📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀭𑀸𑀚𑀺𑀓𑀓𑀡𑁆𑀟-𑀅𑀝𑁆𑀞𑀓𑀣𑀸 (𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 ¶ ¶ ¶ 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁;

𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀸𑀦𑀺;

𑀔𑁂𑀤𑀁 𑀕𑀢𑁄 𑀮𑁄𑀓𑀳𑀺𑀢𑀸𑀬 𑀦𑀸𑀣𑁄;

𑀦𑀫𑁄 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲.

𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀬𑀁;

𑀪𑀯𑀸𑀪𑀯𑀁 𑀕𑀘𑁆𑀙𑀢𑀺 𑀚𑀻𑀯𑀮𑁄𑀓𑁄;

𑀦𑀫𑁄 ¶ 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮-

𑀯𑀺𑀤𑁆𑀥𑀁𑀲𑀺𑀦𑁄 𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲.

𑀕𑀼𑀡𑁂𑀳𑀺 𑀬𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸-

𑀯𑀺𑀫𑀼𑀢𑁆𑀢𑀺𑀜𑀸𑀡𑀧𑁆𑀧𑀪𑀼𑀢𑀻𑀳𑀺 𑀬𑀼𑀢𑁆𑀢𑁄;

𑀔𑁂𑀢𑁆𑀢𑀁 𑀚𑀦𑀸𑀦𑀁 𑀓𑀼𑀲𑀮𑀢𑁆𑀣𑀺𑀓𑀸𑀦𑀁;

𑀢𑀫𑀭𑀺𑀬𑀲𑀗𑁆𑀖𑀁 𑀲𑀺𑀭𑀲𑀸 𑀦𑀫𑀸𑀫𑀺.

𑀇𑀘𑁆𑀘𑁂𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬𑀁;

𑀦𑀫𑀲𑁆𑀲𑀫𑀸𑀦𑁄 𑀭𑀢𑀦𑀢𑁆𑀢𑀬𑀁 𑀬𑀁;

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀯𑀺𑀧𑀼𑀮𑀁 𑀅𑀮𑀢𑁆𑀣𑀁;

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄.

𑀬𑀲𑁆𑀫𑀺𑀁 ¶ 𑀞𑀺𑀢𑁂 𑀲𑀸𑀲𑀦𑀫𑀝𑁆𑀞𑀺𑀢𑀲𑁆𑀲;

𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺 𑀲𑀼𑀲𑀡𑁆𑀞𑀺𑀢𑀲𑁆𑀲;

𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬𑀁 𑀅𑀫𑀺𑀲𑁆𑀲𑀁;

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀁.

𑀓𑀸𑀫𑀜𑁆𑀘 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀺;

𑀜𑀸𑀡𑀫𑁆𑀩𑀼𑀦𑀺𑀤𑁆𑀥𑁄𑀢𑀫𑀮𑀸𑀲𑀯𑁂𑀳𑀺;

𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑁂𑀳𑀺 ¶ ;

𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀺.

𑀲𑀮𑁆𑀮𑁂𑀔𑀺𑀬𑁂 𑀦𑁄𑀲𑀼𑀮𑀪𑀽𑀧𑀫𑁂𑀳𑀺;

𑀫𑀳𑀸𑀯𑀺𑀳𑀸𑀭𑀲𑁆𑀲 𑀥𑀚𑀽𑀧𑀫𑁂𑀳𑀺;

𑀲𑀁𑀯𑀡𑁆𑀡𑀺𑀢𑁄𑀬𑀁 𑀯𑀺𑀦𑀬𑁄 𑀦𑀬𑁂𑀳𑀺;

𑀘𑀺𑀢𑁆𑀢𑁂𑀳𑀺 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑁂𑀳𑀺.

𑀲𑀁𑀯𑀡𑁆𑀡𑀦𑀸 𑀲𑀻𑀳𑀴𑀤𑀻𑀧𑀓𑁂𑀦;

𑀯𑀸𑀓𑁆𑀬𑁂𑀦 𑀏𑀲𑀸 𑀧𑀦 𑀲𑀗𑁆𑀔𑀢𑀢𑁆𑀢𑀸;

𑀦 ¶ 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑀺;

𑀤𑀻𑀧𑀦𑁆𑀢𑀭𑁂 𑀪𑀺𑀓𑁆𑀔𑀼𑀚𑀦𑀲𑁆𑀲 𑀬𑀲𑁆𑀫𑀸.

𑀢𑀲𑁆𑀫𑀸 𑀇𑀫𑀁 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁;

𑀲𑀁𑀯𑀡𑁆𑀡𑀦𑀁 𑀤𑀸𑀦𑀺 𑀲𑀫𑀸𑀭𑀪𑀺𑀲𑁆𑀲𑀁;

𑀅𑀚𑁆𑀛𑁂𑀲𑀦𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀲𑁆𑀲;

𑀣𑁂𑀭𑀲𑁆𑀲 𑀲𑀫𑁆𑀫𑀸 𑀲𑀫𑀦𑀼𑀲𑁆𑀲𑀭𑀦𑁆𑀢𑁄.

𑀲𑀁𑀯𑀡𑁆𑀡𑀦𑀁 𑀢𑀜𑁆𑀘 𑀲𑀫𑀸𑀭𑀪𑀦𑁆𑀢𑁄;

𑀢𑀲𑁆𑀲𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭𑀁;

𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀣𑁂𑀯;

𑀓𑀼𑀭𑀼𑀦𑁆𑀤𑀺𑀦𑀸𑀫𑀸𑀤𑀺𑀲𑀼 𑀯𑀺𑀲𑁆𑀲𑀼𑀢𑀸𑀲𑀼.

𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄;

𑀬𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄;

𑀢𑀢𑁄𑀧𑀺 𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤𑀁;

𑀲𑀁𑀯𑀡𑁆𑀡𑀦𑀁 𑀲𑀫𑁆𑀫 𑀲𑀫𑀸𑀭𑀪𑀺𑀲𑁆𑀲𑀁.

𑀢𑀁 ¶ 𑀫𑁂 𑀦𑀺𑀲𑀸𑀫𑁂𑀦𑁆𑀢𑀼 𑀧𑀲𑀦𑁆𑀦𑀘𑀺𑀢𑁆𑀢𑀸;

𑀣𑁂𑀭𑀸 𑀘 𑀪𑀺𑀓𑁆𑀔𑀽 𑀦𑀯𑀫𑀚𑁆𑀛𑀺𑀫𑀸 𑀘;

𑀥𑀫𑁆𑀫𑀧𑁆𑀧𑀤𑀻𑀧𑀲𑁆𑀲 𑀢𑀣𑀸𑀕𑀢𑀲𑁆𑀲;

𑀲𑀓𑁆𑀓𑀘𑁆𑀘 𑀥𑀫𑁆𑀫𑀁 𑀧𑀢𑀺𑀫𑀸𑀦𑀬𑀦𑁆𑀢𑀸.

𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄;

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸;

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀸 ¶ 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 ¶ 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁;

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦𑀁.

𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸;

𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸;

𑀯𑀺𑀦𑀺𑀘𑁆𑀙𑀬𑀁 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸;

𑀢𑀦𑁆𑀢𑀺𑀓𑁆𑀓𑀫𑀁 𑀓𑀺𑀜𑁆𑀘𑀺 𑀅𑀯𑁄𑀓𑁆𑀓𑀫𑀺𑀢𑁆𑀯𑀸.

𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁;

𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀧𑀭𑀺𑀤𑀻𑀧𑀬𑀦𑁆𑀢𑀻;

𑀬𑀲𑁆𑀫𑀸 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀡𑁆𑀡𑀦𑀸𑀧𑀺;

𑀲𑀓𑁆𑀓𑀘𑁆𑀘 𑀢𑀲𑁆𑀫𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸

𑀢𑀢𑁆𑀣 ¶ 𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀦𑀬𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀦𑀬𑁄 𑀦𑀸𑀫 𑀇𑀥 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀲𑀁𑀯𑀡𑁆𑀡𑀦𑀢𑁆𑀣𑀁 𑀧𑀦𑀲𑁆𑀲 𑀅𑀬𑀁 𑀫𑀸𑀢𑀺𑀓𑀸 𑁋

𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁;

𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀘𑁂𑀢𑀫𑁂𑀢𑀁 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄.

𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄;

𑀤𑀲𑁆𑀲𑀬𑀦𑁆𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀦𑀬𑀲𑁆𑀲𑀢𑁆𑀣𑀯𑀡𑁆𑀡𑀦𑀦𑁆𑀢𑀺.

𑀢𑀢𑁆𑀣 𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸𑀢𑀺 𑀇𑀤𑀁 𑀢𑀸𑀯 𑀯𑀘𑀦𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀢𑁆𑀢𑀩𑁆𑀩𑀫𑁂𑀢𑀁 ¶ ‘‘𑀇𑀤𑀁 𑀯𑀘𑀦𑀁 𑀓𑁂𑀦 𑀯𑀼𑀢𑁆𑀢𑀁, 𑀓𑀤𑀸 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺? 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 ¶ 𑀦𑀸𑀫 𑀘𑁂𑀲𑀸 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸, 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀁 𑀧𑀦 𑀇𑀥𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂, 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀲𑀗𑁆𑀖𑀢𑁆𑀣𑁂𑀭𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦; 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 𑁋 ‘𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺! 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁭; 𑀤𑀻. 𑀦𑀺. 𑁨.𑁨𑁩𑁨) 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀧𑀸𑀧𑀪𑀺𑀓𑁆𑀔𑀽 𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 ¶ 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀬𑀸𑀯 𑀘 𑀥𑀫𑁆𑀫𑀯𑀺𑀦𑀬𑁄 𑀢𑀺𑀝𑁆𑀞𑀢𑀺 𑀢𑀸𑀯 𑀅𑀦𑀢𑀻𑀢𑀲𑀢𑁆𑀣𑀼𑀓𑀫𑁂𑀯 𑀧𑀸𑀯𑀘𑀦𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄 ¶ , 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’𑀢𑀺 (𑀤𑀻. 𑀦𑀺. 𑁨.𑁨𑁧𑁬).

‘‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀁, 𑀬𑀣𑀬𑀺𑀤𑀁 𑀲𑀸𑀲𑀦𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁.

𑀬𑀁 𑀘𑀸𑀳𑀁 𑀪𑀕𑀯𑀢𑀸 𑁋

‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺 𑀯𑀢𑁆𑀯𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀘𑁂𑀯,

‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺 𑁋

𑀏𑀯𑀫𑀸𑀤𑀺𑀦𑀸 ¶ 𑀦𑀬𑁂𑀦 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄, 𑀢𑀲𑁆𑀲 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺; 𑀦𑀦𑀼 𑀫𑀁 𑀪𑀕𑀯𑀸 𑀭𑀸𑀚𑀸 𑀯𑀺𑀬 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 ‘𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄 𑀫𑁂 𑀅𑀬𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀫𑀦𑁆𑀢𑁆𑀯𑀸 𑀇𑀫𑀺𑀦𑀸 𑀅𑀲𑀸𑀥𑀸𑀭𑀡𑁂𑀦 𑀅𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀳𑁂𑀲𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺. 𑀬𑀣𑀸𑀳 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁩𑁧) 𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 ¶ ¶ 𑀧𑀭𑀁 𑀆𑀳 𑁋

‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺. 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’’𑀢𑀺. 𑀣𑁂𑀭𑁄 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑁂 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀪𑀺𑀓𑁆𑀔𑀽 𑀅𑀦𑁂𑀓𑀲𑀢𑁂 𑀅𑀦𑁂𑀓𑀲𑀳𑀲𑁆𑀲𑁂 𑀘 𑀯𑀚𑁆𑀚𑁂𑀢𑁆𑀯𑀸 𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀫𑀳𑀸𑀦𑀼𑀪𑀸𑀯𑁂 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑀸 𑀏𑀢𑀤𑀕𑁆𑀕𑀁 𑀆𑀭𑁄𑀧𑀺𑀢𑁂 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀏𑀓𑀽𑀦𑀧𑀜𑁆𑀘𑀲𑀢𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀬𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀓𑁂𑀦𑀽𑀦𑀸𑀧𑀜𑁆𑀘𑀅𑀭𑀳𑀦𑁆𑀢𑀲𑀢𑀸𑀦𑀺 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀓𑀺𑀲𑁆𑀲 𑀧𑀦 𑀣𑁂𑀭𑁄 𑀏𑀓𑁂𑀦𑀽𑀦𑀫𑀓𑀸𑀲𑀻𑀢𑀺? 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀑𑀓𑀸𑀲𑀓𑀭𑀡𑀢𑁆𑀣𑀁. 𑀢𑁂𑀦 𑀳𑀸𑀬𑀲𑁆𑀫𑀢𑀸 𑀲𑀳𑀸𑀧𑀺 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸 𑀥𑀫𑁆𑀫𑀲𑀗𑁆𑀕𑀻𑀢𑀺 𑀓𑀸𑀢𑀼𑀁, 𑀲𑁄 𑀳𑀸𑀬𑀲𑁆𑀫𑀸 𑀲𑁂𑀓𑁆𑀔𑁄 𑀲𑀓𑀭𑀡𑀻𑀬𑁄, 𑀢𑀲𑁆𑀫𑀸 𑀲𑀳𑀸𑀧𑀺 𑀦 𑀲𑀓𑁆𑀓𑀸; 𑀬𑀲𑁆𑀫𑀸 𑀧𑀦𑀲𑁆𑀲 𑀓𑀺𑀜𑁆𑀘𑀺 𑀤𑀲𑀩𑀮𑀤𑁂𑀲𑀺𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑀁 𑀪𑀕𑀯𑀢𑁄 𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸. 𑀬𑀤𑀺 𑀏𑀯𑀁 𑀲𑁂𑀓𑁆𑀔𑁄𑀧𑀺 𑀲𑀫𑀸𑀦𑁄 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀩𑀳𑀼𑀓𑀸𑀭𑀢𑁆𑀢𑀸 𑀣𑁂𑀭𑁂𑀦 𑀉𑀘𑁆𑀘𑀺𑀦𑀺𑀢𑀩𑁆𑀩𑁄 𑀅𑀲𑁆𑀲. 𑀅𑀣 𑀓𑀲𑁆𑀫𑀸 𑀦 𑀉𑀘𑁆𑀘𑀺𑀦𑀺𑀢𑁄𑀢𑀺 ¶ ? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁄. 𑀣𑁂𑀭𑁄 𑀳𑀺 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄 𑀅𑀳𑁄𑀲𑀺, 𑀢𑀣𑀸 𑀳𑀺 𑀦𑀁 ¶ 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑁂𑀲𑀼 𑀚𑀸𑀢𑁂𑀲𑀼𑀧𑀺 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀓𑀼𑀫𑀸𑀭𑀓𑀯𑀸𑀤𑁂𑀦 𑀑𑀯𑀤𑀢𑀺. 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀘𑀸𑀬𑀁 𑀆𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄. 𑀢𑀢𑁆𑀭 𑀳𑀺 𑀪𑀺𑀓𑁆𑀔𑀽 𑀙𑀦𑁆𑀤𑀸𑀕𑀫𑀦𑀁 𑀯𑀺𑀬 𑀫𑀜𑁆𑀜𑀫𑀸𑀦𑀸 ‘‘𑀩𑀳𑀽 𑀅𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀪𑀺𑀓𑁆𑀔𑀽 𑀞𑀧𑁂𑀢𑁆𑀯𑀸 𑀆𑀦𑀦𑁆𑀤𑀁 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀁 𑀣𑁂𑀭𑁄 𑀉𑀘𑁆𑀘𑀺𑀦𑀻’’𑀢𑀺 𑀉𑀧𑀯𑀤𑁂𑀬𑁆𑀬𑀼𑀁, 𑀢𑀁 𑀧𑀭𑀽𑀧𑀯𑀸𑀤𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 ‘‘𑀆𑀦𑀦𑁆𑀤𑀁 𑀯𑀺𑀦𑀸 𑀲𑀗𑁆𑀕𑀻𑀢𑀺 ¶ 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀦𑀼𑀫𑀢𑀺𑀬𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀦 𑀉𑀘𑁆𑀘𑀺𑀦𑀺.

𑀅𑀣 𑀲𑀬𑀫𑁂𑀯 𑀪𑀺𑀓𑁆𑀔𑀽 𑀆𑀦𑀦𑁆𑀤𑀲𑁆𑀲𑀢𑁆𑀣𑀸𑀬 𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀬𑀣𑀸𑀳 𑁋

‘‘𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄 𑀅𑀪𑀩𑁆𑀩𑁄 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁, 𑀩𑀳𑀼 𑀘𑀸𑀦𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄; 𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀏𑀯𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀉𑀘𑁆𑀘𑀺𑀦𑀺𑀢𑁂𑀦 𑀢𑁂𑀦𑀸𑀬𑀲𑁆𑀫𑀢𑀸 𑀲𑀤𑁆𑀥𑀺𑀁 𑀧𑀜𑁆𑀘 𑀣𑁂𑀭𑀲𑀢𑀸𑀦𑀺 𑀅𑀳𑁂𑀲𑀼𑀁.

𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀫𑀬𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀚𑀕𑀳𑀁 𑀔𑁄 ¶ 𑀫𑀳𑀸𑀕𑁄𑀘𑀭𑀁 𑀧𑀳𑀽𑀢𑀲𑁂𑀦𑀸𑀲𑀦𑀁, 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀦 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺? 𑀇𑀤𑀁 𑀅𑀫𑁆𑀳𑀸𑀓𑀁 𑀣𑀸𑀯𑀭𑀓𑀫𑁆𑀫𑀁, 𑀓𑁄𑀘𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀸𑀯𑁂𑀲𑀺, 𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁.

𑀅𑀣 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼 𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀇𑀤𑀸𑀦𑀺 𑀕𑀺𑀫𑁆𑀳𑀸𑀦𑀁 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄, 𑀉𑀧𑀓𑀝𑁆𑀞𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀫𑀦𑁆𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀭𑀸𑀚𑀕𑀳𑀁, 𑀆𑀯𑀼𑀲𑁄, 𑀕𑀘𑁆𑀙𑀸𑀫𑀸’’𑀢𑀺 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀉𑀧𑀟𑁆𑀠𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑀼𑀓𑀸𑀫𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀕𑀢𑀕𑀢𑀝𑁆𑀞𑀸𑀦𑁂 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺 ¶ 𑁋 ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀓𑀼𑀳𑀺𑀁 𑀲𑀢𑁆𑀣𑀸𑀭𑀁 𑀞𑀧𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 ¶ . 𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀣𑁂𑀭𑁂 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀯𑀺𑀬 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺.

𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀢𑀁 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀲𑀩𑀮𑁂𑀦 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀺𑀮𑀸𑀢𑀫𑀸𑀮𑀸𑀓𑀘𑀯𑀭𑀁 ¶ 𑀙𑀟𑁆𑀟𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀪𑀕𑀯𑀢𑁄 𑀞𑀺𑀢𑀓𑀸𑀮𑁂 𑀓𑀭𑀡𑀻𑀬𑀁 𑀯𑀢𑁆𑀢𑀁 𑀲𑀩𑁆𑀩𑀫𑀓𑀸𑀲𑀺. 𑀅𑀣 𑀣𑁂𑀭𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀪𑀼𑀢𑀺 𑀞𑀸𑀦𑀦𑀺𑀲𑀚𑁆𑀚𑀩𑀳𑀼𑀮𑀢𑁆𑀢𑀸 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀁 𑀓𑀸𑀬𑀁 𑀲𑀫𑀲𑁆𑀲𑀸𑀲𑁂𑀢𑀼𑀁 𑀤𑀼𑀢𑀺𑀬𑀤𑀺𑀯𑀲𑁂 𑀔𑀻𑀭𑀯𑀺𑀭𑁂𑀘𑀦𑀁 𑀧𑀺𑀯𑀺𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺. 𑀬𑀁 𑀲𑀦𑁆𑀥𑀸𑀬 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀳𑀺𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋

‘‘𑀅𑀓𑀸𑀮𑁄 𑀔𑁄, 𑀫𑀸𑀡𑀯𑀓, 𑀅𑀢𑁆𑀣𑀺 𑀫𑁂 𑀅𑀚𑁆𑀚 𑀪𑁂𑀲𑀚𑁆𑀚𑀫𑀢𑁆𑀢𑀸 𑀧𑀻𑀢𑀸, 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭).

𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀓𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀕𑀦𑁆𑀢𑁆𑀯𑀸 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄 𑀤𑀻𑀖𑀦𑀺𑀓𑀸𑀬𑁂 𑀲𑀼𑀪𑀲𑀼𑀢𑁆𑀢𑀁𑀦𑀸𑀫 𑀤𑀲𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀅𑀣 𑀣𑁂𑀭𑁄 𑀚𑁂𑀢𑀯𑀦𑀯𑀺𑀳𑀸𑀭𑁂 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀭𑀸𑀚𑀕𑀳𑀁 𑀕𑀢𑁄. 𑀢𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀕𑀢𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸 𑀅𑀳𑁂𑀲𑀼𑀁. 𑀪𑀕𑀯𑀢𑁄 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀘 𑀧𑀭𑀺𑀯𑁂𑀡𑁂 𑀘 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀢𑀢𑁆𑀣 𑀣𑁂𑀭𑀸 𑀪𑀕𑀯𑀢𑁄 𑀯𑀘𑀦𑀧𑀽𑀚𑀦𑀢𑁆𑀣𑀁 𑀢𑀺𑀢𑁆𑀣𑀺𑀬𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 ‘‘𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀢𑁆𑀣𑀭𑀺 𑀞𑀺𑀢𑁂𑀬𑁂𑀯 𑀯𑀺𑀳𑀸𑀭𑁂 𑀧𑀝𑀺𑀚𑀕𑁆𑀕𑀺𑀁𑀲𑀼, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀟𑁆𑀟𑁂𑀲𑀼’’𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑁋

‘‘𑀅𑀣 ¶ 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 ¶ 𑀯𑀡𑁆𑀡𑀺𑀢𑀁. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫, 𑀫𑀚𑁆𑀛𑀺𑀫𑀁 𑀫𑀸𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁮).

𑀢𑁂 𑀤𑀼𑀢𑀺𑀬𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀧𑀝𑀺𑀧𑀼𑀘𑁆𑀙𑀺. 𑀣𑁂𑀭𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀧𑀝𑀺𑀯𑁂𑀤𑁂𑀲𑀼𑀁. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀳𑀢𑁆𑀣𑀓𑀫𑁆𑀫𑀓𑀸𑀭𑀓𑁂 𑀫𑀦𑀼𑀲𑁆𑀲𑁂 𑀅𑀤𑀸𑀲𑀺. 𑀣𑁂𑀭𑀸 𑀧𑀞𑀫𑀁 𑀫𑀸𑀲𑀁 𑀲𑀩𑁆𑀩𑀯𑀺𑀳𑀸𑀭𑁂 𑀧𑀝𑀺𑀲𑀗𑁆𑀔𑀭𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚, 𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀭𑀡𑀁. 𑀇𑀤𑀸𑀦𑀺 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑁄𑀫𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀯𑀺𑀲𑁆𑀲𑀢𑁆𑀣𑀸 𑀓𑀭𑁄𑀣. 𑀫𑀬𑁆𑀳𑀁 𑀆𑀡𑀸𑀘𑀓𑁆𑀓𑀁, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼. 𑀆𑀡𑀸𑀧𑁂𑀣, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀲𑀚𑁆𑀚𑀝𑁆𑀞𑀸𑀦𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺? ‘‘𑀯𑁂𑀪𑀸𑀭𑀧𑀩𑁆𑀩𑀢𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀓𑀸𑀢𑀼𑀁 𑀬𑀼𑀢𑁆𑀢𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀢𑁆𑀣𑀫𑁆𑀪𑀲𑁄𑀧𑀸𑀦𑀁 𑀦𑀸𑀦𑀸𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀆𑀓𑀫𑁆𑀫𑀯𑀺𑀘𑀺𑀢𑁆𑀢𑀁 𑀅𑀪𑀺𑀪𑀯𑀦𑁆𑀢𑀫𑀺𑀯 𑀭𑀸𑀚𑀪𑀯𑀦𑀯𑀺𑀪𑀽𑀢𑀺𑀁 𑀅𑀯𑀳𑀲𑀦𑁆𑀢𑀫𑀺𑀯 𑀤𑁂𑀯𑀯𑀺𑀫𑀸𑀦𑀲𑀺𑀭𑀺𑀁 𑀲𑀺𑀭𑀺𑀬𑀸 𑀦𑀺𑀓𑁂𑀢𑀫𑀺𑀯 𑀏𑀓𑀦𑀺𑀧𑀸𑀢𑀢𑀺𑀢𑁆𑀣𑀫𑀺𑀯 𑀘 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀯𑀺𑀳𑀗𑁆𑀕𑀸𑀦𑀁 𑀮𑁄𑀓𑀭𑀸𑀫𑀡𑁂𑀬𑁆𑀬𑀓𑀫𑀺𑀯 𑀲𑀫𑁆𑀧𑀺𑀡𑁆𑀟𑀺𑀢𑀁 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑀁 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀯𑀺𑀥𑀓𑀼𑀲𑀼𑀫𑀤𑀸𑀫-𑀑𑀮𑀫𑁆𑀩𑀓-𑀯𑀺𑀦𑀺𑀕𑁆𑀕𑀮𑀦𑁆𑀢𑀘𑀸𑀭𑀼𑀯𑀺𑀢𑀸𑀦𑀁 ¶ 𑀭𑀢𑀦𑀯𑀺𑀘𑀺𑀢𑁆𑀢𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀫𑀺𑀯 𑀘 𑀦𑀁 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀲𑀤𑀺𑀲𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀫𑀳𑀸𑀫𑀡𑁆𑀟𑀧𑁂 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀕𑁆𑀖𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀲𑀢𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀪𑀸𑀕𑀁 𑀦𑀺𑀲𑁆𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀣𑁂𑀭𑀸𑀲𑀦𑀁 𑀫𑀡𑁆𑀟𑀧𑀫𑀚𑁆𑀛𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀲𑀦𑀸𑀭𑀳𑀁 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀜𑁆𑀘𑁂𑀢𑁆𑀣 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀫𑀫 𑀓𑀺𑀘𑁆𑀘’’𑀦𑁆𑀢𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀜𑁆𑀜𑁄 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 ¶ 𑀯𑀺𑀘𑀭𑀡𑀓𑀪𑀺𑀓𑁆𑀔𑀼 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀏𑀢𑁂 𑀫𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀼 𑁋 ‘‘𑀲𑁆𑀯𑁂, 𑀆𑀯𑀼𑀲𑁄, 𑀲𑀦𑁆𑀦𑀺𑀧𑀸𑀢𑁄 𑀢𑁆𑀯𑀜𑁆𑀘 𑀲𑁂𑀓𑁆𑀔𑁄 𑀲𑀓𑀭𑀡𑀻𑀬𑁄, 𑀢𑁂𑀦 𑀢𑁂 𑀦 𑀬𑀼𑀢𑁆𑀢𑀁 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼𑀁, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀲𑁂𑀓𑁆𑀔𑁄 ¶ 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀓𑀸𑀬𑀕𑀢𑀸𑀬𑀲𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀆𑀯𑀚𑁆𑀚𑁂𑀲𑀺. 𑀤𑁆𑀯𑁂 𑀧𑀸𑀤𑀸 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀘𑀗𑁆𑀓𑀫𑁂𑀦 ¶ 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀦𑀼 𑀫𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚; 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’𑀢𑀺 (𑀤𑀻. 𑀦𑀺. 𑁨.𑁨𑁦𑁭). 𑀩𑀼𑀤𑁆𑀥𑀸𑀦𑀜𑁆𑀘 𑀓𑀣𑀸𑀤𑁄𑀲𑁄 𑀦𑀸𑀫 𑀦𑀢𑁆𑀣𑀺. 𑀫𑀫 𑀅𑀘𑁆𑀘𑀸𑀭𑀤𑁆𑀥𑀁 𑀯𑀻𑀭𑀺𑀬𑀁 𑀢𑁂𑀦 𑀫𑁂 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀲𑀫𑀣𑀁 𑀬𑁄𑀚𑁂𑀫𑀻’’𑀢𑀺 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀫𑀜𑁆𑀘𑀓𑁂 𑀉𑀧𑀦𑀸𑀫𑁂𑀲𑀺. 𑀤𑁆𑀯𑁂 𑀧𑀸𑀤𑀸 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀲𑀻𑀲𑀜𑁆𑀘 𑀩𑀺𑀫𑁆𑀩𑁄𑀳𑀦𑀁 𑀅𑀲𑀫𑁆𑀧𑀢𑁆𑀢𑀁. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀭𑀳𑀺𑀢𑀁 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀁 𑀅𑀳𑁄𑀲𑀺. 𑀢𑁂𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀦𑀺𑀧𑀦𑁆𑀦𑁄 𑀅𑀦𑀺𑀲𑀺𑀦𑁆𑀦𑁄 𑀅𑀝𑁆𑀞𑀺𑀢𑁄 𑀅𑀘𑀗𑁆𑀓𑀫𑀦𑁆𑀢𑁄 ‘‘𑀓𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀸𑀧𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦 𑀕𑀢𑁄. 𑀪𑀺𑀓𑁆𑀔𑀽 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀢𑀢𑁆𑀣 𑀓𑁂𑀳𑀺𑀘𑀺 ‘‘𑀏𑀢𑀫𑀸𑀲𑀦𑀁 𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸’’𑀢𑀺. ‘‘𑀆𑀦𑀦𑁆𑀤𑁄 𑀧𑀦 𑀓𑀼𑀳𑀺𑀁 𑀕𑀢𑁄’’𑀢𑀺? 𑀢𑀲𑁆𑀫𑀺𑀁 𑀲𑀫𑀬𑁂 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀕𑀫𑀦𑀓𑀸𑀮𑁄’’𑀢𑀺. 𑀢𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 ¶ 𑀤𑀲𑁆𑀲𑁂𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀻𑀢𑀺𑀧𑀺 𑀏𑀓𑁂.

𑀏𑀯𑀁 ¶ 𑀦𑀺𑀲𑀺𑀦𑁆𑀦𑁂 𑀢𑀲𑁆𑀫𑀺𑀁 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀓𑀺𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫, 𑀥𑀫𑁆𑀫𑀁 𑀯𑀸 𑀯𑀺𑀦𑀬𑀁 𑀯𑀸’’𑀢𑀺? 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧, 𑀯𑀺𑀦𑀬𑁄 𑀦𑀸𑀫 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀆𑀬𑀼, 𑀯𑀺𑀦𑀬𑁂 𑀞𑀺𑀢𑁂 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺; 𑀢𑀲𑁆𑀫𑀸 𑀧𑀞𑀫𑀁 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺,. ‘‘𑀓𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺? ‘‘𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺’’𑀦𑁆𑀢𑀺. ‘‘𑀓𑀺𑀁 𑀆𑀦𑀦𑁆𑀤𑁄 𑀦𑀧𑁆𑀧𑀳𑁄𑀢𑀻’’𑀢𑀺? ‘‘𑀦𑁄 𑀦𑀧𑁆𑀧𑀳𑁄𑀢𑀺; 𑀅𑀧𑀺 𑀘 𑀔𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀭𑀫𑀸𑀦𑁄𑀬𑁂𑀯 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮). 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺. 𑀢𑀢𑁄 𑀣𑁂𑀭𑁄 𑀯𑀺𑀦𑀬𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺. 𑀉𑀧𑀸𑀮𑀺𑀢𑁆𑀣𑁂𑀭𑁄𑀧𑀺 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬 𑀲𑀫𑁆𑀫𑀦𑁆𑀦𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺.

‘‘𑀆𑀬𑀲𑁆𑀫𑀸𑀧𑀺 𑀉𑀧𑀸𑀮𑀺 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺, 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀢𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑀺 𑁋 ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 ¶ ? ‘‘𑀯𑁂𑀲𑀸𑀮𑀺𑀬𑀁, 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫𑁂’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀧𑀞𑀫𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺; 𑀬𑀣𑀸 𑀘 𑀧𑀞𑀫𑀲𑁆𑀲 𑀢𑀣𑀸 𑀤𑀼𑀢𑀺𑀬𑀲𑁆𑀲 𑀢𑀣𑀸 𑀢𑀢𑀺𑀬𑀲𑁆𑀲 𑀢𑀣𑀸 𑀘𑀢𑀼𑀢𑁆𑀣𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁄 ¶ 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑀁 𑀦𑀸𑀫 𑀇𑀤’’𑀦𑁆𑀢𑀺 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 ‘‘𑀢𑁂𑀭𑀲𑀓’’𑀦𑁆𑀢𑀺 𑀞𑀧𑁂𑀲𑀼𑀁. 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀅𑀦𑀺𑀬𑀢𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀢𑀺𑀁𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀤𑁆𑀯𑁂𑀦𑀯𑀼𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀧𑀜𑁆𑀘𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑁂𑀔𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢 𑀥𑀫𑁆𑀫𑁂 ‘‘𑀅𑀥𑀺𑀓𑀭𑀡𑀲𑀫𑀣𑀸’’𑀢𑀺 𑀞𑀧𑁂𑀲𑀼𑀁.

𑀏𑀯𑀁 ¶ 𑀫𑀳𑀸𑀯𑀺𑀪𑀗𑁆𑀕𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑀁 𑀦𑀸𑀫 𑀇𑀤’’𑀦𑁆𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑀢𑁆𑀢𑀭𑀲𑀓’’𑀦𑁆𑀢𑀺 𑀞𑀧𑁂𑀲𑀼𑀁. 𑀢𑀺𑀁𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀙𑀲𑀝𑁆𑀞𑀺𑀲𑀢𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀧𑀜𑁆𑀘𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑁂𑀔𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢 𑀥𑀫𑁆𑀫𑁂 ‘‘𑀅𑀥𑀺𑀓𑀭𑀡𑀲𑀫𑀣𑀸’’𑀢𑀺 ¶ 𑀞𑀧𑁂𑀲𑀼𑀁. 𑀏𑀯𑀁 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀧𑀺 𑀆𑀭𑁄𑀧𑁂𑀲𑀼𑀁. 𑀏𑀯𑀫𑁂𑀢𑀁 𑀲𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑀁 𑀯𑀺𑀦𑀬𑀧𑀺𑀝𑀓𑀁 𑀲𑀗𑁆𑀕𑀳𑀫𑀸𑀭𑀽𑀴𑁆𑀳𑀁 𑀲𑀩𑁆𑀩𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀼𑀘𑁆𑀙𑀺, 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑀬𑁂𑀦𑁂𑀯 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀼. 𑀯𑀺𑀦𑀬𑀲𑀗𑁆𑀕𑀳𑀸𑀯𑀲𑀸𑀦𑁂 𑀉𑀧𑀸𑀮𑀺𑀢𑁆𑀣𑁂𑀭𑁄 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑀸 𑀑𑀭𑁄𑀳𑀺𑀢𑁆𑀯𑀸 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺.

𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀓𑀸𑀫𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀥𑀫𑁆𑀫𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀓𑀁 𑀧𑀼𑀕𑁆𑀕𑀮𑀁 𑀥𑀼𑀭𑀁 𑀓𑀢𑁆𑀯𑀸 𑀥𑀫𑁆𑀫𑁄 𑀲𑀗𑁆𑀕𑀸𑀬𑀺𑀢𑀩𑁆𑀩𑁄’’𑀢𑀺? 𑀪𑀺𑀓𑁆𑀔𑀽 ‘‘𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺 𑀆𑀳𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀥𑀫𑁆𑀫𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 ¶ 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀅𑀣 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺 𑁋 ‘‘𑀩𑁆𑀭𑀳𑁆𑀫𑀚𑀸𑀮𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀅𑀦𑁆𑀢𑀭𑀸 𑀘, 𑀪𑀦𑁆𑀢𑁂, 𑀭𑀸𑀚𑀕𑀳𑀁 ¶ 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀭𑀸𑀚𑀸𑀕𑀸𑀭𑀓𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁, 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯’’𑀦𑁆𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀯𑀡𑁆𑀡𑀸𑀯𑀡𑁆𑀡𑁂’’𑀢𑀺. 𑀅𑀣 𑀔𑁄 ¶ 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀜𑁆𑀜𑀨𑀮𑀁 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘𑀭𑀸𑀚𑀕𑀳𑁂, 𑀪𑀦𑁆𑀢𑁂, 𑀚𑀻𑀯𑀓𑀫𑁆𑀩𑀯𑀦𑁂’’𑀢𑀺. ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺? ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀸𑀫𑀜𑁆𑀜𑀨𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀜𑁆𑀘 𑀦𑀺𑀓𑀸𑀬𑁂 𑀧𑀼𑀘𑁆𑀙𑀺.

𑀧𑀜𑁆𑀘𑀦𑀺𑀓𑀸𑀬𑀸 𑀦𑀸𑀫 𑁋 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀦𑀸𑀫 𑁋 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁. 𑀢𑀢𑁆𑀣 𑀯𑀺𑀦𑀬𑁄 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀲𑁂𑀲𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀘𑀢𑁆𑀢𑀸𑀭𑁄 𑀘 𑀦𑀺𑀓𑀸𑀬𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁, 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁, 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁; 𑀢𑀣𑀸 𑀧𑀺𑀝𑀓𑀯𑀲𑁂𑀦, 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁, 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁, 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁? 𑀬𑀜𑁆𑀳𑀺 𑀪𑀕𑀯𑀢𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀬𑀸𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀬𑀓𑁆𑀔𑀸𑀤𑀬𑁄 𑀅𑀦𑀼𑀲𑀸𑀲𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀏𑀓𑀭𑀲𑀁 𑀯𑀺𑀫𑀼𑀢𑁆𑀢𑀺𑀭𑀲𑀫𑁂𑀯 𑀳𑁄𑀢𑀺. 𑀏𑀯𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁.

𑀓𑀣𑀁 ¶ 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀥𑀫𑁆𑀫𑁄 𑀘𑁂𑀯 𑀯𑀺𑀦𑀬𑁄 𑀘𑀸𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄, 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑁄; 𑀢𑁂𑀦𑁂𑀯𑀸𑀳 𑁋 ‘‘𑀬𑀁𑀦𑀽𑀦 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺. ‘‘𑀅𑀳𑀁 ¶ 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘 𑀏𑀯𑀁 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁.

𑀓𑀣𑀁 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁, 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁, 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀢𑀺𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 ¶ 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪);

𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁.

𑀓𑁂𑀘𑀺 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺 𑀔𑀦𑁆𑀥𑀓𑁂 𑀉𑀤𑀸𑀦𑀕𑀸𑀣𑀁 𑀆𑀳𑀼. 𑀏𑀲𑀸 𑀧𑀦 𑀧𑀸𑀝𑀺𑀧𑀤𑀤𑀺𑀯𑀲𑁂 𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑁂𑀦 𑀧𑀘𑁆𑀘𑀬𑀸𑀓𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀉𑀤𑀸𑀦𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀅𑀪𑀸𑀲𑀺 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁮) 𑀇𑀤𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁.

𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀬𑀁 𑀯𑀼𑀢𑁆𑀢𑀁 𑀏𑀢𑀁 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀦𑁆𑀢𑀺. 𑀏𑀯𑀁 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁.

𑀓𑀣𑀁 ¶ 𑀧𑀺𑀝𑀓𑀯𑀲𑁂𑀦 𑀢𑀺𑀯𑀺𑀥𑀁? 𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀺𑀧𑁆𑀧𑀪𑁂𑀤𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀻𑀢𑀜𑁆𑀘 𑀅𑀲𑀗𑁆𑀕𑀻𑀢𑀜𑁆𑀘 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺, 𑀤𑁆𑀯𑁂 𑀯𑀺𑀪𑀗𑁆𑀕𑀸𑀦𑀺, 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸𑀦𑀺, 𑀲𑁄𑀴𑀲𑀧𑀭𑀺𑀯𑀸𑀭𑀸𑀢𑀺 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫.

𑀩𑁆𑀭𑀳𑁆𑀫𑀚𑀸𑀮𑀸𑀤𑀺 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀤𑀻𑀖𑀦𑀺𑀓𑀸𑀬𑁄, 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀺 𑀤𑀺𑀬𑀟𑁆𑀠𑀲𑀢𑀤𑁆𑀯𑁂𑀲𑀼𑀢𑁆𑀢𑀲𑀗𑁆𑀕𑀳𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀺 𑀲𑀢𑁆𑀢𑀲𑀼𑀢𑁆𑀢𑀲𑀳𑀲𑁆𑀲 𑀲𑀢𑁆𑀢𑀲𑀢 𑀤𑁆𑀯𑀸𑀲𑀝𑁆𑀞𑀺𑀲𑀼𑀢𑁆𑀢𑀲𑀗𑁆𑀕𑀳𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀸𑀤𑀺 𑀦𑀯𑀲𑀼𑀢𑁆𑀢𑀲𑀳𑀲𑁆𑀲 𑀧𑀜𑁆𑀘𑀲𑀢 𑀲𑀢𑁆𑀢𑀧𑀜𑁆𑀜𑀸𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀧𑀸𑀞-𑀥𑀫𑁆𑀫𑀧𑀤-𑀉𑀤𑀸𑀦-𑀇𑀢𑀺𑀯𑀼𑀢𑁆𑀢𑀓-𑀲𑀼𑀢𑁆𑀢𑀦𑀺𑀧𑀸𑀢-𑀯𑀺𑀫𑀸𑀦𑀯𑀢𑁆𑀣𑀼-𑀧𑁂𑀢𑀯𑀢𑁆𑀣𑀼-𑀣𑁂𑀭𑀕𑀸𑀣𑀸-𑀣𑁂𑀭𑀻𑀕𑀸𑀣𑀸-𑀚𑀸𑀢𑀓𑀦𑀺𑀤𑁆𑀤𑁂𑀲-𑀧𑀝𑀺𑀲𑀫𑁆𑀪𑀺𑀤𑀸-𑀅𑀧𑀤𑀸𑀦-𑀩𑀼𑀤𑁆𑀥𑀯𑀁𑀲-𑀘𑀭𑀺𑀬𑀸𑀧𑀺𑀝𑀓𑀯𑀲𑁂𑀦 ¶ 𑀧𑀦𑁆𑀦𑀭𑀲𑀧𑁆𑀧𑀪𑁂𑀤𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀦𑀸𑀫.

𑀥𑀫𑁆𑀫𑀲𑀗𑁆𑀕𑀳𑁄, 𑀯𑀺𑀪𑀗𑁆𑀕𑁄, 𑀥𑀸𑀢𑀼𑀓𑀣𑀸, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺, 𑀓𑀣𑀸𑀯𑀢𑁆𑀣𑀼, 𑀬𑀫𑀓𑀁, 𑀧𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫. 𑀢𑀢𑁆𑀣 𑁋

𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸 ¶ , 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄.

𑀯𑀺𑀯𑀺𑀥𑀸 𑀳𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲 𑀧𑀸𑀭𑀸𑀚𑀺𑀓𑀸𑀤𑀺 𑀲𑀢𑁆𑀢𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀫𑀸𑀢𑀺𑀓𑀸 𑀯𑀺𑀪𑀗𑁆𑀕𑀸𑀤𑀺𑀧𑁆𑀧𑀪𑁂𑀤𑀸 𑀦𑀬𑀸, 𑀯𑀺𑀲𑁂𑀲𑀪𑀽𑀢𑀸 𑀘 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀦𑀬𑀸 ¶ , 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀚𑁆𑀛𑀸𑀘𑀸𑀭𑀦𑀺𑀲𑁂𑀥𑀦𑀢𑁄 𑀘𑁂𑀲 𑀓𑀸𑀬𑀁 𑀯𑀸𑀘𑀜𑁆𑀘 𑀯𑀺𑀦𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀦𑀬𑀢𑁆𑀢𑀸 𑀯𑀺𑀲𑁂𑀲𑀦𑀬𑀢𑁆𑀢𑀸 𑀓𑀸𑀬𑀯𑀸𑀘𑀸𑀦𑀜𑁆𑀘 𑀯𑀺𑀦𑀬𑀦𑀢𑁄 ‘‘𑀯𑀺𑀦𑀬𑁄’’𑀢𑀺 𑀅𑀓𑁆𑀔𑀸𑀢𑁄. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸, 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄’’𑀢𑀺.

𑀇𑀢𑀭𑀁 𑀧𑀦 𑁋

𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘, 𑀲𑀼𑀢𑁆𑀢𑀦𑁆𑀢𑀺 𑀅𑀓𑁆𑀔𑀸𑀢𑀁.

𑀢𑀜𑁆𑀳𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀲𑀽𑀘𑁂𑀢𑀺, 𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀯𑀢𑀺 𑀘𑁂𑀢𑀁 𑀅𑀢𑁆𑀣𑁂 𑀲𑀲𑁆𑀲𑀫𑀺𑀯 𑀨𑀮𑀁 𑀧𑀲𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀽𑀤𑀢𑀺 𑀘𑁂𑀢𑀁 𑀥𑁂𑀦𑀼𑀯𑀺𑀬 𑀔𑀻𑀭𑀁, 𑀧𑀕𑁆𑀖𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀢𑀲𑀪𑀸𑀕𑀜𑁆𑀘𑁂𑀢𑀁, 𑀬𑀣𑀸 𑀳𑀺 𑀢𑀘𑁆𑀙𑀓𑀸𑀦𑀁 𑀲𑀼𑀢𑁆𑀢𑀁 𑀧𑀫𑀸𑀡𑀁 𑀳𑁄𑀢𑀺; 𑀏𑀯𑀫𑁂𑀢𑀫𑁆𑀧𑀺 𑀯𑀺𑀜𑁆𑀜𑀽𑀦𑀁. 𑀬𑀣𑀸 𑀘 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀦 𑀯𑀺𑀤𑁆𑀥𑀁𑀲𑀺𑀬𑀦𑁆𑀢𑀺; 𑀏𑀯𑀫𑁂𑀢𑁂𑀦 𑀲𑀗𑁆𑀕𑀳𑀺𑀢𑀸 𑀅𑀢𑁆𑀣𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘, 𑀲𑀼𑀢𑁆𑀢𑀦𑁆𑀢𑀺 𑀅𑀓𑁆𑀔𑀸𑀢’’𑀦𑁆𑀢𑀺.

𑀇𑀢𑀭𑁄 ¶ ¶ 𑀧𑀦 𑁋

𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄.

𑀅𑀬𑀜𑁆𑀳𑀺 ¶ 𑀅𑀪𑀺𑀲𑀤𑁆𑀤𑁄 𑀯𑀼𑀟𑁆𑀠𑀺𑀮𑀓𑁆𑀔𑀡𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸𑀥𑀺𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑁂𑀲 𑁋 ‘‘𑀩𑀸𑀴𑁆𑀳𑀸 𑀫𑁂 𑀆𑀯𑀼𑀲𑁄 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁮𑁯; 𑀲𑀁. 𑀦𑀺. 𑁫.𑁧𑁯𑁫) 𑀯𑀼𑀟𑁆𑀠𑀺𑀬𑀁 𑀆𑀕𑀢𑁄. ‘‘𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁯) 𑀮𑀓𑁆𑀔𑀡𑁂. ‘‘𑀭𑀸𑀚𑀸𑀪𑀺𑀭𑀸𑀚𑀸 𑀫𑀦𑀼𑀚𑀺𑀦𑁆𑀤𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁮) 𑀧𑀽𑀚𑀺𑀢𑁂. ‘‘𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁮𑁫) 𑀧𑀭𑀺𑀘𑁆𑀙𑀺𑀦𑁆𑀦𑁂. 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀲𑀼 (𑀯𑀺. 𑀯. 𑁭𑁫) 𑀅𑀥𑀺𑀓𑁂.

𑀏𑀢𑁆𑀣 𑀘 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬𑁦 𑀆𑀤𑀬𑁄) 𑀦𑀬𑁂𑀦 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀸𑀤𑀻𑀳𑀺 𑀮𑀓𑁆𑀔𑀡𑀻𑀬𑀢𑁆𑀢𑀸 𑀲𑀮𑀓𑁆𑀔𑀡𑀸𑀧𑀺. ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀽𑀚𑀺𑀢𑀸𑀧𑀺 𑀧𑀽𑀚𑀸𑀭𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀧𑀺. ‘‘𑀫𑀳𑀕𑁆𑀕𑀢𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸, 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀓𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄’’𑀢𑀺.

𑀬𑀁 𑀧𑀦𑁂𑀢𑁆𑀣 𑀅𑀯𑀺𑀲𑀺𑀝𑁆𑀞𑀁, 𑀢𑀁 𑁋

𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽, 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼;

𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸, 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀧𑀭𑀺𑀬𑀢𑁆𑀢𑀺𑀧𑀺 ¶ ¶ 𑀳𑀺 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀧𑀺𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓𑀁 𑀆𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁮; 𑀅. 𑀦𑀺. 𑁩.𑁭𑁦) 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀫𑁆𑀧𑀺. 𑀢𑀲𑁆𑀫𑀸 𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽, 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼.

𑀇𑀤𑀸𑀦𑀺 𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸𑀢𑀺. 𑀢𑁂𑀦 𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦 𑀧𑀺𑀝𑀓𑀲𑀤𑁆𑀤𑁂𑀦 𑀲𑀳 ¶ 𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀦𑀬𑁄 𑀘 𑀲𑁄 𑀧𑀺𑀝𑀓𑀜𑁆𑀘 𑀧𑀭𑀺𑀬𑀢𑁆𑀢𑀺𑀪𑀸𑀯𑀢𑁄 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀪𑀸𑀚𑀦𑀢𑁄 𑀘𑀸𑀢𑀺 𑀯𑀺𑀦𑀬𑀧𑀺𑀝𑀓𑀁, 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀲𑀼𑀢𑁆𑀢𑀦𑁆𑀢𑀜𑁆𑀘 𑀢𑀁 𑀧𑀺𑀝𑀓𑀜𑁆𑀘𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀏𑀯𑀫𑁂𑀢𑁂 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀏𑀯𑀁 𑀜𑀢𑁆𑀯𑀸 𑀘 𑀧𑀼𑀦𑀧𑀺 𑀢𑁂𑀲𑁆𑀯𑁂𑀯 𑀧𑀺𑀝𑀓𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑁋

𑀤𑁂𑀲𑀦𑀸𑀲𑀸𑀲𑀦𑀓𑀣𑀸, 𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭, 𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂.

𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀁 𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀧𑀭𑀺𑀤𑀻𑀧𑀦𑀸 𑀯𑀺𑀪𑀸𑀯𑀦𑀸 𑀘, 𑀏𑀢𑀸𑀦𑀺 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀬𑀣𑀸𑀓𑁆𑀓𑀫𑀁 𑀆𑀡𑀸 𑀯𑁄𑀳𑀸𑀭 𑀧𑀭𑀫𑀢𑁆𑀣𑀤𑁂𑀲𑀦𑀸 𑀬𑀣𑀸𑀧𑀭𑀸𑀥-𑀬𑀣𑀸𑀦𑀼𑀮𑁄𑀫-𑀬𑀣𑀸𑀥𑀫𑁆𑀫𑀲𑀸𑀲𑀦𑀸𑀦𑀺, 𑀲𑀁𑀯𑀭𑀸𑀲𑀁𑀯𑀭𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑀏𑀢𑁆𑀣 𑀳𑀺 𑀯𑀺𑀦𑀬𑀧𑀺𑀝𑀓𑀁 𑀆𑀡𑀸𑀭𑀳𑁂𑀦 𑀪𑀕𑀯𑀢𑀸 𑀆𑀡𑀸𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀆𑀡𑀸𑀤𑁂𑀲𑀦𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀯𑁄𑀳𑀸𑀭𑀓𑀼𑀲𑀮𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀯𑁄𑀳𑀸𑀭𑀤𑁂𑀲𑀦𑀸, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀫𑀢𑁆𑀣𑀓𑀼𑀲𑀮𑁂𑀦 𑀪𑀕𑀯𑀢𑀸 𑀧𑀭𑀫𑀢𑁆𑀣𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀤𑁂𑀲𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 ¶ 𑀧𑀞𑀫𑀁 𑀬𑁂 𑀢𑁂 𑀧𑀘𑀼𑀭𑀸𑀧𑀭𑀸𑀥𑀸 𑀲𑀢𑁆𑀢𑀸 𑀢𑁂 𑀬𑀣𑀸𑀧𑀭𑀸𑀥𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀧𑀭𑀸𑀥𑀲𑀸𑀲𑀦𑀁, 𑀤𑀼𑀢𑀺𑀬𑀁 𑀅𑀦𑁂𑀓𑀚𑁆𑀛𑀸𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀬𑀣𑀸𑀦𑀼𑀮𑁄𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀁, 𑀢𑀢𑀺𑀬𑀁 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 ‘‘𑀅𑀳𑀁 𑀫𑀫𑀸’’𑀢𑀺 𑀲𑀜𑁆𑀜𑀺𑀦𑁄 𑀲𑀢𑁆𑀢𑀸 𑀬𑀣𑀸𑀥𑀫𑁆𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 ¶ 𑀧𑀞𑀫𑀁 𑀅𑀚𑁆𑀛𑀸𑀘𑀸𑀭𑀧𑀝𑀺𑀧𑀓𑁆𑀔𑀪𑀽𑀢𑁄 𑀲𑀁𑀯𑀭𑀸𑀲𑀁𑀯𑀭𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀲𑀁𑀯𑀭𑀸𑀲𑀁𑀯𑀭𑀓𑀣𑀸, 𑀤𑀼𑀢𑀺𑀬𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸 𑀏𑀢𑁆𑀣 𑀓𑀣𑀺𑀢𑀸𑀢𑀺 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸, 𑀢𑀢𑀺𑀬𑀁 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀻𑀲𑀼𑀧𑀺 𑀘 𑀘𑁂𑀢𑁂𑀲𑀼 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀢𑀻𑀡𑀺 𑀧𑀳𑀸𑀦𑀸𑀦𑀺, 𑀘𑀢𑀼𑀩𑁆𑀩𑀺𑀥𑁄 𑀘 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀢𑀣𑀸 𑀳𑀺 𑁋 𑀯𑀺𑀦𑀬𑀧𑀺𑀝𑀓𑁂 𑀯𑀺𑀲𑁂𑀲𑁂𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀯𑀺𑀦𑀬𑀧𑀺𑀝𑀓𑁂 𑀘 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲. 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁, 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀸𑀥𑀺𑀲𑁆𑀲. 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬.

𑀧𑀞𑀫𑁂 𑀘 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀇𑀢𑀭𑁂𑀲𑀼 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀸𑀦𑀺. 𑀧𑀞𑀫𑁂 𑀘 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁, 𑀇𑀢𑀭𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀦𑀁.

𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀧𑀸𑀴𑀺. 𑀅𑀢𑁆𑀣𑁄𑀢𑀺 𑀢𑀲𑁆𑀲𑀸𑀬𑁂𑀯𑀢𑁆𑀣𑁄. 𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀫𑀦𑀲𑀸𑀯𑀯𑀢𑁆𑀣𑀸𑀧𑀺𑀢𑀸𑀬 𑀧𑀸𑀴𑀺𑀬𑀸 𑀤𑁂𑀲𑀦𑀸. 𑀧𑀝𑀺𑀯𑁂𑀥𑁄𑀢𑀺 𑀧𑀸𑀴𑀺𑀬𑀸 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸 ¶ 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀏𑀯𑀁 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀥𑀫𑁆𑀫𑁄𑀢𑀺 𑀳𑁂𑀢𑀼. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺. 𑀅𑀢𑁆𑀣𑁄𑀢𑀺 𑀳𑁂𑀢𑀼𑀨𑀮𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺. 𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀯𑁂𑀥𑁄𑀢𑀺 𑀅𑀪𑀺𑀲𑀫𑀬𑁄, 𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀯𑀺𑀲𑀬𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀼 𑀬𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀯𑀸 𑀅𑀢𑁆𑀣𑀚𑀸𑀢𑀁 𑀯𑀸, 𑀬𑀸 𑀘𑀸𑀬𑀁 𑀬𑀣𑀸 𑀬𑀣𑀸 𑀜𑀸𑀧𑁂𑀢𑀩𑁆𑀩𑁄 𑀅𑀢𑁆𑀣𑁄 𑀲𑁄𑀢𑀽𑀦𑀁 𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀢𑀤𑀢𑁆𑀣𑀚𑁄𑀢𑀺𑀓𑀸 𑀤𑁂𑀲𑀦𑀸, 𑀬𑁄 𑀘𑁂𑀢𑁆𑀣 ¶ 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀲𑀗𑁆𑀔𑀸𑀢𑁄 𑀧𑀝𑀺𑀯𑁂𑀥𑁄 𑀲𑀩𑁆𑀩𑀫𑁂𑀢𑀁 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀧𑁆𑀧𑀜𑁆𑀜𑁂𑀳𑀺 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀤𑀼𑀓𑁆𑀔𑁄𑀕𑀸𑀳𑀁 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀜𑁆𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀁. 𑀏𑀯𑀫𑁆𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀤𑁂𑀲𑀦𑀸-𑀲𑀸𑀲𑀦𑀓𑀣𑀸 ¶ , 𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂’’𑀢𑀺.

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

‘‘𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂’’𑀢𑀺.

𑀏𑀢𑁆𑀣 𑀧𑀦 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀢𑀺𑀯𑀺𑀥𑁄 𑀧𑀭𑀺𑀬𑀢𑁆𑀢𑀺𑀪𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀲𑁆𑀲𑁄 𑀳𑀺 𑀧𑀭𑀺𑀬𑀢𑁆𑀢𑀺𑀬𑁄 𑁋 𑀅𑀮𑀕𑀤𑁆𑀤𑀽𑀧𑀫𑀸, 𑀦𑀺𑀲𑁆𑀲𑀭𑀡𑀢𑁆𑀣𑀸, 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺.

𑀢𑀢𑁆𑀣 𑀬𑀸 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸, 𑀅𑀬𑀁 𑀅𑀮𑀕𑀤𑁆𑀤𑀽𑀧𑀫𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁. 𑀢𑀫𑁂𑀦𑀁 𑀪𑁄𑀕𑁂 𑀯𑀸 𑀦𑀗𑁆𑀕𑀼𑀝𑁆𑀞𑁂 𑀯𑀸 𑀕𑀡𑁆𑀳𑁂𑀬𑁆𑀬. 𑀢𑀲𑁆𑀲 𑀲𑁄 𑀅𑀮𑀕𑀤𑁆𑀤𑁄 𑀧𑀝𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂 𑀟𑀁𑀲𑁂𑀬𑁆𑀬. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀢𑀁 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁮).

𑀬𑀸 ¶ ¶ 𑀧𑀦 𑀲𑀼𑀕𑁆𑀕𑀳𑀺𑀢𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀧𑀽𑀭𑀺𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑁂𑀦 𑀧𑀭𑀺𑀬𑀸𑀧𑀼𑀝𑀸 𑀦 𑀉𑀧𑀸𑀭𑀫𑁆𑀪𑀸𑀤𑀺 𑀳𑁂𑀢𑀼, 𑀅𑀬𑀁 𑀦𑀺𑀲𑁆𑀲𑀭𑀡𑀢𑁆𑀣𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁯).

𑀬𑀁 𑀧𑀦 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄 𑀧𑀳𑀻𑀦𑀓𑀺𑀮𑁂𑀲𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄 ¶ 𑀓𑁂𑀯𑀮𑀁 𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬 𑀯𑀁𑀲𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀬𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀅𑀬𑀢𑁆𑀢𑀻𑀢𑀺.

𑀯𑀺𑀦𑀬𑁂 𑀧𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀲𑀼𑀢𑁆𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀙 𑀅𑀪𑀺𑀜𑁆𑀜𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀅𑀪𑀺𑀥𑀫𑁆𑀫𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀜𑁆𑀘 𑀢𑀢𑁆𑀣𑁂𑀯 𑀧𑀪𑁂𑀤𑀯𑀘𑀦𑀢𑁄. 𑀏𑀯𑀫𑁂𑀢𑁂𑀲𑀼 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀯𑀺𑀚𑁆𑀚𑀸𑀢𑁆𑀢𑀬𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺.

𑀯𑀺𑀦𑀬𑁂 𑀧𑀦 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀜𑁆𑀜𑀸𑀢𑀲𑀼𑀔𑀲𑀫𑁆𑀨𑀲𑁆𑀲𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀨𑀲𑁆𑀲𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑀸𑀤𑀻𑀲𑀼 𑀅𑀦𑀯𑀚𑁆𑀚𑀲𑀜𑁆𑀜𑀻 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁪) 𑀢𑀢𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀲𑀼𑀢𑁆𑀢𑁂 ¶ 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫) 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁬) 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀥𑀫𑁆𑀫𑀘𑀺𑀦𑁆𑀢𑀁 𑀅𑀢𑀺𑀥𑀸𑀯𑀦𑁆𑀢𑁄 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀘𑀺𑀦𑁆𑀢𑁂𑀢𑀺, 𑀢𑀢𑁄 𑀘𑀺𑀢𑁆𑀢𑀓𑁆𑀔𑁂𑀧𑀁 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀏𑀯𑀫𑁂𑀢𑁂𑀲𑀼 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀤𑀼𑀲𑁆𑀲𑀻𑀮𑀪𑀸𑀯𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀸 𑀘𑀺𑀢𑁆𑀢𑀓𑁆𑀔𑁂𑀧𑀪𑁂𑀤𑀁 𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀁 𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂’’𑀢𑀺.

𑀅𑀬𑀫𑁆𑀧𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀺𑀝𑀓𑀸𑀦𑀺 𑀜𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦𑁂𑀢𑀁 𑀩𑀼𑀤𑁆𑀥𑀯𑀘𑀦𑀁 𑀢𑀺𑀯𑀺𑀥𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀓𑀣𑀁 ¶ 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀤𑀻𑀖𑀦𑀺𑀓𑀸𑀬𑁄? 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺.

𑀘𑀢𑀼𑀢𑁆𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀢𑀺𑀯𑀕𑁆𑀕𑁄 𑀬𑀲𑁆𑀲 𑀲𑀗𑁆𑀕𑀳𑁄;

𑀏𑀲 𑀤𑀻𑀖𑀦𑀺𑀓𑀸𑀬𑁄𑀢𑀺, 𑀧𑀞𑀫𑁄 𑀅𑀦𑀼𑀮𑁄𑀫𑀺𑀓𑁄.

𑀓𑀲𑁆𑀫𑀸 𑀧𑀦𑁂𑀲 𑀤𑀻𑀖𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺? 𑀤𑀻𑀖𑀧𑁆𑀧𑀫𑀸𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀲𑀫𑀽𑀳𑀢𑁄 𑀦𑀺𑀯𑀸𑀲𑀢𑁄 𑀘, 𑀲𑀫𑀽𑀳𑀦𑀺𑀯𑀸𑀲𑀸 𑀳𑀺 𑀦𑀺𑀓𑀸𑀬𑁄𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁; 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸; 𑀧𑁄𑀡𑀺𑀓𑀦𑀺𑀓𑀸𑀬𑁄, 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄’’𑀢𑀺 (𑀲𑀁. 𑀦𑀺. 𑁩.𑁧𑁦𑁦) 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺 𑀲𑀸𑀲𑀦𑀢𑁄 𑀘 𑀮𑁄𑀓𑀢𑁄 𑀘. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀦𑀺𑀓𑀸𑀬𑀪𑀸𑀯𑁂 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄? 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀸𑀦𑀺 𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀻𑀦𑀺 𑀤𑀺𑀬𑀟𑁆𑀠𑀲𑀢𑀁 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺.

𑀤𑀺𑀬𑀟𑁆𑀠𑀲𑀢𑀁 𑀲𑀼𑀢𑁆𑀢𑀦𑁆𑀢𑀸, 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺 𑀬𑀢𑁆𑀣 𑀲𑁄;

𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑁄 𑀧𑀜𑁆𑀘-𑀤𑀲𑀯𑀕𑁆𑀕𑀧𑀭𑀺𑀕𑁆𑀕𑀳𑁄.

𑀓𑀢𑀫𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄? 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀺𑀢𑀸𑀦𑀺 𑀑𑀖𑀢𑀭𑀡𑀸𑀤𑀻𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀲𑀼𑀢𑁆𑀢𑀲𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀘 𑀲𑀼𑀢𑁆𑀢𑀸𑀦𑀺.

𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀤𑁆𑀯𑀸𑀲𑀝𑁆𑀞𑀺 𑀘𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀏𑀲𑁄 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄.

𑀓𑀢𑀫𑁄 ¶ 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄? 𑀏𑀓𑁂𑀓𑀅𑀗𑁆𑀕𑀸𑀢𑀺𑀭𑁂𑀓𑀯𑀲𑁂𑀦 𑀞𑀺𑀢𑀸𑀦𑀺 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀸𑀤𑀻𑀦𑀺 𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀲𑀢𑁆𑀢𑀧𑀜𑁆𑀜𑀸𑀲𑀜𑁆𑀘 𑀲𑀼𑀢𑁆𑀢𑀸𑀦𑀺.

𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀲𑀢𑁆𑀢𑀧𑀜𑁆𑀜𑀸𑀲 𑀲𑀼𑀢𑁆𑀢𑀸𑀦𑀺, 𑀲𑀗𑁆𑀔𑁆𑀬𑀸 𑀅𑀗𑁆𑀕𑀼𑀢𑁆𑀢𑀭𑁂 𑀅𑀬𑀁.

𑀓𑀢𑀫𑁄 ¶ 𑀔𑀼𑀤𑁆𑀤𑀓𑀦𑀺𑀓𑀸𑀬𑁄? 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀔𑀼𑀤𑁆𑀤𑀓𑀧𑀸𑀞𑀸𑀤𑀬𑁄 𑀘 𑀧𑀼𑀩𑁆𑀩𑁂 𑀦𑀺𑀤𑀲𑁆𑀲𑀺𑀢𑀸 𑀧𑀦𑁆𑀦𑀭𑀲𑀪𑁂𑀤𑀸 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺.

𑀞𑀧𑁂𑀢𑁆𑀯𑀸 ¶ 𑀘𑀢𑀼𑀭𑁄𑀧𑁂𑀢𑁂, 𑀦𑀺𑀓𑀸𑀬𑁂 𑀤𑀻𑀖𑀆𑀤𑀺𑀓𑁂;

𑀢𑀤𑀜𑁆𑀜𑀁 𑀩𑀼𑀤𑁆𑀥𑀯𑀘𑀦𑀁, 𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑁄 𑀫𑀢𑁄𑀢𑀺.

𑀏𑀯𑀁 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁.

𑀓𑀣𑀁 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀫𑀗𑁆𑀕𑀮𑀲𑀼𑀢𑁆𑀢-𑀭𑀢𑀦𑀲𑀼𑀢𑁆𑀢-𑀦𑀸𑀮𑀓𑀲𑀼𑀢𑁆𑀢-𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀺 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄, 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀁, 𑀣𑁂𑀭𑀕𑀸𑀣𑀸, 𑀣𑁂𑀭𑀻𑀕𑀸𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑀸𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺 (𑀤𑀻. 𑀦𑀺. 𑁨.𑁨𑁦𑁯) -𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀽𑀴𑀯𑁂𑀤𑀮𑁆𑀮-𑀫𑀳𑀸𑀯𑁂𑀤𑀮𑁆𑀮-𑀲𑀫𑁆𑀫𑀸𑀤𑀺𑀝𑁆𑀞𑀺-𑀲𑀓𑁆𑀓𑀧𑀜𑁆𑀳-𑀲𑀗𑁆𑀔𑀸𑀭𑀪𑀸𑀚𑀦𑀺𑀬-𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 ¶ 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁.

𑀓𑀣𑀁 ¶ 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀩𑀼𑀤𑁆𑀥𑀯𑀘𑀦𑀁 𑁋

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭);

𑀏𑀯𑀁 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀬𑀁 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀁 𑀢𑀢𑁆𑀣 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀕𑀡𑀦𑀸. 𑀕𑀸𑀣𑀸𑀩𑀦𑁆𑀥𑁂𑀲𑀼 𑀧𑀜𑁆𑀳𑀸𑀧𑀼𑀘𑁆𑀙𑀦𑀁 ¶ 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑁄. 𑀅𑀪𑀺𑀥𑀫𑁆𑀫𑁂 𑀏𑀓𑀫𑁂𑀓𑀁 𑀢𑀺𑀓-𑀤𑀼𑀓-𑀪𑀸𑀚𑀦𑀁, 𑀏𑀓𑀫𑁂𑀓𑀜𑁆𑀘 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀁, 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀯𑀺𑀦𑀬𑁂 𑀅𑀢𑁆𑀣𑀺 𑀯𑀢𑁆𑀣𑀼, 𑀅𑀢𑁆𑀣𑀺 𑀫𑀸𑀢𑀺𑀓𑀸, 𑀅𑀢𑁆𑀣𑀺 𑀧𑀤𑀪𑀸𑀚𑀦𑀻𑀬𑀁, 𑀅𑀢𑁆𑀣𑀺 𑀅𑀦𑁆𑀢𑀭𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀆𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀦𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀧𑀭𑀺𑀘𑁆𑀙𑁂𑀤𑁄; 𑀢𑀢𑁆𑀣 𑀏𑀓𑀫𑁂𑀓𑁄 𑀓𑁄𑀝𑁆𑀞𑀸𑀲𑁄, 𑀏𑀓𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀁.

𑀏𑀯𑀫𑁂𑀢𑀁 𑀅𑀪𑁂𑀤𑀢𑁄 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁, 𑀪𑁂𑀤𑀢𑁄 𑀥𑀫𑁆𑀫𑀯𑀺𑀦𑀬𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑀸𑀤𑀺𑀪𑁂𑀤𑀁 𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀦 𑀯𑀲𑀻𑀕𑀡𑁂𑀦 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄; 𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁; 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁, 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁; 𑀅𑀬𑀁 𑀤𑀻𑀖𑀦𑀺𑀓𑀸𑀬𑁄…𑀧𑁂… 𑀅𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑁄; 𑀇𑀫𑀸𑀦𑀺 𑀲𑀼𑀢𑁆𑀢𑀸𑀤𑀻𑀦𑀺 𑀦𑀯𑀗𑁆𑀕𑀸𑀦𑀺, 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀫𑀁 𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀯 𑀲𑀗𑁆𑀕𑀻𑀢𑀁. 𑀦 ¶ 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀉𑀤𑁆𑀤𑀸𑀦𑀲𑀗𑁆𑀕𑀳-𑀯𑀕𑁆𑀕𑀲𑀗𑁆𑀕𑀳𑀧𑁂𑀬𑁆𑀬𑀸𑀮𑀲𑀗𑁆𑀕𑀳-𑀏𑀓𑀓𑀦𑀺𑀧𑀸𑀢-𑀤𑀼𑀓𑀦𑀺𑀧𑀸𑀢𑀸𑀤𑀺𑀦𑀺𑀧𑀸𑀢𑀲𑀗𑁆𑀕𑀳-𑀲𑀁𑀬𑀼𑀢𑁆𑀢𑀲𑀗𑁆𑀕𑀳-𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀺𑀅𑀦𑁂𑀓𑀯𑀺𑀥𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀁 𑀲𑀗𑁆𑀕𑀳𑀧𑁆𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀏𑀯 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀲𑀗𑁆𑀕𑀻𑀢𑀁. 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑁋 ‘‘𑀇𑀤𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀓𑀸𑀮𑀁 𑀧𑀯𑀢𑁆𑀢𑀦𑀲𑀫𑀢𑁆𑀣𑀁 𑀓𑀢’’𑀦𑁆𑀢𑀺 𑀲𑀜𑁆𑀚𑀸𑀢𑀧𑁆𑀧𑀫𑁄𑀤𑀸 𑀲𑀸𑀥𑀼𑀓𑀸𑀭𑀁 𑀯𑀺𑀬 𑀤𑀤𑀫𑀸𑀦𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀫𑁆𑀧𑀺 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺, 𑀅𑀦𑁂𑀓𑀸𑀦𑀺 𑀘 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀅𑀬𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀦𑀸𑀫. 𑀬𑀸 𑀮𑁄𑀓𑁂 𑁋

𑀲𑀢𑁂𑀳𑀺 𑀧𑀜𑁆𑀘𑀳𑀺 𑀓𑀢𑀸, 𑀢𑁂𑀦 𑀧𑀜𑁆𑀘𑀲𑀢𑀸𑀢𑀺 𑀘;

𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀘, 𑀣𑁂𑀭𑀺𑀓𑀸𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀇𑀫𑀺𑀲𑁆𑀲𑀸 ¶ 𑀧𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬 𑀯𑀺𑀦𑀬𑀁 𑀧𑀼𑀘𑁆𑀙𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀘𑀦𑀧𑀭𑀺𑀬𑁄𑀲𑀸𑀦𑁂 ‘‘𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺 𑀏𑀢𑁆𑀣 𑀦𑀺𑀤𑀸𑀦𑁂 𑀧𑀼𑀘𑁆𑀙𑀺𑀢𑁂 𑀢𑀁 𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀬𑁂𑀦 𑀘 𑀧𑀜𑁆𑀜𑀢𑁆𑀢𑀁, 𑀬𑀲𑁆𑀫𑀸 𑀘 𑀧𑀜𑁆𑀜𑀢𑁆𑀢𑀁, 𑀲𑀩𑁆𑀩𑀫𑁂𑀢𑀁 𑀓𑀣𑁂𑀢𑀼𑀓𑀸𑀫𑁂𑀦 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 ¶ 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀫𑀺𑀤𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀦 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 ‘‘𑀇𑀤𑀁 𑀯𑀘𑀦𑀁 𑀓𑁂𑀦 𑀯𑀼𑀢𑁆𑀢𑀁, 𑀓𑀤𑀸 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 ¶ 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀼𑀘𑁆𑀘𑀢𑁂, 𑀬𑀲𑁆𑀫𑀸 𑀅𑀬𑀫𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀦𑀺𑀤𑀸𑀦𑀁 𑀧𑀼𑀝𑁆𑀞𑁄 𑀢𑀲𑁆𑀫𑀸𑀦𑁂𑀦 𑀢𑀁 𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑀺𑀤𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀤𑀦𑁆𑀢𑁂𑀦𑀸𑀧𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸𑀢𑀺 𑀇𑀫𑁂𑀲𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁, 𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀁 𑀘𑁂𑀢𑀫𑁂𑀢𑀁 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄𑀢𑀺 𑀏𑀢𑁂𑀲𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀇𑀤𑀁 𑀯𑀼𑀘𑁆𑀘𑀢𑀺. 𑀢𑀁 𑀧𑀦𑁂𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀧𑀝𑀺𑀫𑀡𑁆𑀟𑀺𑀢𑀦𑀺𑀤𑀸𑀦𑀁 𑀯𑀺𑀦𑀬𑀧𑀺𑀝𑀓𑀁 𑀓𑁂𑀦 𑀥𑀸𑀭𑀺𑀢𑀁, 𑀓𑁂𑀦𑀸𑀪𑀢𑀁, 𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀆𑀤𑀺𑀢𑁄 𑀢𑀸𑀯 𑀇𑀤𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀥𑀸𑀭𑀺𑀢𑀁, 𑀢𑀲𑁆𑀲 𑀲𑀫𑁆𑀫𑀼𑀔𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀙𑀴𑀪𑀺𑀜𑁆𑀜𑀸𑀤𑀺𑀪𑁂𑀤𑁂𑀳𑀺 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺. 𑀓𑁂𑀦𑀸𑀪𑀢𑀦𑁆𑀢𑀺? 𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑀫𑀸𑀤𑀺𑀁 𑀓𑀢𑁆𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀁. 𑀢𑀢𑁆𑀭𑀸𑀬𑀁 ¶ 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑁋

𑀉𑀧𑀸𑀮𑀺 𑀤𑀸𑀲𑀓𑁄 𑀘𑁂𑀯, 𑀲𑁄𑀡𑀓𑁄 𑀲𑀺𑀕𑁆𑀕𑀯𑁄 𑀢𑀣𑀸;

𑀢𑀺𑀲𑁆𑀲𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀘, 𑀧𑀜𑁆𑀘𑁂𑀢𑁂 𑀯𑀺𑀚𑀺𑀢𑀸𑀯𑀺𑀦𑁄.

𑀧𑀭𑀫𑁆𑀧𑀭𑀸𑀬 𑀯𑀺𑀦𑀬𑀁, 𑀤𑀻𑀧𑁂 𑀚𑀫𑁆𑀩𑀼𑀲𑀺𑀭𑀺𑀯𑁆𑀳𑀬𑁂;

𑀅𑀘𑁆𑀙𑀺𑀚𑁆𑀚𑀫𑀸𑀦𑀫𑀸𑀦𑁂𑀲𑀼𑀁, 𑀢𑀢𑀺𑀬𑁄 𑀬𑀸𑀯 𑀲𑀗𑁆𑀕𑀳𑁄.

𑀆𑀬𑀲𑁆𑀫𑀸 ¶ 𑀳𑀺 𑀉𑀧𑀸𑀮𑀺 𑀇𑀫𑀁 𑀯𑀺𑀦𑀬𑀯𑀁𑀲𑀁 𑀯𑀺𑀦𑀬𑀢𑀦𑁆𑀢𑀺𑀁 𑀯𑀺𑀦𑀬𑀧𑀯𑁂𑀡𑀺𑀁 𑀪𑀕𑀯𑀢𑁄

𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲 𑀳𑀸𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀯𑀺𑀦𑀬𑀯𑀁𑀲𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀦𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀓𑀁 𑀅𑀳𑁄𑀲𑀺. 𑀤𑀸𑀲𑀓𑀢𑁆𑀣𑁂𑀭𑁄𑀧𑀺 𑀢𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀺𑀦𑀬𑀁 𑀯𑀸𑀘𑁂𑀲𑀺. 𑀢𑀲𑁆𑀲𑀸𑀧𑀺 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀯 𑀅𑀳𑁄𑀲𑀺. 𑀲𑁄𑀡𑀓𑀢𑁆𑀣𑁂𑀭𑁄𑀧𑀺 𑀤𑀸𑀲𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄𑀧𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀸𑀲𑀓𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀺𑀦𑀬𑀁 𑀯𑀸𑀘𑁂𑀲𑀺. 𑀢𑀲𑁆𑀲𑀸𑀧𑀺 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀯 𑀅𑀳𑁄𑀲𑀺. 𑀲𑀺𑀕𑁆𑀕𑀯𑀢𑁆𑀣𑁂𑀭𑁄𑀧𑀺 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄𑀧𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 ¶ 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀦𑁆𑀢𑀲𑀳𑀲𑁆𑀲𑀲𑁆𑀲 𑀥𑀼𑀭𑀕𑁆𑀕𑀸𑀳𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦𑀸𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀦𑁄𑀧𑀺 𑀔𑀻𑀡𑀸𑀲𑀯𑀸𑀧𑀺 𑀏𑀢𑁆𑀢𑀓𑀸𑀦𑀺 ¶ 𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀳𑁂𑀲𑀼𑀁. 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀅𑀢𑀺𑀫𑀳𑀸𑀪𑀺𑀓𑁆𑀔𑀼𑀲𑀫𑀼𑀤𑀸𑀬𑁄 𑀅𑀳𑁄𑀲𑀺. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀧𑀦 𑀆𑀦𑀼𑀪𑀸𑀯𑁄 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀫𑀺𑀤𑀁 𑀯𑀺𑀦𑀬𑀧𑀺𑀝𑀓𑀁 𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀇𑀫𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀯𑀺𑀚𑀸𑀦𑀦𑀢𑁆𑀣𑀁 𑀧𑀦 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 𑁋

𑀲𑀗𑁆𑀕𑀸𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀚𑁄𑀢𑀬𑀺𑀢𑁆𑀯𑀸 𑀘 𑀲𑀩𑁆𑀩𑀥𑀺;

𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁, 𑀞𑀢𑁆𑀯𑀸 𑀧𑀜𑁆𑀘𑀲𑀢𑀸𑀧𑀺 𑀢𑁂.

𑀔𑀻𑀡𑀸𑀲𑀯𑀸 ¶ 𑀚𑀼𑀢𑀻𑀫𑀦𑁆𑀢𑁄, 𑀣𑁂𑀭𑀸 𑀓𑀲𑁆𑀲𑀧𑀆𑀤𑀬𑁄;

𑀔𑀻𑀡𑀲𑁆𑀦𑁂𑀳𑀧𑀤𑀻𑀧𑀸𑀯, 𑀦𑀺𑀩𑁆𑀩𑀸𑀬𑀺𑀁𑀲𑀼 𑀅𑀦𑀸𑀮𑀬𑀸.

𑀅𑀣𑀸𑀦𑀼𑀓𑁆𑀓𑀫𑁂𑀦 𑀕𑀘𑁆𑀙𑀦𑁆𑀢𑁂𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 ‘‘𑀓𑀧𑁆𑀧𑀢𑀺 𑀲𑀺𑀗𑁆𑀕𑀻𑀮𑁄𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀚𑀴𑁄𑀕𑀺𑀁 𑀧𑀸𑀢𑀼𑀁, 𑀓𑀧𑁆𑀧𑀢𑀺 𑀅𑀤𑀲𑀓𑀁 𑀦𑀺𑀲𑀻𑀤𑀦𑀁, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀲𑀼𑀁. 𑀢𑁂𑀲𑀁 𑀲𑀼𑀲𑀼𑀦𑀸𑀕𑀧𑀼𑀢𑁆𑀢𑁄 𑀓𑀸𑀴𑀸𑀲𑁄𑀓𑁄 𑀦𑀸𑀫 𑀭𑀸𑀚𑀸 𑀧𑀓𑁆𑀔𑁄 𑀅𑀳𑁄𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀚𑁆𑀚𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 ‘‘𑀯𑁂𑀲𑀸𑀮𑀺𑀓𑀸 𑀓𑀺𑀭 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀤𑀲𑀩𑀮𑀲𑁆𑀲 𑀲𑀸𑀲𑀦𑀯𑀺𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬𑀁. 𑀳𑀦𑁆𑀤𑀸𑀳𑀁 𑀅𑀥𑀫𑁆𑀫𑀯𑀸𑀤𑀺𑀦𑁄 ¶ 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 ¶ 𑀤𑀻𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀤𑀳𑀼𑀧𑁄𑀲𑀣𑁂 𑀓𑀁𑀲𑀧𑀸𑀢𑀺𑀁 𑀉𑀤𑀓𑁂𑀦 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑁂 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀤𑁂𑀣𑀸𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀫𑁆𑀧𑀺 𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀫𑀸𑀲𑀓𑀭𑀽𑀧𑀫𑁆𑀧𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀓𑁆𑀔𑀸𑀭𑁂𑀦 𑀓𑀭𑀡𑀻𑀬’’𑀦𑁆𑀢𑀺 𑀲𑀩𑁆𑀩𑀁 𑀢𑀸𑀯 𑀯𑀢𑁆𑀢𑀩𑁆𑀩𑀁, 𑀬𑀸𑀯 ‘‘𑀇𑀫𑀸𑀬 𑀧𑀦 𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀲𑀢𑁆𑀢 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀅𑀬𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺 𑀲𑀢𑁆𑀢𑀲𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀏𑀯𑀁 𑀢𑀲𑁆𑀫𑀺𑀜𑁆𑀘 𑀲𑀦𑁆𑀦𑀺𑀧𑀸𑀢𑁂 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀆𑀬𑀲𑁆𑀫𑀢𑀸 𑀬𑀲𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀸. 𑀢𑁂𑀲𑀁 𑀫𑀚𑁆𑀛𑁂 𑀆𑀬𑀲𑁆𑀫𑀢𑀸 𑀭𑁂𑀯𑀢𑁂𑀦 𑀧𑀼𑀝𑁆𑀞𑁂𑀦 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑁂𑀦 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀢𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀯𑀺𑀦𑀺𑀘𑁆𑀙𑀺𑀢𑀸𑀦𑀺, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁. 𑀅𑀣 𑀣𑁂𑀭𑀸 ‘‘𑀧𑀼𑀦 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀢𑀺𑀧𑀺𑀝𑀓𑀥𑀭𑁂 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑁂 𑀲𑀢𑁆𑀢𑀲𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑁂𑀲𑀸𑀮𑀺𑀬𑀁 ¶ 𑀯𑀸𑀮𑀺𑀓𑀸𑀭𑀸𑀫𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀗𑁆𑀕𑀸𑀬𑀺𑀢𑀲𑀤𑀺𑀲𑀫𑁂𑀯 𑀲𑀩𑁆𑀩𑀁 𑀲𑀸𑀲𑀦𑀫𑀮𑀁 𑀲𑁄𑀥𑁂𑀢𑁆𑀯𑀸 𑀧𑀼𑀦 𑀧𑀺𑀝𑀓𑀯𑀲𑁂𑀦 𑀦𑀺𑀓𑀸𑀬𑀯𑀲𑁂𑀦 𑀅𑀗𑁆𑀕𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘 𑀲𑀩𑁆𑀩𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼. 𑀅𑀬𑀁 𑀲𑀗𑁆𑀕𑀻𑀢𑀺 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀸. 𑀬𑀸 𑀮𑁄𑀓𑁂 𑁋

𑀲𑀢𑁂𑀳𑀺 𑀲𑀢𑁆𑀢𑀳𑀺 𑀓𑀢𑀸, 𑀢𑁂𑀦 𑀲𑀢𑁆𑀢𑀲𑀢𑀸𑀢𑀺 𑀘;

𑀧𑀼𑀩𑁆𑀩𑁂 𑀓𑀢𑀁 𑀉𑀧𑀸𑀤𑀸𑀬, 𑀤𑀼𑀢𑀺𑀬𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑀲𑀸 𑀧𑀦𑀸𑀬𑀁 𑁋

𑀬𑁂𑀳𑀺 𑀣𑁂𑀭𑁂𑀳𑀺 𑀲𑀗𑁆𑀕𑀻𑀢𑀸, 𑀲𑀗𑁆𑀕𑀻𑀢𑀺 𑀢𑁂𑀲𑀼 𑀯𑀺𑀲𑁆𑀲𑀼𑀢𑀸;

𑀲𑀩𑁆𑀩𑀓𑀸𑀫𑀻 𑀘 𑀲𑀸𑀴𑁆𑀳𑁄 𑀘, 𑀭𑁂𑀯𑀢𑁄 𑀔𑀼𑀚𑁆𑀚𑀲𑁄𑀪𑀺𑀢𑁄.

𑀬𑀲𑁄 ¶ 𑀘 𑀲𑀸𑀡𑀲𑀫𑁆𑀪𑀽𑀢𑁄, 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸;

𑀣𑁂𑀭𑀸 𑀆𑀦𑀦𑁆𑀤𑀣𑁂𑀭𑀲𑁆𑀲, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑀣𑀸𑀕𑀢𑀁.

𑀲𑀼𑀫𑀦𑁄 𑀯𑀸𑀲𑀪𑀕𑀸𑀫𑀻 𑀘, 𑀜𑁂𑀬𑁆𑀬𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸;

𑀤𑁆𑀯𑁂 𑀇𑀫𑁂 𑀅𑀦𑀼𑀭𑀼𑀤𑁆𑀥𑀲𑁆𑀲, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑀣𑀸𑀕𑀢𑀁.

𑀤𑀼𑀢𑀺𑀬𑁄 ¶ 𑀧𑀦 𑀲𑀗𑁆𑀕𑀻𑀢𑁄, 𑀬𑁂𑀳𑀺 𑀣𑁂𑀭𑁂𑀳𑀺 𑀲𑀗𑁆𑀕𑀳𑁄;

𑀲𑀩𑁆𑀩𑁂𑀧𑀺 𑀧𑀦𑁆𑀦𑀪𑀸𑀭𑀸 𑀢𑁂, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸𑀢𑀺.

𑀅𑀬𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺.

𑀏𑀯𑀫𑀺𑀫𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀣𑁂𑀭𑀸 ‘‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀦𑀸𑀕𑀢𑁂𑀧𑀺 𑀲𑀸𑀲𑀦𑀲𑁆𑀲 𑀏𑀯𑀭𑀽𑀧𑀁 𑀅𑀩𑁆𑀩𑀼𑀤’’𑀦𑁆𑀢𑀺 𑀑𑀮𑁄𑀓𑀬𑀫𑀸𑀦𑀸 𑀇𑀫𑀁 𑀅𑀤𑁆𑀤𑀲𑀁𑀲𑀼 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀧𑀸𑀝𑀮𑀺𑀧𑀼𑀢𑁆𑀢𑁂 𑀥𑀫𑁆𑀫𑀸𑀲𑁄𑀓𑁄 𑀦𑀸𑀫 𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺. 𑀲𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑀬𑀺𑀲𑁆𑀲𑀢𑀺. 𑀢𑀢𑁄 𑀢𑀺𑀢𑁆𑀣𑀺𑀬𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀁 𑀧𑀭𑀺𑀤𑀻𑀧𑁂𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀅𑀩𑁆𑀩𑀼𑀤𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀫𑀬𑀁 𑀏𑀢𑀲𑁆𑀫𑀺𑀁 𑀅𑀩𑁆𑀩𑀼𑀤𑁂 𑀉𑀧𑁆𑀧𑀦𑁆𑀦𑁂 𑀲𑀫𑁆𑀫𑀼𑀔𑀸 𑀪𑀯𑀺𑀲𑁆𑀲𑀸𑀫, 𑀦 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀢𑁂 𑀲𑀩𑁆𑀩𑁂𑀯 𑀢𑀤𑀸 𑀅𑀢𑁆𑀢𑀦𑁄 𑀅𑀲𑀫𑁆𑀫𑀼𑀔𑀪𑀸𑀯𑀁 𑀜𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀓𑀮𑀁 𑀫𑀦𑀼𑀲𑁆𑀲𑀮𑁄𑀓𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀜𑁆𑀘 𑀑𑀮𑁄𑀓𑁂𑀦𑁆𑀢𑀸 𑀦 𑀓𑀜𑁆𑀘𑀺 𑀤𑀺𑀲𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀢𑀺𑀲𑁆𑀲𑀁 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀅𑀤𑁆𑀤𑀲𑀁𑀲𑀼 ¶ 𑀧𑀭𑀺𑀢𑁆𑀢𑀸𑀬𑀼𑀓𑀁 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀪𑀸𑀯𑀺𑀢𑀫𑀕𑁆𑀕𑀁. 𑀤𑀺𑀲𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑀬𑀁 𑀏𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑁂𑀬𑁆𑀬𑀸𑀫, 𑀅𑀤𑁆𑀥𑀸 𑀏𑀲 ¶ 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀲𑁆𑀲𑀢𑀺. 𑀢𑀢𑁄 𑀘 𑀫𑀦𑁆𑀢𑁂𑀳𑀺 𑀧𑀮𑁄𑀪𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀳𑀼𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺.

𑀢𑁂 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑀺𑀲𑁆𑀲𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀅𑀩𑁆𑀩𑀼𑀤𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀫𑀬𑀜𑁆𑀘 𑀲𑀓𑀮𑀁 𑀫𑀦𑀼𑀲𑁆𑀲𑀮𑁄𑀓𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀜𑁆𑀘 𑀑𑀮𑁄𑀓𑀬𑀫𑀸𑀦𑀸 𑀓𑀜𑁆𑀘𑀺 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀯𑀺𑀘𑀺𑀦𑀦𑁆𑀢𑀸 𑀪𑀯𑀦𑁆𑀢𑀫𑁂𑀯 𑀅𑀤𑁆𑀤𑀲𑀸𑀫. 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀧𑀝𑀺𑀜𑁆𑀜𑀁 𑀤𑁂𑀳𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀩𑁆𑀭𑀳𑁆𑀫𑀸, ‘‘𑀅𑀳𑀁 𑀓𑀺𑀭 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀲𑁄𑀥𑁂𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸, ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀣𑁂𑀭𑀸 𑀩𑁆𑀭𑀳𑁆𑀫𑀮𑁄𑀓𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀫𑀺𑀁𑀲𑀼.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀘 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑁄 𑀘 𑀤𑁆𑀯𑁂𑀧𑀺 𑀦𑀯𑀓𑀸 𑀳𑁄𑀦𑁆𑀢𑀺 𑀤𑀳𑀭𑀪𑀺𑀓𑁆𑀔𑀽 𑀢𑀺𑀧𑀺𑀝𑀓𑀥𑀭𑀸 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸 𑀔𑀻𑀡𑀸𑀲𑀯𑀸, 𑀢𑁂 𑀢𑀁 𑀅𑀥𑀺𑀓𑀭𑀡𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀣𑁂𑀭𑀸 ‘‘𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀦𑁄 𑀲𑀳𑀸𑀬𑀓𑀸 𑀅𑀳𑀼𑀯𑀢𑁆𑀣, 𑀢𑁂𑀦 𑀯𑁄 𑀇𑀤𑀁 𑀤𑀡𑁆𑀟𑀓𑀫𑁆𑀫𑀁 𑀳𑁄𑀢𑀼 𑁋 ‘𑀢𑀺𑀲𑁆𑀲𑁄 𑀦𑀸𑀫 𑀩𑁆𑀭𑀳𑁆𑀫𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀢𑀁 𑀢𑀼𑀫𑁆𑀳𑀸𑀓𑀁 𑀏𑀓𑁄 𑀦𑀻𑀳𑀭𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼, 𑀏𑀓𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀽’’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑁋

𑀲𑀩𑁆𑀩𑀓𑀸𑀫𑀺𑀧𑁆𑀧𑀪𑀼𑀢𑀬𑁄, 𑀢𑁂𑀧𑀺 𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯 𑀮𑁄𑀓𑀫𑁆𑀳𑀺, 𑀚𑀮𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸.

𑀤𑀼𑀢𑀺𑀬𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸, 𑀯𑀺𑀲𑁄𑀥𑁂𑀢𑁆𑀯𑀸𑀦 𑀲𑀸𑀲𑀦𑀁;

𑀅𑀦𑀸𑀕𑀢𑁂𑀧𑀺 ¶ 𑀓𑀢𑁆𑀯𑀸𑀦, 𑀳𑁂𑀢𑀼𑀁 𑀲𑀤𑁆𑀥𑀫𑁆𑀫𑀲𑀼𑀤𑁆𑀥𑀺𑀬𑀸.

𑀔𑀻𑀡𑀸𑀲𑀯𑀸 ¶ 𑀯𑀲𑀺𑀧𑁆𑀧𑀢𑁆𑀣𑀸, 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸;

𑀅𑀦𑀺𑀘𑁆𑀘𑀢𑀸𑀯𑀲𑀁 𑀣𑁂𑀭𑀸, 𑀢𑁂𑀧𑀺 𑀦𑀸𑀫 𑀉𑀧𑀸𑀕𑀢𑀸.

𑀏𑀯𑀁 𑀅𑀦𑀺𑀘𑁆𑀘𑀢𑀁 𑀚𑀫𑁆𑀫𑀺𑀁, 𑀜𑀢𑁆𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀢𑀁 𑀧𑀢𑁆𑀢𑀼𑀁 𑀯𑀸𑀬𑀫𑁂 𑀥𑀻𑀭𑁄, 𑀬𑀁 𑀦𑀺𑀘𑁆𑀘𑀁 𑀅𑀫𑀢𑀁 𑀧𑀤𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸

𑀢𑀺𑀲𑁆𑀲𑁄𑀧𑀺 𑀔𑁄 𑀫𑀳𑀸𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀺𑀕𑁆𑀕𑀯𑀢𑁆𑀣𑁂𑀭𑁄𑀧𑀺 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀪𑀼𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀏𑀓𑀤𑀺𑀯𑀲𑀫𑁆𑀧𑀺 𑀉𑀴𑀼𑀗𑁆𑀓𑀫𑀢𑁆𑀢𑀁 𑀯𑀸 𑀬𑀸𑀕𑀼𑀁 𑀓𑀝𑀘𑁆𑀙𑀼𑀫𑀢𑁆𑀢𑀁 𑀯𑀸 𑀪𑀢𑁆𑀢𑀁 𑀦𑀸𑀮𑀢𑁆𑀣. 𑀲𑀢𑁆𑀢𑀦𑁆𑀦𑀁 𑀧𑀦 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀓𑀤𑀺𑀯𑀲𑀁 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀘𑀦𑀫𑀢𑁆𑀢𑀁 𑀅𑀮𑀢𑁆𑀣. 𑀢𑀁𑀤𑀺𑀯𑀲𑀫𑁂𑀯 𑀩𑁆𑀭𑀸𑀳𑁆𑀫𑀡𑁄𑀧𑀺 𑀩𑀳𑀺𑀤𑁆𑀥𑀸 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀝𑀺𑀧𑀣𑁂 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀪𑁄 𑀧𑀩𑁆𑀩𑀚𑀺𑀢, 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀆𑀳. ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀅𑀕𑀫𑀺𑀫𑁆𑀳𑀸’’𑀢𑀺. ‘‘𑀅𑀧𑀺 𑀓𑀺𑀜𑁆𑀘𑀺 ¶ 𑀮𑀪𑀺𑀢𑁆𑀣𑀸’’𑀢𑀺? ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀮𑀪𑀺𑀫𑁆𑀳𑀸’’𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀓𑀺𑀜𑁆𑀘𑀺 𑀅𑀤𑀢𑁆𑀣𑀸’’𑀢𑀺? ‘‘𑀦 𑀓𑀺𑀜𑁆𑀘𑀺 𑀅𑀤𑀫𑁆𑀳𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀤𑀺𑀯𑀲𑁂 𑀖𑀭𑀤𑁆𑀯𑀸𑀭𑁂𑀬𑁂𑀯 𑀦𑀺𑀲𑀻𑀤𑀺 ‘‘𑀅𑀚𑁆𑀚 𑀧𑀩𑁆𑀩𑀚𑀺𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀤𑀼𑀢𑀺𑀬𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀏𑀯𑀫𑀸𑀳 𑁋 ‘‘𑀢𑀼𑀫𑁆𑀳𑁂 𑀳𑀺𑀬𑁆𑀬𑁄 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸𑀬𑁂𑀯 ‘𑀮𑀪𑀺𑀫𑁆𑀳𑀸’𑀢𑀺 𑀅𑀯𑁄𑀘𑀼𑀢𑁆𑀣. 𑀯𑀝𑁆𑀝𑀢𑀺 𑀦𑀼 𑀔𑁄 𑀢𑀼𑀫𑁆𑀳𑀸𑀓𑀁 𑀫𑀼𑀲𑀸𑀯𑀸𑀤𑁄’’𑀢𑀺! 𑀣𑁂𑀭𑁄 𑀆𑀳 𑁋 ‘‘𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀳𑀺𑀬𑁆𑀬𑁄 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀁 𑀮𑀪𑀺𑀫𑁆𑀳; 𑀅𑀣𑁂𑀢𑀁 𑀧𑀝𑀺𑀲𑀦𑁆𑀣𑀸𑀭𑀁 𑀉𑀧𑀸𑀤𑀸𑀬 𑀏𑀯𑀫𑀯𑁄𑀘𑀼𑀫𑁆𑀳𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 ‘𑀮𑀪𑀺𑀫𑁆𑀳𑀸’𑀢𑀺 𑀧𑀲𑀁𑀲𑀦𑁆𑀢𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 ¶ 𑀮𑀪𑀺𑀢𑁆𑀯𑀸 𑀓𑀲𑁆𑀫𑀸 𑀦 𑀧𑀲𑀁𑀲𑀦𑁆𑀢𑀻’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀝𑀺𑀬𑀸𑀤𑀺𑀢𑀪𑀢𑁆𑀢𑀢𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀺𑀓𑁆𑀔𑀁 𑀢𑀤𑀼𑀧𑀺𑀬𑀜𑁆𑀘 𑀩𑁆𑀬𑀜𑁆𑀚𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀪𑀺𑀓𑁆𑀔𑀁 𑀲𑀩𑁆𑀩𑀓𑀸𑀮𑀁 𑀢𑀼𑀫𑁆𑀳𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳 ¶ . 𑀲𑁄 𑀧𑀼𑀦𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀉𑀧𑀲𑀫𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀁 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀢𑀦𑁄 𑀖𑀭𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀭𑀡𑀢𑁆𑀣𑀸𑀬 𑀬𑀸𑀘𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀣𑁄𑀓𑀁 𑀣𑁄𑀓𑀁 𑀩𑀼𑀤𑁆𑀥𑀯𑀘𑀦𑀁 𑀓𑀣𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑁄𑀧𑀺 𑀔𑁄 𑀫𑀸𑀡𑀯𑀓𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄𑀬𑁂𑀯 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀢𑀲𑀼𑀤𑁆𑀥𑀲𑀢𑁆𑀢𑀲𑁆𑀲 𑀆𑀲𑀦𑁂 𑀯𑀸 𑀲𑀬𑀦𑁂 𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀲𑀚𑁆𑀚𑀺𑀢𑀸 𑀯𑀸 𑀦𑀺𑀧𑀚𑁆𑀚𑀺𑀢𑀸 𑀯𑀸 𑀦𑀢𑁆𑀣𑀺. 𑀲𑁄 𑀬𑀤𑀸 𑀆𑀘𑀭𑀺𑀬𑀖𑀭𑀁 𑀕𑀘𑁆𑀙𑀢𑀺, 𑀢𑀤𑀸𑀲𑁆𑀲 𑀫𑀜𑁆𑀘𑀧𑀻𑀞𑀁 𑀲𑁂𑀢𑁂𑀦 𑀯𑀢𑁆𑀣𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀮𑀕𑁆𑀕𑁂𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀬𑁄 𑀤𑀸𑀦𑀺 𑀫𑀸𑀡𑀯𑀓𑀁 𑀧𑀩𑁆𑀩𑀸𑀚𑁂𑀢𑀼𑀁, 𑀘𑀺𑀭𑀜𑁆𑀘 𑀫𑁂 𑀇𑀥𑀸𑀕𑀘𑁆𑀙𑀦𑁆𑀢𑀲𑁆𑀲, 𑀦 𑀘 𑀓𑀸𑀘𑀺 𑀫𑀸𑀡𑀯𑀓𑁂𑀦 𑀲𑀤𑁆𑀥𑀺𑀁 𑀓𑀣𑀸 𑀉𑀧𑁆𑀧𑀚𑁆𑀚𑀢𑀺. 𑀳𑀦𑁆𑀤 𑀤𑀸𑀦𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀧𑀮𑁆𑀮𑀗𑁆𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸 𑀢𑀲𑁆𑀫𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀫𑀸𑀡𑀯𑀓𑀲𑁆𑀲 𑀧𑀮𑁆𑀮𑀗𑁆𑀓𑀁 𑀅𑀜𑁆𑀜𑀁 𑀦 𑀓𑀺𑀜𑁆𑀘𑀺 𑀆𑀲𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀚𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀆𑀲𑀦𑀁 𑀅𑀧𑀲𑁆𑀲𑀦𑁆𑀢𑁄 𑀫𑀸𑀡𑀯𑀓𑀲𑁆𑀲 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀮𑁆𑀮𑀗𑁆𑀓𑁂. 𑀫𑀸𑀡𑀯𑀓𑁄𑀧𑀺 𑀔𑁄 𑀢𑀗𑁆𑀔𑀡𑀜𑁆𑀜𑁂𑀯 𑀆𑀘𑀭𑀺𑀬𑀖𑀭𑀸 𑀆𑀕𑀫𑁆𑀫 𑀣𑁂𑀭𑀁 𑀅𑀢𑁆𑀢𑀦𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 ‘‘𑀓𑁄 𑀫𑀫 𑀧𑀮𑁆𑀮𑀗𑁆𑀓𑀁 𑀲𑀫𑀡𑀲𑁆𑀲 𑀧𑀜𑁆𑀜𑀧𑁂𑀲𑀻’’𑀢𑀺 𑀆𑀳.

𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀽𑀧𑀲𑀦𑁆𑀢𑁂 𑀫𑀸𑀡𑀯𑀓𑀲𑁆𑀲 𑀘𑀡𑁆𑀟𑀺𑀓𑁆𑀓𑀪𑀸𑀯𑁂 𑀏𑀯𑀫𑀸𑀳 𑁋 ‘‘𑀓𑀺𑀁 𑀧𑀦 𑀢𑁆𑀯𑀁, 𑀫𑀸𑀡𑀯𑀓, 𑀓𑀺𑀜𑁆𑀘𑀺 ¶ 𑀫𑀦𑁆𑀢𑀁 𑀚𑀸𑀦𑀸𑀲𑀻’’𑀢𑀺? 𑀫𑀸𑀡𑀯𑀓𑁄 ‘‘𑀪𑁄 𑀧𑀩𑁆𑀩𑀚𑀺𑀢, 𑀫𑀬𑀺 𑀤𑀸𑀦𑀺 𑀫𑀦𑁆𑀢𑁂 𑀅𑀚𑀸𑀦𑀦𑁆𑀢𑁂 𑀅𑀜𑁆𑀜𑁂 𑀓𑁂 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸, 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀧𑀦 𑀫𑀦𑁆𑀢𑀁 𑀚𑀸𑀦𑀸𑀣𑀸’’𑀢𑀺? ‘‘𑀧𑀼𑀘𑁆𑀙, 𑀫𑀸𑀡𑀯𑀓, 𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀫𑀸𑀡𑀯𑀓𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑁂𑀲𑀼 ¶ 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑁂𑀲𑀼 𑀇𑀢𑀺𑀳𑀸𑀲𑀧𑀜𑁆𑀘𑀫𑁂𑀲𑀼 𑀬𑀸𑀦𑀺 𑀬𑀸𑀦𑀺 𑀕𑀡𑁆𑀞𑀺𑀝𑁆𑀞𑀸𑀦𑀸𑀦𑀺, 𑀬𑁂𑀲𑀁 𑀬𑁂𑀲𑀁 𑀦𑀬𑀁 𑀦𑁂𑀯 𑀅𑀢𑁆𑀢𑀦𑀸 𑀧𑀲𑁆𑀲𑀢𑀺 𑀦𑀸𑀧𑀺𑀲𑁆𑀲 𑀆𑀘𑀭𑀺𑀬𑁄 𑀅𑀤𑁆𑀤𑀲, 𑀢𑁂𑀲𑀼 𑀢𑁂𑀲𑀼 𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀧𑀓𑀢𑀺𑀬𑀸𑀧𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽, 𑀇𑀤𑀸𑀦𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄, 𑀢𑁂𑀦𑀲𑁆𑀲 𑀦𑀢𑁆𑀣𑀺 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄’’𑀢𑀺 𑀢𑀸𑀯𑀤𑁂𑀯 𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀸𑀡𑀯𑀓𑀁 𑀆𑀳 𑁋 ‘‘𑀫𑀸𑀡𑀯𑀓, 𑀅𑀳𑀁 𑀢𑀬𑀸 𑀩𑀳𑀼𑀁 𑀧𑀼𑀘𑁆𑀙𑀺𑀢𑁄; 𑀅𑀳𑀫𑁆𑀧𑀺 𑀤𑀸𑀦𑀺 𑀢𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫𑀺, 𑀩𑁆𑀬𑀸𑀓𑀭𑀺𑀲𑁆𑀲𑀲𑀺 𑀫𑁂’’𑀢𑀺? ‘‘𑀆𑀫, 𑀪𑁄 𑀧𑀩𑁆𑀩𑀚𑀺𑀢, 𑀧𑀼𑀘𑁆𑀙 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀘𑀺𑀢𑁆𑀢𑀬𑀫𑀓𑁂 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋

‘‘𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺; 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺?

𑀫𑀸𑀡𑀯𑁄 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀦𑀸𑀫, 𑀪𑁄 𑀧𑀩𑁆𑀩𑀚𑀺𑀢, 𑀇𑀤’’𑀦𑁆𑀢𑀺 𑀆𑀳. ‘‘𑀩𑀼𑀤𑁆𑀥𑀫𑀦𑁆𑀢𑁄 𑀦𑀸𑀫𑀸𑀬𑀁, 𑀫𑀸𑀡𑀯𑀸’’𑀢𑀺. ‘‘𑀲𑀓𑁆𑀓𑀸 𑀧𑀦𑀸𑀬𑀁, 𑀪𑁄, 𑀫𑀬𑁆𑀳𑀫𑁆𑀧𑀺 𑀤𑀸𑀢𑀼’’𑀦𑁆𑀢𑀺. ‘‘𑀲𑀓𑁆𑀓𑀸 𑀫𑀸𑀡𑀯, 𑀅𑀫𑁆𑀳𑁂𑀳𑀺 𑀕𑀳𑀺𑀢𑀧𑀩𑁆𑀩𑀚𑁆𑀚𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀸𑀢𑀼’’𑀦𑁆𑀢𑀺. 𑀢𑀢𑁄 ¶ 𑀫𑀸𑀡𑀯𑁄 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀅𑀬𑀁 𑀧𑀩𑁆𑀩𑀚𑀺𑀢𑁄 𑀩𑀼𑀤𑁆𑀥𑀫𑀦𑁆𑀢𑀁 𑀦𑀸𑀫 𑀚𑀸𑀦𑀸𑀢𑀺, 𑀦 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑁂𑀢𑀺, 𑀅𑀳𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀦𑁄 𑀧𑀼𑀢𑁆𑀢𑁄 𑀫𑀦𑁆𑀢𑁂 𑀕𑀡𑁆𑀳𑀢𑀼, 𑀕𑀳𑁂𑀢𑁆𑀯𑀸 𑀧𑀼𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀉𑀕𑁆𑀕𑀡𑁆𑀳, 𑀧𑀼𑀢𑁆𑀢𑀸’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼. 𑀣𑁂𑀭𑁄 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀢𑀸𑀯 𑀆𑀘𑀺𑀓𑁆𑀔𑀺. 𑀲𑁄 𑀢𑀢𑁆𑀣 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀸𑀫𑀡𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀅𑀪𑀩𑁆𑀩𑁄 𑀤𑀸𑀦𑀺 𑀲𑀸𑀲𑀦𑀢𑁄 𑀦𑀺𑀯𑀢𑁆𑀢𑀺𑀢𑀼𑀁. 𑀲𑀘𑁂 𑀧𑀦𑀲𑁆𑀲𑀸𑀳𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀓𑀣𑁂𑀬𑁆𑀬𑀁, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑀼𑀁, 𑀲𑀫𑀬𑁄 𑀤𑀸𑀦𑀺 𑀦𑀁 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀼’’𑀦𑁆𑀢𑀺. 𑀢𑀢𑁄 𑀆𑀳 𑁋 ‘‘𑀏𑀳𑀺 𑀢𑁆𑀯𑀁, 𑀲𑀸𑀫𑀡𑁂𑀭, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳. 𑀫𑀫 𑀯𑀘𑀦𑁂𑀦 𑀢𑀜𑁆𑀘 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙; 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀉𑀧𑀚𑁆𑀛𑀸𑀬𑁄 𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’𑀢𑀺. ‘𑀓𑁄 𑀦𑀸𑀫 𑀢𑁂 𑀉𑀧𑀚𑁆𑀛𑀸𑀬𑁄’𑀢𑀺 𑀘 𑀯𑀼𑀢𑁆𑀢𑁂 ‘𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀦𑀸𑀫, 𑀪𑀦𑁆𑀢𑁂’𑀢𑀺 𑀯𑀤𑁂𑀬𑁆𑀬𑀸𑀲𑀺. ‘𑀅𑀳𑀁 𑀓𑁄 𑀦𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀫𑀫 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄 𑀣𑁂𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀲𑀸𑀫𑀡𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 ¶ 𑀆𑀕𑀢𑁄𑀲𑀻’’𑀢𑀺? ‘‘𑀉𑀧𑀚𑁆𑀛𑀸𑀬𑁄 𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’’𑀢𑀺. ‘‘𑀓𑁄 𑀦𑀸𑀫 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺? ‘‘𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀓𑁄 𑀦𑀸𑀫𑀸’’𑀢𑀺? ‘‘𑀫𑀫 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’𑀢𑀺. ‘‘𑀧𑀢𑁆𑀢𑀘𑀻𑀯𑀭𑀁 𑀤𑀸𑀦𑀺 𑀧𑀝𑀺𑀲𑀸𑀫𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀫𑀡𑁂𑀭𑁄 𑀧𑀢𑁆𑀢𑀘𑀻𑀯𑀭𑀁 ¶ 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀉𑀤𑀓𑀤𑀦𑁆𑀢𑀧𑁄𑀦𑀁 𑀉𑀧𑀝𑁆𑀞𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀲𑀫𑁆𑀫𑀚𑁆𑀚𑀺𑀢𑀝𑁆𑀞𑀸𑀦𑀁 𑀧𑀼𑀦 𑀲𑀫𑁆𑀫𑀚𑁆𑀚𑀺 ¶ . 𑀢𑀁 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑀓𑀁 𑀆𑀳𑀭𑀺. 𑀢𑀜𑁆𑀘 𑀤𑀦𑁆𑀢𑀓𑀝𑁆𑀞𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀤𑀦𑁆𑀢𑀓𑀝𑁆𑀞𑀁 𑀕𑀡𑁆𑀳𑀺. 𑀏𑀯𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀦 𑀧𑀼𑀘𑁆𑀙𑀺. 𑀲𑀸𑀫𑀡𑁂𑀭𑁄 𑀧𑀼𑀦𑀧𑀺 𑀧𑀼𑀩𑁆𑀩𑁂 𑀓𑀣𑀺𑀢𑀲𑀤𑀺𑀲𑀫𑁂𑀯 𑀓𑀣𑁂𑀲𑀺. 𑀣𑁂𑀭𑁄 ‘‘𑀲𑁄 𑀯𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀆𑀳. ‘‘𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀢𑁆𑀣𑀸𑀬, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀉𑀕𑁆𑀕𑀡𑁆𑀳 𑀤𑀸𑀦𑀺, 𑀲𑀸𑀫𑀡𑁂𑀭𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀤𑀺𑀯𑀲𑀢𑁄 𑀧𑀪𑀼𑀢𑀺 𑀩𑀼𑀤𑁆𑀥𑀯𑀘𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄𑀯 𑀳𑀼𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬. 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀧𑀦 𑀅𑀯𑀲𑁆𑀲𑀺𑀓𑁄𑀯 𑀲𑀫𑀸𑀦𑁄 𑀢𑀺𑀧𑀺𑀝𑀓𑀥𑀭𑁄 𑀅𑀳𑁄𑀲𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑁂 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀩𑀳𑀽𑀦𑀁 𑀥𑀫𑁆𑀫𑀯𑀺𑀦𑀬𑀁 𑀯𑀸𑀘𑁂𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀭𑀜𑁆𑀜𑁄 𑀏𑀓𑀲𑀢𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀲𑀩𑁆𑀩𑁂 𑀅𑀲𑁄𑀓𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀺𑀓𑀁 𑀢𑀺𑀲𑁆𑀲𑀓𑀼𑀫𑀸𑀭𑀁 𑀞𑀧𑁂𑀢𑁆𑀯𑀸 𑀖𑀸𑀢𑁂𑀲𑀺. 𑀖𑀸𑀢𑁂𑀦𑁆𑀢𑁄 𑀘 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀅𑀦𑀪𑀺𑀲𑀺𑀢𑁆𑀢𑁄𑀯 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀁 𑀧𑀸𑀧𑀼𑀡𑀺 ¶ . 𑀅𑀪𑀺𑀲𑁂𑀓𑀸𑀦𑀼𑀪𑀸𑀯𑁂𑀦 𑀘𑀲𑁆𑀲 𑀇𑀫𑀸 𑀭𑀸𑀚𑀺𑀤𑁆𑀥𑀺𑀬𑁄 𑀆𑀕𑀢𑀸 𑁋 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀆𑀡𑀸 𑀧𑀯𑀢𑁆𑀢𑀢𑀺; 𑀢𑀣𑀸 𑀉𑀧𑀭𑀺 𑀆𑀓𑀸𑀲𑁂 𑀅𑀦𑁄𑀢𑀢𑁆𑀢𑀤𑀳𑀢𑁄 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀲𑁄𑀴𑀲 𑀧𑀸𑀦𑀻𑀬𑀖𑀝𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁂𑀯𑀢𑀸 𑀆𑀳𑀭𑀦𑁆𑀢𑀺, 𑀬𑀢𑁄 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀳𑀼𑀢𑁆𑀯𑀸 𑀅𑀝𑁆𑀞 𑀖𑀝𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺, 𑀤𑁆𑀯𑁂 𑀖𑀝𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀢𑀺𑀧𑀺𑀝𑀓𑀥𑀭𑀪𑀺𑀓𑁆𑀔𑀽𑀦𑀁, 𑀤𑁆𑀯𑁂 𑀖𑀝𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀬, 𑀘𑀢𑁆𑀢𑀸𑀭𑁄 𑀖𑀝𑁂 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺; 𑀤𑁂𑀯𑀢𑀸𑀏𑀯 𑀳𑀺𑀫𑀯𑀦𑁆𑀢𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀦𑀸𑀫 𑀅𑀢𑁆𑀣𑀺 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼𑀓𑀁 𑀭𑀲𑀯𑀦𑁆𑀢𑀁 𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀳𑀭𑀦𑁆𑀢𑀺, 𑀬𑁂𑀦 𑀭𑀜𑁆𑀜𑁄 𑀘 𑀫𑀳𑁂𑀲𑀺𑀬𑀸 𑀘 𑀲𑁄𑀴𑀲𑀦𑁆𑀦𑀜𑁆𑀘 𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀲𑀝𑁆𑀞𑀺𑀫𑀢𑁆𑀢𑀸𑀦𑀜𑁆𑀘 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀤𑁂𑀯𑀲𑀺𑀓𑀁 𑀤𑀦𑁆𑀢𑀧𑁄𑀦𑀓𑀺𑀘𑁆𑀘𑀁 𑀦𑀺𑀧𑁆𑀧𑀚𑁆𑀚𑀢𑀺. 𑀤𑁂𑀯𑀲𑀺𑀓𑀫𑁂𑀯 𑀘𑀲𑁆𑀲 𑀤𑁂𑀯𑀢𑀸 𑀅𑀕𑀤𑀸𑀫𑀮𑀓𑀁 𑀅𑀕𑀤𑀳𑀭𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀜𑁆𑀘 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀦𑁆𑀢𑀺. 𑀢𑀣𑀸 𑀙𑀤𑁆𑀤𑀦𑁆𑀢𑀤𑀳𑀢𑁄 𑀧𑀜𑁆𑀘𑀯𑀡𑁆𑀡𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀧𑀻𑀢𑀓𑀯𑀡𑁆𑀡𑀳𑀢𑁆𑀣𑀧𑀼𑀘𑁆𑀙𑀦𑀧𑀝𑀓𑀁 𑀤𑀺𑀩𑁆𑀩𑀜𑁆𑀘 𑀧𑀸𑀦𑀓𑀁 𑀆𑀳𑀭𑀦𑁆𑀢𑀺. 𑀤𑁂𑀯𑀲𑀺𑀓𑀫𑁂𑀯 𑀧𑀦𑀲𑁆𑀲 𑀦𑁆𑀳𑀸𑀦𑀕𑀦𑁆𑀥𑀁 ¶ 𑀅𑀦𑀼𑀯𑀺𑀮𑁂𑀧𑀦𑀕𑀦𑁆𑀥𑀁 ¶ 𑀧𑀸𑀭𑀼𑀧𑀦𑀢𑁆𑀣𑀸𑀬 𑀅𑀲𑀼𑀢𑁆𑀢𑀫𑀬𑀺𑀓𑀁 𑀲𑀼𑀫𑀦𑀧𑀼𑀧𑁆𑀨𑀧𑀝𑀁 𑀫𑀳𑀸𑀭𑀳𑀜𑁆𑀘 𑀅𑀜𑁆𑀚𑀦𑀁 𑀦𑀸𑀕𑀪𑀯𑀦𑀢𑁄 𑀦𑀸𑀕𑀭𑀸𑀚𑀸𑀦𑁄 𑀆𑀳𑀭𑀦𑁆𑀢𑀺. 𑀙𑀤𑁆𑀤𑀦𑁆𑀢𑀤𑀳𑁂𑀯 ¶ 𑀉𑀝𑁆𑀞𑀺𑀢𑀲𑁆𑀲 𑀲𑀸𑀮𑀺𑀦𑁄 𑀦𑀯 𑀯𑀸𑀳𑀲𑀳𑀲𑁆𑀲𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀼𑀓𑀸 𑀆𑀳𑀭𑀦𑁆𑀢𑀺. 𑀫𑀽𑀲𑀺𑀓𑀸 𑀦𑀺𑀢𑁆𑀣𑀼𑀲𑀓𑀡𑁂 𑀓𑀭𑁄𑀦𑁆𑀢𑀺, 𑀏𑀓𑁄𑀧𑀺 𑀔𑀡𑁆𑀟𑀢𑀡𑁆𑀟𑀼𑀮𑁄 𑀦 𑀳𑁄𑀢𑀺, 𑀭𑀜𑁆𑀜𑁄 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀅𑀬𑀫𑁂𑀯 𑀢𑀡𑁆𑀟𑀼𑀮𑁄 𑀧𑀭𑀺𑀪𑁄𑀕𑀁 𑀕𑀘𑁆𑀙𑀢𑀺. 𑀫𑀥𑀼𑀫𑀓𑁆𑀔𑀺𑀓𑀸 𑀫𑀥𑀼𑀁 𑀓𑀭𑁄𑀦𑁆𑀢𑀺. 𑀓𑀫𑁆𑀫𑀸𑀭𑀲𑀸𑀮𑀸𑀲𑀼 𑀅𑀘𑁆𑀙𑀸 𑀓𑀽𑀝𑀁 𑀧𑀳𑀭𑀦𑁆𑀢𑀺. 𑀓𑀭𑀯𑀻𑀓𑀲𑀓𑀼𑀡𑀸 𑀆𑀕𑀦𑁆𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀯𑀺𑀓𑀽𑀚𑀦𑁆𑀢𑀸 𑀭𑀜𑁆𑀜𑁄 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺.

𑀇𑀫𑀸𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀧𑁂𑀲𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀥𑀺𑀕𑀢𑀭𑀽𑀧𑀤𑀲𑁆𑀲𑀦𑀁 𑀓𑀧𑁆𑀧𑀸𑀬𑀼𑀓𑀁 𑀓𑀸𑀴𑀁 𑀦𑀸𑀫 𑀦𑀸𑀕𑀭𑀸𑀚𑀸𑀦𑀁 𑀆𑀦𑀬𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀦𑁂𑀓𑀲𑀢𑀯𑀡𑁆𑀡𑁂𑀳𑀺 𑀚𑀮𑀚 𑀣𑀮𑀚𑀧𑀼𑀧𑁆𑀨𑁂𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀘 𑀧𑀽𑀚𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀲𑁄𑀴𑀲𑀳𑀺 𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑁂𑀳𑀺 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀦𑁆𑀢𑀜𑀸𑀡𑀲𑁆𑀲 𑀢𑀸𑀯 𑀫𑁂 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀭𑀽𑀧𑀁 𑀇𑀫𑁂𑀲𑀁 𑀅𑀓𑁆𑀔𑀻𑀦𑀁 𑀆𑀧𑀸𑀣𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀦𑀺𑀫𑁆𑀫𑀺𑀢𑀁 𑀲𑀓𑀮𑀲𑀭𑀻𑀭𑀯𑀺𑀧𑁆𑀧𑀓𑀺𑀡𑁆𑀡𑀧𑀼𑀜𑁆𑀜𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀸𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀲𑁆𑀲𑀺𑀭𑀻𑀓𑀢𑀸𑀬 𑀯𑀺𑀓𑀲𑀺𑀢𑀓𑀫𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀧𑀝𑀺𑀫𑀡𑁆𑀟𑀺𑀢𑀫𑀺𑀯 𑀲𑀮𑀺𑀮𑀢𑀮𑀁 𑀢𑀸𑀭𑀸𑀕𑀡𑀭𑀲𑁆𑀫𑀺𑀚𑀸𑀮𑀯𑀺𑀲𑀤𑀯𑀺𑀧𑁆𑀨𑀼𑀭𑀺𑀢𑀲𑁄𑀪𑀸𑀲𑀫𑀼𑀚𑁆𑀚𑀮𑀺𑀢𑀫𑀺𑀯 𑀕𑀕𑀦𑀢𑀮𑀁 𑀦𑀻𑀮𑀧𑀻𑀢𑀮𑁄𑀳𑀺𑀢𑀸𑀤𑀺𑀪𑁂𑀤𑀯𑀺𑀘𑀺𑀢𑁆𑀭𑀯𑀡𑁆𑀡𑀭𑀁𑀲𑀺𑀯𑀺𑀦𑀤𑁆𑀥𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀢𑀸𑀬 ¶ 𑀲𑀜𑁆𑀘𑀸𑀧𑁆𑀧𑀪𑀸𑀦𑀼𑀭𑀸𑀕𑀇𑀦𑁆𑀤𑀥𑀦𑀼𑀯𑀺𑀚𑁆𑀚𑀼𑀮𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀦𑀸𑀦𑀸𑀯𑀺𑀭𑀸𑀕𑀯𑀺𑀫𑀮𑀓𑁂𑀢𑀼𑀫𑀸𑀮𑀸𑀲𑀫𑀼𑀚𑁆𑀚𑀮𑀺𑀢𑀘𑀸𑀭𑀼𑀫𑀢𑁆𑀣𑀓𑀲𑁄𑀪𑀁 𑀦𑀬𑀦𑀭𑀲𑀸𑀬𑀢𑀦𑀫𑀺𑀯 𑀩𑁆𑀭𑀳𑁆𑀫𑀤𑁂𑀯𑀫𑀦𑀼𑀚𑀦𑀸𑀕𑀬𑀓𑁆𑀔𑀕𑀡𑀸𑀦𑀁 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀓𑁆𑀔𑀺𑀧𑀽𑀚𑀁 𑀦𑀸𑀫 𑀅𑀓𑀸𑀲𑀺.

𑀭𑀸𑀚𑀸 𑀓𑀺𑀭 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀻𑀡𑀺𑀬𑁂𑀯 𑀲𑀁𑀯𑀘𑁆𑀙𑀭𑀸𑀦𑀺 𑀩𑀸𑀳𑀺𑀭𑀓𑀧𑀸𑀲𑀡𑁆𑀟𑀁 𑀧𑀭𑀺𑀕𑁆𑀕𑀡𑁆𑀳𑀺. 𑀘𑀢𑀼𑀢𑁆𑀣𑁂 𑀲𑀁𑀯𑀘𑁆𑀙𑀭𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺. 𑀢𑀲𑁆𑀲 𑀓𑀺𑀭 𑀧𑀺𑀢𑀸 𑀩𑀺𑀦𑁆𑀤𑀼𑀲𑀸𑀭𑁄 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀧𑀸𑀲𑀡𑁆𑀟𑀸𑀦𑀜𑁆𑀘 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀲𑁄𑀓𑁄𑀧𑀺 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀤𑀸𑀦𑀁 𑀅𑀢𑁆𑀢𑀦𑁄 𑀅𑀦𑁆𑀢𑁂𑀧𑀼𑀭𑁂 𑀢𑀣𑁂𑀯 𑀤𑀤𑀫𑀸𑀦𑁄 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑁂 𑀉𑀧𑀲𑀫𑀧𑀭𑀺𑀩𑀸𑀳𑀺𑀭𑁂𑀦 𑀆𑀘𑀸𑀭𑁂𑀦 𑀪𑀼𑀜𑁆𑀚𑀫𑀸𑀦𑁂 𑀅𑀲𑀁𑀬𑀢𑀺𑀦𑁆𑀤𑁆𑀭𑀺𑀬𑁂 𑀅𑀯𑀺𑀦𑀻𑀢𑀇𑀭𑀺𑀬𑀸𑀧𑀣𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀈𑀤𑀺𑀲𑀁 𑀤𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀸𑀥𑀼𑀲𑀫𑁆𑀫𑀢𑁂 ¶ 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀅𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀣, 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺. 𑀅𑀫𑀘𑁆𑀘𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑁂 𑀢𑁂 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀚𑀻𑀯𑀓𑀦𑀺𑀕𑀡𑁆𑀞𑀸𑀤𑀬𑁄 𑀆𑀦𑁂𑀢𑁆𑀯𑀸 ‘‘𑀇𑀫𑁂, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀅𑀭𑀳𑀦𑁆𑀢𑁄’’𑀢𑀺 𑀆𑀳𑀁𑀲𑀼.

𑀅𑀣 ¶ 𑀭𑀸𑀚𑀸 𑀅𑀦𑁆𑀢𑁂𑀧𑀼𑀭𑁂 𑀉𑀘𑁆𑀘𑀸𑀯𑀘𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀆𑀕𑀢𑀸𑀕𑀢𑁂 𑀆𑀳 𑁋 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀣𑀸’’𑀢𑀺 ¶ . 𑀢𑁂𑀲𑀼 𑀏𑀓𑀘𑁆𑀘𑁂 𑀪𑀤𑁆𑀤𑀧𑀻𑀞𑀓𑁂𑀲𑀼, 𑀏𑀓𑀘𑁆𑀘𑁂 𑀨𑀮𑀓𑀧𑀻𑀞𑀓𑁂𑀲𑀼 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀭𑀸𑀚𑀸 ‘‘𑀦𑀢𑁆𑀣𑀺 𑀦𑁂𑀲𑀁 𑀅𑀦𑁆𑀢𑁄 𑀲𑀸𑀭𑁄’’𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀅𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀁. 𑀓𑁄 𑀧𑀦𑀸𑀬𑀁 𑀦𑀺𑀕𑁆𑀭𑁄𑀥𑁄 𑀦𑀸𑀫? 𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀓𑀺𑀭 𑀤𑀼𑀩𑁆𑀩𑀮𑀓𑀸𑀮𑁂𑀬𑁂𑀯 𑀅𑀲𑁄𑀓𑀓𑀼𑀫𑀸𑀭𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀉𑀚𑁆𑀚𑁂𑀦𑀻𑀭𑀚𑁆𑀚𑀁 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀦𑀕𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀁 𑀅𑀕𑁆𑀕𑀳𑁂𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀲𑀼𑀫𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀲𑀼𑀫𑀦𑀸 𑀦𑀸𑀫 𑀤𑁂𑀯𑀻 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀘𑀡𑁆𑀟𑀸𑀮𑀕𑀸𑀫𑀁 𑀲𑀦𑁆𑀥𑀸𑀬 𑀕𑀘𑁆𑀙𑀦𑁆𑀢𑀻 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑀲𑁆𑀲 𑀕𑁂𑀳𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 ‘‘𑀇𑀢𑁄 𑀏𑀳𑀺, 𑀲𑀼𑀫𑀦𑁂’’𑀢𑀺 𑀯𑀤𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀫𑀻𑀧𑀁 𑀕𑀢𑀸. 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀏𑀓𑀁 𑀲𑀸𑀮𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 ‘‘𑀏𑀢𑁆𑀣 𑀯𑀲𑀸𑀳𑀻’’𑀢𑀺 𑀅𑀤𑀸𑀲𑀺. 𑀲𑀸 𑀢𑀁 𑀲𑀸𑀮𑀁 𑀧𑀸𑀯𑀺𑀲𑀺. 𑀕𑀢𑀤𑀺𑀯𑀲𑁂𑀬𑁂𑀯 𑀘 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑀸 𑀢𑀲𑁆𑀲 𑀦𑀺𑀕𑁆𑀭𑁄𑀥𑀤𑁂𑀯𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀦𑀺𑀕𑁆𑀭𑁄𑀥𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑁄 𑀤𑀺𑀝𑁆𑀞𑀤𑀺𑀯𑀲𑀢𑁄 𑀧𑀪𑀼𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀸𑀫𑀺𑀥𑀻𑀢𑀭𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀦𑀺𑀩𑀤𑁆𑀥𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀭𑀸𑀚𑀥𑀻𑀢𑀸 𑀢𑀢𑁆𑀣 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀲𑀺. 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄𑀧𑀺 ¶ 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑁄. 𑀢𑀤𑀸 𑀫𑀳𑀸𑀯𑀭𑀼𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀅𑀭𑀳𑀸 𑀤𑀸𑀭𑀓𑀲𑁆𑀲 𑀳𑁂𑀢𑀼𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀭𑀓𑁆𑀔𑀺𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀫𑀸𑀦𑁄 ‘‘𑀲𑀢𑁆𑀢𑀯𑀲𑁆𑀲𑀺𑀓𑁄 𑀤𑀸𑀦𑀺 𑀤𑀸𑀭𑀓𑁄, 𑀓𑀸𑀮𑁄 𑀦𑀁 𑀧𑀩𑁆𑀩𑀸𑀚𑁂𑀢𑀼’’𑀦𑁆𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀥𑀻𑀢𑀸𑀬 𑀆𑀭𑁄𑀘𑀸𑀧𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀓𑀼𑀫𑀸𑀭𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀲𑀭𑀻𑀭𑀁 𑀚𑀕𑁆𑀕𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀫𑀸𑀢𑀼𑀉𑀧𑀸𑀲𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀕𑀘𑁆𑀙𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺. 𑀫𑀸𑀢𑀼𑀦𑀺𑀯𑀸𑀲𑀦𑀝𑁆𑀞𑀸𑀦𑀜𑁆𑀘𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀲𑀻𑀳𑀧𑀜𑁆𑀚𑀭𑁂 𑀘𑀗𑁆𑀓𑀫𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀕𑁆𑀭𑁄𑀥𑁄 𑀭𑀸𑀚𑀗𑁆𑀕𑀡𑀁 𑀲𑀫𑁆𑀧𑀸𑀧𑀼𑀡𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀤𑀺𑀯𑀲𑀁 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦’’𑀦𑁆𑀢𑀺. 𑀤𑀺𑀲𑁆𑀯𑀸 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀚𑀦𑁄 𑀲𑀩𑁆𑀩𑁄𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑁄. 𑀅𑀬𑀁 𑀧𑀦 𑀤𑀸𑀭𑀓𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀢𑀺𑀯𑀺𑀬 𑀘𑀲𑁆𑀲 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀜𑁆𑀘 𑀲𑁄𑀪𑀢𑀺. 𑀅𑀤𑁆𑀥𑀸 𑀏𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀜𑁆𑀜𑁄 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀲𑀸𑀫𑀡𑁂𑀭𑁂 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀧𑁂𑀫𑀁 𑀲𑀡𑁆𑀞𑀳𑀺. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀳𑀺 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀏𑀲 𑀭𑀜𑁆𑀜𑁄 𑀚𑁂𑀝𑁆𑀞𑀪𑀸𑀢𑀸 𑀯𑀸𑀡𑀺𑀚𑀓𑁄 𑀅𑀳𑁄𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀧𑀼𑀩𑁆𑀩𑁂 𑀯 ¶ 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁 𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀅𑀣 𑀭𑀸𑀚𑀸 𑀲𑀜𑁆𑀚𑀸𑀢𑀧𑁂𑀫𑁄 𑀲𑀩𑀳𑀼𑀫𑀸𑀦𑁄 ‘‘𑀏𑀢𑀁 𑀲𑀸𑀫𑀡𑁂𑀭𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. ‘‘𑀢𑁂 𑀅𑀢𑀺𑀘𑀺𑀭𑀸𑀬𑀦𑁆𑀢𑀻’’𑀢𑀺 𑀧𑀼𑀦 𑀤𑁆𑀯𑁂 𑀢𑀬𑁄 𑀧𑁂𑀲𑁂𑀲𑀺 𑁋 ‘‘𑀢𑀼𑀭𑀺𑀢𑀁 𑀆𑀕𑀘𑁆𑀙𑀢𑀽’’𑀢𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀏𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀢𑀺𑀭𑀽𑀧𑀫𑀸𑀲𑀦𑀁 𑀜𑀢𑁆𑀯𑀸 ‘‘𑀦𑀺𑀲𑀻𑀤𑀣𑀸’’𑀢𑀺 𑀆𑀳. 𑀲𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽’’𑀢𑀺 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀭𑀸𑀚𑀧𑀮𑁆𑀮𑀗𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀸𑀬 𑀭𑀜𑁆𑀜𑁄 𑀆𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀁 𑀧𑀮𑁆𑀮𑀗𑁆𑀓𑀲𑀫𑀻𑀧𑀁 𑀉𑀧𑀕𑀘𑁆𑀙𑀦𑁆𑀢𑀁𑀬𑁂𑀯 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚𑁂𑀯 𑀤𑀸𑀦𑀺 𑀅𑀬𑀁 𑀲𑀸𑀫𑀡𑁂𑀭𑁄 𑀇𑀫𑀲𑁆𑀲 𑀕𑁂𑀳𑀲𑁆𑀲 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀡𑁂𑀭𑁄 𑀭𑀜𑁆𑀜𑁄 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀲𑀩𑁆𑀩𑀁 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀯𑀺𑀓𑀢𑀺𑀁 ¶ 𑀉𑀧𑀦𑀸𑀫𑁂𑀲𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀬𑀸𑀧𑀦𑀻𑀬𑀫𑀢𑁆𑀢𑀓𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀆𑀳 𑁋 ‘‘𑀲𑀢𑁆𑀣𑀸𑀭𑀸 𑀢𑀼𑀫𑁆𑀳𑀸𑀓𑀁 𑀤𑀺𑀦𑁆𑀦𑁄𑀯𑀸𑀤𑀁 𑀚𑀸𑀦𑀸𑀣𑀸’’𑀢𑀺? ‘‘𑀚𑀸𑀦𑀸𑀫𑀺, 𑀫𑀳𑀸𑀭𑀸𑀚, 𑀏𑀓𑀤𑁂𑀲𑁂𑀦𑀸’’𑀢𑀺. ‘‘𑀢𑀸𑀢, 𑀫𑀬𑁆𑀳𑀫𑁆𑀧𑀺 𑀦𑀁 𑀓𑀣𑁂𑀳𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀅𑀦𑀼𑀭𑀽𑀧𑀁 𑀥𑀫𑁆𑀫𑀧𑀤𑁂 𑀅𑀧𑁆𑀧𑀫𑀸𑀤𑀯𑀕𑁆𑀕𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀅𑀪𑀸𑀲𑀺.

𑀭𑀸𑀚𑀸 𑀧𑀦 ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 𑀲𑀼𑀢𑁆𑀯𑀸𑀯 ‘‘𑀅𑀜𑁆𑀜𑀸𑀢𑀁, 𑀢𑀸𑀢, 𑀧𑀭𑀺𑀬𑁄𑀲𑀸𑀧𑁂𑀳𑀻’’𑀢𑀺 𑀆𑀳. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀘 ‘‘𑀅𑀝𑁆𑀞 𑀢𑁂, 𑀢𑀸𑀢, 𑀥𑀼𑀯𑀪𑀢𑁆𑀢𑀸𑀦𑀺 𑀤𑀫𑁆𑀫𑀻’’𑀢𑀺 𑀆𑀳. 𑀲𑀸𑀫𑀡𑁂𑀭𑁄 𑀆𑀳 𑁋 ‘‘𑀏𑀢𑀸𑀦𑀺 𑀅𑀳𑀁 𑀉𑀧𑀚𑁆𑀛𑀸𑀬𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀉𑀧𑀚𑁆𑀛𑀸𑀬𑁄 𑀦𑀸𑀫𑀸’’𑀢𑀺? ‘‘𑀯𑀚𑁆𑀚𑀸𑀯𑀚𑁆𑀚𑀁 𑀤𑀺𑀲𑁆𑀯𑀸 𑀘𑁄𑀤𑁂𑀢𑀸 𑀲𑀸𑀭𑁂𑀢𑀸 𑀘, 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀜𑁆𑀜𑀸𑀦𑀺𑀧𑀺 𑀢𑁂, 𑀢𑀸𑀢, 𑀅𑀝𑁆𑀞 𑀤𑀫𑁆𑀫𑀻’’𑀢𑀺. ‘‘𑀏𑀢𑀸𑀦𑀺 ¶ 𑀆𑀘𑀭𑀺𑀬𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀆𑀘𑀭𑀺𑀬𑁄 𑀦𑀸𑀫𑀸’’𑀢𑀺? ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀺𑀓𑁆𑀔𑀺𑀢𑀩𑁆𑀩𑀓𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀅𑀜𑁆𑀜𑀸𑀦𑀺𑀧𑀺 𑀢𑁂 𑀅𑀝𑁆𑀞 𑀤𑀫𑁆𑀫𑀻’’𑀢𑀺. ‘‘𑀏𑀢𑀸𑀦𑀺𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀸𑀫𑀸’’𑀢𑀺? ‘‘𑀬𑀁 𑀦𑀺𑀲𑁆𑀲𑀸𑀬 ¶ , 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀜𑁆𑀘 𑀫𑀫 𑀘 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘𑀸’’𑀢𑀺. 𑀭𑀸𑀚𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀼𑀝𑁆𑀞𑀘𑀺𑀢𑁆𑀢𑁄 𑀆𑀳 𑁋 ‘‘𑀅𑀜𑁆𑀜𑀸𑀦𑀺𑀧𑀺 𑀢𑁂, 𑀢𑀸𑀢, 𑀅𑀝𑁆𑀞 𑀤𑀫𑁆𑀫𑀻’’𑀢𑀺. 𑀲𑀸𑀫𑀡𑁂𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑁆𑀯𑀢𑁆𑀢𑀺𑀁𑀲 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀭𑀸𑀚𑀸 ‘‘𑀅𑀜𑁆𑀜𑁂𑀧𑀺 𑀤𑁆𑀯𑀢𑁆𑀢𑀺𑀁𑀲 𑀪𑀺𑀓𑁆𑀔𑀽 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀟𑁆𑀠𑀸𑀧𑁂𑀦𑁆𑀢𑁄 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁 𑀪𑀢𑁆𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁂 𑀕𑀢𑁂𑀦𑁂𑀯 𑀧𑀲𑀸𑀤𑁂𑀦. 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄𑀧𑀺 𑀭𑀸𑀚𑀸𑀦𑀁 𑀲𑀧𑀭𑀺𑀲𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑁄𑀣𑀼𑀚𑁆𑀚𑀦𑀺𑀓𑁂𑀦 𑀧𑀲𑀸𑀤𑁂𑀦 𑀅𑀘𑀮𑀧𑁆𑀧𑀲𑀸𑀤𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀧𑀼𑀦 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀲𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀘𑁂𑀢𑀺𑀬𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

𑀏𑀓𑀤𑀺𑀯𑀲𑀁 𑀓𑀺𑀭 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀚𑁆𑀚 𑀲𑀗𑁆𑀖𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 ¶ 𑁋 ‘‘𑀪𑀦𑁆𑀢𑁂, 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀦𑀸𑀫 𑀓𑀺𑀢𑁆𑀢𑀓𑁄 𑀳𑁄𑀢𑀻’’𑀢𑀺? ‘‘𑀅𑀗𑁆𑀕𑀢𑁄, 𑀫𑀳𑀸𑀭𑀸𑀚, 𑀦𑀯𑀗𑁆𑀕𑀸𑀦𑀺, 𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺. 𑀭𑀸𑀚𑀸 𑀥𑀫𑁆𑀫𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀏𑀓𑁂𑀓𑀁 𑀥𑀫𑁆𑀫𑀓𑁆𑀔𑀦𑁆𑀥𑀁 𑀏𑀓𑁂𑀓𑀯𑀺𑀳𑀸𑀭𑁂𑀦 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀫𑁂𑀯 ¶ 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀏𑀣, 𑀪𑀡𑁂, 𑀏𑀓𑀫𑁂𑀓𑀲𑁆𑀫𑀺𑀁 𑀦𑀕𑀭𑁂 𑀏𑀓𑀫𑁂𑀓𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀦𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀣𑀸’’𑀢𑀺. 𑀲𑀬𑀜𑁆𑀘 𑀅𑀲𑁄𑀓𑀸𑀭𑀸𑀫𑁂 𑀅𑀲𑁄𑀓𑀫𑀳𑀸𑀯𑀺𑀳𑀸𑀭𑀢𑁆𑀣𑀸𑀬 𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺. 𑀲𑀗𑁆𑀖𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀁 𑀦𑀸𑀫 𑀫𑀳𑀺𑀤𑁆𑀥𑀺𑀓𑀁 𑀫𑀳𑀸𑀦𑀼𑀪𑀸𑀯𑀁 𑀔𑀻𑀡𑀸𑀲𑀯𑀁 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑀁 𑀅𑀤𑀸𑀲𑀺. 𑀣𑁂𑀭𑁄 𑀬𑀁 𑀬𑀁 𑀦 𑀦𑀺𑀝𑁆𑀞𑀸𑀢𑀺 𑀢𑀁 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀝𑁆𑀞𑀸𑀧𑁂𑀲𑀺. 𑀏𑀯𑀫𑁆𑀧𑀺 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀯𑀺𑀳𑀸𑀭𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀏𑀓𑀤𑀺𑀯𑀲𑀫𑁂𑀯 𑀲𑀩𑁆𑀩𑀦𑀕𑀭𑁂𑀳𑀺 𑀧𑀡𑁆𑀡𑀸𑀦𑀺 𑀆𑀕𑀫𑀺𑀁𑀲𑀼.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀸𑀦𑀺, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀻’’𑀢𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀇𑀢𑁄 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀯𑀺𑀳𑀸𑀭𑀫𑀳𑁄 𑀪𑀯𑀺𑀲𑁆𑀲𑀢𑀺. 𑀲𑀩𑁆𑀩𑁂 𑀅𑀝𑁆𑀞 𑀲𑀻𑀮𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀘 𑀩𑀳𑀺𑀦𑀕𑀭𑁂 𑀘 𑀯𑀺𑀳𑀸𑀭𑀫𑀳𑀁 𑀧𑀝𑀺𑀬𑀸𑀤𑁂𑀦𑁆𑀢𑀽’’𑀢𑀺. 𑀢𑀢𑁄 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸𑀬 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀤𑁂𑀯𑀮𑁄𑀓𑁂 𑀅𑀫𑀭𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀲𑀺𑀭𑀺𑀢𑁄 𑀅𑀥𑀺𑀓𑀢𑀭𑀲𑀲𑁆𑀲𑀺𑀭𑀻𑀓𑀁 𑀯𑀺𑀬 𑀦𑀕𑀭𑀁 𑀓𑀸𑀢𑀼𑀓𑀸𑀫𑁂𑀦 𑀉𑀲𑁆𑀲𑀸𑀳𑀚𑀸𑀢𑁂𑀦 𑀫𑀳𑀸𑀚𑀦𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀦𑀕𑀭𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀜𑁆𑀘 ¶ 𑀔𑀡𑁂 𑀲𑀦𑁆𑀦𑀺𑀧𑀢𑀺𑀢𑀸 𑀅𑀲𑀻𑀢𑀺 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀳𑁂𑀲𑀼𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀙𑀦𑁆𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀥𑀺𑀓𑀸𑀭𑀁 𑀅𑀦𑀯𑀲𑁂𑀲𑀁 𑀧𑀲𑁆𑀲𑁂𑀬𑁆𑀬 𑀅𑀢𑀺𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀢𑀢𑁄 ¶ 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀁𑀲𑀼. 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑁂 𑀞𑀺𑀢𑁄𑀯 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀲𑀫𑀦𑁆𑀢𑀢𑁄 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀧𑀲𑁆𑀲𑀢𑀺 𑀘𑀢𑀼𑀭𑀸𑀲𑀻𑀢𑀺𑀜𑁆𑀘 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀉𑀴𑀸𑀭𑀸𑀬 𑀯𑀺𑀳𑀸𑀭𑀫𑀳𑀧𑀽𑀚𑀸𑀬 𑀯𑀺𑀭𑁄𑀘𑀫𑀸𑀦𑀸𑀦𑀺. 𑀲𑁄 𑀢𑀁 𑀯𑀺𑀪𑀽𑀢𑀺𑀁 𑀧𑀲𑁆𑀲𑀫𑀸𑀦𑁄 𑀉𑀴𑀸𑀭𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 ‘‘𑀅𑀢𑁆𑀣𑀺 𑀧𑀦 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀏𑀯𑀭𑀽𑀧𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀮𑁄𑀓𑀦𑀸𑀣𑀲𑁆𑀲 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀓𑁄 𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀧𑀭𑀺𑀘𑁆𑀘𑀚𑀺. 𑀓𑀲𑁆𑀲 ¶ 𑀧𑀭𑀺𑀘𑁆𑀘𑀸𑀕𑁄 𑀫𑀳𑀦𑁆𑀢𑁄𑀢𑀺? 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺. 𑀣𑁂𑀭𑁄 𑀆𑀳 𑁋 ‘‘𑀫𑀳𑀸𑀭𑀸𑀚, 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀧𑀘𑁆𑀘𑀬𑀤𑀸𑀬𑀓𑁄 𑀦𑀸𑀫 𑀢𑀬𑀸 𑀲𑀤𑀺𑀲𑁄 𑀥𑀭𑀫𑀸𑀦𑁂𑀧𑀺 𑀢𑀣𑀸𑀕𑀢𑁂 𑀦 𑀓𑁄𑀘𑀺 𑀅𑀳𑁄𑀲𑀺, 𑀢𑀯𑁂𑀯 𑀧𑀭𑀺𑀘𑁆𑀘𑀸𑀕𑁄 𑀫𑀳𑀸’’𑀢𑀺. 𑀭𑀸𑀚𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀴𑀸𑀭𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀢𑁆𑀣𑀺 𑀓𑀺𑀭 𑀫𑀬𑀸 𑀲𑀤𑀺𑀲𑁄 𑀧𑀘𑁆𑀘𑀬𑀤𑀸𑀬𑀓𑁄, 𑀫𑀬𑁆𑀳𑀁 𑀓𑀺𑀭 𑀧𑀭𑀺𑀘𑁆𑀘𑀸𑀕𑁄 𑀫𑀳𑀸, 𑀅𑀳𑀁 𑀓𑀺𑀭 𑀤𑁂𑀬𑁆𑀬𑀥𑀫𑁆𑀫𑁂𑀦 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀸𑀫𑀺. 𑀓𑀺𑀁 𑀧𑀦𑀸𑀳𑀁 𑀏𑀯𑀁 𑀲𑀢𑀺 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀫𑀺, 𑀦 𑀳𑁄𑀫𑀻’’𑀢𑀺. 𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀪𑀯𑀸𑀫𑀺 𑀦𑀼 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄’’𑀢𑀺?

𑀢𑀢𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀭𑀜𑁆𑀜𑁄 𑀇𑀤𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀲𑁆𑀲 𑀫𑀳𑀺𑀦𑁆𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀲𑀘𑁂 𑀅𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀲𑁆𑀲𑀢𑀺 𑀲𑀸𑀲𑀦𑀲𑁆𑀲 𑀅𑀢𑀺𑀯𑀺𑀬 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀏𑀢𑁆𑀢𑀸𑀯𑀢𑀸 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀺; 𑀅𑀧𑀺𑀘 𑀔𑁄 𑀧𑀘𑁆𑀘𑀬𑀤𑀸𑀬𑀓𑁄𑀢𑀺 𑀯𑀸 𑀉𑀧𑀝𑁆𑀞𑀸𑀓𑁄𑀢𑀺 𑀯𑀸 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑁄𑀧𑀺 𑀳𑀺, 𑀫𑀳𑀸𑀭𑀸𑀚, 𑀧𑀣𑀯𑀺𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀫𑀸𑀡𑀁 𑀧𑀘𑁆𑀘𑀬𑀭𑀸𑀲𑀺𑀁 𑀤𑀤𑁂𑀬𑁆𑀬 𑀲𑁄𑀧𑀺 ‘𑀲𑀸𑀲𑀦𑁂 𑀤𑀸𑀬𑀸𑀤𑁄’𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺. ‘‘𑀅𑀣 𑀓𑀣𑀁 𑀘𑀭𑀳𑀺, 𑀪𑀦𑁆𑀢𑁂, 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀻’’𑀢𑀺? ‘‘𑀬𑁄 𑀳𑀺 𑀓𑁄𑀘𑀺, 𑀫𑀳𑀸𑀭𑀸𑀚, 𑀅𑀟𑁆𑀠𑁄 ¶ 𑀯𑀸 𑀤𑀮𑀺𑀤𑁆𑀤𑁄 𑀯𑀸 𑀅𑀢𑁆𑀢𑀦𑁄 𑀑𑀭𑀲𑀁 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚, 𑀤𑀸𑀬𑀸𑀤𑁄 𑀲𑀸𑀲𑀦𑀲𑁆𑀲𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀲𑁄𑀓𑁄 𑀭𑀸𑀚𑀸 ‘‘𑀅𑀳𑀁 𑀓𑀺𑀭 𑀏𑀯𑀭𑀽𑀧𑀁 𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸𑀧𑀺 𑀦𑁂𑀯 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀲𑀸𑀲𑀦𑁂 𑀤𑀸𑀬𑀸𑀤𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀅𑀤𑁆𑀤𑀲 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀅𑀯𑀺𑀤𑀽𑀭𑁂 𑀞𑀺𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀜𑁆𑀘𑀸𑀧𑀺 𑀅𑀳𑀁 𑀇𑀫𑀁 𑀓𑀼𑀫𑀸𑀭𑀁 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺 𑀑𑀧𑀭𑀚𑁆𑀚𑁂 𑀞𑀧𑁂𑀢𑀼𑀓𑀸𑀫𑁄, 𑀅𑀣 𑀔𑁄 𑀑𑀧𑀭𑀚𑁆𑀚𑀢𑁄𑀧𑀺 𑀧𑀩𑁆𑀩𑀚𑁆𑀚𑀸𑀯 ¶ 𑀉𑀢𑁆𑀢𑀫𑀸’’𑀢𑀺. 𑀢𑀢𑁄 𑀓𑀼𑀫𑀸𑀭𑀁 𑀆𑀳 𑁋 ‘‘𑀲𑀓𑁆𑀔𑀲𑀺 𑀢𑁆𑀯𑀁, 𑀢𑀸𑀢, 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺? 𑀓𑀼𑀫𑀸𑀭𑁄 𑀧𑀓𑀢𑀺𑀬𑀸𑀧𑀺 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀯 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑀺𑀯𑀺𑀬 𑀧𑀸𑀫𑁄𑀚𑁆𑀚𑀚𑀸𑀢𑁄 𑀳𑀼𑀢𑁆𑀯𑀸 𑀆𑀳 𑁋 ‘‘𑀧𑀩𑁆𑀩𑀚𑀸𑀫𑀺, 𑀤𑁂𑀯, 𑀫𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀼𑀫𑁆𑀳𑁂 𑀲𑀸𑀲𑀦𑀤𑀸𑀬𑀸𑀤𑀸 𑀳𑁄𑀣𑀸’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀥𑀻𑀢𑀸 𑀲𑀗𑁆𑀖𑀫𑀺𑀢𑁆𑀢𑀸𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀺𑀢𑀸 𑀳𑁄𑀢𑀺. 𑀢𑀲𑁆𑀲𑀸 𑀘 𑀲𑀸𑀫𑀺𑀓𑁄 𑀅𑀕𑁆𑀕𑀺𑀩𑁆𑀭𑀳𑁆𑀫𑀸 𑀦𑀸𑀫 𑀓𑀼𑀫𑀸𑀭𑁄 𑀬𑀼𑀯𑀭𑀸𑀚𑁂𑀦 𑀢𑀺𑀲𑁆𑀲𑀓𑀼𑀫𑀸𑀭𑁂𑀦 ¶ 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑁆𑀯𑀫𑁆𑀧𑀺, 𑀅𑀫𑁆𑀫, 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀲𑀻’’𑀢𑀺? ‘‘𑀲𑀸𑀥𑀼, 𑀢𑀸𑀢, 𑀲𑀓𑁆𑀓𑁄𑀫𑀻’’𑀢𑀺. 𑀭𑀸𑀚𑀸 𑀧𑀼𑀢𑁆𑀢𑀸𑀦𑀁 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀳𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀢𑀤𑀯𑁄𑀘 𑁋 ‘‘𑀪𑀦𑁆𑀢𑁂, 𑀇𑀫𑁂 𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀁 𑀲𑀸𑀲𑀦𑁂 𑀤𑀸𑀬𑀸𑀤𑀁 𑀓𑀭𑁄𑀣𑀸’’𑀢𑀺. 𑀲𑀗𑁆𑀖𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀼𑀫𑀸𑀭𑀁 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁂𑀦 𑀫𑀳𑀸𑀤𑁂𑀯𑀢𑁆𑀣𑁂𑀭𑁂𑀦 𑀘 𑀆𑀘𑀭𑀺𑀬𑁂𑀦 𑀧𑀩𑁆𑀩𑀸𑀚𑁂𑀲𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁂𑀦 𑀆𑀘𑀭𑀺𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑀤𑀸 𑀓𑀺𑀭 𑀓𑀼𑀫𑀸𑀭𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀯 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀉𑀧𑀲𑀫𑁆𑀧𑀤𑀲𑀻𑀫𑀫𑀡𑁆𑀟𑀮𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀗𑁆𑀖𑀫𑀺𑀢𑁆𑀢𑀸𑀬𑀧𑀺 𑀭𑀸𑀚𑀥𑀻𑀢𑀸𑀬 𑀆𑀘𑀭𑀺𑀬𑀸 𑀆𑀬𑀼𑀧𑀸𑀮𑀺𑀢𑁆𑀣𑁂𑀭𑀻 𑀦𑀸𑀫, 𑀉𑀧𑀚𑁆𑀛𑀸𑀬𑀸 𑀧𑀦 𑀥𑀫𑁆𑀫𑀧𑀸𑀮𑀺𑀢𑁆𑀣𑁂𑀭𑀻 𑀦𑀸𑀫 𑀅𑀳𑁄𑀲𑀺. 𑀢𑀤𑀸 ¶ 𑀲𑀗𑁆𑀖𑀫𑀺𑀢𑁆𑀢𑀸 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀳𑁄𑀢𑀺. 𑀢𑀁 𑀧𑀩𑁆𑀩𑀚𑀺𑀢𑀫𑀢𑁆𑀢𑀁 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀉𑀪𑀺𑀦𑁆𑀦𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀭𑀸𑀚𑀸 𑀙𑀩𑁆𑀩𑀲𑁆𑀲𑀸𑀪𑀺𑀲𑁂𑀓𑁄 𑀳𑁄𑀢𑀺.

𑀅𑀣 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀪𑀼𑀢𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀭𑀺𑀬𑀸𑀧𑀼𑀡𑀦𑁆𑀢𑁄 𑀤𑁆𑀯𑁂𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑀁 𑀢𑀺𑀧𑀺𑀝𑀓𑀲𑀗𑁆𑀕𑀳𑀺𑀢𑀁 𑀲𑀸𑀝𑁆𑀞𑀓𑀣𑀁 𑀲𑀩𑁆𑀩𑀁 𑀣𑁂𑀭𑀯𑀸𑀤𑀁 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀫𑁄𑀓𑁆𑀔𑁄 𑀅𑀳𑁄𑀲𑀺. 𑀢𑀤𑀸 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀦𑀯𑀯𑀲𑁆𑀲𑀸𑀪𑀺𑀲𑁂𑀓𑁄 𑀳𑁄𑀢𑀺. 𑀭𑀜𑁆𑀜𑁄 𑀧𑀦 𑀅𑀝𑁆𑀞𑀯𑀲𑁆𑀲𑀸𑀪𑀺𑀲𑁂𑀓𑀓𑀸𑀮𑁂𑀬𑁂𑀯 𑀓𑁄𑀦𑁆𑀢𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀩𑁆𑀬𑀸𑀥𑀺𑀧𑀝𑀺𑀓𑀫𑁆𑀫𑀢𑁆𑀣𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀆𑀳𑀺𑀡𑁆𑀟𑀦𑁆𑀢𑁄 𑀧𑀲𑀢𑀫𑀢𑁆𑀢𑀁 𑀲𑀧𑁆𑀧𑀺𑀁 𑀅𑀮𑀪𑀺𑀢𑁆𑀯𑀸 𑀩𑁆𑀬𑀸𑀥𑀺𑀩𑀮𑁂𑀦 𑀧𑀭𑀺𑀓𑁆𑀔𑀻𑀡𑀸𑀬𑀼𑀲𑀗𑁆𑀔𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀬𑀺 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀯𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸’’𑀢𑀺 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺.

𑀢𑁂𑀦 𑀓𑀺𑀭 𑀲𑀫𑀬𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀪𑀸𑀬𑀁 𑀲𑀢𑀲𑀳𑀲𑁆𑀲𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀭𑀜𑁆𑀜𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀭𑀸𑀚𑀸 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀤𑁂𑀯𑀲𑀺𑀓𑀁 𑀲𑀢𑀲𑀳𑀲𑁆𑀲𑀁 𑀯𑀺𑀲𑀚𑁆𑀚𑁂𑀲𑀺. 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑁂 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀦𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁 ¶ . 𑀥𑀫𑁆𑀫𑀲𑁆𑀲 ¶ 𑀲𑀢𑀲𑀳𑀲𑁆𑀲𑀁, 𑀢𑀁 𑀥𑀫𑁆𑀫𑀥𑀭𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀉𑀧𑀦𑀻𑀬𑀢𑀺. 𑀲𑀗𑁆𑀖𑀲𑁆𑀲 𑀲𑀢𑀲𑀳𑀲𑁆𑀲𑀁, 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁. 𑀏𑀯𑀁 𑀲𑀸𑀲𑀦𑁂 𑀉𑀴𑀸𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 ¶ 𑀦𑀺𑀩𑁆𑀩𑀢𑁆𑀢𑀺.

𑀢𑀺𑀢𑁆𑀣𑀺𑀬𑀸 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀅𑀦𑁆𑀢𑀫𑀲𑁄 𑀖𑀸𑀲𑀘𑁆𑀙𑀸𑀤𑀦𑀫𑁆𑀧𑀺 𑀅𑀮𑀪𑀦𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄’’𑀢𑀺 𑀤𑀻𑀧𑁂𑀦𑁆𑀢𑀺. 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸𑀧𑀺 𑀲𑀬𑀫𑁂𑀯 𑀫𑀼𑀡𑁆𑀟𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑁂𑀲𑀼 𑀯𑀺𑀘𑀭𑀦𑁆𑀢𑀸 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀫𑁆𑀧𑀺 𑀕𑀡𑀓𑀫𑁆𑀫𑀫𑁆𑀧𑀺 𑀧𑀯𑀺𑀲𑀦𑁆𑀢𑀺. 𑀪𑀺𑀓𑁆𑀔𑀽 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀦 𑀓𑀭𑁄𑀦𑁆𑀢𑀺. 𑀢𑀤𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀉𑀧𑁆𑀧𑀦𑁆𑀦𑀁 𑀤𑀸𑀦𑀺 𑀇𑀤𑀁 𑀅𑀥𑀺𑀓𑀭𑀡𑀁, 𑀢𑀁 𑀦𑀘𑀺𑀭𑀲𑁆𑀲𑁂𑀯 𑀓𑀓𑁆𑀔𑀴𑀁 𑀪𑀯𑀺𑀲𑁆𑀲𑀢𑀺. 𑀦 𑀔𑁄 𑀧𑀦𑁂𑀢𑀁 𑀲𑀓𑁆𑀓𑀸 𑀇𑀫𑁂𑀲𑀁 𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀕𑀡𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀨𑀸𑀲𑀼𑀯𑀺𑀳𑀸𑀭𑁂𑀦 𑀯𑀺𑀳𑀭𑀺𑀢𑀼𑀓𑀸𑀫𑁄 𑀅𑀳𑁄𑀕𑀗𑁆𑀕𑀧𑀩𑁆𑀩𑀢𑀁 𑀅𑀕𑀫𑀸𑀲𑀺. 𑀢𑁂𑀧𑀺 𑀔𑁄 𑀢𑀺𑀢𑁆𑀣𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀺 𑀥𑀫𑁆𑀫𑀯𑀺𑀦𑀬𑀸𑀦𑀼𑀮𑁄𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀡𑁆𑀞𑀳𑀦𑁆𑀢𑀸 𑀅𑀦𑁂𑀓𑀭𑀽𑀧𑀁 𑀲𑀸𑀲𑀦𑀲𑁆𑀲 𑀅𑀩𑁆𑀩𑀼𑀤𑀜𑁆𑀘 𑀫𑀮𑀜𑁆𑀘 𑀓𑀡𑁆𑀝𑀓𑀜𑁆𑀘 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀓𑁂𑀘𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀸𑀢𑀧𑁂𑀦 𑀢𑀸𑀧𑁂𑀦𑁆𑀢𑀺, 𑀓𑁂𑀘𑀺 𑀆𑀤𑀺𑀘𑁆𑀘𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑁂𑀘𑀺 ‘‘𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀯𑁄𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀅𑀓𑀸𑀲𑀺. 𑀅𑀲𑁄𑀓𑀸𑀭𑀸𑀫𑁂 𑀲𑀢𑁆𑀢𑀯𑀲𑁆𑀲𑀸𑀦𑀺 𑀉𑀧𑁄𑀲𑀣𑁄 𑀉𑀧𑀘𑁆𑀙𑀺𑀚𑁆𑀚𑀺. 𑀭𑀜𑁆𑀜𑁄𑀧𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’’𑀢𑀺. 𑀅𑀫𑀘𑁆𑀘𑁄 𑀭𑀸𑀚𑀸𑀦𑀁 𑀧𑀝𑀺𑀧𑀼𑀘𑁆𑀙𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀅𑀜𑁆𑀜𑁂 𑀅𑀫𑀘𑁆𑀘𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀭𑀸𑀚𑀸 𑀫𑀁 ‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑀳𑀺𑀡𑀺. 𑀓𑀣𑀁 𑀦𑀼 𑀔𑁄 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀻’’𑀢𑀺? 𑀢𑁂 𑀆𑀳𑀁𑀲𑀼 ¶ 𑁋 ‘‘𑀫𑀬𑀁 𑀏𑀯𑀁 𑀲𑀮𑁆𑀮𑀓𑁆𑀔𑁂𑀫 𑁋 ‘𑀬𑀣𑀸 𑀦𑀸𑀫 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀸 𑀘𑁄𑀭𑁂 𑀖𑀸𑀢𑁂𑀦𑁆𑀢𑀺, 𑀏𑀯𑀫𑁂𑀯 𑀬𑁂 𑀉𑀧𑁄𑀲𑀣𑀁 𑀦 𑀓𑀭𑁄𑀦𑁆𑀢𑀺, 𑀢𑁂 𑀫𑀸𑀭𑁂𑀢𑀼𑀓𑀸𑀫𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’’𑀢𑀺. 𑀅𑀣 𑀲𑁄 𑀅𑀫𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀳 𑁋 ‘‘𑀅𑀳𑀁 𑀭𑀜𑁆𑀜𑀸 ‘𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑁂𑀲𑀺𑀢𑁄. 𑀓𑀭𑁄𑀣 𑀤𑀸𑀦𑀺, 𑀪𑀦𑁆𑀢𑁂, 𑀉𑀧𑁄𑀲𑀣’’𑀦𑁆𑀢𑀺. 𑀪𑀺𑀓𑁆𑀔𑀽 ‘‘𑀦 𑀫𑀬𑀁 𑀢𑀺𑀢𑁆𑀣𑀺𑀬𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑁄𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀅𑀫𑀘𑁆𑀘𑁄 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀅𑀲𑀺𑀦𑀸 𑀲𑀻𑀲𑀸𑀦𑀺 𑀧𑀸𑀢𑁂𑀢𑀼𑀁 𑀆𑀭𑀤𑁆𑀥𑁄.

𑀅𑀤𑁆𑀤𑀲𑀸 ¶ 𑀔𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀅𑀫𑀘𑁆𑀘𑀁 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀁. 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀦 𑀬𑁄 𑀯𑀸 𑀲𑁄 𑀯𑀸, 𑀭𑀜𑁆𑀜𑁄 𑀏𑀓𑀫𑀸𑀢𑀺𑀓𑁄 𑀪𑀸𑀢𑀸 𑀢𑀺𑀲𑁆𑀲𑀓𑀼𑀫𑀸𑀭𑁄 𑀦𑀸𑀫, 𑀢𑀁 𑀓𑀺𑀭 𑀭𑀸𑀚𑀸 𑀧𑀢𑁆𑀢𑀸𑀪𑀺𑀲𑁂𑀓𑁄 𑀑𑀧𑀭𑀚𑁆𑀚𑁂 𑀞𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀦𑀘𑀸𑀭𑀁 𑀕𑀢𑁄 𑀅𑀤𑁆𑀤𑀲 𑀫𑀳𑀦𑁆𑀢𑀁 𑀫𑀺𑀕𑀲𑀗𑁆𑀖𑀁 𑀘𑀺𑀢𑁆𑀢𑀓𑀻𑀴𑀸𑀬 𑀓𑀻𑀴𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀢𑀸𑀯 𑀢𑀺𑀡𑀪𑀓𑁆𑀔𑀸 𑀫𑀺𑀕𑀸 𑀏𑀯𑀁 𑀓𑀻𑀴𑀦𑁆𑀢𑀺, 𑀇𑀫𑁂 𑀧𑀦 𑀲𑀫𑀡𑀸 ¶ 𑀭𑀸𑀚𑀓𑀼𑀮𑁂 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀤𑀼𑀓𑀸𑀲𑀼 𑀲𑁂𑀬𑁆𑀬𑀸𑀲𑀼 𑀲𑀬𑀫𑀸𑀦𑀸 𑀓𑀺𑀁 𑀦𑀸𑀫 𑀓𑀻𑀴𑀺𑀢𑀁 𑀦 𑀓𑀻𑀴𑀺𑀲𑁆𑀲𑀦𑁆𑀢𑀻’’𑀢𑀺! 𑀲𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀅𑀢𑁆𑀢𑀦𑁄 𑀯𑀺𑀢𑀓𑁆𑀓𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀝𑁆𑀞𑀸𑀦𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀁 𑀓𑀼𑀫𑀸𑀭𑁂𑀦! 𑀳𑀦𑁆𑀤, 𑀦𑀁 𑀏𑀯𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀤𑁆𑀥𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀏𑀳𑀺 𑀲𑀢𑁆𑀢𑀤𑀺𑀯𑀲𑁂𑀦 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙, 𑀢𑀢𑁄 𑀢𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀫𑀭𑀡𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀢𑀫𑀢𑁆𑀣𑀁 𑀲𑀜𑁆𑀜𑀸𑀧𑁂𑀲𑀺. 𑀲𑁄 𑀓𑀺𑀭 𑀓𑀼𑀫𑀸𑀭𑁄 ‘‘𑀲𑀢𑁆𑀢𑀫𑁂 𑀫𑀁 𑀤𑀺𑀯𑀲𑁂 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀦 𑀘𑀺𑀢𑁆𑀢𑀭𑀽𑀧𑀁 𑀦𑁆𑀳𑀸𑀬𑀺, 𑀦 𑀪𑀼𑀜𑁆𑀚𑀺, 𑀦 𑀲𑀼𑀧𑀺, 𑀅𑀢𑀺𑀯𑀺𑀬 𑀮𑀽𑀔𑀲𑀭𑀻𑀭𑁄 𑀅𑀳𑁄𑀲𑀺. 𑀢𑀢𑁄 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀲𑁆𑀲 𑀢𑁆𑀯𑀁 𑀏𑀯𑀭𑀽𑀧𑁄 𑀚𑀸𑀢𑁄’’𑀢𑀺? ‘‘𑀫𑀭𑀡𑀪𑀬𑁂𑀦, 𑀤𑁂𑀯𑀸’’𑀢𑀺. ‘‘𑀅𑀭𑁂, 𑀢𑁆𑀯𑀁 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑀫𑀭𑀡𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ¶ 𑀯𑀺𑀲𑁆𑀲𑀢𑁆𑀣𑁄 𑀦 𑀓𑀻𑀴𑀲𑀺? 𑀪𑀺𑀓𑁆𑀔𑀽 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀩𑀤𑁆𑀥𑀁 𑀫𑀭𑀡𑀁 𑀧𑁂𑀓𑁆𑀔𑀫𑀸𑀦𑀸 𑀓𑀣𑀁 𑀓𑀻𑀴𑀺𑀲𑁆𑀲𑀦𑁆𑀢𑀻’’𑀢𑀺! 𑀢𑀢𑁄 𑀧𑀪𑀼𑀢𑀺 𑀓𑀼𑀫𑀸𑀭𑁄 𑀲𑀸𑀲𑀦𑁂 𑀧𑀲𑀻𑀤𑀺.

𑀲𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀫𑀺𑀕𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲 𑀬𑁄𑀦𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀅𑀜𑁆𑀜𑀢𑀭𑁂𑀦 𑀳𑀢𑁆𑀣𑀺𑀦𑀸𑀕𑁂𑀦 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀩𑀻𑀚𑀺𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑀧𑀸𑀫𑁄𑀚𑁆𑀚𑀚𑀸𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀅𑀬𑀁 𑀫𑀳𑀸𑀣𑁂𑀭𑁄 𑀯𑀺𑀬 𑀧𑀩𑁆𑀩𑀚𑁂𑀬𑁆𑀬𑀁! 𑀲𑀺𑀬𑀸 𑀦𑀼 𑀔𑁄 𑀲𑁄 𑀤𑀺𑀯𑀲𑁄’’𑀢𑀺. 𑀣𑁂𑀭𑁄 𑀢𑀲𑁆𑀲𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑁂 𑀧𑁄𑀓𑁆𑀔𑀭𑀡𑀺𑀬𑀸 𑀉𑀤𑀓𑀢𑀮𑁂 𑀞𑀢𑁆𑀯𑀸 𑀘𑀻𑀯𑀭𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀜𑁆𑀘 𑀆𑀓𑀸𑀲𑁂 𑀮𑀕𑁆𑀕𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀆𑀭𑀤𑁆𑀥𑁄.

𑀓𑀼𑀫𑀸𑀭𑁄 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑁄 ‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀺𑀢𑁆𑀯𑀸𑀧𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑁄𑀓𑀸𑀭𑀸𑀫𑀕𑀫𑀦𑀻𑀬𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀓𑀼𑀫𑀸𑀭𑀁 𑀙𑀡𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀸𑀬 𑀲𑁂𑀦𑀸𑀬 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑁂𑀲𑀺. ‘‘𑀬𑀼𑀯𑀭𑀸𑀚𑀸 𑀓𑀺𑀭 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀩𑀳𑀽 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀬𑀸𑀤𑁂𑀲𑀼𑀁. 𑀓𑀼𑀫𑀸𑀭𑁄 𑀧𑀥𑀸𑀦𑀖𑀭𑀁 ¶ 𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑁂𑀦. 𑀓𑀼𑀫𑀸𑀭𑀲𑁆𑀲 𑀧𑀦 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀓𑀼𑀫𑀸𑀭𑁄 𑀭𑀜𑁆𑀜𑁄 𑀘𑀢𑀼𑀯𑀲𑁆𑀲𑀸𑀪𑀺𑀲𑁂𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁄. 𑀅𑀣𑀜𑁆𑀜𑁄𑀧𑀺 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀲𑀗𑁆𑀖𑀫𑀺𑀢𑁆𑀢𑀸𑀬 𑀲𑀸𑀫𑀺𑀓𑁄 𑀅𑀕𑁆𑀕𑀺𑀩𑁆𑀭𑀳𑁆𑀫𑀸 𑀦𑀸𑀫 𑀓𑀼𑀫𑀸𑀭𑁄 𑀅𑀢𑁆𑀣𑀺. 𑀲𑀗𑁆𑀖𑀫𑀺𑀢𑁆𑀢𑀸 𑀢𑀁 𑀧𑀝𑀺𑀘𑁆𑀘 𑀏𑀓𑀫𑁂𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄𑀧𑀺 ¶ ‘‘𑀬𑀼𑀯𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀅𑀳𑀫𑁆𑀧𑀺, 𑀤𑁂𑀯, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀘𑀺. ‘‘𑀧𑀩𑁆𑀩𑀚, 𑀢𑀸𑀢𑀸’’𑀢𑀺 𑀘 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑁄 𑀢𑀁𑀤𑀺𑀯𑀲𑀫𑁂𑀯 𑀧𑀩𑁆𑀩𑀚𑀺.

𑀏𑀯𑀁 ¶ 𑀅𑀦𑀼𑀧𑀩𑁆𑀩𑀚𑀺𑀢𑁄, 𑀉𑀴𑀸𑀭𑀯𑀺𑀪𑀯𑁂𑀦 𑀔𑀢𑁆𑀢𑀺𑀬𑀚𑀦𑁂𑀦;

𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸, 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄.

𑀲𑁄 𑀢𑀁 𑀅𑀫𑀘𑁆𑀘𑀁 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀭𑀸𑀚𑀸 𑀣𑁂𑀭𑁂 𑀫𑀸𑀭𑀸𑀧𑁂𑀢𑀼𑀁 𑀧𑀳𑀺𑀡𑁂𑀬𑁆𑀬; 𑀅𑀤𑁆𑀥𑀸 𑀇𑀫𑀲𑁆𑀲𑁂𑀯𑁂𑀢𑀁 𑀅𑀫𑀘𑁆𑀘𑀲𑁆𑀲 𑀤𑀼𑀕𑁆𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀬𑀁 𑀢𑀲𑁆𑀲 𑀆𑀲𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀲𑁄 𑀣𑁂𑀭𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀢𑁆𑀣𑀁 𑀦𑀺𑀧𑀸𑀢𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀤𑁂𑀯, 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀸𑀦𑀁 𑀏𑀢𑁆𑀢𑀓𑀸𑀦𑀁 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀲𑀻𑀲𑀸𑀦𑀺 𑀧𑀸𑀢𑁂𑀲𑀺𑀁; 𑀅𑀣 𑀅𑀬𑁆𑀬𑀲𑁆𑀲 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀧𑀝𑀺𑀧𑀸𑀝𑀺 𑀲𑀫𑁆𑀧𑀢𑁆𑀢𑀸, 𑀓𑀺𑀦𑁆𑀢𑀺 𑀓𑀭𑁄𑀫𑀻’’𑀢𑀺? 𑀭𑀸𑀚𑀸 𑀲𑀼𑀢𑁆𑀯𑀸𑀯 𑁋 ‘‘𑀅𑀭𑁂! 𑀓𑀺𑀁 𑀧𑀦, 𑀢𑁆𑀯𑀁, 𑀫𑀬𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀼𑀁 𑀧𑁂𑀲𑀺𑀢𑁄’’𑀢𑀺 𑀢𑀸𑀯𑀤𑁂𑀯 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀤𑀸𑀳𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀫𑀘𑁆𑀘𑁄 𑀫𑀬𑀸 𑀅𑀦𑀸𑀡𑀢𑁆𑀢𑁄𑀯 𑀏𑀯𑀁 𑀅𑀓𑀸𑀲𑀺, 𑀓𑀲𑁆𑀲 𑀦𑀼 𑀔𑁄 𑀇𑀫𑀺𑀦𑀸 𑀧𑀸𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺? 𑀏𑀓𑀘𑁆𑀘𑁂 𑀣𑁂𑀭𑀸, ‘‘𑀅𑀬𑀁 𑀢𑀯 𑀯𑀘𑀦𑁂𑀦 𑀅𑀓𑀸𑀲𑀺, 𑀢𑀼𑀬𑁆𑀳𑁂𑀢𑀁 𑀧𑀸𑀧’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑁂 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀯𑁄 𑀏𑀢𑀁 𑀧𑀸𑀧’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀘𑀺𑀢𑁆𑀢𑀁 ‘𑀅𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀽’’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀓𑀼𑀲𑀮𑀸𑀥𑀺𑀧𑁆𑀧𑀸𑀬𑁄 𑀅𑀳𑀁 𑀧𑁂𑀲𑁂𑀲𑀺𑀁 𑁋 ‘𑀲𑀫𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁄𑀢𑀽’’’𑀢𑀺. ‘‘𑀲𑀘𑁂 𑀢𑁆𑀯𑀁 𑀓𑀼𑀲𑀮𑀸𑀥𑀺𑀧𑁆𑀧𑀸𑀬𑁄, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀧𑀸𑀧𑀁, 𑀅𑀫𑀘𑁆𑀘𑀲𑁆𑀲𑁂𑀯𑁂𑀢𑀁 𑀧𑀸𑀧’’𑀦𑁆𑀢𑀺. 𑀭𑀸𑀚𑀸 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑀆𑀳 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀓𑁄𑀘𑀺 𑀪𑀺𑀓𑁆𑀔𑀼 𑀫𑀫𑁂𑀢𑀁 𑀤𑁆𑀯𑁂𑀴𑁆𑀳𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫, 𑀲𑁄 ¶ 𑀢𑁂 𑀇𑀫𑀁 𑀤𑁆𑀯𑁂𑀴𑁆𑀳𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀭𑀸𑀚𑀸 𑀢𑀤𑀳𑁂𑀯 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑀣𑀺𑀓𑁂 𑀏𑀓𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁂, 𑀘𑀢𑁆𑀢𑀸𑀭𑁄 𑀘 𑀅𑀫𑀘𑁆𑀘𑁂 𑀏𑀓𑁂𑀓𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 ‘‘𑀣𑁂𑀭𑀁 𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀦𑀸𑀕𑀘𑁆𑀙𑀺 ¶ . 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀭𑀸𑀚𑀸 𑀅𑀝𑁆𑀞 𑀥𑀫𑁆𑀫𑀓𑀣𑀺𑀓𑁂, 𑀅𑀝𑁆𑀞 𑀘 𑀅𑀫𑀘𑁆𑀘𑁂 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀬𑁂𑀯 𑀧𑁂𑀲𑁂𑀲𑀺 𑁋 ‘‘‘𑀭𑀸𑀚𑀸, 𑀪𑀦𑁆𑀢𑁂, 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸𑀯 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑁂𑀯 𑀆𑀳𑀁𑀲𑀼. 𑀤𑀼𑀢𑀺𑀬𑀫𑁆𑀧𑀺 𑀣𑁂𑀭𑁄 𑀦𑀸𑀕𑀘𑁆𑀙𑀺. 𑀭𑀸𑀚𑀸 𑀣𑁂𑀭𑁂 𑀧𑀼𑀘𑁆𑀙𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀳𑀺𑀡𑀺𑀁; 𑀓𑀲𑁆𑀫𑀸 𑀣𑁂𑀭𑁄 𑀦𑀸𑀕𑀘𑁆𑀙𑀢𑀻’’𑀢𑀺? ‘‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀫𑀳𑀸𑀭𑀸𑀚, 𑀦𑀸𑀕𑀘𑁆𑀙𑀢𑀺. 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀆𑀕𑀘𑁆𑀙𑁂𑀬𑁆𑀬 ‘𑀲𑀸𑀲𑀦𑀁, 𑀪𑀦𑁆𑀢𑁂, 𑀑𑀲𑀻𑀤𑀢𑀺, 𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀧𑀕𑁆𑀕𑀳𑀢𑁆𑀣𑀸𑀬 𑀲𑀳𑀸𑀬𑀓𑀸 𑀳𑁄𑀣𑀸’’’𑀢𑀺. 𑀅𑀣 𑀭𑀸𑀚𑀸 𑀢𑀣𑀸 𑀯𑀢𑁆𑀯𑀸 𑀲𑁄𑀴𑀲 𑀥𑀫𑁆𑀫𑀓𑀣𑀺𑀓𑁂, 𑀲𑁄𑀴𑀲 𑀘 𑀅𑀫𑀘𑁆𑀘𑁂 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀧𑁂𑀲𑁂𑀲𑀺. 𑀪𑀺𑀓𑁆𑀔𑀽 𑀘 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀫𑀳𑀮𑁆𑀮𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀣𑁂𑀭𑁄 𑀤𑀳𑀭𑁄 𑀦𑀼 𑀔𑁄’’𑀢𑀺? ‘‘𑀫𑀳𑀮𑁆𑀮𑀓𑁄, 𑀫𑀳𑀸𑀭𑀸𑀚𑀸’’𑀢𑀺. ‘‘𑀯𑀬𑁆𑀳𑀁 𑀯𑀸 𑀲𑀺𑀯𑀺𑀓𑀁 𑀯𑀸 𑀅𑀪𑀺𑀭𑀼𑀳𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺? ‘‘𑀦𑀸𑀪𑀺𑀭𑀼𑀳𑀺𑀲𑁆𑀲𑀢𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀣𑁂𑀭𑁄 𑀯𑀲𑀢𑀻’’𑀢𑀺? ‘‘𑀉𑀧𑀭𑀺 𑀕𑀗𑁆𑀕𑀸𑀬, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀆𑀳 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀢𑀢𑁆𑀣𑁂𑀯 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑁆𑀯𑀻𑀲𑀼𑀧𑀺 𑀢𑀻𑀭𑁂𑀲𑀼 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀣𑁂𑀭𑀁 𑀆𑀦𑁂𑀣𑀸’’𑀢𑀺. 𑀪𑀺𑀓𑁆𑀔𑀽 𑀘 𑀅𑀫𑀘𑁆𑀘𑀸 𑀘 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀭𑁄𑀘𑁂𑀲𑀼𑀁.

𑀣𑁂𑀭𑁄 𑀲𑀼𑀢𑁆𑀯𑀸 ‘‘𑀬𑀁 𑀔𑁄 𑀅𑀳𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑀺𑀢𑁄𑀫𑁆𑀳𑀺. 𑀅𑀬𑀁 𑀤𑀸𑀦𑀺 𑀫𑁂 𑀲𑁄 𑀓𑀸𑀮𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀘𑀫𑁆𑀫𑀔𑀡𑁆𑀟𑀁 𑀕𑀡𑁆𑀳𑀺𑀢𑁆𑀯𑀸𑀯 𑀉𑀝𑁆𑀞𑀳𑀺. 𑀅𑀣 ‘‘𑀣𑁂𑀭𑁄 ¶ 𑀲𑁆𑀯𑁂 𑀧𑀸𑀝𑀮𑀺𑀧𑀼𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀭𑀸𑀚𑀸 𑀲𑀼𑀧𑀺𑀦𑀁 𑀅𑀤𑁆𑀤𑀲. 𑀏𑀯𑀭𑀽𑀧𑁄 𑀲𑀼𑀧𑀺𑀦𑁄 𑀅𑀳𑁄𑀲𑀺 𑁋 ‘‘𑀲𑀩𑁆𑀩𑀲𑁂𑀢𑁄 𑀳𑀢𑁆𑀣𑀺𑀦𑀸𑀕𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀧𑀭𑀸𑀫𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀻’’𑀢𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀲𑀼𑀧𑀺𑀦𑀚𑁆𑀛𑀸𑀬𑀓𑁂 𑀧𑀼𑀘𑁆𑀙𑀺 𑁋 ‘‘𑀫𑀬𑀸 𑀏𑀯𑀭𑀽𑀧𑁄 𑀲𑀼𑀧𑀺𑀦𑁄 𑀤𑀺𑀝𑁆𑀞𑁄, 𑀓𑀺𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺? 𑀏𑀓𑁄 𑀢𑀁, ‘‘𑀫𑀳𑀸𑀭𑀸𑀚, 𑀲𑀫𑀡𑀦𑀸𑀕𑁄 𑀤𑀓𑁆𑀔𑀺𑀡𑀳𑀢𑁆𑀣𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺. 𑀅𑀣 𑀭𑀸𑀚𑀸 𑀢𑀸𑀯𑀤𑁂𑀯 ‘‘𑀣𑁂𑀭𑁄 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀅𑀩𑁆𑀪𑀼𑀕𑁆𑀕𑀘𑁆𑀙𑀦𑁆𑀢𑁄 𑀚𑀸𑀡𑀼𑀫𑀢𑁆𑀢𑁂 𑀉𑀤𑀓𑁂 𑀣𑁂𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀣𑁂𑀭𑀲𑁆𑀲 𑀦𑀸𑀯𑀸𑀢𑁄 𑀑𑀢𑀭𑀦𑁆𑀢𑀲𑁆𑀲 𑀳𑀢𑁆𑀣𑀁 𑀅𑀤𑀸𑀲𑀺. 𑀣𑁂𑀭𑁄 𑀭𑀸𑀚𑀸𑀦𑀁 𑀤𑀓𑁆𑀔𑀺𑀡𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀲𑀺𑀕𑁆𑀕𑀸𑀳𑀸 ‘‘𑀣𑁂𑀭𑀲𑁆𑀲 𑀲𑀻𑀲𑀁 𑀧𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀓𑁄𑀲𑀢𑁄 𑀅𑀲𑀺𑀁 𑀅𑀩𑁆𑀩𑀸𑀳𑀺𑀁𑀲𑀼. 𑀓𑀲𑁆𑀫𑀸? 𑀏𑀢𑀁 𑀓𑀺𑀭 𑀘𑀸𑀭𑀺𑀢𑁆𑀢𑀁 𑀭𑀸𑀚𑀓𑀼𑀮𑁂𑀲𑀼 𑁋 ‘‘𑀬𑁄 𑀭𑀸𑀚𑀸𑀦𑀁 𑀳𑀢𑁆𑀣𑁂 𑀕𑀡𑁆𑀳𑀢𑀺 𑀢𑀲𑁆𑀲 𑀅𑀲𑀺𑀦𑀸 𑀲𑀻𑀲𑀁 𑀧𑀸𑀢𑁂𑀢𑀩𑁆𑀩’’𑀦𑁆𑀢𑀺. 𑀭𑀸𑀚𑀸 𑀙𑀸𑀬𑀁𑀬𑁂𑀯 𑀤𑀺𑀲𑁆𑀯𑀸 𑀆𑀳 𑁋 ‘‘𑀧𑀼𑀩𑁆𑀩𑁂𑀧𑀺 𑀅𑀳𑀁 𑀪𑀺𑀓𑁆𑀔𑀽𑀲𑀼 𑀯𑀺𑀭𑀤𑁆𑀥𑀓𑀸𑀭𑀡𑀸 𑀅𑀲𑁆𑀲𑀸𑀤𑀁 𑀦 𑀯𑀺𑀦𑁆𑀤𑀸𑀫𑀺, 𑀫𑀸 𑀔𑁄 𑀣𑁂𑀭𑁂 𑀯𑀺𑀭𑀚𑁆𑀛𑀺𑀢𑁆𑀣𑀸’’𑀢𑀺. 𑀣𑁂𑀭𑁄 𑀧𑀦 𑀓𑀲𑁆𑀫𑀸 𑀭𑀸𑀚𑀸𑀦𑀁 𑀳𑀢𑁆𑀣𑁂 ¶ 𑀅𑀕𑁆𑀕𑀳𑁂𑀲𑀻𑀢𑀺? 𑀬𑀲𑁆𑀫𑀸 𑀭𑀜𑁆𑀜𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀧𑀓𑁆𑀓𑁄𑀲𑀸𑀧𑀺𑀢𑁄 𑀢𑀲𑁆𑀫𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑁂 𑀅𑀬’’𑀦𑁆𑀢𑀺 𑀅𑀕𑁆𑀕𑀳𑁂𑀲𑀺.

𑀭𑀸𑀚𑀸 𑀣𑁂𑀭𑀁 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀩𑀸𑀳𑀺𑀭𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀣𑁂𑀭𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀝𑀺𑀩𑀮𑁄 𑀦𑀼 𑀔𑁄 𑀣𑁂𑀭𑁄 𑀫𑀫 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀆𑀳. ‘‘𑀓𑀢𑀭𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑁄𑀲𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀧𑀣𑀯𑀻𑀓𑀫𑁆𑀧𑀦𑀁, 𑀪𑀦𑁆𑀢𑁂’’𑀢𑀺. ‘‘𑀲𑀓𑀮𑀧𑀣𑀯𑀻𑀓𑀫𑁆𑀧𑀦𑀁 𑀤𑀝𑁆𑀞𑀼𑀓𑀸𑀫𑁄𑀲𑀺, 𑀫𑀳𑀸𑀭𑀸𑀚, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦’’𑀦𑁆𑀢𑀺? ‘‘𑀓𑀢𑀭𑀁 𑀧𑀦𑁂𑀢𑁆𑀣, 𑀪𑀦𑁆𑀢𑁂, 𑀤𑀼𑀓𑁆𑀓𑀭’’𑀦𑁆𑀢𑀺? ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀓𑀁𑀲𑀧𑀸𑀢𑀺𑀬𑀸 𑀉𑀤𑀓𑀧𑀼𑀡𑁆𑀡𑀸𑀬 𑀲𑀩𑁆𑀩𑀁 𑀉𑀤𑀓𑀁 𑀓𑀫𑁆𑀧𑁂𑀢𑀼𑀁 𑀤𑀼𑀓𑁆𑀓𑀭𑀁; 𑀉𑀤𑀸𑀳𑀼 𑀉𑀧𑀟𑁆𑀠’’𑀦𑁆𑀢𑀺? ‘‘𑀉𑀧𑀟𑁆𑀠𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 𑀤𑀼𑀓𑁆𑀓𑀭’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 ¶ 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀫𑀦𑁆𑀢𑀢𑁄 𑀬𑁄𑀚𑀦𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑁂𑀦 𑀘𑀓𑁆𑀓𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀭𑀣𑁄 𑀢𑀺𑀝𑁆𑀞𑀢𑀼; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀅𑀲𑁆𑀲𑁄 𑀢𑀺𑀝𑁆𑀞𑀢𑀼; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀏𑀓𑁂𑀦 𑀧𑀸𑀤𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀼; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀧𑀟𑁆𑀠𑀪𑀸𑀕𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀏𑀓𑀸 𑀉𑀤𑀓𑀧𑀸𑀢𑀺 ¶ 𑀢𑀺𑀝𑁆𑀞𑀢𑀽’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑀸𑀧𑁂𑀲𑀺. 𑀣𑁂𑀭𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀭𑀸𑀚𑀸 𑀧𑀲𑁆𑀲𑀢𑀽’’𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑀧𑀣𑀯𑀻𑀘𑀮𑀦𑀁 𑀅𑀥𑀺𑀝𑁆𑀞𑀳𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀭𑀣𑀲𑁆𑀲 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑁄 𑀧𑀸𑀤𑁄𑀯 𑀘𑀮𑀺, 𑀇𑀢𑀭𑁄 𑀦 𑀘𑀮𑀺. 𑀏𑀯𑀁 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀲𑀼 𑀅𑀲𑁆𑀲𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑀧𑀸𑀤𑀸𑀬𑁂𑀯 𑀘𑀮𑀺𑀁𑀲𑀼, 𑀉𑀧𑀟𑁆𑀠𑀼𑀧𑀟𑁆𑀠𑀁 𑀲𑀭𑀻𑀭𑀜𑁆𑀘. 𑀉𑀢𑁆𑀢𑀭𑀤𑀺𑀲𑀸𑀬 𑀉𑀤𑀓𑀧𑀸𑀢𑀺𑀬𑀸𑀧𑀺 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑀁 𑀉𑀧𑀟𑁆𑀠𑀪𑀸𑀕𑀕𑀢𑀫𑁂𑀯 𑀉𑀤𑀓𑀁 𑀘𑀮𑀺, 𑀅𑀯𑀲𑁂𑀲𑀁 𑀦𑀺𑀘𑁆𑀘𑀮𑀫𑀳𑁄𑀲𑀻𑀢𑀺. 𑀭𑀸𑀚𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀲𑀓𑁆𑀔𑀢𑀺 𑀤𑀸𑀦𑀺 𑀣𑁂𑀭𑁄 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀅𑀫𑀘𑁆𑀘𑀁 ‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑀳𑀺𑀡𑀺𑀁, 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀏𑀢𑀁 𑀧𑀸𑀧𑀁 𑀓𑀲𑁆𑀲 𑀳𑁄𑀢𑀻’’𑀢𑀺?

‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀘𑀺𑀢𑁆𑀢𑀁 ‘𑀅𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀽’’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀢𑁂, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀧𑀸𑀧’’𑀦𑁆𑀢𑀺. 𑀅𑀣 𑀣𑁂𑀭𑁄 𑀭𑀸𑀚𑀸𑀦𑀁 𑀏𑀢𑀫𑀢𑁆𑀣𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀧𑁂𑀲𑀺 ¶ 𑁋 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺. 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺 (𑀅. 𑀦𑀺. 𑁬.𑁬𑁩).

𑀢𑀫𑁂𑀯𑀢𑁆𑀣𑀁 ¶ 𑀧𑀭𑀺𑀤𑀻𑀧𑁂𑀢𑀼𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑀁 (𑀚𑀸. 𑁧.𑁪.𑁭𑁫) 𑀆𑀳𑀭𑀺 𑁋 ‘‘𑀅𑀢𑀻𑀢𑁂, 𑀫𑀳𑀸𑀭𑀸𑀚, 𑀤𑀻𑀧𑀓𑀢𑀺𑀢𑁆𑀢𑀺𑀭𑁄 𑀢𑀸𑀧𑀲𑀁 𑀧𑀼𑀘𑁆𑀙𑀺 𑁋

‘𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀩𑀳𑀼 𑀆𑀕𑀘𑁆𑀙𑀢𑀻 𑀚𑀦𑁄;

𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄’𑀢𑀺.

𑀢𑀸𑀧𑀲𑁄 𑀆𑀳 𑁋 ‘𑀅𑀢𑁆𑀣𑀺 𑀧𑀦 𑀢𑁂 𑀘𑀺𑀢𑁆𑀢𑀁 𑀫𑀫 𑀲𑀤𑁆𑀤𑁂𑀦 𑀘 𑀭𑀽𑀧𑀤𑀲𑁆𑀲𑀦𑁂𑀦 𑀘 𑀆𑀕𑀦𑁆𑀢𑁆𑀯𑀸 𑀏𑀢𑁂 𑀧𑀓𑁆𑀔𑀺𑀦𑁄 𑀩𑀚𑁆𑀛𑀦𑁆𑀢𑀼 𑀯𑀸 𑀳𑀜𑁆𑀜𑀦𑁆𑀢𑀼 𑀯𑀸’𑀢𑀺? ‘𑀦𑀢𑁆𑀣𑀺, 𑀪𑀦𑁆𑀢𑁂’𑀢𑀺 𑀢𑀺𑀢𑁆𑀢𑀺𑀭𑁄 𑀆𑀳. 𑀢𑀢𑁄 𑀦𑀁 𑀢𑀸𑀧𑀲𑁄 𑀲𑀜𑁆𑀜𑀸𑀧𑁂𑀲𑀺 𑁋 ‘𑀲𑀘𑁂 𑀢𑁂 𑀦𑀢𑁆𑀣𑀺 𑀘𑀺𑀢𑁆𑀢𑀁, 𑀦𑀢𑁆𑀣𑀺 𑀧𑀸𑀧𑀁; 𑀘𑁂𑀢𑀬𑀦𑁆𑀢𑀫𑁂𑀯 𑀳𑀺 𑀧𑀸𑀧𑀁 𑀨𑀼𑀲𑀢𑀺, 𑀦𑀸𑀘𑁂𑀢𑀬𑀦𑁆𑀢𑀁.

‘𑀦 𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’’𑀢𑀺.

𑀏𑀯𑀁 𑀣𑁂𑀭𑁄 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀭𑀸𑀚𑀼𑀬𑁆𑀬𑀸𑀦𑁂 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀲𑀦𑁆𑀢𑁄 𑀭𑀸𑀚𑀸𑀦𑀁 𑀲𑀫𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀭𑀸𑀚𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀲𑁄𑀓𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ¶ 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀏𑀓𑀮𑀤𑁆𑀥𑀺𑀓𑁂 𑀏𑀓𑀮𑀤𑁆𑀥𑀺𑀓𑁂 𑀪𑀺𑀓𑁆𑀔𑀽 𑀏𑀓𑀢𑁄 𑀏𑀓𑀢𑁄 𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀲𑀫𑀽𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁𑀯𑀸𑀤𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? 𑀢𑀢𑁄𑀲𑀲𑁆𑀲𑀢𑀯𑀸𑀤𑀺𑀦𑁄 ‘‘𑀲𑀲𑁆𑀲𑀢𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸…𑀧𑁂… 𑀅𑀦𑁆𑀢𑀸𑀦𑀦𑁆𑀢𑀺𑀓𑀸… 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸… 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸… 𑀲𑀜𑁆𑀜𑀻𑀯𑀸𑀤𑀸… 𑀅𑀲𑀜𑁆𑀜𑀻𑀯𑀸𑀤𑀸… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 ¶ … 𑀉𑀘𑁆𑀙𑁂𑀤𑀯𑀸𑀤𑀸… 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 ‘‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀞𑀫𑀫𑁂𑀯 𑀲𑀫𑀬𑀲𑁆𑀲 𑀉𑀕𑁆𑀕𑀳𑀺𑀢𑀢𑁆𑀢𑀸 ‘‘𑀦𑀬𑀺𑀫𑁂 𑀪𑀺𑀓𑁆𑀔𑀽, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀇𑀫𑁂’’𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀲𑁂𑀢𑀓𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀸 𑀅𑀳𑁂𑀲𑀼𑀁.

𑀅𑀣𑀜𑁆𑀜𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀭𑀸𑀚𑀸 ‘‘𑀲𑀼𑀤𑁆𑀥𑀁 𑀤𑀸𑀦𑀺, 𑀪𑀦𑁆𑀢𑁂, 𑀲𑀸𑀲𑀦𑀁; 𑀓𑀭𑁄𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣’’𑀦𑁆𑀢𑀺 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀲𑀫𑀕𑁆𑀕𑁄 ¶ 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀭𑀧𑁆𑀧𑀯𑀸𑀤𑀁 𑀫𑀤𑁆𑀤𑀫𑀸𑀦𑁄 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀅𑀪𑀸𑀲𑀺. 𑀢𑀢𑁄 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑀸𑀦𑀁 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀳𑀲𑁆𑀲𑀫𑁂𑀓𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀬𑀲𑀢𑁆𑀣𑁂𑀭𑁄 𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼; 𑀏𑀯𑀫𑁂𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀦𑁆𑀢𑁄 𑀲𑀩𑁆𑀩𑀁 𑀲𑀸𑀲𑀦𑀫𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀅𑀓𑀸𑀲𑀺. 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑀧𑁆𑀧𑀓𑀸𑀭𑀁 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀅𑀬𑀁 𑀲𑀗𑁆𑀕𑀻𑀢𑀺 𑀦𑀯𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀸. 𑀬𑀸 𑀮𑁄𑀓𑁂 𑁋

𑀓𑀢𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀢𑀲𑁆𑀫𑀸 𑀲𑀳𑀲𑁆𑀲𑀺𑀓𑀸𑀢𑀺 𑀘;

𑀧𑀼𑀭𑀺𑀫𑀸 𑀤𑁆𑀯𑁂 𑀉𑀧𑀸𑀤𑀸𑀬, 𑀢𑀢𑀺𑀬𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑀅𑀬𑀁 𑀢𑀢𑀺𑀬𑀲𑀗𑁆𑀕𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀘 ‘‘𑀓𑁂𑀦𑀸𑀪𑀢’’𑀦𑁆𑀢𑀺 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 𑀬𑀁 𑀅𑀯𑁄𑀘𑀼𑀫𑁆𑀳 𑁋 ‘‘𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑀫𑀸𑀤𑀺𑀁 𑀓𑀢𑁆𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 ¶ 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀁. 𑀢𑀢𑁆𑀭𑀸𑀬𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑁋

‘‘𑀉𑀧𑀸𑀮𑀺 ¶ 𑀤𑀸𑀲𑀓𑁄 𑀘𑁂𑀯, 𑀲𑁄𑀡𑀓𑁄 𑀲𑀺𑀕𑁆𑀕𑀯𑁄 𑀢𑀣𑀸;

𑀢𑀺𑀲𑁆𑀲𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀘, 𑀧𑀜𑁆𑀘𑁂𑀢𑁂 𑀯𑀺𑀚𑀺𑀢𑀸𑀯𑀺𑀦𑁄.

‘‘𑀧𑀭𑀫𑁆𑀧𑀭𑀸𑀬 𑀯𑀺𑀦𑀬𑀁, 𑀤𑀻𑀧𑁂 𑀚𑀫𑁆𑀩𑀼𑀲𑀺𑀭𑀺𑀯𑁆𑀳𑀬𑁂;

𑀅𑀘𑁆𑀙𑀺𑀚𑁆𑀚𑀫𑀸𑀦𑀫𑀸𑀦𑁂𑀲𑀼𑀁, 𑀢𑀢𑀺𑀬𑁄 𑀬𑀸𑀯 𑀲𑀗𑁆𑀕𑀳𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄𑀯 𑀳𑁄𑀢𑀺.

𑀢𑀢𑀺𑀬𑀲𑀗𑁆𑀕𑀳𑀢𑁄 𑀧𑀦 𑀉𑀤𑁆𑀥𑀁 𑀇𑀫𑀁 𑀤𑀻𑀧𑀁 𑀫𑀳𑀺𑀦𑁆𑀤𑀸𑀤𑀻𑀳𑀺 𑀆𑀪𑀢𑀁. 𑀫𑀳𑀺𑀦𑁆𑀤𑀢𑁄 𑀉𑀕𑁆𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 𑀓𑀸𑀮𑀁 𑀅𑀭𑀺𑀝𑁆𑀞𑀢𑁆𑀣𑁂𑀭𑀸𑀤𑀻𑀳𑀺 𑀆𑀪𑀢𑀁. 𑀢𑀢𑁄 𑀬𑀸𑀯𑀚𑁆𑀚𑀢𑀦𑀸 𑀢𑁂𑀲𑀁𑀬𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀫𑁆𑀧𑀭𑀪𑀽𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀢𑀢𑁄 𑀫𑀳𑀺𑀦𑁆𑀤𑁄 𑀇𑀝𑁆𑀝𑀺𑀬𑁄, 𑀉𑀢𑁆𑀢𑀺𑀬𑁄 𑀲𑀫𑁆𑀩𑀮𑁄 𑀢𑀣𑀸;

𑀪𑀤𑁆𑀤𑀦𑀸𑀫𑁄 𑀘 𑀧𑀡𑁆𑀟𑀺𑀢𑁄.

‘‘𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸;

𑀯𑀺𑀦𑀬𑀁 𑀢𑁂 𑀯𑀸𑀘𑀬𑀺𑀁𑀲𑀼, 𑀧𑀺𑀝𑀓𑀁 𑀢𑀫𑁆𑀩𑀧𑀡𑁆𑀡𑀺𑀬𑀸.

‘‘𑀦𑀺𑀓𑀸𑀬𑁂 ¶ 𑀧𑀜𑁆𑀘 𑀯𑀸𑀘𑁂𑀲𑀼𑀁, 𑀲𑀢𑁆𑀢 𑀘𑁂𑀯 𑀧𑀓𑀭𑀡𑁂;

𑀢𑀢𑁄 𑀅𑀭𑀺𑀝𑁆𑀞𑁄 𑀫𑁂𑀥𑀸𑀯𑀻, 𑀢𑀺𑀲𑁆𑀲𑀤𑀢𑁆𑀢𑁄 𑀘 𑀧𑀡𑁆𑀟𑀺𑀢𑁄.

‘‘𑀯𑀺𑀲𑀸𑀭𑀤𑁄 𑀓𑀸𑀴𑀲𑀼𑀫𑀦𑁄, 𑀣𑁂𑀭𑁄 𑀘 𑀤𑀻𑀖𑀦𑀸𑀫𑀓𑁄;

𑀤𑀻𑀖𑀲𑀼𑀫𑀦𑁄 𑀘 𑀧𑀡𑁆𑀟𑀺𑀢𑁄.

‘‘𑀧𑀼𑀦𑀤𑁂𑀯 𑀓𑀸𑀴𑀲𑀼𑀫𑀦𑁄, 𑀦𑀸𑀕𑀢𑁆𑀣𑁂𑀭𑁄 𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀤𑁂𑀯𑀢𑁆𑀣𑁂𑀭𑁄 𑀘 𑀧𑀡𑁆𑀟𑀺𑀢𑁄.

‘‘𑀧𑀼𑀦𑀤𑁂𑀯 𑀲𑀼𑀫𑀦𑁄 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀩𑀳𑀼𑀲𑁆𑀲𑀼𑀢𑁄 𑀘𑀽𑀴𑀦𑀸𑀕𑁄, 𑀕𑀚𑁄𑀯 𑀤𑀼𑀧𑁆𑀧𑀥𑀁𑀲𑀺𑀬𑁄.

‘‘𑀥𑀫𑁆𑀫𑀧𑀸𑀮𑀺𑀢𑀦𑀸𑀫𑁄 ¶ ¶ 𑀘, 𑀭𑁄𑀳𑀡𑁂 𑀲𑀸𑀥𑀼𑀧𑀽𑀚𑀺𑀢𑁄;

𑀢𑀲𑁆𑀲 𑀲𑀺𑀲𑁆𑀲𑁄 𑀫𑀳𑀸𑀧𑀜𑁆𑀜𑁄, 𑀔𑁂𑀫𑀦𑀸𑀫𑁄 𑀢𑀺𑀧𑁂𑀝𑀓𑁄.

