 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄 𑀫𑀦𑁄𑀧𑀯𑀺𑀘𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸 𑀲𑀩𑁆𑀩𑀲𑁆𑀲 𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀪𑀸𑀲𑀢𑀻’’𑀢𑀺 𑀲𑀫𑁆𑀫𑀸𑀯𑀸𑀘𑀸, ‘‘𑀓𑀭𑁄𑀢𑀻’’𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀢𑁂 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀫𑀦𑀲𑀸 𑀧𑀲𑀦𑁆𑀦𑁂𑀦𑀸’’𑀢𑀺 𑀏𑀢𑁆𑀣 𑀧𑀲𑀸𑀤𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑀸𑀥𑀺 𑀧𑀜𑁆𑀜𑀸𑀬𑀸𑀢𑀺 𑀬𑀸𑀯 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀁 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑀲𑀫𑁆𑀧𑀸𑀢𑁄? ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑀸𑀯𑀘𑀦𑁂𑀦 𑀥𑀫𑁆𑀫𑀸𑀦𑀁 𑀙𑀦𑁆𑀤𑀧𑀼𑀩𑁆𑀩𑀗𑁆𑀕𑀫𑀢𑀸𑀧𑀺 𑀯𑀻𑀭𑀺𑀬𑀧𑀼𑀩𑁆𑀩𑀗𑁆𑀕𑀫𑀢𑀸𑀧𑀺 𑀯𑀻𑀫𑀁𑀲𑀸𑀧𑀼𑀩𑁆𑀩𑀗𑁆𑀕𑀫𑀢𑀸𑀧𑀺 𑀯𑀼𑀢𑁆𑀢𑀸 𑀳𑁄𑀢𑀺 𑀆𑀥𑀺𑀧𑀢𑁂𑀬𑁆𑀬𑀮𑀓𑁆𑀔𑀡𑁂𑀦 𑀙𑀦𑁆𑀤𑀸𑀤𑀻𑀦𑀁 𑀫𑀦𑀲𑀸 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀦𑁂𑀲𑀁 𑀲𑀤𑁆𑀥𑀸𑀤𑀺𑀧𑀼𑀩𑁆𑀩𑀗𑁆𑀕𑀫𑀢𑀸𑀧𑀺 𑀯𑀼𑀢𑁆𑀢𑀸 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀮𑀓𑁆𑀔𑀡𑁂𑀦 𑀲𑀤𑁆𑀥𑀸𑀤𑀻𑀦𑀁 𑀫𑀦𑀲𑀸 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸’’𑀢𑀺 𑀬𑀣𑀸 𑀫𑀦𑀲𑁆𑀲 𑀧𑀲𑀸𑀤𑀲𑀫𑀦𑁆𑀦𑀸𑀕𑀫𑁄 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀅𑀦𑀯𑀚𑁆𑀚𑀪𑀸𑀯𑀮𑀓𑁆𑀔𑀡𑀁. 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀲𑀢𑀺𑀆𑀤𑀺𑀲𑀫𑀦𑁆𑀦𑀸𑀕𑀫𑁄𑀧𑀺 𑀦𑁂𑀲𑀁 𑀅𑀦𑀯𑀚𑁆𑀚𑀪𑀸𑀯𑀮𑀓𑁆𑀔𑀡𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀲𑀼𑀔𑀫𑀦𑁆𑀯𑁂𑀢𑀻’’𑀢𑀺 𑀲𑀼𑀔𑀸𑀦𑀼𑀕𑀫𑀦𑀯𑀘𑀦𑁂𑀦 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀦𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀦𑀁 ¶ 𑀅𑀦𑀼𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀢𑁂𑀲𑀫𑁆𑀧𑀺 𑀓𑀫𑁆𑀫𑀧𑀘𑁆𑀘𑀬𑀢𑀸𑀬 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺. 𑀅𑀬𑀁 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑀲𑀫𑁆𑀧𑀸𑀢𑁄? ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 ‘‘𑀫𑀦𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀁, 𑀢𑀁 𑀧𑀤𑀢𑁆𑀣𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀤𑀢𑁆𑀣𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀬𑁂 𑀲𑀼𑀔𑁂𑀦 𑀅𑀢𑁆𑀣𑀺𑀓𑀸, 𑀢𑁂𑀳𑀺 𑀧𑀲𑀦𑁆𑀦𑁂𑀦 𑀫𑀦𑀲𑀸 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀜𑁆𑀜𑁂𑀲𑀫𑁆𑀧𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀢𑁂𑀲𑀁 𑀲𑀫𑁆𑀫𑀸 𑀉𑀧𑀦𑁂𑀢𑀸𑀭𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀤𑀸𑀦𑀁. ‘‘𑀙𑀤𑁆𑀯𑀸𑀭𑀸𑀥𑀺𑀧𑀢𑀻 𑀭𑀸𑀚𑀸 (𑀥. 𑀧. 𑀅𑀝𑁆𑀞. 𑁨.𑁧𑁮𑁧 𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼), 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁬𑁨; 𑁧𑁨𑁦𑁫-𑁧𑁨𑁦𑁬), 𑀘𑀺𑀢𑁆𑀢𑀲𑁆𑀲 𑀏𑀓𑀥𑀫𑁆𑀫𑀲𑁆𑀲, 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺 (𑀲𑀁. 𑀦𑀺. 𑁧.𑁬𑁨) 𑀏𑀯𑀫𑀸𑀤𑀺𑀲𑀫𑀸𑀦𑀬𑀦𑁂𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀦𑀸 𑀤𑁂𑀲𑀦𑀸𑀦𑀼𑀲𑀦𑁆𑀥𑀺. 𑀧𑀤𑀸𑀦𑀼𑀲𑀦𑁆𑀥𑀺𑀬𑁄 𑀧𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 ¶ 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄? ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀢𑀢𑁆𑀣 𑀬𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀸𑀦𑀺 𑀅𑀝𑁆𑀞𑀦𑁆𑀦𑀁 𑀲𑀫𑁆𑀫𑀢𑁆𑀢𑀸𑀦𑀁 𑀳𑁂𑀢𑀼. 𑀬𑁂 𑀲𑀫𑁆𑀫𑀢𑁆𑀢𑀸, 𑀅𑀬𑀁 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀁 𑀫𑀦𑁄𑀲𑀳𑀚𑀦𑀸𑀫𑀭𑀽𑀧𑀁, 𑀇𑀤𑀁 𑀤𑀼𑀓𑁆𑀔𑀁. 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀸 𑀅𑀯𑀺𑀚𑁆𑀚𑀸 𑀪𑀯𑀢𑀡𑁆𑀳𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑀢𑁆𑀣 𑀢𑁂𑀲𑀁 𑀧𑀳𑀸𑀦𑀁, 𑀅𑀬𑀁 𑀦𑀺𑀭𑁄𑀥𑁄𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄? ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻’’𑀢𑀺 𑀦𑀬𑀺𑀤𑀁 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀬𑁄 𑀳𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀧𑀸𑀡𑀸𑀢𑀺𑀧𑀸𑀢𑀺𑀫𑁆𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀧𑀲𑀦𑁆𑀦𑁂𑀦 𑀘 𑀘𑀺𑀢𑁆𑀢𑁂𑀦 𑀅𑀪𑀽𑀢𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀪𑀸𑀲𑀢𑀺 𑀯𑀸 𑀦𑀺𑀧𑀘𑁆𑀘𑀓𑀸𑀭𑀁 𑀯𑀸𑀲𑁆𑀲 𑀬𑀁 𑀓𑀭𑁄𑀢𑀺, 𑀦 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺. 𑀤𑀼𑀓𑁆𑀔𑀫𑁂𑀯 𑀧𑀦 𑀢𑀁 𑀢𑀢𑁄 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀫𑀦𑁆𑀯𑁂𑀢𑀺. 𑀇𑀢𑀺 𑀳𑀺 𑀇𑀤𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁. 𑀬𑀁 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸, 𑀢𑀜𑁆𑀘𑁂 𑀯𑀘𑀻𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀜𑁆𑀘 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀫𑁆𑀫𑀢𑁆𑀢𑀕𑀢𑁂𑀳𑀺 𑀲𑀼𑀔𑀯𑁂𑀤𑀦𑀻𑀬𑀁 𑀫𑀺𑀘𑁆𑀙𑀸𑀕𑀢𑁂𑀳𑀺 𑀤𑀼𑀓𑁆𑀔𑀯𑁂𑀤𑀦𑀻𑀬𑀦𑁆𑀢𑀺. 𑀓𑀣𑀁 𑀧𑀦𑀸𑀬𑀁 𑀧𑀲𑀸𑀤𑁄 𑀤𑀝𑁆𑀞𑀩𑁆𑀩𑁄? 𑀦𑀸𑀬𑀁 𑀧𑀲𑀸𑀤𑁄, 𑀧𑀲𑀸𑀤𑀧𑀢𑀺𑀭𑀽𑀧𑀓𑁄 𑀧𑀦 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄𑀢𑀺 𑀯𑀤𑀸𑀫𑀺. 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 ¶ 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺𑀆𑀤𑀺. 𑀬𑀁 𑀫𑀦𑀲𑀸 𑀧𑀤𑀼𑀝𑁆𑀞𑁂𑀦 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸 𑀤𑀼𑀓𑁆𑀔𑀲𑁆𑀲𑀸𑀦𑀼𑀕𑀸𑀫𑀻. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀏𑀢𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑁄. 𑀅𑀬𑀁 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 𑀫𑀦𑁄 𑀘𑀺𑀢𑁆𑀢𑀁 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀼𑀩𑁆𑀩𑀗𑁆𑀕𑀫𑀸 𑀧𑀼𑀭𑁂𑀘𑀸𑀭𑀺𑀦𑁄 𑀧𑀼𑀭𑁂𑀕𑀸𑀫𑀺𑀦𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀥𑀫𑁆𑀫𑀸 𑀅𑀢𑁆𑀢𑀸 𑀲𑀪𑀸𑀯𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀲𑁂𑀝𑁆𑀞𑀁 𑀧𑀥𑀸𑀦𑀁 𑀧𑀯𑀭𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀫𑀦𑁄𑀫𑀬𑀸 𑀫𑀦𑁄𑀦𑀺𑀩𑁆𑀩𑀢𑁆𑀢𑀸 𑀫𑀦𑁄𑀲𑀫𑁆𑀪𑀽𑀢𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀲𑀦𑁆𑀦𑁂𑀦 𑀲𑀤𑁆𑀤𑀳𑀦𑁆𑀢𑁂𑀦 𑀑𑀓𑀧𑁆𑀧𑁂𑀦𑁆𑀢𑁂𑀦𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀲𑀼𑀔𑀁 𑀲𑀸𑀢𑀁 𑀯𑁂𑀤𑀬𑀺𑀢𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑀼𑀩𑀦𑁆𑀥𑀢𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 ¶ 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀅𑀬𑀁 𑀫𑀦𑀲𑁄 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺. 𑀥𑀫𑁆𑀫𑀸𑀢𑀺 𑀲𑀪𑀸𑀯𑀧𑀜𑁆𑀜𑀢𑁆𑀢𑀺, 𑀓𑀼𑀲𑀮𑀓𑀫𑁆𑀫𑀧𑀣𑀧𑀜𑁆𑀜𑀢𑁆𑀢𑀺. 𑀫𑀦𑁄𑀲𑁂𑀝𑁆𑀞𑀸𑀢𑀺 𑀧𑀥𑀸𑀦𑀧𑀜𑁆𑀜𑀢𑁆𑀢𑀺. 𑀫𑀦𑁄𑀫𑀬𑀸𑀢𑀺 𑀲𑀳𑀚𑀸𑀢𑀧𑀜𑁆𑀜𑀢𑁆𑀢𑀺. 𑀧𑀲𑀦𑁆𑀦𑁂𑀦𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀧𑀜𑁆𑀜𑀢𑁆𑀢𑀺, 𑀅𑀲𑁆𑀲𑀤𑁆𑀥𑀺𑀬𑀲𑁆𑀲 𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀦𑀁 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀓𑀫𑁆𑀫𑀲𑁆𑀲 𑀨𑀮𑀸𑀦𑀼𑀩𑀦𑁆𑀥𑀧𑀜𑁆𑀜𑀢𑁆𑀢𑀺, 𑀓𑀫𑁆𑀫𑀲𑁆𑀲 𑀅𑀯𑀺𑀦𑀸𑀲𑀧𑀜𑁆𑀜𑀢𑁆𑀢𑀻𑀢𑀺. 𑀅𑀬𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸. 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄. 𑀢𑀸𑀲𑀁 𑀦𑀺𑀲𑁆𑀲𑀬𑀸 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑁄. 𑀫𑀦𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑁆𑀢𑀺 𑀫𑀦𑁄𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀢𑀺. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀦 𑀑𑀢𑀭𑀡𑁄𑀢𑀺. 𑀅𑀬𑀁 𑀑𑀢𑀭𑀡𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀢𑀺 𑀆𑀭𑀫𑁆𑀪𑁄 𑀦𑁂𑀯 𑀧𑀤𑀲𑀼𑀤𑁆𑀥𑀺, 𑀦 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀧𑀤𑀲𑀼𑀤𑁆𑀥𑀺, 𑀦 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀢𑀣𑀸 𑀥𑀫𑁆𑀫𑀸𑀢𑀺 𑀬𑀸𑀯 𑀲𑀼𑀔𑀦𑁆𑀢𑀺 𑀧𑀤𑀲𑀼𑀤𑁆𑀥𑀺, 𑀦 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀧𑀦 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺. 𑀅𑀬𑀁 𑀲𑁄𑀥𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 ¶ 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸𑀢𑀺 𑀏𑀓𑀢𑁆𑀢𑀢𑀸. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀯𑁂𑀫𑀢𑁆𑀢𑀢𑀸, 𑀢𑀣𑀸 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀏𑀓𑀢𑁆𑀢𑀢𑀸. 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸𑀢𑀺 𑀯𑁂𑀫𑀢𑁆𑀢𑀢𑀸, 𑀢𑀣𑀸 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀏𑀓𑀢𑁆𑀢𑀢𑀸. 𑀲𑁄 𑀧𑀲𑀸𑀤𑁄 𑀤𑀼𑀯𑀺𑀥𑁄 𑀅𑀚𑁆𑀛𑀢𑁆𑀢𑀜𑁆𑀘 𑀩𑁆𑀬𑀸𑀧𑀸𑀤𑀯𑀺𑀓𑁆𑀔𑀫𑁆𑀪𑀦𑀢𑁄, 𑀩𑀳𑀺𑀤𑁆𑀥𑀸 𑀘 𑀑𑀓𑀧𑁆𑀧𑀦𑀢𑁄. 𑀢𑀣𑀸 𑀲𑀫𑁆𑀧𑀢𑁆𑀢𑀺𑀪𑀯𑀳𑁂𑀢𑀼𑀪𑀽𑀢𑁄𑀧𑀺 𑀯𑀟𑁆𑀠𑀺𑀳𑁂𑀢𑀼𑀪𑀽𑀢𑁄𑀯𑀸𑀢𑀺 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀢𑀬𑀺𑀤𑀁 𑀲𑀼𑀢𑁆𑀢𑀁 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀳𑁂𑀢𑀼𑀦𑀸 𑀘 𑀬𑁄 𑀧𑀲𑀦𑁆𑀦𑀫𑀸𑀦𑀲𑁄, 𑀯𑀺𑀧𑀸𑀓𑁂𑀦 𑀘 𑀬𑁄 𑀲𑀼𑀔𑀯𑁂𑀤𑀦𑀻𑀬𑁄𑀢𑀺. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀏𑀢𑁆𑀣 𑀫𑀦𑁄𑀢𑀺 𑀓𑀼𑀲𑀮𑀯𑀺𑀜𑁆𑀜𑀸𑀡𑀁. 𑀢𑀲𑁆𑀲 𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄𑀢𑀺 𑀢𑀬𑁄 𑀲𑀫𑁆𑀧𑀬𑀼𑀢𑁆𑀢𑀸 𑀳𑁂𑀢𑀽, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀅𑀮𑁄𑀪𑁄 ¶ 𑀅𑀤𑁄𑀲𑁄𑀢𑀺 𑀤𑁆𑀯𑁂 𑀲𑀫𑁆𑀧𑀬𑀼𑀢𑁆𑀢𑀸 𑀳𑁂𑀢𑀽. 𑀲𑀩𑁆𑀩𑁂𑀲𑀁 𑀅𑀯𑀺𑀲𑁂𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀳𑁂𑀢𑀼, 𑀘𑀢𑁆𑀢𑀸𑀭𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀧𑀘𑁆𑀘𑀬𑁄. 𑀢𑀣𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀢𑀲𑁆𑀲 𑀘 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀸𑀤𑀬𑁄 𑀧𑀘𑁆𑀘𑀬𑁄. 𑀥𑀫𑁆𑀫𑀸𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀻𑀦𑀁 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀬𑁄. 𑀢𑀣𑀸 𑀢𑀬𑁄 𑀯𑀺𑀜𑁆𑀜𑀸𑀡𑀲𑁆𑀲, 𑀯𑁂𑀤𑀦𑀸𑀤𑀬𑁄 𑀧𑀲𑀸𑀤𑀲𑁆𑀲, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁄 𑀯𑀺𑀧𑀸𑀓𑀲𑀼𑀔𑀲𑁆𑀲 𑀧𑀘𑁆𑀘𑀬𑁄𑀢𑀺. 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀫𑀦𑁄𑀢𑀺 𑀧𑀼𑀜𑁆𑀜𑀘𑀺𑀢𑁆𑀢𑀁, 𑀢𑀁 𑀢𑀺𑀯𑀺𑀥𑀁 𑁋 𑀤𑀸𑀦𑀫𑀬𑀁, 𑀲𑀻𑀮𑀫𑀬𑀁, 𑀪𑀸𑀯𑀦𑀸𑀫𑀬𑀦𑁆𑀢𑀺. 𑀢𑀢𑁆𑀣 𑀤𑀸𑀦𑀫𑀬𑀲𑁆𑀲 𑀅𑀮𑁄𑀪𑁄 𑀧𑀤𑀝𑁆𑀞𑀸𑀦𑀁, 𑀲𑀻𑀮𑀫𑀬𑀲𑁆𑀲 𑀅𑀤𑁄𑀲𑁄 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀫𑀬𑀲𑁆𑀲 𑀅𑀫𑁄𑀳𑁄 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑁂𑀲𑀁 𑀅𑀪𑀺𑀧𑁆𑀧𑀲𑀸𑀤𑁄 𑀧𑀤𑀝𑁆𑀞𑀸𑀦𑀁, ‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺 (𑀫. 𑀦𑀺. 𑁨.𑁧𑁮𑁩) 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀓𑀼𑀲𑀮𑀘𑀺𑀢𑁆𑀢𑀁 𑀲𑀼𑀔𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄𑀦𑀺𑀲𑁄 𑀳𑀺 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁…𑀧𑁂… 𑀧𑀤𑀳𑀢𑀺. 𑀢𑀲𑁆𑀲𑁂𑀯𑀁 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀸𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀅𑀬𑀁 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸. 𑀲𑀢𑀺 𑀘 𑀪𑀸𑀯𑀦𑀸𑀬 𑀧𑀳𑀸𑀦𑀜𑁆𑀘 𑀲𑀺𑀤𑁆𑀥𑀫𑁂𑀯𑀸𑀢𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑀣𑀸 𑁋

‘‘𑀤𑀤𑀢𑁄 ¶ 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄’’𑀢𑀺. (𑀤𑀻. 𑀦𑀺. 𑁨.𑁧𑁯𑁭; 𑀉𑀤𑀸. 𑁭𑁫; 𑀧𑁂𑀝𑀓𑁄. 𑁧𑁬);

𑀢𑀢𑁆𑀣 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀮𑁄𑀪𑀲𑁆𑀲 𑀘 𑀤𑁄𑀲𑀲𑁆𑀲 𑀘 𑀫𑁄𑀳𑀲𑁆𑀲 𑀘 𑀧𑀳𑀸𑀦𑀫𑀸𑀳. 𑀢𑁂𑀦 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀸𑀳.

𑀤𑀤𑀢𑁄 ¶ 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀢𑁂𑀲𑀁 𑀦𑀺𑀲𑁆𑀲𑀭𑀡𑀁 𑀯𑀼𑀢𑁆𑀢𑀁.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀤𑀸𑀦𑁂𑀦 𑀑𑀴𑀸𑀭𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁, 𑀲𑀻𑀮𑁂𑀦 𑀫𑀚𑁆𑀛𑀺𑀫𑀸𑀦𑀁, 𑀧𑀜𑁆𑀜𑀸𑀬 𑀲𑀼𑀔𑀼𑀫𑀸𑀦𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀓𑀢𑀸𑀯𑀻𑀪𑀽𑀫𑀺𑀁 𑀤𑀲𑁆𑀲𑁂𑀢𑀺.

𑀤𑀤𑀢𑁄 𑀧𑀼𑀜𑁆𑀜𑀁…𑀧𑁂… 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀕𑁆𑀕𑀨𑀮𑀁 𑀯𑀼𑀢𑁆𑀢𑀁.

𑀢𑀣𑀸 𑀤𑀤𑀢𑁄 𑀧𑀼𑀜𑁆𑀜𑀁…𑀧𑁂… 𑀦 𑀘𑀻𑀬𑀢𑀻𑀢𑀺 𑀮𑁄𑀓𑀺𑀬𑀓𑀼𑀲𑀮𑀫𑀽𑀮𑀁 𑀯𑀼𑀢𑁆𑀢𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀫𑀽𑀮𑀁 𑀯𑀼𑀢𑁆𑀢𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀮𑁄𑀓𑀼𑀢𑁆𑀢𑀭𑀲𑁆𑀲 𑀓𑀼𑀲𑀮𑀫𑀽𑀮𑀲𑁆𑀲 𑀨𑀮𑀁 𑀯𑀼𑀢𑁆𑀢𑀁.

𑀤𑀤𑀢𑁄…𑀧𑁂… 𑀦 𑀘𑀻𑀬𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸.

𑀤𑀤𑀢𑁄 ¶ …𑀧𑁂… 𑀦 𑀘𑀻𑀬𑀢𑀻𑀢𑀺 𑀲𑀕𑁆𑀕𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸.

𑀤𑀤𑀢𑁄…𑀧𑁂… 𑀦 𑀘𑀻𑀬𑀢𑀻𑀢𑀺 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀮𑁄𑀓𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀤𑁂𑀲𑀦𑀫𑀸𑀳. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀮𑁄𑀓𑁂 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀫𑀸𑀳. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀨𑀮𑀫𑀸𑀳.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀥𑀫𑁆𑀫𑀤𑀸𑀦𑀁 𑀆𑀫𑀺𑀲𑀤𑀸𑀦𑀜𑁆𑀘 𑀯𑀤𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀁 𑀯𑀤𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀢𑁂𑀦 𑀘 𑀲𑀻𑀮𑀲𑀁𑀬𑀫𑁂𑀦 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀘𑀺𑀢𑁆𑀢𑀁 𑀲𑀁𑀬𑀫𑁂𑀢𑀺, 𑀢𑀲𑁆𑀲 𑀲𑀫𑀣𑁄 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀲𑁄 𑀲𑀫𑀣𑁂 𑀞𑀺𑀢𑁄 𑀯𑀺𑀧𑀲𑁆𑀲𑀦𑀸𑀓𑁄𑀲𑀮𑁆𑀮𑀬𑁄𑀕𑀢𑁄 𑀓𑀼𑀲𑀮𑁄 𑀘 𑀚𑀳𑀸𑀢𑀺 ¶ 𑀧𑀸𑀧𑀓𑀁 𑀭𑀸𑀕𑀁 𑀚𑀳𑀸𑀢𑀺, 𑀤𑁄𑀲𑀁 𑀚𑀳𑀸𑀢𑀺, 𑀫𑁄𑀳𑀁 𑀚𑀳𑀸𑀢𑀺, 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑁂𑀧𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀚𑀳𑀸𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀘 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀭𑀸𑀕𑀸𑀤𑀻𑀦𑀁 𑀧𑀭𑀺𑀓𑁆𑀔𑀬𑀸 𑀤𑁆𑀯𑁂𑀧𑀺 𑀯𑀺𑀫𑀼𑀢𑁆𑀢𑀺𑀬𑁄 𑀅𑀥𑀺𑀕𑀘𑁆𑀙𑀢𑀻𑀢𑀺 𑀅𑀬𑀁 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄.

𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄? 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀺𑀁 𑀤𑁂𑀲𑀺𑀢𑀁? 𑀤𑁆𑀯𑁂 𑀲𑀼𑀕𑀢𑀺𑀬𑁄 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘, 𑀤𑀺𑀩𑁆𑀩𑀸 𑀘 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀫𑀸𑀦𑀼𑀲𑀓𑀸 𑀘 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀤𑀺𑀩𑁆𑀩𑀸 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀫𑀸𑀦𑀼𑀲𑀓𑀸 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀢𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀼𑀭𑀺𑀫𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀸 𑀢𑀡𑁆𑀳𑀸 𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀁. 𑀢𑀬𑀺𑀤𑀁 𑀯𑀼𑀘𑁆𑀘𑀢𑀺 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘. 𑀲𑀩𑁆𑀩𑀲𑁆𑀲 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑁂𑀲𑁄 ‘‘𑀤𑀤𑀢𑁄…𑀧𑁂… 𑀦 𑀘𑀻𑀬𑀢𑀻’’𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀫𑀕𑁆𑀕𑁄 𑀯𑀼𑀢𑁆𑀢𑁄. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘. 𑀇𑀤𑀁 𑀦𑀺𑀲𑁆𑀲𑀭𑀡𑀁. 𑀨𑀮𑀸𑀤𑀻𑀦𑀺 𑀧𑀦 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀅𑀬𑀁 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄.

𑀯𑀺𑀘𑀬𑁄𑀢𑀺 ‘‘𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 𑀇𑀫𑀺𑀦𑀸 𑀧𑀞𑀫𑁂𑀦 𑀧𑀤𑁂𑀦 𑀢𑀺𑀯𑀺𑀥𑀫𑁆𑀧𑀺 𑀤𑀸𑀦𑀫𑀬𑀁 𑀲𑀻𑀮𑀫𑀬𑀁 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀤𑀲𑀯𑀺𑀥𑀲𑁆𑀲𑀧𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀸𑀕𑁄 𑀯𑀼𑀢𑁆𑀢𑁄. 𑀢𑀣𑀸 𑀙𑀩𑁆𑀩𑀺𑀥𑀲𑁆𑀲𑀧𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀲𑁆𑀲. ‘‘𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻’’𑀢𑀺 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀅𑀯𑁂𑀭𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀸𑀤𑀸 𑀘 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸. ‘‘𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓’’𑀦𑁆𑀢𑀺 𑀢𑀢𑀺𑀬𑁂𑀦 𑀧𑀤𑁂𑀦 𑀜𑀸𑀡𑀼𑀧𑁆𑀧𑀸𑀤𑁄 𑀅𑀜𑁆𑀜𑀸𑀡𑀦𑀺𑀭𑁄𑀥𑁄 𑀲𑀩𑁆𑀩𑁄𑀧𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀩𑁆𑀩𑁂𑀧𑀺 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 ¶ . ‘‘𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄’’𑀢𑀺 𑀭𑀸𑀕𑀓𑁆𑀔𑀬𑁂𑀦 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀫𑁄𑀳𑀓𑁆𑀔𑀬𑁂𑀦 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀅𑀬𑀁 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀬𑀼𑀢𑁆𑀢𑀻𑀢𑀺 𑀤𑀸𑀦𑁂 𑀞𑀺𑀢𑁄 𑀉𑀪𑀬𑀁 𑀧𑀭𑀺𑀧𑀽𑀭𑁂𑀢𑀺 𑀫𑀘𑁆𑀙𑀭𑀺𑀬𑀧𑁆𑀧𑀳𑀸𑀦𑀜𑁆𑀘 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀜𑁆𑀘𑀸𑀢𑀺 𑀅𑀢𑁆𑀣𑁂𑀲𑀸 𑀬𑀼𑀢𑁆𑀢𑀺. 𑀲𑀻𑀮𑀲𑀁𑀬𑀫𑁂 𑀞𑀺𑀢𑁄 𑀉𑀪𑀬𑀁 𑀧𑀭𑀺𑀧𑀽𑀭𑁂𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀜𑁆𑀘𑀸𑀢𑀺 𑀅𑀢𑁆𑀣𑁂𑀲𑀸 𑀬𑀼𑀢𑁆𑀢𑀺. 𑀧𑀸𑀧𑀓𑁂 𑀥𑀫𑁆𑀫𑁂 𑀧𑀚𑀳𑀦𑁆𑀢𑁄 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁂𑀲𑀸 𑀬𑀼𑀢𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑁂𑀲𑀼 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑁂𑀲𑀼 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀢𑁆𑀣𑁂𑀲𑀸 𑀬𑀼𑀢𑁆𑀢𑀻𑀢𑀺. 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑀧𑀤𑀝𑁆𑀞𑀸𑀦𑀦𑁆𑀢𑀺 ¶ 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺. 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀮𑀓𑁆𑀔𑀡𑁄𑀢𑀺 ‘‘𑀤𑀤𑀢𑁄’’𑀢𑀺 𑀏𑀢𑁂𑀦 𑀧𑁂𑀬𑁆𑀬𑀯𑀚𑁆𑀚𑀁 𑀅𑀢𑁆𑀣𑀘𑀭𑀺𑀬𑀁 𑀲𑀫𑀸𑀦𑀢𑁆𑀢𑀢𑀸 𑀘 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀲𑀗𑁆𑀕𑀳𑀯𑀢𑁆𑀣𑀼𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀲𑀁𑀬𑀫𑀢𑁄’’𑀢𑀺 𑀏𑀢𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑀸𑀅𑀯𑀺𑀳𑀺𑀁𑀲𑀸𑀅𑀦𑀼𑀤𑁆𑀤𑀬𑀸𑀤𑀬𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀯𑁂𑀭𑀸𑀦𑀼𑀧𑁆𑀧𑀸𑀤𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀯𑁂𑀭𑀁 𑀦 𑀘𑀻𑀬𑀢𑀻’’𑀢𑀺 𑀏𑀢𑁂𑀦 𑀳𑀺𑀭𑀻𑀑𑀢𑁆𑀢𑀧𑁆𑀧𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀤𑀬𑁄 𑀤𑀲𑁆𑀲𑀺𑀢𑀸 𑀯𑁂𑀭𑀸𑀯𑀟𑁆𑀠𑀦𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀅𑀳𑀺𑀭𑀻𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀬𑁄 𑀅𑀘𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀓𑀼𑀲𑀮𑁄’’𑀢𑀺 𑀏𑀢𑁂𑀦 𑀓𑁄𑀲𑀮𑁆𑀮𑀤𑀻𑀧𑀦𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀤𑀲𑁆𑀲𑀺𑀢𑀸 𑀫𑀕𑁆𑀕𑀗𑁆𑀕𑀸𑀤𑀺𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀚𑀳𑀸𑀢𑀺 𑀧𑀸𑀧𑀓’’𑀦𑁆𑀢𑀺 𑀏𑀢𑁂𑀦 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀬𑁄𑀧𑀺 𑀤𑀲𑁆𑀲𑀺𑀢𑀸 𑀅𑀪𑀺𑀲𑀫𑀬𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸’’𑀢𑀺 𑀏𑀢𑁂𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀻𑀦𑀫𑁆𑀧𑀺 𑀔𑀬𑀸 𑀤𑀲𑁆𑀲𑀺𑀢𑀸 𑀔𑁂𑀧𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀬𑀁 𑀮𑀓𑁆𑀔𑀡𑁄.

𑀘𑀢𑀼𑀩𑁆𑀬𑀽𑀳𑁄𑀢𑀺 𑀤𑀤𑀢𑁄𑀢𑀺 𑀕𑀸𑀣𑀸𑀬𑀁 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀫𑀳𑀸𑀪𑁄𑀕𑀢𑀁 𑀧𑀢𑁆𑀣𑀬𑀺𑀲𑁆𑀲𑀦𑁆𑀢𑀺, 𑀢𑁂 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺 𑀤𑀸𑀮𑀺𑀤𑁆𑀤𑀺𑀬𑀧𑁆𑀧𑀳𑀸𑀦𑀸𑀬. 𑀬𑁂 𑀅𑀯𑁂𑀭𑀢𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀧𑀜𑁆𑀘 𑀯𑁂𑀭𑀸𑀦𑀺 𑀧𑀚𑀳𑀺𑀲𑁆𑀲𑀦𑁆𑀢𑀺. 𑀬𑁂 𑀓𑀼𑀲𑀮𑀥𑀫𑁆𑀫𑁂𑀳𑀺 𑀙𑀦𑁆𑀤𑀓𑀸𑀫𑀸, 𑀢𑁂 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺. 𑀬𑁂 𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑀸, 𑀢𑁂 𑀭𑀸𑀕𑀤𑁄𑀲𑀫𑁄𑀳𑀁 𑀧𑀚𑀳𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀦𑀺𑀩𑁆𑀩𑀘𑀦𑀦𑀺𑀤𑀸𑀦𑀲𑀦𑁆𑀥𑀬𑁄 𑀯𑀢𑁆𑀢𑀩𑁆𑀩𑀸𑀢𑀺. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄.

𑀆𑀯𑀝𑁆𑀝𑁄𑀢𑀺 ¶ 𑀬𑀜𑁆𑀘 𑀅𑀤𑀤𑀢𑁄 𑀫𑀘𑁆𑀙𑀭𑀺𑀬𑀁, 𑀬𑀜𑁆𑀘 𑀅𑀲𑀁𑀬𑀫𑀢𑁄 𑀯𑁂𑀭𑀁, 𑀬𑀜𑁆𑀘 𑀅𑀓𑀼𑀲𑀮𑀲𑁆𑀲 𑀧𑀸𑀧𑀲𑁆𑀲 𑀅𑀧𑁆𑀧𑀳𑀸𑀦𑀁, 𑀅𑀬𑀁 𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑁂𑀦 𑀲𑀫𑀼𑀤𑀬𑁄. 𑀢𑀲𑁆𑀲 𑀅𑀮𑁄𑀪𑁂𑀦 𑀘 𑀅𑀤𑁄𑀲𑁂𑀦 𑀘 𑀅𑀫𑁄𑀳𑁂𑀦 𑀘 𑀤𑀸𑀦𑀸𑀤𑀻𑀳𑀺 𑀧𑀳𑀸𑀦𑀁, 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀢𑁂𑀲𑀁 𑀧𑀘𑁆𑀘𑀬𑁄 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀬𑀁 𑀫𑀕𑁆𑀕𑁄. 𑀬𑁄 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀔𑀬𑁄, 𑀅𑀬𑀁 𑀦𑀺𑀭𑁄𑀥𑁄𑀢𑀺. 𑀅𑀬𑀁 𑀆𑀯𑀝𑁆𑀝𑁄.

𑀯𑀺𑀪𑀢𑁆𑀢𑀻𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀏𑀓𑀁𑀲𑁂𑀦 𑀬𑁄 𑀪𑀬𑀳𑁂𑀢𑀼 𑀤𑁂𑀢𑀺, 𑀭𑀸𑀕𑀳𑁂𑀢𑀼 𑀤𑁂𑀢𑀺, 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀤𑁂𑀢𑀺, 𑀦 𑀢𑀲𑁆𑀲 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀬𑀜𑁆𑀘 𑀤𑀡𑁆𑀟𑀤𑀸𑀦𑀁 𑀲𑀢𑁆𑀣𑀤𑀸𑀦𑀁 𑀧𑀭𑀯𑀺𑀳𑁂𑀞𑀦𑀢𑁆𑀣𑀁 𑀅𑀧𑀼𑀜𑁆𑀜𑀁 𑀅𑀲𑁆𑀲 𑀧𑀯𑀟𑁆𑀠𑀢𑀺. 𑀬𑀁 𑀧𑀦 𑀓𑀼𑀲𑀮𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀓𑀫𑁆𑀧𑀦𑁆𑀢𑁄 𑀯𑀸 𑀅𑀧𑀘𑀸𑀬𑀫𑀸𑀦𑁄 𑀯𑀸 𑀅𑀦𑁆𑀦𑀁 𑀤𑁂𑀢𑀺, 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 ¶ 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀁 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀅𑀪𑀬𑀤𑀸𑀦𑀁 𑀤𑁂𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀳𑀺𑀢𑀚𑁆𑀛𑀸𑀲𑀬𑁄 𑀦𑀺𑀲𑁆𑀲𑀭𑀡𑀲𑀜𑁆𑀜𑀻 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀏𑀓𑀁𑀲𑁂𑀦 𑀅𑀪𑀬𑀽𑀧𑀭𑀢𑀲𑁆𑀲 𑀘𑀻𑀬𑀢𑀺, 𑀓𑀺𑀁𑀓𑀸𑀭𑀡𑀁? 𑀬𑀁 𑀅𑀲𑀫𑀢𑁆𑀣𑁄, 𑀪𑀬𑀽𑀧𑀭𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀪𑀸𑀬𑀢𑀺 ‘‘𑀫𑀸 𑀫𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀳𑀢𑁆𑀣𑀁 𑀯𑀸 𑀙𑀺𑀦𑁆𑀤𑁂𑀬𑁆𑀬𑀼𑀁…𑀧𑁂… 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀬𑁆𑀬𑀼’’𑀦𑁆𑀢𑀺, 𑀢𑁂𑀦 𑀲𑀁𑀬𑀫𑁂𑀦 𑀅𑀯𑁂𑀭𑀁 𑀘𑀻𑀬𑀢𑀺. 𑀬𑁄 𑀧𑀦 𑀏𑀯𑀁 𑀲𑀫𑀸𑀦𑁄 𑀯𑁂𑀭𑀁 𑀦 𑀘𑀻𑀬𑀢𑀺. 𑀬𑁄 𑀧𑀦 𑀏𑀯𑀁 𑀲𑀫𑀸𑀤𑀺𑀬𑀢𑀺, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘, 𑀏𑀯𑀁 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮𑀲𑁆𑀲, 𑀲𑁄 𑀢𑀢𑁄 𑀆𑀭𑀫𑀢𑀺, 𑀇𑀫𑀺𑀦𑀸 𑀲𑀁𑀬𑀫𑁂𑀦 𑀯𑁂𑀭𑀁 𑀦 𑀘𑀻𑀬𑀢𑀺. 𑀲𑀁𑀬𑀫𑁄 𑀦𑀸𑀫 𑀲𑀻𑀮𑀁. 𑀢𑀁 𑀘𑀢𑀼𑀩𑁆𑀩𑀺𑀥𑀁 𑀘𑁂𑀢𑀦𑀸 𑀲𑀻𑀮𑀁, 𑀘𑁂𑀢𑀲𑀺𑀓𑀁 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀦𑁆𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀧𑀸𑀧𑀧𑀳𑀸𑀬𑀓𑀸 𑀲𑀢𑁆𑀢𑀢𑁆𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀅𑀬𑀁 𑀯𑀺𑀪𑀢𑁆𑀢𑀺.

𑀧𑀭𑀺𑀯𑀢𑁆𑀢𑀦𑁄𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀅𑀤𑀤𑀢𑁄𑀧𑀺 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀦 𑀤𑀸𑀦𑀫𑀬𑀺𑀓𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺 𑀅𑀲𑀁𑀬𑀫𑀢𑁄𑀧𑀺 𑀯𑁂𑀭𑀁 𑀦 𑀘𑀻𑀬𑀢𑀺, 𑀬𑀁 𑀤𑀸𑀦𑁂𑀦 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀪𑀸𑀯𑀦𑀸𑀩𑀮𑁂𑀦. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀅𑀓𑀼𑀲𑀮𑁄 𑀧𑀦 𑀦 𑀚𑀳𑀸𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄, 𑀢𑁂𑀲𑀁 𑀅𑀧𑀭𑀺𑀓𑁆𑀔𑀬𑀸 𑀦𑀢𑁆𑀣𑀺 𑀦𑀺𑀩𑁆𑀩𑀼𑀢𑀻𑀢𑀺. 𑀅𑀬𑀁 𑀧𑀭𑀺𑀯𑀢𑁆𑀢𑀦𑁄.

𑀯𑁂𑀯𑀘𑀦𑁄𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺. 𑀧𑀭𑀺𑀘𑁆𑀘𑀸𑀕𑀢𑁄 𑀓𑀼𑀲𑀮𑀁 𑀉𑀧𑀘𑀻𑀬𑀢𑀺. 𑀅𑀦𑀼𑀫𑁄𑀤𑀢𑁄𑀧𑀺 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺 𑀘𑀺𑀢𑁆𑀢𑀧𑁆𑀧𑀲𑀸𑀤𑀢𑁄𑀧𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀺𑀭𑀺𑀬𑀸𑀬𑀧𑀺. 𑀲𑀁𑀬𑀫𑀢𑁄𑀢𑀺 𑀲𑀻𑀮𑀲𑀁𑀯𑀭𑀢𑁄 𑀲𑁄𑀭𑀘𑁆𑀘𑀢𑁄. 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀸𑀧𑀁 𑀦 𑀯𑀟𑁆𑀠𑀢𑀺, 𑀅𑀓𑀼𑀲𑀮𑀁 𑀦 𑀯𑀟𑁆𑀠𑀢𑀺. 𑀓𑀼𑀲𑀮𑁄𑀢𑀺 𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑁄 𑀫𑁂𑀥𑀸𑀯𑀻 𑀧𑀭𑀺𑀓𑁆𑀔𑀓𑁄. 𑀚𑀳𑀸𑀢𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀲𑀫𑀼𑀕𑁆𑀖𑀸𑀝𑁂𑀢𑀺. 𑀅𑀬𑀁 𑀯𑁂𑀯𑀘𑀦𑁄.

𑀧𑀜𑁆𑀜𑀢𑁆𑀢𑀻𑀢𑀺 ¶ 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀮𑁄𑀪𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀧𑀜𑁆𑀜𑀢𑁆𑀢𑀺, 𑀅𑀮𑁄𑀪𑀲𑁆𑀲 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀤𑁄𑀲𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑀜𑁆𑀜𑀢𑁆𑀢𑀺, 𑀅𑀤𑁄𑀲𑀲𑁆𑀲 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀫𑁄𑀳𑀲𑁆𑀲 𑀲𑀫𑀼𑀕𑁆𑀖𑀸𑀢𑀧𑀜𑁆𑀜𑀢𑁆𑀢𑀺, 𑀅𑀫𑁄𑀳𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀲𑁆𑀲 𑀧𑀳𑀸𑀦𑀧𑀜𑁆𑀜𑀢𑁆𑀢𑀺, 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀜𑁆𑀜𑀢𑁆𑀢𑀺, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀧𑀜𑁆𑀜𑀢𑁆𑀢𑀻𑀢𑀺. 𑀅𑀬𑀁 𑀧𑀜𑁆𑀜𑀢𑁆𑀢𑀺.

𑀑𑀢𑀭𑀡𑁄𑀢𑀺 ¶ 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀤𑀸𑀦𑀁 𑀦𑀸𑀫 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀳𑁄𑀢𑀻𑀢𑀺 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑁄. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀁𑀬𑀫𑁄 𑀦𑀸𑀫 𑀲𑀻𑀮𑀓𑁆𑀔𑀦𑁆𑀥𑁄𑀢𑀺 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑁄. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀧𑀸𑀧𑀧𑁆𑀧𑀳𑀸𑀦𑀁 𑀦𑀸𑀫 𑀢𑀻𑀳𑀺 𑀯𑀺𑀫𑁄𑀓𑁆𑀔𑁂𑀳𑀺 𑀳𑁄𑀢𑀺. 𑀢𑁂𑀲𑀁 𑀉𑀧𑀸𑀬𑀪𑀽𑀢𑀸𑀦𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀻𑀢𑀺 𑀅𑀬𑀁 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀑𑀢𑀭𑀡𑁄. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁄. 𑀲𑁄 𑀘 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀜𑁆𑀘𑀸𑀢𑀺 𑀅𑀬𑀁 𑀥𑀸𑀢𑀽𑀳𑀺 𑀘 𑀆𑀬𑀢𑀦𑁂𑀳𑀺 𑀘 𑀑𑀢𑀭𑀡𑁄𑀢𑀺. 𑀅𑀬𑀁 𑀑𑀢𑀭𑀡𑁄.

𑀲𑁄𑀥𑀦𑁄𑀢𑀺 𑀤𑀤𑀢𑁄𑀢𑀺𑀆𑀤𑀺𑀓𑀸 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀬𑀁 𑀧𑀤𑀲𑀼𑀤𑁆𑀥𑀺 𑀘 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺. 𑀅𑀬𑀁 𑀲𑁄𑀥𑀦𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀤𑀤𑀢𑁄𑀢𑀺 𑀅𑀬𑀁 𑀏𑀓𑀢𑁆𑀢𑀢𑀸, 𑀘𑀸𑀕𑁄 𑀧𑀭𑀺𑀘𑁆𑀘𑀸𑀕𑁄 𑀥𑀫𑁆𑀫𑀤𑀸𑀦𑀁 𑀆𑀫𑀺𑀲𑀤𑀸𑀦𑀁 𑀅𑀪𑀬𑀤𑀸𑀦𑀁, 𑀅𑀝𑁆𑀞 𑀤𑀸𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀲𑀁𑀬𑀫𑁄𑀢𑀺 𑀅𑀬𑀁 𑀏𑀓𑀢𑁆𑀢𑀢𑀸. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄𑀢𑀺 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀅𑀬𑀁 𑀏𑀓𑀢𑁆𑀢𑀢𑀸. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀚𑀳𑀢𑀺 𑀯𑀺𑀘𑀺𑀓𑀺𑀘𑁆𑀙𑀁 𑀧𑀚𑀳𑀢𑀻𑀢𑀺𑀆𑀤𑀺𑀓𑀸 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀬𑀁 𑀏𑀓𑀢𑁆𑀢𑀢𑀸. 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀅𑀬𑀁 𑀯𑁂𑀫𑀢𑁆𑀢𑀢𑀸𑀢𑀺. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀤𑀸𑀦𑀲𑁆𑀲 𑀧𑀸𑀫𑁄𑀚𑁆𑀚𑀁 𑀧𑀘𑁆𑀘𑀬𑁄. 𑀅𑀮𑁄𑀪𑁄 𑀳𑁂𑀢𑀼, 𑀲𑀁𑀬𑀫𑀲𑁆𑀲 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀬𑁄 𑀧𑀘𑁆𑀘𑀬𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀤𑁄𑀲𑁄 𑀘 𑀳𑁂𑀢𑀼, 𑀧𑀸𑀧𑀧𑁆𑀧𑀳𑀸𑀦𑀲𑁆𑀲 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀜𑁆𑀘 𑀧𑀘𑁆𑀘𑀬𑁄. 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀳𑁂𑀢𑀼, 𑀦𑀺𑀩𑁆𑀩𑀼𑀢𑀺𑀬𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁂𑀢𑀼, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀧𑀘𑁆𑀘𑀬𑁄𑀢𑀺. 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄.

𑀲𑀫𑀸𑀭𑁄𑀧𑀦𑁄 ¶ 𑀳𑀸𑀭𑀲𑀫𑁆𑀧𑀸𑀢𑁄𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀢𑀁 𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀢𑀁 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀻𑀮𑁂𑀦 𑀳𑀺 𑀛𑀸𑀦𑁂𑀦𑀧𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸 𑀦 𑀘𑀻𑀬𑀦𑁆𑀢𑀺. 𑀬𑁂𑀧𑀺𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀢𑁂𑀧𑀺𑀲𑁆𑀲 𑀦 𑀳𑁄𑀦𑁆𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀢𑀁 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 ¶ 𑀦𑀺𑀩𑁆𑀩𑀼𑀢𑁄𑀢𑀺 𑀭𑀸𑀕𑀲𑁆𑀲𑀧𑀺 𑀔𑀬𑀸 𑀤𑁄𑀲𑀲𑁆𑀲𑀧𑀺 𑀔𑀬𑀸 𑀫𑁄𑀳𑀲𑁆𑀲𑀧𑀺 𑀔𑀬𑀸. 𑀢𑀢𑁆𑀣 𑀭𑀸𑀕𑁄𑀢𑀺 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑁂𑀢𑀲𑁄 𑀲𑀸𑀭𑀚𑁆𑀚𑀦𑀸 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀤𑁄𑀲𑁄𑀢𑀺 𑀬𑁄 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀸𑀤𑁄 𑀘𑁂𑀢𑀲𑁄 𑀩𑁆𑀬𑀸𑀧𑀚𑁆𑀚𑀦𑀸 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁. 𑀫𑁄𑀳𑁄𑀢𑀺 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀇𑀢𑀺 𑀇𑀫𑁂𑀲𑀁 𑀭𑀸𑀕𑀸𑀤𑀻𑀦𑀁 𑀔𑀬𑁄 𑀦𑀺𑀭𑁄𑀥𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀦𑀺𑀩𑁆𑀩𑀼𑀢𑀺 𑀦𑀺𑀩𑁆𑀩𑀸𑀬𑀦𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀬𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁭𑁯. 𑀏𑀯𑀁 𑀦𑀸𑀦𑀸𑀲𑀼𑀢𑁆𑀢𑀯𑀲𑁂𑀦 𑀏𑀓𑀲𑀼𑀢𑁆𑀢𑀯𑀲𑁂𑀦 𑀘 𑀳𑀸𑀭𑀯𑀺𑀘𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀬𑀯𑀺𑀘𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 ‘‘𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄, 𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸𑀢𑀺 𑀕𑀸𑀣𑀸. 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄 𑀓𑀺𑀁 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀦𑀸 𑀳𑀸𑀭𑀦𑀺𑀤𑁆𑀤𑁂𑀲𑁄 𑀆𑀭𑀤𑁆𑀥𑁄, 𑀏𑀯𑀁 ‘‘𑀢𑀢𑁆𑀣 𑀓𑀢𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘𑀸𑀢𑀺 𑀕𑀸𑀣𑀸, 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀓𑀺𑀁 𑀦𑀬𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀸𑀭𑀪𑀺𑀢𑁆𑀯𑀸 𑀲𑀫𑀼𑀝𑁆𑀞𑀸𑀦𑀫𑀼𑀔𑁂𑀦 𑀆𑀭𑀤𑁆𑀥𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀳𑀸𑀭𑀦𑀬𑀸𑀦𑀁 𑀯𑀺𑀲𑀬𑀪𑁂𑀤𑀢𑁄. 𑀬𑀣𑀸 𑀳𑀺 𑀳𑀸𑀭𑀸 𑀩𑁆𑀬𑀜𑁆𑀚𑀦𑀫𑀼𑀔𑁂𑀦 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸, 𑀦 𑀏𑀯𑀁 𑀦𑀬𑀸. 𑀦𑀬𑀸 𑀧𑀦 𑀦𑀸𑀦𑀸𑀲𑀼𑀢𑁆𑀢𑀢𑁄 𑀦𑀺𑀤𑁆𑀥𑀸𑀭𑀺𑀢𑁂𑀳𑀺 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀻𑀳𑀺 𑀫𑀽𑀮𑀧𑀤𑁂𑀳𑀺 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀬 𑀦𑀬𑀢𑁄 𑀅𑀦𑀼𑀩𑀼𑀚𑁆𑀛𑀺𑀬𑀫𑀸𑀦𑁄 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑁄. 𑀲𑁄 𑀳𑀺 𑀫𑀕𑁆𑀕𑀜𑀸𑀡𑀁 𑀦𑀬𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀦𑀬𑁄. 𑀧𑀝𑀺𑀯𑀺𑀚𑁆𑀛𑀦𑁆𑀢𑀸𑀦𑀁 𑀧𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀢𑀺𑀡𑁆𑀡𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀲𑁂𑀦 𑀫𑀽𑀮𑀧𑀤𑀯𑀺𑀪𑀸𑀕𑀢𑁄 𑀢𑀺𑀥𑀸 𑀯𑀺𑀪𑀢𑁆𑀢𑀸. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀬𑀢𑁄 𑀦𑁂𑀢𑀺, 𑀬𑀜𑁆𑀘 𑀦𑁂𑀢𑀺, 𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀸𑀦𑀁 𑀯𑀺𑀪𑀸𑀕𑀢𑁄 𑀤𑁆𑀯𑀺𑀲𑀗𑁆𑀕𑀳𑁄 𑀘𑀢𑀼𑀙𑀅𑀝𑁆𑀞𑀤𑀺𑀲𑁄 𑀘𑀸𑀢𑀺 𑀪𑀺𑀦𑁆𑀦𑁄 𑀳𑀸𑀭𑀦𑀬𑀸𑀦𑀁 𑀯𑀺𑀲𑀬𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑁄, 𑀲𑀼𑀢𑁆𑀢𑀲𑁆𑀲 𑀦𑀬𑀸 𑀢𑀬𑁄 𑀘 𑀲𑀼𑀢𑁆𑀢𑀢𑁆𑀣𑁄’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭). 𑀏𑀯𑀁 𑀯𑀺𑀲𑀺𑀝𑁆𑀞𑀯𑀺𑀲𑀬𑀢𑁆𑀢𑀸 𑀳𑀸𑀭𑀦𑀬𑀸𑀦𑀁 𑀳𑀸𑀭𑁂𑀳𑀺 𑀅𑀜𑁆𑀜𑀣𑀸 𑀦𑀬𑁂 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣𑀸𑀬𑀁 ¶ ¶ 𑀯𑀘𑀦𑀢𑁆𑀣𑁄 𑁋 𑀲𑀫𑀼𑀝𑁆𑀞𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀓𑁂 𑀲𑀫𑀼𑀝𑁆𑀞𑀳𑀦𑁆𑀢𑀺? 𑀦𑀬𑀸. 𑀦𑀬𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 𑀦𑀬𑀲𑀫𑀼𑀝𑁆𑀞𑀸𑀦𑀁. 𑀓𑀺𑀁 𑀧𑀦 𑀢𑀁? 𑀢𑀁𑀢𑀁𑀫𑀽𑀮𑀧𑀤𑁂𑀳𑀺 𑀘𑀢𑀼𑀲𑀘𑁆𑀘𑀬𑁄𑀚𑀦𑀸. 𑀲𑀸 𑀳𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀻𑀦𑀁 𑀦𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀲𑀫𑀼𑀝𑁆𑀞𑀸𑀦𑀁 𑀪𑀽𑀫𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 𑁋 ‘‘𑀅𑀬𑀁 𑀯𑀼𑀘𑁆𑀘𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻’’𑀢𑀺 (𑀦𑁂𑀢𑁆𑀢𑀺. 𑁮𑁧). 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑀘 𑀪𑀯𑀢𑀡𑁆𑀳𑀸𑀬 𑀘𑀸𑀢𑀺𑀆𑀤𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀅𑀲𑀼𑀓𑀲𑁆𑀲 𑀦𑀸𑀫 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄, 𑀅𑀲𑀼𑀓𑀲𑁆𑀲 𑀯𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑁂 𑀅𑀯𑀺𑀚𑁆𑀚𑀸 𑀪𑀯𑀢𑀡𑁆𑀳𑀸 𑀘 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀧𑀼𑀩𑁆𑀩𑁂 𑀦𑀸𑀳𑁄𑀲𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀦𑀁 𑀦 𑀓𑀸𑀘𑀺 𑀧𑀼𑀭𑀺𑀫𑀸 𑀫𑀭𑀺𑀬𑀸𑀤𑀸 𑀉𑀧𑀮𑀩𑁆𑀪𑀢𑀺. 𑀓𑀲𑁆𑀫𑀸? 𑀅𑀦𑀫𑀢𑀕𑁆𑀕𑀢𑁆𑀢𑀸 𑀲𑀁𑀲𑀸𑀭𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁨𑁪; 𑀓𑀣𑀸. 𑁭𑁫) 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣𑀸𑀢𑀺 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀲𑀼. 𑀬𑀤𑀺𑀧𑀺 𑀅𑀯𑀺𑀚𑁆𑀚𑀸𑀬 𑀲𑀁𑀬𑁄𑀚𑀦𑀪𑀸𑀯𑁄, 𑀢𑀡𑁆𑀳𑀸𑀬 𑀘 𑀦𑀻𑀯𑀭𑀡𑀪𑀸𑀯𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂𑀳𑀺 𑀪𑀯𑁂𑀳𑀺 𑀢𑀡𑁆𑀳𑀸 𑀲𑀁𑀬𑁄𑀚𑁂𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀢𑀡𑁆𑀳𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀯𑀺𑀚𑁆𑀚𑀸𑀲𑀁𑀬𑀼𑀢𑁆𑀢𑀸𑀢𑀺 𑀅𑀯𑀺𑀚𑁆𑀚𑀸𑀬 𑀫𑀺𑀲𑁆𑀲𑀺𑀢𑀸, 𑀅𑀯𑀺𑀚𑁆𑀚𑀸𑀬 𑀯𑀸 𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀽𑀲𑀼 𑀩𑀤𑁆𑀥𑀸. 𑀅𑀯𑀺𑀚𑁆𑀚𑀸𑀧𑀓𑁆𑀔𑁂𑀦 𑀯𑀺𑀘𑀭𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀧𑀓𑁆𑀔𑁂𑀦 𑀅𑀯𑀺𑀚𑁆𑀚𑀸𑀲𑀳𑀸𑀬𑁂𑀦 𑀤𑁆𑀯𑀸𑀤𑀲𑀯𑀺𑀥𑁂𑀦 𑀯𑀺𑀧𑀮𑁆𑀮𑀸𑀲𑁂𑀦 𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀪𑀽𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑁆𑀢𑀺. 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑀸𑀢𑀺 𑀢𑁂 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀸 𑀭𑀽𑀧𑀸𑀤𑀻𑀦𑀺 𑀦𑀺𑀘𑁆𑀘𑀸𑀤𑀺𑀢𑁄 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀤𑀺𑀝𑁆𑀞𑀺𑀘𑀭𑀺𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀧𑀓𑁆𑀔𑁂𑀦𑀸𑀢𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑁂𑀦. 𑀤𑀺𑀝𑁆𑀞𑀺𑀯𑀺𑀘𑀭𑀺𑀢𑁂 𑀢𑀡𑁆𑀳𑀸𑀯𑀺𑀘𑀭𑀺𑀢𑁂 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀓𑀺𑀮𑀺𑀲𑁆𑀲𑀦𑀧𑀬𑁄𑀕𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀧𑀝𑀺𑀧𑀢𑁆𑀢𑀺𑀁. 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀦𑁆𑀢𑀺 𑀓𑀸𑀫𑀲𑀼𑀔𑀲𑁆𑀲 𑀅𑀮𑁆𑀮𑀻𑀬𑀦𑀧𑀬𑁄𑀕𑀁 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁.

𑀬𑀤𑀺𑀧𑀺 𑀩𑀸𑀳𑀺𑀭𑀓𑀸 ‘‘𑀤𑀼𑀓𑁆𑀔𑀁 𑀢𑀡𑁆𑀳𑀸’’𑀢𑀺 𑀘 𑀚𑀸𑀦𑀦𑁆𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔’’𑀦𑁆𑀢𑀺, ‘‘𑀅𑀬𑀁 𑀢𑀡𑁆𑀳𑀸, 𑀅𑀬𑀁 𑀢𑀲𑁆𑀲𑀸 𑀯𑀺𑀭𑀸𑀕𑁄’’𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀧𑀦 𑀦 𑀚𑀸𑀦𑀦𑁆𑀢𑀺, 𑀇𑀢𑀺 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀓𑀸 𑀧𑀦 𑀓𑀣𑀸 𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀳𑁂𑀢𑀽𑀲𑀽𑀢𑀺 𑀆𑀳 𑁋 ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀺 𑀲𑀘𑁆𑀘𑀯𑀯𑀢𑁆𑀣𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ¶ 𑀲𑀘𑁆𑀘𑀧𑁆𑀧𑀓𑀸𑀲𑀦𑀸𑀢𑀺 𑀲𑀘𑁆𑀘𑀤𑁂𑀲𑀦𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑁄𑀲𑀮𑁆𑀮𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀪𑀸𑀯𑀦𑀸𑀓𑁄𑀲𑀮𑁆𑀮𑀁, 𑀢𑀸𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀯𑀸. 𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦𑀜𑁆𑀘𑁂𑀢𑁆𑀣 𑀲𑀫𑀣𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀧𑀲𑀫𑀲𑀼𑀔𑀧𑁆𑀧𑀢𑁆𑀢𑀻𑀢𑀺 ¶ 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀲𑀼𑀔𑀸𑀥𑀺𑀕𑀫𑁄. 𑀯𑀺𑀧𑀭𑀻𑀢𑀘𑁂𑀢𑀸𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑀘𑁂𑀢𑀸. 𑀦𑀢𑁆𑀣𑀺 𑀲𑀼𑀔𑁂𑀦 𑀲𑀼𑀔𑀦𑁆𑀢𑀺 𑀬𑀁 𑀅𑀦𑀯𑀚𑁆𑀚𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀼𑀔𑁂𑀦 𑀓𑀸𑀬𑀁 𑀘𑀺𑀢𑁆𑀢𑀜𑁆𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀁 𑀓𑀢𑁆𑀯𑀸 𑀅𑀭𑀺𑀬𑁂𑀳𑀺 𑀧𑀢𑁆𑀢𑀩𑁆𑀩𑀁 𑀉𑀧𑀲𑀫𑀲𑀼𑀔𑀁, 𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀓𑁆𑀔𑁂𑀦𑀸𑀢𑀺 𑀓𑀸𑀬𑀔𑁂𑀤𑀦𑀤𑀼𑀓𑁆𑀔𑁂𑀦.

𑀲𑁄 𑀮𑁄𑀓𑀁 𑀯𑀟𑁆𑀠𑀬𑀢𑀻𑀢𑀺 𑀲𑁄 𑀓𑀸𑀫𑁂 𑀧𑀝𑀺𑀲𑁂𑀯𑁂𑀦𑁆𑀢𑁄 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀮𑁄𑀓𑀁 𑀯𑀟𑁆𑀠𑁂𑀢𑀺 𑀧𑀻𑀦𑁂𑀢𑀺. 𑀧𑀼𑀢𑁆𑀢𑀦𑀢𑁆𑀢𑀼𑀧𑀭𑀫𑁆𑀧𑀭𑀸𑀬 𑀯𑀸 𑀲𑀁𑀲𑀸𑀭𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀦𑀢𑁄 𑀲𑀢𑁆𑀢𑀮𑁄𑀓𑀁 𑀯𑀟𑁆𑀠𑁂𑀢𑀺. 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀻𑀢𑀺 𑀅𑀢𑁆𑀢𑀦𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀦𑁆𑀢𑀧𑁆𑀧𑀦𑁂𑀦 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑁂𑀦 𑀘 𑀩𑀳𑀼𑀁 𑀧𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀪𑀺𑀦𑀺𑀯𑁂𑀲𑀲𑁆𑀲 𑀦𑀸𑀢𑀺𑀤𑀴𑁆𑀳𑀢𑀸𑀬 𑀏𑀯𑀁𑀲𑀜𑁆𑀜𑀻. 𑀤𑀴𑁆𑀳𑀢𑀸𑀬 𑀏𑀯𑀁𑀤𑀺𑀝𑁆𑀞𑀻 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀧𑀢𑁆𑀣𑀬𑀫𑀸𑀦𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀓𑀸𑀫𑁂𑀲𑀼 𑀧𑀼𑀜𑁆𑀜𑀲𑀜𑁆𑀜𑀻 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀘 𑀯𑀺𑀳𑀭𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀤𑀪𑀺𑀜𑁆𑀜𑀸 𑀲𑀦𑁆𑀢𑀸𑀢𑀺 𑀢𑀣𑀸𑀲𑀜𑁆𑀜𑀺𑀦𑁄 𑀲𑀫𑀸𑀦𑀸. 𑀭𑁄𑀕𑀫𑁂𑀯 𑀯𑀟𑁆𑀠𑀬𑀦𑁆𑀢𑀻𑀢𑀺 𑀅𑀢𑁆𑀢𑀪𑀸𑀯𑀭𑁄𑀕𑀫𑁂𑀯 𑀓𑀺𑀮𑁂𑀲𑀭𑁄𑀕𑀫𑁂𑀯 𑀯𑀸 𑀅𑀧𑀭𑀸𑀧𑀭𑀁 𑀯𑀟𑁆𑀠𑁂𑀦𑁆𑀢𑀺. 𑀕𑀡𑁆𑀟𑀲𑀮𑁆𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑁄𑀕𑀸𑀪𑀺𑀢𑀼𑀦𑁆𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑁄𑀕𑀩𑁆𑀬𑀸𑀥𑀺𑀢𑀸. 𑀕𑀡𑁆𑀟𑀧𑀝𑀺𑀧𑀻𑀴𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀕𑀡𑁆𑀟𑀩𑀸𑀥𑀺𑀢𑀸. 𑀲𑀮𑁆𑀮𑀸𑀦𑀼𑀯𑀺𑀤𑁆𑀥𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀮𑁆𑀮𑁂𑀦 𑀅𑀦𑀼𑀧𑀯𑀺𑀝𑁆𑀞𑀸. 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀸𑀦𑀻𑀢𑀺 𑀉𑀧𑀧𑀚𑁆𑀚𑀦𑀘𑀯𑀦𑀸𑀦𑀺. 𑀉𑀕𑁆𑀖𑀸𑀢𑀦𑀺𑀕𑁆𑀖𑀸𑀢𑀦𑁆𑀢𑀺 𑀉𑀘𑁆𑀘𑀸𑀯𑀘𑀪𑀸𑀯𑀁. 𑀭𑁄𑀕𑀕𑀡𑁆𑀟𑀲𑀮𑁆𑀮𑀪𑁂𑀲𑀚𑁆𑀚𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀭𑁄𑀕𑀸𑀤𑀺𑀢𑀺𑀓𑀺𑀘𑁆𑀙𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸 𑀭𑁄𑀕𑀦𑀺𑀕𑁆𑀖𑀸𑀢𑀓𑀪𑁂𑀲𑀚𑁆𑀚’’𑀦𑁆𑀢𑀺. 𑀢𑀢𑁆𑀣 𑀭𑁄𑀕𑀦𑀺𑀕𑁆𑀖𑀸𑀢𑀓𑀦𑁆𑀢𑀺 𑀭𑁄𑀕𑀯𑀽𑀧𑀲𑀫𑀦𑀁. ‘‘𑀲𑀁𑀓𑀺𑀮𑁂𑀲𑁄 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁂𑀦 𑀓𑀣𑁂𑀢𑀺.

𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑀁𑀓𑀺𑀮𑁂𑀲𑀯𑀦𑁆𑀢𑁄, 𑀢𑁂𑀳𑀺 𑀯𑀸 𑀲𑀁𑀓𑀺𑀮𑀺𑀲𑁆𑀲𑀫𑀸𑀦𑁄 𑀭𑀽𑀧𑀸𑀭𑀽𑀧𑀓𑀸𑀬𑁄 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀢𑀤𑀪𑀺𑀲𑀗𑁆𑀕𑁄 𑀢𑀡𑁆𑀳𑀸𑀢𑀺 𑀢𑀢𑁆𑀣 𑀅𑀪𑀺𑀲𑀗𑁆𑀕𑁄 𑀆𑀲𑀗𑁆𑀕𑁄𑀢𑀺 𑀮𑀤𑁆𑀥𑀦𑀸𑀫𑀸 𑀢𑀡𑁆𑀳𑀸.

𑁮𑁦. 𑀇𑀤𑀸𑀦𑀺 𑀤𑀺𑀝𑁆𑀞𑀺𑀘𑀭𑀺𑀢𑀢𑀡𑁆𑀳𑀸𑀘𑀭𑀺𑀢𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀤𑀲𑁆𑀲𑀦𑁂 𑀧𑀯𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀺𑀘𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑀸 𑀭𑀽𑀧𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 ¶ 𑀤𑀺𑀝𑁆𑀞𑀺𑀘𑀭𑀺𑀢𑀸 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀢𑁄 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀩𑀮𑀯𑀸, 𑀦 𑀢𑀣𑀸 𑀅𑀢𑁆𑀢𑀦𑀺𑀬𑀸𑀪𑀺𑀦𑀺𑀯𑁂𑀲𑁄. 𑀏𑀲 𑀦𑀬𑁄 𑀯𑁂𑀤𑀦𑀦𑁆𑀢𑀺𑀆𑀤𑀻𑀲𑀼𑀧𑀺. 𑀢𑀡𑁆𑀳𑀸𑀘𑀭𑀺𑀢𑀸 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀢𑀸 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀢𑁄 𑀭𑀽𑀧𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀪𑀸𑀯𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀯𑁂𑀤𑀦𑀸𑀤𑀺𑀁 ‘‘𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀢𑁆𑀢𑀸𑀥𑀸𑀭𑀁 𑀯𑀸 𑀭𑀽𑀧𑀁. 𑀭𑀽𑀧𑀲𑁆𑀫𑀺𑀁 𑀯𑀸 ¶ 𑀅𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀥𑀸𑀭𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀸𑀯𑀦𑁆𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀲𑀜𑁆𑀳𑀺 𑀅𑀢𑁆𑀢𑀦𑀺𑀬𑀸𑀪𑀺𑀦𑀺𑀯𑁂𑀲𑁄 𑀩𑀮𑀯𑀸, 𑀦 𑀢𑀣𑀸 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄. 𑀢𑀲𑁆𑀫𑀸 𑀬𑀣𑀸𑀮𑀤𑁆𑀥𑀁 𑀅𑀢𑁆𑀢𑀦𑀺𑀬𑀦𑁆𑀢𑀺 𑀓𑀧𑁆𑀧𑁂𑀢𑁆𑀯𑀸 𑀢𑀤𑀜𑁆𑀜𑀁 ‘‘𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺 𑀅𑀬𑀁 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀕𑀸𑀳𑀸𑀦𑀁 𑀯𑀲𑁂𑀦 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂, 𑀲𑀢𑀻 𑀯𑀸 𑀯𑀺𑀚𑁆𑀚𑀫𑀸𑀦𑀸 𑀢𑀢𑁆𑀣 𑀤𑀺𑀝𑁆𑀞𑀻𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺.

𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀧𑀞𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀦𑁆𑀯𑀸𑀬𑀺𑀓𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑀸𑀫𑀺𑀦𑁄. 𑀬𑀤𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀤𑀸 𑀢𑀲𑁆𑀲𑀸 𑀅𑀦𑀼𑀕𑀼𑀡𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀓𑀸𑀢𑀺 𑀅𑀢𑁆𑀣𑁄. 𑀓𑁂 𑀧𑀦 𑀢𑁂𑀢𑀺? 𑀆𑀳 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀺. ‘‘𑀢𑁂 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀫𑀕𑁆𑀕𑀢𑁄 𑀔𑀦𑁆𑀥𑀫𑀼𑀔𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀤𑁆𑀥𑀸𑀭𑁂𑀢𑀺. ‘‘𑀢𑀢𑁆𑀣 𑀲𑀓𑁆𑀓𑀸𑀬𑁄’’𑀢𑀺𑀆𑀤𑀺 𑀘𑀢𑀼𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀁. 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀼𑀦 ‘‘𑀢𑀢𑁆𑀣 𑀬𑁂 𑀭𑀽𑀧𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀲𑀓𑁆𑀓𑀸𑀬𑀤𑀲𑁆𑀲𑀦𑀫𑀼𑀔𑁂𑀦 𑀉𑀘𑁆𑀙𑁂𑀤𑀸𑀤𑀺𑀅𑀦𑁆𑀢𑀤𑁆𑀯𑀬𑀁, 𑀫𑀚𑁆𑀛𑀺𑀫𑀜𑁆𑀘 𑀧𑀝𑀺𑀧𑀤𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀢𑀢𑁆𑀣 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀉𑀘𑁆𑀙𑁂𑀤𑀯𑀸𑀤𑀺𑀦𑁄𑀢𑀺 𑀇𑀫𑁂 𑀭𑀽𑀧𑀸𑀤𑀺𑀓𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀸 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀪𑀸𑀯𑀢𑁄 𑀉𑀘𑁆𑀙𑀺𑀚𑁆𑀚𑀢𑀺 𑀅𑀢𑁆𑀢𑀸 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸𑀢𑀺 𑀏𑀯𑀁 𑀅𑀪𑀺𑀦𑀺𑀯𑀺𑀲𑀦𑀢𑁄 ‘‘𑀉𑀘𑁆𑀙𑁂𑀤𑀯𑀸𑀤𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀲𑁆𑀲𑀢𑀯𑀸𑀤𑀺𑀦𑁄𑀢𑀺 𑀇𑀫𑁂 ‘‘𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀸𑀢𑀺 𑀉𑀧𑀕𑀘𑁆𑀙𑀦𑁆𑀢𑀸 ‘‘𑀲𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺 𑀅𑀪𑀺𑀦𑀺𑀯𑀺𑀲𑀦𑀢𑁄 ‘‘𑀲𑀲𑁆𑀲𑀢𑀯𑀸𑀤𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀘𑁆𑀙𑁂𑀤𑀲𑀲𑁆𑀲𑀢𑀯𑀸𑀤𑀸 𑀉𑀪𑁄 𑀅𑀦𑁆𑀢𑀸, 𑀅𑀬𑀁 𑀲𑀁𑀲𑀸𑀭𑀧𑀯𑀢𑁆𑀢𑀻’’𑀢𑀺𑀆𑀤𑀺 𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀉𑀘𑁆𑀙𑁂𑀤𑀲𑀲𑁆𑀲𑀢𑀁 𑀲𑀫𑀸𑀲𑀢𑁄 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀅𑀢𑁆𑀢𑀸 𑀦𑀺𑀘𑁆𑀘𑁄𑀢𑀺 𑀘 𑀆𑀤𑀺𑀧𑁆𑀧𑀯𑀢𑁆𑀢𑀦𑀢𑁄 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀲𑁆𑀲𑀦𑀁 𑀲𑀗𑁆𑀔𑁂𑀧𑀢𑁄 ¶ 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀏𑀯 𑀳𑁄𑀢𑀺. 𑀲𑀩𑁆𑀩𑁄𑀧𑀺 𑀳𑀺 𑀅𑀢𑁆𑀢𑀯𑀸𑀤𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀅𑀦𑁆𑀢𑁄𑀕𑀥𑁄 𑀏𑀯𑀸𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑁂𑀦 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁨𑁮 𑀆𑀤𑀬𑁄) 𑀆𑀕𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂𑀲𑀦𑁆𑀢𑀺 𑀏𑀯𑀁 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀦𑁆𑀢𑀸𑀦𑀁 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀲𑁆𑀲𑀦𑀸𑀦𑀁. 𑀧𑀝𑀺𑀧𑀓𑁆𑀔𑁄𑀢𑀺 𑀧𑀳𑀸𑀬𑀓𑀧𑀝𑀺𑀧𑀓𑁆𑀔𑁄. 𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀧𑀳𑀸𑀦𑀲𑀜𑁆𑀜𑀸 𑀯𑀺𑀭𑀸𑀕𑀲𑀜𑁆𑀜𑀸 𑀦𑀺𑀭𑁄𑀥𑀲𑀜𑁆𑀜𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀏𑀢𑁂 𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸.

