📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀧𑁂𑀝𑀓𑁄𑀧𑀤𑁂𑀲𑀧𑀸𑀴𑀺

𑁧. 𑀅𑀭𑀺𑀬𑀲𑀘𑁆𑀘𑀧𑁆𑀧𑀓𑀸𑀲𑀦𑀧𑀞𑀫𑀪𑀽𑀫𑀺

𑀦𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀭𑀫𑀢𑁆𑀣𑀤𑀲𑁆𑀲𑀻𑀦𑀁

𑀲𑀻𑀮𑀸𑀤𑀺𑀕𑀼𑀡𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀦𑀁.

𑁧. 𑀤𑀼𑀯𑁂 𑀳𑁂𑀢𑀽 𑀤𑀼𑀯𑁂 𑀧𑀘𑁆𑀘𑀬𑀸 𑀲𑀸𑀯𑀓𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑁋 𑀧𑀭𑀢𑁄 𑀘 𑀖𑁄𑀲𑁄 𑀲𑀘𑁆𑀘𑀸𑀦𑀼𑀲𑀦𑁆𑀥𑀺, 𑀅𑀚𑁆𑀛𑀢𑁆𑀢𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀓𑀢𑀫𑁄 𑀧𑀭𑀢𑁄 𑀖𑁄𑀲𑁄? 𑀬𑀸 𑀧𑀭𑀢𑁄 𑀤𑁂𑀲𑀦𑀸 𑀑𑀯𑀸𑀤𑁄 𑀅𑀦𑀼𑀲𑀸𑀲𑀦𑀻 𑀲𑀘𑁆𑀘𑀓𑀣𑀸 𑀲𑀘𑁆𑀘𑀸𑀦𑀼𑀮𑁄𑀫𑁄. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀦𑀺𑀭𑁄𑀥𑁄 𑀫𑀕𑁆𑀕𑁄. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀬𑀸 𑀤𑁂𑀲𑀦𑀸 𑀲𑀦𑁆𑀤𑀲𑁆𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀺𑀭𑀺𑀬𑀸 [𑀉𑀢𑁆𑀢𑀸𑀦𑀺𑀓𑀺𑀭𑀺𑀬𑀸 (𑀓.)] 𑀧𑀓𑀸𑀲𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀘𑁆𑀘𑀸𑀦𑀼𑀮𑁄𑀫𑁄 𑀖𑁄𑀲𑁄𑀢𑀺.

𑁨. 𑀢𑀢𑁆𑀣 𑀓𑀢𑀫𑁄 𑀅𑀚𑁆𑀛𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄?

𑀅𑀚𑁆𑀛𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫 𑀬𑁄 𑀬𑀣𑀸𑀤𑁂𑀲𑀺𑀢𑁂 𑀥𑀫𑁆𑀫𑁂 𑀩𑀳𑀺𑀤𑁆𑀥𑀸 𑀆𑀭𑀫𑁆𑀫𑀡𑀁 𑀅𑀦𑀪𑀺𑀦𑀻𑀳𑀭𑀺𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄.

𑀢𑀁𑀆𑀓𑀸𑀭𑁄 𑀬𑁄𑀦𑀺𑀲𑁄 𑀤𑁆𑀯𑀸𑀭𑁄 𑀯𑀺𑀥𑀺 𑀉𑀧𑀸𑀬𑁄. 𑀬𑀣𑀸 𑀧𑀼𑀭𑀺𑀲𑁄 𑀲𑀼𑀓𑁆𑀔𑁂 𑀓𑀝𑁆𑀞𑁂 𑀯𑀺𑀕𑀢𑀲𑁆𑀦𑁂𑀳𑁂 𑀲𑀼𑀓𑁆𑀔𑀸𑀬 𑀉𑀢𑁆𑀢𑀭𑀸𑀭𑀡𑀺𑀬𑀸 𑀣𑀮𑁂 𑀅𑀪𑀺𑀫𑀦𑁆𑀣𑀫𑀸𑀦𑀁 𑀪𑀩𑁆𑀩𑁄 𑀚𑁄𑀢𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼. 𑀬𑁄𑀦𑀺𑀲𑁄 𑀅𑀕𑁆𑀕𑀺𑀲𑁆𑀲 𑀅𑀥𑀺𑀕𑀫𑀸𑀬. 𑀏𑀯𑀫𑁂𑀯𑀲𑁆𑀲 𑀬𑀫𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀸𑀦𑀁 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀁 𑀫𑀦𑀲𑀺𑀓𑀭𑁄𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄.

𑀬𑀣𑀸 𑀢𑀺𑀲𑁆𑀲𑁄 𑀉𑀧𑀫𑀸 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀸 𑀘 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑀘 𑀧𑀝𑀺𑀪𑀦𑁆𑀢𑀺. 𑀬𑁄 𑀳𑀺 𑀓𑁄𑀘𑀺 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄𑀢𑀺…𑀧𑁂… 𑀤𑀼𑀯𑁂 𑀉𑀧𑀫𑀸 𑀅𑀬𑁄𑀦𑀺𑀲𑁄 𑀓𑀸𑀢𑀩𑁆𑀩𑀸 𑀧𑀘𑁆𑀙𑀺𑀫𑁂𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀘 𑀧𑀭𑀢𑁄 𑀖𑁄𑀲𑁄 𑀬𑁄 𑀘 𑀅𑀚𑁆𑀛𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑁋 𑀇𑀫𑁂 𑀤𑁆𑀯𑁂 𑀧𑀘𑁆𑀘𑀬𑀸. 𑀧𑀭𑀢𑁄 𑀖𑁄𑀲𑁂𑀦 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀬𑀸 𑀅𑀚𑁆𑀛𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸𑀢𑀺. 𑀇𑀫𑀸 𑀤𑁆𑀯𑁂 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀺𑀫𑀓𑀸 𑀘 𑀤𑁆𑀯𑁂 𑀧𑀘𑁆𑀘𑀬𑀸. 𑀇𑀫𑁂 𑀤𑁆𑀯𑁂 𑀳𑁂𑀢𑀽 𑀤𑁆𑀯𑁂 𑀧𑀘𑁆𑀘𑀬𑀸 𑀲𑀸𑀯𑀓𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬.

𑁩. 𑀢𑀢𑁆𑀣 𑀧𑀭𑀢𑁄 𑀖𑁄𑀲𑀲𑁆𑀲 𑀲𑀘𑁆𑀘𑀸𑀦𑀼𑀲𑀦𑁆𑀥𑀺𑀲𑁆𑀲 𑀤𑁂𑀲𑀺𑀢𑀲𑁆𑀲 𑀅𑀢𑁆𑀣𑀁 𑀅𑀯𑀺𑀚𑀸𑀦𑀦𑁆𑀢𑁄 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦 𑀘 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀭𑀢𑁄 𑀖𑁄𑀲𑀲𑁆𑀲 𑀲𑀘𑁆𑀘𑀸𑀦𑀼𑀲𑀦𑁆𑀥𑀺𑀲𑁆𑀲 𑀤𑁂𑀲𑀺𑀢𑀲𑁆𑀲 𑀅𑀢𑁆𑀣𑀁 𑀯𑀺𑀚𑀸𑀦𑀦𑁆𑀢𑁄 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻 𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀏𑀲 𑀳𑁂𑀢𑀼 𑀏𑀢𑀁 𑀆𑀭𑀫𑁆𑀫𑀡𑀁 𑀏𑀲𑁄 𑀉𑀧𑀸𑀬𑁄 𑀲𑀸𑀯𑀓𑀲𑁆𑀲 𑀦𑀺𑀬𑁆𑀬𑀸𑀦𑀲𑁆𑀲, 𑀦𑀢𑁆𑀣𑀜𑁆𑀜𑁄. 𑀲𑁄𑀬𑀁 𑀦 𑀘 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀺𑀚𑀸𑀦𑀦𑀸𑀬 𑀲𑀳 𑀬𑀼𑀢𑁆𑀢𑁄 𑀦𑀸𑀧𑀺 𑀖𑁄𑀲𑀸𑀦𑀼𑀬𑁄𑀕𑁂𑀦 𑀧𑀭𑀢𑁄 𑀖𑁄𑀲𑀲𑁆𑀲 𑀅𑀢𑁆𑀣𑀁 𑀅𑀯𑀺𑀚𑀸𑀦𑀦𑁆𑀢𑁂𑀦 𑀲𑀓𑁆𑀓𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀅𑀥𑀺𑀕𑀦𑁆𑀢𑀼𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑁂𑀦 𑀲𑀼𑀢𑀫𑀬𑁂𑀦 𑀅𑀢𑁆𑀣𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀭𑀺𑀬𑁂𑀲𑀦𑀸𑀬 𑀅𑀬𑀁 𑀅𑀦𑀼𑀧𑀼𑀩𑁆𑀩𑀻 𑀪𑀯𑀢𑀺 𑀲𑁄𑀴𑀲 𑀳𑀸𑀭𑀸, 𑀧𑀜𑁆𑀘 𑀦𑀬𑀸, 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺.

𑀢𑀢𑁆𑀣𑀸𑀬𑀁 𑀉𑀤𑁆𑀤𑀸𑀦𑀕𑀸𑀣𑀸

𑀲𑁄𑀴𑀲𑀳𑀸𑀭𑀸 𑀦𑁂𑀢𑁆𑀢𑀻, 𑀧𑀜𑁆𑀘𑀦𑀬𑀸 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀺;

𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀸, 𑀓𑀘𑁆𑀘𑀸𑀬𑀦𑀕𑁄𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀸.

𑁪. 𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲𑀳𑀸𑀭𑀸?

𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺 𑀧𑀤𑀝𑁆𑀞𑀸𑀦𑀁 𑀮𑀓𑁆𑀔𑀡𑀁 𑀘𑀢𑀼𑀩𑁆𑀬𑀽𑀳𑁄 𑀆𑀯𑀝𑁆𑀝𑁄 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄 𑀯𑁂𑀯𑀘𑀦𑁄 𑀧𑀜𑁆𑀜𑀢𑁆𑀢𑀺 𑀑𑀢𑀭𑀡𑁄 𑀲𑁄𑀥𑀦𑁄 𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄 𑀲𑀫𑀸𑀭𑁄𑀧𑀦𑁄 𑁋 𑀇𑀫𑁂 𑀲𑁄𑀴𑀲 𑀳𑀸𑀭𑀸.

𑀢𑀢𑁆𑀣 𑀉𑀤𑁆𑀤𑀸𑀦𑀕𑀸𑀣𑀸

𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺, 𑀧𑀤𑀝𑁆𑀞𑀸𑀦𑁄 𑀘 𑀮𑀓𑁆𑀔𑀡𑁄 [𑀧𑀤𑀝𑁆𑀞𑀸𑀦𑀜𑁆𑀘 𑀮𑀓𑁆𑀔𑀡𑀁 (𑀧𑀻.)];

𑀘𑀢𑀼𑀩𑁆𑀬𑀽𑀳𑁄 𑀘 𑀆𑀯𑀝𑁆𑀝𑁄, 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄.

𑀯𑁂𑀯𑀘𑀦𑁄 𑀘 𑀧𑀜𑁆𑀜𑀢𑁆𑀢𑀺, 𑀑𑀢𑀭𑀡𑁄 𑀘 𑀲𑁄𑀥𑀦𑁄;

𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄, 𑀲𑀫𑀸𑀭𑁄𑀧𑀦𑁄 𑀲𑁄𑀴𑀲𑁄 𑁋 [𑀲𑁄𑀴𑀲 𑀳𑀸𑀭𑀸 (𑀧𑀻. 𑀓.)];

𑁫. 𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀦𑀬𑀸?

𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀢𑀺𑀧𑀼𑀓𑁆𑀔𑀮𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀤𑀺𑀲𑀸𑀮𑁄𑀘𑀦𑁄 𑀅𑀗𑁆𑀓𑀼𑀲𑁄𑀢𑀺.

𑀢𑀢𑁆𑀣 𑀉𑀤𑁆𑀤𑀸𑀦𑀕𑀸𑀣𑀸

𑀧𑀞𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀤𑀼𑀢𑀺𑀬𑁄 𑀘 𑀢𑀺𑀧𑀼𑀓𑁆𑀔𑀮𑁄;

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫, 𑀢𑀢𑀺𑀬𑁄 𑀳𑁄𑀢𑀺 𑀲𑁄 𑀦𑀬𑁄.

𑀤𑀺𑀲𑀸𑀮𑁄𑀘𑀦𑀫𑀸𑀳𑀁𑀲𑀼, 𑀘𑀢𑀼𑀢𑁆𑀣𑁄 𑀦𑀬𑀮𑀜𑁆𑀚𑀓𑁄;

𑀧𑀜𑁆𑀘𑀫𑁄 𑀅𑀗𑁆𑀓𑀼𑀲𑁄 𑀦𑀸𑀫 [𑀧𑀜𑁆𑀘𑀫𑀁 𑀅𑀗𑁆𑀓𑀼𑀲𑀁 𑀆𑀳𑀼 (𑀧𑀻. 𑀓.)], 𑀲𑀩𑁆𑀩𑁂 𑀧𑀜𑁆𑀘 𑀦𑀬𑀸 𑀕𑀢𑀸.

𑁬. 𑀢𑀢𑁆𑀣 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺?

𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀲𑀼𑀪𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀦𑀺𑀘𑁆𑀘𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀲𑀼𑀪𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸, 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺. 𑀢𑀢𑁆𑀣 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀫𑁄𑀲𑀭𑀢𑀺. 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑀁 𑀓𑀼𑀲𑀮𑀁 𑀲𑀫𑁄𑀲𑀭𑀢𑀺.

𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀫𑁄𑀲𑀭𑀢𑀺?

𑀅𑀯𑀺𑀚𑁆𑀚𑀸 𑀬𑀸𑀯 𑀅𑀢𑁆𑀢𑀲𑀜𑁆𑀜𑀸, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀬𑀢𑁆𑀣 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀫𑁄𑀲𑀭𑀢𑀺.

𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑀁 𑀓𑀼𑀲𑀮𑀁 𑀲𑀫𑁄𑀲𑀭𑀢𑀺?

𑀲𑀫𑀣𑁄 𑀬𑀸𑀯 𑀅𑀦𑀢𑁆𑀢𑀲𑀜𑁆𑀜𑀸, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑀁 𑀓𑀼𑀲𑀮𑀁 𑀲𑀫𑁄𑀲𑀭𑀢𑀺. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺.

𑀢𑀢𑁆𑀣 𑀇𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸 𑀮𑁄𑀪𑁄, 𑀤𑁄𑀲𑁄 𑀢𑀣𑁂𑀯 𑀫𑁄𑀳𑁄 𑀘;

𑀘𑀢𑁆𑀢𑀸𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸, 𑀓𑀺𑀮𑁂𑀲𑀪𑀽𑀫𑀺 𑀦𑀯 𑀧𑀤𑀸𑀦𑀺.

𑀬𑁂 𑀘 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑀣𑁄, 𑀯𑀺𑀧𑀲𑁆𑀲𑀦𑀸 𑀓𑀼𑀲𑀮𑀫𑀽𑀮𑀁;

𑀏𑀢𑀁 𑀲𑀩𑁆𑀩𑀁 𑀓𑀼𑀲𑀮𑀁, 𑀇𑀦𑁆𑀤𑁆𑀭𑀺𑀬𑀪𑀽𑀫𑀺 𑀦𑀯𑀧𑀤𑀸𑀦𑀺.

𑀲𑀩𑁆𑀩𑀁 𑀓𑀼𑀲𑀮𑀁 𑀦𑀯𑀳𑀺 𑀧𑀤𑁂𑀳𑀺 𑀬𑀼𑀚𑁆𑀚𑀢𑀺, 𑀦𑀯𑀳𑀺 𑀘𑁂𑀯 𑀅𑀓𑀼𑀲𑀮𑀁;

𑀏𑀓𑀓𑁂 𑀦𑀯 𑀫𑀽𑀮𑀧𑀤𑀸𑀦𑀺, 𑀉𑀪𑀬𑀢𑁄 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺.

𑀇𑀫𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀽𑀮𑀧𑀤𑀸𑀦𑀁 𑀬𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄; 𑀬𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀇𑀢𑀺 𑀲𑀫𑀼𑀤𑀬𑀲𑁆𑀲 𑀤𑀼𑀓𑁆𑀔𑀁 𑀨𑀮𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀦𑀺𑀭𑁄𑀥𑀁 𑀨𑀮𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀪𑀕𑀯𑀢𑀸 𑀩𑀸𑀭𑀸𑀡𑀲𑀺𑀬𑀁 𑀤𑁂𑀲𑀺𑀢𑀸𑀦𑀺.

𑁭. 𑀢𑀢𑁆𑀣 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀧𑀭𑀺𑀫𑀸𑀡𑀸𑀦𑀺 𑀅𑀓𑁆𑀔𑀭𑀸𑀦𑀺 𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀆𑀓𑀸𑀭𑀸𑀦𑀺 𑀦𑀺𑀭𑀼𑀢𑁆𑀢𑀺𑀬𑁄 𑀦𑀺𑀤𑁆𑀤𑁂𑀲𑀸 𑀤𑁂𑀲𑀺𑀢𑀸 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀗𑁆𑀓𑀸𑀲𑀦𑀸𑀬 𑀧𑀓𑀸𑀲𑀦𑀸𑀬 𑀯𑀺𑀯𑀭𑀡𑀸𑀬 𑀯𑀺𑀪𑀚𑀦𑀸𑀬 𑀉𑀢𑁆𑀢𑀸𑀦𑀻𑀓𑀫𑁆𑀫𑀢𑀸𑀬 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀬𑀸 𑀏𑀯𑀁 𑀲𑀩𑁆𑀩𑁂𑀲𑀁 𑀲𑀘𑁆𑀘𑀸𑀦𑀁. 𑀇𑀢𑀺 𑀏𑀓𑀫𑁂𑀓𑀁 𑀲𑀘𑁆𑀘𑀁 𑀅𑀧𑀭𑀺𑀫𑀸𑀡𑁂𑀳𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀆𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑁂𑀳𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀁, 𑀢𑀜𑁆𑀘 𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑀧𑀼𑀣𑀼𑀢𑁆𑀢𑁂𑀦 𑀧𑀦 𑀅𑀢𑁆𑀣𑁂𑀯 𑀩𑁆𑀬𑀜𑁆𑀚𑀦𑀧𑀼𑀣𑀼𑀢𑁆𑀢𑁂𑀦.

𑀬𑁄 𑀳𑀺 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘‘𑀅𑀳𑀁 𑀇𑀤𑀁 𑀤𑀼𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀅𑀜𑁆𑀜𑀁 𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀢𑀁 𑀯𑀸𑀘𑀸𑀯𑀢𑁆𑀣𑀼𑀓𑀫𑁂𑀯𑀲𑁆𑀲 𑀧𑀼𑀘𑁆𑀙𑀺𑀢𑁄 𑀘 𑀦 𑀲𑀫𑁆𑀧𑀸𑀬𑀺𑀲𑁆𑀲𑀢𑀺. 𑀏𑀯𑀁 𑀲𑀘𑁆𑀘𑀸𑀦𑀺. 𑀬𑀜𑁆𑀘 𑀭𑀢𑁆𑀢𑀺𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀢𑁆𑀣𑀦𑁆𑀢𑀭𑁂 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀲𑀩𑁆𑀩𑀁 𑀢𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁. 𑀦 𑀓𑀺𑀜𑁆𑀘𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀥𑀫𑁆𑀫𑀘𑀓𑁆𑀓𑀢𑁄 𑀩𑀳𑀺𑀤𑁆𑀥𑀸, 𑀢𑀲𑁆𑀲 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀅𑀭𑀺𑀬𑀥𑀫𑁆𑀫𑁂𑀲𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀭𑀺𑀕𑁆𑀕𑀡𑁆𑀳𑀦𑀸𑀬 𑀆𑀮𑁄𑀓𑀲𑀪𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀣𑀸𑀯𑀭𑀸𑀦𑀺 𑀇𑀫𑀸𑀦𑀺.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀚𑀸𑀢𑀺 𑀚𑀭𑀸 𑀩𑁆𑀬𑀸𑀥𑀺 𑀫𑀭𑀡𑀁 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸. 𑀢𑀢𑁆𑀣𑀸𑀬𑀁 𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁄, 𑀧𑀸𑀢𑀼𑀪𑀸𑀯𑀮𑀓𑁆𑀔𑀡𑀸 𑀚𑀸𑀢𑀺, 𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀮𑀓𑁆𑀔𑀡𑁄 𑀩𑁆𑀬𑀸𑀥𑀺, 𑀘𑀼𑀢𑀺𑀮𑀓𑁆𑀔𑀡𑀁 𑀫𑀭𑀡𑀁, 𑀧𑀺𑀬𑀯𑀺𑀧𑁆𑀧𑀬𑁄𑀕𑀯𑀺𑀧𑀭𑀺𑀡𑀸𑀫𑀧𑀭𑀺𑀢𑀸𑀧𑀦𑀮𑀓𑁆𑀔𑀡𑁄 𑀲𑁄𑀓𑁄, 𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄 𑀧𑀭𑀺𑀤𑁂𑀯𑁄, 𑀓𑀸𑀬𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀘𑀺𑀢𑁆𑀢𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀓𑀺𑀮𑁂𑀲𑀧𑀭𑀺𑀤𑀳𑀦𑀮𑀓𑁆𑀔𑀡𑁄 𑀉𑀧𑀸𑀬𑀸𑀲𑁄, 𑀅𑀫𑀦𑀸𑀧𑀲𑀫𑁄𑀥𑀸𑀦𑀮𑀓𑁆𑀔𑀡𑁄 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄, 𑀫𑀦𑀸𑀧𑀯𑀺𑀦𑀸𑀪𑀸𑀯𑀮𑀓𑁆𑀔𑀡𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑁄, 𑀅𑀥𑀺𑀧𑁆𑀧𑀸𑀬𑀯𑀺𑀯𑀢𑁆𑀢𑀦𑀮𑀓𑁆𑀔𑀡𑁄 𑀅𑀮𑀸𑀪𑁄, 𑀅𑀧𑀭𑀺𑀜𑁆𑀜𑀸𑀮𑀓𑁆𑀔𑀡𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀧𑀭𑀺𑀧𑀸𑀓𑀘𑀼𑀢𑀺𑀮𑀓𑁆𑀔𑀡𑀁 𑀚𑀭𑀸𑀫𑀭𑀡𑀁, 𑀧𑀸𑀢𑀼𑀪𑀸𑀯𑀘𑀼𑀢𑀺𑀮𑀓𑁆𑀔𑀡𑀁 𑀘𑀼𑀢𑁄𑀧𑀧𑀢𑁆𑀢𑀺, 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀦𑀮𑀓𑁆𑀔𑀡𑁄 𑀲𑀫𑀼𑀤𑀬𑁄, 𑀲𑀫𑀼𑀤𑀬𑀧𑀭𑀺𑀚𑀳𑀦𑀮𑀓𑁆𑀔𑀡𑁄 𑀦𑀺𑀭𑁄𑀥𑁄, 𑀅𑀦𑀼𑀲𑀬𑀲𑀫𑀼𑀘𑁆𑀙𑁂𑀤𑀮𑀓𑁆𑀔𑀡𑁄 𑀫𑀕𑁆𑀕𑁄. 𑀩𑁆𑀬𑀸𑀥𑀺𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁄 𑀲𑀫𑀼𑀤𑀬𑁄, 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁄 𑀫𑀕𑁆𑀕𑁄, 𑀲𑀦𑁆𑀢𑀺𑀮𑀓𑁆𑀔𑀡𑁄 𑀦𑀺𑀭𑁄𑀥𑁄. 𑀅𑀧𑁆𑀧𑀝𑀺𑀲𑀦𑁆𑀥𑀺𑀪𑀸𑀯𑀦𑀺𑀭𑁄𑀥𑀮𑀓𑁆𑀔𑀡𑀸 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘, 𑀤𑀼𑀓𑁆𑀔𑀜𑁆𑀘 𑀦𑀺𑀭𑁄𑀥𑁄 𑀘, 𑀤𑀼𑀓𑁆𑀔𑀜𑁆𑀘 𑀫𑀕𑁆𑀕𑁄 𑀘, 𑀲𑀫𑀼𑀤𑀬𑁄 𑀘 𑀤𑀼𑀓𑁆𑀔𑀜𑁆𑀘, 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘, 𑀲𑀫𑀼𑀤𑀬𑁄 𑀘 𑀫𑀕𑁆𑀕𑁄 𑀘, 𑀦𑀺𑀭𑁄𑀥𑁄 𑀘 𑀲𑀫𑀼𑀤𑀬𑁄 𑀘, 𑀦𑀺𑀭𑁄𑀥𑁄 𑀘 𑀤𑀼𑀓𑁆𑀔𑀜𑁆𑀘, 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘, 𑀫𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀘, 𑀫𑀕𑁆𑀕𑁄 𑀘 𑀲𑀫𑀼𑀤𑀬𑁄 𑀘, 𑀫𑀕𑁆𑀕𑁄 𑀘 𑀤𑀼𑀓𑁆𑀔𑀜𑁆𑀘.

𑁮. 𑀢𑀢𑁆𑀣𑀺𑀫𑀸𑀦𑀺 𑀲𑀼𑀢𑁆𑀢𑀸𑀦𑀺.

‘‘𑀬𑀫𑁂𑀓𑀭𑀢𑁆𑀢𑀺𑀁 [𑀚𑀸𑀢𑀓 𑁧 𑀯𑀻𑀲𑀢𑀺𑀦𑀺𑀧𑀸𑀢𑁂 𑀅𑀬𑁄𑀖𑀭𑀚𑀸𑀢𑀓𑁂] 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺.

𑀅𑀝𑁆𑀞𑀺𑀫𑀸, 𑀆𑀦𑀦𑁆𑀤, 𑀤𑀸𑀦𑀼𑀧𑀧𑀢𑁆𑀢𑀺𑀬𑁄 𑀏𑀓𑀼𑀢𑁆𑀢𑀭𑀺𑀓𑁂 𑀲𑀼𑀢𑁆𑀢𑀁 𑁋 𑀅𑀬𑀁 𑀚𑀸𑀢𑀺.

𑀢𑀢𑁆𑀣 𑀓𑀢𑀫𑀸 𑀚𑀭𑀸?

𑀅𑀘𑀭𑀺𑀢𑁆𑀯𑀸 [𑀥. 𑀧. 𑁧𑁫𑁫] 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀮𑀤𑁆𑀥𑀸 𑀬𑁄𑀩𑁆𑀩𑀦𑁂 𑀥𑀦𑀁;

𑀚𑀺𑀡𑁆𑀡𑀓𑁄𑀜𑁆𑀘𑀸𑀯 𑀛𑀸𑀬𑀦𑁆𑀢𑀺, 𑀔𑀻𑀡𑀫𑀘𑁆𑀙𑁂𑀯 𑀧𑀮𑁆𑀮𑀮𑁂.

𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑁂𑀯𑁂𑀲𑀼 𑁋 𑀅𑀬𑀁 𑀚𑀭𑀸.

𑀢𑀢𑁆𑀣 𑀓𑀢𑀫𑁄 𑀩𑁆𑀬𑀸𑀥𑀺?

𑀲𑀸𑀫𑀁 𑀢𑁂𑀦 𑀓𑀼𑀢𑁄 𑀭𑀸𑀚, 𑀢𑀼𑀯𑀫𑁆𑀧𑀺 𑀚𑀭𑀸𑀬𑀦𑁆𑀢𑀺 𑀯𑁂𑀤𑁂𑀲𑀺;

𑀔𑀢𑁆𑀢𑀺𑀬 𑀓𑀫𑁆𑀫𑀲𑁆𑀲 𑀨𑀮𑁄, 𑀮𑁄𑀓𑁄 𑀦 𑀳𑀺 𑀓𑀫𑁆𑀫𑀁 𑀧𑀦𑀬𑀢𑀺.

𑀢𑀬𑁄 𑀕𑀺𑀮𑀸𑀦𑀸 𑁋 𑀅𑀬𑀁 𑀩𑁆𑀬𑀸𑀥𑀺.

𑀢𑀢𑁆𑀣 𑀓𑀢𑀫𑀁 𑀫𑀭𑀡𑀁?

𑀬𑀣𑀸𑀧𑀺 [𑀤𑀻𑀖𑀦𑀺𑀓𑀸𑀬𑁂 𑀅𑀥𑁄𑀮𑀺𑀔𑀺𑀢𑀕𑀸𑀣𑀸] 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀁 𑀫𑀢𑁆𑀢𑀺𑀓𑀪𑀸𑀚𑀦𑀁;

𑀔𑀼𑀤𑁆𑀤𑀓𑀜𑁆𑀘 𑀫𑀳𑀦𑁆𑀢𑀜𑁆𑀘, 𑀬𑀁 𑀧𑀓𑁆𑀓𑀁 𑀬𑀜𑁆𑀘 𑀆𑀫𑀓𑀁;

𑀲𑀩𑁆𑀩𑀁 𑀪𑁂𑀤𑀦𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁.

𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂 [𑀳𑀜𑁆𑀜𑀫𑀸𑀦𑁂 (𑀧𑀻) 𑀧𑀲𑁆𑀲 𑀲𑀼. 𑀦𑀺. 𑁭𑁮𑁩], 𑀫𑀘𑁆𑀙𑁂𑀯 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬, 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

𑀉𑀤𑀓𑀧𑁆𑀧𑀦𑀲𑀼𑀢𑁆𑀢𑀁 𑁋 𑀇𑀤𑀁 𑀫𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀲𑁄𑀓𑁄?

𑀇𑀥 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺, 𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀲𑁄𑀘𑀢𑀺;

𑀲𑁄 𑀲𑁄𑀘𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺, 𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀫𑀢𑁆𑀢𑀦𑁄 [𑀓𑀫𑁆𑀫𑀓𑀺𑀮𑀺𑀝𑁆𑀞𑀁 𑀅𑀢𑁆𑀣𑀦𑁄 (𑀧𑀻.) 𑀧𑀲𑁆𑀲 𑀥. 𑀧. 𑁧𑁫].

𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀅𑀬𑀁 𑀲𑁄𑀓𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀤𑁂𑀯𑁄?

𑀓𑀸𑀫𑁂𑀲𑀼 [𑀲𑀼. 𑀦𑀺. 𑁭𑁮𑁦] 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸, 𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸;

𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀓𑀺𑀁𑀲𑀼 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂.

𑀢𑀺𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀧𑀭𑀺𑀤𑁂𑀯𑁄.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁?

𑀲𑀢𑀁 𑀆𑀲𑀺 𑀅𑀬𑁄𑀲𑀗𑁆𑀓𑀽 [𑀅𑀬𑁄𑀲𑀗𑁆𑀓𑀼 (𑀧𑀻. 𑀓.) 𑀧𑀲𑁆𑀲 𑀣𑁂𑀭𑀕𑀸. 𑁧𑁧𑁯𑁭], 𑀲𑀩𑁆𑀩𑁂 𑀧𑀘𑁆𑀘𑀢𑁆𑀢𑀯𑁂𑀤𑀦𑀸;

𑀚𑀮𑀺𑀢𑀸 𑀚𑀸𑀢𑀯𑁂𑀤𑀸𑀯, 𑀅𑀘𑁆𑀘𑀺𑀲𑀗𑁆𑀖𑀲𑀫𑀸𑀓𑀼𑀮𑀸.

𑀫𑀳𑀸 𑀯𑀢 𑀲𑁄 𑀧𑀭𑀺𑀴𑀸𑀳𑁄 [𑀧𑀭𑀺𑀤𑀸𑀖𑁄 (𑀧𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁫.𑁧𑁧𑁧𑁩] 𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁 𑀲𑀘𑁆𑀘𑀲𑀁𑀬𑀼𑀢𑁆𑀢𑁂𑀲𑀼 𑁋 𑀇𑀤𑀁 𑀤𑀼𑀓𑁆𑀔𑀁.

𑀢𑀢𑁆𑀣 𑀓𑀢𑀫𑀁 𑀤𑁄𑀫𑀦𑀲𑁆𑀲𑀁?

𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 [𑀧𑀭𑀢𑁄 (𑀓.) 𑀧𑀲𑁆𑀲 𑀲𑀼. 𑀦𑀺. 𑁮𑁨𑁪] 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑀤𑁆𑀯𑁂𑀫𑁂 𑀢𑀧𑀦𑀻𑀬𑀸 𑀥𑀫𑁆𑀫𑀸 𑁋 𑀇𑀤𑀁 𑀤𑁄𑀫𑀦𑀲𑁆𑀲𑀁.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑀸𑀲𑁄?

𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀟𑀬𑁆𑀳𑀢𑀺 𑀦𑁄 𑀩𑀳𑀺;

𑀏𑀯𑀁 𑀟𑀬𑁆𑀳𑀢𑀺 𑀫𑁂 𑀳𑀤𑀬𑀁, 𑀲𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀫𑀫𑁆𑀩𑀼𑀚𑀁.

𑀢𑀬𑁄 𑀅𑀕𑁆𑀕𑀻 𑁋 𑀅𑀬𑀁 𑀉𑀧𑀸𑀬𑀸𑀲𑁄.

𑀢𑀢𑁆𑀣 𑀓𑀢𑀫𑁄 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄?

𑀅𑀬𑀲𑀸𑀯 [𑀥. 𑀧. 𑁨𑁪𑁦] 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀢𑀢𑀼𑀝𑁆𑀞𑀸𑀬 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁, 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑀤𑁆𑀯𑁂𑀫𑁂 𑀢𑀣𑀸𑀕𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀏𑀓𑀼𑀢𑁆𑀢𑀭𑀺𑀓𑁂 𑀲𑀼𑀢𑁆𑀢𑀁 𑀤𑀼𑀓𑁂𑀲𑀼 𑁋 𑀅𑀬𑀁 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄.

𑀢𑀢𑁆𑀣 𑀓𑀢𑀫𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑁄?

𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 [𑀫𑀫𑀸𑀬𑀺𑀢𑀁 (𑀧𑀻. 𑀓.) 𑀧𑀲𑁆𑀲 𑀲𑀼. 𑀦𑀺. 𑁮𑁧𑁩] 𑀚𑀦𑀁, 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 [𑀓𑀸𑀮𑀓𑀢𑀁 (𑀧𑀻.)] 𑀦 𑀧𑀲𑁆𑀲𑀢𑀺.

𑀢𑁂 𑀤𑁂𑀯𑀸 𑀘𑀯𑀦𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸 𑀢𑀻𑀳𑀺 𑀯𑀸𑀘𑀸𑀳𑀺 𑀅𑀦𑀼𑀲𑀸𑀲𑀦𑁆𑀢𑀺. 𑀅𑀬𑀁 𑀧𑀺𑀬𑀯𑀺𑀧𑁆𑀧𑀬𑁄𑀕𑁄.

𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀺𑀲𑁆𑀲𑁄 𑀫𑀸𑀭𑀥𑀻𑀢𑀭𑁄;

𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲 [𑀓𑀸𑀫𑀬𑀫𑀸𑀦𑀲𑁆𑀲 (𑀓.) 𑀧𑀲𑁆𑀲 𑀲𑀼. 𑀦𑀺. 𑁭𑁭𑁩], 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸.

𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄 𑀢𑀢𑁄 𑀫𑀦𑀁;

𑀏𑀢𑁂 𑀮𑁄𑀓𑀸𑀫𑀺𑀲𑀸 𑀖𑁄𑀭𑀸, 𑀬𑀢𑁆𑀣 𑀲𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸.

𑀧𑀜𑁆𑀘𑀺𑀫𑁂 𑀪𑀺𑀓𑁆𑀔𑀯𑁂 𑀔𑀦𑁆𑀥𑀸 𑁋 𑀇𑀤𑀁 𑀤𑀼𑀓𑁆𑀔𑀁.

𑀢𑀢𑁆𑀣 𑀓𑀢𑀫𑀸 𑀚𑀭𑀸 𑀘 𑀫𑀭𑀡𑀜𑁆𑀘?

𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀻𑀬𑀢𑁂 [𑀫𑀻𑀬𑀢𑀺 (𑀲𑀼. 𑀦𑀺. 𑁮𑁧𑁦)];

𑀅𑀣 𑀯𑀸𑀧𑀺 𑀅𑀓𑀺𑀘𑁆𑀙𑀁 𑀚𑀻𑀯𑀺𑀢𑀁, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀻𑀬𑀢𑁂.

𑀲𑀁𑀬𑀼𑀢𑁆𑀢𑀓𑁂 𑀧𑀲𑁂𑀦𑀤𑀺𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁 𑀅𑀬𑁆𑀬𑀺𑀓𑀸 𑀫𑁂 𑀓𑀸𑀮𑀗𑁆𑀓𑀢𑀸 𑁋 𑀅𑀬𑀁 𑀚𑀭𑀸 𑀘 𑀫𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑀸 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘?

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁;

𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑀸’’𑀢𑀺 [𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸𑀢𑀺 (𑀲𑀁. 𑀦𑀺. 𑁧.𑁧𑁩𑁩)]. 𑁋

𑀅𑀬𑀁 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘.

𑀇𑀫𑁂𑀳𑀺 𑀲𑀼𑀢𑁆𑀢𑁂𑀳𑀺 𑀏𑀓𑀲𑀤𑀺𑀲𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀦𑀯𑀯𑀺𑀥𑀁 𑀲𑀼𑀢𑁆𑀢𑀁 𑀢𑀁 𑀅𑀦𑀼𑀧𑀯𑀺𑀝𑁆𑀞𑁂𑀳𑀺 𑀮𑀓𑁆𑀔𑀡𑀢𑁄 𑀤𑀼𑀓𑁆𑀔𑀁 𑀜𑀢𑁆𑀯𑀸 𑀲𑀸𑀥𑀸𑀭𑀡𑀜𑁆𑀘 𑀅𑀲𑀸𑀥𑀸𑀭𑀡𑀜𑁆𑀘 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀕𑀸𑀣𑀸𑀳𑀺 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀩𑁆𑀬𑀸𑀓𑀭𑀡𑁂𑀳𑀺 𑀯𑀸 𑀩𑁆𑀬𑀸𑀓𑀭𑀡𑀁 𑁋 𑀇𑀤𑀁 𑀤𑀼𑀓𑁆𑀔𑀁.

𑁯. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄?

𑀓𑀸𑀫𑁂𑀲𑀼 𑀲𑀢𑁆𑀢𑀸 𑀓𑀸𑀫𑀲𑀗𑁆𑀕𑀲𑀢𑁆𑀢𑀸 [𑀓𑀸𑀫𑀧𑀲𑀗𑁆𑀕𑀲𑀢𑁆𑀢𑀸 (𑀧𑀻.) 𑀧𑀲𑁆𑀲 𑀉𑀤𑀸. 𑁬𑁩], 𑀲𑀁𑀬𑁄𑀚𑀦𑁂 𑀯𑀚𑁆𑀚𑀫𑀧𑀲𑁆𑀲𑀫𑀸𑀦𑀸;

𑀦 𑀳𑀺 𑀚𑀸𑀢𑀼 𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀸, 𑀑𑀖𑀁 𑀢𑀭𑁂𑀬𑁆𑀬𑀼𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁.

𑀘𑀢𑁆𑀢𑀸𑀭𑁄 𑀆𑀲𑀯𑀸 𑀲𑀼𑀢𑁆𑀢𑀁 𑁋 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄?

𑀬𑀫𑁆𑀳𑀺 𑀦 𑀫𑀸𑀬𑀸 𑀯𑀲𑀢𑀻 𑀦 𑀫𑀸𑀦𑁄,

𑀬𑁄 𑀯𑀻𑀢𑀮𑁄𑀪𑁄 𑀅𑀫𑀫𑁄 𑀦𑀺𑀭𑀸𑀲𑁄,

𑀧𑀦𑀼𑀡𑁆𑀡𑀓𑁄𑀥𑁄 [𑀧𑀦𑀼𑀦𑁆𑀦𑀓𑁄𑀥𑁄 (𑀧𑀻.) 𑀧𑀲𑁆𑀲 𑀉𑀤𑀸. 𑁨𑁬] 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄;

𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀼.

𑀤𑁆𑀯𑁂𑀫𑀸 𑀯𑀺𑀫𑀼𑀢𑁆𑀢𑀺𑀬𑁄, 𑀭𑀸𑀕𑀯𑀺𑀭𑀸𑀕𑀸 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀦𑀺𑀭𑁄𑀥𑁄.

𑀢𑀢𑁆𑀣 𑀓𑀢𑀫𑁄 𑀫𑀕𑁆𑀕𑁄?

𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸;

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀫𑀸𑀭𑀲𑁆𑀲𑁂𑀢𑀁 𑀧𑀫𑁄𑀳𑀦𑀁.

𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑁋 𑀅𑀬𑀁 𑀫𑀕𑁆𑀕𑁄.

𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺?

‘‘𑀬𑁂 𑀥𑀫𑁆𑀫𑀸 [𑀫𑀳𑀸𑀯. 𑁬𑁦] 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳;

𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄, 𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄’’𑀢𑀺.

𑀳𑁂𑀢𑀼𑀧𑁆𑀧𑀪𑀯𑀸 𑀥𑀫𑁆𑀫𑀸 𑀤𑀼𑀓𑁆𑀔𑀁, 𑀳𑁂𑀢𑀼𑀲𑀫𑀼𑀤𑀬𑁄, 𑀬𑀁 𑀪𑀕𑀯𑀢𑁄 𑀯𑀘𑀦𑀁. 𑀅𑀬𑀁 𑀥𑀫𑁆𑀫𑁄 𑀬𑁄 𑀦𑀺𑀭𑁄𑀥𑁄, 𑀬𑁂 𑀳𑀺 𑀓𑁂𑀘𑀺 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀦𑁆𑀢𑀺. 𑀓𑀺𑀮𑁂𑀲𑀸 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀢𑀢𑁆𑀣 𑀬𑀁 𑀲𑀁𑀬𑁄𑀚𑀦𑀁 𑁋 𑀅𑀬𑀁 𑀲𑀫𑀼𑀤𑀬𑁄. 𑀬𑁂 𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸 𑀬𑁂 𑀘 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺 𑁋 𑀇𑀤𑀁 𑀤𑀼𑀓𑁆𑀔𑀁. 𑀬𑀸 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑁋 𑀅𑀬𑀁 𑀫𑀕𑁆𑀕𑁄. 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀩𑁆𑀬𑀸𑀥𑀻𑀳𑀺 𑀫𑀭𑀡𑁂𑀳𑀺 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀬𑀸𑀯 𑀉𑀧𑀸𑀬𑀸𑀲𑁂𑀳𑀺 𑁋 𑀇𑀤𑀁 𑀦𑀺𑀩𑁆𑀩𑀸𑀦𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺.

𑀢𑀢𑁆𑀣 𑀓𑀢𑀫𑀸 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼?

𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺, 𑀢𑀁 𑀳𑀺 𑀯𑀸 𑀦𑀢𑁆𑀣𑀺 𑀬𑁂𑀦 𑀦𑀁 𑀧𑀜𑁆𑀜𑀧𑁂𑀬𑁆𑀬;

𑀲𑀩𑁆𑀩𑀲𑀗𑁆𑀕𑀸𑀦𑀁 𑀲𑀫𑀽𑀳𑀢𑀢𑁆𑀢𑀸 𑀯𑀺𑀤𑀽, 𑀲𑀺𑀢𑀸 𑀯𑀸𑀤𑀲𑀢𑀲𑁆𑀲𑀼 [𑀯𑀸𑀤𑀲𑀢𑀲𑁆𑀲 (𑀧𑀻. 𑀓.)] 𑀲𑀩𑁆𑀩𑁂.

𑀲𑀁𑀬𑀼𑀢𑁆𑀢𑀓𑁂 𑀕𑁄𑀥𑀺𑀓𑀲𑀁𑀬𑀼𑀢𑁆𑀢𑀁.

𑀇𑀫𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺. 𑀬𑀳𑀺𑀁 𑀬𑀳𑀺𑀁 𑀲𑀘𑁆𑀘𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀳𑀺𑀁 𑀢𑀳𑀺𑀁 𑀲𑀘𑁆𑀘𑀮𑀓𑁆𑀔𑀡𑀢𑁄 𑀑𑀢𑀸𑀭𑁂𑀢𑁆𑀯𑀸 [𑀑𑀳𑀸𑀭𑁂𑀢𑁆𑀯𑀸 (𑀧𑀻. 𑀓.)] 𑀅𑀧𑀭𑀺𑀫𑀸𑀡𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀲𑁄 𑀅𑀢𑁆𑀣𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀢𑁆𑀣𑀸𑀦𑀼𑀧𑀭𑀺𑀯𑀢𑁆𑀢𑀺 𑀩𑁆𑀬𑀜𑁆𑀚𑀦𑁂𑀦 𑀧𑀼𑀦 𑀩𑁆𑀬𑀜𑁆𑀚𑀦𑀸𑀦𑀼𑀧𑀭𑀺𑀯𑀢𑁆𑀢𑀺 𑀅𑀢𑁆𑀣𑁂𑀦 𑀢𑀲𑁆𑀲 𑀏𑀓𑀫𑁂𑀓𑀲𑁆𑀲 𑀅𑀧𑀭𑀺𑀫𑀸𑀡𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀇𑀫𑁂𑀳𑀺 𑀲𑀼𑀢𑁆𑀢𑁂𑀳𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑁂𑀳𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀧𑀜𑁆𑀘𑀦𑀺𑀓𑀸𑀬𑁂 𑀅𑀦𑀼𑀧𑀯𑀺𑀝𑁆𑀞𑀸𑀳𑀺 𑀕𑀸𑀣𑀸𑀳𑀺 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀩𑁆𑀬𑀸𑀓𑀭𑀡𑁂𑀦 𑀩𑁆𑀬𑀸𑀓𑀭𑀡𑀁. 𑀇𑀫𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺.

𑀢𑁂𑀲𑀁 𑀇𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀅𑀝𑁆𑀞 𑀤𑀸𑀦𑀽𑀧𑀧𑀢𑁆𑀢𑀺𑀬𑁄;

𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺, 𑀔𑀻𑀡𑀫𑀘𑁆𑀙𑀁𑀯 𑀧𑀮𑁆𑀮𑀮𑀁.

𑀲𑀸𑀫𑀁 𑀢𑁂𑀦 𑀓𑀼𑀢𑁄 𑀭𑀸𑀚, 𑀢𑀬𑁄 𑀤𑁂𑀯𑀸 𑀕𑀺𑀮𑀸𑀦𑀓𑀸;

𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀬𑀣𑀸 𑀦𑀤𑀺𑀤𑀓𑀧𑁆𑀧𑀦𑀁.

𑀇𑀥 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀓𑀸𑀫𑁂𑀲𑀼 𑀕𑀺𑀤𑁆𑀥𑀸 𑀧𑀲𑀼𑀢𑀸, 𑀬𑀸𑀯 𑀢𑀺𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄.

𑀲𑀢𑀁 𑀆𑀲𑀺 [𑀲𑀢𑀫𑀸𑀬𑀼 (𑀲𑀻.), 𑀲𑀢𑀥𑀸𑀢𑀼 (𑀧𑀻.)] 𑀅𑀬𑁄𑀲𑀗𑁆𑀓𑀽, 𑀧𑀭𑀺𑀴𑀸𑀳𑁄 𑀫𑀳𑀢𑁆𑀢𑀭𑁄;

𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀢𑀢𑁆𑀣 𑀢𑀧𑀦𑀺𑀬𑁂𑀳𑀺 𑀘.

𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀢𑀬𑁄 𑀅𑀕𑁆𑀕𑀻 𑀧𑀓𑀸𑀲𑀺𑀢𑀸;

𑀅𑀬𑀢𑁄 𑀫𑀮𑀫𑀼𑀧𑁆𑀧𑀦𑁆𑀦𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀢𑀣𑀸𑀕𑀢𑁂.

𑀢𑀺𑀯𑀺𑀥𑀁 𑀤𑁂𑀯𑀸𑀦𑀼𑀲𑀸𑀲𑀦𑁆𑀢𑀺, 𑀲𑀼𑀧𑀺𑀦𑁂𑀦 𑀲𑀗𑁆𑀕𑀫𑁄 𑀬𑀣𑀸;

𑀢𑀺𑀲𑁆𑀲𑁄 𑀘𑁂𑀯 𑀫𑀸𑀭𑀥𑀻𑀢𑀸, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀓𑀸𑀲𑀺𑀢𑀸;

𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀅𑀬𑁆𑀬𑀺𑀓𑀸 𑀫𑁂 𑀫𑀳𑀮𑁆𑀮𑀺𑀓𑀸.

𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀉𑀧𑀧𑀢𑁆𑀢𑀺 𑀘𑀼𑀢𑀺𑀘𑀬𑀁;

𑀓𑀸𑀫𑁂𑀲𑀼 𑀲𑀢𑁆𑀢𑀸 𑀧𑀲𑀼𑀢𑀸, 𑀆𑀲𑀯𑁂𑀳𑀺 𑀘𑀢𑀽𑀳𑀺 𑀘.

𑀬𑀫𑁆𑀳𑀺 𑀦 𑀫𑀸𑀬𑀸 𑀯𑀲𑀢𑀺, 𑀤𑁆𑀯𑁂𑀫𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄;

𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀩𑁄𑀚𑁆𑀛𑀗𑁆𑀕𑀸 𑀘 𑀲𑀼𑀤𑁂𑀲𑀺𑀢𑀸.

𑀅𑀢𑁆𑀣𑀗𑁆𑀕𑀢𑀲𑁆𑀲 𑀦 𑀧𑀫𑀸𑀡𑀫𑀢𑁆𑀣𑀺, 𑀕𑁄𑀥𑀺𑀓𑁄 𑀧𑀭𑀺𑀦𑀺𑀩𑁆𑀩𑀼𑀢𑁄;

𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀲𑀁𑀬𑁄𑀚𑀦𑀸𑀦𑀼𑀧𑀲𑁆𑀲𑀺𑀦𑁄.

𑀇𑀫𑀸 𑀤𑀲 𑀢𑁂𑀲𑀁 𑀉𑀤𑁆𑀤𑀸𑀦𑀕𑀸𑀣𑀸.

𑁧𑁦. 𑀢𑀢𑁆𑀣𑀺𑀫𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀸𑀥𑀸𑀭𑀡𑀸𑀦𑀺 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺 𑀅𑀦𑀼𑀮𑁄𑀫𑀫𑁆𑀧𑀺 𑀧𑀝𑀺𑀮𑁄𑀫𑀫𑁆𑀧𑀺 𑀯𑁄𑀫𑀺𑀲𑁆𑀲𑀓𑀫𑁆𑀧𑀺. 𑀢𑀢𑁆𑀣 𑀅𑀬𑀁 𑀆𑀤𑀺.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 [𑀚𑀧𑁆𑀧𑀸𑀦𑀼𑀮𑁂𑀧𑀦𑀁 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁩𑁯] 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁.

𑀢𑀢𑁆𑀣 𑀬𑀸 𑀅𑀯𑀺𑀚𑁆𑀚𑀸 𑀘 𑀯𑀺𑀯𑀺𑀘𑁆𑀙𑀸 𑀘, 𑀅𑀬𑀁 𑀲𑀫𑀼𑀤𑀬𑁄. 𑀬𑀁 𑀫𑀳𑀩𑁆𑀪𑀬𑀁, 𑀇𑀤𑀁 𑀤𑀼𑀓𑁆𑀔𑀁. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘. ‘‘𑀲𑀁𑀬𑁄𑀚𑀦𑀁 𑀲𑀁𑀬𑁄𑀚𑀦𑀺𑀬𑀸 𑀘 𑀥𑀫𑁆𑀫𑀸’’𑀢𑀺 𑀲𑀁𑀬𑀼𑀢𑁆𑀢𑀓𑁂 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀓𑁂𑀲𑀼 𑀩𑁆𑀬𑀸𑀓𑀭𑀡𑀁. 𑀢𑀢𑁆𑀣 𑀬𑀁 𑀲𑀁𑀬𑁄𑀚𑀦𑀁, 𑀅𑀬𑀁 𑀲𑀫𑀼𑀤𑀬𑁄. 𑀬𑁂 𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸, 𑀇𑀤𑀁 𑀤𑀼𑀓𑁆𑀔𑀁. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀜𑁆𑀘 𑀦𑀺𑀭𑁄𑀥𑁄 𑀘?

𑀉𑀘𑁆𑀙𑀺𑀦𑁆𑀦𑀪𑀯𑀢𑀡𑁆𑀳𑀲𑁆𑀲, 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲 [𑀲𑀦𑁆𑀢𑀘𑀺𑀢𑁆𑀢𑀲𑁆𑀲 (𑀲𑀼. 𑀦𑀺. 𑁭𑁫𑁧)] 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑀬𑀁 𑀘𑀺𑀢𑁆𑀢𑀁, 𑀇𑀤𑀁 𑀤𑀼𑀓𑁆𑀔𑀁. 𑀬𑁄 𑀪𑀯𑀢𑀡𑁆𑀳𑀸𑀬 𑀉𑀧𑀘𑁆𑀙𑁂𑀤𑁄, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀦𑀺𑀤𑁆𑀤𑁂𑀲𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀜𑁆𑀘 𑀦𑀺𑀭𑁄𑀥𑁄 𑀘. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀫𑀼𑀢𑁆𑀢𑀺𑀬𑁄; 𑀭𑀸𑀕𑀯𑀺𑀭𑀸𑀕𑀸 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀬𑀁 𑀘𑀺𑀢𑁆𑀢𑀁, 𑀇𑀤𑀁 𑀤𑀼𑀓𑁆𑀔𑀁. 𑀬𑀸 𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀜𑁆𑀘 𑀦𑀺𑀭𑁄𑀥𑁄 𑀘.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀜𑁆𑀘 𑀫𑀕𑁆𑀕𑁄 𑀘?

𑀓𑀼𑀫𑁆𑀪𑀽𑀧𑀫𑀁 [𑀥. 𑀧. 𑁪𑁦] 𑀓𑀸𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸, 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀞𑀧𑁂𑀢𑁆𑀯𑀸;

𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦, 𑀚𑀺𑀢𑀜𑁆𑀘 𑀭𑀓𑁆𑀔𑁂 𑀅𑀦𑀺𑀯𑁂𑀲𑀦𑁄 𑀲𑀺𑀬𑀸.

𑀢𑀢𑁆𑀣 𑀬𑀜𑁆𑀘 𑀓𑀼𑀫𑁆𑀪𑀽𑀧𑀫𑁄 𑀓𑀸𑀬𑁄 𑀬𑀜𑁆𑀘 𑀦𑀕𑀭𑀽𑀧𑀫𑀁 𑀘𑀺𑀢𑁆𑀢𑀁, 𑀇𑀤𑀁 𑀤𑀼𑀓𑁆𑀔𑀁. 𑀬𑀁 𑀧𑀜𑁆𑀜𑀸𑀯𑀼𑀥𑁂𑀦 𑀫𑀸𑀭𑀁 𑀬𑁄𑀥𑁂𑀣𑀸𑀢𑀺 𑀅𑀬𑀁 𑀫𑀕𑁆𑀕𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀬𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀺𑀢𑀩𑁆𑀩𑀁. 𑀬𑀸 𑀲𑀁𑀬𑁄𑀚𑀦𑀸, 𑀅𑀬𑀁 𑀫𑀕𑁆𑀕𑁄. 𑀬𑁂 𑀢𑁂 𑀥𑀫𑁆𑀫𑀸 𑀅𑀦𑀢𑁆𑀢𑀦𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀭𑀽𑀧𑀁 𑀬𑀸𑀯 𑀯𑀺𑀜𑁆𑀜𑀸𑀡𑀁, 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀫𑀕𑁆𑀕𑁄 𑀘.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘?

𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸, 𑀤𑀼𑀓𑁆𑀔𑀸 𑀘 [𑀤𑀼𑀓𑁆𑀔𑀜𑁆𑀘 (𑀧𑀻. 𑀓.) 𑀧𑀲𑁆𑀲 𑀉𑀤𑀸. 𑁭𑁦] 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸;

𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂, 𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂.

𑀬𑁂 𑀲𑁄𑀓𑀧𑀭𑀺𑀤𑁂𑀯𑀸, 𑀬𑀁 𑀘 𑀅𑀦𑁂𑀓𑀭𑀽𑀧𑀁 𑀤𑀼𑀓𑁆𑀔𑀁, 𑀬𑀁 𑀧𑁂𑀫𑀢𑁄 𑀪𑀯𑀢𑀺, 𑀇𑀤𑀁 𑀤𑀼𑀓𑁆𑀔𑀁. 𑀬𑀁 𑀧𑁂𑀫𑀁, 𑀅𑀬𑀁 𑀲𑀫𑀼𑀤𑀬𑁄. 𑀬𑁄 𑀢𑀢𑁆𑀣 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀧𑀺𑀬𑀲𑁆𑀲 𑀅𑀓𑀺𑀭𑀺𑀬𑀸, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺. 𑀢𑀺𑀫𑁆𑀩𑀭𑀼𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀧𑀘𑁆𑀘𑁂𑀢𑀺 ‘‘𑀲𑀬𑀁𑀓𑀢𑀁 𑀧𑀭𑀁𑀓𑀢’’𑀦𑁆𑀢𑀺. 𑀬𑀣𑁂𑀲𑀸 𑀯𑀻𑀫𑀁𑀲𑀸, 𑀇𑀤𑀁 𑀤𑀼𑀓𑁆𑀔𑀁. 𑀬𑀸 𑀏𑀢𑁂 𑀤𑁆𑀯𑁂 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀬𑀸𑀯 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀇𑀤𑀫𑁆𑀧𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸 𑀪𑀯𑁄 𑀚𑀸𑀢𑀺 𑀚𑀭𑀸𑀫𑀭𑀡𑀁, 𑀇𑀤𑀁 𑀤𑀼𑀓𑁆𑀔𑀁. 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁, 𑀅𑀬𑀁 𑀲𑀫𑀼𑀤𑀬𑁄. 𑀇𑀢𑀺 𑀇𑀤𑀁 𑀲𑀬𑀁𑀓𑀢𑀁 𑀯𑀻𑀫𑀁𑀲𑁂𑀬𑁆𑀬𑀸𑀢𑀺 [𑀯𑀻𑀫𑀁𑀲𑀻𑀬𑀢𑀺 (𑀧𑀻. 𑀓.)] 𑀬𑀜𑁆𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀤𑀼𑀓𑁆𑀔𑀁, 𑀇𑀤𑀁 𑀏𑀲𑁄 𑀲𑀫𑀼𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀘 𑀬𑀸𑀯 𑀘 𑀚𑀭𑀸𑀫𑀭𑀡𑀦𑀺𑀭𑁄𑀥𑁄𑀢𑀺 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘.

𑁧𑁧. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀫𑀕𑁆𑀕𑁄 𑀘?

‘‘𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 [𑀲𑀁. 𑀦𑀺. 𑁧.𑁧𑁫𑁭] 𑀬𑀢𑁄𑀦𑀺𑀤𑀸𑀦𑀁, 𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀓𑀸𑀫𑀸 𑀳𑀺 𑀮𑁄𑀓𑁂 𑀲𑀗𑁆𑀕𑀸𑀢𑀺 𑀜𑀢𑁆𑀯𑀸, 𑀢𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺.

𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺, 𑀇𑀤𑀁 𑀤𑀼𑀓𑁆𑀔𑀁. 𑀬𑀢𑁄 𑀪𑀯𑀢𑀺, 𑀅𑀬𑀁 𑀲𑀫𑀼𑀤𑀬𑁄. 𑀲𑀦𑁆𑀤𑀺𑀝𑁆𑀞𑀁 𑀬𑀢𑁄 𑀪𑀯𑀢𑀺 𑀬𑀸𑀯 𑀢𑀲𑁆𑀲 𑀯𑀺𑀦𑀬𑀸𑀬 𑀲𑀺𑀓𑁆𑀔𑀸, 𑀅𑀬𑀁 𑀫𑀕𑁆𑀕𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺.

𑀏𑀓𑀸𑀤𑀲𑀗𑁆𑀕𑀼𑀢𑁆𑀢𑀭𑁂𑀲𑀼 𑀕𑁄𑀧𑀸𑀮𑀓𑁄𑀧𑀫𑀲𑀼𑀢𑁆𑀢𑀁.

𑀢𑀢𑁆𑀣 𑀬𑀸𑀯 𑀭𑀽𑀧𑀲𑀜𑁆𑀜𑀼𑀢𑁆𑀢𑀸 𑀬𑀜𑁆𑀘 𑀲𑀴𑀸𑀬𑀢𑀦𑀁 𑀬𑀣𑀸 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀺 𑀬𑀜𑁆𑀘 𑀢𑀺𑀢𑁆𑀣𑀁 𑀬𑀣𑀸 𑀘 𑀮𑀪𑀢𑀺 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀘𑀢𑀼𑀩𑁆𑀩𑀺𑀥𑀁 𑀘 𑀅𑀢𑁆𑀢𑀪𑀸𑀯𑀢𑁄 𑀘 𑀯𑀢𑁆𑀣𑀼, 𑀇𑀤𑀁 𑀤𑀼𑀓𑁆𑀔𑀁. 𑀬𑀸𑀯 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 [𑀲𑀸𑀝𑁂𑀢𑀸 (𑀲𑀻. 𑀧𑀻.) 𑀧𑀲𑁆𑀲 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂] 𑀳𑁄𑀢𑀺, 𑀅𑀬𑀁 𑀲𑀫𑀼𑀤𑀬𑁄. 𑀭𑀽𑀧𑀲𑀜𑁆𑀜𑀼𑀢𑁆𑀢𑀸 𑀆𑀲𑀸𑀝𑀓𑀳𑀭𑀡𑀁 [𑀆𑀲𑀸𑀝𑀺𑀓𑀲𑀸𑀝𑀦𑀸 (𑀧𑀻.)] 𑀯𑀡𑀧𑀝𑀺𑀘𑁆𑀙𑀸𑀤𑀦𑀁 𑀯𑀻𑀣𑀺𑀜𑁆𑀜𑀼𑀢𑀸 𑀕𑁄𑀘𑀭𑀓𑀼𑀲𑀮𑀜𑁆𑀘, 𑀅𑀬𑀁 𑀫𑀕𑁆𑀕𑁄. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀅𑀢𑁆𑀣𑀺 𑀳𑁂𑀢𑀽 𑀅𑀢𑁆𑀣𑀺 𑀧𑀘𑁆𑀘𑀬𑀸 𑀅𑀢𑁆𑀣𑀺 𑀦𑀺𑀲𑁆𑀲𑀬𑀸 𑀲𑀸𑀯𑀲𑁂𑀲𑀤𑁄𑀳𑀺𑀢𑀸 𑀅𑀦𑁂𑀓𑀧𑀽𑀚𑀸 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀯𑀻𑀣𑀺𑀜𑁆𑀜𑀼𑀢𑀸 𑀘 𑀳𑁂𑀢𑀼, 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀜𑁆𑀘 𑀫𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀘?

𑀲𑀢𑀺 𑀓𑀸𑀬𑀕𑀢𑀸 𑀉𑀧𑀝𑁆𑀞𑀺𑀢𑀸, 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀲𑀁𑀯𑀼𑀢𑁄 [𑀲𑀁𑀯𑀭𑁄 (𑀧𑀻. 𑀓.) 𑀧𑀲𑁆𑀲 𑀉𑀤𑀸. 𑁨𑁫];

𑀲𑀢𑀢𑀁 𑀪𑀺𑀓𑁆𑀔𑀼 𑀲𑀫𑀸𑀳𑀺𑀢𑁄, 𑀚𑀜𑁆𑀜𑀸 [𑀚𑀸𑀦𑁂𑀬𑁆𑀬 (𑀧𑀻. 𑀓.)] 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀢𑀢𑁆𑀣 𑀬𑀸 𑀘 𑀓𑀸𑀬𑀕𑀢𑀸 𑀲𑀢𑀺 𑀬𑀜𑁆𑀘 𑀲𑀴𑀸𑀬𑀢𑀦𑀁 𑀬𑀢𑁆𑀣 𑀲𑀩𑁆𑀩𑀜𑁆𑀘𑁂𑀢𑀁 𑀤𑀼𑀓𑁆𑀔𑀁. 𑀬𑀸 𑀘 𑀓𑀸𑀬𑀕𑀢𑀸 𑀲𑀢𑀺 𑀬𑁄 𑀘 𑀲𑀻𑀮𑀲𑀁𑀯𑀭𑁄 𑀬𑁄 𑀘 𑀲𑀫𑀸𑀥𑀺 𑀬𑀢𑁆𑀣 𑀬𑀸 𑀲𑀢𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀩𑁆𑀩𑀫𑁆𑀧𑀺 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀬𑀁 𑀫𑀕𑁆𑀕𑁄. 𑀏𑀯𑀁𑀯𑀺𑀳𑀸𑀭𑀺𑀦𑀸 𑀜𑀸𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀁. 𑀅𑀬𑀁 𑀦𑀺𑀭𑁄𑀥𑁄, 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀢𑀢𑁆𑀣 𑀬𑀁 𑀘𑀺𑀢𑁆𑀢𑀲𑀳𑀚𑀸𑀢𑀸 𑀥𑀫𑁆𑀫𑀸, 𑀇𑀤𑀁 𑀤𑀼𑀓𑁆𑀔𑀁. 𑀬𑁄 𑀘 𑀲𑀫𑀣𑁄 𑀬𑀸 𑀘 𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀫𑀕𑁆𑀕𑁄. 𑀭𑀸𑀕𑀯𑀺𑀭𑀸𑀕𑀸 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺.

𑀢𑀢𑁆𑀣 𑀓𑀢𑀫𑁄 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘?

𑀆𑀲𑀸 𑀘 𑀧𑀻𑀳𑀸 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀺𑀓𑀸.

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸𑀢𑀺 𑀧𑀼𑀭𑀺𑀫𑀓𑁂𑀳𑀺 𑀲𑀫𑀼𑀤𑀬𑁄. 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀺𑀓𑀸𑀢𑀺 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀅𑀭𑀺𑀬𑀲𑁆𑀲 𑀲𑀻𑀮𑀲𑁆𑀲 𑀲𑀫𑀸𑀥𑀺𑀦𑁄 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀢𑀢𑁆𑀣 𑀬𑁄 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸, 𑀅𑀬𑀁 𑀲𑀫𑀼𑀤𑀬𑁄. 𑀧𑀝𑀺𑀯𑁂𑀥𑁄 𑀪𑀯𑀦𑁂𑀢𑁆𑀢𑀺𑀬𑀸, 𑀅𑀬𑀁 𑀦𑀺𑀭𑁄𑀥𑁄. 𑀅𑀬𑀁 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘.

𑀢𑀢𑁆𑀣 𑀓𑀢𑀫𑁄 𑀲𑀫𑀼𑀤𑀬𑁄 𑀘 𑀫𑀕𑁆𑀕𑁄 𑀘?

𑀬𑀸𑀦𑀺 [𑀲𑀼. 𑀦𑀺. 𑁧𑁦𑁪𑁧] 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂.

𑀬𑀸𑀦𑀺 𑀲𑁄𑀢𑀸𑀦𑀻𑀢𑀺 𑀅𑀬𑀁 𑀲𑀫𑀼𑀤𑀬𑁄. 𑀬𑀸 𑀘 𑀧𑀜𑁆𑀜𑀸 𑀬𑀸 𑀘 𑀲𑀢𑀺 𑀦𑀺𑀯𑀸𑀭𑀡𑀁 𑀧𑀺𑀥𑀸𑀦𑀜𑁆𑀘, 𑀅𑀬𑀁 𑀫𑀕𑁆𑀕𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀲𑀜𑁆𑀘𑁂𑀢𑀦𑀺𑀬𑀁 𑀲𑀼𑀢𑁆𑀢𑀁 𑀤𑀴𑁆𑀳𑀦𑁂𑀫𑀺𑀬𑀸𑀦𑀸𑀓𑀸𑀭𑁄 𑀙𑀳𑀺 𑀫𑀸𑀲𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀬𑀁 𑀓𑀸𑀬𑀁 𑀓𑀸𑀬𑀓𑀫𑁆𑀫𑀁 𑀲𑀯𑀗𑁆𑀓𑀁 𑀲𑀤𑁄𑀲𑀁 𑀲𑀓𑀲𑀸𑀯𑀁 𑀬𑀸 𑀲𑀯𑀗𑁆𑀓𑀢𑀸 𑀲𑀤𑁄𑀲𑀢𑀸 𑀲𑀓𑀲𑀸𑀯𑀢𑀸, 𑀅𑀬𑀁 𑀲𑀫𑀼𑀤𑀬𑁄. 𑀏𑀯𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑀅𑀯𑀗𑁆𑀓𑀁 𑀅𑀤𑁄𑀲𑀁 𑀅𑀓𑀲𑀸𑀯𑀁, 𑀬𑀸 𑀅𑀯𑀗𑁆𑀓𑀢𑀸 𑀅𑀤𑁄𑀲𑀢𑀸 𑀅𑀓𑀲𑀸𑀯𑀢𑀸, 𑀅𑀬𑀁 𑀫𑀕𑁆𑀕𑁄. 𑀏𑀯𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀲𑀫𑀼𑀤𑀬𑁄 𑀘 𑀫𑀕𑁆𑀕𑁄 𑀘.

𑀢𑀢𑁆𑀣 𑀓𑀢𑀫𑁄 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘?

‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁, 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺, 𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀺, 𑀦𑀢𑀺𑀬𑀸 𑀅𑀲𑀢𑀺 [𑀅𑀲𑀢𑀺𑀬𑀸 (𑀧𑀻.) 𑀧𑀲𑁆𑀲 𑀉𑀤𑀸. 𑁭𑁪] 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺, 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺, 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

𑀢𑀢𑁆𑀣 𑀤𑁆𑀯𑁂 𑀦𑀺𑀲𑁆𑀲𑀬𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑁄 𑀘 𑀅𑀦𑀺𑀲𑁆𑀲𑀬𑁄, 𑀬𑀸 𑀘 𑀅𑀦𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀸 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺 𑀘𑀼𑀢𑀽𑀧𑀧𑀸𑀢𑁄 𑀘 𑀬𑁄 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺. 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀕𑀢𑀸 𑀲𑀢𑀺…𑀧𑁂… 𑀬𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀅𑀬𑀁 𑀲𑀫𑀼𑀤𑀬𑁄. 𑀏𑀓𑀸𑀭𑀲𑀉𑀧𑀦𑀺𑀲𑁆𑀲𑀬𑀸 𑀯𑀺𑀫𑀼𑀢𑁆𑀢𑀺𑀬𑁄 𑀬𑀸𑀯 𑀉𑀧𑀦𑀺𑀲𑁆𑀲𑀬𑀉𑀧𑀲𑀫𑁆𑀧𑀤𑀸 𑀉𑀧𑀝𑁆𑀞𑀺𑀢𑀓𑀸𑀬𑀕𑀢𑀸𑀲𑀢𑀺𑀲𑁆𑀲 𑀯𑀺𑀳𑀭𑀢𑀺. 𑀲𑀻𑀮𑀲𑀁𑀯𑀭𑁄 𑀲𑁄𑀲𑀸𑀦𑀺𑀬𑁄 𑀳𑁄𑀢𑀺, 𑀬𑀜𑁆𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀅𑀬𑀁 𑀫𑀕𑁆𑀕𑁄. 𑀬𑀸 𑀘 𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺. 𑀲𑀫𑀼𑀤𑀬𑁄 𑀘 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘.

𑁧𑁨. 𑀢𑀢𑁆𑀣 𑀓𑀢𑀫𑁄 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘?

𑀲𑀬𑀁 𑀓𑀢𑁂𑀦 𑀲𑀘𑁆𑀘𑁂𑀦, 𑀢𑁂𑀦 𑀅𑀢𑁆𑀢𑀦𑀸 𑀅𑀪𑀺𑀦𑀺𑀩𑁆𑀩𑀸𑀦𑀕𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀪𑀯𑀜𑁆𑀘 𑀜𑀢𑁆𑀯𑀸 𑀮𑁄𑀓𑀲𑁆𑀫𑀺𑀁, 𑀢𑀸𑀯 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀼.

𑀬𑀁 𑀲𑀘𑁆𑀘𑁂𑀦, 𑀅𑀬𑀁 𑀫𑀕𑁆𑀕𑁄. 𑀬𑀁 𑀔𑀻𑀡𑀧𑀼𑀦𑀩𑁆𑀪𑀯𑁄, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀺 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀅𑀜𑁆𑀜𑀢𑀭𑁄 𑀯𑀸 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸. 𑀢𑀲𑁆𑀲 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀺𑀲𑁆𑀲 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀬𑀸𑀯 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀢𑀺, 𑀅𑀬𑀁 𑀫𑀕𑁆𑀕𑁄. 𑀬𑀸 𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀦𑀺𑀭𑁄𑀥𑁄. 𑀏𑀯𑀁 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘.

𑀇𑀫𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺. 𑀇𑀫𑁂𑀳𑀺 𑀲𑀸𑀥𑀸𑀭𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑁂𑀳𑀺 𑀧𑀝𑀺𑀯𑁂𑀥𑀢𑁄 𑀘 𑀮𑀓𑁆𑀔𑀡𑀢𑁄 𑀘 𑀑𑀢𑀸𑀭𑁂𑀢𑁆𑀯𑀸 𑀅𑀜𑁆𑀜𑀸𑀦𑀺 𑀲𑀼𑀢𑁆𑀢𑀸𑀦𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺 𑀅𑀧𑀭𑀺𑀳𑀸𑀬𑀦𑁆𑀢𑁂𑀦. 𑀕𑀸𑀣𑀸𑀳𑀺 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸, 𑀩𑁆𑀬𑀸𑀓𑀭𑀡𑁂𑀳𑀺 𑀩𑁆𑀬𑀸𑀓𑀭𑀡𑀁. 𑀇𑀫𑁂 𑀘 𑀲𑀸𑀥𑀸𑀭𑀡𑀸 𑀤𑀲 𑀧𑀭𑀺𑀯𑀟𑁆𑀠𑀓𑀸 𑀏𑀓𑁄 𑀘 𑀘𑀢𑀼𑀓𑁆𑀓𑁄 𑀦𑀺𑀤𑁆𑀤𑁂𑀲𑁄 𑀲𑀸𑀥𑀸𑀭𑀡𑁄. 𑀅𑀬𑀜𑁆𑀘 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀧𑀜𑁆𑀘 𑀙 𑀘 𑀲𑀯𑁂𑀓𑀤𑁂𑀲𑁄 𑀲𑀩𑁆𑀩𑀁. 𑀇𑀫𑁂 𑀤𑁆𑀯𑁂 𑀧𑀭𑀺𑀯𑀚𑁆𑀚𑀦𑀸 𑀧𑀼𑀭𑀺𑀫𑀓𑀸 𑀘 𑀤𑀲. 𑀇𑀫𑁂 𑀤𑁆𑀯𑀸𑀤𑀲 𑀧𑀭𑀺𑀯𑀟𑁆𑀠𑀓𑀸 𑀲𑀘𑁆𑀘𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀢𑀁 𑀩𑁆𑀬𑀸𑀓𑀭𑀡𑀁 𑀯𑀸 𑀕𑀸𑀣𑀸 𑀯𑀺𑀬. 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀧𑀭𑀺𑀯𑀟𑁆𑀠𑀓𑁂𑀳𑀺 𑀦 𑀑𑀢𑀭𑀺𑀢𑀼𑀁 𑀅𑀧𑁆𑀧𑀫𑀢𑁆𑀢𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸.

𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑁄. 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺. 𑀓𑀢𑀭𑁂𑀳𑀺 𑀲𑀢𑁆𑀢𑀳𑀺? 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀘 𑀧𑀺𑀬𑀯𑀺𑀧𑁆𑀧𑀬𑁄𑀕𑁄 𑀘, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑀲𑁆𑀲 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀜𑁆𑀘𑁂’’𑀢𑀺, 𑀦𑀢𑁆𑀣𑀺 𑀢𑀁 𑀤𑀼𑀓𑁆𑀔𑀁 𑀦 𑀓𑀸𑀬𑀺𑀓𑀁 𑀯𑀸 𑀦 𑀘𑁂𑀢𑀲𑀺𑀓𑀁, 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀤𑁆𑀯𑀻𑀳𑀺 𑀤𑀼𑀓𑁆𑀔𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀓𑀸𑀬𑀺𑀓𑁂𑀦 𑀘 𑀘𑁂𑀢𑀲𑀺𑀓𑁂𑀦 𑀘. 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀲𑀗𑁆𑀕𑀳𑀺𑀢𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬. 𑀇𑀢𑀺 𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀲𑀗𑁆𑀕𑀳𑀺𑀢𑀁. 𑀇𑀢𑀺 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀢𑀺𑀯𑀺𑀥𑀁. 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘. 𑀤𑀼𑀯𑀺𑀥𑀁 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁄 𑀘 𑀧𑀺𑀬𑀯𑀺𑀧𑁆𑀧𑀬𑁄𑀕𑁄 𑀘. 𑀇𑀤𑀁 𑀲𑀢𑁆𑀢𑀯𑀺𑀥𑀁 𑀤𑀼𑀓𑁆𑀔𑀁.

𑀢𑀢𑁆𑀣 𑀢𑀺𑀯𑀺𑀥𑁄 𑀲𑀫𑀼𑀤𑀬𑁄 𑀅𑀘𑀢𑀼𑀢𑁆𑀣𑁄 𑀅𑀧𑀜𑁆𑀘𑀫𑁄. 𑀓𑀢𑀫𑁄 𑀢𑀺𑀯𑀺𑀥𑁄? 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘 𑀓𑀫𑁆𑀫𑀁. 𑀢𑀢𑁆𑀣 𑀢𑀡𑁆𑀳𑀸 𑀘 𑀪𑀯𑀲𑀫𑀼𑀤𑀬𑁄 𑀓𑀫𑁆𑀫𑀁. 𑀢𑀣𑀸 [𑀢𑀢𑁆𑀣 (𑀧𑀻.)] 𑀦𑀺𑀩𑁆𑀩𑀢𑁆𑀢𑀲𑁆𑀲 𑀳𑀻𑀦𑀧𑀡𑀻𑀢𑀢𑀸 [𑀳𑀻𑀦𑀧𑀡𑀻𑀢𑀢𑀸𑀬 (𑀧𑀻.)], 𑀅𑀬𑀁 𑀲𑀫𑀼𑀤𑀬𑁄. 𑀇𑀢𑀺 𑀬𑀸𑀧𑀺 𑀪𑀯𑀕𑀢𑀻𑀲𑀼 𑀳𑀻𑀦𑀢𑀸 𑀘 𑀧𑀡𑀻𑀢𑀢𑀸 𑀘, 𑀬𑀸𑀧𑀺 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀲𑀗𑁆𑀕𑀳𑀺𑀢𑀸, 𑀬𑁄𑀧𑀺 𑀤𑁆𑀯𑀻𑀳𑀺 𑀫𑀽𑀮𑁂𑀳𑀺 𑀲𑀫𑀼𑀤𑀸𑀦𑀻𑀢𑁄 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀪𑀯𑀢𑀡𑁆𑀳𑀸𑀲𑀁𑀬𑀼𑀢𑁆𑀢𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑁄 𑀓𑀸𑀬𑁄, 𑀲𑁄𑀧𑀺 𑀢𑀻𑀳𑀺 𑀤𑀼𑀓𑁆𑀔𑀢𑀸𑀳𑀺 𑀲𑀗𑁆𑀕𑀳𑀺𑀢𑁄.

𑀢𑀣𑀸 𑀯𑀺𑀧𑀮𑁆𑀮𑀸𑀲𑀢𑁄 𑀤𑀺𑀝𑁆𑀞𑀺𑀪𑀯𑀕𑀦𑁆𑀢𑀩𑁆𑀩𑀸. 𑀲𑀸 𑀲𑀢𑁆𑀢𑀯𑀺𑀥𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄 𑀢𑀻𑀡𑀺 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺. 𑀢𑀢𑁆𑀣 𑀓𑀢𑀫𑁄 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄? 𑀬𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀧𑀝𑀺𑀓𑁆𑀔𑁂𑀧𑁂𑀦, 𑀑𑀢𑀭𑀡𑀁 𑀬𑀣𑀸 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀫𑀺𑀢𑀺 𑀯𑀺𑀧𑀭𑀻𑀢𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀅𑀬𑀫𑁂𑀓𑁄 𑀯𑀺𑀧𑀮𑁆𑀮𑀸𑀲𑀻𑀬𑀢𑀺 𑀲𑀜𑁆𑀜𑀸 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺? 𑀓𑀸𑀬𑁄 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀥𑀫𑁆𑀫𑀸. 𑀏𑀯𑀁 𑀯𑀺𑀧𑀮𑁆𑀮𑀸𑀲𑀕𑀢𑀲𑁆𑀲 𑀅𑀓𑀼𑀲𑀮𑀜𑁆𑀘 𑀧𑀯𑀟𑁆𑀠𑁂𑀢𑀺. 𑀢𑀢𑁆𑀣 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀤𑁄𑀲𑀁 𑀅𑀓𑀼𑀲𑀮𑀫𑀽𑀮𑀁 𑀧𑀯𑀟𑁆𑀠𑁂𑀢𑀺. 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀮𑁄𑀪𑀁 𑀅𑀓𑀼𑀲𑀮𑀫𑀽𑀮𑀁 𑀧𑀯𑀟𑁆𑀠𑁂𑀢𑀺. 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀫𑁄𑀳𑀁 𑀅𑀓𑀼𑀲𑀮𑀫𑀽𑀮𑀁 𑀧𑀯𑀟𑁆𑀠𑁂𑀢𑀺. 𑀢𑀢𑁆𑀣 𑀤𑁄𑀲𑀲𑁆𑀲 𑀅𑀓𑀼𑀲𑀮𑀫𑀽𑀮𑀲𑁆𑀲 𑀢𑀻𑀡𑀺 𑀫𑀺𑀘𑁆𑀙𑀢𑁆𑀢𑀸𑀦𑀺 𑀨𑀮𑀁 𑁋 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄; 𑀮𑁄𑀪𑀲𑁆𑀲 𑀅𑀓𑀼𑀲𑀮𑀫𑀽𑀮𑀲𑁆𑀲 𑀢𑀻𑀡𑀺 𑀫𑀺𑀘𑁆𑀙𑀢𑁆𑀢𑀸𑀦𑀺 𑀨𑀮𑀁 𑁋 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀫𑀸𑀥𑀺; 𑀫𑁄𑀳𑀲𑁆𑀲 𑀅𑀓𑀼𑀲𑀮𑀫𑀽𑀮𑀲𑁆𑀲 𑀤𑁆𑀯𑁂 𑀫𑀺𑀘𑁆𑀙𑀢𑁆𑀢𑀸𑀦𑀺 𑀨𑀮𑀁 𑁋 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀫𑀺𑀘𑁆𑀙𑀸𑀲𑀢𑀺 𑀘. 𑀏𑀯𑀁 𑀅𑀓𑀼𑀲𑀮𑀁 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑀁 𑀯𑀺𑀧𑀮𑁆𑀮𑀸𑀲𑀸 𑀘 𑀧𑀘𑁆𑀘𑀬𑁄, 𑀅𑀓𑀼𑀲𑀮𑀫𑀽𑀮𑀸𑀦𑀺 𑀲𑀳𑁂𑀢𑀽 𑀏𑀢𑁂𑀬𑁂𑀯 𑀧𑀝𑀺𑀧𑀓𑁆𑀔𑁂𑀦 𑀅𑀦𑀽𑀦𑀸 𑀅𑀦𑀥𑀺𑀓𑀸 𑀤𑁆𑀯𑀻𑀳𑀺 𑀧𑀘𑁆𑀘𑀬𑁂𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀭𑁄𑀥𑁂 𑀘 𑀫𑀕𑁆𑀕𑁂 𑀘 𑀯𑀺𑀧𑀮𑁆𑀮𑀸𑀲𑀫𑀼𑀧𑀸𑀤𑀸𑀬 𑀧𑀭𑀢𑁄 [𑀧𑀭𑀺𑀢𑁄 (𑀧𑀻.)] 𑀧𑀝𑀺𑀧𑀓𑁆𑀔𑁂𑀦 𑀘𑀢𑀲𑁆𑀲𑁄.

𑀢𑀢𑁆𑀣𑀺𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, 𑀘𑀺𑀢𑁆𑀢𑀁 𑀲𑀁𑀬𑁄𑀚𑀦𑀫𑁆𑀧𑀺;

𑀲𑀸 𑀧𑀘𑁆𑀙𑀺𑀦𑁆𑀦𑀪𑀯𑀢𑀡𑁆𑀳𑀸, 𑀤𑁆𑀯𑁂𑀫𑀸 𑀘𑁂𑀯 𑀯𑀺𑀫𑀼𑀢𑁆𑀢𑀺𑀬𑁄.

𑀓𑀼𑀫𑁆𑀪𑀽𑀧𑀫𑀁 𑀓𑀸𑀬𑀫𑀺𑀫𑀁, 𑀬𑀁 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳 [𑀚𑀳𑀸 (𑀧𑀻. 𑀓.)];

𑀬𑁂 𑀓𑁂𑀘𑀺 𑀲𑁄𑀓𑀧𑀭𑀺𑀤𑁂𑀯𑀸, 𑀢𑀺𑀫𑁆𑀩𑀭𑀼𑀓𑁄 𑀘 𑀲𑀬𑀁𑀓𑀢𑀁.

𑀤𑀼𑀓𑁆𑀔𑀁 𑀤𑀺𑀝𑁆𑀞𑀺 𑀘 𑀉𑀧𑁆𑀧𑀦𑁆𑀦𑀁, 𑀬𑀜𑁆𑀘 𑀕𑁄𑀧𑀸𑀮𑀓𑁄𑀧𑀫𑀁;

𑀲𑀢𑀺 𑀓𑀸𑀬𑀕𑀢𑀸 𑀫𑀸𑀳𑀼, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸.

𑀆𑀲𑀸 𑀧𑀺𑀳𑀸 𑀘 𑀅𑀪𑀺𑀦𑀦𑁆𑀤𑀦𑀸 𑀘, 𑀘𑀢𑀼𑀦𑁆𑀦𑀫𑀦𑀦𑀼𑀩𑁄𑀥𑀦𑀸;

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀤𑀴𑁆𑀳𑀁 𑀦𑁂𑀫𑀺𑀬𑀸𑀦𑀸𑀓𑀸𑀭𑁄.

𑀬𑀁 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀕𑀢𑀸𑀲𑀢𑀺;

𑀲𑀬𑀁 𑀓𑀢𑁂𑀦 𑀲𑀘𑁆𑀘𑁂𑀦, 𑀯𑀺𑀫𑀼𑀢𑁆𑀢𑀸𑀬𑀢𑀦𑁂𑀳𑀺 𑀘.

𑀧𑁂𑀝𑀓𑁄𑀧𑀤𑁂𑀲𑁂 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀪𑀸𑀲𑀺𑀢𑁂 𑀧𑀞𑀫𑀪𑀽𑀫𑀺 𑀅𑀭𑀺𑀬𑀲𑀘𑁆𑀘𑀧𑁆𑀧𑀓𑀸𑀲𑀦𑀸 𑀦𑀸𑀢𑀁 𑀚𑀻𑀯𑀢𑀸 𑀪𑀕𑀯𑀢𑀸 𑀫𑀸𑀤𑀺𑀲𑁂𑀦 𑀲𑀫𑀼𑀤𑁆𑀤𑀦𑁂𑀦 𑀢𑀣𑀸𑀕𑀢𑁂𑀦𑀸𑀢𑀺.

𑁨. 𑀲𑀸𑀲𑀦𑀧𑀝𑁆𑀞𑀸𑀦𑀤𑀼𑀢𑀺𑀬𑀪𑀽𑀫𑀺

𑁧𑁩. 𑀢𑀢𑁆𑀣 𑀓𑀢𑀫𑀁 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑀁? 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀲𑀦𑀸 𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘. 𑀆𑀡𑀢𑁆𑀢𑀺, 𑀨𑀮𑀁, 𑀉𑀧𑀸𑀬𑁄, 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘, 𑀨𑀮𑀜𑁆𑀘 𑀉𑀧𑀸𑀬𑁄 𑀘, 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘 𑀉𑀧𑀸𑀬𑁄 𑀘. 𑀅𑀲𑁆𑀲𑀸𑀤𑁄, 𑀆𑀤𑀻𑀦𑀯𑁄, 𑀦𑀺𑀲𑁆𑀲𑀭𑀡𑀁, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘, 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘. 𑀮𑁄𑀓𑀺𑀓𑀁, 𑀮𑁄𑀓𑀼𑀢𑁆𑀢𑀭𑀁, 𑀮𑁄𑀓𑀺𑀓𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀓𑀫𑁆𑀫𑀁, 𑀯𑀺𑀧𑀸𑀓𑁄, 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘. 𑀦𑀺𑀤𑁆𑀤𑀺𑀝𑁆𑀞𑀁, 𑀅𑀦𑀺𑀤𑁆𑀤𑀺𑀝𑁆𑀞𑀁, 𑀦𑀺𑀤𑁆𑀤𑀺𑀝𑁆𑀞𑀜𑁆𑀘 𑀅𑀦𑀺𑀤𑁆𑀤𑀺𑀝𑁆𑀞𑀜𑁆𑀘. 𑀜𑀸𑀡𑀁, 𑀜𑁂𑀬𑁆𑀬𑀁, 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘. 𑀤𑀲𑁆𑀲𑀦𑀁, 𑀪𑀸𑀯𑀦𑀸, 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘. 𑀯𑀺𑀧𑀸𑀓𑀓𑀫𑁆𑀫𑀁, 𑀦 𑀯𑀺𑀧𑀸𑀓𑀓𑀫𑁆𑀫𑀁, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀓𑀫𑁆𑀫𑀁. 𑀲𑀓𑀯𑀘𑀦𑀁, 𑀧𑀭𑀯𑀘𑀦𑀁, 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘. 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘. 𑀣𑀯𑁄, 𑀲𑀓𑀯𑀘𑀦𑀸𑀥𑀺𑀝𑁆𑀞𑀸𑀦𑀁, 𑀧𑀭𑀯𑀘𑀦𑀸𑀥𑀺𑀝𑁆𑀞𑀸𑀦𑀁, 𑀲𑀓𑀯𑀘𑀦𑀸𑀥𑀺𑀝𑁆𑀞𑀸𑀦𑀜𑁆𑀘 𑀧𑀭𑀯𑀘𑀦𑀸𑀥𑀺𑀝𑁆𑀞𑀸𑀦𑀜𑁆𑀘. 𑀓𑀺𑀭𑀺𑀬𑀁, 𑀨𑀮𑀁, 𑀓𑀺𑀭𑀺𑀬𑀜𑁆𑀘 𑀨𑀮𑀜𑁆𑀘. 𑀅𑀦𑀼𑀜𑁆𑀜𑀸𑀢𑀁, 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘. 𑀇𑀫𑀸𑀦𑀺 𑀙 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺.

𑁧𑁪. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 [𑀔𑀻𑀭𑀽𑀧𑀓𑁄𑀯 (𑀓.) 𑀧𑀲𑁆𑀲 𑀉𑀤𑀸. 𑁬𑁪] 𑀫𑀸𑀢𑀭𑀁.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀦𑀻𑀯𑀭𑀡𑀸.

𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁.

𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀇𑀤𑀁 𑀪𑀕𑀯𑀸 𑀲𑀓𑁆𑀬𑀸𑀦𑀁 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 𑀦𑀕𑀭𑁂 𑀦𑀬𑀯𑀺𑀢𑁆𑀣𑀸𑀭𑁂𑀦 𑀲𑀤𑁆𑀥𑀸𑀲𑀻𑀮𑀧𑀭𑀺𑀪𑀸𑀯𑀺𑀢𑀁 𑀲𑀼𑀢𑁆𑀢𑀁 𑀪𑀸𑀯𑀜𑁆𑀜𑁂𑀦 𑀧𑀭𑀺𑀪𑀸𑀯𑀺𑀢𑀁 𑀢𑀁 𑀦𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂.

𑀢𑀢𑁆𑀣 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀉𑀤𑁆𑀥𑀁 𑀅𑀥𑁄 [𑀉𑀤𑀸. 𑁬𑁧] 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀬𑀁 𑀅𑀳𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻;

𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀲𑀻𑀮𑀸𑀦𑀺 𑀦𑀼 𑀔𑁄 𑀪𑀯𑀦𑁆𑀢𑀺 𑀓𑀺𑀫𑀢𑁆𑀣𑀺𑀬𑀸𑀦𑀺 𑀆𑀦𑀦𑁆𑀤𑁄 𑀧𑀼𑀘𑁆𑀙𑀢𑀺 𑀲𑀢𑁆𑀣𑀸𑀭𑀁.

𑀢𑀢𑁆𑀣 𑀓𑀢𑀫𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑁄𑀧𑀦𑁂𑀬𑁆𑀬𑁂 [𑀓𑁄𑀧𑀦𑀻𑀬𑁂 (𑀓.) 𑀧𑀲𑁆𑀲 𑀉𑀤𑀸. 𑁩𑁪] 𑀦 𑀓𑀼𑀧𑁆𑀧𑀢𑀺;

𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀕𑀯𑀸 𑀣𑁂𑀭𑀜𑁆𑀜𑀢𑀭𑁄 𑀲𑁄 𑀫𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑀢𑀺, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀁 𑀓𑀸𑀢𑀩𑁆𑀩𑀁. 𑀬𑀲𑁆𑀲 𑀦𑀽𑀦 𑀪𑀕𑀯𑀸 𑀓𑀸𑀬𑀕𑀢𑀸 𑀲𑀢𑀺 𑀅𑀪𑀸𑀯𑀺𑀢𑀸 𑀅𑀲𑁆𑀲 𑀅𑀩𑀳𑀼𑀮𑀻𑀓𑀢𑀸 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁.

𑁧𑁫. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘?

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 [𑀉𑀤𑀸. 𑁪𑁫], 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀺.

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀲𑀁𑀓𑀺𑀮𑁂𑀲𑁄. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀯𑀸𑀲𑀦𑀸. 𑀢𑀫𑁄 𑀢𑀫𑀧𑀭𑀸𑀬𑀦𑁄𑀢𑀺 𑀯𑀺𑀢𑁆𑀣𑀸𑀭𑁂𑀦. 𑀢𑀢𑁆𑀣 𑀬𑁄 𑀘 𑀢𑀫𑁄 𑀬𑁄 𑀘 𑀢𑀫𑀧𑀭𑀸𑀬𑀦𑁄, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀬𑁄 𑀘 𑀚𑁄𑀢𑀺 𑀬𑁄 𑀘 𑀚𑁄𑀢𑀺𑀧𑀭𑀸𑀬𑀦𑁄, 𑀅𑀬𑀁 𑀯𑀸𑀲𑀦𑀸.

𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀼𑀚𑀁 𑀧𑀩𑁆𑀩𑀚𑀜𑁆𑀘 (𑀧𑀻.) 𑀥. 𑀧. 𑁩𑁪𑁫; 𑀲𑀁. 𑀦𑀺. 𑁧.𑁧𑁨𑁧];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸 𑀧𑀭𑀺𑀩𑁆𑀩𑀚𑀦𑁆𑀢𑀺 𑀥𑀻𑀭𑀸 𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀓𑀸𑀫𑁂 𑀧𑀳𑀸𑀬𑀸𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀬𑀁 𑀘𑁂𑀢𑀬𑀺𑀢𑀁 𑀧𑀓𑀧𑁆𑀧𑀺𑀢𑀁 𑀬𑀸 𑀘 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀲𑀁𑀓𑀺𑀮𑁂𑀲𑁄. 𑀧𑀘𑁆𑀙𑀺𑀫𑀓𑁂𑀳𑀺 𑀘𑀢𑀽𑀳𑀺 𑀦𑀺𑀩𑁆𑀩𑁂𑀥𑁄.

𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄, 𑀨𑀲𑁆𑀲𑀧𑀭𑁂𑀢𑁄 𑀭𑁄𑀕𑀁 [𑀭𑁄𑀤𑀁 (𑀧𑀻.) 𑀧𑀲𑁆𑀲 𑀉𑀤𑀸. 𑁩𑁦] 𑀯𑀤𑀢𑀺 𑀅𑀢𑁆𑀢𑀢𑁄;

𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸.

𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄, 𑀪𑀯𑀧𑀭𑁂𑀢𑁄 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀺;

𑀬𑀤𑀪𑀺𑀦𑀦𑁆𑀤𑀢𑀺 𑀢𑀁 𑀪𑀬𑀁, 𑀬𑀲𑁆𑀲 𑀪𑀸𑀬𑀢𑀺 𑀢𑀁 𑀤𑀼𑀓𑁆𑀔𑀁;

𑀪𑀯𑀯𑀺𑀧𑁆𑀧𑀳𑀸𑀦𑀸𑀬 𑀔𑁄 𑀧𑀦𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺.

𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀧𑁆𑀧𑀫𑁄𑀓𑁆𑀔𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀯𑀺𑀧𑁆𑀧𑀫𑀼𑀢𑁆𑀢𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀬𑁂 𑀯𑀸 𑀧𑀦 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑀺𑀪𑀯𑁂𑀦 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀦𑀺𑀲𑁆𑀲𑀝𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀉𑀧𑀥𑀺𑀁 𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄, 𑀮𑁄𑀓𑀫𑀺𑀫𑀁 𑀧𑀲𑁆𑀲, 𑀧𑀼𑀣𑀽 𑀅𑀯𑀺𑀚𑁆𑀚𑀸𑀬 𑀧𑀭𑁂𑀢𑀸 𑀪𑀽𑀢𑀸 𑀪𑀽𑀢𑀭𑀢𑀸 𑀪𑀯𑀸 𑀅𑀧𑀭𑀺𑀫𑀼𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺 𑀪𑀯𑀸 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀣𑀢𑀸𑀬 𑀲𑀩𑁆𑀩𑁂𑀢𑁂 𑀪𑀯𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺.

‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄;

𑀪𑀯𑀢𑀡𑁆𑀳𑀸 𑀧𑀳𑀻𑀬𑀢𑀺, 𑀯𑀺𑀪𑀯𑀁 𑀦𑀸𑀪𑀺𑀦𑀦𑁆𑀤𑀢𑀺;

𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁.

‘‘𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀦𑀼𑀧𑀸𑀤𑀸 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺;

𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀉𑀧𑁂𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻’’𑀢𑀺.

𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄 𑀬𑀸𑀯 𑀤𑀼𑀓𑁆𑀔𑀦𑁆𑀢𑀺 𑀬𑀁 𑀢𑀡𑁆𑀳𑀸 𑀲𑀁𑀓𑀺𑀮𑁂𑀲𑁄.

𑀬𑀁 𑀧𑀼𑀦𑀕𑁆𑀕𑀳𑀡𑀁 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀫𑁄𑀓𑁆𑀔𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀯𑀺𑀫𑀼𑀢𑁆𑀢𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀬𑁂 𑀯𑀸 𑀧𑀦 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑀺𑀪𑀯𑁂𑀦 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀼 ‘‘𑀅𑀦𑀺𑀲𑁆𑀲𑀝𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀅𑀬𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄, 𑀢𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀘 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀘, 𑀉𑀪𑀬𑀫𑁂𑀢𑀁 𑀲𑀁𑀓𑀺𑀮𑁂𑀲𑁄. 𑀬𑀁 𑀧𑀼𑀦𑀕𑁆𑀕𑀳𑀡𑀁 𑀪𑀯𑀯𑀺𑀧𑁆𑀧𑀳𑀸𑀦𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀬𑀸𑀯 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑀓𑁆𑀔𑀬𑀸 𑀲𑀫𑁆𑀪𑀯𑀸, 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀉𑀧𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻𑀢𑀺 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀦𑀼𑀲𑁄𑀢𑀕𑀸𑀫𑀻 𑀲𑀁𑀓𑀺𑀮𑁂𑀲𑁄 𑀞𑀺𑀢𑀢𑁆𑀢𑁄 𑀘 𑀧𑀝𑀺𑀲𑁄𑀢𑀕𑀸𑀫𑀻 𑀘 𑀦𑀺𑀩𑁆𑀩𑁂𑀥𑁄. 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀅𑀲𑁂𑀓𑁆𑀔𑀪𑀽𑀫𑀺.

𑁧𑁬. 𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀤𑀤𑀢𑁄 [𑀉𑀤𑀸. 𑁭𑁫; 𑀤𑀻. 𑀦𑀺. 𑁨.𑁧𑁯𑁭] 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺.

‘‘𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻’’𑀢𑀺 𑀯𑀸𑀲𑀦𑀸. ‘‘𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺 𑀦𑀺𑀩𑁆𑀩𑁂𑀥𑁄.

𑀲𑁄𑀢𑀸𑀦𑀼𑀕𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀘𑀲𑀸 𑀧𑀭𑀺𑀘𑀺𑀢𑁂𑀲𑀼 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑁂𑀲𑀼 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁂𑀲𑀼 𑀧𑀜𑁆𑀘𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀇𑀥𑁂𑀓𑀘𑁆𑀘𑀲𑁆𑀲 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀅𑀧𑀫𑀼𑀝𑁆𑀞𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀲𑁄 𑀬𑀼𑀜𑁆𑀚𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀲𑁂𑀲𑀁 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀲𑁂𑀲𑀁 𑀧𑀧𑁆𑀧𑁄𑀢𑀺, 𑀕𑀺𑀮𑀸𑀦𑁄 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀕𑀺𑀮𑀸𑀦𑁄 𑀧𑀧𑁆𑀧𑁄𑀢𑀺, 𑀫𑀭𑀡𑀓𑀸𑀮𑀲𑀫𑀬𑁂 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀫𑀭𑀡𑀓𑀸𑀮𑀲𑀫𑀬𑁂 𑀧𑀧𑁆𑀧𑁄𑀢𑀺, 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺, 𑀢𑁂𑀦 𑀥𑀫𑁆𑀫𑀭𑀸𑀕𑁂𑀦 𑀢𑀸𑀬 𑀥𑀫𑁆𑀫𑀦𑀦𑁆𑀤𑀺𑀬𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺.

𑀢𑀢𑁆𑀣𑀸𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀬𑀁 𑀲𑀫𑁆𑀧𑀭𑀸𑀬𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀯𑀸𑀲𑀦𑀸. 𑀇𑀫𑀸𑀦𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺 𑀲𑀩𑁆𑀩𑀲𑀸𑀲𑀦𑀁 𑀅𑀢𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺. 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀺 𑀦𑀯𑀯𑀺𑀥𑁄 𑀲𑀼𑀢𑁆𑀢𑀦𑁆𑀢𑁄 𑀯𑀺𑀪𑀢𑁆𑀢𑁄 𑀪𑀯𑀢𑀺. 𑀲𑁄 𑀘 𑀧𑀜𑁆𑀜𑀯𑀢𑁄 𑀦𑁄 𑀤𑀼𑀧𑁆𑀧𑀜𑁆𑀜𑀲𑁆𑀲, 𑀬𑀼𑀢𑁆𑀢𑀲𑁆𑀲 𑀦𑁄 𑀅𑀬𑀼𑀢𑁆𑀢𑀲𑁆𑀲, 𑀅𑀓𑀫𑁆𑀫𑀲𑁆𑀲 𑀯𑀺𑀳𑀸𑀭𑀺𑀲𑁆𑀲 𑀧𑀓𑀢𑀺𑀬𑀸 𑀮𑁄𑀓𑁂 𑀲𑀁𑀓𑀺𑀮𑁂𑀲𑁄 𑀘𑀭𑀢𑀺. 𑀲𑁄 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑁋 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄. 𑀢𑀢𑁄 𑀲𑀁𑀓𑀺𑀮𑁂𑀲𑀢𑁄 𑀉𑀝𑁆𑀞𑀳𑀦𑁆𑀢𑁄 𑀲𑀁𑀓𑀺𑀮𑁂𑀲𑁄 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀳𑀢𑀺, 𑀮𑁄𑀓𑀺𑀬𑁂𑀲𑀼 𑀧𑀢𑀺𑀝𑁆𑀞𑀳𑀢𑀻𑀢𑀺. 𑀢𑀢𑁆𑀣𑀸𑀓𑀼𑀲𑀮𑁄 𑀤𑀺𑀝𑁆𑀞𑀢𑁄 𑀲𑀘𑁂 𑀢𑀁 𑀲𑀻𑀮𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀧𑀭𑀸𑀫𑀲𑀢𑀺, 𑀢𑀲𑁆𑀲 𑀲𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀳𑁄𑀢𑀺. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀁 [𑀪𑀯𑀺𑀲𑁆𑀲𑀸𑀫𑀺 (𑀧𑀻.)] 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀬𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀏𑀢𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀪𑀯𑀢𑀺. 𑀲𑀘𑁂 𑀧𑀦 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀅𑀧𑀭𑀸𑀫𑀝𑁆𑀞𑀲𑁆𑀲 𑀳𑀺 𑀲𑀻𑀮𑀯𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀁 𑀲𑀻𑀮𑀯𑀢𑁄 𑀬𑁄𑀦𑀺𑀲𑁄 𑀕𑀳𑀺𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀁 𑀚𑀦𑁂𑀢𑀺 𑀬𑀸𑀯 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀢𑀜𑁆𑀘 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀓𑀸𑀮𑀗𑁆𑀓𑀢𑀲𑁆𑀲 𑀯𑀸 𑀢𑀫𑁆𑀳𑀺𑀬𑁂𑀯 𑀯𑀸 𑀧𑀦 𑀅𑀧𑀭𑀸𑀧𑀭𑀺𑀬𑀸𑀬𑁂𑀦 𑀯𑀸, 𑀅𑀜𑁆𑀜𑁂𑀲𑀼 𑀔𑀦𑁆𑀥𑁂𑀲𑀼 𑀏𑀯𑀁 𑀲𑀼𑀢𑀁 ‘‘𑀲𑀼𑀘𑀭𑀺𑀢𑀁 𑀯𑀸𑀲𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀲𑀻𑀮𑁂𑀲𑀼 𑀞𑀺𑀢𑀲𑁆𑀲 𑀯𑀺𑀦𑀻𑀯𑀭𑀡𑀁 𑀘𑀺𑀢𑁆𑀢𑀁, 𑀢𑀁 𑀢𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁄 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺; 𑀬𑀤𑀺 𑀯𑀸 𑀲𑀸𑀲𑀦𑀦𑁆𑀢𑀭𑁂, 𑀅𑀘𑁆𑀘𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀬𑀤𑀺 𑀯𑀸 𑀏𑀓𑀸𑀲𑀦𑁂 𑀙 𑀅𑀪𑀺𑀜𑁆𑀜𑁂. 𑀢𑀢𑁆𑀣 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀭𑀺𑀬𑀥𑀫𑁆𑀫𑁂 𑀧𑀸𑀧𑀼𑀡𑀦𑁆𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻 𑀘 𑀥𑀫𑁆𑀫𑀸𑀦𑀼𑀲𑀸𑀭𑀻 𑀘. 𑀢𑀢𑁆𑀣 𑀥𑀫𑁆𑀫𑀸𑀦𑀼𑀲𑀸𑀭𑀻 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑁂𑀬𑁆𑀬𑁄. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀤𑀼𑀯𑀺𑀥𑁄 𑁋 𑀓𑁄𑀘𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀓𑁄𑀘𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑁄. 𑀢𑀢𑁆𑀣 𑀦𑁂𑀬𑁆𑀬𑁄𑀧𑀺 𑀤𑀼𑀯𑀺𑀥𑁄 𑁋 𑀓𑁄𑀘𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀓𑁄𑀘𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑁄. 𑀢𑀢𑁆𑀣 𑀬𑁄 𑀘 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄, 𑀬𑁄 𑀘 𑀦𑁂𑀬𑁆𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀇𑀫𑁂 𑀧𑀼𑀕𑁆𑀕𑀮𑀸 𑀅𑀲𑀫𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀫𑁂 𑀧𑀼𑀕𑁆𑀕𑀮𑀸 𑀲𑀫𑀺𑀦𑁆𑀤𑁆𑀭𑀺𑀬𑀸 𑀧𑀭𑀺𑀳𑀸𑀬𑀦𑁆𑀢𑀺 𑀘 𑀉𑀕𑁆𑀖𑀝𑀺𑀢𑀜𑁆𑀜𑀼𑀢𑁄, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑀢𑁄, 𑀇𑀫𑁂 𑀫𑀚𑁆𑀛𑀺𑀫𑀸 𑀪𑀽𑀫𑀺𑀕𑀢𑀸 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀳𑁄𑀢𑀺. 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸.

𑁧𑁭. 𑀢𑀢𑁆𑀣 𑀘𑀢𑀼𑀢𑁆𑀣𑀸 𑀧𑀦 𑀧𑀜𑁆𑀘𑀫𑀸 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀘, 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀏𑀓𑀩𑀻𑀚𑀻 𑀳𑁄𑀢𑀺 𑀧𑀞𑀫𑁄 𑀲𑁄𑀢𑀸𑀧𑀦𑁆𑀦𑁄. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀓𑁄𑀮𑀁𑀓𑁄𑀮𑁄 𑀘 𑀳𑁄𑀢𑀺 𑀤𑀼𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄. 𑀢𑀢𑁆𑀣 𑀦𑁂𑀬𑁆𑀬𑁄 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀘 𑀳𑁄𑀢𑀺, 𑀅𑀬𑀁 𑀢𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄. 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀞𑀺𑀢𑀸.

𑀉𑀕𑁆𑀖𑀝𑀺𑀢𑀜𑁆𑀜𑀽 𑀏𑀓𑀩𑀻𑀚𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀓𑁄𑀮𑀁𑀓𑁄𑀮𑁄 𑀳𑁄𑀢𑀺, 𑀦𑁂𑀬𑁆𑀬𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀳𑁄𑀢𑀺. 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀤𑀼𑀢𑁆𑀢𑀭𑀺 𑀯𑀸𑀬𑀫𑀢𑀺, 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑁋 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀘 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀘. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑁋 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀦𑁆𑀢𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀘 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀘. 𑀢𑀢𑁆𑀣 𑀦𑁂𑀬𑁆𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀦𑁆𑀢𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀘, 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺. 𑀉𑀕𑁆𑀖𑀝𑀺𑀢𑀜𑁆𑀜𑀽 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀘 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀦𑁂𑀬𑁆𑀬𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀦𑁂𑀬𑁆𑀬𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺. 𑀇𑀢𑀺 𑀧𑀜𑁆𑀘 𑀅𑀦𑀸𑀕𑀸𑀫𑀺𑀦𑁄, 𑀙𑀝𑁆𑀞𑁄 𑀲𑀓𑀤𑀸𑀕𑀸𑀫𑀻, 𑀢𑀬𑁄 𑀘 𑀲𑁄𑀢𑀸𑀧𑀦𑁆𑀦𑀸𑀢𑀺 𑀇𑀫𑁂 𑀦𑀯 𑀲𑁂𑀓𑁆𑀔𑀸.

𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀞𑀺𑀢𑀓𑀧𑁆𑀧𑀻 [𑀞𑀺𑀢𑀓𑀧𑁆𑀧𑀺 (𑀧𑀻. 𑀓.) 𑀧𑀲𑁆𑀲 𑀧𑀼. 𑀧. 𑁧𑁭] 𑀘 𑀧𑀝𑀺𑀯𑁂𑀥𑀦𑀪𑀸𑀯𑁄 𑀧𑀼𑀕𑁆𑀕𑀮𑁄 𑀘 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀘𑁂𑀢𑀦𑀸𑀪𑀩𑁆𑀩𑁄 𑀘 𑀭𑀓𑁆𑀔𑀡𑀸𑀪𑀩𑁆𑀩𑁄 𑀘. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀲𑀘𑁂 𑀘𑁂𑀢𑁂𑀢𑀺 𑀦 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀦𑁄 𑀘𑁂 𑀘𑁂𑀢𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀲𑀘𑁂 𑀅𑀦𑀼𑀭𑀓𑁆𑀔𑀢𑀺 𑀦 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀦𑁄 𑀘𑁂 𑀅𑀦𑀼𑀭𑀓𑁆𑀔𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀢𑀢𑁆𑀣 𑀦𑁂𑀬𑁆𑀬𑁄 𑀧𑀼𑀕𑁆𑀕𑀮𑁄 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺 𑀓𑀫𑁆𑀫𑀦𑀺𑀬𑀢𑁄 𑀯𑀸 𑀲𑀫𑀲𑀻𑀲𑀺 𑀯𑀸, 𑀇𑀫𑁂 𑀦𑀯 𑀅𑀭𑀳𑀦𑁆𑀢𑁄 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀇𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀢𑀣𑀸𑀕𑀢𑀲𑁆𑀲 𑀤𑀲𑀯𑀺𑀥𑀁 𑀩𑀮𑀁 𑀧𑀯𑀢𑁆𑀢𑀢𑀺.

𑁧𑁮. 𑀓𑀢𑀫𑀁 𑀤𑀲𑀯𑀺𑀥𑀁? 𑀇𑀥 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀢𑁂 𑀥𑀫𑁆𑀫𑀘𑀓𑁆𑀓𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀧𑀼𑀢𑁆𑀢𑀸 𑀬𑀸𑀘𑀦𑀸𑀬 𑀅𑀪𑀺𑀬𑀸𑀢𑀸 [𑀅𑀢𑀺𑀬𑀸𑀢𑀸 (𑀧𑀻. 𑀓.)] 𑀳𑁄𑀦𑁆𑀢𑀺 ‘‘𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺. 𑀲𑁄 𑀅𑀦𑀼𑀢𑁆𑀢𑀭𑁂𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲𑀸𑀲𑀺 𑀲𑀢𑁆𑀢𑀸𑀦𑀁 𑀢𑀬𑁄 𑀭𑀸𑀲𑀻𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀅𑀦𑀺𑀬𑀢𑁄. 𑀢𑀢𑁆𑀣 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀫𑀺𑀘𑁆𑀙𑀸𑀲𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀲𑀢𑁆𑀣𑀼𑀓𑁄 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀅𑀭𑀺𑀬𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀦𑀭𑀺𑀬𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀅𑀦𑀺𑀬𑀢𑁄 𑀭𑀸𑀲𑀺 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀇𑀫𑁂 𑀢𑀬𑁄 𑀅𑀦𑀼𑀢𑁆𑀢𑀭𑁂𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀦𑁆𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑁂 𑀲𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀢𑁆𑀢𑀯𑀢𑀸 𑀫𑀁 𑀓𑁄𑀘𑀺 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀯𑀻𑀢𑀭𑀸𑀕𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀅𑀔𑀻𑀡𑀸𑀲𑀯𑀢𑀸𑀬 𑀲𑀳𑀥𑀫𑁆𑀫𑁂𑀦 𑀓𑁄𑀘𑀺 𑀧𑀝𑀺𑀘𑁄𑀤𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀢𑁄 𑀧𑀦 𑀇𑀫𑀲𑁆𑀲 𑀅𑀦𑀺𑀬𑀢𑀲𑁆𑀲 𑀭𑀸𑀲𑀺𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀲𑀸 𑀦 𑀤𑀺𑀲𑁆𑀲𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀣𑀸 𑀑𑀯𑀤𑀺𑀢𑁄 𑀬𑀁 𑀧𑀦 𑀫𑁂 𑀅𑀦𑀺𑀬𑀢𑀭𑀸𑀲𑀺 𑀲𑀸𑀯𑀓𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁯. 𑀬𑀁 𑀔𑁄 𑀫𑀼𑀦𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀦𑀸𑀦𑀸𑀦𑀺𑀭𑀼𑀢𑁆𑀢𑀺𑀬𑁄 𑀤𑁂𑀯𑀦𑀸𑀕𑀬𑀓𑁆𑀔𑀸𑀦𑀁 𑀤𑀫𑁂𑀢𑀺 𑀥𑀫𑁆𑀫𑁂 𑀯𑀯𑀢𑁆𑀣𑀸𑀦𑁂𑀦 𑀯𑀢𑁆𑀯𑀸 𑀓𑀸𑀭𑀡𑀢𑁄 𑀅𑀜𑁆𑀜𑀁 𑀧𑀸𑀭𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀬𑀢𑁄 𑀧𑀦𑀺𑀫𑀸 𑀦𑀺𑀭𑀼𑀢𑁆𑀢𑀺𑀢𑁄 𑀲𑀢𑁆𑀢 𑀲𑀢𑁆𑀢 𑀦𑀺𑀭𑀼𑀢𑁆𑀢𑀺𑀬𑁄 𑀦𑀸𑀪𑀺𑀲𑀫𑁆𑀪𑀼𑀦𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺 𑀔𑁄 𑀧𑀦 𑀅𑀪𑀺𑀲𑀫𑀕𑁆𑀕𑀭𑀢𑀸𑀦𑀁 𑀲𑀸𑀯𑀓𑀸𑀦𑀁 𑀢𑀫𑀢𑁆𑀣𑀫𑀯𑀺𑀜𑁆𑀜𑀸𑀧𑀬𑁂𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀫𑀳𑁂𑀲𑀓𑁆𑀔𑀸 𑀤𑁂𑀯𑀧𑀼𑀢𑁆𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑁂 𑀧𑀼𑀘𑁆𑀙𑀺𑀁𑀲𑀼. 𑀓𑀸𑀬𑀺𑀓𑁂𑀦 𑀯𑀸 𑀫𑀸𑀦𑀲𑀺𑀓𑁂𑀦 𑀯𑀸 𑀧𑀭𑀺𑀧𑀻𑀴𑀺𑀢𑀲𑁆𑀲 𑀳𑀢𑁆𑀣𑀓𑀼𑀡𑀻𑀢𑀺 𑀯𑀸 𑀧𑀸𑀤𑁂 𑀯𑀸 𑀔𑀜𑁆𑀚𑁂 𑀤𑀦𑁆𑀥𑀲𑁆𑀲 [𑀤𑀦𑁆𑀢𑀲𑁆𑀲 (𑀧𑀻. 𑀓.)] 𑀲𑁄 𑀅𑀢𑁆𑀣𑁄 𑀦 𑀧𑀭𑀺𑀪𑀸𑀚𑀺𑀬𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀬𑀫𑁆𑀳𑀺 𑀢𑀁 𑀢𑁂𑀲𑀁 𑀳𑁄𑀢𑀺 𑀢𑀫𑁆𑀳𑀺 𑀅𑀲𑀦𑁆𑀢𑀁 𑀪𑀯𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀁 𑀳𑀺 𑀦𑀸𑀲𑀁 𑀢𑁂𑀲𑀁 𑀦 𑀪𑀯𑀢𑀺, 𑀢𑀫𑁆𑀳𑀺 𑀦𑀸𑀲𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀏𑀯𑀁 𑀲𑀫𑀼𑀤𑀬𑀲𑁆𑀲 𑀦𑀺𑀭𑁄𑀥𑀸𑀬 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀫𑀸𑀭𑁄 𑀯𑀸 𑀇𑀦𑁆𑀤𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀢𑀣𑀸𑀕𑀢𑁄 𑀯𑀸 𑀘𑀓𑁆𑀓𑀯𑀢𑁆𑀢𑀻 𑀯𑀸 𑀲𑁄 𑀯𑀢 𑀦𑀸𑀫 𑀫𑀸𑀢𑀼𑀕𑀸𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀅𑀲𑁆𑀲 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀇𑀢𑀺𑀲𑁆𑀲 𑀏𑀯𑀭𑀽𑀧𑀁 𑀩𑀮𑀁 𑀏𑀯𑀭𑀽𑀧𑀁 𑀜𑀸𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁 𑀢𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑀻𑀳𑀺 𑀭𑀸𑀲𑀻𑀳𑀺 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀘𑀢𑀽𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀬𑀁 𑀦𑀺𑀯𑀢𑁆𑀢𑀺𑀬𑀁 𑀪𑀸𑀕𑀺𑀬𑀜𑁆𑀘. 𑀓𑀼𑀲𑀮𑀁 𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘 𑀉𑀧𑀧𑀚𑁆𑀚𑀢𑀺 𑀬𑀜𑁆𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁. 𑀇𑀤𑀁 𑀧𑀞𑀫𑀁 𑀩𑀮𑀁 𑀢𑀣𑀸𑀕𑀢𑁄 𑀏𑀯𑀁 𑀚𑀸𑀦𑀸𑀢𑀺.

𑀬𑁂𑀲𑀁 𑀧𑀦 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀦𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻𑀬𑁂𑀯𑀸𑀬𑀁 𑀧𑀝𑀺𑀧𑀤𑀸. 𑀢𑀢𑁆𑀣 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀏𑀲𑀸𑀧𑀺 𑀦 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑀓𑁆𑀓𑀸𑀬𑀲𑀫𑀼𑀤𑀬𑀕𑀸𑀫𑀺𑀦𑀻𑀬𑁂𑀯𑀸𑀬𑀁 𑀧𑀝𑀺𑀧𑀤𑀸 𑀳𑁄𑀢𑀼, 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀧𑀢𑁆𑀢𑀺𑀬𑀸 𑀞𑀺𑀢𑁄 𑀕𑀘𑁆𑀙𑀢𑀺 𑀦𑀺𑀩𑁆𑀩𑀸𑀦𑀁, 𑀕𑀘𑁆𑀙𑀢𑀺 𑀅𑀧𑀸𑀬𑀁, 𑀕𑀘𑁆𑀙𑀢𑀺 𑀤𑁂𑀯𑀫𑀦𑀼𑀲𑁆𑀲𑀲𑁆𑀲. 𑀬𑀁 𑀬𑀁 𑀯𑀸 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬 𑀲𑀩𑁆𑀩𑀢𑁆𑀣 𑀕𑀘𑁆𑀙𑁂𑀬𑁆𑀬, 𑀅𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀬𑀁 𑀏𑀢𑁆𑀣 𑀜𑀸𑀡𑀁 𑀬𑀣𑀸𑀪𑀽𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀲𑀸 𑀔𑁄 𑀧𑀦𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀦𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀓𑀸𑀫𑁂𑀲𑀼 𑀓𑁂𑀘𑀺 𑀤𑀼𑀓𑁆𑀓𑀭𑀓𑀸𑀭𑀺𑀬𑀁 𑀓𑁂𑀘𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀓𑁂𑀘𑀺 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑀺 𑀓𑁂𑀘𑀺 𑀅𑀦𑀚𑁆𑀚𑀸𑀪𑀸𑀯𑀦𑀸𑀢𑀺. 𑀢𑁂𑀦 𑀢𑁂𑀦 𑀘𑀭𑀺𑀢𑁂𑀦 𑀯𑀺𑀦𑀺𑀩𑀦𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀬𑀁 𑀜𑀸𑀡𑀁 𑀬𑀣𑀸𑀪𑀽𑀢𑀁 𑀦𑀸𑀦𑀸𑀕𑀢𑀁 𑀮𑁄𑀓𑀲𑁆𑀲 𑀅𑀦𑁂𑀓𑀸𑀥𑀺𑀫𑀼𑀢𑁆𑀢𑀕𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀸 𑀪𑀯𑀦𑁆𑀢𑀺 𑀆𑀲𑁂𑀯𑀦𑁆𑀢𑀺 𑀪𑀸𑀯𑁂𑀦𑁆𑀢𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀓𑀫𑁆𑀫𑀼𑀧𑀲𑀬𑀸𑀦𑀁 𑀢𑀤𑀸𑀥𑀺𑀫𑀼𑀢𑁆𑀢𑀸𑀦𑀁. 𑀲𑀸 𑀘𑁂𑀯 𑀥𑀸𑀢𑀼 𑀲𑀁𑀯𑀳𑀢𑀺. 𑀓𑀢𑀭𑀸 𑀧𑀦𑁂𑀲𑀸 𑀥𑀸𑀢𑀼 𑀦𑁂𑀓𑁆𑀔𑀫𑁆𑀫𑀥𑀸𑀢𑀼 𑀩𑀮𑀥𑀸𑀢𑀼 𑀓𑀸𑀘𑀺 𑀲𑀫𑁆𑀧𑀢𑁆𑀢𑀺 𑀓𑀸𑀘𑀺 𑀫𑀺𑀘𑁆𑀙𑀢𑁆𑀢𑀜𑁆𑀘 𑀥𑀸𑀢𑀼 𑀅𑀥𑀺𑀫𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀅𑀜𑁆𑀜𑀢𑀭𑀸 𑀉𑀢𑁆𑀢𑀭𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀢𑁂 𑀢𑀤𑁂𑀯𑀝𑁆𑀞𑀸𑀦𑀁 𑀫𑀬𑀸 𑀚𑀭𑀸𑀫𑀭𑀡𑀲𑁆𑀲 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺. 𑀬𑀣𑀸 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀪𑀸𑀲𑀺𑀢𑀁. 𑀬𑀁 𑀢𑀢𑁆𑀣 𑀬𑀣𑀸𑀪𑀽𑀢𑀁 𑀜𑀸𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀬𑀁𑀬𑁂𑀯 𑀥𑀸𑀢𑀼 [𑀬𑀁 𑀬𑀤𑁂𑀯 𑀥𑀸𑀢𑀼𑀁 (𑀓.)] 𑀲𑁂𑀝𑁆𑀞𑀦𑁆𑀢𑀺 𑀢𑀁 𑀢𑀁 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀆𑀭𑀫𑁆𑀪𑀦𑁆𑀢𑀺 𑀘𑁂𑀢𑀲𑀺𑀓𑁄. 𑀆𑀭𑀫𑁆𑀪𑁄 𑀘𑁂𑀢𑀦𑀸 𑀓𑀫𑁆𑀫𑀁 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀆𑀭𑀫𑁆𑀪𑁄 𑀘𑁂𑀢𑀲𑀺𑀓𑀢𑁆𑀢𑀸 𑀓𑀫𑁆𑀫𑀦𑁆𑀢𑀭𑀁 𑀢𑀣𑀸𑀕𑀢𑁄 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀇𑀫𑀺𑀦𑀸 𑀲𑀢𑁆𑀢𑁂𑀦 𑀏𑀯𑀁 𑀥𑀸𑀢𑀼𑀓𑁂𑀦 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢𑀁, 𑀢𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀢𑀲𑁆𑀲 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄 𑀯𑀺𑀧𑀘𑁆𑀘𑀢𑀺 𑀏𑀢𑀭𑀳𑀺 𑀯𑀺𑀧𑀘𑁆𑀘𑀺𑀲𑁆𑀲𑀢𑀺 𑀯𑀸 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺. 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀏𑀯𑀁𑀥𑀸𑀢𑀼𑀓𑁄 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀢𑀺’’. 𑀢𑀡𑁆𑀳𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀘 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀤𑀺𑀝𑁆𑀞𑁂𑀬𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀉𑀧𑀧𑀚𑁆𑀚𑁂 𑀯𑀸’’𑀢𑀺 𑀅𑀧𑀭𑀫𑁆𑀳𑀺 𑀯𑀸 𑀧𑀭𑀺𑀬𑀸𑀬𑁂 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀢𑀲𑁆𑀲 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀘 𑀲𑀼𑀔𑀯𑀺𑀧𑀸𑀓𑀁’’ …𑀧𑁂… 𑀇𑀢𑀺 𑀅𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺 𑀉𑀘𑁆𑀘𑀸𑀯𑀘𑀸 𑀳𑀻𑀦𑀧𑀡𑀻𑀢𑀢𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁.

𑀢𑀣𑀸 𑀲𑀢𑁆𑀢𑀸 𑀬𑀁 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀸 𑀢𑀢𑁆𑀣 𑀏𑀯𑀁 𑀧𑀚𑀸𑀦𑀸𑀢𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀸𑀥𑀺𑀫𑀼𑀢𑁆𑀢𑀲𑁆𑀲 𑀭𑀸𑀕𑀘𑀭𑀺𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀥𑀸𑀢𑀽𑀦𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀭𑀸𑀕𑀸𑀦𑀼𑀕𑀢𑁂 𑀲𑀼𑀜𑁆𑀜𑀫𑀸𑀦𑀲𑁆𑀲 𑀧𑀞𑀫𑀁 𑀛𑀸𑀦𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀲𑀘𑁂 𑀧𑀼𑀦 𑀉𑀢𑁆𑀢𑀭𑀺 𑀯𑀸𑀬𑀸𑀫𑀢𑁄 𑀛𑀸𑀦𑀯𑁄𑀤𑀸𑀦𑀕𑀢𑁂 𑀫𑀸𑀦𑀲𑁂 𑀯𑀺𑀲𑁂𑀲𑀪𑀸𑀕𑀺𑀬𑀁 𑀧𑀝𑀺𑀧𑀤𑀁 𑀅𑀦𑀼𑀬𑀼𑀜𑁆𑀚𑀺𑀬𑀢𑀺. 𑀢𑀲𑁆𑀲 𑀳𑀺 𑀛𑀸𑀦𑀪𑀸𑀕𑀺𑀬𑀁𑀬𑁂𑀯 𑀧𑀞𑀫𑀚𑁆𑀛𑀸𑀦𑁂 𑀞𑀺𑀢𑀲𑁆𑀲 𑀤𑀼𑀢𑀺𑀬𑀁 𑀛𑀸𑀦𑀁 𑀯𑁄𑀤𑀸𑀦𑀁 𑀕𑀘𑁆𑀙𑀢𑀺, 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀲𑀸 𑀧𑀻𑀢𑀺 𑀅𑀯𑀺𑀲𑁂𑀲𑀪𑀸𑀕𑀺𑀬𑀁 𑀢𑀢𑀺𑀬𑀁 𑀛𑀸𑀦𑀁 𑀆𑀤𑀺𑀲𑁆𑀲 𑀢𑀺𑀝𑁆𑀞𑀢𑀺. 𑀲𑀘𑁂 𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀣𑀸𑀕𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑁄𑀤𑀸𑀦𑀁 𑀕𑀘𑁆𑀙𑀢𑀺𑀬𑁂𑀯, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀳𑀸𑀦𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀢𑁂 𑀘 𑀥𑀫𑁆𑀫𑀸 𑀬𑀢𑁆𑀣 𑀧𑀚𑀸𑀬𑀦𑁆𑀢𑀺 𑀬𑁂𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑁄𑀤𑀸𑀦𑀁 𑀤𑀺𑀲𑁆𑀲𑀢𑀺. 𑀏𑀯𑀁 𑀅𑀚𑁆𑀛𑀸𑀲𑀬𑀲𑀫𑀸𑀧𑀢𑁆𑀢𑀺𑀬𑀸 𑀬𑀸 𑀘𑀢𑀲𑁆𑀲𑁄 𑀲𑀫𑀸𑀧𑀢𑁆𑀢𑀺𑀬𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑀛𑀸𑀦𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀺𑀫𑁄𑀓𑁆𑀔𑀸𑀢𑀺. 𑀅𑀝𑁆𑀞 𑀘 𑀯𑀺𑀫𑁄𑀓𑁆𑀔𑀸 𑀢𑀻𑀡𑀺 𑀘 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺. 𑀲𑀫𑀸𑀥𑀻𑀢𑀺 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻 𑁋 𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺. 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀚𑁆𑀛𑀸𑀲𑀬𑀲𑀫𑀸𑀧𑀢𑁆𑀢𑀺𑀬𑁄 𑀇𑀢𑀺 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀭𑀽𑀧𑁄 𑀲𑀁𑀓𑀺𑀮𑁂𑀲𑁄 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀏𑀯𑀁 𑀤𑁄𑀲𑀘𑀭𑀺𑀢𑀲𑁆𑀲. 𑀫𑁄𑀳𑀘𑀭𑀺𑀢𑀲𑁆𑀲. 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀭𑀽𑀧𑀁 𑀯𑁄𑀤𑀸𑀦𑀁 𑀇𑀢𑀺 𑀬𑀁 𑀏𑀢𑁆𑀣 𑀜𑀸𑀡𑀁 𑀬𑀣𑀸𑀪𑀽𑀢𑀁 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀢𑁆𑀢𑁂𑀳𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀢𑀣𑀸𑀕𑀢𑁄 𑀏𑀯𑀁 𑀧𑀚𑀸𑀦𑀸𑀢𑀺 𑀮𑁄𑀓𑀺𑀓𑀸 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀪𑀸𑀯𑀦𑀸𑀪𑀸𑀕𑀺𑀬𑀁 𑀇𑀦𑁆𑀤𑁆𑀭𑀺𑀬𑀁 𑀦𑀸𑀫𑀁 𑀮𑀪𑀦𑁆𑀢𑀺. 𑀆𑀥𑀺𑀧𑀢𑁂𑀬𑁆𑀬𑀪𑀽𑀫𑀺𑀁 𑀉𑀧𑀸𑀤𑀸𑀬 𑀩𑀮𑀁 𑀦𑀸𑀫𑀁 𑀮𑀪𑀦𑁆𑀢𑀺 𑀣𑀸𑀫𑀕𑀢𑀁 𑀫𑀦𑁄 𑀫𑀦𑀺𑀦𑁆𑀤𑁆𑀭𑀺𑀬𑀁 𑀢𑀁 𑀉𑀧𑀸𑀤𑀸𑀬. 𑀯𑀻𑀭𑀺𑀬𑀁 𑀦𑀸𑀫𑀁 𑀮𑀪𑀦𑁆𑀢𑀺 𑀆𑀭𑀫𑁆𑀪𑀥𑀸𑀢𑀼𑀁 𑀉𑀧𑀸𑀤𑀸𑀬. 𑀇𑀢𑀺𑀲𑁆𑀲 𑀤𑁂𑀯 𑀏𑀯𑀭𑀽𑀧𑀁 𑀜𑀸𑀡𑀁 𑀇𑀫𑁂𑀳𑀺 𑀘 𑀥𑀫𑁆𑀫𑁂𑀳𑀺 𑀇𑀫𑁂 𑀧𑀼𑀕𑁆𑀕𑀮𑀸 𑀲𑀫𑀦𑁆𑀦𑀸𑀕𑀢𑀸𑀢𑀺𑀧𑀺 𑀥𑀫𑁆𑀫𑀤𑁂𑀲𑀦𑀁 𑀅𑀓𑀸𑀲𑀺. 𑀆𑀓𑀸𑀭𑀢𑁄 𑀘 𑀯𑁄𑀓𑀸𑀭𑀢𑁄 𑀘 𑀆𑀲𑀬𑀚𑁆𑀛𑀸𑀲𑀬𑀲𑁆𑀲 𑀅𑀥𑀺𑀫𑀼𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑀸𑀦𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀩𑀮𑀯𑀻𑀭𑀺𑀬𑀯𑁂𑀫𑀢𑁆𑀢𑀢𑀁 𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀘 𑀢𑀣𑀸𑀕𑀢𑁄 𑀮𑁄𑀓𑀸𑀤𑀻𑀲𑀼 𑀘 𑀪𑀽𑀫𑀻𑀲𑀼 𑀲𑀁𑀬𑁄𑀚𑀦𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀕𑀢𑀺𑀁 𑀧𑀚𑀸𑀦𑀸𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸 𑀅𑀢𑀻𑀢𑁂 𑀲𑀁𑀲𑀸𑀭𑁂 𑀏𑀢𑀭𑀳𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀘𑀼𑀢𑀽𑀧𑀧𑀸𑀢𑀁 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀩𑀮𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀢𑁄 𑀅𑀪𑀺𑀦𑀻𑀳𑀺𑀢𑀸𑀦𑀺. 𑀲𑁄 𑀅𑀢𑀻𑀢𑀫𑀤𑁆𑀥𑀸𑀦𑀁 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑁄 𑀏𑀢𑀭𑀳𑀺 𑀲𑀢𑀺 𑀕𑁄𑀘𑀭𑁄 𑀇𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀁 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀇𑀫𑀸𑀦𑀺 𑀤𑁆𑀯𑁂 𑀢𑀣𑀸𑀕𑀢𑀩𑀮𑀸𑀦𑀺, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀦𑀯𑀫𑀁 𑀤𑀺𑀩𑁆𑀩𑀘𑀓𑁆𑀔𑀼.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀛𑀸𑀦𑀁 𑀯𑁄𑀤𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀧𑀚𑀸𑀦𑀸𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀇𑀢𑀺 𑀅𑀢𑁆𑀢𑀦𑁄 𑀘 𑀆𑀲𑀯𑀸𑀦𑀁 𑀔𑀬𑀁 𑀜𑀸𑀡𑀁 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀁 𑀘𑀢𑀼𑀪𑀽𑀫𑀺𑀫𑀼𑀧𑀸𑀤𑀸𑀬 𑀬𑀸𑀯 𑀦𑀯𑀦𑁆𑀦𑀁 𑀅𑀭𑀳𑀦𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑁄 𑀑𑀥𑀺𑀲𑁄 𑀲𑁂𑀓𑁆𑀔𑀸𑀦𑀁 𑀅𑀦𑁄𑀥𑀺𑀲𑁄 𑀅𑀭𑀳𑀦𑁆𑀢𑀸𑀦𑀁. 𑀢𑀢𑁆𑀣 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀤𑁆𑀯𑀻𑀳𑀺 𑀆𑀲𑀯𑁂𑀳𑀺 𑀅𑀦𑀸𑀲𑀯𑀸 𑀓𑀸𑀫𑀸𑀲𑀯𑁂𑀦 𑀘 𑀪𑀯𑀸𑀲𑀯𑁂𑀦 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀤𑁆𑀯𑀻𑀳𑀺 𑀆𑀲𑀯𑁂𑀳𑀺 𑀅𑀦𑀸𑀲𑀯𑀸 𑀤𑀺𑀝𑁆𑀞𑀸𑀲𑀯𑁂𑀦 𑀘 𑀅𑀯𑀺𑀚𑁆𑀚𑀸𑀲𑀯𑁂𑀦 𑀘, 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀲𑀯𑀓𑁆𑀔𑀬𑁂 𑀜𑀸𑀡𑀁. 𑀤𑀲𑀫𑀁 𑀢𑀣𑀸𑀕𑀢𑀩𑀮𑀁.

