📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀧𑀸𑀴𑀺

𑁧. 𑀲𑀗𑁆𑀕𑀳𑀯𑀸𑀭𑁄

𑀬𑀁 ¶ ¶ ¶ 𑀮𑁄𑀓𑁄 𑀧𑀽𑀚𑀬𑀢𑁂, 𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲.

𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘;

𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀉𑀪𑀬𑀁, 𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀁 𑀓𑀢𑀫𑀁.

𑀲𑁄𑀴𑀲𑀳𑀸𑀭𑀸 𑀦𑁂𑀢𑁆𑀢𑀺 [𑀦𑁂𑀢𑁆𑀢𑀻 (𑀓.)], 𑀧𑀜𑁆𑀘𑀦𑀬𑀸 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀺;

𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀸, 𑀫𑀳𑀓𑀘𑁆𑀘𑀸𑀦𑁂𑀦 [𑀫𑀳𑀸𑀓𑀘𑁆𑀘𑀸𑀦𑁂𑀦 (𑀲𑀻.)] 𑀦𑀺𑀤𑁆𑀤𑀺𑀝𑁆𑀞𑀸.

𑀳𑀸𑀭𑀸 ¶ 𑀩𑁆𑀬𑀜𑁆𑀚𑀦𑀯𑀺𑀘𑀬𑁄, 𑀲𑀼𑀢𑁆𑀢𑀲𑁆𑀲 𑀦𑀬𑀸 𑀢𑀬𑁄 𑀘 𑀲𑀼𑀢𑁆𑀢𑀢𑁆𑀣𑁄;

𑀉𑀪𑀬𑀁 𑀧𑀭𑀺𑀕𑁆𑀕𑀳𑀻𑀢𑀁, 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁 𑀬𑀣𑀸𑀲𑀼𑀢𑁆𑀢𑀁.

𑀬𑀸 𑀘𑁂𑀯 𑀤𑁂𑀲𑀦𑀸 𑀬𑀜𑁆𑀘, 𑀤𑁂𑀲𑀺𑀢𑀁 𑀉𑀪𑀬𑀫𑁂𑀯 𑀯𑀺𑀜𑁆𑀜𑁂𑀬𑁆𑀬𑀁;

𑀢𑀢𑁆𑀭𑀸𑀬𑀫𑀸𑀦𑀼𑀧𑀼𑀩𑁆𑀩𑀻, 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻𑀢𑀺.

𑀲𑀗𑁆𑀕𑀳𑀯𑀸𑀭𑁄.

𑁨. 𑀉𑀤𑁆𑀤𑁂𑀲𑀯𑀸𑀭𑁄

𑁧. 𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸? 𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺 𑀧𑀤𑀝𑁆𑀞𑀸𑀦𑁄 𑀮𑀓𑁆𑀔𑀡𑁄 𑀘𑀢𑀼𑀩𑁆𑀬𑀽𑀳𑁄 𑀆𑀯𑀝𑁆𑀝𑁄 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄 𑀯𑁂𑀯𑀘𑀦𑁄 𑀧𑀜𑁆𑀜𑀢𑁆𑀢𑀺 ¶ 𑀑𑀢𑀭𑀡𑁄 𑀲𑁄𑀥𑀦𑁄 𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄 𑀲𑀫𑀸𑀭𑁄𑀧𑀦𑁄 𑀇𑀢𑀺.

𑀢𑀲𑁆𑀲𑀸𑀦𑀼𑀕𑀻𑀢𑀺

𑀤𑁂𑀲𑀦𑀸 ¶ 𑀯𑀺𑀘𑀬𑁄 𑀬𑀼𑀢𑁆𑀢𑀺, 𑀧𑀤𑀝𑁆𑀞𑀸𑀦𑁄 𑀘 𑀮𑀓𑁆𑀔𑀡𑁄;

𑀘𑀢𑀼𑀩𑁆𑀬𑀽𑀳𑁄 𑀘 𑀆𑀯𑀝𑁆𑀝𑁄, 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄.

𑀯𑁂𑀯𑀘𑀦𑁄 𑀘 𑀧𑀜𑁆𑀜𑀢𑁆𑀢𑀺, 𑀑𑀢𑀭𑀡𑁄 𑀘 𑀲𑁄𑀥𑀦𑁄;

𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄, 𑀲𑀫𑀸𑀭𑁄𑀧𑀦𑁄 𑀲𑁄𑀴𑀲𑁄 [𑀲𑁄𑀴𑀲 (𑀲𑀻.)].

𑀏𑀢𑁂 𑀲𑁄𑀴𑀲 𑀳𑀸𑀭𑀸, 𑀧𑀓𑀺𑀢𑁆𑀢𑀺𑀢𑀸 𑀅𑀢𑁆𑀣𑀢𑁄 𑀅𑀲𑀁𑀓𑀺𑀡𑁆𑀡𑀸;

𑀏𑀢𑁂𑀲𑀜𑁆𑀘𑁂𑀯 𑀪𑀯𑀢𑀺, 𑀯𑀺𑀢𑁆𑀣𑀸𑀭𑀢𑀬𑀸 𑀦𑀬𑀯𑀺𑀪𑀢𑁆𑀢𑀻𑀢𑀺.

𑁨. 𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀦𑀬𑀸? 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀢𑀺𑀧𑀼𑀓𑁆𑀔𑀮𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀤𑀺𑀲𑀸𑀮𑁄𑀘𑀦𑁄 𑀅𑀗𑁆𑀓𑀼𑀲𑁄 𑀇𑀢𑀺.

𑀢𑀲𑁆𑀲𑀸𑀦𑀼𑀕𑀻𑀢𑀺

𑀧𑀞𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀤𑀼𑀢𑀺𑀬𑁄 𑀘 𑀢𑀺𑀧𑀼𑀓𑁆𑀔𑀮𑁄;

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫, 𑀢𑀢𑀺𑀬𑁄 𑀦𑀬𑀮𑀜𑁆𑀚𑀓𑁄 [𑀦𑀬𑀮𑀜𑁆𑀙𑀓𑁄 (𑀲𑀻.)].

𑀤𑀺𑀲𑀸𑀮𑁄𑀘𑀦𑀫𑀸𑀳𑀁𑀲𑀼 ¶ , 𑀘𑀢𑀼𑀢𑁆𑀣𑀁 𑀦𑀬𑀫𑀼𑀢𑁆𑀢𑀫𑀁;

𑀧𑀜𑁆𑀘𑀫𑁄 𑀅𑀗𑁆𑀓𑀼𑀲𑁄 𑀦𑀸𑀫, 𑀲𑀩𑁆𑀩𑁂 𑀧𑀜𑁆𑀘 𑀦𑀬𑀸 𑀕𑀢𑀸𑀢𑀺.

𑁩. 𑀢𑀢𑁆𑀣 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺? 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀲𑀼𑀪𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀦𑀺𑀘𑁆𑀘𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸𑀢𑀺, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀬𑀢𑁆𑀣 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺? 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀲𑀼𑀪𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸𑀢𑀺, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀬𑀢𑁆𑀣 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺.

𑀢𑀢𑁆𑀭𑀺𑀤𑀁 𑀉𑀤𑁆𑀤𑀸𑀦𑀁

𑀢𑀡𑁆𑀳𑀸 ¶ 𑀘 𑀅𑀯𑀺𑀚𑁆𑀚𑀸𑀧𑀺 𑀘, 𑀮𑁄𑀪𑁄 𑀤𑁄𑀲𑁄 𑀢𑀣𑁂𑀯 𑀫𑁄𑀳𑁄 𑀘;

𑀘𑀢𑀼𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸, 𑀓𑀺𑀮𑁂𑀲𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀲𑀫𑀣𑁄 ¶ 𑀘 𑀯𑀺𑀧𑀲𑁆𑀲𑀦𑀸 𑀘, 𑀓𑀼𑀲𑀮𑀸𑀦𑀺 𑀘 𑀬𑀸𑀦𑀺 𑀢𑀻𑀡𑀺 𑀫𑀽𑀮𑀸𑀦𑀺;

𑀘𑀢𑀼𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀇𑀦𑁆𑀤𑁆𑀭𑀺𑀬𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀦𑀯𑀳𑀺 𑀘 𑀧𑀤𑁂𑀳𑀺 𑀓𑀼𑀲𑀮𑀸, 𑀦𑀯𑀳𑀺 𑀘 𑀬𑀼𑀚𑁆𑀚𑀦𑁆𑀢𑀺 𑀅𑀓𑀼𑀲𑀮𑀧𑀓𑁆𑀔𑀸;

𑀏𑀢𑁂 𑀔𑁄 𑀫𑀽𑀮𑀧𑀤𑀸, 𑀪𑀯𑀦𑁆𑀢𑀺 𑀅𑀝𑁆𑀞𑀸𑀭𑀲 𑀧𑀤𑀸𑀦𑀻𑀢𑀺.

𑀉𑀤𑁆𑀤𑁂𑀲𑀯𑀸𑀭𑁄.

𑁩. 𑀦𑀺𑀤𑁆𑀤𑁂𑀲𑀯𑀸𑀭𑁄

𑁪. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀦𑁂𑀢𑁆𑀢𑀺 𑀓𑀺𑀢𑁆𑀢𑀺𑀢𑀸.

𑀳𑀸𑀭𑀲𑀗𑁆𑀔𑁂𑀧𑁄

𑁧.

𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸 ¶ , 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘;

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄.

𑁨.

𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀺;

𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑁩.

𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁;

𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑁪.

𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄, 𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁;

𑀇𑀢𑀺 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸, 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄.

𑁫.

𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫.

𑁬.

𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄, 𑀩𑁆𑀬𑀜𑁆𑀚𑀦𑀫𑀣 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘;

𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀻, 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄.

𑁭.

𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄.

𑁮.

𑀥𑀫𑁆𑀫𑀜𑁆𑀘 ¶ 𑀧𑀤𑀝𑁆𑀞𑀸𑀦𑀁, 𑀪𑀽𑀫𑀺𑀜𑁆𑀘 𑀯𑀺𑀪𑀚𑁆𑀚𑀢𑁂 𑀅𑀬𑀁 𑀳𑀸𑀭𑁄;

𑀲𑀸𑀥𑀸𑀭𑀡𑁂 𑀅𑀲𑀸𑀥𑀸𑀭𑀡𑁂 𑀘 𑀦𑁂𑀬𑁆𑀬𑁄 𑀯𑀺𑀪𑀢𑁆𑀢𑀻𑀢𑀺.

𑁯.

𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂, 𑀦𑀺𑀤𑁆𑀤𑀺𑀝𑁆𑀞𑁂 𑀪𑀸𑀯𑀺𑀢𑁂 𑀧𑀳𑀻𑀦𑁂 𑀘;

𑀧𑀭𑀺𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂, 𑀳𑀸𑀭𑁄 𑀧𑀭𑀺𑀯𑀢𑁆𑀢𑀦𑁄 𑀦𑀸𑀫.

𑁧𑁦.

𑀯𑁂𑀯𑀘𑀦𑀸𑀦𑀺 ¶ 𑀩𑀳𑀽𑀦𑀺 𑀢𑀼, 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀏𑀓𑀥𑀫𑁆𑀫𑀲𑁆𑀲;

𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽, 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄.

𑁧𑁧.

𑀏𑀓𑀁 ¶ 𑀪𑀕𑀯𑀸 𑀥𑀫𑁆𑀫𑀁, 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀺;

𑀲𑁄 𑀆𑀓𑀸𑀭𑁄 𑀜𑁂𑀬𑁆𑀬𑁄, 𑀧𑀜𑁆𑀜𑀢𑁆𑀢𑀻 𑀦𑀸𑀫 𑀳𑀸𑀭𑁄𑀢𑀺.

𑁧𑁨.

𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄, 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸 𑀘 𑀥𑀸𑀢𑀼 𑀆𑀬𑀢𑀦𑀸;

𑀏𑀢𑁂𑀳𑀺 𑀑𑀢𑀭𑀢𑀺 𑀬𑁄, 𑀑𑀢𑀭𑀡𑁄 𑀦𑀸𑀫 𑀲𑁄 𑀳𑀸𑀭𑁄.

𑁧𑁩.

𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂, 𑀕𑀸𑀣𑀸𑀬𑀁 𑀧𑀼𑀘𑁆𑀙𑀺𑀢𑀸𑀬𑀫𑀸𑀭𑀩𑁆𑀪;

𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀲𑁄 𑀲𑁄𑀥𑀦𑁄 𑀦𑀸𑀫.

𑁧𑁪.

𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸;

𑀢𑁂𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸, 𑀏𑀲𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑁄.

𑁧𑁫.

𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁, 𑀚𑀦𑀬𑀦𑁆𑀢𑀺𑀧𑁆𑀧𑀘𑁆𑀘𑀬𑀸 𑀧𑀭𑀫𑁆𑀧𑀭𑀢𑁄;

𑀳𑁂𑀢𑀼𑀫𑀯𑀓𑀟𑁆𑀠𑀬𑀺𑀢𑁆𑀯𑀸, 𑀏𑀲𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑁄.

𑁧𑁬.

𑀬𑁂 𑀥𑀫𑁆𑀫𑀸 𑀬𑀁 𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀦𑀬𑀲𑀗𑁆𑀔𑁂𑀧𑁄

𑁧𑁭.

𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘, 𑀲𑀫𑀣𑁂𑀦 𑀯𑀺𑀧𑀲𑁆𑀲𑀦𑀸 𑀬𑁄 𑀦𑁂𑀢𑀺;

𑀲𑀘𑁆𑀘𑁂𑀳𑀺 𑀬𑁄𑀚𑀬𑀺𑀢𑁆𑀯𑀸, 𑀅𑀬𑀁 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄.

𑁧𑁮.

𑀬𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺, 𑀦𑁂𑀢𑀺 𑀓𑀼𑀲𑀮𑁂 𑀘 𑀓𑀼𑀲𑀮𑀫𑀽𑀮𑁂𑀳𑀺;

𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁, 𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀼.

𑁧𑁯.

𑀬𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺, 𑀓𑀺𑀮𑁂𑀲𑁂 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀫𑁆𑀫𑁂;

𑀏𑀢𑀁 𑀦𑀬𑀁 𑀦𑀬𑀯𑀺𑀤𑀽, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀆𑀳𑀼.

𑁨𑁦.

𑀯𑁂𑀬𑁆𑀬𑀸𑀓𑀭𑀡𑁂𑀲𑀼 ¶ 𑀳𑀺 𑀬𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀢𑀳𑀺𑀁 𑀢𑀳𑀺𑀁 𑀯𑀼𑀢𑁆𑀢𑀸;

𑀫𑀦𑀲𑀸 𑀯𑁄𑀮𑁄𑀓𑀬𑀢𑁂, 𑀢𑀁 𑀔𑀼 𑀤𑀺𑀲𑀸𑀮𑁄𑀘𑀦𑀁 𑀆𑀳𑀼.

𑁨𑁧.

𑀑𑀮𑁄𑀓𑁂𑀢𑁆𑀯𑀸 ¶ 𑀤𑀺𑀲𑀮𑁄𑀘𑀦𑁂𑀦, 𑀉𑀓𑁆𑀔𑀺𑀧𑀺𑀬 𑀬𑀁 𑀲𑀫𑀸𑀦𑁂𑀢𑀺;

𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂, 𑀅𑀬𑀁 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀸𑀫.

𑁨𑁨.

𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀮𑁄𑀘𑀦𑀢𑁄 [𑀤𑀺𑀲𑀮𑁄𑀘𑀦𑁂𑀦 (𑀓.)] 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢𑀁.

𑀤𑁆𑀯𑀸𑀤𑀲𑀧𑀤

𑁨𑁩.

𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁, 𑀦𑀺𑀭𑀼𑀢𑁆𑀢𑀺 𑀢𑀣𑁂𑀯 𑀦𑀺𑀤𑁆𑀤𑁂𑀲𑁄;

𑀆𑀓𑀸𑀭𑀙𑀝𑁆𑀞𑀯𑀘𑀦𑀁, 𑀏𑀢𑁆𑀢𑀸𑀯 𑀩𑁆𑀬𑀜𑁆𑀚𑀦𑀁 𑀲𑀩𑁆𑀩𑀁.

𑁨𑁪.

𑀲𑀗𑁆𑀓𑀸𑀲𑀦𑀸 ¶ 𑀧𑀓𑀸𑀲𑀦𑀸, 𑀯𑀺𑀯𑀭𑀡𑀸 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀺;

𑀏𑀢𑁂𑀳𑀺 𑀙𑀳𑀺 𑀧𑀤𑁂𑀳𑀺, 𑀅𑀢𑁆𑀣𑁄 𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞𑀁.

𑁨𑁫.

𑀢𑀻𑀡𑀺 𑀘 𑀦𑀬𑀸 𑀅𑀦𑀽𑀦𑀸, 𑀅𑀢𑁆𑀣𑀲𑁆𑀲 𑀘 𑀙𑀧𑁆𑀧𑀤𑀸𑀦𑀺 𑀕𑀡𑀺𑀢𑀸𑀦𑀺;

𑀦𑀯𑀳𑀺 𑀧𑀤𑁂𑀳𑀺 𑀪𑀕𑀯𑀢𑁄, 𑀯𑀘𑀦𑀲𑁆𑀲𑀢𑁆𑀣𑁄 𑀲𑀫𑀸𑀬𑀼𑀢𑁆𑀢𑁄.

𑁨𑁬.

𑀅𑀢𑁆𑀣𑀲𑁆𑀲 𑀦𑀯𑀧𑁆𑀧𑀤𑀸𑀦𑀺, 𑀩𑁆𑀬𑀜𑁆𑀚𑀦𑀧𑀭𑀺𑀬𑁂𑀝𑁆𑀞𑀺𑀬𑀸 𑀘𑀢𑀼𑀩𑁆𑀩𑀻𑀲;

𑀉𑀪𑀬𑀁 𑀲𑀗𑁆𑀓𑀮𑀬𑀺𑀢𑁆𑀯𑀸 [𑀲𑀗𑁆𑀔𑁂𑀧𑀬𑀢𑁄 (𑀓.)], 𑀢𑁂𑀢𑁆𑀢𑀺𑀁𑀲𑀸 𑀏𑀢𑁆𑀢𑀺𑀓𑀸 𑀦𑁂𑀢𑁆𑀢𑀻𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑁄.

𑁪. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑁄

𑁧. 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄

𑁫. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄? ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀕𑀸𑀣𑀸 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄. 𑀓𑀺𑀁 𑀤𑁂𑀲𑀬𑀢𑀺? 𑀅𑀲𑁆𑀲𑀸𑀤𑀁 𑀆𑀤𑀻𑀦𑀯𑀁 𑀦𑀺𑀲𑁆𑀲𑀭𑀡𑀁 𑀨𑀮𑀁 𑀉𑀧𑀸𑀬𑀁 𑀆𑀡𑀢𑁆𑀢𑀺𑀁. 𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺.

𑀢𑀢𑁆𑀣 ¶ ¶ 𑀓𑀢𑀫𑁄 𑀅𑀲𑁆𑀲𑀸𑀤𑁄?

‘‘𑀓𑀸𑀫𑀁 [𑀓𑀸𑀫𑀫𑀸𑀤𑀺𑀓𑀸 𑀇𑀫𑀸 𑀙 𑀕𑀸𑀣𑀸 𑀲𑀼. 𑀦𑀺. 𑁭𑁭𑁨 𑀧𑀲𑁆𑀲𑀺𑀢𑀩𑁆𑀩𑀸] 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺.

𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

‘‘𑀢𑀲𑁆𑀲 ¶ 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺.

𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄?

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀽 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺.

𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓’’𑀦𑁆𑀢𑀺.

𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

‘‘𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽’’𑀢𑀺.

𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 ¶ ¶ 𑀓𑀢𑀫𑀁 𑀨𑀮𑀁?

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺.

𑀇𑀤𑀁 𑀨𑀮𑀁.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄?

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂…

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 [𑀧𑀲𑁆𑀲 𑀥. 𑀧. 𑁨𑁭𑁭] 𑀤𑀼𑀓𑁆𑀔𑀸’’𑀢𑀺…𑀧𑁂…

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀅𑀬𑀁 𑀉𑀧𑀸𑀬𑁄.

𑀢𑀢𑁆𑀣 ¶ 𑀓𑀢𑀫𑀸 𑀆𑀡𑀢𑁆𑀢𑀺?

‘‘𑀘𑀓𑁆𑀔𑀼𑀫𑀸 [𑀧𑀲𑁆𑀲 𑀉𑀤𑀸. 𑁪𑁩] 𑀯𑀺𑀲𑀫𑀸𑀦𑀻𑀯, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂;

𑀧𑀡𑁆𑀟𑀺𑀢𑁄 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺.

𑀅𑀬𑀁 𑀆𑀡𑀢𑁆𑀢𑀺.

‘‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼,

𑀫𑁄𑀖𑀭𑀸𑀚𑀸’𑀢𑀺 𑀆𑀡𑀢𑁆𑀢𑀺, ‘𑀲𑀤𑀸 𑀲𑀢𑁄’𑀢𑀺 𑀉𑀧𑀸𑀬𑁄;

‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘 [𑀉𑀳𑀘𑁆𑀘 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁧𑁨𑁫], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’’.

𑀇𑀤𑀁 𑀨𑀮𑀁.

𑁬. 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺, 𑀦𑁂𑀬𑁆𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺.

𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀲𑀢𑀺𑀦𑁆𑀤𑁆𑀭𑀺𑀬𑁂𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 [𑀉𑀤𑀢𑁆𑀣𑁄 (𑀲𑀻.) 𑀉 + 𑀆 + 𑀤𑀸 + 𑀢] 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 ¶ ¶ 𑀦𑀺𑀬𑁆𑀬𑀸𑀢𑀺 𑀛𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀘𑁆𑀘𑁂𑀳𑀺 𑀦𑀺𑀲𑁆𑀲𑀬𑁂𑀳𑀺.

𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀧𑀲𑁆𑀲𑀦𑀸 𑀦𑀺𑀬𑁆𑀬𑀦𑁆𑀢𑀺 𑀭𑀸𑀕𑀯𑀺𑀭𑀸𑀕𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸. 𑀉𑀪𑁄 𑀤𑀺𑀝𑁆𑀞𑀺𑀘𑀭𑀺𑀢𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁂 𑀲𑀫𑀣𑁂𑀦 𑀦𑀺𑀬𑁆𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸.

𑀢𑀢𑁆𑀣 𑀬𑁂 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸, 𑀬𑁂 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸.

𑁭. 𑀲𑁆𑀯𑀸𑀬𑀁 ¶ 𑀳𑀸𑀭𑁄 𑀓𑀢𑁆𑀣 𑀲𑀫𑁆𑀪𑀯𑀢𑀺, 𑀬𑀲𑁆𑀲 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑀬𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀻𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻, 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸 𑀉𑀲𑁆𑀲𑀸𑀳𑀦𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀢𑀣𑀸 𑀲𑀼𑀢𑁂𑀦 𑀦𑀺𑀲𑁆𑀲𑀬𑁂𑀦 𑀬𑀸 𑀯𑀻𑀫𑀁𑀲𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀡𑀸, 𑀅𑀬𑀁 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸. 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀺 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀁 𑀯𑀸 𑀪𑀸𑀯𑀦𑀸𑀪𑀽𑀫𑀺𑀬𑀁 𑀯𑀸, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸.

𑁮. 𑀧𑀭𑀢𑁄𑀖𑁄𑀲𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸. 𑀬𑀁 𑀧𑀭𑀢𑁄 𑀘 𑀖𑁄𑀲𑁂𑀦 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸. 𑀬𑀲𑁆𑀲 𑀇𑀫𑀸 𑀤𑁆𑀯𑁂 𑀧𑀜𑁆𑀜𑀸 𑀅𑀢𑁆𑀣𑀺 𑀲𑀼𑀢𑀫𑀬𑀻 𑀘𑀺𑀦𑁆𑀢𑀸𑀫𑀬𑀻 𑀘, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺, 𑀘𑀺𑀦𑁆𑀢𑀸𑀫𑀬𑀻 𑀦𑀢𑁆𑀣𑀺, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 [𑀯𑀺𑀧𑀘𑁆𑀘𑀺𑀢𑀜𑁆𑀜𑀽 (𑀲𑀻.)]. 𑀬𑀲𑁆𑀲 𑀦𑁂𑀯 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺 𑀦 𑀘𑀺𑀦𑁆𑀢𑀸𑀫𑀬𑀻, 𑀅𑀬𑀁 𑀦𑁂𑀬𑁆𑀬𑁄.

𑁯. 𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸 𑀓𑀺𑀁 𑀤𑁂𑀲𑀬𑀢𑀺? 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀆𑀤𑀻𑀦𑀯𑁄 𑀘 𑀨𑀮𑀜𑁆𑀘 𑀤𑀼𑀓𑁆𑀔𑀁, 𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑁄, 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑁄, 𑀉𑀧𑀸𑀬𑁄 𑀆𑀡𑀢𑁆𑀢𑀺 𑀘 𑀫𑀕𑁆𑀕𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀇𑀤𑀁 𑀥𑀫𑁆𑀫𑀘𑀓𑁆𑀓𑀁.

𑀬𑀣𑀸𑀳 ¶ 𑀪𑀕𑀯𑀸 𑁋 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁, 𑀲𑀩𑁆𑀩𑀁 𑀥𑀫𑁆𑀫𑀘𑀓𑁆𑀓𑀁.

𑀢𑀢𑁆𑀣 ¶ 𑀅𑀧𑀭𑀺𑀫𑀸𑀡𑀸 𑀧𑀤𑀸, 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸, 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸, 𑀅𑀧𑀭𑀺𑀫𑀸𑀡𑀸 𑀆𑀓𑀸𑀭𑀸 𑀦𑁂𑀭𑀼𑀢𑁆𑀢𑀸 𑀦𑀺𑀤𑁆𑀤𑁂𑀲𑀸. 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 [𑀉𑀢𑁆𑀢𑀸𑀦𑀺𑀓𑀫𑁆𑀫𑀁 (𑀓.)] 𑀧𑀜𑁆𑀜𑀢𑁆𑀢𑀺, 𑀇𑀢𑀺𑀧𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁.

‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁…𑀧𑁂… ¶ ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸, 𑀅𑀧𑀭𑀺𑀫𑀸𑀡𑀸 𑀅𑀓𑁆𑀔𑀭𑀸, 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸, 𑀅𑀧𑀭𑀺𑀫𑀸𑀡𑀸 𑀆𑀓𑀸𑀭𑀸 𑀦𑁂𑀭𑀼𑀢𑁆𑀢𑀸 𑀦𑀺𑀤𑁆𑀤𑁂𑀲𑀸. 𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀺 𑀇𑀢𑀺𑀧𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁.

𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺 [𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 (𑀓.)], 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀺 [𑀉𑀕𑁆𑀖𑀸𑀝𑁂𑀢𑀺 (𑀲𑀻.)], 𑀩𑁆𑀬𑀜𑁆𑀚𑀦𑁂𑀳𑀺 𑀘 𑀆𑀓𑀸𑀭𑁂𑀳𑀺 𑀘 𑀯𑀺𑀧𑀜𑁆𑀘𑀬𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀘 𑀦𑀺𑀤𑁆𑀤𑁂𑀲𑁂𑀳𑀺 𑀘 𑀯𑀺𑀢𑁆𑀣𑀸𑀭𑁂𑀢𑀺. 𑀢𑀢𑁆𑀣 𑀉𑀕𑁆𑀖𑀝𑀦𑀸 [𑀉𑀕𑁆𑀖𑀸𑀝𑀦𑀸 (𑀲𑀻.)] 𑀆𑀤𑀺, 𑀯𑀺𑀧𑀜𑁆𑀘𑀦𑀸 𑀫𑀚𑁆𑀛𑁂, 𑀯𑀺𑀢𑁆𑀣𑀸𑀭𑀡𑀸 𑀧𑀭𑀺𑀬𑁄𑀲𑀸𑀦𑀁. 𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄 𑀉𑀕𑁆𑀖𑀝𑀻𑀬𑀦𑁆𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 ‘‘𑀆𑀤𑀺𑀓𑀮𑁆𑀬𑀸𑀡𑁄’’𑀢𑀺. 𑀯𑀺𑀧𑀜𑁆𑀘𑀻𑀬𑀦𑁆𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 ‘‘𑀫𑀚𑁆𑀛𑁂𑀓𑀮𑁆𑀬𑀸𑀡𑁄’’𑀢𑀺. 𑀯𑀺𑀢𑁆𑀣𑀸𑀭𑀻𑀬𑀦𑁆𑀢𑁄 𑀦𑁂𑀬𑁆𑀬𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 ‘‘𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺.

𑁧𑁦. 𑀢𑀢𑁆𑀣 ¶ 𑀙𑀧𑁆𑀧𑀤𑀸𑀦𑀺 𑀅𑀢𑁆𑀣𑁄 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀺, 𑀇𑀫𑀸𑀦𑀺 𑀙𑀧𑁆𑀧𑀤𑀸𑀦𑀺 𑀅𑀢𑁆𑀣𑁄. 𑀙𑀧𑁆𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀁 𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁 𑀆𑀓𑀸𑀭𑁄 𑀦𑀺𑀭𑀼𑀢𑁆𑀢𑀺 𑀦𑀺𑀤𑁆𑀤𑁂𑀲𑁄, 𑀇𑀫𑀸𑀦𑀺 𑀙𑀧𑁆𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺.

𑀓𑁂𑀯𑀮𑀦𑁆𑀢𑀺 ¶ 𑀮𑁄𑀓𑀼𑀢𑁆𑀢𑀭𑀁, 𑀦 𑀫𑀺𑀲𑁆𑀲𑀁 𑀮𑁄𑀓𑀺𑀬𑁂𑀳𑀺 𑀥𑀫𑁆𑀫𑁂𑀳𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀧𑀭𑀺𑀧𑀽𑀭𑀁 𑀅𑀦𑀽𑀦𑀁 𑀅𑀦𑀢𑀺𑀭𑁂𑀓𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀫𑁆𑀫𑀮𑀁 𑀲𑀩𑁆𑀩𑀫𑀮𑀸𑀧𑀕𑀢𑀁 𑀧𑀭𑀺𑀬𑁄𑀤𑀸𑀢𑀁 𑀉𑀧𑀝𑁆𑀞𑀺𑀢𑀁 𑀲𑀩𑁆𑀩𑀯𑀺𑀲𑁂𑀲𑀸𑀦𑀁, 𑀇𑀤𑀁 𑀯𑀼𑀘𑁆𑀘𑀢𑀺 ¶ 𑀢𑀣𑀸𑀕𑀢𑀧𑀤𑀁𑀇𑀢𑀺𑀧𑀺 𑀢𑀣𑀸𑀕𑀢𑀦𑀺𑀲𑁂𑀯𑀺𑀢𑀁𑀇𑀢𑀺𑀧𑀺 𑀢𑀣𑀸𑀕𑀢𑀸𑀭𑀜𑁆𑀚𑀺𑀢𑀁𑀇𑀢𑀺𑀧𑀺, 𑀅𑀢𑁄𑀘𑁂𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀜𑁆𑀜𑀸𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺.

𑀓𑁂𑀲𑀁 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸, 𑀬𑁄𑀕𑀻𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋

‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸, 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘;

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀤𑁂𑀲𑀦𑀸𑀳𑀸𑀭𑁄.

𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄

𑁧𑁧. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘𑀸’’𑀢𑀺 𑀕𑀸𑀣𑀸, 𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄.

𑀓𑀺𑀁 𑀯𑀺𑀘𑀺𑀦𑀢𑀺? 𑀧𑀤𑀁 𑀯𑀺𑀘𑀺𑀦𑀢𑀺, 𑀧𑀜𑁆𑀳𑀁 𑀯𑀺𑀘𑀺𑀦𑀢𑀺, 𑀯𑀺𑀲𑀚𑁆𑀚𑀦𑀁 [𑀯𑀺𑀲𑁆𑀲𑀚𑁆𑀚𑀦𑀁 (𑀲𑀻. 𑀓.)] 𑀯𑀺𑀘𑀺𑀦𑀢𑀺, 𑀧𑀼𑀩𑁆𑀩𑀸𑀧𑀭𑀁 𑀯𑀺𑀘𑀺𑀦𑀢𑀺, 𑀅𑀲𑁆𑀲𑀸𑀤𑀁 𑀯𑀺𑀘𑀺𑀦𑀢𑀺, 𑀆𑀤𑀻𑀦𑀯𑀁 𑀯𑀺𑀘𑀺𑀦𑀢𑀺, 𑀦𑀺𑀲𑁆𑀲𑀭𑀡𑀁 𑀯𑀺𑀘𑀺𑀦𑀢𑀺, 𑀨𑀮𑀁 𑀯𑀺𑀘𑀺𑀦𑀢𑀺, 𑀉𑀧𑀸𑀬𑀁 𑀯𑀺𑀘𑀺𑀦𑀢𑀺, 𑀆𑀡𑀢𑁆𑀢𑀺𑀁 𑀯𑀺𑀘𑀺𑀦𑀢𑀺, 𑀅𑀦𑀼𑀕𑀻𑀢𑀺𑀁 𑀯𑀺𑀘𑀺𑀦𑀢𑀺, 𑀲𑀩𑁆𑀩𑁂 𑀦𑀯 𑀲𑀼𑀢𑁆𑀢𑀦𑁆𑀢𑁂 𑀯𑀺𑀘𑀺𑀦𑀢𑀺. 𑀬𑀣𑀸 𑀓𑀺𑀁 𑀪𑀯𑁂, 𑀬𑀣𑀸 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋

‘‘𑀓𑁂𑀦𑀲𑁆𑀲𑀼 [𑀧𑀲𑁆𑀲 𑀲𑀼. 𑀦𑀺. 𑁧𑁦𑁩𑁮] 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑀇𑀫𑀸𑀦𑀺 ¶ 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀲𑁄 𑀏𑀓𑁄 𑀧𑀜𑁆𑀳𑁄. 𑀓𑀲𑁆𑀫𑀸? 𑀏𑀓𑀯𑀢𑁆𑀣𑀼 𑀧𑀭𑀺𑀕𑁆𑀕𑀳𑀸, 𑀏𑀯𑀜𑁆𑀳𑀺 ¶ 𑀆𑀳 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀮𑁄𑀓𑀸𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀮𑁄𑀓𑀲𑁆𑀲 𑀅𑀧𑁆𑀧𑀓𑀸𑀲𑀦𑀁 𑀧𑀼𑀘𑁆𑀙𑀢𑀺, ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀮𑁄𑀓𑀲𑁆𑀲 𑀅𑀪𑀺𑀮𑁂𑀧𑀦𑀁 𑀧𑀼𑀘𑁆𑀙𑀢𑀺, ‘‘𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀢𑀲𑁆𑀲𑁂𑀯 𑀮𑁄𑀓𑀲𑁆𑀲 𑀫𑀳𑀸𑀪𑀬𑀁 𑀧𑀼𑀘𑁆𑀙𑀢𑀺. 𑀮𑁄𑀓𑁄 𑀢𑀺𑀯𑀺𑀥𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄.

𑀢𑀢𑁆𑀣 ¶ 𑀯𑀺𑀲𑀚𑁆𑀚𑀦𑀸 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸,]

𑀯𑀺𑀯𑀺𑀘𑁆𑀙𑀸 [𑀯𑁂𑀯𑀺𑀘𑁆𑀙𑀸 (𑀲𑀼. 𑀦𑀺. 𑁧𑁦𑁩𑁯)] 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀺𑀲𑀚𑁆𑀚𑀺𑀢𑀸𑀦𑀺 𑀧𑀞𑀫𑀁 𑀧𑀞𑀫𑁂𑀦, 𑀤𑀼𑀢𑀺𑀬𑀁 𑀤𑀼𑀢𑀺𑀬𑁂𑀦, 𑀢𑀢𑀺𑀬𑀁 𑀢𑀢𑀺𑀬𑁂𑀦, 𑀘𑀢𑀼𑀢𑁆𑀣𑀁 𑀘𑀢𑀼𑀢𑁆𑀣𑁂𑀦.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀜𑁆𑀳𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀯𑀺𑀲𑀚𑁆𑀚𑀦𑀸. 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄 𑀮𑁄𑀓𑁄, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸. 𑀬𑀣𑀸𑀳 𑀪𑀕𑀯𑀸 ‘‘𑀲𑀩𑁆𑀩𑀲𑀢𑁆𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀸𑀡𑀸𑀦𑀁 𑀲𑀩𑁆𑀩𑀪𑀽𑀢𑀸𑀦𑀁 𑀧𑀭𑀺𑀬𑀸𑀬𑀢𑁄 𑀏𑀓𑀫𑁂𑀯 𑀦𑀻𑀯𑀭𑀡𑀁 𑀯𑀤𑀸𑀫𑀺 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸. 𑀲𑀩𑁆𑀩𑀲𑁄𑀯, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀦𑀢𑁆𑀣𑀺 𑀲𑀢𑁆𑀢𑀸𑀦𑀁 𑀦𑀻𑀯𑀭𑀡𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀢𑁂𑀦 𑀘 𑀧𑀞𑀫𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀧𑀜𑁆𑀳𑁂 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀯𑀺𑀲𑀚𑁆𑀚𑀦𑀸. 𑀬𑁄 𑀧𑀼𑀕𑁆𑀕𑀮𑁄 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄, 𑀲𑁄 𑀯𑀺𑀯𑀺𑀘𑁆𑀙𑀢𑀺. 𑀯𑀺𑀯𑀺𑀘𑁆𑀙𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑁄 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄 𑀦𑀸𑀪𑀺𑀲𑀤𑁆𑀤𑀳𑀢𑀺, 𑀦 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 𑀯𑀻𑀭𑀺𑀬𑀁 𑀦𑀸𑀭𑀪𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀲𑁄 𑀇𑀥𑀧𑁆𑀧𑀫𑀸𑀤𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 𑀧𑀫𑀢𑁆𑀢𑁄, 𑀲𑀼𑀓𑁆𑀓𑁂 𑀥𑀫𑁆𑀫𑁂 𑀦 𑀉𑀧𑁆𑀧𑀸𑀤𑀺𑀬𑀢𑀺, 𑀢𑀲𑁆𑀲 𑀢𑁂 𑀅𑀦𑀼𑀧𑁆𑀧𑀸𑀤𑀺𑀬𑀫𑀸𑀦𑀸 𑀦𑀧𑁆𑀧𑀓𑀸𑀲𑀦𑁆𑀢𑀺, 𑀬𑀣𑀸𑀳 𑀪𑀕𑀯𑀸 𑁋

‘‘𑀤𑀽𑀭𑁂 ¶ 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺 [𑀧𑀓𑀸𑀲𑁂𑀦𑁆𑀢𑀺 𑀥. 𑀧. 𑁩𑁦𑁪], 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 [𑀭𑀢𑁆𑀢𑀺 𑀔𑀺𑀢𑁆𑀢𑀸 (𑀲𑀻.), 𑀧𑀲𑁆𑀲 𑀥. 𑀧. 𑁩𑁦𑁪] 𑀬𑀣𑀸 𑀲𑀭𑀸;

𑀢𑁂 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀺, 𑀓𑀺𑀢𑁆𑀢𑀺𑀬𑀸 𑀘 𑀬𑀲𑁂𑀦 𑀘𑀸’’𑀢𑀺.

𑀢𑁂𑀦 ¶ 𑀘 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀧𑀜𑁆𑀳𑁂 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀯𑀺𑀲𑀚𑁆𑀚𑀦𑀸. 𑀚𑀧𑁆𑀧𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀲𑀸 𑀓𑀣𑀁 𑀅𑀪𑀺𑀮𑀺𑀫𑁆𑀧𑀢𑀺? 𑀬𑀣𑀸𑀳 𑀪𑀕𑀯𑀸 𑁋

‘‘𑀭𑀢𑁆𑀢𑁄 ¶ 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀓.)] 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀲𑀸𑀬𑀁 𑀢𑀡𑁆𑀳𑀸 𑀆𑀲𑀢𑁆𑀢𑀺𑀩𑀳𑀼𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀏𑀯𑀁 𑀅𑀪𑀺𑀚𑀧𑁆𑀧𑀸’’𑀢𑀺 𑀓𑀭𑀺𑀢𑁆𑀯𑀸 𑀢𑀢𑁆𑀣 𑀮𑁄𑀓𑁄 𑀅𑀪𑀺𑀮𑀺𑀢𑁆𑀢𑁄 𑀦𑀸𑀫 𑀪𑀯𑀢𑀺, 𑀢𑁂𑀦 𑀘 𑀢𑀢𑀺𑀬𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀜𑁆𑀳𑁂 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀯𑀺𑀲𑀚𑁆𑀚𑀦𑀸. 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑁋 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘. 𑀬𑀁 𑀓𑀸𑀬𑀺𑀓𑀁 𑀇𑀤𑀁 𑀤𑀼𑀓𑁆𑀔𑀁, 𑀬𑀁 𑀘𑁂𑀢𑀲𑀺𑀓𑀁 𑀇𑀤𑀁 𑀤𑁄𑀫𑀦𑀲𑁆𑀲𑀁. 𑀲𑀩𑁆𑀩𑁂 𑀲𑀢𑁆𑀢𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀉𑀩𑁆𑀩𑀺𑀚𑁆𑀚𑀦𑁆𑀢𑀺, 𑀦𑀢𑁆𑀣𑀺 𑀪𑀬𑀁 𑀤𑀼𑀓𑁆𑀔𑁂𑀦 𑀲𑀫𑀲𑀫𑀁, 𑀓𑀼𑀢𑁄 𑀯𑀸 𑀧𑀦 𑀢𑀲𑁆𑀲 𑀉𑀢𑁆𑀢𑀭𑀺𑀢𑀭𑀁? 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑁋 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸. 𑀢𑀢𑁆𑀣 𑀮𑁄𑀓𑁄 𑀑𑀥𑀲𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀢𑀺. 𑀢𑀣𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀳𑁄𑀦𑁆𑀢𑀺 𑀮𑁄𑀓𑁂 𑀅𑀧𑁆𑀧𑀸𑀩𑀸𑀥𑀸𑀧𑀺 𑀤𑀻𑀖𑀸𑀬𑀼𑀓𑀸𑀧𑀺. 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀧𑀦 𑀮𑁄𑀓𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀤𑀼𑀓𑁆𑀔𑀁 𑀮𑁄𑀓𑀲𑁆𑀲𑀸𑀢𑀺 𑀓𑀢𑁆𑀯𑀸 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺. 𑀢𑁂𑀦 𑀘 𑀘𑀢𑀼𑀢𑁆𑀣𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂 [𑀧𑀺𑀣𑀻𑀬𑀭𑁂 (𑀲𑀻.), 𑀧𑀺𑀥𑀺𑀬𑁆𑀬𑀭𑁂 (𑀓.), 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁦].

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺. 𑀢𑁂 𑀤𑁆𑀯𑁂 𑀧𑀜𑁆𑀳𑀸. 𑀓𑀲𑁆𑀫𑀸? 𑀇𑀫𑁂𑀳𑀺 𑀩𑀢𑁆𑀯𑀸𑀥𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸. 𑀏𑀯𑀁 ¶ 𑀲𑀫𑀸𑀧𑀦𑁆𑀦𑀲𑁆𑀲 𑀮𑁄𑀓𑀲𑁆𑀲 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀲𑁆𑀲 𑀓𑀺𑀁 𑀮𑁄𑀓𑀲𑁆𑀲 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀫𑀺𑀢𑀺, 𑀏𑀯𑀜𑁆𑀳𑀺 𑀆𑀳.

𑀲𑀯𑀦𑁆𑀢𑀺 ¶ 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺. 𑀅𑀲𑀫𑀸𑀳𑀺𑀢𑀲𑁆𑀲 𑀲𑀯𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀩𑀳𑀼𑀮𑀲𑁆𑀲. 𑀢𑀢𑁆𑀣 𑀬𑀸 𑀅𑀪𑀺𑀚𑁆𑀛𑀸 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀬𑁄 𑀩𑁆𑀬𑀸𑀧𑀸𑀤𑁄 𑀅𑀬𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀬𑁄 𑀧𑀫𑀸𑀤𑁄 𑀅𑀬𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀲𑁆𑀲𑁂𑀯𑀁 𑀅𑀲𑀫𑀸𑀳𑀺𑀢𑀲𑁆𑀲 𑀙𑀲𑀼 𑀆𑀬𑀢𑀦𑁂𑀲𑀼 𑀢𑀡𑁆𑀳𑀸 𑀲𑀯𑀦𑁆𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀬𑀣𑀸𑀳 𑀪𑀕𑀯𑀸 𑁋

‘‘𑀲𑀯𑀢𑀻’’𑀢𑀺 𑀘 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼 𑀲𑀯𑀢𑀺 ¶ 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 [𑀅𑀫𑀦𑀸𑀧𑀺𑀬𑁂𑀲𑀼 (𑀓.)] 𑀧𑀝𑀺𑀳𑀜𑁆𑀜𑀢𑀻𑀢𑀺. 𑀲𑁄𑀢𑀁…𑀧𑁂… 𑀖𑀸𑀦𑀁… 𑀚𑀺𑀯𑁆𑀳𑀸… 𑀓𑀸𑀬𑁄… 𑀫𑀦𑁄 𑀲𑀯𑀢𑀺 𑀫𑀦𑀸𑀧𑀺𑀓𑁂𑀲𑀼 𑀥𑀫𑁆𑀫𑁂𑀲𑀼 𑀅𑀫𑀦𑀸𑀧𑀺𑀓𑁂𑀲𑀼 𑀧𑀝𑀺𑀳𑀜𑁆𑀜𑀢𑀻𑀢𑀺. 𑀇𑀢𑀺 𑀲𑀩𑁆𑀩𑀸 𑀘 𑀲𑀯𑀢𑀺, 𑀲𑀩𑁆𑀩𑀣𑀸 𑀘 𑀲𑀯𑀢𑀺. 𑀢𑁂𑀦𑀸𑀳 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺.

‘‘𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀧𑀼𑀘𑁆𑀙𑀢𑀺, 𑀇𑀤𑀁 𑀯𑁄𑀤𑀸𑀦𑀁. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀁 𑀧𑀼𑀘𑁆𑀙𑀢𑀺, 𑀇𑀤𑀁 𑀯𑀼𑀝𑁆𑀞𑀸𑀦𑀁.

𑀢𑀢𑁆𑀣 𑀯𑀺𑀲𑀚𑁆𑀚𑀦𑀸 𑁋

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸,]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀘𑀓𑁆𑀔𑀼 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀺, 𑀲𑁄𑀢𑀁…𑀧𑁂… 𑀖𑀸𑀦𑀁… 𑀚𑀺𑀯𑁆𑀳𑀸… 𑀓𑀸𑀬𑁄… 𑀫𑀦𑁄 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀓𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 ¶ . 𑀓𑁂𑀦 𑀢𑁂 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀸? 𑀲𑀢𑀺𑀆𑀭𑀓𑁆𑀔𑁂𑀦. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺.

𑀧𑀜𑁆𑀜𑀸𑀬 𑀅𑀦𑀼𑀲𑀬𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑁂𑀲𑀼 𑀧𑀳𑀻𑀦𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀸 𑀧𑀳𑀻𑀬𑀦𑁆𑀢𑀺. 𑀓𑀺𑀲𑁆𑀲 [𑀢𑀲𑁆𑀲 (𑀲𑀻.)], 𑀅𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸? 𑀢𑀁 𑀬𑀣𑀸 𑀔𑀦𑁆𑀥𑀯𑀦𑁆𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀦𑀯𑀲𑁂𑀲𑀫𑀽𑀮𑀼𑀤𑁆𑀥𑀭𑀡𑁂 𑀓𑀢𑁂 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀗𑁆𑀓𑀼𑀭𑀲𑀦𑁆𑀢𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀺. 𑀏𑀯𑀁 ¶ 𑀅𑀦𑀼𑀲𑀬𑁂𑀲𑀼 𑀧𑀳𑀻𑀦𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀲𑀦𑁆𑀢𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀺 𑀧𑀺𑀤𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸. 𑀓𑁂𑀦? 𑀧𑀜𑁆𑀜𑀸𑀬. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

‘‘𑀬𑀫𑁂𑀢𑀁 ¶ 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 [𑀫𑀁 𑀧𑀼𑀘𑁆𑀙𑀺 (𑀓.), 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁩], 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀅𑀬𑀁 𑀧𑀜𑁆𑀳𑁂 [𑀧𑀜𑁆𑀳𑁄 (𑀲𑀻. 𑀓.) 𑀦𑁂𑀢𑁆𑀢𑀺𑀯𑀺𑀪𑀸𑀯𑀦𑀻 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀁 𑀧𑀼𑀘𑁆𑀙𑀢𑀺? 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁. 𑀢𑀻𑀡𑀺 𑀘 𑀲𑀘𑁆𑀘𑀸𑀦𑀺 𑀲𑀗𑁆𑀔𑀢𑀸𑀦𑀺 𑀦𑀺𑀭𑁄𑀥𑀥𑀫𑁆𑀫𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀅𑀲𑀗𑁆𑀔𑀢𑁄. 𑀢𑀢𑁆𑀣 𑀲𑀫𑀼𑀤𑀬𑁄 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀳𑀻𑀬𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸 𑀘 𑀪𑀸𑀯𑀦𑀸𑀪𑀽𑀫𑀺𑀬𑀸 𑀘. 𑀤𑀲𑁆𑀲𑀦𑁂𑀦 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀪𑀸𑀯𑀦𑀸𑀬 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀯𑀲𑁂𑀲𑀸 [𑀅𑀯𑀺𑀚𑁆𑀚𑀸 𑀘 𑀦𑀺𑀭𑀯𑀲𑁂𑀲𑀸 (𑀲𑀻. 𑀓.)]. 𑀢𑁂𑀥𑀸𑀢𑀼𑀓𑁂 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺.

𑁧𑁨. 𑀢𑀢𑁆𑀣 ¶ 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀯𑀲𑁂𑀲𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀬𑀁 𑀧𑀦 𑀏𑀯𑀁 𑀚𑀸𑀦𑀸𑀢𑀺 ‘‘𑀔𑀻𑀡𑀸 𑀫𑁂 𑀚𑀸𑀢𑀻’’𑀢𑀺, 𑀇𑀤𑀁 𑀔𑀬𑁂 𑀜𑀸𑀡𑀁. ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀸𑀢𑀺, 𑀇𑀤𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁. 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀬𑀜𑁆𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀬𑀜𑁆𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀫𑀸𑀦𑀺 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀢𑁆𑀣 𑀬𑀜𑁆𑀘 𑀔𑀬𑁂 𑀜𑀸𑀡𑀁 𑀬𑀜𑁆𑀘 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁, 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀏𑀓𑀧𑀜𑁆𑀜𑀸.

𑀅𑀧𑀺 𑀘 𑀆𑀭𑀫𑁆𑀫𑀡𑀲𑀗𑁆𑀓𑁂𑀢𑁂𑀦 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀺, ‘‘𑀔𑀻𑀡𑀸 𑀫𑁂 𑀚𑀸𑀢𑀻’’𑀢𑀺 𑀧𑀚𑀸𑀦𑀦𑁆𑀢𑀲𑁆𑀲 𑀔𑀬𑁂 𑀜𑀸𑀡𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺, ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀦𑁆𑀢𑀲𑁆𑀲 ¶ 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀲𑀸 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀬𑀣𑀸𑀤𑀺𑀝𑁆𑀞𑀁 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀲𑀢𑀺.

𑁧𑁩. 𑀢𑀢𑁆𑀣 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀇𑀤𑀁 𑀦𑀸𑀫𑀭𑀽𑀧𑀁. 𑀢𑀢𑁆𑀣 𑀬𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸, 𑀇𑀤𑀁 𑀦𑀸𑀫𑀁. 𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦𑀺, 𑀇𑀤𑀁 𑀭𑀽𑀧𑀁. 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀢𑀲𑁆𑀲 𑀦𑀺𑀭𑁄𑀥𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀏𑀯𑀫𑀸𑀳 𑁋

‘‘𑀧𑀜𑁆𑀜𑀸 ¶ 𑀘𑁂𑀯 𑀲𑀢𑀺 𑀘, 𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀲𑀢𑀺 𑀘 𑀧𑀜𑁆𑀜𑀸 𑀘 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑀢𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘, 𑀧𑀜𑁆𑀜𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘. 𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀬𑀸 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀙𑀦𑁆𑀤𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 ¶ 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀙𑀦𑁆𑀤𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀢𑀢𑁆𑀣 𑀬𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀢𑀢𑁆𑀣 𑀬𑀸 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀯𑀻𑀫𑀁𑀲𑀸𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

𑁧𑁪. 𑀲𑀩𑁆𑀩𑁄 𑀲𑀫𑀸𑀥𑀺 𑀜𑀸𑀡𑀫𑀽𑀮𑀓𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺.

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂;

𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁 [𑀭𑀢𑁆𑀢𑀺 (𑀓.) 𑀅𑀬𑀁 𑀕𑀸𑀣𑀸 𑀣𑁂𑀭𑀕𑀸. 𑁩𑁯𑁭 𑀤𑀺𑀲𑁆𑀲𑀢𑀺], 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸.

𑀇𑀢𑀺 ¶ 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀼𑀲𑀮𑀸𑀦𑀺 𑀘𑀺𑀢𑁆𑀢𑀲𑀳𑀪𑀽𑀦𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑁂 𑀦𑀺𑀭𑀼𑀚𑁆𑀛𑀫𑀸𑀦𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀦𑀸𑀫𑀭𑀽𑀧𑀜𑁆𑀘 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲 𑀫𑀕𑁆𑀕𑁂𑀦 𑀳𑁂𑀢𑀼 𑀉𑀧𑀘𑁆𑀙𑀺𑀦𑁆𑀦𑁄, 𑀯𑀺𑀜𑁆𑀜𑀸𑀡𑀁 𑀅𑀦𑀸𑀳𑀸𑀭𑀁 𑀅𑀦𑀪𑀺𑀦𑀦𑁆𑀤𑀺𑀢𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀦𑀸𑀫𑀭𑀽𑀧𑀫𑀧𑀺 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀁 𑀧𑀼𑀦𑀩𑁆𑀪𑀯𑀁 𑀦 𑀦𑀺𑀩𑁆𑀩𑀢𑁆𑀢𑀬𑀢𑀺 [𑀦𑀺𑀩𑁆𑀩𑀢𑁆𑀢𑀺𑀬𑀢𑀺 (𑀓.)]. 𑀏𑀯𑀁 ¶ 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀭𑀽𑀧𑀜𑁆𑀘 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀫𑁂𑀢𑀁 ¶ 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

‘‘𑀬𑁂 𑀘 [𑀅𑀬𑀁 𑀕𑀸𑀣𑀸 𑀲𑀼. 𑀦𑀺. 𑁧𑁦𑁪𑁪 𑀅𑀜𑁆𑀜𑀣𑀸 𑀤𑀺𑀲𑁆𑀲𑀢𑀺] 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

𑁧𑁫. 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀢𑁂 𑀢𑀬𑁄 𑀧𑀜𑁆𑀳𑀸. 𑀓𑀺𑀲𑁆𑀲? 𑀲𑁂𑀔𑀸𑀲𑁂𑀔𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑀬𑁄𑀕𑁂𑀦, 𑀏𑀯𑀜𑁆𑀳𑀺 𑀆𑀳. ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂’’𑀢𑀺 𑀅𑀭𑀳𑀢𑁆𑀢𑀁 𑀧𑀼𑀘𑁆𑀙𑀢𑀺, ‘‘𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸’’𑀢𑀺 𑀲𑁂𑀔𑀁 𑀧𑀼𑀘𑁆𑀙𑀢𑀺, ‘‘𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀳𑀸𑀦𑀁 𑀧𑀼𑀘𑁆𑀙𑀢𑀺.

𑀢𑀢𑁆𑀣 𑀯𑀺𑀲𑀚𑁆𑀚𑀦𑀸 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀅𑀦𑀸𑀕𑀢𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁.

𑀓𑁄 ¶ 𑀘 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄? 𑀬𑀁 ¶ 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀦𑀺 𑀘 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁, 𑀅𑀬𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄. 𑀬𑀣𑀸 𑀇𑀥 𑀧𑀼𑀭𑀺𑀲𑁄 𑀢𑀸𑀭𑀓𑀭𑀽𑀧𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀦𑁄 𑀘 𑀕𑀡𑀦𑀲𑀗𑁆𑀓𑁂𑀢𑁂𑀦 𑀚𑀸𑀦𑁂𑀬𑁆𑀬, 𑀅𑀬𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄.

𑀪𑀕𑀯𑀢𑁄 𑀧𑀦 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀅𑀦𑀸𑀯𑀭𑀡𑀜𑀸𑀡𑀤𑀲𑁆𑀲𑀦𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀢𑀢𑁆𑀣 𑀲𑁂𑀔𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁 𑀕𑁂𑀥𑀸 𑀘 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀤𑁄𑀲𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀻𑀬𑁂𑀲𑀼. 𑀢𑀢𑁆𑀣 ¶ 𑀬𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀧𑀺𑀬𑀸𑀬𑀦𑀸 𑀓𑀻𑀴𑀦𑀸, 𑀢𑀁 𑀪𑀕𑀯𑀸 𑀦𑀺𑀯𑀸𑀭𑁂𑀦𑁆𑀢𑁄 𑀏𑀯𑀫𑀸𑀳 ‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸’’𑀢𑀺.

‘‘𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸’’𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀆𑀳. 𑀢𑀣𑀸 𑀳𑀺 𑀲𑁂𑀔𑁄 𑀅𑀪𑀺𑀕𑀺𑀚𑁆𑀛𑀦𑁆𑀢𑁄 𑀅𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀓𑀺𑀮𑁂𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀓𑀺𑀮𑁂𑀲𑀁 𑀨𑀸𑀢𑀺𑀁 𑀓𑀭𑁄𑀢𑀺. 𑀬𑁄 𑀧𑀦 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀅𑀦𑀪𑀺𑀕𑀺𑀚𑁆𑀛𑀦𑁆𑀢𑁄 𑀯𑀸𑀬𑀫𑀢𑀺, 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺.

𑁧𑁬. 𑀓𑀢𑀫𑁂 [𑀓𑀢𑀫𑁂 𑀘 (𑀅𑀝𑁆𑀞.)] 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀅𑀦𑀼𑀲𑀬𑀸 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸? 𑀬𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 ¶ 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸? 𑀬𑀸𑀦𑀺 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸.

𑀬𑁂𑀦 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁.

𑀬𑁂𑀦 ¶ 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀦𑀸𑀥𑀺𑀯𑀸𑀲𑁂𑀢𑀺, 𑀇𑀤𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁.

𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼. 𑀲𑀢𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀏𑀯𑀁 𑀲𑁂𑀔𑁄 𑀲𑀩𑁆𑀩𑁂𑀳𑀺 ¶ 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑁆𑀧𑀫𑀢𑁆𑀢𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀅𑀦𑀸𑀯𑀺𑀮𑀢𑀸𑀬 𑀫𑀦𑀲𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀦𑀲𑀸𑀦𑀸𑀯𑀺𑀮𑁄𑀲𑀺𑀬𑀸’’𑀢𑀺.

𑁧𑁭. ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀮𑁄𑀓𑁄 𑀦𑀸𑀫 𑀢𑀺𑀯𑀺𑀥𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄. 𑀢𑀢𑁆𑀣 𑀓𑀺𑀮𑁂𑀲𑀮𑁄𑀓𑁂𑀦 𑀪𑀯𑀮𑁄𑀓𑁄 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀲𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀦𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀸 𑀪𑀯𑀢𑀺. 𑀲𑀸 𑀤𑀼𑀯𑀺𑀥𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸 𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀬 𑀘 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀬 𑀘. 𑀬𑀤𑀸 𑀳𑀺 𑀲𑁂𑀔𑁄 𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀢𑀤𑀸 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑁂𑀳𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀳𑀺 𑀦𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁 𑀪𑀯𑀢𑀺. 𑀢𑀲𑁆𑀲 𑀤𑁆𑀯𑁂 𑀥𑀫𑁆𑀫𑀸 𑀓𑁄𑀲𑀮𑁆𑀮𑀁 𑀕𑀘𑁆𑀙𑀦𑁆𑀢𑀺 𑁋 𑀤𑀲𑁆𑀲𑀦𑀓𑁄𑀲𑀮𑁆𑀮𑀜𑁆𑀘 𑀪𑀸𑀯𑀦𑀸𑀓𑁄𑀲𑀮𑁆𑀮𑀜𑁆𑀘.

𑀢𑀁 𑀜𑀸𑀡𑀁 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁ः 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑀸 𑀧𑀳𑀸𑀦𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸. 𑀢𑀢𑁆𑀣 ¶ 𑀓𑀢𑀫𑀸 𑀅𑀪𑀺𑀜𑁆𑀜𑀸? 𑀬𑀁 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀘 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀘, 𑀅𑀬𑀁 𑀅𑀪𑀺𑀜𑁆𑀜𑀸.

𑀢𑀢𑁆𑀣 𑀓𑀢𑀫𑀸 𑀧𑀭𑀺𑀜𑁆𑀜𑀸? 𑀏𑀯𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀬𑀸 𑀧𑀭𑀺𑀚𑀸𑀦𑀦𑀸 ‘‘𑀇𑀤𑀁 𑀓𑀼𑀲𑀮𑀁, 𑀇𑀤𑀁 𑀅𑀓𑀼𑀲𑀮𑀁, 𑀇𑀤𑀁 𑀲𑀸𑀯𑀚𑁆𑀚𑀁, 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀓𑀡𑁆𑀳𑀁, 𑀇𑀤𑀁 𑀲𑀼𑀓𑁆𑀓𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀫𑁂 𑀥𑀫𑁆𑀫𑀸 𑀏𑀯𑀁𑀕𑀳𑀺𑀢𑀸, 𑀇𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 [𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺 (𑀓.)], 𑀢𑁂𑀲𑀁 𑀏𑀯𑀁𑀕𑀳𑀺𑀢𑀸𑀦𑀁 𑀅𑀬𑀁 𑀅𑀢𑁆𑀣𑁄’’𑀢𑀺, 𑀅𑀬𑀁 𑀧𑀭𑀺𑀜𑁆𑀜𑀸.

𑀏𑀯𑀁 𑀧𑀭𑀺𑀚𑀸𑀦𑀺𑀢𑁆𑀯𑀸 𑀢𑀬𑁄 𑀥𑀫𑁆𑀫𑀸 𑀅𑀯𑀲𑀺𑀝𑁆𑀞𑀸 𑀪𑀯𑀦𑁆𑀢𑀺 𑀧𑀳𑀸𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀘. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸? 𑀬𑁂 𑀅𑀓𑀼𑀲𑀮𑀸. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸? 𑀬𑁂 𑀓𑀼𑀲𑀮𑀸. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀬𑀁 𑀅𑀲𑀗𑁆𑀔𑀢𑀁. 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 ¶ 𑀓𑀮𑁆𑀬𑀸𑀡𑀢𑀸𑀓𑀼𑀲𑀮𑁄 𑀨𑀮𑀢𑀸𑀓𑀼𑀲𑀮𑁄, 𑀆𑀬𑀓𑀼𑀲𑀮𑁄 𑀅𑀧𑀸𑀬𑀓𑀼𑀲𑀮𑁄 𑀉𑀧𑀸𑀬𑀓𑀼𑀲𑀮𑁄 𑀫𑀳𑀢𑀸 𑀓𑁄𑀲𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺, 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺.

‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀢𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑀺𑀜𑁆𑀚𑀺𑀢𑁂 [𑀲𑀫𑁆𑀫𑀺𑀜𑁆𑀚𑀺𑀢𑁂 (𑀲𑀻.)] 𑀧𑀲𑀸𑀭𑀺𑀢𑁂 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀺𑀪𑀸𑀯𑁂 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀯𑀺𑀳𑀸𑀢𑀩𑁆𑀩𑀁. 𑀇𑀫𑀸 𑀤𑁆𑀯𑁂 𑀘𑀭𑀺𑀬𑀸 𑀅𑀦𑀼𑀜𑁆𑀜𑀸𑀢𑀸 𑀪𑀕𑀯𑀢𑀸 𑀏𑀓𑀸 𑀯𑀺𑀲𑀼𑀤𑁆𑀥𑀸𑀦𑀁, 𑀏𑀓𑀸 𑀯𑀺𑀲𑀼𑀚𑁆𑀛𑀦𑁆𑀢𑀸𑀦𑀁. 𑀓𑁂 𑀯𑀺𑀲𑀼𑀤𑁆𑀥𑀸? 𑀅𑀭𑀳𑀦𑁆𑀢𑁄. 𑀓𑁂 𑀯𑀺𑀲𑀼𑀚𑁆𑀛𑀦𑁆𑀢𑀸? 𑀲𑁂𑀓𑁆𑀔𑀸. 𑀓𑀢𑀓𑀺𑀘𑁆𑀘𑀸𑀦𑀺 𑀳𑀺 𑀅𑀭𑀳𑀢𑁄 ¶ 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀬𑀁 𑀩𑁄𑀚𑁆𑀛𑀁, 𑀢𑀁 𑀘𑀢𑀼𑀩𑁆𑀩𑀺𑀥𑀁 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦, 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀩𑁄𑀚𑁆𑀛𑀁 𑀬𑁄 𑀏𑀯𑀁 𑀚𑀸𑀦𑀸𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ¶ 𑀲𑀢𑁄 𑀅𑀪𑀺𑀓𑁆𑀓𑀫𑀢𑀺 𑀲𑀢𑁄 𑀧𑀝𑀺𑀓𑁆𑀓𑀫𑀢𑀺 𑀔𑀬𑀸 𑀭𑀸𑀕𑀲𑁆𑀲 𑀔𑀬𑀸 𑀤𑁄𑀲𑀲𑁆𑀲 𑀔𑀬𑀸 𑀫𑁄𑀳𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺, 𑀢𑁂𑀦𑀸𑀳 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀲𑀚𑁆𑀚𑀺𑀢𑀩𑁆𑀩𑀁. 𑀲𑀼𑀢𑁆𑀢𑀲𑁆𑀲 𑀘 𑀅𑀦𑀼𑀕𑀻𑀢𑀺 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀫𑀸𑀦𑁂𑀢𑀩𑁆𑀩𑀸 [𑀲𑀫𑀸𑀦𑀬𑀺𑀢𑀩𑁆𑀩𑀸 (𑀲𑀻. 𑀓.)]. 𑀅𑀢𑁆𑀣𑀸𑀧𑀕𑀢𑀁 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀯𑀢𑀺. 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀪𑀯𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀽𑀧𑁂𑀢𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁. 𑀲𑀼𑀢𑁆𑀢𑀜𑁆𑀘 𑀧𑀯𑀺𑀘𑀺𑀦𑀺𑀢𑀩𑁆𑀩𑀁. 𑀓𑀺𑀁 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀘𑁆𑀘 𑀯𑀘𑀦𑀁 𑀅𑀦𑀼𑀲𑀦𑁆𑀥𑀺𑀯𑀘𑀦𑀁 𑀦𑀻𑀢𑀢𑁆𑀣𑀁 𑀦𑁂𑀬𑁆𑀬𑀢𑁆𑀣𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁? 𑀓𑀼𑀳𑀺𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑀩𑁆𑀩𑀸𑀦𑀺, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀢𑀺? 𑀏𑀯𑀁 𑀲𑀼𑀢𑁆𑀢𑀁 𑀧𑀯𑀺𑀘𑁂𑀢𑀩𑁆𑀩𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋 ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑁄.

𑁩. 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄

𑁧𑁮. 𑀢𑀢𑁆𑀣 ¶ 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄? ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦’’𑀦𑁆𑀢𑀺, 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄. 𑀓𑀺𑀁 𑀬𑁄𑀚𑀬𑀢𑀺 [𑀬𑁄𑀚𑁂𑀢𑀺 (𑀲𑀻.)]? 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀩𑀼𑀤𑁆𑀥𑀸𑀧𑀤𑁂𑀲𑁄 𑀲𑀗𑁆𑀖𑀸𑀧𑀤𑁂𑀲𑁄 𑀲𑀫𑁆𑀩𑀳𑀼𑀮𑀢𑁆𑀣𑁂𑀭𑀸𑀧𑀤𑁂𑀲𑁄 [𑀲𑀫𑁆𑀧𑀳𑀼𑀮… (𑀓.)] 𑀏𑀓𑀢𑁆𑀣𑁂𑀭𑀸𑀧𑀤𑁂𑀲𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀼𑀢𑁆𑀢𑁂 𑀑𑀢𑀸𑀭𑀬𑀺𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺, 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺.

𑀓𑀢𑀫𑀲𑁆𑀫𑀺𑀁 ¶ 𑀲𑀼𑀢𑁆𑀢𑁂 𑀑𑀢𑀸𑀭𑀬𑀺𑀢𑀩𑁆𑀩𑀸𑀦𑀺? 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀓𑀢𑀫𑀲𑁆𑀫𑀺𑀁 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺? 𑀭𑀸𑀕𑀯𑀺𑀦𑀬𑁂 𑀤𑁄𑀲𑀯𑀺𑀦𑀬𑁂 𑀫𑁄𑀳𑀯𑀺𑀦𑀬𑁂. 𑀓𑀢𑀫𑀺𑀲𑁆𑀲𑀁 [𑀓𑀢𑀫𑀺𑀬𑀁 (𑀲𑀻.)] 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂. 𑀬𑀤𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀯𑀢𑀭𑀢𑀺, 𑀓𑀺𑀮𑁂𑀲𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀢𑀺 ¶ , 𑀥𑀫𑁆𑀫𑀢𑀜𑁆𑀘 𑀦 𑀯𑀺𑀮𑁄𑀫𑁂𑀢𑀺, 𑀏𑀯𑀁 𑀆𑀲𑀯𑁂 𑀦 𑀚𑀦𑁂𑀢𑀺. 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀁 𑀬𑀁 𑀬𑀼𑀚𑁆𑀚𑀢𑀺, 𑀬𑁂𑀦 𑀬𑁂𑀦 𑀬𑀼𑀚𑁆𑀚𑀢𑀺, 𑀬𑀣𑀸 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀕𑀳𑁂𑀢𑀩𑁆𑀩𑀁.

𑁧𑁯. 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁂𑀦 𑀓𑀢𑀺 𑀧𑀤𑀸𑀦𑀺 𑀧𑀜𑁆𑀳𑁂𑀢𑀺 𑀧𑀤𑀲𑁄 𑀧𑀭𑀺𑀬𑁄𑀕𑀸𑀳𑀺𑀢𑀩𑁆𑀩𑀁 𑀯𑀺𑀘𑁂𑀢𑀩𑁆𑀩𑀁? 𑀬𑀤𑀺 𑀲𑀩𑁆𑀩𑀸𑀦𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀢𑀻𑀡𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀤𑁆𑀯𑁂 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀏𑀓𑀁 𑀧𑀤𑀁 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀢𑀺, 𑀏𑀓𑁄 𑀧𑀜𑁆𑀳𑁄. 𑀢𑀁 𑀉𑀧𑀧𑀭𑀺𑀓𑁆𑀔𑀫𑀸𑀦𑁂𑀦 𑀅𑀜𑁆𑀜𑀸𑀢𑀩𑁆𑀩𑀁 𑀓𑀺𑀁 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀉𑀤𑀸𑀳𑀼 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺. 𑀬𑀣𑀸 𑀓𑀺𑀁 𑀪𑀯𑁂? 𑀬𑀣𑀸 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺.

‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 [𑀧𑀲𑁆𑀲 𑀲. 𑀦𑀺. 𑁧.𑁬𑁬] 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄;

𑀓𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀓𑀺𑀲𑁆𑀲 𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺. 𑀢𑁂 𑀢𑀬𑁄 𑀧𑀜𑁆𑀳𑀸 𑀓𑀣𑀁 𑀜𑀸𑀬𑀢𑀺? 𑀪𑀕𑀯𑀸 𑀳𑀺 𑀤𑁂𑀯𑀢𑀸𑀬 𑀯𑀺𑀲𑀚𑁆𑀚𑁂𑀢𑀺.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 [𑀫𑀘𑁆𑀘𑀼𑀦𑀩𑁆𑀪𑀸𑀳𑀢𑁄 (𑀓.) 𑀣𑁂𑀭𑀕𑀸. 𑁪𑁪𑁮; 𑀲𑀁. 𑀦𑀺. 𑁧.𑁬𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

𑁨𑁦. 𑀢𑀢𑁆𑀣 ¶ 𑀚𑀭𑀸 𑀘 𑀫𑀭𑀡𑀜𑁆𑀘 𑀇𑀫𑀸𑀦𑀺 𑀤𑁆𑀯𑁂 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀚𑀭𑀸𑀬𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀫𑀭𑀡𑀁 𑀯𑀬𑁄. 𑀢𑀢𑁆𑀣 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁. 𑀓𑁂𑀦 𑀓𑀸𑀭𑀡𑁂𑀦, 𑀕𑀩𑁆𑀪𑀕𑀢𑀸𑀧𑀺 ¶ 𑀳𑀺 𑀫𑀻𑀬𑀦𑁆𑀢𑀺, 𑀦 𑀘 𑀢𑁂 𑀚𑀺𑀡𑁆𑀡𑀸 𑀪𑀯𑀦𑁆𑀢𑀺. 𑀅𑀢𑁆𑀣𑀺 𑀘 𑀤𑁂𑀯𑀸𑀦𑀁 𑀫𑀭𑀡𑀁, 𑀦 𑀘 𑀢𑁂𑀲𑀁 𑀲𑀭𑀻𑀭𑀸𑀦𑀺 𑀚𑀻𑀭𑀦𑁆𑀢𑀺. 𑀲𑀓𑁆𑀓𑀢𑁂𑀯 𑀚𑀭𑀸𑀬 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀁, 𑀦 𑀧𑀦 𑀲𑀓𑁆𑀓𑀢𑁂 𑀫𑀭𑀡𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀁 𑀅𑀜𑁆𑀜𑀢𑁆𑀭𑁂𑀯 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑀸. 𑀬𑀁 𑀧𑀦𑀸𑀳 𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀤𑀺𑀲𑁆𑀲𑀦𑁆𑀢𑀺 𑀯𑀻𑀢𑀭𑀸𑀕𑀸 𑀚𑀻𑀭𑀦𑁆𑀢𑀸𑀧𑀺 𑀫𑀻𑀬𑀦𑁆𑀢𑀸𑀧𑀺. 𑀬𑀤𑀺 𑀘 𑀬𑀣𑀸 𑀚𑀭𑀸𑀫𑀭𑀡𑀁, 𑀏𑀯𑀁 𑀢𑀡𑁆𑀳𑀸𑀧𑀺 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂 𑀬𑁄𑀩𑁆𑀩𑀦𑀝𑁆𑀞𑀸𑀧𑀺 𑀯𑀺𑀕𑀢𑀢𑀡𑁆𑀳𑀸 𑀲𑀺𑀬𑀼𑀁. 𑀬𑀣𑀸 𑀘 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀲𑀺𑀬𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀦 𑀘 𑀲𑀺𑀬𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀦 𑀳𑀺 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄. 𑀬𑀣𑀸 𑀘 𑀢𑀡𑁆𑀳𑀸 𑀫𑀕𑁆𑀕𑀯𑀚𑁆𑀛𑀸, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 ¶ 𑀲𑀺𑀬𑀸 𑀫𑀕𑁆𑀕𑀯𑀚𑁆𑀛𑀁. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁. 𑀬𑀤𑀺 𑀘 𑀲𑀦𑁆𑀤𑀺𑀲𑁆𑀲𑀢𑀺 𑀬𑀼𑀢𑁆𑀢𑀺𑀲𑀫𑀸𑀭𑀽𑀴𑁆𑀳𑀁 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀢𑁆𑀢𑀁, 𑀩𑁆𑀬𑀜𑁆𑀚𑀦𑀢𑁄𑀧𑀺 𑀕𑀯𑁂𑀲𑀺𑀢𑀩𑁆𑀩𑀁.

𑀲𑀮𑁆𑀮𑁄𑀢𑀺 𑀯𑀸 𑀥𑀽𑀧𑀸𑀬𑀦𑀦𑁆𑀢𑀺 𑀯𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁. 𑀦 𑀳𑀺 𑀬𑀼𑀚𑁆𑀚𑀢𑀺 𑀇𑀘𑁆𑀙𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁. 𑀢𑀡𑁆𑀳𑀸𑀬 𑀅𑀥𑀺𑀧𑁆𑀧𑀸𑀬𑁂 𑀅𑀧𑀭𑀺𑀧𑀽𑀭𑀫𑀸𑀦𑁂 𑀦𑀯𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁.

𑀬𑀁 𑀧𑀦𑀺𑀤𑀁 𑀪𑀕𑀯𑀢𑀸 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀁 𑀇𑀘𑁆𑀙𑀸𑀢𑀺𑀧𑀺 𑀢𑀡𑁆𑀳𑀸𑀢𑀺𑀧𑀺, 𑀇𑀤𑀁 𑀪𑀕𑀯𑀢𑀸 𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀁 𑀇𑀘𑁆𑀙𑀸𑀢𑀺𑀧𑀺 𑀢𑀡𑁆𑀳𑀸𑀢𑀺𑀧𑀺, 𑀲𑀩𑁆𑀩𑀸 𑀳𑀺 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸. 𑀬𑀣𑀸 𑀲𑀩𑁆𑀩𑁄 𑀅𑀕𑁆𑀕𑀺 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑁄, 𑀅𑀧𑀺 𑀘 𑀉𑀧𑀸𑀤𑀸𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀸𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀓𑀝𑁆𑀞𑀕𑁆𑀕𑀻𑀢𑀺𑀧𑀺 𑀢𑀺𑀡𑀕𑁆𑀕𑀻𑀢𑀺𑀧𑀺 𑀲𑀓𑀮𑀺𑀓𑀕𑁆𑀕𑀻𑀢𑀺𑀧𑀺 𑀕𑁄𑀫𑀬𑀕𑁆𑀕𑀻𑀢𑀺𑀧𑀺 𑀣𑀼𑀲𑀕𑁆𑀕𑀻𑀢𑀺𑀧𑀺 𑀲𑀗𑁆𑀓𑀸𑀭𑀕𑁆𑀕𑀻𑀢𑀺𑀧𑀺, 𑀲𑀩𑁆𑀩𑁄 𑀳𑀺 𑀅𑀕𑁆𑀕𑀺 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁄𑀯. 𑀏𑀯𑀁 𑀲𑀩𑁆𑀩𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸 ¶ , 𑀅𑀧𑀺 𑀢𑀼 𑀆𑀭𑀫𑁆𑀫𑀡𑀉𑀧𑀸𑀤𑀸𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑁂𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀸 𑀇𑀘𑁆𑀙𑀸𑀇𑀢𑀺𑀧𑀺 𑀢𑀡𑁆𑀳𑀸𑀇𑀢𑀺𑀧𑀺 𑀲𑀮𑁆𑀮𑁄𑀇𑀢𑀺𑀧𑀺 𑀥𑀽𑀧𑀸𑀬𑀦𑀸𑀇𑀢𑀺𑀧𑀺 𑀲𑀭𑀺𑀢𑀸𑀇𑀢𑀺𑀧𑀺 𑀯𑀺𑀲𑀢𑁆𑀢𑀺𑀓𑀸𑀇𑀢𑀺𑀧𑀺 𑀲𑀺𑀦𑁂𑀳𑁄𑀇𑀢𑀺𑀧𑀺 𑀓𑀺𑀮𑀫𑀣𑁄𑀇𑀢𑀺𑀧𑀺 𑀮𑀢𑀸𑀇𑀢𑀺𑀧𑀺 𑀫𑀜𑁆𑀜𑀦𑀸𑀇𑀢𑀺𑀧𑀺 𑀩𑀦𑁆𑀥𑁄𑀇𑀢𑀺𑀧𑀺 𑀆𑀲𑀸𑀇𑀢𑀺𑀧𑀺 𑀧𑀺𑀧𑀸𑀲𑀸𑀇𑀢𑀺𑀧𑀺 𑀅𑀪𑀺𑀦𑀦𑁆𑀤𑀦𑀸𑀇𑀢𑀺𑀧𑀺, 𑀇𑀢𑀺 𑀲𑀩𑁆𑀩𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸. 𑀬𑀣𑀸 𑀘 𑀯𑁂𑀯𑀘𑀦𑁂 𑀯𑀼𑀢𑁆𑀢𑀸.

‘‘𑀆𑀲𑀸 ¶ 𑀘 𑀧𑀺𑀳𑀸 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀓𑀸’’𑀢𑀺 [𑀲𑀫𑀽𑀮𑀺𑀓𑀸 (𑀲𑀻.)].

𑀢𑀡𑁆𑀳𑀸𑀬𑁂𑀢𑀁 𑀯𑁂𑀯𑀘𑀦𑀁. 𑀬𑀣𑀸𑀳 𑀪𑀕𑀯𑀸 𑁋 𑀭𑀽𑀧𑁂 𑀢𑀺𑀲𑁆𑀲 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲. 𑀏𑀯𑀁 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀼 𑀯𑀺𑀜𑁆𑀜𑀸𑀡𑁂 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀡𑁆𑀳𑀸𑀬𑁂𑀢𑀁 𑀯𑁂𑀯𑀘𑀦𑀁. 𑀏𑀯𑀁 𑀬𑀼𑀚𑁆𑀚𑀢𑀺.

𑁨𑁧. 𑀲𑀩𑁆𑀩𑁄 𑀤𑀼𑀓𑁆𑀔𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀭𑀫𑀽𑀮𑀓𑁄, 𑀦 𑀧𑀦 𑀬𑀼𑀚𑁆𑀚𑀢𑀺 𑀲𑀩𑁆𑀩𑁄 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁.