𑀏𑀯𑀁 ¶ 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀲𑀫𑀣𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀤𑀲 𑀘 𑀓𑀲𑀺𑀡𑀸𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑁄𑀳𑀚𑀸𑀮𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑁄𑀳𑀚𑀸𑀮𑀳𑁂𑀢𑀼𑀓𑀢𑁆𑀢𑀸 𑀫𑁄𑀳𑀚𑀸𑀮𑀜𑁆𑀘. 𑀅𑀦𑀸𑀤𑀺𑀅𑀦𑀺𑀥𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀅𑀦𑀸𑀤𑀺. 𑀅𑀲𑀢𑀺 𑀧𑀝𑀺𑀧𑀓𑁆𑀔𑀸𑀥𑀺𑀕𑀫𑁂 𑀲𑀦𑁆𑀢𑀸𑀦𑀯𑀲𑁂𑀦 𑀅𑀦𑀼𑀧𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀦𑀢𑁄 𑀅𑀦𑀺𑀥𑀦𑀧𑁆𑀧𑀯𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀫𑁄𑀳𑀚𑀸𑀮𑀳𑁂𑀢𑀼𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑁄𑀳𑀚𑀸𑀮𑁂 𑀧𑀤𑀸𑀮𑀺𑀢𑁂 𑀧𑀤𑀸𑀮𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀜𑀸𑀡𑀯𑀚𑀺𑀭𑀁 𑀫𑁄𑀳𑀚𑀸𑀮𑀧𑁆𑀧𑀤𑀸𑀮𑀦’’𑀦𑁆𑀢𑀺.

𑀢𑀢𑁆𑀣 𑀜𑀸𑀡𑀯𑀚𑀺𑀭𑀦𑁆𑀢𑀺 𑀯𑀚𑀺𑀭𑀽𑀧𑀫𑀜𑀸𑀡𑀁. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀚𑁂𑀢𑁆𑀯𑀸 𑀢𑀺𑀓𑁆𑀔𑀲𑀪𑀸𑀯𑀁 𑀆𑀧𑀸𑀤𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑀜𑀸𑀡𑀜𑁆𑀘 𑀜𑀸𑀡𑀯𑀚𑀺𑀭𑀁. 𑀇𑀤𑀫𑁂𑀯 𑀳𑀺 𑀜𑀸𑀡𑀁 𑀪𑀕𑀯𑀢𑁄 𑀧𑀯𑀢𑁆𑀢𑀁 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀲𑀲𑀫𑁆𑀪𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸’’𑀢𑀺 𑀆𑀳. 𑀫𑁄𑀳𑀚𑀸𑀮𑀧𑁆𑀧𑀤𑀸𑀮𑀦𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀦𑀁 𑀧𑀤𑀸𑀮𑀦𑀁. 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀭𑀽𑀧𑀸𑀤𑀻𑀲𑀼 𑀲𑀓𑀅𑀢𑁆𑀢𑀪𑀸𑀯𑀸𑀤𑀻𑀲𑀼 𑀘 𑀲𑀁𑀲𑀺𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀚𑀸𑀮𑀁 𑀪𑀯𑀢𑀡𑁆𑀳𑀸. 𑀢𑀲𑁆𑀲𑀸 𑀳𑀺 𑀢𑀡𑁆𑀳𑀸 𑀚𑀸𑀮𑀺𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀦𑁆𑀢𑀺 𑀘 𑀅𑀥𑀺𑀯𑀘𑀦𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀤𑀺𑀝𑁆𑀞𑀺𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀁 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀫𑁄𑀳𑀚𑀸𑀮𑀧𑀭𑀺𑀬𑀸𑀬𑀯𑀺𑀲𑁂𑀲𑀢𑁄 𑀅𑀯𑀺𑀚𑁆𑀚𑀸𑀢𑀡𑁆𑀳𑀸 𑀯𑀺𑀪𑀚𑀺𑀢𑁆𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑀺𑀕𑀫𑁂𑀦𑁆𑀢𑁄 ‘‘𑀢𑁂𑀦 𑀯𑀼𑀘𑁆𑀘𑀢𑀺 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑀘 𑀪𑀯𑀢𑀡𑁆𑀳𑀸𑀬 𑀘𑀸’’𑀢𑀺 𑀆𑀳.

𑁮𑁧. ‘‘𑀢𑀢𑁆𑀣 ¶ 𑀤𑀺𑀝𑁆𑀞𑀺𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀮𑁆𑀮𑁂𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀻𑀢𑀺 𑀅𑀦𑀼𑀧𑀤𑁆𑀤𑀼𑀢𑀲𑀮𑁆𑀮𑁂𑀔𑀯𑀼𑀢𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀮𑁆𑀮𑁂𑀔𑁂 𑀢𑀺𑀩𑁆𑀩𑀕𑀸𑀭𑀯𑁄. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀳𑀺 𑀢𑀧𑁄𑀚𑀺𑀕𑀼𑀘𑁆𑀙𑀸𑀤𑀺𑀦𑀸 𑀅𑀦𑀼𑀧𑀸𑀬𑁂𑀦𑀧𑀺 𑀬𑁂𑀪𑀼𑀬𑁆𑀬𑁂𑀦 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀦𑀸𑀥𑀺𑀧𑁆𑀧𑀸𑀬𑁂𑀦 𑀘𑀭𑀢𑀺, 𑀢𑀲𑁆𑀫𑀸 𑀲𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀥𑀼𑀢𑀥𑀫𑁆𑀫𑀯𑀲𑁂𑀦 𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀧𑀽𑀭𑁂𑀢𑀺. 𑀲𑀺𑀓𑁆𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀻𑀢𑀺 𑀅𑀘𑁆𑀙𑀺𑀤𑁆𑀤𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀯𑀼𑀢𑁆𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀯𑀺𑀲𑀬𑁂 𑀧𑀜𑁆𑀜𑀸𑀲𑀤𑀺𑀲𑀻 𑀧𑀯𑀢𑁆𑀢𑀻𑀢𑀺 𑀲𑁄 𑀯𑀺𑀲𑀼𑀚𑁆𑀛𑀫𑀸𑀦𑁄 𑀧𑀜𑁆𑀜𑀸𑀥𑀺𑀓𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀤𑀺𑀝𑁆𑀞𑀺𑀘𑀭𑀺𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀪𑀯𑀢𑀻’’𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀫𑀺𑀘𑁆𑀙𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀻𑀢𑀺 𑀢𑀡𑁆𑀳𑀸𑀘𑀭𑀺𑀢𑁄 𑀯𑀺𑀲𑀼𑀚𑁆𑀛𑀫𑀸𑀦𑁄 𑀲𑀤𑁆𑀥𑀸𑀥𑀺𑀓𑁄𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀡𑁆𑀳𑀸𑀘𑀭𑀺𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀪𑀯𑀢𑀻’’𑀢𑀺. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬𑀸𑀢𑀺𑀆𑀤𑀺 𑀧𑀝𑀺𑀧𑀤𑀸𑀦𑀺𑀤𑁆𑀤𑁂𑀲𑁄 𑀳𑁂𑀝𑁆𑀞𑀸 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁂 (𑀦𑁂𑀢𑁆𑀢𑀺. 𑁫 𑀆𑀤𑀬𑁄) 𑀆𑀕𑀢𑁄 𑀏𑀯, 𑀅𑀢𑁆𑀣𑁄𑀧𑀺 𑀢𑀢𑁆𑀣 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀯𑀼𑀢𑁆𑀢𑁄 𑀏𑀯.

𑀅𑀧𑀼𑀩𑁆𑀩𑀧𑀤𑁂𑀲𑀼 ¶ 𑀧𑀦 𑀯𑀺𑀯𑁂𑀘𑀺𑀬𑀫𑀸𑀦𑁄𑀢𑀺 𑀯𑀺𑀫𑁄𑀘𑀺𑀬𑀫𑀸𑀦𑁄. 𑀧𑀝𑀺𑀦𑀺𑀲𑁆𑀲𑀭𑀢𑀻𑀢𑀺 𑀦𑀺𑀬𑁆𑀬𑀸𑀢𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀤𑀦𑁆𑀥𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀸𑀢𑀻𑀢𑀺 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀫𑀦𑁆𑀤𑀧𑀜𑁆𑀜𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀺𑀓𑁆𑀔𑀧𑀜𑁆𑀜𑁄 𑀧𑀦 𑀔𑀺𑀧𑁆𑀧𑀁 𑀥𑀫𑁆𑀫𑀁 𑀆𑀚𑀸𑀦𑀸𑀢𑀻𑀢𑀺. ‘‘𑀲𑀢𑁆𑀢𑀸𑀧𑀺 𑀤𑀼𑀯𑀺𑀥𑀸’’𑀢𑀺𑀆𑀤𑀺𑀦𑀸 𑀇𑀦𑁆𑀤𑁆𑀭𑀺𑀬𑀯𑀺𑀪𑀸𑀕𑁂𑀦 𑀧𑀼𑀦 𑀧𑀝𑀺𑀧𑀤𑀸𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

‘‘𑀬𑁂 𑀳𑀺 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀢𑀸𑀲𑀁 𑀧𑀝𑀺𑀧𑀤𑀸𑀦𑀁 𑀦𑀺𑀬𑁆𑀬𑀸𑀦𑁂 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀏𑀓𑀦𑁆𑀢𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀇𑀫𑀸𑀳𑀺 𑀏𑀯 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀻𑀢𑀺 𑀇𑀫𑀸𑀳𑀺 𑀏𑀯 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀸𑀬 𑀅𑀜𑁆𑀜𑀸𑀬 𑀧𑀝𑀺𑀧𑀤𑀸𑀬 𑀅𑀪𑀸𑀯𑀢𑁄. 𑀘𑀢𑀼𑀓𑁆𑀓𑀫𑀕𑁆𑀕𑀦𑁆𑀢𑀺 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀁, 𑀧𑀝𑀺𑀧𑀤𑀸 𑀳𑀺 𑀫𑀕𑁆𑀕𑁄𑀢𑀺. 𑀅𑀣 𑀯𑀸 𑀘𑀢𑀼𑀓𑁆𑀓𑀫𑀕𑁆𑀕𑀦𑁆𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀘𑀢𑀼𑀤𑁆𑀤𑀺𑀲𑀸𑀲𑀗𑁆𑀔𑀸𑀢𑀁 𑀫𑀕𑁆𑀕𑀁. 𑀢𑀸 𑀧𑀦 𑀘𑀢𑀲𑁆𑀲𑁄 𑀤𑀺𑀲𑀸 𑀤𑀺𑀲𑀸𑀮𑁄𑀘𑀦𑀦𑀬𑁂 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀓𑀺𑀫𑀢𑁆𑀣𑀁 𑀧𑀦 𑀘𑀢𑀼𑀓𑁆𑀓𑀫𑀕𑁆𑀕𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀅𑀩𑀼𑀥𑀚𑀦𑀲𑁂𑀯𑀺𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀩𑀼𑀥𑀚𑀦𑀲𑁂𑀯𑀺𑀢𑀸𑀬𑀸𑀢𑀺 𑀅𑀧𑀡𑁆𑀟𑀺𑀢𑀚𑀦𑀲𑁂𑀯𑀺𑀢𑀸𑀬. 𑀩𑀸𑀮𑀓𑀦𑁆𑀢𑀸𑀬𑀸𑀢𑀺 𑀩𑀸𑀮𑀚𑀦𑀓𑀸𑀫𑀺𑀢𑀸𑀬. 𑀭𑀢𑁆𑀢𑀯𑀸𑀲𑀺𑀦𑀺𑀬𑀸𑀢𑀺 𑀭𑀢𑁆𑀢𑁂𑀲𑀼 𑀭𑀸𑀕𑀸𑀪𑀺𑀪𑀽𑀢𑁂𑀲𑀼 𑀯𑀲𑀢𑀻𑀢𑀺 𑀭𑀢𑁆𑀢𑀯𑀸𑀲𑀺𑀦𑀻, 𑀢𑀲𑁆𑀲𑀸. 𑀦𑀦𑁆𑀤𑀺𑀬𑀸𑀢𑀺 𑀢𑀢𑁆𑀭 𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻𑀲𑀗𑁆𑀔𑀸𑀢𑀸𑀬. 𑀅𑀯𑀝𑁆𑀝𑀦𑀢𑁆𑀣𑀦𑁆𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺 𑀅𑀬𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀯𑀲𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑁆𑀯𑁂 𑀤𑀺𑀲𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 ¶ 𑀯𑁄𑀤𑀸𑀦𑀧𑀓𑁆𑀔𑁂𑀧𑀺 𑀤𑁆𑀯𑁂 𑀤𑀺𑀲𑀸 𑀘𑀢𑀼𑀲𑀘𑁆𑀘𑀬𑁄𑀚𑀦𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀢𑀸𑀬 𑀪𑀽𑀫𑀻𑀢𑀺.

𑁮𑁨. 𑀏𑀯𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀤𑀺𑀲𑀸𑀪𑀽𑀢𑀥𑀫𑁆𑀫𑁂 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀬𑀲𑁆𑀫𑀸 𑀘𑀲𑁆𑀲 𑀤𑀺𑀲𑀸𑀪𑀽𑀢𑀥𑀫𑁆𑀫𑁂𑀲𑀼 𑀯𑀼𑀢𑁆𑀢𑁂𑀲𑀼 𑀤𑀺𑀲𑀸𑀮𑁄𑀘𑀦𑀦𑀬𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀺 𑀬𑁂 𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺 𑀤𑀺𑀲𑀸𑀮𑁄𑀘𑀦𑀮𑀓𑁆𑀔𑀡𑀁 𑀏𑀓𑀤𑁂𑀲𑁂𑀦 𑀧𑀘𑁆𑀘𑀸𑀫𑀲𑀺𑀢𑁆𑀯𑀸 ‘‘𑀢𑁂 𑀤𑀼𑀯𑀺𑀥𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑁂𑀢𑀺 𑀤𑀺𑀲𑀸𑀪𑀽𑀢𑀥𑀫𑁆𑀫𑀸. 𑀤𑀼𑀯𑀺𑀥𑀸𑀢𑀺 ‘‘𑀇𑀫𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀇𑀫𑁂 𑀯𑁄𑀤𑀸𑀦𑀥𑀫𑁆𑀫𑀸’’𑀢𑀺 𑀏𑀯𑀁 𑀤𑀼𑀯𑀺𑀥𑁂𑀦. 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀉𑀧𑀧𑀢𑁆𑀢𑀺𑀢𑁄 𑀧𑀭𑀺𑀢𑁄 𑀇𑀓𑁆𑀔𑀺𑀢𑀩𑁆𑀩𑀸, 𑀥𑀫𑁆𑀫𑀬𑀼𑀢𑁆𑀢𑀺𑀢𑁄 𑀢𑀁𑀢𑀁𑀤𑀺𑀲𑀸𑀪𑀸𑀯𑁂𑀦 𑀧𑁂𑀓𑁆𑀔𑀺𑀢𑀩𑁆𑀩𑀸 𑀆𑀮𑁄𑀘𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀬𑀁 𑀧𑀓𑀸𑀭𑀁 𑀲𑀦𑁆𑀥𑀸𑀬 ‘‘𑀤𑀼𑀯𑀺𑀥𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀺 ‘‘𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀻 𑀘 𑀮𑁄𑀓𑀯𑀺𑀯𑀝𑁆𑀝𑀸𑀦𑀼𑀲𑀸𑀭𑀻 𑀘𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀮𑁄𑀓𑁄 𑀏𑀯 𑀯𑀝𑁆𑀝𑀁 𑀮𑁄𑀓𑀯𑀝𑁆𑀝𑀁. 𑀮𑁄𑀓𑀯𑀝𑁆𑀝𑀪𑀸𑀯𑁂𑀦 𑀅𑀦𑀼𑀲𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀻, 𑀲𑀁𑀓𑀺𑀮𑁂𑀲𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀲𑁆𑀲, 𑀮𑁄𑀓𑀢𑁄 𑀯𑀸 𑀯𑀺𑀯𑀝𑁆𑀝𑀁 𑀮𑁄𑀓𑀯𑀺𑀯𑀝𑁆𑀝𑀁, 𑀦𑀺𑀩𑁆𑀩𑀸𑀦𑀁. 𑀢𑀁 𑀅𑀦𑀼𑀲𑀭𑀢𑀺 𑀅𑀦𑀼𑀮𑁄𑀫𑀦𑀯𑀲𑁂𑀦 𑀕𑀘𑁆𑀙𑀢𑀻𑀢𑀺 𑀮𑁄𑀓𑀯𑀺𑀯𑀝𑁆𑀝𑀸𑀦𑀼𑀲𑀸𑀭𑀻, 𑀯𑁄𑀤𑀸𑀦𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋 ‘‘𑀯𑀝𑁆𑀝𑀁 𑀦𑀸𑀫 𑀲𑀁𑀲𑀸𑀭𑁄, 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑀢𑀁 ¶ 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀢𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀤𑀝𑁆𑀞𑀩𑁆𑀩𑀦𑁆𑀢𑀺 𑀘𑁂? 𑀉𑀧𑀘𑀬𑁂𑀦. 𑀬𑀣𑀸 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀉𑀧𑀘𑀺𑀢𑀪𑀸𑀯𑁂 𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀤𑀲𑀦𑁆𑀦𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑀢𑁄. 𑀢𑁂 𑀓𑀢𑁆𑀣 𑀤𑀝𑁆𑀞𑀩𑁆𑀩𑀸𑀢𑀺 𑀢𑁂 𑀧𑀦 𑀯𑀺𑀧𑀮𑁆𑀮𑀸𑀲𑀸 𑀓𑀢𑁆𑀣 𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀆𑀳 𑁋 ‘‘𑀤𑀲 𑀯𑀢𑁆𑀣𑀼𑀓𑁂 𑀓𑀺𑀮𑁂𑀲𑀧𑀼𑀜𑁆𑀚𑁂’’𑀢𑀺. 𑀤𑀲𑀯𑀺𑀥𑀓𑀸𑀭𑀡𑁂 𑀓𑀺𑀮𑁂𑀲𑀲𑀫𑀽𑀳𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀮𑁂𑀲𑀸𑀧𑀺 𑀓𑀺𑀮𑁂𑀲𑀯𑀢𑁆𑀣𑀼, 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀧𑀺 𑀓𑀺𑀮𑁂𑀲𑀯𑀢𑁆𑀣𑀼. 𑀢𑁂𑀲𑀼 𑀓𑀸𑀭𑀡𑀪𑀸𑀯𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀸 𑀓𑀺𑀮𑁂𑀲𑀸 𑀧𑀭𑀢𑁄 𑀧𑀭𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀓𑀺𑀮𑁂𑀲𑀸𑀧𑀺 𑀓𑀺𑀮𑁂𑀲𑀯𑀢𑁆𑀣𑀼. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀓𑁆𑀔𑀢𑀸 𑀘 𑀥𑀫𑁆𑀫𑀸 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀓𑀺𑀮𑁂𑀲𑀧𑁆𑀧𑀘𑁆𑀘𑀬𑀸𑀧𑀺 𑀓𑀺𑀮𑁂𑀲𑀯𑀢𑁆𑀣𑀽𑀢𑀺 𑀤𑀝𑁆𑀞𑀩𑁆𑀩𑀁.

𑀘𑀢𑁆𑀢𑀸𑀭𑁄 ¶ 𑀆𑀳𑀸𑀭𑀸𑀢𑀺 𑀏𑀢𑁆𑀣 𑀆𑀳𑀸𑀭𑀲𑀻𑀲𑁂𑀦 𑀢𑀩𑁆𑀩𑀺𑀲𑀬𑀸 𑀓𑀺𑀮𑁂𑀲𑀸𑀧𑀺 𑀅𑀥𑀺𑀧𑁆𑀧𑁂𑀢𑀸. 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀞𑀫𑁂 𑀆𑀳𑀸𑀭𑁂’’𑀢𑀺𑀆𑀤𑀺𑀦𑀸 𑀤𑀲𑀯𑀢𑁆𑀣𑀼𑀓𑁂 𑀓𑀺𑀮𑁂𑀲𑀧𑀼𑀜𑁆𑀚𑁂 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀞𑀫𑁂 𑀆𑀳𑀸𑀭𑁂𑀢𑀺 𑀯𑀺𑀲𑀬𑀪𑀽𑀢𑁂 𑀧𑀞𑀫𑁂 𑀆𑀳𑀸𑀭𑁂 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀳𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂𑀢𑀺 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀅𑀧𑁆𑀧𑀳𑀻𑀦𑁂 𑀲𑀢𑀺 𑀧𑀞𑀫𑀁 𑀉𑀧𑀸𑀤𑀸𑀦𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀤𑁆𑀤𑁂𑀲𑁂𑀬𑁂𑀯 𑀓𑀣𑀬𑀺𑀲𑁆𑀲𑀸𑀫.

𑁮𑁩. 𑀇𑀤𑀸𑀦𑀺 𑀤𑀲𑀯𑀢𑁆𑀣𑀼𑀓𑀁 𑀓𑀺𑀮𑁂𑀲𑀧𑀼𑀜𑁆𑀚𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀭𑁄𑀦𑁆𑀢𑁄 ‘‘𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀨𑀲𑁆𑀲𑀸𑀳𑀸𑀭𑀜𑁆𑀘 𑀅𑀧𑀭𑀺𑀚𑀸𑀦𑀦𑁆𑀢𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀬𑀣𑀸𑀓𑁆𑀓𑀫𑀁 𑀓𑀸𑀬𑀯𑁂𑀤𑀦𑀸𑀲𑀼 𑀢𑀺𑀩𑁆𑀩𑁄 𑀙𑀦𑁆𑀤𑀭𑀸𑀕𑁄 𑀳𑁄𑀢𑀺, 𑀇𑀢𑀺 𑀉𑀧𑀓𑁆𑀓𑀺𑀮𑁂𑀲𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀁 𑀯𑀺𑀜𑁆𑀜𑀸𑀡𑀸𑀳𑀸𑀭𑀜𑁆𑀘 𑀅𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑀺𑀘𑀭𑀺𑀢𑁄 𑀢𑁂𑀲𑀼 𑀅𑀢𑁆𑀢𑀲𑀜𑁆𑀜𑀻 𑀦𑀺𑀘𑁆𑀘𑀲𑀜𑁆𑀜𑀻 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀧𑀼𑀭𑀺𑀫𑀓𑀸 𑀤𑁆𑀯𑁂 𑀯𑀺𑀧𑀮𑁆𑀮𑀸𑀲𑀸 𑀧𑀼𑀭𑀺𑀫𑀓𑀸𑀦𑀺 𑀏𑀯 𑀘 𑀤𑁆𑀯𑁂 𑀤𑁆𑀯𑁂𑀉𑀧𑀸𑀤𑀸𑀦𑀬𑁄𑀕𑀕𑀦𑁆𑀣𑀸𑀲𑀯𑀑𑀖𑀲𑀮𑁆𑀮𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀅𑀕𑀢𑀺𑀕𑀫𑀦𑀸𑀦𑀺 𑀢𑀡𑁆𑀳𑀸𑀧𑀥𑀸𑀦𑀢𑁆𑀢𑀸 𑀢𑀡𑁆𑀳𑀸𑀲𑀪𑀸𑀯𑀢𑁆𑀢𑀸 𑀢𑀡𑁆𑀳𑀸𑀯𑀺𑀲𑀬𑀢𑁆𑀢𑀸 𑀘 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸. 𑀧𑀘𑁆𑀙𑀺𑀫𑀓𑀸𑀦𑀺 𑀧𑀦 𑀢𑀸𑀦𑀺 𑀤𑀺𑀝𑁆𑀞𑀺𑀧𑀥𑀸𑀦𑀢𑁆𑀢𑀸 𑀤𑀺𑀝𑁆𑀞𑀺𑀲𑀪𑀸𑀯𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀲𑀬𑀢𑁆𑀢𑀸 𑀘 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁮𑁪. 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄𑀢𑀺 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀓𑀩𑀴𑀻𑀓𑀸𑀭𑁂 ¶ 𑀆𑀳𑀸𑀭𑁂 𑀘𑀢𑀽𑀲𑀼 𑀘 𑀯𑀺𑀧𑀮𑁆𑀮𑀸𑀲𑁂𑀲𑀼 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀤𑀝𑁆𑀞𑀩𑁆𑀩𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀲𑀼𑀪𑀲𑀪𑀸𑀯𑀢𑁆𑀢𑀸 𑀅𑀲𑀼𑀪𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀘. 𑀢𑀣𑀸 𑀨𑀲𑁆𑀲𑀸𑀳𑀸𑀭𑀲𑁆𑀲 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 𑀤𑀼𑀓𑁆𑀔𑀧𑀘𑁆𑀘𑀬𑀢𑁆𑀢𑀸 𑀘 𑀯𑀺𑀲𑁂𑀲𑀢𑁄 𑀢𑀢𑁆𑀣 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄. 𑀢𑀣𑀸 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑁂 𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀲𑀗𑁆𑀔𑀸𑀭𑁂𑀲𑀼 𑀘 𑀅𑀢𑁆𑀢𑀲𑀜𑁆𑀜𑀺𑀦𑁄, 𑀘𑁂𑀢𑀦𑀸𑀧𑀥𑀸𑀦𑀸 𑀘 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀺𑀜𑁆𑀜𑀸𑀡𑁂 𑀆𑀳𑀸𑀭𑁂…𑀧𑁂… 𑀅𑀢𑁆𑀢𑀸𑀢𑀺 𑀯𑀺𑀧𑀮𑁆𑀮𑀸𑀲𑁄’’𑀢𑀺. 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀓𑀸𑀫𑁂 𑀉𑀧𑀸𑀤𑀺𑀬𑀢𑀻𑀢𑀺 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺 ¶ . 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀬𑀁 𑀢𑀣𑀸 𑀓𑀸𑀫𑀸𑀦𑀁 𑀕𑀳𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 ‘‘𑀲𑀻𑀮𑀩𑁆𑀩𑀢𑁂𑀳𑀺 𑀅𑀦𑀸𑀕𑀢𑁂 𑀪𑀯𑀯𑀺𑀲𑀼𑀤𑁆𑀥𑀻𑀢𑀺 𑀢𑀁 𑀦𑀺𑀩𑁆𑀩𑀼𑀢𑀺𑀲𑀼𑀔’’𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺. ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 ‘‘𑀲𑀩𑁆𑀩𑁂 𑀪𑀯𑀸 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀲𑀁𑀲𑀸𑀭𑀸𑀪𑀺𑀦𑀦𑁆𑀤𑀺𑀦𑀺𑀁 𑀪𑀯𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺. ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 ‘‘𑀅𑀲𑀢𑀺 𑀅𑀢𑁆𑀢𑀦𑀺 𑀓𑀲𑁆𑀲𑀺𑀤𑀁 𑀓𑀫𑁆𑀫𑀨𑀮𑀁, 𑀢𑀲𑁆𑀫𑀸 𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀤𑀼𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄’’𑀢𑀺𑀆𑀤𑀺𑀦𑀸.

𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀬𑁄𑀕𑁄𑀢𑀺 𑀬𑁂𑀦 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑀼𑀧𑀸𑀤𑀸𑀦𑁂𑀦 𑀯𑀢𑁆𑀣𑀼𑀓𑀸𑀫𑁂𑀳𑀺 𑀲𑀳 𑀲𑀢𑁆𑀢𑁄 𑀲𑀁𑀬𑁄𑀚𑀻𑀬𑀢𑀺, 𑀅𑀬𑀁 𑀓𑀸𑀫𑀭𑀸𑀕𑁄 ‘‘𑀓𑀸𑀫𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀬𑁄𑀕𑁄𑀢𑀺 𑀬𑀢𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑀗𑁆𑀔𑀸𑀢𑁂𑀦 𑀪𑀯𑀼𑀧𑀸𑀤𑀸𑀦𑁂𑀦 𑀪𑀯𑁂𑀦 𑀲𑀳 𑀲𑀢𑁆𑀢𑁄 𑀲𑀁𑀬𑁄𑀚𑀻𑀬𑀢𑀺, 𑀅𑀬𑀁 𑀪𑀯𑀭𑀸𑀕𑁄 ‘‘𑀪𑀯𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀬𑁄𑀕𑁄𑀢𑀺 𑀬𑀸𑀬 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀆𑀤𑀺𑀲𑀗𑁆𑀔𑀸𑀢𑀸𑀬 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀺𑀅𑀯𑀲𑀺𑀝𑁆𑀞𑀤𑀺𑀝𑁆𑀞𑀺𑀬𑀸 𑀘 𑀲𑀢𑁆𑀢𑁄 𑀤𑀼𑀓𑁆𑀔𑁂𑀦 𑀲𑀳 𑀲𑀁𑀬𑁄𑀚𑀻𑀬𑀢𑀺, 𑀅𑀬𑀁 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 ‘‘𑀤𑀺𑀝𑁆𑀞𑀺𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑁄𑀢𑀺 𑀬𑀸𑀬 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑁂𑀦 𑀘 𑀲𑀳 𑀲𑀢𑁆𑀢𑁄 𑀲𑀁𑀬𑁄𑀚𑀻𑀬𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸 ‘‘𑀅𑀯𑀺𑀚𑁆𑀚𑀸𑀬𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀓𑀸𑀫𑀬𑁄𑀕𑀸𑀤𑀬𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀻𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀞𑀫𑁂 𑀬𑁄𑀕𑁂 𑀞𑀺𑀢𑁄 𑀅𑀪𑀺𑀚𑁆𑀛𑀸𑀬 𑀓𑀸𑀬𑀁 𑀕𑀦𑁆𑀣𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀬 𑀓𑀸𑀬𑀁 𑀕𑀦𑁆𑀣𑀢𑀻𑀢𑀺 𑀧𑀭𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸𑀬 𑀅𑀪𑀺𑀚𑁆𑀛𑀸𑀬 𑀦𑀸𑀫𑀓𑀸𑀬𑀁 𑀕𑀦𑁆𑀣𑀢𑀺 𑀖𑀝𑁆𑀝𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀪𑀯𑀧𑀢𑁆𑀣𑀦𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀪𑀯𑀤𑀺𑀝𑁆𑀞𑀺𑀪𑀯𑀭𑀸𑀕𑀯𑀲𑁂𑀦 𑀆𑀖𑀸𑀢𑀯𑀢𑁆𑀣𑀽𑀲𑀼 𑀲𑀢𑁆𑀢𑀸 𑀘𑀺𑀢𑁆𑀢𑀸𑀦𑀺 𑀧𑀤𑀽𑀲𑁂𑀦𑁆𑀢𑀻𑀢𑀺 𑀆𑀳 𑁋 ‘‘𑀤𑀼𑀢𑀺𑀬𑁂 𑀬𑁄𑀕𑁂 𑀞𑀺𑀢𑁄 𑀩𑁆𑀬𑀸𑀧𑀸𑀤𑁂𑀦 𑀓𑀸𑀬𑀁 𑀕𑀦𑁆𑀣𑀢𑀻’’𑀢𑀺. 𑀢𑀣𑀸 𑀤𑀺𑀝𑁆𑀞𑀺𑀯𑀲𑁂𑀦 𑀅𑀯𑀺𑀚𑁆𑀚𑀸𑀯𑀲𑁂𑀦 𑀘 𑀲𑀻𑀮𑀩𑁆𑀩𑀢𑁂𑀳𑀺 𑀲𑀼𑀚𑁆𑀛𑀢𑀺, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀘 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀆𑀳 𑁋 ‘‘𑀢𑀢𑀺𑀬𑁂…𑀧𑁂… 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁂𑀦 𑀓𑀸𑀬𑀁 𑀕𑀦𑁆𑀣𑀢𑀻’’𑀢𑀺.

𑀢𑀲𑁆𑀲𑀸𑀢𑀺 ¶ 𑀢𑀲𑁆𑀲 𑀅𑀪𑀺𑀚𑁆𑀛𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀏𑀯𑀁 𑀕𑀦𑁆𑀣𑀺𑀢𑀸𑀢𑀺 𑀏𑀯𑀁 𑀅𑀪𑀺𑀚𑁆𑀛𑀸𑀬𑀦𑀸𑀤𑀺𑀯𑀲𑁂𑀦 𑀦𑀸𑀫𑀓𑀸𑀬𑀁 𑀕𑀦𑁆𑀣𑀺𑀢𑁆𑀯𑀸 𑀞𑀺𑀢𑀸. 𑀆𑀲𑀯𑀦𑁆𑀢𑀻𑀢𑀺 ¶ 𑀆𑀲𑀯𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀓𑀼𑀢𑁄 𑀘 𑀯𑀼𑀘𑁆𑀘𑀢𑀺 𑀆𑀲𑀯𑀦𑁆𑀢𑀻𑀢𑀺 𑀓𑀼𑀢𑁄 𑀧𑀦 𑀳𑁂𑀢𑀼𑀢𑁄 𑀢𑁂 𑀓𑀺𑀮𑁂𑀲𑀸 𑀆𑀲𑀯𑀦𑁆𑀢𑀻𑀢𑀺 𑀆𑀲𑀯𑀳𑁂𑀢𑀼𑀁 𑀧𑀼𑀘𑁆𑀙𑀢𑀺. 𑀬𑀲𑁆𑀫𑀸 𑀧𑀦 𑀓𑀺𑀮𑁂𑀲𑀸 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑁆𑀯𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀸, 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀏𑀯 𑀯𑀸 𑀆𑀲𑀯𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀦𑀼𑀲𑀬𑀢𑁄 𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀓𑀸𑀫𑀸𑀲𑀯𑁄𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀲𑀺𑀤𑁆𑀥𑁂𑀦 𑀓𑀸𑀫𑀭𑀸𑀕𑀲𑀪𑀸𑀯𑀢𑁆𑀢𑀸 𑀓𑀸𑀫𑀸𑀲𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀓𑀢𑁆𑀣𑀘𑀺𑀤𑁂𑀯 𑀯𑀺𑀲𑀬𑁂 𑀤𑁄𑀫𑀦𑀲𑁆𑀲𑀺𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑁂 𑀯𑀺𑀲𑀬𑁂 𑀢𑀩𑁆𑀩𑀺𑀲𑀬𑀩𑀳𑀼𑀮𑁂 𑀘 𑀪𑀯𑁂 𑀧𑀢𑁆𑀣𑁂𑀢𑀻𑀢𑀺 𑀆𑀳 𑁋 ‘‘𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀪𑀯𑀸𑀲𑀯𑁄’’𑀢𑀺. 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀤𑀺𑀝𑁆𑀞𑀸𑀲𑀯𑁄𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀲𑀺𑀤𑁆𑀥𑁂𑀦 𑀢𑀁𑀲𑀪𑀸𑀯𑀢𑁆𑀢𑀸 𑀅𑀧𑀭𑀸𑀧𑀭𑀁 𑀯𑀸 𑀤𑀺𑀝𑁆𑀞𑀺𑀬𑁄 𑀕𑀦𑁆𑀣𑁂𑀦𑁆𑀢𑀲𑁆𑀲 𑀤𑀺𑀝𑁆𑀞𑀸𑀲𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁄 𑀅𑀦𑁂𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑁂𑀲𑀁 𑀯𑀸 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀯𑀺𑀚𑁆𑀚𑀸𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀲𑀺𑀤𑁆𑀥𑁂𑀦 𑀢𑀲𑁆𑀲 𑀳𑁂𑀢𑀼𑀪𑀽𑀢𑁄 𑀅𑀯𑀺𑀚𑁆𑀚𑀸𑀲𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺.

𑀬𑀲𑁆𑀫𑀸 𑀧𑀦 𑀆𑀲𑀯𑀸 𑀏𑀯 𑀧𑀭𑀺𑀩𑀼𑀤𑁆𑀥𑀸 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀸𑀤𑁂𑀦𑁆𑀢𑀻𑀢𑀺 ‘‘𑀑𑀖𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀲 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸’’𑀢𑀺𑀆𑀤𑀺.

𑀅𑀦𑀼𑀲𑀬𑀲𑀳𑀕𑀢𑀸𑀢𑀺 𑀅𑀦𑀼𑀲𑀬𑀪𑀸𑀯𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀸 𑀧𑀯𑀢𑁆𑀢𑀸, 𑀅𑀦𑀼𑀲𑀬𑀪𑀽𑀢𑀸 𑀯𑀸. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀦𑀼𑀧𑀯𑀺𑀝𑁆𑀞𑀸𑀢𑀺 𑀑𑀕𑀸𑀴𑁆𑀳𑀸. 𑀳𑀤𑀬𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑀁 𑀳𑀤𑀬𑀁 𑀆𑀳𑀦𑁆𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁫) ‘‘𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 𑀳𑀤𑀬’’𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 𑀲𑀮𑁆𑀮𑀸𑀢𑀺 𑀬𑀲𑁆𑀫𑀸 𑀅𑀚𑁆𑀛𑀸𑀲𑀬𑀁 𑀅𑀦𑀼𑀧𑀯𑀺𑀝𑁆𑀞𑀸 𑀳𑀤𑀬𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀮𑁆𑀮𑀸’’𑀢𑀺. 𑀧𑀻𑀴𑀸𑀚𑀦𑀦𑀁 𑀤𑀼𑀭𑀼𑀤𑁆𑀥𑀭𑀡𑀢𑀸 𑀘 𑀲𑀮𑁆𑀮𑀝𑁆𑀞𑁄. ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀕𑀳𑀡𑀫𑀼𑀔𑁂𑀦 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀕𑀳𑀡𑀁 𑀳𑁄𑀢𑀻𑀢𑀺 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬𑀧𑀺 𑀫𑀸𑀦𑀁 𑀚𑀧𑁆𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀤𑀺𑀝𑁆𑀞𑁄𑀖𑁂𑀦 𑀫𑀸𑀦𑀲𑀮𑁆𑀮𑁄’’𑀢𑀺.

𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀅𑀜𑁆𑀜𑀲𑁆𑀲 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀲𑀫𑀦𑁆𑀢𑀢𑁄 𑀕𑀳𑀺𑀢𑀁. 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀲𑀡𑁆𑀞𑀳𑀢𑀻𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀬 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀘𑀢𑀽𑀲𑀼 ¶ 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀳𑀢𑀺. 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀭𑀽𑀧𑁂 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀽’’𑀢𑀺. 𑀦𑀦𑁆𑀤𑀽𑀧𑀲𑁂𑀘𑀦𑁂𑀦𑀸𑀢𑀺 𑀮𑁄𑀪𑀲𑀳𑀕𑀢𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸 𑀦𑀦𑁆𑀤𑀻 𑀲𑀳𑀚𑀸𑀢𑀓𑁄𑀝𑀺𑀬𑀸 ¶ , 𑀇𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀉𑀧𑀲𑁂𑀘𑀦𑀦𑁆𑀢𑀺 𑀦𑀦𑁆𑀤𑀽𑀧𑀲𑁂𑀘𑀦𑀁, 𑀢𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦. 𑀓𑁂𑀦 𑀧𑀦 𑀢𑀁 𑀦𑀦𑁆𑀤𑀽𑀧𑀲𑁂𑀘𑀦𑀦𑁆𑀢𑀺 𑀆𑀳 𑁋 ‘‘𑀭𑀸𑀕𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺.

𑀢𑀢𑁆𑀣 𑀭𑀸𑀕𑀲𑀮𑁆𑀮𑁂𑀦𑀸𑀢𑀺 𑀭𑀸𑀕𑀲𑀮𑁆𑀮𑁂𑀦 𑀳𑁂𑀢𑀼𑀪𑀽𑀢𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀢𑀺 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀘 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀺𑀢𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑀲𑁆𑀫𑀺𑀜𑁆𑀳𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀭𑀽𑀧𑀓𑁆𑀔𑀦𑁆𑀥𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀺. 𑀤𑁄𑀲𑀲𑀮𑁆𑀮𑁂𑀦𑀸𑀢𑀺 𑀲𑀳𑀚𑀸𑀢𑁂𑀦 𑀤𑁄𑀲𑀲𑀮𑁆𑀮𑁂𑀦. 𑀬𑀤𑀸 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀦𑀦𑁆𑀤𑀺𑀬𑀸 𑀉𑀧𑀲𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸𑀧𑀺 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀯. 𑀬𑀤𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂𑀦 𑀤𑁄𑀲𑀲𑀮𑁆𑀮𑁂𑀦 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀸 𑀲𑀳𑀚𑀸𑀢𑀓𑁄𑀝𑀺𑀬𑀸, 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀯𑀸 𑀦𑀦𑁆𑀤𑀺𑀬𑀸 𑀉𑀧𑀲𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸 𑀧𑀦 𑀢𑀺𑀲𑁆𑀲𑁄𑀧𑀺 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀪𑀸𑀯𑀢𑁄. 𑀢𑀢𑁆𑀣 𑀧𑀞𑀫𑀦𑀬𑁄 𑀤𑁄𑀫𑀦𑀲𑁆𑀲𑀸𑀭𑀫𑁆𑀫𑀡𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄. 𑀤𑀼𑀢𑀺𑀬𑁄 𑀲𑀩𑁆𑀩𑀯𑁂𑀤𑀦𑀸𑀭𑀫𑁆𑀫𑀡𑀲𑁆𑀲 𑀯𑀲𑁂𑀦𑀸𑀧𑀺 𑀤𑀝𑁆𑀞𑀩𑁆𑀩𑀁.

𑀫𑀸𑀦𑀲𑀮𑁆𑀮𑁂𑀦𑀸𑀢𑀺 𑀫𑀸𑀦𑀲𑀮𑁆𑀮𑁂𑀦 𑀲𑀳𑀚𑀸𑀢𑁂𑀦, 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦 𑀯𑀸. 𑀫𑁄𑀳𑀲𑀮𑁆𑀮𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀅𑀦𑀸𑀤𑀺𑀫𑀢𑀺𑀲𑀁𑀲𑀸𑀭𑁂 𑀇𑀢𑁆𑀣𑀺𑀧𑀼𑀭𑀺𑀲𑀸 𑀭𑀽𑀧𑀸𑀪𑀺𑀭𑀸𑀫𑀸𑀢𑀺 𑀭𑀸𑀕𑀲𑀮𑁆𑀮𑀯𑀲𑁂𑀦 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀬𑁄𑀚𑀺𑀢𑀸. 𑀲𑀩𑁆𑀩𑀸𑀬𑀧𑀺 𑀯𑁂𑀤𑀦𑀸𑀬 𑀤𑀼𑀓𑁆𑀔𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄 𑀤𑀼𑀓𑁆𑀔𑀸𑀬 𑀘 𑀤𑁄𑀲𑁄 𑀅𑀦𑀼𑀲𑁂𑀢𑀻𑀢𑀺 𑀤𑁄𑀲𑀲𑀮𑁆𑀮𑀯𑀲𑁂𑀦 𑀤𑀼𑀢𑀺𑀬𑀸, 𑀲𑀜𑁆𑀜𑀸𑀯𑀲𑁂𑀦 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀜𑁆𑀜𑀦𑀸 𑀳𑁄𑀢𑀻𑀢𑀺 𑀫𑀸𑀦𑀲𑀮𑁆𑀮𑀯𑀲𑁂𑀦 𑀢𑀢𑀺𑀬𑀸, 𑀲𑀗𑁆𑀔𑀸𑀭𑁂𑀲𑀼 𑀲𑀫𑀽𑀳𑀖𑀦𑀁 𑀤𑀼𑀩𑁆𑀩𑀺𑀦𑀺𑀩𑁆𑀪𑁄𑀕𑀦𑁆𑀢𑀺 𑀫𑁄𑀳𑀲𑀮𑁆𑀮𑀯𑀲𑁂𑀦 𑀘𑀢𑀼𑀢𑁆𑀣𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀉𑀧𑀢𑁆𑀣𑀤𑁆𑀥𑀦𑁆𑀢𑀺 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀪𑀽𑀢𑀸𑀳𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀢𑀜𑁆𑀘 𑀓𑀫𑁆𑀫𑀦𑁆𑀢𑀺 𑀬𑀁 ‘‘𑀘𑁂𑀢𑀦𑀸 𑀘𑁂𑀢𑀲𑀺𑀓’’𑀦𑁆𑀢𑀺 𑀧𑀼𑀩𑁆𑀩𑁂 (𑀦𑁂𑀢𑁆𑀢𑀺. 𑁮𑁨) 𑀯𑀼𑀢𑁆𑀢𑀁. 𑀇𑀫𑁂 𑀘 𑀓𑀺𑀮𑁂𑀲𑀸𑀢𑀺 𑀇𑀫𑁂 𑀘 𑀤𑀲𑀯𑀢𑁆𑀣𑀼𑀓𑀸 𑀓𑀺𑀮𑁂𑀲𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁮𑁫. 𑀇𑀤𑀸𑀦𑀺 ¶ 𑀆𑀳𑀸𑀭𑀸𑀤𑀬𑁄 𑀦𑀬𑀸𑀦𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀺𑀲𑀸𑀪𑀸𑀯𑁂𑀦 𑀯𑀯𑀢𑁆𑀣𑀧𑁂𑀢𑀼𑀁 ‘‘𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀼𑀦 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺𑀆𑀤𑀺 𑀆𑀳𑀸𑀭𑀸𑀤𑀻𑀲𑀼𑀬𑁂𑀯 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀦𑁆𑀢𑀺 𑀏𑀓𑀤𑁂𑀲𑁂𑀲𑀼 𑀲𑀫𑀼𑀤𑀸𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀲𑀫𑀼𑀤𑀸𑀬𑁂𑀲𑀼 𑀳𑀺 𑀧𑀯𑀢𑁆𑀢𑀸 𑀲𑀫𑀜𑁆𑀜𑀸 𑀅𑀯𑀬𑀯𑁂𑀲𑀼𑀧𑀺 𑀤𑀺𑀲𑁆𑀲𑀢𑀺 ¶ , ‘‘𑀬𑀣𑀸 𑀧𑀝𑁄 𑀤𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺 𑀘. 𑀏𑀓𑁄 𑀅𑀢𑁆𑀣𑁄𑀢𑀺 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀏𑀢𑁆𑀣 𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑁄𑀧𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀲𑀳𑀺𑀧𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀯𑀢𑁆𑀣𑀼𑀓𑀸 𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀢𑀡𑁆𑀳𑀸 𑀘 𑀭𑀸𑀕𑀘𑀭𑀺𑀢𑀁 𑀧𑀼𑀕𑁆𑀕𑀮𑀁 𑀔𑀺𑀧𑁆𑀧𑀁 𑀤𑀽𑀲𑁂𑀢𑀻𑀢𑀺 𑀆𑀳 𑁋 ‘‘𑀇𑀫𑁂 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺. 𑀬𑀣𑀸 𑀘 𑀧𑀞𑀫𑀤𑀺𑀲𑀸𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸 𑀭𑀸𑀕𑀘𑀭𑀺𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀏𑀯𑀁 𑀤𑀼𑀢𑀺𑀬𑀤𑀺𑀲𑀸𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸 𑀤𑁄𑀲𑀘𑀭𑀺𑀢𑀲𑁆𑀲. 𑀢𑀢𑀺𑀬𑀘𑀢𑀼𑀢𑁆𑀣𑀤𑀺𑀲𑀸𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸 𑀬𑀣𑀸𑀓𑁆𑀓𑀫𑀁 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀫𑀦𑁆𑀤𑀲𑁆𑀲 𑀢𑀺𑀓𑁆𑀔𑀲𑁆𑀲 𑀘 𑀉𑀧𑀓𑁆𑀓𑀺𑀮𑁂𑀲𑀸 𑀯𑀼𑀢𑁆𑀢𑀸. 𑀢𑁂𑀲𑀁 𑀉𑀧𑀓𑁆𑀓𑀺𑀮𑁂𑀲𑀪𑀸𑀯𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀆𑀳𑀸𑀭𑀯𑀺𑀧𑀮𑁆𑀮𑀸𑀲𑀸𑀤𑀬𑁄 𑀬𑀤𑀺𑀧𑀺 𑀲𑀩𑁆𑀩𑁂𑀳𑀺 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀧𑀼𑀩𑁆𑀩𑀪𑀸𑀕𑁂 𑀬𑀣𑀸𑀭𑀳𑀁 𑀧𑀭𑀺𑀜𑁆𑀜𑁂𑀬𑁆𑀬𑀸 𑀧𑀳𑀸𑀢𑀩𑁆𑀩𑀸 𑀘. 𑀬𑀲𑁆𑀲 𑀧𑀦 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀧𑀼𑀭𑀺𑀫𑁂 𑀆𑀳𑀸𑀭𑀤𑁆𑀯𑀬𑁂 𑀤𑀼𑀓𑁆𑀔𑀸𑀓𑀸𑀭𑁂𑀦 𑀩𑀳𑀼𑀮𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀯𑀲𑁂𑀦 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀏𑀯𑀜𑁆𑀘𑁂𑀢𑀁, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀅𑀭𑀺𑀬𑀫𑀕𑁆𑀕𑀸𑀦𑀁 𑀯𑀺𑀬 𑀧𑀳𑀸𑀢𑀩𑁆𑀩𑁂𑀲𑀼 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑁂𑀲𑀼 𑀓𑁄𑀘𑀺 𑀦𑀺𑀬𑀫𑁄 𑀲𑀫𑁆𑀪𑀯𑀢𑀺. 𑀇𑀢𑀺 𑀲𑀩𑁆𑀩𑁂 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄 𑀥𑀫𑁆𑀫𑀸 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀮𑁄𑀓𑀸 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀻𑀢𑀺 𑀦𑀺𑀕𑀫𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀇𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀩𑁆𑀩𑁂 𑀆𑀳𑀸𑀭𑀸𑀤𑀬𑁄 𑀮𑁄𑀓𑀲𑀗𑁆𑀔𑀸𑀢𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄 𑀥𑀫𑁆𑀫𑀸 𑀢𑁂 𑀮𑁄𑀓𑀪𑀽𑀢𑀸 𑀯𑀝𑁆𑀝𑀢𑁄 𑀦𑀺𑀬𑁆𑀬𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀻𑀢𑀺.

𑁮𑁬. 𑀏𑀯𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀺𑀲𑀸𑀪𑀽𑀢𑀥𑀫𑁆𑀫𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀯𑁄𑀤𑀸𑀦𑀧𑀓𑁆𑀔𑁂 𑀤𑀺𑀲𑀸𑀪𑀽𑀢𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀆𑀦𑁂𑀜𑁆𑀚𑀯𑀺𑀳𑀸𑀭𑁄𑀢𑀺 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸. 𑀫𑀸𑀦𑀧𑁆𑀧𑀳𑀸𑀦𑀆𑀮𑀬𑀲𑀫𑀼𑀕𑁆𑀖𑀸𑀢𑀅𑀯𑀺𑀚𑁆𑀚𑀸𑀧𑀳𑀸𑀦𑀪𑀯𑀽𑀧𑀲𑀫𑀸 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺. 𑀙𑀦𑁆𑀤𑀲𑀫𑀸𑀥𑀺𑀪𑀸𑀯𑀦𑀸𑀤𑀬𑁄 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀢𑀧𑀲𑀗𑁆𑀔𑀸𑀢𑁄 𑀧𑀼𑀜𑁆𑀜𑀥𑀫𑁆𑀫𑁄 ¶ 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀞𑀫𑀸 𑀧𑀝𑀺𑀧𑀤𑀸𑀢𑀺𑀆𑀤𑀺 𑀧𑀝𑀺𑀧𑀤𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀅𑀪𑁂𑀤𑀲𑀦𑁆𑀤𑀲𑁆𑀲𑀦𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀦𑁆𑀢𑀺? 𑀤𑀲𑀯𑀢𑁆𑀣𑀼𑀓𑀲𑁆𑀲 𑀓𑀺𑀮𑁂𑀲𑀧𑀼𑀜𑁆𑀚𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀝𑀺𑀧𑀤𑀸𑀤𑀺𑀤𑀲𑀓𑀦𑀺𑀤𑁆𑀤𑁂𑀲𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 ¶ (𑀦𑁂𑀢𑁆𑀢𑀺. 𑁮𑁭). 𑀓𑀺𑀜𑁆𑀘𑀸𑀧𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 ‘‘𑀇𑀤𑀁 𑀦𑀸𑀫 𑀲𑀢𑀺𑀧𑀝𑁆𑀞𑀸𑀦𑀁 𑀇𑀫𑀸𑀬 𑀏𑀯 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀻’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀧𑀞𑀫𑀸𑀬 𑀧𑀝𑀺𑀧𑀤𑀸𑀬 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁 𑁋 ‘‘𑀧𑀞𑀫𑀸 𑀧𑀝𑀺𑀧𑀤𑀸, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀆𑀳𑀸𑀭𑀯𑀺𑀧𑀮𑁆𑀮𑀸𑀲𑀸𑀤𑀻𑀦𑀁 𑀯𑀺𑀬 𑀧𑀝𑀺𑀧𑀤𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀲𑀢𑀺𑀧𑀝𑁆𑀞𑀸𑀦𑀸𑀦𑀺𑀬𑁂𑀯 𑀳𑀺 𑀢𑀣𑀸 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸𑀦𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀺𑀦𑀸𑀫𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 ‘‘𑀧𑀞𑀫𑁂 𑀆𑀳𑀸𑀭𑁂 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄’’𑀢𑀺𑀆𑀤𑀺𑀦𑀸 𑀅𑀥𑀺𑀓𑀭𑀡𑀪𑁂𑀤𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀅𑀥𑀺𑀓𑀭𑀡𑀪𑁂𑀤𑀁 𑀅𑀓𑀢𑁆𑀯𑀸 ‘‘𑀧𑀞𑀫𑀸 𑀧𑀝𑀺𑀧𑀤𑀸, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀓𑀤𑀸𑀘𑀺𑀤𑁂𑀯 𑀉𑀧𑁆𑀧𑀚𑁆𑀚𑀦𑀓𑀁 𑀅𑀘𑁆𑀙𑀭𑀺𑀬𑀁, 𑀅𑀘𑁆𑀙𑀭𑀸𑀬𑁄𑀕𑁆𑀕𑀁 𑀅𑀘𑁆𑀙𑀭𑀺𑀬𑀦𑁆𑀢𑀺 𑀧𑁄𑀭𑀸𑀡𑀸. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀉𑀪𑀬𑀫𑁆𑀧𑁂𑀢𑀁 𑀯𑀺𑀫𑁆𑀳𑀬𑀸𑀯𑀳𑀲𑁆𑀲 𑀅𑀥𑀺𑀯𑀘𑀦𑀁. 𑀦 𑀳𑀺 𑀫𑀸𑀦𑀧𑁆𑀧𑀳𑀸𑀦𑀸𑀤𑀺𑀢𑁄 𑀅𑀜𑁆𑀜𑀁 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀺𑀫𑁆𑀳𑀦𑀻𑀬𑀜𑁆𑀘 𑀉𑀧𑀮𑀩𑁆𑀪𑀢𑀻𑀢𑀺 𑀅𑀥𑀺𑀢𑀺𑀝𑁆𑀞𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁. 𑀲𑀘𑁆𑀘𑀜𑁆𑀘 𑀢𑀁 𑀅𑀥𑀺𑀝𑁆𑀞𑀸𑀦𑀜𑁆𑀘, 𑀲𑀘𑁆𑀘𑀲𑁆𑀲 𑀯𑀸 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀯𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀸𑀥𑀺 𑀏𑀯 𑀪𑀸𑀯𑁂𑀢𑀩𑁆𑀩𑀢𑀸𑀬 𑀲𑀫𑀸𑀥𑀺𑀪𑀸𑀯𑀦𑀸. 𑀲𑀼𑀔𑀁 𑀪𑀚𑀢𑀻𑀢𑀺 𑀲𑀼𑀔𑀪𑀸𑀕𑀺𑀬𑁄, 𑀲𑀼𑀔𑀪𑀸𑀕𑀲𑁆𑀲 𑀯𑀸 𑀲𑀼𑀔𑀓𑁄𑀝𑁆𑀞𑀸𑀲𑀲𑁆𑀲 𑀳𑀺𑀢𑁄𑀢𑀺 𑀲𑀼𑀔𑀪𑀸𑀕𑀺𑀬𑁄. 𑀏𑀓𑀲𑁆𑀲𑀧𑀺 𑀲𑀢𑁆𑀢𑀲𑁆𑀲 𑀅𑀲𑀼𑀪𑀪𑀸𑀯𑀦𑀸𑀤𑀬𑁄 𑀯𑀺𑀬 𑀏𑀓𑀤𑁂𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀧𑀫𑀸𑀡𑀦𑁆𑀢𑀺 𑀅𑀧𑁆𑀧𑀫𑀜𑁆𑀜𑀸.

𑀧𑀞𑀫𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀧𑀞𑀫𑀸𑀬 𑀧𑀝𑀺𑀧𑀤𑀸𑀬 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁄 𑀧𑀞𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀳𑀺 𑀅𑀭𑀺𑀬𑀫𑀕𑁆𑀕𑁂 𑀪𑀸𑀯𑀺𑀢𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀪𑀸𑀯𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 ¶ 𑀓𑀸𑀫𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 ‘‘𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀓𑀸𑀫𑀧𑀝𑀺𑀧𑀓𑁆𑀔𑀁 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀧𑁆𑀧𑀻𑀢𑀺𑀓𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀪𑀺𑀧𑁆𑀧𑀫𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀉𑀓𑁆𑀓𑀁𑀲𑀕𑀢𑀲𑀼𑀔𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀅𑀦𑀺𑀘𑁆𑀘𑀯𑀺𑀭𑀸𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑀗𑁆𑀔𑀸𑀭𑁂𑀲𑀼 𑀉𑀧𑁂𑀓𑁆𑀔𑀓𑀁 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺.

𑀬𑀲𑁆𑀫𑀸 ¶ 𑀧𑀦 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀁 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀦𑀁, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀤𑀺𑀤𑀽𑀭𑀻𑀪𑀸𑀯𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁, 𑀢𑀢𑀺𑀬𑀚𑁆𑀛𑀸𑀦𑀁 𑀧𑀻𑀢𑀺𑀯𑀺𑀭𑀸𑀕𑁂𑀦 𑀲𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀅𑀭𑀺𑀬𑀯𑀺𑀳𑀸𑀭𑀸𑀦𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀦𑀁 𑀯𑀺𑀲𑁂𑀲𑀢𑁄 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀞𑀫𑀁 𑀛𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀧𑀞𑀫𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀺 𑀬𑁄 𑀬𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀲𑁄 𑀢𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁭. 𑀇𑀤𑀸𑀦𑀺 𑀧𑀝𑀺𑀧𑀤𑀸𑀤𑀬𑁄 𑀯𑁄𑀤𑀸𑀦𑀧𑀓𑁆𑀔𑁂 𑀤𑀺𑀲𑀸𑀪𑀸𑀯𑁂𑀦 𑀯𑀯𑀢𑁆𑀣𑀧𑁂𑀢𑀼𑀁 ‘‘𑀢𑀢𑁆𑀣 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀧𑀼𑀦 ‘‘𑀧𑀞𑀫𑀸 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀸𑀤𑀻𑀲𑀼 𑀬𑁂𑀦 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀁, 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀤𑀺𑀧𑀺 𑀢𑀻𑀲𑀼 𑀯𑀺𑀫𑁄𑀓𑁆𑀔𑀫𑀼𑀔𑁂𑀲𑀼 ‘‘𑀇𑀤𑀁 𑀦𑀸𑀫 𑀯𑀺𑀫𑁄𑀓𑁆𑀔𑀫𑀼𑀔𑀁 𑀇𑀫𑀸𑀬 𑀏𑀯 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀻’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀬𑁂𑀲𑀁 𑀧𑀦 𑀧𑀼𑀕𑁆𑀕𑀮𑀸𑀦𑀁 𑀧𑀼𑀭𑀺𑀫𑀸𑀳𑀺 𑀤𑁆𑀯𑀻𑀳𑀺 𑀧𑀝𑀺𑀧𑀤𑀸𑀳𑀺 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁄. 𑀢𑀣𑀸 𑀬𑀲𑁆𑀲 𑀢𑀢𑀺𑀬𑀸𑀬 𑀧𑀝𑀺𑀧𑀤𑀸𑀬 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦, 𑀬𑀲𑁆𑀲 𑀘 𑀘𑀢𑀼𑀢𑁆𑀣𑀸𑀬 𑀧𑀝𑀺𑀧𑀤𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁄, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀅𑀬𑀁 𑀧𑀝𑀺𑀧𑀤𑀸𑀯𑀺𑀫𑁄𑀓𑁆𑀔𑀫𑀼𑀔𑀲𑀁𑀲𑀦𑁆𑀤𑀦𑀸. 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑀲𑀁𑀲𑀦𑁆𑀤𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢𑀦𑁆𑀢𑀺 𑀢𑁂𑀲𑀁 𑀅𑀲𑀦𑁆𑀢𑀸𑀲𑀦𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀺𑀲𑁂𑀲𑀬𑁄𑀕𑁂𑀦 𑀲𑀻𑀳𑀸𑀦𑀁 𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀯𑀺𑀓𑁆𑀓𑀻𑀴𑀺𑀢𑀁 𑀯𑀺𑀳𑀭𑀡𑀁. 𑀬𑀤𑀺𑀤𑀁 𑀆𑀳𑀸𑀭𑀸𑀤𑀺𑀓𑀺𑀮𑁂𑀲𑀯𑀢𑁆𑀣𑀼𑀲𑀫𑀢𑀺𑀓𑁆𑀓𑀫𑀦𑀫𑀼𑀔𑁂𑀦 𑀲𑀧𑀭𑀲𑀦𑁆𑀢𑀸𑀦𑁂 𑀧𑀝𑀺𑀧𑀤𑀸𑀤𑀺𑀲𑀫𑁆𑀧𑀸𑀤𑀦𑀸. 𑀇𑀤𑀸𑀦𑀺 𑀆𑀳𑀸𑀭𑀸𑀤𑀻𑀦𑀁 𑀧𑀝𑀺𑀧𑀤𑀸𑀤𑀻𑀳𑀺 𑀬𑁂𑀦 𑀲𑀫𑀢𑀺𑀓𑁆𑀓𑀫𑀦𑀁, 𑀢𑀁 𑀦𑁂𑀲𑀁 𑀧𑀝𑀺𑀧𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 ¶ 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀁 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀳𑀸𑀢𑀩𑁆𑀩𑀪𑀸𑀯𑁄 𑀧𑀳𑀸𑀬𑀓𑀪𑀸𑀯𑁄 𑀘 𑀆𑀳𑀸𑀭𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀦𑀜𑁆𑀘𑁂𑀢𑁆𑀣 𑀧𑀳𑀸𑀢𑀩𑁆𑀩𑀪𑀸𑀯𑁄 𑀢𑀧𑁆𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀯𑀺𑀓𑁆𑀓𑀻𑀴𑀺𑀢𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘𑀸’’𑀢𑀺𑀆𑀤𑀺 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢𑀦𑁆𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀯𑀺𑀓𑁆𑀓𑀻𑀴𑀺𑀢𑀁 𑀦𑀸𑀫 𑀪𑀸𑀯𑁂𑀢𑀩𑁆𑀩𑀸𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀪𑀸𑀯𑀦𑀸, 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀦𑀁 𑀨𑀮𑀦𑀺𑀩𑁆𑀩𑀸𑀦𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘. 𑀢𑀣𑀸 𑀧𑀳𑀸𑀢𑀩𑁆𑀩𑀲𑁆𑀲 𑀤𑀲𑀯𑀢𑁆𑀣𑀼𑀓𑀲𑁆𑀲 𑀓𑀺𑀮𑁂𑀲𑀧𑀼𑀜𑁆𑀚𑀲𑁆𑀲 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀳𑀸𑀦𑀁 𑀩𑁆𑀬𑀦𑁆𑀢𑀻𑀓𑀺𑀭𑀺𑀬𑀸 𑀅𑀦𑀯𑀲𑁂𑀲𑀦𑀦𑁆𑀢𑀺. 𑀇𑀤𑀸𑀦𑀺 𑀢𑀁 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀯𑀺𑀓𑁆𑀓𑀻𑀴𑀺𑀢𑀁 𑀯𑀺𑀧𑀭𑀺𑀬𑀸𑀲𑀸𑀦𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀆𑀳.

𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀯𑀢𑁆𑀢𑀦𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘. 𑀯𑀺𑀧𑀭𑀺𑀬𑀸𑀲𑀸𑀦𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀸𑀦𑀁 𑀅𑀧𑀯𑀢𑁆𑀢𑀦𑀁 𑀧𑀳𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀁. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀫𑁆𑀫𑀕𑁄𑀘𑀭𑁄𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑁂𑀢𑁆𑀣 𑀲𑀤𑁆𑀥𑀫𑁆𑀫𑀲𑁆𑀲 ¶ 𑀕𑁄𑀘𑀭𑀪𑀽𑀢𑀸𑀦𑀺 𑀧𑀯𑀢𑁆𑀢𑀺𑀳𑁂𑀢𑀽𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀺𑀬𑀸𑀲𑀸 𑀓𑀺𑀮𑁂𑀲𑀕𑁄𑀘𑀭𑁄𑀢𑀺 𑀯𑀺𑀧𑀮𑁆𑀮𑀸𑀲𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀽𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺 𑀬𑀸𑀬𑀁 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸’’𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁, ‘‘𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑁂𑀧𑀺 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀢𑀡𑁆𑀳𑀸𑀘𑀭𑀺𑀢𑀸𑀤𑀻𑀦𑀁 𑀉𑀧𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀫𑀼𑀔𑁂𑀦 𑀦𑀺𑀤𑁆𑀥𑀸𑀭𑀡𑀸, 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺 𑀦𑀸𑀫.

𑁮𑁮. 𑀇𑀤𑀸𑀦𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑀯𑀲𑁂𑀦 𑀢𑀺𑀧𑀼𑀓𑁆𑀔𑀮𑀦𑀬𑀲𑁆𑀲 𑀪𑀽𑀫𑀺𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀬𑀲𑁆𑀫𑀸 𑀧𑀦 𑀦𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑁆𑀧𑀯𑁂𑀲𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀢𑁄 𑀢𑀺𑀧𑀼𑀓𑁆𑀔𑀮𑀦𑀬𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀧𑀤𑀸𑀯𑀺𑀪𑀸𑀕𑀢𑁄 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑁆𑀲 𑀪𑀽𑀫𑀺𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀢𑀢𑁄 𑀏𑀯 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑁂 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸𑀢𑀺 𑀇𑀫𑁂 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀏𑀲 𑀦𑀬𑁄 𑀇𑀢𑀭𑀢𑁆𑀣𑀸𑀧𑀺. 𑀧𑀼𑀦 ‘‘𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀢𑁆𑀢𑀬𑀁 𑀦𑀺𑀤𑁆𑀥𑀸𑀭𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀲𑀸𑀥𑀸𑀭𑀡𑀸𑀬𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬, 𑀲𑀼𑀔𑀸𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀧𑀦 𑀧𑀝𑀺𑀧𑀤𑀸𑀤𑁆𑀯𑀬𑀁 𑀏𑀓𑀲𑁆𑀲 𑀲𑀫𑁆𑀪𑀯𑀢𑀻𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀲𑁆𑀫𑀺𑀁 𑀤𑁆𑀯𑁂 𑀧𑀝𑀺𑀧𑀤𑀸 𑀲𑀫𑁆𑀪𑀯𑀦𑁆𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢𑀸𑀲𑀼 𑀧𑀦 𑀤𑁆𑀯𑀻𑀲𑀼 ¶ 𑀧𑀝𑀺𑀧𑀤𑀸𑀲𑀼 𑀬𑁄 𑀬𑀸𑀬 𑀓𑀸𑀬𑀘𑀺 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁩𑁫𑁦) 𑀧𑀝𑀺𑀧𑀤𑀸 𑀘𑀮𑀢𑀺 𑀦 𑀘𑀮𑀢𑀻𑀢𑀺 𑀯𑀺𑀘𑀸𑀭𑀡𑀸𑀬𑀁 ‘‘𑀘𑀮𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀓𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀛𑀸𑀦𑀦𑁆𑀢𑀭𑀫𑀕𑁆𑀕𑀦𑁆𑀢𑀭𑁂𑀲𑀼 𑀧𑀝𑀺𑀧𑀤𑀸𑀪𑁂𑀤𑁄 𑀇𑀘𑁆𑀙𑀺𑀢𑁄𑀯𑀸𑀢𑀺.

‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀯𑀺𑀪𑀸𑀕𑁂𑀳𑀺𑀧𑀺 𑀢𑀫𑁂𑀯 𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀯𑀺𑀪𑀸𑀯𑁂𑀢𑀺. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀜𑁆𑀘𑀸𑀢𑀺 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀜𑁆𑀘 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀜𑁆𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀧𑀜𑁆𑀜𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀲𑀻𑀮𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀜𑁆𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀳𑀼𑀢𑁆𑀯𑀸 𑀢𑀬𑁄 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀬𑀁 ¶ 𑀲𑀁𑀓𑀺𑀮𑁂𑀲𑁄𑀢𑀺 𑀅𑀬𑀁 𑀅𑀓𑀼𑀲𑀮𑀫𑀽𑀮𑀸𑀤𑀺𑀤𑁆𑀯𑀸𑀤𑀲𑀢𑁆𑀢𑀺𑀓𑀲𑀗𑁆𑀕𑀳𑁄 𑀲𑀁𑀓𑀺𑀮𑀺𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑁄𑀢𑀺 𑀓𑀢𑁆𑀯𑀸. 𑀇𑀤𑀁 𑀯𑁄𑀤𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑀻𑀡𑀺 𑀳𑀼𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀻𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑁆𑀲 𑀤𑀺𑀲𑀸𑀪𑀽𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’’𑀢𑀺𑀆𑀤𑀺, 𑀢𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀦𑀬𑀸𑀦𑀁 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄𑀢𑀺? 𑀦𑀬𑀸𑀦𑀁 𑀦𑀬𑁂𑀳𑀺 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁. 𑀧𑀞𑀫𑀦𑀬𑀢𑁄 𑀳𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀢𑀺𑀬𑀦𑀬𑀲𑁆𑀲, 𑀢𑀢𑀺𑀬𑀦𑀬𑀢𑁄 𑀘 𑀤𑀼𑀢𑀺𑀬𑀦𑀬𑀲𑁆𑀲 𑀲𑀫𑁆𑀪𑀯𑁄𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀧𑀞𑀫𑀦𑀬𑀸𑀦𑀦𑁆𑀢𑀭𑀁 𑀢𑀢𑀺𑀬𑀦𑀬𑁄, 𑀢𑀢𑀺𑀬𑀦𑀬𑀸𑀦𑀦𑁆𑀢𑀭𑀜𑁆𑀘 𑀤𑀼𑀢𑀺𑀬𑀦𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀦 𑀢𑀢𑀺𑀬𑀦𑀬𑀢𑁄 𑀤𑀼𑀢𑀺𑀬𑀦𑀬𑁄, 𑀤𑀼𑀢𑀺𑀬𑀦𑀬𑀢𑁄 𑀧𑀞𑀫𑀦𑀬𑁄𑀧𑀺 𑀲𑀫𑁆𑀪𑀯𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 ‘‘𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀦𑀬𑀲𑁆𑀲 𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀢𑁂𑀦𑁂𑀯 𑀳𑀺 ‘‘𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺, 𑀢𑀻𑀡𑀺 𑀳𑀼𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 ‘‘𑀤𑁆𑀯𑁂 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀪𑀯𑀦𑁆𑀢𑀺, 𑀤𑁆𑀯𑁂 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺, 𑀢𑀻𑀡𑀺 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀪𑀯𑀦𑁆𑀢𑀻’’𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀦𑀬𑁄 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑁄 𑀏𑀯𑀸𑀢𑀺 ¶ 𑀓𑀢𑁆𑀯𑀸 𑀦 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀧𑁆𑀧𑀯𑁂𑀲𑁄 𑀇𑀘𑁆𑀙𑀺𑀢𑁄, 𑀲𑀢𑀺 𑀘 𑀅𑀦𑀼𑀧𑁆𑀧𑀯𑁂𑀲𑁂 𑀢𑀢𑁄 𑀯𑀺𑀦𑀺𑀕𑁆𑀕𑀫𑁄𑀧𑀺 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀧𑁂𑀝𑀓𑁄𑀧𑀤𑁂𑀲𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀢𑀢𑁆𑀣𑀸𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑀦𑀸 𑁋 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀢𑀡𑁆𑀳𑀸𑀘𑀭𑀺𑀢𑁄 𑀤𑀼𑀯𑀺𑀥𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀘. 𑀢𑀣𑀸 𑀤𑀺𑀝𑁆𑀞𑀺𑀘𑀭𑀺𑀢𑁄𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀧𑀦 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺. 𑀇𑀢𑀺 𑀇𑀫𑀸𑀲𑀼 𑀧𑀝𑀺𑀧𑀤𑀸𑀲𑀼 𑀬𑀣𑀸𑀭𑀳𑀁 𑀞𑀺𑀢𑁂𑀳𑀺 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑁂𑀳𑀺 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀧𑁆𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀤𑀝𑁆𑀞𑀩𑁆𑀩𑀸𑀢𑀺 𑀲𑀩𑁆𑀩𑁄 𑀬𑀣𑀸𑀯𑀼𑀢𑁆𑀢𑀦𑀬𑁄 𑀅𑀦𑀼𑀕𑀦𑁆𑀢𑀩𑁆𑀩𑁄.