𑁨𑁦. 𑀇𑀫𑁂𑀲𑀼 𑀤𑀲𑀲𑀼 𑀩𑀮𑁂𑀲𑀼 𑀞𑀺𑀢𑁄 𑀢𑀣𑀸𑀕𑀢𑁄 𑀧𑀜𑁆𑀘𑀯𑀺𑀥𑀁 𑀲𑀸𑀲𑀦𑀁 𑀤𑁂𑀲𑁂𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀪𑀸𑀯𑀦𑀸𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀢𑀢𑁆𑀣 𑀬𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀅𑀮𑁄𑀪𑁄 𑀦𑀺𑀲𑁆𑀲𑀭𑀡𑀁. 𑀬𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀅𑀫𑁄𑀳𑁄 𑀦𑀺𑀲𑁆𑀲𑀭𑀡𑀁. 𑀬𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀢𑀻𑀡𑀺 𑀓𑀼𑀲𑀮𑀸𑀦𑀺 𑀦𑀺𑀲𑁆𑀲𑀭𑀡𑀁. 𑀓𑀺𑀁 𑀦𑀺𑀤𑀸𑀦𑀁? 𑀢𑀻𑀡𑀺 𑀇𑀫𑀸𑀦𑀺 [𑀢𑀻𑀡𑀺 𑀳𑀺 𑀇𑀫𑀸𑀦𑀺 (𑀧𑀻.)] 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀢𑀢𑁆𑀣 𑀅𑀪𑀺𑀚𑁆𑀛𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀩𑁆𑀩𑀜𑁆𑀘 𑀢𑀤𑀼𑀧𑀦𑀺𑀩𑁆𑀩𑀤𑁆𑀥𑀁 𑀯𑀸𑀘𑀸𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀲𑀩𑁆𑀩𑀯𑀺𑀢𑀣𑀁 𑀲𑀩𑁆𑀩𑀁 𑀯𑀸𑀘𑀫𑀪𑀸𑀯𑀁 𑀲𑀩𑁆𑀩𑀫𑀓𑁆𑀔𑀁 𑀧𑀮𑀸𑀲𑀁 𑀅𑀪𑀺𑀚𑁆𑀛𑀸 𑀅𑀓𑀼𑀲𑀮𑀫𑀽𑀮𑀦𑁆𑀢𑀺, 𑀲𑀼𑀘𑀭𑀺𑀢𑁂 𑀲𑀼𑀘𑀭𑀺𑀢𑀁 𑀫𑀼𑀲𑀸𑀯𑀸𑀤𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀅𑀪𑀺𑀚𑁆𑀛𑀸𑀬 𑀘𑁂𑀢𑀦𑀸, 𑀢𑀢𑁆𑀣 𑀩𑁆𑀬𑀸𑀧𑀸𑀤𑁄 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑀁 𑀲𑀩𑁆𑀩𑀜𑁆𑀘 𑀫𑁂𑀢𑀁 𑀆𑀓𑀟𑁆𑀠𑀦𑀁 𑀧𑀭𑀺𑀓𑀟𑁆𑀠𑀦𑀁 𑀦𑀺𑀩𑁆𑀩𑀤𑁆𑀥𑀁 𑀭𑁄𑀘𑀦𑀁 𑀯𑀸𑀘𑀸𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀧𑀺𑀲𑀼𑀡𑀯𑀸𑀘𑀁 𑀨𑀭𑀼𑀲𑀯𑀸𑀘𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀜𑁆𑀘 𑀅𑀪𑀺𑀚𑁆𑀛𑀁 𑀩𑁆𑀬𑀸𑀧𑀸𑀤𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀬𑁄𑀚𑁂𑀢𑀺, 𑀢𑀲𑁆𑀲 𑀬𑁄 𑀓𑁄𑀘𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀸𑀕𑁄 𑀭𑀸𑀕𑀚𑁄 𑀯𑀸 𑀤𑁄𑀲𑀚𑁄 𑀯𑀸 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀪𑀽𑀢𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀉𑀧𑀝𑁆𑀞𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀯𑀘𑀻𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀁. 𑀇𑀫𑀸𑀦𑀺 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺.

𑀬𑀸 𑀅𑀪𑀺𑀚𑁆𑀛𑀸, 𑀲𑁄 𑀮𑁄𑀪𑁄. 𑀬𑁄 𑀩𑁆𑀬𑀸𑀧𑀸𑀤𑁄, 𑀲𑁄 𑀤𑁄𑀲𑁄. 𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑁄 𑀫𑁄𑀳𑁄. 𑀢𑀸𑀦𑀺 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀤𑀲𑀯𑀺𑀥𑀁 𑀅𑀓𑀼𑀲𑀮𑀫𑀽𑀮𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀺𑀯𑀺𑀥𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁 𑀦𑀺𑀲𑁆𑀲𑀭𑀡𑀁. 𑀢𑀢𑁆𑀣 𑀬𑁄 𑀩𑀳𑀼𑀲𑀺𑀢𑁄 𑀦𑀺𑀤𑁆𑀤𑁂𑀲𑁄 𑀬𑀣𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀧𑀺, 𑀢𑀢𑁆𑀣 𑀅𑀲𑀺𑀢𑀼𑀁 𑀏𑀢𑁆𑀣 𑀮𑁄𑀪𑁄 𑀉𑀲𑁆𑀲𑀤𑁄 𑀢𑁂𑀦 𑀓𑀸𑀭𑀡𑁂𑀦 𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀮𑁄𑀪𑁄 𑀧𑀜𑁆𑀜𑀧𑀺𑀬𑀢𑀺. 𑀢𑀢𑁆𑀣𑀸𑀬𑀁 𑀫𑁄𑀳𑁄 𑀅𑀓𑀼𑀲𑀮𑀁 𑀫𑁄𑀳𑁄 𑀅𑀬𑀁 𑀅𑀯𑀺𑀚𑁆𑀚𑀸, 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀭𑀽𑀧𑁂 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀯𑀺𑀚𑁆𑀚𑀸𑀕𑀢𑁄 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀢𑁆𑀣 𑀓𑀢𑀫𑀁 𑀧𑀤𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀉𑀘𑁆𑀙𑁂𑀤𑀁 𑀯𑀤𑀢𑀺 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀤𑀺𑀝𑁆𑀞𑀺 𑀘 𑀅𑀜𑁆𑀜𑁄 𑀘 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀺𑀬𑀢𑀺. 𑀧𑀘𑁆𑀙𑀺𑀫𑀲𑀝𑁆𑀞𑀺𑀓𑀧𑁆𑀧𑀸𑀦𑀁 𑀢𑀻𑀡𑀺 𑀧𑀤𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀁 𑀪𑀚𑀦𑁆𑀢𑀺 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀅𑀓𑀺𑀭𑀺𑀬𑀜𑁆𑀘 𑀢𑀁 𑀤𑀼𑀓𑁆𑀔𑀫𑀺𑀘𑁆𑀙𑀢𑁄 𑀅𑀳𑁂𑀢𑀼𑀓𑀸 𑀘 𑀧𑀢𑀦𑁆𑀢𑀺 𑀅𑀦𑀚𑁆𑀛𑀸𑀪𑀸𑀯𑁄 𑀘 𑀓𑀫𑁆𑀫𑀸𑀦𑀁 𑀲𑀩𑁆𑀩𑀜𑁆𑀘 𑀫𑀸𑀦𑀬𑀺 [𑀫𑀸𑀦𑀢𑀺 (𑀧𑀻.)]. 𑀢𑀢𑁆𑀣 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀺 𑀆𑀚𑀻𑀯𑀓𑀸 𑀙𑀴𑀸𑀲𑀻𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀬𑀣𑀸𑀭𑀽𑀧𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀘𑀢𑀼𑀯𑀢𑁆𑀣𑀼𑀓𑀸, 𑀏𑀯𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀁 𑀪𑀚𑀢𑀺. 𑀅𑀜𑁆𑀜𑀸𑀚𑀻𑀯𑀓𑀸 𑀘 𑀲𑀲𑁆𑀲𑀢𑀯𑀸𑀤𑀺𑀓𑁂 𑀘 𑀲𑀻𑀮𑀩𑁆𑀩𑀢𑀁 𑀪𑀚𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀇𑀫𑀺𑀦𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑁄 𑀯𑀸 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀅𑀬𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀢𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀫𑀺𑀢𑀺 𑀢𑀁 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦𑀸𑀪𑀺𑀧𑁆𑀧𑀲𑀻𑀤𑀢𑀺 𑀧𑀼𑀩𑁆𑀩𑀦𑁆𑀢𑁂 𑀅𑀧𑀭𑀦𑁆𑀢𑁂 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂…𑀧𑁂… 𑀇𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑁂𑀲𑀼 𑀞𑀺𑀢𑀲𑁆𑀲 𑀅𑀬𑀁 𑀉𑀧𑀓𑁆𑀓𑀺𑀮𑁂𑀲𑁄.

𑁨𑁧. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀲𑀩𑁆𑀩𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀁 𑀧𑀚𑀳𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦 𑀘𑀺𑀢𑁆𑀢𑀁 𑀏𑀓𑁄𑀤𑀺 𑀓𑀭𑁄𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦 𑀆𑀭𑀪𑀢𑀺. 𑀲𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀸𑀦𑀼𑀲𑀸𑀭𑀻 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀦𑀺𑀭𑀢𑁄 𑀅𑀦𑀦𑁆𑀢𑀭𑀺𑀬𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀼𑀤𑁆𑀥𑁂𑀳𑀺 𑀥𑀫𑁆𑀫𑀸𑀦𑀼𑀲𑀸𑀭𑀻 𑀅𑀧𑁆𑀧𑀘𑁆𑀘𑀬𑀢𑀸𑀬 𑀅𑀦𑀦𑁆𑀢𑀭𑀺𑀬𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑀘𑁆𑀘𑀸𑀦𑀺 𑀇𑀤𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀢𑀲𑁆𑀲 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀳𑀻𑀦𑀸𑀦𑀺 𑀤𑁆𑀯𑁂 𑀧𑀼𑀕𑁆𑀕𑀮𑀓𑀢𑀸𑀦𑀺. 𑀢𑀢𑁆𑀣 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀸𑀦𑀺 𑀉𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀙 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀢𑀢𑁆𑀣 𑀢𑁂𑀲𑀼 𑀅𑀪𑀺𑀚𑁆𑀛𑀸𑀬 𑀘 𑀩𑁆𑀬𑀸𑀧𑀸𑀤𑁂𑀲𑀼 𑀢𑀦𑀼𑀓𑀢𑁂𑀲𑀼 𑀙 𑀪𑀯𑀸 𑀧𑀭𑀺𑀓𑁆𑀔𑀬𑀸 𑀫𑀭𑀺𑀬𑀸𑀤𑀁 𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀪𑀯𑀸 𑀅𑀯𑀲𑀺𑀝𑁆𑀞𑀸. 𑀢𑀲𑁆𑀲 𑀅𑀪𑀺𑀚𑁆𑀛𑀸 𑀘 𑀩𑁆𑀬𑀸𑀧𑀸𑀤𑁄 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀏𑀓𑁄 𑀪𑀯𑁄 𑀅𑀯𑀲𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀘 𑀫𑀸𑀦𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 𑀅𑀜𑁆𑀜𑁂𑀧𑀺 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑀸 𑀭𑀽𑀧𑀭𑀸𑀕𑁄 𑀪𑀯𑀭𑀸𑀕𑁄 𑀅𑀯𑀺𑀚𑁆𑀚𑀸 𑀉𑀤𑁆𑀥𑀘𑁆𑀘𑀁 𑀓𑁂𑀢𑀼𑀲𑁆𑀫𑀺𑀫𑀸𑀦𑀪𑀽𑀢𑀸 𑀦𑀧𑁆𑀧𑀝𑀺𑀩𑀮𑀸 𑀅𑀲𑁆𑀫𑀺𑀫𑀸𑀦𑀁 𑀯𑀺𑀦𑀺𑀯𑀢𑁆𑀢𑁂𑀢𑀼𑀁, 𑀲𑀩𑁆𑀩𑁂𑀧𑀺 𑀢𑁂 𑀅𑀲𑁆𑀫𑀺𑀫𑀸𑀦𑀲𑁆𑀲 𑀧𑀳𑀸𑀦𑀁 𑀆𑀭𑀪𑀢𑁂. 𑀔𑀻𑀡𑁂𑀲𑀼 𑀦 𑀘 𑀢𑁂𑀲𑀼 𑀇𑀤𑀫𑀼𑀢𑁆𑀢𑀭𑀺𑀤𑀲𑁆𑀲𑀦𑀪𑀽𑀫𑀺𑀬𑀁 𑀧𑀜𑁆𑀘𑀲𑀼 𑀲𑁂𑀓𑁆𑀔𑀧𑀼𑀕𑁆𑀕𑀮𑁂𑀲𑀼 𑀢𑀻𑀲𑀼 𑀘 𑀧𑀝𑀺𑀧𑁆𑀧𑀦𑁆𑀦𑀓𑁂𑀲𑀼 𑀤𑁆𑀯𑀻𑀲𑀼 𑀘 𑀨𑀮𑀝𑁆𑀞𑁂𑀲𑀼 𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀢𑀤𑀼𑀢𑁆𑀢𑀭𑀺 𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀁, 𑀓𑀢𑁆𑀣𑀘𑀺 𑀪𑀽𑀫𑀺 𑀦𑀺𑀧𑀻𑀴𑀺𑀬𑀢𑀺. 𑀇𑀤𑀜𑁆𑀘 𑀧𑀜𑁆𑀘𑀫𑀁 𑀲𑀼𑀢𑁆𑀢𑀁. 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀤𑁂𑀲𑀺𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲 𑀅𑀲𑁂𑀓𑁆𑀔𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀲𑁆𑀲𑀦𑀪𑀸𑀕𑀺𑀬𑀁. 𑀪𑀸𑀯𑀦𑀸𑀪𑀸𑀕𑀺𑀬𑀁 𑀧𑀜𑁆𑀘𑀦𑁆𑀦𑀁 𑀲𑁂𑀓𑁆𑀔𑀸𑀦𑀁. 𑀬𑀁 𑀧𑀞𑀫𑀦𑀺𑀤𑁆𑀤𑀺𑀝𑁆𑀞𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀩𑁆𑀩𑁂𑀲𑀁 𑀅𑀭𑀳𑀦𑁆𑀢𑀸𑀦𑀁. 𑀲𑀸 𑀧𑀦 𑀧𑀜𑁆𑀘𑀯𑀺𑀥𑀸 𑀲𑀢𑁆𑀢𑀯𑀻𑀲𑀆𑀓𑀸𑀭𑁂 [𑀲𑀢𑁆𑀢𑀯𑀻𑀲𑀁 𑀆𑀓𑀸𑀭𑁂 (𑀧𑀻.)] 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀢𑀲𑁆𑀲 𑀕𑀢𑀻𑀦𑀁 𑀢𑀢𑁄 𑀉𑀢𑁆𑀢𑀭𑀺. 𑀢𑀜𑁆𑀘 𑀔𑁄 𑀲𑀗𑁆𑀔𑁂𑀧𑁂𑀦 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀧𑀢𑀢𑀺, 𑀬𑁂 𑀧𑀜𑁆𑀜𑀸𑀲 𑀆𑀓𑀸𑀭𑀸 𑀲𑀸𑀲𑀦𑁂 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀢𑀦𑁆𑀢𑀺. 𑀬𑁂 𑀅𑀭𑀺𑀬𑀲𑀘𑁆𑀘𑀁 𑀦𑀺𑀓𑁆𑀔𑁂𑀧𑁂𑀦 𑀞𑀺𑀢𑁂 𑀲𑀗𑁆𑀔𑀺𑀧𑀺𑀬𑀢𑁆𑀢𑀸 𑀅𑀝𑁆𑀞𑀲𑀼 𑀆𑀓𑀸𑀭𑁂𑀲𑀼 𑀧𑀢𑀦𑁆𑀢𑀺. 𑀘𑀢𑀽𑀲𑀼 𑀘 𑀲𑀸𑀥𑀸𑀭𑀡𑁂𑀲𑀼 𑀲𑀼𑀢𑁆𑀢𑁂𑀲𑀼 𑀬𑀸 𑀳𑀸𑀭𑀲𑀫𑁆𑀧𑀸𑀢𑀲𑁆𑀲 𑀪𑀽𑀫𑀺, 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀧𑀜𑁆𑀘𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂 𑀯𑀸𑀲𑀦𑀸𑀪𑀸𑀕𑀺𑀬𑁂 𑀪𑀸𑀯𑀦𑀸𑀪𑀸𑀕𑀺𑀬𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂 𑀯𑀸𑀲𑀦𑀸𑀪𑀸𑀕𑀺𑀬𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀫𑀸𑀦𑀸 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀪𑀸𑀕𑀺𑀬𑁂 𑀲𑁂𑀓𑁆𑀔𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀘 𑀧𑀼𑀩𑁆𑀩𑀬𑁄𑀕𑀪𑀸𑀕𑀺𑀬𑁂 𑀘. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀲𑀢𑁆𑀣𑀸 𑀧𑀼𑀩𑁆𑀩𑀬𑁄𑀕𑀲𑀫𑀦𑁆𑀦𑀸𑀕𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀫𑀜𑁆𑀜𑀫𑀸𑀦𑀸 𑀯𑀲𑀺𑀬𑀦𑁆𑀢𑀺 𑀧𑀼𑀩𑁆𑀩𑀬𑁄𑀕𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺 𑀲𑀦𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑀸𑀥𑀭𑀸𑀬. 𑀢𑀢𑁆𑀣 𑀧𑀜𑁆𑀜𑀸𑀯𑁂𑀫𑀢𑁆𑀢𑀢𑀁 𑀅𑀢𑁆𑀢𑀦𑁄 𑀲𑀫𑀦𑀼𑀧𑀲𑁆𑀲𑀫𑀸𑀦𑁂𑀦 𑀅𑀝𑁆𑀞𑀯𑀺𑀥𑁂 𑀲𑀼𑀢𑁆𑀢𑀲𑀗𑁆𑀔𑁂𑀧𑁂, 𑀬𑀢𑁆𑀣 𑀬𑀢𑁆𑀣 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀬𑁄𑀚𑁂𑀢𑁆𑀯𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀦 𑀳𑀺 𑀲𑀢𑀺 𑀯𑁂𑀤𑀦𑀸 𑀫𑀦𑁄 𑀥𑀸𑀭𑁂𑀢𑁆𑀯𑀸 𑀲𑀓𑁆𑀓𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀬𑀣𑀸𑀪𑀽𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀁.

𑀢𑀢𑁆𑀣 𑀧𑀼𑀭𑀺𑀫𑀓𑀸𑀦𑀁 𑀲𑀼𑀢𑁆𑀢𑀸𑀦𑀁 𑀇𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘;

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀳𑀸𑀦𑀸𑀫𑁄 𑀘 𑀲𑀸𑀓𑀺𑀬𑁄.

𑀉𑀤𑁆𑀥𑀁 𑀅𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀬𑀜𑁆𑀘 𑀲𑀻𑀮𑀓𑀺𑀫𑀢𑁆𑀣𑀺𑀬𑀸;

𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀉𑀧𑀢𑀺𑀲𑁆𑀲 𑀧𑀼𑀘𑁆𑀙𑀸𑀤𑀺𑀓𑀸.

𑀬𑀲𑁆𑀲 𑀓𑀸𑀬𑀕𑀢𑀸𑀲𑀢𑀺, 𑀙𑀦𑁆𑀦𑀁 𑀢𑀫𑁄𑀧𑀭𑀸𑀬𑀡𑁄;

𑀦 𑀢𑀁 𑀤𑀴𑁆𑀳𑀁 𑀘𑁂𑀢𑀲𑀺𑀓𑀁, 𑀅𑀬𑀁 𑀮𑁄𑀓𑁄𑀢𑀺𑀆𑀤𑀺𑀓𑀁.

𑀘𑀢𑁆𑀢𑀸𑀭𑁄 𑀘𑁂𑀯 𑀧𑀼𑀕𑁆𑀕𑀮𑀸, 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀺𑀢𑀁;

𑀲𑁄𑀢𑀸𑀦𑀼𑀕𑀢𑀥𑀫𑁆𑀫𑁂𑀲𑀼, 𑀇𑀫𑀸 𑀢𑁂𑀲𑀁 𑀉𑀤𑁆𑀤𑀸𑀦𑀕𑀸𑀣𑀸.

𑁨𑁨. 𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺?

𑀲𑀘𑁂 𑀪𑀸𑀬𑀣 [𑀉𑀤𑀸. 𑁪𑁪] 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀳𑀻’’𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸. ‘‘𑀲𑀻𑀮𑀯𑀦𑁆𑀢𑁂𑀦, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀦 𑀲𑀤𑀸 𑀓𑀭𑀡𑀻𑀬𑀸 𑀓𑀺𑀦𑁆𑀢𑀺𑀫𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀅𑀲𑁆𑀲𑀸’’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀡𑀢𑁆𑀢𑀺.

𑀢𑀢𑁆𑀣 𑀓𑀢𑀫𑀁 𑀨𑀮𑀁?

𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑀇𑀤𑀁 𑀨𑀮𑀁.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄?

‘‘𑀲𑀩𑁆𑀩𑁂 𑀥𑀫𑁆𑀫𑀸 [𑀥. 𑀧. 𑁨𑁭𑁯] 𑀅𑀦𑀢𑁆𑀢𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

‘‘𑀲𑀢𑁆𑀢𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑁄, 𑀪𑀺𑀓𑁆𑀔𑀼, 𑀅𑀧𑀺 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀘𑀸𑀮𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀙𑀯𑀁 𑀅𑀯𑀺𑀚𑁆𑀚𑀁 𑀲𑀢𑁆𑀢𑀓𑁂𑀲𑀼’’ 𑀯𑁂𑀬𑁆𑀬𑀸𑀓𑀭𑀡𑀁 𑀓𑀸𑀢𑀩𑁆𑀩𑀁. 𑀅𑀬𑀁 𑀉𑀧𑀸𑀬𑁄.

𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘?

𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

𑀲𑀘𑁂 𑀳𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑁄𑀣 𑀯𑀸 𑀓𑀭𑀺𑀲𑁆𑀲𑀣;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀸𑀢𑁆𑀣𑀺, 𑀉𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑀁 [𑀧𑀮𑀸𑀬𑀢𑁄 (𑀧𑀻.)].

𑀧𑀼𑀭𑀺𑀫𑀺𑀓𑀸𑀬 𑀕𑀸𑀣𑀸𑀬 𑀆𑀡𑀢𑁆𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀨𑀮𑀁. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀬𑀸 𑀘 𑀘𑀺𑀢𑁆𑀢𑀪𑀸𑀯𑀦𑀸 𑀬𑀸 𑀘 𑀧𑀜𑁆𑀜𑀸𑀪𑀸𑀯𑀦𑀸 𑀬𑀸 𑀘 𑀆𑀡𑀢𑁆𑀢𑀺 𑀭𑀸𑀕𑀯𑀺𑀭𑀸𑀕𑀸 𑀘 𑀨𑀮𑀁.

𑀢𑀢𑁆𑀣 𑀓𑀢𑀫𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘?

𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 [𑀲𑀁. 𑀦𑀺. 𑁧.𑁨𑁩] 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

𑀧𑀼𑀭𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀉𑀧𑀸𑀬𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀨𑀮𑀁. 𑀦𑀦𑁆𑀤𑀺𑀬𑁄 [𑀦𑀦𑁆𑀤𑀺𑀓𑁄 (𑀧𑀻. 𑀓.)] 𑀲𑀓𑁆𑀓𑁄 𑀇𑀲𑀺𑀯𑀼𑀢𑁆𑀣𑀧𑀼𑀭𑀺𑀭𑀺𑀓𑀸𑀫𑀏𑀓𑀭𑀓𑁆𑀔𑁂 [𑀇𑀲𑀺𑀯𑀼𑀢𑁆𑀢… (𑀧𑀻.)] 𑀲𑀼𑀢𑁆𑀢𑀁 𑀫𑀽𑀮𑀢𑁄 𑀉𑀧𑀸𑀤𑀸𑀬 𑀬𑀸𑀯 𑀙𑀲𑀼 𑀥𑀫𑁆𑀫𑁂𑀲𑀼. 𑀉𑀢𑁆𑀢𑀭𑀺 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀬𑀸𑀘𑀬𑁄𑀕𑁄 [𑀬𑁄 𑀘 𑀬𑁄𑀕𑁄 (𑀧𑀻.)] 𑀓𑀭𑀡𑀻𑀬𑁄, 𑀅𑀬𑀁 𑀉𑀧𑀸𑀬𑁄. 𑀅𑀲𑀳𑀕𑀢𑀲𑁆𑀲 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀫𑀼𑀘𑁆𑀘𑀢𑀻𑀢𑀺. 𑀲𑀩𑁆𑀩𑀸𑀲𑀼 𑀙𑀲𑀼 𑀢𑀻𑀲𑀼. 𑀅𑀬𑀁 𑀉𑀧𑀸𑀬𑁄 𑀘 𑀨𑀮𑀜𑁆𑀘.

𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘 𑀉𑀧𑀸𑀬𑁄 𑀘?

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀉𑀳𑀘𑁆𑀘 [𑀊𑀳𑀘𑁆𑀘 (𑀲𑀼. 𑀦𑀺. 𑁧𑁧𑁨𑁫)], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸.

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚𑀸’’𑀢𑀺 𑀆𑀡𑀢𑁆𑀢𑀺. ‘‘𑀲𑀤𑀸 𑀲𑀢𑁄’’𑀢𑀺 𑀉𑀧𑀸𑀬𑁄. ‘‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀉𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’𑀢𑀺 𑀨𑀮𑀁. 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀧𑀲𑁆𑀲𑀁 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸𑀧𑀺…𑀧𑁂… 𑀉𑀧𑀸𑀬𑀸𑀲𑁂𑀳𑀺𑀧𑀺 𑀇𑀥 𑀢𑀻𑀡𑀺𑀧𑀺’’.

𑁨𑁩. 𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄?

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺. 𑀅𑀬𑀁 𑀅𑀲𑁆𑀲𑀸𑀤𑁄.

‘‘𑀥𑀫𑁆𑀫𑀘𑀭𑀺𑀬𑀸 𑀲𑀫𑀘𑀭𑀺𑀬𑀸 𑀓𑀼𑀲𑀮𑀘𑀭𑀺𑀬𑀸 𑀳𑁂𑀢𑀽𑀳𑀺, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺’’. 𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

𑀓𑀸𑀫𑁂𑀲𑀼 𑀯𑁂 𑀳𑀜𑁆𑀜𑀢𑁂 𑀲𑀩𑁆𑀩𑀸 𑀫𑀼𑀘𑁆𑀘𑁂𑀯 𑁋 𑀅𑀬𑀁 𑀆𑀤𑀻𑀦𑀯𑁄. 𑀧𑀲𑁂𑀦𑀤𑀺𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑁂 𑀧𑀩𑁆𑀩𑀢𑁄𑀧𑀫𑀸 𑁋 𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀡𑁆𑀟𑀼𑀧𑀮𑀸𑀲𑁄 𑀲𑀦𑁆𑀦𑀺𑀧𑀮𑀸𑀲𑁄 𑁋 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘?

𑀬𑀸𑀦𑀺 [𑀚𑀸. 𑁧.𑁨.𑁧𑁪𑁪 𑀤𑀼𑀓𑀦𑀺𑀧𑀸𑀢𑁂] 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁.

𑀢𑀢𑁆𑀣 𑀬𑀁 𑀧𑀸𑀧𑀓𑀸𑀭𑀻 𑀧𑀘𑁆𑀘𑀦𑀼𑀪𑁄𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀮𑀸𑀪𑀸𑀮𑀸𑀪𑀅𑀝𑁆𑀞𑀓𑁂𑀲𑀼 𑀩𑁆𑀬𑀸𑀓𑀭𑀡𑀁, 𑀢𑀢𑁆𑀣 𑀅𑀮𑀸𑀪𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀤𑀼𑀓𑁆𑀔𑀁, 𑀅𑀬𑀁 𑀆𑀤𑀻𑀦𑀯𑁄. 𑀮𑀸𑀪𑁄 𑀬𑀲𑁄 𑀲𑀼𑀔𑀁 𑀧𑀲𑀁𑀲𑀸, 𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘‘𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀅𑀥𑀺𑀧𑁆𑀧𑀸𑀬𑁄 𑀘 𑀇𑀚𑁆𑀛𑀢𑀺;

𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀻’’𑀢𑀺.

𑀬𑁄 𑀘 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁 𑀬𑀸 𑀘 𑀅𑀥𑀺𑀧𑁆𑀧𑀸𑀬𑀲𑁆𑀲 𑀇𑀚𑁆𑀛𑀦𑀸, 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀺, 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀩𑀸𑀢𑁆𑀢𑀺𑀁𑀲𑀸𑀬 𑀘𑁂𑀯 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀳𑁄𑀦𑁆𑀢𑀺, 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀬𑀸𑀯 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀅𑀚𑁆𑀛𑀸𑀯𑀲𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀲𑀘𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺 𑀲𑀩𑁆𑀩𑁂𑀦 𑀑𑀖𑁂𑀦 [𑀑𑀲𑀥𑁂𑀦 (𑀧𑀻. 𑀓.)] 𑀦𑀺𑀲𑁆𑀲𑀭𑀡𑀁 𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

𑀆𑀤𑀸𑀦𑀲𑁆𑀲 [𑀆𑀤𑀺𑀦𑁆𑀦𑀲𑁆𑀲 (𑀓.)] 𑀪𑀬𑀁 𑀜𑀢𑁆𑀯𑀸, 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑀁;

𑀅𑀦𑀸𑀤𑀸𑀢𑀼𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀸.

𑀧𑀼𑀭𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁄 𑀆𑀤𑀻𑀦𑀯𑁄. 𑀅𑀦𑀸𑀤𑀸𑀢𑀼𑀁 𑀦𑀺𑀩𑁆𑀩𑀢𑁆𑀢𑀢𑀺 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀸𑀢𑀺 𑀦𑀺𑀲𑁆𑀲𑀭𑀡𑀁.

𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀬𑀫𑀺𑀤𑀁 𑀚𑀸𑀬𑀢𑁂 𑀘 𑀫𑀻𑀬𑀢𑁂 𑀘. 𑀬𑀸𑀯 𑀓𑀼𑀤𑀲𑁆𑀲𑀼𑀦𑀸𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀭𑀢𑁄 𑀯𑀸𑀢𑀺 𑀏𑀢𑁆𑀣 𑀬𑀸 𑀉𑀧𑀭𑀺𑀓𑁆𑀔𑀸, 𑀅𑀬𑀁 𑀆𑀤𑀻𑀦𑀯𑁄. 𑀬𑁄 𑀕𑁂𑀥𑀁 𑀜𑀢𑁆𑀯𑀸 𑀅𑀪𑀺𑀦𑀺𑀓𑁆𑀔𑀫𑀢𑀺 𑀬𑀸𑀯 𑀧𑀼𑀭𑀸𑀡𑀓𑀸𑀬 𑀭𑀸𑀚𑀥𑀸𑀦𑀺𑀬𑀸, 𑀇𑀤𑀁 𑀦𑀺𑀲𑁆𑀲𑀭𑀡𑀁. 𑀅𑀬𑀁 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀯𑀺𑀯𑀺𑀥𑀸 [𑀫𑀥𑀼𑀭𑀸 (𑀣𑁂𑀭𑀕𑀸. 𑁭𑁮𑁭)] 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀳𑀺 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀢𑀲𑁆𑀫𑀸 𑀅𑀳𑀁 [𑀣𑁂𑀭𑀕𑀸. 𑁭𑁮𑁭] 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄.

𑀬𑀁 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀯𑀺𑀯𑀺𑀥𑀸 𑀫𑀦𑁄𑀭𑀫𑀸’’𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 ‘‘𑀯𑀺𑀭𑀽𑀧𑀭𑀽𑀧𑁂𑀳𑀺 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀅𑀬𑀁 𑀆𑀤𑀻𑀦𑀯𑁄. 𑀬𑀁 𑀅𑀳𑀁 𑀅𑀕𑀸𑀭𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀩𑀮𑀯𑀁 𑀩𑀸𑀮𑁄𑀧𑀫𑀲𑀼𑀢𑁆𑀢𑀁 𑀬𑀁 𑀆𑀲𑀸𑀬 𑀯𑀸 𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀕𑀸𑀳𑀢𑀺, 𑀢𑀣𑀸 𑀘𑁂𑀧𑀺 𑀬𑀁 𑀬𑀁 𑀧𑀸𑀧𑀓𑀫𑁆𑀫𑀁 𑀅𑀦𑀼𑀪𑁄𑀢𑀺, 𑀢𑀢𑁆𑀣 𑀤𑀼𑀓𑁆𑀔𑀯𑁂𑀤𑀦𑀻𑀬𑁂𑀦 𑀓𑀫𑁆𑀫𑁂𑀦 𑀅𑀪𑀸𑀯𑀺𑀢𑀓𑀸𑀬𑁂𑀦 𑀘 𑀬𑀸𑀯 𑀧𑀭𑀺𑀢𑁆𑀢𑀘𑁂𑀢𑀲𑁄 𑀘 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺 𑀲𑀼𑀔𑀯𑁂𑀤𑀦𑀻𑀬𑁂𑀦 𑀓𑀫𑁆𑀫𑁂𑀦 𑀅𑀲𑁆𑀲𑀸𑀤𑁂𑀢𑀺. 𑀬𑀁 𑀧𑀼𑀭𑀸𑀲𑀤𑀺𑀲𑁄 𑀳𑁄𑀢𑀺. 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀧𑀜𑁆𑀜𑁄 𑀫𑀳𑀸𑀦𑀸𑀫𑁄 𑀅𑀧𑀭𑀺𑀢𑁆𑀢𑀘𑁂𑀢𑀲𑁄, 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑁨𑁪. 𑀢𑀢𑁆𑀣 𑀓𑀢𑀫𑀁 𑀮𑁄𑀓𑀺𑀓𑀁 𑀲𑀼𑀢𑁆𑀢𑀁?

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 [𑀪𑀲𑁆𑀫𑀸𑀙𑀦𑁆𑀦𑁄𑀯 (𑀓.) 𑀧𑀲𑁆𑀲 𑀥. 𑀧. 𑁭𑁧] 𑀧𑀸𑀯𑀓𑁄.

𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺, 𑀇𑀤𑀁 𑀮𑁄𑀓𑀺𑀓𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁?

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺 [𑀲𑀫𑀣𑀁 𑀕𑀢𑀸𑀦𑀺 (𑀧𑀻.) 𑀧𑀲𑁆𑀲 𑀥. 𑀧. 𑁯𑁪], 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀺𑀓𑀁 𑀮𑁄𑀓𑀼𑀢𑁆𑀢𑀭𑀜𑁆𑀘 𑀲𑀼𑀢𑁆𑀢𑀁?

𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀤𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀤𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂’’𑀢𑀺 𑀮𑁄𑀓𑀺𑀓𑀁;

‘‘𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀮𑁄𑀓𑀼𑀢𑁆𑀢𑀭𑀁;

𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀙𑀦𑁆𑀤𑁄𑀢𑀺 𑀮𑁄𑀓𑀺𑀓𑀁. 𑀦𑀢𑁆𑀣𑀺 𑀙𑀦𑁆𑀤𑁄𑀢𑀺 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀓𑀫𑁆𑀫𑀁?

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺 [𑀆𑀤𑀺𑀬𑀺 (𑀓.) 𑀧𑀲𑁆𑀲 𑀅. 𑀦𑀺. 𑁫.𑁧𑁭𑁪], 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺.

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺;

𑀅𑀧𑁆𑀧𑀳𑀸𑀬 𑀧𑀜𑁆𑀘 𑀯𑁂𑀭𑀸𑀦𑀺, 𑀤𑀼𑀲𑁆𑀲𑀻𑀮𑁄 𑀇𑀢𑀺 𑀯𑀼𑀘𑁆𑀘𑀢𑀺.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀇𑀤𑀁 𑀓𑀫𑁆𑀫𑀁.

𑀢𑀢𑁆𑀣 𑀓𑀢𑀫𑁄 𑀯𑀺𑀧𑀸𑀓𑁄?

𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀬𑀣𑀸𑀭𑀽𑀧𑀻 𑀯𑀺𑀧𑀘𑁆𑀘𑀕𑀸.

‘‘𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂 [𑀲𑀁. 𑀦𑀺. 𑁪.𑁧𑁩𑁫], 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀦𑀺𑀭𑀬𑀸. 𑀤𑀺𑀝𑁆𑀞𑀸 𑀫𑀬𑀸, 𑀪𑀺𑀓𑁆𑀔𑀯𑁂, 𑀙 𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀲𑀕𑁆𑀕𑀸’’. 𑀅𑀬𑀁 𑀯𑀺𑀧𑀸𑀓𑁄.

𑀢𑀢𑁆𑀣 𑀓𑀢𑀫𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘?

𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀢𑀢𑀼𑀝𑁆𑀞𑀸𑀬 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁, 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀬𑀸𑀯 𑀲𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀇𑀤𑀁 𑀓𑀫𑁆𑀫𑀁. 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀦𑁆𑀢𑀺 𑀯𑀺𑀧𑀸𑀓𑁄.

𑀘𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀫𑀸𑀢𑀭𑀺 𑀧𑀺𑀢𑀭𑀺 𑀢𑀣𑀸𑀕𑀢𑁂 𑀢𑀣𑀸𑀕𑀢𑀲𑀸𑀯𑀓𑁂 𑀬𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀇𑀤𑀁 𑀓𑀫𑁆𑀫𑀁. 𑀬𑀁 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀢𑀺, 𑀅𑀬𑀁 𑀯𑀺𑀧𑀸𑀓𑁄. 𑀇𑀤𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘.

𑁨𑁫. 𑀢𑀢𑁆𑀣 𑀓𑀢𑀫𑀁 𑀦𑀺𑀤𑁆𑀤𑀺𑀝𑁆𑀞𑀁 𑀲𑀼𑀢𑁆𑀢𑀁?

𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 [𑀯𑀢𑁆𑀢𑀢𑁂 (𑀓.) 𑀉𑀤𑀸. 𑁬𑁫] 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦𑀁;

𑀬𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀡𑁂𑀲𑀼, 𑀘𑀺𑀢𑁆𑀢𑀸𑀕𑀳𑀧𑀢𑀺 𑀤𑀺𑀲𑁆𑀲𑀢𑀺.

𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀣𑁄.

𑀕𑁄𑀧𑀸𑀮𑀓𑁄𑀧𑀫𑁂 𑀏𑀓𑀸𑀤𑀲 𑀧𑀤𑀸𑀦𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀜𑁆𑀜𑀽 𑀳𑁄𑀢𑀺. 𑀬𑀸 𑀘 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀻𑀢𑀺. 𑀇𑀫𑀸𑀦𑀺 𑀏𑀓𑀸𑀤𑀲 𑀧𑀤𑀸𑀦𑀺 𑀬𑀣𑀸𑀪𑀸𑀲𑀺𑀢𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀣𑁄.

𑀢𑀢𑁆𑀣 𑀓𑀢𑀫𑁄 𑀅𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀣𑁄?

𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄;

𑀅𑀩𑁆𑀬𑀸𑀧𑀚𑁆𑀚𑀁 [𑀅𑀩𑁆𑀬𑀸𑀧𑀚𑁆𑀛𑀁 (𑀧𑀻. 𑀓.) 𑀧𑀲𑁆𑀲 𑀉𑀤𑀸. 𑁧𑁧] 𑀲𑀼𑀔𑀁 𑀮𑁄𑀓𑁂, 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄𑀢𑀺.

𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂, 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄;

𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔𑀦𑁆𑀢𑀺.

𑀇𑀤𑀁 𑀅𑀦𑀺𑀤𑁆𑀤𑀺𑀝𑁆𑀞𑀁. 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸. 𑀇𑀤𑀁 𑀅𑀦𑀺𑀤𑁆𑀤𑀺𑀝𑁆𑀞𑀁.

𑀢𑀢𑁆𑀣 𑀓𑀢𑀫𑀁 𑀦𑀺𑀤𑁆𑀤𑀺𑀝𑁆𑀞𑀜𑁆𑀘 𑀅𑀦𑀺𑀤𑁆𑀤𑀺𑀝𑁆𑀞𑀜𑁆𑀘?

𑀧𑀲𑀦𑁆𑀦𑀦𑁂𑀢𑁆𑀢𑁄 [𑀲𑀼. 𑀦𑀺. 𑁫𑁫𑁫] 𑀲𑀼𑀫𑀼𑀔𑁄, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀫𑀚𑁆𑀛𑁂 𑀲𑀫𑀡𑀲𑀗𑁆𑀖𑀲𑁆𑀲, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀲𑀺.

𑀧𑀲𑀦𑁆𑀦𑀦𑁂𑀢𑁆𑀢𑁄 𑀬𑀸𑀯 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀲𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀧𑀲𑀦𑁆𑀦𑀦𑁂𑀢𑁆𑀢𑁄 𑀬𑁄 𑀪𑀕𑀯𑀸 𑀓𑀣𑀜𑁆𑀘 𑀧𑀦 𑀧𑀲𑀦𑁆𑀦𑀦𑁂𑀢𑁆𑀢𑀢𑀸, 𑀓𑀣𑀁 𑀲𑀼𑀫𑀼𑀔𑀢𑀸, 𑀓𑀣𑀁 𑀩𑁆𑀭𑀳𑀓𑀸𑀬𑀢𑀸, 𑀓𑀣𑀁 𑀉𑀚𑀼𑀓𑀢𑀸, 𑀓𑀣𑀁 𑀧𑀢𑀸𑀧𑀯𑀢𑀸, 𑀓𑀣𑀁 𑀯𑀺𑀭𑁄𑀘𑀢𑀸𑀢𑀺 𑀅𑀦𑀺𑀤𑁆𑀤𑀺𑀝𑁆𑀞𑁄. 𑀨𑁂𑀡𑀧𑀺𑀡𑁆𑀟𑁄𑀧𑀫𑀁 𑀯𑁂𑀬𑁆𑀬𑀸𑀓𑀭𑀡𑀁 𑀬𑀣𑀸 𑀨𑁂𑀡𑀧𑀺𑀡𑁆𑀟𑁄 𑀏𑀯𑀁 𑀭𑀽𑀧𑀁 𑀬𑀣𑀸 𑀧𑀼𑀩𑁆𑀩𑀼𑀴𑁄 𑀏𑀯𑀁 𑀯𑁂𑀤𑀦𑀸 𑀫𑀸𑀬𑀸 𑀯𑀺𑀜𑁆𑀜𑀸𑀡𑀁 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀜𑁆𑀘𑀳𑀺 𑀉𑀧𑀫𑀸𑀳𑀺 𑀦𑀺𑀤𑁆𑀤𑀺𑀝𑁆𑀞𑀸. 𑀓𑁂𑀦 𑀓𑀸𑀭𑀡𑁂𑀦 𑀨𑁂𑀡𑀧𑀺𑀡𑁆𑀟𑁄𑀧𑀫𑀁 𑀭𑀽𑀧𑀁 𑀲𑀩𑁆𑀩𑀜𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀬𑀁 𑀯𑀸 𑀘𑀢𑀽𑀳𑀺 𑀆𑀬𑀢𑀦𑁂𑀳𑀺? 𑀓𑀣𑀁 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀽𑀧𑀫𑀸? 𑀓𑀢𑀭𑀸 𑀘 𑀲𑀸 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸? 𑀏𑀯𑀫𑁂𑀲𑀸 𑀅𑀦𑀺𑀤𑁆𑀤𑀺𑀝𑁆𑀞𑀸. 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀜𑁆𑀘 𑀅𑀦𑀺𑀤𑁆𑀤𑀺𑀝𑁆𑀞𑀜𑁆𑀘.

𑁨𑁬. 𑀢𑀢𑁆𑀣 𑀓𑀢𑀫𑀁 𑀜𑀸𑀡𑀁?

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀬𑀸𑀬𑀁 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻;

𑀬𑀸𑀬 [𑀬𑀸𑀬𑀁 (𑀓.) 𑀧𑀲𑁆𑀲 𑀇𑀢𑀺𑀯𑀼. 𑁪𑁧] 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀁.

𑀢𑀻𑀡𑀺𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀇𑀤𑀁 𑀜𑀸𑀡𑀁.

𑀢𑀢𑁆𑀣 𑀓𑀢𑀫𑀁 𑀦𑁂𑀬𑁆𑀬𑀁?

𑀓𑀸𑀫𑁂𑀲𑀼 [𑀉𑀤𑀸. 𑁬𑁩] 𑀲𑀢𑁆𑀢𑀸 𑀓𑀸𑀫𑀲𑀗𑁆𑀕𑀲𑀢𑁆𑀢𑀸, 𑀲𑀁𑀬𑁄𑀚𑀦𑁂 𑀯𑀚𑁆𑀚𑀫𑀧𑀲𑁆𑀲𑀫𑀸𑀦𑀸;

𑀦 𑀳𑀺 𑀚𑀸𑀢𑀼 𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀸, 𑀑𑀖𑀁 𑀢𑀭𑁂𑀬𑁆𑀬𑀼𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁.

𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀤𑀸𑀦𑁂 𑀓𑀸𑀧𑀺𑀬𑀁 𑀲𑀼𑀢𑁆𑀢𑀁 𑀅𑀧𑀡𑁆𑀡𑀓𑀧𑀲𑀸𑀤𑀦𑀻𑀬𑀁 𑁋 𑀇𑀤𑀁 𑀦𑁂𑀬𑁆𑀬𑀁.

𑀢𑀢𑁆𑀣 𑀓𑀢𑀫𑀁 𑀜𑀸𑀡𑀜𑁆𑀘 𑀦𑁂𑀬𑁆𑀬𑀜𑁆𑀘?

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑀬𑀤𑀸 𑀧𑀲𑁆𑀲𑀢𑀻𑀢𑀺 𑀜𑀸𑀡𑀁. 𑀬𑁄 𑀲𑀩𑁆𑀩𑀥𑀫𑁆𑀫𑁂 𑀅𑀦𑀢𑁆𑀢𑀸𑀓𑀸𑀭𑁂𑀦 𑀉𑀧𑀝𑁆𑀞𑀧𑁂𑀢𑀺 𑀇𑀤𑀁 𑀦𑁂𑀬𑁆𑀬𑀁.

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀢𑀢𑁆𑀣 𑀢𑀻𑀡𑀺 𑀦𑁂𑀬𑁆𑀬𑀸𑀦𑀺 𑀫𑀕𑁆𑀕𑀲𑀘𑁆𑀘𑀁 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀘, 𑀇𑀤𑀁 𑀜𑀸𑀡𑀜𑁆𑀘 𑀦𑁂𑀬𑁆𑀬𑀜𑁆𑀘.

𑁨𑁭. 𑀢𑀢𑁆𑀣 𑀓𑀢𑀫𑀁 𑀤𑀲𑁆𑀲𑀦𑀁?

𑀏𑀲𑁂𑀯 𑀫𑀕𑁆𑀕𑁄 [𑀥. 𑀧. 𑁨𑁭𑁪 𑀥𑀫𑁆𑀫𑀧𑀤𑁂] 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸;

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀚𑁆𑀚𑀣, 𑀫𑀸𑀭𑀲𑁆𑀲𑁂𑀢𑀁 𑀧𑀫𑁄𑀳𑀦𑀁.

𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑀸𑀯 [𑀅𑀢𑁆𑀢𑀦𑀸𑀬𑁂𑀯 (𑀓.) 𑀲𑀁. 𑀦𑀺. 𑁫.𑁧𑁦𑁦𑁩] 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 ‘‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀬𑀸𑀯 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺. 𑀇𑀤𑀁 𑀤𑀲𑁆𑀲𑀦𑀁.

𑀢𑀢𑁆𑀣 𑀓𑀢𑀫𑀸 𑀪𑀸𑀯𑀦𑀸?

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀪𑀸𑀯𑀺𑀢𑀸𑀦𑀺, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀲𑁄 𑀧𑀼𑀕𑁆𑀕𑀮𑁄 𑀫𑀢𑀺 𑀘 𑀭𑀽𑀧𑀲𑀜𑁆𑀜𑀻, 𑀲𑀼𑀫𑁄𑀳𑀕𑀢𑀸 𑀦 𑀚𑀸𑀦𑀸𑀢𑀺 [𑀓𑀺𑀁𑀲𑀼 𑀫𑁄𑀳𑀕𑀢𑀸𑀦𑀼 𑀚𑀸𑀦𑀸𑀢𑀺 (𑀓.)].

𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑁋 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀪𑀸𑀯𑀦𑀸.

𑀢𑀢𑁆𑀣 𑀓𑀢𑀫𑀁 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘?

𑀯𑀘𑀲𑀸 𑀫𑀦𑀲𑀸𑀣 𑀓𑀫𑁆𑀫𑀼𑀦𑀸 𑀘, 𑀅𑀯𑀺𑀭𑀼𑀤𑁆𑀥𑁄 𑀲𑀫𑁆𑀫𑀸 𑀯𑀺𑀤𑀺𑀢𑁆𑀯𑀸 [𑀯𑀺𑀤𑀺𑀢𑁆𑀯𑀸𑀦 (𑀓.) 𑀲𑀼. 𑀦𑀺. 𑁩𑁬𑁭] 𑀥𑀫𑁆𑀫𑀁;

𑀦𑀺𑀩𑁆𑀩𑀸𑀦𑀧𑀤𑀸𑀪𑀺𑀧𑀢𑁆𑀣𑀬𑀸𑀦𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀸𑀢𑀼𑀓𑀸𑀫𑁂𑀦 𑀓𑀢𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀪𑀕𑀯𑀸 𑀆𑀳 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀇𑀤𑀁 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘.

𑁨𑁮. 𑀢𑀢𑁆𑀣 𑀓𑀢𑀫𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸?

𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀘𑀭𑀺𑀢𑀸𑀦𑀺. 𑀇𑀫𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸.

𑀢𑀢𑁆𑀣 𑀓𑀢𑀫𑁂 𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸?

𑀭𑀽𑀧𑀁 𑀯𑁂𑀤𑀬𑀺𑀢𑀁 𑀲𑀜𑁆𑀜𑀸, 𑀯𑀺𑀜𑁆𑀜𑀸𑀡𑀁 𑀬𑀸 𑀘𑁂𑀯 𑀘𑁂𑀢𑀦𑀸;

𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸, 𑀇𑀢𑀺 𑀤𑀺𑀝𑁆𑀞𑁄 𑀯𑀺𑀭𑀚𑁆𑀚𑀢𑀺.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀔𑀦𑁆𑀥𑀸 𑁋 𑀇𑀫𑁂 𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸.

𑀢𑀢𑁆𑀣 𑀓𑀢𑀫𑁄 𑀦𑁂𑀯𑀯𑀺𑀧𑀸𑀓𑁄 𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄?

‘‘𑀬𑁂 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦𑀬𑀁 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀓𑀸’’𑀢𑀺.

𑀇𑀢𑀺 𑀬𑀸 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀬𑁄 𑀘 𑀦𑀺𑀭𑁄𑀥𑁄, 𑀉𑀪𑀬𑀫𑁂𑀢𑀁 𑀦𑁂𑀯𑀯𑀺𑀧𑀸𑀓𑁄 𑀦𑀯𑀺𑀧𑀸𑀓𑀥𑀫𑁆𑀫𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀩𑁆𑀭𑀳𑁆𑀫𑀘𑀭𑀺𑀬𑀨𑀮𑀸𑀦𑀺 𑀘 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀨𑀮𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀬𑀸𑀯 𑀅𑀭𑀳𑀢𑁆𑀢𑀁.

𑁨𑁯. 𑀢𑀢𑁆𑀣 𑀓𑀢𑀫𑀁 𑀲𑀓𑀯𑀘𑀦𑀁?

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺. 𑀇𑀤𑀁 𑀲𑀓𑀯𑀘𑀦𑀁.

𑀢𑀢𑁆𑀣 𑀓𑀢𑀫𑀁 𑀧𑀭𑀯𑀘𑀦𑀁?

𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀕𑁄𑀡𑀲𑀫𑀺𑀢𑀁 𑀥𑀦𑀁;

𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 𑀆𑀪𑀸, 𑀲𑀫𑀼𑀤𑁆𑀤𑀧𑀭𑀫𑀸 𑀲𑀭𑀸.

𑀳𑁂𑀢𑀼𑀦𑀸 𑀫𑀸𑀭𑀺𑀲𑀸 𑀓𑁄𑀲𑀺𑀬𑀸 𑀲𑀼𑀪𑀸𑀲𑀺𑀢𑁂𑀦 𑀲𑀗𑁆𑀕𑀸𑀫𑀯𑀺𑀚𑀬𑁄 𑀲𑁄𑀧𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀇𑀤𑀁 𑀧𑀭𑀯𑀘𑀦𑀁.

𑀢𑀢𑁆𑀣 𑀓𑀢𑀫𑀁 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘?

‘‘𑀬𑀁 𑀧𑀢𑁆𑀢𑀁 𑀬𑀜𑁆𑀘 𑀧𑀢𑁆𑀢𑀩𑁆𑀩𑀁, 𑀉𑀪𑀬𑀫𑁂𑀢𑀁 𑀭𑀚𑀸𑀦𑀼𑀓𑀺𑀡𑁆𑀡𑀁;

𑀬𑁂 𑀏𑀯𑀁𑀯𑀸𑀤𑀺𑀦𑁄 𑀦𑀢𑁆𑀣𑀺, 𑀢𑁂𑀲𑀁 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺.

𑀇𑀤𑀁 𑀧𑀭𑀯𑀘𑀦𑀁. 𑀬𑁂 𑀘 𑀔𑁄 𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬. 𑀇𑀤𑀁 𑀲𑀓𑀯𑀘𑀦𑀁.

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 𑀕𑁄𑀳𑀺 [𑀪𑁄𑀕𑀺𑀓𑁄 𑀪𑁄𑀕𑁂𑀳𑀺 (𑀧𑀻.) 𑀲𑀁. 𑀦𑀺. 𑁧.𑁧𑁨] 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺 𑁋 𑀧𑀭𑀯𑀘𑀦𑀁.

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺 𑁋 𑀲𑀓𑀯𑀘𑀦𑀁.

𑀇𑀤𑀁 𑀲𑀓𑀯𑀘𑀦𑀁 𑀧𑀭𑀯𑀘𑀦𑀜𑁆𑀘.

𑁩𑁦. 𑀢𑀢𑁆𑀣 𑀓𑀢𑀫𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁?

𑀬𑁂 𑀓𑁂𑀘𑀺 𑀪𑀽𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀬𑁂 𑀯𑀸𑀧𑀺, 𑀲𑀩𑁆𑀩𑁂 𑀕𑀫𑀺𑀲𑁆𑀲𑀦𑁆𑀢𑀺 𑀧𑀳𑀸𑀬 𑀤𑁂𑀳𑀁;

𑀢𑀁 𑀲𑀩𑁆𑀩𑀚𑀸𑀦𑀺𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸, 𑀥𑀫𑁆𑀫𑁂 [𑀆𑀢𑀸𑀧𑀺𑀬𑁄 (𑀉𑀤𑀸. 𑁪𑁨)] 𑀞𑀺𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬.

𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸𑀭𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑁂𑀓𑁆𑀔𑁄 𑀧𑀝𑀺𑀧𑀤𑁄. 𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁?

𑀬𑀜𑁆𑀘 𑀓𑀸𑀫𑀲𑀼𑀔𑀁 [𑀉𑀤𑀸. 𑁧𑁨] 𑀮𑁄𑀓𑁂, 𑀬𑀜𑁆𑀘𑀺𑀤𑀁 𑀤𑀺𑀯𑀺𑀬𑀁 𑀲𑀼𑀔𑀁;

𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑁆𑀲𑁂𑀢𑁂, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸, 𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘? 𑀤𑀼𑀤𑁆𑀤𑀲𑀫𑀦𑁆𑀢𑀁 𑀲𑀘𑁆𑀘𑀁 𑀤𑀼𑀤𑁆𑀤𑀲𑁄 𑀧𑀝𑀺𑀯𑁂𑀥𑁄 𑀩𑀸𑀮𑁂𑀳𑀺, 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀦𑀦𑁆𑀤𑀻𑀢𑀺 𑀯𑀤𑀸𑀫𑀺. 𑀤𑀼𑀤𑁆𑀤𑀲𑀫𑀦𑁆𑀢𑀁 𑀲𑀘𑁆𑀘𑀁 𑀤𑀼𑀤𑁆𑀤𑀲𑁄 𑀧𑀝𑀺𑀯𑁂𑀥𑁄 𑀩𑀸𑀮𑁂𑀳𑀻𑀢𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀦𑀦𑁆𑀤𑀻𑀢𑀺 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁. 𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀁 𑀕𑀗𑁆𑀕𑀸𑀬 𑀢𑀻𑀭𑀺𑀬𑀸 𑀑𑀭𑀺𑀫𑀜𑁆𑀘 𑀢𑀻𑀭𑀁 𑀧𑀸𑀭𑀺𑀫𑀜𑁆𑀘 𑀢𑀻𑀭𑀁 𑀣𑀮𑁂 𑀯𑀸 [𑀣𑀮𑁂𑀯 𑀘 (𑀓.) 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀦 𑀘 𑀉𑀲𑁆𑀲𑀻𑀤𑀦𑀁, 𑀫𑀚𑁆𑀛𑁂 𑀘 𑀦 𑀲𑀁𑀲𑀻𑀤𑀦𑀁 𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀘 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀘 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄 𑀘, 𑀇𑀤𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀏𑀯𑀁 𑀧𑀦 𑀪𑀺𑀓𑁆𑀔𑀼 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄 𑀪𑀯𑀺𑀲𑁆𑀲𑀢𑀺 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑁄𑀢𑀺 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁. 𑀇𑀤𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀣𑀯𑁄?

𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀸𑀦𑀺 𑁋 𑀩𑀼𑀤𑁆𑀥𑁄 𑀲𑀢𑁆𑀢𑀸𑀦𑀁, 𑀯𑀺𑀭𑀸𑀕𑁄 𑀥𑀫𑁆𑀫𑀸𑀦𑀁, 𑀲𑀗𑁆𑀖𑁄 𑀕𑀡𑀸𑀦𑀁. 𑀅𑀬𑀁 𑀣𑀯𑁄.

𑁩𑁧. 𑀢𑀢𑁆𑀣 𑀓𑀢𑀫𑀁 𑀅𑀦𑀼𑀜𑁆𑀜𑀸𑀢𑀁?

𑀓𑀸𑀬𑁂𑀦 [𑀥. 𑀧. 𑁩𑁬𑁧] 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

𑀇𑀤𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀭𑀡𑀻𑀬𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁. 𑀇𑀤𑀁 𑀅𑀦𑀼𑀜𑁆𑀜𑀸𑀢𑀁.

𑀢𑀢𑁆𑀣 𑀓𑀢𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀁?

𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁. 𑀯𑀺𑀢𑁆𑀣𑀸𑀭𑁄 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀓𑀭𑀡𑀻𑀬𑀸𑀦𑀺 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀤𑁂𑀲𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀇𑀤𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘?

𑀓𑀸𑀬𑁂𑀦 𑀓𑀼𑀲𑀮𑀁 𑀓𑀭𑁂, 𑀅𑀲𑁆𑀲 𑀓𑀸𑀬𑁂𑀦 𑀲𑀁𑀯𑀼𑀢𑁄;

𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀓𑀸𑀬𑀲𑀼𑀘𑀭𑀺𑀢𑀁 𑀘𑀭𑁂.

𑀤𑁆𑀯𑀻𑀳𑀺 𑀧𑀞𑀫𑀧𑀤𑁂𑀳𑀺 𑀘𑀢𑀼𑀢𑁆𑀣𑁂𑀦 𑀘 𑀧𑀤𑁂𑀦 𑀅𑀦𑀼𑀚𑀸𑀦𑀸𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸𑀢𑀺 𑀢𑀢𑀺𑀬𑁂𑀦 𑀧𑀤𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀫𑀳𑀸𑀯𑀺𑀪𑀗𑁆𑀕𑁄 𑀅𑀘𑀺𑀭𑀢𑀧𑀸𑀦𑀸𑀤𑁄.

𑀢𑀢𑁆𑀣𑀺𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀲𑀘𑁂 𑀪𑀸𑀬𑀲𑀺 𑀤𑀼𑀓𑁆𑀔𑀲𑁆𑀲, 𑀫𑀸𑀪𑀺𑀦𑀦𑁆𑀤𑀺 𑀅𑀦𑀸𑀕𑀢𑀁;

𑀯𑀲𑁆𑀲𑀓𑀸𑀮𑁂 𑀬𑀣𑀸 𑀙𑀢𑁆𑀢𑀁, 𑀓𑀼𑀲𑀮𑀸𑀦𑀺 𑀓𑀫𑀢𑁆𑀣𑀓𑁂.

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀲𑀫𑀸𑀕𑀢𑀁 𑀯𑀺𑀘𑀸𑀮𑀬𑁂;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀸𑀢𑁆𑀣𑀺, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸.

𑀓𑀸𑀫𑀘𑁆𑀙𑀦𑁆𑀤𑀁 𑀉𑀧𑀸𑀤𑀸𑀬, 𑀬𑁄 𑀲𑁄 𑀯𑀺𑀢𑀓𑁆𑀓𑁂𑀳𑀺 𑀔𑀚𑁆𑀚𑀢𑀺;

𑀲𑀼𑀪𑀸𑀯𑀺𑀢𑀢𑁆𑀢𑁂 𑀩𑁄𑀚𑁆𑀛𑀗𑁆𑀕𑁂, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀲𑀫𑀸𑀥𑀺𑀪𑀸𑀯𑀺 𑀪𑀸𑀯𑀲𑁂;

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀥𑀫𑁆𑀫𑀘𑀭𑀺𑀬𑀸𑀬 𑀲𑀼𑀕𑀢𑀺𑀁.

𑀳𑀜𑁆𑀜𑀢𑁂 𑀲𑀩𑁆𑀩𑀸 𑀫𑀼𑀘𑁆𑀘𑁂𑀯, 𑀦𑀺𑀧𑁆𑀧𑁄𑀞𑁂𑀦𑁆𑀢𑁄 𑀘𑀢𑀼𑀤𑁆𑀤𑀺𑀲𑀸;

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀧𑀸𑀭𑀺𑀙𑀢𑁆𑀢𑁄𑀧𑀫𑁂𑀯 𑀘.

𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀮𑁄𑀓𑀥𑀫𑁆𑀫𑀸 𑀧𑀓𑀸𑀲𑀺𑀢𑀸;

𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀢𑀢𑀺𑀬𑀁 𑀅𑀜𑁆𑀜𑀁 𑀦 𑀯𑀺𑀚𑁆𑀚𑀢𑀺.

𑀆𑀤𑀸𑀦𑀲𑁆𑀲 𑀪𑀬𑀁 𑀜𑀢𑁆𑀯𑀸, 𑀚𑀸𑀬𑀢𑁂 𑀚𑀻𑀬𑀢𑁂𑀧𑀺 𑀘;

𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀯𑀺𑀯𑀺𑀥𑀸, 𑀅𑀣 𑀮𑁄𑀡𑀲𑀮𑁆𑀮𑁄𑀧𑀫𑀁.

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀅𑀕𑀢𑀻𑀳𑀺 𑀘 𑀕𑀘𑁆𑀙𑀢𑀺;

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺, 𑀢𑀣𑁂𑀯 𑀧𑀜𑁆𑀘𑀜𑀸𑀡𑀺𑀓𑁄.

𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀯𑀺𑀜𑁆𑀜𑀸𑀡𑀜𑁆𑀘 𑀧𑀢𑀺𑀝𑁆𑀞𑀺𑀢𑀸;

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘.

𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀔𑀡𑀁 𑀮𑀤𑁆𑀥𑀸𑀦 𑀤𑀼𑀮𑁆𑀮𑀪𑀁;

𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁, 𑀘𑀢𑀽𑀲𑀼 𑀧𑀝𑀺𑀧𑀢𑁆𑀢𑀺𑀲𑀼.

𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀅𑀣 𑀕𑁄𑀧𑀸𑀮𑀓𑁄𑀧𑀫𑀁;

𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀯𑀺𑀢𑀓𑁆𑀓𑀸 𑀘 𑀲𑀼𑀤𑁂𑀲𑀺𑀢𑀸.

𑀨𑁂𑀡𑀧𑀺𑀡𑁆𑀟𑁄𑀧𑀫𑀁 𑀭𑀽𑀧𑀁, 𑀩𑁆𑀭𑀳𑀸 𑀉𑀚𑀼 𑀧𑀢𑀸𑀧𑀯𑀸;

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀅𑀦𑀜𑁆𑀜𑀸 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺.

𑀓𑀸𑀫𑁂𑀲𑀼 𑀲𑀢𑁆𑀢𑀸 𑀓𑀸𑀫𑀲𑀗𑁆𑀕𑀲𑀢𑁆𑀢𑀸, 𑀅𑀣 𑀯𑀡𑁆𑀡𑁄 𑀭𑀳𑀲𑁆𑀲𑀯𑀸;

𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀅𑀭𑀺𑀬𑀲𑀘𑁆𑀘𑀜𑁆𑀘 𑀤𑁂𑀲𑀺𑀢𑀁.

𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀲𑁄𑀢𑀸𑀧𑀦𑁆𑀦𑁄𑀢𑀺 𑀩𑁆𑀬𑀸𑀓𑀭𑁂;

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀪𑀸𑀯𑀺𑀢𑀸𑀦𑀺, 𑀅𑀣 𑀥𑀫𑁆𑀫𑀧𑀤𑁂𑀳𑀺 𑀘.

𑀯𑀘𑀲𑀸 𑀫𑀦𑀲𑀸 𑀘𑁂𑀯, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀢𑁄;

𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀘.

𑀭𑀽𑀧𑀁 𑀯𑁂𑀤𑀬𑀺𑀢𑀁 𑀲𑀜𑁆𑀜𑀸, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀓𑀸𑀲𑀺𑀢𑀸;

𑀬𑁄 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀩𑁆𑀭𑀳𑁆𑀫𑀸 𑀘𑁂𑀯 𑀨𑀮𑀸𑀦𑀺 𑀘.

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀯𑀺𑀫𑁄𑀓𑁆𑀔𑀸 𑀢𑀁 𑀳𑀺 𑀤𑁂𑀲𑀺𑀢𑀸;

𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁, 𑀤𑁂𑀯𑀸𑀦𑀁 𑀅𑀲𑀼𑀭𑀸𑀦 𑀘.

𑀬𑀁 𑀧𑀢𑁆𑀢𑀁 𑀬𑀜𑁆𑀘 𑀧𑀢𑁆𑀢𑀩𑁆𑀩𑀁, 𑀦𑀦𑁆𑀤𑀢𑀺 𑀲𑁄𑀘𑀢𑀺 𑀦𑀺𑀘𑁆𑀘𑀁;

𑀬𑁂 𑀓𑁂𑀘𑀺 𑀪𑀽𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀢𑁆𑀣𑀸𑀭𑁄 𑀘 𑀧𑀓𑀸𑀲𑀺𑀢𑀸.

𑀬𑀜𑁆𑀘 𑀓𑀸𑀫𑀲𑀼𑀔𑀁 𑀮𑁄𑀓𑁂, 𑀩𑁄𑀚𑁆𑀛𑀗𑁆𑀕𑀸 𑀘 𑀲𑀼𑀤𑁂𑀲𑀺𑀢𑀸;

𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀢𑀬𑁄 𑀘 𑀅𑀕𑁆𑀕𑀧𑀢𑁆𑀢𑀺𑀬𑁄.

𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀓𑀭𑀡𑀻𑀬𑀜𑁆𑀘 𑀤𑁂𑀲𑀺𑀢𑀁;

𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁, 𑀅𑀭𑀺𑀬𑀸 𑀢𑀻𑀡𑀺 𑀘 𑀤𑁂𑀲𑀺𑀢𑀸.

𑀓𑀸𑀬𑁂𑀦 𑀓𑀼𑀲𑀮𑀁 𑀅𑀪𑀺𑀭𑀢𑁄, 𑀯𑀺𑀦𑀬𑀜𑁆𑀘 𑀓𑀸𑀫𑀲𑀼𑀔𑀁 𑀮𑁄𑀓𑁂;

𑀩𑁄𑀚𑁆𑀛𑀗𑁆𑀕𑀸 𑀘 𑀲𑀼𑀤𑁂𑀲𑀺𑀢𑀸, 𑀤𑀼𑀤𑁆𑀤𑀲𑀁 𑀅𑀦𑀢𑀁 𑀘𑁂𑀯 𑀧𑀭𑀸𑀧𑀭𑀁 𑀘;

𑀧𑁂𑀝𑀓𑁄𑀧𑀤𑁂𑀲𑁂 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑀁 𑀦𑀸𑀫 𑀤𑀼𑀢𑀺𑀬𑀪𑀽𑀫𑀺 𑀲𑀫𑀢𑁆𑀢𑀸.

𑁩. 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀢𑀢𑀺𑀬𑀪𑀽𑀫𑀺

𑁩𑁨. 𑀢𑀢𑁆𑀣 𑀓𑀢𑀫𑀁 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀁?

𑀮𑁄𑀪𑀸𑀥𑀺𑀝𑁆𑀞𑀸𑀦𑀁 𑀤𑁄𑀲𑀸𑀥𑀺𑀝𑁆𑀞𑀸𑀦𑀁 𑀫𑁄𑀳𑀸𑀥𑀺𑀝𑁆𑀞𑀸𑀦𑀁 𑀅𑀮𑁄𑀪𑀸𑀥𑀺𑀝𑁆𑀞𑀸𑀦𑀁 𑀅𑀤𑁄𑀲𑀸𑀥𑀺𑀝𑁆𑀞𑀸𑀦𑀁 𑀅𑀫𑁄𑀳𑀸𑀥𑀺𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀯𑀸𑀘𑀸𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀫𑀦𑁄𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀲𑀢𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀪𑀸𑀥𑀺𑀝𑁆𑀞𑀸𑀦𑀁?

𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲 [𑀯𑀺𑀢𑀓𑁆𑀓𑀦𑀺𑀫𑁆𑀫𑀣𑀺𑀢𑀲𑁆𑀲 (𑀓.) 𑀥. 𑀧. 𑁩𑁪𑁯] 𑀚𑀦𑁆𑀢𑀼𑀦𑁄, 𑀢𑀺𑀩𑁆𑀩𑀭𑀸𑀕𑀲𑁆𑀲 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺, 𑀏𑀲 𑀔𑁄 𑀕𑀸𑀴𑁆𑀳𑀁 𑀓𑀭𑁄𑀢𑀺 𑀩𑀦𑁆𑀥𑀦𑀁.

𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲𑀸𑀢𑀺 𑀓𑀸𑀫𑀭𑀸𑀕𑁄. 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀓𑀸𑀫𑀭𑀸𑀕𑀯𑀢𑁆𑀣𑀼. 𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻𑀢𑀺 𑀓𑀸𑀫𑀢𑀡𑁆𑀳𑀸. 𑀏𑀲 𑀕𑀸𑀴𑁆𑀳𑀁 𑀓𑀭𑁄𑀢𑀺 𑀩𑀦𑁆𑀥𑀦𑀦𑁆𑀢𑀺 𑀭𑀸𑀕𑀁, 𑀇𑀢𑀺 𑀬𑁄 𑀬𑁄 𑀥𑀫𑁆𑀫𑁄 𑀫𑀽𑀮𑀦𑀺𑀓𑁆𑀔𑀺𑀢𑁆𑀢𑁄, 𑀲𑁄 𑀬𑁂𑀯𑁂𑀢𑁆𑀣 𑀥𑀫𑁆𑀫𑁄 𑀉𑀕𑁆𑀕𑀸𑀯𑀳𑀺𑀢𑀩𑁆𑀩𑁄 [𑀉𑀕𑁆𑀕𑀸𑀧𑀬𑀺𑀢𑀩𑁆𑀩𑁄 (𑀧𑀻. 𑀓.)]. 𑀦 𑀪𑀕𑀯𑀸 𑀏𑀓𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀅𑀜𑁆𑀜𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀲𑁆𑀲 𑀯𑀺𑀢𑀓𑁆𑀓𑁂𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀢𑀫𑁂𑀯 𑀯𑀺𑀢𑀓𑁆𑀓𑀁 𑀓𑀸𑀫𑀯𑀺𑀢𑀓𑁆𑀓𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀢𑀺𑀩𑁆𑀩𑀭𑀸𑀕𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀯𑀺𑀢𑀓𑁆𑀓𑀲𑁆𑀲 𑀯𑀢𑁆𑀣𑀼𑀁 𑀦𑀺𑀤𑁆𑀤𑀺𑀲𑀢𑀺. 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻𑀢𑀺 𑀢𑀫𑁂𑀯 𑀭𑀸𑀕𑀁 𑀓𑀸𑀫𑀢𑀡𑁆𑀳𑀸𑀢𑀺 𑀦𑀺𑀤𑁆𑀤𑀺𑀲𑀢𑀺. 𑀏𑀲 𑀕𑀸𑀴𑁆𑀳𑀁 𑀓𑀭𑁄𑀢𑀺 𑀩𑀦𑁆𑀥𑀦𑀦𑁆𑀢𑀺 𑀢𑀫𑁂𑀯 𑀢𑀡𑁆𑀳𑀸𑀲𑀁𑀬𑁄𑀚𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀏𑀯𑀁 𑀕𑀸𑀣𑀸𑀲𑀼 𑀅𑀦𑀼𑀫𑀺𑀦𑀺𑀢𑀩𑁆𑀩𑀁. 𑀏𑀯𑀁 𑀲𑀯𑁂𑀬𑁆𑀬𑀸𑀓𑀭𑀡𑁂𑀲𑀼.

𑀢𑀢𑁆𑀣 𑀪𑀕𑀯𑀸 𑀏𑀓𑀁 𑀥𑀫𑁆𑀫𑀁 𑀢𑀺𑀯𑀺𑀥𑀁 𑀦𑀺𑀤𑁆𑀤𑀺𑀲𑀢𑀺, 𑀦𑀺𑀲𑁆𑀲𑀦𑁆𑀤𑀢𑁄 𑀳𑁂𑀢𑀼𑀢𑁄 𑀨𑀮𑀢𑁄.

𑀤𑀤𑀁 𑀧𑀺𑀬𑁄 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽, 𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺 𑀬𑀲𑁄 𑀘 𑀯𑀟𑁆𑀠𑀢𑀺;

𑀅𑀫𑀗𑁆𑀓𑀼𑀪𑀽𑀢𑁄 𑀧𑀭𑀺𑀲𑀁 𑀯𑀺𑀕𑀸𑀳𑀢𑀺, 𑀯𑀺𑀲𑀸𑀭𑀤𑁄 𑀳𑁄𑀢𑀺 𑀦𑀭𑁄 𑀅𑀫𑀘𑁆𑀙𑀭𑀻.

𑀤𑀤𑀦𑁆𑀢𑀺 𑀬𑀁 𑀬𑀁 𑀤𑀸𑀦𑀁, 𑀇𑀤𑀁 𑀤𑀸𑀦𑀫𑀬𑀺𑀓𑀁 𑀧𑀼𑀜𑁆𑀜𑀓𑁆𑀭𑀺𑀬𑀁. 𑀢𑀢𑁆𑀣 𑀳𑁂𑀢𑀼. 𑀬𑀁 𑀘𑁂𑀢𑀁. 𑀪𑀚𑀦𑁆𑀢𑀺 𑀦𑀁 𑀩𑀳𑀽, 𑀓𑀺𑀢𑁆𑀢𑀺𑀦𑁆𑀢𑀺 𑀬𑁄 𑀘 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀮𑁄𑀓𑁂 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀬𑀁 𑀩𑀳𑀼𑀓𑀲𑁆𑀲 𑀚𑀦𑀲𑁆𑀲 𑀧𑀺𑀬𑁄 𑀪𑀯𑀢𑀺 𑀫𑀦𑀸𑀧𑁄 𑀘. 𑀬𑀜𑁆𑀘 𑀅𑀯𑀺𑀧𑁆𑀧𑀝𑀺𑀲𑀸𑀭𑀻 𑀓𑀸𑀮𑀗𑁆𑀓𑀭𑁄𑀢𑀺 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀢𑀻𑀢𑀺 𑀇𑀤𑀁 𑀨𑀮𑀁. 𑀇𑀤𑀁 𑀮𑁄𑀪𑀸𑀥𑀺𑀝𑁆𑀞𑀸𑀦𑀁.

𑁩𑁩. 𑀢𑀢𑁆𑀣 𑀓𑀢𑀫𑀁 𑀤𑁄𑀲𑀸𑀥𑀺𑀝𑁆𑀞𑀸𑀦𑀁?

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺;

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺 [𑀅𑀪𑀺𑀕𑀺𑀚𑁆𑀛𑀢𑀺 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁫.𑁧𑁭𑁪].

𑀅𑀧𑁆𑀧𑀳𑀸𑀬 𑀧𑀜𑁆𑀘 𑀯𑁂𑀭𑀸𑀦𑀺, 𑀤𑀼𑀲𑁆𑀲𑀻𑀮𑁄 𑀇𑀢𑀺 𑀯𑀼𑀘𑁆𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀻𑀢𑀺 𑀤𑀼𑀝𑁆𑀞𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺. 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀻𑀢𑀺 𑀤𑁄𑀲𑁄𑀧𑀖𑀸𑀢𑀸𑀬 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺. 𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀤𑁄𑀲𑁄 𑀦𑀺𑀤𑀸𑀦𑀁. 𑀬𑁄 𑀘 𑀲𑀼𑀭𑀸𑀫𑁂𑀭𑀬𑀧𑀸𑀦𑀁 𑀅𑀦𑀼𑀬𑀼𑀜𑁆𑀚𑀢𑀺 𑀬𑀣𑀸𑀧𑀭𑀤𑀸𑀭𑀯𑀺𑀳𑀸𑀭𑀻 [𑀬𑀣𑀸𑀧𑀫𑀼𑀤𑀺𑀢𑀯𑀺𑀳𑀸𑀭𑀻 (𑀓.)] 𑀅𑀫𑀺𑀢𑁆𑀢𑀸 𑀚𑀦𑀬𑀦𑁆𑀢𑀺.

𑀧𑀜𑁆𑀘 𑀯𑁂𑀭𑀸𑀦𑀺 𑀅𑀧𑁆𑀧𑀳𑀸𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀸𑀧𑀤𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀁 𑀲𑀩𑁆𑀩𑁂𑀲𑀁 𑀤𑁄𑀲𑀚𑀸𑀦𑀁 𑀲𑀸 𑀧𑀡𑁆𑀡𑀢𑁆𑀢𑀺, 𑀢𑁂𑀦𑁂𑀯 𑀤𑁄𑀲𑀚𑀦𑀺𑀢𑁂𑀦 𑀓𑀫𑁆𑀫𑁂𑀦 𑀤𑀼𑀲𑁆𑀲𑀻𑀮𑁄 𑀇𑀢𑀺 𑀯𑀼𑀘𑁆𑀘𑀢𑀺 𑀲𑁄𑀧𑀺 𑀥𑀫𑁆𑀫𑁄 𑀳𑁂𑀢𑀼𑀦𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀦𑀺𑀲𑁆𑀲𑀦𑁆𑀤𑁂𑀦 𑀨𑀮𑁂𑀦 𑀘.

𑀢𑀻𑀡𑀺 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑁋 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 [𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀺𑀢𑀸 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁩.𑁩] 𑀘 𑀳𑁄𑀢𑀺, 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘. 𑀢𑀢𑁆𑀣 𑀬𑀁 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀧𑀭𑀓𑁆𑀓𑀫𑀢𑀺, 𑀇𑀤𑀫𑀲𑁆𑀲 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻. 𑀢𑀸𑀬𑀁 𑀬𑀣𑀸 𑀘 𑀫𑀼𑀲𑀸𑀯𑀸𑀤𑀁 𑀪𑀸𑀲𑀢𑀺 𑀬𑀣𑀸 𑀧𑀼𑀩𑁆𑀩𑀦𑀺𑀤𑁆𑀤𑀺𑀝𑁆𑀞𑀁, 𑀇𑀤𑀫𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀸. 𑀬𑀜𑁆𑀘 𑀲𑀗𑁆𑀓𑀧𑁆𑀧𑁂𑀢𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀩𑁆𑀬𑀸𑀧𑀸𑀤𑀁, 𑀇𑀤𑀫𑀲𑁆𑀲 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸. 𑀬𑀁 𑀲𑁄 𑀇𑀫𑁂𑀳𑀺 𑀢𑀻𑀳𑀺 𑀩𑀸𑀮𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀻𑀡𑀺 𑀢𑀚𑁆𑀚𑀸𑀦𑀺 𑀤𑀼𑀓𑁆𑀔𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀅𑀦𑀼𑀪𑀯𑀢𑀺, 𑀲𑁄 𑀘 𑀳𑁄𑀢𑀺 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀢𑀚𑁆𑀚𑀁 𑀓𑀣𑀁 𑀓𑀣𑀦𑁆𑀢𑀺. 𑀬𑀤𑀸 𑀪𑀯𑀢𑀺 𑀲𑁄 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺. 𑀧𑀼𑀦 𑀘𑀧𑀭𑀁 𑀬𑀤𑀸 𑀧𑀲𑁆𑀲𑀢𑀺 𑀘𑁄𑀭𑀁 𑀭𑀸𑀚𑀸𑀧𑀭𑀸𑀥𑀺𑀓𑀁 𑀭𑀜𑁆𑀜𑀸 𑀕𑀳𑀺𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀁, 𑀢𑀲𑁆𑀲𑁂𑀯𑀁 𑀪𑀯𑀢𑀺 𑀲𑀘𑁂 𑀫𑀫𑀫𑁆𑀧𑀺 𑀭𑀸𑀚𑀸 𑀚𑀸𑀦𑁂𑀬𑁆𑀬 𑀫𑀫𑀫𑁆𑀧𑀺 𑀭𑀸𑀚𑀸 𑀕𑀸𑀳𑀸𑀧𑁂𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺, 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀧𑀼𑀦 𑀘𑀧𑀭𑀁 𑀩𑀸𑀮𑁄 𑀬𑀤𑀸 𑀪𑀯𑀢𑀺 𑀆𑀲𑀦𑀸 𑀲𑀫𑀸𑀭𑀽𑀴𑁆𑀳𑁄 𑀬𑀸𑀯 𑀬𑀸 𑀫𑁂 𑀕𑀢𑀺 𑀪𑀯𑀺𑀲𑁆𑀲𑀢𑀺 𑀇𑀢𑁄 𑀧𑁂𑀘𑁆𑀘 𑀧𑀭𑀁 𑀫𑀭𑀡𑀸𑀢𑀺 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀇𑀢𑀺 𑀩𑀸𑀮𑀮𑀓𑁆𑀔𑀡𑀁 𑀳𑁂𑀢𑀼. 𑀢𑀻𑀡𑀺 𑀢𑀚𑁆𑀚𑀸𑀦𑀺 𑀤𑀼𑀓𑁆𑀔𑀸𑀦𑀺 𑀦𑀺𑀲𑁆𑀲𑀦𑁆𑀤𑁄. 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑁂𑀲𑀼 𑀉𑀧𑀧𑀚𑁆𑀚𑀢𑀺, 𑀇𑀤𑀁 𑀨𑀮𑀁. 𑀇𑀤𑀁 𑀤𑁄𑀲𑀸𑀥𑀺𑀝𑁆𑀞𑀸𑀦𑀁.

𑁩𑁪. 𑀢𑀢𑁆𑀣 𑀓𑀢𑀫𑀁 𑀫𑁄𑀳𑀸𑀥𑀺𑀝𑁆𑀞𑀸𑀦𑀁?

𑀲𑀢𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀁, 𑀓𑀧𑁆𑀧𑀸𑀦𑀁 𑀲𑀁𑀲𑀭𑀺𑀲𑁆𑀲𑀢𑀺;

𑀅𑀣𑀯𑀸 𑀧𑀺 𑀢𑀢𑁄 𑀪𑀺𑀬𑁆𑀬𑁄, 𑀕𑀩𑁆𑀪𑀸 𑀕𑀩𑁆𑀪𑀁 𑀕𑀫𑀺𑀲𑁆𑀲𑀣.

𑀅𑀦𑀼𑀧𑀸𑀤𑀸𑀬 𑀩𑀼𑀤𑁆𑀥𑀯𑀘𑀦𑀁, 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀉𑀧𑀸𑀤𑀸𑀬;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀞𑀸𑀦𑀫𑁂𑀢𑀁 𑀦 𑀯𑀺𑀚𑁆𑀚𑀢𑀺.

𑀬𑁄 𑀬𑀁 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀁 𑀲𑀫𑀸𑀧𑀦𑁆𑀦𑁄 𑀚𑀸𑀬𑀢𑁂 𑀘 𑀫𑀻𑀬𑀢𑁂 𑀘, 𑀅𑀬𑀁 𑀅𑀯𑀺𑀚𑁆𑀚𑀸𑀳𑁂𑀢𑀼𑀓𑀸. 𑀬𑀸𑀦𑀺𑀧𑀺 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀬𑁄𑀚𑀦𑀸𑀦𑀺, 𑀢𑀸𑀦𑀺𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀦𑀺, 𑀬𑀁 𑀅𑀤𑀲𑁆𑀲𑀦𑀁 𑀩𑀼𑀤𑁆𑀥𑀯𑀘𑀦𑀲𑁆𑀲, 𑀅𑀬𑀁 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑁂𑀬𑁂𑀯 𑀦𑀺𑀤𑁆𑀤𑀺𑀝𑁆𑀞𑀁. 𑀬𑁄 𑀘 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀳𑀭𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄 𑀉𑀧𑀕𑀘𑁆𑀙𑀢𑀺. ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀅𑀯𑀺𑀚𑁆𑀚𑀸𑀬 𑀦𑀺𑀓𑁆𑀔𑀺𑀢𑁆𑀢𑀁, 𑀅𑀯𑀺𑀚𑁆𑀚𑀸𑀬 𑀦𑀺𑀓𑁆𑀔𑀺𑀧𑀺𑀢𑀁. 𑀏𑀯𑀁 𑀲𑀢𑁆𑀣𑀸 𑀲𑀼𑀢𑁆𑀢𑁂 𑀦𑀬𑁂𑀦 [𑀲𑀼𑀢𑀦𑀬𑁂𑀦 (𑀧𑀻.)] 𑀥𑀫𑁆𑀫𑁂𑀦 𑀦𑀺𑀤𑁆𑀤𑀺𑀲𑀢𑀺. 𑀅𑀲𑀸𑀥𑀸𑀭𑀡𑁂𑀦 𑀢𑀁𑀬𑁂𑀯 𑀢𑀢𑁆𑀣 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀦 𑀅𑀜𑁆𑀜𑀁.

𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀦𑀧𑁆𑀧𑀚𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑀺𑀢𑁆𑀣𑀸𑀭𑁂𑀦, 𑀬𑀁 𑀢𑀢𑁆𑀣 𑀅𑀧𑁆𑀧𑀚𑀸𑀦𑀦𑀸, 𑀇𑀤𑀁 𑀤𑀼𑀓𑁆𑀔𑀁, 𑀅𑀬𑀁 𑀳𑁂𑀢𑀼. 𑀅𑀧𑁆𑀧𑀚𑀸𑀦𑀦𑁆𑀢𑁄 𑀯𑀺𑀯𑀺𑀥𑁂 𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑀜𑁆𑀘 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀭𑀸𑀫𑀲𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑀁 𑀧𑀼𑀦𑀩𑁆𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀇𑀤𑀁 𑀨𑀮𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀢𑁄 𑀘 𑀨𑀮𑀢𑁄 𑀘 𑀦𑀺𑀲𑁆𑀲𑀦𑁆𑀤𑀢𑁄 𑀘.

𑀏𑀢𑁆𑀣 𑀧𑀦 𑀓𑁂𑀘𑀺 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀪𑀯𑀦𑁆𑀢𑀺. 𑀳𑁂𑀢𑀼 𑀔𑀮𑀼 𑀆𑀤𑀺𑀢𑁄𑀬𑁂𑀯 𑀲𑀼𑀢𑁆𑀢𑁂 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺. 𑀬𑀣𑀸 𑀓𑀺𑀁 𑀪𑀯𑁂 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀕𑀢𑀺𑀕𑀫𑀦𑀸𑀦𑀺. 𑀢𑀢𑁆𑀣 𑀬𑀜𑁆𑀘 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀬𑀜𑁆𑀘 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀁 𑀤𑁄𑀲𑀸, 𑀅𑀬𑀁 𑀤𑁄𑀲𑁄𑀬𑁂𑀯. 𑀬𑀁 𑀫𑁄𑀳𑀸, 𑀅𑀬𑀁 𑀫𑁄𑀳𑁄𑀬𑁂𑀯. 𑀏𑀯𑀁 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀆𑀤𑀺𑀢𑁄𑀬𑁂𑀯 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸𑀦𑀺. 𑀬𑀢𑁆𑀣 𑀏𑀓𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀢𑀢𑁆𑀣 𑀏𑀓𑀁 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀢𑀣𑀸 𑀤𑁆𑀯𑁂 𑀬𑀣𑀸 𑀢𑀻𑀡𑀺, 𑀦 𑀳𑀺 𑀆𑀤𑀻𑀳𑀺 𑀅𑀦𑀺𑀓𑁆𑀔𑀺𑀢𑁆𑀢𑁂 𑀳𑁂𑀢𑀼 𑀯𑀸 𑀦𑀺𑀲𑁆𑀲𑀦𑁆𑀤𑁄 𑀯𑀸 𑀨𑀮𑀁 𑀯𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁.

𑀅𑀬𑀜𑁆𑀘𑁂𑀢𑁆𑀣 𑀕𑀸𑀣𑀸 𑁋

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 [𑀦𑀺𑀳𑀻𑀬𑀢𑁂 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁪.𑁧𑁭] 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑀓𑀢𑁆𑀣 𑀙𑀦𑁆𑀤𑀸 𑀘 𑀅𑀬𑀁 𑀮𑁄𑀪𑁄 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑀁 𑀧𑀼𑀩𑁆𑀩𑁂. 𑀇𑀤𑀁 𑀫𑁄𑀳𑀸𑀥𑀺𑀝𑁆𑀞𑀸𑀦𑀁.

𑁩𑁫. 𑀢𑀢𑁆𑀣 𑀓𑀢𑀫𑀁 𑀅𑀮𑁄𑀪𑀸𑀥𑀺𑀝𑁆𑀞𑀸𑀦𑀁?

‘‘𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀁 [𑀅𑀲𑀼𑀪𑀸𑀦𑀼𑀧𑀲𑁆𑀲𑀻 (𑀧𑀻.) 𑀧𑀲𑁆𑀲 𑀥. 𑀧. 𑁮] 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀼𑀁, 𑀲𑀤𑁆𑀥𑀁 𑀆𑀭𑀤𑁆𑀥𑀯𑀻𑀭𑀺𑀬𑀁;

𑀢𑀁 𑀯𑁂 𑀦𑀧𑁆𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀲𑁂𑀮𑀁𑀯 𑀧𑀩𑁆𑀩𑀢’’𑀦𑁆𑀢𑀺.

𑀢𑀢𑁆𑀣 𑀬𑀸 𑀅𑀲𑀼𑀪𑀸𑀬 𑀉𑀧𑀧𑀭𑀺𑀓𑁆𑀔𑀸, 𑀅𑀬𑀁 𑀓𑀸𑀫𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀧𑀭𑀺𑀘𑁆𑀘𑀸𑀕𑁄. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑁄 𑀢𑀲𑁆𑀲𑁂𑀯 𑀅𑀮𑁄𑀪𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀁 𑀫𑀫 𑀆𑀬𑀢𑀦𑀲𑁄𑀘𑀺𑀢𑀁 𑀅𑀦𑀼𑀧𑀸𑀤𑀸𑀬. 𑀪𑁄𑀚𑀦𑀫𑁆𑀳𑀺 𑀘 𑀫𑀢𑁆𑀢𑀜𑁆𑀜𑀼𑀦𑁆𑀢𑀺 𑀭𑀲𑀢𑀡𑁆𑀳𑀸𑀧𑀳𑀸𑀦𑀁. 𑀇𑀢𑀺 𑀅𑀬𑀁 𑀅𑀮𑁄𑀪𑁄 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀢𑀸𑀬 𑀯𑀢𑁆𑀣𑀼𑀢𑁄 𑀥𑀸𑀭𑀬𑀢𑀺, 𑀲𑁄 𑀅𑀮𑁄𑀪𑁄 𑀳𑁂𑀢𑀼. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀕𑁄𑀘𑀭𑀢𑁄 𑀥𑀸𑀭𑀬𑀢𑀺, 𑀪𑁄𑀚𑀦𑁂𑀫𑀢𑁆𑀢𑀜𑁆𑀜𑀼𑀢𑀸𑀬 𑀧𑀭𑀢𑁄 𑀥𑀸𑀭𑀬𑀢𑀺, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀢𑀁 𑀯𑁂 𑀦𑀧𑁆𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀲𑁂𑀮𑀁 𑀯 𑀧𑀩𑁆𑀩𑀢𑀦𑁆𑀢𑀺, 𑀇𑀤𑀁 𑀨𑀮𑀁. 𑀇𑀢𑀺 𑀬𑁄𑀬𑁂𑀯 𑀥𑀫𑁆𑀫𑁄 𑀆𑀤𑀺𑀫𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑁄, 𑀲𑁄𑀬𑁂𑀯 𑀫𑀚𑁆𑀛𑁂 𑀘𑁂𑀯 𑀅𑀯𑀲𑀸𑀦𑁂 𑀘.

𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀅𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀳𑀸𑀦𑀸𑀬, 𑀬𑀣𑀬𑀺𑀤𑀁 [𑀬𑀤𑀺𑀤𑀁 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁧.𑁧𑁭] 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀇𑀤𑀁 𑀅𑀮𑁄𑀪𑀲𑁆𑀲 𑀯𑀢𑁆𑀣𑀼. 𑀬𑀁 𑀧𑀼𑀦 𑀅𑀦𑀼𑀧𑁆𑀧𑀦𑁆𑀦𑁄 𑀓𑀸𑀫𑀭𑀸𑀕𑁄 𑀧𑀭𑀺𑀬𑀸𑀤𑀺𑀬𑀢𑀺 𑀭𑀽𑀧𑀭𑀸𑀕𑀁 𑀅𑀭𑀽𑀧𑀭𑀸𑀕𑀁, 𑀇𑀢𑀺 𑀨𑀮𑀁. 𑀇𑀢𑀺 𑀅𑀬𑀫𑁆𑀧𑀺 𑀘 𑀥𑀫𑁆𑀫𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀢𑁄 𑀘 𑀦𑀺𑀲𑁆𑀲𑀦𑁆𑀤𑀢𑁄 𑀘 𑀨𑀮𑀢𑁄 𑀘. 𑀇𑀤𑀁 𑀅𑀮𑁄𑀪𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀅𑀤𑁄𑀲𑀸𑀥𑀺𑀝𑁆𑀞𑀸𑀦𑀁?

𑀏𑀓𑀫𑁆𑀧𑀺 𑀘𑁂 𑀧𑀸𑀡𑀫𑀤𑀼𑀝𑁆𑀞𑀘𑀺𑀢𑁆𑀢𑁄, 𑀫𑁂𑀢𑁆𑀢𑀸𑀬𑀢𑀺 𑀓𑀼𑀲𑀮𑁄 [𑀓𑀼𑀲𑀮𑀻 (𑀓.) 𑀧𑀲𑁆𑀲 𑀇𑀢𑀺𑀯𑀼. 𑁨𑁭] 𑀢𑁂𑀦 𑀳𑁄𑀢𑀺;

𑀲𑀩𑁆𑀩𑁂 𑀘 𑀧𑀸𑀡𑁂 𑀫𑀦𑀲𑀸𑀦𑀼𑀓𑀫𑁆𑀧𑀁 [𑀅𑀦𑀼𑀓𑀫𑁆𑀧𑀫𑀸𑀦𑁄 (𑀧𑀻.)], 𑀧𑀳𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜𑀁.

𑀏𑀓𑀫𑁆𑀧𑀺 𑀘𑁂 𑀧𑀸𑀡𑀫𑀤𑀼𑀝𑁆𑀞𑀘𑀺𑀢𑁆𑀢𑁄 𑀫𑁂𑀢𑁆𑀢𑀸𑀬𑀢𑀻𑀢𑀺 𑀅𑀬𑀁 𑀅𑀤𑁄𑀲𑁄. 𑀦𑀺𑀕𑁆𑀖𑀸𑀢𑁂𑀦 𑀅𑀲𑁆𑀲𑀸𑀤𑁄, 𑀓𑀼𑀲𑀮𑁄 𑀢𑁂𑀦 𑀳𑁄𑀢𑀻𑀢𑀺 𑀢𑁂𑀦 𑀓𑀼𑀲𑀮𑁂𑀦 𑀥𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄 𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀓𑀼𑀲𑀮𑁄𑀢𑀺 𑀬𑀣𑀸 𑀧𑀜𑁆𑀜𑀸𑀬 𑀧𑀜𑁆𑀜𑁄 𑀧𑀡𑁆𑀟𑀺𑀘𑁆𑀘𑁂𑀦 𑀧𑀡𑁆𑀟𑀺𑀢𑁄. 𑀧𑀳𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀯𑀺𑀧𑀸𑀓𑁄 𑀅𑀬𑀁 𑀮𑁄𑀓𑀺𑀬𑀲𑁆𑀲, 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀲𑁆𑀲. 𑀢𑀢𑁆𑀣 𑀬𑀸 𑀫𑁂𑀢𑁆𑀢𑀸𑀬𑀦𑀸, 𑀅𑀬𑀁 𑀳𑁂𑀢𑀼. 𑀬𑀁 𑀓𑀼𑀲𑀮𑁄 𑀪𑀯𑀢𑀺 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑀸𑀯 𑀅𑀩𑁆𑀬𑀸𑀧𑀚𑁆𑀚𑁄 𑀪𑀽𑀫𑀺𑀬𑀁 𑀩𑀳𑀼𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀇𑀤𑀁 𑀨𑀮𑀁. 𑀇𑀢𑀺 𑀅𑀤𑁄𑀲𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀢𑁄 𑀘 𑀦𑀺𑀲𑁆𑀲𑀦𑁆𑀤𑀢𑁄 𑀘 𑀨𑀮𑀢𑁄 𑀘.

𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸. 𑀢𑀢𑁆𑀣 𑀬𑀸 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀅𑀭𑀺𑀬𑀥𑀫𑁆𑀫𑁂𑀲𑀼 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀮𑁄𑀓𑀺𑀓𑀸𑀬 𑀪𑀽𑀫𑀺𑀓𑀸 𑀳𑁂𑀢𑀼, 𑀬𑀁 𑀲𑀼𑀔𑀁 𑀆𑀬𑀢𑀺𑀁 𑀫𑀦𑀸𑀧𑁄 𑀳𑁄𑀢𑀺 𑀫𑀦𑀼𑀲𑁆𑀲𑀸𑀦𑀁, 𑀇𑀫𑁂 𑀏𑀓𑀸𑀤𑀲 𑀥𑀫𑁆𑀫𑀸 𑀦𑀺𑀲𑁆𑀲𑀦𑁆𑀤𑁄. 𑀬𑀜𑁆𑀘 𑀅𑀓𑀢𑀸𑀯𑀻 𑀩𑁆𑀭𑀳𑁆𑀫𑀓𑀸𑀬𑁂 𑀉𑀧𑀧𑀚𑁆𑀚𑀢𑀺. 𑀇𑀤𑀁 𑀨𑀮𑀁. 𑀇𑀤𑀁 𑀅𑀤𑁄𑀲𑀸𑀥𑀺𑀝𑁆𑀞𑀸𑀦𑀁.

𑁩𑁬. 𑀢𑀢𑁆𑀣 𑀓𑀢𑀫𑀁 𑀅𑀫𑁄𑀳𑀸𑀥𑀺𑀝𑁆𑀞𑀸𑀦𑀁?

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀬𑀸𑀬𑀁 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻 [𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻 (𑀧𑀻. 𑀓.) 𑀧𑀲𑁆𑀲 𑀇𑀢𑀺𑀯𑀼. 𑁪𑁧];

𑀬𑀸𑀬 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀁.

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸𑀢𑀺 𑀯𑀢𑁆𑀣𑀼𑀁. 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀁 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀦𑁆𑀢𑀺 𑀅𑀫𑁄𑀳𑁄. 𑀧𑀜𑁆𑀜𑀸𑀢𑀺 𑀳𑁂𑀢𑀼. 𑀬𑀁 𑀧𑀚𑀸𑀦𑀸𑀢𑀺 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑁄 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁄, 𑀇𑀤𑀁 𑀨𑀮𑀁. 𑀇𑀢𑀺 𑀅𑀫𑁄𑀳𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀦𑀸 𑀘 𑀦𑀺𑀲𑁆𑀲𑀦𑁆𑀤𑁂𑀦 𑀘 𑀨𑀮𑁂𑀦 𑀘.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂 [𑀇𑀢𑀺𑀯𑀼. 𑁬𑁨 𑀢𑀺𑀓𑀦𑀺𑀧𑀸𑀢𑁂], 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀓𑀢𑀫𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀪𑀺𑀲𑀫𑁂𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀪𑀺𑀲𑀫𑀬𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀏𑀯𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀸 𑀘 𑀫𑀕𑁆𑀕𑁄, 𑀇𑀤𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀆𑀲𑀯𑀓𑁆𑀔𑀬𑀸 𑀅𑀦𑀸𑀲𑀯𑁄 𑀳𑁄𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀣𑀸𑀬𑀁 𑀧𑀜𑁆𑀜𑀸, 𑀅𑀬𑀁 𑀳𑁂𑀢𑀼. 𑀬𑀁 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺, 𑀬𑀸 𑀧𑀚𑀸𑀦𑀸𑀢𑀺, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑁂𑀦 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑀬𑀸 𑀳𑁂𑀢𑀼, 𑀬𑀁 𑀔𑀬𑁂 𑀜𑀸𑀡𑀫𑀼𑀧𑁆𑀧𑀚𑁆𑀚𑀢𑀺, 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀜𑁆𑀘, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀬𑀁 𑀅𑀭𑀳𑀢𑁆𑀢𑀁, 𑀇𑀤𑀁 𑀨𑀮𑀁. 𑀢𑀢𑁆𑀣 𑀔𑀻𑀡𑀸 𑀫𑁂 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺, 𑀇𑀤𑀁 𑀔𑀬𑁂 𑀜𑀸𑀡𑀁. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻𑀢𑀺 𑀇𑀤𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁. 𑀇𑀢𑀺 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀫𑁄𑀳𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀦𑀸 𑀘 𑀦𑀺𑀲𑁆𑀲𑀦𑁆𑀤𑁂𑀦 𑀘 𑀨𑀮𑁂𑀦 𑀘. 𑀇𑀫𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀥𑀸𑀭𑀡𑀸𑀦𑀺? 𑀓𑀼𑀲𑀮𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀓𑀼𑀲𑀮𑀫𑀽𑀮𑀜𑁆𑀘𑁂𑀯. 𑀢𑀢𑁆𑀣 𑀓𑀢𑀫𑀁 𑀓𑀼𑀲𑀮𑀫𑀽𑀮𑀁? 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄. 𑀢𑀢𑁆𑀣 𑀓𑀢𑀫𑀁 𑀓𑀼𑀲𑀮𑀁? 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀸𑀯 𑀲𑀫𑁆𑀫𑀸𑀲𑀫𑀸𑀥𑀺. 𑀢𑀢𑁆𑀣 𑀬𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀅𑀬𑀁 𑀳𑁂𑀢𑀼. 𑀬𑀜𑁆𑀘 𑀅𑀮𑁄𑀪𑁄 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺 𑀲𑀗𑁆𑀓𑀧𑁆𑀧𑀁 𑀯𑀸𑀬𑀸𑀫𑀁 𑀲𑀫𑀸𑀥𑀺𑀜𑁆𑀘, 𑀅𑀬𑀁 𑀅𑀮𑁄𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑁄. 𑀢𑀢𑁆𑀣 𑀬𑁄 𑀅𑀤𑁄𑀲𑁄, 𑀅𑀬𑀁 𑀳𑁂𑀢𑀼. 𑀬𑀁 𑀢𑀬𑁄 𑀥𑀫𑁆𑀫𑁂 𑀧𑀝𑁆𑀞𑀧𑁂𑀢𑀺 𑀲𑀫𑁆𑀫𑀸𑀯𑀸𑀘𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀲𑀫𑁆𑀫𑀸𑀆𑀚𑀻𑀯𑀜𑁆𑀘, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀢𑀢𑁆𑀣 𑀬𑁄 𑀅𑀫𑁄𑀳𑁄 𑀳𑁂𑀢𑀼, 𑀬𑀁 𑀤𑁆𑀯𑁂 𑀥𑀫𑁆𑀫𑁂 𑀉𑀧𑀝𑁆𑀞𑀧𑁂𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑀫𑁆𑀧𑀺 𑀘 𑀅𑀦𑀪𑀺𑀮𑀸𑀧𑀦𑀁, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀇𑀫𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀬𑀁 𑀨𑀮𑀁, 𑀢𑀸 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀯𑀺𑀚𑁆𑀚𑀸 𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀇𑀤𑀁 𑀨𑀮𑀁. 𑀇𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀳𑁂𑀢𑀼𑀢𑁄 𑀘 𑀦𑀺𑀲𑁆𑀲𑀦𑁆𑀤𑀢𑁄 𑀘 𑀨𑀮𑀢𑁄 𑀘. 𑀏𑀯𑀁 𑀲𑀸𑀥𑀸𑀭𑀡𑀸𑀦𑀺 𑀓𑀼𑀲𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺.

𑀬𑀢𑁆𑀣 𑀤𑀼𑀯𑁂 𑀬𑀢𑁆𑀣 𑀢𑀻𑀡𑀺. 𑀅𑀬𑀜𑁆𑀘𑁂𑀢𑁆𑀣 𑀕𑀸𑀣𑀸.

‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀁, 𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀺;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺.

𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀢𑀼𑀮𑀲𑀗𑁆𑀔𑀢𑀁 𑀅𑀢𑀼𑀮𑀲𑀗𑁆𑀔𑀢𑀁. 𑀢𑀢𑁆𑀣 𑀬𑁂 𑀲𑀗𑁆𑀔𑀢𑀸 𑀢𑀼𑀮𑀁, 𑀢𑁂 𑀤𑁆𑀯𑁂 𑀥𑀫𑁆𑀫𑀸 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀢𑀼𑀮𑀺𑀢𑀸 𑀪𑀯𑀦𑁆𑀢𑀺. 𑀏𑀢𑁆𑀢𑀓𑁄 𑀓𑀸𑀫𑁂𑀲𑀼 𑀅𑀲𑁆𑀲𑀸𑀤𑁄. 𑀏𑀢𑁆𑀢𑀓𑁄 𑀆𑀤𑀻𑀦𑀯𑁄 𑀇𑀫𑀲𑁆𑀲, 𑀇𑀤𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀢𑀺 𑀦𑀺𑀩𑁆𑀩𑀸𑀦𑀁 𑀧𑀚𑀸𑀦𑀸𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀢𑀼𑀮𑀁 𑀦 𑀘 𑀲𑀓𑁆𑀓𑀸 𑀢𑀼𑀮𑀬𑀺𑀢𑀼𑀁. 𑀏𑀢𑁆𑀢𑀓𑀁 𑀏𑀢𑀁 𑀦𑁂𑀢𑀁 𑀧𑀭𑀫𑀢𑁆𑀣𑀻𑀢𑀺 𑀢𑁂𑀦 𑀅𑀢𑀼𑀮𑀁. 𑀅𑀣 𑀧𑀸𑀧𑀼𑀡𑀸 𑀭𑀢𑀦𑀁 𑀓𑀭𑀺𑀢𑁆𑀯𑀸 𑀅𑀘𑁆𑀙𑀭𑀺𑀬𑀪𑀸𑀯𑁂𑀦 𑀅𑀢𑀼𑀮𑀁. 𑀢𑀢𑁆𑀣 𑀓𑀼𑀲𑀮𑀲𑁆𑀲 𑀘 𑀅𑀪𑀺𑀲𑀫𑁆𑀪𑀯𑀸 𑀚𑀸𑀦𑀦𑀸 𑀧𑀲𑁆𑀲𑀦𑀸, 𑀅𑀬𑀁 𑀅𑀫𑁄𑀳𑁄. 𑀬𑀁 𑀢𑀢𑁆𑀣 𑀜𑀸𑀢𑀸 𑀑𑀲𑀺𑀭𑀡𑀸 𑀪𑀯𑀲𑀗𑁆𑀔𑀸𑀭𑀸𑀦𑀁, 𑀅𑀬𑀁 𑀅𑀮𑁄𑀪𑁄. 𑀬𑀁 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄𑀢𑀺 𑀯𑀺𑀓𑁆𑀔𑁂𑀧𑀧𑀝𑀺𑀲𑀁𑀳𑀭𑀡𑀸, 𑀅𑀬𑀁 𑀅𑀤𑁄𑀲𑁄. 𑀇𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀢𑀼𑀮𑀫𑀢𑀼𑀮𑀲𑀫𑁆𑀪𑀯𑀦𑁆𑀢𑀺 𑀅𑀬𑀁 𑀅𑀫𑁄𑀳𑁄. 𑀬𑁄 𑀪𑀯𑀲𑀗𑁆𑀔𑀸𑀭𑀸𑀦𑀁 𑀲𑀫𑁄𑀲𑀭𑀡𑀁 𑀮𑁄𑀪𑁄 𑀲𑀫𑁆𑀫𑀸𑀲𑀫𑀸𑀥𑀻𑀦𑀁 𑀅𑀲𑁆𑀲𑀸𑀤𑁄, 𑀅𑀬𑀁 𑀳𑁂𑀢𑀼. 𑀬𑀁 𑀅𑀚𑁆𑀛𑀢𑁆𑀢𑀭𑀢𑁄 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀲𑀫𑁆𑀪𑁂𑀤𑁄, 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄. 𑀲𑀸 𑀧𑀯𑀢𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀓𑀼𑀲𑀮𑀫𑀽𑀮𑀸𑀦𑀺 𑀳𑁂𑀢𑀼𑀢𑁄 𑀘 𑀦𑀺𑀲𑁆𑀲𑀦𑁆𑀤𑀢𑁄 𑀘 𑀨𑀮𑀢𑁄 𑀘.

𑀏𑀢𑁆𑀢𑀸𑀯𑀢𑀸 𑀏𑀲𑀸 𑀧𑀯𑀢𑁆𑀢𑀺 𑀘 𑀦𑀺𑀯𑀢𑁆𑀢𑀺 𑀘 𑀅𑀓𑀼𑀲𑀮𑀫𑀽𑀮𑁂𑀳𑀺 𑀧𑀯𑀢𑁆𑀢𑀢𑀺, 𑀓𑀼𑀲𑀮𑀫𑀽𑀮𑁂𑀳𑀺 𑀦𑀺𑀯𑀢𑁆𑀢𑀢𑀻𑀢𑀺 𑀇𑀫𑁂𑀳𑀺 𑀘 𑀢𑀻𑀳𑀺 𑀲𑀩𑁆𑀩𑀁 𑀅𑀓𑀼𑀲𑀮𑀫𑀽𑀮𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺. 𑀲𑁄 𑀥𑀫𑁆𑀫𑁂 𑀯𑀸 𑀯𑀘𑀦𑀢𑁄 𑀦𑀺𑀤𑁆𑀤𑀺𑀝𑁆𑀞𑁄 𑀢𑀡𑁆𑀳𑀸𑀢𑀺 𑀯𑀸 𑀓𑁄𑀥𑁄𑀢𑀺 𑀯𑀸 𑀅𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀯𑀸 𑀅𑀦𑀼𑀲𑀬𑁄𑀢𑀺 𑀯𑀸 𑀫𑀓𑁆𑀔𑁄𑀢𑀺 𑀯𑀸 𑀧𑀴𑀸𑀲𑁄𑀢𑀺 𑀯𑀸 𑀅𑀲𑁆𑀲𑀢𑀻𑀢𑀺 𑀯𑀸 𑀇𑀲𑁆𑀲𑀸𑀢𑀺 𑀯𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀸 𑀅𑀜𑁆𑀜𑀸𑀡𑀦𑁆𑀢𑀺 𑀯𑀸, 𑀢𑁂𑀳𑀺 𑀬𑁂 𑀘 𑀯𑀢𑁆𑀣𑀽𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑀲𑁆𑀲𑀺𑀫𑀸𑀦𑀺 𑀤𑁆𑀯𑁂 𑀯𑀘𑀦𑀸𑀦𑀺 𑀥𑀫𑁆𑀫𑀧𑀤𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀦 𑀲𑁄 𑀅𑀢𑁆𑀣𑀺 𑀓𑀺𑀮𑁂𑀲𑀸, 𑀬𑁄 𑀇𑀫𑁂𑀲𑀼 𑀦𑀯𑀲𑀼 𑀧𑀤𑁂𑀲𑀼 𑀲𑀫𑁄𑀥𑀸𑀦𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺. 𑀅𑀬𑀁 𑀓𑀺𑀮𑁂𑀲𑁄, 𑀦 𑀘 𑀮𑁄𑀪𑁄, 𑀦 𑀘 𑀤𑁄𑀲𑁄, 𑀦 𑀘 𑀫𑁄𑀳𑁄.

𑀬𑀣𑀸 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀏𑀯𑀁 𑀓𑀼𑀲𑀮𑀸𑀦𑀺 𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺.

𑀇𑀤𑀁 𑀅𑀫𑁄𑀳𑀸𑀥𑀺𑀝𑁆𑀞𑀸𑀦𑀁.

𑁩𑁭. 𑀢𑀢𑁆𑀣 𑀓𑀢𑀫𑀁 𑀓𑀸𑀬𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁?

𑀓𑀸𑀬𑁂𑀦 𑀓𑀼𑀲𑀮𑀁 𑀓𑀭𑁂, 𑀅𑀲𑁆𑀲 𑀓𑀸𑀬𑁂𑀦 𑀲𑀁𑀯𑀼𑀢𑁄;

𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑁂.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀘𑀭𑀺𑀢𑀸𑀦𑀺 [𑀇𑀢𑀺𑀯𑀼. 𑁬𑁯 𑀲𑀼𑀘𑀭𑀺𑀢𑀲𑀼𑀢𑁆𑀢𑁂]. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻, 𑀇𑀤𑀁 𑀓𑀸𑀬𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀯𑀸𑀘𑀸𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁?

𑀲𑀼𑀪𑀸𑀲𑀺𑀢𑀁 [𑀲𑀼. 𑀦𑀺. 𑁪𑁫𑁨 𑀲𑀼𑀢𑁆𑀢𑀦𑀺𑀧𑀸𑀢𑁂] 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄, 𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁, 𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣𑀁.

𑀘𑀢𑁆𑀢𑀸𑀭𑀺𑀫𑀸𑀦𑀺 𑀘 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀇𑀤𑀁 𑀯𑀸𑀘𑀸𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀫𑀦𑁄𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁?

𑀫𑀦𑁂𑀦 𑀓𑀼𑀲𑀮𑀁 𑀓𑀫𑁆𑀫𑀁, 𑀫𑀦𑀲𑀸 𑀲𑀁𑀯𑀼𑀢𑁄 𑀪𑀯𑁂;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑁂.

𑀢𑀻𑀡𑀺𑀫𑀸𑀦𑀺 𑀫𑀦𑁄𑀲𑀼𑀘𑀭𑀺𑀢𑀸𑀦𑀺, 𑀅𑀦𑀪𑀺𑀚𑁆𑀛𑀸, 𑀅𑀩𑁆𑀬𑀸𑀧𑀸𑀤𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀇𑀤𑀁 𑀫𑀦𑁄𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀇𑀫𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺?

𑀯𑀸𑀘𑀸𑀦𑀼𑀭𑀓𑁆𑀔𑀻 𑀫𑀦𑀲𑀸 𑀲𑀼𑀲𑀁𑀯𑀼𑀢𑁄, 𑀓𑀸𑀬𑁂𑀦 𑀘 𑀦𑀸𑀓𑀼𑀲𑀮𑀁 𑀓𑀬𑀺𑀭𑀸 [𑀅𑀓𑀼𑀲𑀮𑀁 𑀦 𑀓𑀬𑀺𑀭𑀸 (𑀧𑀻. 𑀓.) 𑀧𑀲𑁆𑀲 𑀥. 𑀧. 𑁨𑁮𑁧];

𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂, 𑀆𑀭𑀸𑀥𑀬𑁂 𑀫𑀕𑁆𑀕𑀫𑀺𑀲𑀺𑀧𑁆𑀧𑀯𑁂𑀤𑀺𑀢𑀁.

𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀲𑀼𑀤𑁆𑀥𑀺𑀬𑁄 𑁋 𑀓𑀸𑀬𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺, 𑀯𑀸𑀘𑀸𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺, 𑀫𑀦𑁄𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺.

𑀢𑀢𑁆𑀣 𑀓𑀢𑀫𑀸 𑀓𑀸𑀬𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻. 𑀢𑀢𑁆𑀣 𑀓𑀢𑀫𑀸 𑀯𑀘𑀻𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺? 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻…𑀧𑁂… 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻. 𑀢𑀢𑁆𑀣 𑀓𑀢𑀫𑀸 𑀫𑀦𑁄𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺? 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀇𑀤𑀁 𑀲𑀸𑀥𑀸𑀭𑀡𑀲𑀼𑀢𑁆𑀢𑀁.

𑀇𑀢𑀺 𑀲𑀸𑀥𑀸𑀭𑀡𑀸𑀦𑀺 𑀘 𑀲𑀼𑀢𑁆𑀢𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀘 𑀲𑀼𑀢𑁆𑀢𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀸𑀘𑀸𑀬 𑀓𑀸𑀬𑁂𑀦 𑀘 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄.

𑁩𑁮. 𑀢𑀢𑁆𑀣 𑀓𑀢𑀫𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁?

𑀬𑀲𑁆𑀲 𑀲𑀤𑁆𑀥𑀸 [𑀲𑀁. 𑀦𑀺. 𑁧.𑁨𑁬𑁦; 𑀣𑁂𑀭𑀕𑀸. 𑁫𑁦𑁭 𑀅𑀝𑁆𑀞𑀓𑀦𑀺𑀧𑀸𑀢𑁂 𑀘 𑀧𑀲𑁆𑀲𑀺𑀢𑀩𑁆𑀩𑀁] 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑀲𑀤𑁆𑀥𑀸 𑀯𑁂 𑀦𑀦𑁆𑀤𑀺𑀓𑀸 𑀆𑀭𑀸𑀥𑀺𑀓𑁄, 𑀦𑁄 𑀢𑀲𑁆𑀲 𑀲𑀤𑁆𑀥𑁄𑀢𑀺;

𑀲𑀩𑁆𑀩𑀁 𑀲𑀺𑀬𑀸𑀢𑀺 𑀪𑀕𑀯𑀦𑁆𑀢𑀁, 𑀢𑀣𑀸𑀭𑀽𑀧𑁄 𑀥𑀫𑁆𑀫𑀲𑀫𑁆𑀧𑀲𑀸𑀤𑁄.

𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁?

𑀆𑀭𑀫𑁆𑀪𑀣 [𑀆𑀭𑀪𑀣 (𑀧𑀻.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁮𑁫] 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀇𑀤𑀁 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀲𑀢𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁?

𑀲𑀢𑀻𑀫𑀢𑁄 𑀲𑀤𑀸 𑀪𑀤𑁆𑀤𑀁, 𑀪𑀤𑁆𑀤𑀫𑀢𑁆𑀣𑀼 𑀲𑀢𑀻𑀫𑀢𑁄;

𑀲𑀢𑀻𑀫𑀢𑁄 𑀲𑀤𑀸 [𑀲𑀼𑀯𑁂 (𑀲𑀁. 𑀦𑀺. 𑁧.𑁨𑁩𑁮)] 𑀲𑁂𑀬𑁆𑀬𑁄, 𑀲𑀢𑀻𑀫𑀸 𑀲𑀼𑀔𑀫𑁂𑀥𑀢𑀺.

𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸, 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁?

𑀆𑀓𑀗𑁆𑀔𑀢𑁄 𑀢𑁂 𑀦𑀭𑀤𑀫𑁆𑀫𑀲𑀸𑀭𑀣𑀺, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀫𑀦𑀲𑀸 𑀯𑀺𑀘𑀺𑀦𑁆𑀢𑀺𑀢𑀁;

𑀲𑀩𑁆𑀩𑁂𑀦 𑀚𑀜𑁆𑀜𑀸 𑀓𑀲𑀺𑀡𑀸𑀧𑀺 𑀧𑀸𑀡𑀺𑀦𑁄, 𑀲𑀦𑁆𑀢𑀁 𑀲𑀫𑀸𑀥𑀺𑀁 𑀅𑀭𑀡𑀁 𑀦𑀺𑀲𑁂𑀯𑀢𑁄.

𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄, 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄. 𑀇𑀤𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁?

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦.

𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸 𑁋 𑀲𑀼𑀢𑀫𑀬𑀻, 𑀘𑀺𑀦𑁆𑀢𑀸𑀫𑀬𑀻, 𑀪𑀸𑀯𑀦𑀸𑀫𑀬𑀻, 𑀇𑀤𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀲𑀼𑀢𑁆𑀢𑀁, 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀼𑀢𑁆𑀢𑀸𑀦𑀺.

𑁩𑁯. 𑀢𑀢𑁆𑀣 𑀓𑀢𑀫𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀸𑀦𑀺 𑀲𑀼𑀢𑁆𑀢𑀸𑀦𑀺?

𑀅𑀯𑀻𑀢𑀭𑀸𑀕𑁄 [𑀅. 𑀦𑀺. 𑁬.𑁫𑁪] 𑀓𑀸𑀫𑁂𑀲𑀼, 𑀬𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀽;

𑀲𑀤𑁆𑀥𑀸 𑀲𑀢𑀺 𑀘 𑀯𑀻𑀭𑀺𑀬𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀧𑀼𑀩𑁆𑀩𑁂𑀯 𑀉𑀧𑀳𑀜𑁆𑀜𑀢𑀺.

𑀧𑀜𑁆𑀘𑀺𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀇𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀢𑀻𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀯𑀺𑀢𑁆𑀣𑀸𑀭𑁂𑀦 𑀲𑀼𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀇𑀫𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀸𑀦𑀺 𑀲𑀼𑀢𑁆𑀢𑀸𑀦𑀺. 𑀬𑀁 𑀬𑀲𑁆𑀲 𑀲𑀫𑁆𑀩𑀦𑁆𑀥𑀁 𑀓𑀼𑀲𑀮𑀲𑁆𑀲 𑀯𑀸 𑀅𑀓𑀼𑀲𑀮𑀲𑁆𑀲 𑀯𑀸 𑀢𑁂𑀦 𑀢𑁂𑀦 𑀅𑀥𑀺𑀝𑁆𑀞𑀸𑀦𑁂𑀦 𑀢𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦𑀢𑁆𑀣𑀜𑁆𑀜𑁄 𑀥𑀫𑁆𑀫𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀓𑀼𑀲𑀮𑀁 𑀦𑀸𑀧𑀺 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀬𑀣𑀸 𑀲𑀸𑀥𑀸𑀭𑀡𑀸𑀦𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀘 𑀅𑀓𑀼𑀲𑀮𑀫𑀽𑀮𑀸𑀦𑀺 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀧𑀚𑀳𑀢𑀺…𑀧𑁂… 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀓𑀼𑀲𑀮𑀁 𑀅𑀓𑀼𑀲𑀮𑀜𑁆𑀘.

𑀢𑀢𑁆𑀣𑀺𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀯𑀺𑀢𑀓𑁆𑀓𑁄 𑀳𑀺 𑀫𑀫𑀢𑁆𑀣𑀺𑀓𑁄 [𑀧𑀫𑀢𑁆𑀣𑀺𑀓𑁄 (𑀧𑀻.)], 𑀤𑀤𑀁 𑀧𑀺𑀬𑁄 𑀦𑀭𑁄 𑀇𑀢𑀺;

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀢𑀻𑀡𑀺 𑀢𑀲𑁆𑀲 𑀩𑀸𑀮𑀮𑀓𑁆𑀔𑀡𑀁.

𑀲𑀢𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀁, 𑀬𑁂 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀘𑀢𑀽𑀳𑀺 𑀅𑀕𑀢𑀻𑀳𑀺 𑀘.

𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀦𑀺𑀫𑀺𑀢𑁆𑀢𑁂𑀲𑀼 𑀅𑀲𑀼𑀪𑀸 𑀘;

𑀏𑀓𑀫𑁆𑀧𑀺 𑀘𑁂 𑀧𑀺𑀬𑀁 𑀧𑀸𑀡𑀁, 𑀫𑀺𑀢𑁆𑀢𑀸 𑀲𑀘𑁂 𑀲𑀼𑀪𑀸𑀲𑀺𑀢𑀸.

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀅𑀦𑀼𑀜𑁆𑀜𑀸 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺;

𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀘, 𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀁.

𑀓𑀸𑀬𑁂𑀦 𑀓𑀼𑀲𑀮𑀁 𑀓𑀭𑁂, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀘;

𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼, 𑀲𑀦𑁆𑀢𑁄 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀘.

𑀓𑀸𑀬𑁂𑀦 𑀘 𑀓𑀼𑀲𑀮𑀁 𑀓𑀬𑀺𑀭𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀓𑀸𑀬𑀸𑀦𑀼𑀭𑀓𑁆𑀔𑀻 𑀘 𑀲𑀤𑀸, 𑀢𑀺𑀲𑁆𑀲𑁄 𑀘 𑀧𑀸𑀭𑀺𑀲𑀼𑀤𑁆𑀥𑀺𑀬𑁄.

𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀲𑀫𑀼𑀧𑁆𑀧𑀸𑀤𑁂 𑀘 𑀤𑁂𑀲𑀺𑀢𑁄;

𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀸 𑀘 𑀲𑀫𑁆𑀫𑀧𑁆𑀧𑀥𑀸𑀦𑀢𑀸.

𑀲𑀢𑀻𑀫𑀢𑁄 𑀲𑀤𑀸 𑀪𑀤𑁆𑀤𑀁, 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸;

𑀆𑀓𑀗𑁆𑀔𑀢𑁄 𑀘 𑀅𑀦𑀜𑁆𑀜𑀸𑀡𑀁, 𑀬𑁂 𑀘 𑀢𑀻𑀡𑀺 𑀲𑀫𑀸𑀥𑀬𑁄.

𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀮𑁄𑀓𑀲𑁆𑀫𑀺𑀁, 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀧𑀓𑀸𑀲𑀺𑀢𑀸;

𑀅𑀯𑀻𑀢𑀭𑀸𑀕𑁄 𑀓𑀸𑀫𑁂𑀲𑀼, 𑀢𑀣𑁂𑀯 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸.

𑀇𑀢𑀺 𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲

𑀚𑀫𑁆𑀩𑀼𑀯𑀦𑀯𑀸𑀲𑀺𑀦𑁄 𑀧𑁂𑀝𑀓𑁄𑀧𑀤𑁂𑀲𑁂

𑀢𑀢𑀺𑀬𑀪𑀽𑀫𑀺 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀦𑀸𑀫.

𑁪. 𑀲𑀼𑀢𑁆𑀢𑀯𑀺𑀘𑀬𑀘𑀢𑀼𑀢𑁆𑀣𑀪𑀽𑀫𑀺

𑁪𑁦. 𑀢𑀢𑁆𑀣 𑀓𑀢𑀫𑁄 𑀲𑀼𑀢𑁆𑀢𑀯𑀺𑀘𑀬𑁄?

𑀢𑀢𑁆𑀣 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀼𑀩𑁆𑀩𑀸𑀧𑀭𑀲𑁄 𑀲𑀸𑀥𑀼𑀓𑀁 𑀉𑀧𑀧𑀭𑀺𑀓𑁆𑀔𑀺𑀬𑀢𑀺. 𑀓𑀺𑀁𑀦𑀼 𑀔𑁄 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀺…𑀧𑁂… 𑀢𑁂𑀳𑀺 𑀲𑀼𑀢𑁆𑀢𑁂𑀳𑀺 𑀲𑀳 𑀅𑀥𑀺𑀲𑀦𑁆𑀦𑀝𑁆𑀞𑁂𑀳𑀺 𑀬𑀼𑀚𑁆𑀚𑀢𑀺 𑀉𑀤𑀸𑀳𑀼 𑀦 𑀬𑀼𑀚𑁆𑀚𑀢𑀻𑀢𑀺?

𑀬𑀣𑀸 𑀪𑀕𑀯𑀸 𑀓𑀺𑀮𑁂𑀲𑁂 𑀆𑀤𑀺𑀫𑁆𑀳𑀺 𑀢𑀢𑁆𑀣 𑀤𑁂𑀲𑁂𑀢𑀺. 𑀓𑀺𑀁 𑀤𑁂𑀲𑀺𑀢𑀁? 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀉𑀤𑀸𑀳𑀼 𑀦𑁄 𑀤𑁂𑀲𑀺𑀢𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀬𑀤𑀺 𑀦 𑀤𑁂𑀲𑀺𑀢𑀁 𑀪𑀕𑀯𑀢𑀺 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸 𑀬𑀢𑁆𑀣 𑀢𑁂 𑀅𑀓𑀼𑀲𑀮𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀲𑀫𑀦𑁆𑀦𑁂𑀳𑀫𑀸𑀦𑁄 𑀦 𑀮𑀪𑀢𑀺. 𑀢𑀢𑁆𑀣 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀓𑀟𑁆𑀠𑀺𑀢𑀩𑁆𑀩𑀸 𑀯𑀻𑀫𑀁𑀲𑀺𑀢𑀩𑁆𑀩𑀸, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑀼𑀢𑁆𑀢𑀁, 𑀬𑀤𑀺 𑀓𑀺𑀮𑁂𑀲𑀸 𑀅𑀧𑀓𑀟𑁆𑀠𑀺𑀬𑀦𑁆𑀢𑀸. 𑀬𑁂 𑀯𑀸 𑀦 𑀤𑁂𑀦𑁆𑀢𑀺 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀢𑀸𑀲𑀼 𑀪𑀽𑀫𑀻𑀲𑀼 𑀓𑀺𑀮𑁂𑀲𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀉𑀤𑀸𑀳𑀼 𑀦 𑀕𑀘𑁆𑀙𑀦𑁆𑀢𑀻𑀢𑀺. 𑀬𑀢𑁆𑀢𑀓𑀸 𑀧𑀦 𑀓𑀺𑀮𑁂𑀲𑀸 𑀤𑁂𑀲𑀺𑀢𑀸. 𑀦 𑀢𑀢𑁆𑀢𑀓𑀸 𑀅𑀭𑀺𑀬𑀥𑀫𑁆𑀫𑀸 𑀤𑁂𑀲𑀺𑀢𑀸. 𑀬𑀢𑁆𑀣 𑀓𑀺𑀮𑁂𑀲𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀬𑁂 𑀓𑀺𑀮𑁂𑀲𑀸 𑀅𑀭𑀺𑀬𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑁂𑀦 𑀦 𑀬𑀼𑀚𑁆𑀚𑀦𑁆𑀢𑀺, 𑀢𑁂 𑀅𑀧𑀓𑀟𑁆𑀠𑀺𑀢𑀩𑁆𑀩𑀸, 𑀲𑀘𑁂 𑀅𑀧𑀓𑀟𑁆𑀠𑀺𑀬𑀦𑁆𑀢𑀸 𑀬𑁄𑀚𑀦𑀁 𑀤𑁂𑀢𑀺. 𑀢𑀢𑁆𑀣 𑀏𑀯𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀤𑁆𑀯𑁂 𑀢𑀻𑀡𑀺 𑀯𑀸 𑀢𑀤𑀼𑀢𑁆𑀢𑀭𑀺 𑀯𑀸 𑀓𑀺𑀮𑁂𑀲𑀸 𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀲𑀘𑁂 𑀏𑀯𑀁 𑀯𑀻𑀫𑀁𑀲𑀺𑀬𑀦𑁆𑀢𑀸 𑀬𑁄𑀚𑀦𑀁 𑀤𑁂𑀢𑀺, 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀧𑀭𑀫𑁆𑀧𑀭𑀸𑀬 𑀯𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦 𑀯𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀘 𑀦𑀢𑁆𑀣𑁄 𑀘. 𑀬𑀁 𑀯𑀸 𑀦 𑀲𑀓𑁆𑀓𑀸 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀦𑁂𑀯 𑀲𑀼𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀩𑁆𑀩𑀁. 𑀏𑀯𑀁 𑀬𑀣𑀸 𑀆𑀤𑀺𑀫𑁆𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀬𑁂 𑀓𑀺𑀮𑁂𑀲𑀸 𑀢𑁂 𑀧𑀳𑀻𑀦𑁂𑀬𑁆𑀬𑀸𑀢𑀺. 𑀢𑁂 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀧𑀼𑀭𑁄 𑀯𑀸 𑀓𑀼𑀲𑀮𑁄 𑀧𑀝𑀺𑀧𑀓𑁆𑀔𑁂𑀦 𑀯𑀸 𑀧𑀼𑀭𑁄 𑀤𑁂𑀲𑀦𑀸, 𑀅𑀦𑀽𑀦𑀸 𑀅𑀦𑀥𑀺𑀓𑀸 𑀉𑀕𑁆𑀕𑀳𑁂𑀢𑀩𑁆𑀩𑀸. 𑀬𑀣𑀸 𑀧𑀞𑀫𑁄 𑀉𑀢𑁆𑀢𑀺𑀮𑁄 𑀬𑁂𑀲𑀫𑀺𑀤𑀸𑀦𑀺 𑀓𑀺𑀮𑁂𑀲𑀸𑀦𑀁 𑀬𑁂 𑀅𑀭𑀺𑀬𑀥𑀫𑁆𑀫𑀸 𑀤𑁂𑀲𑀺𑀢𑀸 𑀇𑀫𑁂 𑀓𑀺𑀮𑁂𑀲𑀸 𑀇𑀫𑁂𑀳𑀺 𑀅𑀭𑀺𑀬𑀥𑀫𑁆𑀫𑁂𑀳𑀺 𑀧𑀳𑀻𑀬𑀦𑁆𑀢𑀺, 𑀉𑀤𑀸𑀳𑀼 𑀦𑀧𑁆𑀧𑀳𑀻𑀬𑀦𑁆𑀢𑀻𑀢𑀺 𑀯𑀺𑀘𑀺𑀦𑀺𑀢𑀩𑁆𑀩𑀸. 𑀬𑀤𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸 𑀬𑀼𑀚𑁆𑀚𑀦𑁆𑀢𑀺, 𑀕𑀳𑁂𑀢𑀩𑁆𑀩𑀸. 𑀅𑀣 𑀦 𑀬𑀼𑀚𑁆𑀚𑀦𑁆𑀢𑀺, 𑀬𑁂 𑀓𑀺𑀮𑁂𑀲𑀸 𑀅𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺, 𑀢𑁂 𑀓𑀺𑀮𑁂𑀲𑀸 𑀅𑀧𑀭𑀺𑀧𑀓𑁆𑀔𑀺𑀢𑀩𑁆𑀩𑀸. 𑀬𑁂 𑀘 𑀅𑀭𑀺𑀬𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀺, 𑀢𑁂 𑀅𑀭𑀺𑀬𑀥𑀫𑁆𑀫𑀸 𑀅𑀧𑀓𑀟𑁆𑀠𑀺𑀢𑀩𑁆𑀩𑀸. 𑀦 𑀳𑀺 𑀅𑀭𑀺𑀬𑀥𑀫𑁆𑀫𑀸 𑀅𑀦𑀸𑀕𑀸𑀫𑀺𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀦𑀸𑀧𑀺 𑀅𑀭𑀺𑀬𑀥𑀫𑁆𑀫𑀸 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀬𑀣𑀸 𑀓𑀼𑀲𑀮𑀸 𑀫𑁂𑀢𑁆𑀢𑀸 𑀅𑀓𑀼𑀲𑀮𑁄 𑀭𑀸𑀕𑁄 𑀦 𑀢𑀼 𑀓𑀼𑀲𑀮𑀸 𑀫𑁂𑀢𑁆𑀢𑀸𑀢𑀺 𑀓𑀸𑀭𑁂𑀢𑁆𑀯𑀸 𑀅𑀓𑀼𑀲𑀮𑀲𑁆𑀲 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬 𑀲𑀫𑁆𑀪𑀯𑀢𑀺 𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀬 𑀧𑀳𑀸𑀦𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀉𑀪𑁄 𑀓𑀺𑀮𑁂𑀲𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀬𑁄 𑀬𑁄 𑀘 𑀥𑀫𑁆𑀫𑁄 𑀉𑀧𑀤𑀺𑀲𑀺𑀬𑀢𑀺 𑀓𑀼𑀲𑀮𑁄 𑀯𑀸 𑀅𑀓𑀼𑀲𑀮𑁄 𑀯𑀸 𑀲𑁄 𑀅𑀧𑀓𑀟𑁆𑀠𑀺𑀢𑀩𑁆𑀩𑁄. 𑀲𑀘𑁂 𑀢𑁂 𑀬𑀼𑀚𑁆𑀚𑀦𑁆𑀢𑀺 𑀅𑀧𑀓𑀟𑁆𑀠𑀺𑀬𑀫𑀸𑀦𑁄 𑀦𑀢𑁆𑀣𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀤𑁆𑀯𑁂 𑀯𑀸 𑀓𑀺𑀮𑁂𑀲𑀸 𑀏𑀓𑁂𑀦 𑀅𑀭𑀺𑀬𑀥𑀫𑁆𑀫𑁂𑀦 𑀧𑀳𑀻𑀦𑁂𑀬𑁆𑀬𑀸𑀢𑀺 𑀤𑁆𑀯𑀻𑀳𑀺 𑀯𑀸 𑀅𑀭𑀺𑀬𑀥𑀫𑁆𑀫𑁂𑀳𑀺 𑀏𑀓𑁄 𑀯𑀸 𑀓𑀺𑀮𑁂𑀲𑁄 𑀧𑀳𑀻𑀬𑀢𑀻𑀢𑀺.