𑀬𑀣𑀸 ¶ 𑀳𑀺 [𑀬𑀣𑀸𑀳 (𑀲𑀻.)] 𑀪𑀕𑀯𑀸 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀁 𑀤𑁂𑀲𑀬𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀁 𑀤𑁂𑀲𑀬𑀢𑀺. 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑀬𑀢𑀺. 𑀬𑀤𑀺 𑀳𑀺 𑀪𑀕𑀯𑀸 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀤𑁂𑀲𑁂𑀬𑁆𑀬. 𑀲𑀼𑀔𑀁 𑀯𑀸 𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁 𑀲𑀼𑀔𑀁 𑀯𑀸 𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀧𑀳𑀸𑀦𑀁 𑀤𑁂𑀲𑁂𑀬𑁆𑀬, 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀏𑀯𑀁 𑀬𑀁 𑀓𑀺𑀜𑁆𑀘𑀺 𑀭𑀸𑀕𑀲𑁆𑀲 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀤𑁄𑀲𑀲𑁆𑀲 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀫𑁄𑀳𑀲𑁆𑀲 ¶ 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁. 𑀲𑀩𑁆𑀩𑀁 𑀢𑀁 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀺.

𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀩𑁆𑀬𑀸𑀧𑀸𑀤𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀯𑀺𑀳𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀳𑁂𑀲𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀫𑀼𑀤𑀺𑀢𑀸 𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀅𑀭𑀢𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀅𑀭𑀢𑀺 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀭𑀸𑀕𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻 𑀢𑁂𑀦 𑀢𑁂𑀦𑁂𑀯 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸 ¶ , 𑀦𑀺𑀫𑀺𑀢𑁆𑀢𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀅𑀲𑁆𑀫𑀻𑀢𑀺 𑀯𑀺𑀕𑀢𑀁 𑀅𑀬𑀫𑀳𑀫𑀲𑁆𑀫𑀻𑀢𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦 𑀫𑁂 𑀓𑀺𑀲𑁆𑀫𑀻𑀢𑀺 𑀓𑀣𑀲𑁆𑀫𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀬𑀣𑀸 𑀯𑀸 𑀧𑀦 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀢𑀓𑁆𑀓𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀉𑀧𑁂𑀓𑁆𑀔𑀸𑀲𑀼𑀔𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀢𑀢𑀺𑀬𑀁 ¶ 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀧𑀻𑀢𑀺𑀲𑀼𑀔𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸 ¶ . 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀭𑀽𑀧𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 ¶ 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀲𑀜𑁆𑀜𑀽𑀧𑀘𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀦 𑀘 𑀅𑀪𑀺𑀦𑀻𑀳𑀸𑀭𑀁 𑀔𑀫𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀅𑀣 𑀘 𑀅𑀪𑀺𑀦𑀻𑀳𑀸𑀭𑀁 𑀔𑀫𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀏𑀯𑀁 𑀲𑀩𑁆𑀩𑁂 𑀦𑀯𑀲𑀼𑀢𑁆𑀢𑀦𑁆𑀢𑀸 𑀬𑀣𑀸𑀥𑀫𑁆𑀫𑀁 𑀬𑀣𑀸𑀯𑀺𑀦𑀬𑀁 𑀬𑀣𑀸𑀲𑀢𑁆𑀣𑀼𑀲𑀸𑀲𑀦𑀁 ¶ 𑀲𑀩𑁆𑀩𑀢𑁄 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁 𑀬𑀸 𑀪𑀽𑀫𑀺 𑀬𑁄 𑀘 𑀕𑁄𑀘𑀭𑁄 𑀢𑁂𑀲’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀬𑀼𑀢𑁆𑀢𑀺 𑀳𑀸𑀭𑁄.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄

𑁨𑁨. 𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄? ‘‘𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄’’𑀢𑀺, 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄. 𑀓𑀺𑀁 ¶ 𑀤𑁂𑀲𑁂𑀢𑀺? 𑀲𑀩𑁆𑀩𑀥𑀫𑁆𑀫𑀬𑀸𑀣𑀸𑀯𑀅𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀸 𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀢𑀲𑁆𑀲𑀸 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀧𑀤𑀝𑁆𑀞𑀸𑀦𑀁. 𑀧𑀢𑁆𑀣𑀦𑀮𑀓𑁆𑀔𑀡𑁄 𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀯𑀡𑁆𑀡𑀲𑀡𑁆𑀞𑀸𑀦𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀮𑀓𑁆𑀔𑀡𑀸 𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀇𑀦𑁆𑀤𑁆𑀭𑀺𑀬𑀸 𑀲𑀁𑀯𑀭𑁄 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑀉𑀧𑀕𑀫𑀦𑀮𑀓𑁆𑀔𑀡𑀸 𑀲𑀼𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀅𑀲𑁆𑀲𑀸𑀤𑁄 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀸 𑀦𑀺𑀘𑁆𑀘𑀲𑀜𑁆𑀜𑀸, 𑀢𑀲𑁆𑀲𑀸 𑀯𑀺𑀜𑁆𑀜𑀸𑀡𑀁 𑀧𑀤𑀝𑁆𑀞𑀸𑀦𑀁. 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀼𑀓𑁆𑀔𑀲𑀜𑁆𑀜𑀸𑀅𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀸 𑀅𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀦𑀸𑀫𑀓𑀸𑀬𑁄 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀲𑀫𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀧𑀤𑀝𑁆𑀞𑀸𑀦𑀁. 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀲𑀫𑀣𑁄, 𑀢𑀲𑁆𑀲 𑀅𑀲𑀼𑀪𑀸 𑀧𑀤𑀝𑁆𑀞𑀸𑀦𑀁. 𑀇𑀘𑁆𑀙𑀸𑀯𑀘𑀭𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀅𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 [𑀯𑁂𑀭𑀫𑀡𑀺 (𑀓.)] 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀚𑁆𑀚𑀮𑀓𑁆𑀔𑀡𑁄 ¶ 𑀅𑀤𑁄𑀲𑁄, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼𑀅𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑁄 [𑀯𑀢𑁆𑀣𑀼𑀅𑀯𑀺𑀧𑁆𑀧𑀝𑀺𑀧𑀸𑀤𑀸𑀦𑀮𑀓𑁆𑀔𑀡𑁄 (𑀲𑀻. 𑀓.)] 𑀅𑀫𑁄𑀳𑁄, 𑀢𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀕𑀳𑀡𑀮𑀓𑁆𑀔𑀡𑀸 𑀅𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀦𑀺𑀩𑁆𑀩𑀺𑀤𑀸 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑀧𑀭𑀺𑀚𑀸𑀦𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀯𑁂𑀤𑀦𑀸 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀮𑀓𑁆𑀔𑀡𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 ¶ , 𑀢𑀲𑁆𑀲𑀸 𑀉𑀧𑁆𑀧𑀸𑀤𑀯𑀬𑀸 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀅𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸 𑀅𑀦𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀥𑀫𑁆𑀫𑀲𑀜𑁆𑀜𑀸 𑀧𑀤𑀝𑁆𑀞𑀸𑀦𑀁.

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀙𑀝𑁆𑀞𑀸𑀬𑀢𑀦𑀁 𑀪𑀯𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀦𑀺𑀩𑁆𑀩𑀢𑁆𑀢𑀪𑀯𑀸𑀦𑀼𑀧𑀲𑁆𑀲𑀺𑀢𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀲𑀤𑁆𑀥𑀸 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘, 𑀅𑀦𑀸𑀯𑀺𑀮𑀮𑀓𑁆𑀔𑀡𑁄 𑀧𑀲𑀸𑀤𑁄 𑀲𑀫𑁆𑀧𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘. 𑀅𑀪𑀺𑀧𑀢𑁆𑀣𑀺𑀬𑀦𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀢𑀲𑁆𑀲𑀸 𑀅𑀯𑁂𑀘𑁆𑀘𑀧𑀲𑀸𑀤𑁄 𑀧𑀤𑀝𑁆𑀞𑀸𑀦𑀁. 𑀅𑀦𑀸𑀯𑀺𑀮𑀮𑀓𑁆𑀔𑀡𑁄 𑀧𑀲𑀸𑀤𑁄, 𑀢𑀲𑁆𑀲 𑀲𑀤𑁆𑀥𑀸 𑀧𑀤𑀝𑁆𑀞𑀸𑀦𑀁. 𑀆𑀭𑀫𑁆𑀪𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀢𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀺, 𑀢𑀲𑁆𑀲𑀸 𑀲𑀢𑀺𑀧𑀝𑁆𑀞𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀏𑀓𑀕𑁆𑀕𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀢𑀲𑁆𑀲 𑀛𑀸𑀦𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀢𑀲𑁆𑀲𑀸 𑀲𑀘𑁆𑀘𑀸𑀦𑀺 𑀧𑀤𑀝𑁆𑀞𑀸𑀦𑀁.

𑀅𑀧𑀭𑁄 𑀦𑀬𑁄, 𑀅𑀲𑁆𑀲𑀸𑀤𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀢𑀲𑁆𑀲 𑀅𑀯𑀺𑀚𑁆𑀚𑀸 𑀧𑀤𑀝𑁆𑀞𑀸𑀦𑀁. 𑀲𑀘𑁆𑀘𑀲𑀫𑁆𑀫𑁄𑀳𑀦𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀲𑀸 𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀧𑀼𑀦𑀩𑁆𑀪𑀯𑀯𑀺𑀭𑁄𑀳𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀢𑁂 [𑀢𑀁 (𑀓.)] 𑀯𑀺𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀑𑀧𑀧𑀘𑁆𑀘𑀬𑀺𑀓𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀗𑁆𑀖𑀸𑀢𑀮𑀓𑁆𑀔𑀡𑀁 𑀦𑀸𑀫𑀭𑀽𑀧𑀁, 𑀢𑀁 𑀙𑀴𑀸𑀬𑀢𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀦𑀮𑀓𑁆𑀔𑀡𑀁 𑀙𑀴𑀸𑀬𑀢𑀦𑀁, 𑀢𑀁 𑀨𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀓𑁆𑀔𑀼𑀭𑀽𑀧𑀯𑀺𑀜𑁆𑀜𑀸𑀡𑀲𑀦𑁆𑀦𑀺𑀧𑀸𑀢𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑁄 𑀯𑁂𑀤𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀇𑀝𑁆𑀞𑀸𑀦𑀺𑀝𑁆𑀞𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀲𑀸 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 ¶ 𑀢𑀡𑁆𑀳𑀸, 𑀲𑀸 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀑𑀧𑀧𑀘𑁆𑀘𑀬𑀺𑀓𑀁 𑀉𑀧𑀸𑀤𑀸𑀦𑀁, 𑀢𑀁 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀲𑀫𑁆𑀪𑀯𑀦𑀮𑀓𑁆𑀔𑀡𑁄 𑀪𑀯𑁄, 𑀲𑁄 𑀚𑀸𑀢𑀺𑀬𑀸 ¶ 𑀧𑀤𑀝𑁆𑀞𑀸𑀦𑀁. 𑀔𑀦𑁆𑀥𑀧𑀸𑀢𑀼𑀪𑀯𑀦𑀮𑀓𑁆𑀔𑀡𑀸 𑀚𑀸𑀢𑀺, 𑀲𑀸 𑀚𑀭𑀸𑀬 𑀧𑀤𑀝𑁆𑀞𑀸𑀦𑀁. 𑀉𑀧𑀥𑀺𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀲𑀸 𑀫𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀮𑀓𑁆𑀔𑀡𑀁 𑀫𑀭𑀡𑀁, 𑀢𑀁 𑀲𑁄𑀓𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀉𑀲𑁆𑀲𑀼𑀓𑁆𑀓𑀓𑀸𑀭𑀓𑁄 𑀲𑁄𑀓𑁄, 𑀲𑁄 𑀧𑀭𑀺𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁 ¶ . 𑀮𑀸𑀮𑀧𑁆𑀧𑀓𑀸𑀭𑀓𑁄 𑀧𑀭𑀺𑀤𑁂𑀯𑁄, 𑀲𑁄 𑀤𑀼𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀲𑀁𑀧𑀻𑀴𑀦𑀁 𑀤𑀼𑀓𑁆𑀔𑀁, 𑀢𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀺𑀢𑁆𑀢𑀲𑀁𑀧𑀻𑀴𑀦𑀁 𑀤𑁄𑀫𑀦𑀲𑁆𑀲𑀁, 𑀢𑀁 𑀉𑀧𑀸𑀬𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀑𑀤𑀳𑀦𑀓𑀸𑀭𑀓𑁄 𑀉𑀧𑀸𑀬𑀸𑀲𑁄, 𑀲𑁄 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀫𑀸𑀦𑀺 𑀪𑀯𑀗𑁆𑀕𑀸𑀦𑀺 𑀬𑀤𑀸 𑀲𑀫𑀕𑁆𑀕𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀪𑀯𑀦𑁆𑀢𑀺 𑀲𑁄 𑀪𑀯𑁄, 𑀢𑀁 𑀲𑀁𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁄 𑀫𑀕𑁆𑀕𑁄, 𑀲𑁄 𑀦𑀺𑀭𑁄𑀥𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀢𑀺𑀢𑁆𑀣𑀜𑁆𑀜𑀼𑀢𑀸 𑀧𑀻𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀧𑀻𑀢𑀜𑁆𑀜𑀼𑀢𑀸 𑀧𑀢𑁆𑀢𑀜𑁆𑀜𑀼𑀢𑀸𑀬 [𑀫𑀢𑁆𑀢𑀜𑁆𑀜𑀼𑀢𑀸𑀬 (𑀲𑀻. 𑀓.)] 𑀧𑀤𑀝𑁆𑀞𑀸𑀦𑀁, 𑀧𑀢𑁆𑀢𑀜𑁆𑀜𑀼𑀢𑀸 𑀅𑀢𑁆𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀅𑀢𑁆𑀢𑀜𑁆𑀜𑀼𑀢𑀸 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀲𑀻𑀮𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀲𑀻𑀮𑀸𑀦𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀼𑀔𑀁 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀸𑀬 𑀧𑀤𑀝𑁆𑀞𑀸𑀦𑀁, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀏𑀯𑀁 𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀬𑁄 𑀓𑁄𑀘𑀺 𑀧𑀘𑁆𑀘𑀬𑁄, 𑀲𑀩𑁆𑀩𑁄 𑀲𑁄 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑁫. 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁄

𑁨𑁩. 𑀢𑀢𑁆𑀣 ¶ 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? ‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂’’𑀢𑀺, 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄. 𑀓𑀺𑀁 𑀮𑀓𑁆𑀔𑀬𑀢𑀺? 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀬𑀣𑀸 𑀓𑀺𑀁 𑀪𑀯𑁂? 𑀬𑀣𑀸𑀳 𑀪𑀕𑀯𑀸 𑁋

‘‘𑀘𑀓𑁆𑀔𑀼𑀁 ¶ , 𑀪𑀺𑀓𑁆𑀔𑀯𑁂, 𑀅𑀦𑀯𑀝𑁆𑀞𑀺𑀢𑀁 𑀇𑀢𑁆𑀢𑀭𑀁 𑀧𑀭𑀺𑀢𑁆𑀢𑀁 𑀧𑀪𑀗𑁆𑀕𑀼 𑀧𑀭𑀢𑁄 𑀤𑀼𑀓𑁆𑀔𑀁 𑀩𑁆𑀬𑀲𑀦𑀁 𑀘𑀮𑀦𑀁 [𑀘𑀮𑀁 (𑀲𑀻.)] 𑀓𑀼𑀓𑁆𑀓𑀼𑀴𑀁 𑀲𑀗𑁆𑀔𑀸𑀭𑀁 [𑀲𑀲𑀗𑁆𑀔𑀸𑀭𑀁 (𑀓.)] 𑀯𑀥𑀓𑀁 𑀅𑀫𑀺𑀢𑁆𑀢𑀫𑀚𑁆𑀛𑁂. 𑀇𑀫𑀲𑁆𑀫𑀺𑀁 𑀘𑀓𑁆𑀔𑀼𑀲𑁆𑀫𑀺𑀁 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀲𑀩𑁆𑀩𑀸𑀦𑀺 𑀳𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑀥𑀓𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸𑀦𑀺. 𑀬𑀣𑀸 𑀘𑀸𑀳 𑀪𑀕𑀯𑀸 𑁋

‘‘𑀅𑀢𑀻𑀢𑁂 ¶ , 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀳𑀺, 𑀅𑀦𑀸𑀕𑀢𑀁 𑀭𑀽𑀧𑀁 𑀫𑀸 𑀅𑀪𑀺𑀦𑀦𑁆𑀤𑀺 [𑀅𑀪𑀺𑀦𑀦𑁆𑀤 (𑀓.)], 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀘𑀸𑀕𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀚𑁆𑀚. 𑀇𑀫𑀲𑁆𑀫𑀺𑀁 𑀭𑀽𑀧𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀲𑀩𑁆𑀩𑁂 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀬𑀫𑀓𑁄𑀯𑀸𑀤𑀲𑀼𑀢𑁆𑀢𑁂 [𑀧𑀲𑁆𑀲 𑀲𑀁. 𑀦𑀺. 𑁩.𑁮𑁪] 𑀯𑀥𑀓𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸 𑀯𑀼𑀢𑁆𑀢𑀸. 𑀬𑀣𑀸 𑀘𑀸𑀳 𑀪𑀕𑀯𑀸 𑁋

‘‘𑀬𑁂𑀲𑀜𑁆𑀘 [𑀧𑀲𑁆𑀲 𑀥. 𑀧. 𑁨𑁯𑁩] 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸𑀲𑀢𑀺;

𑀅𑀓𑀺𑀘𑁆𑀘𑀁 𑀢𑁂 𑀦 𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀲𑀸𑀢𑀘𑁆𑀘𑀓𑀸𑀭𑀺𑀦𑁄’’.

𑀇𑀢𑀺 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀼𑀢𑁆𑀢𑀸𑀬 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀯𑁂𑀤𑀦𑀸𑀕𑀢𑀸 𑀲𑀢𑀺 𑀘𑀺𑀢𑁆𑀢𑀕𑀢𑀸 𑀥𑀫𑁆𑀫𑀕𑀢𑀸 𑀘. 𑀢𑀣𑀸 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀫𑀼𑀢𑀁 𑀯𑀸𑀢𑀺 𑀯𑀼𑀢𑁆𑀢𑁂 𑀯𑀼𑀢𑁆𑀢𑀁 𑀪𑀯𑀢𑀺 𑀯𑀺𑀜𑁆𑀜𑀸𑀢𑀁. 𑀬𑀣𑀸 𑀘𑀸𑀳 𑀪𑀕𑀯𑀸 𑁋

𑀢𑀲𑁆𑀫𑀸𑀢𑀺𑀳 ¶ 𑀢𑁆𑀯𑀁 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. ‘‘𑀆𑀢𑀸𑀧𑀻’’𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, ‘‘𑀲𑀫𑁆𑀧𑀚𑀸𑀦𑁄’’𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, ‘‘𑀲𑀢𑀺𑀫𑀸’’𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁, ‘‘𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀏𑀯𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦, 𑀏𑀓𑀮𑀓𑁆𑀔𑀡𑀢𑁆𑀢𑀸 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁.

𑁨𑁪. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀬𑀫𑀸𑀦𑁂𑀲𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀧𑀜𑁆𑀘 𑀩𑀮𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘𑀲𑀼 𑀩𑀮𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀯 [𑀲𑀩𑁆𑀩𑁂 𑀘 (𑀲𑀻. 𑀓.)] 𑀩𑁄𑀥𑀗𑁆𑀕𑀫𑀸 𑀥𑀫𑁆𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 ¶ . 𑀓𑁂𑀦 𑀓𑀸𑀭𑀡𑁂𑀦, 𑀲𑀩𑁆𑀩𑁂 𑀳𑀺 𑀩𑁄𑀥𑀗𑁆𑀕𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑁂𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸, 𑀢𑁂 𑀏𑀓𑀮𑀓𑁆𑀔𑀡𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

𑀏𑀯𑀁 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀬𑀦𑁆𑀢𑀺, 𑀆𑀳𑀸𑀭𑀸 ¶ 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀬𑁄𑀕𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀕𑀦𑁆𑀣𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁄 𑀪𑀯𑀢𑀺, 𑀆𑀲𑀯𑁂𑀳𑀺 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀑𑀖𑁂𑀳𑀺 𑀘 𑀦𑀺𑀢𑁆𑀣𑀺𑀡𑁆𑀡𑁄 𑀪𑀯𑀢𑀺, 𑀲𑀮𑁆𑀮𑁂𑀳𑀺 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀅𑀕𑀢𑀺𑀕𑀫𑀦𑁂𑀳𑀺 𑀦 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀏𑀯𑀁 ¶ 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀢𑁆𑀢𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺.

𑀬𑀢𑁆𑀣 𑀯𑀸 𑀧𑀦 𑀭𑀽𑀧𑀺𑀦𑁆𑀤𑁆𑀭𑀺𑀬𑀁 𑀤𑁂𑀲𑀺𑀢𑀁, 𑀤𑁂𑀲𑀺𑀢𑀸 𑀢𑀢𑁆𑀣𑁂𑀯 𑀭𑀽𑀧𑀥𑀸𑀢𑀼 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑀸𑀬𑀢𑀦𑀁. 𑀬𑀢𑁆𑀣 𑀯𑀸 𑀧𑀦 𑀲𑀼𑀔𑀸 𑀯𑁂𑀤𑀦𑀸 𑀤𑁂𑀲𑀺𑀢𑀸, 𑀤𑁂𑀲𑀺𑀢𑀁 𑀢𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀘 𑀅𑀭𑀺𑀬𑀲𑀘𑁆𑀘𑀁. 𑀬𑀢𑁆𑀣 𑀯𑀸 𑀧𑀦 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑁂𑀲𑀺𑀢𑀸, 𑀤𑁂𑀲𑀺𑀢𑀁 𑀢𑀢𑁆𑀣 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀜𑁆𑀘 𑀅𑀭𑀺𑀬𑀲𑀘𑁆𑀘𑀁. 𑀬𑀢𑁆𑀣 𑀯𑀸 𑀧𑀦 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀤𑁂𑀲𑀺𑀢𑀸, 𑀤𑁂𑀲𑀺𑀢𑀁 𑀢𑀢𑁆𑀣 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀩𑁆𑀩𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀓𑁂𑀦 𑀓𑀸𑀭𑀡𑁂𑀦, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀳𑀺 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸 𑀅𑀦𑀼𑀲𑁂𑀢𑀺. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀲𑁄 𑀘 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑀁𑀓𑀺𑀮𑁂𑀲𑀧𑀓𑁆𑀔𑁂𑀦 𑀳𑀸𑀢𑀩𑁆𑀩𑁄, 𑀯𑀻𑀢𑀭𑀸𑀕𑀯𑀻𑀢𑀤𑁄𑀲𑀯𑀻𑀢𑀫𑁄𑀳𑀅𑀭𑀺𑀬𑀥𑀫𑁆𑀫𑁂𑀳𑀺 𑀳𑀸𑀢𑀩𑁆𑀩𑁄.

𑀏𑀯𑀁 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑀺𑀘𑁆𑀘𑀢𑁄 𑀘 𑀮𑀓𑁆𑀔𑀡𑀢𑁄 𑀘 𑀲𑀸𑀫𑀜𑁆𑀜𑀢𑁄 𑀘 𑀘𑀼𑀢𑀽𑀧𑀧𑀸𑀢𑀢𑁄 𑀘, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀅𑀯𑀲𑀺𑀝𑁆𑀞𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂’’𑀢𑀺.

𑀦𑀺𑀬𑀼𑀢𑁆𑀢𑁄 𑀮𑀓𑁆𑀔𑀡𑁄 𑀳𑀸𑀭𑁄.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄

𑁨𑁫. 𑀢𑀢𑁆𑀣 ¶ 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄’’𑀢𑀺 𑀅𑀬𑀁. 𑀩𑁆𑀬𑀜𑁆𑀚𑀦𑁂𑀦 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀜𑁆𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀦𑀺𑀤𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀘 𑀕𑀯𑁂𑀲𑀺𑀢𑀩𑁆𑀩𑁄 ¶ . 𑀢𑀢𑁆𑀣 ¶ 𑀓𑀢𑀫𑀁 𑀦𑁂𑀭𑀼𑀢𑁆𑀢𑀁, 𑀬𑀸 𑀦𑀺𑀭𑀼𑀢𑁆𑀢𑀺𑀧𑀤𑀲𑀁𑀳𑀺𑀢𑀸, 𑀬𑀁 𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡𑀁. 𑀬𑀤𑀸 𑀳𑀺 𑀪𑀺𑀓𑁆𑀔𑀼 𑀅𑀢𑁆𑀣𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺, 𑀥𑀫𑁆𑀫𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺, 𑀢𑀣𑀸 𑀢𑀣𑀸 𑀦𑀁 𑀅𑀪𑀺𑀦𑀺𑀭𑁄𑀧𑁂𑀢𑀺. 𑀅𑀬𑀜𑁆𑀘 𑀯𑀼𑀘𑁆𑀘𑀢𑀺 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀩𑁆𑀬𑀜𑁆𑀚𑀦𑀓𑀼𑀲𑀮𑁄 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄 𑀤𑁂𑀲𑀦𑀸𑀓𑀼𑀲𑀮𑁄 𑀅𑀢𑀻𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀅𑀦𑀸𑀕𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀥𑀺𑀯𑀘𑀦𑀓𑀼𑀲𑀮𑁄 𑀇𑀢𑁆𑀣𑀸𑀥𑀺𑀯𑀘𑀦𑀓𑀼𑀲𑀮𑁄 𑀧𑀼𑀭𑀺𑀲𑀸𑀥𑀺𑀯𑀘𑀦𑀓𑀼𑀲𑀮𑁄 𑀦𑀧𑀼𑀁𑀲𑀓𑀸𑀥𑀺𑀯𑀘𑀦𑀓𑀼𑀲𑀮𑁄 𑀏𑀓𑀸𑀥𑀺𑀯𑀘𑀦𑀓𑀼𑀲𑀮𑁄 𑀅𑀦𑁂𑀓𑀸𑀥𑀺𑀯𑀘𑀦𑀓𑀼𑀲𑀮𑁄, 𑀏𑀯𑀁 𑀲𑀩𑁆𑀩𑀸𑀦𑀺 𑀓𑀸𑀢𑀩𑁆𑀩𑀸𑀦𑀺 𑀚𑀦𑀧𑀤𑀦𑀺𑀭𑀼𑀢𑁆𑀢𑀸𑀦𑀺 𑀲𑀩𑁆𑀩𑀸 𑀘 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑁄. 𑀅𑀬𑀁 𑀦𑀺𑀭𑀼𑀢𑁆𑀢𑀺𑀧𑀤𑀲𑀁𑀳𑀺𑀢𑀸.

𑁨𑁬. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀧𑁆𑀧𑀸𑀬𑁄?

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂 [𑀯𑀺𑀬 𑀯𑀲𑁆𑀲𑀓𑀸𑀮𑁂 𑀚𑀸. 𑁧.𑁧𑁦.𑁧𑁦𑁩];

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀧𑀸𑀬𑁂𑀳𑀺 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀥𑀫𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 [𑀳𑀜𑁆𑀜𑀢𑁂 (𑀲𑀻.)] 𑀩𑀚𑁆𑀛𑀢𑁂 𑀘;

𑀏𑀯𑀁 𑀅𑀬𑀁 𑀧𑁂𑀘𑁆𑀘 𑀧𑀚𑀸 𑀧𑀭𑀢𑁆𑀣, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 [𑀳𑀜𑁆𑀜𑀢𑁂 (𑀲𑀻.)] 𑀩𑀚𑁆𑀛𑀢𑁂 𑀘𑀸’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀉𑀧𑀘𑀺𑀢𑀸𑀦𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀸𑀦𑀁 𑀅𑀦𑀺𑀝𑁆𑀞𑀁 𑀅𑀲𑀸𑀢𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀲𑀼𑀔𑀓𑀸𑀫𑀸𑀦𑀺 [𑀧𑀲𑁆𑀲 𑀥. 𑀧. 𑁧𑁩𑁧-𑁧𑁩𑁨] 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀇𑀥 ¶ 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀲𑀼𑀔𑁂𑀦 𑀅𑀢𑁆𑀣𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀓𑀁 𑀓𑀫𑁆𑀫𑀁 (𑀓.)] 𑀦 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀫𑀺𑀤𑁆𑀥𑀻 ¶ ¶ [𑀧𑀲𑁆𑀲 𑀥. 𑀧. 𑁩𑁨𑁫] 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀚𑀭𑀸𑀫𑀭𑀡𑁂𑀦 𑀅𑀝𑁆𑀝𑀺𑀬𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀕𑀸𑀭𑀯𑀸 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁 [𑀅𑀫𑀢𑀁 𑀧𑀤𑀁 (𑀓.) 𑀧𑀲𑁆𑀲 𑀥. 𑀧. 𑁨𑁧], 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀫𑀢𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑁨𑁭. 𑀢𑀢𑁆𑀣 𑀓𑀢𑀫𑀁 𑀦𑀺𑀤𑀸𑀦𑀁? 𑀬𑀣𑀸 𑀲𑁄 𑀥𑀦𑀺𑀬𑁄 𑀕𑁄𑀧𑀸𑀮𑀓𑁄 𑀪𑀕𑀯𑀦𑁆𑀢𑀁 𑀆𑀳 𑁋

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 [𑀕𑁄𑀫𑀺𑀓𑁄 (𑀲𑀻.), 𑀕𑁄𑀧𑀺𑀓𑁄 (𑀓.) 𑀲𑀼. 𑀦𑀺. 𑁩𑁩; 𑀲𑀁. 𑀦𑀺. 𑁧.𑁧𑁪𑁪 𑀧𑀲𑁆𑀲𑀺𑀢𑀩𑁆𑀩𑀁] 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀪𑀕𑀯𑀸 𑀆𑀳 𑁋

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀓𑁄 [𑀕𑁄𑀫𑀺𑀓𑁄 (𑀲𑀻.)] 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀇𑀫𑀺𑀦𑀸 ¶ 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑀁 𑀧𑀭𑀺𑀕𑁆𑀕𑀳𑀁 𑀉𑀧𑀥𑀺 𑀆𑀳𑀸’’𑀢𑀺. 𑀬𑀣𑀸 𑀘 𑀫𑀸𑀭𑁄 𑀧𑀸𑀧𑀺𑀫𑀸 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀧𑀼𑀣𑀼𑀲𑀺𑀮𑀁 𑀧𑀸𑀢𑁂𑀲𑀺, 𑀪𑀕𑀯𑀸 𑀆𑀳 𑁋

‘‘𑀲𑀘𑁂𑀧𑀺 ¶ ¶ 𑀓𑁂𑀯𑀮𑀁 𑀲𑀩𑁆𑀩𑀁, 𑀕𑀺𑀚𑁆𑀛𑀓𑀽𑀝𑀁 𑀘𑀮𑁂𑀲𑁆𑀲𑀲𑀺 [𑀘𑀮𑁂𑀬𑁆𑀬𑀸𑀲𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁪𑁭];

𑀦𑁂𑀯 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀺 𑀇𑀜𑁆𑀚𑀺𑀢𑀁.

𑀦𑀪𑀁 𑀨𑀮𑁂𑀬𑁆𑀬𑀧𑁆𑀧𑀣𑀯𑀻 𑀘𑀮𑁂𑀬𑁆𑀬, 𑀲𑀩𑁆𑀩𑁂𑀯 𑀧𑀸𑀡𑀸 𑀉𑀤 𑀲𑀦𑁆𑀢𑀲𑁂𑀬𑁆𑀬𑀼𑀁;

𑀲𑀮𑁆𑀮𑀫𑁆𑀧𑀺 𑀘𑁂 𑀉𑀭𑀲𑀺 𑀓𑀫𑁆𑀧𑀬𑁂𑀬𑁆𑀬𑀼𑀁 [𑀧𑀓𑀫𑁆𑀧𑀬𑁂𑀬𑁆𑀬𑀼𑀁 (𑀲𑀻.), 𑀓𑀧𑁆𑀧𑀬𑁂𑀬𑁆𑀬𑀼𑀁 (𑀓.)], 𑀉𑀧𑀥𑀻𑀲𑀼 𑀢𑀸𑀡𑀁 𑀦 𑀓𑀭𑁄𑀦𑁆𑀢𑀺 𑀩𑀼𑀤𑁆𑀥𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀓𑀸𑀬𑀁 𑀉𑀧𑀥𑀺𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀼𑀚𑀁 𑀩𑀩𑁆𑀩𑀚𑀜𑁆𑀘 (𑀲𑀻.) 𑀧𑀲𑁆𑀲 𑀥. 𑀧. 𑁩𑁪𑁫];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑁂𑀲𑀼 𑀯𑀢𑁆𑀣𑀽𑀲𑀼 𑀢𑀡𑁆𑀳𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀤𑀼𑀕𑁆𑀕𑀦𑁆𑀥𑀁 𑀤𑁂𑀳𑀦𑀺𑀲𑁆𑀲𑀺𑀢𑀁;

𑀧𑀕𑁆𑀖𑀭𑀦𑁆𑀢𑀁 𑀤𑀺𑀯𑀸 𑀭𑀢𑁆𑀢𑀺𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢’’𑀦𑁆𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀉𑀘𑁆𑀙𑀺𑀦𑁆𑀤 ¶ ¶ [𑀧𑀲𑁆𑀲 𑀥. 𑀧. 𑁨𑁮𑁫] 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺.

𑀇𑀫𑀺𑀦𑀸 ¶ 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀇𑀤𑀁 𑀦𑀺𑀤𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺. 𑀬𑀣𑀸𑀳 𑁋

‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀦𑀸 [𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀉𑀤𑀸. 𑁬𑁪] 𑀩𑀤𑁆𑀥𑀸 [𑀩𑀦𑁆𑀥𑀸 (𑀓.) 𑀧𑀲𑁆𑀲 𑀉𑀤𑀸. 𑁬𑁪], 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 𑀫𑀸𑀢𑀭’’𑀦𑁆𑀢𑀺.

𑀅𑀬𑀁 𑀓𑀸𑀫𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀲𑀸 𑀓𑀢𑀫𑁂𑀦 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺? 𑀬𑀣𑀸𑀳 𑁋

‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀇𑀢𑀺 𑀅𑀦𑁆𑀥𑀢𑀸𑀬 𑀘 𑀲𑀜𑁆𑀙𑀦𑁆𑀦𑀢𑀸𑀬 𑀘 𑀲𑀸𑀬𑁂𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸. 𑀬𑀜𑁆𑀘𑀸𑀳 𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸𑀢𑀺. 𑀬𑀜𑁆𑀘𑀸𑀳 𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺, 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀲𑀸𑀬𑁂𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸. 𑀬𑀁 𑀅𑀦𑁆𑀥𑀓𑀸𑀭𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀬𑀸 𑀘 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸, 𑀬𑀜𑁆𑀘𑀸𑀳 𑀓𑀸𑀫𑀸𑀢𑀺 𑀇𑀫𑁂 𑀓𑀺𑀮𑁂𑀲𑀓𑀸𑀫𑀸. 𑀬𑀜𑁆𑀘𑀸𑀳 𑀚𑀸𑀮𑀲𑀜𑁆𑀙𑀦𑁆𑀦𑀸𑀢𑀺 𑀢𑁂𑀲𑀁 𑀬𑁂𑀯 𑀓𑀸𑀫𑀸𑀦𑀁 𑀧𑀬𑁄𑀕𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀓𑀺𑀮𑁂𑀲𑀯𑀲𑁂𑀦 𑀘 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀘 𑀢𑀡𑁆𑀳𑀸𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀬𑁂 𑀏𑀤𑀺𑀲𑀺𑀓𑀸, 𑀢𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺, 𑀅𑀬𑀁 ¶ 𑀪𑀕𑀯𑀢𑀸 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀕𑀸𑀣𑀸𑀩𑀮𑁂𑀦 𑀤𑀲𑁆𑀲𑀺𑀢𑀸 𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀻𑀢𑀺.

‘‘𑀬𑀲𑁆𑀲 𑀧𑀧𑀜𑁆𑀘𑀸 𑀞𑀺𑀢𑀻 𑀘 𑀦𑀢𑁆𑀣𑀺, 𑀲𑀦𑁆𑀤𑀸𑀦𑀁 𑀧𑀮𑀺𑀖𑀜𑁆𑀘 [𑀧𑀴𑀺𑀖𑀜𑁆𑀘 (𑀲𑀻.) 𑀧𑀲𑁆𑀲 𑀉𑀤𑀸. 𑁬𑁭] 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀦𑀺𑀢𑁆𑀢𑀡𑁆𑀳𑀁 𑀫𑀼𑀦𑀺𑀁 𑀘𑀭𑀦𑁆𑀢𑀁, 𑀦 𑀯𑀺𑀚𑀸𑀦𑀸𑀢𑀺 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄’’𑀢𑀺.

𑀧𑀧𑀜𑁆𑀘𑀸 𑀦𑀸𑀫 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸, 𑀢𑀤𑀪𑀺𑀲𑀗𑁆𑀔𑀢𑀸 𑀘 𑀲𑀗𑁆𑀔𑀸𑀭𑀸. 𑀞𑀺𑀢𑀺 𑀦𑀸𑀫 𑀅𑀦𑀼𑀲𑀬𑀸. 𑀲𑀦𑁆𑀤𑀸𑀦𑀁 𑀦𑀸𑀫 𑀢𑀡𑁆𑀳𑀸𑀬 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀬𑀸𑀦𑀺 𑀙𑀢𑁆𑀢𑀺𑀁𑀲𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 ¶ 𑀯𑀺𑀘𑀭𑀺𑀢𑀸𑀦𑀺. 𑀧𑀮𑀺𑀖𑁄 𑀦𑀸𑀫 𑀫𑁄𑀳𑁄. 𑀬𑁂 𑀘 𑀧𑀧𑀜𑁆𑀘𑀸 𑀲𑀗𑁆𑀔𑀸𑀭𑀸 𑀬𑀸 𑀘 𑀞𑀺𑀢𑀺 𑀬𑀁 𑀲𑀦𑁆𑀤𑀸𑀦𑀜𑁆𑀘 𑀬𑀁 𑀧𑀮𑀺𑀖𑀜𑁆𑀘 𑀬𑁄 𑀏𑀢𑀁 𑀲𑀩𑁆𑀩𑀁 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀢𑁆𑀢𑀡𑁆𑀳𑁄 𑀇𑀢𑀺.

𑁨𑁮. 𑀢𑀢𑁆𑀣 ¶ 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀭𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀯𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀯𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸 𑀯𑀸, 𑀏𑀯𑀁 𑀢𑀡𑁆𑀳𑀸 𑀢𑀺𑀯𑀺𑀥𑀁 𑀨𑀮𑀁 𑀤𑁂𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀏𑀯𑀁 𑀪𑀕𑀯𑀸 𑀆𑀳 ‘‘𑀬𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀫𑀦𑀲𑀸 𑀯𑀸, 𑀢𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀪𑁄𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺. 𑀇𑀤𑀁 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 [𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 (𑀲𑀻.)] 𑀯𑀸 𑀓𑀫𑁆𑀫𑀁, 𑀏𑀯𑀁 𑀓𑀫𑁆𑀫𑀁 𑀢𑀺𑀥𑀸 𑀯𑀺𑀧𑀘𑁆𑀘𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀬𑀣𑀸𑀳 𑁋

‘‘𑀬𑀜𑁆𑀘𑁂 𑀩𑀸𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺. 𑀇𑀤𑀁 ¶ 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀧𑀳𑀸𑀢𑀩𑁆𑀩𑀁, 𑀲𑀗𑁆𑀔𑀸𑀭𑀸 𑀤𑀲𑁆𑀲𑀦𑀩𑀮𑁂𑀦, 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀪𑀸𑀯𑀦𑀸𑀩𑀮𑁂𑀦 𑀧𑀳𑀸𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀢𑀡𑁆𑀳𑀸𑀧𑀺 𑀢𑀺𑀥𑀸 𑀧𑀳𑀻𑀬𑀢𑀺. 𑀬𑀸 𑀦𑀺𑀢𑁆𑀢𑀡𑁆𑀳𑀸𑀢𑀸 𑀅𑀬𑀁 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀪𑁂𑀤𑀸 𑀓𑀸𑀬𑀲𑁆𑀲 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀧𑀧𑀜𑁆𑀘𑁄 𑀦𑀸𑀫 𑀯𑀼𑀘𑁆𑀘𑀢𑀺 𑀅𑀦𑀼𑀩𑀦𑁆𑀥𑁄. 𑀬𑀜𑁆𑀘𑀸𑀳 𑀪𑀕𑀯𑀸 ‘‘𑀧𑀧𑀜𑁆𑀘𑁂𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀆𑀭𑀩𑁆𑀪𑀸’’𑀢𑀺. 𑀬𑀜𑁆𑀘𑀸𑀳 𑀪𑀕𑀯𑀸 𑁋 ‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀳𑀺, 𑀅𑀦𑀸𑀕𑀢𑀁 𑀭𑀽𑀧𑀁 𑀫𑀸 𑀅𑀪𑀺𑀦𑀦𑁆𑀤𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀚𑁆𑀚𑀸’’𑀢𑀺. 𑀇𑀤𑀁 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀬𑁄 𑀘𑀸𑀧𑀺 𑀧𑀧𑀜𑁆𑀘𑁄 𑀬𑁂 𑀘 𑀲𑀗𑁆𑀔𑀸𑀭𑀸 𑀬𑀸 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀅𑀪𑀺𑀦𑀦𑁆𑀤𑀦𑀸, 𑀇𑀤𑀁 𑀏𑀓𑀢𑁆𑀣𑀁. 𑀅𑀧𑀺 𑀘 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀅𑀓𑁆𑀔𑀭𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀧𑀭𑀺𑀫𑀸𑀡𑀸 𑀥𑀫𑁆𑀫𑀤𑁂𑀲𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀏𑀯𑀁 𑀲𑀼𑀢𑁆𑀢𑁂𑀦 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀬𑀺𑀢𑁆𑀯𑀸 𑀧𑀼𑀩𑁆𑀩𑀸𑀧𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑀬𑀺𑀢𑁆𑀯𑀸 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀪𑀯𑀢𑀺.

𑀲𑁄 𑀘𑀸𑀬𑀁 [𑀲 𑀘𑀸𑀬𑀁 (𑀲𑀻.)] 𑀧𑀼𑀩𑁆𑀩𑀸𑀧𑀭𑁄 𑀲𑀦𑁆𑀥𑀺 𑀘𑀢𑀼𑀩𑁆𑀩𑀺𑀥𑁄 𑀅𑀢𑁆𑀣𑀲𑀦𑁆𑀥𑀺 𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀤𑁂𑀲𑀦𑀸𑀲𑀦𑁆𑀥𑀺 𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺.

𑀢𑀢𑁆𑀣 ¶ 𑀅𑀢𑁆𑀣𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀺 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀢𑀸 𑀧𑀜𑁆𑀜𑀢𑁆𑀢𑀻𑀢𑀺.

𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀺 𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁 𑀆𑀓𑀸𑀭𑁄 𑀦𑀺𑀭𑀼𑀢𑁆𑀢𑀺 𑀦𑀺𑀤𑁆𑀤𑁂𑀲𑁄𑀢𑀺.

𑀤𑁂𑀲𑀦𑀸𑀲𑀦𑁆𑀥𑀺 ¶ 𑀦 𑀘 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀦 𑀘 𑀆𑀧𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘, 𑀦 𑀘 𑀢𑁂𑀚𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘, 𑀦 ¶ 𑀘 𑀯𑀸𑀬𑀼𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀦 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀇𑀫𑀁 𑀮𑁄𑀓𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀧𑀭𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀬𑀫𑀺𑀤𑀁 𑀉𑀪𑀬𑀫𑀦𑁆𑀢𑀭𑁂𑀦 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀯𑀺𑀢𑀓𑁆𑀓𑀺𑀢𑀁 𑀯𑀺𑀘𑀸𑀭𑀺𑀢𑀁 𑀫𑀦𑀲𑀸𑀦𑀼𑀘𑀺𑀦𑁆𑀢𑀺𑀢𑀁, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀅𑀬𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀦 𑀜𑀸𑀬𑀢𑀺 𑀛𑀸𑀬𑀦𑁆𑀢𑁄.

𑀬𑀣𑀸 𑀫𑀸𑀭𑁄 𑀧𑀸𑀧𑀺𑀫𑀸 𑀕𑁄𑀥𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁫𑁯] 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀦𑁆𑀢𑁄 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺. 𑀲𑁄 𑀳𑀺 𑀧𑀧𑀜𑁆𑀘𑀸𑀢𑀻𑀢𑁄 𑀢𑀡𑁆𑀳𑀸𑀧𑀳𑀸𑀦𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄𑀧𑀺𑀲𑁆𑀲 𑀦𑀢𑁆𑀣𑀺. 𑀬𑀣𑀸 𑀘 𑀕𑁄𑀥𑀺𑀓𑀲𑁆𑀲, 𑀏𑀯𑀁 𑀯𑀓𑁆𑀓𑀮𑀺𑀲𑁆𑀲 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀫𑀸𑀭𑀓𑁂𑀦 𑀲𑀩𑁆𑀭𑀳𑁆𑀫𑀓𑁂𑀦 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦 𑀜𑀸𑀬𑀦𑁆𑀢𑀺 𑀛𑀸𑀬𑀫𑀸𑀦𑀸. 𑀅𑀬𑀁 𑀤𑁂𑀲𑀦𑀸𑀲𑀦𑁆𑀥𑀺.

𑀢𑀢𑁆𑀣 𑀓𑀢𑀫𑀸 𑀦𑀺𑀤𑁆𑀤𑁂𑀲𑀲𑀦𑁆𑀥𑀺? 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑀺𑀮𑁂𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀯𑁄𑀤𑀸𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀁𑀲𑀸𑀭𑀦𑀺𑀯𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀢𑀡𑁆𑀳𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀫𑀣𑁂𑀦 𑀘 𑀯𑀺𑀧𑀲𑁆𑀲𑀦𑀸𑀬 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀳𑀺𑀭𑀺𑀓𑁂𑀦 𑀘 𑀅𑀦𑁄𑀢𑁆𑀢𑀧𑁆𑀧𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀳𑀺𑀭𑀺𑀬𑀸 𑀘 𑀑𑀢𑁆𑀢𑀧𑁆𑀧𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑀢𑀺𑀬𑀸 𑀘 𑀅𑀲𑀫𑁆𑀧𑀚𑀜𑁆𑀜𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀢𑀺𑀬𑀸 𑀘 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀬𑁄𑀦𑀺𑀬𑀸 ¶ 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 ¶ 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀬𑁄𑀦𑀺𑀬𑀸 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑁄𑀲𑀚𑁆𑀚𑁂𑀦 𑀘 𑀤𑁄𑀯𑀘𑀲𑁆𑀲𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀘 𑀲𑁄𑀯𑀘𑀲𑁆𑀲𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑁆𑀲𑀤𑁆𑀥𑀺𑀬𑁂𑀦 𑀘 𑀧𑀫𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀤𑁆𑀥𑀸𑀬 𑀘 𑀅𑀧𑁆𑀧𑀫𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀘 𑀅𑀲𑀁𑀯𑀭𑀡𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀘 𑀲𑀁𑀯𑀭𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀪𑀺𑀚𑁆𑀛𑀸𑀬 𑀘 𑀩𑁆𑀬𑀸𑀧𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀦𑀪𑀺𑀚𑁆𑀛𑀸𑀬 𑀘 𑀅𑀩𑁆𑀬𑀸𑀧𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 ¶ 𑀦𑀻𑀯𑀭𑀡𑁂𑀳𑀺 𑀘 𑀲𑀁𑀬𑁄𑀚𑀦𑀺𑀬𑁂𑀳𑀺 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀭𑀸𑀕𑀯𑀺𑀭𑀸𑀕𑀸𑀬 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀘 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀅𑀬𑀁 𑀦𑀺𑀤𑁆𑀤𑁂𑀲𑀲𑀦𑁆𑀥𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑁭. 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁄

𑁨𑁯. 𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄? ‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂’’𑀢𑀺 𑀅𑀬𑀁.

‘‘𑀆𑀭𑀫𑁆𑀪𑀣 [𑀆𑀭𑀩𑁆𑀪𑀣 (𑀲𑀻.) 𑀲𑀁. 𑀦𑀺. 𑁧.𑁧𑁮𑁫; 𑀣𑁂𑀭𑀕𑀸. 𑁨𑁫𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’’𑀢𑀺.

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’’𑀢𑀺 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁. ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’’𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀫𑀸𑀦𑀺 ¶ 𑀧𑀤𑀝𑁆𑀞𑀸𑀦𑀸𑀦𑀺 𑀤𑁂𑀲𑀦𑀸.

𑀅𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀬𑁄𑀕𑁂, 𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸 𑀆𑀭𑀫𑁆𑀪𑁄.

𑀢𑀢𑁆𑀣 𑀬𑁂 𑀦 𑀬𑀼𑀜𑁆𑀚𑀦𑁆𑀢𑀺, 𑀢𑁂 𑀧𑀫𑀸𑀤𑀫𑀽𑀮𑀓𑀸 𑀦 𑀬𑀼𑀜𑁆𑀚𑀦𑁆𑀢𑀺. 𑀲𑁄 𑀧𑀫𑀸𑀤𑁄 𑀤𑀼𑀯𑀺𑀥𑁄 𑀢𑀡𑁆𑀳𑀸𑀫𑀽𑀮𑀓𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀘. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀬𑁂𑀦 ¶ 𑀅𑀜𑁆𑀜𑀸𑀡𑁂𑀦 𑀦𑀺𑀯𑀼𑀢𑁄 𑀜𑁂𑀬𑁆𑀬𑀝𑁆𑀞𑀸𑀦𑀁 𑀦𑀧𑁆𑀧𑀚𑀸𑀦𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀸𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸𑀫𑀽𑀮𑀓𑁄. 𑀬𑁄 𑀢𑀡𑁆𑀳𑀸𑀫𑀽𑀮𑀓𑁄, 𑀲𑁄 𑀢𑀺𑀯𑀺𑀥𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀉𑀧𑁆𑀧𑀸𑀤𑀸𑀬 𑀧𑀭𑀺𑀬𑁂𑀲𑀦𑁆𑀢𑁄 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀆𑀭𑀓𑁆𑀔𑀦𑀺𑀫𑀺𑀢𑁆𑀢𑀁 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀜𑁆𑀘 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺 𑀅𑀬𑀁 𑀮𑁄𑀓𑁂 𑀘𑀢𑀼𑀩𑁆𑀩𑀺𑀥𑁄 𑀧𑀫𑀸𑀤𑁄 𑀏𑀓𑀯𑀺𑀥𑁄 𑀅𑀯𑀺𑀚𑁆𑀚𑀸𑀬 𑀢𑀺𑀯𑀺𑀥𑁄 𑀢𑀡𑁆𑀳𑀸𑀬. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀦𑀸𑀫𑀓𑀸𑀬𑁄 𑀧𑀤𑀝𑁆𑀞𑀸𑀦𑀁. 𑀢𑀡𑁆𑀳𑀸𑀬 𑀭𑀽𑀧𑀓𑀸𑀬𑁄 𑀧𑀤𑀝𑁆𑀞𑀸𑀦𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀭𑀽𑀧𑀻𑀲𑀼 𑀪𑀯𑁂𑀲𑀼 𑀅𑀚𑁆𑀛𑁄𑀲𑀸𑀦𑀁, 𑀅𑀭𑀽𑀧𑀻𑀲𑀼 𑀲𑀫𑁆𑀫𑁄𑀳𑁄? 𑀢𑀢𑁆𑀣 𑀭𑀽𑀧𑀓𑀸𑀬𑁄 ¶ 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫𑀓𑀸𑀬𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀢𑀫𑁂𑀦 𑀉𑀧𑀸𑀤𑀸𑀦𑁂𑀦 𑀲𑀉𑀧𑀸𑀤𑀸𑀦𑀸, 𑀢𑀡𑁆𑀳𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀘? 𑀢𑀢𑁆𑀣 𑀢𑀡𑁆𑀳𑀸 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀜𑁆𑀘 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀜𑁆𑀘. 𑀅𑀯𑀺𑀚𑁆𑀚𑀸 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀜𑁆𑀘 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀜𑁆𑀘. 𑀇𑀫𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀬𑁂 𑀲𑀉𑀧𑀸𑀤𑀸𑀦𑀸 𑀔𑀦𑁆𑀥𑀸, 𑀇𑀤𑀁 𑀤𑀼𑀓𑁆𑀔𑀁. 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀅𑀬𑀁 𑀲𑀫𑀼𑀤𑀬𑁄. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁. 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬.

𑁩𑁦. 𑀢𑀢𑁆𑀣 𑀬𑁄 𑀢𑀺𑀯𑀺𑀥𑁄 𑀢𑀡𑁆𑀳𑀸𑀫𑀽𑀮𑀓𑁄 𑀧𑀫𑀸𑀤𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀉𑀧𑁆𑀧𑀸𑀤𑀸𑀬 𑀧𑀭𑀺𑀬𑁂𑀲𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀆𑀭𑀓𑁆𑀔𑀡𑀜𑁆𑀘 𑀓𑀭𑁄𑀢𑀺 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀜𑁆𑀘, 𑀢𑀲𑁆𑀲 𑀲𑀫𑁆𑀧𑀝𑀺𑀯𑁂𑀥𑁂𑀦 𑀭𑀓𑁆𑀔𑀡𑀸 𑀧𑀝𑀺𑀲𑀁𑀳𑀭𑀡𑀸, 𑀅𑀬𑀁 𑀲𑀫𑀣𑁄.

𑀲𑁄 𑀓𑀣𑀁 𑀪𑀯𑀢𑀺? 𑀬𑀤𑀸 𑀚𑀸𑀦𑀸𑀢𑀺 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 ¶ 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀑𑀓𑀸𑀭𑀜𑁆𑀘 𑀲𑀁𑀓𑀺𑀮𑁂𑀲𑀜𑁆𑀘 𑀯𑁄𑀤𑀸𑀦𑀜𑁆𑀘 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁. 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀤𑁆𑀯𑁂 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘, 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀳𑀻𑀦𑁂𑀲𑀼 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀇𑀢𑀺 𑀧𑀼𑀭𑀺𑀫𑀓𑀸𑀦𑀺 𑀘 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑁄. 𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺.

𑀬𑀣𑀸𑀧𑀺 ¶ 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂, 𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀭𑁂𑀯 [𑀧𑀼𑀦𑀤𑁂𑀯 (𑀓.) 𑀧𑀲𑁆𑀲 𑀥. 𑀧. 𑁩𑁩𑁮] 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂, 𑀦𑀺𑀩𑁆𑀩𑀢𑁆𑀢𑀢𑀻 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦𑀁.

𑀅𑀬𑀁 𑀢𑀡𑁆𑀳𑀸𑀦𑀼𑀲𑀬𑁄. 𑀓𑀢𑀫𑀲𑁆𑀲𑀸 𑀢𑀡𑁆𑀳𑀸𑀬? 𑀪𑀯𑀢𑀡𑁆𑀳𑀸𑀬. 𑀬𑁄 𑀏𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀅𑀬𑀁 𑀅𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑀺 𑀪𑀯𑀢𑀡𑁆𑀳𑀸. 𑀇𑀫𑁂 𑀤𑁆𑀯𑁂 𑀓𑀺𑀮𑁂𑀲𑀸 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘. 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀢𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀬𑁂 𑀲𑀉𑀧𑀸𑀤𑀸𑀦𑀸 𑀔𑀦𑁆𑀥𑀸, 𑀇𑀤𑀁 𑀤𑀼𑀓𑁆𑀔𑀁. 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀅𑀬𑀁 𑀲𑀫𑀼𑀤𑀬𑁄. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁. 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬.

𑀬𑁂𑀦 ¶ ¶ 𑀢𑀡𑁆𑀳𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺 [𑀲𑀫𑀽𑀳𑀦𑁆𑀢𑀺 (𑀲𑀻.)], 𑀅𑀬𑀁 𑀲𑀫𑀣𑁄. 𑀬𑁂𑀦 𑀢𑀡𑁆𑀳𑀸𑀦𑀼𑀲𑀬𑀲𑁆𑀲 𑀧𑀘𑁆𑀘𑀬𑀁 𑀅𑀯𑀺𑀚𑁆𑀚𑀁 𑀯𑀸𑀭𑀬𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀢𑀢𑁆𑀣 𑀲𑀫𑀣𑀲𑁆𑀲 𑀨𑀮𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀨𑀮𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀇𑀢𑀺 𑀧𑀼𑀭𑀺𑀫𑀓𑀸𑀦𑀺 𑀘 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘, 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑁄, 𑀤𑁆𑀯𑁂 𑀘 𑀯𑀺𑀫𑀼𑀢𑁆𑀢𑀺𑀬𑁄 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀣𑀸𑀧𑀺 𑀫𑀽𑀮𑁂’’𑀢𑀺.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁 [𑀧𑀭𑀺𑀬𑁄𑀤𑀧𑀦𑀁 (𑀲𑀻.) 𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦 𑀧𑀲𑁆𑀲𑀺𑀢𑀩𑁆𑀩𑀁], 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑀲𑀩𑁆𑀩𑀧𑀸𑀧𑀁 𑀦𑀸𑀫 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀢𑁂 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀸 𑀯𑀸𑀘𑀸 𑀨𑀭𑀼𑀲𑀸 𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀢𑀸𑀦𑀺 𑀤𑁆𑀯𑁂 𑀓𑀫𑁆𑀫𑀸𑀦𑀺 𑀘𑁂𑀢𑀦𑀸 𑀘𑁂𑀢𑀲𑀺𑀓𑀜𑁆𑀘. 𑀢𑀢𑁆𑀣 𑀬𑁄 𑀘 𑀧𑀸𑀡𑀸𑀢𑀺𑀧𑀸𑀢𑁄 𑀬𑀸 𑀘 𑀧𑀺𑀲𑀼𑀡𑀸 𑀯𑀸𑀘𑀸 𑀬𑀸 𑀘 𑀨𑀭𑀼𑀲𑀸 𑀯𑀸𑀘𑀸, 𑀇𑀤𑀁 𑀤𑁄𑀲𑀲𑀫𑀼𑀝𑁆𑀞𑀸𑀦𑀁. 𑀬𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀁 𑀬𑁄 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀬𑁄 𑀘 𑀫𑀼𑀲𑀸𑀯𑀸𑀤𑁄, 𑀇𑀤𑀁 𑀮𑁄𑀪𑀲𑀫𑀼𑀝𑁆𑀞𑀸𑀦𑀁, 𑀬𑁄 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀇𑀤𑀁 𑀫𑁄𑀳𑀲𑀫𑀼𑀝𑁆𑀞𑀸𑀦𑀁. 𑀇𑀫𑀸𑀦𑀺 𑀲𑀢𑁆𑀢 𑀓𑀸𑀭𑀡𑀸𑀦𑀺 𑀘𑁂𑀢𑀦𑀸𑀓𑀫𑁆𑀫𑀁. 𑀬𑀸 𑀅𑀪𑀺𑀚𑁆𑀛𑀸, 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑁄 𑀩𑁆𑀬𑀸𑀧𑀸𑀤𑁄, 𑀅𑀬𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀸 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀬𑀁 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀇𑀫𑀸𑀦𑀺 𑀢𑀻𑀡𑀺 𑀓𑀸𑀭𑀡𑀸𑀦𑀺 𑀘𑁂𑀢𑀲𑀺𑀓𑀓𑀫𑁆𑀫𑀁. 𑀢𑁂𑀦𑀸𑀳 ‘‘𑀘𑁂𑀢𑀦𑀸𑀓𑀫𑁆𑀫𑀁 𑀘𑁂𑀢𑀲𑀺𑀓𑀓𑀫𑁆𑀫’’𑀦𑁆𑀢𑀺.

𑀅𑀓𑀼𑀲𑀮𑀫𑀽𑀮𑀁 𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀕𑀢𑀺𑀁 𑀕𑀘𑁆𑀙𑀢𑀺 𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸. 𑀢𑀢𑁆𑀣 ¶ 𑀬𑀁 𑀙𑀦𑁆𑀤𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀤𑀁 𑀮𑁄𑀪𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀤𑁄𑀲𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀤𑀁 𑀤𑁄𑀲𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀪𑀬𑀸 𑀘 𑀫𑁄𑀳𑀸 𑀘 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀤𑀁 𑀫𑁄𑀳𑀲𑀫𑀼𑀝𑁆𑀞𑀸𑀦𑀁. 𑀢𑀢𑁆𑀣 𑀮𑁄𑀪𑁄 𑀅𑀲𑀼𑀪𑀸𑀬 𑀧𑀳𑀻𑀬𑀢𑀺. 𑀤𑁄𑀲𑁄 𑀫𑁂𑀢𑁆𑀢𑀸𑀬. 𑀫𑁄𑀳𑁄 𑀧𑀜𑁆𑀜𑀸𑀬. 𑀢𑀣𑀸 𑀮𑁄𑀪𑁄 𑀉𑀧𑁂𑀓𑁆𑀔𑀸𑀬 𑀧𑀳𑀻𑀬𑀢𑀺. 𑀤𑁄𑀲𑁄 𑀫𑁂𑀢𑁆𑀢𑀸𑀬 𑀘 𑀓𑀭𑀼𑀡𑀸𑀬 𑀘. 𑀫𑁄𑀳𑁄 𑀫𑀼𑀤𑀺𑀢𑀸𑀬 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺.

𑁩𑁧. 𑀲𑀩𑁆𑀩𑀧𑀸𑀧𑀁 𑀦𑀸𑀫 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀧𑀸𑀧𑀁. ¶ 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀫𑀺𑀘𑁆𑀙𑀢𑁆𑀢𑀸𑀦𑀁 𑀬𑀸 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀘𑀸𑀭𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁.

𑀅𑀝𑁆𑀞𑀲𑀼 𑀫𑀺𑀘𑁆𑀙𑀢𑁆𑀢𑁂𑀲𑀼 𑀧𑀳𑀻𑀦𑁂𑀲𑀼 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀝𑁆𑀞𑀦𑁆𑀦𑀁 𑀲𑀫𑁆𑀫𑀢𑁆𑀢𑀸𑀦𑀁 𑀬𑀸 𑀓𑀺𑀭𑀺𑀬𑀸 𑀓𑀭𑀡𑀁 𑀲𑀫𑁆𑀧𑀸𑀤𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀦𑁆𑀢𑀺 𑀅𑀢𑀻𑀢𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀓𑀺𑀭𑀺𑀬𑀁 𑀤𑀲𑁆𑀲𑀬𑀢𑀺, 𑀘𑀺𑀢𑁆𑀢𑁂 𑀧𑀭𑀺𑀬𑁄𑀤𑀸𑀧𑀺𑀢𑁂 [𑀧𑀭𑀺𑀬𑁄𑀤𑀧𑀺𑀢𑁂 (𑀲𑀻. 𑀓.)] 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀬𑁄𑀤𑀸𑀧𑀺𑀢𑀸 𑀪𑀯𑀦𑁆𑀢𑀺, 𑀏𑀯𑀜𑁆𑀳𑀺 𑀪𑀕𑀯𑀸 𑀆𑀳 ‘‘𑀘𑁂𑀢𑁄𑀯𑀺𑀲𑀼𑀤𑁆𑀥𑀢𑁆𑀣𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺. 𑀤𑀼𑀯𑀺𑀥𑀸 𑀳𑀺 𑀧𑀭𑀺𑀬𑁄𑀤𑀸𑀧𑀦𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑀜𑁆𑀘 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑁄 𑀘. 𑀤𑁆𑀯𑁂 𑀧𑀭𑀺𑀬𑁄𑀤𑀸𑀧𑀦𑀪𑀽𑀫𑀺𑀬𑁄 𑀤𑀲𑁆𑀲𑀦𑀪𑀽𑀫𑀺 𑀘, 𑀪𑀸𑀯𑀦𑀸𑀪𑀽𑀫𑀺 𑀘, 𑀢𑀢𑁆𑀣 𑀬𑀁 𑀧𑀝𑀺𑀯𑁂𑀥𑁂𑀦 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀇𑀤𑀁 𑀤𑀼𑀓𑁆𑀔𑀁. 𑀬𑀢𑁄 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀅𑀬𑀁 𑀲𑀫𑀼𑀤𑀬𑁄. 𑀬𑁂𑀦 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀁 𑀧𑀭𑀺𑀬𑁄𑀤𑀸𑀧𑀺𑀢𑀁, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺.

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 ¶ 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺.

𑀥𑀫𑁆𑀫𑁄 ¶ 𑀦𑀸𑀫 𑀤𑀼𑀯𑀺𑀥𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀫𑀕𑁆𑀕𑁄 𑀘. 𑀤𑀼𑀕𑁆𑀕𑀢𑀺 𑀦𑀸𑀫 𑀤𑀼𑀯𑀺𑀥𑀸 𑀤𑁂𑀯𑀫𑀦𑀼𑀲𑁆𑀲𑁂 𑀯𑀸 𑀉𑀧𑀦𑀺𑀥𑀸𑀬 𑀅𑀧𑀸𑀬𑀸 𑀤𑀼𑀕𑁆𑀕𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀉𑀧𑀦𑀺𑀥𑀸𑀬 𑀲𑀩𑁆𑀩𑀸 𑀉𑀧𑀧𑀢𑁆𑀢𑀺𑀬𑁄 𑀤𑀼𑀕𑁆𑀕𑀢𑀺. 𑀢𑀢𑁆𑀣 𑀬𑀸 𑀲𑀁𑀯𑀭𑀲𑀻𑀮𑁂 𑀅𑀔𑀡𑁆𑀟𑀓𑀸𑀭𑀺𑀢𑀸, 𑀅𑀬𑀁 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀅𑀧𑀸𑀬𑁂𑀳𑀺 𑀭𑀓𑁆𑀔𑀢𑀺. 𑀏𑀯𑀁 𑀪𑀕𑀯𑀸 𑀆𑀳 𑁋 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀕𑀢𑀺𑀬𑁄 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀏𑀯𑀜𑁆𑀘 𑀦𑀸𑀴𑀦𑁆𑀤𑀸𑀬𑀁 𑀦𑀺𑀕𑀫𑁂 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀩𑁆𑀭𑀸𑀳𑁆𑀫𑀡𑀸, 𑀪𑀦𑁆𑀢𑁂, 𑀧𑀘𑁆𑀙𑀸𑀪𑀽𑀫𑀓𑀸 𑀓𑀸𑀫𑀡𑁆𑀟𑀮𑀼𑀓𑀸 𑀲𑁂𑀯𑀸𑀮𑀫𑀸𑀮𑀺𑀓𑀸 𑀉𑀤𑀓𑁄𑀭𑁄𑀳𑀓𑀸 𑀅𑀕𑁆𑀕𑀺𑀧𑀭𑀺𑀘𑀸𑀭𑀓𑀸, 𑀢𑁂 𑀫𑀢𑀁 𑀓𑀸𑀮𑀗𑁆𑀓𑀢𑀁 𑀉𑀬𑁆𑀬𑀸𑀧𑁂𑀦𑁆𑀢𑀺 𑀦𑀸𑀫, 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦𑀸𑀫, 𑀲𑀕𑁆𑀕𑀁 𑀦𑀸𑀫 𑀑𑀓𑁆𑀓𑀸𑀫𑁂𑀦𑁆𑀢𑀺 [𑀉𑀕𑁆𑀕𑀫𑁂𑀦𑁆𑀢𑀺 (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁪.𑁩𑁫𑁮]. 𑀪𑀕𑀯𑀸 𑀧𑀦, 𑀪𑀦𑁆𑀢𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀳𑁄𑀢𑀺 𑀢𑀣𑀸 𑀓𑀸𑀢𑀼𑀁, 𑀬𑀣𑀸 𑀲𑀩𑁆𑀩𑁄 𑀮𑁄𑀓𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’’𑀢𑀺.

‘‘𑀢𑁂𑀦 𑀳𑀺, 𑀕𑀸𑀫𑀡𑀺, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀇𑀥𑀲𑁆𑀲 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 ¶ 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑁄 𑀨𑀭𑀼𑀲𑀯𑀸𑀘𑁄 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀼 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀢𑀫𑁂𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀽’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀣𑁄𑀫𑀦𑀳𑁂𑀢𑀼𑀯𑀸 𑀧𑀜𑁆𑀚𑀮𑀺𑀓𑀁 [𑀧𑀜𑁆𑀚𑀮𑀺𑀓𑀸 𑀲𑀁. 𑀦𑀺. 𑁪.𑁩𑁫𑁮] 𑀅𑀦𑀼𑀧𑀭𑀺𑀲𑀓𑁆𑀓𑀦𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀧𑀼𑀭𑀺𑀲𑁄 𑀫𑀳𑀢𑀺𑀁 𑀧𑀼𑀣𑀼𑀲𑀺𑀮𑀁 𑀕𑀫𑁆𑀪𑀻𑀭𑁂 𑀉𑀤𑀓𑀭𑀳𑀤𑁂 [𑀉𑀤𑀓𑀤𑀳𑁂 (𑀓.)] 𑀧𑀓𑁆𑀔𑀺𑀧𑁂𑀬𑁆𑀬, 𑀢𑀫𑁂𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 ¶ 𑀲𑀫𑀸𑀕𑀫𑁆𑀫 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀉𑀫𑁆𑀫𑀼𑀚𑁆𑀚, 𑀪𑁄, 𑀧𑀼𑀣𑀼𑀲𑀺𑀮𑁂, 𑀉𑀧𑁆𑀮𑀯 𑀪𑁄 𑀧𑀼𑀣𑀼𑀲𑀺𑀮𑁂, 𑀣𑀮𑀫𑀼𑀧𑁆𑀮𑀯, 𑀪𑁄 𑀧𑀼𑀣𑀼𑀲𑀺𑀮𑁂’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀕𑀸𑀫𑀡𑀺, 𑀅𑀧𑀺 𑀦𑀼 𑀲𑀸 𑀫𑀳𑀢𑀻 𑀧𑀼𑀣𑀼𑀲𑀺𑀮𑀸 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀣𑁄𑀫𑀦𑀳𑁂𑀢𑀼 𑀯𑀸 𑀧𑀜𑁆𑀚𑀮𑀺𑀓𑀁 𑀅𑀦𑀼𑀧𑀭𑀺𑀲𑀓𑁆𑀓𑀦𑀳𑁂𑀢𑀼 𑀯𑀸 𑀉𑀫𑁆𑀫𑀼𑀚𑁆𑀚𑁂𑀬𑁆𑀬 𑀯𑀸 𑀉𑀧𑁆𑀮𑀯𑁂𑀬𑁆𑀬 𑀯𑀸 𑀣𑀮𑀁 𑀯𑀸 𑀉𑀧𑁆𑀮𑀯𑁂𑀬𑁆𑀬𑀸’’𑀢𑀺. ‘‘𑀦𑁄 𑀳𑁂𑀢𑀁 ¶ , 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁄, 𑀕𑀸𑀫𑀡𑀺, 𑀬𑁄 𑀲𑁄 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀻…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀓𑀺𑀜𑁆𑀘𑀸𑀧𑀺 𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀽’𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀇𑀥𑀲𑁆𑀲 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄, 𑀢𑀫𑁂𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀽’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀣𑁄𑀫𑀦𑀳𑁂𑀢𑀼 𑀯𑀸 𑀧𑀜𑁆𑀚𑀮𑀺𑀓𑀁 𑀅𑀦𑀼𑀧𑀭𑀺𑀲𑀓𑁆𑀓𑀦𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀧𑀼𑀭𑀺𑀲𑁄 𑀲𑀧𑁆𑀧𑀺𑀓𑀼𑀫𑁆𑀪𑀁 𑀯𑀸 𑀢𑁂𑀮𑀓𑀼𑀫𑁆𑀪𑀁 𑀯𑀸 𑀕𑀫𑁆𑀪𑀻𑀭𑁂 [𑀕𑀫𑁆𑀪𑀻𑀭𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁩𑁫𑁮] 𑀉𑀤𑀓𑀭𑀳𑀤𑁂 𑀑𑀕𑀸𑀳𑁂𑀢𑁆𑀯𑀸 𑀪𑀺𑀦𑁆𑀤𑁂𑀬𑁆𑀬. 𑀢𑀢𑁆𑀭 𑀬𑀸𑀲𑁆𑀲 𑀲𑀓𑁆𑀔𑀭𑀸 𑀯𑀸 𑀓𑀞𑀮𑀸 [𑀓𑀣𑀮𑀸 (𑀓.)], 𑀲𑀸 𑀅𑀥𑁄𑀕𑀸𑀫𑀻 𑀅𑀲𑁆𑀲. 𑀬𑀜𑁆𑀘 𑀔𑁆𑀯𑀲𑁆𑀲 𑀢𑀢𑁆𑀭 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸, 𑀢𑀁 𑀉𑀤𑁆𑀥𑀁𑀕𑀸𑀫𑀺 𑀅𑀲𑁆𑀲. 𑀢𑀫𑁂𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 ¶ 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀑𑀲𑀻𑀤, 𑀪𑁄 𑀲𑀧𑁆𑀧𑀺𑀢𑁂𑀮, 𑀲𑀁𑀲𑀻𑀤, 𑀪𑁄 𑀲𑀧𑁆𑀧𑀺𑀢𑁂𑀮, 𑀅𑀥𑁄 𑀕𑀘𑁆𑀙 [𑀅𑀯𑀁𑀕𑀘𑁆𑀙 (𑀲𑀻. 𑀓.)]‘𑀪𑁄 𑀲𑀧𑁆𑀧𑀺𑀢𑁂𑀮𑀸’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀕𑀸𑀫𑀡𑀺, 𑀅𑀧𑀺 𑀦𑀼 𑀢𑀁 ¶ 𑀲𑀧𑁆𑀧𑀺𑀢𑁂𑀮𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀣𑁄𑀫𑀦𑀳𑁂𑀢𑀼 𑀯𑀸 𑀧𑀜𑁆𑀚𑀮𑀺𑀓𑀁 𑀅𑀦𑀼𑀧𑀭𑀺𑀲𑀓𑁆𑀓𑀦𑀳𑁂𑀢𑀼 𑀯𑀸 ‘𑀑𑀲𑀻𑀤𑁂𑀬𑁆𑀬 𑀯𑀸 𑀲𑀁𑀲𑀻𑀤𑁂𑀬𑁆𑀬 𑀯𑀸 𑀅𑀥𑁄 𑀯𑀸 𑀕𑀘𑁆𑀙𑁂𑀬𑁆𑀬𑀸’𑀢𑀺. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯 𑀔𑁄, 𑀕𑀸𑀫𑀡𑀺, 𑀬𑁄 𑀲𑁄 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄, 𑀓𑀺𑀜𑁆𑀘𑀸𑀧𑀺 𑀦𑀁 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀆𑀬𑀸𑀘𑁂𑀬𑁆𑀬 𑀣𑁄𑀫𑁂𑀬𑁆𑀬 𑀧𑀜𑁆𑀚𑀮𑀺𑀓𑁄 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 ¶ 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀽’’’𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀢𑀺 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀅𑀧𑀸𑀬𑁂𑀳𑀺 𑀭𑀓𑁆𑀔𑀢𑀺. 𑀢𑀢𑁆𑀣 𑀬𑀸 𑀫𑀕𑁆𑀕𑀲𑁆𑀲 𑀢𑀺𑀓𑁆𑀔𑀢𑀸 𑀅𑀥𑀺𑀫𑀢𑁆𑀢𑀢𑀸, 𑀅𑀬𑀁 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀩𑁆𑀩𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 𑀭𑀓𑁆𑀔𑀢𑀺. 𑀏𑀯𑀁 𑀪𑀕𑀯𑀸 𑀆𑀳 𑁋

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 [𑀧𑀲𑁆𑀲 𑀉𑀤𑀸. 𑁩𑁨], 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺.

𑁩𑁨. 𑀢𑀢𑁆𑀣 𑀤𑀼𑀕𑁆𑀕𑀢𑀻𑀦𑀁 𑀳𑁂𑀢𑀼 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘, 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀢𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀬𑁂 𑀲𑀉𑀧𑀸𑀤𑀸𑀦𑀸 𑀔𑀦𑁆𑀥𑀸, 𑀇𑀤𑀁 𑀤𑀼𑀓𑁆𑀔𑀁. 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀅𑀬𑀁 𑀲𑀫𑀼𑀤𑀬𑁄. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁, 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬. 𑀢𑀢𑁆𑀣 𑀢𑀡𑁆𑀳𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸𑀬 𑀫𑀦𑀺𑀦𑁆𑀤𑁆𑀭𑀺𑀬𑀁 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀭𑀓𑁆𑀔𑀦𑁆𑀢𑁄 𑀲𑀫𑀸𑀥𑀺𑀁 𑀪𑀸𑀯𑀬𑀢𑀺, 𑀢𑀡𑁆𑀳𑀜𑁆𑀘 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀭𑀓𑁆𑀔𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑀺, 𑀅𑀯𑀺𑀚𑁆𑀚𑀜𑁆𑀘 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑀡𑁆𑀳𑀸𑀦𑀺𑀕𑁆𑀕𑀳𑁂𑀦 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀜𑁆𑀘 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀜𑁆𑀘. 𑀅𑀯𑀺𑀚𑁆𑀚𑀸𑀦𑀺𑀕𑁆𑀕𑀳𑁂𑀦 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀜𑁆𑀘 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀜𑁆𑀘. 𑀘𑀢𑀽𑀲𑀼 ¶ 𑀉𑀧𑀸𑀤𑀸𑀦𑁂𑀲𑀼 𑀧𑀳𑀻𑀦𑁂𑀲𑀼 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀇𑀤𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺.

𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀨𑀮𑀁 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀅𑀦𑀸𑀕𑀸𑀫𑀺𑀨𑀮𑀁 𑀅𑀭𑀳𑀢𑁆𑀢𑀁 [𑀅𑀭𑀳𑀢𑁆𑀢𑀨𑀮𑀁 (𑀓.)] 𑀅𑀕𑁆𑀕𑀨𑀮𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀨𑀮𑀸𑀦𑀺 [𑀩𑁆𑀭𑀳𑁆𑀫𑀘𑀭𑀺𑀬𑀨𑀮𑀸𑀦𑀻𑀢𑀺 (𑀲𑀻.)]. 𑀇𑀢𑀺 𑀧𑀼𑀭𑀺𑀫𑀓𑀸𑀦𑀺 𑀘 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘. 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀫𑀕𑁆𑀕𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 ¶ 𑀨𑀮𑀸𑀦𑀺 𑀘 𑀢𑀤𑀸𑀭𑀫𑁆𑀫𑀡𑀸 𑀘 𑀅𑀲𑀗𑁆𑀔𑀢𑀸𑀥𑀸𑀢𑀼 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀬𑀁 𑀧𑀝𑀺𑀯𑁂𑀥𑁂𑀦 𑀭𑀓𑁆𑀔𑀢𑀺, 𑀇𑀤𑀁 𑀤𑀼𑀓𑁆𑀔𑀁. 𑀬𑀢𑁄 𑀭𑀓𑁆𑀔𑀢𑀺, 𑀅𑀬𑀁 𑀲𑀫𑀼𑀤𑀬𑁄. 𑀬𑁂𑀦 𑀭𑀓𑁆𑀔𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀁 𑀭𑀓𑁆𑀔𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂’’𑀢𑀺.

𑀦𑀺𑀬𑀼𑀢𑁆𑀢𑁄 𑀆𑀯𑀝𑁆𑀝𑁄 𑀳𑀸𑀭𑁄.

𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄

𑁩𑁩. 𑀢𑀢𑁆𑀣 ¶ 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑁄? ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁 𑀪𑀽𑀫𑀺𑀜𑁆𑀘𑀸’’𑀢𑀺.

𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘. 𑀤𑁆𑀯𑁂 𑀧𑀝𑀺𑀧𑀤𑀸 𑀧𑀼𑀜𑁆𑀜𑀪𑀸𑀕𑀺𑀬𑀸 𑀘 𑀨𑀮𑀪𑀸𑀕𑀺𑀬𑀸 𑀘. 𑀤𑁆𑀯𑁂 𑀲𑀻𑀮𑀸𑀦𑀺 𑀲𑀁𑀯𑀭𑀲𑀻𑀮𑀜𑁆𑀘 𑀧𑀳𑀸𑀦𑀲𑀻𑀮𑀜𑁆𑀘, 𑀢𑀢𑁆𑀣 𑀪𑀕𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀧𑀼𑀜𑁆𑀜𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀤𑁂𑀲𑀬𑀢𑀺, 𑀲𑁄 𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀺, 𑀢𑀢𑁆𑀣 ¶ 𑀪𑀕𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀨𑀮𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀤𑁂𑀲𑀬𑀢𑀺, 𑀲𑁄 𑀧𑀳𑀸𑀦𑀲𑀻𑀮𑁂 𑀞𑀺𑀢𑁄 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀺.

𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁? 𑀯𑀸𑀲𑀦𑀸𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄𑀢𑀺.

𑀢𑀢𑁆𑀣 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁? 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀬𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸, 𑀯𑀸𑀲𑀦𑀸𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀦𑀢𑁆𑀣𑀺 𑀧𑀚𑀸𑀦𑀦𑀸, 𑀦𑀢𑁆𑀣𑀺 𑀫𑀕𑁆𑀕𑁄, 𑀦𑀢𑁆𑀣𑀺 𑀨𑀮𑀁. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀅𑀢𑁆𑀣𑀺 𑀧𑀚𑀸𑀦𑀦𑀸, 𑀅𑀢𑁆𑀣𑀺 𑀫𑀕𑁆𑀕𑁄, 𑀅𑀢𑁆𑀣𑀺 𑀨𑀮𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀬 𑀨𑀮𑁂𑀦 𑀲𑀻𑀮𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑀩𑁆𑀩𑀢𑁄 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑀬𑀺𑀢𑀩𑁆𑀩𑀸 𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀺.