‘‘𑀤𑀻𑀧𑁂 𑀢𑀸𑀭𑀓𑀭𑀸𑀚𑀸𑀯, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀣;

𑀉𑀧𑀢𑀺𑀲𑁆𑀲𑁄 𑀘 𑀫𑁂𑀥𑀸𑀯𑀻, 𑀨𑀼𑀲𑁆𑀲𑀤𑁂𑀯𑁄 𑀫𑀳𑀸𑀓𑀣𑀻.

‘‘𑀧𑀼𑀦𑀤𑁂𑀯 𑀲𑀼𑀫𑀦𑁄 𑀫𑁂𑀥𑀸𑀯𑀻, 𑀧𑀼𑀧𑁆𑀨𑀦𑀸𑀫𑁄 𑀩𑀳𑀼𑀲𑁆𑀲𑀼𑀢𑁄;

𑀫𑀳𑀸𑀓𑀣𑀻 𑀫𑀳𑀸𑀲𑀺𑀯𑁄, 𑀧𑀺𑀝𑀓𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄.

‘‘𑀧𑀼𑀦𑀤𑁂𑀯 𑀉𑀧𑀸𑀮𑀺 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀫𑀳𑀸𑀦𑀸𑀕𑁄 𑀫𑀳𑀸𑀧𑀜𑁆𑀜𑁄, 𑀲𑀤𑁆𑀥𑀫𑁆𑀫𑀯𑀁𑀲𑀓𑁄𑀯𑀺𑀤𑁄.

‘‘𑀧𑀼𑀦𑀤𑁂𑀯 𑀅𑀪𑀬𑁄 𑀫𑁂𑀥𑀸𑀯𑀻, 𑀧𑀺𑀝𑀓𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄.

‘‘𑀢𑀲𑁆𑀲 𑀲𑀺𑀲𑁆𑀲𑁄 𑀫𑀳𑀸𑀧𑀜𑁆𑀜𑁄, 𑀧𑀼𑀧𑁆𑀨𑀦𑀸𑀫𑁄 𑀩𑀳𑀼𑀲𑁆𑀲𑀼𑀢𑁄;

𑀲𑀸𑀲𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀚𑀫𑁆𑀩𑀼𑀤𑀻𑀧𑁂 𑀧𑀢𑀺𑀝𑁆𑀞𑀺𑀢𑁄.

‘‘𑀘𑀽𑀴𑀸𑀪𑀬𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀲𑀤𑁆𑀥𑀫𑁆𑀫𑀯𑀁𑀲𑀓𑁄𑀯𑀺𑀤𑁄.

‘‘𑀘𑀽𑀴𑀤𑁂𑀯𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀲𑀺𑀯𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄.

‘‘𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸, 𑀯𑀺𑀦𑀬𑀜𑁆𑀜𑀽 𑀫𑀕𑁆𑀕𑀓𑁄𑀯𑀺𑀤𑀸;

𑀯𑀺𑀦𑀬𑀁 𑀤𑀻𑀧𑁂 𑀧𑀓𑀸𑀲𑁂𑀲𑀼𑀁, 𑀧𑀺𑀝𑀓𑀁 𑀢𑀫𑁆𑀩𑀧𑀡𑁆𑀡𑀺𑀬𑀸’’𑀢𑀺.

𑀢𑀢𑁆𑀭𑀸𑀬𑀁 ¶ 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀇𑀫𑀁 𑀢𑀢𑀺𑀬𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀦𑀸𑀕𑀢𑁂 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑁂𑀬𑁆𑀬𑀸’’𑀢𑀺? 𑀅𑀣𑀲𑁆𑀲 𑀉𑀧𑀧𑀭𑀺𑀓𑁆𑀔𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀔𑁄 𑀚𑀦𑀧𑀤𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀪𑀸𑀭𑀁 𑀓𑀢𑁆𑀯𑀸 𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀲𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀁 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀁 𑀧𑁂𑀲𑁂𑀲𑀺 𑁋 ‘‘𑀢𑁆𑀯𑀁 𑀏𑀢𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. 𑀫𑀳𑀸𑀤𑁂𑀯𑀢𑁆𑀣𑁂𑀭𑀁 𑀢𑀣𑁂𑀯 𑀯𑀢𑁆𑀯𑀸 𑀫𑀳𑀺𑀁𑀲𑀓𑀫𑀡𑁆𑀟𑀮𑀁 𑀧𑁂𑀲𑁂𑀲𑀺. 𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀯𑀦𑀯𑀸𑀲𑀺𑀁. 𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 ¶ 𑀅𑀧𑀭𑀦𑁆𑀢𑀓𑀁. 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀫𑀳𑀸𑀭𑀝𑁆𑀞𑀁. 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀬𑁄𑀦𑀓𑀮𑁄𑀓𑀁. 𑀫𑀚𑁆𑀛𑀺𑀫𑀢𑁆𑀣𑁂𑀭𑀁 𑀳𑀺𑀫𑀯𑀦𑁆𑀢𑀤𑁂𑀲𑀪𑀸𑀕𑀁. 𑀲𑁄𑀡𑀢𑁆𑀣𑁂𑀭𑀜𑁆𑀘 𑀉𑀢𑁆𑀢𑀭𑀢𑁆𑀣𑁂𑀭𑀜𑁆𑀘 𑀲𑀼𑀯𑀡𑁆𑀡𑀪𑀽𑀫𑀺𑀁. 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀇𑀝𑁆𑀝𑀺𑀬𑀢𑁆𑀣𑁂𑀭𑁂𑀦 𑀉𑀢𑁆𑀢𑀺𑀬𑀢𑁆𑀣𑁂𑀭𑁂𑀦 𑀲𑀫𑁆𑀩𑀮𑀢𑁆𑀣𑁂𑀭𑁂𑀦 𑀪𑀤𑁆𑀤𑀲𑀸𑀮𑀢𑁆𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑁂𑀲𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀣𑀸’’𑀢𑀺. 𑀲𑀩𑁆𑀩𑁂𑀧𑀺 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀧𑀜𑁆𑀘𑀫𑀸 𑀅𑀕𑀫𑀁𑀲𑀼 ‘‘𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀜𑁆𑀘𑀯𑀕𑁆𑀕𑁄 𑀕𑀡𑁄 𑀅𑀮𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀸𑀬𑀸’’𑀢𑀺 𑀫𑀜𑁆𑀜𑀫𑀸𑀦𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑁂 𑀲𑀲𑁆𑀲𑀧𑀸𑀓𑀲𑀫𑀬𑁂 𑀅𑀭𑀯𑀸𑀴𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀓𑀭𑀓𑀯𑀲𑁆𑀲𑀁 𑀦𑀸𑀫 𑀯𑀲𑁆𑀲𑀸𑀧𑁂𑀢𑁆𑀯𑀸 𑀲𑀲𑁆𑀲𑀁 𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀧𑀦 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀢𑀺 𑀅𑀭𑀯𑀸𑀴𑀤𑀳𑀲𑁆𑀲 𑀉𑀧𑀭𑀺 𑀑𑀢𑀭𑀺𑀢𑁆𑀯𑀸 𑀅𑀭𑀯𑀸𑀴𑀤𑀳𑀧𑀺𑀝𑁆𑀞𑀺𑀬𑀁 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺. 𑀦𑀸𑀕𑀫𑀸𑀡𑀯𑀓𑀸 𑀢𑀁 𑀤𑀺𑀲𑁆𑀯𑀸 𑀅𑀭𑀯𑀸𑀴𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀳𑀸𑀭𑀸𑀚, 𑀏𑀓𑁄 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄 𑀪𑀡𑁆𑀟𑀼 𑀓𑀸𑀲𑀸𑀯𑀯𑀲𑀦𑁄 𑀅𑀫𑁆𑀳𑀸𑀓𑀁 𑀉𑀤𑀓𑀁 𑀤𑀽𑀲𑁂𑀢𑀻’’𑀢𑀺. 𑀦𑀸𑀕𑀭𑀸𑀚𑀸 𑀢𑀸𑀯𑀤𑁂𑀯 𑀓𑁄𑀥𑀸𑀪𑀺𑀪𑀽𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀅𑀦𑁆𑀢𑀮𑀺𑀓𑁆𑀔𑁂 𑀅𑀦𑁂𑀓𑀸𑀦𑀺 𑀪𑀺𑀁𑀲𑀦𑀓𑀸𑀦𑀺 𑀦𑀺𑀫𑁆𑀫𑀺𑀦𑀺. 𑀢𑀢𑁄 𑀢𑀢𑁄 𑀪𑀼𑀲𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀭𑀼𑀓𑁆𑀔𑀸 𑀙𑀺𑀚𑁆𑀚𑀦𑁆𑀢𑀺, 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀢𑀦𑁆𑀢𑀺, 𑀫𑁂𑀖𑀸 𑀕𑀚𑁆𑀚𑀦𑁆𑀢𑀺, 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀅𑀲𑀦𑀺𑀬𑁄 𑀨𑀮𑀦𑁆𑀢𑀺, 𑀪𑀺𑀦𑁆𑀦𑀁 𑀯𑀺𑀬 𑀕𑀕𑀦𑀢𑀮𑀁 𑀉𑀤𑀓𑀁 𑀧𑀕𑁆𑀖𑀭𑀢𑀺. 𑀪𑀬𑀸𑀦𑀓𑀭𑀽𑀧𑀸 ¶ 𑀦𑀸𑀕𑀓𑀼𑀫𑀸𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀲𑀬𑀫𑁆𑀧𑀺 𑀥𑀽𑀫𑀸𑀬𑀢𑀺, 𑀧𑀚𑁆𑀚𑀮𑀢𑀺, 𑀧𑀳𑀭𑀡𑀯𑀼𑀝𑁆𑀞𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀓𑁄 𑀅𑀬𑀁 𑀫𑀼𑀡𑁆𑀟𑀓𑁄 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄’’𑀢𑀺𑀆𑀤𑀻𑀳𑀺 𑀨𑀭𑀼𑀲𑀯𑀘𑀦𑁂𑀳𑀺 𑀣𑁂𑀭𑀁 𑀲𑀦𑁆𑀢𑀚𑁆𑀚𑁂𑀲𑀺. ‘‘𑀏𑀣 𑀕𑀡𑁆𑀳𑀣 𑀳𑀦𑀣 ¶ 𑀦𑀺𑀤𑁆𑀥𑀫𑀣 𑀇𑀫𑀁 𑀲𑀫𑀡’’𑀦𑁆𑀢𑀺 𑀦𑀸𑀕𑀩𑀮𑀁 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀲𑀩𑁆𑀩𑀁 𑀢𑀁 𑀪𑀺𑀁𑀲𑀦𑀓𑀁 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀧𑀝𑀺𑀩𑀸𑀳𑀺𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀁 𑀆𑀳 𑁋

‘‘𑀲𑀤𑁂𑀯𑀓𑁄𑀧𑀺 𑀘𑁂 𑀮𑁄𑀓𑁄, 𑀆𑀕𑀦𑁆𑀢𑁆𑀯𑀸 𑀢𑀸𑀲𑀬𑁂𑀬𑁆𑀬 𑀫𑀁;

𑀦 𑀫𑁂 𑀧𑀝𑀺𑀩𑀮𑁄 𑀅𑀲𑁆𑀲, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁.

‘‘𑀲𑀘𑁂𑀧𑀺 𑀢𑁆𑀯𑀁 𑀫𑀳𑀺𑀁 𑀲𑀩𑁆𑀩𑀁, 𑀲𑀲𑀫𑀼𑀤𑁆𑀤𑀁 𑀲𑀧𑀩𑁆𑀩𑀢𑀁;

𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀦𑀸𑀕, 𑀔𑀺𑀧𑁂𑀬𑁆𑀬𑀸𑀲𑀺 𑀫𑀫𑀽𑀧𑀭𑀺.

‘‘𑀦𑁂𑀯 ¶ 𑀫𑁂 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁;

𑀅𑀜𑁆𑀜𑀤𑀢𑁆𑀣𑀼 𑀢𑀯𑁂𑀯𑀲𑁆𑀲, 𑀯𑀺𑀖𑀸𑀢𑁄 𑀉𑀭𑀕𑀸𑀥𑀺𑀧𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀦𑀸𑀕𑀭𑀸𑀚𑀸 𑀯𑀺𑀳𑀢𑀸𑀦𑀼𑀪𑀸𑀯𑁄 𑀦𑀺𑀧𑁆𑀨𑀮𑀯𑀸𑀬𑀸𑀫𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀳𑁄𑀲𑀺. 𑀢𑀁 𑀣𑁂𑀭𑁄 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀤𑁆𑀥𑀺𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀸𑀕𑀲𑀳𑀲𑁆𑀲𑁂𑀳𑀺. 𑀅𑀜𑁆𑀜𑁂𑀧𑀺 𑀩𑀳𑀽 𑀳𑀺𑀫𑀯𑀦𑁆𑀢𑀯𑀸𑀲𑀺𑀦𑁄 𑀬𑀓𑁆𑀔𑀸 𑀘 𑀕𑀦𑁆𑀥𑀩𑁆𑀩𑀸 𑀘 𑀓𑀼𑀫𑁆𑀪𑀡𑁆𑀟𑀸 𑀘 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀧𑀜𑁆𑀘𑀓𑁄𑀧𑀺 𑀬𑀓𑁆𑀔𑁄 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀬𑀓𑁆𑀔𑀺𑀦𑀺𑀬𑀸 𑀧𑀜𑁆𑀘𑀳𑀺 𑀘 𑀧𑀼𑀢𑁆𑀢𑀲𑀢𑁂𑀳𑀺 𑀧𑀞𑀫𑁂 𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀣𑀸𑀬𑀲𑁆𑀫𑀸 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀲𑀩𑁆𑀩𑁂𑀧𑀺 𑀦𑀸𑀕𑀬𑀓𑁆𑀔𑀭𑀓𑁆𑀔𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 𑁋

‘‘𑀫𑀸 𑀤𑀸𑀦𑀺 𑀓𑁄𑀥𑀁 𑀚𑀦𑀬𑀺𑀢𑁆𑀣, 𑀇𑀢𑁄 𑀉𑀤𑁆𑀥𑀁 𑀬𑀣𑀸 𑀧𑀼𑀭𑁂;

𑀲𑀲𑁆𑀲𑀖𑀸𑀢𑀜𑁆𑀘 𑀫𑀸 𑀓𑀢𑁆𑀣, 𑀲𑀼𑀔𑀓𑀸𑀫𑀸 𑀳𑀺 𑀧𑀸𑀡𑀺𑀦𑁄;

𑀓𑀭𑁄𑀣 𑀫𑁂𑀢𑁆𑀢𑀁 𑀲𑀢𑁆𑀢𑁂𑀲𑀼, 𑀯𑀲𑀦𑁆𑀢𑀼 𑀫𑀦𑀼𑀚𑀸 𑀲𑀼𑀔’’𑀦𑁆𑀢𑀺.

𑀢𑁂 ¶ 𑀲𑀩𑁆𑀩𑁂𑀧𑀺 ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀣𑁂𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑀁𑀤𑀺𑀯𑀲𑀫𑁂𑀯 𑀘 𑀦𑀸𑀕𑀭𑀸𑀚𑀲𑁆𑀲 𑀧𑀽𑀚𑀸𑀲𑀫𑀬𑁄 𑀳𑁄𑀢𑀺. 𑀅𑀣 𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀭𑀢𑀦𑀫𑀬𑀁 𑀧𑀮𑁆𑀮𑀗𑁆𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀜𑁆𑀜𑀧𑁂𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀮𑁆𑀮𑀗𑁆𑀓𑁂. 𑀦𑀸𑀕𑀭𑀸𑀚𑀸𑀧𑀺 𑀣𑁂𑀭𑀁 𑀩𑀻𑀚𑀬𑀫𑀸𑀦𑁄 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀯𑀸𑀲𑀺𑀦𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀦𑀸𑀕𑀭𑀸𑀚𑀢𑁄𑀧𑀺 𑀣𑁂𑀭𑁄 𑀫𑀳𑀺𑀤𑁆𑀥𑀺𑀓𑀢𑀭𑁄’’𑀢𑀺 𑀣𑁂𑀭𑀫𑁂𑀯 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀣𑁂𑀭𑁄 𑀢𑁂𑀲𑀁 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺 ¶ . 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀓𑀼𑀮𑀲𑀢𑀲𑀳𑀲𑁆𑀲𑀁 𑀧𑀩𑁆𑀩𑀚𑀺. 𑀢𑀢𑁄 𑀧𑀪𑀼𑀢𑀺 𑀘 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀸 𑀬𑀸𑀯𑀚𑁆𑀚𑀢𑀦𑀸 𑀓𑀸𑀲𑀸𑀯𑀧𑀚𑁆𑀚𑁄𑀢𑀸 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸 𑀏𑀯.

𑀕𑀦𑁆𑀢𑁆𑀯𑀸 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀁, 𑀇𑀲𑀺 𑀫𑀚𑁆𑀛𑀦𑁆𑀢𑀺𑀓𑁄 𑀢𑀤𑀸;

𑀤𑀼𑀝𑁆𑀞𑀁 𑀦𑀸𑀕𑀁 𑀧𑀲𑀸𑀤𑁂𑀢𑁆𑀯𑀸, 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸 𑀩𑀳𑀽𑀢𑀺.

𑀫𑀳𑀸𑀤𑁂𑀯𑀢𑁆𑀣𑁂𑀭𑁄𑀧𑀺 𑀫𑀳𑀺𑀁𑀲𑀓𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑀢𑁆𑀢𑀸𑀮𑀻𑀲 𑀧𑀸𑀡𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀘𑀓𑁆𑀔𑀼𑀁 𑀧𑀝𑀺𑀮𑀪𑀺𑀁𑀲𑀼, 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀧𑀸𑀡𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼.

𑀕𑀦𑁆𑀢𑁆𑀯𑀸𑀦 ¶ 𑀭𑀝𑁆𑀞𑀁 𑀫𑀳𑀺𑀁𑀲𑀁, 𑀫𑀳𑀸𑀤𑁂𑀯𑁄 𑀫𑀳𑀺𑀤𑁆𑀥𑀺𑀓𑁄;

𑀘𑁄𑀤𑁂𑀢𑁆𑀯𑀸 𑀤𑁂𑀯𑀤𑀽𑀢𑁂𑀳𑀺, 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸 𑀩𑀳𑀽𑀢𑀺.

𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀦 𑀯𑀦𑀯𑀸𑀲𑀺𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀅𑀦𑀫𑀢𑀕𑁆𑀕𑀧𑀭𑀺𑀬𑀸𑀬𑀓𑀣𑀸𑀬 𑀯𑀦𑀯𑀸𑀲𑀺𑀓𑁂 𑀧𑀲𑀸𑀤𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 ¶ 𑀧𑀩𑁆𑀩𑀚𑀺𑀁𑀲𑀼, 𑀧𑀜𑁆𑀘𑀯𑀺𑀳𑀸𑀭𑀲𑀢𑀸𑀦𑀺 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀕𑀦𑁆𑀢𑁆𑀯𑀸𑀦 𑀭𑀓𑁆𑀔𑀺𑀢𑀢𑁆𑀣𑁂𑀭𑁄, 𑀯𑀦𑀯𑀸𑀲𑀺𑀁 𑀫𑀳𑀺𑀤𑁆𑀥𑀺𑀓𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀢𑀢𑁆𑀣, 𑀤𑁂𑀲𑁂𑀲𑀺 𑀅𑀦𑀫𑀢𑀕𑁆𑀕𑀺𑀬𑀦𑁆𑀢𑀺.

𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀧𑀺 𑀅𑀧𑀭𑀦𑁆𑀢𑀓𑀁 𑀕𑀦𑁆𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀅𑀧𑀭𑀦𑁆𑀢𑀓𑁂 𑀧𑀲𑀸𑀤𑁂𑀢𑁆𑀯𑀸 𑀲𑀢𑁆𑀢𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀔𑀢𑁆𑀢𑀺𑀬𑀓𑀼𑀮𑀢𑁄 𑀏𑀯 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀲𑀫𑀥𑀺𑀓𑀸𑀦𑀺 𑀘 𑀙 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀅𑀧𑀭𑀦𑁆𑀢𑀁 𑀯𑀺𑀕𑀸𑀳𑀺𑀢𑁆𑀯𑀸, 𑀬𑁄𑀦𑀓𑁄 𑀥𑀫𑁆𑀫𑀭𑀓𑁆𑀔𑀺𑀢𑁄;

𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑁂𑀦𑁂𑀢𑁆𑀣, 𑀧𑀲𑀸𑀤𑁂𑀲𑀺 𑀚𑀦𑁂 𑀩𑀳𑀽𑀢𑀺.

𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀦 𑀫𑀳𑀸𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀓𑀣𑀸𑀬 𑀫𑀳𑀸𑀭𑀝𑁆𑀞𑀓𑁂 𑀧𑀲𑀸𑀤𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀭𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀫𑀳𑀸𑀭𑀝𑁆𑀞𑀁 𑀇𑀲𑀺 𑀕𑀦𑁆𑀢𑁆𑀯𑀸, 𑀲𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑁄;

𑀚𑀸𑀢𑀓𑀁 𑀓𑀣𑀬𑀺𑀢𑁆𑀯𑀸𑀦, 𑀧𑀲𑀸𑀤𑁂𑀲𑀺 𑀫𑀳𑀸𑀚𑀦𑀦𑁆𑀢𑀺.

𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀧𑀺 ¶ 𑀬𑁄𑀦𑀓𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀬𑁄𑀦𑀓𑀮𑁄𑀓𑀁 𑀧𑀲𑀸𑀤𑁂𑀢𑁆𑀯𑀸 𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀧𑀸𑀡𑀲𑀢𑀲𑀳𑀲𑁆𑀲𑀲𑁆𑀲 𑀫𑀕𑁆𑀕𑀨𑀮𑀸𑀮𑀗𑁆𑀓𑀸𑀭𑀁 𑀅𑀤𑀸𑀲𑀺. 𑀲𑀦𑁆𑀢𑀺𑀓𑁂 𑀘𑀲𑁆𑀲 𑀤𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀲𑁄𑀧𑀺 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀬𑁄𑀦𑀭𑀝𑁆𑀞𑀁 𑀢𑀤𑀸 𑀕𑀦𑁆𑀢𑁆𑀯𑀸, 𑀲𑁄 𑀫𑀳𑀸𑀭𑀓𑁆𑀔𑀺𑀢𑁄 𑀇𑀲𑀺;

𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑁂𑀦 𑀢𑁂 𑀧𑀲𑀸𑀤𑁂𑀲𑀺 𑀬𑁄𑀦𑀓𑁂𑀢𑀺.

𑀫𑀚𑁆𑀛𑀺𑀫𑀢𑁆𑀣𑁂𑀭𑁄 ¶ ¶ 𑀧𑀦 𑀓𑀲𑁆𑀲𑀧𑀕𑁄𑀢𑁆𑀢𑀢𑁆𑀣𑁂𑀭𑁂𑀦 𑀅𑀴𑀓𑀤𑁂𑀯𑀢𑁆𑀣𑁂𑀭𑁂𑀦 𑀤𑀼𑀦𑁆𑀤𑀼𑀪𑀺𑀲𑁆𑀲𑀭𑀢𑁆𑀣𑁂𑀭𑁂𑀦 𑀫𑀳𑀸𑀤𑁂𑀯𑀢𑁆𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀳𑀺𑀫𑀯𑀦𑁆𑀢𑀤𑁂𑀲𑀪𑀸𑀕𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀢𑀁 𑀤𑁂𑀲𑀁 𑀧𑀲𑀸𑀤𑁂𑀢𑁆𑀯𑀸 𑀅𑀲𑀻𑀢𑀺𑀧𑀸𑀡𑀓𑁄𑀝𑀺𑀬𑁄 𑀫𑀕𑁆𑀕𑀨𑀮𑀭𑀢𑀦𑀸𑀦𑀺 𑀧𑀝𑀺𑀮𑀸𑀪𑁂𑀲𑀺. 𑀧𑀜𑁆𑀘𑀧𑀺 𑀘 𑀣𑁂𑀭𑀸 𑀧𑀜𑁆𑀘 𑀭𑀝𑁆𑀞𑀸𑀦𑀺 𑀧𑀲𑀸𑀤𑁂𑀲𑀼𑀁. 𑀏𑀓𑀫𑁂𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀢𑁂 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀕𑀦𑁆𑀢𑁆𑀯𑀸𑀦 𑀫𑀚𑁆𑀛𑀺𑀫𑀢𑁆𑀣𑁂𑀭𑁄, 𑀳𑀺𑀫𑀯𑀦𑁆𑀢𑀁 𑀧𑀲𑀸𑀤𑀬𑀺;

𑀬𑀓𑁆𑀔𑀲𑁂𑀦𑀁 𑀧𑀓𑀸𑀲𑁂𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀦𑁆𑀢𑀺.

𑀲𑁄𑀡𑀢𑁆𑀣𑁂𑀭𑁄𑀧𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀢𑁆𑀣𑁂𑀭𑁂𑀦 𑀲𑀼𑀯𑀡𑁆𑀡𑀪𑀽𑀫𑀺𑀁 𑀅𑀕𑀫𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀢𑁆𑀣 𑀏𑀓𑀸 𑀭𑀓𑁆𑀔𑀲𑀻 𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀚𑀸𑀢𑁂 𑀚𑀸𑀢𑁂 𑀤𑀸𑀭𑀓𑁂 𑀔𑀸𑀤𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀘 𑀭𑀸𑀚𑀓𑀼𑀮𑁂 𑀏𑀓𑁄 𑀤𑀸𑀭𑀓𑁄 𑀚𑀸𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀭𑀓𑁆𑀔𑀲𑀸𑀦𑀁 𑀲𑀳𑀸𑀬𑀓𑁄 𑀏𑀲𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀧𑀳𑀭𑀺𑀢𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀺. 𑀣𑁂𑀭𑁄 ‘‘𑀓𑀺𑀁 𑀢𑀼𑀫𑁆𑀳𑁂 𑀆𑀯𑀼𑀥𑀳𑀢𑁆𑀣𑀸 𑀆𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 𑀆𑀳𑀁𑀲𑀼 𑁋 ‘‘𑀭𑀸𑀚𑀓𑀼𑀮𑁂 𑀚𑀸𑀢𑁂 𑀚𑀸𑀢𑁂 𑀤𑀸𑀭𑀓𑁂 𑀭𑀓𑁆𑀔𑀲𑀸 𑀔𑀸𑀤𑀦𑁆𑀢𑀺, 𑀢𑁂𑀲𑀁 𑀢𑀼𑀫𑁆𑀳𑁂 𑀲𑀳𑀸𑀬𑀓𑀸’’𑀢𑀺. 𑀣𑁂𑀭𑁄 ‘‘𑀦 𑀫𑀬𑀁 𑀭𑀓𑁆𑀔𑀲𑀸𑀦𑀁 𑀲𑀳𑀸𑀬𑀓𑀸, 𑀲𑀫𑀡𑀸 𑀦𑀸𑀫 𑀫𑀬𑀁 𑀯𑀺𑀭𑀢𑀸 𑀧𑀸𑀡𑀸𑀢𑀺𑀧𑀸𑀢𑀸…𑀧𑁂… 𑀯𑀺𑀭𑀢𑀸 𑀫𑀚𑁆𑀚𑀧𑀸𑀦𑀸 𑀏𑀓𑀪𑀢𑁆𑀢𑀺𑀓𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺 𑀆𑀳. 𑀢𑀲𑁆𑀫𑀺𑀁𑀬𑁂𑀯 𑀘 𑀔𑀡𑁂 𑀲𑀸 𑀭𑀓𑁆𑀔𑀲𑀻 𑀲𑀧𑀭𑀺𑀯𑀸𑀭𑀸 𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺 ‘‘𑀭𑀸𑀚𑀓𑀼𑀮𑁂 𑀤𑀸𑀭𑀓𑁄 𑀚𑀸𑀢𑁄 𑀢𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀲𑀸, 𑀪𑀦𑁆𑀢𑁂, 𑀭𑀓𑁆𑀔𑀲𑀻 𑀆𑀕𑀘𑁆𑀙𑀢𑀻’’𑀢𑀺 𑀪𑀻𑀢𑀸 𑀯𑀺𑀭𑀯𑀺𑀁𑀲𑀼. 𑀣𑁂𑀭𑁄 𑀭𑀓𑁆𑀔𑀲𑁂𑀳𑀺 𑀤𑀺𑀕𑀼𑀡𑁂 𑀅𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑁂𑀳𑀺 𑀅𑀢𑁆𑀢𑀪𑀸𑀯𑁂𑀳𑀺 𑀢𑀁 𑀭𑀓𑁆𑀔𑀲𑀺𑀁 ¶ 𑀲𑀧𑀭𑀺𑀲𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀭𑀺𑀓𑁆𑀔𑀺𑀧𑀺 ¶ . 𑀢𑀲𑁆𑀲𑀸 𑀲𑀧𑀭𑀺𑀲𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀅𑀤𑁆𑀥𑀸 𑀇𑀫𑁂𑀳𑀺 𑀇𑀤𑀁 𑀞𑀸𑀦𑀁 𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀺. 𑀫𑀬𑀁 𑀧𑀦 𑀇𑀫𑁂𑀲𑀁 𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀲𑀩𑁆𑀩𑁂 𑀭𑀓𑁆𑀔𑀲𑀸 𑀪𑀻𑀢𑀸 𑀯𑁂𑀕𑀲𑀸 𑀧𑀮𑀸𑀬𑀺𑀁𑀲𑀼. 𑀣𑁂𑀭𑁄𑀧𑀺 𑀢𑁂 𑀬𑀸𑀯 𑀅𑀤𑀲𑁆𑀲𑀦𑀁 𑀢𑀸𑀯 𑀧𑀮𑀸𑀧𑁂𑀢𑁆𑀯𑀸 𑀤𑀻𑀧𑀲𑁆𑀲 𑀲𑀫𑀦𑁆𑀢𑀢𑁄 𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀦𑁆𑀦𑀺𑀧𑀢𑀺𑀢𑀁 𑀫𑀳𑀸𑀚𑀦𑀓𑀸𑀬𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀧𑀲𑀸𑀤𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀧𑀦𑁂𑀢𑁆𑀣 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀓𑀼𑀮𑀤𑀸𑀭𑀓𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀓𑀼𑀮𑀥𑀻𑀢𑀸𑀦𑀁 𑀤𑀺𑀬𑀟𑁆𑀠𑀲𑀳𑀲𑁆𑀲𑀁. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑁄 𑀧𑀪𑀼𑀢𑀺 𑀭𑀸𑀚𑀓𑀼𑀮𑁂 𑀚𑀸𑀢𑀤𑀸𑀭𑀓𑀸𑀦𑀁 𑀲𑁄𑀡𑀼𑀢𑁆𑀢𑀭𑀦𑀸𑀫𑀫𑁂𑀯 𑀓𑀭𑁄𑀦𑁆𑀢𑀺.

𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀲𑁄𑀡𑀼𑀢𑁆𑀢𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀺𑀲𑀸𑀘𑁂 𑀦𑀺𑀤𑁆𑀥𑀫𑁂𑀢𑁆𑀯𑀸𑀦, 𑀩𑁆𑀭𑀳𑁆𑀫𑀚𑀸𑀮𑀁 𑀅𑀤𑁂𑀲𑀺𑀲𑀼𑀦𑁆𑀢𑀺.

𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀧𑀦 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀉𑀧𑀚𑁆𑀛𑀸𑀬𑁂𑀦 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 ¶ 𑀘 𑀅𑀚𑁆𑀛𑀺𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀸𑀮𑁄 𑀦𑀼 𑀔𑁄 𑀫𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑀼𑀁 𑀦𑁄’’𑀢𑀺. 𑀅𑀣𑀲𑁆𑀲 𑀯𑀻𑀫𑀁𑀲𑀢𑁄 ‘‘𑀦 𑀢𑀸𑀯 𑀓𑀸𑀮𑁄’’𑀢𑀺 𑀅𑀳𑁄𑀲𑀺. 𑀓𑀺𑀁 𑀧𑀦𑀲𑁆𑀲 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺? 𑀫𑀼𑀝𑀲𑀺𑀯𑀭𑀜𑁆𑀜𑁄 𑀫𑀳𑀮𑁆𑀮𑀓𑀪𑀸𑀯𑀁. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀳𑀮𑁆𑀮𑀓𑁄, 𑀦 𑀲𑀓𑁆𑀓𑀸 𑀇𑀫𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁. 𑀇𑀤𑀸𑀦𑀺 𑀧𑀦𑀲𑁆𑀲 𑀧𑀼𑀢𑁆𑀢𑁄 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺. 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁. 𑀳𑀦𑁆𑀤 𑀬𑀸𑀯 𑀲𑁄 𑀲𑀫𑀬𑁄 𑀆𑀕𑀘𑁆𑀙𑀢𑀺, 𑀢𑀸𑀯 𑀜𑀸𑀢𑀓𑁂 𑀑𑀮𑁄𑀓𑁂𑀫. 𑀧𑀼𑀦 𑀤𑀸𑀦𑀺 𑀫𑀬𑀁 𑀇𑀫𑀁 𑀚𑀦𑀧𑀤𑀁 𑀆𑀕𑀘𑁆𑀙𑁂𑀬𑁆𑀬𑀸𑀫 𑀯𑀸 𑀦 𑀯𑀸’’𑀢𑀺. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀢𑁂𑀳𑀺 𑀇𑀝𑁆𑀝𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀣𑁂𑀭𑁂𑀳𑀺 𑀲𑀗𑁆𑀖𑀫𑀺𑀢𑁆𑀢𑀸𑀬 𑀧𑀼𑀢𑁆𑀢𑁂𑀦 𑀲𑀼𑀫𑀦𑀲𑀸𑀫𑀡𑁂𑀭𑁂𑀦 𑀪𑀡𑁆𑀟𑀼𑀓𑁂𑀦 ¶ 𑀘 𑀉𑀧𑀸𑀲𑀓𑁂𑀦 𑀲𑀤𑁆𑀥𑀺𑀁 𑀭𑀸𑀚𑀕𑀳𑀦𑀕𑀭𑀧𑀭𑀺𑀯𑀢𑁆𑀢𑀓𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀜𑀸𑀢𑀓𑁂 𑀑𑀮𑁄𑀓𑁂𑀦𑁆𑀢𑁄 𑀙 𑀫𑀸𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀯𑁂𑀤𑀺𑀲𑀦𑀕𑀭𑀁 𑀦𑀸𑀫 𑀲𑀫𑁆𑀧𑀢𑁆𑀢𑁄. 𑀅𑀲𑁄𑀓𑁄 𑀓𑀺𑀭 𑀓𑀼𑀫𑀸𑀭𑀓𑀸𑀮𑁂 𑀚𑀦𑀧𑀤𑀁 𑀮𑀪𑀺𑀢𑁆𑀯𑀸 𑀉𑀚𑁆𑀚𑁂𑀦𑀺𑀁 𑀕𑀘𑁆𑀙𑀦𑁆𑀢𑁄 𑀯𑁂𑀤𑀺𑀲𑀦𑀕𑀭𑀁 𑀧𑀢𑁆𑀯𑀸 𑀯𑁂𑀤𑀺𑀲𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀭𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀢𑀁𑀤𑀺𑀯𑀲𑀫𑁂𑀯 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀉𑀚𑁆𑀚𑁂𑀦𑀺𑀬𑀁 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀯𑀺𑀚𑀸𑀬𑀺. 𑀓𑀼𑀫𑀸𑀭𑀲𑁆𑀲 ¶ 𑀘𑀼𑀤𑁆𑀤𑀲𑀯𑀲𑁆𑀲𑀓𑀸𑀮𑁂 𑀭𑀸𑀚𑀸 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺. 𑀲𑀸 𑀢𑀲𑁆𑀲 𑀫𑀸𑀢𑀸 𑀢𑁂𑀦 𑀲𑀫𑀬𑁂𑀦 𑀜𑀸𑀢𑀺𑀖𑀭𑁂 𑀯𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀯𑁂𑀝𑀺𑀲𑀦𑀕𑀭𑀁 𑀦𑀸𑀫 𑀲𑀫𑁆𑀧𑀢𑁆𑀢𑁄’’𑀢𑀺.

𑀲𑀫𑁆𑀧𑀢𑁆𑀢𑀜𑁆𑀘 𑀧𑀦 𑀣𑁂𑀭𑀁 𑀤𑀺𑀲𑁆𑀯𑀸 𑀣𑁂𑀭𑀫𑀸𑀢𑀸 𑀤𑁂𑀯𑀻 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀣𑁂𑀭𑀁 𑀅𑀢𑁆𑀢𑀦𑀸 𑀓𑀢𑀁 𑀯𑁂𑀤𑀺𑀲𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑀁 𑀦𑀸𑀫 𑀆𑀭𑁄𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀇𑀥 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀲𑀫𑀬𑁄 𑀦𑀼 𑀔𑁄 𑀇𑀤𑀸𑀦𑀺 𑀮𑀗𑁆𑀓𑀸𑀤𑀻𑀧𑀁 𑀕𑀦𑁆𑀢𑀼’’𑀦𑁆𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀪𑀯𑀢𑀼 𑀢𑀸𑀯 𑀫𑁂 𑀧𑀺𑀢𑀭𑀸 𑀧𑁂𑀲𑀺𑀢𑀁 𑀅𑀪𑀺𑀲𑁂𑀓𑀁 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄, 𑀭𑀢𑀦𑀢𑁆𑀢𑀬𑀕𑀼𑀡𑀜𑁆𑀘 𑀲𑀼𑀡𑀸𑀢𑀼, 𑀙𑀡𑀢𑁆𑀣𑀜𑁆𑀘 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀲𑁆𑀲𑀓𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀢𑀼, 𑀢𑀤𑀸 𑀢𑀁 𑀢𑀢𑁆𑀣 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. 𑀅𑀣𑀸𑀧𑀭𑀁 𑀏𑀓𑀫𑀸𑀲𑀁 𑀢𑀢𑁆𑀣𑁂𑀯 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀫𑀸𑀲𑀸𑀢𑀺𑀓𑁆𑀓𑀫𑁂𑀦 𑀘 𑀚𑁂𑀝𑁆𑀞𑀫𑀽𑀮𑀫𑀸𑀲𑀧𑀼𑀡𑁆𑀡𑀫𑀸𑀬𑀁 𑀉𑀧𑁄𑀲𑀣𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀸 𑀲𑀩𑁆𑀩𑁂𑀧𑀺 𑁋 ‘‘𑀓𑀸𑀮𑁄 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀫𑀦𑀸𑀬, 𑀉𑀤𑀸𑀳𑀼 𑀦𑁄’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀫𑀳𑀺𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀼;

𑀇𑀝𑁆𑀝𑀺𑀬𑁄 𑀉𑀢𑁆𑀢𑀺𑀬𑁄 𑀣𑁂𑀭𑁄, 𑀪𑀤𑁆𑀤𑀲𑀸𑀮𑁄 𑀘 𑀲𑀫𑁆𑀩𑀮𑁄.

‘‘𑀲𑀸𑀫𑀡𑁂𑀭𑁄 ¶ 𑀘 𑀲𑀼𑀫𑀦𑁄, 𑀙𑀴𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀪𑀡𑁆𑀟𑀼𑀓𑁄 𑀲𑀢𑁆𑀢𑀫𑁄 𑀢𑁂𑀲𑀁, 𑀤𑀺𑀝𑁆𑀞𑀲𑀘𑁆𑀘𑁄 𑀉𑀧𑀸𑀲𑀓𑁄;

𑀇𑀢𑀺 𑀳𑁂𑀢𑁂 𑀫𑀳𑀸𑀦𑀸𑀕𑀸, 𑀫𑀦𑁆𑀢𑀬𑀺𑀁𑀲𑀼 𑀭𑀳𑁄𑀕𑀢𑀸’’𑀢𑀺.

𑀢𑀤𑀸 ¶ 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀫𑀼𑀝𑀲𑀺𑀯𑀭𑀸𑀚𑀸; 𑀇𑀤𑀸𑀦𑀺 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘 𑀢𑀼𑀫𑁆𑀳𑁂 𑀩𑁆𑀬𑀸𑀓𑀢𑀸 𑁋 ‘𑀅𑀦𑀸𑀕𑀢𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀲𑁆𑀲𑀢𑀻’𑀢𑀺. 𑀢𑀲𑁆𑀫𑀸𑀢𑀺𑀳 𑀯𑁄, 𑀪𑀦𑁆𑀢𑁂, 𑀓𑀸𑀮𑁄 𑀤𑀻𑀧𑀯𑀭𑀁 𑀕𑀫𑀦𑀸𑀬; 𑀅𑀳𑀫𑁆𑀧𑀺 𑀯𑁄 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀓𑀲𑁆𑀫𑀸 𑀧𑀦 𑀲𑀓𑁆𑀓𑁄 𑀏𑀯𑀫𑀸𑀳? 𑀪𑀕𑀯𑀸 𑀓𑀺𑀭𑀲𑁆𑀲 𑀩𑁄𑀥𑀺𑀫𑀽𑀮𑁂𑀬𑁂𑀯 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀅𑀦𑀸𑀕𑀢𑁂 𑀇𑀫𑀲𑁆𑀲 𑀤𑀻𑀧𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘‘𑀢𑀤𑀸 𑀢𑁆𑀯𑀫𑁆𑀧𑀺 𑀲𑀳𑀸𑀬𑁄 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀘 𑀆𑀡𑀸𑀧𑁂𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀲𑀢𑁆𑀢𑀫𑁄 𑀯𑁂𑀝𑀺𑀲𑀓𑀧𑀩𑁆𑀩𑀢𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀫𑀺𑀲𑁆𑀲𑀓𑀧𑀩𑁆𑀩𑀢𑁂 𑀧𑀢𑀺𑀝𑁆𑀞𑀳𑀺. 𑀬𑀁 𑀧𑀦𑁂𑀢𑀭𑀳𑀺 ‘‘𑀘𑁂𑀢𑀺𑀬𑀧𑀩𑁆𑀩𑀢𑁄’’𑀢𑀺𑀧𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀯𑁂𑀝𑀺𑀲𑀕𑀺𑀭𑀺𑀫𑁆𑀳𑀺 ¶ 𑀭𑀸𑀚𑀕𑀳𑁂, 𑀯𑀲𑀺𑀢𑁆𑀯𑀸 𑀢𑀺𑀁𑀲𑀭𑀢𑁆𑀢𑀺𑀬𑁄;

𑀓𑀸𑀮𑁄𑀯 𑀕𑀫𑀦𑀲𑁆𑀲𑀸𑀢𑀺, 𑀕𑀘𑁆𑀙𑀸𑀫 𑀤𑀻𑀧𑀫𑀼𑀢𑁆𑀢𑀫𑀁.

‘‘𑀧𑀴𑀻𑀦𑀸 𑀚𑀫𑁆𑀩𑀼𑀤𑀻𑀧𑀸 𑀢𑁂, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂;

𑀏𑀯𑀫𑀼𑀧𑁆𑀧𑀢𑀺𑀢𑀸 𑀣𑁂𑀭𑀸, 𑀦𑀺𑀧𑀢𑀺𑀁𑀲𑀼 𑀦𑀕𑀼𑀢𑁆𑀢𑀫𑁂.

‘‘𑀧𑀼𑀭𑀢𑁄 𑀧𑀼𑀭𑀲𑁂𑀝𑁆𑀞𑀲𑁆𑀲, 𑀧𑀩𑁆𑀩𑀢𑁂 𑀫𑁂𑀖𑀲𑀦𑁆𑀦𑀺𑀪𑁂;

𑀧𑀢𑀺𑀁𑀲𑀼 𑀲𑀻𑀮𑀓𑀽𑀝𑀫𑁆𑀳𑀺, 𑀳𑀁𑀲𑀸𑀯 𑀦𑀕𑀫𑀼𑀤𑁆𑀥𑀦𑀻’’𑀢𑀺.

𑀏𑀯𑀁 ¶ 𑀇𑀝𑁆𑀝𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀧𑀢𑀺𑀝𑁆𑀞𑀳𑀦𑁆𑀢𑁄 𑀘 𑀆𑀬𑀲𑁆𑀫𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀢𑀺𑀝𑁆𑀞𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀳𑀺 𑀅𑀝𑁆𑀞𑀫𑁂 𑀯𑀲𑁆𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀫𑀺𑀁𑀬𑁂𑀯 𑀯𑀲𑁆𑀲𑁂 𑀲𑀻𑀳𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀆𑀤𑀺𑀭𑀸𑀚𑀸 𑀯𑀺𑀚𑀬𑀓𑀼𑀫𑀸𑀭𑁄 𑀇𑀫𑀁 𑀤𑀻𑀧𑀫𑀸𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀯𑀸𑀲𑀁 𑀅𑀓𑀸𑀲𑀺. 𑀚𑀫𑁆𑀩𑀼𑀤𑀻𑀧𑁂 𑀉𑀤𑀬𑀪𑀤𑁆𑀤𑀲𑁆𑀲 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀥 𑀯𑀺𑀚𑀬𑁄 𑀓𑀸𑀮𑀫𑀓𑀸𑀲𑀺. 𑀉𑀤𑀬𑀪𑀤𑁆𑀤𑀲𑁆𑀲 𑀧𑀜𑁆𑀘𑀤𑀲𑀫𑁂 𑀯𑀲𑁆𑀲𑁂 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀦𑀸𑀕𑀤𑀸𑀲𑀓𑀭𑀜𑁆𑀜𑁄 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀯𑀲𑁆𑀲𑁂 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀲𑀼𑀲𑀼𑀦𑀸𑀕𑀭𑀜𑁆𑀜𑁄 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀅𑀪𑀬𑀭𑀜𑁆𑀜𑁄 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀅𑀣 𑀅𑀪𑀬𑀲𑁆𑀲 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀧𑀡𑁆𑀟𑀼𑀓𑀸𑀪𑀬𑁄 𑀦𑀸𑀫 𑀤𑀸𑀫𑀭𑀺𑀓𑁄 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀢𑁆𑀣 𑀓𑀸𑀴𑀸𑀲𑁄𑀓𑀲𑁆𑀲 𑀲𑁄𑀴𑀲𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀓𑀲𑁆𑀲 𑀲𑀢𑁆𑀢𑀭𑀲𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀢𑀸𑀦𑀺 𑀳𑁂𑀝𑁆𑀞𑀸 𑀏𑀓𑁂𑀦 𑀯𑀲𑁆𑀲𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀢𑀢𑁆𑀣 ¶ 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀓𑀸𑀪𑀬𑁄 𑀓𑀸𑀮𑀫𑀓𑀸𑀲𑀺. 𑀫𑀼𑀝𑀲𑀺𑀯𑀭𑀸𑀚𑀸 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀫𑀼𑀝𑀲𑀺𑀯𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀚𑀸𑀢𑀲𑀢𑁆𑀢𑀼 𑀘𑀢𑀼𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀉𑀤𑀬𑀪𑀤𑁆𑀤𑁄 ¶ 𑀲𑁄𑀴𑀲, 𑀅𑀦𑀼𑀭𑀼𑀤𑁆𑀥𑁄 𑀘 𑀫𑀼𑀡𑁆𑀟𑁄 𑀘 𑀅𑀝𑁆𑀞, 𑀦𑀸𑀕𑀤𑀸𑀲𑀓𑁄 𑀘𑀢𑀼𑀯𑀻𑀲𑀢𑀺, 𑀲𑀼𑀲𑀼𑀦𑀸𑀕𑁄 𑀅𑀝𑁆𑀞𑀸𑀭𑀲, 𑀢𑀲𑁆𑀲𑁂𑀯 𑀧𑀼𑀢𑁆𑀢𑁄 𑀓𑀸𑀴𑀸𑀲𑁄𑀓𑁄 𑀅𑀝𑁆𑀞𑀯𑀻𑀲𑀢𑀺, 𑀢𑀢𑁄 𑀢𑀲𑁆𑀲 𑀧𑀼𑀢𑁆𑀢𑀓𑀸 𑀤𑀲 𑀪𑀸𑀢𑀼𑀓𑀭𑀸𑀚𑀸𑀦𑁄 𑀤𑁆𑀯𑁂𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀢𑁂𑀲𑀁 𑀧𑀘𑁆𑀙𑀢𑁄 𑀦𑀯 𑀦𑀦𑁆𑀤𑀸 𑀤𑁆𑀯𑁂𑀯𑀻𑀲𑀢𑀺𑀫𑁂𑀯, 𑀘𑀦𑁆𑀤𑀕𑀼𑀢𑁆𑀢𑁄 𑀘𑀢𑀼𑀯𑀻𑀲𑀢𑀺, 𑀩𑀺𑀦𑁆𑀤𑀼𑀲𑀸𑀭𑁄 𑀅𑀝𑁆𑀞𑀯𑀻𑀲𑀢𑀺 ¶ . 𑀢𑀲𑁆𑀲𑀸𑀯𑀲𑀸𑀦𑁂 𑀅𑀲𑁄𑀓𑁄 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀼𑀭𑁂 𑀅𑀪𑀺𑀲𑁂𑀓𑀸 𑀘𑀢𑁆𑀢𑀸𑀭𑀺 𑀅𑀪𑀺𑀲𑁂𑀓𑀢𑁄 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀧𑀢𑀺𑀝𑁆𑀞𑀺𑀢𑁄. 𑀏𑀯𑀫𑁂𑀢𑁂𑀦 𑀭𑀸𑀚𑀯𑀁𑀲𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀢𑀺𑀝𑁆𑀞𑀳𑀻’’𑀢𑀺.

𑀢𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀚𑁂𑀝𑁆𑀞𑀫𑀽𑀮𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀭𑀸𑀚𑀸 𑀦𑀓𑁆𑀔𑀢𑁆𑀢𑀁 𑀖𑁄𑀲𑀸𑀧𑁂𑀢𑁆𑀯𑀸 ‘‘𑀙𑀡𑀁 𑀓𑀭𑁄𑀣𑀸’’𑀢𑀺 𑀅𑀫𑀘𑁆𑀘𑁂 𑀘 𑀆𑀡𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀫𑀺𑀲𑁆𑀲𑀓𑀧𑀩𑁆𑀩𑀢𑁄 𑀢𑁂𑀦 𑀧𑀸𑀬𑀸𑀲𑀺 𑀫𑀺𑀕𑀯𑀁 𑀓𑀻𑀴𑀺𑀢𑀼𑀓𑀸𑀫𑁄. 𑀅𑀣 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀏𑀓𑀸 𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀣𑁂𑀭𑁂 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀭𑁄𑀳𑀺𑀢𑀫𑀺𑀕𑀭𑀽𑀧𑀁 𑀕𑀳𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀫𑀸𑀦𑀸 𑀯𑀺𑀬 𑀘𑀭𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀤𑀸𑀦𑀺 𑀧𑀫𑀢𑁆𑀢𑀁 𑀯𑀺𑀚𑁆𑀛𑀺𑀢𑀼’’𑀦𑁆𑀢𑀺 𑀚𑀺𑀬𑀁 𑀨𑁄𑀝𑁂𑀲𑀺. 𑀫𑀺𑀕𑁄 𑀅𑀫𑁆𑀩𑀢𑁆𑀣𑀮𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺. 𑀭𑀸𑀚𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑁆𑀢𑁄 𑀅𑀫𑁆𑀩𑀢𑁆𑀣𑀮𑀫𑁂𑀯 𑀅𑀪𑀺𑀭𑀼𑀳𑀺. 𑀫𑀺𑀕𑁄𑀧𑀺 𑀣𑁂𑀭𑀸𑀦𑀁 𑀅𑀯𑀺𑀤𑀽𑀭𑁂 𑀅𑀦𑁆𑀢𑀭𑀥𑀸𑀬𑀺. 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀭𑀸𑀚𑀸𑀦𑀁 𑀅𑀯𑀺𑀤𑀽𑀭𑁂 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀫𑀁𑀬𑁂𑀯 𑀭𑀸𑀚𑀸 𑀧𑀲𑁆𑀲𑀢𑀼, 𑀫𑀸 𑀇𑀢𑀭𑁂’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ‘‘𑀢𑀺𑀲𑁆𑀲, 𑀢𑀺𑀲𑁆𑀲, 𑀇𑀢𑁄 𑀏𑀳𑀻’’𑀢𑀺 𑀆𑀳. 𑀭𑀸𑀚𑀸 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀤𑀻𑀧𑁂 𑀚𑀸𑀢𑁄 𑀫𑀁 ‘𑀢𑀺𑀲𑁆𑀲𑀸’𑀢𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ¶ 𑀆𑀮𑀧𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄 𑀪𑀡𑁆𑀟𑀼 𑀓𑀸𑀲𑀸𑀯𑀯𑀲𑀦𑁄 𑀫𑀁 𑀦𑀸𑀫𑁂𑀦 𑀆𑀮𑀧𑀢𑀺, 𑀓𑁄 𑀦𑀼 𑀔𑁄 𑀅𑀬𑀁 𑀪𑀯𑀺𑀲𑁆𑀲𑀢𑀺 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸’’𑀢𑀺? 𑀣𑁂𑀭𑁄 𑀆𑀳 𑁋

‘‘𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸;

𑀢𑀯𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀘 𑀅𑀲𑁄𑀓𑀥𑀫𑁆𑀫𑀭𑀸𑀚𑀸 𑀘 𑀅𑀤𑀺𑀝𑁆𑀞𑀲𑀳𑀸𑀬𑀓𑀸 𑀳𑁄𑀦𑁆𑀢𑀺. 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀲𑁆𑀲 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀙𑀸𑀢𑀧𑀩𑁆𑀩𑀢𑀧𑀸𑀤𑁂 𑀏𑀓𑀫𑁆𑀳𑀺 𑀯𑁂𑀴𑀼𑀕𑀼𑀫𑁆𑀩𑁂 𑀢𑀺𑀲𑁆𑀲𑁄 𑀯𑁂𑀴𑀼𑀬𑀝𑁆𑀞𑀺𑀬𑁄 𑀭𑀣𑀬𑀝𑁆𑀞𑀺𑀧𑁆𑀧𑀫𑀸𑀡𑀸 𑀉𑀧𑁆𑀧𑀚𑁆𑀚𑀺𑀁𑀲𑀼 𑁋 𑀏𑀓𑀸 𑀮𑀢𑀸𑀬𑀝𑁆𑀞𑀺 𑀦𑀸𑀫, 𑀏𑀓𑀸 𑀧𑀼𑀧𑁆𑀨𑀬𑀝𑁆𑀞𑀺 𑀦𑀸𑀫, 𑀏𑀓𑀸 ¶ 𑀲𑀓𑀼𑀡𑀬𑀝𑁆𑀞𑀺 𑀦𑀸𑀫. 𑀢𑀸𑀲𑀼 𑀮𑀢𑀸𑀬𑀝𑁆𑀞𑀺 𑀭𑀚𑀢𑀯𑀡𑁆𑀡𑀸 𑀳𑁄𑀢𑀺, 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀮𑀢𑀸 𑀓𑀜𑁆𑀘𑀦𑀯𑀡𑁆𑀡𑀸 𑀔𑀸𑀬𑀢𑀺. 𑀧𑀼𑀧𑁆𑀨𑀬𑀝𑁆𑀞𑀺𑀬𑀁 𑀧𑀦 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀓𑀸𑀴𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀼𑀯𑀺𑀪𑀢𑁆𑀢𑀯𑀡𑁆𑀝𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀸𑀦𑀺 𑀳𑀼𑀢𑁆𑀯𑀸 𑀔𑀸𑀬𑀦𑁆𑀢𑀺. 𑀲𑀓𑀼𑀡𑀬𑀝𑁆𑀞𑀺𑀬𑀁 𑀳𑀁𑀲𑀓𑀼𑀓𑁆𑀓𑀼𑀝𑀚𑀻𑀯𑀚𑀻𑀯𑀓𑀸𑀤𑀬𑁄 𑀲𑀓𑀼𑀡𑀸 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀘 𑀘𑀢𑀼𑀧𑁆𑀧𑀤𑀸𑀦𑀺 𑀲𑀚𑀻𑀯𑀸𑀦𑀺 𑀯𑀺𑀬 𑀔𑀸𑀬𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀙𑀸𑀢𑀧𑀩𑁆𑀩𑀢𑀧𑀸𑀤𑀫𑁆𑀳𑀺 ¶ , 𑀯𑁂𑀴𑀼𑀬𑀝𑁆𑀞𑀻 𑀢𑀬𑁄 𑀅𑀳𑀼;

𑀲𑁂𑀢𑀸 𑀭𑀚𑀢𑀬𑀝𑁆𑀞𑀻𑀯, 𑀮𑀢𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀸.

‘‘𑀦𑀻𑀮𑀸𑀤𑀺 𑀬𑀸𑀤𑀺𑀲𑀁 𑀧𑀼𑀧𑁆𑀨𑀁, 𑀧𑀼𑀧𑁆𑀨𑀬𑀝𑁆𑀞𑀺𑀫𑁆𑀳𑀺 𑀢𑀸𑀤𑀺𑀲𑀁;

𑀲𑀓𑀼𑀡𑀸 𑀲𑀓𑀼𑀡𑀬𑀝𑁆𑀞𑀺𑀫𑁆𑀳𑀺, 𑀲𑀭𑀽𑀧𑁂𑀦𑁂𑀯 𑀲𑀡𑁆𑀞𑀺𑀢𑀸’’𑀢𑀺.

𑀲𑀫𑀼𑀤𑁆𑀤𑀢𑁄𑀧𑀺𑀲𑁆𑀲 ¶ 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀺 𑀅𑀦𑁂𑀓𑀯𑀺𑀳𑀺𑀢𑀁 𑀭𑀢𑀦𑀁 𑀉𑀧𑁆𑀧𑀚𑁆𑀚𑀺. 𑀢𑀫𑁆𑀩𑀧𑀡𑁆𑀡𑀺𑀬𑀁 𑀧𑀦 𑀅𑀝𑁆𑀞 𑀫𑀼𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀁𑀲𑀼 𑁋 𑀳𑀬𑀫𑀼𑀢𑁆𑀢𑀸, 𑀕𑀚𑀫𑀼𑀢𑁆𑀢𑀸, 𑀭𑀣𑀫𑀼𑀢𑁆𑀢𑀸, 𑀆𑀫𑀮𑀓𑀫𑀼𑀢𑁆𑀢𑀸, 𑀯𑀮𑀬𑀫𑀼𑀢𑁆𑀢𑀸, 𑀅𑀗𑁆𑀕𑀼𑀮𑀺𑀯𑁂𑀞𑀓𑀫𑀼𑀢𑁆𑀢𑀸, 𑀓𑀓𑀼𑀥𑀨𑀮𑀫𑀼𑀢𑁆𑀢𑀸, 𑀧𑀸𑀓𑀢𑀺𑀓𑀫𑀼𑀢𑁆𑀢𑀸𑀢𑀺. 𑀲𑁄 𑀢𑀸 𑀘 𑀬𑀝𑁆𑀞𑀺𑀬𑁄 𑀢𑀸 𑀘 𑀫𑀼𑀢𑁆𑀢𑀸 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀭𑀢𑀦𑀁 𑀅𑀲𑁄𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀅𑀲𑁄𑀓𑁄 𑀧𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀧𑀳𑀺𑀡𑀺 𑁋 𑀙𑀢𑁆𑀢𑀁, 𑀘𑀸𑀫𑀭𑀁, 𑀔𑀕𑁆𑀕𑀁, 𑀫𑁄𑀴𑀺𑀁, 𑀭𑀢𑀦𑀧𑀸𑀤𑀼𑀓𑀁, 𑀅𑀜𑁆𑀜𑀜𑁆𑀘 𑀅𑀪𑀺𑀲𑁂𑀓𑀢𑁆𑀣𑀸𑀬 𑀩𑀳𑀼𑀯𑀺𑀥𑀁 𑀧𑀡𑁆𑀡𑀸𑀓𑀸𑀭𑀁; 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀗𑁆𑀔𑀁, 𑀕𑀗𑁆𑀕𑁄𑀤𑀓𑀁, 𑀯𑀟𑁆𑀠𑀫𑀸𑀦𑀁, 𑀯𑀝𑀁𑀲𑀓𑀁, 𑀪𑀺𑀗𑁆𑀕𑀸𑀭𑀁, 𑀦𑀦𑁆𑀤𑀺𑀬𑀸𑀯𑀝𑁆𑀝𑀁, 𑀲𑀺𑀯𑀺𑀓𑀁, 𑀓𑀜𑁆𑀜𑀁, 𑀓𑀝𑀘𑁆𑀙𑀼𑀁, 𑀅𑀥𑁄𑀯𑀺𑀫𑀁 𑀤𑀼𑀲𑁆𑀲𑀬𑀼𑀕𑀁, 𑀳𑀢𑁆𑀣𑀧𑀼𑀜𑁆𑀙𑀦𑀁, 𑀳𑀭𑀺𑀘𑀦𑁆𑀤𑀦𑀁, 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁, 𑀅𑀜𑁆𑀚𑀦𑀁, 𑀳𑀭𑀻𑀢𑀓𑀁, 𑀆𑀫𑀮𑀓𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀯𑀸𑀮𑀩𑀻𑀚𑀦𑀺𑀫𑀼𑀡𑁆𑀳𑀻𑀲𑀁, 𑀙𑀢𑁆𑀢𑀁 𑀔𑀕𑁆𑀕𑀜𑁆𑀘 𑀧𑀸𑀤𑀼𑀓𑀁;

𑀯𑁂𑀞𑀦𑀁 𑀲𑀸𑀭𑀧𑀸𑀫𑀗𑁆𑀕𑀁, 𑀪𑀺𑀗𑁆𑀕𑀸𑀭𑀁 𑀦𑀦𑁆𑀤𑀺𑀯𑀝𑁆𑀝𑀓𑀁.

‘‘𑀲𑀺𑀯𑀺𑀓𑀁 𑀲𑀗𑁆𑀔𑀁 𑀯𑀝𑀁𑀲𑀜𑁆𑀘, 𑀅𑀥𑁄𑀯𑀺𑀫𑀁 𑀯𑀢𑁆𑀣𑀓𑁄𑀝𑀺𑀓𑀁;

𑀲𑁄𑀯𑀡𑁆𑀡𑀧𑀸𑀢𑀺𑀁 𑀓𑀝𑀘𑁆𑀙𑀼𑀁, 𑀫𑀳𑀕𑁆𑀖𑀁 𑀳𑀢𑁆𑀣𑀧𑀼𑀜𑁆𑀙𑀦𑀁.

‘‘𑀅𑀦𑁄𑀢𑀢𑁆𑀢𑁄𑀤𑀓𑀁 𑀓𑀜𑁆𑀜𑀁, 𑀉𑀢𑁆𑀢𑀫𑀁 𑀳𑀭𑀺𑀘𑀦𑁆𑀤𑀦𑀁;

𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁 ¶ , 𑀅𑀜𑁆𑀚𑀦𑀁 𑀦𑀸𑀕𑀫𑀸𑀳𑀝𑀁.

‘‘𑀳𑀭𑀻𑀢𑀓𑀁 ¶ 𑀆𑀫𑀮𑀓𑀁, 𑀫𑀳𑀕𑁆𑀖𑀁 𑀅𑀫𑀢𑁄𑀲𑀥𑀁;

𑀲𑀝𑁆𑀞𑀺𑀯𑀸𑀳𑀲𑀢𑀁 𑀲𑀸𑀮𑀺𑀁, 𑀲𑀼𑀕𑀦𑁆𑀥𑀁 𑀲𑀼𑀯𑀓𑀸𑀳𑀝𑀁;

𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀁, 𑀧𑀸𑀳𑁂𑀲𑀺 𑀅𑀲𑁄𑀓𑀯𑁆𑀳𑀬𑁄’’𑀢𑀺.

𑀦 𑀓𑁂𑀯𑀮𑀜𑁆𑀘𑁂𑀢𑀁 𑀆𑀫𑀺𑀲𑀧𑀡𑁆𑀡𑀸𑀓𑀸𑀭𑀁, 𑀇𑀫𑀁 𑀓𑀺𑀭 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀫𑁆𑀧𑀺 𑀧𑁂𑀲𑁂𑀲𑀺 𑁋

‘‘𑀅𑀳𑀁 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀉𑀧𑀸𑀲𑀓𑀢𑁆𑀢𑀁 𑀤𑁂𑀲𑁂𑀲𑀺𑀁, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

‘‘𑀇𑀫𑁂𑀲𑀼 ¶ 𑀢𑀻𑀲𑀼 𑀯𑀢𑁆𑀣𑀽𑀲𑀼, 𑀉𑀢𑁆𑀢𑀫𑁂 𑀚𑀺𑀦𑀲𑀸𑀲𑀦𑁂;

𑀢𑁆𑀯𑀫𑁆𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀲𑀤𑁆𑀥𑀸 𑀲𑀭𑀡𑀫𑀼𑀧𑁂𑀳𑀻’’𑀢𑀺.

𑀲𑁆𑀯𑀸𑀬𑀁 𑀭𑀸𑀚𑀸 𑀢𑀁 𑀤𑀺𑀯𑀲𑀁 𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀪𑀺𑀲𑁂𑀓𑁂𑀦 𑀏𑀓𑀫𑀸𑀲𑀸𑀪𑀺𑀲𑀺𑀢𑁆𑀢𑁄 𑀳𑁄𑀢𑀺.

𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀳𑀺𑀲𑁆𑀲 𑀅𑀪𑀺𑀲𑁂𑀓𑀫𑀓𑀁𑀲𑀼. 𑀲𑁄 𑀅𑀘𑀺𑀭𑀲𑁆𑀲𑀼𑀢𑀁 𑁋 𑀢𑀁 𑀲𑀸𑀲𑀦𑀧𑁆𑀧𑀯𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀢𑀁 𑀣𑁂𑀭𑀲𑁆𑀲 ‘‘𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑁆𑀬𑀸 𑀦𑀼 𑀔𑁄 𑀆𑀕𑀢𑀸’’𑀢𑀺 𑀢𑀸𑀯𑀤𑁂𑀯 𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑀬𑀫𑀸𑀦𑁄. 𑀬𑀣𑀸𑀳 𑁋

‘‘𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺;

𑀦𑀺𑀲𑀚𑁆𑀚 𑀭𑀸𑀚𑀸 𑀲𑀫𑁆𑀫𑁄𑀤𑀺, 𑀩𑀳𑀼𑀁 𑀅𑀢𑁆𑀣𑀽𑀧𑀲𑀜𑁆𑀳𑀺𑀢’’𑀦𑁆𑀢𑀺.

𑀲𑀫𑁆𑀫𑁄𑀤𑀦𑀻𑀬𑀓𑀣𑀜𑁆𑀘 𑀓𑀼𑀭𑀼𑀫𑀸𑀦𑁂𑀬𑁂𑀯 𑀢𑀲𑁆𑀫𑀺𑀁 𑀢𑀸𑀦𑀺𑀧𑀺 𑀘𑀢𑁆𑀢𑀸𑀮𑀻𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀆𑀕𑀦𑁆𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁. 𑀢𑀤𑀸 𑀣𑁂𑀭𑁄 𑀇𑀢𑀭𑁂𑀧𑀺 𑀙 𑀚𑀦𑁂 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀤𑀸 𑀆𑀕𑀢𑀸’’𑀢𑀺 𑀆𑀳 ¶ . ‘‘𑀫𑀬𑀸 𑀲𑀤𑁆𑀥𑀺𑀁𑀬𑁂𑀯, 𑀫𑀳𑀸𑀭𑀸𑀚𑀸’’𑀢𑀺. ‘‘𑀇𑀤𑀸𑀦𑀺 𑀧𑀦 𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑀸 𑀲𑀫𑀡𑀸 𑀲𑀦𑁆𑀢𑀻’’𑀢𑀺? ‘‘𑀲𑀦𑁆𑀢𑀺, 𑀫𑀳𑀸𑀭𑀸𑀚; 𑀏𑀢𑀭𑀳𑀺 𑀚𑀫𑁆𑀩𑀼𑀤𑀻𑀧𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑁄. 𑀢𑀲𑁆𑀫𑀺𑀁 𑁋

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸𑀢𑀺.

‘‘𑀪𑀦𑁆𑀢𑁂, 𑀓𑁂𑀦 𑀆𑀕𑀢𑀢𑁆𑀣𑀸’’𑀢𑀺? ‘‘𑀦𑁂𑀯, 𑀫𑀳𑀸𑀭𑀸𑀚, 𑀉𑀤𑀓𑁂𑀦 𑀦 𑀣𑀮𑁂𑀦𑀸’’𑀢𑀺. ‘‘𑀭𑀸𑀚𑀸 𑀆𑀓𑀸𑀲𑁂𑀦 ¶ 𑀆𑀕𑀢𑀸’’𑀢𑀺 𑀅𑀜𑁆𑀜𑀸𑀲𑀺. 𑀣𑁂𑀭𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀭𑀜𑁆𑀜𑁄 𑀧𑀜𑁆𑀜𑀸𑀯𑁂𑀬𑀢𑁆𑀢𑀺𑀬’’𑀦𑁆𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 𑀆𑀲𑀦𑁆𑀦𑀁 𑀅𑀫𑁆𑀩𑀭𑀼𑀓𑁆𑀔𑀁 𑀆𑀭𑀩𑁆𑀪 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀸𑀫𑁄 𑀅𑀬𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄’’𑀢𑀺? ‘‘𑀅𑀫𑁆𑀩𑀭𑀼𑀓𑁆𑀔𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀇𑀫𑀁 𑀧𑀦, 𑀫𑀳𑀸𑀭𑀸𑀚, 𑀅𑀫𑁆𑀩𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀅𑀫𑁆𑀩𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀜𑁆𑀜𑁂𑀧𑀺 𑀩𑀳𑀽 𑀅𑀫𑁆𑀩𑀭𑀼𑀓𑁆𑀔𑀸’’𑀢𑀺. ‘‘𑀇𑀫𑀜𑁆𑀘 𑀅𑀫𑁆𑀩𑀁 𑀢𑁂 𑀘 𑀅𑀫𑁆𑀩𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑁂 𑀭𑀼𑀓𑁆𑀔𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀢𑁂 𑀧𑀦 𑀦 𑀅𑀫𑁆𑀩𑀭𑀼𑀓𑁆𑀔𑀸’’𑀢𑀺. ‘‘𑀅𑀜𑁆𑀜𑁂 𑀅𑀫𑁆𑀩𑁂 𑀘 𑀅𑀦𑀫𑁆𑀩𑁂 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀺 𑀧𑀦 𑀅𑀜𑁆𑀜𑁄 𑀭𑀼𑀓𑁆𑀔𑁄’’𑀢𑀺? ‘‘𑀅𑀬𑀫𑁂𑀯, 𑀪𑀦𑁆𑀢𑁂, 𑀅𑀫𑁆𑀩𑀭𑀼𑀓𑁆𑀔𑁄’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁄𑀲𑀺. 𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀜𑀸𑀢𑀓𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀩𑀳𑀽 𑀚𑀦𑀸’’𑀢𑀺. ‘‘𑀢𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁂 𑀓𑁂𑀘𑀺 𑀅𑀜𑁆𑀜𑀸𑀢𑀓𑀸𑀧𑀺 𑀅𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀜𑁆𑀜𑀸𑀢𑀓𑀸, 𑀪𑀦𑁆𑀢𑁂, 𑀜𑀸𑀢𑀓𑁂𑀳𑀺 𑀩𑀳𑀼𑀢𑀭𑀸’’𑀢𑀺. ‘‘𑀢𑀯 𑀜𑀸𑀢𑀓𑁂 𑀘 𑀅𑀜𑁆𑀜𑀸𑀢𑀓𑁂 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺, 𑀫𑀳𑀸𑀭𑀸𑀚𑀸’’𑀢𑀺 ¶ ? ‘‘𑀅𑀳𑀫𑁂𑀯, 𑀅𑀜𑁆𑀜𑀸𑀢𑀓𑁄’’𑀢𑀺. 𑀅𑀣 𑀣𑁂𑀭𑁄 ‘‘𑀧𑀡𑁆𑀟𑀺𑀢𑁄 𑀭𑀸𑀚𑀸 𑀲𑀓𑁆𑀔𑀺𑀲𑁆𑀲𑀢𑀺 𑀥𑀫𑁆𑀫𑀁 𑀅𑀜𑁆𑀜𑀸𑀢𑀼’’𑀦𑁆𑀢𑀺 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺 𑀲𑀤𑁆𑀥𑀺𑀁 𑀘𑀢𑁆𑀢𑀸𑀮𑀻𑀲𑀸𑀬 𑀧𑀸𑀡𑀲𑀳𑀲𑁆𑀲𑁂𑀳𑀺.

𑀢𑀁 𑀔𑀡𑀜𑁆𑀜𑁂𑀯 𑀘 𑀭𑀜𑁆𑀜𑁄 𑀪𑀢𑁆𑀢𑀁 𑀆𑀳𑀭𑀺𑀬𑀺𑀢𑁆𑀣 ¶ . 𑀭𑀸𑀚𑀸 𑀘 𑀲𑀼𑀢𑁆𑀢𑀦𑁆𑀢𑀁 𑀲𑀼𑀡𑀦𑁆𑀢𑁄 𑀏𑀯 𑀅𑀜𑁆𑀜𑀸𑀲𑀺 𑁋 ‘‘𑀦 𑀇𑀫𑁂𑀲𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀪𑁄𑀚𑀦𑀁 𑀓𑀧𑁆𑀧𑀢𑀻’’𑀢𑀺. ‘‘𑀅𑀧𑀼𑀘𑁆𑀙𑀺𑀢𑁆𑀯𑀸 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀼𑀜𑁆𑀚𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀦, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀪𑁄𑀚𑀦𑀁 𑀓𑀧𑁆𑀧𑀢𑀻’’𑀢𑀺. ‘‘𑀓𑀲𑁆𑀫𑀺𑀁 𑀓𑀸𑀮𑁂, 𑀪𑀦𑁆𑀢𑁂, 𑀓𑀧𑁆𑀧𑀢𑀻’’𑀢𑀺? ‘‘𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀕𑀘𑁆𑀙𑀸𑀫, 𑀪𑀦𑁆𑀢𑁂, 𑀦𑀕𑀭’’𑀦𑁆𑀢𑀺? ‘‘𑀅𑀮𑀁, 𑀫𑀳𑀸𑀭𑀸𑀚, 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀯𑀲𑀣, 𑀅𑀬𑀁 𑀤𑀸𑀭𑀓𑁄 𑀆𑀕𑀘𑁆𑀙𑀢𑀽’’𑀢𑀺. ‘‘𑀫𑀳𑀸𑀭𑀸𑀚, 𑀅𑀬𑀁 𑀤𑀸𑀭𑀓𑁄 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀇𑀤𑀸𑀦𑀺 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀲𑁆𑀯𑁂 𑀭𑀣𑀁 𑀧𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀣𑁂𑀭𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀲𑀼𑀫𑀦𑀲𑀸𑀫𑀡𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀲𑀼𑀫𑀦, 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑁂𑀳𑀻’’𑀢𑀺. ‘‘𑀪𑀦𑁆𑀢𑁂, 𑀓𑀺𑀢𑁆𑀢𑀓𑀁 𑀞𑀸𑀦𑀁 𑀲𑀸𑀯𑁂𑀦𑁆𑀢𑁄 𑀖𑁄𑀲𑁂𑀫𑀻’’𑀢𑀺? ‘‘𑀲𑀓𑀮𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀫𑀡𑁂𑀭𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀓𑀮𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀲𑀸𑀯𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑁂𑀲𑀺. 𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀢𑁆𑀣𑀺 𑀓𑁄𑀘𑀺 𑀉𑀧𑀤𑁆𑀤𑀯𑁄’’𑀢𑀺. ‘‘𑀦𑀢𑁆𑀣𑀫𑁆𑀳𑀸𑀓𑀁 𑀓𑁄𑀘𑀺 𑀉𑀧𑀤𑁆𑀤𑀯𑁄, 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑀸𑀧𑀬𑀺𑀫𑁆𑀳 𑀩𑀼𑀤𑁆𑀥𑀯𑀘𑀦𑀁 𑀓𑀣𑁂𑀢𑀼𑀓𑀸𑀫𑀫𑁆𑀳𑀸’’𑀢𑀺 ¶ . 𑀢𑀜𑁆𑀘 𑀧𑀦 𑀲𑀸𑀫𑀡𑁂𑀭𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁. 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺. 𑀢𑁂𑀦 𑀲𑀤𑁆𑀤𑁂𑀦 𑀫𑀳𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀣𑁂𑀭𑁄 𑀫𑀳𑀦𑁆𑀢𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀤𑀺𑀲𑁆𑀯𑀸 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀩𑀳𑀽 𑀦𑀸𑀕𑀸 ¶ 𑀘 𑀲𑀼𑀧𑀡𑁆𑀡𑀸 𑀘 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀬𑀸𑀤𑀺𑀲𑁄𑀯 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀓𑀣𑀬𑀢𑁄 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀢𑀸𑀤𑀺𑀲𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀺 𑀚𑀸𑀢𑁄. 𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀣𑁂𑀭𑀸𑀦𑀁 ¶ 𑀭𑀣𑀁 𑀧𑁂𑀲𑁂𑀲𑀺. 𑀲𑀸𑀭𑀣𑀻 𑀭𑀣𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀣𑁂𑀭𑀸𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀆𑀕𑀢𑁄, 𑀪𑀦𑁆𑀢𑁂, 𑀭𑀣𑁄; 𑀅𑀪𑀺𑀭𑀼𑀳𑀣 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺. 𑀣𑁂𑀭𑀸 ‘‘𑀦 𑀫𑀬𑀁 𑀭𑀣𑀁 𑀅𑀪𑀺𑀭𑀼𑀳𑀸𑀫; 𑀕𑀘𑁆𑀙 𑀢𑁆𑀯𑀁, 𑀧𑀘𑁆𑀙𑀸 𑀫𑀬𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀧𑀞𑀫𑀓𑀘𑁂𑀢𑀺𑀬𑀝𑁆𑀞𑀸𑀦𑁂 𑀑𑀢𑀭𑀺𑀁𑀲𑀼. 𑀢𑀜𑁆𑀳𑀺 𑀘𑁂𑀢𑀺𑀬𑀁 𑀣𑁂𑀭𑁂𑀳𑀺 𑀧𑀞𑀫𑀁 𑀑𑀢𑀺𑀡𑁆𑀡𑀝𑁆𑀞𑀸𑀦𑁂 𑀓𑀢𑀢𑁆𑀢𑀸𑀬𑁂𑀯 ‘‘𑀧𑀞𑀫𑀓𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀭𑀸𑀚𑀸𑀧𑀺 𑀲𑀸𑀭𑀣𑀺𑀁 𑀧𑁂𑀲𑁂𑀢𑁆𑀯𑀸 ‘‘𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀫𑀡𑁆𑀟𑀧𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀢𑀸𑀯𑀤𑁂𑀯 𑀲𑀩𑁆𑀩𑁂 𑀳𑀝𑁆𑀞𑀢𑀼𑀝𑁆𑀞𑀸 𑀅𑀢𑀺𑀯𑀺𑀬 𑀧𑀸𑀲𑀸𑀤𑀺𑀓𑀁 𑀫𑀡𑁆𑀟𑀧𑀁 𑀧𑀝𑀺𑀬𑀸𑀤𑁂𑀲𑀼𑀁. 𑀧𑀼𑀦 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀺𑀬𑁆𑀬𑁄 𑀣𑁂𑀭𑁄 𑀲𑀻𑀮𑀓𑁆𑀔𑀦𑁆𑀥𑀁 𑀓𑀣𑀬𑀫𑀸𑀦𑁄 ‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀦 𑀓𑀧𑁆𑀧𑀢𑀻’𑀢𑀺 𑀆𑀳; ‘𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺 𑀦𑀼 𑀔𑁄 𑀅𑀬𑁆𑀬𑀸 𑀆𑀲𑀦𑁂𑀲𑀼, 𑀦 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀻’’’𑀢𑀺? 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀦𑁆𑀢𑀲𑁆𑀲𑁂𑀯 𑀲𑁄 𑀲𑀸𑀭𑀣𑀺 𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀢𑀢𑁄 𑀅𑀤𑁆𑀤𑀲 𑀣𑁂𑀭𑁂 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂. 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀆𑀕𑀢𑀸, 𑀤𑁂𑀯, 𑀣𑁂𑀭𑀸’’𑀢𑀺. 𑀭𑀸𑀚𑀸 ‘‘𑀭𑀣𑀁 𑀆𑀭𑀽𑀴𑁆𑀳𑀸’’𑀢𑀺 𑀧𑀼𑀘𑁆𑀙𑀺. ‘‘𑀦 𑀆𑀭𑀽𑀴𑁆𑀳𑀸, 𑀤𑁂𑀯, 𑀅𑀧𑀺 𑀘 𑀫𑀫 𑀧𑀘𑁆𑀙𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀞𑀺𑀢𑀸’’𑀢𑀺. 𑀭𑀸𑀚𑀸 ‘‘𑀭𑀣𑀫𑁆𑀧𑀺 𑀦𑀸𑀪𑀺𑀭𑀽𑀳𑀺𑀁𑀲𑀽’’𑀢𑀺 𑀲𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀅𑀬𑁆𑀬𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺, 𑀪𑀡𑁂, 𑀣𑁂𑀭𑀸𑀦𑀁 𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀣𑀁 𑀅𑀕𑀫𑀸𑀲𑀺. 𑀅𑀫𑀘𑁆𑀘𑀸 𑀧𑀣𑀯𑀺𑀬𑀁 𑀢𑀝𑁆𑀝𑀺𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀧𑀭𑀺 𑀓𑁄𑀚𑀯𑀓𑀸𑀤𑀻𑀦𑀺 𑀘𑀺𑀢𑁆𑀢𑀢𑁆𑀣𑀭𑀡𑀸𑀦𑀺 𑀧𑀜𑁆𑀜𑀧𑁂𑀲𑀼𑀁. 𑀉𑀧𑁆𑀧𑀸𑀢𑀧𑀸𑀞𑀓𑀸 𑀤𑀺𑀲𑁆𑀯𑀸 ‘‘𑀕𑀳𑀺𑀢𑀸 𑀤𑀸𑀦𑀺 𑀇𑀫𑁂𑀳𑀺 𑀧𑀣𑀯𑀻, 𑀇𑀫𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 ¶ 𑀲𑀸𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀭𑀸𑀚𑀸𑀧𑀺 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀘 𑀲𑀓𑁆𑀓𑀸𑀭𑁂𑀦 𑀘 𑀣𑁂𑀭𑁂 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺. 𑀣𑁂𑀭𑁄 𑀆𑀲𑀦𑀧𑀜𑁆𑀜𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀧𑀣𑀯𑀻 𑀯𑀺𑀬 𑀧𑀢𑁆𑀣𑀝𑀁 𑀦𑀺𑀘𑁆𑀘𑀮𑀜𑁆𑀘 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀭𑀸𑀚𑀸 𑀣𑁂𑀭𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 ‘‘𑀅𑀦𑀼𑀴𑀸𑀤𑁂𑀯𑀻𑀧𑀫𑀼𑀔𑀸𑀦𑀺 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀣𑁂𑀭𑀸𑀦𑀁 𑀅𑀪𑀺𑀯𑀸𑀤𑀦𑀁 𑀧𑀽𑀚𑀸𑀲𑀓𑁆𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀜𑁆𑀜𑁄 𑀲𑀧𑀭𑀺𑀚𑀦𑀲𑁆𑀲 ¶ 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀧𑁂𑀢𑀯𑀢𑁆𑀣𑀼𑀁 ¶ 𑀯𑀺𑀫𑀸𑀦𑀯𑀢𑁆𑀣𑀼𑀁 𑀲𑀘𑁆𑀘𑀲𑀁𑀬𑀼𑀢𑁆𑀢𑀜𑁆𑀘 𑀓𑀣𑁂𑀲𑀺. 𑀢𑀁 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘𑀧𑀺 𑀇𑀢𑁆𑀣𑀺𑀲𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀁𑀲𑀼.

𑀬𑁂𑀧𑀺 𑀢𑁂 𑀫𑀦𑀼𑀲𑁆𑀲𑀸 𑀧𑀼𑀭𑀺𑀫𑀤𑀺𑀯𑀲𑁂 𑀫𑀺𑀲𑁆𑀲𑀓𑀧𑀩𑁆𑀩𑀢𑁂 𑀣𑁂𑀭𑁂 𑀅𑀤𑁆𑀤𑀲𑀁𑀲𑀼, 𑀢𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀣𑁂𑀭𑀸𑀦𑀁 𑀕𑀼𑀡𑁂 𑀓𑀣𑁂𑀦𑁆𑀢𑀺. 𑀢𑁂𑀲𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁄 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺. 𑀭𑀸𑀚𑀸 ‘‘𑀓𑀺𑀁 𑀏𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺. ‘‘𑀦𑀸𑀕𑀭𑀸, 𑀤𑁂𑀯, ‘𑀣𑁂𑀭𑁂 𑀤𑀝𑁆𑀞𑀼𑀁 𑀦 𑀮𑀪𑀸𑀫𑀸’𑀢𑀺 𑀯𑀺𑀭𑀯𑀦𑁆𑀢𑀻’’𑀢𑀺. 𑀭𑀸𑀚𑀸 ‘‘𑀲𑀘𑁂 𑀇𑀥 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀡𑁂, 𑀳𑀢𑁆𑀣𑀺𑀲𑀸𑀮𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀸𑀮𑀼𑀓𑀁 𑀆𑀓𑀺𑀭𑀺𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑁂 𑀣𑁂𑀭𑀸𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀢𑀣𑀸 𑀅𑀓𑀁𑀲𑀼. 𑀣𑁂𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑀤𑀽𑀢𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀡𑀲𑀳𑀲𑁆𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 ‘‘𑀳𑀢𑁆𑀣𑀺𑀲𑀸𑀮𑀸 𑀅𑀢𑀺𑀲𑀫𑁆𑀩𑀸𑀥𑀸’’𑀢𑀺 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀦𑀦𑁆𑀤𑀦𑀯𑀦𑀼𑀬𑁆𑀬𑀸𑀦𑁂 𑀆𑀲𑀦𑀁 𑀧𑀜𑁆𑀜𑀧𑁂𑀲𑀼𑀁. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀧𑀸𑀡𑀲𑀳𑀲𑁆𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 ¶ 𑀧𑀝𑀺𑀮𑀪𑀺.

𑀏𑀯𑀁 𑀆𑀕𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀣𑁂𑀭𑀲𑁆𑀲 𑀦𑀦𑁆𑀤𑀦𑀯𑀦𑁂 𑀆𑀕𑀢𑀸𑀕𑀢𑀸𑀳𑀺 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑀲𑁆𑀲𑁂𑀯 𑀲𑀸𑀬𑀦𑁆𑀳𑀲𑀫𑀬𑁄 𑀚𑀸𑀢𑁄. 𑀣𑁂𑀭𑁄 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀕𑀘𑁆𑀙𑀸𑀫 𑀤𑀸𑀦𑀺 𑀫𑀺𑀲𑁆𑀲𑀓𑀧𑀩𑁆𑀩𑀢’’𑀦𑁆𑀢𑀺 𑀉𑀝𑁆𑀞𑀳𑀺. 𑀅𑀫𑀘𑁆𑀘𑀸 𑁋 ‘‘𑀓𑀢𑁆𑀣, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀝𑁆𑀞𑀸𑀦’’𑀦𑁆𑀢𑀺. 𑀢𑁂 𑀭𑀜𑁆𑀜𑁄 𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀭𑀸𑀚𑀸𑀦𑀼𑀫𑀢𑁂𑀦 𑀆𑀳𑀁𑀲𑀼 𑁋 ‘‘𑀅𑀓𑀸𑀮𑁄, 𑀪𑀦𑁆𑀢𑁂, 𑀇𑀤𑀸𑀦𑀺 𑀢𑀢𑁆𑀣 𑀕𑀦𑁆𑀢𑀼𑀁; 𑀇𑀤𑀫𑁂𑀯 𑀦𑀦𑁆𑀤𑀦𑀯𑀦𑀼𑀬𑁆𑀬𑀸𑀦𑀁 𑀅𑀬𑁆𑀬𑀸𑀦𑀁 𑀆𑀯𑀸𑀲𑀝𑁆𑀞𑀸𑀦𑀁 𑀳𑁄𑀢𑀽’’𑀢𑀺. ‘‘𑀅𑀮𑀁, 𑀕𑀘𑁆𑀙𑀸𑀫𑀸’’𑀢𑀺. 𑀧𑀼𑀦 𑀭𑀜𑁆𑀜𑁄 𑀯𑀘𑀦𑁂𑀦𑀸𑀳𑀁𑀲𑀼 𑁋 ‘‘𑀭𑀸𑀚𑀸, 𑀪𑀦𑁆𑀢𑁂, 𑀆𑀳 𑁋 ‘𑀏𑀢𑀁 𑀫𑁂𑀖𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀫𑀫 𑀧𑀺𑀢𑀼 𑀲𑀦𑁆𑀢𑀓𑀁 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑀁 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀏𑀢𑁆𑀣 𑀣𑁂𑀭𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀽’’’𑀢𑀺. 𑀯𑀲𑀺𑀁𑀲𑀼 𑀣𑁂𑀭𑀸 𑀫𑁂𑀖𑀯𑀦𑁂 𑀉𑀬𑁆𑀬𑀸𑀦𑁂.

𑀭𑀸𑀚𑀸𑀧𑀺 𑀔𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀣𑁂𑀭𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀲𑀼𑀔𑀲𑀬𑀺𑀢𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑁄’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀓𑀧𑁆𑀧𑀢𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀆𑀳𑀭𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫’’𑀦𑁆𑀢𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁 𑀅𑀤𑀸𑀲𑀺. 𑀲𑀳 ¶ 𑀉𑀤𑀓𑀧𑀸𑀢𑁂𑀦 𑀧𑀣𑀯𑀻 𑀓𑀫𑁆𑀧𑀺. 𑀅𑀬𑀁 𑀫𑀳𑀸𑀯𑀺𑀳𑀸𑀭𑁂 𑀧𑀞𑀫𑁄 𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺. 𑀭𑀸𑀚𑀸 𑀪𑀻𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀢𑀻’’𑀢𑀺? ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺; 𑀇𑀤𑀜𑁆𑀘 𑀧𑀞𑀫𑀁 𑀯𑀺𑀳𑀸𑀭𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀭𑀸𑀚𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ¶ 𑀧𑀲𑀻𑀤𑀺. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂𑀧𑀺 𑀭𑀸𑀚𑀕𑁂𑀳𑁂𑀬𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀦𑀦𑁆𑀤𑀦𑀯𑀦𑁂 𑀅𑀦𑀫𑀢𑀕𑁆𑀕𑀺𑀬𑀸𑀦𑀺 𑀓𑀣𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀟𑁆𑀠𑀦𑀯𑀫𑀸𑀦𑀁 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 ¶ 𑀘 𑀦𑀦𑁆𑀤𑀦𑀯𑀦𑀁 𑀲𑀸𑀲𑀦𑀲𑁆𑀲 𑀚𑁄𑀢𑀺𑀧𑀸𑀢𑀼𑀪𑀸𑀯𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀚𑁄𑀢𑀺𑀯𑀦’’𑀦𑁆𑀢𑀺 𑀦𑀸𑀫𑀁 𑀮𑀪𑀺. 𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀣𑁂𑀭𑀸 𑀅𑀦𑁆𑀢𑁂𑀧𑀼𑀭𑁂 𑀭𑀜𑁆𑀜𑁄 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀁 𑀓𑀣𑀬𑀺𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀼.

𑀅𑀣 𑀔𑁄 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀣𑁂𑀭𑁄, 𑀅𑀫𑁆𑀳𑁂 𑀕𑀸𑀴𑁆𑀳𑁂𑀦 𑀑𑀯𑀸𑀤𑁂𑀦 𑀑𑀯𑀤𑀢𑀺; 𑀕𑀘𑁆𑀙𑁂𑀬𑁆𑀬 𑀦𑀼 𑀔𑁄’’𑀢𑀺? 𑀅𑀫𑀘𑁆𑀘𑀸 ‘‘𑀢𑀼𑀫𑁆𑀳𑁂𑀳𑀺, 𑀤𑁂𑀯, 𑀣𑁂𑀭𑁄 𑀅𑀬𑀸𑀘𑀺𑀢𑁄 𑀲𑀬𑀫𑁂𑀯 𑀆𑀕𑀢𑁄; 𑀢𑀲𑁆𑀫𑀸 𑀢𑀲𑁆𑀲 𑀅𑀦𑀸𑀧𑀼𑀘𑁆𑀙𑀸𑀯 𑀕𑀫𑀦𑀫𑁆𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑁆𑀯𑁂 𑀘 𑀤𑁂𑀯𑀺𑀬𑁄 𑀆𑀭𑁄𑀧𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀁 𑀅𑀕𑀫𑀸𑀲𑀺 𑀫𑀳𑀜𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦. 𑀕𑀦𑁆𑀢𑁆𑀯𑀸 𑀤𑁂𑀯𑀺𑀬𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀣𑁂𑀭𑀸𑀦𑀁 𑀲𑀫𑀻𑀧𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀭𑀽𑀧𑁄 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀢𑀢𑁄 𑀦𑀁 𑀣𑁂𑀭𑁄 𑀆𑀳 𑁋 ‘‘𑀓𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀏𑀯𑀁 𑀓𑀺𑀮𑀫𑀫𑀸𑀦𑁄 𑀆𑀕𑀢𑁄’’𑀢𑀺? ‘‘‘𑀢𑀼𑀫𑁆𑀳𑁂 𑀫𑀫 𑀕𑀸𑀴𑁆𑀳𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀕𑀦𑁆𑀢𑀼𑀓𑀸𑀫𑀸 𑀦𑀼 𑀔𑁄’𑀢𑀺 𑀚𑀸𑀦𑀦𑀢𑁆𑀣𑀁, 𑀪𑀦𑁆𑀢𑁂’’𑀢𑀺. ‘‘𑀦 𑀫𑀬𑀁, 𑀫𑀳𑀸𑀭𑀸𑀚, 𑀕𑀦𑁆𑀢𑀼𑀓𑀸𑀫𑀸; 𑀅𑀧𑀺𑀘 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁄 𑀦𑀸𑀫𑀸𑀬𑀁 𑀫𑀳𑀸𑀭𑀸𑀚, 𑀢𑀢𑁆𑀭 𑀲𑀫𑀡𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀝𑁆𑀞𑀸𑀦𑀁 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀅𑀭𑀺𑀝𑁆𑀞𑁄 𑀦𑀸𑀫 𑀅𑀫𑀘𑁆𑀘𑁄 𑀧𑀜𑁆𑀘𑀧𑀡𑁆𑀡𑀸𑀲𑀸𑀬 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀭𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑁄 𑀆𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀤𑁂𑀯, 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀡𑁂, 𑀧𑀩𑁆𑀩𑀚𑀲𑁆𑀲𑀽’’𑀢𑀺 𑀭𑀸𑀚𑀸 𑀅𑀦𑀼𑀚𑀸𑀦𑀺𑀢𑁆𑀯𑀸 𑀣𑁂𑀭𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀢𑀤𑀳𑁂𑀯 𑀧𑀩𑁆𑀩𑀸𑀚𑁂𑀲𑀺. 𑀲𑀩𑁆𑀩𑁂 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀭𑀸𑀚𑀸𑀧𑀺 𑀔𑁄 𑀢𑀗𑁆𑀔𑀡𑁂𑀬𑁂𑀯 𑀓𑀡𑁆𑀝𑀓𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀲𑀝𑁆𑀞𑀺𑀬𑀸 𑀮𑁂𑀡𑁂𑀲𑀼 𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀕𑀭𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀧𑀺 𑀣𑁂𑀭𑀸 ¶ 𑀤𑀲𑀪𑀸𑀢𑀺𑀓𑀲𑀫𑀸𑀓𑀼𑀮𑀁 𑀭𑀸𑀚𑀓𑀼𑀮𑀁 𑀧𑀲𑀸𑀤𑁂𑀢𑁆𑀯𑀸 𑀫𑀳𑀸𑀚𑀦𑀁 𑀑𑀯𑀤𑀫𑀸𑀦𑀸 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀯𑀲𑁆𑀲𑀁 𑀯𑀲𑀺𑀁𑀲𑀼. 𑀢𑀤𑀸𑀧𑀺 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀧𑀞𑀫𑀁 𑀯𑀲𑁆𑀲𑀁 𑀉𑀧𑀕𑀢𑀸 𑀤𑁆𑀯𑀸𑀲𑀝𑁆𑀞𑀺 ¶ 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑀳𑀺𑀦𑁆𑀤𑁄 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀉𑀧𑁄𑀲𑀣𑀤𑀺𑀯𑀲𑁂 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀳𑀺 𑀘𑀺𑀭𑀤𑀺𑀝𑁆𑀞𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀦𑀸𑀣𑀯𑀸𑀲𑀁 𑀯𑀲𑀺𑀫𑁆𑀳, 𑀇𑀘𑁆𑀙𑀸𑀫 𑀫𑀬𑀁 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀸𑀫𑀺, 𑀅𑀬𑀜𑁆𑀘 𑀫𑀳𑀸𑀚𑀦𑁄 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀉𑀓𑁆𑀓𑀡𑁆𑀞𑀺𑀢𑀢𑁆𑀣𑀸’’𑀢𑀺? ‘‘𑀘𑀺𑀭𑀤𑀺𑀝𑁆𑀞𑁄 𑀦𑁄, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑁂𑀦𑀫𑁆𑀳 𑀉𑀓𑁆𑀓𑀡𑁆𑀞𑀺𑀢𑀸’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀯𑁄𑀘𑀼𑀢𑁆𑀣 𑁋 ‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’’𑀢𑀺. ‘‘𑀓𑀺𑀜𑁆𑀘𑀸𑀧𑀺, 𑀫𑀳𑀸𑀭𑀸𑀚, 𑀧𑀭𑀺𑀦𑀺𑀩𑁆𑀩𑀼𑀢𑁄; 𑀅𑀣 𑀔𑁆𑀯𑀲𑁆𑀲 𑀲𑀭𑀻𑀭𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺. ‘‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂, 𑀣𑀽𑀧𑀧𑀢𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑁂 𑀆𑀓𑀗𑁆𑀔𑀣𑀸𑀢𑀺. 𑀓𑀭𑁄𑀫𑀺 ¶ , 𑀪𑀦𑁆𑀢𑁂, 𑀣𑀽𑀧𑀁, 𑀪𑀽𑀫𑀺𑀪𑀸𑀕𑀁 𑀤𑀸𑀦𑀺 𑀯𑀺𑀘𑀺𑀦𑀸𑀣; 𑀅𑀧𑀺𑀘, 𑀪𑀦𑁆𑀢𑁂, 𑀥𑀸𑀢𑀼𑀬𑁄 𑀓𑀼𑀢𑁄 𑀮𑀘𑁆𑀙𑀸𑀫𑀸’’𑀢𑀺? ‘‘𑀲𑀼𑀫𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀲𑀼𑀫𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 𑀤𑀸𑀦𑀺, 𑀪𑀦𑁆𑀢𑁂, 𑀥𑀸𑀢𑀼𑀬𑁄 𑀮𑀘𑁆𑀙𑀸𑀫𑀸’’𑀢𑀺? 𑀲𑀼𑀫𑀦𑁄 𑀆𑀳 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀯𑀻𑀣𑀺𑀬𑁄 𑀲𑁄𑀥𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀧𑀼𑀡𑁆𑀡𑀖𑀝𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀧𑀭𑀺𑀚𑀦𑁄 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑁂 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀭𑀺 𑀘𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀬𑀸𑀳𑀺. 𑀅𑀤𑁆𑀥𑀸 𑀢𑀲𑁆𑀫𑀺𑀁 𑀞𑀸𑀦𑁂 ¶ 𑀥𑀸𑀢𑀼𑀬𑁄 𑀮𑀘𑁆𑀙𑀲𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀣𑁂𑀭𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀭𑀸𑀬𑀲𑁆𑀫𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀲𑀼𑀫𑀦𑀲𑀸𑀫𑀡𑁂𑀭𑀁 𑀆𑀳 𑁋 ‘‘𑀕𑀘𑁆𑀙 𑀢𑁆𑀯𑀁, 𑀲𑀸𑀫𑀡𑁂𑀭, 𑀚𑀫𑁆𑀩𑀼𑀤𑀻𑀧𑁂 𑀢𑀯 𑀅𑀬𑁆𑀬𑀓𑀁 𑀅𑀲𑁄𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀏𑀯𑀁 𑀯𑀤𑁂𑀳𑀺 𑁋 ‘𑀲𑀳𑀸𑀬𑁄 𑀯𑁄, 𑀫𑀳𑀸𑀭𑀸𑀚, 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀦𑁆𑀦𑁄 𑀣𑀽𑀧𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀳𑀢𑁆𑀣𑁂 𑀥𑀸𑀢𑀼 𑀅𑀢𑁆𑀣𑀺 𑀢𑀁 𑀫𑁂 𑀤𑁂𑀣𑀸’𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀳𑀺 𑁋 ‘𑀢𑀼𑀫𑁆𑀳𑀸𑀓𑀁 𑀓𑀺𑀭, 𑀫𑀳𑀸𑀭𑀸𑀚, 𑀳𑀢𑁆𑀣𑁂 𑀤𑁆𑀯𑁂 𑀥𑀸𑀢𑀼𑀬𑁄 𑀅𑀢𑁆𑀣𑀺 𑁋 𑀤𑀓𑁆𑀔𑀺𑀡𑀤𑀸𑀞𑀸 𑀘 𑀤𑀓𑁆𑀔𑀺𑀡𑀓𑁆𑀔𑀓𑀜𑁆𑀘; 𑀢𑀢𑁄 𑀢𑀼𑀫𑁆𑀳𑁂 𑀤𑀓𑁆𑀔𑀺𑀡𑀤𑀸𑀞𑀁 𑀧𑀽𑀚𑁂𑀣, 𑀤𑀓𑁆𑀔𑀺𑀡𑀓𑁆𑀔𑀓𑀁 𑀧𑀦 𑀫𑀬𑁆𑀳𑀁 𑀤𑁂𑀣𑀸’𑀢𑀺. 𑀏𑀯𑀜𑁆𑀘 𑀦𑀁 𑀯𑀤𑁂𑀳𑀺 𑁋 ‘𑀓𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀳𑀺𑀡𑀺𑀢𑁆𑀯𑀸 𑀧𑀫𑀚𑁆𑀚𑀲𑀻’’’𑀢𑀺?