𑀅𑀣 𑀯𑀸 𑀏𑀯𑀫𑁆𑀧𑀺 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀁 𑀬𑀼𑀚𑁆𑀚𑀢𑀺, 𑀢𑀢𑁆𑀣 𑀯𑀻𑀫𑀁𑀲𑀺𑀢𑀩𑁆𑀩𑀁 𑀯𑀸 𑀬𑀣𑀸 𑀬𑀼𑀚𑁆𑀚𑀢𑀺 𑀢𑀢𑁆𑀣 𑀯𑀻𑀫𑀁𑀲𑀺𑀢𑀩𑁆𑀩𑀁 𑀯𑀸, 𑀬𑀣𑀸 𑀦𑀦𑀼 𑀲𑀓𑁆𑀓𑀸 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀁, 𑀦 𑀳𑀺 𑀲𑀼𑀢𑁆𑀢𑁂 𑀯𑀺𑀘𑀺𑀓𑀺𑀘𑁆𑀙𑀺𑀢𑀩𑁆𑀩𑀁. 𑀓𑀺𑀮𑁂𑀲𑁄 𑀫𑀁 𑀅𑀭𑀺𑀬𑀥𑀫𑁆𑀫𑁂𑀲𑀼 𑀤𑁂𑀲𑀺𑀢𑁂𑀲𑀼 𑀉𑀪𑀬𑀢𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀓𑀺𑀭 𑀬𑁂 𑀯𑀸 𑀇𑀫𑁂 𑀓𑀺𑀮𑁂𑀲𑀸 𑀤𑁂𑀲𑀺𑀢𑀸 𑀬𑁂 𑀘 𑀅𑀭𑀺𑀬𑀥𑀫𑁆𑀫𑀸 𑀤𑁂𑀲𑀺𑀢𑀸 𑀕𑀸𑀣𑀸𑀬 𑀯𑀸 𑀩𑁆𑀬𑀸𑀓𑀭𑀡𑁂𑀦 𑀯𑀸, 𑀓𑀺𑀁 𑀦𑀼 𑀔𑁄 𑀇𑀫𑁂 𑀓𑀺𑀮𑁂𑀲𑀸 𑀇𑀫𑁂𑀳𑀺 𑀅𑀭𑀺𑀬𑀥𑀫𑁆𑀫𑁂𑀳𑀺 𑀧𑀳𑀻𑀬𑀦𑁆𑀢𑀺, 𑀉𑀤𑀸𑀳𑀼 𑀦𑀧𑁆𑀧𑀳𑀻𑀬𑀦𑁆𑀢𑀺? 𑀇𑀫𑁂 𑀯𑀸 𑀅𑀭𑀺𑀬𑀥𑀫𑁆𑀫𑀸 𑀇𑀫𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀦 𑀢𑀼 𑀲𑀩𑁆𑀩𑁂𑀳𑀺 𑀅𑀭𑀺𑀬𑀥𑀫𑁆𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸 𑀫𑁂𑀢𑁆𑀢𑀸 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀘 𑀭𑀸𑀕𑁄 𑀦 𑀢𑀼 𑀓𑀼𑀲𑀮𑀸 𑀫𑁂𑀢𑁆𑀢𑀸 𑀅𑀓𑀼𑀲𑀮𑁄 𑀭𑀸𑀕𑁄𑀢𑀺 𑀓𑀸𑀭𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀭𑀸𑀕𑁄 𑀧𑀳𑀸𑀦𑀁, 𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀬 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀓𑀺𑀮𑁂𑀲𑁄𑀢𑀺 𑀓𑀸𑀭𑁂𑀢𑁆𑀯𑀸 𑀲𑀼𑀢𑁆𑀢𑁂𑀦 𑀧𑀳𑀸𑀦𑀁 𑀕𑀘𑁆𑀙𑀢𑀺. 𑀦 𑀲𑀼𑀢𑁆𑀢𑁄 𑀥𑀫𑁆𑀫𑁄𑀢𑀺 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀁 𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀬𑀁 𑀢𑀼 𑀲𑀼𑀢𑁆𑀢𑀲𑁆𑀲 𑀅𑀭𑀺𑀬𑀥𑀫𑁆𑀫𑁄 𑀲𑀁𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑁄, 𑀲𑁄 𑀢𑁂𑀦 𑀧𑀳𑀸𑀦𑀁 𑀕𑀘𑁆𑀙𑀢𑀻𑀢𑀺.

𑁪𑁧. 𑀢𑀢𑁆𑀣 𑀓𑀼𑀲𑀮𑁂 𑀤𑁂𑀲𑀺𑀢𑁂 𑀲𑀼𑀢𑁆𑀢𑁂 𑀩𑁆𑀬𑀸𑀓𑀭𑀡𑁂 𑀯𑀸 𑀲𑀁𑀓𑀺𑀮𑁂𑀲𑀸 𑀦 𑀬𑀼𑀚𑁆𑀚𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑀸 𑀯𑀸, 𑀢𑁂 𑀫𑀳𑀸𑀧𑀤𑁂𑀲𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀯𑀬𑀯𑁂𑀦 𑀅𑀧𑀓𑀟𑁆𑀠𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀺𑀮𑁂𑀲𑁂𑀳𑀺 𑀘 𑀤𑁂𑀲𑀺𑀢𑁂𑀳𑀺 𑀅𑀭𑀺𑀬𑀥𑀫𑁆𑀫𑁂𑀲𑀼 𑀘 𑀬𑀤𑀺𑀧𑀺 𑀢𑁂𑀦 𑀅𑀭𑀺𑀬𑀥𑀫𑁆𑀫𑁂𑀦 𑀢𑁂 𑀓𑀺𑀮𑁂𑀲𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣𑀧𑀺 𑀉𑀢𑁆𑀢𑀭𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀓𑁂𑀦 𑀓𑀸𑀭𑀡𑁂𑀦 𑀏𑀢𑁂 𑀓𑀺𑀮𑁂𑀲𑀸 𑀧𑀚𑀳𑀺𑀢𑀩𑁆𑀩𑀸, 𑀓𑁂𑀦 𑀓𑀸𑀭𑀡𑁂𑀦 𑀅𑀭𑀺𑀬𑀥𑀫𑁆𑀫𑀸 𑀤𑁂𑀲𑀺𑀢𑀸𑀢𑀺? 𑀬𑁂𑀦 𑀬𑁂𑀦 𑀯𑀸 𑀆𑀓𑀸𑀭𑁂𑀦 𑀅𑀭𑀺𑀬𑀥𑀫𑁆𑀫𑀸 𑀤𑁂𑀲𑀺𑀢𑀸, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀅𑀬𑀁 𑀓𑀺𑀮𑁂𑀲𑁄 𑀞𑀺𑀢𑁄. 𑀅𑀢𑁆𑀣𑀺 𑀳𑀺 𑀏𑀓𑁄 𑀓𑀺𑀮𑁂𑀲𑁄, 𑀢𑁂𑀦 𑀯𑀸 𑀅𑀭𑀺𑀬𑀥𑀫𑁆𑀫𑀸 𑀦 𑀅𑀜𑁆𑀜𑀣𑀸 𑀅𑀜𑁆𑀜𑀣𑀸 𑀧𑀳𑀸𑀢𑀩𑁆𑀩𑁄, 𑀬𑀣𑀸 𑀤𑀺𑀝𑁆𑀞𑀺 𑀭𑀸𑀕𑁄 𑀅𑀯𑀺𑀚𑁆𑀚𑀸 𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀲𑀸 𑀘𑁂 𑀏𑀯𑀜𑁆𑀘 𑀅𑀯𑀺𑀚𑁆𑀚𑀸 𑀪𑀸𑀯𑀦𑀸𑀬 𑀪𑀽𑀫𑀺 𑀯𑀸 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀲𑀸𑀬𑁂𑀯 𑀉𑀤𑁆𑀥𑀁𑀪𑀸𑀕𑀺𑀬𑀁 𑀅𑀲𑀗𑁆𑀔𑀢𑀤𑀲𑁆𑀲𑀦𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀦𑀺𑀫𑀺𑀢𑁆𑀢𑁂𑀦 𑀘𑁂𑀢𑁄𑀲𑀫𑀸𑀥𑀺𑀦𑀸 𑀅𑀫𑀦𑀲𑀺𑀓𑀸𑀭𑁂𑀦 𑀧𑀳𑀻𑀬𑀢𑀺. 𑀏𑀯𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀬𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀤𑀲𑁆𑀲𑀦𑀸𑀓𑀸𑀭𑁂𑀦 𑀅𑀭𑀺𑀬𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀓𑀸𑀭𑁂𑀦 𑀅𑀭𑀺𑀬𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀧𑀢𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸 𑀧𑀢𑀺𑀲𑁂𑀯𑀦𑀸𑀓𑀸𑀭𑁂𑀦 𑀅𑀭𑀺𑀬𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀏𑀯𑀁 𑀯𑀺𑀦𑁄𑀤𑀦𑀧𑀳𑀸𑀢𑀩𑁆𑀩𑀸 𑀬𑀸𑀯 𑀲𑀢𑁆𑀢 𑀆𑀲𑀯𑀸 𑀓𑀸𑀢𑀩𑁆𑀩𑀸, 𑀬𑀸𑀯𑀜𑁆𑀜𑀣𑀸. 𑀅𑀜𑁆𑀜𑀣𑀸 𑀳𑁂𑀲 𑀥𑀫𑁆𑀫𑁄 𑀧𑀳𑀸𑀢𑀩𑁆𑀩𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀅𑀭𑀺𑀬𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀅𑀭𑀺𑀬𑀥𑀫𑁆𑀫𑁄 𑀅𑀜𑁆𑀜𑀣𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀤𑀺 𑀅𑀬𑀁 𑀥𑀫𑁆𑀫𑁄 𑀧𑀭𑀺𑀬𑁂𑀲𑀢𑁄 𑀬𑁄 𑀘 𑀤𑁂𑀲𑁂𑀢𑀺 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦, 𑀲𑁄 𑀅𑀭𑀺𑀬𑀥𑀫𑁆𑀫𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀢𑁂𑀦𑀸𑀓𑀸𑀭𑁂𑀦 𑀓𑀺𑀮𑁂𑀲𑁄 𑀧𑀳𑀻𑀬𑀢𑀺. 𑀲𑁄 𑀢𑀢𑁆𑀣 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀅𑀣 𑀦 𑀬𑀼𑀚𑁆𑀚𑀢𑀺 𑀬𑀤𑀺 𑀳𑀺 𑀢𑁂𑀦 𑀲𑀼𑀢𑁆𑀢𑁂𑀦 𑀯𑀺𑀳𑀺𑀢𑀁 𑀲𑀼𑀢𑁆𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀦 𑀬𑀼𑀚𑁆𑀚𑀢𑀺, 𑀢𑀣𑀸 𑀦 𑀕𑀳𑁂𑀢𑀩𑁆𑀩𑀁, 𑀅𑀤𑁆𑀥𑀸 𑀏𑀢𑀁 𑀪𑀕𑀯𑀢𑀸 𑀦 𑀪𑀸𑀲𑀺𑀢𑀁, 𑀆𑀬𑀲𑁆𑀫𑀢𑀸 𑀯𑀸 𑀤𑀼𑀕𑁆𑀕𑀳𑀺𑀢𑀁, 𑀬𑀣𑀸 𑀫𑀳𑀸𑀧𑀤𑁂𑀲𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀪𑀕𑀯𑀢𑀸 𑀬𑀣𑀸𑀪𑀽𑀢𑀁 𑀤𑁂𑀲𑀺𑀢𑀁, 𑀬𑁄 𑀘 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀦 𑀳𑀺 𑀧𑀘𑁆𑀘𑀬𑀸 𑀯𑀺𑀦𑀸 𑀥𑀫𑁆𑀫𑁄 𑀅𑀧𑁆𑀧𑀘𑁆𑀘𑀬𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀓𑁄 𑀆𑀓𑀸𑀭𑁄 𑀧𑀭𑀺𑀬𑁂𑀲𑀦𑀸𑀬?

𑀢𑀢𑁆𑀣 𑀢𑀣𑀸𑀭𑀽𑀧𑀁 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑀁 𑀲𑁄𑀬𑀁 𑀥𑀫𑁆𑀫𑁄 𑀯𑀼𑀢𑁆𑀢𑁄𑀢𑀺 𑀇𑀤𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀲𑁄 𑀘 𑀧𑀘𑁆𑀘𑀬𑁄 𑀢𑀺𑀯𑀺𑀥𑁄 𑁋 𑀫𑀼𑀤𑀼 𑀫𑀚𑁆𑀛𑁄 𑀅𑀥𑀺𑀫𑀢𑁆𑀢𑁄. 𑀢𑀢𑁆𑀣 𑀫𑀼𑀤𑀼𑀫𑁆𑀳𑀺 𑀧𑀘𑁆𑀘𑀬𑁂 𑀫𑀼𑀤𑀼𑀥𑀫𑁆𑀫𑁄 𑀕𑀳𑁂𑀢𑀩𑁆𑀩𑁄, 𑀏𑀯𑀁 𑀲𑀢𑁆𑀬𑁂𑀲 𑀧𑀘𑁆𑀘𑀬𑁄 𑀤𑀼𑀯𑀺𑀥𑁄 𑀧𑀭𑀁𑀧𑀭𑀸𑀧𑀘𑁆𑀘𑀬𑁄 𑀘 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀘. 𑀲𑁄 𑀧𑀘𑁆𑀘𑀬𑁄 𑀫𑀼𑀤𑀼𑀢𑁂𑀦 𑀩𑁆𑀬𑀸𑀥𑀺𑀫𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀓𑀺𑀁 𑀓𑀸𑀭𑀡𑀁? 𑀅𑀜𑁆𑀜𑀢𑀭𑁄𑀧𑀺 𑀧𑀘𑁆𑀘𑀬𑁄 𑀅𑀜𑁆𑀜𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀭𑀺𑀬𑀢𑁆𑀢𑀺𑀁 𑀯𑀸 𑀧𑀸𑀭𑀺𑀧𑀽𑀭𑀺𑀁 𑀯𑀸 𑀕𑀘𑁆𑀙𑀢𑀺. 𑀢𑀢𑁆𑀣 𑀬𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀏𑀢𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀣𑀸 𑀧𑀘𑁆𑀘𑀬𑁄 𑀳𑁂𑀢𑀼𑀦𑀸 𑀧𑀘𑁆𑀘𑀬𑁂𑀦 𑀘, 𑀲𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑁄 𑀅𑀥𑀺𑀝𑁆𑀞𑀸𑀦𑁂 𑀧𑀥𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀲𑁄 𑀧𑀘𑁆𑀘𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀦 𑀳𑀺 𑀫𑀼𑀤𑀼𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀫𑀢𑁆𑀢𑁄 𑀦𑀺𑀲𑁆𑀲𑀦𑁆𑀤𑁄 𑀅𑀥𑀺𑀫𑀢𑁆𑀢𑀲𑁆𑀲 𑀯𑀸 𑀦𑀺𑀲𑁆𑀲𑀦𑁆𑀤𑀲𑁆𑀲 𑀫𑀼𑀤𑀼𑀥𑀫𑁆𑀫𑁄, 𑀅𑀣 𑀫𑀼𑀤𑀼𑀲𑁆𑀲 𑀫𑀼𑀤𑀼 𑀫𑀚𑁆𑀛𑀸𑀬 𑀫𑀚𑁆𑀛𑁄 𑀅𑀥𑀺𑀫𑀢𑁆𑀢𑀲𑁆𑀲 𑀅𑀥𑀺𑀫𑀢𑁆𑀢𑁄 𑀬𑀼𑀚𑁆𑀚𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁, 𑀅𑀣 𑀦 𑀬𑀼𑀚𑁆𑀚𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀬𑀜𑁆𑀘 𑀪𑀕𑀯𑀸 𑀆𑀭𑀪𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀢𑀁𑀬𑁂𑀯 𑀥𑀫𑁆𑀫𑀁 𑀫𑀚𑁆𑀛𑀦𑁆𑀢𑀧𑀭𑀺𑀬𑁄𑀲𑀸𑀦𑀁 𑀤𑁂𑀲𑁂𑀢𑀺, 𑀬𑀣𑀸 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑁂 𑀥𑀫𑁆𑀫𑀸 𑀆𑀤𑀺𑀫𑁆𑀳𑀺 𑀦𑀺𑀤𑁆𑀤𑀺𑀲𑀢𑀺, 𑀢𑀁𑀬𑁂𑀯 𑀩𑀳𑀼 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀁. 𑀢𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀢𑀁 𑀲𑀼𑀢𑁆𑀢𑀁 𑀳𑁄𑀢𑀺 𑀕𑀸𑀣𑀸 𑀯𑀸 𑀩𑁆𑀬𑀸𑀓𑀭𑀡𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀯𑀸, 𑀬𑀣𑀸 𑀧𑀦 𑀤𑀼𑀯𑀺𑀥𑀸 𑀅𑀦𑀼𑀭𑀽𑀧𑀦𑁆𑀢𑀺 𑀯𑀸 𑀣𑀧𑀦𑀸 𑀘 𑀤𑁂𑀲𑀦𑀸𑀣𑀧𑀦𑀸. 𑀭𑀽𑀧𑀦𑁆𑀢𑀺𑀧𑀺 𑀥𑀫𑁆𑀫𑀲𑁆𑀲 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀬𑀣𑀸 𑀘 𑀪𑀕𑀯𑀢𑀸 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑀡𑀁 𑀤𑁂𑀲𑀺𑀢𑀁 𑀢𑀡𑁆𑀳𑀸𑀬 𑀦𑀺𑀕𑁆𑀕𑀳𑀡𑀢𑁆𑀣𑀁 𑀇𑀘𑁆𑀙𑀸𑀯 𑀳𑁄𑀢𑀺. 𑀤𑁂𑀲𑁂𑀢𑀺 𑀬𑀣𑀸 𑀕𑁄𑀧𑀸𑀮𑀓𑁄𑀧𑀫𑁂 𑀲𑀼𑀢𑁆𑀢𑁂 𑀅𑀜𑁆𑀜𑁂𑀳𑀺𑀧𑀺 𑀲𑀼𑀢𑁆𑀢𑁂𑀳𑀺 𑀪𑀕𑀯𑀸 𑀪𑀸𑀲𑀢𑀺 𑀇𑀘𑁆𑀙𑀸𑀯 𑀳𑁄𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀯𑀺𑀢𑀓𑁆𑀓𑁄 𑀅𑀬𑀁 𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀭𑀽𑀧𑀦𑁆𑀢𑀺 𑀇𑀢𑀺 𑀲𑁄 𑀥𑀫𑁆𑀫𑁄 𑀅𑀜𑁆𑀜𑁂𑀲𑀼𑀧𑀺 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀦 𑀳𑀺 𑀏𑀓𑀁 𑀳𑀺 𑀲𑀼𑀢𑁆𑀢𑁂 𑀤𑀝𑁆𑀞𑀩𑁆𑀩𑁄. 𑀬𑀼𑀚𑁆𑀚𑀦𑀁 𑀢𑀁 𑀕𑀳𑁂𑀢𑀩𑁆𑀩𑀁.

𑁪𑁨. 𑀢𑀢𑁆𑀣 𑀓𑀢𑀫𑀁 𑀅𑀦𑀼𑀜𑁆𑀜𑀸𑀢𑀁? 𑀬𑀁 𑀓𑀺𑀜𑁆𑀘𑀺 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀦 𑀪𑀸𑀲𑀺𑀢𑀁 𑀢𑀜𑁆𑀘 𑀲𑀼𑀢𑁆𑀢𑁂𑀲𑀼𑀬𑁂𑀯 𑀦𑁆𑀤𑀺𑀲𑁆𑀲𑀢𑀺, 𑀏𑀯𑀫𑁂𑀢𑀁 𑀥𑀸𑀭𑁂𑀢𑀩𑁆𑀩𑀁. 𑀬𑀣𑀸 𑀅𑀲𑀼𑀓𑁂𑀦 𑀪𑀸𑀲𑀺𑀢𑀦𑁆𑀢𑀺, 𑀢𑀁 𑀲𑀼𑀢𑁆𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀓𑀺𑀁 𑀦𑀼 𑀔𑁄 𑀇𑀫𑀁 𑀲𑀼𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁 𑀔𑀫𑀁 𑀪𑀕𑀯𑀢𑁄 𑀉𑀤𑀸𑀳𑀼 𑀦𑀸𑀦𑀼𑀜𑁆𑀜𑀸𑀢𑀁 𑀔𑀫𑀁, 𑀓𑀺𑀜𑁆𑀘𑀺 𑀭𑀽𑀧𑀜𑁆𑀘 𑀲𑀼𑀢𑁆𑀢𑀁 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀢𑀁 𑀔𑀫𑀁 𑀓𑀺𑀜𑁆𑀘𑀺 𑀭𑀽𑀧𑀜𑁆𑀘 𑀦𑀸𑀦𑀼𑀜𑁆𑀜𑀸𑀢𑀁 𑀔𑀫𑀁? 𑀬𑀁 𑀲𑀩𑁆𑀩𑀲𑁄 𑀅𑀦𑁄𑀢𑀸𑀭𑁂𑀢𑁆𑀯𑀸 𑀤𑀲𑀩𑀮𑁄 𑀕𑁄𑀘𑀭𑀁 𑀤𑁂𑀲𑁂𑀢𑀺, 𑀢𑀁 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀪𑀕𑀯𑀢𑁄 𑀦𑀸𑀦𑀼𑀜𑁆𑀜𑀸𑀢𑀁 𑀔𑀫𑀁. 𑀅𑀢𑁆𑀣𑀺𑀧𑀺 𑀲𑁄 𑀲𑀸𑀯𑀓𑁄 𑀤𑀲𑀩𑀮𑀸𑀦𑀁 𑀕𑁄𑀘𑀭𑀁 𑀚𑀸𑀦𑀸𑀢𑀺 𑀑𑀥𑀺𑀲𑁄 𑀅𑀦𑁄𑀥𑀺𑀲𑁄, 𑀢𑀁 𑀧𑀦 𑀩𑀮𑀁 𑀲𑀩𑁆𑀩𑀲𑁄 𑀦 𑀚𑀸𑀦𑀸𑀢𑀺 𑀅𑀜𑁆𑀜𑀣𑀸 𑀦𑀸𑀫 𑀲𑀯𑀦𑁂𑀦, 𑀬𑀣𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀑𑀯𑀤𑀺𑀢𑁄, 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀦𑀢𑁆𑀣𑀺 𑀇𑀦𑁆𑀤𑁆𑀭𑀺𑀬𑀩𑀮𑀯𑁂𑀫𑀢𑁆𑀢𑀜𑀸𑀡𑀁, 𑀢𑁂𑀦 𑀧𑀼𑀕𑁆𑀕𑀮𑀧𑀭𑁄 [𑀧𑀼𑀕𑁆𑀕𑀮𑁄 𑀧𑀭𑁄𑀧𑀭𑀜𑁆𑀘 (𑀧𑀻.)] 𑀧𑀭𑀜𑁆𑀘 𑀢𑀁 𑀅𑀚𑀸𑀦𑀦𑁆𑀢𑁄 𑀲𑀢𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑁂 𑀉𑀧𑁆𑀧𑀸𑀤𑀺𑀢𑁄, 𑀲𑁄 𑀪𑀕𑀯𑀢𑀸 𑀅𑀧𑀲𑀸𑀤𑀺𑀢𑁄. 𑀬𑀣𑀸𑀯 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀸𑀕𑀺𑀦𑁂𑀬𑁆𑀬𑀁 𑀑𑀯𑀤𑀢𑀺 𑀅𑀦𑀦𑁆𑀢𑀭𑀺𑀬𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀝𑀺𑀳𑀻𑀭𑁂𑀦 𑀅𑀗𑁆𑀕𑀼𑀮𑀺𑀬𑁄 𑀅𑀤𑀻𑀧𑁂𑀢𑁆𑀯𑀸 𑀬𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀲𑀁𑀯𑀺𑀚𑁆𑀚𑀢𑁂, 𑀢𑁂𑀦 𑀦𑀁 𑀑𑀯𑀤𑀢𑀺, 𑀢𑀁 𑀪𑀕𑀯𑀸 𑀓𑀭𑁄𑀢𑀺.

‘‘𑀲𑀘𑁂𑀧𑀺 𑀤𑀲 𑀧𑀚𑁆𑀚𑁄𑀢𑁂, 𑀥𑀸𑀭𑀬𑀺𑀲𑁆𑀲𑀲𑀺 𑀓𑀲𑁆𑀲𑀧;

𑀦𑁂𑀯 𑀤𑀓𑁆𑀔𑀢𑀺 𑀭𑀽𑀧𑀸𑀦𑀺, 𑀘𑀓𑁆𑀔𑀼 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀻’’𑀢𑀺.

𑀅𑀧𑀺 𑀘 𑀔𑁄 𑀬𑀣𑀸 𑀤𑀽𑀢𑁄 𑀭𑀸𑀚𑀯𑀘𑀦𑁂𑀦 𑀲𑀢𑁆𑀢𑀫𑀦𑀼𑀲𑀸𑀲𑀢𑀺, 𑀏𑀯𑀁 𑀲𑁂𑀲𑀸𑀦𑀼𑀕𑁄 𑀅𑀜𑁆𑀜𑀸𑀢𑀓𑀁 𑀖𑁄𑀲𑀁 𑀧𑀭𑁂𑀲𑀁 𑀤𑁂𑀲𑁂𑀢𑀺. 𑀅𑀦𑀼𑀜𑁆𑀜𑀸𑀢𑀔𑀫𑀲𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀅𑀦𑀦𑀼𑀜𑁆𑀜𑀸𑀢𑀔𑀫𑀁 𑀦 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀣 𑀓𑀢𑀫𑁄 𑀲𑀼𑀢𑁆𑀢𑀲𑀗𑁆𑀓𑀭𑁄? 𑀧𑀜𑁆𑀘𑀯𑀺𑀥𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀪𑀸𑀯𑀦𑀸𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬 𑀅𑀜𑁆𑀜𑀁 𑀤𑁂𑀲𑁂𑀢𑀺 𑀅𑀜𑁆𑀜𑀲𑁆𑀲 𑀘 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀅𑀜𑁆𑀜𑀫𑁆𑀳𑀺 𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀲𑀢𑀺. 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀺 𑀅𑀦𑁂𑀓𑀸𑀓𑀸𑀭𑀁 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀭𑀺𑀬𑀥𑀫𑁆𑀫𑀲𑀸𑀥𑀦𑁂 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀯𑀸𑀲𑀦𑀸𑀪𑀸𑀕𑀺𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑀦𑀪𑀸𑀕𑀺𑀬𑁂𑀲𑀼 𑀦𑀺𑀤𑁆𑀤𑀺𑀲𑀢𑀺. 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀢𑁆𑀣𑀁 𑀉𑀤𑁆𑀥𑀁𑀪𑀸𑀕𑀺𑀬𑁂𑀲𑀼 𑀦𑀺𑀤𑁆𑀤𑀺𑀲𑀢𑀺. 𑀫𑀼𑀤𑀼𑀫𑀚𑁆𑀛𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀫𑀢𑁆𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀦𑀺𑀤𑁆𑀤𑀺𑀲𑀢𑀺. 𑀇𑀢𑀺 𑀅𑀬𑀁 𑀲𑀼𑀢𑁆𑀢𑀁 𑀲𑀫𑁆𑀪𑁂𑀤𑀁 𑀳𑁂𑀢𑀼𑀦𑀸 𑀘 𑀦𑀺𑀲𑁆𑀲𑀦𑁆𑀤𑁂𑀦 𑀘 𑀨𑀮𑁂𑀦 𑀘 𑀦𑀺𑀤𑁆𑀤𑁂𑀲𑁂𑀦 𑀘 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸𑀬𑀧𑀺 𑀘 𑀅𑀢𑁆𑀣𑁂𑀦 𑀘 𑀩𑁆𑀬𑀜𑁆𑀚𑀦𑁂𑀦 𑀘 𑀬𑁄 𑀲𑀫𑁆𑀪𑁂𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀲𑀗𑁆𑀓𑀭𑁄. 𑀬𑁄 𑀅𑀲𑀫𑁆𑀪𑁂𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀯𑀺𑀘𑀬𑁄.

𑀢𑀢𑁆𑀣𑀸𑀬𑀁 𑀉𑀤𑁆𑀤𑀸𑀦𑀕𑀸𑀣𑀸

𑀧𑀼𑀭𑀺𑀫𑀸𑀦𑀁 𑀅𑀓𑁆𑀔𑀡𑁆𑀟𑀁, 𑀬𑀣𑀸𑀪𑀽𑀢𑀲𑁆𑀲 𑀧𑀘𑁆𑀘𑀬𑁄;

𑀦𑀺𑀲𑁆𑀲𑀦𑁆𑀤𑁄 𑀯𑀸𑀲𑀦𑀸𑀲𑀤𑁆𑀥𑀺, 𑀅𑀦𑀼𑀜𑁆𑀜𑀸 𑀲𑀼𑀢𑁆𑀢𑀲𑀗𑁆𑀓𑀭𑁄.

𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲

𑀲𑀼𑀢𑁆𑀢𑀯𑀺𑀘𑀬𑁄 𑀦𑀸𑀫 𑀘𑀢𑀼𑀢𑁆𑀣𑀪𑀽𑀫𑀺.

𑁫. 𑀧𑀜𑁆𑀘𑀫𑀪𑀽𑀫𑀺

𑁪𑁩. 𑀢𑀢𑁆𑀣 𑀓𑀢𑀫𑁄 𑀳𑀸𑀭𑀯𑀺𑀪𑀗𑁆𑀕𑁄? 𑀬𑀢𑁆𑀣 𑀲𑁄𑀴𑀲 𑀳𑀸𑀭𑀸 𑀅𑀓𑁆𑀔𑀭𑀲𑁄 𑀪𑁂𑀤𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀆𑀤𑀺𑀫𑁆𑀳𑀺 𑀤𑁂𑀲𑀦𑀸𑀳𑀸𑀭𑁄. 𑀢𑀢𑁆𑀣 𑀅𑀬𑀁 𑀕𑀸𑀣𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀲𑀘𑁆𑀘𑀸𑀦𑀺 𑀯𑀸 𑀲𑀘𑁆𑀘𑁂𑀓𑀤𑁂𑀲𑁄 𑀯𑀸. 𑀓𑀺𑀁 𑀤𑁂𑀲𑀺𑀢𑀦𑁆𑀢𑀺? 𑀲𑀼𑀢𑁆𑀢𑁂 𑀯𑀻𑀫𑀁𑀲𑀸 𑀤𑁂𑀲𑀦𑀸𑀳𑀸𑀭𑁄. 𑀬𑀣𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀦𑀺𑀓𑁆𑀔𑁂𑀧𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀸𑀥𑀸𑀭𑀡𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀘. 𑀬𑀸𑀦𑀺 𑀘 𑀅𑀝𑁆𑀞𑀸𑀭𑀲 𑀧𑀤𑀸𑀦𑀺 𑀤𑀼𑀓𑁆𑀔𑀢𑁄 𑀲𑀢𑁆𑀢 𑀧𑀤𑀸𑀦𑀺 𑀲𑀗𑁆𑀔𑁂𑀧𑁂𑀦 𑀓𑀸𑀬𑀺𑀓𑁂𑀦 𑀘𑁂𑀢𑀲𑀺𑀓𑁂𑀦 𑀤𑀼𑀓𑁆𑀔𑁂𑀦, 𑀅𑀧𑁆𑀧𑀺𑀬𑀲𑀫𑁆𑀧𑀬𑁄𑀕𑁂𑀦 𑀧𑀺𑀬𑀯𑀺𑀧𑁆𑀧𑀬𑁄𑀕𑁂𑀦 𑀘 𑀢𑀻𑀳𑀺 𑀘 𑀲𑀗𑁆𑀔𑀢𑀸𑀳𑀺. 𑀢𑀢𑁆𑀣 𑀢𑀻𑀡𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑀉𑀧𑁆𑀧𑀸𑀤𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀢𑀸 𑀘 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀢𑀸𑀢𑀺 𑀅𑀜𑁆𑀜𑀣𑀢𑁆𑀣𑀁 𑀘 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀘 𑀤𑀼𑀓𑁆𑀔𑀢𑀸, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀁 𑀢𑀻𑀲𑀼 𑀯𑁂𑀤𑀦𑀸𑀪𑀽𑀫𑀻𑀲𑀼 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀉𑀧𑁆𑀧𑀸𑀤𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀘 𑀤𑀼𑀓𑁆𑀔𑀢𑀸 𑀢𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀲𑀼𑀔𑀸 𑀯𑁂𑀤𑀦𑀸𑀬 𑀘 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀘 𑀤𑀼𑀓𑁆𑀔𑀢𑀸𑀢𑀺 𑀅𑀜𑁆𑀜𑀣𑀢𑁆𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀤𑀼𑀓𑁆𑀔𑀸𑀯𑁂𑀤𑀦𑀸 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀘 𑀤𑀼𑀓𑁆𑀔𑀢𑀸 𑀇𑀫𑀫𑁆𑀳𑀺 𑀇𑀫𑁂𑀲𑀼 𑀦𑀯𑀧𑀤𑁂𑀲𑀼 𑀧𑀞𑀫𑀓𑁂𑀲𑀼 𑀲𑀢𑁆𑀢𑀲𑀼 𑀧𑀤𑁂𑀲𑀼 𑀲𑁄𑀴𑀲𑀲𑀼 𑀧𑀤𑁂𑀲𑀼 𑀤𑀼𑀓𑁆𑀔𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀏𑀓𑀸𑀤𑀲 𑀤𑀼𑀓𑁆𑀔𑀢𑀸𑀬 𑀘 𑀮𑀓𑁆𑀔𑀡𑀁 𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀧𑀸𑀢𑀼𑀪𑀸𑀯𑀮𑀓𑁆𑀔𑀡𑀸 𑀚𑀸𑀢𑀺𑀬𑀸 𑀘 𑀧𑀸𑀢𑀼𑀪𑀸𑀯𑀘𑀼𑀢𑀺𑀮𑀓𑁆𑀔𑀡𑁄 𑀘𑀼𑀢𑁄𑀢𑀺 𑀯𑀺𑀢𑁆𑀣𑀸𑀭𑁂𑀦 𑀧𑀦𑁆𑀦𑀭𑀲𑀧𑀤𑀸𑀦𑀺 𑀓𑀢𑁆𑀢𑀩𑁆𑀩𑀸𑀦𑀺, 𑀏𑀯𑀁 𑀲𑀸𑀥𑀸𑀭𑀡𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀘 𑀲𑀢𑁆𑀢𑀲𑀼 𑀤𑀲𑀲𑀼 𑀧𑀤𑁂𑀲𑀼 𑀲𑀜𑁆𑀜𑀸𑀲 𑀢𑀺𑀯𑀺𑀥𑁂 𑀘 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑁂 𑀅𑀝𑁆𑀞𑀸𑀭𑀲𑀯𑀺𑀥𑁂𑀲𑀼 𑀘 𑀲𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀲𑀼 𑀤𑀲𑀯𑀺𑀥𑁂𑀲𑀼 𑀘 𑀲𑀼𑀢𑁆𑀢𑀯𑀺𑀥𑁂𑀬𑁆𑀬𑁂𑀲𑀼 𑀲𑁄𑀴𑀲𑀯𑀺𑀥𑁂𑀲𑀼 𑀘 𑀳𑀸𑀭𑁂𑀲𑀼 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀘 𑀧𑀯𑀺𑀘𑀬𑀯𑀻𑀫𑀁𑀲𑀸𑀬𑀸𑀢𑀺 𑀇𑀤𑀁 𑀤𑁂𑀲𑀺𑀢𑀁. 𑀬𑀣𑀸𑀪𑀽𑀢𑀜𑁆𑀘 𑀤𑁂𑀲𑀺𑀢𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑁂𑀲𑀦𑀸𑀳𑀸𑀭𑁄.

𑁪𑁪. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄?

𑀧𑀤𑀁 𑀧𑀜𑁆𑀳𑀸 𑀘 𑀧𑀼𑀘𑁆𑀙𑀸 𑀘, 𑀓𑀺𑀁 𑀧𑀼𑀩𑁆𑀩𑀁 𑀓𑀺𑀜𑁆𑀘 𑀧𑀘𑁆𑀙𑀺𑀫𑀁;

𑀅𑀦𑀼𑀕𑀻𑀢𑀺 𑀲𑀸 𑀘 𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑀧𑀤𑀦𑁆𑀢𑀺 𑀧𑀞𑀫𑀁 𑀧𑀤𑀁. 𑀢𑀲𑁆𑀲 𑀓𑁄 𑀅𑀢𑁆𑀣𑁄? 𑀬𑀁 𑀪𑀕𑀯𑀸 𑀧𑀼𑀝𑁆𑀞𑁄 𑀆𑀬𑀲𑁆𑀫𑀢𑀸 𑀅𑀚𑀺𑀢𑁂𑀦 𑀢𑀁 𑀕𑀳𑁂𑀢𑀩𑁆𑀩𑀁, 𑀓𑀢𑀺𑀧𑀤𑀸𑀦𑀺 𑀧𑀼𑀝𑁆𑀞𑀸𑀦𑀺 𑀬𑀣𑀸𑀓𑀺𑀁 𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺 𑀕𑀸𑀣𑀸, 𑀇𑀫𑀸𑀦𑀺 𑀓𑀢𑀺𑀧𑀤𑀸𑀦𑀺 𑀘𑀢𑁆𑀢𑀸𑀭𑀺 𑀇𑀢𑀺 𑀯𑀺𑀲𑀚𑁆𑀚𑀦𑀸𑀬 𑀧𑀼𑀘𑁆𑀙𑀸. 𑀬𑀢𑁆𑀢𑀓𑁂𑀳𑀺 𑀧𑀤𑁂𑀳𑀺 𑀪𑀕𑀯𑀢𑀸 𑀯𑀺𑀲𑀚𑁆𑀚𑀺𑀢𑀸𑀦𑀺 𑀧𑀤𑀸𑀦𑀺 𑀇𑀢𑀺 𑀧𑀼𑀘𑁆𑀙𑀸𑀬 𑀘 𑀬𑀸 𑀧𑀤𑀸𑀦𑀁 𑀲𑀗𑁆𑀓𑀸𑀲𑀦𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀤𑀦𑁆𑀢𑀺.

𑀧𑀜𑁆𑀳𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺. 𑀓𑀢𑀺 𑀧𑀜𑁆𑀳𑀸? 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀤𑀼𑀢𑁆𑀢𑀭𑀺 𑀯𑀸 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀏𑀓𑁄 𑀧𑀜𑁆𑀳𑁄, 𑀅𑀢𑁆𑀣𑀸𑀦𑀼𑀧𑀭𑀺𑀯𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀳𑁄𑀢𑀺, 𑀲𑀫𑁆𑀩𑀳𑀼𑀮𑀸𑀦𑀺𑀧𑀺 𑀧𑀤𑀸𑀦𑀺 𑀏𑀓𑀫𑁂𑀯𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀦𑀼𑀧𑀭𑀺𑀯𑀢𑁆𑀢𑀻𑀦𑀺 𑀢𑀁 𑀩𑁆𑀬𑀜𑁆𑀚𑀦𑁂𑀦 𑀏𑀓𑁄 𑀧𑀜𑁆𑀳𑁄𑀯 𑀳𑁄𑀢𑀺. 𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺 𑀮𑁄𑀓𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺, 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀢𑀁𑀬𑁂𑀯 𑀧𑀼𑀘𑁆𑀙𑀢𑀺. 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺 𑀢𑀁𑀬𑁂𑀯 𑀧𑀼𑀘𑁆𑀙𑀢𑀺. 𑀏𑀯𑀁 𑀅𑀢𑁆𑀣𑀸𑀦𑀼𑀧𑀭𑀺𑀯𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀏𑀓𑁄 𑀧𑀜𑁆𑀳𑁄 𑀳𑁄𑀢𑀺, 𑀲𑁄 𑀧𑀜𑁆𑀳𑁄 𑀘𑀢𑀼𑀩𑁆𑀩𑀺𑀥𑁄 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀞𑀧𑀦𑀺𑀬𑁄𑀢𑀺. 𑀢𑀢𑁆𑀣 𑀘𑀓𑁆𑀔𑀼 𑀅𑀦𑀺𑀘𑁆𑀘𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄, 𑀬𑀁 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄, 𑀲𑀺𑀬𑀸 𑀅𑀦𑀺𑀘𑁆𑀘𑀁 𑀦 𑀘𑀓𑁆𑀔𑀼, 𑀬𑀸𑀦𑀺𑀧𑀺 𑀆𑀬𑀢𑀦𑀸𑀦𑀺 𑀘 𑀦 𑀘𑀓𑁆𑀔𑀼, 𑀢𑀸𑀦𑀺𑀧𑀺 𑀅𑀦𑀺𑀘𑁆𑀘𑀦𑁆𑀢𑀺 𑀦 𑀘𑀓𑁆𑀔𑀼𑀬𑁂𑀯, 𑀅𑀬𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄, 𑀬𑀁 𑀘𑀓𑁆𑀔𑀼 𑀢𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑁂𑀢𑀺 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄, 𑀢𑀁 𑀘𑀓𑁆𑀔𑀼 𑀢𑀣𑀸𑀕𑀢𑁄𑀢𑀺 𑀞𑀧𑀦𑀺𑀬𑁄. 𑀅𑀜𑁆𑀜𑀢𑁆𑀭 𑀘𑀓𑁆𑀔𑀼𑀦𑀸𑀢𑀺 𑀞𑀧𑀦𑀺𑀬𑁄 𑀧𑀜𑁆𑀳𑁄. 𑀇𑀤𑀁 𑀧𑀜𑁆𑀳𑀁 𑀪𑀕𑀯𑀸 𑀓𑀺𑀁 𑀧𑀼𑀘𑁆𑀙𑀺𑀢𑁄, 𑀮𑁄𑀓𑀲𑁆𑀲 𑀲𑀁𑀓𑀺𑀮𑁂𑀲𑁄 𑀧𑀼𑀘𑁆𑀙𑀺𑀢𑁄. 𑀓𑀺𑀁 𑀓𑀸𑀭𑀡𑀁? 𑀢𑀺𑀯𑀺𑀥𑁄 𑀳𑀺 𑀲𑀁𑀓𑀺𑀮𑁂𑀲𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀘 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀘 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀘. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄𑀢𑀺 𑀅𑀯𑀺𑀚𑁆𑀚𑀁 𑀤𑀲𑁆𑀲𑁂𑀢𑀺, 𑀚𑀧𑁆𑀧𑀸𑀢𑀺 𑀢𑀡𑁆𑀳𑀁 𑀤𑀲𑁆𑀲𑁂𑀢𑀺, 𑀫𑀳𑀩𑁆𑀪𑀬𑀦𑁆𑀢𑀺 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀺, 𑀲𑁄𑀢𑀁 𑀦𑀸𑀫 𑀲𑀼𑀔𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺, 𑀘𑀢𑀽𑀳𑀺 𑀬𑁄 𑀧𑀤𑁂𑀳𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺…𑀧𑁂… 𑀏𑀯𑀁 𑀯𑀼𑀘𑁆𑀘𑀢𑀺.

𑁪𑁫. 𑀢𑀤𑀼𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀢𑀺, 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺 𑀕𑀸𑀣𑀸, 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀢𑀺 𑀢𑀁 𑀪𑀕𑀯𑀸 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀺𑀲𑀚𑁆𑀚𑁂𑀢𑀺.

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀺𑀲𑀚𑁆𑀚𑁂𑀢𑀺. 𑀇𑀤𑀁 𑀧𑀤𑀦𑁆𑀢𑀺 𑀧𑀼𑀘𑁆𑀙𑀺𑀢𑁄, 𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀲𑁆𑀲 𑀮𑁄𑀓𑀲𑁆𑀲 𑀯𑁄𑀤𑀸𑀦𑀁 𑀧𑀼𑀘𑁆𑀙𑀺𑀢𑁄, 𑀲𑁄𑀢𑀸𑀦𑀺 𑀙 𑀢𑀡𑁆𑀳𑀸𑀓𑀸𑀬𑀸 𑀩𑀳𑀼𑀮𑀸𑀥𑀺𑀯𑀘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂𑀳𑀺 𑀆𑀬𑀢𑀦𑁂𑀳𑀺. 𑀢𑀸𑀦𑀺 𑀲𑁄𑀢𑀸𑀦𑀺 𑀓𑁂𑀦 𑀦𑀺𑀯𑀸𑀭𑀺𑀬𑀦𑁆𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀧𑀳𑀸𑀦𑀁 𑀧𑀼𑀘𑁆𑀙𑀢𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂𑀢𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀁 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀪𑀕𑀯𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀺𑀬𑀸 𑀤𑁂𑀲𑁂𑀢𑀺, 𑀬𑁄 𑀳𑀺 𑀲𑀫𑁆𑀧𑀚𑀸𑀦𑁄 𑀯𑀺𑀳𑀭𑀢𑀺 𑀲𑀢𑀺𑀤𑁄𑀯𑀸𑀭𑀺𑀓𑁂 𑀘 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀕𑀼𑀢𑁆𑀢𑀸𑀦𑀺 𑀲𑀫𑁆𑀪𑀯𑀦𑁆𑀢𑀺. 𑀢𑀢𑁆𑀣 𑀕𑀼𑀢𑁆𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀬𑀸 𑀬𑀸 𑀯𑀺𑀧𑀲𑁆𑀲𑀦𑀸, 𑀲𑀸 𑀲𑀸 𑀢𑁂𑀲𑀁 𑀢𑁂𑀲𑀁 𑀲𑁄𑀢𑀸𑀦𑀁 𑀢𑀲𑁆𑀲𑀸 𑀘 𑀅𑀯𑀺𑀚𑁆𑀚𑀸𑀬 𑀬𑁄 𑀮𑁄𑀓𑁄 𑀦𑀺𑀯𑀼𑀢𑁄 𑀅𑀘𑁆𑀘𑀦𑁆𑀢𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀏𑀯𑀁 𑀲𑁄𑀢𑀸𑀦𑀺 𑀧𑀺𑀳𑀺𑀢𑀸𑀦𑀺𑀧𑀺 𑀪𑀯𑀦𑁆𑀢𑀺 𑀢𑀢𑁄 𑀉𑀢𑁆𑀢𑀭𑀺 𑀧𑀼𑀘𑁆𑀙𑀢𑀺.

𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀭𑀽𑀧𑀲𑁆𑀲 𑀔𑁄 𑀢𑀲𑁆𑀲 𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫 𑀓𑀢𑁆𑀣𑁂𑀢𑀁 𑀉𑀧𑀲𑀫𑁆𑀫𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀪𑀕𑀯𑀸 𑀏𑀓𑁂𑀦 𑀧𑀤𑁂𑀦 𑀯𑀺𑀲𑀚𑁆𑀚𑁂𑀢𑀺.

𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 [𑀧𑀼𑀘𑁆𑀙𑀲𑁂 𑀧𑀜𑁆𑀳𑀁 (𑀧𑀻. 𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁩], 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂…𑀧𑁂…;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀲𑀫𑁆𑀫𑀢𑀺.

𑀇𑀫𑀺𑀦𑀸 𑀧𑀜𑁆𑀳𑁂𑀦 𑀓𑀺𑀁 𑀧𑀼𑀘𑁆𑀙𑀢𑀺? 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀼𑀘𑁆𑀙𑀢𑀺, 𑀢𑀁 𑀪𑀕𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀯𑀺𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀧𑀞𑀫𑁂𑀦 𑀧𑀜𑁆𑀳𑁂𑀦 𑀲𑀁𑀓𑀺𑀮𑁂𑀲𑀁 𑀧𑀼𑀘𑁆𑀙𑀢𑀺. 𑀤𑀼𑀢𑀺𑀬𑁂𑀦 𑀧𑀜𑁆𑀳𑁂𑀦 𑀯𑁄𑀤𑀸𑀦𑀁 𑀧𑀼𑀘𑁆𑀙𑀢𑀺. 𑀢𑀢𑀺𑀬𑁂𑀦 𑀧𑀜𑁆𑀳𑁂𑀦 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀼𑀘𑁆𑀙𑀢𑀺. 𑀘𑀢𑀼𑀢𑁆𑀣𑁂𑀦 𑀧𑀜𑁆𑀳𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀝𑀺𑀧𑀼𑀘𑁆𑀙𑀢𑀺 𑀢𑀢𑁄 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀢𑀺.

𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 [𑀲𑁂𑀓𑁆𑀔𑀸 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁪] 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀢𑀺. 𑀓𑀢𑀺 𑀘 𑀧𑀦 𑀢𑁂 𑀧𑀜𑁆𑀳𑁂 𑀲𑀗𑁆𑀔𑀸𑀢𑀥𑀫𑁆𑀫𑀸 𑀘 𑀅𑀭𑀳𑀦𑁆𑀢𑀸 𑀲𑁂𑀓𑁆𑀔𑀸 𑀘? 𑀓𑀺𑀁 𑀧𑀼𑀩𑁆𑀩𑀁 𑀓𑀺𑀜𑁆𑀘 𑀧𑀘𑁆𑀙𑀺𑀫𑀦𑁆𑀢𑀺 𑀅𑀬𑀫𑀢𑁆𑀣𑁄. 𑀢𑀢𑁆𑀣 𑀓𑀢𑀭𑀁 𑀧𑀞𑀫𑀁 𑀧𑀼𑀘𑁆𑀙𑀢𑀺, 𑀓𑀢𑀭𑀁 𑀧𑀘𑁆𑀙𑀸? 𑀅𑀭𑀳𑀦𑁆𑀢𑀁 𑀧𑀞𑀫𑀁 𑀧𑀼𑀘𑁆𑀙𑀢𑀺. 𑀲𑁂𑀓𑁆𑀔𑀥𑀫𑁆𑀫𑁂 𑀢𑀢𑁆𑀣 𑀓𑁂𑀦 𑀧𑀤𑁂𑀦 𑀲𑀗𑁆𑀔𑀸𑀢𑀥𑀫𑁆𑀫𑀸𑀢𑀺 𑀅𑀭𑀳𑀦𑁆𑀢𑁄 𑀕𑀳𑀺𑀢𑀸, 𑀧𑀼𑀣𑀽𑀢𑀺 𑀲𑁂𑀓𑁆𑀔𑀸 𑀕𑀳𑀺𑀢𑀸. 𑀢𑁂𑀲𑀁 𑀫𑁂 𑀦𑀺𑀧𑀓𑁄𑀢𑀺 𑀲𑀸𑀥𑀸𑀭𑀡𑀁 𑀧𑀤𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀲𑀸𑀥𑀸𑀭𑀡𑀸𑀦𑀺 𑀘 𑀅𑀲𑀸𑀥𑀸𑀭𑀡𑀸𑀦𑀺 𑀘 𑀧𑀜𑁆𑀳𑁂𑀲𑀼 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑀁 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺. 𑀦 𑀢𑀣𑀸 𑀧𑀼𑀝𑁆𑀞𑀁, 𑀧𑀞𑀫𑀁 𑀧𑀼𑀝𑁆𑀞𑀁, 𑀢𑀁 𑀧𑀘𑁆𑀙𑀸 𑀯𑀺𑀲𑀚𑁆𑀚𑁂𑀢𑀺. 𑀬𑀁 𑀧𑀘𑁆𑀙𑀸 𑀧𑀼𑀘𑁆𑀙𑀺𑀢𑀁 𑀧𑀞𑀫𑀁 𑀯𑀺𑀲𑀚𑁆𑀚𑁂𑀢𑀺. 𑀓𑀺𑀜𑁆𑀘 𑀇𑀤𑀁 𑀧𑀼𑀘𑁆𑀙𑀺𑀢𑀁 𑀯𑀺𑀲𑀼𑀤𑁆𑀥𑀸𑀦𑀁 𑀯𑀺𑀲𑀼𑀚𑁆𑀛𑀦𑁆𑀢𑀸𑀦𑀜𑁆𑀘 𑀓𑀸 𑀇𑀭𑀺𑀬𑀸𑀢𑀺 𑀇𑀤𑀁 𑀧𑀼𑀘𑁆𑀙𑀺, 𑀢𑀁 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬. 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 𑀯𑀺𑀢𑀓𑁆𑀓𑁂𑀦 𑀘 𑀪𑀕𑀯𑀸 𑀦𑀺𑀯𑀸𑀭𑁂𑀢𑀺, 𑀤𑁆𑀯𑁂 𑀧𑀦 𑀯𑀺𑀢𑀓𑁆𑀓𑀅𑀦𑀸𑀯𑀺𑀮𑀢𑀸𑀬 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀬𑀣𑀸 𑀦𑀻𑀯𑀭𑀡𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑀁. 𑀓𑀼𑀲𑀮𑀸 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀅𑀭𑀳𑀦𑁆𑀢𑀁 𑀯𑀺𑀲𑀚𑁆𑀚𑁂𑀢𑀺.

𑀓𑁂𑀦𑀲𑁆𑀲𑀼 𑀢𑀭𑀢𑀺 𑀑𑀖𑀦𑁆𑀢𑀺 𑀕𑀸𑀣𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺. 𑀘𑀢𑁆𑀢𑀸𑀭𑁄𑀬𑁂𑀯 𑀧𑀜𑁆𑀳𑀸. 𑀓𑀺𑀁 𑀓𑀸𑀭𑀡𑀁, 𑀦 𑀳𑀺 𑀏𑀢𑁆𑀣 𑀅𑀢𑁆𑀣𑀸𑀦𑀼𑀧𑀭𑀺𑀯𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 [𑀬𑀣𑀸𑀦𑀼𑀧𑀭𑀺𑀯𑀢𑁆𑀣𑀺𑀯𑀚𑁆𑀚𑀁 (𑀧𑀻. 𑀓.)] 𑀬𑀣𑀸 𑀧𑀞𑀫𑀁 𑀅𑀚𑀺𑀢𑀧𑀜𑁆𑀳𑁂𑀲𑀼, 𑀢𑀲𑁆𑀲 𑀦 𑀏𑀓𑀁𑀲𑁂𑀦 𑀩𑀳𑀽𑀦𑀺 𑀯𑀺𑀲𑀚𑁆𑀚𑀦𑀸𑀦𑀺, 𑀩𑀳𑀼𑀓𑀸 𑀧𑀜𑁆𑀳𑀸, 𑀏𑀓𑁄𑀯 𑀦 𑀘𑀸𑀧𑀺, 𑀲𑀩𑁆𑀩𑁂 𑀧𑀼𑀘𑁆𑀙𑀢𑀺, 𑀧𑀼𑀩𑁆𑀩𑁂 𑀯𑀺𑀲𑀚𑁆𑀚𑀺𑀢𑁄, 𑀬𑀣𑀸 𑀘𑀢𑀼𑀢𑁆𑀣𑁄 𑀅𑀚𑀺𑀢𑁄𑀧𑀜𑁆𑀳𑁂, 𑀬𑀁 𑀏𑀢𑁆𑀣 𑀬𑀣𑀸𑀪𑀽𑀢𑀁 𑀧𑀭𑀺𑀬𑁂𑀲𑀦𑀸𑀧𑀤𑀩𑀦𑁆𑀥𑁂𑀦 𑀯𑀺𑀲𑀚𑁆𑀚𑀦𑀸𑀬𑁄 𑀏𑀯𑀁 𑀬𑀣𑀸𑀪𑀽𑀢𑀁 𑀧𑀭𑀺𑀬𑁂𑀲𑀢𑀺. 𑀬𑁄 𑀧𑀼𑀦 𑀏𑀢𑁆𑀣 𑀬𑀁 𑀏𑀯𑀁 𑀧𑀼𑀘𑁆𑀙𑀢𑀺 𑀢𑀢𑁆𑀣 𑀅𑀬𑀫𑀸𑀓𑀸𑀭𑁄 𑀧𑀼𑀘𑁆𑀙𑀦𑀸𑀬𑀁 𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸𑀢𑀺 𑀕𑀸𑀣𑀸 [𑀲𑀁. 𑀦𑀺. 𑁧.𑁨𑁯] 𑀧𑀼𑀘𑁆𑀙𑀺𑀢𑀯𑀺𑀲𑀚𑁆𑀚𑀦𑀸𑀬 𑀫𑀕𑁆𑀕𑀺𑀢𑀩𑁆𑀩𑀸. 𑀓𑀣𑀁 𑀯𑀺𑀲𑀚𑁆𑀚𑀺𑀢𑀸𑀢𑀺 𑀪𑀕𑀯𑀸𑀢𑀺 𑀯𑀺𑀲𑀚𑁆𑀚𑁂𑀢𑀺? 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄𑀢𑀺 𑀕𑀸𑀣𑀸. 𑀢𑀢𑁆𑀣 𑀘𑀺𑀢𑁆𑀢𑀪𑀸𑀯𑀦𑀸𑀬 𑀲𑀫𑀣𑀸, 𑀧𑀜𑁆𑀜𑀸𑀪𑀸𑀯𑀦𑀸𑀬 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀏𑀯𑀁 𑀅𑀦𑀼𑀫𑀻𑀬𑀢𑀺, 𑀬𑁂 𑀥𑀫𑁆𑀫𑀸 𑀲𑀫𑀣𑁂𑀦 𑀘 𑀯𑀺𑀧𑀲𑁆𑀲𑀦𑀸𑀬 𑀘 𑀧𑀳𑀻𑀬𑀦𑁆𑀢𑀺, 𑀢𑁂 𑀇𑀫𑁂 𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸. 𑀢𑀢𑁆𑀣 𑀯𑀺𑀲𑀚𑁆𑀚𑀦𑀁 𑀲𑀫𑀣𑁂𑀦 𑀭𑀸𑀕𑁄 𑀧𑀳𑀻𑀬𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀅𑀯𑀺𑀚𑁆𑀚𑀸. 𑀅𑀚𑁆𑀛𑀢𑁆𑀢𑀯𑀢𑁆𑀣𑀼𑀓𑁄 𑀭𑀸𑀕𑁄 𑀅𑀦𑁆𑀢𑁄𑀚𑀝𑀸, 𑀩𑀸𑀳𑀺𑀭𑀯𑀢𑁆𑀣𑀼𑀓𑁄 𑀭𑀸𑀕𑁄 𑀩𑀳𑀺𑀚𑀝𑀸. 𑀅𑀚𑁆𑀛𑀢𑁆𑀢𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀅𑀬𑀁 𑀅𑀦𑁆𑀢𑁄𑀚𑀝𑀸. 𑀏𑀓𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘 𑀩𑀸𑀳𑀺𑀭𑀯𑀢𑁆𑀣𑀼𑀓𑀸𑀦𑀺 𑀩𑀳𑀺𑀚𑀝𑀸, 𑀬𑀸 𑀳𑀺 𑀅𑀚𑁆𑀛𑀢𑁆𑀢𑀯𑀢𑁆𑀣𑀼𑀓𑀸 𑀬𑀸 𑀤𑀺𑀝𑁆𑀞𑀺𑀪𑀸𑀕𑀺𑀬𑁂𑀦 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀚𑀝𑀸. 𑀢𑀣𑀸 𑀲𑀁𑀔𑀺𑀢𑁆𑀢𑁂𑀦 𑀬𑀸 𑀓𑀸𑀘𑀺 𑀅𑀚𑁆𑀛𑀢𑁆𑀢𑀯𑀢𑁆𑀣𑀼𑀓𑀸 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘, 𑀅𑀬𑀁 𑀅𑀦𑁆𑀢𑁄𑀚𑀝𑀸. 𑀬𑀸 𑀓𑀸𑀘𑀺 𑀩𑀸𑀳𑀺𑀭𑀯𑀢𑁆𑀣𑀼𑀓𑀸 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘, 𑀅𑀬𑀁 𑀩𑀳𑀺𑀚𑀝𑀸.

𑀬𑀣𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀢𑀺 ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 𑀕𑀸𑀣𑀸 [𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂]. 𑀢𑀢𑁆𑀣 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺 ‘‘𑀙𑁂𑀢𑁆𑀯𑀸 𑀦𑀤𑁆𑀥𑀺𑀁 𑀯𑀭𑀢𑁆𑀢𑀁 𑀘𑀸’’𑀢𑀺 𑀕𑀸𑀣𑀸, 𑀇𑀤𑀁 𑀪𑀕𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀯𑀺𑀲𑀚𑁆𑀚𑁂𑀢𑀺. 𑀇𑀫𑀸𑀬 𑀯𑀺𑀲𑀚𑁆𑀚𑀦𑀸𑀬 𑀪𑀕𑀯𑀸 𑀅𑀦𑀼𑀫𑀻𑀬𑀢𑀺 𑀓𑀺𑀮𑁂𑀲𑁂 𑀏𑀢𑁆𑀣 𑀧𑀼𑀭𑀺𑀫𑀸𑀬 𑀕𑀸𑀣𑀸𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂𑀦. 𑀢𑀁 𑀳𑀺 𑀘𑀢𑀼𑀘𑀓𑁆𑀓𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀳𑀢𑁆𑀣𑀧𑀸𑀤𑀸. 𑀦𑀯𑀤𑁆𑀯𑀸𑀭𑀦𑁆𑀢𑀺 𑀦𑀯 𑀯𑀡𑀫𑀼𑀔𑀸𑀦𑀺. 𑀬𑀣𑀸 𑀘𑀢𑀼𑀘𑀓𑁆𑀓𑀦𑁆𑀢𑀺 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀦𑀸, 𑀉𑀧𑀸𑀤𑀸𑀦𑀧𑁆𑀧𑀘𑁆𑀘𑀬𑀸 𑀪𑀯𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄. 𑀦𑀯𑀤𑁆𑀯𑀸𑀭𑀦𑁆𑀢𑀺 𑀦𑀯 𑀫𑀸𑀦𑀯𑀺𑀥𑀸, 𑀫𑀸𑀦𑀚𑀸𑀢𑀺𑀓𑀸𑀬 𑀳𑀺 𑀤𑀼𑀓𑁆𑀔𑀁 𑀲𑁂𑀬𑁆𑀬𑁂𑀦𑀫𑁆𑀳𑀺 𑀧𑀭𑀲𑁄 𑀢𑀻𑀡𑀺 𑀢𑀺𑀓𑀸𑀦𑀺 𑀧𑀼𑀡𑁆𑀡𑀁. 𑀢𑀺𑀓𑁂𑀦 𑀲𑀁𑀬𑀼𑀢𑁆𑀢𑀁 𑀳𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄. 𑀢𑀢𑁆𑀣 𑀦𑀤𑁆𑀥𑀻𑀢𑀺 𑀢𑀡𑁆𑀳𑀸 𑀯𑀺𑀲𑀚𑁆𑀚𑀻𑀬𑀢𑀺. 𑀯𑀭𑀢𑁆𑀢𑀦𑁆𑀢𑀺 𑀫𑀸𑀦𑀁 𑀯𑀺𑀲𑀚𑁆𑀚𑁂𑀢𑀺, 𑀇𑀘𑁆𑀙𑀸 𑀮𑁄𑀪𑁄 𑀘 𑀧𑀸𑀧𑀓𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄. 𑀢𑀢𑁆𑀣 𑀯𑀺𑀲𑀫𑀮𑁄𑀪𑁄 𑀧𑀸𑀧𑀓𑁄𑀢𑀺 𑀦𑀺𑀤𑁆𑀤𑀺𑀲𑀺𑀬𑀢𑀺 𑀲𑀫𑀽𑀮𑀢𑀡𑁆𑀳𑀦𑁆𑀢𑀺. 𑀅𑀜𑁆𑀜𑀸𑀡𑀫𑀽𑀮𑀓𑀸 𑀢𑀡𑁆𑀳𑀸𑀢𑀺 𑀅𑀜𑁆𑀜𑀸𑀡𑀫𑀽𑀮𑀓𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀘 𑀧𑀳𑀸𑀦𑀁. 𑀬𑁂 𑀘 𑀧𑀼𑀦 𑀅𑀜𑁆𑀜𑁂𑀧𑀺 𑀓𑁂𑀘𑀺 𑀘𑀢𑀼𑀘𑀓𑁆𑀓𑀬𑁄𑀕𑁂𑀦 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀘 𑀬𑀼𑀚𑁆𑀚𑀦𑁆𑀢𑀺, 𑀲𑀁𑀲𑀸𑀭𑀕𑀸𑀫𑀺𑀦𑁄 𑀥𑀫𑁆𑀫𑀸 𑀲𑀩𑁆𑀩𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀢𑀢𑁆𑀣𑀸𑀬𑀁 𑀕𑀸𑀣𑀸 𑀯𑀺𑀲𑀚𑁆𑀚𑀦𑀸 𑀧𑀼𑀘𑁆𑀙𑀸𑀬 𑀘 𑀯𑀺𑀲𑀚𑁆𑀚𑀦𑀸𑀬 𑀲𑀫𑁂𑀢𑀺 [𑀲𑀫𑀁𑀢𑀺 (𑀧𑀻.)]. 𑀬𑀁 𑀬𑀤𑀺 𑀲𑀦𑁆𑀤𑁂𑀦 𑀅𑀣 𑀲𑀳 𑀩𑁆𑀬𑀸𑀓𑀭𑀡𑁂𑀦 𑀅𑀦𑀼𑀕𑀻𑀢𑀺𑀬𑀁 𑀘 𑀲𑁄 𑀯𑀺𑀘𑀬𑁄𑀢𑀺 𑀪𑀕𑀯𑀸 𑀬𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀦𑀺𑀓𑁆𑀔𑀺𑀧𑀢𑀺, 𑀢𑀢𑁆𑀢𑀓𑁂𑀳𑀺 𑀅𑀦𑀼𑀕𑀸𑀬𑀢𑀺.

𑁪𑁬. 𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺 [𑀓𑀸𑀢𑀼𑀫𑀭𑀳𑀢𑀺 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁮.𑁧𑁬]. 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀙𑀳𑀺 𑀧𑀤𑁂𑀳𑀺 𑀪𑀕𑀯𑀸 𑀅𑀦𑀼𑀕𑀸𑀬𑀢𑀺.

‘‘𑀬𑁄 𑀯𑁂 𑀦 𑀩𑁆𑀬𑀣𑀢𑀺 [𑀩𑁆𑀬𑀸𑀣𑀢𑀺 (𑀓.)] 𑀧𑀢𑁆𑀯𑀸, 𑀧𑀭𑀺𑀲𑀁 𑀉𑀕𑁆𑀕𑀯𑀸𑀤𑀺𑀦𑀺𑀁;

𑀦 𑀘 𑀳𑀸𑀧𑁂𑀢𑀺 𑀯𑀘𑀦𑀁, 𑀦 𑀘 𑀙𑀸𑀤𑁂𑀢𑀺 𑀲𑀸𑀲𑀦𑀁.

‘‘𑀅𑀲𑀦𑁆𑀤𑀺𑀤𑁆𑀥𑀺𑀁 𑀘 𑀪𑀡𑀢𑀺, 𑀧𑀼𑀘𑁆𑀙𑀺𑀢𑁄 𑀦 𑀘 𑀓𑀼𑀧𑁆𑀧𑀢𑀺;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀻’’𑀢𑀺.

𑀢𑀢𑁆𑀣 𑀧𑀦 𑀪𑀕𑀯𑀸 𑀬𑀢𑁆𑀢𑀓𑀸𑀦𑀺 𑀧𑀤𑀸𑀦𑀺 𑀦𑀺𑀓𑁆𑀔𑀺𑀧𑀢𑀺, 𑀢𑀢𑁆𑀢𑀓𑁂𑀳𑀺 𑀅𑀦𑀼𑀕𑀸𑀬𑀢𑀺. 𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀧𑀺𑀬𑁄 𑀕𑀭𑀼𑀪𑀸𑀯𑀦𑀻𑀬𑁄𑀢𑀺 𑀯𑀺𑀢𑁆𑀣𑀸𑀭𑁂𑀦, 𑀇𑀤𑀁 𑀪𑀕𑀯𑀸 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀅𑀦𑀼𑀕𑀸𑀬𑀢𑀺. 𑀇𑀢𑀺 𑀩𑀳𑀼𑀲𑁆𑀲𑀼𑀢𑀯𑀸 𑀅𑀦𑀼𑀕𑀸𑀬𑀢𑀺, 𑀅𑀧𑁆𑀧𑀢𑀭𑀓𑀣𑀁 𑀧𑀤𑀁 𑀯𑀸 𑀦𑀺𑀓𑁆𑀔𑁂𑀧𑁄, 𑀩𑀳𑀼𑀲𑁆𑀲𑀼𑀢𑀯𑀸 𑀦𑀯 𑀧𑀤𑀸𑀦𑀺 𑀦𑀺𑀓𑁆𑀔𑁂𑀧𑁄, 𑀅𑀧𑁆𑀧𑀢𑀭𑀺𑀓𑀸 𑀅𑀦𑀼𑀕𑀻𑀢𑀺𑀬𑀸 𑀩𑀳𑀼𑀢𑀭𑀺𑀓𑀸 𑀅𑀦𑀼𑀕𑀸𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀢𑁂 𑀅𑀦𑀼𑀕𑀻𑀢𑀺 𑀘 𑀯𑀺𑀘𑀬𑁄, 𑀅𑀬𑀁 𑀯𑀺𑀘𑀬𑁄 𑀦𑀸𑀫 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄?

𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁;

𑀬𑀼𑀢𑁆𑀢𑀸𑀬𑀼𑀢𑁆𑀢𑀺 𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑀳𑀸𑀭𑀸𑀦𑀁 𑀲𑁄𑀴𑀲𑀦𑁆𑀦𑀁 𑀬𑀣𑀸 𑀤𑁂𑀲𑀦𑀸 𑀬𑀣𑀸 𑀯𑀺𑀘𑀬𑁄 𑀬𑁄 𑀘 𑀦𑀺𑀤𑁆𑀤𑀺𑀲𑀺𑀬𑀢𑀺, 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀅𑀬𑀁 𑀧𑀼𑀘𑁆𑀙𑀸 𑀲𑀼𑀢𑁆𑀢𑁂𑀲𑀼 𑀦 𑀬𑀼𑀚𑁆𑀚𑀢𑀻𑀢𑀺 𑀬𑀸 𑀢𑀢𑁆𑀣 𑀯𑀻𑀫𑀁𑀲𑀸, 𑀅𑀬𑀁 𑀬𑀼𑀢𑁆𑀢𑀺.

𑀬𑀣𑀸 𑀳𑀺 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀅𑀢𑁆𑀣𑀺 𑀳𑁂𑀢𑀼 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑀺 𑀳𑁂𑀢𑀼 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸. 𑀲𑀻𑀮𑀯𑀢𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀦 𑀦 𑀯𑁂𑀬𑁆𑀬𑀸𑀓𑀭𑀡𑀺𑀬𑀸 𑀓𑀺𑀦𑁆𑀢𑀺 𑀫𑁂 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀸𑀤𑁂𑀬𑁆𑀬…𑀧𑁂… 𑀅𑀩𑁆𑀬𑀸𑀓𑀭𑀡𑀁 𑀓𑀢𑁆𑀢𑀩𑁆𑀩𑀁, 𑀅𑀬𑀁 𑀯𑀺𑀲𑀼𑀤𑁆𑀥𑀺𑀬𑀸 𑀫𑀕𑁆𑀕𑁄. 𑀢𑀲𑁆𑀲 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘. 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀬𑁄 𑀘 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘, 𑀅𑀬𑀁 𑀉𑀧𑀸𑀤𑀸𑀧𑀘𑁆𑀘𑀬𑀢𑀸 𑀲𑀧𑁆𑀧𑀘𑁆𑀘𑀬𑁄. 𑀬𑀁 𑀧𑁄𑀭𑀸𑀡𑀓𑀫𑁆𑀫𑀁 𑀅𑀲𑁆𑀲 𑀯𑀺𑀧𑀸𑀓𑁄 𑀧𑀘𑁆𑀘𑀬𑁄, 𑀢𑀸𑀬 𑀧𑀘𑁆𑀘𑀬𑀸𑀬 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺, 𑀅𑀬𑀁 𑀳𑁂𑀢𑀼. 𑀇𑀢𑀺 𑀲𑀻𑀮𑀓𑁆𑀔𑀦𑁆𑀥𑁄 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑁄𑀢𑀺 𑀇𑀤𑀁 𑀮𑁄𑀓𑀺𑀓𑀁 𑀲𑀻𑀮𑀁.

𑀬𑀁 𑀧𑀦 𑀮𑁄𑀓𑀼𑀢𑁆𑀢𑀭𑀁 𑀲𑀻𑀮𑀁, 𑀢𑀲𑁆𑀲 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀘𑁆𑀘𑀬𑁄 𑁋 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑁋 𑀅𑀬𑀁 𑀧𑀘𑁆𑀘𑀬𑁄. 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀳𑁂𑀢𑀼. 𑀧𑀜𑁆𑀜𑀸𑀬 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀺𑀬𑀸, 𑀬𑀁 𑀲𑀻𑀮𑀁 𑀚𑀸𑀬𑀢𑀺. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀲𑀻𑀮𑀁 𑀢𑁂𑀦𑀸𑀬𑀁 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄. 𑀬𑀁 𑀧𑀼𑀦 𑀲𑀫𑀸𑀥𑀺𑀦𑁄 𑀧𑀲𑁆𑀲𑀤𑁆𑀥𑀺 𑀘 𑀧𑀻𑀢𑀺 𑀘 𑀧𑀸𑀫𑁄𑀚𑁆𑀚𑀁 𑀧𑀘𑁆𑀘𑀬𑁄. 𑀬𑀁 𑀲𑀼𑀔𑀁 𑀳𑁂𑀢𑀼 𑀢𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑁄. 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀧𑀜𑁆𑀜𑀸. 𑀢𑀲𑁆𑀲 𑀧𑀭𑀢𑁄𑀖𑁄𑀲𑁄 𑀅𑀚𑁆𑀛𑀢𑁆𑀢𑀁 𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘, 𑀇𑀢𑀺 𑀇𑀫𑁂 𑀢𑀬𑁄 𑀔𑀦𑁆𑀥𑀸 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀏𑀯𑀁 𑀲𑀢𑁆𑀢 𑀧𑀜𑁆𑀜𑀸. 𑀲𑀢𑁆𑀢𑀩𑁆𑀬𑀸𑀓𑀭𑀡𑀻𑀲𑀼 𑀘 𑀲𑀼𑀢𑁆𑀢𑁂𑀲𑀼 𑀦 𑀬𑀼𑀚𑁆𑀚𑀢𑀺. 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄. 𑀲𑁄 𑀘𑀢𑀽𑀲𑀼 𑀫𑀳𑀸𑀧𑀤𑁂𑀲𑁂𑀲𑀼 𑀤𑀝𑁆𑀞𑀩𑁆𑀩𑁄.

𑁪𑁭. 𑀢𑀢𑁆𑀣 𑀓𑀢𑀫𑀁 𑀧𑀤𑀝𑁆𑀞𑀸𑀦𑀁?

𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄, 𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁;

𑀇𑀢𑀺 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸, 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄.

𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀸 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀓𑀸𑀫𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀦𑁆𑀦𑁄 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸, 𑀏𑀢𑁂𑀲𑀼 𑀬𑁂𑀧𑀺 𑀧𑀜𑁆𑀘𑀲𑀼 𑀭𑀽𑀧𑁂𑀲𑀼 𑀆𑀬𑀢𑀦𑁂𑀲𑀼 𑀦𑀸𑀜𑁆𑀜𑀢𑁆𑀭 𑀏𑀢𑁂𑀳𑀺 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺. 𑀯𑀼𑀘𑁆𑀘𑀢𑁂, 𑀢𑁂𑀦 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀪𑀯𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀏𑀓𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀺𑀝𑁆𑀞𑀺𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀫𑀥𑀸𑀢𑀼 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀭𑀽𑀧𑀥𑀸𑀢𑀼 𑀅𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀼𑀔𑀲𑀜𑁆𑀜𑀸 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀲𑀫𑁆𑀧𑀚𑀜𑁆𑀜𑀢𑀸 𑀲𑀫𑁆𑀫𑁄𑀳𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀩𑁆𑀬𑀸𑀧𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀯𑀯𑀺𑀥𑀁 𑀫𑀸𑀦𑀁 [𑀦𑀯𑀫𑀸𑀦𑀁 𑀯𑀺𑀥𑀫𑀸𑀦𑀲𑁆𑀲 (𑀧𑀻. 𑀓.)] 𑀫𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀼𑀔𑀸 𑀯𑁂𑀤𑀦𑀸 𑀭𑀸𑀕𑀸𑀦𑀼𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀜𑁆𑀘 𑀫𑀼𑀲𑀸𑀯𑀸𑀤𑁄 𑀘 𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀸𑀡𑀸𑀢𑀺𑀧𑀸𑀢𑁄 𑀘 𑀧𑀺𑀲𑀼𑀡𑀯𑀸𑀘𑀸 𑀘 𑀨𑀭𑀼𑀲𑀯𑀸𑀘𑀸 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀫𑀺𑀘𑁆𑀙𑀢𑁆𑀢𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑁄 𑀘 𑀫𑁄𑀳𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀪𑀯𑀁 𑀪𑁄𑀕𑀜𑁆𑀘 𑀯𑁄𑀓𑀸𑀭𑁄 𑀅𑀳𑀁𑀓𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀩𑀸𑀳𑀺𑀭𑀸𑀦𑀁 𑀧𑀭𑀺𑀕𑁆𑀕𑀳𑁄 𑀫𑀫𑀁𑀓𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀲𑁆𑀲 𑀲𑀗𑁆𑀕𑀁 [𑀓𑀸𑀬𑀯𑀗𑁆𑀓𑀁 (𑀧𑀻.)] 𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀺𑀓𑀤𑁄𑀲𑁄 𑀤𑁄𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀺𑀓𑀓𑀸𑀲𑀸𑀯𑁄 𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁄 𑀬𑁄 𑀯𑀸 𑀧𑀦 𑀥𑀫𑁆𑀫𑁄 𑀬𑁂𑀦 𑀬𑁂𑀦 𑀆𑀭𑀫𑁆𑀫𑀡𑁂𑀦 𑀉𑀧𑁆𑀧𑀚𑁆𑀚𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀯𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀦 𑀯𑀸 𑀅𑀦𑀼𑀲𑀬𑀦𑁂𑀦 𑀯𑀸, 𑀲𑁄 𑀥𑀫𑁆𑀫𑁄 𑀢𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀢𑁂𑀦 𑀲𑀸𑀭𑀫𑁆𑀫𑀡𑁂𑀦 𑀲𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺.

𑀬𑀣𑀸 𑀫𑀦𑀼𑀲𑁆𑀲𑁄 𑀧𑀼𑀭𑀺𑀫𑀲𑁆𑀲 𑀧𑀤𑀲𑁆𑀲 𑀧𑀤𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁄 𑀤𑀼𑀢𑀺𑀬𑀁 𑀧𑀤𑀁 𑀉𑀤𑁆𑀥𑀭𑀢𑀺, 𑀲𑁄 𑀧𑀘𑁆𑀙𑀸𑀦𑀼𑀧𑀤𑀁 𑀲𑀁𑀳𑀭𑀢𑀺. 𑀬𑀤𑀺 𑀧𑀦 𑀬𑁄 𑀦 𑀤𑀼𑀢𑀺𑀬𑀧𑀤𑀲𑁆𑀲 𑀧𑀤𑀝𑁆𑀞𑀸𑀦𑀁 𑀮𑀪𑀢𑀺, 𑀅𑀧𑀭𑀁 𑀧𑀤𑀁 𑀉𑀤𑁆𑀥𑀭𑀢𑀺. 𑀢𑀲𑁆𑀲 𑀬𑁄 𑀘𑁂𑀲𑁄 𑀧𑀘𑁆𑀘𑀬𑁄 𑀪𑀯𑀢𑀺. 𑀏𑀯𑀁 𑀥𑀫𑁆𑀫𑁄 𑀓𑀼𑀲𑀮𑁄 𑀯𑀸 𑀅𑀓𑀼𑀲𑀮𑁄 𑀯𑀸 𑀅𑀩𑁆𑀬𑀸𑀓𑀢𑁄 𑀯𑀸 𑀧𑀤𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁄 𑀦 𑀧𑀯𑀢𑁆𑀢𑀢𑀺. 𑀬𑀣𑀸 𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑁄𑀦𑀺𑀮𑀸𑀪𑁄 [𑀬𑁄𑀦𑀺𑀲𑁄 𑀮𑀸𑀪𑁄 (𑀧𑀻.)], 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑁪𑁮. 𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄?

𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀢𑁂𑀦;

𑀲𑀩𑁆𑀩𑁂 𑀪𑀯𑀦𑁆𑀢𑀺 𑀯𑀼𑀢𑁆𑀢𑀸, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫.

𑀬𑁂𑀲𑀜𑁆𑀘 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸𑀲𑀢𑀻𑀢𑀺 𑀕𑀸𑀣𑀸𑀬 𑀯𑀼𑀢𑁆𑀢𑀸𑀬 𑀓𑀸𑀬𑀕𑀢𑀸𑀲𑀢𑀺𑀬𑀸 𑀯𑀼𑀢𑁆𑀢𑀸 𑀯𑁂𑀤𑀦𑀸𑀕𑀢𑀸 𑀘𑀺𑀢𑁆𑀢𑀕𑀢𑀸 𑀥𑀫𑁆𑀫𑀕𑀢𑀸 𑀘 𑀲𑀢𑀺 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀢𑀺𑀧𑀝𑁆𑀞𑀸𑀦𑁂𑀦. 𑀦 𑀳𑀺 𑀘𑀺𑀢𑁆𑀢𑀁 𑀏𑀓𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀧𑀯𑀢𑁆𑀢𑀢𑀺, 𑀦𑀸𑀦𑀸𑀲𑀼 𑀕𑀢𑀻𑀲𑀼 𑀧𑀯𑀢𑁆𑀢𑀢𑀺, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀯𑀼𑀢𑁆𑀢𑀸𑀬 𑀯𑀼𑀢𑁆𑀢𑀸 𑀯𑁂𑀤𑀦𑀸𑀕𑀢𑀸 𑀘𑀺𑀢𑁆𑀢𑀥𑀫𑁆𑀫𑀕𑀢𑀸 𑀘. 𑀦 𑀳𑀺 𑀓𑀸𑀬𑀕𑀢𑀸𑀲𑀢𑀺𑀬𑀸 𑀪𑀸𑀯𑀺𑀢𑀸𑀬 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀦 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀢𑀲𑁆𑀲𑀤𑀺𑀲𑁂𑀲𑀼 𑀥𑀫𑁆𑀫𑁂𑀲𑀼 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸 𑀘 𑀪𑀯𑀦𑁆𑀢𑀺.

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀕𑀸𑀣𑀸 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀘𑀺𑀢𑁆𑀢𑁂 𑀭𑀽𑀧𑀁 𑀯𑀼𑀢𑁆𑀢𑀁. 𑀇𑀤𑀁 𑀦𑀸𑀫𑀭𑀽𑀧𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀢𑀢𑁄 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀸 𑀬𑀁 𑀬𑀁 𑀑𑀤𑀧𑁂𑀢𑀺, 𑀢𑀁 𑀤𑀼𑀓𑁆𑀔𑀁. 𑀬𑁂𑀦 𑀑𑀤𑀧𑁂𑀢𑀺, 𑀲𑁄 𑀫𑀕𑁆𑀕𑁄. 𑀬𑀢𑁄 𑀑𑀤𑀧𑀦𑀸, 𑀲𑁄 𑀦𑀺𑀭𑁄𑀥𑁄. 𑀘𑀓𑁆𑀔𑀼𑀁 𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀢𑁆𑀣 𑀲𑀳𑀚𑀸𑀢𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄 𑀏𑀢𑁂 𑀢𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀉𑀧𑁆𑀧𑀸𑀤𑀮𑀓𑁆𑀔𑀡𑁂𑀦. 𑀬𑁄 𑀘 𑀭𑀽𑀧𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬 𑀲𑁄 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀲𑁄 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀇𑀢𑀺 𑀬𑁂 𑀏𑀓𑀮𑀓𑁆𑀔𑀡𑀸 𑀥𑀫𑁆𑀫𑀸, 𑀢𑁂𑀲𑀁 𑀏𑀓𑀫𑁆𑀳𑀺 𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄?

𑀦𑀺𑀭𑀼𑀢𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀘, 𑀩𑁆𑀬𑀜𑁆𑀚𑀦𑀸 𑀤𑁂𑀲𑀦𑀸𑀬 𑀘;

𑀲𑀼𑀢𑁆𑀢𑀢𑁆𑀣𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺, 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄.

𑀢𑀢𑁆𑀣 𑀓𑀢𑀫𑀸 𑀦𑀺𑀭𑀼𑀢𑁆𑀢𑀺, 𑀲𑀸 𑀓𑀣𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀸 [𑀧𑀲𑁆𑀲𑀺𑀢𑀩𑁆𑀩𑀸 (𑀧𑀻. 𑀓.)]? 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀏𑀓𑀸𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀔𑀺𑀧𑁆𑀧𑀁 𑀥𑀫𑁆𑀫𑁂𑀲𑀼 𑀫𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀢𑁆𑀣𑀓𑀼𑀲𑀮𑁄 𑀘 𑀳𑁄𑀢𑀺, 𑀥𑀫𑁆𑀫𑀓𑀼𑀲𑀮𑁄 𑀘 𑀳𑁄𑀢𑀺, 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀘 𑀳𑁄𑀢𑀺, 𑀇𑀢𑁆𑀣𑀸𑀥𑀺𑀯𑀘𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀧𑀼𑀭𑀺𑀲𑀸𑀥𑀺𑀯𑀘𑀦𑀓𑀼𑀲𑀮𑁄 𑀘, 𑀯𑀺𑀧𑀼𑀭𑀺𑀲𑀸𑀥𑀺𑀯𑀘𑀦𑀓𑀼𑀲𑀮𑁄 𑀘, 𑀅𑀢𑀻𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀘, 𑀅𑀦𑀸𑀕𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀘, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀥𑀺𑀯𑀘𑀦𑀓𑀼𑀲𑀮𑁄 𑀘. 𑀏𑀓𑀸𑀥𑀺𑀧𑁆𑀧𑀸𑀬𑁂𑀦 𑀓𑀼𑀲𑀮𑁄 𑀦𑀸𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀼𑀲𑀮𑁄. 𑀓𑀺𑀫𑁆𑀳𑀺 𑀤𑁂𑀲𑀺𑀢𑀁, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀇𑀢𑁆𑀣𑀸𑀥𑀺𑀯𑀘𑀦𑁂𑀦 𑀧𑀼𑀭𑀺𑀲𑀸𑀥𑀺𑀯𑀘𑀦𑁂𑀦 𑀯𑀺𑀧𑀼𑀭𑀺𑀲𑀸𑀥𑀺𑀯𑀘𑀦𑁂𑀦 𑀲𑀩𑁆𑀩𑀁 𑀬𑀣𑀸𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀁 𑀩𑁆𑀬𑀜𑁆𑀚𑀦𑀢𑁄 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀢𑁄 𑀬𑁄 𑀬𑀁 𑀲𑀼𑀢𑁆𑀢𑀲𑁆𑀲 𑀲𑀼𑀦𑀺𑀭𑀼𑀢𑁆𑀢𑀺𑀤𑀼𑀦𑁆𑀦𑀺𑀭𑀼𑀢𑁆𑀢𑀺𑀢𑀁 𑀅𑀯𑁂𑀓𑁆𑀔𑀢𑀺, 𑀇𑀤𑀁 𑀏𑀯𑀁 𑀦𑀺𑀭𑁄𑀧𑀬𑀺𑀢𑀩𑁆𑀩𑀁. 𑀇𑀤𑀫𑁆𑀧𑀺 𑀦 𑀦𑀺𑀭𑁄𑀧𑀬𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀘𑁆𑀘𑀢𑁂 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀁.

𑁪𑁯. 𑀢𑀢𑁆𑀣 𑀓𑀢𑀫𑀁 𑀅𑀥𑀺𑀧𑁆𑀧𑀸𑀬𑀓𑁄𑀲𑀮𑁆𑀮𑀁? 𑀬𑀣𑀸𑀤𑁂𑀲𑀺𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀩𑁆𑀩𑀲𑁆𑀲 𑀯𑀸𑀭𑀁 𑀕𑀘𑁆𑀙𑀢𑀺 𑀇𑀫𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀩𑁆𑀩𑀦𑁆𑀢𑀺. 𑀬𑀣𑀸 𑀓𑀺𑀁 𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀦𑁆𑀢𑀺 𑀕𑀸𑀣𑀸. 𑀏𑀢𑁆𑀣 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀲𑀻𑀢𑀺𑀫𑁂𑀯 𑀆𑀓𑀗𑁆𑀔𑀦𑁆𑀢𑀺 𑀢𑁂 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑀬𑁄𑀕𑀲𑁆𑀲 𑀓𑀸𑀮𑀁 𑀦 𑀦𑀺𑀯𑀢𑁆𑀢𑀢𑀺 𑀬𑀸 𑀘, 𑀲𑁄 𑀦 𑀢𑀢𑁆𑀣 𑀧𑀸𑀧𑀺𑀦𑁆𑀢𑀯𑁂 𑀪𑀯𑀦𑁆𑀢𑀺;

𑀯𑁂𑀤𑀦𑀸𑀫𑀕𑁆𑀕𑀇𑀲𑀺𑀦𑀸 [𑀯𑁂𑀤𑀦𑀸𑀫𑀕𑁆𑀕𑀁 𑀇𑀲𑀺𑀦𑀸 (𑀧𑀻.)] 𑀧𑀯𑁂𑀤𑀺𑀢𑀁, 𑀥𑀼𑀢𑀭𑀚𑀸𑀲𑀯𑀸 𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀸𑀢𑀸.

𑀏𑀢𑁆𑀣 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀤𑀼𑀓𑁆𑀔𑁂 𑀦𑀸𑀲𑁆𑀲𑀸𑀤𑀓𑀸 [𑀤𑀼𑀓𑁆𑀔𑁂𑀦 𑀲𑀸𑀥𑀓𑀸 (𑀧𑀻.)], 𑀢𑁂 𑀯𑀻𑀭𑀺𑀬𑀫𑀸𑀭𑀪𑀺𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺. 𑀅𑀬𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀕𑀸𑀣𑀸𑀬 𑀯𑀸 𑀩𑁆𑀬𑀸𑀓𑀭𑀡𑁂𑀦 𑀯𑀸 𑀤𑁂𑀲𑀺𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀸𑀥𑀓𑀸, 𑀬𑁄 𑀏𑀯𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀲𑁄 𑀅𑀥𑀺𑀧𑁆𑀧𑀸𑀬𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑁂𑀲𑀦𑀸𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀓𑀢𑀫𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺? 𑀬𑀁 𑀕𑀸𑀣𑀸𑀬𑀁 𑀯𑀸 𑀲𑀼𑀢𑁆𑀢𑁂𑀲𑀼 𑀯𑀸 𑀧𑀤𑀸𑀦𑀺 𑀅𑀲𑀻𑀢𑀺 𑀢𑀸𑀦𑀺 𑀪𑀯𑀦𑁆𑀢𑀺 𑀏𑀯𑀁 𑀯𑀸 𑀏𑀯𑀫𑁂𑀢𑀺 𑀢𑀲𑁆𑀲𑀸 𑀕𑀸𑀣𑀸𑀬 𑀲𑀼𑀢𑁆𑀢𑀲𑁆𑀲 𑀯𑀸 𑀬𑀸𑀦𑀺 𑀧𑀼𑀭𑀺𑀫𑀸𑀦𑀺 𑀧𑀤𑀸𑀦𑀺 𑀬𑀸𑀦𑀺 𑀘 𑀧𑀘𑁆𑀙𑀺𑀫𑀓𑀸𑀦𑀺, 𑀢𑀸𑀦𑀺 𑀲𑀫𑁄𑀲𑀸𑀭𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀲𑁄 𑀧𑀼𑀩𑁆𑀩𑀸𑀧𑀭𑁂𑀦 𑀲𑀦𑁆𑀥𑀺 𑀜𑀸𑀬𑀢𑀺. 𑀬𑀸 𑀏𑀓𑀸 𑀲𑀫𑀸𑀭𑀤𑁆𑀥𑀸 𑀕𑀸𑀣𑀸 𑀤𑁆𑀯𑁂 𑀢𑀻𑀡𑀺 𑀯𑀸 𑀢𑀲𑁆𑀲 𑀫𑁂𑀓𑀤𑁂𑀲𑁂 𑀪𑀸𑀲𑀺𑀢𑀸𑀦𑀁 𑀅𑀪𑀸𑀲𑀺𑀢𑀸𑀳𑀺 𑀕𑀸𑀣𑀸𑀳𑀺 𑀅𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀣𑁄 𑀪𑀯𑀢𑀺 𑀢𑀤𑀼𑀧𑀥𑀸𑀭𑀺𑀢𑀩𑁆𑀩𑀁. 𑀬𑀁𑀯 𑀲𑀩𑁆𑀩𑀸 [𑀬𑀁 𑀯𑀢𑁆𑀢𑀩𑁆𑀩𑀁 (𑀧𑀻.)] 𑀇𑀢𑀺𑀲𑁆𑀲 𑀧𑀭𑀺𑀬𑁂𑀲𑀫𑀸𑀦𑀲𑁆𑀲 𑀧𑀭𑀺𑀬𑁂𑀲𑀦𑀸 𑀓𑀗𑁆𑀔𑀸, 𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀻𑀦𑀁 𑀅𑀧𑀭𑁂 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀘𑁆𑀘𑀢𑁂 𑀧𑀼𑀩𑁆𑀩𑀸𑀧𑀭𑁂𑀦 𑀲𑀦𑁆𑀥𑀺. 𑀓𑁄𑀲𑀮𑁆𑀮𑀦𑁆𑀢𑀺 𑀯𑀢𑁆𑀣𑀼𑀢𑁄 𑀦𑀺𑀤𑀸𑀦𑀓𑁄𑀲𑀮𑁆𑀮𑀁. 𑀩𑁆𑀬𑀜𑁆𑀚𑀦𑀢𑁄 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀁. 𑀤𑁂𑀲𑀦𑀸𑀥𑀺𑀧𑁆𑀧𑀸𑀬𑀓𑁄𑀲𑀮𑁆𑀮𑀁. 𑀧𑀼𑀩𑁆𑀩𑀸𑀧𑀭𑁂𑀦 𑀲𑀦𑁆𑀥𑀺𑀓𑁄𑀲𑀮𑁆𑀮𑀁. 𑀢𑀢𑁆𑀣 𑀢𑀲𑁆𑀲 𑀕𑀸𑀣𑀸 𑀧𑀭𑀺𑀬𑁂𑀲𑀺𑀢𑀸 𑀦𑀺𑀤𑀸𑀦𑀁 𑀯𑀸. 𑀉𑀧𑀮𑀩𑁆𑀪𑀺𑀢𑀼𑀁 𑀦 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀯𑀢𑁆𑀣𑀼𑀢𑁄 𑀦𑀺𑀤𑀸𑀦𑀓𑁄𑀲𑀮𑁆𑀮𑀁 𑀅𑀢𑁆𑀣𑀓𑁄𑀲𑀮𑁆𑀮𑀁 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀅𑀢𑁆𑀣𑁄 𑀧𑀭𑀺𑀬𑁂𑀲𑀺𑀬𑀦𑁆𑀢𑁄 𑀬𑀣𑀸𑀪𑀽𑀢𑀁 𑀧𑀭𑀺𑀬𑀺𑀝𑁆𑀞𑁄 𑀳𑁄𑀢𑀺. 𑀅𑀣 𑀘 𑀲𑀩𑁆𑀩𑁄 𑀯𑀢𑁆𑀣𑀼𑀢𑁄 𑀯𑀸 𑀦𑀺𑀤𑀸𑀦𑁂𑀦 𑀯𑀸 𑀬𑁄 𑀅𑀥𑀺𑀧𑁆𑀧𑀸𑀬𑁄 𑀩𑁆𑀬𑀜𑁆𑀚𑀦𑁄 𑀦𑀺𑀭𑀼𑀢𑁆𑀢𑀺 𑀲𑀦𑁆𑀥𑀺 𑀘 𑀅𑀦𑀼𑀢𑁆𑀢𑀭𑁄 𑀏𑀲𑁄 𑀧𑀼𑀩𑁆𑀩𑀸𑀧𑀭𑁂𑀦 𑀏𑀯𑀁 𑀲𑀼𑀢𑁆𑀢𑀢𑁆𑀣𑁂𑀦 𑀤𑁂𑀲𑀺𑀢𑀩𑁆𑀩𑀁. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑁫𑁦. 𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄?

𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄.

𑀬𑀣𑀸 𑀓𑀺𑀁 𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀦𑁆𑀢𑀺 𑀕𑀸𑀣𑀸𑀬𑁄. 𑀬𑀁 𑀧𑀫𑀸𑀤𑁄, 𑀇𑀤𑀁 𑀓𑀺𑀲𑁆𑀲 𑀧𑀤𑀝𑁆𑀞𑀸𑀦𑀁? 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀑𑀲𑀕𑁆𑀕𑀲𑁆𑀲. 𑀓𑀼𑀲𑀮𑀥𑀫𑁆𑀫𑁄𑀲𑀕𑁆𑀕𑁄 𑀧𑀦 𑀓𑀺𑀲𑁆𑀲 𑀧𑀤𑀝𑁆𑀞𑀸𑀦𑀁? 𑀅𑀓𑀼𑀲𑀮𑀥𑀫𑁆𑀫𑀧𑀝𑀺𑀲𑁂𑀯𑀦𑀸𑀬. 𑀓𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀓𑀼𑀲𑀮𑀥𑀫𑁆𑀫𑀧𑀝𑀺𑀲𑁂𑀯𑀦𑀸𑀬? 𑀓𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀓𑀺𑀮𑁂𑀲𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀸𑀬? 𑀇𑀢𑀺 𑀧𑀫𑀸𑀤𑁂𑀦 𑀫𑁄𑀳𑀧𑀓𑁆𑀔𑀺𑀬𑀸 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸 𑀙𑀦𑁆𑀤𑀭𑀸𑀕𑀧𑀓𑁆𑀔𑀺𑀬𑀸. 𑀢𑀢𑁆𑀣 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀢𑀡𑁆𑀳𑀸 𑀓𑀸𑀫𑀸𑀲𑀯𑁄 𑀘 𑀪𑀯𑀸𑀲𑀯𑁄 𑀘 𑀤𑀺𑀝𑁆𑀞𑀸𑀲𑀯𑁄 𑀘 𑀅𑀯𑀺𑀚𑁆𑀚𑀸𑀲𑀯𑁄 𑀘. 𑀢𑀢𑁆𑀣 𑀘𑀺𑀢𑁆𑀢𑁂 𑀅𑀢𑁆𑀣𑀻𑀢𑀺 𑀤𑀺𑀝𑁆𑀞𑀺 𑀘𑁂𑀢𑀲𑀺𑀓𑁂𑀲𑀼 𑀦𑀺𑀘𑁆𑀘𑀦𑁆𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀚𑁆𑀛𑀸𑀯𑀳𑀦𑁂𑀦 𑀓𑀸𑀫𑀸𑀲𑀯𑁄, 𑀉𑀧𑀧𑀢𑁆𑀢𑀻𑀲𑀼 𑀆𑀲𑀢𑁆𑀢𑀺 𑀪𑀯𑀸𑀲𑀯𑁄. 𑀢𑀢𑁆𑀣 𑀭𑀽𑀧𑀓𑀸𑀬𑁄 𑀓𑀸𑀫𑀸𑀲𑀯𑀲𑁆𑀲 𑀪𑀯𑀸𑀲𑀯𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁. 𑀦𑀸𑀫𑀓𑀸𑀬𑁄 𑀤𑀺𑀝𑁆𑀞𑀸𑀲𑀯𑀲𑁆𑀲 𑀅𑀯𑀺𑀚𑁆𑀚𑀸𑀲𑀯𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀅𑀮𑁆𑀮𑀺𑀬𑀦𑀸𑀬 𑀅𑀚𑁆𑀛𑀢𑁆𑀢𑀯𑀸𑀳𑀦𑀁 𑀓𑀸𑀫𑀸𑀲𑀯𑀲𑁆𑀲 𑀮𑀓𑁆𑀔𑀡𑀁. 𑀧𑀢𑁆𑀣𑀦𑀕𑀦𑁆𑀣𑀦𑀅𑀪𑀺𑀲𑀗𑁆𑀔𑀸𑀭𑀓𑀸𑀬𑀲𑀗𑁆𑀔𑀸𑀭𑀡𑀁 𑀪𑀯𑀸𑀲𑀯𑀲𑁆𑀲 𑀮𑀓𑁆𑀔𑀡𑀁, 𑀅𑀪𑀺𑀦𑀺𑀯𑁂𑀲𑁄 𑀘 𑀧𑀭𑀸𑀫𑀸𑀲𑁄 𑀘 𑀤𑀺𑀝𑁆𑀞𑀸𑀲𑀯𑀲𑁆𑀲 𑀮𑀓𑁆𑀔𑀡𑀁. 𑀅𑀧𑁆𑀧𑀝𑀺𑀯𑁂𑀥𑁄 𑀥𑀫𑁆𑀫𑁂𑀲𑀼 𑀅𑀲𑀫𑁆𑀧𑀚𑀜𑁆𑀜𑀸 𑀘 𑀅𑀯𑀺𑀚𑁆𑀚𑀸𑀲𑀯𑀲𑁆𑀲 𑀮𑀓𑁆𑀔𑀡𑀁. 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺. 𑀓𑀸𑀫𑀸𑀲𑀯𑁄 𑀓𑀸𑀫𑀼𑀧𑀸𑀤𑀸𑀦𑀁, 𑀪𑀯𑀸𑀲𑀯𑁄 𑀪𑀯𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀸𑀲𑀯𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀅𑀯𑀺𑀚𑁆𑀚𑀸𑀲𑀯𑁄 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀇𑀫𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀲𑀯𑁄 𑀘𑀺𑀢𑁆𑀢𑁂 𑀧𑀳𑀸𑀢𑀩𑁆𑀩𑁄, 𑀲𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀺𑀲𑁆𑀲 𑀧𑀳𑀻𑀬𑀢𑀺. 𑀤𑀺𑀝𑁆𑀞𑀸𑀲𑀯𑁄 𑀥𑀫𑁆𑀫𑁂𑀲𑀼 𑀧𑀳𑀸𑀢𑀩𑁆𑀩𑁄, 𑀲𑁄 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀲𑁆𑀲 𑀧𑀳𑀻𑀬𑀢𑀺. 𑀪𑀯𑀸𑀲𑀯𑁄 𑀆𑀲𑀢𑁆𑀢𑀺𑀬𑀸 𑀧𑀳𑀸𑀢𑀩𑁆𑀩𑁄, 𑀲𑁄 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀺𑀲𑁆𑀲 𑀧𑀳𑀻𑀬𑀢𑀺. 𑀓𑀸𑀫𑀸𑀲𑀯𑁄 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀧𑀳𑀸𑀢𑀩𑁆𑀩𑁄, 𑀲𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀲𑁆𑀲 𑀧𑀳𑀻𑀬𑀢𑀺. 𑀢𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀁 𑀪𑀚𑀢𑀺. 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀘𑁆𑀘𑀬𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲, 𑀲𑀢𑁆𑀢𑀓𑀺𑀮𑁂𑀲𑁄𑀧𑀘𑀸𑀭𑁄 𑀢𑁂𑀦 𑀲𑀫𑀼𑀤𑀬𑀁 𑀪𑀚𑀢𑀺. 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀁 𑀪𑀚𑀢𑀺. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀫𑀕𑁆𑀕𑀁 𑀪𑀚𑀢𑀺. 𑀢𑁂𑀦𑀲𑁆𑀲 𑀘𑀢𑀽𑀲𑀼 𑀘 𑀤𑀲𑁆𑀲𑀦𑁂𑀦 𑀢𑀲𑁆𑀲𑁂𑀯 𑀲𑀩𑁆𑀩𑁂 𑀧𑀳𑀻𑀬𑀦𑁆𑀢𑀺, 𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀧𑀞𑀫𑀁 𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸. 𑀚𑀸𑀦𑀢𑁄 𑀳𑀺 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀦𑀺𑀭𑁄𑀥𑁄 𑀫𑀕𑁆𑀕𑁄 𑀳𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀏𑀯𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀬𑀸𑀯 𑀢𑀲𑁆𑀲 𑀅𑀓𑀼𑀲𑀮𑀲𑁆𑀲 𑀕𑀢𑀺 𑀢𑀢𑁄 𑀧𑀝𑀺𑀧𑀓𑁆𑀔𑁂𑀦 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀭𑀺𑀬𑁂𑀲𑀢𑀺 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀳𑀸𑀭𑁂𑀦 𑀆𑀯𑀝𑁆𑀝𑀢𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀆𑀯𑀝𑁆𑀝𑁄 𑀳𑀸𑀭𑁄. 𑀏𑀯𑀁 𑀲𑀼𑀓𑁆𑀓𑀸𑀧𑀺 𑀥𑀫𑁆𑀫𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀅𑀓𑀼𑀲𑀮𑀥𑀫𑁆𑀫𑁂 𑀆𑀕𑀫𑀺𑀲𑁆𑀲.

𑀢𑀢𑁆𑀣 𑀆𑀯𑀝𑁆𑀝𑀲𑁆𑀲 𑀳𑀸𑀭𑀲𑁆𑀲 𑀅𑀬𑀁 𑀪𑀽𑀫𑀺 𑀲𑀢𑀺 𑀉𑀧𑀝𑁆𑀞𑀸𑀦𑀸 𑀘 𑀯𑀺𑀧𑀮𑁆𑀮𑀸𑀲𑀸 𑀘 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀲𑀓𑁆𑀓𑀸𑀬𑀲𑀫𑀼𑀧𑁆𑀧𑀸𑀤𑀸𑀬𑀕𑀸𑀫𑀺𑀦𑀻 𑀘 𑀧𑀝𑀺𑀧𑀤𑀸 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑁫𑁧. 𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄? 𑀬𑀁 𑀓𑀺𑀜𑁆𑀘𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁 𑀯𑀼𑀘𑁆𑀘𑀢𑀺 𑀯𑀺𑀪𑀢𑁆𑀢𑀺 𑀳𑀸𑀭𑁄. 𑀬𑀣𑀸 𑀓𑀺𑀁 𑀆𑀕𑀦𑁆𑀢𑁆𑀯𑀸 𑀘 𑀧𑀼𑀦 𑀧𑀼𑀕𑁆𑀕𑀮𑁄 𑀳𑁄𑀢𑀺, 𑀦𑁄 𑀯𑀸𑀕𑀢𑀁 𑀦 𑀧𑀭𑀺𑀪𑀸𑀲𑀢𑀺 [𑀦𑁄 𑀯𑀸 𑀦 𑀧𑀭𑀺𑀪𑀸𑀲𑀢𑀺 (𑀧𑀻.), 𑀦 𑀢𑀸𑀯𑀸𑀬𑀁 𑀧𑀭𑀺𑀪𑀸𑀲𑀺 (𑀓.)] 𑀧𑀭𑀺𑀧𑀼𑀘𑁆𑀙𑀢𑀸𑀬 𑀧𑀜𑁆𑀳𑀸𑀬 𑀅𑀢𑀺𑀬𑀦𑀁 𑀏𑀓𑀲𑁆𑀲 𑀓𑀺𑀜𑁆𑀘𑀺 𑁋 𑀅𑀬𑀁 𑀯𑀼𑀘𑁆𑀘𑀢𑁂 𑀯𑀺𑀪𑀢𑁆𑀢𑀺 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄. 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀲𑀩𑁆𑀩𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄?

𑀯𑁂𑀯𑀘𑀦𑁂𑀳𑀺 𑀅𑀦𑁂𑀓𑁂𑀳𑀺, 𑀏𑀓𑀁 𑀥𑀫𑁆𑀫𑀁 𑀧𑀓𑀸𑀲𑀺𑀢𑀁;

𑀲𑀼𑀢𑁆𑀢𑁂 𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽, 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄.

𑀬𑀣𑀸 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑀫𑁆𑀳𑀺 𑀯𑀢𑁆𑀣𑀼𑀫𑁆𑀳𑀺 𑀯𑁂𑀯𑀘𑀦𑁂𑀦 𑀦𑀸𑀦𑀸𑀯𑀼𑀢𑁆𑀢𑁂𑀦 𑀪𑀕𑀯𑀢𑀸 𑀧𑀲𑀁𑀲𑀺𑀢𑁄 ‘‘𑀫𑀳𑀸𑀧𑀜𑁆𑀜𑁄 𑀲𑀸𑀭𑀺𑀧𑀼𑀢𑁆𑀢𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄’’𑀢𑀺 𑀇𑀤𑀁 𑀧𑀜𑁆𑀜𑀸𑀬 𑀯𑁂𑀯𑀘𑀦𑀁. 𑀬𑀣𑀸 𑀘 𑀫𑀕𑁆𑀕𑀯𑀺𑀪𑀗𑁆𑀕𑁂 𑀦𑀺𑀬𑁆𑀬𑀸𑀦𑀢𑁆𑀣𑁄 𑀏𑀓𑀫𑁂𑀓𑀁 𑀫𑀕𑁆𑀕𑀗𑁆𑀕𑀁 𑀯𑁂𑀯𑀘𑀦𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀯𑁂𑀯𑀘𑀦𑀸. 𑀏𑀓𑀁 𑀅𑀓𑀼𑀲𑀮𑀫𑀽𑀮𑀁 𑀢𑀤𑁂𑀯 𑀲𑀦𑁆𑀢𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀢𑁂𑀦 𑀢𑁂𑀦 𑀧𑀚𑀸𑀦𑀦𑁆𑀢𑀺. 𑀦 𑀳𑀺 𑀅𑀦𑁂𑀦 𑀢𑀤𑁂𑀯𑀧𑀺 𑀆𑀮𑀧𑀺𑀬𑀦𑁆𑀢𑀺 𑀅𑀜𑁆𑀜𑀁 𑀪𑀚𑀢𑀺. 𑀲𑀩𑁆𑀩𑀓𑀸𑀫𑀚𑀳𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀓𑀸𑀫𑀸 𑀆𑀮𑀧𑀺𑀢𑀸. 𑀬𑀲𑁆𑀲 𑀦𑀺𑀢𑁆𑀣𑀺𑀡𑁆𑀡𑁄 𑀲𑀗𑁆𑀓𑁄𑀢𑀺 𑀢𑁂𑀬𑁂𑀯 𑀓𑀸𑀫𑁂 𑀲𑀗𑁆𑀓𑀸𑀢𑀺 𑀆𑀮𑀧𑀢𑀺. 𑀲𑀼𑀡𑀫𑀸𑀦𑀲𑁆𑀲 𑀧𑀼𑀭𑁂𑀢𑀭𑀁 𑀭𑀚𑁆𑀚𑀦𑁆𑀢𑀺 𑀢𑁂𑀬𑁂𑀯 𑀓𑀸𑀫𑁂 𑀭𑀚𑁆𑀚𑀦𑁆𑀢𑀺 𑀆𑀮𑀧𑀢𑀺. 𑀏𑀯𑀁 𑀲𑀼𑀢𑁆𑀢𑀫𑁆𑀳𑀺 𑀬𑁄 𑀥𑀫𑁆𑀫𑁄 𑀤𑁂𑀲𑀺𑀬𑀢𑀺 𑀢𑀲𑁆𑀲 𑀧𑀭𑀺𑀬𑁂𑀝𑁆𑀞𑀺 ‘‘𑀓𑀢𑀫𑀲𑁆𑀲 𑀥𑀫𑁆𑀫𑀲𑁆𑀲 𑀇𑀤𑀁 𑀦𑀸𑀫𑀁 𑀓𑀢𑀫𑀲𑁆𑀲 𑀇𑀤𑀁 𑀯𑁂𑀯𑀘𑀦’’𑀦𑁆𑀢𑀺. 𑀲𑀩𑁆𑀩𑀜𑁆𑀜𑀽 𑀳𑀺 𑀬𑁂𑀲𑀁 𑀬𑁂𑀲𑀁 𑀬𑀸 𑀦𑀺𑀭𑀼𑀢𑁆𑀢𑀺 𑀳𑁄𑀢𑀺, 𑀬𑀣𑀸𑀕𑀸𑀫𑀺 𑀢𑁂𑀦 𑀢𑁂𑀦 𑀤𑁂𑀲𑁂𑀢𑀻𑀢𑀺 𑀢𑀲𑁆𑀲 𑀯𑁂𑀯𑀘𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑁫𑁨. 𑀢𑀢𑁆𑀣 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄? 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀢𑀺, 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀬𑀸 𑀲𑀫𑀼𑀤𑀬𑀧𑀜𑁆𑀜𑀢𑁆𑀢𑀺. 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀙𑀦𑁆𑀤𑁄 𑀅𑀢𑁆𑀣𑀺 𑀭𑀸𑀕𑁄 𑀬𑀸𑀯 𑀧𑀢𑀺𑀝𑁆𑀞𑀺𑀢𑀁. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀧𑀪𑀯𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀢𑀺. 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀦𑀢𑁆𑀣𑀺 𑀙𑀦𑁆𑀤𑁄…𑀧𑁂… 𑀲𑀫𑀼𑀕𑁆𑀖𑀸𑀢𑀺 𑀧𑀜𑁆𑀜𑀢𑁆𑀢𑀺.

𑀢𑀲𑁆𑀲 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀳𑀸𑀦𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀢𑀺. 𑀢𑀡𑁆𑀳𑀸 𑀬𑀲𑁆𑀲 𑀧𑀼𑀭𑀓𑁆𑀔𑀢𑀸 𑀧𑀜𑁆𑀜𑀸 𑀧𑀭𑀺𑀯𑀢𑁆𑀢𑀢𑀺 𑀕𑀸𑀣𑀸 𑀫𑀦𑀸𑀧𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀢𑀺. 𑀏𑀯𑀁 𑀧𑀦 𑀫𑀦𑀸𑀧𑀧𑀜𑁆𑀜𑀢𑁆𑀢𑀻𑀢𑀺 𑀏𑀓𑀥𑀫𑁆𑀫𑀁 𑀪𑀕𑀯𑀸 𑀧𑀜𑁆𑀜𑀧𑁂𑀢𑀺. 𑀦 𑀳𑀺 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀢𑀡𑁆𑀳𑀸𑀲𑀫𑀼𑀤𑀬𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀬𑀣𑀸 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀯𑀺𑀦𑁄𑀤𑁂𑀢𑀺 𑀧𑀚𑀳𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘 𑀬𑀜𑁆𑀘𑀲𑁆𑀲 𑀥𑀫𑁆𑀫𑀓𑁆𑀔𑁂𑀢𑁆𑀢𑀁 𑀪𑀯𑀢𑀺, 𑀲𑁄 𑀘𑁂𑀯 𑀥𑀫𑁆𑀫𑁄 𑀢𑀢𑁆𑀣 𑀧𑀯𑀢𑁆𑀢𑀢𑀺. 𑀢𑀤𑀯𑀲𑀺𑀝𑁆𑀞𑀸 𑀥𑀫𑁆𑀫𑀸 𑀢𑀲𑁆𑀲𑀸𑀦𑀼𑀯𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀲𑀸 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀺 𑁋 𑀧𑀭𑀸𑀥𑀻𑀦𑀧𑀜𑁆𑀜𑀢𑁆𑀢𑀺 𑀘 𑀲𑀸𑀥𑀻𑀦𑀧𑀜𑁆𑀜𑀢𑁆𑀢𑀺 𑀘. 𑀓𑀢𑀫𑀸 𑀲𑀸𑀥𑀻𑀦𑀧𑀜𑁆𑀜𑀢𑁆𑀢𑀺? 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂 [𑀧𑀲𑁆𑀲 𑀲𑀁. 𑀦𑀺. 𑁩.𑁫], 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀲𑀸𑀥𑀻𑀦𑀧𑀜𑁆𑀜𑀢𑁆𑀢𑀺 𑀧𑀭𑀸𑀥𑀻𑀦𑀧𑀜𑁆𑀜𑀢𑁆𑀢𑀺 𑀘, 𑀲𑀸 𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀸𑀬 𑀘 𑀲𑀻𑀮𑀲𑁆𑀲 𑀘, 𑀬𑀣𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀪𑀸𑀯𑁂𑀣. 𑀢𑀲𑁆𑀲 𑀅𑀢𑁆𑀣𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀫𑀼𑀤𑀽𑀦𑀺 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀸𑀦𑀺 𑀘𑀢𑀼𑀧𑀭𑀸𑀥𑀻𑀦𑀸𑀦𑀺, 𑀢𑀻𑀡𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀢𑀺 𑀧𑀭𑀸𑀥𑀻𑀦𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀸𑀥𑀻𑀦𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀧𑀭𑀸𑀥𑀻𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀇𑀢𑀺 𑀲𑀓𑁂 𑀧𑀤𑀝𑁆𑀞𑀸𑀦𑁂 𑀲𑀓𑁂 𑀔𑁂𑀢𑁆𑀢𑀲𑀸𑀥𑀻𑀦𑁄 𑀲𑁄 𑀥𑀫𑁆𑀫𑁄, 𑀲𑁄 𑀘 𑀢𑀢𑁆𑀣 𑀧𑀜𑁆𑀜𑀸𑀧𑁂𑀢𑀩𑁆𑀩𑁄. 𑀢𑀲𑁆𑀲 𑀧𑀝𑀺𑀧𑀓𑁆𑀔𑀸 𑀦𑀺𑀖𑀸𑀢𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀏𑀢𑁆𑀣𑀸𑀬𑀁 𑀅𑀦𑁂𑀓𑀸𑀓𑀸𑀭𑀧𑀜𑁆𑀜𑀢𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀥𑀫𑁆𑀫𑁄 𑀧𑀜𑁆𑀜𑀢𑁆𑀢𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀜𑁆𑀜𑀢𑁆𑀢𑀺.

𑁫𑁩. 𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑁄? 𑀙𑀲𑀼 𑀥𑀫𑁆𑀫𑁂𑀲𑀼 𑀑𑀢𑀸𑀭𑁂𑀢𑀩𑁆𑀩𑀁. 𑀓𑀢𑀫𑁂𑀲𑀼 𑀙𑀲𑀼? 𑀔𑀦𑁆𑀥𑁂𑀲𑀼 𑀥𑀸𑀢𑀽𑀲𑀼 𑀆𑀬𑀢𑀦𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀘𑁆𑀘𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼. 𑀦𑀢𑁆𑀣𑀺 𑀢𑀁 𑀲𑀼𑀢𑁆𑀢𑀁 𑀯𑀸 𑀕𑀸𑀣𑀸 𑀯𑀸 𑀩𑁆𑀬𑀸𑀓𑀭𑀡𑀁 𑀯𑀸. 𑀇𑀫𑁂𑀲𑀼 𑀙𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦 𑀲𑀦𑁆𑀤𑀺𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀏𑀲 𑀲𑀩𑁆𑀩𑀸 𑀤𑁂𑀲𑀦𑀸 𑀬𑀸 𑀢𑀸 𑀔𑀦𑁆𑀥𑀸 𑀯𑀸 𑀥𑀸𑀢𑀼𑀬𑁄 𑀯𑀸 𑀆𑀬𑀢𑀦𑀸𑀦𑀺 𑀯𑀸 𑀲𑀘𑁆𑀘𑀸𑀦𑀺 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀸, 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀢𑀺𑀲𑁆𑀲𑁄 𑀯𑁂𑀤𑀦𑀸𑀬𑁄 𑀢𑀲𑁆𑀲 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑁄𑀫𑀦𑀲𑁆𑀲𑁄 𑀲𑀯𑀺𑀘𑀸𑀭𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀤𑁄𑀫𑀦𑀲𑁆𑀲𑁄 𑀲𑀯𑀺𑀘𑀸𑀭𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀉𑀧𑁂𑀓𑁆𑀔𑁄 𑀲𑀯𑀺𑀘𑀸𑀭𑁄. 𑀬𑀁 𑀧𑀼𑀦 𑀢𑀢𑁆𑀣 𑀯𑁂𑀤𑀬𑀺𑀢𑀁 𑀇𑀤𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀢𑁆𑀣 𑀓𑀸𑀬𑁄 𑀧𑀫𑀢𑁆𑀢𑀁 𑀲𑀉𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀲𑀗𑁆𑀔𑀸𑀭𑀕𑀢𑁄 𑀤𑁆𑀯𑀺𑀥𑀸 𑀘 𑀪𑀯𑀗𑁆𑀕𑁄𑀢𑀭𑀡𑀁 𑀓𑀫𑁆𑀫𑀁 𑀢𑀻𑀡𑀺 𑀘 𑀲𑀗𑁆𑀔𑀸𑀭𑀸𑀦𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸 𑀯𑀸 𑀅𑀧𑀼𑀜𑁆𑀜𑀸 𑀯𑀸 𑀆𑀦𑁂𑀜𑁆𑀚𑀸 𑀯𑀸 𑀳𑁂𑀢𑀼 𑀲𑀩𑁆𑀩𑀲𑀭𑀸𑀕𑀲𑁆𑀲 𑀦𑁄 𑀯𑀻𑀢𑀭𑀸𑀕𑀲𑁆𑀲, 𑀤𑁄𑀲𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀸𑀦𑀺 𑀘 𑀅𑀯𑀻𑀢𑀭𑀸𑀕𑁄 𑀘𑁂𑀢𑁂𑀢𑀺 𑀘 𑀧𑀓𑀧𑁆𑀧𑁂𑀢𑀺 𑀘, 𑀯𑀻𑀢𑀭𑀸𑀕𑁄 𑀧𑀦 𑀘𑁂𑀢𑁂𑀢𑀺 𑀘 𑀦𑁄 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁 𑀉𑀡𑁆𑀳𑀁 𑀯𑀚𑀺𑀭𑀁 𑀓𑀝𑁆𑀞𑁂 𑀯𑀸 𑀭𑀼𑀓𑁆𑀔𑁂 𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀧𑀢𑀦𑁆𑀢𑀁 𑀪𑀺𑀦𑁆𑀤𑀢𑀺 𑀘 𑀟𑀳𑀢𑀺 𑀘, 𑀏𑀯𑀁 𑀲𑀭𑀸𑀕𑀘𑁂𑀢𑀦𑀸 𑀘𑁂𑀢𑁂𑀢𑀺 𑀘 𑀅𑀪𑀺𑀲𑀗𑁆𑀔𑀭𑁄𑀢𑀺 𑀘. 𑀬𑀣𑀸 𑀲𑀢𑀁 𑀯𑀚𑀺𑀭𑀁 𑀦 𑀪𑀺𑀦𑁆𑀤𑀢𑀺 𑀦 𑀘 𑀟𑀳𑀢𑀺, 𑀏𑀯𑀁 𑀯𑀻𑀢𑀭𑀸𑀕𑀘𑁂𑀢𑀦𑀸 𑀘𑁂𑀢𑁂𑀢𑀺 𑀦 𑀘 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀓𑁄 𑀔𑀦𑁆𑀥𑁄 𑀅𑀦𑀺𑀦𑁆𑀤𑁆𑀭𑀺𑀬𑀲𑀭𑀻𑀭𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁄.

𑀢𑀢𑁆𑀣 𑀥𑀸𑀢𑀽𑀦𑀁 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀢𑀢𑁆𑀣 𑀬𑀸 𑀭𑀽𑀧𑀻 𑀤𑀲 𑀥𑀸𑀢𑀼𑀬𑁄, 𑀢𑀸𑀲𑀼 𑀤𑁂𑀲𑀺𑀬𑀫𑀸𑀦𑀸𑀲𑀼 𑀭𑀽𑀧𑀓𑁆𑀔𑀦𑁆𑀥𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀬𑁂𑀧𑀺 𑀘 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀫𑀦𑁄𑀥𑀸𑀢𑀼𑀲𑀢𑁆𑀢𑀫𑀸, 𑀢𑀢𑁆𑀣 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀥𑀫𑁆𑀫𑀥𑀸𑀢𑀼 𑀧𑀦 𑀥𑀫𑁆𑀫𑀲𑀫𑁄𑀲𑀭𑀡𑀸, 𑀲𑁄 𑀥𑀫𑁆𑀫𑁄 𑀳𑁂𑀢𑀼𑀦𑀸 𑀘 𑀦𑀺𑀲𑁆𑀲𑀦𑁆𑀤𑁂𑀦 𑀘 𑀨𑀮𑁂𑀦 𑀘 𑀓𑀺𑀘𑁆𑀘𑁂𑀦 𑀘 𑀯𑁂𑀯𑀘𑀦𑁂𑀦 𑀘 𑀬𑁂𑀦 𑀬𑁂𑀦 𑀉𑀧𑀮𑀩𑁆𑀪𑀢𑀺, 𑀢𑁂𑀦 𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀬𑀤𑀺 𑀯𑀸 𑀓𑀼𑀲𑀮𑀸 𑀬𑀤𑀺 𑀯𑀸 𑀅𑀓𑀼𑀲𑀮𑀸 𑀬𑀤𑀺 𑀯𑀸 𑀅𑀩𑁆𑀬𑀸𑀓𑀢𑀸 𑀬𑀤𑀺 𑀯𑀸 𑀅𑀲𑀗𑁆𑀔𑀢𑀸. 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀤𑀲 𑀆𑀬𑀢𑀦𑀸𑀦𑀺 𑀭𑀽𑀧𑀸𑀦𑀺 𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀫𑀦𑀸𑀬𑀢𑀦𑀜𑁆𑀘 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀥𑀫𑁆𑀫𑀸𑀬𑀢𑀦𑀁 𑀦𑀸𑀦𑀸𑀥𑀫𑁆𑀫𑀲𑀫𑁄𑀲𑀭𑀡𑀁. 𑀢𑀢𑁆𑀣 𑀬𑁂 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀬𑁂 𑀅𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀧𑀭𑀺𑀬𑀸𑀬𑀢𑁄 𑀘 𑀑𑀢𑀸𑀭𑁂𑀢𑀩𑁆𑀩𑀸. 𑀬𑀣𑀸 𑀲𑀸 𑀥𑀫𑁆𑀫𑀥𑀸𑀢𑀼 𑀢𑀣𑀸 𑀥𑀫𑁆𑀫𑀸𑀬𑀢𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀸𑀬𑁂𑀯 𑀳𑀺 𑀥𑀫𑁆𑀫𑀥𑀸𑀢𑀼 𑀢𑀤𑁂𑀯 𑀥𑀫𑁆𑀫𑀸𑀬𑀢𑀦𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁.

𑀢𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀢𑁆𑀣𑀺 𑀢𑀺𑀯𑀺𑀥𑁄, 𑀅𑀢𑁆𑀣𑀺 𑀘𑀢𑀼𑀩𑁆𑀩𑀺𑀥𑁄, 𑀅𑀢𑁆𑀣𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀢𑀺𑀯𑀺𑀥𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀳𑁂𑀢𑀼𑀨𑀮𑀦𑀺𑀲𑁆𑀲𑀦𑁆𑀤𑁄. 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑀘 𑀅𑀬𑀁 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸 𑀘 𑀅𑀬𑀁 𑀧𑀘𑁆𑀘𑀬𑁄, 𑀬𑁄 𑀪𑀯𑁄 𑀅𑀬𑀁 𑀯𑀺𑀧𑀸𑀓𑁄, 𑀬𑀸 𑀚𑀸𑀢𑀺 𑀫𑀭𑀡𑀁 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄.

𑀓𑀣𑀁 𑀘𑀢𑀼𑀩𑁆𑀩𑀺𑀥𑁄 𑀳𑁂𑀢𑀼 𑀧𑀘𑁆𑀘𑀬𑁄 𑀯𑀺𑀧𑀸𑀓𑁄 𑀦𑀺𑀲𑁆𑀲𑀦𑁆𑀤𑁄 𑀘? 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸𑀲𑀗𑁆𑀔𑀸𑀭𑀸 𑀘 𑀉𑀧𑀸𑀤𑀸𑀦𑀁 𑀘 𑁋 𑀅𑀬𑀁 𑀳𑁂𑀢𑀼. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄. 𑀦𑀸𑀫𑀭𑀽𑀧𑀁 𑀉𑀧𑀧𑀚𑁆𑀚𑀢𑀺, 𑀢𑀣𑀸 𑀉𑀧𑀧𑀦𑁆𑀦𑀲𑁆𑀲 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸 𑀘 𑁋 𑀅𑀬𑀁 𑀧𑀘𑁆𑀘𑀬𑁄. 𑀬𑁄 𑀪𑀯𑁄 𑀅𑀬𑀁 𑀯𑀺𑀧𑀸𑀓𑁄. 𑀬𑀸 𑀚𑀸𑀢𑀺 𑀬𑀸 𑀘 𑀚𑀭𑀸𑀫𑀭𑀡𑀁 𑁋 𑀅𑀬𑀁 𑀦𑀺𑀲𑁆𑀲𑀦𑁆𑀤𑁄.

𑀓𑀣𑀁 𑀤𑀼𑀯𑀺𑀥𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄? 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑁋 𑀅𑀬𑀁 𑀲𑀫𑀼𑀤𑀬𑁄. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸 𑀪𑀯𑁄 𑀚𑀸𑀢𑀺 𑀫𑀭𑀡𑀜𑁆𑀘 𑁋 𑀇𑀤𑀁 𑀤𑀼𑀓𑁆𑀔𑀁. 𑀬𑀁 𑀧𑀦 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀇𑀫𑀸𑀦𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀢𑀲𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀬𑁂𑀦 𑀆𑀓𑀸𑀭𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀢𑁂𑀦 𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄.

𑀢𑀣𑀸 𑀩𑀸𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀤𑁆𑀯𑀸𑀤𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀬𑁂𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀇𑀤𑀁 𑀤𑀼𑀓𑁆𑀔𑀁. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀘 𑀤𑀺𑀝𑁆𑀞𑀺𑀬𑀸 𑀘 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀁. 𑀬𑀢𑁄 𑀧𑀼𑀭𑀺𑀲𑁄 𑀧𑀼𑀭𑀺𑀲𑀓𑀸𑀦𑀁 𑀢𑀁 𑀏𑀯𑀁 𑀓𑀸𑀢𑀩𑁆𑀩𑀢𑀸. 𑀅𑀣 𑀅𑀚𑁆𑀛𑀢𑁆𑀢𑀁 𑀲𑀸𑀭𑀚𑁆𑀚𑀢𑀺. 𑀅𑀬𑀁 𑀅𑀳𑀁𑀓𑀸𑀭𑁄 𑀢𑀁 𑀬𑀲𑀸 𑀲𑀸𑀭𑀢𑁆𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀬𑁂𑀲𑀢𑀺, 𑀅𑀬𑀁 𑀫𑀫𑀁𑀓𑀸𑀭𑁄 𑀏𑀯𑀁 𑀇𑀢𑁆𑀣𑀻, 𑀢𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀘 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀦𑀼𑀯𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀧𑀭𑀺𑀧𑀼𑀡𑁆𑀡𑀸 𑀮𑁄𑀪𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂 𑀧𑀯𑀟𑁆𑀠𑁂𑀦𑁆𑀢𑀺. 𑀢𑀲𑁆𑀲 𑀘𑁂 𑀅𑀬𑀫𑀥𑀺𑀧𑁆𑀧𑀸𑀬𑁄 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀘 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀘 𑀯𑀢𑁆𑀢𑀢𑀺. 𑀤𑁄𑀲𑁄 𑀘 𑀅𑀓𑀼𑀲𑀮𑀫𑀽𑀮𑀁 𑀧𑀯𑀟𑁆𑀠𑀢𑀺. 𑀲𑀘𑁂 𑀧𑀦 𑀉𑀧𑁂𑀓𑁆𑀔𑀸 𑀪𑀸𑀯𑁂𑀢𑀺 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀯𑀢𑁆𑀢𑀓𑀸𑀫𑀸 𑀪𑀯𑀢𑀺. 𑀅𑀫𑁄𑀳𑁄 𑀘 𑀓𑀼𑀲𑀮𑀫𑀽𑀮𑀁 𑀧𑀯𑀟𑁆𑀠𑀢𑀺. 𑀇𑀢𑀺 𑀲𑀢𑁆𑀢 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀺𑀮𑁂𑀲𑀯𑀢𑁆𑀣𑀼𑀫𑀼𑀧𑀸𑀤𑀸𑀬 𑀅𑀦𑀦𑁆𑀯𑁂𑀫𑀸𑀦𑀺 𑀅𑀯𑀫𑀸𑀦𑀺 𑀲𑀩𑁆𑀩𑀲𑁆𑀲 𑀯𑁂𑀤𑀦𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀬𑀸𑀯 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀁, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀤𑀲𑀦𑁆𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀁 𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀪𑀯𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀘 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀘 𑀲𑀢𑁆𑀢 𑀧𑀜𑁆𑀜𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀬𑁂𑀦 𑀬𑁂𑀦 𑀇𑀦𑁆𑀤𑁆𑀭𑀺𑀬𑁂𑀦 𑀬𑀼𑀢𑁆𑀢𑀁 𑀯𑀸 𑀕𑀸𑀣𑀸𑀬 𑀑𑀢𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑁂𑀦 𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀏𑀯𑀁 𑀔𑀦𑁆𑀥𑁂𑀲𑀼 𑀥𑀸𑀢𑀽𑀲𑀼 𑀆𑀬𑀢𑀦𑁂𑀲𑀼 𑀲𑀘𑁆𑀘𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑁫𑁪. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀬𑁄 𑀕𑀸𑀣𑀸 𑀏𑀓𑁂𑀦 𑀆𑀭𑀫𑁆𑀪𑁄 𑀪𑀸𑀲𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀏𑀓𑀺𑀲𑁆𑀲𑀸 𑀪𑀸𑀲𑀺𑀢𑀸𑀬 𑀅𑀯𑀲𑀺𑀝𑁆𑀞𑀸𑀲𑀼 𑀪𑀸𑀲𑀺𑀢𑀸𑀲𑀼 𑀲𑁄 𑀅𑀢𑁆𑀣𑁄 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀁? 𑀦 𑀳𑀺 𑀢𑀸𑀯 𑀲𑁄 𑀅𑀢𑁆𑀣𑁄 𑀪𑀸𑀲𑀺𑀢𑁄, 𑀲𑁄 𑀅𑀪𑀸𑀲𑀺𑀢𑁄 𑀦 𑀲𑀓𑁆𑀓𑀸 𑀦𑀺𑀤𑁆𑀤𑀺𑀲𑀺𑀢𑀼𑀁. 𑀬𑀣𑀸 𑀓𑀺𑀁 𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀦𑁆𑀢𑀺 𑀕𑀸𑀣𑀸 𑀅𑀬𑀫𑁂𑀓𑀸 𑀕𑀸𑀣𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀓𑀺𑀁 𑀓𑀸𑀭𑀡𑀁, 𑀅𑀢𑁆𑀣𑀺𑀓𑁆𑀔𑀸𑀢𑀸𑀯 𑀇𑀫𑀲𑁆𑀲 𑀆𑀭𑀫𑁆𑀪𑀲𑁆𑀲 𑀅𑀦𑀪𑀸𑀲𑀺𑀢𑀁?