𑁩𑁪. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸? 𑀤𑁆𑀯𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀦𑀸𑀫𑀲𑀸𑀥𑀸𑀭𑀡𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀘. 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀅𑀜𑁆𑀜𑀫𑁆𑀧𑀺 𑀏𑀯𑀁 𑀚𑀸𑀢𑀺𑀬𑀁, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑀺𑀬𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 ¶ 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀲𑀸𑀥𑀸𑀭𑀡𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀉𑀤𑁆𑀥𑀁𑀪𑀸𑀕𑀺𑀬𑀸 𑀲𑀁𑀬𑁄𑀚𑀦𑀸 𑀲𑀸𑀥𑀸𑀭𑀡𑀸, 𑀬𑀁 𑀓𑀺𑀜𑁆𑀘𑀺 𑀅𑀭𑀺𑀬𑀲𑀸𑀯𑀓𑁄 𑀮𑁄𑀓𑀺𑀬𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀩𑁆𑀩𑀸 𑀲𑀸 𑀅𑀯𑀻𑀢𑀭𑀸𑀕𑁂𑀳𑀺 [𑀅𑀯𑀺𑀕𑀢𑀭𑀸𑀕𑁂𑀳𑀺 (𑀓.)] 𑀲𑀸𑀥𑀸𑀭𑀡𑀸, 𑀲𑀸𑀥𑀸𑀭𑀡𑀸 𑀳𑀺 𑀥𑀫𑁆𑀫𑀸 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀭𑀁 𑀧𑀭𑀁 𑀲𑀓𑀁 𑀲𑀓𑀁 𑀯𑀺𑀲𑀬𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀬𑁄𑀧𑀺 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄 𑀢𑀁 𑀥𑀫𑁆𑀫𑀁 𑀉𑀧𑀸𑀢𑀺𑀯𑀢𑁆𑀢𑀢𑀺. 𑀇𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸.

𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸? 𑀬𑀸𑀯 𑀤𑁂𑀲𑀦𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸 𑀪𑀩𑁆𑀩𑀸𑀪𑀩𑁆𑀩𑀸𑀢𑀺, 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸 ¶ 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸, 𑀅𑀝𑁆𑀞𑀫𑀓𑀲𑁆𑀲 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸 ¶ 𑀲𑀁𑀬𑁄𑀚𑀦𑀸 𑀲𑀸𑀥𑀸𑀭𑀡𑀸 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀲𑁂𑀓𑁆𑀔𑀸𑀦𑀁 𑀦𑀸𑀫𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀧𑀝𑀺𑀧𑀦𑁆𑀦𑀓𑀸𑀦𑀁 𑀦𑀸𑀫𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀲𑁂𑀓𑁆𑀔𑀸𑀦𑀁 𑀲𑁂𑀓𑁆𑀔𑀲𑀻𑀮𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀏𑀯𑀁 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸 𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀁.

𑀤𑀲𑁆𑀲𑀦𑀪𑀽𑀫𑀺 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀪𑀽𑀫𑀺 𑀉𑀢𑁆𑀢𑀭𑀺𑀓𑀸𑀦𑀁 𑀨𑀮𑀸𑀦𑀁 𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀭𑀢𑁄 𑀖𑁄𑀲𑀲𑁆𑀲 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀺𑀦𑁆𑀢𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀪𑀸𑀯𑀦𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀭𑀢𑁄 𑀘 𑀖𑁄𑀲𑀲𑁆𑀲 𑀲𑀼𑀢𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀺𑀦𑁆𑀢𑀸𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀲𑁆𑀲 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀪𑀸𑀯𑀦𑀸𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀯𑀺𑀯𑁂𑀓𑀲𑁆𑀲 𑀘 𑀲𑀫𑀸𑀥𑀺𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀢𑀺𑀡𑁆𑀡𑀜𑁆𑀘 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀦𑀁 𑀲𑀫𑀣𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀳𑀺𑀭𑀺𑀬𑀸 𑀘 𑀯𑀺𑀧𑀲𑁆𑀲𑀦𑀸𑀬 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀧𑀭𑀺𑀘𑁆𑀘𑀸𑀕𑁄 𑀓𑀼𑀲𑀮𑀯𑀻𑀫𑀁𑀲𑀸𑀬 𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸 𑀓𑀼𑀲𑀮𑀫𑀽𑀮𑀭𑁄𑀧𑀦𑀸𑀬 𑀘 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀢𑁆𑀣𑀼𑀲𑀫𑁆𑀧𑀤𑀸 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀧𑁆𑀧𑀝𑀺𑀳𑀢𑀧𑀸𑀢𑀺𑀫𑁄𑀓𑁆𑀔𑀢𑀸 𑀤𑀼𑀫𑁆𑀫𑀗𑁆𑀓𑀽𑀦𑀜𑁆𑀘 ¶ 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬 𑀧𑁂𑀲𑀮𑀸𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄.

𑁯. 𑀧𑀭𑀺𑀯𑀢𑁆𑀢𑀦𑀳𑀸𑀭𑀯𑀺𑀪𑀗𑁆𑀕𑁄

𑁩𑁫. 𑀢𑀢𑁆𑀣 ¶ ¶ 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄? ‘‘𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂’’𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀪𑀯𑀢𑀺. 𑀬𑁂 𑀘𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀅𑀦𑁂𑀓𑁂 [𑀅𑀦𑁂𑀓𑀸 (𑀓.)] 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘𑀲𑁆𑀲 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀢𑁂 𑀘𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀦𑀺𑀚𑁆𑀚𑀺𑀡𑁆𑀡𑁄 𑀪𑀯𑀢𑀺. 𑀬𑁂 𑀘𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀘𑀲𑁆𑀲 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀢𑁂 𑀘𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀦𑀺𑀚𑁆𑀚𑀺𑀡𑁆𑀡𑀁 𑀪𑀯𑀢𑀺. 𑀬𑁂 𑀘𑀲𑁆𑀲 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀧𑀘𑁆𑀘𑀬𑀸 𑀘𑀲𑁆𑀲 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀢𑁂 𑀘𑀲𑁆𑀲 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

𑁩𑁬. 𑀬𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀧𑀳𑀻𑀦𑁄 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀻𑀦𑀁 𑀳𑁄𑀢𑀺. 𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀻𑀦𑀁 𑀳𑁄𑀢𑀺. 𑀲𑀘𑁆𑀘𑀯𑀸𑀤𑀺𑀲𑁆𑀲 𑀫𑀼𑀲𑀸𑀯𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺. 𑀅𑀧𑀺𑀲𑀼𑀡𑀯𑀸𑀘𑀲𑁆𑀲 𑀧𑀺𑀲𑀼𑀡𑀸 𑀯𑀸𑀘𑀸 𑀧𑀳𑀻𑀦𑀸 𑀳𑁄𑀢𑀺. 𑀲𑀡𑁆𑀳𑀯𑀸𑀘𑀲𑁆𑀲 𑀨𑀭𑀼𑀲𑀸 𑀯𑀸𑀘𑀸 𑀧𑀳𑀻𑀦𑀸 𑀳𑁄𑀢𑀺. 𑀓𑀸𑀮𑀯𑀸𑀤𑀺𑀲𑁆𑀲 𑀲𑀫𑁆𑀨𑀧𑁆𑀧𑀮𑀸𑀧𑁄 𑀧𑀳𑀻𑀦𑁄 𑀳𑁄𑀢𑀺. 𑀅𑀦𑀪𑀺𑀚𑁆𑀛𑀸𑀮𑀼𑀲𑁆𑀲 [𑀅𑀦𑀪𑀺𑀚𑁆𑀛𑀸𑀫𑀦𑀲𑁆𑀲 (𑀓.)] 𑀅𑀪𑀺𑀚𑁆𑀛𑀸 𑀧𑀳𑀻𑀦𑀸 ¶ 𑀳𑁄𑀢𑀺. 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀳𑁄𑀢𑀺.

𑀬𑁂 𑀘 𑀔𑁄 𑀓𑁂𑀘𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀕𑀭𑀳𑀦𑁆𑀢𑀺, 𑀦𑁂𑀲𑀁 𑀲𑀦𑁆𑀤𑀺𑀝𑁆𑀞𑀺𑀓𑀸 𑀲𑀳𑀥𑀫𑁆𑀫𑀺𑀓𑀸 𑀕𑀸𑀭𑀬𑁆𑀳𑀸 𑀯𑀸𑀤𑀸𑀦𑀼𑀯𑀸𑀤𑀸 𑀆𑀕𑀘𑁆𑀙𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀜𑁆𑀘 𑀢𑁂 𑀪𑀯𑀦𑁆𑀢𑁄 𑀥𑀫𑁆𑀫𑀁 𑀕𑀭𑀳𑀦𑁆𑀢𑀺. 𑀢𑁂𑀦 𑀳𑀺 𑀬𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀢𑁂𑀲𑀁 𑀪𑀯𑀦𑁆𑀢𑀸𑀦𑀁 𑀧𑀼𑀚𑁆𑀚𑀸 𑀘 𑀧𑀸𑀲𑀁𑀲𑀸 𑀘. 𑀏𑀯𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀲𑀫𑁆𑀫𑀸𑀯𑀸𑀘𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀲𑀫𑁆𑀫𑀸𑀆𑀚𑀻𑀯𑀁 𑀲𑀫𑁆𑀫𑀸𑀯𑀸𑀬𑀸𑀫𑀁 𑀲𑀫𑁆𑀫𑀸𑀲𑀢𑀺𑀁 𑀲𑀫𑁆𑀫𑀸𑀲𑀫𑀸𑀥𑀺𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀜𑁆𑀘 𑀢𑁂 𑀪𑀯𑀦𑁆𑀢𑁄 𑀥𑀫𑁆𑀫𑀁 𑀕𑀭𑀳𑀦𑁆𑀢𑀺. 𑀢𑁂𑀦 𑀳𑀺 𑀬𑁂 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸, 𑀢𑁂𑀲𑀁 𑀪𑀯𑀦𑁆𑀢𑀸𑀦𑀁 𑀧𑀼𑀚𑁆𑀚𑀸 𑀘 𑀧𑀸𑀲𑀁𑀲𑀸 𑀘.

𑀬𑁂 ¶ ¶ 𑀘 𑀔𑁄 𑀓𑁂𑀘𑀺 𑀏𑀯𑀫𑀸𑀳𑀁𑀲𑀼 ‘‘𑀪𑀼𑀜𑁆𑀚𑀺𑀢𑀩𑁆𑀩𑀸 𑀓𑀸𑀫𑀸, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸 𑀓𑀸𑀫𑀸, 𑀆𑀲𑁂𑀯𑀺𑀢𑀩𑁆𑀩𑀸 𑀓𑀸𑀫𑀸, 𑀦𑀺𑀲𑁂𑀯𑀺𑀢𑀩𑁆𑀩𑀸 𑀓𑀸𑀫𑀸, 𑀪𑀸𑀯𑀬𑀺𑀢𑀩𑁆𑀩𑀸 𑀓𑀸𑀫𑀸, 𑀩𑀳𑀼𑀮𑀻𑀓𑀸𑀢𑀩𑁆𑀩𑀸 𑀓𑀸𑀫𑀸’’𑀢𑀺. 𑀓𑀸𑀫𑁂𑀳𑀺 𑀯𑁂𑀭𑀫𑀡𑀻 𑀢𑁂𑀲𑀁 𑀅𑀥𑀫𑁆𑀫𑁄.

𑀬𑁂 𑀯𑀸 𑀧𑀦 𑀓𑁂𑀘𑀺 𑀏𑀯𑀫𑀸𑀳𑀁𑀲𑀼 ‘‘𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀥𑀫𑁆𑀫𑁄’’𑀢𑀺. 𑀦𑀺𑀬𑁆𑀬𑀸𑀦𑀺𑀓𑁄 𑀢𑁂𑀲𑀁 𑀥𑀫𑁆𑀫𑁄 𑀅𑀥𑀫𑁆𑀫𑁄. 𑀬𑁂 𑀘 𑀔𑁄 𑀓𑁂𑀘𑀺 𑀏𑀯𑀫𑀸𑀳𑀁𑀲𑀼 ‘‘𑀤𑀼𑀓𑁆𑀔𑁄 𑀥𑀫𑁆𑀫𑁄’’𑀢𑀺. 𑀲𑀼𑀔𑁄 𑀢𑁂𑀲𑀁 𑀥𑀫𑁆𑀫𑁄 𑀅𑀥𑀫𑁆𑀫𑁄. 𑀬𑀣𑀸 𑀯𑀸 𑀧𑀦 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀲𑀼𑀪𑀲𑀜𑁆𑀜𑀸 𑀧𑀳𑀻𑀬𑀦𑁆𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀲𑀼𑀔𑀲𑀜𑁆𑀜𑀸 𑀧𑀳𑀻𑀬𑀦𑁆𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀦𑀺𑀘𑁆𑀘𑀲𑀜𑁆𑀜𑀸 𑀧𑀳𑀻𑀬𑀦𑁆𑀢𑀺. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀅𑀢𑁆𑀢𑀲𑀜𑁆𑀜𑀸 𑀧𑀳𑀻𑀬𑀦𑁆𑀢𑀺. 𑀬𑀁 𑀬𑀁 𑀯𑀸 𑀧𑀦 𑀥𑀫𑁆𑀫𑀁 𑀭𑁄𑀘𑀬𑀢𑀺 𑀯𑀸 𑀉𑀧𑀕𑀘𑁆𑀙𑀢𑀺 𑀯𑀸, 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑁄 𑀧𑀝𑀺𑀧𑀓𑁆𑀔𑁄, 𑀲𑁆𑀯𑀲𑁆𑀲 𑀅𑀦𑀺𑀝𑁆𑀞𑀢𑁄 𑀅𑀚𑁆𑀛𑀸𑀧𑀦𑁆𑀦𑁄 𑀪𑀯𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑁂’’𑀢𑀺.

𑀦𑀺𑀬𑀼𑀢𑁆𑀢𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄.

𑁧𑁦. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄

𑁩𑁭. 𑀢𑀢𑁆𑀣 ¶ 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄? ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀻’’𑀢𑀺. 𑀬𑀣𑀸 𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀯𑁂𑀯𑀘𑀦𑁂𑀳𑀺 𑀦𑀺𑀤𑁆𑀤𑀺𑀲𑀢𑀺. 𑀬𑀣𑀸𑀳 𑀪𑀕𑀯𑀸 𑁋

‘‘𑀆𑀲𑀸 𑀘 𑀧𑀺𑀳𑀸 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀺𑀓𑀸’’𑀢𑀺.

𑀆𑀲𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀬𑀸 𑀪𑀯𑀺𑀲𑁆𑀲𑀲𑁆𑀲 𑀅𑀢𑁆𑀣𑀲𑁆𑀲 𑀆𑀲𑀻𑀲𑀦𑀸 [𑀆𑀲𑀺𑀁𑀲𑀦𑀸 (𑀲𑀻.)] 𑀅𑀯𑀲𑁆𑀲𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀆𑀲𑀸𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀧𑀺𑀳𑀸 𑀦𑀸𑀫 𑀬𑀸 𑀯𑀢𑁆𑀢𑀫𑀸𑀦𑀲𑁆𑀲 [𑀯𑀢𑁆𑀢𑀫𑀸𑀦𑀓𑀲𑁆𑀲 (𑀲𑀻.)] 𑀅𑀢𑁆𑀣𑀲𑁆𑀲 𑀧𑀢𑁆𑀣𑀦𑀸, 𑀲𑁂𑀬𑁆𑀬𑀢𑀭𑀁 𑀯𑀸 𑀤𑀺𑀲𑁆𑀯𑀸 ‘‘𑀏𑀤𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀺𑀳𑀸𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀮𑀦𑀸 𑀅𑀪𑀺𑀦𑀦𑁆𑀤𑀦𑀸 𑀦𑀸𑀫, 𑀧𑀺𑀬𑀁 𑀯𑀸 𑀜𑀸𑀢𑀺𑀁 𑀅𑀪𑀺𑀦𑀦𑁆𑀤𑀢𑀺, 𑀧𑀺𑀬𑀁 𑀯𑀸 𑀥𑀫𑁆𑀫𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑁆𑀧𑀝𑀺𑀓𑀽𑀮𑀢𑁄 𑀯𑀸 𑀅𑀪𑀺𑀦𑀦𑁆𑀤𑀢𑀺.

𑀅𑀦𑁂𑀓𑀥𑀸𑀢𑀽𑀢𑀺 ¶ 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼 𑀭𑀲𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼 ¶ , 𑀓𑀸𑀬𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼.

𑀲𑀭𑀸𑀢𑀺 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀕𑀦𑁆𑀥𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀭𑀲𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀨𑁄𑀝𑁆𑀞𑀩𑁆𑀩𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀸. 𑀢𑀢𑁆𑀣 𑀬𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀇𑀫𑀸𑀦𑀺 𑀘𑀢𑀼𑀯𑀻𑀲𑀧𑀤𑀸𑀦𑀺 𑀢𑀡𑁆𑀳𑀸𑀧𑀓𑁆𑀔𑁄, 𑀢𑀡𑁆𑀳𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀬𑀸 𑀙 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄.

𑁩𑁮. 𑀲𑀸𑀬𑁂𑀯 𑀧𑀢𑁆𑀣𑀦𑀸𑀓𑀸𑀭𑁂𑀦 𑀥𑀫𑁆𑀫𑀦𑀦𑁆𑀤𑀻 𑀥𑀫𑁆𑀫𑀧𑁂𑀫𑀁 𑀥𑀫𑁆𑀫𑀚𑁆𑀛𑁄𑀲𑀸𑀦𑀦𑁆𑀢𑀺 𑀢𑀡𑁆𑀳𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀘𑀺𑀢𑁆𑀢𑀁 𑀫𑀦𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 ¶ 𑀘𑀺𑀢𑁆𑀢𑀲𑁆𑀲 𑀏𑀢𑀁 𑀯𑁂𑀯𑀘𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄𑀥𑀸𑀢𑀼 𑀫𑀦𑀸𑀬𑀢𑀦𑀁 𑀯𑀺𑀚𑀸𑀦𑀦𑀸𑀢𑀺 𑀫𑀦𑀲𑁆𑀲𑁂𑀢𑀁 𑀯𑁂𑀯𑀘𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀅𑀥𑀺𑀧𑀜𑁆𑀜𑀸 𑀲𑀺𑀓𑁆𑀔𑀸 𑀧𑀜𑁆𑀜𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀜𑀸𑀡𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀻𑀭𑀡𑀸 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑁂 𑀜𑀸𑀡𑀁 𑀅𑀢𑁆𑀣𑁂 𑀜𑀸𑀡𑀁 𑀅𑀦𑁆𑀯𑀬𑁂 𑀜𑀸𑀡𑀁 𑀔𑀬𑁂 𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼 𑀯𑀺𑀚𑁆𑀚𑀸 𑀩𑀼𑀤𑁆𑀥𑀺 𑀪𑀽𑀭𑀺 𑀫𑁂𑀥𑀸 𑀆𑀮𑁄𑀓𑁄, 𑀬𑀁 𑀯𑀸 𑀧𑀦 𑀬𑀁 𑀓𑀺𑀜𑁆𑀘𑀺 𑀅𑀜𑁆𑀜𑀁𑀧𑀺 𑀏𑀯𑀁 𑀚𑀸𑀢𑀺𑀬𑀁, 𑀧𑀜𑁆𑀜𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀲𑀩𑁆𑀩𑀸 𑀧𑀜𑁆𑀜𑀸. 𑀅𑀧𑀺 𑀘 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀲𑀤𑁆𑀥𑀸, 𑀆𑀭𑀫𑁆𑀪𑀝𑁆𑀞𑁂𑀦 𑀯𑀻𑀭𑀺𑀬𑀁, 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸.

𑀬𑀣𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀩𑀮𑀦𑀺𑀧𑁆𑀨𑀢𑁆𑀢𑀺𑀕𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀥𑀺𑀕𑀢𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀬𑁄𑀕𑀯𑀺𑀧𑁆𑀧𑀳𑀻𑀦𑁄 𑀅𑀕𑀢𑀺𑀕𑀫𑀦𑀯𑀻𑀢𑀺𑀯𑀢𑁆𑀢𑁄 𑀉𑀤𑁆𑀥𑀝𑀲𑀮𑁆𑀮𑁄 𑀦𑀺𑀭𑀽𑀴𑁆𑀳𑀯𑀡𑁄 𑀫𑀤𑁆𑀤𑀺𑀢𑀓𑀡𑁆𑀟𑀓𑁄 𑀦𑀺𑀩𑁆𑀩𑀸𑀧𑀺𑀢𑀧𑀭𑀺𑀬𑀼𑀝𑁆𑀞𑀸𑀦𑁄 [𑀦𑀺𑀩𑁆𑀩𑀸𑀳𑀺𑀢 … (𑀓.)] 𑀩𑀦𑁆𑀥𑀦𑀸𑀢𑀻𑀢𑁄 𑀕𑀦𑁆𑀣𑀯𑀺𑀦𑀺𑀯𑁂𑀞𑀦𑁄 𑀅𑀚𑁆𑀛𑀸𑀲𑀬𑀯𑀻𑀢𑀺𑀯𑀢𑁆𑀢𑁄 𑀪𑀺𑀦𑁆𑀦𑀦𑁆𑀥𑀓𑀸𑀭𑁄 𑀘𑀓𑁆𑀔𑀼𑀫𑀸 𑀮𑁄𑀓𑀥𑀫𑁆𑀫𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀬𑀼𑀢𑁆𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀗𑁆𑀔𑁂𑀧𑀕𑀢𑁄 𑀩𑀦𑁆𑀥𑀦𑀸𑀢𑀺𑀯𑀢𑁆𑀢𑁄 𑀞𑀧𑀺𑀢𑀲𑀗𑁆𑀕𑀸𑀫𑁄 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀉𑀓𑁆𑀓𑀸𑀥𑀭𑁄 𑀆𑀮𑁄𑀓𑀓𑀭𑁄 𑀧𑀚𑁆𑀚𑁄𑀢𑀓𑀭𑁄 𑀢𑀫𑁄𑀦𑀼𑀤𑁄 𑀭𑀡𑀜𑁆𑀚𑀳𑁄 𑀅𑀧𑀭𑀺𑀫𑀸𑀡𑀯𑀡𑁆𑀡𑁄 𑀅𑀧𑁆𑀧𑀫𑁂𑀬𑁆𑀬𑀯𑀡𑁆𑀡𑁄 𑀅𑀲𑀗𑁆𑀔𑁂𑀬𑁆𑀬𑀯𑀡𑁆𑀡𑁄 𑀆𑀪𑀁𑀓𑀭𑁄 𑀧𑀪𑀁𑀓𑀭𑁄 𑀥𑀫𑁆𑀫𑁄𑀪𑀸𑀲𑀧𑀚𑁆𑀚𑁄𑀢𑀓𑀭𑁄𑀢𑀺 ¶ 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀢𑀺 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀲𑁆𑀯𑀸𑀓𑁆𑀔𑀸𑀢𑁄 ¶ 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 ¶ 𑀑𑀧𑀦𑁂𑀬𑁆𑀬𑀺𑀓𑁄 [𑀑𑀧𑀦𑀬𑀺𑀓𑁄 (𑀲𑀻.)] 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀝𑁄 𑀯𑀝𑁆𑀝𑀽𑀧𑀘𑁆𑀙𑁂𑀤𑁄 𑀲𑀼𑀜𑁆𑀜𑀢𑁄 𑀅𑀢𑀺𑀤𑀼𑀮𑁆𑀮𑀪𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁.

‘‘𑀅𑀲𑀗𑁆𑀔𑀢𑀁 𑀅𑀦𑀢𑀁 [𑀅𑀲𑀗𑁆𑀔𑀢𑀁 𑀦𑀦𑁆𑀢 … (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁪.𑁪𑁦𑁯] 𑀅𑀦𑀸𑀲𑀯𑀜𑁆𑀘, 𑀲𑀘𑁆𑀘𑀜𑁆𑀘 𑀧𑀸𑀭𑀁 𑀦𑀺𑀧𑀼𑀡𑀁 𑀲𑀼𑀤𑀼𑀤𑁆𑀤𑀲𑀁;

𑀅𑀚𑀚𑁆𑀚𑀭𑀁 𑀥𑀼𑀯𑀁 𑀅𑀧𑀮𑁄𑀓𑀺𑀢𑀁 [𑀅𑀧𑀮𑁄𑀓𑀺𑀬𑀁 (𑀲𑀻. 𑀓.)], 𑀅𑀦𑀺𑀤𑀲𑁆𑀲𑀦𑀁 𑀦𑀺𑀧𑁆𑀧𑀧𑀜𑁆𑀘 𑀲𑀦𑁆𑀢𑀁.

‘‘𑀅𑀫𑀢𑀁 𑀧𑀡𑀻𑀢𑀜𑁆𑀘 𑀲𑀺𑀯𑀜𑁆𑀘 𑀔𑁂𑀫𑀁, 𑀢𑀡𑁆𑀳𑀸𑀓𑁆𑀔𑀬𑁄 𑀅𑀘𑁆𑀙𑀭𑀺𑀬𑀜𑁆𑀘 𑀅𑀩𑁆𑀪𑀼𑀢𑀁;

𑀅𑀦𑀻𑀢𑀺𑀓𑀁 𑀅𑀦𑀻𑀢𑀺𑀓𑀥𑀫𑁆𑀫𑀁 [𑀦𑀻𑀢𑀺𑀓𑀥𑀫𑁆𑀫𑀫𑁂𑀯 𑀯𑀸 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁪𑁦𑁯], 𑀦𑀺𑀩𑁆𑀩𑀸𑀦𑀫𑁂𑀢𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

‘‘𑀅𑀚𑀸𑀢𑀁 𑀅𑀪𑀽𑀢𑀁 𑀅𑀦𑀼𑀧𑀤𑁆𑀤𑀯𑀜𑁆𑀘, 𑀅𑀓𑀢𑀁 𑀅𑀲𑁄𑀓𑀜𑁆𑀘 𑀅𑀣𑁄 𑀯𑀺𑀲𑁄𑀓𑀁;

𑀅𑀦𑀽𑀧𑀲𑀕𑁆𑀕𑀁𑀦𑀼𑀧𑀲𑀕𑁆𑀕𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀫𑁂𑀢𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

‘‘𑀕𑀫𑁆𑀪𑀻𑀭𑀜𑁆𑀘𑁂𑀯 𑀤𑀼𑀧𑁆𑀧𑀲𑁆𑀲𑀁, 𑀉𑀢𑁆𑀢𑀭𑀜𑁆𑀘 𑀅𑀦𑀼𑀢𑁆𑀢𑀭𑀁;

𑀅𑀲𑀫𑀁 𑀅𑀧𑁆𑀧𑀝𑀺𑀲𑀫𑀁, 𑀚𑁂𑀝𑁆𑀞𑀁 𑀲𑁂𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀮𑁂𑀡𑀜𑁆𑀘 𑀢𑀸𑀡𑀁 𑀅𑀭𑀡𑀁 𑀅𑀦𑀗𑁆𑀕𑀡𑀁, 𑀅𑀓𑀸𑀘 𑀫𑁂𑀢𑀁 𑀯𑀺𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀤𑀻𑀧𑁄 𑀲𑀼𑀔𑀁 𑀅𑀧𑁆𑀧𑀫𑀸𑀡𑀁 𑀧𑀢𑀺𑀝𑁆𑀞𑀸, 𑀅𑀓𑀺𑀜𑁆𑀘𑀦𑀁 𑀅𑀧𑁆𑀧𑀧𑀜𑁆𑀘𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺.

𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 ¶ 𑀘 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀲𑀻𑀮𑀲𑀫𑁆𑀧𑀦𑁆𑀦𑁄 ¶ 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀲𑀢𑁆𑀢𑀸𑀦𑀁 𑀲𑀸𑀭𑁄 𑀲𑀢𑁆𑀢𑀸𑀦𑀁 𑀫𑀡𑁆𑀟𑁄 𑀲𑀢𑁆𑀢𑀸𑀦𑀁 𑀉𑀤𑁆𑀥𑀸𑀭𑁄 𑀲𑀢𑁆𑀢𑀸𑀦𑀁 𑀏𑀲𑀺𑀓𑀸 [𑀏𑀲𑀺𑀓𑁄 (𑀓.)] 𑀲𑀢𑁆𑀢𑀸𑀦𑀁 𑀲𑀼𑀭𑀪𑀺𑀧𑀲𑀽𑀦𑀁 𑀧𑀼𑀚𑁆𑀚𑁄 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘𑀸𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀅𑀭𑀺𑀬𑀸𑀦𑀺 𑀅𑀭𑀺𑀬𑀓𑀦𑁆𑀢𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀅𑀮𑀗𑁆𑀓𑀸𑀭𑁄 𑀘 𑀲𑀻𑀮𑀁 𑀉𑀢𑁆𑀢𑀫𑀗𑁆𑀕𑁄𑀧𑀲𑁄𑀪𑀡𑀢𑀸𑀬, 𑀦𑀺𑀥𑀸𑀦𑀜𑁆𑀘 𑀲𑀻𑀮𑀁 𑀲𑀩𑁆𑀩𑀤𑁄𑀪𑀕𑁆𑀕𑀲𑀫𑀢𑀺𑀓𑁆𑀓𑀫𑀦𑀝𑁆𑀞𑁂𑀦 ¶ , 𑀲𑀺𑀧𑁆𑀧𑀜𑁆𑀘 𑀲𑀻𑀮𑀁 𑀅𑀓𑁆𑀔𑀡𑀯𑁂𑀥𑀺𑀢𑀸𑀬, 𑀯𑁂𑀮𑀸 𑀘 𑀲𑀻𑀮𑀁 𑀅𑀦𑀢𑀺𑀓𑁆𑀓𑀫𑀦𑀝𑁆𑀞𑁂𑀦, 𑀥𑀜𑁆𑀜𑀜𑁆𑀘 𑀲𑀻𑀮𑀁 𑀤𑀮𑀺𑀤𑁆𑀤𑁄𑀧𑀘𑁆𑀙𑁂𑀤𑀦𑀝𑁆𑀞𑁂𑀦 [𑀤𑀴𑀺𑀤𑁆𑀤𑁄… (𑀲𑀻.)], 𑀆𑀤𑀸𑀲𑁄 𑀘 𑀲𑀻𑀮𑀁 𑀥𑀫𑁆𑀫𑀯𑁄𑀮𑁄𑀓𑀦𑀢𑀸𑀬, 𑀧𑀸𑀲𑀸𑀤𑁄 𑀘 𑀲𑀻𑀮𑀁 𑀯𑁄𑀮𑁄𑀓𑀦𑀝𑁆𑀞𑁂𑀦, 𑀲𑀩𑁆𑀩𑀪𑀽𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀘 𑀲𑀻𑀮𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀯𑁂𑀯𑀘𑀦𑁄 𑀳𑀸𑀭𑁄.

𑁧𑁧. 𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄

𑁩𑁯. 𑀢𑀢𑁆𑀣 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑁄? ‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀻’’𑀢𑀺.

𑀬𑀸 ¶ 𑀧𑀓𑀢𑀺𑀓𑀣𑀸𑀬 𑀤𑁂𑀲𑀦𑀸. 𑀅𑀬𑀁 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀓𑀸 𑀘 𑀧𑀓𑀢𑀺𑀓𑀣𑀸𑀬 𑀤𑁂𑀲𑀦𑀸, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀬𑀣𑀸 𑀪𑀕𑀯𑀸 𑀆𑀳 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀤𑀲𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺.

𑀓𑀩𑀴𑀻𑀓𑀸𑀭𑁂 ¶ 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁨.𑁬𑁪)] 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺 [𑀩𑀼𑀤𑁆𑀥𑀺 (𑀓.)]. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

𑀨𑀲𑁆𑀲𑁂 𑀘𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂. 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 ¶ , 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺. 𑀅𑀬𑀁 𑀧𑀪𑀯𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲 𑀘 𑀲𑀫𑀼𑀤𑀬𑀲𑁆𑀲 𑀘.

𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂 [𑀧𑀲𑁆𑀲 𑀲𑀁. 𑀦𑀺. 𑁨.𑁬𑁪], 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁, 𑀦𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 ¶ 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀅𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀅𑀤𑀭𑀁 𑀅𑀦𑀼𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

𑀨𑀲𑁆𑀲𑁂 𑀘𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂. 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁, 𑀦𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀅𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀅𑀤𑀭𑀁 𑀅𑀦𑀼𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

𑀅𑀬𑀁 ¶ 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲, 𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲.

𑁪𑁦. 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣. 𑀅𑀧𑁆𑀧𑀫𑀢𑁆𑀢𑁄 𑀦𑀺𑀧𑀓𑁄 𑀲𑀢𑁄, 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀓𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺? ‘‘𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁯𑁯] 𑀅𑀦𑀺𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀭𑀽𑀧𑀸 𑀅𑀦𑀺𑀘𑁆𑀘𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺𑀤𑀁 [𑀬𑀫𑀺𑀤𑀁 (𑀲𑀻. 𑀓.)] 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀅𑀦𑀺𑀘𑁆𑀘𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀲𑁄𑀢𑀁 ¶ …𑀧𑁂… 𑀖𑀸𑀦𑀁…𑀧𑁂… 𑀚𑀺𑀯𑁆𑀳𑀸…𑀧𑁂… 𑀓𑀸𑀬𑁄…𑀧𑁂… ‘‘𑀫𑀦𑁄 𑀅𑀦𑀺𑀘𑁆𑀘𑁄’’𑀢𑀺 [𑀅𑀦𑀺𑀘𑁆𑀘’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁦𑁦)] 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀥𑀫𑁆𑀫𑀸 𑀅𑀦𑀺𑀘𑁆𑀘𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀫𑀦𑁄𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀫𑁆𑀧𑀺 𑀅𑀦𑀺𑀘𑁆𑀘𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀅𑀬𑀁 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲, 𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲.

𑀭𑀽𑀧𑀁 ¶ , 𑀭𑀸𑀥, 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 [𑀯𑀺𑀓𑀻𑀴𑀦𑀺𑀓𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁩.𑁧𑁬𑁯] 𑀓𑀭𑁄𑀣, 𑀧𑀜𑁆𑀜𑀸𑀬 𑀢𑀡𑁆𑀳𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀢𑀡𑁆𑀳𑀓𑁆𑀔𑀬𑀸 𑀤𑀼𑀓𑁆𑀔𑀓𑁆𑀔𑀬𑁄, 𑀤𑀼𑀓𑁆𑀔𑀓𑁆𑀔𑀬𑀸 𑀦𑀺𑀩𑁆𑀩𑀸𑀦𑀁. 𑀯𑁂𑀤𑀦𑀁…𑀧𑁂…. 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂 𑀯𑀺𑀜𑁆𑀜𑀸𑀡𑀁 𑀯𑀺𑀓𑀺𑀭𑀣 𑀯𑀺𑀥𑀫𑀣 𑀯𑀺𑀤𑁆𑀥𑀁𑀲𑁂𑀣 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀣, 𑀧𑀜𑁆𑀜𑀸𑀬 𑀢𑀡𑁆𑀳𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀣. 𑀢𑀡𑁆𑀳𑀓𑁆𑀔𑀬𑀸 𑀤𑀼𑀓𑁆𑀔𑀓𑁆𑀔𑀬𑁄, 𑀤𑀼𑀓𑁆𑀔𑀓𑁆𑀔𑀬𑀸 𑀦𑀺𑀩𑁆𑀩𑀸𑀦𑀁.

𑀅𑀬𑀁 𑀦𑀺𑀭𑁄𑀥𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲, 𑀦𑀺𑀩𑁆𑀩𑀺𑀤𑀸𑀧𑀜𑁆𑀜𑀢𑁆𑀢𑀺 𑀅𑀲𑁆𑀲𑀸𑀤𑀲𑁆𑀲, 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲, 𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀦𑀺𑀭𑁄𑀥𑀲𑁆𑀲.

‘‘𑀲𑁄 𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀅𑀬𑀁 ¶ 𑀧𑀝𑀺𑀯𑁂𑀥𑀧𑀜𑁆𑀜𑀢𑁆𑀢𑀺 𑀲𑀘𑁆𑀘𑀸𑀦𑀁, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲. ‘‘𑀲𑁄 𑀇𑀫𑁂 𑀆𑀲𑀯𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀇𑀫𑁂 𑀆𑀲𑀯𑀸 𑀅𑀲𑁂𑀲𑀁 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀅𑀬𑀁 𑀉𑀧𑁆𑀧𑀸𑀤𑀧𑀜𑁆𑀜𑀢𑁆𑀢𑀺 𑀔𑀬𑁂 𑀜𑀸𑀡𑀲𑁆𑀲, 𑀑𑀓𑀸𑀲𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀲𑁆𑀲, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲, 𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲, 𑀆𑀭𑀫𑁆𑀪𑀧𑀜𑁆𑀜𑀢𑁆𑀢𑀺 ¶ 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲, 𑀆𑀲𑀸𑀝𑀦𑀧𑀜𑁆𑀜𑀢𑁆𑀢𑀺 𑀆𑀲𑀸𑀝𑀺𑀓𑀸𑀦𑀁, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀪𑀸𑀯𑀦𑀸𑀪𑀽𑀫𑀺𑀬𑀸, 𑀅𑀪𑀺𑀦𑀺𑀖𑀸𑀢𑀧𑀜𑁆𑀜𑀢𑁆𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁.

𑁪𑁧. 𑀇𑀤𑀁 ‘‘𑀤𑀼𑀓𑁆𑀔’’𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀅𑀬𑀁 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂…. 𑀅𑀬𑀁 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 ¶ 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀅𑀬𑀁 𑀤𑁂𑀲𑀦𑀸𑀧𑀜𑁆𑀜𑀢𑁆𑀢𑀺 𑀲𑀘𑁆𑀘𑀸𑀦𑀁, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀲𑀼𑀢𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀲𑁆𑀲, 𑀧𑀯𑀢𑁆𑀢𑀦𑀸𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀘𑀓𑁆𑀓𑀲𑁆𑀲.

‘‘𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘‘𑀲𑁄 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑁄 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀸 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀫𑁂, 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑀅𑀬𑀁 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀘𑀺𑀦𑁆𑀢𑀸𑀫𑀬𑀺𑀬𑀸 𑀧𑀜𑁆𑀜𑀸𑀬, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲.

‘‘𑀢𑀁 ¶ 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘‘𑀲𑁄 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀧𑀳𑀻𑀦𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑁄 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄’’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀸 𑀔𑁄 𑀧𑀦𑀸𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸’’𑀢𑀺 𑀫𑁂, 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀅𑀬𑀁 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀪𑀸𑀯𑀦𑀸𑀫𑀬𑀺𑀬𑀸 𑀧𑀜𑁆𑀜𑀸𑀬, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀲𑁆𑀲, 𑀧𑀯𑀢𑁆𑀢𑀦𑀸𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀘𑀓𑁆𑀓𑀲𑁆𑀲.

‘‘𑀢𑀼𑀮𑀫𑀢𑀼𑀮𑀜𑁆𑀘 ¶ 𑀲𑀫𑁆𑀪𑀯𑀁, 𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀺;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 [𑀅𑀪𑀺𑀤𑀸 (𑀲𑀻. 𑀓.) 𑀧𑀲𑁆𑀲 𑀤𑀻. 𑀦𑀺. 𑁨.𑁧𑁬𑁯] 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺.

‘‘𑀢𑀼𑀮’’𑀦𑁆𑀢𑀺 ¶ 𑀲𑀗𑁆𑀔𑀸𑀭𑀥𑀸𑀢𑀼. ‘‘𑀅𑀢𑀼𑀮’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀸𑀢𑀼, ‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯’’𑀦𑁆𑀢𑀺 𑀅𑀪𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁. 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬. ‘‘𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀻’’𑀢𑀺 𑀧𑀭𑀺𑀘𑁆𑀘𑀸𑀕𑀧𑀜𑁆𑀜𑀢𑁆𑀢𑀺 𑀲𑀫𑀼𑀤𑀬𑀲𑁆𑀲. 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀤𑀼𑀓𑁆𑀔𑀲𑁆𑀲. ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸. 𑀞𑀺𑀢𑀺𑀧𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬. ‘‘𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀺𑀤𑀸𑀧𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀸𑀬, 𑀧𑀤𑀸𑀮𑀦𑀸𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯’’𑀦𑁆𑀢𑀺.

𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀁, 𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀓𑀸𑀫𑀸 𑀳𑀺 𑀮𑁄𑀓𑁂 𑀲𑀗𑁆𑀕𑁄𑀢𑀺 𑀜𑀢𑁆𑀯𑀸, 𑀢𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺.

‘‘𑀬𑁄 𑀤𑀼𑀓𑁆𑀔’’𑀦𑁆𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀘 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺 𑀘. ‘‘𑀬𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀧𑀪𑀯𑀧𑀜𑁆𑀜𑀢𑁆𑀢𑀺 𑀘 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀧𑀜𑁆𑀜𑀢𑁆𑀢𑀺 𑀘. ‘‘𑀅𑀤𑁆𑀤𑀓𑁆𑀔𑀻’’𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀘 𑀜𑀸𑀡𑀘𑀓𑁆𑀔𑀼𑀲𑁆𑀲 𑀧𑀝𑀺𑀯𑁂𑀥𑀧𑀜𑁆𑀜𑀢𑁆𑀢𑀺 𑀘. ‘‘𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼𑀓𑀣𑀁 𑀦𑀫𑁂𑀬𑁆𑀬𑀸’’𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀘 𑀓𑀸𑀫𑀢𑀡𑁆𑀳𑀸𑀬 𑀅𑀪𑀺𑀦𑀺𑀯𑁂𑀲𑀧𑀜𑁆𑀜𑀢𑁆𑀢𑀺 𑀘. ‘‘𑀓𑀸𑀫𑀸 𑀳𑀺 𑀮𑁄𑀓𑁂 𑀲𑀗𑁆𑀕𑁄𑀢𑀺 𑀜𑀢𑁆𑀯𑀸’’𑀢𑀺 𑀧𑀘𑁆𑀘𑀢𑁆𑀣𑀺𑀓𑀢𑁄 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀺 𑀓𑀸𑀫𑀸𑀦𑀁. 𑀓𑀸𑀫𑀸 𑀳𑀺 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀫𑀁𑀲𑀧𑁂𑀲𑀽𑀧𑀫𑀸 𑀧𑀸𑀯𑀓𑀓𑀧𑁆𑀧𑀸 𑀧𑀧𑀸𑀢𑀉𑀭𑀕𑁄𑀧𑀫𑀸 𑀘. ‘‘𑀢𑁂𑀲𑀁 𑀲𑀢𑀻𑀫𑀸’’𑀢𑀺 𑀅𑀧𑀘𑀬𑀧𑀜𑁆𑀜𑀢𑁆𑀢𑀺 𑀧𑀳𑀸𑀦𑀸𑀬, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀓𑀸𑀬𑀕𑀢𑀸𑀬 ¶ 𑀲𑀢𑀺𑀬𑀸, 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲. ‘‘𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺 𑀧𑀝𑀺𑀯𑁂𑀥𑀧𑀜𑁆𑀜𑀢𑁆𑀢𑀺 𑀭𑀸𑀕𑀯𑀺𑀦𑀬𑀲𑁆𑀲 𑀤𑁄𑀲𑀯𑀺𑀦𑀬𑀲𑁆𑀲 𑀫𑁄𑀳𑀯𑀺𑀦𑀬𑀲𑁆𑀲. ‘‘𑀚𑀦𑁆𑀢𑀽’’𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀬𑁄𑀕𑀺𑀲𑁆𑀲. 𑀬𑀤𑀸 𑀳𑀺 𑀬𑁄𑀕𑀻 𑀓𑀸𑀫𑀸 𑀲𑀗𑁆𑀕𑁄𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀓𑀸𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑀬𑀢𑀺, 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀯𑀸𑀬𑀫𑀢𑀺. 𑀅𑀬𑀁 ¶ 𑀯𑀸𑀬𑀸𑀫𑀧𑀜𑁆𑀜𑀢𑁆𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸. 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀑𑀭𑀫𑀢𑁆𑀢𑀺𑀓𑀸𑀬 𑀅𑀲𑀦𑁆𑀢𑀼𑀝𑁆𑀞𑀺𑀬𑀸. 𑀢𑀢𑁆𑀣 𑀲𑁄 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀯𑀸𑀬𑀫𑀢𑀻𑀢𑀺 𑀅𑀬𑀁 𑀅𑀧𑁆𑀧𑀫𑀸𑀤𑀧𑀜𑁆𑀜𑀢𑁆𑀢𑀺 𑀪𑀸𑀯𑀦𑀸𑀬, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲, 𑀆𑀭𑀓𑁆𑀔𑀧𑀜𑁆𑀜𑀢𑁆𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀞𑀺𑀢𑀺𑀧𑀜𑁆𑀜𑀢𑁆𑀢𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦’’𑀦𑁆𑀢𑀺.

‘‘𑀫𑁄𑀳𑀲𑀫𑁆𑀩𑀦𑁆𑀥𑀦𑁄 ¶ 𑀮𑁄𑀓𑁄, 𑀪𑀩𑁆𑀩𑀭𑀽𑀧𑁄𑀯 𑀤𑀺𑀲𑁆𑀲𑀢𑀺;

𑀉𑀧𑀥𑀺𑀩𑀦𑁆𑀥𑀦𑁄 [𑀉𑀧𑀥𑀺𑀲𑀫𑁆𑀩𑀦𑁆𑀥𑀦𑁄 (𑀲𑀻.) 𑀧𑀲𑁆𑀲 𑀉𑀤𑀸. 𑁭𑁦] 𑀩𑀸𑀮𑁄, 𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄;

𑀅𑀲𑁆𑀲𑀺𑀭𑀻 𑀯𑀺𑀬 [𑀲𑀲𑁆𑀲𑀢𑁄𑀭𑀺𑀯 (𑀉𑀤𑀸. 𑁭𑁦)] 𑀔𑀸𑀬𑀢𑀺, 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦’’𑀦𑁆𑀢𑀺.

‘‘𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄’’𑀢𑀺 𑀤𑁂𑀲𑀦𑀸𑀧𑀜𑁆𑀜𑀢𑁆𑀢𑀺 𑀯𑀺𑀧𑀮𑁆𑀮𑀸𑀲𑀸𑀦𑀁. ‘‘𑀪𑀩𑁆𑀩𑀭𑀽𑀧𑁄𑀯 𑀤𑀺𑀲𑁆𑀲𑀢𑀻’’𑀢𑀺 𑀯𑀺𑀧𑀭𑀻𑀢𑀧𑀜𑁆𑀜𑀢𑁆𑀢𑀺 𑀮𑁄𑀓𑀲𑁆𑀲. ‘‘𑀉𑀧𑀥𑀺𑀩𑀦𑁆𑀥𑀦𑁄 𑀩𑀸𑀮𑁄’’𑀢𑀺 𑀧𑀪𑀯𑀧𑀜𑁆𑀜𑀢𑁆𑀢𑀺 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁, 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀁. 𑀩𑀮𑀯𑀧𑀜𑁆𑀜𑀢𑁆𑀢𑀺 𑀓𑀺𑀮𑁂𑀲𑀸𑀦𑀁. 𑀯𑀺𑀭𑀽𑀳𑀦𑀸𑀧𑀜𑁆𑀜𑀢𑁆𑀢𑀺 𑀲𑀗𑁆𑀔𑀸𑀭𑀸𑀦𑀁. ‘‘𑀢𑀫𑀲𑀸 𑀧𑀭𑀺𑀯𑀸𑀭𑀺𑀢𑁄’’𑀢𑀺 𑀤𑁂𑀲𑀦𑀸𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑁆𑀲 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀘. ‘‘𑀅𑀲𑁆𑀲𑀺𑀭𑀻 𑀯𑀺𑀬 𑀔𑀸𑀬𑀢𑀻’’𑀢𑀺 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲. ‘‘𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦’’𑀦𑁆𑀢𑀺 𑀧𑀝𑀺𑀯𑁂𑀥𑀧𑀜𑁆𑀜𑀢𑁆𑀢𑀺 𑀲𑀢𑁆𑀢𑀸𑀦𑀁, 𑀭𑀸𑀕𑁄 𑀓𑀺𑀜𑁆𑀘𑀦𑀁 𑀤𑁄𑀲𑁄 𑀓𑀺𑀜𑁆𑀘𑀦𑀁 𑀫𑁄𑀳𑁄 𑀓𑀺𑀜𑁆𑀘𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑁄𑀳𑀲𑀫𑁆𑀩𑀦𑁆𑀥𑀦𑁄 𑀮𑁄𑀓𑁄’’𑀢𑀺.

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁. 𑀦𑀬𑀺𑀥 [𑀦 𑀇𑀥 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁭𑁩] 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺.

‘‘𑀦𑁄 ¶ 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀤𑁂𑀲𑀦𑀸𑀧𑀜𑁆𑀜𑀢𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀘. ‘‘𑀦𑀬𑀺𑀥 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀲𑀗𑁆𑀔𑀢𑀲𑁆𑀲 𑀉𑀧𑀦𑀬𑀦𑀧𑀜𑁆𑀜𑀢𑁆𑀢𑀺 ¶ 𑀘. ‘‘𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀚𑁄𑀢𑀦𑀸𑀧𑀜𑁆𑀜𑀢𑁆𑀢𑀺 𑀘. ‘‘𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀅𑀬𑀁 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲, 𑀦𑀺𑀬𑁆𑀬𑀸𑀦𑀺𑀓𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲, 𑀦𑀺𑀲𑁆𑀲𑀭𑀡𑀧𑀜𑁆𑀜𑀢𑁆𑀢𑀺 𑀲𑀁𑀲𑀸𑀭𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲𑀸’’𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁, 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑁧𑁨. 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑁄

𑁪𑁨. 𑀢𑀢𑁆𑀣 ¶ 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑁄? ‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄’’𑀢𑀺.

‘‘𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀬𑀁 𑀅𑀳𑀲𑁆𑀫𑀻𑀢𑀺 [𑀅𑀬𑀫𑀳𑀫𑀲𑁆𑀫𑀻𑀢𑀺 (𑀲𑀻.) 𑀧𑀲𑁆𑀲 𑀉𑀤𑀸. 𑁬𑁧] 𑀅𑀦𑀸𑀦𑀼𑀧𑀲𑁆𑀲𑀻;

𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

‘‘𑀉𑀤𑁆𑀥’’𑀦𑁆𑀢𑀺 𑀭𑀽𑀧𑀥𑀸𑀢𑀼 𑀘 𑀅𑀭𑀽𑀧𑀥𑀸𑀢𑀼 𑀘. ‘‘𑀅𑀥𑁄’’𑀢𑀺 𑀓𑀸𑀫𑀥𑀸𑀢𑀼. ‘‘𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺 𑀢𑁂𑀥𑀸𑀢𑀼𑀓𑁂 𑀅𑀬𑀁 𑀅𑀲𑁂𑀓𑁆𑀔𑀸𑀯𑀺𑀫𑀼𑀢𑁆𑀢𑀺. 𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 ¶ 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 ¶ 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 𑁋 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

‘‘𑀅𑀬𑀁 ¶ 𑀅𑀳𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻’’𑀢𑀺 𑀅𑀬𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀫𑀼𑀕𑁆𑀖𑀸𑀢𑁄, 𑀲𑀸 𑀲𑁂𑀓𑁆𑀔𑀸𑀯𑀺𑀫𑀼𑀢𑁆𑀢𑀺, 𑀢𑀸𑀦𑀺𑀬𑁂𑀯 𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀲𑁂𑀓𑁆𑀔𑀸𑀬 𑀘 𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑁂𑀓𑁆𑀔𑀸𑀬 𑀘 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 ¶ 𑀪𑀕𑀯𑀸 ‘‘𑀉𑀤𑁆𑀥𑀁 𑀅𑀥𑁄’’𑀢𑀺.

𑁪𑁩. ‘‘𑀦𑀺𑀲𑁆𑀲𑀺𑀢𑀲𑁆𑀲 [𑀧𑀲𑁆𑀲 𑀉𑀤𑀸. 𑁭𑁪] 𑀘𑀮𑀺𑀢𑀁, 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺, 𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀺, 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺, 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺, 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢’’𑀦𑁆𑀢𑀺 𑀦𑀺𑀲𑁆𑀲𑀬𑁄 𑀦𑀸𑀫 𑀤𑀼𑀯𑀺𑀥𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘. 𑀢𑀢𑁆𑀣 𑀬𑀸 𑀭𑀢𑁆𑀢𑀲𑁆𑀲 𑀘𑁂𑀢𑀦𑀸, 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄; 𑀬𑀸 𑀫𑀽𑀴𑁆𑀳𑀲𑁆𑀲 𑀘𑁂𑀢𑀦𑀸, 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀘𑁂𑀢𑀦𑀸 𑀧𑀦 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 ¶ 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀬𑀸 𑀭𑀢𑁆𑀢𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸. 𑀬𑀸 𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀇𑀫𑀸 𑀤𑁆𑀯𑁂 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 ¶ 𑀲𑀼𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺, 𑀬𑁂 𑀲𑀗𑁆𑀔𑀸𑀭𑀸 𑀲𑀸𑀲𑀯𑀸 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀲𑀸𑀲𑀯𑀁 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

‘‘𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀻’’𑀢𑀺 𑀲𑀫𑀣𑀯𑀲𑁂𑀦 𑀯𑀸 𑀢𑀡𑁆𑀳𑀸𑀬 𑀅𑀦𑀺𑀲𑁆𑀲𑀺𑀢𑁄 𑀯𑀺𑀧𑀲𑁆𑀲𑀦𑀸𑀯𑀲𑁂 𑀯𑀸 𑀤𑀺𑀝𑁆𑀞𑀺𑀬𑀸 𑀅𑀦𑀺𑀲𑁆𑀲𑀺𑀢𑁄. 𑀬𑀸 𑀯𑀺𑀧𑀲𑁆𑀲𑀦𑀸 𑀅𑀬𑀁 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

‘‘𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀻’’𑀢𑀺 𑀤𑀼𑀯𑀺𑀥𑀸 𑀧𑀲𑁆𑀲𑀤𑁆𑀥𑀺 𑀓𑀸𑀬𑀺𑀓𑀸 𑀘 𑀘𑁂𑀢𑀲𑀺𑀓𑀸 𑀘. 𑀬𑀁 𑀓𑀸𑀬𑀺𑀓𑀁 𑀲𑀼𑀔𑀁, 𑀅𑀬𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀬𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁, 𑀅𑀬𑀁 𑀘𑁂𑀢𑀲𑀺𑀓𑀸 𑀧𑀲𑁆𑀲𑀤𑁆𑀥𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺 [𑀯𑁂𑀤𑀬𑀢𑀺 (𑀓.)], 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 ¶ 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 ‘‘𑀯𑀺𑀫𑀼𑀢𑁆𑀢’’𑀫𑀺𑀢𑀺 [𑀯𑀺𑀫𑀼𑀢𑁆𑀢𑀫𑁆𑀳𑀻𑀢𑀺 (𑀲𑀻. 𑀓.)] 𑀜𑀸𑀡𑀁 𑀳𑁄𑀢𑀺, ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀸𑀢𑀺. 𑀲𑁄 ¶ 𑀦 𑀦𑀫𑀢𑀺 𑀭𑀽𑀧𑁂𑀲𑀼, 𑀦 𑀲𑀤𑁆𑀤𑁂𑀲𑀼, 𑀦 𑀕𑀦𑁆𑀥𑁂𑀲𑀼, 𑀦 𑀭𑀲𑁂𑀲𑀼, 𑀦 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀦 𑀥𑀫𑁆𑀫𑁂𑀲𑀼 𑀔𑀬𑀸 𑀭𑀸𑀕𑀲𑁆𑀲 𑀔𑀬𑀸 𑀤𑁄𑀲𑀲𑁆𑀲 𑀔𑀬𑀸 𑀫𑁄𑀳𑀲𑁆𑀲 𑀬𑁂𑀦 𑀭𑀽𑀧𑁂𑀦 𑀢𑀣𑀸𑀕𑀢𑀁 𑀢𑀺𑀝𑁆𑀞𑀦𑁆𑀢𑀁 𑀘𑀭𑀦𑁆𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀲𑁆𑀲 𑀭𑀽𑀧𑀲𑁆𑀲 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀭𑀽𑀧𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁂𑀬𑁆𑀬𑁄 𑀦𑀺𑀩𑁆𑀩𑀼𑀢𑁄𑀢𑀺𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀔𑀬𑀸 𑀭𑀸𑀕𑀲𑁆𑀲, 𑀔𑀬𑀸 𑀤𑁄𑀲𑀲𑁆𑀲, 𑀔𑀬𑀸 𑀫𑁄𑀳𑀲𑁆𑀲.

𑀬𑀸𑀬 𑀯𑁂𑀤𑀦𑀸𑀬…𑀧𑁂… 𑀬𑀸𑀬 𑀲𑀜𑁆𑀜𑀸𑀬. 𑀬𑁂𑀳𑀺 𑀲𑀗𑁆𑀔𑀸𑀭𑁂𑀳𑀺. 𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀢𑀣𑀸𑀕𑀢𑀁 ¶ 𑀢𑀺𑀝𑁆𑀞𑀦𑁆𑀢𑀁 𑀘𑀭𑀦𑁆𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀯𑀺𑀜𑁆𑀜𑀸𑀡𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁂𑀬𑁆𑀬𑁄 𑀦𑀺𑀩𑁆𑀩𑀼𑀢𑁄𑀢𑀺𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀔𑀬𑀸 𑀭𑀸𑀕𑀲𑁆𑀲, 𑀔𑀬𑀸 𑀤𑁄𑀲𑀲𑁆𑀲, 𑀔𑀬𑀸 𑀫𑁄𑀳𑀲𑁆𑀲. ‘‘𑀆𑀕𑀢𑀻’’𑀢𑀺 𑀇𑀥𑀸𑀕𑀢𑀺. ‘‘𑀕𑀢𑀻’’𑀢𑀺 𑀧𑁂𑀘𑁆𑀘𑀪𑀯𑁄. 𑀆𑀕𑀢𑀺𑀕𑀢𑀻𑀧𑀺 𑀦 𑀪𑀯𑀦𑁆𑀢𑀺, ‘‘𑀦𑁂𑀯𑀺𑀥𑀸’’𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼. ‘‘𑀦 𑀳𑀼𑀭’’𑀦𑁆𑀢𑀺 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. ‘‘𑀦 𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀨𑀲𑁆𑀲𑀲𑀫𑀼𑀤𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺. ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀲𑁄 𑀤𑀼𑀯𑀺𑀥𑁄 𑀮𑁄𑀓𑀺𑀬𑁄 𑀘 𑀮𑁄𑀓𑀼𑀢𑁆𑀢𑀭𑁄 𑀘. 𑀢𑀢𑁆𑀣 𑀮𑁄𑀓𑀺𑀬𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀬𑀸𑀯 𑀚𑀭𑀸𑀫𑀭𑀡𑀸. 𑀮𑁄𑀓𑀼𑀢𑁆𑀢𑀭𑁄 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀚𑀸𑀬𑀢𑀺, 𑀬𑀸𑀯 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺…𑀧𑁂… 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

𑁪𑁪.

‘‘𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸, 𑀤𑀼𑀓𑁆𑀔𑀸 [𑀤𑀼𑀓𑁆𑀔𑀁 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁭𑁮] 𑀘 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸;

𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂, 𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂.

𑀢𑀲𑁆𑀫𑀸 ¶ 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸, 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄, 𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

‘‘𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸, 𑀤𑀼𑀓𑁆𑀔𑀸 𑀘 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸 𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂’’𑀢𑀺 𑁋 𑀅𑀬𑀁 𑀤𑀼𑀓𑁆𑀔𑀸 𑀯𑁂𑀤𑀦𑀸. ‘‘𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂’’𑀢𑀺 𑁋 𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸. 𑀯𑁂𑀤𑀦𑀸 ¶ 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀯𑁂𑀤𑀦𑀸𑀧𑀘𑁆𑀘𑀬𑀸 ¶ 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀲𑀼𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺, 𑀬𑁂 𑀲𑀗𑁆𑀔𑀸𑀭𑀸 𑀲𑀸𑀲𑀯𑀸 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀲𑀸𑀲𑀯𑀁 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸, 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄, 𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺.

𑀇𑀤𑀁 𑀢𑀡𑁆𑀳𑀸𑀧𑀳𑀸𑀦𑀁. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀁𑀬𑁂𑀯 𑀢𑀡𑁆𑀳𑀸𑀧𑀳𑀸𑀦𑀁 𑀲𑀫𑀣𑁄. 𑀲𑁄 𑀲𑀫𑀣𑁄 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑁄𑀬𑁂𑀯 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑁄𑀬𑁂𑀯 𑀲𑀫𑀣𑁄 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑁄, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 ¶ 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁂 𑀓𑁂𑀘𑀺 𑀲𑁄𑀓𑀸’’𑀢𑀺.

𑀓𑀸𑀫𑀁 ¶ ¶ 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 [𑀲𑀩𑁆𑀩𑀲𑁆𑀲𑁂𑀯 (𑀓.) 𑀧𑀲𑁆𑀲 𑀲𑀼. 𑀦𑀺. 𑁭𑁭𑁪] 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺.

𑀢𑀢𑁆𑀣 𑀬𑀸 𑀧𑀻𑀢𑀺𑀫𑀦𑀢𑀸, 𑀅𑀬𑀁 𑀅𑀦𑀼𑀦𑀬𑁄. 𑀬𑀤𑀸𑀳 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺, 𑀇𑀤𑀁 𑀧𑀝𑀺𑀖𑀁. 𑀅𑀦𑀼𑀦𑀬𑀁 𑀧𑀝𑀺𑀖𑀜𑁆𑀘 𑀧𑀦 𑀢𑀡𑁆𑀳𑀸𑀧𑀓𑁆𑀔𑁄, 𑀢𑀡𑁆𑀳𑀸𑀬 𑀘 𑀧𑀦 𑀤𑀲𑀭𑀽𑀧𑀻𑀦𑀺 𑀆𑀬𑀢𑀦𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀤𑀲 𑀭𑀽𑀧𑀻𑀦𑀺 𑀭𑀽𑀧𑀓𑀸𑀬𑁄 𑀦𑀸𑀫𑀲𑀫𑁆𑀧𑀬𑀼𑀢𑁆𑀢𑁄, 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀤𑁂𑀯 𑀦𑀸𑀫𑀭𑀽𑀧𑀁 𑀧𑀜𑁆𑀘𑀓𑁆𑀔𑀦𑁆𑀥𑁄; 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸;

𑀢𑀤𑁂𑀯 𑀦𑀸𑀫𑀭𑀽𑀧𑀁 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄; 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸;

𑀢𑀢𑁆𑀣 𑀬𑁄 𑀭𑀽𑀧𑀓𑀸𑀬𑁄 𑀇𑀫𑀸𑀦𑀺 𑀧𑀜𑁆𑀘 𑀭𑀽𑀧𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀬𑁄 𑀦𑀸𑀫𑀓𑀸𑀬𑁄 𑀇𑀫𑀸𑀦𑀺 𑀧𑀜𑁆𑀘 𑀅𑀭𑀽𑀧𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀤𑀲 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀬𑀤𑀸𑀳 𑁋

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀅𑀬𑀁 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 ¶ 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 ¶ 𑀯𑀺𑀚𑁆𑀚𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺.

𑀏𑀢𑁆𑀢𑀸𑀯𑀢𑀸 𑀧𑀝𑀺𑀘𑁆𑀘 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀲𑀫𑁄𑀲𑀭𑀡𑁄𑀢𑀭𑀡𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀧𑀝𑀺𑀘𑁆𑀘 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀑𑀢𑀸𑀭𑁂𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀑𑀢𑀭𑀡𑁄 𑀳𑀸𑀭𑁄.

𑁧𑁩. 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄

𑁪𑁫. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺𑀕𑀸𑀣𑀸. 𑀬𑀣𑀸 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

‘‘𑀅𑀯𑀺𑀚𑁆𑀚𑀸𑀬 ¶ 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀜𑁆𑀳𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 ¶ 𑀧𑀜𑁆𑀳𑁂 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀧𑀜𑁆𑀳𑁂 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀜𑁆𑀳𑁂 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺.

‘‘𑀲𑀯𑀦𑁆𑀢𑀺 ¶ 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, 𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀧𑀜𑁆𑀳𑁂 ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺 𑀧𑀜𑁆𑀳𑁂 ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 [𑀦𑀸𑀫𑀁 𑀭𑀽𑀧𑀜𑁆𑀘 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁨] 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀧𑀜𑁆𑀳𑁂 ¶ 𑁋

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻’’𑀢𑀺. 𑀬𑀢𑁆𑀣 ¶ 𑀏𑀯𑀁 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄, 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺. 𑀬𑀢𑁆𑀣 𑀧𑀦 𑀆𑀭𑀫𑁆𑀪𑁄 𑀅𑀲𑀼𑀤𑁆𑀥𑁄, 𑀦 𑀢𑀸𑀯 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺.

𑀦𑀺𑀬𑀼𑀢𑁆𑀢𑁄 𑀲𑁄𑀥𑀦𑁄 𑀳𑀸𑀭𑁄.

𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑁄

𑁪𑁬. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄? ‘‘𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸’’𑀢𑀺.

𑀬𑁂 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸 𑀢𑁂 𑀥𑀸𑀭𑀬𑀺𑀢𑀩𑁆𑀩𑀸.

‘‘𑀤𑀼𑀓𑁆𑀔’’𑀦𑁆𑀢𑀺 ¶ 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀚𑀸𑀢𑀺 𑀤𑀼𑀓𑁆𑀔𑀸, 𑀚𑀭𑀸 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺 𑀤𑀼𑀓𑁆𑀔𑁄, 𑀫𑀭𑀡𑀁 𑀤𑀼𑀓𑁆𑀔𑀁, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸, 𑀭𑀽𑀧𑀸 𑀤𑀼𑀓𑁆𑀔𑀸, 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀲𑀜𑁆𑀜𑀸 𑀤𑀼𑀓𑁆𑀔𑀸, 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀁. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀓.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻. 𑀲𑁂𑀬𑁆𑀬𑀣𑀺𑀤𑀁, 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 ¶ 𑀧𑀝𑀺𑀧𑀤𑀸’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 ¶ 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀫𑀕𑁆𑀕𑁄’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀫𑀕𑁆𑀕𑁄? 𑀦𑀺𑀭𑀬𑀕𑀸𑀫𑀻 𑀫𑀕𑁆𑀕𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀻 𑀫𑀕𑁆𑀕𑁄 𑀧𑁂𑀢𑁆𑀢𑀺𑀯𑀺𑀲𑀬𑀕𑀸𑀫𑀻 𑀫𑀕𑁆𑀕𑁄 𑀅𑀲𑀼𑀭𑀬𑁄𑀦𑀺𑀬𑁄 [𑀅𑀲𑀼𑀭𑀬𑁄𑀦𑀺𑀕𑀸𑀫𑀺𑀬𑁄 (𑀲𑀻.), 𑀅𑀲𑀼𑀭𑀬𑁄𑀦𑀺𑀕𑀸𑀫𑀻𑀦𑀺𑀬𑁄 (𑀓.)] 𑀫𑀕𑁆𑀕𑁄 𑀲𑀕𑁆𑀕𑀕𑀸𑀫𑀺𑀬𑁄 𑀫𑀕𑁆𑀕𑁄 𑀫𑀦𑀼𑀲𑁆𑀲𑀕𑀸𑀫𑀻 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀕𑀸𑀫𑀻 𑀫𑀕𑁆𑀕𑁄. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀦𑀺𑀭𑁄𑀥𑁄’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀦𑀺𑀭𑁄𑀥𑁄? 𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀺𑀭𑁄𑀥𑁄 𑀅𑀦𑀼𑀦𑀬𑀦𑀺𑀭𑁄𑀥𑁄 𑀧𑀝𑀺𑀖𑀦𑀺𑀭𑁄𑀥𑁄 𑀫𑀸𑀦𑀦𑀺𑀭𑁄𑀥𑁄 𑀫𑀓𑁆𑀔𑀦𑀺𑀭𑁄𑀥𑁄 𑀧𑀴𑀸𑀲𑀦𑀺𑀭𑁄𑀥𑁄 𑀇𑀲𑁆𑀲𑀸𑀦𑀺𑀭𑁄𑀥𑁄 𑀫𑀘𑁆𑀙𑀭𑀺𑀬𑀦𑀺𑀭𑁄𑀥𑁄 𑀲𑀩𑁆𑀩𑀓𑀺𑀮𑁂𑀲𑀦𑀺𑀭𑁄𑀥𑁄. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀭𑀽𑀧’’𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁? 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀁 (𑀲𑀻.)] 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀲𑁆𑀲 𑀧𑀜𑁆𑀜𑀢𑁆𑀢𑀺. 𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺? 𑀧𑀣𑀯𑀻𑀥𑀸𑀢𑀼 [𑀧𑀞𑀯𑀻𑀥𑀸𑀢𑀼 (𑀲𑀻.)] 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼.

𑁪𑁭. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀲𑀗𑁆𑀔𑁂𑀧𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘. 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺? 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼𑀁 ¶ 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀆𑀧𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀢𑁂𑀚𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀙𑀳𑀺 𑀆𑀓𑀸𑀭𑁂𑀳𑀺 𑀯𑀸𑀬𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺? 𑀅𑀢𑁆𑀣𑀺 ¶ 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄, 𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 [𑀅𑀝𑁆𑀞𑀺𑀫𑀺𑀜𑁆𑀚𑀸 (𑀲𑀻.)] 𑀯𑀓𑁆𑀓𑀁, 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀁, 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀫𑀢𑁆𑀣𑀓𑁂 𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 𑀇𑀫𑁂𑀳𑀺 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀧𑀣𑀯𑀻𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀓𑀢𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀆𑀧𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺? 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀆𑀧𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀓𑀢𑀫𑁂𑀳𑀺 ¶ 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀢𑁂𑀚𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺? 𑀬𑁂𑀦 𑀘 𑀲𑀦𑁆𑀢𑀧𑁆𑀧𑀢𑀺, 𑀬𑁂𑀦 𑀘 𑀚𑀻𑀭𑀻𑀬𑀢𑀺 [𑀚𑀻𑀭𑀢𑀺 (𑀲𑀻.), 𑀚𑀻𑀭𑀬𑀢𑀺 (𑀓.), 𑀧𑀲𑁆𑀲 𑀫. 𑀦𑀺. 𑁩.𑁩𑁫𑁧], 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀺, 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀇𑀫𑁂𑀳𑀺 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀢𑁂𑀚𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀓𑀢𑀫𑁂𑀳𑀺 𑀙𑀳𑀺 𑀆𑀓𑀸𑀭𑁂𑀳𑀺 𑀯𑀸𑀬𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺? 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸, 𑀅𑀥𑁄𑀕𑀫𑀸 𑀯𑀸𑀢𑀸, 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸, 𑀓𑁄𑀝𑁆𑀞𑀸𑀲𑀬𑀸 [𑀓𑁄𑀝𑁆𑀞𑀲𑀬𑀸 (𑀲𑀻.)] 𑀯𑀸𑀢𑀸, 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸, 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄 𑀇𑀢𑀺, 𑀇𑀫𑁂𑀳𑀺 𑀙𑀳𑀺 𑀆𑀓𑀸𑀭𑁂𑀳𑀺 𑀯𑀸𑀬𑁄𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀏𑀯𑀁 𑀇𑀫𑁂𑀳𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑁂𑀦 𑀥𑀸𑀢𑀼𑀬𑁄 𑀲𑀪𑀸𑀯𑀢𑁄 𑀉𑀧𑀮𑀓𑁆𑀔𑀬𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀧𑀭𑀺𑀯𑀻𑀫𑀁𑀲𑀦𑁆𑀢𑁄 𑀧𑀭𑀺𑀬𑁄𑀕𑀸𑀳𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑀢𑀺 𑀓𑀸𑀬𑀁 𑀯𑀸 𑀓𑀸𑀬𑀧𑀤𑁂𑀲𑀁 𑀯𑀸, 𑀬𑀣𑀸 𑀘𑀦𑁆𑀤𑀦𑀺𑀓𑀁 𑀧𑀯𑀺𑀘𑀺𑀦𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑁂𑀬𑁆𑀬, 𑀬𑀣𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀧𑀯𑀺𑀘𑀺𑀦𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑁂𑀬𑁆𑀬, 𑀬𑀣𑀸 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀘𑀺𑀦𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑁂𑀬𑁆𑀬, 𑀬𑀣𑀸 𑀲𑀺𑀯𑀣𑀺𑀓𑀁 [𑀲𑀻𑀯𑀣𑀺𑀓𑀁 (𑀲𑀻.)] 𑀧𑀯𑀺𑀘𑀺𑀦𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀇𑀫𑁂𑀳𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 ¶ 𑀥𑀸𑀢𑀼𑀬𑁄 𑀲𑀪𑀸𑀯𑀢𑁄 ¶ 𑀉𑀧𑀮𑀓𑁆𑀔𑀬𑀦𑁆𑀢𑁄 𑀢𑀼𑀮𑀬𑀦𑁆𑀢𑁄 𑀧𑀭𑀺𑀯𑀻𑀫𑀁𑀲𑀦𑁆𑀢𑁄 𑀧𑀭𑀺𑀬𑁄𑀕𑀸𑀳𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑀢𑀺 𑀓𑀸𑀬𑀁 𑀯𑀸 𑀓𑀸𑀬𑀧𑀤𑁂𑀲𑀁 𑀯𑀸. 𑀢𑁂𑀦𑀸𑀳 𑀪𑀕𑀯𑀸 𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 [𑀦𑁂𑀯𑁂𑀲𑀸𑀳𑀁 (𑀲𑀻. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁩𑁪𑁯], 𑀬𑀸 𑀘 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸. 𑀢𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀣𑀯𑀻𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀧𑀣𑀯𑀻𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺. 𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀼, 𑀬𑀸 𑀘 𑀩𑀸𑀳𑀺𑀭𑀸 𑀆𑀧𑁄𑀥𑀸𑀢𑀼…𑀧𑁂… 𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀢𑁂𑀚𑁄𑀥𑀸𑀢𑀼, 𑀬𑀸 𑀘 𑀩𑀸𑀳𑀺𑀭𑀸 𑀢𑁂𑀚𑁄𑀥𑀸𑀢𑀼…𑀧𑁂… 𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀯𑀸𑀬𑁄𑀥𑀸𑀢𑀼, 𑀬𑀸 𑀘 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼𑀭𑁂𑀯𑁂𑀲𑀸. 𑀢𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀯𑀸𑀬𑁄𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀸𑀬𑁄𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

𑁪𑁮. ‘‘𑀅𑀯𑀺𑀚𑁆𑀚𑀸’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀮𑁆𑀮𑀓𑁆𑀔𑀡𑀸 𑀅𑀦𑀼𑀧𑀮𑀓𑁆𑀔𑀡𑀸 𑀅𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀅𑀲𑀫𑀯𑁂𑀓𑁆𑀔𑀡𑀁 ¶ [𑀅𑀲𑀫𑀯𑁂𑀓𑁆𑀔𑀦𑀁 (𑀓.)] 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 ¶ 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀯𑀺𑀚𑁆𑀚𑀸’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀸 𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁, 𑀬𑀸 𑀏𑀯𑀭𑀽𑀧𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀁𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 [𑀯𑁂𑀪𑀯𑁆𑀬𑀸 (𑀲𑀻.)] 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 ¶ 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀲𑀫𑀸𑀧𑀢𑁆𑀢𑀻’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀸 𑀲𑀫𑀸𑀧𑀢𑁆𑀢𑀺? 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺. 𑀯𑀺𑀪𑀽𑀢𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀛𑀸𑀬𑀻’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀛𑀸𑀬𑀻? 𑀅𑀢𑁆𑀣𑀺 𑀲𑁂𑀓𑁆𑀔𑁄 𑀛𑀸𑀬𑀻, 𑀅𑀢𑁆𑀣𑀺 𑀅𑀲𑁂𑀓𑁆𑀔𑁄 𑀛𑀸𑀬𑀻, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑁄 𑀛𑀸𑀬𑀻, 𑀆𑀚𑀸𑀦𑀺𑀬𑁄 𑀛𑀸𑀬𑀻, 𑀅𑀲𑁆𑀲𑀔𑀮𑀼𑀗𑁆𑀓𑁄 𑀛𑀸𑀬𑀻, 𑀤𑀺𑀝𑁆𑀞𑀼𑀢𑁆𑀢𑀭𑁄 𑀛𑀸𑀬𑀻, 𑀢𑀡𑁆𑀳𑀼𑀢𑁆𑀢𑀭𑁄 𑀛𑀸𑀬𑀻, 𑀧𑀜𑁆𑀜𑀼𑀢𑁆𑀢𑀭𑁄 𑀛𑀸𑀬𑀻. 𑀅𑀬𑀁 ¶ 𑀯𑁂𑀫𑀢𑁆𑀢𑀢𑀸.

‘‘𑀲𑀫𑀸𑀥𑀻’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀲𑀫𑀸𑀥𑀺? 𑀲𑀭𑀡𑁄 𑀲𑀫𑀸𑀥𑀺, 𑀅𑀭𑀡𑁄 𑀲𑀫𑀸𑀥𑀺, 𑀲𑀯𑁂𑀭𑁄 𑀲𑀫𑀸𑀥𑀺, 𑀅𑀯𑁂𑀭𑁄 𑀲𑀫𑀸𑀥𑀺, 𑀲𑀩𑁆𑀬𑀸𑀧𑀚𑁆𑀚𑁄 [𑀲𑀩𑁆𑀬𑀸𑀧𑀚𑁆𑀛𑁄 (𑀲𑀻.)] 𑀲𑀫𑀸𑀥𑀺, 𑀅𑀩𑁆𑀬𑀸𑀧𑀚𑁆𑀚𑁄 𑀲𑀫𑀸𑀥𑀺, 𑀲𑀧𑁆𑀧𑀻𑀢𑀺𑀓𑁄 𑀲𑀫𑀸𑀥𑀺, 𑀦𑀺𑀧𑁆𑀧𑀻𑀢𑀺𑀓𑁄 𑀲𑀫𑀸𑀥𑀺, 𑀲𑀸𑀫𑀺𑀲𑁄 𑀲𑀫𑀸𑀥𑀺, 𑀦𑀺𑀭𑀸𑀫𑀺𑀲𑁄 𑀲𑀫𑀸𑀥𑀺, 𑀲𑀲𑀗𑁆𑀔𑀸𑀭𑁄 𑀲𑀫𑀸𑀥𑀺, 𑀅𑀲𑀗𑁆𑀔𑀸𑀭𑁄 𑀲𑀫𑀸𑀥𑀺, 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺, 𑀉𑀪𑀬𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺, 𑀉𑀪𑀬𑀢𑁄 𑀪𑀸𑀯𑀺𑀢𑀪𑀸𑀯𑀦𑁄 𑀲𑀫𑀸𑀥𑀺, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀮𑁄𑀓𑀺𑀬𑁄 𑀲𑀫𑀸𑀥𑀺, 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀧𑀝𑀺𑀧𑀤𑀸’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑀸 𑀧𑀝𑀺𑀧𑀤𑀸? 𑀆𑀕𑀸𑀴𑁆𑀳𑀧𑀝𑀺𑀧𑀤𑀸 [𑀆𑀕𑀴𑁆𑀳𑀸 𑀧𑀝𑀺𑀧𑀤𑀸 (𑀲𑀻.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸], 𑀦𑀺𑀚𑁆𑀛𑀸𑀫𑀧𑀝𑀺𑀧𑀤𑀸, 𑀫𑀚𑁆𑀛𑀺𑀫𑀧𑀝𑀺𑀧𑀤𑀸, 𑀅𑀓𑁆𑀔𑀫𑀸 𑀧𑀝𑀺𑀧𑀤𑀸, 𑀔𑀫𑀸 𑀧𑀝𑀺𑀧𑀤𑀸, 𑀲𑀫𑀸 𑀧𑀝𑀺𑀧𑀤𑀸, 𑀤𑀫𑀸 𑀧𑀝𑀺𑀧𑀤𑀸 ¶ , 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀢𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀸𑀬𑁄’’𑀢𑀺 𑀏𑀓𑀢𑁆𑀢𑀢𑀸. 𑀢𑀢𑁆𑀣 𑀓𑀢𑀫𑁄 𑀓𑀸𑀬𑁄? 𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄 𑀘. 𑀢𑀢𑁆𑀣 𑀓𑀢𑀫𑁄 𑀭𑀽𑀧𑀓𑀸𑀬𑁄? 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄 𑀫𑀁𑀲𑀁 𑀦𑁆𑀳𑀸𑀭𑀼 [𑀦𑀳𑀸𑀭𑀼 (𑀲𑀻.)] 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀁 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀁 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄 ¶ 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢𑀁 𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 𑁋 𑀅𑀬𑀁 ¶ 𑀭𑀽𑀧𑀓𑀸𑀬𑁄. 𑀦𑀸𑀫𑀓𑀸𑀬𑁄 𑀦𑀸𑀫 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀘𑀺𑀢𑁆𑀢𑀁 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑁋 𑀅𑀬𑀁 𑀦𑀸𑀫𑀓𑀸𑀬𑁄𑀢𑀺. 𑀅𑀬𑀁 𑀯𑁂𑀫𑀢𑁆𑀢𑀢𑀸.

𑀏𑀯𑀁 𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀲𑀫𑀸𑀦𑀪𑀸𑀯𑁄, 𑀲𑁄 𑀥𑀫𑁆𑀫𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑀢𑁆𑀢𑀢𑀸𑀬 𑀏𑀓𑀻 𑀪𑀯𑀢𑀺. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀺𑀮𑀓𑁆𑀔𑀡𑁄, 𑀢𑁂𑀦 𑀢𑁂𑀦 𑀯𑁂𑀫𑀢𑁆𑀢𑀁 𑀕𑀘𑁆𑀙𑀢𑀺. 𑀏𑀯𑀁 𑀲𑀼𑀢𑁆𑀢𑁂 𑀯𑀸 𑀯𑁂𑀬𑁆𑀬𑀸𑀓𑀭𑀡𑁂 𑀯𑀸 𑀕𑀸𑀣𑀸𑀬𑀁 𑀯𑀸 𑀧𑀼𑀘𑁆𑀙𑀺𑀢𑁂𑀦 𑀯𑀻𑀫𑀁𑀲𑀬𑀺𑀢𑀩𑁆𑀩𑀁, 𑀓𑀺𑀁 𑀏𑀓𑀢𑁆𑀢𑀢𑀸𑀬 𑀧𑀼𑀘𑁆𑀙𑀢𑀺, 𑀉𑀤𑀸𑀳𑀼 𑀯𑁂𑀫𑀢𑁆𑀢𑀢𑀸𑀬𑀸𑀢𑀺. 𑀬𑀤𑀺 𑀏𑀓𑀢𑁆𑀢𑀢𑀸𑀬 𑀧𑀼𑀘𑁆𑀙𑀺𑀢𑀁, 𑀏𑀓𑀢𑁆𑀢𑀢𑀸𑀬 𑀯𑀺𑀲𑀚𑁆𑀚𑀬𑀺𑀢𑀩𑁆𑀩𑀁. 𑀬𑀤𑀺 𑀯𑁂𑀫𑀢𑁆𑀢𑀢𑀸𑀬 𑀧𑀼𑀘𑁆𑀙𑀺𑀢𑀁, 𑀯𑁂𑀫𑀢𑁆𑀢𑀢𑀸𑀬 𑀯𑀺𑀲𑀚𑁆𑀚𑀬𑀺𑀢𑀩𑁆𑀩𑀁. 𑀬𑀤𑀺 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀧𑀼𑀘𑁆𑀙𑀺𑀢𑀁, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀯𑀺𑀲𑀚𑁆𑀚𑀬𑀺𑀢𑀩𑁆𑀩𑀁. 𑀬𑀤𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀦 𑀧𑀼𑀘𑁆𑀙𑀺𑀢𑀁, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀦 𑀯𑀺𑀲𑀚𑁆𑀚𑀬𑀺𑀢𑀩𑁆𑀩𑀁. 𑀬𑀣𑀸 𑀬𑀣𑀸 𑀯𑀸 𑀧𑀦 𑀧𑀼𑀘𑁆𑀙𑀺𑀢𑀁, 𑀢𑀣𑀸 𑀢𑀣𑀸 𑀯𑀺𑀲𑀚𑁆𑀚𑀬𑀺𑀢𑀩𑁆𑀩𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸’’𑀢𑀺.