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑀼𑀫𑀦𑁄 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀤𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀭𑀜𑁆𑀜𑁄 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀸𑀫𑀡𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀯𑀭𑀫𑀼𑀢𑁆𑀢𑀲𑀤𑀺𑀲𑀸𑀦𑀁 𑀥𑀸𑀢𑀽𑀦𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀪𑀦𑁆𑀢𑁂 𑀲𑀼𑀫𑀦, 𑀆𑀳𑀺𑀡𑁆𑀟𑀲𑀻’’𑀢𑀺 𑀆𑀳. ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑁂𑀲𑁂𑀢𑁆𑀯𑀸 𑀓𑀲𑁆𑀫𑀸 𑀧𑀫𑀚𑁆𑀚𑀲𑀻’’𑀢𑀺? ‘‘𑀦𑀧𑁆𑀧𑀫𑀚𑁆𑀚𑀸𑀫𑀺, 𑀪𑀦𑁆𑀢𑁂, 𑀯𑀤𑁂𑀳𑀺 𑁋 ‘𑀓𑀺𑀁 𑀓𑀭𑁄𑀫𑀻’’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀳𑀢𑁆𑀣𑁂 𑀤𑁆𑀯𑁂 𑀥𑀸𑀢𑀼𑀬𑁄 𑀅𑀢𑁆𑀣𑀺 𑁋 𑀤𑀓𑁆𑀔𑀺𑀡𑀤𑀸𑀞𑀸 𑀘 𑀤𑀓𑁆𑀔𑀺𑀡𑀓𑁆𑀔𑀓𑀜𑁆𑀘; 𑀢𑀢𑁄 𑀢𑀼𑀫𑁆𑀳𑁂 𑀤𑀓𑁆𑀔𑀺𑀡𑀤𑀸𑀞𑀁 𑀧𑀽𑀚𑁂𑀣, 𑀤𑀓𑁆𑀔𑀺𑀡𑀓𑁆𑀔𑀓𑀁 𑀧𑀦 𑀫𑀬𑁆𑀳𑀁 𑀤𑁂𑀣𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁄𑀚𑀦𑀧𑁆𑀧𑀫𑀸𑀡𑀁 𑀫𑀡𑀺𑀣𑀽𑀧𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀫𑀦𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀔𑁄 𑀫𑀳𑀺𑀦𑁆𑀤𑀧𑀫𑀼𑀔𑀸 𑀲𑀩𑁆𑀩𑁂𑀧𑀺 𑀢𑁂 𑀫𑀳𑀸𑀦𑀸𑀕𑀸 ¶ 𑀅𑀲𑁄𑀓𑀥𑀫𑁆𑀫𑀭𑀸𑀚𑁂𑀦 𑀤𑀺𑀦𑁆𑀦𑀥𑀸𑀢𑀼𑀬𑁄 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀁 𑀆𑀤𑀸𑀬 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀫𑀕𑀫𑀁𑀲𑀼 ¶ . 𑀭𑀸𑀚𑀸𑀧𑀺 𑀔𑁄 𑀲𑀼𑀫𑀦𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀲𑀬𑀁 𑀫𑀗𑁆𑀕𑀮𑀳𑀢𑁆𑀣𑀺𑀫𑀢𑁆𑀣𑀓𑁂 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀫𑀳𑀸𑀦𑀸𑀕𑀯𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀸𑀢𑀼, 𑀙𑀢𑁆𑀢𑀁 𑀅𑀧𑀦𑀫𑀢𑀼, 𑀫𑀗𑁆𑀕𑀮𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀼, 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀫𑀬𑁆𑀳𑀁 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀢𑀽’’𑀢𑀺. 𑀲𑀳 𑀭𑀜𑁆𑀜𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀙𑀢𑁆𑀢𑀁 𑀅𑀧𑀦𑀫𑀺, 𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺, 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀳𑀺. 𑀭𑀸𑀚𑀸 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑀕𑀢𑁆𑀢𑁄 𑀯𑀺𑀬 𑀧𑀭𑀫𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀥𑀸𑀢𑀼𑀁, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀳𑀢𑁆𑀣𑀺𑀓𑀼𑀫𑁆𑀪𑀫𑁆𑀳𑀺𑀬𑁂𑀯 𑀢𑀸𑀯, 𑀫𑀳𑀸𑀭𑀸𑀚, 𑀞𑀧𑁂𑀳𑀻’’𑀢𑀺. 𑀭𑀸𑀚𑀸 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀓𑀼𑀫𑁆𑀪𑁂 𑀞𑀧𑁂𑀲𑀺. 𑀧𑀫𑀼𑀤𑀺𑀢𑁄 𑀦𑀸𑀕𑁄 𑀓𑁄𑀜𑁆𑀘𑀦𑀸𑀤𑀁 𑀦𑀤𑀺. 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. ‘‘𑀧𑀘𑁆𑀘𑀦𑁆𑀢𑁂𑀧𑀺 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀸𑀢𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀫𑀦𑀼𑀲𑁆𑀲𑀸 𑀧𑀫𑁄𑀤𑀺𑀁𑀲𑀼. 𑀏𑀯𑀁 𑀇𑀤𑁆𑀥𑀸𑀦𑀼𑀪𑀸𑀯𑀲𑀺𑀭𑀺𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀻𑀢𑀺𑀁 𑀚𑀦𑀬𑀦𑁆𑀢𑁄 𑁋

𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀯𑀻𑀭𑁄, 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀇𑀥;

𑀆𑀕𑀦𑁆𑀢𑁆𑀯𑀸 𑀤𑁂𑀯𑀮𑁄𑀓𑀫𑁆𑀳𑀸, 𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑀅𑀣𑀲𑁆𑀲 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀅𑀦𑁂𑀓𑀢𑀸𑀴𑀸𑀯𑀘𑀭𑀧𑀭𑀺𑀯𑀸𑀭𑀺𑀢𑁄 𑀅𑀢𑀺𑀯𑀺𑀬 𑀉𑀴𑀸𑀭𑁂𑀦 𑀧𑀽𑀚𑀸𑀲𑀓𑁆𑀓𑀸𑀭𑁂𑀦 𑀲𑀓𑁆𑀓𑀭𑀺𑀬𑀫𑀸𑀦𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄𑀯 𑀳𑀼𑀢𑁆𑀯𑀸, 𑀅𑀧𑀲𑀓𑁆𑀓𑀦𑁆𑀢𑁄 ¶ 𑀬𑀸𑀯 𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑁆𑀯𑀸𑀭𑀁 𑀢𑀸𑀯 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑀮𑀦𑀸𑀕𑀭𑁂𑀦 ¶ 𑀉𑀴𑀸𑀭𑀸𑀬 𑀧𑀽𑀚𑀸𑀬 𑀓𑀭𑀻𑀬𑀫𑀸𑀦𑀸𑀬 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑀽𑀧𑀸𑀭𑀸𑀫𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀫𑀳𑁂𑀚𑀯𑀢𑁆𑀣𑀼 𑀦𑀸𑀫 𑀓𑀺𑀭 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀦 𑀣𑀽𑀧𑀸𑀭𑀸𑀫𑀸𑀪𑀺𑀫𑀼𑀔𑁄𑀬𑁂𑀯 𑀧𑀝𑀺𑀦𑀺𑀯𑀢𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀁 𑀳𑁄𑀢𑀺.

𑀅𑀢𑀻𑀢𑁂 𑀓𑀺𑀭 𑀅𑀬𑀁 𑀤𑀻𑀧𑁄 𑀑𑀚𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀅𑀪𑀬𑁄 𑀦𑀸𑀫, 𑀦𑀕𑀭𑀁 𑀅𑀪𑀬𑀧𑀼𑀭𑀁 𑀦𑀸𑀫, 𑀘𑁂𑀢𑀺𑀬𑀧𑀩𑁆𑀩𑀢𑁄 𑀤𑁂𑀯𑀓𑀽𑀝𑀧𑀩𑁆𑀩𑀢𑁄 𑀦𑀸𑀫, 𑀣𑀽𑀧𑀸𑀭𑀸𑀫𑁄 𑀧𑀝𑀺𑀬𑀸𑀭𑀸𑀫𑁄 𑀦𑀸𑀫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀲𑀸𑀯𑀓𑁄 𑀫𑀳𑀸𑀤𑁂𑀯𑁄 𑀦𑀸𑀫 𑀣𑁂𑀭𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀤𑁂𑀯𑀓𑀽𑀝𑁂 𑀧𑀢𑀺𑀝𑁆𑀞𑀸𑀲𑀺, 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀘𑁂𑀢𑀺𑀬𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀑𑀚𑀤𑀻𑀧𑁂 𑀲𑀢𑁆𑀢𑀸 𑀧𑀚𑁆𑀚𑀭𑀓𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀫𑀸𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀸𑀯𑀤𑁂𑀯 𑀧𑀚𑁆𑀚𑀭𑀓𑁄 𑀯𑀽𑀧𑀲𑀦𑁆𑀢𑁄. 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀥𑀫𑀓𑀭𑀡𑀁 ¶ 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀬𑀸𑀭𑀸𑀫𑁂 𑀘𑁂𑀢𑀺𑀬𑀁 𑀅𑀓𑀁𑀲𑀼. 𑀫𑀳𑀸𑀤𑁂𑀯𑁄 𑀤𑀻𑀧𑀁 𑀅𑀦𑀼𑀲𑀸𑀲𑀦𑁆𑀢𑁄 𑀯𑀺𑀳𑀸𑀲𑀺.

𑀓𑁄𑀡𑀸𑀕𑀫𑀦𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀅𑀬𑀁 𑀤𑀻𑀧𑁄 𑀯𑀭𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀲𑀫𑁂𑀡𑁆𑀟𑀻 𑀦𑀸𑀫, 𑀦𑀕𑀭𑀁 𑀯𑀟𑁆𑀠𑀫𑀸𑀦𑀁 𑀦𑀸𑀫 ¶ , 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀓𑀽𑀝𑁄 𑀦𑀸𑀫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀭𑀤𑀻𑀧𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀳𑁄𑀢𑀺 𑀤𑀼𑀩𑁆𑀪𑀺𑀓𑁆𑀔𑀁 𑀤𑀼𑀲𑁆𑀲𑀲𑁆𑀲𑀁. 𑀲𑀢𑁆𑀢𑀸 𑀙𑀸𑀢𑀓𑀭𑁄𑀕𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀤𑁂𑀯𑁄 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀺. 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀫𑀳𑀸𑀲𑀼𑀫𑀦𑀁 𑀦𑀸𑀫 𑀣𑁂𑀭𑀁 𑀤𑀻𑀧𑁂 𑀞𑀧𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀁𑀲𑀼.

𑀓𑀲𑁆𑀲𑀧𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀅𑀬𑀁 𑀤𑀻𑀧𑁄 𑀫𑀡𑁆𑀟𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀚𑀬𑀦𑁆𑀢𑁄 𑀦𑀸𑀫, 𑀦𑀕𑀭𑀁 𑀯𑀺𑀲𑀸𑀮𑀁 𑀦𑀸𑀫, 𑀧𑀩𑁆𑀩𑀢𑁄 𑀲𑀼𑀪𑀓𑀽𑀝𑁄 𑀦𑀸𑀫 ¶ . 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀡𑁆𑀟𑀤𑀻𑀧𑁂 𑀫𑀳𑀸𑀯𑀺𑀯𑀸𑀤𑁄 𑀳𑁄𑀢𑀺. 𑀩𑀳𑀽 𑀲𑀢𑁆𑀢𑀸 𑀓𑀮𑀳𑀯𑀺𑀕𑁆𑀕𑀳𑀚𑀸𑀢𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀲𑁆𑀲𑀧𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀲𑀩𑁆𑀩𑀦𑀦𑁆𑀤𑀁 𑀦𑀸𑀫 𑀣𑁂𑀭𑀁 𑀤𑀻𑀧𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑀓𑀲𑀸𑀝𑀓𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀁𑀲𑀼. 𑀏𑀯𑀁 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀘𑁂𑀢𑀺𑀬𑀸𑀦𑀺 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀸𑀦𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀦𑀲𑁆𑀲𑀦𑁆𑀢𑀺, 𑀞𑀸𑀦𑀫𑀢𑁆𑀢𑀁 𑀅𑀯𑀲𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀘 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺. 𑀢𑀤𑁂𑀢𑀁 𑀯𑀺𑀦𑀝𑁆𑀞𑁂𑀲𑀼 𑀘𑁂𑀢𑀺𑀬𑁂𑀲𑀼 ¶ 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀓𑀡𑁆𑀝𑀓𑀲𑀫𑀸𑀓𑀺𑀡𑁆𑀡𑀲𑀸𑀔𑁂𑀳𑀺 𑀦𑀸𑀦𑀸𑀕𑀘𑁆𑀙𑁂𑀳𑀺 𑀧𑀭𑀺𑀯𑀼𑀢𑀁 𑀢𑀺𑀝𑁆𑀞𑀢𑀺 𑁋 ‘‘𑀫𑀸 𑀦𑀁 𑀓𑁄𑀘𑀺 𑀉𑀘𑁆𑀙𑀺𑀝𑁆𑀞𑀸𑀲𑀼𑀘𑀺𑀫𑀮𑀓𑀘𑀯𑀭𑁂𑀳𑀺 𑀧𑀤𑀽𑀲𑁂𑀲𑀻’’𑀢𑀺.

𑀅𑀣 𑀔𑁆𑀯𑀲𑁆𑀲 𑀳𑀢𑁆𑀣𑀺𑀦𑁄 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀲𑀩𑁆𑀩𑀕𑀘𑁆𑀙𑁂 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀲𑁄𑀥𑁂𑀢𑁆𑀯𑀸 𑀢𑀁 𑀳𑀢𑁆𑀣𑀢𑀮𑀲𑀤𑀺𑀲𑀁 𑀅𑀓𑀁𑀲𑀼. 𑀳𑀢𑁆𑀣𑀺𑀦𑀸𑀕𑁄 𑀕𑀦𑁆𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀢𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀩𑁄𑀥𑀺𑀭𑀼𑀓𑁆𑀔𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀫𑀢𑁆𑀣𑀓𑀢𑁄 𑀥𑀸𑀢𑀼𑀁 𑀑𑀭𑁄𑀧𑁂𑀢𑀼𑀁 𑀆𑀭𑀪𑀺𑀁𑀲𑀼. 𑀦𑀸𑀕𑁄 𑀑𑀭𑁄𑀧𑁂𑀢𑀼𑀁 𑀦 𑀤𑁂𑀢𑀺. 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦𑀸𑀕𑁄 𑀥𑀸𑀢𑀼𑀁 𑀑𑀭𑁄𑀧𑁂𑀢𑀼𑀁 𑀦 𑀤𑁂𑀢𑀻’’𑀢𑀺? ‘‘𑀆𑀭𑀽𑀴𑁆𑀳𑀁, 𑀫𑀳𑀸𑀭𑀸𑀚, 𑀑𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀅𑀪𑀬𑀯𑀸𑀧𑀺𑀬𑀸 𑀉𑀤𑀓𑀁 ¶ 𑀙𑀺𑀦𑁆𑀦𑀁 𑀳𑁄𑀢𑀺. 𑀲𑀫𑀦𑁆𑀢𑀸 𑀪𑀽𑀫𑀺 𑀨𑀮𑀺𑀢𑀸 𑀳𑁄𑀢𑀺, 𑀲𑀼𑀉𑀤𑁆𑀥𑀭𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸. 𑀢𑀢𑁄 𑀫𑀳𑀸𑀚𑀦𑁄 𑀲𑀻𑀖𑀁 𑀲𑀻𑀖𑀁 𑀫𑀢𑁆𑀢𑀺𑀓𑀁 𑀆𑀳𑀭𑀺𑀢𑁆𑀯𑀸 𑀳𑀢𑁆𑀣𑀺𑀓𑀼𑀫𑁆𑀪𑀧𑁆𑀧𑀫𑀸𑀡𑀁 𑀯𑀢𑁆𑀣𑀼𑀫𑀓𑀸𑀲𑀺. 𑀢𑀸𑀯𑀤𑁂𑀯 𑀘 𑀣𑀽𑀧𑀓𑀭𑀡𑀢𑁆𑀣𑀁 𑀇𑀝𑁆𑀞𑀓𑀸 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀦 𑀬𑀸𑀯 𑀇𑀝𑁆𑀞𑀓𑀸 𑀧𑀭𑀺𑀦𑀺𑀝𑁆𑀞𑀦𑁆𑀢𑀺 𑀢𑀸𑀯 𑀳𑀢𑁆𑀣𑀺𑀦𑀸𑀕𑁄 𑀓𑀢𑀺𑀧𑀸𑀳𑀁 𑀤𑀺𑀯𑀸 𑀩𑁄𑀥𑀺𑀭𑀼𑀓𑁆𑀔𑀝𑁆𑀞𑀸𑀦𑁂 𑀳𑀢𑁆𑀣𑀺𑀲𑀸𑀮𑀸𑀬𑀁 𑀢𑀺𑀝𑁆𑀞𑀢𑀺, 𑀭𑀢𑁆𑀢𑀺𑀁 𑀣𑀽𑀧𑀧𑀢𑀺𑀝𑁆𑀞𑀸𑀦𑀪𑀽𑀫𑀺𑀁 𑀧𑀭𑀺𑀬𑀸𑀬𑀢𑀺. 𑀅𑀣 𑀯𑀢𑁆𑀣𑀼𑀁 𑀘𑀺𑀦𑀸𑀧𑁂𑀢𑁆𑀯𑀸 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀻𑀤𑀺𑀲𑁄, 𑀪𑀦𑁆𑀢𑁂, 𑀣𑀽𑀧𑁄 𑀓𑀸𑀢𑀩𑁆𑀩𑁄’’𑀢𑀺? ‘‘𑀯𑀻𑀳𑀺𑀭𑀸𑀲𑀺𑀲𑀤𑀺𑀲𑁄, 𑀫𑀳𑀸𑀭𑀸𑀚𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀚𑀗𑁆𑀖𑀧𑁆𑀧𑀫𑀸𑀡𑀁 𑀣𑀽𑀧𑀁 𑀘𑀺𑀦𑀸𑀧𑁂𑀢𑁆𑀯𑀸 𑀥𑀸𑀢𑀼𑀑𑀭𑁄𑀧𑀦𑀢𑁆𑀣𑀸𑀬 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀲𑀓𑀮𑀦𑀕𑀭𑀜𑁆𑀘 𑀚𑀦𑀧𑀤𑁄 𑀘 𑀥𑀸𑀢𑀼𑀫𑀳𑀤𑀲𑁆𑀲𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺. 𑀲𑀦𑁆𑀦𑀺𑀧𑀢𑀺𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀫𑀳𑀸𑀚𑀦𑀓𑀸𑀬𑁂 𑀤𑀲𑀩𑀮𑀲𑁆𑀲 ¶ 𑀥𑀸𑀢𑀼 𑀳𑀢𑁆𑀣𑀺𑀓𑀼𑀫𑁆𑀪𑀢𑁄 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀢𑁂𑀳𑀺 𑀢𑁂𑀳𑀺 𑀥𑀸𑀢𑀼𑀧𑁆𑀧𑀤𑁂𑀲𑁂𑀳𑀺 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀉𑀤𑀓𑀥𑀸𑀭𑀸 𑀘 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀘 𑀧𑀯𑀢𑁆𑀢𑀦𑁆𑀢𑀺, 𑀲𑀸𑀯𑀢𑁆𑀣𑀺𑀬𑀁 𑀓𑀡𑁆𑀟𑀫𑁆𑀩𑀫𑀽𑀮𑁂 𑀪𑀕𑀯𑀢𑀸 𑀤𑀲𑁆𑀲𑀺𑀢𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀫𑁂𑀯 ¶ 𑀧𑀸𑀝𑀺𑀳𑀸𑀭𑀺𑀬𑀁 𑀅𑀳𑁄𑀲𑀺. 𑀢𑀜𑁆𑀘 𑀔𑁄 𑀦𑁂𑀯 𑀣𑁂𑀭𑀸𑀦𑀼𑀪𑀸𑀯𑁂𑀦, 𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦; 𑀅𑀧𑀺𑀘 𑀔𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑁂𑀯. 𑀪𑀕𑀯𑀸 𑀓𑀺𑀭 𑀥𑀭𑀫𑀸𑀦𑁄𑀯 𑀅𑀥𑀺𑀝𑁆𑀞𑀸𑀲𑀺 𑁋 ‘‘𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑁂 𑀫𑀫 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀧𑀢𑀺𑀝𑁆𑀞𑀸𑀦𑀤𑀺𑀯𑀲𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀳𑁄𑀢𑀽’’𑀢𑀺.

‘‘𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺. (𑀅𑀧. 𑀣𑁂𑀭 𑁧.𑁧.𑁮𑁨);

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀺𑀭 𑀇𑀫𑀁 𑀤𑀻𑀧𑀁 𑀥𑀭𑀫𑀸𑀦𑀓𑀸𑀮𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀫𑀸𑀲𑀺. 𑀧𑀞𑀫𑀁 𑁋 𑀬𑀓𑁆𑀔𑀤𑀫𑀦𑀢𑁆𑀣𑀁 𑀏𑀓𑀓𑁄𑀯 𑀆𑀕𑀦𑁆𑀢𑁆𑀯𑀸 𑀬𑀓𑁆𑀔𑁂 𑀤𑀫𑁂𑀢𑁆𑀯𑀸 ‘‘𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀭𑀓𑁆𑀔𑀁 𑀓𑀭𑁄𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀤𑀻𑀧𑀁 𑀆𑀯𑀺𑀚𑁆𑀚𑀺. 𑀤𑀼𑀢𑀺𑀬𑀁 𑁋 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀁 𑀦𑀸𑀕𑀭𑀸𑀚𑀽𑀦𑀁 𑀤𑀫𑀦𑀢𑁆𑀣𑀸𑀬 𑀏𑀓𑀓𑁄𑀯 𑀆𑀕𑀦𑁆𑀢𑁆𑀯𑀸 𑀢𑁂 𑀤𑀫𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑀺𑀬𑀁 𑁋 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀣𑀽𑀧𑀸𑀭𑀸𑀫𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀳𑀸𑀩𑁄𑀥𑀺𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀘 𑀫𑀳𑀺𑀬𑀗𑁆𑀕𑀡𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀼𑀢𑀺𑀬𑀗𑁆𑀕𑀡𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀓𑀮𑁆𑀬𑀸𑀡𑀺𑀬𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀇𑀤𑀫𑀲𑁆𑀲 𑀘𑀢𑀼𑀢𑁆𑀣𑀁 𑀥𑀸𑀢𑀼𑀲𑀭𑀻𑀭𑁂𑀦 𑀆𑀕𑀫𑀦𑀁.

𑀥𑀸𑀢𑀼𑀲𑀭𑀻𑀭𑀢𑁄 ¶ 𑀘 𑀧𑀦𑀲𑁆𑀲 𑀦𑀺𑀓𑁆𑀔𑀦𑁆𑀢𑀉𑀤𑀓𑀨𑀼𑀲𑀺𑀢𑁂𑀳𑀺 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀢𑀮𑁂 𑀦 𑀓𑁄𑀘𑀺 𑀅𑀨𑀼𑀝𑁆𑀞𑁄𑀓𑀸𑀲𑁄 𑀦𑀸𑀫 𑀅𑀳𑁄𑀲𑀺. 𑀏𑀯𑀫𑀲𑁆𑀲 𑀢𑀁 𑀥𑀸𑀢𑀼𑀲𑀭𑀻𑀭𑀁 𑀉𑀤𑀓𑀨𑀼𑀲𑀺𑀢𑁂𑀳𑀺 𑀢𑀫𑁆𑀩𑀧𑀡𑁆𑀡𑀺𑀢𑀮𑀲𑁆𑀲 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀲𑀺 ¶ . 𑀭𑀸𑀚𑀸 𑀲𑀨𑀮𑀁 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑀁 𑀫𑀜𑁆𑀜𑀫𑀸𑀦𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀥𑀸𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀳 𑀥𑀸𑀢𑀼𑀧𑀢𑀺𑀝𑁆𑀞𑀸𑀧𑀦𑁂𑀦 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀜𑁆𑀘 𑀧𑀦 𑀥𑀸𑀢𑀼𑀧𑀸𑀝𑀺𑀳𑀸𑀭𑀺𑀬𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀪𑀸𑀢𑀸 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺. 𑀘𑁂𑀢𑀭𑀝𑁆𑀞𑀕𑀸𑀫𑀢𑁄 𑀧𑀜𑁆𑀘 𑀤𑀸𑀭𑀓𑀲𑀢𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀢𑀣𑀸 𑀤𑁆𑀯𑀸𑀭𑀫𑀡𑁆𑀟𑀮𑀸𑀤𑀻𑀳𑀺 𑀕𑀸𑀫𑀓𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀘𑀧𑀜𑁆𑀘 ¶ 𑀤𑀸𑀭𑀓𑀲𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀅𑀦𑁆𑀢𑁄𑀦𑀕𑀭𑀢𑁄 𑀘 𑀩𑀳𑀺𑀦𑀕𑀭𑀢𑁄 𑀘 𑀧𑀩𑁆𑀩𑀚𑀺𑀢𑀸𑀦𑀺 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀦𑀺𑀝𑁆𑀞𑀺𑀢𑁂 𑀧𑀦 𑀣𑀽𑀧𑀲𑁆𑀫𑀺𑀁 𑀭𑀸𑀚𑀸 𑀘 𑀭𑀸𑀚𑀪𑀸𑀢𑀺𑀓𑀸 𑀘 𑀤𑁂𑀯𑀺𑀬𑁄 𑀘 𑀤𑁂𑀯𑀦𑀸𑀕𑀬𑀓𑁆𑀔𑀸𑀦𑀫𑁆𑀧𑀺 𑀯𑀺𑀫𑁆𑀳𑀬𑀓𑀭𑀁 𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓𑀁 𑀧𑀽𑀚𑀁 𑀅𑀓𑀁𑀲𑀼. 𑀦𑀺𑀝𑁆𑀞𑀺𑀢𑀸𑀬 𑀧𑀦 𑀥𑀸𑀢𑀼𑀧𑀽𑀚𑀸𑀬 𑀧𑀢𑀺𑀝𑁆𑀞𑀺𑀢𑁂 𑀥𑀸𑀢𑀼𑀯𑀭𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀫𑁂𑀖𑀯𑀦𑀼𑀬𑁆𑀬𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀅𑀦𑀼𑀴𑀸 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀴𑀸, 𑀪𑀦𑁆𑀢𑁂, 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺. ‘‘𑀦, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀫𑀸𑀢𑀼𑀕𑀸𑀫𑀁 𑀧𑀩𑁆𑀩𑀸𑀚𑁂𑀢𑀼𑀁 𑀓𑀧𑁆𑀧𑀢𑀺. 𑀧𑀸𑀝𑀮𑀺𑀧𑀼𑀢𑁆𑀢𑁂 𑀧𑀦 𑀫𑀬𑁆𑀳𑀁 𑀪𑀕𑀺𑀦𑀻 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻 𑀦𑀸𑀫 𑀅𑀢𑁆𑀣𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀳𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦, 𑀫𑀳𑀸𑀭𑀸𑀚, 𑀤𑀻𑀧𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀢𑁄 𑀲𑀭𑀲𑀭𑀁𑀲𑀺𑀚𑀸𑀮𑀯𑀺𑀲𑁆𑀲𑀚𑁆𑀚𑀦𑀓𑁂𑀦 𑀩𑁄𑀥𑀺𑀦𑀸 𑀇𑀥 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀣𑀸 𑀲𑀸𑀲𑀦𑀁 𑀧𑀳𑀺𑀡𑁂𑀬𑁆𑀬𑀸𑀲𑀺 𑀬𑀣𑀸 𑀲𑀗𑁆𑀖𑀫𑀺𑀢𑁆𑀢𑀸 𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀅𑀭𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀆𑀳 𑁋 ‘‘𑀲𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁, 𑀢𑀸𑀢, 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀦𑀸 𑀲𑀤𑁆𑀥𑀺𑀁 𑀅𑀬𑁆𑀬𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀆𑀦𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯, 𑀲𑀘𑁂 𑀫𑁂 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺𑀲𑁆𑀲𑀲𑀻’’𑀢𑀺. ‘‘𑀕𑀘𑁆𑀙, 𑀢𑀸𑀢 ¶ , 𑀣𑁂𑀭𑀺𑀁 𑀆𑀦𑁂𑀢𑁆𑀯𑀸 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑁄 𑀭𑀜𑁆𑀜𑁄 𑀘 𑀣𑁂𑀭𑀲𑁆𑀲 𑀘 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀏𑀓𑀤𑀺𑀯𑀲𑁂𑀦𑁂𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀫𑁂𑀯 𑀅𑀕𑀫𑀸𑀲𑀺. 𑀅𑀦𑀼𑀴𑀸𑀧𑀺 𑀔𑁄 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀦𑀕𑀭𑀲𑁆𑀲 𑀏𑀓𑀤𑁂𑀲𑁂 𑀉𑀧𑀲𑁆𑀲𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀭𑀺𑀝𑁆𑀞𑁄𑀧𑀺 𑀢𑀁𑀤𑀺𑀯𑀲𑀫𑁂𑀯 𑀭𑀜𑁆𑀜𑁄 𑀲𑀸𑀲𑀦𑀁 𑀅𑀧𑁆𑀧𑁂𑀲𑀺, 𑀏𑀯𑀜𑁆𑀘 𑀅𑀯𑁄𑀘 𑁋 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀏𑀯𑀫𑀸𑀳 𑁋 ‘𑀲𑀳𑀸𑀬𑀓𑀲𑁆𑀲 𑀓𑀺𑀭 𑀢𑁂 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 ¶ , 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀅𑀬𑁆𑀬𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀧𑀳𑀺𑀡𑀣, 𑀅𑀬𑁆𑀬𑀸𑀬𑁂𑀯 𑀘 𑀲𑀤𑁆𑀥𑀺𑀁 𑀫𑀳𑀸𑀩𑁄𑀥𑀺’’’𑀦𑁆𑀢𑀺. 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀬𑁆𑀬𑁂, 𑀢𑀼𑀫𑁆𑀳𑀸𑀓𑀁 𑀪𑀸𑀢𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀫𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺, 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 ¶ 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺, 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀢𑀁 𑀓𑀺𑀭 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀲𑀸 𑀢𑀸𑀯𑀤𑁂𑀯 𑀢𑀼𑀭𑀺𑀢𑀢𑀼𑀭𑀺𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀪𑀸𑀢𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀏𑀯𑀁 𑀧𑀳𑀺𑀡𑀺, ‘𑀭𑀜𑁆𑀜𑁄 𑀓𑀺𑀭 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀫𑀬𑁆𑀳𑀁 𑀆𑀕𑀫𑀦𑀁 𑀉𑀤𑀺𑀓𑁆𑀔𑀢𑀺’. 𑀕𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧’’𑀦𑁆𑀢𑀺.

𑀭𑀸𑀚𑀸 𑀆𑀳 𑁋 ‘‘𑀅𑀫𑁆𑀫, 𑀧𑀼𑀢𑁆𑀢𑁄𑀧𑀺 𑀫𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀦𑀢𑁆𑀢𑀸 𑀘 𑀫𑁂 𑀲𑀼𑀫𑀦𑀲𑀸𑀫𑀡𑁂𑀭𑁄 𑀫𑀁 𑀙𑀺𑀦𑁆𑀦𑀳𑀢𑁆𑀣𑀁 𑀯𑀺𑀬 𑀓𑀭𑁄𑀦𑁆𑀢𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 ¶ 𑀕𑀢𑀸. 𑀢𑀲𑁆𑀲 𑀫𑀬𑁆𑀳𑀁 𑀢𑁂𑀧𑀺 𑀅𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀲𑁄𑀓𑁄 𑀢𑀯 𑀫𑀼𑀔𑀁 𑀧𑀲𑁆𑀲𑀦𑁆𑀢𑀲𑁆𑀲 𑀯𑀽𑀧𑀲𑀫𑁆𑀫𑀢𑀺! 𑀅𑀮𑀁, 𑀅𑀫𑁆𑀫, 𑀫𑀸 𑀢𑁆𑀯𑀁 𑀅𑀕𑀫𑀸𑀲𑀻’’𑀢𑀺. ‘‘𑀪𑀸𑀭𑀺𑀬𑀁 𑀫𑁂, 𑀫𑀳𑀸𑀭𑀸𑀚, 𑀪𑀸𑀢𑀼 𑀯𑀘𑀦𑀁; 𑀅𑀦𑀼𑀴𑀸𑀧𑀺 𑀔𑀢𑁆𑀢𑀺𑀬𑀸 𑀇𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀧𑀩𑁆𑀩𑀚𑁆𑀚𑀸𑀧𑀼𑀭𑁂𑀓𑁆𑀔𑀸𑀭𑀸 𑀫𑀁 𑀧𑀝𑀺𑀫𑀸𑀦𑁂𑀢𑀺; 𑀕𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀅𑀫𑁆𑀫, 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀓𑀼𑀢𑁄 𑀭𑀜𑁆𑀜𑁄 𑀫𑀳𑀸𑀩𑁄𑀥𑀺? 𑀭𑀸𑀚𑀸 𑀓𑀺𑀭 𑀢𑀢𑁄 𑀧𑀼𑀩𑁆𑀩𑁂 𑀏𑀯 𑀥𑀸𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀅𑀦𑀸𑀕𑀢𑁂 𑀲𑀼𑀫𑀦𑁂 𑀮𑀗𑁆𑀓𑀸𑀤𑀻𑀧𑀁 𑀫𑀳𑀸𑀩𑁄𑀥𑀺𑀁 𑀧𑁂𑀲𑁂𑀢𑀼𑀓𑀸𑀫𑁄, ‘‘𑀓𑀣𑀁 𑀦𑀼 𑀔𑁄 𑀅𑀲𑀢𑁆𑀣𑀖𑀸𑀢𑀸𑀭𑀳𑀁 𑀫𑀳𑀸𑀩𑁄𑀥𑀺𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀬𑀁 𑀅𑀧𑀲𑁆𑀲𑀦𑁆𑀢𑁄 𑀫𑀳𑀸𑀤𑁂𑀯𑀁 𑀦𑀸𑀫 𑀅𑀫𑀘𑁆𑀘𑀁 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀲𑀦𑁆𑀢𑀺, 𑀤𑁂𑀯, 𑀩𑀳𑀽 𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀕𑀦𑁆𑀢𑀩𑁆𑀩𑀁 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧𑀁 𑀦𑁄’’𑀢𑀺? 𑀲𑀗𑁆𑀖𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺.

𑀣𑁂𑀭𑁄 ‘‘𑀕𑀦𑁆𑀢𑀩𑁆𑀩𑀁, 𑀫𑀳𑀸𑀭𑀸𑀚, 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧’’𑀦𑁆𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀧𑀜𑁆𑀘 𑀫𑀳𑀸𑀅𑀥𑀺𑀝𑁆𑀞𑀸𑀦𑀸𑀦𑀺 𑀓𑀣𑁂𑀲𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀕𑀯𑀸 𑀓𑀺𑀭 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀮𑀗𑁆𑀓𑀸𑀤𑀻𑀧𑁂 𑀫𑀳𑀸𑀩𑁄𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬 ‘‘𑀅𑀲𑁄𑀓𑀫𑀳𑀸𑀭𑀸𑀚𑀸 𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑀢𑁆𑀣𑀁 𑀕𑀫𑀺𑀲𑁆𑀲𑀢𑀺, 𑀢𑀤𑀸 𑀫𑀳𑀸𑀩𑁄𑀥𑀺𑀲𑁆𑀲 𑀤𑀓𑁆𑀔𑀺𑀡𑀲𑀸𑀔𑀸 𑀲𑀬𑀫𑁂𑀯 𑀙𑀺𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀫𑁂𑀓𑀫𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀘 ‘‘𑀫𑀳𑀸𑀩𑁄𑀥𑀺 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀤𑀼𑀢𑀺𑀬𑀫𑀥𑀺𑀝𑁆𑀞𑀸𑀦𑀁.

‘‘𑀲𑀢𑁆𑀢𑀫𑁂 ¶ ¶ 𑀤𑀺𑀯𑀲𑁂 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀢𑁄 𑀑𑀭𑀼𑀬𑁆𑀳 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀧𑀢𑁆𑀢𑁂𑀳𑀺 𑀘 𑀨𑀮𑁂𑀳𑀺 𑀘 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀫𑀼𑀜𑁆𑀘𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀢𑀢𑀺𑀬𑀫𑀥𑀺𑀝𑁆𑀞𑀸𑀦𑀁.

‘‘𑀣𑀽𑀧𑀸𑀭𑀸𑀫𑁂 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀘𑁂𑀢𑀺𑀬𑀫𑁆𑀳𑀺 𑀧𑀢𑀺𑀝𑁆𑀞𑀸𑀦𑀤𑀺𑀯𑀲𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀥𑀺𑀝𑁆𑀞𑀸𑀦𑀁.

𑀮𑀗𑁆𑀓𑀸𑀤𑀻𑀧𑀫𑁆𑀳𑀺𑀬𑁂𑀯 𑀫𑁂 𑀤𑁄𑀡𑀫𑀢𑁆𑀢𑀸 𑀥𑀸𑀢𑀼𑀬𑁄 𑀫𑀳𑀸𑀘𑁂𑀢𑀺𑀬𑀫𑁆𑀳𑀺 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 ¶ 𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀧𑀜𑁆𑀘𑀫𑀁 𑀅𑀥𑀺𑀝𑁆𑀞𑀸𑀦𑀦𑁆𑀢𑀺.

𑀭𑀸𑀚𑀸 𑀇𑀫𑀸𑀦𑀺 𑀧𑀜𑁆𑀘 𑀫𑀳𑀸𑀅𑀥𑀺𑀝𑁆𑀞𑀸𑀦𑀸𑀦𑀺 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀢𑀸𑀯 𑀫𑀕𑁆𑀕𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑀢𑁆𑀣𑀸𑀬 𑀩𑀳𑀼𑀁 𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀲𑀺. 𑀢𑀸𑀯𑀤𑁂𑀯 𑀘 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀓𑀫𑁆𑀫𑀸𑀭𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀇𑀫𑀁 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀓𑀝𑀸𑀳𑀁 𑀓𑀭𑁄𑀳𑀻’’𑀢𑀺 𑀆𑀳. ‘‘𑀧𑀫𑀸𑀡𑀁, 𑀤𑁂𑀯, 𑀚𑀸𑀦𑀸𑀣𑀸’’𑀢𑀺? ‘‘𑀢𑁆𑀯𑀫𑁂𑀯, 𑀢𑀸𑀢, 𑀜𑀢𑁆𑀯𑀸 𑀓𑀭𑁄𑀳𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑀁 𑀦𑀺𑀫𑁆𑀫𑀺𑀦𑀺 𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀁 𑀧𑀜𑁆𑀘𑀳𑀢𑁆𑀣𑀼𑀩𑁆𑀩𑁂𑀥𑀁 𑀢𑀺𑀳𑀢𑁆𑀣𑀯𑀺𑀓𑁆𑀔𑀫𑁆𑀪𑀁 𑀅𑀝𑁆𑀞𑀗𑁆𑀕𑀼𑀮𑀩𑀳𑀮𑀁 𑀳𑀢𑁆𑀣𑀺𑀲𑁄𑀡𑁆𑀟𑀧𑁆𑀧𑀫𑀸𑀡𑀫𑀼𑀔𑀯𑀝𑁆𑀝𑀺𑀁. 𑀅𑀣 𑀭𑀸𑀚𑀸 𑀲𑀢𑁆𑀢𑀬𑁄𑀚𑀦𑀸𑀬𑀸𑀫𑀸𑀬 𑀢𑀺𑀬𑁄𑀚𑀦𑀯𑀺𑀢𑁆𑀣𑀸𑀭𑀸𑀬 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀺𑀬𑀲𑀗𑁆𑀖𑀫𑀸𑀤𑀸𑀬 𑀫𑀳𑀸𑀩𑁄𑀥𑀺𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀲𑁂𑀦𑀸 𑀲𑀫𑀼𑀲𑁆𑀲𑀺𑀢𑀥𑀚𑀧𑀝𑀸𑀓𑀁 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀅𑀦𑁂𑀓𑀸𑀮𑀗𑁆𑀓𑀸𑀭𑀧𑀅𑀫𑀡𑁆𑀟𑀺𑀢𑀁 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀁 𑀅𑀦𑁂𑀓𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑀁 𑀫𑀳𑀸𑀩𑁄𑀥𑀺𑀁 𑀧𑀭𑀺𑀓𑁆𑀔𑀺𑀧𑀺. 𑀭𑀸𑀚𑀸 𑀲𑀳𑀲𑁆𑀲𑀫𑀢𑁆𑀢𑁂 𑀕𑀡𑀧𑀸𑀫𑁄𑀓𑁆𑀔𑁂 𑀫𑀳𑀸𑀣𑁂𑀭𑁂 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀢𑀸𑀪𑀺𑀲𑁂𑀓𑀸𑀦𑀁 𑀭𑀸𑀚𑀽𑀦𑀁 𑀲𑀳𑀲𑁆𑀲𑁂𑀦 𑀅𑀢𑁆𑀢𑀸𑀦𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀽𑀮𑁂 𑀞𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀉𑀮𑁆𑀮𑁄𑀓𑁂𑀲𑀺. 𑀫𑀳𑀸𑀩𑁄𑀥𑀺𑀲𑁆𑀲 𑀔𑀦𑁆𑀥𑀜𑁆𑀘 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀸𑀬 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀧𑁆𑀧𑀤𑁂𑀲𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺.

𑀭𑀸𑀚𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀧𑀻𑀢𑀺𑀧𑀸𑀫𑁄𑀚𑁆𑀚𑁄 ‘‘𑀅𑀳𑀁, 𑀪𑀦𑁆𑀢𑁂, 𑀇𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀫𑀳𑀸𑀩𑁄𑀥𑀺𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀫𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀤𑀸𑀲𑀺. 𑀢𑀢𑁄 ¶ 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ¶ 𑀞𑀢𑁆𑀯𑀸 𑀲𑀘𑁆𑀘𑀯𑀘𑀦𑀓𑀺𑀭𑀺𑀬𑀸𑀬 𑀩𑁄𑀥𑀺𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀪𑀽𑀫𑀺𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺𑀲𑁆𑀲 𑀤𑀓𑁆𑀔𑀺𑀡𑀲𑀸𑀔𑀸 𑀢𑀸𑀯 𑀉𑀘𑁆𑀘𑀁 𑀓𑀢𑁆𑀯𑀸 𑀞𑀧𑀺𑀢𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑀧𑀻𑀞𑀲𑁆𑀲 𑀉𑀧𑀭𑀺 𑀲𑀼𑀯𑀡𑁆𑀡𑀓𑀝𑀸𑀳𑀁 𑀞𑀧𑀸𑀧𑁂𑀢𑁆𑀯𑀸 𑀭𑀢𑀦𑀧𑀻𑀞𑀁 𑀆𑀭𑀼𑀬𑁆𑀳 𑀲𑀼𑀯𑀡𑁆𑀡𑀢𑀼𑀮𑀺𑀓𑀁 𑀕𑀳𑁂𑀢𑁆𑀯𑀸 𑀫𑀦𑁄𑀲𑀺𑀮𑀸𑀬 𑀮𑁂𑀔𑀁 𑀓𑀢𑁆𑀯𑀸 ‘‘𑀬𑀤𑀺 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀬𑀤𑀺 𑀘𑀸𑀳𑀁 𑀩𑀼𑀤𑁆𑀥𑀲𑀸𑀲𑀦𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑁂𑀬𑁆𑀬𑀁, 𑀫𑀳𑀸𑀩𑁄𑀥𑀺 ¶ 𑀲𑀬𑀫𑁂𑀯 𑀇𑀫𑀲𑁆𑀫𑀺𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀑𑀭𑀼𑀬𑁆𑀳 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀲𑀘𑁆𑀘𑀯𑀘𑀦𑀓𑀺𑀭𑀺𑀬𑀫𑀓𑀸𑀲𑀺. 𑀲𑀳 𑀲𑀘𑁆𑀘𑀓𑀺𑀭𑀺𑀬𑀸𑀬 𑀩𑁄𑀥𑀺𑀲𑀸𑀔𑀸 𑀫𑀦𑁄𑀲𑀺𑀮𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂 𑀙𑀺𑀚𑁆𑀚𑀺𑀢𑁆𑀯𑀸 𑀕𑀦𑁆𑀥𑀓𑀮𑀮𑀧𑀽𑀭𑀲𑁆𑀲 𑀲𑀼𑀯𑀡𑁆𑀡𑀓𑀝𑀸𑀳𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀉𑀩𑁆𑀩𑁂𑀥𑁂𑀦 𑀤𑀲𑀳𑀢𑁆𑀣𑁄 𑀔𑀦𑁆𑀥𑁄 𑀳𑁄𑀢𑀺 𑀘𑀢𑀼𑀳𑀢𑁆𑀣𑀸 𑀧𑀜𑁆𑀘 𑀫𑀳𑀸𑀲𑀸𑀔𑀸 𑀧𑀜𑁆𑀘𑀳𑀺𑀬𑁂𑀯 𑀨𑀮𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸, 𑀔𑀼𑀤𑁆𑀤𑀓𑀲𑀸𑀔𑀸𑀦𑀁 𑀧𑀦 𑀲𑀳𑀲𑁆𑀲𑀁. 𑀅𑀣 𑀭𑀸𑀚𑀸 𑀫𑀽𑀮𑀮𑁂𑀔𑀸𑀬 𑀉𑀧𑀭𑀺 𑀢𑀺𑀯𑀗𑁆𑀕𑀼𑀮𑀧𑁆𑀧𑀤𑁂𑀲𑁂 𑀅𑀜𑁆𑀜𑀁 𑀮𑁂𑀔𑀁 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀢𑀢𑁄 𑀢𑀸𑀯𑀤𑁂𑀯 𑀧𑀼𑀧𑁆𑀨𑀼𑀴𑀓𑀸 𑀳𑀼𑀢𑁆𑀯𑀸 𑀤𑀲 𑀫𑀳𑀸𑀫𑀽𑀮𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀧𑀼𑀦 𑀉𑀧𑀭𑀽𑀧𑀭𑀺 𑀢𑀺𑀯𑀗𑁆𑀕𑀼𑀮𑁂 𑀢𑀺𑀯𑀗𑁆𑀕𑀼𑀮𑁂 𑀅𑀜𑁆𑀜𑀸 𑀦𑀯 𑀮𑁂𑀔𑀸 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀢𑀸𑀳𑀺𑀧𑀺 𑀤𑀲 𑀤𑀲 𑀧𑀼𑀧𑁆𑀨𑀼𑀴𑀓𑀸 𑀳𑀼𑀢𑁆𑀯𑀸 𑀦𑀯𑀼𑀢𑀺 𑀫𑀽𑀮𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀧𑀞𑀫𑀓𑀸 𑀤𑀲 𑀫𑀳𑀸𑀫𑀽𑀮𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀓𑁆𑀔𑀦𑁆𑀢𑀸. 𑀇𑀢𑀭𑁂𑀧𑀺 𑀕𑀯𑀓𑁆𑀔𑀚𑀸𑀮𑀲𑀤𑀺𑀲𑀁 𑀅𑀦𑀼𑀲𑀺𑀩𑁆𑀩𑀦𑁆𑀢𑀸 𑀦𑀺𑀓𑁆𑀔𑀦𑁆𑀢𑀸. 𑀏𑀢𑁆𑀢𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀭𑀸𑀚𑀸 𑀭𑀢𑀦𑀧𑀻𑀞𑀫𑀢𑁆𑀣𑀓𑁂 𑀞𑀺𑀢𑁄𑀬𑁂𑀯 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀫𑀳𑀸𑀦𑀸𑀤𑀁 𑀦𑀤𑀺. 𑀅𑀦𑁂𑀓𑀸𑀦𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀸𑀥𑀼𑀓𑀸𑀭𑀫𑀓𑀁𑀲𑀼. 𑀲𑀓𑀮𑀭𑀸𑀚𑀲𑁂𑀦𑀸 𑀉𑀦𑁆𑀦𑀸𑀤𑀺𑀦𑀻 𑀅𑀳𑁄𑀲𑀺. 𑀘𑁂𑀮𑀼𑀓𑁆𑀔𑁂𑀧𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀪𑀽𑀫𑀝𑁆𑀞𑀓𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 ¶ 𑀢𑀸𑀯 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀭𑀜𑁆𑀜𑁄 𑀇𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀲𑀭𑀻𑀭𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲𑁂𑀯 𑀫𑀳𑀸𑀩𑁄𑀥𑀺 𑀫𑀽𑀮𑀲𑀢𑁂𑀦 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀸𑀲𑀺. 𑀤𑀲 𑀫𑀳𑀸𑀫𑀽𑀮𑀸𑀦𑀺 𑀲𑀼𑀯𑀡𑁆𑀡𑀓𑀝𑀸𑀳𑀢𑀮𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼. 𑀅𑀯𑀲𑁂𑀲𑀸𑀦𑀺 𑀦𑀯𑀼𑀢𑀺 𑀔𑀼𑀤𑁆𑀤𑀓𑀫𑀽𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀦𑀓𑀸𑀦𑀺 𑀳𑀼𑀢𑁆𑀯𑀸 𑀕𑀦𑁆𑀥𑀓𑀮𑀮𑁂 𑀑𑀭𑀼𑀬𑁆𑀳 𑀞𑀺𑀢𑀸𑀦𑀺.

𑀏𑀯𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑁂 𑀫𑀳𑀸𑀩𑁄𑀥𑀺𑀫𑁆𑀳𑀺 𑀫𑀳𑀸𑀧𑀣𑀯𑀻 𑀘𑀮𑀺. 𑀆𑀓𑀸𑀲𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀨𑀮𑀺𑀁𑀲𑀼. 𑀧𑀩𑁆𑀩𑀢𑀸𑀦𑀁 𑀦𑀘𑁆𑀘𑁂𑀳𑀺 𑀤𑁂𑀯𑀸𑀦𑀁 𑀲𑀸𑀥𑀼𑀓𑀸𑀭𑁂𑀳𑀺 𑀬𑀓𑁆𑀔𑀸𑀦𑀁 𑀳𑀺𑀗𑁆𑀓𑀸𑀭𑁂𑀳𑀺 𑀅𑀲𑀼𑀭𑀸𑀦𑀁 𑀣𑀼𑀢𑀺𑀚𑀧𑁆𑀧𑁂𑀳𑀺 𑀩𑁆𑀭𑀳𑁆𑀫𑀸𑀦𑀁 𑀅𑀧𑁆𑀨𑁄𑀝𑀦𑁂𑀳𑀺 𑀫𑁂𑀖𑀸𑀦𑀁 𑀕𑀚𑁆𑀚𑀺𑀢𑁂𑀳𑀺 𑀘𑀢𑀼𑀧𑁆𑀧𑀤𑀸𑀦𑀁 𑀭𑀯𑁂𑀳𑀺 𑀧𑀓𑁆𑀔𑀻𑀦𑀁 𑀭𑀼𑀢𑁂𑀳𑀺 𑀲𑀩𑁆𑀩𑀢𑀸𑀴𑀸𑀯𑀘𑀭𑀸𑀦𑀁 ¶ 𑀲𑀓𑀲𑀓𑀧𑀝𑀺𑀪𑀸𑀦𑁂𑀳𑀺 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀢𑀸𑀯 𑀏𑀓𑀓𑁄𑀮𑀸𑀳𑀮𑀁 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀧𑀜𑁆𑀘𑀲𑀼 𑀲𑀸𑀔𑀸𑀲𑀼 𑀨𑀮𑀢𑁄 𑀨𑀮𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀭𑀢𑀦𑀕𑁄𑀧𑀸𑀦𑀲𑀻𑀯𑀺𑀦𑀤𑁆𑀥𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀩𑁆𑀪𑀼𑀕𑁆𑀕𑀘𑁆𑀙𑀺𑀁𑀲𑀼. 𑀢𑀁 𑀔𑀡𑀢𑁄 𑀘 𑀧𑀦 𑀧𑀪𑀼𑀢𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀦 𑀓𑁄𑀘𑀺 𑀫𑀳𑀸𑀩𑁄𑀥𑀺𑀁 𑀧𑀲𑁆𑀲𑀢𑀺. 𑀭𑀸𑀚𑀸 𑀭𑀢𑀦𑀧𑀻𑀞𑀢𑁄 𑀑𑀭𑀼𑀬𑁆𑀳 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀧𑀽𑀚𑀁 𑀓𑀸𑀭𑁂𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀤𑀺𑀲𑀸𑀳𑀺 𑀳𑀺𑀫𑀸 𑀘 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀯𑀺𑀕𑀢𑀳𑀺𑀫𑀯𑀮𑀸𑀳𑀓𑁂 𑀯𑀺𑀧𑁆𑀧𑀲𑀦𑁆𑀦𑁂 𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀫𑀳𑀸𑀩𑁄𑀥𑀺 𑀧𑀭𑀺𑀧𑀼𑀡𑁆𑀡𑀔𑀦𑁆𑀥𑀲𑀸𑀔𑀸𑀧𑀲𑀸𑀔𑁄 ¶ 𑀧𑀜𑁆𑀘𑀨𑀮𑀧𑀝𑀺𑀫𑀡𑁆𑀟𑀺𑀢𑁄 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑁄𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀤𑀺𑀲𑁆𑀯𑀸 𑀢𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀢𑀭𑀼𑀡𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀫𑀳𑀸𑀩𑁄𑀥𑀺 ¶ 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀯𑀸𑀭𑀡𑀸𑀤𑀺𑀯𑀲𑁂 𑀲𑀸𑀬𑀦𑁆𑀳𑀲𑀫𑀬𑁂 𑀧𑀞𑀫𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀳𑀺𑀫𑀕𑀩𑁆𑀪𑀲𑀢𑁆𑀢𑀸𑀳𑀁 𑀅𑀪𑀺𑀲𑁂𑀓𑀲𑀢𑁆𑀢𑀸𑀳𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀓𑀸𑀴𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀤𑀺𑀯𑀲𑁂 𑀭𑀸𑀚𑀸 𑀏𑀓𑀤𑀺𑀯𑀲𑁂𑀦𑁂𑀯 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑀲𑁆𑀲 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀁 𑀧𑀸𑀘𑀻𑀦𑀫𑀳𑀸𑀲𑀸𑀮𑀫𑀽𑀮𑁂 𑀞𑀧𑁂𑀲𑀺. 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀭𑀲𑀫𑁂 𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀲𑁆𑀲 𑀅𑀪𑀺𑀦𑀯𑀗𑁆𑀓𑀼𑀭𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀢𑁂 𑀤𑀺𑀲𑁆𑀯𑀸𑀧𑀺 𑀧𑀲𑀦𑁆𑀦𑁄 𑀭𑀸𑀚𑀸 𑀧𑀼𑀦 𑀫𑀳𑀸𑀩𑁄𑀥𑀺𑀁 𑀭𑀚𑁆𑀚𑁂𑀦 𑀧𑀽𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀸𑀪𑀺𑀲𑁂𑀓𑀫𑀤𑀸𑀲𑀺. 𑀢𑀤𑀸 𑀲𑀼𑀫𑀦𑀲𑀸𑀫𑀡𑁂𑀭𑁄 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀥𑀸𑀢𑀼𑀕𑁆𑀕𑀳𑀡𑀢𑁆𑀣𑀁 𑀕𑀢𑁄 𑀫𑀳𑀸𑀩𑁄𑀥𑀺𑀲𑁆𑀲 𑀓𑀢𑁆𑀢𑀺𑀓𑀙𑀡𑀧𑀽𑀚𑀁 𑀅𑀤𑁆𑀤𑀲. 𑀏𑀯𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑀢𑁄 𑀆𑀦𑁂𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑁂 𑀞𑀧𑀺𑀢𑀁 𑀫𑀳𑀸𑀩𑁄𑀥𑀺𑀁 𑀲𑀦𑁆𑀥𑀸𑀬 𑀆𑀳 𑁋 ‘‘𑀢𑁂𑀦 𑀳𑀺, 𑀅𑀫𑁆𑀫, 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀭𑀸𑀚𑀸 𑀫𑀳𑀸𑀩𑁄𑀥𑀺𑀭𑀓𑁆𑀔𑀡𑀢𑁆𑀣𑀸𑀬 𑀅𑀝𑁆𑀞𑀸𑀭𑀲 𑀤𑁂𑀯𑀢𑀸𑀓𑀼𑀮𑀸𑀦𑀺, 𑀅𑀝𑁆𑀞 𑀅𑀫𑀘𑁆𑀘𑀓𑀼𑀮𑀸𑀦𑀺, 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀺, 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑀸𑀦𑀺, 𑀅𑀝𑁆𑀞 𑀕𑁄𑀧𑀓𑀓𑀼𑀮𑀸𑀦𑀺, 𑀅𑀝𑁆𑀞 𑀢𑀭𑀘𑁆𑀙𑀓𑀼𑀮𑀸𑀦𑀺, 𑀅𑀝𑁆𑀞 𑀘 𑀓𑀸𑀮𑀺𑀗𑁆𑀕𑀓𑀼𑀮𑀸𑀦𑀺 𑀤𑀢𑁆𑀯𑀸 𑀉𑀤𑀓𑀲𑀺𑀜𑁆𑀘𑀦𑀢𑁆𑀣𑀸𑀬 𑀘 𑀅𑀝𑁆𑀞 𑀲𑀼𑀯𑀡𑁆𑀡𑀖𑀝𑁂, 𑀅𑀝𑁆𑀞 𑀘 𑀭𑀚𑀢𑀖𑀝𑁂 𑀤𑀢𑁆𑀯𑀸 𑀇𑀫𑀺𑀦𑀸 𑀧𑀭𑀺𑀯𑀸𑀭𑁂𑀦 𑀫𑀳𑀸𑀩𑁄𑀥𑀺𑀁 ¶ 𑀕𑀗𑁆𑀕𑀸𑀬 𑀦𑀸𑀯𑀁 ¶ 𑀆𑀭𑁄𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑁆𑀛𑀸𑀝𑀯𑀺𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀢𑀸𑀫𑀮𑀺𑀢𑁆𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁂𑀯𑀦𑀸𑀕𑀫𑀦𑀼𑀲𑁆𑀲𑀸 𑀉𑀴𑀸𑀭𑀁 𑀫𑀳𑀸𑀩𑁄𑀥𑀺𑀧𑀽𑀚𑀁 𑀅𑀓𑀁𑀲𑀼. 𑀭𑀸𑀚𑀸𑀧𑀺 𑀲𑀫𑀼𑀤𑁆𑀤𑀢𑀻𑀭𑁂 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀫𑀳𑀸𑀭𑀚𑁆𑀚𑀁 𑀅𑀤𑀸𑀲𑀺. 𑀇𑀤𑀫𑀲𑁆𑀲 𑀢𑀢𑀺𑀬𑀁 𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀲𑀫𑁆𑀧𑀤𑀸𑀦𑀁 𑀳𑁄𑀢𑀺.

𑀏𑀯𑀁 𑀫𑀳𑀸𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀫𑀸𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑁂 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 𑀦𑀸𑀯𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀫𑁆𑀧𑀺 𑀲𑀧𑀭𑀺𑀯𑀸𑀭𑀁 𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀁 𑀅𑀫𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀢𑀸𑀢, 𑀫𑀳𑀸𑀩𑁄𑀥𑀺𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 𑀫𑀫 𑀲𑀳𑀸𑀬𑀓𑀲𑁆𑀲 𑀧𑁂𑀲𑁂𑀲𑀺𑀁, 𑀲𑁄𑀧𑀺 𑀏𑀯𑀫𑁂𑀯 𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀢𑀽’’𑀢𑀺. 𑀏𑀯𑀁 𑀲𑀳𑀸𑀬𑀓𑀲𑁆𑀲 𑀲𑀸𑀲𑀦𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀢𑀺 𑀯𑀢𑀭𑁂, 𑀤𑀲𑀩𑀮𑀲𑁆𑀲 𑀲𑀭𑀲𑀭𑀁𑀲𑀺𑀚𑀸𑀮𑀁 𑀯𑀺𑀫𑀼𑀜𑁆𑀘𑀦𑁆𑀢𑁄 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀸𑀧𑀺 𑀔𑁄 𑀫𑀳𑀸𑀩𑁄𑀥𑀺𑀲𑀫𑀸𑀭𑀽𑀴𑁆𑀳𑀸 𑀦𑀸𑀯𑀸 𑀧𑀲𑁆𑀲𑀢𑁄 𑀧𑀲𑁆𑀲𑀢𑁄 𑀫𑀳𑀸𑀭𑀸𑀚𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀧𑀓𑁆𑀔𑀦𑁆𑀢𑀸. 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀯𑀻𑀘𑀺𑀬𑁄 𑀯𑀽𑀧𑀲𑀦𑁆𑀢𑀸; 𑀧𑀜𑁆𑀘 𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀢𑀸𑀦𑀺; 𑀅𑀦𑁆𑀢𑀮𑀺𑀓𑁆𑀔𑁂 𑀤𑀺𑀩𑁆𑀩𑀸𑀦𑀺 𑀢𑀽𑀭𑀺𑀬𑀸𑀦𑀺 𑀧𑀯𑀚𑁆𑀚𑀺𑀁𑀲𑀼; 𑀆𑀓𑀸𑀲𑁂 𑀚𑀮𑀚𑀣𑀮𑀚𑀭𑀼𑀓𑁆𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀧𑀯𑀢𑁆𑀢𑀺𑀢𑀸 𑀅𑀢𑀺𑀯𑀺𑀬 𑀉𑀴𑀸𑀭𑀸 𑀧𑀽𑀚𑀸 𑀅𑀳𑁄𑀲𑀺. 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻𑀧𑀺 𑀲𑀼𑀧𑀡𑁆𑀡𑀭𑀽𑀧𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀦𑀸𑀕𑀓𑀼𑀮𑀸𑀦𑀺 𑀲𑀦𑁆𑀢𑀸𑀲𑁂𑀲𑀺. 𑀢𑁂 𑀘 𑀉𑀢𑁆𑀭𑀲𑁆𑀢𑀭𑀽𑀧𑀸 𑀦𑀸𑀕𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀺𑀪𑀽𑀢𑀺𑀁 𑀧𑀲𑁆𑀲𑀺𑀢𑁆𑀯𑀸 𑀣𑁂𑀭𑀺𑀁 𑀬𑀸𑀘𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀦𑀸𑀕𑀪𑀯𑀦𑀁 𑀅𑀢𑀺𑀳𑀭𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 ¶ 𑀦𑀸𑀕𑀭𑀚𑁆𑀚𑁂𑀦 ¶ 𑀧𑀽𑀚𑁂𑀢𑁆𑀯𑀸 𑀧𑀼𑀦 𑀦𑀸𑀯𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀢𑀁𑀤𑀺𑀯𑀲𑀫𑁂𑀯 𑀦𑀸𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀅𑀕𑀫𑀸𑀲𑀺. 𑀅𑀲𑁄𑀓𑀫𑀳𑀸𑀭𑀸𑀚𑀸𑀧𑀺 𑀫𑀳𑀸𑀩𑁄𑀥𑀺𑀯𑀺𑀬𑁄𑀕𑀤𑀼𑀓𑁆𑀔𑀺𑀢𑁄 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺.

𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀫𑀳𑀸𑀭𑀸𑀚𑀸𑀧𑀺 𑀔𑁄 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲 𑀯𑀘𑀦𑁂𑀦 𑀫𑀸𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀢𑁆𑀢𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀢𑀸𑀯 𑀫𑀕𑁆𑀕𑀁 𑀲𑁄𑀥𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀉𑀢𑁆𑀢𑀭𑀤𑁆𑀯𑀸𑀭𑀲𑀫𑀻𑀧𑁂 𑀲𑀫𑀼𑀤𑁆𑀤𑀲𑀸𑀮𑀯𑀢𑁆𑀣𑀼𑀲𑁆𑀫𑀺𑀁 𑀞𑀺𑀢𑁄𑀬𑁂𑀯 𑀢𑀸𑀬 𑀯𑀺𑀪𑀽𑀢𑀺𑀬𑀸 𑀫𑀳𑀸𑀲𑀫𑀼𑀤𑁆𑀤𑁂 𑀆𑀕𑀘𑁆𑀙𑀦𑁆𑀢𑀁𑀬𑁂𑀯 𑀫𑀳𑀸𑀩𑁄𑀥𑀺𑀁 𑀣𑁂𑀭𑀲𑁆𑀲 ¶ 𑀆𑀦𑀼𑀪𑀸𑀯𑁂𑀦 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀁 𑀫𑀕𑁆𑀕𑀁 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀸𑀧𑁂𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑁂 𑀧𑀼𑀧𑁆𑀨𑀅𑀕𑁆𑀖𑀺𑀬𑀸𑀦𑀺 𑀞𑀧𑁂𑀦𑁆𑀢𑁄 𑀏𑀓𑀸𑀳𑁂𑀦𑁂𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑀧𑀭𑀺𑀯𑀼𑀢𑁄 𑀧𑀼𑀧𑁆𑀨𑀥𑀽𑀫𑀕𑀦𑁆𑀥𑀯𑀸𑀲𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 ‘‘𑀆𑀕𑀢𑁄 𑀯𑀢𑀭𑁂, 𑀤𑀲𑀩𑀮𑀲𑁆𑀲 𑀲𑀭𑀲𑀭𑀁𑀲𑀺𑀚𑀸𑀮𑀯𑀺𑀲𑁆𑀲𑀚𑁆𑀚𑀦𑀓𑁄 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀫𑀳𑀸𑀩𑁄𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀕𑀢𑁂𑀳𑀺 𑀲𑁄𑀴𑀲𑀳𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀲𑀫𑀼𑀤𑁆𑀤𑀢𑁄 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀲𑀺, 𑀲𑁄𑀴𑀲𑀦𑁆𑀦𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀁 𑀭𑀚𑁆𑀚𑀁 𑀯𑀺𑀘𑀸𑀭𑁂𑀲𑀺. 𑀅𑀣 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀁 𑀆𑀤𑀸𑀬 𑀉𑀴𑀸𑀭𑀁 𑀧𑀽𑀚𑀁 𑀓𑀼𑀭𑀼𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀭𑀸𑀥𑀧𑀼𑀭𑀁 𑀲𑀫𑁆𑀧𑀢𑁆𑀢𑁄. 𑀅𑀦𑀼𑀭𑀸𑀥𑀧𑀼𑀭𑁂𑀧𑀺 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁂 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀫𑀳𑀸𑀩𑁄𑀥𑀺𑀁 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀧𑀯𑁂𑀲𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀅𑀢𑀺𑀳𑀭𑀦𑁆𑀢𑁄 ¶ 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑁂 𑀞𑀸𑀦𑁂 𑀬𑀢𑁆𑀣 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀧𑀼𑀭𑀺𑀫𑀓𑀸 𑀘 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀬𑀢𑁆𑀣 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀫𑀳𑀸𑀲𑀺𑀭𑀻𑀲𑀩𑁄𑀥𑀺, 𑀓𑁄𑀦𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀉𑀤𑀼𑀫𑁆𑀩𑀭𑀩𑁄𑀥𑀺, 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀦𑀺𑀕𑁆𑀭𑁄𑀥𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀲𑁆𑀲 𑀢𑀺𑀮𑀓𑀪𑀽𑀢𑁂 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲 𑀯𑀘𑀦𑁂𑀦 𑀧𑀞𑀫𑀫𑁂𑀯 𑀓𑀢𑀪𑀽𑀫𑀺𑀧𑀭𑀺𑀓𑀫𑁆𑀫𑁂 𑀭𑀸𑀚𑀯𑀢𑁆𑀣𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑀝𑁆𑀞𑀸𑀦𑁂 𑀫𑀳𑀸𑀩𑁄𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀓𑀣𑀁? 𑀢𑀸𑀦𑀺 𑀓𑀺𑀭 𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀕𑀢𑀸𑀦𑀺 𑀲𑁄𑀴𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀺 𑀭𑀸𑀚𑀯𑁂𑀲𑀁 𑀕𑀡𑁆𑀳𑀺𑀁𑀲𑀼. 𑀭𑀸𑀚𑀸 𑀤𑁄𑀯𑀸𑀭𑀺𑀓𑀯𑁂𑀲𑀁 𑀕𑀡𑁆𑀳𑀺. 𑀲𑁄𑀴𑀲 𑀓𑀼𑀮𑀸𑀦𑀺 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀑𑀭𑁄𑀧𑀬𑀺𑀁𑀲𑀼. 𑀫𑀳𑀸𑀩𑁄𑀥𑀺 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀼𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀫𑀼𑀜𑁆𑀘𑀺. 𑀭𑀁𑀲𑀺𑀬𑁄 𑀲𑀓𑀮𑀤𑀻𑀧𑀁 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼. 𑀫𑀳𑀸𑀩𑁄𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀸𑀦𑀺 𑀤𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀸 𑀫𑀳𑀸𑀩𑁄𑀥𑀺 𑀅𑀦𑁆𑀢𑀮𑀺𑀓𑁆𑀔𑁂 𑀅𑀝𑁆𑀞𑀸𑀲𑀺. 𑀅𑀢𑁆𑀣𑀗𑁆𑀕𑀫𑀺𑀢𑁂 𑀧𑀦 ¶ 𑀲𑀽𑀭𑀺𑀬𑁂 𑀭𑁄𑀳𑀺𑀡𑀺𑀦𑀓𑁆𑀔𑀢𑁆𑀢𑁂𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀳 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑀸 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺. 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀘 𑀧𑀦 𑀫𑀳𑀸𑀩𑁄𑀥𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀳𑀺𑀫𑀕𑀩𑁆𑀪𑁂 𑀲𑀦𑁆𑀦𑀺𑀲𑀻𑀤𑀺. 𑀮𑁄𑀓𑀲𑁆𑀲 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺. 𑀲𑀢𑁆𑀢𑀫𑁂 ¶ 𑀤𑀺𑀯𑀲𑁂 𑀯𑀺𑀕𑀢𑀯𑀮𑀸𑀳𑀓𑀁 𑀦𑀪𑀁 𑀅𑀳𑁄𑀲𑀺. 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀚𑀮𑀦𑁆𑀢𑀸 𑀯𑀺𑀧𑁆𑀨𑀼𑀭𑀦𑁆𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀫𑀳𑀸𑀩𑁄𑀥𑀺𑀲𑁆𑀲 𑀔𑀦𑁆𑀥𑁄 𑀘 𑀲𑀸𑀔𑀸𑀬𑁄 𑀘 𑀧𑀢𑁆𑀢𑀸𑀦𑀺 ¶ 𑀘 𑀧𑀜𑁆𑀘 𑀨𑀮𑀸𑀦𑀺 𑀘 𑀤𑀲𑁆𑀲𑀺𑀁𑀲𑀼. 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀘 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻 𑀘 𑀭𑀸𑀚𑀸 𑀘 𑀲𑀧𑀭𑀺𑀯𑀸𑀭𑀸 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀬𑁂𑀪𑀼𑀬𑁆𑀬𑁂𑀦 𑀘 𑀲𑀩𑁆𑀩𑁂 𑀤𑀻𑀧𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀉𑀢𑁆𑀢𑀭𑀲𑀸𑀔𑀢𑁄 𑀏𑀓𑀁 𑀨𑀮𑀁 𑀧𑀘𑁆𑀘𑀺𑀢𑁆𑀯𑀸 𑀲𑀸𑀔𑀢𑁄 𑀫𑀼𑀘𑁆𑀘𑀺. 𑀣𑁂𑀭𑁄 𑀳𑀢𑁆𑀣𑀁 𑀉𑀧𑀦𑀸𑀫𑁂𑀲𑀺. 𑀨𑀮𑀁 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 ‘‘𑀭𑁄𑀧𑀬, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀫𑀥𑀼𑀭𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀕𑀦𑁆𑀥𑀓𑀮𑀮𑀁 𑀧𑀽𑀭𑁂𑀢𑁆𑀯𑀸 𑀭𑁄𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀆𑀲𑀦𑁆𑀦𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀸 𑀅𑀝𑁆𑀞 𑀢𑀭𑀼𑀡𑀩𑁄𑀥𑀺𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀝𑁆𑀞 𑀢𑀭𑀼𑀡𑀩𑁄𑀥𑀺𑀭𑀼𑀓𑁆𑀔𑁂 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀤𑀸𑀲𑀺. 𑀢𑀢𑁄 𑀏𑀓𑀁 𑀩𑁄𑀥𑀺𑀭𑀼𑀓𑁆𑀔𑀁 𑀆𑀕𑀫𑀦𑀓𑀸𑀮𑁂 𑀫𑀳𑀸𑀩𑁄𑀥𑀺𑀦𑀸 𑀧𑀞𑀫𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀭𑁄𑀧𑀬𑀺𑀁𑀲𑀼, 𑀏𑀓𑀁 𑀢𑀯𑀓𑁆𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑀸𑀫𑀤𑁆𑀯𑀸𑀭𑁂, 𑀏𑀓𑀁 𑀣𑀽𑀧𑀸𑀭𑀸𑀫𑁂, 𑀏𑀓𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀺𑀳𑀸𑀭𑁂, 𑀏𑀓𑀁 𑀧𑀞𑀫𑀘𑁂𑀢𑀺𑀬𑀝𑁆𑀞𑀸𑀦𑁂, 𑀏𑀓𑀁 𑀘𑁂𑀢𑀺𑀬𑀧𑀩𑁆𑀩𑀢𑁂, 𑀏𑀓𑀁 𑀭𑁄𑀳𑀡𑀚𑀦𑀧𑀤𑀫𑁆𑀳𑀺 𑀓𑀸𑀚𑀭𑀕𑀸𑀫𑁂, 𑀏𑀓𑀁 𑀭𑁄𑀳𑀡𑀚𑀦𑀧𑀤𑀫𑁆𑀳𑀺𑀬𑁂𑀯 𑀘𑀦𑁆𑀤𑀦𑀕𑀸𑀫𑁂. 𑀇𑀢𑀭𑁂𑀲𑀁 𑀘𑀢𑀼𑀦𑁆𑀦𑀁 𑀨𑀮𑀸𑀦𑀁 𑀩𑀻𑀚𑁂𑀳𑀺 𑀚𑀸𑀢𑁂 𑀤𑁆𑀯𑀢𑁆𑀢𑀺𑀁𑀲 𑀩𑁄𑀥𑀺𑀢𑀭𑀼𑀡𑁂 𑀬𑁄𑀚𑀦𑀺𑀬𑀆𑀭𑀸𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀏𑀯𑀁 𑀧𑀼𑀢𑁆𑀢𑀦𑀢𑁆𑀢𑀼𑀧𑀭𑀫𑁆𑀧𑀭𑀸𑀬 𑀲𑀫𑀦𑁆𑀢𑀸 𑀤𑀻𑀧𑀯𑀸𑀲𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀢𑀺𑀝𑁆𑀞𑀺𑀢𑁂 𑀤𑀲𑀩𑀮𑀲𑁆𑀲 𑀥𑀫𑁆𑀫𑀥𑀚𑀪𑀽𑀢𑁂 𑀫𑀳𑀸𑀩𑁄𑀥𑀺𑀫𑁆𑀳𑀺 ¶ 𑀅𑀦𑀼𑀴𑀸 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀻𑀢𑀺 𑀫𑀸𑀢𑀼𑀕𑀸𑀫𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀭𑀺𑀝𑁆𑀞𑁄𑀧𑀺 𑀔𑁄 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀧𑀜𑁆𑀘𑀳𑀺 𑀧𑀼𑀭𑀺𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀣𑀽𑀧𑀸𑀭𑀸𑀫𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀮𑁄𑀳𑀧𑀸𑀲𑀸𑀤𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀲𑁆𑀲 𑀧𑀼𑀭𑀺𑀲𑀸 𑀧𑀼𑀧𑁆𑀨𑀸𑀦𑀺 𑀅𑀪𑀺𑀳𑀭𑀺𑀁𑀲𑀼. 𑀭𑀸𑀚𑀸 𑀣𑁂𑀭𑀲𑁆𑀲 𑀧𑀼𑀧𑁆𑀨𑀸𑀦𑀺 𑀅𑀤𑀸𑀲𑀺. 𑀣𑁂𑀭𑁄 𑀧𑀼𑀧𑁆𑀨𑁂𑀳𑀺 𑀮𑁄𑀳𑀧𑀸𑀲𑀸𑀤𑀝𑁆𑀞𑀸𑀦𑀁 𑀧𑀽𑀚𑁂𑀲𑀺. 𑀧𑀼𑀧𑁆𑀨𑁂𑀲𑀼 𑀪𑀽𑀫𑀺𑀬𑀁 𑀧𑀢𑀺𑀢𑀫𑀢𑁆𑀢𑁂𑀲𑀼 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀪𑀽𑀫𑀺 𑀘𑀮𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀲𑀗𑁆𑀖𑀲𑁆𑀲 𑀅𑀦𑀸𑀕𑀢𑁂 𑀉𑀧𑁄𑀲𑀣𑀸𑀕𑀸𑀭𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀭𑀸𑀚𑀸 ¶ 𑀧𑀼𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀫𑁆𑀩𑀗𑁆𑀕𑀡𑀝𑁆𑀞𑀸𑀦𑀁 𑀧𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀢𑀺𑀫𑀥𑀼𑀭𑀭𑀲𑀁 𑀏𑀓𑀁 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀻𑀬𑀺𑀢𑁆𑀣. 𑀭𑀸𑀚𑀸 𑀢𑀁 𑀣𑁂𑀭𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀅𑀤𑀸𑀲𑀺. 𑀣𑁂𑀭𑁄 𑀢𑀢𑁆𑀣𑁂𑀯 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀇𑀤𑀁 𑀏𑀢𑁆𑀣𑁂𑀯 𑀭𑁄𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀅𑀫𑁆𑀩𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀭𑁄𑀧𑁂𑀢𑁆𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀲𑀳 𑀅𑀫𑁆𑀩𑀩𑀻𑀚𑀭𑁄𑀧𑀦𑁂𑀦 𑀧𑀣𑀯𑀻 𑀅𑀓𑀫𑁆𑀧𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀫𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀲𑀗𑁆𑀖𑀲𑁆𑀲 𑀅𑀦𑀸𑀕𑀢𑁂 ‘𑀅𑀫𑁆𑀩𑀗𑁆𑀕𑀡𑀁’ 𑀦𑀸𑀫 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀭𑀸𑀚𑀸 𑀢𑀢𑁆𑀣 𑀅𑀝𑁆𑀞 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀑𑀓𑀺𑀭𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀧𑀼𑀭𑀺𑀲𑀸 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺 𑀅𑀪𑀺𑀳𑀭𑀺𑀁𑀲𑀼. 𑀢𑀸𑀦𑀺 𑀭𑀸𑀚𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺. 𑀢𑀸𑀯𑀤𑁂𑀯 𑀫𑀳𑀸𑀧𑀣𑀯𑀻 𑀲𑀗𑁆𑀓𑀫𑁆𑀧𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀫𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀲𑀤𑀺𑀲𑁄 𑀫𑀳𑀸𑀣𑀽𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 ¶ 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. ‘‘𑀅𑀳𑀫𑁂𑀯 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺. ‘‘𑀅𑀮𑀁, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀅𑀜𑁆𑀜𑀁 𑀩𑀳𑀼𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀦𑀢𑁆𑀢𑀸 𑀤𑀼𑀝𑁆𑀞𑀕𑀸𑀫𑀡𑀻 𑀅𑀪𑀬𑁄 𑀦𑀸𑀫 𑀓𑀸𑀭𑁂𑀲𑁆𑀲𑀢𑀻’’𑀢𑀺. 𑀅𑀣 𑀭𑀸𑀚𑀸 ‘‘𑀲𑀘𑁂, 𑀪𑀦𑁆𑀢𑁂, 𑀫𑀬𑁆𑀳𑀁 𑀦𑀢𑁆𑀢𑀸 𑀓𑀭𑀺𑀲𑁆𑀲𑀢𑀺, 𑀓𑀢𑀁𑀬𑁂𑀯 𑀫𑀬𑀸’’𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀁 𑀧𑀸𑀲𑀸𑀡𑀢𑁆𑀣𑀫𑁆𑀪𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀦𑀢𑁆𑀢𑀸 𑀤𑀼𑀝𑁆𑀞𑀕𑀸𑀫𑀡𑀻 𑀅𑀪𑀬𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀣𑀽𑀧𑀁 𑀓𑀭𑁄𑀢𑀽’’𑀢𑀺 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀧𑀢𑀺𑀝𑁆𑀞𑀺𑀢𑀁 𑀦𑀼 𑀔𑁄, 𑀪𑀦𑁆𑀢𑁂, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀸𑀲𑀦’’𑀦𑁆𑀢𑀺? ‘‘𑀧𑀢𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚, 𑀲𑀸𑀲𑀦𑀁; 𑀫𑀽𑀮𑀸𑀦𑀺 𑀧𑀦𑀲𑁆𑀲 𑀦 𑀢𑀸𑀯 𑀑𑀢𑀭𑀦𑁆𑀢𑀻’’𑀢𑀺. ‘‘𑀓𑀤𑀸 𑀧𑀦, 𑀪𑀦𑁆𑀢𑁂 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀺 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀬𑀤𑀸, 𑀫𑀳𑀸𑀭𑀸𑀚, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀚𑀸𑀢𑁄 𑀤𑀸𑀭𑀓𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺𑀬𑁂𑀯 𑀯𑀺𑀦𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀯𑀸𑀘𑁂𑀲𑁆𑀲𑀢𑀺, 𑀢𑀤𑀸 𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀺 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀏𑀤𑀺𑀲𑁄 𑀪𑀺𑀓𑁆𑀔𑀽’’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀳𑀸𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀧𑀝𑀺𑀩𑀮𑁄 𑀏𑀢𑀲𑁆𑀫𑀺𑀁 𑀓𑀫𑁆𑀫𑁂’’𑀢𑀺. ‘‘𑀫𑀬𑀸 𑀏𑀢𑁆𑀣, 𑀪𑀦𑁆𑀢𑁂, 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀫𑀡𑁆𑀟𑀧𑀁, 𑀫𑀳𑀸𑀭𑀸𑀚, 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀫𑁂𑀖𑀯𑀡𑁆𑀡𑀸𑀪𑀬𑀲𑁆𑀲 𑀅𑀫𑀘𑁆𑀘𑀲𑁆𑀲 𑀧𑀭𑀺𑀯𑁂𑀡𑀝𑁆𑀞𑀸𑀦𑁂 𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀅𑀚𑀸𑀢𑀲𑀢𑁆𑀢𑀼𑀫𑀳𑀸𑀭𑀸𑀚𑁂𑀦 𑀓𑀢𑀫𑀡𑁆𑀟𑀧𑀧𑁆𑀧𑀓𑀸𑀭𑀁 𑀭𑀸𑀚𑀸𑀦𑀼𑀪𑀸𑀯𑁂𑀦 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑁂 𑀲𑀓𑀲𑀓𑀲𑀺𑀧𑁆𑀧𑁂𑀲𑀼 𑀧𑀬𑁄𑀚𑁂𑀢𑁆𑀯𑀸 ‘‘𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀭𑀦𑁆𑀢𑀸𑀦𑀺 ¶ 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀓𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀣𑀽𑀧𑀸𑀭𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀅𑀝𑁆𑀞𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑀁 ¶ 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀁 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁄 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀅𑀚𑁆𑀛𑀺𑀝𑁆𑀞𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺. 𑀫𑀳𑀺𑀦𑁆𑀤𑀢𑁆𑀣𑁂𑀭𑀧𑀫𑀼𑀔𑀸 𑀅𑀝𑁆𑀞𑀲𑀝𑁆𑀞𑀺 𑀫𑀳𑀸𑀣𑁂𑀭𑀸 𑀥𑀫𑁆𑀫𑀸𑀲𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀦𑀺𑀲𑀻𑀤𑀺𑀁𑀲𑀼. 𑀭𑀜𑁆𑀜𑁄𑀧𑀺 𑀓𑀦𑀺𑀝𑁆𑀞𑀪𑀸𑀢𑀸 𑀫𑀢𑁆𑀢𑀸𑀪𑀬𑀢𑁆𑀣𑁂𑀭𑁄 𑀦𑀸𑀫 ‘‘𑀥𑀼𑀭𑀕𑁆𑀕𑀸𑀳𑁄 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀫𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀯𑀲𑁂𑀲𑀸𑀧𑀺 𑀪𑀺𑀓𑁆𑀔𑀽 𑀲𑀭𑀸𑀚𑀺𑀓𑀸 𑀘 𑀧𑀭𑀺𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 𑀯𑀺𑀦𑀬𑀦𑀺𑀤𑀸𑀦𑀁 𑀅𑀪𑀸𑀲𑀺. 𑀪𑀸𑀲𑀺𑀢𑁂 𑀘 𑀧𑀦𑀸𑀬𑀲𑁆𑀫𑀢𑀸 𑀅𑀭𑀺𑀝𑁆𑀞𑀢𑁆𑀣𑁂𑀭𑁂𑀦 𑀯𑀺𑀦𑀬𑀦𑀺𑀤𑀸𑀦𑁂 𑀆𑀓𑀸𑀲𑀁 𑀫𑀳𑀸𑀯𑀺𑀭𑀯𑀁 𑀭𑀯𑀺. 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀗𑁆𑀓𑀫𑁆𑀧𑀺. 𑀏𑀯𑀁 𑀅𑀦𑁂𑀓𑁂𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀆𑀬𑀲𑁆𑀫𑀸 𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀫𑀳𑀸𑀫𑀳𑀺𑀦𑁆𑀤𑀧𑀫𑀼𑀔𑁂𑀳𑀺 𑀅𑀝𑁆𑀞𑀲𑀝𑁆𑀞𑀺𑀬𑀸 𑀧𑀘𑁆𑀘𑁂𑀓𑀕𑀡𑀻𑀳𑀺 𑀔𑀻𑀡𑀸𑀲𑀯𑀫𑀳𑀸𑀣𑁂𑀭𑁂𑀳𑀺 𑀢𑀤𑀜𑁆𑀜𑁂𑀳𑀺 𑀘 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀞𑀫𑀓𑀢𑁆𑀢𑀺𑀓𑀧𑀯𑀸𑀭𑀡𑀸𑀤𑀺𑀯𑀲𑁂 𑀣𑀽𑀧𑀸𑀭𑀸𑀫𑀯𑀺𑀳𑀸𑀭𑀫𑀚𑁆𑀛𑁂 𑀲𑀢𑁆𑀣𑀼 𑀓𑀭𑀼𑀡𑀸𑀕𑀼𑀡𑀤𑀻𑀧𑀓𑀁 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀓𑀭𑀸𑀦𑀁 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀯𑀺𑀧𑁆𑀨𑀦𑁆𑀤𑀺𑀢𑀯𑀺𑀦𑀬𑀦𑀁 𑀯𑀺𑀦𑀬𑀧𑀺𑀝𑀓𑀁 𑀧𑀓𑀸𑀲𑁂𑀲𑀺. 𑀧𑀓𑀸𑀲𑁂𑀢𑁆𑀯𑀸 𑀘 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀫𑀸𑀦𑁄 𑀩𑀳𑀽𑀦𑀁 𑀯𑀸𑀘𑁂𑀢𑁆𑀯𑀸 𑀩𑀳𑀽𑀦𑀁 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑁂𑀧𑀺 𑀔𑁄 𑀫𑀳𑀸𑀫𑀳𑀺𑀦𑁆𑀤𑀧𑁆𑀧𑀫𑀼𑀔𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑁋

‘‘𑀅𑀝𑁆𑀞𑀲𑀝𑁆𑀞𑀺 ¶ 𑀫𑀳𑀸𑀣𑁂𑀭𑀸, 𑀥𑀼𑀭𑀕𑁆𑀕𑀸𑀳𑀸 𑀲𑀫𑀸𑀕𑀢𑀸;

𑀧𑀘𑁆𑀘𑁂𑀓𑀕𑀡𑀺𑀦𑁄 𑀲𑀩𑁆𑀩𑁂, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸.

‘‘𑀔𑀻𑀡𑀸𑀲𑀯𑀸 𑀯𑀲𑀺𑀧𑁆𑀧𑀢𑁆𑀢𑀸, 𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀓𑁄𑀯𑀺𑀤𑀸;

𑀉𑀢𑁆𑀢𑀫𑀢𑁆𑀣𑀫𑀪𑀺𑀜𑁆𑀜𑀸𑀬, 𑀅𑀦𑀼𑀲𑀸𑀲𑀺𑀁𑀲𑀼 𑀭𑀸𑀚𑀺𑀦𑁄.

‘‘𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀑𑀪𑀸𑀲𑁂𑀢𑁆𑀯𑀸 𑀫𑀳𑀺𑀁 𑀇𑀫𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯, 𑀦𑀺𑀩𑁆𑀩𑀸𑀬𑀺𑀁𑀲𑀼 𑀫𑀳𑁂𑀲𑀬𑁄’’.

𑀢𑁂𑀲𑀁 ¶ 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀧𑀭𑀪𑀸𑀕𑁂 𑀅𑀜𑁆𑀜𑁂𑀧𑀺 𑀢𑁂𑀲𑀁 𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑀺𑀲𑁆𑀲𑀤𑀢𑁆𑀢𑀓𑀸𑀴𑀲𑀼𑀫𑀦-𑀤𑀻𑀖𑀲𑀼𑀫𑀦𑀸𑀤𑀬𑁄 𑀘 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀸𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀇𑀫𑀁 𑀯𑀺𑀦𑀬𑀧𑀺𑀝𑀓𑀁 𑀬𑀸𑀯𑀚𑁆𑀚𑀢𑀦𑀸 𑀆𑀦𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀢𑀺𑀬𑀲𑀗𑁆𑀕𑀳𑀢𑁄 𑀧𑀦 𑀉𑀤𑁆𑀥𑀁 𑀇𑀫𑀁 𑀤𑀻𑀧𑀁 𑀫𑀳𑀺𑀦𑁆𑀤𑀸𑀤𑀻𑀳𑀺 𑀆𑀪𑀢𑀁, 𑀫𑀳𑀺𑀦𑁆𑀤𑀢𑁄 𑀉𑀕𑁆𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 ¶ 𑀓𑀸𑀮𑀁 𑀅𑀭𑀺𑀝𑁆𑀞𑀢𑁆𑀣𑁂𑀭𑀸𑀤𑀻𑀳𑀺 𑀆𑀪𑀢𑀁, 𑀢𑀢𑁄 𑀬𑀸𑀯𑀚𑁆𑀚𑀢𑀦𑀸 𑀢𑁂𑀲𑀁𑀬𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀫𑁆𑀧𑀭𑀪𑀽𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢’’𑀦𑁆𑀢𑀺.

𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀦𑁆𑀢𑀺? 𑀬𑁂𑀲𑀁 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀽𑀦𑀁 𑀯𑀢𑁆𑀢𑀢𑀺, 𑀫𑀡𑀺𑀖𑀝𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀫𑀺𑀯 𑀈𑀲𑀓𑀫𑁆𑀧𑀺 𑀦 𑀧𑀕𑁆𑀖𑀭𑀢𑀺, 𑀏𑀯𑀭𑀽𑀧𑁂𑀲𑀼 𑀅𑀥𑀺𑀫𑀢𑁆𑀢𑀲𑀢𑀺-𑀕𑀢𑀺-𑀥𑀺𑀢𑀺-𑀫𑀦𑁆𑀢𑁂𑀲𑀼 𑀮𑀚𑁆𑀚𑀻𑀲𑀼 𑀓𑀼𑀓𑁆𑀓𑀼𑀘𑁆𑀘𑀓𑁂𑀲𑀼 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀯𑀺𑀦𑀬𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀺𑀓𑁆𑀔𑀸𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑁄 𑁋 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀓𑀼𑀲𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀺𑀬𑁄 𑀳𑁄𑀢𑀺, 𑀢𑀤𑀸𑀬𑀢𑁆𑀢𑀸 𑀳𑀺 𑀦𑁂𑀲𑀁 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀯𑀢𑁆𑀢𑀸𑀦𑀼𑀯𑀢𑁆𑀢𑀧𑀝𑀺𑀧𑀢𑁆𑀢𑀺 𑀆𑀘𑀸𑀭𑀕𑁄𑀘𑀭𑀓𑀼𑀲𑀮𑀢𑀸. 𑀅𑀧𑀺 𑀘𑀲𑁆𑀲 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄; 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺; 𑀯𑀺𑀲𑀸𑀭𑀤𑁄 𑀲𑀗𑁆𑀖𑀫𑀚𑁆𑀛𑁂 𑀯𑁄𑀳𑀭𑀢𑀺; 𑀧𑀘𑁆𑀘𑀢𑁆𑀣𑀺𑀓𑁂 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺; 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 ¶ 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂 𑀧𑀼𑀕𑁆𑀕𑀮𑁂; 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄…𑀧𑁂… 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 (𑀧𑀭𑀺. 𑁩𑁨𑁫).

𑀬𑁂 𑀘𑀸𑀧𑀺 𑀲𑀁𑀯𑀭𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀯𑀺𑀦𑀬𑀥𑀭𑁄 𑀧𑀼𑀕𑁆𑀕𑀮𑁄 𑀢𑁂𑀲𑀁 𑀤𑀸𑀬𑀸𑀤𑁄; 𑀯𑀺𑀦𑀬𑀫𑀽𑀮𑀓𑀢𑁆𑀢𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬 ¶ , 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸, 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸, 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁 𑁋 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀭𑀺. 𑁩𑁬𑁬). 𑀢𑀲𑁆𑀫𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀬𑀸 𑀲𑀸 𑀯𑀺𑀦𑀬𑀲𑀁𑀯𑀡𑁆𑀡𑀦𑀢𑁆𑀣𑀁 𑀫𑀸𑀢𑀺𑀓𑀸 𑀞𑀧𑀺𑀢𑀸 𑀢𑀢𑁆𑀣 𑁋

‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁;

𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀁 𑀘𑁂𑀢𑀫𑁂𑀢𑀁, 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄’’𑀢𑀺.

𑀇𑀫𑀺𑀲𑁆𑀲𑀸 𑀢𑀸𑀯 𑀕𑀸𑀣𑀸𑀬 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀯𑀺𑀦𑀬𑀲𑁆𑀲 𑀘 𑀩𑀸𑀳𑀺𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀁𑀯𑀡𑁆𑀡𑀺𑀢𑀸 𑀳𑁄𑀢𑀻𑀢𑀺.

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ¶ ¶ ¶

‘‘𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄;

𑀤𑀲𑁆𑀲𑀬𑀦𑁆𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀦𑀬𑀲𑁆𑀲𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀢𑁂𑀦𑀸𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁. 𑀢𑀲𑁆𑀲 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂𑀦𑀧𑀺 𑀅𑀧𑀭𑀪𑀸𑀕𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄. 𑀅𑀧𑀭𑀪𑀸𑀕𑁂 𑀳𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀬𑁂𑀦 𑀲𑀫𑀬𑁂𑀦 𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀺𑀦𑀬𑁂 𑀬𑀼𑀢𑁆𑀢𑀺, 𑀬𑀤𑀺𑀤𑀁 𑀬𑀢𑁆𑀣 𑀬𑀢𑁆𑀣 ‘‘𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 ‘‘𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄𑀢𑀺.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀬𑁂𑀦 𑀲𑀼𑀤𑀺𑀦𑁆𑀦𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺; 𑀬𑀲𑁆𑀫𑀸 𑀧𑀝𑀺𑀲𑁂𑀯𑀺, 𑀢𑀲𑁆𑀫𑀸 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀢𑀸𑀯 𑀧𑀼𑀩𑁆𑀩𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀬𑁂𑀦 𑀲𑀫𑀬𑁂𑀦 𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄 𑀭𑀜𑁆𑀜𑁄 𑀤𑀸𑀭𑀽𑀦𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀻𑀢𑀺 𑀏𑀯𑀁 𑀧𑀘𑁆𑀙𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑁄 𑀢𑁂𑀦𑀸𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑁄. 𑀲𑀫𑀬𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀲𑀫𑀬𑀲𑀤𑁆𑀤𑁄 𑀢𑀸𑀯 𑁋

𑀲𑀫𑀯𑀸𑀬𑁂 ¶ 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼-𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 ¶ 𑀳𑀺𑀲𑁆𑀲 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭) 𑀏𑀯𑀫𑀸𑀤𑀻𑀲𑀼 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺 (𑀅. 𑀦𑀺. 𑁮.𑁨𑁯) 𑀏𑀯𑀫𑀸𑀤𑀻𑀲𑀼 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 ¶ 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺 (𑀧𑀸𑀘𑀺. 𑁩𑁫𑁮) 𑀏𑀯𑀫𑀸𑀤𑀻𑀲𑀼 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺 𑁋 ‘𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 𑁋 𑀪𑀤𑁆𑀤𑀸𑀮𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺 (𑀫. 𑀦𑀺. 𑁨.𑁧𑁩𑁫) 𑀏𑀯𑀫𑀸𑀤𑀻𑀲𑀼 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺 (𑀫. 𑀦𑀺. 𑁨.𑁨𑁬𑁦) 𑀏𑀯𑀫𑀸𑀤𑀻𑀲𑀼 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯);

𑀏𑀯𑀫𑀸𑀤𑀻𑀲𑀼 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁮) 𑀏𑀯𑀫𑀸𑀤𑀻𑀲𑀼 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁨.𑁮) 𑀏𑀯𑀫𑀸𑀤𑀻𑀲𑀼 𑀧𑀝𑀺𑀯𑁂𑀥𑁄 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑀲𑁆𑀫𑀸 𑀬𑁂𑀦 𑀓𑀸𑀮𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑁂𑀦 𑀓𑀸𑀮𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣𑀸𑀳 𑁋 ‘‘𑀅𑀣 𑀓𑀲𑁆𑀫𑀸 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘𑀏𑀓𑀁 𑀲𑀫𑀬’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀪𑀺𑀥𑀫𑁆𑀫𑁂 𑀘 ‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑁂𑀦, 𑀢𑀣𑀸 𑀅𑀓𑀢𑁆𑀯𑀸 𑀇𑀥 ‘𑀢𑁂𑀦 𑀲𑀫𑀬𑁂𑀦𑀸’𑀢𑀺 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺? 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀓𑀣𑀁? 𑀲𑀼𑀢𑁆𑀢𑀦𑁆𑀢𑁂 𑀢𑀸𑀯 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺; 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀪𑀺𑀥𑀫𑁆𑀫𑁂 𑀘 𑀅𑀥𑀺𑀓𑀭𑀡𑀢𑁆𑀣𑁄 ¶ 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀺𑀬𑀢𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 ¶ 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 ¶ 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺; 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀉𑀧𑀬𑁄𑀕𑁂𑀦 𑀪𑀼𑀫𑁆𑀫𑁂𑀦, 𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀬;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀓𑀭𑀡𑁂𑀦𑁂𑀯 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘𑀏𑀓𑀁 𑀲𑀫𑀬’𑀦𑁆𑀢𑀺 𑀯𑀸 ‘𑀬𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀯𑀸 ‘𑀢𑁂𑀦 𑀲𑀫𑀬𑁂𑀦𑀸’𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯 𑀅𑀢𑁆𑀣𑁄’’𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀮𑀤𑁆𑀥𑀺𑀬𑀸 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀧𑀭𑀢𑁄 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀯𑁂𑀭𑀜𑁆𑀚𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀦𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀲𑀁 𑀯𑁂𑀭𑀜𑁆𑀚𑀸𑀬𑀁; 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀫𑁂𑀢𑀁, 𑀇𑀥 𑀧𑀦 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁, 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 𑀏𑀢𑁆𑀣 𑀦𑀴𑁂𑀭𑀼 𑀦𑀸𑀫 𑀬𑀓𑁆𑀔𑁄, 𑀧𑀼𑀘𑀺𑀫𑀦𑁆𑀤𑁄𑀢𑀺 ¶ 𑀦𑀺𑀫𑁆𑀩𑀭𑀼𑀓𑁆𑀔𑁄, 𑀫𑀽𑀮𑀦𑁆𑀢𑀺 𑀲𑀫𑀻𑀧𑀁. 𑀅𑀬𑀜𑁆𑀳𑀺 𑀫𑀽𑀮𑀲𑀤𑁆𑀤𑁄 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀻’’𑀢𑀺 (𑀅. 𑀦𑀺. 𑁪.𑁧𑁯𑁫) -𑀆𑀤𑀻𑀲𑀼 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫) -𑀆𑀤𑀻𑀲𑀼 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂. 𑀇𑀥 𑀧𑀦 𑀲𑀫𑀻𑀧𑁂 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀦𑀴𑁂𑀭𑀼𑀬𑀓𑁆𑀔𑁂𑀦 𑀅𑀥𑀺𑀕𑁆𑀕𑀳𑀺𑀢𑀲𑁆𑀲 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀫𑀻𑀧𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀓𑀺𑀭 𑀧𑀼𑀘𑀺𑀫𑀦𑁆𑀤𑁄 𑀭𑀫𑀡𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀦𑁂𑀓𑁂𑀲𑀁 𑀭𑀼𑀓𑁆𑀔𑀸𑀦𑀁 𑀆𑀥𑀺𑀧𑀘𑁆𑀘𑀁 𑀯𑀺𑀬 𑀓𑀼𑀭𑀼𑀫𑀸𑀦𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀅𑀳𑁄𑀲𑀺. 𑀅𑀣 ¶ 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀕𑀦𑁆𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀯𑀺𑀳𑀭𑀦𑁆𑀢𑁄 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀳𑁂𑀝𑁆𑀞𑀸𑀪𑀸𑀕𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺.

𑀢𑀢𑁆𑀣 ¶ 𑀲𑀺𑀬𑀸 𑀬𑀤𑀺 𑀢𑀸𑀯 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺, ‘‘𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘‘𑀯𑁂𑀭𑀜𑁆𑀚𑀸𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀢𑁂𑀦𑁂𑀯 𑀲𑀫𑀬𑁂𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀳𑀭𑀺𑀢𑀼𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀯𑁂𑀭𑀜𑁆𑀚𑀸𑀬 𑀲𑀫𑀻𑀧𑁂 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀁 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀯𑁂𑀭𑀜𑁆𑀚𑀸𑀯𑀘𑀦𑀁. 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀦𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀯𑀘𑀦𑀁.