𑀏𑀯𑀁 [𑀏𑀢𑀁 (𑀧𑀻.) 𑀧𑀲𑁆𑀲 𑀥. 𑀧. 𑁨𑁨] 𑀯𑀺𑀲𑁂𑀲𑀢𑁄 𑀜𑀢𑁆𑀯𑀸, 𑀅𑀧𑁆𑀧𑀫𑀸𑀤𑀫𑁆𑀳𑀺 𑀧𑀡𑁆𑀟𑀺𑀢𑀸;

𑀅𑀧𑁆𑀧𑀫𑀸𑀤𑁂 𑀧𑀫𑁄𑀤𑀦𑁆𑀢𑀺, 𑀅𑀭𑀺𑀬𑀸𑀦𑀁 𑀕𑁄𑀘𑀭𑁂 𑀭𑀢𑀸𑀢𑀺.

𑀇𑀤𑀁 𑀅𑀪𑀸𑀲𑀺𑀢𑀁. 𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀪𑀸𑀲𑀺𑀢𑀸𑀬 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀁, 𑀅𑀢𑁆𑀣𑀺 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁? 𑀢𑁂 𑀛𑀸𑀬𑀺𑀦𑁄 [𑀥. 𑀧. 𑁨𑁩] 𑀲𑀸𑀢𑀢𑀺𑀓𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀢𑀺 𑀕𑀸𑀣𑀸, 𑀏𑀯𑀁 𑀇𑀫𑀸 𑀕𑀸𑀣𑀸𑀬𑁄 𑀉𑀧𑀥𑀸𑀭𑀺𑀢𑀸 𑀬𑀤𑀸 𑀪𑀯𑀦𑁆𑀢𑀺, 𑀢𑀤𑀸 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀏𑀯𑀁 𑀅𑀲𑁆𑀲𑀼𑀢𑀧𑀼𑀩𑁆𑀩𑁂𑀲𑀼 𑀲𑀼𑀢𑁆𑀢𑁂𑀲𑀼 𑀩𑁆𑀬𑀸𑀓𑀭𑀡𑁂𑀲𑀼 𑀯𑀸 𑀏𑀓𑀼𑀤𑁆𑀤𑁂𑀲𑁄 𑀪𑀸𑀲𑀺𑀢𑁄. 𑀬𑀸 𑀯𑀻𑀫𑀁𑀲𑀸 𑀢𑀼𑀮𑀦𑀸 𑀇𑀤𑀁 𑀅𑀢𑁆𑀣𑀺 𑀓𑀺𑀘𑁆𑀘𑀁, 𑀇𑀤𑀁 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁 𑀢𑀲𑁆𑀲 𑀯𑁂𑀯𑀘𑀦𑀁 𑀦𑀺𑀤𑁆𑀤𑀺𑀝𑁆𑀞𑀁 𑀯𑀸 𑀦 𑀯𑀸𑀢𑀺. 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸, 𑀅𑀬𑀁 𑀯𑀼𑀘𑁆𑀘𑀢𑁂 𑀲𑁄𑀥𑀦𑁄 𑀳𑀸𑀭𑁄.

𑁫𑁫. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄? 𑀏𑀓𑀢𑁆𑀢𑀢𑀸 𑀘 𑀯𑁂𑀫𑀢𑁆𑀢𑀢𑀸 𑀘. 𑀢𑀢𑁆𑀣 𑀓𑀺𑀢𑀧𑀜𑁆𑀜𑀢𑁆𑀢𑀺 𑀘 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀘. 𑀲𑀸 𑀏𑀓𑀢𑁆𑀢𑀢𑀸 𑀘 𑀯𑁂𑀫𑀢𑁆𑀢𑀢𑀸 𑀘 𑀬𑀣𑀸 𑀧𑀜𑁆𑀜𑀢𑁆𑀢𑀺 𑀏𑀓𑀯𑁂𑀯𑀘𑀦𑁂𑀦 𑀯𑁂𑀫𑀢𑁆𑀢𑀢𑀸 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀲𑀸 𑀘 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀺. 𑀬𑀁 𑀅𑀦𑁄𑀫𑀢𑁆𑀢𑀺𑀬𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀢𑀁 𑀅𑀦𑁄𑀫𑀢𑁆𑀢𑀺𑀬𑀝𑁆𑀞𑁂𑀦 𑀧𑀜𑁆𑀜𑀸𑀩𑀮𑀁. 𑀢𑀦𑀼𑀪𑀽𑀢𑀸 𑀕𑁄𑀘𑀭𑀢𑁆𑀢𑀯𑀲𑀸 𑀲𑁂𑀯𑀲𑀢𑀺 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀅𑀯𑀺𑀧𑀭𑀻𑀢𑀸𑀦𑀼𑀲𑁆𑀲𑀭𑀡𑀢𑀸𑀬. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀸𑀦𑀁 𑀧𑀯𑀺𑀘𑀬𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀅𑀪𑀺𑀦𑀻𑀳𑀸𑀭𑀢𑁄 𑀅𑀪𑀺𑀜𑁆𑀜𑀸𑀢𑀺. 𑀲𑀗𑁆𑀔𑁂𑀧𑁂𑀦 𑀫𑀕𑁆𑀕𑀸 𑀓𑀸 𑀯𑀢𑁆𑀣𑀼 𑀅𑀯𑀺𑀓𑁄𑀧𑀦𑀢𑀸𑀬 𑀏𑀓𑀢𑁆𑀢𑀸, 𑀬𑀣𑀸 𑀉𑀡𑁆𑀳𑁂𑀦 𑀲𑀁𑀲𑀝𑁆𑀞𑀁 𑀉𑀡𑁆𑀳𑁄𑀤𑀓𑀁, 𑀲𑀻𑀢𑁂𑀦 𑀲𑀁𑀲𑀝𑁆𑀞𑀁 𑀲𑀻𑀢𑁄𑀤𑀓𑀁 𑀔𑀸𑀭𑁄𑀤𑀓𑀁 𑀕𑀼𑀴𑁆𑀳𑁄𑀤𑀓𑀦𑁆𑀢𑀺, 𑀇𑀤𑀁 𑀏𑀓𑀢𑁆𑀢𑀢𑀸 𑀯𑁂𑀫𑀢𑁆𑀢𑀢𑀸 𑀘.

𑀅𑀢𑁆𑀣𑀺 𑀧𑀼𑀦 𑀥𑀫𑁆𑀫𑁄 𑀦𑀸𑀦𑀸𑀥𑀫𑁆𑀫𑀲𑀗𑁆𑀖𑀢𑁄 𑀏𑀓𑀢𑁄 𑀬𑀣𑀸𑀭𑀽𑀧𑀁 𑀘𑀢𑁆𑀢𑀸𑀭𑁄 𑀯𑀸𑀭𑁂𑀢𑀩𑁆𑀩𑀸, 𑀢𑀜𑁆𑀘 𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀢𑀸. 𑀧𑀣𑀯𑀻𑀥𑀸𑀢𑀼 𑀆𑀧𑁄 𑀢𑁂𑀚𑁄 𑀯𑀸𑀬𑁄𑀥𑀸𑀢𑀽𑀢𑀺 𑀯𑁂𑀫𑀢𑁆𑀢𑀢𑀸. 𑀏𑀯𑀁 𑀲𑀩𑁆𑀩𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀢𑀸, 𑀧𑀣𑀯𑀻𑀥𑀸𑀢𑀼 𑀆𑀧𑁄 𑀢𑁂𑀚𑁄 𑀯𑀸𑀬𑁄𑀥𑀸𑀢𑀽𑀢𑀺 𑀯𑁂𑀫𑀢𑁆𑀢𑀢𑀸. 𑀧𑀣𑀯𑀻𑀥𑀸𑀢𑀽𑀢𑀺 𑀮𑀓𑁆𑀔𑀡𑀢𑁄 𑀏𑀓𑀢𑁆𑀢𑀢𑀸, 𑀲𑀁𑀓𑀺𑀡𑁆𑀡𑀯𑀢𑁆𑀣𑀼𑀢𑁄 𑀯𑁂𑀫𑀢𑁆𑀢𑀢𑀸. 𑀬𑀁 𑀓𑀺𑀜𑁆𑀘𑀺 𑀓𑀓𑁆𑀔𑀴𑀮𑀓𑁆𑀔𑀡𑀁, 𑀲𑀩𑁆𑀩𑀁 𑀢𑀁 𑀧𑀣𑀯𑀻𑀥𑀸𑀢𑀽𑀢𑀺 𑀏𑀓𑀢𑁆𑀢𑀢𑀸. 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀙𑀯𑀺 𑀘𑀫𑁆𑀫𑀦𑁆𑀢𑀺 𑀯𑁂𑀫𑀢𑁆𑀢𑀢𑀸. 𑀏𑀯𑀁 𑀲𑀩𑁆𑀩𑀁 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀭𑀽𑀧𑀦𑁆𑀢𑀺 𑀏𑀓𑀢𑁆𑀢𑀁. 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸𑀢𑀺 𑀯𑁂𑀫𑀢𑁆𑀢𑀢𑀸.

𑀅𑀢𑁆𑀣𑀺 𑀧𑀼𑀦 𑀥𑀫𑁆𑀫𑁄 𑀯𑁂𑀫𑀢𑁆𑀢𑀢𑀸 𑀅𑀜𑁆𑀜𑁄 𑀦𑀸𑀫𑀁 𑀮𑀪𑀢𑀺. 𑀬𑀣𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀦𑀯𑀲𑀜𑁆𑀜𑀸 𑀯𑀺𑀦𑀻𑀮𑀓𑀲𑀜𑁆𑀜𑀸 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸, 𑀅𑀬𑀁 𑀅𑀲𑀼𑀪𑀲𑀜𑁆𑀜𑀸, 𑀬𑀸 𑀏𑀓𑀢𑁆𑀢𑀢𑀸 𑀆𑀭𑀫𑁆𑀫𑀡𑀢𑁄 𑀯𑁂𑀫𑀢𑁆𑀢𑀢𑁄, 𑀲𑀸 𑀏𑀯𑀁 𑀲𑀜𑁆𑀜𑀸𑀯𑁂𑀤𑀦𑀸𑀲𑀼 𑀆𑀤𑀻𑀦𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀢𑀣𑀸𑀥𑀺𑀝𑁆𑀞𑀸𑀦𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀘 𑀲𑀸𑀬𑁂𑀯 𑀥𑀫𑁆𑀫𑁂𑀲𑀼 𑀢𑀢𑁆𑀣 𑀲𑀜𑁆𑀜𑀸𑀪𑀸𑀯𑀦𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀘 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑁂 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀘 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸. (𑀇𑀢𑀺) [( ) 𑀦𑀢𑁆𑀣𑀺 𑀧𑀻. 𑀧𑁄𑀢𑁆𑀣𑀓𑁂] 𑀬𑁄 𑀓𑁄𑀘𑀺 𑀜𑀸𑀡𑀧𑀘𑀸𑀭𑁄 𑀲𑀩𑁆𑀩𑀲𑁄 𑀧𑀜𑁆𑀜𑀸𑀬 𑀕𑁄𑀘𑀭𑁄 𑀧𑀜𑁆𑀜𑀸, 𑀅𑀬𑀁 𑀯𑁂𑀫𑀢𑁆𑀢𑀢𑀸, 𑀬𑀣𑀸 𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄 𑀤𑀺𑀝𑁆𑀞𑀺𑀭𑀸𑀕𑁄𑀢𑀺 𑀯𑁂𑀫𑀢𑁆𑀢𑀢𑀸 𑀢𑀡𑁆𑀳𑀸𑀬. 𑀇𑀢𑀺 𑀬𑀁 𑀏𑀓𑀢𑁆𑀢𑀢𑀸𑀬 𑀘 𑀯𑁂𑀫𑀢𑁆𑀢𑀢𑀸𑀬 𑀘 𑀜𑀸𑀡𑀁 𑀯𑀻𑀫𑀁𑀲𑀦𑀸 𑀢𑀼𑀮𑀦𑀸. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑁫𑁬. 𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄? 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑀁 𑀯𑁄𑀤𑀸𑀦𑀜𑁆𑀘 𑀲𑀁𑀓𑀺𑀮𑁂𑀲𑁄 𑀘, 𑀬𑀁 𑀢𑀤𑀼𑀪𑀬𑀁 𑀧𑀭𑀺𑀬𑁂𑀝𑁆𑀞𑀺, 𑀲 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄. 𑀇𑀢𑀺 𑀥𑀫𑁆𑀫𑀸𑀦𑀁 𑀲𑀳𑁂𑀢𑀼𑀓𑀸𑀦𑀁 𑀳𑁂𑀢𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀲𑀧𑁆𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄.

𑀢𑀢𑁆𑀣 𑀓𑀺𑀁 𑀦𑀸𑀦𑀸𑀓𑀭𑀡𑀁, 𑀳𑁂𑀢𑀼𑀲𑁆𑀲 𑀘 𑀧𑀘𑁆𑀘𑀬𑀲𑁆𑀲 𑀘? 𑀲𑀪𑀸𑀯𑁄 𑀳𑁂𑀢𑀼, 𑀧𑀭𑀪𑀸𑀯𑁄 𑀧𑀘𑁆𑀘𑀬𑁄. 𑀧𑀭𑀪𑀸𑀯𑀲𑁆𑀲 𑀧𑀘𑁆𑀘𑀬𑁄 𑀳𑁂𑀢𑀼𑀧𑀺, 𑀲𑀪𑀸𑀯𑀲𑁆𑀲 𑀳𑁂𑀢𑀼𑀬𑀸 𑀧𑀭𑀪𑀸𑀯𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑁄 𑀅𑀯𑀼𑀢𑁆𑀢𑁄 𑀳𑁂𑀢𑀼, 𑀯𑀼𑀢𑁆𑀢𑁄 𑀧𑀘𑁆𑀘𑀬𑁄. 𑀅𑀚𑁆𑀛𑀢𑁆𑀢𑀺𑀓𑁄 𑀳𑁂𑀢𑀼, 𑀩𑀸𑀳𑀺𑀭𑁄 𑀧𑀘𑁆𑀘𑀬𑁄. 𑀲𑀪𑀸𑀯𑁄 𑀳𑁂𑀢𑀼, 𑀧𑀭𑀪𑀸𑀯𑁄 𑀧𑀘𑁆𑀘𑀬𑁄. 𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀧𑀝𑀺𑀕𑁆𑀕𑀸𑀳𑀓𑁄 [𑀧𑀭𑀺𑀕𑁆𑀕𑀸𑀳𑀓𑁄 (𑀓.)] 𑀧𑀘𑁆𑀘𑀬𑁄. 𑀦𑁂𑀯𑀸𑀲𑀺𑀓𑁄 𑀳𑁂𑀢𑀼, 𑀆𑀕𑀦𑁆𑀢𑀼𑀓𑁄 𑀧𑀘𑁆𑀘𑀬𑁄. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄. 𑀏𑀓𑁄𑀬𑁂𑀯 𑀳𑁂𑀢𑀼, 𑀅𑀧𑀭𑀸𑀧𑀭𑁄 𑀧𑀘𑁆𑀘𑀬𑁄.

𑀳𑁂𑀢𑀼𑀲𑁆𑀲 𑀉𑀧𑀓𑀭𑀡𑀁 𑀲𑀫𑀼𑀤𑀸𑀦𑁂𑀢𑀩𑁆𑀩𑁄. 𑀲𑀫𑀼𑀤𑀸𑀦𑀁 𑀳𑁂𑀢𑀼, 𑀢𑀢𑁆𑀣 𑀤𑀼𑀯𑀺𑀥𑁄 𑀳𑁂𑀢𑀼. 𑀤𑀼𑀯𑀺𑀥𑁄 𑀧𑀘𑁆𑀘𑀬𑁄 𑁋 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀘 𑀧𑀭𑀫𑁆𑀧𑀭𑀧𑀘𑁆𑀘𑀬𑁄 𑀘. 𑀳𑁂𑀢𑀼𑀧𑀺 𑀤𑀼𑀯𑀺𑀥𑁄 𑁋 𑀲𑀫𑀦𑀦𑁆𑀢𑀭𑀳𑁂𑀢𑀼 𑀘 𑀧𑀭𑀫𑁆𑀧𑀭𑀳𑁂𑀢𑀼 𑀘. 𑀢𑀢𑁆𑀣 𑀓𑀢𑀫𑁄 𑀧𑀭𑀫𑁆𑀧𑀭𑀧𑀘𑁆𑀘𑀬𑁄? 𑀅𑀯𑀺𑀚𑁆𑀚𑀸 𑀦𑀸𑀫𑀭𑀽𑀧𑀲𑁆𑀲 𑀧𑀭𑀫𑁆𑀧𑀭𑀧𑀘𑁆𑀘𑀬𑁄, 𑀯𑀺𑀜𑁆𑀜𑀸𑀡𑀁 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀬𑀤𑀺 𑀆𑀤𑀺𑀫𑁆𑀳𑀺 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀪𑀯𑀢𑀺 𑀦𑀸𑀫𑀭𑀽𑀧𑀲𑁆𑀲 𑀦𑀺𑀭𑁄𑀥𑁄𑀧𑀺. 𑀢𑀢𑁆𑀣 𑀲𑀫𑀦𑀦𑁆𑀢𑀭𑀁 𑀓𑀺𑀁 𑀓𑀸𑀭𑀡𑀁 𑀧𑀭𑀫𑁆𑀧𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀼𑀤𑁆𑀤𑀸𑀦𑀺𑀢𑁄, 𑀅𑀬𑀁 𑀧𑀘𑁆𑀘𑀬𑀢𑁄. 𑀢𑀢𑁆𑀣 𑀓𑀢𑀫𑁄 𑀧𑀭𑀫𑁆𑀧𑀭𑀳𑁂𑀢𑀼? 𑀯𑀺𑀚𑀸𑀦𑀦𑁆𑀢𑀲𑁆𑀲 𑀧𑀭𑀫𑁆𑀧𑀭𑀳𑁂𑀢𑀼𑀢𑀸𑀬 𑀳𑁂𑀢𑀼, 𑀅𑀜𑁆𑀜𑀸𑀓𑀸𑀭𑁄 𑀲𑀫𑀦𑀦𑁆𑀢𑀭𑀳𑁂𑀢𑀼𑀢𑀸𑀬 𑀳𑁂𑀢𑀼. 𑀬𑀲𑁆𑀲 𑀳𑀺 𑀬𑀁 𑀲𑀫𑀦𑀦𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀲𑁄 𑀢𑀲𑁆𑀲 𑀳𑁂𑀢𑀼𑀧𑀺 𑀚𑀸𑀢𑀺𑀦𑀺𑀭𑁄𑀥𑀸 𑀩𑀳𑀺 𑀆𑀓𑀸𑀭𑀦𑀺𑀭𑁄𑀥𑁄, 𑀆𑀓𑀸𑀭𑀦𑀺𑀭𑁄𑀥𑀸 𑀤𑀡𑁆𑀟𑀦𑀺𑀭𑁄𑀥𑁄, 𑀤𑀡𑁆𑀟𑀦𑀺𑀭𑁄𑀥𑀸 𑀔𑀡𑁆𑀟𑀦𑀺𑀭𑁄𑀥𑁄. 𑀏𑀯𑀁 𑀳𑁂𑀢𑀼𑀧𑀺 𑀤𑁆𑀯𑀺𑀥𑀸 𑀲𑁄 𑀢𑀸𑀳𑀺 𑀧𑀲𑁆𑀲𑀺𑀢𑀩𑁆𑀩𑁄.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀬𑀣𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄 𑀢𑀲𑁆𑀲 𑀧𑀼𑀦 𑀓𑀺𑀁𑀧𑀘𑁆𑀘𑀬𑁄, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄. 𑀲𑁄 𑀓𑀲𑁆𑀲 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀸𑀦𑀁, 𑀇𑀢𑀺 𑀧𑀘𑁆𑀘𑀬𑁄 𑀘 𑀲𑀫𑀼𑀧𑁆𑀧𑀦𑁆𑀦𑀁 𑀘 𑀢𑀲𑁆𑀲 𑀓𑁄 𑀳𑁂𑀢𑀼 𑀅𑀯𑀺𑀚𑁆𑀚𑀸𑀬𑁂𑀯. 𑀢𑀣𑀸 𑀳𑀺 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀳𑁂𑀢𑀼 𑀧𑀼𑀭𑀺𑀫𑀸 𑀳𑁂𑀢𑀼 𑀧𑀘𑁆𑀙𑀸 𑀧𑀘𑁆𑀘𑀬𑁄, 𑀲𑀸𑀧𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀅𑀪𑀺𑀲𑀦𑁆𑀤𑀦𑀧𑀘𑁆𑀘𑀬𑀢𑀸𑀬 𑀧𑀢𑀺𑀝𑁆𑀞𑀸𑀦𑀧𑀘𑁆𑀘𑀬𑀢𑀸𑀬.

𑁫𑁭. 𑀓𑀣𑀁 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀬 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄? 𑀬𑀁 𑀘𑀺𑀢𑁆𑀢𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀁, 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀩𑁆𑀩𑀁 𑀧𑀜𑁆𑀜𑀸𑀬 𑀕𑁄𑀘𑀭𑀁 𑀳𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀸 𑀢𑀺𑀧𑀘𑁆𑀘𑀬𑀝𑁆𑀞𑀺𑀓𑀸 𑀅𑀤𑁆𑀥𑀸𑀪𑀽𑀫𑀺𑀓𑀸𑀭𑀫𑀳𑀢𑁆𑀢𑀲𑁆𑀲 [𑀮𑀤𑁆𑀥𑀸 𑀪𑀽𑀫𑀺𑀓𑀭𑀫𑀳𑀢𑁆𑀢𑀲𑁆𑀲 (𑀧𑀻. 𑀓.)] 𑀅𑀬𑀁 𑀅𑀯𑀺𑀚𑁆𑀚𑀸𑀲𑀳𑀲𑀫𑀼𑀧𑁆𑀧𑀦𑁆𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀫𑀸𑀧𑀚𑁆𑀚𑀦𑁆𑀢𑀻 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀜𑁆𑀜𑀸 𑀧𑀳𑀻𑀬𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀲𑀁𑀬𑁄𑀚𑀦𑀁 𑀉𑀧𑀸𑀤𑀸𑀦𑀁. 𑀢𑀢𑁆𑀣 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀚𑀸𑀢𑀺 𑀧𑀭𑀺𑀬𑀼𑀝𑁆𑀞𑀺𑀢𑀸 𑀲𑀁𑀬𑀼𑀚𑁆𑀚𑀢𑀺 𑀲𑀁𑀬𑀼𑀢𑁆𑀢𑀸 𑀉𑀧𑀸𑀤𑀺𑀬𑀢𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄. 𑀏𑀯𑀁 𑀢𑁂 𑀲𑀗𑁆𑀔𑀸𑀭𑀸 𑀢𑀺𑀯𑀺𑀥𑀸 𑀉𑀧𑁆𑀧𑀦𑁆𑀦𑀸 𑀪𑀽𑀫𑀺𑀕𑀢𑀸 𑀦𑀸𑀲𑀜𑁆𑀜𑀢𑁆𑀣 𑀅𑀬𑀁 𑀫𑀕𑁆𑀕𑁂𑀦 𑀯𑀺𑀦𑀻𑀢𑀢𑁆𑀢𑀸𑀬𑀸𑀢𑀺 [𑀯𑀺𑀦𑀺𑀪𑀢𑁆𑀢𑀸𑀬 (𑀧𑀻.), 𑀯𑀺𑀦𑀺𑀪𑀢𑁆𑀢𑀢𑀸𑀬 (𑀓.)] 𑀢𑁂 𑀣𑀸𑀫𑀕𑀢𑀸 𑀅𑀧𑀢𑀺𑀯𑀺𑀦𑀻𑀢𑀸𑀢𑀺𑀧𑀺 𑀢𑁂 𑀲𑀗𑁆𑀔𑀸𑀭𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀝𑁆𑀞𑁂𑀦 𑀅𑀢𑁆𑀣𑀺 𑀫𑁂𑀯 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀦𑀺𑀤𑁆𑀤𑀺𑀝𑁆𑀞𑀁 𑀅𑀧𑀦𑁂𑀢𑁆𑀯𑀸 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀓𑀼𑀲𑀮𑁄 𑀘 𑀅𑀓𑀼𑀲𑀮𑁄 𑀘 𑀧𑀓𑁆𑀔𑀺𑀧𑀺𑀢𑀩𑁆𑀩𑁄, 𑀯𑀺𑀧𑀸𑀓𑀥𑀫𑁆𑀫𑀸 𑀅𑀧𑀦𑁂𑀢𑁆𑀯𑀸 𑀯𑀘𑀦𑀻𑀬𑀁 𑀅𑀯𑀘𑀦𑀻𑀬𑀁 𑀯𑀘𑀦𑀻𑀬𑀜𑁆𑀘 𑀅𑀯𑀘𑀦𑀻𑀬𑀜𑁆𑀘 𑀧𑀓𑁆𑀔𑀺𑀧𑀺𑀢𑀩𑁆𑀩𑀁, 𑀪𑀯𑀅𑀧𑁂𑀯𑀺𑀭𑀺𑀢𑁆𑀢𑀸, 𑀲𑀩𑁆𑀩𑀲𑀼𑀢𑁆𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

𑀤𑀲 𑀢𑀣𑀸𑀕𑀢𑀩𑀮𑀸𑀦𑀺 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀸𑀦𑀺 𑀧𑀼𑀜𑁆𑀜𑀸𑀦𑀺 𑀅𑀦𑀜𑁆𑀜𑀸𑀓𑀢𑀁 𑀅𑀯𑀺𑀚𑁆𑀚𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀲𑀫𑀼𑀧𑁆𑀧𑀦𑁆𑀦𑀸 𑀅𑀯𑀺𑀚𑁆𑀚𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀦𑀦𑁆𑀢𑀭𑀘𑀺𑀢𑁆𑀢𑀁 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺, 𑀢𑀲𑁆𑀲 𑀬𑀁 𑀲𑀫𑀦𑀦𑁆𑀢𑀭𑀘𑀺𑀢𑁆𑀢𑀁 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺, 𑀢𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀫𑀘𑀺𑀢𑁆𑀢𑀁 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄, 𑀢𑁂𑀦 𑀅𑀯𑀺𑀚𑁆𑀚𑀸 𑀳𑁂𑀢𑀼 𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑀸𑀤𑀸𑀦𑀁 𑀅𑀦𑁄𑀓𑀸𑀲𑀓𑀢𑀸 𑀜𑀸𑀡𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸 𑀢𑀲𑁆𑀲 𑀅𑀧𑁆𑀧𑀫𑀸𑀤𑀸 𑀥𑀸𑀢𑀼 𑀅𑀪𑀺𑀚𑁆𑀛𑀸𑀪𑀺𑀲𑀦𑁆𑀤𑀺𑀢𑀸 𑀢𑀳𑀺𑀁 𑀯𑀺𑀧𑀮𑁆𑀮𑀸𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺, 𑀢𑀢𑁆𑀣 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀭𑀢𑁆𑀢𑀸 𑀤𑀼𑀝𑁆𑀞𑀸 𑀫𑀽𑀮𑀲𑁆𑀲 𑀘𑁂𑀢𑀦𑀸 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀬𑀁 𑀯𑀺𑀧𑀭𑀻𑀢𑀘𑀺𑀢𑁆𑀢𑁄 𑀯𑀺𑀚𑀸𑀦𑀸𑀢𑀺 𑀅𑀬𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀬𑀸 𑀯𑀺𑀧𑀭𑀻𑀢𑀲𑀜𑁆𑀜𑀸 𑀉𑀧𑀕𑁆𑀕𑀡𑁆𑀳𑀸𑀢𑀺 𑀅𑀬𑀁 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀬𑀁 𑀯𑀺𑀧𑀭𑀻𑀢𑀤𑀺𑀝𑁆𑀞𑀺 𑀅𑀪𑀺𑀦𑀺𑀯𑀺𑀲𑀢𑀺 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄. 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀯𑀟𑁆𑀠𑀦𑁆𑀢𑀺, 𑀢𑀻𑀡𑀺 𑀅𑀓𑀼𑀲𑀮𑀸𑀦𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀉𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀜𑁆𑀘 𑀯𑀺𑀚𑁆𑀚𑀜𑁆𑀘 𑀓𑀭𑁄𑀦𑁆𑀢𑀺. 𑀇𑀢𑀺 𑀧𑀼𑀩𑁆𑀩𑀸𑀧𑀭𑀦𑁆𑀢𑁂 𑀅𑀓𑀼𑀲𑀮𑀸𑀦𑀸𑀢𑀭𑀺𑀢𑀭𑁄 𑀲𑀗𑁆𑀔𑀸𑀭𑀸 𑀯𑀼𑀤𑁆𑀥𑀺𑀁 𑀯𑁂𑀧𑀼𑀮𑁆𑀮𑀢𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀘 𑀫𑀳𑀢𑀸 𑀘 𑀅𑀧𑁆𑀧𑀝𑀺𑀯𑀺𑀤𑀺𑀢𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀓.)] 𑀲𑀗𑁆𑀔𑀸𑀭𑀸 𑀪𑀯𑀦𑁆𑀢𑀺. 𑀇𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸 𑀲𑀳𑀚𑀸𑀢𑀧𑀘𑁆𑀘𑀬𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀘.

𑁫𑁮. 𑀓𑀣𑀁 𑀅𑀪𑀺𑀲𑀦𑁆𑀤𑀦𑀸𑀓𑀸𑀭𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄? 𑀲𑀸 𑀅𑀯𑀺𑀚𑁆𑀚𑀸 𑀢𑁂 𑀲𑀗𑁆𑀔𑀸𑀭𑁂 𑀅𑀪𑀺𑀲𑀦𑁆𑀦𑁂𑀢𑀺 𑀧𑀭𑀺𑀧𑁆𑀨𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀢𑀁 𑀉𑀤𑀓𑁂 𑀯𑀟𑁆𑀠𑀁 𑀅𑀲𑁆𑀲, 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀪𑀺𑀲𑀦𑁆𑀦𑀁 𑀧𑀭𑀺𑀲𑀦𑁆𑀤𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀆𑀧𑀚𑁆𑀚𑀢𑀺. 𑀏𑀯𑀁 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄.

𑀓𑀣𑀁 𑀧𑀢𑀺𑀝𑁆𑀞𑀳𑀦𑀝𑁆𑀞𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄? 𑀢𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬𑀁 𑀦𑀺𑀲𑁆𑀲𑀸𑀬 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀁 𑀧𑀢𑀺𑀝𑁆𑀞𑀸𑀬 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀆𑀧𑀚𑁆𑀚𑀢𑀺. 𑀏𑀢𑁂 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬𑀁 𑀧𑀢𑀺𑀝𑁆𑀞𑀺𑀢𑀸 𑀅𑀯𑀺𑀚𑁆𑀚𑀸𑀬𑀁 𑀦𑀺𑀲𑁆𑀲𑀸𑀬 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀢𑀺𑀝𑁆𑀞𑀳𑀦𑀝𑁆𑀞𑁂𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄.

𑀧𑀼𑀦 𑀭𑀸𑀕𑀲𑀳𑀕𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀧𑀝𑀺𑀲𑀦𑁆𑀥𑀺𑀫𑁆𑀳𑀺 𑀪𑀯𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀓𑀫𑁆𑀫𑀲𑁆𑀲 [𑀓𑀸𑀫𑀲𑁆𑀲 (𑀧𑀻.)] 𑀲𑀩𑁆𑀩𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀜𑁆𑀜𑀸𑀡𑀯𑀲𑁂𑀦 𑀧𑁄𑀦𑁄𑀪𑀯𑀺𑀓𑀸 𑀲𑀗𑁆𑀔𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀅𑀢𑁆𑀣𑀺. 𑀧𑀼𑀦 𑀧𑀜𑁆𑀘𑀲𑀼 𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀕𑁆𑀕𑀮𑀸, 𑀬𑁂 𑀘 𑀅𑀲𑀜𑁆𑀜𑀺𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀸, 𑀬𑁂 𑀘 𑀪𑀯𑀕𑀢𑀸, 𑀬𑁂 𑀘 𑀅𑀦𑁆𑀢𑁄𑀕𑀢𑀸𑀬𑁂𑀯 𑀲𑀁𑀲𑁂𑀤𑀚𑀸, 𑀬𑁂 𑀘 𑀯𑀸 𑀧𑀦 𑀅𑀜𑁆𑀜𑁄 𑀳𑀺 𑀓𑁄𑀘𑀺 𑀅𑀦𑀸𑀕𑀸𑀫𑀺𑀪𑀽𑀢𑀸 𑀦 𑀘𑁂𑀢𑁂𑀦𑁆𑀢𑀺 𑀦 𑀘 𑀧𑀢𑁆𑀣𑁂𑀦𑁆𑀢𑀺, 𑀢𑁂𑀲𑀁 𑀓𑀺𑀁 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀧𑀼𑀦 𑀭𑀸𑀕𑀸 𑀅𑀢𑁆𑀣𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀺 𑀉𑀧𑀸𑀤𑀸𑀦𑀸𑀦𑀺 𑀘𑀺𑀢𑁆𑀢𑀫𑀦𑀼𑀲𑁆𑀲𑀭𑀦𑁆𑀢𑀺𑀬𑁂𑀯 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑀫𑀽𑀳𑀢𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀧𑀘𑁆𑀘𑀬𑀸 𑀢𑁂𑀲𑀁 𑀧𑀼𑀦 𑀘 𑀕𑀢𑁄 𑀪𑀯𑀢𑀺. 𑀏𑀯𑀫𑁆𑀧𑀺 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀧𑀼𑀦 𑀲𑀸 𑀢𑁂 𑀦 𑀉𑀧𑀸𑀤𑀸𑀦𑀸 𑀦𑀧𑀺 𑀲𑀗𑁆𑀔𑀸𑀭𑀸 𑀅𑀢𑁆𑀣𑀺, 𑀧𑀼𑀦 𑀢𑁂𑀲𑀁 𑀲𑀢𑁆𑀢 𑀅𑀦𑀼𑀲𑀬𑀸 𑀅𑀲𑀫𑀽𑀳𑀢𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀢𑀤𑀸𑀭𑀫𑁆𑀫𑀡𑀁 𑀪𑀯𑀢𑀺. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸𑀬 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀏𑀯𑀫𑁆𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀧𑀼𑀦 𑀲𑀸 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀆𑀘𑀬𑀕𑀸𑀫𑀺 𑀲𑀩𑁆𑀩𑀁 𑀢𑀁 𑀅𑀯𑀺𑀚𑁆𑀚𑀸𑀯𑀲𑁂𑀦 𑀅𑀪𑀺𑀲𑀗𑁆𑀔𑀭𑀺𑀬𑀢𑀺 𑀢𑀡𑁆𑀳𑀸𑀯𑀲𑁂𑀦 𑀘 𑀅𑀮𑁆𑀮𑀻𑀬𑀢𑀺 𑀅𑀜𑁆𑀜𑀸𑀡𑀯𑀲𑁂𑀦 𑀘 𑀢𑀢𑁆𑀣 𑀆𑀤𑀻𑀦𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀢𑀤𑁂𑀯 𑀯𑀺𑀜𑁆𑀜𑀸𑀡𑀩𑀻𑀚𑀁 𑀪𑀯𑀢𑀺, 𑀲𑀸𑀬𑁂𑀯 𑀢𑀡𑁆𑀳𑀸𑀲𑀺𑀦𑁂𑀳𑁄 𑀪𑀯𑀢𑀺. 𑀲𑀸𑀬𑁂𑀯 𑀅𑀯𑀺𑀚𑁆𑀚𑀸 𑀲𑀫𑁆𑀫𑁄𑀳𑁄𑀢𑀺. 𑀏𑀯𑀫𑁆𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀯𑀢𑁆𑀢𑀩𑁆𑀩𑀸. 𑀇𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄.

𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀳𑁂𑀢𑀼 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀪𑀺𑀘𑁆𑀙𑁂𑀤𑁄 𑀅𑀬𑀁 𑀢𑀢𑁆𑀣 𑀢𑀢𑀺𑀬𑀁 𑀩𑀮𑀁 [𑀨𑀮𑀁 (𑀧𑀻.)] 𑀦𑀺𑀯𑀢𑁆𑀢𑀺, 𑀅𑀬𑀁 𑀧𑀝𑀺𑀲𑀦𑁆𑀥𑀺. 𑀢𑀢𑁆𑀣 𑀧𑀼𑀦𑀩𑁆𑀪𑀯𑁄 𑀬𑁄 𑀅𑀯𑁂𑀘𑁆𑀙𑁂𑀤𑁄 𑀅𑀲𑀫𑀼𑀕𑁆𑀖𑀸𑀢𑀦𑀝𑁆𑀞𑁂𑀦 𑀅𑀬𑀁 𑀅𑀦𑀼𑀲𑀬𑁄. 𑀬𑀣𑀸 𑀧𑀝𑀸𑀓𑀁 𑀯𑀸 𑀲𑀸𑀝𑀓𑀁 𑀯𑀸 𑀤𑁆𑀯𑁂 𑀚𑀦𑀸 𑀧𑀻𑀴𑁂𑀲𑀼 𑀘 𑀏𑀓𑀸 𑀯𑀸 𑀩𑀮𑀁 𑀯𑀸 𑀅𑀲𑁆𑀲 𑀦𑀺𑀯𑀸𑀝𑀲𑁆𑀲𑁂𑀲𑀼, 𑀦 𑀧𑀦 𑀧𑀻𑀴𑁂𑀲𑀼 𑀲𑁄𑀲𑁂𑀬𑁆𑀬. 𑀢𑀢𑁆𑀣 𑀬𑀁 𑀲𑀺𑀦𑁂𑀳𑀸 𑀆𑀧𑁄𑀥𑀸𑀢𑀼 𑀅𑀦𑀼𑀧𑀼𑀮𑁆𑀮𑀦𑀸 𑀲𑁄𑀲𑁂𑀢𑀩𑁆𑀩𑀸. 𑀉𑀡𑁆𑀳𑀥𑀸𑀢𑀼𑀫𑀸𑀕𑀫𑁆𑀫 𑀲𑀘𑁂 𑀧𑀼𑀦 𑀢𑀁 𑀆𑀓𑀸𑀲𑁂 𑀦𑀺𑀓𑁆𑀔𑀺𑀧𑁂𑀬𑁆𑀬 𑀢𑀁 𑀉𑀲𑁆𑀲𑀸𑀯𑁂𑀦 𑀬𑁂𑀪𑀼𑀬𑁆𑀬𑀢𑀭𑀁 𑀲𑀺𑀦𑁂𑀳𑀫𑀸𑀧𑀚𑁆𑀚𑁂𑀬𑁆𑀬, 𑀦 𑀳𑀺 𑀅𑀦𑀸𑀕𑀫𑁆𑀫 𑀢𑁂𑀚𑁄𑀥𑀸𑀢𑀼𑀁 𑀧𑀭𑀺𑀲𑁂𑀲𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀫𑁂𑀯 𑀪𑀯𑀕𑁆𑀕𑀧𑀭𑀫𑀸𑀧𑀺 𑀲𑀫𑀸𑀧𑀢𑁆𑀢𑀺 𑀦 𑀅𑀦𑀼𑀭𑀽𑀧𑀲𑁆𑀲 𑀲𑀫𑀼𑀕𑁆𑀖𑀸𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑁂 𑀳𑀺 𑀆𑀮𑀬𑀦𑁆𑀢𑀺 𑀲𑀫𑁆𑀫𑀲𑀦𑁆𑀢𑀺, 𑀦 𑀘 𑀢𑀡𑁆𑀳𑀸𑀬 𑀢𑀡𑁆𑀳𑀸𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀲𑁄 𑀅𑀲𑀫𑀼𑀕𑁆𑀖𑀸𑀢𑁄. 𑀅𑀯𑀺𑀚𑁆𑀚𑀸𑀬 𑀅𑀦𑀼𑀲𑀬𑁄 𑀘 𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀮𑀺𑀩𑁄𑀥𑁄, 𑀇𑀤𑀁 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀬𑀣𑀸𑀪𑀽𑀢𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀝𑀺𑀯𑁂𑀥𑁄 𑀅𑀬𑀁 𑀅𑀯𑀺𑀚𑁆𑀚𑀸𑀆𑀲𑀯𑁄 𑀅𑀯𑀺𑀚𑁆𑀚𑀸𑀯𑀺𑀜𑁆𑀜𑀸𑀡𑀩𑀻𑀚𑀁 𑀪𑀯𑀢𑀺. 𑀬𑀁 𑀩𑀻𑀚𑀁 𑀲𑁄 𑀳𑁂𑀢𑀼 𑀦 𑀲𑀫𑀼𑀘𑁆𑀙𑀺𑀚𑁆𑀚𑀢𑀺, 𑀅𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑁄 𑀧𑀝𑀺𑀲𑀦𑁆𑀤𑁂𑀳𑀢𑀺. 𑀧𑀝𑀺𑀲𑀦𑁆𑀤𑀳𑀦𑁆𑀢𑁄 𑀦 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀅𑀲𑀫𑀼𑀕𑁆𑀖𑀸𑀢𑀁 𑀘𑀺𑀢𑁆𑀢𑀁 𑀧𑀭𑀺𑀬𑁄𑀦𑀳𑀢𑀺, 𑀧𑀭𑀺𑀬𑁄𑀦𑀤𑁆𑀥𑀘𑀺𑀢𑁆𑀢𑁄 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀇𑀢𑀺 𑀲𑀜𑁆𑀜𑀸𑀡𑀲𑁆𑀲 𑀲𑀸𑀲𑀯𑀢𑁆𑀣𑁄, 𑀅𑀯𑀺𑀚𑁆𑀚𑀢𑁆𑀣𑁄, 𑀳𑁂𑀢𑀼𑀅𑀢𑁆𑀣𑁄, 𑀅𑀯𑀘𑁆𑀙𑁂𑀤𑀢𑁆𑀣𑁄, 𑀅𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀨𑀮𑀢𑁆𑀣𑁄 𑀧𑀝𑀺𑀲𑀦𑁆𑀥𑀺𑀅𑀢𑁆𑀣𑁄, 𑀧𑀼𑀦𑀩𑁆𑀪𑀯𑀢𑁆𑀣𑁄, 𑀅𑀲𑀫𑀼𑀕𑁆𑀖𑀸𑀢𑀢𑁆𑀣𑁄, 𑀅𑀦𑀼𑀲𑀬𑀢𑁆𑀣𑁄, 𑀧𑀭𑀺𑀬𑀼𑀝𑁆𑀞𑀸𑀦𑀢𑁆𑀣𑁄, 𑀅𑀧𑀝𑀺𑀯𑁂𑀥𑀦𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀅𑀯𑀺𑀚𑁆𑀚𑀸𑀬 𑀔𑁂𑀢𑁆𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀪𑀯𑀢𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫 𑀳𑀸𑀭𑁄.

𑁫𑁯. 𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄? 𑀉𑀕𑁆𑀖𑀝𑀺𑀢𑀫𑁆𑀳𑀺 𑀢𑀫𑁆𑀳𑀺 𑀲𑀦𑁆𑀢𑀜𑁆𑀘𑁂𑀯 𑀘 𑀦𑀁 𑀯𑀺𑀢𑁆𑀣𑀸𑀭𑀁 𑀧𑀦 𑀯𑀢𑁆𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀯𑀺𑀥𑀁 𑀘𑀺𑀢𑁆𑀢𑀜𑁆𑀜𑀸 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀢𑀢𑁆𑀣 𑀦𑀸𑀫𑀦𑀺𑀤𑁆𑀤𑁂𑀲𑁄 𑀉𑀧𑀖𑀝𑀓𑀸 [𑀉𑀕𑁆𑀖𑀝𑀓𑀸 (𑀧𑀻.)] 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁄 𑀯𑁂𑀯𑀘𑀦𑀁 𑀯𑀢𑁆𑀣𑀼𑀪𑀽𑀢𑁄 𑀯𑀺𑀢𑁆𑀣𑀸𑀭𑁄. 𑀬𑀣𑀸 𑀓𑀺𑀁, 𑀬𑀸 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀢𑁄 [𑀦𑀺𑀯𑀢𑁆𑀢𑀢𑁄 (𑀧𑀻.)] 𑀧𑀳𑀸𑀢𑀩𑁆𑀩𑁄, 𑀅𑀬𑀁 𑀉𑀧𑀖𑀝𑀦𑀸.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀓𑀺𑀜𑁆𑀘𑀺 𑀦 𑀯𑀢𑁆𑀢𑀩𑁆𑀩𑀁, 𑀭𑀽𑀧𑀭𑀸𑀕𑀁 𑀯𑀸 𑀦𑀸𑀫𑀯𑀦𑁆𑀢𑀧𑀳𑀸𑀢𑀩𑁆𑀩𑀁 [𑀦𑀸𑀫𑀫𑀦𑁆𑀢𑀧𑀳𑀸𑀢𑀩𑁆𑀩𑀁 (𑀓.)]. 𑀬𑀸𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸𑀦𑀺. 𑀅𑀯𑀺𑀚𑁆𑀚𑀸 𑀢𑀸 𑀑𑀧𑀫𑁆𑀫𑁂𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀸, 𑀅𑀬𑀁 𑀲𑀫𑀸𑀭𑁄𑀧𑀦𑁄. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀲𑁆𑀲 𑀘 𑀫𑀢𑁆𑀢𑀺𑀓𑁄 𑀘 𑀦𑀺𑀲𑁆𑀲𑀬𑁄 𑀢𑀡𑁆𑀳𑀸 𑀘 𑀤𑀺𑀝𑁆𑀞𑀺 𑀘. 𑀢𑀢𑁆𑀣 𑀤𑀺𑀝𑁆𑀞𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀢𑀡𑁆𑀳𑀸 𑀇𑀫𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀇𑀤𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀬𑀸𑀯 𑀚𑀭𑀸𑀫𑀭𑀡𑀁, 𑀇𑀤𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑁂 𑀅𑀯𑀲𑀺𑀝𑁆𑀞𑀁 𑀧𑀭𑁄𑀧𑀬𑀢𑀺.

𑀅𑀦𑀺𑀲𑁆𑀲𑀺𑀢𑀲𑁆𑀲 [𑀧𑀲𑁆𑀲 𑀉𑀤𑀸. 𑁭𑁪] 𑀘𑀮𑀺𑀢𑀁 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀢𑀡𑁆𑀳𑀸𑀬 𑀘 𑀧𑀳𑀸𑀦𑀁 𑀢𑀢𑁆𑀣 𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀬 𑀪𑀽𑀢𑀁 𑀯𑀺𑀜𑁆𑀜𑀸𑀡𑀁 𑀲𑀭𑀸𑀕𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀢𑀁 𑀢𑀁 𑀥𑀫𑁆𑀫𑀁 𑀉𑀧𑁂𑀘𑁆𑀘 𑀅𑀜𑁆𑀜𑀁 𑀥𑀫𑁆𑀫𑀁 𑀥𑀸𑀯𑀢𑀺 𑀫𑀓𑁆𑀓𑀝𑁄𑀧𑀫𑀢𑀸𑀬, 𑀅𑀣 𑀔𑁆𑀯𑀲𑁆𑀲 𑀧𑀭𑀺𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀭𑀸𑀕𑀝𑁆𑀞𑀸𑀦𑀺𑀬𑁂𑀲𑀼 𑀙𑀦𑁆𑀤𑀭𑀸𑀕𑁄 𑀦𑀢𑁆𑀣𑀺 𑀓𑀼𑀢𑁄 𑀢𑀢𑁄 𑀘𑀮𑀦𑀸, 𑀅𑀥𑀺𑀫𑀢𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀘𑀺𑀢𑁆𑀢𑀁 𑀦𑀺𑀯𑁂𑀲𑁆𑀲𑀬𑀢𑀺 𑀢𑀁 𑀅𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀸𑀳𑀸𑀭𑀁 𑀦𑀺𑀭𑀼𑀚𑁆𑀛𑀢𑀺 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄 𑀬𑀸𑀯 𑀚𑀭𑀸𑀫𑀭𑀡𑀦𑀺𑀭𑁄𑀥𑁄. 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑀢𑀢𑁆𑀣 𑀭𑀸𑀕𑀯𑀲𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀘𑀮𑀺𑀢𑀁 𑀲𑀧𑀭𑀺𑀕𑁆𑀕𑀳𑁄, 𑀢𑀲𑁆𑀫𑀺𑀁 𑀘𑀮𑀺𑀢𑁂 𑀅𑀲𑀢𑀺 𑀬𑁄 𑀧𑀭𑀺𑀓𑀺𑀮𑁂𑀲𑁄𑀧𑀘𑀸𑀭𑁄 𑀢𑀺𑀯𑀺𑀥𑁄 𑀅𑀕𑁆𑀕𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀪𑀯𑀢𑀺. 𑀢𑁂𑀦𑀸𑀳 𑀘𑀮𑀺𑀢𑁂 𑀅𑀲𑀦𑁆𑀢𑁂 𑀧𑀲𑁆𑀲𑀤𑁆𑀥𑀺 𑀳𑁄𑀢𑀺. 𑀢𑀢𑁆𑀣 𑀬𑀁 𑀲𑀫𑀸𑀭𑁄𑀧𑀦𑀸 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀬𑀸𑀯 𑀯𑀺𑀫𑀼𑀢𑁆𑀢𑀺𑀢𑀫𑀺𑀢𑀺 𑀜𑀸𑀡𑀤𑀲𑁆𑀲𑀦𑀁 𑀪𑀯𑀢𑀺. 𑀲𑁄 𑀆𑀲𑀯𑀸𑀦𑀁 𑀔𑀬𑀸 𑀘 𑀯𑀺𑀫𑀼𑀢𑁆𑀢𑀺 𑀦𑁄 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀉𑀧𑀧𑀢𑁆𑀢𑀺𑀲𑁆𑀲 𑀆𑀕𑀢𑀺𑀕𑀢𑀺𑀬𑀸 𑀅𑀲𑀦𑁆𑀢𑀺𑀬𑀸 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀇𑀤𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀫𑀚𑁆𑀛𑁂 𑀲𑀫𑀸𑀭𑁄𑀧𑀺𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀘 𑀯𑀺𑀫𑀼𑀢𑁆𑀢𑀺𑀬𑀁 𑀘 𑀬𑁄𑀕𑁄 𑀦 𑀘 𑀏𑀢𑀁 𑀢𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁆𑀚𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀦 𑀘 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 𑀲𑀼𑀢𑁆𑀢𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁄 𑀬𑁂 𑀘 𑀥𑀫𑁆𑀫𑀸 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸 𑀦𑀸𑀜𑁆𑀜𑁂. 𑀏𑀯𑀁 𑀯𑀸𑀲𑀦𑀸𑀪𑀸𑀕𑀺𑀬𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂, 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀇𑀫𑁂 𑀲𑁄𑀴𑀲 𑀳𑀸𑀭𑀸.

𑀲𑀼𑀯𑀻𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀚𑀫𑁆𑀩𑀼𑀯𑀦𑀯𑀸𑀲𑀺𑀦𑁄 𑀧𑁂𑀝𑀓𑁄𑀧𑀤𑁂𑀲𑁂

𑀧𑀜𑁆𑀘𑀫𑀸 𑀪𑀽𑀫𑀺.

𑁬. 𑀲𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑀪𑀽𑀫𑀺

𑁬𑁦. 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀸𑀲𑀦𑀁 𑀢𑀺𑀯𑀺𑀥𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀔𑀦𑁆𑀥𑁂𑀲𑀼 𑀥𑀸𑀢𑀽𑀲𑀼 𑀆𑀬𑀢𑀦𑁂𑀲𑀼 𑀘. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄 𑀬𑀸𑀯 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀤𑀲 𑀭𑀽𑀧𑀆𑀬𑀢𑀦𑀸𑀦𑀺 𑀘𑀓𑁆𑀔𑀼 𑀭𑀽𑀧𑀸 𑀘 𑀬𑀸𑀯 𑀓𑀸𑀬𑁄 𑀨𑁄𑀝𑁆𑀞𑀩𑁆𑀩𑀸 𑀘, 𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀯𑁂𑀤𑀦𑀸𑀓𑀸𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀬𑀸𑀯 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀲𑀜𑁆𑀜𑀸𑀓𑀸𑀬𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀭𑀽𑀧𑀲𑀜𑁆𑀜𑀸 𑀬𑀸𑀯 𑀥𑀫𑁆𑀫𑀲𑀜𑁆𑀜𑀸 𑀇𑀫𑁂 𑀙 𑀲𑀜𑁆𑀜𑀸𑀓𑀸𑀬𑀸, 𑀅𑀬𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀘𑁂𑀢𑀦𑀸𑀓𑀸𑀬𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀭𑀽𑀧𑀲𑀜𑁆𑀘𑁂𑀢𑀦𑀸 𑀬𑀸𑀯 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀇𑀫𑁂 𑀙 𑀘𑁂𑀢𑀦𑀸𑀓𑀸𑀬𑀸, 𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀬𑀸𑀯 𑀫𑀦𑁄𑀯𑀺𑀜𑁆𑀜𑀸𑀡𑀁 𑀇𑀫𑁂 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸, 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸.

𑀢𑁂𑀲𑀁 𑀓𑀸 𑀧𑀭𑀺𑀜𑁆𑀜𑀸? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺 𑀏𑀲𑀸 𑀏𑀢𑁂𑀲𑀁 𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑀢𑀫𑁄 𑀔𑀦𑁆𑀥𑀢𑁆𑀣𑁄? 𑀲𑀫𑀽𑀳𑀢𑁆𑀣𑁄 𑀔𑀦𑁆𑀥𑀢𑁆𑀣𑁄, 𑀧𑀼𑀜𑁆𑀚𑀢𑁆𑀣𑁄 𑀔𑀦𑁆𑀥𑀢𑁆𑀣𑁄, 𑀭𑀸𑀲𑀢𑁆𑀣𑁄 𑀔𑀦𑁆𑀥𑀢𑁆𑀣𑁄. 𑀢𑀁 𑀬𑀣𑀸 𑀤𑀩𑁆𑀩𑀓𑁆𑀔𑀦𑁆𑀥𑁄 𑀯𑀦𑀓𑁆𑀔𑀦𑁆𑀥𑁄 𑀤𑀸𑀭𑀼𑀓𑁆𑀔𑀦𑁆𑀥𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀤𑀓𑀓𑁆𑀔𑀦𑁆𑀥𑁄 𑀯𑀸𑀬𑀼𑀓𑁆𑀔𑀦𑁆𑀥𑁄 𑀇𑀢𑀺 𑀏𑀯𑀁 𑀔𑀦𑁆𑀥𑁂𑀲𑀼 𑀲𑀩𑁆𑀩𑀲𑀗𑁆𑀕𑀳𑁄𑀯 𑀏𑀯𑀁 𑀔𑀦𑁆𑀥𑀢𑁆𑀣𑁄.

𑀢𑀢𑁆𑀣 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀢𑀸𑀬𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀢𑀸𑀲𑀁 𑀧𑀭𑀺𑀜𑁆𑀜𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺 𑀏𑀲𑀸 𑀏𑀢𑀸𑀲𑀁 𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑁄 𑀥𑀸𑀢𑀼𑀅𑀢𑁆𑀣𑁄? 𑀯𑀼𑀘𑁆𑀘𑀢𑁂 𑀅𑀯𑀬𑀯𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄. 𑀅𑀯𑀬𑀯𑁄𑀢𑀺 𑀘𑀓𑁆𑀔𑀼 𑀦𑁄 𑀧𑀲𑀸𑀤𑁄 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀧𑀜𑁆𑀘𑀲𑀼 𑀥𑀸𑀢𑀽𑀲𑀼 𑀧𑀼𑀦 𑀭𑀸𑀕𑀯𑀯𑀘𑁆𑀙𑁂𑀤𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄. 𑀯𑀯𑀘𑁆𑀙𑀺𑀦𑁆𑀦𑀸 𑀳𑀺 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀧𑀜𑁆𑀘𑀲𑀼 𑀧𑀼𑀦𑀭𑀸𑀳 𑀏𑀓𑀦𑁆𑀢𑀺𑀧𑀓𑀢𑁆𑀬𑀢𑁆𑀣𑁂𑀦 𑀥𑀸𑀢𑀼𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑁂. 𑀢𑀁 𑀬𑀣𑀸, 𑀧𑀓𑀢𑀺𑀬𑀸 𑀅𑀬𑀁 𑀧𑀼𑀭𑀺𑀲𑁄 𑀧𑀺𑀢𑁆𑀢𑀺𑀓𑁄 𑀲𑁂𑀫𑁆𑀳𑀺𑀓𑁄 𑀯𑀸𑀢𑀺𑀓𑁄 𑀲𑀦𑁆𑀦𑀺𑀧𑀸𑀢𑀺𑀓𑁄𑀢𑀺 𑀏𑀯𑀁 𑀧𑀓𑀢𑀺𑀘𑀓𑁆𑀔𑀼𑀥𑀸𑀢𑀼 𑀤𑀲𑀦𑁆𑀦𑀁 𑀧𑀺𑀬𑀸 𑀘 𑀲𑀩𑁆𑀩𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼…𑀧𑁂… 𑀯𑀺𑀲𑀪𑀸𑀕𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄.

𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀓𑀢𑀫𑀸𑀦𑀺? 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀩𑀸𑀳𑀺𑀭𑀸𑀦𑀺. 𑀘𑀓𑁆𑀔𑀸𑀬𑀢𑀦𑀁 𑀬𑀸𑀯 𑀫𑀦𑀸𑀬𑀢𑀦𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀁, 𑀭𑀽𑀧𑀸𑀬𑀢𑀦𑀁 𑀬𑀸𑀯 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀩𑀸𑀳𑀺𑀭𑀁. 𑀏𑀢𑀸𑀦𑀺 𑀤𑁆𑀯𑀸𑀤𑀲 𑀆𑀬𑀢𑀦𑀸𑀦𑀺. 𑀏𑀢𑁂𑀲𑀁 𑀓𑀸 𑀧𑀭𑀺𑀜𑁆𑀜𑀸? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺, 𑀏𑀲𑀸 𑀏𑀢𑁂𑀲𑀁 𑀧𑀭𑀺𑀜𑁆𑀜𑀸. 𑀅𑀧𑀺 𑀘 𑀤𑁆𑀯𑀺𑀥𑀸 𑀧𑀭𑀺𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀘 𑀧𑀳𑀸𑀦𑀧𑀭𑀺𑀜𑁆𑀜𑀸 𑀘. 𑀢𑀢𑁆𑀣 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺, 𑀏𑀲𑀸 𑀜𑀸𑀢𑀧𑀭𑀺𑀜𑁆𑀜𑀸. 𑀧𑀳𑀸𑀦𑀧𑀭𑀺𑀜𑁆𑀜𑀸 𑀧𑀦 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀸, 𑀏𑀲𑀸 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑀢𑀫𑁄 𑀆𑀬𑀢𑀦𑀢𑁆𑀣𑁄? 𑀯𑀼𑀘𑁆𑀘𑀢𑁂 𑀆𑀓𑀸𑀭𑀢𑁆𑀣𑁄 𑀆𑀬𑀢𑀦𑀢𑁆𑀣𑁄. 𑀬𑀣𑀸 𑀲𑀼𑀯𑀡𑁆𑀡𑀸𑀓𑀭𑁄 𑀤𑀼𑀩𑁆𑀩𑀡𑁆𑀡𑀸𑀓𑀭𑁄, 𑀬𑀣𑀸 𑀤𑁆𑀯𑀻𑀳𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂 𑀢𑁂 𑀕𑀸𑀯𑀸 𑀉𑀢𑁆𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀏𑀢𑁂𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀕𑀸𑀯𑀸 𑀉𑀢𑁆𑀢𑀺𑀝𑁆𑀞𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑀸 𑀤𑀼𑀓𑁆𑀔𑀥𑀫𑁆𑀫𑀸 𑀘. 𑀧𑀼𑀦𑀭𑀸𑀳 𑀆𑀬𑀤𑀸𑀦𑀢𑁆𑀣𑁄 𑀆𑀬𑀢𑀦𑀢𑁆𑀣𑁄. 𑀬𑀣𑀸 𑀭𑀜𑁆𑀜𑁄 𑀆𑀬𑀤𑀸𑀦𑁂𑀳𑀺 𑀆𑀬𑁄 𑀪𑀯𑀢𑀺, 𑀏𑀯𑀁 𑀆𑀬𑀤𑀸𑀦𑀢𑁆𑀣𑁄 𑀆𑀬𑀢𑀦𑀢𑁆𑀣𑁄.

𑁬𑁧. 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀦𑀺𑀭𑁄𑀥𑁄 𑀫𑀕𑁆𑀕𑁄 𑀘. 𑀤𑀼𑀓𑁆𑀔𑀁 𑀬𑀣𑀸 𑀲𑀫𑀸𑀲𑁂𑀦 𑀥𑀫𑁆𑀫𑀸𑀘𑀭𑀺𑀬𑀁 𑀫𑀸𑀦𑀲𑀜𑁆𑀘, 𑀲𑀫𑀼𑀤𑀬𑁄 𑀲𑀫𑀸𑀲𑁂𑀦 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘, 𑀦𑀺𑀭𑁄𑀥𑁄 𑀲𑀫𑀸𑀲𑁂𑀦 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘, 𑀫𑀕𑁆𑀕𑁄 𑀲𑀫𑀸𑀲𑁂𑀦 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘.

𑀢𑀢𑁆𑀣 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀓𑀢𑀫𑁂? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀸𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀏𑀯𑀫𑁂𑀢𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸. 𑀬𑁂 𑀥𑀫𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀘 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀲𑁄 𑀫𑀕𑁆𑀕𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑀫𑁆𑀫𑀧𑁆𑀧𑀥𑀸𑀦𑀁…𑀧𑁂… 𑀇𑀤𑁆𑀥𑀺𑀧𑀸𑀤𑀁…𑀧𑁂… 𑀇𑀦𑁆𑀤𑁆𑀭𑀺𑀬𑀸𑀦𑀺…𑀧𑁂… 𑀩𑀮𑀸𑀦𑀺…𑀧𑁂… 𑀢𑀢𑁆𑀣 𑀓𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄? 𑀇𑀦𑁆𑀤𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀆𑀥𑀺𑀧𑀢𑁂𑀬𑁆𑀬𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀧𑀲𑀸𑀤𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀅𑀲𑀸𑀥𑀸𑀭𑀡𑀁 𑀓𑀲𑁆𑀲 𑀓𑀺𑀭𑀺𑀬𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄 𑀅𑀦𑀯𑀧𑀭𑀺𑀬𑀢𑁆𑀣𑁄 𑀩𑀮𑀢𑁆𑀣𑁄, 𑀣𑀸𑀫𑀢𑁆𑀣𑁄 𑀩𑀮𑀢𑁆𑀣𑁄, 𑀉𑀧𑀸𑀤𑀸𑀬𑀢𑁆𑀣𑁄 𑀩𑀮𑀢𑁆𑀣𑁄, 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑁄 𑀩𑀮𑀢𑁆𑀣𑁄.

𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀬𑀸𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀢𑁆𑀣 𑀓𑀢𑀫𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀸𑀯 𑀲𑀫𑁆𑀫𑀸𑀲𑀫𑀸𑀥𑀺. 𑀢𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀔𑀦𑁆𑀥𑁄 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀘. 𑀢𑀢𑁆𑀣 𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀬𑀸 𑀘 𑀲𑀫𑁆𑀫𑀸𑀲𑀢𑀺 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀏𑀯𑀁 𑀢𑀸𑀬𑁄 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀤𑀲 𑀧𑀤𑀸𑀦𑀺…𑀧𑁂….

𑀢𑀢𑁆𑀣 𑀬𑁄𑀕𑀸𑀯𑀘𑀭𑁄 𑀲𑀻𑀮𑀓𑁆𑀔𑀦𑁆𑀥𑁂 𑀞𑀺𑀢𑁄 𑀤𑁄𑀲𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀤𑁄𑀲𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀤𑁄𑀲𑀲𑀮𑁆𑀮𑀁 𑀉𑀤𑁆𑀥𑀭𑀢𑀺, 𑀤𑀼𑀓𑁆𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀸𑀫𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀞𑀺𑀢𑁄 𑀮𑁄𑀪𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀭𑀸𑀕𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀮𑁄𑀪𑀲𑀮𑁆𑀮𑀁 𑀉𑀤𑁆𑀥𑀭𑀢𑀺, 𑀲𑀼𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀞𑀺𑀢𑁄 𑀫𑁄𑀳𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀫𑁄𑀳𑀲𑀮𑁆𑀮𑀁 𑀤𑀺𑀝𑁆𑀞𑀺𑀲𑀮𑁆𑀮𑀜𑁆𑀘 𑀉𑀤𑁆𑀥𑀭𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀭𑀽𑀧𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀇𑀢𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀦 𑀉𑀧𑀸𑀤𑀺𑀬𑀢𑀺, 𑀘𑀢𑁆𑀢𑀸𑀭𑀺 𑀲𑀮𑁆𑀮𑀸𑀦𑀺 𑀉𑀤𑁆𑀥𑀭𑀢𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀚𑀸𑀦𑀸𑀢𑀺, 𑀢𑁂𑀥𑀸𑀢𑀼𑀓𑀁 𑀲𑀫𑀢𑀺𑀓𑁆𑀓𑀫𑀢𑀺.

𑁬𑁨. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀬𑀣𑀸 𑀲𑁄 𑀧𑀸𑀡𑀲𑀚𑁆𑀚𑁂𑀲𑀼 𑀓𑀣𑀁𑀓𑀣𑀸 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑀁 𑀯𑀺𑀜𑁆𑀜𑀸𑀡𑀁? 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄, 𑀇𑀤𑀁 𑀦𑀸𑀫𑀁. 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁? 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀲𑁆𑀲 𑀧𑀜𑁆𑀜𑀢𑁆𑀢𑀺𑀁. 𑀇𑀢𑀺 𑀧𑀼𑀭𑀺𑀫𑀓𑀜𑁆𑀘 𑀦𑀸𑀫𑀁 𑀇𑀤𑀜𑁆𑀘 𑀭𑀽𑀧𑀁 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀙𑀴𑀸𑀬𑀢𑀦𑀦𑁆𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀘𑀓𑁆𑀔𑀼 𑀅𑀚𑁆𑀛𑀢𑁆𑀢𑀺𑀓𑀁 𑀆𑀬𑀢𑀦𑀁 𑀬𑀸𑀯 𑀫𑀦𑁄 𑀅𑀚𑁆𑀛𑀢𑁆𑀢𑀺𑀓𑀁 𑀆𑀬𑀢𑀦𑀁. 𑀨𑀲𑁆𑀲𑁄𑀢𑀺 𑀙 𑀨𑀲𑁆𑀲𑀓𑀸𑀬𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀬𑀸𑀯 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀨𑀲𑁆𑀲𑁄. 𑀙 𑀯𑁂𑀤𑀦𑀸𑀓𑀸𑀬𑀸 𑀯𑁂𑀤𑀦𑀸. 𑀢𑀡𑁆𑀳𑀸𑀢𑀺 𑀙 𑀢𑀡𑁆𑀳𑀸𑀓𑀸𑀬𑀸 𑀢𑀡𑁆𑀳𑀸. 𑀉𑀧𑀸𑀤𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀉𑀧𑀸𑀤𑀸𑀦𑀁. 𑀪𑀯𑁄𑀢𑀺 𑀢𑀬𑁄 𑀪𑀯𑀸 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀅𑀭𑀽𑀧𑀪𑀯𑁄. 𑀢𑀢𑁆𑀣 𑀓𑀢𑀫𑀸 𑀚𑀸𑀢𑀺? 𑀬𑀸 𑀧𑀞𑀫𑀁 𑀔𑀦𑁆𑀥𑀸𑀦𑀁 𑀧𑀞𑀫𑀁 𑀥𑀸𑀢𑀽𑀦𑀁 𑀧𑀞𑀫𑀁 𑀆𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀚𑀸𑀢𑀺. 𑀢𑀢𑁆𑀣 𑀓𑀢𑀫𑀸 𑀚𑀭𑀸? 𑀚𑀭𑀸 𑀦𑀸𑀫 𑀬𑀁 𑀢𑀁 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀧𑀯𑀺𑀯𑀺𑀢𑁆𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀯𑀺𑀯𑀡𑁆𑀡𑀢𑀁 𑀪𑀕𑁆𑀕𑁄 𑀢𑀁 𑀚𑀭𑀸 𑀳𑀻𑀬𑀦𑀸 𑀧𑀳𑀻𑀬𑀦𑀸 𑀆𑀬𑀼𑀦𑁄 𑀳𑀸𑀦𑀺 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀪𑁂𑀤𑁄 𑀉𑀧𑀦𑀸𑀳𑁄 𑀧𑀭𑀺𑀧𑀸𑀓𑁄, 𑀅𑀬𑀁 𑀚𑀭𑀸. 𑀢𑀢𑁆𑀣 𑀓𑀢𑀫𑀁 𑀫𑀭𑀡𑀁? 𑀫𑀭𑀡𑀁 𑀦𑀸𑀫 𑀬𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘𑀯𑀦𑀢𑀸 𑀫𑀭𑀡𑀁 𑀓𑀸𑀮𑀗𑁆𑀓𑀺𑀭𑀺𑀬𑀸 𑀉𑀤𑁆𑀥𑀼𑀫𑀸𑀢𑀓𑀸𑀦𑀁 𑀪𑁂𑀤𑁄 𑀓𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄, 𑀇𑀤𑀁 𑀫𑀭𑀡𑀁. 𑀇𑀢𑀺 𑀧𑀼𑀭𑀺𑀫𑀺𑀓𑀸 𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁 𑀢𑀤𑀼𑀪𑀬𑀁 𑀚𑀭𑀸𑀫𑀭𑀡𑀁.

𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁 𑀳. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀉𑀧𑀘𑀬𑀧𑀼𑀦𑀩𑁆𑀪𑀯𑀸𑀪𑀺𑀭𑁄𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑁂 𑀯𑀺𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼 𑀲𑀯𑀺𑀜𑁆𑀜𑀢𑁆𑀢𑀺𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀦𑁂𑀓𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀦𑀸𑀫𑀭𑀽𑀧𑀁, 𑀢𑀁 𑀲𑀴𑀸𑀬𑀢𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀧𑀦𑀮𑀓𑁆𑀔𑀡𑀁 𑀲𑀴𑀸𑀬𑀢𑀦𑀁, 𑀢𑀁 𑀨𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀦𑁆𑀦𑀺𑀧𑀸𑀢𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑁄 𑀯𑁂𑀤𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀲𑀸 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀲𑀸 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀤𑀸𑀦𑀧𑀭𑀺𑀳𑀦𑀦𑀮𑀓𑁆𑀔𑀡𑀁 𑀉𑀧𑀸𑀤𑀸𑀦𑀁, 𑀢𑀁 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀦𑀸𑀕𑀢𑀺𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀪𑀯𑁄, 𑀲𑁄 𑀚𑀸𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑀮𑀓𑁆𑀔𑀡𑀸 𑀚𑀸𑀢𑀺, 𑀲𑀸 𑀚𑀭𑀸𑀬 𑀧𑀤𑀝𑁆𑀞𑀸𑀦𑀁. 𑀉𑀧𑀦𑀬𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀲𑀸 𑀫𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀬𑀼𑀓𑁆𑀔𑀬𑀚𑀻𑀯𑀺𑀢𑀉𑀧𑀭𑁄𑀥𑀮𑀓𑁆𑀔𑀡𑀁 𑀫𑀭𑀡𑀁, 𑀢𑀁 𑀤𑀼𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀢𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀺𑀢𑁆𑀢𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀢𑀁 𑀲𑁄𑀓𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑁄𑀘𑀦𑀮𑀓𑁆𑀔𑀡𑁄 𑀲𑁄𑀓𑁄, 𑀲𑁄 𑀧𑀭𑀺𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀘𑀻𑀦𑀺𑀘𑁆𑀙𑀸𑀭𑀡𑀮𑀓𑁆𑀔𑀡𑁄 𑀧𑀭𑀺𑀤𑁂𑀯𑁄, 𑀲𑁄 𑀉𑀧𑀸𑀬𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁂 𑀆𑀬𑀸𑀲𑀸 𑀢𑁂 𑀉𑀧𑀸𑀬𑀸𑀲𑀸.

𑀦𑀯 𑀧𑀤𑀸𑀦𑀺 𑀬𑀢𑁆𑀣 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺. 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺? 𑀤𑁆𑀯𑁂 𑀫𑀽𑀮𑀓𑀺𑀮𑁂𑀲𑀸, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀢𑀢𑁆𑀣 𑀤𑁆𑀯𑁂 𑀫𑀽𑀮𑀓𑀺𑀮𑁂𑀲𑀸 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀘. 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 [𑀅. 𑀦𑀺. 𑁪.𑁪𑁯] 𑁋 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄.

𑁬𑁩. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀦𑀸𑀫 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀁 𑀅𑀜𑁆𑀜𑀸𑀡𑀁, 𑀅𑀬𑀁 𑀅𑀯𑀺𑀚𑁆𑀚𑀸. 𑀪𑀯𑀢𑀡𑁆𑀳𑀸 𑀦𑀸𑀫 𑀬𑁄 𑀪𑀯𑁂𑀲𑀼 𑀭𑀸𑀕𑁄 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀦𑀦𑁆𑀤𑀻 𑀅𑀚𑁆𑀛𑁄𑀲𑀸𑀦𑀁 𑀅𑀧𑀭𑀺𑀘𑁆𑀘𑀸𑀕𑁄, 𑀅𑀬𑀁 𑀪𑀯𑀢𑀡𑁆𑀳𑀸.

𑀢𑀢𑁆𑀣 𑀓𑀢𑀫𑁄 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁?

𑀮𑁄𑀪𑁄 𑀦𑀸𑀫 𑀲𑁄 𑀢𑁂𑀲𑀼 𑀢𑁂𑀲𑀼 𑀧𑀭𑀯𑀢𑁆𑀣𑀽𑀲𑀼 𑀧𑀭𑀤𑀩𑁆𑀩𑁂𑀲𑀼 𑀧𑀭𑀝𑁆𑀞𑀸𑀦𑁂𑀲𑀼 𑀧𑀭𑀲𑀸𑀧𑀢𑁂𑀬𑁆𑀬𑁂𑀲𑀼 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀦𑀦𑁆𑀤𑀻 𑀅𑀚𑁆𑀛𑁄𑀲𑀸𑀦𑀁 𑀅𑀧𑀭𑀺𑀘𑁆𑀘𑀸𑀕𑁄, 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀮𑁄𑀪𑁄 𑀮𑁄𑀪𑀚𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀘, 𑀢𑀣𑀸 𑀬𑀣𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀓𑀢𑀫𑁄 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁?

𑀲𑁄 𑀲𑀢𑁆𑀢𑁂𑀲𑀼 𑀆𑀖𑀸𑀢𑁄 𑀅𑀓𑁆𑀔𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀧𑀤𑁄𑀲𑁄 𑀅𑀦𑀢𑁆𑀣𑀓𑀸𑀫𑀢𑀸 𑀘𑁂𑀢𑀲𑁄 𑀧𑀝𑀺𑀖𑀸𑀢𑁄, 𑀅𑀬𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁.

𑀓𑀲𑁆𑀲𑁂𑀢𑀁 𑀫𑀽𑀮𑀁?

𑀤𑁄𑀲𑀚𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀓𑀢𑀫𑁄 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁?

𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀦𑀪𑀺𑀲𑀫𑀬𑁄 𑀅𑀲𑀫𑁆𑀧𑀚𑁆𑀚𑀕𑁆𑀕𑀸𑀳𑁄 𑀅𑀧𑁆𑀧𑀝𑀺𑀯𑁂𑀥𑁄 𑀫𑁄𑀳𑁄 𑀫𑀼𑀬𑁆𑀳𑀦𑀸 𑀲𑀫𑁆𑀫𑁄𑀳𑁄 𑀲𑀫𑁆𑀫𑀼𑀬𑁆𑀳𑀦𑀸 𑀅𑀯𑀺𑀚𑁆𑀚𑀸 𑀢𑀫𑁄 𑀅𑀦𑁆𑀥𑀓𑀸𑀭𑁄 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀅𑀘𑁆𑀙𑀤𑀦𑀁 [𑀅𑀯𑁂𑀘𑁆𑀙𑀤𑀦𑀁 (𑀧𑀻. 𑀓.)] 𑀅𑀧𑀲𑀘𑁆𑀙𑀸𑀕𑀫𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀬𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁.

𑀓𑀲𑁆𑀲𑁂𑀢𑀁 𑀫𑀽𑀮𑀁?

𑀫𑁄𑀳𑀚𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀸 𑀚𑀸𑀦𑀺𑀢𑀩𑁆𑀩𑀸, 𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁. 𑀬𑀁 𑀯𑀺𑀧𑀮𑁆𑀮𑀸𑀲𑀁 𑀲𑀺𑀬𑀸, 𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺. 𑀓𑀢𑀫𑁄 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄 𑀘, 𑀬𑁂𑀦 𑀧𑀝𑀺𑀧𑀓𑁆𑀔𑁂𑀦 𑀯𑀺𑀧𑀮𑁆𑀮𑀸𑀲𑀺𑀢𑀁 𑀕𑀡𑁆𑀳𑀸𑀢𑀺?

‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺, ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺, ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺, ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺, 𑀅𑀬𑀁 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄.

𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺?

𑀓𑀸𑀬𑁄 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀥𑀫𑁆𑀫𑀸 𑀘. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺.

𑀓𑀢𑀫𑀸𑀦𑀺 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺?

𑀲𑀜𑁆𑀜𑀸 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺 𑀘. 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺.

𑀢𑀢𑁆𑀣 𑀫𑀦𑀸𑀧𑀺𑀓𑁂 𑀯𑀢𑁆𑀣𑀼𑀫𑁆𑀳𑀺 𑀇𑀦𑁆𑀤𑁆𑀭𑀺𑀬𑀯𑀢𑁆𑀣𑁂 𑀯𑀡𑁆𑀡𑀸𑀬𑀢𑀦𑁂 𑀯𑀸 𑀬𑁄 𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀸𑀳𑁄, 𑀅𑀬𑀁 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀺𑀧𑀭𑀻𑀢𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀲𑀢𑀺 𑀯𑀺𑀜𑁆𑀜𑀢𑁆𑀢𑀺, 𑀅𑀬𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀺𑀧𑀭𑀻𑀢𑀘𑀺𑀢𑁆𑀢𑀲𑁆𑀲 𑀢𑀫𑁆𑀳𑀺 𑀭𑀽𑀧𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀬𑀸 𑀔𑀦𑁆𑀢𑀺 𑀭𑀼𑀘𑀺 𑀉𑀧𑁂𑀓𑁆𑀔𑀦𑀸 𑀦𑀺𑀘𑁆𑀙𑀬𑁄 𑀤𑀺𑀝𑁆𑀞𑀺 𑀦𑀺𑀤𑀲𑁆𑀲𑀦𑀁 𑀲𑀦𑁆𑀢𑀻𑀭𑀡𑀸, 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀢𑁆𑀣𑀼𑀪𑁂𑀤𑁂𑀦 𑀓𑀸𑀬𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺. 𑀢𑀬𑁄 𑀓𑀸𑀬𑁂 𑀢𑀬𑁄 𑀯𑁂𑀤𑀦𑀸𑀬 𑀢𑀬𑁄 𑀘𑀺𑀢𑁆𑀢𑁂 𑀢𑀬𑁄 𑀥𑀫𑁆𑀫𑁂, 𑀘𑀢𑁆𑀢𑀸𑀭𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀸 𑀘𑀢𑁆𑀢𑀸𑀭𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸, 𑀆𑀬𑀢𑀦𑀽𑀧𑀘𑀬𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀜𑁆𑀜𑀸𑀲𑀫𑀗𑁆𑀕𑀺𑀲𑁆𑀲 𑀭𑀽𑀧𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀬𑀸𑀯 𑀫𑀦𑁄 𑀲𑀜𑁆𑀜𑀸𑀲𑀫𑀗𑁆𑀕𑀺𑀲𑁆𑀲, 𑀥𑀫𑁆𑀫𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀙 𑀤𑁆𑀯𑀸𑀤𑀲𑀓𑀸 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺. 𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀢𑁄 𑀳𑀺 𑀅𑀧𑀭𑀺𑀫𑀺𑀢𑀲𑀗𑁆𑀔𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 [𑀅𑀢𑁆𑀢𑀸𑀦𑀁 (𑀓.)] 𑀅𑀧𑀭𑀺𑀫𑀺𑀢𑀫𑀲𑀗𑁆𑀔𑁂𑀬𑁆𑀬𑀸 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺 𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀢𑀸𑀬.

𑁬𑁪. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘𑀢𑁆𑀢𑀸𑀭𑀺 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀦𑀺 𑀪𑀯𑀦𑁆𑀢𑀺. 𑀬𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀲𑁄 𑀓𑀸𑀬𑁄 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑁄 𑀯𑁂𑀤𑀦𑀸 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀘, 𑀢𑁂 𑀥𑀫𑁆𑀫𑀸 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀲𑁄 𑀘𑀺𑀢𑁆𑀢𑀁 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀇𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘𑀢𑁆𑀢𑀸𑀭𑀺 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀦𑀺. 𑀢𑀢𑁆𑀣 𑀓𑀸𑀬𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀪𑀯𑀢𑀺. 𑀏𑀯𑀁 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀘 𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀪𑀯𑀢𑀺. 𑀢𑀢𑁆𑀣 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀦𑀢𑁆𑀣𑀁 𑀪𑀕𑀯𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀏𑀯𑀁 𑀯𑁂𑀤𑀦𑀸𑀲𑀼, 𑀘𑀺𑀢𑁆𑀢𑁂, 𑀥𑀫𑁆𑀫𑁂𑀲𑀼 𑀘 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀅𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀢𑀲𑁆𑀲𑀸 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀁 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀸𑀲𑀬𑀯𑀜𑁆𑀘𑀦𑀸𑀮𑀓𑁆𑀔𑀡𑁄 𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀇𑀥 𑀯𑀺𑀯𑀸𑀤𑀮𑀓𑁆𑀔𑀡𑁄 𑀤𑁄𑀲𑁄, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑁄 𑀫𑁄𑀳𑁄, 𑀢𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀦𑀸𑀲𑀕𑁆𑀕𑀳𑀡𑀮𑀓𑁆𑀔𑀡𑀸 𑀦𑀺𑀘𑁆𑀘𑀲𑀜𑁆𑀜𑀸, 𑀢𑀲𑁆𑀲𑀸 𑀲𑀩𑁆𑀩𑀲𑀗𑁆𑀔𑀸𑀭𑀸 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑁄𑀧𑀕𑀫𑀦𑀮𑀓𑁆𑀔𑀡𑀸 𑀲𑀼𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀫𑀫𑀗𑁆𑀓𑀸𑀭𑁄 𑀧𑀤𑀝𑁆𑀞𑀸𑀦𑀁. 𑀥𑀫𑁆𑀫𑁂𑀲𑀼 𑀉𑀧𑀕𑀫𑀦𑀮𑀓𑁆𑀔𑀡𑀸 𑀅𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀅𑀳𑀗𑁆𑀓𑀸𑀭𑁄 𑀧𑀤𑀝𑁆𑀞𑀸𑀦𑀁. 𑀯𑀡𑁆𑀡𑀲𑀗𑁆𑀕𑀳𑀡𑀮𑀓𑁆𑀔𑀡𑀸 𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀤𑀝𑁆𑀞𑀸𑀦𑀁. 𑀏𑀢𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀉𑀤𑁆𑀤𑀺𑀝𑁆𑀞𑁂𑀳𑀺 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀦𑀺𑀤𑁆𑀤𑀺𑀝𑁆𑀞𑁄 𑀪𑀯𑀢𑀺, 𑀲𑁄 𑀘 𑀔𑁄 𑀩𑀳𑀼𑀲𑁆𑀲𑀼𑀢𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀦𑁄 𑀅𑀧𑁆𑀧𑀲𑁆𑀲𑀼𑀢𑁂𑀦, 𑀧𑀜𑁆𑀜𑀯𑀢𑀸 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦, 𑀬𑀼𑀢𑁆𑀢𑁂𑀦 𑀦𑁄 𑀅𑀬𑀼𑀢𑁆𑀢𑁂𑀦.

𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑁄 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺. 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺? 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀅𑀲𑀼𑀪𑀲𑀜𑁆𑀜𑀸 𑀘.

𑀢𑀢𑁆𑀣 𑀓𑀢𑀫𑁄 𑀲𑀫𑀣𑁄? 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀞𑀸𑀦𑀁 𑀧𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀦𑀁 𑀲𑀫𑀸𑀥𑀺 𑀲𑀫𑀸𑀥𑀸𑀦𑀁 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀯𑀽𑀧𑀲𑀫𑁄 𑀫𑀸𑀦𑀲𑁄 𑀏𑀓𑀕𑁆𑀕𑀁 𑀘𑀺𑀢𑁆𑀢𑀲𑁆𑀲, 𑀅𑀬𑀁 𑀲𑀫𑀣𑁄.

𑀢𑀢𑁆𑀣 𑀓𑀢𑀫𑀸 𑀯𑀺𑀧𑀲𑁆𑀲𑀦𑀸? 𑀔𑀦𑁆𑀥𑁂𑀲𑀼 𑀯𑀸 𑀥𑀸𑀢𑀽𑀲𑀼 𑀯𑀸 𑀆𑀬𑀢𑀦𑁂𑀲𑀼 𑀯𑀸 𑀦𑀸𑀫𑀭𑀽𑀧𑁂𑀲𑀼 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀤𑀼𑀓𑁆𑀔𑁂𑀲𑀼 𑀯𑀸 𑀲𑀫𑀼𑀤𑀬𑁂𑀲𑀼 𑀯𑀸 𑀦𑀺𑀭𑁄𑀥𑁂 𑀯𑀸 𑀫𑀕𑁆𑀕𑁂 𑀯𑀸 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀲𑀸𑀯𑀚𑁆𑀚𑀅𑀦𑀯𑀚𑁆𑀚𑁂𑀲𑀼 𑀯𑀸 𑀓𑀡𑁆𑀳𑀲𑀼𑀓𑁆𑀓𑁂𑀲𑀼 𑀯𑀸 𑀲𑁂𑀯𑀺𑀢𑀩𑁆𑀩𑀅𑀲𑁂𑀯𑀺𑀢𑀩𑁆𑀩𑁂𑀲𑀼 𑀯𑀸 𑀲𑁄 𑀬𑀣𑀸𑀪𑀽𑀢𑀁 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀯𑀻𑀫𑀁𑀲𑀸 𑀧𑀭𑀯𑀻𑀫𑀁𑀲𑀸 𑀕𑀸𑀳𑀦𑀸 𑀅𑀕𑁆𑀕𑀸𑀳𑀦𑀸 𑀧𑀭𑀺𑀕𑁆𑀕𑀸𑀳𑀦𑀸 𑀘𑀺𑀢𑁆𑀢𑁂𑀦 𑀧𑀭𑀺𑀘𑀺𑀢𑀦𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸 𑀜𑀸𑀡𑀁 𑀯𑀺𑀚𑁆𑀚𑀸 𑀯𑀸 𑀘𑀓𑁆𑀔𑀼 𑀩𑀼𑀤𑁆𑀥𑀺 𑀫𑁂𑀥𑀸 𑀧𑀜𑁆𑀜𑀸 𑀑𑀪𑀸𑀲𑁄 𑀆𑀮𑁄𑀓𑁄 𑀆𑀪𑀸 𑀧𑀪𑀸 𑀔𑀕𑁆𑀕𑁄 𑀦𑀸𑀭𑀸𑀘𑁄 [𑀦𑀸𑀭𑀚𑁆𑀚𑁄 (𑀧𑀻. 𑀓.)] 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑀗𑁆𑀕𑀁, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀢𑁂𑀦𑁂𑀲𑀸 𑀯𑀺𑀧𑀲𑁆𑀲𑀦𑀸 𑀇𑀢𑀺 𑀯𑀼𑀘𑁆𑀘𑀢𑀺 𑀯𑀺𑀯𑀺𑀥𑀸 𑀯𑀸 𑀏𑀲𑀸 𑀯𑀺𑀧𑀲𑁆𑀲𑀦𑀸𑀢𑀺, 𑀢𑀲𑁆𑀫𑀸 𑀏𑀲𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀥𑀸 𑀘𑁂𑀲𑀸 𑀳𑀺 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀤𑁆𑀯𑀺𑀥𑀸 𑀇𑀫𑀸𑀬 𑀧𑀲𑁆𑀲𑀢𑀺 𑀲𑀼𑀪𑀜𑁆𑀘 𑀅𑀲𑀼𑀪𑀜𑁆𑀘 𑀓𑀡𑁆𑀳𑀜𑁆𑀘 𑀲𑀼𑀓𑁆𑀓𑀜𑁆𑀘 𑀲𑁂𑀯𑀺𑀢𑀩𑁆𑀩𑀜𑁆𑀘 𑀅𑀲𑁂𑀯𑀺𑀢𑀩𑁆𑀩𑀜𑁆𑀘 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑀜𑁆𑀘 𑀩𑀦𑁆𑀥𑀜𑁆𑀘 𑀯𑀺𑀫𑁄𑀓𑁆𑀔𑀜𑁆𑀘 𑀆𑀘𑀬𑀜𑁆𑀘 𑀅𑀧𑀘𑀬𑀜𑁆𑀘 𑀧𑀯𑀢𑁆𑀢𑀺𑀜𑁆𑀘 𑀦𑀺𑀯𑀢𑁆𑀢𑀺𑀜𑁆𑀘 𑀲𑀁𑀓𑀺𑀮𑁂𑀲𑀜𑁆𑀘 𑀯𑁄𑀤𑀸𑀦𑀜𑁆𑀘, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀯𑀺𑀇𑀢𑀺 𑀉𑀧𑀲𑀕𑁆𑀕𑁄 𑀧𑀲𑁆𑀲𑀦𑀸𑀢𑀺 𑀅𑀢𑁆𑀣𑁄 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑁂, 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁬𑁫. 𑀢𑀢𑁆𑀣 𑀤𑁆𑀯𑁂 𑀭𑁄𑀕𑀸 𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑁄𑀕𑀸𑀦𑀁 𑀦𑀺𑀖𑀸𑀢𑀸𑀬 𑀪𑀕𑀯𑀢𑀸 𑀤𑁆𑀯𑁂 𑀪𑁂𑀲𑀚𑁆𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀇𑀫𑀸𑀦𑀺 𑀤𑁆𑀯𑁂 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀲𑁂𑀯𑁂𑀦𑁆𑀢𑁄 𑀤𑁆𑀯𑁂 𑀅𑀭𑁄𑀕𑁂 𑀲𑀘𑁆𑀙𑀺𑀓𑀭𑁄𑀢𑀺 𑀭𑀸𑀕𑀯𑀺𑀭𑀸𑀕𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀜𑁆𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁. 𑀢𑀢𑁆𑀣 𑀢𑀡𑁆𑀳𑀸𑀭𑁄𑀕𑀲𑁆𑀲 𑀲𑀫𑀣𑁄 𑀪𑁂𑀲𑀚𑁆𑀚𑀁, 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀭𑁄𑀕𑀁. 𑀅𑀯𑀺𑀚𑁆𑀚𑀸𑀭𑁄𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑁂𑀲𑀚𑁆𑀚𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀭𑁄𑀕𑀁. 𑀏𑀯𑀜𑁆𑀳𑀺 𑀪𑀕𑀯𑀸 𑀘𑀸𑀳, ‘‘𑀤𑁆𑀯𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 [𑀧𑀲𑁆𑀲 𑀤𑀻. 𑀦𑀺. 𑁩.𑁩𑁫𑁨] 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀤𑁆𑀯𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸’’𑀢𑀺. 𑀢𑀢𑁆𑀣 𑀲𑀫𑀣𑀁 𑀪𑀸𑀯𑁂𑀦𑁆𑀢𑁄 𑀭𑀽𑀧𑀁 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀁 𑀧𑀭𑀺𑀚𑀸𑀦𑀦𑁆𑀢𑁄 𑀢𑀡𑁆𑀳𑀁 𑀧𑀚𑀳𑀢𑀺, 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀦𑀸𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀦𑀸𑀫𑀁 𑀧𑀭𑀺𑀚𑀸𑀦𑀦𑁆𑀢𑁄 𑀅𑀯𑀺𑀚𑁆𑀚𑀁 𑀧𑀚𑀳𑀢𑀺, 𑀅𑀯𑀺𑀚𑁆𑀚𑀁 𑀧𑀚𑀳𑀦𑁆𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀤𑀸 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑀸𑀢𑀸 𑀪𑀯𑀦𑁆𑀢𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀢𑀣𑀸𑀲𑁆𑀲 𑀤𑁆𑀯𑁂 𑀥𑀫𑁆𑀫𑀸 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘. 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀪𑀯𑀦𑁆𑀢𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀪𑀯𑀦𑁆𑀢𑀺 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀏𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼 𑀓𑀢𑀓𑀺𑀘𑁆𑀘𑁄 𑀪𑀯𑀢𑀺. 𑀏𑀲𑀸 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀢𑀲𑁆𑀲 𑀆𑀬𑀼𑀧𑀭𑀺𑀬𑀸𑀤𑀸𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀭𑁄𑀥𑀸 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑁄 𑀇𑀫𑁂𑀲𑀁 𑀔𑀦𑁆𑀥𑀸𑀦𑀁 𑀥𑀸𑀢𑀼𑀆𑀬𑀢𑀦𑀸𑀦𑀁 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀜𑁆𑀜𑁂𑀲𑀜𑁆𑀘 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺 𑀅𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀢𑀢𑁆𑀣 𑀓𑀢𑀫𑀁 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁? 𑀬𑀁𑀥𑀸𑀢𑀼𑀓𑁄 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢𑀁 𑀅𑀦𑀺𑀘𑁆𑀙𑀸 𑀅𑀧𑀢𑁆𑀣𑀦𑀸 𑀅𑀓𑀦𑁆𑀢𑀸 𑀅𑀦𑀚𑁆𑀛𑁄𑀲𑀸𑀦𑀁. 𑀅𑀬𑀁 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀮𑁄𑀪𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀼𑀲𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀘 𑀇𑀫𑁂𑀲𑀁 𑀫𑀽𑀮𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀢𑀫𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁? 𑀬𑀸 𑀲𑀢𑁆𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀅𑀦𑀖𑀸𑀢𑁄 𑀅𑀧𑁆𑀧𑀝𑀺𑀖𑀸𑀢𑁄 𑀅𑀩𑁆𑀬𑀸𑀧𑀢𑁆𑀢𑀺 𑀅𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑁄 𑀫𑁂𑀢𑁆𑀢𑀸 𑀫𑁂𑀢𑁆𑀢𑀸𑀬𑀦𑀸 𑀅𑀢𑁆𑀣𑀓𑀸𑀫𑀢𑀸 𑀳𑀺𑀢𑀓𑀸𑀫𑀢𑀸 𑀘𑁂𑀢𑀲𑁄 𑀧𑀲𑀸𑀤𑁄, 𑀅𑀬𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀤𑁄𑀲𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀘 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀢𑀫𑀁 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁? 𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀲𑀫𑀬𑁄 𑀲𑀫𑁆𑀫𑀸 𑀘 𑀧𑀘𑁆𑀘𑀸𑀕𑀫𑁄 𑀧𑀝𑀺𑀯𑁂𑀥𑁄 𑀅𑀫𑁄𑀳𑁄 𑀅𑀲𑀫𑁆𑀫𑀼𑀬𑁆𑀳𑀦𑀸 𑀅𑀲𑀫𑁆𑀫𑁄𑀳𑁄 𑀯𑀺𑀚𑁆𑀚𑀸𑀧𑀓𑀸𑀲𑁄 𑀆𑀮𑁄𑀓𑁄 𑀅𑀦𑀸𑀯𑀭𑀡𑀁 𑀲𑁂𑀓𑁆𑀔𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀬𑀁 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀫𑁄𑀳𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀏𑀢𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸 𑀘 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀇𑀫𑁂𑀲𑀁 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀬𑁄𑀚𑁂𑀢𑀩𑁆𑀩𑁄.

𑁬𑁬. 𑀢𑀢𑁆𑀣 𑀓𑀢𑀫𑀸 𑀅𑀦𑀺𑀘𑁆𑀘𑀲𑀜𑁆𑀜𑀸? ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄’’𑀢𑀺 𑀘 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀦𑀺𑀘𑁆𑀘𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀲𑀜𑁆𑀜𑀸? ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀤𑀼𑀓𑁆𑀔𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀤𑀼𑀓𑁆𑀔𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀆𑀮𑀲𑁆𑀲𑁂 𑀲𑀁𑀧𑀫𑀸𑀤𑁂 𑀯𑀺𑀫𑁆𑀳𑀬𑁂 𑀘 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀅𑀦𑀢𑁆𑀢𑀲𑀜𑁆𑀜𑀸? ‘‘𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀢𑁆𑀢𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀦𑀢𑁆𑀢𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄, 𑀅𑀦𑀢𑁆𑀢𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀅𑀳𑀗𑁆𑀓𑀸𑀭𑁄 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺, 𑀫𑀫𑀗𑁆𑀓𑀸𑀭𑁄 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀅𑀲𑀼𑀪𑀲𑀜𑁆𑀜𑀸? ‘‘𑀲𑀢𑁆𑀢 𑀲𑀗𑁆𑀔𑀸𑀭𑀸 𑀅𑀲𑀼𑀪𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀲𑀼𑀪𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀅𑀲𑀼𑀪𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀲𑀼𑀪𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀬𑁄 𑀢𑀢𑁆𑀣 𑀅𑀲𑀼𑀪𑀲𑀜𑁆𑀜𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀤𑀼𑀓𑁆𑀔𑀲𑀜𑁆𑀜𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀲𑀫𑀣𑁂𑀦 𑀢𑀡𑁆𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀯𑀺𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀤𑁄𑀲𑁂𑀦 𑀤𑁄𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀫𑁄𑀳𑁂𑀦 𑀫𑁄𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀤𑀼𑀓𑁆𑀔𑀲𑀜𑁆𑀜𑀸𑀬 𑀲𑀼𑀔𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀦𑀢𑁆𑀢𑀲𑀜𑁆𑀜𑀸𑀬 𑀅𑀢𑁆𑀢𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀲𑀼𑀪𑀲𑀜𑁆𑀜𑀸𑀬 𑀲𑀼𑀪𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺.

𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀲𑀫𑀣𑁄, 𑀢𑀲𑁆𑀲 𑀛𑀸𑀦𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀁 𑀬𑀣𑀸𑀪𑀽𑀢𑀁 𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲𑀸 𑀲𑀩𑁆𑀩𑀦𑁂𑀬𑁆𑀬𑀁 𑀧𑀤𑀝𑁆𑀞𑀸𑀦𑀁. 𑀇𑀘𑁆𑀙𑀸𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀅𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀸𑀤𑀮𑀓𑁆𑀔𑀡𑁄 𑀅𑀤𑁄𑀲𑁄, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼𑀅𑀧𑁆𑀧𑀝𑀺𑀳𑀢𑀮𑀓𑁆𑀔𑀡𑁄 𑀅𑀫𑁄𑀳𑁄, 𑀢𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀸𑀲𑀕𑁆𑀕𑀳𑀡𑀮𑀓𑁆𑀔𑀡𑀸 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀢𑀲𑁆𑀲𑀸 𑀉𑀤𑀬𑀩𑁆𑀩𑀬𑁄 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀯𑁂𑀤𑀦𑀸 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀅𑀦𑀼𑀧𑀕𑀫𑀦𑀮𑀓𑁆𑀔𑀡𑀸 𑀅𑀦𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀥𑀫𑁆𑀫𑀲𑀜𑁆𑀜𑀸 𑀧𑀤𑀝𑁆𑀞𑀸𑀦𑀁. 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀉𑀤𑁆𑀥𑀼𑀫𑀸𑀢𑀓𑀲𑀫𑀼𑀕𑁆𑀕𑀳𑀡𑀮𑀓𑁆𑀔𑀡𑀸 𑀅𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀦𑀺𑀩𑁆𑀩𑀺𑀤𑀸 𑀧𑀤𑀝𑁆𑀞𑀸𑀦𑀁. 𑀇𑀫𑁂𑀲𑀼 𑀦𑀯𑀲𑀼 𑀧𑀤𑁂𑀲𑀼 𑀉𑀧𑀤𑀺𑀝𑁆𑀞𑁂𑀲𑀼 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀉𑀧𑀤𑀺𑀝𑁆𑀞𑁄 𑀪𑀯𑀢𑀺, 𑀲𑁄 𑀘 𑀩𑀳𑀼𑀲𑁆𑀲𑀼𑀢𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀦𑁄 𑀅𑀧𑁆𑀧𑀲𑁆𑀲𑀼𑀢𑁂𑀦, 𑀧𑀜𑁆𑀜𑀯𑀢𑀸 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦, 𑀬𑀼𑀢𑁆𑀢𑁂𑀦 𑀦𑁄 𑀅𑀬𑀼𑀢𑁆𑀢𑁂𑀦𑀸𑀢𑀺.

𑁬𑁭. 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀸𑀥𑀺𑀫𑀼𑀢𑁆𑀢𑀲𑁆𑀲 𑀅𑀧𑀭𑀸𑀧𑀭𑀁 𑀘𑀺𑀢𑁆𑀢𑀁 𑀧𑀡𑀸𑀫𑁂𑀦𑁆𑀢𑁄 𑀲𑀢𑀺𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀅𑀦𑀺𑀘𑁆𑀘𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀼𑀔𑀲𑁆𑀲𑀸𑀤𑀸𑀥𑀺𑀫𑀼𑀢𑁆𑀢𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀅𑀕𑀢𑀺𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀤𑀼𑀓𑁆𑀔𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑁂𑀲𑀼 𑀅𑀢𑁆𑀢𑀸𑀥𑀺𑀫𑀼𑀢𑁆𑀢𑀲𑁆𑀲 𑀦𑀸𑀦𑀸𑀥𑀸𑀢𑀼𑀅𑀦𑁂𑀓𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀅𑀦𑀢𑁆𑀢𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀯𑀡𑁆𑀡𑀲𑀡𑁆𑀞𑀸𑀦𑀸𑀪𑀺𑀭𑀢𑀲𑁆𑀲 𑀓𑀸𑀬𑁂 𑀲𑀼𑀪𑀸𑀥𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀅𑀲𑀼𑀪𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺.

𑀅𑀯𑀺𑀧𑁆𑀧𑀝𑀺𑀲𑀸𑀭𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀲𑀤𑁆𑀤𑀳𑀦𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑀲𑀽𑀭𑀸𑀅𑀧𑀝𑀺𑀓𑁆𑀔𑁂𑀧𑀦𑀮𑀓𑁆𑀔𑀡𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀪𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀲𑁆𑀲 𑀅𑀢𑀻𑀢𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼.

𑀲𑀢𑀺 𑀲𑀭𑀡𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑀲𑁆𑀲 𑀅𑀢𑀻𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀢𑀺𑀦𑁆𑀤𑁆𑀭𑀺𑀬𑀁 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼.

𑀏𑀓𑀕𑁆𑀕𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀅𑀯𑀺𑀓𑁆𑀔𑁂𑀧𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀛𑀸𑀦𑁂𑀲𑀼.

𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀪𑀽𑀢𑀢𑁆𑀣𑀲𑀦𑁆𑀢𑀻𑀭𑀡𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼.

𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 [𑀧𑀲𑁆𑀲 𑀅. 𑀦𑀺. 𑁪.𑁩𑁧] 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀓𑁆𑀓𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀘𑀓𑁆𑀓𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀘𑀓𑁆𑀓𑀁, 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸 𑀘𑀓𑁆𑀓𑀁. 𑀢𑀢𑁆𑀣 𑀅𑀭𑀺𑀬𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑁄 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀭𑀺𑀬𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑁄 𑀲𑀧𑁆𑀧𑀼𑀭𑀺𑀲𑁆𑀲𑀽𑀧𑀦𑀺𑀲𑁆𑀲𑀬𑁄, 𑀲𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁, 𑀢𑀁 𑀧𑀼𑀜𑁆𑀜𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀓𑀼𑀲𑀮𑀥𑀫𑁆𑀫𑁄𑀧𑀘𑀬𑀮𑀓𑁆𑀔𑀡𑀁 𑀧𑀼𑀜𑁆𑀜𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀧𑀤𑀝𑁆𑀞𑀸𑀦𑀁.

𑀏𑀓𑀸𑀤𑀲𑀲𑀻𑀮𑀫𑀽𑀮𑀓𑀸 𑀥𑀫𑁆𑀫𑀸 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑀢𑀺…𑀧𑁂… 𑀲𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀦𑀸. 𑀢𑀢𑁆𑀣 𑀯𑁂𑀭𑀫𑀡𑀺𑀮𑀓𑁆𑀔𑀡𑀁 𑀲𑀻𑀮𑀁, 𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦 𑀅𑀢𑁆𑀢𑀸𑀦𑀼𑀯𑀸𑀤𑀮𑀓𑁆𑀔𑀡𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀲𑁄 𑀧𑀸𑀫𑁄𑀚𑁆𑀚𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀪𑀺𑀧𑁆𑀧𑀫𑁄𑀤𑀦𑀮𑀓𑁆𑀔𑀡𑀁 𑀧𑀸𑀫𑁄𑀚𑁆𑀚𑀁, 𑀢𑀁 𑀧𑀻𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀫𑀦𑀮𑀓𑁆𑀔𑀡𑀸 𑀧𑀻𑀢𑀺, 𑀲𑀸 𑀧𑀲𑁆𑀲𑀤𑁆𑀥𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀦𑀺𑀬𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺, 𑀲𑀸 𑀲𑀼𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀸𑀤𑀮𑀓𑁆𑀔𑀡𑀁 𑀲𑀼𑀔𑀁, 𑀢𑀁 𑀲𑀫𑀸𑀥𑀺𑀦𑁄 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀓𑁆𑀔𑁂𑀧𑀦𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀲𑁄 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀧𑀭𑀻𑀢𑀲𑀦𑁆𑀢𑀻𑀭𑀡𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀲𑀸 𑀦𑀺𑀩𑁆𑀩𑀺𑀤𑀸𑀬 𑀧𑀤𑀝𑁆𑀞𑀸𑀦𑀁 𑀅𑀦𑀸𑀮𑀬𑀦𑀮𑀓𑁆𑀔𑀡𑀸 𑀦𑀺𑀩𑁆𑀩𑀺𑀤𑀸, 𑀲𑀸 𑀯𑀺𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀲𑀁𑀓𑀺𑀮𑁂𑀲𑀮𑀓𑁆𑀔𑀡𑁄 𑀯𑀺𑀭𑀸𑀕𑁄, 𑀲𑁄 𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀅𑀓𑀼𑀲𑀮𑀥𑀫𑁆𑀫𑀯𑀺𑀯𑁂𑀓𑀮𑀓𑁆𑀔𑀡𑀸 𑀯𑀺𑀫𑀼𑀢𑁆𑀢𑀺, 𑀲𑀸 𑀯𑀺𑀫𑀼𑀢𑁆𑀢𑀺𑀦𑁄 𑀯𑁄𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁.

𑁬𑁮. 𑀘𑀢𑀲𑁆𑀲𑁄 𑀅𑀭𑀺𑀬𑀪𑀽𑀫𑀺𑀬𑁄 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀢𑀢𑁆𑀣 𑀬𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀲𑀸 𑀤𑀲𑁆𑀲𑀦𑀪𑀽𑀫𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀺𑀢𑁆𑀯𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀇𑀤𑀁 𑀢𑀦𑀼𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁 𑀩𑁆𑀬𑀸𑀧𑀸𑀤𑀸𑀦𑀁. 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀲𑀡𑁆𑀳𑀁 𑀯𑀺𑀭𑀚𑁆𑀚𑀢𑀺, 𑀅𑀬𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀦𑀸𑀕𑀸𑀫𑀺𑀨𑀮𑀜𑁆𑀘 𑀬𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀓𑀢𑀸𑀪𑀽𑀫𑀺. 𑀅𑀭𑀳𑀢𑁆𑀢𑀜𑁆𑀘 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀓𑁄 𑀯𑀘𑀦𑀢𑁆𑀣𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀸𑀫𑀜𑁆𑀜𑀁, 𑀢𑀲𑁆𑀲𑁂𑀢𑀸𑀦𑀺 𑀨𑀮𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀲𑁆𑀲 𑀩𑁆𑀭𑀳𑁆𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑁂? 𑀩𑁆𑀭𑀳𑁆𑀫𑀜𑁆𑀜𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀲𑁆𑀲 𑀢𑀸𑀦𑀺 𑀨𑀮𑀸𑀦𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀲𑁄𑀢𑀸𑀧𑀦𑁆𑀦𑁄 𑀓𑀣𑀁 𑀳𑁄𑀢𑀺? 𑀲𑀳 𑀲𑀘𑁆𑀘𑀸𑀪𑀺𑀲𑀫𑀬𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀘, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀧𑀭𑀺𑀓𑁆𑀔𑀬𑀸 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀬𑀸𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺? 𑀅𑀲𑁆𑀲𑀼𑀢𑀯𑀸 𑀩𑀸𑀮𑁄 𑀧𑀼𑀣𑀼𑀚𑁆𑀚𑀦𑁄 𑀬𑀸𑀯 𑀅𑀭𑀺𑀬𑀥𑀫𑁆𑀫𑁂 𑀅𑀓𑁄𑀯𑀺𑀤𑁄, 𑀲𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀬𑀸𑀯 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁, 𑀲𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑁄 𑀯𑀸 𑀅𑀢𑁆𑀢𑀦𑀺𑀬𑀕𑁆𑀕𑀸𑀳𑁄 𑀯𑀸 𑀏𑀲𑁄𑀳𑀫𑀲𑁆𑀫𑀺 𑀏𑀓𑀲𑁆𑀫𑀺𑀁 𑀯𑀲𑀯𑀢𑁆𑀢𑀺𑀓𑁄 [𑀅𑀯𑀢𑁆𑀢𑀺𑀢𑁄 (𑀧𑀻. 𑀓.)] 𑀧𑀓𑁆𑀔𑀺𑀢𑁆𑀢𑁄 𑀅𑀦𑀼𑀕𑁆𑀕𑀳𑁄 𑀅𑀦𑀼𑀲𑀬𑀦𑁆𑀢𑁄 𑀅𑀗𑁆𑀕𑀫𑀗𑁆𑀕𑀦𑁆𑀢𑀺 𑀧𑀭𑀢𑀺. 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀔𑀦𑁆𑀢𑀺 𑀭𑀼𑀘𑀺 𑀧𑁂𑀓𑁆𑀔𑀦𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀬𑀦𑀸 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀅𑀬𑀁 𑀯𑀼𑀘𑁆𑀘𑀢𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺.

𑀢𑀢𑁆𑀣 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺. 𑀓𑀢𑀫𑀸𑀬𑁄 𑀧𑀜𑁆𑀘? 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀸𑀯 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀇𑀫𑀸𑀬𑁄 𑀧𑀜𑁆𑀘 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺, 𑀅𑀯𑀲𑁂𑀲𑀸𑀬𑁄 𑀧𑀦𑁆𑀦𑀭𑀲 𑀲𑀲𑁆𑀲𑀢𑀁 𑀪𑀚𑀦𑁆𑀢𑀺. 𑀇𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀳𑀸𑀦𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀧𑀳𑀸𑀦𑀸 𑀉𑀘𑁆𑀙𑁂𑀤𑀁 𑀲𑀲𑁆𑀲𑀢𑀜𑁆𑀘 𑀦 𑀪𑀚𑀢𑀺. 𑀇𑀢𑀺 𑀉𑀘𑁆𑀙𑁂𑀤𑀲𑀲𑁆𑀲𑀢𑀧𑁆𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀕𑀢𑀁 𑀪𑀯𑀢𑀺, 𑀅𑀜𑁆𑀜𑀸 𑀯𑀸 𑀮𑁄𑀓𑀼𑀢𑁆𑀢𑀭𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀓𑀣𑀁 𑀧𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀪𑀯𑀢𑀺? 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀲𑀼𑀢𑀯𑀸 𑀳𑁄𑀢𑀺, 𑀲𑀩𑁆𑀩𑁄 𑀲𑀼𑀓𑁆𑀓𑀧𑀓𑁆𑀔𑁄 𑀓𑀸𑀢𑀩𑁆𑀩𑁄, 𑀬𑀸𑀯 𑀅𑀭𑀺𑀬𑀥𑀫𑁆𑀫𑁂𑀲𑀼 𑀓𑁄𑀯𑀺𑀤𑁄 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀸𑀯 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀪𑀯𑀢𑀺.

𑀓𑀣𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦 𑀪𑀯𑀢𑀺? 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀦 𑀓𑀗𑁆𑀔𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺, 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀲𑀩𑁆𑀩𑀁. 𑀥𑀫𑁆𑀫𑁂 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀲𑀩𑁆𑀩𑀁. 𑀬𑀸𑀯 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀆𑀓𑀗𑁆𑀔𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀲𑀗𑁆𑀖𑁂 𑀦 𑀓𑀗𑁆𑀔𑀢𑀺…𑀧𑁂… 𑀬𑀸𑀯 𑀧𑀽𑀚𑀸 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘𑀸𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀆𑀓𑀗𑁆𑀔𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀬𑀸𑀯 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀤𑀼𑀓𑁆𑀔𑁂 𑀯𑀸 𑀲𑀫𑀼𑀤𑀬𑁂 𑀯𑀸 𑀦𑀺𑀭𑁄𑀥𑁂 𑀯𑀸 𑀫𑀕𑁆𑀕𑁂 𑀯𑀸 𑀓𑀗𑁆𑀔𑀸𑀬𑀦𑀸 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀥𑀸𑀧𑀣𑀸 𑀆𑀲𑀧𑁆𑀧𑀦𑀸 [𑀅𑀧𑁆𑀧𑀦𑀸 (𑀧𑀻. 𑀓.) 𑀥. 𑀲. 𑁧𑁦𑁦𑁮 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀭𑀺𑀲𑀧𑁆𑀧𑀦𑀸 𑀅𑀦𑀯𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀕𑀫𑀦𑀁 [𑀅𑀦𑀺𑀝𑁆𑀞𑀸𑀕𑀫𑀦𑀁 (𑀓.)] 𑀅𑀦𑁂𑀓𑀁𑀲𑁄 𑀅𑀦𑁂𑀓𑀁𑀲𑀺𑀓𑀢𑀸, 𑀢𑁂 𑀢𑀲𑁆𑀲 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀧𑀡𑀼𑀦𑁆𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸.

𑁬𑁯. 𑀢𑀢𑁆𑀣 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀤𑁆𑀯𑀺𑀥𑀸 𑁋 𑀲𑀻𑀮𑀲𑁆𑀲 𑀯𑀸 𑀲𑀼𑀤𑁆𑀥𑀲𑁆𑀲 𑀯𑀸. 𑀢𑀢𑁆𑀣 𑀲𑀻𑀮𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸 𑀢𑀢𑁆𑀣 𑀓𑀧𑁄𑀢𑀧𑀸𑀤𑀸𑀳𑀺 𑀅𑀘𑁆𑀙𑀭𑀸𑀳𑀺 𑀲𑀤𑁆𑀥𑀺𑀁 𑀓𑀻𑀴𑀺𑀲𑁆𑀲𑀸𑀫𑀺 𑀭𑀫𑀺𑀲𑁆𑀲𑀸𑀫𑀺 𑀧𑀭𑀺𑀘𑀭𑀺𑀲𑁆𑀲𑀸𑀫𑀻𑀢𑀺. 𑀬𑀣𑀸𑀪𑀽𑀢𑀤𑀲𑁆𑀲𑀦𑀦𑁆𑀢𑀺 𑀭𑀼𑀘𑀺𑀯𑀺𑀫𑀼𑀢𑁆𑀢𑀺 𑀭𑀸𑀕𑁄 𑀭𑀸𑀕𑀧𑀭𑀺𑀯𑀢𑁆𑀢𑀓𑀸 𑀤𑀺𑀝𑁆𑀞𑀺𑀭𑀽𑀧𑀦𑀸 𑀧𑀲𑁆𑀲𑀦𑀸 𑀅𑀲𑀦𑁆𑀢𑀼𑀲𑁆𑀲𑀺𑀢𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀢𑀢𑁆𑀣 𑀓𑀢𑀫𑁄 𑀲𑀼𑀤𑁆𑀥𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄? 𑀇𑀥𑁂𑀓𑀘𑁆𑀘𑁄 𑀲𑀻𑀮𑀁 𑀧𑀭𑀸𑀫𑀲𑀢𑀺, 𑀲𑀻𑀮𑁂𑀦 𑀲𑀼𑀚𑁆𑀛𑀢𑀺, 𑀲𑀻𑀮𑁂𑀦 𑀦𑀻𑀬𑀢𑀺, 𑀲𑀻𑀮𑁂𑀦 𑀫𑀼𑀘𑁆𑀘𑀢𑀺, 𑀲𑀼𑀔𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀢𑀺 𑀅𑀦𑀼𑀧𑀸𑀧𑀼𑀡𑀸𑀢𑀺 𑀉𑀧𑀭𑀺𑀫𑁂𑀦. 𑀢𑀤𑀼𑀪𑀬𑀁 𑀲𑀻𑀮𑀯𑀢𑀁 𑀧𑀭𑀸𑀫𑀲𑀢𑀺 𑀢𑀤𑀼𑀪𑀬𑁂𑀦 𑀲𑀻𑀮𑀯𑀢𑁂𑀦 𑀲𑀼𑀚𑁆𑀛𑀦𑁆𑀢𑀺 𑀫𑀼𑀘𑁆𑀘𑀦𑁆𑀢𑀺 𑀦𑀻𑀬𑀦𑁆𑀢𑀺, 𑀲𑀼𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀅𑀦𑀼𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀯𑀺𑀲𑀼𑀘𑀺𑀓𑀭𑀁 𑀥𑀫𑁆𑀫𑀁 𑀅𑀯𑀺𑀫𑀼𑀢𑁆𑀢𑀺𑀓𑀭𑀁 𑀥𑀫𑁆𑀫𑀁 𑀯𑀺𑀲𑀼𑀘𑀺𑀢𑁄 𑀯𑀺𑀫𑀼𑀢𑁆𑀢𑀺𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀔𑀦𑁆𑀢𑀺 𑀭𑀼𑀘𑀺 𑀫𑀼𑀢𑁆𑀢𑀺 𑀧𑁂𑀓𑁆𑀔𑀦𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀬𑀦𑀸 𑀧𑀲𑁆𑀲𑀦𑀸, 𑀅𑀬𑀁 𑀲𑀼𑀤𑁆𑀥𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀏𑀢𑁂 𑀉𑀪𑁄 𑀧𑀭𑀸𑀫𑀸𑀲𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀬𑀸𑀯 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀲𑁄 𑀲𑀻𑀮𑀯𑀸 𑀪𑀯𑀢𑀺 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀓𑁆𑀔𑀡𑁆𑀟𑁂𑀳𑀺 𑀬𑀸𑀯 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀪𑀯𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀲𑀩𑁆𑀩𑀁.

𑀲𑀳𑀲𑀘𑁆𑀘𑀸𑀪𑀺𑀲𑀫𑀬𑀸, 𑀇𑀢𑀺 𑀓𑁄 𑀯𑀘𑀦𑀢𑁆𑀣𑁄? 𑀘𑀢𑁆𑀢𑀸𑀭𑁄 𑀅𑀪𑀺𑀲𑀫𑀬𑀸, 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄 𑀧𑀳𑀸𑀦𑀸𑀪𑀺𑀲𑀫𑀬𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄 𑀪𑀸𑀯𑀦𑀸𑀪𑀺𑀲𑀫𑀬𑁄.

𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑁄 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀁? 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄, 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄, 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀪𑀺𑀲𑀫𑀬𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀓𑀣𑀁 𑀅𑀪𑀺𑀲𑀫𑁂𑀢𑀺? 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑁂𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀢𑀢𑁆𑀣 𑀬𑁄 𑀉𑀧𑀦𑀺𑀩𑀦𑁆𑀥𑁄, 𑀅𑀬𑀁 𑀲𑀫𑀣𑁄. 𑀬𑀸 𑀧𑀭𑀺𑀬𑁄𑀕𑀸𑀳𑀦𑀸, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀸𑀢𑀺 𑀧𑀲𑁆𑀲𑀢𑁄 𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀆𑀮𑀬𑁄 𑀦𑀺𑀓𑀦𑁆𑀢𑀺 𑀉𑀧𑀕𑀫𑀦𑀁 𑀅𑀚𑁆𑀛𑁄𑀲𑀸𑀦𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀡𑀺𑀥𑀺 𑀧𑀢𑁆𑀣𑀦𑀸 𑀧𑀳𑀻𑀬𑀢𑀺. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁. 𑀬𑁄 𑀢𑀢𑁆𑀣 𑀆𑀮𑀬𑁄 𑀦𑀺𑀓𑀦𑁆𑀢𑀺 𑀉𑀧𑀕𑀫𑀦𑀁 𑀅𑀚𑁆𑀛𑁄𑀲𑀸𑀦𑀁 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀡𑀺𑀥𑀺 𑀧𑀢𑁆𑀣𑀦𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑀁 𑀢𑀲𑁆𑀲 𑀧𑀳𑀸𑀦𑀁, 𑀲𑁄 𑀦𑀺𑀭𑁄𑀥𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑁄, 𑀏𑀯𑀁 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀅𑀪𑀺𑀲𑀫𑀬𑁄 𑀪𑀯𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀳𑀲𑀘𑁆𑀘𑀸𑀪𑀺𑀲𑀫𑀬𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀻’’𑀢𑀺.

𑁭𑁦. 𑀢𑀢𑁆𑀣 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁄. 𑀏𑀯𑀁 𑀤𑀺𑀝𑁆𑀞𑀦𑁆𑀢𑁄 𑀬𑀣𑀸 𑀦𑀸𑀯𑀸 𑀚𑀮𑀁 𑀕𑀘𑁆𑀙𑀦𑁆𑀢𑀻 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀧𑀸𑀭𑀺𑀫𑀁 𑀢𑀻𑀭𑀁 𑀧𑀸𑀧𑁂𑀢𑀺, 𑀑𑀭𑀺𑀫𑀁 𑀢𑀻𑀭𑀁 𑀚𑀳𑀢𑀺, 𑀪𑀸𑀭𑀁 𑀯𑀳𑀢𑀺, 𑀲𑁄𑀢𑀁 𑀙𑀺𑀦𑁆𑀤𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀬𑀣𑀸 𑀯𑀸 𑀲𑀽𑀭𑀺𑀬𑁄 𑀉𑀤𑀬𑀦𑁆𑀢𑁄 𑀏𑀓𑀓𑀸𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀧𑀸𑀢𑀼𑀓𑀭𑁄𑀢𑀺, 𑀭𑀽𑀧𑀁 𑀦𑀺𑀤𑀲𑁆𑀲𑀻𑀬𑀢𑀺, 𑀲𑀻𑀢𑀁 𑀧𑀭𑀺𑀬𑀸𑀤𑀺𑀬𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂…𑀧𑁂… 𑀬𑀣𑀸 𑀧𑀤𑀻𑀧𑁄 𑀚𑀮𑀦𑁆𑀢𑁄 𑀏𑀓𑀓𑀸𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀧𑀸𑀢𑀼𑀓𑀭𑁄𑀢𑀺, 𑀭𑀽𑀧𑀁 𑀦𑀺𑀤𑀲𑁆𑀲𑀻𑀬𑀢𑀺, 𑀉𑀧𑀸𑀤𑀸𑀦𑀁 𑀧𑀭𑀺𑀬𑀸𑀤𑀺𑀬𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂…𑀧𑁂….

𑀬𑀤𑀸 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀯𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀬𑀸𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀤𑀲𑁆𑀲𑀦𑀪𑀽𑀫𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀞𑀺𑀢𑁄 𑀉𑀢𑁆𑀢𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀺 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀢𑀦𑀼𑀪𑀽𑀫𑀺.

𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀬𑁄 𑀲𑀓𑀤𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂 𑀲𑀸𑀦𑀼𑀲𑀬𑁂 𑀅𑀦𑀯𑀲𑁂𑀲𑀁 𑀧𑀚𑀳𑀢𑀺, 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂𑀲𑀼 𑀅𑀦𑀯𑀲𑁂𑀲𑀁 𑀧𑀳𑀻𑀦𑁂𑀲𑀼 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀘𑀺𑀓𑀺𑀘𑁆𑀙𑀸 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀘, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 [𑀧𑀳𑀸𑀦𑀸𑀬 (𑀧𑀻. 𑀓.)] 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺 𑀅𑀦𑀸𑀕𑀸𑀫𑀻 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸, 𑀅𑀬𑀁 𑀯𑀻𑀢𑀭𑀸𑀕𑀪𑀽𑀫𑀺.

𑀅𑀦𑀸𑀕𑀸𑀫𑀺𑀨𑀮𑀜𑁆𑀘 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀉𑀢𑁆𑀢𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀚𑀳𑀢𑀺 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀜𑁆𑀘. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀳𑀸 𑀪𑀯𑀢𑀺, 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀲𑀫𑁆𑀫𑀤𑀜𑁆𑀜𑀸 [𑀲𑀫𑁆𑀧𑀚𑀜𑁆𑀜𑁄 (𑀧𑀻. 𑀓.)] 𑀯𑀺𑀫𑀼𑀢𑁆𑀢𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄, 𑀅𑀬𑀁 𑀓𑀢𑀸𑀪𑀽𑀫𑀺.

𑀅𑀭𑀳𑀦𑁆𑀢𑁄𑀯 𑀅𑀬𑀁 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀢𑀲𑁆𑀲 𑀆𑀬𑀼𑀓𑁆𑀔𑀬𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀧𑀭𑁄𑀥𑀸 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄, 𑀅𑀜𑁆𑀜𑀲𑁆𑀲 𑀘 𑀅𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀇𑀫𑀸 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄. 𑀇𑀢𑀺 𑀲𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀘𑁆𑀘𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄, 𑀓𑀺𑀮𑁂𑀲𑀯𑀯𑀢𑁆𑀣𑀸𑀦𑀁 𑀯𑀼𑀢𑁆𑀢𑀁, 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀪𑀽𑀫𑀺𑀬𑁄 𑀯𑀼𑀢𑁆𑀢𑀸, 𑀨𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄 𑀯𑀼𑀢𑁆𑀢𑀸. 𑀏𑀯𑀫𑀺𑀫𑁂𑀲𑀼 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑀩𑁄𑀥𑀺 𑀯𑀼𑀢𑁆𑀢𑀸 𑀪𑀯𑀢𑀺. 𑀏𑀢𑁆𑀣 𑀬𑁄𑀕𑁄 𑀓𑀭𑀡𑀻𑀬𑁄.

𑁭𑁧. 𑀢𑀢𑁆𑀣 𑀓𑀢𑀫𑀸𑀬𑁄 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄? 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑀢𑀫𑀸𑀦𑀺? 𑀇𑀥, 𑀪𑀺𑀓𑁆𑀔𑀯𑁂, [𑀧𑀲𑁆𑀲 𑀤𑀻𑀖𑀦𑀺𑀓𑀸𑀬𑁂] 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀓𑀢𑀫𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄? 𑀯𑀺𑀭𑀸𑀕𑀺𑀦𑁄 𑀯𑀢 𑀯𑀢𑁆𑀢𑀩𑁆𑀩𑁄, 𑀬𑀸𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸. 𑀇𑀫𑀸𑀬𑁄 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄.

𑀢𑀢𑁆𑀣 𑀓𑀢𑀫𑀁 𑀧𑀞𑀫𑀁 𑀛𑀸𑀦𑀁? 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺. 𑀢𑀢𑁆𑀣 𑀓𑀢𑀫𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺? 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄? 𑀬𑁄 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑁂𑀫𑀁 𑀦𑀺𑀓𑀦𑁆𑀢𑀺 𑀅𑀚𑁆𑀛𑁄𑀲𑀸𑀦𑀁 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀅𑀧𑀭𑀺𑀘𑁆𑀘𑀸𑀕𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀅𑀬𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀢𑀢𑁆𑀣 𑀓𑀢𑀫𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁? 𑀬𑁄 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀆𑀖𑀸𑀢𑁄…𑀧𑁂… 𑀬𑀣𑀸 𑀤𑁄𑀲𑁂 𑀢𑀣𑀸 𑀦𑀺𑀑𑀝𑁆𑀞𑀸𑀦𑀸, 𑀅𑀬𑀁 𑀩𑁆𑀬𑀸𑀧𑀸𑀤𑁄 𑀦𑀻𑀯𑀭𑀡𑀁. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀴𑀢𑀸 𑀘𑀺𑀢𑁆𑀢𑀲𑁆𑀲 𑀕𑀭𑀼𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀦𑀻𑀬𑀢𑀸 𑀘𑀺𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀦𑀺𑀤𑁆𑀤𑀸𑀬𑀦𑀸 𑀧𑀘𑀮𑀺𑀓𑀢𑀸 𑀧𑀘𑀮𑀸𑀬𑀦𑀸 𑀧𑀘𑀮𑀸𑀬𑀦𑀁, 𑀇𑀤𑀁 𑀫𑀺𑀤𑁆𑀥𑀁. 𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁 [𑀣𑀻𑀦𑀁 (𑀧𑀻.)]? 𑀬𑀸 𑀓𑀸𑀬𑀲𑁆𑀲 𑀣𑀺𑀦𑀢𑀸 𑀚𑀴𑀢𑀸 𑀓𑀸𑀬𑀲𑁆𑀲 𑀕𑀭𑀼𑀢𑁆𑀢𑀸 𑀓𑀸𑀬𑀲𑁆𑀲 𑀅𑀧𑁆𑀧𑀲𑁆𑀲𑀤𑁆𑀥𑀺, 𑀇𑀤𑀁 𑀣𑀺𑀦𑀁. 𑀇𑀢𑀺 𑀇𑀤𑀜𑁆𑀘 𑀣𑀺𑀦𑀁 𑀧𑀼𑀭𑀺𑀫𑀓𑀜𑁆𑀘 𑀫𑀺𑀤𑁆𑀥𑀁 𑀢𑀤𑀼𑀪𑀬𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀢𑀫𑀁 𑀉𑀤𑁆𑀥𑀘𑁆𑀘𑀁? 𑀬𑁄 𑀅𑀯𑀽𑀧𑀲𑀫𑁄 𑀘𑀺𑀢𑁆𑀢𑀲𑁆𑀲, 𑀇𑀤𑀁 𑀉𑀤𑁆𑀥𑀘𑁆𑀘𑀁. 𑀢𑀢𑁆𑀣 𑀓𑀢𑀫𑀁 𑀓𑀼𑀓𑁆𑀓𑀼𑀘𑁆𑀘𑀁? 𑀬𑁄 𑀘𑁂𑀢𑀲𑁄 𑀯𑀺𑀮𑁂𑀔𑁄 𑀅𑀮𑀜𑁆𑀘𑀦𑀸 𑀯𑀺𑀮𑀜𑁆𑀘𑀦𑀸 𑀳𑀤𑀬𑀮𑁂𑀔𑁄 𑀯𑀺𑀧𑁆𑀧𑀝𑀺𑀲𑀸𑀭𑁄, 𑀇𑀤𑀁 𑀓𑀼𑀓𑁆𑀓𑀼𑀘𑁆𑀘𑀁. 𑀇𑀢𑀺 𑀇𑀤𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀭𑀺𑀫𑀓𑀜𑁆𑀘 𑀉𑀤𑁆𑀥𑀘𑁆𑀘𑀁 𑀢𑀤𑀼𑀪𑀬𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀢𑀫𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁? 𑀬𑁄 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸…𑀧𑁂… 𑀅𑀬𑀁 𑀯𑀺𑀘𑀺𑀓𑀺𑀘𑁆𑀙𑀸. 𑀅𑀧𑀺 𑀘 𑀔𑁄 𑀧𑀦 𑀧𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀬𑁄 𑀲𑀫𑀦𑀦𑁆𑀢𑀭𑀸𑀬𑀺𑀓𑀸 𑀤𑁂𑀲𑀦𑁆𑀢𑀭𑀸𑀬𑀺𑀓𑀸 𑀲𑀫𑀸𑀧𑀢𑁆𑀢𑀦𑁆𑀢𑀭𑀸𑀬𑀺𑀓𑀸 𑀫𑀕𑁆𑀕𑀦𑁆𑀢𑀭𑀸𑀬𑀺𑀓𑀸 𑀲𑀕𑁆𑀕𑀦𑁆𑀢𑀭𑀸𑀬𑀺𑀓𑀸, 𑀇𑀫𑀸𑀬𑁄 𑀧𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀬𑁄. 𑀇𑀥 𑀧𑀦 𑀲𑀫𑀸𑀧𑀢𑁆𑀢𑀦𑁆𑀢𑀭𑀸𑀬𑀺𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸. 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸.

𑀢𑀢𑁆𑀣 𑀦𑀻𑀯𑀭𑀡𑀸𑀦𑀻𑀢𑀺 𑀓𑁄 𑀯𑀘𑀦𑀢𑁆𑀣𑁄, 𑀓𑀼𑀢𑁄 𑀦𑀺𑀯𑀸𑀭𑀬𑀦𑁆𑀢𑀻𑀢𑀺? 𑀲𑀩𑁆𑀩𑀢𑁄 𑀓𑀼𑀲𑀮𑀧𑀓𑁆𑀔𑀺𑀓𑀸 𑀦𑀺𑀯𑀸𑀭𑀬𑀦𑁆𑀢𑀺. 𑀓𑀣𑀁 [𑀓𑀺𑀁 𑀓𑀁 (𑀧𑀻. 𑀓.)] 𑀦𑀺𑀯𑀸𑀭𑀬𑀦𑁆𑀢𑀺? 𑀓𑀸𑀫𑀘𑁆𑀙𑀦𑁆𑀤𑁄 𑀅𑀲𑀼𑀪𑀢𑁄 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀬 [𑀫𑁂𑀢𑁆𑀢𑀢𑁄 (𑀧𑀻.)] 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀁 𑀧𑀲𑁆𑀲𑀤𑁆𑀥𑀺𑀢𑁄 𑀦𑀺𑀯𑀸𑀭𑀬𑀢𑀺, 𑀫𑀺𑀤𑁆𑀥𑀁 𑀯𑀻𑀭𑀺𑀬𑀸𑀭𑀫𑁆𑀪𑀢𑁄 𑀦𑀺𑀯𑀸𑀭𑀬𑀢𑀺, 𑀉𑀤𑁆𑀥𑀘𑁆𑀘𑀁 𑀲𑀫𑀣𑀢𑁄 𑀦𑀺𑀯𑀸𑀭𑀬𑀢𑀺, 𑀓𑀼𑀓𑁆𑀓𑀼𑀘𑁆𑀘𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀦𑀺𑀯𑀸𑀭𑀬𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀜𑁆𑀜𑀸𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁄 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀓𑀸𑀫𑀘𑁆𑀙𑀦𑁆𑀤𑁄 𑀅𑀮𑁄𑀪𑀢𑁄 𑀓𑀼𑀲𑀮𑀫𑀽𑀮𑀢𑁄 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑀢𑁄 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀲𑀫𑀸𑀥𑀺𑀢𑁄 𑀦𑀺𑀯𑀸𑀭𑀬𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀯𑀸𑀭𑀬𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀅𑀫𑁄𑀳𑀢𑁄 𑀓𑀼𑀲𑀮𑀫𑀽𑀮𑀢𑁄 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀢𑀬𑁄 𑀯𑀺𑀳𑀸𑀭𑀸 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄. 𑀤𑀺𑀩𑁆𑀩𑀯𑀺𑀳𑀸𑀭𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀘𑀢𑁆𑀢𑀸𑀭𑀺 𑀅𑀧𑁆𑀧𑀫𑀸𑀡𑀸𑀦𑀺, 𑀅𑀭𑀺𑀬𑀯𑀺𑀳𑀸𑀭𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀤𑀺𑀩𑁆𑀩𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀭𑀺𑀬𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀲𑀫𑀣𑀁 𑀦𑀺𑀯𑀸𑀭𑀬𑀦𑁆𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀯𑀺𑀧𑀲𑁆𑀲𑀦𑀁 𑀦𑀺𑀯𑀸𑀭𑀬𑀦𑁆𑀢𑀺, 𑀅𑀢𑁄 𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀛𑀸𑀦𑀁.

𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀛𑀸𑀦𑀁? 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀻𑀢𑀺𑀬𑀸 𑀲𑀼𑀔𑁂𑀦 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀘. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀉𑀧𑁆𑀧𑀸𑀤𑀧𑀝𑀺𑀮𑀸𑀪𑀲𑀫𑀦𑁆𑀦𑀸𑀕𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀁 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀻𑀢𑀺, 𑀢𑁂𑀦 𑀯𑀼𑀘𑁆𑀘𑀢𑁂 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦.

𑀢𑀢𑁆𑀣 𑀤𑀼𑀢𑀺𑀬𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀧𑀻𑀢𑀺𑀲𑀼𑀔𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑁂𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀢𑀺𑀬𑀁 𑀛𑀸𑀦𑀁 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂 𑀲𑀼𑀔𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀉𑀧𑁂𑀓𑁆𑀔𑀸𑀬 𑀇𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁂𑀓𑁆𑀔𑀸𑀬 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘, 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀇𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀉𑀧𑁆𑀧𑀸𑀤𑁄 𑀧𑀝𑀺𑀮𑀸𑀪𑁄 𑀲𑀫𑀦𑁆𑀦𑀸𑀕𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀓𑀢𑀫𑁄 𑀅𑀦𑀺𑀘𑁆𑀘𑀝𑁆𑀞𑁄? 𑀧𑀻𑀴𑀦𑀝𑁆𑀞𑁄 𑀅𑀦𑀺𑀘𑁆𑀘𑀝𑁆𑀞𑁄 𑀧𑀪𑀗𑁆𑀕𑀝𑁆𑀞𑁄 𑀲𑀫𑁆𑀧𑀸𑀧𑀦𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀦𑀺𑀘𑁆𑀘𑀝𑁆𑀞𑁄, 𑀅𑀬𑀁 𑀅𑀦𑀺𑀘𑁆𑀘𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀝𑁆𑀞𑁄? 𑀧𑀻𑀴𑀦𑀝𑁆𑀞𑁄 𑀤𑀼𑀓𑁆𑀔𑀝𑁆𑀞𑁄 𑀲𑀫𑁆𑀧𑀻𑀴𑀦𑀝𑁆𑀞𑁄 𑀲𑀁𑀯𑁂𑀕𑀝𑁆𑀞𑁄 𑀩𑁆𑀬𑀸𑀥𑀺𑀦𑀝𑁆𑀞𑁄, 𑀅𑀬𑀁 𑀤𑀼𑀓𑁆𑀔𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀲𑀼𑀜𑁆𑀜𑀝𑁆𑀞𑁄? 𑀅𑀦𑀼𑀧𑀮𑀺𑀢𑁆𑀢𑁄 𑀲𑀼𑀜𑁆𑀜𑀝𑁆𑀞𑁄, 𑀅𑀲𑀫𑁆𑀪𑀸𑀚𑀦𑀝𑁆𑀞𑁄 𑀕𑀢𑀧𑀝𑁆𑀞𑁄 [𑀅𑀧𑁆𑀧𑀝𑁆𑀞𑁄 (𑀧𑀻.)] 𑀯𑀺𑀯𑀝𑁆𑀝𑀝𑁆𑀞𑁄, 𑀅𑀬𑀁 𑀲𑀼𑀜𑁆𑀜𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀅𑀦𑀢𑁆𑀢𑀝𑁆𑀞𑁄? 𑀅𑀦𑀺𑀲𑁆𑀲𑀭𑀺𑀬𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄, 𑀅𑀯𑀲𑀯𑀢𑁆𑀢𑀦𑀝𑁆𑀞𑁄, 𑀅𑀓𑀸𑀫𑀓𑀸𑀭𑀺𑀝𑁆𑀞𑁄 𑀧𑀭𑀺𑀯𑀺𑀤𑀝𑁆𑀞𑁄, 𑀅𑀬𑀁 𑀅𑀦𑀢𑁆𑀢𑀝𑁆𑀞𑁄𑀢𑀺.

𑀲𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄 𑀦𑀸𑀫 𑀲𑀁𑀯𑀢𑁆𑀢𑀺𑀲𑀦𑁆𑀢𑀺𑀓𑀸 𑀧𑁂𑀝𑀓𑀪𑀽𑀫𑀺 𑀲𑀫𑀢𑁆𑀢𑀸.

𑁭. 𑀳𑀸𑀭𑀲𑀫𑁆𑀧𑀸𑀢𑀪𑀽𑀫𑀺

𑁭𑁨. 𑀛𑀸𑀦𑀁 𑀯𑀺𑀭𑀸𑀕𑁄. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀤𑀼𑀯𑀺𑀥𑀸𑀦𑀺; 𑀩𑁄𑀚𑁆𑀛𑀗𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀘 𑀩𑁄𑀚𑁆𑀛𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘. 𑀢𑀢𑁆𑀣 𑀩𑁄𑀚𑁆𑀛𑀗𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀩𑀸𑀳𑀺𑀭𑀓𑀸𑀦𑀺, 𑀩𑁄𑀚𑁆𑀛𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀺. 𑀢𑀢𑁆𑀣 𑀬𑁂𑀦 𑀙 𑀧𑀼𑀕𑁆𑀕𑀮𑀫𑀽𑀮𑀸𑀦𑀺 𑀢𑁂𑀲𑀁 𑀦𑀺𑀓𑁆𑀔𑀺𑀧𑁂𑀢𑁆𑀯𑀸 𑀭𑀸𑀕𑀘𑀭𑀺𑀢𑁄, 𑀤𑁄𑀲𑀘𑀭𑀺𑀢𑁄, 𑀫𑁄𑀳𑀘𑀭𑀺𑀢𑁄, 𑀭𑀸𑀕𑀤𑁄𑀲𑀘𑀭𑀺𑀢𑁄, 𑀭𑀸𑀕𑀫𑁄𑀳𑀘𑀭𑀺𑀢𑁄, 𑀤𑁄𑀲𑀫𑁄𑀳𑀘𑀭𑀺𑀢𑁄, 𑀲𑀫𑀪𑀸𑀕𑀘𑀭𑀺𑀢𑁄, 𑀇𑀢𑀺 𑀇𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀸𑀦𑀁 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀧𑀝𑀺𑀧𑀓𑁆𑀔𑁄 𑀢𑁂𑀲𑀁 𑀧𑀝𑀺𑀖𑀸𑀢𑀸𑀬 𑀬𑀣𑀸 𑀅𑀲𑀫𑀢𑁆𑀣𑁄 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀮𑁄𑀪𑁂𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀪𑀺𑀚𑁆𑀛𑀸 𑀘 𑀉𑀤𑁆𑀥𑀘𑁆𑀘𑀜𑁆𑀘 𑀉𑀧𑁆𑀧𑀺𑀮𑀯𑀢𑀁 𑀅𑀮𑁄𑀪𑁂𑀦 𑀓𑀼𑀲𑀮𑀫𑀽𑀮𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀫𑁄𑀳𑀧𑀓𑁆𑀔𑁄, 𑀢𑀁 𑀅𑀫𑁄𑀳𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀤𑁄𑀲𑁄 𑀘 𑀣𑀺𑀦𑀫𑀺𑀤𑁆𑀥𑀜𑁆𑀘 𑀤𑁄𑀲𑀧𑀓𑁆𑀔𑁄, 𑀢𑀁 𑀅𑀤𑁄𑀲𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺.

𑀢𑀢𑁆𑀣 𑀅𑀮𑁄𑀪𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺. 𑀢𑀢𑁆𑀣 𑀅𑀤𑁄𑀲𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺. 𑀢𑀢𑁆𑀣 𑀅𑀫𑁄𑀳𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺. 𑀢𑀢𑁆𑀣 𑀅𑀮𑁄𑀪𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀓𑀸𑀫𑁂𑀳𑀺. 𑀢𑀢𑁆𑀣 𑀅𑀤𑁄𑀲𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀫𑁄𑀳𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀘 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

𑀯𑀺𑀢𑀓𑁆𑀓𑀸𑀢𑀺 𑀢𑀬𑁄 𑀯𑀺𑀢𑀓𑁆𑀓𑀸 𑁋 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀢𑁆𑀣 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀧𑀝𑀺𑀮𑀤𑁆𑀥𑀲𑁆𑀲 𑀯𑀺𑀘𑀭𑀡𑀁 𑀯𑀺𑀘𑀸𑀭𑁄. 𑀬𑀣𑀸 𑀧𑀼𑀭𑀺𑀲𑁄 𑀤𑀽𑀭𑀢𑁄 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺 𑀆𑀕𑀘𑁆𑀙𑀦𑁆𑀢𑀁, 𑀦 𑀘 𑀢𑀸𑀯 𑀚𑀸𑀦𑀸𑀢𑀺 𑀏𑀲𑁄 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀬𑀤𑀸 𑀢𑀼 𑀧𑀝𑀺𑀮𑀪𑀢𑀺 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀏𑀯𑀁 𑀯𑀡𑁆𑀡𑁄𑀢𑀺 𑀯𑀸 𑀏𑀯𑀁 𑀲𑀡𑁆𑀞𑀸𑀦𑁄𑀢𑀺 𑀯𑀸 𑀇𑀫𑁂 𑀯𑀺𑀢𑀓𑁆𑀓𑀬𑀦𑁆𑀢𑁄 𑀉𑀢𑁆𑀢𑀭𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑀺 𑀓𑀺𑀁 𑀦𑀼 𑀔𑁄 𑀅𑀬𑀁 𑀲𑀻𑀮𑀯𑀸 𑀉𑀤𑀸𑀳𑀼 𑀤𑀼𑀲𑁆𑀲𑀻𑀮𑁄 𑀅𑀟𑁆𑀠𑁄 𑀯𑀸 𑀤𑀼𑀕𑁆𑀕𑀢𑁄𑀢𑀺 𑀯𑀸. 𑀏𑀯𑀁 𑀯𑀺𑀘𑀸𑀭𑁄 𑀯𑀺𑀢𑀓𑁆𑀓𑁂 𑀅𑀧𑁆𑀧𑁂𑀢𑀺, 𑀯𑀺𑀘𑀸𑀭𑁄 𑀘𑀭𑀺𑀬𑀢𑀺 𑀘 𑀅𑀦𑀼𑀯𑀢𑁆𑀢𑀢𑀺 𑀘. 𑀬𑀣𑀸 𑀧𑀓𑁆𑀔𑀻 𑀧𑀼𑀩𑁆𑀩𑀁 𑀆𑀬𑀽𑀳𑀢𑀺 𑀧𑀘𑁆𑀙𑀸 𑀦𑀸𑀬𑀽𑀳𑀢𑀺 𑀬𑀣𑀸 𑀆𑀬𑀽𑀳𑀦𑀸 𑀏𑀯𑀁 𑀯𑀺𑀢𑀓𑁆𑀓𑁄, 𑀬𑀣𑀸 𑀧𑀓𑁆𑀔𑀸𑀦𑀁 𑀧𑀲𑀸𑀭𑀡𑀁 𑀏𑀯𑀁 𑀯𑀺𑀘𑀸𑀭𑁄 𑀅𑀦𑀼𑀧𑀸𑀮𑀢𑀺 𑀯𑀺𑀢𑀓𑁆𑀓𑁂𑀢𑀺 𑀯𑀺𑀘𑀭𑀢𑀺 𑀯𑀺𑀘𑀸𑀭𑁂𑀢𑀺. 𑀯𑀺𑀢𑀓𑁆𑀓𑀬𑀢𑀺 𑀯𑀺𑀢𑀓𑁆𑀓𑁂𑀢𑀺, 𑀅𑀦𑀼𑀯𑀺𑀘𑀭𑀢𑀺 𑀯𑀺𑀘𑀸𑀭𑁂𑀢𑀺. 𑀓𑀸𑀫𑀲𑀜𑁆𑀜𑀸𑀬 𑀧𑀝𑀺𑀧𑀓𑁆𑀔𑁄 𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬 𑀯𑀺𑀳𑀺𑀁𑀲𑀲𑀜𑁆𑀜𑀸𑀬 𑀘 𑀧𑀝𑀺𑀧𑀓𑁆𑀔𑁄 𑀯𑀺𑀘𑀸𑀭𑁄. 𑀯𑀺𑀢𑀓𑁆𑀓𑀸𑀦𑀁 𑀓𑀫𑁆𑀫𑀁 𑀅𑀓𑀼𑀲𑀮𑀲𑁆𑀲 𑀅𑀫𑀦𑀲𑀺𑀓𑀸𑀭𑁄, 𑀯𑀺𑀘𑀸𑀭𑀸𑀦𑀁 𑀓𑀫𑁆𑀫𑀁 𑀚𑁂𑀝𑁆𑀞𑀸𑀦𑀁 𑀲𑀁𑀯𑀸𑀭𑀡𑀸. 𑀬𑀣𑀸 𑀧𑀮𑀺𑀓𑁄 𑀢𑀼𑀡𑁆𑀳𑀺𑀓𑁄 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺 𑀏𑀯𑀁 𑀯𑀺𑀢𑀓𑁆𑀓𑁄, 𑀬𑀣𑀸 𑀢𑀁𑀬𑁂𑀯 𑀅𑀦𑀼𑀧𑀲𑁆𑀲𑀢𑀺 𑀏𑀯𑀁 𑀯𑀺𑀘𑀸𑀭𑁄. 𑀬𑀣𑀸 𑀅𑀧𑀭𑀺𑀜𑁆𑀜𑀸 𑀏𑀯𑀁 𑀯𑀺𑀢𑀓𑁆𑀓𑁄. 𑀬𑀣𑀸 𑀧𑀭𑀺𑀜𑁆𑀜𑀸 𑀏𑀯𑀁 𑀯𑀺𑀘𑀸𑀭𑁄. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀘 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀘 𑀯𑀺𑀢𑀓𑁆𑀓𑁄, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀘 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀘 𑀯𑀺𑀘𑀸𑀭𑁄. 𑀓𑀮𑁆𑀮𑀺𑀢𑀸 𑀓𑁄𑀲𑀮𑁆𑀮𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀯𑀺𑀢𑀓𑁆𑀓𑁄, 𑀅𑀪𑀺𑀦𑀻𑀳𑀸𑀭𑀓𑁄𑀲𑀮𑁆𑀮𑀁 𑀘𑀺𑀢𑁆𑀢𑀲𑁆𑀲 𑀯𑀺𑀘𑀸𑀭𑁄. 𑀇𑀤𑀁 𑀓𑀼𑀲𑀮𑀁 𑀇𑀤𑀁 𑀅𑀓𑀼𑀲𑀮𑀁 𑀇𑀤𑀁 𑀪𑀸𑀯𑁂𑀢𑀩𑁆𑀩𑀁 𑀇𑀤𑀁 𑀧𑀳𑀸𑀢𑀩𑁆𑀩𑀁 𑀇𑀤𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑁆𑀢𑀺 𑀯𑀺𑀢𑀓𑁆𑀓𑁄, 𑀬𑀣𑀸 𑀧𑀳𑀸𑀦𑀜𑁆𑀘 𑀪𑀸𑀯𑀦𑀸 𑀘 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀏𑀯𑀁 𑀯𑀺𑀘𑀸𑀭𑁄. 𑀇𑀫𑁂𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀞𑀺𑀢𑀲𑁆𑀲 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘; 𑀤𑀼𑀯𑀺𑀥𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘. 𑀇𑀢𑀺 𑀯𑀺𑀢𑀓𑁆𑀓𑀚𑀦𑀺𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀧𑀻𑀢𑀺 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀺𑀓𑁄𑀬𑁂𑀯. 𑀬𑀸 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸, 𑀅𑀬𑀁 𑀲𑀫𑀸𑀥𑀺. 𑀇𑀢𑀺 𑀧𑀞𑀫𑀁 𑀛𑀸𑀦𑀁 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁.

𑀢𑁂𑀲𑀁𑀬𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀪𑀺𑀓𑁆𑀔𑀡𑀁 𑀆𑀲𑁂𑀯𑀦𑀸𑀬 𑀢𑀲𑁆𑀲 𑀢𑀧𑁆𑀧𑁄𑀡𑀫𑀸𑀦𑀲𑀁 𑀳𑁄𑀢𑀺. 𑀢𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀑𑀴𑀸𑀭𑀺𑀓𑀸 𑀔𑀸𑀬𑀦𑁆𑀢𑀺. 𑀬𑀜𑁆𑀘 𑀧𑀻𑀢𑀺𑀲𑀼𑀔𑀜𑁆𑀘 𑀦𑁂𑀓𑁆𑀔𑀫𑁆𑀫𑀜𑁆𑀘 𑀑𑀴𑀸𑀭𑀺𑀓𑀁 𑀪𑀯𑀢𑀺. 𑀅𑀧𑀺 𑀘 𑀲𑀫𑀸𑀥𑀺𑀚𑀸 𑀧𑀻𑀢𑀺 𑀭𑀢𑀺 𑀘 𑀚𑀸𑀬𑀢𑀺. 𑀢𑀲𑁆𑀲 𑀯𑀺𑀘𑀸𑀭𑀸𑀭𑀫𑁆𑀫𑀡𑀁. 𑀢𑁂𑀲𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄 𑀲𑀫𑁆𑀧𑀲𑀻𑀤𑀢𑀺. 𑀬𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑁆𑀯𑁂 𑀥𑀫𑁆𑀫𑀸𑀦𑀼𑀲𑁆𑀲𑀭𑀺𑀢𑀩𑁆𑀩𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀤𑀭𑀡𑀺𑀢𑀩𑁆𑀩𑀁. 𑀢𑁂𑀲𑀁 𑀯𑀽𑀧𑀲𑀫𑀸 𑀏𑀓𑁄𑀤𑀺𑀪𑀸𑀯𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀳𑁄𑀢𑀺. 𑀢𑀲𑁆𑀲 𑀏𑀓𑁄𑀤𑀺𑀪𑀸𑀯𑁂𑀦 𑀧𑀻𑀢𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀬𑀸 𑀧𑀻𑀢𑀺, 𑀢𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀬𑀁 𑀲𑀼𑀔𑀁, 𑀢𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁. 𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀲𑀫𑀸𑀥𑀺. 𑀢𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀲𑁄 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀬𑀸𑀢𑀺 𑀑𑀚𑀳𑀺 𑀚𑀮𑁆𑀮𑀲𑀳𑀕𑀢𑀁.

𑁭𑁩. 𑀢𑀢𑁆𑀣 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀫𑀼𑀧𑀸𑀤𑀸𑀦𑀦𑁆𑀢𑀺 𑀘 𑀲𑁄 𑀢𑀁 𑀯𑀺𑀘𑀺𑀦𑀦𑁆𑀢𑁄 𑀉𑀧𑁂𑀓𑁆𑀔𑀫𑁂𑀯 𑀫𑀦𑀲𑀺𑀓𑀭𑁄𑀢𑀺. 𑀲𑁄 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺. 𑀬𑀣𑀸 𑀘 𑀧𑀻𑀢𑀺𑀬𑀸 𑀲𑀼𑀔𑀫𑀸𑀦𑀺𑀢𑀁, 𑀢𑀁 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑀫𑁆𑀧𑀚𑀸𑀦𑁄 𑀯𑀺𑀳𑀭𑀢𑀺. 𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀉𑀧𑁂𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀇𑀤𑀁 𑀢𑀢𑀺𑀬𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁.

𑀢𑀣𑀸 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲 𑀧𑀳𑀸𑀦𑀸𑀬 𑀧𑀞𑀫𑁂 𑀛𑀸𑀦𑁂 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀢𑀺. 𑀤𑀼𑀢𑀺𑀬𑁂 𑀛𑀸𑀦𑁂 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀢𑀺. 𑀲𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀢𑁆𑀣 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀉𑀧𑁂𑀓𑁆𑀔𑀸 𑀧𑀲𑀸𑀤𑀸 𑀳𑁄𑀢𑀺, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀘. 𑀢𑁂𑀲𑀁 𑀦𑀺𑀭𑁄𑀥𑀸 𑀉𑀧𑁂𑀓𑁆𑀔𑀸𑀲𑀫𑁆𑀧𑀚𑀜𑁆𑀜𑀁 𑀳𑁄𑀢𑀺, 𑀢𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀘 𑀅𑀲𑀢𑀺 𑀳𑁄𑀢𑀺, 𑀢𑁂𑀲𑀁 𑀦𑀺𑀭𑁄𑀥𑀸 𑀲𑀢𑀺𑀫𑀸 𑀳𑁄𑀢𑀺, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀘 𑀅𑀲𑀫𑁆𑀧𑀚𑀜𑁆𑀜𑀁, 𑀢𑁂𑀲𑀁 𑀦𑀺𑀭𑁄𑀥𑀸 𑀲𑀫𑁆𑀧𑀚𑀜𑁆𑀜𑀁 𑀳𑁄𑀢𑀺, 𑀇𑀢𑀺 𑀉𑀧𑁂𑀓𑁆𑀔𑀸𑀬 𑀘 𑀲𑀜𑁆𑀜𑀸, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘 𑀇𑀤𑀁 𑀯𑀼𑀘𑁆𑀘𑀢𑁂 𑀘 𑀘𑀢𑀼𑀢𑁆𑀣𑀁 𑀛𑀸𑀦𑀁.

𑀢𑀢𑁆𑀣 𑀬𑁄 𑀭𑀸𑀕𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘; 𑀬𑁄 𑀤𑁄𑀲𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘; 𑀬𑁄 𑀫𑁄𑀳𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀅𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘.

𑀢𑀢𑁆𑀣 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑀺𑀬𑁂 𑀛𑀸𑀦𑁂 𑀘𑀢𑀼𑀢𑁆𑀣𑁂 𑀘 𑀅𑀦𑀼𑀦𑀬𑁄 𑀦𑀺𑀭𑀼𑀚𑁆𑀛𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀧𑀞𑀫𑁂 𑀛𑀸𑀦𑁂 𑀤𑀼𑀢𑀺𑀬𑁂 𑀘 𑀧𑀝𑀺𑀖𑀁 𑀦𑀺𑀭𑀼𑀚𑁆𑀛𑀢𑀺, 𑀫𑁄𑀳𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀞𑀫𑁂 𑀛𑀸𑀦𑁂 𑀤𑀼𑀢𑀺𑀬𑁂 𑀘 𑀅𑀲𑀫𑁆𑀧𑀚𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀢𑀺𑀬𑁂 𑀛𑀸𑀦𑁂 𑀘𑀢𑀼𑀢𑁆𑀣𑁂 𑀘 𑀅𑀲𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀏𑀯𑀫𑁂𑀯 𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑁄𑀤𑀸𑀦𑀁 𑀕𑀫𑀺𑀲𑁆𑀲𑀦𑁆𑀢𑀺.

𑀢𑀢𑁆𑀣 𑀭𑀸𑀕𑀤𑁄𑀲𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀅𑀦𑀼𑀦𑀬𑁄 𑀘 𑀧𑀝𑀺𑀖𑀜𑁆𑀘, 𑀢𑁂𑀦 𑀳𑀸𑀦𑀪𑀸𑀕𑀺𑀬𑀁 [𑀧𑀳𑀸𑀦𑀪𑀸𑀕𑀺𑀬𑀁 (𑀧𑀻. 𑀓.)] 𑀛𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀭𑀸𑀕𑀫𑁄𑀳𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀦𑀬𑀢𑁆𑀢𑀁 𑀘 𑀆𑀤𑀻𑀦𑀯𑀁 𑀤𑀲𑁆𑀲𑀺𑀢𑀸, 𑀢𑀁 𑀢𑀲𑁆𑀲 𑀳𑀸𑀦𑀪𑀸𑀕𑀺𑀬𑀁 𑀛𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀤𑁄𑀲𑀫𑁄𑀳𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀖𑁄 𑀘 𑀅𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀆𑀤𑀻𑀦𑀯𑀁 𑀤𑀲𑁆𑀲𑀺𑀢𑀸 𑀢𑁂𑀦 𑀢𑀲𑁆𑀲 𑀳𑀸𑀦𑀪𑀸𑀕𑀺𑀬𑀁 𑀛𑀸𑀦𑀁 𑀳𑁄𑀢𑀺.

𑀢𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀲𑀫𑀪𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀬𑀁 𑀛𑀸𑀦𑀁 𑀳𑁄𑀢𑀺, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀢𑁆𑀢𑀲𑀼 𑀧𑀼𑀕𑁆𑀕𑀮𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀘𑀢𑀽𑀲𑀼 𑀘 𑀲𑀫𑀸𑀥𑀻𑀲𑀼 𑀙𑀦𑁆𑀤𑀲𑀫𑀸𑀥𑀺𑀦𑀸 𑀧𑀞𑀫𑀁 𑀛𑀸𑀦𑀁, 𑀯𑀻𑀭𑀺𑀬𑀲𑀫𑀸𑀥𑀺𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁, 𑀘𑀺𑀢𑁆𑀢𑀲𑀫𑀸𑀥𑀺𑀦𑀸 𑀢𑀢𑀺𑀬𑀁 𑀛𑀸𑀦𑀁, 𑀯𑀻𑀫𑀁𑀲𑀸𑀲𑀫𑀸𑀥𑀺𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀅𑀧𑁆𑀧𑀡𑀺𑀳𑀺𑀢𑁂𑀦 𑀧𑀞𑀫𑀁 𑀛𑀸𑀦𑀁, 𑀲𑀼𑀜𑁆𑀜𑀢𑀸𑀬 𑀤𑀼𑀢𑀺𑀬𑀁 𑀛𑀸𑀦𑀁, 𑀅𑀦𑀺𑀫𑀺𑀢𑁆𑀢𑁂𑀦 𑀢𑀢𑀺𑀬𑀁 𑀛𑀸𑀦𑀁, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀓𑀸𑀫𑀯𑀺𑀢𑀓𑁆𑀓𑀩𑁆𑀬𑀸𑀧𑀸𑀤𑀸𑀦𑀜𑁆𑀘 𑀢𑀁 𑀢𑀁 𑀯𑀽𑀧𑀲𑀫𑁂𑀦 𑀧𑀞𑀫𑀁 𑀛𑀸𑀦𑀁 𑀳𑁄𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁂𑀦 𑀤𑀼𑀢𑀺𑀬𑀁 𑀛𑀸𑀦𑀁, 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀽𑀧𑀲𑀫𑁂𑀦 𑀢𑀢𑀺𑀬𑀁 𑀛𑀸𑀦𑀁, 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁂𑀦 𑀘𑀢𑀼𑀢𑁆𑀣𑀁 𑀛𑀸𑀦𑀜𑁆𑀘. 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀧𑀞𑀫𑀁 𑀛𑀸𑀦𑀁, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀤𑀼𑀢𑀺𑀬𑀁 𑀛𑀸𑀦𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦 𑀢𑀢𑀺𑀬𑀁 𑀛𑀸𑀦𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑁂𑀦 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀗𑁆𑀔𑁂𑀧𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀢𑁆𑀣 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀅𑀦𑀼𑀯𑀢𑁆𑀢𑀦𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀢𑁆𑀣 𑀬𑁄 𑀧𑀞𑀫𑀁 𑀛𑀸𑀦𑀁 𑀦𑀺𑀲𑁆𑀲𑀸𑀬 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀧𑀝𑀺𑀧𑀓𑁆𑀔𑁂𑀦. 𑀬𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀦𑀺𑀲𑁆𑀲𑀸𑀬 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀧𑀝𑀺𑀧𑀓𑁆𑀔𑁂𑀦. 𑀬𑁄 𑀢𑀢𑀺𑀬𑀁 𑀛𑀸𑀦𑀁 𑀦𑀺𑀲𑁆𑀲𑀸𑀬 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀧𑀝𑀺𑀧𑀓𑁆𑀔𑁂𑀦. 𑀬𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀦𑀺𑀲𑁆𑀲𑀸𑀬 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀲𑀼𑀔𑀺𑀦𑁆𑀤𑁆𑀭𑀺𑀬𑀧𑀝𑀺𑀧𑀓𑁆𑀔𑁂𑀦 𑀕𑀢𑁄.

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄.

𑁭𑁪. 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀢𑁂𑀲𑀁 𑀛𑀸𑀦𑀸𑀦𑀁 𑀇𑀫𑀸𑀦𑀺 𑀅𑀗𑁆𑀕𑀸𑀦𑀺, 𑀢𑁂𑀲𑀁 𑀅𑀗𑁆𑀕𑀸𑀦𑀁 𑀲𑀫𑀽𑀳𑁄 [𑀲𑀫𑁆𑀫𑁄𑀳𑁄 (𑀧𑀻. 𑀓.)] 𑀅𑀲𑁆𑀲 𑀅𑀗𑁆𑀕𑀸, 𑀅𑀬𑀁 𑀛𑀸𑀦𑀪𑀽𑀫𑀺 𑀓𑁄 𑀯𑀺𑀲𑁂𑀲𑁄𑀢𑀺 𑀅𑀲𑁆𑀲 𑀯𑀺𑀲𑁂𑀲𑁄. 𑀇𑀫𑁂 𑀲𑀫𑁆𑀪𑀸𑀭𑀸 𑀢𑁂𑀳𑀺 𑀅𑀬𑀁 𑀲𑀫𑀼𑀤𑀸𑀕𑀫𑁄, 𑀢𑀲𑁆𑀲 𑀲𑀫𑀼𑀤𑀸𑀕𑀫𑀲𑁆𑀲 𑀅𑀬𑀁 𑀉𑀧𑀦𑀺𑀲𑀸, 𑀢𑀸𑀬 𑀉𑀧𑀦𑀺𑀲𑀸𑀬 𑀅𑀬𑀁 𑀪𑀸𑀯𑀦𑀸. 𑀢𑀲𑁆𑀲𑀸 𑀪𑀸𑀯𑀦𑀸𑀬 𑀅𑀬𑀁 𑀆𑀤𑀻𑀦𑀯𑁄. 𑀢𑁂𑀦 𑀅𑀬𑀁 𑀧𑀭𑀺𑀳𑀸𑀦𑀺. 𑀓𑀲𑁆𑀲 𑀧𑀭𑀺𑀳𑀸𑀦𑀻𑀢𑀺 𑀢𑀤𑀼𑀧𑀕𑀚𑁆𑀛𑀸𑀬𑀺𑀦𑁄 [𑀢𑀤𑀼𑀧𑀓𑀚𑁆𑀛𑀸𑀬𑀺𑀦𑁄 (𑀧𑀻. 𑀓.)]. 𑀢𑀁 𑀬𑀣𑀸 𑀪𑀡𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀬𑀁 𑀯𑀺𑀲𑁂𑀲𑁄. 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀬𑀁 𑀅𑀲𑁆𑀲𑀸𑀤𑁄, 𑀲𑁄 𑀓𑀲𑁆𑀲 𑀅𑀲𑁆𑀲𑀸𑀤𑁄 𑀅𑀛𑀸𑀦𑀺𑀬𑀸 𑀛𑀸𑀬𑀺𑀦𑁄, 𑀢𑀲𑁆𑀲𑀸 𑀅𑀛𑀸𑀦𑀺𑀬𑀸 𑀛𑀸𑀬𑀺𑀦𑁄, 𑀇𑀤𑀁 𑀓𑀮𑁆𑀮𑀺𑀢𑀸 𑀓𑁄𑀲𑀮𑁆𑀮𑁂 𑀞𑀺𑀢𑀚𑁆𑀛𑀸𑀦𑀁 𑀅𑀦𑁄𑀫𑀤𑁆𑀤𑀺𑀬𑀢𑀁 𑀕𑀘𑁆𑀙𑀢𑀺 𑀛𑀸𑀦𑀩𑀮𑀁, 𑀛𑀸𑀦𑀩𑀮𑁂 𑀞𑀺𑀢𑀲𑁆𑀲 𑀅𑀬𑀁 𑀧𑀸𑀭𑀫𑀺𑀧𑁆𑀧𑀢𑁆𑀢𑀲𑁆𑀲 𑀇𑀫𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀞𑀫𑁂 𑀛𑀸𑀦𑁂 𑀛𑀸𑀦𑀗𑁆𑀕𑀸𑀦𑀺 𑀪𑀸𑀯𑀻. 𑀲𑁄 𑀧𑀻𑀢𑀺 𑀢𑀤𑀦𑀼𑀲𑀸𑀭𑀺𑀢𑁆𑀢𑀸𑀯 𑀧𑀞𑀫𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁 𑀢𑀲𑁆𑀲𑀗𑁆𑀕𑀼𑀦𑁄 𑀘 𑀥𑀫𑁆𑀫𑀸 𑀢𑀤𑀪𑀺𑀲𑀦𑁆𑀦𑀺𑀢𑀸𑀬 𑀘. 𑀧𑀻𑀢𑀺 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀥𑀫𑁆𑀫𑀢𑀸 𑀔𑁄 𑀧𑀦 𑀢𑀣𑀸 𑀧𑀯𑀢𑁆𑀢𑀲𑁆𑀲 𑀲𑀳𑀕𑀢𑀁 𑀛𑀸𑀦𑀗𑁆𑀕𑀥𑀫𑁆𑀫𑀁 𑀲𑀲𑀼𑀔𑀢𑀸𑀬 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑁄 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁 𑀫𑀦𑁄𑀲𑀫𑁆𑀧𑀲𑀸𑀤𑀦𑀢𑀸𑀬 𑀢𑀤𑀪𑀺𑀲𑀦𑁆𑀦𑀺𑀢𑀸𑀬 𑀘. 𑀧𑀻𑀢𑀺 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀲𑀫𑀸𑀥𑀺𑀢𑀸 [𑀲𑀫𑀸𑀥𑀺𑀓𑀸 (𑀧𑀻.)] 𑀧𑀻𑀢𑀺 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁, 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑁄 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁, 𑀉𑀧𑁂𑀓𑁆𑀔𑀸 𑀨𑀲𑁆𑀲𑀢𑀸 𑀢𑀢𑀺𑀬𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁, 𑀲𑀼𑀔𑀁 𑀢𑀲𑁆𑀲 𑀅𑀗𑁆𑀕𑀦𑁆𑀢𑀺 𑀘. 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑁄 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁, 𑀉𑀧𑁂𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁, 𑀅𑀪𑀺𑀦𑀺𑀲𑀸𑀪𑀽𑀫𑀺 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁. 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺 𑀘 𑀅𑀦𑁂𑀓𑀚𑁆𑀛𑀸𑀪𑀽𑀫𑀻𑀲𑀼 𑀛𑀸𑀦𑀗𑁆𑀕𑀲𑀫𑀸𑀬𑀼𑀢𑁆𑀢𑀸 𑀧𑀻𑀢𑀺 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑁄 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀛𑀸𑀦𑀗𑁆𑀕𑀁.

𑀢𑀢𑁆𑀣 𑀓𑀢𑀫𑀸 𑀛𑀸𑀦𑀪𑀽𑀫𑀺? 𑀲𑀯𑀺𑀢𑀓𑁆𑀓𑁂 𑀲𑀯𑀺𑀘𑀸𑀭𑁂 𑀯𑀺𑀯𑁂𑀓𑀸 𑀅𑀦𑀼𑀕𑀢𑀸 𑀧𑀞𑀫𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀚𑀦𑀺𑀢𑀁 𑀧𑀻𑀢𑀺𑀫𑀦𑀼𑀕𑀢𑀸 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀲𑀼𑀔𑀲𑀸𑀢𑀲𑀫𑁄𑀳𑀺𑀢𑀸 𑀲𑀧𑁆𑀧𑀻𑀢𑀺𑀓𑀸 𑀢𑀢𑀺𑀬𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀢𑀲𑁆𑀲 𑀲𑀼𑀔𑀤𑀼𑀓𑁆𑀔𑀲𑀳𑀕𑀢𑀸 𑀅𑀪𑀺𑀦𑀻𑀳𑀸𑀭𑀲𑀳𑀕𑀢𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀅𑀧𑁆𑀧𑀫𑀸𑀡𑀲𑀳𑀕𑀢𑀸 𑀲𑀢𑁆𑀢𑀸𑀭𑀫𑁆𑀫𑀡𑀸 𑀧𑀞𑀫𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀅𑀪𑀺𑀪𑀽𑀫𑀺𑀆𑀬𑀢𑀦𑀲𑀳𑀕𑀢𑀸 𑀭𑀽𑀧𑀲𑀜𑁆𑀜𑀻𑀲𑀼 𑀤𑀼𑀢𑀺𑀬𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀯𑀺𑀫𑁄𑀓𑁆𑀔𑀲𑀳𑀕𑀢𑀸𑀦𑀁 𑀯𑀺𑀫𑁄𑀓𑁆𑀔𑁂𑀲𑀼 𑀢𑀢𑀺𑀬𑁂 𑀛𑀸𑀦𑁂 𑀛𑀸𑀦𑀪𑀽𑀫𑀺. 𑀅𑀦𑀼𑀧𑀲𑁆𑀲𑀦𑀸𑀲𑀳𑀕𑀢𑀸 𑀓𑀸𑀬𑀲𑀗𑁆𑀔𑀸𑀭𑀸 𑀲𑀫𑁆𑀫𑀸 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀪𑀽𑀫𑀺.

𑁭𑁫. 𑀢𑀢𑁆𑀣 𑀓𑀢𑀫𑁂 𑀛𑀸𑀦𑀯𑀺𑀲𑁂𑀲𑀸? 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀳𑀕𑀢𑀸 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑀸𑀧𑀺, 𑀅𑀬𑀁 𑀛𑀸𑀦𑀯𑀺𑀲𑁂𑀲𑁄. 𑀅𑀯𑀺𑀢𑀓𑁆𑀓𑀸 𑀘𑁂𑀯 𑀅𑀯𑀺𑀘𑀸𑀭𑀸 𑀘 𑀲𑀧𑁆𑀧𑀻𑀢𑀺𑀓𑀸𑀬 𑀲𑀢𑀺𑀲𑀳𑀕𑀢𑀸𑀬 𑀧𑀻𑀢𑀺𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀅𑀬𑀁 𑀛𑀸𑀦𑀯𑀺𑀲𑁂𑀲𑁄. 𑀅𑀯𑀺𑀢𑀓𑁆𑀓𑀸𑀬 𑀪𑀽𑀫𑀺𑀬𑀸 𑀅𑀯𑀺𑀘𑀸𑀭𑁂𑀬𑁂𑀯 𑀲𑀢𑀺 𑀅𑀦𑀼𑀕𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀤𑀦𑀼𑀥𑀫𑁆𑀫𑀢𑀸𑀬 𑀘 𑀲𑀢𑀺 𑀲𑀡𑁆𑀟𑀳𑀢𑀺 [𑀲𑀦𑁆𑀤𑀳𑀢𑀺 (𑀧𑀻.)]. 𑀢𑀜𑁆𑀘 𑀪𑀽𑀫𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀛𑀸𑀦𑀯𑀺𑀲𑁂𑀲𑁄. 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀜𑁆𑀘 𑀪𑀽𑀫𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀛𑀸𑀦𑀯𑀺𑀲𑁂𑀲𑁄. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀳𑀕𑀢𑀸𑀬 𑀪𑀽𑀫𑀺𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀜𑁆𑀘 𑀪𑀽𑀫𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀛𑀸𑀦𑀯𑀺𑀲𑁂𑀲𑁄.

𑀛𑀸𑀦𑀲𑀫𑁆𑀪𑀸𑀭𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀲𑀫𑁆𑀪𑀸𑀭𑁄 𑀓𑀸𑀫𑀯𑀺𑀢𑀓𑁆𑀓𑀯𑀺𑀦𑁄𑀤𑀦𑀸𑀥𑀺𑀧𑁆𑀧𑀸𑀬𑀢𑀸. 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀲𑀫𑁆𑀪𑀸𑀭𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀧𑀝𑀺𑀯𑀺𑀦𑁄𑀤𑀦𑀸𑀥𑀺𑀧𑁆𑀧𑀸𑀬𑀢𑀸. 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀫𑁆𑀪𑀸𑀭𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀧𑀝𑀺𑀯𑀺𑀦𑁄𑀤𑀦𑀸𑀥𑀺𑀧𑁆𑀧𑀸𑀬𑀢𑀸. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀅𑀧𑁆𑀧𑀺𑀘𑁆𑀙𑀢𑀸 𑀲𑀫𑁆𑀪𑀸𑀭𑁄 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀘𑀢𑀼𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑁆𑀪𑀸𑀭𑁄 𑀅𑀓𑀫𑁆𑀫𑀲𑁆𑀲 𑀯𑀺𑀳𑀸𑀭𑀺𑀢𑀸. 𑀫𑀕𑁆𑀕𑀲𑀫𑁆𑀪𑀸𑀭𑁄 𑀲𑀫𑀸𑀧𑀢𑁆𑀢𑀺𑀧𑀚𑁆𑀚𑀦𑀢𑀸. 𑀨𑀮𑀲𑀫𑁆𑀪𑀸𑀭𑁄 𑀛𑀸𑀦𑀦𑀺𑀩𑁆𑀩𑀢𑁆𑀢𑀺𑀢𑀸𑀬 𑀛𑀸𑀦𑀲𑀫𑀼𑀤𑀸𑀕𑀫𑁄. 𑀓𑀼𑀲𑀮𑀳𑁂𑀢𑀼 𑀬𑀁 𑀛𑀸𑀦𑀁 𑀲𑀫𑀼𑀤𑀬𑀁 𑀕𑀘𑁆𑀙𑀦𑁆𑀢𑀺 𑀓𑁄 𑀘 [𑀓𑁄𑀘𑀺 (𑀓.)] 𑀦 𑀓𑀼𑀢𑁄𑀘𑀺 𑀦𑁂𑀓𑁆𑀔𑀫𑁆𑀫𑀧𑁆𑀧𑀢𑁆𑀢𑀸 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀆𑀮𑀫𑁆𑀩𑀦𑀺𑀭𑁄𑀥𑀲𑀫𑀸𑀥𑀺 𑀲𑀦𑁆𑀢𑁄 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀅𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀳𑀸𑀦𑀸𑀬 𑀢𑁂 𑀘 𑀅𑀩𑁆𑀬𑀸𑀧𑀚𑁆𑀚𑀢𑀸𑀬 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀢𑀁 𑀧𑀦 𑀲𑀦𑁆𑀥𑀸𑀬 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀅𑀧𑀭𑀺𑀤𑀸𑀳𑀦𑀸𑀬 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀜𑀸𑀡𑀲𑀫𑀼𑀤𑀸𑀕𑀫𑁄.

𑁭𑁬. 𑀢𑀢𑁆𑀣 𑀓𑀢𑀫𑀸 𑀉𑀧𑀦𑀺𑀲𑀸? 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀛𑀸𑀦𑀲𑁆𑀲 𑀉𑀧𑀦𑀺𑀲𑀸. 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸 𑀛𑀸𑀦𑀲𑁆𑀲 𑀉𑀧𑀦𑀺𑀲𑀸. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀛𑀸𑀦𑀲𑁆𑀲 𑀉𑀧𑀦𑀺𑀲𑀸. 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀛𑀸𑀦𑀲𑁆𑀲 𑀉𑀧𑀦𑀺𑀲𑀸. 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀛𑀸𑀦𑀲𑁆𑀲 𑀉𑀧𑀦𑀺𑀲𑀸. 𑀲𑀁𑀯𑁂𑀚𑀦𑀺𑀬𑁂 𑀞𑀸𑀦𑁂 𑀲𑀁𑀯𑀺𑀕𑁆𑀕𑀲𑁆𑀲 𑀬𑁄𑀦𑀺𑀲𑁄 𑀧𑀥𑀸𑀦𑀁. 𑀅𑀬𑀁 𑀛𑀸𑀦𑁄𑀧𑀦𑀺𑀲𑀸.

𑀢𑀢𑁆𑀣 𑀓𑀢𑀫𑀸 𑀪𑀸𑀯𑀦𑀸? 𑀫𑁂𑀢𑁆𑀢𑀸𑀲𑁂𑀯𑀦𑀸 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀪𑀸𑀯𑀦𑀸. 𑀓𑀭𑀼𑀡𑀸𑀲𑁂𑀯𑀦𑀸 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀪𑀸𑀯𑀦𑀸. 𑀫𑀼𑀤𑀺𑀢𑀸𑀪𑀸𑀯𑀦𑀸 𑀧𑀻𑀢𑀺𑀲𑀼𑀔𑀲𑀫𑁆𑀧𑀚𑀜𑁆𑀜𑀸 𑀓𑀸𑀭𑀺𑀢𑀸. 𑀉𑀧𑁂𑀓𑁆𑀔𑀸𑀪𑀸𑀯𑀦𑀸 𑀧𑀲𑁆𑀲𑀯𑀢𑀸 𑀉𑀧𑁂𑀓𑁆𑀔𑀸𑀪𑀸𑀯𑀦𑀸 𑀅𑀧𑀲𑁆𑀲𑀯𑀢𑀸 𑀉𑀧𑁂𑀓𑁆𑀔𑀸 𑀘 𑀅𑀚𑁆𑀛𑀼𑀧𑁂𑀓𑁆𑀔𑀸 𑀘, 𑀅𑀲𑀼𑀪𑀲𑀜𑁆𑀜𑀸𑀪𑀸𑀯𑀦𑀸 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀪𑀯𑀲𑀦𑁆𑀥𑀸𑀪𑀺𑀜𑁆𑀜𑀸 𑀪𑀯𑀲𑀦𑁆𑀥𑀸𑀦𑀁, 𑀲𑀸 𑀙𑀩𑁆𑀩𑀺𑀥𑀸 𑀪𑀸𑀯𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀯𑀢𑁆𑀣𑀼𑀓𑀢𑀸 𑀬𑀸𑀦𑀻𑀓𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸. 𑀅𑀬𑀁 𑀪𑀸𑀯𑀦𑀸.

𑀏𑀯𑀁 𑀪𑀸𑀯𑀬𑀦𑁆𑀢𑀲𑁆𑀲 𑀅𑀬𑀁 𑀆𑀤𑀻𑀦𑀯𑁄. 𑀧𑀞𑀫𑁂 𑀛𑀸𑀦𑁂 𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀏𑀲𑁄 𑀥𑀫𑁆𑀫𑁄 𑀅𑀲𑁆𑀲𑀼𑀢𑁄 𑀲𑀸𑀲𑀯𑁄. 𑀲𑀘𑁂 𑀏𑀲 𑀥𑀫𑁆𑀫𑁄 𑀅𑀬𑀁 𑀲𑀻𑀮𑁄 𑀆𑀲𑀦𑁆𑀦𑀧𑀝𑀺𑀧𑀓𑁆𑀔𑁄 𑀘 𑀏𑀲 𑀥𑀫𑁆𑀫𑁄 𑀓𑀸𑀫𑁄 𑀧𑀢𑀺𑀘𑀸𑀭𑁄 𑀧𑀢𑀺𑀯𑀺𑀘𑀸𑀭𑁄 𑀲𑀫𑀸𑀧𑀢𑁆𑀢𑀻𑀦𑀁 𑀘 𑀲𑀩𑁆𑀩𑁄𑀴𑀸𑀭𑀺𑀓𑁄 𑀏𑀲 𑀥𑀫𑁆𑀫𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑁄 𑀘. 𑀢𑀢𑁆𑀣 𑀘𑀺𑀢𑁆𑀢𑀁 𑀔𑁄𑀪𑁂𑀦𑁆𑀢𑀺, 𑀓𑀸𑀬𑁄 𑀘𑁂𑀢𑁆𑀣 𑀓𑀺𑀮𑀫𑀢𑀺, 𑀓𑀸𑀬𑀫𑁆𑀳𑀺 𑀘𑁂𑀢𑁆𑀣 𑀓𑀺𑀮𑀦𑁆𑀢𑁂 𑀘𑀺𑀢𑁆𑀢𑀁 𑀯𑀺𑀳𑀜𑁆𑀜𑀢𑀺. 𑀅𑀦𑀪𑀺𑀦𑀻𑀳𑀸𑀭𑀓𑁆𑀔𑀫𑁄𑀯 𑀅𑀪𑀺𑀜𑁆𑀜𑀸𑀦𑀁 𑀇𑀫𑁂 𑀆𑀤𑀻𑀦𑀯𑀸 𑀧𑀞𑀫𑁂 𑀛𑀸𑀦𑁂.

𑀤𑀼𑀢𑀺𑀬𑁂 𑀛𑀸𑀦𑁂 𑀇𑀫𑁂 𑀆𑀤𑀻𑀦𑀯𑀸 𑀧𑀻𑀢𑀺𑀨𑀭𑀡𑀲𑀳𑀕𑀢𑁄 𑀘 𑀏𑀲𑁄 𑀥𑀫𑁆𑀫𑁄, 𑀦 𑀲𑀫𑀼𑀤𑀸𑀘𑀸𑀭𑀲𑁆𑀲𑁂𑀢𑀺 𑀘𑀺𑀢𑁆𑀢𑀁. 𑀅𑀲𑁄𑀥𑀬𑀁 𑀉𑀧𑀕𑀫𑁄 𑀘𑁂𑀲 𑀥𑀫𑁆𑀫𑁄 𑀉𑀧𑀕𑀫𑀺𑀧𑀭𑀺𑀲𑁆𑀲𑀬𑁄 [𑀉𑀧𑀕𑀫𑀺𑀧𑀭𑀺𑀘𑀬𑁄 (𑀧𑀻.)] 𑀤𑁄𑀫𑀦𑀲𑁆𑀲𑀧𑀘𑁆𑀘𑀢𑁆𑀣𑀺𑀓𑁄 𑀘𑁂𑀲 𑀥𑀫𑁆𑀫𑁄. 𑀢𑀢𑁆𑀣 𑀢𑀢𑁆𑀣 𑀬𑀼𑀢𑁆𑀢𑀻𑀦𑀁 𑀧𑀻𑀢𑀺 𑀧𑀭𑀚𑁆𑀚𑀢𑁄 𑀘𑁂𑀲 𑀥𑀫𑁆𑀫𑁄 𑀤𑀼𑀓𑁆𑀓𑀭𑀁 𑀳𑁄𑀢𑀺, 𑀅𑀯𑀢𑁆𑀢𑀲𑀦𑁆𑀢𑀸𑀲𑀪𑀽𑀫𑀺𑀧𑀭𑀺𑀯𑀚𑁆𑀚𑀬𑀦𑁆𑀢𑁄 𑀘𑀢𑀽𑀲𑀼 𑀤𑀼𑀓𑁆𑀔𑀢𑀸𑀲𑀼 𑀏𑀲 𑀥𑀫𑁆𑀫𑁄 𑀅𑀦𑀼𑀯𑀺𑀤𑁆𑀥𑀸𑀧𑀦𑀲𑀤𑁆𑀥𑀸𑀬 [𑀅𑀦𑀼𑀯𑀺𑀤𑁆𑀥𑀸 𑀧𑀲𑁆𑀲𑀢𑀺𑀬𑀸 (𑀧𑀻.)] 𑀤𑀼𑀓𑁆𑀔𑀢𑀸𑀬 𑀘 𑀦 𑀧𑀮𑀺𑀩𑁄𑀥𑀤𑀼𑀓𑁆𑀔𑀢𑀸𑀬 𑀘 𑀅𑀪𑀺𑀜𑁆𑀜𑀸𑀤𑀼𑀓𑁆𑀔𑀢𑀸𑀬 𑀘 𑀭𑁄𑀕𑀤𑀼𑀓𑁆𑀔𑀢𑀸𑀬 𑀘, 𑀇𑀫𑁂 𑀆𑀤𑀻𑀦𑀯𑀸 𑀤𑀼𑀢𑀺𑀬𑁂 𑀛𑀸𑀦𑁂.

𑀢𑀢𑁆𑀣 𑀓𑀢𑀫𑁂 𑀆𑀤𑀻𑀦𑀯𑀸 𑀢𑀢𑀺𑀬𑁂 𑀛𑀸𑀦𑁂? 𑀉𑀧𑁂𑀓𑁆𑀔𑀸𑀲𑀼𑀔𑀲𑀳𑀕𑀢𑀸𑀬 𑀢𑀢𑁆𑀣 𑀲𑀸𑀢𑀸𑀯𑀻𑀦𑀁 𑀧𑀜𑁆𑀘𑀦𑁆𑀦𑀁 𑀉𑀧𑁂𑀓𑁆𑀔𑀸𑀲𑀼𑀔𑀁 𑀧𑀭𑀺𑀯𑀢𑁆𑀢𑀺𑀢𑁄 𑀏𑀲 𑀥𑀫𑁆𑀫𑁄 𑀢𑁂𑀦 𑀦𑀺𑀘𑁆𑀘𑀲𑀜𑁆𑀜𑀺𑀢𑀸𑀦𑀜𑁆𑀘 𑀬𑀁 𑀳𑁄𑀢𑀺. 𑀤𑀼𑀓𑁆𑀔𑁄𑀧𑀦𑀺𑀬𑀁 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑁄𑀪𑀢𑀁 𑀉𑀧𑀸𑀤𑀸𑀬 𑀲𑀼𑀔𑀤𑀼𑀓𑁆𑀔𑀸𑀬 𑀕𑀢𑁄 𑀲𑀯𑀢𑀺. 𑀲𑀼𑀔𑀤𑀼𑀓𑁆𑀔𑀸𑀦𑀼𑀓𑀢𑀜𑁆𑀘 𑀉𑀧𑀸𑀤𑀸𑀬 𑀅𑀦𑀪𑀺𑀳𑀸𑀭𑀓𑁆𑀔𑀫𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀜𑁆𑀜𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀼 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀥𑀫𑁆𑀫𑀸 𑀢𑀻𑀲𑀼 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀘𑀢𑀽𑀳𑀺 𑀘 𑀤𑀼𑀓𑁆𑀔𑀢𑀸𑀳𑀺 𑀅𑀦𑀼𑀯𑀺𑀤𑁆𑀥𑀸𑀦𑀁 𑀲𑀸 𑀪𑀬𑀸 𑀤𑀼𑀓𑁆𑀔𑀢𑀸𑀬 𑀧𑀮𑀺𑀩𑁄𑀥𑀤𑀼𑀓𑁆𑀔𑀢𑀸𑀬 𑀘 𑀅𑀪𑀺𑀜𑁆𑀜𑀸𑀬 𑀤𑀼𑀓𑁆𑀔𑀢𑀸𑀬 𑀘 𑀇𑀫𑁂 𑀆𑀤𑀻𑀦𑀯𑀸 𑀢𑀢𑀺𑀬𑁂 𑀛𑀸𑀦𑁂.

𑀢𑀢𑁆𑀣 𑀓𑀢𑀫𑁂 𑀆𑀤𑀻𑀦𑀯𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂? 𑀆𑀓𑀺𑀜𑁆𑀘𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀓𑀸 𑀢𑁂 𑀥𑀫𑁆𑀫𑀸𑀦𑀼𑀲𑀫𑀸𑀧𑀢𑁆𑀢𑀺𑀓𑀸 𑀏𑀢𑀺𑀲𑁆𑀲𑀸 𑀘 𑀪𑀽𑀫𑀺𑀬𑀁 𑀲𑀸𑀢𑀸𑀦𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀦𑁂𑀓𑀯𑀺𑀥𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀑𑀴𑀸𑀭𑀺𑀓𑀸 𑀲𑀼𑀔𑀼𑀫𑁂𑀳𑀺 𑀘 𑀭𑀽𑀧𑀲𑀜𑁆𑀜𑀸𑀳𑀺 𑀅𑀦𑀼𑀯𑀺𑀥𑀸𑀦𑀺 𑀏𑀢𑀸𑀦𑀺 𑀛𑀸𑀦𑀸𑀦𑀺 𑀲𑀤𑀸 𑀅𑀦𑀼𑀤𑀬𑀫𑁂𑀢𑁆𑀢𑀸𑀛𑀸𑀦𑀓𑀮𑀸𑀦𑀼𑀤𑀦𑀼𑀓𑀮𑀸𑀬 𑀲𑀸𑀥𑀸𑀭𑀡𑀸, 𑀤𑀼𑀓𑁆𑀓𑀭𑀸 𑀘 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄 𑀫𑀳𑀸𑀲𑀫𑁆𑀪𑀸𑀭𑀸 𑀲𑀫𑀼𑀤𑀸𑀕𑀢𑀸𑀦𑀺 𑀘 𑀏𑀢𑀸𑀦𑀺 𑀛𑀸𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺. 𑀏𑀢𑁆𑀣 𑀲𑀫𑀼𑀤𑀸𑀕𑀢𑀸 𑀘 𑀏𑀢𑁂 𑀥𑀫𑁆𑀫𑀸 𑀦 𑀲𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀲𑀫𑀼𑀕𑁆𑀕𑀳𑀺𑀢𑀦𑀺𑀫𑀺𑀢𑁆𑀢𑀸 𑀘 𑀏𑀢𑁂 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘 𑀏𑀢𑁂 𑀥𑀫𑁆𑀫𑀸 𑀦 𑀉𑀧𑀸𑀤𑀺𑀬𑀦𑁆𑀢𑀺 𑀦𑀺𑀭𑀼𑀚𑁆𑀛𑀗𑁆𑀕𑀸𑀦𑀺 𑀘, 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀛𑀸𑀦𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀦 𑀛𑀸𑀦𑀦𑀺𑀫𑀺𑀢𑁆𑀢𑀲𑀜𑁆𑀜𑀸 𑀯𑁄𑀓𑀺𑀭𑀢𑀺. 𑀅𑀧𑁆𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀸 𑀘 𑀛𑀸𑀬𑀻𑀯𑀲𑁂𑀦 𑀘 𑀪𑀯𑀢𑀺 [𑀛𑀸𑀬𑀻 𑀘 𑀯𑀲𑁂𑀦 𑀘 𑀪𑀯𑀢𑀺 (𑀧𑀻. 𑀓.)]. 𑀇𑀫𑁂𑀳𑀺 𑀆𑀤𑀻𑀦𑀯𑁂𑀳𑀺 𑀅𑀬𑀁 𑀛𑀸𑀦𑀧𑀭𑀺𑀳𑀸𑀦𑀺.

𑁭𑁭. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀅𑀧𑀝𑀺𑀲𑀗𑁆𑀔𑀸𑀬 𑀅𑀯𑀲𑁂𑀲𑀲𑀜𑁆𑀜𑀺𑀦𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀭𑀺𑀳𑀸𑀬𑀢𑀺. 𑀆𑀦𑁂𑀜𑁆𑀚𑀲𑀜𑁆𑀜𑀺𑀦𑁄 𑀅𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀜𑁆𑀘 𑀪𑀽𑀫𑀺𑀁 𑀦 𑀧𑀚𑀸𑀦𑀸𑀢𑀺, 𑀲𑁄 𑀢𑀢𑁄 𑀧𑀭𑀺𑀳𑀸𑀬𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀜𑁆𑀘 𑀪𑀽𑀫𑀺𑀁 𑀦 𑀧𑀚𑀸𑀦𑀸𑀢𑀺, 𑀲𑁄 𑀢𑀢𑁄 𑀧𑀭𑀺𑀳𑀸𑀬𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀲𑀳𑀕𑀢𑀸. 𑀯𑀺𑀢𑁆𑀣𑀸𑀭𑁂𑀦…𑀧𑁂… 𑀬𑀸𑀯 𑀧𑀞𑀫𑁂 𑀛𑀸𑀦𑁂 𑀓𑀸𑀫𑀲𑀜𑁆𑀜𑀸𑀲𑀳𑀕𑀢𑀸 𑀓𑀸𑀢𑀩𑁆𑀩𑀸. 𑀲𑀓𑀲𑁆𑀲 [𑀲𑀸 𑀢𑀲𑁆𑀲 (𑀧𑀻. 𑀓.)] 𑀧𑀭𑀺𑀳𑀸𑀬𑀢𑀺, 𑀓𑀮𑀗𑁆𑀓𑀚𑁆𑀛𑀸𑀦𑁂 𑀓𑀮𑀗𑁆𑀓𑀁 𑀛𑀸𑀬𑀢𑀺, 𑀧𑀭𑀺𑀲𑀫𑀦𑁆𑀢𑀢𑁄 𑀛𑀸𑀬𑀢𑀺, 𑀪𑀺𑀦𑁆𑀤𑀦𑁆𑀢𑁄 𑀛𑀸𑀬𑀢𑀺, 𑀦 𑀲𑀚𑁆𑀛𑀸𑀬𑀢𑀺, 𑀆𑀬𑀽𑀳𑀦𑁆𑀢𑁄 𑀛𑀸𑀬𑀢𑀺, 𑀓𑀺𑀜𑁆𑀘𑀺 𑀘 𑀦𑀺𑀧𑀭𑀺𑀘𑀺𑀢𑁄 𑀛𑀸𑀬𑀢𑀺. 𑀅𑀢𑀺𑀯𑀺𑀥𑀸𑀯𑀦𑁆𑀢𑁄 𑀛𑀸𑀬𑀢𑀺, 𑀅𑀢𑀺𑀫𑀜𑁆𑀜𑀦𑁆𑀢𑁄 𑀛𑀸𑀬𑀢𑀺, 𑀓𑀸𑀬𑀲𑀗𑁆𑀔𑀸𑀭𑁂 𑀅𑀧𑁆𑀧𑀝𑀺𑀲𑀫𑁆𑀪𑀸𑀭𑁂 𑀛𑀸𑀬𑀢𑀺, 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀚𑀸𑀦𑀦𑁆𑀢𑁄 𑀛𑀸𑀬𑀢𑀺, 𑀦𑀻𑀯𑀭𑀡𑀸𑀪𑀺𑀪𑀽𑀢𑁄 𑀛𑀸𑀬𑀢𑀺, 𑀅𑀲𑁆𑀲𑀸𑀧𑀢𑁆𑀢𑀺𑀫𑀦𑀲𑀺𑀓𑀭𑁄𑀦𑁆𑀢𑁄 𑀛𑀸𑀦𑀲𑁆𑀲 𑀅𑀲𑁆𑀲𑀸𑀤𑁄 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀳𑀸𑀦𑀁 𑀛𑀸𑀦𑀲𑁆𑀲 𑀅𑀲𑁆𑀲𑀸𑀤𑁄 𑀓𑀸𑀫𑀭𑀸𑀕𑀳𑁂𑀢𑀽𑀦𑀁 𑀥𑀫𑁆𑀫𑀸𑀦𑀁 𑀉𑀤𑀬𑀦𑁆𑀢𑀺, 𑀦𑀺𑀭𑀼𑀚𑁆𑀛𑀗𑁆𑀕𑀸𑀦𑀺 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀛𑀸𑀦𑀸𑀦𑀺 𑀉𑀧𑀭𑀺𑀫𑀸 𑀲𑀼𑀔𑀼𑀧𑁂𑀓𑁆𑀔𑀸 𑀓𑀸𑀫𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀅𑀲𑁆𑀲𑀸𑀤𑁄, 𑀏𑀯𑀁 𑀔𑁄 𑀧𑀼𑀦 𑀛𑀸𑀦𑀲𑁆𑀲 𑀅𑀲𑁆𑀲𑀸𑀤𑁄 𑀫𑀳𑀸𑀲𑀁𑀯𑀸𑀲𑀫𑀧𑁆𑀧𑀻𑀴𑀺𑀢𑁂 𑀮𑁄𑀓𑀲𑀁𑀦𑀺𑀯𑀸𑀲𑁂 𑀅𑀲𑀫𑁆𑀩𑁄𑀥𑁄𑀓𑀸𑀲𑀸 𑀯𑀺𑀕𑀫𑁂𑀲𑁆𑀲𑀫𑀺𑀤𑀁 𑀛𑀸𑀦𑀧𑁆𑀧𑀳𑀸𑀦𑀸. 𑀅𑀬𑀁 𑀧𑀮𑀺𑀭𑁄𑀥𑀫𑀧𑁆𑀧𑀮𑀺𑀭𑁄𑀥𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀏𑀲𑀦𑀺𑀥𑀫𑀺𑀤𑀁 𑀛𑀸𑀦𑀁 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀲𑀫𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀧𑁆𑀧𑀳𑀸𑀦𑀦𑀸 𑀆𑀦𑀺𑀲𑀁𑀲𑁄, 𑀬𑀫𑀺𑀤𑀁 𑀛𑀸𑀦𑀲𑁆𑀲 𑀅𑀲𑁆𑀲𑀸𑀤𑁄 𑀓𑀸𑀬𑀲𑁆𑀲 𑀅𑀛𑀸𑀦𑀺𑀬𑀛𑀸𑀬𑀺𑀦𑁄 𑀪𑀯𑀢𑀺. 𑀅𑀛𑀸𑀦𑀺𑀬𑀛𑀸𑀦𑀺𑀬𑀛𑀸𑀬𑀻𑀳𑀺 𑀅𑀧𑀭𑀸𑀫𑀲𑀦𑁆𑀢𑁄 𑀅𑀛𑀸𑀦𑀺𑀬𑀛𑀸𑀬𑀺𑀢𑀁 𑀛𑀸𑀬𑀢𑀺, 𑀬𑀸𑀦𑀺 𑀓𑀮𑀗𑁆𑀓𑀚𑁆𑀛𑀸𑀬𑀺𑀦𑁄 𑀧𑀤𑀸𑀦𑀺, 𑀢𑀸𑀦𑀺 𑀅𑀦𑀼𑀥𑀺𑀢𑀸𑀦𑀺 𑀧𑀝𑀺𑀧𑀓𑁆𑀔𑁂.

𑁭𑁮. 𑀢𑀢𑁆𑀣 𑀓𑀢𑀫𑀁 𑀛𑀸𑀦𑀓𑁄𑀲𑀮𑁆𑀮𑀁? 𑀲𑀫𑀸𑀧𑀢𑁆𑀢𑀺𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑀯𑀺𑀲𑁂𑀲𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑀦𑁆𑀢𑀭𑀺𑀓𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑁂 𑀲𑀪𑀸𑀯𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑁂 𑀆𑀤𑀻𑀦𑀯𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑁂 𑀦𑀺𑀲𑁆𑀲𑀭𑀡𑀓𑁄𑀲𑀮𑁆𑀮𑀁 𑀛𑀸𑀦𑀓𑁄𑀲𑀮𑁆𑀮𑀁, 𑀛𑀸𑀦𑀨𑀮𑁂𑀦 𑀉𑀧𑀸𑀤𑀸𑀬 𑀓𑁄𑀲𑀮𑁆𑀮𑀁, 𑀛𑀸𑀦𑀨𑀮𑁂𑀦 𑀧𑀝𑀺𑀲𑀗𑁆𑀔𑀸𑀦𑀨𑀮𑁂 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑀸 𑀦𑀺𑀩𑁆𑀩𑀢𑁆𑀢𑀺𑀛𑀸𑀦𑁂 𑀘 𑀓𑀻𑀴𑀺𑀢𑀸𑀧𑀺 𑀯𑀺𑀲𑁂𑀲𑀪𑀸𑀕𑀺𑀬𑀁 𑀛𑀸𑀦𑀁 𑀧𑀝𑀺𑀮𑀩𑁆𑀪𑀢𑀺. 𑀇𑀤𑀁 𑀧𑀦𑀲𑁆𑀲𑀸𑀢𑀺 𑀪𑀯𑀳𑀸𑀭𑀺𑀢𑀸 𑀘 𑀆𑀭𑀫𑁆𑀫𑀡𑀸𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀅𑀦𑀪𑀺𑀦𑀻𑀳𑀸𑀭𑀩𑀮𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀺𑀫𑀺𑀢𑁆𑀢𑀸𑀲𑀼 𑀕𑀢𑀺𑀲𑀳𑀺𑀢𑀸 𑀲𑀫𑀣𑀩𑀮𑁂𑀦 𑀅𑀲𑀁𑀲𑀻𑀤𑀦𑀜𑁆𑀘 𑀛𑀸𑀦𑁂 𑀫𑀕𑁆𑀕𑀨𑀮𑀁 𑀲𑀫𑀣𑀁 𑀧𑀯𑀢𑁆𑀢𑁂 𑀲𑀫𑀸𑀥𑀺𑀦𑁄 𑀉𑀧𑁂𑀓𑁆𑀔𑀸𑀧𑀮𑀺𑀧𑀼𑀩𑁆𑀩𑀸𑀧𑀭𑀦𑀺𑀫𑀺𑀢𑁆𑀢𑀸𑀲𑀬𑁄 𑀧𑀕𑁆𑀕𑀸𑀳𑀺𑀦𑁄 [𑀫𑀕𑁆𑀕𑀸𑀳𑀺𑀦𑁄 (𑀧𑀻.)] 𑀲𑀢𑀺𑀩𑀮𑀁 𑀢𑀁 𑀧𑀯𑀢𑁆𑀢𑀺𑀢𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸𑀦𑀁 𑀲𑀫𑀜𑁆𑀜𑀸𑀩𑀮𑁂.

𑀢𑀢𑁆𑀣 𑀓𑀢𑀫𑀸 𑀛𑀸𑀦𑀧𑀸𑀭𑀫𑀺𑀢𑀸? 𑀲𑀼𑀧𑀸𑀭𑀫𑀺𑀢𑀸 𑀫𑁂𑀢𑁆𑀢𑀸 𑀓𑀸𑀫𑁂𑀲𑀼 𑀲𑀢𑁆𑀢𑀸 𑀓𑀸𑀫𑀲𑀗𑁆𑀕𑀲𑀢𑁆𑀢𑀸𑀢𑀺 [𑀉𑀤𑀸. 𑁬𑁩 𑀉𑀤𑀸𑀦𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀬𑀫𑁆𑀳𑀺 𑀲𑀼𑀢𑁆𑀢𑁂 𑀤𑁂𑀲𑀦𑀸𑀬 𑀯𑁄𑀳𑀸𑀭𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘, 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀬𑁂 𑀲𑀁𑀬𑁄𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀚𑁆𑀚𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑁂 𑀑𑀖𑀁 𑀢𑀭𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦 𑀢𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺 𑀘 𑀯𑀺𑀘𑀬𑁄 𑀘 𑀇𑀤𑀁 𑀦𑀼 𑀓𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀓𑀸𑀫𑁂𑀲𑀼 𑀲𑀢𑁆𑀢𑀸𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀢𑀁 𑀓𑀸𑀫𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁. 𑀲𑀁𑀬𑁄𑀚𑀦𑁂 𑀯𑀚𑁆𑀚𑀫𑀧𑀲𑁆𑀲𑀫𑀸𑀦𑀸𑀢𑀺 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁, 𑀦 𑀳𑀺 𑀚𑀸𑀢𑀼 𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀸 𑀑𑀖𑀁 𑀢𑀭𑁂𑀬𑁆𑀬𑀼𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀦𑁆𑀢𑀺 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀫𑁂𑀲𑀼 𑀲𑀢𑁆𑀢𑀸𑀢𑀺 𑀓𑀸𑀫𑀸 𑀤𑁆𑀯𑀺𑀥𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘, 𑀢𑀢𑁆𑀣 𑀓𑀺𑀮𑁂𑀲𑀓𑀸𑀫𑀸 𑀓𑀸𑀫𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸𑀬 𑀬𑀼𑀢𑁆𑀢𑀸 𑀪𑀯𑀦𑁆𑀢𑀺 𑀭𑀽𑀧𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀮𑀓𑁆𑀔𑀡𑁂𑀦 𑀳𑀸𑀭𑁂𑀦, 𑀲𑀁𑀬𑁄𑀚𑀦𑁂 𑀯𑀚𑁆𑀚𑀫𑀧𑀲𑁆𑀲𑀫𑀸𑀦𑀸𑀢𑀺 𑀲𑀁𑀬𑁄𑀚𑀦𑀲𑁆𑀲. 𑀬𑁄 𑀢𑀢𑁆𑀣 𑀙𑀦𑁆𑀤𑀭𑀸𑀕𑁄 𑀢𑀲𑁆𑀲 𑀓𑀺𑀁 𑀧𑀤𑀝𑁆𑀞𑀸𑀦𑀁? 𑀲𑀼𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀇𑀢𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀕𑀳𑀺𑀢𑀸𑀬 𑀢𑀬𑁄𑀧𑀺 𑀯𑁂𑀤𑀦𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂 𑀕𑀳𑀺𑀢𑁂 𑀲𑀩𑁆𑀩𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀕𑀳𑀺𑀢𑀸, 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑀳𑀺𑀢𑁂𑀲𑀼 𑀲𑀩𑁆𑀩𑀸𑀦𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀬𑁄 𑀲𑀢𑁄, 𑀅𑀬𑀁 𑀯𑀼𑀘𑁆𑀘𑀢𑁂 𑀮𑀓𑁆𑀔𑀡𑁄 𑀳𑀸𑀭𑁄, 𑀢𑀢𑁆𑀣 𑀬𑁄 𑀑𑀴𑀸𑀭𑀺𑀓𑀫𑁆𑀳𑀺 𑀓𑀺𑀮𑁂𑀲𑁂 𑀅𑀚𑁆𑀛𑀸𑀯𑀲𑀺𑀢𑁄 𑀲𑀩𑁆𑀩𑀓𑀺𑀮𑁂𑀲𑁂𑀲𑀼 𑀬𑁄 𑀦 𑀢𑀢𑁄 𑀲𑀼𑀔𑀼𑀫𑀢𑀭𑁂𑀲𑀼 𑀦 𑀯𑀻𑀢𑀭𑀸𑀕𑁄 𑀪𑀯𑀢𑀺. 𑀢𑀢𑁆𑀣 𑀩𑀸𑀳𑀺𑀭𑀲𑀁𑀬𑁄𑀚𑀦𑀁 𑀫𑀫𑀦𑁆𑀢𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁 𑀅𑀳𑀦𑁆𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀑𑀖𑀁 𑀢𑀭𑀺𑀢𑀼𑀓𑀸𑀫𑀸 𑀢𑁂 𑀲𑀁𑀬𑁄𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑁂𑀲𑀼 𑀲𑀢𑁆𑀢𑀸𑀢𑀺 𑀬𑁂𑀲𑀼 𑀘 𑀲𑀢𑁆𑀢𑀸 𑀬𑁂𑀦 𑀘 𑀲𑀢𑁆𑀢𑀸 𑀬𑁂𑀲𑀜𑁆𑀘 𑀲𑀢𑁆𑀢𑀸 𑀅𑀬𑀁 𑀘𑀢𑀼𑀩𑁆𑀩𑀺𑀥𑁄 𑀆𑀓𑀸𑀭𑁄 𑀲𑀩𑁆𑀩𑁂𑀲𑀁 𑀳𑀸𑀭𑀪𑀸𑀕𑀺𑀬𑁄.

𑁭𑁯. 𑀢𑀢𑁆𑀣 𑀓𑀢𑀫𑀸𑀦𑀺 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀘? 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀲𑁆𑀲 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀲𑁆𑀲 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀲𑁆𑀲 𑀢𑀬𑁄 𑀯𑀺𑀧𑀮𑁆𑀮𑀸𑀲𑀸 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀳𑀻𑀦𑀧𑁆𑀧𑀡𑀻𑀢𑀓𑀸𑀭𑀺𑀬𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀢𑀼𑀦𑁆𑀦𑀜𑁆𑀘 𑀉𑀧𑀸𑀤𑀸𑀦𑀸𑀦𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁 𑀤𑀺𑀲𑁆𑀲𑀢𑀺. 𑀳𑀻𑀦𑀧𑁆𑀧𑀡𑀻𑀢𑀓𑀸𑀭𑀺𑀬𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀫𑀸𑀢𑀼𑀬𑀸 𑀯𑀸 𑀧𑀺𑀢𑀼𑀦𑁄 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀧𑀼𑀦 𑀉𑀴𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀬𑀁 𑀤𑁂𑀢𑀺. 𑀢𑀢𑁆𑀣 𑀅𑀜𑁆𑀜𑁄 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑁂𑀬𑁆𑀬 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸. 𑀢𑀢𑁆𑀣 𑀲𑁄 𑀩𑁆𑀬𑀸𑀧𑀸𑀤𑀫𑀼𑀧𑀸𑀤𑀸𑀬 𑀢𑁂𑀲𑀁 𑀉𑀴𑀸𑀭𑀸𑀦𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀅𑀦𑀼𑀧𑀸𑀮𑀬𑀦𑁆𑀢𑁄 𑀬𑁄 𑀉𑀴𑀸𑀭𑀸𑀦𑀁 𑀅𑀪𑀬𑀁 𑀤𑁂𑀢𑀺. 𑀢𑁂𑀲𑀁 𑀅𑀪𑀬𑁂 𑀤𑀺𑀦𑁆𑀦𑁂 𑀬𑁄 𑀢𑀢𑁆𑀣 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀲𑁄 𑀩𑁆𑀬𑀸𑀧𑀸𑀤𑀁 𑀉𑀧𑀸𑀤𑀸𑀬𑀦𑁆𑀢𑁄 𑀤𑁄𑀲𑀚𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀬𑁄 𑀢𑀢𑁆𑀣 𑀅𑀲𑀸𑀥𑀼 𑀇𑀦𑁆𑀤𑁆𑀭𑀺𑀬𑀸 𑀦𑀻𑀯𑀭𑀡𑀁 𑀬𑀁 𑀢𑁂𑀲𑀁 𑀅𑀪𑀬𑀁 𑀤𑀓𑁆𑀔𑀺𑀡𑀢𑁄 𑀲𑀜𑁆𑀜𑀁 𑀇𑀤𑀁 𑀧𑀡𑀻𑀢𑀁 𑀓𑀸𑀭𑀡𑀁 𑀫𑀬𑀸 𑀧𑀼𑀦 𑀢𑀢𑁆𑀣 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀅𑀬𑀁 𑀩𑁆𑀬𑀸𑀧𑀸𑀤𑁄 𑀳𑀻𑀦𑀕𑀫𑀺𑀯𑀓𑀫𑁆𑀫𑀁 𑀮𑁄𑀪𑁄 𑀫𑁄𑀳𑁄 𑀘 𑀇𑀫𑀸𑀦𑀺 𑀦𑀻𑀯𑀭𑀡𑀸𑀦𑀺 𑀯𑀘𑀦𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀢𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀬𑁄 𑀲𑁄 𑀉𑀧𑀸𑀤𑀸𑀦𑁄 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀢𑁂𑀲𑀁 𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀢𑁂𑀬𑁂𑀯 𑀉𑀧𑀸𑀤𑀸𑀦𑁄 𑀲𑀫𑀼𑀤𑀬𑁄 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀲𑁄𑀬𑁂𑀯 𑀤𑁂𑀲𑀦𑀸𑀳𑀸𑀭𑁄.

𑀢𑀢𑁆𑀣 𑀓𑀸𑀫𑁂𑀲𑀼 𑀬𑁂 𑀦 𑀧𑀚𑁆𑀚𑀦𑁆𑀢𑀺, 𑀢𑁂 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀧𑀚𑁆𑀚𑀦𑁆𑀢𑀺. 𑀇𑀢𑀺𑀲𑁆𑀲𑀸 𑀓𑀸𑀫𑀥𑀸𑀢𑀼𑀬𑀸 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁄. 𑀬𑁄 𑀢𑀢𑁆𑀣 𑀅𑀦𑀪𑀺𑀲𑀗𑁆𑀔𑀸𑀭𑀸𑀦𑀁 𑀓𑀺𑀜𑁆𑀘𑀺 𑀯𑀺𑀲𑁄𑀥𑁂𑀢𑀺 𑀢𑀲𑁆𑀲 𑀥𑀸𑀯𑀭𑀸 𑀯𑀸, 𑀅𑀬𑀁 𑀅𑀩𑁆𑀬𑀸𑀧𑀸𑀤𑀘𑁆𑀙𑀦𑁆𑀤𑁄. 𑀓𑀺𑀜𑁆𑀘𑀺 𑀯𑀺𑀳𑀺𑀁𑀲𑀢𑀺, 𑀅𑀬𑀁 𑀯𑀺𑀳𑀺𑀁𑀲𑀸𑀙𑀦𑁆𑀤𑁄. 𑀇𑀢𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀦𑀻𑀳𑀢𑀸 𑀢𑀬𑁄 𑀙𑀦𑁆𑀤𑀸 𑁋 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁄 𑀅𑀩𑁆𑀬𑀸𑀧𑀸𑀤𑀘𑁆𑀙𑀦𑁆𑀤𑁄 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁄. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁄 𑀅𑀮𑁄𑀪𑁄; 𑀅𑀩𑁆𑀬𑀸𑀧𑀸𑀤𑀘𑁆𑀙𑀦𑁆𑀤𑁄 𑀅𑀤𑁄𑀲𑁄; 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁄 𑀅𑀫𑁄𑀳𑁄. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀝𑁆𑀞𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀧𑀭𑀳𑀺𑀢𑀸𑀦𑀺, 𑀢𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀦𑀺𑀭𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀘𑁂 𑀯𑀸 𑀧𑀼𑀦 𑀓𑀫𑁆𑀫𑀁 𑀓𑀭𑁂𑀬𑁆𑀬 𑀓𑀡𑁆𑀳𑀁 𑀯𑀸 𑀲𑀼𑀓𑁆𑀓𑀁 𑀯𑀸 𑀢𑀲𑁆𑀲 𑀯𑀺𑀧𑀸𑀓𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀇𑀤𑀁 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀢𑁆𑀣 𑀬𑁄 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀦𑀺𑀭𑁄𑀥𑁄, 𑀅𑀬𑀁 𑀦𑀺𑀭𑁄𑀥𑁄. 𑀲𑁄𑀬𑁂𑀯 𑀫𑀕𑁆𑀕𑁄 𑀢𑀢𑁆𑀣 𑀧𑀝𑀺𑀧𑀤𑀸𑀦𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀆𑀯𑀝𑁆𑀝𑁄 𑀳𑀸𑀭𑁄.

𑀓𑀸𑀫𑁂𑀲𑀼 𑀲𑀢𑁆𑀢𑀸𑀢𑀺 𑀬𑁂 𑀲𑁂𑀓𑁆𑀔𑀸, 𑀢𑁂 𑀏𑀓𑁂𑀦𑁂𑀯𑀸𑀓𑀸𑀭𑁂𑀦 𑀲𑀢𑁆𑀢𑀸. 𑀬𑁂 𑀧𑀼𑀣𑀼𑀚𑁆𑀚𑀦𑀸, 𑀢𑁂 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀸, 𑀢𑀲𑁆𑀲𑀸𑀬𑀁 𑀧𑀜𑁆𑀳𑁄 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀯𑀢𑁆𑀢𑀩𑁆𑀩𑁄. 𑀓𑀺𑀜𑁆𑀘𑀸𑀧𑀺 𑀲𑁄𑀢𑀸𑀧𑀦𑁆𑀦𑁄 𑀧𑀝𑀺𑀲𑁂𑀯𑀦𑀸𑀬, 𑀦𑁄 𑀘 𑀔𑁄 𑀅𑀪𑀺𑀦𑀺𑀯𑁂𑀲𑁂 𑀲𑀢𑁆𑀢𑁄 𑀬𑁄 𑀳𑀺 𑀅𑀧𑀘𑀬𑀸𑀬 𑀧𑀤𑀳𑀢𑀺, 𑀦 𑀉𑀧𑀘𑀬𑀸𑀬. 𑀲𑁂𑀓𑁆𑀔𑁄 𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀓𑀺𑀮𑁂𑀲𑀲𑀫𑀼𑀝𑁆𑀞𑀸𑀦𑀸𑀬 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺. 𑀢𑀢𑁆𑀣 𑀓𑀸𑀫𑁂𑀲𑀼 𑀲𑀢𑁆𑀢𑀸𑀦𑀁 𑀘𑀢𑀼𑀑𑀖𑀁 𑀢𑀭𑀺𑀲𑁆𑀲𑀢𑀻𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄, 𑀅𑀬𑀁 𑀯𑀺𑀪𑀢𑁆𑀢𑀺.

𑁮𑁦. 𑀧𑀭𑀺𑀯𑀢𑁆𑀢𑀦𑁄𑀢𑀺 𑀓𑀸𑀫𑁂 𑀬𑁂 𑀦𑁂𑀯 𑀲𑀚𑁆𑀚𑀦𑁆𑀢𑀺 𑀦 𑀘 𑀲𑀁𑀬𑁄𑀚𑀦𑁂𑀳𑀺 𑀲𑀁𑀬𑀼𑀢𑁆𑀢𑀸, 𑀢𑁂 𑀑𑀖𑀁 𑀢𑀭𑀺𑀲𑁆𑀲𑀦𑁆𑀢𑀺 𑀯𑀺𑀧𑀼𑀮𑀁 𑀫𑀳𑀦𑁆𑀢𑀦𑁆𑀢𑀺. 𑀅𑀬𑀁 𑀲𑀼𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑁄.

𑀯𑁂𑀯𑀘𑀦𑀦𑁆𑀢𑀺 𑀬𑁄 𑀓𑀸𑀫𑁂𑀲𑀼 𑀲𑀢𑁆𑀢𑁄 𑀬𑁄 𑀘 𑀢𑀢𑁆𑀣 𑀓𑀸𑀫𑀸𑀦𑀁 𑀕𑀼𑀡𑁄, 𑀢𑀢𑁆𑀣 𑀯𑀺𑀲𑁄 𑀲𑀢𑁆𑀢𑁄. 𑀬𑁂𑀧𑀺 𑀓𑀸𑀫𑀸𑀦𑀁 𑀆𑀳𑀸𑀭𑀸 𑀥𑀫𑁆𑀫𑀸, 𑀢𑀢𑁆𑀣 𑀯𑀺𑀲𑁄 𑀲𑀢𑁆𑀢𑁄. 𑀢𑀢𑁆𑀣𑀺𑀫𑀁 𑀓𑀸𑀫𑀸𑀦𑀁 𑀯𑁂𑀯𑀘𑀦𑀁 𑀧𑀸𑀓𑁄 𑀭𑀚𑁄 𑀲𑀮𑁆𑀮𑀁 𑀕𑀡𑁆𑀟𑁄 𑀈𑀢𑀺 𑀉𑀧𑀤𑁆𑀤𑀯𑁄𑀢𑀺. 𑀬𑀸𑀦𑀺 𑀯𑀸 𑀧𑀦 𑀅𑀜𑁆𑀜𑀸𑀦𑀺 𑀯𑁂𑀯𑀘𑀦𑀸𑀦𑀺 𑀢𑀢𑁆𑀣 𑀯𑀺𑀲𑁄 𑀲𑀢𑁆𑀢𑁄𑀢𑀺 𑀯𑁂𑀯𑀘𑀦𑀁. 𑀲𑀢𑁆𑀢𑁄 𑀩𑀦𑁆𑀥𑁄 𑀫𑀼𑀘𑁆𑀙𑀺𑀢𑁄 𑀕𑀥𑀺𑀢𑁄 𑀅𑀚𑁆𑀛𑁄𑀲𑀺𑀢𑁄 𑀓𑀸𑀫𑁂 𑀅𑀚𑁆𑀛𑀸𑀧𑀦𑁆𑀦𑀸 𑀧𑀭𑀺𑀫𑀼𑀢𑁆𑀢𑁄 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻𑀢𑀺. 𑀬𑀸𑀦𑀺 𑀯𑀸 𑀧𑀦 𑀅𑀜𑁆𑀜𑀸𑀦𑀺 𑀯𑁂𑀯𑀘𑀦𑀸𑀦𑀺, 𑀅𑀬𑀁 𑀯𑁂𑀯𑀘𑀦𑁄 𑀦𑀸𑀫. 𑀓𑀸𑀫𑀧𑁆𑀧𑀘𑀸𑀭𑀧𑀜𑁆𑀜𑀢𑁆𑀢𑀺𑀬𑀸 𑀓𑀺𑀮𑁂𑀲𑀕𑁄𑀘𑀭𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸 𑀘𑀺𑀢𑁆𑀢𑀦𑁆𑀢𑀺 𑀯𑁂𑀯𑀘𑀦𑀁. 𑀲𑀢𑁆𑀢𑁄 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻𑀢𑀺 𑀬𑀸𑀦𑀺 𑀯𑀸 𑀧𑀦 𑀅𑀜𑁆𑀜𑀸𑀦𑀺. 𑀇𑀫𑁂 𑀓𑀸𑀫𑀧𑁆𑀧𑀘𑀸𑀭𑀧𑀜𑁆𑀜𑀢𑁆𑀢𑀺𑀬𑀸 𑀓𑀺𑀮𑁂𑀲𑀕𑁄𑀘𑀭 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸, 𑀩𑀻𑀚𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀲𑀁𑀬𑁄𑀚𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸, 𑀉𑀧𑀸𑀤𑀸𑀦𑀁 𑀳𑁂𑀢𑀼𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀧𑀼𑀣𑀼𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄.

𑀑𑀢𑀭𑀡𑁄𑀢𑀺 𑀇𑀫𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘. 𑀬𑁂 𑀓𑀺𑀮𑁂𑀲𑀸 𑀬𑁂 𑀲𑀗𑁆𑀔𑀸𑀭𑀸 𑀲𑀁𑀬𑁄𑀚𑀦𑀸𑀦𑀺 𑀘 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀥𑀫𑁆𑀫𑀸𑀬𑀢𑀦𑁂𑀲𑀼 𑀅𑀓𑀼𑀲𑀮𑀸 𑀥𑀫𑁆𑀫𑀸𑀬𑀢𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘, 𑀅𑀬𑀁 𑀇𑀦𑁆𑀤𑁆𑀭𑀺𑀬𑁄𑀢𑀭𑀡𑁄.

𑀲𑁄𑀥𑀦𑁄𑀢𑀺 𑀏𑀢𑁆𑀢𑀓𑁄. 𑀏𑀲𑁂𑀯 𑀆𑀭𑀫𑁆𑀪𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀲𑀼𑀢𑁆𑀢𑀢𑁆𑀣𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀇𑀫𑁂 𑀥𑀫𑁆𑀫𑀸 𑀅𑀢𑁆𑀣𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸 𑀅𑀢𑁆𑀣𑀺 𑀯𑁂𑀫𑀢𑁆𑀢𑀢𑀸𑀬. 𑀬𑁂 𑀲𑀜𑁆𑀜𑀸 𑀩𑀸𑀳𑀺𑀭𑁄 𑀓𑀸𑀫𑁂, 𑀢𑁂 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸. 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀢𑁆𑀢𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀧𑀮𑁆𑀮𑀸𑀲𑀸 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸 𑀑𑀖𑀁 𑀢𑀭𑁂𑀬𑁆𑀬𑀼𑀁. 𑀯𑀺𑀧𑀼𑀮𑀁 𑀫𑀳𑀦𑁆𑀢𑀦𑁆𑀢𑀺 𑀅𑀯𑀺𑀚𑁆𑀚𑀸 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀢𑀲𑁆𑀲 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄? 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄 𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀅𑀯𑀺𑀚𑁆𑀚𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀭𑀸𑀕𑀸𑀦𑀼𑀲𑀬𑁄 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀅𑀬𑀁 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄.

𑀲𑀫𑀸𑀭𑁄𑀧𑀦𑁄 𑀧𑀘𑁆𑀘𑀬𑁄𑀢𑀺 𑀬𑁂 𑀓𑀸𑀫𑁂𑀲𑀼 𑀲𑀢𑁆𑀢𑀸 𑀲𑀼𑀕𑀢𑀸 𑀲𑀼𑀭𑀽𑀧𑀸𑀢𑀺 𑀅𑀬𑀁 𑀓𑀸𑀫𑀥𑀸𑀢𑀼𑀬𑀸 𑀙𑀦𑁆𑀤𑁄 𑀭𑀸𑀕𑁄 𑀢𑁂 𑀅𑀧𑀼𑀜𑁆𑀜𑀫𑀬𑀸 𑀲𑀗𑁆𑀔𑀸𑀭𑀸. 𑀢𑁂 𑀓𑀺𑀁 𑀧𑀘𑁆𑀘𑀬𑀸? 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸. 𑀢𑁂 𑀓𑀺𑀲𑁆𑀲 𑀧𑀘𑁆𑀘𑀬𑀸? 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀸. 𑀇𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀬𑀸𑀯 𑀚𑀭𑀸𑀫𑀭𑀡𑀁 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀫𑀳𑀢𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺 𑀏𑀓𑀁 𑀲𑀼𑀢𑁆𑀢𑀁 𑀕𑀢𑀁. 𑀧𑀜𑁆𑀘𑀦𑀻𑀯𑀭𑀡𑀺𑀓𑀁 𑀲𑀼𑀢𑁆𑀢𑀁 𑀓𑀸𑀢𑀩𑁆𑀩𑀁.

𑁮𑁧. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄 𑀦𑀸𑀫? 𑀬𑀸 𑀘 𑀅𑀪𑀺𑀚𑁆𑀛𑀸 𑀬𑁄 𑀘 𑀩𑁆𑀬𑀸𑀧𑀸𑀤𑁄 𑀬𑀜𑁆𑀘 𑀉𑀤𑁆𑀥𑀘𑁆𑀘𑀁, 𑀅𑀬𑀁 𑀢𑀡𑁆𑀳𑀸. 𑀬𑀜𑁆𑀘 𑀣𑀺𑀦𑀫𑀺𑀤𑁆𑀥𑀁, 𑀬𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀁 𑀬𑀸 𑀘 𑀯𑀺𑀘𑀺𑀓𑀺𑀘𑁆𑀙𑀸, 𑀅𑀬𑀁 𑀤𑀺𑀝𑁆𑀞𑀺. 𑀬𑀸 𑀧𑀦 𑀓𑀸𑀬𑀲𑁆𑀲 𑀅𑀓𑀫𑁆𑀫𑀦𑀺𑀬𑀢𑀸 𑀓𑀺𑀜𑁆𑀘𑀸𑀧𑀺 𑀢𑀁 𑀫𑀺𑀤𑁆𑀥𑀁 𑀦𑁄 𑀢𑀼 𑀲𑀪𑀸𑀯𑀓𑀺𑀮𑁂𑀲𑀢𑀸𑀬 𑀓𑀺𑀮𑁂𑀲𑁄, 𑀇𑀢𑀺 𑀬𑀸 𑀘 𑀘𑀺𑀢𑁆𑀢𑀲𑀮𑁆𑀮𑀻𑀬𑀦𑀸 𑀬𑀸 𑀘 𑀓𑀸𑀬𑀸𑀓𑀫𑁆𑀫𑀦𑀺𑀬𑀢𑀸, 𑀅𑀬𑀁 𑀧𑀓𑁆𑀔𑁄𑀧𑀓𑀺𑀮𑁂𑀲𑁄 𑀦 𑀢𑀼 𑀲𑀪𑀸𑀯𑀓𑀺𑀮𑁂𑀲𑁄. 𑀢𑀢𑁆𑀣 𑀅𑀢𑁆𑀢𑀲𑀜𑁆𑀜𑀸𑀦𑀼𑀧𑀘𑀺𑀢𑁆𑀢𑀁 𑀓𑀺𑀮𑀫𑀣𑁄 𑀓𑀼𑀓𑁆𑀓𑀼𑀘𑁆𑀘𑀸𑀦𑀼𑀧𑀘𑀺𑀢𑁆𑀢𑀁 𑀣𑀺𑀦𑀁 𑀬𑀸 𑀘𑀺𑀢𑁆𑀢𑀲𑁆𑀲 𑀮𑀻𑀬𑀦𑀸, 𑀇𑀢𑀺 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀘𑀢𑁆𑀢𑀸𑀭𑀺 𑀦𑀻𑀯𑀭𑀡𑀸𑀦𑀺 𑀲𑀪𑀸𑀯𑀓𑀺𑀮𑁂𑀲𑀸 𑀣𑀺𑀦𑀫𑀺𑀤𑁆𑀥𑀁 𑀦𑀻𑀯𑀭𑀡𑀧𑀓𑁆𑀔𑁄𑀧𑀓𑀺𑀮𑁂𑀲𑁄. 𑀬𑀣𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀲𑀪𑀸𑀯𑀆𑀲𑀯𑀢𑀸𑀬 𑀆𑀲𑀯𑀸 𑀦𑁄 𑀢𑀼 𑀘𑀺𑀢𑁆𑀢𑀲𑀸𑀲𑀯𑀢𑀸𑀬 𑀆𑀲𑀯𑀸. 𑀲𑀪𑀸𑀯𑀢𑀸𑀬 𑀆𑀲𑀯𑀸. 𑀧𑀓𑁆𑀔𑁂 𑀆𑀲𑀯𑀢𑀸𑀬 𑀆𑀲𑀯𑀸. 𑀅𑀣 𑀧𑀦𑀸𑀳 𑀲𑀼𑀢𑁆𑀢𑀦𑁆𑀢𑀁 𑀬𑁂𑀦 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑀸 𑀆𑀲𑀯𑀸, 𑀢𑁂𑀬𑁂𑀯 𑀏𑀢𑁂 𑀯𑀢𑁆𑀢𑀩𑁆𑀩𑀸 𑀲𑀸𑀲𑀯𑀸 𑀯𑀸 𑀅𑀦𑀸𑀲𑀯𑀸 𑀯𑀸.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄. 𑀅𑀪𑀺𑀚𑁆𑀛𑀸 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀪𑀯𑀢𑀡𑁆𑀳𑀸. 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀅𑀚𑁆𑀛𑁄𑀲𑀸𑀦𑀕𑀢𑀁 𑀲𑀸𑀲𑀯𑀸 𑀅𑀪𑀺𑀚𑁆𑀛𑀺𑀢𑀲𑁆𑀲 𑀫𑁂𑀢𑁆𑀢𑀸𑀦𑀼𑀧𑀲𑁆𑀲𑀺𑀬 𑀬𑁄 𑀅𑀦𑀢𑁆𑀣𑀁 𑀘𑀭𑀢𑀺. 𑀢𑀢𑁆𑀣 𑀬𑁄 𑀩𑁆𑀬𑀸𑀧𑀸𑀤𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀘𑀭𑀺 𑀘𑀭𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀓𑀢𑁆𑀢𑀩𑁆𑀩𑀸𑀦𑀺, 𑀢𑀲𑁆𑀲𑁂𑀯𑀁 𑀩𑁆𑀬𑀸𑀧𑀸𑀤𑀸𑀦𑀼𑀧𑀲𑁆𑀲𑀺𑀲𑁆𑀲 𑀓𑀺𑀮𑁂𑀲𑁄 𑀬𑁄 𑀧𑀭𑀺𑀤𑀸𑀳𑁄 𑀓𑀸𑀬𑀓𑀺𑀮𑀫𑀣𑁄 𑀅𑀓𑀫𑁆𑀫𑀦𑀺𑀬𑀢𑀸 𑀫𑀺𑀤𑁆𑀥𑀁. 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀺𑀲𑁆𑀲 𑀧𑀝𑀺𑀖𑀸𑀢𑁂𑀦 𑀔𑀺𑀬𑀦𑀸, 𑀇𑀤𑀁 𑀣𑀺𑀦𑀫𑀺𑀤𑁆𑀥𑀁. 𑀢𑀢𑁆𑀣 𑀅𑀥𑀺𑀓𑀭𑀡𑀅𑀯𑀽𑀧𑀲𑀫𑁄, 𑀇𑀤𑀁 𑀉𑀤𑁆𑀥𑀘𑁆𑀘𑀁. 𑀬𑀁 𑀓𑀺𑀁 𑀓𑀲𑀣𑀫𑀻𑀢𑀺 [𑀓𑀭𑀣𑀫𑀻𑀢𑀺 (𑀧𑀻. 𑀓.)] 𑀇𑀤𑀁 𑀓𑀼𑀓𑁆𑀓𑀼𑀘𑁆𑀘𑀁. 𑀬𑀁 𑀬𑀣𑀸 𑀇𑀤𑀁 𑀲𑀦𑁆𑀢𑀻𑀭𑀡𑀁, 𑀅𑀬𑀁 𑀯𑀺𑀘𑀺𑀓𑀺𑀘𑁆𑀙𑀸. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘 𑀅𑀢𑁆𑀣𑀺, 𑀇𑀤𑀁 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀘 𑀅𑀢𑁆𑀣𑀺, 𑀇𑀤𑀁 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑁄 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀣𑀺𑀦𑀫𑀺𑀤𑁆𑀥𑀁 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀦𑀼𑀲𑀬𑀲𑀁𑀬𑁄𑀚𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀝𑀺𑀖𑀲𑀁𑀬𑁄𑀚𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀸𑀦𑀁 𑀫𑀸𑀦𑀲𑀁𑀬𑁄𑀚𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀸𑀦𑀜𑁆𑀘 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂 𑀯𑀼𑀢𑁆𑀢𑁂 𑀲𑀩𑁆𑀩𑀸𑀦𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀲𑀁𑀬𑁄𑀚𑀦𑁂𑀲𑀼 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑀲𑀁𑀬𑁄𑀚𑀦𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑁮𑁨. 𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀬𑁂 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀛𑀸𑀦𑀧𑀝𑀺𑀧𑀓𑁆𑀔𑁄 𑀲𑁄 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀬𑀁 𑀨𑀮𑀁, 𑀇𑀤𑀁 𑀤𑀼𑀓𑁆𑀔𑀁. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀧𑀝𑀺𑀧𑀓𑁆𑀔𑁄; 𑀩𑁆𑀬𑀸𑀧𑀸𑀤𑀲𑁆𑀲 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀧𑀝𑀺𑀧𑀓𑁆𑀔𑁄; 𑀢𑀺𑀡𑁆𑀡𑀁 𑀦𑀻𑀯𑀭𑀡𑀸𑀦𑀁 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀧𑀝𑀺𑀧𑀓𑁆𑀔𑁄. 𑀇𑀢𑀺 𑀇𑀫𑁂 𑀢𑀬𑁄 𑀯𑀺𑀢𑀓𑁆𑀓𑀸. 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀪𑀚𑀢𑀺. 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀲𑀻𑀮𑀓𑁆𑀔𑀦𑁆𑀥𑀁 𑀪𑀚𑀢𑀺. 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀪𑀚𑀢𑀺. 𑀇𑀫𑁂 𑀢𑀬𑁄 𑀔𑀦𑁆𑀥𑀸. 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦𑀻𑀯𑀭𑀡𑀧𑁆𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀬𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑀁, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄? 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀤𑀲 𑀪𑀯𑀦𑁆𑀢𑀺. 𑀬𑀤𑀧𑀺 𑀅𑀚𑁆𑀛𑀢𑁆𑀢𑀁 𑀲𑀸𑀭𑀚𑁆𑀚𑀢𑀺, 𑀢𑀤𑀧𑀺 𑀦𑀻𑀯𑀭𑀡𑀁. 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀲𑀸𑀭𑀚𑁆𑀚𑀢𑀺, 𑀢𑀤𑀧𑀺 𑀦𑀻𑀯𑀭𑀡𑀁, 𑀏𑀯𑀁 𑀬𑀸𑀯 𑀯𑀺𑀘𑀺𑀓𑀺𑀘𑁆𑀙𑀸 𑀇𑀫𑁂 𑀤𑀲 𑀦𑀻𑀯𑀭𑀡𑀸. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀺𑀮𑁂𑀲𑀸 𑀇𑀫𑀸𑀦𑀺 𑀤𑁆𑀯𑁂 𑀲𑀁𑀬𑁄𑀚𑀦𑀸𑀦𑀺 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘. 𑀢𑀢𑁆𑀣 𑀅𑀳𑀦𑁆𑀢𑀺 𑀅𑀚𑁆𑀛𑀢𑁆𑀢𑀁, 𑀫𑀫𑀦𑁆𑀢𑀺 𑀩𑀳𑀺𑀤𑁆𑀥𑀸. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀅𑀚𑁆𑀛𑀢𑁆𑀢𑀁, 𑀏𑀓𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑀳𑀺𑀤𑁆𑀥𑀸. 𑀬𑁄 𑀅𑀚𑁆𑀛𑀢𑁆𑀢𑀁 𑀙𑀦𑁆𑀤𑀭𑀸𑀕𑁄 𑀭𑀽𑀧𑁂𑀲𑀼 𑀅𑀯𑀻𑀢𑀭𑀸𑀕𑁄 𑀪𑀯𑀢𑀺 𑀅𑀯𑀻𑀢𑀘𑁆𑀙𑀦𑁆𑀤𑁄. 𑀏𑀯𑀁 𑀬𑀸𑀯 𑀯𑀺𑀜𑁆𑀜𑀸𑀡𑁂, 𑀅𑀬𑀁 𑀅𑀚𑁆𑀛𑀢𑁆𑀢𑀸 𑀢𑀡𑁆𑀳𑀸. 𑀬𑀁 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀢𑀻𑀲𑀼 𑀘 𑀪𑀯𑁂𑀲𑀼 𑀅𑀚𑁆𑀛𑁄𑀲𑀸𑀦𑀁, 𑀅𑀬𑀁 𑀩𑀳𑀺𑀤𑁆𑀥𑀸 𑀢𑀡𑁆𑀳𑀸. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀲𑀁𑀬𑁄𑀚𑀦𑀻𑀬𑀸 𑀘 𑀥𑀫𑁆𑀫𑀸. 𑀢𑀢𑁆𑀣 𑀲𑀁𑀬𑁄𑀚𑀦𑁂𑀲𑀼 𑀥𑀫𑁆𑀫𑁂𑀲𑀼 𑀬𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀘, 𑀅𑀬𑀁 𑀫𑀕𑁆𑀕𑁄. 𑀬𑀁 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁, 𑀅𑀬𑀁 𑀦𑀺𑀭𑁄𑀥𑁄. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑁄? 𑀲𑀁𑀬𑁄𑀚𑀦𑀦𑁆𑀢𑀺 𑀦 𑀏𑀢𑀁 𑀏𑀓𑀁𑀲𑁂𑀦. 𑀫𑀸𑀦𑀲𑀁𑀬𑁄𑀚𑀦𑀁 𑀤𑀺𑀝𑁆𑀞𑀺𑀪𑀸𑀕𑀺𑀬𑀦𑁆𑀢𑀺 𑀦 𑀢𑀁 𑀏𑀓𑀁𑀲𑁂𑀦 𑀅𑀤𑀺𑀝𑁆𑀞𑀫𑀸𑀦𑀁 𑀦𑀺𑀲𑁆𑀲𑀸𑀬𑀫𑀸𑀦𑀁 𑀦 𑀧𑀚𑀳𑀢𑀺. 𑀬𑁄 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑁄 𑀫𑀸𑀦𑁄 𑀓𑀺𑀜𑁆𑀘𑀸𑀧𑀺 𑀲𑁄 𑀤𑀺𑀝𑁆𑀞𑀺𑀧𑀓𑁆𑀔𑁂 𑀲𑀺𑀬𑀸. 𑀦 𑀢𑀼 𑀑𑀭𑀫𑁆𑀪𑀸𑀕𑀺𑀬𑀁 𑀲𑀁𑀬𑁄𑀚𑀦𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺. 𑀬𑁄 𑀘 𑀅𑀳𑀁𑀓𑀸𑀭𑁄 𑀦 𑀧𑀯𑀺𑀤𑁆𑀥𑁄𑀬𑀁 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺. 𑀓𑀤𑀸𑀲𑀼 𑀦𑀸𑀫𑀸𑀳𑀁 𑀢𑀁 𑀲𑀦𑁆𑀢𑀁 𑀆𑀬𑀢𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀁 𑀅𑀭𑀺𑀬𑀸 𑀲𑀦𑁆𑀢𑀁 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺, 𑀅𑀬𑀁 𑀅𑀪𑀺𑀚𑁆𑀛𑀸 𑀦 𑀘 𑀢𑀁 𑀦𑀻𑀯𑀭𑀡𑀁. 𑀅𑀢𑁆𑀣𑀺 𑀧𑀦 𑀅𑀭𑀳𑀢𑁄 𑀓𑀸𑀬𑀓𑀺𑀮𑁂𑀲𑀫𑀺𑀤𑁆𑀥𑀜𑁆𑀘 𑀑𑀓𑁆𑀓𑀫𑀢𑀺 𑀦 𑀘 𑀢𑀁 𑀦𑀻𑀯𑀭𑀡𑀁 𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀦𑀻𑀯𑀭𑀡𑀦𑁆𑀢𑀺. 𑀦 𑀏𑀓𑀁𑀲𑁂𑀦. 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑀧𑀭𑀺𑀯𑀢𑁆𑀢𑀦𑁄𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀜𑁆𑀘𑀗𑁆𑀕𑀺𑀓𑁂𑀦 𑀛𑀸𑀦𑁂𑀦 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀢𑁂𑀲𑀁 𑀧𑀝𑀺𑀧𑀓𑁆𑀔𑁄 𑀦𑀻𑀯𑀭𑀡𑁄 𑀅𑀲𑀼𑀓𑀲𑁆𑀲 𑀧𑀳𑀻𑀦𑀸𑀢𑀺 𑀦 𑀅𑀜𑁆𑀜𑀸𑀦𑀼𑀫𑀺𑀦𑀺𑀢𑀩𑁆𑀩𑀁, 𑀧𑀭𑀫𑀢𑁆𑀣𑀫𑀚𑁆𑀛𑀢𑁆𑀢𑀁, 𑀅𑀬𑀁 𑀧𑀭𑀺𑀯𑀢𑁆𑀢𑀦𑀸.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄? 𑀓𑀸𑀫𑀘𑁆𑀙𑀦𑁆𑀤𑁄 𑀙𑀦𑁆𑀤𑀭𑀸𑀕𑁄 𑀧𑁂𑀫𑀁 𑀦𑀺𑀓𑀦𑁆𑀢𑀻𑀢𑀺 𑀯𑁂𑀯𑀘𑀦𑀁. 𑀦𑀻𑀯𑀭𑀡𑀁 𑀙𑀤𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀯𑁂𑀯𑀘𑀦𑀁.

𑀧𑀜𑁆𑀜𑀢𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀬𑀸 [𑀧𑀘𑁆𑀘𑀸𑀧𑀜𑁆𑀜𑀢𑁆𑀢𑀺𑀬𑀸 (𑀓.)] 𑀧𑀜𑁆𑀜𑀢𑁆𑀢𑀺, 𑀩𑁆𑀬𑀸𑀧𑀸𑀤𑁄 𑀯𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀅𑀲𑀫𑀼𑀕𑁆𑀖𑀸𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺. 𑀏𑀯𑀁 𑀲𑀩𑁆𑀩𑁂𑀧𑀺 𑀏𑀢𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀯𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘 𑀢𑀢𑁆𑀣 𑀅𑀯𑀺𑀚𑁆𑀚𑀸𑀫𑀽𑀮𑀸 𑀦𑀻𑀯𑀭𑀡𑀸. 𑀬𑀸 𑀢𑀡𑁆𑀳𑀸 𑀇𑀫𑁂 𑀲𑀗𑁆𑀔𑀸𑀭𑀸, 𑀢𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸, 𑀆𑀬𑀢𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀁, 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀘.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀇𑀤𑀁 𑀲𑀼𑀢𑁆𑀢𑀁 𑀬𑀣𑀸 𑀆𑀭𑀩𑁆𑀪 𑀦𑀺𑀓𑁆𑀔𑀺𑀢𑁆𑀢𑀁 𑀲𑁄 𑀅𑀢𑁆𑀣𑁄 𑀪𑀸𑀲𑀺𑀢𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺.

𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀘 𑀩𑁆𑀬𑀸𑀧𑀸𑀤𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀦 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸, 𑀓𑀸𑀫𑀸𑀢𑀺 𑀦 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸, 𑀅𑀣 𑀔𑀮𑀼 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀲𑀼𑀪𑀸𑀭𑀫𑁆𑀫𑀡𑀧𑀘𑁆𑀘𑀬𑁄; 𑀲𑀼𑀪𑀦𑀺𑀫𑀺𑀢𑁆𑀢𑀜𑁆𑀘 𑀳𑁂𑀢𑀼. 𑀩𑁆𑀬𑀸𑀧𑀸𑀤𑀲𑁆𑀲 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀆𑀖𑀸𑀢𑀯𑀢𑁆𑀣𑀽𑀦𑀺 𑀘 𑀧𑀘𑁆𑀘𑀬𑁄; 𑀧𑀝𑀺𑀖𑀸𑀦𑀼𑀲𑀬𑁄 𑀳𑁂𑀢𑀼. 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀝𑀺𑀲𑀁𑀳𑀸𑀭𑁄 𑀧𑀘𑁆𑀘𑀬𑁄; 𑀧𑀯𑀢𑁆𑀢𑀺𑀬𑀸 𑀓𑀺𑀮𑀫𑀣𑀸 𑀘𑀮𑀦𑀸 𑀢𑀜𑁆𑀘 𑀳𑁂𑀢𑀼. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀭𑀚𑀦𑀻𑀬𑀁 𑀆𑀭𑀫𑁆𑀫𑀡𑀺𑀬𑀁 𑀅𑀲𑁆𑀲𑀸𑀤𑀺𑀬𑀸𑀓𑀺𑀦𑁆𑀤𑁆𑀭𑀺𑀬𑀁 𑀢𑀸𑀯 𑀅𑀧𑀭𑀺𑀧𑀼𑀡𑁆𑀡𑀜𑁆𑀘 𑀜𑀸𑀡𑀁 𑀧𑀘𑁆𑀘𑀬𑁄; 𑀓𑀸𑀫𑀲𑀜𑁆𑀜𑀸 𑀘 𑀤𑀺𑀝𑁆𑀞𑀺𑀅𑀦𑀼𑀲𑀬𑁄 𑀘 𑀳𑁂𑀢𑀼. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀯 𑀫𑀸𑀦𑀯𑀺𑀥𑀸 𑀆𑀭𑀫𑁆𑀫𑀡𑀁 𑀫𑀸𑀦𑀸𑀦𑀼𑀲𑀬𑁄, 𑀲𑁄𑀯 𑀧𑀘𑁆𑀘𑀬𑁄; 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀳𑁂𑀢𑀼. 𑀏𑀢𑁂 𑀧𑀜𑁆𑀘 𑀥𑀫𑁆𑀫𑀸 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄? 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀘𑀢𑁆𑀢𑀸𑀭𑁄𑀧𑀺 𑀏𑀢𑁂 𑀆𑀲𑀯𑀸 𑀕𑀡𑁆𑀟𑀸𑀧𑀺 [𑀢𑀡𑁆𑀳𑀸𑀧𑀺 (𑀧𑀻.)] 𑀏𑀢𑁂 𑀲𑀮𑁆𑀮𑀸𑀧𑀺 𑀏𑀢𑁂 𑀉𑀧𑀸𑀤𑀸𑀦𑀸𑀦𑀺 𑀏𑀢𑁂. 𑀢𑁂𑀲𑀼 𑀏𑀯 𑀩𑀸𑀳𑀺𑀭𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀦𑀺𑀤𑁆𑀤𑀺𑀝𑁆𑀞𑀁 𑀲𑀁𑀓𑀺𑀮𑁂𑀲𑀺𑀓𑀪𑀸𑀕𑀺𑀬𑀁 𑀲𑀼𑀢𑁆𑀢𑀁.

𑁮𑁩. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀕𑀸𑀣𑀸.

𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑁄 𑀅𑀢𑁆𑀣𑁄 𑀔𑀦𑁆𑀥𑀯𑀯𑀢𑁆𑀣𑀸𑀦𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑀤𑁂𑀲𑁂𑀢𑀺, 𑀥𑀸𑀢𑀼𑀯𑀯𑀢𑁆𑀣𑀸𑀦𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁, 𑀆𑀬𑀢𑀦𑀯𑀯𑀢𑁆𑀣𑀸𑀦𑁂𑀦 𑀫𑀦𑀸𑀬𑀢𑀦𑀁, 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸? 𑀲𑀁𑀔𑀺𑀢𑁆𑀢𑁂𑀦 𑀙 𑀥𑀫𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑀸𑀦𑀺 𑀘 𑀅𑀓𑀼𑀲𑀮𑀫𑀽𑀮𑀸𑀦𑀺 𑀘 𑀅𑀦𑀺𑀫𑀺𑀢𑁆𑀢𑀁 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑀼𑀲𑀮𑀫𑀽𑀮𑀁 𑀤𑁂𑀲𑀺𑀢𑀁. 𑀢𑀢𑁆𑀣 𑀓𑀢𑀫𑀸 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸? 𑀫𑀦𑁄 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑀁, 𑀬𑀣𑀸𑀧𑀺 𑀩𑀮𑀲𑁆𑀲 𑀭𑀸𑀚𑀸 𑀧𑀼𑀩𑁆𑀩𑀗𑁆𑀕𑀫𑁄, 𑀏𑀯𑀫𑁂𑀯 𑀥𑀫𑁆𑀫𑀸𑀦𑀁 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀢𑀢𑁆𑀣 𑀢𑀺𑀯𑀺𑀥𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀸𑀦𑀁 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁂𑀦 𑀅𑀩𑁆𑀬𑀸𑀧𑀸𑀤𑀘𑁆𑀙𑀦𑁆𑀤𑁂𑀦 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁂𑀦. 𑀅𑀮𑁄𑀪𑀲𑁆𑀲 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁂𑀦 𑀧𑀼𑀩𑁆𑀩𑀗𑁆𑀕𑀫𑀸. 𑀅𑀤𑁄𑀲𑀲𑁆𑀲 𑀅𑀩𑁆𑀬𑀸𑀧𑀸𑀤𑀘𑁆𑀙𑀦𑁆𑀤𑁂𑀦 𑀧𑀼𑀩𑁆𑀩𑀗𑁆𑀕𑀫𑀸. 𑀅𑀫𑁄𑀳𑀲𑁆𑀲 𑀅𑀯𑀺𑀳𑀺𑀁𑀲𑀸𑀙𑀦𑁆𑀤𑁂𑀦 𑀧𑀼𑀩𑁆𑀩𑀗𑁆𑀕𑀫𑀸. 𑀢𑀢𑁆𑀣 𑀫𑀦𑁄𑀲𑁂𑀝𑁆𑀞𑀸𑀢𑀺 𑀫𑀦𑀲𑀸 𑀇𑀫𑁂 𑀥𑀫𑁆𑀫𑀸 𑀉𑀲𑁆𑀲𑀝𑀸 𑀫𑀦𑁂𑀦 𑀯𑀸 𑀦𑀺𑀫𑁆𑀫𑀺𑀢𑀸. 𑀫𑀦𑁄𑀯 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑁂𑀝𑁆𑀞𑁄𑀢𑀺 𑀫𑀦𑁄𑀯 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑁂𑀝𑁆𑀞𑀚𑁂𑀝𑁆𑀞𑁄𑀢𑀺 𑀫𑀦𑁄𑀯 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀆𑀥𑀺𑀧𑀘𑁆𑀘𑀁 𑀓𑀭𑁄𑀢𑀻𑀢𑀺 𑀫𑀦𑁄𑀲𑁂𑀝𑁆𑀞𑀸. 𑀫𑀦𑁄𑀚𑀯𑀸𑀢𑀺 𑀬𑀢𑁆𑀣 𑀫𑀦𑁄 𑀕𑀘𑁆𑀙𑀢𑀺. 𑀢𑀢𑁆𑀣 𑀇𑀫𑁂 𑀥𑀫𑁆𑀫𑀸 𑀕𑀘𑁆𑀙𑀦𑁆𑀢𑀻𑀢𑀺 𑀫𑀦𑁄𑀚𑀯𑀸. 𑀬𑀣𑀸 𑀯𑀸𑀢𑁄 𑀲𑀻𑀖𑀁 𑀕𑀘𑁆𑀙𑀢𑀺 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀲𑀻𑀖𑀁 𑀕𑀸𑀫𑀓𑁄 𑀯𑀼𑀘𑁆𑀘𑀢𑁂 𑀯𑀸𑀢𑀚𑀯𑁄𑀢𑀺 𑀧𑀓𑁆𑀔𑀺𑀕𑀸𑀫𑀺𑀓𑁄𑀢𑀺, 𑀏𑀯𑀫𑁂𑀯 𑀇𑀫𑁂 𑀥𑀫𑁆𑀫𑀸 𑀫𑀦𑁂𑀦 𑀲𑀫𑁆𑀧𑀚𑀸𑀬𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀇𑀫𑁂 𑀥𑀫𑁆𑀫𑀸 𑀕𑀘𑁆𑀙𑀦𑁆𑀢𑀻𑀢𑀺 𑀫𑀦𑁄𑀚𑀯𑀸𑀢𑀺. 𑀢𑁂 𑀢𑀺𑀯𑀺𑀥𑀸 𑀙𑀦𑁆𑀤𑀲𑀫𑀼𑀤𑀸𑀦𑀺𑀢𑀸 𑀅𑀦𑀸𑀯𑀺𑀮𑀢𑀸 𑀘 𑀲𑀗𑁆𑀓𑀧𑁆𑀧𑁄. 𑀲𑀢𑁆𑀢𑀯𑀺𑀥𑀸 𑀘 𑀓𑀸𑀬𑀺𑀓𑀁 𑀲𑀼𑀘𑀭𑀺𑀢𑀁 𑀯𑀸𑀘𑀲𑀺𑀓𑀁 𑀲𑀼𑀘𑀭𑀺𑀢𑀁, 𑀢𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸. 𑀢𑀢𑁆𑀣 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀫𑀦𑁄𑀓𑀫𑁆𑀫𑀁. 𑀪𑀸𑀲𑀢𑀺 𑀯𑀸𑀢𑀺 𑀯𑀘𑀻𑀓𑀫𑁆𑀫𑀁. 𑀓𑀭𑁄𑀢𑀺 𑀯𑀸𑀢𑀺 𑀓𑀸𑀬𑀓𑀫𑁆𑀫𑀁. 𑀇𑀫𑁂𑀳𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀭𑀫𑀸𑀧𑀺 𑀲𑀦𑁆𑀢𑀸 𑀲𑀻𑀮𑀯𑀢𑀸 𑀧𑀭𑀫𑀸. 𑀲𑁄 𑀪𑀯𑀢𑀺 𑀯𑀺𑀯𑀢𑁆𑀢𑀺𑀬𑀁 𑀦 𑀮𑁄𑀓𑀦𑀺𑀬𑁆𑀬𑀸𑀦𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀪𑀯𑀢𑀺. 𑀅𑀬𑀁 𑀤𑁂𑀲𑀦𑀸.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀓𑀼𑀲𑀮𑀫𑀽𑀮𑀸𑀦𑀺 𑀘 𑀅𑀝𑁆𑀞𑀗𑁆𑀕𑀲𑀫𑁆𑀫𑀢𑁆𑀢𑀸𑀦𑀺. 𑀇𑀤𑀁 𑀲𑀼𑀢𑁆𑀢𑀁.

𑀬𑀼𑀢𑁆𑀢𑀻𑀢𑀺 𑀤𑀲𑀦𑁆𑀦𑀁 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀬𑁄 𑀯𑀺𑀧𑀸𑀓𑁄, 𑀲𑁄 𑀲𑀼𑀔𑀯𑁂𑀤𑀦𑀻𑀬𑁄 𑀅𑀩𑁆𑀬𑀸𑀧𑀸𑀤𑀲𑁆𑀲𑀗𑁆𑀕𑀫𑀸𑀦𑁄. 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀧𑀤𑀝𑁆𑀞𑀸𑀦𑀦𑁆𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀦𑁄𑀧𑀯𑀺𑀘𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀲𑀩𑁆𑀩𑀓𑀼𑀲𑀮𑀧𑀓𑁆𑀔𑀲𑁆𑀲 𑀇𑀫𑁂 𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀬𑁄 𑀘𑁂𑀢𑀲𑁄 𑀧𑀲𑀸𑀤𑁄, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀪𑀸𑀲𑀢𑀺 𑀯𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀬. 𑀓𑀭𑁄𑀢𑀺 𑀯𑀸𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁.

𑀮𑀓𑁆𑀔𑀡𑁄𑀢𑀺 𑀇𑀢𑀺 𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀧𑀺 𑀏𑀢𑁂, 𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀧𑀺 𑀏𑀢𑁂, 𑀲𑀗𑁆𑀔𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀧𑀺 𑀏𑀢𑁂. 𑀬𑁂 𑀓𑁂𑀘𑀺 𑀥𑀫𑁆𑀫𑀸 𑀲𑀳𑀚𑀸𑀢𑀸 𑀲𑀩𑁆𑀩𑁂 𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀲𑁄𑀫𑀦𑀲𑁆𑀲𑀫𑀧𑀺 𑀦𑀁 𑀅𑀦𑁆𑀯𑁂𑀢𑀺 𑀬𑀁 𑀲𑀼𑀲𑀼𑀔𑀘𑁆𑀙𑀸𑀬𑀸 𑀢𑀤𑀸𑀧𑀺 𑀦𑀁 𑀲𑀼𑀔𑀁 𑀢𑀤𑀧𑀺 𑀅𑀦𑁆𑀯𑁂𑀢𑀺.

𑁮𑁪. 𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀦 𑀇𑀤𑀁 𑀏𑀓𑀸𑀤𑀺𑀯𑀘𑀦𑀁. 𑀓𑀺𑀁 𑀓𑀸𑀭𑀡𑀸? 𑀲𑀩𑁆𑀩𑁂 𑀬𑁂𑀯 𑀇𑀫𑁂 𑀙𑀯𑀺𑀜𑁆𑀜𑀸𑀡𑀓𑀸𑀬𑀸, 𑀇𑀫𑀫𑁆𑀳𑀺 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀲𑀼𑀔𑁂𑀦 𑀅𑀢𑁆𑀣𑀺𑀓𑀸, 𑀢𑁂 𑀫𑀦𑀁 𑀧𑀲𑀸𑀤𑁂𑀦𑁆𑀢𑀻𑀢𑀺 𑀅𑀬𑀁 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑁄 𑀧𑀼𑀩𑁆𑀩𑁂𑀬𑁂𑀯 𑀦𑀺𑀤𑁆𑀤𑀺𑀝𑁆𑀞𑁄.

𑀬𑀸𑀦𑀺 𑀳𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀸𑀦𑀺 𑀅𑀝𑁆𑀞𑀸𑀦𑀺𑀲𑀁𑀲𑀫𑀢𑁆𑀢𑀸 𑀳𑁂𑀢𑀼, 𑀅𑀬𑀁 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀤𑀲 𑀞𑀸𑀦𑀸𑀦𑀺 𑀤𑁂𑀲𑀦𑀸𑀳𑁂𑀢𑀽𑀦𑀺 𑀤𑁂𑀲𑀦𑀸𑀧𑀘𑁆𑀘𑀬𑀸 𑀦𑀺𑀤𑁆𑀤𑁂𑀲𑀦𑀸 𑀘. 𑀢𑀢𑁆𑀣 𑀬𑀁 𑀫𑀜𑁆𑀜𑁂 𑀤𑀼𑀓𑁆𑀔𑁂𑀦 𑀲𑀳 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀘𑁆𑀘𑀦𑁆𑀢𑀺 𑀅𑀗𑁆𑀕𑁂𑀦 𑀓𑀼𑀲𑀮𑀫𑀽𑀮𑀁 𑀧𑀳𑀻𑀬𑀢𑀺, 𑀅𑀬𑀁 𑀅𑀧𑁆𑀧𑀳𑀻𑀦𑀪𑀽𑀫𑀺𑀬𑀁 𑀲𑀫𑀼𑀤𑀬𑁄. 𑀬𑀁 𑀢𑁂𑀲𑀁 𑀧𑀳𑀸𑀦𑀸, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑁄.

𑀯𑀺𑀪𑀢𑁆𑀢𑀻𑀢𑀺 𑁋

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻𑀢𑀺.

𑀢𑀁 𑀦 𑀏𑀓𑀁𑀲𑁂𑀦 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀧𑀦 𑀳𑁄𑀢𑀺. 𑀢𑀲𑁆𑀲 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀲𑀓𑀲𑀢𑁆𑀣𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀢𑁂𑀦 𑀘 𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀪𑀸𑀲𑀢𑀺 𑀩𑁆𑀬𑀸𑀓𑀭𑁄𑀢𑀺 𑀦 𑀢𑀁 𑀲𑀼𑀔𑀫𑀦𑁆𑀯𑁂𑀢𑀺 𑀦 𑀙𑀸𑀬𑀸𑀯 𑀅𑀦𑀼𑀕𑀸𑀫𑀺𑀦𑀻, 𑀤𑀼𑀓𑁆𑀔𑀫𑁂𑀯 𑀢𑀁 𑀅𑀦𑁆𑀯𑁂𑀢𑀺. 𑀬𑀣𑀸 𑀯𑀳𑀦𑁆𑀢𑀁 𑀘𑀓𑁆𑀓𑀁 𑀧𑀤𑀫𑀦𑁆𑀯𑁂𑀢𑀺, 𑀇𑀤𑀁 𑀢𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺 𑀲𑀫𑀕𑁆𑀕𑀢𑁂 𑀲𑀼𑀔𑀯𑁂𑀤𑀦𑀻𑀬𑀁 𑀫𑀺𑀘𑁆𑀙𑀕𑁆𑀕𑀢𑁂 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀅𑀬𑀁 𑀯𑀺𑀪𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀬𑀁 𑀫𑀦𑀲𑀸 𑀧𑀤𑀼𑀝𑁆𑀞𑁂𑀦 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸 𑀤𑀼𑀓𑁆𑀔𑀫𑀲𑁆𑀲𑀸𑀦𑀼𑀕𑀸𑀫𑀺𑀦𑀻, 𑀏𑀢𑀸𑀦𑀺𑀬𑁂𑀯 𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀪𑀸𑀲𑀺𑀢𑀸𑀦𑀺 𑀏𑀲 𑀏𑀯 𑀘 𑀧𑀝𑀺𑀧𑀓𑁆𑀔𑁄. 𑀯𑁂𑀯𑀘𑀦𑀦𑁆𑀢𑀺 𑀬𑀤𑀺𑀤𑀁 𑀫𑀦𑁄𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼.