𑀦𑀺𑀬𑀼𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑁧𑁫. 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀺𑀪𑀗𑁆𑀕𑁄

𑁪𑁯. 𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄? ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁 𑀚𑀦𑀬𑀦𑁆𑀢𑀻’’𑀢𑀺.

𑀬𑁄 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀚𑀦𑀬𑀢𑀺, 𑀢𑀲𑁆𑀲 𑀲𑁄 𑀧𑀭𑀺𑀓𑁆𑀔𑀸𑀭𑁄. 𑀓𑀺𑀁𑀮𑀓𑁆𑀔𑀡𑁄 𑀧𑀭𑀺𑀓𑁆𑀔𑀸𑀭𑁄? 𑀚𑀦𑀓𑀮𑀓𑁆𑀔𑀡𑁄 𑀧𑀭𑀺𑀓𑁆𑀔𑀸𑀭𑁄. 𑀤𑁆𑀯𑁂 𑀥𑀫𑁆𑀫𑀸 𑀚𑀦𑀬𑀦𑁆𑀢𑀺 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘. 𑀢𑀢𑁆𑀣 𑀓𑀺𑀁𑀮𑀓𑁆𑀔𑀡𑁄 𑀳𑁂𑀢𑀼, 𑀓𑀺𑀁𑀮𑀓𑁆𑀔𑀡𑁄 𑀧𑀘𑁆𑀘𑀬𑁄? 𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑀮𑀓𑁆𑀔𑀡𑁄 𑀧𑀘𑁆𑀘𑀬𑁄. 𑀬𑀣𑀸 𑀓𑀺𑀁 𑀪𑀯𑁂? 𑀬𑀣𑀸 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀻𑀚𑀁 𑀅𑀲𑀸𑀥𑀸𑀭𑀡𑀁, 𑀧𑀣𑀯𑀻 𑀆𑀧𑁄 ¶ 𑀘 𑀲𑀸𑀥𑀸𑀭𑀡𑀸. 𑀅𑀗𑁆𑀓𑀼𑀭𑀲𑁆𑀲 𑀳𑀺 𑀧𑀣𑀯𑀻 𑀆𑀧𑁄 𑀘 𑀧𑀘𑁆𑀘𑀬𑁄 𑀲𑀪𑀸𑀯𑁄 𑀳𑁂𑀢𑀼. 𑀬𑀣𑀸 𑀯𑀸 𑀧𑀦 𑀖𑀝𑁂 𑀤𑀼𑀤𑁆𑀥𑀁 𑀧𑀓𑁆𑀔𑀺𑀢𑁆𑀢𑀁 𑀤𑀥𑀺 𑀪𑀯𑀢𑀺, 𑀦 ¶ 𑀘𑀢𑁆𑀣𑀺 𑀏𑀓𑀓𑀸𑀮𑀲𑀫𑀯𑀥𑀸𑀦𑀁 𑀤𑀼𑀤𑁆𑀥𑀲𑁆𑀲 𑀘 𑀤𑀥𑀺𑀲𑁆𑀲 𑀘. 𑀏𑀯𑀫𑁂𑀯𑀁 𑀦𑀢𑁆𑀣𑀺 𑀏𑀓𑀓𑀸𑀮𑀲𑀫𑀯𑀥𑀸𑀦𑀁 𑀳𑁂𑀢𑀼𑀲𑁆𑀲 𑀘 𑀧𑀘𑁆𑀘𑀬𑀲𑁆𑀲 𑀘.

𑀅𑀬𑀜𑁆𑀳𑀺 𑀲𑀁𑀲𑀸𑀭𑁄 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑁄 𑀦𑀺𑀩𑁆𑀩𑀢𑁆𑀢𑁄. 𑀯𑀼𑀢𑁆𑀢𑀁 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀇𑀢𑀺 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄. 𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀧𑀘𑁆𑀙𑀺𑀫𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼. 𑀢𑀢𑁆𑀣 𑀧𑀼𑀭𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 ¶ 𑀧𑀘𑁆𑀙𑀺𑀫𑀺𑀓𑀸 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁, 𑀧𑀼𑀭𑀺𑀫𑀺𑀓𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀘𑁆𑀙𑀺𑀫𑀺𑀓𑀲𑁆𑀲 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀽𑀢𑁄 𑀧𑀭𑀺𑀩𑁆𑀭𑀽𑀳𑀦𑀸𑀬, 𑀩𑀻𑀚𑀗𑁆𑀓𑀼𑀭𑁄 𑀯𑀺𑀬 𑀲𑀫𑀦𑀦𑁆𑀢𑀭𑀳𑁂𑀢𑀼𑀢𑀸𑀬. 𑀬𑀁 𑀧𑀦 𑀬𑀢𑁆𑀣 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀇𑀤𑀫𑀲𑁆𑀲 𑀧𑀭𑀫𑁆𑀧𑀭𑀳𑁂𑀢𑀼𑀢𑀸𑀬 𑀳𑁂𑀢𑀼𑀪𑀽𑀢𑀁. 𑀤𑀼𑀯𑀺𑀥𑁄 𑀳𑀺 𑀳𑁂𑀢𑀼 𑀲𑀫𑀦𑀦𑁆𑀢𑀭𑀳𑁂𑀢𑀼 𑀧𑀭𑀫𑁆𑀧𑀭𑀳𑁂𑀢𑀼 𑀘, 𑀏𑀯𑀁 𑀅𑀯𑀺𑀚𑁆𑀚𑀸𑀬𑀧𑀺 𑀤𑀼𑀯𑀺𑀥𑁄 𑀳𑁂𑀢𑀼 𑀲𑀫𑀦𑀦𑁆𑀢𑀭𑀳𑁂𑀢𑀼 𑀧𑀭𑀫𑁆𑀧𑀭𑀳𑁂𑀢𑀼 𑀘.

𑀬𑀣𑀸 𑀯𑀸 𑀧𑀦 𑀣𑀸𑀮𑀓𑀜𑁆𑀘 𑀯𑀝𑁆𑀝𑀺 𑀘 𑀢𑁂𑀮𑀜𑁆𑀘 𑀧𑀤𑀻𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀦 𑀲𑀪𑀸𑀯𑀳𑁂𑀢𑀼, 𑀦 𑀳𑀺 𑀲𑀓𑁆𑀓𑀸 𑀣𑀸𑀮𑀓𑀜𑁆𑀘 𑀯𑀝𑁆𑀝𑀺𑀜𑁆𑀘 𑀢𑁂𑀮𑀜𑁆𑀘 𑀅𑀦𑀕𑁆𑀕𑀺𑀓𑀁 𑀤𑀻𑀧𑁂𑀢𑀼𑀁 𑀧𑀤𑀻𑀧𑀲𑁆𑀲 𑀧𑀘𑁆𑀘𑀬𑀪𑀽𑀢𑀁. 𑀧𑀤𑀻𑀧𑁄 𑀯𑀺𑀬 𑀲𑀪𑀸𑀯𑁄 𑀳𑁂𑀢𑀼 𑀳𑁄𑀢𑀺. 𑀇𑀢𑀺 𑀲𑀪𑀸𑀯𑁄 𑀳𑁂𑀢𑀼, 𑀧𑀭𑀪𑀸𑀯𑁄 𑀧𑀘𑁆𑀘𑀬𑁄. 𑀅𑀚𑁆𑀛𑀢𑁆𑀢𑀺𑀓𑁄 𑀳𑁂𑀢𑀼, 𑀩𑀸𑀳𑀺𑀭𑁄 𑀧𑀘𑁆𑀘𑀬𑁄. 𑀚𑀦𑀓𑁄 𑀳𑁂𑀢𑀼, 𑀧𑀭𑀺𑀕𑁆𑀕𑀸𑀳𑀓𑁄 𑀧𑀘𑁆𑀘𑀬𑁄. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄.

𑀅𑀯𑀼𑀧𑀘𑁆𑀙𑁂𑀤𑀢𑁆𑀣𑁄 𑀲𑀦𑁆𑀢𑀢𑀺 𑀅𑀢𑁆𑀣𑁄, 𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑁄 𑀨𑀮𑀢𑁆𑀣𑁄, 𑀧𑀝𑀺𑀲𑀦𑁆𑀥𑀺 𑀅𑀢𑁆𑀣𑁄 𑀧𑀼𑀦𑀩𑁆𑀪𑀯𑀢𑁆𑀣𑁄, 𑀧𑀮𑀺𑀩𑁄𑀥𑀢𑁆𑀣𑁄 𑀧𑀭𑀺𑀬𑀼𑀝𑁆𑀞𑀸𑀦𑀢𑁆𑀣𑁄, 𑀅𑀲𑀫𑀼𑀕𑁆𑀖𑀸𑀢𑀢𑁆𑀣𑁄 𑀅𑀦𑀼𑀲𑀬𑀢𑁆𑀣𑁄, 𑀅𑀲𑀫𑁆𑀧𑀝𑀺𑀯𑁂𑀥𑀢𑁆𑀣𑁄 𑀅𑀯𑀺𑀚𑁆𑀚𑀢𑁆𑀣𑁄, 𑀅𑀧𑀭𑀺𑀜𑁆𑀜𑀸𑀢𑀢𑁆𑀣𑁄 𑀯𑀺𑀜𑁆𑀜𑀸𑀡𑀲𑁆𑀲 𑀩𑀻𑀚𑀢𑁆𑀣𑁄. 𑀬𑀢𑁆𑀣 𑀅𑀯𑀼𑀧𑀘𑁆𑀙𑁂𑀤𑁄 𑀢𑀢𑁆𑀣 𑀲𑀦𑁆𑀢𑀢𑀺, 𑀬𑀢𑁆𑀣 𑀲𑀦𑁆𑀢𑀢𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺 ¶ , 𑀬𑀢𑁆𑀣 𑀦𑀺𑀩𑁆𑀩𑀢𑁆𑀢𑀺 𑀢𑀢𑁆𑀣 𑀨𑀮𑀁, 𑀬𑀢𑁆𑀣 𑀨𑀮𑀁 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺, 𑀬𑀢𑁆𑀣 𑀧𑀝𑀺𑀲𑀦𑁆𑀥𑀺 𑀢𑀢𑁆𑀣 𑀧𑀼𑀦𑀩𑁆𑀪𑀯𑁄, 𑀬𑀢𑁆𑀣 𑀧𑀼𑀦𑀩𑁆𑀪𑀯𑁄 𑀢𑀢𑁆𑀣 𑀧𑀮𑀺𑀩𑁄𑀥𑁄, 𑀬𑀢𑁆𑀣 𑀧𑀮𑀺𑀩𑁄𑀥𑁄 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀬𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 𑀢𑀢𑁆𑀣 𑀅𑀲𑀫𑀼𑀕𑁆𑀖𑀸𑀢𑁄. 𑀬𑀢𑁆𑀣 𑀅𑀲𑀫𑀼𑀕𑁆𑀖𑀸𑀢𑁄 𑀢𑀢𑁆𑀣 𑀅𑀦𑀼𑀲𑀬𑁄, 𑀬𑀢𑁆𑀣 𑀅𑀦𑀼𑀲𑀬𑁄 𑀢𑀢𑁆𑀣 𑀅𑀲𑀫𑁆𑀧𑀝𑀺𑀯𑁂𑀥𑁄, 𑀬𑀢𑁆𑀣 𑀅𑀲𑀫𑁆𑀧𑀝𑀺𑀯𑁂𑀥𑁄 𑀢𑀢𑁆𑀣 𑀅𑀯𑀺𑀚𑁆𑀚𑀸, 𑀬𑀢𑁆𑀣 𑀅𑀯𑀺𑀚𑁆𑀚𑀸 𑀢𑀢𑁆𑀣 𑀲𑀸𑀲𑀯𑀁 𑀯𑀺𑀜𑁆𑀜𑀸𑀡𑀁 𑀅𑀧𑀭𑀺𑀜𑁆𑀜𑀸𑀢𑀁, 𑀬𑀢𑁆𑀣 𑀲𑀸𑀲𑀯𑀁 𑀯𑀺𑀜𑁆𑀜𑀸𑀡𑀁 𑀅𑀧𑀭𑀺𑀜𑁆𑀜𑀸𑀢𑀁 𑀢𑀢𑁆𑀣 𑀩𑀻𑀚𑀢𑁆𑀣𑁄.

𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑁄, 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑁄, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀬𑁄. 𑀢𑀺𑀢𑁆𑀣𑀜𑁆𑀜𑀼𑀢𑀸 𑀧𑀻𑀢𑀜𑁆𑀜𑀼𑀢𑀸𑀬 𑀧𑀘𑁆𑀘𑀬𑁄, 𑀧𑀻𑀢𑀜𑁆𑀜𑀼𑀢𑀸 𑀧𑀢𑁆𑀢𑀜𑁆𑀜𑀼𑀢𑀸𑀬 𑀧𑀘𑁆𑀘𑀬𑁄, 𑀧𑀢𑁆𑀢𑀜𑁆𑀜𑀼𑀢𑀸 𑀅𑀢𑁆𑀢𑀜𑁆𑀜𑀼𑀢𑀸𑀬 𑀧𑀘𑁆𑀘𑀬𑁄.

𑀬𑀣𑀸 ¶ 𑀯𑀸 𑀧𑀦 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀘𑀓𑁆𑀔𑀼 𑀆𑀥𑀺𑀧𑀢𑁂𑀬𑁆𑀬𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄, 𑀭𑀽𑀧𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀆𑀮𑁄𑀓𑁄 𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀧𑀘𑁆𑀘𑀬𑁄, 𑀫𑀦𑀲𑀺𑀓𑀸𑀭𑁄 𑀲𑀪𑀸𑀯𑁄 𑀳𑁂𑀢𑀼 ¶ . 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀲𑀴𑀸𑀬𑀢𑀦𑀁 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀨𑀲𑁆𑀲𑁄 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀉𑀧𑀸𑀤𑀸𑀦𑀁 𑀪𑀯𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀪𑀯𑁄 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀚𑀭𑀸𑀫𑀭𑀡𑀁 𑀲𑁄𑀓𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀲𑁄𑀓𑁄 𑀧𑀭𑀺𑀤𑁂𑀯𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀧𑀭𑀺𑀤𑁂𑀯𑁄 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀤𑁄𑀫𑀦𑀲𑁆𑀲𑀁 𑀉𑀧𑀸𑀬𑀸𑀲𑀲𑁆𑀲 𑀧𑀘𑁆𑀘𑀬𑁄, 𑀲𑀪𑀸𑀯𑁄 𑀳𑁂𑀢𑀼. 𑀏𑀯𑀁 𑀬𑁄 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄 𑀲𑀩𑁆𑀩𑁄 𑀲𑁄 𑀧𑀭𑀺𑀓𑁆𑀔𑀸𑀭𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁 𑀚𑀦𑀬𑀦𑁆𑀢𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄

𑁫𑁦. 𑀢𑀢𑁆𑀣 ¶ 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄? ‘‘𑀬𑁂 𑀥𑀫𑁆𑀫𑀸 𑀬𑀁𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸’’𑀢𑀺.

𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀬𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀆𑀯𑀝𑁆𑀝𑁂 𑀳𑀸𑀭𑁂 𑀩𑀳𑀼𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀻𑀢𑀺. 𑀢𑀢𑁆𑀣 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸 𑀧𑀤𑀝𑁆𑀞𑀸𑀦𑀁, 𑀯𑁂𑀯𑀘𑀦𑀁, 𑀪𑀸𑀯𑀦𑀸, 𑀧𑀳𑀸𑀦𑀫𑀺𑀢𑀺.

𑀢𑀢𑁆𑀣 𑀓𑀢𑀫𑀸 𑀧𑀤𑀝𑁆𑀞𑀸𑀦𑁂𑀦 𑀲𑀫𑀸𑀭𑁄𑀧𑀦𑀸?

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑀢𑀲𑁆𑀲 𑀓𑀺𑀁 𑀧𑀤𑀝𑁆𑀞𑀸𑀦𑀁? 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁 𑁋 𑀇𑀤𑀁 𑀧𑀤𑀝𑁆𑀞𑀸𑀦𑀁; 𑀢𑀢𑁆𑀣 𑀬𑀁 𑀓𑀸𑀬𑀺𑀓𑀜𑁆𑀘 𑀯𑀸𑀘𑀲𑀺𑀓𑀜𑁆𑀘 𑀲𑀼𑀘𑀭𑀺𑀢𑀁, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀫𑀦𑁄𑀲𑀼𑀘𑀭𑀺𑀢𑁂 𑀬𑀸 ¶ 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀘, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 ¶ 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸. 𑀇𑀤𑀁 𑀧𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀲𑀫𑀣𑀲𑁆𑀲 𑀨𑀮𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸 𑀨𑀮𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀇𑀤𑀁 𑀧𑀤𑀝𑁆𑀞𑀸𑀦𑀁.

𑀯𑀦𑀁 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀺𑀜𑁆𑀘 𑀯𑀦𑀁? 𑀓𑁄 𑀘 𑀯𑀦𑀣𑁄? 𑀯𑀦𑀁 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀢𑀡𑁆𑀳𑀸 𑀯𑀦𑀣𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 ¶ 𑀦𑀸𑀫 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸. 𑀯𑀦𑀣𑁄 𑀦𑀸𑀫 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑁄 ‘‘𑀅𑀳𑁄 𑀘𑀓𑁆𑀔𑀼, 𑀅𑀳𑁄 𑀲𑁄𑀢𑀁, 𑀅𑀳𑁄 𑀖𑀸𑀦𑀁, 𑀅𑀳𑁄 𑀚𑀺𑀯𑁆𑀳𑀸, 𑀅𑀳𑁄 𑀓𑀸𑀬𑁄, 𑀇𑀢𑀺. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 𑀦𑀸𑀫 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀅𑀧𑀭𑀺𑀜𑁆𑀜𑀸𑀢𑀸𑀦𑀺. 𑀬𑀁 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁, 𑀅𑀬𑀁 𑀯𑀦𑀣𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 𑀦𑀸𑀫 𑀅𑀦𑀼𑀲𑀬𑁄. 𑀯𑀦𑀣𑁄 𑀦𑀸𑀫 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘𑀸’’𑀢𑀺. 𑀅𑀬𑀁 𑀧𑀤𑀝𑁆𑀞𑀸𑀦𑁂𑀦 𑀲𑀫𑀸𑀭𑁄𑀧𑀦𑀸.

𑁫𑁧. 𑀢𑀢𑁆𑀣 𑀓𑀢𑀫𑀸 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸? 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀨𑀮𑀁. 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁. 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀢𑁂𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁. 𑀇𑀤𑀁 𑀯𑁂𑀯𑀘𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀸𑀩𑀮𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀜𑀸𑀡𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀻𑀭𑀡𑀸, 𑀲𑀦𑁆𑀢𑀻𑀭𑀡𑀸, 𑀳𑀺𑀭𑀻, 𑀯𑀺𑀧𑀲𑁆𑀲𑀦𑀸, 𑀥𑀫𑁆𑀫𑁂 𑀜𑀸𑀡𑀁, 𑀲𑀩𑁆𑀩𑀁, 𑀇𑀤𑀁 𑀯𑁂𑀯𑀘𑀦𑀁. 𑀅𑀬𑀁 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸.

𑀢𑀢𑁆𑀣 𑀓𑀢𑀫𑀸 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸? 𑀬𑀣𑀸𑀳 𑀪𑀕𑀯𑀸 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺, 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁’’. 𑀆𑀢𑀸𑀧𑀻𑀢𑀺 ¶ 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀲𑀫𑁆𑀧𑀚𑀸𑀦𑁄𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀲𑀢𑀺𑀫𑀸𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀏𑀯𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀏𑀓𑀮𑀓𑁆𑀔𑀡𑀢𑁆𑀢𑀸 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑀩𑁆𑀩𑁂 ¶ . 𑀓𑁂𑀦 𑀓𑀸𑀭𑀡𑁂𑀦? 𑀲𑀩𑁆𑀩𑁂 𑀳𑀺 ¶ 𑀩𑁄𑀥𑀗𑁆𑀕𑀫𑀸 𑀥𑀫𑁆𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸, 𑀢𑁂 𑀏𑀓𑀮𑀓𑁆𑀔𑀡𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸.

𑀢𑀢𑁆𑀣 𑀓𑀢𑀫𑀸 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸? 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀓𑀩𑀴𑀻𑀓𑀸𑀭𑁄 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀓𑀸𑀫𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀓𑀸𑀫𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀓𑀸𑀫𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀓𑀸𑀫𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀭𑀸𑀕𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀭𑀽𑀧𑀽𑀧𑀺𑀓𑀸 [𑀭𑀽𑀧𑀼𑀧𑀺𑀓𑀸 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀭𑀽𑀧𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀨𑀲𑁆𑀲𑁄 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀪𑀯𑀽𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀪𑀯𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀪𑀯𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀪𑀯𑁄𑀖𑀜𑁆𑀘 ¶ 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀤𑁄𑀲𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀯𑁂𑀤𑀦𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀯𑁂𑀤𑀦𑀸𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀯𑀺𑀜𑁆𑀜𑀸𑀡𑀁 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀤𑀺𑀝𑁆𑀞𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀤𑀺𑀝𑁆𑀞𑀺𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀤𑀺𑀝𑁆𑀞𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀤𑀺𑀝𑁆𑀞𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀫𑀸𑀦𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀲𑀜𑁆𑀜𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀲𑀜𑁆𑀜𑀸𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀦𑀢𑁆𑀢𑀦𑀺 [𑀅𑀦𑀢𑁆𑀢𑀦𑀺𑀬𑁂 (𑀲𑀻.) 𑀧𑀲𑁆𑀲 𑀅. 𑀦𑀺. 𑁪.𑁪𑁯] 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀅𑀯𑀺𑀚𑁆𑀚𑀸𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀅𑀯𑀺𑀚𑁆𑀚𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀅𑀯𑀺𑀚𑁆𑀚𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀫𑁄𑀳𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺 ¶ , 𑀲𑀗𑁆𑀔𑀸𑀭𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀲𑀗𑁆𑀔𑀸𑀭𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀅𑀬𑀁 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸.

𑀢𑁂𑀦𑀸𑀳 ¶ 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋

‘‘𑀬𑁂 𑀥𑀫𑁆𑀫𑀸 𑀬𑀁 𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀦𑀺𑀝𑁆𑀞𑀺𑀢𑁄 𑀘 𑀳𑀸𑀭𑀯𑀺𑀪𑀗𑁆𑀕𑁄.

𑁧. 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄

𑁫𑁨.

‘‘𑀲𑁄𑀴𑀲 ¶ ¶ 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺.

𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀦𑀺𑀤𑁆𑀤𑁂𑀲𑁄 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑁄? 𑀳𑀸𑀭𑀲𑀫𑁆𑀧𑀸𑀢𑁂. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑁄?

‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦 [𑀓𑀸𑀬𑁂𑀦 (𑀉𑀤𑀸. 𑁩𑁨)], 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦, 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻’’𑀢𑀺.

𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀓𑀺𑀁 𑀤𑁂𑀲𑀬𑀢𑀺, 𑀧𑀫𑀸𑀤𑀁 𑀢𑀁 𑀫𑀘𑁆𑀘𑀼𑀦𑁄 𑀧𑀤𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑁂𑀦 𑀘𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁 𑀦𑀸𑀫 𑀯𑀼𑀘𑁆𑀘𑀢𑀺 𑀬𑀤𑀸 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀢𑀺, 𑀲𑁄 𑀯𑀺𑀧𑀮𑁆𑀮𑀸𑀲𑁄. 𑀲𑁄 𑀧𑀦 𑀯𑀺𑀧𑀮𑁆𑀮𑀸𑀲𑁄 𑀓𑀺𑀁𑀮𑀓𑁆𑀔𑀡𑁄? 𑀯𑀺𑀧𑀭𑀻𑀢𑀕𑁆𑀕𑀸𑀳𑀮𑀓𑁆𑀔𑀡𑁄 𑀯𑀺𑀧𑀮𑁆𑀮𑀸𑀲𑁄. 𑀲𑁄 𑀓𑀺𑀁 𑀯𑀺𑀧𑀮𑁆𑀮𑀸𑀲𑀬𑀢𑀺? 𑀢𑀬𑁄 𑀥𑀫𑁆𑀫𑁂 𑀲𑀜𑁆𑀜𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀫𑀺𑀢𑀺. 𑀲𑁄 𑀓𑀼𑀳𑀺𑀁 𑀯𑀺𑀧𑀮𑁆𑀮𑀸𑀲𑀬𑀢𑀺? 𑀘𑀢𑀽𑀲𑀼 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀲𑀼, 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

𑀢𑀢𑁆𑀣 ¶ 𑀭𑀽𑀧𑀁 𑀧𑀞𑀫𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺. 𑀯𑁂𑀤𑀦𑀸 𑀤𑀼𑀢𑀺𑀬𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺. 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀘 𑀢𑀢𑀺𑀬𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺. 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺. 𑀤𑁆𑀯𑁂 ¶ 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀸 𑁋 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘. 𑀢𑀡𑁆𑀳𑀸𑀦𑀺𑀯𑀼𑀢𑀁 𑀘𑀺𑀢𑁆𑀢𑀁 𑀤𑁆𑀯𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀯𑀺𑀧𑀮𑁆𑀮𑀸𑀲𑀻𑀬𑀢𑀺 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺. 𑀤𑀺𑀝𑁆𑀞𑀺𑀦𑀺𑀯𑀼𑀢𑀁 𑀘𑀺𑀢𑁆𑀢𑀁 𑀤𑁆𑀯𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀯𑀺𑀧𑀮𑁆𑀮𑀸𑀲𑀻𑀬𑀢𑀺 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺.

𑀢𑀢𑁆𑀣 𑀬𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, 𑀲𑁄 𑀅𑀢𑀻𑀢𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀢𑀻𑀢𑀁 𑀯𑁂𑀤𑀦𑀁…𑀧𑁂… 𑀅𑀢𑀻𑀢𑀁 𑀲𑀜𑁆𑀜𑀁, 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂…𑀧𑁂… 𑀅𑀢𑀻𑀢𑀁 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀢𑁆𑀣 𑀬𑁄 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄, 𑀲𑁄 𑀅𑀦𑀸𑀕𑀢𑀁 𑀭𑀽𑀧𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀦𑀸𑀕𑀢𑀁 𑀯𑁂𑀤𑀦𑀁…𑀧𑁂… 𑀅𑀦𑀸𑀕𑀢𑀁 𑀲𑀜𑁆𑀜𑀁, 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂, 𑀅𑀦𑀸𑀕𑀢𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀦𑁆𑀤𑀢𑀺. 𑀤𑁆𑀯𑁂 𑀥𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 ¶ 𑀉𑀧𑀓𑁆𑀓𑀺𑀮𑁂𑀲𑀸 𑁋 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘. 𑀢𑀸𑀳𑀺 𑀯𑀺𑀲𑀼𑀚𑁆𑀛𑀦𑁆𑀢𑀁 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺. 𑀢𑁂𑀲𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀲𑀦𑁆𑀥𑀸𑀯𑀦𑁆𑀢𑀸𑀦𑀁 𑀲𑀁𑀲𑀭𑀦𑁆𑀢𑀸𑀦𑀁 𑀲𑀓𑀺𑀁 𑀦𑀺𑀭𑀬𑀁 𑀲𑀓𑀺𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀲𑀓𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑀁 𑀲𑀓𑀺𑀁 𑀅𑀲𑀼𑀭𑀓𑀸𑀬𑀁 𑀲𑀓𑀺𑀁 𑀤𑁂𑀯𑁂 𑀲𑀓𑀺𑀁 𑀫𑀦𑀼𑀲𑁆𑀲𑁂.

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦𑀸𑀢𑀺. 𑀣𑀺𑀦𑀁 [𑀣𑀻𑀦𑀁 (𑀲𑀻.)] 𑀦𑀸𑀫 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀦𑀺𑀬𑀢𑀸; 𑀫𑀺𑀤𑁆𑀥𑀁 𑀦𑀸𑀫 𑀬𑀁 𑀓𑀸𑀬𑀲𑁆𑀲 𑀮𑀻𑀦𑀢𑁆𑀢𑀁. 𑀯𑀲𑀁 𑀫𑀸𑀭𑀲𑁆𑀲 𑀕𑀘𑁆𑀙𑀢𑀻𑀢𑀺 𑀓𑀺𑀮𑁂𑀲𑀫𑀸𑀭𑀲𑁆𑀲 𑀘 𑀲𑀢𑁆𑀢𑀫𑀸𑀭𑀲𑁆𑀲 𑀘 𑀯𑀲𑀁 𑀕𑀘𑁆𑀙𑀢𑀺, 𑀲𑁄 𑀳𑀺 𑀦𑀺𑀯𑀼𑀢𑁄 𑀲𑀁𑀲𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀇𑀫𑀸𑀦𑀺 𑀪𑀕𑀯𑀢𑀸 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘. 𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬 𑀘 𑀧𑀳𑀸𑀦𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬. 𑀬𑁂𑀦 𑀘 𑀧𑀭𑀺𑀚𑀸𑀦𑀸𑀢𑀺 𑀬𑁂𑀦 𑀘 𑀧𑀚𑀳𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀁 𑀢𑀡𑁆𑀳𑀸𑀬 𑀅𑀯𑀺𑀚𑁆𑀚𑀸𑀬 𑀘 𑀧𑀳𑀸𑀦𑀁, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺. 𑀢𑁂𑀦𑀸𑀳𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺.

𑀦𑀺𑀬𑀼𑀢𑁆𑀢𑁄 𑀤𑁂𑀲𑀦𑀸 𑀳𑀸𑀭𑀲𑀫𑁆𑀧𑀸𑀢𑁄.

𑁨. 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄

𑁫𑁩. 𑀢𑀢𑁆𑀣 ¶ ¶ 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀢𑀢𑁆𑀣 𑀢𑀡𑁆𑀳𑀸 𑀤𑀼𑀯𑀺𑀥𑀸 𑀓𑀼𑀲𑀮𑀸𑀧𑀺 𑀅𑀓𑀼𑀲𑀮𑀸𑀧𑀺. 𑀅𑀓𑀼𑀲𑀮𑀸 𑀲𑀁𑀲𑀸𑀭𑀕𑀸𑀫𑀺𑀦𑀻, 𑀓𑀼𑀲𑀮𑀸 𑀅𑀧𑀘𑀬𑀕𑀸𑀫𑀺𑀦𑀻 𑀧𑀳𑀸𑀦𑀢𑀡𑁆𑀳𑀸. 𑀫𑀸𑀦𑁄𑀧𑀺 𑀤𑀼𑀯𑀺𑀥𑁄 𑀓𑀼𑀲𑀮𑁄𑀧𑀺 𑀅𑀓𑀼𑀲𑀮𑁄𑀧𑀺. 𑀬𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀧𑀚𑀳𑀢𑀺, 𑀅𑀬𑀁 𑀫𑀸𑀦𑁄 𑀓𑀼𑀲𑀮𑁄. 𑀬𑁄 𑀧𑀦 𑀫𑀸𑀦𑁄 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀅𑀬𑀁 𑀫𑀸𑀦𑁄 𑀅𑀓𑀼𑀲𑀮𑁄. 𑀢𑀢𑁆𑀣 𑀬𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀓𑀼𑀤𑀸𑀲𑁆𑀲𑀼𑀦𑀸𑀫𑀸𑀳𑀁 𑀢𑀁 𑀆𑀬𑀢𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀁 𑀬𑀁 𑀅𑀭𑀺𑀬𑀸 𑀲𑀦𑁆𑀢𑀁 𑀆𑀬𑀢𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻𑀢𑀺 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸, 𑀧𑀺𑀳𑀸𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁, 𑀅𑀬𑀁 𑀢𑀡𑁆𑀳𑀸 𑀓𑀼𑀲𑀮𑀸 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀢𑀤𑀸𑀭𑀫𑁆𑀫𑀡𑀸 𑀓𑀼𑀲𑀮𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺.

𑀢𑀲𑁆𑀲𑀸 𑀓𑁄 𑀧𑀯𑀺𑀘𑀬𑁄? 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀲𑁄 𑀓𑀢𑁆𑀣 𑀤𑀝𑁆𑀞𑀩𑁆𑀩𑁄? 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀧𑀸𑀭𑀫𑀺𑀢𑀸𑀬. 𑀘𑀢𑀼𑀢𑁆𑀣𑁂 𑀳𑀺 𑀛𑀸𑀦𑁂 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀪𑀸𑀯𑀬𑀢𑀺 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁 𑀅𑀦𑀗𑁆𑀕𑀡𑀁 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁 𑀫𑀼𑀤𑀼 𑀓𑀫𑁆𑀫𑀦𑀺𑀬𑀁 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀲𑁄 𑀢𑀢𑁆𑀣 𑀅𑀝𑁆𑀞𑀯𑀺𑀥𑀁 𑀅𑀥𑀺𑀕𑀘𑁆𑀙𑀢𑀺 𑀙 𑀅𑀪𑀺𑀜𑁆𑀜𑀸 𑀤𑁆𑀯𑁂 𑀘 𑀯𑀺𑀲𑁂𑀲𑁂, 𑀢𑀁 𑀘𑀺𑀢𑁆𑀢𑀁 𑀬𑀢𑁄 𑀧𑀭𑀺𑀲𑀼𑀤𑁆𑀥𑀁, 𑀢𑀢𑁄 𑀧𑀭𑀺𑀬𑁄𑀤𑀸𑀢𑀁, 𑀬𑀢𑁄 𑀧𑀭𑀺𑀬𑁄𑀤𑀸𑀢𑀁 ¶ , 𑀢𑀢𑁄 𑀅𑀦𑀗𑁆𑀕𑀡𑀁, 𑀬𑀢𑁄 𑀅𑀦𑀗𑁆𑀕𑀡𑀁, 𑀢𑀢𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀬𑀢𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀢𑀢𑁄 𑀫𑀼𑀤𑀼, 𑀬𑀢𑁄 𑀫𑀼𑀤𑀼, 𑀢𑀢𑁄 𑀓𑀫𑁆𑀫𑀦𑀺𑀬𑀁, 𑀬𑀢𑁄 𑀓𑀫𑁆𑀫𑀦𑀺𑀬𑀁, 𑀢𑀢𑁄 𑀞𑀺𑀢𑀁, 𑀬𑀢𑁄 𑀞𑀺𑀢𑀁, 𑀢𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀢𑀢𑁆𑀣 ¶ 𑀅𑀗𑁆𑀕𑀡𑀸 𑀘 𑀉𑀧𑀓𑁆𑀓𑀺𑀮𑁂𑀲𑀸 𑀘 𑀢𑀤𑀼𑀪𑀬𑀁 𑀢𑀡𑁆𑀳𑀸𑀧𑀓𑁆𑀔𑁄. 𑀬𑀸 𑀘 𑀇𑀜𑁆𑀚𑀦𑀸 𑀬𑀸 𑀘 𑀘𑀺𑀢𑁆𑀢𑀲𑁆𑀲 𑀅𑀝𑁆𑀞𑀺𑀢𑀺, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄.

𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀯𑀲𑀺𑀝𑁆𑀞𑀁 𑀪𑀯𑀢𑀺. 𑀲𑁄 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀢𑀲𑁆𑀲 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀲𑀡𑁆𑀞𑀳𑀢𑀺 𑀉𑀓𑁆𑀓𑀡𑁆𑀞𑀸 𑀘 𑀧𑀝𑀺𑀖𑀲𑀜𑁆𑀜𑀸, 𑀲𑁄 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀅𑀦𑀦𑁆𑀢𑀁 𑀆𑀓𑀸𑀲’’𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑁄 𑀭𑀽𑀧𑀲𑀜𑁆𑀜𑀸 𑀯𑁄𑀓𑀸𑀭𑁄 𑀦𑀸𑀦𑀢𑁆𑀢𑀲𑀜𑁆𑀜𑀸 𑀲𑀫𑀢𑀺𑀓𑁆𑀓𑀫𑀢𑀺 𑀧𑀝𑀺𑀖𑀲𑀜𑁆𑀜𑀸 𑀘𑀲𑁆𑀲 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀺, 𑀏𑀯𑀁 𑀲𑀫𑀸𑀥𑀺 𑀢𑀲𑁆𑀲 𑀲𑀫𑀸𑀳𑀺𑀢𑀲𑁆𑀲 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄 𑀲𑀫𑀸𑀥𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄 ¶ . 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁 𑀫𑁂 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑁂, 𑀅𑀩𑁆𑀬𑀸𑀧𑀦𑁆𑀦𑀁 𑀫𑁂 𑀘𑀺𑀢𑁆𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼, 𑀆𑀭𑀤𑁆𑀥𑀁 𑀫𑁂 𑀯𑀻𑀭𑀺𑀬𑀁 𑀧𑀕𑁆𑀕𑀳𑀺𑀢𑀁, 𑀧𑀲𑁆𑀲𑀤𑁆𑀥𑁄 𑀫𑁂 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀫𑁂 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀉𑀧𑀝𑁆𑀞𑀺𑀢𑀸 𑀫𑁂 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 [𑀅𑀧𑁆𑀧𑀫𑁆𑀫𑀼𑀝𑁆𑀞𑀸 (𑀲𑀻.)], 𑀢𑀢𑁆𑀣 𑀬𑀜𑁆𑀘 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑁂 𑀬𑀜𑁆𑀘 𑀅𑀩𑁆𑀬𑀸𑀧𑀦𑁆𑀦𑀁 𑀘𑀺𑀢𑁆𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀬𑀜𑁆𑀘 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁 𑀧𑀕𑁆𑀕𑀳𑀺𑀢𑀁 𑀬𑀜𑁆𑀘 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀲𑀫𑀣𑁄. 𑀬𑁄 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀅𑀬𑀁 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑁄. 𑀬𑀸 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁫𑁪. 𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀲𑀫𑀸𑀥𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀅𑀭𑀺𑀬𑁄 𑀦𑀺𑀭𑀸𑀫𑀺𑀲𑁄’’𑀢𑀺 𑀇𑀢𑀺𑀲𑁆𑀲 ¶ 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀘 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀘 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 [𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀯𑀢𑁄 (𑀲𑀻.), 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀯𑀸𑀯𑀝𑁄 (𑀓.)] 𑀘𑀸’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺. 𑀢𑀁 𑀔𑁄 𑀧𑀦𑀺𑀫𑀁 𑀲𑀫𑀸𑀥𑀺𑀁 ‘‘𑀲𑀢𑁄 𑀲𑀫𑀸𑀧𑀚𑁆𑀚𑀸𑀫𑀺 𑀲𑀢𑁄 𑀯𑀼𑀝𑁆𑀞𑀳𑀸𑀫𑀻’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺. 𑀢𑀢𑁆𑀣 𑀬𑁄 𑀘 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀬𑁄 𑀘 𑀲𑀫𑀸𑀥𑀺 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄 𑀅𑀬𑀁 𑀲𑀫𑀣𑁄. 𑀬𑁄 𑀘 𑀲𑀫𑀸𑀥𑀺 𑀅𑀭𑀺𑀬𑁄 𑀦𑀺𑀭𑀸𑀫𑀺𑀲𑁄, 𑀬𑁄 𑀘 𑀲𑀫𑀸𑀥𑀺 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄, 𑀬𑁄 𑀘 𑀲𑀫𑀸𑀥𑀺 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 ¶ 𑀘 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀘 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 𑀘 𑀬𑀜𑁆𑀘𑀸𑀳𑀁 𑀢𑀁 𑀔𑁄 𑀧𑀦𑀺𑀫𑀁 𑀲𑀫𑀸𑀥𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀸𑀫𑀺 𑀲𑀢𑁄 𑀯𑀼𑀝𑁆𑀞𑀳𑀸𑀫𑀻𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄 𑀘 𑀧𑀻𑀢𑀺𑀨𑀭𑀡𑁄 𑀬𑁄 𑀘 𑀲𑀼𑀔𑀨𑀭𑀡𑁄 𑀬𑁄 𑀘 𑀘𑁂𑀢𑁄𑀨𑀭𑀡𑁄, 𑀅𑀬𑀁 𑀲𑀫𑀣𑁄. 𑀬𑁄 𑀘 𑀆𑀮𑁄𑀓𑀨𑀭𑀡𑁄 𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁. 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁫𑁫. 𑀤𑀲 ¶ 𑀓𑀲𑀺𑀡𑀸𑀬𑀢𑀦𑀸𑀦𑀺 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀓𑀲𑀺𑀡𑀁 𑀢𑁂𑀚𑁄𑀓𑀲𑀺𑀡𑀁 𑀯𑀸𑀬𑁄𑀓𑀲𑀺𑀡𑀁 𑀦𑀻𑀮𑀓𑀲𑀺𑀡𑀁 𑀧𑀻𑀢𑀓𑀲𑀺𑀡𑀁 𑀮𑁄𑀳𑀺𑀢𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀁 𑀆𑀓𑀸𑀲𑀓𑀲𑀺𑀡𑀁 𑀯𑀺𑀜𑁆𑀜𑀸𑀡𑀓𑀲𑀺𑀡𑀁. 𑀢𑀢𑁆𑀣 𑀬𑀜𑁆𑀘 𑀧𑀣𑀯𑀻𑀓𑀲𑀺𑀡𑀁 𑀬𑀜𑁆𑀘 𑀆𑀧𑁄𑀓𑀲𑀺𑀡𑀁 𑀏𑀯𑀁 𑀲𑀩𑁆𑀩𑀁, 𑀬𑀜𑁆𑀘 𑀑𑀤𑀸𑀢𑀓𑀲𑀺𑀡𑀁. 𑀇𑀫𑀸𑀦𑀺 𑀅𑀝𑁆𑀞 𑀓𑀲𑀺𑀡𑀸𑀦𑀺 𑀲𑀫𑀣𑁄. 𑀬𑀜𑁆𑀘 𑀆𑀓𑀸𑀲𑀓𑀲𑀺𑀡𑀁 𑀬𑀜𑁆𑀘 𑀯𑀺𑀜𑁆𑀜𑀸𑀡𑀓𑀲𑀺𑀡𑀁, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀲𑀩𑁆𑀩𑁄 𑀅𑀭𑀺𑀬𑁄 𑀫𑀕𑁆𑀕𑁄 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀯𑀼𑀢𑁆𑀢𑁄, 𑀢𑁂𑀦 𑀢𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑁂𑀦 𑀬𑁄𑀚𑀬𑀺𑀢𑀩𑁆𑀩𑁄. 𑀢𑁂 ¶ 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀢𑀺. 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀺. 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀺.

𑀭𑀸𑀕𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀦𑀺𑀫𑀺𑀢𑁆𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 [𑀦𑀻𑀬𑀸𑀢𑀺 (𑀲𑀻.)] 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀮𑁄𑀪𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀭𑀸𑀕𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀭𑀸𑀕𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀭𑀸𑀕𑀯𑀺𑀲𑀁 𑀯𑀫𑁂𑀦𑁆𑀢𑁄 𑀭𑀸𑀕𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀭𑀸𑀕𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀭𑀸𑀕𑀚𑀝𑀁 𑀯𑀺𑀚𑀝𑁂𑀦𑁆𑀢𑁄. 𑀤𑁄𑀲𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀤𑁄𑀲𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑁄𑀲𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀤𑁄𑀲𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀤𑁄𑀲𑀯𑀺𑀲𑀁 𑀯𑀫𑁂𑀦𑁆𑀢𑁄 𑀤𑁄𑀲𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀤𑁄𑀲𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀤𑁄𑀲𑀚𑀝𑀁 𑀯𑀺𑀚𑀝𑁂𑀦𑁆𑀢𑁄. 𑀫𑁄𑀳𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀫𑁄𑀳𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀫𑁄𑀳𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀫𑁄𑀳𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀫𑁄𑀳𑀯𑀺𑀲𑀁 𑀯𑀫𑁂𑀦𑁆𑀢𑁄 𑀫𑁄𑀳𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑁄𑀳𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀫𑁄𑀳𑀚𑀝𑀁 𑀯𑀺𑀚𑀝𑁂𑀦𑁆𑀢𑁄.

𑀢𑀢𑁆𑀣 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁 ¶ 𑀲𑀻𑀮𑀓𑁆𑀔𑀦𑁆𑀥𑁄. 𑀲𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀺, 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀺. 𑀢𑀢𑁆𑀣 ¶ 𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄, 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 ¶ 𑀬𑀸 𑀘 𑀲𑀫𑁆𑀫𑀸𑀲𑀢𑀺 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄.

𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸. 𑀬𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀓𑀸𑀬𑁄 𑀘𑀺𑀢𑁆𑀢𑀜𑁆𑀘, 𑀪𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀤𑁆𑀯𑁂 𑀧𑀤𑀸𑀦𑀺 𑀲𑀻𑀮𑀁 𑀲𑀫𑀸𑀥𑀺 𑀘. 𑀲𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄. 𑀓𑀸𑀬𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘, 𑀲𑀻𑀮𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀆𑀚𑀻𑀯𑁄 𑀘, 𑀘𑀺𑀢𑁆𑀢𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀘, 𑀧𑀜𑁆𑀜𑀸𑀬 𑀪𑀸𑀯𑀺𑀬𑀫𑀸𑀦𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀘.

𑀢𑀢𑁆𑀣 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀺𑀬𑀸 𑀓𑀸𑀬𑀺𑀓𑁄 𑀲𑀺𑀬𑀸 𑀘𑁂𑀢𑀲𑀺𑀓𑁄, 𑀢𑀢𑁆𑀣 𑀬𑁄 𑀓𑀸𑀬𑀲𑀗𑁆𑀕𑀳𑁄, 𑀲𑁄 𑀓𑀸𑀬𑁂 𑀪𑀸𑀯𑀺𑀢𑁂 𑀪𑀸𑀯𑀦𑀁 𑀕𑀘𑁆𑀙𑀢𑀺, 𑀬𑁄 𑀘𑀺𑀢𑁆𑀢𑀲𑀗𑁆𑀕𑀳𑁄, 𑀲𑁄 𑀘𑀺𑀢𑁆𑀢𑁂 𑀪𑀸𑀯𑀺𑀢𑁂 𑀪𑀸𑀯𑀦𑀁 𑀕𑀘𑁆𑀙𑀢𑀺. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀦𑁆𑀢𑁄 𑀧𑀜𑁆𑀘𑀯𑀺𑀥𑀁 𑀅𑀥𑀺𑀕𑀫𑀁 𑀕𑀘𑁆𑀙𑀢𑀺 [𑀅𑀥𑀺𑀕𑀘𑁆𑀙𑀢𑀺 (𑀲𑀻.)] 𑀔𑀺𑀧𑁆𑀧𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀫𑀳𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀧𑀼𑀮𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀅𑀦𑀯𑀲𑁂𑀲𑀸𑀥𑀺𑀕𑀫𑁄 𑀘 𑀳𑁄𑀢𑀺. 𑀢𑀢𑁆𑀣 𑀲𑀫𑀣𑁂𑀦 𑀔𑀺𑀧𑁆𑀧𑀸𑀥𑀺𑀕𑀫𑁄 𑀘 𑀫𑀳𑀸𑀥𑀺𑀕𑀫𑁄 𑀘 𑀯𑀺𑀧𑀼𑀮𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀯𑀺𑀫𑀼𑀢𑁆𑀢𑀸𑀥𑀺𑀕𑀫𑁄 𑀘 𑀅𑀦𑀯𑀲𑁂𑀲𑀸𑀥𑀺𑀕𑀫𑁄 𑀘 𑀳𑁄𑀢𑀺.

𑁫𑁬. 𑀢𑀢𑁆𑀣 𑀬𑁄 𑀤𑁂𑀲𑀬𑀢𑀺, 𑀲𑁄 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀣𑀸 𑀑𑀯𑀸𑀤𑁂𑀦 𑀲𑀸𑀯𑀓𑁂 𑀦 𑀯𑀺𑀲𑀁𑀯𑀸𑀤𑀬𑀢𑀺. 𑀲𑁄 𑀢𑀺𑀯𑀺𑀥𑀁 𑀇𑀤𑀁 𑀓𑀭𑁄𑀣 ¶ 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀭𑁄𑀣 𑀇𑀤𑀁 𑀯𑁄 𑀓𑀼𑀭𑀼𑀫𑀸𑀦𑀸𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺, 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀢𑀣𑀸𑀓𑀭𑁄𑀦𑁆𑀢𑁄 𑀢𑀣𑀸𑀧𑀝𑀺𑀧𑀚𑁆𑀚𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀦 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀲𑀻𑀮𑀓𑁆𑀔𑀦𑁆𑀥𑀁 𑀅𑀧𑀭𑀺𑀧𑀽𑀭𑀬𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑀬𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀲𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀲𑁆𑀲 𑀢𑁂 𑀲𑀢𑁄 𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸𑀢𑀺 𑀦𑁂𑀢𑀁 ¶ 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀲𑁆𑀲 𑀢𑁂 ¶ 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀸𑀯𑀓𑁄 𑀔𑁄 𑀧𑀦 𑀢𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻 𑀲𑁄 𑀧𑀼𑀩𑁆𑀩𑁂𑀦 𑀅𑀧𑀭𑀁 𑀉𑀴𑀸𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑁂 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀢𑁂 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀲𑀸𑀯𑀓𑁄 𑀔𑁄 𑀧𑀦 𑀢𑁂 𑀲𑀉𑀧𑀸𑀤𑀺𑀲𑁂𑀲𑁄 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀲𑀼𑀳𑀢𑀁 𑀓𑀭𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀲𑀼𑀳𑀢𑀁 𑀓𑀭𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀏𑀯𑀁 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁, 𑀪𑀺𑀓𑁆𑀔𑀼𑀁. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬 𑀲𑀗𑁆𑀖𑁂 𑀯𑀸 𑀲𑀗𑁆𑀖𑀭𑀸𑀚𑀺𑀁 𑀚𑀦𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀖𑀁 ¶ 𑀪𑀺𑀦𑁆𑀤𑁂𑀬𑁆𑀬 𑀲𑀗𑁆𑀖𑁂 𑀯𑀸 𑀲𑀗𑁆𑀖𑀭𑀸𑀚𑀺𑀁 𑀚𑀦𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀣𑀽𑀧𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀣𑀽𑀧𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑁂𑀬𑁆𑀬 𑀅𑀧𑀺 𑀚𑀻𑀯𑀺𑀢𑀳𑁂𑀢𑀽𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑁫𑁭. 𑀇𑀢𑁆𑀣𑀻 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀫𑀸𑀭𑁄 𑀧𑀸𑀧𑀺𑀫𑀸 ¶ 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀫𑀳𑀸𑀩𑁆𑀭𑀳𑁆𑀫𑀸 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀤𑁆𑀯𑁂 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀯𑀸 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀬𑁆𑀬𑀼𑀦𑁆𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀏𑀓𑁄𑀯 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀇𑀝𑁆𑀞𑁄 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺 ¶ . 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀇𑀝𑁆𑀞𑁄 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀳𑀓𑁄 𑀮𑀧𑀓𑁄 𑀦𑁂𑀫𑀺𑀢𑁆𑀢𑀓𑁄 𑀓𑀼𑀳𑀦𑀮𑀧𑀦𑀦𑁂𑀫𑀺𑀢𑁆𑀢𑀓𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀧𑁆𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀺 [𑀅𑀦𑀼𑀧𑀝𑁆𑀞𑀺𑀢𑀲𑀢𑀺 (𑀲𑀻.)] 𑀯𑀺𑀳𑀭𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀪𑀸𑀯𑀬𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀩𑁆𑀩𑀤𑁄𑀲𑀸𑀧𑀕𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀯𑀺𑀳𑀭𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑀬𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀇𑀤𑀁 𑀯𑀼𑀘𑁆𑀘𑀢𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀞𑀸𑀦𑀸𑀝𑁆𑀞𑀸𑀦𑀕𑀢𑀸 𑀲𑀩𑁆𑀩𑁂 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸 𑀓𑁂𑀘𑀺 𑀲𑀕𑁆𑀕𑀽𑀧𑀕𑀸 𑀓𑁂𑀘𑀺 𑀅𑀧𑀸𑀬𑀽𑀧𑀕𑀸 𑀓𑁂𑀘𑀺 𑀦𑀺𑀩𑁆𑀩𑀸𑀦𑀽𑀧𑀕𑀸, 𑀏𑀯𑀁 𑀪𑀕𑀯𑀸 𑀆𑀳 𑁋

𑁫𑁮.

𑀲𑀩𑁆𑀩𑁂 ¶ 𑀲𑀢𑁆𑀢𑀸 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁩𑁩] 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁;

𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸;

𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺𑀁;

𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 [𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸𑀢𑀺 (𑀲𑀻. 𑀓.)].

𑀲𑀩𑁆𑀩𑁂 ¶ 𑀲𑀢𑁆𑀢𑀸𑀢𑀺 𑀅𑀭𑀺𑀬𑀸 𑀘 𑀅𑀦𑀭𑀺𑀬𑀸 𑀘 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀘 𑀲𑀓𑁆𑀓𑀸𑀬𑀯𑀻𑀢𑀺𑀯𑀢𑁆𑀢𑀸 𑀘. 𑀫𑀭𑀺𑀲𑁆𑀲𑀦𑁆𑀢𑀻𑀢𑀺 𑀤𑁆𑀯𑀻𑀳𑀺 𑀫𑀭𑀡𑁂𑀳𑀺 𑀤𑀦𑁆𑀥𑀫𑀭𑀡𑁂𑀦 𑀘 𑀅𑀤𑀦𑁆𑀥𑀫𑀭𑀡𑁂𑀦 𑀘, 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀤𑀦𑁆𑀥𑀫𑀭𑀡𑀁 𑀲𑀓𑁆𑀓𑀸𑀬𑀯𑀻𑀢𑀺𑀯𑀢𑁆𑀢𑀸𑀦𑀁 𑀤𑀦𑁆𑀥𑀫𑀭𑀡𑀁. 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀦𑁆𑀢𑀺 𑀔𑀬𑀸 𑀆𑀬𑀼𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑀭𑁄𑀥𑀸 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑁄 𑀫𑀭𑀡𑀧𑀭𑀺𑀬𑀦𑁆𑀢𑁄. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸. 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸𑀢𑀺 𑀓𑀫𑁆𑀫𑀸𑀦𑀁 𑀨𑀮𑀤𑀲𑁆𑀲𑀸𑀯𑀺𑀢𑀸 𑀘 𑀅𑀯𑀺𑀧𑁆𑀧𑀯𑀸𑀲𑁄 𑀘.

𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸𑀢𑀺 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑀸. 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺𑀦𑁆𑀢𑀺 𑀧𑀼𑀜𑁆𑀜𑀲𑀗𑁆𑀔𑀸𑀭𑀸 ¶ 𑀲𑀼𑀕𑀢𑀺𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀩𑁆𑀩𑁂…𑀧𑁂… 𑀦𑀸𑀲𑀯𑀸’’𑀢𑀺.

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸. 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀆𑀕𑀸𑀴𑁆𑀳𑀸 𑀘 𑀦𑀺𑀚𑁆𑀛𑀸𑀫𑀸 𑀘 𑀧𑀝𑀺𑀧𑀤𑀸. ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁, 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀏𑀯𑀁 𑀲𑀁𑀲𑀸𑀭𑀁 𑀦𑀺𑀩𑁆𑀩𑀢𑁆𑀢𑀬𑀢𑀺. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀇𑀫𑁂 𑀢𑀬𑁄 𑀯𑀝𑁆𑀝𑀸 𑀤𑀼𑀓𑁆𑀔𑀯𑀝𑁆𑀝𑁄 𑀓𑀫𑁆𑀫𑀯𑀝𑁆𑀝𑁄 𑀓𑀺𑀮𑁂𑀲𑀯𑀝𑁆𑀝𑁄. ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀢𑀺𑀡𑁆𑀡𑀁 𑀯𑀝𑁆𑀝𑀸𑀦𑀁 𑀯𑀺𑀯𑀝𑁆𑀝𑀦𑀸. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀆𑀤𑀻𑀦𑀯𑁄, ‘‘𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺’’𑀦𑁆𑀢𑀺 𑀅𑀲𑁆𑀲𑀸𑀤𑁄, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀦𑀺𑀲𑁆𑀲𑀭𑀡𑀁. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀳𑁂𑀢𑀼 𑀘 𑀨𑀮𑀜𑁆𑀘, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀨𑀮𑀁, 𑀢𑀡𑁆𑀳𑀸 𑀳𑁂𑀢𑀼, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀫𑀕𑁆𑀕𑁄 𑀘 𑀨𑀮𑀜𑁆𑀘. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀲𑁄 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄𑀢𑀺.

𑁫𑁯. 𑀢𑀢𑁆𑀣 ¶ 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀢𑀻𑀳𑀺 𑀢𑀡𑁆𑀳𑀸𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑁋 𑀓𑀸𑀫𑀢𑀡𑁆𑀳𑀸𑀬 𑀪𑀯𑀢𑀡𑁆𑀳𑀸𑀬 𑀯𑀺𑀪𑀯𑀢𑀡𑁆𑀳𑀸𑀬. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀅𑀚𑁆𑀛𑁄𑀲𑀺𑀢𑁄, 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀙𑀢𑁆𑀢𑀺𑀁𑀲𑀸𑀬 𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 𑀯𑀺𑀘𑀭𑀺𑀢𑀸𑀦𑀺. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀉𑀘𑁆𑀙𑁂𑀤𑀲𑀲𑁆𑀲𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀺, ‘‘𑀇𑀤𑀫𑁂𑀯 ¶ 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀘𑁂𑀢𑀦𑀸 𑀘𑁂𑀢𑀲𑀺𑀓𑀓𑀫𑁆𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 ¶ 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 𑀇𑀤𑀁 𑀯𑁄𑀤𑀸𑀦𑀁.

𑀢𑀬𑀺𑀤𑀁 𑀯𑁄𑀤𑀸𑀦𑀁 𑀢𑀺𑀯𑀺𑀥𑀁; 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀲𑀫𑀣𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀲𑁄 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀼𑀚𑁆𑀛𑀢𑀺, 𑀲𑀸 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀲𑀼𑀘𑀭𑀺𑀢𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀢𑀁 𑀲𑀼𑀘𑀭𑀺𑀢𑀁 𑀲𑀻𑀮𑀓𑁆𑀔𑀦𑁆𑀥𑁄.

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁, 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, ‘‘𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺’’𑀦𑁆𑀢𑀺 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀧𑀼𑀜𑁆𑀜𑀧𑀸𑀧𑀲𑀫𑀢𑀺𑀓𑁆𑀓𑀫𑀧𑁆𑀧𑀝𑀺𑀧𑀤𑀸, 𑀢𑀢𑁆𑀣 𑀬𑀸 𑀘 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸 𑀬𑀸 𑀘 𑀅𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, 𑀅𑀬𑀁 𑀏𑀓𑀸 𑀧𑀝𑀺𑀧𑀤𑀸 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀏𑀓𑀸 𑀅𑀧𑀸𑀬𑁂𑀲𑀼, 𑀏𑀓𑀸 𑀤𑁂𑀯𑁂𑀲𑀼, 𑀬𑀸 𑀘 𑀧𑀼𑀜𑁆𑀜𑀧𑀸𑀧𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀧𑀤𑀸 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑀢𑀬𑁄 𑀭𑀸𑀲𑀻 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀺, 𑀢𑀢𑁆𑀣 𑀬𑁄 𑀘 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀬𑁄 𑀘 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀏𑀓𑀸 𑀧𑀝𑀺𑀧𑀤𑀸 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻, 𑀢𑀢𑁆𑀣 𑀬𑁄 𑀅𑀦𑀺𑀬𑀢𑁄 𑀭𑀸𑀲𑀺, 𑀅𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀓𑁂𑀦 𑀓𑀸𑀭𑀡𑁂𑀦? 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀦𑀺𑀭𑀬𑁂 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼 ¶ 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀅𑀲𑀼𑀭𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬, 𑀢𑀲𑁆𑀫𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 ¶ 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀦𑁂𑀓𑀥𑀸𑀢𑀼𑀮𑁄𑀓𑁄, 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀦𑀸𑀥𑀸𑀢𑀼𑀮𑁄𑀓𑁄. 𑀢𑀢𑁆𑀣 𑀓𑀢𑀫𑁄 𑀅𑀦𑁂𑀓𑀥𑀸𑀢𑀼𑀮𑁄𑀓𑁄? 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼 𑀭𑀲𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼, 𑀆𑀓𑀸𑀲𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀫𑀥𑀸𑀢𑀼, 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀅𑀯𑀺𑀳𑀺𑀁𑀲𑀸𑀥𑀸𑀢𑀼, 𑀤𑀼𑀓𑁆𑀔𑀥𑀸𑀢𑀼, 𑀤𑁄𑀫𑀦𑀲𑁆𑀲𑀥𑀸𑀢𑀼 ¶ , 𑀅𑀯𑀺𑀚𑁆𑀚𑀸𑀥𑀸𑀢𑀼, 𑀲𑀼𑀔𑀥𑀸𑀢𑀼, 𑀲𑁄𑀫𑀦𑀲𑁆𑀲𑀥𑀸𑀢𑀼, 𑀉𑀧𑁂𑀓𑁆𑀔𑀸𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀥𑀸𑀢𑀼, 𑀦𑀺𑀭𑁄𑀥𑀥𑀸𑀢𑀼, 𑀲𑀗𑁆𑀔𑀸𑀭𑀥𑀸𑀢𑀼, 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀬𑀁 𑀅𑀦𑁂𑀓𑀥𑀸𑀢𑀼𑀮𑁄𑀓𑁄.

𑀢𑀢𑁆𑀣 𑀓𑀢𑀫𑁄 𑀦𑀸𑀦𑀸𑀥𑀸𑀢𑀼𑀮𑁄𑀓𑁄? 𑀅𑀜𑁆𑀜𑀸 𑀘𑀓𑁆𑀔𑀼𑀥𑀸𑀢𑀼, 𑀅𑀜𑁆𑀜𑀸 𑀭𑀽𑀧𑀥𑀸𑀢𑀼, 𑀅𑀜𑁆𑀜𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀲𑀩𑁆𑀩𑀸. 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀜𑀸𑀡𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑁬𑁦. 𑀇𑀢𑀺 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼𑀓𑀲𑁆𑀲 𑀮𑁄𑀓𑀲𑁆𑀲 𑀬𑀁 𑀬𑀤𑁂𑀯 𑀥𑀸𑀢𑀼𑀁 𑀲𑀢𑁆𑀢𑀸 𑀅𑀥𑀺𑀫𑀼𑀘𑁆𑀘𑀦𑁆𑀢𑀺, 𑀢𑀁 𑀢𑀤𑁂𑀯 𑀅𑀥𑀺𑀝𑁆𑀞𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀕𑀦𑁆𑀥𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀭𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀨𑁄𑀝𑁆𑀞𑀩𑁆𑀩𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀇𑀢𑁆𑀣𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀧𑀼𑀭𑀺𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀘𑀸𑀕𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀳𑀻𑀦𑀸𑀥𑀺𑀫𑀼𑀢𑁆𑀢𑀸 ¶ , 𑀓𑁂𑀘𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀤𑁂𑀯𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀫𑀦𑀼𑀲𑁆𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑀸. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀅𑀬𑀁 𑀯𑁂𑀦𑁂𑀬𑁆𑀬𑁄, 𑀅𑀬𑀁 𑀦 𑀯𑁂𑀦𑁂𑀬𑁆𑀬𑁄, 𑀅𑀬𑀁 𑀲𑀕𑁆𑀕𑀕𑀸𑀫𑀻, 𑀅𑀬𑀁 𑀤𑀼𑀕𑁆𑀕𑀢𑀺𑀕𑀸𑀫𑀻𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀜𑀸𑀡𑀁 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑁂 𑀬𑀣𑀸𑀥𑀺𑀫𑀼𑀢𑁆𑀢𑀸 𑀘 𑀪𑀯𑀦𑁆𑀢𑀺, 𑀢𑀁 𑀢𑀁 𑀓𑀫𑁆𑀫𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀺. 𑀢𑁂 𑀙𑀩𑁆𑀩𑀺𑀥𑀁 𑀓𑀫𑁆𑀫𑀁 𑀲𑀫𑀸𑀤𑀺𑀬𑀦𑁆𑀢𑀺 𑁋 𑀓𑁂𑀘𑀺 𑀮𑁄𑀪𑀯𑀲𑁂𑀦, 𑀓𑁂𑀘𑀺 𑀤𑁄𑀲𑀯𑀲𑁂𑀦, 𑀓𑁂𑀘𑀺 𑀫𑁄𑀳𑀯𑀲𑁂𑀦, 𑀓𑁂𑀘𑀺 𑀲𑀤𑁆𑀥𑀸𑀯𑀲𑁂𑀦, 𑀓𑁂𑀘𑀺 𑀯𑀻𑀭𑀺𑀬𑀯𑀲𑁂𑀦, 𑀓𑁂𑀘𑀺 𑀧𑀜𑁆𑀜𑀸𑀯𑀲𑁂𑀦. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀁 𑀤𑀼𑀯𑀺𑀥𑀁 𑁋 𑀲𑀁𑀲𑀸𑀭𑀕𑀸𑀫𑀺 𑀘 𑀦𑀺𑀩𑁆𑀩𑀸𑀦𑀕𑀸𑀫𑀺 𑀘.

𑀢𑀢𑁆𑀣 𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀲𑀤𑁆𑀥𑀸𑀯𑀲𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀲𑀼𑀓𑁆𑀓𑀁 ¶ 𑀲𑀼𑀓𑁆𑀓𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀲𑀤𑁆𑀥𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀯𑀻𑀭𑀺𑀬𑀯𑀲𑁂𑀦 𑀧𑀜𑁆𑀜𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀼𑀢𑁆𑀢𑀫𑀁 𑀓𑀫𑁆𑀫𑀲𑁂𑀝𑁆𑀞𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺.

𑀘𑀢𑁆𑀢𑀸𑀭𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺. 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀜𑁆𑀘𑁂𑀯 𑀆𑀬𑀢𑀺𑀁 𑀘 𑀤𑀼𑀓𑁆𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯 𑀆𑀬𑀢𑀺𑀁 𑀘 𑀲𑀼𑀔𑀯𑀺𑀧𑀸𑀓𑀁. 𑀬𑀁 𑀏𑀯𑀁 𑀚𑀸𑀢𑀺𑀬𑀁 𑀓𑀫𑁆𑀫𑀲𑀫𑀸𑀤𑀸𑀦𑀁, 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀅𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀁 ¶ 𑀉𑀧𑀘𑀺𑀢𑀁 𑀅𑀯𑀺𑀧𑀓𑁆𑀓𑀁 𑀯𑀺𑀧𑀸𑀓𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀦 𑀘 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀥𑀸 𑀕𑀦𑁆𑀢𑀼𑀦𑁆𑀢𑀺 𑀢𑀁 ¶ 𑀪𑀕𑀯𑀸 𑀦 𑀑𑀯𑀤𑀢𑀺. 𑀬𑀣𑀸 𑀤𑁂𑀯𑀤𑀢𑁆𑀢𑀁 𑀓𑁄𑀓𑀸𑀮𑀺𑀓𑀁 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀲𑀢𑁆𑀢𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀇𑀫𑁂𑀲𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀉𑀧𑀘𑀺𑀢𑀁 𑀅𑀓𑀼𑀲𑀮𑀁 𑀦 𑀘 𑀢𑀸𑀯 𑀧𑀸𑀭𑀺𑀧𑀽𑀭𑀺𑀁 𑀕𑀢𑀁, 𑀧𑀼𑀭𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀧𑀼𑀭𑀸 𑀨𑀮𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀧𑀼𑀭𑀸 𑀫𑀕𑁆𑀕𑀫𑀸𑀯𑀸𑀭𑀬𑀢𑀺, 𑀧𑀼𑀭𑀸 𑀯𑁂𑀦𑁂𑀬𑁆𑀬𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀢𑁂 𑀪𑀕𑀯𑀸 𑀅𑀲𑀫𑀢𑁆𑀢𑁂 𑀑𑀯𑀤𑀢𑀺. 𑀬𑀣𑀸 𑀧𑀼𑀡𑁆𑀡𑀜𑁆𑀘 𑀕𑁄𑀯𑀢𑀺𑀓𑀁 𑀅𑀘𑁂𑀮𑀜𑁆𑀘 𑀓𑀼𑀓𑁆𑀓𑀼𑀭𑀯𑀢𑀺𑀓𑀁.

𑁬𑁧. 𑀇𑀫𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀭𑀺𑀧𑀽𑀭𑀫𑀸𑀦𑀁 𑀫𑀕𑁆𑀕𑀁 𑀆𑀯𑀸𑀭𑀬𑀺𑀲𑁆𑀲𑀢𑀺 𑀧𑀼𑀭𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀧𑀼𑀭𑀸 𑀨𑀮𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀧𑀼𑀭𑀸 𑀫𑀕𑁆𑀕𑀫𑀸𑀯𑀸𑀭𑀬𑀢𑀺, 𑀧𑀼𑀭𑀸 𑀯𑁂𑀦𑁂𑀬𑁆𑀬𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀢𑀁 𑀪𑀕𑀯𑀸 𑀅𑀲𑀫𑀢𑁆𑀢𑀁 𑀑𑀯𑀤𑀢𑀺. 𑀬𑀣𑀸 𑀆𑀬𑀲𑁆𑀫𑀦𑁆𑀢𑀁 𑀅𑀗𑁆𑀕𑀼𑀮𑀺𑀫𑀸𑀮𑀁.

𑀲𑀩𑁆𑀩𑁂𑀲𑀁 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸. 𑀢𑀢𑁆𑀣 𑀫𑀼𑀤𑀼 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀫𑀚𑁆𑀛𑀁 𑀅𑀯𑀲𑁂𑀲𑀓𑀼𑀲𑀮𑀲𑀗𑁆𑀔𑀸𑀭𑀸, 𑀅𑀥𑀺𑀫𑀢𑁆𑀢𑀁 𑀅𑀓𑀼𑀲𑀮𑀲𑀗𑁆𑀔𑀸𑀭𑀸, 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀇𑀤𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀇𑀤𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀦𑀺𑀭𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀢𑀺𑀭𑀘𑁆𑀙𑀸𑀦𑀯𑁂𑀤𑀦𑀻𑀬𑀁, 𑀇𑀤𑀁 𑀧𑁂𑀢𑁆𑀢𑀺𑀯𑀺𑀲𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀅𑀲𑀼𑀭𑀯𑁂𑀤𑀦𑀻𑀬𑀁, 𑀇𑀤𑀁 𑀤𑁂𑀯𑀯𑁂𑀤𑀦𑀻𑀬𑀁, 𑀇𑀤𑀁 𑀫𑀦𑀼𑀲𑁆𑀲𑀯𑁂𑀤𑀦𑀻𑀬𑀦𑁆𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸 𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁.

𑁬𑁨. 𑀇𑀢𑀺 𑀢𑀣𑀸 𑀲𑀫𑀸𑀤𑀺𑀦𑁆𑀦𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀸𑀦𑀁 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀫𑀸𑀥𑀻𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀇𑀤𑀁 𑀯𑁄𑀤𑀸𑀦𑀁, 𑀇𑀤𑀁 𑀯𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀏𑀯𑀁 𑀯𑁄𑀤𑀸𑀬𑀢𑀺, 𑀏𑀯𑀁 𑀯𑀼𑀝𑁆𑀞𑀳𑀢𑀻𑀢𑀺 𑀜𑀸𑀡𑀁 𑀅𑀦𑀸𑀯𑀭𑀡𑀁.

𑀢𑀢𑁆𑀣 ¶ 𑀓𑀢𑀺 𑀛𑀸𑀦𑀸𑀦𑀺? 𑀘𑀢𑁆𑀢𑀸𑀭𑀺 ¶ 𑀛𑀸𑀦𑀸𑀦𑀺. 𑀓𑀢𑀺 𑀯𑀺𑀫𑁄𑀓𑁆𑀔𑀸? 𑀏𑀓𑀸𑀤𑀲 𑀘 𑀅𑀝𑁆𑀞 𑀘 𑀲𑀢𑁆𑀢 𑀘 𑀢𑀬𑁄 𑀘 𑀤𑁆𑀯𑁂 𑀘. 𑀓𑀢𑀺 𑀲𑀫𑀸𑀥𑀻? 𑀢𑀬𑁄 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺. 𑀓𑀢𑀺 𑀲𑀫𑀸𑀧𑀢𑁆𑀢𑀺𑀬𑁄? 𑀧𑀜𑁆𑀘 𑀲𑀫𑀸𑀧𑀢𑁆𑀢𑀺𑀬𑁄 𑁋 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀯𑀺𑀪𑀽𑀢𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 [𑀯𑀺𑀪𑀽𑀢𑀲𑀫𑀸𑀧𑀢𑁆𑀢𑀺 (𑀲𑀻. 𑀓.)] 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀲𑀁𑀓𑀺𑀮𑁂𑀲𑁄? 𑀧𑀞𑀫𑀚𑁆𑀛𑀸𑀦𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀁𑀓𑀺𑀮𑁂𑀲𑁄. 𑀬𑁂 𑀘 𑀓𑀼𑀓𑁆𑀓𑀼𑀝𑀛𑀸𑀬𑀻 𑀤𑁆𑀯𑁂 𑀧𑀞𑀫𑀓𑀸 𑀬𑁄 𑀯𑀸 𑀧𑀦 𑀓𑁄𑀘𑀺 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀢𑀢𑁆𑀣 𑀓𑀢𑀫𑀁 ¶ 𑀯𑁄𑀤𑀸𑀦𑀁, 𑀦𑀻𑀯𑀭𑀡𑀧𑀸𑀭𑀺𑀲𑀼𑀤𑁆𑀥𑀺, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀬𑁂 𑀘 𑀓𑀼𑀓𑁆𑀓𑀼𑀝𑀛𑀸𑀬𑀻 𑀤𑁆𑀯𑁂 𑀧𑀘𑁆𑀙𑀺𑀫𑀓𑀸 𑀬𑁄 𑀯𑀸 𑀧𑀦 𑀓𑁄𑀘𑀺 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀇𑀤𑀁 𑀯𑁄𑀤𑀸𑀦𑀁. 𑀢𑀢𑁆𑀣 𑀓𑀢𑀫𑀁 𑀯𑀼𑀝𑁆𑀞𑀸𑀦𑀁? 𑀬𑀁 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀁, 𑀇𑀤𑀁 𑀯𑀼𑀝𑁆𑀞𑀸𑀦𑀁. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑁂𑀲𑀁 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀁 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁.

𑁬𑁩. 𑀇𑀢𑀺 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲 𑀢𑀬𑁄 𑀥𑀫𑁆𑀫𑀸 𑀧𑀭𑀺𑀯𑀸𑀭𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀯𑀻𑀭𑀺𑀬𑀫𑀺𑀢𑀺, 𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀻𑀭𑀺𑀬𑀯𑀲𑁂𑀦 𑀩𑀮𑀸𑀦𑀺 𑀪𑀯𑀦𑁆𑀢𑀺, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀺, 𑀇𑀢𑀺 𑀢𑁂𑀲𑀁 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸 𑀅𑀬𑀁 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀬𑀁 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑁄 𑀅𑀬𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀑𑀯𑀤𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦 𑀑𑀯𑀤𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀯𑀺𑀢𑁆𑀣𑀸𑀭𑁂𑀦 𑀑𑀯𑀤𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀼𑀤𑀼𑀓𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀫𑀼𑀤𑀼𑀢𑀺𑀓𑁆𑀔𑀥𑀫𑁆𑀫𑀤𑁂𑀲𑀦𑀁 ¶ 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀢𑀺𑀓𑁆𑀔𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀫𑀣𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀁 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀯𑀺𑀧𑀲𑁆𑀲𑀦𑀁 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀭𑀡𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺.

𑀬𑀁 ¶ 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀅𑀬𑀁 𑀇𑀫𑀁 𑀪𑀽𑀫𑀺𑀁 𑀪𑀸𑀯𑀦𑀜𑁆𑀘 𑀕𑀢𑁄, 𑀇𑀫𑀸𑀬 𑀯𑁂𑀮𑀸𑀬 𑀇𑀫𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀏𑀯𑀁 𑀥𑀸𑀢𑀼𑀓𑁄 𑀘𑀸𑀬𑀁 𑀅𑀬𑀁 𑀘𑀲𑁆𑀲 𑀆𑀲𑀬𑁄 𑀅𑀬𑀜𑁆𑀘 𑀅𑀦𑀼𑀲𑀬𑁄 𑀇𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸 𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑀢𑁆𑀣 𑀬𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂. 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 ¶ 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 ¶ 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺, 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

𑁬𑁪. 𑀢𑀢𑁆𑀣 𑀲𑀕𑁆𑀕𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀅𑀧𑀸𑀬𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀮𑁄𑀪𑀸𑀤𑀬𑁄 𑀉𑀲𑁆𑀲𑀦𑁆𑀦𑀸 𑀅𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀮𑁄𑀪𑀸𑀤𑀬𑁄 𑀉𑀲𑁆𑀲𑀦𑁆𑀦𑀸 𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀬𑁂 𑀯𑀸 𑀧𑀦 𑀉𑀲𑁆𑀲𑀦𑁆𑀦𑀸 𑀬𑁂 𑀯𑀸 𑀧𑀦 𑀫𑀦𑁆𑀤𑀸 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑀘𑀺𑀢𑀸𑀦𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀼𑀧𑀘𑀺𑀢𑀸𑀦𑀺 𑀅𑀫𑀼𑀓𑀸𑀬 𑀯𑀸 𑀓𑀧𑁆𑀧𑀓𑁄𑀝𑀺𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀢𑁂 𑀯𑀸 𑀓𑀧𑁆𑀧𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀉𑀧𑀟𑁆𑀠𑀓𑀧𑁆𑀧𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀉𑀧𑀟𑁆𑀠𑀲𑀁𑀯𑀘𑁆𑀙𑀭𑁂 𑀯𑀸 𑀫𑀸𑀲𑁂 𑀯𑀸 𑀧𑀓𑁆𑀔𑁂 𑀯𑀸 𑀤𑀺𑀯𑀲𑁂 𑀯𑀸 𑀫𑀼𑀳𑀼𑀢𑁆𑀢𑁂 𑀯𑀸 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀯𑀸 𑀧𑀲𑀸𑀤𑁂𑀦 𑀯𑀸𑀢𑀺. 𑀢𑀁 𑀢𑀁 𑀪𑀯𑀁 𑀪𑀕𑀯𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀲𑁂𑀲𑀁 𑀚𑀸𑀦𑀸𑀢𑀺, 𑀢𑀢𑁆𑀣 𑀬𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀢𑀢𑁆𑀣 𑀲𑀕𑁆𑀕𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀅𑀧𑀸𑀬𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀫𑀼𑀓𑀸𑀬 𑀓𑀧𑁆𑀧𑀓𑁄𑀝𑀺𑀬𑀁 𑀉𑀧𑀘𑀺𑀢𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀳𑀲𑁆𑀲𑁂 𑀯𑀸 ¶ 𑀓𑀧𑁆𑀧𑀲𑀢𑁂 𑀯𑀸 𑀓𑀧𑁆𑀧𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀉𑀧𑀟𑁆𑀠𑀓𑀧𑁆𑀧𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀉𑀧𑀟𑁆𑀠𑀲𑀁𑀯𑀘𑁆𑀙𑀭𑁂 𑀯𑀸 𑀫𑀸𑀲𑁂 𑀯𑀸 𑀧𑀓𑁆𑀔𑁂 𑀯𑀸 𑀤𑀺𑀯𑀲𑁂 𑀯𑀸 𑀫𑀼𑀳𑀼𑀢𑁆𑀢𑁂 𑀯𑀸 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀯𑀸 𑀧𑀲𑀸𑀤𑁂𑀦 𑀯𑀸𑀢𑀺. 𑀇𑀫𑀸𑀦𑀺 𑀪𑀕𑀯𑀢𑁄 𑀤𑁆𑀯𑁂 𑀜𑀸𑀡𑀸𑀦𑀺 𑁋 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼 𑀘 𑀅𑀝𑁆𑀞𑀫𑀁 𑀦𑀯𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑀢𑁆𑀣 𑀬𑀁 𑀲𑀩𑁆𑀩𑀜𑁆𑀜𑀼𑀢𑀸 𑀧𑀢𑁆𑀢𑀸 𑀯𑀺𑀤𑀺𑀢𑀸 𑀲𑀩𑁆𑀩𑀥𑀫𑁆𑀫𑀸 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀦𑀺𑀳𑀢𑁄 𑀫𑀸𑀭𑁄 𑀩𑁄𑀥𑀺𑀫𑀽𑀮𑁂, 𑀇𑀤𑀁 𑀪𑀕𑀯𑀢𑁄 𑀤𑀲𑀫𑀁 𑀩𑀮𑀁 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀬𑀁 𑀜𑀸𑀡𑀁. 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁩. 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄

𑁬𑁫.