𑀢𑀢𑁆𑀣 𑀯𑁂𑀭𑀜𑁆𑀚𑀸𑀓𑀺𑀢𑁆𑀢𑀦𑁂𑀦 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀪𑀕𑀯𑀢𑁄 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀓𑀺𑀢𑁆𑀢𑀦𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁, 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀕𑁆𑀕𑀳𑀡𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁, 𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀼𑀧𑀸𑀬𑀤𑀲𑁆𑀲𑀦𑀁; 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀁, 𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺𑀁; 𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁 ¶ , 𑀧𑀘𑁆𑀙𑀺𑀫𑁂𑀦 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁; 𑀧𑀼𑀭𑀺𑀫𑁂𑀦 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀢𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀦𑀺𑀭𑀼𑀧𑀮𑁂𑀧𑀦𑀁; 𑀧𑀼𑀭𑀺𑀫𑁂𑀦 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀁, 𑀧𑀘𑁆𑀙𑀺𑀫𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀼𑀬𑁄𑀕𑀦𑀺𑀫𑀺𑀢𑁆𑀢𑀁; 𑀧𑀼𑀭𑀺𑀫𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁, 𑀧𑀘𑁆𑀙𑀺𑀫𑁂𑀦 𑀤𑁂𑀯𑀢𑀸𑀦𑀁; 𑀧𑀼𑀭𑀺𑀫𑁂𑀦 𑀮𑁄𑀓𑁂 𑀚𑀸𑀢𑀲𑁆𑀲 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀁, 𑀧𑀘𑁆𑀙𑀺𑀫𑁂𑀦 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀁; 𑀧𑀼𑀭𑀺𑀫𑁂𑀦 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁦) 𑀯𑀘𑀦𑀢𑁄 𑀬𑀤𑀢𑁆𑀣𑀁 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀁, 𑀧𑀘𑁆𑀙𑀺𑀫𑁂𑀦 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀁. 𑀪𑀕𑀯𑀸 𑀳𑀺 𑀧𑀞𑀫𑀁 𑀮𑀼𑀫𑁆𑀩𑀺𑀦𑀻𑀯𑀦𑁂, 𑀤𑀼𑀢𑀺𑀬𑀁 𑀩𑁄𑀥𑀺𑀫𑀡𑁆𑀟𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀯𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑁄, 𑀢𑁂𑀦𑀲𑁆𑀲 𑀯𑀦𑁂𑀬𑁂𑀯 𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀳𑀢𑀸 ¶ 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸; 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺, 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀕𑀼𑀡𑁂𑀳𑀺𑀧𑀺 𑀫𑀳𑀸 𑀅𑀳𑁄𑀲𑀺, 𑀬𑀲𑁆𑀫𑀸 𑀬𑁄 𑀢𑀢𑁆𑀣 𑀧𑀘𑁆𑀙𑀺𑀫𑀓𑁄 𑀲𑁄 𑀲𑁄𑀢𑀸𑀧𑀦𑁆𑀦𑁄; 𑀲𑀗𑁆𑀔𑁆𑀬𑀸𑀬𑀧𑀺 𑀫𑀳𑀸 𑀧𑀜𑁆𑀘𑀲𑀢𑀲𑀗𑁆𑀔𑁆𑀬𑀢𑁆𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦; 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀲𑀗𑁆𑀖𑀸𑀢𑁂𑀦 𑀲𑀫𑀡𑀕𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻𑀢𑀺 𑀧𑀜𑁆𑀘 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀘𑀫𑀢𑁆𑀢𑀸𑀦𑀺. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑀣𑀸 ‘‘𑀪𑁄𑀚𑀦𑁂 ¶ 𑀫𑀢𑁆𑀢𑀜𑁆𑀜𑀽’’𑀢𑀺 𑀯𑀼𑀢𑁆𑀢𑁂 𑀪𑁄𑀚𑀦𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀧𑀫𑀸𑀡𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀳𑁄𑀢𑀺; 𑀏𑀯𑀫𑀺𑀥𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘 𑀫𑀢𑁆𑀢𑀸 𑀧𑀜𑁆𑀘𑀧𑁆𑀧𑀫𑀸𑀡𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀽𑀦𑀁 𑀲𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀢𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀏𑀢𑁂𑀦 𑀬𑀁 𑀯𑀼𑀢𑁆𑀢𑀁 𑁋 ‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺’’𑀦𑁆𑀢𑀺, 𑀏𑀢𑁆𑀣 𑀢𑀲𑁆𑀲 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀭𑀢𑁄 𑀧𑀦𑀲𑁆𑀲 ¶ ‘‘𑀦𑀺𑀭𑀩𑁆𑀩𑀼𑀤𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀭𑀸𑀤𑀻𑀦𑀯𑁄 𑀅𑀧𑀕𑀢𑀓𑀸𑀴𑀓𑁄 𑀲𑀼𑀤𑁆𑀥𑁄 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄. 𑀇𑀫𑁂𑀲𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀬𑁄 𑀧𑀘𑁆𑀙𑀺𑀫𑀓𑁄 𑀲𑁄 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦 𑀕𑀼𑀡𑀫𑀳𑀢𑁆𑀢𑀁 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀲𑁆𑀲𑁄𑀲𑀻𑀢𑀺 𑀲𑀼𑀡𑀺 𑀉𑀧𑀮𑀪𑀺, 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀸𑀲𑀺. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 𑀅𑀲𑁆𑀲𑁄𑀲𑀺 𑀏𑀯, 𑀦𑀸𑀲𑁆𑀲 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯. 𑀯𑁂𑀭𑀜𑁆𑀚𑀸𑀬𑀁 𑀚𑀸𑀢𑁄, 𑀯𑁂𑀭𑀜𑁆𑀚𑀸𑀬𑀁 𑀪𑀯𑁄, 𑀯𑁂𑀭𑀜𑁆𑀚𑀸 𑀯𑀸 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀯𑁂𑀭𑀜𑁆𑀚𑁄. 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀯𑀲𑁂𑀦 𑀧𑀦𑀸𑀬𑀁 ‘‘𑀉𑀤𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀯𑀘𑀦𑀁. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀅𑀲𑁆𑀲𑁄𑀲𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 (𑀥. 𑀧. 𑁩𑁮𑁮), 𑀲𑀫𑀺𑀢𑀧𑀸𑀧𑀢𑁆𑀢𑀸 ¶ 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫). 𑀪𑀕𑀯𑀸 𑀘 𑀅𑀦𑀼𑀢𑁆𑀢𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀺𑀢𑀧𑀸𑀧𑁄, 𑀢𑁂𑀦𑀲𑁆𑀲 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀫𑁂𑀢𑀁 𑀦𑀸𑀫𑀁 𑀬𑀤𑀺𑀤𑀁 𑀲𑀫𑀡𑁄𑀢𑀺. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸𑀦𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀆𑀮𑀧𑀦𑀫𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀪𑁄𑀯𑀸𑀤𑀻 𑀦𑀸𑀫𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺. (𑀥. 𑀧. 𑁩𑁯𑁬; 𑀲𑀼. 𑀦𑀺. 𑁬𑁨𑁫). 𑀕𑁄𑀢𑀫𑁄𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀲𑀫𑀡𑁄 𑀓𑀺𑀭 𑀪𑁄 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁, 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯, 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀢𑀁 𑀔𑁄 𑀧𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 ¶ 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀔𑁄 𑀧𑀦 ¶ 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁄𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄; 𑀲𑁂𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺 𑀏𑀯, 𑀣𑀼𑀢𑀺𑀖𑁄𑀲𑁄 𑀯𑀸.

𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀢𑀸𑀯 𑀬𑁄𑀚𑀦𑀸 𑁋 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀯𑀺𑀦𑀬𑀥𑀭𑀸𑀦𑀁 𑀲𑀼𑀢𑁆𑀢𑀦𑁆𑀢𑀦𑀬𑀓𑁄𑀲𑀮𑁆𑀮𑀢𑁆𑀣𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀜𑁆𑀘 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀺𑀢𑁆𑀣𑀸𑀭𑀦𑀬𑁂𑀦 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑁋 ‘‘𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳’’𑀦𑁆𑀢𑀺𑀆𑀤𑀺; 𑀢𑀢𑁆𑀣 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀓𑀸 𑀳𑀺 𑀲𑁄 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑁄, 𑀫𑀕𑁆𑀕𑁂𑀦 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸𑀢𑀺 𑀆𑀭𑀓𑀢𑁆𑀢𑀸 𑀅𑀭𑀳𑀁; 𑀢𑁂 𑀘𑀸𑀦𑁂𑀦 𑀓𑀺𑀮𑁂𑀲𑀸𑀭𑀬𑁄 𑀫𑀕𑁆𑀕𑁂𑀦 𑀳𑀢𑀸𑀢𑀺 𑀅𑀭𑀻𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀜𑁆𑀘𑁂𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀺𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀭𑀁 𑀚𑀭𑀸𑀫𑀭𑀡𑀦𑁂𑀫𑀺 𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀯𑀭𑀣𑁂 𑀲𑀫𑀸𑀬𑁄𑀚𑀺𑀢𑀁 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁 𑀲𑀁𑀲𑀸𑀭𑀘𑀓𑁆𑀓𑀁, 𑀢𑀲𑁆𑀲𑀸𑀦𑁂𑀦 𑀩𑁄𑀥𑀺𑀫𑀡𑁆𑀟𑁂 ¶ 𑀯𑀻𑀭𑀺𑀬𑀧𑀸𑀤𑁂𑀳𑀺 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑀸 𑀳𑀢𑀸𑀢𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳𑀁.

𑀅𑀣 𑀯𑀸 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀘 𑀅𑀯𑀺𑀚𑁆𑀚𑀸 𑀦𑀸𑀪𑀺, 𑀫𑀽𑀮𑀢𑁆𑀢𑀸; 𑀚𑀭𑀸𑀫𑀭𑀡𑀁 𑀦𑁂𑀫𑀺, 𑀧𑀭𑀺𑀬𑁄𑀲𑀸𑀦𑀢𑁆𑀢𑀸; 𑀲𑁂𑀲𑀸 𑀤𑀲 𑀥𑀫𑁆𑀫𑀸 𑀅𑀭𑀸, 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀢𑁆𑀢𑀸 𑀘. 𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸, 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸 𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸 𑀅𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸 𑀓𑀸𑀫𑀪𑀯𑁂 ¶ 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀓𑀸𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀓𑀸𑀫𑀪𑀯𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀭𑀽𑀧𑀪𑀯𑁂. 𑀅𑀭𑀽𑀧𑀪𑀯𑁂 𑀦𑀸𑀫𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀦𑀸𑀫𑀭𑀽𑀧𑀁 𑀓𑀸𑀫𑀪𑀯𑁂 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀦𑀸𑀫𑀭𑀽𑀧𑀁 𑀭𑀽𑀧𑀪𑀯𑁂 𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀦𑀸𑀫𑀁 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀲𑀴𑀸𑀬𑀢𑀦𑀁 𑀓𑀸𑀫𑀪𑀯𑁂 𑀙𑀩𑁆𑀩𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀢𑀻𑀡𑀺 𑀆𑀬𑀢𑀦𑀸𑀦𑀺 𑀭𑀽𑀧𑀪𑀯𑁂 𑀢𑀺𑀡𑁆𑀡𑀁 𑀨𑀲𑁆𑀲𑀸𑀦𑀁; 𑀅𑀭𑀽𑀧𑀪𑀯𑁂 𑀏𑀓𑀫𑀸𑀬𑀢𑀦𑀁 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀙 𑀨𑀲𑁆𑀲𑀸 𑀓𑀸𑀫𑀪𑀯𑁂 𑀙𑀦𑁆𑀦𑀁 𑀯𑁂𑀤𑀦𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀽𑀧𑀪𑀯𑁂 𑀢𑀬𑁄 𑀢𑀢𑁆𑀣𑁂𑀯 ¶ 𑀢𑀺𑀲𑁆𑀲𑀦𑁆𑀦𑀁; 𑀅𑀭𑀽𑀧𑀪𑀯𑁂 𑀏𑀓𑁄 𑀢𑀢𑁆𑀣𑁂𑀯 𑀏𑀓𑀺𑀲𑁆𑀲𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀙 𑀯𑁂𑀤𑀦𑀸 𑀓𑀸𑀫𑀪𑀯𑁂 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀽𑀧𑀪𑀯𑁂 𑀢𑀺𑀲𑁆𑀲𑁄 𑀢𑀢𑁆𑀣𑁂𑀯 𑀢𑀺𑀡𑁆𑀡𑀁; 𑀅𑀭𑀽𑀧𑀪𑀯𑁂 𑀏𑀓𑀸 𑀯𑁂𑀤𑀦𑀸 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲 𑀢𑀡𑁆𑀳𑀸𑀓𑀸𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀢𑀢𑁆𑀣 𑀲𑀸 𑀲𑀸 𑀢𑀡𑁆𑀳𑀸 𑀢𑀲𑁆𑀲 𑀢𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑁄; 𑀉𑀧𑀸𑀤𑀸𑀦𑀸𑀤𑀬𑁄 𑀪𑀯𑀸𑀤𑀻𑀦𑀁.

𑀓𑀣𑀁? 𑀇𑀥𑁂𑀓𑀘𑁆𑀘𑁄 ‘‘𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺; 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀣𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄, 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺, 𑀧𑀭𑀺𑀧𑀸𑀓𑁄 𑀚𑀭𑀸, 𑀪𑁂𑀤𑁄 𑀫𑀭𑀡𑀁.

𑀅𑀧𑀭𑁄 ¶ ‘‘𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀲𑀼𑀘𑀭𑀺𑀢𑀁 𑀘𑀭𑀢𑀺; 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀲𑀕𑁆𑀕𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀣𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄𑀢𑀺 𑀲𑁄 𑀏𑀯 𑀦𑀬𑁄.

𑀅𑀧𑀭𑁄 𑀧𑀦 ‘‘𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀺, 𑀓𑀭𑀼𑀡𑀁… 𑀫𑀼𑀤𑀺𑀢𑀁… 𑀉𑀧𑁂𑀓𑁆𑀔𑀁 𑀪𑀸𑀯𑁂𑀢𑀺, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄𑀢𑀺 𑀲𑁄𑀬𑁂𑀯 𑀦𑀬𑁄.

𑀅𑀧𑀭𑁄 ‘‘𑀅𑀭𑀽𑀧𑀯𑀪𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 ¶ 𑀢𑀣𑁂𑀯 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀬𑁄 𑀪𑀸𑀯𑁂𑀢𑀺, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄, 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺, 𑀧𑀭𑀺𑀧𑀸𑀓𑁄 𑀚𑀭𑀸, 𑀪𑁂𑀤𑁄 𑀫𑀭𑀡𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀺 𑀬𑁄𑀚𑀦𑀸𑀲𑀼.

𑀏𑀯𑀁 ‘‘𑀅𑀬𑀁 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁; 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁; 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀏𑀓𑁄 𑀲𑀗𑁆𑀔𑁂𑀧𑁄, 𑀯𑀺𑀜𑁆𑀜𑀸𑀡-𑀦𑀸𑀫𑀭𑀽𑀧-𑀲𑀴𑀸𑀬𑀢𑀦-𑀨𑀲𑁆𑀲-𑀯𑁂𑀤𑀦𑀸 𑀏𑀓𑁄, 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀏𑀓𑁄, 𑀚𑀸𑀢𑀺-𑀚𑀭𑀸-𑀫𑀭𑀡𑀁 𑀏𑀓𑁄. 𑀧𑀼𑀭𑀺𑀫𑀲𑀗𑁆𑀔𑁂𑀧𑁄 𑀘𑁂𑀢𑁆𑀣 𑀅𑀢𑀻𑀢𑁄 𑀅𑀤𑁆𑀥𑀸, 𑀤𑁆𑀯𑁂 𑀫𑀚𑁆𑀛𑀺𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀸𑀕𑀢𑁄. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑀻𑀢𑁂 𑀓𑀫𑁆𑀫𑀯𑀝𑁆𑀝𑀁; 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀏𑀢𑀭𑀳𑀺 𑀯𑀺𑀧𑀸𑀓𑀯𑀝𑁆𑀝𑀁. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀕𑁆𑀕𑀳𑀡𑁂𑀦 ¶ 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀏𑀢𑀭𑀳𑀺 𑀓𑀫𑁆𑀫𑀯𑀝𑁆𑀝𑀁; 𑀚𑀸𑀢𑀺𑀚𑀭𑀸𑀫𑀭𑀡𑀸𑀧𑀤𑁂𑀲𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀁. 𑀢𑁂 𑀆𑀓𑀸𑀭𑀢𑁄 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑁂𑀢𑁆𑀣 𑀅𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀺, 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑀸 𑀏𑀓𑁄, 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑀸 𑀏𑀓𑁄. 𑀇𑀢𑀺 𑀪𑀕𑀯𑀸 𑀏𑀯𑀁 𑀘𑀢𑀼𑀲𑀗𑁆𑀔𑁂𑀧𑀁, 𑀢𑀺𑀬𑀤𑁆𑀥𑀁, 𑀯𑀻𑀲𑀢𑀸𑀓𑀸𑀭𑀁, 𑀢𑀺𑀲𑀦𑁆𑀥𑀺𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺. 𑀇𑀫𑀺𑀦𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀪𑀕𑀯𑀸 𑀢𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀢𑁂𑀲𑀼 ¶ 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀇𑀫𑀲𑁆𑀲 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑁂 𑀳𑀦𑀺 𑀯𑀺𑀳𑀦𑀺 𑀯𑀺𑀤𑁆𑀥𑀁𑀲𑁂𑀲𑀺. 𑀏𑀯𑀫𑁆𑀧𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳𑀁.

𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 ¶ 𑀅𑀭𑀳𑀢𑀺 𑀧𑀽𑀚𑀸𑀯𑀺𑀲𑁂𑀲𑀜𑁆𑀘; 𑀢𑁂𑀦𑁂𑀯 𑀘 𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂 𑀬𑁂 𑀓𑁂𑀘𑀺 𑀫𑀳𑁂𑀲𑀓𑁆𑀔𑀸 𑀤𑁂𑀯𑀫𑀦𑀼𑀲𑁆𑀲𑀸 𑀦 𑀢𑁂 𑀅𑀜𑁆𑀜𑀢𑁆𑀣 𑀧𑀽𑀚𑀁 𑀓𑀭𑁄𑀦𑁆𑀢𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀭𑀢𑀦𑀤𑀸𑀫𑁂𑀦 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀬𑀣𑀸𑀩𑀮𑀜𑁆𑀘 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀸𑀤𑀬𑁄. 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀧𑀺 𑀘 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀦𑁆𑀢𑀺! 𑀏𑀯𑀁 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀣𑀸 𑀘 𑀮𑁄𑀓𑁂 𑀓𑁂𑀘𑀺 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀩𑀸𑀮𑀸 𑀅𑀲𑀺𑀮𑁄𑀓𑀪𑀬𑁂𑀦 𑀭𑀳𑁄 𑀧𑀸𑀧𑀁 𑀓𑀭𑁄𑀦𑁆𑀢𑀺; 𑀏𑀯𑀫𑁂𑀲 𑀦 𑀓𑀤𑀸𑀘𑀺 𑀓𑀭𑁄𑀢𑀻𑀢𑀺 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀢𑁄𑀧𑀺 𑀅𑀭𑀳𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀆𑀭𑀓𑀢𑁆𑀢𑀸 𑀳𑀢𑀢𑁆𑀢𑀸 𑀘, 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀺;

𑀳𑀢𑀲𑀁𑀲𑀸𑀭𑀘𑀓𑁆𑀓𑀸𑀭𑁄, 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄;

𑀦 𑀭𑀳𑁄 𑀓𑀭𑁄𑀢𑀺 𑀧𑀸𑀧𑀸𑀦𑀺, 𑀅𑀭𑀳𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀣𑀸 𑀳𑁂𑀲 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄, 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀢𑁄 𑀩𑀼𑀤𑁆𑀥𑁄, 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀧𑀭𑀺𑀜𑁆𑀜𑁂𑀬𑁆𑀬𑀢𑁄, 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀧𑀳𑀸𑀢𑀩𑁆𑀩𑀢𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀥𑀫𑁆𑀫𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀢𑁄, 𑀪𑀸𑀯𑁂𑀢𑀩𑁆𑀩𑁂 𑀥𑀫𑁆𑀫𑁂 𑀪𑀸𑀯𑁂𑀢𑀩𑁆𑀩𑀢𑁄. 𑀢𑁂𑀦𑁂𑀯 𑀘𑀸𑀳 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀁 ¶ 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁬𑁩);

𑀅𑀧𑀺𑀘 𑀘𑀓𑁆𑀔𑀼 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦𑀸𑀧𑀺 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄. 𑀏𑀲 𑀦𑀬𑁄 𑀲𑁄𑀢-𑀖𑀸𑀦-𑀚𑀺𑀯𑁆𑀳𑀸-𑀓𑀸𑀬𑀫𑀦𑁂𑀲𑀼𑀧𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀭𑀽𑀧𑀸𑀤𑀻𑀦𑀺 𑀙 𑀆𑀬𑀢𑀦𑀸𑀦𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀙 𑀨𑀲𑁆𑀲𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀬𑁄 𑀙 𑀯𑁂𑀤𑀦𑀸, 𑀭𑀽𑀧𑀲𑀜𑁆𑀜𑀸𑀤𑀬𑁄 𑀙 𑀲𑀜𑁆𑀜𑀸, 𑀭𑀽𑀧𑀲𑀜𑁆𑀘𑁂𑀢𑀦𑀸𑀤𑀬𑁄 𑀙 𑀘𑁂𑀢𑀦𑀸, 𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 ¶ 𑀢𑀡𑁆𑀳𑀸𑀓𑀸𑀬𑀸, 𑀭𑀽𑀧𑀯𑀺𑀢𑀓𑁆𑀓𑀸𑀤𑀬𑁄 𑀙 𑀯𑀺𑀢𑀓𑁆𑀓𑀸, 𑀭𑀽𑀧𑀯𑀺𑀘𑀸𑀭𑀸𑀤𑀬𑁄 𑀙 𑀯𑀺𑀘𑀸𑀭𑀸 ¶ , 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑀲 𑀓𑀲𑀺𑀡𑀸𑀦𑀺, 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄, 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀤𑀺𑀯𑀲𑁂𑀦 𑀤𑀲 𑀲𑀜𑁆𑀜𑀸, 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀓𑀸𑀫𑀪𑀯𑀸𑀤𑀬𑁄 𑀦𑀯 𑀪𑀯𑀸, 𑀧𑀞𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀬𑁄 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸, 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀧𑀝𑀺𑀮𑁄𑀫𑀢𑁄 𑀚𑀭𑀸𑀫𑀭𑀡𑀸𑀤𑀻𑀦𑀺, 𑀅𑀦𑀼𑀮𑁄𑀫𑀢𑁄 𑀅𑀯𑀺𑀚𑁆𑀚𑀸𑀤𑀻𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀏𑀓𑀧𑀤𑀬𑁄𑀚𑀦𑀸 𑁋 ‘‘𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀚𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘’’𑀦𑁆𑀢𑀺. 𑀏𑀯𑀁 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄 𑀅𑀦𑀼𑀩𑀼𑀤𑁆𑀥𑁄 𑀧𑀝𑀺𑀯𑀺𑀤𑁆𑀥𑁄. 𑀢𑁂𑀦 𑀯𑀼𑀢𑁆𑀢𑀁 𑁋 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺.

𑀯𑀺𑀚𑁆𑀚𑀸𑀳𑀺 𑀧𑀦 𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄; 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄𑀧𑀺 𑀯𑀺𑀚𑁆𑀚𑀸, 𑀅𑀝𑁆𑀞𑀧𑀺 𑀯𑀺𑀚𑁆𑀚𑀸. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞 𑀯𑀺𑀚𑁆𑀚𑀸 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁭𑁮 𑀆𑀤𑀬𑁄). 𑀢𑀢𑁆𑀭 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀘 𑀲𑀳 𑀙 𑀅𑀪𑀺𑀜𑁆𑀜𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀼𑀢𑁆𑀢𑀸. 𑀘𑀭𑀡𑀦𑁆𑀢𑀺 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀬𑁂𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸, 𑀬𑀲𑁆𑀫𑀸 𑀏𑀢𑁂𑀳𑀺 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁 𑀢𑀲𑁆𑀫𑀸, 𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁨.𑁨𑁪) 𑀯𑀺𑀢𑁆𑀣𑀸𑀭𑁄. 𑀪𑀕𑀯𑀸 𑀇𑀫𑀸𑀳𑀺 𑀯𑀺𑀚𑁆𑀚𑀸𑀳𑀺 𑀇𑀫𑀺𑀦𑀸 𑀘 𑀘𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 ¶ . 𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸, 𑀘𑀭𑀡𑀲𑀫𑁆𑀧𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀁. 𑀲𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀦𑀢𑁆𑀣𑀁 𑀜𑀢𑁆𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑁂 𑀦𑀺𑀬𑁄𑀚𑁂𑀢𑀺, 𑀬𑀣𑀸 𑀢𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 𑀲𑀸𑀯𑀓𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀦𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑀸, 𑀯𑀺𑀚𑁆𑀚𑀸𑀘𑀭𑀡𑀯𑀺𑀧𑀦𑁆𑀦𑀸𑀦𑀜𑁆𑀳𑀺 𑀲𑀸𑀯𑀓𑀸 𑀅𑀢𑁆𑀢𑀦𑁆𑀢𑀧𑀸𑀤𑀬𑁄 𑀯𑀺𑀬.

𑀲𑁄𑀪𑀦𑀕𑀫𑀦𑀢𑁆𑀢𑀸, 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀫𑁆𑀫𑀸𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀘 𑀕𑀤𑀢𑁆𑀢𑀸 𑀲𑀼𑀕𑀢𑁄. 𑀕𑀫𑀦𑀫𑁆𑀧𑀺 𑀳𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀪𑀕𑀯𑀢𑁄 𑀲𑁄𑀪𑀦𑀁 𑀧𑀭𑀺𑀲𑀼𑀤𑁆𑀥𑀫𑀦𑀯𑀚𑁆𑀚𑀁 ¶ . 𑀓𑀺𑀁 ¶ 𑀧𑀦 𑀢𑀦𑁆𑀢𑀺? 𑀅𑀭𑀺𑀬𑀫𑀕𑁆𑀕𑁄. 𑀢𑁂𑀦 𑀳𑁂𑀲 𑀕𑀫𑀦𑁂𑀦 𑀔𑁂𑀫𑀁 𑀤𑀺𑀲𑀁 𑀅𑀲𑀚𑁆𑀚𑀫𑀸𑀦𑁄 𑀕𑀢𑁄𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀕𑀢𑁄. 𑀲𑀼𑀦𑁆𑀤𑀭𑀁 𑀘𑁂𑀲 𑀞𑀸𑀦𑀁 𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘 𑀕𑀢𑁄 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺 (𑀫𑀳𑀸𑀦𑀺. 𑁩𑁮). 𑀲𑀫𑁆𑀫𑀸 𑀯𑀸 𑀆𑀕𑀢𑁄 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀩𑁄𑀥𑀺𑀫𑀡𑁆𑀟𑁄 𑀢𑀸𑀯 𑀲𑀫𑀢𑀺𑀁𑀲𑀧𑀸𑀭𑀫𑀺𑀧𑀽𑀭𑀺𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀇𑀫𑁂 𑀘 𑀅𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀆𑀕𑀢𑁄𑀢𑀺 𑀲𑀫𑁆𑀫𑀸𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘𑁂𑀲 𑀕𑀤𑀢𑀺, 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀫𑁂𑀯 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄.

𑀢𑀢𑁆𑀭𑀺𑀤𑀁 𑀲𑀸𑀥𑀓𑀲𑀼𑀢𑁆𑀢𑀁 𑁋 ‘‘𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺 (𑀫. 𑀦𑀺. 𑁨.𑁮𑁬). 𑀏𑀯𑀁 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀧𑀦 𑀮𑁄𑀓𑀯𑀺𑀤𑀽. 𑀲𑁄 𑀳𑀺 𑀪𑀕𑀯𑀸 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 ¶ 𑀲𑀩𑁆𑀩𑀣𑀸 𑀮𑁄𑀓𑀁 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀬𑀣𑀸𑀳 𑁋 ‘‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 ¶ 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 ¶ 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀺; 𑀦 𑀘𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀧𑀺 𑀘𑀸𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁.

‘‘𑀕𑀫𑀦𑁂𑀦 𑀦 𑀧𑀢𑁆𑀢𑀩𑁆𑀩𑁄, 𑀮𑁄𑀓𑀲𑁆𑀲𑀦𑁆𑀢𑁄 𑀓𑀼𑀤𑀸𑀘𑀦𑀁;

𑀦 𑀘 𑀅𑀧𑁆𑀧𑀢𑁆𑀯𑀸 𑀮𑁄𑀓𑀦𑁆𑀢𑀁, 𑀤𑀼𑀓𑁆𑀔𑀸 𑀅𑀢𑁆𑀣𑀺 𑀧𑀫𑁄𑀘𑀦𑀁.

‘‘𑀢𑀲𑁆𑀫𑀸 𑀳𑀯𑁂 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄;

𑀮𑁄𑀓𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀫𑀺𑀢𑀸𑀯𑀺 𑀜𑀢𑁆𑀯𑀸;

𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀅. 𑀦𑀺. 𑁪.𑁪𑁫; 𑀲𑀁. 𑀦𑀺. 𑁧.𑁧𑁦𑁭);

𑀅𑀧𑀺𑀘 𑀢𑀬𑁄 𑀮𑁄𑀓𑀸 𑁋 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄𑀢𑀺; 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀧𑀝𑀺. 𑀫. 𑁧.𑁧𑁧𑁨) 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸’’𑀢𑀺 (𑀤𑀻. 𑀦𑀺. 𑁧.𑁪𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺. (𑀫. 𑀦𑀺. 𑁧.𑁫𑁦𑁩) 𑁋

𑀆𑀕𑀢𑀝𑁆𑀞𑀸𑀦𑁂 𑀑𑀓𑀸𑀲𑀮𑁄𑀓𑁄, 𑀢𑀫𑁆𑀧𑀺 𑀪𑀕𑀯𑀸 𑀲𑀩𑁆𑀩𑀣𑀸 𑀅𑀯𑁂𑀤𑀺. 𑀢𑀣𑀸 𑀳𑀺𑀲𑁆𑀲 𑁋 ‘‘𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑁋 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑁋 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 ¶ . 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺 (𑀧𑀝𑀺. 𑀫. 𑁧.𑁧𑁧𑁨). 𑀅𑀬𑀁 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄.

𑀬𑀲𑁆𑀫𑀸 ¶ 𑀧𑀦𑁂𑀲 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑁂 𑀅𑀪𑀩𑁆𑀩𑁂 𑀲𑀢𑁆𑀢𑁂 𑀚𑀸𑀦𑀸𑀢𑀺, 𑀢𑀲𑁆𑀫𑀸𑀲𑁆𑀲 𑀲𑀢𑁆𑀢𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀬𑀣𑀸 𑀘 𑀲𑀢𑁆𑀢𑀮𑁄𑀓𑁄 ¶ 𑀏𑀯𑀁 𑀑𑀓𑀸𑀲𑀮𑁄𑀓𑁄𑀧𑀺. 𑀢𑀣𑀸 𑀳𑁂𑀲 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀺. 𑀧𑀭𑀺𑀓𑁆𑀔𑁂𑀧𑀢𑁄 𑁋

𑀲𑀩𑁆𑀩𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲 𑀧𑀭𑀺𑀫𑀡𑁆𑀟𑀮𑀁;

𑀤𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘.

𑀢𑀢𑁆𑀣 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸.

𑀢𑀲𑁆𑀲𑀸 𑀏𑀯 𑀲𑀦𑁆𑀥𑀸𑀭𑀓𑀁 𑁋

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑁂𑀯 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀚𑀮𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀲𑁆𑀲𑀸𑀧𑀺 𑀲𑀦𑁆𑀥𑀸𑀭𑀓𑁄 𑁋

𑀦𑀯𑀲𑀢𑀲𑀳𑀲𑁆𑀲𑀸𑀦𑀺, 𑀫𑀸𑀮𑀼𑀢𑁄 𑀦𑀪𑀫𑀼𑀕𑁆𑀕𑀢𑁄;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀏𑀲𑀸 𑀮𑁄𑀓𑀲𑁆𑀲 𑀲𑀡𑁆𑀞𑀺𑀢𑀺.

𑀏𑀯𑀁 𑀲𑀡𑁆𑀞𑀺𑀢𑁂 𑀘𑁂𑀢𑁆𑀣 𑀬𑁄𑀚𑀦𑀸𑀦𑀁 𑁋

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁄.

𑀢𑀢𑁄 ¶ 𑀉𑀧𑀟𑁆𑀠𑀼𑀧𑀟𑁆𑀠𑁂𑀦, 𑀧𑀫𑀸𑀡𑁂𑀦 𑀬𑀣𑀸𑀓𑁆𑀓𑀫𑀁;

𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸 𑀤𑀺𑀩𑁆𑀩𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑀸.

𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀻 𑀩𑁆𑀭𑀳𑀸.

𑀏𑀢𑁂 𑀲𑀢𑁆𑀢 𑀫𑀳𑀸𑀲𑁂𑀮𑀸, 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸, 𑀤𑁂𑀯𑀬𑀓𑁆𑀔𑀦𑀺𑀲𑁂𑀯𑀺𑀢𑀸.

𑀬𑁄𑀚𑀦𑀸𑀦𑀁 ¶ 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄;

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄.

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥, 𑀧𑀭𑀺𑀓𑁆𑀔𑁂𑀧𑀸 𑀦𑀕𑀯𑁆𑀳𑀬𑀸;

𑀧𑀜𑁆𑀜𑀸𑀲 𑀬𑁄𑀚𑀦𑀓𑁆𑀔𑀦𑁆𑀥, 𑀲𑀸𑀔𑀸𑀬𑀸𑀫𑀸 𑀲𑀫𑀦𑁆𑀢𑀢𑁄.

𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸;

𑀚𑀫𑁆𑀩𑀽 𑀬𑀲𑁆𑀲𑀸𑀦𑀼𑀪𑀸𑀯𑁂𑀦, 𑀚𑀫𑁆𑀩𑀼𑀤𑀻𑀧𑁄 𑀧𑀓𑀸𑀲𑀺𑀢𑁄.

𑀤𑁆𑀯𑁂 𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄.

𑀢𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀁; 𑀢𑀣𑀸 𑀅𑀲𑀼𑀭𑀪𑀯𑀦𑀁, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄, 𑀚𑀫𑁆𑀩𑀼𑀤𑀻𑀧𑁄 𑀘. 𑀅𑀧𑀭𑀕𑁄𑀬𑀸𑀦𑀁 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀁; 𑀢𑀣𑀸 𑀧𑀼𑀩𑁆𑀩𑀯𑀺𑀤𑁂𑀳𑁄. 𑀉𑀢𑁆𑀢𑀭𑀓𑀼𑀭𑀼 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁄, 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀫𑀳𑀸𑀤𑀻𑀧𑁄 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁄; 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀓𑀁 𑀘𑀓𑁆𑀓𑀯𑀸𑀴𑀁 ¶ , 𑀏𑀓𑀸 𑀮𑁄𑀓𑀥𑀸𑀢𑀼, 𑀢𑀤𑀦𑁆𑀢𑀭𑁂𑀲𑀼 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸. 𑀏𑀯𑀁 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀪𑀕𑀯𑀸 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀺, 𑀅𑀜𑁆𑀜𑀸𑀲𑀺, 𑀧𑀝𑀺𑀯𑀺𑀚𑁆𑀛𑀺. 𑀏𑀯𑀫𑀲𑁆𑀲 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀏𑀯𑀫𑁆𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽.

𑀅𑀢𑁆𑀢𑀦𑁄 ¶ 𑀧𑀦 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀢𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄. 𑀢𑀣𑀸 𑀳𑁂𑀲 𑀲𑀻𑀮𑀕𑀼𑀡𑁂𑀦𑀸𑀧𑀺 𑀲𑀩𑁆𑀩𑀁 𑀮𑁄𑀓𑀫𑀪𑀺𑀪𑀯𑀢𑀺, 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸… 𑀯𑀺𑀫𑀼𑀢𑁆𑀢𑀺… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀸𑀧𑀺, 𑀲𑀻𑀮𑀕𑀼𑀡𑁂𑀦𑀸𑀧𑀺 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀸𑀧𑀺. 𑀬𑀣𑀸𑀳 𑁋 ‘‘𑀦 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭’’𑀦𑁆𑀢𑀺 𑀯𑀺𑀢𑁆𑀣𑀸𑀭𑁄.

𑀏𑀯𑀁 ¶ 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧) 𑀘 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺, 𑀤𑀫𑁂𑀢𑀺 𑀯𑀺𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀲𑀤𑀫𑁆𑀫𑀸𑀢𑀺 𑀅𑀤𑀦𑁆𑀢𑀸 𑀤𑀫𑁂𑀢𑀼𑀁 𑀬𑀼𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺. 𑀢𑀣𑀸 𑀳𑀺 𑀪𑀕𑀯𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀅𑀧𑀮𑀸𑀴𑁄 𑀦𑀸𑀕𑀭𑀸𑀚𑀸, 𑀘𑀽𑀴𑁄𑀤𑀭𑁄, 𑀫𑀳𑁄𑀤𑀭𑁄, 𑀅𑀕𑁆𑀕𑀺𑀲𑀺𑀔𑁄, 𑀥𑀽𑀫𑀲𑀺𑀔𑁄, 𑀥𑀦𑀧𑀸𑀮𑀓𑁄 𑀳𑀢𑁆𑀣𑀻𑀢𑀺 𑀏𑀯𑀫𑀸𑀤𑀬𑁄 𑀤𑀫𑀺𑀢𑀸, 𑀦𑀺𑀩𑁆𑀩𑀺𑀲𑀸 𑀓𑀢𑀸, 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀺𑀢𑀸. 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀲𑀘𑁆𑀘𑀓𑀦𑀺𑀕𑀡𑁆𑀞𑀧𑀼𑀢𑁆𑀢-𑀅𑀫𑁆𑀩𑀝𑁆𑀞𑀫𑀸𑀡𑀯-𑀧𑁄𑀓𑁆𑀔𑀭𑀲𑀸𑀢𑀺-𑀲𑁄𑀡𑀤𑀡𑁆𑀟𑀓𑀽𑀝𑀤𑀦𑁆𑀢𑀸𑀤𑀬𑁄. 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀆𑀴𑀯𑀓-𑀲𑀽𑀘𑀺𑀮𑁄𑀫-𑀔𑀭𑀮𑁄𑀫-𑀬𑀓𑁆𑀔-𑀲𑀓𑁆𑀓𑀤𑁂𑀯𑀭𑀸𑀚𑀸𑀤𑀬𑁄 𑀤𑀫𑀺𑀢𑀸 𑀯𑀺𑀦𑀻𑀢𑀸 𑀯𑀺𑀘𑀺𑀢𑁆𑀭𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀺. ‘‘𑀅𑀳𑀁 𑀔𑁄, 𑀓𑁂𑀲𑀺, 𑀧𑀼𑀭𑀺𑀲𑀤𑀫𑁆𑀫𑀁 𑀲𑀡𑁆𑀳𑁂𑀦𑀧𑀺 𑀯𑀺𑀦𑁂𑀫𑀺, 𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀺, 𑀲𑀡𑁆𑀳𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀻’’𑀢𑀺 (𑀅. 𑀦𑀺. 𑁪.𑁧𑁧𑁧) 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀣 𑀯𑀸 𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀘 𑀉𑀢𑁆𑀢𑀭𑀺𑀫𑀕𑁆𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯.

𑀅𑀣 𑀯𑀸 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻𑀢𑀺 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀁 ¶ . 𑀪𑀕𑀯𑀸 𑀳𑀺 𑀢𑀣𑀸 𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀺, 𑀬𑀣𑀸 𑀏𑀓𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀸 𑀅𑀝𑁆𑀞 𑀤𑀺𑀲𑀸 𑀅𑀲𑀚𑁆𑀚𑀫𑀸𑀦𑀸 𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀻’’𑀢𑀺 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁧𑁨) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀅𑀧𑀺𑀘 𑀲𑀢𑁆𑀣𑀸 𑀯𑀺𑀬𑀸𑀢𑀺 𑀲𑀢𑁆𑀣𑀸, 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. ‘‘𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀘𑁄𑀭𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀯𑀸𑀴𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 ¶ 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀢𑁆𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀚𑀸𑀢𑀺𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁦) 𑀦𑀺𑀤𑁆𑀤𑁂𑀲𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 ¶ 𑀤𑀏𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘. 𑀪𑀕𑀯𑀸 𑀧𑀦 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀅𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑁂𑀦 𑀲𑀢𑁆𑀣𑀸𑀬𑁂𑀯. 𑀢𑁂𑀧𑀺 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀲𑀯𑀦𑁂𑀦 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀸𑀬 𑀏𑀯 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀢𑀺𑀬𑁂 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀪𑀸𑀕𑀺𑀦𑁄 𑀳𑁄𑀦𑁆𑀢𑀺. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀪𑀕𑀯𑀢𑀺 𑀓𑀺𑀭 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀘𑀫𑁆𑀧𑀸𑀦𑀕𑀭𑀯𑀸𑀲𑀻𑀦𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁂 𑀏𑀓𑁄 𑀫𑀡𑁆𑀟𑀽𑀓𑁄 𑀪𑀕𑀯𑀢𑁄 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀏𑀓𑁄 𑀯𑀘𑁆𑀙𑀧𑀸𑀮𑀓𑁄 𑀤𑀡𑁆𑀟𑀫𑁄𑀮𑀼𑀩𑁆𑀪 𑀢𑀺𑀝𑁆𑀞𑀦𑁆𑀢𑁄 𑀢𑀲𑁆𑀲 𑀲𑀻𑀲𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑀸𑀯𑀤𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀘 𑀢𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀁 𑀅𑀢𑁆𑀢𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀭𑁂, 𑀅𑀳𑀫𑁆𑀧𑀺 𑀦𑀸𑀫 𑀇𑀥 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀺! 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀦𑀸𑀜𑁆𑀜𑀁 𑀓𑀺𑀜𑁆𑀘𑀺 𑀅𑀤𑁆𑀤𑀲, 𑀅𑀜𑁆𑀜𑀢𑁆𑀭 𑀪𑀕𑀯𑀢𑁄 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸. 𑀲𑁄 ¶ 𑀢𑀆𑀯𑀤𑁂𑀯 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺. 𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀺 𑁋

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺.

‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀉𑀤𑀓𑁂 𑀯𑀸𑀭𑀺𑀕𑁄𑀘𑀭𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲, 𑀅𑀯𑀥𑀺 𑀯𑀘𑁆𑀙𑀧𑀸𑀮𑀓𑁄’’𑀢𑀺. (𑀯𑀺. 𑀯. 𑁮𑁫𑁭-𑁮𑁫𑁮);

𑀪𑀕𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑁂𑀯𑀧𑀼𑀢𑁆𑀢𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀺𑀢𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀬𑀁 𑀧𑀦 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀜𑁂𑀬𑁆𑀬𑀁 𑀦𑀸𑀫, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀯𑀲𑁂𑀦 𑀩𑀼𑀤𑁆𑀥𑁄. 𑀬𑀲𑁆𑀫𑀸 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀢𑁆𑀢𑀦𑀸𑀧𑀺 𑀩𑀼𑀚𑁆𑀛𑀺, 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀩𑁄𑀥𑁂𑀲𑀺; 𑀢𑀲𑁆𑀫𑀸 𑀏𑀯𑀫𑀸𑀤𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑁄. 𑀇𑀫𑀲𑁆𑀲 𑀘𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀲𑀩𑁆𑀩𑁄𑀧𑀺 𑀦𑀺𑀤𑁆𑀤𑁂𑀲𑀦𑀬𑁄 (𑀫𑀳𑀸𑀦𑀺. 𑁧𑁯𑁨) 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁄 (𑀧𑀝𑀺. 𑀫. 𑁧.𑁧𑁬𑁨) 𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀪𑀕𑀯𑀸𑀢𑀺 ¶ 𑀇𑀤𑀁 𑀧𑀦𑀲𑁆𑀲 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀪𑀕𑀯𑀸𑀢𑀺 ¶ 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀦𑀸𑀫𑀁 𑁋 𑀆𑀯𑀢𑁆𑀣𑀺𑀓𑀁, 𑀮𑀺𑀗𑁆𑀕𑀺𑀓𑀁, 𑀦𑁂𑀫𑀺𑀢𑁆𑀢𑀺𑀓𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 𑀮𑁄𑀓𑀺𑀬𑀯𑁄𑀳𑀸𑀭𑁂𑀦 ‘‘𑀬𑀤𑀺𑀘𑁆𑀙𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀺𑀩𑀤𑁆𑀤𑁄’’𑀢𑀺 𑀏𑀯𑀫𑀸𑀤𑀺 𑀆𑀯𑀢𑁆𑀣𑀺𑀓𑀁. ‘‘𑀤𑀡𑁆𑀟𑀻 𑀙𑀢𑁆𑀢𑀻 𑀲𑀺𑀔𑀻 𑀓𑀭𑀻’’𑀢𑀺 𑀏𑀯𑀫𑀸𑀤𑀺 𑀮𑀺𑀗𑁆𑀕𑀺𑀓𑀁. ‘‘𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄’’𑀢𑀺 𑀏𑀯𑀫𑀸𑀤𑀺 𑀦𑁂𑀫𑀺𑀢𑁆𑀢𑀺𑀓𑀁. ‘‘𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄’’𑀢𑀺 𑀏𑀯𑀫𑀸𑀤𑀺 𑀯𑀘𑀦𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀇𑀤𑀁 𑀧𑀦 𑀪𑀕𑀯𑀸𑀢𑀺 𑀦𑀸𑀫𑀁 𑀦𑁂𑀫𑀺𑀢𑁆𑀢𑀺𑀓𑀁, 𑀦 𑀫𑀳𑀸𑀫𑀸𑀬𑀸𑀬 𑀦 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀦 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑁂𑀳𑀺 𑀓𑀢𑀁, 𑀦 𑀲𑀓𑁆𑀓𑀲𑀦𑁆𑀢𑀼𑀲𑀺𑀢𑀸𑀤𑀻𑀳𑀺 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁…𑀧𑁂… 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 ¶ 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁪).

𑀬𑀁𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀜𑁆𑀘𑁂𑀢𑀁 𑀦𑀸𑀫𑀁, 𑀢𑁂𑀲𑀁 𑀕𑀼𑀡𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑀺 𑁋

‘‘𑀪𑀕𑀻 𑀪𑀚𑀻 𑀪𑀸𑀕𑀻 𑀯𑀺𑀪𑀢𑁆𑀢𑀯𑀸 𑀇𑀢𑀺;

𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀕𑀭𑀽𑀢𑀺 𑀪𑀸𑀕𑁆𑀬𑀯𑀸;

𑀩𑀳𑀽𑀳𑀺 𑀜𑀸𑀬𑁂𑀳𑀺 𑀲𑀼𑀪𑀸𑀯𑀺𑀢𑀢𑁆𑀢𑀦𑁄;

𑀪𑀯𑀦𑁆𑀢𑀕𑁄 𑀲𑁄 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀢𑁂𑀲𑀁 𑀢𑁂𑀲𑀁 𑀧𑀤𑀸𑀦𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺.

𑀢𑀢𑁆𑀣 𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀬𑁄𑀢𑀺 𑀏𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 ¶ 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀪𑀸𑀕𑁆𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀮𑁄𑀪-𑀤𑁄𑀲-𑀫𑁄𑀳-𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭-𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧-𑀓𑁄𑀥𑀽𑀧𑀦𑀸𑀳-𑀫𑀓𑁆𑀔-𑀧𑀴𑀸𑀲𑀇𑀲𑁆𑀲𑀸-𑀫𑀘𑁆𑀙𑀭𑀺𑀬-𑀫𑀸𑀬𑀸𑀲𑀸𑀞𑁂𑀬𑁆𑀬-𑀣𑀫𑁆𑀪-𑀲𑀸𑀭𑀫𑁆𑀪-𑀫𑀸𑀦𑀸𑀢𑀺𑀫𑀸𑀦-𑀫𑀤-𑀧𑀫𑀸𑀤-𑀢𑀡𑁆𑀳𑀸𑀯𑀺𑀚𑁆𑀚𑀸 ¶ 𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮-𑀤𑀼𑀘𑁆𑀘𑀭𑀺𑀢-𑀲𑀁𑀓𑀺𑀮𑁂𑀲-𑀫𑀮-𑀯𑀺𑀲𑀫𑀲𑀜𑁆𑀜𑀸-𑀯𑀺𑀢𑀓𑁆𑀓-𑀧𑀧𑀜𑁆𑀘-𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀆𑀲𑀯-𑀕𑀦𑁆𑀣-𑀑𑀖-𑀬𑁄𑀕𑀸𑀕𑀢𑀺-𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦-𑀧𑀜𑁆𑀘𑀘𑁂𑀢𑁄𑀔𑀻𑀮-𑀯𑀺𑀦𑀺𑀩𑀦𑁆𑀥-𑀦𑀻𑀯𑀭𑀡𑀸𑀪𑀺𑀦𑀦𑁆𑀤𑀦𑀙𑀯𑀺𑀯𑀸𑀤𑀫𑀽𑀮-𑀢𑀡𑁆𑀳𑀸𑀓𑀸𑀬-𑀲𑀢𑁆𑀢𑀸𑀦𑀼𑀲𑀬-𑀅𑀝𑁆𑀞𑀫𑀺𑀘𑁆𑀙𑀢𑁆𑀢-𑀦𑀯𑀢𑀡𑁆𑀳𑀸𑀫𑀽𑀮𑀓-𑀤𑀲𑀸𑀓𑀼𑀲𑀮𑀓𑀫 𑀤𑀺𑀝𑁆𑀞𑀺𑀕𑀢-𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤-𑀲𑀩𑁆𑀩𑀤𑀭𑀣-𑀧𑀭𑀺𑀴𑀸𑀳-𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘 𑀓𑀺𑀮𑁂𑀲-𑀅𑀪𑀺𑀲𑀗𑁆𑀔𑀸𑀭𑀔𑀦𑁆𑀥𑀫𑀘𑁆𑀘𑀼-𑀤𑁂𑀯𑀧𑀼𑀢𑁆𑀢-𑀫𑀸𑀭𑁂 𑀅𑀪𑀜𑁆𑀚𑀺, 𑀢𑀲𑁆𑀫𑀸 𑀪𑀕𑁆𑀕𑀢𑁆𑀢𑀸 𑀏𑀢𑁂𑀲𑀁 𑀧𑀭𑀺𑀲𑁆𑀲𑀬𑀸𑀦𑀁 𑀪𑀕𑁆𑀕𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘𑁂𑀢𑁆𑀣 𑁋

‘‘𑀪𑀕𑁆𑀕𑀭𑀸𑀕𑁄 𑀪𑀕𑁆𑀕𑀤𑁄𑀲𑁄, 𑀪𑀕𑁆𑀕𑀫𑁄𑀳𑁄 𑀅𑀦𑀸𑀲𑀯𑁄;

𑀪𑀕𑁆𑀕𑀸𑀲𑁆𑀲 𑀧𑀸𑀧𑀓𑀸 𑀥𑀫𑁆𑀫𑀸, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀪𑀸𑀕𑁆𑀬𑀯𑀦𑁆𑀢𑀢𑀸𑀬 ¶ 𑀘𑀲𑁆𑀲 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀥𑀭𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀤𑀻𑀧𑀺𑀢𑀸 𑀳𑁄𑀢𑀺, 𑀪𑀕𑁆𑀕𑀤𑁄𑀲𑀢𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺. 𑀢𑀣𑀸 𑀮𑁄𑀓𑀺𑀬𑀧𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀪𑀺𑀕𑀫𑀦𑀻𑀬𑀢𑀸, 𑀅𑀪𑀺𑀕𑀢𑀸𑀦𑀜𑁆𑀘 𑀦𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄, 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀘 𑀲𑀫𑁆𑀧𑀬𑁄𑀚𑀦𑀲𑀫𑀢𑁆𑀣𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀬𑀲𑁆𑀫𑀸 𑀘 𑀮𑁄𑀓𑁂 𑀇𑀲𑁆𑀲𑀭𑀺𑀬-𑀥𑀫𑁆𑀫-𑀬𑀲-𑀲𑀺𑀭𑀻-𑀓𑀸𑀫-𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀕𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀧𑀭𑀫𑀜𑁆𑀘𑀲𑁆𑀲 𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁, 𑀅𑀡𑀺𑀫𑀸 𑀮𑀖𑀺𑀫𑀸𑀤𑀺𑀓𑀁 𑀯𑀸 𑀮𑁄𑀓𑀺𑀬𑀲𑀫𑁆𑀫𑀢𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀢𑁆𑀣𑀺 𑀢𑀣𑀸 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀬𑀲𑁄, 𑀭𑀽𑀧𑀓𑀸𑀬𑀤𑀲𑁆𑀲𑀦𑀩𑁆𑀬𑀸𑀯𑀝𑀚𑀦𑀦𑀬𑀦𑀧𑁆𑀧𑀲𑀸𑀤𑀚𑀦𑀦𑀲𑀫𑀢𑁆𑀣𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻, 𑀬𑀁 𑀬𑀁 𑀏𑀢𑁂𑀦 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀁 𑀯𑀸, 𑀢𑀲𑁆𑀲 𑀢𑀲𑁆𑀲 𑀢𑀣𑁂𑀯 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀇𑀘𑁆𑀙𑀺𑀢𑀺𑀘𑁆𑀙𑀺, 𑀢𑀢𑁆𑀣 𑀦𑀺𑀧𑁆𑀨𑀢𑁆𑀢𑀺𑀲𑀜𑁆𑀜𑀺𑀢𑁄 𑀓𑀸𑀫𑁄, 𑀲𑀩𑁆𑀩𑀮𑁄𑀓𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄 𑀘 𑀅𑀢𑁆𑀣𑀺; 𑀢𑀲𑁆𑀫𑀸 𑀇𑀫𑁂𑀳𑀺 𑀪𑀕𑁂𑀳𑀺 𑀬𑀼𑀢𑁆𑀢𑀢𑁆𑀢𑀸𑀧𑀺 𑀪𑀕𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀤𑀻𑀳𑀺 𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂, 𑀔𑀦𑁆𑀥𑀸𑀬𑀢𑀦-𑀥𑀸𑀢𑀼𑀲𑀘𑁆𑀘-𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺 ¶ 𑀯𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑁂, 𑀧𑀻𑀴𑀦-𑀲𑀗𑁆𑀔𑀢-𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀁, 𑀆𑀬𑀽𑀳𑀦-𑀦𑀺𑀤𑀸𑀦-𑀲𑀁𑀬𑁄𑀕-𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑀼𑀤𑀬𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢-𑀅𑀫𑀢𑀝𑁆𑀞𑁂𑀦 ¶ 𑀦𑀺𑀭𑁄𑀥𑀁, 𑀦𑀺𑀬𑁆𑀬𑀸𑀦-𑀳𑁂𑀢𑀼-𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀫𑀕𑁆𑀕𑀁 𑀯𑀺𑀪𑀢𑁆𑀢𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀯𑀺𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺 ¶ .

𑀬𑀲𑁆𑀫𑀸 𑀘 𑀏𑀲 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂 𑀲𑀼𑀜𑁆𑀜𑀢𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀺, 𑀢𑀲𑁆𑀫𑀸 𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀫𑀦𑁂𑀦 𑀯𑀦𑁆𑀢𑀁, 𑀢𑀲𑁆𑀫𑀸 𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪𑀓𑀸𑀭𑀁, 𑀕𑀫𑀦𑀲𑀤𑁆𑀤𑀢𑁄 𑀕𑀓𑀸𑀭𑀁, 𑀯𑀦𑁆𑀢𑀲𑀤𑁆𑀤𑀢𑁄 𑀯𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 𑀆𑀤𑀸𑀬 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀮𑁄𑀓𑁂 ‘‘𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑁂𑀔𑀮𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺 𑀲𑁄 𑀪𑀕𑀯𑀸 𑀇𑀫𑀁 𑀮𑁄𑀓𑀁. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀦𑁆𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀁; 𑀏𑀯𑀁 𑀲𑀳 𑀫𑀸𑀭𑁂𑀦 𑀲𑀫𑀸𑀭𑀓𑀁; 𑀲𑀳 𑀩𑁆𑀭𑀳𑁆𑀫𑀼𑀦𑀸 𑀲𑀩𑁆𑀭𑀳𑁆𑀫𑀓𑀁; 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁; 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀢𑀁 𑀧𑀚𑀁; 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀤𑁂𑀯𑀫𑀦𑀼𑀲𑁆𑀲𑀁. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁, 𑀲𑀫𑀺𑀢𑀧𑀸𑀧-𑀩𑀸𑀳𑀺𑀢𑀧𑀸𑀧-𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘, 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄, 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸, 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁄, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄, 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸.

𑀅𑀧𑀺𑀘𑁂𑀢𑁆𑀣 ¶ 𑀲𑀤𑁂𑀯𑀓𑀯𑀘𑀦𑁂𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 𑀢𑀲𑁆𑀲 𑀪𑀕𑀯𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄. 𑀢𑀢𑁄 𑀬𑁂𑀲𑀁 𑀲𑀺𑀬𑀸 𑁋 ‘‘𑀫𑀸𑀭𑁄 𑀫𑀳𑀸𑀦𑀼𑀪𑀸𑀯𑁄 𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄 𑀯𑀲𑀯𑀢𑁆𑀢𑀻; 𑀓𑀺𑀁 𑀲𑁄𑀧𑀺 𑀏𑀢𑁂𑀦 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀫𑀸𑀭𑀓𑀦𑁆𑀢𑀺 ¶ 𑀅𑀩𑁆𑀪𑀼𑀕𑁆𑀕𑀢𑁄. 𑀬𑁂𑀲𑀁 𑀧𑀦 𑀲𑀺𑀬𑀸 𑁋 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 ¶ 𑀆𑀮𑁄𑀓𑀁 𑀨𑀭𑀢𑀺, 𑀤𑁆𑀯𑀻𑀳𑀺…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺, 𑀅𑀦𑀼𑀢𑁆𑀢𑀭𑀜𑁆𑀘 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀓𑀺𑀁 𑀲𑁄𑀧𑀺 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀢𑀢𑁄 𑀬𑁂𑀲𑀁 𑀲𑀺𑀬𑀸 𑁋 ‘‘𑀧𑀼𑀣𑀽𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸, 𑀓𑀺𑀁 𑀢𑁂𑀧𑀺 𑀲𑀘𑁆𑀙𑀺𑀓𑀢𑀸’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀏𑀯𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀸𑀦𑀁 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀣 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀯𑀲𑁂𑀲𑀫𑀦𑀼𑀲𑁆𑀲𑁂 𑀘 𑀉𑀧𑀸𑀤𑀸𑀬 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑁂𑀲𑀲𑀢𑁆𑀢𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀅𑀬𑀫𑁂𑀢𑁆𑀣𑀸𑀦𑀼𑀲𑀦𑁆𑀥𑀺𑀓𑁆𑀓𑀫𑁄.

𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀬𑀦𑁆𑀢𑀺 𑀲𑀸𑀫𑀁, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸; 𑀅𑀪𑀺𑀜𑁆𑀜𑀸𑀢𑀺 𑀅𑀪𑀺𑀜𑁆𑀜𑀸𑀬, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀏𑀢𑁂𑀦 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀺. 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀲𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀳𑀺𑀢𑁆𑀯𑀸𑀧𑀺 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀺.

𑀓𑀣𑀁? 𑀏𑀓𑀕𑀸𑀣𑀸𑀧𑀺 𑀳𑀺 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀸 𑀥𑀫𑁆𑀫𑀲𑁆𑀲 𑀧𑀞𑀫𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸, 𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀸, 𑀧𑀘𑁆𑀙𑀺𑀫𑀧𑀸𑀤𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸. 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀧𑀞𑀫𑀸𑀦𑀼𑀲𑀦𑁆𑀥𑀺𑀦𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀲𑀓𑀮𑁄𑀧𑀺 𑀲𑀸𑀲𑀦𑀥𑀫𑁆𑀫𑁄 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑁂𑀦 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 ¶ . 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀸𑀬 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀸𑀯𑀓𑀩𑁄𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀼𑀬𑁆𑀬𑀫𑀸𑀦𑁄 𑀘𑁂𑀲 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀲𑀯𑀦𑁂𑀦𑀧𑀺 ¶ 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀝𑀺𑀧𑀚𑁆𑀚𑀺𑀬𑀫𑀸𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀧𑀢𑁆𑀢𑀺𑀨𑀮𑁂 𑀦𑀺𑀝𑁆𑀞𑀺𑀢𑁂 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀨𑀮𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀦𑀸𑀣𑀧𑁆𑀧𑀪𑀯𑀢𑁆𑀢𑀸 𑀘 𑀧𑀪𑀯𑀲𑀼𑀤𑁆𑀥𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀅𑀢𑁆𑀣𑀲𑀼𑀤𑁆𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 ¶ , 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀢𑀲𑁆𑀫𑀸 𑀏𑀲𑁄 𑀪𑀕𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀦 𑀬𑀲𑁆𑀫𑀸 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀦𑀸𑀦𑀸𑀦𑀬𑁂𑀳𑀺 𑀤𑀻𑀧𑁂𑀢𑀺; 𑀢𑀜𑁆𑀘 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦-𑀯𑀺𑀯𑀭𑀡-𑀯𑀺𑀪𑀚𑀦-𑀉𑀢𑁆𑀢𑀸𑀦𑀻𑀓𑀭𑀡-𑀧𑀜𑁆𑀜𑀢𑁆𑀢𑀺-𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁, 𑀅𑀓𑁆𑀔𑀭𑀧𑀤-𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀕𑀫𑁆𑀪𑀻𑀭𑀢𑀸-𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣𑀁, 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣𑀁, 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀸𑀢𑁆𑀣𑀁, 𑀲𑀤𑁆𑀥𑁂𑀬𑁆𑀬𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀁. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀁, 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁; 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁; 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀲𑁂𑀝𑁆𑀞𑁂𑀳𑀺 𑀘𑀭𑀺𑀢𑀩𑁆𑀩𑀢𑁄 𑀢𑁂𑀲𑀜𑁆𑀘 𑀘𑀭𑀺𑀬𑀪𑀸𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀲𑁆𑀫𑀸 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀬𑀲𑁆𑀫𑀸 𑀲𑀦𑀺𑀤𑀸𑀦𑀁 𑀲𑀉𑀧𑁆𑀧𑀢𑁆𑀢𑀺𑀓𑀜𑁆𑀘 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀁 𑀤𑁂𑀲𑁂𑀢𑀺, 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄 𑀅𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀢𑀸𑀬 𑀘 𑀳𑁂𑀢𑀼𑀤𑀸𑀳𑀭𑀡𑀬𑀼𑀢𑁆𑀢𑀢𑁄 𑀘 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀲𑁄𑀢𑀽𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀦𑀺𑀕𑀫𑀦𑁂𑀦 ¶ 𑀘 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀤𑁂𑀲𑁂𑀢𑀺. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀜𑁆𑀘 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀸𑀢𑁆𑀣𑀁, 𑀧𑀭𑀺𑀬𑀢𑁆𑀢𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀩𑁆𑀬𑀜𑁆𑀚𑀦𑀁, 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 ¶ 𑀧𑀯𑀢𑁆𑀢𑀺𑀢𑁄 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄 𑀘 𑀧𑀭𑀺𑀲𑀼𑀤𑁆𑀥𑀁, 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀘𑀭𑀺𑀬𑀢𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸𑀧𑀺 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀦𑁆𑀢𑀺 𑀬𑀣𑀸𑀭𑀽𑀧𑁄 𑀲𑁄 𑀪𑀯 𑀕𑁄𑀢𑀫𑁄, 𑀏𑀯𑀭𑀽𑀧𑀸𑀦𑀁 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀤𑀸𑀦𑀁 𑀅𑀭𑀳𑀢𑀁. 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑀺𑀢𑁆𑀯𑀸 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻’’𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺.

𑁨. 𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀫𑀸 𑀬𑀢𑁆𑀣 𑀪𑀕𑀯𑀸 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ¶ . 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀦, 𑀏𑀯𑀁 𑀲𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺, 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀸𑀲𑀺. 𑀬𑀸𑀬 𑀘 ‘‘𑀓𑀘𑁆𑀘𑀺, 𑀪𑁄, 𑀕𑁄𑀢𑀫, 𑀔𑀫𑀦𑀻𑀬𑀁; 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀘 𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀁 𑀲𑀫𑁆𑀫𑁄𑀤𑀁 𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 ¶ 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀯𑀸 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 ¶ 𑀲𑀸𑀭𑀡𑀻𑀬𑀁. 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺. 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀲𑀸𑀭𑀡𑀻𑀬𑀁 𑀓𑀣𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑁂𑀦𑀢𑁆𑀣𑁂𑀦 𑀆𑀕𑀢𑁄 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀉𑀧𑀸𑀯𑀺𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀧𑀼𑀭𑀺𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀜𑁆𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁, 𑀅𑀘𑁆𑀘𑀸𑀲𑀦𑁆𑀦𑀁, 𑀉𑀧𑀭𑀺𑀯𑀸𑀢𑀁, 𑀉𑀦𑁆𑀦𑀢𑀧𑁆𑀧𑀤𑁂𑀲𑀁, 𑀅𑀢𑀺𑀲𑀫𑁆𑀫𑀼𑀔𑀁, 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 ¶ 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀏𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀯𑁄𑀘𑀸𑀢𑀺 𑀅𑀪𑀸𑀲𑀺. 𑀲𑀼𑀢𑀁 𑀫𑁂𑀢𑀦𑁆𑀢𑀺 𑀲𑀼𑀢𑀁 𑀫𑁂 𑀏𑀢𑀁, 𑀏𑀢𑀁 𑀫𑀬𑀸 𑀲𑀼𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑁄 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑀇𑀤𑀸𑀦𑀺 𑀬𑀁 𑀢𑁂𑀦 𑀲𑀼𑀢𑀁 𑁋 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀦 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀩𑁆𑀭𑀸𑀳𑁆𑀫𑀡𑁂𑀢𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂. 𑀚𑀺𑀡𑁆𑀡𑁂𑀢𑀺 𑀚𑀚𑁆𑀚𑀭𑀻𑀪𑀽𑀢𑁂 ¶ 𑀚𑀭𑀸𑀬 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀆𑀧𑀸𑀤𑀺𑀢𑁂. 𑀯𑀼𑀟𑁆𑀠𑁂𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀼𑀟𑁆𑀠𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑁂. 𑀫𑀳𑀮𑁆𑀮𑀓𑁂𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑁂, 𑀘𑀺𑀭𑀓𑀸𑀮𑀧𑁆𑀧𑀲𑀼𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀕𑀢𑁂𑀢𑀺 𑀅𑀤𑁆𑀥𑀸𑀦𑀁 𑀕𑀢𑁂 ¶ , 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑁂, 𑀧𑀘𑁆𑀙𑀺𑀫𑀯𑀬𑁄 𑀦𑀸𑀫 𑀯𑀲𑁆𑀲𑀲𑀢𑀲𑁆𑀲 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄.

𑀅𑀧𑀺𑀘 𑁋 𑀚𑀺𑀡𑁆𑀡𑁂𑀢𑀺 𑀧𑁄𑀭𑀸𑀡𑁂, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀟𑁆𑀠𑁂𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀟𑁆𑀠𑀺𑀬𑀼𑀢𑁆𑀢𑁂. 𑀫𑀳𑀮𑁆𑀮𑀓𑁂𑀢𑀺 𑀯𑀺𑀪𑀯𑀫𑀳𑀢𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂. 𑀅𑀤𑁆𑀥𑀕𑀢𑁂𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀘𑀭𑀺𑀬𑀸𑀤𑀺𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫 𑀘𑀭𑀫𑀸𑀦𑁂. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀚𑀸𑀢𑀺𑀯𑀼𑀟𑁆𑀠𑀪𑀸𑀯𑀁 𑀅𑀦𑁆𑀢𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀪𑀺𑀯𑀸𑀤𑁂𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 ‘‘𑀦 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀏𑀯𑀫𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 ‘‘𑀦 𑀯𑀦𑁆𑀤𑀢𑀺 𑀯𑀸, 𑀦𑀸𑀲𑀦𑀸 𑀯𑀼𑀝𑁆𑀞𑀳𑀢𑀺 𑀯𑀸, 𑀦𑀸𑀧𑀺 ‘𑀇𑀥 𑀪𑁄𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑀽’𑀢𑀺 𑀏𑀯𑀁 𑀆𑀲𑀦𑁂𑀦 𑀯𑀸 𑀉𑀧𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀏𑀢𑁆𑀣 𑀳𑀺 𑀯𑀸 𑀲𑀤𑁆𑀤𑁄 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂, ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀯𑀁 𑀯𑀢𑁆𑀯𑀸 𑀅𑀣 𑀅𑀢𑁆𑀢𑀦𑁄 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑀬𑀺𑀤𑀁 𑀪𑁄 𑀕𑁄𑀢𑀫 𑀢𑀣𑁂𑀯𑀸’’𑀢𑀺. 𑀬𑀁 𑀢𑀁 𑀫𑀬𑀸 𑀲𑀼𑀢𑀁 𑁋 𑀢𑀁 𑀢𑀣𑁂𑀯, 𑀢𑀁 𑀲𑀯𑀦𑀜𑁆𑀘 𑀫𑁂 𑀤𑀲𑁆𑀲𑀦𑀜𑁆𑀘 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀁 𑀕𑀘𑁆𑀙𑀢𑀺. ‘‘𑀦 𑀳𑀺 𑀪𑀯𑀁 𑀕𑁄𑀢𑀫𑁄…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀲𑀼𑀢𑀁 𑀤𑀺𑀝𑁆𑀞𑁂𑀦 𑀦𑀺𑀕𑀫𑁂𑀢𑁆𑀯𑀸 𑀦𑀺𑀦𑁆𑀤𑀦𑁆𑀢𑁄 𑀆𑀳 𑁋 ‘‘𑀢𑀬𑀺𑀤𑀁 𑀪𑁄 𑀕𑁄𑀢𑀫 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’𑀢𑀺 𑀢𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀓𑀭𑀡𑀁 𑀦 𑀬𑀼𑀢𑁆𑀢𑀫𑁂𑀯.

𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀤𑁄𑀲𑀁 𑀅𑀦𑀼𑀧𑀕𑀫𑁆𑀫 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁂𑀦 𑀢𑀁 𑀅𑀜𑁆𑀜𑀸𑀡𑀁 𑀯𑀺𑀥𑀫𑀺𑀢𑁆𑀯𑀸 ¶ 𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡 ¶ …𑀧𑁂… 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀝𑀺𑀳𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀅𑀦𑀘𑁆𑀙𑀭𑀺𑀬𑀁 𑀯𑀸 𑀏𑀢𑀁, 𑀬𑁆𑀯𑀸𑀳𑀁 𑀅𑀚𑁆𑀚 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀓𑀸𑀭𑀸𑀭𑀳𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺. 𑀅𑀧𑀺𑀘 𑀔𑁄 𑀬𑀤𑀸𑀧𑀸𑀳𑀁 𑀲𑀫𑁆𑀧𑀢𑀺𑀚𑀸𑀢𑁄𑀯 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺𑀁; 𑀢𑀤𑀸𑀧𑀺 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 ¶ 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀅𑀣 𑀔𑁄 𑀫𑀁 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁄 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 𑀮𑁄𑀓𑁂 𑀫𑀳𑀸𑀧𑀼𑀭𑀺𑀲𑁄, 𑀢𑁆𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑁄 𑀘 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘, 𑀦𑀢𑁆𑀣𑀺 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀢𑀺𑀦𑀸𑀫𑁂𑀲𑀺; 𑀢𑀤𑀸𑀧𑀺 𑀘𑀸𑀳𑀁 𑀅𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺𑀁 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺. 𑀏𑀯𑀁 𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀧𑀺 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀭𑀳𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀢𑀲𑁆𑀫𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀫𑀸 𑀢𑀣𑀸𑀕𑀢𑁂 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀓𑀸𑀭𑀁 𑀧𑀢𑁆𑀣𑀬𑀺𑀢𑁆𑀣. 𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀪𑀺𑀯𑀸𑀤𑁂𑀬𑁆𑀬 𑀯𑀸…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀧𑀸𑀓𑀲𑀺𑀣𑀺𑀮𑀩𑀦𑁆𑀥𑀦𑀁 𑀯𑀡𑁆𑀝𑀸 𑀧𑀯𑀼𑀢𑁆𑀢𑀢𑀸𑀮𑀨𑀮𑀫𑀺𑀯 𑀕𑀻𑀯𑀢𑁄 𑀧𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀲𑀳𑀲𑀸𑀯 𑀪𑀽𑀫𑀺𑀬𑀁 𑀯𑀺𑀧𑀢𑁂𑀬𑁆𑀬𑀸𑀢𑀺.

𑁩. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑁄 𑀤𑀼𑀧𑁆𑀧𑀜𑁆𑀜𑀢𑀸𑀬 𑀢𑀣𑀸𑀕𑀢𑀲𑁆𑀲 𑀮𑁄𑀓𑁂 𑀚𑁂𑀝𑁆𑀞𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀓𑁂𑀯𑀮𑀁 𑀢𑀁 𑀯𑀘𑀦𑀁 𑀅𑀲𑀳𑀫𑀸𑀦𑁄 𑀆𑀳 𑁋 ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀮𑁄𑀓𑁂 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀁 ‘‘𑀲𑀸𑀫𑀕𑁆𑀕𑀺𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀦𑀢𑁆𑀣𑀺 ¶ , 𑀢𑀲𑁆𑀫𑀸 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄, 𑀅𑀭𑀲𑀚𑀸𑀢𑀺𑀓𑁄 𑀅𑀭𑀲𑀲𑀪𑀸𑀯𑁄𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀚𑀦𑀦𑀢𑁆𑀣𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀁 𑀧𑀭𑀺𑀳𑀭𑀦𑁆𑀢𑁄 𑀅𑀜𑁆𑀜𑀣𑀸 𑀢𑀲𑁆𑀲 𑀯𑀘𑀦𑀲𑁆𑀲𑀢𑁆𑀣𑀁 𑀅𑀢𑁆𑀢𑀦𑀺 𑀲𑀦𑁆𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀔𑁆𑀯𑁂𑀲 𑀩𑁆𑀭𑀸𑀳𑁆𑀫𑀡 𑀧𑀭𑀺𑀬𑀸𑀬𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀭𑀺𑀬𑀸𑀬𑁄𑀢𑀺 𑀓𑀸𑀭𑀡𑀁; 𑀅𑀬𑀜𑁆𑀳𑀺 𑀧𑀭𑀺𑀬𑀸𑀬𑀲𑀤𑁆𑀤𑁄 𑀤𑁂𑀲𑀦𑀸-𑀯𑀸𑀭-𑀓𑀸𑀭𑀡𑁂𑀲𑀼 𑀯𑀢𑁆𑀢𑀢𑀺. ‘‘𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑁆𑀯𑁂𑀯 𑀦𑀁 𑀥𑀸𑀭𑁂𑀳𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁫) 𑀳𑀺 𑀏𑀲 𑀤𑁂𑀲𑀦𑀸𑀬𑀁 𑀯𑀢𑁆𑀢𑀢𑀺. ‘‘𑀓𑀲𑁆𑀲 𑀦𑀼 𑀔𑁄, 𑀆𑀦𑀦𑁆𑀤, 𑀅𑀚𑁆𑀚 𑀧𑀭𑀺𑀬𑀸𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁯𑁮) 𑀯𑀸𑀭𑁂. ‘‘𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀢𑀼, 𑀬𑀣𑀸𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁬𑁪) 𑀓𑀸𑀭𑀡𑁂. 𑀲𑁆𑀯𑀸𑀬𑀫𑀺𑀥 𑀓𑀸𑀭𑀡𑁂 𑀯𑀢𑁆𑀢𑀢𑀺 ¶ . 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀢𑀁 𑀓𑀸𑀭𑀡𑀁; 𑀬𑁂𑀦 𑀓𑀸𑀭𑀡𑁂𑀦 𑀫𑀁 ‘‘𑀅𑀭𑀲𑀭𑀽𑀧𑁄 ¶ 𑀪𑀯𑀁 𑀕𑁄𑀢𑀫𑁄’’𑀢𑀺 𑀯𑀤𑀫𑀸𑀦𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀅𑀯𑀺𑀢𑀣𑀯𑀸𑀤𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑁂𑀬𑁆𑀬. 𑀓𑀢𑀫𑁄 𑀧𑀦 𑀲𑁄𑀢𑀺? 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡 𑀭𑀽𑀧𑀭𑀲𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀲𑀸 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂 𑀢𑁂 𑀚𑀸𑀢𑀺𑀯𑀲𑁂𑀦 𑀯𑀸 𑀉𑀧𑀧𑀢𑁆𑀢𑀺𑀯𑀲𑁂𑀦 𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀦𑁆𑀢𑀸𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀁 𑀭𑀚𑁆𑀚𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀸𑀫𑀲𑀼𑀔𑀲𑁆𑀲𑀸𑀤𑀲𑀗𑁆𑀔𑀸𑀢𑀸 𑀭𑀽𑀧𑀭𑀲𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀭𑀲𑀸, 𑀬𑁂 𑀇𑀫𑀁 𑀮𑁄𑀓𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀆𑀯𑀺𑀜𑁆𑀙𑀦𑁆𑀢𑀺, 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀲𑀸𑀫𑀕𑁆𑀕𑀺𑀬𑀜𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀸𑀫𑀕𑁆𑀕𑀺𑀭𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺. 𑀫𑀬𑁆𑀳𑀁 𑀧𑀳𑀻𑀦𑀸𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀫𑀫𑀸𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄 𑀯𑀸 𑀏𑀲 𑀪𑀕𑀯𑀢𑁄.

𑀢𑀢𑁆𑀣 𑀧𑀳𑀻𑀦𑀸𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀺𑀕𑀢𑀸 𑀚𑀳𑀺𑀢𑀸 𑀯𑀸. 𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀉𑀘𑁆𑀙𑀺𑀦𑁆𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀬𑀁 𑀫𑀽𑀮𑀫𑁂𑀢𑁂𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸. 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀣𑀸 𑀳𑀺 𑀢𑀸𑀮𑀭𑀼𑀓𑁆𑀔𑀁 𑀲𑀫𑀽𑀮𑀁 ¶ 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀫𑀢𑁆𑀢𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀓𑀢𑁂 𑀦 𑀧𑀼𑀦 𑀢𑀲𑁆𑀲 𑀢𑀸𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀜𑁆𑀜𑀸𑀬𑀢𑀺; 𑀏𑀯𑀁 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀲𑀫𑀽𑀮𑁂 𑀭𑀽𑀧𑀸𑀤𑀺𑀭𑀲𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀪𑀸𑀯𑁂𑀦 𑀯𑀢𑁆𑀣𑀼𑀫𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀢𑁂 𑀲𑀩𑁆𑀩𑁂𑀧𑀺 𑀢𑁂 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀯𑀺𑀭𑀽𑀴𑁆𑀳𑀺𑀥𑀫𑁆𑀫𑀢𑁆𑀢𑀸 𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀲𑁆𑀫𑀸 𑀧𑀦 𑀏𑀯𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀳𑁄𑀦𑁆𑀢𑀺, 𑀬𑀣𑀸 𑀦𑁂𑀲𑀁 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀺, 𑀢𑀣𑀸 𑀓𑀢𑀸 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀆𑀳 𑁋 ‘‘𑀅𑀦𑀪𑀸𑀯𑀁𑀓𑀢𑀸’’𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀧𑀤𑀘𑁆𑀙𑁂𑀤𑁄 𑁋 𑀅𑀦𑀼𑀅𑀪𑀸𑀯𑀁 𑀓𑀢𑀸 𑀅𑀦𑀪𑀸𑀯𑀁𑀓𑀢𑀸𑀢𑀺. ‘‘𑀅𑀦𑀪𑀸𑀯𑀁 𑀕𑀢𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀦𑀼𑀅𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀤𑀘𑁆𑀙𑁂𑀤𑁄 𑀅𑀦𑀼𑀅𑀪𑀸𑀯𑀁 𑀕𑀢𑀸 𑀅𑀦𑀪𑀸𑀯𑀁 𑀕𑀢𑀸𑀢𑀺, 𑀬𑀣𑀸 𑀅𑀦𑀼𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸𑀢𑀺. 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀅𑀦𑀸𑀕𑀢𑁂 𑀅𑀦𑀼𑀧𑁆𑀧𑀚𑁆𑀚𑀦𑀓𑀲𑀪𑀸𑀯𑀸. 𑀬𑁂 𑀳𑀺 𑀅𑀪𑀸𑀯𑀁 𑀕𑀢𑀸, 𑀢𑁂 𑀧𑀼𑀦 𑀓𑀣𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺? 𑀢𑁂𑀦𑀸𑀳 𑁋 ‘‘𑀅𑀦𑀪𑀸𑀯𑀁 𑀕𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺.

𑀅𑀬𑀁 𑀔𑁄 𑀩𑁆𑀭𑀸𑀳𑁆𑀫𑀡 𑀧𑀭𑀺𑀬𑀸𑀬𑁄𑀢𑀺 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀸𑀭𑀡𑀁 𑀬𑁂𑀦 𑀫𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 ‘‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺. 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻𑀢𑀺 𑀬𑀜𑁆𑀘 𑀔𑁄 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺, 𑀲𑁄 𑀧𑀭𑀺𑀬𑀸𑀬𑁄 𑀦 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳? 𑀦𑀦𑀼 𑀏𑀯𑀁 𑀯𑀼𑀢𑁆𑀢𑁂 ¶ 𑀬𑁄 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁄 𑀲𑀸𑀫𑀕𑁆𑀕𑀺𑀭𑀲𑁄 𑀢𑀲𑁆𑀲 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀦 𑀳𑁄𑀢𑀺. 𑀬𑁄 𑀳𑀺 𑀢𑀁 𑀲𑀸𑀫𑀕𑁆𑀕𑀺𑀭𑀲𑀁 𑀓𑀸𑀢𑀼𑀁 𑀪𑀩𑁆𑀩𑁄 𑀳𑀼𑀢𑁆𑀯𑀸 𑀦 𑀓𑀭𑁄𑀢𑀺, 𑀲𑁄 𑀢𑀤𑀪𑀸𑀯𑁂𑀦 𑀅𑀭𑀲𑀭𑀽𑀧𑁄𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀪𑀕𑀯𑀸 𑀧𑀦 𑀅𑀪𑀩𑁆𑀩𑁄𑀯 𑀏𑀢𑀁 𑀓𑀸𑀢𑀼𑀁, 𑀢𑁂𑀦𑀲𑁆𑀲 𑀓𑀭𑀡𑁂 𑀅𑀪𑀩𑁆𑀩𑀢𑀁 𑀧𑀓𑀸𑀲𑁂𑀦𑁆𑀢𑁄 ¶ 𑀆𑀳 𑁋 ‘‘𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺. 𑀬𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀫𑀁 ‘‘𑀅𑀭𑀲𑀭𑀽𑀧𑁄’’𑀢𑀺 𑀯𑀤𑁂𑀲𑀺, 𑀲𑁄 𑀅𑀫𑁆𑀳𑁂𑀲𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄𑀢𑀺.

𑁪. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀅𑀭𑀲𑀭𑀽𑀧𑀢𑀁 𑀆𑀭𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀣𑀸𑀧𑀭𑀁 𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀧𑀭𑀺𑀬𑀸𑀬𑁂𑀲𑀼 𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑀦𑀓𑁆𑀓𑀫𑀁 𑀯𑀺𑀤𑀺𑀢𑁆𑀯𑀸 ¶ 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀓𑀫𑁆𑀫𑀸𑀤𑀺𑀁 𑀮𑁄𑀓𑁂 𑀲𑀸𑀫𑀕𑁆𑀕𑀺𑀧𑀭𑀺𑀪𑁄𑀕𑁄𑀢𑀺 𑀫𑀜𑁆𑀜𑀫𑀸𑀦𑁄 𑀢𑀤𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀦𑀺𑀩𑁆𑀪𑁄𑀕𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑁆𑀯𑀸𑀬𑀁 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸𑀦𑀁 𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄 𑀢𑀤𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁫. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀮𑁄𑀓𑁂 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁 𑀮𑁄𑀓𑀺𑀬𑀸 𑀓𑀭𑁄𑀦𑁆𑀢𑀺 𑀢𑀲𑁆𑀲 𑀅𑀓𑀺𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀦𑁆𑀢𑀁 𑀅𑀓𑀺𑀭𑀺𑀬𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦, 𑀬𑀲𑁆𑀫𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀅𑀓𑀺𑀭𑀺𑀬𑀁 𑀯𑀤𑀢𑀺 𑀢𑀲𑁆𑀫𑀸, 𑀢𑀁 𑀅𑀓𑀺𑀭𑀺𑀬𑀯𑀸𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀣 𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢-𑀅𑀤𑀺𑀦𑁆𑀦𑀸𑀤𑀸𑀦-𑀫𑀺𑀘𑁆𑀙𑀸𑀘𑀸𑀭𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀼𑀲𑀸𑀯𑀸𑀤-𑀧𑀺𑀲𑀼𑀡𑀯𑀸𑀘𑀸-𑀨𑀭𑀼𑀲𑀯𑀸𑀘𑀸-𑀲𑀫𑁆𑀨𑀧𑁆𑀧𑀮𑀸𑀧𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀞𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂, 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 ‘‘𑀅𑀦𑁂𑀓𑀯𑀺𑀳𑀺𑀢𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 𑀇𑀫𑀁 ‘‘𑀆𑀕𑀫𑁆𑀫 𑀅𑀬𑀁 𑀮𑁄𑀓𑀢𑀦𑁆𑀢𑀺 𑀮𑁄𑀓𑀧𑀯𑁂𑀡𑀻 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀉𑀘𑁆𑀙𑁂𑀤𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀤𑁆𑀯𑀻𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀓𑀤𑁄𑀲𑀲𑁆𑀲 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺. 𑀲𑀩𑁆𑀩𑀸𑀓𑀼𑀲𑀮𑀲𑀫𑁆𑀪𑀯𑀲𑁆𑀲 𑀧𑀦 𑀦𑀺𑀭𑀯𑀲𑁂𑀲𑀲𑁆𑀲 𑀫𑁄𑀳𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺. 𑀞𑀧𑁂𑀢𑁆𑀯𑀸 𑀢𑁂 𑀢𑀬𑁄, 𑀅𑀯𑀲𑁂𑀲𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀦𑀼𑀭𑀽𑀧𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 ¶ 𑀉𑀘𑁆𑀙𑁂𑀤𑀁 𑀯𑀤𑀢𑀺; 𑀢𑀲𑁆𑀫𑀸 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁭. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀤𑀁 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁, 𑀢𑁂𑀦 𑀢𑀁 𑀦 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀚𑁂𑀕𑀼𑀘𑁆𑀙𑀻𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀚𑀺𑀕𑀼𑀘𑁆𑀙𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺; 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 ¶ ? 𑀬𑀜𑁆𑀘 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀬𑀜𑁆𑀘 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀬𑀸 𑀘 𑀞𑀧𑁂𑀢𑁆𑀯𑀸 𑀢𑀸𑀦𑀺 ¶ 𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀯𑀲𑁂𑀲𑀸𑀦𑀁 𑀮𑀸𑀫𑀓𑀝𑁆𑀞𑁂𑀦 𑀧𑀸𑀧𑀓𑀸𑀦𑀁 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀚𑁆𑀚𑀦𑀸 𑀲𑀫𑀗𑁆𑀕𑀺𑀪𑀸𑀯𑁄, 𑀢𑀁 𑀲𑀩𑁆𑀩𑀫𑁆𑀧𑀺 𑀕𑀽𑀣𑀁 𑀯𑀺𑀬 𑀫𑀡𑁆𑀟𑀦𑀓𑀚𑀸𑀢𑀺𑀬𑁄 𑀧𑀼𑀭𑀺𑀲𑁄 𑀚𑀺𑀕𑀼𑀘𑁆𑀙𑀢𑀺 𑀳𑀺𑀭𑀻𑀬𑀢𑀺, 𑀢𑀲𑁆𑀫𑀸 𑀢𑀁 𑀚𑁂𑀕𑀼𑀘𑁆𑀙𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀣 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑁮. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀬𑀁 𑀇𑀫𑀁 𑀮𑁄𑀓𑀚𑁂𑀝𑁆𑀞𑀓𑀓𑀫𑁆𑀫𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀅𑀣 𑀯𑀸 𑀬𑀲𑁆𑀫𑀸 𑀏𑀢𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑁄𑀢𑀺 𑀢𑀲𑁆𑀫𑀸 𑀅𑀬𑀁 𑀯𑀺𑀦𑁂𑀢𑀩𑁆𑀩𑁄 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀯𑁂𑀦𑀬𑀺𑀓𑁄𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄, 𑀯𑀺𑀦𑀬𑀁 𑀯𑀸 𑀅𑀭𑀳𑀢𑀻𑀢𑀺 𑀯𑁂𑀦𑀬𑀺𑀓𑁄, 𑀦𑀺𑀕𑁆𑀕𑀳𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀸 𑀧𑀦, 𑀬𑀲𑁆𑀫𑀸 𑀭𑀸𑀕𑀸𑀤𑀻𑀦𑀁 𑀯𑀺𑀦𑀬𑀸𑀬 𑀯𑀽𑀧𑀲𑀫𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀯𑁂𑀦𑀬𑀺𑀓𑁄 𑀳𑁄𑀢𑀺. 𑀅𑀬𑀫𑁂𑀯 𑀘𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀦𑀬𑀺𑀓𑁄. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺! 𑀲𑁆𑀯𑀸𑀬𑀁 𑀢𑀁 𑀯𑁂𑀦𑀬𑀺𑀓𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁯. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀲𑁆𑀫𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀲𑀸𑀫𑀻𑀘𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀬𑁄𑀯𑀼𑀟𑁆𑀠𑁂 𑀢𑁄𑀲𑁂𑀦𑁆𑀢𑀺 𑀳𑀸𑀲𑁂𑀦𑁆𑀢𑀺, 𑀅𑀓𑀭𑁄𑀦𑁆𑀢𑀸 𑀧𑀦 𑀢𑀸𑀧𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀦𑁂𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀪𑀕𑀯𑀸 𑀘 𑀢𑀸𑀦𑀺 𑀦 𑀓𑀭𑁄𑀢𑀺; 𑀢𑀲𑁆𑀫𑀸 ‘‘𑀅𑀬𑀁 𑀯𑀬𑁄𑀯𑀼𑀟𑁆𑀠𑁂 𑀢𑀧𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑀸𑀘𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀯𑀸 ‘‘𑀓𑀧𑀡𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀢𑀧𑀲𑁆𑀲𑀻𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀢𑀧𑀢𑀻𑀢𑀺 𑀢𑀧𑁄, 𑀭𑁄𑀲𑁂𑀢𑀺 𑀯𑀺𑀳𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀸𑀫𑀻𑀘𑀺𑀓𑀫𑁆𑀫𑀸𑀓𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀩𑁆𑀬𑀜𑁆𑀚𑀦𑀸𑀦𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀮𑁄𑀓𑁂 𑀓𑀧𑀡𑀧𑀼𑀭𑀺𑀲𑁄 ‘‘𑀢𑀧𑀲𑁆𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀧𑀦 𑀬𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀮𑁄𑀓𑀁 𑀢𑀧𑀦𑀢𑁄 𑀢𑀧𑀦𑀻𑀬𑀸𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀢𑀧𑀲𑁆𑀲𑀻𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀲𑁆𑀫𑀸 𑀢𑀁 𑀢𑀧𑀲𑁆𑀲𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀢𑀧𑀦𑁆𑀢𑀻𑀢𑀺 𑀢𑀧𑀸, 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁂𑀢𑀁 ¶ 𑀅𑀥𑀺𑀯𑀘𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀇𑀥 𑀢𑀧𑁆𑀧𑀢𑀺 𑀧𑁂𑀘𑁆𑀘 𑀢𑀧𑁆𑀧𑀢𑀻’’𑀢𑀺. 𑀢𑀣𑀸 𑀢𑁂 𑀢𑀧𑁂 𑀅𑀲𑁆𑀲𑀺 𑀦𑀺𑀭𑀲𑁆𑀲𑀺 𑀧𑀳𑀸𑀲𑀺 𑀯𑀺𑀤𑁆𑀥𑀁𑀲𑁂𑀲𑀻𑀢𑀺 𑀢𑀧𑀲𑁆𑀲𑀻.

𑁧𑁦. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀤𑁂𑀯𑀮𑁄𑀓𑀕𑀩𑁆𑀪𑀲𑀫𑁆𑀧𑀢𑁆𑀢𑀺𑀬𑀸 𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀢𑀺 𑀘𑀲𑁆𑀲 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀅𑀧𑀕𑀩𑁆𑀪𑁄𑀢𑀺 𑀆𑀳. 𑀓𑁄𑀥𑀯𑀲𑁂𑀦 𑀯𑀸 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 𑀏𑀯𑀫𑀸𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀕𑀩𑁆𑀪𑀢𑁄 𑀅𑀧𑀕𑀢𑁄𑀢𑀺 𑀅𑀧𑀕𑀩𑁆𑀪𑁄, 𑀅𑀪𑀩𑁆𑀩𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄, 𑀤𑁂𑀯𑀮𑁄𑀓𑀕𑀩𑁆𑀪𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀆𑀬𑀢𑀺𑀁 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻𑀢𑀺, 𑀳𑀻𑀦𑁄 𑀯𑀸𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑀯𑀸𑀲𑁄 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀢𑁄 𑀧𑀦 𑀬𑀲𑁆𑀫𑀸 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀅𑀧𑀕𑀢𑀸, 𑀢𑀲𑁆𑀫𑀸 𑀲𑁄 𑀢𑀁 𑀅𑀧𑀕𑀩𑁆𑀪𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀭 𑀘 𑀬𑀲𑁆𑀲 𑀔𑁄 𑀩𑁆𑀭𑀸𑀳𑁆𑀫𑀡 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀕𑀢𑁂 𑀕𑀩𑁆𑀪𑀲𑁂𑀬𑁆𑀬𑀸, 𑀧𑀼𑀦𑀩𑁆𑀪𑀯𑁂 𑀘 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦 𑀯𑀺𑀳𑀢𑀓𑀸𑀭𑀡𑀢𑁆𑀢𑀸 𑀧𑀳𑀻𑀦𑀸𑀢𑀺. 𑀕𑀩𑁆𑀪𑀲𑁂𑀬𑁆𑀬𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀚𑀮𑀸𑀩𑀼𑀚𑀬𑁄𑀦𑀺 𑀕𑀳𑀺𑀢𑀸. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀕𑁆𑀕𑀳𑀡𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄𑀧𑀺.

𑀅𑀧𑀺𑀘 𑀕𑀩𑁆𑀪𑀲𑁆𑀲 𑀲𑁂𑀬𑁆𑀬𑀸 𑀕𑀩𑁆𑀪𑀲𑁂𑀬𑁆𑀬𑀸, 𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀯𑀺𑀜𑁆𑀜𑀸𑀡𑀢𑁄 𑀅𑀜𑁆𑀜𑀸 𑀞𑀺𑀢𑀺 𑀅𑀢𑁆𑀣𑀺, 𑀏𑀯𑀫𑀺𑀥𑀸𑀧𑀺 𑀦 𑀕𑀩𑁆𑀪𑀢𑁄 𑀅𑀜𑁆𑀜𑀸 𑀲𑁂𑀬𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀦𑀸𑀫 𑀬𑀲𑁆𑀫𑀸 𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀢𑁆𑀣𑀺, 𑀇𑀥 𑀘 𑀧𑀼𑀦𑀩𑁆𑀪𑀯𑀪𑀽𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺.

𑁧𑁧. 𑀏𑀯𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀭𑀲𑀭𑀽𑀧𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀲𑁆𑀲𑀸𑀫𑀻 ¶ 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀸𑀬 𑀲𑀻𑀢𑀮𑁂𑀦𑁂𑀯 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀬𑀁 𑀥𑀫𑁆𑀫𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 ¶ 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑀺𑀕𑀢𑀯𑀮𑀸𑀳𑀓𑁂 𑀅𑀦𑁆𑀢𑀮𑀺𑀓𑁆𑀔𑁂 𑀲𑀫𑀩𑁆𑀪𑀼𑀕𑁆𑀕𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀭𑀤𑀓𑀸𑀮𑁂 𑀲𑀽𑀭𑀺𑀬𑁄 𑀯𑀺𑀬 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑁄 𑀢𑀸𑀦𑀺𑀬𑁂𑀯 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑀣𑀸 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀁 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀁, 𑀢𑀸𑀤𑀺𑀕𑀼𑀡𑀮𑀓𑁆𑀔𑀡𑀁 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀁 𑀅𑀓𑀼𑀧𑁆𑀧𑀥𑀫𑁆𑀫𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀓𑁂𑀯𑀮𑀁 𑀧𑀮𑀺𑀢𑀲𑀺𑀭𑀔𑀡𑁆𑀟𑀤𑀦𑁆𑀢𑀯𑀮𑀺𑀢𑁆𑀢𑀘𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀪𑀸𑀯𑀁 𑀲𑀜𑁆𑀚𑀸𑀦𑀸𑀢𑀺, 𑀦𑁄 𑀘 𑀔𑁄 𑀚𑀸𑀦𑀸𑀢𑀺 𑀅𑀢𑁆𑀢𑀸𑀦𑀁 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁 𑀚𑀭𑀸𑀬 𑀅𑀦𑀼𑀲𑀝𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁 𑀯𑀝𑁆𑀝𑀔𑀸𑀡𑀼𑀪𑀽𑀢𑀁 𑀅𑀚𑁆𑀚 𑀫𑀭𑀺𑀢𑁆𑀯𑀸 𑀧𑀼𑀦 𑀲𑁆𑀯𑁂𑀯 𑀉𑀢𑁆𑀢𑀸𑀦𑀲𑀬𑀦𑀤𑀸𑀭𑀓𑀪𑀸𑀯𑀕𑀫𑀦𑀻𑀬𑀁. 𑀫𑀳𑀦𑁆𑀢𑁂𑀦 𑀔𑁄 𑀧𑀦 𑀉𑀲𑁆𑀲𑀸𑀳𑁂𑀦 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀤𑀲𑁆𑀲 𑀆𑀕𑀫𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺.

𑀢𑀢𑁆𑀣 𑀲𑁂𑀬𑁆𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄; 𑀧𑀻𑀢𑀺 𑀲𑀫𑁆𑀪𑀸𑀯𑀦𑀢𑁆𑀣𑁂; 𑀉𑀪𑀬𑁂𑀦𑀸𑀧𑀺 𑀬𑀣𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀢𑀺 ¶ 𑀤𑀲𑁆𑀲𑁂𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀊𑀦𑀸𑀥𑀺𑀓𑀸𑀦𑀺𑀧𑀺 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺. 𑀢𑀸𑀦𑀲𑁆𑀲𑀽𑀢𑀺 𑀢𑀸𑀦𑀺 𑀅𑀲𑁆𑀲𑀼, 𑀪𑀯𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀢𑀸𑀬 𑀚𑀦𑁂𑀢𑁆𑀢𑀺𑀬𑀸 𑀓𑀼𑀓𑁆𑀓𑀼𑀝𑀺𑀬𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀬𑀦𑁆𑀢𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀲𑁂𑀤𑀺𑀢𑀸𑀦𑀺, 𑀉𑀲𑁆𑀫𑀻𑀓𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀪𑀸𑀯𑀺𑀢𑀸𑀦𑀺, 𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀢𑀸𑀬 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀺𑀬𑀫𑀸𑀦𑀸𑀦𑀺 𑀦 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺. 𑀬𑁄𑀧𑀺 𑀦𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑁄 𑀲𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺. 𑀓𑀧𑀸𑀮𑀁 𑀢𑀦𑀼𑀓𑀁 𑀳𑁄𑀢𑀺, 𑀧𑀸𑀤𑀦𑀔𑀲𑀺𑀔𑀸 𑀘 𑀫𑀼𑀔𑀢𑀼𑀡𑁆𑀟𑀓𑀜𑁆𑀘 𑀔𑀭𑀁 𑀳𑁄𑀢𑀺, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺, 𑀓𑀧𑀸𑀮𑀲𑁆𑀲 𑀢𑀦𑀼𑀓𑀢𑁆𑀢𑀸 𑀩𑀳𑀺𑀤𑁆𑀥𑀸 ¶ 𑀆𑀮𑁄𑀓𑁄 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀅𑀣 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 ‘‘𑀘𑀺𑀭𑀁 ¶ 𑀯𑀢 𑀫𑀬𑀁 𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸 𑀲𑀫𑁆𑀩𑀸𑀥𑁂 𑀲𑀬𑀺𑀫𑁆𑀳, 𑀅𑀬𑀜𑁆𑀘 𑀩𑀳𑀺 𑀆𑀮𑁄𑀓𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀤𑀸𑀦𑀺 𑀦𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀧𑀸𑀮𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀦𑁆𑀢𑀺. 𑀢𑀢𑁄 𑀢𑀁 𑀓𑀧𑀸𑀮𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀏𑀯𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀦𑁂𑀲𑀁 𑀬𑁄 𑀧𑀞𑀫𑀢𑀭𑀁 𑀦𑀺𑀓𑁆𑀔𑀫𑀢𑀺 𑀲𑁄 ‘𑀚𑁂𑀝𑁆𑀞𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀸𑀬 𑀉𑀧𑀫𑀸𑀬 𑀅𑀢𑁆𑀢𑀦𑁄 𑀚𑁂𑀝𑁆𑀞𑀓𑀪𑀸𑀯𑀁 𑀲𑀸𑀥𑁂𑀢𑀼𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺 𑁋 ‘‘𑀬𑁄 𑀦𑀼 𑀔𑁄 𑀢𑁂𑀲𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁…𑀧𑁂… 𑀓𑀺𑀦𑁆𑀢𑀺 𑀲𑁆𑀯𑀲𑁆𑀲 𑀯𑀘𑀦𑀻𑀬𑁄’’𑀢𑀺. 𑀢𑀢𑁆𑀣 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀦𑁆𑀢𑀺 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁. 𑀓𑀺𑀦𑁆𑀢𑀺 𑀲𑁆𑀯𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑁄 𑀓𑀺𑀦𑁆𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀓𑀺𑀦𑁆𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀚𑁂𑀝𑁆𑀞𑁄𑀢𑀺𑀲𑁆𑀲 𑀪𑁄 𑀕𑁄𑀢𑀫 𑀯𑀘𑀦𑀻𑀬𑁄’’𑀢𑀺. 𑀪𑁄, 𑀕𑁄𑀢𑀫, 𑀲𑁄 𑀚𑁂𑀝𑁆𑀞𑁄 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑁄. 𑀓𑀲𑁆𑀫𑀸𑀢𑀺 𑀘𑁂? 𑀲𑁄 𑀳𑀺 𑀦𑁂𑀲𑀁 𑀚𑁂𑀝𑁆𑀞𑁄, 𑀢𑀲𑁆𑀫𑀸 𑀲𑁄 𑀦𑁂𑀲𑀁 𑀯𑀼𑀟𑁆𑀠𑀢𑀭𑁄𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀪𑀕𑀯𑀸 𑀑𑀧𑀫𑁆𑀫𑀁 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀫𑁂𑀯 𑀔𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺. 𑀬𑀣𑀸 𑀲𑁄 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀚𑁂𑀝𑁆𑀞𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀏𑀯𑀁 𑀅𑀳𑀫𑁆𑀧𑀺 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬. 𑀅𑀯𑀺𑀚𑁆𑀚𑀸𑀕𑀢𑀸𑀬𑀸𑀢𑀺 𑀅𑀯𑀺𑀚𑁆𑀚𑀸 𑀯𑀼𑀘𑁆𑀘𑀢𑀺 𑀅𑀜𑁆𑀜𑀸𑀡𑀁, 𑀢𑀢𑁆𑀣 𑀕𑀢𑀸𑀬. 𑀧𑀚𑀸𑀬𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀢𑀲𑁆𑀫𑀸 𑀏𑀢𑁆𑀣 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀽𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀡𑁆𑀟𑀪𑀽𑀢𑀸𑀬𑀸𑀢𑀺 𑀅𑀡𑁆𑀟𑁂 𑀪𑀽𑀢𑀸𑀬 𑀚𑀸𑀢𑀸𑀬 𑀲𑀜𑁆𑀚𑀸𑀢𑀸𑀬. 𑀬𑀣𑀸 𑀳𑀺 𑀅𑀡𑁆𑀟𑁂 𑀦𑀺𑀩𑁆𑀩𑀢𑁆𑀢𑀸 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑀬𑀁 𑀲𑀩𑁆𑀩𑀸𑀧𑀺 𑀧𑀚𑀸 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑁄𑀦𑀤𑁆𑀥𑀸𑀬𑀸𑀢𑀺 𑀢𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑀸𑀬 𑀩𑀤𑁆𑀥𑀸𑀬 𑀯𑁂𑀞𑀺𑀢𑀸𑀬 ¶ . 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸𑀢𑀺 𑀢𑀁 𑀅𑀯𑀺𑀚𑁆𑀚𑀸𑀫𑀬𑀁 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 ¶ . 𑀏𑀓𑁄𑀯 𑀮𑁄𑀓𑁂𑀢𑀺 𑀲𑀓𑀮𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀳𑀫𑁂𑀯 𑀏𑀓𑁄 𑀅𑀤𑀼𑀢𑀺𑀬𑁄. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁; 𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺𑀁; 𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘 ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑀘 𑀆𑀕𑀢𑀝𑁆𑀞𑀸𑀦𑁂𑀲𑀼 𑀳𑀺 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺 ¶ 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀺𑀬𑀪𑀸𑀯𑀁. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦 𑀳𑁄𑀢𑀻𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀁; 𑀧𑀢𑁆𑀢𑁄𑀫𑁆𑀳𑀺 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑀤𑁂𑀢𑀁 𑀪𑀕𑀯𑀢𑀸 ‘‘𑀏𑀯𑀫𑁂𑀯 𑀔𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁, 𑀢𑀁 𑀏𑀯𑀫𑀢𑁆𑀣𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀢𑁆𑀢𑀦𑁄 𑀅𑀡𑁆𑀟𑁂𑀲𑀼 𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁; 𑀏𑀯𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺. 𑀓𑀼𑀓𑁆𑀓𑀼𑀝𑀺𑀬𑀸 ¶ 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀸𑀦𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀓𑀧𑀸𑀮𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀸𑀤𑀦𑀔𑀲𑀺𑀔𑀸𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀔𑀭𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 ¶ 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀭𑀺𑀧𑀸𑀓𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 ¶ 𑀧𑀭𑀺𑀧𑀸𑀓𑀓𑀸𑀮𑁄 𑀯𑀟𑁆𑀠𑀺𑀢𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀲𑀓𑀮𑀩𑀼𑀤𑁆𑀥𑀕𑀼𑀡𑀲𑀘𑁆𑀙𑀺𑀓𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑁆𑀯𑀸𑀳𑀁 𑀩𑁆𑀭𑀸𑀳𑁆𑀫𑀡 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲𑀸𑀢𑀺 𑀲𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡 𑀬𑀣𑀸 𑀢𑁂𑀲𑀁 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀞𑀫𑀢𑀭𑀁 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀪𑀺𑀤𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀚𑁂𑀝𑁆𑀞𑁄 𑀳𑁄𑀢𑀺; 𑀏𑀯𑀁 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬 𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀢𑀭𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀚𑁂𑀝𑁆𑀞𑁄 𑀯𑀼𑀟𑁆𑀠𑀢𑀭𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀲𑀩𑁆𑀩𑀕𑀼𑀡𑁂𑀳𑀺 𑀧𑀦 𑀅𑀧𑁆𑀧𑀝𑀺𑀲𑀫𑀢𑁆𑀢𑀸 𑀲𑁂𑀝𑁆𑀞𑁄𑀢𑀺.

𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀁 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀸𑀬 𑀧𑀝𑀺𑀧𑀤𑀸𑀬 𑀢𑀁 𑀅𑀥𑀺𑀕𑀢𑁄 𑀢𑀁 𑀧𑀝𑀺𑀧𑀤𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀁 𑀯𑀸 𑀪𑀕𑀯𑀢𑁄 𑀅𑀦𑀼𑀢𑁆𑀢𑀭𑀁 ¶ 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀫𑁂𑀯𑀫𑀼𑀧𑁆𑀧𑀦𑁆𑀦𑀁 𑁋 ‘‘𑀓𑀸𑀬 𑀦𑀼 𑀔𑁄 𑀧𑀝𑀺𑀧𑀤𑀸𑀬 𑀇𑀫𑀁 𑀧𑀢𑁆𑀢𑁄’’𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬 ‘‘𑀇𑀫𑀸𑀬𑀸𑀳𑀁 𑀧𑀝𑀺𑀧𑀤𑀸𑀬 𑀇𑀫𑀁 𑀅𑀦𑀼𑀢𑁆𑀢𑀭𑀁 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡 𑀯𑀻𑀭𑀺𑀬𑀁 𑀅𑀳𑁄𑀲𑀻𑀢𑀺 𑀩𑁆𑀭𑀸𑀳𑁆𑀫𑀡, 𑀦 𑀫𑀬𑀸 𑀅𑀬𑀁 𑀅𑀦𑀼𑀢𑁆𑀢𑀭𑁄 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁄 𑀓𑀼𑀲𑀻𑀢𑁂𑀦 𑀫𑀼𑀝𑁆𑀞𑀲𑁆𑀲𑀢𑀺𑀦𑀸 𑀲𑀸𑀭𑀤𑁆𑀥𑀓𑀸𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂𑀦 𑀅𑀥𑀺𑀕𑀢𑁄, 𑀅𑀧𑀺𑀘 𑀔𑁄 𑀢𑀤𑀥𑀺𑀕𑀫𑀸𑀬 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀅𑀳𑁄𑀲𑀺, 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑁂𑀦 𑀫𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀅𑀳𑁄𑀲𑀺, 𑀧𑀕𑁆𑀕𑀳𑀺𑀢𑀁 𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀤𑁆𑀥𑀢𑁆𑀢𑀸𑀬𑁂𑀯 𑀘 𑀫𑁂 𑀢𑀁 𑀅𑀲𑀮𑁆𑀮𑀻𑀦𑀁 𑀅𑀳𑁄𑀲𑀺. 𑀦 𑀓𑁂𑀯𑀮𑀜𑁆𑀘 𑀯𑀻𑀭𑀺𑀬𑀫𑁂𑀯, 𑀲𑀢𑀺𑀧𑀺 𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸 𑀅𑀳𑁄𑀲𑀺. 𑀉𑀧𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀘 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀓𑀸𑀬𑁄𑀧𑀺 𑀫𑁂 𑀧𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 ¶ . 𑀢𑀢𑁆𑀣 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸𑀯 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀭𑀤𑁆𑀥𑁄𑀢𑀺 𑀲𑁄 𑀘 𑀔𑁄 𑀧𑀲𑁆𑀲𑀤𑁆𑀥𑀢𑁆𑀢𑀸𑀬𑁂𑀯 𑀅𑀲𑀸𑀭𑀤𑁆𑀥𑁄, 𑀯𑀺𑀕𑀢𑀤𑀭𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺 𑀫𑁂 𑀲𑀫𑁆𑀫𑀸 ¶ 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺; 𑀲𑀫𑀸𑀳𑀺𑀢𑀢𑁆𑀢𑀸 𑀏𑀯 𑀘 𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸 𑀳𑁄𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸

𑀇𑀤𑀸𑀦𑀺 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑀁 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀚𑁆𑀚𑀢𑁆𑀢𑀬𑀧𑀭𑀺𑀬𑁄𑀲𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀔𑁄 𑀅𑀳’’𑀦𑁆𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺𑀆𑀤𑀻𑀦𑀁 𑀓𑀺𑀜𑁆𑀘𑀸𑀧𑀺 ‘‘𑀢𑀢𑁆𑀣 𑀓𑀢𑀫𑁂 𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄; 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀸𑀫𑀸. 𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀓𑀸𑀫𑀘𑁆𑀙𑀦𑁆𑀤𑁄…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀢𑀺 𑀇𑀫𑁂𑀳𑀺 𑀘 𑀓𑀸𑀫𑁂𑀳𑀺 𑀇𑀫𑁂𑀳𑀺 𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 ¶ 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀧𑀯𑀺𑀯𑀺𑀢𑁆𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁪) 𑀦𑀬𑁂𑀦 𑀯𑀺𑀪𑀗𑁆𑀕𑁂𑀬𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸𑀧𑀺 𑀅𑀝𑁆𑀞𑀓𑀣𑀸𑀦𑀬𑀁 𑀯𑀺𑀦𑀸 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄𑀢𑀺 𑀅𑀝𑁆𑀞𑀓𑀣𑀸𑀦𑀬𑁂𑀦𑁂𑀯 𑀦𑀁 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀁 𑁋 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀲𑀓𑁆𑀓𑁂𑀢𑁆𑀯𑀸. 𑀬𑁄 𑀧𑀦𑀸𑀬𑀫𑁂𑀢𑁆𑀣 𑀏𑀯𑀓𑀸𑀭𑁄, 𑀲𑁄 𑀦𑀺𑀬𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀦𑀺𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀁 𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑀁 𑀤𑀻𑀧𑁂𑀢𑀺. 𑀓𑀣𑀁? ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀏𑀯𑀜𑁆𑀳𑀺 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺. 𑀦𑀽𑀦𑀺𑀫𑀲𑁆𑀲 𑀛𑀸𑀦𑀲𑁆𑀲 𑀓𑀸𑀫𑀸 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀬𑁂𑀲𑀼 𑀲𑀢𑀺 𑀇𑀤𑀁 𑀦 𑀧𑀯𑀢𑁆𑀢𑀢𑀺, 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄 𑀯𑀺𑀬, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺, 𑀑𑀭𑀺𑀫𑀢𑀻𑀭𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀫𑀢𑀻𑀭𑀲𑁆𑀲𑁂𑀯, 𑀢𑀲𑁆𑀫𑀸 𑀦𑀺𑀬𑀫𑀁 𑀓𑀭𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘‘𑀓𑀲𑁆𑀫𑀸 𑀧𑀦𑁂𑀲 𑀧𑀼𑀩𑁆𑀩𑀧𑀤𑁂𑀬𑁂𑀯 𑀯𑀼𑀢𑁆𑀢𑁄 𑀦 𑀉𑀢𑁆𑀢𑀭𑀧𑀤𑁂, 𑀓𑀺𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺? 𑀦 ¶ 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀦𑀺𑀲𑁆𑀲𑀭𑀡𑀢𑁄 𑀳𑀺 𑀧𑀼𑀩𑁆𑀩𑀧𑀤𑁂𑀏𑀯 𑀏𑀲 𑀯𑀼𑀢𑁆𑀢𑁄. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀳𑀺 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀘 𑀇𑀤𑀁 𑀛𑀸𑀦𑀁 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀬𑀣𑀸𑀳 𑁋 ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨). 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯) 𑀏𑀢𑁆𑀣 𑀏𑀯𑀓𑀸𑀭𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁 ¶ . 𑀢𑀲𑁆𑀫𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀯𑀁 𑀧𑀤𑀤𑁆𑀯𑀬𑁂𑀧𑀺 𑀏𑀲 𑀤𑀝𑁆𑀞𑀩𑁆𑀩𑁄. 𑀧𑀤𑀤𑁆𑀯𑀬𑁂𑀧𑀺 𑀘 𑀓𑀺𑀜𑁆𑀘𑀸𑀧𑀺 ‘‘𑀯𑀺𑀯𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀘𑀦𑁂𑀦 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸𑀧𑀺 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄𑀢𑀺 𑀢𑀬𑁄 𑀏𑀯 𑀇𑀥 𑀤𑀝𑁆𑀞𑀩𑁆𑀩𑀸. ‘‘𑀓𑀸𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁂 𑀘 𑀦𑀺𑀤𑁆𑀤𑁂𑀲𑁂 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧; 𑀯𑀺𑀪. 𑁯𑁬𑁪) 𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸, 𑀬𑁂 𑀘 𑀢𑀢𑁆𑀣𑁂𑀯 𑀯𑀺𑀪𑀗𑁆𑀕𑁂 𑀘 ‘‘𑀙𑀦𑁆𑀤𑁄 ¶ 𑀓𑀸𑀫𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧) 𑀦𑀬𑁂𑀦 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀺𑀢𑀸 𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀯𑀸 𑀯𑀺𑀯𑀺𑀘𑁆𑀘𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑀭𑀺𑀕𑁆𑀕𑀳𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀘 𑀏𑀢𑁂𑀲𑀁 𑀧𑀞𑀫𑁂𑀦 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁; 𑀧𑀞𑀫𑁂𑀦 𑀮𑁄𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀩𑀸𑀮𑀪𑀸𑀯𑀲𑁆𑀲; 𑀧𑀞𑀫𑁂𑀦 𑀘 𑀧𑀬𑁄𑀕𑀲𑀼𑀤𑁆𑀥𑀺, 𑀤𑀼𑀢𑀺𑀬𑁂𑀦 𑀆𑀲𑀬𑀧𑁄𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀏𑀲 𑀢𑀸𑀯 𑀦𑀬𑁄 ‘‘𑀓𑀸𑀫𑁂𑀳𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂.

𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀙𑀦𑁆𑀤𑁄𑀢𑀺 𑀘 𑀭𑀸𑀕𑁄𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁄 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯 𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀺 ¶ 𑀲𑀫𑀸𑀦𑁄, ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀛𑀸𑀦𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀪𑁂𑀤𑀢𑁄 𑀘𑀲𑁆𑀲 𑀓𑀸𑀫𑀢𑁄𑀢𑀺 𑀅𑀯𑀢𑁆𑀯𑀸 𑀓𑀸𑀫𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 ‘‘𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁪) 𑀉𑀧𑀭𑀺𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺, 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑁂𑀯 𑀧𑀝𑀺𑀧𑀓𑁆𑀔𑀸𑀦𑀺, 𑀯𑀺𑀤𑁆𑀥𑀁𑀲𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲, 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺 𑀧𑁂𑀝𑀓𑁂 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀻𑀯𑀭𑀡𑀸𑀦𑀁. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 ¶ 𑀧𑀞𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀤𑀼𑀢𑀺𑀬𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀁. 𑀢𑀣𑀸 𑀧𑀞𑀫𑁂𑀦 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲 𑀮𑁄𑀪𑀲𑁆𑀲, 𑀤𑀼𑀢𑀺𑀬𑁂𑀦 ¶ 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀁 𑀤𑁄𑀲𑀫𑁄𑀳𑀸𑀦𑀁. 𑀑𑀖𑀸𑀤𑀻𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀞𑀫𑁂𑀦 𑀓𑀸𑀫𑁄𑀖-𑀓𑀸𑀫𑀬𑁄𑀕-𑀓𑀸𑀫𑀸𑀲𑀯-𑀓𑀸𑀫𑀼𑀧𑀸𑀤𑀸𑀦-𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣-𑀓𑀸𑀫𑀭𑀸𑀕-𑀲𑀁𑀬𑁄𑀚𑀦𑀸𑀦𑀁, 𑀤𑀼𑀢𑀺𑀬𑁂𑀦 𑀅𑀯𑀲𑁂𑀲𑀑𑀖-𑀬𑁄𑀕𑀸𑀲𑀯-𑀉𑀧𑀸𑀤𑀸𑀦-𑀕𑀦𑁆𑀣-𑀲𑀁𑀬𑁄𑀚𑀦𑀸𑀦𑀁. 𑀧𑀞𑀫𑁂𑀦 𑀘 𑀢𑀡𑁆𑀳𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀅𑀯𑀺𑀚𑁆𑀚𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘. 𑀅𑀧𑀺𑀘 𑀧𑀞𑀫𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀅𑀝𑁆𑀞𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁, 𑀤𑀼𑀢𑀺𑀬𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑀧𑁆𑀧𑀓𑀸𑀲𑀦𑀸.

𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄, 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄. 𑀢𑀣𑀸 𑀳𑀺 ‘‘𑀢𑁂𑀦 𑀬𑁄𑀕𑀸𑀯𑀘𑀭𑁄 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀺𑀘𑀭𑀡𑀁 𑀯𑀺𑀘𑀸𑀭𑁄, 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀑𑀴𑀸𑀭𑀺𑀓𑀝𑁆𑀞𑁂𑀦 𑀖𑀡𑁆𑀝𑀸𑀪𑀺𑀖𑀸𑀢𑀲𑀤𑁆𑀤𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫-𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀇𑀢𑀺 𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀲𑀳 𑀯𑀢𑁆𑀢𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦 𑀘 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 ¶ 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁫) 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀺𑀯𑁂𑀓𑀚𑀦𑁆𑀢𑀺 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀸, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀺𑀦𑀬𑀢𑀻𑀢𑀺 𑀧𑀻𑀢𑀺, 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸 𑀓𑀸𑀬𑀘𑀺𑀢𑁆𑀢𑀧𑀻𑀦𑀦𑀭𑀲𑀸 ¶ , 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀼𑀔𑀦𑀁 𑀲𑀼𑀔𑀁, 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁, 𑀢𑀁 𑀲𑀸𑀢𑀮𑀓𑁆𑀔𑀡𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀅𑀦𑀼𑀕𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀢𑀺𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺, 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺 𑀢𑀢𑁆𑀣 𑀲𑀼𑀔𑀁, 𑀬𑀢𑁆𑀣 𑀲𑀼𑀔𑀁 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺, 𑀯𑀦𑀘𑁆𑀙𑀸𑀬𑀧𑁆𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀧𑀻𑀢𑀺, 𑀇𑀤𑀜𑁆𑀘 𑀲𑀼𑀔𑀁, 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 ‘‘𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀥𑀫𑁆𑀫𑀯𑀺𑀦𑀬𑀸𑀤𑀬𑁄 𑀯𑀺𑀬. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀫𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀁. 𑀬𑀣𑁂𑀯 ¶ 𑀳𑀺 𑀛𑀸𑀦𑀁, 𑀏𑀯𑀁 𑀧𑀻𑀢𑀺𑀲𑀼𑀔𑀁 𑀧𑁂𑀢𑁆𑀣 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀫𑀸 𑀏𑀓𑀧𑀤𑁂𑀦𑁂𑀯 ‘‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁭) 𑀦𑀬𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀧𑀞𑀫𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁, 𑀇𑀤𑀁 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀧𑀞𑀫𑀁. 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀛𑀸𑀧𑁂𑀢𑀻𑀢𑀺 𑀛𑀸𑀦𑀁, 𑀇𑀫𑀺𑀦𑀸 𑀬𑁄𑀕𑀺𑀦𑁄 𑀛𑀸𑀬𑀦𑁆𑀢𑀻𑀢𑀺𑀧𑀺 𑀛𑀸𑀦𑀁, 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀟𑀳𑀦𑁆𑀢𑀺 𑀕𑁄𑀘𑀭𑀁 𑀯𑀸 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀬𑀁 𑀯𑀸 𑀢𑀁 𑀛𑀸𑀬𑀢𑀺 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀛𑀸𑀦𑀁, 𑀢𑁂𑀦𑁂𑀯 𑀉𑀧𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 ¶ , 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀲𑀳 𑀉𑀧𑀘𑀸𑀭𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄. 𑀏𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀺 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀚𑁆𑀛𑀸𑀬𑀦𑀓𑀺𑀘𑁆𑀘𑀁 𑀧𑀦 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀮𑀁 𑀧𑀦 𑀦𑀺𑀭𑁄𑀥𑀲𑁆𑀲 𑀢𑀣𑀮𑀓𑁆𑀔𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀛𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀏𑀢𑁆𑀣𑀸𑀳 𑁋 ‘‘𑀓𑀢𑀫𑀁 𑀧𑀦 𑀢𑀁 𑀛𑀸𑀦𑀁 𑀦𑀸𑀫, 𑀬𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁…𑀧𑁂… 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀯𑀁 𑀅𑀧𑀤𑁂𑀲𑀁 𑀅𑀭𑀳𑀢𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀣𑀸 𑀲𑀥𑀦𑁄 𑀲𑀧𑀭𑀺𑀚𑀦𑁄𑀢𑀺𑀆𑀤𑀻𑀲𑀼 𑀞𑀧𑁂𑀢𑁆𑀯𑀸 𑀥𑀦𑀜𑁆𑀘 𑀧𑀭𑀺𑀚𑀦𑀜𑁆𑀘 𑀅𑀜𑁆𑀜𑁄 𑀅𑀧𑀤𑁂𑀲𑀸𑀭𑀳𑁄 𑀳𑁄𑀢𑀺, 𑀏𑀯𑀁 𑀞𑀧𑁂𑀢𑁆𑀯𑀸 𑀯𑀺𑀢𑀓𑁆𑀓𑀸𑀤𑀺𑀥𑀫𑁆𑀫𑁂 𑀅𑀜𑁆𑀜𑀁 𑀅𑀧𑀤𑁂𑀲𑀸𑀭𑀳𑀁 𑀦𑀢𑁆𑀣𑀺. 𑀬𑀣𑀸 𑀧𑀦 𑀲𑀭𑀣𑀸 𑀲𑀧𑀢𑁆𑀢𑀺 𑀲𑁂𑀦𑀸𑀢𑀺 𑀯𑀼𑀢𑁆𑀢𑁂 𑀲𑁂𑀦𑀗𑁆𑀕𑁂𑀲𑀼𑀬𑁂𑀯 𑀲𑁂𑀦𑀸𑀲𑀫𑁆𑀫𑀼𑀢𑀺, 𑀏𑀯𑀫𑀺𑀥 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼𑀬𑁂𑀯 ¶ 𑀛𑀸𑀦𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀏𑀢𑁂𑀲𑀼. 𑀏𑀢𑀸𑀦𑁂𑀯 𑀳𑀺𑀲𑁆𑀲 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀯𑀼𑀢𑁆𑀢𑀢𑁆𑀢𑀸 𑀏𑀓𑀕𑁆𑀕𑀢𑀸 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀘𑁂 𑀢𑀜𑁆𑀘 𑀦. 𑀓𑀲𑁆𑀫𑀸? 𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀲𑀸𑀧𑀺 𑀳𑀺 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬𑁂𑀯. 𑀢𑀲𑁆𑀫𑀸 𑀬𑀣𑀸 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺, 𑀏𑀯𑀁 𑀲𑀘𑀺𑀢𑁆𑀢𑁂𑀓𑀕𑁆𑀕𑀢𑀦𑁆𑀢𑀺 𑀇𑀥 𑀅𑀯𑀼𑀢𑁆𑀢𑁂𑀧𑀺 𑀇𑀫𑀺𑀦𑀸 𑀯𑀺𑀪𑀗𑁆𑀕𑀯𑀘𑀦𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀅𑀗𑁆𑀕𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀉𑀤𑁆𑀤𑁂𑀲𑁄 𑀓𑀢𑁄, 𑀲𑁄 𑀏𑀯 𑀢𑁂𑀦 𑀯𑀺𑀪𑀗𑁆𑀕𑁂𑀧𑀺 𑀧𑀓𑀸𑀲𑀺𑀢𑁄𑀢𑀺.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 ¶ 𑀉𑀧𑀕𑀦𑁆𑀢𑁆𑀯𑀸, 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸 𑀯𑀸, 𑀦𑀺𑀧𑁆𑀨𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀏𑀯𑀫𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀳𑀸𑀲𑀺𑀦𑁆𑀢𑀺 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀚𑁆𑀚𑀲𑀗𑁆𑀔𑀸𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀇𑀢𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀛𑀸𑀦𑀲𑀫𑀗𑁆𑀕𑀻 ¶ 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀇𑀭𑀺𑀬𑀁 𑀯𑀼𑀢𑁆𑀢𑀺𑀁 𑀧𑀸𑀮𑀦𑀁 𑀬𑀧𑀦𑀁 𑀬𑀸𑀧𑀦𑀁 𑀘𑀸𑀭𑀁 𑀯𑀺𑀳𑀸𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑁋 ‘‘𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁧𑁨).

𑀓𑀺𑀁 𑀧𑀦 𑀓𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺? 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸. 𑀓𑀢𑀭𑀁? 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁. 𑀅𑀜𑁆𑀜𑁂𑀦 𑀢𑀤𑀢𑁆𑀣𑀺𑀓𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀅𑀜𑁆𑀜𑁂𑀦𑀧𑀺 𑀏𑀢𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀪𑀸𑀯𑁂𑀢𑀩𑁆𑀩𑀁. 𑀢𑁂𑀲𑀁 𑀪𑀸𑀯𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀫𑀢𑁆𑀢𑀫𑁂𑀯 𑀓𑀭𑁄𑀫𑀸𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸

𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀯𑀺𑀢𑀓𑁆𑀓𑀲𑁆𑀲 𑀘 𑀯𑀺𑀘𑀸𑀭𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀽𑀧𑀲𑀫𑀸 𑀲𑀫𑀢𑀺𑀓𑁆𑀓𑀫𑀸; 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀦 𑀲𑀦𑁆𑀢𑀺, 𑀅𑀜𑁆𑀜𑁂𑀬𑁂𑀯 𑀳𑀺 𑀧𑀞𑀫𑀚𑁆𑀛𑀸𑀦𑁂 𑀨𑀲𑁆𑀲𑀸𑀤𑀬𑁄, 𑀅𑀜𑁆𑀜𑁂 𑀇𑀥; 𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑁄 ¶ 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀫𑀥𑀺𑀧𑁆𑀧𑁂𑀢𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁩) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸. 𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁, 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀬𑀲𑁆𑀫𑀸 𑀯𑀸 𑀢𑀁 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀽𑀧𑀲𑀫𑀦𑁂𑀦 𑀘𑁂𑀢𑁄 𑀲𑀫𑁆𑀧𑀲𑀸𑀤𑀬𑀢𑀺, 𑀢𑀲𑁆𑀫𑀸𑀧𑀺 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 ¶ 𑀘𑁂𑀢𑀲𑁄𑀢𑀺 𑀏𑀢𑀁 𑀏𑀓𑁄𑀤𑀺𑀪𑀸𑀯𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀽𑀴𑁆𑀳𑀢𑁆𑀢𑀸 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀉𑀤𑁂𑀢𑀻𑀢𑀺 ¶ 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀭𑀳𑀢𑁄 𑀯𑀸 𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀉𑀤𑀸𑀬𑀢𑀻𑀢𑀺 𑀉𑀤𑀺, 𑀉𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀏𑀓𑁄 𑀘 𑀲𑁄 𑀉𑀤𑀺 𑀘𑀸𑀢𑀺 𑀏𑀓𑁄𑀤𑀺, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀁 𑀏𑀓𑁄𑀤𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑀬𑀢𑀻𑀢𑀺 𑀇𑀤𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀓𑁄𑀤𑀺𑀪𑀸𑀯𑀁. 𑀲𑁄 𑀧𑀦𑀸𑀬𑀁 𑀏𑀓𑁄𑀤𑀺 𑀬𑀲𑁆𑀫𑀸 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲 𑀦 𑀚𑀻𑀯𑀲𑁆𑀲, 𑀢𑀲𑁆𑀫𑀸 𑀏𑀢𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀅𑀬𑀜𑁆𑀘 𑀏𑀓𑁄𑀤𑀺𑀦𑀸𑀫𑀓𑁄 𑀲𑀫𑀸𑀥𑀺; 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀲𑀫𑁆𑀧𑀲𑀸𑀤𑀦𑀁 ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀤𑀼𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀫𑀺𑀯 𑀚𑀮𑀁 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀬𑀸𑀧𑀺 𑀲𑀤𑁆𑀥𑀸𑀬 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀦 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸𑀬𑁂𑀯 𑀘𑁂𑀢𑁆𑀣 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄, 𑀢𑀲𑁆𑀫𑀸 𑀏𑀓𑁄𑀤𑀺𑀪𑀸𑀯𑀦𑁆𑀢𑀺𑀧𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦 𑀮𑀤𑁆𑀥𑁄𑀓𑀸𑀲𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀩𑀮𑀯𑀲𑀤𑁆𑀥𑀸𑀲𑀳𑀸𑀬𑀧𑁆𑀧𑀝𑀺𑀮𑀸𑀪𑁂𑀦𑁂𑀯 𑀘 𑀲𑀫𑀸𑀥𑀺𑀧𑀺 𑀧𑀸𑀓𑀝𑁄; 𑀢𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄, 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀦𑁂𑀢𑁂𑀦 𑀲𑀤𑁆𑀥𑀺𑀁 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀏𑀢𑀲𑁆𑀫𑀺𑀁 𑀏𑀢𑀲𑁆𑀲 𑀯𑀸 𑀯𑀺𑀢𑀓𑁆𑀓𑁄 𑀦𑀢𑁆𑀣𑀻𑀢𑀺 𑀅𑀯𑀺𑀢𑀓𑁆𑀓𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀯𑀺𑀘𑀸𑀭𑀁. 𑀯𑀺𑀪𑀗𑁆𑀕𑁂𑀧𑀺 (𑀯𑀺𑀪. 𑁫𑁭𑁬) 𑀯𑀼𑀢𑁆𑀢𑀁 ‘‘𑀇𑀢𑀺 𑀅𑀬𑀜𑁆𑀘 𑀯𑀺𑀢𑀓𑁆𑀓𑁄 ¶ 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸 𑀯𑀽𑀧𑀲𑀦𑁆𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀩𑁆𑀪𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀺𑀢𑀸 𑀩𑁆𑀬𑀧𑁆𑀧𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀘 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀇𑀫𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄, 𑀅𑀣 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀫𑁂𑀢𑀁 𑀲𑀺𑀤𑁆𑀥𑁄 𑀯𑀸𑀬𑀫𑀢𑁆𑀣𑁄, 𑀦 𑀧𑀦𑁂𑀢𑀁 𑀢𑀤𑀢𑁆𑀣𑀤𑀻𑀧𑀓𑀁; 𑀦𑀦𑀼 𑀅𑀯𑁄𑀘𑀼𑀫𑁆𑀳 𑁋 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 ¶ 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 ¶ 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺.

𑀅𑀧𑀺𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀲𑀫𑁆𑀧𑀲𑀸𑀤𑀦𑀁, 𑀦 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀲𑁆𑀲. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸 𑀏𑀓𑁄𑀤𑀺𑀪𑀸𑀯𑀁 𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀺𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸, 𑀦 𑀧𑀞𑀫𑀚𑁆𑀛𑀸𑀦𑀫𑀺𑀯 𑀘 𑀅𑀗𑁆𑀕𑀧𑀸𑀢𑀼𑀪𑀸𑀯𑀸𑀢𑀺 𑀏𑀯𑀁 𑀲𑀫𑁆𑀧𑀲𑀸𑀤𑀦𑀏𑀓𑁄𑀤𑀺𑀪𑀸𑀯𑀸𑀦𑀁 𑀳𑁂𑀢𑀼𑀧𑀭𑀺𑀤𑀻𑀧𑀓𑀫𑀺𑀤𑀁 𑀯𑀘𑀦𑀁. 𑀢𑀣𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀦 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀬 𑀘 𑀅𑀪𑀸𑀯𑀸𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀤𑀻𑀧𑀓𑀜𑁆𑀘, 𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀫𑁂𑀯 𑀧𑀦 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀇𑀤𑀁 𑀯𑀘𑀦𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀁 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑀲𑀫𑀸𑀥𑀺𑀚𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀯𑀸 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀞𑀫𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀚𑀸𑀢𑀁, 𑀅𑀣 𑀔𑁄 𑀅𑀬𑀫𑁂𑀯 ‘‘𑀲𑀫𑀸𑀥𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑁂𑀦 𑀅𑀢𑀺𑀯𑀺𑀬 𑀅𑀘𑀮𑀢𑁆𑀢𑀸 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀘. 𑀢𑀲𑁆𑀫𑀸 𑀇𑀫𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀫𑁂𑀯 ‘‘𑀲𑀫𑀸𑀥𑀺𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀤𑀼𑀢𑀺𑀬𑀁, 𑀇𑀤𑀁 𑀤𑀼𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀤𑀼𑀢𑀺𑀬𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁 𑀳𑁄𑀢𑀺, 𑀏𑀯𑀫𑀺𑀤𑀁 𑀲𑀫𑁆𑀧𑀲𑀸𑀤𑀸𑀤𑀻𑀳𑀺 ‘‘𑀘𑀢𑀼𑀭𑀗𑁆𑀕𑀺𑀓’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑁄, 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁮𑁦). 𑀧𑀭𑀺𑀬𑀸𑀬𑁄𑀬𑁂𑀯 𑀘𑁂𑀲𑁄. 𑀲𑀫𑁆𑀧𑀲𑀸𑀤𑀦𑀁 𑀧𑀦 𑀞𑀧𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀺𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀺𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺? 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁧). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸

𑀧𑀻𑀢𑀺𑀬𑀸 ¶ 𑀘 𑀯𑀺𑀭𑀸𑀕𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀢𑁆𑀣𑀸𑀬𑁂𑀯 𑀧𑀻𑀢𑀺. 𑀯𑀺𑀭𑀸𑀕𑁄𑀢𑀺 𑀢𑀲𑁆𑀲𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 ‘‘𑀘’’ 𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀲𑁄 ¶ 𑀳𑀺 𑀯𑀽𑀧𑀲𑀫𑀁 𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀯𑀸. 𑀢𑀢𑁆𑀣 𑀬𑀤𑀸 𑀯𑀽𑀧𑀲𑀫𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀘, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀽𑀧𑀲𑀫𑀸 𑀘𑀸𑀢𑀺 𑀏𑀯𑀁 𑀬𑁄𑀚𑀦𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬𑀁 𑀯𑀺𑀭𑀸𑀕𑁄 𑀚𑀺𑀕𑀼𑀘𑁆𑀙𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀸 𑀘 𑀯𑀽𑀧𑀲𑀫𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬𑀁 𑀯𑀺𑀭𑀸𑀕𑁄 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀸𑀫𑀜𑁆𑀘𑁂𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀯𑀽𑀧𑀲𑀦𑁆𑀢𑀸 𑀇𑀫𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀫𑀕𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘𑁂𑀢𑀁 𑀯𑀼𑀢𑁆𑀢𑀁. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺 𑁋 ‘‘𑀦𑀽𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑁄 𑀫𑀕𑁆𑀕𑁄 𑀇𑀫𑀲𑁆𑀲 𑀛𑀸𑀦𑀲𑁆𑀲𑀸’’𑀢𑀺. 𑀬𑀣𑀸 𑀘 𑀢𑀢𑀺𑀬𑁂 𑀅𑀭𑀺𑀬𑀫𑀕𑁆𑀕𑁂 𑀅𑀧𑁆𑀧𑀳𑀻𑀦𑀸𑀦𑀫𑁆𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸’’𑀢𑀺 (𑀫. 𑀦𑀺. 𑁨.𑁧𑁩𑁨) 𑀏𑀯𑀁 𑀧𑀳𑀸𑀦𑀁 𑀯𑀼𑀘𑁆𑀘𑀫𑀸𑀦𑀁 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑀸𑀦𑀁 𑀉𑀲𑁆𑀲𑀸𑀳𑀚𑀦𑀓𑀁; 𑀏𑀯𑀫𑁂𑀯𑀁 𑀇𑀥 𑀅𑀯𑀽𑀧𑀲𑀦𑁆𑀢𑀸𑀦𑀫𑁆𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺. 𑀢𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑁋 ‘‘𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’’𑀢𑀺.

𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺𑀦𑁆𑀢𑀺 𑀏𑀢𑁆𑀣 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀲𑀫𑀁 𑀧𑀲𑁆𑀲𑀢𑀺, 𑀅𑀧𑀓𑁆𑀔𑀧𑀢𑀺𑀢𑀸𑀯 𑀳𑀼𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀬 𑀯𑀺𑀲𑀤𑀸𑀬 𑀯𑀺𑀧𑀼𑀮𑀸𑀬 𑀣𑀸𑀫𑀕𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻 ‘‘𑀉𑀧𑁂𑀓𑁆𑀔𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀤𑀲𑀯𑀺𑀥𑀸 𑀳𑁄𑀢𑀺 𑁋 𑀙𑀴𑀗𑁆𑀕𑀼𑀧𑁂𑀓𑁆𑀔𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸, 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸, 𑀯𑀻𑀭𑀺𑀬𑀼𑀧𑁂𑀓𑁆𑀔𑀸, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀯𑁂𑀤𑀦𑀼𑀧𑁂𑀓𑁆𑀔𑀸, 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸, 𑀛𑀸𑀦𑀼𑀧𑁂𑀓𑁆𑀔𑀸, 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸𑀢𑀺. 𑀏𑀯𑀫𑀬𑀁 𑀤𑀲𑀯𑀺𑀥𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄 𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄, 𑀔𑀦𑁆𑀥𑀲𑀗𑁆𑀕𑀳-𑀏𑀓𑀓𑁆𑀔𑀡𑀓𑀼𑀲𑀮𑀢𑁆𑀢𑀺𑀓𑀲𑀗𑁆𑀔𑁂𑀧𑀯𑀲𑁂𑀦 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀯𑀼𑀘𑁆𑀘𑀫𑀸𑀦𑀸 𑀯𑀺𑀦𑀬𑀦𑀺𑀤𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀓𑀭𑁄𑀢𑀻𑀢𑀺 𑀦 𑀯𑀼𑀢𑁆𑀢𑀸. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢𑀼𑀧𑁂𑀓𑁆𑀔𑀸 𑀫𑀚𑁆𑀛𑀢𑁆𑀢𑀮𑀓𑁆𑀔𑀡𑀸, 𑀅𑀦𑀸𑀪𑁄𑀕𑀭𑀲𑀸, 𑀅𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀻𑀢𑀺𑀯𑀺𑀭𑀸𑀕𑀧𑀤𑀝𑁆𑀞𑀸𑀦𑀸𑀢𑀺.

𑀏𑀢𑁆𑀣𑀸𑀳 ¶ 𑁋 𑀦𑀦𑀼 𑀘𑀸𑀬𑀁 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀳𑁄𑀢𑀺, 𑀲𑀸 𑀘 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀭𑀸𑀧𑀺 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺’’𑀦𑁆𑀢𑀺 𑀏𑀯𑀫𑀬𑀁 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀲𑀸 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺? 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁄. 𑀅𑀧𑀭𑀺𑀩𑁆𑀬𑀢𑁆𑀢𑀜𑁆𑀳𑀺 ¶ 𑀢𑀲𑁆𑀲𑀸 𑀢𑀢𑁆𑀣 𑀓𑀺𑀘𑁆𑀘𑀁, 𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑁆𑀢𑀸. 𑀇𑀥 𑀧𑀦𑀸𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀲𑀺𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸 𑀚𑀸𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀢𑀺.

𑀦𑀺𑀝𑁆𑀞𑀺𑀢𑀸 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺’’𑀦𑁆𑀢𑀺 𑀏𑀢𑀲𑁆𑀲 𑀲𑀩𑁆𑀩𑀲𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀇𑀤𑀸𑀦𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀲𑀭𑀢𑀻𑀢𑀺 𑀲𑀢𑁄, 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄. 𑀧𑀼𑀕𑁆𑀕𑀮𑁂𑀦 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀭𑀡𑀮𑀓𑁆𑀔𑀡𑀸 𑀲𑀢𑀺, 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸; 𑀅𑀲𑀫𑁆𑀫𑁄𑀳𑀮𑀓𑁆𑀔𑀡𑀁 𑀲𑀫𑁆𑀧𑀚𑀜𑁆𑀜𑀁, 𑀢𑀻𑀭𑀡𑀭𑀲𑀁, 𑀧𑀯𑀺𑀘𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀼𑀭𑀺𑀫𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀳𑀺 𑀅𑀲𑀫𑁆𑀧𑀚𑀸𑀦𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀫𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀅𑀧𑁆𑀧𑀦𑀸; 𑀑𑀴𑀸𑀭𑀺𑀓𑀢𑁆𑀢𑀸 𑀧𑀦 𑀢𑁂𑀲𑀁 𑀛𑀸𑀦𑀸𑀦𑀁 𑀪𑀽𑀫𑀺𑀬𑀁 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀲𑀼𑀔𑀸 𑀳𑁄𑀢𑀺, 𑀅𑀩𑁆𑀬𑀢𑁆𑀢𑀁 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀁. 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀦 𑀲𑀼𑀔𑀼𑀫𑀢𑁆𑀢𑀸 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀔𑀼𑀭𑀥𑀸𑀭𑀸𑀬𑀁 𑀯𑀺𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸𑀬𑁂𑀯 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀇𑀥𑁂𑀯 𑀯𑀼𑀢𑁆𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑀣𑀸𑀧𑀺 𑀥𑁂𑀦𑀼𑀧𑀕𑁄 𑀯𑀘𑁆𑀙𑁄 𑀥𑁂𑀦𑀼𑀢𑁄 𑀅𑀧𑀦𑀻𑀢𑁄 𑀅𑀭𑀓𑁆𑀔𑀺𑀬𑀫𑀸𑀦𑁄 𑀧𑀼𑀦𑀤𑁂𑀯 𑀥𑁂𑀦𑀼𑀁 𑀉𑀧𑀕𑀘𑁆𑀙𑀢𑀺; 𑀏𑀯𑀫𑀺𑀤𑀁 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀧𑀻𑀢𑀺𑀢𑁄 𑀅𑀧𑀦𑀻𑀢𑀫𑁆𑀧𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀭𑀓𑁆𑀔𑁂𑀦 𑀅𑀭𑀓𑁆𑀔𑀺𑀬𑀫𑀸𑀦𑀁 𑀧𑀼𑀦𑀤𑁂𑀯 𑀧𑀻𑀢𑀺𑀁 𑀉𑀧𑀕𑀘𑁆𑀙𑁂𑀬𑁆𑀬 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸. 𑀲𑀼𑀔𑁂 𑀯𑀸𑀧𑀺 𑀲𑀢𑁆𑀢𑀸 𑀭𑀚𑁆𑀚𑀦𑁆𑀢𑀺, 𑀇𑀤𑀜𑁆𑀘 𑀅𑀢𑀺𑀫𑀥𑀼𑀭𑀁 𑀲𑀼𑀔𑀁, 𑀢𑀢𑁄 𑀧𑀭𑀁 𑀲𑀼𑀔𑀸𑀪𑀸𑀯𑀸 ¶ . 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀼𑀪𑀸𑀯𑁂𑀦 𑀧𑀦𑁂𑀢𑁆𑀣 𑀲𑀼𑀔𑁂 𑀅𑀲𑀸𑀭𑀚𑁆𑀚𑀦𑀸 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀇𑀥𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀦𑀸𑀪𑁄𑀕𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀬𑀁 𑀯𑀸 𑀢𑀁 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀁𑀲𑀫𑀼𑀝𑁆𑀞𑀸𑀦𑁂𑀦𑀲𑁆𑀲 𑀬𑀲𑁆𑀫𑀸 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀭𑀽𑀧𑀓𑀸𑀬𑁄 𑀨𑀼𑀝𑁄, 𑀬𑀲𑁆𑀲 ¶ 𑀨𑀼𑀝𑀢𑁆𑀢𑀸 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺’’𑀦𑁆𑀢𑀺 𑀆𑀳.

𑀇𑀤𑀸𑀦𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀬𑀁𑀛𑀸𑀦𑀳𑁂𑀢𑀼 𑀬𑀁𑀛𑀸𑀦𑀓𑀸𑀭𑀡𑀸 𑀢𑀁 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 ¶ 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀧𑀲𑀁𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀦𑁆𑀢𑀺? ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺. 𑀢𑀁 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀦𑁆𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦 𑀢𑀁 𑀢𑁂 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺? 𑀧𑀲𑀁𑀲𑀸𑀭𑀳𑀢𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀅𑀢𑀺𑀫𑀥𑀼𑀭𑀲𑀼𑀔𑁂 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀧𑀺 𑀢𑀢𑀺𑀬𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀓𑁄, 𑀦 𑀢𑀢𑁆𑀣 𑀲𑀼𑀔𑀸𑀪𑀺𑀲𑀗𑁆𑀕𑁂𑀦 𑀆𑀓𑀟𑁆𑀠𑀻𑀬𑀢𑀺, 𑀬𑀣𑀸 𑀘 𑀧𑀻𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺; 𑀏𑀯𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀲𑀢𑀺𑀫𑀸. 𑀬𑀲𑁆𑀫𑀸 𑀘 𑀅𑀭𑀺𑀬𑀓𑀦𑁆𑀢𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀫𑁂𑀯 𑀘 𑀅𑀲𑀁𑀓𑀺𑀮𑀺𑀝𑁆𑀞𑀁 𑀲𑀼𑀔𑀁 𑀦𑀸𑀫𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀢𑀲𑁆𑀫𑀸 𑀧𑀲𑀁𑀲𑀸𑀭𑀳𑁄. 𑀇𑀢𑀺 𑀧𑀲𑀁𑀲𑀸𑀭𑀳𑀢𑁄 𑀦𑀁 𑀅𑀭𑀺𑀬𑀸 𑀢𑁂 𑀏𑀯𑀁 𑀧𑀲𑀁𑀲𑀸𑀳𑁂𑀢𑀼𑀪𑀽𑀢𑁂 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀸 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀢𑀢𑀺𑀬𑀁. 𑀇𑀤𑀁 𑀢𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀢𑀢𑀺𑀬𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀘 𑀬𑀣𑀸 𑀤𑀼𑀢𑀺𑀬𑀁 𑀲𑀫𑁆𑀧𑀲𑀸𑀤𑀸𑀤𑀻𑀳𑀺 𑀘𑀢𑀼𑀭𑀗𑁆𑀕𑀺𑀓𑀁; 𑀏𑀯𑀫𑀺𑀤𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁯𑁧). 𑀧𑀭𑀺𑀬𑀸𑀬𑁄𑀬𑁂𑀯 𑀘𑁂𑀲𑁄. 𑀉𑀧𑁂𑀓𑁆𑀔𑀸𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺 ¶ ? 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁩). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸

𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀓𑀸𑀬𑀺𑀓𑀲𑀼𑀔𑀲𑁆𑀲 𑀘 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸. 𑀧𑀼𑀩𑁆𑀩𑁂𑀯𑀸𑀢𑀺 𑀢𑀜𑁆𑀘 𑀔𑁄 𑀧𑀼𑀩𑁆𑀩𑁂𑀯, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑁂 ¶ . 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑁂𑀢𑀲𑀺𑀓𑀲𑀼𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀘𑀸𑀢𑀺 𑀇𑀫𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀩𑁆𑀩𑁂𑀯 𑀅𑀢𑁆𑀣𑀗𑁆𑀕𑀫𑀸 𑀧𑀳𑀸𑀦𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀤𑀸 𑀧𑀦 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺? 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂. 𑀲𑁄𑀫𑀦𑀲𑁆𑀲𑀜𑁆𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀢𑀺, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂𑀲𑀼. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀓𑁆𑀓𑀫𑁂𑀦 𑀅𑀯𑀼𑀢𑁆𑀢𑀸𑀦𑀁, 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑁂𑀯 𑀇𑀥𑀸𑀧𑀺 𑀯𑀼𑀢𑁆𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀁 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 ¶ 𑀧𑀦𑁂𑀢𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲𑀼𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁… 𑀲𑀼𑀔𑀺𑀦𑁆𑀤𑁆𑀭𑀺𑀬𑀁… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁦) 𑀏𑀯𑀁 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺? 𑀅𑀢𑀺𑀲𑀬𑀦𑀺𑀭𑁄𑀥𑀢𑁆𑀢𑀸. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀳𑀺 𑀦𑁂𑀲𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼, 𑀦 𑀦𑀺𑀭𑁄𑀥𑁄𑀬𑁂𑀯; 𑀦𑀺𑀭𑁄𑀥𑁄𑀬𑁂𑀯 𑀧𑀦 𑀉𑀧𑀘𑀸𑀭𑀓𑁆𑀔𑀡𑁂, 𑀦𑀸𑀢𑀺𑀲𑀬𑀦𑀺𑀭𑁄𑀥𑁄. 𑀢𑀣𑀸 𑀳𑀺 𑀦𑀸𑀦𑀸𑀯𑀚𑁆𑀚𑀦𑁂 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀟𑀁𑀲𑀫𑀓𑀲𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁂𑀦 𑀯𑀸 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁. 𑀉𑀧𑀘𑀸𑀭𑁂 𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑁂𑀢𑀁 𑀦 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺; 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸. 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀧𑀦 𑀧𑀻𑀢𑀺𑀨𑀭𑀡𑁂𑀦 𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀲𑀼𑀔𑁄𑀓𑁆𑀓𑀦𑁆𑀢𑀓𑀸𑀬𑀲𑁆𑀲 𑀘 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁; 𑀧𑀝𑀺𑀧𑀓𑁆𑀔𑁂𑀦 𑀯𑀺𑀳𑀢𑀢𑁆𑀢𑀸. 𑀦𑀸𑀦𑀸𑀯𑀚𑁆𑀚𑀦𑁂 𑀏𑀯 ¶ 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀬𑀲𑁆𑀫𑀸 𑀏𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑁆𑀧𑀘𑁆𑀘𑀬𑁂𑀧𑀺 𑀓𑀸𑀬𑀓𑀺𑀮𑀫𑀣𑁂 𑀘𑀺𑀢𑁆𑀢𑀼𑀧𑀖𑀸𑀢𑁂 𑀘 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁂 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂. 𑀅𑀧𑁆𑀧𑀳𑀻𑀦𑀸 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺; 𑀅𑀧𑁆𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀦 𑀢𑁆𑀯𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑁂; 𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀓𑀸𑀬𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀢𑀢𑀺𑀬𑀚𑁆𑀛𑀸𑀦𑁂. 𑀢𑀢𑀺𑀬𑀚𑁆𑀛𑀸𑀦𑁂 𑀳𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 ¶ 𑀧𑀻𑀢𑀺 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑀸𑀢𑀺. 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀲𑀦𑁆𑀦𑀢𑁆𑀢𑀸, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀫𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀘 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀢𑀲𑁆𑀫𑀸 𑀏𑀯 𑀘 ‘‘𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺.

𑀏𑀢𑁆𑀣𑀸𑀳 𑁋 ‘‘𑀅𑀣𑁂𑀯𑀁 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲𑀽𑀧𑀘𑀸𑀭𑁂 𑀧𑀳𑀻𑀦𑀸𑀧𑀺 𑀏𑀢𑀸 𑀯𑁂𑀤𑀦𑀸 𑀇𑀥 𑀓𑀲𑁆𑀫𑀸 𑀲𑀫𑀸𑀳𑀭𑀻’’𑀢𑀺? 𑀲𑀼𑀔𑀕𑁆𑀕𑀳𑀡𑀢𑁆𑀣𑀁. 𑀬𑀸 𑀳𑀺 𑀅𑀬𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔’’𑀦𑁆𑀢𑀺 𑀏𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀸 𑀲𑀼𑀔𑀼𑀫𑀸 𑀅𑀢𑀺𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀕𑀳𑁂𑀢𑀼𑀁. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀤𑀼𑀝𑁆𑀞𑀲𑁆𑀲 𑀬𑀣𑀸 𑀯𑀸 𑀢𑀣𑀸 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀕𑁄𑀡𑀲𑁆𑀲 𑀕𑀳𑀡𑀢𑁆𑀣𑀁 𑀕𑁄𑀧𑁄 𑀏𑀓𑀲𑁆𑀫𑀺𑀁 𑀯𑀚𑁂 𑀲𑀩𑁆𑀩𑁂 𑀕𑀸𑀯𑁄 𑀲𑀫𑀸𑀳𑀭𑀢𑀺, 𑀅𑀣𑁂𑀓𑁂𑀓𑀁 𑀦𑀻𑀳𑀭𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁 ‘‘𑀅𑀬𑀁 𑀲𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 𑀢𑀫𑁆𑀧𑀺 𑀕𑀸𑀳𑀸𑀧𑀬𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀩𑁆𑀩𑀸 𑀏𑀢𑀸 𑀲𑀫𑀸𑀳𑀭𑀺. 𑀏𑀯𑀜𑁆𑀳𑀺 ¶ 𑀲𑀫𑀸𑀳𑀝𑀸 𑀏𑀢𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀁 𑀦𑁂𑀯 𑀲𑀼𑀔𑀁 𑀦 𑀤𑀼𑀓𑁆𑀔𑀁 𑀦 𑀲𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀁, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀏𑀲𑀸 𑀕𑀸𑀳𑀬𑀺𑀢𑀼𑀁.

𑀅𑀧𑀺𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀧𑀺 𑀏𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀧𑁆𑀧𑀳𑀸𑀦𑀸𑀤𑀬𑁄 𑀳𑀺 𑀢𑀲𑁆𑀲𑀸 𑀧𑀘𑁆𑀘𑀬𑀸. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 ¶ 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 (𑀫. 𑀦𑀺. 𑁧.𑁪𑁫𑁮). 𑀬𑀣𑀸 𑀯𑀸 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄 𑀢𑀢𑀺𑀬𑀫𑀕𑁆𑀕𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀢𑀢𑁆𑀣 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸; 𑀏𑀯𑀁 𑀯𑀡𑁆𑀡𑀪𑀡𑀦𑀢𑁆𑀣𑀫𑁆𑀧𑁂𑀢𑀲𑁆𑀲 𑀛𑀸𑀦𑀲𑁆𑀲𑁂𑀢𑀸 𑀇𑀥 𑀯𑀼𑀢𑁆𑀢𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀖𑀸𑀢𑁂𑀦 𑀯𑀸 𑀏𑀢𑁆𑀣 𑀭𑀸𑀕𑀤𑁄𑀲𑀸𑀦𑀁 𑀅𑀢𑀺𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑁆𑀧𑁂𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀳𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲, 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲, 𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲. 𑀲𑀼𑀔𑀸𑀤𑀺𑀖𑀸𑀢𑁂𑀦 𑀘 𑀢𑁂 𑀲𑀧𑁆𑀧𑀘𑁆𑀘𑀬𑀸 𑀭𑀸𑀕𑀤𑁄𑀲𑀸 𑀳𑀢𑀸𑀢𑀺 𑀅𑀢𑀺𑀤𑀽𑀭𑁂 𑀳𑁄𑀦𑁆𑀢𑀻𑀢𑀺.

𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀤𑀼𑀓𑁆𑀔𑀸𑀪𑀸𑀯𑁂𑀦 𑀅𑀤𑀼𑀓𑁆𑀔𑀁, 𑀲𑀼𑀔𑀸𑀪𑀸𑀯𑁂𑀦 𑀅𑀲𑀼𑀔𑀁. 𑀏𑀢𑁂𑀦𑁂𑀢𑁆𑀣 𑀤𑀼𑀓𑁆𑀔𑀲𑀼𑀔𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀢𑀺𑀬𑀯𑁂𑀤𑀦𑀁 𑀤𑀻𑀧𑁂𑀢𑀺, 𑀦 𑀤𑀼𑀓𑁆𑀔𑀲𑀼𑀔𑀸𑀪𑀸𑀯𑀫𑀢𑁆𑀢𑀁. 𑀢𑀢𑀺𑀬𑀯𑁂𑀤𑀦𑀸 𑀦𑀸𑀫 𑁋 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀉𑀧𑁂𑀓𑁆𑀔𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸, 𑀫𑀚𑁆𑀛𑀢𑁆𑀢𑀭𑀲𑀸, 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀼𑀔𑀦𑀺𑀭𑁄𑀥𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀛𑀸𑀦𑁂 𑀲𑀼𑀧𑀭𑀺𑀲𑀼𑀤𑁆𑀥𑀸 𑀲𑀢𑀺. 𑀬𑀸 𑀘 𑀢𑀲𑁆𑀲𑀸 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀲𑀸 𑀉𑀧𑁂𑀓𑁆𑀔𑀸𑀬 𑀓𑀢𑀸 𑀦 𑀅𑀜𑁆𑀜𑁂𑀦; 𑀢𑀲𑁆𑀫𑀸 𑀏𑀢𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀲𑀢𑀺 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀯𑀺𑀲𑀤𑀸 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’’𑀦𑁆𑀢𑀺 (𑀯𑀺𑀪. 𑁫𑁯𑁭). 𑀬𑀸𑀬 𑀘 𑀉𑀧𑁂𑀓𑁆𑀔𑀸𑀬 𑀏𑀢𑁆𑀣 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺 𑀳𑁄𑀢𑀺, 𑀲𑀸 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀸𑀬 𑀲𑀢𑀺𑀬𑁂𑀯 𑀧𑀭𑀺𑀲𑀼𑀤𑁆𑀥𑀸, 𑀅𑀧𑀺𑀘 𑀔𑁄 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸; 𑀲𑀢𑀺𑀲𑀻𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀼𑀢𑁆𑀢𑀸.

𑀢𑀢𑁆𑀣 ¶ 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀉𑀧𑁂𑀓𑁆𑀔𑀸 𑀳𑁂𑀝𑁆𑀞𑀸𑀧𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀯𑀺𑀚𑁆𑀚𑀢𑀺, 𑀬𑀣𑀸 𑀧𑀦 𑀤𑀺𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸 𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀸 𑀅𑀮𑀸𑀪𑀸 𑀤𑀺𑀯𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀘𑀦𑁆𑀤𑀮𑁂𑀔𑀸 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀅𑀧𑀭𑀺𑀬𑁄𑀤𑀸𑀢𑀸; 𑀏𑀯𑀫𑀬𑀫𑁆𑀧𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀅𑀮𑀸𑀪𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀧𑀞𑀫𑀸𑀤𑀺𑀚𑁆𑀛𑀸𑀦𑀪𑁂𑀤𑁂𑀲𑀼 𑀅𑀧𑀭𑀺𑀲𑀼𑀤𑁆𑀥𑀸 ¶ 𑀳𑁄𑀢𑀺. 𑀢𑀲𑁆𑀲𑀸 𑀘 ¶ 𑀅𑀧𑀭𑀺𑀲𑀼𑀤𑁆𑀥𑀸𑀬 𑀤𑀺𑀯𑀸 𑀅𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀅𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀼 𑀏𑀓𑀫𑁆𑀧𑀺 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀇𑀥 𑀧𑀦 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸𑀪𑀸𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑀸 𑀅𑀬𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀸, 𑀢𑀲𑁆𑀲𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀧𑀭𑀺𑀲𑀼𑀤𑁆𑀥𑀸 𑀳𑁄𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀸, 𑀢𑀲𑁆𑀫𑀸 𑀇𑀤𑀫𑁂𑀯 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀘𑀢𑀼𑀢𑁆𑀣𑀁. 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀘𑀢𑀼𑀢𑁆𑀣𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀢𑀢𑀺𑀬𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁; 𑀏𑀯𑀫𑀺𑀤𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀢𑀺𑀯𑀗𑁆𑀕𑀺𑀓𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸, 𑀲𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺. 𑀧𑀭𑀺𑀬𑀸𑀬𑁄 𑀏𑀯 𑀘𑁂𑀲𑁄. 𑀞𑀧𑁂𑀢𑁆𑀯𑀸 𑀧𑀦 𑀲𑀢𑀺𑀁 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺? 𑀉𑀧𑁂𑀓𑁆𑀔𑀸, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁫). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸

𑁧𑁨. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀲𑀜𑁆𑀘𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀳𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 ¶ 𑀇𑀘𑁆𑀘𑁂𑀯𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 ‘‘𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑀬𑀸 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀣𑁂𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀦𑀺𑀭𑁄𑀥𑀧𑀸𑀤𑀓𑀸𑀦𑀺 ¶ 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺 𑀳𑁄𑀦𑁆𑀢𑀺.

𑀪𑀕𑀯𑀢𑀸 ¶ 𑀧𑀦𑀺𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑀁 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀜𑁆𑀘𑁂𑀯 𑀅𑀳𑁄𑀲𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀜𑁆𑀘 𑀦𑀺𑀭𑁄𑀥𑀧𑀸𑀤𑀓𑀜𑁆𑀘 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀜𑁆𑀘 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀲𑀜𑁆𑀘 𑀕𑀼𑀡𑀸𑀦𑀁 𑀤𑀸𑀬𑀓𑀁 𑀅𑀳𑁄𑀲𑀺, 𑀢𑁂𑀲𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀳𑀁. 𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀇𑀫𑀺𑀦𑀸 𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑁂𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀧𑀭𑀺𑀲𑀼𑀤𑁆𑀥𑁂𑀢𑀺𑀆𑀤𑀻𑀲𑀼 𑀧𑀦 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦 𑀯𑀺𑀳𑀢𑀭𑀸𑀕𑀸𑀤𑀺𑀅𑀗𑁆𑀕𑀡𑀢𑁆𑀢𑀸 𑀅𑀦𑀗𑁆𑀕𑀡𑁂. 𑀅𑀦𑀗𑁆𑀕𑀡𑀢𑁆𑀢𑀸𑀬𑁂𑀯 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂; 𑀅𑀗𑁆𑀕𑀡𑁂𑀦 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺. 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑁂, 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑁂 𑀯𑀢𑁆𑀢𑀫𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀢𑁆𑀢𑀸𑀬𑁂𑀯 𑀘 𑀓𑀫𑁆𑀫𑀦𑀺𑀬𑁂, 𑀓𑀫𑁆𑀫𑀓𑁆𑀔𑀫𑁂 𑀓𑀫𑁆𑀫𑀬𑁄𑀕𑁆𑀕𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼 𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀲𑀼𑀥𑀦𑁆𑀢𑀫𑀺𑀯 𑀲𑀼𑀯𑀡𑁆𑀡𑀁, 𑀢𑀤𑀼𑀪𑀬𑀫𑁆𑀧𑀺 𑀘 𑀲𑀼𑀪𑀸𑀯𑀺𑀢𑀢𑁆𑀢𑀸 𑀏𑀯. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀫𑀼𑀤𑀼 𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁨𑁨).

𑀏𑀢𑁂𑀲𑀼 ¶ 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂, 𑀅𑀘𑀮𑁂 𑀦𑀺𑀭𑀺𑀜𑁆𑀚𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂, 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂. 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂𑀦 𑀦 𑀇𑀜𑁆𑀚𑀢𑀺, 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀁 𑀓𑁄𑀲𑀚𑁆𑀚𑁂𑀦 𑀦 𑀇𑀜𑁆𑀚𑀢𑀺, 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀁 𑀧𑀫𑀸𑀤𑁂𑀦 𑀦 𑀇𑀜𑁆𑀚𑀢𑀺, 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑁆𑀥𑀘𑁆𑀘𑁂𑀦 𑀦 𑀇𑀜𑁆𑀚𑀢𑀺, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺, 𑀑𑀪𑀸𑀲𑀕𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀺. 𑀇𑀫𑁂𑀳𑀺 ¶ 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀅𑀧𑀭𑁄 𑀦𑀬𑁄 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀸𑀢𑁂. 𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀘𑀺𑀢𑁆𑀢𑀽𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀗𑁆𑀕𑀡𑀯𑀢𑁆𑀣𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀯𑀲𑀺𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀪𑀽𑀢𑁂. 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑁂𑀦 𑀓𑀫𑁆𑀫𑀦𑀺𑀬𑁂. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 ¶ . 𑀬𑀣𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺; 𑀏𑀯𑀁 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬𑀸𑀢𑀺 𑀏𑀯𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑁂 𑀚𑀸𑀢𑁂 𑀏𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀺 𑀬𑀁 𑀜𑀸𑀡𑀁 𑀢𑀤𑀢𑁆𑀣𑀸𑀬. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑁄𑀢𑀺 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸. 𑀦𑀺𑀯𑀼𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀦𑀺𑀯𑀼𑀢𑁆𑀣𑀸, 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀢𑁆𑀣𑀸, 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀜𑀸𑀡𑀦𑁆𑀢𑀺 𑀢𑀸𑀬 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁. 𑀏𑀯𑀫𑀺𑀫𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀢𑁆𑀣𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀏𑀢𑀲𑁆𑀲 𑀜𑀸𑀡𑀲𑁆𑀲 𑀅𑀥𑀺𑀕𑀫𑀸𑀬 𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀅𑀪𑀺𑀦𑀻𑀳𑀭𑀺𑀁.

𑀲𑁄𑀢𑀺 ¶ 𑀲𑁄 𑀅𑀳𑀁. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁, 𑀅𑀦𑁂𑀓𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀁 𑀪𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦𑀁. 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 𑀏𑀯𑀁 𑀚𑀸𑀢𑀺𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀸𑀫𑀺, 𑀅𑀦𑀼𑀤𑁂𑀯 𑀯𑀸 𑀲𑀭𑀸𑀫𑀺, 𑀘𑀺𑀢𑁆𑀢𑁂 ¶ 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀲𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀽𑀭𑀺𑀢𑀧𑀸𑀭𑀫𑀻𑀦𑀜𑁆𑀳𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺, 𑀢𑁂𑀦 𑀢𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑁆𑀯𑀸𑀯 𑀲𑀭𑀦𑁆𑀢𑀺. 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀯 𑀲𑀭𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀧𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀯𑀤𑀸𑀫. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀧𑀸𑀴𑀺𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀆𑀭𑀤𑁆𑀥𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦𑁂𑀯 𑀬𑁆𑀯𑀸𑀬𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀆𑀭𑀤𑁆𑀥𑁄, 𑀢𑀲𑁆𑀲 𑀧𑀓𑀸𑀭𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼. 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀘 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀕𑀳𑀺𑀢𑁄 𑀳𑁄𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸. 𑀯𑀺𑀯𑀝𑁆𑀝𑁂𑀦 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 ¶ . 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 𑀯𑀼𑀢𑁆𑀢𑀸𑀦𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑁋 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀆𑀧𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑁋 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀉𑀤𑀓𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀢𑁂𑀦 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀺𑀬𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀤𑀸𑀧𑀺 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺.

𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥𑀁 𑀳𑁄𑀢𑀺 𑁋 𑀚𑀸𑀢𑀺𑀓𑁆𑀔𑁂𑀢𑁆𑀢𑀁, 𑀆𑀡𑀸𑀓𑁆𑀔𑁂𑀢𑁆𑀢𑀁, 𑀯𑀺𑀲𑀬𑀓𑁆𑀔𑁂𑀢𑁆𑀢𑀜𑁆𑀘. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺, 𑀬𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀆𑀤𑀻𑀲𑀼 𑀓𑀫𑁆𑀧𑀢𑀺. 𑀆𑀡𑀸𑀓𑁆𑀔𑁂𑀢𑁆𑀢𑀁 ¶ 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺. 𑀬𑀢𑁆𑀣 𑀭𑀢𑀦𑀧𑀭𑀺𑀢𑁆𑀢𑀁, 𑀔𑀦𑁆𑀥𑀧𑀭𑀺𑀢𑁆𑀢𑀁, 𑀥𑀚𑀕𑁆𑀕𑀧𑀭𑀺𑀢𑁆𑀢𑀁, 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁, 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀧𑀦 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁, ‘‘𑀬𑀁 ¶ 𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀼𑀢𑁆𑀢𑀁 𑀬𑀢𑁆𑀣 𑀬𑀁 𑀬𑀁 𑀆𑀓𑀗𑁆𑀔𑀢𑀺 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀢𑀺. 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀼 𑀏𑀓𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀦𑀲𑁆𑀲𑀦𑁆𑀢𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑀫𑁆𑀧𑀺 𑀯𑀺𑀦𑀝𑁆𑀞𑀫𑁂𑀯 𑀳𑁄𑀢𑀺; 𑀯𑀺𑀦𑀲𑁆𑀲𑀦𑁆𑀢𑀜𑁆𑀘 𑀏𑀓𑀢𑁄𑀯 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄𑀯 𑀲𑀡𑁆𑀞𑀳𑀢𑀺. 𑀢𑀲𑁆𑀲 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁪) 𑀯𑀼𑀢𑁆𑀢𑀁. 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑀁.

𑀬𑁂 𑀧𑀦𑁂𑀢𑁂 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸 𑀯𑀼𑀢𑁆𑀢𑀸, 𑀏𑀢𑁂𑀲𑀼 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁄 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀲𑀭𑀺. 𑀓𑀣𑀁? ‘‘𑀅𑀫𑀼𑀢𑁆𑀭𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀳𑀁 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀸 𑀯𑀸 𑀕𑀢𑀺𑀬𑀸 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺 𑀯𑁂𑀲𑁆𑀲𑀦𑁆𑀢𑀭𑁄 𑀯𑀸 𑀚𑁄𑀢𑀺𑀧𑀸𑀮𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀪𑀕𑁆𑀕𑀯𑁄 𑀯𑀸 𑀕𑁄𑀢𑀫𑁄 𑀯𑀸. 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸.

𑀲𑁄 ¶ 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄 𑀅𑀳𑀁 𑀢𑀢𑁄 𑀪𑀯𑀢𑁄 𑀬𑁄𑀦𑀺𑀢𑁄 𑀕𑀢𑀺𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀢𑁄 𑀲𑀢𑁆𑀢𑀸𑀯𑀸𑀲𑀢𑁄 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄, 𑀧𑀼𑀦 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀅𑀣 𑀢𑀢𑁆𑀭𑀸𑀧𑀺 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀧𑀼𑀦 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 𑀯𑀸 𑀬𑀲𑁆𑀫𑀸 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀲𑀭𑀡𑀁. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀢𑀲𑁆𑀫𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀢𑀼𑀲𑀺𑀢𑀪𑀯𑀦𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄𑀢𑀺 𑀢𑀢𑁆𑀭𑀸𑀧𑀺 ¶ 𑀢𑀼𑀲𑀺𑀢𑀪𑀯𑀦𑁂 ¶ 𑀲𑁂𑀢𑀓𑁂𑀢𑀼 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺𑀁. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀏𑀓𑀕𑁄𑀢𑁆𑀢𑁄. 𑀏𑀯𑀁𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀏𑀯𑀫𑀸𑀳𑀸𑀭𑁄𑀢𑀺 𑀤𑀺𑀩𑁆𑀩𑀲𑀼𑀥𑀸𑀳𑀸𑀭𑁄. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀯𑀁 𑀤𑀺𑀩𑁆𑀩𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻. 𑀤𑀼𑀓𑁆𑀔𑀁 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀫𑀢𑁆𑀢𑀫𑁂𑀯. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀲𑁄 𑀅𑀳𑀁 𑀢𑀢𑁄 𑀢𑀼𑀲𑀺𑀢𑀪𑀯𑀦𑀢𑁄 𑀘𑀼𑀢𑁄. 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀥 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄.

𑀇𑀢𑀻𑀢𑀺 𑀏𑀯𑀁. 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀲𑀉𑀤𑁆𑀤𑁂𑀲𑀁, 𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀸𑀓𑀸𑀭𑀁. 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀳𑀺 𑀲𑀢𑁆𑀢𑁄 ‘‘𑀤𑀢𑁆𑀢𑁄, 𑀢𑀺𑀲𑁆𑀲𑁄, 𑀕𑁄𑀢𑀫𑁄’’𑀢𑀺 𑀉𑀤𑁆𑀤𑀺𑀲𑀻𑀬𑀢𑀺; 𑀯𑀡𑁆𑀡𑀸𑀤𑀻𑀳𑀺 𑀑𑀤𑀸𑀢𑁄, 𑀲𑀸𑀫𑁄𑀢𑀺 𑀦𑀸𑀦𑀢𑁆𑀢𑀢𑁄 𑀧𑀜𑁆𑀜𑀸𑀬𑀢𑀺; 𑀢𑀲𑁆𑀫𑀸 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄, 𑀇𑀢𑀭𑁂 𑀆𑀓𑀸𑀭𑀸. 𑀓𑀺𑀁 𑀧𑀦 𑀩𑀼𑀤𑁆𑀥𑀸𑀬𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀲𑀭𑀦𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀩𑀼𑀤𑁆𑀥𑀸𑀬𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓-𑀢𑀺𑀢𑁆𑀣𑀺𑀬𑀸𑀧𑀺, 𑀦𑁄 𑀘 𑀔𑁄 𑀅𑀯𑀺𑀲𑁂𑀲𑁂𑀦. 𑀢𑀺𑀢𑁆𑀣𑀺𑀬𑀸 𑀳𑀺 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀧𑁆𑀧𑁂 𑀲𑀭𑀦𑁆𑀢𑀺, 𑀦 𑀢𑀢𑁄 𑀧𑀭𑀁. 𑀓𑀲𑁆𑀫𑀸? 𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀺𑀭𑀳𑀢𑁄 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀳𑁄𑀢𑀺. 𑀲𑀸𑀯𑀓𑁂𑀲𑀼 𑀧𑀦 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀲𑀭𑀦𑁆𑀢𑀺; 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀢𑀲𑀳𑀲𑁆𑀲𑀜𑁆𑀘. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁆𑀢𑀓𑁄 𑀳𑀺 𑀢𑁂𑀲𑀁 𑀅𑀪𑀺𑀦𑀻𑀳𑀸𑀭𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯 𑀇𑀘𑁆𑀙𑀦𑁆𑀢𑀺 𑀢𑀸𑀯 𑀲𑀭𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸 𑀘 𑀔𑀦𑁆𑀥𑀧𑀝𑀺𑀧𑀸𑀝𑀺𑀫𑁂𑀯 𑀲𑀭𑀦𑁆𑀢𑀺. 𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀭𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀦𑁆𑀥𑀸𑀦𑀁 𑀯𑀺𑀬 𑀇𑀘𑁆𑀙𑀺𑀢𑀧𑁆𑀧𑀤𑁂𑀲𑁄𑀓𑁆𑀓𑀫𑀦𑀁 𑀦𑀢𑁆𑀣𑀺. 𑀲𑀸𑀯𑀓𑀸 𑀉𑀪𑀬𑀣𑀸𑀧𑀺 𑀲𑀭𑀦𑁆𑀢𑀺; 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀩𑀼𑀤𑁆𑀥𑀸 𑀧𑀦 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦𑀧𑀺 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀬𑀁 𑀬𑀁 𑀞𑀸𑀦𑀁 𑀆𑀓𑀗𑁆𑀔𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀲𑀭𑀦𑁆𑀢𑀺𑀬𑁂𑀯.

𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀫𑁂𑀢𑀺 𑀫𑀬𑀸. 𑀯𑀺𑀚𑁆𑀚𑀸𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. 𑀓𑀺𑀁 𑀯𑀺𑀤𑀺𑀢𑀁 ¶ 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲𑀁. 𑀅𑀯𑀺𑀚𑁆𑀚𑀸𑀢𑀺 𑀢𑀲𑁆𑀲𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀼𑀘𑁆𑀘𑀢𑀺. 𑀢𑀫𑁄𑀢𑀺 𑀲𑁆𑀯𑁂𑀯 𑀫𑁄𑀳𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 ¶ ‘‘𑀢𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀮𑁄𑀓𑁄𑀢𑀺 𑀲𑀸𑀬𑁂𑀯𑀯𑀺𑀚𑁆𑀚𑀸 𑀑𑀪𑀸𑀲𑀓𑀭𑀡𑀝𑁆𑀞𑁂𑀦 ‘‘𑀆𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸𑀢𑀺 𑀅𑀬𑀁 𑀅𑀢𑁆𑀣𑁄, 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀁. 𑀬𑁄𑀚𑀦𑀸 ¶ 𑀧𑀦𑁂𑀢𑁆𑀣 𑁋 𑀅𑀬𑀁 𑀔𑁄 𑀫𑁂 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀢𑀲𑁆𑀲 𑀫𑁂 𑀅𑀥𑀺𑀕𑀢𑀯𑀺𑀚𑁆𑀚𑀲𑁆𑀲 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂.

𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂. 𑀢𑀦𑁆𑀢𑀺 𑀦𑀺𑀧𑀸𑀢𑁄. 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲. 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄. 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑀳𑀺𑀢𑀢𑁆𑀢𑀲𑁆𑀲, 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀯𑀺𑀚𑁆𑀚𑀸 𑀯𑀺𑀳𑀜𑁆𑀜𑁂𑀬𑁆𑀬 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀫𑁄 𑀯𑀺𑀳𑀜𑁆𑀜𑁂𑀬𑁆𑀬 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀫𑀫 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄. 𑀏𑀢𑀲𑁆𑀲 𑀫𑁂 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀫𑁂𑀯 𑀨𑀮𑀁 𑀮𑀤𑁆𑀥𑀦𑁆𑀢𑀺.

𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸𑀢𑀺 𑀅𑀬𑀁 𑀔𑁄 𑀫𑀫 𑀩𑁆𑀭𑀸𑀳𑁆𑀫𑀡 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀧𑀞𑀫𑀸 𑀦𑀺𑀓𑁆𑀔𑀦𑁆𑀢𑀺 𑀧𑀞𑀫𑀸 𑀅𑀭𑀺𑀬𑀸𑀚𑀸𑀢𑀺 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸

𑁧𑁩. 𑀲𑁄 𑀏𑀯𑀁…𑀧𑁂… 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬𑀸𑀢𑀺 𑀘𑀼𑀢𑀺𑀬𑀸 𑀘 𑀉𑀧𑀧𑀸𑀢𑁂 𑀘 𑀜𑀸𑀡𑀸𑀬; 𑀬𑁂𑀦 𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘 𑀉𑀧𑀧𑀸𑀢𑁄 𑀘 𑀜𑀸𑀬𑀢𑀺, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀦𑀻𑀳𑀭𑀺𑀁. 𑀲𑁄 𑀤𑀺𑀩𑁆𑀩𑁂𑀦…𑀧𑁂… 𑀧𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀲𑀢𑁆𑀢𑀸𑀦𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺. 𑀢𑁂 𑀳𑀺 𑀘𑀺𑀢𑁆𑀢𑁂 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀢𑁆𑀢𑁂 𑀧𑀲𑁆𑀲𑀦𑁆𑀢𑀺, 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀧𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀺; 𑀢𑀲𑁆𑀫𑀸 𑀢𑀁 ¶ 𑀦 𑀯𑀤𑀸𑀫. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀧𑀸𑀴𑀺𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀲𑁄𑀢𑀺 ¶ 𑀲𑁄 𑀅𑀳𑀁. 𑀤𑀺𑀩𑁆𑀩𑁂𑀦𑀸𑀢𑀺𑀆𑀤𑀻𑀲𑀼 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁 ¶ . 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼. 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀁. 𑀬𑁄 𑀳𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀁 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺. 𑀢𑀤𑀼𑀪𑀬𑀜𑁆𑀘 𑀪𑀕𑀯𑀸 𑀅𑀤𑁆𑀤𑀲. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺.

𑀏𑀓𑀸𑀤𑀲𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 𑀯𑀸 𑀯𑀺𑀲𑀼𑀤𑁆𑀥𑀁. 𑀪𑀕𑀯𑀢𑁄 𑀳𑀺 𑀏𑀓𑀸𑀤𑀲𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼. 𑀬𑀣𑀸𑀳 𑁋 ‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥, ‘𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁. 𑀅𑀫𑀦𑀲𑀺𑀓𑀸𑀭𑁄…𑀧𑁂… 𑀣𑀺𑀦𑀫𑀺𑀤𑁆𑀥𑀁… 𑀙𑀫𑁆𑀪𑀺𑀢𑀢𑁆𑀢𑀁… 𑀉𑀧𑁆𑀧𑀺𑀮𑀁… 𑀤𑀼𑀝𑁆𑀞𑀼𑀮𑁆𑀮𑀁… 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁… 𑀅𑀢𑀺𑀮𑀻𑀦𑀯𑀻𑀭𑀺𑀬𑀁… 𑀅𑀪𑀺𑀚𑀧𑁆𑀧𑀸… 𑀦𑀸𑀦𑀢𑁆𑀢𑀲𑀜𑁆𑀜𑀸… ‘𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁. 𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀳𑀺 𑀔𑁄 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺. 𑀭𑀽𑀧𑀸𑀦𑀺 𑀳𑀺 𑀔𑁄 𑀧𑀲𑁆𑀲𑀸𑀫𑀺, 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 (𑀫. 𑀦𑀺. 𑁩.𑁨𑁪𑁨-𑁨𑁪𑁩) 𑀏𑀯𑀫𑀸𑀤𑀺. 𑀢𑀤𑁂𑀯𑀁 𑀏𑀓𑀸𑀤𑀲𑀼𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 ¶ 𑀯𑀺𑀲𑀼𑀤𑁆𑀥𑀁.

𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁; 𑀫𑀸𑀦𑀼𑀲𑀓𑀁 𑀯𑀸 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦.

𑀲𑀢𑁆𑀢𑁂 ¶ 𑀧𑀲𑁆𑀲𑀸𑀫𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺. 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀯𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 ¶ 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸, 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺 𑀢𑁂 𑀘𑀯𑀫𑀸𑀦𑀸. 𑀬𑁂 𑀘 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺𑀦𑀺𑀩𑁆𑀩𑀢𑁆𑀢𑀸 𑀯𑀸, 𑀢𑁂 𑀉𑀧𑀧𑀚𑁆𑀚𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀧𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀦𑁂𑀢𑀺 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑀸𑀦𑀁 𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀻𑀦𑀁 𑀯𑀲𑁂𑀦 𑀳𑀻𑀴𑀺𑀢𑁂 𑀑𑀳𑀻𑀴𑀺𑀢𑁂 𑀉𑀜𑁆𑀜𑀸𑀢𑁂 𑀅𑀯𑀜𑁆𑀜𑀸𑀢𑁂. 𑀧𑀡𑀻𑀢𑁂𑀢𑀺 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀧𑀭𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀸𑀓𑀦𑁆𑀢𑀅𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂; 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺𑀧𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂, 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂, 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂. 𑀬𑀣𑀸𑀓𑀫𑁆𑀫𑀽𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀁; 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀓𑀺𑀘𑁆𑀘𑀁.

𑀢𑀲𑁆𑀲 𑀘 𑀜𑀸𑀡𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑁋 𑀲𑁄 𑀳𑁂𑀝𑁆𑀞𑀸 𑀦𑀺𑀭𑀬𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑁂𑀭𑀬𑀺𑀓𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀦𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀫𑀸𑀦𑁂, 𑀢𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑀻’’𑀢𑀺? 𑀅𑀣𑀲𑁆𑀲 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁 𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀉𑀧𑀭𑀺 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑀦𑁆𑀤𑀦𑀯𑀦-𑀫𑀺𑀲𑁆𑀲𑀓𑀯𑀦-𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀼 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂. 𑀢𑀫𑁆𑀧𑀺 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺? 𑀅𑀣𑀲𑁆𑀲 ‘‘𑀇𑀤𑀁 ¶ 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀦𑀸𑀫. 𑀇𑀫𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘𑀺𑀫𑀲𑁆𑀲, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀤𑀼𑀝𑁆𑀞𑀁 𑀯𑀸 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸𑀢𑀺 𑀤𑀼𑀘𑁆𑀘𑀭𑀺𑀢𑀁; 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀏𑀯𑀁 𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸. 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 ¶ 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸; 𑀅𑀓𑁆𑀓𑁄𑀲𑀓𑀸, 𑀕𑀭𑀳𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄, 𑀅𑀲𑁆𑀲𑀫𑀡𑀸 𑀏𑀢𑁂’’𑀢𑀺 𑀯𑀤𑀦𑁆𑀢𑁄 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀉𑀧𑀯𑀤𑀢𑀺. ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀛𑀸𑀦𑀁 𑀯𑀸 𑀯𑀺𑀫𑁄𑀓𑁆𑀔𑁄 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸’’𑀢𑀺 𑀯𑀤𑀦𑁆𑀢𑁄 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀉𑀧𑀯𑀤𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀚𑀸𑀦𑀁 𑀯𑀸 𑀉𑀧𑀯𑀤𑁂𑀬𑁆𑀬 𑀅𑀚𑀸𑀦𑀁 𑀯𑀸, 𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀺. 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀲𑀕𑁆𑀕𑀸𑀯𑀭𑀡𑀁 𑀫𑀕𑁆𑀕𑀸𑀯𑀭𑀡𑀜𑁆𑀘, 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺. 𑀢𑀲𑁆𑀲 𑀘 𑀆𑀯𑀺𑀪𑀸𑀯𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼𑀫𑀼𑀤𑀸𑀳𑀭𑀦𑁆𑀢𑀺 𑁋

‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀺𑀭 𑀕𑀸𑀫𑁂 𑀏𑀓𑁄 𑀣𑁂𑀭𑁄 𑀘 𑀤𑀳𑀭𑀪𑀺𑀓𑁆𑀔𑀼 𑀘 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀢𑁂 𑀧𑀞𑀫𑀖𑀭𑁂𑀬𑁂𑀯 𑀉𑀴𑀼𑀗𑁆𑀓𑀫𑀢𑁆𑀢𑀁 𑀉𑀡𑁆𑀳𑀬𑀸𑀕𑀼𑀁 𑀮𑀪𑀺𑀁𑀲𑀼. 𑀣𑁂𑀭𑀲𑁆𑀲 𑀘 𑀓𑀼𑀘𑁆𑀙𑀺𑀯𑀸𑀢𑁄 𑀅𑀢𑁆𑀣𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘𑀅𑀬𑀁 𑀬𑀸𑀕𑀼 𑀫𑀬𑁆𑀳𑀁 𑀲𑀧𑁆𑀧𑀸𑀬𑀸, 𑀬𑀸𑀯 𑀦 𑀲𑀻𑀢𑀮𑀸 𑀳𑁄𑀢𑀺 𑀢𑀸𑀯 𑀦𑀁 𑀧𑀺𑀯𑀸𑀫𑀻’𑀢𑀺. 𑀲𑁄 𑀫𑀦𑀼𑀲𑁆𑀲𑁂𑀳𑀺 𑀉𑀫𑁆𑀫𑀸𑀭𑀢𑁆𑀣𑀸𑀬 𑀆𑀳𑀝𑁂 𑀤𑀸𑀭𑀼𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀺𑀯𑀺. 𑀇𑀢𑀭𑁄 𑀢𑀁 𑀚𑀺𑀕𑀼𑀘𑁆𑀙𑀺 𑁋 ‘𑀅𑀢𑀺𑀘𑁆𑀙𑀸𑀢𑁄 𑀯𑀢𑀸𑀬𑀁 𑀫𑀳𑀮𑁆𑀮𑀓𑁄 𑀅𑀫𑁆𑀳𑀸𑀓𑀁 𑀮𑀚𑁆𑀚𑀺𑀢𑀩𑁆𑀩𑀓𑀁 𑀅𑀓𑀸𑀲𑀻’𑀢𑀺. 𑀣𑁂𑀭𑁄 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀳𑀭𑀪𑀺𑀓𑁆𑀔𑀼𑀁 𑀆𑀳 𑁋 ‘𑀅𑀢𑁆𑀣𑀺 𑀢𑁂, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸’𑀢𑀺? ‘𑀆𑀫, 𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑁄 𑀅𑀳’𑀦𑁆𑀢𑀺. ‘𑀢𑁂𑀦 𑀳𑀸𑀯𑀼𑀲𑁄, 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀸𑀬𑀸𑀫𑀁 𑀫𑀸 𑀅𑀓𑀸𑀲𑀺, 𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄’𑀢𑀺. 𑀲𑁄 𑀢𑀁 𑀔𑀫𑀸𑀧𑁂𑀲𑀺. 𑀢𑁂𑀦𑀲𑁆𑀲 𑀢𑀁 𑀧𑀸𑀓𑀢𑀺𑀓𑀁 𑀅𑀳𑁄𑀲𑀺’’. 𑀢𑀲𑁆𑀫𑀸 𑀬𑁄 𑀅𑀜𑁆𑀜𑁄𑀧𑀺 𑀅𑀭𑀺𑀬𑀁 𑀉𑀧𑀯𑀤𑀢𑀺, 𑀢𑁂𑀦 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, ‘‘𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀸𑀳𑀻’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦𑀯𑀓𑀢𑀭𑁄 𑀳𑁄𑀢𑀺 ¶ , 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀢𑀼𑀫𑁆𑀳𑁂 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀦𑀓𑁆𑀔𑀫𑀢𑀺 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺 𑀞𑀺𑀢𑀓𑁂𑀦𑁂𑀯, 𑀲𑀘𑁂 𑀦𑀯𑀓𑀢𑀭𑁄 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀔𑀫𑀢𑀼 𑀫𑁂 𑀲𑁄 𑀆𑀬𑀲𑁆𑀫𑀸’’𑀢𑀺 𑀏𑀯𑀁 𑀯𑀤𑀦𑁆𑀢𑁂𑀦 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀧𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀓𑀢𑁂 𑀲𑀕𑁆𑀕𑀸𑀯𑀭𑀡𑀜𑁆𑀘 𑀫𑀕𑁆𑀕𑀸𑀯𑀭𑀡𑀜𑁆𑀘 𑀦 𑀳𑁄𑀢𑀺, 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸, 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 ¶ 𑀲𑀫𑀸𑀤𑀧𑁂𑀦𑁆𑀢𑀺. 𑀢𑀢𑁆𑀣 𑀯𑀘𑀻𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦𑁂𑀯 𑀅𑀭𑀺𑀬𑀽𑀧𑀯𑀸𑀤𑁂, 𑀫𑀦𑁄𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑀺𑀢𑀸𑀬𑀧𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀦 𑀯𑀘𑀦𑀁 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀸𑀯𑀚𑁆𑀚𑁄 𑀳𑀺 𑀅𑀭𑀺𑀬𑀽𑀧𑀯𑀸𑀤𑁄 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑁄. 𑀬𑀣𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬; 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂’’𑀢𑀺 (𑀫. 𑀦𑀺. 𑁧.𑁧𑁪𑁯).

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 ¶ 𑀘 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀢𑀭𑀁, 𑀬𑀣𑀬𑀺𑀤𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂. 𑀅𑀣𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀁. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 ¶ 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺; 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄; 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀦𑀺𑀧𑀢𑀦𑁆𑀢𑀺 𑀲𑀫𑁆𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄, 𑀲𑀼𑀕𑀢𑀺𑀬𑀸 𑀅𑀧𑁂𑀢𑀢𑁆𑀢𑀸; 𑀦 𑀤𑀼𑀕𑁆𑀕𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸; 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀧𑁂𑀢𑀫𑀳𑀺𑀤𑁆𑀥𑀺𑀓𑀸𑀦𑀜𑁆𑀳𑀺 𑀯𑀺𑀫𑀸𑀦𑀸𑀦𑀺𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀺 𑀘 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺-𑀆𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯 𑀤𑀻𑀧𑁂𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 ¶ 𑀧𑀦 𑀯𑀺𑀲𑁂𑀲𑁄 𑁋 𑀏𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀺𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀯𑀺𑀚𑁆𑀚𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀬𑀣𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀅𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁; 𑀏𑀯𑀫𑀺𑀥 ‘‘𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀼𑀢𑀽𑀧𑀧𑀸𑀢𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸

𑁧𑁪. 𑀲𑁄 ¶ 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀇𑀥 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀢𑁆𑀣𑀸𑀬. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀆𑀲𑀯𑀯𑀺𑀦𑀸𑀲𑀦𑀢𑁄 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀘𑁂𑀢𑀁 𑀜𑀸𑀡𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 ¶ . 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺𑀁. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀁 𑀢𑀡𑁆𑀳𑀁 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺, 𑀢𑀲𑁆𑀲 𑀘 𑀲𑀫𑁆𑀧𑀸𑀧𑀓𑀁 𑀅𑀭𑀺𑀬𑀫𑀕𑁆𑀕𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀭𑀽𑀧𑀢𑁄 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂 𑀆𑀲𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀺. 𑀓𑀸𑀫𑀸𑀲𑀯𑀸𑀢𑀺 𑀓𑀸𑀫𑀸𑀲𑀯𑀢𑁄. 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 ¶ 𑀤𑀲𑁆𑀲𑁂𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺𑀁. 𑀢𑁂𑀦 𑀳𑀺 𑀜𑀸𑀡𑁂𑀦 𑀪𑀕𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀻𑀦𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀓𑀢𑀫𑀸 𑀧𑀦 𑀪𑀕𑀯𑀢𑁄 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸, 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸; 𑀦 𑀅𑀦𑀸𑀕𑀢𑀸, 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄; 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸; 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀅𑀩𑁆𑀪𑀜𑁆𑀜𑀸𑀲𑀺𑀁.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑁂𑀓𑁆𑀔𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀯𑀼𑀢𑁆𑀣𑀯𑀸𑀲𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 ¶ 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄 ¶ . 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀏𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁.

𑀇𑀤𑀸𑀦𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀢𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀥𑀺𑀕𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀅𑀬𑀁 𑀔𑁄 𑀫𑀫 𑀩𑁆𑀭𑀸𑀳𑁆𑀫𑀡 𑀆𑀲𑀯𑀸𑀦𑀁 𑀔𑀬𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀢𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑀺 𑀢𑀢𑀺𑀬𑀸 𑀅𑀭𑀺𑀬𑀚𑀸𑀢𑀺 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺? 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀅𑀡𑁆𑀟𑀓𑁄𑀲𑀁

𑀧𑀤𑀸𑀮𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀲𑀓𑀺𑀫𑁂𑀯 𑀚𑀸𑀬𑀢𑀺, 𑀅𑀳𑀁 𑀧𑀦 𑀧𑀼𑀩𑁆𑀩𑁂-𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄, 𑀢𑀢𑁄 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀤𑀼𑀢𑀺𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄, 𑀧𑀼𑀦 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄; 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄. 𑀲𑀸 𑀘 𑀫𑁂 𑀚𑀸𑀢𑀺 𑀅𑀭𑀺𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀸𑀢𑀺 𑀇𑀤𑀁 𑀤𑀲𑁆𑀲𑁂𑀲𑀺. 𑀏𑀯𑀁 𑀤𑀲𑁆𑀲𑁂𑀦𑁆𑀢𑁄 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁, 𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀻𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸

𑁧𑁫. 𑀏𑀯𑀁 ¶ 𑀯𑀼𑀢𑁆𑀢𑁂 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀁 𑀪𑀕𑀯𑀢𑀸 𑀮𑁄𑀓𑀸𑀦𑀼𑀓𑀫𑁆𑀧𑀓𑁂𑀦 𑀩𑁆𑀭𑀸𑀳𑁆𑀫𑀡𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀯𑀺𑀦𑀺𑀕𑀽𑀳𑀺𑀢𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁂 𑀯𑀺𑀚𑁆𑀚𑀢𑁆𑀢𑀬𑀧𑀓𑀸𑀲𑀺𑀓𑀸𑀬 ¶ 𑀥𑀫𑁆𑀫𑀤𑁂𑀲𑀦𑀸𑀬 𑀯𑀼𑀢𑁆𑀢𑁂 𑀧𑀻𑀢𑀺𑀯𑀺𑀧𑁆𑀨𑀸𑀭𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑀘𑀺𑀢𑁆𑀢𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀪𑀕𑀯𑀢𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 ‘‘𑀈𑀤𑀺𑀲𑀁 𑀦𑀸𑀫𑀸𑀳𑀁 𑀲𑀩𑁆𑀩𑀮𑁄𑀓𑀚𑁂𑀝𑁆𑀞𑀲𑁂𑀝𑁆𑀞𑀁 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀩𑁆𑀩𑀜𑁆𑀜𑀼𑀁 ‘𑀅𑀜𑁆𑀜𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀦 𑀓𑀭𑁄𑀢𑀻’𑀢𑀺 𑀅𑀯𑀘𑀁 𑁋 ‘𑀥𑀻𑀭𑀢𑁆𑀣𑀼 𑀯𑀢𑀭𑁂 𑀅𑀜𑁆𑀜𑀸𑀡’’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀺𑀢𑁆𑀯𑀸 ‘‘𑀅𑀬𑀁 𑀤𑀸𑀦𑀺 𑀮𑁄𑀓𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀧𑀼𑀭𑁂𑀚𑀸𑀢𑀝𑁆𑀞𑁂𑀦 𑀚𑁂𑀝𑁆𑀞𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀲𑁂𑀝𑁆𑀞𑁄’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀚𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄 𑀲𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀢𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣𑀸𑀬𑀁 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 ¶ (𑀅. 𑀦𑀺. 𑁮.𑁨𑁦) 𑀳𑀺 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀆𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁦) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥𑀸𑀧𑀺 𑀅𑀩𑁆𑀪𑀦𑀼𑀫𑁄𑀤𑀦𑁂𑀬𑁂𑀯. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑁂, 𑀢𑀲𑁆𑀫𑀸 ‘‘𑀲𑀸𑀥𑀼 𑀲𑀸𑀥𑀼, 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺.

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄’’𑀢𑀺. 𑀪𑀕𑀯𑀢𑁄𑀬𑁂𑀯 𑀯𑀸 𑀯𑀘𑀦𑀁 𑀤𑁆𑀯𑁂 ¶ 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 ¶ 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀅𑀧𑀸𑀣𑀭𑀫𑀡𑀻𑀬𑀢𑁄 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀞𑀧𑀺𑀢𑀁, 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀧𑀝𑀺𑀘𑁆𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀏𑀲 𑀫𑀕𑁆𑀕𑁄𑀢𑀺 ¶ 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻 𑀅𑀟𑁆𑀠𑀭𑀢𑁆𑀢-𑀖𑀦𑀯𑀦𑀲𑀡𑁆𑀟-𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀬𑀁 𑀢𑀸𑀯 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦; 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦; 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦; 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑁂 𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀁 𑀥𑀸𑀭𑁂𑀦𑁆𑀢𑁂𑀦, 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸

𑀏𑀯𑀁 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀏𑀲𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀺; 𑀪𑀯𑀁 𑀫𑁂 𑀕𑁄𑀢𑀫𑁄 𑀲𑀭𑀡𑀁, 𑀧𑀭𑀸𑀬𑀡𑀁, 𑀅𑀖𑀲𑁆𑀲 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀕𑀘𑁆𑀙𑀸𑀫𑀺 𑀪𑀚𑀸𑀫𑀺 𑀲𑁂𑀯𑀸𑀫𑀺 𑀧𑀬𑀺𑀭𑀼𑀧𑀸𑀲𑀸𑀫𑀺 ¶ , 𑀏𑀯𑀁 𑀯𑀸 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄; 𑀢𑀲𑁆𑀫𑀸 ‘‘𑀕𑀘𑁆𑀙𑀸𑀫𑀻’’𑀢𑀺 𑀇𑀫𑀲𑁆𑀲 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀏𑀢𑁆𑀣 𑀧𑀦 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 ¶ 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄; 𑀲𑁄 𑀅𑀢𑁆𑀣𑀢𑁄 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪) 𑀯𑀺𑀢𑁆𑀣𑀸𑀭𑁄. 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀧𑀺 𑀘 𑀔𑁄 𑀅𑀭𑀺𑀬𑀨𑀮𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑁂 𑁋

‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁭);

𑀏𑀢𑁆𑀣 𑀳𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁. 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀧𑁆𑀧𑀝𑀺𑀓𑀽𑀮𑀁 𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀸 ¶ 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄, 𑀲𑁄 𑀅𑀢𑁆𑀣𑀢𑁄 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀲𑁆𑀫𑀺𑀁𑀬𑁂𑀯 𑀯𑀺𑀫𑀸𑀦𑁂 𑁋

‘‘𑀬𑀢𑁆𑀣 𑀘 𑀤𑀺𑀦𑁆𑀦𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁮);

𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀏𑀢𑁆𑀢𑀸𑀯𑀢𑀸 𑀘 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺 𑀧𑀝𑀺𑀯𑁂𑀤𑁂𑀲𑀺.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀓𑀣𑀸

𑀇𑀤𑀸𑀦𑀺 𑀢𑁂𑀲𑁆𑀯𑁂𑀯 𑀢𑀻𑀲𑀼 𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁, 𑀲𑀭𑀡𑀕𑀫𑀦𑀁, 𑀬𑁄 𑀲𑀭𑀡𑀁 𑀕𑀘𑁆𑀙𑀢𑀺,

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄, 𑀲𑀭𑀡𑀕𑀫𑀦𑀨𑀮𑀁, 𑀲𑀁𑀓𑀺𑀮𑁂𑀲𑁄, 𑀪𑁂𑀤𑁄𑀢𑀺 𑀅𑀬𑀁 𑀯𑀺𑀥𑀺 𑀯𑁂𑀤𑀺 𑀢𑀩𑁆𑀩𑁄. 𑀲𑁄 𑀧𑀦 𑀇𑀥 𑀯𑀼𑀘𑁆𑀘𑀫𑀸𑀦𑁄 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀻𑀢𑀺 𑀦 𑀯𑀼𑀢𑁆𑀢𑁄. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀯𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀢𑁄 (𑀫. 𑀦𑀺. 𑀅𑀝𑁆𑀞. 𑁧.𑁫𑁬) 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 𑀯𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦) 𑀲𑀭𑀡𑀯𑀡𑁆𑀡𑀦𑀢𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀲𑀭𑀡𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸

𑀉𑀧𑀸𑀲𑀓𑀁 ¶ 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀽𑀢𑀺 𑀫𑀁 𑀪𑀯𑀁 𑀕𑁄𑀢𑀫𑁄 ‘‘𑀉𑀧𑀸𑀲𑀓𑁄 𑀅𑀬’’𑀦𑁆𑀢𑀺 𑀏𑀯𑀁 𑀥𑀸𑀭𑁂𑀢𑀽𑀢𑀺 𑀅𑀢𑁆𑀣𑁄. 𑀉𑀧𑀸𑀲𑀓𑀯𑀺𑀥𑀺𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀓𑁄 𑀉𑀧𑀸𑀲𑀓𑁄, 𑀓𑀲𑁆𑀫𑀸 ¶ 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀫𑀲𑁆𑀲 𑀲𑀻𑀮𑀁, 𑀓𑁄 𑀆𑀚𑀻𑀯𑁄, 𑀓𑀸 𑀯𑀺𑀧𑀢𑁆𑀢𑀺, 𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀅𑀢𑀺𑀪𑀸𑀭𑀺𑀬𑀓𑀭𑀡𑀢𑁄 𑀇𑀥 𑀦 𑀯𑀺𑀪𑀢𑁆𑀢𑀁, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁫𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀏𑀢𑁆𑀣 𑀅𑀬𑀁 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀚𑀢𑀕𑁆𑀕𑁂, 𑀲𑀫𑁆𑀫 𑀤𑁄𑀯𑀸𑀭𑀺𑀓, 𑀆𑀯𑀭𑀸𑀫𑀺 𑀤𑁆𑀯𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀳𑀺 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬 (𑀓𑀣𑀸. 𑁪𑁪𑁧), 𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸 𑀢𑀺𑀢𑁆𑀢𑀓𑀕𑁆𑀕𑀁 𑀯𑀸 (𑀲𑀁. 𑀦𑀺. 𑁫.𑁩𑁭𑁪) 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪) 𑀲𑁂𑀝𑁆𑀞𑁂. 𑀇𑀥 𑀧𑀦𑀸𑀬𑀁 𑀆𑀤𑀺𑀫𑁆𑀳𑀺 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀚𑀤𑀕𑁆𑀕𑁂 𑀇𑀘𑁆𑀘𑁂𑀯 𑀯𑀸 ¶ 𑀧𑀸𑀞𑁄, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑀼𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀉𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀕𑀢𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀼, 𑀅𑀳𑀜𑁆𑀳𑀺 𑀲𑀘𑁂𑀧𑀺 𑀫𑁂 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀦𑁂𑀯 𑀩𑀼𑀤𑁆𑀥𑀁 ‘‘𑀦 𑀩𑀼𑀤𑁆𑀥𑁄’’𑀢𑀺 𑀯𑀸, 𑀥𑀫𑁆𑀫𑀁 ‘‘𑀦 𑀥𑀫𑁆𑀫𑁄’’𑀢𑀺 𑀯𑀸, 𑀲𑀗𑁆𑀖𑀁 ‘‘𑀦 𑀲𑀗𑁆𑀖𑁄’’𑀢𑀺 𑀯𑀸 𑀯𑀤𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀩𑁆𑀭𑀸𑀳𑁆𑀫𑀡𑁄 𑀧𑀸𑀡𑀼𑀧𑁂𑀢𑀁 𑀲𑀭𑀡𑀕𑀢𑀦𑁆𑀢𑀺 𑀧𑀼𑀦 𑀲𑀭𑀡𑀕𑀫𑀦𑀁 𑀯𑀤𑀦𑁆𑀢𑁄 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀧𑀓𑀸𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀧𑀭𑀺𑀲𑀁 𑀉𑀧𑀝𑁆𑀞𑀸𑀢𑀼𑀓𑀸𑀫𑁄 𑀆𑀳 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀧𑀸𑀲𑀓𑀜𑁆𑀘 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼, 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀁, 𑀢𑀬𑁄 𑀫𑀸𑀲𑁂 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀫𑀫 𑀅𑀦𑀼𑀕𑁆𑀕𑀳𑀢𑁆𑀣𑀁 𑀯𑀸𑀲𑀁 𑀲𑀫𑁆𑀧𑀝𑀺𑀘𑁆𑀙𑀢𑀽𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀔𑀦𑁆𑀢𑀺𑀁 𑀘𑀸𑀭𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺; 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀫𑀦𑀲𑀸𑀯 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸𑀢𑀺 𑀅𑀣 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀘𑁂 𑀫𑁂 ¶ 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀥𑀺𑀯𑀸𑀲𑁂𑀬𑁆𑀬, 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀔𑀦𑁆𑀢𑀺𑀁 𑀥𑀸𑀭𑁂𑀲𑀺, 𑀢𑀲𑁆𑀫𑀸 𑀫𑁂 𑀫𑀦𑀲𑀸𑀯 𑀅𑀥𑀺𑀯𑀸𑀲𑁂𑀲𑀻𑀢𑀺 𑀏𑀯𑀁 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑀓𑀼𑀲𑀮𑀢𑀸𑀬 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸, 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀪𑀕𑀯𑀦𑁆𑀢𑀁 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀕𑀢𑀓𑀸𑀮𑀢𑁄 𑀧𑀪𑀼𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑁄𑀢𑀻𑀢𑀺 𑀯𑀺𑀕𑀭𑀳𑀺𑀢𑁆𑀯𑀸𑀧𑀺 𑀇𑀤𑀸𑀦𑀺 𑀯𑀺𑀜𑁆𑀜𑀸𑀢𑀩𑀼𑀤𑁆𑀥𑀕𑀼𑀡𑁄 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀦𑁆𑀤𑀦𑁆𑀢𑁄𑀧𑀺 𑀅𑀢𑀺𑀢𑁆𑀢𑁄𑀬𑁂𑀯 𑀳𑀼𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑁄 𑀢𑀸𑀯 𑀧𑀝𑀺𑀫𑀼𑀔𑁄𑀬𑁂𑀯 𑀅𑀧𑀓𑁆𑀓𑀫𑀺𑀢𑁆𑀯𑀸 𑀤𑀲𑁆𑀲𑀦𑀯𑀺𑀲𑀬𑀁 𑀯𑀺𑀚𑀳𑀦𑀝𑁆𑀞𑀸𑀦𑁂 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸

𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀯𑁂𑀭𑀜𑁆𑀚𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀢𑁄 ¶ , 𑀢𑁂𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺. 𑀤𑀼𑀩𑁆𑀪𑀺𑀓𑁆𑀔𑀸𑀢𑀺 𑀤𑀼𑀮𑁆𑀮𑀪𑀪𑀺𑀓𑁆𑀔𑀸; 𑀲𑀸 𑀧𑀦 𑀤𑀼𑀮𑁆𑀮𑀪𑀪𑀺𑀓𑁆𑀔𑀢𑀸 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸, 𑀢𑀢𑁆𑀣 𑀲𑀼𑀲𑀲𑁆𑀲𑀓𑀸𑀮𑁂𑀧𑀺 𑀅𑀢𑀺𑀲𑀫𑀕𑁆𑀖𑁂𑀧𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑁂 𑀳𑁄𑀢𑀺. 𑀯𑁂𑀭𑀜𑁆𑀚𑀸𑀬𑀁 𑀧𑀦 𑀬𑀲𑁆𑀫𑀸 𑀦 𑀢𑀣𑀸 𑀅𑀳𑁄𑀲𑀺, 𑀅𑀧𑀺𑀘 𑀔𑁄 𑀤𑀼𑀲𑀲𑁆𑀲𑀢𑀸𑀬 𑀙𑀸𑀢𑀓𑀤𑁄𑀲𑁂𑀦 𑀅𑀳𑁄𑀲𑀺 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑀻𑀳𑀺𑀢𑀺𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀤𑁆𑀯𑀺𑀥𑀸 𑀧𑀯𑀢𑁆𑀢𑀈𑀳𑀺𑀢𑀺𑀓𑀸. 𑀈𑀳𑀺𑀢𑀁 𑀦𑀸𑀫 𑀇𑀭𑀺𑀬𑀸 𑀤𑁆𑀯𑀺𑀥𑀸 𑀧𑀯𑀢𑁆𑀢𑀸 𑁋 𑀘𑀺𑀢𑁆𑀢𑀇𑀭𑀺𑀬𑀸, 𑀘𑀺𑀢𑁆𑀢𑀈𑀳𑀸. ‘‘𑀏𑀢𑁆𑀣 𑀮𑀘𑁆𑀙𑀸𑀫 𑀦𑀼 𑀔𑁄 𑀓𑀺𑀜𑁆𑀘𑀺 𑀪𑀺𑀓𑁆𑀔𑀫𑀸𑀦𑀸 𑀦 𑀮𑀘𑁆𑀙𑀸𑀫𑀸’’𑀢𑀺, ‘‘𑀚𑀻𑀯𑀺𑀢𑀼𑀁 𑀯𑀸 𑀲𑀓𑁆𑀔𑀺𑀲𑁆𑀲𑀸𑀫 𑀦𑀼 𑀔𑁄 𑀦𑁄’’𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀯𑀸 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀤𑀼𑀚𑁆𑀚𑀻𑀯𑀺𑀓𑀸, 𑀈𑀳𑀺𑀢𑀁 𑀈𑀳𑀸 𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀚𑀻𑀯𑀺𑀢𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀏𑀓𑀢𑁆𑀣𑀸𑀦𑀺. 𑀢𑀲𑁆𑀫𑀸 𑀤𑀼𑀓𑁆𑀔𑁂𑀦 𑀈𑀳𑀺𑀢𑀁 𑀏𑀢𑁆𑀣 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀅𑀬𑀫𑁂𑀢𑁆𑀣 ¶ 𑀧𑀤𑀢𑁆𑀣𑁄. 𑀲𑁂𑀢𑀝𑁆𑀞𑀺𑀓𑀸𑀢𑀺 𑀲𑁂𑀢𑀓𑀸𑀦𑀺 𑀅𑀝𑁆𑀞𑀻𑀦𑀺 𑀏𑀢𑁆𑀣𑀸𑀢𑀺 𑀲𑁂𑀢𑀝𑁆𑀞𑀺𑀓𑀸. 𑀤𑀺𑀯𑀲𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀫𑀢𑀸𑀦𑀁 𑀓𑀧𑀡𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀘𑁆𑀙𑀢𑁆𑀢𑀓𑀯𑀡𑁆𑀡𑁂𑀳𑀺 𑀅𑀝𑁆𑀞𑀻𑀳𑀺 𑀢𑀢𑁆𑀭 𑀢𑀢𑁆𑀭 𑀧𑀭𑀺𑀓𑀺𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀢𑀝𑁆𑀝𑀺𑀓𑀸𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑁂𑀢𑀸 𑀅𑀝𑁆𑀝𑀺 𑀏𑀢𑁆𑀣𑀸𑀢𑀺 𑀲𑁂𑀢𑀝𑁆𑀝𑀺𑀓𑀸. 𑀅𑀝𑁆𑀝𑀻𑀢𑀺 𑀆𑀢𑀼𑀭𑀢𑀸 𑀩𑁆𑀬𑀸𑀥𑀺 𑀭𑁄𑀕𑁄. 𑀢𑀢𑁆𑀣 𑀘 𑀲𑀲𑁆𑀲𑀸𑀦𑀁 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁂 𑀲𑁂𑀢𑀓𑀭𑁄𑀕𑁂𑀦 𑀉𑀧𑀳𑀢𑀫𑁂𑀯 𑀧𑀘𑁆𑀙𑀺𑀦𑁆𑀦𑀔𑀻𑀭𑀁 𑀅𑀕𑁆𑀕𑀳𑀺𑀢𑀢𑀡𑁆𑀟𑀼𑀮𑀁 𑀧𑀡𑁆𑀟𑀭𑀧𑀡𑁆𑀟𑀭𑀁 𑀲𑀸𑀮𑀺𑀲𑀻𑀲𑀁 𑀯𑀸 𑀬𑀯𑀕𑁄𑀥𑀽𑀫𑀲𑀻𑀲𑀁 𑀯𑀸 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀫𑀸 ‘‘𑀲𑁂𑀢𑀝𑁆𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺.