𑀧𑀜𑁆𑀜𑀢𑁆𑀢𑀻𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀅𑀬𑀁 𑀫𑀦𑁄 𑀓𑀺𑀜𑁆𑀘𑀺 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀓𑀼𑀲𑀮𑀓𑀫𑁆𑀫𑀧𑀣𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑁄𑀲𑁂𑀝𑁆𑀞𑀸𑀢𑀺 𑀯𑀺𑀲𑀺𑀝𑁆𑀞𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑁄𑀚𑀯𑀸𑀢𑀺 𑀲𑀳𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀤𑀼𑀢𑀺𑀬𑀚𑁆𑀛𑀸𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀅𑀲𑁆𑀲𑀤𑁆𑀥𑀸𑀦𑀁 𑀧𑀝𑀺𑀧𑀓𑁆𑀔𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀪𑀸𑀲𑀢𑀺 𑀯𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀓𑀭𑁄𑀢𑀺 𑀯𑀸𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀛𑀸𑀦𑀲𑀫𑀸𑀥𑀸𑀦𑀁. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀯𑀺𑀜𑁆𑀜𑀸𑀡𑀁. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀫𑁂𑀢𑁆𑀢𑀸 𑀘 𑀫𑀼𑀤𑀼𑀢𑀸 𑀘 𑀛𑀸𑀦𑁂𑀲𑀼 𑀤𑀼𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑀜𑁆𑀘. 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄. 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼, 𑀆𑀬𑀢𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀁. 𑀬𑀁 𑀓𑀼𑀲𑀮𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀤𑀝𑁆𑀞𑀸𑀦𑀁. 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀨𑀲𑁆𑀲𑀧𑀘𑁆𑀘𑀬𑀸 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀸 𑀫𑀦𑁄𑀧𑀯𑀺𑀘𑀸𑀭𑁂𑀲𑀼 𑀲𑁄𑀫𑀦𑀲𑁆𑀲𑀯𑀺𑀘𑀸𑀭𑁄 𑀙𑀢𑁆𑀢𑀺𑀁𑀲𑁂𑀲𑀼 𑀧𑀞𑀫𑀧𑀤𑁂𑀲𑀼 𑀙 𑀲𑁄𑀫𑀦𑀲𑁆𑀲𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸. 𑀇𑀢𑀺 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀬𑀁 𑀅𑀢𑁆𑀣𑀁 𑀆𑀭𑀩𑁆𑀪 𑀇𑀤𑀁 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁. 𑀲𑁄 𑀅𑀢𑁆𑀣𑁄 𑀦𑀺𑀬𑀼𑀢𑁆𑀢𑁄 𑀏𑀢𑀫𑀢𑁆𑀣𑀁 𑀆𑀭𑀩𑁆𑀪 𑀲𑀼𑀢𑁆𑀢𑀁. 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑁮𑁫. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄? 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺, 𑀦 𑀏𑀓𑀢𑁆𑀢𑀧𑀜𑁆𑀜𑀢𑁆𑀢𑀺. 𑀥𑀫𑁆𑀫𑀸𑀢𑀺 𑀏𑀓𑀢𑁄 𑀦 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺. 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦𑀸𑀢𑀺 𑀲𑁄 𑀧𑀲𑀸𑀤𑁄 𑀤𑁆𑀯𑀺𑀥𑁄 𑀅𑀚𑁆𑀛𑀢𑁆𑀢𑀜𑁆𑀘 𑀅𑀩𑁆𑀬𑀸𑀧𑀸𑀤𑀸𑀯𑀺𑀓𑁆𑀔𑀫𑁆𑀪𑀦𑀩𑀳𑀺𑀤𑁆𑀥𑀸 𑀘 𑀑𑀓𑀧𑁆𑀧𑀦𑀢𑁄. 𑀲𑁄 𑀅𑀚𑁆𑀛𑀢𑁆𑀢𑀧𑀲𑀸𑀤𑁄 𑀤𑁆𑀯𑀺𑀥𑁄. 𑀲𑀫𑀼𑀕𑁆𑀖𑀸𑀢𑀧𑀲𑀸𑀤𑁄 𑀘 𑀯𑀺𑀓𑁆𑀔𑀫𑁆𑀪𑀦𑀧𑀲𑀸𑀤𑁄 𑀘 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑀁. 𑀯𑀺𑀖𑀸𑀢𑁄 𑀦 𑀫𑀽𑀮𑀧𑀲𑀸𑀤𑁄 𑀚𑀸𑀢𑀫𑀽𑀮𑀫𑁆𑀧𑀺 𑀯𑀸. 𑀧𑀲𑀸𑀤𑁄 𑀲𑀩𑁆𑀬𑀸𑀧𑀸𑀤𑀁 𑀯𑀺𑀖𑀸𑀢𑁂𑀦. 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀲𑀼𑀔𑀁 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘 𑀅𑀧𑁆𑀧𑀺𑀬𑀯𑀺𑀧𑁆𑀧𑀬𑁄𑀕𑁄𑀧𑀺 𑀧𑀺𑀬𑀲𑀫𑁆𑀧𑀬𑁄𑀕𑁄𑀧𑀺 𑀦𑁂𑀓𑁆𑀔𑀫𑁆𑀫𑀲𑀼𑀔𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀲𑀼𑀔𑀫𑁆𑀧𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀫𑁆𑀧𑀺 𑀘𑁂𑀢𑀲𑀺𑀓𑀁 𑀲𑀼𑀔𑀁. 𑀬𑀫𑁆𑀧𑀺 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀢𑀫𑁆𑀧𑀺 𑀓𑀸𑀬𑀺𑀓𑀁 𑀲𑀼𑀔𑀁 𑀩𑁄𑀚𑁆𑀛𑀗𑁆𑀕𑀸 𑀘 𑀘𑁂𑀢𑀲𑀺𑀓𑀁 𑀲𑀼𑀔𑀁. 𑀬𑀫𑁆𑀧𑀺 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀲𑀺, 𑀢𑀫𑁆𑀧𑀺 𑀢𑀜𑁆𑀘 𑀲𑀼𑀔𑀧𑀤𑀝𑁆𑀞𑀸𑀦𑀁 𑀧𑀜𑁆𑀜𑀢𑁆𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑀁 𑀢𑀁 𑀅𑀧𑀭𑀸𑀫𑀝𑁆𑀞𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁. 𑀅𑀦𑁆𑀯𑁂𑀢𑀻𑀢𑀺 𑀅𑀧𑁆𑀧𑀦𑀸 𑀲𑀦𑁆𑀤𑀺𑀲𑁆𑀲𑀢𑀺 𑀦 𑀘𑀸𑀬𑀁 𑀯𑀸 𑀧𑀢𑁆𑀢𑀪𑀽𑀢𑁄 𑀅𑀦𑁆𑀯𑁂𑀢𑀺. 𑀢𑀤𑀺𑀤𑀁 𑀲𑀼𑀢𑁆𑀢𑀁 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀳𑁂𑀢𑀼𑀦𑀸 𑀘 𑀬𑁄 𑀧𑀲𑀦𑁆𑀦𑀫𑀸𑀦𑀲𑁄 𑀯𑀺𑀧𑀸𑀓𑁂𑀦 𑀘 𑀬𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑁄.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀪𑀕𑀯𑀸 𑀧𑀜𑁆𑀘𑀲𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀕𑀭𑀁 𑀧𑀯𑀺𑀲𑀢𑀺 𑀭𑀸𑀚𑀕𑀳𑀁. 𑀢𑀢𑁆𑀣 𑀫𑀦𑀼𑀲𑁆𑀲𑁄 𑀧𑀼𑀕𑁆𑀕𑀮𑁄 𑀪𑀕𑀯𑀦𑁆𑀢𑀁 𑀧𑀭𑀺𑀯𑀺𑀲𑀢𑀺, 𑀢𑀲𑁆𑀲 𑀧𑀲𑀸𑀤𑁄 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀫𑀽𑀮𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁄𑀧𑀺. 𑀲𑁄 𑀅𑀜𑁆𑀜𑁂𑀲𑀜𑁆𑀘 𑀅𑀓𑁆𑀔𑀸𑀢𑀺, 𑀇𑀤𑀁 𑀯𑀸𑀘𑀁 𑀪𑀸𑀲𑀢𑀺 𑀮𑀸𑀪𑀸 𑀢𑁂𑀲𑀁, 𑀬𑁂𑀲𑀁 𑀦𑀺𑀯𑁂𑀲𑀦𑀁 𑀪𑀕𑀯𑀸 𑀧𑀯𑀺𑀲𑀢𑀺, 𑀅𑀫𑁆𑀳𑀸𑀓𑀫𑁆𑀧𑀺 𑀬𑀤𑀺 𑀪𑀯𑁂𑀬𑁆𑀬 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀁𑀧𑀲𑀸𑀤𑀁 𑀮𑀘𑁆𑀙𑀫𑁆𑀳𑀸𑀢𑀺. 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 ‘‘𑀦𑀫𑁄 𑀪𑀕𑀯𑀢𑁄 𑀦𑀫𑁄 𑀪𑀕𑀯𑀢𑁄’’𑀢𑀺 𑀅𑀩𑁆𑀬𑀸𑀧𑀸𑀤𑀫𑀸𑀦𑁄 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀢𑀤𑀦𑀦𑁆𑀢𑀭𑁂 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺𑀢𑁆𑀣 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺. 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀢𑀣𑀸 𑀬𑀁 𑀧𑀭𑁂𑀲𑀁 𑀪𑀸𑀲𑀢𑀺 𑀇𑀤𑀁 𑀯𑀸𑀘𑀸𑀓𑀫𑁆𑀫𑀁. 𑀬𑀁 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑀺, 𑀇𑀤𑀁 𑀓𑀸𑀬𑀓𑀫𑁆𑀫𑀁. 𑀬𑁄 𑀫𑀦𑁄𑀧𑀲𑀸𑀤𑁄, 𑀇𑀤𑀁 𑀫𑀦𑁄𑀓𑀫𑁆𑀫𑀁. 𑀢𑀢𑁆𑀣 𑀬𑀁 𑀧𑀭𑁂𑀲𑀁 𑀧𑀓𑀸𑀲𑁂𑀢𑀺 𑀪𑀸𑀲𑀢𑀺 𑀯𑀡𑁆𑀡𑀁. 𑀬𑁂𑀲𑀁 𑀪𑀕𑀯𑀸 𑀦𑀺𑀯𑁂𑀲𑀦𑀁 𑀕𑀘𑁆𑀙𑀢𑀻𑀢𑀺. 𑀲𑀩𑁆𑀩𑀁 𑀢𑀲𑁆𑀲 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁. 𑀬𑀁 𑀪𑀕𑀯𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀢𑀲𑁆𑀲 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀬𑀁 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑀺 𑀫𑀸𑀦𑀜𑁆𑀘 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀢𑀢𑁆𑀣𑀲𑁆𑀲 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁 𑀧𑀸𑀢𑀼𑀪𑀯𑀢𑀺. 𑀬𑀁 𑀉𑀴𑀸𑀭𑀧𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀇𑀤𑀫𑀲𑁆𑀲 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀁. 𑀬𑀁 𑀢𑀣𑀸𑀬𑁂𑀯 𑀲𑀁𑀯𑀭𑁄 𑀳𑁄𑀢𑀺, 𑀇𑀤𑀫𑀲𑁆𑀲 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀁. 𑀬𑀁 𑀫𑀦𑀲𑁆𑀲 𑀧𑀲𑀸𑀤𑀦𑀁, 𑀇𑀤𑀫𑀲𑁆𑀲 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁 𑀧𑀳𑀸𑀦𑀁 𑀧𑀘𑁆𑀘𑀬𑁄. 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀬𑁄 𑀅𑀦𑀸𑀯𑀺𑀮𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄, 𑀲𑁄 𑀢𑀲𑁆𑀲 𑀫𑀦𑀲𑀺𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀓𑀺𑀮𑁂𑀲𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀁 𑀇𑀢𑀺 𑀯𑀺𑀧𑀮𑁆𑀮𑀸𑀲𑀸 𑀘 𑀆𑀭𑀫𑁆𑀫𑀡𑀸 𑀲𑀧𑁆𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄 𑀓𑀼𑀲𑀮𑀫𑀽𑀮𑀸𑀦𑀺 𑀘 𑀲𑀦𑁆𑀤𑀺𑀲𑁆𑀲𑀬𑀢𑀸𑀬 𑀧𑀘𑁆𑀘𑀬𑁄, 𑀲𑁄 𑀘 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼𑀦𑀸 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀬𑀁 𑀲𑀲𑀢𑁆𑀣𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀁 𑀅𑀬𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺. 𑀬𑀫𑁆𑀧𑀺 𑀪𑀕𑀯𑀢𑁄 𑀕𑀼𑀡𑁂 𑀫𑀦𑀲𑀺 𑀓𑀭𑁄𑀢𑀺, 𑀅𑀬𑀫𑀲𑁆𑀲 𑀥𑀫𑁆𑀫𑀸𑀦𑀼𑀲𑁆𑀲𑀢𑀺. 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀳𑁂𑀢𑀼, 𑀅𑀬𑀜𑁆𑀘 𑀧𑀘𑁆𑀘𑀬𑁄. 𑀯𑀸𑀘𑀸 𑀧𑀜𑁆𑀜𑀸 𑀳𑁂𑀢𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀘𑁆𑀘𑀬𑁄. 𑀓𑀸𑀬𑀲𑀗𑁆𑀔𑀸𑀭𑀸 𑀓𑀫𑁆𑀫𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑁄 𑀦𑀸𑀫 𑀳𑁂𑀢𑀼 𑀯𑀸 𑀅𑀧𑁆𑀧𑀘𑁆𑀘𑀬𑁄 𑀲𑀼𑀔𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀘𑀬𑁄 𑀳𑁂𑀢𑀼𑀓𑀸 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄.

𑁮𑁬. 𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄? 𑀫𑀦𑀲𑀸𑀬𑁂𑀯 𑀧𑀲𑀦𑁆𑀦𑁂𑀦 𑀲𑀢𑁄𑀬𑁂𑀯𑁂𑀢𑁆𑀣 𑀧𑀲𑀦𑁆𑀦𑁄 𑀅𑀧𑀺 𑀘 𑀘𑀺𑀢𑁆𑀢𑀯𑁄𑀤𑀸𑀦𑀸 𑀲𑀢𑁆𑀢𑀸 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺 𑀢𑁂𑀦 𑀲𑀢𑁆𑀢𑀸 𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀸 𑀘𑀺𑀢𑁆𑀢𑁂𑀦 𑀧𑀲𑀦𑁆𑀦𑁂𑀦 𑀘𑁂𑀢𑀦𑀸𑀧𑀺 𑀢𑀢𑁆𑀣 𑀘𑀺𑀢𑁆𑀢𑀪𑀽𑀢𑀸 𑀪𑀯𑀦𑁆𑀢𑀻𑀢𑀺 𑀧𑀝𑀺𑀖𑀸 𑀅𑀬𑀁 𑀘𑁂𑀢𑀦𑀸𑀦𑀁 𑀧𑀲𑀸𑀤𑁂𑀦 𑀓𑀸𑀬𑁄 𑀘𑀲𑁆𑀲 𑀧𑀲𑀸𑀤𑁄, 𑀲𑁄 𑀘 𑀆𑀭𑀪𑀢𑀺 𑀧𑀲𑀸𑀤𑁂𑀦 𑀧𑀲𑀦𑁆𑀦𑁄 𑀲𑀜𑁆𑀜𑀸𑀦𑀦𑁆𑀢𑀺 𑀘𑀲𑁆𑀲 𑀅𑀯𑀺𑀧𑀭𑀻𑀢𑀸, 𑀲𑁄 𑀧𑀜𑁆𑀘𑀯𑀺𑀥𑁄 𑀯𑀺𑀓𑁆𑀔𑀫𑁆𑀪𑀦𑀸, 𑀓𑀸𑀬𑀧𑀲𑁆𑀲𑀫𑁆𑀪𑀦𑀸𑀬𑁂𑀯𑀸 𑀧𑀲𑀸𑀤𑁄 𑀘𑀺𑀢𑁆𑀢𑀲𑀺𑀢𑁄 𑀘𑀺𑀢𑁆𑀢𑀁 𑀧𑀦 𑀧𑀼𑀩𑁆𑀩𑀁𑀬𑁂𑀯 𑀧𑀲𑀦𑁆𑀦𑀁. 𑀅𑀬𑀁 𑀲𑀫𑀸𑀭𑁄𑀧𑀦𑀸. 𑀏𑀯𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀧𑀲𑀸𑀤𑁄. 𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀓𑀢𑀫𑀁 𑀪𑀕𑀯𑀸 𑀦𑀺𑀤𑁆𑀤𑀺𑀲𑀢𑀺? 𑀦 𑀳𑀺 𑀅𑀢𑁆𑀢𑀲𑀘𑁆𑀘𑀁 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀅𑀦𑁆𑀯𑁂𑀢𑀺. 𑀢𑀲𑁆𑀲 𑀉𑀧𑀸𑀬𑁄 𑀅𑀦𑀼𑀕𑀘𑁆𑀙𑀢𑀺 𑀬𑀤𑀸 𑀲𑀺𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑁂 𑀲𑁄𑀫𑀦𑀲𑁆𑀲𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀧𑀺 𑀅𑀦𑁆𑀯𑁂𑀢𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀫𑀳𑀸𑀦𑀸𑀫 𑀲𑀓𑁆𑀓𑀲𑁆𑀲 𑀲𑀼𑀢𑁆𑀢𑀁 [𑀧𑀲𑁆𑀲 𑀲𑀁. 𑀦𑀺. 𑁫.𑁧𑁦𑁧𑁭]. 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀅𑀲𑁆𑀲𑀢𑁄 𑀅𑀲𑀫𑁆𑀧𑀚𑀸𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬 𑀓𑀸𑀫𑁂 𑀪𑀯𑀢𑀺. 𑀅𑀲𑁆𑀲𑀢𑁄 𑀅𑀪𑀺𑀲𑀫𑀸𑀳𑀸𑀭𑁄 𑀬𑁄 𑀫𑀸 𑀪𑀸𑀬𑀺, 𑀫𑀳𑀸𑀦𑀸𑀫, 𑀬𑀁 𑀢𑀁 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀲𑀤𑁆𑀥𑀸𑀧𑀭𑀺𑀪𑀸𑀯𑀺𑀢𑀁 𑀲𑀻𑀮𑀧𑀭𑀺𑀪𑀸𑀯𑀺𑀢𑀁 𑀲𑀼𑀢𑀘𑀸𑀕𑀧𑀭𑀺𑀪𑀸𑀯𑀺𑀢𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀘𑀸𑀕𑁂𑀦 𑀘 𑀧𑀜𑁆𑀜𑀸𑀬 𑀘 𑀓𑀺𑀁 𑀤𑀲𑁆𑀲𑁂𑀢𑀺? 𑀬𑀸 𑀲𑀤𑁆𑀥𑀸, 𑀲𑀸 𑀘𑁂𑀢𑀲𑁄 𑀧𑀲𑀸𑀤𑁄. 𑀬𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀺𑀢𑀸, 𑀲𑀸 𑀲𑀤𑁆𑀥𑀸. 𑀓𑀺𑀁 𑀓𑀸𑀭𑀡𑀸? 𑀅𑀦𑀸𑀯𑀺𑀮𑀮𑀓𑁆𑀔𑀡𑀸. 𑀅𑀦𑀸𑀯𑀺𑀮𑀮𑀓𑁆𑀔𑀡𑀸 𑀳𑀺 𑀲𑀤𑁆𑀥𑀸. 𑀅𑀧𑀭𑁂 𑀆𑀳𑀼 𑀕𑀼𑀡𑀧𑀭𑀺𑀲𑀼𑀤𑁆𑀥𑀺𑀦𑀺𑀝𑁆𑀞𑀸𑀕𑀫𑀦𑀮𑀓𑁆𑀔𑀡𑀸, 𑀬𑀜𑁆𑀘 𑀅𑀧𑀭𑁂 𑀯𑀸 𑀯𑀘𑀦𑀧𑀝𑀺𑀕𑁆𑀕𑀳𑀮𑀓𑁆𑀔𑀡𑀸 𑀲𑀤𑁆𑀥𑀸. 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀅𑀢𑁆𑀢𑀸𑀦𑀁 𑀬𑀤𑀺 𑀏𑀯𑀁 𑀑𑀓𑀧𑁆𑀧𑁂𑀢𑀺 ‘‘𑀦𑀸𑀳𑀁 𑀓𑀺𑀜𑁆𑀘𑀺 𑀚𑀸𑀦𑀸𑀫𑀻𑀢𑀺 𑀏𑀲𑀸 𑀅𑀳𑀁 𑀢𑀢𑁆𑀣 𑀅𑀦𑀼𑀜𑁆𑀜𑀢𑁆𑀢𑀸 𑀅𑀦𑀜𑁆𑀜𑀢𑀸’’𑀢𑀺. 𑀅𑀬𑀁 𑀲𑀤𑁆𑀥𑀸𑀢𑀺. 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀏𑀓𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺. 𑀢𑁂𑀦 𑀘 𑀧𑀤𑀺𑀝𑁆𑀞𑀁 𑀪𑀯𑀢𑀺 𑀬𑀣𑀸 𑀕𑀫𑁆𑀪𑀻𑀭𑁂 𑀉𑀤𑀧𑀸𑀦𑁂 𑀉𑀤𑀓𑀁 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺 𑀦 𑀘 𑀓𑀸𑀬𑁂𑀦 𑀅𑀪𑀺𑀲𑀫𑁆𑀪𑀼𑀦𑀸𑀢𑀺. 𑀏𑀯𑀫𑀲𑁆𑀲 𑀅𑀭𑀺𑀬𑀸 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀤𑀺𑀝𑁆𑀞𑀺 𑀪𑀯𑀢𑀺, 𑀦 𑀘 𑀲𑀘𑁆𑀙𑀺𑀓𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸. 𑀲𑀸 𑀘 𑀮𑁄𑀓𑀺𑀓𑀸. 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀔𑀫𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀢𑀲𑁆𑀲 𑀯𑀻𑀲𑀢𑀺 𑀘𑀸𑀢𑀺 𑀓𑁄 𑀲𑀓𑁆𑀓𑀸𑀬𑀸𑀥𑀻𑀦𑀸 𑀦 𑀦𑀺𑀯𑁂𑀲𑁄. 𑀦 𑀏𑀢𑀁 𑀏𑀓𑀦𑁆𑀢𑀺 𑀦𑀬𑀲𑀜𑁆𑀜𑀸 𑀬𑀣𑀸𑀪𑀽𑀢𑀁 𑀤𑀺𑀝𑁆𑀞𑀺𑀬𑀸 𑀢𑀼 𑀔𑀮𑀼 𑀫𑀼𑀤𑀽𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀤𑀲𑁆𑀲𑀦𑀫𑀕𑁆𑀕𑁂𑀦 𑀧𑀳𑀻𑀦𑀸 𑀪𑀯𑀦𑁆𑀢𑀺. 𑀤𑀺𑀝𑁆𑀞𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸, 𑀅𑀬𑀁 𑀲𑀤𑁆𑀥𑀸.

𑀲𑁄𑀢𑀸𑀧𑀢𑁆𑀢𑀗𑁆𑀕𑀫𑀤𑀼𑀓𑁆𑀔𑀸𑀬𑀁 𑀪𑀽𑀫𑀺𑀬𑀁 𑀧𑀭𑀺𑀧𑀼𑀡𑁆𑀡𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀪𑀽𑀫𑀺𑀬𑀁 𑀲𑁂𑀓𑁆𑀔𑀲𑀻𑀮𑀁 𑀅𑀭𑀺𑀬𑀸 𑀥𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀪𑀽𑀫𑀺𑀬𑀁 𑀫𑀼𑀤𑀼𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀪𑀽𑀫𑀺𑀬𑀁 𑀔𑀦𑁆𑀥𑁂𑀳𑀺 𑀅𑀦𑀢𑁆𑀣𑀺𑀓𑀢𑀸, 𑀅𑀬𑀁 𑀘𑀸𑀕𑁄. 𑀢𑀲𑁆𑀫𑀸 𑀲𑀤𑁆𑀥𑀸 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀬𑀢𑀺𑀓𑁂𑀦 [𑀢𑁂𑀦 (𑀓.)] 𑀪𑀺𑀬𑁆𑀬𑁄 𑀫𑀦𑁂𑀦 𑀲𑀸 𑀳𑀺𑀲𑁆𑀲 𑀯𑀺𑀧𑀭𑀻𑀢𑀸 𑀤𑀺𑀝𑁆𑀞𑀺𑀓𑀸 𑀅𑀲𑁆𑀲𑀤𑁆𑀥𑀸, 𑀲𑀸 𑀦𑀬𑀦𑀉𑀧𑀥𑀻𑀲𑀼 𑀧𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀬𑁄 𑀓𑀸𑀫𑀁 𑀧𑀭𑀺𑀯𑀺𑀲𑁆𑀲𑀦𑁆𑀢𑀺 𑀇𑀢𑀺 𑀲𑀦𑁆𑀢𑀧𑀸𑀧𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁, 𑀲𑀻𑀮𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁. 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀻𑀮𑀁 𑀧𑀭𑀺𑀪𑀸𑀯𑀬𑀦𑁆𑀢𑀺 𑀲𑀤𑁆𑀥𑀸 𑀲𑀻𑀮𑀁 𑀘𑀸𑀕𑁄 𑀘 𑀧𑀜𑁆𑀜𑀸𑀢𑀺. 𑀢𑀢𑁆𑀣 𑀲𑀤𑁆𑀥𑀸𑀬 𑀑𑀖𑀁 𑀢𑀭𑀢𑀺. 𑀬𑀁 𑀲𑀻𑀮𑀁, 𑀅𑀬𑀁 𑀅𑀧𑁆𑀧𑀫𑀸𑀤𑁄. 𑀬𑁄 𑀘𑀸𑀕𑁄, 𑀇𑀤𑀁 𑀧𑀜𑁆𑀜𑀸𑀬 𑀓𑀫𑁆𑀫𑀁. 𑀬𑀸 𑀧𑀜𑁆𑀜𑀸, 𑀇𑀤𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀢𑀢𑁆𑀣 𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀢𑀁 𑀢𑀻𑀲𑀼 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀲𑀼. 𑀬𑀁 𑀲𑀻𑀮𑀁, 𑀢𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀲𑀼. 𑀬𑁄 𑀘𑀸𑀕𑁄, 𑀲𑁄 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀬𑀸 𑀧𑀜𑁆𑀜𑀸, 𑀲𑀸 𑀲𑀘𑁆𑀘𑁂𑀲𑀼, 𑀲𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻. 𑀢𑀲𑁆𑀲 𑀲𑁂𑀓𑁆𑀔𑀲𑁆𑀲 𑀪𑀤𑁆𑀤𑀺𑀓𑀸 𑀪𑀢𑀺, 𑀪𑀤𑁆𑀤𑀺𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄. 𑀢𑀲𑁆𑀲 𑀲𑀫𑁆𑀫𑀼𑀝𑁆𑀞𑀲𑁆𑀲𑀢𑀺𑀓𑀲𑁆𑀲 𑀲𑀻𑀮𑀁 𑀓𑀭𑁄𑀦𑁆𑀢𑀲𑁆𑀲 𑀦 𑀓𑀸𑀬𑀲𑀫𑁆𑀫𑀼𑀝𑁆𑀞𑀲𑁆𑀲𑀢𑀺𑀢𑀸𑀬 𑀢𑀸𑀦𑀺 𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀁 𑀯𑀸 𑀓𑀼𑀲𑀮𑀫𑀽𑀮𑀁 𑀓𑀫𑁆𑀫𑀯𑀺𑀧𑀸𑀓𑀁 𑀪𑀯𑀢𑀺. 𑀢𑀲𑁆𑀲 𑀢𑀺𑀓𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣 𑀲𑀤𑁆𑀥𑀸 𑀲𑀻𑀮𑀁 𑀘𑀸𑀕𑁄 𑀧𑀜𑁆𑀜𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸. 𑀬𑀸 𑀲𑀤𑁆𑀥𑀸 𑀬𑀸 𑀘 𑀧𑀜𑁆𑀜𑀸, 𑀇𑀤𑀁 𑀫𑀦𑁄𑀲𑀼𑀘𑀭𑀺𑀢𑀁. 𑀬𑀁 𑀲𑀻𑀮𑀁, 𑀇𑀤𑀁 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀲𑀼𑀘𑀭𑀺𑀢𑀁. 𑀬𑁄 𑀘𑀸𑀕𑁄, 𑀇𑀤𑀁 𑀘𑁂𑀢𑀲𑀺𑀓𑀁 𑀅𑀮𑁄𑀪𑁄 𑀲𑀼𑀘𑀭𑀺𑀢𑀁. 𑀇𑀢𑀺 𑀘𑀺𑀢𑁆𑀢𑁂 𑀕𑀳𑀺𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀕𑀳𑀺𑀢𑀸 𑀪𑀯𑀦𑁆𑀢𑀺. 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀘𑀭𑀺𑀢𑀁 𑀇𑀤𑀁 𑀤𑀼𑀓𑁆𑀔𑀜𑁆𑀘 𑀅𑀭𑀺𑀬𑀲𑀘𑁆𑀘𑀁 𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀲𑁆𑀲.

𑁮𑁭. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? 𑀬𑀸 𑀘 𑀲𑀤𑁆𑀥𑀸 𑀬𑀜𑁆𑀘 𑀲𑀻𑀮𑀁. 𑀢𑀁 𑀓𑀺𑀲𑁆𑀲 𑀓𑀭𑁄𑀢𑀺? 𑀬𑀸 𑀲𑀤𑁆𑀥𑀸 𑀢𑀸𑀬 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀢𑀺 𑀫𑀢𑁆𑀢𑁂𑀦𑀧𑀺 𑀳𑀢𑁆𑀣𑀺𑀦𑀸 𑀲𑀫𑀸𑀕𑀢𑀸, 𑀅𑀲𑁆𑀲 𑀪𑁄 𑀓𑀼𑀓𑁆𑀓𑀼𑀭𑀸 𑀲𑀩𑁆𑀩𑀁 𑀲𑀻𑀮𑁂𑀦 𑀦𑀧𑁆𑀧𑀝𑀺𑀧𑀚𑁆𑀚𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀞𑀸𑀦𑀁 𑀯𑀺𑀲𑀸𑀭𑀤𑁄 𑀪𑀯𑀢𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀻 𑀧𑀜𑁆𑀜𑀸 𑀬𑀲𑁆𑀲 𑀧𑀜𑁆𑀜𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺. 𑀢𑀲𑁆𑀲 𑀅𑀔𑀡𑁆𑀟𑀲𑁆𑀲 𑀲𑀻𑀮𑀁 𑀬𑀁 𑀦 𑀧𑀘𑁆𑀙𑀺 𑀢𑀲𑁆𑀲𑀁 𑀫𑁄𑀳𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀳𑀕𑀢𑀁 𑀯𑀸, 𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄. 𑀥𑀫𑁆𑀫𑀯𑀸𑀤𑀺𑀦𑁄 𑀪𑀤𑁆𑀤𑀺𑀓𑀸𑀭𑀸𑀢𑀺 𑀪𑀯𑀺𑀲𑁆𑀲𑀢𑀺 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄? 𑀬𑀫𑀺𑀤𑀁 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀁 𑀲𑀤𑁆𑀥𑀸𑀬 𑀲𑀻𑀮𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬 𑀲𑀫𑀸𑀥𑀺𑀦𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀸 𑀲𑀤𑁆𑀥𑀸 𑀅𑀲𑁆𑀲 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄, 𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀢𑀻𑀡𑀺 𑀘 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸 𑀬𑀁 𑀲𑀻𑀮𑀁, 𑀢𑀁 𑀅𑀭𑀺𑀬𑀓𑀦𑁆𑀢𑀁, 𑀢𑀁 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀸 𑀧𑀜𑁆𑀜𑀸, 𑀲𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀫𑁂 𑀘 𑀥𑀫𑁆𑀫𑀸 𑀇𑀤𑀜𑁆𑀘 𑀘𑀺𑀢𑁆𑀢𑀁 𑀏𑀓𑁄𑀤𑀺𑀪𑀽𑀢𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀸𑀕𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘 𑀯𑀺𑀧𑀲𑁆𑀲𑀦𑀸 𑀧𑀤𑀝𑁆𑀞𑀸𑀦𑀁. 𑀲𑀻𑀮𑀜𑁆𑀘 𑀘𑀸𑀕𑁄 𑀘 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘 𑀅𑀯𑀺𑀚𑁆𑀚𑀸 𑀯𑀺𑀭𑀸𑀕𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀲𑀻𑀮𑀜𑁆𑀘 𑀘𑀸𑀕𑁄 𑀘 𑀭𑀸𑀕𑀯𑀺𑀭𑀸𑀕𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? 𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑁂 𑀲𑀤𑁆𑀥𑀸𑀲𑀢𑀺𑀪𑀸𑀯𑀺𑀢𑁂 𑀲𑀩𑁆𑀩𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀲𑀤𑁆𑀥𑀸𑀬 𑀪𑀡𑀺𑀢𑀸𑀬 𑀲𑀩𑁆𑀩𑀸𑀦𑀺 𑀲𑀢𑁆𑀢 𑀥𑀦𑀸𑀦𑀺 𑀪𑀡𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀤𑁆𑀥𑀸𑀥𑀦𑀁…𑀧𑁂… 𑀲𑀻𑀮𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀘 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀬𑀁 𑀢𑀁 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀁 𑀧𑀘𑁆𑀙𑀺𑀫𑀓𑁂 𑀓𑀸𑀮𑁂 𑀦 𑀢𑀤𑀦𑀼𑀧𑀭𑀺𑀯𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀲𑀜𑁆𑀜𑀸𑀧𑀺 𑀢𑀤𑀦𑀼𑀧𑀭𑀺𑀯𑀢𑁆𑀢𑀺𑀦𑀻 𑀪𑀯𑀢𑀺. 𑀬𑁂𑀧𑀺 𑀢𑀚𑁆𑀚𑀸𑀢𑀺𑀓𑀸 𑀥𑀫𑁆𑀫𑀸, 𑀢𑁂𑀧𑀺 𑀢𑀤𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀪𑀯𑀦𑁆𑀢𑀺. 𑀭𑀽𑀧𑀲𑀜𑁆𑀜𑀸 𑀭𑀽𑀧𑀲𑀜𑁆𑀘𑁂𑀢𑀦𑀸𑀦𑀼𑀧𑀲𑁆𑀲𑀦𑀫𑀦𑀲𑀺𑀓𑀸𑀭𑁄 𑀏𑀯𑀁 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀯𑀺𑀜𑁆𑀜𑀸𑀡𑀓𑀸𑀬𑁂, 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀥 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀪𑀤𑁆𑀤𑀺𑀓𑀁 𑀪𑀢𑀺𑀁 𑀆𑀓𑀗𑁆𑀔𑁂𑀬𑁆𑀬 𑀪𑀤𑁆𑀤𑀺𑀓𑀜𑁆𑀘 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀢𑁂 𑀲𑀤𑁆𑀥𑀁 𑀲𑀻𑀮𑀁 𑀘𑀸𑀕𑀁 𑀧𑀜𑁆𑀜𑀜𑁆𑀘 𑀫𑀦𑀲𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀘𑀜𑁆𑀜𑁂𑀧𑀺 𑀲𑀢𑁆𑀢𑀸 𑀢𑀣𑀸𑀕𑀢𑀲𑁆𑀲 𑀲𑀫𑁆𑀫𑀼𑀔𑀁 𑀦 𑀧𑀝𑀺𑀬𑀼𑀚𑁆𑀛𑀦𑁆𑀢𑁂, 𑀇𑀫𑀁 𑀥𑀫𑁆𑀫𑀁 𑀲𑁄𑀢𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑁮𑁮. 𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄? 𑀇𑀤𑀫𑁆𑀧𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘 𑀅𑀲𑁆𑀲𑀤𑁆𑀥𑀺𑀬𑀜𑁆𑀘 𑀅𑀯𑀺𑀚𑁆𑀚𑀜𑁆𑀘 𑀳𑀦𑀦𑁆𑀢𑀺. 𑀲𑀻𑀮𑀜𑁆𑀘 𑀘𑀸𑀕𑁄 𑀘 𑀢𑀡𑁆𑀳𑀸 𑀘 𑀤𑁄𑀲𑀜𑁆𑀘 𑀳𑀦𑀦𑁆𑀢𑀺. 𑀢𑀲𑁆𑀲 𑀤𑁆𑀯𑁂 𑀫𑀽𑀮𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀤𑀼𑀓𑁆𑀔𑀁 𑀦𑀺𑀯𑀢𑁆𑀢𑁂𑀢𑀺 𑀅𑀧𑁆𑀧𑀳𑀻𑀦𑀪𑀽𑀫𑀺𑀬𑀜𑁆𑀘 𑀤𑁆𑀯𑀺𑀫𑀽𑀮𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀤𑁆𑀯𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀤𑁆𑀯𑀺𑀦𑁆𑀦𑀁 𑀫𑀽𑀮𑀸𑀦𑀁 𑀧𑀳𑀸𑀦𑀁. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺? 𑀬𑀁 𑀢𑀁 𑀘𑀺𑀢𑁆𑀢𑀁 𑀲𑀤𑁆𑀥𑀸𑀧𑀭𑀺𑀪𑀸𑀯𑀺𑀢𑀁…𑀧𑁂… 𑀲𑀘𑁂 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀲𑁆𑀲𑀧𑀺 𑀪𑀤𑁆𑀤𑀺𑀓𑀸 𑀪𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀦 𑀏𑀓𑀁𑀲𑁂𑀦 𑀢𑀲𑁆𑀲 𑀓𑀫𑁆𑀫𑀁 𑀤𑀺𑀝𑁆𑀞𑁂𑀬𑁂𑀯 𑀥𑀫𑁆𑀫𑁂 𑀯𑀺𑀧𑀸𑀓𑀦𑁆𑀢𑀺 𑀧𑀘𑁆𑀘𑁂𑀲𑁆𑀲𑀢𑀺, 𑀅𑀧𑀭𑀫𑁆𑀳𑀺 𑀯𑀸 𑀧𑀭𑀺𑀬𑀸𑀬𑁂 𑀪𑀯𑀺𑀲𑁆𑀲𑀢𑀺. 𑀬𑀁 𑀯𑀸 𑀅𑀢𑀻𑀢𑀁 𑀯𑀺𑀧𑀸𑀓𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀁, 𑀢𑀧𑁆𑀧𑀘𑁆𑀘𑀬𑀸𑀦𑀺 𑀘𑁂𑀢𑀸𑀦𑀺, 𑀬𑁂 𑀬𑀣𑀸 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑁂 ‘‘𑀢𑁂𑀦𑀸𑀬𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀺𑀬𑁄 𑀦𑀺𑀤𑁆𑀤𑁂𑀲𑁄 𑀥𑀫𑁆𑀫𑀘𑀸𑀭𑀺𑀦𑁄 𑀬𑀸 𑀪𑀤𑁆𑀤𑀺𑀓𑀸 𑀪𑀢𑀻’’𑀢𑀺.

𑀢𑀢𑁆𑀣 𑀓𑀢𑀫𑀸 𑀧𑀭𑀺𑀯𑀢𑁆𑀢𑀦𑀸? 𑀅𑀲𑁆𑀲𑀤𑁆𑀥𑀺𑀬𑀁 𑀤𑀼𑀲𑁆𑀲𑀻𑀮𑁆𑀬𑀁 𑀬𑀁 𑀫𑀘𑁆𑀙𑁂𑀭𑀁 𑀤𑀼𑀧𑁆𑀧𑀜𑁆𑀜𑀁 𑀘 [𑀤𑀼𑀧𑁆𑀧𑀜𑁆𑀜𑀺𑀬𑀁 (𑀓.)] 𑀬𑀜𑁆𑀘 𑀧𑀝𑀺𑀧𑀓𑁆𑀔𑁂𑀦 𑀧𑀳𑀻𑀦𑀸 𑀪𑀯𑀦𑁆𑀢𑀺, 𑀅𑀬𑀁 𑀧𑀭𑀺𑀯𑀢𑁆𑀢𑀦𑀸.

𑀢𑀢𑁆𑀣 𑀓𑀢𑀫𑀁 𑀯𑁂𑀯𑀘𑀦𑀁? 𑀬𑀁 𑀢𑀁 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀁…𑀧𑁂… 𑀬𑀁 𑀲𑀤𑁆𑀥𑀸𑀩𑀮𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀬𑀁 𑀲𑀻𑀮𑀁 𑀢𑀁 𑀲𑀼𑀘𑀭𑀺𑀢𑀁, 𑀲𑀁𑀬𑀫𑁄 𑀦𑀺𑀬𑀫𑁄 𑀤𑀫𑁄 𑀔𑀦𑁆𑀥𑀢𑀸 𑀇𑀫𑀸𑀦𑀺 𑀢𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀬𑁄 𑀘𑀸𑀕𑁄 𑀲𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀅𑀮𑁄𑀪𑁄 𑀯𑁄𑀲𑀕𑁆𑀕𑁄 𑀘𑀸𑀕𑁄𑀬𑀺𑀝𑁆𑀞𑀸𑀦𑀁. 𑀬𑀸 𑀧𑀜𑁆𑀜𑀸 𑀲𑀸 𑀧𑀜𑁆𑀜𑀢𑁆𑀢𑀸 𑀧𑀜𑁆𑀜𑀧𑁆𑀧𑀪𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀬𑀁 𑀢𑀁 𑀘𑀺𑀢𑁆𑀢𑀁 𑀩𑀻𑀚𑀁 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀧𑀭𑀺𑀪𑀸𑀯𑀦𑀸 𑀯𑀸𑀲𑀦𑀸 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺. 𑀲𑀤𑁆𑀥𑀸 𑀧𑀲𑀸𑀤𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀲𑀻𑀮𑀁 𑀲𑀼𑀘𑀭𑀺𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀘𑀸𑀕𑁄 𑀧𑀼𑀜𑁆𑀜𑀓𑀺𑀭𑀺𑀬𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄. 𑀧𑀜𑁆𑀜𑀸 𑀯𑀻𑀫𑀁𑀲𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀲𑀤𑁆𑀥𑀸 𑀲𑀻𑀮𑀁 𑀘𑀸𑀕𑁄 𑀧𑀜𑁆𑀜𑀯𑀢𑁄 𑀧𑀸𑀭𑀺𑀲𑀼𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀬𑀁 𑀘𑀺𑀢𑁆𑀢𑀁, 𑀢𑀁 𑀔𑀦𑁆𑀥𑁂𑀲𑀼 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀥𑀸𑀢𑀽𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀆𑀬𑀢𑀦𑁂𑀲𑀼 𑀫𑀦𑀸𑀬𑀢𑀦𑀁. 𑀬𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸, 𑀢𑁂 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀧𑀭𑀺𑀬𑀸𑀧𑀦𑁆𑀦𑀸…𑀧𑁂… 𑀥𑀸𑀢𑀽𑀲𑀼 𑀆𑀬𑀢𑀦𑁂𑀲𑀼.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀇𑀤𑀁 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 𑀧𑀼𑀘𑁆𑀙𑀺𑀢𑁂𑀦 𑀲𑀩𑁆𑀩𑀁 𑀢𑀁 𑀦𑀺𑀬𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄? 𑀇𑀤𑀁 𑀘𑀺𑀢𑁆𑀢𑀁 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀁 𑀅𑀓𑀼𑀲𑀮𑁂𑀳𑀺 𑀘𑀺𑀢𑁆𑀢𑁂𑀳𑀺 𑀅𑀧𑀭𑀺𑀪𑀸𑀯𑀺𑀢𑁂𑀳𑀺 𑀧𑀭𑀺𑀪𑀸𑀯𑀺𑀢𑀦𑁆𑀢𑀺 𑀬𑀸𑀦𑀺 𑀧𑀼𑀦 𑀧𑀭𑀺𑀪𑀸𑀯𑀺𑀢𑀸𑀦𑀺 𑀅𑀜𑁆𑀜𑁂𑀲𑀫𑁆𑀧𑀺 𑀢𑀢𑁆𑀣 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀁 𑀲𑀩𑁆𑀩𑁂𑀧𑀺𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸. 𑀪𑀤𑁆𑀤𑀺𑀓𑀸 𑀪𑀢𑀻𑀢𑀺 𑀓𑀸𑀫𑀪𑁄𑀕𑀺𑀦𑁄 𑀢𑁂𑀯 𑀭𑀽𑀧𑀥𑀸𑀢𑀼 𑀅𑀭𑀽𑀧𑀥𑀸𑀢𑀼 𑀫𑀦𑀼𑀲𑁆𑀲𑀸𑀢𑀺 𑀲𑀩𑁆𑀩𑀸 𑀪𑀤𑁆𑀤𑀺𑀓𑀸 𑀪𑀢𑀺 𑀢𑀤𑁂𑀯 𑀓𑀣𑀸𑀬 𑀧𑀜𑁆𑀜𑀢𑁆𑀢𑀁, 𑀅𑀬𑀁 𑀧𑀜𑁆𑀜𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀘𑀺𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀘𑁆𑀘𑀬𑁄 𑀆𑀥𑀺𑀧𑀢𑁂𑀬𑁆𑀬𑀧𑀘𑁆𑀘𑀬𑀢𑀸𑀬 𑀫𑀦𑀲𑀺𑀓𑀸𑀭𑁄. 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀲𑀤𑁆𑀥𑀸𑀬 𑀮𑁄𑀓𑀺𑀓𑀸 𑀧𑀜𑁆𑀜𑀸 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄. 𑀲𑀻𑀮𑀲𑁆𑀲 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀧𑀘𑁆𑀘𑀬𑁄. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀜𑁆𑀘 𑀳𑁂𑀢𑀼. 𑀘𑀸𑀕𑀲𑁆𑀲 𑀅𑀮𑁄𑀪𑁄 𑀳𑁂𑀢𑀼. 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀘 𑀳𑁂𑀢𑀼𑀧𑀘𑁆𑀘𑀬𑁄. 𑀧𑀜𑁆𑀜𑀸 𑀧𑀭𑀢𑁄 𑀘 𑀖𑁄𑀲𑁄 𑀅𑀚𑁆𑀛𑀢𑁆𑀢𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼𑀧𑀘𑁆𑀘𑀬𑁄 𑀘.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀬𑀁 𑀢𑀁 𑀘𑀺𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀦𑁆𑀢𑀺 𑀘𑁂𑀢𑀲𑀺𑀓𑀸𑀧𑀺. 𑀏𑀢𑁆𑀣 𑀲𑀩𑁆𑀩𑁂 𑀥𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸 𑀪𑀤𑁆𑀤𑀺𑀓𑀸 𑀢𑁂 𑀪𑀢𑀺 𑀪𑀯𑀺𑀲𑁆𑀲𑀢𑀺, 𑀪𑀤𑁆𑀤𑀺𑀓𑀸 𑀉𑀧𑀧𑀢𑁆𑀢𑀺𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄. 𑀇𑀢𑀺 𑀬𑁂 𑀓𑁂𑀘𑀺 𑀫𑀦𑀼𑀲𑁆𑀲𑀓𑀸 𑀉𑀧𑀪𑁄𑀕𑀧𑀭𑀺𑀪𑁄𑀕𑀸 𑀲𑀩𑁆𑀩𑁂 𑀪𑀤𑁆𑀤𑀺𑀓𑀸 𑀪𑀢𑀺𑀬𑁂𑀯, 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑁮𑁯. 𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀻𑀢𑀭𑀸𑀕𑁄𑀢𑀺 𑀕𑀸𑀣𑀸 [𑀧𑀲𑁆𑀲 𑀉𑀤𑀸. 𑁬𑁧 𑀉𑀤𑀸𑀦𑁂]. 𑀢𑀢𑁆𑀣 𑀓𑀺𑀁 𑀉𑀤𑁆𑀥𑀁 𑀦𑀸𑀫? 𑀬𑀁 𑀇𑀢𑁄 𑀉𑀤𑁆𑀥𑀁 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀸𑀫𑀻, 𑀇𑀤𑀁 𑀉𑀤𑁆𑀥𑀁. 𑀅𑀥𑁄 𑀦𑀸𑀫 𑀬𑀫𑀢𑀺𑀓𑁆𑀓𑀦𑁆𑀢𑀫𑀢𑀻𑀢𑀁, 𑀇𑀤𑀫𑀯𑁄𑀘 𑀅𑀧𑀤𑀸𑀦𑀢𑀦𑁆𑀢𑀺 𑀉𑀤𑁆𑀥𑀁. 𑀢𑀢𑁆𑀣 𑀅𑀢𑀻𑀢𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺 𑀧𑀼𑀩𑁆𑀩𑀦𑁆𑀢𑀸𑀓𑀧𑁆𑀧𑀺𑀓𑀸𑀦𑀁 𑀅𑀧𑀭𑀦𑁆𑀢𑀤𑀺𑀝𑁆𑀞𑀺 𑀓𑁂𑀲𑀜𑁆𑀘𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀬𑀁 [𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀁 (𑀓.)] 𑀯𑀼𑀢𑁆𑀢𑀓𑀧𑁆𑀧𑀺𑀓𑀸𑀦𑀁 𑀇𑀫𑀸 𑀘𑁂𑀯 𑀤𑀺𑀝𑁆𑀞𑀺𑀬𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘. 𑀢𑀢𑁆𑀣𑀸𑀬𑀁 𑀲𑀲𑁆𑀲𑀢𑀤𑀺𑀝𑁆𑀞𑀺 𑀇𑀫𑀸𑀦𑀺 𑀧𑀦𑁆𑀦𑀭𑀲 𑀧𑀤𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀲𑁆𑀲𑀢𑀁 𑀪𑀚𑀦𑁆𑀢𑀺. 𑀭𑀽𑀧𑀯𑀦𑁆𑀢𑀁 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀦𑀺 𑀫𑁂 𑀭𑀽𑀧𑀁, 𑀭𑀽𑀧𑀁 𑀫𑁂 𑀅𑀢𑁆𑀢𑀸𑀢𑀺 𑀬𑀤𑀼𑀘𑁆𑀘𑀢𑁂 𑀧𑀜𑁆𑀜𑀁 𑀧𑀭𑀺𑀤𑀳𑀦𑁆𑀢𑀺. 𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀲𑀸 𑀧𑀜𑁆𑀘𑀲𑀢𑀸𑀦𑀺 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺. 𑀢𑁂 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀺, 𑀭𑀽𑀧𑀁 𑀫𑁂 𑀅𑀢𑁆𑀢𑀸𑀢𑀺 𑀢𑀣𑀸𑀭𑀽𑀧𑀸 𑀘𑀢𑀼𑀩𑁆𑀩𑀺𑀥𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑁂𑀦 𑀘 𑀲𑀲𑁆𑀲𑀢𑁂𑀦 𑀘. 𑀏𑀯𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀬 𑀤𑀺𑀝𑁆𑀞𑀺𑀬𑀸 𑀧𑀦𑁆𑀦𑀭𑀲 𑀧𑀤𑀸𑀦𑀺 𑀧𑀼𑀩𑁆𑀩𑀦𑁆𑀢𑀁 𑀪𑀚𑀦𑁆𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀜𑁆𑀘 𑀧𑀤𑀸𑀦𑀺 𑀅𑀧𑀭𑀦𑁆𑀢𑀁 𑀪𑀚𑀦𑁆𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸. 𑀢𑀢𑁆𑀣 ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀧𑀲𑁆𑀲𑀦𑁆𑀢𑀸 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑁄 𑀉𑀘𑁆𑀙𑁂𑀤𑀯𑀸𑀤𑀻 𑀭𑀽𑀧𑀯𑀦𑁆𑀢𑀜𑁆𑀘 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀘 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀢𑀺 𑀲𑁄 𑀧𑀲𑁆𑀲𑀢𑀺 𑀘𑀸𑀢𑀺 𑀇𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀅𑀢𑁆𑀢𑀢𑁄 𑀧𑀝𑀺𑀲𑁆𑀲𑀭𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀧𑀼𑀩𑁆𑀩𑀦𑁆𑀢𑀢𑁄 𑀘 𑀧𑀝𑀺𑀲𑁆𑀲𑀭𑀢𑀺. ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀲 𑀤𑀺𑀝𑁆𑀞𑀸𑀲𑀯𑀸 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀬𑁄 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀧𑀼𑀩𑁆𑀩𑀦𑁆𑀢𑁂 𑀘 𑀅𑀧𑀭𑀦𑁆𑀢𑁂 𑀘 𑀢𑁂𑀦 𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑁂𑀦 𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀻𑀢𑀭𑀸𑀕𑁄 ‘‘𑀅𑀳𑀫𑀲𑁆𑀫𑀻’’𑀢𑀺 𑀦 𑀅𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀤𑁆𑀯𑀸𑀭𑁂𑀦 𑀇𑀫𑀺𑀦𑀸 𑀧𑀬𑁄𑀕𑁂𑀦 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀤𑀁 𑀤𑀲𑁆𑀲𑀦𑀪𑀽𑀫𑀺 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑁄 𑀅𑀭𑀺𑀬𑁄 𑀧𑀬𑁄𑀕𑁄 𑀅𑀦𑀪𑀸𑀯𑀁𑀕𑀢𑁂𑀦 𑀲𑀁𑀲𑀸𑀭𑁂𑀦 𑀅𑀧𑀼𑀦𑀩𑁆𑀪𑀯𑀸𑀢𑀺 𑀬𑁄 𑀓𑁄𑀘𑀺 𑀅𑀭𑀺𑀬𑁄 𑀧𑀬𑁄𑀕𑁄 𑀧𑀼𑀦𑀩𑁆𑀪𑀯𑀸𑀬 𑀫𑀼𑀤𑀽𑀦𑀺 𑀯𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑀚𑁆𑀛𑀸𑀦𑀺 𑀅𑀥𑀺𑀫𑀢𑁆𑀢𑀸𑀦𑀺 𑀯𑀸 𑀲𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀧𑁆𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀅𑀳𑀦𑁆𑀢𑀺 𑀤𑀺𑀝𑁆𑀞𑁄𑀖𑁄 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀅𑀯𑀺𑀚𑁆𑀚𑁄𑀖𑁄 𑀘 𑀑𑀥𑀺𑀲𑁄. 𑀢𑀢𑁆𑀣 𑀤𑁂𑀲𑀦𑀸𑀳𑀸𑀭𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦 𑀘 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀫𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀘. 𑀲𑀓𑁆𑀓𑀸𑀬𑀲𑀫𑀼𑀤𑀬𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘, 𑀅𑀬𑀁 𑀤𑁂𑀲𑀦𑀸 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀢𑀻𑀡𑀺 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀚𑀳𑀢𑀺. 𑀅𑀬𑀁 𑀯𑀺𑀘𑀬𑁄.

𑀢𑀢𑁆𑀣 𑀓𑀢𑀫𑀸 𑀬𑀼𑀢𑁆𑀢𑀺? 𑀢𑀺𑀯𑀺𑀥𑀸 𑀧𑀼𑀕𑁆𑀕𑀮𑀸 𑀓𑁄𑀘𑀺 𑀉𑀕𑁆𑀖𑀝𑀺𑀢𑀜𑁆𑀜𑀽 𑀓𑁄𑀘𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀓𑁄𑀘𑀺 𑀦𑁂𑀬𑁆𑀬𑁄. 𑀉𑀕𑁆𑀖𑀝𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀘 𑀢𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀳𑀺 𑀦𑁂𑀬𑁆𑀬𑁄. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀸𑀬 𑀤𑀲𑁆𑀲𑀦𑀪𑀽𑀫𑀺𑀫𑀸𑀕𑀫𑁆𑀫 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀸𑀢𑀺, 𑀏𑀓𑀩𑀻𑀚𑀓𑁄 𑀪𑀯𑀢𑀺. 𑀅𑀬𑀁 𑀧𑀞𑀫𑁄 𑀲𑁄𑀢𑀸𑀧𑀦𑁆𑀦𑁄. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀤𑀲𑁆𑀲𑀦𑀪𑀽𑀫𑀺𑀫𑀸𑀕𑀫𑁆𑀫 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀸𑀢𑀺, 𑀓𑁄𑀮𑀁𑀓𑁄𑀮𑁄 𑀘 𑀳𑁄𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄. 𑀢𑀢𑁆𑀣 𑀦𑁂𑀬𑁆𑀬𑁄 𑀤𑀲𑁆𑀲𑀦𑀪𑀽𑀫𑀺𑀫𑀸𑀕𑀫𑁆𑀫 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀸𑀢𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀘 𑀪𑀯𑀢𑀺. 𑀅𑀬𑀁 𑀢𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄.

𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀁 𑀪𑀽𑀫𑀺𑀁 𑀲𑀘𑁆𑀙𑀺𑀓𑀭𑁂𑀬𑁆𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑁂𑀦 𑀯𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀚𑀳𑀢𑀺. 𑀅𑀬𑀁 𑀬𑀼𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄? 𑀢𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀩𑁆𑀩𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀲𑀓𑁆𑀓𑀸𑀬𑁄 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀫𑀭𑀽𑀧𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀭𑀽𑀧𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀴𑀸𑀬𑀢𑀦𑀁 𑀅𑀳𑀁𑀓𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀤𑁆𑀯𑀻𑀲𑀼 𑀤𑀺𑀝𑁆𑀞𑀻𑀲𑀼 𑀧𑀳𑀻𑀦𑀸𑀲𑀼 𑀢𑀢𑁆𑀣 𑀏𑀓𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀉𑀤𑁆𑀥𑀁 𑀘 𑀅𑀥𑁄 𑀘 𑀯𑀻𑀢𑀭𑀸𑀕𑁄 𑀲𑀩𑁆𑀩𑀭𑀚𑀦𑀻𑀬𑁂𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺. 𑀢𑀚𑁆𑀚𑀸 𑀧𑀭𑀪𑀽𑀫𑀺𑀬𑀁, 𑀇𑀤𑀁 𑀧𑀘𑁆𑀘𑀬𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑀺. 𑀲𑁄 𑀲𑀩𑁆𑀩𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀆𑀫𑀲𑀢𑀺. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑁯𑁦. 𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀲𑀢𑁆𑀢𑀸 𑀬𑁂 𑀦𑀸𑀪𑀺𑀭𑀫𑀺𑀲𑁆𑀲𑀦𑁆𑀢𑀺, 𑀢𑁂 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬 𑀯𑀸𑀬𑀫𑀺𑀲𑁆𑀲𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄? 𑀬𑀸𑀦𑀺𑀫𑀸𑀦𑀺 𑀫𑀼𑀤𑀽𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀸𑀦𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀽𑀳𑀦𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑁄 𑀘 𑀪𑀸𑀯𑀦𑀸𑀓𑀸𑀭𑁂𑀦 𑀲𑁂𑀓𑁆𑀔𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀩𑀮𑀁 𑀲𑀤𑁆𑀥𑀸, 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀤𑀺𑀝𑁆𑀞𑀺𑀯𑀲𑁂𑀦 𑀩𑀮𑀁 𑀲𑀤𑁆𑀥𑀸, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀆𑀭𑀪𑀺𑀢𑀢𑁆𑀢𑀸 𑀲𑀢𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀺𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀬𑀁 𑀫𑀕𑁆𑀕𑁄 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀅𑀬𑀁 𑀦𑀺𑀭𑁄𑀥𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀇𑀤𑀁 𑀤𑀼𑀓𑁆𑀔𑀁. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄? ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀬𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑁄 𑀘 𑀔𑁄 𑀅𑀥𑀺𑀫𑀢𑁆𑀢𑁂𑀦 𑀮𑁄𑀓𑀺𑀓𑀸 𑀬𑀁 𑀪𑀽𑀫𑀺𑀬𑀁 𑀦 𑀢𑀼 𑀅𑀭𑀺𑀬𑁂𑀦 𑀧𑀬𑁄𑀕𑁂𑀦 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀧𑀚𑀳𑀢𑀺. 𑀬𑀁 𑀯𑀼𑀘𑁆𑀘𑀢𑀺 𑀢𑀚𑁆𑀚𑀸𑀬 𑀪𑀽𑀫𑀺𑀬𑀸 𑀅𑀥𑀺𑀫𑀢𑁆𑀢𑀸𑀬. 𑀢𑀢𑁆𑀣 𑀢𑀚𑁆𑀚𑀸𑀬 𑀪𑀽𑀫𑀺𑀬𑀁 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀅𑀥𑀺𑀫𑀢𑁆𑀢𑀢𑀁 𑀧𑀝𑀺𑀮𑀪𑀢𑀺 𑀲𑀻𑀮𑁂𑀦 𑀯𑀢𑁂𑀦 𑀩𑀸𑀳𑀼𑀲𑁆𑀲𑀘𑁆𑀘𑁂𑀦 𑀲𑀫𑀸𑀥𑀺𑀦𑀸 𑀦𑁂𑀓𑁆𑀔𑀫𑁆𑀫𑀲𑀼𑀔𑁂𑀦. 𑀢𑀢𑁆𑀣 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻 𑀅𑀥𑀺𑀫𑀸𑀦𑀁 𑀕𑀡𑁆𑀳𑀸𑀢𑀺. 𑀏𑀢𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀪𑀕𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀪𑀸𑀲𑀢𑀺. 𑀲𑀻𑀮𑀯𑀸 𑀯𑀢𑀫𑀢𑁆𑀢𑁂𑀦𑀸𑀢𑀺. 𑀢𑀢𑁆𑀣 𑀬𑁄 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻 𑀢𑀲𑁆𑀲 𑀬𑁄 𑀲𑀫𑀸𑀥𑀺, 𑀲𑁄 𑀲𑀸𑀫𑀺𑀲𑁄 𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄 𑀧𑀦 𑀲𑁄 𑀓𑀸𑀧𑀼𑀭𑀺𑀲𑀸 𑀯𑀼𑀘𑁆𑀘𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀆𑀫𑀺𑀲𑀁 𑀬𑀜𑁆𑀘 𑀅𑀭𑀺𑀬𑀫𑀕𑁆𑀕𑀫𑀸𑀕𑀫𑁆𑀫 𑀮𑁄𑀓𑀺𑀓𑀸 𑀅𑀦𑀭𑀺𑀬𑀁 𑀢𑁂𑀦 𑀲𑀫𑀸𑀥𑀺 𑀳𑁄𑀢𑀺 𑀅𑀦𑀭𑀺𑀬𑁄 𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀬𑁄 𑀧𑀦 𑀅𑀭𑀺𑀬𑀸𑀓𑀸𑀭𑁂𑀦 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 [𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 (𑀧𑀻.)], 𑀲𑁄 𑀅𑀥𑀺𑀕𑀫𑀦𑀁 𑀧𑀚𑀳𑀢𑀺 𑀬𑁄 𑀅𑀭𑀺𑀬𑁂𑀦 𑀲𑀫𑀸𑀥𑀺𑀦𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁂𑀦 𑀦𑀺𑀭𑀸𑀫𑀺𑀲𑁂𑀦 𑀦𑀻𑀬𑀢𑀺, 𑀢𑀢𑁆𑀣 𑀅𑀓𑀸𑀧𑀼𑀭𑀺𑀲𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀬𑁄 𑀢𑁂𑀳𑀺 𑀲𑁂𑀯𑀺𑀢𑁄 𑀲𑀫𑀸𑀥𑀺, 𑀲𑁄 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀢𑀲𑁆𑀫𑀸 𑀏𑀓𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁 ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀢𑀣𑀸 𑀧𑀸𑀢𑁂𑀢𑀺.

𑀢𑀢𑁆𑀣 𑀓𑀢𑀫𑀸 𑀧𑀭𑀺𑀯𑀢𑁆𑀢𑀦𑀸? 𑀇𑀫𑀸𑀬 𑀤𑀲𑁆𑀲𑀦𑀪𑀽𑀫𑀺𑀬𑀸 𑀓𑀺𑀮𑁂𑀲𑀸 𑀧𑀳𑀸𑀢𑀩𑁆𑀩𑀸, 𑀢𑁂𑀳𑀺 𑀧𑀳𑀻𑀬𑀦𑁆𑀢𑀺 𑀅𑀦𑀺𑀤𑁆𑀤𑀺𑀝𑁆𑀞𑀸𑀧𑀺 𑀪𑀕𑀯𑀢𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀬𑁄.

𑀢𑀢𑁆𑀣 𑀓𑀢𑀫𑀁 𑀯𑁂𑀯𑀘𑀦𑀁? 𑀬𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀢𑁆𑀢𑀤𑀺𑀝𑁆𑀞𑀺𑀬𑀸. 𑀅𑀬𑀁 𑀪𑀽𑀫𑀺. 𑀬𑁂 𑀓𑀺𑀮𑁂𑀲𑀸 𑀧𑀳𑀸𑀢𑀩𑁆𑀩𑀸. 𑀢𑁂 𑀅𑀧𑁆𑀧𑀳𑀻𑀬𑀦𑁆𑀢𑀺 𑀅𑀦𑀺𑀤𑁆𑀤𑀺𑀝𑁆𑀞𑀸𑀧𑀺 𑀪𑀕𑀯𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀲𑀸 𑀧𑀭𑀺𑀬𑀦𑁆𑀢𑀤𑀺𑀝𑁆𑀞𑀺 𑀘. 𑀬𑀸 𑀅𑀧𑀭𑀺𑀬𑀦𑁆𑀢𑀤𑀺𑀝𑁆𑀞𑀺 𑀘, 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘. 𑀬𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀲𑀸 𑀦𑀢𑁆𑀣𑀺𑀓𑀸 𑀤𑀺𑀝𑁆𑀞𑀺. 𑀬𑀸 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀲𑀸 𑀅𑀓𑀺𑀭𑀺𑀬𑀤𑀺𑀝𑁆𑀞𑀺. 𑀇𑀤𑀁 𑀯𑁂𑀯𑀘𑀦𑀁.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀢𑀡𑁆𑀳𑀸 𑀲𑀁𑀬𑁄𑀚𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀫𑀕𑁆𑀕𑁄 𑀧𑀝𑀺𑀮𑀸𑀪𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄. 𑀇𑀦𑁆𑀤𑁆𑀭𑀺𑀬𑀸 𑀧𑀝𑀺𑀮𑀸𑀪𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸𑀢𑀺. 𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀲𑀓𑁆𑀓𑀸𑀬𑁄 𑀤𑀼𑀓𑁆𑀔𑀁 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑁄. 𑀲𑀫𑀼𑀤𑀬𑁄 𑀫𑀕𑁆𑀕𑁄. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀸𑀦𑀺 𑀘 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑁂𑀲𑀼.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀬𑀜𑁆𑀳𑀺 𑀆𑀭𑀩𑁆𑀪 𑀪𑀕𑀯𑀢𑀸 𑀇𑀤𑀁 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁, 𑀲𑁄 𑀆𑀭𑀩𑁆𑀪 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁄𑀧𑀺 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼 𑀩𑀻𑀚𑀁. 𑀢𑁂𑀦 𑀅𑀯𑀺𑀚𑁆𑀚𑀸 𑀘 𑀲𑀗𑁆𑀔𑀸𑀭𑀸 𑀘 𑀧𑀘𑁆𑀘𑀬𑁄. 𑀦𑀺𑀯𑀢𑁆𑀢𑀺𑀦𑀬𑁄 𑀦 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀲𑀩𑁆𑀩𑀪𑀯𑁄, 𑀬𑁂 𑀘 𑀲𑀩𑁆𑀩𑀪𑀯𑀲𑁆𑀲 𑀳𑁂𑀢𑀼 𑀧𑀭𑀪𑀡𑁆𑀟𑀧𑀘𑁆𑀘𑀬𑁄 𑀇𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀢𑁄 𑀘 𑀖𑁄𑀲𑁄 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄 𑀧𑀘𑁆𑀘𑀬𑁄. 𑀬𑀸 𑀧𑀜𑁆𑀜𑀸 𑀉𑀧𑁆𑀧𑀸𑀤𑁂𑀢𑀺, 𑀏𑀲𑀸 𑀳𑁂𑀢𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀪𑀯𑀢𑀺, 𑀬𑀸 𑀲𑀫𑁆𑀫𑀸𑀲𑀫𑀸𑀥𑀺 [𑀲𑀫𑁆𑀫𑀸𑀤𑀺𑀝𑁆𑀞𑀺 (𑀧𑀻.)], 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀅𑀲𑀫𑀦𑀼𑀧𑀲𑁆𑀲𑀻 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄…𑀧𑁂… 𑀧𑀦𑁆𑀦𑀭𑀲 𑀧𑀤𑀸𑀦𑀺. 𑀲𑀻𑀮𑀸𑀦𑀺 𑀪𑀕𑀯𑀸 𑀓𑀺𑀫𑀢𑁆𑀣𑀺𑀬𑀸𑀦𑀺 𑀓𑀺𑀫𑀸𑀦𑀺𑀲𑀁𑀲𑀸𑀦𑀺. 𑀲𑀻𑀮𑀸𑀦𑀺, 𑀆𑀦𑀦𑁆𑀤, 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀬𑀸𑀯 𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀤𑀼𑀯𑀺𑀥𑁄 𑀅𑀢𑁆𑀣𑁄 𑁋 𑀧𑀼𑀭𑀺𑀲𑀢𑁆𑀣𑁄 𑀘 𑀯𑀘𑀦𑀢𑁆𑀣𑁄 𑀘.

𑁯𑁧. 𑀢𑀢𑁆𑀣 𑀓𑀢𑀫𑁄 𑀧𑀼𑀭𑀺𑀲𑀢𑁆𑀣𑁄? 𑀬𑀸𑀬𑀁 𑀦 𑀧𑀘𑁆𑀙𑀸𑀦𑀼𑀢𑀸𑀧𑀺𑀢𑀸 𑀅𑀬𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀬𑀁 𑀧𑀼𑀭𑀺𑀲𑀢𑁆𑀣𑁄. 𑀬𑀣𑀸 𑀓𑁄𑀘𑀺 𑀩𑁆𑀭𑀽𑀳𑀬𑀢𑀺 𑀇𑀫𑀢𑁆𑀣𑀫𑀸𑀲𑁂𑀯𑀢𑀺 𑀲𑁄 𑀪𑀡𑁂𑀬𑁆𑀬, 𑀓𑀺𑀜𑁆𑀘𑀺 𑀫𑀫𑁂𑀢𑁆𑀣 𑀅𑀥𑀻𑀦𑀁 𑀢𑀲𑁆𑀲𑀢𑁆𑀣𑀸𑀬 𑀇𑀤𑀁 𑀓𑀺𑀭𑀺𑀬𑀁 𑀆𑀭𑀪𑀸𑀫𑀻𑀢𑀺. 𑀅𑀬𑀁 𑀧𑀼𑀭𑀺𑀲𑀢𑁆𑀣𑁄.

𑀢𑀢𑁆𑀣 𑀓𑀢𑀫𑁄 𑀯𑀘𑀦𑀢𑁆𑀣𑁄? 𑀲𑀻𑀮𑀸𑀦𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀲𑀼𑀘𑀭𑀺𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺. 𑀢𑀢𑁆𑀣 𑀲𑀻𑀮𑀲𑁆𑀲 𑀯𑀢𑀲𑁆𑀲 𑀘 𑀪𑀸𑀲𑁄𑀬𑁂𑀯. 𑀅𑀦𑀜𑁆𑀜𑀸 𑀲𑀼𑀕𑀢𑀓𑀫𑁆𑀫𑀢𑀸 𑀲𑀼𑀘𑀭𑀺𑀢𑀁 𑀅𑀬𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑁄. 𑀏𑀯𑀁 𑀬𑀸𑀯 𑀯𑀺𑀫𑀼𑀢𑁆𑀢𑀻𑀢𑀺 𑀏𑀓𑀫𑁂𑀓𑀲𑁆𑀫𑀺𑀁 𑀧𑀤𑁂 𑀤𑁆𑀯𑁂 𑀅𑀢𑁆𑀣𑀸 𑁋 𑀧𑀼𑀭𑀺𑀲𑀢𑁆𑀣𑁄 𑀘 𑀯𑀘𑀦𑀢𑁆𑀣𑁄 𑀘, 𑀬𑀣𑀸 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀏𑀯𑀁 𑀲𑀩𑁆𑀩𑁂𑀲𑀼 𑀲𑀼𑀢𑁆𑀢𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑀸. 𑀅𑀬𑀁 𑀳𑀺 𑀧𑀭𑀫𑀢𑁆𑀣𑁄 𑀉𑀢𑁆𑀢𑀫𑀢𑁆𑀣𑁄 𑀘. 𑀬𑀁 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀁 𑀦𑀺𑀲𑁆𑀲𑀸𑀬 𑀬𑀁 𑀲𑀓𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀪𑀯𑀢𑀺, 𑀲𑁄 𑀯𑀼𑀘𑁆𑀘𑀢𑀺 𑀓𑀢𑀲𑁆𑀲 [𑀲𑀢𑀲𑁆𑀲 (𑀓.)] 𑀓𑀢𑁆𑀣𑁄𑀢𑀺. 𑀅𑀬𑀁 𑀧𑀼𑀦 𑀯𑁂𑀯𑀘𑀦𑀁 𑀲𑀫𑁆𑀧𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀦𑀺𑀬𑀼𑀢𑁆𑀢𑀢𑁆𑀣𑀫𑀪𑀺𑀮𑀩𑁆𑀪𑀦𑁆𑀢𑀺 𑀯𑀘𑀦𑀢𑁆𑀣𑁄. 𑀢𑀢𑁆𑀣 𑀬𑀁 𑀅𑀢𑁆𑀣𑀁 𑀲𑀸𑀯𑀓𑁄 𑀅𑀪𑀺𑀓𑀗𑁆𑀔𑀢𑀺. 𑀢𑀲𑁆𑀲 𑀬𑁄 𑀧𑀝𑀺𑀮𑀸𑀪𑁄, 𑀅𑀬𑀁 𑀧𑀼𑀭𑀺𑀲𑀢𑁆𑀣𑁄. 𑀬𑀁 𑀬𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀸 𑀅𑀢𑁆𑀣𑀯𑀺𑀜𑁆𑀜𑀢𑁆𑀢𑀺. 𑀅𑀬𑀁 𑀅𑀢𑁆𑀣𑁄, 𑀢𑀢𑁆𑀣 𑀲𑀻𑀮𑀸𑀦𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀅𑀢𑁆𑀣𑁄𑀧𑀺 𑀆𑀦𑀺𑀲𑀁𑀲𑁄𑀧𑀺. 𑀏𑀲𑁄 𑀘 𑀆𑀦𑀺𑀲𑀁𑀲𑁄 𑀬𑀁 𑀤𑀼𑀕𑁆𑀕𑀢𑀺𑀁 𑀦 𑀕𑀘𑁆𑀙𑀢𑀺. 𑀬𑀣𑀸 𑀢𑀁 𑀪𑀕𑀯𑀢𑀸 𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻, 𑀅𑀬𑀁 𑀅𑀢𑁆𑀣𑁄.

𑀬𑀁 𑀧𑀼𑀭𑀺𑀲𑁄 𑀪𑀸𑀯𑀦𑀸𑀪𑀽𑀫𑀺𑀬𑀁 𑀲𑀻𑀮𑀸𑀦𑀺 𑀆𑀭𑀩𑁆𑀪 𑀲𑀻𑀮𑁂𑀦 𑀲𑀁𑀬𑀼𑀢𑁆𑀢𑁄 𑀳𑁄𑀢𑀺 𑀏𑀯𑀁 𑀬𑀸𑀯 𑀯𑀺𑀫𑀼𑀢𑁆𑀢𑀺 𑀢𑀣𑀸 𑀲𑀻𑀮𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀬𑁄 𑀘 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀅𑀦𑀼𑀲𑀬𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀜𑁆𑀘 𑀲𑀻𑀮𑀁 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀻𑀢𑀺 𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀇𑀫𑁂 𑀢𑀬𑁄 𑀔𑀦𑁆𑀥𑀸 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘 𑀢𑀣𑀸 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺 𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀓𑀼𑀲𑀮𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀯𑀸𑀬𑀫𑀢𑀺, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀧𑀳𑀸𑀦𑀸𑀬 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀘 𑀓𑀼𑀲𑀮𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀼𑀲𑀮𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀇𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁆𑀣 𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀇𑀤𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀬𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀓𑀼𑀲𑀮𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀯𑀸𑀬𑀫𑀢𑀺, 𑀇𑀤𑀁 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀬𑀁 𑀉𑀧𑁆𑀧𑀦𑁆𑀦𑀲𑁆𑀲, 𑀇𑀤𑀁 𑀤𑀼𑀢𑀺𑀬𑀁. 𑀘𑀢𑁆𑀢𑀸𑀭𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀲𑀻𑀮𑀓𑁆𑀔𑀦𑁆𑀥𑁂𑀦 𑀦𑁂𑀓𑁆𑀔𑀫𑁆𑀫𑀥𑀸𑀢𑀼 𑀘 𑀅𑀥𑀺𑀓𑀸 [𑀆𑀤𑀺𑀓𑀸 (𑀧𑀻.)], 𑀢𑀬𑁄 𑀘 𑀯𑀺𑀢𑀓𑁆𑀓𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀘. 𑀲𑀸𑀥𑀸𑀭𑀡𑀪𑀽𑀢𑀸. 𑀬𑀸 𑀧𑀺𑀬𑀸𑀬𑀫𑀸𑀦𑀲𑁆𑀲 𑀧𑀸𑀫𑁄𑀚𑁆𑀚𑁂𑀦 𑀇𑀤𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀆𑀦𑀺𑀢𑀁 𑀅𑀦𑀺𑀬𑀫𑀻𑀢𑀺𑀧𑁂𑀫𑁂𑀦, 𑀇𑀤𑀁 𑀤𑀼𑀓𑁆𑀔𑀁. 𑀬𑁄 𑀢𑀢𑁆𑀣 𑀅𑀯𑀺𑀓𑁆𑀔𑁂𑀧𑁄, 𑀅𑀬𑀁 𑀲𑀫𑀸𑀥𑀺. 𑀇𑀤𑀁 𑀧𑀜𑁆𑀘𑀗𑁆𑀕𑀺𑀓𑀁 𑀧𑀞𑀫𑀁 𑀛𑀸𑀦𑀁. 𑀬𑀸 𑀘𑁂𑀢𑀲𑀺𑀓𑀸 𑀧𑀲𑁆𑀲𑀤𑁆𑀥𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀭𑁄𑀥𑀦𑀁, 𑀬𑁄 𑀓𑀺𑀮𑁂𑀲𑁄 𑀘 𑀧𑀭𑀺𑀤𑀸𑀳𑁄, 𑀲𑁄 𑀧𑀞𑀫𑁂 𑀛𑀸𑀦𑁂 𑀦𑀺𑀭𑀼𑀤𑁆𑀥𑁄. 𑀢𑀣𑀸 𑀬𑀸 𑀘 𑀓𑀺𑀮𑁂𑀲𑀧𑀲𑁆𑀲𑀤𑁆𑀥𑀺 𑀬𑀸 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀧𑀲𑁆𑀲𑀤𑁆𑀥𑀺, 𑀉𑀪𑀬𑁂𑀧𑀺 𑀏𑀢𑁂 𑀥𑀫𑁆𑀫𑁂 𑀧𑀲𑁆𑀲𑀤𑁆𑀥𑀸𑀬𑀁. 𑀢𑀢𑁆𑀣 𑀓𑀸𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀘 𑀲𑀼𑀔𑀁 𑀲𑀼𑀔𑀸𑀬𑀦𑀸, 𑀇𑀤𑀁 𑀧𑀻𑀢𑀺𑀲𑀼𑀔𑀺𑀦𑁄 𑀧𑀲𑁆𑀲𑀤𑁆𑀥𑀺. 𑀬𑁄𑀧𑀺 𑀏𑀓𑁄𑀤𑀺𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀢𑁂𑀦 𑀏𑀓𑁄𑀤𑀺𑀪𑀸𑀯𑁂𑀦 𑀬𑀁 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁, 𑀇𑀤𑀁 𑀘𑀢𑀼𑀢𑁆𑀣𑀁 𑀛𑀸𑀦𑀗𑁆𑀕𑀁. 𑀇𑀢𑀺 𑀅𑀚𑁆𑀛𑀢𑁆𑀢𑀜𑁆𑀘 𑀲𑀫𑁆𑀧𑀲𑀸𑀤𑁄 𑀘𑁂𑀢𑀲𑁄 𑀘 𑀏𑀓𑁄𑀤𑀺𑀪𑀸𑀯𑁄 𑀧𑀻𑀢𑀺 𑀘 𑀲𑀼𑀔𑀜𑁆𑀘, 𑀇𑀤𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀺𑀓𑀁. 𑀬𑁄 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀢𑁂𑀦 𑀅𑀥𑀺𑀫𑀢𑁆𑀢𑁂𑀦 𑀲𑀼𑀔𑁂𑀦 𑀨𑀭𑀺𑀢𑁆𑀯𑀸 𑀲𑀼𑀔𑀁 𑀘𑁂𑀢𑀲𑀺𑀓𑀁 𑀬𑀁, 𑀲𑁄 𑀧𑀻𑀢𑀺𑀯𑀻𑀢𑀭𑀸𑀕𑁄 𑀏𑀯𑀁 𑀢𑀲𑁆𑀲 𑀧𑀻𑀢𑀺𑀯𑀻𑀢𑀭𑀸𑀕𑀢𑀸𑀬 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑁄 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀢𑀺 𑀘 𑀲𑀫𑁆𑀫𑀸 𑀧𑀜𑁆𑀜𑀸𑀬 𑀧𑀝𑀺𑀮𑀪𑀢𑀺. 𑀲𑀘𑁂 𑀲𑀢𑀺 𑀏𑀓𑀕𑁆𑀕𑀢𑀸 𑀇𑀤𑀁 𑀧𑀜𑁆𑀘𑀗𑁆𑀕𑀺𑀓𑀁 𑀢𑀢𑀺𑀬𑀁 𑀛𑀸𑀦𑀁. 𑀬𑀁 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀏𑀓𑀕𑁆𑀕𑀢𑀸𑀬 𑀧𑀭𑀸𑀯𑀺𑀥𑀸𑀦𑀪𑀸𑀕𑀺𑀬𑀸, 𑀧𑀞𑀫𑁂 𑀛𑀸𑀦𑁂 𑀅𑀢𑁆𑀣𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑁄 𑀘𑀓𑁆𑀔𑀼𑀲𑁆𑀲 𑀯𑁂𑀤𑀦𑀸 𑀲𑀩𑁆𑀩𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀬𑀣𑀸 𑀘𑀢𑀼𑀢𑁆𑀣𑁂 𑀛𑀸𑀦𑁂, 𑀢𑀣𑀸 𑀬𑀸 𑀉𑀧𑁂𑀓𑁆𑀔𑀸 𑀧𑀲𑁆𑀲𑀫𑁆𑀪𑀬𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘, 𑀇𑀤𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁.

𑁯𑁨. 𑀬𑀣𑀸 𑀲𑀫𑀸𑀥𑀺 𑀤𑀲𑁆𑀲𑀬𑀺𑀢𑀩𑁆𑀩𑀁, 𑀢𑀣𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁. 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀲𑀸 𑀧𑀚𑀸𑀦𑀦𑀸 𑀘𑀢𑀼𑀩𑁆𑀩𑀺𑀥𑀸 𑀅𑀲𑀼𑀪𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀘, 𑀬𑀤𑀸𑀭𑀫𑁆𑀫𑀡𑀁 𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀬𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀺 𑀯𑀺𑀫𑀼𑀘𑁆𑀘𑀢𑀺 𑀢𑀣𑀸 𑀬𑀁 𑀓𑀸𑀫𑀸𑀲𑀯𑀲𑁆𑀲 𑀧𑀳𑀸𑀦𑀁 𑀪𑀯𑀸𑀲𑀯𑀲𑁆𑀲 𑀤𑀺𑀝𑁆𑀞𑀸𑀲𑀯𑀲𑁆𑀲 𑀅𑀯𑀺𑀚𑁆𑀚𑀸𑀲𑀯𑀲𑁆𑀲, 𑀅𑀬𑀁 𑀦𑀺𑀭𑁄𑀥𑁄 𑀅𑀧𑁆𑀧𑀳𑀻𑀦𑀪𑀽𑀫𑀺𑀬𑀁 𑀆𑀲𑀯𑀲𑀫𑀼𑀤𑀬𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀬𑀣𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀲𑁆𑀲𑀺𑀢𑀩𑁆𑀩𑀁. 𑀬𑀣𑀸𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀲𑁆𑀲𑀦𑀪𑀽𑀫𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺, 𑀇𑀤𑀁 𑀢𑀦𑀼𑀓𑀜𑁆𑀘. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀁 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀬𑀁 𑀦𑀺𑀩𑁆𑀩𑀺𑀦𑁆𑀤𑀢𑀺 𑀯𑀺𑀭𑀚𑁆𑀚𑀢𑀺, 𑀅𑀬𑀁 𑀧𑀞𑀫𑀚𑁆𑀛𑀸𑀦𑀪𑀸𑀯𑀦𑀸𑀪𑀽𑀫𑀺 𑀘 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀜𑁆𑀘. 𑀬𑀁 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀜𑁆𑀘. 𑀇𑀫𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸 𑀘 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀸 𑀢𑀜𑁆𑀘 𑀉𑀧𑀭𑀺 𑀬𑀸𑀯 𑀲𑀫𑀸𑀥𑀺, 𑀏𑀯𑀁 𑀢𑁂 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀻𑀮𑀧𑀸𑀭𑀺𑀧𑀽𑀭𑀺𑀫𑀼𑀧𑀸𑀤𑀸𑀬 𑀘𑀸𑀕𑀲𑀁𑀳𑀺𑀢𑁂𑀦 𑀘 𑀦𑀺𑀩𑁆𑀩𑁂𑀥𑀺𑀓𑀸𑀦𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑀸𑀯𑀺𑀮𑀫𑀦𑀸, 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀬𑀁 𑀧𑀼𑀦 𑀇𑀫𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑁄𑀕𑀫𑀦𑀓𑀺𑀦𑁆𑀤𑁆𑀭𑀺𑀬𑀁 𑀓𑀺𑀮𑁂𑀲𑀧𑀳𑀸𑀦𑁂𑀦 𑀘 𑀲𑁂𑀓𑁆𑀔𑀲𑀻𑀮𑀁, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀘𑀢𑁆𑀢𑀸𑀭𑀺 𑀘 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀨𑀮𑀸𑀦𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑁄𑀧𑀦𑀺𑀬𑀸𑀳𑀸𑀭𑀻𑀦𑀺 𑀲𑀩𑁆𑀩𑀲𑀼𑀢𑁆𑀢𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀬𑀁 𑀛𑀸𑀦𑀁 𑀧𑀝𑀺𑀮𑀪𑀦𑀁 𑀯𑀻𑀭𑀺𑀬𑀕𑀳𑀺𑀢𑀁𑀬𑁂𑀯 𑀜𑀸𑀡𑀁 𑀧𑀝𑀺𑀲𑁆𑀲𑀭𑀢𑁄, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀬𑁄 𑀲𑀫𑀸𑀥𑀺 𑀧𑀼𑀩𑁆𑀩𑀸𑀧𑀭𑀦𑀺𑀫𑀺𑀢𑁆𑀢𑀸𑀪𑀸𑀲𑁄 𑀅𑀦𑁄𑀫𑀕𑀢𑀺𑀢𑀸𑀬 𑀬𑀣𑀸𑀓𑀸𑀫𑁄, 𑀅𑀬𑀁 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸, 𑀬𑀁 𑀢𑀣𑀸𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸. 𑀅𑀬𑀁 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄.

𑀇𑀫𑀁 𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀩𑀼𑀚𑁆𑀛𑀓𑀸𑀭𑀥𑀺𑀓𑀁 𑀩𑀼𑀚𑁆𑀛𑀺𑀢𑀩𑁆𑀩𑀁. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀁 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺 𑀢𑀲𑁆𑀲 𑀅𑀗𑁆𑀕𑀸𑀦𑀺 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀢𑁂𑀦 𑀩𑁄𑀚𑁆𑀛𑀗𑁆𑀕𑀸. 𑀢𑀣𑀸 𑀆𑀤𑀺𑀢𑁄 𑀬𑀸𑀯 𑀲𑀻𑀮𑀁 𑀯𑀢𑀁 𑀘𑁂𑀢𑀦𑀸 𑀓𑀭𑀡𑀻𑀬𑀸, 𑀓𑀺𑀲𑁆𑀲 𑀲𑀻𑀮𑀸𑀦𑀺 𑀧𑀸𑀭𑀺𑀧𑀽𑀭𑁂𑀢𑀺. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀓𑀼𑀲𑀮𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀅𑀓𑀼𑀲𑀮𑀲𑁆𑀲 𑀧𑀳𑀸𑀦𑀸𑀬 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀓𑀼𑀲𑀮𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀼𑀲𑀮𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀇𑀤𑀁 𑀯𑀻𑀭𑀺𑀬𑀁 𑀢𑀲𑁆𑀲 𑀢𑀲𑁆𑀲 𑀩𑀼𑀚𑁆𑀛𑀺𑀢𑀲𑁆𑀲 𑀅𑀗𑁆𑀕𑀦𑁆𑀢𑀺. 𑀅𑀬𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀇𑀫𑀺𑀦𑀸 𑀯𑀻𑀭𑀺𑀬𑁂𑀦 𑀤𑁆𑀯𑁂 𑀥𑀫𑁆𑀫𑀸 𑀆𑀤𑀺𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀜𑁆𑀘 𑀬𑀸 𑀧𑀼𑀦 𑀧𑀻𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑀘𑁆𑀘𑀬𑀸 𑀧𑀸𑀫𑁄𑀚𑁆𑀚𑀧𑀘𑁆𑀘𑀬𑀸, 𑀅𑀬𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀁 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺. 𑀅𑀬𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑁂𑀦 𑀓𑀸𑀬𑀺𑀓𑀲𑀼𑀔𑀫𑀸𑀦𑀺𑀢𑀁 𑀬𑀁 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀁 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀸 𑀲𑀻𑀮𑀫𑀼𑀧𑀸𑀤𑀸𑀬 𑀧𑀜𑁆𑀘𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀉𑀧𑀸𑀤𑀸𑀬𑀸𑀦𑀼𑀮𑁄𑀫𑀢𑀸 𑀦𑀺𑀫𑀺𑀢𑁆𑀢𑀸𑀬𑀦𑀸 𑀧𑀻𑀢𑀺𑀪𑀸𑀕𑀺𑀬𑀸𑀦𑀜𑁆𑀘 𑀯𑀺𑀲𑁂𑀲𑀪𑀸𑀕𑀺𑀬𑀸𑀦𑀜𑁆𑀘 𑀅𑀧𑀺𑀮𑀸𑀧𑀦𑀢𑀸 𑀲𑀳𑀕𑀢𑀸 𑀳𑁄𑀢𑀺 𑀅𑀦𑀯𑀫𑀕𑁆𑀕𑁄, 𑀅𑀬𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀉𑀤𑁆𑀥𑀘𑁆𑀘𑀪𑀽𑀫𑀻𑀢𑀺 𑀓𑀢𑀸 𑀅𑀪𑀺𑀧𑀢𑁆𑀣𑀺𑀢𑀁 𑀧𑁂𑀲𑁂𑀢𑀺. 𑀓𑁄𑀲𑀚𑁆𑀚𑀪𑀽𑀫𑀻𑀢𑀺 𑀕𑀭𑀳𑀺𑀢𑁄 𑀭𑀳𑀺𑀢𑁂𑀳𑀺 𑀅𑀗𑁆𑀕𑁂𑀳𑀺 𑀩𑀼𑀚𑁆𑀛𑀢𑀺 𑀬𑀁 𑀘𑀓𑁆𑀔𑀼𑀲𑀫𑀣𑀧𑀣𑀁, 𑀲𑀸 𑀉𑀧𑁂𑀓𑁆𑀔𑀸𑀢𑀺. 𑀢𑁂𑀦 𑀲𑀸 𑀉𑀧𑁂𑀓𑁆𑀔𑀸 𑀢𑀲𑁆𑀲 𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀯𑀼𑀘𑁆𑀘𑀢𑁂. 𑀏𑀲𑁄 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄.

𑁯𑁩. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀅𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀬𑀸𑀯 𑀯𑀺𑀫𑀼𑀢𑁆𑀢𑀺 𑀇𑀫𑀺𑀲𑁆𑀲𑀸𑀬 𑀧𑀼𑀘𑁆𑀙𑀸𑀬 𑀫𑀺𑀦𑀺𑀓𑀺𑀫𑀢𑁆𑀣𑀲𑁆𑀲𑀫𑀻𑀢𑀺 𑀤𑁆𑀯𑁂 𑀧𑀤𑀸𑀦𑀺 𑀧𑀼𑀘𑁆𑀙𑀸 𑀤𑁆𑀯𑁂 𑀧𑀤𑀸𑀦𑀺 𑀯𑀺𑀲𑀚𑁆𑀚𑀦𑀸𑀦𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀤𑁆𑀯𑁂 𑀅𑀪𑀺𑀜𑁆𑀜𑀁 𑀤𑁆𑀯𑀻𑀳𑀺 𑀘𑁂𑀯 𑀧𑀤𑁂𑀳𑀺 𑀯𑀺𑀲𑀚𑁆𑀚𑀦𑀸 𑀓𑀺𑀁 𑀧𑀼𑀘𑁆𑀙𑀢𑀺 𑀦𑀺𑀩𑁆𑀩𑀸𑀥𑀺𑀓𑀁 𑀓𑀸𑀬𑀪𑀽𑀫𑀺𑀁 𑀓𑀫𑁆𑀫𑀲𑁆𑀲 𑀢𑀣𑀸 𑀳𑀺 𑀧𑀢𑀺𑀝𑁆𑀞𑀸 𑀘 𑀅𑀲𑁂𑀓𑁆𑀔𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀺. 𑀢𑀢𑁆𑀣 𑀓𑀢𑀫𑀸 𑀬𑀼𑀢𑁆𑀢𑀺? 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑀢𑀺 𑀓𑀺𑀁 𑀦𑀺𑀘𑁆𑀙𑀦𑁆𑀤𑀲𑁆𑀲 𑀘 𑀯𑀺𑀭𑀸𑀕𑁄 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺. 𑀢𑀢𑁆𑀣 𑀓𑀢𑀫𑀁 𑀧𑀤𑀝𑁆𑀞𑀸𑀦𑀁? 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀻𑀭𑀺𑀬𑀁 𑀅𑀤𑁄𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑀸𑀥𑀺 𑀅𑀮𑁄𑀪𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀜𑁆𑀜𑀸 𑀅𑀫𑁄𑀳𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑀲𑁆𑀲. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀲𑀫𑀸𑀥𑀺𑀦𑁄. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀲𑀫𑁆𑀫𑀸𑀲𑀢𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀲𑀻𑀮𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀢𑀬𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺, 𑀲𑀻𑀮𑀫𑁂𑀯 𑀳𑀺 𑀲𑁂𑀮𑁄𑀧𑀫𑀢𑀸 𑀬𑀣𑀸 𑀲𑁂𑀮𑁄 𑀲𑀩𑁆𑀩𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀓𑀭𑀡𑀻𑀬𑁄 𑀏𑀯𑀁 𑀢𑀁 𑀘𑀺𑀢𑁆𑀢𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦 𑀓𑀫𑁆𑀧𑀢𑀻𑀢𑀺, 𑀅𑀬𑀁 𑀅𑀫𑁄𑀳𑁄. 𑀯𑀺𑀭𑀢𑁆𑀢𑀁 [𑀧𑀲𑁆𑀲 𑀉𑀤𑀸. 𑁩𑁪 𑀉𑀤𑀸𑀦𑀧𑀸𑀴𑀺𑀬𑀁] 𑀭𑀚𑀦𑀻𑀬𑁂𑀲𑀽𑀢𑀺 𑀅𑀬𑀁 𑀅𑀮𑁄𑀪𑁄. 𑀓𑁄𑀧𑀦𑁂𑀬𑁆𑀬𑁂 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀬𑀁 𑀅𑀤𑁄𑀲𑁄. 𑀢𑀢𑁆𑀣 𑀧𑀜𑁆𑀜𑀸 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁, 𑀅𑀮𑁄𑀪𑁄 𑀅𑀮𑁄𑀪𑁄𑀬𑁂𑀯, 𑀅𑀤𑁄𑀲𑁄 𑀅𑀤𑁄𑀲𑁄𑀬𑁂𑀯. 𑀇𑀫𑁂𑀳𑀺 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀲𑁂𑀓𑁆𑀔𑀪𑀽𑀫𑀺𑀬𑀁 𑀞𑀺𑀢𑁄 𑀅𑀲𑁂𑀓𑁆𑀔𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁂𑀓𑁆𑀔𑀪𑀽𑀫𑀺 𑀲𑀫𑁆𑀧𑀢𑁆𑀢𑀺𑀓𑀫𑁆𑀫𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀺, 𑀲𑀸 𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺, 𑀬𑀜𑁆𑀘 𑀯𑀺𑀫𑀼𑀢𑁆𑀢𑀺𑀭𑀲𑀜𑀸𑀡𑀤𑀲𑁆𑀲𑀦𑀁 𑀇𑀫𑁂 𑀤𑀲 𑀅𑀲𑁂𑀓𑁆𑀔𑀸𑀦𑀁 𑀅𑀭𑀳𑀢𑁆𑀢𑀁 𑀥𑀫𑁆𑀫𑀸. 𑀢𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀘𑀢𑀼𑀩𑁆𑀩𑀺𑀥𑀸 𑀪𑀸𑀯𑀦𑀸𑀧𑀺 𑀮𑀩𑁆𑀪𑀢𑀺. 𑀲𑀻𑀮𑀪𑀸𑀯𑀦𑀸 𑀓𑀸𑀬𑀪𑀸𑀯𑀦𑀸 𑀘𑀺𑀢𑁆𑀢𑀪𑀸𑀯𑀦𑀸 𑀧𑀜𑁆𑀜𑀸𑀪𑀸𑀯𑀦𑀸 𑀘. 𑀢𑀢𑁆𑀣 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀲𑀫𑁆𑀫𑀸𑀆𑀚𑀻𑀯𑁂𑀦 𑀘 𑀓𑀸𑀬𑁄 𑀪𑀸𑀯𑀺𑀢𑁄. 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀘 𑀲𑀻𑀮𑀁 𑀪𑀸𑀯𑀺𑀢𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀘 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀲𑀢𑀺𑀬𑀸 𑀘 𑀧𑀜𑁆𑀜𑀸 𑀪𑀸𑀯𑀺𑀢𑀸. 𑀇𑀫𑀸𑀬 𑀘𑀢𑀼𑀩𑁆𑀩𑀺𑀥𑀸𑀬 𑀪𑀸𑀯𑀦𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘. 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀲𑀫𑀣𑁄, 𑀧𑀜𑁆𑀜𑀸 𑀪𑀸𑀯𑀦𑀸𑀬 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀧𑀳𑀸𑀦𑁂𑀦 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀦𑁆𑀢𑀺. 𑀧𑀜𑁆𑀜𑀸 𑀪𑀸𑀯𑀦𑀸𑀬 𑀘𑀺𑀢𑁆𑀢𑀪𑀸𑀯𑀦𑀁𑀬𑁂𑀯 𑀧𑀭𑀺𑀧𑀽𑀭𑁂𑀢𑀺. 𑀏𑀯𑀁 𑀬𑀲𑁆𑀲 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺. 𑀅𑀧𑀺 𑀘 𑀔𑁄 𑀧𑀦 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀩𑁆𑀬𑀸𑀧𑀸𑀤𑀥𑀸𑀢𑀼 𑀅𑀥𑀺𑀫𑀼𑀢𑁆𑀢𑀸, 𑀦 𑀲𑁄 𑀧𑁂𑀢𑀁 𑀲𑀫𑀸𑀧𑀦𑁆𑀦𑁄 𑀢𑀲𑁆𑀲 𑀲𑀗𑁆𑀔𑀸𑀧𑀳𑀸𑀭𑀁 𑀤𑁂𑀢𑀺, 𑀲𑀗𑁆𑀔𑀸𑀯𑀺𑀢𑀓𑁆𑀓𑀺𑀢𑁂 𑀲𑀭𑀻𑀭𑁂 𑀤𑀼𑀓𑁆𑀔𑀁 𑀦 𑀯𑁂𑀤𑀺𑀬𑀢𑀺, 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁯𑁪. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀤𑀲 𑀅𑀲𑁂𑀓𑁆𑀔𑀸 𑀅𑀭𑀳𑀢𑁆𑀢𑀥𑀫𑁆𑀫𑀸 𑀤𑁂𑀲𑀺𑀢𑀸 𑀅𑀧𑁆𑀧𑀫𑀸𑀡𑀸 𑀘 𑀲𑀫𑁆𑀫𑀸 𑀯𑀺𑀪𑀸𑀯𑀦𑀸. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀲𑁂𑀮𑁄𑀧𑀫𑀢𑀸 𑀬𑁂 𑀬𑁂 𑀥𑀫𑁆𑀫𑀸 𑀯𑁂𑀤𑀦𑀻𑀬𑀲𑀼𑀔𑀤𑀼𑀓𑁆𑀔𑁄𑀧𑀕𑀢𑀸, 𑀢𑁂 𑀲𑀩𑁆𑀩𑁂 𑀦𑀺𑀭𑀽𑀧𑀁 𑀯𑀸𑀦𑀼𑀧𑀲𑁆𑀲𑀦𑁆𑀢𑀸𑀦𑀁 𑀯𑀽𑀧𑀕𑀢𑀸 𑀓𑀸𑀬𑀢𑁄 𑀯𑁂𑀤𑀬𑀺𑀢𑀧𑀭𑀺𑀓𑁆𑀔𑀸𑀭𑁄 𑀅𑀧𑁆𑀧𑀯𑀢𑁆𑀢𑀺𑀢𑁄 𑀤𑀼𑀓𑁆𑀔𑀁 𑀦 𑀯𑁂𑀤𑀺𑀬𑀢𑀺. 𑀢𑀢𑁆𑀣 𑀓𑀢𑀫𑀸 𑀬𑀼𑀢𑁆𑀢𑀺, 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀼𑀢𑁄 𑀢𑀁 [𑀦𑀁 (𑀓.)] 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺. 𑀢𑀻𑀲𑀼 𑀪𑀸𑀯𑀦𑀸𑀲𑀼 𑀤𑀼𑀓𑁆𑀔𑀁 𑀦𑀓𑁆𑀔𑀫𑀢𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀪𑀸𑀯𑀦𑀸𑀬 𑀘. 𑀦𑀺𑀭𑁄𑀥𑀪𑀸𑀯𑀦𑀸𑀬 𑀘 𑀆𑀦𑀦𑁆𑀢𑀭𑀺𑀓𑀸 𑀲𑀫𑀸𑀥𑀺𑀪𑀸𑀯𑀦𑀸𑀬 𑀘. 𑀇𑀢𑀺 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺 𑀨𑀮𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 [𑀧𑀲𑁆𑀲 𑀉𑀤𑀸. 𑁩𑁪 𑀉𑀤𑀸𑀦𑀧𑀸𑀴𑀺𑀬𑀁] 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀸𑀦𑀺 𑀪𑀸𑀯𑀺𑀢𑀸𑀦𑀺 𑀬𑀣𑀸 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀧𑀜𑁆𑀜𑀸 𑀲𑀻𑀮𑀁 𑀓𑀸𑀬𑁄 𑀘𑀺𑀢𑁆𑀢𑀁, 𑀲𑀻𑀮𑀫𑁆𑀧𑀺 𑀲𑀼𑀪𑀸𑀯𑀺𑀢𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀜𑁆𑀘 𑀞𑀺𑀢𑀢𑁆𑀢𑀸 𑀦𑀸𑀦𑀼𑀧𑀓𑀫𑁆𑀧𑀢𑀻𑀢𑀺 𑀯𑁂𑀤𑀦𑀸𑀧𑀺 𑀢𑀣𑀸 𑀲𑀜𑁆𑀜𑀸𑀧𑀺 𑀲𑀗𑁆𑀔𑀸𑀭𑀸𑀧𑀺. 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺 𑀲𑀼𑀔𑀫𑁆𑀧𑀺 𑀦𑀸𑀦𑀼𑀕𑀘𑁆𑀙𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀦𑀸𑀕𑀢𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀤𑀼𑀓𑁆𑀔𑁂𑀦 𑀅𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯𑀭𑀽𑀧𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀯𑀺𑀭𑀳𑀺𑀲𑁆𑀲𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀘 𑀅𑀧𑁆𑀧𑀲𑀦𑁆𑀦𑀸, 𑀢𑁂 𑀳𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀧𑀲𑀦𑁆𑀦𑀸𑀦𑀜𑁆𑀘 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀆𑀯𑀝𑁆𑀝𑁄𑀢𑀺 𑀦𑀢𑁆𑀣𑀺 𑀆𑀯𑀝𑁆𑀝𑀦𑀲𑁆𑀲 𑀪𑀽𑀫𑀺.

𑀯𑀺𑀪𑀢𑁆𑀢𑀻𑀢𑀺 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺 𑀤𑀼𑀯𑀺𑀥𑁄 𑀦𑀺𑀤𑁆𑀤𑁂𑀲𑁄 𑁋 𑀤𑀼𑀓𑁆𑀔𑀳𑁂𑀢𑀼𑀦𑀺𑀤𑁆𑀤𑁂𑀲𑁄 𑀘 𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑁄 𑀘. 𑀓𑁄 𑀲𑁄 𑀤𑀼𑀓𑁆𑀔𑀳𑁂𑀢𑀼? 𑀬𑀢𑁄 𑀤𑀼𑀓𑁆𑀔𑀁 𑀆𑀕𑀘𑁆𑀙𑀢𑀺 𑀧𑀝𑀺𑀧𑀓𑁆𑀔𑁂 𑀯𑀼𑀢𑁆𑀢𑁂 𑀲𑁂𑀲𑀥𑀫𑁆𑀫𑀸𑀦𑀁 𑀲𑀻𑀮𑀁 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘, 𑀢𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀏𑀓𑀩𑁄𑀥𑀺𑀧𑀓𑁆𑀔𑀺𑀬𑁂 𑀥𑀫𑁆𑀫𑁂 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀩𑁄𑀥𑀕𑀫𑀦𑀻𑀬𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀙𑀦𑁆𑀤𑀺𑀓𑀸, 𑀢𑁂 𑀲𑀻𑀮𑀧𑀸𑀭𑀺𑀧𑀽𑀭𑀻 𑀪𑀯𑀦𑁆𑀢𑀺 𑀧𑀸𑀫𑁄𑀚𑁆𑀚𑀙𑀦𑁆𑀤𑀺𑀓𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀻𑀧𑀸𑀭𑀺𑀧𑀽𑀭𑀻, 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄…𑀧𑁂… 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄? 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀬𑁄 𑀦𑀺𑀩𑁆𑀩𑁂𑀥𑁄, 𑀅𑀬𑀁 𑀦𑀺𑀭𑁄𑀥𑁄. 𑀬𑁂𑀦 𑀦𑀺𑀩𑁆𑀩𑀺𑀚𑁆𑀛𑀢𑀺, 𑀲𑁄 𑀫𑀕𑁆𑀕𑁄. 𑀬𑀁 𑀦𑀺𑀩𑁆𑀩𑀺𑀚𑁆𑀛𑀢𑀺, 𑀢𑀁 𑀤𑀼𑀓𑁆𑀔𑀁. 𑀬𑀁 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀸 𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀲𑀫𑀼𑀤𑀬𑁄𑀬𑀁 𑀯𑀼𑀢𑁆𑀢𑁄.

𑀢𑀢𑁆𑀣 𑀓𑀢𑀫𑀸 𑀯𑀺𑀪𑀢𑁆𑀢𑀺? 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁, 𑀧𑀭𑀸𑀫𑀲𑀦𑁆𑀢𑀲𑁆𑀲 𑀦𑀢𑁆𑀣𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀬𑀸𑀯 𑀤𑁄𑀲𑀓𑀢𑀁 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀓𑀼𑀲𑀮𑀁 𑀆𑀭𑀪𑀢𑀺. 𑀓𑀺𑀜𑁆𑀘𑀺𑀧𑀺𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀲𑀼𑀓𑀢𑀫𑁂𑀢𑀁 𑀲𑀼𑀘𑀭𑀺𑀢𑀫𑁂𑀢𑀁 𑀦𑁄 𑀘𑀲𑁆𑀲 𑀢𑁂𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺 𑀬𑀸𑀯 𑀯𑀺𑀫𑀼𑀢𑁆𑀢𑀺, 𑀢𑀲𑁆𑀲 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁, 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑀢𑀢𑁆𑀣 𑀓𑀢𑀫𑀸 𑀧𑀭𑀺𑀯𑀢𑁆𑀢𑀦𑀸? 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀉𑀧𑀦𑀺𑀲𑀸𑀲𑀫𑁆𑀧𑀢𑁆𑀢𑀻𑀳𑀺 𑀏𑀓𑀸𑀤𑀲 𑀉𑀧𑀦𑀺𑀲𑀸 𑀯𑀺𑀪𑀢𑁆𑀢𑀺𑀬𑀁 𑀧𑀚𑀳𑀸𑀦𑀁 𑀧𑀚𑀳𑀦𑁆𑀢𑀺, 𑀅𑀬𑀁 𑀧𑀭𑀺𑀯𑀢𑁆𑀢𑀦𑀸.

𑀢𑀢𑁆𑀣 𑀓𑀢𑀫𑀸 𑀯𑁂𑀯𑀘𑀦𑀸? 𑀇𑀫𑁂𑀲𑀁 𑀅𑀭𑀺𑀬𑀥𑀫𑁆𑀫𑀸𑀦𑀁 𑀩𑀮𑀩𑁄𑀚𑁆𑀛𑀗𑁆𑀕𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀇𑀫𑀸𑀦𑀺 𑀯𑁂𑀯𑀘𑀦𑀸𑀦𑀺.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀲𑀻𑀮𑀓𑁆𑀔𑀦𑁆𑀥𑁂 𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁, 𑀦𑀺𑀲𑀚𑁆𑀚𑀧𑀜𑁆𑀜𑀢𑁆𑀢𑀺 𑀘 𑀏𑀯𑀁 𑀤𑀲 𑀅𑀗𑁆𑀕𑀸𑀦𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀧𑀜𑁆𑀜𑀢𑁆𑀢𑀸𑀦𑀺.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀁 𑀧𑀜𑁆𑀘𑀲𑀼 𑀑𑀢𑀺𑀡𑁆𑀡𑀁 𑀬𑀣𑀸 𑀬𑀁 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞𑀁 𑀏𑀯𑀫𑀺𑀦𑁆𑀤𑁆𑀭𑀺𑀬𑀸𑀤𑀺𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀦 𑀢𑀸𑀯 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀸𑀫𑁄𑀚𑁆𑀚𑀦𑁆𑀢𑀺 𑀦 𑀢𑀸𑀯 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄 𑀬𑀸𑀦𑀺 𑀏𑀓𑀸𑀤𑀲 𑀧𑀤𑀸𑀦𑀺 𑀤𑁂𑀲𑀺𑀢𑀸𑀦𑀺 𑀬𑀤𑀸 𑀢𑀤𑀸 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄, 𑀅𑀬𑀁 𑀲𑁄𑀥𑀦𑁄.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄? 𑀲𑀻𑀮𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀁 𑀏𑀯𑀁 𑀤𑀲 𑀧𑀤𑀸𑀦𑀺 𑀲𑀩𑁆𑀩𑀸𑀦𑀺 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀆𑀦𑀺𑀲𑀁𑀲𑁄, 𑀢𑁂 𑀘 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘 𑀧𑀘𑁆𑀘𑀬𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀜𑁆𑀘 𑀳𑁂𑀢𑀼, 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀲𑀼𑀔𑀁 𑀳𑁂𑀢𑀼 𑀧𑀲𑁆𑀲𑀤𑁆𑀥𑀺 𑀧𑀘𑁆𑀘𑀬𑁄, 𑀬𑁂𑀦 𑀛𑀸𑀦𑀲𑀳𑀚𑀸𑀢𑀺 𑀘 𑀞𑀸𑀦𑀦𑁆𑀢𑀺 𑀛𑀸𑀦𑀗𑁆𑀕𑀸 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀲𑀫𑀸𑀥𑀺𑀦𑁄 𑀧𑀘𑁆𑀘𑀬𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸 𑀳𑁂𑀢𑀼.

𑀢𑀢𑁆𑀣 𑀓𑀢𑀫𑀸 𑀲𑀫𑀸𑀭𑁄𑀧𑀦𑀸? 𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀬𑀁 𑀲𑀻𑀮𑀁, 𑀢𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀧𑀥𑀸𑀦𑀸. 𑀬𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺, 𑀲𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄.

𑁯𑁫. 𑀬𑀲𑁆𑀲 𑀲𑁂𑀮𑁄𑀧𑀫𑀁 𑀘𑀺𑀢𑁆𑀢𑀦𑁆𑀢𑀺 𑀕𑀸𑀣𑀸 [𑀧𑀲𑁆𑀲 𑀉𑀤𑀸. 𑁩𑁪 𑀉𑀤𑀸𑀦𑁂], 𑀲𑁂𑀮𑁄𑀧𑀫𑀦𑁆𑀢𑀺 𑀉𑀧𑀫𑀸 𑀬𑀣𑀸 𑀲𑁂𑀮𑁄 𑀯𑀸𑀢𑁂𑀦 𑀦 𑀓𑀫𑁆𑀧𑀢𑀺 𑀦 𑀉𑀡𑁆𑀳𑁂𑀦 𑀦 𑀲𑀻𑀢𑁂𑀦 𑀲𑀁𑀓𑀫𑁆𑀧𑀢𑀺. 𑀬𑀣𑀸 𑀅𑀦𑁂𑀓𑀸 𑀅𑀘𑁂𑀢𑀦𑀸, 𑀢𑁂 𑀉𑀡𑁆𑀳𑁂𑀦 𑀫𑀺𑀮𑀸𑀬𑀦𑁆𑀢𑀺, 𑀲𑀻𑀢𑁂𑀦 𑀅𑀯𑀲𑀼𑀲𑁆𑀲𑀦𑁆𑀢𑀺, 𑀯𑀸𑀢𑁂𑀦 𑀪𑀚𑀦𑁆𑀢𑀺. 𑀦 𑀏𑀯𑀁 𑀲𑁂𑀮𑁄 𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼 𑀤𑁄𑀲𑀦𑀻𑀬𑁂 𑀦 𑀤𑀼𑀲𑁆𑀲𑀢𑀻𑀢𑀺 𑀓𑀸𑀭𑀡𑀁 𑀤𑁄𑀲𑀦𑀻𑀬𑁂 𑀤𑁄𑀫𑀦𑀲𑁆𑀲𑀦𑁆𑀢𑀁, 𑀦 𑀤𑀼𑀝𑁆𑀞𑁂𑀦 𑀯𑀸 𑀓𑀫𑁆𑀧𑀢𑀺 𑀉𑀡𑁆𑀳𑁂𑀦 𑀯𑀸, 𑀲𑁄 𑀫𑀺𑀮𑀸𑀬𑀢𑀺 𑀲𑀻𑀢𑁂𑀦 𑀯𑀸 𑀅𑀯𑀲𑀼𑀲𑁆𑀲𑀢𑀺, 𑀏𑀯𑀁 𑀘𑀺𑀢𑁆𑀢𑀁 𑀭𑀸𑀕𑁂𑀦 𑀦𑀸𑀦𑀼𑀲𑁆𑀲𑀢𑀺 𑀲𑀻𑀢𑁂𑀦 𑀓𑀫𑁆𑀧𑀢𑀻𑀢𑀺. 𑀓𑀺𑀁 𑀓𑀸𑀭𑀡𑀁? 𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼 𑀤𑁄𑀲𑀦𑀻𑀬𑁂 𑀦 𑀤𑀼𑀲𑁆𑀲𑀢𑀺. 𑀓𑀺𑀁 𑀓𑀸𑀭𑀡𑀁? 𑀤𑁄𑀲𑀦𑀻𑀬𑁂 𑀧𑀦𑀲𑁆𑀲𑀦𑁆𑀢𑀺 𑀦 𑀤𑀼𑀲𑁆𑀲𑀢𑀺, 𑀅𑀤𑀼𑀝𑁆𑀞𑀁 𑀢𑀁 𑀦 𑀓𑁄𑀲𑀺𑀲𑁆𑀲𑀦𑁆𑀢𑀺, 𑀢𑁂𑀦 𑀓𑀼𑀧𑁆𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺, 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑁄 𑀘 𑀓𑀼𑀢𑁄 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀁.

𑀧𑀭𑀺𑀯𑀢𑁆𑀢𑀦𑀸𑀢𑀺 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻𑀢𑀺 𑀬𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀅𑀬𑀁 𑀦𑀢𑁆𑀣𑀺 𑀲𑁄𑀧𑀸𑀤𑀺𑀲𑁂𑀲𑀸 𑀅𑀬𑀁 𑀅𑀢𑁆𑀣𑀺. 𑀧𑀼𑀦 𑀏𑀯𑀫𑀸𑀳𑀁𑀲𑀼 𑀢𑀁 𑀔𑀡𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀉𑀪𑀬𑀫𑁂𑀯 𑀅𑀯𑁂𑀤𑀬𑀺𑀢𑀁 𑀲𑁄𑀧𑀸𑀤𑀺𑀲𑁂𑀲𑀁 𑀬𑀜𑁆𑀘 𑀅𑀦𑀼𑀧𑀸𑀤𑀺𑀲𑁂𑀲𑀁 𑀬𑀜𑁆𑀘 𑀢𑀁 𑀔𑀡𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀅𑀦𑀼𑀧𑀸𑀤𑀺𑀲𑁂𑀲𑀁 𑀬𑀜𑁆𑀘 𑀲𑁄𑀧𑀸𑀤𑀺𑀲𑁂𑀲𑀁 𑀘 𑀅𑀯𑁂𑀤𑀬𑀺𑀢𑀁. 𑀲𑀼𑀔𑀫𑀸𑀧𑀦𑁆𑀦𑀲𑁆𑀲 𑀅𑀦𑀸𑀯𑀢𑁆𑀢𑀺𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀧𑀭𑀺𑀯𑀢𑁆𑀢𑀦𑀸.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄? 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀯𑀸 𑀪𑀸𑀯𑀺𑀢𑀁 𑀲𑀼𑀪𑀸𑀯𑀺𑀢𑀁 𑀅𑀦𑀼𑀝𑁆𑀞𑀺𑀢𑀁 𑀯𑀢𑁆𑀣𑀼𑀓𑀢𑀁 𑀲𑀼𑀲𑀫𑀸𑀭𑀤𑁆𑀥𑀁. 𑀘𑀺𑀢𑁆𑀢𑀦𑁆𑀢𑀺 𑀫𑀦𑁄 𑀯𑀺𑀜𑁆𑀜𑀸𑀡𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀘𑀺𑀢𑁆𑀢𑀁 𑀫𑀦𑁄 𑀲𑀗𑁆𑀔𑀸𑀭𑀸 𑀯𑀽𑀧𑀲𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀲𑀫𑀸𑀥𑀺 𑀅𑀲𑁂𑀓𑁆𑀔𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄. 𑀤𑀼𑀓𑁆𑀔𑀁 𑀉𑀘𑁆𑀙𑀺𑀦𑁆𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀘𑀺𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀅𑀬𑀁 𑀔𑀦𑁆𑀥𑁂𑀲𑀼 𑀑𑀢𑀭𑀡𑁄, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀦𑀺𑀤𑁆𑀤𑀺𑀝𑁆𑀞𑀸𑀬 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀅𑀬𑀁 𑀥𑀸𑀢𑀽𑀲𑀼 𑀑𑀢𑀭𑀡𑁄. 𑀫𑀦𑀸𑀬𑀢𑀦𑁂 𑀦𑀺𑀤𑁆𑀤𑀺𑀝𑁆𑀞𑁂 𑀲𑀩𑁆𑀩𑀸𑀦𑀺 𑀆𑀬𑀢𑀦𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀫𑀦𑀸𑀬𑀢𑀦𑀁 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁. 𑀢𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂. 𑀅𑀬𑀁 𑀑𑀢𑀭𑀡𑁄. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀲𑀼𑀤𑁆𑀥𑁄𑀬𑁂𑀯 𑀆𑀭𑀫𑁆𑀪𑁄.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄? 𑀙𑀴𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀦𑀸 𑀏𑀓𑀢𑁆𑀢𑀸𑀬𑀁 𑀧𑀜𑁆𑀜𑀢𑁆𑀢𑀺 𑀙𑀝𑁆𑀞𑀺𑀢𑁂𑀦 𑀓𑀸𑀬𑁄 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀳𑁂𑀢𑀼 𑀲𑀫𑀼𑀧𑁆𑀧𑀸𑀤𑀸𑀬 𑀫𑀦𑀲𑀺𑀓𑀸𑀭𑁄 𑀘 𑀢𑀧𑁆𑀧𑁄𑀡𑀢𑀸 𑀘 𑀬𑀁 𑀅𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀘 𑀯𑀺𑀲𑁂𑀲𑀥𑀫𑁆𑀫𑀸𑀦𑀁 𑀅𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑀢𑀢𑀁 𑀕𑀘𑁆𑀙𑀢𑀺, 𑀲𑀘𑁂 𑀲𑀫𑀸𑀥𑀺𑀦𑁄 𑀲𑀼𑀔𑀁 𑀳𑁂𑀢𑀼 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀘𑁆𑀘𑀬𑁄, 𑀅𑀬𑀁 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀧𑀭𑀺𑀓𑁆𑀔𑀸𑀭𑁄.

𑀢𑀢𑁆𑀣 𑀓𑀢𑀫𑀸 𑀲𑀫𑀸𑀭𑁄𑀧𑀦𑀸? 𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀦𑁆𑀢𑀺 𑀢𑀲𑁆𑀲 𑀥𑀫𑁆𑀫𑀸 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸. 𑀓𑀸𑀬𑁄 𑀲𑀻𑀮𑀁 𑀧𑀜𑁆𑀜𑀸 𑀪𑀸𑀯𑀺𑀢𑀘𑀺𑀢𑁆𑀢𑀦𑁆𑀢𑀺 𑀅𑀦𑀪𑀺𑀭𑀢𑀁 𑀅𑀦𑀧𑀡𑀢𑀁 𑀅𑀦𑁂𑀓𑀁 𑀅𑀦𑀼𑀢𑀁 𑀅𑀦𑀸𑀧𑀚𑁆𑀚𑀸𑀲𑀢𑁆𑀢𑀁 𑀅𑀬𑀁 𑀲𑀫𑀜𑁆𑀜𑀸𑀬𑀢𑀦𑀸 𑀦 𑀢𑀲𑁆𑀲 𑀲𑁂𑀓𑁆𑀔𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀲𑀩𑁆𑀩𑁂 𑀅𑀲𑁂𑀓𑁆𑀔𑀸 𑀤𑀲 𑀅𑀭𑀳𑀦𑁆𑀢𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀦𑀺 𑀲𑀼𑀢𑁆𑀢𑀸𑀦𑀺.

𑁯𑁬. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑀕𑀢𑀸𑀲𑀢𑀺 𑀅𑀪𑀸𑀯𑀺𑀢𑀸, 𑀅𑀬𑀁 𑀲𑁄 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 [𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 (𑀓.)] 𑀆𑀲𑀚𑁆𑀚 𑀲𑀫𑀸𑀧𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑀚𑁆𑀚 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬, 𑀲𑁄 𑀆𑀬𑀲𑁆𑀫𑀸 𑀇𑀫𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀚𑀸𑀦𑀸𑀢𑀺 𑀤𑁆𑀯𑁂 𑀧𑀚𑀸𑀦𑀺 𑀧𑀝𑀺𑀚𑀸𑀦𑀸𑀢𑀺 𑀘𑀺𑀢𑁆𑀢𑀪𑀸𑀯𑀦𑀸𑀬𑀜𑁆𑀘 𑀤𑀺𑀝𑁆𑀞𑀺𑀬𑀸 𑀧𑀳𑀸𑀦𑀁, 𑀓𑀸𑀬𑀪𑀸𑀯𑀦𑀸𑀬𑀜𑁆𑀘 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁, 𑀓𑀸𑀬𑀪𑀸𑀯𑀦𑀸𑀬𑀜𑁆𑀘 𑀢𑀡𑁆𑀳𑀸𑀧𑀳𑀸𑀦𑀁, 𑀬𑀁 𑀧𑀞𑀫𑀁 𑀉𑀧𑀫𑀁 𑀓𑀭𑁄𑀢𑀺. 𑀅𑀲𑀼𑀘𑀺𑀦𑀸𑀧𑀺 𑀲𑀼𑀘𑀺𑀦𑀸𑀧𑀺 𑀧𑀣𑀯𑀻 𑀦𑁂𑀯 𑀅𑀝𑁆𑀝𑀺𑀬𑀢𑀺 𑀦 𑀚𑀺𑀕𑀼𑀘𑁆𑀙𑀢𑀺 𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀧𑀝𑀺𑀮𑀪𑀢𑀺, 𑀏𑀯𑀫𑁂𑀯 𑀳𑀺 𑀧𑀣𑀯𑀻𑀲𑀫𑁂𑀦 𑀲𑁄 𑀘𑁂𑀢𑀲𑀸 𑀅𑀦𑁆𑀯𑀬𑁂𑀦 𑀅𑀧𑁆𑀧𑀓𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀯𑀺𑀳𑀭𑀸𑀫𑀻𑀢𑀺. 𑀇𑀢𑀺 𑀲𑁄 𑀆𑀬𑀲𑁆𑀫𑀸 𑀓𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀓𑀸𑀬𑀪𑀸𑀯𑀦𑀸𑀬 𑀲𑀼𑀔𑀺𑀦𑁆𑀤𑁆𑀭𑀺𑀬𑀧𑀳𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀘𑀺𑀢𑁆𑀢𑀪𑀸𑀯𑀦𑀸𑀬 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀧𑀳𑀸𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀓𑀸𑀬𑀺𑀓𑀸 𑀯𑁂𑀤𑀦𑀸 𑀭𑀸𑀕𑀸𑀦𑀼𑀲𑀬𑀫𑀦𑀼𑀕𑀢𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀬𑀸 𑀘𑁂𑀢𑀲𑀺𑀓𑀸 𑀲𑀼𑀔𑀯𑁂𑀤𑀦𑀸 𑀢𑀢𑁆𑀣 𑀅𑀬𑀁 𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁. 𑀲𑁄𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀳𑀺 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁. 𑀢𑀢𑁆𑀣 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀅𑀦𑀼𑀲𑀬𑀧𑀝𑀺𑀖𑀧𑀳𑀸𑀦𑀁 𑀪𑀡𑀢𑀺. 𑀓𑀸𑀫𑁂 𑀭𑀽𑀧𑀜𑁆𑀘 𑀢𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀁. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀜𑁆𑀘. 𑀩𑀮𑁂𑀦 𑀘 𑀉𑀲𑁆𑀲𑀸𑀳𑁂𑀦 𑀘 𑀲𑀩𑁆𑀩𑀁 𑀫𑀦𑀲𑀺 𑀓𑀢𑀢𑁆𑀢𑀸𑀦𑀁 𑀧𑀳𑀸𑀦𑀁 𑀫𑁂𑀤𑀁 𑀓𑀢𑀸𑀮𑀺𑀓𑀸𑀬 𑀘 𑀧𑀼𑀭𑀺𑀲𑁂𑀦 𑀘 𑀫𑀡𑁆𑀟𑀦𑀓𑀚𑀸𑀢𑀺𑀓𑁂𑀦 𑀘, 𑀏𑀢𑁂𑀳𑀺 𑀇𑀫𑀲𑁆𑀲 𑀫𑀸𑀢𑀸𑀧𑀺𑀢𑀼𑀲𑀫𑁆𑀪𑀽𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀲𑁄 𑀓𑀸𑀬𑁂𑀦 𑀘 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀘 𑀘𑀺𑀢𑁆𑀢𑁂𑀦 𑀘 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀘 𑀤𑁆𑀯𑁂 𑀥𑀫𑁆𑀫𑁂 𑀥𑀸𑀭𑁂𑀢𑀺. 𑀓𑀸𑀬𑀓𑀺𑀮𑁂𑀲𑀯𑀢𑁆𑀣𑀼𑀁 𑀘𑀺𑀢𑁆𑀢𑁂𑀦 𑀘 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂 𑀘𑀺𑀢𑁆𑀢𑁂𑀦 𑀲𑀼𑀪𑀸𑀯𑀺𑀢𑁂𑀦 𑀲𑀢𑁆𑀢𑀦𑁆𑀦𑀁 𑀘 𑀲𑀫𑀸𑀧𑀢𑁆𑀢𑀻𑀦𑀁 𑀯𑀺𑀳𑀭𑀺𑀢𑀼𑀁 𑀧𑀝𑀺𑀚𑀸𑀦𑀸𑀢𑀺.

𑀕𑀳𑀧𑀢𑀺𑀧𑀼𑀢𑁆𑀢𑁄𑀧𑀫𑀢𑀸𑀬 𑀘 𑀬𑀣𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀦𑀸𑀦𑀸𑀭𑀗𑁆𑀕𑀸𑀦𑀁 𑀯𑀢𑁆𑀣𑀓𑀭𑀡𑁆𑀟𑀓𑁄 𑀧𑀼𑀡𑁆𑀡𑁄 𑀪𑀯𑁂𑀬𑁆𑀬, 𑀲𑁄 𑀬𑀁 𑀬𑀤𑁂𑀯 𑀯𑀢𑁆𑀣𑀬𑀼𑀕𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀆𑀓𑀗𑁆𑀔𑀢𑀺, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀦𑀺𑀩𑁆𑀩𑀸𑀧𑁂𑀢𑀺, 𑀏𑀯𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂, 𑀲𑀸𑀬𑀦𑁆𑀳𑀲𑀫𑀬𑁂, 𑀏𑀯𑀫𑁂𑀯 𑀲𑁄 𑀆𑀬𑀲𑁆𑀫𑀸 𑀘𑀺𑀢𑁆𑀢𑀲𑁆𑀲 𑀲𑀼𑀪𑀸𑀯𑀺𑀢𑀢𑁆𑀢𑀸 𑀬𑀣𑀸𑀭𑀽𑀧𑁂𑀦 𑀯𑀺𑀳𑀸𑀭𑁂𑀦 𑀆𑀓𑀗𑁆𑀔𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑀣𑀸𑀭𑀽𑀧𑁂𑀦 [𑀬𑀣𑀸𑀭𑀽𑀧𑁂𑀦 (𑀧𑀻. 𑀓.)] 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀢𑀺, 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂, 𑀲𑀸𑀬𑀦𑁆𑀳𑀲𑀫𑀬𑁂. 𑀢𑁂𑀦 𑀯𑁂𑀲 𑀆𑀬𑀲𑁆𑀫𑀢𑀸 𑀉𑀧𑀫𑀸𑀬 𑀫𑁂 𑀆𑀲𑀺𑀢𑀸𑀬 𑀧𑀣𑀯𑀻 𑀯𑀸 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀪𑀸𑀯𑀺𑀢𑀘𑀺𑀢𑁆𑀢𑁂𑀦. 𑀢𑁂𑀦 𑀲𑁄 𑀆𑀬𑀲𑁆𑀫𑀸 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀪𑀸𑀯𑀦𑀁 𑀧𑀝𑀺𑀚𑀸𑀦𑀸𑀢𑀺 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼, 𑀓𑀸𑀬𑀪𑀸𑀯𑀦𑀁 𑀉𑀧𑀓𑀘𑀡𑁆𑀟𑀸𑀮𑀁 𑀧𑀼𑀭𑀺𑀲𑀫𑁂𑀢𑀓𑀁 𑀪𑀯𑀢𑀮𑀸𑀓𑀸𑀲𑀼 𑀘𑀺𑀢𑁆𑀢𑀪𑀸𑀯𑀦𑀁, 𑀇𑀫𑀸𑀳𑀺 𑀪𑀸𑀯𑀦𑀸𑀳𑀺 𑀢𑀸𑀬 𑀪𑀸𑀯𑀦𑀸𑀬 𑀘 𑀲𑀫𑀣𑀸 𑀧𑀸𑀭𑀺𑀧𑀽𑀭𑀺𑀫𑀦𑁆𑀢𑁂𑀳𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀫𑀦𑁆𑀢𑁂𑀳𑀺.

𑁯𑁭. 𑀓𑀣𑀁 𑀉𑀧𑀓𑀘𑀡𑁆𑀟𑀸𑀮𑀁 𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀓𑀸𑀬𑁄 𑀧𑀓𑀢𑀺𑀬𑀸 𑀅𑀧𑁆𑀧𑀝𑀺𑀓𑀽𑀮𑀁 𑀓𑀸𑀬𑁂 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸 𑀲𑀁𑀔𑀺𑀢𑁆𑀢𑁂𑀦 𑀦𑀯 𑀲𑀜𑁆𑀜𑀸 𑀇𑀫𑁂 𑀧𑀝𑀺𑀓𑀽𑀮𑀸 𑀥𑀫𑁆𑀫𑀸 𑀘𑁂𑀲𑁄 𑀆𑀬𑀲𑁆𑀫𑀸 𑀧𑀝𑀺𑀓𑀽𑀮𑀢𑁄 𑀅𑀚𑀺𑀕𑀼𑀘𑁆𑀙𑀺𑀢𑁄 𑀓𑀸𑀬𑀕𑀢𑀸𑀲𑀢𑀺𑀬𑀸 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀦 𑀳𑀺 𑀢𑀲𑁆𑀲 𑀚𑀺𑀕𑀼𑀘𑁆𑀙𑀧𑁆𑀧𑀳𑀸𑀬 𑀘𑀺𑀢𑁆𑀢𑀁 𑀧𑀝𑀺𑀓𑀽𑀮𑀢𑀺.

𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻𑀢𑀺? 𑀓𑀸𑀬𑁄 𑀲𑀩𑁆𑀩𑀮𑁄𑀓𑀲𑁆𑀲 𑀅𑀧𑁆𑀧𑀝𑀺𑀓𑀽𑀮𑁄 𑀢𑀁 𑀲𑁄 𑀆𑀬𑀲𑁆𑀫𑀸 𑀅𑀲𑀼𑀪𑀲𑀜𑁆𑀜𑀸𑀬 𑀯𑀺𑀳𑀭𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻𑀢𑀺 𑀅𑀧𑀺 𑀲𑀩𑁆𑀩𑁄𑀬𑀁 𑀮𑁄𑀓𑀲𑁆𑀲 𑀬𑀫𑀺𑀤𑀁 𑀫𑀼𑀡𑁆𑀟𑁄 𑀧𑀢𑁆𑀢𑀧𑀸𑀡𑀻 𑀓𑀼𑀮𑁂𑀲𑀼 𑀧𑀺𑀡𑁆𑀟𑀸𑀬 𑀯𑀺𑀘𑀭𑀢𑀺, 𑀢𑁂𑀦 𑀘 𑀲𑁄 𑀆𑀬𑀲𑁆𑀫𑀸 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑁂𑀦 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀘𑀺𑀢𑁆𑀢𑁂𑀦 𑀘 𑀓𑀸𑀬𑁂𑀦 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑁂𑀦 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻, 𑀏𑀯𑀁 𑀧𑀝𑀺𑀓𑀽𑀮𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀲𑀼𑀪𑀲𑀜𑁆𑀜𑀺𑀦𑁄 𑀇𑀢𑁆𑀣𑀺𑀭𑀽𑀧𑁂 𑀧𑀝𑀺𑀓𑀽𑀮𑁂𑀲𑀼 𑀘 𑀚𑀺𑀕𑀼𑀘𑁆𑀙𑀺𑀦𑁄 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑁂 𑀢𑀢𑁆𑀣 𑀲𑁄 𑀆𑀬𑀲𑁆𑀫𑀸 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀘? 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀲𑀼𑀪𑀲𑀜𑁆𑀜𑀺𑀦𑁄 𑀇𑀢𑁆𑀣𑀺𑀭𑀽𑀧𑁂 𑀧𑀝𑀺𑀓𑀽𑀮𑁂𑀲𑀼 𑀘 𑀚𑀺𑀕𑀼𑀘𑁆𑀙𑀺𑀦𑁄 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑁂 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 ‘𑀦𑁂𑀢𑀁 𑀫𑀫’‘𑀦𑁂𑀲𑁄𑀳𑀫𑀲𑁆𑀫𑀺’‘𑀦𑁂𑀲𑁄 𑀫𑁂’ 𑀅𑀢𑁆𑀢𑀸𑀢𑀺 𑀯𑀺𑀳𑀭𑀢𑀺. 𑀏𑀯𑀁 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀢𑁂𑀥𑀸𑀢𑀼𑀓𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀲𑀩𑁆𑀩𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀸. 𑀢𑀢𑁆𑀣 𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄 𑀲𑀩𑁆𑀩𑀲𑁂𑀓𑁆𑀔𑀸 𑀇𑀥 𑀓𑀸 𑀢𑁂𑀥𑀸𑀢𑀼𑀓𑁂 𑀲𑀩𑁆𑀩𑀮𑁄𑀓𑁂. 𑀢𑀢𑁆𑀣 𑀓𑀢𑀫𑁄 𑀪𑀽𑀫𑀺𑀧𑁆𑀧𑀢𑁆𑀢𑁄 𑀲𑀫𑀸𑀥𑀺𑀨𑀮𑁂 𑀲𑀘𑁆𑀙𑀺𑀓𑀢𑁄 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀓𑀺𑀁 𑀓𑀸𑀭𑀡𑀁? 𑀦 𑀳𑀺 𑀢𑀁 𑀅𑀢𑁆𑀣𑀺 𑀬𑀲𑁆𑀲 𑀮𑁄𑀓𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀓𑀽𑀮𑀲𑀜𑁆𑀜𑀻 𑀉𑀧𑁆𑀧𑀸𑀤𑁂𑀬𑁆𑀬.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀢𑁂𑀥𑀸𑀢𑀼𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀬𑀸𑀯 𑀓𑀸𑀫𑀮𑁄𑀓𑀪𑀽𑀫𑀢𑀸 𑀳𑀺 𑀭𑀸𑀕𑀸𑀦𑀁 𑀯𑀻𑀢𑀭𑀸𑀕𑀸𑀦𑀁 𑀧𑀝𑀺𑀓𑀽𑀮𑀲𑀫𑀢𑀸 𑀭𑀽𑀧𑀸𑀭𑀽𑀧𑀥𑀸𑀢𑀼𑀁 𑀅𑀧𑁆𑀧𑀝𑀺𑀓𑀽𑀮𑀲𑀫𑀢𑀸. 𑀢𑀢𑁆𑀣 𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀬𑀁 𑀓𑀺𑀜𑁆𑀘𑀺 𑀧𑀭𑀢𑁄 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀢𑀁 𑀯𑀘𑀦𑀁 𑀅𑀧𑁆𑀧𑀝𑀺𑀓𑀽𑀮𑀁 𑀬𑀸𑀯𑀢𑀸 𑀯𑀸𑀘𑀲𑁄 𑀅𑀧𑁆𑀧𑀢𑀺𑀭𑀽𑀧𑀸 𑀢𑀣𑀸 𑀚𑀦𑀲𑁆𑀲 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀸. 𑀢𑀢𑁆𑀣 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀪𑀺𑀜𑁆𑀜𑀸𑀬 𑀲𑀘𑁆𑀙𑀺𑀓𑀢𑁄 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺, 𑀏𑀯𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑁯𑁮. 𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄? 𑀬𑀜𑁆𑀘 𑀦𑁂𑀲𑀁 𑀲𑀫𑀦𑀼𑀧𑀲𑁆𑀲𑀢𑀺 𑀬𑁂 𑀥𑀫𑁆𑀫𑀸 𑀤𑀼𑀘𑁆𑀘𑀭𑀺𑀢𑀸, 𑀢𑁂 𑀥𑀫𑁆𑀫𑀸 𑀅𑀧𑁆𑀧𑀝𑀺𑀓𑀽𑀮𑀸. 𑀢𑀢𑁆𑀣 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑀬𑁂 𑀥𑀫𑁆𑀫𑀸 𑀤𑀼𑀘𑁆𑀘𑀭𑀺𑀢𑀸, 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀯𑀺𑀧𑀸𑀓𑀸. 𑀬𑁂 𑀥𑀫𑁆𑀫𑀸 𑀲𑀼𑀘𑀭𑀺𑀢𑀸, 𑀢𑁂 𑀆𑀘𑀬𑀕𑀸𑀫𑀺𑀦𑁄. 𑀲𑁄 𑀘 𑀲𑀼𑀘𑀭𑀺𑀢𑀁 𑀆𑀘𑀬𑀕𑀸𑀫𑀺𑀦𑀺𑀁 𑀓𑀭𑀺𑀢𑁆𑀯𑀸 𑀤𑀼𑀘𑁆𑀘𑀭𑀺𑀢𑀁 𑀅𑀦𑀺𑀝𑁆𑀞𑀯𑀺𑀧𑀸𑀓𑀁 𑀓𑀭𑀺𑀢𑁆𑀯𑀸 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺.