𑀢𑀢𑁆𑀣 ¶ 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺.

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀯𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀯𑀺𑀳𑀭𑀦𑁆𑀢𑁄 𑀉𑀤𑀬𑀩𑁆𑀩𑀬𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑀦𑁆𑀢𑁄 𑀲𑀩𑁆𑀩𑀸𑀦𑀺 𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀪𑀬𑀸𑀦𑀺 𑀲𑀫𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀻𑀢𑀺.

𑀦𑀺𑀬𑀼𑀢𑁆𑀢𑁄 𑀬𑀼𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄

𑁬𑁬. 𑀢𑀢𑁆𑀣 ¶ ¶ 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀁. ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁. ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬’’𑀦𑁆𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸 𑀧𑀤𑀝𑁆𑀞𑀸𑀦𑀁. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽’’𑀢𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦𑀁.

𑀦𑀺𑀬𑀼𑀢𑁆𑀢𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁫. 𑀮𑀓𑁆𑀔𑀡𑀳𑀸𑀭𑀲𑀫𑁆𑀧𑀸𑀢𑁄

𑁬𑁭. 𑀢𑀢𑁆𑀣 ¶ 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑁂 𑀕𑀳𑀺𑀢𑁂 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀕𑀳𑀺𑀢𑁄 𑀪𑀯𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑁄 𑀳𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀢𑁄 𑀲𑀫𑁆𑀫𑀸𑀯𑀸𑀘𑀸 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀸𑀘𑀸𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀆𑀚𑀻𑀯𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀢𑁄 𑀲𑀫𑁆𑀫𑀸𑀲𑀢𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀢𑀺𑀢𑁄 𑀲𑀫𑁆𑀫𑀸𑀲𑀫𑀸𑀥𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀪𑀯𑀢𑀺.

𑀦𑀺𑀬𑀼𑀢𑁆𑀢𑁄 𑀮𑀓𑁆𑀔𑀡𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑀫𑁆𑀧𑀸𑀢𑁄

𑁬𑁮. 𑀢𑀢𑁆𑀣 ¶ 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑀲𑀫𑁆𑀧𑀸𑀢𑁄.

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀭𑀓𑁆𑀔𑀺𑀢𑀁 𑀧𑀭𑀺𑀧𑀸𑀮𑀻𑀬𑀢𑀻𑀢𑀺 𑀏𑀲𑀸 𑀦𑀺𑀭𑀼𑀢𑁆𑀢𑀺. 𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀤𑀼𑀕𑁆𑀕𑀢𑀻𑀳𑀺 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀥𑀫𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀓𑁄𑀓𑀸𑀮𑀺𑀓𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 ¶ 𑀣𑁂𑀭𑁂𑀲𑀼 𑀘𑀺𑀢𑁆𑀢𑀁 𑀧𑀤𑁄𑀲𑀬𑀺𑀢𑁆𑀯𑀸 𑀫𑀳𑀸𑀧𑀤𑀼𑀫𑀦𑀺𑀭𑀬𑁂 𑀉𑀧𑀧𑀦𑁆𑀦𑁄. 𑀪𑀕𑀯𑀸 𑀘 𑀲𑀢𑀺𑀆𑀭𑀓𑁆𑀔𑁂𑀦 𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑁄, 𑀲𑀼𑀢𑁆𑀢𑀫𑁆𑀳𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀬𑀸 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁭. 𑀆𑀯𑀝𑁆𑀝𑀳𑀸𑀭𑀲𑀫𑁆𑀧𑀸𑀢𑁄

𑁬𑁯. 𑀢𑀢𑁆𑀣 ¶ 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀲𑀫𑀣𑁄 [𑀅𑀬𑀁 𑀲𑀫𑀣𑁄 (𑀲𑀻. 𑀓.)]. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀯𑀺𑀧𑀲𑁆𑀲𑀦𑀸. ‘‘𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬’’𑀦𑁆𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽’’𑀢𑀺 𑀲𑀫𑀼𑀤𑀬𑀧𑀳𑀸𑀦𑀁. ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀦𑀺𑀭𑁄𑀥𑁄 [𑀅𑀬𑀁 𑀦𑀺𑀭𑁄𑀥𑁄 (𑀲𑀻. 𑀓.)]. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺.

𑀦𑀺𑀬𑀼𑀢𑁆𑀢𑁄 𑀆𑀯𑀝𑁆𑀝𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁮. 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄

𑁭𑁦. 𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. 𑀓𑀼𑀲𑀮𑀧𑀓𑁆𑀔𑁄 𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀅𑀓𑀼𑀲𑀮𑀧𑀓𑁆𑀔𑁄 𑀅𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄.

𑀦𑀺𑀬𑀼𑀢𑁆𑀢𑁄 𑀯𑀺𑀪𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑁯. 𑀧𑀭𑀺𑀯𑀢𑁆𑀢𑀦𑀳𑀸𑀭𑀲𑀫𑁆𑀧𑀸𑀢𑁄

𑁭𑁧. 𑀢𑀢𑁆𑀣 ¶ 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀪𑀸𑀯𑀺𑀢𑀸𑀬 𑀦𑀺𑀭𑁄𑀥𑁄 𑀨𑀮𑀁, 𑀧𑀭𑀺𑀜𑁆𑀜𑀸𑀢𑀁 𑀤𑀼𑀓𑁆𑀔𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀧𑀝𑀺𑀧𑀓𑁆𑀔𑁂𑀦.

𑀦𑀺𑀬𑀼𑀢𑁆𑀢𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁦. 𑀯𑁂𑀯𑀘𑀦𑀳𑀸𑀭𑀲𑀫𑁆𑀧𑀸𑀢𑁄

𑁭𑁨. 𑀢𑀢𑁆𑀣 ¶ ¶ 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀘𑀺𑀢𑁆𑀢𑀁 𑀫𑀦𑁄 𑀯𑀺𑀜𑁆𑀜𑀸𑀡𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑀸𑀬𑀢𑀦𑀁 𑀯𑀺𑀚𑀸𑀦𑀦𑀸 𑀯𑀺𑀚𑀸𑀦𑀺𑀢𑀢𑁆𑀢𑀁, 𑀇𑀤𑀁 𑀯𑁂𑀯𑀘𑀦𑀁. ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄, 𑀇𑀤𑀁 𑀯𑁂𑀯𑀘𑀦𑀁. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀔𑀕𑁆𑀕𑁄 𑀧𑀜𑁆𑀜𑀸𑀭𑀢𑀦𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀧𑀢𑁄𑀤𑁄 𑀧𑀜𑁆𑀜𑀸𑀧𑀸𑀲𑀸𑀤𑁄, 𑀇𑀤𑀁 𑀯𑁂𑀯𑀘𑀦𑀁.

𑀦𑀺𑀬𑀼𑀢𑁆𑀢𑁄 𑀯𑁂𑀯𑀘𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁧. 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄

𑁭𑁩. 𑀢𑀢𑁆𑀣 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀧𑀤𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀲𑀢𑀺𑀬𑀸. ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀲𑀫𑀣𑀲𑁆𑀲. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬’’𑀦𑁆𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. ‘‘𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽’’𑀢𑀺 𑀲𑀫𑀼𑀤𑀬𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀧𑀜𑁆𑀜𑀢𑁆𑀢𑀺, ‘‘𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀫𑀕𑁆𑀕𑀲𑁆𑀲.

𑀦𑀺𑀬𑀼𑀢𑁆𑀢𑁄 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑀫𑁆𑀧𑀸𑀢𑁄.

𑁧𑁨. 𑀑𑀢𑀭𑀡𑀳𑀸𑀭𑀲𑀫𑁆𑀧𑀸𑀢𑁄

𑁭𑁪. 𑀢𑀢𑁆𑀣 ¶ 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’ ¶ . ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁, 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀦 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 𑁋 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺 ¶ 𑀬𑁂𑀯 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁 𑀦𑁄 𑀘 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀦𑀺𑀬𑀼𑀢𑁆𑀢𑁄 𑀑𑀢𑀭𑀡𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁩. 𑀲𑁄𑀥𑀦𑀳𑀸𑀭𑀲𑀫𑁆𑀧𑀸𑀢𑁄

𑁭𑁫. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. 𑀬𑀢𑁆𑀣 𑀆𑀭𑀫𑁆𑀪𑁄 𑀲𑀼𑀤𑁆𑀥𑁄, 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺. 𑀬𑀢𑁆𑀣 𑀧𑀦 𑀆𑀭𑀫𑁆𑀪𑁄 𑀦 𑀲𑀼𑀤𑁆𑀥𑁄, 𑀦 𑀢𑀸𑀯 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺.

𑀦𑀺𑀬𑀼𑀢𑁆𑀢𑁄 𑀲𑁄𑀥𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑁄

𑁭𑁬. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

𑀢𑀲𑁆𑀫𑀸 ¶ 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀕𑀸𑀣𑀸. 𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀓𑀢𑁆𑀢𑀢𑀸. 𑀘𑀺𑀢𑁆𑀢𑀁 𑀫𑀦𑁄 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄𑀢𑀺 𑀏𑀓𑀢𑁆𑀢𑀢𑀸. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄 ¶ 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀏𑀓𑀢𑁆𑀢𑀢𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀬𑀁 𑀤𑀼𑀓𑁆𑀔𑁂 𑀜𑀸𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀫𑀕𑁆𑀕𑁂 𑀜𑀸𑀡𑀁 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀧𑀘𑁆𑀘𑀬𑁂 𑀜𑀸𑀡𑀁 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁, 𑀬𑀁 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀲𑀫𑀬𑁄 𑀲𑀫𑁆𑀧𑀝𑀺𑀯𑁂𑀥𑁄 𑀲𑀘𑁆𑀘𑀸𑀕𑀫𑀦𑀁, 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀦𑁆𑀢𑀺 𑀏𑀓𑀢𑁆𑀢𑀢𑀸, 𑀉𑀤𑀬𑁂𑀦 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀏𑀯𑀁 𑀲𑀩𑁆𑀩𑀁 𑀲𑀫𑀼𑀤𑀬𑁄 𑀪𑀯𑀢𑀺. 𑀯𑀬𑁂𑀦 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁 𑀦𑀺𑀭𑁄𑀥𑁄 𑀳𑁄𑀢𑀺, 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀽𑀢𑀺 𑀏𑀓𑀢𑁆𑀢𑀢𑀸, 𑀣𑀺𑀦𑀁 𑀦𑀸𑀫 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀦𑀺𑀬𑀢𑀸, 𑀫𑀺𑀤𑁆𑀥𑀁 𑀦𑀸𑀫 𑀬𑀁 𑀓𑀸𑀬𑀲𑁆𑀲 𑀮𑀻𑀦𑀢𑁆𑀢𑀁, 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂𑀢𑀺 𑀏𑀓𑀢𑁆𑀢𑀢𑀸, 𑀤𑁂𑀯𑀫𑀦𑀼𑀲𑁆𑀲𑁂 𑀯𑀸 𑀉𑀧𑀦𑀺𑀥𑀸𑀬 ¶ 𑀅𑀧𑀸𑀬𑀸 𑀤𑀼𑀕𑁆𑀕𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀉𑀧𑀦𑀺𑀥𑀸𑀬 𑀲𑀩𑁆𑀩𑀸 𑀉𑀧𑀧𑀢𑁆𑀢𑀺𑀬𑁄 𑀤𑀼𑀕𑁆𑀕𑀢𑀺, 𑀅𑀬𑀁 𑀯𑁂𑀫𑀢𑁆𑀢𑀢𑀸.

𑀦𑀺𑀬𑀼𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁫. 𑀧𑀭𑀺𑀓𑁆𑀔𑀸𑀭𑀳𑀸𑀭𑀲𑀫𑁆𑀧𑀸𑀢𑁄

𑁭𑁭. 𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄’’𑀢𑀺 𑀕𑀸𑀣𑀸. 𑀅𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀓𑁆𑀔𑀸𑀭𑁄.

𑀦𑀺𑀬𑀼𑀢𑁆𑀢𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑀲𑀫𑁆𑀧𑀸𑀢𑁄.

𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀲𑀫𑁆𑀧𑀸𑀢𑁄

𑁭𑁮. 𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑀲𑀫𑁆𑀧𑀸𑀢𑁄?

‘‘𑀢𑀲𑁆𑀫𑀸 ¶ 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄, 𑀜𑀢𑁆𑀯𑀸𑀦 𑀉𑀤𑀬𑀩𑁆𑀩𑀬𑀁;

𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺.

𑀢𑀲𑁆𑀫𑀸 ¶ 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀘𑀺𑀢𑁆𑀢𑁂 𑀭𑀓𑁆𑀔𑀺𑀢𑁂 𑀢𑀁 𑀭𑀓𑁆𑀔𑀺𑀢𑀁 𑀪𑀯𑀢𑀺 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀪𑀸𑀯𑀺𑀢𑀸𑀬 𑀪𑀸𑀯𑀺𑀢𑁄 𑀪𑀯𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀓𑁂𑀦 𑀓𑀸𑀭𑀡𑁂𑀦? 𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑁄 𑀳𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀢𑁄 𑀲𑀫𑁆𑀫𑀸𑀯𑀸𑀘𑀸 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀸𑀘𑀸𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀆𑀚𑀻𑀯𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀢𑁄 𑀲𑀫𑁆𑀫𑀸𑀲𑀢𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀢𑀺𑀢𑁄 𑀲𑀫𑁆𑀫𑀸𑀲𑀫𑀸𑀥𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀪𑀯𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀢𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀪𑀯𑀢𑀺. 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑁄 𑀧𑀼𑀕𑁆𑀕𑀮𑁄 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀦𑀺𑀬𑀼𑀢𑁆𑀢𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀢𑁂𑀦𑀸𑀳 ¶ 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋

‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀮𑁄𑀘𑀦𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀳𑀸𑀭𑀲𑀫𑁆𑀧𑀸𑀢𑁄.

𑀦𑀬𑀲𑀫𑀼𑀝𑁆𑀞𑀸𑀦𑀁

𑁭𑁯. 𑀢𑀢𑁆𑀣 𑀓𑀢𑀫𑀁 𑀦𑀬𑀲𑀫𑀼𑀝𑁆𑀞𑀸𑀦𑀁? 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬𑀘 𑀪𑀯𑀢𑀡𑁆𑀳𑀸𑀬 𑀘, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀁. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀲𑀁𑀬𑀼𑀢𑁆𑀢𑀸 [𑀅𑀯𑀺𑀚𑁆𑀚𑀸𑀬 𑀲𑀁𑀬𑀼𑀢𑁆𑀢𑀸 (𑀲𑀻. 𑀓.)] 𑀅𑀯𑀺𑀚𑁆𑀚𑀸𑀧𑀓𑁆𑀔𑁂𑀦 𑀯𑀺𑀘𑀭𑀦𑁆𑀢𑀺, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑀸𑀢𑀺. 𑀢𑀡𑁆𑀳𑀸𑀲𑀁𑀬𑁄𑀚𑀦𑀸 𑀲𑀢𑁆𑀢𑀸 𑀢𑀡𑁆𑀳𑀸𑀲𑀁𑀬𑀼𑀢𑁆𑀢𑀸 𑀢𑀡𑁆𑀳𑀸𑀧𑀓𑁆𑀔𑁂𑀦 𑀯𑀺𑀘𑀭𑀦𑁆𑀢𑀺, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀢𑀸𑀢𑀺. 𑀤𑀺𑀝𑁆𑀞𑀺𑀘𑀭𑀺𑀢𑀸 ¶ 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑀡𑁆𑀳𑀸𑀘𑀭𑀺𑀢𑀸 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺.

𑀢𑀢𑁆𑀣 ¶ 𑀓𑀺𑀁𑀓𑀸𑀭𑀡𑀁 𑀬𑀁 𑀤𑀺𑀝𑁆𑀞𑀺𑀘𑀭𑀺𑀢𑀸 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀡𑁆𑀳𑀸𑀘𑀭𑀺𑀢𑀸 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀩𑁆𑀩𑀚𑀺𑀢𑀸 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺? 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀺 𑀲𑀘𑁆𑀘𑀯𑀯𑀢𑁆𑀣𑀸𑀦𑀁, 𑀓𑀼𑀢𑁄 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑁄𑀲𑀮𑁆𑀮𑀁 𑀯𑀸 𑀉𑀧𑀲𑀫𑀲𑀼𑀔𑀧𑁆𑀧𑀢𑁆𑀢𑀺 𑀯𑀸! 𑀢𑁂 𑀉𑀧𑀲𑀫𑀲𑀼𑀔𑀲𑁆𑀲 𑀅𑀦𑀪𑀺𑀜𑁆𑀜𑀸 𑀯𑀺𑀧𑀭𑀻𑀢𑀘𑁂𑀢𑀸 𑀏𑀯𑀫𑀸𑀳𑀁𑀲𑀼 ‘‘𑀦𑀢𑁆𑀣𑀺 𑀲𑀼𑀔𑁂𑀦 𑀲𑀼𑀔𑀁, 𑀤𑀼𑀓𑁆𑀔𑁂𑀦 𑀦𑀸𑀫 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺, 𑀲𑁄 𑀮𑁄𑀓𑀁 𑀯𑀟𑁆𑀠𑀬𑀢𑀺, 𑀬𑁄 𑀮𑁄𑀓𑀁 𑀯𑀟𑁆𑀠𑀬𑀢𑀺, 𑀲𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀻𑀢𑀺 𑀢𑁂 𑀏𑀯𑀁𑀲𑀜𑁆𑀜𑀻 𑀏𑀯𑀁𑀤𑀺𑀝𑁆𑀞𑀻 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀧𑀢𑁆𑀣𑀬𑀫𑀸𑀦𑀸 𑀓𑀸𑀫𑁂𑀲𑀼 𑀧𑀼𑀜𑁆𑀜𑀲𑀜𑁆𑀜𑀻 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀘 𑀯𑀺𑀳𑀭𑀦𑁆𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀘, 𑀢𑁂 𑀢𑀤𑀪𑀺𑀜𑁆𑀜𑀸 𑀲𑀦𑁆𑀢𑀸 𑀭𑁄𑀕𑀫𑁂𑀯 𑀯𑀟𑁆𑀠𑀬𑀦𑁆𑀢𑀺, 𑀕𑀡𑁆𑀟𑀫𑁂𑀯 𑀯𑀟𑁆𑀠𑀬𑀦𑁆𑀢𑀺, 𑀲𑀮𑁆𑀮𑀫𑁂𑀯 𑀯𑀟𑁆𑀠𑀬𑀦𑁆𑀢𑀺, 𑀢𑁂 𑀭𑁄𑀕𑀸𑀪𑀺𑀢𑀼𑀦𑁆𑀦𑀸 𑀕𑀡𑁆𑀟𑀧𑀝𑀺𑀧𑀻𑀴𑀺𑀢𑀸 𑀲𑀮𑁆𑀮𑀸𑀦𑀼𑀯𑀺𑀤𑁆𑀥𑀸 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑀸𑀲𑀼𑀭𑁂𑀲𑀼 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀸𑀦𑀺 𑀓𑀭𑁄𑀦𑁆𑀢𑀸 𑀉𑀕𑁆𑀖𑀸𑀢𑀦𑀺𑀕𑁆𑀖𑀸𑀢𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸 𑀭𑁄𑀕𑀕𑀡𑁆𑀟𑀲𑀮𑁆𑀮𑀪𑁂𑀲𑀚𑁆𑀚𑀁 𑀦 𑀯𑀺𑀦𑁆𑀤𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘 𑀲𑀁𑀓𑀺𑀮𑁂𑀲𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀯𑁄𑀤𑀸𑀦𑀁. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘 𑀭𑁄𑀕𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀭𑁄𑀕𑀦𑀺𑀕𑁆𑀖𑀸𑀢𑀓𑀪𑁂𑀲𑀚𑁆𑀚𑀁. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘 𑀕𑀡𑁆𑀟𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀕𑀡𑁆𑀟𑀦𑀺𑀕𑁆𑀖𑀸𑀢𑀓𑀪𑁂𑀲𑀚𑁆𑀚𑀁 ¶ . 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀘 𑀲𑀮𑁆𑀮𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀲𑀮𑁆𑀮𑀼𑀤𑁆𑀥𑀭𑀡𑀪𑁂𑀲𑀚𑁆𑀚𑀁.

𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀤𑀼𑀓𑁆𑀔𑀁, 𑀢𑀤𑀪𑀺𑀲𑀗𑁆𑀕𑁄 𑀢𑀡𑁆𑀳𑀸 𑀲𑀫𑀼𑀤𑀬𑁄, 𑀢𑀡𑁆𑀳𑀸𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀇𑀫𑀸𑀦𑀺 ¶ 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄, 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄.

𑁮𑁦. 𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑀸 𑀭𑀽𑀧𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀡𑁆𑀳𑀸𑀘𑀭𑀺𑀢𑀸 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, 𑀯𑁂𑀤𑀦𑀸𑀯𑀦𑁆𑀢𑀁…𑀧𑁂… 𑀲𑀜𑁆𑀜𑀸𑀯𑀦𑁆𑀢𑀁…𑀧𑁂… 𑀲𑀗𑁆𑀔𑀸𑀭𑀯𑀦𑁆𑀢𑀁…𑀧𑁂… 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺.

𑀢𑀲𑁆𑀲𑀸 𑀧𑀝𑀺𑀧𑀓𑁆𑀔𑁄 𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀦𑁆𑀯𑀸𑀬𑀺𑀓𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀢𑁂 𑀢𑀬𑁄 𑀔𑀦𑁆𑀥𑀸 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀲𑀓𑁆𑀓𑀸𑀬𑁄 𑀤𑀼𑀓𑁆𑀔𑀁, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 ¶ 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄, 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄.

𑀢𑀢𑁆𑀣 𑀬𑁂 𑀭𑀽𑀧𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀉𑀘𑁆𑀙𑁂𑀤𑀯𑀸𑀤𑀺𑀦𑁄’’𑀢𑀺. 𑀬𑁂 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑁂 𑀯𑁂𑀤𑀦𑀸𑀯𑀦𑁆𑀢𑀁…𑀧𑁂… 𑀬𑁂 𑀲𑀜𑁆𑀜𑀸𑀯𑀦𑁆𑀢𑀁…𑀧𑁂… 𑀬𑁂 𑀲𑀗𑁆𑀔𑀸𑀭𑀯𑀦𑁆𑀢𑀁…𑀧𑁂… 𑀬𑁂 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀲𑁆𑀲𑀢𑀯𑀸𑀤𑀺𑀦𑁄’’𑀢𑀺, 𑀢𑀢𑁆𑀣 𑀉𑀘𑁆𑀙𑁂𑀤𑀲𑀲𑁆𑀲𑀢𑀯𑀸𑀤𑀸 𑀉𑀪𑁄 𑀅𑀦𑁆𑀢𑀸, 𑀅𑀬𑀁 𑀲𑀁𑀲𑀸𑀭𑀧𑀯𑀢𑁆𑀢𑀺. 𑀢𑀲𑁆𑀲 ¶ 𑀧𑀝𑀺𑀧𑀓𑁆𑀔𑁄 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀅𑀬𑀁 𑀲𑀁𑀲𑀸𑀭𑀦𑀺𑀯𑀢𑁆𑀢𑀺. 𑀢𑀢𑁆𑀣 𑀧𑀯𑀢𑁆𑀢𑀺 𑀤𑀼𑀓𑁆𑀔𑀁, 𑀢𑀤𑀪𑀺𑀲𑀗𑁆𑀕𑁄 𑀢𑀡𑁆𑀳𑀸 𑀲𑀫𑀼𑀤𑀬𑁄, 𑀢𑀡𑁆𑀳𑀸𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 ¶ 𑀧𑀝𑀺𑀧𑀤𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄, 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄.

𑀢𑀢𑁆𑀣 𑀉𑀘𑁆𑀙𑁂𑀤𑀲𑀲𑁆𑀲𑀢𑀁 𑀲𑀫𑀸𑀲𑀢𑁄 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑁄𑀳𑀚𑀸𑀮𑀁 𑀅𑀦𑀸𑀤𑀺𑀅𑀦𑀺𑀥𑀦𑀧𑁆𑀧𑀯𑀢𑁆𑀢𑀁. 𑀢𑁂𑀘𑀢𑁆𑀢𑀸𑀮𑀻𑀲𑀁 [𑀢𑁂𑀢𑀸𑀮𑀻𑀲𑀁 (𑀲𑀻.)] 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀜𑀸𑀡𑀯𑀚𑀺𑀭𑀁 𑀫𑁄𑀳𑀚𑀸𑀮𑀧𑁆𑀧𑀤𑀸𑀮𑀦𑀁. 𑀢𑀢𑁆𑀣 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀚𑀸𑀮𑀁 𑀪𑀯𑀢𑀡𑁆𑀳𑀸, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑀘 𑀪𑀯𑀢𑀡𑁆𑀳𑀸𑀬 𑀘𑀸’’𑀢𑀺.

𑁮𑁧. 𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑁄 𑀅𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀮𑁆𑀮𑁂𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀺 𑀪𑀯𑀢𑀺 𑀲𑀮𑁆𑀮𑁂𑀔𑁂 𑀢𑀺𑀩𑁆𑀩𑀕𑀸𑀭𑀯𑁄. 𑀢𑀡𑁆𑀳𑀸𑀘𑀭𑀺𑀢𑁄 𑀅𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀺𑀓𑁆𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀺 𑀪𑀯𑀢𑀺 𑀲𑀺𑀓𑁆𑀔𑀸𑀬 𑀢𑀺𑀩𑁆𑀩𑀕𑀸𑀭𑀯𑁄. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀪𑀯𑀢𑀺. 𑀢𑀡𑁆𑀳𑀸𑀘𑀭𑀺𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀪𑀯𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺. 𑀢𑀡𑁆𑀳𑀸𑀘𑀭𑀺𑀢𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺.

𑀢𑀢𑁆𑀣 𑀓𑀺𑀁𑀓𑀸𑀭𑀡𑀁, 𑀬𑀁 𑀢𑀡𑁆𑀳𑀸𑀘𑀭𑀺𑀢𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀺, 𑀢𑀲𑁆𑀲 𑀳𑀺 𑀓𑀸𑀫𑀸 𑀅𑀧𑀭𑀺𑀘𑁆𑀘𑀢𑁆𑀢𑀸 𑀪𑀯𑀦𑁆𑀢𑀺, 𑀲𑁄 ¶ 𑀓𑀸𑀫𑁂𑀳𑀺 𑀯𑀺𑀯𑁂𑀘𑀺𑀬𑀫𑀸𑀦𑁄 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀭𑀢𑀺 ¶ 𑀤𑀦𑁆𑀥𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀸𑀢𑀺? 𑀬𑁄 𑀧𑀦𑀸𑀬𑀁 𑀤𑀺𑀝𑁆𑀞𑀺𑀘𑀭𑀺𑀢𑁄 𑀅𑀬𑀁 𑀆𑀤𑀺𑀢𑁄𑀬𑁂𑀯 𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑁄 𑀪𑀯𑀢𑀺. 𑀲𑁄 𑀢𑀢𑁄 𑀯𑀺𑀯𑁂𑀘𑀺𑀬𑀫𑀸𑀦𑁄 𑀔𑀺𑀧𑁆𑀧𑀜𑁆𑀘 𑀧𑀝𑀺𑀦𑀺𑀲𑁆𑀲𑀭𑀢𑀺, 𑀔𑀺𑀧𑁆𑀧𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀸𑀢𑀺. 𑀤𑀼𑀓𑁆𑀔𑀸𑀧𑀺 𑀧𑀝𑀺𑀧𑀤𑀸 𑀤𑀼𑀯𑀺𑀥𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀘 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘. 𑀲𑀼𑀔𑀸𑀧𑀺 𑀧𑀝𑀺𑀧𑀤𑀸 𑀤𑀼𑀯𑀺𑀥𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀘 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘. 𑀲𑀢𑁆𑀢𑀸𑀧𑀺 𑀤𑀼𑀯𑀺𑀥𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀧𑀺. 𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸, 𑀢𑁂 𑀤𑀦𑁆𑀥𑀜𑁆𑀘 𑀧𑀝𑀺𑀦𑀺𑀲𑁆𑀲𑀭𑀦𑁆𑀢𑀺 𑀤𑀦𑁆𑀥𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀦𑁆𑀢𑀺. 𑀬𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸, 𑀢𑁂 𑀔𑀺𑀧𑁆𑀧𑀜𑁆𑀘 𑀧𑀝𑀺𑀦𑀺𑀲𑁆𑀲𑀭𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀥𑀫𑁆𑀫𑀁 𑀆𑀚𑀸𑀦𑀦𑁆𑀢𑀺, 𑀇𑀫𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸. 𑀬𑁂 𑀳𑀺 𑀓𑁂𑀘𑀺 𑀦𑀺𑀬𑁆𑀬𑀺𑀁𑀲𑀼 𑀯𑀸 𑀦𑀺𑀬𑁆𑀬𑀦𑁆𑀢𑀺 𑀯𑀸 𑀦𑀺𑀬𑁆𑀬𑀺𑀲𑁆𑀲𑀦𑁆𑀢𑀺 𑀯𑀸, 𑀢𑁂 𑀇𑀫𑀸𑀳𑀺 𑀏𑀯 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺. 𑀏𑀯𑀁 𑀅𑀭𑀺𑀬𑀸 𑀘𑀢𑀼𑀓𑁆𑀓𑀫𑀕𑁆𑀕𑀁 𑀧𑀜𑁆𑀜𑀸𑀧𑁂𑀦𑁆𑀢𑀺 𑀅𑀩𑀼𑀥𑀚𑀦𑀲𑁂𑀯𑀺𑀢𑀸𑀬 𑀩𑀸𑀮𑀓𑀦𑁆𑀢𑀸𑀬 𑀭𑀢𑁆𑀢𑀯𑀸𑀲𑀺𑀦𑀺𑀬𑀸 𑀦𑀦𑁆𑀤𑀺𑀬𑀸 𑀪𑀯𑀢𑀡𑁆𑀳𑀸𑀬 𑀅𑀯𑀝𑁆𑀝𑀦𑀢𑁆𑀣𑀁 [𑀆𑀯𑀝𑁆𑀝𑀦𑀢𑁆𑀣𑀁 (𑀲𑀻. 𑀓.)]. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺, 𑀢𑁂𑀦𑀸𑀳 ‘‘𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘 𑀲𑀫𑀣𑁂𑀦𑀸’’𑀢𑀺.

𑁮𑁨. 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 ¶ 𑀳𑀺 𑀬𑁂 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀢𑁂 𑀤𑀼𑀯𑀺𑀥𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸 𑁋 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀻 𑀘 𑀮𑁄𑀓𑀯𑀺𑀯𑀝𑁆𑀝𑀸𑀦𑀼𑀲𑀸𑀭𑀻 𑀘. 𑀯𑀝𑁆𑀝𑀁 𑀦𑀸𑀫 𑀲𑀁𑀲𑀸𑀭𑁄. 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁. 𑀓𑀫𑁆𑀫𑀓𑀺𑀮𑁂𑀲𑀸 𑀳𑁂𑀢𑀼 𑀲𑀁𑀲𑀸𑀭𑀲𑁆𑀲. 𑀢𑀢𑁆𑀣 𑀓𑀫𑁆𑀫𑀁 𑀘𑁂𑀢𑀦𑀸 𑀘𑁂𑀢𑀲𑀺𑀓𑀜𑁆𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑀁 𑀓𑀣𑀁 𑀤𑀝𑁆𑀞𑀩𑁆𑀩𑀁? 𑀉𑀧𑀘𑀬𑁂𑀦 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀢𑁂 𑀓𑀢𑁆𑀣 𑀤𑀝𑁆𑀞𑀩𑁆𑀩𑀸? 𑀤𑀲 𑀯𑀢𑁆𑀣𑀼𑀓𑁂 𑀓𑀺𑀮𑁂𑀲𑀧𑀼𑀜𑁆𑀚𑁂. 𑀓𑀢𑀫𑀸𑀦𑀺 ¶ 𑀤𑀲 𑀯𑀢𑁆𑀣𑀽𑀦𑀺? 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀲𑀮𑁆𑀮𑀸, 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺. 𑀧𑀞𑀫𑁂 𑀆𑀳𑀸𑀭𑁂 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄, 𑀤𑀼𑀢𑀺𑀬𑁂 𑀆𑀳𑀸𑀭𑁂 𑀤𑀼𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀢𑀢𑀺𑀬𑁂 𑀆𑀳𑀸𑀭𑁂 𑀢𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀘𑀢𑀼𑀢𑁆𑀣𑁂 𑀆𑀳𑀸𑀭𑁂 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄. 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀧𑀞𑀫𑀁 𑀉𑀧𑀸𑀤𑀸𑀦𑀁. 𑀤𑀼𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀤𑀼𑀢𑀺𑀬𑀁 𑀉𑀧𑀸𑀤𑀸𑀦𑀁, 𑀢𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀢𑀢𑀺𑀬𑀁 𑀉𑀧𑀸𑀤𑀸𑀦𑀁, 𑀘𑀢𑀼𑀢𑁆𑀣𑁂 𑀯𑀺𑀧𑀮𑁆𑀮𑀸𑀲𑁂 𑀘𑀢𑀼𑀢𑁆𑀣𑀁 𑀉𑀧𑀸𑀤𑀸𑀦𑀁. 𑀧𑀞𑀫𑁂 𑀉𑀧𑀸𑀤𑀸𑀦𑁂 𑀧𑀞𑀫𑁄 𑀬𑁄𑀕𑁄, 𑀤𑀼𑀢𑀺𑀬𑁂 𑀉𑀧𑀸𑀤𑀸𑀦𑁂 𑀤𑀼𑀢𑀺𑀬𑁄 𑀬𑁄𑀕𑁄, 𑀢𑀢𑀺𑀬𑁂 𑀉𑀧𑀸𑀤𑀸𑀦𑁂 𑀢𑀢𑀺𑀬𑁄 𑀬𑁄𑀕𑁄, 𑀘𑀢𑀼𑀢𑁆𑀣𑁂 𑀉𑀧𑀸𑀤𑀸𑀦𑁂 𑀘𑀢𑀼𑀢𑁆𑀣𑁄 𑀬𑁄𑀕𑁄. 𑀧𑀞𑀫𑁂 𑀬𑁄𑀕𑁂 𑀧𑀞𑀫𑁄 𑀕𑀦𑁆𑀣𑁄, 𑀤𑀼𑀢𑀺𑀬𑁂 𑀬𑁄𑀕𑁂 𑀤𑀼𑀢𑀺𑀬𑁄 𑀕𑀦𑁆𑀣𑁄, 𑀢𑀢𑀺𑀬𑁂 𑀬𑁄𑀕𑁂 𑀢𑀢𑀺𑀬𑁄 𑀕𑀦𑁆𑀣𑁄, 𑀘𑀢𑀼𑀢𑁆𑀣𑁂 𑀬𑁄𑀕𑁂 𑀘𑀢𑀼𑀢𑁆𑀣𑁄 𑀕𑀦𑁆𑀣𑁄, 𑀧𑀞𑀫𑁂 𑀕𑀦𑁆𑀣𑁂 𑀧𑀞𑀫𑁄 𑀆𑀲𑀯𑁄, 𑀤𑀼𑀢𑀺𑀬𑁂 𑀕𑀦𑁆𑀣𑁂 𑀤𑀼𑀢𑀺𑀬𑁄 𑀆𑀲𑀯𑁄, 𑀢𑀢𑀺𑀬𑁂 𑀕𑀦𑁆𑀣𑁂 𑀢𑀢𑀺𑀬𑁄 𑀆𑀲𑀯𑁄, 𑀘𑀢𑀼𑀢𑁆𑀣𑁂 𑀕𑀦𑁆𑀣𑁂 𑀘𑀢𑀼𑀢𑁆𑀣𑁄 𑀆𑀲𑀯𑁄. 𑀧𑀞𑀫𑁂 𑀆𑀲𑀯𑁂 𑀧𑀞𑀫𑁄 𑀑𑀖𑁄, 𑀤𑀼𑀢𑀺𑀬𑁂 𑀆𑀲𑀯𑁂 𑀤𑀼𑀢𑀺𑀬𑁄 𑀑𑀖𑁄, 𑀢𑀢𑀺𑀬𑁂 𑀆𑀲𑀯𑁂 𑀢𑀢𑀺𑀬𑁄 𑀑𑀖𑁄, 𑀘𑀢𑀼𑀢𑁆𑀣𑁂 𑀆𑀲𑀯𑁂 𑀘𑀢𑀼𑀢𑁆𑀣𑁄 𑀑𑀖𑁄. 𑀧𑀞𑀫𑁂 𑀑𑀖𑁂 𑀧𑀞𑀫𑁄 𑀲𑀮𑁆𑀮𑁄, 𑀤𑀼𑀢𑀺𑀬𑁂 𑀑𑀖𑁂 𑀤𑀼𑀢𑀺𑀬𑁄 𑀲𑀮𑁆𑀮𑁄, 𑀢𑀢𑀺𑀬𑁂 𑀑𑀖𑁂 𑀢𑀢𑀺𑀬𑁄 𑀲𑀮𑁆𑀮𑁄, 𑀘𑀢𑀼𑀢𑁆𑀣𑁂 𑀑𑀖𑁂 𑀘𑀢𑀼𑀢𑁆𑀣𑁄 𑀲𑀮𑁆𑀮𑁄. 𑀧𑀞𑀫𑁂 𑀲𑀮𑁆𑀮𑁂 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀤𑀼𑀢𑀺𑀬𑁂 𑀲𑀮𑁆𑀮𑁂 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀢𑀢𑀺𑀬𑁂 𑀲𑀮𑁆𑀮𑁂 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀘𑀢𑀼𑀢𑁆𑀣𑁂 𑀲𑀮𑁆𑀮𑁂 𑀘𑀢𑀼𑀢𑁆𑀣𑀻 [𑀘𑀢𑀼𑀢𑁆𑀣𑀸 (𑀲𑀻.)] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀧𑀞𑀫𑀸𑀬𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀧𑀞𑀫𑀁 𑀅𑀕𑀢𑀺𑀕𑀫𑀦𑀁. 𑀤𑀼𑀢𑀺𑀬𑀸𑀬𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 ¶ 𑀤𑀼𑀢𑀺𑀬𑀁 𑀅𑀕𑀢𑀺𑀕𑀫𑀦𑀁. 𑀢𑀢𑀺𑀬𑀸𑀬𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀢𑀢𑀺𑀬𑀁 𑀅𑀕𑀢𑀺𑀕𑀫𑀦𑀁, 𑀘𑀢𑀼𑀢𑁆𑀣𑀺𑀬𑀁 [𑀘𑀢𑀼𑀢𑁆𑀣𑀸𑀬𑀁 (𑀲𑀻.)] 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀘𑀢𑀼𑀢𑁆𑀣𑀁 𑀅𑀕𑀢𑀺𑀕𑀫𑀦𑀁.

𑁮𑁩. 𑀢𑀢𑁆𑀣 ¶ 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀬𑁄 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀬𑁄 𑀘 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀬𑁄 𑀘 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 ¶ 𑀬𑀜𑁆𑀘 𑀓𑀸𑀫𑀼𑀧𑀸𑀤𑀸𑀦𑀁 𑀬𑀜𑁆𑀘 𑀪𑀯𑀼𑀧𑀸𑀤𑀸𑀦𑀁, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑀜𑁆𑀘 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀬𑀜𑁆𑀘 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 𑀓𑀸𑀫𑀬𑁄𑀕𑁄, 𑀬𑁄 𑀘 𑀪𑀯𑀬𑁄𑀕𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀤𑀺𑀝𑁆𑀞𑀺𑀬𑁄𑀕𑁄, 𑀬𑁄 𑀘 𑀅𑀯𑀺𑀚𑁆𑀚𑀸𑀬𑁄𑀕𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀬𑁄 𑀘 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄, 𑀬𑁄 𑀘 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 𑀓𑀸𑀫𑀸𑀲𑀯𑁄, 𑀬𑁄 𑀘 𑀪𑀯𑀸𑀲𑀯𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀤𑀺𑀝𑁆𑀞𑀸𑀲𑀯𑁄, 𑀬𑁄 𑀘 𑀅𑀯𑀺𑀚𑁆𑀚𑀸𑀲𑀯𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 𑀓𑀸𑀫𑁄𑀖𑁄, 𑀬𑁄 𑀘 𑀪𑀯𑁄𑀖𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀤𑀺𑀝𑁆𑀞𑁄𑀖𑁄, 𑀬𑁄 𑀘 𑀅𑀯𑀺𑀚𑁆𑀚𑁄𑀖𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑁄 𑀘 𑀭𑀸𑀕𑀲𑀮𑁆𑀮𑁄, 𑀬𑁄 𑀘 𑀤𑁄𑀲𑀲𑀮𑁆𑀮𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑁄 𑀘 𑀫𑀸𑀦𑀲𑀮𑁆𑀮𑁄, 𑀬𑁄 𑀘 𑀫𑁄𑀳𑀲𑀮𑁆𑀮𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑀸 𑀘 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀬𑀸 𑀘 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑀸 𑀘 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀬𑀸 𑀘 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀢𑀢𑁆𑀣 𑀬𑀜𑁆𑀘 𑀙𑀦𑁆𑀤𑀸 𑀅𑀕𑀢𑀺𑀕𑀫𑀦𑀁 𑀬𑀜𑁆𑀘 𑀤𑁄𑀲𑀸 𑀅𑀕𑀢𑀺𑀕𑀫𑀦𑀁, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸. 𑀬𑀜𑁆𑀘 𑀪𑀬𑀸 𑀅𑀕𑀢𑀺𑀕𑀫𑀦𑀁, 𑀬𑀜𑁆𑀘 𑀫𑁄𑀳𑀸 𑀅𑀕𑀢𑀺𑀕𑀫𑀦𑀁, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸.

𑁮𑁪. 𑀢𑀢𑁆𑀣 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀨𑀲𑁆𑀲𑁂 𑀆𑀳𑀸𑀭𑁂 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀯𑀺𑀜𑁆𑀜𑀸𑀡𑁂 𑀆𑀳𑀸𑀭𑁂 ‘‘𑀅𑀦𑀺𑀘𑁆𑀘𑁂 ¶ 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀆𑀳𑀸𑀭𑁂 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄. 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀓𑀸𑀫𑁂 𑀉𑀧𑀸𑀤𑀺𑀬𑀢𑀺 ¶ , 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦𑀁; 𑀤𑀼𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀅𑀦𑀸𑀕𑀢𑀁 𑀪𑀯𑀁 𑀉𑀧𑀸𑀤𑀺𑀬𑀢𑀺 ¶ , 𑀇𑀤𑀁 𑀯𑀼𑀘𑁆𑀘𑀢𑀺 𑀪𑀯𑀼𑀧𑀸𑀤𑀸𑀦𑀁; 𑀢𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀲𑀁𑀲𑀸𑀭𑀸𑀪𑀺𑀦𑀦𑁆𑀤𑀺𑀦𑀺𑀁 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁; 𑀘𑀢𑀼𑀢𑁆𑀣𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀅𑀢𑁆𑀢𑀸𑀦𑀁 𑀓𑀧𑁆𑀧𑀺𑀬𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

𑀓𑀸𑀫𑀼𑀧𑀸𑀤𑀸𑀦𑁂𑀦 𑀓𑀸𑀫𑁂𑀳𑀺 𑀲𑀁𑀬𑀼𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀬𑁄𑀕𑁄; 𑀪𑀯𑀼𑀧𑀸𑀤𑀸𑀦𑁂𑀦 𑀪𑀯𑁂𑀳𑀺 𑀲𑀁𑀬𑀼𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀬𑁄𑀕𑁄; 𑀤𑀺𑀝𑁆𑀞𑀼𑀧𑀸𑀤𑀸𑀦𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀁𑀬𑀼𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀬𑁄𑀕𑁄; 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀅𑀯𑀺𑀚𑁆𑀚𑀸𑀬 𑀲𑀁𑀬𑀼𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑁄.

𑀧𑀞𑀫𑁂 𑀬𑁄𑀕𑁂 𑀞𑀺𑀢𑁄 𑀅𑀪𑀺𑀚𑁆𑀛𑀸𑀬 𑀓𑀸𑀬𑀁 𑀕𑀦𑁆𑀣𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄; 𑀤𑀼𑀢𑀺𑀬𑁂 𑀬𑁄𑀕𑁂 𑀞𑀺𑀢𑁄 𑀩𑁆𑀬𑀸𑀧𑀸𑀤𑁂𑀦 𑀓𑀸𑀬𑀁 𑀕𑀦𑁆𑀣𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄; 𑀢𑀢𑀺𑀬𑁂 𑀬𑁄𑀕𑁂 𑀞𑀺𑀢𑁄 𑀧𑀭𑀸𑀫𑀸𑀲𑁂𑀦 𑀓𑀸𑀬𑀁 𑀕𑀦𑁆𑀣𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄; 𑀘𑀢𑀼𑀢𑁆𑀣𑁂 𑀬𑁄𑀕𑁂 𑀞𑀺𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁂𑀦 𑀓𑀸𑀬𑀁 𑀕𑀦𑁆𑀣𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄.

𑀢𑀲𑁆𑀲 𑀏𑀯𑀁𑀕𑀦𑁆𑀣𑀺𑀢𑀸 𑀓𑀺𑀮𑁂𑀲𑀸 𑀆𑀲𑀯𑀦𑁆𑀢𑀺. 𑀓𑀼𑀢𑁄 𑀘 𑀯𑀼𑀘𑁆𑀘𑀢𑀺 𑀆𑀲𑀯𑀦𑁆𑀢𑀻𑀢𑀺? 𑀅𑀦𑀼𑀲𑀬𑀢𑁄 𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀢𑁄 𑀯𑀸. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀓𑀸𑀫𑀸𑀲𑀯𑁄, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀪𑀯𑀸𑀲𑀯𑁄, 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀤𑀺𑀝𑁆𑀞𑀸𑀲𑀯𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀅𑀯𑀺𑀚𑁆𑀚𑀸𑀲𑀯𑁄.

𑀢𑀲𑁆𑀲 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑁂𑀧𑀼𑀮𑁆𑀮𑀁 𑀕𑀢𑀸 𑀑𑀖𑀸 𑀪𑀯𑀦𑁆𑀢𑀺. 𑀇𑀢𑀺 𑀆𑀲𑀯𑀯𑁂𑀧𑀼𑀮𑁆𑀮𑀸 𑀑𑀖𑀯𑁂𑀧𑀼𑀮𑁆𑀮𑀁. 𑀢𑀢𑁆𑀣 𑀓𑀸𑀫𑀸𑀲𑀯𑁂𑀦 𑀓𑀸𑀫𑁄𑀖𑁄, 𑀪𑀯𑀸𑀲𑀯𑁂𑀦 𑀪𑀯𑁄𑀖𑁄, 𑀤𑀺𑀝𑁆𑀞𑀸𑀲𑀯𑁂𑀦 𑀤𑀺𑀝𑁆𑀞𑁄𑀖𑁄, 𑀅𑀯𑀺𑀚𑁆𑀚𑀸𑀲𑀯𑁂𑀦 𑀅𑀯𑀺𑀚𑁆𑀚𑁄𑀖𑁄.

𑀢𑀲𑁆𑀲 𑀇𑀫𑁂 𑀘𑀢𑁆𑀢𑀸𑀭𑁄 𑀑𑀖𑀸 𑀅𑀦𑀼𑀲𑀬𑀲𑀳𑀕𑀢𑀸 𑀅𑀚𑁆𑀛𑀸𑀲𑀬𑀁 𑀅𑀦𑀼𑀧𑀯𑀺𑀝𑁆𑀞𑀸 𑀳𑀤𑀬𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 𑀲𑀮𑁆𑀮𑀸𑀇𑀢𑀺. 𑀢𑀢𑁆𑀣 𑀓𑀸𑀫𑁄𑀖𑁂𑀦 𑀭𑀸𑀕𑀲𑀮𑁆𑀮𑁄, 𑀪𑀯𑁄𑀖𑁂𑀦 𑀤𑁄𑀲𑀲𑀮𑁆𑀮𑁄, 𑀤𑀺𑀝𑁆𑀞𑁄𑀖𑁂𑀦 𑀫𑀸𑀦𑀲𑀮𑁆𑀮𑁄, 𑀅𑀯𑀺𑀚𑁆𑀚𑁄𑀖𑁂𑀦 𑀫𑁄𑀳𑀲𑀮𑁆𑀮𑁄.

𑀢𑀲𑁆𑀲 ¶ 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀮𑁆𑀮𑁂𑀳𑀺 𑀧𑀭𑀺𑀬𑀸𑀤𑀺𑀦𑁆𑀦𑀁 [𑀧𑀭𑀺𑀬𑀸𑀤𑀺𑀡𑁆𑀡𑀁 (𑀓.)] 𑀯𑀺𑀜𑁆𑀜𑀸𑀡𑀁 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀲𑀡𑁆𑀞𑀳𑀢𑀺 𑀭𑀽𑀧𑁂 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀼. 𑀢𑀢𑁆𑀣 𑀭𑀸𑀕𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀽𑀧𑀕𑀸 ¶ 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀤𑁄𑀲𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀫𑀸𑀦𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 ¶ 𑀯𑀺𑀜𑁆𑀜𑀸𑀡𑁂𑀦 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀫𑁄𑀳𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

𑀢𑀲𑁆𑀲 𑀇𑀫𑀸𑀳𑀺 𑀘𑀢𑀽𑀳𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀳𑀺 𑀉𑀧𑀢𑁆𑀣𑀤𑁆𑀥𑀁 𑀯𑀺𑀜𑁆𑀜𑀸𑀡𑀁 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀅𑀕𑀢𑀺𑀁 𑀕𑀘𑁆𑀙𑀢𑀺 𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸. 𑀢𑀢𑁆𑀣 𑀭𑀸𑀕𑁂𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑁂𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑁂𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑁂𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀇𑀢𑀺 𑀔𑁄 𑀢𑀜𑁆𑀘 𑀓𑀫𑁆𑀫𑀁 𑀇𑀫𑁂 𑀘 𑀓𑀺𑀮𑁂𑀲𑀸, 𑀏𑀲 𑀳𑁂𑀢𑀼 𑀲𑀁𑀲𑀸𑀭𑀲𑁆𑀲, 𑀏𑀯𑀁 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸.

𑁮𑁫. 𑀢𑀢𑁆𑀣 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀸𑀫𑀬𑁄𑀕𑁄, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀓𑀸𑀫𑀸𑀲𑀯𑁄, 𑀓𑀸𑀫𑁄𑀖𑁄, 𑀭𑀸𑀕𑀲𑀮𑁆𑀮𑁄, 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀙𑀦𑁆𑀤𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀧𑀞𑀫𑀸 𑀤𑀺𑀲𑀸.

𑀨𑀲𑁆𑀲𑁄 𑀆𑀳𑀸𑀭𑁄, ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀪𑀯𑀼𑀧𑀸𑀤𑀸𑀦𑀁, 𑀪𑀯𑀬𑁄𑀕𑁄, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄, 𑀪𑀯𑀸𑀲𑀯𑁄, 𑀪𑀯𑁄𑀖𑁄, 𑀤𑁄𑀲𑀲𑀮𑁆𑀮𑁄, 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀤𑁄𑀲𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀤𑀼𑀢𑀺𑀬𑀸 𑀤𑀺𑀲𑀸.

𑀯𑀺𑀜𑁆𑀜𑀸𑀡𑀸𑀳𑀸𑀭𑁄 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀺𑀬𑁄𑀕𑁄 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄, 𑀤𑀺𑀝𑁆𑀞𑀸𑀲𑀯𑁄, 𑀤𑀺𑀝𑁆𑀞𑁄𑀖𑁄, 𑀫𑀸𑀦𑀲𑀮𑁆𑀮𑁄, 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀪𑀬𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀢𑀢𑀺𑀬𑀸 𑀤𑀺𑀲𑀸.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀅𑀯𑀺𑀚𑁆𑀚𑀸𑀬𑁄𑀕𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄, 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀯𑀺𑀚𑁆𑀚𑁄𑀖𑁄, 𑀫𑁄𑀳𑀲𑀮𑁆𑀮𑁄, 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀫𑁄𑀳𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀘𑀢𑀼𑀢𑁆𑀣𑀻 𑀤𑀺𑀲𑀸.

𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀬𑁄 𑀘 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀸𑀫𑀬𑁄𑀕𑁄, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄, 𑀓𑀸𑀫𑀸𑀲𑀯𑁄 ¶ , 𑀓𑀸𑀫𑁄𑀖𑁄, 𑀭𑀸𑀕𑀲𑀮𑁆𑀮𑁄, 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀙𑀦𑁆𑀤𑀸 𑀅𑀕𑀢𑀺𑀕𑀫𑀦𑀦𑁆𑀢𑀺, 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀫𑁂 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸.

𑀢𑀢𑁆𑀣 ¶ 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄 𑀬𑁄 𑀘 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀪𑀯𑀼𑀧𑀸𑀤𑀸𑀦𑀁, 𑀪𑀯𑀬𑁄𑀕𑁄 ¶ , 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄, 𑀪𑀯𑀸𑀲𑀯𑁄, 𑀪𑀯𑁄𑀖𑁄, 𑀤𑁄𑀲𑀲𑀮𑁆𑀮𑁄, 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀤𑁄𑀲𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀇𑀫𑁂 𑀤𑁄𑀲𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸.

𑀢𑀢𑁆𑀣 𑀬𑁄 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀬𑁄 𑀘 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀺𑀬𑁄𑀕𑁄, 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄, 𑀤𑀺𑀝𑁆𑀞𑀸𑀲𑀯𑁄, 𑀤𑀺𑀝𑁆𑀞𑁄𑀖𑁄, 𑀫𑀸𑀦𑀲𑀮𑁆𑀮𑁄, 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀪𑀬𑀸 𑀅𑀕𑀢𑀺𑀕𑀫𑀦𑀦𑁆𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀫𑀦𑁆𑀤𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸.

𑀢𑀢𑁆𑀣 𑀬𑁄 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀬𑁄 𑀘 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀅𑀯𑀺𑀚𑁆𑀚𑀸𑀬𑁄𑀕𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄, 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀯𑀺𑀚𑁆𑀚𑁄𑀖𑁄, 𑀫𑁄𑀳𑀲𑀮𑁆𑀮𑁄, 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀫𑁄𑀳𑀸 𑀅𑀕𑀢𑀺𑀕𑀫𑀦𑀦𑁆𑀢𑀺, 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀉𑀤𑀢𑁆𑀢𑀲𑁆𑀲 [𑀉𑀤𑀢𑁆𑀣𑀲𑁆𑀲 (𑀲𑀻. 𑀓.)] 𑀉𑀧𑀓𑁆𑀓𑀺𑀮𑁂𑀲𑀸.

𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀲𑀼𑀜𑁆𑀜𑀢𑀸𑀬, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀅𑀦𑀺𑀫𑀺𑀢𑁆𑀢𑁂𑀦, 𑀢𑀢𑁆𑀣 𑀬𑁄 𑀘 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀬𑁄 𑀘 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀇𑀫𑁂 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀲𑀼𑀜𑁆𑀜𑀢𑀸𑀬, ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀜𑁆𑀘 𑀪𑀯𑀼𑀧𑀸𑀤𑀸𑀦𑀜𑁆𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀼𑀜𑁆𑀜𑀢𑀸𑀬, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀓𑀸𑀫𑀬𑁄𑀕𑁄 𑀘 𑀪𑀯𑀬𑁄𑀕𑁄 𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀤𑀺𑀝𑁆𑀞𑀺𑀬𑁄𑀕𑁄 𑀲𑀼𑀜𑁆𑀜𑀢𑀸𑀬, 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀘 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄 𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 ¶ 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄 ¶ 𑀲𑀼𑀜𑁆𑀜𑀢𑀸𑀬, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁄 𑀅𑀦𑀺𑀫𑀺𑀢𑁆𑀢𑁂𑀦.

𑀢𑀢𑁆𑀣 𑀓𑀸𑀫𑀸𑀲𑀯𑁄 𑀘 𑀪𑀯𑀸𑀲𑀯𑁄 𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀤𑀺𑀝𑁆𑀞𑀸𑀲𑀯𑁄 𑀲𑀼𑀜𑁆𑀜𑀢𑀸𑀬, 𑀅𑀯𑀺𑀚𑁆𑀚𑀸𑀲𑀯𑁄 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀓𑀸𑀫𑁄𑀖𑁄 𑀘 𑀪𑀯𑁄𑀖𑁄 𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀤𑀺𑀝𑁆𑀞𑁄𑀖𑁄 𑀲𑀼𑀜𑁆𑀜𑀢𑀸𑀬, 𑀅𑀯𑀺𑀚𑁆𑀚𑁄𑀖𑁄 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀭𑀸𑀕𑀲𑀮𑁆𑀮𑁄 𑀘 𑀤𑁄𑀲𑀲𑀮𑁆𑀮𑁄 𑀘 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀫𑀸𑀦𑀲𑀮𑁆𑀮𑁄 𑀲𑀼𑀜𑁆𑀜𑀢𑀸𑀬, 𑀫𑁄𑀳𑀲𑀮𑁆𑀮𑁄 𑀅𑀦𑀺𑀫𑀺𑀢𑁆𑀢𑁂𑀦. 𑀢𑀢𑁆𑀣 𑀭𑀽𑀧𑀽𑀧𑀕𑀸 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀯𑁂𑀤𑀦𑀽𑀧𑀕𑀸 ¶ 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀺, 𑀲𑀜𑁆𑀜𑀽𑀧𑀕𑀸 𑀲𑀼𑀜𑁆𑀜𑀢𑀸𑀬, 𑀲𑀗𑁆𑀔𑀸𑀭𑀽𑀧𑀕𑀸 𑀅𑀦𑀺𑀫𑀺𑀢𑁆𑀢𑁂𑀦.

𑀢𑀢𑁆𑀣 𑀙𑀦𑁆𑀤𑀸 𑀘 𑀅𑀕𑀢𑀺𑀕𑀫𑀦𑀁 𑀤𑁄𑀲𑀸 𑀘 𑀅𑀕𑀢𑀺𑀕𑀫𑀦𑀁 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀪𑀬𑀸 𑀅𑀕𑀢𑀺𑀕𑀫𑀦𑀁 𑀲𑀼𑀜𑁆𑀜𑀢𑀸𑀬, 𑀫𑁄𑀳𑀸 𑀅𑀕𑀢𑀺𑀕𑀫𑀦𑀁 𑀅𑀦𑀺𑀫𑀺𑀢𑁆𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀇𑀢𑀺 𑀲𑀩𑁆𑀩𑁂 𑀮𑁄𑀓𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄 𑀥𑀫𑁆𑀫𑀸 𑀦𑀺𑀬𑁆𑀬𑀦𑁆𑀢𑀺. 𑀢𑁂 𑀮𑁄𑀓𑀸 𑀢𑀻𑀳𑀺 𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺.

𑁮𑁬. 𑀢𑀢𑁆𑀭𑀺𑀤𑀁 𑀦𑀺𑀬𑁆𑀬𑀸𑀦𑀁 𑁋

𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸, 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀸𑀡𑀸.

𑀧𑀞𑀫𑀸 𑀧𑀝𑀺𑀧𑀤𑀸 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀤𑀼𑀢𑀺𑀬𑀸 𑀧𑀝𑀺𑀧𑀤𑀸 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀢𑀺𑀬𑀸 𑀧𑀝𑀺𑀧𑀤𑀸 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀘𑀢𑀼𑀢𑁆𑀣𑀻 𑀧𑀝𑀺𑀧𑀤𑀸 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀞𑀫𑀁 𑀛𑀸𑀦𑀁, 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀤𑀼𑀢𑀺𑀬𑀁 𑀛𑀸𑀦𑀁, 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀢𑀢𑀺𑀬𑀁 𑀛𑀸𑀦𑀁. 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀧𑀞𑀫𑀁 𑀛𑀸𑀦𑀁 𑀧𑀞𑀫𑁄 𑀯𑀺𑀳𑀸𑀭𑁄, 𑀤𑀼𑀢𑀺𑀬𑀁 𑀛𑀸𑀦𑀁 𑀤𑀼𑀢𑀺𑀬𑁄 𑀯𑀺𑀳𑀸𑀭𑁄, 𑀢𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑁄 𑀯𑀺𑀳𑀸𑀭𑁄, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄. 𑀧𑀞𑀫𑁄 𑀯𑀺𑀳𑀸𑀭𑁄 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀤𑀼𑀢𑀺𑀬𑁄 𑀯𑀺𑀳𑀸𑀭𑁄 𑀤𑀼𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀢𑀢𑀺𑀬𑁄 𑀯𑀺𑀳𑀸𑀭𑁄 𑀢𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄 𑀘𑀢𑀼𑀢𑁆𑀣𑀁 ¶ 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀤𑀼𑀢𑀺𑀬𑀁 𑀤𑀼𑀢𑀺𑀬𑁄, 𑀢𑀢𑀺𑀬𑀁 𑀢𑀢𑀺𑀬𑁄, 𑀘𑀢𑀼𑀢𑁆𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀞𑀫𑀁 ¶ 𑀅𑀥𑀺𑀝𑁆𑀞𑀸𑀦𑀁, 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀤𑀼𑀢𑀺𑀬𑀁 𑀅𑀥𑀺𑀝𑁆𑀞𑀸𑀦𑀁, 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀢𑀢𑀺𑀬𑀁 𑀅𑀥𑀺𑀝𑁆𑀞𑀸𑀦𑀁, 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀘𑀢𑀼𑀢𑁆𑀣𑀁 𑀅𑀥𑀺𑀝𑁆𑀞𑀸𑀦𑀁. 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀁 𑀧𑀞𑀫𑀸 𑀲𑀫𑀸𑀥𑀺𑀪𑀸𑀯𑀦𑀸, 𑀤𑀼𑀢𑀺𑀬𑀁 𑀅𑀥𑀺𑀝𑁆𑀞𑀸𑀦𑀁 𑀤𑀼𑀢𑀺𑀬𑀸 𑀲𑀫𑀸𑀥𑀺𑀪𑀸𑀯𑀦𑀸, 𑀢𑀢𑀺𑀬𑀁 𑀅𑀥𑀺𑀝𑁆𑀞𑀸𑀦𑀁 𑀢𑀢𑀺𑀬𑀸 𑀲𑀫𑀸𑀥𑀺𑀪𑀸𑀯𑀦𑀸, 𑀘𑀢𑀼𑀢𑁆𑀣𑀁 𑀅𑀥𑀺𑀝𑁆𑀞𑀸𑀦𑀁 𑀘𑀢𑀼𑀢𑁆𑀣𑀻 𑀲𑀫𑀸𑀥𑀺𑀪𑀸𑀯𑀦𑀸. 𑀧𑀞𑀫𑀸 𑀲𑀫𑀸𑀥𑀺𑀪𑀸𑀯𑀦𑀸 𑀧𑀞𑀫𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄, 𑀤𑀼𑀢𑀺𑀬𑀸 𑀲𑀫𑀸𑀥𑀺𑀪𑀸𑀯𑀦𑀸 𑀤𑀼𑀢𑀺𑀬𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄, 𑀢𑀢𑀺𑀬𑀸 𑀲𑀫𑀸𑀥𑀺𑀪𑀸𑀯𑀦𑀸 𑀢𑀢𑀺𑀬𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄, 𑀘𑀢𑀼𑀢𑁆𑀣𑀻 𑀲𑀫𑀸𑀥𑀺𑀪𑀸𑀯𑀦𑀸 𑀘𑀢𑀼𑀢𑁆𑀣𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄. 𑀧𑀞𑀫𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄 𑀧𑀞𑀫𑀁 𑀅𑀧𑁆𑀧𑀫𑀸𑀡𑀁, 𑀤𑀼𑀢𑀺𑀬𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄 𑀤𑀼𑀢𑀺𑀬𑀁 𑀅𑀧𑁆𑀧𑀫𑀸𑀡𑀁, 𑀢𑀢𑀺𑀬𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄 𑀢𑀢𑀺𑀬𑀁 𑀅𑀧𑁆𑀧𑀫𑀸𑀡𑀁, 𑀘𑀢𑀼𑀢𑁆𑀣𑁄 𑀲𑀼𑀔𑀪𑀸𑀕𑀺𑀬𑁄 𑀥𑀫𑁆𑀫𑁄 𑀘𑀢𑀼𑀢𑁆𑀣𑀁 ¶ 𑀅𑀧𑁆𑀧𑀫𑀸𑀡𑀁. 𑀧𑀞𑀫𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 [𑀩𑀳𑀼𑀮𑀺𑀓𑀢𑀸 (𑀓.)] 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀼𑀢𑀺𑀬𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀢𑀺𑀬𑀸 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀢𑀼𑀢𑁆𑀣𑀻 𑀧𑀝𑀺𑀧𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀼𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀢𑀺𑀬𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀢𑀼𑀢𑁆𑀣𑁄 𑀲𑀢𑀺𑀧𑀝𑁆𑀞𑀸𑀦𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺.

𑀧𑀞𑀫𑀁 𑀛𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀧𑀞𑀫𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀤𑀼𑀢𑀺𑀬𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀢𑀢𑀺𑀬𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 ¶ 𑀘𑀢𑀼𑀢𑁆𑀣𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀞𑀫𑁄 𑀯𑀺𑀳𑀸𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀼𑀢𑀺𑀬𑁄 𑀯𑀺𑀳𑀸𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀢𑀺𑀬𑁄 𑀯𑀺𑀳𑀸𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀁 𑀅𑀲𑀫𑁆𑀫𑁄𑀲𑀁 𑀪𑀺𑀬𑁆𑀬𑁄𑀪𑀸𑀯𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀫𑀸𑀦𑀧𑁆𑀧𑀳𑀸𑀦𑀁 ¶ 𑀧𑀭𑀺𑀧𑀽𑀭𑁂𑀢𑀺, 𑀤𑀼𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀆𑀮𑀬𑀲𑀫𑀼𑀕𑁆𑀖𑀸𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀢𑀼𑀢𑁆𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀪𑀯𑀽𑀧𑀲𑀫𑀁 𑀧𑀭𑀺𑀧𑀽𑀭𑁂𑀢𑀺. 𑀫𑀸𑀦𑀧𑁆𑀧𑀳𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀪𑀯𑀽𑀧𑀲𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀙𑀦𑁆𑀤𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀯𑀻𑀭𑀺𑀬𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀘𑀺𑀢𑁆𑀢𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺. 𑀙𑀦𑁆𑀤𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀢𑀧𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀩𑀼𑀤𑁆𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀭𑀺𑀧𑀽𑀭𑁂𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀫𑁂𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀢𑀧𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀓𑀭𑀼𑀡𑀁 𑀧𑀭𑀺𑀧𑀽𑀭𑁂𑀢𑀺, 𑀩𑀼𑀤𑁆𑀥𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀼𑀤𑀺𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀧𑁂𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺.

𑁮𑁭. 𑀢𑀢𑁆𑀣 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀧𑀞𑀫𑀸 𑀧𑀝𑀺𑀧𑀤𑀸 𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑁄 𑀧𑀞𑀫𑀁 𑀛𑀸𑀦𑀁 𑀧𑀞𑀫𑁄 ¶ 𑀯𑀺𑀳𑀸𑀭𑁄 𑀧𑀞𑀫𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀙𑀦𑁆𑀤𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀫𑁂𑀢𑁆𑀢𑀸 𑀇𑀢𑀺 𑀧𑀞𑀫𑀸 ¶ 𑀤𑀺𑀲𑀸.

𑀤𑀼𑀢𑀺𑀬𑀸 𑀧𑀝𑀺𑀧𑀤𑀸 𑀤𑀼𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀤𑀼𑀢𑀺𑀬𑁄 𑀯𑀺𑀳𑀸𑀭𑁄 𑀤𑀼𑀢𑀺𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀪𑀯𑀸𑀥𑀺𑀝𑁆𑀞𑀸𑀦𑀁 𑀯𑀻𑀭𑀺𑀬𑀲𑀫𑀸𑀥𑀺 𑀢𑀧𑁄 𑀓𑀭𑀼𑀡𑀸 𑀇𑀢𑀺 𑀤𑀼𑀢𑀺𑀬𑀸 𑀤𑀺𑀲𑀸.

𑀢𑀢𑀺𑀬𑀸 𑀧𑀝𑀺𑀧𑀤𑀸 𑀢𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀢𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑁄 𑀯𑀺𑀳𑀸𑀭𑁄 𑀢𑀢𑀺𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀘𑀺𑀢𑁆𑀢𑀲𑀫𑀸𑀥𑀺 𑀩𑀼𑀤𑁆𑀥𑀺 𑀫𑀼𑀤𑀺𑀢𑀸 𑀇𑀢𑀺 𑀢𑀢𑀺𑀬𑀸 𑀤𑀺𑀲𑀸.

𑀘𑀢𑀼𑀢𑁆𑀣𑀻 𑀧𑀝𑀺𑀧𑀤𑀸 𑀘𑀢𑀼𑀢𑁆𑀣𑁄 𑀲𑀢𑀺𑀧𑀝𑁆𑀞𑀸𑀦𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄 𑀘𑀢𑀼𑀢𑁆𑀣𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀯𑀻𑀫𑀁𑀲𑀸𑀲𑀫𑀸𑀥𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀉𑀧𑁂𑀓𑁆𑀔𑀸 𑀇𑀢𑀺 𑀘𑀢𑀼𑀢𑁆𑀣𑀻 𑀤𑀺𑀲𑀸.

𑀢𑀢𑁆𑀣 ¶ 𑀧𑀞𑀫𑀸 𑀧𑀝𑀺𑀧𑀤𑀸 𑀧𑀞𑀫𑁄 𑀲𑀢𑀺𑀧𑀝𑁆𑀞𑀸𑀦𑁄 𑀧𑀞𑀫𑀁 𑀛𑀸𑀦𑀁 𑀧𑀞𑀫𑁄 𑀯𑀺𑀳𑀸𑀭𑁄 𑀧𑀞𑀫𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀙𑀦𑁆𑀤𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀫𑁂𑀢𑁆𑀢𑀸 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀤𑀁 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑁂𑀲𑀚𑁆𑀚𑀁.

𑀤𑀼𑀢𑀺𑀬𑀸 𑀧𑀝𑀺𑀧𑀤𑀸 𑀤𑀼𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀤𑀼𑀢𑀺𑀬𑁄 𑀯𑀺𑀳𑀸𑀭𑁄 𑀤𑀼𑀢𑀺𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀯𑀻𑀭𑀺𑀬𑀲𑀫𑀸𑀥𑀺 𑀢𑀧𑁄 𑀓𑀭𑀼𑀡𑀸 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀤𑀁 𑀤𑁄𑀲𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑁂𑀲𑀚𑁆𑀚𑀁.

𑀢𑀢𑀺𑀬𑀸 𑀧𑀝𑀺𑀧𑀤𑀸 𑀢𑀢𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑁄 𑀢𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑁄 𑀯𑀺𑀳𑀸𑀭𑁄 𑀢𑀢𑀺𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀘𑀺𑀢𑁆𑀢𑀲𑀫𑀸𑀥𑀺 𑀩𑀼𑀤𑁆𑀥𑀺 𑀫𑀼𑀤𑀺𑀢𑀸 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀤𑀁 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀫𑀦𑁆𑀤𑀲𑁆𑀲 𑀪𑁂𑀲𑀚𑁆𑀚𑀁.

𑀘𑀢𑀼𑀢𑁆𑀣𑀻 𑀧𑀝𑀺𑀧𑀤𑀸 𑀘𑀢𑀼𑀢𑁆𑀣𑁄 𑀲𑀢𑀺𑀧𑀝𑁆𑀞𑀸𑀦𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄 𑀘𑀢𑀼𑀢𑁆𑀣𑁄 𑀲𑀫𑁆𑀫𑀧𑁆𑀧𑀥𑀸𑀦𑁄 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀯𑀻𑀫𑀁𑀲𑀸𑀲𑀫𑀸𑀥𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀉𑀧𑁂𑀓𑁆𑀔𑀸 ¶ 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀇𑀤𑀁 ¶ 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲 𑀉𑀤𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁.

𑀢𑀢𑁆𑀣 𑀤𑀼𑀓𑁆𑀔𑀸 𑀘 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀤𑀼𑀓𑁆𑀔𑀸 𑀘 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑀜𑁆𑀘 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀺𑀢𑀸 𑀲𑀢𑀺𑀧𑀝𑁆𑀞𑀸𑀦𑀜𑁆𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀺𑀢𑀸 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀧𑀞𑀫𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀢𑀢𑀺𑀬𑀁 𑀛𑀸𑀦𑀁 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀧𑀞𑀫𑁄 𑀘 𑀯𑀺𑀳𑀸𑀭𑁄 𑀤𑀼𑀢𑀺𑀬𑁄 𑀘 𑀯𑀺𑀳𑀸𑀭𑁄 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀢𑀢𑀺𑀬𑁄 𑀯𑀺𑀳𑀸𑀭𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀘𑀢𑀼𑀢𑁆𑀣𑁄 𑀯𑀺𑀳𑀸𑀭𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀬𑀢𑁆𑀣 ¶ 𑀧𑀞𑀫𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀤𑀼𑀢𑀺𑀬𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀢𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀘𑀢𑀼𑀢𑁆𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀫𑀸𑀦𑀧𑁆𑀧𑀳𑀸𑀦𑀜𑁆𑀘 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀪𑀯𑀽𑀧𑀲𑀫𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀜𑁆𑀘 𑀘𑀸𑀕𑀸𑀥𑀺𑀝𑁆𑀞𑀸𑀦𑀜𑁆𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 𑀙𑀦𑁆𑀤𑀲𑀫𑀸𑀥𑀺 𑀘 𑀯𑀻𑀭𑀺𑀬𑀲𑀫𑀸𑀥𑀺 𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀘𑀺𑀢𑁆𑀢𑀲𑀫𑀸𑀥𑀺 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀯𑀻𑀫𑀁𑀲𑀸𑀲𑀫𑀸𑀥𑀺 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 ¶ 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘 𑀢𑀧𑁄 𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀩𑀼𑀤𑁆𑀥𑀺 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑀢𑁆𑀣 ¶ 𑀫𑁂𑀢𑁆𑀢𑀸 𑀘 𑀓𑀭𑀼𑀡𑀸 𑀘 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀫𑀼𑀤𑀺𑀢𑀸 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁 𑀉𑀧𑁂𑀓𑁆𑀔𑀸 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢𑀁. 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸…𑀧𑁂… 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺. 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸. 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸. 𑀘𑀢𑁆𑀢𑀸𑀭𑁄 𑀑𑀖𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺. 𑀘𑀢𑁆𑀢𑀸𑀭𑁄 𑀲𑀮𑁆𑀮𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸. 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀢𑀸𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸. 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀘𑀢𑀲𑁆𑀲𑁄 𑀅𑀧𑁆𑀧𑀫𑀸𑀡𑀸.

𑀲𑀻𑀳𑀸 𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀸𑀯𑀓𑀸 𑀘 𑀳𑀢𑀭𑀸𑀕𑀤𑁄𑀲𑀫𑁄𑀳𑀸, 𑀢𑁂𑀲𑀁 𑀯𑀺𑀓𑁆𑀓𑀻𑀴𑀺𑀢𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀩𑁆𑀬𑀦𑁆𑀢𑀻𑀓𑀺𑀭𑀺𑀬𑀸 𑀘. 𑀯𑀺𑀓𑁆𑀓𑀻𑀴𑀺𑀢𑀁 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀯𑀺𑀓𑁆𑀓𑀻𑀴𑀺𑀢𑀁 𑀯𑀺𑀧𑀭𑀺𑀬𑀸𑀲𑀸𑀦𑀥𑀺𑀝𑁆𑀞𑀸𑀦𑀜𑁆𑀘. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀫𑁆𑀫𑀕𑁄𑀘𑀭𑁄 𑀯𑀺𑀧𑀭𑀺𑀬𑀸𑀲𑀸 𑀓𑀺𑀮𑁂𑀲𑀕𑁄𑀘𑀭𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀘 𑀦𑀬𑀲𑁆𑀲 𑀤𑀺𑀲𑀸𑀮𑁄𑀘𑀦𑀲𑁆𑀲 𑀘 𑀦𑀬𑀲𑁆𑀲 𑀪𑀽𑀫𑀻𑀢𑀺. 𑀢𑁂𑀦𑀸𑀳 ‘‘𑀬𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀁𑀓𑀺𑀮𑁂𑀲𑁂’’𑀢𑀺. 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀺 𑀬𑁂 ‘‘𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺 𑀘.

𑀢𑀢𑁆𑀣 ¶ 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀤𑁆𑀯𑁂 ¶ 𑀧𑀼𑀕𑁆𑀕𑀮𑀸; 𑀬𑁂 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸, 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀬𑁄𑀕𑀸, 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀘𑀢𑁆𑀢𑀸𑀭𑁄 𑀆𑀲𑀯𑀸, 𑀘𑀢𑁆𑀢𑀸𑀭𑁄 𑀑𑀖𑀸, 𑀘𑀢𑁆𑀢𑀸𑀭𑁄 𑀲𑀮𑁆𑀮𑀸, 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀻𑀢𑀺. 𑀢𑁂𑀲𑀁 ¶ 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦𑀁, 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸, 𑀘𑀢𑁆𑀢𑀸𑀭𑁄 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀸𑀡𑀸 𑀇𑀢𑀺.

𑁮𑁮. 𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀬𑁂 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀢𑀢𑁆𑀣 𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑁄 𑀲𑀸𑀥𑀸𑀭𑀡𑀸𑀬, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀦𑁂𑀬𑁆𑀬𑁄.

𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀫𑀣𑀁 𑀉𑀧𑀤𑀺𑀲𑀢𑀺, 𑀦𑁂𑀬𑁆𑀬𑀲𑁆𑀲 𑀯𑀺𑀧𑀲𑁆𑀲𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲. 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀼𑀤𑀼𑀓𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺, 𑀢𑀺𑀓𑁆𑀔𑀁 𑀦𑁂𑀬𑁆𑀬𑀲𑁆𑀲, 𑀫𑀼𑀤𑀼𑀢𑀺𑀓𑁆𑀔𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑀬𑀢𑀺, 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦 𑀦𑁂𑀬𑁆𑀬𑀲𑁆𑀲. 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀭𑀡𑀁 𑀉𑀧𑀤𑀺𑀲𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺, 𑀦𑁂𑀬𑁆𑀬𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀧𑀜𑁆𑀜𑀸𑀧𑀬𑀢𑀺, 𑀅𑀥𑀺𑀘𑀺𑀢𑁆𑀢𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀅𑀥𑀺𑀲𑀻𑀮𑀁 𑀦𑁂𑀬𑁆𑀬𑀲𑁆𑀲.

𑀢𑀢𑁆𑀣 𑀬𑁂 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀬𑁂 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺. 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀇𑀢𑀺 𑀔𑁄 𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄𑀢𑀺.

𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 ¶ , 𑀢𑀻𑀡𑀺 ¶ 𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁; 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑁋 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄; 𑀢𑀺𑀲𑁆𑀲𑁄 𑀅𑀓𑀼𑀲𑀮𑀲𑀜𑁆𑀜𑀸 𑁋 𑀓𑀸𑀫𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀯𑀺𑀳𑀺𑀁𑀲𑀸𑀲𑀜𑁆𑀜𑀸; 𑀢𑀺𑀲𑁆𑀲𑁄 𑀯𑀺𑀧𑀭𑀻𑀢𑀲𑀜𑁆𑀜𑀸 𑁋 𑀦𑀺𑀘𑁆𑀘𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸; 𑀢𑀺𑀲𑁆𑀲𑁄 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸; 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑁋 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸; 𑀢𑀬𑁄 𑀅𑀕𑁆𑀕𑀻 𑁋 𑀭𑀸𑀕𑀕𑁆𑀕𑀺 𑀤𑁄𑀲𑀕𑁆𑀕𑀺 𑀫𑁄𑀳𑀕𑁆𑀕𑀺; 𑀢𑀬𑁄 𑀲𑀮𑁆𑀮𑀸 𑁋 𑀭𑀸𑀕𑀲𑀮𑁆𑀮𑁄 𑀤𑁄𑀲𑀲𑀮𑁆𑀮𑁄 𑀫𑁄𑀳𑀲𑀮𑁆𑀮𑁄; 𑀢𑀺𑀲𑁆𑀲𑁄 𑀚𑀝𑀸 𑁋 𑀭𑀸𑀕𑀚𑀝𑀸 𑀤𑁄𑀲𑀚𑀝𑀸 𑀫𑁄𑀳𑀚𑀝𑀸; 𑀢𑀺𑀲𑁆𑀲𑁄 𑀅𑀓𑀼𑀲𑀮𑀽𑀧𑀧𑀭𑀺𑀓𑁆𑀔𑀸 𑁋 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀢𑀺𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑁋 𑀲𑀻𑀮𑀯𑀺𑀧𑀢𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀻𑀢𑀺. 𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦𑀁. 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁. 𑀢𑀬𑁄 𑀓𑀼𑀲𑀮𑀯𑀺𑀢𑀓𑁆𑀓𑀸 𑁋 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 ¶ 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀬𑁄 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺. 𑀢𑀺𑀲𑁆𑀲𑁄 𑀓𑀼𑀲𑀮𑀲𑀜𑁆𑀜𑀸 𑁋 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀅𑀯𑀺𑀧𑀭𑀻𑀢𑀲𑀜𑁆𑀜𑀸 𑁋 𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸. 𑀢𑀺𑀲𑁆𑀲𑁄 𑀓𑀼𑀲𑀮𑀽𑀧𑀧𑀭𑀺𑀓𑁆𑀔𑀸 𑁋 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀢𑀻𑀡𑀺 𑀲𑁄𑀘𑁂𑀬𑁆𑀬𑀸𑀦𑀺 𑁋 𑀓𑀸𑀬𑀲𑁄𑀘𑁂𑀬𑁆𑀬𑀁 𑀯𑀘𑀻𑀲𑁄𑀘𑁂𑀬𑁆𑀬𑀁 𑀫𑀦𑁄𑀲𑁄𑀘𑁂𑀬𑁆𑀬𑀁; 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑁋 𑀲𑀻𑀮𑀲𑀫𑁆𑀧𑀢𑁆𑀢𑀺 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸; 𑀢𑀬𑁄 𑀔𑀦𑁆𑀥𑀸 𑁋 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑁋 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺.