𑀢𑀢𑁆𑀣𑀸𑀬𑀁 𑀧𑀸𑀴𑀺 𑁋 𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀓𑀸𑀫𑁂𑀲𑀼 𑀤𑁄𑀲𑀤𑀺𑀝𑁆𑀞𑀻, 𑀦 𑀘 𑀬𑁂 𑀓𑀸𑀫𑁂𑀲𑀼 𑀅𑀦𑀼𑀲𑀬𑀸 𑀲𑀫𑀽𑀳𑀢𑀸, 𑀢𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 ‘‘𑀓𑀸𑀫𑁂𑀳𑀺 𑀦𑀢𑁆𑀣𑀺 𑀅𑀢𑁆𑀣𑁄’’𑀢𑀺, 𑀢𑁂 𑀘 𑀧𑀼𑀩𑁆𑀩𑁂𑀬𑁂𑀯 𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑀸 ¶ , 𑀇𑀢𑀺 𑀓𑀸𑀫𑁂 𑀅𑀧𑁆𑀧𑀓𑀲𑀺𑀭𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀢𑁂 𑀘𑁂𑀢𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀅𑀦𑀚𑁆𑀛𑁄𑀲𑀺𑀢𑀸. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀼𑀔𑀸 𑀧𑀝𑀺𑀧𑀤𑀸’’𑀢𑀺. 𑀬𑁂 𑀧𑀦 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀓𑀸𑀫𑁂𑀲𑀼 𑀅𑀚𑁆𑀛𑁄𑀲𑀺𑀢𑀸, 𑀢𑁂𑀲𑀁 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀪𑀺𑀓𑁆𑀔𑀼 ‘‘𑀓𑀸𑀫𑁂𑀳𑀺 𑀦𑀢𑁆𑀣𑀺 𑀅𑀢𑁆𑀣𑁄’’𑀢𑀺, 𑀢𑁂 𑀧𑀺𑀬𑀭𑀽𑀧𑀁 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸’’𑀢𑀺. 𑀇𑀢𑀺 𑀇𑀫𑁂 𑀲𑀩𑁆𑀩𑁂 𑀲𑀢𑁆𑀢𑀸 𑀤𑁆𑀯𑀻𑀲𑀼 𑀧𑀝𑀺𑀧𑀤𑀸𑀲𑀼 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺 𑀤𑀼𑀓𑁆𑀔𑀸𑀬𑀜𑁆𑀘 𑀲𑀼𑀔𑀸𑀬𑀜𑁆𑀘.

𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀤𑁆𑀯𑀺𑀥𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀘 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀘. 𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸, 𑀢𑁂 𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀧𑀞𑀫𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑀸𑀤𑀸𑀬 𑀤𑀦𑁆𑀥𑀢𑀭𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂 𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀤𑀦𑁆𑀥𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀤𑀼𑀯𑀺𑀥𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀘 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 ¶ 𑀘. 𑀢𑀢𑁆𑀣 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸, 𑀢𑁂 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀧𑀞𑀫𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑀸𑀤𑀸𑀬 𑀤𑀦𑁆𑀥𑀢𑀭𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀤𑀦𑁆𑀥𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸’’𑀢𑀺. 𑀇𑀫𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸𑀬𑁄 𑀅𑀧𑀜𑁆𑀘𑀫𑀸 𑀅𑀙𑀝𑁆𑀞𑀸. 𑀬𑁂 𑀳𑀺 𑀓𑁂𑀘𑀺 𑀦𑀺𑀩𑁆𑀩𑀼𑀢𑀸 𑀦𑀺𑀩𑁆𑀩𑀸𑀬𑀦𑁆𑀢𑀺 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺 𑀯𑀸 𑀇𑀫𑀸𑀳𑀺 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀅𑀦𑀜𑁆𑀜𑀸𑀳𑀺, 𑀅𑀬𑀁 𑀧𑀝𑀺𑀧𑀤𑀸 𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀦𑀺𑀤𑁆𑀤𑀺𑀲𑀢𑀺. 𑀬𑀸 𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀅𑀭𑀺𑀬𑀥𑀫𑁆𑀫𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫 𑀦𑀬𑁄.

𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀉𑀧𑀸𑀤𑀸𑀦𑀸 𑀬𑁄𑀕𑀸 𑀕𑀦𑁆𑀣𑀸 𑀆𑀲𑀯𑀸 𑀑𑀖𑀸 𑀲𑀮𑁆𑀮𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀅𑀕𑀢𑀺𑀕𑀫𑀦𑀸𑀦𑀻𑀢𑀺 𑀏𑀯𑀁 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀤𑀲 𑀧𑀤𑀸𑀦𑀺. 𑀅𑀬𑀁 𑀲𑀼𑀢𑁆𑀢𑀲𑁆𑀲 𑀲𑀁𑀲𑀦𑁆𑀤𑀦𑀸.

𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑁂𑀦 𑀧𑀳𑀸𑀢𑀩𑁆𑀩𑀸. 𑀢𑀢𑁆𑀣 𑀬𑁄 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄, 𑀬𑁄 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑁂𑀦 𑀧𑀳𑀸𑀢𑀩𑁆𑀩𑀸.

𑀢𑀢𑁆𑀣 𑀧𑀞𑀫𑁄 𑀆𑀳𑀸𑀭𑁄 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄, 𑀤𑀼𑀢𑀺𑀬𑁄 𑀆𑀳𑀸𑀭𑁄 𑀤𑀼𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀢𑀢𑀺𑀬𑁄 𑀆𑀳𑀸𑀭𑁄 ¶ 𑀢𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀘𑀢𑀼𑀢𑁆𑀣𑁄 𑀆𑀳𑀸𑀭𑁄 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑀜𑁆𑀘𑀫𑀸 𑀅𑀙𑀝𑁆𑀞𑀸. 𑀇𑀤𑀜𑁆𑀘 𑀧𑀫𑀸𑀡𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸.

𑀢𑀢𑁆𑀣 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀓𑀸𑀫𑁂 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀓𑀸𑀫𑀼𑀧𑀸𑀤𑀸𑀦𑀁. 𑀤𑀼𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀅𑀦𑀸𑀕𑀢𑀁 𑀪𑀯𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀢𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀯𑀺𑀧𑀭𑀻𑀢𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀘𑀢𑀼𑀢𑁆𑀣𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀔𑀦𑁆𑀥𑁂 𑀅𑀢𑁆𑀢𑀢𑁄 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑁂 𑀞𑀺𑀢𑁄 𑀓𑀸𑀫𑁂 𑀅𑀪𑀺𑀚𑁆𑀛𑀸𑀬 𑀕𑀦𑁆𑀣𑀢𑀺, 𑀅𑀬𑀁 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑁂 𑀞𑀺𑀢𑁄 𑀩𑁆𑀬𑀸𑀧𑀸𑀤𑀁 𑀕𑀦𑁆𑀣𑀢𑀺, 𑀅𑀬𑀁 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄. 𑀤𑀺𑀝𑁆𑀞𑀼𑀧𑀸𑀤𑀸𑀦𑁂 𑀞𑀺𑀢𑁄 𑀧𑀭𑀸𑀫𑀸𑀲𑀁 𑀕𑀦𑁆𑀣𑀢𑀺, 𑀅𑀬𑀁 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂 𑀞𑀺𑀢𑁄 𑀧𑀧𑀜𑁆𑀘𑁂𑀦𑁆𑀢𑁄 𑀕𑀦𑁆𑀣𑀢𑀺, 𑀅𑀬𑀁 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄.

𑀢𑀲𑁆𑀲 ¶ 𑀕𑀦𑁆𑀣𑀕𑀦𑁆𑀣𑀺𑀢𑀸 𑀓𑀺𑀮𑁂𑀲𑀸 𑀆𑀲𑀯𑀦𑁆𑀢𑀺. 𑀓𑀺𑀁 𑀧𑀦 𑀯𑀼𑀘𑁆𑀘𑀢𑀺 𑀆𑀲𑀯𑀦𑁆𑀢𑀻𑀢𑀺? 𑀯𑀺𑀧𑁆𑀧𑀝𑀺𑀲𑀸𑀭𑀸. 𑀬𑁂 𑀯𑀺𑀧𑁆𑀧𑀝𑀺𑀲𑀸𑀭𑀸, 𑀢𑁂 𑀅𑀦𑀼𑀲𑀬𑀸. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀓𑀸𑀫𑀸𑀲𑀯𑁄, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀪𑀯𑀸𑀲𑀯𑁄, 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀤𑀺𑀝𑁆𑀞𑀸𑀲𑀯𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀅𑀯𑀺𑀚𑁆𑀚𑀸𑀲𑀯𑁄.

𑀢𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑁂𑀧𑀼𑀮𑁆𑀮𑀁 𑀕𑀢𑀸 𑀑𑀖𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 ‘‘𑀑𑀖𑀸’’𑀢𑀺. 𑀢𑀢𑁆𑀣 𑀓𑀸𑀫𑀸𑀲𑀯𑁄 𑀓𑀸𑀫𑁄𑀖𑁄, 𑀪𑀯𑀸𑀲𑀯𑁄 𑀪𑀯𑁄𑀖𑁄, 𑀅𑀯𑀺𑀚𑁆𑀚𑀸𑀲𑀯𑁄 𑀅𑀯𑀺𑀚𑁆𑀚𑁄𑀖𑁄, 𑀤𑀺𑀝𑁆𑀞𑀸𑀲𑀯𑁄 𑀤𑀺𑀝𑁆𑀞𑁄𑀖𑁄.

𑀢𑁂 𑀘𑀢𑁆𑀢𑀸𑀭𑁄 𑀑𑀖𑀸 𑀆𑀲𑀬𑀫𑀦𑀼𑀧𑀯𑀺𑀝𑁆𑀞𑀸 𑀅𑀦𑀼𑀲𑀬𑀲𑀳𑀕𑀢𑀸 𑀯𑀼𑀘𑁆𑀘𑀦𑁆𑀢𑀺 𑀲𑀮𑁆𑀮𑀸𑀢𑀺 𑀳𑀤𑀬𑀫𑀸𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀣 𑀓𑀸𑀫𑁄𑀖𑁄 𑀭𑀸𑀕𑀲𑀮𑁆𑀮𑀁, 𑀪𑀯𑁄𑀖𑁄 𑀤𑁄𑀲𑀲𑀮𑁆𑀮𑀁, 𑀅𑀯𑀺𑀚𑁆𑀚𑁄𑀖𑁄 𑀫𑁄𑀳𑀲𑀮𑁆𑀮𑀁, 𑀤𑀺𑀝𑁆𑀞𑁄𑀖𑁄 𑀤𑀺𑀝𑁆𑀞𑀺𑀲𑀮𑁆𑀮𑀁.

𑀇𑀫𑁂𑀳𑀺 𑀘𑀢𑀽𑀳𑀺 𑀲𑀮𑁆𑀮𑁂𑀳𑀺 𑀧𑀭𑀺𑀬𑀸𑀤𑀺𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺 𑀭𑀽𑀧𑁂 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀼. 𑀇𑀫𑀸 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀢𑀢𑁆𑀣 𑀭𑀸𑀕𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑀁 𑀭𑀽𑀧𑀽𑀧𑀕𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺. 𑀤𑁄𑀲𑀲𑀮𑁆𑀮𑁂𑀦 𑀯𑁂𑀤𑀦𑀽𑀧𑀕𑀁. 𑀫𑁄𑀳𑀲𑀮𑁆𑀮𑁂𑀦 𑀲𑀜𑁆𑀜𑀽𑀧𑀕𑀁. 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑀁 𑀲𑀗𑁆𑀔𑀸𑀭𑀽𑀧𑀕𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺.

𑀘𑀢𑀽𑀳𑀺 ¶ 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀳𑀺 𑀘𑀢𑀼𑀩𑁆𑀩𑀺𑀥𑀁 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀺 𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸. 𑀭𑀸𑀕𑁂𑀦 𑀙𑀦𑁆𑀤𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑁂𑀦 𑀤𑁄𑀲𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑁂𑀦 𑀫𑁄𑀳𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀤𑀺𑀝𑁆𑀞𑀺𑀬𑀸 𑀪𑀬𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀢𑀺 𑀇𑀫𑀸𑀦𑀺 𑀘 𑀓𑀫𑁆𑀫𑀸𑀦𑀺 𑀇𑀫𑁂 𑀘 𑀓𑀺𑀮𑁂𑀲𑀸 𑀅𑀬𑀁 𑀲𑀁𑀲𑀸𑀭𑀳𑁂𑀢𑀼.

𑀢𑀢𑁆𑀣𑀺𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀬𑁄𑀕𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀓𑀸𑀫𑀸𑀲𑀯𑁄 𑀓𑀸𑀫𑁄𑀖𑁄 𑀭𑀸𑀕𑀲𑀮𑁆𑀮𑀁 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀙𑀦𑁆𑀤𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀧𑀞𑀫𑀸 𑀤𑀺𑀲𑀸.

𑀨𑀲𑁆𑀲𑁄 𑀆𑀳𑀸𑀭𑁄 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀪𑀯𑀬𑁄𑀕𑁄 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄 𑀪𑀯𑀸𑀲𑀯𑁄 𑀪𑀯𑁄𑀖𑁄 𑀤𑁄𑀲𑀲𑀮𑁆𑀮𑀁 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀤𑁄𑀲𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀺𑀬𑁄𑀕𑁄 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄 𑀤𑀺𑀝𑁆𑀞𑀸𑀲𑀯𑁄 𑀤𑀺𑀝𑁆𑀞𑁄𑀖𑁄 𑀤𑀺𑀝𑁆𑀞𑀺𑀲𑀮𑁆𑀮𑀁 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀪𑀬𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀢𑀢𑀺𑀬𑀸 𑀤𑀺𑀲𑀸.

𑀯𑀺𑀜𑁆𑀜𑀸𑀡𑀸𑀳𑀸𑀭𑁄 ¶ ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀅𑀯𑀺𑀚𑁆𑀚𑀸𑀬𑁄𑀕𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄𑀓𑀸𑀬𑀕𑀦𑁆𑀣𑁄 𑀅𑀯𑀺𑀚𑁆𑀚𑀸𑀲𑀯𑁄 𑀅𑀯𑀺𑀚𑁆𑀚𑁄𑀖𑁄 𑀫𑁄𑀳𑀲𑀮𑁆𑀮𑀁 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀫𑁄𑀳𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀘𑀢𑀼𑀢𑁆𑀣𑀻 𑀤𑀺𑀲𑀸. 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀧𑀞𑀫𑁂𑀦 𑀧𑀤𑁂𑀦 𑀧𑀞𑀫𑀸𑀬 𑀤𑀺𑀲𑀸𑀬 𑀆𑀮𑁄𑀓𑀦𑀁, 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬, 𑀢𑀢𑀺𑀬𑁂𑀦 𑀧𑀤𑁂𑀦 𑀢𑀢𑀺𑀬𑀸𑀬 𑀤𑀺𑀲𑀸𑀬, 𑀘𑀢𑀼𑀢𑁆𑀣𑁂𑀦 𑀧𑀤𑁂𑀦 𑀘𑀢𑀼𑀢𑁆𑀣𑀺𑀬𑀸 𑀤𑀺𑀲𑀸𑀬 𑀆𑀮𑁄𑀓𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸 𑀆𑀮𑁄𑀓𑀦𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀘𑀢𑀽𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀸. 𑀅𑀬𑀁 𑀅𑀓𑀼𑀲𑀮𑀧𑀓𑁆𑀔𑁄.

𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸 𑀤𑀺𑀩𑁆𑀩𑁄 𑀩𑁆𑀭𑀳𑁆𑀫𑀸 𑀅𑀭𑀺𑀬𑁄 𑀆𑀦𑁂𑀜𑁆𑀚𑁄, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑁄 𑀅𑀥𑀺𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑀸𑀥𑀬𑁄 𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀺, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀼𑀔𑀪𑀸𑀕𑀺𑀬𑀸 𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑀸 𑀦𑀸𑀜𑁆𑀜𑀢𑁆𑀭 𑀢𑀧𑀲𑀸 𑀦𑀸𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸 𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀧𑁆𑀧𑀫𑀸𑀡𑀸𑀦𑀺.

𑀢𑀢𑁆𑀣 ¶ 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀪𑀸𑀯𑀺𑀬𑀫𑀸𑀦𑀸 𑀩𑀳𑀼𑀮𑀻𑀓𑀭𑀺𑀬𑀫𑀸𑀦𑀸 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑁄 𑀯𑀺𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀙𑀦𑁆𑀤𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀙𑀦𑁆𑀤𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀅𑀧𑁆𑀧𑀫𑀸𑀡𑀁 𑀧𑀭𑀺𑀧𑀽𑀭𑁂𑀢𑀺. 𑀏𑀯𑀁 𑀬𑀸𑀯 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸 𑀘𑀢𑀼𑀢𑁆𑀣𑀁 𑀅𑀧𑁆𑀧𑀫𑀸𑀡𑀁 𑀧𑀭𑀺𑀧𑀽𑀭𑁂𑀢𑀺.

𑀢𑀢𑁆𑀣 𑀧𑀞𑀫𑀸 𑀘 𑀧𑀝𑀺𑀧𑀤𑀸 𑀧𑀞𑀫𑀜𑁆𑀘 𑀛𑀸𑀦𑀁 𑀧𑀞𑀫𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀤𑀺𑀩𑁆𑀩𑁄 𑀘 𑀯𑀺𑀳𑀸𑀭𑁄 𑀧𑀞𑀫𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀞𑀫𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀜𑁆𑀘 𑀙𑀦𑁆𑀤𑀲𑀫𑀸𑀥𑀺 𑀘 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘 𑀫𑁂𑀢𑁆𑀢𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀧𑀞𑀫𑀸 𑀤𑀺𑀲𑀸.

𑀤𑀼𑀢𑀺𑀬𑀸 𑀘 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀩𑁆𑀭𑀳𑁆𑀫𑀸 𑀘 𑀯𑀺𑀳𑀸𑀭𑁄 𑀤𑀼𑀢𑀺𑀬𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀤𑀼𑀢𑀺𑀬𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀜𑁆𑀘 ¶ 𑀘𑀺𑀢𑁆𑀢𑀲𑀫𑀸𑀥𑀺 𑀘 𑀢𑀧𑁄 𑀘 𑀓𑀭𑀼𑀡𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀢𑀢𑀺𑀬𑀸 𑀘 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀅𑀭𑀺𑀬𑁄 𑀘 𑀯𑀺𑀳𑀸𑀭𑁄 𑀢𑀢𑀺𑀬𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀢𑀢𑀺𑀬𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀜𑁆𑀘 𑀯𑀻𑀭𑀺𑀬𑀲𑀫𑀸𑀥𑀺 𑀘 𑀩𑁄𑀚𑁆𑀛𑀗𑁆𑀕𑀸 𑀘 𑀫𑀼𑀤𑀺𑀢𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀢𑀢𑀺𑀬𑀸 𑀤𑀺𑀲𑀸.

𑀘𑀢𑀼𑀢𑁆𑀣𑀻 𑀘 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀆𑀦𑁂𑀜𑁆𑀚𑁄 𑀘 𑀯𑀺𑀳𑀸𑀭𑁄 𑀘𑀢𑀼𑀢𑁆𑀣𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀘𑀢𑀼𑀢𑁆𑀣𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀜𑁆𑀘 𑀯𑀻𑀫𑀁𑀲𑀸𑀲𑀫𑀸𑀥𑀺 𑀘 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑁄 𑀘 𑀉𑀧𑁂𑀓𑁆𑀔𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀘𑀢𑀼𑀢𑁆𑀣𑀻 𑀤𑀺𑀲𑀸. 𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀤𑀺𑀲𑀸𑀦𑀁 𑀬𑀸 𑀆𑀮𑁄𑀓𑀦𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀮𑁄𑀘𑀦𑁄 𑀦𑀸𑀫 𑀦𑀬𑁄.

𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀘𑀢𑁆𑀢𑀸𑀭𑁄 𑀘 𑀆𑀳𑀸𑀭𑀸, 𑀘𑀢𑀲𑁆𑀲𑁄 𑀘 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸, 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀘 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀘 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀘 𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀘 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀘 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀘 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀘 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑁄 𑀘 𑀑𑀖𑀸, 𑀘𑀢𑁆𑀢𑀸𑀭𑀺 𑀘 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀘 ¶ 𑀲𑀮𑁆𑀮𑀸𑀦𑀺, 𑀘𑀢𑁆𑀢𑀸𑀭𑁄 𑀘 𑀲𑀫𑀸𑀥𑀬𑁄, 𑀘𑀢𑀲𑁆𑀲𑁄 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀘 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀘 𑀅𑀕𑀢𑀺𑀕𑀫𑀦𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀅𑀧𑁆𑀧𑀫𑀸𑀡𑀸𑀦𑀺. 𑀇𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀓𑁆𑀔𑀧𑀝𑀺𑀧𑀓𑁆𑀔𑀯𑀲𑁂𑀦 𑀬𑁄𑀚𑀦𑀸. 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂 𑀤𑀺𑀲𑀸𑀮𑁄𑀘𑀦𑁄 𑀦𑀬𑁄.

𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀭𑀺𑀬𑁄𑀲𑀸𑀦𑀁, 𑀢𑀢𑁆𑀣 𑀧𑀞𑀫𑀸𑀬 𑀤𑀺𑀲𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀭𑀺𑀬𑁄𑀲𑀸𑀦𑀁, 𑀤𑀼𑀢𑀺𑀬𑀸𑀬 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀢𑀢𑀺𑀬𑀸𑀬 𑀅𑀦𑀸𑀕𑀸𑀫𑀺𑀨𑀮𑀁, 𑀘𑀢𑀼𑀢𑁆𑀣𑀺𑀬𑀸 𑀅𑀭𑀳𑀢𑁆𑀢𑀨𑀮𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀢𑀺𑀧𑀼𑀓𑁆𑀔𑀮𑀦𑀬𑁄? 𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑁄 𑀲𑀼𑀔𑀸𑀬 𑀯𑀸 𑀧𑀝𑀺𑀧𑀤𑀸𑀬, 𑀤𑀦𑁆𑀥𑀸𑀪𑀺𑀜𑁆𑀜𑀸𑀬, 𑀤𑀼𑀓𑁆𑀔𑀸𑀬 𑀯𑀸 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀦𑁂𑀬𑁆𑀬𑁄. 𑀇𑀢𑀺 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀢𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸 𑀯𑀺𑀧𑀲𑁆𑀲𑀦𑀸 𑀲𑀧𑁆𑀧𑀸𑀬𑀸 ¶ . 𑀦𑁂𑀬𑁆𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀣𑁄, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸. 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀫𑀼𑀤𑀼𑀓𑀸 𑀤𑁂𑀲𑀦𑀸, 𑀦𑁂𑀬𑁆𑀬𑀲𑁆𑀲 𑀢𑀺𑀓𑁆𑀔𑀸 𑀤𑁂𑀲𑀦𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀢𑀺𑀓𑁆𑀔𑀫𑀼𑀤𑀼𑀓𑀸 𑀤𑁂𑀲𑀦𑀸.

𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀘 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀘, 𑀦𑁂𑀬𑁆𑀬𑀲𑁆𑀲 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀘 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀘 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀘. 𑀇𑀢𑀺 𑀇𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀸𑀦𑀁.

𑀢𑀢𑁆𑀣𑀸𑀬𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑁄, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑀬𑁄 𑀨𑀲𑁆𑀲𑀸, 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀢𑀬𑁄 𑀉𑀧𑀯𑀺𑀘𑀸𑀭𑀸, 𑀢𑀬𑁄 𑀓𑀺𑀮𑁂𑀲𑀸, 𑀢𑀬𑁄 𑀯𑀺𑀢𑀓𑁆𑀓𑀸, 𑀢𑀬𑁄 𑀧𑀭𑀺𑀴𑀸𑀳𑀸, 𑀢𑀻𑀡𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺, 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸.

𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀬𑁄 𑀨𑀲𑁆𑀲𑀸𑀢𑀺 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄. 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀢𑀬𑁄 𑀉𑀧𑀯𑀺𑀘𑀸𑀭𑀸𑀢𑀺 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑁄. 𑀢𑀬𑁄 𑀓𑀺𑀮𑁂𑀲𑀸𑀢𑀺 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄. 𑀢𑀬𑁄 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀬𑁄 𑀧𑀭𑀺𑀴𑀸𑀳𑀸𑀢𑀺 ¶ 𑀭𑀸𑀕𑀚𑁄, 𑀤𑁄𑀲𑀚𑁄, 𑀫𑁄𑀳𑀚𑁄. 𑀢𑀻𑀡𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻𑀢𑀺 𑀉𑀧𑁆𑀧𑀸𑀤𑁄, 𑀞𑀺𑀢𑀺, 𑀯𑀬𑁄. 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸.

𑀢𑀢𑁆𑀣 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀫𑀦𑀸𑀧𑀺𑀓𑁂𑀦 𑀆𑀭𑀫𑁆𑀫𑀡𑁂𑀦 𑀲𑀫𑀼𑀝𑁆𑀞𑀳𑀢𑀺. 𑀢𑀤𑁂𑀯 𑀫𑀦𑀸𑀧𑀺𑀓𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀸 𑀯𑁂𑀤𑀦𑀸, 𑀲𑀼𑀔𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀭𑀸𑀕𑁄, 𑀭𑀸𑀕𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄, 𑀓𑀸𑀫𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀭𑀸𑀕𑀚𑁄 𑀧𑀭𑀺𑀴𑀸𑀳𑁄, 𑀭𑀸𑀕𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀸𑀤𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀉𑀧𑁆𑀧𑀸𑀤𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸.

𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁 𑀅𑀫𑀦𑀸𑀧𑀺𑀓𑁂𑀦 𑀆𑀭𑀫𑁆𑀫𑀡𑁂𑀦 𑀲𑀫𑀼𑀝𑁆𑀞𑀳𑀢𑀺. 𑀢𑀤𑁂𑀯 𑀅𑀫𑀦𑀸𑀧𑀺𑀓𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 ¶ 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑁄𑀲𑁄, 𑀤𑁄𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑁄𑀲𑀚𑁄 𑀧𑀭𑀺𑀴𑀸𑀳𑁄, 𑀤𑁄𑀲𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸.

𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑀉𑀧𑁂𑀓𑁆𑀔𑀸𑀞𑀸𑀦𑀺𑀬𑀁 𑀆𑀭𑀫𑁆𑀫𑀡𑁂𑀦 𑀲𑀫𑀼𑀝𑁆𑀞𑀳𑀢𑀺. 𑀢𑀤𑁂𑀯 𑀉𑀧𑁂𑀓𑁆𑀔𑀸𑀞𑀸𑀦𑀺𑀬𑀁 𑀆𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑁄, 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀫𑁄𑀳𑁄, 𑀫𑁄𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀫𑁄𑀳𑀚𑁄 𑀧𑀭𑀺𑀴𑀸𑀳𑁄, 𑀫𑁄𑀳𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀯𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀯𑀬𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸. 𑀇𑀢𑀺 𑀅𑀬𑀁 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀦𑀺𑀤𑁆𑀤𑁂𑀲𑁄. 𑀬𑁄 𑀓𑁄𑀘𑀺 𑀅𑀓𑀼𑀲𑀮𑀧𑀓𑁆𑀔𑁄, 𑀲𑀩𑁆𑀩𑁄 𑀲𑁄 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀲𑀫𑁄𑀲𑀭𑀢𑀻𑀢𑀺.

𑀢𑀢𑁆𑀣 𑀓𑀢𑀫𑁄 𑀓𑀼𑀲𑀮𑀧𑀓𑁆𑀔𑁄? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄. 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀲𑀼𑀢𑀫𑀬𑀻, 𑀘𑀺𑀦𑁆𑀢𑀸𑀫𑀬𑀻, 𑀪𑀸𑀯𑀦𑀸𑀫𑀬𑀻. 𑀢𑀬𑁄 𑀲𑀫𑀸𑀥𑀻 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 ¶ , 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁. 𑀢𑀬𑁄 𑀯𑀺𑀢𑀓𑁆𑀓𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀬𑁄 𑀉𑀧𑀯𑀺𑀘𑀸𑀭𑀸 𑀦𑁂𑀓𑁆𑀔𑀫𑁆𑀫𑀽𑀧𑀯𑀺𑀘𑀸𑀭𑁄, 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑁄, 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑁄 𑀢𑀺𑀲𑁆𑀲𑁄 𑀏𑀲𑀦𑀸 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸. 𑀢𑀬𑁄 𑀔𑀦𑁆𑀥𑀸 𑀲𑀻𑀮𑀓𑁆𑀔𑀦𑁆𑀥𑁄, 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄.

𑀢𑀢𑁆𑀣 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀲𑀼𑀢𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀲𑀼𑀢𑀫𑀬𑀺 𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 ¶ 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀁 𑀧𑀭𑀺𑀧𑀽𑀭𑁂𑀢𑀺, 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀧𑀭𑀺𑀧𑀼𑀡𑁆𑀡𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀦𑁂𑀓𑁆𑀔𑀫𑁆𑀫𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀼𑀡𑁆𑀡𑁄 𑀓𑀸𑀫𑁂𑀲𑀦𑀁 𑀧𑀚𑀳𑀢𑀺. 𑀓𑀸𑀫𑁂𑀲𑀦𑀧𑁆𑀧𑀳𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀧𑀭𑀺𑀧𑀼𑀡𑁆𑀡𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀪𑀯𑁂𑀲𑀦𑀁 𑀧𑀚𑀳𑀢𑀺, 𑀪𑀯𑁂𑀲𑀦𑀧𑁆𑀧𑀳𑀸𑀦𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀧𑀭𑀺𑀧𑀼𑀡𑁆𑀡𑁄 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀭𑀺𑀧𑀼𑀡𑁆𑀡𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀇𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸 𑀓𑀼𑀲𑀮𑀧𑀓𑁆𑀔𑀺𑀓𑀸 𑀘 𑀢𑀺𑀓𑀦𑀺𑀤𑁆𑀤𑁂𑀲𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀸 𑀢𑀺𑀧𑀼𑀓𑁆𑀔𑀮𑀦𑀬𑀲𑁆𑀲 ¶ 𑀤𑀺𑀲𑀸 𑀦𑀸𑀫. 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀅𑀧𑁆𑀧𑀡𑀺𑀳𑀺𑀢𑁄 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄, 𑀅𑀬𑀁 𑀢𑀺𑀧𑀼𑀓𑁆𑀔𑀮𑁄 𑀦𑀸𑀫 𑀤𑀼𑀢𑀺𑀬𑁄 𑀦𑀬𑁄.

𑀢𑀢𑁆𑀣 𑀬𑁂 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬, 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀤𑁆𑀯𑁂𑀬𑁂𑀯 𑀧𑀼𑀕𑁆𑀕𑀮𑀸 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬, 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄. 𑀢𑁂 𑀯𑀺𑀲𑁂𑀲𑁂𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘 𑀢𑀡𑁆𑀳𑀸𑀘𑀭𑀺𑀢𑁄 𑀘. 𑀇𑀫𑁂 ¶ 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀢𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀳𑀼𑀢𑁆𑀯𑀸 𑀤𑁆𑀯𑁂 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄 𑁋 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘 𑀅𑀳𑀺𑀭𑀻𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀅𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘 𑀲𑀁𑀬𑁄𑀚𑀦𑀸𑀦𑀺 𑀘 𑀅𑀚𑁆𑀛𑁄𑀲𑀸𑀦𑀜𑁆𑀘 𑀅𑀪𑀺𑀦𑀺𑀯𑁂𑀲𑁄 𑀘 𑀅𑀳𑀁𑀓𑀸𑀭𑁄 𑀘 𑀫𑀫𑀁𑀓𑀸𑀭𑁄 𑀘 𑀅𑀲𑁆𑀲𑀤𑁆𑀥𑀺𑀬𑀜𑁆𑀘 𑀤𑁄𑀯𑀘𑀲𑁆𑀲𑀢𑀸 𑀘 𑀓𑁄𑀲𑀚𑁆𑀚𑀜𑁆𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀯𑀺𑀚𑁆𑀚𑀸 𑀘 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀲𑀫𑀸𑀧𑀢𑁆𑀢𑀺 𑀘.

𑀢𑀢𑁆𑀣 𑀅𑀯𑀺𑀚𑁆𑀚𑀸 𑀘 𑀅𑀳𑀺𑀭𑀻𑀓𑀜𑁆𑀘 𑀅𑀲𑀢𑀺 𑀘 𑀦𑀻𑀯𑀭𑀡𑀸𑀦𑀺 𑀘 𑀅𑀚𑁆𑀛𑁄𑀲𑀸𑀦𑀜𑁆𑀘 𑀅𑀳𑀁𑀓𑀸𑀭𑁄 𑀘 𑀅𑀲𑁆𑀲𑀤𑁆𑀥𑀺𑀬𑀜𑁆𑀘 𑀓𑁄𑀲𑀚𑁆𑀚𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘, 𑀅𑀬𑀁 𑀏𑀓𑀸 𑀤𑀺𑀲𑀸.

𑀢𑀡𑁆𑀳𑀸 𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀁𑀬𑁄𑀚𑀦𑀸𑀦𑀺 𑀘 𑀅𑀪𑀺𑀦𑀺𑀯𑁂𑀲𑁄 𑀘 𑀫𑀫𑀁𑀓𑀸𑀭𑁄 𑀘 𑀤𑁄𑀯𑀘𑀲𑁆𑀲𑀢𑀸 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀅𑀯𑀺𑀚𑁆𑀚𑀸 𑀘 𑀅𑀲𑀫𑀸𑀧𑀢𑁆𑀢𑀺 𑀘, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸. 𑀤𑀲𑀦𑁆𑀦𑀁 𑀤𑀼𑀓𑀸𑀦𑀁 𑀤𑀲 𑀧𑀤𑀸𑀦𑀺 𑀧𑀞𑀫𑀸 𑀤𑀺𑀲𑀸𑀢𑀺 𑀓𑀸𑀢𑀩𑁆𑀩𑀸𑀦𑀺. 𑀲𑀁𑀔𑀺𑀢𑁆𑀢𑁂𑀦 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑀺 𑀧𑀝𑀺𑀧𑀓𑁆𑀔𑁂 𑀓𑀡𑁆𑀳𑀧𑀓𑁆𑀔𑀲𑁆𑀲 𑀤𑀲𑀦𑁆𑀦𑀁 𑀤𑀼𑀓𑀸𑀦𑀁 𑀤𑀲 𑀧𑀤𑀸𑀦𑀺 𑀤𑀼𑀢𑀺𑀬𑀓𑀸𑀦𑀺, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀢𑀢𑁆𑀣 𑀓𑀢𑀫𑁄 𑀓𑀼𑀲𑀮𑀧𑀓𑁆𑀔𑁄? 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘 𑀅𑀳𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘 𑀫𑀫𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀲𑀫𑁆𑀫𑀸𑀲𑀢𑀺 𑀘 𑀲𑀫𑁆𑀫𑀸𑀲𑀫𑀸𑀥𑀺 𑀘 𑀧𑀜𑁆𑀜𑀸 𑀘 𑀦𑀺𑀩𑁆𑀩𑀺𑀤𑀸 𑀘 𑀲𑀫𑀸𑀧𑀢𑁆𑀢𑀺 𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀲𑁄𑀫𑀦𑀲𑁆𑀲𑀜𑁆𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀘.

𑀤𑀲𑀦𑁆𑀦𑀁 𑀤𑀼𑀓𑀸𑀦𑀁 𑀲𑀫𑀣𑀸𑀤𑀻𑀦𑀺 𑀲𑁄𑀫𑀦𑀲𑁆𑀲𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀞𑀫𑀸𑀦𑀺 𑀤𑀲 𑀧𑀤𑀸𑀦𑀺 𑀧𑀞𑀫𑀸 𑀤𑀺𑀲𑀸, 𑀯𑀺𑀧𑀲𑁆𑀲𑀦𑀸𑀤𑀻𑀦𑀺 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀺 𑀤𑀼𑀢𑀺𑀬𑀸𑀦𑀺 𑀤𑀲 𑀧𑀤𑀸𑀦𑀺 𑀤𑀼𑀢𑀺𑀬𑀸 𑀤𑀺𑀲𑀸. 𑀇𑀢𑀺 𑀅𑀓𑀼𑀲𑀮𑀧𑀓𑁆𑀔𑁂 𑀓𑀼𑀲𑀮𑀧𑀓𑁆𑀔𑁂 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀘𑀢𑀲𑁆𑀲𑁄 𑀤𑀺𑀲𑀸.

𑀢𑀸𑀲𑀼 ¶ 𑀓𑀼𑀲𑀮𑀧𑀓𑁆𑀔𑁂 𑀲𑀫𑀣𑀸𑀤𑀻𑀳𑀺 𑀅𑀓𑀼𑀲𑀮𑀧𑀓𑁆𑀔𑁂 𑀢𑀡𑁆𑀳𑀸𑀤𑀬𑁄 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀧𑀳𑀸𑀦𑀸 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀼𑀲𑀮𑀧𑀓𑁆𑀔𑁂 𑀯𑀺𑀧𑀲𑁆𑀲𑀦𑀸𑀤𑀻𑀳𑀺 𑀅𑀓𑀼𑀲𑀮𑀧𑀓𑁆𑀔𑁂 𑀅𑀯𑀺𑀚𑁆𑀚𑀸𑀤𑀬𑁄 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀧𑀳𑀸𑀦𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀇𑀢𑀺 𑀇𑀫𑀸 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑁂 𑀧𑀭𑀺𑀬𑁄𑀲𑀸𑀦𑀁.

𑀢𑀢𑁆𑀣 ¶ 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑁂𑀲𑀼 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀫𑁄𑀲𑀭𑀦𑁆𑀢𑀺. 𑀓𑀣𑀁? 𑀲𑀫𑀣𑁄 𑀘 𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘 𑀤𑀼𑀓𑁆𑀔𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀲𑀫𑀣𑀁 𑀪𑀚𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸 𑀘 𑀅𑀫𑁄𑀳𑁄 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀺𑀧𑀲𑁆𑀲𑀦𑀁 𑀪𑀚𑀦𑁆𑀢𑀺. 𑀏𑀯𑀁 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀢𑀡𑁆𑀳𑀸 𑀘 𑀮𑁄𑀪𑁄 𑀘 𑀤𑁄𑀲𑁄 𑀘 𑀲𑀼𑀪𑀲𑀜𑁆𑀜𑀸 𑀘 𑀲𑀼𑀔𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀢𑀡𑁆𑀳𑀁 𑀪𑀚𑀦𑁆𑀢𑀺, 𑀅𑀯𑀺𑀚𑁆𑀚𑀸 𑀘 𑀫𑁄𑀳𑁄 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀢𑁆𑀢𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀯𑀺𑀚𑁆𑀚𑀁 𑀪𑀚𑀦𑁆𑀢𑀺. 𑀏𑀯𑀁 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀇𑀢𑀺 𑀢𑀺𑀧𑀼𑀓𑁆𑀔𑀮𑁄 𑀘 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀁 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺.

𑀓𑀣𑀁 𑀢𑀺𑀧𑀼𑀓𑁆𑀔𑀮𑁂 𑀦𑀬𑁂 𑀇𑀢𑀭𑁂 𑀤𑁆𑀯𑁂 𑀦𑀬𑀸 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺? 𑀯𑀺𑀧𑀲𑁆𑀲𑀦𑀸 𑀘 𑀅𑀫𑁄𑀳𑁄 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀫𑁄𑀳𑁄, 𑀲𑀫𑀣𑁄 𑀘 𑀅𑀮𑁄𑀪𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘 𑀤𑀼𑀓𑁆𑀔𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀮𑁄𑀪𑁄, 𑀅𑀤𑁄𑀲𑁄 𑀅𑀤𑁄𑀲𑁄 𑀏𑀯. 𑀏𑀯𑀁 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀢𑀻𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀢𑀡𑁆𑀳𑀸 𑀘 𑀮𑁄𑀪𑁄 𑀘 𑀲𑀼𑀪𑀲𑀜𑁆𑀜𑀸 𑀘 𑀲𑀼𑀔𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀮𑁄𑀪𑁄, 𑀅𑀯𑀺𑀚𑁆𑀚𑀸 𑀘 𑀫𑁄𑀳𑁄 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀢𑁆𑀢𑀲𑀜𑁆𑀜𑀸 𑀘𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀫𑁄𑀳𑁄, 𑀤𑁄𑀲𑁄 𑀤𑁄𑀲𑁄 𑀏𑀯. 𑀏𑀯𑀁 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀢𑀻𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀇𑀢𑀺 𑀢𑀺𑀧𑀼𑀓𑁆𑀔𑀮𑁂 𑀦𑀬𑁂 𑀇𑀢𑀭𑁂 𑀤𑁆𑀯𑁂 𑀦𑀬𑀸 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺.

𑀓𑀣𑀁 𑀘𑀢𑀽𑀲𑀼 𑀧𑀤𑁂𑀲𑀼 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀫𑁄𑀲𑀭𑀦𑁆𑀢𑀺? 𑀢𑀡𑁆𑀳𑀸 𑀘 𑀲𑀼𑀪𑀲𑀜𑁆𑀜𑀸 𑀘, 𑀅𑀬𑀁 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄. 𑀮𑁄𑀪𑁄 𑀘 𑀲𑀼𑀔𑀲𑀜𑁆𑀜𑀸 𑀘, 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄. 𑀅𑀯𑀺𑀚𑁆𑀚𑀸 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀘, 𑀅𑀬𑀁 𑀢𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄. 𑀫𑁄𑀳𑁄 𑀘 𑀅𑀢𑁆𑀢𑀲𑀜𑁆𑀜𑀸 𑀘, 𑀅𑀬𑀁 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄. 𑀇𑀢𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀘𑀢𑀽𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀲𑀫𑀣𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀅𑀮𑁄𑀪𑁄 𑀘 𑀤𑀼𑀓𑁆𑀔𑀲𑀜𑁆𑀜𑀸 𑀘 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀯𑀺𑀧𑀲𑁆𑀲𑀦𑀸 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀅𑀫𑁄𑀳𑁄 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀢𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀘𑀢𑀽𑀲𑀼 𑀧𑀤𑁂𑀲𑀼 𑀲𑀫𑁄𑀲𑀭𑀦𑁆𑀢𑀺. 𑀏𑀯𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑁂 ¶ 𑀇𑀢𑀭𑁂 𑀤𑁆𑀯𑁂 𑀦𑀬𑀸 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺. 𑀢𑀺𑀡𑁆𑀡𑀜𑁆𑀳𑀺 𑀦𑀬𑀸𑀦𑀁 𑀬𑀸 𑀪𑀽𑀫𑀺𑀬𑁄 𑀕𑁄𑀘𑀭𑁄, 𑀲𑁄 𑀏𑀓𑁂𑀓𑀁 𑀦𑀬𑀁 ¶ 𑀅𑀦𑀼𑀧𑁆𑀧𑀯𑀺𑀲𑀢𑀺. 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲 𑀦𑀬𑀲𑁆𑀲 𑀅𑀓𑀼𑀲𑀮𑁂 𑀯𑀸 𑀥𑀫𑁆𑀫𑁂 𑀯𑀺𑀜𑁆𑀜𑀸𑀢𑁂 𑀓𑀼𑀲𑀮𑁂 𑀯𑀸 𑀧𑀝𑀺𑀧𑀓𑁆𑀔𑁄 𑀅𑀦𑁆𑀯𑁂𑀲𑀺𑀢𑀩𑁆𑀩𑁄. 𑀧𑀝𑀺𑀧𑀓𑁆𑀔𑀁 𑀅𑀦𑁆𑀯𑁂𑀲𑀺𑀢𑁆𑀯𑀸 𑀲𑁄 𑀦𑀬𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀢𑀫𑁆𑀳𑀺 𑀦𑀬𑁂 𑀦𑀺𑀤𑁆𑀤𑀺𑀝𑁆𑀞𑁂 𑀬𑀣𑀸 𑀏𑀓𑀫𑁆𑀳𑀺 𑀦𑀬𑁂 𑀇𑀢𑀭𑁂𑀲𑀁 𑀦𑀬𑀸𑀦𑀁 𑀫𑀽𑀮𑀧𑀤𑀸𑀦𑀺 𑀅𑀦𑀼𑀧𑁆𑀧𑀯𑀺𑀝𑁆𑀞𑀸𑀦𑀺, 𑀢𑀢𑁄 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀏𑀓𑁂𑀓𑀲𑁆𑀫𑀺𑀜𑁆𑀳𑀺 𑀦𑀬𑁂 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀅𑀦𑀼𑀧𑁆𑀧𑀯𑀺𑀝𑁆𑀞𑀸𑀦𑀺.

𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀺𑀜𑁆𑀜𑀸𑀢𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀯𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀧𑀭𑀺𑀬𑁄𑀲𑀸𑀦𑀁 𑀧𑀞𑀫𑀸𑀬 𑀤𑀺𑀲𑀸𑀬 𑀧𑀞𑀫𑀁 𑀨𑀮𑀁, 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬 𑀤𑀼𑀢𑀺𑀬𑀁 𑀨𑀮𑀁, 𑀢𑀢𑀺𑀬𑀸𑀬 𑀤𑀺𑀲𑀸𑀬 𑀢𑀢𑀺𑀬𑀁 𑀨𑀮𑀁, 𑀘𑀢𑀼𑀢𑁆𑀣𑀸𑀬 𑀤𑀺𑀲𑀸𑀬 𑀘𑀢𑀼𑀢𑁆𑀣𑀁 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁.

𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀧𑀭𑀺𑀬𑁄𑀲𑀸𑀦𑀁 𑀧𑀞𑀫𑀸𑀬 𑀤𑀺𑀲𑀸𑀬 𑀅𑀧𑁆𑀧𑀡𑀺𑀳𑀺𑀢𑁄, 𑀤𑀼𑀢𑀺𑀬𑀸𑀬 𑀲𑀼𑀜𑁆𑀜𑀢𑁄, 𑀢𑀢𑀺𑀬𑀸𑀬 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀧𑀭𑀺𑀬𑁄𑀲𑀸𑀦𑀁.

𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀧𑀭𑀺𑀬𑁄𑀲𑀸𑀦𑀁 𑀧𑀞𑀫𑀸𑀬 𑀤𑀺𑀲𑀸𑀬 𑀢𑀡𑁆𑀳𑀸𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀇𑀫𑁂𑀲𑀼 𑀢𑀻𑀲𑀼 𑀦𑀬𑁂𑀲𑀼 𑀬𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀧𑀤𑀸𑀦𑀁 𑀆𑀮𑁄𑀘𑀦𑀸, 𑀅𑀬𑀁 𑀤𑀺𑀲𑀸𑀮𑁄𑀘𑀦𑁄 𑀦𑀬𑁄. 𑀬𑀸 𑀆𑀮𑁄𑀓𑁂𑀢𑁆𑀯𑀸 𑀓𑀼𑀲𑀮𑀧𑀓𑁆𑀔𑁂 𑀅𑀓𑀼𑀲𑀮𑀧𑀓𑁆𑀔𑁂 𑀘 ‘‘𑀅𑀬𑀁 𑀥𑀫𑁆𑀫𑁄 𑀇𑀫𑀁 𑀥𑀫𑁆𑀫𑀁 𑀪𑀚𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀲𑀫𑁆𑀫𑀸 𑀬𑁄𑀚𑀦𑀸, 𑀅𑀬𑀁 𑀅𑀗𑁆𑀓𑀼𑀲𑁄 𑀦𑀬𑁄𑀢𑀺 𑀇𑀫𑁂 𑀧𑀜𑁆𑀘 𑀦𑀬𑀸.

𑀦𑀬𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁮𑁯. 𑀏𑀯𑀁 𑀲𑀩𑁆𑀩𑀣𑀸 𑀦𑀬𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀲𑀸𑀲𑀦𑀧𑀝𑁆𑀞𑀸𑀦𑀁 𑀯𑀺𑀪𑀚𑀦𑁆𑀢𑁄 𑀬𑀲𑁆𑀫𑀸 𑀲𑀗𑁆𑀕𑀳𑀯𑀸𑀭𑀸𑀤𑀻𑀲𑀼 𑀫𑀽𑀮𑀧𑀤𑁂𑀳𑁂𑀯 𑀧𑀝𑁆𑀞𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀲𑀭𑀽𑀧𑀢𑁄 𑀦 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀬𑀣𑀸 𑀫𑀽𑀮𑀧𑀤𑁂𑀳𑀺 𑀧𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀏𑀯𑀁 𑀧𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀧𑀤𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸? 𑀲𑀸𑀲𑀦𑀧𑀝𑁆𑀞𑀸𑀦𑁂’’𑀢𑀺 𑀆𑀳. 𑀫𑀽𑀮𑀧𑀤𑀲𑀸𑀲𑀦𑀧𑀝𑁆𑀞𑀸𑀦𑀸𑀦𑀜𑁆𑀳𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀳𑁄 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑁄 𑀏𑀯𑀸𑀢𑀺. 𑀅𑀣 𑀲𑀸𑀲𑀦𑀧𑀝𑁆𑀞𑀸𑀦𑀦𑁆𑀢𑀺 𑀓𑁄 𑀯𑀘𑀦𑀢𑁆𑀣𑁄? 𑀲𑀸𑀲𑀦𑀲𑁆𑀲 𑀧𑀝𑁆𑀞𑀸𑀦𑀦𑁆𑀢𑀺 𑀲𑀸𑀲𑀦𑀧𑀝𑁆𑀞𑀸𑀦𑀁 ¶ , 𑀲𑀸𑀲𑀦𑀁 ¶ 𑀤𑁂𑀲𑀦𑀸, 𑀢𑀲𑁆𑀲𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀧𑀓𑀸𑀭𑁂𑀳𑀺 𑀞𑀸𑀦𑀁 𑀧𑀯𑀢𑁆𑀢𑀺 𑀲𑀸𑀲𑀦𑀧𑀝𑁆𑀞𑀸𑀦𑀁. 𑀇𑀥 𑀧𑀦 𑀢𑀲𑁆𑀲 𑀢𑀣𑀸𑀪𑀸𑀯𑀤𑀻𑀧𑀦𑀁 ‘‘𑀲𑀸𑀲𑀦𑀧𑀝𑁆𑀞𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀲𑀸𑀲𑀦𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄. 𑀢𑁂𑀲𑀁 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁂𑀳𑀻𑀢𑀺 𑀧𑀝𑁆𑀞𑀸𑀦𑀸𑀦𑀺, 𑀲𑀁𑀓𑀺𑀮𑁂𑀲𑀸𑀤𑀺𑀥𑀫𑁆𑀫𑀸. 𑀢𑁂𑀲𑀁 𑀧𑀯𑁂𑀤𑀦𑀢𑁄 𑀢𑀤𑀼𑀧𑀘𑀸𑀭𑁂𑀦 𑀲𑀼𑀢𑁆𑀢𑀸𑀦𑀺 𑀧𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀧𑀦 𑀲𑀫𑀽𑀳𑀪𑀸𑀯𑀢𑁄 𑀅𑀬𑀁 𑀧𑀓𑀭𑀡𑀧𑁆𑀧𑀤𑁂𑀲𑁄 𑀧𑀝𑁆𑀞𑀸𑀦𑀁 𑀦𑀸𑀫.

𑀅𑀧𑀭𑁄 𑀦𑀬𑁄 𑁋 𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁? 𑀧𑀝𑁆𑀞𑀺𑀢𑀝𑁆𑀞𑁂𑀦 𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀬𑁂 𑀢𑁂 𑀕𑁄𑀝𑁆𑀞𑀸 𑀧𑀝𑁆𑀞𑀺𑀢𑀕𑀸𑀯𑁄’’𑀢𑀺 (𑀫. 𑀦𑀺. 𑁧.𑁧𑁫𑁬) 𑀆𑀕𑀢𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀬𑁂𑀦 𑀧𑀝𑁆𑀞𑀸𑀦𑁂𑀦 𑀢𑁂 ‘‘𑀕𑁄𑀝𑁆𑀞𑀸 𑀧𑀝𑁆𑀞𑀺𑀢𑀕𑀸𑀯𑁄’’𑀢𑀺 𑀯𑀼𑀢𑁆𑀢𑀸, 𑀢𑀁 𑀅𑀢𑁆𑀣𑀢𑁄 𑀕𑀫𑀦𑀁 𑀳𑁄𑀢𑀺. 𑀇𑀢𑀺 𑀦𑀸𑀢𑀺𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀲𑀼 𑀳𑀸𑀭𑀦𑀬𑁂𑀲𑀼 𑀅𑀦𑀺𑀲𑁆𑀲𑀗𑁆𑀕𑀕𑀫𑀦𑀲𑁆𑀲 𑀤𑁂𑀲𑀦𑀸𑀜𑀸𑀡𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀪𑁂𑀤𑁂𑀲𑀼 𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀪𑁂𑀤𑁂𑀲𑀼 𑀘 𑀯𑀺𑀢𑁆𑀣𑀸𑀭𑀺𑀢𑀦𑀬𑀮𑀸𑀪𑀢𑁄 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀕𑀫𑀦𑀢𑁆𑀢𑀸 𑀢𑁂 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀬𑁄 𑀮𑁄𑀓𑀺𑀬𑀸𑀤𑀬𑁄 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀯𑁄𑀫𑀺𑀲𑁆𑀲𑀸 𑀘 𑀅𑀥𑀺𑀓𑀭𑀡𑀯𑀲𑁂𑀦 𑀧𑀝𑁆𑀞𑀸𑀦𑀁 𑀦𑀸𑀫. 𑀢𑁂𑀲𑀁 𑀧𑀓𑀸𑀲𑀦𑀢𑁄 𑀅𑀬𑀁 𑀧𑀓𑀭𑀡𑀧𑁆𑀧𑀤𑁂𑀲𑁄 𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬’’𑀦𑁆𑀢𑀺𑀆𑀤𑀻𑀲𑀼 𑀲𑀁𑀓𑀺𑀮𑀺𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑁄. 𑀲𑀁𑀓𑀺𑀮𑁂𑀲𑀪𑀸𑀕𑁂 𑀲𑀁𑀓𑀺𑀮𑁂𑀲𑀓𑁄𑀝𑁆𑀞𑀸𑀲𑁂 𑀧𑀯𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁. 𑀯𑀸𑀲𑀦𑀸 𑀧𑀼𑀜𑁆𑀜𑀪𑀸𑀯𑀦𑀸, 𑀯𑀸𑀲𑀦𑀸𑀪𑀸𑀕𑁂 𑀧𑀯𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁, 𑀯𑀸𑀲𑀦𑀁 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀤𑀸𑀮𑀦𑀁 𑀦𑀺𑀩𑁆𑀩𑁂𑀥𑁄. 𑀦𑀺𑀩𑁆𑀩𑁂𑀥𑀪𑀸𑀕𑁂 𑀧𑀯𑀢𑁆𑀢𑀁, 𑀦𑀺𑀩𑁆𑀩𑁂𑀥𑀁 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀥𑀫𑁆𑀫𑀸 𑀅𑀲𑁂𑀓𑁆𑀔𑀸, 𑀅𑀲𑁂𑀓𑁆𑀔𑀪𑀸𑀯𑁂 𑀧𑀯𑀢𑁆𑀢𑀁, 𑀅𑀲𑁂𑀓𑁆𑀔𑁂 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀢𑁂𑀲𑀼 𑀬𑀢𑁆𑀣 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄 𑀯𑀺𑀪𑀢𑁆𑀢𑁄, 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁. 𑀬𑀢𑁆𑀣 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀺𑀪𑀢𑁆𑀢𑀁, 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀬𑀢𑁆𑀣 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀬𑀢𑁆𑀣 𑀧𑀦 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀇𑀢𑀭𑀸𑀦𑀺 𑀢𑁂𑀲𑀁 𑀯𑁄𑀫𑀺𑀲𑁆𑀲𑀓𑀦𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀢𑀸𑀦𑀺 𑀧𑀦 𑀙 𑀤𑀼𑀓𑀸 𑀘𑀢𑁆𑀢𑀸𑀭𑁄 𑀢𑀺𑀓𑀸 𑀏𑀓𑀁 𑀘𑀢𑀼𑀓𑁆𑀓𑀁 𑀅𑀧𑀭𑀫𑁆𑀧𑀺 𑀏𑀓𑀁 𑀘𑀢𑀼𑀓𑁆𑀓𑀦𑁆𑀢𑀺 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑁂𑀲𑀼 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀤𑁆𑀯𑁂 𑀘 𑀢𑀺𑀓𑀸 𑀉𑀤𑁆𑀥𑀝𑀸, 𑀇𑀢𑀭𑁂 ¶ 𑀦 𑀉𑀤𑁆𑀥𑀝𑀸, 𑀅𑀦𑀼𑀤𑁆𑀥𑀭𑀡𑁂 𑀓𑀸𑀭𑀡𑀁 𑀦𑀢𑁆𑀣𑀺. 𑀇𑀫𑀺𑀦𑀸 𑀦𑀬𑁂𑀦 𑀢𑁂𑀧𑀺 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀧𑀸𑀴𑀺𑀬𑀁 𑀲𑀁𑀔𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺, 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀺 𑀅𑀝𑁆𑀞 𑀪𑀯𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄𑀯 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀓𑀢𑁆𑀣𑀘𑀺 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄𑀯, 𑀓𑀢𑁆𑀣𑀘𑀺 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄𑀯 ¶ 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀢𑀲𑁆𑀫𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀉𑀤𑁆𑀤𑀺𑀝𑁆𑀞𑀁 ‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸. 𑀢𑀣𑀸 𑀯𑁄𑀤𑀸𑀦𑀁 𑀦𑀸𑀫 𑀲𑀁𑀓𑀺𑀮𑁂𑀲𑁂 𑀲𑀢𑀺 𑀳𑁄𑀢𑀻𑀢𑀺 𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀯𑀺𑀪𑀸𑀕𑁂𑀦 𑀢𑀺𑀥𑀸𑀯 𑀉𑀤𑁆𑀤𑀺𑀝𑁆𑀞𑀁 ‘‘𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸. 𑀢𑀁 𑀧𑀦 𑀅𑀢𑁆𑀣𑀢𑁄 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀺 𑀏𑀯 𑀳𑁄𑀢𑀺. 𑀅𑀬𑀜𑁆𑀘 𑀦𑀬𑁄 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺.

‘‘𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄’’𑀢𑀺𑀆𑀤𑀺 𑀲𑀁𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀢𑁄 𑀲𑀫𑀣𑀸𑀤𑀺𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀺𑀲𑀼𑀢𑁆𑀢𑀸𑀦𑀁 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀤𑀺 𑀆𑀲𑀢𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀪𑀯𑁂𑀲𑀽𑀢𑀺 𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑀁 𑀧𑀚𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀬𑀤𑀺 𑀪𑀯𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀲𑀸𑀬𑀦𑁆𑀢𑀺 𑀏𑀯𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀪𑀯𑀢𑀺 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄. 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀢𑀢𑁆𑀭 𑀢𑀢𑁆𑀭 𑀪𑀯𑁂 𑀉𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻𑀢𑀺 𑀇𑀫𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺. 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀻𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘𑀸𑀢𑀺 𑀏𑀯𑀁 𑀧𑀤𑀦𑁆𑀢𑀭𑀲𑀁𑀬𑁄𑀚𑀦𑀯𑀲𑁂𑀦 𑀫𑀺𑀲𑁆𑀲𑀺𑀢𑀸𑀦𑀺 𑀓𑀢𑀸𑀦𑀺. 𑀅𑀝𑁆𑀞 𑀪𑀯𑀦𑁆𑀢𑀻𑀢𑀺 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀏𑀯𑀁 𑀅𑀝𑁆𑀞 𑀪𑀯𑀦𑁆𑀢𑀺.

𑀢𑀸𑀦𑀺𑀬𑁂𑀯 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀺 𑀲𑁄𑀴𑀲 𑀪𑀯𑀦𑁆𑀢𑀻𑀢𑀺 𑀢𑀸𑀦𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀸𑀦𑀺 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀦𑁂𑀯𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘, 𑀦𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀦 ¶ 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘𑀸𑀢𑀺 𑀏𑀯𑀁 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀺 𑀧𑀼𑀭𑀺𑀫𑀸𑀦𑀺 𑀅𑀝𑁆𑀞 𑀇𑀫𑀸𑀦𑀺 𑀅𑀝𑁆𑀞𑀸𑀢𑀺 𑀲𑁄𑀴𑀲 𑀪𑀯𑀦𑁆𑀢𑀺. 𑀢𑁂𑀲𑀼 𑀘𑀢𑁆𑀢𑀸𑀭𑁄 𑀏𑀓𑀓𑀸, 𑀙 𑀤𑀼𑀓𑀸, 𑀘𑀢𑁆𑀢𑀸𑀭𑁄 𑀢𑀺𑀓𑀸, 𑀏𑀓𑁄 𑀘𑀢𑀼𑀓𑁆𑀓𑁄, 𑀅𑀧𑀭𑁄𑀧𑀺 𑀏𑀓𑁄 𑀘𑀢𑀼𑀓𑁆𑀓𑁄𑀢𑀺 𑀅𑀬𑀫𑁆𑀧𑀺 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀸𑀧𑀺 𑀤𑁆𑀯𑁂 𑀤𑀼𑀓𑀸, 𑀤𑁆𑀯𑁂 𑀢𑀺𑀓𑀸, 𑀤𑁆𑀯𑁂 𑀘𑀢𑀼𑀓𑁆𑀓𑀸 𑀘 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀇𑀫𑀲𑁆𑀲 𑀧𑀝𑁆𑀞𑀸𑀦𑀲𑁆𑀲 𑀲𑀓𑀮𑀲𑀸𑀲𑀦𑀲𑀗𑁆𑀕𑀳𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀫𑁂𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀺 𑀪𑀺𑀦𑁆𑀦𑁂𑀳𑀺 𑀦𑀯𑀯𑀺𑀥𑀁 𑀲𑀼𑀢𑁆𑀢𑀁 𑀪𑀺𑀦𑁆𑀦𑀁 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀇𑀫𑁂𑀳𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀺 𑀧𑀝𑁆𑀞𑀸𑀦𑀦𑀬𑁂𑀦 𑀯𑀺𑀪𑀢𑁆𑀢𑁂𑀳𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀦𑀯𑀯𑀺𑀥𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑀗𑁆𑀔𑀸𑀢𑀁 𑀲𑀼𑀢𑁆𑀢𑀁 𑀪𑀺𑀦𑁆𑀦𑀁 𑀲𑁄𑀴𑀲𑀥𑀸 ¶ 𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀲𑁄𑀴𑀲𑀯𑀺𑀥𑁂𑀦 𑀧𑀝𑁆𑀞𑀸𑀦𑁂𑀦 𑀅𑀲𑀗𑁆𑀕𑀳𑀺𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀧𑀤𑁂𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀁 𑀧𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀪𑀸𑀯𑁄 𑀕𑀳𑁂𑀢𑀩𑁆𑀩𑁄𑀢𑀺? 𑀆𑀳 ‘‘𑀕𑀸𑀣𑀸𑀬 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸’’𑀢𑀺𑀆𑀤𑀺. 𑀢𑀢𑁆𑀣 𑀕𑀸𑀣𑀸𑀬 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸𑀢𑀺 𑀅𑀬𑀁 𑀕𑀸𑀣𑀸 𑀯𑀺𑀬 𑀕𑀸𑀣𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀢𑀺 𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀸𑀢𑀺 𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀢𑀺 𑀯𑀸 𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀢𑀺 𑀯𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀅𑀦𑀼 𑀅𑀦𑀼 𑀫𑀺𑀦𑀺𑀢𑁆𑀯𑀸 𑀢𑀓𑁆𑀓𑁂𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀕𑀸𑀣𑀸𑀯𑁂𑀬𑁆𑀬𑀸𑀓𑀭𑀡𑀯𑀺𑀦𑀺𑀫𑀼𑀢𑁆𑀢𑀸 𑀲𑀩𑁆𑀩𑀸 𑀧𑀭𑀺𑀬𑀢𑁆𑀢𑀺 ‘‘𑀲𑀼𑀢𑁆𑀢𑁂𑀦𑀸’’𑀢𑀺𑀧𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁯𑁦. 𑀇𑀤𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀉𑀤𑀸𑀳𑀭𑀡𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸’’𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸 𑀇𑀫𑀲𑁆𑀲, 𑀏𑀯𑀁 𑀇𑀢𑁄 𑀧𑀭𑀸𑀦𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑀁 𑀉𑀢𑁆𑀢𑀸𑀦𑀧𑀤𑀸𑀦𑀜𑁆𑀘 𑀅𑀢𑁆𑀣𑀁 𑀦 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀅𑀕𑀢𑀺𑀕𑀫𑀦𑀸𑀦𑀻𑀢𑀺 𑀓𑀸𑀬𑀸𑀤𑀻𑀳𑀺 𑀅𑀬𑀼𑀢𑁆𑀢𑀕𑀫𑀦𑀸𑀦𑀺, 𑀅𑀓𑀢𑁆𑀢𑀩𑁆𑀩𑀓𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀸𑀢𑀺 𑀙𑀦𑁆𑀤𑀳𑁂𑀢𑀼 𑀇𑀘𑁆𑀙𑀸𑀧𑀘𑁆𑀘𑀬𑀸. 𑀅𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀅𑀕𑀦𑁆𑀢𑀩𑁆𑀩𑀁 𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀲𑀸𑀥𑀽𑀦𑀁 𑀅𑀭𑀺𑀬𑀸𑀦𑀁 𑀥𑀫𑁆𑀫𑀁. 𑀅𑀢𑀺𑀯𑀢𑁆𑀢𑀢𑀻𑀢𑀺 𑀅𑀢𑀺𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀢𑀺. 𑀦𑀺𑀳𑀻𑀬𑀢𑀻𑀢𑀺 𑀳𑀸𑀬𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺 𑀘 𑀧𑀭𑀺𑀯𑀸𑀭𑁄 𑀘.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀕𑀸𑀣𑀸𑀬𑀁 𑀫𑀦𑁄𑀢𑀺 𑀬𑀤𑀺𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀁 𑀫𑀦𑁄, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀲𑁆𑀲 ¶ (𑀥. 𑀧. 𑁧-𑁨; 𑀣𑁂𑀭𑀕𑀸. 𑁯𑁫) 𑀧𑀼𑀭𑀺𑀫𑀚𑀸𑀢𑀺𑀬𑀁 𑀯𑁂𑀚𑁆𑀚𑀪𑀽𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀲𑁂𑀦 𑀦𑀺𑀬𑀫𑀺𑀬𑀫𑀸𑀦𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. 𑀲𑁄 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸, 𑀫𑀦𑀲𑀸 𑀧𑀞𑀫𑀕𑀸𑀫𑀺𑀦𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀢𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀫𑁆𑀫𑀸, 𑀢𑁂 𑀧𑀦 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀏𑀢𑁂 𑀳𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀓𑀣𑀁 𑀧𑀦𑁂𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀲𑁆𑀫𑀺𑀜𑁆𑀘 𑀆𑀭𑀫𑁆𑀫𑀡𑁂 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀦𑀸𑀫 𑀳𑁄𑀢𑀻𑀢𑀺? 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦. 𑀬𑀣𑀸 𑀳𑀺 𑀩𑀳𑀽𑀲𑀼 𑀏𑀓𑀢𑁄 𑀕𑀸𑀫𑀖𑀸𑀢𑀸𑀤𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁂𑀲𑀼 ‘‘𑀓𑁄 𑀏𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀯𑀼𑀢𑁆𑀢𑁂 𑀬𑁄 𑀢𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀁 𑀬𑀁 𑀦𑀺𑀲𑁆𑀲𑀸𑀬 𑀢𑁂 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀲𑁄 𑀤𑀢𑁆𑀢𑁄 𑀯𑀸 𑀫𑀺𑀢𑁆𑀢𑁄 𑀯𑀸 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀇𑀢𑀺 𑀉𑀧𑁆𑀧𑀸𑀤𑀧𑀘𑁆𑀘𑀬𑀝𑁆𑀞𑁂𑀦 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀦 𑀳𑀺 ¶ 𑀢𑁂 𑀫𑀦𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀺, 𑀫𑀦𑁄 𑀧𑀦 𑀏𑀓𑀘𑁆𑀘𑁂𑀲𑀼 𑀘𑁂𑀢𑀲𑀺𑀓𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀢𑀺 𑀏𑀯.

𑀅𑀥𑀺𑀧𑀢𑀺𑀯𑀲𑁂𑀦 𑀫𑀦𑁄 𑀲𑁂𑀝𑁆𑀞𑁄 𑀏𑀢𑁂𑀲𑀦𑁆𑀢𑀺 𑀫𑀦𑁄𑀲𑁂𑀝𑁆𑀞𑀸. 𑀬𑀣𑀸 𑀳𑀺 𑀘𑁄𑀭𑀸𑀤𑀻𑀦𑀁 𑀘𑁄𑀭𑀚𑁂𑀝𑁆𑀞𑀓𑀸𑀤𑀬𑁄 𑀅𑀥𑀺𑀧𑀢𑀺𑀦𑁄 𑀲𑁂𑀝𑁆𑀞𑀸, 𑀢𑀣𑀸 𑀢𑁂𑀲𑀫𑁆𑀧𑀺 𑀫𑀦𑁄 𑀲𑁂𑀝𑁆𑀞𑁄. 𑀬𑀣𑀸 𑀧𑀦 𑀤𑀸𑀭𑀼𑀆𑀤𑀻𑀳𑀺 𑀦𑀺𑀧𑁆𑀨𑀦𑁆𑀦𑀸𑀦𑀺 𑀪𑀡𑁆𑀟𑀸𑀦𑀺 𑀤𑀸𑀭𑀼𑀫𑀬𑀸𑀤𑀻𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀣𑀸 𑀏𑀢𑁂𑀧𑀺 𑀫𑀦𑀢𑁄 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀫𑀦𑁄𑀫𑀬𑀸 𑀦𑀸𑀫. 𑀧𑀤𑀼𑀝𑁆𑀞𑁂𑀦𑀸𑀢𑀺 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑁄𑀲𑁂𑀳𑀺 𑀧𑀤𑀼𑀝𑁆𑀞𑁂𑀦 𑀤𑀽𑀲𑀺𑀢𑁂𑀦 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸. 𑀲𑁄 𑀳𑀺 𑀪𑀸𑀲𑀦𑁆𑀢𑁄 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀫𑁂𑀯 𑀪𑀸𑀲𑀢𑀺, 𑀓𑀭𑁄𑀦𑁆𑀢𑁄𑀧𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀫𑁂𑀯 𑀓𑀭𑁄𑀢𑀺, 𑀅𑀪𑀸𑀲𑀦𑁆𑀢𑁄 𑀅𑀓𑀭𑁄𑀦𑁆𑀢𑁄 𑀢𑁂𑀳𑀺 𑀅𑀪𑀺𑀚𑁆𑀛𑀸𑀤𑀻𑀳𑀺 𑀧𑀤𑀼𑀝𑁆𑀞𑀫𑀦𑀢𑀸𑀬 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀧𑀽𑀭𑁂𑀢𑀺. 𑀏𑀯𑀫𑀲𑁆𑀲 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀻𑀢𑀺 𑀢𑀢𑁄 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀤𑀼𑀘𑁆𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀼𑀓𑁆𑀔𑀁 𑀅𑀦𑀼𑀕𑀘𑁆𑀙𑀢𑀺. 𑀬𑀣𑀸 𑀓𑀺𑀁? 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤𑀦𑁆𑀢𑀺, 𑀬𑀣𑀸 𑀦𑀸𑀫 𑀲𑀓𑀝𑀁 𑀯𑀳𑀢𑁄 𑀩𑀮𑀻𑀩𑀤𑁆𑀤𑀲𑁆𑀲 𑀧𑀤𑀁 𑀧𑀳𑀭𑀦𑁆𑀢𑀁 𑀘𑀓𑁆𑀓𑀁 𑀅𑀦𑀼𑀕𑀘𑁆𑀙𑀢𑀺, 𑀏𑀯𑀁 𑀦𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀫𑀦𑀼𑀕𑀘𑁆𑀙𑀢𑀻𑀢𑀺.

‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀻’’𑀢𑀺 𑀕𑀸𑀣𑀸𑀬𑀁 𑀫𑀺𑀤𑁆𑀥𑀻𑀢𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄. 𑀫𑀳𑀕𑁆𑀖𑀲𑁄𑀢𑀺 𑀫𑀳𑀸𑀪𑁄𑀚𑀦𑁄 𑀆𑀳𑀭𑀳𑀢𑁆𑀣𑀓𑀅𑀮𑀁𑀲𑀸𑀝𑀓𑀢𑀢𑁆𑀭𑀯𑀝𑁆𑀝𑀓𑀓𑀸𑀓𑀫𑀸𑀲𑀓𑀪𑀼𑀢𑁆𑀢𑀯𑀫𑀺𑀢𑀓𑀸𑀦𑀁 𑀅𑀜𑁆𑀜𑀢𑀭𑁄 𑀯𑀺𑀬. 𑀦𑀺𑀤𑁆𑀤𑀸𑀬𑀺𑀢𑀸𑀢𑀺 𑀲𑀼𑀧𑀦𑀲𑀻𑀮𑁄. 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻𑀢𑀺 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑀯𑀲𑁂𑀦 𑀲𑀫𑁆𑀧𑀭𑀺𑀯𑀢𑁆𑀢𑀓𑀲𑀬𑀦𑀲𑀻𑀮𑁄 ¶ . 𑀦𑀺𑀯𑀸𑀧𑀧𑀼𑀝𑁆𑀞𑁄𑀢𑀺 𑀓𑀼𑀡𑁆𑀟𑀓𑀸𑀤𑀺𑀦𑀸 𑀲𑀽𑀓𑀭𑀪𑀢𑁆𑀢𑁂𑀦 𑀧𑀼𑀝𑁆𑀞𑁄. 𑀖𑀭𑀲𑀽𑀓𑀭𑁄 𑀳𑀺 𑀩𑀸𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑁄𑀲𑀺𑀬𑀫𑀸𑀦𑁄 𑀣𑀽𑀮𑀲𑀭𑀻𑀭𑀓𑀸𑀮𑁂 𑀕𑁂𑀳𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑁄 𑀳𑁂𑀝𑁆𑀞𑀸𑀫𑀜𑁆𑀘𑀸𑀤𑀻𑀲𑀼 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄 𑀲𑀬𑀢𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀸 𑀧𑀼𑀭𑀺𑀲𑁄 𑀫𑀺𑀤𑁆𑀥𑀻 𑀘 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀯𑀸𑀧𑀧𑀼𑀝𑁆𑀞𑁄 𑀫𑀳𑀸𑀯𑀭𑀸𑀳𑁄 𑀯𑀺𑀬 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀬𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀤𑁆𑀤𑀸𑀲𑀻𑀮𑁄 𑀲𑀁𑀧𑀭𑀺𑀯𑀢𑁆𑀢𑀲𑀸𑀬𑀻, 𑀢𑀤𑀸 𑀲𑁄 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀫𑀦𑀲𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀲𑀁 𑀅𑀫𑀦𑀲𑀺𑀓𑀸𑀭𑀸 𑀫𑀦𑁆𑀤𑀧𑀜𑁆𑀜𑁄 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀁 𑀉𑀧𑁂𑀢𑀺, 𑀕𑀩𑁆𑀪𑀯𑀸𑀲𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺.

‘‘𑀅𑀬𑀲𑀸𑀯 𑀫𑀮’’𑀦𑁆𑀢𑀺 𑀕𑀸𑀣𑀸𑀬𑀁 𑀅𑀬𑀲𑀸𑀢𑀺 𑀅𑀬𑀢𑁄. 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀚𑀸𑀢𑀁. 𑀢𑀢𑀼𑀝𑁆𑀞𑀸𑀬𑀸𑀢𑀺 𑀢𑀢𑁄 𑀉𑀝𑁆𑀞𑀳𑀺𑀢𑁆𑀯𑀸. 𑀅𑀢𑀺𑀥𑁄𑀦𑀘𑀸𑀭𑀺𑀦𑀦𑁆𑀢𑀺 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀇𑀤𑀫𑀢𑁆𑀣𑀺𑀢𑀸𑀬 𑀅𑀮𑀫𑁂𑀢𑁂𑀦𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀧𑀜𑁆𑀜𑀸, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀦𑁆𑀢𑁄 𑀅𑀢𑀺𑀥𑁄𑀦𑀘𑀸𑀭𑀻 𑀦𑀸𑀫. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀬𑀢𑁄 𑀫𑀮𑀁 𑀲𑀫𑀼𑀝𑁆𑀞𑀸𑀬 𑀬𑀢𑁄 𑀢𑀁 𑀲𑀫𑀼𑀝𑁆𑀞𑀺𑀢𑀁, 𑀢𑀫𑁂𑀯 𑀔𑀸𑀤𑀢𑀺 𑀯𑀺𑀦𑀸𑀲𑁂𑀢𑀺, 𑀏𑀯𑀫𑁂𑀯𑀁 𑀘𑀢𑁆𑀢𑀸𑀭𑁄 ¶ 𑀧𑀘𑁆𑀘𑀬𑁂 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀝𑁆𑀞𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑁂𑀯 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀼𑀕𑁆𑀕𑀢𑀺𑀁 𑀦𑀬𑀦𑁆𑀢𑀻𑀢𑀺.

‘‘𑀘𑁄𑀭𑁄 𑀬𑀣𑀸’’𑀢𑀺 𑀕𑀸𑀣𑀸𑀬𑀁 𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄𑀢𑀺 𑀬𑀣𑀸 𑀘𑁄𑀭𑁄 𑀖𑀭𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑁄 𑀖𑀭𑀲𑀦𑁆𑀥𑀺𑀫𑀼𑀔𑁂 𑀏𑀯 𑀭𑀸𑀚𑀧𑀼𑀭𑀺𑀲𑁂𑀳𑀺 𑀕𑀳𑀺𑀢𑁄. 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘𑀸𑀢𑀺 𑀢𑁂𑀦 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑁂𑀦 𑀓𑀲𑀸𑀪𑀺𑀢𑀸𑀴𑀦𑀸𑀤𑀺𑀦𑀸 𑀳𑀜𑁆𑀜𑀢𑀺 𑀘𑁂𑀯 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀦𑀸 𑀩𑀚𑁆𑀛𑀢𑀺 𑀘. 𑀏𑀯𑀁 𑀅𑀬𑀁 𑀧𑁂𑀘𑁆𑀘 𑀧𑀚𑀸 𑀧𑀭𑀢𑁆𑀣𑀸𑀢𑀺 𑀏𑀯𑀫𑁆𑀧𑀺 𑀅𑀬𑀁 𑀧𑀸𑀧𑀓𑀸𑀭𑀺𑀦𑀻 𑀧𑀚𑀸 𑀇𑀢𑁄 𑀘𑀯𑀺𑀢𑁆𑀯𑀸 𑀧𑀭𑀮𑁄𑀓𑁂. 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘𑀸𑀢𑀺 𑀅𑀢𑁆𑀢𑀦𑀸𑀯 𑀓𑀢𑁂𑀦 𑀧𑀸𑀧𑀓𑀫𑁆𑀫𑁂𑀦 𑀦𑀺𑀭𑀬𑀸𑀤𑀻𑀲𑀼 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀫𑁆𑀫𑀓𑀸𑀭𑀡𑀸𑀤𑀻𑀳𑀺 𑀳𑀜𑁆𑀜𑀢𑀺 𑀘𑁂𑀯 𑀧𑀭𑀺𑀩𑀚𑁆𑀛𑀢𑀺 𑀘𑀸𑀢𑀺.

‘‘𑀲𑀼𑀔𑀓𑀸𑀫𑀸𑀦𑀻’’𑀢𑀺 𑀕𑀸𑀣𑀸𑀬𑀁 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀤𑀡𑁆𑀟𑁂𑀦 𑀯𑀸 𑀮𑁂𑀟𑁆𑀟𑀼𑀆𑀤𑀻𑀳𑀺 𑀯𑀸 𑀯𑀺𑀩𑀸𑀥𑀢𑀺. 𑀧𑁂𑀘𑁆𑀘 𑀲𑁄 𑀦 𑀮𑀪𑁂 𑀲𑀼𑀔𑀦𑁆𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑁂 𑀫𑀦𑀼𑀲𑁆𑀲𑀲𑀼𑀔𑀁 𑀯𑀸 𑀤𑀺𑀩𑁆𑀩𑀲𑀼𑀔𑀁 𑀯𑀸 𑀦 𑀮𑀪𑀢𑀺, 𑀦𑀺𑀩𑁆𑀩𑀸𑀦𑀲𑀼𑀔𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀕𑀼𑀦𑁆𑀦𑀁 ¶ 𑀘𑁂 𑀢𑀭𑀫𑀸𑀦𑀸𑀦𑀦𑁆𑀢𑀺 𑀕𑀸𑀯𑀻𑀲𑀼 𑀫𑀳𑁄𑀖𑀁 𑀢𑀭𑀦𑁆𑀢𑀻𑀲𑀼. 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄𑀢𑀺 𑀬𑀤𑀺 𑀬𑀽𑀣𑀧𑀢𑀺 𑀉𑀲𑀪𑁄 𑀓𑀼𑀝𑀺𑀮𑀁 𑀕𑀘𑁆𑀙𑀢𑀺. 𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀩𑁆𑀩𑀸𑀧𑀺 𑀢𑀸 𑀕𑀸𑀯𑀺𑀬𑁄 𑀓𑀼𑀝𑀺𑀮𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀓𑀲𑁆𑀫𑀸? 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀻𑀢𑀺 𑀦𑁂𑀢𑁆𑀢𑀭𑀺 𑀓𑀼𑀝𑀺𑀮𑀁 𑀕𑀢𑁂 𑀲𑀢𑀺, 𑀦𑁂𑀢𑁆𑀢𑀲𑁆𑀲 𑀓𑀼𑀝𑀺𑀮𑀁 𑀕𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀢𑀸𑀲𑀁 𑀧𑀘𑁆𑀘𑀬𑀺𑀓𑁄 𑀉𑀧𑀤𑁆𑀤𑀯𑀳𑀭𑁄 𑀘.

‘‘𑀏𑀯𑀫𑁂𑀯’’𑀦𑁆𑀢𑀺 𑀕𑀸𑀣𑀸𑀬𑀁 𑀬𑀣𑀸 𑀘𑁂𑀢𑀁, 𑀏𑀯𑀫𑁂𑀯𑀁 𑀬𑁄 𑀫𑀦𑀼𑀲𑁆𑀲𑁂𑀲𑀼 𑀧𑀥𑀸𑀦𑀲𑀫𑁆𑀫𑀢𑁄, 𑀬𑀤𑀺 𑀲𑁄 𑀅𑀥𑀫𑁆𑀫𑀘𑀸𑀭𑀻 𑀲𑀺𑀬𑀸. 𑀬𑁂 𑀢𑀲𑁆𑀲 𑀅𑀦𑀼𑀚𑀻𑀯𑀺𑀦𑁄, 𑀲𑀩𑁆𑀩𑁂𑀧𑀺 𑀅𑀥𑀫𑁆𑀫𑀺𑀓𑀸𑀯 𑀳𑁄𑀦𑁆𑀢𑀺. 𑀲𑀸𑀫𑀺𑀲𑀫𑁆𑀧𑀤𑀸 𑀳𑀺 𑀧𑀓𑀢𑀺𑀲𑀫𑁆𑀧𑀤𑀁 𑀲𑀫𑁆𑀧𑀸𑀤𑁂𑀢𑀺. 𑀬𑀲𑁆𑀫𑀸 𑀘 𑀏𑀢𑀤𑁂𑀯, 𑀢𑀲𑁆𑀫𑀸 𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄. 𑀲𑀼𑀓𑀺𑀘𑁆𑀙𑀭𑀽𑀧𑀸 𑀯𑀢𑀸𑀢𑀺 𑀲𑀼𑀝𑁆𑀞𑀼 𑀓𑀺𑀘𑁆𑀙𑀸𑀧𑀦𑁆𑀦𑀭𑀽𑀧𑀸 𑀯𑀢. 𑀉𑀧𑀥𑀻𑀲𑀽𑀢𑀺 𑀓𑀸𑀫𑀕𑀼𑀡𑀽𑀧𑀥𑀻𑀲𑀼. 𑀭𑀢𑁆𑀢𑀸𑀢𑀺 𑀭𑀸𑀕𑀸𑀪𑀺𑀪𑀽𑀢𑀸. 𑀓𑀝𑀼𑀓𑀦𑁆𑀢𑀺 𑀤𑀼𑀓𑁆𑀔𑀁.

𑀓𑀼𑀓𑁆𑀓𑀼𑀘𑁆𑀘𑀚𑀦𑀓𑁂𑀦𑁂𑀯 𑀧𑀢𑁆𑀢𑀯𑀝𑁆𑀝𑀺𑀧𑁆𑀧𑀪𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀨𑀮𑀼𑀧𑁆𑀧𑀢𑁆𑀢𑀺 𑀓𑀤𑀮𑀺𑀬𑀸 𑀧𑀭𑀸𑀪𑀯𑀸𑀬 𑀳𑁄𑀢𑀻𑀢𑀺 𑀆𑀳 𑁋 ‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀻’’𑀢𑀺. 𑀢𑀣𑀸 𑀨𑀮𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀑𑀲𑀥𑀻𑀦𑀁 ‘‘𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀴𑀯𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀤𑁆𑀭𑀪𑀲𑁆𑀲 𑀚𑀸𑀢𑀸 𑀅𑀲𑁆𑀲𑀢𑀭𑀻 𑀦𑀸𑀫, 𑀲𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀺𑀚𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀸𑀤𑁂𑀳𑀺 𑀪𑀽𑀫𑀺𑀁 𑀧𑀳𑀭𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲 𑀘𑀢𑁆𑀢𑀸𑀭𑁄 ¶ 𑀧𑀸𑀤𑁂 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀧𑁄𑀢𑀓𑀁 𑀦𑀻𑀳𑀭𑀦𑁆𑀢𑀺, 𑀲𑀸 𑀢𑀢𑁆𑀣𑁂𑀯 𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀢𑁆𑀢𑀦𑁄 𑀨𑀮𑀁 𑀓𑀤𑀮𑀺𑀯𑁂𑀴𑀼𑀦𑀴𑁂𑀧𑀺 𑀯𑀺𑀦𑀸𑀲𑁂𑀢𑀺, 𑀕𑀩𑁆𑀪𑁄 𑀘 𑀅𑀲𑁆𑀲𑀢𑀭𑀺𑀁, 𑀏𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑀨𑀮𑀪𑀽𑀢𑁄 𑀲𑀓𑁆𑀓𑀸𑀭𑁄 𑀅𑀲𑀧𑁆𑀧𑀼𑀭𑀺𑀲𑀁 𑀯𑀺𑀦𑀸𑀲𑁂𑀢𑀻𑀢𑀺.

𑀓𑁄𑀥𑀫𑀓𑁆𑀔𑀕𑀭𑀽𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑀁 𑀓𑁄𑀥𑀁, 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑀁 𑀫𑀓𑁆𑀔𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀉𑀤𑁆𑀥𑀁 𑀓𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀦𑁆𑀢𑁄. 𑀲𑀼𑀔𑁂𑀢𑁆𑀢𑁂𑀢𑀺 𑀲𑀼𑀔𑁂𑀢𑁆𑀢𑁂𑀧𑀺. 𑀧𑀽𑀢𑀺𑀩𑀻𑀚𑀁𑀯𑀸𑀢𑀺 𑀧𑀽𑀢𑀺𑀪𑀸𑀯𑀁 𑀕𑀢𑀁 𑀩𑀻𑀚𑀁 𑀯𑀺𑀬. 𑀙𑀓𑀡𑀭𑀲𑀸𑀤𑀺𑀧𑀭𑀺𑀪𑀸𑀯𑀦𑀲𑀼𑀓𑁆𑀔𑀸𑀧𑀦𑀲𑀼𑀔𑀲𑀬𑀸𑀤𑀻𑀦𑀺 𑀅𑀓𑀭𑀡𑁂𑀦 𑀩𑀻𑀚𑀤𑁄𑀲𑀤𑀼𑀝𑁆𑀞𑀦𑁆𑀢𑀺 𑀅𑀢𑁆𑀣𑁄.

𑁯𑁧. 𑀘𑁂𑀢𑀲𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦. 𑀘𑁂𑀢𑁄𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁. 𑀧𑀭𑀺𑀘𑁆𑀘𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀇𑀭𑀺𑀬𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀬𑀣𑀸𑀪𑀢𑀦𑁆𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀁.

𑀫𑀸𑀓𑀢𑁆𑀣𑀸𑀢𑀺 𑀫𑀸 𑀅𑀓𑀢𑁆𑀣. 𑀦 𑀧𑀫𑀼𑀢𑁆𑀬𑀢𑁆𑀣𑀻𑀢𑀺 𑀧𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀉𑀧𑁂𑀘𑁆𑀘𑀸𑀧𑀻𑀢𑀺 𑀲𑀜𑁆𑀘𑀺𑀘𑁆𑀘𑀸𑀧𑀺, 𑀩𑀼𑀤𑁆𑀥𑀺𑀧𑀼𑀩𑁆𑀩𑁂𑀦𑀸𑀧𑀻𑀢𑀺 𑀅𑀢𑁆𑀣𑁄.

‘‘𑀅𑀥𑀫𑁆𑀫𑁂𑀦𑀸’’𑀢𑀺 ¶ 𑀯𑀢𑁆𑀯𑀸𑀧𑀺 ‘‘𑀫𑀼𑀲𑀸𑀯𑀸𑀤𑁂𑀦𑀸’’𑀢𑀺 𑀯𑀘𑀦𑀁 𑀫𑀼𑀲𑀸𑀯𑀸𑀤𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯𑀸𑀳 𑁋 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲𑀸’’𑀢𑀺𑀆𑀤𑀺 (𑀥. 𑀧. 𑁧𑁭𑁬), 𑀢𑀣𑀸 ‘‘𑀏𑀯𑀁 𑀧𑀭𑀺𑀢𑁆𑀢𑀁 𑀔𑁄, 𑀭𑀸𑀳𑀼𑀮, 𑀢𑁂𑀲𑀁 𑀲𑀸𑀫𑀜𑁆𑀜𑀁, 𑀬𑁂𑀲𑀁 𑀦𑀢𑁆𑀣𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀚𑁆𑀚𑀸’’𑀢𑀺𑀆𑀤𑀺 (𑀫. 𑀦𑀺. 𑁨.𑁧𑁦𑁮). 𑀢𑀁 𑀓𑀣𑀁 𑀦𑀼 𑀪𑀯𑀺𑀲𑁆𑀲𑀢𑀻𑀢𑀺 𑀢𑀁 𑀥𑀦𑀁 𑀓𑁂𑀦 𑀦𑀼 𑀧𑀓𑀸𑀭𑁂𑀦 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺. 𑀅𑀥𑀫𑁆𑀫𑁂𑀦 𑀢𑁂𑀲𑀁 𑀲𑀫𑁆𑀪𑀢𑀢𑁆𑀢𑀸 𑀢𑁂𑀲𑀼 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀸𑀬𑀸 𑀲𑀼 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀫𑁆𑀫𑀺𑀬𑀯𑁄𑀳𑀸𑀭𑀸𑀤𑀺𑀢𑁄 𑀭𑀸𑀚𑀦𑁆𑀢𑀭𑀸𑀬𑀸𑀤𑀬𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀫𑁆𑀪𑀢𑀲𑁆𑀲 𑀯𑀺𑀦𑀲𑁆𑀲𑀢𑀻𑀢𑀺 𑀇𑀫𑀲𑁆𑀲 𑀲𑀫𑁆𑀪𑀢𑀁 𑀲𑀚𑁆𑀚𑀺𑀢𑀁 𑀯𑀺𑀦𑀲𑁆𑀲𑀢𑀺. 𑀲𑀕𑁆𑀕𑀦𑁆𑀢𑀺 𑀲𑀼𑀕𑀢𑀺𑀁. 𑀲𑀸 𑀳𑀺 𑀭𑀽𑀧𑀸𑀤𑀻𑀳𑀺 𑀲𑁄𑀪𑀦𑁂𑀳𑀺 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀏𑀢𑁆𑀢𑀸𑀯𑀢𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀢𑁆𑀣𑀸𑀦𑀁 𑀳𑀸𑀦𑀺𑀬𑀸. 𑀳𑀢𑀸𑀢𑀺 𑀯𑀺𑀦𑀝𑁆𑀞𑀸.

𑀯𑀺𑀯𑀝𑁆𑀝𑀢𑁂𑀢𑀺 𑀦𑀺𑀯𑀝𑁆𑀝𑀢𑀺. 𑀮𑁄𑀪𑀸 𑀔𑀡𑀢𑀺 𑀅𑀢𑁆𑀢𑀸𑀦𑀦𑁆𑀢𑀺 𑀮𑁄𑀪𑀳𑁂𑀢𑀼 𑀅𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀓𑀸𑀬𑀯𑀺𑀲𑀫𑀸𑀤𑀺𑀬𑁄𑀕𑁂𑀦 𑀅𑀢𑁆𑀢𑀸𑀦𑀁 𑀔𑀡𑀢𑀺 𑀦𑀸𑀫. 𑀫𑀺𑀢𑁆𑀢𑁂𑀳𑀺 𑀚𑀻𑀭𑀢𑀻𑀢𑀺 𑀫𑀺𑀢𑁆𑀢𑀪𑀸𑀯𑁂𑀳𑀺 𑀳𑀸𑀬𑀢𑀺.

𑀘𑀭𑀦𑁆𑀢𑀻𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀅𑀓𑀼𑀲𑀮𑀫𑁂𑀯 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀩𑀸𑀮𑀸𑀢𑀺 𑀇𑀥𑀮𑁄𑀓𑀢𑁆𑀣𑀁 𑀧𑀭𑀮𑁄𑀓𑀢𑁆𑀣𑀜𑁆𑀘 ¶ 𑀅𑀚𑀸𑀦𑀦𑁆𑀢𑀸 𑀇𑀥 𑀩𑀸𑀮𑀸 𑀦𑀸𑀫. 𑀤𑀼𑀫𑁆𑀫𑁂𑀥𑀸𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀦 𑀳𑀺 𑀧𑀜𑁆𑀜𑀸𑀬 𑀤𑀼𑀝𑁆𑀞𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺. 𑀅𑀫𑀺𑀢𑁆𑀢𑁂𑀦𑁂𑀯𑀸𑀢𑀺 𑀅𑀫𑀺𑀢𑁆𑀢𑀪𑀽𑀢𑁂𑀦 𑀯𑀺𑀬 𑀯𑁂𑀭𑀺𑀦𑀸 𑀯𑀺𑀬 𑀳𑀼𑀢𑁆𑀯𑀸. 𑀓𑀝𑀼𑀓𑀧𑁆𑀨𑀮𑀦𑁆𑀢𑀺 𑀢𑀺𑀔𑀺𑀡𑀨𑀮𑀁, 𑀤𑀼𑀓𑁆𑀔𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀻𑀢𑀺 𑀬𑀁 𑀓𑀫𑁆𑀫𑀁 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀁 𑀤𑀼𑀓𑁆𑀔𑀼𑀤𑀬𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀅𑀦𑀼𑀢𑀧𑁆𑀧𑀢𑀺 𑀅𑀦𑀼𑀲𑁄𑀘𑀢𑀺, 𑀢𑀁 𑀓𑀢𑀁 𑀦 𑀲𑀸𑀥𑀼 𑀦 𑀲𑀼𑀦𑁆𑀤𑀭𑀁 𑀦 𑀪𑀤𑁆𑀤𑀓𑀁. 𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄𑀢𑀺 𑀬𑀲𑁆𑀲 𑀅𑀲𑁆𑀲𑀽𑀳𑀺 𑀢𑀺𑀦𑁆𑀢𑀫𑀼𑀔𑁄 𑀭𑁄𑀤𑀦𑁆𑀢𑁄 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺 𑀅𑀦𑀼𑀪𑁄𑀢𑀺.

𑀤𑀼𑀓𑁆𑀓𑀭𑀦𑁆𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀧𑀽𑀭𑀡𑀸𑀤𑀺𑀯𑀲𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀲𑁆𑀲 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀓𑁆𑀓𑀭𑀁. 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀔𑀡𑁆𑀟𑀁 𑀅𑀓𑀢𑁆𑀯𑀸 𑀯𑀺𑀲𑁂𑀲𑀢𑁄 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑁆𑀲 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀤𑀼𑀢𑁆𑀢𑀺𑀢𑀺𑀓𑁆𑀔𑀁, 𑀲𑀻𑀮𑀲𑀁𑀯𑀭𑀸𑀤𑀬𑁄 𑀯𑀸 𑀅𑀧𑀭𑀺𑀓𑁆𑀔𑀢𑁂 𑀓𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀓𑁆𑀓𑀭𑀁. 𑀅𑀥𑀺𑀯𑀸𑀲𑁂𑀢𑀩𑁆𑀩𑀸𑀦𑀁 𑀧𑀦 𑀤𑀼𑀲𑁆𑀲𑀳𑀦𑀢𑁄 𑀔𑀦𑁆𑀢𑀺𑀲𑀁𑀯𑀭𑀁𑀯𑀲𑁂𑀦 𑀤𑀼𑀢𑁆𑀢𑀺𑀢𑀺𑀓𑁆𑀔𑀁. 𑀅𑀩𑁆𑀬𑀢𑁆𑀢𑁂𑀦𑀸𑀢𑀺 𑀫𑀦𑁆𑀤𑀧𑀜𑁆𑀜𑁂𑀦. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲. 𑀲𑀫𑁆𑀩𑀸𑀥𑀸𑀢𑀺 𑀤𑀼𑀦𑁆𑀦𑀺𑀯𑀢𑁆𑀣𑀤𑀼𑀧𑁆𑀧𑀸𑀭𑀼𑀢𑀫𑀸𑀢𑀼𑀕𑀸𑀫𑀸𑀤𑀺𑀲𑀫𑁆𑀫𑀤𑁆𑀤𑀸. 𑀬𑀢𑁆𑀣𑀸𑀢𑀺 𑀲𑀻𑀮𑀲𑀁𑀯𑀭𑀸𑀤𑀻𑀦𑀁 𑀧𑀭𑀺𑀩𑀦𑁆𑀥𑀪𑀽𑀢𑁂𑀲𑀼 𑀲𑀫𑁆𑀩𑀸𑀥𑀲𑀗𑁆𑀔𑀸𑀢𑁂𑀲𑀼 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀤𑀻𑀲𑀼 ¶ . 𑀅𑀣 𑀯𑀸 𑀤𑀼𑀓𑁆𑀓𑀭𑀦𑁆𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀢𑁆𑀢𑀺𑀢𑀺𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀫𑀁 𑀤𑀼𑀭𑀥𑀺𑀯𑀸𑀲𑀺𑀬𑀁. 𑀅𑀩𑁆𑀬𑀢𑁆𑀢𑁂𑀦𑀸𑀢𑀺 𑀩𑀸𑀮𑁂𑀦. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀥𑀫𑁆𑀫𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀧𑀡𑁆𑀟𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀧𑀺…𑀧𑁂… 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀤𑀦𑁆𑀢𑁂𑀪𑀺 𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀸𑀲𑀦𑀁 𑀏𑀓𑀪𑀢𑁆𑀢𑀁 𑀧𑀝𑀺𑀲𑁂𑀯𑀫𑀸𑀦𑀸 𑀆𑀧𑀸𑀡𑀓𑁄𑀝𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸 𑀲𑀸𑀫𑀜𑁆𑀜𑀁 𑀓𑀭𑁄𑀦𑁆𑀢𑀺, 𑀢𑀁 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀩𑀳𑀽𑀳𑀺 𑀢𑀢𑁆𑀣 𑀲𑀫𑁆𑀩𑀸𑀥𑀸𑀢𑀺 𑀢𑀲𑁆𑀫𑀺𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑁂 𑀅𑀭𑀺𑀬𑀫𑀕𑁆𑀕𑁂 𑀩𑀳𑀽 𑀲𑀫𑁆𑀩𑀸𑀥𑀸, 𑀫𑀕𑁆𑀕𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀩𑀳𑀽 𑀧𑀭𑀺𑀲𑁆𑀲𑀬𑀸𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀺𑀦𑀦𑁆𑀢𑁄𑀢𑀺 𑀅𑀧𑁆𑀧𑀫𑁂𑀬𑁆𑀬𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀁 ‘‘𑀏𑀢𑁆𑀢𑀓𑀲𑀻𑀮𑁄 𑀅𑀬𑀁 𑀏𑀢𑁆𑀢𑀓𑀲𑀫𑀸𑀥𑀺 𑀏𑀢𑁆𑀢𑀓𑀧𑀜𑁆𑀜𑁄’’𑀢𑀺 𑀏𑀯𑀁 𑀫𑀺𑀦𑀦𑁆𑀢𑁄. 𑀓𑁄𑀥 𑀯𑀺𑀤𑁆𑀯𑀸 𑀯𑀺𑀓𑀧𑁆𑀧𑀬𑁂𑀢𑀺 𑀓𑁄 𑀇𑀥 𑀯𑀺𑀤𑁆𑀯𑀸 𑀫𑁂𑀥𑀸𑀯𑀻 𑀯𑀺𑀓𑀧𑁆𑀧𑁂𑀬𑁆𑀬, 𑀔𑀻𑀡𑀸𑀲𑀯𑁄𑀯 𑀔𑀻𑀡𑀸𑀲𑀯𑀁 𑀫𑀺𑀦𑀦𑁆𑀢𑁄 𑀯𑀺𑀓𑀧𑁆𑀧𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺. 𑀦𑀺𑀯𑀼𑀢𑀁 𑀫𑀜𑁆𑀜𑁂𑀢𑀺 𑀬𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀫𑀺𑀦𑁂𑀢𑀼𑀁 𑀆𑀭𑀪𑀢𑀺, 𑀢𑀁 𑀦𑀺𑀯𑀼𑀢𑀁 𑀅𑀯𑀓𑀼𑀚𑁆𑀚𑀧𑀜𑁆𑀜𑀁 𑀫𑀜𑁆𑀜𑀸𑀫𑀺. 𑀅𑀓𑀺𑀲𑁆𑀲𑀯𑀦𑁆𑀢𑀺 𑀓𑀺𑀲𑁆𑀲𑀯𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀦𑀺𑀧𑁆𑀧𑀜𑁆𑀜𑀦𑁆𑀢𑀺 𑀅𑀢𑁆𑀣𑁄.

𑀓𑀼𑀞𑀸𑀭𑀻𑀢𑀺 𑀅𑀢𑁆𑀢𑀘𑁆𑀙𑁂𑀤𑀓𑀝𑁆𑀞𑁂𑀦 𑀓𑀼𑀞𑀸𑀭𑀺𑀲𑀤𑀺𑀲𑀻 𑀨𑀭𑀼𑀲𑀯𑀸𑀘𑀸. 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑁂 𑀫𑀽𑀮𑁂𑀬𑁂𑀯 𑀦𑀺𑀓𑀦𑁆𑀢𑀢𑀺. 𑀯𑀺𑀲𑀁 𑀳𑀮𑀸𑀳𑀮𑀁 𑀇𑀯𑀸𑀢𑀺 𑀳𑀮𑀸𑀳𑀮𑀲𑀗𑁆𑀔𑀸𑀢𑀁 𑀯𑀺𑀲𑀁 𑀇𑀯. 𑀏𑀯𑀁 𑀯𑀺𑀭𑀤𑁆𑀥𑀁 𑀧𑀸𑀢𑁂𑀢𑀻𑀢𑀺 𑀯𑀺𑀭𑀤𑁆𑀥𑀁 ¶ 𑀅𑀧𑀭𑀤𑁆𑀥𑀁 𑀔𑀮𑀺𑀢𑀧𑀼𑀕𑁆𑀕𑀮𑀁 𑀏𑀯𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑁂𑀢𑀺. 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸 𑀬𑀣𑀸𑀢𑀺 𑀬𑀣𑀸 𑀯𑀸𑀘𑀸 𑀅𑀭𑀺𑀬𑀽𑀧𑀯𑀸𑀤𑀦𑀯𑀲𑁂𑀦 𑀤𑀼𑀩𑁆𑀪𑀸𑀲𑀺𑀢𑀸.

𑁯𑁨. 𑀦𑀺𑀦𑁆𑀤𑀺𑀬𑀦𑁆𑀢𑀺 𑀦𑀺𑀦𑁆𑀤𑀦𑀻𑀬𑀁. 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄𑀢𑀺 𑀬𑁄 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀧𑀲𑀁𑀲𑀸𑀭𑀳𑁄 𑀧𑀼𑀕𑁆𑀕𑀮𑁄, 𑀢𑀁 𑀯𑀸 𑀲𑁄 𑀧𑀸𑀧𑀺𑀘𑁆𑀙𑀢𑀸𑀤𑀻𑀦𑀺 𑀆𑀭𑁄𑀧𑁂𑀢𑁆𑀯𑀸 𑀕𑀭𑀳𑀢𑀺. 𑀯𑀺𑀘𑀺𑀦𑀸𑀢𑀻𑀢𑀺 𑀉𑀧𑀘𑀺𑀦𑀸𑀢𑀺. 𑀓𑀮𑀺𑀦𑁆𑀢𑀺 𑀅𑀧𑀭𑀸𑀥𑀁. 𑀅𑀬𑀁 𑀓𑀮𑀻𑀢𑀺 𑀅𑀬𑀁 𑀅𑀧𑀭𑀸𑀥𑁄. 𑀅𑀓𑁆𑀔𑁂𑀲𑀽𑀢𑀺 𑀚𑀽𑀢𑀓𑀻𑀴𑀦𑀓𑁆𑀔𑁂𑀲𑀼. 𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸𑀢𑀺 𑀲𑀩𑁆𑀩𑁂𑀦 𑀅𑀢𑁆𑀢𑀦𑁄 𑀥𑀦𑁂𑀦𑀸𑀧𑀺 𑀅𑀢𑁆𑀢𑀦𑀸𑀧𑀺 𑀲𑀤𑁆𑀥𑀺𑀁. 𑀲𑀼𑀕𑀢𑁂𑀲𑀽𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸, 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀘 𑀕𑀤𑀢𑁆𑀢𑀸 𑀲𑀼𑀕𑀢𑀲𑀗𑁆𑀔𑀸𑀢𑁂𑀲𑀼 𑀩𑀼𑀤𑁆𑀥𑀸𑀤𑀻𑀲𑀼. 𑀫𑀦𑀁 𑀧𑀤𑁄𑀲𑀬𑁂𑀢𑀺 𑀬𑁄 𑀫𑀦𑀁 𑀧𑀤𑁄𑀲𑁂𑀬𑁆𑀬, 𑀢𑀲𑁆𑀲 𑀅𑀬𑀁 𑀫𑀦𑁄𑀧𑀤𑁄𑀲𑁄 𑀏𑀯 𑀫𑀳𑀢𑁆𑀢𑀭𑁄 𑀓𑀮𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀢𑀁 𑀲𑀳𑀲𑁆𑀲𑀸𑀦𑀁…𑀧𑁂… 𑀧𑀸𑀧𑀓𑀦𑁆𑀢𑀺. 𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀲𑀢𑀲𑀳𑀲𑁆𑀲𑀁. 𑀙𑀢𑁆𑀢𑀺𑀁𑀲𑀢𑀻𑀢𑀺 𑀅𑀧𑀭𑀸𑀦𑀺 𑀙𑀢𑁆𑀢𑀺𑀁𑀲𑀢𑀺 ¶ 𑀦𑀺𑀭𑀩𑁆𑀩𑀼𑀤𑀸𑀦𑀺. 𑀧𑀜𑁆𑀘 𑀘𑀸𑀢𑀺 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀜𑁆𑀘 𑀘 𑀅𑀩𑁆𑀩𑀼𑀤𑀸𑀦𑀺. 𑀢𑀲𑁆𑀫𑀸 𑀯𑀲𑁆𑀲𑀕𑀡𑀦𑀸𑀬 𑀏𑀢𑁆𑀢𑀓𑁄 𑀲𑁄 𑀓𑀸𑀮𑁄, 𑀬𑀁 𑀓𑀸𑀮𑀁 𑀅𑀭𑀺𑀬𑀕𑀭𑀳𑀺𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓𑀁 𑀦𑀺𑀭𑀬𑀁 𑀉𑀧𑁂𑀢𑀺, 𑀢𑀢𑁆𑀣 𑀧𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀲𑀗𑁆𑀔𑁂𑀧𑁂𑀦 𑀧𑀤𑀼𑀫𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀮𑁄𑀪𑀕𑀼𑀡𑁂𑀢𑀺 ‘‘𑀕𑀼𑀡𑁄’’𑀢𑀺 𑀩𑀸𑀮𑁂𑀳𑀺 𑀤𑀺𑀝𑁆𑀞𑀢𑁆𑀢𑀸, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑀢𑁆𑀢𑀸 𑀘 𑀮𑁄𑀪𑁄𑀬𑁂𑀯 𑀮𑁄𑀪𑀕𑀼𑀡𑁄, 𑀢𑀲𑁆𑀫𑀺𑀁 𑀮𑁄𑀪𑀕𑀼𑀡𑁂, 𑀢𑀡𑁆𑀳𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀬𑀼𑀢𑁆𑀢𑁄𑀢𑀺 𑀅𑀦𑀼 𑀅𑀦𑀼 𑀬𑀼𑀢𑁆𑀢𑁄. 𑀅𑀯𑀤𑀜𑁆𑀜𑀽𑀢𑀺 𑀅𑀯𑀘𑀦𑀜𑁆𑀜𑀽, 𑀩𑀼𑀤𑁆𑀥𑀸𑀦𑀫𑁆𑀧𑀺 𑀑𑀯𑀸𑀤𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀫𑀘𑁆𑀙𑀭𑀻𑀢𑀺 𑀧𑀜𑁆𑀘𑀯𑀺𑀥𑀫𑀘𑁆𑀙𑀭𑀺𑀬𑁂𑀦 𑀫𑀘𑁆𑀙𑀭𑀻. 𑀧𑁂𑀲𑀼𑀡𑀺𑀬𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀧𑁂𑀲𑀼𑀡𑀺𑀬𑀲𑁆𑀫𑀺𑀁 𑀅𑀦𑀼𑀬𑀼𑀢𑁆𑀢𑁄 𑀅𑀕𑁆𑀕𑀲𑀸𑀯𑀓𑀸𑀦𑀁 𑀪𑁂𑀤𑀦𑁂𑀦. 𑀓𑁄𑀓𑀸𑀮𑀺𑀓𑀜𑁆𑀳𑀺 𑀫𑀻𑀬𑀫𑀸𑀦𑀁 𑀑𑀯𑀤𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀪𑀸𑀲𑀺𑀢𑀸 𑀇𑀫𑀸 𑀕𑀸𑀣𑀸𑀢𑀺. 𑀫𑀼𑀔𑀤𑀼𑀕𑁆𑀕𑀸𑀢𑀺 𑀫𑀼𑀔𑀯𑀺𑀲𑀫. 𑀯𑀺𑀪𑀽𑀢𑀸𑀢𑀺 𑀯𑀺𑀕𑀢𑀪𑀽𑀢 𑀅𑀮𑀺𑀓𑀯𑀸𑀤𑀺. 𑀅𑀦𑀭𑀺𑀬𑀸𑀢𑀺 𑀅𑀲𑀧𑁆𑀧𑀼𑀭𑀺𑀲. 𑀪𑀽𑀦𑀳𑀽𑀢𑀺 𑀪𑀽𑀢𑀺𑀳𑀦𑀓 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀯𑀺𑀦𑀸𑀲𑀓. 𑀧𑀼𑀭𑀺𑀲𑀦𑁆𑀢𑀸𑀢𑀺 𑀧𑀼𑀭𑀺𑀲𑀸𑀥𑀫. 𑀓𑀮𑀻𑀢𑀺 𑀅𑀮𑀓𑁆𑀔𑀺𑀧𑀼𑀭𑀺𑀲. 𑀅𑀯𑀚𑀸𑀢𑀓𑀧𑀼𑀢𑁆𑀢𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀯𑀚𑀸𑀢𑀧𑀼𑀢𑁆𑀢. 𑀫𑀸 𑀩𑀳𑀼𑀪𑀸𑀡𑀺𑀥 𑀦𑁂𑀭𑀬𑀺𑀓𑁄𑀲𑀻𑀢𑀺 𑀇𑀤𑀸𑀦𑀺 𑀩𑀳𑀼𑀪𑀸𑀡𑀻 𑀫𑀸 𑀳𑁄𑀳𑀺, 𑀦𑁂𑀭𑀬𑀺𑀓𑁄 𑀅𑀲𑀺 𑀚𑀸𑀢𑁄. 𑀭𑀚𑀫𑀸𑀓𑀺𑀭𑀲𑀻𑀢𑀺 𑀓𑀺𑀮𑁂𑀲𑀭𑀚𑀁 𑀅𑀢𑁆𑀢𑀦𑀺 𑀧𑀓𑁆𑀔𑀺𑀧𑀲𑀺. 𑀲𑀦𑁆𑀢𑁂𑀢𑀺 𑀲𑀫𑀺𑀢𑀓𑀺𑀮𑁂𑀲𑁂 𑀔𑀻𑀡𑀸𑀲𑀯𑁂. 𑀓𑀺𑀩𑁆𑀩𑀺𑀲𑀓𑀸𑀭𑀻𑀢𑀺 𑀧𑀸𑀧𑀓𑀸𑀭𑀺. 𑀧𑀧𑀢𑀦𑁆𑀢𑀺 𑀦𑀭𑀓𑀁.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑁆𑀢𑀺 𑀇𑀤𑀁 𑀢𑀡𑁆𑀳𑀸𑀤𑀻𑀦𑀁 𑀲𑀪𑀸𑀯𑀪𑁂𑀤𑀢𑁄 𑀅𑀯𑀢𑁆𑀣𑀸𑀪𑁂𑀤𑀢𑁄 𑀘 𑀅𑀦𑁂𑀓𑀪𑁂𑀤𑀓𑀁 𑀤𑀲𑁆𑀲𑁂𑀢𑀼𑀁 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀲𑀦𑁆𑀦𑁂𑀦𑀸𑀢𑀺 ¶ 𑀓𑀫𑁆𑀫𑀓𑀫𑁆𑀫𑀨𑀮𑀸𑀤𑀻𑀦𑀺 𑀲𑀤𑁆𑀤𑀳𑀦𑁆𑀢𑁂𑀦.

𑁯𑁩. 𑀇𑀤𑁆𑀥𑀦𑁆𑀢𑀺 𑀳𑀢𑁆𑀣𑀽𑀧𑀕𑀲𑀻𑀲𑀽𑀧𑀕𑀸𑀤𑀺𑀅𑀮𑀗𑁆𑀓𑀸𑀭𑁂𑀳𑀺 𑀫𑀡𑀺𑀓𑀦𑀓𑀸𑀤𑀻𑀳𑀺 𑀘 𑀲𑀫𑀺𑀤𑁆𑀥𑀁. 𑀨𑀻𑀢𑀦𑁆𑀢𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀘 𑀥𑀦𑀥𑀜𑁆𑀜𑀸𑀤𑀻𑀳𑀺 𑀘 𑀯𑀺𑀧𑀼𑀮𑀁. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀦𑀺𑀭𑀦𑁆𑀢𑀭𑀫𑀦𑀼𑀲𑁆𑀲𑀁. 𑀲𑀫𑁆𑀩𑀸𑀥𑀩𑁆𑀬𑀽𑀳𑀦𑁆𑀢𑀺 𑀩𑁆𑀬𑀽𑀳𑀸 𑀯𑀼𑀘𑁆𑀘𑀦𑁆𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑀭𑀘𑁆𑀙𑀸𑀬𑁄. 𑀬𑁂𑀲𑀼 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀦𑀺𑀕𑁆𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀫𑁆𑀩𑀸𑀥𑀸 𑀩𑁆𑀬𑀽𑀳𑀓𑀸 𑀏𑀢𑁆𑀣𑀸𑀢𑀺 𑀲𑀫𑁆𑀩𑀸𑀥𑀩𑁆𑀬𑀽𑀳𑀁. 𑀇𑀫𑀺𑀦𑀸𑀧𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀖𑀦𑀯𑀸𑀲𑀫𑁂𑀯 𑀤𑀻𑀧𑁂𑀢𑀺. 𑀪𑀦𑁆𑀢𑁂𑀦𑀸𑀢𑀺 𑀤𑀫𑀣𑀁 𑀅𑀦𑀼𑀧𑀕𑀢𑁂𑀦, 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑁂𑀦 𑀯𑀸. 𑀅𑀧𑀸𑀧𑀓𑀦𑁆𑀢𑀺 𑀅𑀮𑀸𑀫𑀓𑀁. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀘𑀮𑀧𑁆𑀧𑀲𑀸𑀤𑁂𑀦, 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁄 𑀆𑀕𑀢𑁂𑀦 𑀧𑀲𑀸𑀤𑁂𑀦.

𑀧𑁂𑀘𑁆𑀘 ¶ 𑀲𑁄 𑀮𑀪𑀢𑁂𑀢𑀺 𑀬𑁄 𑀪𑀽𑀢𑁂 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑁂 𑀫𑀦𑀼𑀲𑁆𑀲𑀪𑀽𑀢𑁄 𑀫𑀦𑀼𑀲𑁆𑀲𑀲𑀼𑀔𑀁 𑀤𑁂𑀯𑀪𑀽𑀢𑁄 𑀤𑀺𑀩𑁆𑀩𑀲𑀼𑀔𑀁 𑀉𑀪𑀬𑀁 𑀅𑀢𑀺𑀓𑁆𑀓𑀦𑁆𑀢𑁄 𑀦𑀺𑀩𑁆𑀩𑀸𑀦𑀲𑀼𑀔𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑁯𑁪. 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀚𑀦𑀧𑀤𑀘𑀸𑀭𑀺𑀓𑀁 𑀕𑀫𑀺𑀲𑁆𑀲𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀢𑀻𑀢𑀺? 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀤𑁂𑀲𑀦𑁆𑀢𑀭𑀕𑀢𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀢𑀁, 𑀢𑀢𑁆𑀭 𑀞𑀺𑀢𑀸𑀦𑀁 𑀉𑀲𑁆𑀲𑀼𑀓𑁆𑀓𑀲𑀫𑀼𑀧𑁆𑀧𑀸𑀤𑀦𑀁, 𑀪𑀸𑀯𑀓𑀸𑀦𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑀧𑀭𑀺𑀳𑀭𑀡𑀁 𑀅𑀢𑁆𑀢𑀦𑁄 𑀘 𑀢𑀢𑁆𑀣 𑀅𑀦𑀸𑀲𑀗𑁆𑀕𑀤𑀲𑁆𑀲𑀦𑀁, 𑀲𑀫𑁆𑀩𑀼𑀤𑁆𑀥𑀯𑀲𑀺𑀢𑀝𑁆𑀞𑀸𑀦𑀢𑀸𑀬 𑀤𑁂𑀲𑀸𑀦𑀁 𑀘𑁂𑀢𑀺𑀬𑀪𑀸𑀯𑀲𑀫𑁆𑀧𑀸𑀤𑀦𑀁, 𑀩𑀳𑀽𑀦𑀁 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀽𑀧𑀲𑀗𑁆𑀓𑀫𑀦𑀸𑀤𑀻𑀳𑀺 𑀧𑀼𑀜𑁆𑀜𑁄𑀖𑀧𑁆𑀧𑀲𑀯𑀦𑀁, 𑀅𑀯𑀼𑀝𑁆𑀞𑀺𑀆𑀤𑀺𑀉𑀧𑀤𑁆𑀤𑀯𑀽𑀧𑀲𑀫𑀦𑀜𑁆𑀘𑀸𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸𑀢𑀺 𑀇𑀲𑀺𑀤𑀢𑁆𑀢𑁄 𑀘 𑀧𑀼𑀭𑀸𑀡𑁄 𑀘, 𑀢𑁂𑀲𑀼 𑀇𑀲𑀺𑀤𑀢𑁆𑀢𑁄 𑀲𑀓𑀤𑀸𑀕𑀸𑀫𑀻. 𑀧𑀼𑀭𑀸𑀡𑁄 𑀲𑁄𑀢𑀸𑀧𑀦𑁆𑀦𑁄. 𑀲𑀸𑀓𑁂𑀢𑁂𑀢𑀺 ‘‘𑀲𑀸𑀓𑁂𑀢𑁄’’𑀢𑀺 𑀮𑀤𑁆𑀥𑀦𑀸𑀫𑁂 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀓𑁂. 𑀫𑀕𑁆𑀕𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀦𑁆𑀢𑀺 𑀢𑁂𑀲𑀁 𑀓𑀺𑀭 𑀕𑀸𑀫𑀤𑁆𑀯𑀸𑀭𑁂𑀦 𑀪𑀕𑀯𑀢𑁄 𑀕𑀫𑀦𑀫𑀕𑁆𑀕𑁄, 𑀢𑀲𑁆𑀫𑀸 ‘‘𑀲𑀘𑁂 𑀪𑀕𑀯𑀸 𑀅𑀫𑁆𑀳𑀸𑀓𑀁 𑀲𑀼𑀢𑁆𑀢𑀸𑀦𑀁 𑀯𑀸 𑀧𑀫𑀢𑁆𑀢𑀸𑀦𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀅𑀣 𑀧𑀲𑁆𑀲𑀺𑀢𑀼𑀁 𑀦 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀫𑀕𑁆𑀕𑀫𑀚𑁆𑀛𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀁. 𑀅𑀦𑀼𑀩𑀦𑁆𑀥𑀺𑀁𑀲𑀽𑀢𑀺 𑀦 𑀤𑀽𑀭𑀢𑁄𑀯, 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀪𑀕𑀯𑀸 𑀳𑀺 𑀲𑀓𑀝𑀫𑀕𑁆𑀕𑀲𑁆𑀲 𑀫𑀚𑁆𑀛𑁂 𑀚𑀗𑁆𑀖𑀫𑀕𑁆𑀕𑁂𑀦 𑀅𑀕𑀫𑀸𑀲𑀺, 𑀇𑀢𑀭𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀅𑀦𑀼𑀕𑀘𑁆𑀙𑀦𑁆𑀢𑀸 𑀅𑀕𑀫𑀁𑀲𑀼. 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫𑀸𑀢𑀺 𑀩𑀼𑀤𑁆𑀥𑀸 𑀳𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸𑀯 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀞𑀺𑀢𑀸 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀤𑀺𑀯𑀲𑀪𑀸𑀕𑀫𑁆𑀧𑀺 𑀦𑀺𑀲𑀺𑀦𑁆𑀦𑀸, 𑀢𑀲𑁆𑀫𑀸 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑁆𑀳𑀁 𑀲𑀸𑀲𑀦𑁂 𑀯𑀮𑁆𑀮𑀪𑀸 𑀆𑀕𑀢𑀨𑀮𑀸, 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀤𑀺𑀯𑀲𑀪𑀸𑀕𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀫𑀕𑁆𑀕𑀢𑁄 𑀑𑀓𑁆𑀓𑀫𑀺𑀢𑁆𑀯𑀸 𑀬𑁂𑀦𑀜𑁆𑀜𑀢𑀭𑀁 ¶ 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻𑀢𑀺 𑀢𑁂 𑀓𑀺𑀭 𑀙𑀢𑁆𑀢𑀼𑀧𑀸𑀳𑀦𑀓𑀢𑁆𑀢𑀭𑀤𑀡𑁆𑀟𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀸𑀦𑀺 𑀘𑁂𑀯 𑀅𑀝𑁆𑀞𑀯𑀺𑀥𑀜𑁆𑀘 𑀧𑀸𑀦𑀓𑀁 𑀲𑀭𑀪𑀧𑀸𑀤𑀧𑀮𑁆𑀮𑀗𑁆𑀓𑀜𑁆𑀘 𑀕𑀸𑀳𑀸𑀧𑁂𑀢𑁆𑀯𑀸 𑀆𑀕𑀫𑀁𑀲𑀼. 𑀅𑀣 𑀦𑀁 𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀁𑀲𑀼. 𑀲𑀢𑁆𑀣𑀸 𑀢𑀢𑁆𑀣 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀽𑀢𑀺 ‘‘𑀙𑀢𑁆𑀢𑀼𑀧𑀸𑀳𑀦𑀸𑀤𑀻𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀲𑀸𑀯𑀢𑁆𑀣𑀺𑀬𑀸 ¶ 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀫𑀚𑁆𑀛𑀺𑀫𑀤𑁂𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀦𑀺𑀬𑀢𑀸𑀘𑀺𑀡𑁆𑀡𑀢𑁆𑀢𑀸. 𑀪𑀕𑀯𑀢𑁄 𑀳𑀺 𑀘𑀸𑀭𑀺𑀓𑀘𑀭𑀡𑀁 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯. 𑀲𑀘𑁂𑀧𑀺 𑀧𑀘𑁆𑀘𑀦𑁆𑀢𑀤𑁂𑀲𑁂 𑀕𑀘𑁆𑀙𑀢𑀺, 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀻𑀢𑀺 𑀦𑀺𑀬𑀢𑀸𑀘𑀺𑀡𑁆𑀡𑀁, 𑀢𑀲𑁆𑀫𑀸 𑀫𑀚𑁆𑀛𑀺𑀫𑀤𑁂𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀸𑀲𑀻𑀲𑀽𑀢𑀺 𑀓𑀸𑀲𑀺𑀭𑀝𑁆𑀞𑀢𑁄. 𑀢𑀣𑀸 𑀫𑀕𑀥𑁂𑀲𑀽𑀢𑀺 𑀫𑀕𑀥𑀭𑀝𑁆𑀞𑀢𑁄. 𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀆𑀲𑀦𑁆𑀦𑀢𑁆𑀢𑀸 𑀏𑀯 𑀢𑁂𑀲𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀅𑀣 𑀔𑁄 ‘‘𑀇𑀤𑀸𑀦𑀺 𑀤𑀸𑀦𑀁 𑀤𑀸𑀢𑀼𑀁 𑀕𑀦𑁆𑀥𑀫𑀸𑀮𑀸𑀤𑀺𑀧𑀽𑀚𑀁 𑀓𑀸𑀢𑀼𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀦𑁂𑀲𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺.

𑀢𑀲𑁆𑀫𑀸𑀢𑀺𑀳 𑀣𑀧𑀢𑀬𑁄 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺 𑀣𑀧𑀢𑀬𑁄 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀫𑀬𑀺 𑀤𑀽𑀭𑀻𑀪𑀽𑀢𑁂 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 𑀆𑀲𑀦𑁆𑀦𑁂 𑀅𑀦𑀧𑁆𑀧𑀓𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄’’𑀢𑀺. 𑀖𑀭𑀸𑀯𑀸𑀲𑀲𑁆𑀲 𑀳𑀺 𑀤𑁄𑀲𑁂𑀦 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀳𑁄𑀢𑀺. 𑀲𑀘𑁂 𑀧𑀦 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸 𑀅𑀲𑁆𑀲𑀣, 𑀏𑀯𑀁 𑀯𑁄 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀢𑀁 𑀦 𑀪𑀯𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑁆𑀩𑀸𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀳𑀸𑀖𑀭𑁂 𑀯𑀲𑀦𑁆𑀢𑀲𑁆𑀲𑀸𑀧𑀺 𑀳𑀺 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀯. 𑀭𑀚𑁄𑀧𑀣𑁄𑀢𑀺 𑀭𑀸𑀕𑀸𑀤𑀺𑀭𑀚𑀸𑀦𑀁 𑀆𑀕𑀫𑀦𑀧𑀣𑁄, 𑀆𑀕𑀫𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸𑀢𑀺 𑀧𑀩𑁆𑀩𑀚𑁆𑀚𑀸 𑀧𑀦 𑀅𑀓𑀺𑀜𑁆𑀘𑀦𑀅𑀧𑀮𑀺𑀩𑁄𑀥𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄. 𑀘𑀢𑀼𑀭𑀢𑀦𑀺𑀓𑁂𑀧𑀺 𑀳𑀺 𑀕𑀩𑁆𑀪𑁂 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀮𑁆𑀮𑀗𑁆𑀓𑁂𑀦 𑀧𑀮𑁆𑀮𑀗𑁆𑀓𑀁 𑀖𑀝𑁆𑀝𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀫𑁆𑀧𑀺 𑀅𑀓𑀺𑀜𑁆𑀘𑀦𑀸𑀧𑀮𑀺𑀩𑁄𑀥𑀝𑁆𑀞𑁂𑀦 𑀧𑀩𑁆𑀩𑀚𑁆𑀚𑀸 𑀅𑀩𑁆𑀪𑁄𑀓𑀸𑀲𑁄 𑀦𑀸𑀫 𑀳𑁄𑀢𑀺. 𑀅𑀮𑀜𑁆𑀘 𑀧𑀦 𑀯𑁄 𑀣𑀧𑀢𑀬𑁄 𑀅𑀧𑁆𑀧𑀫𑀸𑀤𑀸𑀬𑀸𑀢𑀺 𑀏𑀯𑀁 𑀲𑀫𑁆𑀩𑀸𑀥𑀖𑀭𑀸𑀯𑀸𑀲𑁂 𑀯𑀲𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀅𑀧𑁆𑀧𑀫𑀸𑀤𑀫𑁂𑀯 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀦𑀸𑀕𑀸𑀢𑀺 𑀳𑀢𑁆𑀣𑀺𑀦𑁄. 𑀑𑀧𑀯𑀬𑁆𑀳𑀸𑀢𑀺 𑀭𑀜𑁆𑀜𑁄 𑀆𑀭𑁄𑀳𑀦𑀬𑁄𑀕𑁆𑀕𑀸. 𑀏𑀓𑀁 𑀧𑀼𑀭𑀢𑁄 𑀏𑀓𑀁 𑀧𑀘𑁆𑀙𑀢𑁄 𑀦𑀺𑀲𑀻𑀤𑀸𑀧𑁂𑀫𑀸𑀢𑀺 𑀢𑁂 𑀓𑀺𑀭 𑀤𑁆𑀯𑁂𑀧𑀺 𑀚𑀦𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀤𑁆𑀯𑀻𑀲𑀼 𑀦𑀸𑀕𑁂𑀲𑀼 𑀢𑀸 𑀇𑀢𑁆𑀣𑀺𑀬𑁄 𑀏𑀯𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀦𑀸𑀕𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀦𑀸𑀕𑁄𑀧𑀺 𑀭𑀓𑁆𑀔𑀺𑀢𑀩𑁆𑀩𑁄𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀯𑀺𑀲𑁂𑀲𑀺𑀢𑀁 𑀦 𑀓𑀭𑁄𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀸𑀧𑀺 𑀪𑀕𑀺𑀦𑀺𑀬𑁄𑀢𑀺 𑀬𑀣𑀸 𑀧𑀫𑀸𑀤𑀁 𑀦𑀸𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀸𑀧𑀻𑀢𑀺 𑀲𑀺𑀢𑀓𑀣𑀺𑀢𑀯𑀺𑀓𑁆𑀔𑁂𑀧𑀺𑀢𑀸𑀤𑀻𑀦𑀺 ¶ 𑀅𑀓𑀭𑁄𑀦𑁆𑀢𑁂𑀳𑀺 𑀅𑀢𑁆𑀢𑀸𑀧𑀺 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺 ¶ . 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 ‘‘𑀲𑀸𑀫𑀺𑀤𑀼𑀩𑁆𑀪𑀓𑁄 𑀏𑀲𑁄’’𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀳𑁄𑀢𑀺.

𑀢𑀲𑁆𑀫𑀸𑀢𑀺𑀳 𑀣𑀧𑀢𑀬𑁄𑀢𑀺 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀭𑀸𑀚𑀸 𑀦𑀺𑀘𑁆𑀘𑀁 𑀭𑀸𑀚𑀪𑀡𑁆𑀟𑀁 𑀧𑀝𑀺𑀘𑁆𑀙𑀸𑀧𑁂𑀢𑀺, 𑀢𑀲𑁆𑀫𑀸𑀧𑀺 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄. 𑀬𑀲𑁆𑀫𑀸 𑀧𑀦 𑀧𑀁𑀲𑀼𑀓𑀽𑀮𑀺𑀓𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸, 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺. 𑀅𑀮𑀜𑁆𑀘 𑀔𑁄 𑀣𑀧𑀢𑀬𑁄 𑀅𑀧𑁆𑀧𑀫𑀸𑀤𑀸𑀬, 𑀅𑀧𑁆𑀧𑀫𑀸𑀤𑀫𑁂𑀯 𑀓𑀭𑁄𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀫𑀼𑀢𑁆𑀢𑀘𑀸𑀕𑁄𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑁄. 𑀧𑀬𑀢𑀧𑀸𑀡𑀻𑀢𑀺 𑀆𑀕𑀢𑀸𑀕𑀢𑀸𑀦𑀁 𑀤𑀸𑀦𑀢𑁆𑀣𑀸𑀬 𑀥𑁄𑀢𑀳𑀢𑁆𑀣𑁄. 𑀯𑁄𑀲𑀕𑁆𑀕𑀭𑀢𑁄𑀢𑀺 𑀯𑁄𑀲𑀕𑁆𑀕𑀲𑀗𑁆𑀔𑀸𑀢𑁂 𑀘𑀸𑀕𑁂 𑀭𑀢𑁄. 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀺𑀢𑀩𑁆𑀩𑀬𑀼𑀢𑁆𑀢𑁄. ‘‘𑀬𑀸𑀚𑀬𑁄𑀕𑁄’’𑀢𑀺𑀧𑀺 𑀧𑀸𑀞𑁄, 𑀤𑀸𑀦𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀏𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀢𑀢𑁄𑀧𑀺 𑀲𑀁𑀯𑀺𑀪𑀸𑀕𑁂 𑀭𑀢𑁄. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀬𑁆𑀬𑀸𑀦’’𑀦𑁆𑀢𑀺 𑀏𑀯𑀁 𑀅𑀓𑀢𑀯𑀺𑀪𑀸𑀕𑀁, 𑀲𑀩𑁆𑀩𑀁 𑀤𑀸𑀢𑀩𑁆𑀩𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀔𑁄 𑀣𑀧𑀢𑀬𑁄 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑁄 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑁄𑀢𑀸𑀧𑀦𑁆𑀦𑁂𑀦 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑀢𑁄 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀺.

𑀏𑀯𑀁 𑀢𑁂𑀲𑀁 𑀣𑀧𑀢𑀻𑀦𑀁 𑀇𑀫𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀫𑁆𑀳𑁂 𑀔𑁄 𑀣𑀧𑀢𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁯𑁫. 𑀲𑀳𑀲𑁆𑀲𑀁 𑀓𑀧𑁆𑀧𑀓𑁄𑀝𑀺𑀬𑁄𑀢𑀺 𑀲𑀳𑀲𑁆𑀲𑀁 𑀅𑀢𑁆𑀢𑀪𑀸𑀯𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀲𑀻𑀢𑀺 𑀓𑀧𑁆𑀧𑀓𑁄𑀝𑀺𑀬𑁄’’𑀢𑀺𑀧𑀺 𑀧𑀸𑀞𑁄, 𑀅𑀲𑀻𑀢𑀺𑀆𑀬𑀼𑀓𑀧𑁆𑀧𑀓𑁄𑀝𑀺𑀬𑁄 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀢𑁆𑀣 𑀧𑀦 𑀢𑁂 𑀅𑀳𑁂𑀲𑀼𑀦𑁆𑀢𑀺? 𑀆𑀳 ‘‘𑀤𑁂𑀯𑁂 𑀘𑁂𑀯 𑀫𑀦𑀼𑀲𑁆𑀲𑁂 𑀘𑀸’’𑀢𑀺, 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘𑀸𑀢𑀺 𑀅𑀢𑁆𑀣𑁄. 𑀲𑀁𑀯𑀺𑀭𑀼𑀴𑁆𑀳𑀫𑁆𑀳𑀻𑀢𑀺 𑀲𑀫𑀦𑁆𑀢𑀢𑁄 𑀧𑀮𑁆𑀮𑀯𑀕𑁆𑀕𑀳𑀡𑁂𑀦 𑀯𑀺𑀭𑀼𑀴𑁆𑀳𑁂. 𑀅𑀮𑀪𑀺𑀁𑀳𑀦𑁆𑀢𑀺 𑀅𑀮𑀪𑀺𑀁 𑀅𑀳𑀁. 𑀅𑀚𑁆𑀚 𑀢𑀺𑀁𑀲𑀁 𑀢𑀢𑁄 𑀓𑀧𑁆𑀧𑀸𑀢𑀺 𑀢𑀢𑁄 𑀓𑀧𑁆𑀧𑀢𑁄 𑀅𑀚𑁆𑀚 𑀲𑀫𑁆𑀧𑀢𑀺 𑀅𑀬𑀁 𑀓𑀧𑁆𑀧𑁄 𑀢𑀺𑀁𑀲𑀢𑀺𑀫𑁄. 𑀢𑀲𑁆𑀲𑀸 𑀲𑀜𑁆𑀜𑀸𑀬 𑀯𑀸𑀲𑀦𑀸𑀢𑀺 𑀢𑀲𑁆𑀲 𑀩𑀼𑀤𑁆𑀥𑀕𑀢𑀸𑀬 𑀲𑀜𑁆𑀜𑀸𑀬 𑀯𑀸𑀲𑀦𑀢𑁄.

𑀢𑀡𑁆𑀳𑀸𑀦𑀺𑀖𑀸𑀢𑀓𑁄𑀢𑀺 ¶ 𑀢𑀡𑁆𑀳𑀸𑀬 𑀲𑀫𑀼𑀘𑁆𑀙𑁂𑀤𑀓𑁄. 𑀯𑀝𑀁𑀲𑀓𑁄𑀢𑀺 𑀧𑀼𑀧𑁆𑀨𑀫𑀬𑀓𑀡𑁆𑀡𑀺𑀓𑁄. 𑀲𑀩𑁆𑀩𑀧𑀼𑀧𑁆𑀨𑁂𑀳𑀺𑀮𑀗𑁆𑀓𑀢𑁄𑀢𑀺 𑀦𑀸𑀦𑀸𑀧𑀼𑀧𑁆𑀨𑁂𑀳𑀺 𑀅𑀮𑀗𑁆𑀓𑀢𑁄. 𑀮𑀧𑀦𑀦𑁆𑀢𑀭𑀸𑀢𑀺 𑀉𑀢𑁆𑀢𑀭𑀸𑀥𑀭𑁄𑀝𑁆𑀞𑀸𑀦𑀁 𑀅𑀦𑁆𑀢𑀭𑀢𑁄. 𑀑𑀓𑁆𑀓𑀸𑀢𑀺 𑀧𑀪𑀸. 𑀫𑀼𑀤𑁆𑀥𑀦𑀦𑁆𑀢𑀭𑀥𑀸𑀬𑀣𑀸𑀢𑀺 𑀫𑀼𑀤𑁆𑀥𑀦𑀺 𑀅𑀦𑁆𑀢𑀭𑀥𑀸𑀬𑀣. 𑀓𑀗𑁆𑀔𑀁 𑀯𑀺𑀢𑀭𑀸𑀢𑀺 𑀯𑀺𑀫𑀢𑀺𑀁 𑀯𑀺𑀦𑁄𑀤𑁂𑀳𑀺. 𑀬𑀲𑁆𑀲 𑀢𑀁 𑀲𑀩𑁆𑀩𑀥𑀫𑁆𑀫𑁂𑀲𑀼 ¶ , 𑀲𑀤𑀸 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀲𑁆𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀤𑀸 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑁄 𑀲𑀩𑁆𑀩𑀜𑁆𑀜𑀽 𑀪𑀕𑀯𑀸 𑀣𑁂𑀭𑀁 𑀆𑀦𑀦𑁆𑀤𑀁 𑀏𑀢𑀤𑀩𑁆𑀭𑀯𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀻𑀢𑀺 𑀲𑀩𑁆𑀩𑀲𑁆𑀫𑀺𑀁 𑀭𑀝𑁆𑀞𑁂 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺. 𑀘𑀭𑀺𑀫𑀦𑁆𑀢𑀺 𑀘𑀭𑀺𑀫𑀪𑀯𑀁. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀥𑀫𑁆𑀫𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁, 𑀧𑀘𑁆𑀘𑁂𑀓𑀩𑁄𑀥𑀺𑀁 𑀯𑀸.

𑁯𑁬. 𑀲𑀼𑀯𑀡𑁆𑀡𑀘𑁆𑀙𑀤𑀦𑀁 𑀦𑀸𑀯𑀦𑁆𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀯𑀲𑁂𑀦 𑀙𑀸𑀤𑀺𑀢𑀁 𑀲𑀼𑀯𑀡𑁆𑀡𑀦𑀸𑀯𑀁. 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀲𑀓𑁆𑀓𑀲𑁆𑀲 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀬𑀣𑀸 𑀲𑀸 𑀤𑁂𑀯𑀢𑀸 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀓𑁆𑀓𑀲𑁆𑀲 𑀩𑁆𑀬𑀸𑀓𑀸𑀲𑀺, 𑀏𑀯𑀁 𑀫𑀬𑀸𑀧𑀺 𑀲𑀼𑀢𑀦𑁆𑀢𑀺 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀢𑁆𑀢𑀦𑀸 𑀬𑀣𑀸𑀲𑀼𑀢𑀁 𑀢𑀁 𑀪𑀕𑀯𑀢𑁄 𑀯𑀤𑀢𑀺.

𑀧𑀁𑀲𑀼𑀣𑀽𑀧𑁂𑀲𑀽𑀢𑀺 𑀲𑀭𑀻𑀭𑀥𑀸𑀢𑀼𑀁 𑀅𑀩𑁆𑀪𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀧𑀁𑀲𑀽𑀳𑀺 𑀓𑀢𑀣𑀽𑀧𑁂𑀲𑀼. 𑀏𑀯𑀜𑁆𑀳𑀺 𑀢𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲𑀓𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀦𑁂𑀯𑀸𑀳 𑁋 ‘‘𑀉𑀤𑁆𑀤𑀺𑀲𑁆𑀲𑀓𑀢𑁂𑀲𑀼 𑀤𑀲𑀩𑀮𑀥𑀭𑀸𑀦’’𑀦𑁆𑀢𑀺.

𑁯𑁭. 𑀤𑁂𑀯𑀧𑀼𑀢𑁆𑀢𑀲𑀭𑀻𑀭𑀯𑀡𑁆𑀡𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀭𑀻𑀭𑀲𑀤𑀺𑀲𑀯𑀡𑁆𑀡𑀸. 𑀲𑀼𑀪𑀕𑀲𑀡𑁆𑀞𑀺𑀢𑀻𑀢𑀺 𑀲𑁄𑀪𑀕𑁆𑀕𑀬𑀼𑀢𑁆𑀢𑀲𑀡𑁆𑀞𑀸𑀦𑀸. 𑀉𑀴𑀸𑀭𑀁 𑀯𑀢 𑀢𑀁 𑀆𑀲𑀻𑀢𑀺 𑀢𑀁 𑀫𑀬𑀸 𑀓𑀢𑀁 𑀧𑀼𑀜𑁆𑀜𑀁 𑀉𑀴𑀸𑀭𑀁 𑀯𑀢 𑀅𑀳𑁄𑀲𑀺. 𑀬𑀸𑀳𑀦𑁆𑀢𑀺 𑀬𑀸 𑀅𑀳𑀁. 𑀲𑀢𑀲𑀳𑀲𑁆𑀲𑀁 𑀓𑀧𑁆𑀧𑁂, 𑀫𑀼𑀤𑀺𑀢𑁄 𑀣𑀽𑀧𑀁 𑀅𑀧𑀽𑀚𑁂𑀲𑀻𑀢𑀺 𑀣𑀽𑀧𑀁 𑀧𑀽𑀚𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀆𑀬𑀼𑀓𑀧𑁆𑀧𑁂 𑀅𑀳𑀁 𑀫𑀼𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀦𑁆𑀢𑀼𑀦 𑀯𑀺𑀦𑀺𑀧𑀸𑀢𑀦𑁆𑀢𑀺 𑀅𑀧𑀸𑀬𑀼𑀧𑀧𑀢𑁆𑀢𑀺𑀁 𑀅𑀦𑀼𑀧𑀕𑀦𑁆𑀢𑁆𑀯𑀸. 𑀬𑀁 𑀘𑀓𑁆𑀔𑀼𑀦𑁆𑀢𑀺 𑀬𑀁 𑀧𑀜𑁆𑀜𑀸𑀘𑀓𑁆𑀔𑀼𑀁. 𑀧𑀡𑀺𑀳𑀺𑀢𑀦𑁆𑀢𑀺 𑀞𑀧𑀺𑀢𑀁. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀫𑁆𑀳𑀻𑀢𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀫𑁆𑀳𑀺. 𑀯𑀺𑀥𑀽𑀢𑀮𑀢𑁄𑀢𑀺 𑀯𑀺𑀥𑀽𑀢𑀢𑀡𑁆𑀳𑀸𑀮𑀢𑁄, 𑀲𑀫𑀼𑀘𑁆𑀙𑀺𑀦𑁆𑀦𑀢𑀡𑁆𑀳𑁄𑀢𑀺 𑀅𑀢𑁆𑀣𑁄.