𑀅𑀣 𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀢𑀡𑁆𑀳𑀸 𑀧𑀝𑀺𑀓𑀽𑀮𑀥𑀫𑁆𑀫𑀸 𑀓𑀺𑀁 𑀓𑀸𑀭𑀡𑀁? 𑀢𑀡𑁆𑀳𑀸𑀯𑀲𑁂𑀦 𑀳𑀺 𑀲𑀢𑁆𑀢𑀸 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀲𑀢𑁆𑀢𑀸, 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀭𑀲𑀢𑀡𑁆𑀳𑀸𑀬 𑀲𑀢𑁆𑀢𑀸, 𑀨𑀲𑁆𑀲𑁂 𑀲𑀼𑀔𑀲𑀜𑁆𑀜𑀸𑀬 𑀲𑀢𑁆𑀢𑀸. 𑀢𑀢𑁆𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀓𑀩𑀴𑀻𑀓𑀸𑀭𑁂 𑀘 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺, 𑀨𑀲𑁆𑀲𑁂 𑀘 𑀤𑀼𑀓𑁆𑀔𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀢𑀡𑁆𑀳𑀸𑀓𑁆𑀔𑀬𑀁 𑀅𑀦𑀼𑀢𑁆𑀢𑀭𑀁 𑀦𑀺𑀩𑁆𑀩𑀸𑀦𑀁 𑀢𑀣𑀸 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀝𑀺𑀓𑀽𑀮𑀲𑀜𑁆𑀜𑀸 𑀧𑀳𑀢𑀲𑀜𑁆𑀜𑀸 𑀘. 𑀢𑀢𑁆𑀣𑀸𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀸 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀘 𑀲𑀸𑀫𑀁 𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯𑀸 𑀏𑀯𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂𑀲𑀼 𑀘 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀢𑀢𑀺𑀬𑁂 𑀘 𑀦𑀺𑀩𑁆𑀩𑀸𑀦𑁂 𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄 𑀬𑀲𑁂𑀦 𑀘 𑀓𑀺𑀢𑁆𑀢𑀺𑀦𑀺 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄. 𑀢𑀢𑁆𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀲𑀫𑁆𑀫𑀸𑀧𑀜𑁆𑀜𑀸𑀬 𑀧𑀝𑀺𑀚𑀸𑀦𑀦𑁆𑀢𑁄 𑀧𑀝𑀺𑀓𑀽𑀮𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀥𑀫𑁆𑀫𑀁 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑀁 𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀥𑀫𑁆𑀫𑀁 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑀬𑀺𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺? 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀘, 𑀬𑀜𑁆𑀘 𑀲𑀫𑀦𑀼𑀧𑀲𑁆𑀲𑀢𑀺 𑀅𑀦𑀼𑀦𑀬𑁄 𑀅𑀧𑁆𑀧𑀝𑀺𑀓𑀽𑀮𑁄 𑀥𑀫𑁆𑀫𑁄 𑀧𑀝𑀺𑀖𑁄 𑀘 𑀧𑀝𑀺𑀓𑀽𑀮𑁄 𑀥𑀫𑁆𑀫𑁄, 𑀢𑀢𑁆𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑀼𑀦𑀬𑀲𑁆𑀲 𑀧𑀝𑀺𑀖𑀧𑁆𑀧𑀳𑀻𑀦𑀢𑁆𑀢𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀘. 𑀬𑀜𑁆𑀘𑀲𑁆𑀲 𑀲𑀫𑀦𑀼𑀧𑀲𑁆𑀲𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑀸 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸. 𑀅𑀬𑀁 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄.

𑁯𑁯. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑀺𑀁 𑀤𑁂𑀲𑀺𑀢𑀩𑁆𑀩𑀁? 𑀢𑀢𑁆𑀣 𑀯𑀼𑀘𑁆𑀘𑀢𑁂, 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀤𑁂𑀲𑀺𑀢𑁄, 𑀢𑀣𑀸 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀁 𑀤𑁂𑀲𑀺𑀢𑀁.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀬𑁂 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀦𑁆𑀢𑀺, 𑀢𑁂𑀲𑀁 𑀘𑀺𑀢𑁆𑀢𑀁 𑀅𑀦𑀼𑀦𑀬𑀧𑁆𑀧𑀝𑀺𑀖𑁂𑀦 𑀦 𑀯𑀺𑀳𑀭𑀢𑀺 𑀅𑀦𑀼𑀦𑀬𑀧𑁆𑀧𑀝𑀺𑀖𑁂𑀦 𑀘𑀸𑀪𑀺𑀭𑀫𑀫𑀸𑀦𑀲𑁆𑀲 𑀘𑀺𑀢𑁆𑀢𑀁 𑀲𑀫𑀕𑁆𑀕𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀪𑀸𑀯𑀦𑀸𑀬 𑀩𑀮𑀫𑁂𑀢𑀁, 𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄? 𑀓𑀸𑀬𑀪𑀸𑀯𑀦𑀸𑀬 𑀘 𑀘𑀺𑀢𑁆𑀢𑀪𑀸𑀯𑀦𑀸𑀬 𑀘 𑀦 𑀓𑀺𑀜𑁆𑀘𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻𑀢𑀺. 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺, 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄? 𑀓𑀸𑀬𑀪𑀸𑀯𑀦𑀸𑀬 𑀧𑀞𑀫𑀲𑁆𑀲 𑀲𑀢𑀺 𑀉𑀧𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀸 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀸, 𑀲𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀬𑀁 𑀧𑀣𑀯𑀻𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀅𑀢𑁆𑀢𑀸𑀦𑀼𑀧𑀲𑁆𑀲𑀻 𑀧𑀣𑀯𑀻𑀲𑀫𑁂𑀦 𑀕𑀺𑀳𑀻 𑀯𑀺𑀳𑀭𑀢𑀺. 𑀓𑁄 𑀅𑀢𑁆𑀣𑁄 𑀧𑀣𑀯𑀻𑀲𑀫𑁂𑀦𑀸𑀢𑀺? 𑀬𑀣𑀸 𑀬𑁂 𑀘 𑀲𑁂𑀮𑁄𑀧𑀫𑀢𑀸𑀬 𑀅𑀓𑀫𑁆𑀫𑀬𑀼𑀢𑁆𑀢𑀸 𑀏𑀯𑀫𑁂𑀯 𑀧𑀣𑀯𑀻𑀲𑀫𑁄 𑀅𑀬𑀁 𑀳𑀺𑀭𑀺𑀬𑀢𑀸𑀬. 𑀅𑀬𑀁 𑀮𑀓𑁆𑀔𑀡𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀫𑀫𑁆𑀳𑀺 𑀩𑁆𑀬𑀸𑀓𑀭𑀡𑁂 𑀓𑁄 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀓𑁂𑀘𑀺 𑀅𑀭𑀳𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀆𑀓𑀗𑁆𑀔𑀺𑀬𑀦𑁆𑀢𑀺, 𑀢𑁂 𑀧𑀣𑀯𑀻𑀲𑀫𑀢𑀁 𑀉𑀧𑁆𑀧𑀸𑀤𑀬𑀺𑀲𑁆𑀲𑀦𑁆𑀢𑀻𑀢𑀺. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄𑀢𑀺? 𑀦𑀢𑁆𑀣𑀺 𑀆𑀯𑀝𑁆𑀝𑀲𑁆𑀲 𑀪𑀽𑀫𑀺.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺? 𑀬𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑁄 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀁 𑀧𑀝𑀺𑀮𑀪𑀺𑀲𑁆𑀲𑀢𑀻𑀢𑀺 𑀦 𑀏𑀓𑀁𑀲𑁂𑀦. 𑀓𑀺𑀁 𑀓𑀸𑀭𑀡𑀁? 𑀬𑁂 𑀔𑀡𑁆𑀟𑀓𑀸𑀤𑀺𑀙𑀺𑀦𑁆𑀦𑀓𑀸𑀤𑀺𑀦𑁄, 𑀦 𑀢𑁂 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀁 𑀧𑀝𑀺𑀮𑀪𑀦𑁆𑀢𑀺. 𑀲𑀩𑁆𑀩𑀸 𑀓𑀸𑀬𑀕𑀢𑀸𑀲𑀢𑀺 𑀲𑁂𑀓𑁆𑀔𑀪𑀸𑀯𑀦𑀸𑀬 𑀦𑀺𑀩𑁆𑀩𑀸𑀦𑀁 𑀨𑀮𑀁, 𑀅𑀬𑀁 𑀯𑀺𑀪𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄? 𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀓𑀸𑀬𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀅𑀬𑀁 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀧𑀜𑁆𑀘𑀓𑁆𑀔𑀦𑁆𑀥𑀸 [𑀲𑀢𑁆𑀢𑁂𑀲𑀼 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 (𑀧𑀻.)] 𑀅𑀯𑀺𑀢𑀺𑀡𑁆𑀡𑀸 [𑀅𑀯𑀢𑀺𑀡𑁆𑀡𑀸 (𑀧𑀻.)] 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀣𑀸 𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀫𑀦𑁄𑀥𑀸𑀢𑀼 𑀫𑀦𑀸𑀬𑀢𑀦𑀜𑁆𑀘. 𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀜𑁆𑀘. 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀬𑁂 𑀘 𑀫𑀦𑀲𑀸 𑀘𑀢𑁆𑀢𑀸𑀭𑁄 𑀪𑀸𑀯𑁂𑀢𑀩𑁆𑀩𑀸, 𑀢𑁂 𑀲𑀩𑁆𑀩𑁂 𑀪𑀸𑀯𑀺𑀢𑀸 𑀬𑀁 𑀢𑀁 𑀫𑀦𑁂𑀦 𑀧𑀳𑀻𑀦𑁂 𑀧𑀢𑁆𑀢𑀩𑁆𑀩𑀢𑀁 𑀲𑀩𑁆𑀩𑀢𑁆𑀣 𑀏𑀢𑀲𑁆𑀲 𑀘 𑀅𑀢𑁆𑀣𑀸𑀬 𑀆𑀭𑀫𑁆𑀪𑁄, 𑀲𑁄 𑀅𑀢𑁆𑀣𑁄 𑀲𑀼𑀤𑁆𑀥𑁄. 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄? 𑀅𑀬𑀁 𑀲𑀫𑀸𑀥𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑁄, 𑀙 𑀓𑀸𑀬𑀸 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀻𑀦𑀺 𑀭𑀽𑀧𑀓𑀸𑀬𑁄. 𑀙 𑀯𑁂𑀤𑀦𑀸𑀓𑀸𑀬𑀸 𑀯𑁂𑀤𑀦𑀸𑀓𑀸𑀬𑁄. 𑀙 𑀲𑀜𑁆𑀜𑀸𑀓𑀸𑀬𑀸 𑀲𑀜𑁆𑀜𑀸𑀓𑀸𑀬𑁄. 𑀙 𑀘𑁂𑀢𑀦𑀸𑀓𑀸𑀬𑀸 𑀘𑁂𑀢𑀦𑀸𑀓𑀸𑀬𑁄. 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑀺𑀜𑁆𑀜𑀸𑀡𑀓𑀸𑀬𑁄. 𑀲𑀩𑁆𑀩𑁂𑀧𑀺 𑀏𑀢𑁂 𑀥𑀫𑁆𑀫𑀸 𑀥𑀫𑁆𑀫𑀓𑀸𑀬𑁄𑀢𑀺𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀫𑀸𑀧𑀢𑁆𑀢𑀺𑀓𑁄𑀲𑀮𑁆𑀮𑀜𑁆𑀘 𑀯𑀻𑀣𑀺𑀓𑁄𑀲𑀮𑁆𑀮𑀜𑁆𑀘 [𑀥𑀻𑀢𑀺𑀓𑁄𑀲𑀮𑁆𑀮𑀜𑁆𑀘 (𑀧𑀻.)] 𑀳𑁂𑀢𑀼. 𑀬𑀜𑁆𑀘 𑀕𑁄𑀘𑀭𑀓𑁄𑀲𑀮𑁆𑀮𑀁 𑀬𑀜𑁆𑀘 𑀓𑀮𑁆𑀮𑀁 𑀢𑀁 𑀓𑁄𑀲𑀮𑁆𑀮𑀁 𑀧𑀘𑁆𑀘𑀬𑁄. 𑀯𑁄𑀤𑀸𑀦𑀓𑁄𑀲𑀮𑁆𑀮𑀁 𑀳𑁂𑀢𑀼, 𑀓𑀮𑁆𑀮𑀁 𑀧𑀘𑁆𑀘𑀬𑁄. 𑀲𑀼𑀔𑀁 𑀳𑁂𑀢𑀼, 𑀅𑀩𑁆𑀬𑀸𑀧𑀚𑁆𑀚𑀁 𑀧𑀘𑁆𑀘𑀬𑁄. 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄𑀢𑀺? 𑀬𑀣𑀸 𑀧𑀣𑀯𑀻 𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀻𑀧𑀦𑁆𑀢𑁂 𑀅𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀢𑁆𑀢𑁂 𑀢𑀸𑀤𑀺𑀲𑁂𑀬𑁂𑀯 𑀏𑀯𑀁 𑀓𑀸𑀬𑁄 𑀫𑀦𑀸𑀧𑀺𑀓𑁂𑀳𑀺𑀧𑀺 𑀨𑀲𑁆𑀲𑁂𑀳𑀺 𑀅𑀫𑀦𑀸𑀧𑀺𑀓𑁂𑀳𑀺𑀧𑀺 𑀨𑀲𑁆𑀲𑁂𑀳𑀺 𑀢𑀸𑀤𑀺𑀲𑁄𑀬𑁂𑀯 𑀧𑀝𑀺𑀖𑀲𑀫𑁆𑀨𑀲𑁆𑀲𑁂𑀦 𑀯𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀢𑀸𑀤𑀺𑀲𑀁 𑀬𑁄 𑀘𑀺𑀢𑁆𑀢𑀁. 𑀇𑀤𑀁 𑀲𑀼𑀢𑁆𑀢𑀁 𑀯𑀺𑀪𑀢𑁆𑀢𑀁 𑀲𑀑𑀧𑀫𑁆𑀫𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀪𑀸𑀕𑁂𑀦. 𑀢𑀢𑁆𑀣 𑀲𑀫𑀸𑀭𑁄𑀧𑀦𑀸𑀬 𑀅𑀯𑀓𑀸𑀲𑁄 𑀦𑀢𑁆𑀣𑀺.

𑁧𑁦𑁦. 𑀢𑀢𑁆𑀣 𑀓𑀢𑀫𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁? 𑀬𑀢𑁄 𑀘 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀦 𑀯𑀺𑀭𑁄𑀥𑀢𑀺, 𑀦 𑀯𑀟𑁆𑀠𑀢𑀺, 𑀇𑀫𑀁 𑀆𑀤𑀻𑀦𑀯𑀁 𑀪𑀕𑀯𑀸 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺, 𑀢𑀢𑁄 𑀆𑀤𑀻𑀦𑀯𑀢𑁄 𑀯𑀺𑀯𑀭𑁂𑀬𑁆𑀬𑀸𑀢𑀺 𑀢𑀁 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀦𑀸𑀪𑀺𑀥𑀁𑀲𑀺𑀢𑀸𑀢𑀺 𑀅𑀲𑀼𑀪𑀲𑀜𑁆𑀜𑀸𑀬 𑀭𑀸𑀕𑁂𑀦 𑀦𑀸𑀪𑀺𑀥𑀁𑀲𑀺𑀬𑀢𑀺. 𑀫𑁂𑀢𑁆𑀢𑀸𑀬 𑀤𑁄𑀲𑁂𑀦 𑀦𑀸𑀪𑀺𑀥𑀁𑀲𑀺𑀬𑀢𑀺. 𑀯𑀺𑀧𑀲𑁆𑀲𑀦𑀸 𑀫𑁄𑀳𑁂𑀦 𑀦𑀸𑀪𑀺𑀥𑀁𑀲𑀺𑀬𑀢𑀺. 𑀏𑀯𑀜𑁆𑀘𑀲𑁆𑀲 𑀬𑁄 𑀬𑁄 𑀥𑀫𑁆𑀫𑁄 𑀧𑀝𑀺𑀧𑀓𑁆𑀔𑁄 𑀢𑀫𑁆𑀳𑀺 𑀢𑀫𑁆𑀳𑀺 𑀥𑀫𑁆𑀫𑁂 𑀧𑀭𑀺𑀧𑀽𑀭𑀺𑀲𑁆𑀲𑀢𑀺. 𑀬𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀧𑀝𑀺𑀧𑀓𑁆𑀔𑁄, 𑀢𑁂𑀦 𑀦𑀸𑀥𑀺𑀯𑀸𑀲𑀺𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀬𑁂 𑀇𑀫𑁂 𑀥𑀫𑁆𑀫𑀸 𑀅𑀢𑁆𑀢𑀦𑀸 𑀦 𑀲𑀓𑁆𑀓𑁄𑀢𑀺 𑀯𑀼𑀝𑁆𑀞𑀸𑀦𑀁, 𑀢𑁂 𑀏𑀢𑁂 𑀥𑀫𑁆𑀫𑀸 𑀤𑁂𑀲𑀺𑀢𑀸. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀢𑁂𑀳𑀺 𑀯𑀺𑀢𑀓𑁆𑀓𑀁 𑀬𑁂𑀦 𑀘 𑀲𑀓𑁆𑀓𑀸 𑀧𑀼𑀦 𑀤𑁂𑀲𑀺𑀢𑀁 𑀘𑀺𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 𑀧𑀭𑀺𑀬𑁄𑀤𑀸𑀧𑁂𑀢𑀼𑀁 𑀯𑀺𑀯𑁂𑀓𑀦𑀺𑀦𑁆𑀦𑀲𑁆𑀲 𑀯𑀺𑀯𑁂𑀓𑀧𑁄𑀡𑀲𑁆𑀲 𑀯𑀺𑀯𑁂𑀓𑀧𑀩𑁆𑀪𑀸𑀭𑀲𑁆𑀲 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀆𑀧𑀚𑁆𑀚𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀁 𑀯𑀸 𑀓𑀼𑀫𑀼𑀤𑀁 𑀯𑀸 𑀧𑀤𑀼𑀫𑀁 𑀯𑀸 𑀉𑀤𑀓𑁂 𑀲𑀼𑀓𑁆𑀓𑀧𑀓𑁆𑀔𑁂 𑀘𑀦𑁆𑀤𑁄 𑀬𑀸𑀯𑀭𑀢𑁆𑀢𑀺 𑀬𑀸𑀯𑀤𑀺𑀯𑀲𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀦 𑀧𑀭𑀺𑀳𑀸𑀦𑀺, 𑀏𑀯𑀁𑀯𑀺𑀥𑀁 𑀢𑀁 𑀘𑀺𑀢𑁆𑀢𑀁 𑀦𑀸𑀪𑀺𑀥𑀁𑀲𑀺𑀬𑀢𑀺. 𑀅𑀧𑀭𑁄𑀧𑁂𑀢𑁆𑀣 𑀬𑁄 𑀅𑀓𑀽𑀝𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼 𑀧𑀼𑀭𑀺𑀲𑁄 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺. 𑀢𑀢𑁆𑀣 𑀬𑁄 𑀙𑀸𑀤𑁂𑀢𑀺 𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀅𑀦𑀼𑀥𑀸𑀯𑀦𑁆𑀢𑀺. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀬𑁄 𑀧𑀦 𑀳𑁄𑀢𑀺 𑀅𑀲𑀞𑁄 𑀅𑀓𑀽𑀝𑁄 𑀅𑀫𑀸𑀬𑀸𑀯𑀻 𑀉𑀚𑀼 𑀧𑀼𑀭𑀺𑀲𑁄 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀦 𑀯𑀺𑀤𑁆𑀥𑀁𑀲𑀺𑀬𑀢𑀺, 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁧𑁦𑁧. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀥 𑀤𑁂𑀲𑀺𑀢𑀸 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀥𑀺𑀯𑀲𑁆𑀲𑀦𑀢𑀸𑀬 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀦𑀥𑀺𑀯𑀲𑁆𑀲𑀦𑀢𑀸𑀬 𑀅𑀓𑀼𑀲𑀮𑁂𑀳𑀺 𑀦 𑀯𑀺𑀲𑀼𑀚𑁆𑀛𑀢𑀺. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀻’’𑀢𑀺.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀬𑀲𑁆𑀲𑁂𑀯𑀁 𑀘𑀺𑀢𑁆𑀢𑀁 𑀅𑀥𑀺𑀯𑀸𑀲𑀺𑀬𑀢𑀺, 𑀢𑀲𑁆𑀲 𑀩𑀼𑀚𑁆𑀛𑀺𑀢𑀲𑁆𑀲 𑀬𑀁 𑀪𑀯𑁂𑀬𑁆𑀬 𑀓𑀽𑀝𑁂𑀬𑁆𑀬, 𑀢𑀁 𑀆𑀦𑀦𑁆𑀢𑀭𑀺𑀬𑁂𑀦𑀧𑀺 𑀲𑀢𑁆𑀣𑀭𑀺 𑀯𑀸 𑀕𑀼𑀡𑀸𑀦𑀼𑀓𑀫𑁆𑀧𑀦𑀢𑀸𑀬, 𑀅𑀬𑀁 𑀯𑀺𑀘𑀬𑁄.

𑀢𑀢𑁆𑀣 𑀓𑀢𑀫𑀸 𑀬𑀼𑀢𑁆𑀢𑀻𑀢𑀺? 𑀏𑀯𑀁 𑀅𑀦𑀥𑀺𑀯𑀲𑀺𑀬𑀦𑁆𑀢𑀁 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺. 𑀯𑀼𑀝𑁆𑀞𑀺𑀢𑀁 𑀧𑀢𑀺𑀝𑁆𑀞𑀳𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀧𑀤𑀝𑁆𑀞𑀸𑀦𑀦𑁆𑀢𑀺 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀙𑀦𑁆𑀦𑀁 𑀅𑀲𑀁𑀯𑀭𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀅𑀙𑀦𑁆𑀦𑀁 𑀲𑀁𑀯𑀭𑀡𑀸𑀦𑀁. 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀤𑁂𑀲𑀦𑀸𑀬 𑀧𑀤𑀝𑁆𑀞𑀸𑀦𑀁.

𑀮𑀓𑁆𑀔𑀡𑁄𑀢𑀺 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀬𑁂 𑀓𑁂𑀘𑀺 𑀯𑀺𑀘𑀺𑀢𑁆𑀢𑁂𑀦 𑀙𑀦𑁆𑀦𑁂𑀦 𑀏𑀓𑀮𑀓𑁆𑀔𑀡𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀢𑁂 𑀅𑀯𑀺𑀤𑁆𑀥𑀁𑀲𑀺𑀬𑀦𑁆𑀢𑀺. 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀬𑁂 𑀓𑁂𑀘𑀺 𑀢𑁂𑀦 𑀅𑀘𑁆𑀙𑀦𑁆𑀦𑁂𑀦 𑀏𑀓𑀮𑀓𑁆𑀔𑀡𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀢𑁂 𑀦𑀸𑀢𑀺𑀯𑀲𑁆𑀲𑀦𑁆𑀢𑀻𑀢𑀺 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑀁 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀥𑀺𑀧𑀝𑀺𑀤𑁂𑀲𑀺𑀢𑀸 𑀢𑁂 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀆𑀯𑀝𑁆𑀝𑁄𑀢𑀺 𑀬𑀁 𑀙𑀦𑁆𑀦𑀁 𑀢𑀁 𑀤𑀼𑀯𑀺𑀥𑀁 𑀓𑀫𑁆𑀧𑀫𑀸𑀦𑀁 𑀲𑀫𑀼𑀘𑁆𑀙𑀺𑀢𑀩𑁆𑀩𑁄. 𑀆𑀦𑀦𑁆𑀢𑀭𑀺𑀬𑀲𑀫𑀸𑀥𑀻𑀦𑀁. 𑀢𑀢𑁆𑀣 𑀧𑀲𑁆𑀲𑀤𑁆𑀥𑀺𑀬𑀜𑁆𑀘 𑀫𑀸𑀦𑁄 𑀆𑀲𑀯𑁂 𑀯𑀟𑁆𑀠𑁂𑀢𑀺, 𑀅𑀲𑁆𑀲𑀤𑁆𑀥𑀺𑀬𑁂𑀦 𑀘 𑀧𑀫𑀸𑀤𑀁 𑀕𑀘𑁆𑀙𑀢𑀺, 𑀧𑀫𑀸𑀤𑁂𑀦 𑀑𑀦𑀫𑀢𑀺, 𑀉𑀦𑁆𑀦𑀴𑀪𑀸𑀯𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀁 𑀘𑁂𑀢𑀁 𑀪𑀕𑀯𑀢𑀸 ‘‘𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸’’𑀢𑀺 𑀘𑀢𑁆𑀢𑀸𑀭𑀺 𑀢𑀸𑀦𑀺 𑀉𑀧𑀸𑀤𑀸𑀦𑀸𑀦𑀺, 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺, 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀪𑀯𑀦𑁆𑀢𑀺. 𑀇𑀫𑀸𑀦𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘. 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬𑀸𑀢𑀺 𑀬𑁂𑀦 𑀳𑁂𑀢𑀼𑀦𑀸, 𑀢𑁂 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀆𑀲𑀯𑀸 𑀧𑀳𑀻𑀬𑀦𑁆𑀢𑁂. 𑀢𑀢𑁆𑀣 𑀅𑀧𑁆𑀧𑀫𑀸𑀤𑁂𑀦 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀻𑀬𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑁂𑀦 𑀑𑀴𑀸𑀭𑀺𑀓𑀢𑀸 𑀢𑀲𑁆𑀲 𑀤𑁆𑀯𑁂 𑀥𑀫𑁆𑀫𑀸 𑀦 𑀲𑀫𑀣𑁄 𑀘 𑀪𑀸𑀯𑀦𑀸 𑀘 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀬𑁄 𑀢𑁂𑀲𑀁 𑀆𑀲𑀯𑀸𑀦𑀁 𑀔𑀬𑁄, 𑀅𑀬𑀁 𑀦𑀺𑀭𑁄𑀥𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀅𑀬𑀁 𑀆𑀯𑀝𑁆𑀝𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄? 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀦 𑀏𑀓𑀁𑀲𑁄. 𑀓𑀺𑀁 𑀓𑀸𑀭𑀡𑀁? 𑀬𑀲𑁆𑀲 𑀅𑀲𑁆𑀲𑀸 𑀦𑀺𑀯𑀢𑁆𑀢𑀦𑀸 𑀬𑀣𑀸𑀧𑀺 𑀲𑁂𑀓𑁆𑀔𑀸𑀦𑀁. 𑀬𑀣𑀸𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄 𑀧𑀓𑀭𑁂𑀬𑁆𑀬 𑀧𑀸𑀧𑀁, 𑀓𑀸𑀬𑁂𑀦 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸 𑀯𑀸;

𑀅𑀪𑀩𑁆𑀩𑁄 𑀳𑀺 𑀢𑀲𑁆𑀲 𑀧𑀭𑀺𑀕𑀼𑀳𑀦𑀸𑀬, 𑀅𑀪𑀩𑁆𑀩𑀢𑀸 𑀤𑀺𑀝𑁆𑀞𑀧𑀤𑀲𑁆𑀲 𑀳𑁄𑀢𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀧𑀺 𑀢𑀼 𑀅𑀧𑁆𑀧𑀘𑁆𑀘𑀬𑀸 𑀲𑀫𑀸𑀬𑁂 𑀘 𑀢𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀬𑀲𑁆𑀲 𑀬𑁂 𑀥𑀫𑁆𑀫𑀸 𑀲𑀩𑁆𑀩𑀁 𑀅𑀦𑀯𑀺𑀯𑀝𑀁 𑀅𑀢𑀺𑀯𑀲𑁆𑀲𑀺𑀬𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺, 𑀅𑀯𑀕𑀼𑀡𑀦𑁆𑀢𑀁 𑀦𑀸𑀢𑀺𑀯𑀲𑁆𑀲𑀢𑀺. 𑀅𑀬𑀁 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄. 𑀙𑀦𑁆𑀦𑀦𑁆𑀢𑀺 𑀆𑀯𑀼𑀢𑀁 𑀦𑀺𑀯𑀼𑀢𑀁 𑀧𑀺𑀳𑀺𑀢𑀁 𑀧𑀝𑀺𑀓𑀼𑀚𑁆𑀚𑀺𑀢𑀁 𑀲𑀜𑁆𑀙𑀦𑁆𑀦𑀁 𑀧𑀭𑁄𑀥𑀁, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀬𑀲𑁆𑀲 𑀢𑁂 𑀥𑀫𑁆𑀫𑀸 𑀧𑀩𑁆𑀩𑀚𑁆𑀚𑀺𑀢𑀸 𑀯𑀺𑀦𑁄𑀤𑀁 𑀦𑀸𑀥𑀺𑀯𑀲𑁆𑀲𑀺𑀢𑀸 𑀯𑀦𑁆𑀢𑀺𑀓𑀢𑀸𑀢𑀺, 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀓𑀺𑀮𑁂𑀲𑀪𑀸𑀕𑀺𑀬𑀧𑀜𑁆𑀜𑀢𑁆𑀢𑀁 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀲𑀥𑀫𑁆𑀫𑀓𑀺𑀘𑁆𑀘𑀁 𑀬𑀁 𑀧𑀝𑀺𑀧𑀤𑀸 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀳𑀺 𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬𑀸𑀢𑀺 𑀅𑀦𑀼𑀲𑀸𑀲𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀦𑀺𑀤𑁆𑀥𑀸𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁, 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑁄? 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀢𑀬𑁄 𑀓𑀺𑀮𑁂𑀲𑀸 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄, 𑀢𑁂 𑀔𑀦𑁆𑀥𑁂𑀲𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄…𑀧𑁂… 𑀢𑁂 𑀧𑀼𑀭𑀸 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑁂𑀲𑀼, 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? 𑀬𑁂𑀦𑀸𑀭𑀫𑁆𑀪𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀪𑀸𑀲𑀢𑀺 𑀲𑁄 𑀆𑀭𑀫𑁆𑀪𑁄 𑀦𑀺𑀬𑀼𑀢𑁆𑀢𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀁. 𑀓𑀺𑀁𑀓𑀸𑀭𑀡𑀁? 𑀇𑀤𑀁 𑀳𑀺 𑀅𑀢𑀺𑀯𑀲𑁆𑀲𑀢𑀻𑀢𑀺 𑀇𑀫𑀲𑁆𑀲 𑀘 𑀅𑀢𑀺𑀯𑀲𑁆𑀲𑀢𑀺 𑀏𑀯𑀜𑁆𑀘 𑀅𑀢𑀺𑀯𑀲𑁆𑀲𑀢𑀻𑀢𑀺 𑀅𑀬𑀁 𑀯𑁂𑀫𑀢𑁆𑀢𑀢𑀸𑀬 𑀬𑀸 𑀲𑀼𑀡𑀲𑀸𑀥𑀸𑀭𑀡𑁂𑀳𑀺 𑀮𑀓𑁆𑀔𑀡𑁂𑀳𑀺 𑀧𑀜𑁆𑀜𑀸𑀧𑀺𑀬𑀢𑀺, 𑀲𑀸 𑀏𑀓𑀢𑁆𑀢𑀧𑀜𑁆𑀜𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀬𑀜𑁆𑀘 𑀢𑀁 𑀅𑀢𑀺𑀯𑀲𑁆𑀲𑀺𑀬𑀦𑁆𑀢𑀺, 𑀢𑀲𑁆𑀲 𑀤𑁆𑀯𑁂 𑀳𑁂𑀢𑀽 𑀤𑁆𑀯𑁂 𑀧𑀘𑁆𑀘𑀬𑀸 𑀅𑀓𑀼𑀲𑀮𑀧𑀲𑀼𑀢𑁂𑀯 𑀯𑀸𑀘𑀓𑀢𑁆𑀢𑀸𑀪𑀺𑀭𑀢𑀺 𑀘. 𑀇𑀫𑁂 𑀤𑁆𑀯𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀯𑁄𑀧𑀲𑀕𑁆𑀕𑀸 𑀘, 𑀇𑀫𑁂 𑀤𑁆𑀯𑁂 𑀧𑀘𑁆𑀘𑀬𑀸.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀯𑁂𑀫𑀢𑀺 𑀧𑀲𑁆𑀲𑀢𑀻𑀢𑀺 𑀙𑀦𑁆𑀦𑀁 𑀬𑀁 𑀧𑀭𑀺𑀕𑁆𑀕𑀳𑀺𑀢𑀼𑀁 𑀬𑀁 𑀅𑀤𑁂𑀲𑀺𑀢𑀼𑀁 𑀅𑀧𑁆𑀧𑀲𑁆𑀲𑀼𑀢𑀁 𑀬𑀁 𑀓𑀣𑀁𑀓𑀣𑀸 𑀯𑀺𑀪𑀽𑀢𑁂𑀦 𑀅𑀓𑀼𑀲𑀮𑀫𑀽𑀮𑁂𑀦 𑀬𑀁 𑀢𑀡𑁆𑀳𑀸𑀬 𑀘 𑀢𑁂 𑀯𑀟𑁆𑀠𑀢𑀺 𑀤𑁄𑀲𑀸𑀢𑀺 𑀲𑀦𑁆𑀦𑀺𑀢𑁆𑀯𑀸 𑀢𑁂 𑀅𑀧𑁆𑀧𑀲𑀓𑁆𑀔𑀬𑁂𑀦 𑀲𑀗𑁆𑀔𑀸𑀭𑀸. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀬𑀸𑀯 𑀚𑀭𑀸𑀫𑀭𑀡𑀁, 𑀅𑀬𑀁 𑀲𑀫𑀸𑀭𑁄𑀧𑀦𑁄. 𑀬𑀁 𑀧𑀼𑀦 𑀢𑀣𑀸 𑀤𑁂𑀲𑀦𑀸, 𑀢𑀲𑁆𑀲𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀫𑀸𑀧𑀚𑁆𑀚𑀢𑀺 𑀢𑀲𑁆𑀲 𑀲𑀗𑁆𑀔𑀸𑀭𑀸 𑀦𑀺𑀭𑁄𑀥𑀸, 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑁧𑁦𑁨. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 [𑀧𑀲𑁆𑀲 𑀅. 𑀦𑀺. 𑁪.𑁮𑁫] 𑀢𑀫𑁄 𑀢𑀫𑀧𑀭𑀸𑀬𑀦𑁄𑀢𑀺…𑀧𑁂… 𑀢𑀢𑁆𑀣 𑀓𑀢𑀫𑁄 𑀯𑀼𑀘𑁆𑀘𑀢𑁂 𑀢𑀫𑁄 𑀦𑀸𑀫? 𑀬𑁄 𑀢𑀫𑁄 𑀅𑀦𑁆𑀥𑀓𑀸𑀭𑁄, 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑀲𑁆𑀫𑀺𑀁 𑀪𑀬𑀸𑀦𑀓𑁂 𑀲𑀓𑀫𑁆𑀧𑀺𑀥𑀸𑀢𑀼𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀅𑀜𑁆𑀜𑀸𑀡𑀢𑁄 𑀢𑀫𑁄𑀧𑀦𑀦𑁆𑀥𑀓𑀸𑀭𑁄 𑀧𑀸𑀧𑀓𑀲𑀓𑀫𑁆𑀫𑀲𑀯𑀺𑀧𑀸𑀓𑀁 𑀦 𑀲𑀤𑁆𑀥𑁄 𑀳𑁄𑀢𑀺. 𑀇𑀢𑀺 𑀏𑀯𑀁 𑀮𑀓𑁆𑀔𑀡𑀢𑀸 𑀅𑀜𑁆𑀜𑀸𑀡𑀁 𑀢𑀫𑁄 𑀅𑀯𑀺𑀚𑁆𑀚𑀸 𑀫𑁄𑀳𑁄, 𑀬𑁂𑀦 𑀲𑀢𑁆𑀢𑀸 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀢𑀺 𑀯𑀼𑀘𑁆𑀘𑀢𑀺 𑀢𑀫𑁄𑀢𑀺. 𑀲𑁄 𑀢𑀺𑀡𑁆𑀡𑀁 𑀘𑀓𑁆𑀔𑀽𑀦𑀁 𑀢𑀫𑁄 𑀫𑀁𑀲𑀘𑀓𑁆𑀔𑀼𑀦𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑁄, 𑀇𑀫𑁂𑀲𑀁 𑀘𑀓𑁆𑀔𑀽𑀦𑀁 𑀇𑀥 𑀢𑀫𑁄 𑀦𑀺𑀤𑁆𑀤𑀺𑀲𑀺𑀬𑀢𑀺 𑀅𑀜𑁆𑀜𑀸𑀡𑀦𑁆𑀢𑀺. 𑀢𑀢𑁆𑀣 𑀓𑀢𑀫𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁? 𑀅𑀣 𑀦𑀺𑀲𑁆𑀲𑀬𑁂 𑀬𑀁 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁 𑀳𑁂𑀢𑀼𑀫𑁆𑀳𑀺 𑀅𑀜𑁆𑀜𑀸𑀡𑀁 𑀧𑀘𑁆𑀘𑀬𑀫𑁆𑀳𑀺 𑀅𑀜𑁆𑀜𑀸𑀡𑀁 𑀢𑀲𑁆𑀲 𑀅𑀜𑁆𑀜𑀸𑀡𑀺𑀦𑁄 𑀲𑀫𑀸𑀥𑀺𑀪𑀽𑀢𑀲𑁆𑀲 𑀏𑀲𑁄 𑀦𑀺𑀲𑁆𑀲𑀦𑁆𑀤𑁄. 𑀬𑀁 𑀦 𑀚𑀸𑀦𑀸𑀢𑀺 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺. 𑀲𑁄 𑀢𑁂𑀦 𑀢𑀫𑁂𑀦 𑀦𑀺𑀤𑁆𑀤𑀺𑀲𑀺𑀬𑀢𑀺 𑀢𑀫𑁄𑀧𑀺 𑀬𑀣𑀸 𑀯𑀼𑀘𑁆𑀘𑀢𑀺. 𑀫𑀽𑀴𑁆𑀳𑁄𑀢𑀺 𑀏𑀯𑀁 𑀘𑁂𑀢𑀦𑀸. 𑀢𑁂𑀦 𑀢𑀫𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺. 𑀢𑀫𑁄𑀢𑀺 𑀲𑁄 𑀢𑁂𑀦 𑀢𑀫𑁂𑀦 𑀅𑀲𑀫𑀽𑀳𑀢𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑁂𑀦 𑀢𑀧𑁆𑀧𑀭𑀫𑁄 𑀪𑀯𑀢𑀺 𑀢𑀧𑁆𑀧𑀭𑀸𑀬𑀦𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀢𑀫𑁄 𑀢𑀫𑀧𑀭𑀸𑀬𑀦𑁄𑀢𑀺. 𑀧𑀭𑀸𑀬𑀦𑁄𑀬𑁂𑀯 𑀥𑀫𑁆𑀫𑁄 𑀫𑀦𑀲𑀺𑀓𑀸𑀢𑀩𑁆𑀩𑁄 𑀲𑁄 𑀢𑀫𑁄 𑀤𑀳𑀢𑀺 𑀅𑀜𑁆𑀜𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺. 𑀢𑁂 𑀘𑀲𑁆𑀲 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑁆𑀢𑀺. 𑀲𑁄 𑀲𑀼𑀢𑀫𑀬𑀸𑀬 𑀧𑀜𑁆𑀜𑀸𑀬 𑀲𑀫𑀦𑀼𑀧𑀲𑁆𑀲𑀢𑀺.

𑀢𑀢𑁆𑀣 𑀓𑀢𑀫𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄? 𑀲𑁄 𑀢𑁂𑀦 𑀧𑀜𑁆𑀜𑀸𑀯𑀲𑁂𑀦 𑀇𑀭𑀺𑀬𑀢𑀺 𑀏𑀯𑀁 𑀢𑀲𑁆𑀲𑁂𑀯 𑀇𑀭𑀺𑀬𑀦𑁆𑀢𑀲𑁆𑀲 𑀧𑀭𑀸𑀬𑀦𑁄 𑀪𑀯𑀢𑀺. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀼𑀕𑁆𑀕𑀮𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄.

𑀢𑀢𑁆𑀣 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀦𑁄 [𑀚𑁄𑀢𑀺𑀧𑀭𑀸𑀬𑀦𑁄 (𑀧𑀻.)]? 𑀢𑀢𑁆𑀣 𑀯𑀼𑀘𑁆𑀘𑀢𑀺 𑀚𑁄𑀢𑀺 𑀦𑀸𑀫 𑀬𑀁 𑀢𑀲𑁆𑀲 𑀘𑁂 𑀢𑀫𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀬𑁂 𑀘 𑀥𑀫𑁆𑀫𑁂 𑀅𑀦𑁆𑀢𑀫𑀲𑁄 𑀜𑀸𑀡𑀸𑀮𑁄𑀓𑁄, 𑀲𑁄 𑀲𑀼𑀡𑀥𑀫𑁆𑀫𑁄 𑀧𑀼𑀕𑁆𑀕𑀮𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄, 𑀢𑀢𑁆𑀣 𑀯𑀼𑀘𑁆𑀘𑀢𑁂, 𑀬𑁄𑀬𑀁 𑀧𑀼𑀕𑁆𑀕𑀮𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄, 𑀲𑁄 𑀬𑀤𑀺 𑀢𑀣𑀸𑀭𑀽𑀧𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀬𑁄 𑀦𑀁 𑀅𑀓𑀼𑀲𑀮𑀢𑁄 𑀘 𑀦𑀺𑀯𑀸𑀭𑁂𑀢𑀺 𑀪𑀸𑀯𑀺𑀢𑀓𑀼𑀲𑀮𑀢𑀸𑀯 𑀪𑀸𑀯𑀻 𑀦𑀺𑀬𑁄𑀚𑁂𑀢𑀻𑀢𑀺. 𑀏𑀯𑀜𑁆𑀘 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸. 𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀪𑀚𑀺𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀪𑀚𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀸𑀢𑀩𑁆𑀩𑀸𑀢𑀺. 𑀧𑀘𑁆𑀘𑀢𑁂 𑀲𑀜𑁆𑀜𑀸𑀬 𑀬𑀣𑀸 𑀲𑀜𑁆𑀜𑀸𑀬𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸. 𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀪𑀸𑀯𑁂𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀸𑀢𑀩𑁆𑀩𑀸𑀢𑀺. 𑀲𑁄 𑀢𑁂 𑀥𑀫𑁆𑀫𑁂 𑀲𑀼𑀲𑀼𑀬𑁆𑀬𑀢𑀺, 𑀲𑁄𑀢𑀁 𑀑𑀤𑀳𑀢𑀺, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺, 𑀢𑁂 𑀘𑀲𑁆𑀲 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑁆𑀢𑀺, 𑀲𑁄 𑀲𑀼𑀢𑀫𑀬𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑁄 𑀢𑁂𑀦 𑀧𑀘𑁆𑀘𑀬𑀯𑀲𑁂𑀦 𑀇𑀭𑀺𑀬𑀢𑀺 𑀏𑀯𑀁 𑀢𑀲𑁆𑀲𑁂𑀯 𑀇𑀭𑀺𑀬𑀦𑁆𑀢𑀺 𑀢𑀧𑁆𑀧𑀭𑀫𑁄 𑀪𑀯𑀢𑀺 𑀢𑀧𑁆𑀧𑀭𑀸𑀬𑀦𑁄. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀼𑀕𑁆𑀕𑀮𑁄 𑀢𑀫𑁄 𑀢𑀫𑀧𑀭𑀸𑀬𑀦𑁄.

𑀢𑀢𑁆𑀣 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀢𑀫𑀧𑀭𑀸𑀬𑀦𑁄? 𑀚𑁄𑀢𑀺 𑀦𑀸𑀫 𑀬𑀸 𑀢𑀲𑁆𑀲𑁂𑀯 𑀢𑀫𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀬𑁂 𑀥𑀫𑁆𑀫𑀸 𑀅𑀦𑁆𑀢𑀫𑀲𑁄 𑀜𑀸𑀡𑀸𑀮𑁄𑀓𑁄, 𑀲𑁄 𑀧𑀼𑀦 𑀥𑀫𑁆𑀫𑁄. 𑀓𑀢𑀫𑀸 𑀉𑀘𑁆𑀘𑀢𑁂? 𑀧𑀜𑁆𑀜𑀸𑀬𑀢𑁄 𑀧𑀡𑁆𑀟𑀺𑀢𑁄𑀢𑀺 𑀯𑀼𑀘𑁆𑀘𑀢𑁂, 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸. 𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀪𑀸𑀯𑀺𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀪𑀸𑀯𑀺𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀸. 𑀇𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀸𑀢𑀩𑁆𑀩𑀸, 𑀇𑀫𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀇𑀥 𑀧𑀦 𑀧𑀸𑀧𑀫𑀺𑀢𑁆𑀢𑀲𑀁𑀲𑁂𑀯𑀦𑁄 𑀧𑀸𑀧𑀫𑀺𑀢𑁆𑀢𑀯𑀲𑀸𑀦𑀼𑀕𑁄 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀪𑀺𑀯𑀟𑁆𑀠𑁂𑀢𑀺, 𑀓𑀼𑀲𑀮𑁂 𑀥𑀫𑁆𑀫𑁂 𑀧𑀚𑀳𑀢𑀺. 𑀲𑁄 𑀢𑁂𑀦 𑀧𑀫𑀸𑀤𑁂𑀦 𑀧𑀘𑁆𑀘𑀬𑀲𑀜𑁆𑀜𑀸 𑀅𑀫𑀦𑀲𑀺𑀓𑀢𑁆𑀯𑀸 𑀅𑀲𑁆𑀲𑀢𑀺𑀅𑀲𑀫𑁆𑀧𑀚𑀜𑁆𑀜𑀁 𑀆𑀲𑁂𑀯𑀢𑀺. 𑀢𑀬𑀸 𑀬𑁄 𑀧𑀝𑀺𑀧𑀓𑁆𑀔𑁄 𑀢𑀫𑁄, 𑀲𑁄 𑀧𑀯𑀟𑁆𑀠𑁂𑀢𑀺. 𑀲𑁄 𑀢𑀫𑀸𑀪𑀺𑀪𑀽𑀢𑁄 𑀧𑀭𑀸𑀬𑀦𑁄 𑀢𑀫𑀧𑀭𑀫𑁄 𑀘𑁂𑀯 𑀪𑀯𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀢𑀫𑀧𑀭𑀸𑀬𑀦𑁄.

𑁧𑁦𑁩. 𑀢𑀢𑁆𑀣 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀦𑁄? 𑀢𑀢𑁆𑀣 𑀯𑀼𑀘𑁆𑀘𑀢𑁂 𑀲𑁄𑀬𑀁 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀦𑁆𑀦𑀺𑀲𑁆𑀲𑀺𑀢𑁄 𑀪𑀯𑀢𑀺 𑀲𑀓𑁆𑀓𑀸 𑀲𑀁𑀬𑁄𑀕𑀻 𑀓𑀼𑀲𑀮𑀁 𑀕𑀯𑁂𑀲𑀻, 𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺, 𑀧𑀭𑀺𑀧𑀜𑁆𑀳𑀬𑀢𑀺? 𑀓𑀺𑀁 𑀓𑀼𑀲𑀮𑀁, 𑀓𑀺𑀁 𑀅𑀓𑀼𑀲𑀮𑀁? 𑀓𑀺𑀁 𑀲𑀸𑀯𑀚𑁆𑀚𑀁, 𑀓𑀺𑀁 𑀅𑀦𑀯𑀚𑁆𑀚𑀁? 𑀓𑀺𑀁 𑀲𑁂𑀯𑀺𑀢𑀩𑁆𑀩𑀁, 𑀓𑀺𑀁 𑀦 𑀲𑁂𑀯𑀺𑀢𑀩𑁆𑀩𑀁? 𑀓𑀺𑀁 𑀪𑀸𑀯𑀺𑀢𑀩𑁆𑀩𑀁, 𑀓𑀺𑀁 𑀦 𑀪𑀸𑀯𑀺𑀢𑀩𑁆𑀩𑀁? 𑀓𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁, 𑀓𑀺𑀁 𑀦 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀢𑀩𑁆𑀩𑀁? 𑀓𑀺𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀓𑀺𑀁 𑀦 𑀫𑀦𑀲𑀺𑀓𑀸𑀢𑀩𑁆𑀩𑀁? 𑀓𑀣𑀁 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺, 𑀓𑀣𑀁 𑀯𑁄𑀤𑀸𑀦𑀁 𑀳𑁄𑀢𑀺? 𑀓𑀣𑀁 𑀧𑀯𑀢𑁆𑀢𑀺 𑀳𑁄𑀢𑀺, 𑀓𑀣𑀁 𑀦𑀺𑀯𑀢𑁆𑀢𑀺 𑀳𑁄𑀢𑀺? 𑀓𑀣𑀁 𑀩𑀦𑁆𑀥𑁄 𑀳𑁄𑀢𑀺, 𑀓𑀣𑀁 𑀫𑁄𑀓𑁆𑀔𑁄 𑀳𑁄𑀢𑀺? 𑀓𑀣𑀁 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀓𑀣𑀁 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀳𑁄𑀢𑀺? 𑀲𑁄 𑀏𑀢𑁆𑀣 𑀤𑁂𑀲𑀺𑀢𑀁 𑀬𑀣𑀸 𑀉𑀧𑀝𑁆𑀞𑀺𑀢𑀁 𑀢𑀣𑀸 𑀲𑀫𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀏𑀯𑀁…𑀧𑁂… 𑀬𑀸𑀯 𑀓𑀣𑀁 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀓𑀣𑀁 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀲𑁄 𑀢𑁂 𑀥𑀫𑁆𑀫𑁂 𑀅𑀥𑀺𑀧𑀸𑀝𑀺𑀓𑀗𑁆𑀔𑀸𑀢𑀺 𑀏𑀯𑀁 𑀮𑀓𑁆𑀔𑀡𑀁 𑀜𑀸𑀡𑀁 𑀯𑀺𑀚𑁆𑀚𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑀺. 𑀲𑁄 𑀧𑀼𑀕𑁆𑀕𑀮𑁄 𑀢𑀧𑁆𑀧𑀭𑀫𑁄 𑀪𑀯𑀢𑀺 𑀢𑀧𑁆𑀧𑀭𑀸𑀬𑀦𑁄, 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀦𑁄.

𑀢𑀢𑁆𑀣 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀢𑀫𑁄 𑀢𑀫𑀧𑀭𑀸𑀬𑀦𑁄? 𑀬𑁄 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀤𑀻𑀧𑁂𑀢𑀺. 𑀢𑀁 𑀪𑀸𑀯𑀦𑀸𑀬 𑀳𑀻𑀦𑀸𑀲𑀼 𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀢𑀧𑁆𑀧𑀭𑀫𑁄 𑀪𑀯𑀢𑀺 𑀢𑀧𑁆𑀧𑀭𑀸𑀬𑀦𑁄. 𑀅𑀬𑀁 𑀯𑀼𑀘𑁆𑀘𑀢𑁂 𑀧𑀼𑀕𑁆𑀕𑀮𑁄 𑀢𑀫𑁄 𑀢𑀫𑀧𑀭𑀸𑀬𑀦𑁄.

𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄? 𑀲𑁄 𑀢𑀫𑁂𑀦 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀢𑀺 𑀬𑀁 𑀘𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀬𑁂𑀦 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀚𑀳𑀢𑀺, 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀪𑀺𑀯𑀟𑁆𑀠𑀢𑀺.

𑀢𑀢𑁆𑀣 𑀬𑁄 𑀘 𑀧𑀡𑀻𑀢𑀸𑀲𑀼 𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀢𑀧𑁆𑀧𑀭𑀫𑁄 𑀢𑁂𑀦 𑀯𑀼𑀘𑁆𑀘𑀢𑁂 𑀢𑀫𑁄 𑀚𑁄𑀢𑀺𑀧𑀭𑀸𑀬𑀦𑁄.

𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀢𑀫𑀧𑀭𑀸𑀬𑀦𑁄? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀺. 𑀬𑀁 𑀘𑀓𑁆𑀔𑀼 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀧𑀸𑀧𑀫𑀺𑀢𑁆𑀢𑀼𑀧𑀲𑁂𑀯𑁂𑀦 𑀧𑀸𑀧𑀫𑀺𑀢𑁆𑀢𑀯𑀲𑀸𑀦𑀼𑀕𑁄 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀅𑀪𑀺𑀯𑀟𑁆𑀠𑀢𑀺, 𑀢𑀁 𑀪𑀸𑀯𑀦𑀸𑀬 𑀳𑀻𑀦𑀸𑀲𑀼 𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑀧𑁆𑀧𑀭𑀫𑁄 𑀢𑁂𑀦 𑀯𑀼𑀘𑁆𑀘𑀢𑁂 𑀚𑁄𑀢𑀺 𑀢𑀫𑀧𑀭𑀸𑀬𑀦𑁄.

𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀦𑁄 𑀲𑁄 𑀚𑁄𑀢𑀺𑀢𑀸 𑀧𑀪𑀸𑀢𑀸 [𑀚𑁄𑀢𑀺𑀢𑀪𑀸𑀯𑀢𑀸𑀬 (𑀧𑀻.)] 𑀬𑀸𑀯 𑀧𑀡𑀻𑀢𑀸𑀲𑀼 𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑀧𑁆𑀧𑀭𑀫𑁄 𑀢𑁂𑀦𑀸𑀳 𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀦𑁄.

𑀚𑁄𑀢𑀺𑀢𑀫𑀧𑀭𑀸𑀬𑀦𑁂𑀦 𑀤𑀲 𑀅𑀓𑀼𑀲𑀮𑀸𑀦𑀁 𑀓𑀫𑁆𑀫𑀸𑀦𑀁 𑀉𑀤𑀬𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀦 𑀧𑀼𑀕𑁆𑀕𑀮𑁂𑀦 𑀅𑀓𑀼𑀲𑀮𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀺. 𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀦 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀺. 𑀚𑁄𑀢𑀺𑀦𑀸 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀺. 𑀚𑁄𑀢𑀺𑀦𑀸 𑀢𑀫𑀧𑀭𑀸𑀬𑀦𑁂𑀦 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀤𑀲𑁆𑀲𑁂𑀢𑀺. 𑀚𑁄𑀢𑀺𑀦𑀸 𑀧𑀡𑀻𑀢𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀦 𑀚𑁄𑀢𑀺𑀧𑀭𑀸𑀬𑀦𑁂𑀦 𑀅𑀢𑀧𑀦𑀻𑀬𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀚𑁄𑀢𑀺𑀦𑀸 𑀢𑀫𑀧𑀭𑀸𑀬𑀦𑁂𑀦 𑀢𑀧𑀦𑀻𑀬𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁧𑁦𑁪. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑀺𑀁 𑀤𑁂𑀲𑀺𑀢𑀁? 𑀢𑀢𑁆𑀣 𑀯𑀼𑀘𑁆𑀘𑀢𑁂 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸. 𑀓𑀼𑀲𑀮𑀸𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀤𑁂𑀲𑀺𑀢𑁄. 𑀳𑀻𑀦𑀧𑁆𑀧𑀡𑀻𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀕𑀢𑀺 𑀦𑀸𑀦𑀸𑀓𑀸𑀭𑀡𑀁 𑀤𑁂𑀲𑀺𑀢𑀁. 𑀅𑀬𑀁 𑀤𑁂𑀲𑀦𑀸 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀬𑁄 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀢𑀢𑁆𑀣 𑀞𑀺𑀢𑁄 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑀺𑀬𑀢𑀺 𑀯𑀺𑀘𑀬𑀦𑁆𑀢𑀁 𑀬𑀼𑀚𑁆𑀚𑀢𑀺. 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀬𑁄 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀢𑀢𑁆𑀣 𑀞𑀺𑀢𑁄 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑀺𑀬𑀢𑀺 𑀯𑀺𑀘𑀬𑀦𑁆𑀢𑀁 𑀬𑀼𑀚𑁆𑀚𑀢𑀺. 𑀅𑀬𑀁 𑀯𑀺𑀘𑀬𑁄 𑀬𑀼𑀢𑁆𑀢𑀺 𑀘.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄? 𑀬𑁄 𑀧𑀼𑀕𑁆𑀕𑀮𑁄 𑀚𑁄𑀢𑀺, 𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀤𑀝𑁆𑀞𑀸𑀦𑀁. 𑀬𑁄 𑀧𑀼𑀕𑁆𑀕𑀮𑁄 𑀢𑀫𑁄, 𑀲𑁄 𑀢𑀫𑀸𑀤𑀺𑀦𑁆𑀦𑀁 𑀯𑀸𑀦𑀼𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀫𑁂𑀦 𑀚𑁄𑀢𑀺𑀧𑀭𑀸𑀬𑀦𑁂𑀦 𑀅𑀧𑁆𑀧𑀫𑀸𑀤𑀲𑁆𑀲 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀫𑁄 𑀅𑀯𑀺𑀚𑁆𑀚𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀘 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀚𑁄𑀢𑀺𑀦𑀸 𑀢𑀫𑀧𑀭𑀸𑀬𑀦𑁂𑀦 𑀧𑀫𑀸𑀤𑀲𑁆𑀲 𑀘 𑀤𑀺𑀝𑁆𑀞𑀺𑀬𑀸 𑀘 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀧𑀤𑀝𑁆𑀞𑀸𑀦𑁄.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? 𑀢𑀫𑁂𑀦 𑀢𑀫𑀧𑀭𑀸𑀬𑀦𑁂𑀦 𑀢𑀫𑁄𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀤𑁆𑀤𑀺𑀝𑁆𑀞𑀸𑀬 𑀲𑀩𑁆𑀩𑀓𑀺𑀮𑁂𑀲𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀢𑀫𑁂𑀦 𑀚𑁄𑀢𑀺𑀧𑀭𑀸𑀬𑀦𑁂𑀦 𑀚𑁄𑀢𑀺𑀯𑀺𑀚𑁆𑀚𑀸𑀬 𑀦𑀺𑀤𑁆𑀤𑀺𑀝𑁆𑀞𑀸𑀬 𑀲𑀩𑁆𑀩𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀚𑁄𑀢𑀺𑀢𑀫𑀧𑀭𑀸𑀬𑀦𑁂𑀦 𑀧𑀫𑀸𑀤𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀢𑀫𑁂𑀦 𑀚𑁄𑀢𑀺𑀧𑀭𑀸𑀬𑀦𑁂𑀦 𑀅𑀧𑁆𑀧𑀫𑀸𑀤𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀲𑀢𑁆𑀢𑀸 𑀦𑀻𑀘𑀓𑀼𑀮𑀺𑀦𑁄, 𑀦 𑀢𑁂 𑀇𑀫𑀁 𑀲𑀼𑀢𑁆𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀬𑁂 𑀲𑀢𑁆𑀢𑀸 𑀉𑀘𑁆𑀘𑀓𑀼𑀮𑀺𑀦𑁄, 𑀢𑁂 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀻𑀢𑀺. 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄. 𑀪𑀽𑀫𑀺𑀬𑀁 𑀉𑀧𑀤𑁂𑀲𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄? 𑀬𑀸 𑀅𑀯𑀺𑀚𑁆𑀚𑀸𑀢𑁄 𑀧𑀪𑀽𑀢𑀺 𑀢𑀡𑁆𑀳𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑁄 𑀢𑀫𑁄 𑀢𑀫𑀧𑀭𑀸𑀬𑀦𑁄, 𑀇𑀤𑀁 𑀤𑀼𑀓𑁆𑀔𑀁. 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀚𑁄𑀢𑀺 𑀬𑁂𑀦 𑀲𑀼𑀢𑁆𑀢𑁂𑀦 𑀥𑀫𑁆𑀫𑁂𑀦 𑀧𑀜𑁆𑀜𑀸𑀧𑀺𑀬𑀢𑀺, 𑀲𑁄 𑀥𑀫𑁆𑀫𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀢𑁂𑀦 𑀅𑀫𑁄𑀳𑁂𑀦 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀲𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑀸 𑀯𑀺𑀪𑀢𑁆𑀢𑀺? 𑀢𑀫𑁄 𑀢𑀫𑀧𑀭𑀸𑀬𑀦𑁄𑀢𑀺 𑀦 𑀏𑀓𑀁𑀲𑁂𑀦. 𑀓𑀺𑀁 𑀓𑀸𑀭𑀡𑀁? 𑀅𑀢𑁆𑀣𑀺 𑀢𑀫𑁄 𑀘 𑀪𑀯𑁄 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑁂𑀦 𑀘 𑀓𑀼𑀲𑀮𑁂𑀦 𑀚𑁄𑀢𑀺𑀦𑀸 𑀧𑀼𑀕𑁆𑀕𑀮𑁂𑀦 𑀲𑀳𑁄𑀧𑀢𑁆𑀢𑀺𑀪𑀸𑀯𑁂. 𑀅𑀢𑁆𑀣𑀺 𑀚𑁄𑀢𑀺 𑀘 𑀪𑀯𑁄 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑁂𑀦 𑀘 𑀅𑀓𑀼𑀲𑀮𑁂𑀦 𑀢𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀳𑁄𑀧𑀢𑁆𑀢𑀺𑀪𑀸𑀯𑁂 𑀧𑀭𑀺𑀯𑀢𑁆𑀢𑀦𑀸 𑀢𑀫𑁂𑀲𑀼 𑀧𑀝𑀺𑀧𑀓𑁆𑀔𑁄𑀢𑀺 𑀚𑁄𑀢𑀺𑀦𑀸 𑀢𑀫𑀧𑀭𑀸𑀬𑀦𑁄.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄? 𑀬𑁄 𑀢𑀫𑁄, 𑀲𑁄 𑀏𑀯𑀁 𑀅𑀢𑁆𑀢𑀩𑁆𑀬𑀸𑀧𑀸𑀤𑀸𑀬 𑀧𑀝𑀺𑀧𑀦𑁆𑀦𑁄, 𑀲𑁄 𑀅𑀲𑁆𑀲𑀤𑁆𑀥𑀸𑀬 𑀩𑀸𑀮𑁄 𑀅𑀓𑀼𑀲𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀻. 𑀬𑁄 𑀚𑁄𑀢𑀺, 𑀲𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀧𑀡𑁆𑀟𑀺𑀢𑁄 𑀓𑀼𑀲𑀮𑁄 𑀩𑁆𑀬𑀢𑁆𑀢𑁄 𑀆𑀤𑀻𑀦𑀯𑀤𑀲𑁆𑀲𑀻. 𑀅𑀬𑀁 𑀯𑁂𑀯𑀘𑀦𑁄.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀧𑀸𑀓𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀬𑀢𑀺, 𑀅𑀓𑀼𑀲𑀮𑁂 𑀧𑀭𑀺𑀬𑀸𑀤𑀺𑀦𑁆𑀦𑀢𑀸 𑀧𑀜𑁆𑀜𑀸𑀧𑀺𑀬𑀢𑀺. 𑀚𑁄𑀢𑀺𑀓𑀼𑀲𑀮𑀥𑀫𑁆𑀫𑀼𑀧𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀬𑀢𑀺 𑀓𑀼𑀲𑀮𑀥𑀫𑁆𑀫𑀯𑀺𑀧𑀸𑀓𑀧𑀜𑁆𑀜𑀢𑁆𑀢𑀺𑀬𑀸 𑀘𑀸𑀢𑀺.

𑀑𑀢𑀭𑀡𑁄𑀢𑀺 𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀬𑀜𑁆𑀘 𑀚𑀭𑀸𑀫𑀭𑀡𑀁 𑀬𑀸 𑀘 𑀅𑀯𑀺𑀚𑁆𑀚𑀸, 𑀢𑀁 𑀧𑀤𑀝𑁆𑀞𑀸𑀦𑀁, 𑀦𑀺𑀤𑁆𑀤𑁂𑀲𑁂𑀦 𑀯𑀺𑀚𑁆𑀚𑀼𑀧𑁆𑀧𑀸𑀤𑁄 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀬𑁄 𑀬𑀸𑀯 𑀚𑀭𑀸𑀫𑀭𑀡𑀦𑀺𑀭𑁄𑀥𑁄, 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸. 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀜𑁆𑀘 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀤𑁂𑀲𑁂𑀦 𑀥𑀸𑀢𑀽𑀲𑀼.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄? 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀤𑁂𑀲𑀺𑀢𑀲𑁆𑀲 𑀆𑀭𑀫𑁆𑀪𑁄. 𑀅𑀥𑀺𑀝𑁆𑀞𑀸𑀦𑁄𑀢𑀺 𑀢𑀫𑁄𑀢𑀺 𑀪𑀕𑀯𑀸 𑀩𑁆𑀭𑀯𑀻𑀢𑀺, 𑀦 𑀏𑀓𑀁 𑀧𑀼𑀕𑁆𑀕𑀮𑀁 𑀤𑁂𑀲𑁂𑀢𑀺. 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀕𑀢𑀺, 𑀢𑀢𑁆𑀣 𑀬𑁂 𑀤𑀼𑀘𑁆𑀘𑀭𑀺𑀢𑀥𑀫𑁆𑀫𑁂𑀦 𑀉𑀧𑀧𑀦𑁆𑀦𑀸, 𑀢𑁂 𑀩𑀳𑀼𑀮𑀸𑀥𑀺𑀯𑀘𑀦𑁂𑀦 𑀢𑀫𑁄 𑀦𑀺𑀤𑁆𑀤𑀺𑀲𑀢𑀺. 𑀬𑀸 𑀚𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀓𑀼𑀲𑀮𑀥𑀫𑁆𑀫𑁄𑀧𑀧𑀢𑁆𑀢𑀺 𑀲𑀩𑁆𑀩𑀁 𑀢𑀁 𑀚𑁄𑀢𑀻𑀢𑀺 𑀅𑀪𑀺𑀮𑀧𑀢𑀺 𑀅𑀬𑀫𑁂𑀓𑀢𑀸 𑀧𑀘𑁆𑀘𑀬𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀜𑁆𑀜𑀢𑁆𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀅𑀓𑀼𑀲𑀮𑀲𑁆𑀲 𑀧𑀸𑀧𑀫𑀺𑀢𑁆𑀢𑀢𑀸 𑀧𑀘𑁆𑀘𑀬𑁄, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼. 𑀓𑀼𑀲𑀮𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀧𑀘𑁆𑀘𑀬𑁄, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼.

𑀢𑀢𑁆𑀣 𑀓𑀢𑀫𑀸 𑀲𑀫𑀸𑀭𑁄𑀧𑀦𑀸𑀢𑀺? 𑀇𑀥𑁂𑀓𑀘𑁆𑀘𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀻𑀢𑀺 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀕𑀦𑁆𑀥𑁂𑀲𑀼 𑀭𑀲𑁂𑀲𑀼 𑀨𑀲𑁆𑀲𑁂𑀲𑀼, 𑀲𑁄 𑀉𑀧𑀧𑀦𑁆𑀦𑁄 𑀲𑀩𑁆𑀩𑀫𑁆𑀳𑀺 𑀫𑀸𑀦𑀼𑀲𑁆𑀲𑀓𑁂 𑀉𑀧𑀪𑁄𑀕𑀧𑀭𑀺𑀪𑁄𑀕𑁂. 𑀚𑁄𑀢𑀺 𑀧𑀡𑀻𑀢𑁂𑀲𑀼 𑀓𑀼𑀲𑀮𑁂𑀲𑀼 𑀉𑀧𑀧𑀦𑁆𑀦𑁄 𑀲𑀩𑁆𑀩𑀫𑁆𑀳𑀺 𑀫𑀸𑀦𑀼𑀲𑁆𑀲𑀓𑁂 𑀉𑀧𑀪𑁄𑀕𑀧𑀭𑀺𑀪𑁄𑀕𑁂 𑀉𑀧𑀧𑀦𑁆𑀦𑁄𑀢𑀺.

𑁧𑁦𑁫. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀘 𑀲𑀼𑀢𑁆𑀢𑀁? 𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸𑀢𑀺 𑀕𑀸𑀣𑀸. 𑀓𑁂𑀦 𑀓𑀸𑀭𑀡𑁂𑀦 𑀢𑀁 𑀩𑀦𑁆𑀥𑀦𑀁 𑀤𑀴𑁆𑀳𑀁? 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀇𑀲𑁆𑀲𑀭𑀺𑀬𑁂𑀦 𑀲𑀓𑁆𑀓𑀸 𑀫𑁄𑀘𑁂𑀢𑀼𑀁 𑀥𑀦𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑀸𑀘𑀦𑀸𑀬 𑀯𑀸 𑀧𑀭𑀸𑀬𑀦𑁂𑀦 𑀯𑀸. 𑀬𑁂𑀲𑀼 𑀘 𑀅𑀬𑀁 𑀭𑀸𑀕𑁄 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀇𑀤𑀫𑀲𑁆𑀲 𑀘𑁂𑀢𑀲𑀺𑀓𑀩𑀦𑁆𑀥𑀦𑀁. 𑀢𑀁 𑀦 𑀲𑀓𑁆𑀓𑀸 𑀇𑀲𑁆𑀲𑀭𑀺𑀬𑁂𑀦 𑀯𑀸 𑀥𑀦𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑀸𑀘𑀦𑀸𑀬 𑀯𑀸 𑀧𑀭𑀸𑀬𑀦𑁂𑀦 𑀯𑀸 𑀫𑁄𑀘𑁂𑀢𑀼𑀁. 𑀦 𑀘 𑀢𑀢𑁆𑀣 𑀓𑁄𑀘𑀺 𑀅𑀢𑁆𑀣𑀺 𑀧𑀸𑀝𑀺𑀪𑁄𑀕𑁄. 𑀇𑀫𑀺𑀦𑀸 𑀩𑀦𑁆𑀥𑀦𑀢𑁄 𑀫𑁄𑀘𑀬𑀺𑀢𑁆𑀣𑀸𑀢𑀺 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀢𑀤𑀺𑀤𑀁 𑀩𑀦𑁆𑀥𑀦𑀁 𑀭𑀸𑀕𑀸𑀦𑀼𑀲𑀬𑁂𑀦 𑀘 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀘 𑀆𑀬𑀢𑀦𑁂𑀲𑀼 𑀩𑀦𑁆𑀥𑀢𑀺. 𑀭𑀽𑀧𑁂𑀲𑀼 𑀭𑀽𑀧𑀢𑀡𑁆𑀳𑀸 𑀩𑀦𑁆𑀥𑀢𑀺, 𑀬𑀸𑀯 𑀥𑀫𑁆𑀫𑁂𑀲𑀼 𑀥𑀫𑁆𑀫𑀢𑀡𑁆𑀳𑀸. 𑀬𑁄 𑀇𑀥 𑀮𑁄𑀓𑁂 𑀩𑀦𑁆𑀥𑁄 𑀧𑀭𑀮𑁄𑀓𑀲𑁆𑀫𑀺𑀁 𑀩𑀦𑁆𑀥𑁄 𑀦𑀻𑀬𑀢𑀺. 𑀲𑁄 𑀩𑀦𑁆𑀥𑁄 𑀚𑀸𑀬𑀢𑀺, 𑀩𑀦𑁆𑀥𑁄 𑀫𑀻𑀬𑀢𑀺. 𑀩𑀦𑁆𑀥𑁄 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀢𑀺. 𑀦 𑀲𑀓𑁆𑀓𑀸 𑀫𑁄𑀘𑁂𑀢𑀼𑀁 𑀅𑀜𑁆𑀜𑀢𑁆𑀭 𑀅𑀭𑀺𑀬𑀫𑀕𑁆𑀕𑁂𑀦 𑀇𑀫𑀜𑁆𑀘 𑀩𑀦𑁆𑀥𑀦𑀁. 𑀫𑀭𑀡𑀪𑀸𑀯𑀜𑁆𑀘 𑀉𑀧𑀧𑀢𑁆𑀢𑀺𑀪𑀸𑀯𑀜𑁆𑀘 𑀪𑀬𑀢𑁄 𑀯𑀺𑀤𑀺𑀢𑁆𑀯𑀸 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺. 𑀲𑁄 𑀇𑀫𑀁 𑀙𑀦𑁆𑀤𑀭𑀸𑀕𑀁 𑀧𑀚𑀳𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀢𑀺. 𑀅𑀬𑀜𑁆𑀘 𑀮𑁄𑀓𑁄 𑀇𑀢𑁄 𑀧𑀭𑀁 𑀤𑀼𑀢𑀺𑀬𑁄.

𑀢𑀢𑁆𑀣 𑀬𑀁 𑀩𑀦𑁆𑀥𑀦𑀸𑀲𑀗𑁆𑀔𑀸𑀭𑀸𑀦𑀁 𑀧𑀳𑀸𑀦𑀁 𑀇𑀤𑀁 𑀯𑀼𑀘𑁆𑀘𑀢𑀺 𑀉𑀪𑀬𑁂𑀲𑀼 𑀞𑀸𑀦𑁂𑀲𑀼 𑀯𑀻𑀭𑀺𑀬𑀁, 𑀕𑀦𑁆𑀥𑀧𑀭𑀺𑀯𑀸𑀢𑁄 [𑀕𑀦𑁆𑀣𑀧𑀭𑀺𑀯𑀲𑁄 (𑀧𑀻.) 𑀕𑀦𑁆𑀣𑀧𑀭𑀺𑀯𑀼𑀢𑁄 (𑀓.)] 𑀲𑀼𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺. 𑀢𑀣𑁂𑀯 𑀧𑀭𑀺𑀕𑁆𑀕𑀳𑁂𑀲𑀼 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀅𑀯𑀽𑀴𑁆𑀳𑁄 𑀲𑀮𑁆𑀮𑁄𑀢𑀺 𑀢𑀲𑁆𑀲𑁂𑀯 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀢𑀡𑁆𑀳𑀸𑀫𑀽𑀮𑀲𑁆𑀲 𑀧𑀳𑀸𑀦𑀸 𑀯𑀭𑁂 [𑀅𑀳𑀦𑀸𑀯𑀭𑁂 (𑀧𑀻.), 𑀅𑀳𑀦𑀸𑀯𑀭𑁄 (𑀓.)] 𑀅𑀧𑁆𑀧𑀫𑀢𑁆𑀢𑁄𑀢𑀺 𑀓𑀸𑀫𑁄 𑀧𑀫𑀸𑀤𑀯𑀢𑁆𑀢𑀢𑀺 𑀧𑀳𑀸𑀦𑀸𑀬 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀪𑀯𑀢𑀺. 𑀢𑀲𑁆𑀲 𑀆𑀲𑀬𑀁 𑀧𑀳𑀸𑀦𑀸𑀬 𑀦𑁂𑀯 𑀇𑀫𑀁 𑀮𑁄𑀓𑀁 𑀆𑀲𑀻𑀲𑀢𑀺 𑀦 𑀧𑀭𑀮𑁄𑀓𑀁. 𑀦 𑀇𑀥𑀮𑁄𑀓𑀁 𑀦𑀺𑀲𑁆𑀲𑀺𑀢𑀁, 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀆𑀓𑀗𑁆𑀔𑀢𑀺. 𑀦𑀸𑀧𑀺 𑀧𑀭𑀮𑁄𑀓𑀁 𑀦𑀺𑀲𑁆𑀲𑀺𑀢𑀁 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀆𑀓𑀗𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑁂 ‘‘𑀦𑀸𑀲𑀻𑀲𑀢𑁂 𑀮𑁄𑀓𑀫𑀺𑀫𑀁 𑀧𑀭𑀁 𑀮𑁄𑀓𑀜𑁆𑀘𑀸’’𑀢𑀺. 𑀬𑀁 𑀢𑀲𑁆𑀲 𑀧𑀳𑀸𑀦𑀁 𑀢𑀁 𑀙𑁂𑀤𑀦𑀁 𑀅𑀝𑁆𑀞𑀓𑀯𑀕𑁆𑀕𑀺𑀬𑁂𑀲𑀼 𑀫𑀼𑀦𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑁄 𑀇𑀥 𑀯𑀺𑀭𑁄𑀥𑁄 𑀅𑀝𑁆𑀞𑀓𑀯𑀕𑁆𑀕𑀺𑀬𑁂𑀲𑀼 𑀦𑀸𑀲𑀻𑀲𑀦𑀁 𑀇𑀥 𑀅𑀦𑀸𑀣𑀸. 𑀢𑀣𑀸𑀬𑀁 𑀢𑀡𑁆𑀳𑀸𑀬 𑀢𑀲𑁆𑀲 𑀧𑀭𑀺𑀕𑁆𑀕𑀳𑀲𑁆𑀲 𑀯𑀢𑁆𑀣𑀼𑀓𑀸𑀫𑀲𑁆𑀲 𑀏𑀓𑀕𑀸𑀣𑀸𑀬 𑀏𑀢𑁂 𑀲𑀩𑁆𑀩𑁂 𑀓𑀸𑀫𑀸 𑀤𑀲𑁆𑀲𑀺𑀢𑀸. 𑀢𑁂𑀦 𑀪𑀕𑀯𑀸 𑀤𑁂𑀲𑁂𑀢𑀺 ‘‘𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺 𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀓𑀸𑀫𑁂 𑀧𑀳𑀸𑀬𑀸’’𑀢𑀺. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀤𑁆𑀯𑀺𑀥𑀸 𑀦𑀺𑀤𑁆𑀤𑁂𑀲𑁄 𑀲𑀁𑀲𑀦𑁆𑀤𑀦𑀦𑀺𑀤𑁆𑀤𑁂𑀲𑁄 𑀘 𑀲𑀫𑀬𑀦𑀺𑀤𑁆𑀤𑁂𑀲𑁄 𑀘, 𑀬𑀣𑀸 𑀅𑀬𑀁 𑀕𑀸𑀣𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀏𑀯𑀁 𑀢𑀸𑀬 𑀕𑀸𑀣𑀸𑀬 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀯𑀺𑀲𑀚𑁆𑀚𑀦𑀸. 𑀏𑀯𑀁 𑀕𑀸𑀣𑀸 𑀲𑀩𑁆𑀩𑀕𑀸𑀣𑀸𑀲𑀼 𑀩𑁆𑀬𑀸𑀓𑀭𑀡𑁂𑀲𑀼 𑀯𑀸 𑀦𑀺𑀤𑁆𑀤𑀺𑀝𑁆𑀞𑀁 𑀲𑀼𑀢𑁆𑀢𑀁.

𑁧𑁦𑁬. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀫𑀁 𑀲𑀼𑀢𑁆𑀢𑀁 𑀓𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀤𑁂𑀲𑀺𑀢𑀁. 𑀬𑁂 𑀭𑀸𑀕𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀓𑀸𑀫𑁂 𑀧𑀚𑀳𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀬𑀲𑁆𑀲 𑀤𑀲𑀯𑀢𑁆𑀣𑀼𑀓𑀸 𑀓𑀺𑀮𑁂𑀲𑀸 𑀉𑀢𑁆𑀢𑀺𑀡𑁆𑀡𑀸 𑀯𑀦𑁆𑀢𑀸 𑀯𑀺𑀤𑀺𑀢𑀸. 𑀓𑀢𑀫𑁂 𑀤𑀲𑀯𑀺𑀥𑀸𑀢𑀺, 𑀓𑀺𑀮𑁂𑀲𑀓𑀸𑀫𑀸 𑀘 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀸 𑀘 𑀲𑀁𑀬𑁄𑀚𑀦𑀸 𑀤𑀲𑀯𑀢𑁆𑀣𑀼𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀅𑀬𑀁 𑀯𑀺𑀘𑀬𑁄.

𑀢𑀢𑁆𑀣 𑀓𑀢𑀫𑀸 𑀬𑀼𑀢𑁆𑀢𑀺? 𑀬𑁂 𑀲𑀸𑀭𑀢𑁆𑀢𑀸 𑀢𑁂 𑀕𑀸𑀴𑁆𑀳𑀩𑀦𑁆𑀥𑀦𑁂𑀦 𑀩𑀦𑁆𑀥𑀦𑁆𑀢𑀺 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄? 𑀲𑀸𑀭𑀢𑁆𑀢𑁄 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀫𑀫𑀁𑀓𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀧𑁂𑀓𑁆𑀔𑀸𑀢𑀺 𑀅𑀢𑀻𑀢𑀯𑀢𑁆𑀣𑀼𑀲𑁆𑀲 𑀲𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀢𑀺 𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀬𑁄 𑀅𑀳𑀁𑀓𑀸𑀭𑁂 𑀯𑀺𑀲𑀢𑁆𑀢𑁄 𑀫𑀫𑀁𑀓𑀸𑀭𑁂 𑀯𑀺𑀲𑀢𑁆𑀢𑁄, 𑀬𑁄 𑀧𑀼𑀢𑁆𑀢𑀤𑀸𑀭𑁂 𑀲𑀸𑀭𑀢𑁆𑀢𑁄. 𑀔𑁂𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀭𑀢𑁆𑀢𑁄. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? 𑀇𑀥 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀦𑀺𑀩𑁆𑀩𑀸𑀦𑁂𑀦 𑀙𑀦𑁆𑀤𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀼𑀢𑁆𑀢𑀤𑀸𑀭𑁂 𑀢𑀡𑁆𑀳𑀁 𑀧𑀚𑀳𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄? 𑀬𑀸 𑀧𑀼𑀢𑁆𑀢𑀤𑀸𑀭𑁂 𑀢𑀡𑁆𑀳𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑁂 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸, 𑀢𑁂 𑀬𑁂 𑀘 𑀩𑀸𑀳𑀺𑀭𑁂𑀲𑀼 𑀭𑀽𑀧𑁂𑀲𑀼 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀇𑀤𑀁 𑀤𑀼𑀓𑁆𑀔𑀁, 𑀬𑀁 𑀢𑀢𑁆𑀣 𑀙𑁂𑀤𑀦𑀻𑀬𑀁, 𑀅𑀬𑀁 𑀦𑀺𑀭𑁄𑀥𑁄. 𑀬𑁂𑀦 𑀪𑀺𑀚𑁆𑀚𑀢𑀺, 𑀅𑀬𑀁 𑀫𑀕𑁆𑀕𑁄. 𑀯𑀺𑀪𑀢𑁆𑀢𑀻𑀢𑀺 𑀦𑀢𑁆𑀣𑀺 𑀯𑀺𑀪𑀢𑁆𑀢𑀺𑀬𑀸 𑀪𑀽𑀫𑀺, 𑀧𑀭𑀺𑀯𑀢𑁆𑀢𑀦𑁄𑀢𑀺 𑀧𑀝𑀺𑀧𑀓𑁆𑀔𑁄 𑀦𑀺𑀤𑁆𑀤𑀺𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄? 𑀦𑀺𑀤𑁆𑀤𑀺𑀝𑁆𑀞𑁄 𑀯𑁂𑀯𑀘𑀦𑁄. 𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀅𑀢𑁆𑀣𑀺 𑀢𑀡𑁆𑀳𑀸 𑀏𑀓𑁄 𑀲𑀢𑁆𑀢𑁄 𑀑𑀢𑀺𑀡𑁆𑀡𑁄 𑀢𑀧𑁆𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀬𑀸𑀯 𑀚𑀭𑀸𑀫𑀭𑀡𑀁. 𑀬𑀸 𑀢𑀢𑁆𑀣 𑀯𑁂𑀤𑀦𑀸, 𑀅𑀬𑀁 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀬𑀸𑀯 𑀚𑀭𑀸𑀫𑀭𑀡𑀦𑀺𑀭𑁄𑀥𑁄.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄? 𑀲𑀼𑀤𑁆𑀥𑁄 𑀕𑀸𑀣𑀸𑀬 𑀆𑀭𑀫𑁆𑀪𑁄. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄? 𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸𑀢𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸, 𑀦 𑀯𑁂𑀫𑀢𑁆𑀢𑀢𑀸𑀬. 𑀘𑀢𑁆𑀢𑀸𑀭𑁄 𑀭𑀸𑀕𑀸 𑀓𑀸𑀫𑀭𑀸𑀕𑁄 𑀭𑀽𑀧𑀭𑀸𑀕𑁄 𑀪𑀯𑀭𑀸𑀕𑁄 𑀤𑀺𑀝𑁆𑀞𑀺𑀭𑀸𑀕𑁄 𑀘𑀸𑀢𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀬𑁂𑀲𑀁 𑀭𑀸𑀕𑁄 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀢𑀲𑁆𑀲 𑀲𑀼𑀪𑀲𑀜𑁆𑀜𑀸 𑀳𑁂𑀢𑀼, 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀘 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀢𑀸 𑀧𑀘𑁆𑀘𑀬𑁄. 𑀬𑀸𑀬 𑀢𑁂 𑀙𑀺𑀦𑁆𑀦𑀸𑀦𑀺 𑀢𑀲𑁆𑀲 𑀅𑀲𑀼𑀪𑀲𑀜𑁆𑀜𑀸 𑀳𑁂𑀢𑀼, 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀯𑀺𑀦𑁄𑀤𑀦𑀁 𑀧𑀘𑁆𑀘𑀬𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀲𑀸𑀭𑀢𑁆𑀢𑁄 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀲𑀫𑁆𑀫𑀽𑀴𑁆𑀳𑀯𑀺𑀥𑁄 𑀤𑀼𑀝𑁆𑀞𑀸𑀢𑀺𑀧𑀺 𑀏𑀢𑀫𑁆𑀧𑀺 [𑀏𑀯𑀫𑁆𑀧𑀺 (𑀧𑀻. 𑀓.)] 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀻𑀢𑀺 𑀢𑀁 𑀧𑀭𑀺𑀜𑁆𑀜𑀸𑀢𑀢𑁆𑀣𑀁 𑀧𑀭𑀺𑀯𑀚𑁆𑀚𑀺𑀢𑀢𑁆𑀣𑀁 𑀧𑀚𑀳𑀺𑀢𑀸, 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑁧𑁦𑁭. 𑀬𑀁 𑀘𑁂𑀢𑀲𑀺𑀓𑀁 𑀬𑀁 𑀧𑀓𑀧𑁆𑀧𑀺𑀢𑀁 𑀯𑀺𑀢𑁆𑀣𑀸𑀭𑁂𑀦 𑀧𑀘𑁆𑀘𑀬𑁄, 𑀬𑀁 𑀯𑀸 𑀘𑁂𑀢𑀲𑀺𑀓𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀁 𑀓𑀫𑁆𑀫𑀁. 𑀓𑀺𑀁𑀓𑀸𑀭𑀡𑀸? 𑀘𑁂𑀢𑀲𑀺𑀓𑀸 𑀳𑀺 𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀸𑀢𑀺 𑀯𑀼𑀘𑁆𑀘𑀢𑁂, 𑀲𑀸 𑀘𑁂𑀢𑀦𑀸𑀓𑀫𑁆𑀫𑀁, 𑀬𑀁 𑀘𑁂𑀢𑀲𑀺𑀓𑀁 𑀇𑀫𑀁 𑀓𑀸𑀬𑀺𑀓𑀜𑁆𑀘 𑀯𑀸𑀘𑀲𑀺𑀓𑀜𑁆𑀘 𑀇𑀫𑀸𑀦𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀜𑁆𑀘 𑀢𑀸𑀦𑀺 𑀓𑀼𑀲𑀮𑀸𑀦𑀺 𑀧𑀺𑀬𑀁 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀆𑀭𑀪𑀢𑀺 𑀧𑀭𑀸𑀫𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀲𑀗𑁆𑀓𑀧𑁆𑀧𑀦𑀸 𑀢𑁂 𑀢𑀺𑀯𑀺𑀥𑀸 𑀲𑀗𑁆𑀔𑀸𑀭𑀸 𑀧𑀼𑀜𑁆𑀜𑀫𑀬𑀸 𑀅𑀧𑀼𑀜𑁆𑀜𑀫𑀬𑀸 𑀆𑀦𑁂𑀜𑁆𑀚𑀫𑀬𑀸, 𑀢𑀧𑁆𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀢𑁂 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸. 𑀬𑀸 𑀲𑀼𑀪𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸 𑀘. 𑀇𑀤𑀁 𑀘𑁂𑀢𑀲𑀺𑀓𑀁. 𑀬𑀁 𑀭𑀽𑀧𑀽𑀧𑀕𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑀢𑀺𑀝𑁆𑀞𑀺𑀢𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀢𑀁 𑀕𑀘𑁆𑀙𑀢𑀺, 𑀅𑀬𑀁 𑀲𑀗𑁆𑀓𑀧𑁆𑀧𑀦𑀸, 𑀇𑀢𑀺 𑀬𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀞𑀺𑀢𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑀸𑀤𑀸𑀦𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀘𑁂𑀢𑀲𑀺𑀓𑀦𑁆𑀢𑀺.

𑀢𑀢𑁆𑀣 𑀞𑀺𑀢𑀲𑁆𑀲 𑀅𑀭𑀽𑀧𑀲𑁆𑀲 𑀬𑀸 𑀦𑀺𑀓𑀦𑁆𑀢𑀺 𑀅𑀚𑁆𑀛𑁄𑀲𑀸𑀦𑀁, 𑀇𑀤𑀫𑁆𑀧𑀺 𑀲𑀓𑀫𑁆𑀧𑀺𑀢𑀁 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀆𑀪𑁄𑀕𑁄, 𑀇𑀤𑀁 𑀘𑁂𑀢𑀲𑀺𑀓𑀁. 𑀬𑀁 𑀘𑁂𑀢𑁂𑀢𑀺 𑀲𑀢𑁆𑀢𑁂𑀲𑀼 [𑀲𑀢𑁆𑀢𑀲𑀼 (𑀧𑀻.)] 𑀫𑀦𑀸𑀧𑀺𑀓𑁂𑀲𑀼 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀧𑀝𑀺𑀖𑀸𑀦𑀼𑀲𑀬𑁂𑀲𑀼 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸, 𑀅𑀬𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀘𑀺𑀢𑁆𑀢𑀲𑁆𑀲 𑀬𑀸 𑀘𑁂𑀢𑀦𑀸 𑀬𑀲𑁆𑀲 𑀢𑀢𑁆𑀣 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀲𑁆𑀲 𑀅𑀦𑁂𑀓𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀅𑀭𑀽𑀧𑀯𑀢𑀺𑀬𑁄 𑀳𑁄𑀦𑁆𑀢𑀺. 𑀧𑀼𑀕𑁆𑀕𑀮𑁄 𑀭𑀸𑀕𑀸𑀦𑀼𑀩𑀦𑁆𑀥𑀺𑀪𑀽𑀢𑁄 𑀢𑁂𑀳𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀬𑀣𑀸 𑀓𑀸𑀫𑀓𑀭𑀡𑀻𑀬𑁄, 𑀅𑀬𑀁 𑀯𑀼𑀘𑁆𑀘𑀢𑁂 𑀓𑀸𑀫𑁂𑀲𑀼 𑀧𑀓𑀧𑁆𑀧𑀦𑀸. 𑀏𑀯𑀁 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄 𑀑𑀖𑀸. 𑀬𑀁 𑀢𑁂𑀳𑀺 𑀓𑀸𑀫𑁂𑀳𑀺 𑀲𑀁𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 𑀪𑀸𑀯𑀺𑀢𑁄 𑀅𑀚𑁆𑀛𑁄𑀲𑀦𑁆𑀦𑁄, 𑀅𑀬𑀁 𑀘𑁂𑀢𑀦𑀸. 𑀬𑀲𑁆𑀲 𑀢𑀣𑀸𑀬𑀁 𑀅𑀯𑀻𑀢𑀭𑀸𑀕𑀲𑁆𑀲 𑀅𑀥𑀺𑀕𑀢𑀧𑁂𑀫𑀲𑁆𑀲 𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀤𑀼𑀓𑁆𑀔𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺 𑀲𑀭𑀺𑀢𑀲𑁆𑀲 𑀯𑀬𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀓𑀧𑁆𑀧𑀺𑀢𑀦𑁆𑀢𑀺.

𑀏𑀓𑀫𑁂𑀓𑀲𑁆𑀲 𑀘𑁂𑀢𑁂𑀢𑀺 𑀘 𑀧𑀓𑀧𑁆𑀧𑁂𑀢𑀺 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺 𑀬𑀸 𑀳𑁄𑀢𑀺, 𑀲𑀸 𑀘 𑀞𑀺𑀢𑀺 𑀤𑁆𑀯𑀺𑀥𑀸 𑀆𑀭𑀫𑁆𑀫𑀡𑀝𑁆𑀞𑀺𑀢𑀺 𑀘 𑀆𑀳𑀸𑀭𑀝𑁆𑀞𑀺𑀢𑀺 𑀘. 𑀢𑀢𑁆𑀣 𑀬𑀸 𑀆𑀭𑀫𑁆𑀫𑀡𑀝𑁆𑀞𑀺𑀢𑀺, 𑀅𑀬𑀁 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄. 𑀬𑀸 𑀆𑀳𑀸𑀭𑀝𑁆𑀞𑀺𑀢𑀺 𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀓𑀸 𑀞𑀺𑀢𑀺 𑀬𑀸 𑀘 𑀧𑁄𑀦𑁄𑀪𑀯𑀺𑀓𑀸 𑀞𑀺𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀭𑀫𑁆𑀫𑀡𑀁. 𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀢𑀲𑁆𑀲 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀬𑀸𑀯 𑀚𑀭𑀸𑀫𑀭𑀡𑀜𑁆𑀘 𑀘𑁂𑀢𑁂𑀢𑀺, 𑀅𑀣 𑀘 𑀧𑀼𑀦 𑀧𑀢𑁆𑀣𑀬𑀢𑁂 𑀬𑀢𑁄 𑀦 𑀧𑁄𑀦𑁄𑀪𑀯𑀺𑀓𑀸 𑀅𑀦𑀸𑀕𑀢𑀯𑀢𑁆𑀣𑀼𑀫𑁆𑀳𑀺, 𑀅𑀬𑀁 𑀧𑀝𑀺𑀧𑀓𑁆𑀔𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀦 𑀘𑁂𑀢𑁂𑀢𑀺 𑀦 𑀧𑀢𑁆𑀣𑀬𑀢𑀺 𑀅𑀣 𑀘 𑀤𑀽𑀲𑁂𑀢𑀻𑀢𑀺 𑀤𑀼𑀯𑀺𑀥𑁄 𑀦𑀺𑀤𑁆𑀤𑁂𑀲𑁄. 𑀅𑀲𑁆𑀲 𑀧𑀼𑀩𑁆𑀩𑁂 𑀳𑁄𑀢𑀺 𑀢𑀁 𑀘𑁂𑀢𑀲𑀺𑀓𑀁 𑀢𑀁 𑀧𑀓𑀧𑁆𑀧𑀺𑀢𑀁 𑀅𑀲𑀫𑀽𑀳𑀢𑀁 𑀢𑀧𑁆𑀧𑀘𑁆𑀘𑀬𑀸, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺 𑀳𑁄𑀢𑀺.

𑁧𑁦𑁮. 𑀅𑀣 𑀯𑀸 𑀢𑀲𑁆𑀲 𑀅𑀦𑀼𑀲𑀬𑀸 𑀆𑀯𑀺𑀪𑀯𑀦𑁆𑀢𑀺 𑀢𑀧𑁆𑀧𑀘𑁆𑀘𑀬𑀸 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀣 𑀯𑀸 𑀦𑀁 𑀲𑀁𑀓𑀺𑀬𑀢𑁂 𑀅𑀧𑁆𑀧𑁂𑀢𑀼 𑀆𑀕𑀸𑀭𑁂 𑀯𑀸, 𑀲𑀼𑀔𑀼𑀫𑀸 𑀯𑀸 𑀲𑀦𑁆𑀢𑀺 𑀯𑀸 𑀦 𑀲𑀁𑀓𑀺𑀬𑀢𑁂 𑀓𑀸𑀫𑁂 𑀢𑀁 𑀏𑀯𑀁 𑀦𑀺𑀘𑁆𑀘𑁂𑀲𑀼𑀧𑀺 𑀆𑀕𑀸𑀭𑁂𑀲𑀼 𑀚𑀸𑀢𑁄 𑀳𑁄𑀢𑀺. 𑀢𑀁 𑀦𑀬𑀢𑀺 𑀬𑀁 𑀦𑁄 𑀓𑀧𑁆𑀧𑁂𑀢𑀼𑀁 𑀏𑀯𑀁 𑀲𑀗𑁆𑀔𑀸𑀭𑀸 𑀘𑁂𑀢𑀺𑀢𑀸 𑀧𑀓𑀧𑁆𑀧𑀺𑀢𑀸 𑀘 𑀆𑀭𑀫𑁆𑀫𑀡𑀪𑀽𑀢𑀸 𑀳𑁄𑀦𑁆𑀢𑀺, 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀓𑀧𑁆𑀧𑀦𑀸 𑀬𑀜𑁆𑀘 𑀯𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀁, 𑀉𑀪𑁄𑀧𑀺 𑀏𑀢𑁂 𑀆𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀡𑀲𑁆𑀲 𑀢𑀣𑀸 𑀘𑁂𑀢𑀦𑀸𑀬 𑀘 𑀲𑀗𑁆𑀓𑀧𑁆𑀧𑀦𑀸𑀬 𑀘 𑀧𑀢𑁆𑀣𑀦𑀸𑀬 𑀘 𑀪𑀽𑀢𑀸 𑀲𑀢𑁆𑀢𑀸 𑀘𑁂𑀢𑁂𑀢𑀺 𑀘 𑀲𑀗𑁆𑀓𑀧𑁆𑀧𑁂𑀢𑀺 𑀘. 𑀬𑀁 𑀕𑀯𑁂𑀲𑀦𑀸 𑀦 𑀘 𑀘𑁂𑀢𑁂𑀢𑀺 𑀦 𑀘 𑀲𑀗𑁆𑀓𑀧𑁆𑀧𑁂𑀢𑀺. 𑀓𑀢𑀫𑁂 𑀘 𑀲𑀢𑁆𑀢𑀸 𑀪𑀽𑀢𑀸? 𑀬𑁂 𑀘 𑀢𑀦𑀼𑀚𑀸𑀢𑀅𑀡𑁆𑀟𑀚𑀸𑀧𑀺 𑀅𑀡𑁆𑀟𑀓𑀸 𑀅𑀦𑀼𑀪𑀺𑀦𑁆𑀦𑀸 𑀲𑀁𑀲𑁂𑀤𑀚𑀸 𑀦 𑀘 𑀲𑀫𑁆𑀪𑀺𑀦𑁆𑀦𑀸 𑀇𑀫𑁂 𑀪𑀽𑀢𑀸. 𑀓𑀢𑀫𑁂 𑀲𑀫𑁆𑀪𑀯𑁂𑀲𑀺𑀦𑁄 𑀕𑀩𑁆𑀪𑀕𑀢𑀸 𑀅𑀡𑁆𑀟𑀕𑀢𑀸 𑀲𑀁𑀲𑀭𑀦𑁆𑀢𑁄 𑀇𑀫𑁂 𑀦 𑀘𑁂𑀢𑁂𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀘 𑀲𑀗𑁆𑀓𑀧𑁆𑀧𑁂𑀢𑀺. 𑀅𑀦𑀼𑀲𑀬𑁂 𑀦 𑀘 𑀧𑀼𑀦𑀩𑁆𑀪𑀯𑁄 𑀦𑀺𑀩𑁆𑀩𑀢𑁆𑀢𑀻𑀢𑀺? 𑀬𑁂 𑀪𑀽𑀢𑀸 𑀲𑀢𑁆𑀢𑀸 𑀬𑁂 𑀲𑀫𑁆𑀪𑀯𑁂𑀲𑀺𑀦𑁄, 𑀢𑁂 𑀣𑀸𑀯𑀭𑀸. 𑀬𑁂 𑀯𑀸 𑀲𑀢𑁄 𑀘𑁂𑀢𑁂𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺 𑀘 𑀬𑁂 𑀣𑀸𑀯𑀭𑀸. 𑀢𑁂 𑀦 𑀘 𑀘𑁂𑀢𑁂𑀦𑁆𑀢𑀺, 𑀦 𑀘 𑀧𑀢𑁆𑀣𑁂𑀦𑁆𑀢𑀺, 𑀦 𑀘 𑀲𑀗𑁆𑀓𑀧𑁆𑀧𑁂𑀦𑁆𑀢𑀺, 𑀅𑀦𑀼𑀲𑀬𑁂𑀦 𑀘 𑀲𑀁𑀲𑀭𑀦𑁆𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀬𑁂 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑁂𑀓𑁆𑀔𑀸, 𑀢𑀢𑁆𑀣 𑀢𑁂 𑀦 𑀘 𑀘𑁂𑀢𑁂𑀦𑁆𑀢𑀺, 𑀦 𑀘 𑀲𑀗𑁆𑀓𑀧𑁆𑀧𑁂𑀦𑁆𑀢𑀺, 𑀅𑀦𑀼𑀲𑀬𑁂𑀦 𑀧𑀼𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀲𑀼𑀔𑀼𑀫𑀸 𑀧𑀸𑀡𑀸 𑀪𑀽𑀫𑀺𑀕𑀢𑀸 𑀉𑀤𑀓𑀕𑀢𑀸 𑀘𑀓𑁆𑀔𑀼𑀦𑁄 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀢𑁂 𑀦 𑀘 𑀘𑁂𑀢𑁂𑀦𑁆𑀢𑀺, 𑀦 𑀘 𑀲𑀗𑁆𑀓𑀧𑁆𑀧𑁂𑀦𑁆𑀢𑀺, 𑀅𑀦𑀼𑀲𑀬𑁂𑀦 𑀘 𑀲𑀁𑀲𑀭𑀦𑁆𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀩𑀸𑀳𑀺𑀓𑀸 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀪𑀺𑀫𑀸𑀦𑀺𑀓𑀸, 𑀢𑁂 𑀦 𑀘 𑀘𑁂𑀢𑁂𑀦𑁆𑀢𑀺, 𑀦 𑀘 𑀧𑀢𑁆𑀣𑀬𑀦𑁆𑀢𑀺, 𑀅𑀦𑀼𑀲𑀬𑁂𑀦 𑀘 𑀲𑀁𑀲𑀭𑀦𑁆𑀢𑀺, 𑀦 𑀘 𑀘𑁂𑀢𑁂𑀦𑁆𑀢𑀺, 𑀦 𑀘 𑀲𑀗𑁆𑀓𑀧𑁆𑀧𑁂𑀦𑁆𑀢𑀺, 𑀦 𑀘 𑀅𑀦𑀼𑀲𑁂𑀦𑁆𑀢𑀺. 𑀆𑀭𑀫𑁆𑀫𑀡𑀫𑁆𑀧𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸.

𑀦 𑀘 𑀘𑁂𑀢𑁂𑀢𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀲𑀫𑀼𑀕𑁆𑀖𑀸𑀢𑀁 𑀤𑀲𑁆𑀲𑁂𑀢𑀺. 𑀦 𑀘 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀁 𑀤𑀲𑁆𑀲𑁂𑀢𑀺. 𑀦 𑀘 𑀘𑁂𑀢𑁂𑀢𑀻𑀢𑀺 𑀑𑀴𑀸𑀭𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺. 𑀦 𑀘 𑀅𑀦𑀼𑀲𑁂𑀢𑀻𑀢𑀺 𑀲𑀼𑀔𑀼𑀫𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺. 𑀦 𑀘 𑀘𑁂𑀢𑁂𑀢𑀻𑀢𑀺 𑀬𑁂𑀦 𑀪𑀽𑀫𑀺 𑀘 𑀦 𑀘 𑀧𑀢𑁆𑀣𑀬𑀦𑁆𑀢𑀻𑀢𑀺 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻, 𑀦 𑀘 𑀅𑀦𑀼𑀲𑁂𑀢𑀻𑀢𑀺 𑀅𑀭𑀳𑀁, 𑀦 𑀘 𑀘𑁂𑀢𑁂𑀢𑀻𑀢𑀺 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀧𑀢𑁆𑀣𑀬𑀢𑀻𑀢𑀺 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀅𑀦𑀼𑀲𑀬𑀢𑀻𑀢𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁂𑀦 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀘𑁂𑀢𑁂𑀢𑀻𑀢𑀺 𑀅𑀧𑀼𑀜𑁆𑀜𑀫𑀬𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀧𑀢𑁆𑀣𑀬𑀢𑀻𑀢𑀺 𑀧𑀼𑀜𑁆𑀜𑀫𑀬𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀅𑀦𑀼𑀲𑁂𑀢𑀻𑀢𑀺 𑀆𑀦𑁂𑀜𑁆𑀚𑀫𑀬𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀳𑀸𑀦𑀁 𑀤𑀲𑁆𑀲𑁂𑀢𑀺, 𑀦 𑀘 𑀘𑁂𑀢𑁂𑀢𑀻𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀦 𑀘 𑀧𑀢𑁆𑀣𑀬𑀢𑀻𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀦 𑀘 𑀅𑀦𑀼𑀲𑀬𑀢𑀻𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀁. 𑀦 𑀘 𑀘𑁂𑀢𑁂𑀢𑀻𑀢𑀺 𑀫𑀼𑀤𑀼𑀓𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸, 𑀦 𑀘 𑀧𑀢𑁆𑀣𑀬𑀢𑀻𑀢𑀺 𑀫𑀚𑁆𑀛𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸, 𑀦 𑀘 𑀅𑀦𑀼𑀲𑁂𑀢𑀻𑀢𑀺 𑀅𑀥𑀺𑀫𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸. 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁧𑁦𑁯. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀥 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀬𑀜𑁆𑀘 𑀘𑁂𑀢𑀬𑀺𑀢𑀁 𑀬𑀜𑁆𑀘 𑀧𑀓𑀧𑁆𑀧𑀺𑀢𑀁 𑀅𑀢𑁆𑀣𑀺 𑀏𑀢𑀁 𑀆𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀢𑀺 𑀯𑀺𑀘𑀺𑀦𑀢𑀺 [𑀯𑀺𑀘𑀺𑀦𑀬𑀢𑀺 (𑀧𑀻. 𑀓.)] 𑀬𑀼𑀚𑁆𑀚𑀢𑀺. 𑀦 𑀘 𑀘𑁂𑀢𑁂𑀢𑀻𑀢𑀺 𑀦 𑀘 𑀧𑀢𑁆𑀣𑀬𑀢𑀻𑀢𑀺 𑀅𑀢𑁆𑀣𑀺 𑀏𑀯𑀁 𑀆𑀭𑀫𑁆𑀫𑀡𑀁 𑀅𑀦𑀼𑀲𑀬𑁂 𑀯𑀺𑀜𑁆𑀜𑀸𑀡𑀫𑀺𑀢𑀺 𑀯𑀺𑀘𑀺𑀦𑀺𑀬𑀢𑀺 𑀬𑀼𑀚𑁆𑀚𑀢𑀺 𑀦 𑀘 𑀘𑁂𑀢𑁂𑀢𑀺 𑀦 𑀘 𑀧𑀢𑁆𑀣𑀬𑀢𑀺. 𑀅𑀦𑀼𑀲𑀬𑀧𑁆𑀧𑀳𑀸𑀦𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀦 𑀕𑀯𑁂𑀲𑀦𑁆𑀢𑀺, 𑀯𑀺𑀘𑀺𑀬𑀦𑁆𑀢𑀁 𑀬𑀼𑀚𑁆𑀚𑀢𑀺. 𑀅𑀬𑀁 𑀬𑀼𑀢𑁆𑀢𑀺𑀯𑀺𑀘𑀬𑁄.

𑀢𑀢𑁆𑀣 𑀓𑀢𑀫𑁄 𑀧𑀤𑀝𑁆𑀞𑀸𑀦𑁄? 𑀘𑁂𑀢𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀘𑁂𑀢𑀦𑀸𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀓𑀧𑁆𑀧𑀦𑀁 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀢𑁂𑀲𑀁 𑀙𑀦𑁆𑀤𑀭𑀸𑀕𑀯𑀺𑀦𑀸𑀲𑀸𑀬 𑀪𑀸𑀯𑀦𑀸 𑀪𑀯𑀭𑀸𑀕𑀲𑁆𑀲 𑀧𑀳𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀬𑀁 𑀘𑁂𑀢𑀲𑀺𑀓𑀦𑁆𑀢𑀺 𑀯𑁂𑀤𑀬𑀺𑀢𑀁 𑀧𑀓𑀧𑁆𑀧𑀺𑀢𑀁 𑀉𑀕𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀢𑀁 𑀢𑀩𑁆𑀩𑀺𑀜𑁆𑀜𑀸𑀡𑀁 𑀆𑀭𑀫𑁆𑀫𑀡𑀫𑁆𑀧𑀺 𑀧𑀘𑁆𑀘𑀬𑁄𑀧𑀺.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄? 𑀇𑀥 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀧𑀼𑀦𑀩𑁆𑀪𑀯𑀁 𑀦 𑀇𑀘𑁆𑀙𑀦𑁆𑀢𑀺, 𑀢𑁂 𑀦 𑀘𑁂𑀢𑀬𑀺𑀲𑁆𑀲𑀦𑁆𑀢𑀺 𑀦 𑀘 𑀧𑀢𑁆𑀣𑀬𑀺𑀲𑁆𑀲𑀦𑁆𑀢𑀻𑀢𑀺, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑀆𑀯𑀝𑁆𑀝𑁄𑀢𑀺 𑀬𑀸 𑀘 𑀘𑁂𑀢𑀦𑀸 𑀧𑀢𑁆𑀣𑀦𑀸 𑀘 𑀅𑀦𑀼𑀲𑀬𑁄 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀧𑀳𑀸𑀦𑀸 𑀘, 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺. 𑀯𑀺𑀪𑀢𑁆𑀢𑀻𑀢𑀺 𑀦𑀢𑁆𑀣𑀺 𑀯𑀺𑀪𑀢𑁆𑀢𑀺𑀬𑀸 𑀪𑀽𑀫𑀺. 𑀧𑀭𑀺𑀯𑀢𑁆𑀢𑀦𑀸 𑀧𑀦 𑀧𑀝𑀺𑀧𑀓𑁆𑀔𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄? 𑀘𑁂𑀢𑀦𑀸 𑀭𑀽𑀧𑀲𑀜𑁆𑀘𑁂𑀢𑀦𑀸 𑀬𑀸𑀯𑀥𑀫𑁆𑀫𑀲𑀜𑁆𑀘𑁂𑀢𑀦𑀸. 𑀬𑁄 𑀅𑀦𑀼𑀲𑀬𑁄, 𑀢𑁂 𑀲𑀢𑁆𑀢 𑀅𑀦𑀼𑀲𑀬𑀸.

𑀧𑀜𑁆𑀜𑀢𑁆𑀢𑀻𑀢𑀺 𑀘𑁂𑀢𑀦𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀲𑀗𑁆𑀓𑀧𑁆𑀧𑀦𑀁 𑀉𑀧𑀸𑀤𑀸𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀅𑀦𑀼𑀲𑀬𑁄 𑀳𑁂𑀢𑀼𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄. 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀉𑀧𑀧𑀢𑁆𑀢𑀺𑀳𑁂𑀢𑀼𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀘𑁂𑀢𑀦𑀸 𑀲𑀗𑁆𑀓𑀧𑁆𑀧𑀦𑀸 𑀅𑀦𑀼𑀲𑀬𑁄 𑀲𑀫𑀼𑀘𑁆𑀙𑁂𑀤𑁄 𑀙𑀦𑁆𑀤𑀭𑀸𑀕𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄. 𑀧𑀞𑀫𑁂 𑀓𑁂𑀘𑀺 𑀤𑁆𑀯𑀻𑀳𑀺 𑀧𑀭𑀺𑀯𑀢𑁆𑀢𑀓𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀫𑀚𑁆𑀛𑀧𑀜𑁆𑀜𑀢𑁆𑀢𑀺.

𑀑𑀢𑀭𑀡𑁄𑀢𑀺 𑀤𑁆𑀯𑀻𑀳𑀺 𑀧𑀭𑀺𑀯𑀢𑁆𑀢𑀓𑁂𑀳𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀫𑀚𑁆𑀛𑀺𑀫𑀓𑁂𑀳𑀺 𑀫𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀘. 𑀲𑁄𑀥𑀦𑁄𑀢𑀺 𑀲𑀼𑀢𑁆𑀢𑁂 𑀲𑀼𑀢𑁆𑀢𑀲𑁆𑀲 𑀆𑀭𑀫𑁆𑀪𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀬𑀜𑁆𑀘𑁂𑀢𑀬𑀺𑀢𑀁 𑀲𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑁂𑀦 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀁. 𑀲𑀗𑁆𑀓𑀧𑁆𑀧𑀺𑀢𑀦𑁆𑀢𑀺 𑀉𑀧𑀸𑀤𑀸𑀦𑁂𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀁. 𑀯𑀺𑀜𑁆𑀜𑀸𑀡𑀁 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀁.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀼𑀪𑀜𑁆𑀘 𑀆𑀭𑀫𑁆𑀫𑀡𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀘𑁂𑀢𑀦𑀸 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸𑀦𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄. 𑀢𑀲𑁆𑀲 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼𑀧𑀘𑁆𑀘𑀬𑀢𑀸𑀬 𑀧𑀘𑁆𑀘𑀬𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀇𑀤𑀁 𑀲𑀼𑀢𑁆𑀢𑀁 𑀲𑀜𑁆𑀜𑀺𑀢𑀁 𑀢𑀢𑁆𑀣 𑀘𑁂𑀢𑁂𑀢𑀺 𑀯𑀺𑀲𑀚𑁆𑀚𑀦𑀸 𑀇𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁 𑀬𑀸𑀯 𑀚𑀭𑀸𑀫𑀭𑀡𑀁, 𑀅𑀬𑀁 𑀲𑀫𑀸𑀭𑁄𑀧𑀦𑁄. 𑀆𑀭𑀫𑁆𑀫𑀡𑀫𑁂𑀢𑀁 𑀦 𑀳𑁄𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀬𑀸𑀯 𑀚𑀭𑀸𑀫𑀭𑀡𑀦𑀺𑀭𑁄𑀥𑁄.

𑁧𑁧𑁦. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁? 𑀅𑀬𑀁 𑀮𑁄𑀓𑁄 [𑀧𑀲𑁆𑀲 𑀉𑀤𑀸. 𑁩𑁦 𑀉𑀤𑀸𑀦𑁂] 𑀲𑀦𑁆𑀢𑀸𑀧𑀚𑀸𑀢𑁄 𑀬𑀸𑀯 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀧𑁆𑀧𑀫𑁄𑀓𑁆𑀔𑀫𑀸𑀳𑀁𑀲𑀼. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀉𑀧𑀥𑀺𑀁 𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀲𑀫𑁆𑀪𑁄𑀢𑀺, 𑀬𑀸 𑀢𑀸 𑀧𑀦 𑀢𑀡𑁆𑀳𑀸 𑀧𑀳𑀻𑀬𑀦𑁆𑀢𑀺, 𑀪𑀯𑀁 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀦𑀺𑀩𑁆𑀩𑁂𑀥𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 [𑀦𑀺𑀘𑁆𑀘𑀼𑀢𑀲𑁆𑀲 (𑀧𑀻. 𑀓.)] 𑀪𑀺𑀓𑁆𑀔𑀼𑀦𑁄 𑀅𑀦𑀼𑀧𑀸𑀤𑀸𑀬 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺. 𑀉𑀧𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻𑀢𑀺 𑀅𑀲𑁂𑀓𑁆𑀔𑀪𑀸𑀕𑀺𑀬𑀁.

𑀢𑀢𑁆𑀣 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀭𑀸𑀕𑀚𑁄 𑀲𑀦𑁆𑀢𑀸𑀧𑁄 𑀤𑁄𑀲𑀚𑁄 𑀫𑁄𑀳𑀚𑁄𑀢𑀺. 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀨𑀲𑁆𑀲𑁄 𑀢𑀺𑀯𑀺𑀥𑁄 𑀲𑀼𑀔𑀯𑁂𑀤𑀦𑀻𑀬𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄. 𑀢𑀢𑁆𑀣 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀭𑀸𑀕𑀲𑀦𑁆𑀢𑀸𑀧𑁄, 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀤𑁄𑀲𑀲𑀦𑁆𑀢𑀸𑀧𑁄, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀫𑁄𑀳𑀲𑀦𑁆𑀢𑀸𑀧𑁄. 𑀬𑀣𑀸 𑀘 𑀪𑀕𑀯𑀸 𑀆𑀳 𑀧𑀞𑀫𑀓𑀲𑁆𑀲 𑀯𑀮𑀸𑀳𑀓𑀲𑁆𑀲 𑀕𑁄𑀫𑀕𑁆𑀕𑁂 [𑀓𑁄𑀫𑀕𑁆𑀕𑁂 (𑀧𑀻. 𑀓.) 𑀧𑀲𑁆𑀲 𑀅. 𑀦𑀺. 𑁩.𑁩𑁫] 𑀬𑁂𑀳𑀺 𑀕𑀳𑀧𑀢𑀺𑀧𑀼𑀢𑁆𑀢 𑀭𑀸𑀕𑀚𑁂𑀳𑀺 𑀤𑁄𑀲𑀚𑁂𑀳𑀺 𑀫𑁄𑀳𑀚𑁂𑀳𑀺 𑀲𑀦𑁆𑀢𑀸𑀧𑁂𑀳𑀺 𑀤𑀼𑀓𑁆𑀔𑀁 𑀲𑀼𑀧𑀢𑀺, 𑀢𑁂 𑀫𑀫 𑀲𑀦𑁆𑀢𑀸𑀧𑀸 𑀦 𑀲𑀦𑁆𑀢𑀺.

𑀭𑁄𑀕𑀁 𑀯𑀤𑀢𑀺 𑀅𑀢𑁆𑀢𑀢𑁄𑀢𑀺 𑀢𑁂𑀳𑀺 𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀸𑀧𑀺𑀢𑁄 𑀢𑀺𑀯𑀺𑀥𑀁 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀁. 𑀢𑀢𑁆𑀣 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄. 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄.

𑀬𑀣𑀸 𑀘𑀺𑀢𑁆𑀢𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀤𑀺𑀝𑁆𑀞𑀺𑀢𑁂 𑀢𑀺𑀯𑀺𑀥𑀸 𑀯𑀺𑀢𑀓𑁆𑀓𑀸 𑁋 𑀘𑀺𑀢𑁆𑀢𑀯𑀺𑀢𑀓𑁆𑀓𑁄 𑀯𑀺𑀧𑀮𑁆𑀮𑀸𑀲𑁄 𑀲𑀜𑁆𑀜𑀸𑀯𑀺𑀢𑀓𑁆𑀓𑁄 𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑁄 𑀯𑀺𑀧𑀮𑁆𑀮𑀸𑀲𑁄𑀧𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀯𑀺𑀧𑀮𑁆𑀮𑀸𑀲𑁄 𑀕𑁄𑀘𑀭𑀸 𑀕𑀢𑀺𑀧𑀢𑁂𑀬𑁆𑀬𑀪𑀽𑀫𑀺, 𑀬𑀣𑀸 𑀳𑀺 𑀢𑀁 𑀲𑀜𑁆𑀚𑀸𑀦𑀸𑀢𑀺 𑀬𑀣𑀸 𑀯𑀺𑀚𑀸𑀦𑀸𑀢𑀺 𑀬𑀣𑀸 𑀲𑀜𑁆𑀚𑀸𑀦𑀸𑀢𑀺 𑀘 𑀯𑀺𑀚𑀸𑀦𑀸𑀢𑀺 𑀘. 𑀬𑀣𑀸 𑀔𑀦𑁆𑀢𑀺 𑀘𑁂𑀢𑁂𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀲𑀢𑁆𑀢𑀸 𑀬𑁂𑀳𑀺 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀢𑀪𑀸𑀯𑀯𑀢𑁆𑀣𑀼𑀁 𑀭𑁄𑀕𑀪𑀽𑀢𑀁 𑀕𑀡𑁆𑀟𑀪𑀽𑀢𑀁 ‘‘𑀅𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀭𑁄𑀕𑀁 𑀯𑀤𑀢𑀺 𑀅𑀢𑁆𑀢𑀢𑁄𑀢𑀺 𑀅𑀬𑀁 𑀆𑀯𑀝𑁆𑀝𑁄. 𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀢𑀺 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸𑀢𑀺 𑀲𑀼𑀪𑀦𑁆𑀢𑀺 𑀫𑀜𑁆𑀜𑀢𑀺 𑀦 𑀢𑀣𑀸 𑀳𑁄𑀢𑀺. 𑀏𑀯𑀁 𑀲𑀼𑀔𑀦𑁆𑀢𑀺 𑀦𑀺𑀘𑁆𑀘𑀁 𑀅𑀢𑁆𑀢𑀸𑀢𑀺 𑀲𑁄 𑀅𑀜𑁆𑀜𑀣𑀸 𑀪𑀯𑀫𑁂𑀯 𑀲𑀦𑁆𑀢𑀁 𑀅𑀦𑀸𑀕𑀢𑀁 𑀪𑀯𑀁 𑀧𑀢𑁆𑀣𑀬𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀪𑀯𑀭𑀸𑀕𑁄’’𑀢𑀺. 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀺, 𑀬𑀁 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀤𑁆𑀤𑀺𑀲𑀺𑀬𑀢𑀺. 𑀬𑀜𑁆𑀘 𑀢𑀧𑁆𑀧𑀘𑁆𑀘𑀬𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀁 𑀢𑀲𑁆𑀲 𑀳𑀺 𑀪𑀸𑀯𑁂𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀁𑀓𑀺𑀮𑁂𑀲𑁄 𑀳𑁄𑀢𑀺. 𑀧𑀳𑀸𑀦𑀢𑁆𑀣𑀁 𑀔𑁄 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀢𑀺𑀡𑁆𑀡𑀁 𑀲𑀦𑁆𑀢𑀸𑀧𑀸𑀦𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀳𑁄𑀢𑀺.

𑀉𑀧𑀥𑀺𑀁 𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀪𑀯𑀢𑀻𑀢𑀺 𑀬𑁂 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀦𑁆𑀢𑀺 𑀬𑀲𑁆𑀲 𑀪𑀸𑀯𑁂𑀲𑁆𑀲𑀢𑀺, 𑀢𑀁 𑀤𑀼𑀓𑁆𑀔𑀁 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀫𑀸𑀳. 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑀜𑁆𑀘 𑀬𑀁 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀬𑀣𑀸 𑀦𑀺𑀤𑁆𑀤𑀺𑀝𑁆𑀞𑀉𑀧𑀸𑀤𑀸𑀦𑀫𑀸𑀳. 𑀢𑀲𑁆𑀲 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄 𑀓𑀸𑀫𑀼𑀧𑀸𑀤𑀸𑀦𑀁, 𑀤𑀼𑀢𑀺𑀬𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀢𑀢𑀺𑀬𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀘𑀢𑀼𑀢𑁆𑀣𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀢𑁂𑀲𑀁 𑀬𑁄 𑀔𑀬𑁄 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄 𑀉𑀧𑀥𑀺 𑀦𑀺𑀤𑀸𑀦𑀁 𑀤𑀼𑀓𑁆𑀔𑀦𑀺𑀭𑁄𑀥𑀫𑀸𑀳. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀯𑀺𑀪𑀯𑀢𑀡𑁆𑀳𑀸 𑀦 𑀳𑁄𑀢𑀺. 𑀯𑀺𑀪𑀯𑀁 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀤𑀲𑁆𑀲𑀦𑀪𑀽𑀫𑀺𑀁 𑀫𑀦𑁆𑀢𑁂𑀢𑀺 𑀲𑀩𑁆𑀩𑀲𑁄 𑀢𑀡𑁆𑀳𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀓𑀣𑁂𑀢𑀺 𑀭𑀸𑀕𑀯𑀺𑀭𑀸𑀕𑀜𑁆𑀘 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀜𑁆𑀘. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀫𑀦𑁆𑀢𑁂𑀢𑀺. 𑀅𑀬𑀁 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑁄.

𑁧𑁧𑁧. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄? 𑀬𑀲𑁆𑀲 𑀬𑀢𑁆𑀣 𑀧𑀭𑀺𑀴𑀸𑀳𑁂𑀢𑀺 𑀢𑀲𑁆𑀲 𑀧𑀭𑀺𑀟𑀬𑁆𑀳𑀦𑁆𑀢𑀲𑁆𑀲 𑀲𑁄 𑀬𑀣𑀸𑀪𑀽𑀢𑀁 𑀦𑀢𑁆𑀣𑀺 𑀦𑀺𑀩𑁆𑀩𑀺𑀦𑁆𑀤𑀢𑀺 𑀘, 𑀅𑀬𑀁 𑀯𑀺𑀘𑀬𑁄 𑀘 𑀬𑀼𑀢𑁆𑀢𑀺 𑀘. 𑀧𑀤𑀝𑁆𑀞𑀸𑀦𑁄 𑀭𑀸𑀕𑀚𑁄 𑀧𑀭𑀺𑀴𑀸𑀳𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁. 𑀤𑁄𑀲𑀚𑁄 𑀧𑀭𑀺𑀴𑀸𑀳𑁄 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁. 𑀫𑁄𑀳𑀚𑁄 𑀧𑀭𑀺𑀴𑀸𑀳𑁄 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? 𑀨𑀲𑁆𑀲𑀧𑀭𑁂𑀢𑁄 𑀯𑁂𑀤𑀦𑀸𑀧𑀭𑁂𑀢𑁄 𑀲𑀜𑁆𑀜𑀸𑀧𑀭𑁂𑀢𑁄𑀧𑀺 𑀲𑀗𑁆𑀔𑀸𑀭𑀧𑀭𑁂𑀢𑁄𑀧𑀺 𑀬𑁂𑀦 𑀬𑁂𑀦 𑀫𑀜𑁆𑀜𑀢𑀺 𑀬𑀤𑀺 𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀬𑀤𑀺 𑀲𑀼𑀔𑀦𑀺𑀫𑀺𑀢𑁆𑀢𑁂𑀦 𑀬𑀤𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑁂𑀦 𑀬𑀤𑀺 𑀅𑀢𑁆𑀢𑀦𑀺𑀫𑀺𑀢𑁆𑀢𑁂𑀦 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀫𑀜𑁆𑀜𑀢𑀺, 𑀏𑀯𑀁 𑀲𑀩𑁆𑀩𑀁 𑀭𑀸𑀕𑀚𑁂 𑀧𑀭𑀺𑀴𑀸𑀳𑁂 𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀧𑀭𑀺𑀴𑀸𑀳𑀸 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀭𑀸𑀕𑀚𑁄 𑀤𑁄𑀲𑀚𑁄 𑀫𑁄𑀳𑀚𑁄 𑀤𑀺𑀝𑁆𑀞𑀺𑀚𑁄 𑀘 𑀭𑀸𑀕𑀁 𑀯𑀤𑀸𑀫𑀻𑀢𑀺 𑀅𑀢𑁆𑀢𑀢𑁄 𑀯𑀤𑀢𑀺. 𑀲𑀩𑁆𑀩𑀸𑀦𑀺 𑀧𑀦𑁆𑀦𑀭𑀲 𑀧𑀤𑀸𑀦𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀦𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄? 𑀇𑀥 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀧𑀭𑀺𑀴𑀸𑀳𑁂𑀦 𑀦 𑀅𑀘𑁆𑀙𑀦𑁆𑀢𑀺 𑀢𑁂 𑀪𑀯𑀁 𑀦𑀸𑀪𑀺𑀦𑀦𑁆𑀤𑀦𑁆𑀢𑀺. 𑀬𑁂 𑀪𑀯𑀁 𑀦𑀸𑀪𑀺𑀦𑀦𑁆𑀤𑀦𑁆𑀢𑀺, 𑀢𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄? 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂𑀦 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑀜𑁆𑀘 𑀦𑀺𑀤𑁆𑀤𑀺𑀲𑀢𑀺. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂𑀦 𑀫𑀕𑁆𑀕𑀜𑁆𑀘 𑀦𑀺𑀭𑁄𑀥𑀜𑁆𑀘.

𑀢𑀢𑁆𑀣 𑀓𑀢𑀫𑀸 𑀯𑀺𑀪𑀢𑁆𑀢𑀺? 𑀲𑀦𑁆𑀢𑀸𑀧𑀚𑀸𑀢𑁄 𑀭𑁄𑀕𑀚𑀸𑀢𑁄 𑀭𑁄𑀕𑀁 𑀯𑀤𑀢𑀺 𑀅𑀢𑁆𑀢𑀢𑁄 𑀢𑀁 𑀦 𑀏𑀓𑀁𑀲𑁂𑀦 𑀳𑁄𑀢𑀺 𑀅𑀫𑀦𑀲𑀺𑀓𑀸𑀭𑀸 𑀲𑀦𑁆𑀢𑀸𑀧𑀚𑀸𑀢𑁄 𑀔𑁄 𑀦 𑀘 𑀭𑁄𑀕𑀁 𑀅𑀢𑁆𑀢𑀢𑁄 𑀯𑀤𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄? 𑀧𑀓𑁆𑀔𑀧𑀝𑀺𑀧𑀓𑁆𑀔𑀦𑀺𑀤𑀲𑁆𑀲𑀦𑀢𑁆𑀣𑀁 𑀪𑀽𑀫𑀺 𑀧𑀭𑀺𑀯𑀢𑁆𑀢𑀦𑀸𑀬.

𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄? 𑀭𑁄𑀕𑀜𑁆𑀘 𑀅𑀢𑁆𑀢𑀢𑁄 𑀯𑀤𑀢𑀺 𑀲𑀮𑁆𑀮𑀁 𑀅𑀢𑁆𑀢𑀢𑁄 𑀯𑀤𑀢𑀺. 𑀧𑀦𑁆𑀦𑀭𑀲 𑀧𑀤𑀸𑀦𑀺 𑀲𑀩𑁆𑀩𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀓𑀢𑀫𑀸 𑀧𑀜𑁆𑀜𑀢𑁆𑀢𑀺? 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀤𑁄𑀫𑀦𑀲𑁆𑀲𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑁂 𑀯𑀘𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀧𑁂𑀢𑀺. 𑀭𑁄𑀕𑀁 𑀯𑀤𑀢𑀺 𑀅𑀢𑁆𑀢𑀢𑁄 𑀯𑀺𑀧𑀮𑁆𑀮𑀸𑀲𑁄 𑀲𑀁𑀓𑀺𑀮𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀧𑁂𑀢𑀺. 𑀬𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀢𑁂 𑀅𑀓𑀢𑀲𑀢𑁆𑀢𑀸 𑀮𑁄𑀓𑀸 𑀫𑀚𑁆𑀛𑁂𑀦 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸.

𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄? 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑁂 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸, 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼, 𑀆𑀬𑀢𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀁. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄? 𑀲𑀼𑀤𑁆𑀥𑁄 𑀲𑀼𑀢𑁆𑀢𑀲𑁆𑀲 𑀆𑀭𑀫𑁆𑀪𑁄.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄? 𑀧𑀭𑀺𑀴𑀸𑀳𑁄𑀢𑀺 𑀬𑁂 𑀲𑀢𑁆𑀢𑀸 𑀮𑁄𑀓𑀸 𑀏𑀓𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸, 𑀢𑁂 𑀅𑀓𑀢𑀲𑀢𑁆𑀢𑀸 𑀮𑁄𑀓𑀸 𑀫𑀚𑁆𑀛𑁂𑀦 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀓𑁆𑀔𑀸𑀭𑁄? 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼, 𑀯𑀺𑀧𑀮𑁆𑀮𑀸𑀲𑀜𑁆𑀘 𑀧𑀘𑁆𑀘𑀬𑁄. 𑀢𑀢𑁆𑀣 𑀤𑁆𑀯𑀻𑀳𑀺 𑀥𑀫𑁆𑀫𑁂𑀳𑀺 𑀅𑀢𑁆𑀢𑀸 𑀅𑀪𑀺𑀦𑀺𑀯𑀺𑀝𑁆𑀞𑀸 𑀘𑀺𑀢𑁆𑀢𑀜𑁆𑀘 𑀘𑁂𑀢𑀲𑀺𑀓𑀜𑁆𑀘 𑀥𑀫𑁆𑀫𑁂 𑀉𑀪𑀬𑀸𑀦𑀺 𑀢𑀲𑁆𑀲 𑀯𑀺𑀧𑀭𑀻𑀢𑁂𑀦 𑀧𑀭𑀸𑀫𑀲𑀢𑁄. 𑀅𑀧𑀭𑁄 𑀧𑀭𑀺𑀬𑀸𑀬𑁄, 𑀘𑁂𑀢𑀲𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀢𑁆𑀢𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘𑁂𑀢𑀲𑀺𑀓𑁂𑀲𑀼 𑀥𑀫𑁆𑀫𑁂𑀲𑀼, 𑀦 𑀢𑀼 𑀅𑀢𑁆𑀢𑀲𑀜𑁆𑀜𑀸. 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀦𑁆𑀢𑀺 𑀯𑀸 𑀫𑀦𑁄𑀢𑀺 𑀯𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀇𑀤𑀁 𑀤𑀻𑀖𑀭𑀢𑁆𑀢𑀁 𑀅𑀩𑁆𑀪𑀼𑀕𑁆𑀕𑀢𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺. 𑀢𑀢𑁆𑀣 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀏𑀲𑀸𑀧𑀺 𑀥𑀫𑁆𑀫𑀲𑀜𑁆𑀜𑀸. 𑀢𑀲𑁆𑀲 𑀓𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄? 𑀅𑀳𑀁𑀓𑀸𑀭𑁄 𑀳𑁂𑀢𑀼, 𑀫𑀫𑀁𑀓𑀸𑀭𑁄 𑀧𑀘𑁆𑀘𑀬𑁄.

𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄? 𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄𑀢𑀺 𑀅𑀓𑀼𑀲𑀮𑀁 𑀫𑀦𑁆𑀢𑁂𑀢𑀺 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀬𑀸𑀯 𑀚𑀭𑀸𑀫𑀭𑀡𑀦𑁆𑀢𑀺, 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑁧𑁧𑁨. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀬𑀸𑀯 𑀚𑀭𑀸𑀫𑀭𑀡𑀦𑀺𑀭𑁄𑀥𑁄, 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 [𑀧𑀲𑁆𑀲 𑀅. 𑀦𑀺. 𑁪.𑁫] 𑁋 𑀅𑀦𑀼𑀲𑁄𑀢𑀕𑀸𑀫𑀻 𑀧𑀝𑀺𑀲𑁄𑀢𑀕𑀸𑀫𑀻 𑀞𑀺𑀢𑀢𑁆𑀢𑁄, 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺.

𑀢𑀢𑁆𑀣 𑀬𑁄 𑀅𑀦𑀼𑀲𑁄𑀢𑀕𑀸𑀫𑀻 𑀅𑀬𑀁 𑀓𑀸𑀫𑁂 𑀲𑁂𑀯𑀢𑀺. 𑀧𑀸𑀧𑀜𑁆𑀘 𑀓𑀫𑁆𑀫𑀁 𑀓𑀭𑁄𑀢𑀺 𑀬𑀸𑀯 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺. 𑀇𑀤𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀲𑁄 𑀬𑁂𑀯 𑀢𑀡𑁆𑀳𑀸, 𑀲𑁄 𑀢𑁂𑀳𑀺 𑀓𑀸𑀫𑁂𑀳𑀺 𑀯𑀼𑀬𑁆𑀳𑀢𑀺 𑀅𑀦𑀼𑀲𑁄𑀢𑀕𑀸𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀼𑀕𑁆𑀕𑀮𑁄 𑀢𑀸𑀳𑀺 𑀕𑀫𑀺𑀢𑁄 𑀢𑀧𑁆𑀧𑀘𑁆𑀘𑀬𑀸 𑀢𑀲𑁆𑀲 𑀳𑁂𑀢𑀼 𑀅𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀻𑀢𑀺. 𑀢𑀲𑁆𑀲 𑀢𑀻𑀡𑀺 𑀲𑁄𑀢𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀇𑀫𑁂𑀳𑀺 𑀢𑀻𑀳𑀺 𑀲𑁄𑀢𑁂𑀳𑀺 𑀢𑀺𑀯𑀺𑀥𑀥𑀸𑀢𑀼𑀬𑀁 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀥𑀸𑀢𑀼𑀬𑀁 𑀭𑀽𑀧𑀥𑀸𑀢𑀼𑀬𑀁 𑀅𑀭𑀽𑀧𑀥𑀸𑀢𑀼𑀬𑀁. 𑀢𑁂𑀦 𑀧𑀝𑀺𑀧𑀓𑁆𑀔𑁂𑀦 𑀬𑁄 𑀓𑀸𑀫𑁂 𑀦 𑀧𑀝𑀺𑀲𑁂𑀯𑀢𑀺. 𑀬𑁄 𑀲𑀻𑀮𑀯𑀢𑀁 𑀦 𑀧𑀭𑀸𑀫𑀲𑀢𑀺. 𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀸𑀬 𑀓𑀸𑀫𑁂𑀲𑀼 𑀬𑀣𑀸𑀪𑀽𑀢𑀁 𑀆𑀤𑀻𑀦𑀯𑀁 𑀧𑀲𑁆𑀲𑀢𑀺. 𑀬𑁂𑀦 𑀘 𑀢𑁂 𑀥𑀫𑁆𑀫𑁂 𑀧𑀝𑀺𑀲𑁂𑀯𑀢𑀺. 𑀬𑀜𑁆𑀘 𑀢𑀧𑁆𑀧𑀘𑁆𑀘𑀬𑀸 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀭𑀳𑀁 𑀓𑀺𑀭. 𑀢𑀢𑁆𑀣 𑀅𑀭𑀳𑀁 𑀢𑀲𑁆𑀲 𑀧𑀸𑀭𑀗𑁆𑀕𑀢𑁄 𑀳𑁄𑀢𑀺, 𑀧𑀸𑀭𑀗𑁆𑀕𑀢𑀲𑁆𑀲 𑀣𑀮𑁂 𑀢𑀺𑀝𑁆𑀞𑀢𑀺 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀅𑀦𑀼𑀲𑁄𑀢𑀕𑀸𑀫𑀺𑀦𑀻𑀢𑀺 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀧𑁆𑀧𑀳𑀸𑀦𑀫𑀸𑀳. 𑀧𑀝𑀺𑀲𑁄𑀢𑀕𑀸𑀫𑀺𑀦𑀻𑀢𑀺 𑀨𑀮𑁂 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀫𑀸𑀳, 𑀞𑀺𑀢𑀢𑁆𑀢𑁂𑀦 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀫𑀸𑀳. 𑀢𑀢𑁆𑀣 𑀅𑀦𑀼𑀲𑁄𑀢𑀕𑀸𑀫𑀺𑀦𑀸 𑀫𑀕𑁆𑀕𑀭𑀽𑀧𑀺𑀫𑀸𑀳. 𑀧𑀝𑀺𑀲𑁄𑀢𑀕𑀸𑀫𑀺𑀦𑀸 𑀞𑀺𑀢𑀢𑁆𑀢𑁂𑀦 𑀘 𑀫𑀕𑁆𑀕𑀫𑀺𑀢𑀺𑀫𑀸𑀳. 𑀧𑀸𑀭𑀗𑁆𑀕𑀢𑁂𑀦 𑀲𑀸𑀯𑀓𑀸 𑀅𑀲𑁂𑀓𑁆𑀔𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀘 𑀯𑀼𑀢𑁆𑀢𑀸. 𑀅𑀦𑀼𑀲𑁄𑀢𑀕𑀸𑀫𑀺𑀦𑀸 𑀲𑀓𑁆𑀓𑀸𑀬𑀲𑀫𑀼𑀤𑀬𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀫𑀸𑀳. 𑀧𑀝𑀺𑀲𑁄𑀢𑀕𑀸𑀫𑀺𑀦𑀸 𑀞𑀺𑀢𑀢𑁆𑀢𑁂𑀦 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀫𑀸𑀳. 𑀧𑀸𑀭𑀗𑁆𑀕𑀢𑁂𑀦 𑀤𑀲 𑀅𑀲𑁂𑀓𑁆𑀔𑀸 𑀅𑀭𑀳𑀦𑁆𑀢𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁧𑁧𑁩. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀫𑀲𑁆𑀫𑀺𑀁 𑀳𑀺 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀢𑁂𑀥𑀸𑀢𑀼𑀓𑀮𑁄𑀓𑀲𑀫𑀢𑀺𑀓𑁆𑀓𑀫𑀦𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺 𑀧𑀸𑀧𑀁 [𑀧𑀸𑀧𑀓𑀁 (𑀧𑀻.)] 𑀓𑀭𑁂𑀬𑁆𑀬𑀸𑀢𑀺 𑀬𑁄 𑀘 𑀓𑀸𑀫𑁂 𑀦 𑀧𑀝𑀺𑀲𑁂𑀯𑀢𑀺 𑀲𑁄 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀬𑁄 𑀘 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀪𑀽𑀫𑀻𑀳𑀺 𑀉𑀢𑁆𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄𑀢𑀺 𑀬𑀸 𑀯𑀻𑀫𑀁𑀲𑀸 𑀅𑀬𑀁 𑀯𑀺𑀘𑀬𑁄.