𑀇𑀢𑀺 𑀔𑁄 𑀘𑀢𑁆𑀢𑀸𑀭𑀺 𑀳𑀼𑀢𑁆𑀯𑀸 𑀢𑀻𑀡𑀺 𑀪𑀯𑀦𑁆𑀢𑀺, 𑀢𑀻𑀡𑀺 𑀳𑀼𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀺 𑀢𑀡𑁆𑀳𑀸𑀘𑀭𑀺𑀢𑁄 𑀘 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘.

𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀘 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀅𑀲𑁆𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 ¶ 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀘 𑀓𑁄𑀲𑀚𑁆𑀚𑀜𑁆𑀘 𑀤𑁄𑀯𑀘𑀲𑁆𑀲𑀜𑁆𑀘 𑀅𑀳𑀁𑀓𑀸𑀭𑁄 𑀘 𑀫𑀫𑀁𑀓𑀸𑀭𑁄 𑀘 𑀅𑀲𑁆𑀲𑀤𑁆𑀥𑀸 𑀘 𑀧𑀫𑀸𑀤𑁄 𑀘 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀲𑀁𑀯𑀭𑁄 𑀘 𑀅𑀪𑀺𑀚𑁆𑀛𑀸 𑀘 𑀩𑁆𑀬𑀸𑀧𑀸𑀤𑁄 𑀘 𑀦𑀻𑀯𑀭𑀡𑀜𑁆𑀘 𑀲𑀁𑀬𑁄𑀚𑀦𑀜𑁆𑀘 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 𑀫𑀓𑁆𑀔𑁄 𑀘 𑀧𑀮𑀸𑀲𑁄 𑀘 𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀜𑁆𑀘 𑀫𑀸𑀬𑀸 𑀘 𑀲𑀸𑀞𑁂𑀬𑁆𑀬𑀜𑁆𑀘 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀘𑀸𑀢𑀺.

𑀢𑁂𑀲𑀁 ¶ 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀇𑀤𑀁 𑀯𑁄𑀤𑀸𑀦𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀘 𑀯𑀻𑀭𑀺𑀬𑀸𑀭𑀫𑁆𑀪𑁄 𑀘 𑀲𑁄𑀯𑀘𑀲𑁆𑀲𑀜𑁆𑀘 𑀥𑀫𑁆𑀫𑁂 𑀜𑀸𑀡𑀜𑁆𑀘 𑀅𑀦𑁆𑀯𑀬𑁂 𑀜𑀸𑀡𑀜𑁆𑀘 𑀔𑀬𑁂 𑀜𑀸𑀡𑀜𑁆𑀘 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀜𑁆𑀘 𑀲𑀤𑁆𑀥𑀸 𑀘 𑀅𑀧𑁆𑀧𑀫𑀸𑀤𑁄 𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀲𑀁𑀯𑀭𑁄 𑀘 𑀅𑀦𑀪𑀺𑀚𑁆𑀛𑀸 𑀘 𑀅𑀩𑁆𑀬𑀸𑀧𑀸𑀤𑁄 𑀘 𑀭𑀸𑀕𑀯𑀺𑀭𑀸𑀕𑀸 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀪𑀺𑀲𑀫𑀬𑁄 𑀘 𑀅𑀧𑁆𑀧𑀺𑀘𑁆𑀙𑀢𑀸 𑀘 𑀲𑀦𑁆𑀢𑀼𑀝𑁆𑀞𑀺 𑀘 𑀅𑀓𑁆𑀓𑁄𑀥𑁄 𑀘 𑀅𑀦𑀼𑀧𑀦𑀸𑀳𑁄 𑀘 𑀅𑀫𑀓𑁆𑀔𑁄 𑀘 𑀅𑀧𑀮𑀸𑀲𑁄 𑀘 𑀇𑀲𑁆𑀲𑀸𑀧𑀳𑀸𑀦𑀜𑁆𑀘 𑀫𑀘𑁆𑀙𑀭𑀺𑀬𑀧𑁆𑀧𑀳𑀸𑀦𑀜𑁆𑀘 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘 𑀲𑀗𑁆𑀔𑀢𑀸𑀭𑀫𑁆𑀫𑀡𑁄 𑀘 𑀯𑀺𑀫𑁄𑀓𑁆𑀔𑁄 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑁄 𑀘 𑀯𑀺𑀫𑁄𑀓𑁆𑀔𑁄 𑀲𑀉𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺.

𑀅𑀬𑀁 𑀯𑀼𑀘𑁆𑀘𑀢𑀺 𑀢𑀺𑀧𑀼𑀓𑁆𑀔𑀮𑀲𑁆𑀲 𑀘 𑀦𑀬𑀲𑁆𑀲 𑀅𑀗𑁆𑀓𑀼𑀲𑀲𑁆𑀲 𑀘 𑀦𑀬𑀲𑁆𑀲 𑀪𑀽𑀫𑀻𑀢𑀺. 𑀢𑁂𑀦𑀸𑀳 ‘‘𑀬𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺 𑀦𑁂𑀢𑀻’’𑀢𑀺 ‘‘𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀮𑁄𑀘𑀦𑁂𑀦𑀸’’𑀢𑀺 𑀘.

𑀦𑀺𑀬𑀼𑀢𑁆𑀢𑀁 𑀦𑀬𑀲𑀫𑀼𑀝𑁆𑀞𑀸𑀦𑀁.

𑀲𑀸𑀲𑀦𑀧𑀝𑁆𑀞𑀸𑀦𑀁

𑁮𑁯. 𑀢𑀢𑁆𑀣 ¶ 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸? 𑀲𑀸𑀲𑀦𑀧𑀝𑁆𑀞𑀸𑀦𑁂. 𑀢𑀢𑁆𑀣 𑀓𑀢𑀫𑀁 𑀲𑀸𑀲𑀦𑀧𑀝𑁆𑀞𑀸𑀦𑀁? 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 ¶ 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀺𑀝𑁆𑀞𑀺𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀤𑀼𑀘𑁆𑀘𑀭𑀺𑀢𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑁋 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄. 𑀢𑀢𑁆𑀣 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀲𑀫𑀣𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀲𑁄 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀼𑀚𑁆𑀛𑀢𑀺, 𑀲𑀸 ¶ 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀲𑀼𑀘𑀭𑀺𑀢𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀢𑀁 𑀲𑀼𑀘𑀭𑀺𑀢𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀢𑀲𑁆𑀲 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀬𑀤𑀺 𑀆𑀲𑀢𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀪𑀯𑁂𑀲𑀼, 𑀏𑀯𑀁 𑀲𑀸𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼 𑀪𑀯𑀢𑀺 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺, 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀺 𑀅𑀝𑁆𑀞 𑀪𑀯𑀦𑁆𑀢𑀺, 𑀢𑀸𑀦𑀺𑀬𑁂𑀯 𑀅𑀝𑁆𑀞 𑀲𑀼𑀢𑁆𑀢𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀺 𑀲𑁄𑀴𑀲 𑀪𑀯𑀦𑁆𑀢𑀺.

𑀇𑀫𑁂𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀺 𑀪𑀺𑀦𑁆𑀦𑁂𑀳𑀺 𑀦𑀯𑀯𑀺𑀥𑀁 𑀲𑀼𑀢𑁆𑀢𑀁 𑀪𑀺𑀦𑁆𑀦𑀁 𑀪𑀯𑀢𑀺. 𑀕𑀸𑀣𑀸𑀬 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀯𑁂𑀬𑁆𑀬𑀸𑀓𑀭𑀡𑁂𑀦 𑀯𑁂𑀬𑁆𑀬𑀸𑀓𑀭𑀡𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀁. 𑀲𑀼𑀢𑁆𑀢𑁂𑀦 𑀲𑀼𑀢𑁆𑀢𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀁.

𑁯𑁦. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀦𑀸 ¶ [𑀧𑀫𑀢𑁆𑀢𑀩𑀦𑁆𑀥𑀼𑀦𑀸 (𑀉𑀤𑀸. 𑁭𑁪)] 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 [𑀔𑀻𑀭𑀽𑀧𑀓𑁄𑀯 (𑀓.) 𑀧𑀲𑁆𑀲 𑀉𑀤𑀸. 𑁬𑁪] 𑀫𑀸𑀢𑀭’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀘𑀢𑁆𑀢𑀸𑀭𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀙𑀦𑁆𑀤𑀸𑀕𑀢𑀺𑀁 [𑀙𑀦𑁆𑀤𑀸 𑀅𑀕𑀢𑀺𑀁 (𑀲𑀻. 𑀓.) 𑀧𑀲𑁆𑀲 𑀅. 𑀦𑀺. 𑁪.𑁧𑁭] 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄, 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀫𑀺𑀤𑁆𑀥𑀻 ¶ [𑀧𑀲𑁆𑀲 𑀥. 𑀧. 𑁩𑁨𑁫] 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀢𑀢𑀼𑀝𑁆𑀞𑀸𑀬 [𑀢𑀤𑀼𑀝𑁆𑀞𑀸𑀬 (𑀲𑀻.) 𑀧𑀲𑁆𑀲 𑀥. 𑀧. 𑁨𑁪𑁦] 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁, 𑀲𑀸𑀦𑀺 [𑀢𑀸𑀦𑀺 (𑀲𑀻.) 𑀧𑀲𑁆𑀲 𑀥. 𑀧. 𑁨𑁪𑁦] 𑀓𑀫𑁆𑀫𑀸𑀦𑀺 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀘𑁄𑀭𑁄 ¶ 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘;

𑀏𑀯𑀁 𑀅𑀬𑀁 𑀧𑁂𑀘𑁆𑀘 𑀧𑀚𑀸 𑀧𑀭𑀢𑁆𑀣, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 𑀩𑀚𑁆𑀛𑀢𑁂 𑀘𑀸’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 [𑀮𑀪𑁂 (𑀓.) 𑀧𑀲𑁆𑀲 𑀥. 𑀧. 𑁧𑁩𑁧] 𑀲𑀼𑀔’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀕𑀼𑀦𑁆𑀦𑀁 ¶ 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 [𑀚𑀺𑀫𑁆𑀳𑀕𑀢𑁂 (𑀲𑀻. 𑀓.) 𑀧𑀲𑁆𑀲 𑀅. 𑀦𑀺. 𑁪.𑁭𑁦] 𑀲𑀢𑀺.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀼𑀓𑀺𑀘𑁆𑀙𑀭𑀽𑀧𑀸𑀯𑀢𑀺𑀫𑁂 𑀫𑀦𑀼𑀲𑁆𑀲𑀸, 𑀓𑀭𑁄𑀦𑁆𑀢𑀺 𑀧𑀸𑀧𑀁 𑀉𑀧𑀥𑀻𑀲𑀼 𑀭𑀢𑁆𑀢𑀸;

𑀕𑀘𑁆𑀙𑀦𑁆𑀢𑀺 𑀢𑁂 𑀩𑀳𑀼𑀚𑀦𑀲𑀦𑁆𑀦𑀺𑀯𑀸𑀲𑀁, 𑀦𑀺𑀭𑀬𑀁 𑀅𑀯𑀻𑀘𑀺𑀁 𑀓𑀝𑀼𑀓𑀁 𑀪𑀬𑀸𑀦𑀓’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀨𑀮𑀁 ¶ 𑀯𑁂 [𑀧𑀲𑁆𑀲 𑀅. 𑀦𑀺. 𑁪.𑁬𑁮] 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑁄𑀥𑀫𑀓𑁆𑀔𑀕𑀭𑀼 𑀪𑀺𑀓𑁆𑀔𑀼, 𑀮𑀸𑀪𑀲𑀓𑁆𑀓𑀸𑀭𑀕𑀸𑀭𑀯𑁄 [𑀮𑀸𑀪𑀲𑀓𑁆𑀓𑀸𑀭𑀓𑀸𑀭𑀡𑀸 (𑀲𑀻. 𑀓.) 𑀧𑀲𑁆𑀲 𑀅. 𑀦𑀺. 𑁪.𑁪𑁩];

𑀲𑀼𑀔𑁂𑀢𑁆𑀢𑁂 𑀧𑀽𑀢𑀺𑀩𑀻𑀚𑀁𑀯, 𑀲𑀤𑁆𑀥𑀫𑁆𑀫𑁂 𑀦 𑀯𑀺𑀭𑀽𑀳𑀢𑀻’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁧. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺, (𑀬𑀣𑀸 𑀔𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀇𑀭𑀺𑀬𑀢𑀺, 𑀬𑀜𑁆𑀘 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄, 𑀬𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄) ¶ [( ) 𑀦𑀢𑁆𑀣𑀺 𑀅. 𑀦𑀺. 𑁧.𑁪𑁩-𑁪𑁪; 𑀇𑀢𑀺𑀯𑀼. 𑁨𑁦]. 𑀇𑀫𑀫𑁆𑀳𑀺 𑀘𑀸𑀬𑀁 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬, 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀘𑀺𑀢𑁆𑀢𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀤𑀼𑀝𑁆𑀞𑀁 [𑀧𑀤𑁄𑀲𑀺𑀢𑀁 (𑀲𑀻. 𑀓.) 𑀅. 𑀦𑀺. 𑁧.𑁪𑁩; 𑀇𑀢𑀺𑀯𑀼. 𑁨𑁦 𑀧𑀲𑁆𑀲𑀺𑀢𑀩𑁆𑀩𑀁], 𑀘𑁂𑀢𑁄𑀧𑀤𑁄𑀲𑀳𑁂𑀢𑀼 [𑀘𑀺𑀢𑁆𑀢𑀧𑀤𑁄𑀲𑀳𑁂𑀢𑀼 (𑀲𑀻. 𑀓.)] 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘, 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀜𑀢𑁆𑀯𑀸𑀦, 𑀏𑀓𑀘𑁆𑀘𑀁 𑀇𑀥 𑀧𑀼𑀕𑁆𑀕𑀮𑀁;

𑀏𑀢𑀫𑀢𑁆𑀣𑀜𑁆𑀘 𑀩𑁆𑀬𑀸𑀓𑀸𑀲𑀺, 𑀩𑀼𑀤𑁆𑀥𑁄 [𑀲𑀢𑁆𑀣𑀸 (𑀲𑀻. 𑀓.)] 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂;

𑀇𑀫𑀫𑁆𑀳𑀺 ¶ 𑀘𑀸𑀬𑀁 𑀲𑀫𑀬𑁂, 𑀓𑀸𑀮𑀁 𑀓𑀬𑀺𑀭𑀸𑀣 𑀧𑀼𑀕𑁆𑀕𑀮𑁄;

𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀁 𑀳𑀺𑀲𑁆𑀲 𑀧𑀤𑀽𑀲𑀺𑀢𑀁;

𑀘𑁂𑀢𑁄𑀧𑀤𑁄𑀲𑀳𑁂𑀢𑀼 𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀏𑀯𑀫𑁂𑀯 𑀢𑀣𑀸𑀯𑀺𑀥𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 [𑀆𑀯𑀻 (𑀲𑀻.) 𑀧𑀲𑁆𑀲 𑀉𑀤𑀸. 𑁪𑁪] 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 ¶ 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀣 𑀓𑀭𑁄𑀣 𑀯𑀸;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁂𑀘𑁆𑀘𑀧𑀺 𑀧𑀮𑀸𑀬𑀢’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀥𑀫𑁆𑀫𑁂𑀦 𑀥𑀦𑀁 𑀮𑀤𑁆𑀥𑀸, 𑀫𑀼𑀲𑀸𑀯𑀸𑀤𑁂𑀦 𑀘𑀽𑀪𑀬𑀁;

𑀫𑀫𑁂𑀢𑀺 𑀩𑀸𑀮𑀸 𑀫𑀜𑁆𑀜𑀦𑁆𑀢𑀺, 𑀢𑀁 𑀓𑀣𑀁 𑀦𑀼 𑀪𑀯𑀺𑀲𑁆𑀲𑀢𑀺.

‘‘𑀅𑀦𑁆𑀢𑀭𑀸𑀬𑀸 𑀲𑀼 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀫𑁆𑀪𑀢𑀲𑁆𑀲 𑀯𑀺𑀦𑀲𑁆𑀲𑀢𑀺;

𑀫𑀢𑀸 𑀲𑀕𑁆𑀕𑀁 𑀦 𑀕𑀘𑁆𑀙𑀦𑁆𑀢𑀺, 𑀦𑀦𑀼 𑀏𑀢𑁆𑀢𑀸𑀯𑀢𑀸 𑀳𑀢𑀸’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀣𑀁 𑀔𑀡𑀢𑀺 𑀅𑀢𑁆𑀢𑀸𑀦𑀁, 𑀓𑀣𑀁 𑀫𑀺𑀢𑁆𑀢𑁂𑀳𑀺 𑀚𑀻𑀭𑀢𑀺;

𑀓𑀣𑀁 𑀯𑀺𑀯𑀝𑁆𑀝𑀢𑁂 𑀥𑀫𑁆𑀫𑀸, 𑀓𑀣𑀁 𑀲𑀕𑁆𑀕𑀁 𑀦 𑀕𑀘𑁆𑀙𑀢𑀺.

‘‘𑀮𑁄𑀪𑀸 ¶ 𑀔𑀡𑀢𑀺 𑀅𑀢𑁆𑀢𑀸𑀦𑀁, 𑀮𑀼𑀤𑁆𑀥𑁄 𑀫𑀺𑀢𑁆𑀢𑁂𑀳𑀺 𑀚𑀻𑀭𑀢𑀺;

𑀮𑁄𑀪𑀸 𑀯𑀺𑀯𑀝𑁆𑀝𑀢𑁂 𑀥𑀫𑁆𑀫𑀸, 𑀮𑁄𑀪𑀸 𑀲𑀕𑁆𑀕𑀁 𑀦 𑀕𑀘𑁆𑀙𑀢𑀻’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮𑀁 [𑀓𑀝𑀓𑀁 𑀨𑀮𑀁 (𑀓.) 𑀧𑀲𑁆𑀲 𑀥. 𑀧. 𑁬𑁬].

‘‘𑀦 ¶ 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀤𑀼𑀓𑁆𑀓𑀭𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀜𑁆𑀘, 𑀅𑀩𑁆𑀬𑀢𑁆𑀢𑁂𑀦 𑀘 [𑀅𑀯𑀺𑀬𑀢𑁆𑀢𑁂𑀦 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁭] 𑀲𑀸𑀫𑀜𑁆𑀜𑀁;

𑀩𑀳𑀽 𑀳𑀺 𑀢𑀢𑁆𑀣 𑀲𑀫𑁆𑀩𑀸𑀥𑀸, 𑀬𑀢𑁆𑀣 𑀩𑀸𑀮𑁄 𑀯𑀺𑀲𑀻𑀤𑀢𑀺.

‘‘𑀬𑁄 𑀳𑀺 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀪𑀸𑀲𑀫𑀸𑀦𑁂 𑀢𑀣𑀸𑀕𑀢𑁂;

𑀫𑀦𑀁 𑀧𑀤𑁄𑀲𑀬𑁂 𑀩𑀸𑀮𑁄, 𑀫𑁄𑀖𑀁 𑀔𑁄 𑀢𑀲𑁆𑀲 𑀚𑀻𑀯𑀺𑀢𑀁.

‘‘𑀏𑀢𑀜𑁆𑀘𑀸𑀳𑀁 𑀅𑀭𑀳𑀸𑀫𑀺, 𑀤𑀼𑀓𑁆𑀔𑀜𑁆𑀘 𑀇𑀢𑁄 𑀘 𑀧𑀸𑀧𑀺𑀬𑀢𑀭𑀁 𑀪𑀦𑁆𑀢𑁂;

𑀬𑁄 𑀅𑀧𑁆𑀧𑀫𑁂𑀬𑁆𑀬𑁂𑀲𑀼 𑀢𑀣𑀸𑀕𑀢𑁂𑀲𑀼, 𑀘𑀺𑀢𑁆𑀢𑀁 𑀧𑀤𑁄𑀲𑁂𑀫𑀺 𑀅𑀯𑀻𑀢𑀭𑀸𑀕𑁄’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀧𑁆𑀧𑀫𑁂𑀬𑁆𑀬𑀁 ¶ 𑀧𑀫𑀺𑀦𑀦𑁆𑀢𑁄, 𑀓𑁄𑀥 𑀯𑀺𑀤𑁆𑀯𑀸 𑀯𑀺𑀓𑀧𑁆𑀧𑀬𑁂;

𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀸𑀬𑀺𑀦𑀁 [𑀧𑀫𑀸𑀬𑀦𑁆𑀢𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁭𑁯], 𑀦𑀺𑀯𑀼𑀢𑀁 𑀢𑀁 𑀫𑀜𑁆𑀜𑁂 𑀅𑀓𑀺𑀲𑁆𑀲𑀯’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀞𑀸𑀭𑀻 [𑀓𑀼𑀥𑀸𑀭𑀻 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁮𑁦] 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁.

‘‘𑀦 ¶ 𑀳𑀺 𑀲𑀢𑁆𑀣𑀁 𑀲𑀼𑀦𑀺𑀲𑀺𑀢𑀁, 𑀯𑀺𑀲𑀁 𑀳𑀮𑀸𑀳𑀮𑀁 𑀇𑀯;

𑀏𑀯𑀁 𑀯𑀺𑀭𑀤𑁆𑀥𑀁 𑀧𑀸𑀢𑁂𑀢𑀺, 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸 𑀬𑀣𑀸’’𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁨.

‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺, 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁, 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺.

‘‘𑀅𑀧𑁆𑀧𑀫𑀢𑁆𑀢𑁄 𑀅𑀬𑀁 𑀓𑀮𑀺, 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄;

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸, 𑀅𑀬𑀫𑁂𑀯 𑀫𑀳𑀦𑁆𑀢𑀢𑀭𑁄 [𑀫𑀳𑀢𑁆𑀢𑀭𑁄 (𑀓.) 𑀧𑀲𑁆𑀲 𑀅. 𑀦𑀺. 𑁪.𑁩; 𑀲𑀁. 𑀦𑀺. 𑁧.𑁧𑁮𑁦] 𑀓𑀮𑀺;

𑀬𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑁄𑀲𑀬𑁂.

‘‘𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀙𑀢𑁆𑀢𑀺𑀁𑀲𑀢𑀻 𑀧𑀜𑁆𑀘 𑀘 𑀅𑀩𑁆𑀩𑀼𑀤𑀸𑀦𑀺;

𑀬𑀫𑀭𑀺𑀬𑀕𑀭𑀳𑀻 ¶ 𑀦𑀺𑀭𑀬𑀁 𑀉𑀧𑁂𑀢𑀺, 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑁄 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄, 𑀲𑁄 𑀯𑀘𑀲𑀸 [𑀯𑀘𑀲𑀸 𑀘 (𑀓.) 𑀧𑀲𑁆𑀲 𑀲𑀼. 𑀦𑀺. 𑁬𑁬𑁮] 𑀧𑀭𑀺𑀪𑀸𑀲𑀢𑀺 𑀅𑀜𑁆𑀜𑁂;

𑀅𑀲𑁆𑀲𑀤𑁆𑀥𑁄 𑀓𑀤𑀭𑀺𑀬𑁄 [𑀅𑀦𑀭𑀺𑀬𑁄 (𑀲𑀻. 𑀓.)] 𑀅𑀯𑀤𑀜𑁆𑀜𑀽, 𑀫𑀘𑁆𑀙𑀭𑀺 𑀧𑁂𑀲𑀼𑀡𑀺𑀬𑀁 𑀅𑀦𑀼𑀬𑀼𑀢𑁆𑀢𑁄.

‘‘𑀫𑀼𑀔𑀤𑀼𑀕𑁆𑀕 ¶ 𑀯𑀺𑀪𑀽𑀢 𑀅𑀦𑀭𑀺𑀬, 𑀪𑀽𑀦𑀳𑀼 𑀧𑀸𑀧𑀓 𑀤𑀼𑀓𑁆𑀓𑀝𑀓𑀸𑀭𑀺;

𑀧𑀼𑀭𑀺𑀲𑀦𑁆𑀢 𑀓𑀮𑀻 𑀅𑀯𑀚𑀸𑀢𑀧𑀼𑀢𑁆𑀢 [𑀅𑀯𑀚𑀸𑀢𑀓𑀧𑀼𑀢𑁆𑀢 (𑀲𑀻. 𑀓.) 𑀧𑀲𑁆𑀲 𑀲𑀼. 𑀦𑀺. 𑁬𑁬𑁯], 𑀫𑀸 𑀩𑀳𑀼𑀪𑀸𑀡𑀺𑀥 𑀦𑁂𑀭𑀬𑀺𑀓𑁄𑀲𑀺.

‘‘𑀭𑀚𑀫𑀸𑀓𑀺𑀭𑀲𑀻 𑀅𑀳𑀺𑀢𑀸𑀬, 𑀲𑀦𑁆𑀢𑁂 𑀕𑀭𑀳𑀲𑀺 𑀓𑀺𑀩𑁆𑀩𑀺𑀲𑀓𑀸𑀭𑀻;

𑀩𑀳𑀽𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘𑀭𑀺𑀢𑁆𑀯𑀸, 𑀕𑀘𑁆𑀙𑀲𑀺 𑀔𑁄 𑀧𑀧𑀢𑀁 𑀘𑀺𑀭𑀭𑀢𑁆𑀢’’𑀦𑁆𑀢𑀺.

𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 ¶ 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 [𑀅𑀦𑀼𑀧𑀸𑀬𑀺𑀦𑀻𑀢𑀺 (𑀓.) 𑀧𑀲𑁆𑀲 𑀥. 𑀧. 𑁨].

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁩. 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀓𑀧𑀺𑀮𑀯𑀢𑁆𑀣𑀼 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀩𑀸𑀳𑀼𑀚𑀜𑁆𑀜𑀁 [𑀩𑀳𑀼𑀚𑀦𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁧𑁦𑁧𑁮] 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀲𑀫𑁆𑀩𑀸𑀥𑀩𑁆𑀬𑀽𑀳𑀁, 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀫𑀦𑁄𑀪𑀸𑀯𑀦𑀻𑀬𑁂 𑀯𑀸 𑀪𑀺𑀓𑁆𑀔𑀽 𑀲𑀸𑀬𑀦𑁆𑀳𑀲𑀫𑀬𑀁 𑀓𑀧𑀺𑀮𑀯𑀢𑁆𑀣𑀼𑀁 𑀧𑀯𑀺𑀲𑀦𑁆𑀢𑁄 𑀪𑀦𑁆𑀢𑁂𑀦𑀧𑀺 𑀳𑀢𑁆𑀣𑀺𑀦𑀸 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀅𑀲𑁆𑀲𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀭𑀣𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀲𑀓𑀝𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀧𑀼𑀭𑀺𑀲𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀲𑁆𑀲𑀢𑁂𑀯 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀲𑀢𑀺, 𑀫𑀼𑀲𑁆𑀲𑀢𑀺 𑀥𑀫𑁆𑀫𑀁 𑀆𑀭𑀩𑁆𑀪 𑀲𑀢𑀺, 𑀫𑀼𑀲𑁆𑀲𑀢𑀺 𑀲𑀗𑁆𑀖𑀁 𑀆𑀭𑀩𑁆𑀪 𑀲𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 ‘𑀇𑀫𑀫𑁆𑀳𑀺 𑀘𑀸𑀳𑀁 𑀲𑀸𑀬𑀦𑁆𑀳𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬𑀁, 𑀓𑀸 𑀫𑀬𑁆𑀳𑀁 [𑀫𑀫𑀲𑁆𑀲 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁧𑁦𑁧𑁮] 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’’𑀢𑀺.

‘‘𑀫𑀸 ¶ 𑀪𑀸𑀬𑀺, 𑀫𑀳𑀸𑀦𑀸𑀫, 𑀫𑀸 𑀪𑀸𑀬𑀺, 𑀫𑀳𑀸𑀦𑀸𑀫, 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀸𑀧𑀺𑀓𑀸 [𑀅𑀧𑀸𑀧𑀺𑀓𑀸 𑀢𑁂 (𑀲𑀻.)] 𑀓𑀸𑀮𑀗𑁆𑀓𑀺𑀭𑀺𑀬𑀸. 𑀘𑀢𑀽𑀳𑀺 𑀔𑁄, 𑀫𑀳𑀸𑀦𑀸𑀫, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 ¶ 𑀅𑀭𑀺𑀬𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄 𑀳𑁄𑀢𑀺 𑀦𑀺𑀩𑁆𑀩𑀸𑀦𑀧𑁄𑀡𑁄 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀦𑀸𑀫, 𑀭𑀼𑀓𑁆𑀔𑁄 𑀧𑀸𑀘𑀻𑀦𑀦𑀺𑀦𑁆𑀦𑁄 𑀧𑀸𑀘𑀻𑀦𑀧𑁄𑀡𑁄 𑀧𑀸𑀘𑀻𑀦𑀧𑀩𑁆𑀪𑀸𑀭𑁄, 𑀲𑁄 𑀫𑀽𑀮𑀘𑁆𑀙𑀺𑀦𑁆𑀦𑁄 [𑀫𑀽𑀮𑁂𑀳𑀺 𑀙𑀺𑀦𑁆𑀦𑁄 (𑀲𑀻. 𑀓.)] 𑀓𑀢𑀫𑁂𑀦 𑀧𑀧𑀢𑁂𑀬𑁆𑀬𑀸’’𑀢𑀺? ‘‘𑀬𑁂𑀦, 𑀪𑀦𑁆𑀢𑁂, 𑀦𑀺𑀦𑁆𑀦𑁄 𑀬𑁂𑀦 𑀧𑁄𑀡𑁄 𑀬𑁂𑀦 𑀧𑀩𑁆𑀪𑀸𑀭𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀦𑀸𑀫, 𑀇𑀫𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄 𑀳𑁄𑀢𑀺 𑀦𑀺𑀩𑁆𑀩𑀸𑀦𑀧𑁄𑀡𑁄 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑁄. 𑀫𑀸 𑀪𑀸𑀬𑀺, 𑀫𑀳𑀸𑀦𑀸𑀫, 𑀫𑀸 𑀪𑀸𑀬𑀺, 𑀫𑀳𑀸𑀦𑀸𑀫, 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀸𑀧𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀕𑀼𑀦𑁆𑀦𑀜𑁆𑀘𑁂 ¶ 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀉𑀚𑀼𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 [𑀲𑁄 𑀘𑁂𑀯 (𑀲𑀻.) 𑀧𑀲𑁆𑀲 (𑀲𑀻.) 𑀧𑀲𑁆𑀲 𑀅. 𑀦𑀺. 𑁪.𑁭𑁦] 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁪. 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 ¶ 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑁄 𑀪𑀕𑀯𑀸 𑀢𑁂𑀫𑀸𑀲𑀘𑁆𑀘𑀬𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀲𑀸𑀓𑁂𑀢𑁂 [𑀲𑀸𑀥𑀼𑀓𑁂 (𑀲𑀁. 𑀦𑀺. 𑁫.𑁧𑁦𑁦𑁨)] 𑀧𑀝𑀺𑀯𑀲𑀦𑁆𑀢𑀺 𑀓𑁂𑀦𑀘𑀺 𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀼𑀁 𑀔𑁄 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 ‘‘𑀲𑀫𑁆𑀩𑀳𑀼𑀮𑀸 𑀓𑀺𑀭 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀦𑀺𑀝𑁆𑀞𑀺𑀢𑀘𑀻𑀯𑀭𑁄 𑀪𑀕𑀯𑀸 𑀢𑁂𑀫𑀸𑀲𑀘𑁆𑀘𑀬𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺.

𑀅𑀣 ¶ 𑀔𑁄 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀫𑀕𑁆𑀕𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀁 ‘‘𑀬𑀤𑀸 𑀢𑁆𑀯𑀁 𑀅𑀫𑁆𑀪𑁄 𑀧𑀼𑀭𑀺𑀲 𑀧𑀲𑁆𑀲𑁂𑀬𑁆𑀬𑀸𑀲𑀺 𑀪𑀕𑀯𑀦𑁆𑀢𑀁 𑀆𑀕𑀘𑁆𑀙𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀅𑀣 𑀅𑀫𑁆𑀳𑀸𑀓𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀤𑁆𑀯𑀻𑀳𑀢𑀻𑀳𑀁 𑀞𑀺𑀢𑁄 𑀔𑁄 𑀲𑁄 𑀧𑀼𑀭𑀺𑀲𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑁂 𑀣𑀧𑀢𑀬𑁄 𑀏𑀢𑀤𑀯𑁄𑀘 ‘‘𑀅𑀬𑀁 𑀲𑁄 𑀪𑀦𑁆𑀢𑁂 [𑀅𑀬𑀁 𑀪𑀦𑁆𑀢𑁂 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁧𑁦𑁦𑁨] 𑀪𑀕𑀯𑀸 𑀆𑀕𑀘𑁆𑀙𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺.

𑀅𑀣 𑀔𑁄 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸 𑀣𑀧𑀢𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀬𑀤𑀸 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀲𑀸𑀯𑀢𑁆𑀣𑀺𑀬𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’𑀢𑀺, 𑀳𑁄𑀢𑀺 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀢𑁆𑀢𑀫𑀦𑀢𑀸 𑀳𑁄𑀢𑀺 𑀤𑁄𑀫𑀦𑀲𑁆𑀲𑀁 ‘𑀤𑀽𑀭𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀤𑀸 𑀧𑀦 ¶ 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀲𑀸𑀯𑀢𑁆𑀣𑀺𑀬𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’𑀢𑀺, 𑀳𑁄𑀢𑀺 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀢𑁆𑀢𑀫𑀦𑀢𑀸 𑀳𑁄𑀢𑀺 𑀤𑁄𑀫𑀦𑀲𑁆𑀲𑀁 ‘𑀤𑀽𑀭𑁂 𑀦𑁄 𑀪𑀕𑀯𑀸’𑀢𑀺…𑀧𑁂….

‘‘𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀓𑀸𑀲𑀻𑀲𑀼 𑀫𑀕𑀥𑁂𑀲𑀼 [𑀓𑀸𑀲𑀻𑀳𑀺 𑀫𑀸𑀕𑀥𑁂 (𑀲𑀁. 𑀦𑀺. 𑁫.𑁧𑁦𑁦𑁨)] 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’𑀢𑀺, 𑀳𑁄𑀢𑀺 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀢𑁆𑀢𑀫𑀦𑀢𑀸 𑀳𑁄𑀢𑀺 𑀤𑁄𑀫𑀦𑀲𑁆𑀲𑀁 ‘𑀤𑀽𑀭𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻’𑀢𑀺 ¶ . 𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀓𑀸𑀲𑀻𑀲𑀼 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’𑀢𑀺, 𑀅𑀦𑀧𑁆𑀧𑀓𑀸 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑀢𑁆𑀢𑀫𑀦𑀢𑀸 𑀳𑁄𑀢𑀺 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 ‘𑀤𑀽𑀭𑁂 𑀦𑁄 𑀪𑀕𑀯𑀸’𑀢𑀺.

‘‘𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀫𑀕𑀥𑁂𑀲𑀼 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’𑀢𑀺, 𑀳𑁄𑀢𑀺 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀫𑀦𑀢𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀁 ‘𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀫𑀕𑀥𑁂𑀲𑀼 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’𑀢𑀺, 𑀳𑁄𑀢𑀺 𑀦𑁄 ¶ 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀫𑀦𑀢𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀁 ‘𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸’𑀢𑀺…𑀧𑁂….

‘‘𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀓𑁄𑀲𑀮𑁂𑀲𑀼 𑀲𑀸𑀯𑀢𑁆𑀣𑀺𑀁 [𑀲𑀸𑀯𑀢𑁆𑀣𑀺𑀬𑀁 (𑀲𑀻. 𑀓.)] 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’𑀢𑀺. 𑀳𑁄𑀢𑀺 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀫𑀦𑀢𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀁 ‘𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻’𑀢𑀺.

‘‘𑀬𑀤𑀸 𑀧𑀦 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀲𑀼𑀡𑁄𑀫 ‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’𑀢𑀺 𑀳𑁄𑀢𑀺 𑀅𑀦𑀧𑁆𑀧𑀓𑀸 𑀦𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑁆𑀢𑀫𑀦𑀢𑀸, 𑀳𑁄𑀢𑀺 𑀅𑀦𑀧𑁆𑀧𑀓𑀁 𑀲𑁄𑀫𑀦𑀲𑁆𑀲𑀁 ‘𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸’’’𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀣𑀧𑀢𑀬𑁄, 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸, 𑀅𑀮𑀜𑁆𑀘 𑀧𑀦 𑀯𑁄, 𑀣𑀧𑀢𑀬𑁄, 𑀅𑀧𑁆𑀧𑀫𑀸𑀤𑀸𑀬𑀸’’𑀢𑀺. ‘‘𑀅𑀢𑁆𑀣𑀺 𑀔𑁄 𑀦𑁄, 𑀪𑀦𑁆𑀢𑁂, 𑀏𑀢𑀫𑁆𑀳𑀸 𑀲𑀫𑁆𑀩𑀸𑀥𑀸 𑀅𑀜𑁆𑀜𑁄 𑀲𑀫𑁆𑀩𑀸𑀥𑁄 𑀲𑀫𑁆𑀩𑀸𑀥𑀢𑀭𑁄 𑀘𑁂𑀯 𑀲𑀫𑁆𑀩𑀸𑀥𑀲𑀗𑁆𑀔𑀸𑀢𑀢𑀭𑁄 𑀘𑀸’’𑀢𑀺? ‘‘𑀓𑀢𑀫𑁄 𑀧𑀦 𑀯𑁄, 𑀣𑀧𑀢𑀬𑁄, 𑀏𑀢𑀫𑁆𑀳𑀸 𑀲𑀫𑁆𑀩𑀸𑀥𑀸 𑀅𑀜𑁆𑀜𑁄 𑀲𑀫𑁆𑀩𑀸𑀥𑁄 𑀲𑀫𑁆𑀩𑀸𑀥𑀢𑀭𑁄 𑀘𑁂𑀯 𑀲𑀫𑁆𑀩𑀸𑀥𑀲𑀗𑁆𑀔𑀸𑀢𑀢𑀭𑁄 𑀘𑀸’’𑀢𑀺?

‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀬𑀤𑀸 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀢𑀼𑀓𑀸𑀫𑁄 [𑀕𑀦𑁆𑀢𑀼𑀓𑀸𑀫𑁄 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁧𑁦𑁦𑁨] 𑀳𑁄𑀢𑀺, 𑀬𑁂 𑀢𑁂 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀦𑀸𑀕𑀸 𑀑𑀧𑀯𑀬𑁆𑀳𑀸, 𑀢𑁂 𑀓𑀧𑁆𑀧𑁂𑀢𑁆𑀯𑀸 𑀬𑀸 𑀢𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀚𑀸𑀧𑀢𑀺𑀬𑁄 𑀧𑀺𑀬𑀸 𑀫𑀦𑀸𑀧𑀸, 𑀢𑀸 [𑀢𑀸𑀲𑀁 (𑀲𑀻. 𑀓.)] 𑀏𑀓𑀁 𑀧𑀼𑀭𑀢𑁄 𑀏𑀓𑀁 𑀧𑀘𑁆𑀙𑀢𑁄 𑀦𑀺𑀲𑀻𑀤𑀸𑀧𑁂𑀫, 𑀢𑀸𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀺𑀦𑀻𑀦𑀁 𑀏𑀯𑀭𑀽𑀧𑁄 𑀕𑀦𑁆𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀦𑁆𑀥𑀓𑀭𑀡𑁆𑀟𑀓𑀲𑁆𑀲 𑀢𑀸𑀯𑀤𑁂𑀯 ¶ 𑀯𑀺𑀯𑀭𑀺𑀬𑀫𑀸𑀦𑀲𑁆𑀲, 𑀬𑀣𑀸 𑀢𑀁 𑀭𑀸𑀚𑀓𑀜𑁆𑀜𑀸𑀦𑀁 [𑀭𑀸𑀚𑀸𑀭𑀳𑁂𑀦 (𑀲𑀻. 𑀓.)] 𑀕𑀦𑁆𑀥𑁂𑀦 𑀯𑀺𑀪𑀽𑀲𑀺𑀢𑀸𑀦𑀁. 𑀢𑀸𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀺𑀦𑀻𑀦𑀁 𑀏𑀯𑀭𑀽𑀧𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 ¶ 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀳𑀧𑀺𑀘𑀼𑀦𑁄 𑀯𑀸, 𑀬𑀣𑀸 𑀢𑀁 𑀭𑀸𑀚𑀓𑀜𑁆𑀜𑀸𑀦𑀁 𑀲𑀼𑀔𑁂𑀥𑀺𑀢𑀸𑀦𑀁. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀦𑁆𑀢𑁂, 𑀲𑀫𑀬𑁂 𑀦𑀸𑀕𑁄𑀧𑀺 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀸𑀧𑀺 𑀪𑀕𑀺𑀦𑀺𑀬𑁄 𑀭𑀓𑁆𑀔𑀺𑀢𑀩𑁆𑀩𑀸 𑀳𑁄𑀢𑀺. 𑀅𑀢𑁆𑀢𑀸𑀧𑀺 𑀭𑀓𑁆𑀔𑀺𑀢𑀩𑁆𑀩𑀸 𑀳𑁄𑀢𑀺. 𑀦 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫 𑀢𑀸𑀲𑀼 𑀪𑀕𑀻𑀦𑀺𑀲𑀼 𑀧𑀸𑀧𑀓𑀁 𑀘𑀺𑀢𑁆𑀢𑀁 𑀜𑀧𑁆𑀧𑀸𑀤𑁂𑀦𑁆𑀢𑀸, 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀏𑀢𑀫𑁆𑀳𑀸 𑀲𑀫𑁆𑀩𑀸𑀥𑀸 𑀅𑀜𑁆𑀜𑁄 𑀲𑀫𑁆𑀩𑀸𑀥𑁄 𑀲𑀫𑁆𑀩𑀸𑀥𑀢𑀭𑁄 𑀘𑁂𑀯 𑀲𑀫𑁆𑀩𑀸𑀥𑀲𑀗𑁆𑀖𑀸𑀢𑀢𑀭𑁄 𑀘𑀸𑀢𑀺.

‘‘𑀢𑀲𑁆𑀫𑀸𑀢𑀺𑀳 ¶ , 𑀣𑀧𑀢𑀬𑁄, 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀅𑀮𑀜𑁆𑀘 𑀧𑀦 𑀯𑁄, 𑀣𑀧𑀢𑀬𑁄, 𑀅𑀧𑁆𑀧𑀫𑀸𑀤𑀸𑀬. 𑀘𑀢𑀽𑀳𑀺 𑀔𑁄 𑀣𑀧𑀢𑀬𑁄, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

‘‘𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀣𑀧𑀢𑀬𑁄, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁. 𑀇𑀫𑁂𑀳𑀺 𑀔𑁄, 𑀣𑀧𑀢𑀬𑁄, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

‘‘𑀢𑀼𑀫𑁆𑀳𑁂 𑀔𑁄, 𑀣𑀧𑀢𑀬𑁄, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺, 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀓𑀼𑀮𑁂 𑀤𑁂𑀬𑁆𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀺, 𑀢𑀁 𑀓𑀺𑀁 𑀫𑀜𑁆𑀜𑀣, 𑀣𑀧𑀢𑀬𑁄, 𑀓𑀢𑀺𑀯𑀺𑀥𑀸 𑀢𑁂 𑀓𑁄𑀲𑀮𑁂𑀲𑀼 𑀫𑀦𑀼𑀲𑁆𑀲𑀸 𑀬𑁂 𑀢𑀼𑀫𑁆𑀳𑀸𑀓𑀁 𑀲𑀫𑀲𑀫𑀸 𑀬𑀤𑀺𑀤𑀁 𑀤𑀸𑀦𑀲𑀁𑀯𑀺𑀪𑀸𑀕𑁂𑀳𑀻’’𑀢𑀺? ‘‘𑀮𑀸𑀪𑀸 𑀦𑁄, 𑀪𑀦𑁆𑀢𑁂, 𑀲𑀼𑀮𑀤𑁆𑀥𑀁 𑀦𑁄, 𑀪𑀦𑁆𑀢𑁂, 𑀬𑁂𑀲𑀁 𑀦𑁄 𑀪𑀕𑀯𑀸 𑀏𑀯𑀁 𑀧𑀚𑀸𑀦𑀸𑀢𑀻’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁫.

‘‘𑀏𑀓𑀧𑀼𑀧𑁆𑀨𑀁 ¶ 𑀘𑀚𑀺𑀢𑁆𑀯𑀸𑀦 [𑀬𑀚𑀺𑀢𑁆𑀯𑀸𑀦 (𑀓.) 𑀧𑀲𑁆𑀲 𑀣𑁂𑀭𑀕𑀸. 𑁯𑁬], 𑀲𑀳𑀲𑁆𑀲𑀁 𑀓𑀧𑁆𑀧𑀓𑁄𑀝𑀺𑀬𑁄;

𑀤𑁂𑀯𑁂 𑀘𑁂𑀯 𑀫𑀦𑀼𑀲𑁆𑀲𑁂 𑀘, 𑀲𑁂𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀲𑁆𑀲𑀢𑁆𑀣𑁂 ¶ 𑀳𑀭𑀺𑀢𑁄𑀪𑀸𑀲𑁂, 𑀲𑀁𑀯𑀺𑀭𑀽𑀴𑁆𑀳𑀫𑁆𑀳𑀺 𑀧𑀸𑀤𑀧𑁂;

𑀏𑀓𑀁 𑀩𑀼𑀤𑁆𑀥𑀕𑀢𑀁 [𑀩𑀼𑀤𑁆𑀥𑀓𑀢𑀁 (𑀓.) 𑀧𑀲𑁆𑀲 𑀣𑁂𑀭𑀕𑀸. 𑁨𑁧𑁭] 𑀲𑀜𑁆𑀜𑀁, 𑀅𑀮𑀪𑀺𑀁𑀢𑁆𑀣𑀁 [𑀅𑀮𑀪𑀺𑀁𑀳𑀁 (𑀲𑀻. 𑀓.)] 𑀧𑀢𑀺𑀲𑁆𑀲𑀢𑁄.

‘‘𑀅𑀚𑁆𑀚 𑀢𑀺𑀁𑀲𑀁 𑀢𑀢𑁄 𑀓𑀧𑁆𑀧𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀤𑀼𑀕𑁆𑀕𑀢𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀢𑀲𑁆𑀲𑀸 𑀲𑀜𑁆𑀜𑀸𑀬 𑀯𑀸𑀲𑀦𑀸’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀧𑀺𑀡𑁆𑀟𑀸𑀬 ¶ 𑀓𑁄𑀲𑀮𑀁 𑀧𑀼𑀭𑀁, 𑀧𑀸𑀯𑀺𑀲𑀺 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀅𑀦𑀼𑀓𑀫𑁆𑀧𑀓𑁄 𑀧𑀼𑀭𑁂𑀪𑀢𑁆𑀢𑀁, 𑀢𑀡𑁆𑀳𑀸𑀦𑀺𑀖𑀸𑀢𑀓𑁄 𑀫𑀼𑀦𑀺.

‘‘𑀧𑀼𑀭𑀺𑀲𑀲𑁆𑀲 𑀯𑀝𑀁𑀲𑀓𑁄 𑀳𑀢𑁆𑀣𑁂, 𑀲𑀩𑁆𑀩𑀧𑀼𑀧𑁆𑀨𑁂𑀳𑀺𑀮𑀗𑁆𑀓𑀢𑁄;

𑀲𑁄 𑀅𑀤𑁆𑀤𑀲𑀸𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

‘‘𑀧𑀯𑀺𑀲𑀦𑁆𑀢𑀁 𑀭𑀸𑀚𑀫𑀕𑁆𑀕𑁂𑀦, 𑀤𑁂𑀯𑀫𑀸𑀦𑀼𑀲𑀧𑀽𑀚𑀺𑀢𑀁;

𑀳𑀝𑁆𑀞𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀺.

‘‘𑀲𑁄 𑀢𑀁 𑀯𑀝𑀁𑀲𑀓𑀁 𑀲𑀼𑀭𑀪𑀺𑀁, 𑀯𑀡𑁆𑀡𑀯𑀦𑁆𑀢𑀁 𑀫𑀦𑁄𑀭𑀫𑀁;

𑀲𑀫𑁆𑀩𑀼𑀤𑁆𑀥𑀲𑁆𑀲𑀼𑀧𑀦𑀸𑀫𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

‘‘𑀢𑀢𑁄 𑀅𑀕𑁆𑀕𑀺𑀲𑀺𑀔𑀸 𑀯𑀡𑁆𑀡𑀸, 𑀩𑀼𑀤𑁆𑀥𑀲𑁆𑀲 𑀮𑀧𑀦𑀦𑁆𑀢𑀭𑀸;

𑀲𑀳𑀲𑁆𑀲𑀭𑀁𑀲𑀺 𑀯𑀺𑀚𑁆𑀚𑀼𑀭𑀺𑀯, 𑀑𑀓𑁆𑀓𑀸 𑀦𑀺𑀓𑁆𑀔𑀫𑀺 𑀆𑀦𑀦𑀸.

‘‘𑀧𑀤𑀓𑁆𑀔𑀺𑀡𑀁 𑀓𑀭𑀺𑀢𑁆𑀯𑀸𑀦, 𑀲𑀻𑀲𑁂 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸, 𑀫𑀼𑀤𑁆𑀥𑀦𑀦𑁆𑀢𑀭𑀥𑀸𑀬𑀣.

‘‘𑀇𑀤𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀆𑀦𑀦𑁆𑀤𑁄 𑀏𑀢𑀤𑀩𑁆𑀭𑀯𑀺.

‘‘‘𑀓𑁄 𑀳𑁂𑀢𑀼 𑀲𑀺𑀢𑀓𑀫𑁆𑀫𑀲𑁆𑀲, 𑀩𑁆𑀬𑀸𑀓𑀭𑁄𑀳𑀺 𑀫𑀳𑀸𑀫𑀼𑀦𑁂;

𑀥𑀫𑁆𑀫𑀸𑀮𑁄𑀓𑁄 𑀪𑀯𑀺𑀲𑁆𑀲𑀢𑀺, 𑀓𑀗𑁆𑀔𑀁 𑀯𑀺𑀢𑀭 𑀦𑁄 𑀫𑀼𑀦𑁂.

‘‘‘𑀬𑀲𑁆𑀲 ¶ 𑀢𑀁 𑀲𑀩𑁆𑀩𑀥𑀫𑁆𑀫𑁂𑀲𑀼, 𑀲𑀤𑀸 𑀜𑀸𑀡𑀁 𑀧𑀯𑀢𑁆𑀢𑀢𑀺;

𑀓𑀗𑁆𑀔𑀺𑀁 ¶ 𑀯𑁂𑀫𑀢𑀺𑀓𑀁 𑀣𑁂𑀭𑀁, 𑀆𑀦𑀦𑁆𑀤𑀁 𑀏𑀢𑀤𑀩𑁆𑀭𑀯𑀺.

‘‘‘𑀬𑁄 𑀲𑁄 𑀆𑀦𑀦𑁆𑀤 𑀧𑀼𑀭𑀺𑀲𑁄, 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺;

𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀸𑀦𑀺, 𑀤𑀼𑀕𑁆𑀕𑀢𑀺𑀁 𑀦 𑀕𑀫𑀺𑀲𑁆𑀲𑀢𑀺.

‘‘‘𑀤𑁂𑀯𑁂𑀲𑀼 𑀤𑁂𑀯𑀲𑁄𑀪𑀕𑁆𑀕𑀁, 𑀤𑀺𑀩𑁆𑀩𑀁 𑀭𑀚𑁆𑀚𑀁 𑀧𑀲𑀸𑀲𑀺𑀬;

𑀫𑀦𑀼𑀚𑁂𑀲𑀼 𑀫𑀦𑀼𑀚𑀺𑀦𑁆𑀤𑁄, 𑀭𑀸𑀚𑀸 𑀭𑀝𑁆𑀞𑁂 𑀪𑀯𑀺𑀲𑁆𑀲𑀢𑀺.

‘‘‘𑀲𑁄 𑀘𑀭𑀺𑀫𑀁 𑀧𑀩𑁆𑀩𑀚𑀺𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸𑀦 [𑀲𑀘𑁆𑀙𑀺𑀓𑀢𑁆𑀯𑀸 𑀘 (𑀓.)] 𑀥𑀫𑁆𑀫𑀢𑀁;

𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀥𑀼𑀢𑀭𑀸𑀕𑁄, 𑀯𑀝𑀁𑀲𑀓𑁄 𑀦𑀸𑀫 𑀪𑀯𑀺𑀲𑁆𑀲𑀢𑀺.

‘‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 [𑀧𑀲𑁆𑀲 𑀯𑀺. 𑀯. 𑁮𑁦𑁪] 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸;

𑀢𑀣𑀸𑀕𑀢𑁂 𑀯𑀸 𑀲𑀫𑁆𑀩𑀼𑀤𑁆𑀥𑁂, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑁂.

‘‘‘𑀏𑀯𑀁 ¶ 𑀅𑀘𑀺𑀦𑁆𑀢𑀺𑀬𑀸 [𑀧𑀲𑁆𑀲 𑀅𑀧. 𑀣𑁂𑀭 𑁧.𑁧.𑁮𑁨] 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁬. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀲𑀦𑁆𑀦𑀘𑀺𑀢𑁆𑀢𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 ‘‘(𑀬𑀣𑀸 𑀔𑁄 𑀅𑀬𑀁 𑀧𑀼𑀕𑁆𑀕𑀮𑁄 𑀇𑀭𑀺𑀬𑀢𑀺, 𑀬𑀜𑁆𑀘 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄, 𑀬𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄) [( ) 𑀦𑀢𑁆𑀣𑀺 𑀅. 𑀦𑀺. 𑁧.𑁪𑁩-𑁪𑁪; 𑀇𑀢𑀺𑀯𑀼. 𑁨𑁧]. 𑀇𑀫𑀫𑁆𑀳𑀺 𑀘𑀸𑀬𑀁 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬, 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀘𑀺𑀢𑁆𑀢𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀲𑀦𑁆𑀦𑀁, 𑀘𑁂𑀢𑁄𑀧𑀲𑀸𑀤𑀳𑁂𑀢𑀼 [𑀘𑀺𑀢𑁆𑀢𑀧𑁆𑀧𑀲𑀸𑀤𑀳𑁂𑀢𑀼 (𑀲𑀻. 𑀓.)] 𑀔𑁄 𑀧𑀦 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘, 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀲𑀦𑁆𑀦𑀘𑀺𑀢𑁆𑀢𑀁 𑀜𑀢𑁆𑀯𑀸𑀦, 𑀏𑀓𑀘𑁆𑀘𑀁 𑀇𑀥 𑀧𑀼𑀕𑁆𑀕𑀮𑀁;

𑀏𑀢𑀫𑀢𑁆𑀣𑀜𑁆𑀘 𑀩𑁆𑀬𑀸𑀓𑀸𑀲𑀺, 𑀩𑀼𑀤𑁆𑀥𑁄 [𑀲𑀢𑁆𑀣𑀸 (𑀲𑀻. 𑀓.) 𑀧𑀲𑁆𑀲 𑀇𑀢𑀺𑀯𑀼. 𑁨𑁧] 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂.

‘‘𑀇𑀫𑀫𑁆𑀳𑀺 ¶ 𑀘𑀸𑀬𑀁 𑀲𑀫𑀬𑁂, 𑀓𑀸𑀮𑀁 𑀓𑀬𑀺𑀭𑀸𑀣 𑀧𑀼𑀕𑁆𑀕𑀮𑁄;

𑀲𑀕𑁆𑀕𑀫𑁆𑀳𑀺 𑀉𑀧𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀁 𑀳𑀺𑀲𑁆𑀲 𑀧𑀲𑀸𑀤𑀺𑀢𑀁.

‘‘𑀘𑁂𑀢𑁄𑀧𑀲𑀸𑀤𑀳𑁂𑀢𑀼 𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁;

𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀏𑀯𑀫𑁂𑀯𑀁 𑀢𑀣𑀸𑀯𑀺𑀥𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻’’𑀢𑀺.

‘‘𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀇𑀢𑀺 𑀫𑁂 𑀲𑀼𑀢’’𑀦𑁆𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀼𑀯𑀡𑁆𑀡𑀘𑁆𑀙𑀤𑀦𑀁 ¶ 𑀦𑀸𑀯𑀁, 𑀦𑀸𑀭𑀺 𑀆𑀭𑀼𑀬𑁆𑀳 𑀢𑀺𑀝𑁆𑀞𑀲𑀺;

𑀑𑀕𑀸𑀳𑀲𑀺 [𑀑𑀕𑀸𑀳𑀲𑁂 (𑀲𑀻. 𑀓.) 𑀧𑀲𑁆𑀲 𑀯𑀺. 𑀯. 𑁫𑁩] 𑀧𑁄𑀓𑁆𑀔𑀭𑀡𑀺𑀁, 𑀧𑀤𑁆𑀫𑀁 𑀙𑀺𑀦𑁆𑀤𑀲𑀺 𑀧𑀸𑀡𑀺𑀦𑀸.

‘‘𑀓𑁂𑀦 𑀢𑁂 𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀆𑀦𑀼𑀪𑀸𑀯𑁄 𑀚𑀼𑀢𑀺 𑀘 𑀢𑁂;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑀺𑀘𑁆𑀙𑀺𑀢𑀸.

‘‘𑀧𑀼𑀘𑁆𑀙𑀺𑀢𑀸 𑀤𑁂𑀯𑀢𑁂 𑀲𑀁𑀲, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁;

𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀤𑁂𑀯𑀭𑀸𑀚𑁂𑀦 𑀧𑀼𑀘𑁆𑀙𑀺𑀢𑀸.

‘‘𑀧𑀜𑁆𑀳𑀁 ¶ 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀲𑀓𑁆𑀓𑀲𑁆𑀲 𑀇𑀢𑀺 𑀫𑁂 𑀲𑀼𑀢𑀁;

𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀸𑀳𑀁, 𑀤𑀺𑀲𑁆𑀯𑀸 𑀣𑀽𑀧𑀁 𑀫𑀦𑁄𑀭𑀫𑀁.

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀓𑀲𑁆𑀲𑀧𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀧𑀤𑁆𑀥𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀢𑀲𑁆𑀲𑁂𑀯;

𑀓𑀫𑁆𑀫𑀲𑁆𑀲 𑀨𑀮𑀁 𑀯𑀺𑀧𑀸𑀓𑁄, 𑀏𑀢𑀸𑀤𑀺𑀲𑀁 𑀓𑀢𑀧𑀼𑀜𑁆𑀜𑀸 𑀮𑀪𑀦𑁆𑀢𑀻’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀧𑀼𑀜𑁆𑀜𑀓𑀣𑀸 𑀧𑀼𑀜𑁆𑀜𑀯𑀺𑀧𑀸𑀓𑀓𑀣𑀸’’𑀢𑀺;

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀧𑀺𑀘𑀸𑀧𑀺 ¶ 𑀧𑀁𑀲𑀼𑀣𑀽𑀧𑁂𑀲𑀼 𑀉𑀤𑁆𑀤𑀺𑀲𑁆𑀲𑀓𑀢𑁂𑀲𑀼 𑀤𑀲𑀩𑀮𑀥𑀭𑀸𑀦𑀁 𑀢𑀢𑁆𑀣𑀧𑀺 𑀓𑀸𑀭𑀁 𑀓𑀢𑁆𑀯𑀸 𑀲𑀕𑁆𑀕𑁂𑀲𑀼 𑀦𑀭𑀸 𑀧𑀫𑁄𑀤𑀦𑁆𑀢𑀻’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁭.

‘‘𑀤𑁂𑀯𑀧𑀼𑀢𑁆𑀢𑀲𑀭𑀻𑀭𑀯𑀡𑁆𑀡𑀸, 𑀲𑀩𑁆𑀩𑁂 𑀲𑀼𑀪𑀕𑀲𑀡𑁆𑀞𑀺𑀢𑀻;

𑀉𑀤𑀓𑁂𑀦 𑀧𑀁𑀲𑀼𑀁 𑀢𑁂𑀫𑁂𑀢𑁆𑀯𑀸, 𑀣𑀽𑀧𑀁 𑀯𑀟𑁆𑀠𑁂𑀣 𑀓𑀲𑁆𑀲𑀧𑀁.

‘‘𑀅𑀬𑀁 𑀲𑀼𑀕𑀢𑁆𑀢𑁂 𑀲𑀼𑀕𑀢𑀲𑁆𑀲 𑀣𑀽𑀧𑁄, 𑀫𑀳𑁂𑀲𑀺𑀦𑁄 𑀤𑀲𑀩𑀮𑀥𑀫𑁆𑀫𑀥𑀸𑀭𑀺𑀦𑁄;

𑀢𑀲𑁆𑀫𑀺𑀁 [𑀬𑀲𑁆𑀫𑀺𑀁 (𑀲𑀻.)] 𑀇𑀫𑁂 𑀤𑁂𑀯𑀫𑀦𑀼𑀚𑀸 𑀧𑀲𑀦𑁆𑀦𑀸, 𑀓𑀸𑀭𑀁 𑀓𑀭𑁄𑀦𑁆𑀢𑀸 𑀚𑀭𑀸𑀫𑀭𑀡𑀸 𑀧𑀫𑀼𑀘𑁆𑀘𑀭𑁂’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀉𑀴𑀸𑀭𑀁 𑀯𑀢 𑀢𑀁 𑀆𑀲𑀺, 𑀬𑀸𑀳𑀁 𑀣𑀽𑀧𑀁 𑀫𑀳𑁂𑀲𑀺𑀦𑁄;

𑀉𑀧𑁆𑀧𑀮𑀸𑀦𑀺 ¶ 𑀘 𑀘𑀢𑁆𑀢𑀸𑀭𑀺, 𑀫𑀸𑀮𑀜𑁆𑀘 𑀅𑀪𑀺𑀭𑁄𑀧𑀬𑀺𑀁.

‘‘𑀅𑀚𑁆𑀚 𑀢𑀺𑀁𑀲𑀁 𑀢𑀢𑁄 𑀓𑀧𑁆𑀧𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀤𑀼𑀕𑁆𑀕𑀢𑀺𑀁;

𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀸𑀫𑀺, 𑀣𑀽𑀧𑀁 𑀧𑀽𑀚𑁂𑀢𑁆𑀯 [𑀧𑀽𑀚𑁂𑀢𑁆𑀯𑀸 (𑀓.)] 𑀲𑀢𑁆𑀣𑀼𑀦𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀥𑀭𑀲𑁆𑀲, 𑀯𑀺𑀚𑀺𑀢𑀯𑀺𑀚𑀬𑀲𑁆𑀲 𑀮𑁄𑀓𑀦𑀸𑀣𑀲𑁆𑀲;

𑀲𑀢𑀲𑀳𑀲𑁆𑀲𑀁 𑀓𑀧𑁆𑀧𑁂, 𑀫𑀼𑀤𑀺𑀢𑁄 𑀣𑀽𑀧𑀁 𑀅𑀧𑀽𑀚𑁂𑀲𑀺.

‘‘𑀬𑀁 ¶ 𑀫𑀬𑀸 𑀧𑀲𑀼𑀢𑀁 𑀧𑀼𑀜𑁆𑀜𑀁, 𑀢𑁂𑀦 𑀘 𑀧𑀼𑀜𑁆𑀜𑁂𑀦 𑀤𑁂𑀯 𑀲𑁄𑀪𑀕𑁆𑀕𑀁;

𑀭𑀚𑁆𑀚𑀸𑀦𑀺 𑀘 𑀓𑀸𑀭𑀺𑀢𑀸𑀦𑀺, 𑀅𑀦𑀸𑀕𑀦𑁆𑀢𑀼𑀦 𑀯𑀺𑀦𑀺𑀧𑀸𑀢𑀁.

‘‘𑀬𑀁 𑀘𑀓𑁆𑀔𑀼 𑀅𑀤𑀦𑁆𑀢𑀤𑀫𑀓𑀲𑁆𑀲, 𑀲𑀸𑀲𑀦𑁂 𑀧𑀡𑀺𑀳𑀺𑀢𑀁 𑀢𑀣𑀸;

𑀘𑀺𑀢𑁆𑀢𑀁 𑀢𑀁 𑀫𑁂 𑀲𑀩𑁆𑀩𑀁, 𑀮𑀤𑁆𑀥𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀫𑁆𑀳𑀺 𑀯𑀺𑀥𑀽𑀢𑀮𑀢𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁮.

‘‘𑀲𑀸𑀫𑀸𑀓𑀧𑀢𑁆𑀣𑁄𑀤𑀦𑀫𑀢𑁆𑀢𑀫𑁂𑀯 𑀳𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑁆𑀳𑀺 𑀅𑀤𑀸𑀲𑀺 𑀤𑀓𑁆𑀔𑀺𑀡𑀁;

𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁂 𑀅𑀔𑀺𑀮𑁂 𑀅𑀦𑀸𑀲𑀯𑁂, 𑀅𑀭𑀡𑀯𑀺𑀳𑀸𑀭𑀺𑀫𑁆𑀳𑀺 𑀅𑀲𑀗𑁆𑀕𑀫𑀸𑀦𑀲𑁂.

‘‘𑀢𑀲𑁆𑀫𑀺𑀜𑁆𑀘 ¶ 𑀑𑀓𑀧𑁆𑀧𑀬𑀺 𑀥𑀫𑁆𑀫𑀫𑀼𑀢𑁆𑀢𑀫𑀁, 𑀢𑀲𑁆𑀫𑀺𑀜𑁆𑀘 𑀥𑀫𑁆𑀫𑁂 𑀧𑀡𑀺𑀥𑁂𑀲𑀺𑀁 𑀫𑀸𑀦𑀲𑀁;

𑀏𑀯𑀁 𑀯𑀺𑀳𑀸𑀭𑀻𑀳𑀺 𑀫𑁂 𑀲𑀗𑁆𑀕𑀫𑁄 𑀲𑀺𑀬𑀸, 𑀪𑀯𑁂 𑀓𑀼𑀤𑀸𑀲𑀼𑀧𑀺 𑀘 𑀫𑀸 𑀅𑀧𑁂𑀓𑁆𑀔𑀯𑀸.

‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀅𑀳𑀁, 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀓𑀼𑀭𑀼𑀲𑀽𑀧𑀧𑀚𑁆𑀚𑀣 [𑀓𑀼𑀭𑀽𑀲𑀽𑀧𑀧𑀚𑁆𑀚𑀣 (𑀲𑀻.)];

𑀤𑀻𑀖𑀸𑀬𑀼𑀓𑁂𑀲𑀼 𑀅𑀫𑀫𑁂𑀲𑀼 𑀧𑀸𑀡𑀺𑀲𑀼, 𑀯𑀺𑀲𑁂𑀲𑀕𑀸𑀫𑀻𑀲𑀼 𑀅𑀳𑀻𑀦𑀕𑀸𑀫𑀺𑀲𑀼.

‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀅𑀳𑀁, 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀢𑀺𑀤𑀲𑁄𑀧𑀧𑀚𑁆𑀚𑀣;

𑀯𑀺𑀘𑀺𑀢𑁆𑀭𑀫𑀸𑀮𑀸𑀪𑀭𑀡𑀸𑀦𑀼𑀮𑁂𑀧𑀺𑀲𑀼, 𑀯𑀺𑀲𑀺𑀝𑁆𑀞𑀓𑀸𑀬𑀽𑀧𑀕𑀢𑁄 𑀬𑀲𑀲𑁆𑀲𑀺𑀲𑀼.

‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁄 𑀅𑀳𑀁, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀅𑀔𑀺𑀮𑁄 𑀅𑀦𑀸𑀲𑀯𑁄;

𑀇𑀫𑁂𑀳𑀺 𑀫𑁂 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀺𑀪𑀺, 𑀲𑀫𑀸𑀕𑀫𑁄 ¶ 𑀆𑀲𑀺𑀳𑀺 𑀢𑀸𑀳𑀺 𑀢𑀸𑀲𑀺𑀳𑀺.

‘‘𑀧𑀘𑁆𑀘𑀓𑁆𑀔𑀁 ¶ 𑀔𑁆𑀯𑀺𑀫𑀁 𑀅𑀯𑀘 𑀢𑀣𑀸𑀕𑀢𑁄 𑀚𑀺𑀦𑁄, 𑀲𑀫𑀺𑀚𑁆𑀛𑀢𑁂 𑀲𑀻𑀮𑀯𑀢𑁄 𑀬𑀤𑀺𑀘𑁆𑀙𑀢𑀺;

𑀬𑀣𑀸 𑀬𑀣𑀸 𑀫𑁂 𑀫𑀦𑀲𑀸 𑀯𑀺𑀘𑀺𑀦𑁆𑀢𑀺𑀢𑀁, 𑀢𑀣𑀸 𑀲𑀫𑀺𑀤𑁆𑀥𑀁 𑀅𑀬𑀫𑀦𑁆𑀢𑀺𑀫𑁄 𑀪𑀯𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀏𑀓𑀢𑀺𑀁𑀲𑀫𑁆𑀳𑀺 𑀓𑀧𑁆𑀧𑀫𑁆𑀳𑀺 𑀚𑀺𑀦𑁄 𑀅𑀦𑁂𑀚𑁄, 𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸 𑀲𑀺𑀔𑀻𑀢𑀺;

𑀢𑀲𑁆𑀲𑀸𑀧𑀺 𑀭𑀸𑀚𑀸 𑀪𑀸𑀢𑀸 𑀲𑀺𑀔𑀺𑀤𑁆𑀥𑁂 [𑀲𑀺𑀔𑀡𑁆𑀟𑀺 (𑀲𑀻.)], 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀅𑀪𑀺𑀧𑁆𑀧𑀲𑀦𑁆𑀦𑁄.

‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀮𑁄𑀓𑀯𑀺𑀦𑀸𑀬𑀓𑀫𑁆𑀳𑀺, 𑀣𑀽𑀧𑀁 𑀲𑀓𑀸𑀲𑀺 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁;

𑀲𑀫𑀦𑁆𑀢𑀢𑁄 𑀕𑀸𑀯𑀼𑀢𑀺𑀓𑀁 𑀫𑀳𑁂𑀲𑀺𑀦𑁄, 𑀤𑁂𑀯𑀸𑀢𑀺𑀤𑁂𑀯𑀲𑁆𑀲 𑀦𑀭𑀼𑀢𑁆𑀢𑀫𑀲𑁆𑀲.

‘‘𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑁄 𑀩𑀮𑀺𑀫𑀸𑀪𑀺𑀳𑀸𑀭𑀻, 𑀧𑀕𑁆𑀕𑀬𑁆𑀳 𑀚𑀸𑀢𑀺𑀲𑀼𑀫𑀦𑀁 𑀧𑀳𑀝𑁆𑀞𑁄;

𑀯𑀸𑀢𑁂𑀦 𑀧𑀼𑀧𑁆𑀨𑀁 𑀧𑀢𑀺𑀢𑀲𑁆𑀲 𑀏𑀓𑀁, 𑀢𑀸𑀳𑀁 𑀕𑀳𑁂𑀢𑁆𑀯𑀸𑀦 𑀢𑀲𑁆𑀲𑁂𑀯 𑀤𑀸𑀲𑀺.

‘‘𑀲𑁄 𑀫𑀁 𑀅𑀯𑁄𑀘𑀸𑀪𑀺𑀧𑀲𑀦𑁆𑀦𑀘𑀺𑀢𑁆𑀢𑁄, 𑀢𑀼𑀬𑁆𑀳𑀫𑁂𑀯 𑀏𑀢𑀁 𑀧𑀼𑀧𑁆𑀨𑀁 𑀤𑀤𑀸𑀫𑀺;

𑀢𑀸𑀳𑀁 𑀕𑀳𑁂𑀢𑁆𑀯𑀸 𑀅𑀪𑀺𑀭𑁄𑀧𑀬𑁂𑀲𑀺𑀁, 𑀧𑀼𑀦𑀧𑁆𑀧𑀼𑀦𑀁 𑀩𑀼𑀤𑁆𑀥𑀫𑀦𑀼𑀲𑁆𑀲𑀭𑀦𑁆𑀢𑁄.

‘‘𑀅𑀚𑁆𑀚 ¶ 𑀢𑀺𑀁𑀲𑀁 𑀢𑀢𑁄 𑀓𑀧𑁆𑀧𑀸, 𑀦𑀸𑀪𑀺𑀚𑀸𑀦𑀸𑀫𑀺 𑀤𑀼𑀕𑁆𑀕𑀢𑀺𑀁;

𑀯𑀺𑀦𑀺𑀧𑀸𑀢𑀜𑁆𑀘 𑀦 𑀕𑀘𑁆𑀙𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 𑀨𑀮’’𑀦𑁆𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀧𑀺𑀮𑀁 𑀦𑀸𑀫 𑀦𑀕𑀭𑀁, 𑀲𑀼𑀯𑀺𑀪𑀢𑁆𑀢𑀁 𑀫𑀳𑀸𑀧𑀣𑀁;

𑀆𑀓𑀺𑀡𑁆𑀡𑀫𑀺𑀤𑁆𑀥𑀁 𑀨𑀻𑀢𑀜𑁆𑀘, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀸𑀚𑀺𑀦𑁄.

‘‘𑀓𑀼𑀫𑁆𑀫𑀸𑀲𑀁 ¶ 𑀯𑀺𑀓𑁆𑀓𑀺𑀡𑀺𑀁 𑀢𑀢𑁆𑀣, 𑀧𑀜𑁆𑀘𑀸𑀮𑀸𑀦𑀁 𑀧𑀼𑀭𑀼𑀢𑁆𑀢𑀫𑁂;

𑀲𑁄𑀳𑀁 ¶ 𑀅𑀤𑁆𑀤𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀉𑀧𑀭𑀺𑀝𑁆𑀞𑀁 𑀬𑀲𑀲𑁆𑀲𑀺𑀦𑀁.

‘‘𑀳𑀝𑁆𑀞𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀫𑀦𑁆𑀢𑁂𑀲𑀺𑀁 𑀦𑀭𑀼𑀢𑁆𑀢𑀫𑀁;

𑀅𑀭𑀺𑀝𑁆𑀞𑀁 𑀥𑀼𑀯𑀪𑀢𑁆𑀢𑁂𑀦, 𑀬𑀁 𑀫𑁂 𑀕𑁂𑀳𑀫𑁆𑀳𑀺 𑀯𑀺𑀚𑁆𑀚𑀣.

‘‘𑀢𑀢𑁄 𑀘 𑀓𑀢𑁆𑀢𑀺𑀓𑁄 𑀧𑀼𑀡𑁆𑀡𑁄 [𑀓𑀢𑁆𑀢𑀺𑀓𑀸 𑀧𑀼𑀡𑁆𑀡𑀸 (𑀓.)], 𑀧𑀼𑀡𑁆𑀡𑀫𑀸𑀲𑀻 𑀉𑀧𑀝𑁆𑀞𑀺𑀢𑀸;

𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀕𑀬𑁆𑀳, 𑀅𑀭𑀺𑀝𑁆𑀞𑀲𑁆𑀲𑁄𑀧𑀦𑀸𑀫𑀬𑀺𑀁.

‘‘𑀧𑀲𑀦𑁆𑀦𑀘𑀺𑀢𑁆𑀢𑀁 𑀜𑀢𑁆𑀯𑀸𑀦, 𑀧𑀝𑀺𑀕𑁆𑀕𑀡𑁆𑀳𑀺 𑀦𑀭𑀼𑀢𑁆𑀢𑀫𑁄;

𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀢𑀡𑁆𑀳𑀸𑀦𑀺𑀖𑀸𑀢𑀓𑁄 𑀫𑀼𑀦𑀺.

‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀮𑁆𑀬𑀸𑀡𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀤𑁂𑀯𑁂 𑀘𑁂𑀯 𑀫𑀦𑀼𑀲𑁆𑀲𑁂 𑀘, 𑀲𑀦𑁆𑀥𑀸𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄.

‘‘𑀩𑀸𑀭𑀸𑀡𑀲𑀺𑀬𑀁 𑀦𑀕𑀭𑁂, 𑀲𑁂𑀝𑁆𑀞𑀺𑀲𑁆𑀲 𑀏𑀓𑀧𑀼𑀢𑁆𑀢𑀓𑁄;

𑀅𑀟𑁆𑀠𑁂 𑀓𑀼𑀮𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀺𑀁, 𑀧𑀸𑀡𑁂𑀳𑀺 𑀘 𑀧𑀺𑀬𑀢𑀭𑁄.

‘‘𑀢𑀢𑁄 𑀘 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀤𑁂𑀯𑀧𑀼𑀢𑁆𑀢𑁂𑀦 𑀘𑁄𑀤𑀺𑀢𑁄;

𑀧𑀸𑀲𑀸𑀤𑀸 𑀑𑀭𑀽𑀳𑀺𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀺𑀁.

‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑀬𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁄;

𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁.

‘‘𑀅𑀭𑀺𑀬𑀁 ¶ 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀫𑀼𑀦𑀺 𑀥𑀫𑁆𑀫𑀫𑀤𑁂𑀲𑀬𑀺.

‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀭𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀫𑀣𑀁 𑀧𑀝𑀺𑀯𑀺𑀚𑁆𑀛𑀸𑀳𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀼 [𑀯𑀺𑀚𑁆𑀛𑀺𑀁𑀲𑀼 (𑀲𑀻.)] 𑀆𑀲𑀯𑀸;

𑀲𑀩𑁆𑀩𑁂 𑀆𑀲𑀼𑀁 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀦 𑀘 𑀉𑀧𑁆𑀧𑀚𑁆𑀚𑀭𑁂 𑀧𑀼𑀦.

‘‘𑀧𑀭𑀺𑀬𑀦𑁆𑀢𑀓𑀢𑀁 𑀤𑀼𑀓𑁆𑀔𑀁, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁯𑁯. 𑀢𑀢𑁆𑀣 ¶ 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀬𑀁 𑀅𑀳𑀲𑁆𑀫𑀻𑀢𑀺 [𑀅𑀬𑀫𑀳𑀫𑀲𑁆𑀫𑀻𑀢𑀺 (𑀲𑀻.) 𑀧𑀲𑁆𑀲 𑀉𑀤𑀸. 𑁬𑁧] 𑀅𑀦𑀸𑀦𑀼𑀧𑀲𑁆𑀲𑀻;

𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀻𑀮𑀯𑀢𑁄 ¶ , 𑀆𑀦𑀦𑁆𑀤, 𑀦 𑀘𑁂𑀢𑀦𑀸 [𑀘𑁂𑀢𑀦𑀸𑀬 (𑀅. 𑀦𑀺. 𑁧𑁧.𑁨)] 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀚𑀸𑀬𑁂𑀬𑁆𑀬. 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀸, 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀬𑁆𑀬. 𑀧𑀫𑀼𑀤𑀺𑀢𑁂𑀦, 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀧𑀻𑀢𑀺 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑁂𑀬𑁆𑀬. 𑀧𑀻𑀢𑀺𑀫𑀦𑀲𑁆𑀲, 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀓𑀸𑀬𑁄 𑀧𑀲𑁆𑀲𑀫𑁆𑀪𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑁂𑀬𑁆𑀬. 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀸𑀳𑀁 𑀲𑀼𑀔𑀁 𑀯𑁂𑀤𑀺𑀬𑁂𑀬𑁆𑀬’𑀦𑁆𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑁂𑀬𑁆𑀬. 𑀲𑀼𑀔𑀺𑀦𑁄 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀲𑀫𑀸𑀥𑀺 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀲𑀼𑀔𑀺𑀦𑁄 𑀲𑀫𑀸𑀥𑀺 𑀚𑀸𑀬𑁂𑀬𑁆𑀬. 𑀲𑀫𑀸𑀳𑀺𑀢𑀲𑁆𑀲 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀸𑀳𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬’𑀦𑁆𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑁂𑀬𑁆𑀬. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀢𑀸 ¶ , 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀦𑀺𑀩𑁆𑀩𑀺𑀤𑀸 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁂𑀦, 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀯𑀺𑀭𑀸𑀕𑁄 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑁂𑀬𑁆𑀬. 𑀯𑀺𑀭𑀚𑁆𑀚𑀦𑁆𑀢𑁂𑀦 𑀆𑀦𑀦𑁆𑀤 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀯𑀺𑀫𑀼𑀢𑁆𑀢𑀺 𑀚𑀸𑀬𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑁂𑀬𑁆𑀬. 𑀯𑀺𑀫𑀼𑀢𑁆𑀢𑁂𑀦, 𑀆𑀦𑀦𑁆𑀤, 𑀦 𑀘𑁂𑀢𑀦𑀸 𑀓𑀭𑀡𑀻𑀬𑀸 ‘𑀓𑀺𑀦𑁆𑀢𑀺 𑀫𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺. 𑀥𑀫𑁆𑀫𑀢𑀸 𑀏𑀲𑀸, 𑀆𑀦𑀦𑁆𑀤, 𑀬𑀁 𑀯𑀺𑀫𑀼𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁦.

‘‘𑀬𑀤𑀸 ¶ ¶ 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸, 𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸, 𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸, 𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸, 𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀺𑀁𑀦𑀼 [𑀧𑀲𑁆𑀲 𑀲𑀁. 𑀦𑀺. 𑁨.𑁨𑁪𑁩] 𑀓𑀼𑀚𑁆𑀛𑀲𑀺 𑀫𑀸 𑀓𑀼𑀚𑁆𑀛𑀺, 𑀅𑀓𑁆𑀓𑁄𑀥𑁄 𑀢𑀺𑀲𑁆𑀲 𑀢𑁂 𑀯𑀭𑀁;

𑀓𑁄𑀥𑀫𑀸𑀦𑀫𑀓𑁆𑀔𑀯𑀺𑀦𑀬𑀢𑁆𑀣𑀁 𑀳𑀺, 𑀢𑀺𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀤𑀸𑀳𑀁 𑀦𑀦𑁆𑀤𑀁 𑀧𑀲𑁆𑀲𑁂𑀬𑁆𑀬𑀁, 𑀆𑀭𑀜𑁆𑀜𑀁 [𑀅𑀭𑀜𑁆𑀜𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁨𑁪𑁨] 𑀧𑀁𑀲𑀼𑀓𑀽𑀮𑀺𑀓𑀁;

𑀅𑀜𑁆𑀜𑀸𑀢𑀼𑀜𑁆𑀙𑁂𑀦 𑀬𑀸𑀧𑁂𑀦𑁆𑀢𑀁, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦’’𑀦𑁆𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 [𑀓𑀺𑀲𑁆𑀲𑀲𑁆𑀲 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁮𑁭] 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸𑀢𑀺.