𑁯𑁮. 𑀲𑀸𑀫𑀸𑀓𑀧𑀢𑁆𑀣𑁄𑀤𑀦𑀫𑀢𑁆𑀢𑀦𑁆𑀢𑀺 𑀲𑀸𑀫𑀸𑀓𑀢𑀺𑀡𑀸𑀦𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀁. 𑀅𑀔𑀺𑀮𑁂𑀢𑀺 𑀧𑀜𑁆𑀘𑀦𑁆𑀦𑀁 𑀘𑁂𑀢𑁄𑀔𑀺𑀮𑀸𑀦𑀁 𑀅𑀪𑀸𑀯𑁂𑀦 𑀅𑀔𑀺𑀮𑁂. 𑀢𑀲𑁆𑀫𑀺𑀜𑁆𑀘 𑀑𑀓𑀧𑁆𑀧𑀬𑀺 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀢𑁆𑀢𑀫𑀥𑀫𑁆𑀫𑀁 𑀧𑀘𑁆𑀘𑁂𑀓𑀩𑁄𑀥𑀺𑀁 ‘‘𑀉𑀢𑁆𑀢𑀫𑀥𑀫𑁆𑀫𑁂𑀦 𑀦𑀸𑀫 𑀇𑀫𑀲𑁆𑀫𑀺𑀁 ¶ 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀲𑀤𑁆𑀤𑀳𑀺𑀁. ‘‘𑀢𑀲𑁆𑀫𑀺𑀜𑁆𑀘 𑀥𑀫𑁆𑀫𑁂 𑀧𑀡𑀺𑀥𑁂𑀲𑀺𑀁 𑀫𑀸𑀦𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀮𑀤𑁆𑀥𑀥𑀫𑁆𑀫𑀁 𑀅𑀳𑀫𑁆𑀧𑀺 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑀘𑀺𑀢𑁆𑀢𑀁 𑀧𑀡𑀺𑀤𑀳𑀺𑀁. 𑀪𑀯𑁂 𑀓𑀼𑀤𑀸𑀲𑀼𑀧𑀺 𑀘 𑀫𑀸 𑀅𑀧𑁂𑀓𑁆𑀔𑀯𑀸𑀢𑀺 𑀓𑀢𑁆𑀣𑀘𑀺 𑀪𑀯𑁂 𑀅𑀧𑁂𑀓𑁆𑀔𑀯𑀸 𑀫𑀸 𑀪𑀯𑁂𑀬𑁆𑀬𑀦𑁆𑀢𑀺 𑀘 𑀧𑀡𑀺𑀥𑁂𑀲𑀺𑀁 𑀫𑀸𑀦𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀼𑀭𑀽𑀲𑀽𑀢𑀺 𑀉𑀢𑁆𑀢𑀭𑀓𑀼𑀭𑀽𑀲𑀼. 𑀤𑀻𑀖𑀸𑀬𑀼𑀓𑁂𑀲𑀽𑀢𑀺 𑀢𑁂𑀲𑀁 𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀢𑀸𑀬 𑀯𑀼𑀢𑁆𑀢𑀁. 𑀅𑀫𑀫𑁂𑀲𑀽𑀢𑀺 𑀅𑀧𑀭𑀺𑀕𑁆𑀕𑀳𑁂𑀲𑀼. 𑀧𑀸𑀡𑀻𑀲𑀽𑀢𑀺 𑀲𑀢𑁆𑀢𑁂𑀲𑀼. 𑀅𑀳𑀻𑀦𑀕𑀸𑀫𑀻𑀲𑀽𑀢𑀺 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀻𑀳𑀺 𑀬𑀸𑀯𑀢𑀸𑀬𑀼𑀓𑀁 𑀅𑀧𑀭𑀺𑀳𑀻𑀦𑀲𑀪𑀸𑀯𑁂𑀲𑀼 ¶ . 𑀢𑀺𑀤𑀲𑁄𑀧𑀧𑀚𑁆𑀚𑀣𑀸𑀢𑀺 𑀢𑀸𑀯𑀢𑀺𑀁𑀲𑁄 𑀳𑀼𑀢𑁆𑀯𑀸 𑀉𑀧𑀧𑀚𑁆𑀚𑀺𑀁, 𑀢𑀺𑀤𑀲𑁂 𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑀧𑀚𑁆𑀚𑀺𑀁. 𑀯𑀺𑀲𑀺𑀝𑁆𑀞𑀓𑀸𑀬𑀽𑀧𑀕𑀢𑁄𑀢𑀺 𑀯𑀺𑀲𑀺𑀝𑁆𑀞𑀓𑀸𑀬𑁂𑀲𑀼 𑀦𑀸𑀦𑀸𑀯𑀡𑁆𑀡𑀓𑀸𑀬𑁂𑀲𑀼 𑀉𑀧𑀕𑀢𑁄. 𑀬𑀲𑀲𑁆𑀲𑀺𑀲𑀽𑀢𑀺 𑀧𑀭𑀺𑀯𑀸𑀭𑀯𑀦𑁆𑀢𑁂𑀲𑀼. 𑀳𑀺𑀢𑀸𑀳𑀺𑀢𑀸𑀲𑀺𑀳𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑁂 𑀯𑀻𑀢𑀺𑀯𑀢𑁆𑀢𑀻𑀳𑀺. 𑀧𑀘𑁆𑀘𑀓𑁆𑀔𑀁 𑀔𑁆𑀯𑀺𑀫𑀦𑁆𑀢𑀺 𑀧𑀘𑁆𑀘𑀓𑁆𑀔𑀁 𑀔𑁄 𑀇𑀫𑀁 𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀓𑀸𑀲𑀻𑀢𑀺 𑀲𑁄 𑀅𑀓𑀸𑀲𑀺. 𑀩𑀮𑀺𑀫𑀸𑀪𑀺𑀳𑀸𑀭𑀻𑀢𑀺 𑀧𑀽𑀚𑀸𑀩𑀮𑀺𑀁 𑀅𑀪𑀺𑀳𑀭𑀺. 𑀧𑀢𑀺𑀢𑀲𑁆𑀲 𑀏𑀓𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑀢𑁄 𑀏𑀓𑀧𑀼𑀧𑁆𑀨𑀁 𑀧𑀢𑀺𑀢𑀁.

𑀉𑀧𑀭𑀺𑀝𑁆𑀞𑀦𑁆𑀢𑀺 𑀉𑀧𑀭𑀺 𑀯𑁂𑀳𑀸𑀲𑁂 𑀞𑀺𑀢𑀁. 𑀅𑀭𑀺𑀝𑁆𑀞𑀦𑁆𑀢𑀺 𑀅𑀭𑀺𑀝𑁆𑀞𑀁 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁. 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀅𑀚𑁆𑀛𑀢𑁆𑀢𑀯𑀺𑀲𑀬𑀸 𑀘 𑀩𑀳𑀺𑀤𑁆𑀥𑀯𑀺𑀲𑀬𑀸 𑀘. 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀽𑀢𑀺 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀚𑁆𑀚𑀫𑀸𑀦𑀸 𑀅𑀳𑁂𑀲𑀼𑀁. 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀦𑀫𑀻𑀬𑀦𑀪𑀽𑀢𑁄 𑀲𑀁𑀲𑀸𑀭𑁄 𑀧𑀼𑀦𑀩𑁆𑀪𑀯𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀘 𑀤𑀸𑀦𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀯𑀸𑀲𑀦𑀸𑀪𑀸𑀕𑀧𑀼𑀜𑁆𑀜𑀯𑀺𑀪𑀸𑀯𑀦𑀸𑀦𑀁 𑀦𑀸𑀦𑀸𑀲𑀼𑀢𑁆𑀢𑀧𑀤𑀸𑀦𑀁 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁯. ‘‘𑀉𑀤𑁆𑀥𑀁 𑀅𑀥𑁄…𑀧𑁂… 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀑𑀖𑀢𑀭𑀡𑀲𑁆𑀲 𑀅𑀭𑀺𑀬𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸. 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸𑀢𑀺 𑀦 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀥𑀫𑁆𑀫𑀢𑀸𑀢𑀺 𑀥𑀫𑁆𑀫𑀲𑀪𑀸𑀯𑁄.

𑁧𑁦𑁦. 𑀬𑀤𑀸 𑀳𑀯𑁂𑀢𑀺 𑀬𑀲𑁆𑀫𑀺𑀁 𑀳𑀯𑁂 𑀓𑀸𑀮𑁂. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀲𑀸𑀥𑀓𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀯𑀸 𑀧𑀓𑀸𑀲𑁂𑀦𑁆𑀢𑀺, 𑀅𑀪𑀺𑀲𑀫𑀬𑀯𑀲𑁂𑀦 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀘𑀢𑀼𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸. 𑀆𑀢𑀸𑀧𑁄 𑀯𑀼𑀘𑁆𑀘𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀆𑀢𑀸𑀧𑀺𑀦𑁄𑀢𑀺 ¶ 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀢𑁄. 𑀛𑀸𑀬𑀢𑁄𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀘 𑀛𑀸𑀦𑁂𑀦 𑀛𑀸𑀬𑀦𑁆𑀢𑀲𑁆𑀲. 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀩𑀸𑀳𑀺𑀢𑀧𑀸𑀧𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸𑀢𑀺 𑀅𑀣𑀲𑁆𑀲 𑀏𑀯𑀁 𑀧𑀸𑀢𑀼𑀪𑀽𑀢𑀥𑀫𑁆𑀫𑀲𑁆𑀲 𑀬𑀸 𑀢𑀸 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀨𑀼𑀲𑀢𑀻𑀢𑀺? 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁨) 𑀦𑀬𑁂𑀦 ‘‘𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀧𑀦𑀺𑀤𑀁 𑀚𑀭𑀸𑀫𑀭𑀡𑀦𑁆𑀢𑀺? 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩𑁫) 𑀘 𑀦𑀬𑁂𑀦 𑀧𑀘𑁆𑀘𑀬𑀸𑀓𑀸𑀭𑀓𑀗𑁆𑀔𑀸 𑀯𑀼𑀢𑁆𑀢𑀸. 𑀬𑀸 𑀘 ¶ 𑀧𑀘𑁆𑀘𑀬𑀸𑀓𑀸𑀭𑀲𑁆𑀲𑁂𑀯 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀓𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑁄𑀴𑀲𑀓𑀗𑁆𑀔𑀸 ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀺 𑀥𑀫𑁆𑀫𑁂 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀓𑀸 (𑀥. 𑀲. 𑁧𑁦𑁦𑁮) 𑀅𑀝𑁆𑀞 𑀘 𑀓𑀗𑁆𑀔𑀸 𑀆𑀕𑀢𑀸, 𑀢𑀸 𑀲𑀩𑁆𑀩𑀸 𑀯𑀧𑀬𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀓𑀲𑁆𑀫𑀸? 𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫𑀁, 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀤𑀺𑀓𑁂𑀦 𑀳𑁂𑀢𑀼𑀦𑀸 𑀲𑀳𑁂𑀢𑀼𑀓𑀁 𑀇𑀫𑀁 𑀲𑀗𑁆𑀔𑀸𑀭𑀸𑀤𑀺𑀁 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀥𑀫𑁆𑀫𑀁 𑀧𑀚𑀸𑀦𑀸𑀢𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀢𑀺.

𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻𑀳𑀺 𑀬𑀲𑁆𑀫𑀸 𑀧𑀘𑁆𑀘𑀬𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺, 𑀢𑀲𑁆𑀫𑀸 𑀬𑀤𑀸𑀲𑁆𑀲 𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀤𑀺𑀢𑀢𑁆𑀢𑀸 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀲𑀩𑁆𑀩𑀸𑀧𑀺 𑀢𑀸 𑀓𑀗𑁆𑀔𑀸 𑀯𑀧𑀬𑀦𑁆𑀢𑀻𑀢𑀺.

𑀆𑀭𑀜𑁆𑀜𑀦𑁆𑀢𑀺 𑀆𑀭𑀜𑁆𑀜𑀓𑀁. 𑀅𑀜𑁆𑀜𑀸𑀢𑀼𑀜𑁆𑀙𑁂𑀦 𑀬𑀸𑀧𑁂𑀦𑁆𑀢𑀦𑁆𑀢𑀺 𑀓𑀼𑀮𑁂𑀲𑀼 𑀅𑀜𑁆𑀜𑀸𑀢𑁄 𑀦𑀺𑀘𑁆𑀘𑀦𑀯𑁄𑀬𑁂𑀯 𑀳𑀼𑀢𑁆𑀯𑀸 𑀉𑀜𑁆𑀙𑁂𑀦 𑀧𑀺𑀡𑁆𑀟𑀘𑀭𑀺𑀬𑀸𑀬 𑀬𑀸𑀧𑁂𑀦𑁆𑀢𑀁. 𑀅𑀣 𑀯𑀸 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀇𑀲𑁆𑀲𑀭𑀚𑀦𑀕𑁂𑀳𑁂𑀲𑀼 𑀓𑀝𑀼𑀓𑀪𑀡𑁆𑀟𑀲𑀫𑁆𑀪𑀸𑀭𑀁 𑀲𑀼𑀕𑀦𑁆𑀥𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀉𑀜𑁆𑀙𑀦𑀁 𑀜𑀸𑀢𑀼𑀜𑁆𑀙𑀦𑀁 𑀦𑀸𑀫, 𑀖𑀭𑀧𑀝𑀺𑀧𑀸𑀝𑀺𑀬𑀸 𑀧𑀦 𑀤𑁆𑀯𑀸𑀭𑁂 𑀞𑀺𑀢𑁂𑀦 𑀮𑀤𑁆𑀥𑀫𑀺𑀲𑁆𑀲𑀓𑀪𑁄𑀚𑀦𑀁 𑀅𑀜𑁆𑀜𑀸𑀢𑀼𑀜𑁆𑀙𑀦𑀁 𑀦𑀸𑀫. 𑀇𑀤𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 𑀬𑀸𑀧𑁂𑀦𑁆𑀢𑀁. 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀦𑀺𑀭𑀧𑁂𑀓𑁆𑀔𑀁.

𑀙𑁂𑀢𑁆𑀯𑀸𑀢𑀺 𑀯𑀥𑀺𑀢𑁆𑀯𑀸. 𑀲𑀼𑀔𑀁 𑀲𑁂𑀢𑀻𑀢𑀺 𑀓𑁄𑀥𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀤𑀬𑁆𑀳𑀫𑀸𑀦𑀢𑁆𑀢𑀸 𑀲𑀼𑀔𑀁 𑀲𑀬𑀢𑀺. 𑀦 𑀲𑁄𑀘𑀢𑀻𑀢𑀺 𑀓𑁄𑀥𑀯𑀺𑀦𑀸𑀲𑁂𑀦 𑀯𑀺𑀦𑀝𑁆𑀞𑀤𑁄𑀫𑀦𑀲𑁆𑀲𑀢𑁆𑀢𑀸 𑀦 𑀲𑁄𑀘𑀢𑀺. 𑀯𑀺𑀲𑀫𑀽𑀮𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲. 𑀫𑀥𑀼𑀭𑀕𑁆𑀕𑀲𑁆𑀲𑀸𑀢𑀺 𑀬𑀁 𑀅𑀓𑁆𑀓𑀼𑀝𑁆𑀞𑀲𑁆𑀲 𑀧𑀘𑁆𑀘𑀓𑁆𑀓𑁄𑀲𑀺𑀢𑁆𑀯𑀸 𑀧𑀳𑀝𑀲𑁆𑀲 𑀧𑀝𑀺𑀧𑁆𑀧𑀳𑀭𑀺𑀢𑁆𑀯𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀲𑁄 ‘‘𑀫𑀥𑀼𑀭𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀧𑀭𑀺𑀬𑁄𑀲𑀸𑀦𑀁 ‘‘𑀅𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀸𑀢𑀺 𑀩𑀼𑀤𑁆𑀥𑀸𑀤𑀬𑁄.

𑀳𑀦𑁂𑀢𑀺 ¶ 𑀳𑀦𑁂𑀬𑁆𑀬. 𑀉𑀧𑁆𑀧𑀢𑀺𑀢𑀦𑁆𑀢𑀺 𑀅𑀲𑀫𑀼𑀕𑁆𑀖𑀸𑀝𑀺𑀢𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀯𑀲𑁂𑀦 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀯𑀲𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀁. 𑀯𑀺𑀦𑁄𑀤𑀬𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑁂𑀬𑁆𑀬.

𑁧𑁦𑁧. 𑀲𑀢𑁆𑀢𑀺𑀬𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑁄. 𑀑𑀫𑀝𑁆𑀞𑁄𑀢𑀺 𑀧𑀳𑀝𑁄. 𑀘𑀢𑁆𑀢𑀸𑀭𑁄 𑀳𑀺 𑀧𑀳𑀸𑀭𑀸 𑀑𑀫𑀝𑁆𑀞𑁄 𑀉𑀫𑁆𑀫𑀝𑁆𑀞𑁄 𑀫𑀝𑁆𑀞𑁄 𑀯𑀺𑀫𑀝𑁆𑀞𑁄𑀢𑀺. 𑀢𑀢𑁆𑀣 𑀉𑀧𑀭𑀺 𑀞𑀢𑁆𑀯𑀸 𑀅𑀥𑁄𑀫𑀼𑀔𑀁 𑀤𑀺𑀦𑁆𑀦𑀧𑁆𑀧𑀳𑀸𑀭𑁄 𑀑𑀫𑀝𑁆𑀞𑁄 𑀦𑀸𑀫, 𑀅𑀥𑁄 𑀞𑀢𑁆𑀯𑀸 𑀉𑀤𑁆𑀥𑀁 𑀫𑀼𑀔𑀁 𑀤𑀺𑀦𑁆𑀦𑀧𑁆𑀧𑀳𑀸𑀭𑁄 𑀉𑀫𑁆𑀫𑀝𑁆𑀞𑁄 𑀦𑀸𑀫, 𑀅𑀕𑁆𑀕𑀴𑀲𑀽𑀘𑀺 𑀯𑀺𑀬 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀓𑀢𑁄 𑀫𑀝𑁆𑀞𑁄 𑀦𑀸𑀫, 𑀲𑁂𑀲𑁄 𑀲𑀩𑁆𑀩𑁄𑀧𑀺 𑀯𑀺𑀫𑀝𑁆𑀞𑁄 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀑𑀫𑀝𑁆𑀞𑁄 ¶ 𑀕𑀳𑀺𑀢𑁄. 𑀲𑁄 𑀳𑀺 𑀲𑀩𑁆𑀩𑀤𑀸𑀭𑀼𑀡𑁄 𑀤𑀼𑀭𑀼𑀤𑁆𑀥𑀭𑀡𑀲𑀮𑁆𑀮𑁄 𑀤𑀼𑀢𑁆𑀢𑀺𑀓𑀺𑀘𑁆𑀙𑁄 𑀅𑀦𑁆𑀢𑁄𑀤𑁄𑀲𑁄 𑀅𑀦𑁆𑀢𑁄𑀧𑀼𑀩𑁆𑀩𑀮𑁄𑀳𑀺𑀢𑁄 𑀘 𑀳𑁄𑀢𑀺. 𑀧𑀼𑀩𑁆𑀩𑀮𑁄𑀳𑀺𑀢𑀁 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀡𑀫𑀼𑀔𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀼𑀩𑁆𑀩𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑀼𑀓𑀸𑀫𑁂𑀳𑀺 𑀫𑀜𑁆𑀘𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀥𑁄𑀲𑀺𑀭𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀧𑀭𑀺𑀩𑁆𑀩𑀚𑁂𑀢𑀺 𑀯𑀺𑀳𑀭𑁂𑀬𑁆𑀬.

𑀇𑀫𑀸𑀬 𑀕𑀸𑀣𑀸𑀬 𑀓𑀺𑀁 𑀓𑀣𑀺𑀢𑀁? 𑀬𑀣𑀸 𑀲𑀢𑁆𑀢𑀺𑀬𑀸 𑀑𑀫𑀝𑁆𑀞𑀧𑀼𑀭𑀺𑀲𑁄 𑀲𑀮𑁆𑀮𑀼𑀩𑁆𑀩𑀸𑀳𑀦𑀯𑀡𑀢𑀺𑀓𑀺𑀘𑁆𑀙𑀦𑀸𑀦𑀁 𑀅𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀧𑀬𑁄𑀕𑀁 𑀓𑀭𑁄𑀢𑀺 𑀧𑀭𑀓𑁆𑀓𑀫𑀢𑀺. 𑀬𑀣𑀸 𑀘 𑀤𑀬𑁆𑀳𑀫𑀸𑀦𑁂 𑀫𑀢𑁆𑀣𑀓𑁂 𑀆𑀤𑀺𑀢𑁆𑀢𑀲𑀺𑀭𑁄 𑀢𑀲𑁆𑀲 𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀧𑀬𑁄𑀕𑀁 𑀓𑀭𑁄𑀢𑀺 𑀧𑀭𑀓𑁆𑀓𑀫𑀢𑀺, 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬 𑀪𑀕𑀯𑀸𑀢𑀺 𑀓𑀣𑁂𑀲𑀺.

𑀏𑀯𑀁 𑀤𑁂𑀯𑀢𑀸𑀬 𑀓𑀣𑀺𑀢𑁂 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸𑀬 𑀤𑁂𑀯𑀢𑀸𑀬 𑀉𑀧𑀫𑀸 𑀤𑀴𑁆𑀳𑀁 𑀓𑀢𑁆𑀯𑀸 𑀆𑀦𑀻𑀢𑀸, 𑀅𑀢𑁆𑀣𑀁 𑀧𑀦 𑀧𑀭𑀺𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀻𑀧𑀺 𑀳𑀺 𑀏𑀲𑀸 𑀓𑀸𑀫𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑁂𑀯 𑀓𑀣𑁂𑀬𑁆𑀬, 𑀬𑀸𑀯 𑀘 𑀓𑀸𑀫𑀭𑀸𑀕𑁄 𑀫𑀕𑁆𑀕𑁂𑀦 𑀦 𑀲𑀫𑀼𑀕𑁆𑀖𑀸𑀝𑀺𑀬𑁆𑀬𑀢𑀺, 𑀢𑀸𑀯 𑀅𑀦𑀼𑀩𑀦𑁆𑀥𑁄𑀯 𑀳𑁄𑀢𑀻’’𑀢𑀺 𑀢𑀫𑁂𑀯 𑀉𑀧𑀫𑀁 𑀕𑀳𑁂𑀢𑁆𑀯𑀸 𑀧𑀞𑀫𑀫𑀕𑁆𑀕𑀯𑀲𑁂𑀦 𑀤𑁂𑀯𑀢𑀸𑀬 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄’’𑀢𑀺 𑀤𑀼𑀢𑀺𑀬𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀼𑀭𑀺𑀫𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀮𑁄𑀓𑀸𑀫𑀺𑀲𑀦𑁆𑀢𑀺 𑀓𑀸𑀫𑀕𑀼𑀡𑁄. 𑀲𑀦𑁆𑀢𑀺𑀧𑁂𑀓𑁆𑀔𑁄𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑀁 𑀦𑀺𑀩𑁆𑀩𑀸𑀦𑀁 𑀅𑀧𑁂𑀓𑁆𑀔𑀫𑀸𑀦𑁄. 𑀧𑀜𑁆𑀜𑀯𑀸𑀢𑀺 𑀧𑀜𑁆𑀜𑀯𑀦𑁆𑀢𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺𑀧𑁂𑀲𑀺𑀢𑀘𑀺𑀢𑁆𑀢𑁄. 𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬𑀸𑀢𑀺 𑀬𑀸𑀬 𑀓𑀸𑀬𑀘𑀺 𑀲𑀩𑁆𑀩𑀢𑁄 𑀓𑀸𑀫𑀲𑀜𑁆𑀜𑀸𑀬 ¶ 𑀘𑀢𑀼𑀢𑁆𑀣𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀬𑀸 𑀯𑀺𑀭𑀢𑁄. ‘‘𑀯𑀺𑀭𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀓𑀸𑀫𑀲𑀜𑁆𑀜𑀸𑀬𑀸𑀢𑀺 𑀧𑀦 𑀪𑀼𑀫𑁆𑀫𑀯𑀘𑀦𑀁 𑀳𑁄𑀢𑀺. 𑀲𑀕𑀸𑀣𑀸𑀯𑀕𑁆𑀕𑁂 (𑀲𑀁. 𑀦𑀺. 𑁧.𑁯𑁬) ‘‘𑀓𑀸𑀫𑀲𑀜𑁆𑀜𑀸𑀲𑀽’’𑀢𑀺 𑀧𑀸𑀞𑁄. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀤𑀲𑀦𑁆𑀦𑀫𑁆𑀧𑀺 𑀲𑀁𑀬𑁄𑀚𑀦𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑁄. 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑁂𑀯 𑀯𑀸 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀢𑀻𑀢𑁄 𑀢𑀢𑁆𑀭 𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀢𑁄 𑀦𑀦𑁆𑀤𑀺𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀢𑀺𑀡𑁆𑀡𑀜𑁆𑀘 𑀪𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀦𑀦𑁆𑀤𑀺𑀪𑀯𑀧𑀭𑀺𑀓𑁆𑀔𑀻𑀡𑁄. 𑀲𑁄 𑀢𑀸𑀤𑀺𑀲𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀕𑀫𑁆𑀪𑀻𑀭𑁂 𑀲𑀁𑀲𑀸𑀭𑀡𑁆𑀡𑀯𑁂 𑀦 𑀲𑀻𑀤𑀢𑀺.

𑀲𑀤𑁆𑀤𑀳𑀸𑀦𑁄𑀢𑀺 𑀬𑁂𑀦 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑁂𑀦, 𑀅𑀧𑀭𑀪𑀸𑀕𑁂 𑀘 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑁂𑀦 𑀥𑀫𑁆𑀫𑁂𑀦 𑀅𑀭𑀳𑀦𑁆𑀢𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸. 𑀢𑀁 𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀁 𑀮𑀪𑀢𑀺, 𑀢𑀜𑁆𑀘 𑀔𑁄 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯. 𑀬𑀲𑁆𑀫𑀸 𑀧𑀦 𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 ¶ 𑀲𑁄𑀢𑀁 𑀑𑀤𑀳𑀢𑀺, 𑀑𑀤𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀥𑀫𑁆𑀫𑀲𑁆𑀲𑀯𑀦𑁂𑀦 𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜𑀁.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀁 𑀥𑀫𑁆𑀫𑀁 𑀲𑀤𑁆𑀤𑀳𑀺𑀢𑁆𑀯𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀧𑀺 𑀯𑀢𑁆𑀢𑀓𑀭𑀡𑁂𑀦 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀬𑀤𑀸 𑀧𑀬𑀺𑀭𑀼𑀧𑀸𑀲𑀦𑀸𑀬 𑀆𑀭𑀸𑀥𑀺𑀢𑀘𑀺𑀢𑁆𑀢𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀣 𑀅𑀥𑀺𑀕𑀢𑀸𑀬 𑀲𑁄𑀢𑀼𑀓𑀸𑀫𑀢𑀸𑀬 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀲𑀼𑀡𑀦𑁆𑀢𑁄 𑀮𑀪𑀢𑀻𑀢𑀺 𑀏𑀯𑀁 𑀲𑀼𑀲𑁆𑀲𑀽𑀲𑀫𑁆𑀧𑀺 𑀘 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀼𑀢𑀸𑀬 𑀯𑀺𑀘𑀓𑁆𑀔𑀡𑁄 𑀏𑀯 𑀮𑀪𑀢𑀺, 𑀦 𑀇𑀢𑀭𑁄. 𑀢𑁂𑀦𑀸𑀳 𑁋 ‘‘𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄’’𑀢𑀺.

𑀧𑀢𑀺𑀭𑀽𑀧𑀓𑀸𑀭𑀻𑀢𑀺 𑀤𑁂𑀲𑀓𑀸𑀮𑀸𑀤𑀻𑀦𑀺 𑀅𑀳𑀸𑀧𑁂𑀢𑁆𑀯𑀸 𑀮𑁄𑀓𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑁆𑀲 𑀥𑀫𑁆𑀫𑀲𑁆𑀲 𑀧𑀢𑀺𑀭𑀽𑀧𑀁 𑀅𑀥𑀺𑀕𑀫𑀽𑀧𑀸𑀬𑀁 𑀓𑀭𑁄𑀢𑀻𑀢𑀺 𑀧𑀢𑀺𑀭𑀽𑀧𑀓𑀸𑀭𑀻. 𑀥𑀼𑀭𑀯𑀸𑀢𑀺 𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄. 𑀉𑀝𑁆𑀞𑀸𑀢𑀸𑀢𑀺 𑀓𑀸𑀬𑀺𑀓𑀯𑀻𑀭𑀺𑀬𑀯𑀲𑁂𑀦 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄. 𑀯𑀺𑀦𑁆𑀤𑀢𑁂 𑀥𑀦𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀦𑀁 𑀅𑀥𑀺𑀕𑀘𑁆𑀙𑀢𑀺. 𑀲𑀘𑁆𑀘𑁂𑀦𑀸𑀢𑀺 𑀯𑀘𑀻𑀲𑀘𑁆𑀘𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑁂𑀦 𑀘. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀦𑁆𑀢𑀸 𑀓𑀺𑀢𑁆𑀢𑀺𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺𑀬𑁂𑀯. 𑀤𑀤𑀦𑁆𑀢𑀺 𑀧𑀭𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀤𑁂𑀦𑁆𑀢𑁄 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺 𑀲𑀫𑁆𑀧𑀸𑀤𑁂𑀢𑀺 𑀓𑀭𑁄𑀢𑀻𑀢𑀺 ¶ 𑀅𑀢𑁆𑀣𑁄. 𑀤𑀼𑀤𑁆𑀤𑀤𑀁 𑀯𑀸 𑀤𑀤𑀦𑁆𑀢𑁄 𑀕𑀦𑁆𑀣𑀢𑀺, 𑀤𑀸𑀦𑀫𑀼𑀔𑁂𑀦 𑀘𑀢𑁆𑀢𑀸𑀭𑀺𑀧𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀳𑀺 𑀫𑀺𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀺. 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑁂 𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸 𑀯𑀺𑀚𑁆𑀚𑀦𑁆𑀢𑀺, 𑀲𑁄 𑀇𑀫𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺, 𑀲𑁄𑀓𑀓𑀸𑀭𑀡𑀁 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁦) 𑁋

𑀕𑀸𑀣𑀁 𑀅𑀯𑀲𑁂𑀲𑀁 𑀓𑀢𑁆𑀯𑀸 𑀉𑀤𑀸𑀳𑀝𑀁. 𑀆𑀴𑀯𑀓𑀲𑀼𑀢𑁆𑀢𑁂 𑀳𑀺 𑀇𑀫𑀸 𑀕𑀸𑀣𑀸 𑀆𑀴𑀯𑀓𑁂𑀦 ‘‘𑀓𑀣𑀁 𑀲𑀼 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁭) 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀸𑀢𑀺.

𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦, 𑀧𑀓𑀸𑀭𑁂𑀦 𑀯𑀸. 𑀲𑀁𑀯𑀸𑀲𑁄𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀳𑀯𑀸𑀲𑁄 𑀲𑀫𑀸𑀕𑀫𑁄. 𑀢𑀦𑁆𑀢𑀺 𑀢𑀣𑀸 𑀲𑀫𑀸𑀕𑀢𑀁 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀁 𑀧𑀼𑀭𑀺𑀲𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑁂𑀦 ¶ 𑀧𑀲𑀸𑀤𑁂𑀦 𑀧𑀲𑀦𑁆𑀦𑁂𑀦 𑀫𑀦𑀲𑀸. 𑀦 𑀢𑁂𑀦 𑀳𑁄𑀢𑀺 𑀲𑀁𑀬𑀼𑀢𑁆𑀢𑁄𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀅𑀦𑀼𑀲𑀸𑀲𑀦𑁂𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀲𑀁𑀬𑁄𑀚𑀦𑀯𑀲𑁂𑀦 𑀲𑀁𑀬𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺. 𑀬𑀸𑀦𑀼𑀓𑀫𑁆𑀧𑀸 𑀅𑀦𑀼𑀤𑁆𑀤𑀬𑀸𑀢𑀺 𑀬𑀸 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀸𑀧𑀦𑀯𑀲𑁂𑀦 𑀓𑀭𑀼𑀡𑀸𑀬𑀦𑀸, 𑀫𑁂𑀢𑁆𑀢𑀸𑀬𑀦𑀸 𑀘𑀸𑀢𑀺 𑀅𑀢𑁆𑀣𑁄.

𑁧𑁦𑁨. 𑀭𑀸𑀕𑁄 𑀘 𑀤𑁄𑀲𑁄 𑀘𑀸𑀢𑀺 𑀭𑀸𑀕𑀤𑁄𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯. 𑀓𑀼𑀢𑁄𑀦𑀺𑀤𑀸𑀦𑀸𑀢𑀺 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀳𑁂𑀢𑀼𑀓𑀸. 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀳𑀺 𑀅𑀬𑀁 𑀢𑁄-𑀆𑀤𑁂𑀲𑁄, 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀓𑀼𑀢𑁄𑀚𑀸𑀢𑀺 𑀬𑀸𑀬𑀁 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀉𑀓𑁆𑀓𑀡𑁆𑀞𑀺𑀢𑀸, 𑀬𑀸 𑀘 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑀺 𑀅𑀪𑀺𑀭𑀢𑀺 𑀆𑀲𑀢𑁆𑀢𑀺 𑀓𑀻𑀴𑀦𑀸𑀤𑀺, 𑀬𑁄 𑀘 𑀮𑁄𑀫𑀳𑀁𑀲𑀲𑀫𑀼𑀝𑁆𑀞𑀸𑀦𑀢𑁄 𑀮𑁄𑀫𑀳𑀁𑀲𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄, 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀓𑀼𑀢𑁄 𑀚𑀸𑀢𑀸 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀸𑀢𑀺 𑀧𑀼𑀘𑁆𑀙𑀸. 𑀓𑀼𑀢𑁄 𑀲𑀫𑀼𑀝𑁆𑀞𑀸𑀬𑀸𑀢𑀺 𑀓𑀼𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀫𑀦𑁄𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄. 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑀚𑀦𑁆𑀢𑀻𑀢𑀺 𑀬𑀣𑀸 𑀓𑀼𑀫𑀸𑀭𑀓𑀸 𑀓𑀻𑀴𑀦𑁆𑀢𑀸 𑀓𑀸𑀓𑀁 𑀲𑀼𑀢𑁆𑀢𑁂𑀦 𑀧𑀸𑀤𑁂 𑀩𑀦𑁆𑀥𑀺𑀢𑁆𑀯𑀸 𑀑𑀲𑀚𑀦𑁆𑀢𑀺 𑀔𑀺𑀧𑀦𑁆𑀢𑀺, 𑀏𑀯𑀁 𑀓𑀼𑀲𑀮𑀫𑀦𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀓𑀼𑀢𑁄 𑀲𑀫𑀼𑀝𑁆𑀞𑀸𑀬 𑀑𑀲𑀚𑀦𑁆𑀢𑀻𑀢𑀺 𑀧𑀼𑀘𑁆𑀙𑀸.

𑀭𑀸𑀕𑁄 ¶ 𑀘𑀸𑀢𑀺 𑀤𑀼𑀢𑀺𑀬𑀕𑀸𑀣𑀸 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀇𑀢𑁄𑀢𑀺 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀅𑀢𑁆𑀢𑀪𑀸𑀯𑀦𑀺𑀤𑀸𑀦𑀸 𑀳𑀺 𑀭𑀸𑀕𑀤𑁄𑀲𑀸, 𑀅𑀭𑀢𑀺 𑀭𑀢𑀺 𑀮𑁄𑀫𑀳𑀁𑀲𑀸 𑀘 𑀅𑀢𑁆𑀢𑀪𑀸𑀯𑀢𑁄 𑀚𑀸𑀢𑀸. 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀅𑀢𑁆𑀢𑀪𑀸𑀯𑀢𑁄 𑀏𑀯 𑀲𑀫𑀼𑀝𑁆𑀞𑀸𑀬 𑀓𑀼𑀲𑀮𑀫𑀦𑀁 𑀑𑀲𑀚𑀦𑁆𑀢𑀺. 𑀢𑁂𑀦 𑀢𑀤𑀜𑁆𑀜𑀁 𑀧𑀓𑀢𑀺𑀆𑀤𑀺𑀓𑀸𑀭𑀡𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀇𑀢𑁄𑀦𑀺𑀤𑀸𑀦𑀸 𑀇𑀢𑁄 𑀲𑀫𑀼𑀝𑁆𑀞𑀸𑀬𑀸’’𑀢𑀺. 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀢𑁆𑀣 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀬𑁆𑀯𑀸𑀬𑀁 ‘‘𑀇𑀢𑁄𑀦𑀺𑀤𑀸𑀦𑀸’’𑀢𑀺𑀆𑀤𑀻𑀲𑀼 𑀅𑀢𑁆𑀢𑀪𑀸𑀯𑀦𑀺𑀤𑀸𑀦𑀸 𑀅𑀢𑁆𑀢𑀪𑀸𑀯𑀢𑁄 𑀚𑀸𑀢𑀸 𑀅𑀢𑁆𑀢𑀪𑀸𑀯𑀢𑁄 𑀲𑀫𑀼𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀲𑀸𑀥𑁂𑀦𑁆𑀢𑁄 𑀆𑀳 𑁋 ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀏𑀢𑁂 𑀳𑀺 𑀭𑀸𑀕𑀸𑀤𑀬𑁄 𑀯𑀺𑀢𑀓𑁆𑀓𑀧𑀭𑀺𑀬𑁄𑀲𑀸𑀦𑀸 𑀢𑀡𑁆𑀳𑀸𑀲𑁆𑀦𑁂𑀳𑁂𑀦 𑀚𑀸𑀢𑀸. 𑀢𑀣𑀸 𑀚𑀸𑀬𑀦𑁆𑀢𑀸 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑁂𑀤𑁂 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸. 𑀢𑁂𑀦𑀸𑀳 𑁋 ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀇𑀤𑀸𑀦𑀺 𑀢𑀤𑀢𑁆𑀣𑀚𑁄𑀢𑀺𑀓𑀁 𑀉𑀧𑀫𑀁 𑀤𑀲𑁆𑀲𑁂𑀢𑀺 ‘‘𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸’’𑀢𑀺. 𑀢𑀢𑁆𑀣 𑀔𑀦𑁆𑀥𑀚𑀸𑀢𑀺 𑀔𑀦𑁆𑀥𑁂𑀲𑀼 𑀚𑀸𑀢𑀸 𑀧𑀸𑀭𑁄𑀳𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀺𑀕𑁆𑀭𑁄𑀥𑀲𑁆𑀲 𑀔𑀦𑁆𑀥𑀚𑀲𑀗𑁆𑀔𑀸𑀢𑀸 𑀧𑀸𑀭𑁄𑀳𑀸 𑀆𑀧𑁄𑀭𑀲𑀲𑀗𑁆𑀔𑀸𑀢𑁂 𑀲𑁆𑀦𑁂𑀳𑁂 𑀲𑀢𑀺 𑀚𑀸𑀬𑀦𑁆𑀢𑀺, 𑀚𑀸𑀬𑀦𑁆𑀢𑀸 𑀘 𑀢𑀲𑁆𑀫𑀺𑀁𑀬𑁂𑀯 𑀦𑀺𑀕𑁆𑀭𑁄𑀥𑁂 𑀢𑁂𑀲𑀼 𑀢𑁂𑀲𑀼 𑀲𑀸𑀔𑀧𑁆𑀧𑀤𑁂𑀲𑁂𑀲𑀼 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀁 𑀏𑀢𑁂 𑀭𑀸𑀕𑀸𑀤𑀬𑁄 𑀅𑀚𑁆𑀛𑀢𑁆𑀢𑀁 𑀢𑀡𑁆𑀳𑀸𑀲𑁆𑀦𑁂𑀳𑁂 𑀲𑀢𑀺 𑀚𑀸𑀬𑀦𑁆𑀢𑀺, 𑀚𑀸𑀬𑀦𑁆𑀢𑀸 𑀘 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀢𑁂𑀲𑀼 𑀢𑁂𑀲𑀼 𑀘𑀓𑁆𑀔𑀸𑀤𑀺𑀧𑁆𑀧𑀤𑁂𑀲𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀲𑀫𑁆𑀪𑀯𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀧𑀼𑀣𑀼 𑀯𑀺𑀲𑀢𑁆𑀢𑀸 𑀓𑀸𑀫𑁂𑀲𑀽𑀢𑀺 𑀬𑀲𑁆𑀫𑀸 ¶ 𑀭𑀸𑀕𑁄𑀧𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀸𑀤𑀺𑀯𑀲𑁂𑀦, 𑀤𑁄𑀲𑁄𑀧𑀺 𑀆𑀖𑀸𑀢𑀯𑀢𑁆𑀣𑀼𑀆𑀤𑀺𑀯𑀲𑁂𑀦 𑀅𑀭𑀢𑀺𑀆𑀤𑀬𑁄𑀧𑀺 𑀢𑀲𑁆𑀲 𑀢𑀲𑁆𑀲 𑀪𑁂𑀤𑀲𑁆𑀲 𑀯𑀲𑁂𑀦𑀸𑀢𑀺 𑀲𑀩𑁆𑀩𑀣𑀸 𑀲𑀩𑁆𑀩𑁂𑀧𑀺𑀫𑁂 𑀓𑀺𑀮𑁂𑀲𑀸 𑀧𑀼𑀣𑀼 𑀅𑀦𑁂𑀓𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀢𑁂𑀲𑀼 𑀢𑁂𑀲𑀼 𑀓𑀸𑀫𑁂𑀲𑀼 𑀢𑀣𑀸 𑀢𑀣𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸. 𑀓𑀺𑀫𑀺𑀯? 𑀫𑀸𑀮𑀼𑀯𑀸𑀯 𑀯𑀺𑀢𑀢𑀸 𑀯𑀦𑁂 𑀬𑀣𑀸 𑀯𑀦𑁂 𑀯𑀺𑀢𑀢𑀸 𑀫𑀸𑀮𑀼𑀯𑀸 𑀢𑁂𑀲𑀼 𑀢𑁂𑀲𑀼 𑀭𑀼𑀓𑁆𑀔𑀲𑀸𑀔𑀧𑁆𑀧𑀲𑀸𑀔𑀸𑀤𑀺𑀪𑁂𑀤𑁂𑀲𑀼 𑀯𑀺𑀲𑀢𑁆𑀢𑀸 𑀳𑁄𑀢𑀺 𑀮𑀕𑁆𑀕𑀸 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀸, 𑀏𑀯𑀁 𑀏𑀢𑁂 𑀓𑀺𑀮𑁂𑀲𑀸 𑀥𑀫𑁆𑀫𑀸, 𑀢𑀲𑁆𑀫𑀸 𑀏𑀢𑁆𑀣 𑀧𑀼𑀣𑀼𑀧𑀪𑁂𑀤𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀯𑀺𑀲𑀢𑁆𑀢𑀁 𑀓𑀺𑀮𑁂𑀲𑀕𑀳𑀦𑀁.

𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺 𑀬𑀢𑁄𑀦𑀺𑀤𑀸𑀦𑀁, 𑀢𑁂 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺 𑀲𑀼𑀡𑁄𑀳𑀺 𑀬𑀓𑁆𑀔. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀲𑀢𑁆𑀢𑀸 𑀦𑀁 𑀓𑀺𑀮𑁂𑀲𑀕𑀳𑀦𑀁 ‘‘𑀇𑀢𑁄𑀦𑀺𑀤𑀸𑀦𑀁 𑀏𑀲 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀚𑀸𑀦𑀦𑁆𑀢𑀺, 𑀢𑁂 𑀦𑀁 𑀢𑀡𑁆𑀳𑀸𑀲𑀺𑀦𑁂𑀳𑀲𑀺𑀦𑁂𑀳𑀺𑀢𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 ¶ 𑀜𑀢𑁆𑀯𑀸 𑀢𑀁 𑀢𑀡𑁆𑀳𑀸𑀲𑀺𑀦𑁂𑀳𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑀸𑀯𑀦𑀸𑀜𑀸𑀡𑀕𑁆𑀕𑀺𑀦𑀸 𑀯𑀺𑀲𑁄𑀲𑁂𑀦𑁆𑀢𑀸 𑀯𑀺𑀦𑁄𑀤𑁂𑀦𑁆𑀢𑀺 𑀧𑀚𑀳𑀦𑁆𑀢𑀺, 𑀏𑀯𑀁 𑀅𑀫𑁆𑀳𑀸𑀓𑀁 𑀪𑀸𑀲𑀺𑀢𑀁 𑀲𑀼𑀡𑁄𑀳𑀺 𑀬𑀓𑁆𑀔𑀸𑀢𑀺. 𑀢𑁂 𑀤𑀼𑀢𑁆𑀢𑀭𑀁 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀬𑁂 𑀳𑀺 𑀲𑀁𑀓𑀺𑀮𑁂𑀲𑀕𑀳𑀦𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀢𑁂 𑀏𑀓𑀦𑁆𑀢𑁂𑀦 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺. 𑀦 𑀳𑀺 𑀫𑀕𑁆𑀕𑀪𑀸𑀯𑀦𑀁 𑀯𑀺𑀦𑀸 𑀓𑀺𑀮𑁂𑀲𑀯𑀺𑀦𑁄𑀤𑀦𑀁 𑀅𑀢𑁆𑀣𑀺. 𑀏𑀯𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀸 𑀢𑁂 𑀧𑀓𑀢𑀺𑀜𑀸𑀡𑁂𑀦 𑀤𑀼𑀢𑁆𑀢𑀭𑀁 𑀓𑀸𑀫𑁄𑀖𑀸𑀤𑀺𑀁 𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀦𑀢𑀺𑀓𑁆𑀓𑀦𑁆𑀢𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬 𑀦𑀺𑀩𑁆𑀩𑀸𑀦𑀸𑀬 𑀢𑀭𑀦𑁆𑀢𑀺.

𑀤𑀼𑀓𑁆𑀓𑀭𑀁 𑀪𑀕𑀯𑀸𑀢𑀺 𑀏𑀓𑁄 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁄 𑀩𑀳𑀮𑀓𑀺𑀮𑁂𑀲𑀢𑀸𑀬 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀧𑀼𑀩𑁆𑀩𑀳𑁂𑀢𑀼𑀫𑀦𑁆𑀤𑀢𑀸𑀬 𑀅𑀭𑀺𑀬𑀪𑀽𑀫𑀺𑀁 𑀅𑀧𑁆𑀧𑀢𑁆𑀯𑀸𑀯 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀲𑁄 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀼𑀓𑁆𑀓𑀭𑀪𑀸𑀯𑀁 𑀆𑀭𑁄𑀘𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀓𑀭𑀦𑁆𑀢𑀺 𑀤𑀲𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀫𑀡𑀥𑀫𑁆𑀫𑀲𑁆𑀲 𑀓𑀭𑀡𑀁 𑀦𑀸𑀫𑁂𑀢𑀁 𑀤𑀼𑀓𑁆𑀓𑀭𑀁. 𑀲𑁂𑀓𑁆𑀔𑀸𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀲𑀻𑀮𑀲𑀫𑀸𑀳𑀺𑀢𑀸𑀢𑀺 𑀲𑀻𑀮𑁂𑀦 𑀲𑀫𑀸𑀳𑀺𑀢𑀸 𑀲𑀫𑀼𑀧𑁂𑀢𑀸. 𑀞𑀺𑀢𑀢𑁆𑀢𑀸𑀢𑀺 𑀧𑀢𑀺𑀝𑁆𑀞𑀺𑀢𑀲𑀪𑀸𑀯𑀸. 𑀏𑀯𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀉𑀧𑀭𑀺𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 ‘‘𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲𑀸𑀢𑀺 𑀅𑀦𑀕𑀸𑀭𑀺𑀬𑀁 𑀦𑀺𑀕𑁆𑀕𑁂𑀳𑀪𑀸𑀯𑀁 𑀉𑀧𑀕𑀢𑀲𑁆𑀲, 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀼𑀝𑁆𑀞𑀻𑀢𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄.

𑀪𑀸𑀯𑀦𑀸𑀬𑀸𑀢𑀺 𑀘𑀺𑀢𑁆𑀢𑀯𑀽𑀧𑀲𑀫𑀪𑀸𑀯𑀦𑀸𑀬. 𑀢𑁂 𑀙𑁂𑀢𑁆𑀯𑀸 𑀫𑀘𑁆𑀘𑀼𑀦𑁄 𑀚𑀸𑀮𑀦𑁆𑀢𑀺 𑀬𑁂 𑀭𑀢𑁆𑀢𑀺𑀦𑁆𑀤𑀺𑀯𑀁 𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸, 𑀢𑁂 𑀤𑀼𑀲𑁆𑀲𑀫𑀸𑀤𑀳𑀁 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑀺. 𑀬𑁂 𑀲𑀫𑀸𑀳𑀺𑀢𑀘𑀺𑀢𑁆𑀢𑀸, 𑀢𑁂 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀦𑁆𑀢𑀼𑀝𑁆𑀞𑀸, 𑀢𑁂 𑀲𑀻𑀮𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀸 𑀲𑀢𑁆𑀢 𑀲𑁂𑀓𑁆𑀔𑀸, 𑀢𑁂 𑀅𑀭𑀺𑀬𑀸 𑀫𑀘𑁆𑀘𑀼𑀦𑁄 𑀚𑀸𑀮𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀤𑀼𑀕𑁆𑀕𑀫𑁄𑀢𑀺 ¶ 𑀲𑀘𑁆𑀘𑀫𑁂𑀢𑀁, 𑀪𑀦𑁆𑀢𑁂, 𑀬𑁂 𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸, 𑀢𑁂 𑀤𑀼𑀲𑁆𑀲𑀫𑀸𑀤𑀳𑀁 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑀺. 𑀬𑁂 𑀲𑀫𑀸𑀳𑀺𑀢𑀘𑀺𑀢𑁆𑀢𑀸, 𑀢𑁂 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀦𑁆𑀢𑀼𑀝𑁆𑀞𑀸, 𑀢𑁂 𑀲𑀻𑀮𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀻𑀮𑁂 𑀧𑀭𑀫𑀕𑁆𑀕𑀸𑀳𑀺𑀦𑁄 𑀲𑀢𑁆𑀢 𑀲𑁂𑀓𑁆𑀔𑀸, 𑀢𑁂 𑀅𑀭𑀺𑀬𑀸 𑀫𑀘𑁆𑀘𑀼𑀦𑁄 𑀚𑀸𑀮𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀓𑀺𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀬𑀁 𑀧𑀦 𑀤𑀼𑀕𑁆𑀕𑀫𑁄 ‘‘𑀪𑀕𑀯𑀸 ¶ 𑀯𑀺𑀲𑀫𑁄 𑀫𑀕𑁆𑀕𑁄’’𑀢𑀺 𑀆𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀫𑀕𑁆𑀕𑁄 𑀦𑁂𑀯 𑀤𑀼𑀕𑁆𑀕𑀫𑁄 𑀦 𑀯𑀺𑀲𑀫𑁄, 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀧𑀦𑀲𑁆𑀲 𑀩𑀳𑀽 𑀧𑀭𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁄. 𑀅𑀯𑀁𑀲𑀺𑀭𑀸𑀢𑀺 𑀜𑀸𑀡𑀲𑀺𑀭𑁂𑀦 𑀅𑀥𑁄𑀲𑀺𑀭𑀸 𑀳𑀼𑀢𑁆𑀯𑀸 𑀧𑀧𑀢𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀏𑀯 𑀢𑁂 𑀫𑀕𑁆𑀕𑁂 𑀧𑀧𑀢𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀭𑀺𑀬𑀸𑀦𑀁 𑀲𑀫𑁄 𑀫𑀕𑁆𑀕𑁄𑀢𑀺 𑀲𑁆𑀯𑁂𑀯 𑀫𑀕𑁆𑀕𑁄 𑀅𑀭𑀺𑀬𑀸𑀦𑀁 𑀲𑀫𑁄 𑀳𑁄𑀢𑀺. 𑀯𑀺𑀲𑀫𑁂 𑀲𑀫𑀸𑀢𑀺 𑀯𑀺𑀲𑀫𑁂𑀧𑀺 𑀲𑀢𑁆𑀢𑀓𑀸𑀬𑁂 𑀲𑀫𑀸 𑀏𑀯.

𑁧𑁦𑁩. 𑀇𑀤𑀜𑁆𑀳𑀺 𑀢𑀁 𑀚𑁂𑀢𑀯𑀦𑀦𑁆𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀚𑁂𑀢𑀯𑀦𑀲𑁆𑀲 𑀘𑁂𑀯 𑀩𑀼𑀤𑁆𑀥𑀸𑀤𑀻𑀦𑀜𑁆𑀘 𑀯𑀡𑁆𑀡𑀪𑀡𑀦𑀢𑁆𑀣𑀁 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀳. 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀯𑁂𑀲𑀺𑀢𑀁. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 ‘‘𑀓𑀫𑁆𑀫𑀁 𑀯𑀺𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸. 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸. 𑀥𑀫𑁆𑀫𑁄𑀢𑀺 𑀲𑀫𑀸𑀥𑀺, 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀯𑀸 𑀥𑀫𑁆𑀫𑀸. 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀜𑁆𑀘 𑀉𑀢𑁆𑀢𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀯𑀺𑀚𑁆𑀚𑀸𑀢𑀺 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸. 𑀥𑀫𑁆𑀫𑁄𑀢𑀺 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀲𑀻𑀮𑀦𑁆𑀢𑀺 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸. 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀦𑀸𑀫 𑀉𑀢𑁆𑀢𑀫𑀦𑁆𑀢𑀺. ‘‘𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀻’’𑀢𑀺 𑀏𑀢𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑀥𑀦𑁂𑀳𑀺, 𑀢𑀲𑁆𑀫𑀸. 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀯𑀺𑀲𑀼𑀚𑁆𑀛𑀢𑀺. 𑀅𑀣 𑀯𑀸 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀯𑀺𑀲𑀼𑀚𑁆𑀛𑀢𑀺. 𑀇𑀤𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 ‘‘𑀲𑀸𑀭𑀺𑀧𑀼𑀢𑁆𑀢𑁄𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑁄𑀯𑀸𑀢𑀺 𑀅𑀯𑀥𑀸𑀭𑀡𑀯𑀘𑀦𑀁, 𑀏𑀢𑁂𑀳𑀺 𑀧𑀜𑁆𑀜𑀸𑀤𑀻𑀳𑀺 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀯𑀤𑀢𑀺. 𑀉𑀧𑀲𑀫𑁂𑀦𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑁂𑀦. 𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄, 𑀬𑁄 𑀓𑁄𑀘𑀺 𑀦𑀺𑀩𑁆𑀩𑀸𑀦𑀧𑀢𑁆𑀢𑁄 𑀪𑀺𑀓𑁆𑀔𑀼, 𑀦 𑀢𑀸𑀤𑀺𑀲𑁄. 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸, 𑀦 𑀣𑁂𑀭𑀸 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫 𑀲𑀸𑀯𑀓𑁄 𑀅𑀢𑁆𑀣𑀻𑀢𑀺 𑀯𑀤𑀢𑀺.

𑀅𑀢𑀻𑀢𑀦𑁆𑀢𑀺 𑀅𑀢𑀻𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑁂. 𑀦𑀸𑀦𑁆𑀯𑀸𑀕𑀫𑁂𑀬𑁆𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀸𑀦𑀼𑀕𑀘𑁆𑀙𑁂𑀬𑁆𑀬. 𑀦𑀧𑁆𑀧𑀝𑀺𑀓𑀗𑁆𑀔𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦 𑀧𑀢𑁆𑀣𑁂𑀬𑁆𑀬. 𑀬𑀤𑀢𑀻𑀢𑀦𑁆𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀬𑀁 𑀅𑀢𑀻𑀢𑀁, 𑀢𑀁 ¶ 𑀧𑀳𑀻𑀦𑀁 𑀦𑀺𑀭𑀼𑀤𑁆𑀥𑀁 𑀅𑀢𑁆𑀣𑀗𑁆𑀕𑀢𑀁, 𑀢𑀲𑁆𑀫𑀸 ¶ 𑀢𑀁 𑀦𑀸𑀦𑀼𑀕𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀘 𑀬𑀁 𑀢𑀢𑁆𑀣 𑀅𑀦𑀸𑀕𑀢𑀁, 𑀢𑀁 𑀅𑀧𑁆𑀧𑀢𑁆𑀢𑀁 𑀅𑀚𑀸𑀢𑀁 𑀅𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀦 𑀧𑀢𑁆𑀣𑁂𑀬𑁆𑀬. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀬𑀢𑁆𑀣 𑀬𑀢𑁆𑀣𑁂𑀯 𑀲𑁄 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀲𑀢𑁆𑀢𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀯𑀺𑀧𑀲𑁆𑀲𑀢𑀺, 𑀅𑀭𑀜𑁆𑀜𑀸𑀤𑀻𑀲𑀼 𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺. 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸 𑀳𑀺 𑀭𑀸𑀕𑀸𑀤𑀻𑀳𑀺 𑀦 𑀲𑀁𑀳𑀺𑀭𑀢𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀲𑀁𑀳𑀻𑀭𑀸 𑀅𑀲𑀁𑀓𑀼𑀧𑁆𑀧𑀸, 𑀢𑀁 𑀅𑀦𑀼𑀩𑁆𑀭𑀽𑀳𑀬𑁂 𑀯𑀟𑁆𑀠𑁂𑀬𑁆𑀬 𑀧𑀝𑀺𑀯𑀺𑀧𑀲𑁆𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺 𑀦 𑀲𑀁𑀳𑀺𑀭𑀢𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀅𑀦𑀼𑀩𑁆𑀭𑀽𑀳𑀬𑁂, 𑀧𑀼𑀦𑀧𑁆𑀧𑀼𑀦𑀁 𑀢𑀤𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀦𑁆𑀢𑁄 𑀯𑀟𑁆𑀠𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀅𑀦𑀼𑀩𑁆𑀭𑀽𑀳𑀦𑀲𑁆𑀲 𑀅𑀢𑁆𑀣𑀸𑀬 𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑁂𑀦 ‘‘𑀆𑀢𑀧𑁆𑀧’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑀻𑀭𑀺𑀬𑀁 𑀅𑀚𑁆𑀚𑁂𑀯 𑀓𑀸𑀢𑀩𑁆𑀩𑀁. 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂𑀢𑀺 𑀲𑁆𑀯𑁂 𑀚𑀻𑀯𑀺𑀢𑀁 𑀯𑀸 𑀫𑀭𑀡𑀁 𑀯𑀸 𑀓𑁄 𑀚𑀸𑀦𑀸𑀢𑀺. 𑀅𑀚𑁆𑀚𑁂𑀯 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀻𑀮𑀁 𑀯𑀸 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀺, ‘‘𑀅𑀚𑁆𑀚 𑀢𑀸𑀯 𑀧𑀧𑀜𑁆𑀘𑁄 𑀅𑀢𑁆𑀣𑀺, 𑀲𑁆𑀯𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀻𑀭𑀺𑀬𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀲𑁂𑀦𑁂𑀦𑀸𑀢𑀺 𑀅𑀳𑀺𑀯𑀺𑀘𑁆𑀙𑀺𑀓𑀯𑀺𑀲𑀲𑀢𑁆𑀣𑀸𑀤𑀻𑀦𑀺 𑀳𑀺 𑀅𑀦𑁂𑀓𑀸𑀦𑀺 𑀫𑀭𑀡𑀓𑀸𑀭𑀡𑀸𑀦𑀺 𑀢𑀲𑁆𑀲 𑀲𑁂𑀦𑀸𑀢𑀺 𑀢𑀸𑀬 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀯𑀲𑁂𑀦 𑀫𑀳𑀸𑀲𑁂𑀦𑁂𑀦 𑀏𑀯𑀭𑀽𑀧𑁂𑀦 𑀫𑀘𑁆𑀘𑀼𑀦𑀸 𑀲𑀤𑁆𑀥𑀺𑀁 ‘‘𑀓𑀢𑀺𑀧𑀸𑀳𑀁 𑀢𑀸𑀯 𑀆𑀕𑀫𑁂𑀳𑀺, 𑀬𑀸𑀯𑀸𑀳𑀁 𑀩𑀼𑀤𑁆𑀥𑀧𑀽𑀚𑀸𑀤𑀺𑀁 𑀅𑀢𑁆𑀢𑀦𑁄 𑀅𑀯𑀲𑁆𑀲𑀬𑀁 𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀏𑀯𑀁 𑀫𑀺𑀢𑁆𑀢𑀲𑀦𑁆𑀣𑀯𑀸𑀓𑀸𑀭𑀲𑀗𑁆𑀔𑀸𑀢𑁄 𑀯𑀸 ‘‘𑀇𑀤𑀁 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀕𑀳𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀆𑀕𑀫𑁂𑀳𑀻’’𑀢𑀺 𑀏𑀯𑀁 𑀮𑀜𑁆𑀚𑀸𑀦𑀼𑀧𑁆𑀧𑀤𑀸𑀦𑀲𑀗𑁆𑀔𑀸𑀢𑁄 𑀯𑀸 ‘‘𑀇𑀫𑀺𑀦𑀸 𑀩𑀮𑀭𑀸𑀲𑀺𑀦𑀸 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀩𑀮𑀭𑀸𑀲𑀺𑀲𑀗𑁆𑀔𑀸𑀢𑁄 𑀯𑀸 𑀲𑀗𑁆𑀕𑀭𑁄 𑀦𑀢𑁆𑀣𑀺. 𑀲𑀗𑁆𑀕𑀭𑁄𑀢𑀺 𑀳𑀺 𑀫𑀺𑀢𑁆𑀢𑀓𑀭𑀡𑀮𑀜𑁆𑀚𑀤𑀸𑀦𑀩𑀮𑀭𑀸𑀲𑀺𑀲𑀗𑁆𑀓𑀟𑁆𑀠𑀦𑀸𑀦𑀁 𑀦𑀸𑀫𑀁, 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀢𑀦𑁆𑀤𑀺𑀢𑀦𑁆𑀢𑀺 𑀅𑀦𑀮𑀲𑀁 𑀉𑀝𑁆𑀞𑀸𑀳𑀓𑀁. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀪𑀤𑁆𑀤𑁄 𑀏𑀓𑀭𑀢𑁆𑀢𑁄 𑀅𑀲𑁆𑀲𑀸𑀢𑀺 𑀪𑀤𑁆𑀤𑁂𑀓𑀭𑀢𑁆𑀢𑁄. 𑀇𑀢𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 ‘‘𑀪𑀤𑁆𑀤𑁂𑀓𑀭𑀢𑁆𑀢𑁄 𑀅𑀬’’𑀦𑁆𑀢𑀺 𑀭𑀸𑀕𑀸𑀤𑀺𑀲𑀦𑁆𑀢𑀢𑀸𑀬 𑀲𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀆𑀘𑀺𑀓𑁆𑀔𑀢𑀺.

𑀘𑀓𑁆𑀔𑀼𑀦𑀸 𑀧𑀜𑁆𑀜𑀸𑀬 𑀘𑀸𑀢𑀺 𑀘𑀓𑁆𑀔𑀼𑀦𑀸 𑀘 𑀧𑀜𑁆𑀜𑀸𑀬 𑀘. 𑀘𑀓𑁆𑀔𑀼𑀪𑀽𑀢𑀸𑀬 𑀯𑀸 𑀧𑀜𑁆𑀜𑀸𑀬. 𑀲𑀢𑀺𑀬𑀸 𑀧𑀜𑁆𑀜𑀸𑀬 𑀘𑀸𑀢𑀺 𑀲𑀢𑀺𑀬𑀸 𑀘 𑀧𑀜𑁆𑀜𑀸𑀬 𑀘, 𑀲𑀢𑀺𑀯𑀺𑀲𑀺𑀝𑁆𑀞𑀸𑀬 𑀯𑀸 𑀧𑀜𑁆𑀜𑀸𑀬. 𑀓𑀸𑀬𑁂𑀦𑀸𑀢𑀺 𑀦𑀸𑀫𑀓𑀸𑀬𑁂𑀦.

𑀤𑀺𑀩𑁆𑀩𑀘𑀓𑁆𑀔𑀼 ¶ 𑀲𑀼𑀯𑀺𑀲𑀼𑀤𑁆𑀥𑀦𑁆𑀢𑀺 𑀤𑀺𑀩𑁆𑀩𑀁 𑀘𑀓𑁆𑀔𑀼 𑀲𑀼𑀯𑀺𑀲𑀼𑀤𑁆𑀥𑀁, 𑀬𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀢𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸. 𑀇𑀤𑁆𑀥𑀺𑀯𑀺𑀥𑀸𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀸. 𑀦𑀺𑀭𑁄𑀥𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁦𑁪. 𑀬𑀲𑁆𑀲 ¶ 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀦𑁆𑀢𑀺 𑀏𑀓𑀖𑀦𑀁 𑀲𑁂𑀮𑀁 𑀯𑀺𑀬 𑀧𑀓𑀢𑀺𑀯𑀸𑀢𑁂𑀳𑀺 𑀮𑁄𑀓𑀥𑀫𑁆𑀫𑀯𑀸𑀢𑁂𑀳𑀺 𑀅𑀓𑀫𑁆𑀧𑀦𑀻𑀬𑀢𑁄 𑀬𑀲𑁆𑀲 𑀘𑀺𑀢𑁆𑀢𑀁 𑀲𑁂𑀮𑀽𑀧𑀫𑀁. 𑀢𑁂𑀦𑀸𑀳 𑁋 ‘‘𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀻’’𑀢𑀺. 𑀭𑀚𑀦𑀻𑀬𑁂𑀲𑀽𑀢𑀺 𑀮𑀸𑀪𑀸𑀤𑀻𑀲𑀼. 𑀓𑁄𑀧𑀦𑁂𑀬𑁆𑀬𑁂𑀢𑀺 𑀅𑀮𑀸𑀪𑀸𑀤𑀺𑀓𑁂. 𑀓𑀼𑀢𑁄 𑀦𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺 𑀢𑀁 𑀏𑀯𑀁 𑀪𑀸𑀯𑀺𑀢𑀘𑀺𑀢𑁆𑀢𑀁 𑀯𑀻𑀢𑀺𑀓𑁆𑀓𑀦𑁆𑀢𑀮𑁄𑀓𑀥𑀫𑁆𑀫𑀁 𑀉𑀢𑁆𑀢𑀫𑀧𑀼𑀭𑀺𑀲𑀁 𑀮𑁄𑀓𑀥𑀫𑁆𑀫𑀳𑁂𑀢𑀼𑀓𑀁 𑀤𑀼𑀓𑁆𑀔𑀁 𑀦𑀸𑀦𑀼𑀕𑀫𑀺𑀲𑁆𑀲𑀢𑀺.

𑀬𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀢𑀸𑀬 𑀳𑀼𑀁𑀳𑀼𑀗𑁆𑀓𑀸𑀭𑀓𑀲𑀸𑀯𑀸𑀤𑀺𑀧𑀸𑀧𑀥𑀫𑁆𑀫𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀓𑁂𑀯𑀮𑀁 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑁆𑀢𑀸 𑀳𑀼𑀁𑀳𑀼𑀗𑁆𑀓𑀸𑀭𑀧𑁆𑀧𑀳𑀸𑀦𑁂𑀦 𑀦𑀺𑀳𑀼𑀁𑀳𑀼𑀗𑁆𑀓𑁄. 𑀭𑀸𑀕𑀸𑀤𑀺𑀓𑀲𑀸𑀯𑀸𑀪𑀸𑀯𑁂𑀦 𑀦𑀺𑀓𑁆𑀓𑀪𑀸𑀯𑁄. 𑀲𑀻𑀮𑀲𑀁𑀯𑀭𑁂𑀦 𑀲𑀁𑀬𑀢𑀘𑀺𑀢𑁆𑀢𑀢𑀸𑀬 𑀬𑀢𑀢𑁆𑀢𑁄. 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀳𑀺 𑀯𑁂𑀤𑁂𑀳𑀺 𑀅𑀦𑁆𑀢𑀁 𑀦𑀺𑀩𑁆𑀩𑀸𑀦𑀁, 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀁 𑀕𑀢𑀢𑁆𑀢𑀸 𑀯𑁂𑀤𑀦𑁆𑀢𑀕𑀽. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄. 𑀥𑀫𑁆𑀫𑁂𑀦 𑀲𑁄 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬𑀸𑀢𑀺 𑀲𑁄 ‘‘𑀩𑁆𑀭𑀸𑀳𑁆𑀫𑀡𑁄 𑀅𑀳’’𑀦𑁆𑀢𑀺 𑀏𑀢𑀁 𑀯𑀸𑀤𑀁 𑀯𑀤𑁂𑀬𑁆𑀬. 𑀬𑀲𑁆𑀲 𑀲𑀓𑀮𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀓𑀼𑀳𑀺𑀜𑁆𑀘𑀺 𑀏𑀓𑀸𑀭𑀫𑁆𑀫𑀡𑁂𑀧𑀺 𑀭𑀸𑀕𑀼𑀲𑁆𑀲𑀤𑁄 𑀤𑁄𑀲𑀼𑀲𑁆𑀲𑀤𑁄 𑀫𑁄𑀳𑀼𑀲𑁆𑀲𑀤𑁄 𑀫𑀸𑀦𑀼𑀲𑁆𑀲𑀤𑁄 𑀤𑀺𑀝𑁆𑀞𑀼𑀲𑁆𑀲𑀤𑁄𑀢𑀺 𑀇𑀫𑁂 𑀉𑀲𑁆𑀲𑀤𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀦 𑀕𑀸𑀥𑀢𑀻𑀢𑀺 𑀦 𑀧𑀢𑀺𑀝𑁆𑀞𑀳𑀢𑀺. 𑀲𑀼𑀓𑁆𑀓𑀸𑀢𑀺 𑀲𑀼𑀓𑁆𑀓𑀲𑀗𑁆𑀔𑀸𑀢𑀸 𑀕𑀳𑀸. 𑀬𑀤𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀦𑀁 𑀧𑀪𑀸 𑀢𑀢𑁆𑀣 𑀦𑀢𑁆𑀣𑀺, 𑀢𑀫𑁄 𑀏𑀯 𑀘 𑀲𑀺𑀬𑀸𑀢𑀺 𑀆𑀲𑀗𑁆𑀓𑀫𑀸𑀦𑁂 𑀲𑀦𑁆𑀥𑀸𑀬𑀸𑀳 ‘‘𑀢𑀫𑁄 𑀢𑀢𑁆𑀣 𑀦 𑀯𑀺𑀚𑁆𑀚𑀢𑀻’’𑀢𑀺. 𑀬𑀤𑀸 𑀘 𑀅𑀢𑁆𑀢𑀦𑀸𑀯𑁂𑀤𑀻𑀢𑀺𑀆𑀤𑀻𑀲𑀼 𑀏𑀯𑀁𑀯𑀺𑀥𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦 𑀜𑀸𑀡𑁂𑀦 𑀬𑀤𑀸 𑀯𑀺𑀦𑁆𑀤𑀢𑀺, 𑀅𑀣 𑀭𑀽𑀧𑀸𑀭𑀽𑀧𑀥𑀫𑁆𑀫𑀢𑁄 𑀲𑀼𑀔𑀤𑀼𑀓𑁆𑀔𑀢𑁄 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄 𑀳𑁄𑀢𑀻𑀢𑀺.

𑀲𑀓𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀲𑀓𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀅𑀚𑁆𑀛𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺. 𑀏𑀢𑀁 𑀧𑀺𑀲𑀸𑀘𑀦𑁆𑀢𑀺 𑀅𑀚𑀓𑀮𑀸𑀧𑀓, 𑀏𑀢𑀁 𑀢𑀬𑀸 𑀯𑀼𑀢𑁆𑀢𑀁 𑀧𑀺𑀲𑀸𑀘𑀁 𑀓𑀺𑀮𑁂𑀲𑀧𑀺𑀲𑀸𑀘𑀜𑁆𑀘. 𑀧𑀓𑁆𑀓𑀼𑀮𑀦𑁆𑀢𑀺 𑀢𑀬𑀸 𑀓𑀢𑀁 𑀅𑀓𑁆𑀓𑀼𑀮𑀁 𑀧𑀓𑁆𑀓𑀼𑀮𑀓𑀭𑀡𑀜𑁆𑀘. 𑀅𑀢𑀺𑀯𑀢𑁆𑀢𑀢𑀻𑀢𑀺 𑀅𑀢𑀺𑀓𑁆𑀓𑀫𑀢𑀺.