𑀬𑀼𑀢𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀲𑀼𑀢𑁆𑀢𑁂𑀲𑀼, 𑀦𑀸𑀬𑀼𑀚𑁆𑀚𑀢𑀻𑀢𑀺 𑀬𑀸 𑀯𑀻𑀫𑀁𑀲𑀸𑀬, 𑀅𑀬𑀁 𑀬𑀼𑀢𑁆𑀢𑀺. 𑀧𑀤𑀝𑁆𑀞𑀸𑀦𑁄𑀢𑀺 𑀅𑀦𑀼𑀲𑁄𑀢𑀕𑀸𑀫𑀺𑀦𑀸 𑀲𑀢𑁆𑀢𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀅𑀓𑀼𑀲𑀮𑀲𑁆𑀲 𑀓𑀺𑀭𑀺𑀬𑀸 𑀅𑀓𑀼𑀲𑀮𑀲𑁆𑀲 𑀫𑀽𑀮𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀧𑀝𑀺𑀲𑁄𑀢𑀕𑀸𑀫𑀺𑀦𑀸 𑀬𑀣𑀸𑀪𑀽𑀢𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀞𑀺𑀢𑀢𑁆𑀢𑁂𑀦 𑀅𑀲𑀁𑀳𑀸𑀭𑀺𑀬𑀸𑀬 [𑀅𑀲𑀳𑀸𑀭𑀺𑀬𑀸𑀬 (𑀧𑀻.)] 𑀧𑀤𑀝𑁆𑀞𑀸𑀦𑀁. 𑀧𑀸𑀭𑀗𑁆𑀕𑀢𑁄𑀢𑀺 𑀓𑀤𑀸𑀘𑀺 𑀪𑀽𑀫𑀺𑀬𑀸 𑀧𑀤𑀝𑁆𑀞𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄 𑀳𑀸𑀭𑁄? 𑀬𑁄 𑀅𑀦𑀼𑀲𑁄𑀢𑀁 𑀕𑀘𑁆𑀙𑀢𑀺 𑀢𑀡𑁆𑀳𑀸𑀯𑀲𑁂𑀦. 𑀲𑀩𑁆𑀩𑁂𑀲𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀕𑀘𑁆𑀙𑀢𑀺. 𑀬𑁄 𑀧𑀝𑀺𑀲𑁄𑀢𑀁 𑀯𑀸𑀬𑀫𑀢𑀺. 𑀢𑀡𑁆𑀳𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀲𑁄 𑀓𑀺𑀮𑁂𑀲𑀸𑀦𑀁 𑀯𑀸𑀬𑀫𑀢𑀺 𑀧𑀝𑀺𑀲𑁄𑀢𑀁. 𑀬𑁄 𑀅𑀢𑁆𑀢𑀦𑀸 𑀞𑀺𑀢𑁄 𑀓𑀸𑀬𑁂𑀦𑀧𑀺 𑀲𑁄 𑀞𑀺𑀢𑁄 𑀯𑀸𑀘𑀸𑀘𑀺𑀢𑁆𑀢𑁂𑀦𑀧𑀺 𑀲𑁄 𑀞𑀺𑀢𑁄. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄? 𑀇𑀥 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀦𑀼𑀲𑁄𑀢𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀦𑀸𑀪𑀺𑀭𑀫𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀝𑀺𑀲𑁄𑀢𑀁 𑀯𑀸𑀬𑀫𑀺𑀲𑁆𑀲𑀦𑁆𑀢𑀻𑀢𑀺 𑀬𑀸𑀯 𑀓𑀤𑀸𑀘𑀺 𑀪𑀽𑀫𑀺𑀬𑀁, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀆𑀯𑀝𑁆𑀝𑁄𑀢𑀺 𑀇𑀥 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺 𑀤𑁂𑀲𑀺𑀢𑀸𑀦𑀺.

𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄? 𑀬𑁄 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺 𑀧𑀸𑀧𑀜𑁆𑀘 𑀓𑀫𑁆𑀫𑀁 𑀓𑀭𑁄𑀢𑀺. 𑀲𑁄 𑀅𑀦𑀼𑀲𑁄𑀢𑀕𑀸𑀫𑀻𑀢𑀺 𑀦 𑀏𑀓𑀁𑀲𑁂𑀦 𑀲𑁄𑀢𑀸𑀧𑀦𑁆𑀦𑁄𑀧𑀺 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺. 𑀢𑀁 𑀪𑀸𑀕𑀺𑀬𑀜𑁆𑀘 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄𑀧𑀺 𑀓𑀭𑁂𑀬𑁆𑀬 𑀧𑀸𑀧𑀁 𑀬𑀣𑀸 𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑁄 𑀦 𑀘 𑀲𑁄 𑀅𑀦𑀼𑀲𑁄𑀢𑀕𑀸𑀫𑀻, 𑀇𑀤𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁. 𑀦 𑀘 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺 𑀦 𑀘 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀧𑀝𑀺𑀲𑁄𑀢𑀕𑀸𑀫𑀻 𑀦 𑀘 𑀏𑀓𑀁𑀲𑁂𑀦 𑀲𑀩𑁆𑀩𑁂 𑀩𑀸𑀳𑀺𑀭𑀓𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀦 𑀘 𑀓𑀸𑀫𑁂 𑀧𑀝𑀺𑀲𑁂𑀯𑀢𑀺, 𑀢𑁂𑀦 𑀘 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀅𑀦𑀼𑀲𑁄𑀢𑀕𑀸𑀫𑀻 𑀧𑀝𑀺𑀲𑁄𑀢𑀕𑀸𑀫𑀻, 𑀅𑀬𑀁 𑀯𑀺𑀪𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀧𑀭𑀺𑀯𑀢𑁆𑀢𑀦𑁄 𑀳𑀸𑀭𑁄? 𑀦𑀺𑀤𑁆𑀤𑀺𑀝𑁆𑀞𑁄 𑀧𑀝𑀺𑀧𑀓𑁆𑀔𑁄. 𑀯𑁂𑀯𑀘𑀦𑁄𑀢𑀺 𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀸𑀧𑀺 𑀓𑀺𑀮𑁂𑀲𑀓𑀸𑀫𑀸𑀧𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑀲𑁆𑀲𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀜𑁆𑀘 𑀧𑀭𑀺𑀕𑁆𑀕𑀳𑀸.

𑀧𑀜𑁆𑀜𑀢𑁆𑀢𑀻𑀢𑀺 𑀲𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀸 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀸. 𑀅𑀦𑀼𑀲𑁄𑀢𑀕𑀸𑀫𑀻𑀢𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸. 𑀬𑁂 𑀧𑀦 𑀲𑁂𑀓𑁆𑀔𑀸 𑀧𑀼𑀕𑁆𑀕𑀮𑀸, 𑀢𑁂 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀬𑀸 [𑀦𑀺𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀺𑀬𑀸 (𑀓.)] 𑀧𑀜𑁆𑀜𑀢𑁆𑀢𑀸. 𑀬𑁂 𑀧𑀦 𑀅𑀦𑀸𑀕𑀸𑀫𑀻, 𑀢𑁂 𑀅𑀲𑀁𑀳𑀸𑀭𑀺𑀬 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸, 𑀅𑀬𑀁 𑀧𑀜𑁆𑀜𑀢𑁆𑀢𑀺.

𑀑𑀢𑀭𑀡𑁄𑀢𑀺 𑀬𑁄 𑀅𑀦𑀼𑀲𑁄𑀢𑀕𑀸𑀫𑀻, 𑀲𑁄 𑀤𑀼𑀓𑁆𑀔𑀁. 𑀬𑁂 𑀢𑀲𑁆𑀲 𑀥𑀫𑁆𑀫𑀸, 𑀢𑁂 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄. 𑀬𑀁 𑀭𑀽𑀧𑀁, 𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀯𑀁 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀢𑁂 𑀓𑀺𑀮𑁂𑀲𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀜𑀢𑁆𑀢𑀸.

𑀲𑁄𑀥𑀦𑁄𑀢𑀺 𑀬𑁂𑀦𑀸𑀭𑀫𑁆𑀪𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀁, 𑀲𑁄 𑀆𑀭𑀫𑁆𑀪𑁄 𑀲𑀩𑁆𑀩𑁄 𑀲𑀼𑀤𑁆𑀥𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀧𑀝𑀺𑀲𑁄𑀢𑀕𑀸𑀫𑀺𑀦𑀸 𑀲𑀩𑁆𑀩𑁂 𑀲𑁄𑀢𑀸𑀧𑀦𑁆𑀦𑀸 𑀏𑀓𑀢𑁆𑀢𑁂𑀦 𑀯𑀸 𑀦𑀺𑀤𑁆𑀤𑀺𑀝𑁆𑀞𑀸 𑀭𑀸𑀕𑀸𑀦𑀼𑀲𑀬𑀧𑀝𑀺𑀲𑁄𑀢𑀕𑀸𑀫𑀺𑀦𑁄 𑀲𑁂𑀓𑁆𑀔𑀸𑀯 𑀫𑀕𑁆𑀕𑁄 𑀘 𑀲𑁂𑀓𑁆𑀔𑁄 𑀘 𑀧𑀼𑀕𑁆𑀕𑀮𑁄 𑀞𑀺𑀢𑀢𑁆𑀢𑁄𑀢𑀺.

𑀯𑀻𑀢𑀭𑀸𑀕𑁄 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑁄. 𑀧𑀸𑀭𑀗𑁆𑀕𑀢𑁄𑀢𑀺 𑀲𑀩𑁆𑀩𑁂 𑀅𑀭𑀳𑀦𑁆𑀢𑁄 𑀲𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀘 𑀏𑀓𑀢𑁆𑀢𑀸𑀬 𑀧𑀜𑁆𑀜𑀢𑁆𑀢𑀸.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀅𑀦𑀼𑀲𑁄𑀢𑀕𑀸𑀫𑀺𑀦𑁄 𑀧𑀸𑀧𑀫𑀺𑀢𑁆𑀢𑀧𑀘𑁆𑀘𑀬𑁄 𑀓𑀸𑀫𑀧𑀭𑀺𑀬𑀼𑀝𑁆𑀞𑀸𑀦𑀁 𑀳𑁂𑀢𑀼. 𑀧𑀝𑀺𑀲𑁄𑀢𑀕𑀸𑀫𑀺𑀦𑁄 𑀤𑁆𑀯𑁂 𑀳𑁂𑀢𑀽 𑀤𑁆𑀯𑁂 𑀧𑀘𑁆𑀘𑀬𑀸 𑀘 𑀬𑀸𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀤𑀺𑀝𑁆𑀞𑀺 [𑀉𑀧𑀸𑀤𑀸𑀬𑀤𑀺𑀝𑁆𑀞𑀺 (𑀧𑀻.)], 𑀢𑀲𑁆𑀲 𑀧𑀝𑀺𑀮𑀤𑁆𑀥𑀫𑀕𑁆𑀕𑁄 𑀳𑁂𑀢𑀼 𑀆𑀭𑀫𑁆𑀪𑁄 𑀧𑀘𑁆𑀘𑀬𑁄 𑀓𑀸𑀬𑀺𑀓𑁄 𑀘𑁂𑀢𑀲𑀺𑀓𑀲𑁆𑀲 𑀓𑁄𑀝𑁆𑀞𑀸𑀲𑁄 𑀘. 𑀲𑀫𑀸𑀭𑁄𑀧𑀦𑁄𑀢𑀺 𑀯𑀺𑀪𑀢𑁆𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀦𑀢𑁆𑀣𑀺 𑀲𑀫𑀸𑀭𑁄𑀧𑀦𑀸𑀬 𑀪𑀽𑀫𑀺.

𑁧𑁧𑁪. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀲𑁄𑀢𑀸𑀦𑀼𑀕𑀢𑀸𑀦𑀁 𑀥𑀫𑁆𑀫𑀸𑀦𑀁 [𑀧𑀲𑁆𑀲 𑀅. 𑀦𑀺. 𑁪.𑁧𑁯𑁧] 𑀬𑀸𑀯 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀬𑀼𑀜𑁆𑀚𑀢𑁄 𑀖𑀝𑁂𑀦𑁆𑀢𑀲𑁆𑀲 𑀯𑀸𑀬𑀫𑀢𑁄 𑀕𑀺𑀮𑀸𑀦𑁄 𑀫𑀭𑀡𑀓𑀸𑀮𑁂 𑀤𑁂𑀯𑀪𑀽𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀲𑁄𑀢𑀸𑀦𑀼𑀕𑀢𑀸𑀢𑀺 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀓𑀢𑀁 𑀳𑁄𑀢𑀺. 𑀦 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀢𑀲𑁆𑀲 𑀘𑀺𑀢𑁆𑀢𑀁 𑀢𑀲𑀺𑀢𑀁 𑀳𑁄𑀢𑀺, 𑀦 𑀘 𑀅𑀦𑀺𑀩𑁆𑀩𑀺𑀤𑁆𑀥𑀢𑁆𑀢𑀁, 𑀇𑀤𑀁 𑀘 𑀲𑀼𑀢𑁆𑀢𑀁 𑀧𑀜𑁆𑀘𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀤𑁂𑀲𑀺𑀢𑀁, 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀘. 𑀬𑁄 𑀧𑀦 𑀫𑁄𑀳𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀦 𑀲𑀓𑁆𑀓𑁄𑀢𑀺 𑀬𑀼𑀜𑁆𑀚𑀺𑀢𑀼𑀁 𑀖𑀝𑀺𑀢𑀼𑀁 𑀯𑀸𑀬𑀫𑀺𑀢𑀼𑀁 𑀬𑀣𑀸𑀪𑀽𑀢𑀁 𑀬𑀣𑀸𑀲𑀫𑀸𑀥𑀺𑀓𑀸 𑀯𑀺𑀫𑀼𑀢𑁆𑀢𑀺 𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀨𑀮𑀁 𑀤𑀲𑁆𑀲𑁂𑀢𑀺. 𑀲𑀸𑀥𑀼 𑀧𑀭𑀺𑀳𑀸𑀬𑀢𑀺 𑀧𑀭𑁄 𑀢𑀁 𑀤𑀼𑀬𑁆𑀳𑀢𑀺, 𑀦𑁄 𑀢𑀼 𑀲𑀼𑀔𑀅𑀯𑀺𑀧𑀸𑀓𑀺𑀦𑀻 𑀪𑀯𑀢𑀺. 𑀢𑀲𑁆𑀲 𑀤𑀺𑀝𑁆𑀞𑁂 𑀬𑁂𑀯 𑀘 𑀥𑀫𑁆𑀫𑁂 𑀉𑀧𑀧𑀚𑁆𑀚𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁. 𑀢𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀢𑀲𑁆𑀲 𑀬𑀤𑀺 𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀲𑁄 𑀬𑀼𑀜𑁆𑀚𑀦𑁆𑀢𑁄 𑀧𑀸𑀧𑀼𑀡𑀸𑀢𑀺. 𑀬𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀫𑀼𑀤𑀺𑀦𑁆𑀤𑁆𑀭𑀺𑀬𑁄, 𑀲𑁄 𑀕𑀺𑀮𑀸𑀦𑁄 𑀧𑀸𑀧𑀼𑀡𑀸𑀢𑀺. 𑀬𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀲𑁄 𑀫𑀭𑀡𑀓𑀸𑀮𑀲𑀫𑀬𑁂 𑀧𑀸𑀧𑀼𑀡𑀸𑀢𑀺. 𑀬𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄, 𑀲𑁄 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺. 𑀬𑀤𑀸 𑀤𑁂𑀯𑀪𑀽𑀢𑁄 𑀦 𑀧𑀸𑀧𑀼𑀡𑀸𑀢𑀺, 𑀦 𑀲𑁄 𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦 𑀢𑀸𑀬 𑀥𑀫𑁆𑀫𑀦𑀦𑁆𑀤𑀺𑀬𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀲𑁄𑀢𑀸𑀦𑀼𑀕𑀢𑁂𑀲𑀼 𑀬𑀼𑀜𑁆𑀚𑀢𑀺 𑀖𑀝𑁂𑀢𑀺 𑀯𑀸𑀬𑀫𑀢𑀺, 𑀲𑁄 𑀧𑀼𑀩𑁆𑀩𑀸𑀧𑀦𑁆𑀦𑁂𑀦 𑀯𑀺𑀲𑁂𑀲𑀁 𑀲𑀜𑁆𑀚𑀸𑀦𑀸𑀢𑀺, 𑀲𑀜𑁆𑀚𑀸𑀦𑀦𑁆𑀢𑁄 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀕𑀺𑀮𑀸𑀦𑀲𑁆𑀲 𑀫𑀦𑀲𑀺𑀓𑀸𑀭𑁄 𑀳𑁄𑀢𑀺, 𑀢𑀢𑁆𑀣 𑀬𑀼𑀜𑁆𑀚𑀦𑁆𑀢𑁄 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦𑀲𑁆𑀲 𑀫𑀭𑀡𑀓𑀸𑀮𑁂 𑀲𑀁𑀯𑀺𑀕𑁆𑀕𑁄 𑀳𑁄𑀢𑀺, 𑀢𑀢𑁆𑀣 𑀬𑀼𑀜𑁆𑀚𑀦𑁆𑀢𑁄 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀦 𑀓𑀢𑁆𑀣𑀘𑀺 [𑀓𑀢𑁆𑀣 (𑀧𑀻. 𑀓.), 𑀢𑀢𑁆𑀣 (𑀓.)] 𑀲𑀁𑀯𑁂𑀕𑁄 𑀳𑁄𑀢𑀺, 𑀢𑀲𑁆𑀲 𑀤𑁂𑀯𑀪𑀽𑀢𑀲𑁆𑀲 𑀲𑀼𑀔𑀺𑀦𑁄 𑀥𑀫𑁆𑀫𑀪𑀽𑀢𑀸 𑀧𑀸𑀤𑀸 𑀏𑀯𑀁 𑀅𑀯𑀺𑀮𑀧𑀢𑀺. 𑀲𑁄 𑀏𑀯𑀁 𑀚𑀸𑀦𑀸𑀢𑀺 ‘‘𑀅𑀬𑀁 𑀲𑁄 𑀥𑀫𑁆𑀫𑀯𑀺𑀦𑀬𑁄 𑀬𑀢𑁆𑀣 𑀫𑀬𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀫𑁆𑀳𑀸’’𑀢𑀺. 𑀅𑀣 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺. 𑀤𑀺𑀩𑁆𑀩𑁂𑀲𑀼 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀚𑁆𑀛𑁄𑀲𑀺𑀢𑁄 𑀳𑁄𑀢𑀺 𑀧𑀫𑀸𑀤𑀯𑀺𑀳𑀸𑀭𑀻, 𑀲𑁄 𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺.

𑀬𑀸 𑀧𑀭𑀢𑁄𑀖𑁄𑀲𑁂𑀦 𑀯𑀘𑀲𑀸 𑀲𑀼𑀧𑀭𑀺𑀘𑀺𑀢𑀸, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀬𑁂 𑀧𑀦 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸, 𑀅𑀬𑀁 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸. 𑀬𑀁 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸. 𑀬𑀁 𑀲𑁄𑀢𑀸𑀦𑀼𑀕𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀳𑁄𑀦𑁆𑀢𑀺, 𑀲𑁄 𑀘 𑀤𑀺𑀝𑁆𑀞𑁂 𑀬𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀬𑀁 𑀅𑀭𑀳𑀁 𑀧𑀼𑀕𑁆𑀕𑀮𑁄. 𑀬𑁄 𑀉𑀧𑀧𑀚𑁆𑀚𑀢𑀺 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀘 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀅𑀦𑀸𑀕𑀸𑀫𑀻. 𑀬𑁄 𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀧𑀼𑀩𑁆𑀩𑀬𑁄𑀕𑀲𑀫𑁆𑀪𑀸𑀭𑀲𑀫𑁆𑀪𑀽𑀢𑁄 𑀧𑀼𑀕𑁆𑀕𑀮𑁄.

𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸𑀢𑀺 𑀧𑀞𑀫𑀁 𑀯𑀺𑀫𑀼𑀢𑁆𑀢𑀸𑀬𑀢𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀤𑀼𑀢𑀺𑀬𑀁 𑀢𑀢𑀺𑀬𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀁, 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀘𑀢𑀼𑀢𑁆𑀣𑀁 𑀯𑀺𑀫𑀼𑀢𑁆𑀢𑀸𑀬𑀢𑀦𑀁 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀜𑁆𑀘𑀫𑀁 𑀯𑀺𑀫𑀼𑀢𑁆𑀢𑀸𑀬𑀢𑀦𑀁.

𑀲𑁄𑀢𑀸𑀦𑀼𑀕𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀘𑀲𑀸 𑀬𑀸 𑀯𑀸𑀘𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀅𑀦𑀼𑀧𑀼𑀩𑁆𑀩𑀥𑀫𑁆𑀫𑀲𑁆𑀲 𑀲𑁄𑀢𑁂𑀦 𑀲𑀼𑀢𑁆𑀯𑀸 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀧𑀽𑀭𑁂𑀢𑀺, 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀇𑀤𑀁 𑀧𑀞𑀫𑀁 𑀲𑀤𑁆𑀥𑀸𑀧𑀤𑀸𑀦𑀁 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀧𑀝𑀺𑀲𑀮𑁆𑀮𑀸𑀦𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁. 𑀇𑀤𑀁 𑀤𑀼𑀢𑀺𑀬𑀁 𑀲𑀤𑁆𑀥𑀸𑀧𑀤𑀸𑀦𑀁 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀅𑀦𑀸𑀲𑀯𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺. 𑀇𑀤𑀁 𑀢𑀢𑀺𑀬𑀁 𑀲𑀤𑁆𑀥𑀸𑀧𑀤𑀸𑀦𑀁.

𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸𑀢𑀺 𑀲𑁂𑀓𑁆𑀔𑀁 𑀲𑀢𑁆𑀣𑀸 𑀤𑀲𑁆𑀲𑁂𑀢𑀺. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀅𑀭𑀳𑀢𑁆𑀢𑀁 𑀲𑀢𑁆𑀣𑀸 𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀢𑁆𑀣𑀸 𑀤𑀲𑁆𑀲𑁂𑀢𑀺.

𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁 𑀤𑀲𑁆𑀲𑁂𑀢𑀺. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀭𑀽𑀧𑀥𑀸𑀢𑀼𑀬𑀸 𑀦𑀺𑀲𑁆𑀲𑀭𑀡𑀁 𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀢𑁂𑀥𑀸𑀢𑀼𑀓𑀸𑀦𑀁 𑀦𑀺𑀲𑁆𑀲𑀭𑀡𑀁 𑀤𑀲𑁆𑀲𑁂𑀢𑀺. 𑀅𑀬𑀁 𑀲𑀼𑀢𑁆𑀢𑀢𑁆𑀣𑁄.

𑁧𑁧𑁫. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀢𑀬𑁄 𑀏𑀲𑀦𑀸 𑀤𑁂𑀲𑀺𑀢𑀸 𑀲𑁄𑀢𑀸𑀦𑀼𑀕𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀘𑀲𑀸 𑀧𑀭𑀺𑀘𑀺𑀢𑁂𑀳𑀺 𑀓𑀸𑀫𑁂𑀲𑀦𑀸𑀬 𑀲𑀫𑀣𑀫𑀕𑁆𑀕𑁄. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁂𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀲𑀫𑀣𑀫𑀕𑁆𑀕𑁄.

𑀯𑀺𑀘𑀬𑁄𑀢𑀺 𑀬𑀣𑀸 𑀲𑀼𑀢𑁆𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀲𑀼𑀢𑀫𑀬𑀺𑀧𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀬𑀣𑀸 𑀘 𑀲𑁄 𑀫𑀦𑀲𑀺𑀓𑀭𑁄𑀢𑀻𑀢𑀺 𑀬𑀣𑀸 𑀲𑀼𑀢𑀥𑀫𑁆𑀫𑀸 𑀢𑀤𑀸 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀬𑀣𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑀺 𑀢𑀤𑀸 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀅𑀬𑀁 𑀯𑀺𑀘𑀬𑁄.

𑀲𑀼𑀢𑁂𑀦 𑀲𑀼𑀢𑀫𑀬𑀺𑀧𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀘𑀺𑀦𑁆𑀢𑀸𑀬 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀁 𑀪𑀸𑀯𑀦𑀸𑀬 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀧𑀤𑀝𑁆𑀞𑀸𑀦𑁄𑀢𑀺 𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀬𑀼𑀜𑁆𑀚𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀥𑀫𑁆𑀫𑀸𑀦𑀼𑀥𑀫𑁆𑀫𑀸𑀬 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀤𑀺𑀝𑁆𑀞𑀺𑀬𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀧𑀜𑁆𑀜𑀸𑀬𑀧𑀺 𑀅𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸𑀧𑀺 𑀅𑀦𑀼𑀧𑁂𑀓𑁆𑀔𑀺𑀢𑀸.

𑀘𑀢𑀼𑀩𑁆𑀬𑀽𑀳𑁄𑀢𑀺 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑀸 𑀢𑁂𑀳𑀺….

𑀲 𑀦𑀺𑀩𑁆𑀩𑀼𑀢𑁄𑀢𑀺 𑀫𑀕𑁆𑀕𑀨𑀮𑀁 𑀅𑀦𑀼𑀧𑀸𑀤𑀺𑀲𑁂𑀲𑀜𑁆𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀫𑀦𑁆𑀢𑁂𑀢𑀺, 𑀤𑀸𑀦𑁂𑀦 𑀑𑀴𑀸𑀭𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀫𑀦𑁆𑀢𑁂𑀢𑀺. 𑀲𑀻𑀮𑁂𑀦 𑀫𑀚𑁆𑀛𑀺𑀫𑀸𑀦𑀁, 𑀧𑀜𑁆𑀜𑀸𑀬 𑀲𑀼𑀔𑀼𑀫𑀓𑀺𑀮𑁂𑀲𑀸𑀦𑀁 𑀫𑀦𑁆𑀢𑁂𑀢𑀺, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀓𑀢𑀸 𑀘 𑀪𑀽𑀫𑀺.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀫𑀕𑁆𑀕𑁄 𑀯𑀼𑀢𑁆𑀢𑁄;

𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀫𑀕𑁆𑀕𑀨𑀮𑀫𑀸𑀳.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀮𑁄𑀓𑀺𑀓𑀁 𑀓𑀼𑀲𑀮𑀫𑀽𑀮𑀁 𑀯𑀼𑀢𑁆𑀢𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀮𑁄𑀓𑀼𑀢𑁆𑀢𑀭𑀁 𑀓𑀼𑀲𑀮𑀫𑀽𑀮𑀁 𑀯𑀼𑀢𑁆𑀢𑀁.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁 𑀫𑀦𑁆𑀢𑁂𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑁂𑀓𑁆𑀔𑀪𑀽𑀫𑀺𑀁 𑀫𑀦𑁆𑀢𑁂𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀲𑁂𑀓𑁆𑀔𑀪𑀽𑀫𑀺 𑀯𑀼𑀢𑁆𑀢𑀸.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀫𑀕𑁆𑀕𑀦𑀺𑀬𑀸 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀅𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀫𑀕𑁆𑀕𑀓𑀣𑀁 𑀮𑁄𑀓𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀤𑁂𑀲𑀦𑀫𑀸𑀳. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀮𑁄𑀓𑁂 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬𑀧𑀺 𑀧𑀝𑀺𑀯𑀺𑀤𑁆𑀥𑀸.

𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀧𑀸𑀡𑀸𑀦𑀁 𑀅𑀪𑀬𑀤𑀸𑀦𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀘𑀺𑀢𑁆𑀢𑀁 𑀲𑀁𑀬𑀫𑁂𑀢𑀺, 𑀢𑀲𑁆𑀲 𑀲𑀁𑀬𑀫𑀢𑁄 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄. 𑀅𑀬𑀁 𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄.

𑁧𑁧𑁬. 𑀢𑀢𑁆𑀣 𑀓𑀢𑀫𑀸 𑀤𑁂𑀲𑀦𑀸? 𑀇𑀫𑀫𑁆𑀳𑀺 𑀲𑀼𑀢𑁆𑀢𑁂 𑀓𑀺𑀁 𑀤𑁂𑀲𑀺𑀢𑀁? 𑀤𑁆𑀯𑁂 𑀲𑀼𑀕𑀢𑀺𑀬𑁄 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘, 𑀤𑀺𑀩𑁆𑀩𑀸 𑀘 𑀧𑀜𑁆𑀘𑀓𑀸𑀫𑀕𑀼𑀡𑀸, 𑀫𑀸𑀦𑀼𑀲𑁆𑀲𑀓𑀸 𑀘. 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑁂𑀲𑁄. 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺, 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀫𑀕𑁆𑀕𑁄 𑀯𑀼𑀢𑁆𑀢𑁄. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄 𑀤𑁂𑀲𑀺𑀢𑀸 𑀲𑁄𑀧𑀸𑀤𑀺𑀲𑁂𑀲𑀸 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸 𑀘. 𑀅𑀬𑀁 𑀤𑁂𑀲𑀦𑀸.

𑀯𑀺𑀘𑀬𑁄𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀇𑀫𑀺𑀦𑀸 𑀧𑀞𑀫𑁂𑀦 𑀧𑀤𑁂𑀦 𑀤𑀸𑀦𑀫𑀬𑀺𑀓𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀆𑀦𑀦𑁆𑀢𑀭𑀺𑀬𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁. 𑀤𑀼𑀢𑀺𑀬𑁂𑀦 𑀧𑀤𑁂𑀦… 𑀬𑀦𑁆𑀢𑀺, 𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀦𑁆𑀢𑀺, 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀯𑀦𑁂𑀦 𑀘 𑀅𑀫𑀦𑀲𑀺𑀓𑀸𑀭𑁂𑀦 𑀘 𑀅𑀧𑁆𑀧𑀝𑀺𑀯𑁂𑀥𑁂𑀦 𑀘 𑀲𑀓𑁆𑀓𑀸𑀬𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸. 𑀲𑀯𑀦𑁂𑀦 𑀘 𑀫𑀦𑀲𑀺𑀓𑀸𑀭𑁂𑀦 𑀘 𑀧𑀝𑀺𑀯𑁂𑀥𑁂𑀦 𑀘 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑀼𑀢𑁆𑀢𑀸. 𑀅𑀬𑀁 𑀆𑀯𑀝𑁆𑀝𑁄.

𑀯𑀺𑀪𑀢𑁆𑀢𑀻𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄. 𑀦𑀢𑁆𑀣𑀺 𑀢𑀢𑁆𑀣 𑀯𑀺𑀪𑀢𑁆𑀢𑀺𑀬𑀸 𑀪𑀽𑀫𑀺. 𑀧𑀭𑀺𑀯𑀢𑁆𑀢𑀦𑀸𑀢𑀺 𑀬𑁂 𑀧𑀜𑁆𑀘𑀸𑀦𑀺𑀲𑀁𑀲𑀸, 𑀢𑁂 𑀧𑀜𑁆𑀘𑀸𑀤𑀺𑀦𑀸 𑀧𑀝𑀺𑀧𑀓𑁆𑀔𑁂𑀦 𑀢𑁂𑀦𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀧𑀼𑀡𑀸𑀢𑀺, 𑀢𑀁 𑀉𑀧𑀧𑀚𑁆𑀚𑀫𑀸𑀦𑀸 𑀅𑀧𑀭𑁄 𑀧𑀭𑀺𑀬𑀸𑀬𑁄.

𑀯𑁂𑀯𑀘𑀦𑀦𑁆𑀢𑀺 𑀲𑁄𑀢𑀸𑀦𑀼𑀕𑀢𑀸 𑀥𑀫𑁆𑀫𑀸𑀢𑀺 𑀬𑀁 𑀲𑀼𑀢𑁆𑀢𑀁 𑀤𑀺𑀝𑁆𑀞𑀫𑁆𑀧𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀫𑁆𑀧𑀺 𑀯𑀺𑀪𑀸𑀯𑀺𑀢𑀫𑁆𑀧𑀺.

𑀧𑀜𑁆𑀜𑀢𑁆𑀢𑀻𑀢𑀺 𑀲𑁄𑀢𑀸𑀦𑀼𑀕𑀢𑀸𑀥𑀫𑁆𑀫𑀸𑀢𑀺 𑀤𑁂𑀲𑀦𑀸 𑀅𑀯𑀺𑀚𑁆𑀚𑀸𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀫𑀦𑀲𑀺𑀓𑀸𑀭𑁄 𑀧𑀸𑀫𑁄𑀚𑁆𑀚𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁄, 𑀤𑀺𑀝𑁆𑀞𑀥𑀫𑁆𑀫𑀸𑀧𑀺 𑀆𑀦𑀺𑀲𑀁𑀲𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀸.

𑀑𑀢𑀭𑀡𑁄𑀢𑀺 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀯𑀘𑀲𑀸 𑀧𑀭𑀺𑀘𑀺𑀢𑁂𑀲𑀼 𑀲𑀼𑀢𑀫𑀬𑀻𑀧𑀜𑁆𑀜𑀸 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑁂𑀲𑀼 𑀘𑀺𑀦𑁆𑀢𑀸𑀫𑀬𑀻𑀧𑀜𑁆𑀜𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀲𑀼 𑀪𑀸𑀯𑀦𑀸𑀫𑀬𑀻𑀧𑀜𑁆𑀜𑀸. 𑀇𑀫𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀆𑀬𑀢𑀦𑁂𑀲𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸𑀢𑀺. 𑀲𑁄𑀥𑀦𑁄𑀢𑀺 𑀬𑁄 𑀆𑀭𑀫𑁆𑀪𑁄 𑀲𑀼𑀢𑁆𑀢𑀲𑁆𑀲 𑀧𑀯𑁂𑀲𑁄 𑀦𑀺𑀬𑀼𑀢𑁆𑀢𑁄.

𑀅𑀥𑀺𑀝𑁆𑀞𑀸𑀦𑁄𑀢𑀺 𑀧𑀜𑁆𑀘𑀸𑀦𑀺𑀲𑀁𑀲𑀸𑀢𑀺 𑀯𑁂𑀫𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀸 𑀆𑀦𑀺𑀲𑀁𑀲𑀸 𑀲𑁄𑀢𑀸 𑀅𑀦𑀼𑀕𑀢𑀸𑀢𑀺 𑀯𑁂𑀫𑀢𑁆𑀢𑀢𑀸𑀬 𑀅𑀭𑀺𑀬𑀯𑁄𑀳𑀸𑀭𑁄 𑀧𑀜𑁆𑀜𑀢𑁆𑀢𑁄, 𑀥𑀫𑁆𑀫𑁂 𑀘 𑀲𑀯𑀦𑀦𑁆𑀢𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀁.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀧𑀬𑀺𑀭𑀼𑀧𑀸𑀲𑀦𑀸 𑀧𑀘𑁆𑀘𑀬𑁄, 𑀲𑀤𑁆𑀥𑀸 𑀳𑁂𑀢𑀼. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑀸 𑀧𑀘𑁆𑀘𑀬𑁄, 𑀥𑀫𑁆𑀫𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑀸 𑀳𑁂𑀢𑀼, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀫𑀦𑀲𑀺𑀓𑀸𑀭𑁄 𑀘 𑀧𑀘𑁆𑀘𑀬𑁄, 𑀲𑀼𑀢𑀫𑀬𑀻 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀳𑁂𑀢𑀼. 𑀲𑀫𑀸𑀭𑁄𑀧𑀦𑁄𑀢𑀺 𑀯𑀺𑀪𑀢𑁆𑀢𑀁 𑀲𑀼𑀢𑁆𑀢𑀁 𑀅𑀧𑀭𑁄 𑀧𑀭𑀺𑀬𑀸𑀬𑁄 𑀦𑀺𑀩𑁆𑀩𑀢𑁆𑀢𑀺 𑀩𑀮𑁂 𑀦𑀢𑁆𑀣𑀺. 𑀢𑀢𑁆𑀣 𑀲𑀫𑀸𑀭𑁄𑀧𑀦𑀸𑀬 𑀪𑀽𑀫𑀺.

𑁧𑁧𑁭. 𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁? 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀕𑀸𑀣𑀸. 𑀤𑀤𑀢𑁄𑀢𑀺 𑀤𑀸𑀦𑀫𑀬𑀺𑀓𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀲𑀻𑀮𑀫𑀬𑀺𑀓𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀮𑁄𑀪𑀲𑁆𑀲 𑀘 𑀫𑁄𑀳𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀘 𑀧𑀳𑀸𑀦𑀫𑀸𑀳. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀮𑁄𑀪𑀲𑁆𑀲 𑀘 𑀫𑁄𑀳𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀘 𑀙𑀦𑁆𑀤𑀭𑀸𑀕𑀯𑀺𑀦𑀬𑀫𑀸𑀳𑀸𑀢𑀺. 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀕𑀸𑀣𑀸 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀪𑀯𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑀪𑀯𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀅𑀯𑁂𑀭𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀸𑀤𑀢𑀸𑀬 𑀲𑀤𑀸. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀜𑀸𑀡𑀼𑀧𑁆𑀧𑀸𑀤𑀸 𑀅𑀜𑁆𑀜𑀸𑀡𑀦𑀺𑀭𑁄𑀥𑁄. 𑀘𑀢𑀼𑀢𑁆𑀣𑀧𑀤𑁂𑀦 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑁂𑀦 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀫𑁄𑀳𑀓𑁆𑀔𑀬𑁂𑀦 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀯𑀺𑀘𑀬𑁄.

𑀬𑀼𑀢𑁆𑀢𑀻𑀢𑀺 𑀤𑀸𑀦𑁂 𑀞𑀺𑀢𑁄 𑀉𑀪𑀬𑀁 𑀳𑀺 𑀧𑀭𑀺𑀧𑀽𑀭𑁂𑀢𑀺. 𑀫𑀘𑁆𑀙𑀭𑀺𑀬𑀜𑁆𑀘 𑀧𑀚𑀳𑀢𑀺. 𑀧𑀼𑀜𑁆𑀜𑀜𑁆𑀘 𑀧𑀯𑀟𑁆𑀠𑀢𑀺. 𑀅𑀢𑁆𑀣𑀺 𑀏𑀲𑀸 𑀬𑀼𑀢𑁆𑀢𑀺.

𑀧𑀤𑀝𑁆𑀞𑀸𑀦𑀦𑁆𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀬𑀁 𑀧𑀤𑀝𑁆𑀞𑀸𑀦𑁄.

𑀢𑀢𑁆𑀣 𑀓𑀢𑀫𑁄 𑀮𑀓𑁆𑀔𑀡𑁄? 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺. 𑀤𑀤𑀢𑁄𑀧𑀺 𑀯𑁂𑀭𑀁 𑀦 𑀓𑀭𑀺𑀬𑀸𑀢𑀺 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄 𑀭𑀽𑀧𑀓𑁆𑀔𑀬𑀸𑀧𑀺 𑀯𑁂𑀤𑀦𑀓𑁆𑀔𑀬𑀸𑀧𑀺, 𑀬𑁂𑀦 𑀭𑀽𑀧𑁂𑀦 𑀤𑀺𑀝𑁆𑀞𑀁, 𑀢𑁂𑀦 𑀢𑀣𑀸𑀕𑀢𑁄 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀬𑁆𑀬 𑀭𑀽𑀧𑀲𑁆𑀲 𑀔𑀬𑀸 𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑀸.

𑀘𑀢𑀼𑀩𑁆𑀬𑀽𑀳𑁄 𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀫𑀳𑀸𑀪𑁄𑀕𑀸𑀦𑀁 𑀧𑀢𑁆𑀣𑀬𑀺𑀲𑁆𑀲𑀦𑁆𑀢𑀺? 𑀢𑁂 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺 𑀧𑀭𑀺𑀲𑁆𑀲𑀬𑀧𑀳𑀸𑀦𑀸𑀬, 𑀬𑁂 𑀅𑀯𑁂𑀭𑀸𑀪𑀺𑀙𑀦𑁆𑀤𑀓𑀸, 𑀢𑁂 𑀧𑀜𑁆𑀘 𑀯𑁂𑀭𑀸𑀦𑀺 𑀧𑀚𑀳𑀺𑀲𑁆𑀲𑀦𑁆𑀢𑀺, 𑀬𑁂 𑀓𑀼𑀲𑀮𑀸𑀪𑀺𑀙𑀦𑁆𑀤𑀓𑀸, 𑀢𑁂 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀫𑀺𑀘𑁆𑀙𑀢𑁆𑀢𑀸𑀦𑀁 𑀧𑀳𑀸𑀦𑀸𑀬. 𑀬𑁂 𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑀸, 𑀢𑁂 𑀭𑀸𑀕𑀤𑁄𑀲𑀫𑁄𑀳𑀁 𑀧𑀚𑀳𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

𑀆𑀯𑀝𑁆𑀝𑁄𑀢𑀺 𑀬𑀜𑁆𑀘 𑀅𑀤𑀤𑀢𑁄 𑀫𑀘𑁆𑀙𑀭𑀺𑀬𑀁 𑀬𑀜𑁆𑀘 𑀅𑀲𑀁𑀬𑀫𑀢𑁄 𑀯𑁂𑀭𑀁 𑀬𑀜𑁆𑀘 𑀅𑀓𑀼𑀲𑀮𑀲𑁆𑀲 𑀧𑀸𑀧𑀲𑁆𑀲 𑀅𑀧𑁆𑀧𑀳𑀸𑀦𑀁, 𑀅𑀬𑀁 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑁄 𑀦 𑀲𑀫𑀼𑀤𑀬𑁄. 𑀅𑀮𑁄𑀪𑁂𑀦 𑀘 𑀅𑀤𑁄𑀲𑁂𑀦 𑀘 𑀅𑀫𑁄𑀳𑁂𑀦 𑀘 𑀓𑀼𑀲𑀮𑁂𑀦 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀢𑁂𑀲𑀁 𑀧𑀘𑁆𑀘𑀬𑁄 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀬𑀁 𑀫𑀕𑁆𑀕𑁄. 𑀢𑁂𑀲𑀁 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀔𑀬𑀸, 𑀅𑀬𑀁 𑀦𑀺𑀭𑁄𑀥𑁄.

𑀯𑀺𑀪𑀢𑁆𑀢𑀻𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀦 𑀏𑀓𑀁𑀲𑁂𑀦 𑀬𑁄 𑀭𑀸𑀚𑀤𑀡𑁆𑀟𑀪𑀬𑁂𑀦 𑀤𑁂𑀢𑀺, 𑀬𑁄 𑀘 𑀅𑀓𑀧𑁆𑀧𑀺𑀬𑀲𑁆𑀲 𑀧𑀭𑀺𑀪𑁄𑀕𑁂𑀦 𑀲𑀻𑀮𑀯𑀦𑁆𑀢𑁂𑀲𑀼 𑀤𑁂𑀢𑀺, 𑀦 𑀢𑀲𑁆𑀲 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀲𑁄 𑀘𑁂𑀢𑀁 𑀤𑀸𑀦𑀁 𑀅𑀓𑀼𑀲𑀮𑁂𑀦 𑀤𑁂𑀢𑀺, 𑀤𑀡𑁆𑀟𑀤𑀸𑀦𑀁 𑀲𑀢𑁆𑀣𑀤𑀸𑀦𑀁 𑀅𑀧𑀼𑀜𑁆𑀜𑀫𑀬𑀁 𑀧𑀯𑀟𑁆𑀠𑀢𑀺, 𑀦 𑀧𑀼𑀜𑁆𑀜𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀦 𑀏𑀓𑀁𑀲𑁂𑀦 𑀓𑀺𑀁 𑀓𑀸𑀭𑀡𑀁 𑀬𑀜𑁆𑀘 𑀬𑁄 𑀧𑀤𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀧𑀲𑁆𑀲𑀢𑀺 𑀬𑀤𑀺 𑀫𑀫 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀳𑀢𑁆𑀣𑀁 𑀯𑀸 𑀙𑀺𑀦𑁆𑀤𑁂𑀬𑁆𑀬…𑀧𑁂… 𑀦 𑀢𑁂𑀦 𑀲𑀁𑀬𑀫𑁂𑀦 𑀯𑁂𑀭𑀁 𑀦 𑀓𑀭𑁄𑀢𑀺. 𑀬𑁄 𑀢𑀼 𑀏𑀯𑀁 𑀲𑀫𑀸𑀤𑀺𑀬𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀸𑀧𑀓𑁄 𑀯𑀺𑀧𑀸𑀓𑁄𑀢𑀺, 𑀤𑀺𑀝𑁆𑀞𑁂 𑀬𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑁂 𑀘 𑀏𑀯𑀁 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮𑀲𑁆𑀲 𑀳𑁂𑀢𑀼𑀢𑁄 𑀆𑀭𑀢𑀺. 𑀇𑀫𑀺𑀦𑀸 𑀲𑀁𑀬𑀫𑁂𑀦 𑀯𑁂𑀭𑀁 𑀦 𑀘𑀻𑀬𑀢𑀺.

𑀧𑀭𑀺𑀯𑀢𑁆𑀢𑀦𑀸𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀅𑀤𑀤𑀢𑁄 𑀧𑀼𑀜𑁆𑀜𑀁 𑀦 𑀧𑀯𑀟𑁆𑀠𑀢𑀺. 𑀬𑀁 𑀤𑀸𑀦𑀫𑀬𑀁, 𑀢𑀁 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺, 𑀅𑀲𑀁𑀬𑀫𑀢𑁄 𑀯𑁂𑀭𑀁 𑀓𑀭𑀻𑀬𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁 𑀅𑀓𑀼𑀲𑀮𑁄 𑀦 𑀚𑀳𑀸𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄𑀢𑀺 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀧𑀡𑀻𑀢𑀁 𑀧𑁂𑀲𑁂𑀢𑁆𑀯𑀸𑀧𑀺 𑀦 𑀧𑀓𑁆𑀓𑁄𑀲𑀸𑀫𑀺, 𑀲𑁄 𑀲𑀬𑀫𑁂𑀯 𑀧𑀦 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁄 𑀅𑀫𑁆𑀳𑁂𑀳𑀺 𑀘 𑀲𑀦𑁆𑀣𑀸𑀕𑀸𑀭𑀲𑀸𑀮𑀸 [𑀲𑀦𑁆𑀥𑀸𑀕𑀸𑀭𑀲𑀸𑀮𑀸 (𑀓.)] 𑀓𑀸𑀭𑀺𑀢𑀸, 𑀏𑀢𑁆𑀣 𑀫𑀬𑀁 𑀤𑀲𑀩𑀮𑀁 𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀁 𑀪𑀡𑀸𑀧𑁂𑀫𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀬𑁂𑀦 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀢𑀁 𑀤𑀺𑀯𑀲𑀁 𑀓𑀺𑀭 𑀲𑀦𑁆𑀣𑀸𑀕𑀸𑀭𑁂 𑀘𑀺𑀢𑁆𑀢𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀝𑁆𑀝𑀓𑀸 𑀫𑀼𑀢𑁆𑀢𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑀸 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸𑀢𑀺 𑀢𑀲𑁆𑀫𑀸 𑀪𑀕𑀯𑀢𑁄 𑀫𑀦𑀁 𑀚𑀸𑀦𑀺𑀢𑁆𑀯𑀸𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀇𑀤𑀸𑀦𑀺 𑀧𑀦 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑀼𑀓𑀸𑀫𑀸 𑀬𑁂𑀦 𑀲𑀦𑁆𑀣𑀸𑀕𑀸𑀭𑀁, 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀲𑀩𑁆𑀩𑀲𑀦𑁆𑀣𑀭𑀺𑀦𑁆𑀢𑀺 𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺 𑀏𑀯𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺. 𑀏𑀢𑁆𑀣 𑀧𑀦 𑀢𑁂 𑀫𑀮𑁆𑀮𑀭𑀸𑀚𑀸𑀦𑁄 𑀲𑀦𑁆𑀣𑀸𑀕𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀦𑀕𑀭𑀯𑀻𑀣𑀺𑀬𑁄𑀧𑀺 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀖𑀝𑀺𑀓𑀤𑀮𑀺𑀬𑁄 𑀘 𑀞𑀧𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀤𑀻𑀧𑀫𑀸𑀮𑀸𑀳𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 𑀔𑀻𑀭𑀧𑀓𑁂 [𑀔𑀻𑀭𑀼𑀧𑀓𑁂 (𑀧𑀻. 𑀓.)] 𑀤𑀸𑀭𑀓𑁂 𑀔𑀻𑀭𑀁 𑀧𑀸𑀬𑁂𑀣, 𑀤𑀳𑀭𑁂 𑀓𑀼𑀫𑀸𑀭𑁂 𑀮𑀳𑀼𑀁 𑀮𑀳𑀼𑀁 𑀪𑁄𑀚𑀸𑀧𑁂𑀢𑁆𑀯𑀸 𑀲𑀬𑀸𑀧𑁂𑀣, 𑀉𑀘𑁆𑀘𑀸𑀲𑀤𑁆𑀤𑀁 𑀫𑀸𑀓𑀭𑀺, 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀲𑀢𑁆𑀣𑀸 𑀅𑀦𑁆𑀢𑁄𑀕𑀸𑀫𑁂𑀯 𑀯𑀲𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀤𑀡𑁆𑀟𑀓𑀤𑀻𑀧𑀺𑀓𑀸 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀪𑀕𑀯𑀦𑁆𑀢𑀁 𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸, 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀉𑀧𑀸𑀲𑀓𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀢𑀡𑁆𑀟𑀫𑀸𑀦𑀸 𑀯𑀺𑀥𑀸𑀯𑀦𑁆𑀢𑀺, 𑀲𑀩𑁆𑀩𑁂 𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀯𑀺𑀓𑀺𑀭𑀺𑀬𑀫𑀸𑀦𑀸 𑀯𑀺𑀬 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑁆𑀯𑀺𑀬 𑀯𑁂𑀭𑀫𑁆𑀪𑀯𑀸𑀢𑀲𑀫𑀼𑀝𑁆𑀞𑀺𑀢𑀓𑀺𑀁𑀲𑀼𑀓𑀓𑀺𑀁𑀲𑀼𑀓𑀸𑀭𑀓𑀡𑀺𑀓𑀸𑀭𑀧𑀼𑀧𑁆𑀨𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀸 𑀯𑀺𑀬 𑀯𑀺𑀧𑁆𑀧𑀓𑀲𑀦𑁆𑀢𑀁 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀁 𑀲𑀭𑀻𑀭𑀁 𑀲𑀫𑀼𑀕𑁆𑀕𑀢𑀢𑀸𑀭𑀓𑀁 𑀯𑀺𑀬 𑀕𑀕𑀦𑀢𑀮𑀁 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀯𑀦𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀬𑁄𑀚𑀦𑀲𑀢𑀺𑀓𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀻𑀦𑀁 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀦𑀺𑀩𑁆𑀩𑀼𑀢𑁄 𑀅𑀲𑁂𑀓𑁆𑀔𑀲𑁆𑀲 𑀦𑀢𑁆𑀣𑀺 𑀦𑀺𑀩𑁆𑀩𑀼𑀢𑀺.

𑀯𑁂𑀯𑀘𑀦𑀦𑁆𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀅𑀦𑀼𑀫𑁄𑀤𑀢𑁄𑀧𑀺 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺. 𑀘𑀺𑀢𑁆𑀢𑀲𑁆𑀲 𑀲𑀫𑀸𑀤𑀳𑀢𑁄𑀧𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀺𑀭𑀺𑀬𑀸𑀬𑀧𑀺 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺.

𑀧𑀜𑁆𑀜𑀢𑁆𑀢𑀻𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀅𑀮𑁄𑀪𑀲𑁆𑀲 𑀧𑀝𑀺𑀦𑀺𑀲𑁆𑀲𑀬𑀖𑀸𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀅𑀤𑁄𑀲𑀲𑁆𑀲 𑀧𑀝𑀺𑀦𑀺𑀲𑁆𑀲𑀬𑀖𑀸𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀅𑀫𑁄𑀳𑀲𑁆𑀲 𑀧𑀝𑀺𑀦𑀺𑀲𑁆𑀲𑀬𑀖𑀸𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁.

𑀑𑀢𑀭𑀡𑁄𑀢𑀺 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺 𑀲𑀁𑀬𑀫𑁂𑀦 𑀲𑀻𑀮𑀓𑁆𑀔𑀦𑁆𑀥𑁄. 𑀑𑀢𑀺𑀡𑁆𑀡𑁄 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀁𑀯𑀭𑁄, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑀁 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁄. 𑀥𑀸𑀢𑀽𑀲𑀼 𑀥𑀫𑁆𑀫𑀥𑀸𑀢𑀼, 𑀆𑀬𑀢𑀦𑁂𑀲𑀼 𑀫𑀦𑀸𑀬𑀢𑀦𑀁.

𑀲𑁄𑀥𑀦𑁄𑀢𑀺 𑀬𑁂𑀦𑀸𑀭𑀫𑁆𑀪𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀁 𑀲𑁄 𑀆𑀭𑀫𑁆𑀪𑁄 𑀲𑀼𑀤𑁆𑀥𑁄.

𑀅𑀥𑀺𑀝𑁆𑀞𑀸𑀦𑁄 𑀤𑀸𑀦𑀦𑁆𑀢𑀺 𑀏𑀓𑀢𑁆𑀢𑀢𑀸𑀬 𑀧𑀜𑁆𑀜𑀢𑁆𑀢𑀁. 𑀘𑀸𑀕𑁄 𑀧𑀭𑀺𑀘𑁆𑀘𑀸𑀕𑁄 𑀥𑀫𑁆𑀫𑀤𑀸𑀦𑀁 𑀆𑀫𑀺𑀲𑀤𑀸𑀦𑀁, 𑀅𑀝𑁆𑀞 𑀤𑀸𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸𑀦𑀺, 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀦 𑀘 𑀤𑀤𑀢𑁄 𑀏𑀓𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀔𑀦𑁆𑀢𑀻 𑀅𑀦𑀯𑀚𑁆𑀚𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀁. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀭𑁄𑀥𑀯𑀻𑀭𑀺𑀬𑀧𑀜𑁆𑀜𑀢𑁆𑀢𑀺𑀬𑀸 [𑀬𑁄𑀥 𑀯𑀻𑀭𑀺𑀬𑀧𑀜𑁆𑀜𑀢𑁆𑀢𑀺𑀬𑀸 (𑀧𑀻. 𑀓.)] 𑀧𑀜𑁆𑀜𑀢𑁆𑀢𑀸.

𑀧𑀭𑀺𑀓𑁆𑀔𑀸𑀭𑁄𑀢𑀺 𑀤𑀸𑀦𑀲𑁆𑀲 𑀧𑀸𑀫𑁄𑀚𑁆𑀚𑀁 𑀧𑀘𑁆𑀘𑀬𑁄, 𑀅𑀮𑁄𑀪𑁄 𑀳𑁂𑀢𑀼. 𑀲𑀁𑀬𑀫𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼, 𑀧𑀭𑀺𑀘𑁆𑀘𑀸𑀕𑁄 𑀧𑀘𑁆𑀘𑀬𑁄. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀬𑀣𑀸𑀪𑀽𑀢𑀤𑀲𑁆𑀲𑀦𑀁 𑀧𑀘𑁆𑀘𑀬𑁄, 𑀜𑀸𑀡𑀧𑁆𑀧𑀝𑀺𑀮𑀸𑀪𑁄 𑀳𑁂𑀢𑀼. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀧𑀭𑀢𑁄 𑀘 𑀖𑁄𑀲𑁄 𑀅𑀚𑁆𑀛𑀢𑁆𑀢𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀫𑀕𑁆𑀕𑁄 𑀘 𑀳𑁂𑀢𑀼 𑀘 𑀧𑀘𑁆𑀘𑀬𑁄 𑀘.

𑀲𑀫𑀸𑀭𑁄𑀧𑀦𑁄𑀢𑀺 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀕𑀸𑀣𑀸 𑀢𑀲𑁆𑀲 𑀲𑀻𑀮𑀫𑁆𑀧𑀺 𑀯𑀟𑁆𑀠𑀢𑀺. 𑀲𑀁𑀬𑀫𑁄𑀧𑀺 𑀯𑀟𑁆𑀠𑀢𑀺. 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺. 𑀅𑀜𑁆𑀜𑁂𑀧𑀺 𑀓𑀺𑀮𑁂𑀲𑀸 𑀦 𑀘𑀻𑀬𑀦𑁆𑀢𑀺 𑀬𑁂𑀧𑀺𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀸, 𑀢𑁂𑀧𑀺𑀲𑁆𑀲 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀭𑀸𑀕𑀤𑁄𑀲𑀲𑁆𑀲𑀸𑀧𑀺 𑀔𑀬𑀸 𑀭𑀸𑀕𑀸𑀦𑀼𑀲𑀬𑀲𑁆𑀲𑀧𑀺 𑀔𑀬𑀸 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲𑀸𑀧𑀺 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀼𑀧𑀸𑀤𑀺𑀲𑁂𑀲𑀸𑀧𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄.

𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀧𑁂𑀝𑀓𑁄𑀧𑀤𑁂𑀲𑁂

𑀳𑀸𑀭𑀲𑁆𑀲 𑀲𑀫𑁆𑀧𑀸𑀢𑀪𑀽𑀫𑀺 𑀲𑀫𑀢𑁆𑀢𑀸.

𑁮. 𑀲𑀼𑀢𑁆𑀢𑀯𑁂𑀪𑀗𑁆𑀕𑀺𑀬𑀁

𑁧𑁧𑁮. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑀘 𑀪𑀯𑀢𑀡𑁆𑀳𑀸𑀬 𑀘. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀢𑁆𑀢𑀸𑀦𑀁 𑀧𑀼𑀩𑁆𑀩𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀬𑁂 𑀲𑀢𑁆𑀢𑀸 𑀢𑀡𑁆𑀳𑀸𑀲𑀁𑀬𑁄𑀚𑀦𑀸, 𑀢𑁂 𑀅𑀚𑁆𑀛𑁄𑀲𑀸𑀦𑀩𑀳𑀼𑀮𑀸 𑀫𑀦𑁆𑀤𑀯𑀺𑀧𑀲𑁆𑀲𑀓𑀸. 𑀬𑁂 𑀧𑀦 𑀉𑀲𑁆𑀲𑀦𑁆𑀦𑀤𑀺𑀝𑁆𑀞𑀺𑀓𑀸 𑀲𑀢𑁆𑀢𑀸, 𑀢𑁂 𑀯𑀺𑀧𑀲𑁆𑀲𑀦𑀸𑀩𑀳𑀼𑀮𑀸 𑀫𑀦𑁆𑀤𑀚𑁆𑀛𑁄𑀲𑀸𑀦𑀸.

𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀲𑀢𑁆𑀢𑀲𑀜𑁆𑀜𑀸𑀪𑀺𑀦𑀺𑀯𑀺𑀝𑁆𑀞𑀸 𑀅𑀦𑀼𑀧𑁆𑀧𑀸𑀤𑀯𑀬𑀤𑀲𑁆𑀲𑀺𑀦𑁄. 𑀢𑁂 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀺 ‘‘𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺. 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀅𑀜𑁆𑀜𑁂𑀳𑀺 𑀔𑀦𑁆𑀥𑁂𑀳𑀺 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀺 𑀢𑀲𑁆𑀲 𑀉𑀲𑁆𑀲𑀦𑁆𑀦𑀤𑀺𑀝𑁆𑀞𑀺𑀓𑀸 𑀲𑀢𑁆𑀢𑀸 𑀯𑀺𑀧𑀲𑁆𑀲𑀫𑀸𑀦𑀸 𑀔𑀦𑁆𑀥𑁂 𑀉𑀚𑀼𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀢𑁂 𑀭𑀽𑀧𑀁 𑀅𑀢𑁆𑀢𑀓𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀬𑀁 𑀭𑀽𑀧𑀁, 𑀲𑁄 𑀅𑀢𑁆𑀢𑀸. 𑀬𑁄 𑀅𑀳𑀁, 𑀢𑀁 𑀭𑀽𑀧𑀁. 𑀲𑁄 𑀭𑀽𑀧𑀯𑀺𑀦𑀸𑀲𑀁 𑀧𑀲𑁆𑀲𑀢𑀺, 𑀅𑀬𑀁 𑀉𑀘𑁆𑀙𑁂𑀤𑀯𑀸𑀤𑀻. 𑀇𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀞𑀫𑀸𑀪𑀺𑀦𑀺𑀧𑀸𑀢𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄 𑀧𑀜𑁆𑀘 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺. 𑀏𑀓𑀫𑁂𑀓𑀫𑁆𑀳𑀺 𑀔𑀦𑁆𑀥𑁂 𑀢𑀻𑀳𑀺 𑀧𑀤𑁂𑀳𑀺 𑀧𑀘𑁆𑀙𑀺𑀫𑀓𑁂𑀳𑀺 𑀲𑀲𑁆𑀲𑀢𑀁 𑀪𑀚𑀢𑀺 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸𑀢𑁂 𑀧𑀩𑁆𑀩𑀚𑀺𑀢𑀸 𑀢𑀡𑁆𑀳𑀸𑀘𑀭𑀺𑀢𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀬𑁂 𑀘 𑀦𑀺𑀲𑁆𑀲𑀦𑁆𑀤𑁂𑀦 𑀤𑀺𑀝𑁆𑀞𑀺𑀘𑀭𑀺𑀢𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀬𑁂𑀯 𑀤𑀺𑀝𑁆𑀞𑀺𑀲𑀼𑀔𑁂𑀦 𑀏𑀢𑁆𑀢𑀸𑀯𑀢𑀸 𑀩𑀸𑀳𑀺𑀭𑀓𑁄 𑀧𑀬𑁄𑀕𑁄.

𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀬𑁂 𑀅𑀭𑀺𑀬𑀥𑀫𑁆𑀫𑀯𑀺𑀦𑀬𑀁 𑀑𑀢𑀭𑀦𑁆𑀢𑀺, 𑀢𑁂 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀅𑀭𑀺𑀬𑀁 𑀥𑀫𑁆𑀫𑀯𑀺𑀦𑀬𑀁 𑀑𑀢𑀭𑀦𑁆𑀢𑀺, 𑀢𑁂 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀳𑁄𑀦𑁆𑀢𑀺.

𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀓𑀸𑀫𑁂𑀲𑀼 𑀤𑁄𑀲𑀤𑀺𑀝𑁆𑀞𑀻, 𑀦 𑀘 𑀬𑁂 𑀓𑀸𑀫𑁂𑀲𑀼 𑀅𑀦𑀼𑀲𑀬𑀸 𑀲𑀫𑀽𑀳𑀢𑀸, 𑀢𑁂 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀜𑁆𑀜𑁄 𑀯𑀸 𑀲𑀸𑀯𑀓𑁄 𑀓𑀸𑀫𑁂𑀳𑀺 𑀦𑀢𑁆𑀣𑀺 𑀅𑀢𑁆𑀣𑁄𑀢𑀺 𑀢𑁂 𑀘 𑀧𑀼𑀩𑁆𑀩𑁂𑀬𑁂𑀯 𑀓𑀸𑀫𑁂𑀳𑀺 𑀅𑀦𑀢𑁆𑀣𑀺𑀓𑀸 𑀇𑀢𑀺 𑀓𑀸𑀫𑁂 𑀅𑀧𑁆𑀧𑀓𑀲𑀺𑀭𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺. 𑀢𑁂 𑀘𑁂𑀢𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀅𑀦𑀚𑁆𑀛𑁄𑀲𑀺𑀢𑀸. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀼𑀔𑀸 𑀧𑀝𑀺𑀧𑀤𑀸’’𑀢𑀺. 𑀬𑁂 𑀧𑀦 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀓𑀸𑀫𑁂𑀲𑀼 𑀅𑀚𑁆𑀛𑁄𑀲𑀺𑀢𑀸, 𑀢𑁂𑀲𑀁 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀜𑁆𑀜𑀢𑀭𑁄 𑀯𑀸 𑀪𑀺𑀓𑁆𑀔𑀼 𑀓𑀸𑀫𑁂𑀳𑀺 𑀦𑀢𑁆𑀣𑀺 𑀅𑀢𑁆𑀣𑁄𑀢𑀺, 𑀢𑁂 𑀧𑀺𑀬𑀭𑀽𑀧𑀁 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸’’𑀢𑀺. 𑀇𑀢𑀺 𑀇𑀫𑁂 𑀲𑀩𑁆𑀩𑀲𑀢𑁆𑀢𑀸 𑀤𑁆𑀯𑀻𑀲𑀼 𑀧𑀝𑀺𑀧𑀤𑀸𑀲𑀼 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺 𑀤𑀼𑀓𑁆𑀔𑀸𑀬𑀜𑁆𑀘 𑀲𑀼𑀔𑀸𑀬𑀜𑁆𑀘.

𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸, 𑀢𑁂 𑀤𑁆𑀯𑀺𑀥𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀘 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀘. 𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀲𑀼𑀔𑀸 𑀧𑀝𑀺𑀧𑀤𑀸’’𑀢𑀺. 𑀢𑀢𑁆𑀣 𑀬𑁂 𑀤𑀺𑀝𑁆𑀞𑀺𑀘𑀭𑀺𑀢𑀸 𑀲𑀢𑁆𑀢𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀧𑀞𑀫𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑀸𑀤𑀸𑀬 𑀤𑀦𑁆𑀥𑀢𑀭𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂 𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀤𑀦𑁆𑀥𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀼𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀤𑁆𑀯𑀺𑀥𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀘 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀘. 𑀢𑀢𑁆𑀣 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀔𑀺𑀧𑁆𑀧𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀬𑁂 𑀢𑀡𑁆𑀳𑀸𑀘𑀭𑀺𑀢𑀸 𑀲𑀢𑁆𑀢𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀧𑀞𑀫𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑀸𑀤𑀸𑀬 𑀤𑀦𑁆𑀥𑀢𑀭𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑁂 𑀤𑀼𑀓𑁆𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀤𑀦𑁆𑀥𑀜𑁆𑀘 𑀅𑀪𑀺𑀲𑀫𑁂𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸’’𑀢𑀺. 𑀇𑀫𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸𑀬𑁄 𑀅𑀧𑀜𑁆𑀘𑀫𑀸 𑀅𑀙𑀝𑁆𑀞𑀸. 𑀬𑁂 𑀳𑀺 𑀓𑁂𑀘𑀺 𑀦𑀺𑀩𑁆𑀩𑀼𑀢𑀸 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺 𑀯𑀸 𑀇𑀫𑀸𑀳𑀺 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀅𑀦𑀜𑁆𑀜𑀸𑀳𑀺 𑀅𑀬𑀁 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑁂𑀦 𑀓𑀺𑀮𑁂𑀲𑁂 𑀦𑀺𑀤𑁆𑀤𑀺𑀲𑀢𑀺. 𑀬𑀸 𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀅𑀭𑀺𑀬𑀥𑀫𑁆𑀫𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫 𑀦𑀬𑁄.

𑁧𑁧𑁯. 𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀉𑀧𑀸𑀤𑀸𑀦𑀸 𑀬𑁄𑀕𑀸 𑀕𑀦𑁆𑀣𑀸 𑀆𑀲𑀯𑀸 𑀑𑀖𑀸 𑀲𑀮𑁆𑀮𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀅𑀕𑀢𑀺𑀕𑀫𑀦𑀸𑀢𑀺, 𑀏𑀯𑀁 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀤𑀲 𑀧𑀤𑀸𑀦𑀺. 𑀅𑀬𑀁 𑀲𑀼𑀢𑁆𑀢𑀲𑁆𑀲 𑀲𑀁𑀲𑀦𑁆𑀤𑀦𑀸.

𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀢𑀢𑁆𑀣 𑀬𑁄 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀬𑁄 𑀘 𑀨𑀲𑁆𑀲𑁄 𑀆𑀳𑀸𑀭𑁄, 𑀇𑀫𑁂 𑀢𑀡𑁆𑀳𑀸𑀘𑀭𑀺𑀢𑁂𑀦 𑀧𑀳𑀸𑀢𑀩𑁆𑀩𑀸. 𑀢𑀢𑁆𑀣 𑀬𑁄 𑀘 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀬𑁄 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄, 𑀇𑀫𑁂 𑀤𑀺𑀝𑁆𑀞𑀺𑀘𑀭𑀺𑀢𑁂𑀦 𑀧𑀳𑀸𑀢𑀩𑁆𑀩𑀸.

𑀧𑀞𑀫𑁄 𑀆𑀳𑀸𑀭𑁄 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄, 𑀤𑀼𑀢𑀺𑀬𑁄 𑀆𑀳𑀸𑀭𑁄 𑀤𑀼𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀢𑀢𑀺𑀬𑁄 𑀆𑀳𑀸𑀭𑁄 𑀢𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄, 𑀘𑀢𑀼𑀢𑁆𑀣𑁄 𑀆𑀳𑀸𑀭𑁄 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑀜𑁆𑀘𑀫𑀸 𑀅𑀙𑀝𑁆𑀞𑀸. 𑀇𑀤𑀜𑁆𑀘 𑀧𑀫𑀸𑀡𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸.

𑀢𑀢𑁆𑀣 𑀧𑀞𑀫𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀓𑀸𑀫𑁂 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀓𑀸𑀫𑀼𑀧𑀸𑀤𑀸𑀦𑀁. 𑀤𑀼𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀅𑀦𑀸𑀕𑀢𑀁 𑀪𑀯𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀢𑀢𑀺𑀬𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀯𑀺𑀧𑀭𑀻𑀢𑁄 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀘𑀢𑀼𑀢𑁆𑀣𑁂 𑀯𑀺𑀧𑀮𑁆𑀮𑀸𑀲𑁂 𑀞𑀺𑀢𑁄 𑀔𑀦𑁆𑀥𑁂 𑀅𑀢𑁆𑀢𑀢𑁄 𑀉𑀧𑀸𑀤𑀺𑀬𑀢𑀺, 𑀇𑀤𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑁂 𑀞𑀺𑀢𑁄 𑀓𑀸𑀫𑁂 𑀅𑀪𑀺𑀚𑁆𑀛𑀸𑀬𑀢𑀺 𑀕𑀦𑁆𑀣𑀢𑀺, 𑀅𑀬𑀁 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄. 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑁂 𑀞𑀺𑀢𑁄 𑀩𑁆𑀬𑀸𑀧𑀸𑀤𑀁 𑀕𑀦𑁆𑀣𑀢𑀺, 𑀅𑀬𑀁 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁄. 𑀤𑀺𑀝𑁆𑀞𑀼𑀧𑀸𑀤𑀸𑀦𑁂 𑀞𑀺𑀢𑁄 𑀧𑀭𑀸𑀫𑀸𑀲𑀁 𑀕𑀦𑁆𑀣𑀢𑀺, 𑀅𑀬𑀁 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂 𑀞𑀺𑀢𑁄 𑀧𑀧𑀜𑁆𑀘𑀦𑁆𑀢𑁄 𑀕𑀦𑁆𑀣𑀢𑀺, 𑀅𑀬𑀁 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄.

𑀢𑀲𑁆𑀲 𑀕𑀦𑁆𑀣𑀺𑀢𑀸 𑀓𑀺𑀮𑁂𑀲𑀸 𑀆𑀲𑀯𑀦𑁆𑀢𑀺. 𑀓𑀺𑀜𑁆𑀘𑀺 𑀧𑀦 𑀯𑀼𑀘𑁆𑀘𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀬𑁂 𑀯𑀺𑀧𑁆𑀧𑀝𑀺𑀲𑀸𑀭𑀸 [𑀬𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 (𑀧𑀻. 𑀓.)] 𑀢𑁂 𑀅𑀦𑀼𑀲𑀬𑀸. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀓𑀸𑀫𑀸𑀲𑀯𑁄, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀪𑀯𑀸𑀲𑀯𑁄, 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀤𑀺𑀝𑁆𑀞𑀸𑀲𑀯𑁄, 𑀇𑀤𑀁 𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀅𑀯𑀺𑀚𑁆𑀚𑀸𑀲𑀯𑁄.

𑀢𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑁂𑀧𑀼𑀮𑁆𑀮𑀪𑀸𑀯𑀁 𑀕𑀢𑀸 𑀑𑀖𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀦𑁆𑀢𑀺 ‘‘𑀑𑀖𑀸’’𑀢𑀺. 𑀢𑀢𑁆𑀣 𑀓𑀸𑀫𑀸𑀲𑀯𑁄 𑀓𑀸𑀫𑁄𑀖𑁄, 𑀪𑀯𑀸𑀲𑀯𑁄 𑀪𑀯𑁄𑀖𑁄, 𑀅𑀯𑀺𑀚𑁆𑀚𑀸𑀲𑀯𑁄 𑀅𑀯𑀺𑀚𑁆𑀚𑁄𑀖𑁄, 𑀤𑀺𑀝𑁆𑀞𑀸𑀲𑀯𑁄 𑀤𑀺𑀝𑁆𑀞𑁄𑀖𑁄.

𑀢𑁂 𑀘𑀢𑁆𑀢𑀸𑀭𑁄 𑀑𑀖𑀸 𑀆𑀲𑀬𑀫𑀦𑀼𑀧𑀯𑀺𑀝𑁆𑀞𑀸 𑀅𑀦𑀼𑀲𑀬𑀲𑀳𑀕𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀲𑀮𑁆𑀮𑀸𑀢𑀺 𑀳𑀤𑀬𑀫𑀸𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀸. 𑀢𑀢𑁆𑀣 𑀓𑀸𑀫𑁄𑀖𑁄 𑀭𑀸𑀕𑀲𑀮𑁆𑀮𑀁, 𑀪𑀯𑁄𑀖𑁄 𑀤𑁄𑀲𑀲𑀮𑁆𑀮𑀁, 𑀅𑀯𑀺𑀚𑁆𑀚𑁄𑀖𑁄 𑀫𑁄𑀳𑀲𑀮𑁆𑀮𑀁, 𑀤𑀺𑀝𑁆𑀞𑁄𑀖𑁄 𑀤𑀺𑀝𑁆𑀞𑀺𑀲𑀮𑁆𑀮𑀁.

𑀇𑀫𑁂𑀳𑀺 𑀘𑀢𑀽𑀳𑀺 𑀲𑀮𑁆𑀮𑁂𑀳𑀺 𑀧𑀭𑀺𑀬𑀸𑀤𑀺𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺 𑀭𑀽𑀧𑁂 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀼. 𑀇𑀫𑀸 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀢𑀢𑁆𑀣 𑀭𑀸𑀕𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑀁 𑀭𑀽𑀧𑀽𑀧𑀕𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺. 𑀤𑁄𑀲𑀲𑀮𑁆𑀮𑁂𑀦 𑀯𑁂𑀤𑀦𑀽𑀧𑀕𑀁 𑀫𑁄𑀳𑀲𑀮𑁆𑀮𑁂𑀦 𑀲𑀜𑁆𑀜𑀽𑀧𑀕𑀁 𑀤𑀺𑀝𑁆𑀞𑀺𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑀁 𑀲𑀗𑁆𑀔𑀸𑀭𑀽𑀧𑀕𑀁 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺.

𑀘𑀢𑀽𑀳𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀳𑀺 𑀘𑀢𑀼𑀩𑁆𑀩𑀺𑀥𑀁 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀺 𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸. 𑀭𑀸𑀕𑁂𑀦 𑀙𑀦𑁆𑀤𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑁂𑀦 𑀤𑁄𑀲𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑁂𑀦 𑀫𑁄𑀳𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀤𑀺𑀝𑁆𑀞𑀺𑀬𑀸 𑀪𑀬𑀸 𑀅𑀕𑀢𑀺𑀁 𑀕𑀘𑁆𑀙𑀢𑀺. 𑀇𑀢𑀺 𑀇𑀤𑀜𑁆𑀘 𑀓𑀫𑁆𑀫𑀁 𑀇𑀫𑁂 𑀘 𑀓𑀺𑀮𑁂𑀲𑀸. 𑀅𑀬𑀁 𑀲𑀁𑀲𑀸𑀭𑀲𑁆𑀲 𑀳𑁂𑀢𑀼.

𑁧𑁨𑁦. 𑀢𑀢𑁆𑀣𑀺𑀫𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀬𑁄𑀕𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀓𑀸𑀫𑀸𑀲𑀯𑁄 𑀓𑀸𑀫𑁄𑀖𑁄 𑀭𑀸𑀕𑀲𑀮𑁆𑀮𑀁 𑀭𑀽𑀧𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀙𑀦𑁆𑀤𑀸 𑀅𑀕𑀢𑀺𑀕𑀫𑀦𑀁. 𑀅𑀬𑀁 𑀧𑀞𑀫𑀸 𑀤𑀺𑀲𑀸.

𑀨𑀲𑁆𑀲𑁄 𑀆𑀳𑀸𑀭𑁄 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀪𑀯𑀬𑁄𑀕𑁄𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄 𑀪𑀯𑀸𑀲𑀯𑁄 𑀪𑀯𑁄𑀖𑁄 𑀤𑁄𑀲𑀲𑀮𑁆𑀮𑀁 𑀯𑁂𑀤𑀦𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀤𑁄𑀲𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀺𑀬𑁄𑀕𑁄 𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁄 𑀤𑀺𑀝𑁆𑀞𑀸𑀲𑀯𑁄 𑀤𑀺𑀝𑁆𑀞𑁄𑀖𑁄 𑀤𑀺𑀝𑁆𑀞𑀺𑀲𑀮𑁆𑀮𑀁 𑀲𑀜𑁆𑀜𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀪𑀬𑀸 𑀅𑀕𑀢𑀺𑀕𑀫𑀦𑀁. 𑀅𑀬𑀁 𑀢𑀢𑀺𑀬𑀸 𑀤𑀺𑀲𑀸.

𑀯𑀺𑀜𑁆𑀜𑀸𑀡𑀸𑀳𑀸𑀭𑁄 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀅𑀯𑀺𑀚𑁆𑀚𑀸𑀬𑁄𑀕𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄 𑀅𑀯𑀺𑀚𑁆𑀚𑀸𑀲𑀯𑁄 𑀅𑀯𑀺𑀚𑁆𑀚𑁄𑀖𑁄 𑀫𑁄𑀳𑀲𑀮𑁆𑀮𑀁 𑀲𑀗𑁆𑀔𑀸𑀭𑀽𑀧𑀕𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀫𑁄𑀳𑀸 𑀅𑀕𑀢𑀺𑀕𑀫𑀦𑀁, 𑀅𑀬𑀁 𑀘𑀢𑀼𑀢𑁆𑀣𑀻 𑀤𑀺𑀲𑀸. 𑀇𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀧𑀞𑀫𑁂𑀦 𑀧𑀤𑁂𑀦 𑀧𑀞𑀫𑀸𑀬 𑀤𑀺𑀲𑀸𑀬 𑀆𑀮𑁄𑀓𑀦𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀮𑁄𑀓𑀦𑀸.

𑀘𑀢𑀽𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀅𑀓𑀼𑀲𑀮𑀧𑀓𑁆𑀔𑁂 𑀤𑀺𑀲𑀸𑀯𑀺𑀮𑁄𑀓𑀦𑀸 𑀓𑀺𑀮𑁂𑀲𑀁 𑀲𑀁𑀬𑁄𑀚𑁂𑀢𑁆𑀯𑀸 𑀅𑀬𑀁 𑀅𑀓𑀼𑀲𑀮𑀧𑀓𑁆𑀔𑁂 𑀤𑀺𑀲𑀸𑀯𑀺𑀮𑁄𑀓𑀦𑀸𑀬 𑀪𑀽𑀫𑀺 𑀧𑀜𑁆𑀘𑀦𑁆𑀦𑀁 𑀤𑀲𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀬𑀸𑀦𑀺 𑀧𑀞𑀫𑀸𑀦𑀺 𑀧𑀤𑀸𑀦𑀺 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀓𑁄 𑀅𑀢𑁆𑀣𑁄? 𑀏𑀓𑁄 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀏𑀯𑀁 𑀤𑀼𑀢𑀺𑀬𑀸 𑀏𑀯𑀁 𑀢𑀢𑀺𑀬𑀸 𑀏𑀯𑀁 𑀘𑀢𑀼𑀢𑁆𑀣𑀻. 𑀅𑀬𑀁 𑀧𑀞𑀫𑀸 𑀲𑀁𑀲𑀦𑁆𑀤𑀦𑀸.

𑀇𑀫𑀺𑀦𑀸 𑀧𑁂𑀬𑁆𑀬𑀸𑀮𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀘𑀢𑀽𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀸. 𑀢𑀢𑁄 𑀓𑀼𑀲𑀮𑀧𑀓𑁆𑀔𑁂 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑀸 𑀤𑀺𑀩𑁆𑀩𑁄 𑀩𑁆𑀭𑀳𑁆𑀫𑀸 𑀅𑀭𑀺𑀬𑁄 𑀆𑀦𑁂𑀜𑁆𑀚𑁄 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀅𑀥𑀺𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑀸𑀥𑀬𑁄 𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀺. 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀼𑀔𑀪𑀸𑀕𑀺𑀬𑀸 𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑀸 𑀦𑀸𑀜𑁆𑀜𑀢𑁆𑀭 𑀢𑀧𑀲𑀸 𑀦𑀸𑀜𑁆𑀜𑀢𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸 𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸 𑀘𑀢𑁆𑀢𑀸𑀭𑀺 𑀅𑀧𑁆𑀧𑀫𑀸𑀡𑀸𑀦𑀺.

𑀢𑀢𑁆𑀣 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀪𑀸𑀯𑀺𑀬𑀫𑀸𑀦𑀸 𑀩𑀳𑀼𑀮𑀻𑀓𑀭𑀺𑀬𑀫𑀸𑀦𑀸 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀯𑀺𑀳𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑁄 𑀯𑀺𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀞𑀫𑀁 𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀙𑀦𑁆𑀤𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀙𑀦𑁆𑀤𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀭𑀺𑀧𑀼𑀡𑁆𑀡𑁄 𑀧𑀞𑀫𑀁 𑀫𑁂𑀢𑁆𑀢𑀸𑀅𑀧𑁆𑀧𑀫𑀸𑀡𑀁 𑀧𑀭𑀺𑀧𑀽𑀭𑁂𑀢𑀺. 𑀏𑀯𑀁 𑀬𑀸𑀯 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑁄 𑀘𑀢𑀼𑀢𑁆𑀣𑀁 𑀅𑀧𑁆𑀧𑀫𑀸𑀡𑀁 𑀧𑀭𑀺𑀧𑀽𑀭𑁂𑀢𑀺.

𑀢𑀢𑁆𑀣 𑀧𑀞𑀫𑀸 𑀘 𑀧𑀝𑀺𑀧𑀤𑀸 𑀧𑀞𑀫𑀜𑁆𑀘 𑀛𑀸𑀦𑀁 𑀧𑀞𑀫𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀧𑀞𑀫𑁄 𑀘 𑀯𑀺𑀳𑀸𑀭𑁄 𑀧𑀞𑀫𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀞𑀫𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀜𑁆𑀘 𑀙𑀦𑁆𑀤𑀲𑀫𑀸𑀥𑀺 𑀘 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘 𑀫𑁂𑀢𑁆𑀢𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀧𑀞𑀫𑀸 𑀤𑀺𑀲𑀸.

𑀤𑀼𑀓𑁆𑀔𑀸 𑀘 [𑀤𑀼𑀢𑀺𑀬𑀸 𑀘 (𑀓.)] 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀤𑀼𑀢𑀺𑀬𑁄 𑀘 𑀯𑀺𑀳𑀸𑀭𑁄 𑀤𑀼𑀢𑀺𑀬𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀤𑀼𑀢𑀺𑀬𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀘𑀺𑀢𑁆𑀢𑀲𑀫𑀸𑀥𑀺 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀓𑀭𑀼𑀡𑀸 𑀘 𑀅𑀧𑁆𑀧𑀫𑀸𑀡𑀁, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀲𑀼𑀔𑀸 𑀘 [𑀢𑀢𑀺𑀬𑀸 𑀘 (𑀓.)] 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀢𑀢𑀺𑀬𑁄 𑀘 𑀯𑀺𑀳𑀸𑀭𑁄 𑀢𑀢𑀺𑀬𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀢𑀢𑀺𑀬𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀜𑁆𑀘 𑀯𑀻𑀭𑀺𑀬𑀲𑀫𑀸𑀥𑀺 𑀘 𑀩𑁄𑀚𑁆𑀛𑀗𑁆𑀕𑀸 𑀘 𑀫𑀼𑀤𑀺𑀢𑀸 𑀘 𑀅𑀧𑁆𑀧𑀫𑀸𑀡𑀁. 𑀅𑀬𑀁 𑀢𑀢𑀺𑀬𑀸 𑀤𑀺𑀲𑀸.

𑀲𑀼𑀔𑀸 𑀘 [𑀘𑀢𑀼𑀢𑁆𑀣𑀻 𑀘 (𑀓.)] 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀲𑀢𑀺𑀧𑀝𑁆𑀞𑀸𑀦𑀁 𑀘𑀢𑀼𑀢𑁆𑀣𑁄 𑀘 𑀯𑀺𑀳𑀸𑀭𑁄 𑀘𑀢𑀼𑀢𑁆𑀣𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀘𑀢𑀼𑀢𑁆𑀣𑁄 𑀘 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀜𑁆𑀘 𑀯𑀻𑀫𑀁𑀲𑀸𑀲𑀫𑀸𑀥𑀺 𑀘 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑁄 𑀘 𑀉𑀧𑁂𑀓𑁆𑀔𑀸 𑀅𑀧𑁆𑀧𑀫𑀸𑀡𑀜𑁆𑀘. 𑀅𑀬𑀁 𑀘𑀢𑀼𑀢𑁆𑀣𑀻 𑀤𑀺𑀲𑀸. 𑀇𑀫𑀸𑀲𑀁 𑀘𑀢𑀲𑁆𑀲𑀦𑁆𑀦𑀁 𑀤𑀺𑀲𑀸𑀦𑀁 𑀆𑀮𑁄𑀓𑀦𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀮𑁄𑀓𑀦𑁄 𑀦𑀸𑀫 𑀦𑀬𑁄.

𑀢𑀢𑁆𑀣𑀸𑀬𑀁 𑀬𑁄𑀚𑀦𑀸. 𑀘𑀢𑁆𑀢𑀸𑀭𑁄 𑀘 𑀆𑀳𑀸𑀭𑀸 𑀘𑀢𑀲𑁆𑀲𑁄 𑀘 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑀺 𑀘 𑀉𑀧𑀸𑀤𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑁄 𑀘 𑀬𑁄𑀕𑀸 𑀯𑀺𑀳𑀸𑀭𑀸 𑀘, 𑀕𑀦𑁆𑀣𑀸 𑀘 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘, 𑀆𑀲𑀯𑀸 𑀘 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸 𑀘, 𑀑𑀖𑀸 𑀘 𑀅𑀥𑀺𑀝𑁆𑀞𑀸𑀦𑀸𑀦𑀺 𑀘, 𑀲𑀮𑁆𑀮𑀸 𑀘 𑀲𑀫𑀸𑀥𑀬𑁄, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘𑀢𑁆𑀢𑀸𑀭𑁄 𑀘 𑀲𑀼𑀔𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀘 𑀅𑀕𑀢𑀺𑀕𑀫𑀦𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀅𑀧𑁆𑀧𑀫𑀸𑀡𑀸𑀦𑀺 𑀇𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀬𑁄𑀚𑀦𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀮𑁄𑀓𑀦𑁄 𑀦𑀬𑁄.

𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀭𑀺𑀬𑁄𑀲𑀸𑀦𑀁, 𑀬𑁄 𑀘 𑀥𑀫𑁆𑀫𑁄 𑀓𑀼𑀲𑀮𑀸𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀧𑀞𑀫𑁄 𑀤𑀺𑀲𑀸𑀦𑀺𑀤𑁆𑀤𑁂𑀲𑁄, 𑀇𑀫𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀭𑀺𑀬𑁄𑀲𑀸𑀦𑀁 𑀤𑀼𑀢𑀺𑀬𑀁 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀢𑀢𑀺𑀬𑀁 𑀅𑀦𑀸𑀕𑀸𑀫𑀺𑀨𑀮𑀁, 𑀘𑀢𑀼𑀢𑁆𑀣𑀁 𑀅𑀭𑀳𑀢𑁆𑀢𑀨𑀮𑀁.

𑀢𑀢𑁆𑀣 𑀓𑀢𑀫𑁄 𑀢𑀺𑀧𑀼𑀓𑁆𑀔𑀮𑁄 𑀦𑀬𑁄? 𑀬𑁂 𑀘 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸, 𑀬𑁂 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸.

𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑁄 𑀧𑀼𑀕𑁆𑀕𑀮𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀬𑁄 𑀘 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺. 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀯𑀦𑁆𑀢𑀺. 𑀢𑀢𑁆𑀣 𑀬𑁄 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑁄 𑀧𑀘𑁆𑀙𑀺𑀫𑁄 𑀧𑀼𑀕𑁆𑀕𑀮𑁄 𑀲𑀸𑀥𑀸𑀭𑀡𑁄, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑁄 𑀧𑀼𑀕𑁆𑀕𑀮𑁄 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀦𑀺𑀬𑁆𑀬𑀸𑀢𑀺, 𑀅𑀬𑀁 𑀦𑁂𑀬𑁆𑀬𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀪𑀯𑀺𑀢𑁆𑀯𑀸 𑀢𑀻𑀡𑀺 𑀳𑁄𑀦𑁆𑀢𑀺, 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸 𑀯𑀺𑀧𑀲𑁆𑀲𑀦𑀸, 𑀦𑁂𑀬𑁆𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀣𑁄, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸. 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀫𑀼𑀤𑀼𑀓𑀸 𑀤𑁂𑀲𑀦𑀸, 𑀦𑁂𑀬𑁆𑀬𑀲𑁆𑀲 𑀢𑀺𑀓𑁆𑀔𑀸 𑀤𑁂𑀲𑀦𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀢𑀺𑀓𑁆𑀔𑀫𑀼𑀤𑀼𑀓𑀸 𑀤𑁂𑀲𑀦𑀸.

𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀦𑁂𑀬𑁆𑀬𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀇𑀢𑀺 𑀇𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀸𑀦𑀁.

𑀢𑀢𑁆𑀣 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀢𑀬𑁄 𑀨𑀲𑁆𑀲𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀢𑀬𑁄 𑀉𑀧𑀯𑀺𑀘𑀸𑀭𑀸 𑀢𑀬𑁄 𑀲𑀁𑀓𑀺𑀮𑁂𑀲𑀸 𑀢𑀬𑁄 𑀯𑀺𑀢𑀓𑁆𑀓𑀸 𑀢𑀬𑁄 𑀧𑀭𑀺𑀴𑀸𑀳𑀸 𑀢𑀻𑀡𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸𑀢𑀺.

𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀬𑁄 𑀨𑀲𑁆𑀲𑀸𑀢𑀺 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄. 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀢𑀬𑁄 𑀉𑀧𑀯𑀺𑀘𑀸𑀭𑀸𑀢𑀺 𑀲𑁄𑀫𑀦𑀲𑁆𑀲𑁄𑀧𑀯𑀺𑀘𑀸𑀭𑁄 𑀤𑁄𑀫𑀦𑀲𑁆𑀲𑁄𑀧𑀯𑀺𑀘𑀸𑀭𑁄 𑀉𑀧𑁂𑀓𑁆𑀔𑁄𑀧𑀯𑀺𑀘𑀸𑀭𑁄. 𑀢𑀬𑁄 𑀲𑀁𑀓𑀺𑀮𑁂𑀲𑀸𑀢𑀺 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄. 𑀢𑀬𑁄 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀬𑁄 𑀧𑀭𑀺𑀴𑀸𑀳𑀸𑀢𑀺 𑀭𑀸𑀕𑀚𑁄 𑀤𑁄𑀲𑀚𑁄 𑀫𑁄𑀳𑀚𑁄. 𑀢𑀻𑀡𑀺 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻𑀢𑀺 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀯𑀬𑁄. 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸 𑀲𑀗𑁆𑀔𑀢𑀤𑀼𑀓𑁆𑀔𑀢𑀸.

𑀢𑀢𑁆𑀣 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀓𑀼𑀢𑁄 𑀲𑀫𑀼𑀝𑁆𑀞𑀺𑀢𑀁? 𑀢𑀺𑀯𑀺𑀥𑀁 𑀆𑀭𑀫𑁆𑀫𑀡𑀁 𑀫𑀦𑀸𑀧𑀺𑀓𑀁 𑀅𑀫𑀦𑀸𑀧𑀺𑀓𑀁 𑀉𑀧𑁂𑀓𑁆𑀔𑀸𑀞𑀸𑀦𑀺𑀬𑀜𑁆𑀘. 𑀢𑀢𑁆𑀣 𑀫𑀦𑀸𑀧𑀺𑀓𑁂𑀦 𑀆𑀭𑀫𑁆𑀫𑀡𑁂𑀦 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀲𑀫𑀼𑀝𑁆𑀞𑀳𑀢𑀺. 𑀇𑀢𑀺 𑀫𑀦𑀸𑀧𑀺𑀓𑀸 𑀆𑀭𑀫𑁆𑀫𑀡𑀸 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀲𑀼𑀔𑀯𑁂𑀤𑀦𑀸, 𑀲𑀼𑀔𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀭𑀸𑀕𑁄, 𑀭𑀸𑀕𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀓𑀸𑀫𑀯𑀺𑀢𑀓𑁆𑀓𑁄, 𑀓𑀸𑀫𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀭𑀸𑀕𑀚𑁄 𑀧𑀭𑀺𑀴𑀸𑀳𑁄 𑀭𑀸𑀕𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀉𑀧𑁆𑀧𑀸𑀤𑁄 𑀲𑀗𑁆𑀔𑀢𑀮𑀓𑁆𑀔𑀡𑁄, 𑀉𑀧𑁆𑀧𑀸𑀤𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸.

𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁 𑀓𑀼𑀢𑁄 𑀲𑀫𑀼𑀝𑁆𑀞𑀺𑀢𑀁? 𑀅𑀫𑀦𑀸𑀧𑀺𑀓𑁂𑀦 𑀆𑀭𑀫𑁆𑀫𑀡𑁂𑀦 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁 𑀲𑀫𑀼𑀝𑁆𑀞𑀺𑀢𑀁. 𑀇𑀢𑀺 𑀅𑀫𑀦𑀸𑀧𑀺𑀓𑀸 𑀆𑀭𑀫𑁆𑀫𑀡𑀸 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀤𑀼𑀓𑁆𑀔𑀯𑁂𑀤𑀦𑀸, 𑀤𑀼𑀓𑁆𑀔𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄, 𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀤𑁄𑀲𑁄, 𑀤𑁄𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀤𑁄𑀲𑀚𑁄 𑀧𑀭𑀺𑀴𑀸𑀳𑁄, 𑀤𑁄𑀲𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀯𑁂𑀤𑀦𑀸.

𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑀓𑀼𑀢𑁄 𑀲𑀫𑀼𑀝𑁆𑀞𑀺𑀢𑀁? 𑀉𑀧𑁂𑀓𑁆𑀔𑀸𑀞𑀸𑀦𑀺𑀬𑁂𑀦 𑀆𑀭𑀫𑁆𑀫𑀡𑁂𑀦 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑀲𑀫𑀼𑀝𑁆𑀞𑀺𑀢𑀁. 𑀇𑀢𑀺 𑀉𑀧𑁂𑀓𑁆𑀔𑀸𑀞𑀸𑀦𑀺𑀬𑀸 𑀆𑀭𑀫𑁆𑀫𑀡𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑁄, 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀫𑁄𑀳𑁄, 𑀫𑁄𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀫𑁄𑀳𑀚𑁄 𑀧𑀭𑀺𑀴𑀸𑀳𑁄, 𑀫𑁄𑀳𑀚𑀁 𑀧𑀭𑀺𑀴𑀸𑀳𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀯𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀁, 𑀯𑀬𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑁂 𑀲𑀗𑁆𑀔𑀢𑀤𑀼𑀓𑁆𑀔𑀢𑀸, 𑀇𑀢𑀺 𑀅𑀬𑀁 𑀢𑀺𑀡𑁆𑀡𑀁 𑀓𑀺𑀮𑁂𑀲𑀸𑀦𑀁 𑀦𑀺𑀤𑁆𑀤𑁂𑀲𑁄, 𑀅𑀬𑀁 𑀯𑀼𑀘𑁆𑀘𑀢𑁂 𑀓𑀼𑀲𑀮𑀧𑀓𑁆𑀔𑁂 𑀢𑀺𑀧𑀼𑀓𑁆𑀔𑀮𑁄 𑀦𑀬𑁄.

𑀇𑀢𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀦 𑀘𑀢𑀼𑀢𑁆𑀣𑀸𑀦𑀺 𑀦 𑀧𑀜𑁆𑀘𑀫𑀸𑀦𑀺, 𑀢𑀬𑁄 𑀨𑀲𑁆𑀲𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀬𑀸𑀯 𑀲𑀗𑁆𑀔𑀢𑀤𑀼𑀓𑁆𑀔𑀢𑀸𑀢𑀺, 𑀬𑁄 𑀓𑁄𑀘𑀺 𑀅𑀓𑀼𑀲𑀮𑀧𑀓𑁆𑀔𑁄, 𑀲𑀩𑁆𑀩𑁄 𑀲𑁄 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀲𑀫𑁄𑀲𑀭𑀢𑀺.

𑀢𑀢𑁆𑀣 𑀓𑀢𑀫𑁄 𑀓𑀼𑀲𑀮𑀧𑀓𑁆𑀔𑁄? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸. 𑀢𑀬𑁄 𑀲𑀫𑀸𑀥𑀻 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄…𑀧𑁂… 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸…𑀧𑁂… 𑀲𑀺𑀓𑁆𑀔𑀸. 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁. 𑀢𑀬𑁄 𑀯𑀺𑀢𑀓𑁆𑀓𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄…𑀧𑁂… 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀬𑁄 𑀉𑀧𑀯𑀺𑀘𑀸𑀭𑀸 𑀦𑁂𑀓𑁆𑀔𑀫𑁆𑀫𑀽𑀧𑀯𑀺𑀘𑀸𑀭𑁄 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑁄 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑁄. 𑀢𑀺𑀲𑁆𑀲𑁄 𑀏𑀲𑀦𑀸 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸. 𑀢𑀬𑁄 𑀔𑀦𑁆𑀥𑀸 𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄.

𑀢𑀢𑁆𑀣 𑀬𑀁 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀢𑀁 𑀲𑀼𑀢𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀁 𑀧𑀭𑀺𑀧𑀽𑀭𑁂𑀢𑀺, 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀧𑀭𑀺𑀧𑀼𑀡𑁆𑀡𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀦𑁂𑀓𑁆𑀔𑀫𑁆𑀫𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀦𑁂𑀓𑁆𑀔𑀫𑁆𑀫𑀽𑀧𑀯𑀺𑀘𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀓𑀸𑀫𑁂𑀲𑀦𑀁 𑀧𑀚𑀳𑀢𑀺, 𑀓𑀸𑀫𑁂𑀲𑀦𑀧𑁆𑀧𑀳𑀸𑀦𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑀘𑀺𑀦𑁆𑀢𑀸𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀧𑀭𑀺𑀧𑀼𑀡𑁆𑀡𑁄 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀪𑀯𑁂𑀲𑀦𑀁 𑀧𑀚𑀳𑀢𑀺, 𑀪𑀯𑁂𑀲𑀦𑀧𑁆𑀧𑀳𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁 𑀪𑀸𑀯𑀦𑀸𑀫𑀬𑀺𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀪𑀸𑀯𑀦𑀸𑀫𑀬𑀻𑀧𑀜𑁆𑀜𑀸 𑀧𑀭𑀺𑀧𑀼𑀡𑁆𑀡𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀧𑀭𑀺𑀧𑀼𑀡𑁆𑀡𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀧𑀭𑀺𑀧𑀼𑀡𑁆𑀡𑀸 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀜𑁆𑀜𑀸𑀢𑀸𑀯𑀺𑀦𑁄 𑀇𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀁 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀳𑀺𑀁𑀲𑀽𑀧𑀯𑀺𑀘𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀭𑀺𑀧𑀼𑀡𑁆𑀡𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀺.

𑀇𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀓𑀼𑀲𑀮𑀧𑀓𑁆𑀔𑀺𑀓𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀢𑀻𑀳𑀺 𑀢𑀺𑀓𑀦𑀺𑀤𑁆𑀤𑁂𑀲𑁂𑀳𑀺 𑀦𑀺𑀤𑁆𑀤𑀺𑀲𑀺𑀬𑀦𑁆𑀢𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀁. 𑀢𑀢𑁆𑀣 𑀧𑀞𑀫𑁂𑀦 𑀅𑀧𑁆𑀧𑀡𑀺𑀳𑀺𑀢𑀁, 𑀤𑀼𑀢𑀺𑀬𑁂𑀦 𑀲𑀼𑀜𑁆𑀜𑀢𑀁, 𑀢𑀢𑀺𑀬𑁂𑀦 𑀅𑀦𑀺𑀫𑀺𑀢𑁆𑀢𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀼𑀢𑀺𑀬𑁄 𑀢𑀺𑀧𑀼𑀓𑁆𑀔𑀮𑁄 𑀦𑀸𑀫 𑀦𑀬𑁄.

𑀢𑀢𑁆𑀣 𑀬𑁂 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄𑀢𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀬𑁂 𑀘 𑀧𑀼𑀕𑁆𑀕𑀮𑀸 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬, 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀬𑁂 𑀘 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬, 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀦𑁆𑀢𑀺, 𑀇𑀫𑁂 𑀘𑀢𑁆𑀢𑀸𑀭𑁄 𑀢𑁂𑀦 𑀯𑀺𑀲𑁂𑀲𑁂𑀦 𑀤𑁆𑀯𑁂 𑀪𑀯𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘 𑀢𑀡𑁆𑀳𑀸𑀘𑀭𑀺𑀢𑁄 𑀘. 𑀇𑀫𑁂 𑀘𑀢𑁆𑀢𑀸𑀭𑁄 𑀪𑀯𑀺𑀢𑁆𑀯𑀸 𑀢𑀬𑁄 𑀪𑀯𑀦𑁆𑀢𑀺, 𑀢𑀬𑁄 𑀪𑀯𑀺𑀢𑁆𑀯𑀸 𑀤𑁆𑀯𑁂 𑀪𑀯𑀦𑁆𑀢𑀺. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘, 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘, 𑀅𑀲𑁆𑀲𑀢𑀺 𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘, 𑀦𑀻𑀯𑀭𑀡𑀸𑀦𑀺 𑀘 𑀲𑀁𑀬𑁄𑀚𑀦𑀸𑀦𑀺 𑀘, 𑀅𑀚𑁆𑀛𑁄𑀲𑀸𑀦𑀜𑁆𑀘 𑀅𑀪𑀺𑀦𑀺𑀯𑁂𑀲𑁄 𑀘, 𑀅𑀳𑀁𑀓𑀸𑀭𑁄 𑀘 𑀫𑀫𑀁𑀓𑀸𑀭𑁄 𑀘, 𑀅𑀲𑁆𑀲𑀤𑁆𑀥𑀺𑀬𑀜𑁆𑀘 𑀤𑁄𑀯𑀘𑀲𑁆𑀲𑀜𑁆𑀘, 𑀓𑁄𑀲𑀚𑁆𑀚𑀜𑁆𑀘 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄, 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀪𑀺𑀚𑁆𑀛𑀸 𑀘, 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀅𑀲𑀫𑀸𑀧𑀢𑁆𑀢𑀺 𑀘.

𑀢𑀢𑁆𑀣 𑀅𑀯𑀺𑀚𑁆𑀚𑀸 𑀘 𑀅𑀳𑀺𑀭𑀺𑀓𑀜𑁆𑀘 𑀅𑀲𑁆𑀲𑀢𑀺 𑀘 𑀦𑀻𑀯𑀭𑀡𑀸𑀦𑀺 𑀘 𑀅𑀚𑁆𑀛𑁄𑀲𑀸𑀦𑀜𑁆𑀘 𑀅𑀳𑀁𑀓𑀸𑀭𑁄 𑀘 𑀅𑀲𑁆𑀲𑀤𑁆𑀥𑀺𑀬𑀜𑁆𑀘 𑀓𑁄𑀲𑀚𑁆𑀚𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘, 𑀅𑀬𑀁 𑀏𑀓𑀸 𑀤𑀺𑀲𑀸.

𑀢𑀡𑁆𑀳𑀸 𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀁𑀬𑁄𑀚𑀦𑀸𑀦𑀺 𑀘 𑀅𑀪𑀺𑀦𑀺𑀯𑁂𑀲𑁄 𑀘 𑀫𑀫𑀁𑀓𑀸𑀭𑁄 𑀘 𑀤𑁄𑀯𑀘𑀲𑁆𑀲𑀢𑀸 𑀘 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀘 𑀅𑀪𑀺𑀚𑁆𑀛𑀸 𑀘 𑀅𑀲𑀫𑀸𑀧𑀢𑁆𑀢𑀺 𑀘, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸. 𑀤𑀲𑀦𑁆𑀦𑀁 𑀤𑀼𑀓𑀸𑀦𑀁 𑀤𑀲 𑀧𑀤𑀸𑀦𑀺 𑀧𑀞𑀫𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀲𑀁𑀔𑀺𑀢𑁆𑀢𑁂𑀦 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑀺 𑀧𑀝𑀺𑀧𑀓𑁆𑀔𑁂 𑀓𑀡𑁆𑀳𑀧𑀓𑁆𑀔𑀲𑁆𑀲 𑀲𑀩𑁆𑀩𑁂𑀲𑀁 𑀤𑀼𑀓𑀸𑀦𑀁 𑀤𑀲 𑀧𑀤𑀸𑀦𑀺 𑀤𑀼𑀢𑀺𑀬𑀓𑀸𑀦𑀺, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸.

𑀇𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑀦𑀺𑀤𑁆𑀤𑁂𑀲𑁄, 𑀅𑀬𑀁 𑀲𑀫𑀼𑀤𑀬𑁄. 𑀬𑀁 𑀢𑀁 𑀥𑀫𑁆𑀫𑀁 𑀅𑀚𑁆𑀛𑀸𑀯𑀲𑀢𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀇𑀤𑀁 𑀤𑀼𑀓𑁆𑀔𑀁 𑀇𑀢𑀺 𑀅𑀬𑀜𑁆𑀘 𑀲𑀫𑀼𑀤𑀬𑁄, 𑀇𑀤𑀜𑁆𑀘 𑀤𑀼𑀓𑁆𑀔𑀁, 𑀇𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀜𑁆𑀘 𑀲𑀫𑀼𑀤𑀬𑁄 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀧𑀞𑀫𑀦𑀺𑀤𑁆𑀤𑁂𑀲𑁄.

𑀢𑀢𑁆𑀣 𑀓𑀢𑀫𑁄 𑀓𑀼𑀲𑀮𑀧𑀓𑁆𑀔𑁄? 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘, 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘, 𑀅𑀳𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘 𑀫𑀫𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄, 𑀲𑀫𑁆𑀫𑀸𑀲𑀢𑀺 𑀘 𑀲𑀫𑁆𑀫𑀸𑀲𑀫𑀸𑀥𑀺 𑀘, 𑀧𑀜𑁆𑀜𑀸 𑀘 𑀦𑀺𑀩𑁆𑀩𑀺𑀤𑀸 𑀘, 𑀲𑀫𑀸𑀧𑀢𑁆𑀢𑀺 𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘, 𑀲𑁄𑀫𑀦𑀲𑁆𑀲𑀜𑁆𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀘.

𑀢𑀢𑁆𑀣 𑀲𑀫𑀣𑁄 𑀘 𑀯𑀺𑀚𑁆𑀚𑀸 𑀘 𑀲𑀢𑀺 𑀘 𑀳𑀺𑀭𑀻 𑀘 𑀅𑀳𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀲𑀫𑁆𑀫𑀸𑀲𑀢𑀺 𑀘 𑀧𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺 𑀘 𑀲𑁄𑀫𑀦𑀲𑁆𑀲𑀜𑁆𑀘, 𑀇𑀫𑁂 𑀥𑀫𑁆𑀫𑀸 𑀏𑀓𑀸 𑀤𑀺𑀲𑀸. 𑀯𑀺𑀧𑀲𑁆𑀲𑀦𑀸 𑀘 𑀘𑀭𑀡𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀑𑀢𑁆𑀢𑀧𑁆𑀧𑀜𑁆𑀘 𑀫𑀫𑀁𑀓𑀸𑀭𑀧𑁆𑀧𑀳𑀸𑀦𑀜𑁆𑀘 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺 𑀘 𑀦𑀺𑀩𑁆𑀩𑀺𑀤𑀸 𑀘 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀘, 𑀅𑀬𑀁 𑀤𑀼𑀢𑀺𑀬𑀸 𑀤𑀺𑀲𑀸. 𑀇𑀢𑀺 𑀓𑀼𑀲𑀮𑀧𑀓𑁆𑀔𑁂 𑀘 𑀅𑀓𑀼𑀲𑀮𑀧𑀓𑁆𑀔𑁂 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀧𑀦 𑀦𑀬𑀲𑁆𑀲 𑀘𑀢𑀲𑁆𑀲𑁄 𑀤𑀺𑀲𑀸.

𑀢𑀸𑀲𑀼 𑀬𑀸𑀦𑀺 𑀅𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀞𑀫𑀸𑀦𑀺 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀓𑀼𑀲𑀮𑁂𑀳𑀺 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀓𑀼𑀲𑀮𑀧𑀓𑁆𑀔𑁂 𑀤𑀼𑀢𑀺𑀬𑁂𑀳𑀺 𑀧𑀤𑁂𑀳𑀺 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀬𑀸𑀦𑀺 𑀅𑀓𑀼𑀲𑀮𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀸𑀦𑀺 𑀅𑀓𑀼𑀲𑀮𑀧𑀤𑀸𑀦𑀺 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀞𑀫𑁂𑀳𑀺 𑀧𑀤𑁂𑀳𑀺 𑀧𑀳𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀳𑀸𑀦𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀧𑀞𑀫𑁄 𑀦𑀬𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫. 𑀅𑀝𑁆𑀞 𑀧𑀤𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀓𑀼𑀲𑀮𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀅𑀓𑀼𑀲𑀮𑀸𑀦𑀺 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀫𑀽𑀮𑀧𑀤𑀸𑀦𑀺, 𑀅𑀢𑁆𑀣𑀦𑀬𑁂𑀦 𑀤𑀼𑀢𑀺𑀬𑁄 𑀢𑀺𑀧𑀼𑀓𑁆𑀔𑀮𑁄. 𑀲𑁄 𑀙𑀳𑀺 𑀥𑀫𑁆𑀫𑁂𑀳𑀺 𑀦𑁂𑀢𑀺 𑀓𑀼𑀲𑀮𑀫𑀽𑀮𑀸𑀦𑀺 𑀘 𑀦𑁂𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀘, 𑀇𑀢𑀺 𑀇𑀫𑀸𑀦𑀺 𑀙 𑀧𑀤𑀸𑀦𑀺 𑀧𑀼𑀭𑀺𑀫𑀓𑀸𑀦𑀺 𑀘 𑀅𑀝𑁆𑀞 𑀫𑀽𑀮𑀧𑀤𑀸𑀦𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀧𑀤𑀸𑀦𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀽𑀮𑀧𑀤𑀸𑀦𑀁. 𑀢𑀢𑁆𑀣 𑀬𑁄 𑀧𑀘𑁆𑀙𑀺𑀫𑀓𑁄 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀲𑁄 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀦𑁂𑀢𑀺. 𑀅𑀯𑀺𑀚𑁆𑀚𑀸𑀬 𑀘 𑀢𑀡𑁆𑀳𑀸𑀬 𑀘 𑀲𑀫𑀣𑁂𑀦 𑀘 𑀯𑀺𑀧𑀲𑁆𑀲𑀦𑀸𑀬 𑀘, 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀢𑀻𑀲𑀼 𑀦𑀬𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀢𑀢𑁆𑀣 𑀬𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀢𑀢𑁆𑀣 𑀲𑀩𑁆𑀩𑀁 𑀓𑀼𑀲𑀮𑀁 𑀲𑀫𑁄𑀲𑀭𑀢𑀺. 𑀢𑁂𑀲𑀜𑁆𑀘 𑀦𑀯𑀦𑁆𑀦𑀁 𑀫𑀽𑀮𑀸𑀦𑀁 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑁂 𑀢𑀻𑀡𑀺 𑀢𑀺𑀧𑀼𑀓𑁆𑀔𑀮𑁂 𑀤𑁆𑀯𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑁂, 𑀇𑀘𑁆𑀘𑁂𑀢𑁂 𑀓𑀼𑀲𑀮𑀲𑁆𑀲 𑀧𑀓𑁆𑀔𑀸. 𑀢𑀢𑁆𑀣 𑀬𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀢𑀢𑁆𑀣 𑀲𑀩𑁆𑀩𑀁 𑀓𑀼𑀲𑀮𑀁 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂 𑀦𑀬𑁂 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀢𑀻𑀡𑀺 𑀢𑀺𑀧𑀼𑀓𑁆𑀔𑀮𑁂 𑀤𑁆𑀯𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑁂 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀢𑀢𑁆𑀣 𑀬𑀸𑀦𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁂 𑀦𑀬𑁂 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑀢𑁆𑀣 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀫𑁄𑀲𑀭𑀦𑁆𑀢𑀺. 𑀬𑀣𑀸 𑀓𑀣𑀁, 𑀲𑀫𑀣𑁄 𑀘 𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘 𑀤𑀼𑀓𑁆𑀔𑀲𑀜𑁆𑀜𑀸 𑀘 𑀇𑀫𑀸𑀦𑀺 𑀓𑀼𑀲𑀮𑀧𑀓𑁆𑀔𑁂 𑀧𑀜𑁆𑀘 𑀧𑀤𑀸𑀦𑀺 𑀲𑀫𑀣𑀁 𑀪𑀚𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸 𑀘 𑀅𑀫𑁄𑀳𑁄 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀯𑀺𑀧𑀲𑁆𑀲𑀦𑀁 𑀪𑀚𑀦𑁆𑀢𑀺. 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀬𑁄𑀚𑀺𑀢𑀸𑀦𑀺, 𑀢𑀢𑁆𑀣 𑀅𑀓𑀼𑀲𑀮𑀧𑀓𑁆𑀔𑁂 𑀦𑀯𑀦𑁆𑀦𑀁 𑀅𑀓𑀼𑀲𑀮𑀫𑀽𑀮𑀧𑀤𑀸𑀦𑀁 𑀬𑀸 𑀘 𑀢𑀡𑁆𑀳𑀸 𑀬𑁄 𑀘 𑀮𑁄𑀪𑁄 𑀬𑁄 𑀘 𑀤𑁄𑀲𑁄 𑀬𑀸 𑀘 𑀲𑀼𑀪𑀲𑀜𑁆𑀜𑀸 𑀬𑀸 𑀘 𑀲𑀼𑀔𑀲𑀜𑁆𑀜𑀸, 𑀇𑀫𑀸𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀢𑀡𑁆𑀳𑀁 𑀪𑀚𑀦𑁆𑀢𑀺. 𑀬𑀸 𑀘 𑀅𑀯𑀺𑀚𑁆𑀚𑀸 𑀬𑁄 𑀘 𑀫𑁄𑀳𑁄 𑀬𑀸 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀬𑀸 𑀘 𑀅𑀢𑁆𑀢𑀲𑀜𑁆𑀜𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀯𑀺𑀚𑁆𑀚𑀁 𑀪𑀚𑀦𑁆𑀢𑀺. 𑀏𑀢𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺 𑀲𑀼𑀲𑀁𑀔𑀺𑀢𑁆𑀢𑀸𑀦𑀺. 𑀇𑀢𑀺 𑀢𑀬𑁄 𑀦𑀬𑀸 𑀏𑀓𑀁 𑀦𑀬𑀁 𑀦 𑀧𑀯𑀺𑀝𑁆𑀞𑀸. 𑀏𑀯𑀁 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑁂 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺.

𑀓𑀣𑀁 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺, 𑀢𑀺𑀧𑀼𑀓𑁆𑀔𑀮𑁂 𑀦𑀬𑁂 𑀬𑀼𑀚𑁆𑀚𑀦𑁆𑀢𑀺? 𑀦𑀯𑀦𑁆𑀦𑀁 𑀧𑀤𑀸𑀦𑀁 𑀓𑀼𑀲𑀮𑀸𑀦𑀁, 𑀯𑀺𑀧𑀲𑁆𑀲𑀦𑀸 𑀘 𑀅𑀫𑁄𑀳𑁄 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺; 𑀅𑀫𑁄𑀳𑁄 𑀘 𑀲𑀫𑀣𑁄 𑀘 𑀅𑀮𑁄𑀪𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺; 𑀮𑁄𑀪𑁄 𑀘 𑀤𑁄𑀲𑁄 𑀘, 𑀏𑀯𑀁 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀢𑀻𑀲𑀼 𑀓𑀼𑀲𑀮𑁂𑀲𑀼 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀦𑀯𑀦𑁆𑀦𑀁 𑀧𑀤𑀸𑀦𑀁 𑀅𑀓𑀼𑀲𑀮𑀸𑀦𑀁 𑀢𑀡𑁆𑀳𑀸 𑀘 𑀮𑁄𑀪𑁄 𑀘 𑀲𑀼𑀪𑀲𑀜𑁆𑀜𑀸 𑀘 𑀲𑀼𑀔𑀲𑀜𑁆𑀜𑀸 𑀘, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁; 𑀅𑀯𑀺𑀚𑁆𑀚𑀸 𑀘 𑀫𑁄𑀳𑁄 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀘 𑀅𑀢𑁆𑀢𑀲𑀜𑁆𑀜𑀸 𑀘 𑀅𑀬𑀁 𑀫𑁄𑀳𑁄 𑀅𑀬𑀁 𑀤𑁄𑀲𑁄, 𑀬𑁂 𑀘 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀢𑀻𑀲𑀼 𑀅𑀓𑀼𑀲𑀮𑁂𑀲𑀼 𑀬𑁄𑀚𑀺𑀢𑀸𑀦𑀺. 𑀏𑀯𑀁 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀓𑀼𑀲𑀮𑀫𑀽𑀮𑁂𑀲𑀼 𑀘 𑀬𑁄𑀚𑁂𑀢𑁆𑀯𑀸 𑀢𑀺𑀧𑀼𑀓𑁆𑀔𑀮𑁂𑀦 𑀦𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺.

𑀓𑀣𑀁 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂 𑀦𑀬𑁂 𑀬𑀼𑀚𑁆𑀚𑀦𑁆𑀢𑀺? 𑀢𑀡𑁆𑀳𑀸 𑀘 𑀲𑀼𑀪𑀲𑀜𑁆𑀜𑀸 𑀘, 𑀅𑀬𑀁 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄. 𑀮𑁄𑀪𑁄 𑀘 𑀲𑀼𑀔𑀲𑀜𑁆𑀜𑀸 𑀘, 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄. 𑀅𑀯𑀺𑀚𑁆𑀚𑀸 𑀘 𑀦𑀺𑀘𑁆𑀘𑀲𑀜𑁆𑀜𑀸 𑀘, 𑀅𑀬𑀁 𑀢𑀢𑀺𑀬𑁄 𑀯𑀺𑀧𑀮𑁆𑀮𑀸𑀲𑁄. 𑀫𑁄𑀳𑁄 𑀘 𑀅𑀢𑁆𑀢𑀲𑀜𑁆𑀜𑀸 𑀘, 𑀅𑀬𑀁 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄. 𑀇𑀢𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀘𑀢𑀽𑀲𑀼 𑀧𑀤𑁂𑀲𑀼 𑀬𑁄𑀚𑀺𑀢𑀸𑀦𑀺. 𑀢𑀢𑁆𑀣 𑀦𑀯𑀦𑁆𑀦𑀁 𑀫𑀽𑀮𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀲𑀫𑀣𑁄 𑀘 𑀅𑀲𑀼𑀪𑀲𑀜𑁆𑀜𑀸 𑀘, 𑀇𑀤𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀮𑁄𑀪𑁄 𑀘 𑀤𑀼𑀓𑁆𑀔𑀲𑀜𑁆𑀜𑀸 𑀘, 𑀇𑀤𑀁 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀯𑀺𑀧𑀲𑁆𑀲𑀦𑀸 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀘, 𑀇𑀤𑀁 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀫𑁄𑀳𑁄 𑀘 𑀅𑀦𑀢𑁆𑀢𑀲𑀜𑁆𑀜𑀸 𑀘, 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀁 𑀅𑀦𑀼𑀧𑀯𑀺𑀝𑁆𑀞𑀸𑀦𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀬𑀸 𑀪𑀽𑀫𑀺 𑀘 𑀬𑁄 𑀭𑀸𑀕𑁄 𑀘 𑀬𑁄 𑀤𑁄𑀲𑁄 𑀘 𑀏𑀓𑀁 𑀦𑀬𑀁 𑀧𑀯𑀺𑀲𑀢𑀺. 𑀏𑀓𑀲𑁆𑀲 𑀦𑀬𑀲𑁆𑀲 𑀅𑀓𑀼𑀲𑀮𑁂 𑀯𑀸 𑀥𑀫𑁆𑀫𑁂 𑀓𑀼𑀲𑀮𑁂 𑀯𑀸 𑀥𑀫𑁆𑀫𑁂 𑀯𑀺𑀜𑁆𑀜𑀸𑀢𑁂 𑀧𑀝𑀺𑀧𑀓𑁆𑀔𑁄 𑀅𑀦𑁆𑀯𑁂𑀲𑀺𑀢𑀩𑁆𑀩𑁄, 𑀧𑀝𑀺𑀧𑀓𑁆𑀔𑁂 𑀅𑀦𑁆𑀯𑁂𑀲𑀺𑀢𑁆𑀯𑀸 𑀲𑁄 𑀦𑀬𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀫𑁆𑀳𑀺 𑀦𑀬𑁂 𑀦𑀺𑀤𑁆𑀤𑀺𑀝𑁆𑀞𑁄. 𑀬𑀣𑀸 𑀏𑀓𑀫𑁆𑀳𑀺 𑀦𑀬𑁂 𑀲𑀩𑁆𑀩𑁂 𑀦𑀬𑀸 𑀧𑀯𑀺𑀝𑁆𑀞𑀸 𑀢𑀣𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀏𑀓𑀫𑁆𑀳𑀺 𑀘 𑀦𑀬𑁂 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀧𑀯𑀺𑀝𑁆𑀞𑀸𑀦𑀺, 𑀢𑀫𑁆𑀳𑀺 𑀥𑀫𑁆𑀫𑁂 𑀯𑀺𑀜𑁆𑀜𑀸𑀢𑁂 𑀲𑀩𑁆𑀩𑁂 𑀥𑀫𑁆𑀫𑀸 𑀯𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀲𑁆𑀲 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀸𑀬 𑀤𑀺𑀲𑀸𑀬 𑀧𑀞𑀫𑀁 𑀨𑀮𑀁, 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬 𑀤𑀼𑀢𑀺𑀬𑀁 𑀨𑀮𑀁, 𑀢𑀢𑀺𑀬𑀸𑀬 𑀤𑀺𑀲𑀸𑀬 𑀢𑀢𑀺𑀬𑀁 𑀨𑀮𑀁, 𑀘𑀢𑀼𑀢𑁆𑀣𑀸𑀬 𑀤𑀺𑀲𑀸𑀬 𑀘𑀢𑀼𑀢𑁆𑀣𑀁 𑀨𑀮𑀁. 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀸𑀬 𑀤𑀺𑀲𑀸𑀬 𑀅𑀧𑁆𑀧𑀡𑀺𑀳𑀺𑀢𑀁, 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬 𑀲𑀼𑀜𑁆𑀜𑀢𑀁, 𑀢𑀢𑀺𑀬𑀸𑀬 𑀤𑀺𑀲𑀸𑀬 𑀅𑀦𑀺𑀫𑀺𑀢𑁆𑀢𑀁. 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀸𑀬 𑀤𑀺𑀲𑀸𑀬 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀤𑀼𑀢𑀺𑀬𑀸𑀬 𑀤𑀺𑀲𑀸𑀬 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀇𑀫𑁂 𑀢𑀬𑁄 𑀦𑀬𑀸 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀽𑀮𑀧𑀤𑀸𑀦𑀁 𑀆𑀮𑁄𑀓𑀦𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀮𑁄𑀓𑀦𑁄 [𑀤𑀺𑀲𑀸𑀮𑁄𑀘𑀦𑁄 (𑀓.)] 𑀦𑀬𑁄. 𑀆𑀮𑁄𑀓𑁂𑀢𑁆𑀯𑀸𑀦 𑀚𑀸𑀦𑀸𑀢𑀺 ‘‘𑀅𑀬𑀁 𑀥𑀫𑁆𑀫𑁄 𑀇𑀫𑀁 𑀥𑀫𑁆𑀫𑀁 𑀪𑀚𑀢𑀻’’𑀢𑀺 𑀲𑀫𑁆𑀫𑀸 𑀬𑁄𑀚𑀦𑀸. 𑀓𑀼𑀲𑀮𑀧𑀓𑁆𑀔𑁂 𑀅𑀓𑀼𑀲𑀮𑀧𑀓𑁆𑀔𑁂 𑀘 𑀅𑀬𑀁 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀸𑀫. 𑀇𑀫𑁂 𑀧𑀜𑁆𑀘 𑀦𑀬𑀸.

𑀢𑀢𑁆𑀣𑀺𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸𑀧𑀺 𑀘, 𑀮𑁄𑀪𑁄 𑀤𑁄𑀲𑁄 𑀢𑀣𑁂𑀯 𑀫𑁄𑀳𑁄 𑀘;

𑀘𑀢𑁆𑀢𑀸𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸, 𑀓𑀺𑀮𑁂𑀲𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀬𑁂 𑀘 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀓𑀼𑀲𑀮𑀫𑀽𑀮𑀸;

𑀏𑀢𑀁 𑀲𑀩𑁆𑀩𑀁 𑀓𑀼𑀲𑀮𑀁, 𑀇𑀦𑁆𑀤𑁆𑀭𑀺𑀬𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀲𑀩𑁆𑀩𑀓𑀼𑀲𑀮𑀁 𑀦𑀯𑀳𑀺 𑀧𑀤𑁂𑀳𑀺 𑀬𑀼𑀚𑁆𑀚𑀢𑀺, 𑀦𑀯𑀳𑀺 𑀘𑁂𑀯 𑀅𑀓𑀼𑀲𑀮𑀁;

𑀏𑀢𑁂 𑀢𑁂 𑀫𑀽𑀮𑀧𑀤𑀸, 𑀉𑀪𑀢𑁄 𑀅𑀝𑁆𑀞𑀸𑀭𑀲 𑀧𑀤𑀸𑀦𑀺.

𑀢𑀡𑁆𑀳𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀘, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸;

𑀬𑁄 𑀦𑁂𑀢𑀺 𑀲𑀩𑁆𑀩𑁂𑀲𑀼 𑀬𑁄𑀕𑀬𑀼𑀢𑁆𑀢𑁄, 𑀅𑀬𑀁 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄.

𑀬𑀁 𑀓𑀼𑀲𑀮𑀫𑀽𑀮𑁂𑀳𑀺, 𑀦𑀬𑀢𑀺 𑀓𑀼𑀲𑀮𑀅𑀓𑀼𑀲𑀮𑀫𑀽𑀮𑁂𑀳𑀺;

𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁, 𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀼.

𑀲𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺, 𑀓𑀺𑀮𑁂𑀲𑀇𑀦𑁆𑀤𑁆𑀭𑀺𑀬𑁂𑀳𑀺 𑀘;

𑀥𑀫𑁆𑀫𑁂 𑀢𑀁 𑀦𑀬𑀁 𑀯𑀺𑀦𑀬𑀫𑀸𑀳𑀼, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀦𑀸𑀫.

𑀯𑁂𑀬𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑁂, 𑀓𑀼𑀲𑀮𑀢𑀸𑀳𑀺 𑀅𑀓𑀼𑀲𑀮𑀢𑀸𑀳𑀺 𑀘;

𑀢𑀬𑁄 𑀆𑀮𑁄𑀓𑀬𑀢𑀺, 𑀅𑀬𑀁 𑀦𑀬𑁄 𑀤𑀺𑀲𑀸𑀮𑁄𑀘𑀦𑁄 𑀦𑀸𑀫.

𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀸𑀮𑁄𑀘𑀦𑁂𑀦, 𑀉𑀓𑁆𑀔𑀺𑀧𑀺𑀬 𑀬𑀁 𑀲𑀫𑀸𑀦𑁂𑀢𑀺;

𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂, 𑀅𑀬𑀁 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀸𑀫.

𑀦𑀬𑀲𑀫𑀼𑀝𑁆𑀞𑀸𑀦𑀁.

𑀧𑁂𑀝𑀓𑁄𑀧𑀤𑁂𑀲𑁂 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀣𑁂𑀭𑀲𑁆𑀲 𑀲𑀼𑀢𑁆𑀢𑀯𑀺𑀪𑀗𑁆𑀕𑀲𑁆𑀲

[𑀯𑁂𑀪𑀗𑁆𑀕𑀺𑀲𑁆𑀲 (𑀧𑀻. 𑀓.)] 𑀤𑀲𑁆𑀲𑀦𑀁 𑀲𑀫𑀢𑁆𑀢𑀁.

𑀬𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀅𑀓𑀼𑀲𑀮𑀸𑀦𑀺 𑀓𑀼𑀲𑀮𑀸𑀦𑀺 𑀘 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂 𑀦𑀬𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀢𑀺𑀓𑀸𑀦𑀺 𑀓𑀼𑀲𑀮𑀸𑀦𑀺 𑀘 𑀅𑀓𑀼𑀲𑀮𑀸𑀦𑀺 𑀘 𑀢𑀺𑀧𑀼𑀓𑁆𑀔𑀮𑁂 𑀦𑀬𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀤𑀼𑀓𑀸𑀦𑀺 𑀓𑀼𑀲𑀮𑀸𑀦𑀺 𑀘 𑀅𑀓𑀼𑀲𑀮𑀸𑀦𑀺 𑀘 𑀦𑀦𑁆𑀤𑀺𑀬𑀸𑀯𑀝𑁆𑀝𑁂 𑀦𑀬𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀬𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 [𑀯𑀺𑀲𑀼𑀤𑁆𑀥𑀻𑀲𑀼 (𑀓.)] 𑀓𑀼𑀲𑀮𑁂𑀲𑀼 𑀲𑁄 𑀅𑀢𑁆𑀣𑁄 𑀢𑀺𑀓𑁂𑀲𑀼 𑀯𑀺𑀪𑀚𑁆𑀚𑀫𑀸𑀦𑀲𑁆𑀲 𑀪𑀯𑀪𑀽𑀫𑀺, 𑀅𑀣 𑀘 𑀲𑀩𑁆𑀩𑁄 [𑀧𑀼𑀩𑁆𑀩𑁄 (𑀓.)] 𑀘 𑀅𑀢𑁆𑀣𑁄 𑀢𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀦𑀺𑀤𑁆𑀤𑀺𑀲𑀢𑀺. 𑀢𑀢𑁆𑀢𑀓𑀸𑀦𑀺 𑀯𑀼𑀘𑁆𑀘𑀢𑀺. 𑀬𑁄 𑀅𑀢𑁆𑀣𑁄 𑀘𑀢𑀽𑀳𑀺 𑀧𑀤𑁂𑀳𑀺 𑀅𑀝𑁆𑀞𑀯𑀻𑀲𑀢𑀺𑀪𑀸𑀕𑁂𑀳𑀺 𑀦𑀢𑁆𑀣𑀺𑀪𑀽𑀫𑀺 𑀦𑀺𑀤𑁆𑀤𑀺𑀲𑀺𑀢𑀼𑀁, 𑀅𑀯𑀘𑀭𑀦𑁆𑀢𑁄𑀯 𑀘𑀢𑀽𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀲𑀢𑀺. 𑀇𑀢𑀺 𑀬𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀯𑀺𑀓𑁄𑀲𑀦𑀸 𑀇𑀤𑀁 𑀧𑀫𑀸𑀡𑀁. 𑀬𑀣𑀸 𑀲𑀩𑁆𑀩𑁂 𑀲𑀫𑀸𑀥𑀬𑁄 𑀢𑀻𑀲𑀼 𑀲𑀫𑀸𑀥𑀻𑀲𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂 𑀇𑀤𑀁 𑀧𑀫𑀸𑀡𑀁, 𑀦𑀢𑁆𑀣𑀺 𑀘𑀢𑀼𑀢𑁆𑀣𑁄 𑀲𑀫𑀸𑀥𑀺. 𑀢𑀣𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀘𑀺𑀦𑁆𑀢𑀸𑀫𑀬𑀻 𑀲𑀼𑀢𑀫𑀬𑀻 𑀪𑀸𑀯𑀦𑀸𑀫𑀬𑀻 𑀲𑀩𑁆𑀩𑀸𑀲𑀼 𑀧𑀜𑁆𑀜𑀸𑀲𑀼 𑀦𑀺𑀤𑁆𑀤𑀺𑀲𑀢𑀺, 𑀦𑀢𑁆𑀣𑀺 𑀘𑀢𑀼𑀢𑁆𑀣𑀻 𑀧𑀜𑁆𑀜𑀸 𑀦 𑀘𑀺𑀦𑁆𑀢𑀸𑀫𑀬𑀻 𑀦 𑀲𑀼𑀢𑀫𑀬𑀻 𑀦 𑀪𑀸𑀯𑀦𑀸𑀫𑀬𑀻, 𑀧𑀜𑁆𑀜𑀸 𑀦𑀸𑀲𑁆𑀲 𑀅𑀢𑁆𑀣𑀺 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀬𑀸 𑀅𑀯𑀺𑀓𑁆𑀔𑁂𑀧𑀦𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀦𑁆𑀢𑀺.

𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀚𑀫𑁆𑀩𑀼𑀯𑀦𑀯𑀸𑀲𑀺𑀦𑁄 𑀧𑁂𑀝𑀓𑁄𑀧𑀤𑁂𑀲𑁄

𑀲𑀫𑀢𑁆𑀢𑁄.

𑀧𑁂𑀝𑀓𑁄𑀧𑀤𑁂𑀲𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.