‘‘𑀓𑁄𑀥𑀁 ¶ 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀁 𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀓𑀺𑀁𑀲𑀼 𑀳𑀦𑁂 𑀉𑀧𑁆𑀧𑀢𑀺𑀢𑀁, 𑀓𑀺𑀁𑀲𑀼 𑀚𑀸𑀢𑀁 𑀯𑀺𑀦𑁄𑀤𑀬𑁂;

𑀓𑀺𑀜𑁆𑀘𑀲𑁆𑀲𑀼 𑀧𑀚𑀳𑁂 𑀥𑀻𑀭𑁄, 𑀓𑀺𑀲𑁆𑀲𑀸𑀪𑀺𑀲𑀫𑀬𑁄 𑀲𑀼𑀔𑁄.

‘‘𑀓𑁄𑀥𑀁 ¶ ¶ 𑀳𑀦𑁂 𑀉𑀧𑁆𑀧𑀢𑀺𑀢𑀁, 𑀭𑀸𑀕𑀁 𑀚𑀸𑀢𑀁 𑀯𑀺𑀦𑁄𑀤𑀬𑁂;

𑀅𑀯𑀺𑀚𑁆𑀚𑀁 𑀧𑀚𑀳𑁂 𑀥𑀻𑀭𑁄, 𑀲𑀘𑁆𑀘𑀸𑀪𑀺𑀲𑀫𑀬𑁄 𑀲𑀼𑀔𑁄’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁧.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 [𑀤𑀬𑁆𑀳𑀫𑀸𑀦𑁂𑀯 (𑀓.) 𑀲𑀁. 𑀦𑀺. 𑁧.𑁨𑁧; 𑀣𑁂𑀭𑀕𑀸. 𑁩𑁯 𑀧𑀲𑁆𑀲𑀺𑀢𑀩𑁆𑀩𑀁] 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀩𑁆𑀩𑁂 𑀔𑀬𑀦𑁆𑀢𑀸 𑀦𑀺𑀘𑀬𑀸, 𑀧𑀢𑀦𑀦𑁆𑀢𑀸 𑀲𑀫𑀼𑀲𑁆𑀲𑀬𑀸;

𑀲𑀩𑁆𑀩𑁂𑀲𑀁 𑀫𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀫𑀤𑁆𑀥𑀼𑀯𑀁;

𑀏𑀢𑀁 𑀪𑀬𑀁 𑀫𑀭𑀡𑁂 [𑀫𑀭𑀡𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁦𑁦] 𑀧𑁂𑀓𑁆𑀔𑀫𑀸𑀦𑁄, 𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀺.

‘‘𑀲𑀩𑁆𑀩𑁂 𑀔𑀬𑀦𑁆𑀢𑀸 𑀦𑀺𑀘𑀬𑀸, 𑀧𑀢𑀦𑀦𑁆𑀢𑀸 𑀲𑀫𑀼𑀲𑁆𑀲𑀬𑀸;

𑀲𑀩𑁆𑀩𑁂𑀲𑀁 𑀫𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑁂𑀲𑀁 𑀚𑀻𑀯𑀺𑀢𑀫𑀤𑁆𑀥𑀼𑀯𑀁;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄, 𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀼𑀔𑀁 ¶ 𑀲𑀬𑀦𑁆𑀢𑀺 𑀫𑀼𑀦𑀬𑁄, 𑀦 𑀢𑁂 𑀲𑁄𑀘𑀦𑁆𑀢𑀺 𑀫𑀸𑀯𑀺𑀥;

𑀬𑁂𑀲𑀁 𑀛𑀸𑀦𑀭𑀢𑀁 𑀘𑀺𑀢𑁆𑀢𑀁, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀑𑀖𑀁 𑀢𑀭𑀢𑀺 𑀤𑀼𑀢𑁆𑀢𑀭𑀁.

‘‘𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬, 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑁄 [𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀺𑀕𑁄 (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁧.𑁯𑁬];

𑀦𑀦𑁆𑀤𑀺𑀪𑀯𑀧𑀭𑀺𑀓𑁆𑀔𑀻𑀡𑁄 [𑀦𑀦𑁆𑀤𑀻𑀭𑀸𑀕𑀧𑀭𑀺𑀓𑁆𑀔𑀻𑀡𑁄 (𑀓.) 𑀲𑀁. 𑀦𑀺. 𑁧.𑁯𑁬], 𑀲𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁, 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜𑀁, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄.

𑀧𑀢𑀺𑀭𑀽𑀧𑀓𑀸𑀭𑀻 ¶ ¶ 𑀥𑀼𑀭𑀯𑀸, 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀏𑀯𑀁 [𑀲𑀯𑁂 (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁧.𑁨𑁪𑁬] 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀩𑁆𑀩𑀕𑀦𑁆𑀣𑀧𑀳𑀻𑀦𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀻𑀢𑀺.

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀲𑀁𑀯𑀸𑀲𑁄 𑀲𑀓𑁆𑀓 𑀚𑀸𑀬𑀢𑀺;

𑀦 𑀢𑀁 𑀅𑀭𑀳𑀢𑀺 𑀲𑀧𑁆𑀧𑀜𑁆𑀜𑁄, 𑀫𑀦𑀲𑀸 𑀅𑀦𑀼𑀓𑀫𑁆𑀧𑀺𑀢𑀼𑀁 [𑀅𑀦𑀦𑀼𑀓𑀫𑁆𑀧𑀺𑀢𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁨𑁩𑁬].

‘‘𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀺;

𑀦 𑀢𑁂𑀦 𑀳𑁄𑀢𑀺 𑀲𑀁𑀬𑀼𑀢𑁆𑀢𑁄, 𑀬𑀸𑀦𑀼𑀓𑀫𑁆𑀧𑀸 𑀅𑀦𑀼𑀤𑁆𑀤𑀬𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁨.

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 [𑀅𑀭𑀢𑀺 𑀭𑀢𑀺 (𑀓.) 𑀲𑀁. 𑀦𑀺. 𑁧.𑁨𑁩𑁭; 𑀲𑀼. 𑀦𑀺. 𑁨𑁭𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀮𑁄𑀫𑀳𑀁𑀲𑁄 𑀓𑀼𑀢𑁄𑀚𑀸;

𑀓𑀼𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀺.

‘‘𑀭𑀸𑀕𑁄 ¶ 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀺.

‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸;

𑀧𑀼𑀣𑀼 𑀯𑀺𑀲𑀢𑁆𑀢𑀸 𑀓𑀸𑀫𑁂𑀲𑀼, 𑀫𑀸𑀮𑀼𑀯𑀸𑀯 𑀯𑀺𑀢𑀢𑀸 𑀯𑀦𑁂.

‘‘𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺 𑀬𑀢𑁄𑀦𑀺𑀤𑀸𑀦𑀁, 𑀢𑁂 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺 𑀲𑀼𑀡𑁄𑀳𑀺 𑀬𑀓𑁆𑀔;

𑀢𑁂 𑀤𑀼𑀢𑁆𑀢𑀭𑀁 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀤𑀼𑀓𑁆𑀓𑀭𑀁 ¶ ¶ 𑀪𑀕𑀯𑀸 𑀲𑀼𑀤𑀼𑀓𑁆𑀓𑀭𑀁 𑀪𑀕𑀯𑀸’’𑀢𑀺;

‘‘𑀤𑀼𑀓𑁆𑀓𑀭𑀁 𑀯𑀸𑀧𑀺 𑀓𑀭𑁄𑀦𑁆𑀢𑀺, [𑀓𑀸𑀫𑀤𑀸𑀢𑀺 𑀪𑀕𑀯𑀸]

𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀳𑀺𑀢𑀸;

𑀞𑀺𑀢𑀢𑁆𑀢𑀸 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲, 𑀢𑀼𑀝𑁆𑀞𑀺 𑀳𑁄𑀢𑀺 𑀲𑀼𑀔𑀸𑀯𑀳𑀸’’𑀢𑀺.

‘‘𑀤𑀼𑀮𑁆𑀮𑀪𑀸 [𑀤𑀼𑀮𑁆𑀮𑀪𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁮𑁭] 𑀪𑀕𑀯𑀸 𑀬𑀤𑀺𑀤𑀁 𑀢𑀼𑀝𑁆𑀞𑀻’’𑀢𑀺;

‘‘𑀤𑀼𑀮𑁆𑀮𑀪𑀁 𑀯𑀸𑀧𑀺 𑀮𑀪𑀦𑁆𑀢𑀺, [𑀓𑀸𑀫𑀤𑀸𑀢𑀺 𑀪𑀕𑀯𑀸]

𑀘𑀺𑀢𑁆𑀢𑀯𑀽𑀧𑀲𑀫𑁂 𑀭𑀢𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀪𑀸𑀯𑀦𑀸𑀬 𑀭𑀢𑁄 𑀫𑀦𑁄’’𑀢𑀺.

‘‘𑀤𑀼𑀲𑁆𑀲𑀫𑀸𑀤𑀳𑀁 𑀪𑀕𑀯𑀸 𑀬𑀤𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺;

‘‘𑀤𑀼𑀲𑁆𑀲𑀫𑀸𑀤𑀳𑀁 𑀯𑀸𑀧𑀺 𑀲𑀫𑀸𑀤𑀳𑀦𑁆𑀢𑀺, [𑀓𑀸𑀫𑀤𑀸𑀢𑀺 𑀪𑀕𑀯𑀸]

𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸;

𑀢𑁂 𑀙𑁂𑀢𑁆𑀯𑀸 𑀫𑀘𑁆𑀘𑀼𑀦𑁄 𑀚𑀸𑀮𑀁, 𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀺 𑀓𑀸𑀫𑀤𑀸’’𑀢𑀺.

‘‘𑀤𑀼𑀕𑁆𑀕𑀫𑁄 𑀪𑀕𑀯𑀸 𑀯𑀺𑀲𑀫𑁄 𑀫𑀕𑁆𑀕𑁄’’𑀢𑀺;

‘‘𑀤𑀼𑀕𑁆𑀕𑀫𑁂 ¶ 𑀯𑀺𑀲𑀫𑁂 𑀯𑀸𑀧𑀺, 𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀺 𑀓𑀸𑀫𑀤 [𑀓𑀸𑀫𑀤𑀸 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁮𑁭];

𑀅𑀦𑀭𑀺𑀬𑀸 𑀯𑀺𑀲𑀫𑁂 𑀫𑀕𑁆𑀕𑁂, 𑀧𑀧𑀢𑀦𑁆𑀢𑀺 𑀅𑀯𑀁𑀲𑀺𑀭𑀸;

𑀅𑀭𑀺𑀬𑀸𑀦𑀁 𑀲𑀫𑁄 𑀫𑀕𑁆𑀕𑁄, 𑀅𑀭𑀺𑀬𑀸 𑀳𑀺 𑀯𑀺𑀲𑀫𑁂 𑀲𑀫𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁩.

‘‘𑀇𑀤𑀁 𑀳𑀺 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁦𑁧] 𑀢𑀁 𑀚𑁂𑀢𑀯𑀦𑀁, 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁;

𑀆𑀯𑀼𑀢𑁆𑀣𑀁 𑀥𑀫𑁆𑀫𑀭𑀸𑀚𑁂𑀦, 𑀧𑀻𑀢𑀺𑀲𑀜𑁆𑀚𑀦𑀦𑀁 𑀫𑀫.

‘‘𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀥𑀫𑁆𑀫𑁄 𑀘, 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀁;

𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑁂𑀦 𑀥𑀦𑁂𑀦 𑀯𑀸.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑁄𑀯 ¶ 𑀧𑀜𑁆𑀜𑀸𑀬, 𑀲𑀻𑀮𑁂𑀦 𑀉𑀧𑀲𑀫𑁂𑀦 𑀘;

𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀅𑀢𑀻𑀢𑀁 𑀦𑀸𑀦𑁆𑀯𑀸𑀕𑀫𑁂𑀬𑁆𑀬, 𑀦𑀧𑁆𑀧𑀝𑀺𑀓𑀗𑁆𑀔𑁂 𑀅𑀦𑀸𑀕𑀢𑀁;

𑀬𑀤𑀢𑀻𑀢𑀁 𑀧𑀳𑀻𑀦𑀁 [𑀧𑀳𑀻𑀡𑀁 (𑀲𑀻.) 𑀧𑀲𑁆𑀲 𑀫. 𑀦𑀺. 𑁩.𑁨𑁭𑁨] 𑀢𑀁, 𑀅𑀧𑁆𑀧𑀢𑁆𑀢𑀜𑁆𑀘 𑀅𑀦𑀸𑀕𑀢𑀁.

‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 ¶ 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁 [𑀓𑀺𑀘𑁆𑀘𑀁 𑀆𑀢𑀧𑁆𑀧𑀁 (𑀲𑀻.)], 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 ‘‘𑀪𑀤𑁆𑀤𑁂𑀓𑀭𑀢𑁆𑀢𑁄’’𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀘𑀓𑁆𑀔𑀼𑀦𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀥𑀫𑁆𑀫𑀸 𑀲𑀢𑀺𑀬𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀥𑀫𑁆𑀫𑀸 𑀓𑀸𑀬𑁂𑀦 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀘𑀓𑁆𑀔𑀼𑀦𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀤𑀺𑀩𑁆𑀩𑀘𑀓𑁆𑀔𑀼 𑀲𑀼𑀯𑀺𑀲𑀼𑀤𑁆𑀥𑀁 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁 𑀘𑀓𑁆𑀔𑀼𑀦𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀁.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀢𑀺𑀬𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀲𑀢𑀺𑀬𑀸 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀇𑀤𑁆𑀥𑀺𑀯𑀺𑀥𑀸 𑀦𑀺𑀭𑁄𑀥𑀸 𑀓𑀸𑀬𑁂𑀦 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀧𑀜𑁆𑀜𑀸𑀬 𑀯𑁂𑀤𑀺𑀢𑀩𑁆𑀩𑀁, 𑀧𑀜𑁆𑀜𑀸𑀬 𑀘 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺.

𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁪. 𑀢𑀢𑁆𑀣 ¶ 𑀓𑀢𑀫𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑁄𑀧𑀦𑁂𑀬𑁆𑀬𑁂 𑀦 𑀓𑀼𑀧𑁆𑀧𑀢𑀺;

𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀦𑀁 [𑀢𑀁 (𑀉𑀤𑀸. 𑁩𑁪)] 𑀤𑀼𑀓𑁆𑀔𑀫𑁂𑀲𑁆𑀲𑀢𑀻’’𑀢𑀺.

𑀇𑀤𑀁 ¶ 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀆𑀬𑀲𑁆𑀫𑀢𑁄 𑀘 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀘𑀸𑀭𑀺𑀓𑀸𑀤𑀲𑀫𑀁 𑀯𑁂𑀬𑁆𑀬𑀸𑀓𑀭𑀡𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁄, 𑀦𑀺𑀳𑀼𑀁𑀳𑀼𑀗𑁆𑀓𑁄 [𑀦𑀺𑀳𑀼𑀳𑀼𑀗𑁆𑀓𑁄 (𑀲𑀻.) 𑀧𑀲𑁆𑀲 𑀉𑀤𑀸. 𑁪] 𑀦𑀺𑀓𑁆𑀓𑀲𑀸𑀯𑁄 𑀬𑀢𑀢𑁆𑀢𑁄;

𑀯𑁂𑀤𑀦𑁆𑀢𑀕𑀽 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄, 𑀥𑀫𑁆𑀫𑁂𑀦 𑀲𑁄 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬;

𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀩𑀸𑀳𑀺𑀢𑁆𑀯𑀸 𑀧𑀸𑀧𑀓𑁂 𑀥𑀫𑁆𑀫𑁂, 𑀬𑁂 𑀘𑀭𑀦𑁆𑀢𑀺 𑀲𑀤𑀸 𑀲𑀢𑀸;

𑀔𑀻𑀡𑀲𑀁𑀬𑁄𑀚𑀦𑀸 𑀩𑀼𑀤𑁆𑀥𑀸, 𑀢𑁂 𑀯𑁂 𑀮𑁄𑀓𑀲𑁆𑀫𑀺 [𑀮𑁄𑀓𑀲𑁆𑀫𑀺𑀁 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁫] 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀦 𑀢𑀢𑁆𑀣 𑀲𑀼𑀓𑁆𑀓𑀸 𑀚𑁄𑀢𑀦𑁆𑀢𑀺, 𑀆𑀤𑀺𑀘𑁆𑀘𑁄 𑀦𑀧𑁆𑀧𑀓𑀸𑀲𑀢𑀺;

𑀦 𑀢𑀢𑁆𑀣 𑀘𑀦𑁆𑀤𑀺𑀫𑀸 𑀪𑀸𑀢𑀺, 𑀢𑀫𑁄 𑀢𑀢𑁆𑀣 𑀦 𑀯𑀺𑀚𑁆𑀚𑀢𑀺.

‘‘𑀬𑀤𑀸 𑀘 𑀅𑀢𑁆𑀢𑀦𑀸𑀯𑁂𑀤𑀺 [𑀯𑁂𑀤𑀻 (𑀲𑀻.) 𑀧𑀲𑁆𑀲 𑀉𑀤𑀸. 𑁧𑁦], 𑀫𑀼𑀦𑀺 𑀫𑁄𑀦𑁂𑀦 𑀩𑁆𑀭𑀸𑀳𑁆𑀫𑀡𑁄;

𑀅𑀣 𑀭𑀽𑀧𑀸 𑀅𑀭𑀽𑀧𑀸 𑀘, 𑀲𑀼𑀔𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑀤𑀸 𑀲𑀓𑁂𑀲𑀼 [𑀧𑀲𑁆𑀲 𑀉𑀤𑀸. 𑁭] 𑀥𑀫𑁆𑀫𑁂𑀲𑀼, 𑀧𑀸𑀭𑀕𑀽 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀅𑀣 𑀏𑀢𑀁 𑀧𑀺𑀲𑀸𑀘𑀜𑁆𑀘, 𑀧𑀓𑁆𑀓𑀼𑀮𑀜𑁆𑀘𑀸𑀢𑀺𑀯𑀢𑁆𑀢𑀢𑀻’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀦𑀸𑀪𑀺𑀦𑀦𑁆𑀤𑀢𑀺 ¶ 𑀆𑀬𑀦𑁆𑀢𑀺𑀁 [𑀆𑀬𑀦𑁆𑀢𑀺𑀁 𑀦𑀸𑀪𑀺𑀦𑀦𑁆𑀤𑀢𑀺 (𑀉𑀤𑀸. 𑁮)], 𑀧𑀓𑁆𑀓𑀫𑀦𑁆𑀢𑀺𑀁 𑀦 𑀲𑁄𑀘𑀢𑀺;

𑀲𑀗𑁆𑀕𑀸 𑀲𑀗𑁆𑀕𑀸𑀫𑀚𑀺𑀁 𑀫𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀦 ¶ 𑀉𑀤𑀓𑁂𑀦 𑀲𑀼𑀘𑀻 [𑀲𑀼𑀘𑀺 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁯] 𑀳𑁄𑀢𑀺, 𑀩𑀳𑁆𑀯𑁂𑀢𑁆𑀣 𑀦𑁆𑀳𑀸𑀬𑀢𑀻 [𑀦𑀳𑀸𑀬𑀢𑀺 (𑀲𑀻.)] 𑀚𑀦𑁄;

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀲𑁄 𑀲𑀼𑀘𑀻 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀬𑀤𑀸 ¶ 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸, 𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀯𑀺𑀥𑀽𑀧𑀬𑀁 𑀢𑀺𑀝𑁆𑀞𑀢𑀺 𑀫𑀸𑀭𑀲𑁂𑀦𑀁, 𑀲𑀽𑀭𑀺𑀬𑁄𑀯 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀧𑀲𑁆𑀲𑀣 𑀇𑀭𑀺𑀬𑀫𑀸𑀦𑀁, 𑀢𑁂𑀯𑀺𑀚𑁆𑀚𑀧𑀢𑁆𑀢𑀁 𑀅𑀧𑀳𑀸𑀦𑀥𑀫𑁆𑀫𑀁;

𑀲𑀩𑁆𑀩𑀸𑀦𑀺 𑀬𑁄𑀕𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀅𑀓𑀺𑀜𑁆𑀘𑀦𑁄 𑀇𑀭𑀺𑀬𑀢𑀺 𑀧𑀁𑀲𑀼𑀓𑀽𑀮𑀺𑀓𑁄.

‘‘𑀢𑀁 𑀤𑁂𑀯𑀢𑀸 𑀲𑀫𑁆𑀩𑀳𑀼𑀮𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;

𑀆𑀚𑀸𑀦𑀺𑀬𑀁 𑀚𑀸𑀢𑀺𑀩𑀮𑀁 𑀦𑀺𑀲𑁂𑀥𑀁, 𑀦𑀺𑀥 𑀦𑀫𑀲𑁆𑀲𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀦𑀸𑀪𑀺𑀚𑀸𑀦𑀸𑀫, 𑀓𑀺𑀁 𑀢𑁆𑀯𑀁 𑀦𑀺𑀲𑁆𑀲𑀸𑀬 𑀛𑀸𑀬𑀲𑀻’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀲𑀳𑀸𑀬𑀸 𑀯𑀢𑀺𑀫𑁂 𑀪𑀺𑀓𑁆𑀔𑀽, 𑀘𑀺𑀭𑀭𑀢𑁆𑀢𑀁 𑀲𑀫𑁂𑀢𑀺𑀓𑀸;

𑀲𑀫𑁂𑀢𑀺 𑀦𑁂𑀲𑀁 𑀲𑀤𑁆𑀥𑀫𑁆𑀫𑁄, 𑀥𑀫𑁆𑀫𑁂 𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂’’.

‘‘𑀲𑀼𑀯𑀺𑀦𑀻𑀢𑀸 ¶ 𑀓𑀧𑁆𑀧𑀺𑀦𑁂𑀦, 𑀥𑀫𑁆𑀫𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂;

𑀥𑀸𑀭𑁂𑀦𑁆𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺 [𑀲𑀯𑀸𑀳𑀦’’𑀦𑁆𑀢𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁨𑁪𑁬].

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀦𑀬𑀺𑀤𑀁 𑀲𑀺𑀣𑀺𑀮𑀫𑀸𑀭𑀩𑁆𑀪, 𑀦𑀬𑀺𑀤𑀁 𑀅𑀧𑁆𑀧𑁂𑀦 𑀣𑀸𑀫𑀲𑀸;

𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀦𑁆𑀢𑀩𑁆𑀩𑀁, 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁 [𑀲𑀩𑁆𑀩𑀕𑀦𑁆𑀢𑀧𑀫𑁄𑀘𑀦𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁨𑁩𑁮].

‘‘𑀅𑀬𑀜𑁆𑀘 ¶ 𑀤𑀳𑀭𑁄 𑀪𑀺𑀓𑁆𑀔𑀼, 𑀅𑀬𑀫𑀼𑀢𑁆𑀢𑀫𑀧𑀼𑀭𑀺𑀲𑁄;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

‘‘𑀤𑀼𑀩𑁆𑀩𑀡𑁆𑀡𑀓𑁄 𑀮𑀽𑀔𑀘𑀻𑀯𑀭𑁄, 𑀫𑁄𑀖𑀭𑀸𑀚𑀸 𑀲𑀤𑀸 𑀲𑀢𑁄;

𑀔𑀻𑀡𑀸𑀲𑀯𑁄 𑀯𑀺𑀲𑀁𑀬𑀼𑀢𑁆𑀢𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

‘‘𑀢𑁂𑀯𑀺𑀚𑁆𑀚𑁄 ¶ 𑀇𑀤𑁆𑀥𑀺𑀧𑁆𑀧𑀢𑁆𑀢𑁄 𑀘, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑁄 [𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄 (𑀲𑀻.)];

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺’’𑀦𑁆𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁫. ‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑀸𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀓𑁄 𑀯𑀺𑀲𑁂𑀲𑁄 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 [𑀅𑀥𑀺𑀧𑁆𑀧𑀸𑀬𑁄 (𑀓.) 𑀧𑀲𑁆𑀲 𑀲𑀁. 𑀦𑀺. 𑁩.𑁫𑁮] 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺? 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂…

‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸 ¶ , 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄, 𑀫𑀕𑁆𑀕𑀸𑀦𑀼𑀕𑀸 𑀘, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸𑀲𑀫𑀦𑁆𑀦𑀸𑀕𑀢𑀸. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑁂𑀲𑁄, 𑀅𑀬𑀁 𑀅𑀥𑀺𑀧𑁆𑀧𑀬𑀸𑀲𑁄, 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺.

𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁧𑁦𑁬. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 ¶ [𑀧𑀲𑁆𑀲 𑀉𑀤𑀸. 𑁪𑁫], 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺.

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻’’𑀢𑀺 ¶ 𑀲𑀁𑀓𑀺𑀮𑁂𑀲𑁄, ‘‘𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺 𑀯𑀸𑀲𑀦𑀸, ‘‘𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄 𑀘 𑀯𑀸𑀲𑀦𑀸 𑀘. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

‘‘𑀘𑀢𑁆𑀢𑀸𑀭𑁄𑀫𑁂, 𑀫𑀳𑀸𑀭𑀸𑀚 [𑀪𑀺𑀓𑁆𑀔𑀯𑁂 (𑀅. 𑀦𑀺. 𑁪.𑁮𑁫)], 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀢𑀫𑁄 𑀢𑀫𑀧𑀭𑀸𑀬𑀡𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀡𑁄 𑀚𑁄𑀢𑀺 𑀢𑀫𑀧𑀭𑀸𑀬𑀡𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄’’𑀢𑀺. 𑀢𑀢𑁆𑀣 𑀬𑁄 𑀘 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀢𑀫𑀧𑀭𑀸𑀬𑀡𑁄 𑀬𑁄 𑀘 𑀧𑀼𑀕𑁆𑀕𑀮𑁄 𑀢𑀫𑁄 𑀢𑀫𑀧𑀭𑀸𑀬𑀡𑁄, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸, 𑀬𑁄 𑀘 𑀧𑀼𑀕𑁆𑀕𑀮𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀡𑁄 𑀬𑁄 𑀘 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀯𑀸𑀲𑀦𑀸𑀪𑀸𑀕𑀺𑀬𑀸. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀼𑀚𑀁 𑀧𑀩𑁆𑀩𑀚𑀜𑁆𑀘 (𑀲𑀁. 𑀦𑀺. 𑁧.𑁧𑁨𑁧)];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸’’𑀢𑀺;

𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀅𑀬𑀁 𑀦𑀺𑀩𑁆𑀩𑁂𑀥𑁄 ¶ . 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑁧𑁦𑁭. ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺, 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺, 𑀬𑀜𑁆𑀘 𑀅𑀦𑀼𑀲𑁂𑀢𑀺. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸, 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 ¶ 𑀆𑀬𑀢𑀺𑀁 [𑀆𑀬𑀢𑀺 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁩𑁮] 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀢𑀺 𑀆𑀬𑀢𑀺𑀁 [𑀆𑀬𑀢𑀺 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁩𑁮] 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

‘‘𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺, 𑀦𑁄 𑀘𑁂 𑀧𑀓𑀧𑁆𑀧𑁂𑀢𑀺, 𑀅𑀣 𑀘𑁂 𑀅𑀦𑀼𑀲𑁂𑀢𑀺. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸, 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 [𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁨.𑁩𑁮] 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀽𑀴𑁆𑀳𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀢𑀺 𑀆𑀬𑀢𑀺𑀁 ¶ 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁄 𑀘𑁂𑀯 [𑀘 (𑀲𑀻. 𑀓.)] 𑀘𑁂𑀢𑁂𑀢𑀺, 𑀦𑁄 𑀘 𑀧𑀓𑀧𑁆𑀧𑁂𑀢𑀺, 𑀦𑁄 𑀘 𑀅𑀦𑀼𑀲𑁂𑀢𑀺. 𑀆𑀭𑀫𑁆𑀫𑀡𑀫𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸, 𑀆𑀭𑀫𑁆𑀫𑀡𑁂 𑀅𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀅𑀯𑀺𑀭𑀽𑀴𑁆𑀳𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀺, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀲𑀢𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑁧𑁦𑁮. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘‘𑀲𑀫𑀼𑀤𑁆𑀤𑁄 𑀲𑀫𑀼𑀤𑁆𑀤𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀺, 𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀫𑀼𑀤𑁆𑀤𑁄, 𑀫𑀳𑀸 𑀏𑀲𑁄 𑀪𑀺𑀓𑁆𑀔𑀯𑁂, 𑀉𑀤𑀓𑀭𑀸𑀲𑀺 𑀫𑀳𑀸𑀉𑀤𑀓𑀡𑁆𑀡𑀯𑁄. 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄, 𑀢𑀲𑁆𑀲 𑀭𑀽𑀧𑀫𑀬𑁄 𑀯𑁂𑀕𑁄. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀬𑁄 ¶ 𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀲𑀳𑀢𑀺 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 [𑀅𑀢𑀸𑀭𑀺 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁨𑁮] 𑀘𑀓𑁆𑀔𑀼𑀲𑀫𑀼𑀤𑁆𑀤𑀁 𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀕𑀳𑀁 [𑀲𑀕𑀸𑀳𑀁 (𑀲𑀁. 𑀦𑀺. 𑁪.𑁨𑁨𑁮)] 𑀲𑀭𑀓𑁆𑀔𑀲𑀁 ¶ 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀅𑀬𑀁 𑀅𑀲𑁂𑀓𑁆𑀔𑁄.

‘‘‘𑀲𑁄𑀢𑀁, 𑀪𑀺𑀓𑁆𑀔𑀯𑁂…𑀧𑁂… 𑀖𑀸𑀦𑀁…𑀧𑁂… 𑀚𑀺𑀯𑁆𑀳𑀸…𑀧𑁂… 𑀓𑀸𑀬𑁄…𑀧𑁂… 𑀫𑀦𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄 𑀢𑀲𑁆𑀲 𑀥𑀫𑁆𑀫𑀫𑀬𑁄 𑀯𑁂𑀕𑁄𑀢𑀺. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀬𑁄 𑀢𑀁 𑀥𑀫𑁆𑀫𑀫𑀬𑀁 𑀯𑁂𑀕𑀁 𑀲𑀳𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀭𑀺 𑀫𑀦𑁄𑀲𑀫𑀼𑀤𑁆𑀤𑀁 𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀕𑀳𑀁 𑀲𑀭𑀓𑁆𑀔𑀲𑀁 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀅𑀬𑀁 𑀅𑀲𑁂𑀓𑁆𑀔𑁄. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄, 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀬𑁄 𑀇𑀫𑀁 𑀲𑀫𑀼𑀤𑁆𑀤𑀁 𑀲𑀕𑀳𑀁 𑀲𑀭𑀓𑁆𑀔𑀲𑀁,

𑀲𑀊𑀫𑀺𑀁 𑀲𑀸𑀯𑀝𑁆𑀝𑀁 𑀲𑀪𑀬𑀁 𑀤𑀼𑀢𑁆𑀢𑀭𑀁 𑀅𑀘𑁆𑀘𑀢𑀭𑀺;

𑀲 𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄, 𑀮𑁄𑀓𑀦𑁆𑀢𑀕𑀽 𑀧𑀸𑀭𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀅𑀬𑀁 ¶ 𑀅𑀲𑁂𑀓𑁆𑀔𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑀴𑀺𑀲𑀸 𑀮𑁄𑀓𑀲𑁆𑀫𑀺𑀁 𑀅𑀦𑀬𑀸𑀬 𑀲𑀢𑁆𑀢𑀸𑀦𑀁 𑀩𑁆𑀬𑀸𑀩𑀸𑀥𑀸𑀬 [𑀯𑀥𑀸𑀬 (𑀲𑀁. 𑀦𑀺. 𑁪.𑁨𑁩𑁦)] 𑀧𑀸𑀡𑀻𑀦𑀁. 𑀓𑀢𑀫𑁂 𑀙? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀺𑀢𑀩𑀴𑀺𑀲𑁄 [𑀕𑀺𑀮𑀩𑀴𑀺𑀲𑁄 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁨𑁩𑁦] 𑀫𑀸𑀭𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄, 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄, 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸…𑀧𑁂… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 ¶ 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲 𑀅𑀦𑀬𑀁 𑀆𑀧𑀦𑁆𑀦𑁄, 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄, 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑁄 [𑀬𑀣𑀸𑀓𑀸𑀫𑀓𑀭𑀡𑀻𑀬𑁄 (𑀲𑀻.) 𑀲𑀁. 𑀦𑀺. 𑁪.𑁨𑁩𑁦] 𑀧𑀸𑀧𑀺𑀫𑀢𑁄’’𑀢𑀺. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀲𑀦𑁆𑀢𑀺 ¶ 𑀘, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲, 𑀅𑀪𑁂𑀤𑀺 𑀩𑀴𑀺𑀲𑀁, 𑀧𑀭𑀺𑀪𑁂𑀤𑀺 𑀩𑀴𑀺𑀲𑀁, 𑀦 𑀅𑀦𑀬𑀁 𑀆𑀧𑀦𑁆𑀦𑁄, 𑀦 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄, 𑀦 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄.

‘‘𑀲𑀦𑁆𑀢𑀺 𑀘, 𑀪𑀺𑀓𑁆𑀔𑀯𑁂, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀺, 𑀦𑀸𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀕𑀺𑀮𑀺𑀢𑀩𑀴𑀺𑀲𑁄 𑀫𑀸𑀭𑀲𑁆𑀲, 𑀅𑀪𑁂𑀤𑀺 𑀩𑀴𑀺𑀲𑀁, 𑀧𑀭𑀺𑀪𑁂𑀤𑀺 𑀩𑀴𑀺𑀲𑀁, 𑀦 𑀅𑀦𑀬𑀁 𑀆𑀧𑀦𑁆𑀦𑁄, 𑀦 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄, 𑀦 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄’’𑀢𑀺. 𑀅𑀬𑀁 𑀅𑀲𑁂𑀓𑁆𑀔𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑁧𑁦𑁯. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄, 𑀨𑀲𑁆𑀲𑀧𑀭𑁂𑀢𑁄 𑀭𑁄𑀕𑀁 𑀯𑀤𑀢𑀺 𑀅𑀢𑁆𑀢𑀢𑁄 [𑀅𑀢𑁆𑀢𑀦𑁄 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁩𑁦];

𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀢𑀺 [𑀫𑀜𑁆𑀜𑀦𑁆𑀢𑀺 (𑀲𑀻. 𑀓.)], 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸.

‘‘𑀅𑀜𑁆𑀜𑀣𑀸𑀪𑀸𑀯𑀻 ¶ 𑀪𑀯𑀲𑀢𑁆𑀢𑁄 𑀮𑁄𑀓𑁄, 𑀪𑀯𑀧𑀭𑁂𑀢𑁄 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀺;

𑀬𑀤𑀪𑀺𑀦𑀦𑁆𑀤𑀢𑀺 𑀢𑀁 𑀪𑀬𑀁;

𑀬𑀲𑁆𑀲 𑀪𑀸𑀬𑀢𑀺 𑀢𑀁 𑀤𑀼𑀓𑁆𑀔’’𑀦𑁆𑀢𑀺; 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀪𑀯𑀯𑀺𑀧𑁆𑀧𑀳𑀸𑀦𑀸𑀬 𑀔𑁄 𑀧𑀦𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺; 𑀅𑀬𑀁 𑀦𑀺𑀩𑁆𑀩𑁂𑀥𑁄;

‘‘𑀬𑁂 ¶ 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀧𑁆𑀧𑀫𑁄𑀓𑁆𑀔𑀫𑀸𑀳𑀁𑀲𑀼, 𑀲𑀩𑁆𑀩𑁂 𑀢𑁂 ‘𑀅𑀯𑀺𑀧𑁆𑀧𑀫𑀼𑀢𑁆𑀢𑀸 𑀪𑀯𑀲𑁆𑀫𑀸’𑀢𑀺 𑀯𑀤𑀸𑀫𑀺. 𑀬𑁂 𑀯𑀸 𑀧𑀦 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑀺𑀪𑀯𑁂𑀦 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀼, 𑀲𑀩𑁆𑀩𑁂 𑀢𑁂 ‘𑀅𑀦𑀺𑀲𑁆𑀲𑀝𑀸 𑀪𑀯𑀲𑁆𑀫𑀸’𑀢𑀺 𑀯𑀤𑀸𑀫𑀺. 𑀉𑀧𑀥𑀺𑀁 [𑀉𑀧𑀥𑀺 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁩𑁦] 𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀲𑀫𑁆𑀪𑁄𑀢𑀻’’𑀢𑀺. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸 ¶ 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄’’𑀢𑀺. 𑀅𑀬𑀁 𑀦𑀺𑀩𑁆𑀩𑁂𑀥𑁄.

‘‘𑀮𑁄𑀓𑀫𑀺𑀫𑀁 𑀧𑀲𑁆𑀲, 𑀧𑀼𑀣𑀽 𑀅𑀯𑀺𑀚𑁆𑀚𑀸𑀬 𑀧𑀭𑁂𑀢𑀸 𑀪𑀽𑀢𑀸 𑀪𑀽𑀢𑀭𑀢𑀸, 𑀪𑀯𑀸 𑀅𑀧𑀭𑀺𑀫𑀼𑀢𑁆𑀢𑀸, 𑀬𑁂 𑀳𑀺 𑀓𑁂𑀘𑀺 𑀪𑀯𑀸 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀣𑀢𑀸𑀬, 𑀲𑀩𑁆𑀩𑁂 𑀢𑁂 𑀪𑀯𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺. 𑀅𑀬𑀁 𑀲𑀁𑀓𑀺𑀮𑁂𑀲𑁄.

‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄;

𑀪𑀯𑀢𑀡𑁆𑀳𑀸 𑀧𑀳𑀻𑀬𑀢𑀺, 𑀯𑀺𑀪𑀯𑀁 𑀦𑀸𑀪𑀺𑀦𑀦𑁆𑀤𑀢𑀺;

𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺;

𑀅𑀬𑀁 𑀦𑀺𑀩𑁆𑀩𑁂𑀥𑁄.

‘‘𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀦𑀼𑀧𑀸𑀤𑀸 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺;

𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀉𑀧𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻’’𑀢𑀺.

𑀅𑀬𑀁 𑀅𑀲𑁂𑀓𑁆𑀔𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂 [𑀧𑀲𑁆𑀲 𑀅. 𑀦𑀺. 𑁪.𑁫], 𑀧𑀼𑀕𑁆𑀕𑀮𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀦𑀼𑀲𑁄𑀢𑀕𑀸𑀫𑀻 𑀧𑀝𑀺𑀲𑁄𑀢𑀕𑀸𑀫𑀻 𑀞𑀺𑀢𑀢𑁆𑀢𑁄 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀢𑀢𑁆𑀣 𑀬𑁄𑀬𑀁 𑀧𑀼𑀕𑁆𑀕𑀮𑁄 𑀅𑀦𑀼𑀲𑁄𑀢𑀕𑀸𑀫𑀻, 𑀅𑀬𑀁 𑀧𑀼𑀕𑁆𑀕𑀮𑁄 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁄. 𑀢𑀢𑁆𑀣 𑀬𑁄𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀲𑁄𑀢𑀕𑀸𑀫𑀻 𑀬𑁄 𑀘 𑀞𑀺𑀢𑀢𑁆𑀢𑁄, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 ¶ 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸. 𑀢𑀢𑁆𑀣 ¶ 𑀬𑁄𑀬𑀁 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀬𑀁 𑀅𑀲𑁂𑀓𑁆𑀔𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑁧𑁧𑁦. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

𑀙𑀴𑀸𑀪𑀺𑀚𑀸𑀢𑀺𑀓𑁄 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀅𑀘𑁆𑀘𑀦𑁆𑀢𑀤𑀺𑀝𑁆𑀞𑀁 [𑀅𑀦𑁆𑀢𑀁 𑀦𑀺𑀝𑁆𑀞𑀁 (𑀲𑀻.)] 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀢𑀺, 𑀅𑀢𑁆𑀣𑀺 ¶ 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀅𑀘𑁆𑀘𑀦𑁆𑀢𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀢𑀺.

𑀢𑀢𑁆𑀣 𑀬𑁄 𑀘 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀬𑁄 𑀘 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸.

𑀢𑀢𑁆𑀣 𑀬𑁄 𑀘 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀬𑁄 𑀘 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀯𑀸𑀲𑀦𑀸𑀪𑀸𑀕𑀺𑀬𑀸.

𑀢𑀢𑁆𑀣 𑀬𑁄 𑀘 𑀧𑀼𑀕𑁆𑀕𑀮𑁄 𑀓𑀡𑁆𑀳𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀅𑀘𑁆𑀘𑀦𑁆𑀢𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀢𑀺, 𑀬𑁄 𑀘 𑀧𑀼𑀕𑁆𑀕𑀮𑁄 𑀲𑀼𑀓𑁆𑀓𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀓𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀅𑀘𑁆𑀘𑀦𑁆𑀢𑀤𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀢𑀺, 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸, 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂 [𑀧𑀲𑁆𑀲 𑀅. 𑀦𑀺. 𑁪.𑁨𑁩𑁨-𑁨𑁩𑁩], 𑀓𑀫𑁆𑀫𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺 ¶ 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀼𑀢𑁆𑀢𑀫𑀁 𑀓𑀫𑁆𑀫𑀲𑁂𑀝𑁆𑀞𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺’’.

𑀢𑀢𑁆𑀣 ¶ 𑀬𑀜𑁆𑀘 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁, 𑀬𑀜𑁆𑀘 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀬𑀜𑁆𑀘 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁, 𑀅𑀬𑀁 𑀯𑀸𑀲𑀦𑀸. 𑀬𑀜𑁆𑀘 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀼𑀢𑁆𑀢𑀫𑀁 𑀓𑀫𑁆𑀫𑀲𑁂𑀝𑁆𑀞𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑁧𑁧𑁧. 𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀮𑀤𑁆𑀥𑀸𑀦 𑀫𑀸𑀦𑀼𑀲𑀢𑁆𑀢𑀁 𑀤𑁆𑀯𑁂, 𑀓𑀺𑀘𑁆𑀘𑀁 𑀅𑀓𑀺𑀘𑁆𑀘𑀫𑁂𑀯 𑀘;

𑀲𑀼𑀓𑀺𑀘𑁆𑀘𑀁 𑀘𑁂𑀯 𑀧𑀼𑀜𑁆𑀜𑀸𑀦𑀺, 𑀲𑀁𑀬𑁄𑀚𑀦𑀯𑀺𑀧𑁆𑀧𑀳𑀸𑀦𑀁 𑀯𑀸’’𑀢𑀺.

‘‘𑀲𑀼𑀓𑀺𑀘𑁆𑀘𑀁 ¶ 𑀘𑁂𑀯 𑀧𑀼𑀜𑁆𑀜𑀸𑀦𑀻’’𑀢𑀺 𑀯𑀸𑀲𑀦𑀸. ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀳𑀸𑀦𑀁 𑀯𑀸’’𑀢𑀺 𑀦𑀺𑀩𑁆𑀩𑁂𑀥𑁄.

‘‘𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸𑀦, 𑀲𑀕𑁆𑀕𑀸 𑀲𑀕𑁆𑀕𑀁 𑀯𑀚𑀦𑁆𑀢𑀺 𑀓𑀢𑀧𑀼𑀜𑁆𑀜𑀸;

𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀸, 𑀚𑀭𑀸𑀫𑀭𑀡𑀸 𑀯𑀺𑀧𑁆𑀧𑀫𑀼𑀘𑁆𑀘𑀦𑁆𑀢𑀻’’𑀢𑀺.

‘‘𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸𑀦, 𑀲𑀕𑁆𑀕𑀸 𑀲𑀕𑁆𑀕𑀁 𑀯𑀚𑀦𑁆𑀢𑀺 𑀓𑀢𑀧𑀼𑀜𑁆𑀜𑀸’’𑀢𑀺 𑀯𑀸𑀲𑀦𑀸. ‘‘𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀸 𑀚𑀭𑀸𑀫𑀭𑀡𑀸 𑀯𑀺𑀧𑁆𑀧𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀦𑀺𑀩𑁆𑀩𑁂𑀥𑁄. 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀥𑀸𑀦𑀸𑀦𑀺 [𑀧𑀲𑁆𑀲 𑀅. 𑀦𑀺. 𑁨.𑁨]. 𑀓𑀢𑀫𑀸𑀦𑀺 𑀤𑁆𑀯𑁂? 𑀬𑁄 𑀘 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁂𑀲𑀼 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀘𑁆𑀘𑀚𑀢𑀺, 𑀬𑁄 𑀘 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁂𑀲𑀼 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑀢𑁆𑀣 ¶ 𑀬𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁂𑀲𑀼 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀘𑁆𑀘𑀚𑀢𑀺, 𑀅𑀬𑀁 𑀯𑀸𑀲𑀦𑀸.

𑀬𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁂𑀲𑀼 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁.

𑀢𑀢𑁆𑀣 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀡𑁆𑀳𑀸𑀧𑀓𑁆𑀔𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀢𑀻𑀳𑀺 𑀢𑀡𑁆𑀳𑀸𑀳𑀺 𑁋 𑀓𑀸𑀫𑀢𑀡𑁆𑀳𑀸𑀬 𑀪𑀯𑀢𑀡𑁆𑀳𑀸𑀬 𑀯𑀺𑀪𑀯𑀢𑀡𑁆𑀳𑀸𑀬. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀅𑀚𑁆𑀛𑁄𑀲𑀺𑀢𑀸, 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀙𑀢𑁆𑀢𑀺𑀁𑀲𑀢𑀡𑁆𑀳𑀸𑀚𑀸𑀮𑀺𑀦𑀺𑀬𑀸𑀯𑀺𑀘𑀭𑀺𑀢𑀸𑀦𑀺.

𑀢𑀢𑁆𑀣 ¶ 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀺𑀝𑁆𑀞𑀺𑀧𑀓𑁆𑀔𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀉𑀘𑁆𑀙𑁂𑀤𑀲𑀲𑁆𑀲𑀢𑁂𑀦, 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺, 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺.

𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀘𑁂𑀢𑀦𑀸𑀬 𑀘𑁂𑀢𑀲𑀺𑀓𑀓𑀫𑁆𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀸.

𑀢𑀢𑁆𑀣 ¶ 𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀫𑀣𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀤𑀺𑀝𑁆𑀞𑀺𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀤𑀼𑀘𑁆𑀘𑀭𑀺𑀢𑀯𑁄𑀤𑀸𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀼𑀘𑀭𑀺𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀁𑀲𑀸𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸. 𑀢𑀣𑀸 𑀦𑀺𑀩𑁆𑀩𑀢𑁆𑀢𑁂 𑀲𑀁𑀲𑀸𑀭𑁂 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁 𑀇𑀫𑀺𑀦𑀸 𑀅𑀲𑀼𑀪𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀇𑀤𑀁 𑀩𑀸𑀮𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀇𑀤𑀁 ¶ 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀇𑀫𑀺𑀦𑀸 𑀲𑀼𑀪𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀇𑀤𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀘𑀢𑀽𑀳𑀺 𑀓𑀺𑀮𑁂𑀲𑀪𑀽𑀫𑀻𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑁋 𑀅𑀦𑀼𑀲𑀬𑀪𑀽𑀫𑀺𑀬𑀸 𑀧𑀭𑀺𑀬𑀼𑀝𑁆𑀞𑀸𑀦𑀪𑀽𑀫𑀺𑀬𑀸 𑀲𑀁𑀬𑁄𑀚𑀦𑀪𑀽𑀫𑀺𑀬𑀸 𑀉𑀧𑀸𑀤𑀸𑀦𑀪𑀽𑀫𑀺𑀬𑀸. 𑀲𑀸𑀦𑀼𑀲𑀬𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀁 𑀚𑀸𑀬𑀢𑀺, 𑀧𑀭𑀺𑀬𑀼𑀝𑁆𑀞𑀺𑀢𑁄 𑀲𑀁𑀬𑀼𑀚𑁆𑀚𑀢𑀺, 𑀲𑀁𑀬𑀼𑀚𑁆𑀚𑀦𑁆𑀢𑁄 𑀉𑀧𑀸𑀤𑀺𑀬𑀢𑀺, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀇𑀫𑀸𑀳𑀺 𑀘𑀢𑀽𑀳𑀺 𑀓𑀺𑀮𑁂𑀲𑀪𑀽𑀫𑀻𑀳𑀺 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺, 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀻𑀳𑀺 𑀲𑀼𑀘𑀭𑀺𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑁋 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀲𑀸𑀯𑀓𑀪𑀽𑀫𑀺𑀬𑀸. 𑀛𑀸𑀬𑀺𑀯𑀺𑀲𑀬𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺.

𑁧𑁧𑁨. 𑀢𑀢𑁆𑀣 𑀓𑀢𑀫𑁂 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸? 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘, 𑀜𑀸𑀡𑀁 𑀜𑁂𑀬𑁆𑀬𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘, 𑀤𑀲𑁆𑀲𑀦𑀁 ¶ 𑀪𑀸𑀯𑀦𑀸 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘, 𑀲𑀓𑀯𑀘𑀦𑀁 𑀧𑀭𑀯𑀘𑀦𑀁 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘, 𑀯𑀺𑀲𑀚𑁆𑀚𑀦𑀻𑀬𑀁 𑀅𑀯𑀺𑀲𑀚𑁆𑀚𑀦𑀻𑀬𑀁 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘, 𑀓𑀫𑁆𑀫𑀁 𑀯𑀺𑀧𑀸𑀓𑁄 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘, 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘, 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘, 𑀣𑀯𑁄 𑀘𑀸𑀢𑀺.

𑀢𑀢𑁆𑀣 ¶ 𑀓𑀢𑀫𑀁 𑀮𑁄𑀓𑀺𑀬𑀁?

‘‘𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀟𑀳𑀦𑁆𑀢𑀁 [𑀤𑀳𑀦𑁆𑀢𑀁 (𑀲𑀻. 𑀓.) 𑀧𑀲𑁆𑀲 𑀥. 𑀧. 𑁭𑁧] 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 [𑀪𑀲𑁆𑀫𑀸𑀙𑀦𑁆𑀦𑁄𑀯 (𑀓.)] 𑀧𑀸𑀯𑀓𑁄𑀢𑀺.

𑀇𑀤𑀁 ¶ 𑀮𑁄𑀓𑀺𑀬𑀁.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺 𑀲𑀩𑁆𑀩𑀁…𑀧𑁂… 𑀦𑀺𑀳𑀻𑀬𑀢𑁂 𑀢𑀲𑁆𑀲 𑀬𑀲𑁄 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸’’𑀢𑀺. 𑀇𑀤𑀁 𑀮𑁄𑀓𑀺𑀬𑀁.

‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑀥𑀫𑁆𑀫𑀸 [𑀧𑀲𑁆𑀲 𑀅. 𑀦𑀺. 𑁮.𑁬]. 𑀓𑀢𑀫𑁂 𑀅𑀝𑁆𑀞? 𑀮𑀸𑀪𑁄 𑀅𑀮𑀸𑀪𑁄, 𑀬𑀲𑁄 𑀅𑀬𑀲𑁄, 𑀦𑀺𑀦𑁆𑀤𑀸 𑀧𑀲𑀁𑀲𑀸, 𑀲𑀼𑀔𑀁 𑀤𑀼𑀓𑁆𑀔𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸’’𑀢𑀺. 𑀇𑀤𑀁 𑀮𑁄𑀓𑀺𑀬𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀼𑀢𑁆𑀢𑀭𑀁?

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺 [𑀲𑀫𑀣𑀁 𑀕𑀢𑀸𑀦𑀺 (𑀲𑀻.) 𑀧𑀲𑁆𑀲 𑀥. 𑀧. 𑁯𑁪]; 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

𑀇𑀤𑀁 𑀮𑁄𑀓𑀼𑀢𑁆𑀢𑀭𑀁.

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀻’’𑀢𑀺. 𑀇𑀤𑀁 𑀮𑁄𑀓𑀼𑀢𑁆𑀢𑀭𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘?

‘‘𑀮𑀤𑁆𑀥𑀸𑀦 𑀫𑀸𑀦𑀼𑀲𑀢𑁆𑀢𑀁 𑀤𑁆𑀯𑁂, 𑀓𑀺𑀘𑁆𑀘𑀁 𑀅𑀓𑀺𑀘𑁆𑀘𑀫𑁂𑀯 𑀘𑀸’’𑀢𑀺 𑀤𑁆𑀯𑁂 𑀕𑀸𑀣𑀸. 𑀬𑀁 𑀇𑀳 ‘‘𑀲𑀼𑀓𑀺𑀘𑁆𑀘𑀁 𑀘𑁂𑀯 ¶ 𑀧𑀼𑀜𑁆𑀜𑀸𑀦𑀻’’𑀢𑀺 𑀘 ‘‘𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸𑀦, 𑀲𑀕𑁆𑀕𑀸 𑀲𑀕𑁆𑀕𑀁 𑀯𑀚𑀦𑁆𑀢𑀺 𑀓𑀢𑀧𑀼𑀜𑁆𑀜𑀸’’𑀢𑀺 𑀘. 𑀇𑀤𑀁 𑀮𑁄𑀓𑀺𑀬𑀁.

𑀬𑀁 𑀇𑀳 ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀳𑀸𑀦𑀁 𑀯𑀸’’𑀢𑀺 𑀘 ‘‘𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀸, 𑀚𑀭𑀸𑀫𑀭𑀡𑀸 𑀯𑀺𑀧𑁆𑀧𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀘, 𑀇𑀤𑀁 𑀮𑁄𑀓𑀼𑀢𑁆𑀢𑀭𑀁. 𑀇𑀤𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘.

‘‘𑀯𑀺𑀜𑁆𑀜𑀸𑀡𑁂 ¶ ¶ 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀲𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀧𑀼𑀦𑀩𑁆𑀪𑀯𑁄 𑀳𑁄𑀢𑀺, 𑀧𑀼𑀦𑀩𑁆𑀪𑀯𑁂 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀚𑀸𑀢𑀺𑀬𑀸 𑀲𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂 [𑀧𑀲𑁆𑀲 𑀲𑀁. 𑀦𑀺. 𑁨.𑁫𑁫], 𑀫𑀳𑀸𑀭𑀼𑀓𑁆𑀔𑁄, 𑀢𑀲𑁆𑀲 𑀬𑀸𑀦𑀺 𑀘𑁂𑀯 𑀫𑀽𑀮𑀸𑀦𑀺 𑀅𑀥𑁄𑀕𑀫𑀸𑀦𑀺 𑀬𑀸𑀦𑀺 𑀘 𑀢𑀺𑀭𑀺𑀬𑀁 𑀕𑀫𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀉𑀤𑁆𑀥𑀁 𑀑𑀚𑀁 𑀅𑀪𑀺𑀳𑀭𑀦𑁆𑀢𑀺. 𑀏𑀯𑀁 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑁄 𑀢𑀤𑀸𑀳𑀸𑀭𑁄 𑀢𑀤𑀼𑀧𑀸𑀤𑀸𑀦𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀆𑀳𑀸𑀭𑁂 𑀲𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺 𑀲𑀩𑁆𑀩𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀇𑀤𑀁 𑀮𑁄𑀓𑀺𑀬𑀁.

‘‘𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀲𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺𑀬𑀸 𑀅𑀲𑀢𑀺 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺, 𑀧𑀼𑀦𑀩𑁆𑀪𑀯𑁂 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀚𑀸𑀢𑀺𑀬𑀸 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑁄 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 [𑀓𑀼𑀤𑀸𑀮𑀧𑀺𑀝𑀓𑀁 (𑀓.)] 𑀆𑀤𑀸𑀬, 𑀲𑁄 𑀢𑀁 𑀭𑀼𑀓𑁆𑀔𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬, 𑀫𑀽𑀮𑁂 [𑀫𑀽𑀮𑀁 (𑀲𑀁. 𑀦𑀺. 𑁨.𑁫𑁫)] 𑀙𑁂𑀢𑁆𑀯𑀸 𑀧𑀮𑀺𑀔𑀡𑁂𑀬𑁆𑀬, 𑀧𑀮𑀺𑀔𑀡𑀺𑀢𑁆𑀯𑀸 𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀺. 𑀲𑁄 𑀢𑀁 𑀭𑀼𑀓𑁆𑀔𑀁 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 [𑀙𑀺𑀢𑁆𑀯𑀸 (𑀲𑀻. 𑀓.)] 𑀨𑀸𑀮𑁂𑀬𑁆𑀬, 𑀨𑀸𑀮𑁂𑀢𑁆𑀯𑀸 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑁂𑀬𑁆𑀬, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀺𑀢𑁆𑀯𑀸 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀬𑁆𑀬, 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀢𑁆𑀯𑀸 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬, 𑀅𑀕𑁆𑀕𑀺𑀦𑀸 𑀟𑀳𑁂𑀢𑁆𑀯𑀸 𑀫𑀲𑀺𑀁 𑀓𑀭𑁂𑀬𑁆𑀬, 𑀫𑀲𑀺𑀁 𑀓𑀭𑀺𑀢𑁆𑀯𑀸 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀦𑁂𑀬𑁆𑀬, 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬, 𑀏𑀯𑀁 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀭𑀼𑀓𑁆𑀔𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀅𑀲𑁆𑀲 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 [𑀅𑀦𑀪𑀸𑀯𑀁𑀕𑀢𑁄 (𑀲𑀻.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀆𑀳𑀸𑀭𑁂 𑀅𑀲𑀢𑀺 𑀦𑀸𑀫𑀭𑀽𑀧𑀲𑁆𑀲 ¶ 𑀅𑀯𑀓𑁆𑀓𑀦𑁆𑀢𑀺 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺𑀬𑀸 𑀅𑀲𑀢𑀺 𑀲𑀩𑁆𑀩𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀇𑀤𑀁 𑀮𑁄𑀓𑀼𑀢𑁆𑀢𑀭𑀁. 𑀇𑀤𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘.

𑁧𑁧𑁩. 𑀢𑀢𑁆𑀣 ¶ ¶ 𑀓𑀢𑀫𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁?

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸, 𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺;

𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁, 𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄’’𑀢𑀺 [𑀧𑀭𑀁 𑀅𑀢𑁆𑀢𑀓𑀸𑀫𑁄𑀢𑀺 (𑀲𑀻.) 𑀲𑀁. 𑀦𑀺. 𑁧.𑁧𑁧𑁯; 𑀉𑀤𑀸. 𑁪𑁧 𑀧𑀲𑁆𑀲𑀺𑀢𑀩𑁆𑀩𑀁].

𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁.

‘‘𑀬𑁂 𑀓𑁂𑀘𑀺 𑀪𑀽𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀬𑁂 𑀯𑀸𑀧𑀺 [𑀘 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁪𑁨], 𑀲𑀩𑁆𑀩𑁂 𑀕𑀫𑀺𑀲𑁆𑀲𑀦𑁆𑀢𑀺 𑀧𑀳𑀸𑀬 𑀤𑁂𑀳𑀁;

𑀢𑀁 𑀲𑀩𑁆𑀩𑀚𑀸𑀦𑀺𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸, 𑀆𑀢𑀸𑀧𑀺𑀬𑁄 [𑀆𑀢𑀸𑀧𑀻 𑀲𑁄 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁪𑁨] 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸’’𑀢𑀺.

𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁.

‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀅𑀧𑀺 𑀯𑀺𑀯𑁂𑀘𑀺𑀬𑀫𑀸𑀦𑁂𑀦 𑀧𑀡𑀸𑀫𑀺𑀬𑀫𑀸𑀦𑁂𑀦 𑀕𑀮𑁂 𑀧𑀺𑀲𑀦𑀫𑀚𑁆𑀚𑀫𑀸𑀦𑁂𑀦 [𑀕𑀮𑁂𑀧𑀺 𑀧𑀫𑀚𑁆𑀚𑀫𑀸𑀦𑁂𑀦 (𑀲𑀻.)] 𑀬𑀸𑀯𑀚𑀻𑀯𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄 𑀘 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺, 𑀦𑁄 𑀘 𑀅𑀝𑁆𑀞𑀸𑀦𑁂 [𑀦 𑀘 𑀅𑀝𑁆𑀞𑀸𑀦𑁂 (𑀲𑀻. 𑀓.) 𑀧𑀲𑁆𑀲 𑀅. 𑀦𑀺. 𑁭.𑁩𑁭] 𑀦𑀺𑀬𑁄𑀚𑁂𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺…𑀧𑁂… 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄. 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄;

𑀢𑀁 𑀫𑀺𑀢𑁆𑀢𑀁 𑀫𑀺𑀢𑁆𑀢𑀓𑀸𑀫𑁂𑀦, 𑀬𑀸𑀯𑀚𑀻𑀯𑀫𑁆𑀧𑀺 𑀲𑁂𑀯𑀺𑀬’’𑀦𑁆𑀢𑀺.

𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 ¶ 𑀓𑀢𑀫𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁?

‘‘𑀬𑀜𑁆𑀘 𑀓𑀸𑀫𑀲𑀼𑀔𑀁 𑀮𑁄𑀓𑁂, 𑀬𑀜𑁆𑀘𑀺𑀤𑀁 𑀤𑀺𑀯𑀺𑀬𑀁 𑀲𑀼𑀔𑀁;

𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑁆𑀲𑁂𑀢𑁂 [𑀢𑀡𑁆𑀳𑀓𑁆𑀔𑀬𑀸 𑀲𑀼𑀔𑀲𑁆𑀲𑁂𑀢𑁂 (𑀲𑀻.) 𑀧𑀲𑁆𑀲 𑀉𑀤𑀸. 𑁧𑁨], 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

‘‘𑀲𑀼𑀲𑀼𑀔𑀁 ¶ [𑀧𑀲𑁆𑀲 𑀣𑁂𑀭𑀕𑀸. 𑁨𑁨𑁭] 𑀯𑀢 𑀦𑀺𑀩𑁆𑀩𑀸𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 ¶ 𑀓𑀢𑀫𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘

‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀔𑀢𑁆𑀢𑀺𑀬𑁂;

𑀭𑀝𑁆𑀞𑀁 𑀲𑀸𑀦𑀼𑀘𑀭𑀁 𑀳𑀦𑁆𑀢𑁆𑀯𑀸’’𑀢𑀺 𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

‘‘𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺; 𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁;

𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 [𑀧𑀲𑁆𑀲 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑁂]. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄, 𑀯𑀻𑀭𑀺𑀬…𑀧𑁂… 𑀘𑀺𑀢𑁆𑀢. 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺. 𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

𑀲𑁄 𑀓𑀸𑀬𑁂𑀧𑀺 𑀘𑀺𑀢𑁆𑀢𑀁 𑀲𑀫𑁄𑀤𑀳𑀢𑀺, 𑀘𑀺𑀢𑁆𑀢𑁂𑀧𑀺 𑀓𑀸𑀬𑀁 𑀲𑀫𑁄𑀤𑀳𑀢𑀺, 𑀓𑀸𑀬𑁂 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁, 𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘.

𑁧𑁧𑁪. 𑀢𑀢𑁆𑀣 𑀓𑀢𑀫𑀁 𑀜𑀸𑀡𑀁?

‘‘𑀬𑀁 𑀢𑀁 𑀮𑁄𑀓𑀼𑀢𑁆𑀢𑀭𑀁 𑀜𑀸𑀡𑀁, 𑀲𑀩𑁆𑀩𑀜𑁆𑀜𑀽 𑀬𑁂𑀦 𑀯𑀼𑀘𑁆𑀘𑀢𑀺;

𑀦 𑀢𑀲𑁆𑀲 𑀧𑀭𑀺𑀳𑀸𑀦𑀢𑁆𑀣𑀺, 𑀲𑀩𑁆𑀩𑀓𑀸𑀮𑁂 𑀧𑀯𑀢𑁆𑀢𑀢𑀻’’𑀢𑀺.

𑀇𑀤𑀁 𑀜𑀸𑀡𑀁.

‘‘𑀧𑀜𑁆𑀜𑀸 ¶ 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀬𑀸𑀬𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 [𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻 (𑀇𑀢𑀺𑀯𑀼. 𑁪𑁧)];

𑀬𑀸𑀬 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬’’𑀦𑁆𑀢𑀺.

𑀇𑀤𑀁 𑀜𑀸𑀡𑀁.

𑀢𑀢𑁆𑀣 𑀓𑀢𑀫𑀁 𑀜𑁂𑀬𑁆𑀬𑀁?

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 ¶ 𑀢𑁂 [𑀯𑁄 (𑀲𑀻. 𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁭𑁨] 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸,]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

‘‘𑀢𑀜𑁆𑀘𑀸𑀳𑀁 ¶ 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂,

𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳’’𑀦𑁆𑀢𑀺.

𑀇𑀤𑀁 𑀜𑁂𑀬𑁆𑀬𑀁.

‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘…𑀧𑁂… 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑀻. 𑀓.) 𑀧𑀲𑁆𑀲 𑀤𑀻. 𑀦𑀺. 𑁨.𑁧𑁫𑁫] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑀻. 𑀓.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁. 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄, 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸;

𑀲𑀁𑀲𑀺𑀢𑀁 [𑀲𑀁𑀲𑀭𑀺𑀢𑀁 (𑀲𑀻.)] 𑀤𑀻𑀖𑀫𑀤𑁆𑀥𑀸𑀦𑀁, 𑀢𑀸𑀲𑀼 𑀢𑀸𑀲𑁆𑀯𑁂𑀯 𑀚𑀸𑀢𑀺𑀲𑀼.

‘‘𑀢𑀸𑀦𑀺 𑀏𑀢𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸;

𑀉𑀘𑁆𑀙𑀺𑀦𑁆𑀦𑀁 𑀫𑀽𑀮𑀁 𑀤𑀼𑀓𑁆𑀔𑀲𑁆𑀲, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀇𑀤𑀁 ¶ 𑀜𑁂𑀬𑁆𑀬𑀁.

𑀢𑀢𑁆𑀣 𑀓𑀢𑀫𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘? 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺. 𑀇𑀤𑀁 𑀜𑁂𑀬𑁆𑀬𑀁.

𑀏𑀯𑀁 ¶ 𑀚𑀸𑀦𑀁 𑀏𑀯𑀁 𑀧𑀲𑁆𑀲𑀁 𑀅𑀭𑀺𑀬𑀲𑀸𑀯𑀓𑁄 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀢𑀺, ‘‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀧𑀲𑁆𑀲𑀢𑀺, ‘‘𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀢𑀻𑀢𑀺. 𑀇𑀤𑀁 𑀜𑀸𑀡𑀁.

𑀲𑁄 𑀧𑀭𑀺𑀫𑀼𑀘𑁆𑀘𑀢𑀺 𑀭𑀽𑀧𑁂𑀦, 𑀧𑀭𑀺𑀫𑀼𑀘𑁆𑀘𑀢𑀺 𑀯𑁂𑀤𑀦𑀸𑀬, 𑀧𑀭𑀺𑀫𑀼𑀘𑁆𑀘𑀢𑀺 𑀲𑀜𑁆𑀜𑀸𑀬, 𑀧𑀭𑀺𑀫𑀼𑀘𑁆𑀘𑀢𑀺 𑀲𑀗𑁆𑀔𑀸𑀭𑁂𑀳𑀺, 𑀧𑀭𑀺𑀫𑀼𑀘𑁆𑀘𑀢𑀺 𑀯𑀺𑀜𑁆𑀜𑀸𑀡𑀫𑁆𑀳𑀸, 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻𑀢𑀺. 𑀇𑀤𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘.

‘‘𑀲𑀩𑁆𑀩𑁂 ¶ 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀇𑀤𑀁 𑀜𑁂𑀬𑁆𑀬𑀁. ‘‘𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 𑀇𑀤𑀁 𑀜𑀸𑀡𑀁. ‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀇𑀤𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀇𑀤𑀁 𑀜𑁂𑀬𑁆𑀬𑀁. ‘‘𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 𑀇𑀤𑀁 𑀜𑀸𑀡𑀁. ‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀇𑀤𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘.

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀇𑀤𑀁 𑀜𑁂𑀬𑁆𑀬𑀁. ‘‘𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 𑀇𑀤𑀁 𑀜𑀸𑀡𑀁. ‘‘𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀇𑀤𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘.

‘‘𑀬𑁂 ¶ 𑀳𑀺 𑀓𑁂𑀘𑀺, 𑀲𑁄𑀡 [𑀧𑀲𑁆𑀲 𑀲𑀁. 𑀦𑀺. 𑁩.𑁪𑁯], 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑀺𑀘𑁆𑀘𑁂𑀦 𑀭𑀽𑀧𑁂𑀦 𑀤𑀼𑀓𑁆𑀔𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀅𑀤𑀲𑁆𑀲𑀦𑀸. 𑀅𑀦𑀺𑀘𑁆𑀘𑀸𑀬 𑀯𑁂𑀤𑀦𑀸𑀬…𑀧𑁂… 𑀅𑀦𑀺𑀘𑁆𑀘𑀸𑀬 𑀲𑀜𑁆𑀜𑀸𑀬…𑀧𑁂… 𑀅𑀦𑀺𑀘𑁆𑀘𑁂𑀳𑀺 𑀲𑀗𑁆𑀔𑀸𑀭𑁂𑀳𑀺…𑀧𑁂… 𑀅𑀦𑀺𑀘𑁆𑀘𑁂𑀦 𑀯𑀺𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀅𑀤𑀲𑁆𑀲𑀦𑀸’’𑀢𑀺. 𑀇𑀤𑀁 𑀜𑁂𑀬𑁆𑀬𑀁.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀲𑁄𑀡, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑀺𑀘𑁆𑀘𑁂𑀦 𑀭𑀽𑀧𑁂𑀦 𑀤𑀼𑀓𑁆𑀔𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺𑀧𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺𑀧𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺𑀧𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀤𑀲𑁆𑀲𑀦𑀸. 𑀅𑀦𑀺𑀘𑁆𑀘𑀸𑀬 𑀯𑁂𑀤𑀦𑀸𑀬…𑀧𑁂… 𑀅𑀦𑀺𑀘𑁆𑀘𑀸𑀬 𑀲𑀜𑁆𑀜𑀸𑀬…𑀧𑁂… 𑀅𑀦𑀺𑀘𑁆𑀘𑁂𑀳𑀺 𑀲𑀗𑁆𑀔𑀸𑀭𑁂𑀳𑀺…𑀧𑁂… 𑀅𑀦𑀺𑀘𑁆𑀘𑁂𑀦 𑀯𑀺𑀜𑁆𑀜𑀸𑀡𑁂𑀦 𑀤𑀼𑀓𑁆𑀔𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺𑀧𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺𑀧𑀺 ¶ 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺𑀧𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀤𑀲𑁆𑀲𑀦𑀸𑀢𑀺. 𑀇𑀤𑀁 𑀜𑀸𑀡𑀁.

𑀇𑀤𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘.

𑀢𑀢𑁆𑀣 𑀓𑀢𑀫𑀁 𑀤𑀲𑁆𑀲𑀦𑀁?

𑁧𑁧𑁫.

‘‘𑀬𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀪𑀸𑀯𑀬𑀦𑁆𑀢𑀺, 𑀕𑀫𑁆𑀪𑀻𑀭𑀧𑀜𑁆𑀜𑁂𑀦 𑀲𑀼𑀤𑁂𑀲𑀺𑀢𑀸𑀦𑀺;

𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁 𑀧𑀫𑀢𑁆𑀢𑀸 [𑀪𑀼𑀲𑀧𑁆𑀧𑀫𑀢𑁆𑀢𑀸 (𑀲𑀻.) 𑀧𑀲𑁆𑀲 𑀔𑀼. 𑀧𑀸. 𑁬𑁦𑁯], 𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺.

𑀇𑀤𑀁 𑀤𑀲𑁆𑀲𑀦𑀁.

‘‘𑀬𑀣𑀺𑀦𑁆𑀤𑀔𑀻𑀮𑁄 ¶ 𑀧𑀣𑀯𑀺𑀲𑁆𑀲𑀺𑀢𑁄 𑀲𑀺𑀬𑀸, 𑀘𑀢𑀼𑀩𑁆𑀪𑀺 𑀯𑀸𑀢𑁂𑀳𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄;

𑀢𑀣𑀽𑀧𑀫𑀁 ¶ 𑀲𑀧𑁆𑀧𑀼𑀭𑀺𑀲𑀁 𑀯𑀤𑀸𑀫𑀺, 𑀬𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑁂𑀘𑁆𑀘 𑀧𑀲𑁆𑀲𑀢𑀻’’𑀢𑀺.

𑀇𑀤𑀁 𑀤𑀲𑁆𑀲𑀦𑀁.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺, 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄, 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 [𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 (𑀲𑀻.)] 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀣𑀸𑀕𑀢𑁂 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀯𑀺𑀭𑀽𑀴𑁆𑀳𑀸 𑀫𑀽𑀮𑀚𑀸𑀢𑀸 𑀅𑀲𑀁𑀳𑀸𑀭𑀺𑀬𑀸 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳 𑀥𑀫𑁆𑀫𑁂𑀦, 𑀥𑀫𑁆𑀫𑁂 𑀔𑁄 𑀧𑀦 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀺, 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺, 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁, 𑀲𑀳 𑀥𑀫𑁆𑀫𑀺𑀬𑀸 𑀔𑁄 𑀧𑀦𑀲𑁆𑀲 𑀳𑁄𑀦𑁆𑀢𑀺 𑀇𑀝𑁆𑀞𑀸 𑀓𑀦𑁆𑀢𑀸 𑀧𑀺𑀬𑀸 𑀫𑀦𑀸𑀧𑀸 𑀕𑀺𑀳𑀻 𑀘𑁂𑀯 𑀧𑀩𑁆𑀩𑀚𑀺𑀢𑀸 𑀘. 𑀅𑀭𑀺𑀬𑀓𑀦𑁆𑀢𑁂𑀳𑀺 𑀔𑁄 𑀧𑀦 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺 𑀅𑀘𑁆𑀙𑀺𑀤𑁆𑀤𑁂𑀳𑀺 𑀅𑀲𑀩𑀮𑁂𑀳𑀺 𑀅𑀓𑀫𑁆𑀫𑀸𑀲𑁂𑀳𑀺 𑀪𑀼𑀚𑀺𑀲𑁆𑀲𑁂𑀳𑀺 𑀯𑀺𑀜𑁆𑀜𑀼𑀧𑁆𑀧𑀲𑀝𑁆𑀞𑁂𑀳𑀺 𑀅𑀧𑀭𑀸𑀫𑀝𑁆𑀞𑁂𑀳𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺, 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄, 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 ¶ 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’’𑀢𑀺.

𑀇𑀤𑀁 ¶ 𑀤𑀲𑁆𑀲𑀦𑀁.

𑀢𑀢𑁆𑀣 ¶ 𑀓𑀢𑀫𑀸 𑀪𑀸𑀯𑀦𑀸?

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 [𑀲𑀼𑀪𑀸𑀯𑀺𑀢𑀸𑀦𑀺 (𑀲𑀻. 𑀓.) 𑀧𑀲𑁆𑀲 𑀲𑀼. 𑀦𑀺. 𑁫𑁧𑁨], 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀦𑀺𑀩𑁆𑀩𑀺𑀚𑁆𑀛 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁, 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲𑀤𑀦𑁆𑀢𑁄’’𑀢𑀺.

𑀅𑀬𑀁 𑀪𑀸𑀯𑀦𑀸.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀸𑀦𑀺 [𑀧𑀲𑁆𑀲 𑀅. 𑀦𑀺. 𑁪.𑁨𑁯]. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤𑀁, 𑀅𑀩𑁆𑀬𑀸𑀧𑀸𑀤𑁄 𑀥𑀫𑁆𑀫𑀧𑀤𑀁, 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑀧𑀤𑀁, 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑀧𑀤𑀁, 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀻’’𑀢𑀺. 𑀅𑀬𑀁 𑀪𑀸𑀯𑀦𑀸.

𑀢𑀢𑁆𑀣 𑀓𑀢𑀫𑀁 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘? ‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂’’𑀢𑀺 𑀇𑀤𑀁 𑀤𑀲𑁆𑀲𑀦𑀁. ‘‘𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂. 𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀅𑀬𑀁 𑀪𑀸𑀯𑀦𑀸. 𑀇𑀤𑀁 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 [𑀧𑀲𑁆𑀲 𑀲𑀁. 𑀦𑀺. 𑁫.𑁪𑁯𑁩]. 𑀓𑀢𑀫𑀸𑀦𑀺 𑀢𑀻𑀡𑀺, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀪𑀺𑀲𑀫𑁂𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀪𑀺𑀲𑀫𑀬𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺, 𑀅𑀦𑀪𑀺𑀲𑀫𑁂𑀢𑀲𑁆𑀲 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 ¶ 𑀅𑀭𑀺𑀬𑀲𑀘𑁆𑀘𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀪𑀺𑀲𑀫𑀬𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀇𑀤𑀁 𑀤𑀲𑁆𑀲𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

‘‘𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁 ¶ 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀅𑀬𑀁 𑀪𑀸𑀯𑀦𑀸.

𑀇𑀤𑀁 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘.

𑁧𑁧𑁬. 𑀢𑀢𑁆𑀣 𑀓𑀢𑀫𑀁 𑀲𑀓𑀯𑀘𑀦𑀁?

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑀇𑀤𑀁 𑀲𑀓𑀯𑀘𑀦𑀁.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺 𑀩𑀸𑀮𑀸𑀧𑀤𑀸𑀦𑀸𑀦𑀺, 𑀬𑁂𑀳𑀺 𑀩𑀸𑀮𑀁 𑀩𑀸𑀮𑁄𑀢𑀺 𑀧𑀭𑁂 𑀲𑀜𑁆𑀚𑀸𑀦𑀦𑁆𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀩𑀸𑀮𑁄, 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺, 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 𑀘 𑀳𑁄𑀢𑀺, 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 [𑀤𑀼𑀓𑁆𑀓𑀢𑀓𑀫𑁆𑀫𑀓𑀸𑀭𑀻 (𑀲𑀻.) 𑀫. 𑀦𑀺. 𑁩.𑁨𑁪𑁬; 𑀅. 𑀦𑀺. 𑁩.𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀘 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺 𑀩𑀸𑀮𑀸𑀧𑀤𑀸𑀦𑀸𑀦𑀺.

‘‘𑀢𑀻𑀡𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺 𑀧𑀡𑁆𑀟𑀺𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀡𑁆𑀟𑀺𑀢𑀸𑀧𑀤𑀸𑀦𑀸𑀦𑀺, 𑀬𑁂𑀳𑀺 𑀧𑀡𑁆𑀟𑀺𑀢𑀁 𑀧𑀡𑁆𑀟𑀺𑀢𑁄𑀢𑀺 𑀧𑀭𑁂 𑀲𑀜𑁆𑀚𑀸𑀦𑀦𑁆𑀢𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺, 𑀲𑀼𑀪𑀸𑀲𑀺𑀢𑀪𑀸𑀲𑀻 𑀘 𑀳𑁄𑀢𑀺, 𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺 𑀧𑀡𑁆𑀟𑀺𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀡𑁆𑀟𑀺𑀢𑀸𑀧𑀤𑀸𑀦𑀸𑀦𑀻’’𑀢𑀺.

𑀇𑀤𑀁 𑀲𑀓𑀯𑀘𑀦𑀁.

𑀢𑀢𑁆𑀣 𑀓𑀢𑀫𑀁 𑀧𑀭𑀯𑀘𑀦𑀁?

‘‘𑀧𑀣𑀯𑀻𑀲𑀫𑁄 𑀦𑀢𑁆𑀣𑀺 𑀯𑀺𑀢𑁆𑀣𑀢𑁄, 𑀦𑀺𑀦𑁆𑀦𑁄 𑀧𑀸𑀢𑀸𑀮𑀲𑀫𑁄 𑀦 𑀯𑀺𑀚𑁆𑀚𑀢𑀺;

𑀫𑁂𑀭𑀼𑀲𑀫𑁄 𑀦𑀢𑁆𑀣𑀺 𑀉𑀦𑁆𑀦𑀢𑁄, 𑀘𑀓𑁆𑀓𑀯𑀢𑁆𑀢𑀺𑀲𑀤𑀺𑀲𑁄 𑀦𑀢𑁆𑀣𑀺 𑀧𑁄𑀭𑀺𑀲𑁄’’𑀢𑀺.

𑀇𑀤𑀁 𑀧𑀭𑀯𑀘𑀦𑀁.