𑀦𑀸𑀪𑀺𑀦𑀦𑁆𑀤𑀢𑀺 ¶ 𑀆𑀬𑀦𑁆𑀢𑀺𑀦𑁆𑀢𑀺 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀕𑀘𑁆𑀙𑀦𑁆𑀢𑀺𑀁 𑀅𑀜𑁆𑀜𑀁 𑀯𑀸 𑀦 𑀅𑀪𑀺𑀦𑀦𑁆𑀤𑀢𑀺 𑀘𑀺𑀢𑁆𑀢𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀢𑀫𑁂𑀯 𑀧𑀓𑁆𑀓𑀫𑀦𑁆𑀢𑀺𑀁 𑀦 𑀲𑁄𑀘𑀢𑀺. 𑀲𑀗𑁆𑀕𑀸 𑀲𑀗𑁆𑀕𑀸𑀫𑀚𑀺𑀁 𑀫𑀼𑀢𑁆𑀢𑀦𑁆𑀢𑀺 𑀧𑀜𑁆𑀘𑀯𑀺𑀥𑀸𑀧𑀺 𑀲𑀗𑁆𑀕𑀢𑁄 𑀫𑀼𑀢𑁆𑀢𑀁 𑀲𑀗𑁆𑀕𑀸𑀫𑀚𑀺𑀁 𑀪𑀺𑀓𑁆𑀔𑀼𑀁.

𑀩𑀳𑁆𑀯𑁂𑀢𑁆𑀣𑀸𑀢𑀺 𑀩𑀳𑀼 𑀏𑀢𑁆𑀣 𑀦𑁆𑀳𑀸𑀬𑀢𑀺 𑀚𑀦𑁄, 𑀦 𑀢𑁂𑀦 𑀲𑁄 𑀲𑀼𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀚𑀸𑀢𑀺𑀩𑀮𑀁 ¶ 𑀦𑀺𑀲𑁂𑀥𑀦𑁆𑀢𑀺 𑀚𑀸𑀢𑀺𑀩𑀮𑀲𑁆𑀲 𑀦𑀺𑀲𑁂𑀥𑀓𑀁. 𑀲𑀳𑀸𑀬𑀸 𑀯𑀢𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀲𑀳 𑀅𑀬𑀦𑀯𑀲𑁂𑀦 𑀲𑀳𑀸𑀬𑀸 𑀯𑀢. 𑀓𑀸𑀮𑁂𑀦 𑀓𑀸𑀮𑀁 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲 𑀲𑀯𑀦𑀯𑀲𑁂𑀦 𑀘𑀺𑀭𑀭𑀢𑁆𑀢𑀁 𑀲𑀫𑁂𑀢𑀺 𑀲𑀫𑀸𑀕𑀫𑁄 𑀏𑀢𑁂𑀲𑀦𑁆𑀢𑀺 𑀘𑀺𑀭𑀭𑀢𑁆𑀢𑀲𑀫𑁂𑀢𑀺𑀓𑀸. 𑀲𑀺𑀣𑀺𑀮𑀫𑀸𑀭𑀩𑁆𑀪𑀸𑀢𑀺 𑀲𑀺𑀣𑀺𑀮𑀁 𑀯𑀻𑀭𑀺𑀬𑀁 𑀓𑀢𑁆𑀯𑀸.

𑁧𑁦𑁫. 𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀓𑁄 𑀯𑀺𑀲𑁂𑀲𑁄𑀢𑀺 𑀲𑀢𑁆𑀣𑀼 𑀲𑀸𑀯𑀓𑀲𑁆𑀲 𑀘 𑀧𑀜𑁆𑀘𑀲𑁆𑀯𑁂𑀯 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦𑀺𑀩𑁆𑀩𑀺𑀤𑀸𑀤𑀬𑁄𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀬𑀜𑁆𑀘 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀯𑀺𑀲𑁂𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁫.𑁩𑁧; 𑀓𑀣𑀸. 𑁩𑁫𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁). 𑀢𑀢𑁆𑀣 𑀯𑀺𑀲𑁂𑀲𑀸𑀪𑀸𑀯𑀁 𑀧𑀘𑁆𑀘𑀸𑀫𑀲𑀢𑀺 ‘‘𑀢𑀢𑁆𑀭 𑀓𑁄 𑀯𑀺𑀲𑁂𑀲𑁄’’𑀢𑀺. 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀅𑀥𑀺𑀓𑀧𑀬𑁄𑀕𑁄. 𑀦𑀸𑀦𑀸𑀓𑀭𑀡𑀦𑁆𑀢𑀺 𑀘 𑀯𑀺𑀲𑁂𑀲𑁄𑀬𑁂𑀯 𑀯𑀼𑀢𑁆𑀢𑁄.

𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑁂𑀲𑁄𑀢𑀺 𑀪𑀺𑀓𑁆𑀔𑀯𑁂, 𑀬𑀤𑀺𑀧𑀺 𑀲𑀸𑀯𑀓𑀲𑁆𑀲 𑀲𑀢𑁆𑀣𑀼 𑀘 𑀯𑀺𑀫𑀼𑀢𑁆𑀢𑀺𑀬𑀁 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀦 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀭𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀸𑀤𑀺𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑀲𑀫𑀸𑀬𑁄𑀕𑁄. 𑀅𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀢𑁄 𑀯𑀺𑀲𑁂𑀲𑁄𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀯𑀢𑁆𑀢𑀫𑀸𑀦𑀲𑁆𑀲. 𑀅𑀭𑀺𑀬𑀫𑀕𑁆𑀕𑀜𑁆𑀳𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀸𑀤𑁂𑀲𑀺. 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀲𑀢𑁆𑀣𑀸 𑀉𑀧𑁆𑀧𑀸𑀤𑁂𑀢𑀸 𑀦𑀸𑀫 𑀦𑀸𑀳𑁄𑀲𑀺, 𑀢𑀲𑁆𑀫𑀸 𑀅𑀬𑀁 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸 𑀦𑀸𑀫. 𑀅𑀲𑀜𑁆𑀚𑀸𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀓𑁆𑀔𑀸𑀢𑀲𑁆𑀲𑀸𑀢𑀺 𑀅𑀓𑀣𑀺𑀢𑀲𑁆𑀲. 𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀫𑀕𑁆𑀕𑀜𑁆𑀜𑀽. 𑀫𑀕𑁆𑀕𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀅𑀓𑀸𑀲𑀻𑀢𑀺 𑀫𑀕𑁆𑀕𑀯𑀺𑀤𑀽. 𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘 𑀓𑁄𑀯𑀺𑀤𑁄𑀢𑀺 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸𑀢𑀺 𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀦𑁆𑀢𑀸. 𑀧𑀘𑁆𑀙𑀸𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀳𑀁 𑀧𑀞𑀫𑀁 𑀲𑀫𑀦𑁆𑀦𑀸𑀕𑀢𑁄, 𑀲𑀸𑀯𑀓𑀸 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑁧𑁦𑁬. ‘‘𑀦𑀻𑀘𑁂 ¶ 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁮𑁫; 𑀧𑀼. 𑀧. 𑁧𑁬𑁮) 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀦𑀺𑀭𑀬𑀢𑀫𑀼𑀧𑀕𑀫𑀦𑀢𑁄 𑀢𑀫𑀧𑀭𑀸𑀬𑀡𑁄. 𑀇𑀢𑀺 𑀉𑀪𑀬𑁂𑀦𑀧𑀺 𑀔𑀦𑁆𑀥𑀢𑀫𑁄𑀯 𑀓𑀣𑀺𑀢𑁄 𑀳𑁄𑀢𑀺. ‘‘𑀅𑀟𑁆𑀠𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁮𑁫; 𑀧𑀼. 𑀧. 𑁧𑁬𑁮) 𑀚𑁄𑀢𑀺𑀦𑀸 𑀬𑀼𑀢𑁆𑀢𑁄𑀢𑀺 𑀚𑁄𑀢𑀺, 𑀆𑀮𑁄𑀓𑀪𑀽𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀲𑀕𑁆𑀕𑀽𑀧𑀧𑀢𑁆𑀢𑀺𑀪𑀯𑀽𑀧𑀕𑀫𑀦𑀢𑁄 𑀚𑁄𑀢𑀺𑀧𑀭𑀸𑀬𑀡𑁄. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑁂𑀧𑀺 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸.

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸𑀢𑀺 𑀏𑀢𑁆𑀣 𑀥𑀻𑀭𑀸𑀢𑀺 𑀩𑀼𑀤𑁆𑀥𑀸𑀤𑀬𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑀸. 𑀬𑀁 𑀲𑀗𑁆𑀔𑀮𑀺𑀓𑀲𑀗𑁆𑀔𑀸𑀢𑀁 ¶ 𑀅𑀬𑁂𑀦 𑀦𑀺𑀩𑁆𑀩𑀢𑁆𑀢𑀁 𑀆𑀬𑀲𑀁 𑀅𑀤𑁆𑀤𑀼𑀩𑀦𑁆𑀥𑀦𑀲𑀗𑁆𑀔𑀸𑀢𑀁 𑀤𑀸𑀭𑀼𑀫𑀬𑀜𑁆𑀘 𑀧𑀩𑁆𑀩𑀚𑀢𑀺𑀡𑁂𑀳𑀺 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀓𑀢𑀭𑀚𑁆𑀚𑀼𑀩𑀦𑁆𑀥𑀦𑀜𑁆𑀘, 𑀢𑀁 𑀅𑀲𑀺𑀆𑀤𑀻𑀳𑀺 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀣𑀺𑀭’’𑀦𑁆𑀢𑀺 𑀦 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀭𑀢𑁆𑀢𑀸 𑀳𑀼𑀢𑁆𑀯𑀸 𑀭𑀢𑁆𑀢𑀸. 𑀩𑀮𑀯𑀭𑀸𑀕𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀡𑀺𑀓𑀼𑀡𑁆𑀟𑀮𑁂𑀲𑀽𑀢𑀺 𑀫𑀡𑀻𑀲𑀼 𑀘 𑀓𑀼𑀡𑁆𑀟𑀮𑁂𑀲𑀼 𑀘, 𑀫𑀡𑀺𑀘𑀺𑀢𑁆𑀢𑁂𑀲𑀼 𑀯𑀸 𑀓𑀼𑀡𑁆𑀟𑀮𑁂𑀲𑀼. 𑀏𑀢𑀁 𑀤𑀴𑁆𑀳𑀦𑁆𑀢𑀺 𑀬𑁂 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀲𑀸𑀭𑀢𑁆𑀢𑀭𑀢𑁆𑀢𑀸, 𑀢𑁂𑀲𑀼 𑀬𑁄 𑀭𑀸𑀕𑁄, 𑀬𑀸 𑀘 𑀧𑀼𑀢𑁆𑀢𑀤𑀸𑀭𑁂𑀲𑀼 𑀅𑀧𑁂𑀓𑁆𑀔𑀸 𑀢𑀡𑁆𑀳𑀸, 𑀏𑀢𑀁 𑀓𑀺𑀮𑁂𑀲𑀫𑀬𑀁 𑀩𑀦𑁆𑀥𑀦𑀁 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 ‘‘𑀤𑀴𑁆𑀳’’𑀦𑁆𑀢𑀺 𑀯𑀤𑀦𑁆𑀢𑀺.

𑀑𑀳𑀸𑀭𑀺𑀦𑀦𑁆𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀸𑀢𑀦𑀢𑁄 𑀅𑀯𑀳𑀭𑀢𑀺 𑀳𑁂𑀝𑁆𑀞𑀸 𑀳𑀭𑀢𑀻𑀢𑀺 𑀑𑀳𑀸𑀭𑀺𑀦𑀁. 𑀲𑀺𑀣𑀺𑀮𑀦𑁆𑀢𑀺 𑀩𑀦𑁆𑀥𑀦𑀝𑁆𑀞𑀸𑀦𑁂 𑀙𑀯𑀺𑀆𑀤𑀻𑀦𑀺 𑀅𑀓𑁄𑀧𑁂𑀢𑁆𑀯𑀸 𑀩𑀦𑁆𑀥𑀦𑀪𑀸𑀯𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀚𑀮𑀧𑀣𑀣𑀮𑀧𑀣𑀸𑀤𑀻𑀲𑀼 𑀓𑀫𑁆𑀫𑀁 𑀓𑀸𑀢𑀼𑀁 𑀤𑁂𑀢𑀻𑀢𑀺 𑀲𑀺𑀣𑀺𑀮𑀁. 𑀤𑀼𑀧𑁆𑀧𑀫𑀼𑀜𑁆𑀘𑀦𑁆𑀢𑀺 𑀮𑁄𑀪𑀯𑀲𑁂𑀦 𑀳𑀺 𑀏𑀓𑀯𑀸𑀭𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀤𑀝𑁆𑀞𑀝𑁆𑀞𑀸𑀦𑀢𑁄 𑀓𑀘𑁆𑀙𑀧𑁄 𑀯𑀺𑀬 𑀤𑀼𑀫𑁆𑀫𑁄𑀘𑀬𑀁 𑀳𑁄𑀢𑀻𑀢𑀺 𑀤𑀼𑀧𑁆𑀧𑀫𑀼𑀜𑁆𑀘𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦𑀸𑀢𑀺 𑀏𑀢𑀁 𑀤𑀴𑁆𑀳𑀫𑁆𑀧𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀜𑀸𑀡𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀺𑀦𑁄 𑀳𑀼𑀢𑁆𑀯𑀸 𑀓𑀸𑀫𑀲𑀼𑀔𑀁 𑀧𑀳𑀸𑀬 𑀧𑀭𑀺𑀩𑁆𑀩𑀚𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺 𑀧𑀩𑁆𑀩𑀚𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑁧𑁦𑁭. 𑀘𑁂𑀢𑁂𑀢𑀻𑀢𑀺 𑀅𑀓𑀼𑀲𑀮𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑀺. 𑀧𑀓𑀧𑁆𑀧𑁂𑀢𑀻𑀢𑀺 𑀢𑀫𑁂𑀯 𑀅𑀓𑀼𑀲𑀮𑀘𑁂𑀢𑀦𑀁 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑀁 𑀧𑀸𑀧𑀦𑀯𑀲𑁂𑀦 𑀓𑀧𑁆𑀧𑁂𑀢𑀺. 𑀅𑀦𑀼𑀲𑁂𑀢𑀻𑀢𑀺 𑀭𑀸𑀕𑀸𑀤𑀺𑀅𑀦𑀼𑀲𑀬𑁄𑀯 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀅𑀦𑀼𑀲𑁂𑀢𑀺. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸𑀢𑀺 𑀬𑀤𑁂𑀢𑀁 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀅𑀦𑀼𑀲𑀬𑀦𑀜𑁆𑀘, 𑀏𑀢𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑁂 𑀲𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀓𑀫𑁆𑀫𑀁 ¶ 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀲𑀫𑁆𑀧𑀸𑀤𑀦𑀢𑁄 𑀧𑀢𑀺𑀝𑁆𑀞𑀸 𑀳𑁄𑀢𑀺. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑀸 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺.

‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀓𑀼𑀲𑀮𑀓𑀫𑁆𑀫𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄, 𑀬𑀤𑀺𑀧𑀺 𑀓𑀤𑀸𑀘𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸 𑀅𑀓𑀼𑀲𑀮𑀘𑁂𑀢𑀦𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀦𑀼𑀲𑀬𑀸 𑀧𑀦 𑀅𑀧𑁆𑀧𑀳𑀻𑀦𑀸𑀢𑀺, 𑀢𑁂 𑀓𑀼𑀲𑀮𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀬𑁂𑀯𑀸𑀢𑀺. 𑀲𑀢𑀺 𑀘 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀢𑀺𑀬𑀯𑀸𑀭𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁮. ‘‘𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄’’𑀢𑀺𑀆𑀤𑀺 𑀬𑀤𑀺 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀲𑀁𑀲𑀻𑀤𑀦𑀝𑁆𑀞𑁂𑀦 ¶ 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀲𑀸𑀕𑀭𑁄 ‘‘𑀲𑀫𑀼𑀤𑁆𑀤𑁄’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀢𑀢𑁄 𑀲𑀢𑀪𑀸𑀕𑁂𑀦𑀧𑀺 𑀲𑀳𑀲𑁆𑀲𑀪𑀸𑀕𑁂𑀦𑀧𑀺 𑀘𑀓𑁆𑀔𑀼𑀆𑀤𑀻𑀲𑁆𑀯𑁂𑀯 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄, 𑀢𑀲𑁆𑀲 𑀭𑀽𑀧𑀫𑀬𑁄 𑀯𑁂𑀕𑁄’’𑀢𑀺, 𑀭𑀽𑀧𑁂𑀲𑀼 𑀲𑀢𑁆𑀢𑀸𑀦𑀁 𑀆𑀯𑀺𑀜𑁆𑀙𑀦𑀢𑁄 𑀭𑀽𑀧𑀸𑀬𑀢𑀦𑀫𑁂𑀯 𑀯𑁂𑀕𑁄 𑀘𑀓𑁆𑀔𑀼𑀲𑁆𑀲 𑀯𑁂𑀕𑁄𑀢𑀺 𑀅𑀢𑁆𑀣𑁄.

𑀬𑁄 𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀲𑀳𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀲𑀳 𑀯𑀺𑀲𑀬𑁂𑀦 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀲𑀫𑁆𑀫𑀲𑀦𑁆𑀢𑁄 𑀢𑀢𑁆𑀣 𑀘 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀢𑁄 𑀓𑀺𑀮𑁂𑀲𑀚𑀸𑀮𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀅𑀪𑀺𑀪𑀯𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 𑀘𑀓𑁆𑀔𑀼𑀲𑀫𑀼𑀤𑁆𑀤𑀦𑁆𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀘𑀓𑁆𑀔𑀼𑀲𑀗𑁆𑀔𑀸𑀢𑀁 𑀲𑀫𑀼𑀤𑁆𑀤𑀁 𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀭𑁄 𑀦𑀬𑁄 𑁋 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄𑀢𑀺 𑀬𑀤𑀺𑀧𑀺 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀬𑀤𑀺 𑀯𑀸 𑀲𑀫𑀼𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄, 𑀘𑀓𑁆𑀔𑀼𑀫𑁂𑀯 𑀲𑀫𑀼𑀤𑁆𑀤𑁄. 𑀢𑀲𑁆𑀲 𑀳𑀺 𑀧𑀣𑀯𑀺𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀦𑀻𑀮𑀸𑀤𑀺𑀆𑀭𑀫𑁆𑀫𑀡𑀁 𑀲𑀫𑁄𑀲𑀭𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦𑀧𑀺 𑀲𑀫𑀼𑀤𑁆𑀤𑁄. 𑀘𑀓𑁆𑀔𑀼 𑀘 𑀢𑁂𑀲𑀼 𑀢𑁂𑀲𑀼 𑀦𑀻𑀮𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀲𑀫𑀼𑀤𑁂𑀢𑀺 𑀅𑀲𑀁𑀯𑀼𑀢𑀁 𑀳𑀼𑀢𑁆𑀯𑀸 𑀑𑀲𑀭𑀫𑀸𑀦𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁂𑀦 𑀲𑀤𑁄𑀲𑀪𑀸𑀯𑁂𑀦 𑀕𑀘𑁆𑀙𑀢𑀻𑀢𑀺 𑀲𑀫𑀼𑀤𑀦𑀝𑁆𑀞𑁂𑀦𑀧𑀺 𑀲𑀫𑀼𑀤𑁆𑀤𑁄. 𑀢𑀣𑀸 𑀘𑀓𑁆𑀔𑀼𑀁 𑀢𑀡𑁆𑀳𑀸𑀲𑁄𑀢𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀢𑀸𑀬 𑀢𑁂𑀳𑀺 𑀲𑀦𑁆𑀢𑀸𑀦𑀲𑁆𑀲 𑀲𑀫𑀼𑀤𑀦𑀝𑁆𑀞𑁂𑀦 𑀢𑁂𑀫𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄. 𑀢𑀲𑁆𑀲 𑀭𑀽𑀧𑀫𑀬𑁄 𑀯𑁂𑀕𑁄𑀢𑀺 𑀲𑀫𑀼𑀤𑁆𑀤𑀲𑁆𑀲 𑀅𑀧𑁆𑀧𑀫𑀸𑀡𑁄 𑀊𑀫𑀺𑀫𑀬𑁄 𑀯𑁂𑀕𑁄 𑀯𑀺𑀬 ¶ 𑀢𑀲𑁆𑀲𑀸𑀧𑀺 𑀘𑀓𑁆𑀔𑀼𑀲𑀫𑀼𑀤𑁆𑀤𑀲𑁆𑀲 𑀲𑀫𑁄𑀲𑀭𑀦𑁆𑀢𑀲𑁆𑀲 𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀬𑁆𑀬𑁄 𑀭𑀽𑀧𑀫𑀬𑁄 𑀯𑁂𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀲𑀳𑀢𑀻𑀢𑀺 𑀬𑁄 𑀢𑀁 𑀘𑀓𑁆𑀔𑀼𑀲𑀫𑀼𑀤𑁆𑀤𑁂 𑀲𑀫𑁄𑀲𑀭𑀦𑁆𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀫𑀦𑀸𑀧𑁂 𑀭𑀽𑀧𑁂 𑀭𑀸𑀕𑀁, 𑀅𑀫𑀦𑀸𑀧𑁂 𑀤𑁄𑀲𑀁, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑀦𑁆𑀢𑀺 𑀏𑀯𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑁂 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀉𑀧𑁂𑀓𑁆𑀔𑀓𑀪𑀸𑀯𑁂𑀦 𑀲𑀳𑀢𑀺.

𑀲𑀊𑀫𑀺𑀦𑁆𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑀊𑀫𑀻𑀳𑀺 𑀲𑀊𑀫𑀺𑀁. 𑀓𑀺𑀮𑁂𑀲𑀯𑀝𑁆𑀝𑁂𑀳𑀺 𑀲𑀸𑀯𑀝𑁆𑀝𑀁. 𑀓𑀺𑀮𑁂𑀲𑀕𑀳𑁂𑀳𑀺 𑀲𑀕𑀳𑀁. 𑀓𑀺𑀮𑁂𑀲𑀭𑀓𑁆𑀔𑀲𑁂𑀳𑀺 𑀲𑀭𑀓𑁆𑀔𑀲𑀁. 𑀓𑁄𑀥𑀼𑀧𑀸𑀬𑀸𑀲𑀲𑁆𑀲 𑀯𑀸 𑀯𑀲𑁂𑀦 𑀲𑀊𑀫𑀺𑀁. 𑀓𑀸𑀫𑀕𑀼𑀡𑀯𑀲𑁂𑀦 𑀲𑀸𑀯𑀝𑁆𑀝𑀁. 𑀫𑀸𑀢𑀼𑀕𑀸𑀫𑀯𑀲𑁂𑀦 𑀲𑀕𑀳𑀁 𑀲𑀭𑀓𑁆𑀔𑀲𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀊𑀫𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 (𑀇𑀢𑀺𑀯𑀼. 𑁧𑁦𑁯; 𑀫. 𑀦𑀺. 𑁨.𑁧𑁬𑁨; 𑀅. 𑀦𑀺. 𑁪.𑁧𑁨𑁨). 𑀢𑀣𑀸 𑀆𑀯𑀝𑁆𑀝𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁 (𑀇𑀢𑀺𑀯𑀼. 𑁧𑁦𑁯; 𑀫. 𑀦𑀺. 𑁨.𑁧𑁬𑁪; 𑀅. 𑀦𑀺. 𑁪.𑁧𑁨𑁨). 𑀕𑀳𑀭𑀓𑁆𑀔𑀲𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀇𑀢𑀺𑀯𑀼. 𑁧𑁦𑁯). 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀊𑀫𑀺𑀪𑀬𑀁 ¶ 𑀤𑀼𑀢𑁆𑀢𑀭𑀁 𑀅𑀘𑁆𑀘𑀢𑀭𑀻𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀊𑀫𑀺𑀪𑀬𑁂𑀦 𑀲𑀪𑀬𑀁 𑀤𑀼𑀭𑀢𑀺𑀓𑁆𑀓𑀫𑀁 𑀅𑀢𑀺𑀓𑁆𑀓𑀫𑀺. 𑀮𑁄𑀓𑀦𑁆𑀢𑀕𑀽𑀢𑀺 𑀲𑀁𑀲𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀕𑀢𑁄. 𑀧𑀸𑀭𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀓𑀣𑀻𑀬𑀢𑀺.

𑀩𑀴𑀺𑀲𑀸𑀢𑀺 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀳𑁂𑀢𑀼𑀢𑀸𑀬 𑀩𑀴𑀺𑀲𑀸 𑀯𑀺𑀬 𑀩𑀴𑀺𑀲𑀸. 𑀅𑀦𑀬𑀸𑀬𑀸𑀢𑀺 𑀅𑀦𑀢𑁆𑀣𑀸𑀬. 𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀤𑀼𑀓𑁆𑀔𑀸𑀬. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀅𑀧𑀭𑀺𑀬𑀺𑀝𑁆𑀞𑀸 𑀯𑀸 𑀲𑀼𑀔𑀸𑀭𑀫𑁆𑀫𑀡𑀢𑀸𑀬 𑀇𑀝𑁆𑀞𑀸. 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀦𑁆𑀢𑀸. 𑀫𑀦𑀲𑁆𑀲 𑀯𑀟𑁆𑀠𑀦𑀝𑁆𑀞𑁂𑀦 𑀫𑀦𑀸𑀧𑀸. 𑀧𑀺𑀬𑀲𑀪𑀸𑀯𑀢𑀸𑀬 𑀧𑀺𑀬𑀭𑀽𑀧𑀸. 𑀓𑀺𑀮𑁂𑀲𑀓𑀸𑀫𑀲𑀳𑀺𑀢𑀢𑁆𑀢𑀸 𑀓𑀸𑀫𑀽𑀧𑀲𑀁𑀳𑀺𑀢𑀸. 𑀭𑀸𑀕𑀚𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀲𑁆𑀲 𑀭𑀜𑁆𑀚𑀦𑀢𑁄 𑀭𑀚𑀦𑀻𑀬𑀸. 𑀢𑀜𑁆𑀘𑁂𑀢𑀺 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀦𑀻𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀳𑀺 𑀭𑀽𑀧𑀸𑀬𑀢𑀦𑀁 𑀭𑀽𑀧𑀸𑀭𑀫𑁆𑀫𑀡𑀪𑀸𑀯𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀘 𑀏𑀓𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀢𑀁𑀲𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀢𑀜𑁆𑀘𑁂’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀅𑀪𑀺𑀦𑀦𑁆𑀤𑀦𑀪𑀽𑀢𑀸𑀬 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀬 𑀅𑀪𑀺𑀫𑀼𑀔𑁄 𑀦𑀦𑁆𑀤𑀢𑀺. 𑀅𑀪𑀺𑀯𑀤𑀢𑀻𑀢𑀺 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀤𑀸𑀧𑁂𑀦𑁆𑀢𑀺𑀬𑀸 𑀢𑀡𑁆𑀳𑀸𑀬𑀦𑀯𑀲𑁂𑀦 𑀅𑀪𑀺𑀯𑀤𑀢𑀺. 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲𑀸𑀢𑀺 𑀅𑀬𑀁, 𑀪𑀺𑀓𑁆𑀔𑀼, 𑀓𑀺𑀮𑁂𑀲𑀫𑀸𑀭𑀲𑁆𑀲 𑀩𑀴𑀺𑀲𑀪𑀽𑀢𑀁 𑀭𑀽𑀧𑀢𑀡𑁆𑀳𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 ¶ 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑁂𑀤𑀻𑀢𑀺 𑀪𑀺𑀦𑁆𑀤𑀺. 𑀧𑀭𑀺𑀪𑁂𑀤𑀻𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀺𑀦𑁆𑀤𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁧𑁦𑁯. 𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀅𑀬𑀁 𑀲𑀢𑁆𑀢𑀮𑁄𑀓𑁄 𑀚𑀸𑀢𑀲𑀦𑁆𑀢𑀸𑀧𑁄 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁄𑀓𑀲𑀦𑁆𑀢𑀸𑀧𑁄 𑀘 𑀭𑀸𑀕𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀲𑀦𑁆𑀢𑀸𑀧𑁄 𑀘𑀸𑀢𑀺 𑀅𑀢𑁆𑀣𑁄. 𑀨𑀲𑁆𑀲𑀧𑀭𑁂𑀢𑁄𑀢𑀺 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑀨𑀲𑁆𑀲𑁂𑀳𑀺 𑀅𑀪𑀺𑀪𑀽𑀢𑁄. 𑀭𑁄𑀤𑀁 𑀯𑀤𑀢𑀺 𑀅𑀢𑁆𑀢𑀢𑁄𑀢𑀺 𑀢𑀁 𑀢𑀁 𑀅𑀢𑁆𑀢𑀦𑀸 𑀨𑀼𑀝𑁆𑀞𑀁 𑀤𑀼𑀓𑁆𑀔𑀁 𑀅𑀪𑀸𑀯𑀺𑀢𑀓𑀸𑀬𑀢𑀸𑀬 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀳𑁄 𑀤𑀼𑀓𑁆𑀔𑀁, 𑀈𑀤𑀺𑀲𑀁 𑀤𑀼𑀓𑁆𑀔𑀁 𑀫𑀬𑁆𑀳𑀁 𑀲𑀢𑁆𑀢𑀼𑀦𑁄𑀧𑀺 𑀫𑀸 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀯𑀺𑀮𑀧𑀦𑁆𑀢𑁄 𑀯𑀤𑀢𑀺. 𑀓𑀲𑁆𑀫𑀸? 𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸, 𑀬𑀲𑁆𑀫𑀸 𑀏𑀢𑁂 𑀲𑀢𑁆𑀢𑀸 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀅𑀢𑁆𑀢𑀦𑁄 𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑀸𑀭𑀁 𑀫𑀜𑁆𑀜𑀦𑁆𑀢𑀺 𑀆𑀲𑀻𑀲𑀦𑁆𑀢𑀺, 𑀢𑀁 𑀤𑀼𑀓𑁆𑀔𑀁 𑀢𑀢𑁄 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀢𑀺𑀓𑀺𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺. 𑀬𑁂𑀦 𑀯𑀸 𑀧𑀓𑀸𑀭𑁂𑀦 𑀅𑀢𑁆𑀢𑀦𑁄 𑀯𑀟𑁆𑀠𑀺𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀜𑁆𑀜𑀣𑀸 𑀅𑀯𑀟𑁆𑀠𑀺 𑀏𑀯 𑀧𑀦 𑀳𑁄𑀢𑀺. 𑀏𑀯𑀁 𑀅𑀜𑁆𑀜𑀣𑀸𑀪𑀸𑀯𑀺𑀢𑀁 𑀇𑀘𑁆𑀙𑀸𑀯𑀺𑀖𑀸𑀢𑀁 𑀏𑀯 𑀧𑀸𑀧𑀼𑀡𑀸𑀢𑀺. 𑀅𑀬𑀁 𑀪𑀯𑀲𑀢𑁆𑀢𑁄 𑀓𑀸𑀫𑀸𑀤𑀺𑀪𑀯𑁂𑀲𑀼 𑀲𑀢𑁆𑀢𑁄 𑀲𑀢𑁆𑀢𑀮𑁄𑀓𑁄, 𑀢𑀣𑀸𑀧𑀺 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀺, 𑀦 𑀢𑀢𑁆𑀣 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀬𑀤𑀪𑀺𑀦𑀦𑁆𑀤𑀢𑀺 𑀢𑀁 𑀪𑀬𑀦𑁆𑀢𑀺 𑀬𑀁 𑀓𑀸𑀫𑀸𑀤𑀺𑀪𑀯𑀁 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀚𑀭𑀸𑀫𑀭𑀡𑀸𑀤𑀺𑀅𑀦𑁂𑀓𑀩𑁆𑀬𑀲𑀦𑀸𑀦𑀼𑀩𑀦𑁆𑀥𑀢𑁆𑀢𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀝𑁆𑀞𑁂𑀦 𑀪𑀬𑀁. 𑀬𑀲𑁆𑀲 𑀪𑀸𑀬𑀢𑀻𑀢𑀺 𑀬𑀢𑁄 𑀚𑀭𑀸𑀫𑀭𑀡𑀸𑀤𑀺𑀢𑁄 𑀪𑀸𑀬𑀢𑀺, 𑀢𑀁 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀘 𑀤𑀼𑀓𑁆𑀔𑀦𑁆𑀢𑀺.

𑀪𑀯𑀯𑀺𑀧𑁆𑀧𑀳𑀸𑀦𑀸𑀬𑀸𑀢𑀺 ¶ 𑀪𑀯𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑀦𑁆𑀢𑁂𑀦𑁂𑀯 𑀓𑀸𑀫𑀸𑀤𑀺𑀪𑀯𑀲𑁆𑀲 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀧𑀳𑀸𑀦𑀢𑁆𑀣𑀁 𑀇𑀤𑀁 𑀫𑀬𑀸 𑀅𑀥𑀺𑀕𑀢𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻𑀢𑀺.

𑀏𑀯𑀁 𑀅𑀭𑀺𑀬𑀲𑁆𑀲 𑀫𑀕𑁆𑀕𑀲𑁆𑀲 𑀏𑀓𑀁𑀲𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀬𑁂 𑀳𑀺 𑀓𑁂𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀯𑁂𑀦𑀸𑀢𑀺 𑀭𑀽𑀧𑀪𑀯𑁂𑀦 𑀯𑀸 𑀅𑀭𑀽𑀧𑀪𑀯𑁂𑀦 𑀯𑀸. 𑀪𑀯𑀲𑁆𑀲𑀸𑀢𑀺 𑀲𑀁𑀲𑀸𑀭𑀲𑁆𑀲. 𑀯𑀺𑀧𑁆𑀧𑀫𑁄𑀓𑁆𑀔𑀦𑁆𑀢𑀺 𑀪𑀯𑀢𑁄 𑀯𑀺𑀫𑀼𑀢𑁆𑀢𑀺𑀁, 𑀲𑀁𑀲𑀸𑀭𑀲𑀼𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀢𑁆𑀣 𑀦𑀺𑀩𑁆𑀩𑀸𑀦𑀲𑀜𑁆𑀜𑀺𑀦𑁄, 𑀪𑀯𑀕𑀸𑀫𑀺𑀓𑀫𑁆𑀫𑁂𑀦 𑀧𑀦 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑁂𑀦 ¶ , 𑀢𑀁𑀦𑀺𑀩𑁆𑀩𑀢𑁆𑀢𑁂𑀦 𑀘 𑀉𑀧𑀧𑀢𑁆𑀢𑀺𑀪𑀯𑁂𑀦 𑀪𑀯𑀯𑀺𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀸 𑀪𑀯𑁂𑀦 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑀁 𑀯𑀤𑀦𑁆𑀢𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑁂 𑀢𑁂 𑀅𑀯𑀺𑀧𑁆𑀧𑀫𑀼𑀢𑁆𑀢𑀸 𑀪𑀯𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺. 𑀅𑀣 𑀯𑀸 𑀪𑀯𑁂𑀦𑀸𑀢𑀺 𑀪𑀯𑀤𑀺𑀝𑁆𑀞𑀺𑀬𑀸, 𑀪𑀯𑀢𑀺 𑀢𑀺𑀝𑁆𑀞𑀢𑀺 𑀲𑀲𑁆𑀲𑀢𑀦𑁆𑀢𑀺 𑀳𑀺 𑀧𑀯𑀢𑁆𑀢𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺 ‘‘𑀪𑀯𑀤𑀺𑀝𑁆𑀞𑀻’’𑀢𑀺 𑀯𑀼𑀘𑁆𑀘𑀢𑀺. 𑀪𑀯𑀤𑀺𑀝𑁆𑀞𑀺 𑀏𑀯 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀪𑀯𑁄’’𑀢𑀺 𑀯𑀼𑀢𑁆𑀢𑀸 𑀪𑀯𑀢𑀡𑁆𑀳𑀸𑀢𑀺𑀆𑀤𑀻𑀲𑀼 𑀯𑀺𑀬. 𑀪𑀯𑀤𑀺𑀝𑁆𑀞𑀺𑀯𑀲𑁂𑀦 𑀳𑀺 𑀇𑀥𑁂𑀓𑀘𑁆𑀘𑁂 𑀪𑀯𑀯𑀺𑀲𑁂𑀲𑀁𑀬𑁂𑀯 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑀁 𑀫𑀜𑁆𑀜𑀦𑁆𑀢𑀺. 𑀬𑀣𑀸 𑀢𑀁 𑀩𑀓𑁄 𑀩𑁆𑀭𑀳𑁆𑀫𑀸 𑀆𑀳 𑁋 ‘‘𑀇𑀤𑀁 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯𑀁, 𑀇𑀤𑀁 𑀲𑀲𑁆𑀲𑀢𑀁, 𑀇𑀤𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫’’𑀦𑁆𑀢𑀺 (𑀫. 𑀦𑀺. 𑁧.𑁫𑁦𑁧; 𑀲𑀁. 𑀦𑀺. 𑁧.𑁧𑁭𑁫). 𑀯𑀺𑀪𑀯𑁂𑀦𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸. 𑀯𑀺𑀪𑀯𑀢𑀺 𑀯𑀺𑀦𑀲𑁆𑀲𑀢𑀺 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀳𑀺 𑀧𑀯𑀢𑁆𑀢𑀦𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀯𑀼𑀢𑁆𑀢𑀦𑀬𑁂𑀦 ‘‘𑀯𑀺𑀪𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀽𑀢𑀺 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀯𑀤𑀺𑀁𑀲𑀼. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦 𑀳𑀺 𑀇𑀥𑁂𑀓𑀘𑁆𑀘𑁂 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁯𑁧).

𑀅𑀦𑀺𑀲𑁆𑀲𑀝𑀸𑀢𑀺 𑀅𑀦𑀺𑀓𑁆𑀔𑀦𑁆𑀢𑀸. 𑀢𑀢𑁆𑀣 𑀓𑀸𑀭𑀡𑀫𑀸𑀳 𑁋 ‘‘𑀉𑀧𑀥𑀺𑀜𑁆𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀲𑀫𑁆𑀪𑁄𑀢𑀻’’𑀢𑀺. 𑀢𑀢𑁆𑀣 𑀉𑀧𑀥𑀺𑀦𑁆𑀢𑀺 𑀔𑀦𑁆𑀥𑀸𑀤𑀺𑀉𑀧𑀥𑀺𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀢𑁆𑀣 𑀇𑀫𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀦𑀺𑀩𑁆𑀩𑀸𑀦𑀲𑀜𑁆𑀜𑀺𑀦𑁄, 𑀢𑀢𑁆𑀣 𑀔𑀦𑁆𑀥𑀽𑀧𑀥𑀺𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀬𑁄 𑀅𑀥𑀺𑀕𑀢𑀸 𑀜𑀸𑀢𑀸. 𑀓𑀼𑀢𑁄 𑀢𑀲𑁆𑀲 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑀸𑀢𑀺. 𑀬𑀁 𑀧𑀦 𑀧𑀭𑀫𑀢𑁆𑀣𑀢𑁄 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄’’𑀢𑀺 𑀯𑀼𑀢𑁆𑀢𑀁.

𑀮𑁄𑀓𑀫𑀺𑀫𑀁 𑀧𑀲𑁆𑀲𑀸𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀮𑀧𑀢𑀺. 𑀧𑀼𑀣𑀽𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁. 𑀅𑀯𑀺𑀚𑁆𑀚𑀸𑀬 𑀧𑀭𑁂𑀢𑀦𑁆𑀢𑀺 ¶ 𑀫𑁄𑀳𑁂𑀦 𑀅𑀪𑀺𑀪𑀽𑀢𑀁. 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀪𑀽𑀢𑀭𑀢𑀦𑁆𑀢𑀺 𑀇𑀢𑁆𑀣𑀻 𑀧𑀼𑀭𑀺𑀲𑁂, 𑀧𑀼𑀭𑀺𑀲𑁄 𑀇𑀢𑁆𑀣𑀺𑀬𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀲𑀢𑁆𑀢𑁂𑀲𑀼 𑀭𑀢𑀁, 𑀢𑀢𑁄 𑀏𑀯 𑀪𑀯𑀸 𑀅𑀧𑀭𑀺𑀫𑀼𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺 𑀪𑀯𑀸𑀢𑀺 𑀇𑀢𑁆𑀢𑀭𑀔𑀡𑀸 𑀯𑀸 𑀤𑀻𑀖𑀸𑀬𑀼𑀓𑀸 𑀯𑀸 𑀲𑀸𑀢𑀯𑀦𑁆𑀢𑁄 𑀯𑀸 𑀅𑀲𑀸𑀢𑀯𑀦𑁆𑀢𑁄 𑀯𑀸 𑀪𑀯𑀸. 𑀲𑀩𑁆𑀩𑀥𑀻𑀢𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀣𑀢𑀸𑀬𑀸𑀢𑀺 𑀲𑀩𑁆𑀩𑀪𑀸𑀯𑁂𑀦. 𑀲𑀩𑁆𑀩𑁂 𑀢𑁂 𑀪𑀯𑀸𑀢𑀺𑀆𑀤𑀻𑀲𑀼 ‘‘𑀲𑀩𑁆𑀩𑁂𑀧𑀺 𑀪𑀯𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀅𑀯𑀺𑀧𑀭𑀻𑀢𑀁 𑀧𑀲𑁆𑀲𑀢𑁄 𑀪𑀯𑀢𑀡𑁆𑀳𑀸𑀧𑀺 𑀧𑀳𑀻𑀬𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀯𑀺𑀪𑀯𑀁 𑀉𑀘𑁆𑀙𑁂𑀤𑀫𑁆𑀧𑀺 𑀦𑀸𑀪𑀺𑀦𑀦𑁆𑀤𑀢𑀺 𑀦 𑀧𑀢𑁆𑀣𑁂𑀢𑀺, 𑀢𑀲𑁆𑀲 𑀲𑀩𑁆𑀩 ¶ 𑀢𑀡𑁆𑀳𑀸𑀦𑀁 𑀅𑀦𑀯𑀲𑁂𑀲𑀢𑁄 𑀫𑀕𑁆𑀕𑁂𑀦 𑀦𑀺𑀭𑀼𑀚𑁆𑀛𑀦𑀢𑁄 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀼𑀢𑀺 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀧𑀸𑀤𑀸 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑀸𑀤𑀸𑀦𑀢𑁄 𑀅𑀕𑁆𑀕𑀳𑀡𑀢𑁄 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺. 𑀏𑀯𑀁𑀪𑀽𑀢𑁂𑀦 𑀘 𑀅𑀪𑀺𑀪𑀽𑀢𑁄 𑀧𑀜𑁆𑀘𑀯𑀺𑀥𑁄𑀧𑀺 𑀫𑀸𑀭𑁄 𑀯𑀺𑀚𑀺𑀢𑁄 𑀅𑀲𑁆𑀲 𑀅𑀦𑁂𑀦 𑀫𑀸𑀭𑁂𑀦 𑀲𑀗𑁆𑀕𑀸𑀫𑁄, 𑀲𑀩𑁆𑀩𑁂𑀧𑀺 𑀪𑀯𑁂 𑀲𑀫𑀢𑀺𑀓𑁆𑀓𑀦𑁆𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁄𑀢𑀺.

𑀅𑀦𑀼𑀲𑁄𑀢𑀕𑀸𑀫𑀻 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀧𑀝𑀺𑀲𑁄𑀢𑀕𑀸𑀫𑀻 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄. 𑀞𑀺𑀢𑀢𑁆𑀢𑁄 𑀲𑁂𑀓𑁆𑀔𑁄. 𑀇𑀢𑀭𑁄 𑀅𑀲𑁂𑀓𑁆𑀔𑁄.

𑁧𑁧𑁦. 𑀅𑀪𑀺𑀚𑀸𑀢𑀺𑀓𑁄𑀢𑀺 𑀚𑀸𑀢𑀺𑀬𑁄. 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺 𑀓𑀡𑁆𑀳𑁂 𑀦𑀻𑀘𑁂 𑀓𑀼𑀮𑁂 𑀚𑀸𑀢𑁄. 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀻𑀢𑀺 𑀓𑀸𑀴𑀓𑀁 𑀤𑀲𑀯𑀺𑀥𑀁 𑀤𑀼𑀲𑁆𑀲𑀻𑀮𑀥𑀫𑁆𑀫𑀁 𑀧𑀲𑀯𑀢𑀺 𑀓𑀭𑁄𑀢𑀺, 𑀲𑁄 𑀢𑀁 𑀅𑀪𑀺𑀚𑀸𑀬𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀼𑀓𑁆𑀓𑀁 𑀥𑀫𑁆𑀫𑀦𑁆𑀢𑀺 ‘‘𑀅𑀳𑀁 𑀧𑀼𑀩𑁆𑀩𑁂𑀧𑀺 𑀧𑀼𑀜𑁆𑀜𑀸𑀦𑀁 𑀅𑀓𑀢𑀢𑁆𑀢𑀸 𑀦𑀻𑀘𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀤𑀸𑀦𑀺 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀲𑀗𑁆𑀔𑀸𑀢𑀁 𑀲𑀼𑀓𑁆𑀓𑀁 𑀧𑀡𑁆𑀟𑀭𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀲𑁄 𑀢𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀘𑁂 𑀓𑀡𑁆𑀳𑀁 𑀪𑀯𑁂𑀬𑁆𑀬, 𑀓𑀡𑁆𑀳𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀲𑀼𑀓𑁆𑀓𑀁, 𑀲𑀼𑀓𑁆𑀓𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀧𑁆𑀧𑀤𑀸𑀦𑀢𑁄 𑀧𑀦 ‘‘𑀅𑀓𑀡𑁆𑀳𑀁 𑀅𑀲𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂𑀢𑁆𑀣 𑀅𑀭𑀳𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀦𑀸𑀫. 𑀢𑀁 𑀏𑀲 𑀅𑀪𑀺𑀚𑀸𑀬𑀢𑀺 𑀧𑀲𑀯𑀢𑀺 𑀓𑀭𑁄𑀢𑀺. 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄𑀢𑀺 𑀲𑀼𑀓𑁆𑀓𑁂 𑀉𑀘𑁆𑀘𑁂 𑀓𑀼𑀮𑁂 𑀚𑀸𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀓𑀫𑁆𑀫𑀘𑀢𑀼𑀓𑁆𑀓𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁂 𑀯𑀺𑀪𑀢𑁆𑀢𑁄 𑀏𑀯.

𑁧𑁧𑁧. 𑀫𑀸𑀦𑀼𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑀁, 𑀫𑀦𑀼𑀲𑁆𑀲𑀬𑁄𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑁂𑀢𑀺 𑀓𑀺𑀘𑁆𑀘𑀁 𑀅𑀓𑀺𑀘𑁆𑀘𑀫𑁂𑀯 𑀘𑀸𑀢𑀺 𑀤𑁆𑀯𑁂. 𑀓𑀺𑀘𑁆𑀘𑀸𑀦𑀺 𑀢𑁆𑀯𑁂𑀯 𑀓𑀢𑁆𑀢𑀩𑁆𑀩𑀸𑀦𑀺, 𑀦 𑀘𑀸𑀓𑀺𑀘𑁆𑀘𑀁 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀓𑀺𑀘𑁆𑀘𑀦𑁆𑀢𑀺𑀆𑀤𑀺 ‘‘𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀁.

𑀧𑀥𑀸𑀦𑀸𑀦𑀻𑀢𑀺 ¶ 𑀉𑀢𑁆𑀢𑀫𑀸𑀦𑀺 𑀯𑀺𑀲𑀺𑀝𑁆𑀞𑀸𑀦𑀺. 𑀧𑀼𑀭𑀺𑀫𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂𑀲𑀽𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀤𑀼𑀢𑀺𑀬𑁂 𑀅𑀥𑀺𑀓𑀭𑀡𑁂. 𑀢𑀢𑁆𑀣 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀭𑀳𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀫𑀺𑀲𑀧𑀭𑀺𑀘𑁆𑀘𑀸𑀕𑁄 𑀅𑀭𑀳𑀢𑁆𑀢𑁂𑀦 𑀲𑀫𑀥𑀼𑀭𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺? 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀤𑀓𑁆𑀔𑀺𑀡𑀸𑀬 𑀫𑀳𑀧𑁆𑀨𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸𑀢𑀺 𑀉𑀘𑁆𑀙𑁂𑀤𑀸𑀤𑀺𑀯𑀢𑁆𑀣𑀼𑀦𑀸. 𑀅𑀚𑁆𑀛𑁄𑀲𑀺𑀢𑀸𑀢𑀺 𑀪𑀯𑀢𑀡𑁆𑀳𑀸𑀤𑀺𑀯𑀲𑁂𑀦 𑀅𑀚𑁆𑀛𑁄𑀲𑀺𑀢𑀸. 𑀤𑀼𑀢𑀺𑀬𑁂 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀢𑁆𑀣𑀼𑀆𑀤𑀺𑀦𑀸.

𑀇𑀫𑀺𑀦𑀸 ¶ 𑀅𑀲𑀼𑀪𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀅𑀲𑀼𑀪𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁆𑀢𑀸 𑀅𑀲𑀼𑀪𑁂𑀦 𑀅𑀲𑀺𑀯𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦. 𑀇𑀤𑀁 𑀩𑀸𑀮𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂 𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀺𑀢𑀸𑀬 𑀩𑀸𑀮𑁄 𑀅𑀬𑀁 𑀪𑀯𑀢𑀻𑀢𑀺 𑀉𑀧𑀮𑀓𑁆𑀔𑀡𑀁 𑀚𑀸𑀬𑀢𑀺. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀏𑀯𑀁 𑀧𑀯𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁.

𑀇𑀫𑀺𑀦𑀸 𑀲𑀼𑀪𑁂𑀦𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀦𑁆𑀢𑀺 𑀧𑀡𑁆𑀟𑀺𑀢𑀮𑀓𑁆𑀔𑀡𑀁. 𑀓𑀺𑀮𑁂𑀲𑀪𑀽𑀫𑀻𑀳𑀻𑀢𑀺 𑀓𑀺𑀮𑁂𑀲𑀝𑁆𑀞𑀸𑀦𑁂𑀳𑀺 𑀓𑀺𑀮𑁂𑀲𑀸𑀯𑀢𑁆𑀣𑀸𑀳𑀺 𑀯𑀸. 𑀲𑀸𑀦𑀼𑀲𑀬𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀁 𑀚𑀸𑀬𑀢𑀻𑀢𑀺 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀲𑁆𑀲 𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀭𑀸𑀕𑀸𑀤𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀧𑀭𑀺𑀬𑀼𑀝𑁆𑀞𑀺𑀢𑁄 𑀲𑀁𑀬𑀼𑀚𑁆𑀚𑀢𑀻𑀢𑀺 𑀬𑁄 𑀭𑀸𑀕𑀸𑀤𑀻𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄, 𑀲𑁄 𑀓𑀸𑀫𑀭𑀸𑀕𑀸𑀤𑀻𑀳𑀺 𑀲𑀁𑀬𑀼𑀚𑁆𑀚𑀢𑀺 𑀦𑀸𑀫. 𑀲𑀁𑀬𑀼𑀚𑁆𑀚𑀦𑁆𑀢𑁄 𑀉𑀧𑀸𑀤𑀺𑀬𑀢𑀻𑀢𑀺 𑀬𑁄 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀻𑀳𑀺 𑀲𑀁𑀬𑀼𑀢𑁆𑀢𑁄, 𑀲𑁄 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀘 𑀉𑀧𑀸𑀤𑀺𑀬𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁧𑁧𑁨. 𑀏𑀯𑀁 𑀲𑁄𑀴𑀲𑀯𑀺𑀥𑁂𑀦 𑀲𑀸𑀲𑀦𑀧𑀝𑁆𑀞𑀸𑀦𑀁 𑀦𑀸𑀦𑀸𑀲𑀼𑀢𑁆𑀢𑁂𑀳𑀺 𑀉𑀤𑀸𑀳𑀭𑀡𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂𑀦 𑀲𑀸𑀲𑀦𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀬𑀲𑁆𑀫𑀸 𑀅𑀬𑀫𑁆𑀧𑀺 𑀧𑀝𑁆𑀞𑀸𑀦𑀯𑀺𑀪𑀸𑀕𑁄 𑀫𑀽𑀮𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑁄, 𑀦 𑀇𑀫𑀲𑁆𑀲𑀸𑀧𑀺 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑁄 𑀧𑀤𑁂𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀫𑀽𑀮𑀧𑀤𑀁 𑀯𑀺𑀪𑀚𑀺𑀢𑀩𑁆𑀩𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁂 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸’’𑀢𑀺 𑀧𑀼𑀘𑁆𑀙𑀸𑀬 𑀯𑀲𑁂𑀦 𑀫𑀽𑀮𑀧𑀤𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀦𑀯𑀢𑀺𑀓𑀸, 𑀣𑀯𑁄 𑀘𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀲𑀸𑀲𑀦𑀧𑀝𑁆𑀞𑀸𑀦𑀁 𑀉𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀮𑁄𑀓𑀺𑀬𑀦𑁆𑀢𑀺 𑀮𑁄𑀓𑁂 𑀦𑀺𑀬𑀼𑀢𑁆𑀢𑁄, 𑀮𑁄𑀓𑁂 𑀯𑀸 𑀯𑀺𑀤𑀺𑀢𑁄 𑀮𑁄𑀓𑀺𑀬𑁄. 𑀇𑀥 𑀧𑀦 𑀮𑁄𑀓𑀺𑀬𑁄 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄, 𑀢𑀁 𑀲𑀼𑀢𑁆𑀢𑀁 𑀮𑁄𑀓𑀺𑀬𑀁. 𑀢𑀣𑀸 𑀮𑁄𑀓𑀼𑀢𑁆𑀢𑀭𑀁. 𑀬𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀧𑀤𑁂𑀲𑁂𑀦 𑀮𑁄𑀓𑀺𑀬𑁄, 𑀧𑀤𑁂𑀲𑁂𑀦 𑀮𑁄𑀓𑀼𑀢𑁆𑀢𑀭𑁄 𑀯𑀼𑀢𑁆𑀢𑁄, 𑀢𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀬𑀜𑁆𑀘 𑀲𑀢𑁆𑀢𑁂 𑀅𑀥𑀺𑀝𑁆𑀞𑀸𑀬 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦 𑀤𑁂𑀲𑀺𑀢𑀁, 𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁. 𑀥𑀫𑁆𑀫𑀯𑀲𑁂𑀦𑁂𑀯 𑀤𑁂𑀲𑀺𑀢𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀉𑀪𑀬𑀯𑀲𑁂𑀦 𑀤𑁂𑀲𑀺𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀼𑀤𑁆𑀥𑀸𑀤𑀻𑀦𑀁 𑀧𑀦 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑀁 𑀲𑀼𑀢𑁆𑀢𑀁 𑀣𑀯𑁄 𑀦𑀸𑀫.

𑀢𑀢𑁆𑀣 ¶ 𑀲𑀚𑁆𑀚𑀼𑀔𑀻𑀭𑀦𑁆𑀢𑀺 𑀢𑀗𑁆𑀔𑀡𑀁𑀬𑁂𑀯 𑀥𑁂𑀦𑀼𑀬𑀸 𑀣𑀦𑁂𑀳𑀺 𑀦𑀺𑀓𑁆𑀔𑀦𑁆𑀢𑀁 𑀅𑀩𑁆𑀪𑀼𑀡𑁆𑀳𑀔𑀻𑀭𑀁. 𑀫𑀼𑀘𑁆𑀘𑀢𑀻𑀢𑀺 𑀧𑀭𑀺𑀡𑀫𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀥𑁂𑀦𑀼𑀬𑀸 𑀣𑀦𑀢𑁄 𑀦𑀺𑀓𑁆𑀔𑀦𑁆𑀢𑀁 𑀔𑀻𑀭𑀁 ¶ 𑀢𑀗𑁆𑀔𑀡𑀁𑀬𑁂𑀯 𑀦 𑀫𑀼𑀘𑁆𑀘𑀢𑀺 𑀦 𑀧𑀭𑀺𑀡𑀫𑀢𑀺 𑀦 𑀤𑀥𑀺𑀪𑀸𑀯𑀁 𑀕𑀘𑁆𑀙𑀢𑀺, 𑀢𑀓𑁆𑀓𑀸𑀤𑀺𑀅𑀫𑁆𑀩𑀺𑀮𑀲𑀫𑀸𑀬𑁄𑀕𑀢𑁄 𑀧𑀦 𑀧𑀭𑀢𑁄 𑀓𑀸𑀮𑀦𑁆𑀢𑀭𑁂𑀦 𑀧𑀓𑀢𑀺𑀁 𑀚𑀳𑀢𑀺 𑀤𑀥𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀫𑁂𑀯𑀁 𑀧𑀸𑀧𑀓𑀫𑁆𑀫𑀫𑁆𑀧𑀺 𑀓𑀺𑀭𑀺𑀬𑀓𑁆𑀔𑀡𑁂𑀬𑁂𑀯 𑀦 𑀯𑀺𑀧𑀘𑁆𑀘𑀢𑀺. 𑀬𑀤𑀺 𑀯𑀺𑀧𑀘𑁆𑀘𑁂𑀬𑁆𑀬, 𑀦𑀸𑀦𑀸𑀕𑀢𑀻𑀦𑀁 𑀲𑀪𑀸𑀯𑀝𑁆𑀞𑀸𑀦𑀁 𑀲𑀺𑀬𑀸, 𑀦 𑀓𑁄𑀘𑀺 𑀧𑀸𑀧𑀓𑀫𑁆𑀫𑀁 𑀓𑀸𑀢𑀼𑀁 𑀯𑀺𑀲𑀳𑁂𑀬𑁆𑀬. 𑀬𑀸𑀯 𑀧𑀦 𑀓𑀼𑀲𑀮𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸 𑀘𑀭𑀦𑁆𑀢𑀺, 𑀢𑀸𑀯 𑀢𑀁 𑀢𑁂 𑀭𑀓𑁆𑀔𑀦𑁆𑀢𑀺, 𑀢𑁂𑀲𑀁 𑀪𑁂𑀤𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑀦𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀯𑀺𑀧𑀘𑁆𑀘𑀫𑀸𑀦𑀜𑁆𑀘 𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀓𑀺𑀁 𑀯𑀺𑀬? 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 𑀧𑀸𑀯𑀓𑁄. 𑀬𑀣𑀸 𑀳𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑁄 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁄 𑀅𑀓𑁆𑀓𑀦𑁆𑀢𑁄𑀧𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀢𑀸𑀯 𑀟𑀳𑀢𑀺, 𑀙𑀸𑀭𑀺𑀓𑀁 𑀧𑀦 𑀢𑀸𑀧𑁂𑀢𑁆𑀯𑀸 𑀘𑀫𑁆𑀫𑀸𑀤𑀻𑀦𑀺 𑀟𑀳𑀦𑀯𑀲𑁂𑀦 𑀬𑀸𑀯 𑀫𑀢𑁆𑀣𑀮𑀼𑀗𑁆𑀕𑀸 𑀟𑀳𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀧𑀸𑀧𑀓𑀫𑁆𑀫𑀫𑁆𑀧𑀺 𑀬𑁂𑀦 𑀓𑀢𑀁, 𑀢𑀁 𑀩𑀸𑀮𑀁 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀁 𑀟𑀳𑀦𑁆𑀢𑀁 𑀅𑀦𑀼𑀕𑀘𑁆𑀙𑀢𑀻𑀢𑀺.

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸 𑀅𑀲𑁆𑀲𑀸 𑀯𑀺𑀬 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀁 𑀤𑀦𑁆𑀢𑀪𑀸𑀯𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀕𑀢𑀸𑀦𑀺, 𑀢𑀲𑁆𑀲 𑀦𑀯𑀯𑀺𑀥𑀁 𑀫𑀸𑀦𑀁 𑀧𑀳𑀸𑀬 𑀞𑀺𑀢𑀢𑁆𑀢𑀸 𑀧𑀳𑀻𑀦𑀫𑀸𑀦𑀲𑁆𑀲 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀲𑁆𑀲 𑀢𑀸𑀤𑀺𑀪𑀸𑀯𑁂 𑀞𑀺𑀢𑀲𑁆𑀲 𑀢𑀣𑀸𑀭𑀽𑀧𑀲𑁆𑀲 𑀤𑁂𑀯𑀸𑀧𑀺 𑀧𑀺𑀳𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀤𑀲𑁆𑀲𑀦𑀜𑁆𑀘 𑀆𑀕𑀫𑀦𑀜𑁆𑀘 𑀧𑀢𑁆𑀣𑁂𑀦𑁆𑀢𑀺𑀬𑁂𑀯𑀸𑀢𑀺. 𑀆𑀳𑀸𑀭𑁂 𑀲𑀢𑀻𑀢𑀺 𑀆𑀳𑀸𑀭𑀧𑀝𑀺𑀩𑀤𑁆𑀥𑁂 𑀙𑀦𑁆𑀤𑀭𑀸𑀕𑁂 𑀅𑀧𑁆𑀧𑀳𑀻𑀦𑁂 𑀲𑀢𑀺.

𑁧𑁧𑁩. 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸𑀢𑀺 𑀧𑀭𑀺𑀢𑁄 𑀤𑀲𑀧𑀺 𑀤𑀺𑀲𑀸 𑀘𑀺𑀢𑁆𑀢𑁂𑀦 𑀅𑀦𑀼𑀕𑀦𑁆𑀢𑁆𑀯𑀸. 𑀦𑁂𑀯𑀚𑁆𑀛𑀕𑀸𑀢𑀺 𑀦𑁂𑀯 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀧𑀺𑀬𑀢𑀭𑀦𑁆𑀢𑀺 𑀅𑀢𑀺𑀲𑀬𑁂𑀦 𑀧𑀺𑀬𑀁. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀢𑁄. 𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀦𑁆𑀢𑀺 𑀏𑀯𑀁 𑀓𑀲𑁆𑀲𑀘𑀺𑀧𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸 𑀧𑀺𑀬𑁄. 𑀬𑀲𑁆𑀫𑀸 𑀘 𑀏𑀢𑀤𑁂𑀯, 𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀁 𑀅𑀢𑁆𑀢𑀓𑀸𑀫𑁄 𑀅𑀢𑁆𑀢𑀦𑁄 𑀲𑀼𑀔𑀓𑀸𑀫𑁄𑀢𑀺.

𑀪𑀽𑀢𑀸𑀢𑀺 𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺. 𑀪𑀽𑀢𑀸𑀢𑀺 𑀯𑀸 𑀔𑀻𑀡𑀸𑀲𑀯𑀸. 𑀢𑁂 𑀳𑀺 𑀧𑀳𑀻𑀦𑀪𑀯𑀢𑁆𑀢𑀸 𑀪𑀽𑀢𑀸 𑀏𑀯. 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀮𑁄𑀓𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀔𑀻𑀡𑀸𑀲𑀯𑀸 𑀧𑀦 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁.

𑀧𑀺𑀬𑁄 ¶ 𑀘 𑀳𑁄𑀢𑀻𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀸𑀬 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸, 𑀲𑀼𑀧𑀭𑀺𑀲𑀼𑀤𑁆𑀥𑀸𑀬 𑀘 𑀤𑀺𑀝𑁆𑀞𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀺𑀬𑁄 𑀧𑀺𑀬𑀸𑀬𑀺𑀢𑀩𑁆𑀩𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀻𑀮𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁 ¶ , 𑀥𑀫𑁆𑀫𑀝𑁆𑀞𑀁 𑀲𑀘𑁆𑀘𑀯𑀸𑀤𑀺𑀦𑀁;

𑀅𑀢𑁆𑀢𑀦𑁄 𑀓𑀫𑁆𑀫𑀓𑀼𑀩𑁆𑀩𑀸𑀦𑀁, 𑀢𑀁 𑀚𑀦𑁄 𑀓𑀼𑀭𑀼𑀢𑁂 𑀧𑀺𑀬’’𑀦𑁆𑀢𑀺. (𑀥. 𑀧. 𑁨𑁧𑁭);

𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀸𑀢𑀩𑁆𑀩𑀢𑀸𑀬 𑀕𑀭𑀼. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 𑀲𑀫𑁆𑀪𑀸𑀯𑁂𑀢𑀩𑁆𑀩𑀢𑀸𑀬 𑀪𑀸𑀯𑀦𑀻𑀬𑁄. 𑀲𑀻𑀮𑀕𑀼𑀡𑁂𑀦 𑀯𑀸 𑀧𑀺𑀬𑀕𑀭𑀼𑀆𑀤𑀺𑀪𑀸𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 (𑀫. 𑀦𑀺. 𑁧.𑁬𑁫).

𑀯𑀢𑁆𑀢𑀸𑀢𑀺 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀧𑀜𑁆𑀘𑀥𑀫𑁆𑀫𑁂 𑀅𑀢𑁆𑀢𑀦𑀺 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀮𑁆𑀮𑀼𑀫𑁆𑀧𑀦𑀪𑀸𑀯𑁂 𑀞𑀢𑁆𑀯𑀸 𑀯𑀢𑁆𑀢𑀸. 𑀯𑀘𑀦𑀓𑁆𑀔𑀫𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀬𑁂𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄 𑀲𑀼𑀩𑁆𑀩𑀘𑁄 𑀳𑀼𑀢𑁆𑀯𑀸 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀬 𑀢𑁂𑀲𑀁 𑀯𑀘𑀦𑀁 𑀔𑀫𑀢𑀻𑀢𑀺 𑀯𑀘𑀦𑀓𑁆𑀔𑀫𑁄. 𑀯𑀢𑁆𑀢𑀸𑀢𑀺 𑀯𑀸 𑀥𑀫𑁆𑀫𑀓𑀣𑀸𑀯𑀲𑁂𑀦 𑀯𑀘𑀦𑀲𑀻𑀮𑁄. 𑀯𑀘𑀦𑀓𑁆𑀔𑀫𑁄𑀢𑀺 𑀥𑀫𑁆𑀫𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀧𑀭𑁂𑀳𑀺 𑀅𑀲𑀁𑀳𑀻𑀭𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀧𑀼𑀘𑁆𑀙𑀸𑀯𑀘𑀦𑀓𑁆𑀔𑀫𑀢𑀸𑀬 𑀯𑀘𑀦𑀓𑁆𑀔𑀫𑁄. 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸𑀢𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀁, 𑀅𑀜𑁆𑀜𑀁 𑀯𑀸 𑀕𑀫𑁆𑀪𑀻𑀭𑀓𑀣𑀁 𑀓𑀢𑁆𑀢𑀸. 𑀦 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄𑀢𑀺 𑀥𑀫𑁆𑀫𑀯𑀺𑀦𑀬𑀸𑀤𑀺𑀁 𑀅𑀥𑀫𑁆𑀫𑀸𑀯𑀺𑀦𑀬𑀸𑀤𑀺𑀯𑀲𑁂𑀦 𑀅𑀯𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀸𑀤𑀺𑀯𑀲𑁂𑀦𑁂𑀯 𑀤𑀻𑀧𑀦𑀢𑁄 𑀦 𑀘 𑀅𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄.

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲’’𑀦𑁆𑀢𑀺 (𑀲𑀁. 𑀦𑀺. 𑁧.𑁫𑁫-𑁫𑁭) 𑀯𑀘𑀦𑀢𑁄 𑀢𑀻𑀲𑀼 𑀪𑀯𑁂𑀲𑀼 𑀲𑀢𑁆𑀢𑀸𑀦𑀁 𑀚𑀦𑀦𑀢𑁄 𑀢𑀡𑁆𑀳𑀸 𑀫𑀸𑀢𑀸 𑀦𑀸𑀫. ‘‘𑀅𑀳𑀁 𑀅𑀲𑀼𑀓𑀲𑁆𑀲 𑀦𑀸𑀫 𑀭𑀜𑁆𑀜𑁄, 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀧𑀼𑀢𑁆𑀢𑁄’’𑀢𑀺 𑀧𑀺𑀢𑀭𑀁 𑀦𑀺𑀲𑁆𑀲𑀸𑀬 𑀅𑀲𑁆𑀫𑀺𑀫𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀅𑀲𑁆𑀫𑀺𑀫𑀸𑀦𑁄 𑀧𑀺𑀢𑀸 𑀦𑀸𑀫. 𑀮𑁄𑀓𑁄 𑀯𑀺𑀬 𑀭𑀸𑀚𑀸𑀦𑀁 𑀬𑀲𑁆𑀫𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀪𑀚𑀦𑁆𑀢𑀺, 𑀢𑀲𑁆𑀫𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀤𑁆𑀯𑁂 𑀔𑀢𑁆𑀢𑀺𑀬𑀸 𑀭𑀸𑀚𑀸𑀦𑁄 𑀦𑀸𑀫. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀺𑀢𑁆𑀣𑀢𑀝𑁆𑀞𑁂𑀦 𑀭𑀝𑁆𑀞𑀲𑀤𑀺𑀲𑀢𑁆𑀢𑀸 𑀭𑀝𑁆𑀞𑀁 𑀦𑀸𑀫. 𑀆𑀬𑀲𑀸𑀥𑀓𑁄 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀯𑀺𑀬 𑀢𑀁𑀦𑀺𑀲𑁆𑀲𑀺𑀢𑁄 𑀦𑀦𑁆𑀤𑀺𑀭𑀸𑀕𑁄 𑀅𑀦𑀼𑀘𑀭𑁄 𑀦𑀸𑀫.

𑀅𑀦𑀻𑀖𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑀻𑀡𑀸𑀲𑀯𑁄. 𑀏𑀢𑁂𑀦 𑀳𑀺 𑀢𑀡𑁆𑀳𑀸𑀤𑀬𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀲𑀺𑀦𑀸 𑀳𑀢𑀸 𑀩𑀸𑀳𑀺𑀢𑀸. 𑀬𑀸𑀢𑀻𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀤𑁆𑀤𑀼𑀓𑁆𑀔𑁄 𑀳𑀼𑀢𑁆𑀯𑀸 𑀬𑀸𑀢𑀻𑀢𑀺.

𑀓𑀸𑀬𑁂𑀢𑀺 ¶ 𑀓𑀭𑀚𑀓𑀸𑀬𑁂. 𑀘𑀺𑀢𑁆𑀢𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁. 𑀲𑀫𑁄𑀤𑀳𑀢𑀻𑀢𑀺 𑀧𑀓𑁆𑀔𑀺𑀧𑀢𑀺. 𑀬𑀤𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀓𑀸𑀬𑀕𑀢𑀺𑀓𑀁 ¶ 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑁂𑀧𑀺 𑀓𑀸𑀬𑀁 𑀲𑀫𑁄𑀤𑀳𑀢𑀻𑀢𑀺 𑀬𑀤𑀸 𑀲𑀻𑀖𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑁂 𑀓𑀸𑀬𑀁 𑀧𑀓𑁆𑀔𑀺𑀧𑀢𑀺, 𑀘𑀺𑀢𑁆𑀢𑀕𑀢𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸𑀢𑀺 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 (𑀫𑀳𑀸𑀯. 𑁮, 𑁧𑁩𑁭; 𑀤𑀻. 𑀦𑀺. 𑁨.𑁬𑁬; 𑀫. 𑀦𑀺. 𑁧.𑁨𑁮𑁨; 𑁨.𑁩𑁩𑁮; 𑀲𑀁. 𑀦𑀺. 𑁧.𑁧𑁭𑁨) 𑀇𑀤𑁆𑀥𑀺𑀫𑀸 𑀓𑀸𑀬𑁂 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀧𑀭𑁂𑀲𑀁 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀦𑀺 𑀧𑁂𑀓𑁆𑀔𑀫𑀸𑀦𑁄 𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀺.