𑀯𑀧𑁆𑀧𑀓𑀸𑀮𑁂 ¶ 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀧𑀺 𑀯𑀼𑀢𑁆𑀢𑀲𑀲𑁆𑀲𑀁 𑀢𑀢𑁆𑀣 𑀲𑀮𑀸𑀓𑀸 𑀏𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸; 𑀲𑀮𑀸𑀓𑀸𑀬 𑀯𑀸 𑀢𑀢𑁆𑀣 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀢𑁆𑀣 𑀓𑀺𑀭 𑀥𑀜𑁆𑀜𑀯𑀺𑀓𑁆𑀓𑀬𑀓𑀸𑀦𑀁 𑀲𑀦𑁆𑀢𑀺𑀓𑀁 𑀓𑀬𑀓𑁂𑀲𑀼 𑀕𑀢𑁂𑀲𑀼 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑁂 𑀅𑀪𑀺𑀪𑀯𑀺𑀢𑁆𑀯𑀸 𑀩𑀮𑀯𑀫𑀦𑀼𑀲𑁆𑀲𑀸𑀯 𑀥𑀜𑁆𑀜𑀁 𑀓𑀺𑀡𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑀸 𑀅𑀮𑀪𑀫𑀸𑀦𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀥𑀜𑁆𑀜𑀯𑀺𑀓𑁆𑀓𑀬𑀓𑀸 ‘‘𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀥𑀜𑁆𑀜𑀫𑀸𑀧𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀏𑀓𑀧𑀲𑁆𑀲𑁂 𑀯𑀡𑁆𑀡𑀚𑁆𑀛𑀓𑁆𑀔𑀁 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀥𑀜𑁆𑀜𑀢𑁆𑀣𑀺𑀓𑀸 𑀯𑀡𑁆𑀡𑀚𑁆𑀛𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀫𑀽𑀮𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀏𑀢𑁆𑀢𑀓𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀮𑀸𑀓𑀁 𑀮𑀺𑀔𑀺𑀢𑁆𑀯𑀸 𑀤𑁂𑀢𑀺, 𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀥𑀜𑁆𑀜𑀫𑀸𑀧𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀺𑀦𑁆𑀦𑀧𑀝𑀺𑀧𑀸𑀝𑀺𑀬𑀸 𑀥𑀜𑁆𑀜𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀲𑀮𑀸𑀓𑀸𑀬 𑀢𑀢𑁆𑀣 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸.

𑀦 ¶ 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀦𑁆𑀢𑀺 𑀧𑀕𑁆𑀕𑀳𑁂𑀦 𑀬𑁄 𑀉𑀜𑁆𑀙𑁄, 𑀢𑁂𑀦 𑀬𑀸𑀧𑁂𑀢𑀼𑀁 𑀦 𑀲𑀼𑀓𑀭𑀸. 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀁 𑀅𑀭𑀺𑀬𑀸 𑀉𑀜𑁆𑀙𑀁 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀢𑁂𑀦 𑀉𑀜𑁆𑀙𑁂𑀦 𑀬𑀸𑀧𑁂𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀸 𑀓𑀺𑀭 𑀢𑀢𑁆𑀣 𑀲𑀢𑁆𑀢𑀝𑁆𑀞𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀏𑀓𑀤𑀺𑀯𑀲𑀫𑁆𑀧𑀺 𑀬𑀸𑀧𑀦𑀫𑀢𑁆𑀢𑀁 𑀦 𑀮𑀪𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀢𑁆𑀢𑀭𑀸𑀧𑀣𑀓𑀸 𑀅𑀲𑁆𑀲𑀯𑀸𑀡𑀺𑀚𑀸…𑀧𑁂… 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀦𑁆𑀢𑀺 𑁋 𑀢𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑁄 𑀢𑁂𑀦 𑀲𑀫𑀬𑁂𑀦. 𑀉𑀢𑁆𑀢𑀭𑀸𑀧𑀣𑀯𑀸𑀲𑀺𑀓𑀸 𑀉𑀢𑁆𑀢𑀭𑀸𑀧𑀣𑀢𑁄 𑀯𑀸 𑀆𑀕𑀢𑀢𑁆𑀢𑀸 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀅𑀲𑁆𑀲𑀯𑀸𑀡𑀺𑀚𑀸 𑀉𑀢𑁆𑀢𑀭𑀸𑀧𑀣𑁂 𑀅𑀲𑁆𑀲𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑁂 ¶ 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀤𑀺𑀕𑀼𑀡𑀁 𑀢𑀺𑀕𑀼𑀡𑀁 𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑀸 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀸 𑀢𑁂𑀳𑀺 𑀅𑀢𑁆𑀢𑀦𑁄 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀪𑀽𑀢𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀅𑀲𑁆𑀲𑀲𑀢𑁂𑀳𑀺 𑀯𑁂𑀭𑀜𑁆𑀚𑀁 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑀸 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀦 𑀳𑀺 𑀲𑀓𑁆𑀓𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀉𑀧𑀕𑀘𑁆𑀙𑀦𑁆𑀢𑀸 𑀘 𑀩𑀳𑀺𑀦𑀕𑀭𑁂 𑀉𑀤𑀓𑁂𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑁂 𑀞𑀸𑀦𑁂 𑀅𑀢𑁆𑀢𑀦𑁄 𑀘 𑀯𑀸𑀲𑀸𑀕𑀸𑀭𑀸𑀦𑀺 𑀅𑀲𑁆𑀲𑀸𑀦𑀜𑁆𑀘 𑀫𑀦𑁆𑀤𑀺𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀸𑀦𑀺 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 ‘‘𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀬𑁄’’𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂𑀦𑀸𑀳 𑁋 ‘‘𑀢𑁂𑀳𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀦𑁆𑀢𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀣𑀧𑀢𑁆𑀣𑀧𑀫𑀸𑀡𑀁 𑀧𑀼𑀮𑀓𑀁. 𑀧𑀢𑁆𑀣𑁄 𑀦𑀸𑀫 𑀦𑀸𑀴𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀮𑀁 𑀬𑀸𑀧𑀦𑀸𑀬. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦’’𑀦𑁆𑀢𑀺 (𑀚𑀸. 𑁨.𑁨𑁧.𑁧𑁯𑁨). 𑀧𑀼𑀮𑀓𑀁 𑀦𑀸𑀫 𑀦𑀺𑀢𑁆𑀣𑀼𑀲𑀁 𑀓𑀢𑁆𑀯𑀸 𑀉𑀲𑁆𑀲𑁂𑀤𑁂𑀢𑁆𑀯𑀸 𑀕𑀳𑀺𑀢𑀬𑀯𑀢𑀡𑁆𑀟𑀼𑀮𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀳𑀺 𑀲𑀣𑀼𑀲𑀸 𑀳𑁄𑀦𑁆𑀢𑀺, 𑀧𑀸𑀡𑀓𑀸 𑀯𑀺𑀚𑁆𑀛𑀦𑁆𑀢𑀺, 𑀅𑀤𑁆𑀥𑀸𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀯𑀸𑀡𑀺𑀚𑀸 𑀅𑀤𑁆𑀥𑀸𑀦𑀓𑁆𑀔𑀫𑀁 𑀓𑀢𑁆𑀯𑀸 𑀬𑀯𑀢𑀡𑁆𑀟𑀼𑀮𑀫𑀸𑀤𑀸𑀬 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀺 ¶ ‘‘𑀬𑀢𑁆𑀣 𑀅𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀁 𑀢𑀺𑀡𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣𑁂𑀢𑀁 𑀅𑀲𑁆𑀲𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀓𑀲𑁆𑀫𑀸 𑀧𑀦 𑀢𑁂𑀳𑀺 𑀢𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀦 𑀳𑀺 𑀢𑁂 𑀤𑀓𑁆𑀔𑀺𑀡𑀸𑀧𑀣𑀫𑀦𑀼𑀲𑁆𑀲𑀸 𑀯𑀺𑀬 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸, 𑀢𑁂 𑀧𑀦 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸, 𑀥𑀫𑁆𑀫𑀫𑀸𑀫𑀓𑀸, 𑀲𑀗𑁆𑀖𑀫𑀸𑀫𑀓𑀸; 𑀢𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀅𑀤𑁆𑀤𑀲𑀁𑀲𑀼 𑀲𑀢𑁆𑀢𑀝𑁆𑀞 𑀪𑀺𑀓𑁆𑀔𑀽 𑀲𑀼𑀦𑀺𑀯𑀢𑁆𑀣𑁂 𑀲𑀼𑀧𑀸𑀭𑀼𑀢𑁂 ¶ 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁂 𑀲𑀓𑀮𑀫𑁆𑀧𑀺 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀫𑀸𑀦𑁂. 𑀤𑀺𑀲𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑁆𑀬𑀸 𑀇𑀫𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀁 𑀉𑀧𑀕𑀢𑀸; 𑀙𑀸𑀢𑀓𑀜𑁆𑀘 𑀯𑀢𑁆𑀢𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑀪𑀦𑁆𑀢𑀺, 𑀅𑀢𑀺𑀯𑀺𑀬 𑀓𑀺𑀮𑀫𑀦𑁆𑀢𑀺. 𑀫𑀬𑀜𑁆𑀘𑀫𑁆𑀳 𑀆𑀕𑀦𑁆𑀢𑀼𑀓𑀸, 𑀦 𑀲𑀓𑁆𑀓𑁄𑀫 𑀦𑁂𑀲𑀁 𑀤𑁂𑀯𑀲𑀺𑀓𑀁 𑀬𑀸𑀕𑀼𑀜𑁆𑀘 𑀪𑀢𑁆𑀢𑀜𑁆𑀘 𑀧𑀝𑀺𑀬𑀸𑀤𑁂𑀢𑀼𑀁. 𑀅𑀫𑁆𑀳𑀸𑀓𑀁 𑀧𑀦 𑀅𑀲𑁆𑀲𑀸 𑀲𑀸𑀬𑀜𑁆𑀘 𑀧𑀸𑀢𑁄 𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀢𑁆𑀢𑀁 𑀮𑀪𑀦𑁆𑀢𑀺. 𑀬𑀁𑀦𑀽𑀦 𑀫𑀬𑀁 𑀏𑀓𑀫𑁂𑀓𑀲𑁆𑀲 𑀅𑀲𑁆𑀲𑀲𑁆𑀲 𑀧𑀸𑀢𑀭𑀸𑀲𑀪𑀢𑁆𑀢𑀢𑁄 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀤𑀤𑁂𑀬𑁆𑀬𑀸𑀫. 𑀏𑀯𑀁 𑀅𑀬𑁆𑀬𑀸 𑀘 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺 ¶ , 𑀅𑀲𑁆𑀲𑀸 𑀘 𑀬𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀳𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺.

𑀧𑀜𑁆𑀜𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑀲𑀗𑁆𑀔𑁂𑀧𑁂𑀦 𑀞𑀧𑀺𑀢𑀁. 𑀇𑀤𑀸𑀦𑀺 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀮𑀩𑁆𑀪𑀢𑀺. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸, 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀢𑁂 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑀸 𑀅𑀳𑁂𑀲𑀼𑀁. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸, 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀯𑀸 𑀢𑁂𑀦 𑀯𑀸 𑀳𑀺 𑀧𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸 𑀆𑀤𑀸𑀬𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀬𑀣𑀸 ‘‘𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧). 𑀧𑀺𑀡𑁆𑀟𑀁 𑀅𑀮𑀪𑀫𑀸𑀦𑀸𑀢𑀺 𑀲𑀓𑀮𑀫𑁆𑀧𑀺 𑀯𑁂𑀭𑀜𑁆𑀚𑀁 𑀘𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀼 𑀧𑀺𑀡𑁆𑀟𑁄, 𑀅𑀦𑁆𑀢𑀫𑀲𑁄 ‘‘𑀅𑀢𑀺𑀘𑁆𑀙𑀣𑀸’’𑀢𑀺 𑀯𑀸𑀘𑀫𑁆𑀧𑀺 𑀅𑀮𑀪𑀫𑀸𑀦𑀸.

𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀆𑀭𑀸𑀫𑀁 𑀆𑀳𑀭𑀺𑀢𑁆𑀯𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑁂 𑀮𑀤𑁆𑀥𑀁 𑀏𑀓𑀫𑁂𑀓𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀕𑀳𑁂𑀢𑁆𑀯𑀸 𑀆𑀭𑀸𑀫𑀁 𑀦𑁂𑀢𑁆𑀯𑀸. 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀣𑁂𑀭𑀸𑀦𑀁 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀺, 𑀬𑁄 𑀦𑁂𑀲𑀁 𑀢𑀁 𑀕𑀳𑁂𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀧𑀘𑁂𑀬𑁆𑀬. 𑀲𑀸𑀫𑀫𑁆𑀧𑀺 𑀧𑀘𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺 𑀦 𑀘 𑀯𑀝𑁆𑀝𑀢𑀺. 𑀢𑁂 𑀏𑀯𑀁 𑀦𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸 𑀘 𑀪𑀯𑀺𑀲𑁆𑀲𑀢𑀺, 𑀲𑀸𑀫𑀧𑀸𑀓𑀧𑀭𑀺𑀫𑁄𑀘𑀦𑀜𑁆𑀘𑀸𑀢𑀺 𑀅𑀝𑁆𑀞 𑀅𑀝𑁆𑀞 ¶ 𑀚𑀦𑀸 𑀯𑀸 𑀤𑀲 𑀤𑀲 𑀚𑀦𑀸 𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀲𑀓𑀁 𑀲𑀓𑀁 𑀧𑀝𑀺𑀯𑀻𑀲𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺 ¶ . 𑀪𑀕𑀯𑀢𑁄 𑀧𑀦 𑀢𑁂 𑀅𑀲𑁆𑀲𑀯𑀸𑀡𑀺𑀚𑀸 𑀧𑀢𑁆𑀣𑀧𑀼𑀮𑀓𑀜𑁆𑀘 𑀤𑁂𑀦𑁆𑀢𑀺, 𑀢𑀤𑀼𑀧𑀺𑀬𑀜𑁆𑀘 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀁. 𑀢𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀳𑀭𑀺𑀢𑁆𑀯𑀸 𑀲𑀺𑀮𑀸𑀬𑀁 𑀧𑀺𑀲𑀢𑀺. 𑀧𑀼𑀜𑁆𑀜𑀯𑀢𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀦 𑀓𑀢𑀁 𑀫𑀦𑀸𑀧𑀫𑁂𑀯 𑀳𑁄𑀢𑀺. 𑀅𑀣 𑀦𑀁 𑀧𑀺𑀲𑀺𑀢𑁆𑀯𑀸 𑀲𑀧𑁆𑀧𑀺𑀆𑀤𑀻𑀳𑀺 𑀲𑀫𑁆𑀫𑀸 𑀬𑁄𑀚𑁂𑀢𑁆𑀯𑀸 𑀪𑀕𑀯𑀢𑁄 ¶ 𑀉𑀧𑀦𑀸𑀫𑁂𑀲𑀺. 𑀅𑀣𑁂𑀢𑁆𑀣 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀦𑁆𑀢𑀺. 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀓𑀸𑀮𑀁 𑀅𑀢𑀺𑀦𑀸𑀫𑁂𑀢𑀺. 𑀦 𑀢𑀢𑁄 𑀧𑀝𑁆𑀞𑀸𑀬 𑀧𑀺𑀡𑁆𑀟𑀸𑀬 𑀘𑀭𑀢𑀺.

𑀓𑀺𑀁 𑀧𑀦𑀸𑀦𑀦𑁆𑀤𑀢𑁆𑀣𑁂𑀭𑁄 𑀢𑀤𑀸 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺? 𑀳𑁄𑀢𑀺, 𑀦𑁄 𑀘 𑀔𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀸. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀺. 𑀓𑀤𑀸𑀘𑀺 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀲𑀺, 𑀓𑀤𑀸𑀘𑀺 𑀦𑀸𑀕𑀺𑀢𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀫𑁂𑀖𑀺𑀬𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀉𑀧𑀯𑀸𑀡𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀲𑀸𑀕𑀢𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄. 𑀢𑁂 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀬𑀤𑀸 𑀇𑀘𑁆𑀙𑀦𑁆𑀢𑀺 𑀢𑀤𑀸 𑀧𑀓𑁆𑀓𑀫𑀦𑁆𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂𑀲𑀼 𑀢𑁂𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑁄𑀢𑀺, 𑀧𑀓𑁆𑀓𑀦𑁆𑀢𑁂𑀲𑀼 𑀲𑀬𑀫𑁂𑀯 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀪𑀕𑀯𑀸𑀧𑀺 𑀓𑀺𑀜𑁆𑀘𑀸𑀧𑀺 𑀫𑁂 𑀜𑀸𑀢𑀺𑀲𑁂𑀝𑁆𑀞𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀦 𑀢𑀸𑀯 𑀮𑀪𑀢𑀺, 𑀅𑀣 𑀔𑁄 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀬𑀫𑁂𑀯 𑀧𑀢𑀺𑀭𑀽𑀧𑁄𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀬𑀲𑁆𑀫𑀸 𑀧𑀦𑀸𑀦𑀦𑁆𑀤𑁄 𑀧𑀢𑁆𑀣𑀧𑀼𑀮𑀓𑀁 𑀲𑀺𑀮𑀸𑀬𑀁 𑀧𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺, 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺.

𑀦𑀦𑀼 𑀘 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀚𑀸𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀅𑀢𑁆𑀢𑀦𑀸 𑀅𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑁂 𑀢𑀤𑀸 𑀓𑀲𑁆𑀫𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀦 𑀅𑀤𑀁𑀲𑀼? 𑀅𑀬𑀜𑁆𑀘 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀪𑀕𑀯𑀦𑁆𑀢𑀁 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺, 𑀲𑁄 𑀓𑀲𑁆𑀫𑀸 𑀪𑀕𑀯𑀢𑁄 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀸𑀭𑀸𑀯𑀝𑁆𑀝𑀦𑀸𑀬. 𑀯𑁂𑀭𑀜𑁆𑀚𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀧𑀓𑁆𑀓𑀦𑁆𑀢𑀫𑀢𑁆𑀢𑀫𑁂𑀯 𑀲𑀓𑀮𑀜𑁆𑀘 𑀦𑀕𑀭𑀁 𑀲𑀫𑀦𑁆𑀢𑀸 𑀘 𑀬𑁄𑀚𑀦𑀫𑀢𑁆𑀢𑀁 𑀬𑀢𑁆𑀣 𑀲𑀓𑁆𑀓𑀸 𑀧𑀼𑀭𑁂𑀪𑀢𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑀼𑀁, 𑀢𑀁 𑀲𑀩𑁆𑀩𑀁 𑀫𑀸𑀭𑁄 𑀆𑀯𑀝𑁆𑀝𑁂𑀢𑁆𑀯𑀸 𑀫𑁄𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀫𑀸 𑀦 𑀓𑁄𑀘𑀺 𑀅𑀦𑁆𑀢𑀫𑀲𑁄 𑀲𑀸𑀫𑀻𑀘𑀺𑀓𑀫𑁆𑀫𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣.

𑀓𑀺𑀁 ¶ 𑀧𑀦 𑀪𑀕𑀯𑀸𑀧𑀺 𑀫𑀸𑀭𑀸𑀯𑀝𑁆𑀝𑀦𑀁 𑀅𑀚𑀸𑀦𑀺𑀢𑁆𑀯𑀸𑀯 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀢𑁄𑀢𑀺? 𑀦𑁄 𑀅𑀚𑀸𑀦𑀺𑀢𑁆𑀯𑀸. 𑀅𑀣 𑀓𑀲𑁆𑀫𑀸 𑀘𑀫𑁆𑀧𑀸-𑀲𑀸𑀯𑀢𑁆𑀣𑀺-𑀭𑀸𑀚𑀕𑀳𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦 𑀉𑀧𑀕𑀢𑁄𑀢𑀺? 𑀢𑀺𑀝𑁆𑀞𑀦𑁆𑀢𑀼 𑀘𑀫𑁆𑀧𑀸-𑀲𑀸𑀯𑀢𑁆𑀣𑀺-𑀭𑀸𑀚𑀕𑀳𑀸𑀤𑀻𑀦𑀺, 𑀲𑀘𑁂𑀧𑀺 𑀪𑀕𑀯𑀸 𑀢𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 ¶ 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀢𑀺𑀤𑀲𑀧𑀼𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬, 𑀢𑀫𑁆𑀧𑀺 𑀫𑀸𑀭𑁄 𑀆𑀯𑀝𑁆𑀝𑁂𑀬𑁆𑀬. 𑀲𑁄 𑀓𑀺𑀭 𑀢𑀁 𑀲𑀁𑀯𑀘𑁆𑀙𑀭𑀁 𑀅𑀢𑀺𑀯𑀺𑀬 𑀆𑀖𑀸𑀢𑁂𑀦 ¶ 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀇𑀥 𑀧𑀦 𑀪𑀕𑀯𑀸 𑀇𑀫𑀁 𑀅𑀢𑀺𑀭𑁂𑀓𑀓𑀸𑀭𑀡𑀁 𑀅𑀤𑁆𑀤𑀲 𑁋 ‘‘𑀅𑀲𑁆𑀲𑀯𑀸𑀡𑀺𑀚𑀸 𑀪𑀺𑀓𑁆𑀔𑀽𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀯𑁂𑀭𑀜𑁆𑀚𑀸𑀬𑀫𑁂𑀯 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺.

𑀓𑀺𑀁 𑀧𑀦 𑀫𑀸𑀭𑁄 𑀯𑀸𑀡𑀺𑀚𑀓𑁂 𑀆𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀦𑁄 𑀦 𑀲𑀓𑁆𑀓𑁄𑀢𑀺, 𑀢𑁂 𑀧𑀦 𑀆𑀯𑀝𑁆𑀝𑀺𑀢𑀧𑀭𑀺𑀬𑁄𑀲𑀸𑀦𑁂 𑀆𑀕𑀫𑀺𑀁𑀲𑀼. 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀫𑀸 𑀦 𑀆𑀯𑀝𑁆𑀝𑁂𑀢𑀻𑀢𑀺? 𑀅𑀯𑀺𑀲𑀳𑀢𑀸𑀬. 𑀦 𑀳𑀺 𑀲𑁄 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀝𑀪𑀺𑀓𑁆𑀔𑀸𑀬 𑀦𑀺𑀩𑀤𑁆𑀥𑀤𑀸𑀦𑀲𑁆𑀲 𑀅𑀧𑁆𑀧𑀺𑀢𑀯𑀢𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀯𑀺𑀲𑀳𑀢𑀺. 𑀘𑀢𑀼𑀦𑁆𑀦𑀜𑁆𑀳𑀺 𑀦 𑀲𑀓𑁆𑀓𑀸 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀝𑀪𑀺𑀓𑁆𑀔𑀸𑀲𑀗𑁆𑀔𑁂𑀧𑁂𑀦 𑀯𑀸 𑀦𑀺𑀩𑀤𑁆𑀥𑀤𑀸𑀦𑀲𑁆𑀲 𑀅𑀧𑁆𑀧𑀺𑀢𑀯𑀢𑁆𑀢𑀲𑀗𑁆𑀔𑁂𑀧𑁂𑀦 𑀯𑀸 𑀧𑀭𑀺𑀘𑁆𑀘𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀩𑀼𑀤𑁆𑀥𑀸𑀦𑀁 𑀚𑀻𑀯𑀺𑀢𑀲𑁆𑀲 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀯𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑁂𑀯𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀳𑀺 𑀧𑀪𑀸 𑀢𑀣𑀸𑀕𑀢𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀯𑀺𑀳𑀢𑀸𑀦𑀼𑀪𑀸𑀯𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀢𑀲𑁆𑀫𑀸 𑀫𑀸𑀭𑁂𑀦 𑀅𑀓𑀢𑀦𑁆𑀢𑀭𑀸𑀬𑀁 𑀪𑀺𑀓𑁆𑀔𑀁 𑀪𑀕𑀯𑀸 𑀲𑀲𑀸𑀯𑀓𑀲𑀗𑁆𑀖𑁄 𑀢𑀤𑀸 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀘 𑀏𑀓𑀤𑀺𑀯𑀲𑀁 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀦𑁆𑀢𑀺 𑀪𑀕𑀯𑀸 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀼𑀲𑀮𑀲𑀗𑁆𑀖𑀝𑁆𑀝𑀚𑀦𑀺𑀢𑀁 𑀉𑀤𑀼𑀓𑁆𑀔𑀮𑀲𑀤𑁆𑀤𑀁 𑀲𑀼𑀡𑀺. 𑀢𑀢𑁄 𑀧𑀭𑀁 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸𑀢𑀺 𑀏𑀯𑀫𑀸𑀤𑀺 𑀬𑀁 𑀧𑀭𑀢𑁄 ‘‘𑀓𑀺𑀦𑁆𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀤𑀼𑀓𑁆𑀔𑀮𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺, 𑀢𑀲𑁆𑀲 𑀧𑀭𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀢𑀣𑀸𑀕𑀢𑀸 𑀦𑀸𑀫 𑀚𑀸𑀦𑀦𑁆𑀢𑀸𑀧𑀺 𑀲𑀘𑁂 𑀢𑀸𑀤𑀺𑀲𑀁 𑀧𑀼𑀘𑁆𑀙𑀸𑀓𑀸𑀭𑀡𑀁 𑀳𑁄𑀢𑀺, 𑀧𑀼𑀘𑁆𑀙𑀦𑁆𑀢𑀺. 𑀲𑀘𑁂 𑀧𑀦 𑀢𑀸𑀤𑀺𑀲𑀁 𑀧𑀼𑀘𑁆𑀙𑀸𑀓𑀸𑀭𑀡𑀁 𑀦𑀢𑁆𑀣𑀺, 𑀚𑀸𑀦𑀦𑁆𑀢𑀸𑀧𑀺 ¶ 𑀦 𑀧𑀼𑀘𑁆𑀙𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀅𑀚𑀸𑀦𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀚𑀸𑀦𑀦𑁆𑀢𑀸𑀧𑀻𑀢𑀺 𑀦 𑀯𑀼𑀢𑁆𑀢𑀁. 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀻𑀢𑀺 𑀲𑀘𑁂 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀲𑁄 𑀓𑀸𑀮𑁄 𑀳𑁄𑀢𑀺, 𑀏𑀯𑀁 𑀢𑀁 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺; 𑀲𑀘𑁂 𑀦 𑀳𑁄𑀢𑀺 ¶ , 𑀏𑀯𑀫𑁆𑀧𑀺 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸𑀯 𑀦 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀧𑀺 𑀘 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀸𑀭𑀡𑀦𑀺𑀲𑁆𑀲𑀺𑀢𑀁, 𑀢𑀤𑁂𑀯 𑀧𑀼𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀲𑁂𑀢𑀼 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀫𑀕𑁆𑀕𑁂𑀦𑁂𑀯 𑀢𑀸𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀖𑀸𑀢𑁄, 𑀲𑀫𑀼𑀘𑁆𑀙𑁂𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀏𑀢𑁆𑀣 𑀬𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫𑀸𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀲𑀼𑀢𑁆𑀢𑀁 𑀯𑀸 𑀧𑀼𑀩𑁆𑀩𑀘𑀭𑀺𑀢𑀓𑀸𑀭𑀡𑀬𑀼𑀢𑁆𑀢𑀁 𑀚𑀸𑀢𑀓𑀁 𑀯𑀸 𑀓𑀣𑀬𑀺𑀲𑁆𑀲𑀸𑀫. 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 ¶ 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺 𑀲𑀸𑀯𑀓𑀸𑀦𑀁 𑀯𑀸 𑀢𑀸𑀬 𑀧𑀼𑀘𑁆𑀙𑀸𑀬 𑀯𑀻𑀢𑀺𑀓𑁆𑀓𑀫𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫 𑀆𑀡𑀁 𑀞𑀧𑁂𑀲𑁆𑀲𑀸𑀫𑀸𑀢𑀺.

𑀅𑀣 𑀔𑁄 𑀪𑀕𑀯𑀸…𑀧𑁂… 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯 𑀳𑀺 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀧𑀝𑀺𑀮𑀸𑀪𑀁 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀁 𑀲𑀸𑀫𑀧𑀸𑀓𑀧𑀭𑀺𑀫𑁄𑀘𑀦𑀜𑁆𑀘 𑀆𑀭𑁄𑀘𑁂𑀦𑁆𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤𑀸’’𑀢𑀺 𑀇𑀤𑀁 𑀧𑀦 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄 𑀆𑀳. 𑀲𑀸𑀥𑀼𑀓𑀸𑀭𑀁 𑀧𑀦 𑀤𑀢𑁆𑀯𑀸 𑀤𑁆𑀯𑀻𑀲𑀼 𑀆𑀓𑀸𑀭𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀺𑀚𑀺𑀢𑀁, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀏𑀯𑀁 𑀤𑀼𑀩𑁆𑀪𑀺𑀓𑁆𑀔𑁂 𑀤𑀼𑀮𑁆𑀮𑀪𑀧𑀺𑀡𑁆𑀟𑁂 𑀇𑀫𑀸𑀬 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸𑀬 𑀇𑀫𑀺𑀦𑀸 𑀘 𑀲𑀮𑁆𑀮𑁂𑀔𑁂𑀦 𑀯𑀺𑀚𑀺𑀢𑀁. 𑀓𑀺𑀁 𑀯𑀺𑀚𑀺𑀢𑀦𑁆𑀢𑀺? 𑀤𑀼𑀩𑁆𑀪𑀺𑀓𑁆𑀔𑀁 𑀯𑀺𑀚𑀺𑀢𑀁, 𑀮𑁄𑀪𑁄 𑀯𑀺𑀚𑀺𑀢𑁄, 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄. 𑀓𑀣𑀁? ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀲𑀫𑀦𑁆𑀢𑀢𑁄 𑀧𑀦 𑀅𑀦𑀦𑁆𑀢𑀭𑀸 𑀕𑀸𑀫𑀦𑀺𑀕𑀫𑀸 𑀨𑀮𑀪𑀸𑀭𑀦𑀫𑀺𑀢𑀲𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀲𑀼𑀮𑀪𑀧𑀺𑀡𑁆𑀟𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀸 𑀇𑀥𑁂𑀯 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀲𑀢𑀻’’𑀢𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀘𑀺𑀦𑁆𑀢𑀸 𑀯𑀸 𑀯𑀺𑀖𑀸𑀢𑁄 𑀯𑀸 𑀦𑀢𑁆𑀣𑀺. 𑀏𑀯𑀁 𑀢𑀸𑀯 𑀤𑀼𑀩𑁆𑀪𑀺𑀓𑁆𑀔𑀁 𑀯𑀺𑀚𑀺𑀢𑀁 𑀅𑀪𑀺𑀪𑀽𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀺𑀢𑀁.

𑀓𑀣𑀁 𑀮𑁄𑀪𑁄 𑀯𑀺𑀚𑀺𑀢𑁄? ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀲𑀫𑀦𑁆𑀢𑀢𑁄 𑀧𑀦 𑀅𑀦𑀦𑁆𑀢𑀭𑀸 𑀕𑀸𑀫𑀦𑀺𑀕𑀫𑀸 𑀨𑀮𑀪𑀸𑀭𑀦𑀫𑀺𑀢𑀲𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀲𑀼𑀮𑀪𑀧𑀺𑀡𑁆𑀟𑀸 ¶ . 𑀳𑀦𑁆𑀤 𑀫𑀬𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀮𑁄𑀪𑀯𑀲𑁂𑀦 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 ‘‘𑀧𑀘𑁆𑀙𑀺𑀫𑀺𑀓𑀸𑀬 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀸’’𑀢𑀺 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄. 𑀏𑀯𑀁 𑀮𑁄𑀪𑁄 𑀯𑀺𑀚𑀺𑀢𑁄.

𑀓𑀣𑀁 ¶ 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄? 𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀇𑀫𑁂 𑀘 𑀫𑀦𑀼𑀲𑁆𑀲𑀸 𑀅𑀫𑁆𑀳𑁂 𑀤𑁆𑀯𑁂 𑀢𑀬𑁄 𑀫𑀸𑀲𑁂 𑀯𑀲𑀦𑁆𑀢𑁂𑀧𑀺 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀫𑀜𑁆𑀜𑀦𑁆𑀢𑀺. 𑀬𑀁𑀦𑀽𑀦 𑀫𑀬𑀁 𑀕𑀼𑀡𑀯𑀸𑀡𑀺𑀚𑁆𑀚𑀁 𑀓𑀢𑁆𑀯𑀸 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻…𑀧𑁂… 𑀅𑀲𑀼𑀓𑁄 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀓𑀸𑀲𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀫𑀸’’𑀢𑀺 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀦 𑀉𑀧𑁆𑀧𑀸𑀤𑀺𑀢𑀸. 𑀏𑀯𑀁 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄 𑀅𑀪𑀺𑀪𑀽𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀺𑀢𑁄𑀢𑀺.

𑀅𑀦𑀸𑀕𑀢𑁂 𑀧𑀦 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀮𑀪𑀺𑀢𑁆𑀯𑀸𑀧𑀺 ‘‘𑀓𑀺𑀁 𑀇𑀤𑀁 𑀉𑀢𑁆𑀢𑀡𑁆𑀟𑀼𑀮𑀁 𑀅𑀢𑀺𑀓𑀺𑀮𑀺𑀦𑁆𑀦𑀁 𑀅𑀮𑁄𑀡𑀁 𑀅𑀢𑀺𑀮𑁄𑀡𑀁 𑀅𑀦𑀫𑁆𑀩𑀺𑀮𑀁 𑀅𑀘𑁆𑀘𑀫𑁆𑀩𑀺𑀮𑀁, 𑀓𑁄 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀺, 𑀑𑀜𑁆𑀜𑀸𑀢𑀁 𑀅𑀯𑀜𑁆𑀜𑀸𑀢𑀁 𑀓𑀭𑀺𑀲𑁆𑀲𑀢𑀺. 𑀅𑀣 𑀯𑀸 𑀚𑀦𑀧𑀤𑁄 ¶ 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀤𑀼𑀩𑁆𑀪𑀺𑀓𑁆𑀔𑁄 𑀳𑁄𑀢𑀺. 𑀏𑀓𑀤𑀸 𑀤𑀼𑀩𑁆𑀪𑀺𑀓𑁆𑀔𑁄 𑀳𑁄𑀢𑀺, 𑀏𑀓𑀤𑀸 𑀲𑀼𑀪𑀺𑀓𑁆𑀔𑁄 𑀳𑁄𑀢𑀺. 𑀲𑁆𑀯𑀸𑀬𑀁 𑀬𑀤𑀸 𑀲𑀼𑀪𑀺𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀢𑀼𑀫𑁆𑀳𑀸𑀓𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀔𑀚𑁆𑀚𑀓𑀸𑀤𑀺𑀧𑁆𑀧𑀪𑁂𑀤𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀸𑀮𑀺𑀯𑀺𑀓𑀢𑀺𑀁 𑀫𑀁𑀲𑁄𑀤𑀦𑀜𑁆𑀘 𑀤𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀢𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁 𑀢𑀼𑀫𑁆𑀳𑀸𑀓𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀗𑁆𑀔𑀸𑀢𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀼𑀪𑀯𑀫𑀸𑀦𑀸𑀯 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀺, 𑀢𑀧𑁆𑀧𑀘𑁆𑀘𑀬𑀁 𑀫𑀸𑀦𑀜𑁆𑀘 𑀑𑀫𑀸𑀦𑀜𑁆𑀘 𑀓𑀭𑀺𑀲𑁆𑀲𑀢𑀺. 𑀓𑀣𑀁? 𑀓𑀲𑁆𑀫𑀸 𑀏𑀢𑁆𑀢𑀓𑀁 𑀧𑀓𑁆𑀓𑀁, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀪𑀸𑀚𑀦𑀸𑀦𑀺 𑀦𑀢𑁆𑀣𑀺, 𑀬𑀢𑁆𑀣 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀬𑁆𑀬𑀸𑀣𑀸𑀢𑀺.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀲𑀻𑀳𑀦𑀸𑀤𑀓𑀣𑀸

𑁧𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺𑀆𑀤𑀻𑀲𑀼 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀫𑀳𑀸 𑀘 𑀲𑁄 𑀕𑀼𑀡𑀫𑀳𑀦𑁆𑀢𑀢𑀸𑀬 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀕𑁄𑀢𑁆𑀢𑁂𑀦𑀸𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 ‘‘𑀏𑀢𑀭𑀳𑀺 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀅𑀯𑁄𑀘? 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 ¶ 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀲𑀢𑁆𑀣𑀸𑀭𑀸𑀧𑀺 𑀫𑀳𑀺𑀤𑁆𑀥𑀺𑀓𑀢𑀸𑀬 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀲𑁄 𑀢𑀁 𑀅𑀢𑁆𑀢𑀦𑁄 𑀫𑀳𑀺𑀤𑁆𑀥𑀺𑀓𑀢𑀁 𑀦𑀺𑀲𑁆𑀲𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀪𑀺𑀓𑁆𑀔𑀽 𑀘 𑀓𑀺𑀮𑀫𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀧𑁆𑀧𑀝𑀓𑁄𑀚𑀁 𑀪𑁄𑀚𑁂𑀬𑁆𑀬’’𑀦𑁆𑀢𑀺. 𑀅𑀣𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀧𑀦𑀸𑀳𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀯𑀺𑀳𑀭𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀬𑀸𑀘𑀺𑀢𑁆𑀯𑀸 𑀏𑀯𑀁 𑀓𑀭𑁂𑀬𑁆𑀬𑀁, 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧𑀁; 𑀬𑀼𑀕𑀕𑁆𑀕𑀸𑀳𑁄 𑀯𑀺𑀬 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑀢𑁄 𑀪𑀯𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀸 𑀬𑀸𑀘𑀺𑀢𑀼𑀓𑀸𑀫𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘.

𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀣𑀯𑀺𑀬𑀸 𑀓𑀺𑀭 𑀳𑁂𑀝𑁆𑀞𑀺𑀫𑀢𑀮𑁂 𑀧𑀣𑀯𑀺𑀫𑀡𑁆𑀟𑁄 𑀧𑀣𑀯𑁄𑀚𑁄 𑀧𑀣𑀯𑀺-𑀧𑀧𑁆𑀧𑀝𑀓𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀁, 𑀲𑀸𑀤𑀼𑀭𑀲𑀦𑁆𑀢𑀺 𑀅𑀢𑁆𑀣𑁄. 𑀬𑀣𑁂𑀯 𑀳𑀺 ‘‘𑀢𑀢𑁆𑀭𑀲𑁆𑀲 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘𑀸’’𑀢𑀺 (𑀫. 𑀦𑀺. 𑁨.𑁪𑁮) 𑀏𑀢𑁆𑀣 𑀫𑀥𑀼𑀭𑀨𑀮𑁄𑀢𑀺 𑀅𑀢𑁆𑀣𑁄; 𑀏𑀯𑀫𑀺𑀥𑀸𑀧𑀺 𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀴𑀓𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲 𑀫𑀥𑀼𑀭𑀢𑀸𑀬 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀔𑀼𑀤𑁆𑀤𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀫𑀥𑀼. 𑀅𑀦𑀻𑀴𑀓𑀦𑁆𑀢𑀺 𑀦𑀺𑀫𑁆𑀫𑀓𑁆𑀔𑀺𑀓𑀁 𑀦𑀺𑀫𑁆𑀫𑀓𑁆𑀔𑀺𑀓𑀡𑁆𑀟𑀓𑀁 𑀧𑀭𑀺𑀲𑀼𑀤𑁆𑀥𑀁. 𑀏𑀢𑀁 𑀓𑀺𑀭 𑀫𑀥𑀼 𑀲𑀩𑁆𑀩𑀫𑀥𑀽𑀳𑀺 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀲𑀼𑀭𑀲𑀜𑁆𑀘 𑀑𑀚𑀯𑀦𑁆𑀢𑀜𑁆𑀘. 𑀢𑁂𑀦𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀴𑀓𑀁 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺.

𑀲𑀸𑀥𑀸𑀳𑀁 ¶ , 𑀪𑀦𑁆𑀢𑁂𑀢𑀺 𑀲𑀸𑀥𑀼 𑀅𑀳𑀁, 𑀪𑀦𑁆𑀢𑁂. 𑀏𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑀯𑀘𑀦𑀫𑁂𑀢𑀁. 𑀧𑀣𑀯𑀺𑀧𑀭𑀺𑀯𑀢𑁆𑀢𑀦𑀁 𑀆𑀬𑀸𑀘𑀦𑁆𑀢𑁄 𑀳𑀺 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳. 𑀧𑀭𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀁, 𑀳𑁂𑀝𑁆𑀞𑀺𑀫𑀢𑀮𑀁 𑀉𑀧𑀭𑀺𑀫𑀁 𑀓𑀭𑁂𑀬𑁆𑀬𑀁. 𑀓𑀲𑁆𑀫𑀸? 𑀏𑀯𑀜𑁆𑀳𑀺 𑀓𑀢𑁂 𑀲𑀼𑀔𑁂𑀦 𑀪𑀺𑀓𑁆𑀔𑀽 𑀧𑀧𑁆𑀧𑀝𑀓𑁄𑀚𑀁 𑀧𑀣𑀯𑀺𑀫𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺. 𑀅𑀣 𑀪𑀕𑀯𑀸 𑀅𑀦𑀦𑀼𑀜𑁆𑀜𑀸𑀢𑀼𑀓𑀸𑀫𑁄𑀧𑀺 𑀣𑁂𑀭𑀁 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀧𑀼𑀘𑁆𑀙𑀺 𑁋 ‘‘𑀬𑁂 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀧𑀸𑀡𑀸, 𑀢𑁂 𑀧𑀣𑀯𑀺𑀬𑀸 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀸𑀬 𑀆𑀓𑀸𑀲𑁂 ¶ 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀓𑀣𑀁 𑀓𑀭𑀺𑀲𑁆𑀲𑀲𑀺, 𑀓𑀢𑁆𑀣 𑀞𑀧𑁂𑀲𑁆𑀲𑀲𑀻𑀢𑀺? 𑀅𑀣 𑀣𑁂𑀭𑁄 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀓𑀸𑀳𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀏𑀓𑀁 𑀅𑀳𑀁 𑀪𑀦𑁆𑀢𑁂 𑀳𑀢𑁆𑀣𑀁 𑀬𑀣𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀏𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀺, 𑀧𑀣𑀯𑀺𑀲𑀤𑀺𑀲𑀁 𑀓𑀭𑀺𑀲𑁆𑀲𑀸𑀫𑀺. 𑀏𑀯𑀁 𑀓𑀢𑁆𑀯𑀸 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀏𑀓𑀲𑁆𑀫𑀺𑀁 𑀳𑀢𑁆𑀣𑀢𑀮𑁂 𑀞𑀺𑀢𑁂 𑀧𑀸𑀡𑁂 𑀢𑀢𑁄 𑀤𑀼𑀢𑀺𑀬𑀳𑀢𑁆𑀣𑀢𑀮𑁂 𑀲𑀗𑁆𑀓𑀸𑀫𑁂𑀦𑁆𑀢𑁄 𑀯𑀺𑀬 𑀢𑀢𑁆𑀣 𑀲𑀗𑁆𑀓𑀸𑀫𑁂𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀆𑀬𑀸𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀅𑀮𑀁 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀯𑀺𑀧𑀭𑀻𑀢𑀕𑁆𑀕𑀸𑀳𑀫𑁆𑀧𑀺 𑀲𑀢𑁆𑀢𑀸 𑀲𑀫𑁆𑀧𑀸𑀧𑀼𑀡𑁂𑀬𑁆𑀬𑀼𑀁. 𑀓𑀣𑀁? 𑀅𑀬𑀁 𑀦𑀼 𑀔𑁄 𑀧𑀣𑀯𑀻 ¶ , 𑀉𑀤𑀸𑀳𑀼 𑀦 𑀅𑀬𑀦𑁆𑀢𑀺. 𑀅𑀣 𑀯𑀸 𑀅𑀫𑁆𑀳𑀸𑀓𑀁 𑀦𑀼 𑀔𑁄 𑀅𑀬𑀁 𑀕𑀸𑀫𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀲’’𑀦𑁆𑀢𑀺. 𑀏𑀯𑀁 𑀦𑀺𑀕𑀫𑀚𑀦𑀧𑀤𑀔𑁂𑀢𑁆𑀢𑀸𑀭𑀸𑀫𑀸𑀤𑀻𑀲𑀼. 𑀦 𑀯𑀸 𑀏𑀲 𑀯𑀺𑀧𑀮𑁆𑀮𑀸𑀲𑁄, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀇𑀤𑁆𑀥𑀺𑀫𑀢𑁄 𑀇𑀤𑁆𑀥𑀺𑀯𑀺𑀲𑀬𑁄. 𑀏𑀯𑀁 𑀧𑀦 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀁 𑁋 𑀇𑀤𑀁 𑀤𑀼𑀩𑁆𑀪𑀺𑀓𑁆𑀔𑀁 𑀦𑀸𑀫 𑀦 𑀇𑀤𑀸𑀦𑀺𑀬𑁂𑀯 𑀳𑁄𑀢𑀺, 𑀅𑀦𑀸𑀕𑀢𑁂𑀧𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀪𑀺𑀓𑁆𑀔𑀽 𑀢𑀸𑀤𑀺𑀲𑀁 𑀇𑀤𑁆𑀥𑀺𑀫𑀦𑁆𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀓𑀼𑀢𑁄 𑀮𑀪𑀺𑀲𑁆𑀲𑀦𑁆𑀢𑀺? 𑀢𑁂 𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀲𑀼𑀓𑁆𑀔𑀯𑀺𑀧𑀲𑁆𑀲𑀓-𑀛𑀸𑀦𑀮𑀸𑀪𑀺-𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀸𑀧𑀺 𑀲𑀫𑀸𑀦𑀸 𑀇𑀤𑁆𑀥𑀺𑀩𑀮𑀸𑀪𑀸𑀯𑀸 𑀧𑀭𑀓𑀼𑀮𑀸𑀦𑀺 𑀧𑀺𑀡𑁆𑀟𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺. 𑀢𑀢𑁆𑀭 𑀫𑀦𑀼𑀲𑁆𑀲𑀸𑀦𑀁 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘‘𑀩𑀼𑀤𑁆𑀥𑀓𑀸𑀮𑁂 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀳𑁂𑀲𑀼𑀁. 𑀢𑁂 𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀇𑀤𑀸𑀦𑀺 𑀧𑀦 𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀼𑀁, 𑀢𑀣𑁂𑀯 𑀓𑀭𑁂𑀬𑁆𑀬𑀼𑀁. 𑀦 𑀅𑀫𑁆𑀳𑀸𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀓𑁆𑀓𑀁 𑀯𑀸 𑀆𑀫𑀁 𑀯𑀸 𑀔𑀸𑀤𑀺𑀢𑀼𑀁 𑀤𑀤𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀁 𑀢𑁂𑀲𑀼𑀬𑁂𑀯 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 ‘‘𑀦𑀢𑁆𑀣𑀺 𑀅𑀭𑀺𑀬𑀧𑀼𑀕𑁆𑀕𑀮𑀸’’𑀢𑀺 𑀇𑀫𑀁 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀁. 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀘 𑀅𑀭𑀺𑀬𑁂 𑀕𑀭𑀳𑀦𑁆𑀢𑀸 𑀉𑀧𑀯𑀤𑀦𑁆𑀢𑀸 𑀅𑀧𑀸𑀬𑀼𑀧𑀕𑀸 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀫𑀸 𑀢𑁂 𑀭𑀼𑀘𑁆𑀘𑀺 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺.

𑀅𑀣 𑀣𑁂𑀭𑁄 𑀇𑀫𑀁 𑀬𑀸𑀘𑀦𑀁 𑀅𑀮𑀪𑀫𑀸𑀦𑁄 𑀅𑀜𑁆𑀜𑀁 𑀬𑀸𑀘𑀦𑁆𑀢𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀫𑁆𑀧𑀺𑀲𑁆𑀲 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀅𑀮𑀁 ¶ 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁; 𑀅𑀢𑁆𑀣𑁄𑀧𑀺 𑀘𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀧𑀦 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀣𑁂𑀭𑁄 𑀓𑀺𑀁 𑀓𑀭𑁂𑀬𑁆𑀬𑀸𑀢𑀺? 𑀫𑀳𑀸𑀲𑀫𑀼𑀤𑁆𑀤𑀁 𑀏𑀓𑁂𑀦 ¶ 𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀫𑀸𑀢𑀺𑀓𑀸𑀫𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀢𑁄 𑀉𑀢𑁆𑀢𑀭𑀓𑀼𑀭𑀼𑀅𑀪𑀺𑀫𑀼𑀔𑀁 𑀫𑀕𑁆𑀕𑀁 𑀦𑀻𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀓𑀢𑁆𑀯𑀸 𑀤𑀲𑁆𑀲𑁂𑀬𑁆𑀬, 𑀬𑀣𑀸 𑀪𑀺𑀓𑁆𑀔𑀽 𑀕𑁄𑀘𑀭𑀕𑀸𑀫𑀁 𑀯𑀺𑀬 𑀬𑀣𑀸𑀲𑀼𑀔𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑁂𑀬𑁆𑀬𑀼𑀦𑁆𑀢𑀺.

𑀦𑀺𑀝𑁆𑀞𑀺𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀻𑀳𑀦𑀸𑀤𑀓𑀣𑀸.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁧𑁮. 𑀇𑀤𑀸𑀦𑀺 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀫𑀽𑀮𑀢𑁄 𑀧𑀪𑀼𑀢𑀺 𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀲𑀮𑁆𑀮𑀻𑀦𑀲𑁆𑀲 𑀏𑀓𑀻𑀪𑀸𑀯𑀁 𑀕𑀢𑀲𑁆𑀲. 𑀓𑀢𑀫𑁂𑀲𑀸𑀦𑀦𑁆𑀢𑀺 𑀅𑀢𑀻𑀢𑁂𑀲𑀼 𑀯𑀺𑀧𑀲𑁆𑀲𑀻𑀆𑀤𑀻𑀲𑀼 𑀩𑀼𑀤𑁆𑀥𑁂𑀲𑀼 𑀓𑀢𑀫𑁂𑀲𑀁. 𑀘𑀺𑀭𑀁 𑀅𑀲𑁆𑀲 𑀞𑀺𑀢𑀺, 𑀘𑀺𑀭𑀸 𑀯𑀸 𑀅𑀲𑁆𑀲 𑀞𑀺𑀢𑀻𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯.

𑀓𑀺𑀁 𑀧𑀦 𑀣𑁂𑀭𑁄 𑀇𑀫𑀁 𑀅𑀢𑁆𑀢𑀦𑁄 𑀧𑀭𑀺𑀯𑀺𑀢𑀓𑁆𑀓𑀁 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀓𑁆𑀓𑁄𑀢𑀺 𑀘 𑀦 𑀲𑀓𑁆𑀓𑁄𑀢𑀺 𑀘. 𑀅𑀬𑀜𑁆𑀳𑀺 𑀇𑀫𑁂𑀲𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀇𑀫𑁂𑀲𑀁 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀏𑀢𑁆𑀢𑀓𑀁 𑀲𑀓𑁆𑀓𑁄𑀢𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁. 𑀇𑀫𑀺𑀦𑀸 𑀧𑀦 𑀓𑀸𑀭𑀡𑁂𑀦 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀇𑀫𑀺𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀏𑀢𑀁 𑀦 𑀲𑀓𑁆𑀓𑁄𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀏𑀢𑀫𑁆𑀧𑀺 𑀲𑁄𑀴𑀲𑀯𑀺𑀥𑀸𑀬 𑀧𑀜𑁆𑀜𑀸𑀬 𑀫𑀢𑁆𑀣𑀓𑀁 𑀧𑀢𑁆𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀦 𑀪𑀸𑀭𑀺𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀬𑀁 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀢𑀼𑀮𑀁 𑀙𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑁂𑀦 𑀢𑀼𑀮𑀦𑀲𑀤𑀺𑀲𑀁 𑀳𑁄𑀢𑀻𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀪𑀕𑀯𑀢𑁄 𑀘 𑀲𑀸𑀭𑀺𑀧𑀼𑀢𑁆𑀢 𑀯𑀺𑀧𑀲𑁆𑀲𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁯. 𑀧𑀼𑀦 𑀣𑁂𑀭𑁄 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄 𑀦𑀼 𑀔𑁄 𑀪𑀦𑁆𑀢𑁂𑀢𑀺 𑀓𑀸𑀭𑀡𑀧𑀼𑀘𑁆𑀙𑀸 ¶ , 𑀢𑀲𑁆𑀲 𑀓𑀢𑀫𑁄 𑀦𑀼 𑀔𑁄 𑀪𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀳𑁂𑀢𑀼 𑀧𑀘𑁆𑀘𑀬𑁄𑀢𑀺 𑀉𑀪𑀬𑀫𑁂𑀢𑀁 𑀓𑀸𑀭𑀡𑀸𑀥𑀺𑀯𑀘𑀦𑀁; 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑁂𑀦 𑀢𑀲𑁆𑀲 𑀨𑀮𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀧𑀝𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀅𑀢𑁆𑀣𑀢𑁄 𑀏𑀓𑀫𑁆𑀧𑀺 𑀯𑁄𑀳𑀸𑀭𑀯𑀲𑁂𑀦 𑀘 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀘 𑀢𑀢𑁆𑀭 𑀢𑀢𑁆𑀭 𑀏𑀢𑀁 𑀉𑀪𑀬𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀤𑀸𑀦𑀺 ¶ 𑀢𑀁 𑀳𑁂𑀢𑀼𑀜𑁆𑀘 𑀧𑀘𑁆𑀘𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀘 𑀲𑀸𑀭𑀺𑀧𑀼𑀢𑁆𑀢 𑀯𑀺𑀧𑀲𑁆𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀦𑁆𑀢𑀺 𑀦 𑀆𑀮𑀲𑀺𑀬𑀓𑀺𑀮𑀸𑀲𑀼𑀦𑁄, 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀆𑀮𑀲𑀺𑀬𑀁 𑀯𑀸 𑀑𑀲𑀦𑁆𑀦𑀯𑀻𑀭𑀺𑀬𑀢𑀸 𑀯𑀸 𑀅𑀢𑁆𑀣𑀺. 𑀩𑀼𑀤𑁆𑀥𑀸 𑀳𑀺 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀲𑁆𑀲 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀲𑀫𑀓𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀦 𑀧𑀭𑀺𑀲𑀸𑀬 𑀅𑀧𑁆𑀧𑀪𑀸𑀯𑀁 𑀤𑀺𑀲𑁆𑀯𑀸 𑀑𑀲𑀦𑁆𑀦𑀯𑀻𑀭𑀺𑀬𑀸 𑀳𑁄𑀦𑁆𑀢𑀺, 𑀦𑀸𑀧𑀺 𑀫𑀳𑀦𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀉𑀲𑁆𑀲𑀦𑁆𑀦𑀯𑀻𑀭𑀺𑀬𑀸. 𑀬𑀣𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑁄 𑀔𑀼𑀤𑁆𑀤𑀓𑁂 𑀯𑀸 𑀫𑀳𑀦𑁆𑀢𑁂 𑀯𑀸 ¶ 𑀧𑀸𑀡𑁂 𑀏𑀓𑀲𑀤𑀺𑀲𑁂𑀦𑁂𑀯 𑀯𑁂𑀕𑁂𑀦 𑀥𑀸𑀯𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘‘𑀫𑀸 𑀫𑁂 𑀚𑀯𑁄 𑀧𑀭𑀺𑀳𑀸𑀬𑀻’’𑀢𑀺. 𑀏𑀯𑀁 𑀩𑀼𑀤𑁆𑀥𑀸 𑀅𑀧𑁆𑀧𑀓𑀸𑀬 𑀯𑀸 𑀫𑀳𑀢𑀺𑀬𑀸 𑀯𑀸 𑀧𑀭𑀺𑀲𑀸𑀬 𑀲𑀫𑀓𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘‘𑀫𑀸 𑀦𑁄 𑀥𑀫𑁆𑀫𑀕𑀭𑀼𑀢𑀸 𑀧𑀭𑀺𑀳𑀸𑀬𑀻’’𑀢𑀺. 𑀥𑀫𑁆𑀫𑀕𑀭𑀼𑀦𑁄 𑀳𑀺 𑀩𑀼𑀤𑁆𑀥𑀸 𑀥𑀫𑁆𑀫𑀕𑀸𑀭𑀯𑀸𑀢𑀺.

𑀬𑀣𑀸 𑀧𑀦 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀏𑀯𑀁 𑀢𑁂 𑀦 𑀤𑁂𑀲𑁂𑀲𑀼𑀁. 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀅𑀧𑁆𑀧𑀭𑀚𑀓𑁆𑀔𑀢𑀸𑀬. 𑀢𑁂𑀲𑀁 𑀓𑀺𑀭 𑀓𑀸𑀮𑁂 𑀤𑀻𑀖𑀸𑀬𑀼𑀓𑀸 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀸 𑀅𑀳𑁂𑀲𑀼𑀁. 𑀢𑁂 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀏𑀓𑀕𑀸𑀣𑀫𑁆𑀧𑀺 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀼𑀁. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀧𑁆𑀧𑀓𑀜𑁆𑀘 𑀦𑁂𑀲𑀁 𑀅𑀳𑁄𑀲𑀺 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀦𑁆𑀢𑀺. 𑀢𑀢𑁆𑀣 𑀲𑀼𑀢𑁆𑀢𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑀧𑀞𑀫𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀅𑀧𑀜𑁆𑀜𑀢𑁆𑀢𑀁 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀸𑀯𑀓𑀸𑀦𑀁 𑀦𑀺𑀤𑁆𑀤𑁄𑀲𑀢𑀸𑀬 𑀤𑁄𑀲𑀸𑀦𑀼𑀭𑀽𑀧𑀢𑁄 𑀧𑀜𑁆𑀜𑀧𑁂𑀢𑀩𑁆𑀩𑀁 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀆𑀡𑀸𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢𑀁. 𑀅𑀦𑀼𑀤𑁆𑀤𑀺𑀝𑁆𑀞𑀁 ¶ 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀅𑀦𑁆𑀯𑀤𑁆𑀥𑀫𑀸𑀲𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀤𑁆𑀤𑀺𑀝𑁆𑀞𑀁 𑀅𑀳𑁄𑀲𑀺. 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀢𑁂 𑀉𑀤𑁆𑀤𑀺𑀲𑀺𑀁𑀲𑀼; 𑀢𑀫𑁆𑀧𑀺 𑀘 𑀦𑁄 𑀅𑀦𑁆𑀯𑀤𑁆𑀥𑀫𑀸𑀲𑀁. 𑀢𑀣𑀸 𑀳𑀺 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀲𑀓𑀺𑀁 𑀲𑀓𑀺𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺; 𑀢𑀜𑁆𑀘 𑀔𑁄 𑀲𑀸𑀫𑀁𑀬𑁂𑀯. 𑀲𑀸𑀯𑀓𑀸 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀲𑀼 𑀦 𑀉𑀤𑁆𑀤𑀺𑀲𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑁂 𑀲𑀩𑁆𑀩𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀜𑁆𑀘 𑀔𑁄 𑀲𑀗𑁆𑀖𑀼𑀧𑁄𑀲𑀣𑀫𑁂𑀯; 𑀦 𑀕𑀡𑀼𑀧𑁄𑀲𑀣𑀁, 𑀦 𑀧𑀼𑀕𑁆𑀕𑀮𑀼𑀧𑁄𑀲𑀣𑀁, 𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁, 𑀦 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁.

𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀫𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀺, 𑀪𑀺𑀬𑁆𑀬𑁄𑀧𑀺 𑀯𑀲𑀦𑁆𑀢𑀺. 𑀉𑀧𑁄𑀲𑀣𑀸𑀭𑁄𑀘𑀺𑀓𑀸 𑀤𑁂𑀯𑀢𑀸 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀫𑀸𑀭𑀺𑀲𑀸, 𑀏𑀓𑀁 𑀯𑀲𑁆𑀲𑀁 𑀅𑀢𑀺𑀓𑁆𑀓𑀦𑁆𑀢𑀁, 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀇𑀤𑀁 𑀙𑀝𑁆𑀞𑀁 𑀯𑀲𑁆𑀲𑀁, 𑀆𑀕𑀸𑀫𑀺𑀦𑀺𑀬𑀸 𑀧𑀼𑀡𑁆𑀡𑀫𑀸𑀲𑀺𑀬𑀸 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀉𑀧𑁄𑀲𑀣𑀓𑀭𑀡𑀢𑁆𑀣𑀜𑁆𑀘 𑀕𑀦𑁆𑀢𑀩𑁆𑀩𑀁! 𑀲𑀫𑁆𑀧𑀢𑁆𑀢𑁄 𑀯𑁄 𑀲𑀦𑁆𑀦𑀺𑀧𑀸𑀢𑀓𑀸𑀮𑁄’’𑀢𑀺. 𑀢𑀢𑁄 ¶ 𑀲𑀸𑀦𑀼𑀪𑀸𑀯𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀕𑀘𑁆𑀙𑀦𑁆𑀢𑀺, 𑀇𑀢𑀭𑁂 𑀤𑁂𑀯𑀢𑀸𑀦𑀼𑀪𑀸𑀯𑁂𑀦. 𑀓𑀣𑀁? 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀧𑀸𑀘𑀻𑀦𑀲𑀫𑀼𑀤𑁆𑀤𑀦𑁆𑀢𑁂 𑀯𑀸 𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀦𑁆𑀢𑁂 𑀯𑀸 𑀞𑀺𑀢𑀸 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀕𑀘𑁆𑀙𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺; 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀉𑀧𑁄𑀲𑀣𑀕𑁆𑀕𑀁 𑀕𑀢𑀸𑀯 ¶ 𑀳𑁄𑀦𑁆𑀢𑀺. 𑀢𑁂 𑀯𑀺𑀧𑀲𑁆𑀲𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀸𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑀸𑀬 𑀧𑀭𑀺𑀲𑀸𑀬 𑀇𑀫𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺.

‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸;

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻;

𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀅𑀦𑀼𑀧𑀯𑀸𑀤𑁄 ¶ 𑀅𑀦𑀼𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫);

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑀭𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀇𑀫𑀸 𑀢𑀺𑀲𑁆𑀲𑁄𑀯 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀕𑀸𑀣𑀸𑀬𑁄 𑀳𑁄𑀦𑁆𑀢𑀺. 𑀢𑀸 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀬𑀸𑀯 𑀲𑀸𑀲𑀦𑀧𑀭𑀺𑀬𑀦𑁆𑀢𑀸 𑀉𑀤𑁆𑀤𑁂𑀲𑀫𑀸𑀕𑀘𑁆𑀙𑀦𑁆𑀢𑀺; 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀞𑀫𑀩𑁄𑀥𑀺𑀬𑀁𑀬𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑀢𑁄 𑀧𑀦 𑀧𑀪𑀼𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀉𑀤𑁆𑀤𑀺𑀲𑀻𑀬𑀢𑀺. 𑀢𑀜𑁆𑀘 𑀔𑁄 𑀪𑀺𑀓𑁆𑀔𑀽 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸. 𑀢𑀲𑁆𑀫𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀫𑀢𑁆𑀢𑀫𑁂𑀯 𑀇𑀤𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦 𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂𑀯 𑀤𑀸𑀦𑀺 𑀪𑀺𑀓𑁆𑀔𑀯𑁂 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁮𑁬). 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀇𑀤𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁 𑀅𑀦𑀼𑀤𑁆𑀤𑀺𑀝𑁆𑀞𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀤𑁆𑀤𑀺𑀝𑁆𑀞𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺.

𑀢𑁂𑀲𑀁 ¶ 𑀩𑀼𑀤𑁆𑀥𑀸𑀦𑀦𑁆𑀢𑀺 𑀢𑁂𑀲𑀁 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁. 𑀅𑀦𑁆𑀢𑀭𑀥𑀸𑀦𑁂𑀦𑀸𑀢𑀺 𑀔𑀦𑁆𑀥𑀦𑁆𑀢𑀭𑀥𑀸𑀦𑁂𑀦; 𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀦𑁆𑀢𑀺 𑀬𑁂 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑀸 𑀲𑀫𑁆𑀫𑀼𑀔𑀲𑀸𑀯𑀓𑀸 𑀢𑁂𑀲𑀜𑁆𑀘 𑀔𑀦𑁆𑀥𑀦𑁆𑀢𑀭𑀥𑀸𑀦𑁂𑀦. 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸𑀢𑀺 ¶ 𑀬𑁂 𑀢𑁂𑀲𑀁 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸. 𑀦𑀸𑀦𑀸𑀦𑀸𑀫𑀸𑀢𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄, 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺𑀆𑀤𑀺 𑀦𑀸𑀫𑀯𑀲𑁂𑀦 𑀯𑀺𑀯𑀺𑀥𑀦𑀸𑀫𑀸. 𑀦𑀸𑀦𑀸𑀕𑁄𑀢𑁆𑀢𑀸𑀢𑀺 ‘‘𑀕𑁄𑀢𑀫𑁄, 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺𑀆𑀤𑀺 𑀕𑁄𑀢𑁆𑀢𑀯𑀲𑁂𑀦 𑀯𑀺𑀯𑀺𑀥𑀕𑁄𑀢𑁆𑀢𑀸. 𑀦𑀸𑀦𑀸𑀚𑀘𑁆𑀘𑀸𑀢𑀺 ‘‘𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀚𑀸𑀢𑀺𑀯𑀲𑁂𑀦 𑀦𑀸𑀦𑀸𑀚𑀘𑁆𑀘𑀸. 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀯𑀲𑁂 𑀦𑁂𑀯 𑀉𑀘𑁆𑀘𑀦𑀻𑀘𑀉𑀴𑀸𑀭𑀼𑀴𑀸𑀭𑀪𑁄𑀕𑀸𑀤𑀺𑀓𑀼𑀮𑀯𑀲𑁂𑀦 𑀯𑀸 𑀯𑀺𑀯𑀺𑀥𑀓𑀼𑀮𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑀸.

𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 ¶ 𑀬𑀲𑁆𑀫𑀸 𑀏𑀓𑀦𑀸𑀫𑀸 𑀏𑀓𑀕𑁄𑀢𑁆𑀢𑀸 𑀏𑀓𑀚𑀸𑀢𑀺𑀓𑀸 𑀏𑀓𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀢𑀦𑁆𑀢𑀺 𑀧𑀯𑁂𑀡𑀻’’𑀢𑀺 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀭𑀓𑁆𑀔𑀦𑁆𑀢𑀺, 𑀘𑀺𑀭𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀭𑀺𑀳𑀭𑀦𑁆𑀢𑀺. 𑀇𑀫𑁂 𑀘 𑀢𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀳𑁂𑀞𑁂𑀦𑁆𑀢𑀸 𑀯𑀺𑀮𑁄𑀫𑀁 𑀕𑀡𑁆𑀳𑀦𑁆𑀢𑀸 ‘‘𑀅𑀲𑀼𑀓𑁄 𑀣𑁂𑀭𑁄 𑀚𑀸𑀦𑀺𑀲𑁆𑀲𑀢𑀺, 𑀅𑀲𑀼𑀓𑁄 𑀣𑁂𑀭𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀸 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀦𑁆𑀢𑀭𑀥𑀸𑀧𑁂𑀲𑀼𑀁, 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀭𑀓𑁆𑀔𑀺𑀁𑀲𑀼. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀢𑀲𑁆𑀲𑀢𑁆𑀣𑀲𑁆𑀲 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀁. 𑀯𑀺𑀓𑀺𑀭𑀢𑀻𑀢𑀺 𑀯𑀺𑀓𑁆𑀔𑀺𑀧𑀢𑀺. 𑀯𑀺𑀥𑀫𑀢𑀻𑀢𑀺 𑀞𑀸𑀦𑀦𑁆𑀢𑀭𑀁 𑀦𑁂𑀢𑀺. 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀢𑀺. 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀬𑀣𑀸 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀕𑀦𑁆𑀣𑀺𑀢𑀢𑁆𑀢𑀸 𑀅𑀩𑀤𑁆𑀥𑀢𑁆𑀢𑀸 𑀏𑀯𑀁 𑀯𑀺𑀓𑀺𑀭𑀢𑀺 𑀬𑀣𑀸 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀏𑀯𑀁 𑀯𑀺𑀓𑀺𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀅𑀦𑁆𑀢𑀭𑀥𑀸𑀧𑁂𑀲𑀼𑀦𑁆𑀢𑀺 𑀯𑀕𑁆𑀕𑀲𑀗𑁆𑀕𑀳-𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀻𑀳𑀺 𑀅𑀲𑀗𑁆𑀕𑀡𑁆𑀳𑀦𑁆𑀢𑀸 𑀬𑀁 𑀬𑀁 𑀅𑀢𑁆𑀢𑀦𑁄 𑀭𑀼𑀘𑁆𑀘𑀢𑀺, 𑀢𑀁 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀲𑁂𑀲𑀁 𑀯𑀺𑀦𑀸𑀲𑁂𑀲𑀼𑀁 𑀅𑀤𑀲𑁆𑀲𑀦𑀁 𑀦𑀬𑀺𑀁𑀲𑀼.

𑀅𑀓𑀺𑀮𑀸𑀲𑀼𑀦𑁄 𑀘 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀲𑀸𑀯𑀓𑁂 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀑𑀯𑀤𑀺𑀢𑀼𑀦𑁆𑀢𑀺 𑀅𑀧𑀺𑀘 𑀲𑀸𑀭𑀺𑀧𑀼𑀢𑁆𑀢 𑀢𑁂 𑀩𑀼𑀤𑁆𑀥𑀸 𑀅𑀢𑁆𑀢𑀦𑁄 𑀘𑁂𑀢𑀲𑀸 𑀲𑀸𑀯𑀓𑀸𑀦𑀁 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀑𑀯𑀤𑀺𑀢𑀼𑀁 𑀅𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁, 𑀧𑀭𑀘𑀺𑀢𑁆𑀢𑀁 𑀜𑀢𑁆𑀯𑀸 𑀅𑀦𑀼𑀲𑀸𑀲𑀦𑀺𑀁 𑀦 𑀪𑀸𑀭𑀺𑀬𑀢𑁄 𑀦 𑀧𑀧𑀜𑁆𑀘𑀢𑁄 𑀅𑀤𑁆𑀤𑀲𑀁𑀲𑀼. 𑀪𑀽𑀢𑀧𑀼𑀩𑁆𑀩𑀁 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺 𑀢𑁂𑀲𑀁 𑀅𑀓𑀺𑀮𑀸𑀲𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀺𑀁𑀲𑀦𑀓𑁂𑀢𑀺 𑀪𑀬𑀸𑀦𑀓𑁂 𑀪𑀬𑀚𑀦𑀦𑀓𑁂. 𑀏𑀯𑀁 𑀯𑀺𑀢𑀓𑁆𑀓𑁂𑀣𑀸𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀣. 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑁂 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀏𑀯𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀣. 𑀫𑀸 𑀏𑀯𑀁 𑀫𑀦𑀲𑀸 ¶ 𑀓𑀢𑁆𑀣𑀸𑀢𑀺 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀫𑀸 𑀫𑀦𑀲𑀺 𑀅𑀓𑀭𑀺𑀢𑁆𑀣. 𑀇𑀤𑀁 𑀧𑀚𑀳𑀣𑀸𑀢𑀺 𑀅𑀓𑀼𑀲𑀮𑀁 𑀧𑀚𑀳𑀣. 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸𑀢𑀺 𑀓𑀼𑀲𑀮𑀁 𑀉𑀧𑀲𑀫𑁆𑀧𑀚𑁆𑀚 𑀧𑀝𑀺𑀮𑀪𑀺𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀯𑀺𑀳𑀭𑀣.

𑀅𑀦𑀼𑀧𑀸𑀤𑀸𑀬 ¶ ¶ 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀲𑀜𑁆𑀳𑀺 𑀘𑀺𑀢𑁆𑀢𑀸𑀦𑀺 𑀬𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀺𑀁𑀲𑀼, 𑀦 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀧𑀦 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽’’𑀢𑀺. 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀼𑀝𑁆𑀞𑀫𑀺𑀯 𑀧𑀤𑀼𑀫𑀯𑀦𑀁 𑀯𑀺𑀓𑀲𑀺𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀢𑁆𑀭 𑀲𑀼𑀤𑀁 𑀲𑀸𑀭𑀺𑀧𑀼𑀢𑁆𑀢 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀻𑀢𑀺 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁; 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄; 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀮𑀧𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀢𑀢𑁆𑀭𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 𑀯𑀦𑀲𑀡𑁆𑀟𑁂’’𑀢𑀺, 𑀢𑀢𑁆𑀭 𑀬𑁄 𑀲𑁄 𑀪𑀺𑀁𑀲𑀦𑀓𑁄𑀢𑀺 𑀯𑀦𑀲𑀡𑁆𑀟𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀺, 𑀪𑀺𑀁𑀲𑀦𑀓𑀺𑀭𑀺𑀬𑀸𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀳𑁄𑀢𑀺? 𑀇𑀤𑀁 𑀳𑁄𑀢𑀺 𑁋 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄…𑀧𑁂… 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺.

𑀅𑀣 𑀯𑀸 𑀢𑀢𑁆𑀭𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀁. 𑀲𑀼𑀇𑀢𑀺 𑀦𑀺𑀧𑀸𑀢𑁄; ‘‘𑀓𑀺𑀁 𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁯) 𑀯𑀺𑀬. 𑀇𑀤𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀦𑀯𑀘𑀦𑀁. 𑀲𑀼𑀇𑀤𑀦𑁆𑀢𑀺 𑀲𑀼𑀤𑀁, 𑀲𑀦𑁆𑀥𑀺𑀯𑀲𑁂𑀦 𑀇𑀓𑀸𑀭𑀮𑁄𑀧𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 (𑀯𑀺𑀪. 𑁨𑁧𑁯), ‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁩) 𑀯𑀺𑀬. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀢𑀲𑁆𑀲 𑀲𑀸𑀭𑀺𑀧𑀼𑀢𑁆𑀢 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀇𑀤𑀁𑀲𑀼 𑀳𑁄𑀢𑀺. 𑀪𑀺𑀁𑀲𑀦𑀓𑀢𑀲𑁆𑀫𑀺𑀦𑁆𑀢𑀺 𑀪𑀺𑀁𑀲𑀦𑀓𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀢𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀁𑀲𑀦𑀓𑀢𑁆𑀢𑀲𑁆𑀫𑀺𑀦𑁆𑀢𑀺𑀬𑁂𑀯 𑀯𑀸 𑀧𑀸𑀞𑁄. ‘‘𑀪𑀺𑀁𑀲𑀦𑀓𑀢𑀸𑀬’’ 𑀇𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀪𑀺𑀁𑀲𑀦𑀓𑀪𑀸𑀯𑁂 𑀇𑀤𑀁𑀲𑀼 𑀳𑁄𑀢𑀺, 𑀪𑀺𑀁𑀲𑀦𑀓𑀪𑀸𑀯𑀦𑀺𑀫𑀺𑀢𑁆𑀢𑀁 𑀪𑀺𑀁𑀲𑀦𑀓𑀪𑀸𑀯𑀳𑁂𑀢𑀼 𑀪𑀺𑀁𑀲𑀦𑀓𑀪𑀸𑀯𑀧𑀘𑁆𑀘𑀬𑀸 𑀇𑀤𑀁𑀲𑀼 𑀳𑁄𑀢𑀺. 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺 𑀩𑀳𑀼𑀢𑀭𑀸𑀦𑀺 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺 𑀉𑀤𑁆𑀥𑀁 𑀫𑀼𑀔𑀸𑀦𑀺 𑀲𑀽𑀘𑀺𑀲𑀤𑀺𑀲𑀸𑀦𑀺 𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀘 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀧𑁆𑀧𑀸𑀦𑀺 𑀦 𑀳𑀁𑀲𑀦𑁆𑀢𑀺. 𑀩𑀳𑀼𑀢𑀭𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀳𑀁𑀲𑀦𑁆𑀢𑀺. 𑀅𑀧𑁆𑀧𑀓𑀸𑀦𑀁 𑀅𑀢𑀺𑀲𑀽𑀭𑀧𑀼𑀭𑀺𑀲𑀸𑀦𑀁 𑀦 𑀳𑀁𑀲𑀦𑁆𑀢𑀺.

𑀇𑀤𑀸𑀦𑀺 ¶ ¶ 𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀽𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀜𑁆𑀘𑁂𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑀲𑁆𑀫𑀸 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀯𑀼𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻𑀢𑀺, 𑀢𑀁 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀲𑁆𑀲𑀕𑀡𑀦𑀸𑀬 𑀳𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀏𑀯𑀫𑀲𑁆𑀲 𑀬𑁆𑀯𑀸𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑀸𑀯𑀓𑁄, 𑀢𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀅𑀝𑁆𑀞𑀸𑀲𑀺. 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀧𑀦 𑀬𑀼𑀕𑀧𑀭𑀫𑁆𑀧𑀭𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀸 𑀦 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀺𑀔𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼. 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼. 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀏𑀯𑀁 𑀢𑁂𑀲𑀫𑁆𑀧𑀺 𑀬𑁂 𑀲𑀩𑁆𑀩𑀧𑀘𑁆𑀙𑀺𑀫𑀓𑀸 𑀲𑀸𑀯𑀓𑀸 𑀢𑁂𑀳𑀺 𑀲𑀳 𑀖𑀝𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀺 𑀯𑀻𑀲𑀢𑀺𑀫𑀢𑁆𑀢𑀸𑀦𑀺 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀝𑁆𑀞𑀸𑀲𑀺. 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀧𑀦 𑀬𑀼𑀕𑀧𑀭𑀫𑁆𑀧𑀭𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑁂 𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀸 𑀦 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁦. 𑀏𑀯𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑀼𑀢𑁆𑀯𑀸 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑁄𑀢𑀼𑀓𑀸𑀫𑁄 𑀧𑀼𑀦 𑀪𑀕𑀯𑀦𑁆𑀢𑀁 ‘‘𑀓𑁄 𑀧𑀦 𑀪𑀦𑁆𑀢𑁂 𑀳𑁂𑀢𑀽’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀧𑀼𑀘𑁆𑀙𑀺. 𑀪𑀕𑀯𑀸𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑁂𑀧𑀺 𑀘𑁂𑀢𑁆𑀣 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀆𑀬𑀼𑀧𑀭𑀺𑀫𑀸𑀡𑀢𑁄𑀧𑀺 𑀧𑀼𑀭𑀺𑀲𑀬𑀼𑀕𑀢𑁄𑀧𑀺 𑀉𑀪𑀬𑀣𑀸 𑀘𑀺𑀭𑀝𑁆𑀞𑀺𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀓𑀼𑀲𑀦𑁆𑀥𑀲𑁆𑀲 𑀳𑀺 𑀪𑀕𑀯𑀢𑁄 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺; 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺 𑀦𑁂𑀲𑀁 𑀢𑀢𑁆𑀢𑀓𑀫𑁂𑀯. 𑀩𑀳𑀽𑀦𑀺 𑀘 𑀦𑁂𑀲𑀁 𑀲𑀸𑀯𑀓𑀬𑀼𑀕𑀸𑀦𑀺 𑀧𑀭𑀫𑁆𑀧𑀭𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀯𑀁 𑀢𑁂𑀲𑀁 𑀆𑀬𑀼𑀧𑀭𑀺𑀫𑀸𑀡𑀢𑁄𑀧𑀺 𑀲𑀸𑀯𑀓𑀬𑀼𑀕𑀢𑁄𑀧𑀺 𑀉𑀪𑀬𑀣𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺.

𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀉𑀧𑀟𑁆𑀠𑀸𑀬𑀼𑀓𑀧𑁆𑀧𑀫𑀸𑀡𑁂 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 ¶ 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀅𑀲𑀫𑁆𑀪𑀼𑀡𑀦𑁆𑀢𑁂𑀦 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂, 𑀏𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂, 𑀧𑀜𑁆𑀘𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂𑀧𑀺 𑀯𑀸 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦𑀲𑁆𑀲 𑀩𑀼𑀤𑁆𑀥𑀢𑁆𑀢𑀓𑀸𑀭𑀓𑁂 𑀥𑀫𑁆𑀫𑁂 𑀏𑀲𑀦𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀘𑁂𑀦𑁆𑀢𑀲𑁆𑀲 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 ¶ 𑀜𑀸𑀡𑀁 𑀧𑀭𑀺𑀧𑀸𑀓𑀫𑀕𑀫𑀸𑀲𑀺. 𑀢𑀲𑁆𑀫𑀸 𑀅𑀢𑀺𑀧𑀭𑀺𑀢𑁆𑀢𑀸𑀬𑀼𑀓𑀓𑀸𑀮𑁂 𑀉𑀧𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 𑀲𑀸𑀯𑀓𑀧𑀭𑀫𑁆𑀧𑀭𑀸𑀯𑀲𑁂𑀦 𑀘𑀺𑀭𑀝𑁆𑀞𑀺𑀢𑀺𑀓𑀫𑁆𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀬𑀼𑀧𑀭𑀺𑀫𑀸𑀡𑀯𑀲𑁂𑀦 𑀯𑀲𑁆𑀲𑀕𑀡𑀦𑀸𑀬 𑀦𑀘𑀺𑀭𑀝𑁆𑀞𑀺𑀢𑀺𑀓𑀫𑁂𑀯𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁨𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀏𑀯𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑀼𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑁂𑀯 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀳𑁂𑀢𑀽𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀬𑀸𑀘𑀺. 𑀢𑀲𑁆𑀲𑀸 𑀬𑀸𑀘𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 ¶ …𑀧𑁂… 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺. 𑀢𑀢𑁆𑀣 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀓𑁆𑀔𑀫𑀁; 𑀤𑀻𑀖𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀣𑀲𑁆𑀲 𑀪𑀕𑀯𑀸 ‘‘𑀦 𑀢𑀸𑀯𑀸𑀬𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑁄’’𑀢𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀕𑀫𑁂𑀳𑀺 𑀢𑁆𑀯𑀦𑁆𑀢𑀺 𑀢𑀺𑀝𑁆𑀞 𑀢𑀸𑀯 𑀢𑁆𑀯𑀁; 𑀅𑀥𑀺𑀯𑀸𑀲𑁂𑀳𑀺 𑀢𑀸𑀯 𑀢𑁆𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀭𑀢𑁆𑀣𑀯𑀲𑁂𑀦𑁂𑀯𑁂𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀯𑀓𑀸𑀦𑀁 𑀯𑀺𑀲𑀬𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀩𑀼𑀤𑁆𑀥𑀯𑀺𑀲𑀬𑁄𑀯 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀻’’𑀢𑀺 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀢𑀣𑀸𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀢𑀢𑁆𑀣𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀁 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺, 𑀢𑀢𑁆𑀣 𑀢𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀢𑀣𑀸𑀕𑀢𑁄𑀬𑁂𑀯 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀯𑀢𑁆𑀯𑀸 𑀅𑀓𑀸𑀮𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀲𑀽𑀢𑀺 𑀆𑀲𑀯𑀝𑁆𑀞𑀸𑀦𑀻𑀬𑀸. 𑀬𑁂𑀲𑀼 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀤𑀼𑀓𑁆𑀔𑀸𑀲𑀯𑀸 𑀓𑀺𑀮𑁂𑀲𑀸𑀲𑀯𑀸 𑀘 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀦𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀯𑀺𑀲𑁂𑀲𑀪𑀽𑀢𑀸 𑀘 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺𑀬𑁂𑀯, 𑀬𑀲𑁆𑀫𑀸 𑀦𑁂𑀲𑀁 ¶ 𑀢𑁂 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸 𑀬𑀸𑀯 𑀦 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀢𑀸𑀯 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. 𑀬𑀤𑀺 𑀳𑀺 𑀧𑀜𑁆𑀜𑀧𑁂𑀬𑁆𑀬, 𑀧𑀭𑀽𑀧𑀯𑀸𑀤𑀸 𑀧𑀭𑀽𑀧𑀸𑀭𑀫𑁆𑀪𑀸 𑀕𑀭𑀳𑀤𑁄𑀲𑀸 𑀦 𑀧𑀭𑀺𑀫𑀼𑀘𑁆𑀘𑁂𑀬𑁆𑀬.

𑀓𑀣𑀁? 𑀧𑀜𑁆𑀜𑀧𑁂𑀦𑁆𑀢𑁂𑀦 𑀳𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀅𑀤𑀺𑀲𑁆𑀯𑀸𑀯 𑀯𑀻𑀢𑀺𑀓𑁆𑀓𑀫𑀤𑁄𑀲𑀁 𑀇𑀫𑀁 𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 ¶ 𑀧𑀭𑁂 𑀏𑀯𑀁 𑀉𑀧𑀯𑀸𑀤𑀜𑁆𑀘 𑀉𑀧𑀸𑀭𑀫𑁆𑀪𑀜𑁆𑀘 𑀕𑀭𑀳𑀜𑁆𑀘 𑀧𑀯𑀢𑁆𑀢𑁂𑀬𑁆𑀬𑀼𑀁 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑁄 𑀕𑁄𑀢𑀫𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑁂 𑀅𑀦𑁆𑀯𑀸𑀬𑀺𑀓𑁄 𑀯𑀘𑀦𑀓𑀭𑁄𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀓𑁆𑀔𑀸𑀧𑀤𑁂𑀳𑀺 𑀧𑀮𑀺𑀯𑁂𑀞𑁂𑀲𑁆𑀲𑀢𑀺, 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑁆𑀲𑀢𑀺? 𑀦𑀦𑀼 𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀳𑀢𑁆𑀣𑀕𑀢𑀸𑀦𑀺 𑀘 𑀭𑀚𑁆𑀚𑀸𑀦𑀺𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸, 𑀲𑀺𑀓𑁆𑀔𑀸𑀬 𑀢𑀺𑀩𑁆𑀩𑀕𑀸𑀭𑀯𑀸, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀼 𑀦𑀸𑀫 𑀓𑁄 𑀮𑁄𑀓𑀸𑀫𑀺𑀲𑀪𑀽𑀢𑀁 𑀫𑁂𑀣𑀼𑀦𑀁 𑀯𑀸 𑀧𑀝𑀺𑀲𑁂𑀯𑀺𑀲𑁆𑀲𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀺𑀲𑁆𑀲𑀢𑀺, 𑀧𑀭𑀲𑁆𑀲 𑀯𑀸 𑀇𑀝𑁆𑀞𑀁 𑀓𑀦𑁆𑀢𑀁 𑀅𑀢𑀺𑀫𑀥𑀼𑀭𑀁 𑀚𑀻𑀯𑀺𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀺, 𑀅𑀪𑀽𑀢𑀕𑀼𑀡𑀓𑀣𑀸𑀬 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀲𑁆𑀲𑀢𑀺! 𑀦𑀦𑀼 𑀧𑀸𑀭𑀸𑀚𑀺𑀓𑁂 𑀅𑀧𑀜𑁆𑀜𑀢𑁆𑀢𑁂𑀧𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦𑁂𑀯𑁂𑀢𑀁 𑀧𑀸𑀓𑀝𑀁 𑀓𑀢’’𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀘 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀲𑀢𑁆𑀢𑀸 𑀦 𑀚𑀸𑀦𑁂𑀬𑁆𑀬𑀼𑀁. 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀓𑀼𑀧𑁆𑀧𑁂𑀬𑁆𑀬, 𑀦 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀓𑀼𑀲𑀮𑁄 𑀯𑁂𑀚𑁆𑀚𑁄 𑀓𑀜𑁆𑀘𑀺 𑀅𑀦𑀼𑀧𑁆𑀧𑀦𑁆𑀦𑀕𑀡𑁆𑀟𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀳𑀺 𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀫𑀺𑀁 𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀫𑀳𑀸𑀕𑀡𑁆𑀟𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 ¶ 𑀧𑀸𑀧𑁂𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀦𑀁 𑀢𑀺𑀓𑀺𑀘𑁆𑀙𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀸𑀘𑀭𑀺𑀬, 𑀢𑁆𑀯𑀁𑀬𑁂𑀯 𑀦𑀁 𑀢𑀺𑀓𑀺𑀘𑁆𑀙𑀲𑁆𑀲𑀽’’𑀢𑀺 𑀯𑀼𑀢𑁆𑀢𑁄 𑀢𑀲𑁆𑀲 𑀅𑀭𑁄𑀕𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀨𑀸𑀮𑁂𑀢𑁆𑀯𑀸 𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀆𑀮𑁂𑀧𑀦𑀩𑀦𑁆𑀥𑀦𑀥𑁄𑀯𑀦𑀸𑀤𑀻𑀳𑀺 𑀢𑀁 𑀧𑀤𑁂𑀲𑀁 𑀲𑀜𑁆𑀙𑀯𑀺𑀁 𑀓𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀯𑀤𑁂𑀬𑁆𑀬 𑁋 ‘‘𑀫𑀳𑀸𑀭𑁄𑀕𑁄 𑀢𑁂 𑀫𑀬𑀸 𑀢𑀺𑀓𑀺𑀘𑁆𑀙𑀺𑀢𑁄, 𑀤𑁂𑀳𑀺 𑀫𑁂 𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺. 𑀲𑁄 𑀢𑀁 ‘‘𑀓𑀺𑀫𑀬𑀁 𑀩𑀸𑀮𑀯𑁂𑀚𑁆𑀚𑁄 𑀯𑀤𑀢𑀺? 𑀓𑀢𑀭𑁄 𑀓𑀺𑀭 𑀫𑁂 𑀇𑀫𑀺𑀦𑀸 𑀭𑁄𑀕𑁄 𑀢𑀺𑀓𑀺𑀘𑁆𑀙𑀺𑀢𑁄? 𑀦𑀦𑀼 𑀫𑁂 𑀅𑀬𑀁 𑀤𑀼𑀓𑁆𑀔𑀜𑁆𑀘 𑀚𑀦𑁂𑀢𑀺, 𑀮𑁄𑀳𑀺𑀢𑀓𑁆𑀔𑀬𑀜𑁆𑀘 𑀫𑀁 𑀧𑀸𑀧𑁂𑀢𑀻’’𑀢𑀺 𑀏𑀯𑀁 𑀉𑀧𑀯𑀤𑁂𑀬𑁆𑀬 𑀘𑁂𑀯 𑀉𑀧𑀸𑀭𑀫𑁆𑀪𑁂𑀬𑁆𑀬 ¶ 𑀘 𑀕𑀭𑀳𑁂𑀬𑁆𑀬 𑀘, 𑀦 𑀘𑀲𑁆𑀲 𑀕𑀼𑀡𑀁 𑀚𑀸𑀦𑁂𑀬𑁆𑀬. 𑀏𑀯𑀫𑁂𑀯 𑀬𑀤𑀺 𑀅𑀦𑀼𑀧𑁆𑀧𑀦𑁆𑀦𑁂 𑀯𑀻𑀢𑀺𑀓𑁆𑀓𑀫𑀤𑁄𑀲𑁂 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬, 𑀧𑀭𑀽𑀧𑀯𑀸𑀤𑀸𑀤𑀻𑀳𑀺 𑀘 𑀦 𑀧𑀭𑀺𑀫𑀼𑀘𑁆𑀘𑁂𑀬𑁆𑀬, 𑀦 𑀘𑀲𑁆𑀲 𑀣𑀸𑀫𑀁 𑀯𑀸 𑀩𑀮𑀁 𑀯𑀸 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀓𑀼𑀧𑁆𑀧𑁂𑀬𑁆𑀬, 𑀦 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁…𑀧𑁂… 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺.

𑀏𑀯𑀁 𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀓𑀸𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁄 𑀘 𑀔𑁄 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸; 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀯𑀸 𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 ‘‘𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀤𑀸 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀓𑀲𑁆𑀫𑀸? 𑀢𑁂𑀲𑀁𑀬𑁂𑀯 ‘‘𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁆𑀬𑀁 ¶ 𑀕𑀢𑀸𑀦𑀁 𑀯𑀻𑀢𑀺𑀓𑁆𑀓𑀫𑀤𑁄𑀲𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀁 𑀧𑀜𑁆𑀜𑀧𑁂𑀦𑁆𑀢𑁄 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀯𑁂𑀚𑁆𑀚𑁄 𑀉𑀧𑁆𑀧𑀦𑁆𑀦𑀁 𑀕𑀡𑁆𑀟𑀁 𑀨𑀸𑀮𑀦𑀮𑁂𑀧𑀦𑀩𑀦𑁆𑀥𑀦𑀥𑁄𑀯𑀦𑀸𑀤𑀻𑀳𑀺 𑀢𑀺𑀓𑀺𑀘𑁆𑀙𑀦𑁆𑀢𑁄 𑀭𑁄𑀕𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀜𑁆𑀙𑀯𑀺𑀁 𑀓𑀢𑁆𑀯𑀸 𑀦 𑀢𑁆𑀯𑁂𑀯 𑀉𑀧𑀯𑀸𑀤𑀸𑀤𑀺𑀭𑀳𑁄 𑀳𑁄𑀢𑀺, 𑀲𑀓𑁂 𑀘 𑀆𑀘𑀭𑀺𑀬𑀓𑁂 𑀯𑀺𑀤𑀺𑀢𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀸𑀢𑀺; 𑀏𑀯𑀁 𑀦 𑀘 𑀉𑀧𑀯𑀸𑀤𑀸𑀤𑀺𑀭𑀳𑁄 𑀳𑁄𑀢𑀺, 𑀲𑀓𑁂 𑀘 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂 𑀯𑀺𑀤𑀺𑀢𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀢𑀜𑁆𑀘𑀲𑁆𑀲 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀧𑁆𑀧𑀁 𑀳𑁄𑀢𑀺, 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺.

𑀏𑀯𑀁 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁 𑀉𑀧𑁆𑀧𑀢𑁆𑀢𑀺𑀜𑁆𑀘 𑀓𑀸𑀮𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢 𑀇𑀥𑁂𑀓𑀘𑁆𑀘𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀧𑀦 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽, 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀳𑀼𑀓𑀸 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺, 𑀘𑀺𑀭𑀧𑀩𑁆𑀩𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑁆𑀢𑀜𑁆𑀜𑀽𑀳𑀺 𑀫𑀳𑀢𑁆𑀢𑀁 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁; 𑀘𑀺𑀭𑀧𑀩𑁆𑀩𑀚𑀺𑀢𑁂𑀳𑀺 𑀫𑀳𑀦𑁆𑀢𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 ¶ 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀆𑀭𑀩𑁆𑀪 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀳𑀸𑀬𑀲𑁆𑀫𑀸 𑀊𑀦𑀤𑀲𑀯𑀲𑁆𑀲𑁂 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀯𑀲𑁆𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀅𑀣 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂 ¶ , 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁭𑁫). 𑀏𑀯𑀁 𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀧𑀼𑀦 𑀪𑀺𑀓𑁆𑀔𑀽 ‘‘𑀤𑀲𑀯𑀲𑁆𑀲𑀸𑀫𑁆𑀳 𑀤𑀲𑀯𑀲𑁆𑀲𑀸𑀫𑁆𑀳𑀸’’𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁭𑁬) 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺.

𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀦𑁆𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀫𑀳𑀢𑁆𑀢𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀯𑀲𑁂𑀦 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀲𑁂𑀦𑀸𑀲𑀦𑀸𑀦𑀺 𑀧𑀳𑁄𑀦𑁆𑀢𑀺. 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀦 𑀧𑀢𑁆𑀢𑁂 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁’’ ¶ (𑀧𑀸𑀘𑀺. 𑁫𑁧); ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁’’ (𑀧𑀸𑀘𑀺. 𑁧𑁧𑁭𑁧); ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁭𑁫) 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀮𑀸𑀪𑀕𑁆𑀕𑀫𑀳𑀢𑁆𑀢𑀦𑁆𑀢𑀺 𑀮𑀸𑀪𑀲𑁆𑀲 𑀅𑀕𑁆𑀕𑀫𑀳𑀢𑁆𑀢𑀁; 𑀬𑁄 𑀮𑀸𑀪𑀲𑁆𑀲 𑀅𑀕𑁆𑀕𑁄 𑀉𑀢𑁆𑀢𑀫𑁄 𑀫𑀳𑀦𑁆𑀢𑀪𑀸𑀯𑁄, 𑀢𑀁 𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀮𑀸𑀪𑁂𑀦 𑀯𑀸 𑀅𑀕𑁆𑀕𑀫𑀳𑀢𑁆𑀢𑀫𑁆𑀧𑀺, 𑀮𑀸𑀪𑁂𑀦 𑀲𑁂𑀝𑁆𑀞𑀢𑁆𑀢𑀜𑁆𑀘 𑀫𑀳𑀦𑁆𑀢𑀢𑁆𑀢𑀜𑁆𑀘 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀦 𑀮𑀸𑀪𑀁 𑀧𑀝𑀺𑀘𑁆𑀘 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀢𑁆𑀢𑁂 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 ¶ 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀘𑁂𑀮𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁭𑁦). 𑀇𑀤𑀜𑁆𑀳𑀺 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁.

𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀦𑁆𑀢𑀺 𑀩𑀸𑀳𑀼𑀲𑀘𑁆𑀘𑀲𑁆𑀲 𑀫𑀳𑀦𑁆𑀢𑀪𑀸𑀯𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀦 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀏𑀓𑀫𑁆𑀧𑀺 𑀦𑀺𑀓𑀸𑀬𑀁, 𑀤𑁆𑀯𑁂𑀧𑀺…𑀧𑁂… 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀧𑀼𑀕𑁆𑀕𑀮𑀸 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀺. 𑀅𑀣 𑀲𑀢𑁆𑀣𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺…𑀧𑁂… 𑀲𑀫𑀡𑀼𑀤𑁆𑀤𑁂𑀲𑁄𑀧𑀺 𑀘𑁂 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁮) 𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺.