‘‘‘𑀳𑁄𑀢𑀼 ¶ , 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄𑀢𑀺. 𑀳𑁄𑀢𑀼, 𑀯𑁂𑀧𑀘𑀺𑀢𑁆𑀢𑀺 𑀲𑀼𑀪𑀸𑀲𑀺𑀢𑁂𑀦 𑀚𑀬𑁄𑀢𑀺. 𑀪𑀡, 𑀯𑁂𑀧𑀘𑀺𑀢𑁆𑀢𑀺, 𑀕𑀸𑀣’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀪𑀺𑀬𑁆𑀬𑁄 ¶ 𑀩𑀸𑀮𑀸 𑀧𑀪𑀺𑀚𑁆𑀚𑁂𑀬𑁆𑀬𑀼𑀁 [𑀧𑀓𑀼𑀚𑁆𑀛𑁂𑀬𑁆𑀬𑀼𑀁 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁨𑁫𑁧], 𑀦𑁄 𑀘𑀲𑁆𑀲 𑀧𑀝𑀺𑀲𑁂𑀥𑀓𑁄;

𑀢𑀲𑁆𑀫𑀸 𑀪𑀼𑀲𑁂𑀦 𑀤𑀡𑁆𑀟𑁂𑀦, 𑀥𑀻𑀭𑁄 𑀩𑀸𑀮𑀁 𑀦𑀺𑀲𑁂𑀥𑀬𑁂’’𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀸𑀣𑀸𑀬 𑀅𑀲𑀼𑀭𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀤𑁂𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 ‘𑀪𑀡, 𑀤𑁂𑀯𑀸𑀦𑀫𑀺𑀦𑁆𑀤, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀢𑀤𑁂𑀯 𑀅𑀳𑀁 𑀫𑀜𑁆𑀜𑁂, 𑀩𑀸𑀮𑀲𑁆𑀲 𑀧𑀝𑀺𑀲𑁂𑀥𑀦𑀁;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻’’𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸𑀬 𑀤𑁂𑀯𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀅𑀲𑀼𑀭𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀧𑀘𑀺𑀢𑁆𑀢𑀺𑀁 𑀅𑀲𑀼𑀭𑀺𑀦𑁆𑀤𑀁 𑀏𑀢𑀤𑀯𑁄𑀘 ‘𑀪𑀡, 𑀯𑁂𑀧𑀘𑀺𑀢𑁆𑀢𑀺, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀢𑀤𑁂𑀯 ¶ 𑀢𑀺𑀢𑀺𑀓𑁆𑀔𑀸𑀬, 𑀯𑀚𑁆𑀚𑀁 𑀧𑀲𑁆𑀲𑀸𑀫𑀺 𑀯𑀸𑀲𑀯;

𑀬𑀤𑀸 𑀦𑀁 𑀫𑀜𑁆𑀜𑀢𑀺 [𑀫𑀜𑁆𑀜𑀢𑀻 (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁧.𑁨𑁫𑁧] 𑀩𑀸𑀮𑁄, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀅𑀚𑁆𑀛𑀸𑀭𑀼𑀳𑀢𑀺 𑀤𑀼𑀫𑁆𑀫𑁂𑀥𑁄, 𑀕𑁄𑀯 𑀪𑀺𑀬𑁆𑀬𑁄 𑀧𑀮𑀸𑀬𑀺𑀦’’𑀦𑁆𑀢𑀺.

‘‘𑀪𑀸𑀲𑀺𑀢𑀸𑀬 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀸𑀣𑀸𑀬 𑀅𑀲𑀼𑀭𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀤𑁂𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 ‘𑀪𑀡, 𑀤𑁂𑀯𑀸𑀦𑀫𑀺𑀦𑁆𑀤, 𑀕𑀸𑀣’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀓𑀸𑀫𑀁 𑀫𑀜𑁆𑀜𑀢𑀼 𑀯𑀸 𑀫𑀸 𑀯𑀸, 𑀪𑀬𑀸 𑀫𑁆𑀬𑀸𑀬𑀁 𑀢𑀺𑀢𑀺𑀓𑁆𑀔𑀢𑀺;

𑀲𑀤𑀢𑁆𑀣𑀧𑀭𑀫𑀸 𑀅𑀢𑁆𑀣𑀸, 𑀔𑀦𑁆𑀢𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀺.

‘‘𑀬𑁄 ¶ 𑀳𑀯𑁂 𑀩𑀮𑀯𑀸 𑀲𑀦𑁆𑀢𑁄, 𑀤𑀼𑀩𑁆𑀩𑀮𑀲𑁆𑀲 𑀢𑀺𑀢𑀺𑀓𑁆𑀔𑀢𑀺;

𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀁, 𑀦𑀺𑀘𑁆𑀘𑀁 𑀔𑀫𑀢𑀺 𑀤𑀼𑀩𑁆𑀩𑀮𑁄.

‘‘𑀅𑀩𑀮𑀁 𑀢𑀁 𑀩𑀮𑀁 𑀆𑀳𑀼, 𑀬𑀲𑁆𑀲 𑀩𑀸𑀮𑀩𑀮𑀁 𑀩𑀮𑀁;

𑀩𑀮𑀲𑁆𑀲 𑀥𑀫𑁆𑀫𑀕𑀼𑀢𑁆𑀢𑀲𑁆𑀲, 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

‘‘𑀉𑀪𑀺𑀦𑁆𑀦𑀫𑀢𑁆𑀣𑀁 ¶ 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

‘‘𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀚𑀦𑀸 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸’’𑀢𑀺.

‘‘𑀪𑀸𑀲𑀺𑀢𑀸𑀲𑀼 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸𑀲𑀼 𑀤𑁂𑀯𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀅𑀲𑀼𑀭𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼’’𑀦𑁆𑀢𑀺. 𑀇𑀤𑀁 𑀧𑀭𑀯𑀘𑀦𑀁.

𑁧𑁧𑁭. 𑀢𑀢𑁆𑀣 𑀓𑀢𑀫𑀁 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘?

𑀬𑀜𑁆𑀘 𑀧𑀢𑁆𑀢𑀁 𑀬𑀜𑁆𑀘 𑀧𑀢𑁆𑀢𑀩𑁆𑀩𑀁 𑀉𑀪𑀬𑀫𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀁 𑀆𑀢𑀼𑀭𑀲𑁆𑀲𑀸𑀦𑀼𑀲𑀺𑀓𑁆𑀔𑀢𑁄. 𑀬𑁂 𑀘 𑀲𑀺𑀓𑁆𑀔𑀸𑀲𑀸𑀭𑀸 𑀲𑀻𑀮𑀁 𑀯𑀢𑀁 𑀚𑀻𑀯𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀉𑀧𑀝𑁆𑀞𑀸𑀦𑀲𑀸𑀭𑀸, 𑀅𑀬𑀫𑁂𑀓𑁄 𑀅𑀦𑁆𑀢𑁄. 𑀬𑁂 𑀘 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺, 𑀅𑀬𑀁 𑀤𑀼𑀢𑀺𑀬𑁄 ¶ 𑀅𑀦𑁆𑀢𑁄. 𑀇𑀘𑁆𑀘𑁂𑀢𑁂 𑀉𑀪𑁄 𑀅𑀦𑁆𑀢𑀸 𑀓𑀝𑀲𑀺𑀯𑀟𑁆𑀠𑀦𑀸 𑀓𑀝𑀲𑀺𑀬𑁄 𑀤𑀺𑀝𑁆𑀞𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀏𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀪𑀺𑀜𑁆𑀜𑀸𑀬 𑀑𑀮𑀻𑀬𑀦𑁆𑀢𑀺 𑀏𑀓𑁂 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂𑀢𑀺. 𑀇𑀤𑀁 𑀧𑀭𑀯𑀘𑀦𑀁.

𑀬𑁂 𑀘 𑀔𑁄 𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀪𑀺𑀜𑁆𑀜𑀸𑀬 𑀢𑀢𑁆𑀭 𑀘 𑀦 𑀅𑀳𑁂𑀲𑀼𑀁, 𑀢𑁂𑀦 𑀘 𑀅𑀫𑀜𑁆𑀜𑀺𑀁𑀲𑀼, 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸𑀢𑀺. 𑀇𑀤𑀁 𑀲𑀓𑀯𑀘𑀦𑀁. 𑀅𑀬𑀁 𑀉𑀤𑀸𑀦𑁄 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘.

𑀭𑀸𑀚𑀸 𑀧𑀲𑁂𑀦𑀤𑀺 [𑀧𑀲𑁆𑀲𑁂𑀦𑀤𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁧𑁩] 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 ¶ 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀓𑁂𑀲𑀁 𑀦𑀼 𑀔𑁄 𑀧𑀺𑀬𑁄 𑀅𑀢𑁆𑀢𑀸, 𑀓𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 ‘‘𑀬𑁂 𑀘 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀁 𑀳𑀺 𑀅𑀧𑁆𑀧𑀺𑀬𑁄 𑀅𑀧𑁆𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘𑀅𑀧𑁆𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀁 𑀳𑀺 𑀧𑀺𑀬𑁄 𑀧𑀺𑀬𑀲𑁆𑀲 𑀓𑀭𑁂𑀬𑁆𑀬 ¶ . 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀬𑁂 𑀳𑀺 𑀓𑁂𑀘𑀺, 𑀫𑀳𑀸𑀭𑀸𑀚, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺 𑀢𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀁 𑀳𑀺, 𑀫𑀳𑀸𑀭𑀸𑀚, 𑀅𑀧𑁆𑀧𑀺𑀬𑁄 𑀅𑀧𑁆𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺 𑀫𑀳𑀸𑀭𑀸𑀚 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘𑀅𑀧𑁆𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀢𑀁 ¶ 𑀓𑀺𑀲𑁆𑀲 𑀳𑁂𑀢𑀼? 𑀬𑀁 𑀳𑀺, 𑀫𑀳𑀸𑀭𑀸𑀚, 𑀧𑀺𑀬𑁄 𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑁋

‘‘𑀅𑀢𑁆𑀢𑀸𑀦𑀜𑁆𑀘𑁂 𑀧𑀺𑀬𑀁 𑀚𑀜𑁆𑀜𑀸, 𑀦 𑀦𑀁 𑀧𑀸𑀧𑁂𑀦 𑀲𑀁𑀬𑀼𑀚𑁂;

𑀦 𑀳𑀺 𑀢𑀁 𑀲𑀼𑀮𑀪𑀁 𑀳𑁄𑀢𑀺, 𑀲𑀼𑀔𑀁 𑀤𑀼𑀓𑁆𑀓𑀝𑀓𑀸𑀭𑀺𑀦𑀸.

‘‘𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲 [𑀫𑀭𑀡𑁂𑀦𑀸𑀪𑀺𑀪𑀽𑀢𑀲𑁆𑀲 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁧𑁫], 𑀚𑀳𑀢𑁄 𑀫𑀸𑀦𑀼𑀲𑀁 𑀪𑀯𑀁;

𑀓𑀺𑀁 𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀓𑀺𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀓𑀺𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀉𑀪𑁄 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀬𑀁 𑀫𑀘𑁆𑀘𑁄 𑀓𑀼𑀭𑀼𑀢𑁂 𑀇𑀥;

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀁𑀯 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀁𑀯𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀢𑀲𑁆𑀫𑀸 ¶ 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀦𑀺𑀘𑀬𑀁 𑀲𑀫𑁆𑀧𑀭𑀸𑀬𑀺𑀓𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀇𑀤𑀁 𑀲𑀼𑀢𑁆𑀢𑀁 𑀧𑀭𑀯𑀘𑀦𑀁. 𑀅𑀦𑀼𑀕𑀻𑀢𑀺 𑀲𑀓𑀯𑀘𑀦𑀁. 𑀇𑀤𑀁 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘.

𑁧𑁧𑁮. 𑀢𑀢𑁆𑀣 𑀓𑀢𑀫𑀁 𑀯𑀺𑀲𑀚𑁆𑀚𑀦𑀻𑀬𑀁?

𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑀇𑀤𑀁 𑀅𑀪𑀺𑀜𑁆𑀜𑁂𑀬𑁆𑀬𑀁, 𑀇𑀤𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀇𑀤𑀁 𑀧𑀳𑀸𑀢𑀩𑁆𑀩𑀁, 𑀇𑀤𑀁 𑀪𑀸𑀯𑁂𑀢𑀩𑁆𑀩𑀁, 𑀇𑀤𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀇𑀫𑁂 𑀥𑀫𑁆𑀫𑀸 𑀏𑀯𑀁𑀕𑀳𑀺𑀢𑀸 𑀇𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀬𑀦𑁆𑀢𑀺. 𑀢𑁂𑀲𑀁 ¶ 𑀏𑀯𑀁𑀕𑀳𑀺𑀢𑀸𑀦𑀁 𑀅𑀬𑀫𑀢𑁆𑀣𑁄 𑀇𑀢𑀺 𑀇𑀤𑀁 𑀯𑀺𑀲𑀚𑁆𑀚𑀦𑀻𑀬𑀁. ‘‘𑀉𑀴𑀸𑀭𑁄 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀩𑀼𑀤𑁆𑀥𑀉𑀴𑀸𑀭𑀢𑀁 𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀏𑀓𑀁𑀲𑁂𑀦𑁂𑀯 𑀦𑀺𑀤𑁆𑀤𑀺𑀲𑁂. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀏𑀓𑀁𑀲𑁂𑀦𑁂𑀯 𑀦𑀺𑀤𑁆𑀤𑀺𑀲𑁂. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀏𑀯𑀁 𑀚𑀸𑀢𑀺𑀬𑀁. 𑀇𑀤𑀁 𑀯𑀺𑀲𑀚𑁆𑀚𑀦𑀻𑀬𑀁.

𑀢𑀢𑁆𑀣 ¶ 𑀓𑀢𑀫𑀁 𑀅𑀯𑀺𑀲𑀚𑁆𑀚𑀦𑀻𑀬𑀁?

‘‘𑀆𑀓𑀗𑁆𑀔𑀢𑁄 𑀢𑁂 𑀦𑀭𑀤𑀫𑁆𑀫𑀲𑀸𑀭𑀣𑀺 [𑀦𑀭𑀤𑀫𑁆𑀫𑀲𑀸𑀭𑀣𑀻 (𑀲𑀻.)], 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀫𑀦𑀲𑀸 𑀯𑀺𑀘𑀺𑀦𑁆𑀢𑀺𑀢𑀁;

𑀲𑀩𑁆𑀩𑁂 𑀦 𑀚𑀜𑁆𑀜𑀸 𑀓𑀲𑀺𑀡𑀸𑀧𑀺 𑀧𑀸𑀡𑀺𑀦𑁄, 𑀲𑀦𑁆𑀢𑀁 𑀲𑀫𑀸𑀥𑀺𑀁 𑀅𑀭𑀡𑀁 𑀦𑀺𑀲𑁂𑀯𑀢𑁄;

𑀓𑀺𑀦𑁆𑀢𑀁 𑀪𑀕𑀯𑀸 𑀆𑀓𑀗𑁆𑀔𑀢𑀻’’𑀢𑀺.

𑀇𑀤𑀁 𑀅𑀯𑀺𑀲𑀚𑁆𑀚𑀦𑀻𑀬𑀁.

𑀏𑀢𑁆𑀢𑀓𑁄 𑀪𑀕𑀯𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀇𑀭𑀺𑀬𑀸𑀬𑀁 𑀧𑀪𑀸𑀯𑁂 𑀳𑀺𑀢𑁂𑀲𑀺𑀢𑀸𑀬𑀁 𑀓𑀭𑀼𑀡𑀸𑀬𑀁 𑀇𑀤𑁆𑀥𑀺𑀬𑀦𑁆𑀢𑀺. 𑀇𑀤𑀁 𑀅𑀯𑀺𑀲𑀚𑁆𑀚𑀦𑀻𑀬𑀁.

‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑁄𑀓𑁂 𑀉𑀧𑁆𑀧𑀸𑀤𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑁆𑀧𑀸𑀤𑁄 𑀩𑀼𑀤𑁆𑀥𑀭𑀢𑀦𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀲𑀗𑁆𑀖𑀭𑀢𑀦𑀲𑁆𑀲’’. 𑀓𑀺𑀁 𑀧𑀫𑀸𑀡𑀸𑀦𑀺 𑀢𑀻𑀡𑀺 𑀭𑀢𑀦𑀸𑀦𑀻𑀢𑀺? 𑀇𑀤𑀁 𑀅𑀯𑀺𑀲𑀚𑁆𑀚𑀦𑀻𑀬𑀁.

𑀩𑀼𑀤𑁆𑀥𑀯𑀺𑀲𑀬𑁄 𑀅𑀯𑀺𑀲𑀚𑁆𑀚𑀦𑀻𑀬𑁄. 𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀼𑀢𑀸 𑀅𑀯𑀺𑀲𑀚𑁆𑀚𑀦𑀻𑀬𑀸. ‘‘𑀧𑀼𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 ¶ 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀓𑀺𑀁 𑀦𑀺𑀭𑀬𑀁 𑀲𑀓𑀺𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀲𑀓𑀺𑀁 𑀧𑁂𑀢𑁆𑀢𑀺𑀯𑀺𑀲𑀬𑀁 𑀲𑀓𑀺𑀁 𑀅𑀲𑀼𑀭𑀬𑁄𑀦𑀺𑀁 𑀲𑀓𑀺𑀁 𑀤𑁂𑀯𑁂 𑀲𑀓𑀺𑀁 𑀫𑀦𑀼𑀲𑁆𑀲𑁂 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁’’. 𑀓𑀢𑀫𑀸 𑀧𑀼𑀩𑁆𑀩𑀸 𑀓𑁄𑀝𑀻𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀲𑀸𑀯𑀓𑀸𑀦𑀁 𑀜𑀸𑀡𑀯𑁂𑀓𑀮𑁆𑀮𑁂𑀦. 𑀤𑀼𑀯𑀺𑀥𑀸 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀤𑁂𑀲𑀦𑀸 𑀅𑀢𑁆𑀢𑀽𑀧𑀦𑀸𑀬𑀺𑀓𑀸 𑀘 𑀧𑀭𑀽𑀧𑀦𑀸𑀬𑀺𑀓𑀸 𑀘. 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀧𑀭𑀽𑀧𑀦𑀸𑀬𑀺𑀓𑀸. 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀯𑀺𑀚𑀸𑀦𑀦𑀸𑀢𑀺 [𑀅𑀧𑁆𑀧𑀚𑀸𑀦𑀦𑀸𑀢𑀺 (𑀲𑀻.)] 𑀅𑀢𑁆𑀢𑀽𑀧𑀦𑀸𑀬𑀺𑀓𑀸. 𑀬𑀣𑀸 𑀪𑀕𑀯𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀯𑀫𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺 ¶ ¶ , 𑀪𑀺𑀓𑁆𑀔𑀼, 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄…𑀧𑁂… 𑀦 𑀢𑁆𑀯𑁂𑀯 𑀏𑀓𑁄 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀩𑁆𑀩𑀼𑀤𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀦𑀺𑀭𑀩𑁆𑀩𑀼𑀤𑁄 𑀦𑀺𑀭𑀬𑁄 [𑀦𑀺𑀭𑀩𑁆𑀩𑀼𑀤𑀦𑀺𑀭𑀬𑁄 (𑀲𑀁. 𑀦𑀺. 𑁧.𑁧𑁮𑁧)]. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀦𑀺𑀭𑀩𑁆𑀩𑀼𑀤𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀅𑀩𑀩𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀩𑀩𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀅𑀝𑀝𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀝𑀝𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀅𑀳𑀳𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀳𑀳𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀓𑀼𑀫𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀓𑀼𑀫𑀼𑀤𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀲𑁄𑀕𑀦𑁆𑀥𑀺𑀓𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀲𑁄𑀕𑀦𑁆𑀥𑀺𑀓𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀉𑀧𑁆𑀧𑀮𑀓𑁄 𑀦𑀺𑀭𑀬𑁄 [𑀉𑀧𑁆𑀧𑀮𑀦𑀺𑀭𑀬𑁄 (𑀲𑀁. 𑀦𑀺. 𑁧.𑁧𑁮𑁧)]. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀉𑀧𑁆𑀧𑀮𑀓𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀧𑀼𑀡𑁆𑀟𑀭𑀻𑀓𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀧𑀼𑀡𑁆𑀟𑀭𑀻𑀓𑀸 𑀦𑀺𑀭𑀬𑀸, 𑀏𑀯𑀫𑁂𑀓𑁄 𑀧𑀤𑀼𑀫𑁄 𑀦𑀺𑀭𑀬𑁄. 𑀧𑀤𑀼𑀫𑁂 𑀧𑀦, 𑀪𑀺𑀓𑁆𑀔𑀼, 𑀦𑀺𑀭𑀬𑁂 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺. 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀪𑀕𑀯𑀸 𑀆𑀳 ‘‘𑀅𑀬𑀁 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁆𑀬𑁂𑀬𑁄’’𑀢𑀺. 𑀲𑀩𑁆𑀩𑀁 𑀢𑀁 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀇𑀤𑀁 𑀅𑀯𑀺𑀲𑀚𑁆𑀚𑀦𑀻𑀬𑀁.

𑁧𑁧𑁯. 𑀢𑀢𑁆𑀣 𑀓𑀢𑀫𑀁 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘, 𑀬𑀤𑀸 𑀲𑁄 𑀉𑀧𑀓𑁄 𑀆𑀚𑀻𑀯𑀓𑁄 𑀪𑀕𑀯𑀦𑁆𑀢𑀁 𑀆𑀳 ‘‘𑀓𑀼𑀳𑀺𑀁, 𑀆𑀯𑀼𑀲𑁄 𑀕𑁄𑀢𑀫, 𑀕𑀫𑀺𑀲𑁆𑀲𑀲𑀻’’𑀢𑀺. 𑀪𑀕𑀯𑀸 𑀆𑀳 𑁋

‘‘𑀩𑀸𑀭𑀸𑀡𑀲𑀺𑀁 𑀕𑀫𑀺𑀲𑁆𑀲𑀸𑀫𑀺, 𑀅𑀳𑀁 𑀢𑀁 𑀅𑀫𑀢𑀤𑀼𑀦𑁆𑀤𑀼𑀪𑀺𑀁;

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁, 𑀮𑁄𑀓𑁂 𑀅𑀧𑁆𑀧𑀝𑀺𑀯𑀢𑁆𑀢𑀺𑀬’’𑀦𑁆𑀢𑀺.

𑀉𑀧𑀓𑁄 𑀆𑀚𑀻𑀯𑀓𑁄 𑀆𑀳 ‘‘‘𑀚𑀺𑀦𑁄’𑀢𑀺 𑀔𑁄 𑀆𑀯𑀼𑀲𑁄, 𑀪𑁄 𑀕𑁄𑀢𑀫, 𑀧𑀝𑀺𑀚𑀸𑀦𑀸𑀲𑀻’’𑀢𑀺. 𑀪𑀕𑀯𑀸 𑀆𑀳 𑁋

‘‘𑀫𑀸𑀤𑀺𑀲𑀸 ¶ 𑀯𑁂 𑀚𑀺𑀦𑀸 [𑀚𑀺𑀦𑀸 𑀯𑁂 𑀫𑀸𑀤𑀺𑀲𑀸 (𑀲𑀻. 𑀓.) 𑀧𑀲𑁆𑀲 𑀫. 𑀦𑀺. 𑁨.𑁩𑁪𑁧] 𑀳𑁄𑀦𑁆𑀢𑀺, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁;

𑀚𑀺𑀢𑀸 𑀫𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀢𑀲𑁆𑀫𑀸𑀳𑀁 𑀉𑀧𑀓𑀸 𑀚𑀺𑀦𑁄’’𑀢𑀺.

𑀓𑀣𑀁 𑀚𑀺𑀦𑁄 𑀓𑁂𑀦 𑀚𑀺𑀦𑁄𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀓𑀢𑀫𑁄 𑀚𑀺𑀦𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀓𑀢𑀫𑁄 𑀆𑀲𑀯𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀓𑀺𑀢𑁆𑀢𑀓𑁄 𑀆𑀲𑀯𑀓𑁆𑀔𑀬𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀇𑀤𑀁 ¶ 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘.

𑀅𑀢𑁆𑀣𑀺 ¶ 𑀢𑀣𑀸𑀕𑀢𑁄𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀅𑀢𑁆𑀣𑀺 𑀭𑀽𑀧𑀦𑁆𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀭𑀽𑀧𑀯𑀸 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀭𑀽𑀧𑁂 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀢𑀣𑀸𑀕𑀢𑁂 𑀭𑀽𑀧𑀦𑁆𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀏𑀯𑀁 𑀅𑀢𑁆𑀣𑀺 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀅𑀢𑁆𑀣𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀯𑀺𑀜𑁆𑀜𑀸𑀡𑀯𑀸 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀯𑀺𑀜𑁆𑀜𑀸𑀡𑁂 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀢𑀣𑀸𑀕𑀢𑁂 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀅𑀜𑁆𑀜𑀢𑁆𑀭 𑀭𑀽𑀧𑁂𑀦 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑁂𑀳𑀺…𑀧𑁂… 𑀯𑀺𑀜𑁆𑀜𑀸𑀡𑁂𑀦 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀅𑀬𑀁 𑀲𑁄 𑀢𑀣𑀸𑀕𑀢𑁄 𑀅𑀭𑀽𑀧𑀓𑁄…𑀧𑁂… 𑀅𑀯𑁂𑀤𑀦𑀓𑁄…𑀧𑁂… 𑀅𑀲𑀜𑁆𑀜𑀓𑁄…𑀧𑁂… 𑀅𑀲𑀗𑁆𑀔𑀸𑀭𑀓𑁄…𑀧𑁂… 𑀅𑀯𑀺𑀜𑁆𑀜𑀸𑀡𑀓𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀇𑀤𑀁 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘.

𑀧𑀲𑁆𑀲𑀢𑀺 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀏𑀯𑀁 𑀲𑀩𑁆𑀩𑀁…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀻𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀓𑀢𑀫𑁂 𑀲𑀢𑁆𑀢𑀸, 𑀓𑀢𑀫𑁄 𑀢𑀣𑀸𑀕𑀢𑁄𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀇𑀤𑀁 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘.

𑀅𑀢𑁆𑀣𑀺 𑀢𑀣𑀸𑀕𑀢𑁄𑀢𑀺 𑀯𑀺𑀲𑀚𑁆𑀚𑀦𑀻𑀬𑀁. 𑀅𑀢𑁆𑀣𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀅𑀯𑀺𑀲𑀚𑁆𑀚𑀦𑀻𑀬𑀁. 𑀇𑀤𑀁 𑀯𑀺𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑀚𑁆𑀚𑀦𑀻𑀬𑀜𑁆𑀘.

𑁧𑁨𑁦. 𑀢𑀢𑁆𑀣 𑀓𑀢𑀫𑀁 𑀓𑀫𑁆𑀫𑀁?

‘‘𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲 ¶ , 𑀚𑀳𑀢𑁄 𑀫𑀸𑀦𑀼𑀲𑀁 𑀪𑀯𑀁;

𑀓𑀺𑀁 𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀓𑀺𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀓𑀺𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀉𑀪𑁄 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀬𑀁 𑀫𑀘𑁆𑀘𑁄 𑀓𑀼𑀭𑀼𑀢𑁂 𑀇𑀥;

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀁𑀯 [𑀢𑀜𑁆𑀘 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁧𑁫] 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀁𑀯𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺.

𑀇𑀤𑀁 𑀓𑀫𑁆𑀫𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀩𑀸𑀮𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 ¶ 𑀯𑀸 𑀙𑀫𑀸𑀬𑀁 [𑀙𑀫𑀸𑀬 (𑀲𑀻. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁨𑁪𑁮] 𑀯𑀸 𑀲𑁂𑀫𑀸𑀦𑀁 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀸𑀦𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 ¶ 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀢𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀣𑀯𑀺𑀬𑀁 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀸𑀦𑀺 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀸𑀦𑀺, 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺 ‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁. 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲𑀁, 𑀬𑀸𑀯𑀢𑀸 𑀪𑁄 𑀅𑀓𑀢𑀓𑀮𑁆𑀬𑀸𑀡𑀸𑀦𑀁 𑀅𑀓𑀢𑀓𑀼𑀲𑀮𑀸𑀦𑀁 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀓𑀢𑀧𑀸𑀧𑀸𑀦𑀁 𑀓𑀢𑀮𑀼𑀤𑁆𑀤𑀸𑀦𑀁 𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀕𑀢𑀺, 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺, 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀲𑀼𑀘𑀭𑀺𑀢𑀸𑀦𑀺 𑀫𑀦𑀲𑀸 𑀲𑀼𑀘𑀭𑀺𑀢𑀸𑀦𑀺, 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀢𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀣𑀯𑀺𑀬𑀁 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀁 𑀧𑀻𑀞𑀲𑀫𑀸𑀭𑀽𑀴𑁆𑀳𑀁 𑀯𑀸 𑀫𑀜𑁆𑀘𑀲𑀫𑀸𑀭𑀽𑀴𑁆𑀳𑀁 𑀯𑀸 𑀙𑀫𑀸𑀬𑀁 𑀯𑀸 𑀲𑁂𑀫𑀸𑀦𑀁 𑀬𑀸𑀦𑀺𑀲𑁆𑀲 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀸𑀦𑀺 𑀯𑀸𑀘𑀸𑀬 𑀲𑀼𑀘𑀭𑀺𑀢𑀸𑀦𑀺 𑀫𑀦𑀲𑀸 𑀲𑀼𑀘𑀭𑀺𑀢𑀸𑀦𑀺, 𑀢𑀸𑀦𑀺𑀲𑁆𑀲 𑀢𑀫𑁆𑀳𑀺 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀧𑁆𑀧𑀮𑀫𑁆𑀩𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 ‘𑀏𑀯𑀁 𑀳𑁄𑀢𑀺 𑀅𑀓𑀢𑀁 𑀯𑀢 𑀫𑁂 𑀧𑀸𑀧𑀁 ¶ , 𑀅𑀓𑀢𑀁 𑀮𑀼𑀤𑁆𑀤𑀁, 𑀅𑀓𑀢𑀁 𑀓𑀺𑀩𑁆𑀩𑀺𑀲𑀁. 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀓𑀼𑀲𑀮𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁, 𑀬𑀸𑀯𑀢𑀸 𑀪𑁄 𑀅𑀓𑀢𑀧𑀸𑀧𑀸𑀦𑀁 ¶ 𑀅𑀓𑀢𑀮𑀼𑀤𑁆𑀤𑀸𑀦𑀁 𑀅𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀓𑀢𑀓𑀮𑁆𑀬𑀸𑀡𑀸𑀦𑀁 𑀓𑀢𑀓𑀼𑀲𑀮𑀸𑀦𑀁 𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀕𑀢𑀺, 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺, 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, ‘𑀓𑀢𑀁 𑀫𑁂 𑀧𑀼𑀜𑁆𑀜𑀁, 𑀅𑀓𑀢𑀁 𑀧𑀸𑀧𑀁, 𑀬𑀸 𑀪𑀯𑀺𑀲𑁆𑀲𑀢𑀺 𑀕𑀢𑀺 𑀅𑀓𑀢𑀧𑀸𑀧𑀲𑁆𑀲 𑀅𑀓𑀢𑀮𑀼𑀤𑁆𑀤𑀲𑁆𑀲 𑀅𑀓𑀢𑀓𑀺𑀩𑁆𑀩𑀺𑀲𑀲𑁆𑀲 𑀓𑀢𑀧𑀼𑀜𑁆𑀜𑀲𑁆𑀲 𑀓𑀢𑀓𑀼𑀲𑀮𑀲𑁆𑀲 𑀓𑀢𑀪𑀻𑀭𑀼𑀢𑁆𑀢𑀸𑀡𑀲𑁆𑀲, 𑀢𑀁 𑀧𑁂𑀘𑁆𑀘 𑀪𑀯𑁂 𑀕𑀢𑀺𑀁 𑀧𑀘𑁆𑀘𑀦𑀼𑀪𑀯𑀺𑀲𑁆𑀲𑀸𑀫𑀻’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦 𑀚𑀸𑀬𑀢𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀔𑁄, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀕𑀺𑀳𑀺𑀦𑁄 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀪𑀤𑁆𑀤𑀓𑀁 𑀫𑀭𑀡𑀁 𑀪𑀤𑁆𑀤𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸𑀢𑀺 𑀯𑀤𑀸𑀫𑀻’’𑀢𑀺. 𑀇𑀤𑀁 𑀓𑀫𑁆𑀫𑀁.

‘‘𑀢𑀻𑀡𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺, 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀘𑀭𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺. 𑀇𑀤𑀁 𑀓𑀫𑁆𑀫𑀁.

𑀢𑀢𑁆𑀣 𑀓𑀢𑀫𑁄 𑀯𑀺𑀧𑀸𑀓𑁄?

‘‘𑀮𑀸𑀪𑀸 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀮𑀤𑁆𑀥𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬. 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀦𑀺𑀭𑀬𑀸. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺 𑀅𑀦𑀺𑀝𑁆𑀞𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀇𑀝𑁆𑀞𑀭𑀽𑀧𑀁. 𑀅𑀓𑀦𑁆𑀢𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀓𑀦𑁆𑀢𑀭𑀽𑀧𑀁. 𑀅𑀫𑀦𑀸𑀧𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀫𑀦𑀸𑀧𑀭𑀽𑀧𑀁.

𑀬𑀁 𑀓𑀺𑀜𑁆𑀘𑀺 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺…𑀧𑁂… 𑀖𑀸𑀦𑁂𑀦…𑀧𑁂… 𑀚𑀺𑀯𑁆𑀳𑀸𑀬…𑀧𑁂… 𑀓𑀸𑀬𑁂𑀦…𑀧𑁂… 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺 𑀅𑀦𑀺𑀝𑁆𑀞𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀇𑀝𑁆𑀞𑀥𑀫𑁆𑀫𑀁. 𑀅𑀓𑀦𑁆𑀢𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀓𑀦𑁆𑀢𑀥𑀫𑁆𑀫𑀁. 𑀅𑀫𑀦𑀸𑀧𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀫𑀦𑀸𑀧𑀥𑀫𑁆𑀫𑀁. 𑀮𑀸𑀪𑀸 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀮𑀤𑁆𑀥𑁄 ¶ 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬.

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀲𑀕𑁆𑀕𑀸. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺 𑀇𑀝𑁆𑀞𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀅𑀦𑀺𑀝𑁆𑀞𑀭𑀽𑀧𑀁. 𑀓𑀦𑁆𑀢𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀅𑀓𑀦𑁆𑀢𑀭𑀽𑀧𑀁. 𑀫𑀦𑀸𑀧𑀭𑀽𑀧𑀁𑀬𑁂𑀯 𑀧𑀲𑁆𑀲𑀢𑀺, 𑀦𑁄 𑀅𑀫𑀦𑀸𑀧𑀭𑀽𑀧𑀁. 𑀬𑀁 𑀓𑀺𑀜𑁆𑀘𑀺 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺…𑀧𑁂… 𑀖𑀸𑀦𑁂𑀦 ¶ …𑀧𑁂… 𑀚𑀺𑀯𑁆𑀳𑀸𑀬…𑀧𑁂… 𑀓𑀸𑀬𑁂𑀦…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺 𑀇𑀝𑁆𑀞𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀅𑀦𑀺𑀝𑁆𑀞𑀥𑀫𑁆𑀫𑀁. 𑀓𑀦𑁆𑀢𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀅𑀓𑀦𑁆𑀢𑀥𑀫𑁆𑀫𑀁. 𑀫𑀦𑀸𑀧𑀥𑀫𑁆𑀫𑀁𑀬𑁂𑀯 𑀯𑀺𑀚𑀸𑀦𑀸𑀢𑀺, 𑀦𑁄 𑀅𑀫𑀦𑀸𑀧𑀥𑀫𑁆𑀫𑀁. 𑀮𑀸𑀪𑀸 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀮𑀤𑁆𑀥𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺. 𑀅𑀬𑀁 𑀯𑀺𑀧𑀸𑀓𑁄.

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁 [𑀧𑀘𑁆𑀘𑀫𑀸𑀦𑀲𑁆𑀲 (𑀓.) 𑀧𑀲𑁆𑀲 𑀧𑁂. 𑀯. 𑁮𑁦𑁨], 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺 [𑀧𑀢𑀺𑀤𑀺𑀲𑁆𑀲𑀢𑀺 (𑀲𑀻.) 𑀚𑀸. 𑁧.𑁪.𑁫𑁫];

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘 𑀫𑀸𑀭𑀺𑀲𑀸’’𑀢𑀺.

𑀅𑀬𑀁 𑀯𑀺𑀧𑀸𑀓𑁄.

𑁧𑁨𑁧. 𑀢𑀢𑁆𑀣 ¶ 𑀓𑀢𑀫𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘?

‘‘𑀅𑀥𑀫𑁆𑀫𑀘𑀸𑀭𑀻 𑀳𑀺 𑀦𑀭𑁄 𑀧𑀫𑀢𑁆𑀢𑁄, 𑀬𑀳𑀺𑀁 𑀬𑀳𑀺𑀁 𑀕𑀘𑁆𑀙𑀢𑀺 𑀤𑀼𑀕𑁆𑀕𑀢𑀺𑀁 𑀬𑁄;

𑀲𑁄 𑀦𑀁 𑀅𑀥𑀫𑁆𑀫𑁄 𑀘𑀭𑀺𑀢𑁄 𑀳𑀦𑀸𑀢𑀺, 𑀲𑀬𑀁 𑀕𑀳𑀻𑀢𑁄 𑀬𑀣𑀸 𑀓𑀡𑁆𑀳𑀲𑀧𑁆𑀧𑁄.

‘‘𑀦 𑀳𑀺 [𑀧𑀲𑁆𑀲 𑀣𑁂𑀭𑀕𑀸. 𑁩𑁦𑁪] 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀇𑀤𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘.

‘‘𑀫𑀸, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀦𑀁 𑀪𑀸𑀬𑀺𑀢𑁆𑀣, 𑀲𑀼𑀔𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀥𑀺𑀯𑀘𑀦𑀁 𑀇𑀝𑁆𑀞𑀲𑁆𑀲 𑀓𑀦𑁆𑀢𑀲𑁆𑀲 𑀧𑀺𑀬𑀲𑁆𑀲 𑀫𑀦𑀸𑀧𑀲𑁆𑀲 𑀬𑀤𑀺𑀤𑀁 ¶ 𑀧𑀼𑀜𑁆𑀜𑀸𑀦𑀺. 𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀤𑀻𑀖𑀭𑀢𑁆𑀢𑀁 𑀓𑀢𑀸𑀦𑀁 𑀧𑀼𑀜𑁆𑀜𑀸𑀦𑀁 𑀇𑀝𑁆𑀞𑀁 [𑀤𑀻𑀖𑀭𑀢𑁆𑀢𑀁 𑀇𑀝𑁆𑀞𑀁 (𑀲𑀻. 𑀓.) 𑀧𑀲𑁆𑀲 𑀇𑀢𑀺𑀯𑀼. 𑁨𑁨] 𑀓𑀦𑁆𑀢𑀁 𑀧𑀺𑀬𑀁 𑀫𑀦𑀸𑀧𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀽𑀢𑀁, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀦 𑀇𑀫𑀁 [𑀦 𑀬𑀺𑀫𑀁 (𑀇𑀢𑀺𑀯𑀼. 𑁨𑁨)] 𑀮𑁄𑀓𑀁 𑀧𑀼𑀦𑀭𑀸𑀕𑀫𑀸𑀲𑀺𑀁. 𑀲𑀁𑀯𑀝𑁆𑀝𑀫𑀸𑀦𑁂 𑀲𑀼𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑁂 𑀆𑀪𑀲𑁆𑀲𑀭𑀽𑀧𑀕𑁄 𑀳𑁄𑀫𑀺. 𑀯𑀺𑀯𑀝𑁆𑀝𑀫𑀸𑀦𑁂 𑀓𑀧𑁆𑀧𑁂 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀸𑀫𑀺. 𑀢𑀢𑁆𑀭 𑀲𑀼𑀤𑀸𑀳𑀁 [𑀲𑀼𑀤𑀁 (𑀇𑀢𑀺𑀯𑀼. 𑁨𑁨)], 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀳𑁄𑀫𑀺 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻. 𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀅𑀳𑁄𑀲𑀺𑀁 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀅𑀳𑁄𑀲𑀺𑀁 𑀘𑀓𑁆𑀓𑀯𑀢𑁆𑀢𑀻 [𑀘𑀓𑁆𑀓𑀯𑀢𑁆𑀢𑀺 (𑀓.)] 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄, 𑀓𑁄 𑀧𑀦 𑀯𑀸𑀤𑁄 𑀧𑀤𑁂𑀲𑀭𑀚𑁆𑀚𑀲𑁆𑀲? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 ‘𑀓𑀺𑀲𑁆𑀲 𑀦𑀼 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀲𑁆𑀲 ¶ 𑀨𑀮𑀁, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 ‘𑀢𑀺𑀡𑁆𑀡𑀁 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀸𑀦𑀁 𑀨𑀮𑀁, 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄. 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀤𑀸𑀦𑀲𑁆𑀲 𑀤𑀫𑀲𑁆𑀲 𑀲𑀁𑀬𑀫𑀲𑁆𑀲𑀸’’𑀢𑀺. 𑀢𑀢𑁆𑀣 𑀬𑀜𑁆𑀘 𑀤𑀸𑀦𑀁 𑀬𑁄 𑀘 𑀤𑀫𑁄 𑀬𑁄 𑀘 𑀲𑀁𑀬𑀫𑁄, 𑀇𑀤𑀁 𑀓𑀫𑁆𑀫𑀁. 𑀬𑁄 𑀢𑀧𑁆𑀧𑀘𑁆𑀘𑀬𑀸 𑀯𑀺𑀧𑀸𑀓𑁄 𑀧𑀘𑁆𑀘𑀦𑀼𑀪𑀽𑀢𑁄, 𑀅𑀬𑀁 𑀯𑀺𑀧𑀸𑀓𑁄. 𑀢𑀣𑀸 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑁄 𑀯𑀢𑁆𑀢𑀩𑁆𑀩𑁄.

𑀬𑀁 ¶ 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀤𑁂𑀲𑀺𑀢𑀁. 𑀢𑀢𑁆𑀣 𑀬𑁂 𑀥𑀫𑁆𑀫𑀸 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀳𑁆𑀯𑀸𑀩𑀸𑀥𑀅𑀧𑁆𑀧𑀸𑀩𑀸𑀥𑀢𑀸𑀬 𑀅𑀧𑁆𑀧𑁂𑀲𑀓𑁆𑀔𑀫𑀳𑁂𑀲𑀓𑁆𑀔𑀢𑀸𑀬 𑀤𑀼𑀩𑁆𑀩𑀡𑁆𑀡𑀲𑀼𑀯𑀡𑁆𑀡𑀢𑀸𑀬 𑀦𑀻𑀘𑀓𑀼𑀮𑀺𑀓𑀉𑀘𑁆𑀘𑀓𑀼𑀮𑀺𑀓𑀢𑀸𑀬 𑀅𑀧𑁆𑀧𑀪𑁄𑀕𑀫𑀳𑀸𑀪𑁄𑀕𑀢𑀸𑀬 𑀤𑀼𑀧𑁆𑀧𑀜𑁆𑀜𑀧𑀜𑁆𑀜𑀯𑀦𑁆𑀢𑀢𑀸𑀬 𑀘 ¶ 𑀲𑀁𑀯𑀢𑁆𑀢𑀦𑁆𑀢𑀺, 𑀇𑀤𑀁 𑀓𑀫𑁆𑀫𑀁. 𑀬𑀸 𑀢𑀢𑁆𑀣 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀢𑀸…𑀧𑁂… 𑀤𑀼𑀧𑁆𑀧𑀜𑁆𑀜𑀧𑀜𑁆𑀜𑀯𑀦𑁆𑀢𑀢𑀸, 𑀅𑀬𑀁 𑀯𑀺𑀧𑀸𑀓𑁄. 𑀇𑀤𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘.

𑁧𑁨𑁨. 𑀢𑀢𑁆𑀣 𑀓𑀢𑀫𑀁 𑀓𑀼𑀲𑀮𑀁?

‘‘𑀯𑀸𑀘𑀸𑀦𑀼𑀭𑀓𑁆𑀔𑀻 𑀫𑀦𑀲𑀸 𑀲𑀼𑀲𑀁𑀯𑀼𑀢𑁄, 𑀓𑀸𑀬𑁂𑀦 𑀘 𑀦𑀸𑀓𑀼𑀲𑀮𑀁 𑀓𑀬𑀺𑀭𑀸 [𑀅𑀓𑀼𑀲𑀮𑀁 𑀦 𑀓𑀬𑀺𑀭𑀸 (𑀲𑀻.) 𑀧𑀲𑁆𑀲 𑀥. 𑀧. 𑁨𑁮𑁧];

𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂, 𑀆𑀭𑀸𑀥𑀬𑁂 𑀫𑀕𑁆𑀕𑀫𑀺𑀲𑀺𑀧𑁆𑀧𑀯𑁂𑀤𑀺𑀢’’𑀦𑁆𑀢𑀺.

𑀇𑀤𑀁 𑀓𑀼𑀲𑀮𑀁.

‘‘𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀲𑀁𑀯𑀼𑀢𑀁 𑀢𑀻𑀳𑀺 𑀞𑀸𑀦𑁂𑀳𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀇𑀤𑀁 𑀓𑀼𑀲𑀮𑀁.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀇𑀤𑀁 𑀓𑀼𑀲𑀮𑀁. ‘‘𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂 [𑀯𑀺𑀚𑁆𑀚𑀸 𑀘 𑀔𑁄 𑀪𑀺𑀓𑁆𑀔𑀯𑁂 (𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂)], 𑀧𑀼𑀩𑁆𑀩𑀗𑁆𑀕𑀫𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀼𑀤𑁂𑀯 [𑀅𑀦𑁆𑀯𑀤𑁂𑀯 (𑀲𑀻. 𑀓.), 𑀲𑁆𑀬𑀸𑀤𑀺𑀓𑀡𑁆𑀟𑁂 (𑀫𑁄𑀕𑁆𑀕𑀮𑁆𑀮𑀸𑀦𑁂) 𑁧𑁧 𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁] 𑀳𑀺𑀭𑀻 𑀑𑀢𑁆𑀢𑀧𑁆𑀧𑀜𑁆𑀘𑀸’’𑀢𑀺. 𑀇𑀤𑀁 𑀓𑀼𑀲𑀮𑀁.

𑀢𑀢𑁆𑀣 𑀓𑀢𑀫𑀁 𑀅𑀓𑀼𑀲𑀮𑀁?

‘‘𑀬𑀲𑁆𑀲 ¶ 𑀅𑀘𑁆𑀘𑀦𑁆𑀢 𑀤𑀼𑀲𑁆𑀲𑀻𑀮𑁆𑀬𑀁, 𑀫𑀸𑀮𑀼𑀯𑀸 𑀲𑀸𑀮𑀫𑀺𑀯𑁄𑀢𑁆𑀣𑀢𑀁;

𑀓𑀭𑁄𑀢𑀺 𑀲𑁄 𑀢𑀣𑀢𑁆𑀢𑀸𑀦𑀁, 𑀬𑀣𑀸 𑀦𑀁 𑀇𑀘𑁆𑀙𑀢𑀻 𑀤𑀺𑀲𑁄’’𑀢𑀺.

𑀇𑀤𑀁 𑀅𑀓𑀼𑀲𑀮𑀁.

‘‘𑀅𑀢𑁆𑀢𑀦𑀸 𑀳𑀺 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀚𑀁 𑀅𑀢𑁆𑀢𑀲𑀫𑁆𑀪𑀯𑀁;

𑀅𑀪𑀺𑀫𑀢𑁆𑀣𑀢𑀺 [𑀅𑀪𑀺𑀫𑀦𑁆𑀣𑀢𑀺 (𑀲𑀻.) 𑀧𑀲𑁆𑀲 𑀥. 𑀧. 𑁧𑁬𑁧] 𑀤𑀼𑀫𑁆𑀫𑁂𑀥𑀁, 𑀯𑀚𑀺𑀭𑀁𑀯𑀲𑁆𑀫𑀫𑀬𑀁 𑀫𑀡𑀺’’𑀦𑁆𑀢𑀺.

𑀇𑀤𑀁 𑀅𑀓𑀼𑀲𑀮𑀁.

‘‘𑀤𑀲 ¶ ¶ 𑀓𑀫𑁆𑀫𑀧𑀣𑁂 𑀦𑀺𑀲𑁂𑀯𑀺𑀬, 𑀅𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀺𑀯𑀚𑁆𑀚𑀺𑀢𑀸;

𑀕𑀭𑀳𑀸 𑀘 𑀪𑀯𑀦𑁆𑀢𑀺 𑀤𑁂𑀯𑀢𑁂, 𑀩𑀸𑀮𑀫𑀢𑀻 𑀦𑀺𑀭𑀬𑁂𑀲𑀼 𑀧𑀘𑁆𑀘𑀭𑁂’’𑀢𑀺.

𑀇𑀤𑀁 𑀅𑀓𑀼𑀲𑀮𑀁.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀫𑀽𑀮𑀸𑀦𑀺 [𑀧𑀲𑁆𑀲 𑀅. 𑀦𑀺. 𑁩.𑁭𑁦], 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺’’. 𑀇𑀤𑀁 𑀅𑀓𑀼𑀲𑀮𑀁.

𑀢𑀢𑁆𑀣 𑀓𑀢𑀫𑀁 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘?

‘‘𑀬𑀸𑀤𑀺𑀲𑀁 [𑀲𑀁. 𑀦𑀺. 𑁧.𑁨𑁫𑁬] 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺.

𑀢𑀢𑁆𑀣 𑀬𑀁 𑀆𑀳 ‘‘𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡’’𑀦𑁆𑀢𑀺, 𑀇𑀤𑀁 𑀓𑀼𑀲𑀮𑀁. 𑀬𑀁 𑀆𑀳 ‘‘𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺, 𑀇𑀤𑀁 𑀅𑀓𑀼𑀲𑀮𑀁. 𑀇𑀤𑀁 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘.

‘‘𑀲𑀼𑀪𑁂𑀦 𑀓𑀫𑁆𑀫𑁂𑀦 𑀯𑀚𑀦𑁆𑀢𑀺 𑀲𑀼𑀕𑁆𑀕𑀢𑀺𑀁, 𑀅𑀧𑀸𑀬𑀪𑀽𑀫𑀺𑀁 𑀅𑀲𑀼𑀪𑁂𑀦 𑀓𑀫𑁆𑀫𑀼𑀦𑀸;

𑀔𑀬𑀸 𑀘 𑀓𑀫𑁆𑀫𑀲𑁆𑀲 𑀯𑀺𑀫𑀼𑀢𑁆𑀢𑀘𑁂𑀢𑀲𑁄, 𑀦𑀺𑀩𑁆𑀩𑀦𑁆𑀢𑀺 𑀢𑁂 𑀚𑁄𑀢𑀺𑀭𑀺𑀯𑀺𑀦𑁆𑀥𑀦𑀓𑁆𑀔𑀬𑀸’’.

𑀢𑀢𑁆𑀣 𑀬𑀁 𑀆𑀳 ‘‘𑀲𑀼𑀪𑁂𑀦 𑀓𑀫𑁆𑀫𑁂𑀦 𑀯𑀚𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺, 𑀇𑀤𑀁 𑀓𑀼𑀲𑀮𑀁. 𑀬𑀁 𑀆𑀳 ‘‘𑀅𑀧𑀸𑀬𑀪𑀽𑀫𑀺𑀁 𑀅𑀲𑀼𑀪𑁂𑀦 𑀓𑀫𑁆𑀫𑀼𑀦𑀸’’𑀢𑀺, 𑀇𑀤𑀁 𑀅𑀓𑀼𑀲𑀮𑀁. 𑀇𑀤𑀁 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘.

𑁧𑁨𑁩. 𑀢𑀢𑁆𑀣 ¶ 𑀓𑀢𑀫𑀁 𑀅𑀦𑀼𑀜𑁆𑀜𑀸𑀢𑀁?

‘‘𑀬𑀣𑀸𑀧𑀺 𑀪𑀫𑀭𑁄 𑀧𑀼𑀧𑁆𑀨𑀁, 𑀯𑀡𑁆𑀡𑀕𑀦𑁆𑀥𑀫𑀳𑁂𑀞𑀬𑀁 [𑀯𑀡𑁆𑀡𑀕𑀦𑁆𑀥𑀁 𑀅𑀳𑁂𑀞𑀬𑀁 (𑀲𑀻.) 𑀧𑀲𑁆𑀲 𑀥. 𑀧. 𑁪𑁯];

𑀧𑀮𑁂𑀢𑀺 [𑀧𑀴𑁂𑀢𑀺 (𑀓.)] 𑀭𑀲𑀫𑀸𑀤𑀸𑀬, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂’’𑀢𑀺.

𑀇𑀤𑀁 𑀅𑀦𑀼𑀜𑁆𑀜𑀸𑀢𑀁.

‘‘𑀢𑀻𑀡𑀺𑀫𑀸𑀦𑀺 ¶ ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺, 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀔𑁄 𑀧𑀦 𑀳𑁄𑀢𑀺 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀧𑀜𑁆𑀜𑀯𑀸 𑀔𑁄 𑀧𑀦 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀢𑀻𑀡𑀺 𑀓𑀭𑀡𑀻𑀬𑀸𑀦𑀻’’𑀢𑀺. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁.

‘‘𑀤𑀲𑀬𑀺𑀫𑁂 [𑀤𑀲 𑀇𑀫𑁂 (𑀲𑀻. 𑀓.) 𑀧𑀲𑁆𑀲 𑀅. 𑀦𑀺. 𑁧𑁦.𑁪𑁮], 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀧𑀩𑁆𑀩𑀚𑀺𑀢𑁂𑀦 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀓𑀢𑀫𑁂 𑀤𑀲? ‘𑀯𑁂𑀯𑀡𑁆𑀡𑀺𑀬𑀫𑁆𑀳𑀺 𑀅𑀚𑁆𑀛𑀼𑀧𑀕𑀢𑁄’𑀢𑀺 𑀧𑀩𑁆𑀩𑀚𑀺𑀢𑁂𑀦 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁…𑀧𑁂… 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂 𑀤𑀲 𑀥𑀫𑁆𑀫𑀸 𑀧𑀩𑁆𑀩𑀚𑀺𑀢𑁂𑀦 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸’’𑀢𑀺. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀓𑀭𑀡𑀻𑀬𑀸𑀦𑀻’’𑀢𑀺. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁.

𑀢𑀢𑁆𑀣 𑀓𑀢𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀁?

‘‘𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀕𑁄𑀲𑀫𑀺𑀢𑀁 [𑀕𑁄𑀡𑀲𑀫𑀁 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁩] 𑀥𑀦𑀁;

𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 [𑀲𑀼𑀭𑀺𑀬𑀲𑀫𑀸 (𑀲𑀻.)] 𑀆𑀪𑀸, 𑀲𑀫𑀼𑀤𑁆𑀤𑀧𑀭𑀫𑀸 𑀲𑀭𑀸’’𑀢𑀺.

𑀪𑀕𑀯𑀸 𑀆𑀳 𑁋

‘‘𑀦𑀢𑁆𑀣𑀺 ¶ 𑀅𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀥𑀜𑁆𑀜𑀲𑀫𑀁 𑀥𑀦𑀁;

𑀦𑀢𑁆𑀣𑀺 𑀧𑀜𑁆𑀜𑀸𑀲𑀫𑀸 𑀆𑀪𑀸, 𑀯𑀼𑀝𑁆𑀞𑀺𑀯𑁂𑀧𑀭𑀫𑀸 𑀲𑀭𑀸’’𑀢𑀺.

𑀏𑀢𑁆𑀣 𑀬𑀁 𑀧𑀼𑀭𑀺𑀫𑀓𑀁, 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

‘‘𑀢𑀻𑀡𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂ऋ 𑀅𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀅𑀓𑀭𑀡𑀻𑀬𑀸𑀦𑀻’’𑀢𑀺. 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

𑁧𑁨𑁪. 𑀢𑀢𑁆𑀣 ¶ 𑀓𑀢𑀫𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘?

‘‘𑀓𑀺𑀁𑀲𑀽𑀥 𑀪𑀻𑀢𑀸 𑀚𑀦𑀢𑀸 𑀅𑀦𑁂𑀓𑀸, 𑀫𑀕𑁆𑀕𑁄 𑀘𑀦𑁂𑀓𑀸𑀬𑀢𑀦𑁄 𑀧𑀯𑀼𑀢𑁆𑀢𑁄 [𑀘𑀦𑁂𑀓𑀸𑀬𑀢𑀦𑀧𑁆𑀧𑀯𑀼𑀢𑁆𑀢𑀸 (𑀲𑀁. 𑀦𑀺. 𑁧.𑁭𑁫)];

𑀧𑀼𑀘𑁆𑀙𑀸𑀫𑀺 𑀢𑀁 𑀕𑁄𑀢𑀫 𑀪𑀽𑀭𑀺𑀧𑀜𑁆𑀜, 𑀓𑀺𑀲𑁆𑀫𑀺𑀁 𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂𑀢𑀺.

‘‘𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀲𑀫𑁆𑀫𑀸, 𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄;

𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀼, 𑀥𑀫𑁆𑀫𑁂 𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺.

𑀢𑀢𑁆𑀣 𑀬𑀁 𑀆𑀳 ‘‘𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀲𑀫𑁆𑀫𑀸’’𑀢𑀺, 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁. ‘‘𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄’’𑀢𑀺, 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. ‘‘𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽. 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀼, 𑀥𑀫𑁆𑀫𑁂 𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂’’𑀢𑀺, 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦𑀲𑀸𑀲𑀦𑀁’’.

𑀢𑀢𑁆𑀣 𑀬𑀁 𑀆𑀳 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺, 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀬𑀁 𑀆𑀳 ‘‘𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺, 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘.

‘‘𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀯𑀘𑀻𑀲𑀫𑀸𑀘𑀸𑀭𑀫𑁆𑀧𑀸𑀳𑀁 ¶ , 𑀤𑁂𑀯𑀸𑀦𑀫𑀺𑀦𑁆𑀤 ¶ , 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀫𑀦𑁄𑀲𑀫𑀸𑀘𑀸𑀭𑀫𑁆𑀧𑀸𑀳𑀁 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺…𑀧𑁂… 𑀧𑀭𑀺𑀬𑁂𑀲𑀦𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺’’.

‘‘𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀬𑀣𑀸𑀭𑀽𑀧𑀜𑁆𑀘 𑀔𑁄 𑀓𑀸𑀬𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀓𑀸𑀬𑀲𑀫𑀸𑀘𑀸𑀭𑀁 ¶ ‘‘𑀇𑀫𑀁 [𑀇𑀤𑀁 (𑀓.) 𑀧𑀲𑁆𑀲 𑀤𑀻. 𑀦𑀺. 𑁨.𑁩𑁬𑁪] 𑀔𑁄 𑀫𑁂 𑀓𑀸𑀬𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. ‘‘𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀸𑀳𑀁 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. ‘‘𑀯𑀘𑀻𑀲𑀫𑀸𑀘𑀸𑀭𑀁…𑀧𑁂… ‘‘𑀧𑀭𑀺𑀬𑁂𑀲𑀦𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀬𑀣𑀸𑀭𑀽𑀧𑀜𑁆𑀘 𑀔𑁄 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀭𑀺𑀬𑁂𑀲𑀦𑀁 ‘‘𑀇𑀫𑀁 𑀔𑁄 𑀫𑁂 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀲𑁂𑀯𑀺𑀢𑀩𑁆𑀩𑀸. ‘‘𑀧𑀭𑀺𑀬𑁂𑀲𑀦𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀁 𑀆𑀳 ‘‘𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺, 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁. 𑀬𑀁 𑀆𑀳 ‘‘𑀦 𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺, 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘.

𑁧𑁭𑁦. 𑀢𑀢𑁆𑀣 ¶ 𑀓𑀢𑀫𑁄 𑀣𑀯𑁄?

‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 [𑀧𑀲𑁆𑀲 𑀥. 𑀧. 𑁨𑁭𑁩] 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺.

𑀅𑀬𑀁 𑀣𑀯𑁄.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀲𑁂𑀝𑁆𑀞𑀫𑀓𑁆𑀔𑀸𑀬𑀢𑀺 𑀧𑀯𑀭𑀫𑀓𑁆𑀔𑀸𑀬𑀢𑀺 ¶ , 𑀬𑀤𑀺𑀤𑀁 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 [𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁮𑁧 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀡𑁆𑀡𑀢𑁆𑀢𑀺𑀲𑀗𑁆𑀔𑀢𑀸𑀦𑀁 𑀯𑀸 𑀅𑀲𑀗𑁆𑀔𑀢𑀸𑀦𑀁 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀲𑁂𑀝𑁆𑀞𑀫𑀓𑁆𑀔𑀸𑀬𑀢𑀺 𑀧𑀯𑀭𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀦𑀁 𑀧𑀡𑁆𑀡𑀢𑁆𑀢𑀺 𑀕𑀡𑀸𑀦𑀁 𑀧𑀡𑁆𑀡𑀢𑁆𑀢𑀺 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑀸𑀦𑀁 𑀧𑀡𑁆𑀡𑀢𑁆𑀢𑀺, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀲𑁂𑀝𑁆𑀞𑀫𑀓𑁆𑀔𑀸𑀬𑀢𑀺 𑀧𑀯𑀭𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸…𑀧𑁂… 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺.

‘‘𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁄 ¶ 𑀲𑀢𑁆𑀣𑀸, 𑀥𑀫𑁆𑀫𑁄 𑀘 𑀓𑀼𑀲𑀮𑀓𑁆𑀔𑀢𑁄 [𑀓𑀼𑀲𑀮𑀫𑀓𑁆𑀔𑀢𑁄 (𑀓.)];

𑀕𑀡𑁄 𑀘 𑀦𑀭𑀲𑀻𑀳𑀲𑁆𑀲, 𑀢𑀸𑀦𑀺 𑀢𑀻𑀡𑀺 𑀯𑀺𑀲𑁆𑀲𑀺𑀲𑁆𑀲𑀭𑁂.

‘‘𑀲𑀫𑀡𑀧𑀤𑀼𑀫𑀲𑀜𑁆𑀘𑀬𑁄 𑀕𑀡𑁄, 𑀥𑀫𑁆𑀫𑀯𑀭𑁄 𑀘 𑀯𑀺𑀤𑀽𑀦𑀁 𑀲𑀓𑁆𑀓𑀢𑁄;

𑀦𑀭𑀯𑀭𑀤𑀫𑀓𑁄 𑀘 𑀘𑀓𑁆𑀔𑀼𑀫𑀸, 𑀢𑀸𑀦𑀺 𑀢𑀻𑀡𑀺 𑀮𑁄𑀓𑀲𑁆𑀲 𑀉𑀢𑁆𑀢𑀭𑀺.

‘‘𑀲𑀢𑁆𑀣𑀸 𑀘 𑀅𑀧𑁆𑀧𑀝𑀺𑀲𑀫𑁄, 𑀥𑀫𑁆𑀫𑁄 𑀘 𑀲𑀩𑁆𑀩𑁄 𑀦𑀺𑀭𑀼𑀧𑀤𑀸𑀳𑁄;

𑀅𑀭𑀺𑀬𑁄 𑀘 𑀕𑀡𑀯𑀭𑁄, 𑀢𑀸𑀦𑀺 ¶ 𑀔𑀮𑀼 𑀯𑀺𑀲𑁆𑀲𑀺𑀲𑁆𑀲𑀭𑁂 𑀢𑀻𑀡𑀺.

‘‘𑀲𑀘𑁆𑀘𑀦𑀸𑀫𑁄 𑀚𑀺𑀦𑁄 𑀔𑁂𑀫𑁄 𑀲𑀩𑁆𑀩𑀸𑀪𑀺𑀪𑀽, 𑀲𑀘𑁆𑀘𑀥𑀫𑁆𑀫𑁄 𑀦𑀢𑁆𑀣𑀜𑁆𑀜𑁄 𑀢𑀲𑁆𑀲 𑀉𑀢𑁆𑀢𑀭𑀺;

𑀅𑀭𑀺𑀬𑀲𑀗𑁆𑀖𑁄 𑀦𑀺𑀘𑁆𑀘𑀁 𑀯𑀺𑀜𑁆𑀜𑀽𑀦𑀁 𑀧𑀽𑀚𑀺𑀢𑁄, 𑀢𑀸𑀦𑀺 𑀢𑀻𑀡𑀺 𑀮𑁄𑀓𑀲𑁆𑀲 𑀉𑀢𑁆𑀢𑀭𑀺.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 [𑀬𑁂 𑀘𑀸𑀧𑀺 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁩𑁮𑁪] 𑀢𑀭𑀦𑁆𑀢𑀺 𑀑𑀖𑀁.

‘‘𑀢𑀁 𑀢𑀸𑀤𑀺𑀲𑀁 𑀤𑁂𑀯𑀫𑀦𑀼𑀲𑁆𑀲𑀲𑁂𑀝𑁆𑀞𑀁;

𑀲𑀢𑁆𑀢𑀸 𑀦𑀫𑀲𑁆𑀲𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀧𑁂𑀓𑁆𑀔𑀸’’𑀢𑀺.

𑀅𑀬𑀁 𑀣𑀯𑁄𑀢𑀺.

𑀢𑀢𑁆𑀣 𑀮𑁄𑀓𑀺𑀬𑀁 𑀲𑀼𑀢𑁆𑀢𑀁 𑀤𑁆𑀯𑀻𑀳𑀺 𑀲𑀼𑀢𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 𑀘 𑀯𑀸𑀲𑀦𑀸𑀪𑀸𑀕𑀺𑀬𑁂𑀦 𑀘. 𑀮𑁄𑀓𑀼𑀢𑁆𑀢𑀭𑀁𑀧𑀺 𑀲𑀼𑀢𑁆𑀢𑀁 𑀢𑀻𑀳𑀺 𑀲𑀼𑀢𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀤𑀲𑁆𑀲𑀦𑀪𑀸𑀕𑀺𑀬𑁂𑀦 𑀘 𑀪𑀸𑀯𑀦𑀸𑀪𑀸𑀕𑀺𑀬𑁂𑀦 𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑁂𑀦 𑀘. 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀬𑀁 𑀬𑀁 𑀧𑀤𑀁 𑀤𑀺𑀲𑁆𑀲𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀁 𑀯𑀸, 𑀢𑁂𑀦 𑀢𑁂𑀦 𑀮𑁄𑀓𑀺𑀬𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀤𑀲𑁆𑀲𑀦𑀪𑀸𑀕𑀺𑀬𑀁 𑀯𑀸 ¶ 𑀪𑀸𑀯𑀦𑀸𑀪𑀸𑀕𑀺𑀬𑀁 𑀯𑀸 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀯𑀸 𑀬𑀁 𑀬𑀁 𑀧𑀤𑀁 𑀤𑀺𑀲𑁆𑀲𑀢𑀺 𑀢𑁂𑀦 𑀢𑁂𑀦 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀯𑀸𑀲𑀦𑀸𑀪𑀸𑀕𑀺𑀬𑀁 ¶ 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀕𑁆𑀖𑀸𑀢𑀸𑀬, 𑀤𑀲𑁆𑀲𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀕𑁆𑀖𑀸𑀢𑀸𑀬, 𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀲𑁆𑀲𑀦𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀪𑀸𑀯𑀦𑀸𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁.

𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀙𑀩𑁆𑀩𑀻𑀲𑀢𑀺𑀬𑀸 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑁂 𑀢𑀻𑀳𑀺 𑀲𑀼𑀢𑁆𑀢𑁂𑀳𑀺 𑀲𑀫𑀦𑁆𑀯𑁂𑀲𑀺𑀢𑀩𑁆𑀩𑀸 𑀤𑀲𑁆𑀲𑀦𑀪𑀸𑀕𑀺𑀬𑁂𑀦 𑀪𑀸𑀯𑀦𑀸𑀪𑀸𑀕𑀺𑀬𑁂𑀦 𑀅𑀲𑁂𑀓𑁆𑀔𑀪𑀸𑀕𑀺𑀬𑁂𑀦 𑀘𑀸𑀢𑀺.

𑀢𑀢𑁆𑀣 𑀤𑀲𑁆𑀲𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀧𑀜𑁆𑀘𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀏𑀓𑀩𑀻𑀚𑀺𑀦𑀸 𑀓𑁄𑀮𑀁𑀓𑁄𑀮𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁂𑀦 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑀸 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑀸 𑀘𑀸𑀢𑀺, 𑀤𑀲𑁆𑀲𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑁆𑀯𑀸𑀤𑀲𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂𑀦, 𑀲𑀓𑀤𑀸𑀕𑀸𑀫𑀺𑀦𑀸, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂𑀦, 𑀅𑀦𑀸𑀕𑀸𑀫𑀺𑀦𑀸 ¶ , 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀸, 𑀉𑀧𑀳𑀘𑁆𑀘 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀸, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀸, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀸, 𑀉𑀤𑁆𑀥𑀁𑀲𑁄𑀢𑁂𑀦 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑀸, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁂𑀦, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁂𑀦, 𑀓𑀸𑀬𑀲𑀓𑁆𑀔𑀺𑀦𑀸 𑀘𑀸𑀢𑀺, 𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀦𑀯𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁂𑀦, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁂𑀦, 𑀲𑀼𑀜𑁆𑀜𑀢𑀯𑀺𑀫𑀼𑀢𑁆𑀢𑁂𑀦, 𑀅𑀦𑀺𑀫𑀺𑀢𑁆𑀢𑀯𑀺𑀫𑀼𑀢𑁆𑀢𑁂𑀦, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑀼𑀢𑁆𑀢𑁂𑀦, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁂𑀦 𑀲𑀫𑀲𑀻𑀲𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀘𑀸𑀢𑀺, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀇𑀫𑁂𑀳𑀺 𑀦𑀯𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀇𑀫𑁂𑀳𑀺 𑀙𑀩𑁆𑀩𑀻𑀲𑀢𑀺𑀬𑀸 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀮𑁄𑀓𑀺𑀬𑀁 𑀲𑀼𑀢𑁆𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑁂 𑀘𑀭𑀺𑀢𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀸 𑀲𑀫𑀦𑁆𑀯𑁂𑀲𑀺𑀢𑀩𑁆𑀩𑀸 𑀓𑁂𑀘𑀺 𑀭𑀸𑀕𑀘𑀭𑀺𑀢𑀸, 𑀓𑁂𑀘𑀺 𑀤𑁄𑀲𑀘𑀭𑀺𑀢𑀸, 𑀓𑁂𑀘𑀺 𑀫𑁄𑀳𑀘𑀭𑀺𑀢𑀸, 𑀓𑁂𑀘𑀺 𑀭𑀸𑀕𑀘𑀭𑀺𑀢𑀸 𑀘 𑀤𑁄𑀲𑀘𑀭𑀺𑀢𑀸 𑀘, 𑀓𑁂𑀘𑀺 𑀭𑀸𑀕𑀘𑀭𑀺𑀢𑀸 𑀘 𑀫𑁄𑀳𑀘𑀭𑀺𑀢𑀸 𑀘, 𑀓𑁂𑀘𑀺 𑀤𑁄𑀲𑀘𑀭𑀺𑀢𑀸 𑀘 𑀫𑁄𑀳𑀘𑀭𑀺𑀢𑀸 𑀘, 𑀓𑁂𑀘𑀺 𑀭𑀸𑀕𑀘𑀭𑀺𑀢𑀸 𑀘 𑀤𑁄𑀲𑀘𑀭𑀺𑀢𑀸 𑀘 𑀫𑁄𑀳𑀘𑀭𑀺𑀢𑀸 𑀘, 𑀭𑀸𑀕𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄, 𑀭𑀸𑀕𑀫𑀼𑀔𑁂 𑀞𑀺𑀢𑁄 𑀤𑁄𑀲𑀘𑀭𑀺𑀢𑁄, 𑀭𑀸𑀕𑀫𑀼𑀔𑁂 𑀞𑀺𑀢𑁄 𑀫𑁄𑀳𑀘𑀭𑀺𑀢𑁄, 𑀭𑀸𑀕𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄 𑀘 𑀤𑁄𑀲𑀘𑀭𑀺𑀢𑁄 𑀘 𑀫𑁄𑀳𑀘𑀭𑀺𑀢𑁄 𑀘, 𑀤𑁄𑀲𑀫𑀼𑀔𑁂 𑀞𑀺𑀢𑁄 𑀤𑁄𑀲𑀘𑀭𑀺𑀢𑁄, 𑀤𑁄𑀲𑀫𑀼𑀔𑁂 𑀞𑀺𑀢𑁄 𑀫𑁄𑀳𑀘𑀭𑀺𑀢𑁄, 𑀤𑁄𑀲𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄, 𑀤𑁄𑀲𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄 𑀘 𑀤𑁄𑀲𑀘𑀭𑀺𑀢𑁄 ¶ 𑀘 𑀫𑁄𑀳𑀘𑀭𑀺𑀢𑁄 ¶ 𑀘, 𑀫𑁄𑀳𑀫𑀼𑀔𑁂 𑀞𑀺𑀢𑁄 𑀫𑁄𑀳𑀘𑀭𑀺𑀢𑁄, 𑀫𑁄𑀳𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄 𑀫𑁄𑀳𑀫𑀼𑀔𑁂 𑀞𑀺𑀢𑁄 𑀤𑁄𑀲𑀘𑀭𑀺𑀢𑁄, 𑀫𑁄𑀳𑀫𑀼𑀔𑁂 𑀞𑀺𑀢𑁄 𑀭𑀸𑀕𑀘𑀭𑀺𑀢𑁄 𑀘 𑀤𑁄𑀲𑀘𑀭𑀺𑀢𑁄 𑀘 𑀫𑁄𑀳𑀘𑀭𑀺𑀢𑁄 𑀘𑀸𑀢𑀺, 𑀮𑁄𑀓𑀺𑀬𑀁 𑀲𑀼𑀢𑁆𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀇𑀫𑁂𑀳𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀻𑀮𑀯𑀦𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑁂 𑀲𑀻𑀮𑀯𑀦𑁆𑀢𑁄 ¶ 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀧𑀓𑀢𑀺𑀲𑀻𑀮𑀁 𑀲𑀫𑀸𑀤𑀸𑀦𑀲𑀻𑀮𑀁 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺, 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀼𑀕𑁆𑀕𑀮𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀢𑀻𑀳𑀺 𑀲𑀼𑀢𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀤𑀲𑁆𑀲𑀦𑀪𑀸𑀕𑀺𑀬𑁂𑀦 𑀪𑀸𑀯𑀦𑀸𑀪𑀸𑀕𑀺𑀬𑁂𑀦 𑀅𑀲𑁂𑀓𑁆𑀔𑀪𑀸𑀕𑀺𑀬𑁂𑀦 𑀘.

𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘 𑀉𑀪𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀜𑀸𑀡𑀁 𑀧𑀜𑁆𑀜𑀸𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀧𑀜𑁆𑀜𑀸𑀩𑀮𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀢𑀻𑀭𑀡𑀸𑀬 𑀲𑀦𑁆𑀢𑀻𑀭𑀡𑀸𑀬 𑀥𑀫𑁆𑀫𑁂 𑀜𑀸𑀡𑁂𑀦 𑀅𑀦𑁆𑀯𑀬𑁂 𑀜𑀸𑀡𑁂𑀦 𑀔𑀬𑁂 𑀜𑀸𑀡𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑁂𑀦 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑁂𑀦 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀘𑀓𑁆𑀔𑀼𑀦𑀸 𑀯𑀺𑀚𑁆𑀚𑀸𑀬 𑀩𑀼𑀤𑁆𑀥𑀺𑀬𑀸 𑀪𑀽𑀭𑀺𑀬𑀸 𑀫𑁂𑀥𑀸𑀬, 𑀬𑀁 𑀬𑀁 𑀯𑀸 𑀧𑀦 𑀮𑀩𑁆𑀪𑀢𑀺, 𑀢𑁂𑀦 𑀢𑁂𑀦 𑀧𑀜𑁆𑀜𑀸𑀥𑀺𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀜𑁂𑀬𑁆𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀳𑀺 𑀳𑀻𑀦𑀧𑁆𑀧𑀡𑀻𑀢𑁂𑀳𑀺 𑀤𑀽𑀭𑀲𑀦𑁆𑀢𑀺𑀓𑁂𑀳𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀲𑀗𑁆𑀔𑁂𑀧𑀢𑁄 𑀯𑀸 𑀙𑀳𑀺 𑀆𑀭𑀫𑁆𑀫𑀡𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘 𑀢𑀤𑀼𑀪𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀧𑀜𑁆𑀜𑀸𑀧𑀺 𑀆𑀭𑀫𑁆𑀫𑀡𑀪𑀽𑀢𑀸 𑀜𑁂𑀬𑁆𑀬𑀁, 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀪𑀽𑀢𑀁 𑀅𑀚𑁆𑀛𑀢𑁆𑀢𑀺𑀓𑀁 𑀯𑀸 𑀩𑀸𑀳𑀺𑀭𑀁 𑀯𑀸, 𑀲𑀩𑁆𑀩𑀁 𑀢𑀁 𑀲𑀗𑁆𑀔𑀢𑁂𑀦 𑀅𑀲𑀗𑁆𑀔𑀢𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀤𑀲𑁆𑀲𑀦𑀁 𑀪𑀸𑀯𑀦𑀸 [𑀤𑀲𑁆𑀲𑀦𑀸 𑀪𑀸𑀯𑀦𑀸 (𑀲𑀻.)] 𑀲𑀓𑀯𑀘𑀦𑀁 𑀧𑀭𑀯𑀘𑀦𑀁 𑀯𑀺𑀲𑀚𑁆𑀚𑀦𑀻𑀬𑀁 𑀅𑀯𑀺𑀲𑀚𑁆𑀚𑀦𑀻𑀬𑀁 𑀓𑀫𑁆𑀫𑀁 𑀯𑀺𑀧𑀸𑀓𑁄𑀢𑀺 𑀲𑀩𑁆𑀩𑀢𑁆𑀣 𑀢𑀤𑀼𑀪𑀬𑀁 𑀲𑀼𑀢𑁆𑀢𑁂 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀣𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀢𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀪𑀕𑀯𑀸 𑀅𑀜𑁆𑀜𑀢𑀭𑀯𑀘𑀦𑀁 𑀪𑀸𑀲𑀢𑀺, 𑀲𑀩𑁆𑀩𑀁 𑀢𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀁 𑀥𑀸𑀭𑀬𑀺𑀢𑀩𑁆𑀩𑀁.

𑀤𑀼𑀯𑀺𑀥𑁄 𑀳𑁂𑀢𑀼 𑀬𑀜𑁆𑀘 𑀓𑀫𑁆𑀫𑀁 𑀬𑁂 𑀘 𑀓𑀺𑀮𑁂𑀲𑀸, 𑀲𑀫𑀼𑀤𑀬𑁄 𑀓𑀺𑀮𑁂𑀲𑀸. 𑀢𑀢𑁆𑀣 ¶ 𑀓𑀺𑀮𑁂𑀲𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 𑀲𑀼𑀢𑁆𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀲𑀫𑀼𑀤𑀬𑁄 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 ¶ 𑀘 𑀯𑀸𑀲𑀦𑀸𑀪𑀸𑀕𑀺𑀬𑁂𑀦 𑀘 𑀲𑀼𑀢𑁆𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀼𑀲𑀮𑀁 𑀘𑀢𑀽𑀳𑀺 𑀲𑀼𑀢𑁆𑀢𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀯𑀸𑀲𑀦𑀸𑀪𑀸𑀕𑀺𑀬𑁂𑀦 𑀤𑀲𑁆𑀲𑀦𑀪𑀸𑀕𑀺𑀬𑁂𑀦 𑀪𑀸𑀯𑀦𑀸𑀪𑀸𑀕𑀺𑀬𑁂𑀦 𑀅𑀲𑁂𑀓𑁆𑀔𑀪𑀸𑀕𑀺𑀬𑁂𑀦 𑀘. 𑀅𑀓𑀼𑀲𑀮𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 𑀲𑀼𑀢𑁆𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 ¶ . 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀢𑀤𑀼𑀪𑀬𑁂𑀦 [𑀢𑀤𑀼𑀪𑀬𑁂𑀳𑀺 (𑀲𑀻.)] 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀅𑀦𑀼𑀜𑁆𑀜𑀸𑀢𑀁 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀢𑀸𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑀁 𑀧𑀜𑁆𑀘𑀯𑀺𑀥𑀁 𑀲𑀁𑀯𑀭𑁄 𑀧𑀳𑀸𑀦𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑁄𑀢𑀺, 𑀬𑀁 𑀤𑀺𑀲𑁆𑀲𑀢𑀺 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀼, 𑀢𑀁 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀧𑀝𑀺𑀓𑁆𑀔𑀺𑀢𑁆𑀢𑀁 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀭𑀡𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘 𑀢𑀤𑀼𑀪𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀣𑀯𑁄 𑀧𑀲𑀁𑀲𑀸𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀲𑁄 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑀪𑀕𑀯𑀢𑁄 𑀥𑀫𑁆𑀫𑀲𑁆𑀲 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀭𑀺𑀬𑀥𑀫𑁆𑀫𑀸𑀦𑀁 𑀲𑀺𑀓𑁆𑀔𑀸𑀬 𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸𑀢𑀺. 𑀏𑀯𑀁 𑀣𑀯𑁄 𑀧𑀜𑁆𑀘𑀯𑀺𑀥𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄.

𑀇𑀦𑁆𑀤𑁆𑀭𑀺𑀬𑀪𑀽𑀫𑀺 𑀦𑀯𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀓𑀺𑀮𑁂𑀲𑀪𑀽𑀫𑀺 𑀦𑀯𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀏𑀯𑀫𑁂𑀢𑀸𑀦𑀺 𑀅𑀝𑁆𑀞𑀸𑀭𑀲 𑀧𑀤𑀸𑀦𑀺 𑀳𑁄𑀦𑁆𑀢𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀻𑀢𑀺, 𑀢𑀣𑀸𑀳𑀺 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀸, 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑁂’’𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋

‘‘𑀦𑀯𑀳𑀺 𑀘 𑀧𑀤𑁂𑀳𑀺 𑀓𑀼𑀲𑀮𑀸, 𑀦𑀯𑀳𑀺 𑀘 𑀬𑀼𑀚𑁆𑀚𑀦𑁆𑀢𑀺 𑀅𑀓𑀼𑀲𑀮𑀧𑁆𑀧𑀓𑁆𑀔𑀸;

𑀏𑀢𑁂 𑀔𑀮𑀼 𑀫𑀽𑀮𑀧𑀤𑀸, 𑀪𑀯𑀦𑁆𑀢𑀺 𑀅𑀝𑁆𑀞𑀸𑀭𑀲 𑀧𑀤𑀸𑀦𑀻’’𑀢𑀺.

𑀦𑀺𑀬𑀼𑀢𑁆𑀢𑀁 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑀁.

𑀏𑀢𑁆𑀢𑀸𑀯𑀢𑀸 ¶ 𑀲𑀫𑀢𑁆𑀢𑀸 𑀦𑁂𑀢𑁆𑀢𑀺 𑀬𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀪𑀸𑀲𑀺𑀢𑀸 𑀪𑀕𑀯𑀢𑀸 𑀅𑀦𑀼𑀫𑁄𑀤𑀺𑀢𑀸 𑀫𑀽𑀮𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀻𑀢𑀸𑀢𑀺.

𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.