𑁧𑁧𑁪. 𑀬𑀁 𑀢𑀁 𑀮𑁄𑀓𑀼𑀢𑁆𑀢𑀭𑀁 𑀜𑀸𑀡𑀦𑁆𑀢𑀺 𑀲𑀩𑁆𑀩𑀁 𑀮𑁄𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦 𑀮𑁄𑀓𑀼𑀢𑁆𑀢𑀭𑀪𑀽𑀫𑀺𑀓𑀢𑁆𑀢𑀸. 𑀲𑀩𑁆𑀩𑀓𑀸𑀮𑁂 𑀧𑀯𑀢𑁆𑀢𑀢𑀻𑀢𑀺 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀢𑀢𑀁 𑀲𑀫𑀺𑀢𑀁 𑀧𑀯𑀢𑁆𑀢𑀢𑀻𑀢𑀺. 𑀦 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀪𑀕𑀯𑀢𑁄 𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑀳𑁂𑀢𑀼𑀢𑀸𑀬 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂 𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑁂, 𑀇𑀫𑀲𑁆𑀫𑀺𑀁 𑀏𑀯 𑀯𑀸 𑀅𑀢𑁆𑀢𑀪𑀸𑀯𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀇𑀢𑀺𑀳𑀸𑀲𑀸𑀢𑀺 𑀏𑀯𑀁 𑀦 𑀇𑀢𑀺𑀓𑀺𑀭𑀸𑀬 𑀧𑀯𑀢𑁆𑀢𑀁, 𑀅𑀢𑁆𑀢𑀧𑀘𑁆𑀘𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭; 𑀣𑁂𑀭𑀕𑀸. 𑁬𑁭𑁬; 𑀦𑁂𑀢𑁆𑀢𑀺. 𑁫) 𑀦𑀬𑁂𑀦 𑀲𑀢𑁄 𑀳𑀼𑀢𑁆𑀯𑀸 𑀘𑀭𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂𑀦 𑀬𑀁 𑀲𑀦𑁆𑀢𑀺𑀁 𑀯𑀺𑀤𑀺𑀢𑁆𑀯𑀸. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀲𑀗𑁆𑀔𑀸𑀭𑀮𑁄𑀓𑁂 𑀯𑀺𑀲𑀧𑁆𑀧𑀦𑀢𑁄 𑀯𑀺𑀲𑀢𑁆𑀢𑀺𑀓𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀢𑀭𑁂 𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀦𑁆𑀢𑀺𑀚𑁄𑀢𑀓𑀁 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀅𑀳𑀁 𑀧𑀢𑁆𑀣𑀬𑀸𑀫𑀺, 𑀢𑀁 𑀏𑀯 𑀯𑀸 𑀲𑀦𑁆𑀢𑀺𑀁 𑀉𑀢𑁆𑀢𑀫𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺 𑀥𑁄𑀢𑀓𑁄 𑀯𑀤𑀢𑀺. 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀏𑀢𑁆𑀣 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁 𑀉𑀧𑀭𑀺 𑀘. 𑀅𑀥𑁄𑀢𑀺 𑀅𑀢𑀻𑀢𑀁 𑀳𑁂𑀝𑁆𑀞𑀸 𑀘. 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀭𑀺𑀢𑁄 𑀘. 𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀻𑀢𑀺 𑀏𑀢𑀁 𑀅𑀦𑀸𑀕𑀢𑀸𑀤𑀺𑀁 𑀲𑀗𑁆𑀕𑀚𑀦𑀦𑀝𑁆𑀞𑀸𑀦𑀦𑁆𑀢𑀺 𑀜𑀢𑁆𑀯𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀔𑀼𑀤𑁆𑀤𑀓𑀸𑀦𑀜𑁆𑀘𑁂𑀯 𑀫𑀳𑀦𑁆𑀢𑀸𑀦𑀜𑁆𑀘 𑀪𑀯𑀸𑀦𑀁 𑀅𑀢𑁆𑀣𑀸𑀬, 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀬 𑀯𑀸.

𑀅𑀭𑀺𑀬𑀲𑀘𑁆𑀘𑀸𑀦𑀦𑁆𑀢𑀺 ¶ 𑀅𑀭𑀺𑀬𑀪𑀸𑀯𑀓𑀭𑀸𑀦𑀁 𑀲𑀘𑁆𑀘𑀸𑀦𑀁. 𑀅𑀦𑀦𑀼𑀩𑁄𑀥𑀸𑀢𑀺 𑀅𑀩𑀼𑀚𑁆𑀛𑀦𑁂𑀦 𑀅𑀚𑀸𑀦𑀦𑁂𑀦. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 ¶ 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦. 𑀲𑀦𑁆𑀥𑀸𑀯𑀺𑀢𑀦𑁆𑀢𑀺 𑀪𑀯𑀢𑁄 𑀪𑀯𑀲𑁆𑀲 𑀕𑀫𑀦𑁂𑀦 𑀲𑀦𑁆𑀥𑀸𑀯𑀺𑀢𑀁. 𑀲𑀁𑀲𑀭𑀺𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀯𑀲𑁂𑀦 𑀲𑀁𑀲𑀭𑀺𑀢𑀁. 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸𑀢𑀺 𑀫𑀬𑀸 𑀘𑁂𑀯 𑀢𑀼𑀫𑁆𑀳𑁂𑀳𑀺 𑀘. 𑀅𑀣 𑀯𑀸 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀦𑁆𑀢𑀺 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀸𑀪𑀯𑀁 𑀦𑀬𑀦𑀲𑀫𑀢𑁆𑀣𑀸 𑀢𑀡𑁆𑀳𑀸𑀭𑀚𑁆𑀚𑀼. 𑀲𑀁𑀲𑀺𑀢𑀦𑁆𑀢𑀺 𑀲𑀁𑀲𑀭𑀺𑀢𑀁. 𑀲𑀫𑀽𑀳𑀢𑀸𑀢𑀺 𑀲𑀼𑀝𑁆𑀞𑀼 𑀳𑀢𑀸 𑀙𑀺𑀦𑁆𑀦𑀸 𑀅𑀧𑁆𑀧𑀯𑀢𑁆𑀢𑀺𑀓𑀢𑀸.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 ‘‘𑀲𑀗𑁆𑀔𑀸𑀭𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑁄 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀔𑀡𑀧𑀭𑀺𑀢𑁆𑀢𑀢𑁄 𑀘 𑀦 𑀦𑀺𑀘𑁆𑀘𑀸𑀢𑀺 𑀅𑀦𑀺𑀘𑁆𑀘𑀸. 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀬𑀤𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀅𑀣 𑀇𑀫𑀲𑁆𑀫𑀺𑀁 𑀯𑀝𑁆𑀝𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀬𑁆𑀯𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄, 𑀏𑀲 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀫𑀕𑁆𑀕𑁄. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀔𑀬𑀝𑁆𑀞𑁂𑀦 𑀘 𑀤𑀼𑀓𑁆𑀔𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑀸 𑀧𑀭𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀲𑀸𑀭𑀢𑁄 𑀅𑀯𑀲𑀯𑀢𑁆𑀢𑀦𑀢𑁄 𑀘 𑀅𑀦𑀢𑁆𑀢𑀸𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀲𑁂𑀬𑁆𑀬𑁄𑀢𑀺 𑀯𑀺𑀲𑀺𑀝𑁆𑀞𑁄 𑀉𑀢𑁆𑀢𑀫𑁄. 𑀲𑀤𑀺𑀲𑁄𑀢𑀺 𑀲𑀫𑀸𑀦𑁄. 𑀳𑀻𑀦𑁄𑀢𑀺 𑀮𑀸𑀫𑀓𑁄. 𑀑𑀫𑀸𑀦𑁄𑀧𑀺 𑀳𑀺 𑀅𑀢𑁆𑀢𑀦𑁄 𑀅𑀯𑀗𑁆𑀓𑀭𑀡𑀫𑀼𑀔𑁂𑀦𑀧𑀺 𑀲𑀁𑀧𑀕𑁆𑀕𑀡𑁆𑀳𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺. 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀅𑀤𑀲𑁆𑀲𑀦𑀸𑀢𑀺 𑀲𑀭𑀲𑀧𑀪𑀗𑁆𑀕𑀼𑀢𑀸𑀬 𑀏𑀓𑀦𑁆𑀢𑁂𑀦𑁂𑀯 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑁂𑀳𑀺 𑀭𑀽𑀧𑀥𑀫𑁆𑀫𑁂𑀳𑀺 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀉𑀓𑁆𑀔𑀺𑀧𑀦𑀲𑁆𑀲 𑀢𑁂𑀲𑀁 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀁 𑀅𑀜𑁆𑀜𑀸𑀡𑀁 𑀯𑀺𑀦𑀸 𑀓𑀺𑀁 𑀅𑀜𑁆𑀜𑀁 𑀓𑀸𑀭𑀡𑀁 𑀲𑀺𑀬𑀸, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁧𑁫. 𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀪𑀸𑀯𑀬𑀦𑁆𑀢𑀻𑀢𑀺 𑀤𑀼𑀓𑁆𑀔𑀸𑀤𑀻𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀜𑁆𑀜𑀸𑀑𑀪𑀸𑀲𑁂𑀦 𑀲𑀘𑁆𑀘𑀧𑁆𑀧𑀝𑀺𑀘𑁆𑀙𑀸𑀤𑀓𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑀸𑀲𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀦𑁆𑀢𑀺. 𑀕𑀫𑁆𑀪𑀻𑀭𑀧𑀜𑁆𑀜𑁂𑀦𑀸𑀢𑀺 𑀅𑀧𑁆𑀧𑀫𑁂𑀬𑁆𑀬𑀧𑀜𑁆𑀜𑀢𑀸𑀬 𑀲𑀤𑁂𑀯𑀓𑀲𑁆𑀲𑀧𑀺 𑀮𑁄𑀓𑀲𑁆𑀲 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀧𑀜𑁆𑀜𑁂𑀦 𑀲𑀩𑁆𑀩𑀜𑁆𑀜𑀼𑀦𑀸𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀲𑀼𑀤𑁂𑀲𑀺𑀢𑀸𑀦𑀻𑀢𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀦𑀬𑁂𑀳𑀺 𑀲𑀼𑀝𑁆𑀞𑀼 𑀤𑁂𑀲𑀺𑀢𑀸𑀦𑀺. 𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁 𑀧𑀫𑀢𑁆𑀢𑀸𑀢𑀺 𑀢𑁂 𑀯𑀺𑀪𑀸𑀯𑀺𑀢𑀅𑀭𑀺𑀬𑀲𑀘𑁆𑀘𑀸 𑀧𑀼𑀕𑁆𑀕𑀮𑀸 𑀓𑀸𑀫𑀁 𑀤𑁂𑀯𑀭𑀚𑁆𑀚𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀸𑀤𑀺𑀧𑀫𑀸𑀤𑀝𑁆𑀞𑀸𑀦𑀁 𑀆𑀕𑀫𑁆𑀫 𑀪𑀼𑀲𑀁 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀪𑀯𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 ¶ 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀢𑁂𑀲𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀦 𑀅𑀝𑁆𑀞𑀫𑀁 𑀪𑀯𑀁 𑀆𑀤𑀺𑀬𑀦𑁆𑀢𑀺, 𑀲𑀢𑁆𑀢𑀫𑀪𑀯𑁂𑀬𑁂𑀯 𑀧𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀬𑀣𑀺𑀦𑁆𑀤𑀔𑀻𑀮𑁄𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀉𑀧𑀫𑀸𑀯𑀘𑀦𑀁. 𑀇𑀦𑁆𑀤𑀔𑀻𑀮𑁄𑀢𑀺 𑀦𑀕𑀭𑀤𑁆𑀯𑀸𑀭𑀣𑀺𑀭𑀓𑀭𑀡𑀢𑁆𑀣𑀁 𑀉𑀫𑁆𑀫𑀸𑀭𑀩𑁆𑀪𑀦𑁆𑀢𑀭𑁂 𑀅𑀝𑁆𑀞 𑀯𑀸 𑀤𑀲 𑀯𑀸 𑀳𑀢𑁆𑀣𑁂 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀆𑀓𑁄𑀝𑀺𑀢𑀲𑁆𑀲 𑀲𑀸𑀭𑀤𑀸𑀭𑀼𑀫𑀬𑀲𑁆𑀲 𑀣𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀣𑀯𑀺𑀲𑁆𑀲𑀺𑀢𑁄 𑀲𑀺𑀬𑀸𑀢𑀺 𑀕𑀫𑁆𑀪𑀻𑀭𑀦𑁂𑀫𑀺𑀢𑀸𑀬 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀪𑀽𑀫𑀺𑀦𑀺𑀲𑁆𑀲𑀺𑀢𑁄 𑀲𑀺𑀬𑀸 𑀪𑀯𑁂𑀬𑁆𑀬. 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀻𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑀯𑀸𑀢𑁂𑀳𑀺. 𑀅𑀲𑀫𑁆𑀧𑀓𑀫𑁆𑀧𑀺𑀬𑁄𑀢𑀺 𑀓𑀫𑁆𑀧𑁂𑀢𑀼𑀁 𑀯𑀸 𑀘𑀸𑀮𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑀣𑀽𑀧𑀫𑀁…𑀧𑁂… 𑀧𑀲𑁆𑀲𑀢𑀻𑀢𑀺 𑀬𑁄 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀜𑁆𑀜𑀸𑀬 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀲𑁆𑀲𑀢𑀺, 𑀢𑀁 𑀲𑀧𑁆𑀧𑀼𑀭𑀺𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑀁 𑀢𑀣𑀸 𑀤𑀲𑁆𑀲𑀦𑀢𑁄 𑀲𑀩𑁆𑀩𑀢𑀺𑀢𑁆𑀣𑀺𑀬𑀯𑀸𑀤𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑀢𑀸𑀬 𑀢𑀣𑀽𑀧𑀫𑀁 𑀬𑀣𑀸𑀯𑀼𑀢𑁆𑀢𑀇𑀦𑁆𑀤𑀔𑀻𑀮𑀽𑀧𑀫𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀻𑀢𑀺 𑀅𑀭𑀺𑀬𑀲𑁄𑀢𑀸𑀧𑀚𑁆𑀚𑀦𑀲𑁆𑀲 𑀅𑀗𑁆𑀕𑀪𑀽𑀢𑁂𑀳𑀺. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀅𑀭𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑁄. 𑀔𑀻𑀡𑀦𑀺𑀭𑀬𑁄𑀫𑁆𑀳𑀻𑀢𑀺 𑀔𑀻𑀡𑀦𑀺𑀭𑀬𑁄 𑀅𑀫𑁆𑀳𑀺. 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄𑀢𑀺 𑀇𑀤𑀁 𑀦𑀺𑀭𑀬𑀸𑀤𑀻𑀦𑀁𑀬𑁂𑀯 𑀯𑁂𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀭𑀬𑀸𑀤𑀬𑁄 𑀳𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑀢𑁄 𑀅𑀬𑀢𑁄 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑀸. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺𑀬𑁄. 𑀤𑀼𑀓𑁆𑀓𑀝𑀓𑀸𑀭𑀺𑀦𑁄 𑀯𑀺𑀯𑀲𑀸 𑀏𑀢𑁆𑀣 𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑀸. 𑀲𑁄𑀢𑀁 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀫𑀕𑁆𑀕𑀨𑀮𑀸𑀦𑀁 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑀗𑁆𑀔𑀸𑀢𑁂 𑀯𑀺𑀭𑀽𑀧𑁂 𑀦 𑀦𑀺𑀧𑀢𑀦𑀲𑀪𑀸𑀯𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄. 𑀢𑀢𑁄 𑀏𑀯 𑀥𑀫𑁆𑀫𑀦𑀺𑀬𑀸𑀫𑁂𑀦 𑀦𑀺𑀬𑀢𑀢𑀸𑀬 𑀦𑀺𑀬𑀢𑁄. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀸 𑀲𑀫𑁆𑀩𑁄𑀥𑀺 𑀅𑀯𑀲𑁆𑀲𑀁 𑀧𑀢𑁆𑀢𑀩𑁆𑀩𑀢𑀸𑀬 𑀅𑀲𑁆𑀲 𑀧𑀭𑀁 𑀅𑀬𑀦𑀁 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑀦𑀺𑀯𑀺𑀝𑁆𑀞𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀲𑀳𑀥𑀫𑁆𑀫𑀺𑀬𑀸𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺. 𑀧𑀜𑁆𑀘 𑀲𑀻𑀮𑀸𑀦𑀺 ¶ 𑀳𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀭𑁂𑀧𑀺 𑀅𑀯𑀺𑀚𑀳𑀦𑀢𑁄. 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀩𑁆𑀩𑁄𑀧𑀺 𑀧𑀦𑁂𑀢𑁆𑀣 𑀲𑀁𑀯𑀭𑁄 𑀮𑀩𑁆𑀪𑀢𑀺𑀬𑁂𑀯. 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀻𑀢𑀺 𑀇𑀤𑀁 𑀤𑁂𑀲𑀦𑀸𑀲𑀻𑀲𑀫𑁂𑀯. 𑀲𑀓𑀤𑀸𑀕𑀸𑀫𑀺𑀆𑀤𑀬𑁄𑀧𑀺 ‘‘𑀲𑀓𑀤𑀸𑀕𑀸𑀫𑀻𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀭𑁄𑀦𑁆𑀢𑀺𑀬𑁂𑀯. 𑀬𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀸𑀯𑀺𑀭𑁄𑀥𑁂𑀦 𑀬𑀼𑀢𑁆𑀢𑀝𑁆𑀞𑀸𑀦𑁂 𑀩𑁆𑀬𑀸𑀓𑀭𑀡𑀁 𑀅𑀦𑀼𑀜𑁆𑀜𑀸𑀢𑀫𑁂𑀯𑀸𑀢𑀺.

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀼𑀪𑀸𑀯𑀺𑀢𑀸𑀦𑀻𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼 𑀪𑀸𑀯𑀺𑀢𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀜𑁆𑀘 ¶ 𑀲𑀁𑀬𑁄𑀚𑀦𑀸𑀦𑀁 𑀧𑀚𑀳𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀲𑀩𑁆𑀩𑀮𑁄𑀓𑁂’’𑀢𑀺. 𑀦𑀺𑀩𑁆𑀩𑀺𑀚𑁆𑀛𑀸𑀢𑀺 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸.

𑀥𑀫𑁆𑀫𑀧𑀤𑀸𑀦𑀻𑀢𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑀸𑀦𑀺. 𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤𑀁 𑀦𑀸𑀫 𑀅𑀮𑁄𑀪𑁄 𑀯𑀸 𑀅𑀮𑁄𑀪𑀲𑀻𑀲𑁂𑀦 𑀅𑀥𑀺𑀕𑀢𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀯𑀸 𑀤𑀲𑀅𑀲𑀼𑀪𑀯𑀲𑁂𑀦 𑀯𑀸 𑀅𑀥𑀺𑀕𑀢𑀛𑀸𑀦𑀸𑀤𑀻𑀦𑀺 𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤𑀁. 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀅𑀥𑀺𑀕𑀢𑀸𑀦𑀺 𑀅𑀩𑁆𑀬𑀸𑀧𑀸𑀤𑁄 𑀥𑀫𑁆𑀫𑀧𑀤𑀁. 𑀤𑀲𑀸𑀦𑀼𑀲𑁆𑀲𑀢𑀺𑀆𑀳𑀸𑀭𑁂𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀯𑀲𑁂𑀦 𑀅𑀥𑀺𑀕𑀢𑀸𑀦𑀺 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑀧𑀤𑀁. 𑀤𑀲𑀓𑀲𑀺𑀡𑀆𑀦𑀸𑀧𑀸𑀦𑀯𑀲𑁂𑀦 𑀅𑀥𑀺𑀕𑀢𑀸𑀦𑀺 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑀧𑀤𑀁.

𑀧𑀜𑁆𑀘 𑀙𑀺𑀦𑁆𑀤𑁂𑀢𑀺 𑀳𑁂𑀝𑁆𑀞𑀸 𑀅𑀧𑀸𑀬𑀼𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀧𑀜𑁆𑀘 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀸𑀤𑁂 𑀩𑀤𑁆𑀥𑀭𑀚𑁆𑀚𑀼𑀁 𑀯𑀺𑀬 𑀧𑀼𑀭𑀺𑀲𑁄 𑀲𑀢𑁆𑀣𑁂𑀦 𑀳𑁂𑀝𑁆𑀞𑀸 𑀫𑀕𑁆𑀕𑀢𑁆𑀢𑀬𑁂𑀦 𑀙𑀺𑀦𑁆𑀤𑁂𑀬𑁆𑀬. 𑀧𑀜𑁆𑀘 𑀚𑀳𑁂𑀢𑀺 𑀉𑀧𑀭𑀺𑀤𑁂𑀯𑀮𑁄𑀓𑀲𑀫𑁆𑀧𑀸𑀧𑀓𑀸𑀦𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀼𑀭𑀺𑀲𑁄 𑀕𑀻𑀯𑀸𑀬 𑀩𑀤𑁆𑀥𑀭𑀚𑁆𑀚𑀼𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀚𑀳𑁂𑀬𑁆𑀬 𑀙𑀺𑀦𑁆𑀤𑁂𑀬𑁆𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀢𑁆𑀣𑀸𑀬 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀉𑀢𑁆𑀢𑀭𑀺 𑀪𑀸𑀯𑁂𑀬𑁆𑀬. 𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄𑀢𑀺 𑀏𑀯𑀁 𑀲𑀦𑁆𑀢𑁂 𑀧𑀜𑁆𑀘𑀦𑁆𑀦𑀁 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀕𑀸𑀦𑀁 𑀅𑀢𑀺𑀓𑁆𑀓𑀫𑀦𑁂𑀦 𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼 ‘‘𑀑𑀖𑀢𑀺𑀡𑁆𑀡𑁄’’𑀢𑀺 𑀯𑀼𑀘𑁆𑀘𑀢𑀺, 𑀦𑀺𑀢𑁆𑀢𑀺𑀡𑁆𑀡𑀘𑀢𑀼𑀭𑁄𑀖𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀜𑁆𑀜𑀸𑀢𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁, 𑀅𑀫𑀢𑀧𑀤𑀁𑀬𑁂𑀯 𑀯𑀸 𑀜𑀲𑁆𑀲𑀸𑀫𑀺 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀧𑀞𑀫𑀫𑀕𑁆𑀕𑀝𑁆𑀞𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀧𑀞𑀫𑀫𑀕𑁆𑀕𑀜𑀸𑀡𑀜𑁆𑀳𑀺 𑀢𑀁𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀆𑀚𑀸𑀦𑀸𑀢𑀺 𑀧𑀞𑀫𑀫𑀕𑁆𑀕𑁂𑀦 𑀜𑀸𑀢𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄, 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀳𑁂𑀝𑁆𑀞𑀸 𑀢𑀻𑀲𑀼 𑀨𑀮𑁂𑀲𑀼, 𑀉𑀧𑀭𑀺 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀘 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑁆𑀲 𑀅𑀭𑀳𑀢𑁄 ¶ 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀅𑀕𑁆𑀕𑀨𑀮𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀪𑀺𑀲𑀫𑁂𑀢𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀲𑁆𑀲. 𑀅𑀪𑀺𑀲𑀫𑀬𑀸𑀬𑀸𑀢𑀺 𑀧𑀝𑀺𑀯𑁂𑀥𑀸𑀬.

𑁧𑁧𑁬. 𑀩𑀸𑀮𑀮𑀓𑁆𑀔𑀡𑀸𑀦𑀻𑀢𑀺 𑀩𑀸𑀮𑀲𑁆𑀲 𑀉𑀧𑀮𑀓𑁆𑀔𑀡𑀓𑀸𑀭𑀡𑀸𑀦𑀺. 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀻𑀢𑀺 ‘‘𑀩𑀸𑀮𑁄 𑀅𑀬’’𑀦𑁆𑀢𑀺 𑀕𑀳𑁂𑀢𑀼𑀁 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀭𑀡𑀸𑀦𑀺. 𑀩𑀸𑀮𑀸𑀧𑀤𑀸𑀦𑀸𑀦𑀻𑀢𑀺 𑀩𑀸𑀮𑀲𑁆𑀲 𑀧𑁄𑀭𑀸𑀡𑀸𑀦𑀺 𑀯𑀺𑀭𑀼𑀴𑁆𑀳𑀸𑀦𑀺 𑀓𑀫𑁆𑀫𑀸𑀦𑀺. ‘‘𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀤𑀼𑀘𑁆𑀘𑀺𑀦𑁆𑀢𑀺𑀢𑀁 𑀅𑀪𑀺𑀚𑁆𑀛𑀁 𑀩𑁆𑀬𑀸𑀧𑀸𑀤𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀜𑁆𑀘 𑀘𑀺𑀦𑁆𑀢𑁂𑀢𑀻𑀢𑀺 ¶ 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻. 𑀤𑀼𑀩𑁆𑀪𑀸𑀲𑀺𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀁 𑀪𑀸𑀲𑀢𑀻𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻. 𑀤𑀼𑀓𑁆𑀓𑀝𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀬𑁆𑀬𑁄𑀢𑀺 𑀉𑀧𑀭𑀽𑀧𑀭𑀺. 𑀧𑀓𑀼𑀚𑁆𑀛𑁂𑀬𑁆𑀬𑀼𑀦𑁆𑀢𑀺 𑀯𑀺𑀭𑀼𑀚𑁆𑀛𑁂𑀬𑁆𑀬𑀼𑀁. ‘‘𑀧𑀓𑀼𑀧𑁆𑀧𑁂𑀬𑁆𑀬𑀼’’𑀦𑁆𑀢𑀺𑀧𑀺 𑀧𑀸𑀞𑁄. 𑀪𑀼𑀲𑁂𑀦𑀸𑀢𑀺 𑀤𑀴𑁆𑀳𑁂𑀦. 𑀤𑀡𑁆𑀟𑁂𑀦𑀸𑀢𑀺 𑀤𑀡𑁆𑀟𑀤𑀸𑀦𑁂𑀦. 𑀥𑀻𑀭𑁄𑀢𑀺 𑀧𑀡𑁆𑀟𑀺𑀢𑁄 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑁄. 𑀦𑀺𑀲𑁂𑀥𑀬𑁂𑀢𑀺 𑀧𑀝𑀺𑀩𑀸𑀳𑁂𑀬𑁆𑀬. 𑀧𑀼𑀦 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀯𑀢𑁆𑀢𑀼𑀁 𑀯𑀸 𑀅𑀲𑀫𑀢𑁆𑀣𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀧𑀭𑀦𑁆𑀢𑀺 𑀧𑀘𑁆𑀘𑀢𑁆𑀣𑀺𑀓𑀁. 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻𑀢𑀺 𑀬𑁄 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺, 𑀢𑀲𑁆𑀲 𑀉𑀧𑀲𑀫𑀁𑀬𑁂𑀯𑀸𑀳𑀁 𑀩𑀸𑀮𑀲𑁆𑀲 𑀧𑀝𑀺𑀲𑁂𑀥𑀦𑀁 𑀫𑀜𑁆𑀜𑀸𑀫𑀻𑀢𑀺 𑀅𑀢𑁆𑀣𑁄.

𑀯𑀚𑁆𑀚𑀦𑁆𑀢𑀺 𑀤𑁄𑀲𑀁. 𑀬𑀤𑀸 𑀦𑀁 𑀫𑀜𑁆𑀜𑀢𑀻𑀢𑀺 𑀬𑀲𑁆𑀫𑀸 𑀦𑀁 𑀫𑀜𑁆𑀜𑀢𑀺. 𑀅𑀚𑁆𑀛𑀸𑀭𑀼𑀳𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀕𑁄𑀯 𑀪𑀺𑀬𑁆𑀬𑁄 𑀧𑀮𑀸𑀬𑀺𑀦𑀦𑁆𑀢𑀺 𑀬𑀣𑀸 𑀕𑁄𑀬𑀽𑀣𑁂 𑀢𑀸𑀯𑀤𑁂𑀯 𑀤𑁆𑀯𑁂 𑀕𑀸𑀯𑁄 𑀬𑀼𑀚𑁆𑀛𑀦𑁆𑀢𑁂 𑀕𑁄𑀕𑀡𑁄 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀺 𑀬𑀸𑀯 𑀦 𑀏𑀓𑁄 𑀧𑀮𑀸𑀬𑀢𑀺, 𑀬𑀤𑀸 𑀧𑀦 𑀧𑀮𑀸𑀬𑀢𑀺, 𑀅𑀣 𑀢𑀁 𑀧𑀮𑀸𑀬𑀻𑀦𑀁 𑀲𑀩𑁆𑀩𑁄 𑀕𑁄𑀕𑀡𑁄 𑀪𑀺𑀬𑁆𑀬𑁄 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀏𑀯𑀁 𑀤𑀼𑀫𑁆𑀫𑁂𑀥𑁄 𑀔𑀫𑀦𑁆𑀢𑀁 𑀪𑀺𑀬𑁆𑀬𑁄 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑀲𑀤𑀢𑁆𑀣𑀧𑀭𑀫𑀸𑀢𑀺 𑀲𑀓𑀢𑁆𑀣𑀧𑀭𑀫𑀸. 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀲𑀼 𑀲𑀓𑀢𑁆𑀣𑀧𑀭𑀫𑁂𑀲𑀼 𑀅𑀢𑁆𑀣𑁂𑀲𑀼 𑀔𑀦𑁆𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺. 𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀦𑁆𑀢𑀺 𑀬𑁄 𑀩𑀮𑀯𑀸 𑀢𑀺𑀢𑀺𑀓𑁆𑀔𑀢𑀺, 𑀢𑀲𑁆𑀲 𑀢𑀁 𑀔𑀦𑁆𑀢𑀺𑀁 𑀧𑀭𑀫𑀁 𑀆𑀳𑀼. 𑀩𑀸𑀮𑀩𑀮𑀁 𑀦𑀸𑀫 𑀅𑀜𑁆𑀜𑀸𑀡𑀩𑀮𑀁. 𑀢𑀁 𑀬𑀲𑁆𑀲 𑀩𑀮𑀁, 𑀅𑀩𑀮𑀫𑁂𑀯 𑀢𑀁, 𑀦 𑀢𑀁 𑀩𑀮𑀦𑁆𑀢𑀺 𑀆𑀳𑀼 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺. 𑀥𑀫𑁆𑀫𑀕𑀼𑀢𑁆𑀢𑀲𑁆𑀲𑀸𑀢𑀺 𑀥𑀫𑁆𑀫𑁂𑀦 𑀭𑀓𑁆𑀔𑀺𑀢𑀲𑁆𑀲 𑀥𑀫𑁆𑀫𑀁 𑀯𑀸 𑀭𑀓𑁆𑀔𑀦𑁆𑀢𑀲𑁆𑀲. 𑀧𑀝𑀺𑀯𑀢𑁆𑀢𑀸𑀢𑀺 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀯𑀢𑁆𑀢𑀸, 𑀧𑀝𑀺𑀧𑁆𑀧𑀭𑀺𑀢𑁆𑀯𑀸 𑀯𑀸 𑀬𑀁 𑀯𑀸 𑀢𑀁 𑀯𑀸 𑀯𑀤𑁂𑀬𑁆𑀬𑀸𑀲𑀺. 𑀥𑀫𑁆𑀫𑀝𑁆𑀞𑀁 𑀧𑀦 𑀘𑀸𑀮𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄𑀢𑀺 𑀢𑁂𑀦 𑀓𑁄𑀥𑁂𑀦 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀧𑀸𑀧𑀁 𑀳𑁄𑀢𑀺. 𑀓𑀢𑀭𑀲𑁆𑀲𑀸𑀢𑀺 ¶ ? 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺, 𑀢𑀲𑁆𑀲. 𑀢𑀢𑁆𑀣 𑀓𑀼𑀤𑁆𑀥𑀦𑁆𑀢𑀺 𑀲𑀫𑁆𑀧𑀤𑀸𑀦𑁂 𑀉𑀧𑀬𑁄𑀕𑀯𑀘𑀦𑀁, 𑀓𑀼𑀤𑁆𑀥𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀦𑁆𑀢𑀺 𑀏𑀓𑀯𑀘𑀦𑁂 𑀩𑀳𑀼𑀯𑀘𑀦𑀁, 𑀢𑀺𑀓𑀺𑀘𑁆𑀙𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀚𑀦𑀸 𑀫𑀜𑁆𑀜𑀦𑁆𑀢𑀻𑀢𑀺 𑀏𑀯𑀭𑀽𑀧𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀅𑀢𑁆𑀣𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁 𑀧𑀼𑀕𑁆𑀕𑀮𑀁 ‘‘𑀩𑀸𑀮𑁄 𑀅𑀬’’𑀦𑁆𑀢𑀺 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀏𑀯𑀁 𑀫𑀜𑁆𑀜𑀦𑁆𑀢𑀺. 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺 𑀬𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀓𑁄𑀯𑀺𑀤𑀸 𑀅𑀘𑁆𑀙𑁂𑀓𑀸, 𑀢𑁂 𑀏𑀯𑀁 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁧𑁭. 𑀧𑀢𑁆𑀢𑀦𑁆𑀢𑀺 𑀅𑀥𑀺𑀕𑀢𑀁 𑀏𑀢𑀭𑀳𑀺 𑀅𑀦𑀼𑀪𑀼𑀬𑁆𑀬𑀫𑀸𑀦𑀁 𑀓𑀸𑀫𑀽𑀧𑀓𑀭𑀡𑀁 𑀧𑀢𑁆𑀢𑀩𑁆𑀩𑀦𑁆𑀢𑀺 𑀢𑀤𑁂𑀯 𑀅𑀦𑀸𑀕𑀢𑁂 𑀅𑀥𑀺𑀕𑀦𑁆𑀢𑀩𑁆𑀩𑀁 𑀅𑀦𑀼𑀪𑀯𑀺𑀢𑀩𑁆𑀩𑀁, 𑀉𑀪𑀬𑀫𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀦𑁆𑀢𑀺 𑀢𑀤𑀼𑀪𑀬𑀫𑁆𑀧𑀺 𑀭𑀸𑀕𑀭𑀚𑀸𑀤𑀻𑀳𑀺 𑀅𑀯𑀓𑀺𑀡𑁆𑀡𑀁 ¶ . 𑀆𑀢𑀼𑀭𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀢𑀼𑀭𑀲𑁆𑀲. 𑀅𑀦𑀼𑀲𑀺𑀓𑁆𑀔𑀢𑁄𑀢𑀺 𑀓𑀺𑀮𑁂𑀲𑀩𑀳𑀼𑀮𑀧𑀼𑀕𑁆𑀕𑀮𑁂 𑀅𑀦𑀼𑀲𑀺𑀓𑁆𑀔𑀢𑁄. 𑀬𑁂 𑀘 𑀲𑀺𑀓𑁆𑀔𑀸𑀲𑀸𑀭𑀸𑀢𑀺 𑀬𑁂 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀯𑀢𑀸𑀤𑀺𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀁 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀸. 𑀢𑁂𑀦𑀸𑀳 𑁋 ‘‘𑀲𑀻𑀮𑀁 𑀯𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀢𑀢𑁆𑀣 𑀬𑀁 ‘‘𑀦 𑀓𑀭𑁄𑀫𑀻’’𑀢𑀺 𑀑𑀭𑀫𑀢𑀺, 𑀢𑀁 𑀲𑀻𑀮𑀁. 𑀬𑀁 𑀯𑁂𑀲𑀪𑁄𑀚𑀦𑀓𑀺𑀘𑁆𑀘𑀘𑀭𑀡𑀸𑀤𑀺, 𑀢𑀁 𑀯𑀢𑀁. 𑀚𑀻𑀯𑀺𑀢𑀦𑁆𑀢𑀺 𑀆𑀚𑀻𑀯𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀉𑀧𑀝𑁆𑀞𑀸𑀦𑀲𑀸𑀭𑀸𑀢𑀺 𑀏𑀢𑁂𑀲𑀁 𑀲𑀻𑀮𑀸𑀤𑀻𑀦𑀁 𑀅𑀦𑀼𑀝𑁆𑀞𑀸𑀦𑀲𑀸𑀭𑀸. 𑀏𑀢𑁂𑀳𑀺 𑀏𑀯 𑀲𑀁𑀲𑀸𑀭𑀲𑀼𑀤𑁆𑀥𑀻𑀢𑀺 𑀢𑀸𑀦𑀺 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄.

𑀇𑀘𑁆𑀘𑁂𑀢𑁂 𑀉𑀪𑁄 𑀅𑀦𑁆𑀢𑀸𑀢𑀺 𑀇𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀫𑀼𑀔𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄, 𑀓𑀸𑀫𑁂𑀲𑀼 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀸𑀫𑀼𑀔𑁂𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘𑀸𑀢𑀺 𑀏𑀢𑁂 𑀉𑀪𑁄 𑀅𑀦𑁆𑀢𑀸. 𑀢𑁂 𑀘 𑀔𑁄 𑀬𑀣𑀸𑀓𑁆𑀓𑀫𑀁 𑀆𑀬𑀢𑀺𑀁 𑀧𑀢𑁆𑀢𑀩𑁆𑀩𑁂, 𑀏𑀢𑀭𑀳𑀺 𑀧𑀢𑁆𑀢𑁂 𑀘 𑀭𑀸𑀕𑀭𑀚𑀸𑀤𑀺𑀑𑀓𑀺𑀡𑁆𑀡𑁂 𑀓𑀸𑀫𑀕𑀼𑀡𑁂 𑀅𑀮𑁆𑀮𑀻𑀦𑁂𑀳𑀺 𑀓𑀺𑀮𑁂𑀲𑀸𑀢𑀼𑀭𑀸𑀦𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀳𑀺, 𑀲𑀬𑀜𑁆𑀘 𑀓𑀺𑀮𑁂𑀲𑀸𑀢𑀼𑀭𑁂𑀳𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸, 𑀢𑀢𑁄 𑀏𑀯 𑀘 𑀢𑁂 𑀓𑀝𑀲𑀺𑀯𑀟𑁆𑀠𑀦𑀸 𑀅𑀧𑀭𑀸𑀧𑀭𑀁 𑀚𑀭𑀸𑀫𑀭𑀡𑁂𑀳𑀺 𑀲𑀺𑀯𑀣𑀺𑀓𑀸𑀬 𑀯𑀟𑁆𑀠𑀦𑀲𑀻𑀮𑀸 𑀏𑀓𑀦𑁆𑀢𑁂𑀦𑁂𑀯 𑀓𑀝𑀲𑀺𑀁 𑀯𑀟𑁆𑀠𑁂𑀦𑁆𑀢𑀺, 𑀲𑀬𑀁 𑀯𑀟𑁆𑀠𑀦𑁆𑀢𑀸 𑀧𑀭𑁂 𑀘 𑀅𑀦𑁆𑀢𑀤𑁆𑀯𑀬𑁂 𑀲𑀫𑀸𑀤𑀧𑁂𑀦𑁆𑀢𑀸 𑀯𑀟𑁆𑀠𑀸𑀧𑁂𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑀉𑀪𑁄 𑀅𑀦𑁆𑀢𑁂 𑀅𑀦𑀪𑀺𑀜𑁆𑀜𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀚𑀸𑀦𑀺𑀢𑁆𑀯𑀸. 𑀑𑀮𑀻𑀬𑀦𑁆𑀢𑀺 𑀏𑀓𑁂𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀑𑀮𑀻𑀬𑀦𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀯𑀮𑀻𑀬𑀦𑁆𑀢𑀺 𑀏𑀓𑀘𑁆𑀘𑁂. 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂𑀢𑀺 𑀏𑀓𑀘𑁆𑀘𑁂 𑁋 ‘‘𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀺.

𑀦 ¶ 𑀅𑀫𑀜𑁆𑀜𑀺𑀁𑀲𑀼 𑀢𑁂𑀲𑀜𑁆𑀘 𑀢𑀡𑁆𑀳𑀸𑀤𑀺𑀫𑀜𑁆𑀜𑀦𑀸𑀦𑀁 𑀧𑀳𑀻𑀦𑀢𑁆𑀢𑀸. 𑀢𑀢𑁄 𑀏𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀢𑀺𑀯𑀺𑀥𑀫𑁆𑀧𑀺 𑀯𑀝𑁆𑀝𑀁 𑀢𑁂𑀲𑀁 𑀧𑀜𑁆𑀜𑀸𑀧𑀦𑀸𑀬 𑀦𑀢𑁆𑀣𑀻𑀢𑀺.

𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. 𑀲𑀁𑀬𑀼𑀚𑁂𑀢𑀺 𑀲𑀁𑀬𑁄𑀚𑁂𑀬𑁆𑀬. 𑀫𑀸𑀦𑀼𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀇𑀤𑀦𑁆𑀢𑀺 𑀫𑀸𑀦𑀼𑀲𑀁, 𑀫𑀦𑀼𑀲𑁆𑀲𑀪𑀯𑀧𑀭𑀺𑀬𑀸𑀧𑀦𑁆𑀦𑀁. 𑀓𑀺𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀫𑀘𑁆𑀘𑀼𑀫𑀼𑀔𑀁 𑀧𑀯𑀺𑀲𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀓𑀺𑀁 𑀅𑀜𑁆𑀜𑀁 𑀲𑀓𑀁 𑀦𑀸𑀫 𑀅𑀜𑁆𑀜𑀢𑁆𑀭 𑀓𑀮𑁆𑀬𑀸𑀡𑀓𑀫𑁆𑀫𑀢𑁄. 𑀓𑀫𑁆𑀫𑀲𑁆𑀲𑀓𑀸 𑀳𑀺 𑀲𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀢𑀲𑁆𑀫𑀸 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀲𑀫𑁆𑀧𑀭𑀸𑀬𑀨𑀮𑀦𑀺𑀩𑁆𑀩𑀢𑁆𑀢𑀓𑀁.

𑁧𑁧𑁮. 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀥𑀫𑁆𑀫𑀸. 𑀏𑀯𑀁𑀕𑀳𑀺𑀢𑀸𑀢𑀺 𑀏𑀯𑀁 𑀲𑀫𑀸𑀤𑀺𑀦𑁆𑀦𑀸 ¶ 𑀉𑀧𑁆𑀧𑀸𑀤𑀺𑀢𑀸. 𑀇𑀤𑀁 𑀨𑀮𑀦𑁆𑀢𑀺 𑀇𑀤𑀁 𑀇𑀝𑁆𑀞𑀯𑀺𑀧𑀸𑀓𑀁 𑀅𑀦𑀺𑀝𑁆𑀞𑀯𑀺𑀧𑀸𑀓𑀜𑁆𑀘 𑀨𑀮𑀁. 𑀅𑀬𑀫𑀢𑁆𑀣𑁄𑀢𑀺 𑀅𑀬𑀁 𑀯𑀼𑀟𑁆𑀠𑀺, 𑀅𑀬𑀁 𑀳𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑁆𑀧𑀺 𑀏𑀯𑀁𑀚𑀸𑀢𑀺𑀬𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀁 𑀯𑀤𑀢𑀺.

𑀆𑀓𑀗𑁆𑀔𑀢𑁄 𑀦 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀢𑀢𑁆𑀣 𑀬𑁂𑀦 𑀳𑁂𑀢𑀼𑀦𑀸 𑀪𑀕𑀯𑀢𑁄 𑀬𑀸 𑀆𑀓𑀗𑁆𑀔𑀸, 𑀲𑀸 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄𑀢𑀺 𑀆𑀳 𑁋 ‘‘𑀓𑀺𑀦𑁆𑀢𑀁 𑀪𑀕𑀯𑀸 𑀆𑀓𑀗𑁆𑀔𑀢𑀻𑀢𑀺. 𑀇𑀤𑀁 𑀅𑀯𑀺𑀲𑀚𑁆𑀚𑀦𑀻𑀬’’𑀦𑁆𑀢𑀺.

𑀏𑀢𑁆𑀢𑀓𑁄𑀢𑀺 𑀏𑀢𑀧𑀭𑀺𑀫𑀸𑀡𑁄. 𑀲𑀻𑀮𑀓𑁆𑀔𑀦𑁆𑀥𑁂𑀢𑀺 𑀲𑀻𑀮𑀓𑁆𑀔𑀦𑁆𑀥𑀳𑁂𑀢𑀼. ‘‘𑀲𑀻𑀮𑀓𑁆𑀔𑀦𑁆𑀥𑁂𑀦𑀸’’𑀢𑀺𑀧𑀺 𑀧𑀸𑀞𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀭𑀺𑀬𑀸𑀬𑀦𑁆𑀢𑀺 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁂. 𑀧𑀪𑀸𑀯𑁂𑀢𑀺 𑀆𑀦𑀼𑀪𑀸𑀯𑁂. 𑀳𑀺𑀢𑁂𑀲𑀺𑀢𑀸𑀬𑀦𑁆𑀢𑀺 𑀫𑁂𑀢𑁆𑀢𑀸𑀬. 𑀇𑀤𑁆𑀥𑀺𑀬𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀬. 𑀏𑀢𑁆𑀢𑀓𑀸 𑀩𑀼𑀤𑁆𑀥𑀕𑀼𑀡𑀸, 𑀢𑁂 𑀘 𑀧𑀘𑁆𑀘𑁂𑀓𑀁 𑀏𑀯𑀁𑀧𑀪𑀸𑀯𑀸. 𑀢𑀣𑀸 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀏𑀯𑀫𑀸𑀦𑀼𑀪𑀸𑀯𑀸𑀦𑀺. 𑀅𑀭𑀺𑀬𑀲𑀗𑁆𑀖𑁄 𑀏𑀯𑀁𑀯𑀺𑀥𑀕𑀼𑀡𑁂𑀳𑀺 𑀬𑀼𑀢𑁆𑀢𑁄𑀢𑀺.

𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸 𑀦 𑀲𑀩𑁆𑀩𑀣𑀸 𑀅𑀜𑁆𑀜𑁂𑀲𑀁 𑀯𑀺𑀲𑀬𑁄, 𑀪𑀕𑀯𑀢𑁄 𑀏𑀯 𑀯𑀺𑀲𑀬𑁄𑀢𑀺 𑀆𑀳 𑁋 ‘‘𑀩𑀼𑀤𑁆𑀥𑀯𑀺𑀲𑀬𑁄 𑀅𑀯𑀺𑀲𑀚𑁆𑀚𑀦𑀻𑀬𑁄’’𑀢𑀺. 𑀢𑁂𑀦 𑀬𑁄 𑀅𑀜𑁆𑀜𑁄𑀧𑀺 𑀅𑀢𑁆𑀣𑁄 𑀩𑀼𑀤𑁆𑀥𑀯𑀺𑀲𑀬𑁄, 𑀲𑁄 𑀅𑀯𑀺𑀲𑀚𑁆𑀚𑀦𑀻𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀓𑀢𑀫𑀸 𑀧𑀼𑀩𑁆𑀩𑀸 𑀓𑁄𑀝𑀻𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀦𑁆𑀢𑀺 ‘‘𑀓𑀢𑀫𑀸 𑀧𑀼𑀩𑁆𑀩𑀸 𑀓𑁄𑀝𑀻’’𑀢𑀺 𑀓𑁂𑀦𑀘𑀺 𑀓𑀢𑀁 𑀧𑀼𑀘𑁆𑀙𑀦𑀁 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀓𑀲𑁆𑀫𑀸? 𑀲𑀁𑀲𑀸𑀭𑀲𑁆𑀲 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺 (𑀅. 𑀦𑀺. 𑁧𑁦.𑁬𑁧). 𑀢𑀢𑁆𑀣 𑀦 𑀧𑀜𑁆𑀜𑀸𑀬𑀢𑀻𑀢𑀺 ¶ 𑀦 𑀤𑀺𑀲𑁆𑀲𑀢𑀺, 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀅𑀜𑁆𑀜𑀲𑁆𑀲 𑀜𑀸𑀡𑀯𑀺𑀲𑀬𑁄 𑀦 𑀳𑁄𑀢𑀻𑀢𑀺 𑀧𑀦 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀦 𑀧𑀜𑁆𑀜𑀸𑀬𑀢𑀻𑀢𑀺 𑀲𑀸𑀯𑀓𑀸𑀦𑀁 𑀜𑀸𑀡𑀯𑁂𑀓𑀮𑁆𑀮𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀽𑀧𑀦𑀸𑀬𑀺𑀓𑀸𑀢𑀺 𑀅𑀢𑁆𑀢𑀸 𑀉𑀧𑀦𑁂𑀢𑀩𑁆𑀩𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀽𑀧𑀦𑀸𑀬𑀺𑀓𑀸. 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀯𑀺𑀚𑀸𑀦𑀦𑀸𑀢𑀺 𑀏𑀢𑁂𑀦 𑀧𑀼𑀭𑀺𑀫𑀸𑀬 𑀓𑁄𑀝𑀺𑀬𑀸 𑀅𑀪𑀸𑀯𑀢𑁄 𑀏𑀯 𑀦 𑀧𑀜𑁆𑀜𑀸𑀬𑀢𑀺, 𑀦 𑀢𑀢𑁆𑀣 𑀜𑀸𑀡𑀲𑁆𑀲 𑀧𑀝𑀺𑀖𑀸𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀬𑀁 𑀧𑀦 𑀅𑀢𑁆𑀣𑀺, 𑀢𑀁 𑀅𑀜𑁆𑀜𑁂𑀲𑀁 𑀅𑀧𑁆𑀧𑀫𑁂𑀬𑁆𑀬𑀫𑁆𑀧𑀺 𑀪𑀕𑀯𑀢𑁄 𑀦 𑀅𑀧𑁆𑀧𑀫𑁂𑀬𑁆𑀬𑀦𑁆𑀢𑀺 𑀪𑀕𑀯𑀢𑁄 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑁆𑀜𑀸𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀪𑀕𑀯𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁. ‘‘𑀓𑀻𑀯 𑀤𑀻𑀖𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀯𑀫𑀸𑀳𑀸𑀢𑀺. 𑀏𑀢𑁆𑀣𑀸𑀬𑀁 𑀧𑀸𑀞𑀲𑁂𑀲𑁄 𑁋 𑀤𑀻𑀖𑀁 𑀔𑁄, 𑀪𑀺𑀓𑁆𑀔𑀼, 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀺 ¶ 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀸𑀢𑀺. 𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀸 𑀓𑀸𑀢𑀼𑀦𑁆𑀢𑀺. ‘‘𑀲𑀓𑁆𑀓𑀸 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄. 𑀢𑀢𑁄 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀢𑀺𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀼, 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀏𑀓𑁄 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀩𑁆𑀩𑀼𑀤𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀦𑀺𑀭𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁮𑁧; 𑀅. 𑀦𑀺. 𑁧𑁦.𑁮𑁯; 𑀲𑀼. 𑀦𑀺. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢).

𑀢𑀢𑁆𑀣 𑀯𑀻𑀲𑀢𑀺𑀔𑀸𑀭𑀺𑀓𑁄𑀢𑀺 𑀫𑀸𑀕𑀥𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀧𑀢𑁆𑀣𑁄 𑀳𑁄𑀢𑀺. 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁, 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁, 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸, 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻. 𑀢𑀸𑀬 𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄 𑀢𑀺𑀮𑀯𑀸𑀳𑁄. 𑀢𑀺𑀮𑀯𑀸𑀳𑁄𑀢𑀺 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀏𑀓𑁄 𑀧𑀘𑁆𑀘𑁂𑀓𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺 𑀏𑀯 𑀧𑀦 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁄 ‘‘𑀅𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼𑀧𑀺.

𑀢𑀢𑁆𑀣 𑀯𑀲𑁆𑀲𑀕𑀡𑀦𑀸𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑀸 𑀳𑀺 𑀲𑀢𑀁𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺. 𑀏𑀯𑀁 𑀲𑀢𑀁𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫. 𑀲𑀢𑀁𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 ¶ 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫. 𑀲𑀢𑀁𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑁄 𑀅𑀩𑁆𑀩𑀼𑀤𑁄. 𑀢𑀢𑁄 𑀯𑀻𑀲𑀢𑀺𑀕𑀼𑀡𑁄 𑀦𑀺𑀭𑀩𑁆𑀩𑀼𑀤𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀬𑀜𑁆𑀘 𑀕𑀡𑀦𑀸 𑀅𑀧𑀭𑀺𑀘𑀺𑀢𑀸𑀦𑀁 𑀤𑀼𑀓𑁆𑀓𑀭𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀢𑀢𑁆𑀣 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀦𑀢𑁆𑀢𑁂𑀦 𑀓𑀫𑁆𑀫𑀓𑀸𑀭𑀡𑀦𑀸𑀦𑀢𑁆𑀢𑁂𑀦𑀧𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑀮𑀤𑁆𑀥𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀲𑀻𑀢𑀦𑀭𑀓𑀸 𑀏𑀢𑁂’’𑀢𑀺. 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑀁 𑀧𑀤𑀽𑀲𑁂𑀢𑁆𑀯𑀸.

𑁧𑁧𑁯. 𑀓𑀣𑀁 𑀚𑀺𑀦𑁄𑀢𑀺 𑀧𑀓𑀸𑀭𑀧𑀼𑀘𑁆𑀙𑀸. 𑀓𑁂𑀦 𑀚𑀺𑀦𑁄𑀢𑀺 𑀓𑀸𑀭𑀡𑀧𑀼𑀘𑁆𑀙𑀸. 𑀓𑁂𑀦 𑀓𑀸𑀭𑀡𑁂𑀦 𑀓𑁂𑀦 𑀳𑁂𑀢𑀼𑀦𑀸 𑀓𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀚𑀺𑀦𑁄𑀢𑀺 𑀧𑀼𑀘𑁆𑀙𑀢𑀺. 𑀓𑀣𑀦𑁆𑀢𑀺 𑀧𑀦 𑀓𑁂𑀦 𑀧𑀓𑀸𑀭𑁂𑀦 𑀓𑀺𑀁 𑀅𑀢𑀻𑀢𑀸𑀦𑀁, 𑀉𑀤𑀸𑀳𑀼 𑀅𑀦𑀸𑀕𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑁂𑀦 𑀚𑀺𑀦𑁄𑀢𑀺 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀁 ‘‘𑀯𑀺𑀲𑀚𑁆𑀚𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀢𑀫𑁄 𑀚𑀺𑀦𑁄𑀢𑀺 𑀓𑀺𑀁 𑀭𑀽𑀧𑀁 𑀚𑀺𑀦𑁄, 𑀉𑀤𑀸𑀳𑀼 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀚𑀺𑀦𑁄. 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀯𑀸 𑀅𑀜𑁆𑀜𑁄 𑀚𑀺𑀦𑁄, 𑀬𑁄 ‘‘𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀯𑀺𑀲𑀚𑁆𑀚𑀦𑀻𑀬’’𑀦𑁆𑀢𑀺. 𑀓𑀺𑀢𑁆𑀢𑀓𑁄𑀢𑀺 𑀧𑀫𑀸𑀡𑀢𑁄 𑀓𑀺𑀁𑀧𑀭𑀺𑀫𑀸𑀡𑁄.

𑀅𑀢𑁆𑀣𑀺 ¶ 𑀢𑀣𑀸𑀕𑀢𑁄𑀢𑀺 𑀅𑀢𑁆𑀣𑀺 𑀲𑀢𑁆𑀢𑁄. 𑀬𑁆𑀯𑀸𑀬𑀫𑀸𑀬𑀲𑁆𑀫𑀸 ‘‘𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄’’𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀧𑀻𑀬𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀺𑀲𑀚𑁆𑀚𑀦𑀻𑀬’’𑀦𑁆𑀢𑀺. 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀲𑁂𑀦 𑀧𑀼𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀲𑀚𑁆𑀚𑀦𑀻𑀬’’𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁨𑁦. 𑀩𑀸𑀮𑀁 𑀧𑀻𑀞𑀲𑀫𑀸𑀭𑀼𑀴𑁆𑀳𑀦𑁆𑀢𑀺𑀆𑀤𑀻𑀦𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀸𑀦𑀺. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑀻𑀢𑀺 𑀓𑀸𑀬𑁂𑀦 𑀤𑀼𑀝𑁆𑀞𑀼 𑀓𑀢𑀸𑀦𑀺. 𑀑𑀮𑀩𑁆𑀪𑀦𑁆𑀢𑀻𑀢𑀺 𑀅𑀯𑀮𑀫𑁆𑀩𑀦𑁆𑀢𑀺 𑀅𑀯𑀢𑁆𑀣𑀭𑀺𑀬𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀑𑀮𑀫𑁆𑀩𑀦𑀸𑀤𑀺𑀆𑀓𑀸𑀭𑁂𑀦 𑀳𑀺 𑀢𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀫𑀳𑀢𑀦𑁆𑀢𑀺 𑀫𑀳𑀦𑁆𑀢𑀸𑀦𑀁. 𑀧𑀣𑀯𑀺𑀬𑀁 𑀑𑀮𑀫𑁆𑀩𑀦𑁆𑀢𑀻𑀢𑀺 𑀧𑀣𑀯𑀺𑀢𑀮𑁂 𑀧𑀢𑁆𑀣𑀭𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀢𑁆𑀣𑀭𑀡𑀸𑀓𑀸𑀭𑁄𑀬𑁂𑀯 𑀳𑁂𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀉𑀧𑀝𑁆𑀞𑀳𑀦𑀸𑀓𑀸𑀭𑁂 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺.

𑀮𑀸𑀪𑀸 ¶ 𑀯𑁄, 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀯𑁂, 𑀬𑁂 𑀇𑀫𑁂 𑀢𑀼𑀫𑁆𑀳𑁂𑀳𑀺 𑀧𑀝𑀺𑀮𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀤𑀬𑁄, 𑀮𑀸𑀪𑀸 𑀯𑁄 𑀢𑀼𑀫𑁆𑀳𑀸𑀓𑀁 𑀮𑀸𑀪𑀸 𑀏𑀯. 𑀲𑀼𑀮𑀤𑁆𑀥𑀦𑁆𑀢𑀺 𑀬𑀫𑁆𑀧𑀺𑀤𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀲𑀫𑁆𑀧𑀸𑀤𑀦𑀁 𑀮𑀤𑁆𑀥𑀁, 𑀢𑀫𑁆𑀧𑀺 𑀲𑀼𑀮𑀤𑁆𑀥𑀁. 𑀔𑀡𑁄 𑀯𑁄 𑀧𑀝𑀺𑀮𑀤𑁆𑀥𑁄𑀢𑀺 𑀅𑀝𑁆𑀞𑀅𑀓𑁆𑀔𑀡𑀯𑀚𑁆𑀚𑀺𑀢𑁄 𑀦𑀯𑀫𑁄𑀬𑀁 𑀔𑀡𑁄 𑀧𑀝𑀺𑀮𑀤𑁆𑀥𑁄 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬. ‘‘𑀤𑀺𑀝𑁆𑀞𑀸 𑀫𑀬𑀸’’𑀢𑀺𑀆𑀤𑀺𑀦𑀸 𑀏𑀓𑀤𑁂𑀲𑀦𑀺𑀤𑀲𑁆𑀲𑀦𑁂𑀦 𑀅𑀝𑁆𑀞 𑀅𑀓𑁆𑀔𑀡𑁂 𑀯𑀺𑀪𑀸𑀯𑁂𑀢𑀺.

𑁧𑁨𑁧. 𑀬𑀳𑀺𑀁 𑀬𑀳𑀺𑀦𑁆𑀢𑀺 𑀬𑀁 𑀬𑀁 𑀤𑀼𑀕𑁆𑀕𑀢𑀺𑀁 𑀬𑁄 𑀕𑀘𑁆𑀙𑀢𑀺. 𑀲𑁄 𑀦𑀁 𑀅𑀥𑀫𑁆𑀫𑁄𑀢𑀺 𑀬𑁄 𑀅𑀥𑀫𑁆𑀫𑁄 𑀢𑁂𑀦 𑀘𑀭𑀺𑀢𑁄, 𑀲𑁄 𑀦𑀁 𑀅𑀥𑀫𑁆𑀫𑀘𑀸𑀭𑀺𑀁 𑀧𑀼𑀕𑁆𑀕𑀮𑀁. 𑀳𑀦𑀸𑀢𑀻𑀢𑀺 𑀩𑀸𑀥𑀢𑀺.

𑀅𑀧𑁆𑀧𑁂𑀲𑀓𑁆𑀔𑀢𑀸𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑀸. 𑀤𑀼𑀩𑁆𑀩𑀡𑁆𑀡𑀢𑀸𑀢𑀺 𑀯𑀺𑀭𑀽𑀧𑀢𑀸 𑀩𑀻𑀪𑀘𑁆𑀙𑀢𑀸. 𑀤𑀼𑀧𑁆𑀧𑀜𑁆𑀜𑀢𑀸𑀢𑀺 𑀦𑀺𑀧𑁆𑀧𑀜𑁆𑀜𑀢𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀴𑀫𑀽𑀕𑀢𑀸.

𑁧𑁨𑁨. 𑀯𑀸𑀘𑀸𑀦𑀼𑀭𑀓𑁆𑀔𑀻𑀢𑀺 𑀘𑀢𑀼𑀦𑁆𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀭𑀺𑀯𑀚𑁆𑀚𑀦𑁂𑀦 𑀯𑀸𑀘𑀸𑀦𑀼𑀭𑀓𑁆𑀔𑀻. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀦𑁂𑀦 𑀫𑀦𑀲𑀸 𑀲𑀼𑀝𑁆𑀞𑀼 𑀲𑀁𑀯𑀼𑀢𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀧𑀚𑀳𑀦𑁆𑀢𑁄 𑀓𑀸𑀬𑁂𑀦 𑀘 𑀅𑀓𑀼𑀲𑀮𑀁 𑀦 𑀓𑀬𑀺𑀭𑀸, 𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂. 𑀏𑀯𑀁 𑀯𑀺𑀲𑁄𑀥𑁂𑀦𑁆𑀢𑁄 𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀓𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀇𑀲𑀻𑀳𑀺 𑀧𑀯𑁂𑀤𑀺𑀢𑀁 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀆𑀭𑀸𑀥𑁂𑀬𑁆𑀬𑀸𑀢𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀤𑀼𑀓𑁆𑀓𑀝𑀁 𑀲𑀸𑀯𑀚𑁆𑀚𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀕𑁆𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀬𑀲𑁆𑀲 𑀦𑀢𑁆𑀣𑀺. 𑀲𑀁𑀯𑀼𑀢𑀁 𑀢𑀻𑀳𑀺 ¶ 𑀞𑀸𑀦𑁂𑀳𑀻𑀢𑀺 𑀏𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀧𑀯𑁂𑀲𑀦𑀺𑀯𑀸𑀭𑀡𑀢𑁄 𑀧𑀺𑀳𑀺𑀢𑀁, 𑀢𑀁 𑀅𑀳𑀁 ‘‘𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺 𑀯𑀤𑀸𑀫𑀻𑀢𑀺.

𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀏𑀓𑀦𑁆𑀢𑀤𑀼𑀲𑁆𑀲𑀻𑀮𑀪𑀸𑀯𑁄. 𑀕𑀺𑀳𑀻 𑀯𑀸𑀧𑀺 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀓𑀭𑁄𑀦𑁆𑀢𑁄, 𑀧𑀩𑁆𑀩𑀚𑀺𑀢𑁄 𑀯𑀸𑀧𑀺 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑁄 𑀦𑀸𑀫. 𑀇𑀥 𑀧𑀦 𑀬𑁄 𑀤𑁆𑀯𑀻𑀲𑀼 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀤𑀼𑀲𑁆𑀲𑀻𑀮𑁄, 𑀢𑀲𑁆𑀲 𑀕𑀢𑀺𑀬𑀸 𑀆𑀕𑀢𑀁 𑀤𑀼𑀲𑁆𑀲𑀻𑀮𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀼𑀲𑁆𑀲𑀻𑀮𑀪𑀸𑀯𑁄𑀢𑀺 𑀘𑁂𑀢𑁆𑀣 𑀤𑀼𑀲𑁆𑀲𑀻𑀮𑀲𑁆𑀲 𑀙 𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀮𑀼𑀯𑀸 𑀲𑀸𑀮𑀫𑀺𑀯𑁄𑀢𑁆𑀣𑀢𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁. 𑀬𑀣𑀸 𑀦𑀸𑀫 𑀫𑀸𑀮𑀼𑀯𑀸 𑀲𑀸𑀮𑀁 𑀑𑀢𑁆𑀣𑀢𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀢𑁆𑀢𑁂𑀳𑀺 𑀉𑀤𑀓𑀁 𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀁𑀪𑀜𑁆𑀚𑀦𑀯𑀲𑁂𑀦 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀭𑀺𑀬𑁄𑀦𑀦𑁆𑀥𑀢𑀺, 𑀏𑀯𑀁 𑀅𑀢𑁆𑀢𑀪𑀸𑀯𑀁 𑀑𑀢𑁆𑀣𑀢𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 ¶ 𑀲𑁄 𑀫𑀸𑀮𑀼𑀯𑀸𑀬 𑀲𑀁𑀪𑀜𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑀺𑀬𑀫𑀸𑀦𑁄 𑀭𑀼𑀓𑁆𑀔𑁄 𑀯𑀺𑀬 𑀢𑀸𑀬 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀲𑀁𑀪𑀜𑁆𑀚𑀺𑀢𑁆𑀯𑀸 𑀅𑀧𑀸𑀬𑁂𑀲𑀼 𑀧𑀸𑀢𑀺𑀬𑀫𑀸𑀦𑁄, 𑀬𑀣𑀸 𑀦𑀁 𑀅𑀦𑀢𑁆𑀣𑀓𑀸𑀫𑁄 𑀤𑀺𑀲𑁄 𑀇𑀘𑁆𑀙𑀢𑀺, 𑀢𑀣𑀸 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.

‘‘𑀅𑀢𑁆𑀢𑀦𑀸 𑀳𑀺 𑀓𑀢’’𑀦𑁆𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀧𑀸𑀲𑀸𑀡𑀫𑀬𑀁 𑀧𑀸𑀲𑀸𑀡𑀲𑀫𑁆𑀪𑀯𑀁 𑀯𑀚𑀺𑀭𑀁 𑀢𑀫𑁂𑀯 𑀅𑀲𑁆𑀫𑀫𑀬𑀁 𑀫𑀡𑀺𑀁 𑀅𑀢𑁆𑀢𑀦𑁄 𑀉𑀝𑁆𑀞𑀸𑀦𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀧𑀸𑀲𑀸𑀡𑀫𑀡𑀺𑀁 𑀔𑀸𑀬𑀺𑀢𑁆𑀯𑀸 𑀙𑀺𑀤𑁆𑀤𑀸𑀙𑀺𑀤𑁆𑀤𑀁 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀅𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀅𑀢𑁆𑀢𑀦𑀸 𑀓𑀢𑀁 𑀅𑀢𑁆𑀢𑀦𑀺 𑀚𑀸𑀢𑀁 𑀅𑀢𑁆𑀢𑀲𑀫𑁆𑀪𑀯𑀁 𑀧𑀸𑀧𑀁 𑀤𑀼𑀫𑁆𑀫𑁂𑀥𑀁 𑀦𑀺𑀧𑁆𑀧𑀜𑁆𑀜𑀁 𑀧𑀼𑀕𑁆𑀕𑀮𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀪𑀺𑀫𑀢𑁆𑀣𑀢𑀺 𑀓𑀦𑁆𑀢𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺.

𑀦𑀺𑀲𑁂𑀯𑀺𑀬𑀸𑀢𑀺 𑀓𑀢𑁆𑀯𑀸. 𑀕𑀭𑀳𑀸𑀢𑀺 𑀕𑀸𑀭𑀬𑁆𑀳𑀸. 𑀩𑀸𑀮𑀫𑀢𑀻𑀢𑀺 𑀫𑀦𑁆𑀤𑀩𑀼𑀤𑁆𑀥𑀺𑀦𑁄. 𑀔𑀬𑀸 𑀘 𑀓𑀫𑁆𑀫𑀲𑁆𑀲𑀸𑀢𑀺 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑁂𑀦 𑀓𑀫𑁆𑀫𑀲𑁆𑀲 𑀔𑁂𑀧𑀦𑀢𑁄. 𑀯𑀺𑀫𑀼𑀢𑁆𑀢𑀘𑁂𑀢𑀲𑁄𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑀸 𑀘 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄. 𑀦𑀺𑀩𑁆𑀩𑀦𑁆𑀢𑀺 𑀢𑁂 𑀚𑁄𑀢𑀺𑀭𑀺𑀯𑀺𑀦𑁆𑀥𑀦𑀓𑁆𑀔𑀬𑀸𑀢𑀺 𑀬𑀣𑀸 𑀦𑀸𑀫 𑀅𑀦𑀼𑀧𑀸𑀤𑀸𑀦𑁄 𑀚𑀸𑀢𑀯𑁂𑀤𑁄 𑀦𑀺𑀩𑁆𑀩𑀸𑀬𑀢𑀺, 𑀏𑀯𑀫𑁂𑀯𑀁 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀯𑀲𑁂𑀲𑀓𑁆𑀔𑀬𑀸 𑀦𑀺𑀩𑁆𑀩𑀸𑀬𑀢𑀺.

𑁧𑁨𑁩. ‘‘𑀬𑀣𑀸𑀧𑀺 𑀪𑀫𑀭𑁄’’𑀢𑀺 𑀕𑀸𑀣𑀸𑀬𑀁 𑀪𑀫𑀭𑁄𑀢𑀺 𑀬𑀸 𑀓𑀸𑀘𑀺 𑀫𑀥𑀼𑀓𑀭𑀚𑀸𑀢𑀺. 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑁂 𑀘𑀭𑀦𑁆𑀢𑁄 𑀧𑀼𑀧𑁆𑀨𑀜𑁆𑀘 𑀢𑀲𑁆𑀲 𑀯𑀡𑁆𑀡𑀜𑁆𑀘 𑀕𑀦𑁆𑀥𑀜𑁆𑀘 𑀅𑀳𑁂𑀞𑀬𑀁 𑀅𑀳𑁂𑀞𑀬𑀦𑁆𑀢𑁄 𑀅𑀯𑀺𑀦𑀸𑀲𑁂𑀦𑁆𑀢𑁄 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀭𑀺𑀢𑁆𑀯𑀸 𑀘 𑀧𑀮𑁂𑀢𑀺 𑀭𑀲𑀫𑀸𑀤𑀸𑀬𑀸𑀢𑀺 𑀬𑀸𑀯𑀤𑀢𑁆𑀣𑀁 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀅𑀧𑀭𑀫𑁆𑀧𑀺 𑀫𑀥𑀼𑀓𑀭𑀡𑀢𑁆𑀣𑀸𑀬 𑀭𑀲𑀁 𑀕𑀳𑁂𑀢𑁆𑀯𑀸 𑀟𑁂𑀢𑀺. 𑀲𑁄 𑀏𑀓𑀁 𑀯𑀦𑀕𑀳𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀭𑀼𑀓𑁆𑀔𑀲𑀼𑀲𑀺𑀭𑀸𑀤𑀻𑀲𑀼 𑀢𑀁 𑀭𑀚𑀫𑀺𑀲𑁆𑀲𑀓𑀁 𑀭𑀲𑀁 𑀞𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀥𑀼𑀭𑀭𑀲𑀁 𑀫𑀥𑀼𑀁 𑀓𑀭𑁄𑀢𑀺, 𑀦 𑀢𑀲𑁆𑀲 𑀧𑀼𑀧𑁆𑀨𑀸𑀭𑀸𑀫𑁂 𑀘𑀭𑀺𑀢𑀧𑀘𑁆𑀘𑀬𑀸 𑀧𑀼𑀧𑁆𑀨𑀁 𑀯𑀸 𑀢𑀲𑁆𑀲 𑀯𑀡𑁆𑀡𑁄 𑀯𑀸 𑀕𑀦𑁆𑀥𑁄 𑀯𑀸 𑀯𑀺𑀦𑀲𑁆𑀲𑀢𑀺, 𑀅𑀣 𑀔𑁄 𑀧𑀼𑀧𑁆𑀨𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂𑀢𑀺 𑀏𑀯𑀁 ¶ 𑀲𑁂𑀓𑁆𑀔𑁄 𑀅𑀲𑁂𑀓𑁆𑀔𑁄 𑀯𑀸 𑀅𑀦𑀕𑀸𑀭𑀺𑀬𑀫𑀼𑀦𑀺 𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀕𑀸𑀫𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑁄 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀲𑁆𑀲 𑀕𑀸𑀫𑁂 𑀘𑀭𑀡𑀧𑀘𑁆𑀘𑀬𑀸 𑀲𑀤𑁆𑀥𑀸𑀳𑀸𑀦𑀺 𑀯𑀸 𑀪𑁄𑀕𑀳𑀸𑀦𑀺 𑀯𑀸 𑀳𑁄𑀢𑀺, 𑀲𑀤𑁆𑀥𑀸𑀧𑀺 𑀪𑁄𑀕𑀸𑀧𑀺 𑀧𑀸𑀓𑀢𑀺𑀓𑀸𑀯 𑀳𑁄𑀦𑁆𑀢𑀺. 𑀏𑀯𑀁 𑀘𑀭𑀺𑀢𑁆𑀯𑀸 𑀘 𑀧𑀦 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀓𑁆𑀔𑀪𑀜𑁆𑀚𑀦- (𑀫𑀺. 𑀧. 𑁬.𑁧.𑁨) 𑀯𑀡𑀮𑁂𑀧𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀯𑀲𑁂𑀦 (𑀫𑀺. 𑀧. 𑁬.𑁧.𑁨; 𑀲𑀁. 𑀦𑀺. 𑁨.𑁬𑁩) 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ¶ 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀭𑀽𑀧𑀁 𑀯𑀦𑀲𑀡𑁆𑀟𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀫𑀕𑁆𑀕𑀨𑀮𑀸𑀦𑀺 𑀳𑀢𑁆𑀣𑀕𑀢𑀸𑀦𑁂𑀯 𑀓𑀭𑁄𑀢𑀺. 𑀅𑀲𑁂𑀓𑁆𑀔𑀫𑀼𑀦𑀺 𑀧𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀜𑁆𑀚𑀢𑀺. 𑀅𑀬𑀫𑀲𑁆𑀲 𑀪𑀫𑀭𑁂𑀦 𑀫𑀥𑀼𑀓𑀭𑁂𑀦 𑀲𑀭𑀺𑀓𑁆𑀔𑀢𑀸. 𑀔𑀻𑀡𑀸𑀲𑀯𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻𑀢𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀲𑁄 𑀏𑀯 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀲𑀁𑀯𑀭𑀡𑀢𑁄 𑀧𑀺𑀤𑀳𑀦𑀢𑁄 𑀲𑀁𑀯𑀭𑁄. 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀘𑀭𑀢𑀺. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀅𑀡𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀲𑀼. 𑀯𑀚𑁆𑀚𑁂𑀲𑀽𑀢𑀺 𑀅𑀓𑀼𑀲𑀮𑀥𑀫𑁆𑀫𑁂𑀲𑀼. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀁 𑀤𑀲𑁆𑀲𑀻. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀢𑀺.

𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀼𑀲𑀮𑁂𑀦 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀢𑀺 𑀏𑀢𑁆𑀣 𑀆𑀘𑀸𑀭𑀕𑁄𑀘𑀭𑀕𑁆𑀕𑀳𑀡𑁂𑀦𑁂𑀯 𑀓𑀼𑀲𑀮𑁂 𑀓𑀸𑀬𑀓𑀫𑁆𑀫𑁂 𑀯𑀘𑀻𑀓𑀫𑁆𑀫𑁂 𑀘 𑀕𑀳𑀺𑀢𑁂𑀧𑀺 𑀬𑀲𑁆𑀫𑀸 𑀇𑀤𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀦 𑀆𑀓𑀸𑀲𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀏𑀯 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀬𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀼𑀲𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀺 𑀲𑀻𑀮𑀫𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀢𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀢𑀫𑁂 𑀘 𑀣𑀧𑀢𑀺 𑀓𑀼𑀲𑀮𑀸 𑀲𑀻𑀮𑀸? 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁, 𑀧𑀭𑀺𑀲𑀼𑀤𑁆𑀥𑀁 𑀆𑀚𑀻𑀯𑀫𑁆𑀧𑀺 𑀔𑁄 𑀅𑀳𑀁 𑀣𑀧𑀢𑀺 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁬𑁫). 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀬𑀲𑁆𑀲 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀳𑁄𑀢𑀺, 𑀲𑁄 ‘‘𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑁄 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀝𑁆𑀞𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀓𑁄 𑀳𑁄𑀢𑀺, 𑀢𑀲𑁆𑀲 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀬𑁄 𑀘𑀺𑀢𑁆𑀢𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀏𑀓𑀓𑁄 𑀳𑁄𑀢𑀺, 𑀕𑀫𑀦𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀲𑁆𑀲 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑁄. 𑀣𑀸𑀫𑀯𑀸𑀢𑀺 𑀞𑀺𑀢𑀺𑀫𑀸. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 ¶ 𑀣𑀺𑀭𑀧𑀭𑀓𑁆𑀓𑀫𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄…𑀧𑁂… 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀧𑀳𑀸𑀦𑀢𑁆𑀣𑀁 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀲𑀫𑁆𑀧𑀸𑀤𑀦𑀢𑁆𑀣𑀁 ¶ , 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀜𑁆𑀘 𑀥𑀼𑀭𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀭𑀺𑀬𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄 𑀯𑀺𑀳𑀭𑀢𑀺. 𑀧𑀜𑁆𑀜𑀯𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀸𑀳 ‘‘𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸’’𑀢𑀺.

𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄 𑀯𑀺𑀭𑀽𑀧𑁂𑀧𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑁂 𑀲𑀼𑀯𑀡𑁆𑀡𑀩𑀺𑀫𑁆𑀩𑀓𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺 𑀫𑀸𑀮𑀸𑀕𑀼𑀴𑁂 𑀯𑀺𑀬 𑀲𑀻𑀲𑀸𑀤𑀻𑀲𑀼 𑀓𑀢𑁆𑀯𑀸 𑀧𑀭𑀺𑀳𑀭𑀫𑀸𑀦𑀸. 𑀢𑁂𑀳𑀺 𑀉𑀳𑀤𑀺𑀢𑀸𑀧𑀺 𑀑𑀫𑀼𑀢𑁆𑀢𑀺𑀢𑀸𑀧𑀺 𑀕𑀦𑁆𑀥𑀯𑀺𑀮𑁂𑀧𑀦𑀁 𑀧𑀝𑀺𑀘𑁆𑀙𑀦𑁆𑀢𑀸 𑀯𑀺𑀬 𑀲𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫’’𑀦𑁆𑀢𑀺. 𑀧𑀼𑀢𑁆𑀢𑀧𑁂𑀫𑁂𑀦 𑀲𑀫𑀁 𑀧𑁂𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑁄𑀲𑀫𑀺𑀢𑀦𑁆𑀢𑀺 𑀕𑁄𑀳𑀺 𑀲𑀫𑀁 𑀕𑁄𑀥𑀦𑀲𑀤𑀺𑀲𑀁 𑀅𑀜𑁆𑀜𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺. 𑀲𑀽𑀭𑀺𑀬𑀲𑀫𑀸 𑀆𑀪𑀸𑀢𑀺 𑀲𑀽𑀭𑀺𑀬𑀸𑀪𑀸𑀬 𑀲𑀫𑀸 𑀅𑀜𑁆𑀜𑀸 𑀆𑀪𑀸 𑀦𑀸𑀫 𑀦𑀢𑁆𑀣𑀺. 𑀲𑀫𑀼𑀤𑁆𑀤𑀧𑀭𑀫𑀸𑀢𑀺 𑀬𑁂 𑀓𑁂𑀘𑀺 𑀅𑀜𑁆𑀜𑁂 𑀲𑀭𑀸 𑀦𑀸𑀫, 𑀲𑀩𑁆𑀩𑁂 𑀢𑁂 𑀲𑀫𑀼𑀤𑁆𑀤𑀧𑀭𑀫𑀸. 𑀲𑀫𑀼𑀤𑁆𑀤𑁄 𑀢𑁂𑀲𑀁 𑀉𑀢𑁆𑀢𑀫𑁄, 𑀲𑀫𑀼𑀤𑁆𑀤𑀲𑀤𑀺𑀲𑀁 𑀅𑀜𑁆𑀜𑀁 𑀉𑀤𑀓𑀁 𑀦𑀺𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺 𑀪𑀕𑀯𑀸𑀢𑀺 𑀯𑀤𑀢𑀺.

𑀬𑀲𑁆𑀫𑀸 𑀧𑀦 𑀅𑀢𑁆𑀢𑀧𑁂𑀫𑁂𑀦 𑀲𑀫𑀁 𑀧𑁂𑀫𑀁 𑀦𑀢𑁆𑀣𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀧𑀼𑀢𑁆𑀢𑀥𑀻𑀢𑀭𑁄 𑀅𑀧𑁄𑀲𑁂𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀧𑁄𑀲𑁂𑀦𑁆𑀢𑀺. 𑀥𑀜𑁆𑀜𑁂𑀦 𑀘 𑀲𑀫𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀣𑀸𑀭𑀽𑀧𑁂 𑀳𑀺 𑀓𑀸𑀮𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺𑀧𑀺 𑀕𑁄𑀫𑀳𑀺𑀁𑀲𑀸𑀤𑀻𑀦𑀺𑀧𑀺 𑀥𑀜𑁆𑀜𑀕𑁆𑀕𑀳𑀡𑀢𑁆𑀣𑀁 𑀥𑀜𑁆𑀜𑀲𑀸𑀫𑀺𑀓𑀸𑀦𑀫𑁂𑀯 𑀲𑀦𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀧𑀜𑁆𑀜𑀸𑀬 𑀘 𑀲𑀫𑀸 𑀆𑀪𑀸 𑀦𑀸𑀫 𑀦𑀢𑁆𑀣𑀺. 𑀲𑀽𑀭𑀺𑀬𑀸𑀤𑀬𑁄 𑀳𑀺 𑀏𑀓𑀤𑁂𑀲𑀁𑀬𑁂𑀯 𑀑𑀪𑀸𑀲𑁂𑀦𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀘 𑀢𑀫𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀧𑀜𑁆𑀜𑀸 𑀧𑀦 𑀤𑀲𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀏𑀓𑀧𑀚𑁆𑀚𑁄𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀢𑀻𑀢𑀁𑀲𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀜𑁆𑀘 𑀢𑀫𑀁 𑀯𑀺𑀥𑀫𑀢𑀺. 𑀫𑁂𑀖𑀯𑀼𑀝𑁆𑀞𑀺𑀬𑀸 𑀘 𑀲𑀫𑁄 𑀲𑀭𑁄 𑀦𑀸𑀫 𑀦𑀢𑁆𑀣𑀺. 𑀦𑀤𑀻 𑀯𑀸 𑀳𑀺 𑀳𑁄𑀢𑀼 𑀢𑀴𑀸𑀓𑀸𑀤𑀻𑀦𑀺 𑀯𑀸, 𑀯𑀼𑀝𑁆𑀞𑀺𑀲𑀫𑁄 𑀲𑀭𑁄 𑀦𑀸𑀫 𑀦𑀢𑁆𑀣𑀺. 𑀫𑁂𑀖𑀯𑀼𑀝𑁆𑀞𑀺𑀬𑀸 𑀳𑀺 𑀧𑀘𑁆𑀙𑀺𑀦𑁆𑀦𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀳𑁄𑀢𑀺, 𑀯𑀼𑀝𑁆𑀞𑀺𑀬𑀸 𑀧𑀦 𑀧𑀯𑀢𑁆𑀢𑀫𑀸𑀦𑀸𑀬 𑀬𑀸𑀯 𑀆𑀪𑀲𑁆𑀲𑀭𑀪𑀯𑀦𑀸𑀧𑀺 𑀏𑀓𑁄𑀤𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀤𑁂𑀯𑀢𑀸𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑀯𑀲𑁂𑀦 𑀧𑀝𑀺𑀕𑀸𑀣𑀁 𑀯𑀤𑀦𑁆𑀢𑁄 ‘‘𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁨𑁪. 𑀓𑀺𑀁𑀲𑀽𑀥 𑀪𑀻𑀢𑀸𑀢𑀺 𑀓𑀺𑀁 𑀦𑀼 𑀪𑀻𑀢𑀸. 𑀫𑀕𑁆𑀕𑁄 𑀘𑀦𑁂𑀓𑀸𑀬𑀢𑀦𑁄 𑀧𑀯𑀼𑀢𑁆𑀢𑁄𑀢𑀺 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀲𑁂𑀦 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀫𑀕𑁆𑀕𑁄 𑀓𑀣𑀺𑀢𑁄, 𑀏𑀯𑀁 𑀲𑀦𑁆𑀢𑁂 𑀓𑀺𑀲𑁆𑀲 𑀪𑀻𑀢𑀸 𑀳𑀼𑀢𑁆𑀯𑀸 𑀅𑀬𑀁 𑀚𑀦𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀅𑀕𑁆𑀕𑀳𑁂𑀲𑀻𑀢𑀺 𑀯𑀤𑀢𑀺. 𑀪𑀽𑀭𑀺𑀧𑀜𑁆𑀜𑀸𑀢𑀺 𑀩𑀳𑀼𑀧𑀜𑁆𑀜 𑀉𑀲𑁆𑀲𑀦𑁆𑀦𑀧𑀜𑁆𑀜. 𑀧𑀭𑀮𑁄𑀓𑀁 𑀦 𑀪𑀸𑀬𑁂𑀢𑀺 𑀇𑀫𑀲𑁆𑀫𑀸 𑀮𑁄𑀓𑀸 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀦 𑀪𑀸𑀬𑁂𑀬𑁆𑀬.

𑀧𑀡𑀺𑀥𑀸𑀬𑀸𑀢𑀺 ¶ ¶ 𑀞𑀧𑁂𑀢𑁆𑀯𑀸. 𑀖𑀭𑀫𑀸𑀯𑀲𑀦𑁆𑀢𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄 𑀯𑀺𑀬 𑀩𑀳𑁆𑀯𑀦𑁆𑀦𑀧𑀸𑀦𑁂 𑀖𑀭𑁂 𑀯𑀲𑀦𑁆𑀢𑁄. 𑀲𑀁𑀯𑀺𑀪𑀸𑀕𑀻𑀢𑀺 𑀅𑀘𑁆𑀙𑀭𑀸𑀬 𑀕𑀳𑀺𑀢𑀫𑁆𑀧𑀺 𑀦𑀔𑁂𑀦 𑀨𑀸𑀮𑁂𑀢𑁆𑀯𑀸 𑀧𑀭𑀲𑁆𑀲 𑀤𑀢𑁆𑀯𑀸𑀯 𑀪𑀼𑀜𑁆𑀚𑀦𑀲𑀻𑀮𑁄. 𑀯𑀤𑀜𑁆𑀜𑀽𑀢𑀺 𑀬𑀸𑀘𑀓𑀸𑀦𑀁 𑀬𑀸𑀘𑀦𑀯𑀲𑁂𑀦 𑀯𑀼𑀢𑁆𑀢𑀯𑀘𑀦𑀜𑁆𑀜𑀽, 𑀯𑀘𑀦𑀻𑀬𑁄 𑀯𑀸. 𑀏𑀢𑁆𑀣 𑀘 𑀯𑀸𑀘𑀦𑁆𑀢𑀺 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀕𑀳𑀺𑀢𑀸𑀦𑀺. 𑀫𑀦𑀦𑁆𑀢𑀺 𑀢𑀻𑀡𑀺 𑀫𑀦𑁄𑀲𑀼𑀘𑀭𑀺𑀢𑀸𑀦𑀺. 𑀓𑀸𑀬𑁂𑀦𑀸𑀢𑀺 𑀢𑀻𑀡𑀺 𑀓𑀸𑀬𑀲𑀼𑀘𑀭𑀺𑀢𑀸𑀦𑀺. 𑀇𑀫𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀼𑀩𑁆𑀩𑀲𑀼𑀤𑁆𑀥𑀺𑀅𑀗𑁆𑀕𑀁 𑀦𑀸𑀫. ‘‘𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀬𑀜𑁆𑀜𑀉𑀧𑀓𑁆𑀔𑀭𑁄 𑀕𑀳𑀺𑀢𑁄. 𑀲𑀤𑁆𑀥𑁄𑀢𑀺 𑀏𑀓𑀁 𑀅𑀗𑁆𑀕𑀁, 𑀫𑀼𑀤𑀽𑀢𑀺 𑀏𑀓𑀁, 𑀲𑀁𑀯𑀺𑀪𑀸𑀕𑀻𑀢𑀺 𑀏𑀓𑀁, 𑀯𑀤𑀜𑁆𑀜𑀽𑀢𑀺 𑀏𑀓𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀲𑀦𑁆𑀥𑀸𑀬 ‘‘𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀽’’𑀢𑀺 𑀆𑀳.

𑀅𑀧𑀭𑁄 𑀦𑀬𑁄 𑁋 ‘‘𑀯𑀸𑀘’’𑀦𑁆𑀢𑀺𑀆𑀤𑀻𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺, ‘‘𑀩𑀳𑁆𑀯𑀦𑁆𑀦𑀧𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀬𑀜𑁆𑀜𑀉𑀧𑀓𑁆𑀔𑀭𑁄𑀯 𑀕𑀳𑀺𑀢𑁄, ‘‘𑀲𑀤𑁆𑀥𑁄 𑀫𑀼𑀤𑀼 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽’’𑀢𑀺 𑀏𑀓𑀁 𑀅𑀗𑁆𑀕𑀁.

𑀅𑀧𑀭𑁄 𑀤𑀼𑀓𑀦𑀬𑁄 𑀦𑀸𑀫 𑀳𑁄𑀢𑀺 𑁋 ‘‘𑀯𑀸𑀘𑀁 𑀫𑀦𑀜𑁆𑀘𑀸’’𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄 𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄’’𑀢𑀺 𑀏𑀓𑀁, ‘‘𑀲𑀤𑁆𑀥𑁄 𑀫𑀼𑀤𑀽’’𑀢𑀺 𑀏𑀓𑀁, ‘‘𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽’’𑀢𑀺 𑀏𑀓𑀦𑁆𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂 𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀲𑁄 𑀇𑀢𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄𑀦 𑀪𑀸𑀬𑀢𑀺.

𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀻𑀢𑀺𑀆𑀤𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀤𑀼𑀯𑀺𑀥𑁂𑀦𑀸𑀢𑀺 𑀤𑁆𑀯𑀺𑀯𑀺𑀥𑁂𑀦, 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. 𑀲𑀻𑀮𑀓𑀣𑀸 𑀘 𑀦𑀸𑀫𑁂𑀲𑀸 𑀓𑀫𑁆𑀫𑀧𑀣𑀯𑀲𑁂𑀦 𑀯𑀸 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀯𑀸 𑀓𑀣𑁂𑀢𑀩𑁆𑀩𑀸. 𑀢𑀢𑁆𑀣 𑀓𑀫𑁆𑀫𑀧𑀣𑀯𑀲𑁂𑀦 𑀢𑀸𑀯 𑀓𑀣𑁂𑀦𑁆𑀢𑁂𑀦 𑀅𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑁆𑀦𑀸𑀤𑀸𑀦𑀫𑀺𑀘𑁆𑀙𑀸𑀘𑀸𑀭𑁂𑀳𑀺 𑀓𑀣𑁂𑀢𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀯𑀲𑁂𑀦. 𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑁂𑀭𑀫𑀡𑀻𑀳𑀺 𑀘𑁂𑀯 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀅𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄.

𑀅𑀲𑁂𑀯𑀺𑀢𑀩𑁆𑀩𑀯𑀘𑀻𑀲𑀫𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑀸𑀤𑀺𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀘𑁂𑀯 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄. 𑀲𑁂𑀯𑀺𑀢𑀩𑁆𑀩𑀯𑀘𑀻𑀲𑀫𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑀸𑀤𑀺𑀯𑁂𑀭𑀫𑀡𑀻𑀳𑀺 𑀘𑁂𑀯 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀅𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄.

𑀧𑀭𑀺𑀬𑁂𑀲𑀦𑀸 ¶ 𑀧𑀦 𑀓𑀸𑀬𑀯𑀸𑀘𑀸𑀳𑀺 𑀧𑀭𑀺𑀬𑁂𑀲𑀦𑀸 𑀏𑀯, 𑀲𑀸 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀧𑀺 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀦𑀸𑀫 𑀏𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑀤𑁆𑀯𑀬𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀆𑀓𑀸𑀲𑁂, 𑀢𑀲𑁆𑀫𑀸 ¶ 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀦𑀲𑁂𑀯𑀺𑀢𑀩𑁆𑀩𑀧𑀭𑀺𑀬𑁂𑀲𑀦𑀸 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸𑀬 𑀓𑀣𑁂𑀢𑀩𑁆𑀩𑀸, 𑀲𑁂𑀯𑀺𑀢𑀩𑁆𑀩𑀧𑀭𑀺𑀬𑁂𑀲𑀦𑀸 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄 𑀚𑀸𑀢𑀺𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁭𑁪). 𑀢𑀣𑀸 ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀧𑀭𑀺𑀬𑁂𑀲𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄 𑀚𑀸𑀢𑀺𑀥𑀫𑁆𑀫𑁂 𑀆𑀤𑀻𑀦𑀯𑀁 𑀯𑀺𑀤𑀺𑀢𑁆𑀯𑀸 𑀅𑀚𑀸𑀢𑀁 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁭𑁫).

𑁧𑁭𑁦. 𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄𑀢𑀺 𑀚𑀗𑁆𑀖𑀫𑀕𑁆𑀕𑀸𑀤𑀬𑁄 𑀯𑀸 𑀳𑁄𑀦𑁆𑀢𑀼 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀫𑀕𑁆𑀕𑀸 𑀯𑀸, 𑀲𑀩𑁆𑀩𑁂𑀲𑀫𑁆𑀧𑀺 𑀫𑀕𑁆𑀕𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀸𑀦𑀓𑀭𑁄 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼𑀧𑀺 𑀲𑀘𑁆𑀘𑁂𑀲𑀼 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄. 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸𑀢𑀺 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺 (𑀥. 𑀧. 𑁨𑁨𑁪) 𑀆𑀕𑀢𑀁 𑀯𑀘𑀻𑀲𑀘𑁆𑀘𑀁 𑀯𑀸 𑀳𑁄𑀢𑀼, ‘‘𑀲𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄, 𑀲𑀘𑁆𑀘𑁄 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺𑀪𑁂𑀤𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸, ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁩.𑁩𑁩𑁧; 𑀉𑀤𑀸. 𑁫𑁪; 𑀫𑀳𑀸𑀦𑀺. 𑁨𑁦) 𑀤𑀺𑀝𑁆𑀞𑀺𑀲𑀘𑁆𑀘𑀁 𑀯𑀸, ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀻’’𑀢𑀺 (𑀲𑀼. 𑀦𑀺. 𑁮𑁯𑁦; 𑀫𑀳𑀸𑀦𑀺. 𑁧𑁧𑁯) 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀯𑀸 𑀳𑁄𑀢𑀼. 𑀲𑀩𑁆𑀩𑁂𑀲𑀫𑁆𑀧𑀺 𑀇𑀫𑁂𑀲𑀁 𑀲𑀘𑁆𑀘𑀸𑀦𑀁 𑀧𑀭𑀺𑀚𑀸𑀦𑀺𑀢𑀩𑁆𑀩𑀝𑁆𑀞𑁂𑀦 𑀧𑀳𑀸𑀢𑀩𑁆𑀩𑀝𑁆𑀞𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀝𑁆𑀞𑁂𑀦 𑀪𑀸𑀯𑁂𑀢𑀩𑁆𑀩𑀝𑁆𑀞𑁂𑀦 𑀏𑀓𑀧𑀝𑀺𑀯𑁂𑀥𑀝𑁆𑀞𑁂𑀦 𑀢𑀣𑀧𑀝𑀺𑀯𑁂𑀥𑀝𑁆𑀞𑁂𑀦 𑀘 ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀬𑁄 (𑀫𑀳𑀸𑀯. 𑁧𑁪; 𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁨𑁦) 𑀘𑀢𑀼𑀭𑁄 𑀧𑀤𑀸 𑀲𑁂𑀝𑁆𑀞𑀸 𑀦𑀸𑀫. 𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀦𑁆𑀢𑀺 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦) 𑀯𑀘𑀦𑀢𑁄 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀯𑀺𑀭𑀸𑀕𑁄 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑁂𑀝𑁆𑀞𑁄. 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀁 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀪𑀕𑀯𑀸𑀯 𑀲𑁂𑀝𑁆𑀞𑁄𑀢𑀺.

𑀅𑀕𑁆𑀕𑀸𑀦𑀻𑀢𑀺 𑀉𑀢𑁆𑀢𑀫𑀸𑀦𑀺. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀸. 𑀅𑀧𑀤𑀸𑀢𑀺 𑀦𑀺𑀧𑁆𑀧𑀤𑀸 𑀅𑀳𑀺𑀫𑀘𑁆𑀙𑀸𑀤𑀬𑁄. 𑀤𑁆𑀯𑀺𑀧𑀤𑀸𑀢𑀺 𑀫𑀦𑀼𑀲𑁆𑀲𑀧𑀓𑁆𑀔𑀺𑀚𑀸𑀢𑀸𑀤𑀬𑁄. 𑀘𑀢𑀼𑀧𑁆𑀧𑀤𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 ¶ . 𑀩𑀳𑀼𑀧𑁆𑀧𑀤𑀸𑀢𑀺 𑀲𑀢𑀧𑀤𑀺𑀆𑀤𑀬𑁄. 𑀭𑀽𑀧𑀺𑀦𑁄𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀅𑀲𑀜𑁆𑀜𑀺𑀦𑁄𑀢𑀺 𑀅𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄𑀢𑀺 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀕𑀼𑀡𑁂𑀳𑀺 𑀅𑀕𑁆𑀕𑁄 𑀉𑀢𑁆𑀢𑀫𑁄 𑀲𑁂𑀝𑁆𑀞𑁄 𑀅𑀓𑁆𑀔𑀸𑀬𑀢𑀺.

𑀅𑀲𑀗𑁆𑀔𑀢𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀯𑀼𑀢𑁆𑀢𑀁. 𑀯𑀺𑀭𑀸𑀕𑁄𑀢𑀺𑀆𑀤𑀻𑀦𑀺 𑀘 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀢𑀜𑁆𑀳𑀺 𑀆𑀕𑀫𑁆𑀫 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀭𑀸𑀕𑀫𑀤𑀸𑀤𑀬𑁄 𑀫𑀤𑀸 𑀦𑀺𑀫𑁆𑀫𑀤𑀸 𑀳𑁄𑀦𑁆𑀢𑀺 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 ¶ , 𑀲𑀩𑁆𑀩𑀸 𑀧𑀺𑀧𑀸𑀲𑀸 𑀯𑀺𑀦𑀬𑀁 𑀉𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀆𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀸𑀦𑀺 𑀉𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀢𑀡𑁆𑀳𑀸 𑀔𑀻𑀬𑀢𑀺, 𑀲𑀩𑁆𑀩𑀧𑀭𑀺𑀴𑀸𑀳𑀸 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀯𑀝𑁆𑀝𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺 𑀦𑀺𑀩𑁆𑀩𑀸𑀬𑀢𑀺. 𑀢𑀲𑁆𑀫𑀸 𑀢𑀁 𑀏𑀢𑀸𑀦𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺.

𑀥𑀫𑁆𑀫𑁄 𑀘 𑀓𑀼𑀲𑀮𑀓𑁆𑀔𑀢𑁄𑀢𑀺 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀥𑀫𑁆𑀫𑁄 𑀘 𑀓𑀼𑀲𑀮𑁄 𑀅𑀦𑀯𑀚𑁆𑀚𑁄, 𑀅𑀦𑀯𑀚𑁆𑀚𑀢𑁆𑀢𑀸 𑀏𑀯 𑀧𑀝𑀺𑀧𑀓𑁆𑀔𑁂𑀳𑀺 𑀭𑀸𑀕𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀢𑀺𑀢𑁆𑀣𑀺𑀬𑀯𑀸𑀤𑁂𑀳𑀺 𑀘 𑀅𑀧𑀭𑀺𑀓𑁆𑀔𑀢𑁄. 𑀢𑀸𑀦𑀺 𑀢𑀻𑀡𑀺 𑀯𑀺𑀲𑀺𑀲𑁆𑀲𑀭𑁂𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀮𑁄𑀓𑁂 𑀲𑀩𑁆𑀩𑀭𑀢𑀦𑁂𑀳𑀺 𑀯𑀺𑀲𑀺𑀲𑁆𑀲𑀦𑁆𑀢𑀺 𑀕𑀼𑀡𑀯𑀲𑁂𑀦 𑀲𑀩𑁆𑀩𑀮𑁄𑀓𑀁 𑀅𑀢𑀺𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀡𑀧𑀤𑀼𑀫𑀲𑀜𑁆𑀘𑀬𑁄 𑀕𑀡𑁄𑀢𑀺 𑀧𑀤𑀼𑀫𑀲𑀤𑀺𑀲𑀸𑀦𑀁 𑀅𑀭𑀺𑀬𑀲𑀫𑀡𑀸𑀦𑀁 𑀲𑀫𑀽𑀳𑀲𑀗𑁆𑀔𑀸𑀢𑁄 𑀕𑀡𑁄. 𑀧𑀤𑀼𑀫𑀦𑁆𑀢𑀺 𑀳𑀺 𑀧𑀭𑀺𑀧𑀼𑀡𑁆𑀡𑀲𑀢𑀧𑀢𑁆𑀢𑀲𑁆𑀲 𑀲𑀭𑁄𑀭𑀼𑀳𑀲𑁆𑀲 𑀦𑀸𑀫𑀁. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀘 𑀲𑀩𑁆𑀩𑀣𑀸𑀧𑀺 𑀧𑀭𑀺𑀧𑀼𑀡𑁆𑀡𑀕𑀼𑀡𑀸𑀢𑀺 𑀧𑀤𑀼𑀫𑀲𑀤𑀺𑀲𑀸 𑀯𑀼𑀢𑁆𑀢𑀸. 𑀯𑀺𑀤𑀽𑀦𑀁 𑀲𑀓𑁆𑀓𑀢𑁄𑀢𑀺 𑀯𑀺𑀤𑀽𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀓𑁆𑀓𑀢𑁄. 𑀦𑀭𑀯𑀭𑀤𑀫𑀓𑁄𑀢𑀺 𑀦𑀭𑀯𑀭𑁄 𑀘 𑀧𑀼𑀭𑀺𑀲𑀸𑀦𑀁 𑀤𑀫𑀓𑁄 𑀦𑀸𑀬𑀓𑁄 𑀘𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀲𑁆𑀲 𑀉𑀢𑁆𑀢𑀭𑀻𑀢𑀺 𑀮𑁄𑀓𑀲𑁆𑀲 𑀉𑀧𑀭𑀺 𑀞𑀺𑀢𑀸𑀦𑀺, 𑀲𑀩𑁆𑀩𑀮𑁄𑀓𑁂 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄.

𑀦𑀺𑀭𑀼𑀧𑀤𑀸𑀳𑁄𑀢𑀺 𑀭𑀸𑀕𑀧𑀭𑀺𑀴𑀸𑀳𑀸𑀤𑀻𑀳𑀺 𑀅𑀦𑀼𑀧𑀤𑀸𑀳𑁄. 𑀲𑀘𑁆𑀘𑀦𑀸𑀫𑁄𑀢𑀺 𑀅𑀯𑀺𑀢𑀣𑀦𑀸𑀫𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀆𑀕𑀢𑀦𑀸𑀫𑁄. 𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀮𑁄𑀓𑀁 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀲𑀘𑁆𑀘𑀥𑀫𑁆𑀫𑁄𑀢𑀺 𑀯𑀝𑁆𑀝𑀢𑁄 𑀏𑀓𑀦𑁆𑀢𑀦𑀺𑀲𑁆𑀲𑀭𑀡𑀪𑀸𑀯𑁂𑀦 𑀅𑀯𑀺𑀢𑀣𑁄 𑀲𑀳 𑀧𑀭𑀺𑀬𑀢𑁆𑀢𑀺𑀬𑀸 𑀦𑀯𑀯𑀺𑀥𑁄𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄, 𑀢𑀢𑁄 𑀏𑀯 𑀦𑀢𑁆𑀣𑀜𑁆𑀜𑁄 𑀢𑀲𑁆𑀲 𑀉𑀢𑁆𑀢𑀭𑀻𑀢𑀺 𑀢𑀲𑁆𑀲 𑀉𑀢𑁆𑀢𑀭𑀺 𑀅𑀥𑀺𑀓𑀕𑀼𑀡𑁄 𑀅𑀜𑁆𑀜𑁄 𑀘 𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀲𑀗𑁆𑀖𑁄𑀯 𑀦𑀺𑀘𑁆𑀘𑀁 𑀲𑀩𑁆𑀩𑀓𑀸𑀮𑀁 𑀯𑀺𑀤𑀽𑀳𑀺 𑀲𑀩𑁆𑀩𑀧𑀡𑁆𑀟𑀺𑀢𑁂𑀳𑀺 𑀧𑀽𑀚𑀺𑀢𑁄.

‘‘𑀏𑀓𑀸𑀬𑀦’’𑀦𑁆𑀢𑀺 ¶ 𑀕𑀸𑀣𑀸𑀬 𑀏𑀓𑀸𑀬𑀦𑀦𑁆𑀢𑀺 𑀏𑀓𑀁 𑀫𑀕𑁆𑀕𑀁. 𑀫𑀕𑁆𑀕𑀲𑁆𑀲 𑀳𑀺 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀕𑀫𑁄’’𑀢𑀺. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧) 𑁋

𑀩𑀳𑀽𑀦𑀺 𑀦𑀸𑀫𑀸𑀦𑀺, 𑀲𑁆𑀯𑀸𑀬𑀁 𑀇𑀥 𑀅𑀬𑀦𑀦𑀸𑀫𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀏𑀓𑀸𑀬𑀦𑀦𑁆𑀢𑀺 𑀏𑀓𑀫𑀕𑁆𑀕𑀁, 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀏𑀓𑁂𑀦 𑀅𑀬𑀺𑀢𑀩𑁆𑀩𑀦𑁆𑀢𑀺 𑀏𑀓𑀸𑀬𑀦𑀁. 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀺𑀯𑁂𑀓𑀝𑁆𑀞𑁂𑀦 ¶ 𑀧𑀯𑀺𑀯𑀺𑀢𑁆𑀢𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀅𑀬𑀦𑁄, 𑀲𑀁𑀲𑀸𑀭𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀯𑀸 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑀲𑁆𑀲 𑀪𑀕𑀯𑀢𑁄 𑀅𑀬𑀦𑁄𑀢𑀺 𑀏𑀓𑀸𑀬𑀦𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑁂𑀦 𑀅𑀜𑁆𑀜𑁂𑀧𑀺 𑀅𑀬𑀦𑁆𑀢𑀺, 𑀢𑀣𑀸𑀧𑀺 𑀪𑀕𑀯𑀢𑁄𑀯 𑀲𑁄 𑀅𑀬𑀦𑁄, 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀬𑀣𑀸𑀳 𑁋 ‘‘𑀲𑁄 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁭𑁯). 𑀅𑀬𑀢𑀻𑀢𑀺 𑀯𑀸 𑀅𑀬𑀦𑁄, 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀇𑀫𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑀯𑀺𑀦𑀬𑁂 𑀅𑀬𑀦𑁄, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀏𑀓𑀸𑀬𑀦𑁄. 𑀬𑀣𑀸𑀳 𑁋 ‘‘𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪). 𑀅𑀧𑀺 𑀘 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀬 𑀧𑀯𑀢𑁆𑀢𑁄𑀧𑀺 𑀅𑀧𑀭𑀪𑀸𑀕𑁂 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀅𑀬𑀢𑀺 𑀕𑀘𑁆𑀙𑀢𑀻𑀢𑀺 𑀏𑀓𑀸𑀬𑀦𑁄, 𑀢𑀁 𑀏𑀓𑀸𑀬𑀦𑀁.

𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻𑀢𑀺 𑀚𑀸𑀢𑀺𑀬𑀸 𑀔𑀬𑀲𑀗𑁆𑀔𑀸𑀢𑁄 𑀅𑀦𑁆𑀢𑁄 𑀚𑀸𑀢𑀺𑀔𑀬𑀦𑁆𑀢𑁄. 𑀚𑀸𑀢𑀺𑀬𑀸 𑀅𑀘𑁆𑀘𑀦𑁆𑀢𑀔𑀬𑀦𑁆𑀢𑁄 𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀲𑁆𑀲𑀻𑀢𑀺 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻. ‘‘𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀏𑀓𑀸𑀬𑀦𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀪𑀕𑀯𑀸 𑀧𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄 𑀘 𑀢𑁂𑀦 𑀢𑁂𑀦 𑀳𑀺𑀢𑁂𑀦 𑀲𑀢𑁆𑀢𑁂 𑀅𑀦𑀼𑀓𑀫𑁆𑀧𑀢𑀻𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀏𑀓𑀸𑀬𑀦𑀪𑀸𑀯𑀁, 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀢𑀜𑁆𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀅𑀢𑀻𑀢𑀫𑀤𑁆𑀥𑀸𑀦𑀁 𑀓𑀸𑀫𑁄𑀖𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀢𑀭𑀺𑀁𑀲𑀼, 𑀬𑁂 𑀢𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀢𑀭𑀺𑀲𑁆𑀲𑀦𑁆𑀢𑀺, 𑀏𑀢𑀭𑀳𑀺 𑀘 𑀢𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀏𑀢𑁂𑀦𑁂𑀯 𑀫𑀕𑁆𑀕𑁂𑀦, 𑀦 𑀅𑀜𑁆𑀜𑁂𑀦𑀸𑀢𑀺. 𑀯𑀺𑀲𑀼𑀤𑁆𑀥𑀺𑀧𑁂𑀓𑁆𑀔𑀸𑀢𑀺 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑁂𑀦 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀁 𑀅𑀧𑁂𑀓𑁆𑀔𑀦𑁆𑀢𑀸, 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑀸𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀤𑀼𑀯𑀺𑀥𑀫𑁆𑀧𑀺 𑀲𑀸𑀲𑀦𑀧𑀝𑁆𑀞𑀸𑀦𑀁 𑀦𑀸𑀦𑀸𑀲𑀼𑀢𑁆𑀢𑀧𑀤𑀸𑀦𑀺 𑀉𑀤𑀸𑀳𑀭𑀦𑁆𑀢𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀳𑀺 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀮𑁄𑀓𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀲𑁆𑀲𑀦𑀪𑀸𑀕𑀺𑀬𑁂𑀦 𑀘 𑀪𑀸𑀯𑀦𑀸𑀪𑀸𑀕𑀺𑀬𑁂𑀦 𑀘𑀸𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂𑀦. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀫𑁂𑀯 𑀳𑀺 𑀤𑀲𑁆𑀲𑀦𑀪𑀸𑀕𑀺𑀬𑀁 𑀪𑀸𑀯𑀦𑀸𑀪𑀸𑀕𑀺𑀬𑀦𑁆𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘𑀸𑀢𑀺 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀳𑀺 𑀤𑀲𑁆𑀲𑀦𑀪𑀸𑀕𑀺𑀬𑀸𑀤𑀻𑀳𑀺 𑀘𑀸𑀢𑀺 𑀉𑀪𑀬𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂𑀢𑀺𑀆𑀤𑀺 𑀦𑀺𑀤𑁆𑀤𑀺𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑀓𑁄𑀝𑁆𑀞𑀸𑀲𑀲𑀳𑀺𑀢𑀁, 𑀲𑀁𑀓𑀺𑀮𑁂𑀲𑀢𑁆𑀣𑀤𑀻𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀏𑀯𑀁 𑀮𑁄𑀓𑀺𑀬𑀢𑁆𑀢𑀺𑀓𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀲𑀁𑀲𑀦𑁆𑀤𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀢𑀺𑀓𑀸𑀦𑀁 𑀲𑁂𑀲𑀧𑀤𑀸𑀦𑀜𑁆𑀘 𑀲𑀁𑀲𑀦𑁆𑀤𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀢𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 ¶ 𑀲𑀫𑀢𑀺𑀓𑁆𑀓𑀫𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺𑀧𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁 𑀮𑁄𑀓𑀺𑀬𑀫𑁂𑀯. 𑀢𑀣𑀸𑀧𑀺 𑀮𑁄𑀓𑀼𑀢𑁆𑀢𑀭𑀲𑀼𑀢𑁆𑀢𑀸𑀦𑀺 𑀯𑀺𑀬 𑀮𑁄𑀓𑀺𑀬𑀲𑀼𑀢𑁆𑀢𑀸𑀦𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀕𑁆𑀖𑀸𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀕𑁆𑀖𑀸𑀢𑀸𑀬𑀸𑀢𑀺 𑀧𑀳𑀸𑀦𑀸𑀬. 𑀲𑀼𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀼𑀢𑁆𑀢𑀢𑁆𑀣𑁄 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀘 𑀯𑁄𑀤𑀸𑀦𑀥𑀫𑁆𑀫𑀸 𑀯𑀺𑀬 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀦𑁂𑀦𑁂𑀯 𑀪𑀸𑀯𑀦𑀸𑀪𑀽𑀫𑀺 𑀅𑀥𑀺𑀕𑀦𑁆𑀢𑀩𑁆𑀩𑀸, 𑀢𑀲𑁆𑀫𑀸 ‘‘𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀲𑁆𑀲𑀦𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀅𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀛𑀸𑀦𑀪𑀸𑀯𑀦𑀸𑀧𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀪𑀸𑀯𑀦𑀸𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣’’𑀦𑁆𑀢𑀺 𑀘 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀢𑀺𑀓𑀧𑀤𑁂𑀳𑁂𑀯 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀩𑀻𑀚𑀺𑀦𑀸𑀢𑀺𑀆𑀤𑀻𑀲𑀼 𑀬𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀏𑀓𑀫𑁂𑀯 𑀅𑀢𑁆𑀢𑀪𑀸𑀯𑀁 𑀚𑀦𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀏𑀓𑀩𑀻𑀚𑀻 𑀦𑀸𑀫. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀏𑀓𑀩𑀻𑀚𑀻? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 ¶ 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀲𑁄 𑀏𑀓𑀁𑀬𑁂𑀯 𑀫𑀸𑀦𑀼𑀲𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀏𑀓𑀩𑀻𑀚𑀻’’𑀢𑀺 (𑀧𑀼. 𑀧. 𑁩𑁩).

𑀬𑁄 𑀧𑀦 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀓𑁄𑀮𑀁𑀓𑁄𑀮𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁…𑀧𑁂… 𑀧𑀭𑀸𑀬𑀡𑁄. 𑀲𑁄 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑁄𑀮𑀁𑀓𑁄𑀮𑁄’’𑀢𑀺 (𑀧𑀼. 𑀧. 𑁩𑁨).

𑀢𑀢𑁆𑀣 𑀓𑀼𑀮𑀸𑀦𑀻𑀢𑀺 𑀪𑀯𑁂. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸𑀢𑀺 𑀇𑀤𑀫𑁂𑀢𑁆𑀣 𑀤𑁂𑀲𑀦𑀸𑀫𑀢𑁆𑀢𑀫𑁂𑀯. 𑀬𑀸𑀯 𑀙𑀝𑁆𑀞𑀪𑀯𑀸 𑀲𑀁𑀲𑀭𑀦𑁆𑀢𑁄𑀧𑀺 𑀓𑁄𑀮𑀁𑀓𑁄𑀮𑁄 𑀳𑁄𑀢𑀺 𑀏𑀯.

𑀬𑁄 ¶ 𑀧𑀦 𑀲𑀢𑁆𑀢 𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀬𑀣𑀸𑀳 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄? 𑀇𑀥𑁂𑀓𑀘𑁆𑀘𑁄…𑀧𑁂… 𑀧𑀭𑀸𑀬𑀡𑁄. 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂 𑀘𑁂𑀯 𑀫𑀸𑀦𑀼𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 (𑀧𑀼. 𑀧. 𑁩𑁧).

𑀓𑁄 𑀧𑀦 𑀢𑁂𑀲𑀁 𑀏𑀢𑀁 𑀧𑀪𑁂𑀤𑀁 𑀦𑀺𑀬𑀫𑁂𑀢𑀻𑀢𑀺? 𑀓𑁂𑀘𑀺 𑀢𑀸𑀯 ‘‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀧𑀞𑀫𑀫𑀕𑁆𑀕𑁄’’, 𑀓𑁂𑀘𑀺 ‘‘𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸’’. 𑀓𑁂𑀘𑀺 ‘‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸’’𑀢𑀺. 𑀢𑀢𑁆𑀣 𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻𑀢𑀺 𑀯𑀸𑀤𑁂 𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀓𑀢𑁄 𑀦𑀸𑀫 𑀳𑁄𑀢𑀺. 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀭𑀼𑀧𑀦𑀺𑀲𑁆𑀲𑀬𑀸 𑀉𑀧𑁆𑀧𑀦𑁆𑀦𑀸𑀢𑀺 𑀆𑀧𑀚𑁆𑀚𑀢𑀺. 𑀧𑀞𑀫𑀫𑀕𑁆𑀕𑁄 𑀦𑀺𑀬𑀫𑁂𑀢𑀻𑀢𑀺 𑀯𑀸𑀤𑁂 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺. 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀬𑀫𑁂𑀦𑁆𑀢𑀻𑀢𑀺 𑀯𑀸𑀤𑁂 ‘‘𑀧𑀞𑀫𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀆𑀧𑀚𑁆𑀚𑀢𑀺. 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻𑀢𑀺 𑀯𑀸𑀤𑁄 𑀧𑀦 𑀬𑀼𑀚𑁆𑀚𑀢𑀺. 𑀲𑀘𑁂 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺. 𑀢𑀢𑁄 𑀫𑀦𑁆𑀤𑀢𑀭𑀸 𑀓𑁄𑀮𑀁𑀓𑁄𑀮𑁄. 𑀢𑀢𑁄 𑀫𑀦𑁆𑀤𑀢𑀭𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺. 𑀏𑀢𑁆𑀣 𑀘 𑀬𑁄 𑀫𑀦𑀼𑀲𑁆𑀲𑁂𑀲𑀼 𑀏𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀬𑁄 𑀘 ¶ 𑀤𑁂𑀯𑁂𑀲𑀼𑀬𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀇𑀫𑁂 𑀦 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀬𑁄 𑀧𑀦 𑀓𑀸𑀮𑁂𑀦 𑀤𑁂𑀯𑁂𑀲𑀼, 𑀓𑀸𑀮𑁂𑀦 𑀫𑀦𑀼𑀲𑁆𑀲𑁂𑀲𑀽𑀢𑀺 𑀯𑁄𑀫𑀺𑀲𑁆𑀲𑀓𑀦𑀬𑁂𑀦 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 𑀇𑀤𑀁 𑀇𑀥𑀝𑁆𑀞𑀓𑀯𑁄𑀓𑀺𑀡𑁆𑀡𑀯𑀝𑁆𑀝𑀚𑁆𑀛𑀸𑀲𑀬𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀝𑁆𑀝𑀚𑁆𑀛𑀸𑀲𑀬𑁄 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺.

𑀢𑀢𑁆𑀣 𑀬𑁄 𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺. 𑀨𑀮𑀓𑁆𑀔𑀡𑁂 𑀧𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀏𑀓𑀩𑀻𑀚𑀺𑀆𑀤𑀺𑀪𑁂𑀤𑁄 𑀳𑁄𑀢𑀺. 𑀬𑁄 𑀧𑀦 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫. 𑀨𑀮𑀓𑁆𑀔𑀡𑁂 𑀧𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀏𑀓𑀩𑀻𑀚𑀺𑀆𑀤𑀺𑀪𑁂𑀤𑁄 𑀳𑁄𑀢𑀺. 𑀇𑀤𑀜𑁆𑀘 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀮𑀸𑀪𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁. 𑀮𑀸𑀪𑀻 𑀧𑀦 𑀨𑀮𑀓𑁆𑀔𑀡𑁂 𑀓𑀸𑀬𑀲𑀓𑁆𑀔𑀻 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀓𑀸𑀬𑀲𑀓𑁆𑀔𑀺𑀦𑀸𑀫𑀓𑀸 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸, 𑀢𑁂 𑀏𑀓𑀩𑀻𑀚𑀺𑀆𑀤𑀻𑀳𑀺 𑀢𑀻𑀳𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀘𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀏𑀓𑀩𑀻𑀚𑀺𑀦𑀸…𑀧𑁂… 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑀸’’𑀢𑀺, 𑀏𑀯𑀁 𑀧𑀜𑁆𑀘𑀳𑀺.

𑀤𑁆𑀯𑀸𑀤𑀲𑀳𑀺 ¶ 𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑁄, 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑁄, 𑀅𑀪𑁂𑀤𑁂𑀦 𑀅𑀦𑀸𑀕𑀸𑀫𑀻, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀆𑀤𑀬𑁄 𑀧𑀜𑁆𑀘, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀓𑀸𑀬𑀲𑀓𑁆𑀔𑀺𑀦𑁄 𑀢𑀬𑁄𑀢𑀺 𑀪𑁂𑀤𑁂𑀦 𑀅𑀝𑁆𑀞𑀸𑀢𑀺, 𑀏𑀯𑀁 𑀤𑁆𑀯𑀸𑀤𑀲𑀳𑀺. 𑀢𑀢𑁆𑀣 𑀳𑀺 𑀬𑁄 𑀅𑀯𑀺𑀳𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀬𑀼𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀬𑁄 𑀧𑀦 𑀆𑀬𑀼𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻. 𑀢𑀣𑀸 𑀬𑁄 𑀅𑀯𑀺𑀳𑀸𑀤𑀻𑀲𑀼 𑀉𑀧𑀧𑀦𑁆𑀦𑁄 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀁 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀬𑁄 𑀧𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀁 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻. 𑀉𑀤𑁆𑀥𑀁 𑀉𑀧𑀭𑀽𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀢𑁆𑀢𑀺𑀲𑁄𑀢𑁄 𑀏𑀢𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑁄. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀓𑀦𑀺𑀝𑁆𑀞𑁂 𑀕𑀘𑁆𑀙𑀢𑀻𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻.

𑀢𑀢𑁆𑀣 𑀅𑀢𑁆𑀣𑀺 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀅𑀢𑁆𑀣𑀺 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀢𑁆𑀣𑀺 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀅𑀢𑁆𑀣𑀺 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺. 𑀢𑀢𑁆𑀣 𑀬𑁄 𑀇𑀥 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀅𑀯𑀺𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 ¶ 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀯𑀺𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣𑁂𑀯 𑀅𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀫𑁆𑀧𑀺 𑀅𑀧𑁆𑀧𑀢𑁆𑀯𑀸 𑀉𑀧𑀭𑀽𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀇𑀢𑁄 𑀘𑀯𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀯𑀺𑀳𑀸𑀤𑀻𑀲𑀼 𑀘𑀢𑀽𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀤𑀬𑁄 𑀯𑀼𑀢𑁆𑀢𑀯𑀺𑀪𑀸𑀕𑀸𑀬𑁂𑀯.

𑀦𑀯𑀳𑀺 𑀧𑀼𑀕𑁆𑀕𑀮𑁂𑀳𑀻𑀢𑀺 𑀏𑀢𑁆𑀣 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀮𑀸𑀪𑀻 𑀅𑀭𑀳𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀢𑁂𑀲𑀁 𑀧𑀦 𑀮𑀸𑀪𑀻 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑀯𑀲𑁂𑀦 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑀲𑀗𑁆𑀔𑀸𑀢𑀢𑁄 𑀉𑀪𑀢𑁄 𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀲𑀫𑀲𑀻𑀲𑀺𑀦𑀸𑀢𑀺 𑀏𑀢𑁆𑀣 𑀢𑀺𑀯𑀺𑀥𑁄 𑀲𑀫𑀲𑀻𑀲𑀻 𑁋 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺.

𑀢𑀢𑁆𑀭 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀬𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀺, 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂 𑀏𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀧𑀮𑀺𑀩𑁄𑀥𑀲𑀻𑀲𑀁 𑀢𑀡𑁆𑀳𑀸, 𑀩𑀦𑁆𑀥𑀦𑀲𑀻𑀲𑀁 𑀫𑀸𑀦𑁄, 𑀧𑀭𑀸𑀫𑀸𑀲𑀲𑀻𑀲𑀁 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀲𑀻𑀲𑀁 𑀉𑀤𑁆𑀥𑀘𑁆𑀘𑀁, 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸, 𑀅𑀥𑀺𑀫𑁄𑀓𑁆𑀔𑀲𑀻𑀲𑀁 𑀲𑀤𑁆𑀥𑀸, 𑀧𑀕𑁆𑀕𑀳𑀲𑀻𑀲𑀁 𑀯𑀻𑀭𑀺𑀬𑀁, 𑀉𑀧𑀝𑁆𑀞𑀸𑀦𑀲𑀻𑀲𑀁 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀲𑀻𑀲𑀁 𑀲𑀫𑀸𑀥𑀺, 𑀤𑀲𑁆𑀲𑀦𑀲𑀻𑀲𑀁 𑀧𑀜𑁆𑀜𑀸, 𑀧𑀯𑀢𑁆𑀢𑀲𑀻𑀲𑀁 ¶ 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀘𑀭𑀲𑀻𑀲𑀁 𑀯𑀺𑀫𑁄𑀓𑁆𑀔𑁄, 𑀲𑀗𑁆𑀔𑀸𑀭𑀲𑀻𑀲𑀁 𑀦𑀺𑀭𑁄𑀥𑁄𑀢𑀺 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀅𑀯𑀺𑀚𑁆𑀚𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀜𑁆𑀜𑀁 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁. 𑀬𑀲𑁆𑀲 𑀘𑁂𑀢𑀁 𑀲𑀻𑀲𑀤𑁆𑀯𑀬𑀁 𑀲𑀫𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀲𑁄 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫.

𑀓𑀣𑀁 ¶ 𑀧𑀦𑀺𑀤𑀁 𑀲𑀫𑀁 𑀳𑁄𑀢𑀻𑀢𑀺? 𑀯𑀸𑀭𑀲𑀫𑀢𑀸𑀬. 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀺 𑀦𑀸𑀫. 𑀢𑁂𑀦𑀸𑀬𑀁 𑀧𑀼𑀕𑁆𑀕𑀮𑁄 ‘‘𑀚𑀻𑀯𑀺𑀢𑀲𑀫𑀲𑀻𑀲𑀻’’𑀢𑀺 𑀯𑀼𑀘𑁆𑀘𑀢𑀺, 𑀅𑀬𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀏𑀯𑀁 𑀲𑀼𑀜𑁆𑀜𑀢𑀯𑀺𑀫𑀼𑀢𑁆𑀢𑀸𑀤𑀬𑁄 𑀢𑀬𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀲𑀫𑀲𑀻𑀲𑀻𑀢𑀺 𑀲𑀢𑁆𑀢 𑀲𑀸𑀯𑀓𑀸 𑀅𑀭𑀳𑀦𑁆𑀢𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀧𑀼𑀕𑁆𑀕𑀮𑁂𑀳𑀺 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀭𑀸𑀕𑀘𑀭𑀺𑀢𑁄𑀢𑀺 𑀭𑀸𑀕𑀲𑀳𑀺𑀢𑀁 𑀘𑀭𑀺𑀢𑀁 𑀏𑀢𑀲𑁆𑀲𑀸𑀢𑀺 𑀭𑀸𑀕𑀘𑀭𑀺𑀢𑁄. 𑀭𑀸𑀕𑁂𑀦 𑀯𑀸 𑀘𑀭𑀺𑀢𑁄 𑀧𑀯𑀢𑁆𑀢𑀺𑀢𑁄 𑀭𑀸𑀕𑀘𑀭𑀺𑀢𑁄, 𑀭𑀸𑀕𑀚𑁆𑀛𑀸𑀲𑀬𑁄 𑀭𑀸𑀕𑀸𑀥𑀺𑀓𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀭𑀸𑀕𑀫𑀼𑀔𑁂 𑀞𑀺𑀢𑁄𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂 𑀞𑀺𑀢𑁄, 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀮𑁄𑀓𑀺𑀬𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀮𑁄𑀓𑀺𑀬𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀳𑀺 𑀲𑀼𑀢𑁆𑀢𑀁 𑀭𑀸𑀕𑀘𑀭𑀺𑀢𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 ‘‘𑀮𑁄𑀓𑀺𑀬𑀁, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀧𑀤𑀤𑁆𑀯𑀬𑀁 𑀅𑀦𑀼𑀯𑀢𑁆𑀢𑀫𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀸𑀲𑀦𑀸𑀪𑀸𑀕𑀺𑀬’’𑀦𑁆𑀢𑀺. 𑀲𑀻𑀮𑀯𑀦𑁆𑀢𑁂𑀳𑀻𑀢𑀺 𑀲𑀻𑀮𑀯𑀦𑁆𑀢𑀸𑀤𑀻𑀳𑀺 𑀧𑀼𑀕𑁆𑀕𑀮𑁂𑀳𑀺. 𑀧𑀓𑀢𑀺𑀲𑀻𑀮𑀦𑁆𑀢𑀺𑀆𑀤𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀢𑁂 𑀧𑀼𑀕𑁆𑀕𑀮𑀸. 𑀢𑁂𑀲𑀁 𑀤𑀲𑁆𑀲𑀦𑁂𑀦 𑀧𑀼𑀕𑁆𑀕𑀮𑀸𑀦𑀁 𑀉𑀧𑀮𑀓𑁆𑀔𑀡𑀁. 𑀅𑀣 𑀯𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀧𑀓𑀢𑀺𑀲𑀻𑀮𑀸𑀤𑀺𑀯𑀲𑁂𑀦, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀧𑀓𑀢𑀺𑀲𑀻𑀮𑀯𑀦𑁆𑀢𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀲 𑀦𑀬𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀻𑀮𑀯𑀦𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀧𑀓𑀢𑀺𑀲𑀻𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀧𑀓𑀢𑀺𑀲𑀻𑀮𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀏𑀯 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀧𑀢𑁆𑀢𑀺𑀤𑀸𑀦𑀅𑀩𑁆𑀪𑀦𑀼𑀫𑁄𑀤𑀦𑀥𑀫𑁆𑀫𑀲𑁆𑀲𑀯𑀦𑀤𑁂𑀲𑀦𑀸𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀸𑀤𑀻𑀦𑀫𑁆𑀧𑀺 𑀘𑁂𑀢𑁆𑀣 𑀲𑀫𑁆𑀪𑀯𑀢𑁄. 𑀢𑁂𑀲𑀫𑁆𑀧𑀺 𑀯𑀸 𑀏𑀢𑁆𑀣𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀧𑀓𑀢𑀺𑀲𑀻𑀮𑀦𑁆𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀻𑀮𑀁. 𑀘𑀺𑀢𑁆𑀢𑀧𑁆𑀧𑀲𑀸𑀤𑁄𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸 𑀭𑀢𑀦𑀢𑁆𑀢𑀬𑀲𑀤𑁆𑀥𑀸 𑀘. 𑀜𑀸𑀡𑀁 𑀧𑀜𑁆𑀜𑀸𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀜𑀸 𑀆𑀕𑀢𑀸, 𑀢𑀁 𑀲𑀼𑀢𑁆𑀢𑀁 𑀜𑀸𑀡𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀦 𑀓𑁂𑀯𑀮𑀁 𑀧𑀜𑁆𑀜𑀸𑀧𑀭𑀺𑀬𑀸𑀬𑁂𑀦𑁂𑀯, 𑀅𑀣 𑀔𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀭𑀺𑀬𑀸𑀬𑁂𑀦𑀧𑀺 𑀬𑀢𑁆𑀣 𑀧𑀜𑁆𑀜𑀸 𑀆𑀕𑀢𑀸, 𑀢𑀁 𑀲𑀼𑀢𑁆𑀢𑀁 𑀜𑀸𑀡𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. 𑀬𑀁 𑀯𑀸 𑀧𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀜𑁆𑀜𑀸𑀬 𑀅𑀥𑀺𑀯𑀘𑀦𑀁. 𑀲𑀩𑁆𑀩𑀁 𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀆𑀕𑀢𑀁, 𑀢𑀁 𑀲𑀼𑀢𑁆𑀢𑀁 𑀜𑀸𑀡𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀳𑀻𑀢𑀺 ¶ 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀩𑀸𑀳𑀺𑀭𑀸𑀦𑀺 𑀘 𑀆𑀬𑀢𑀦𑀸𑀦𑀺 𑀆𑀕𑀢𑀸𑀦𑀺, 𑀢𑀁 𑀲𑀼𑀢𑁆𑀢𑀁 𑀢𑁂𑀳𑀺 𑀆𑀬𑀢𑀦𑁂𑀳𑀺 𑀜𑀸𑀡𑀁 𑀜𑁂𑀬𑁆𑀬𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀧𑀜𑁆𑀜𑀸𑀧𑀺 𑀆𑀭𑀫𑁆𑀫𑀡𑀪𑀽𑀢𑀸 𑀜𑁂𑀬𑁆𑀬𑀦𑁆𑀢𑀺 𑀜𑁂𑀬𑁆𑀬𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀧𑀜𑁆𑀜𑀸 𑀜𑀸𑀡𑀦𑁆𑀢𑀭𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀜𑁂𑀬𑁆𑀬𑀪𑀸𑀯𑁂𑀦𑀧𑀺 𑀯𑀼𑀘𑁆𑀘𑀢𑀺. 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀪𑀽𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀜𑀸𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀭𑀽𑀧𑀸𑀤𑀺. 𑀅𑀚𑁆𑀛𑀢𑁆𑀢𑀺𑀓𑀁 𑀯𑀸 𑀩𑀸𑀳𑀺𑀭𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀑𑀴𑀸𑀭𑀺𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀁 𑀢𑀁 𑀲𑀗𑁆𑀔𑀢𑁂𑀦 𑀅𑀲𑀗𑁆𑀔𑀢𑁂𑀦 𑀘𑀸𑀢𑀺 𑀲𑀩𑁆𑀩𑀁 𑀢𑀁 𑀬𑀣𑀸𑀲𑀫𑁆𑀪𑀯𑀁 𑀲𑀗𑁆𑀔𑀢𑀪𑀸𑀯𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦 𑀘 𑀜𑁂𑀬𑁆𑀬𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀜𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀳𑀺 𑀜𑁂𑀬𑁆𑀬𑀲𑀼𑀢𑁆𑀢𑀁 𑀜𑁂𑀬𑁆𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀪𑀕𑀯𑀸 𑀅𑀜𑁆𑀜𑀢𑀭𑀯𑀘𑀦𑀁 𑀪𑀸𑀲𑀢𑀻𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀤𑀺𑀲𑀼𑀢𑁆𑀢𑁂𑀲𑀼 𑀏𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑁆𑀯𑁂. 𑀢𑁂𑀲𑀼 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀅𑀜𑁆𑀜𑀢𑀭𑀯𑀘𑀦𑀁 𑀏𑀓𑀲𑁆𑀲𑁂𑀯 𑀓𑀣𑀦𑀁 𑀪𑀸𑀲𑀢𑀺 𑀦𑀺𑀤𑁆𑀤𑀺𑀲𑀢𑀺. 𑀲𑀩𑁆𑀩𑀁 𑀢𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀁 𑀥𑀸𑀭𑀬𑀺𑀢𑀩𑁆𑀩𑀦𑁆𑀢𑀺 𑀢𑀁 𑀬𑀣𑀸 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀮𑁄𑀓𑀺𑀬𑀸𑀤𑀻𑀲𑀼 𑀬𑀤𑀺 𑀅𑀜𑁆𑀜𑀢𑀭𑀯𑀲𑁂𑀦, 𑀅𑀣 𑀉𑀪𑀬𑀯𑀲𑁂𑀦 𑀬𑀣𑀸 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑀁, 𑀢𑀁 𑀢𑀁 𑀧𑀥𑀸𑀦𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀮𑁂𑀲𑀲𑀳𑀺𑀢𑀜𑁆𑀜𑁂𑀯 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀳𑁂𑀢𑀼, 𑀦 𑀇𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀯𑀺𑀥𑁄 𑀳𑁂𑀢𑀼 𑀬𑀜𑁆𑀘 𑀓𑀫𑁆𑀫𑀁 𑀬𑁂 𑀘 𑀓𑀺𑀮𑁂𑀲𑀸’’𑀢𑀺. 𑀲𑀫𑀼𑀤𑀬𑁄 𑀓𑀺𑀮𑁂𑀲𑀸𑀢𑀺 𑀏𑀢𑁆𑀣 ‘‘𑀲𑀫𑀼𑀤𑀬𑁄’’𑀢𑀺 𑀏𑀢𑁂𑀦 𑀲𑀫𑀼𑀤𑀬𑀧𑀓𑁆𑀔𑀺𑀬𑀸 𑀯𑀼𑀢𑁆𑀢𑀸. ‘‘𑀓𑀺𑀮𑁂𑀲𑀸’’𑀢𑀺 𑀘 𑀓𑀺𑀮𑁂𑀲𑀯𑀦𑁆𑀢𑁄, 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀬𑀁 𑀤𑀺𑀲𑁆𑀲𑀢𑀻𑀢𑀺 𑀬𑀁 𑀬𑀁 𑀤𑀺𑀲𑁆𑀲𑀢𑀺. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀽𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀆𑀤𑀻𑀲𑀼. 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑁂𑀦𑀸𑀢𑀺 𑀓𑀧𑁆𑀧𑀺𑀬𑁂𑀦 𑀘 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑁂𑀦 𑀘. 𑀢𑀢𑁆𑀣 𑀓𑀧𑁆𑀧𑀺𑀬𑀁 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀯𑀼𑀢𑁆𑀢𑀁, 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀁 𑀫𑀳𑀸𑀧𑀤𑁂𑀲𑀯𑀲𑁂𑀦 𑀦𑀬𑀢𑁄 𑀤𑀲𑁆𑀲𑀺𑀢𑀁. 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀭𑀡𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀢𑀸 𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀏𑀓𑀦𑁆𑀢𑁂𑀦 𑀲𑀭𑀸𑀕𑀸𑀤𑀺𑀲𑀁𑀯𑀢𑁆𑀢𑀦𑀫𑁂𑀯 𑀳𑀺 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑀸𑀤𑀺𑀓𑀸𑀭𑀡𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 ¶ . 𑀥𑀫𑁆𑀫𑀲𑁆𑀲𑀸𑀢𑀺 𑀅𑀲𑀗𑁆𑀔𑀢𑀥𑀫𑁆𑀫𑀲𑁆𑀲. 𑀅𑀭𑀺𑀬𑀥𑀫𑁆𑀫𑀸𑀦𑀦𑁆𑀢𑀺 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣 𑀘 𑀬𑀣𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑀢𑁄 𑀅𑀦𑁂𑀓𑀯𑀺𑀥𑁄 𑀧𑀝𑁆𑀞𑀸𑀦𑀪𑁂𑀤𑁄 𑀇𑀘𑁆𑀙𑀺𑀢𑁄, 𑀏𑀯𑀁 𑀮𑁄𑀓𑀺𑀬𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸𑀤𑀺𑀲𑀁𑀲𑀕𑁆𑀕𑀢𑁄𑀧𑀺 𑀅𑀦𑁂𑀓𑀯𑀺𑀥𑁄 𑀧𑀝𑁆𑀞𑀸𑀦𑀪𑁂𑀤𑁄 𑀲𑀫𑁆𑀪𑀯𑀢𑀺. 𑀧𑀸𑀴𑀺𑀬𑀁 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀏𑀓𑀤𑁂𑀲𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑀢𑁆𑀢𑀸 𑀦𑀬𑀤𑀲𑁆𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀓𑁆𑀓𑀸 𑀳𑀺 𑀇𑀫𑀺𑀦𑀸 ¶ 𑀦𑀬𑁂𑀦 𑀯𑀺𑀜𑁆𑀜𑀼𑀦𑀸 𑀢𑁂 𑀦𑀺𑀤𑁆𑀥𑀸𑀭𑁂𑀢𑀼𑀦𑁆𑀢𑀺. 𑀬𑀣𑀸 𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 𑀮𑁄𑀓𑀺𑀬𑀸𑀤𑀻𑀦𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀁𑀲𑀕𑁆𑀕𑀪𑁂𑀤𑀯𑀲𑁂𑀦 𑀅𑀬𑀁 𑀧𑀝𑁆𑀞𑀸𑀦𑀪𑁂𑀤𑁄 𑀅𑀦𑁂𑀓𑀯𑀺𑀥𑁄 𑀮𑀩𑁆𑀪𑀢𑀺, 𑀏𑀯𑀁 𑀉𑀪𑀬𑁂𑀲𑀫𑁆𑀧𑀺 𑀲𑀁𑀲𑀕𑁆𑀕𑀯𑀲𑁂𑀦 𑀅𑀬𑀁 𑀦𑀬𑁄 𑀬𑀣𑀸𑀭𑀳𑀁 𑀮𑀩𑁆𑀪𑀢𑁂𑀯. 𑀮𑀩𑁆𑀪𑀢𑀺 𑀳𑀺 𑀮𑁄𑀓𑀺𑀬𑀁 𑀲𑀼𑀢𑁆𑀢𑀁 𑀓𑀺𑀜𑁆𑀘𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁, 𑀓𑀺𑀜𑁆𑀘𑀺 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀢𑀣𑀸 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁 𑀓𑀺𑀜𑁆𑀘𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, 𑀓𑀺𑀜𑁆𑀘𑀺 𑀅𑀲𑁂𑀓𑁆𑀔𑀪𑀸𑀕𑀺𑀬𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀲𑁄𑀴𑀲𑀯𑀺𑀥𑁂 𑀧𑀝𑁆𑀞𑀸𑀦𑁂 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀧𑀝𑁆𑀞𑀸𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸, 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂 𑀘 𑀧𑀝𑁆𑀞𑀸𑀦𑁂 𑀲𑁄𑀴𑀲𑀯𑀺𑀥𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀭𑀳𑀁 𑀤𑀼𑀓𑀢𑀺𑀓𑀸𑀤𑀺𑀪𑁂𑀤𑁂𑀦 𑀲𑀫𑁆𑀪𑀯𑀢𑁄 𑀧𑀝𑁆𑀞𑀸𑀦𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀔𑁄 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀮𑀩𑁆𑀪𑀫𑀸𑀦𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀯𑀲𑁂𑀦. 𑀬𑀲𑁆𑀫𑀸 𑀧𑀦 𑀢𑀸𑀦𑀺 𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀉𑀤𑀸𑀳𑀭𑀡𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑀧𑀜𑁆𑀘𑁄 𑀳𑁄𑀢𑀺, 𑀅𑀢𑀺𑀪𑀸𑀭𑀺𑀬𑀸 𑀘 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸, 𑀲𑀓𑁆𑀓𑀸 𑀘 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀜𑁆𑀜𑀼𑀦𑀸 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀢𑀲𑁆𑀫𑀸 𑀦 𑀢𑀁 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀢𑁂𑀦𑁂𑀯 𑀳𑀺 𑀧𑀸𑀴𑀺𑀬𑀁 𑀅𑀜𑁆𑀜𑀫𑀜𑁆𑀜𑀲𑀁𑀲𑀕𑁆𑀕𑀯𑀲𑁂𑀦 𑀧𑀝𑁆𑀞𑀸𑀦𑀯𑀺𑀪𑀸𑀕𑁄 𑀏𑀓𑀤𑁂𑀲𑁂𑀦𑁂𑀯 𑀤𑀲𑁆𑀲𑀺𑀢𑁄, 𑀦 𑀦𑀺𑀧𑁆𑀧𑀤𑁂𑀲𑀢𑁄𑀢𑀺.

𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 ¶ 𑀘 𑁋

𑀳𑀸𑀭𑁂 𑀦𑀬𑁂 𑀘 𑀧𑀝𑁆𑀞𑀸𑀦𑁂, 𑀲𑀼𑀯𑀺𑀲𑀼𑀤𑁆𑀥𑀯𑀺𑀦𑀺𑀘𑁆𑀙𑀬𑀁;

𑀯𑀺𑀪𑀚𑀦𑁆𑀢𑁄 𑀦𑀯𑀗𑁆𑀕𑀲𑁆𑀲, 𑀲𑀸𑀲𑀦𑀲𑁆𑀲𑀢𑁆𑀣𑀯𑀡𑁆𑀡𑀦𑀁.

𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀥𑀻𑀭𑁄, 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀜𑁆𑀘 𑀬𑀁;

𑀅𑀤𑁂𑀲𑀬𑀺 𑀫𑀳𑀸𑀣𑁂𑀭𑁄, 𑀫𑀳𑀸𑀓𑀘𑁆𑀘𑀸𑀬𑀦𑁄 𑀯𑀲𑀻.

𑀲𑀤𑁆𑀥𑀫𑁆𑀫𑀸𑀯𑀢𑀭𑀝𑁆𑀞𑀸𑀦𑁂, 𑀧𑀝𑁆𑀝𑀦𑁂 𑀦𑀸𑀕𑀲𑀯𑁆𑀳𑀬𑁂;

𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚-𑀯𑀺𑀳𑀸𑀭𑁂 𑀯𑀲𑀢𑀸 𑀫𑀬𑀸.

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀬𑀸 𑀢𑀲𑁆𑀲, 𑀆𑀭𑀤𑁆𑀥𑀸 𑀅𑀢𑁆𑀣𑀯𑀡𑁆𑀡𑀦𑀸;

𑀉𑀤𑀸𑀳𑀭𑀡𑀲𑀼𑀢𑁆𑀢𑀸𑀦𑀁, 𑀮𑀓𑁆𑀔𑀡𑀸𑀦𑀜𑁆𑀘 𑀲𑀩𑁆𑀩𑀲𑁄.

𑀅𑀢𑁆𑀣𑀁 ¶ 𑀧𑀓𑀸𑀲𑀬𑀦𑁆𑀢𑀻 𑀲𑀸, 𑀅𑀦𑀸𑀓𑀼𑀮𑀯𑀺𑀦𑀺𑀘𑁆𑀙𑀬𑀸;

𑀲𑀫𑀢𑁆𑀢𑀸 𑀲𑀢𑁆𑀢𑀯𑀻𑀲𑀸𑀬, 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑀢𑁄.

𑀇𑀢𑀺 𑀢𑀁 𑀲𑀗𑁆𑀔𑀭𑁄𑀦𑁆𑀢𑁂𑀦, 𑀬𑀁 𑀢𑀁 𑀅𑀥𑀺𑀕𑀢𑀁 𑀫𑀬𑀸;

𑀧𑀼𑀜𑁆𑀜𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑀁.

𑀑𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀸𑀬, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸;

𑀲𑀩𑁆𑀩𑁂𑀧𑀺 𑀤𑁂𑀳𑀺𑀦𑁄 𑀳𑁄𑀦𑁆𑀢𑀼, 𑀯𑀺𑀫𑀼𑀢𑁆𑀢𑀺𑀭𑀲𑀪𑀸𑀕𑀺𑀦𑁄.

𑀘𑀺𑀭𑀁 ¶ 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀁;

𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀦𑀺𑀘𑁆𑀘𑀁, 𑀳𑁄𑀦𑁆𑀢𑀼 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄.

𑀲𑀫𑁆𑀫𑀸 𑀯𑀲𑁆𑀲𑀢𑀼 𑀓𑀸𑀮𑁂𑀦, 𑀤𑁂𑀯𑁄𑀧𑀺 𑀚𑀕𑀢𑀻𑀧𑀢𑀺;

𑀲𑀤𑁆𑀥𑀫𑁆𑀫𑀦𑀺𑀭𑀢𑁄 𑀮𑁄𑀓𑀁, 𑀥𑀫𑁆𑀫𑁂𑀦𑁂𑀯 𑀧𑀲𑀸𑀲𑀢𑀽𑀢𑀺.

𑀇𑀢𑀺 𑀩𑀤𑀭𑀢𑀺𑀢𑁆𑀣𑀯𑀺𑀳𑀸𑀭𑀯𑀸𑀲𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑁂𑀦 𑀓𑀢𑀸

𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸𑀢𑀺.

𑀦𑁂𑀢𑁆𑀢𑀺𑀧𑁆𑀧𑀓𑀭𑀡-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.