𑀏𑀯𑀁 ¶ 𑀪𑀕𑀯𑀸 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀩𑁆𑀩𑀲𑁄𑀧𑀺 𑀢𑁂𑀲𑀁 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀭𑀩𑁆𑀩𑀼𑀤𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀭𑀩𑁆𑀩𑀼𑀤𑁄𑀢𑀺 𑀅𑀩𑁆𑀩𑀼𑀤𑀯𑀺𑀭𑀳𑀺𑀢𑁄; 𑀅𑀩𑁆𑀩𑀼𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑁄𑀭𑀸, 𑀦𑀺𑀘𑁆𑀘𑁄𑀭𑁄𑀢𑀺 𑀅𑀢𑁆𑀣𑁄. 𑀘𑁄𑀭𑀸𑀢𑀺 𑀘 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀤𑀼𑀲𑁆𑀲𑀻𑀮𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀳𑀺 𑀅𑀲𑁆𑀲𑀫𑀡𑀸𑀯 𑀳𑀼𑀢𑁆𑀯𑀸 𑀲𑀫𑀡𑀧𑀝𑀺𑀜𑁆𑀜𑀢𑀸𑀬 𑀧𑀭𑁂𑀲𑀁 𑀧𑀘𑁆𑀘𑀬𑁂 𑀘𑁄𑀭𑁂𑀦𑁆𑀢𑀺. 𑀢𑀲𑁆𑀫𑀸 𑀦𑀺𑀭𑀩𑁆𑀩𑀼𑀤𑁄𑀢𑀺 𑀦𑀺𑀘𑁆𑀘𑁄𑀭𑁄, 𑀦𑀺𑀤𑁆𑀤𑀼𑀲𑁆𑀲𑀻𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀭𑀸𑀤𑀻𑀦𑀯𑁄𑀢𑀺 𑀦𑀺𑀭𑀼𑀧𑀤𑁆𑀤𑀯𑁄 𑀦𑀺𑀭𑀼𑀧𑀲𑀕𑁆𑀕𑁄; 𑀤𑀼𑀲𑁆𑀲𑀻𑀮𑀸𑀤𑀻𑀦𑀯𑀭𑀳𑀺𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀕𑀢𑀓𑀸𑀴𑀓𑁄𑀢𑀺 𑀓𑀸𑀴𑀓𑀸 𑀯𑀼𑀘𑁆𑀘𑀦𑁆𑀢𑀺 𑀤𑀼𑀲𑁆𑀲𑀻𑀮𑀸𑀬𑁂𑀯; 𑀢𑁂 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀧𑀺 𑀲𑀫𑀸𑀦𑀸 𑀓𑀸𑀴𑀓𑀥𑀫𑁆𑀫𑀬𑁄𑀕𑀸 𑀓𑀸𑀴𑀓𑀸𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀅𑀪𑀸𑀯𑀸 𑀅𑀧𑀕𑀢𑀓𑀸𑀴𑀓𑁄 ¶ . 𑀅𑀧𑀳𑀢𑀓𑀸𑀴𑀓𑁄𑀢𑀺𑀧𑀺 𑀧𑀸𑀞𑁄. 𑀲𑀼𑀤𑁆𑀥𑁄𑀢𑀺 𑀅𑀧𑀕𑀢𑀓𑀸𑀴𑀓𑀢𑁆𑀢𑀸𑀬𑁂𑀯 𑀲𑀼𑀤𑁆𑀥𑁄 𑀧𑀭𑀺𑀬𑁄𑀤𑀸𑀢𑁄 𑀧𑀪𑀲𑁆𑀲𑀭𑁄. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀸𑀭𑁄 𑀯𑀼𑀘𑁆𑀘𑀦𑁆𑀢𑀺 𑀲𑀻𑀮-𑀲𑀫𑀸𑀥𑀺-𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑀸, 𑀢𑀲𑁆𑀫𑀺𑀁 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄.

𑀏𑀯𑀁 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀲𑁄 𑀘𑀲𑁆𑀲 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂𑀲𑀜𑁆𑀳𑀺 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀬𑀸𑀦𑀺𑀫𑀸𑀦𑀺 𑀯𑁂𑀭𑀜𑁆𑀚𑀸𑀬𑀁 ¶ 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀇𑀫𑁂𑀲𑀁 𑀬𑁄 𑀕𑀼𑀡𑀯𑀲𑁂𑀦 𑀧𑀘𑁆𑀙𑀺𑀫𑀓𑁄 𑀲𑀩𑁆𑀩𑀧𑀭𑀺𑀢𑁆𑀢𑀕𑀼𑀡𑁄 𑀪𑀺𑀓𑁆𑀔𑀼, 𑀲𑁄 𑀲𑁄𑀢𑀸𑀧𑀦𑁆𑀦𑁄. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀲𑁄𑀢𑀁 𑀆𑀧𑀦𑁆𑀦𑁄; 𑀲𑁄𑀢𑁄𑀢𑀺 𑀘 𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀬𑀣𑀸𑀳 𑁋

‘‘𑀲𑁄𑀢𑁄 𑀲𑁄𑀢𑁄𑀢𑀺 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑁄𑀢𑀺? 𑀅𑀬𑀫𑁂𑀯 𑀳𑀺, 𑀪𑀦𑁆𑀢𑁂, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺. ‘‘𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄𑀢𑀺 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑀸𑀧𑀦𑁆𑀦𑁄’’𑀢𑀺? ‘‘𑀬𑁄 𑀳𑀺, 𑀪𑀦𑁆𑀢𑁂, 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑁋 𑀲𑁄𑀢𑀸𑀧𑀦𑁆𑀦𑁄. 𑀲𑁄𑀬𑀫𑀸𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁦𑁧). 𑀇𑀥 𑀧𑀦 𑀫𑀕𑁆𑀕𑁂𑀦 𑀨𑀮𑀲𑁆𑀲 𑀦𑀸𑀫𑀁 𑀤𑀺𑀦𑁆𑀦𑀁. 𑀢𑀲𑁆𑀫𑀸 𑀨𑀮𑀝𑁆𑀞𑁄 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀯𑀺𑀦𑀺𑀧𑀸𑀢𑁂𑀢𑀻𑀢𑀺 𑀯𑀺𑀦𑀺𑀧𑀸𑀢𑁄; 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀦 𑀅𑀢𑁆𑀢𑀸𑀦𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑁂 𑀥𑀫𑁆𑀫𑀸 𑀅𑀧𑀸𑀬𑀕𑀫𑀦𑀻𑀬𑀸, 𑀢𑁂𑀲𑀁 𑀧𑀭𑀺𑀓𑁆𑀔𑀬𑀸. 𑀯𑀺𑀦𑀺𑀧𑀢𑀦𑀁 𑀯𑀸 𑀯𑀺𑀦𑀺𑀧𑀸𑀢𑁄, 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀫𑀕𑁆𑀕𑁂𑀦 ¶ 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀧𑀭𑀸 𑀕𑀢𑀺 𑀅𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀉𑀧𑀭𑀺 𑀫𑀕𑁆𑀕𑀢𑁆𑀢𑀬𑀁 𑀅𑀯𑀲𑁆𑀲𑀁 𑀲𑀫𑁆𑀧𑀸𑀧𑀓𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀧𑀝𑀺𑀮𑀤𑁆𑀥𑀧𑀞𑀫𑀫𑀕𑁆𑀕𑀢𑁆𑀢𑀸𑀢𑀺.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸

𑁨𑁨. 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀯𑁂𑀭𑀜𑁆𑀚𑀸𑀬𑀁 𑀢𑀁 𑀯𑀲𑁆𑀲𑀸𑀯𑀸𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀅𑀣 𑀔𑁄 𑀪𑀕𑀯𑀸 ¶ 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀺. 𑀓𑀺𑀦𑁆𑀢𑀺? 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀦𑁆𑀢𑀺 𑀏𑀯𑀫𑀸𑀤𑀺. 𑀆𑀘𑀺𑀡𑁆𑀡𑀦𑁆𑀢𑀺 𑀘𑀭𑀺𑀢𑀁 𑀯𑀢𑁆𑀢𑀁 𑀅𑀦𑀼𑀥𑀫𑁆𑀫𑀢𑀸. 𑀢𑀁 𑀔𑁄 𑀧𑀦𑁂𑀢𑀁 𑀆𑀘𑀺𑀡𑁆𑀡𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀩𑀼𑀤𑁆𑀥𑀸𑀘𑀺𑀡𑁆𑀡𑀁, 𑀲𑀸𑀯𑀓𑀸𑀘𑀺𑀡𑁆𑀡𑀦𑁆𑀢𑀺. 𑀓𑀢𑀫𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁? 𑀇𑀤𑀁 𑀢𑀸𑀯 𑀏𑀓𑀁 𑁋 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑀸 𑀯𑀲𑁆𑀲𑀁 𑀯𑀲𑀦𑁆𑀢𑀺, 𑀦 𑀢𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺. 𑀲𑀸𑀯𑀓𑀸 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀯𑀸 𑀬𑀣𑀸𑀲𑀼𑀔𑀁 𑀧𑀓𑁆𑀓𑀫𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑁋 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 𑀚𑀦𑀲𑀗𑁆𑀕𑀳𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺𑀬𑁂𑀯. 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀘 𑀫𑀳𑀸𑀫𑀡𑁆𑀟𑀮𑀁 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀡𑁆𑀟𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀡𑁆𑀟𑀮𑁂 ¶ 𑀘𑀭𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀫𑀡𑁆𑀟𑀮𑀁 𑀦𑀯𑀬𑁄𑀚𑀦𑀲𑀢𑀺𑀓𑀁, 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀙𑀬𑁄𑀚𑀦𑀲𑀢𑀺𑀓𑀁, 𑀅𑀦𑁆𑀢𑀺𑀫𑀫𑀡𑁆𑀟𑀮𑀁 𑀢𑀺𑀬𑁄𑀚𑀦𑀲𑀢𑀺𑀓𑀁. 𑀬𑀤𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀫𑀳𑀸𑀚𑀦𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀸 𑀥𑀫𑁆𑀫𑀤𑀸𑀦𑁂𑀦 𑀘𑀲𑁆𑀲 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁 𑀯𑀟𑁆𑀠𑁂𑀦𑁆𑀢𑀸 𑀦𑀯𑀳𑀺 𑀫𑀸𑀲𑁂𑀳𑀺 𑀚𑀦𑀧𑀤𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀲𑀘𑁂 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀧𑀯𑀸𑀭𑁂𑀢𑁆𑀯𑀸 𑀫𑀸𑀕𑀲𑀺𑀭𑀲𑁆𑀲 𑀧𑀞𑀫𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀲𑀘𑁂 𑀧𑀦 𑀦𑁂𑀲𑀁 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀅𑀧𑀭𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀸 𑀫𑀸𑀕𑀲𑀺𑀭𑀫𑀸𑀲𑀫𑁆𑀧𑀺 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀨𑀼𑀲𑁆𑀲𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁆𑀢𑀺𑀫𑀫𑀡𑁆𑀟𑀮𑁂 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀢𑁂𑀲𑀼 𑀘 𑀫𑀡𑁆𑀟𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀘𑀭𑀦𑁆𑀢𑀸𑀧𑀺 𑀢𑁂 𑀢𑁂 𑀲𑀢𑁆𑀢𑁂 𑀓𑀺𑀮𑁂𑀲𑁂𑀳𑀺 𑀯𑀺𑀬𑁄𑀚𑁂𑀦𑁆𑀢𑀸 ¶ 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀳𑀺 𑀧𑀬𑁄𑀚𑁂𑀦𑁆𑀢𑀸 𑀯𑁂𑀦𑁂𑀬𑁆𑀬𑀯𑀲𑁂𑀦𑁂𑀯 𑀦𑀸𑀦𑀸𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁 𑁋 𑀤𑁂𑀯𑀲𑀺𑀓𑀁 𑀧𑀘𑁆𑀘𑀽𑀲𑀲𑀫𑀬𑁂 𑀲𑀦𑁆𑀢𑀁 𑀲𑀼𑀔𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀁, 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑀫𑀯𑀮𑁄𑀓𑀦𑀁.

𑀅𑀧𑀭𑀫𑁆𑀧𑀺 ¶ 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁 𑁋 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀢𑀭𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸, 𑀑𑀢𑀺𑀡𑁆𑀡𑁂 𑀤𑁄𑀲𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀦𑁆𑀢𑀺 𑀇𑀤𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁.

𑀓𑀢𑀫𑀁 𑀲𑀸𑀯𑀓𑀸𑀘𑀺𑀡𑁆𑀡𑀁? 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀦𑁆𑀦𑀺𑀧𑀸𑀢𑁄 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀘 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀁, 𑀯𑀼𑀢𑁆𑀣𑀯𑀲𑁆𑀲𑀸𑀦𑀜𑁆𑀘 𑀅𑀥𑀺𑀕𑀢𑀕𑀼𑀡𑀸𑀭𑁄𑀘𑀦𑀢𑁆𑀣𑀁 𑀉𑀧𑀭𑀺 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀜𑁆𑀘 ¶ . 𑀇𑀤𑀁 𑀲𑀸𑀯𑀓𑀸𑀘𑀺𑀡𑁆𑀡𑀁. 𑀇𑀥 𑀧𑀦 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀸𑀦’’𑀦𑁆𑀢𑀺.

𑀆𑀬𑀸𑀫𑀸𑀢𑀺 𑀆𑀕𑀘𑁆𑀙 𑀬𑀸𑀫. 𑀅𑀧𑀮𑁄𑀓𑁂𑀲𑁆𑀲𑀸𑀫𑀸𑀢𑀺 𑀘𑀸𑀭𑀺𑀓𑀁 𑀘𑀭𑀡𑀢𑁆𑀣𑀸𑀬 𑀆𑀧𑀼𑀘𑁆𑀙𑀺𑀲𑁆𑀲𑀸𑀫. 𑀏𑀯𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑀦𑁆𑀢𑁂𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁; 𑀲𑀢𑁆𑀣𑀼𑀦𑁄 𑀧𑀝𑀺𑀯𑀘𑀦𑀤𑀸𑀦𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀝𑀺𑀅𑀲𑁆𑀲𑁄𑀲𑀺, 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀲𑀼𑀡𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀇𑀥 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀯𑀸 𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀯𑀸 𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀫𑀚𑁆𑀛𑀦𑁆𑀳𑀺𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀦𑀕𑀭𑀯𑀻𑀣𑀺𑀬𑁄 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀳𑀺 𑀭𑀁𑀲𑀻𑀳𑀺 𑀲𑀫𑀼𑀚𑁆𑀚𑁄𑀢𑀬𑀫𑀸𑀦𑁄 𑀬𑁂𑀦 𑀯𑁂𑀭𑀜𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀖𑀭𑀤𑁆𑀯𑀸𑀭𑁂 𑀞𑀺𑀢𑀫𑀢𑁆𑀢𑀫𑁂𑀯 𑀘𑀲𑁆𑀲 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀭𑀺𑀚𑀦𑁄 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀬 𑀫𑀳𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀫𑁆𑀫 ‘‘𑀇𑀢𑁄, 𑀪𑀕𑀯𑀸, 𑀉𑀧𑀲𑀗𑁆𑀓𑀫𑀢𑀽’’𑀢𑀺 𑀆𑀳. 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀦𑀺𑀲𑀻𑀤𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑀸 𑀞𑀺𑀢𑀧𑀤𑁂𑀲𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀅𑀧𑀺𑀘 𑀬𑁄 𑀤𑁂𑀬𑁆𑀬𑀥𑀫𑁆𑀫𑁄, 𑀲𑁄 𑀦 𑀤𑀺𑀦𑁆𑀦𑁄’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 ¶ 𑁋 𑀫𑀬𑀸 𑀦𑀺𑀫𑀦𑁆𑀢𑀺𑀢𑀸𑀦𑀁 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀢𑀼𑀫𑁆𑀳𑀸𑀓𑀁 𑀢𑁂𑀫𑀸𑀲𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀢𑁄 𑀬𑀸𑀕𑀼𑀔𑀚𑁆𑀚𑀓𑀁, 𑀫𑀚𑁆𑀛𑀦𑁆𑀳𑀺𑀓𑁂 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁, 𑀲𑀸𑀬𑀦𑁆𑀳𑁂 𑀅𑀦𑁂𑀓𑀯𑀺𑀥 𑀧𑀸𑀦𑀯𑀺𑀓𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸𑀲𑀓𑁆𑀓𑀸𑀭𑁄𑀢𑀺 𑀏𑀯𑀫𑀸𑀤𑀺𑀓𑁄 𑀬𑁄 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀢𑀩𑁆𑀩𑁄 𑀅𑀲𑁆𑀲, 𑀲𑁄 𑀦 𑀤𑀺𑀦𑁆𑀦𑁄𑀢𑀺. 𑀢𑀜𑁆𑀘 𑀔𑁄 𑀦𑁄 𑀅𑀲𑀦𑁆𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀤𑁂𑀬𑁆𑀬𑀥𑀫𑁆𑀫𑁄 𑀅𑀫𑁆𑀳𑀸𑀓𑀁 𑀦𑁄 𑀅𑀲𑀦𑁆𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀣 ¶ 𑀯𑀸 𑀬𑀁 𑀤𑀸𑀦𑀯𑀢𑁆𑀣𑀼𑀁 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑀤𑁂𑀬𑁆𑀬𑀸𑀫, 𑀢𑀜𑁆𑀘 𑀔𑁄 𑀦𑁄 𑀅𑀲𑀦𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑁄𑀧𑀺 𑀅𑀤𑀸𑀢𑀼𑀓𑀫𑁆𑀬𑀢𑀸𑀢𑀺 𑀅𑀤𑀸𑀢𑀼𑀓𑀸𑀫𑀢𑀸𑀧𑀺 ¶ 𑀦𑁄 𑀦𑀢𑁆𑀣𑀺, 𑀬𑀣𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀁 𑀫𑀘𑁆𑀙𑀭𑀻𑀦𑀁. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀩𑀳𑀼𑀓𑀺𑀘𑁆𑀘𑀸 𑀖𑀭𑀸𑀯𑀸𑀲𑀸𑀢𑀺 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀩𑀳𑀼𑀓𑀺𑀘𑁆𑀘𑀸 𑀖𑀭𑀸𑀯𑀸𑀲𑀸, 𑀢𑀲𑁆𑀫𑀸 𑀏𑀢𑁆𑀣 𑀲𑀦𑁆𑀢𑁂𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀤𑀸𑀢𑀼𑀓𑀫𑁆𑀬𑀢𑀸𑀬 𑀘 𑀢𑀁 𑀓𑀼𑀢𑁄 𑀮𑀩𑁆𑀪𑀸 𑀓𑀼𑀢𑁄 𑀢𑀁 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀬𑀁 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀤𑁂𑀬𑁆𑀬𑀸𑀫𑀸𑀢𑀺 𑀖𑀭𑀸𑀯𑀸𑀲𑀁 𑀕𑀭𑀳𑀦𑁆𑀢𑁄 𑀆𑀳. 𑀲𑁄 𑀓𑀺𑀭 𑀫𑀸𑀭𑁂𑀦 𑀆𑀯𑀝𑁆𑀝𑀺𑀢𑀪𑀸𑀯𑀁 𑀦 𑀚𑀸𑀦𑀸𑀢𑀺, ‘‘𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑁂𑀦 𑀫𑁂 𑀲𑀢𑀺𑀲𑀫𑁆𑀫𑁄𑀲𑁄 𑀚𑀸𑀢𑁄’’𑀢𑀺 𑀫𑀜𑁆𑀜𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀧𑀺𑀘 𑁋 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀬𑀫𑀳𑀁 𑀢𑀼𑀫𑁆𑀳𑀸𑀓𑀁 𑀤𑀤𑁂𑀬𑁆𑀬𑀁, 𑀢𑀁 𑀓𑀼𑀢𑁄 𑀮𑀩𑁆𑀪𑀸? 𑀩𑀳𑀼𑀓𑀺𑀘𑁆𑀘𑀸 𑀳𑀺 𑀖𑀭𑀸𑀯𑀸𑀲𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀬𑀁𑀦𑀽𑀦𑀸𑀳𑀁 𑀬𑀁 𑀫𑁂 𑀢𑀻𑀳𑀺 𑀫𑀸𑀲𑁂𑀳𑀺 𑀤𑀸𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀏𑀓𑀤𑀺𑀯𑀲𑁂𑀦𑁂𑀯 𑀤𑀤𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁆𑀯𑀸𑀢𑀦𑀸𑀬𑀸𑀢𑀺 𑀬𑀁 𑀫𑁂 𑀢𑀼𑀫𑁆𑀳𑁂𑀲𑀼 𑀲𑀓𑁆𑀓𑀸𑀭𑀁 𑀓𑀭𑁄𑀢𑁄 𑀲𑁆𑀯𑁂 𑀪𑀯𑀺𑀲𑁆𑀲𑀢𑀺 𑀧𑀼𑀜𑁆𑀜𑀜𑁆𑀘𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑀜𑁆𑀘, 𑀢𑀤𑀢𑁆𑀣𑀸𑀬. 𑀅𑀣 𑀢𑀣𑀸𑀕𑀢𑁄 ‘‘𑀲𑀘𑁂 𑀅𑀳𑀁 𑀦𑀸𑀥𑀺𑀯𑀸𑀲𑁂𑀬𑁆𑀬𑀁, ‘𑀅𑀬𑀁 𑀢𑁂𑀫𑀸𑀲𑀁 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀓𑀼𑀧𑀺𑀢𑁄 𑀫𑀜𑁆𑀜𑁂, 𑀢𑁂𑀦 𑀫𑁂 𑀬𑀸𑀘𑀺𑀬𑀫𑀸𑀦𑁄 𑀏𑀓𑀪𑀢𑁆𑀢𑀫𑁆𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀢𑁆𑀣𑀺 𑀇𑀫𑀲𑁆𑀫𑀺𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺, 𑀅𑀲𑀩𑁆𑀩𑀜𑁆𑀜𑀽 𑀅𑀬’𑀦𑁆𑀢𑀺 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀘 𑀯𑁂𑀭𑀜𑁆𑀚𑀸𑀯𑀸𑀲𑀺𑀦𑁄 𑀘 𑀕𑀭𑀳𑀺𑀢𑁆𑀯𑀸 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼𑀁, 𑀢𑀁 𑀢𑁂𑀲𑀁 𑀫𑀸 𑀅𑀳𑁄𑀲𑀻’’𑀢𑀺 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀥𑀺𑀯𑀸𑀲𑁂𑀢𑁆𑀯𑀸 𑀘 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 ‘‘𑀅𑀮𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀘𑀺𑀦𑁆𑀢𑀸𑀬𑀸’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀘 𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀢𑀸𑀬 𑀲𑀉𑀲𑁆𑀲𑀸𑀳𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀧𑀓𑁆𑀓𑀦𑁆𑀢𑁂 𑀘 𑀧𑀦 𑀪𑀕𑀯𑀢𑀺 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑀤𑀸𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀬𑀁, 𑀪𑀡𑁂, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀪𑀢𑁆𑀢𑀫𑁆𑀧𑀺 𑀦𑀸𑀤𑀫𑁆𑀳. 𑀳𑀦𑁆𑀤, 𑀤𑀸𑀦𑀺 𑀢𑀣𑀸 𑀤𑀸𑀦𑀁 𑀧𑀝𑀺𑀬𑀸𑀤𑁂𑀣 𑀬𑀣𑀸 𑀢𑁂𑀫𑀸𑀲𑀺𑀓𑁄𑀧𑀺 𑀤𑁂𑀬𑁆𑀬𑀥𑀫𑁆𑀫𑁄 𑀲𑁆𑀯𑁂 𑀏𑀓𑀤𑀺𑀯𑀲𑁂𑀦𑁂𑀯 ¶ 𑀤𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀻’’𑀢𑀺. 𑀢𑀢𑁄 𑀧𑀡𑀻𑀢𑀁 ¶ 𑀤𑀸𑀦𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 ¶ 𑀬𑀁 𑀤𑀺𑀯𑀲𑀁 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀆𑀲𑀦𑀝𑁆𑀞𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀕𑀦𑁆𑀥𑀥𑀽𑀫𑀯𑀸𑀲𑀓𑀼𑀲𑀼𑀫𑀯𑀺𑀘𑀺𑀢𑁆𑀭𑀁 𑀫𑀳𑀸𑀧𑀽𑀚𑀁 𑀲𑀚𑁆𑀚𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦…𑀧𑁂… 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁨𑁩. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀦𑁆𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀦𑁆𑀢𑀺 𑀩𑀼𑀤𑁆𑀥𑀧𑀭𑀺𑀡𑀸𑀬𑀓𑀁; 𑀩𑀼𑀤𑁆𑀥𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀢𑁆𑀯𑀸, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸. 𑀲𑀫𑁆𑀧𑀯𑀸𑀭𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀧𑀯𑀸𑀭𑁂𑀢𑁆𑀯𑀸 ‘𑀅𑀮’𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀫𑀼𑀔𑀲𑀜𑁆𑀜𑀸𑀬 𑀯𑀘𑀻𑀪𑁂𑀤𑁂𑀦 𑀘 𑀧𑀝𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁; 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀻𑀢𑀺 𑀢𑀺𑀘𑀻𑀯𑀭𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀇𑀤𑀁 𑀧𑀦 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀁 𑀳𑁄𑀢𑀺 ‘‘𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀻’’𑀢𑀺, 𑀢𑀲𑁆𑀫𑀺𑀜𑁆𑀘 𑀢𑀺𑀘𑀻𑀯𑀭𑁂 𑀏𑀓𑀫𑁂𑀓𑁄 𑀲𑀸𑀝𑀓𑁄 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺. 𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀢𑀺𑀲𑀳𑀲𑁆𑀲𑀕𑁆𑀖𑀦𑀓𑀁 𑀢𑀺𑀘𑀻𑀯𑀭𑀫𑀤𑀸𑀲𑀺 𑀉𑀢𑁆𑀢𑀫𑀁 𑀓𑀸𑀲𑀺𑀓𑀯𑀢𑁆𑀣𑀲𑀤𑀺𑀲𑀁. 𑀏𑀓𑀫𑁂𑀓𑀜𑁆𑀘 𑀪𑀺𑀓𑁆𑀔𑀼𑀁 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑁂𑀦𑀸𑀢𑀺 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑀴𑁂𑀦. 𑀢𑀢𑁆𑀭 𑀏𑀓𑀲𑀸𑀝𑀓𑁄 𑀧𑀜𑁆𑀘𑀲𑀢𑀸𑀦𑀺 𑀅𑀕𑁆𑀖𑀢𑀺. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀺 𑀤𑀼𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀢𑁆𑀢𑀓𑀫𑁆𑀧𑀺 𑀤𑀢𑁆𑀯𑀸 𑀅𑀢𑀼𑀝𑁆𑀞𑁄 𑀧𑀼𑀦 𑀲𑀢𑁆𑀢𑀝𑁆𑀞𑀲𑀳𑀲𑁆𑀲𑀕𑁆𑀖𑀦𑀓𑁂 𑀅𑀦𑁂𑀓𑀭𑀢𑁆𑀢𑀓𑀫𑁆𑀩𑀮𑁂 𑀘 𑀧𑀝𑁆𑀝𑀼𑀡𑁆𑀡𑀧𑀢𑁆𑀢𑀧𑀝𑁂 𑀘 𑀨𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀤𑀸𑀲𑀺. 𑀲𑀢𑀧𑀸𑀓𑀲𑀳𑀲𑁆𑀲𑀧𑀸𑀓𑀸𑀦𑀜𑁆𑀘 𑀪𑁂𑀲𑀚𑁆𑀚𑀢𑁂𑀮𑀸𑀦𑀁 𑀢𑀼𑀫𑁆𑀩𑀸𑀦𑀺 𑀧𑀽𑀭𑁂𑀢𑁆𑀯𑀸 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀜𑁆𑀚𑀦𑀢𑁆𑀣𑀸𑀬 𑀲𑀳𑀲𑁆𑀲𑀕𑁆𑀖𑀦𑀓𑀁 𑀢𑁂𑀮𑀫𑀤𑀸𑀲𑀺. 𑀓𑀺𑀁 𑀩𑀳𑀼𑀦𑀸, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀦 𑀓𑁄𑀘𑀺 𑀧𑀭𑀺𑀓𑁆𑀔𑀸𑀭𑁄 𑀲𑀫𑀡𑀧𑀭𑀺𑀪𑁄𑀕𑁄 ¶ 𑀅𑀤𑀺𑀦𑁆𑀦𑁄 𑀦𑀸𑀫 𑀅𑀳𑁄𑀲𑀺. 𑀧𑀸𑀴𑀺𑀬𑀁 𑀧𑀦 𑀘𑀻𑀯𑀭𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁.

𑀏𑀯𑀁 𑀫𑀳𑀸𑀬𑀸𑀕𑀁 𑀬𑀚𑀺𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀢𑁂𑀫𑀸𑀲𑀁 𑀫𑀸𑀭𑀸𑀯𑀝𑁆𑀝𑀦𑁂𑀦 𑀥𑀫𑁆𑀫𑀲𑀯𑀦𑀸𑀫𑀢𑀭𑀲𑀧𑀭𑀺𑀪𑁄𑀕𑀧𑀭𑀺𑀳𑀻𑀦𑀁 𑀏𑀓𑀤𑀺𑀯𑀲𑁂𑀦𑁂𑀯 𑀥𑀫𑁆𑀫𑀸𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀧𑀼𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀁 𑀓𑀼𑀭𑀼𑀫𑀸𑀦𑁄 𑀥𑀫𑁆𑀫𑀺𑀬𑀸 ¶ 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸…𑀧𑁂… 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀲𑀧𑀼𑀢𑁆𑀢𑀤𑀸𑀭𑁄 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀦𑀧𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀦𑀼𑀕𑁆𑀕𑀳𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀯𑀤𑀦𑁆𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀦𑀺𑀯𑀢𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸𑀢𑀺 𑀬𑀣𑀸𑀚𑁆𑀛𑀸𑀲𑀬𑀁 𑀬𑀣𑀸𑀭𑀼𑀘𑀺𑀢𑀁 𑀯𑀸𑀲𑀁 𑀯𑀲𑀺𑀢𑁆𑀯𑀸 𑀯𑁂𑀭𑀜𑁆𑀚𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀸𑀬 𑀘𑀭𑀡𑀓𑀸𑀮𑁂 𑀕𑀦𑁆𑀢𑀩𑁆𑀩𑀁 𑀩𑀼𑀤𑁆𑀥𑀯𑀻𑀣𑀺 𑀧𑀳𑀸𑀬 𑀤𑀼𑀩𑁆𑀪𑀺𑀓𑁆𑀔𑀤𑁄𑀲𑁂𑀦 ¶ 𑀓𑀺𑀮𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀚𑀼𑀦𑀸𑀯 𑀫𑀕𑁆𑀕𑁂𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀲𑁄𑀭𑁂𑀬𑁆𑀬𑀸𑀤𑀻𑀦𑀺 𑀅𑀦𑀼𑀧𑀕𑀫𑁆𑀫 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑁂𑀦 𑀅𑀯𑀲𑀭𑀺 𑀢𑀤𑀯𑀲𑀭𑀺. 𑀢𑀢𑁆𑀭𑀸𑀧𑀺 𑀬𑀣𑀸𑀚𑁆𑀛𑀸𑀲𑀬𑀁 𑀯𑀺𑀳𑀭𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀧𑀕𑀫𑁆𑀫 𑀲𑁄𑀭𑁂𑀬𑁆𑀬𑀁…𑀧𑁂… 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀁 𑁋

𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄, 𑀦𑀺𑀤𑀸𑀦𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄;

𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄, 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄 𑀘𑁂𑀯.

𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀢𑁄, 𑀧𑀤𑀢𑁆𑀣𑀢𑁄 𑀧𑀸𑀴𑀺𑀬𑁄𑀚𑀦𑀓𑁆𑀓𑀫𑀢𑁄;

𑀲𑀺𑀓𑁆𑀔𑀸𑀧𑀤𑀦𑀺𑀘𑁆𑀙𑀬𑀢𑁄, 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄.

𑀲𑀫𑁆𑀧𑀲𑁆𑀲𑀢𑀁 𑀦 𑀤𑀺𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀅𑀧𑀸𑀲𑀸𑀤𑀺𑀓𑀁 𑀬𑀢𑁄 𑀏𑀢𑁆𑀣;

𑀯𑀺𑀜𑁆𑀜𑀽𑀦𑀫𑀬𑀁 𑀢𑀲𑁆𑀫𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯.

𑀲𑀁𑀯𑀡𑁆𑀡𑀦𑀸 ¶ 𑀧𑀯𑀢𑁆𑀢𑀸, 𑀯𑀺𑀦𑀬𑀲𑁆𑀲 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦;

𑀯𑀼𑀢𑁆𑀢𑀲𑁆𑀲 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁪. 𑀇𑀢𑁄 ¶ ¶ 𑀧𑀭𑀁 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂𑀢𑀺𑀆𑀤𑀺 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀸𑀦𑀢𑁆𑀣𑀁. 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀁 𑀧𑀳𑀸𑀬 𑀬𑀢𑁆𑀣 𑀬𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀓𑀮𑀦𑁆𑀤𑀕𑀸𑀫𑁄𑀢𑀺 𑀓𑀮𑀦𑁆𑀤𑀓𑀸 𑀯𑀼𑀘𑁆𑀘𑀦𑁆𑀢𑀺 𑀓𑀸𑀴𑀓𑀸, 𑀢𑁂𑀲𑀁 𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀕𑀸𑀫𑁄. 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀕𑀸𑀫𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀭𑀸𑀚𑀲𑀫𑁆𑀫𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀲𑁆𑀲 𑀓𑀮𑀦𑁆𑀤𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑁂𑀧𑀺 𑀓𑀮𑀦𑁆𑀤𑀦𑀸𑀫𑀓𑀸 𑀫𑀦𑀼𑀲𑁆𑀲𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀩𑀳𑀼𑀮𑁂𑀳𑀻𑀢𑀺 𑀩𑀳𑀼𑀓𑁂𑀳𑀺. 𑀲𑀳𑀸𑀬𑀓𑁂𑀳𑀻𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀲𑀳 𑀆𑀬𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀲𑀳𑀸𑀬𑀸, 𑀲𑀳𑀸𑀬𑀸 𑀏𑀯 𑀲𑀳𑀸𑀬𑀓𑀸, 𑀢𑁂𑀳𑀺 𑀲𑀳𑀸𑀬𑀓𑁂𑀳𑀺. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀺𑀦𑀸 𑀓𑀺𑀘𑁆𑀘𑁂𑀦; 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸𑀓𑀺𑀘𑁆𑀘𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀪𑀕𑀯𑀸 𑀳𑀺 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑁂 𑀯𑁂𑀲𑀸𑀮𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸 𑀘𑁂𑀢𑁆𑀣 𑀉𑀴𑀸𑀭𑀸 𑀳𑁄𑀢𑀺. 𑀢𑀤𑀢𑁆𑀣𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀤𑁆𑀤𑀲 𑀔𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀦𑀕𑀭𑀢𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀁 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀳𑀢𑁆𑀣𑀁 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘 𑀦𑀺𑀓𑁆𑀔𑀫𑀦𑁆𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 ‘‘𑀓𑁆𑀯 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘𑀸’’𑀢𑀺. 𑀢𑁂𑀦 𑀳𑀺 ‘‘𑀅𑀳𑀫𑁆𑀧𑀺 𑀕𑀘𑁆𑀙𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄…𑀧𑁂… 𑀤𑁂𑀲𑁂𑀦𑁆𑀢’’𑀦𑁆𑀢𑀺. 𑀤𑀺𑀲𑁆𑀯𑀸𑀦𑀲𑁆𑀲𑀸𑀢𑀺 𑀤𑀺𑀲𑁆𑀯𑀸𑀦 𑀅𑀲𑁆𑀲. 𑀏𑀢𑀤𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸𑀬 𑀘𑁄𑀤𑀺𑀬𑀫𑀸𑀦𑀲𑁆𑀲 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 𑀅𑀳𑁄𑀲𑀺. 𑀓𑀺𑀁 𑀅𑀳𑁄𑀲𑀺? 𑀬𑀁𑀦𑀽𑀦𑀸𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀦𑁆𑀢𑀺 ¶ . 𑀢𑀢𑁆𑀣 𑀬𑀦𑁆𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑀫𑁂𑀢𑀁. 𑀏𑀯𑀁 𑀓𑀺𑀭𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄 ‘‘𑀬𑀫𑀬𑀁 𑀧𑀭𑀺𑀲𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀢𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺.

𑀅𑀣 ¶ 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸𑀢𑀺 𑀇𑀥 𑀓𑀲𑁆𑀫𑀸 ‘‘𑀬𑁂𑀦 𑀪𑀕𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀪𑀕𑀯𑀦𑁆𑀢𑀜𑁆𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀴𑀸𑀭𑀼𑀴𑀸𑀭𑀚𑀦𑀸 𑀫𑀳𑀢𑀻 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸, 𑀢𑀢𑁆𑀭 𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀧𑀘𑁆𑀙𑀸 𑀆𑀕𑀢𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁. 𑀧𑀭𑀺𑀲𑀸𑀬 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀓𑁆𑀓𑀸𑀢𑀺 𑀲𑁄 𑀢𑀁 𑀧𑀭𑀺𑀲𑀁𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 ¶ 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀦 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀳𑁄𑀲𑀺, 𑀅𑀣 𑀔𑁄 𑀪𑀕𑀯𑀢𑁄 𑀲𑀺𑀢𑁆𑀢𑀬𑀽𑀧𑀲𑀁𑀳𑀺𑀢𑀁 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸; 𑀢𑀁 𑀧𑀦𑀲𑁆𑀲 𑀬𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀻’’𑀢𑀺. 𑀓𑀺𑀁 𑀅𑀳𑁄𑀲𑀻𑀢𑀺? 𑀬𑀣𑀸 𑀬𑀣𑀸 𑀔𑁄𑀢𑀺𑀆𑀤𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀅𑀳𑀁 𑀔𑁄 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄 𑀏𑀯𑀁 𑀳𑁄𑀢𑀺 𑀬𑀤𑁂𑀢𑀁 𑀲𑀺𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀘𑀭𑀺𑀢𑀩𑁆𑀩𑀁, 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺; 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 ‘‘𑀅𑀦𑀕𑀸𑀭𑀺𑀬𑀸’’𑀢𑀺 𑀜𑀸𑀢𑀩𑁆𑀩𑀸. 𑀢𑀁 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀭𑀺𑀩𑁆𑀩𑀚𑁂𑀬𑁆𑀬𑀁.

𑁨𑁫. 𑀅𑀘𑀺𑀭𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑀼𑀤𑀺𑀦𑁆𑀦𑁄 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀓𑀲𑁆𑀫𑀸? 𑀢𑀢𑁆𑀭𑀲𑁆𑀲 ¶ 𑀩𑀳𑀽 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀲𑀦𑁆𑀢𑀺, 𑀢𑁂 ‘‘‘𑀢𑁆𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀏𑀓𑀧𑀼𑀢𑁆𑀢𑀓𑁄, 𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼’𑀦𑁆𑀢𑀺 𑀩𑀸𑀳𑀸𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑁂𑀬𑁆𑀬𑀼𑀁, 𑀢𑀢𑁄 𑀧𑀩𑁆𑀩𑀚𑁆𑀚𑀸𑀬 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀳𑁂𑀯 𑀧𑀭𑀺𑀲𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀓𑁂𑀦𑀘𑀺 𑀲𑀭𑀻𑀭𑀓𑀺𑀘𑁆𑀘𑀮𑁂𑀲𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺.

𑀪𑀕𑀯𑀸 ¶ 𑀧𑀦 𑀬𑀲𑁆𑀫𑀸 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀢𑁄 𑀧𑀪𑀼𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀢𑀺, 𑀢𑀲𑁆𑀫𑀸 𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀁 𑀲𑀼𑀤𑀺𑀦𑁆𑀦 𑀫𑀸𑀢𑀸𑀧𑀺𑀢𑀽𑀳𑀺…𑀧𑁂… 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁨𑁬. 𑀇𑀢𑁄 ¶ 𑀧𑀭𑀁 𑀧𑀸𑀞𑀸𑀦𑀼𑀲𑀸𑀭𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑁂𑀯 𑀢𑀁 𑀓𑀭𑀡𑀻𑀬𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺; 𑀦 𑀳𑀺 𑀧𑀩𑁆𑀩𑀚𑁆𑀚𑀸𑀬 𑀢𑀺𑀩𑁆𑀩𑀘𑁆𑀙𑀦𑁆𑀤𑀲𑁆𑀲 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀻𑀲𑀼 𑀯𑀸 𑀦𑀓𑁆𑀔𑀢𑁆𑀢𑀓𑀻𑀴𑀸𑀬𑀁 𑀯𑀸 𑀘𑀺𑀢𑁆𑀢𑀁 𑀦𑀫𑀢𑀺. 𑀅𑀫𑁆𑀫 𑀢𑀸𑀢𑀸𑀢𑀺 𑀏𑀢𑁆𑀣 𑀧𑀦 𑀅𑀫𑁆𑀫𑀸𑀢𑀺 𑀫𑀸𑀢𑀭𑀁 𑀆𑀮𑀧𑀢𑀺; 𑀢𑀸𑀢𑀸𑀢𑀺 𑀧𑀺𑀢𑀭𑀁. 𑀢𑁆𑀯𑀁 𑀔𑁄𑀲𑀻𑀢𑀺 𑀢𑁆𑀯𑀁 𑀔𑁄 𑀅𑀲𑀺. 𑀏𑀓𑀧𑀼𑀢𑁆𑀢𑀓𑁄𑀢𑀺 𑀏𑀓𑁄𑀯 𑀧𑀼𑀢𑁆𑀢𑀓𑁄; 𑀅𑀜𑁆𑀜𑁄 𑀢𑁂 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸 𑀦𑀢𑁆𑀣𑀺. 𑀏𑀢𑁆𑀣 𑀘 ‘‘𑀏𑀓𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀓𑀫𑁆𑀧𑀸𑀯𑀲𑁂𑀦 ‘‘𑀏𑀓𑀧𑀼𑀢𑁆𑀢𑀓𑁄’’𑀢𑀺 𑀯𑀼𑀢𑁆𑀢𑀁. 𑀧𑀺𑀬𑁄𑀢𑀺 𑀧𑀻𑀢𑀺𑀚𑀦𑀦𑀓𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀲𑀼𑀔𑁂𑀥𑀺𑀢𑁄𑀢𑀺 𑀲𑀼𑀔𑁂𑀦 𑀏𑀥𑀺𑀢𑁄; 𑀲𑀼𑀔𑀲𑀁𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀧𑀭𑀺𑀳𑀢𑁄𑀢𑀺 𑀲𑀼𑀔𑁂𑀦 𑀧𑀭𑀺𑀳𑀢𑁄; 𑀚𑀸𑀢𑀓𑀸𑀮𑀢𑁄 𑀧𑀪𑀼𑀢𑀺 𑀥𑀸𑀢𑀻𑀳𑀺 𑀅𑀗𑁆𑀓𑀢𑁄 𑀅𑀗𑁆𑀓𑀁 𑀳𑀭𑀺𑀢𑁆𑀯𑀸 𑀥𑀸𑀭𑀺𑀬𑀫𑀸𑀦𑁄 𑀅𑀲𑁆𑀲𑀓𑀭𑀣𑀓𑀸𑀤𑀻𑀳𑀺 𑀩𑀸𑀮𑀓𑀻𑀴𑀦𑀓𑁂𑀳𑀺 𑀓𑀻𑀴𑀫𑀸𑀦𑁄 𑀲𑀸𑀤𑀼𑀭𑀲𑀪𑁄𑀚𑀦𑀁 𑀪𑁄𑀚𑀺𑀬𑀫𑀸𑀦𑁄 𑀲𑀼𑀔𑁂𑀦 𑀧𑀭𑀺𑀳𑀢𑁄.

𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀻𑀢𑀺 𑀢𑁆𑀯𑀁 𑀢𑀸𑀢 𑀲𑀼𑀤𑀺𑀦𑁆𑀦 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀮𑀪𑀸𑀕𑀁 𑀤𑀼𑀓𑁆𑀔𑀲𑁆𑀲 𑀦 𑀚𑀸𑀦𑀸𑀲𑀺; 𑀅𑀣 𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑁂𑀦 𑀦𑀸𑀦𑀼𑀪𑁄𑀲𑀻𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀦𑀼𑀪𑀯𑀦𑀢𑁆𑀣𑁂 𑀘 𑀚𑀸𑀦𑀦𑀸; 𑀅𑀣 𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀦𑀲𑁆𑀲𑀭𑀲𑀻𑀢𑀺 𑀅𑀢𑁆𑀣𑁄. 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀲𑀭𑀡𑀢𑁆𑀣𑁂 𑀘 𑀚𑀸𑀦𑀦𑀸. 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀼𑀭𑀺𑀫𑀧𑀤𑀲𑁆𑀲 𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 ¶ 𑀲𑀘𑁂𑀧𑀺 𑀢𑀯 𑀅𑀫𑁆𑀳𑁂𑀲𑀼 𑀚𑀻𑀯𑀫𑀸𑀦𑁂𑀲𑀼 𑀫𑀭𑀡𑀁 𑀪𑀯𑁂𑀬𑁆𑀬, 𑀢𑁂𑀦 𑀢𑁂 𑀫𑀭𑀡𑁂𑀦𑀧𑀺 𑀫𑀬𑀁 𑀅𑀓𑀸𑀫𑀓𑀸 𑀅𑀦𑀺𑀘𑁆𑀙𑀓𑀸 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸, 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫; 𑀢𑀬𑀸 𑀯𑀺𑀬𑁄𑀕𑀁 𑀯𑀸 𑀧𑀸𑀧𑀼𑀡𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀧𑀦 𑀓𑀺𑀁 𑀦𑀸𑀫 𑀢𑀁 𑀓𑀸𑀭𑀡𑀁 𑀬𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫; 𑀅𑀣 𑀯𑀸 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁨𑁭. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀦𑀁 𑀞𑀺𑀢𑀁 𑀫𑀸𑀢𑀸𑀧𑀺𑀢𑀭𑁄 𑀦𑀸𑀦𑀼𑀚𑀸𑀦𑀺𑀁𑀲𑀼, 𑀢𑀢𑁆𑀣𑁂𑀯 𑀞𑀸𑀦𑁂. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀓𑁂𑀦𑀘𑀺 𑀅𑀢𑁆𑀣𑀭𑀡𑁂𑀦 𑀅𑀦𑀢𑁆𑀣𑀢𑀸𑀬.

𑁨𑁮. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀳𑀺 𑀲𑀜𑁆𑀘𑀸𑀭𑁂𑀳𑀺; 𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀭𑀺𑀘𑀸𑀭𑁂𑀳𑀻𑀢𑀺 ¶ 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 ¶ 𑀢𑀢𑁆𑀣 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀮𑀴, 𑀉𑀧𑀮𑀴, 𑀭𑀫, 𑀓𑀻𑀴𑀲𑁆𑀲𑀽𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀪𑁄𑀕𑁂 𑀪𑀼𑀜𑁆𑀚𑀦𑁆𑀢𑁄. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄𑀢𑀺 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀆𑀭𑀩𑁆𑀪 𑀤𑀸𑀦𑀧𑁆𑀧𑀤𑀸𑀦𑀸𑀤𑀻𑀦𑀺 𑀲𑀼𑀕𑀢𑀺𑀫𑀕𑁆𑀕𑀲𑁄𑀥𑀓𑀸𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀓𑀣𑀸𑀦𑀼𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀢𑁆𑀣𑀁 𑀦𑀺𑀭𑀸𑀮𑀸𑀧𑀲𑀮𑁆𑀮𑀸𑀧𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀝𑀺𑀯𑀘𑀦𑀫𑁆𑀧𑀺 𑀅𑀮𑀪𑀫𑀸𑀦𑀸 𑀲𑀳𑀸𑀬𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀲 𑀯𑁄 𑀲𑀳𑀸𑀬𑀓𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀦𑀺𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀧𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀯𑁄𑀘𑀼𑀁, 𑀢𑁂𑀲𑀫𑁆𑀧𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸…𑀧𑁂… 𑀢𑀼𑀡𑁆𑀳𑀻 𑀅𑀳𑁄𑀲𑀻’’𑀢𑀺.

𑁨𑁯. 𑀅𑀣𑀲𑁆𑀲 𑀲𑀳𑀸𑀬𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀬𑀁 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀫𑀭𑀺𑀲𑁆𑀲𑀢𑀺 𑀦 𑀓𑁄𑀘𑀺 𑀕𑀼𑀡𑁄 𑀪𑀯𑀺𑀲𑁆𑀲𑀢𑀺. 𑀧𑀩𑁆𑀩𑀚𑀺𑀢𑀁 𑀧𑀦 𑀦𑀁 𑀫𑀸𑀢𑀸𑀧𑀺𑀢𑀭𑁄𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀫𑀬𑀫𑁆𑀧𑀺 𑀧𑀲𑁆𑀲𑀺𑀲𑁆𑀲𑀸𑀫. 𑀧𑀩𑁆𑀩𑀚𑁆𑀚𑀸𑀧𑀺 𑀘 𑀦𑀸𑀫𑁂𑀲𑀸 𑀪𑀸𑀭𑀺𑀬𑀸, 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀢𑀺𑀤𑀼𑀓𑁆𑀓𑀭𑀁. 𑀅𑀬𑀜𑁆𑀘 𑀲𑀼𑀔𑀼𑀫𑀸𑀮𑁄 𑀦𑀸𑀕𑀭𑀺𑀓𑀚𑀸𑀢𑀺𑀬𑁄, 𑀲𑁄 𑀢𑀁 𑀘𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀇𑀥𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀳𑀦𑁆𑀤𑀲𑁆𑀲 ¶ 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀁 𑀅𑀦𑀼𑀚𑀸𑀦𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄…𑀧𑁂… 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁩𑁦. 𑀳𑀝𑁆𑀞𑁄𑀢𑀺 𑀢𑀼𑀝𑁆𑀞𑁄. 𑀉𑀤𑀕𑁆𑀕𑁄𑀢𑀺 𑀧𑀻𑀢𑀺𑀯𑀲𑁂𑀦 𑀅𑀩𑁆𑀪𑀼𑀦𑁆𑀦𑀢𑀓𑀸𑀬𑀘𑀺𑀢𑁆𑀢𑁄. 𑀓𑀢𑀺𑀧𑀸𑀳𑀦𑁆𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺. 𑀩𑀮𑀁 𑀕𑀸𑀳𑁂𑀢𑁆𑀯𑀸𑀢𑀺 𑀲𑀧𑁆𑀧𑀸𑀬𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑁄, 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀸𑀤𑀻𑀳𑀺 𑀘 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑁄, 𑀓𑀸𑀬𑀩𑀮𑀁 𑀚𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀦𑁆𑀢𑁂 𑀪𑀕𑀯𑀸𑀢𑀺. 𑀪𑀕𑀯𑀸 𑀲𑀫𑀻𑀧𑁂 𑀞𑀺𑀢𑀁 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀲𑀼𑀤𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀳𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀳𑀺 𑀘𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀚𑀺𑀦𑀤𑀢𑁆𑀢𑀺𑀬𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀮𑀤𑁆𑀥𑀸 𑀧𑀩𑁆𑀩𑀸𑀚𑁂𑀲𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺 𑀘. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀢𑁆𑀣 𑀔𑁄 ¶ 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀓𑀣𑀺𑀢𑀸. 𑀫𑀬𑀁 𑀧𑀦 𑀬𑀣𑀸𑀞𑀺𑀢𑀧𑀸𑀴𑀺𑀯𑀲𑁂𑀦𑁂𑀯 𑀔𑀦𑁆𑀥𑀓𑁂 𑀓𑀣𑀬𑀺𑀲𑁆𑀲𑀸𑀫. 𑀦 𑀓𑁂𑀯𑀮𑀜𑁆𑀘𑁂𑀢𑀁, 𑀅𑀜𑁆𑀜𑀫𑁆𑀧𑀺 𑀬𑀁 𑀔𑀦𑁆𑀥𑀓𑁂 𑀯𑀸 𑀧𑀭𑀺𑀯𑀸𑀭𑁂 𑀯𑀸 𑀓𑀣𑁂𑀢𑀩𑁆𑀩𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀺𑀪𑀗𑁆𑀕𑁂𑀓𑀣𑀺𑀢𑀁, 𑀢𑀁 𑀲𑀩𑁆𑀩𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀣𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀓𑀣𑀺𑀬𑀫𑀸𑀦𑁂 ¶ 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀯𑀡𑁆𑀡𑀦𑀸 𑀓𑀢𑀸 𑀳𑁄𑀢𑀺. 𑀢𑀢𑁄 𑀢𑁂𑀦 𑀢𑁂𑀦 𑀯𑀺𑀦𑀺𑀘𑁆𑀙𑀬𑁂𑀦 𑀅𑀢𑁆𑀣𑀺𑀓𑀸𑀦𑀁 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀇𑀫𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀑𑀮𑁄𑀓𑁂𑀢𑁆𑀯𑀸 𑀲𑁄 𑀲𑁄 𑀯𑀺𑀦𑀺𑀘𑁆𑀙𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄𑀢𑀺 𑀅𑀘𑀺𑀭𑀁 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸; 𑀉𑀧𑀲𑀫𑁆𑀧𑀤𑀢𑁄 𑀦𑀘𑀺𑀭𑀓𑀸𑀮𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀭𑀽𑀧𑁂𑀢𑀺 𑀏𑀯𑀁𑀯𑀺𑀥𑁂 𑀏𑀯𑀁𑀚𑀸𑀢𑀺𑀓𑁂. 𑀥𑀼𑀢𑀕𑀼𑀡𑁂𑀢𑀺 𑀓𑀺𑀮𑁂𑀲𑀦𑀺𑀤𑁆𑀥𑀼𑀦𑀦𑀓𑁂 𑀕𑀼𑀡𑁂. 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀯𑀢𑁆𑀢𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺. 𑀆𑀭𑀜𑁆𑀜𑀺𑀓𑁄 𑀳𑁄𑀢𑀻𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀅𑀭𑀜𑁆𑀜𑀯𑀸𑀲𑀺𑀓𑁄 𑀳𑁄𑀢𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀅𑀢𑀺𑀭𑁂𑀓𑀮𑀸𑀪𑀧𑀝𑀺𑀓𑁆𑀔𑁂𑀧𑁂𑀦 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺. 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀲𑀧𑀤𑀸𑀦𑀘𑀸𑀭𑀺𑀓𑁄 𑀳𑁄𑀢𑀺; 𑀖𑀭𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀸𑀬 𑀧𑀯𑀺𑀲𑀢𑀺. 𑀯𑀚𑁆𑀚𑀺𑀕𑀸𑀫𑀦𑁆𑀢𑀺 𑀯𑀚𑁆𑀚𑀻𑀦𑀁 𑀕𑀸𑀫𑀁 𑀯𑀚𑁆𑀚𑀻𑀲𑀼 𑀯𑀸 𑀕𑀸𑀫𑀁.

𑀅𑀟𑁆𑀠𑀸 𑀫𑀳𑀤𑁆𑀥𑀦𑀸𑀢𑀺𑀆𑀤𑀻𑀲𑀼 𑀉𑀧𑀪𑁄𑀕𑀧𑀭𑀺𑀪𑁄𑀕𑀽𑀧𑀓𑀭𑀡𑀫𑀳𑀦𑁆𑀢𑀢𑀸𑀬 𑀅𑀟𑁆𑀠𑀸; 𑀬𑁂 𑀳𑀺 𑀢𑁂𑀲𑀁 𑀉𑀧𑀪𑁄𑀕𑀸 𑀬𑀸𑀦𑀺 𑀘 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀺, 𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀩𑀳𑀼𑀮𑀸𑀦𑀺 𑀲𑀸𑀭𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀥𑁂𑀢𑁆𑀯𑀸 𑀞𑀧𑀺𑀢𑀥𑀦𑀫𑀳𑀦𑁆𑀢𑀢𑀸𑀬 𑀫𑀳𑀤𑁆𑀥𑀦𑀸. 𑀫𑀳𑀸𑀪𑁄𑀕𑀸𑀢𑀺 𑀤𑀺𑀯𑀲𑀧𑀭𑀺𑀩𑁆𑀩𑀬𑀲𑀗𑁆𑀔𑀸𑀢𑀪𑁄𑀕𑀫𑀳𑀦𑁆𑀢𑀢𑀸𑀬 𑀫𑀳𑀸𑀪𑁄𑀕𑀸. 𑀅𑀜𑁆𑀜𑁂𑀳𑀺 𑀉𑀧𑀪𑁄𑀕𑁂𑀳𑀺 𑀚𑀸𑀢𑀭𑀽𑀧𑀭𑀚𑀢𑀲𑁆𑀲𑁂𑀯 𑀧𑀳𑀽𑀢𑀢𑀸𑀬 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸. 𑀅𑀮𑀗𑁆𑀓𑀸𑀭𑀪𑀽𑀢𑀲𑁆𑀲 𑀯𑀺𑀢𑁆𑀢𑀽𑀧𑀓𑀭𑀡𑀲𑁆𑀲 𑀧𑀻𑀢𑀺𑀧𑀸𑀫𑁄𑀚𑁆𑀚𑀓𑀭𑀡𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸. 𑀯𑁄𑀳𑀸𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀥𑀦𑀥𑀜𑁆𑀜𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀥𑀦𑀥𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀦𑀸𑀲𑀦𑀁 ¶ 𑀲𑀁𑀲𑀸𑀫𑁂𑀢𑁆𑀯𑀸𑀢𑀺 𑀲𑁂𑀦𑀸𑀲𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸; 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺 𑀢𑀣𑀸 𑀦𑀁 𑀲𑀼𑀝𑁆𑀞𑀼 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄 𑀲𑀝𑁆𑀞𑀺𑀣𑀸𑀮𑀺𑀧𑀸𑀓𑁂. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀣𑀸𑀮𑀺𑀧𑀸𑀓𑁄 𑀤𑀲𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀙𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀪𑀢𑁆𑀢𑀁 𑀳𑁄𑀢𑀺. 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽𑀢𑀺 𑀏𑀢𑁆𑀣 𑀅𑀪𑀺𑀳𑀭𑀻𑀬𑀢𑀻𑀢𑀺 𑀅𑀪𑀺𑀳𑀸𑀭𑁄. 𑀓𑀺𑀁 𑀅𑀪𑀺𑀳𑀭𑀻𑀬𑀢𑀺? 𑀪𑀢𑁆𑀢𑀁. 𑀪𑀢𑁆𑀢𑀫𑁂𑀯 𑀅𑀪𑀺𑀳𑀸𑀭𑁄 𑀪𑀢𑁆𑀢𑀸𑀪𑀺𑀳𑀸𑀭𑁄, 𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑀁. 𑀅𑀪𑀺𑀳𑀭𑀺𑀁𑀲𑀽𑀢𑀺 𑀅𑀪𑀺𑀫𑀼𑀔𑀸 𑀳𑀭𑀺𑀁𑀲𑀼. 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀆𑀕𑀫𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 𑀓𑀺𑀁 𑀧𑀫𑀸𑀡𑀦𑁆𑀢𑀺? 𑀲𑀝𑁆𑀞𑀺 𑀣𑀸𑀮𑀺𑀧𑀸𑀓𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽’’𑀢𑀺. 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀬𑀁 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀸 𑀲𑀧𑀤𑀸𑀦𑀘𑀸𑀭𑀁 𑀘𑀭𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀢𑁆𑀯𑀸. 𑀅𑀬𑀁 𑀳𑀺 𑀆𑀬𑀲𑁆𑀫𑀸 ‘‘𑀪𑀺𑀓𑁆𑀔𑀽 𑀘 𑀮𑀸𑀪𑀁 𑀮𑀘𑁆𑀙𑀦𑁆𑀢𑀺 𑀅𑀳𑀜𑁆𑀘 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀤𑀢𑁆𑀣𑀫𑁂𑀯 𑀆𑀕𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀆𑀕𑀫𑀦𑀸𑀦𑀼𑀭𑀽𑀧𑀁 ¶ 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑁩𑁧. 𑀜𑀸𑀢𑀺𑀤𑀸𑀲𑀻𑀢𑀺 ¶ 𑀜𑀸𑀢𑀓𑀸𑀦𑀁 𑀤𑀸𑀲𑀻. 𑀆𑀪𑀺𑀤𑁄𑀲𑀺𑀓𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀁 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀁 𑀧𑀽𑀢𑀺𑀪𑀽𑀢𑀁. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀧𑀽𑀢𑀺𑀪𑀸𑀯𑀤𑁄𑀲𑁂𑀦 𑀅𑀪𑀺𑀪𑀽𑀢𑁄𑀢𑀺 𑀅𑀪𑀺𑀤𑁄𑀲𑁄, 𑀅𑀪𑀺𑀤𑁄𑀲𑁄𑀯 𑀆𑀪𑀺𑀤𑁄𑀲𑀺𑀓𑁄, 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀯𑀸 𑀦𑀸𑀫𑀲𑀜𑁆𑀜𑀸 𑀏𑀲𑀸, 𑀬𑀤𑀺𑀤𑀁 𑀆𑀪𑀺𑀤𑁄𑀲𑀺𑀓𑁄𑀢𑀺, 𑀢𑀁 𑀆𑀪𑀺𑀤𑁄𑀲𑀺𑀓𑀁. 𑀓𑀼𑀫𑁆𑀫𑀸𑀲𑀦𑁆𑀢𑀺 𑀬𑀯𑀓𑀼𑀫𑁆𑀫𑀸𑀲𑀁. 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀸𑀦𑀫𑁆𑀧𑀺 𑀕𑁄𑀭𑀽𑀧𑀸𑀦𑀫𑁆𑀧𑀺 𑀅𑀧𑀭𑀺𑀪𑁄𑀕𑀸𑀭𑀳𑁄, 𑀢𑀲𑁆𑀫𑀸 𑀢𑀁 𑀓𑀘𑀯𑀭𑀁 𑀯𑀺𑀬 𑀩𑀳𑀺 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀘𑁂𑀢𑀦𑁆𑀢𑀺 𑀲𑀘𑁂 𑀏𑀢𑀁. 𑀪𑀕𑀺𑀦𑀻𑀢𑀺 𑀅𑀭𑀺𑀬𑀯𑁄𑀳𑀸𑀭𑁂𑀦 𑀜𑀸𑀢𑀺𑀤𑀸𑀲𑀺𑀁 𑀆𑀮𑀧𑀢𑀺. 𑀙𑀟𑁆𑀟𑀦𑀻𑀬𑀥𑀫𑁆𑀫𑀦𑁆𑀢𑀺 𑀙𑀟𑁆𑀟𑁂𑀢𑀩𑁆𑀩𑀲𑀪𑀸𑀯𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀪𑀕𑀺𑀦𑀺, 𑀏𑀢𑀁 𑀲𑀘𑁂 𑀩𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀢𑀁 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸’’𑀢𑀺.

𑀓𑀺𑀁 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀧𑀬𑀼𑀢𑁆𑀢𑀯𑀸𑀘𑀸 𑀯𑀸 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀢𑁆𑀢𑀸. 𑀬𑀜𑁆𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀬𑀢𑁆𑀣 𑀲𑀸𑀫𑀺𑀓𑀸 𑀅𑀦𑀸𑀮𑀬𑀸 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 ‘‘𑀤𑁂𑀣 𑀆𑀳𑀭𑀣 𑀇𑀥 𑀆𑀓𑀺𑀭𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀅𑀕𑁆𑀕𑀅𑀭𑀺𑀬𑀯𑀁𑀲𑀺𑀓𑁄 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄𑀧𑀺 ‘‘𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀓𑀼𑀫𑁆𑀫𑀸𑀲𑀁 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸’’𑀢𑀺 (𑀫. 𑀦𑀺. 𑁨.𑁨𑁯𑁯) 𑀅𑀯𑀘. 𑀢𑀲𑁆𑀫𑀸 𑀬𑀁 𑀏𑀯𑀭𑀽𑀧𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀅𑀜𑁆𑀜𑀁 𑀯𑀸 𑀅𑀧𑀭𑀺𑀕𑁆𑀕𑀳𑀺𑀢𑀁 𑀯𑀦𑀫𑀽𑀮𑀨𑀮𑀪𑁂𑀲𑀚𑁆𑀚𑀸𑀤𑀺𑀓𑀁 𑀢𑀁 𑀲𑀩𑁆𑀩𑀁 𑀬𑀣𑀸𑀲𑀼𑀔𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁. 𑀳𑀢𑁆𑀣𑀸𑀦𑀦𑁆𑀢𑀺 ¶ 𑀪𑀺𑀓𑁆𑀔𑀸𑀕𑁆𑀕𑀳𑀡𑀢𑁆𑀣𑀁 𑀧𑀢𑁆𑀢𑀁 𑀉𑀧𑀦𑀸𑀫𑀬𑀢𑁄 𑀫𑀡𑀺𑀩𑀦𑁆𑀥𑀢𑁄 𑀧𑀪𑀼𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑀢𑁆𑀣𑀸𑀦𑀁. 𑀧𑀸𑀤𑀸𑀦𑀦𑁆𑀢𑀺 𑀦𑀺𑀯𑀸𑀲𑀦𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀸𑀤𑀸𑀦𑀁. 𑀲𑀭𑀲𑁆𑀲𑀸𑀢𑀺 ‘‘𑀲𑀘𑁂𑀢𑀁 𑀪𑀕𑀺𑀦𑀻’’𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀢𑁄 𑀲𑀭𑀲𑁆𑀲 𑀘. 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 𑀕𑀺𑀳𑀺𑀓𑀸𑀮𑁂 𑀲𑀮𑁆𑀮𑀓𑁆𑀔𑀺𑀢𑀧𑀼𑀩𑁆𑀩𑀁 𑀆𑀓𑀸𑀭𑀁 𑀅𑀕𑁆𑀕𑀳𑁂𑀲𑀺 𑀲𑀜𑁆𑀚𑀸𑀦𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀲𑀼𑀤𑀺𑀦𑁆𑀦𑁄 𑀳𑀺 𑀪𑀕𑀯𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑁄 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀬𑀁 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸; 𑀢𑁂𑀦 𑀦𑀁 𑀲𑀸 𑀜𑀸𑀢𑀺𑀤𑀸𑀲𑀻 𑀤𑀺𑀲𑁆𑀯𑀸𑀯 𑀦 𑀲𑀜𑁆𑀚𑀸𑀦𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀅𑀕𑁆𑀕𑀳𑁂𑀲𑀻𑀢𑀺.

𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘𑀸𑀢𑀺 𑀅𑀢𑀺𑀕𑀭𑀼𑀦𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑁂𑀦 𑀲𑀸𑀫𑀺𑀧𑀼𑀢𑁆𑀢𑁂𑀦 ¶ 𑀲𑀤𑁆𑀥𑀺𑀁 ‘‘𑀢𑁆𑀯𑀁 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀤𑀺𑀦𑁆𑀦𑁄’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀯𑁂𑀕𑁂𑀦 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀁 𑀅𑀯𑁄𑀘. 𑀬𑀕𑁆𑀖𑁂𑀢𑀺 𑀆𑀭𑁄𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀘𑁂 𑀚𑁂 𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀚𑁂𑀢𑀺 𑀆𑀮𑀧𑀦𑁂 𑀦𑀺𑀧𑀸𑀢𑁄. 𑀏𑀯𑀜𑁆𑀳𑀺 𑀢𑀲𑁆𑀫𑀺𑀁 𑀤𑁂𑀲𑁂 𑀤𑀸𑀲𑀺𑀚𑀦𑀁 𑀆𑀮𑀧𑀦𑁆𑀢𑀺, 𑀢𑀲𑁆𑀫𑀸 ‘‘𑀢𑁆𑀯𑀁, 𑀪𑁄𑀢𑀺 𑀤𑀸𑀲𑀺, 𑀲𑀘𑁂 𑀲𑀘𑁆𑀘𑀁 𑀪𑀡𑀲𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁨. 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀲𑁂 𑀤𑀸𑀦𑀧𑀢𑀻𑀦𑀁 𑀖𑀭𑁂𑀲𑀼 𑀲𑀸𑀮𑀸 𑀳𑁄𑀦𑁆𑀢𑀺, 𑀆𑀲𑀦𑀸𑀦𑀺 𑀘𑁂𑀢𑁆𑀣 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀝𑁆𑀞𑀸𑀧𑀺𑀢𑀁 𑀉𑀤𑀓𑀓𑀜𑁆𑀚𑀺𑀬𑀁; 𑀢𑀢𑁆𑀣 𑀧𑀩𑁆𑀩𑀚𑀺𑀢𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀲𑀘𑁂 𑀇𑀘𑁆𑀙𑀦𑁆𑀢𑀺, 𑀤𑀸𑀦𑀧𑀢𑀻𑀦𑀫𑁆𑀧𑀺 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀈𑀤𑀺𑀲𑀸𑀬 𑀲𑀸𑀮𑀸𑀬 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀧𑀩𑁆𑀩𑀚𑀺𑀢𑀸 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀲𑀸𑀭𑀼𑀧𑁆𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻𑀢𑀺.

𑀅𑀢𑁆𑀣𑀺 𑀦𑀸𑀫 𑀢𑀸𑀢𑀸𑀢𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑁂; 𑀦𑀸𑀫𑀸𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀫𑀜𑁆𑀜𑀦𑀢𑁆𑀣𑁂 𑀘 𑀦𑀺𑀧𑀸𑀢𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀥𑀦𑀁, 𑀦 𑀫𑀬𑀁 𑀦𑀺𑀤𑁆𑀥𑀦𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺’’; 𑀢𑀣𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁, 𑀦 𑀫𑀬𑀁 𑀫𑀢𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺’’; 𑀢𑀣𑀸 ‘‘𑀅𑀢𑁆𑀣𑀺 𑀫𑀜𑁆𑀜𑁂, 𑀢𑀸𑀢 𑀲𑀼𑀤𑀺𑀦𑁆𑀦, 𑀢𑀯 𑀅𑀩𑁆𑀪𑀦𑁆𑀢𑀭𑁂 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀝𑀺𑀮𑀤𑁆𑀥𑁄 ¶ 𑀲𑀫𑀡𑀕𑀼𑀡𑁄, 𑀬𑀁 𑀢𑁆𑀯𑀁 𑀲𑀼𑀪𑁄𑀚𑀦𑀭𑀲𑀲𑀁𑀯𑀟𑁆𑀠𑀺𑀢𑁄𑀧𑀺 𑀇𑀫𑀁 𑀚𑀺𑀕𑀼𑀘𑁆𑀙𑀦𑁂𑀬𑁆𑀬𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀅𑀫𑀢𑀫𑀺𑀯 𑀦𑀺𑀩𑁆𑀩𑀺𑀓𑀸𑀭𑁄 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺.

𑀲𑁄 𑀧𑀦 𑀕𑀳𑀧𑀢𑀺 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬 𑀏𑀢𑀫𑀢𑁆𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁄 ‘‘𑀅𑀢𑁆𑀣𑀺 𑀦𑀸𑀫, 𑀢𑀸𑀢 𑀲𑀼𑀤𑀺𑀦𑁆𑀦, 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑁄𑀘. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦𑁂𑀢𑁆𑀣 𑀇𑀫𑀁 𑀮𑀓𑁆𑀔𑀡𑀁 𑀯𑀤𑀦𑁆𑀢𑀺 𑁋 𑀅𑀦𑁄𑀓𑀧𑁆𑀧𑀦𑀸𑀫𑀭𑀺𑀲𑀦𑀢𑁆𑀣𑀯𑀲𑁂𑀦 𑀏𑀢𑀁 𑀅𑀢𑁆𑀣𑀺𑀦𑀸𑀫𑀲𑀤𑁆𑀤𑁂 𑀉𑀧𑀧𑀤𑁂 ‘‘𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀅𑀢𑁆𑀣𑀺 𑀦𑀸𑀫…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀧𑀘𑁆𑀘𑀓𑁆𑀔𑀫𑁆𑀧𑀺 𑀅𑀳𑀁 𑀦 𑀲𑀤𑁆𑀤𑀳𑀸𑀫𑀺 ¶ 𑀦 𑀫𑀭𑀺𑀲𑀬𑀸𑀫𑀻𑀢𑀺. 𑀢𑀢𑀸𑀬𑀁 𑀆𑀪𑀺𑀤𑁄𑀲𑀺𑀓𑁄𑀢𑀺 𑀢𑀢𑁄 𑀢𑀯 𑀕𑁂𑀳𑀢𑁄 𑀅𑀬𑀁 𑀆𑀪𑀺𑀤𑁄𑀲𑀺𑀓𑁄 𑀓𑀼𑀫𑁆𑀫𑀸𑀲𑁄 𑀮𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀬𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀤𑀸𑀬𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑁂𑀦 𑀲𑀓𑀧𑀺𑀢𑀼 𑀦𑀺𑀯𑁂𑀲𑀦𑀦𑁆𑀢𑀺 𑀬𑁂𑀦 𑀲𑀓𑀲𑁆𑀲 𑀧𑀺𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀦𑀺𑀯𑁂𑀲𑀦𑀦𑁆𑀢𑀺 𑀅𑀢𑁆𑀣𑁄; 𑀣𑁂𑀭𑁄 𑀧𑀺𑀢𑀭𑀺 𑀧𑁂𑀫𑁂𑀦𑁂𑀯 𑀲𑀼𑀩𑁆𑀩𑀘𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀣𑁂𑀭𑁄 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑁄𑀧𑀺 𑀲𑀫𑀸𑀦𑁄 ‘‘𑀲𑀘𑁂 𑀏𑀓𑀪𑀢𑁆𑀢𑀫𑁆𑀧𑀺 𑀦 𑀕𑀳𑁂𑀲𑁆𑀲𑀸𑀫𑀺, 𑀅𑀢𑀺𑀯𑀺𑀬 𑀦𑁂𑀲𑀁 𑀤𑁄𑀫𑀦𑀲𑁆𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀸𑀢𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀅𑀥𑀺𑀯𑀸𑀲𑁂𑀲𑀺.

𑁩𑁩. 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸𑀢𑀺 𑀉𑀧𑀮𑀺𑀫𑁆𑀧𑀸𑀧𑁂𑀢𑁆𑀯𑀸. 𑀏𑀓𑀁 𑀳𑀺𑀭𑀜𑁆𑀜𑀲𑁆𑀲𑀸𑀢𑀺 𑀏𑀢𑁆𑀣 𑀳𑀺𑀭𑀜𑁆𑀜𑀦𑁆𑀢𑀺 𑀓𑀳𑀸𑀧𑀡𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀲𑁄𑀢𑀺 𑀦𑀸𑀢𑀺𑀤𑀻𑀖𑁄 𑀦𑀸𑀢𑀺𑀭𑀲𑁆𑀲𑁄 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀭𑁄𑀓𑀭𑀡𑀻𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀁; 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀭𑁄 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀢𑀺𑀭𑁄𑀓𑀭𑀡𑀻𑀬𑀁, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸; 𑀲𑀫𑀦𑁆𑀢𑀢𑁄 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀻𑀢𑀺 𑀬𑀲𑁆𑀫𑀸 𑀅𑀚𑁆𑀚 𑀲𑀼𑀤𑀺𑀦𑁆𑀦𑁄 𑀆𑀕𑀫𑀺𑀲𑁆𑀲𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀳𑀺 𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀢𑁂𑀦𑀸𑀢𑀺 𑀅𑀬𑀫𑁆𑀧𑀺 𑀯𑀸 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄𑀬𑁂𑀯.

𑁩𑁪. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 ¶ 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀓𑀸𑀮𑀸𑀭𑁄𑀘𑀦𑀁 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀆𑀭𑁄𑀘𑀺𑀢𑁂𑀬𑁂𑀯 𑀓𑀸𑀮𑁂 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀢𑁂 𑀢𑀸𑀢𑀸𑀢𑀺 𑀤𑁆𑀯𑁂 𑀧𑀼𑀜𑁆𑀚𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀫𑀸𑀢𑀽𑀢𑀺 𑀚𑀦𑁂𑀢𑁆𑀢𑀺𑀬𑀸. 𑀫𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀺𑀢𑁄 𑀆𑀕𑀢𑀁; 𑀇𑀤𑀁 𑀢𑁂 𑀫𑀸𑀢𑀸𑀫𑀳𑀺𑀬𑀸 𑀫𑀸𑀢𑀼 𑀇𑀫𑀁 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀺𑀬𑀸 𑀤𑀺𑀦𑁆𑀦𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀦𑁆𑀢𑀺 𑀳𑀻𑀴𑁂𑀦𑁆𑀢𑁄 𑀆𑀳 ¶ . 𑀇𑀢𑁆𑀣𑀺𑀓𑀸𑀬 𑀦𑀸𑀫 𑀇𑀢𑁆𑀣𑀺𑀧𑀭𑀺𑀪𑁄𑀕𑀸𑀦𑀁𑀬𑁂𑀯 𑀦𑁆𑀳𑀸𑀦𑀘𑀼𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀮𑀤𑁆𑀥𑀁 𑀥𑀦𑀁 𑀓𑀺𑀢𑁆𑀢𑀓𑀁 𑀪𑀯𑁂𑀬𑁆𑀬. 𑀢𑀲𑁆𑀲𑀸𑀧𑀺 𑀢𑀸𑀯 𑀧𑀭𑀺𑀫𑀸𑀡𑀁 𑀧𑀲𑁆𑀲. 𑀅𑀣 𑀯𑀸 𑀇𑀤𑀁 𑀢𑁂 𑀢𑀸𑀢 𑀲𑀼𑀤𑀺𑀦𑁆𑀦 𑀫𑀸𑀢𑀼 𑀥𑀦𑀁, 𑀢𑀜𑁆𑀘 𑀔𑁄 𑀫𑀢𑁆𑀢𑀺𑀓𑀁, 𑀦 𑀫𑀬𑀸 𑀤𑀺𑀦𑁆𑀦𑀁, 𑀢𑀯 𑀫𑀸𑀢𑀼𑀬𑁂𑀯 𑀲𑀦𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀦𑁂𑀢𑀁 𑀦 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀲𑀫𑁆𑀪𑀽𑀢𑀁, 𑀅𑀧𑀺𑀘 𑀔𑁄 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁. 𑀬𑀁 𑀇𑀢𑁆𑀣𑀺𑀓𑀸𑀬 𑀜𑀸𑀢𑀺𑀓𑀼𑀮𑀢𑁄 𑀲𑀸𑀫𑀺𑀓𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑀸 𑀮𑀤𑁆𑀥𑀩𑁆𑀩𑀁 𑀦𑁆𑀳𑀸𑀦𑀘𑀼𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀢𑁆𑀣𑀺𑀥𑀦𑀁, 𑀢𑀁 𑀢𑀸𑀯 𑀏𑀢𑁆𑀢𑀓𑀦𑁆𑀢𑀺 𑀏𑀯𑀫𑁂𑀢𑁆𑀣 ¶ 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁 𑀅𑀜𑁆𑀜𑀁 𑀧𑀺𑀢𑀸𑀫𑀳𑀦𑁆𑀢𑀺 𑀬𑀁 𑀧𑀦 𑀢𑁂 𑀧𑀺𑀢𑀼 𑀘 𑀧𑀺𑀢𑀸𑀫𑀳𑀸𑀦𑀜𑁆𑀘 𑀲𑀦𑁆𑀢𑀓𑀁, 𑀢𑀁 𑀅𑀜𑁆𑀜𑀁𑀬𑁂𑀯. 𑀦𑀺𑀳𑀺𑀢𑀜𑁆𑀘 𑀧𑀬𑀼𑀢𑁆𑀢𑀜𑁆𑀘 𑀅𑀢𑀺𑀯𑀺𑀬 𑀩𑀳𑀼; 𑀏𑀢𑁆𑀣 𑀘 𑀧𑀺𑀢𑀸𑀫𑀳𑀦𑁆𑀢𑀺 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀧𑁂𑀢𑀸𑀫𑀳𑀦𑁆𑀢𑀺 𑀯𑀸 𑀧𑀸𑀞𑁄. 𑀮𑀩𑁆𑀪𑀸 𑀢𑀸𑀢 𑀲𑀼𑀤𑀺𑀦𑁆𑀦 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸𑀢𑀺 𑀢𑀸𑀢, 𑀲𑀼𑀤𑀺𑀦𑁆𑀦, 𑀉𑀢𑁆𑀢𑀫𑀁 𑀅𑀭𑀺𑀬𑀤𑁆𑀥𑀚𑀁 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀁 𑀧𑀳𑀸𑀬 𑀳𑀻𑀦𑀸𑀬 𑀕𑀺𑀳𑀺𑀪𑀸𑀯𑀸𑀬 𑀆𑀯𑀢𑁆𑀢𑀺𑀢𑁆𑀯𑀸 𑀮𑀩𑁆𑀪𑀸 𑀪𑁄𑀕𑀸 𑀪𑀼𑀜𑁆𑀚𑀺𑀢𑀼𑀁, 𑀦𑀸𑀮𑀩𑁆𑀪𑀸 𑀪𑀼𑀜𑁆𑀚𑀺𑀢𑀼𑀁, 𑀦 𑀢𑁆𑀯𑀁 𑀭𑀸𑀚𑀪𑀻𑀢𑁄 𑀧𑀩𑁆𑀩𑀚𑀺𑀢𑁄, 𑀦 𑀇𑀡𑀸𑀬𑀺𑀓𑁂𑀳𑀺 𑀧𑀮𑀺𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀢𑀺. 𑀢𑀸𑀢 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀏𑀢𑁆𑀣 𑀧𑀦 𑀢𑀸𑀢𑀸𑀢𑀺 𑀯𑀘𑀦𑀁 𑀕𑁂𑀳𑀲𑀺𑀢𑀧𑁂𑀫𑁂𑀦 𑀆𑀳, 𑀦 𑀲𑀫𑀡𑀢𑁂𑀚𑁂𑀦. 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀦 𑀲𑀓𑁆𑀓𑁄𑀫𑀺. 𑀦 𑀯𑀺𑀲𑀳𑀸𑀫𑀻𑀢𑀺 𑀦𑀧𑁆𑀧𑀳𑁄𑀫𑀺, 𑀦 𑀲𑀫𑀢𑁆𑀣𑁄𑀫𑁆𑀳𑀺.

‘‘𑀯𑀤𑁂𑀬𑁆𑀬𑀸𑀫 𑀔𑁄 𑀢𑀁 𑀕𑀳𑀧𑀢𑀻’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀲𑀫𑀡𑀢𑁂𑀚𑁂𑀦𑀸𑀳. 𑀦𑀸𑀢𑀺𑀓𑀟𑁆𑀠𑁂𑀬𑁆𑀬𑀸𑀲𑀻𑀢𑀺 𑀬𑀁 𑀢𑁂 𑀫𑀬𑀺 𑀧𑁂𑀫𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀁 𑀓𑁄𑀥𑀯𑀲𑁂𑀦 𑀦 𑀅𑀢𑀺𑀓𑀟𑁆𑀠𑁂𑀬𑁆𑀬𑀸𑀲𑀺; 𑀲𑀘𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀲𑁂𑀝𑁆𑀞𑀺 ‘‘𑀧𑀼𑀢𑁆𑀢𑁄 𑀫𑁂 𑀲𑀗𑁆𑀕𑀳𑀁 𑀫𑀜𑁆𑀜𑁂 𑀓𑀢𑁆𑀢𑀼𑀓𑀸𑀫𑁄’’𑀢𑀺 𑀉𑀤𑀕𑁆𑀕𑀘𑀺𑀢𑁆𑀢𑁄 𑀆𑀳 𑁋 ‘‘𑀯𑀤𑁂𑀳𑀺 𑀢𑀸𑀢 𑀲𑀼𑀤𑀺𑀦𑁆𑀦𑀸’’𑀢𑀺. 𑀢𑁂𑀦𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀯𑀺𑀪𑀢𑁆𑀢𑀺𑀧𑀢𑀺𑀭𑀽𑀧𑀓𑁄 𑀦𑀺𑀧𑀸𑀢𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀁𑀦𑀺𑀤𑀸𑀦𑀁 𑀢𑀁𑀳𑁂𑀢𑀼𑀓𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄-𑀆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄; 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄. 𑀪𑀬𑀁 𑀯𑀸𑀢𑀺 ‘‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀭𑀸𑀚𑀸𑀤𑀺𑀪𑀬𑀁; 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀢𑀺 𑀅𑀢𑁆𑀣𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 ‘‘𑀥𑀦𑀁 𑀤𑁂𑀳𑀻’’𑀢𑀺 𑀓𑀫𑁆𑀫𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑀲𑁆𑀲 𑀓𑀸𑀬𑀺𑀜𑁆𑀚𑀦𑀁 𑀓𑀸𑀬𑀓𑀫𑁆𑀧𑁄 𑀳𑀤𑀬𑀫𑀁𑀲𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀉𑀧𑁆𑀧𑀦𑁆𑀦𑁂 𑀪𑀬𑁂 𑀮𑁄𑀫𑀸𑀦𑀁 𑀳𑀁𑀲𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄. 𑀆𑀭𑀓𑁆𑀔𑁄𑀢𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀆𑀭𑀓𑁆𑀔𑀡𑀁.

𑁩𑁫. 𑀢𑁂𑀦 𑀳𑀺 𑀯𑀥𑀽𑀢𑀺 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀢𑁆𑀢𑀁 𑀅𑀢𑁆𑀢𑀦𑀸 𑀕𑀺𑀳𑀺𑀪𑀸𑀯𑀢𑁆𑀣𑀸𑀬 𑀧𑀮𑁄𑀪𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀫𑀸𑀢𑀼𑀕𑀸𑀫𑀲𑀤𑀺𑀲𑀁 𑀤𑀸𑀦𑀺 𑀧𑀼𑀭𑀺𑀲𑀸𑀦𑀁 ¶ 𑀩𑀦𑁆𑀥𑀦𑀁 𑀦𑀢𑁆𑀣𑀻’’𑀢𑀺 𑀫𑀜𑁆𑀜𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 ¶ 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀯𑀥𑀽’’𑀢𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀦𑁆𑀢𑀺 𑀧𑀼𑀭𑀸𑀡𑀁 𑀤𑀼𑀢𑀺𑀬𑀺𑀓𑀁 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀤𑀼𑀢𑀺𑀬𑀺𑀓𑀁, 𑀕𑁂𑀳𑀲𑀺𑀢𑀲𑀼𑀔𑀼𑀧𑀪𑁄𑀕𑀲𑀳𑀸𑀬𑀺𑀓𑀁 𑀪𑀽𑀢𑀧𑀼𑀩𑁆𑀩𑀪𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀫𑀸𑀢𑀼𑀕𑀸𑀫𑀲𑀤𑀺𑀲𑀁 𑀩𑀦𑁆𑀥𑀦𑀁 𑀦𑀢𑁆𑀣𑀺. 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸𑀢𑀺 ¶ 𑀧𑀸𑀤𑁂 𑀕𑀳𑁂𑀢𑁆𑀯𑀸; 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀧𑀸𑀤𑁂𑀲𑀼 𑀯𑀸 𑀢𑀁 𑀕𑀳𑁂𑀢𑁆𑀯𑀸. ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸 𑀅𑀬𑁆𑀬𑀧𑀼𑀢𑁆𑀢 𑀅𑀘𑁆𑀙𑀭𑀸𑀬𑁄’’𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀢𑀤𑀸 𑀓𑀺𑀭 𑀲𑀫𑁆𑀩𑀳𑀼𑀮𑁂 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀧𑀺 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀧𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑁋 ‘‘𑀓𑀲𑁆𑀫𑀸 𑀏𑀢𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺. 𑀅𑀣𑀜𑁆𑀜𑁂 𑀯𑀤𑀦𑁆𑀢𑀺 𑁋 ‘‘𑀤𑁂𑀯𑀘𑁆𑀙𑀭𑀸𑀦𑀁 𑀤𑁂𑀯𑀦𑀸𑀝𑀓𑀸𑀦𑀁 𑀓𑀸𑀭𑀡𑀸’’𑀢𑀺. 𑀲𑀸 𑀓𑀣𑀸 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀏𑀯𑀫𑀸𑀳𑀸𑀢𑀺. 𑀣𑁂𑀭𑁄 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀔𑁄 𑀅𑀳𑀁 𑀪𑀕𑀺𑀦𑀻𑀢𑀺 𑀆𑀳. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀯𑁄𑀳𑀭𑀢𑀺 𑀯𑀤𑁂𑀢𑀺. 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑀸 𑀧𑀧𑀢𑀸𑀢𑀺 𑀦𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀦𑀢𑁆𑀣𑀺𑀓𑁄 𑀤𑀸𑀦𑀺 𑀫𑀬𑀸 𑀅𑀬𑀁 𑀬𑁄 𑀫𑀁 𑀧𑀚𑀸𑀧𑀢𑀺𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀲𑀬𑀺𑀢𑀤𑀸𑀭𑀺𑀓𑀁 𑀯𑀺𑀬 𑀫𑀜𑁆𑀜𑀢𑀻’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀫𑀼𑀘𑁆𑀙𑀺𑀢𑀸 𑀧𑀧𑀢𑀸; 𑀧𑀢𑀺𑀢𑀸𑀢𑀺 𑀅𑀢𑁆𑀣𑁄.

𑀫𑀸 𑀦𑁄 𑀯𑀺𑀳𑁂𑀞𑀬𑀺𑀢𑁆𑀣𑀸𑀢𑀺 𑀫𑀸 𑀅𑀫𑁆𑀳𑁂 𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑀜𑁆𑀘 𑀉𑀬𑁆𑀬𑁄𑀚𑁂𑀢𑁆𑀯𑀸 𑀯𑀺𑀳𑁂𑀞𑀬𑀺𑀢𑁆𑀣; 𑀯𑀺𑀳𑁂𑀲𑀸 𑀳𑁂𑀲𑀸 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺. 𑀢𑁂𑀦 𑀳𑀺 𑀢𑀸𑀢 𑀲𑀼𑀤𑀺𑀦𑁆𑀦 𑀩𑀻𑀚𑀓𑀫𑁆𑀧𑀺 𑀤𑁂𑀳𑀻𑀢𑀺 𑀏𑀢𑁆𑀣 𑀢𑁂𑀦 𑀳𑀻𑀢𑀺 𑀅𑀪𑀺𑀭𑀢𑀺𑀬𑀁 𑀉𑀬𑁆𑀬𑁄𑀚𑁂𑀢𑀺. 𑀲𑀘𑁂 𑀢𑁆𑀯𑀁 𑀅𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀺, 𑀘𑀭𑀺𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀳𑁄𑀳𑀺, 𑀅𑀫𑁆𑀳𑀸𑀓𑀁 𑀧𑀦 𑀓𑀼𑀮𑀯𑀁𑀲𑀩𑀻𑀚𑀓𑀁 𑀏𑀓𑀁 𑀧𑀼𑀢𑁆𑀢𑀁 𑀤𑁂𑀳𑀺. 𑀫𑀸 𑀦𑁄 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀮𑀺𑀘𑁆𑀙𑀯𑀬𑁄 𑀅𑀢𑀺𑀳𑀭𑀸𑀧𑁂𑀲𑀼𑀦𑁆𑀢𑀺 𑀫𑀬𑀜𑁆𑀳𑀺 𑀮𑀺𑀘𑁆𑀙𑀯𑀻𑀦𑀁 𑀕𑀡𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀲𑀸𑀫, 𑀢𑁂 𑀢𑁂 𑀧𑀺𑀢𑀼𑀦𑁄 𑀅𑀘𑁆𑀘𑀬𑁂𑀦 𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀏𑀯𑀁 𑀫𑀳𑀦𑁆𑀢𑀁 𑀅𑀫𑁆𑀳𑀸𑀓𑀁 𑀯𑀺𑀪𑀯𑀁 𑀅𑀧𑀼𑀢𑁆𑀢𑀓𑀁 𑀓𑀼𑀮𑀥𑀦𑀭𑀓𑁆𑀔𑀓𑁂𑀦 𑀧𑀼𑀢𑁆𑀢𑁂𑀦 𑀯𑀺𑀭𑀳𑀺𑀢𑀁 𑀅𑀢𑁆𑀢𑀦𑁄 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀸𑀧𑁂𑀬𑁆𑀬𑀼𑀦𑁆𑀢𑀺, 𑀢𑀁 𑀢𑁂 𑀫𑀸 𑀅𑀢𑀺𑀳𑀭𑀸𑀧𑁂𑀲𑀼𑀁, 𑀫𑀸 𑀅𑀢𑀺𑀳𑀭𑀸𑀧𑁂𑀦𑁆𑀢𑀽𑀢𑀺.

𑀏𑀢𑀁 𑀔𑁄 𑀫𑁂, 𑀅𑀫𑁆𑀫, 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁂𑀲𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀅𑀳𑀫𑁂𑀯 𑀲𑀸𑀫𑀻, 𑀅𑀜𑁆𑀜𑁄 𑀦𑀢𑁆𑀣𑀺. 𑀢𑁂 𑀫𑀁 𑀲𑀸𑀧𑀢𑁂𑀬𑁆𑀬𑀭𑀓𑁆𑀔𑀡𑀢𑁆𑀣𑀸𑀬 𑀦𑀺𑀘𑁆𑀘𑀁 𑀅𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀺; 𑀢𑁂𑀦𑀸𑀳𑀁 𑀦 𑀮𑀘𑁆𑀙𑀸𑀫𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁, 𑀧𑀼𑀢𑁆𑀢𑀓𑀁 𑀧𑀦 𑀮𑀪𑀺𑀢𑁆𑀯𑀸 𑀑𑀭𑀫𑀺𑀲𑁆𑀲𑀦𑁆𑀢𑀺, 𑀢𑀢𑁄 ¶ 𑀅𑀳𑀁 𑀬𑀣𑀸𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀦𑀬𑀁 𑀧𑀲𑁆𑀲𑀦𑁆𑀢𑁄 ¶ 𑀏𑀯𑀫𑀸𑀳𑀸𑀢𑀺.

𑁩𑁬. 𑀧𑀼𑀧𑁆𑀨𑀦𑁆𑀢𑀺 𑀉𑀢𑀼𑀓𑀸𑀮𑁂 𑀉𑀧𑁆𑀧𑀦𑁆𑀦𑀮𑁄𑀳𑀺𑀢𑀲𑁆𑀲 𑀦𑀸𑀫𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀺 𑀉𑀢𑀼𑀓𑀸𑀮𑁂 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂 𑀮𑁄𑀳𑀺𑀢𑀯𑀡𑁆𑀡𑀸 𑀧𑀺𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀟𑁆𑀠𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁄 𑀮𑁄𑀳𑀺𑀢𑀁 ¶ 𑀧𑀕𑁆𑀖𑀭𑀢𑀺, 𑀢𑀲𑁆𑀲𑁂𑀢𑀁 𑀦𑀸𑀫𑀁 ‘‘𑀧𑀼𑀧𑁆𑀨’’𑀦𑁆𑀢𑀺. 𑀢𑀁 𑀧𑀦 𑀬𑀸𑀯 𑀩𑀮𑀯𑀁 𑀳𑁄𑀢𑀺 𑀩𑀳𑀼 𑀧𑀕𑁆𑀖𑀭𑀢𑀺, 𑀢𑀸𑀯 𑀤𑀺𑀦𑁆𑀦𑀸𑀧𑀺 𑀧𑀝𑀺𑀲𑀦𑁆𑀥𑀺 𑀦 𑀢𑀺𑀝𑁆𑀞𑀢𑀺, 𑀤𑁄𑀲𑁂𑀦𑁂𑀯 𑀲𑀤𑁆𑀥𑀺𑀁 𑀧𑀕𑁆𑀖𑀭𑀢𑀺; 𑀤𑁄𑀲𑁂 𑀧𑀦 𑀧𑀕𑁆𑀖𑀭𑀺𑀢𑁂 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀤𑀺𑀦𑁆𑀦𑀸 𑀧𑀝𑀺𑀲𑀦𑁆𑀥𑀺 𑀔𑀺𑀧𑁆𑀧𑀁 𑀧𑀢𑀺𑀝𑁆𑀞𑀸𑀢𑀺. 𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀻𑀢𑀺 𑀧𑀼𑀧𑁆𑀨𑀁 𑀅𑀲𑁆𑀲𑀸 𑀉𑀧𑁆𑀧𑀚𑁆𑀚𑀺; 𑀅𑀓𑀸𑀭𑀮𑁄𑀧𑁂𑀦 𑀲𑀦𑁆𑀥𑀺 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀬𑀸 𑀩𑀸𑀳𑀸, 𑀢𑀢𑁆𑀭 𑀦𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀧𑀺𑀢𑁂. 𑀪𑀕𑀯𑀢𑁄 𑀓𑀺𑀭 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀽 𑀘𑀺𑀢𑁆𑀢𑀁 𑀆𑀭𑀸𑀥𑀬𑀺𑀁𑀲𑀼, 𑀦 𑀏𑀯𑀭𑀽𑀧𑀁 𑀅𑀚𑁆𑀛𑀸𑀘𑀸𑀭𑀫𑀓𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀯 𑀇𑀤𑀁 𑀲𑀼𑀢𑁆𑀢𑀫𑀸𑀳 𑁋 ‘‘𑀆𑀭𑀸𑀥𑀬𑀺𑀁𑀲𑀼 𑀯𑀢 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀏𑀓𑀁 𑀲𑀫𑀬𑀁 𑀘𑀺𑀢𑁆𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁨𑁫). 𑀅𑀣 𑀪𑀕𑀯𑀸 𑀅𑀚𑁆𑀛𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀦 𑀧𑀜𑁆𑀜𑀧𑁂𑀲𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑀲𑁂𑀲𑁂 𑀧𑀜𑁆𑀘 𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀏𑀯 𑀧𑀜𑁆𑀜𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂’’𑀢𑀺.

𑀅𑀦𑀸𑀤𑀻𑀦𑀯𑀤𑀲𑁆𑀲𑁄𑀢𑀺 𑀬𑀁 𑀪𑀕𑀯𑀸 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀆𑀤𑀻𑀦𑀯𑀁 𑀤𑀲𑁆𑀲𑁂𑀲𑁆𑀲𑀢𑀺, 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑀯𑀚𑁆𑀚𑀲𑀜𑁆𑀜𑀻 𑀳𑀼𑀢𑁆𑀯𑀸. 𑀲𑀘𑁂 𑀳𑀺 ‘‘𑀅𑀬𑀁 𑀇𑀤𑀁 𑀦 𑀓𑀭𑀡𑀻𑀬𑀦𑁆𑀢𑀺 𑀯𑀸 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀚𑀸𑀦𑁂𑀬𑁆𑀬, 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀢𑀢𑁄𑀦𑀺𑀤𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀦 𑀓𑀭𑁂𑀬𑁆𑀬. 𑀏𑀢𑁆𑀣 𑀧𑀦 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀦𑀺𑀤𑁆𑀤𑁄𑀲𑀲𑀜𑁆𑀜𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀸𑀤𑀻𑀦𑀯𑀤𑀲𑁆𑀲𑁄’’𑀢𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻𑀢𑀺 𑀧𑀯𑀢𑁆𑀢𑁂𑀲𑀺; 𑀧𑀯𑀢𑁆𑀢𑀦𑀸𑀧𑀺 𑀳𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀘𑁄𑀧𑀦𑀢𑁄 ‘‘𑀯𑀺𑀜𑁆𑀜𑀸𑀧𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀯𑀺𑀜𑁆𑀜𑀸𑀧𑀦𑀜𑁆𑀘𑁂𑀲 𑀕𑀩𑁆𑀪𑀲𑀡𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀫𑀓𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀻𑀢𑀺 𑀲𑀸 𑀘 𑀢𑁂𑀦𑁂𑀯 𑀅𑀚𑁆𑀛𑀸𑀘𑀸𑀭𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺, 𑀦 𑀅𑀜𑁆𑀜𑀣𑀸. 𑀓𑀺𑀁 𑀧𑀦 𑀅𑀜𑁆𑀜𑀣𑀸𑀧𑀺 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 ¶ ? 𑀳𑁄𑀢𑀺. 𑀓𑀣𑀁? 𑀓𑀸𑀬𑀲𑀁𑀲𑀕𑁆𑀕𑁂𑀦 ¶ , 𑀘𑁄𑀴𑀕𑁆𑀕𑀳𑀡𑁂𑀦, 𑀅𑀲𑀼𑀘𑀺𑀧𑀸𑀦𑁂𑀦, 𑀦𑀸𑀪𑀺𑀧𑀭𑀸𑀫𑀲𑀦𑁂𑀦, 𑀭𑀽𑀧𑀤𑀲𑁆𑀲𑀦𑁂𑀦, 𑀲𑀤𑁆𑀤𑁂𑀦, 𑀕𑀦𑁆𑀥𑁂𑀦. 𑀇𑀢𑁆𑀣𑀺𑀬𑁄 𑀳𑀺 𑀏𑀓𑀘𑁆𑀘𑀸 𑀉𑀢𑀼𑀲𑀫𑀬𑁂 𑀙𑀦𑁆𑀤𑀭𑀸𑀕𑀭𑀢𑁆𑀢𑀸 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀕𑁆𑀕𑀸𑀳-𑀯𑁂𑀡𑀺𑀕𑁆𑀕𑀸𑀳-𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀁 𑀲𑀸𑀤𑀺𑀬𑀦𑁆𑀢𑀺𑀬𑁄𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀓𑀸𑀬𑀲𑀁𑀲𑀕𑁆𑀕𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀧𑀦 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺, 𑀏𑀓𑀤𑁂𑀲𑀁 𑀘𑁄𑀴𑀓𑁂𑀦𑁂𑀯 𑀲𑀤𑁆𑀥𑀺𑀁 𑀅𑀗𑁆𑀕𑀚𑀸𑀢𑁂 𑀧𑀓𑁆𑀔𑀺𑀧𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀏𑀯𑀁 𑀘𑁄𑀴𑀕𑁆𑀕𑀳𑀡𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑁆𑀲 ¶ 𑀫𑀸𑀢𑀸 𑀫𑀺𑀕𑀻 𑀉𑀢𑀼𑀲𑀫𑀬𑁂 𑀢𑀸𑀧𑀲𑀲𑁆𑀲 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀲𑀲𑀫𑁆𑀪𑀯𑀁 𑀧𑀲𑁆𑀲𑀸𑀯𑀁 𑀧𑀺𑀯𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀫𑀺𑀕𑀲𑀺𑀗𑁆𑀕𑀁 𑀯𑀺𑀚𑀸𑀬𑀺. 𑀏𑀯𑀁 𑀅𑀲𑀼𑀘𑀺𑀧𑀸𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀲𑀸𑀫𑀲𑁆𑀲 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀘𑀓𑁆𑀔𑀼𑀧𑀭𑀺𑀳𑀸𑀦𑀺𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀧𑀼𑀢𑁆𑀢𑀁 𑀤𑀸𑀢𑀼𑀓𑀸𑀫𑁄 𑀤𑀼𑀓𑀽𑀮𑀧𑀡𑁆𑀟𑀺𑀢𑀁 𑀆𑀳 𑁋 ‘‘𑀯𑀝𑁆𑀝𑀢𑀺 𑀢𑀼𑀫𑁆𑀳𑀸𑀓𑀁 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺? ‘‘𑀅𑀦𑀢𑁆𑀣𑀺𑀓𑀸 𑀫𑀬𑀁 𑀏𑀢𑁂𑀦, 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸𑀫𑁆𑀳𑀸’’𑀢𑀺. ‘‘𑀢𑁂𑀦 𑀳𑀺 𑀇𑀫𑀺𑀲𑁆𑀲𑀸 𑀉𑀢𑀼𑀲𑀫𑀬𑁂 𑀅𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺𑀁 𑀧𑀭𑀸𑀫𑀲𑁂𑀬𑁆𑀬𑀸𑀣𑀸’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀫𑀁 𑀢𑀸𑀧𑀲𑀤𑀸𑀭𑀓𑀁 𑀯𑀺𑀚𑀸𑀬𑀺. 𑀏𑀯𑀁 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀫𑀡𑁆𑀟𑀩𑁆𑀬𑀲𑁆𑀲 𑀘 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀘 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀭𑀽𑀧𑀤𑀲𑁆𑀲𑀦𑁂𑀦 𑀳𑁄𑀢𑀺? 𑀇𑀥𑁂𑀓𑀘𑁆𑀘𑀸 𑀇𑀢𑁆𑀣𑀻 𑀉𑀢𑀼𑀲𑀫𑀬𑁂 𑀧𑀼𑀭𑀺𑀲𑀲𑀁𑀲𑀕𑁆𑀕𑀁 𑀅𑀮𑀪𑀫𑀸𑀦𑀸 𑀙𑀦𑁆𑀤𑀭𑀸𑀕𑀯𑀲𑁂𑀦 𑀅𑀦𑁆𑀢𑁄𑀕𑁂𑀳𑀕𑀢𑀸𑀯 𑀧𑀼𑀭𑀺𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀭𑀸𑀚𑁄𑀭𑁄𑀥𑀸 𑀯𑀺𑀬, 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀭𑀽𑀧𑀤𑀲𑁆𑀲𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀩𑀮𑀸𑀓𑀸𑀲𑀼 𑀧𑀦 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀢𑀸 𑀉𑀢𑀼𑀲𑀫𑀬𑁂 𑀫𑁂𑀖𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀓𑀼𑀓𑁆𑀓𑀼𑀝𑀺𑀬𑁄𑀧𑀺 𑀓𑀤𑀸𑀘𑀺 𑀏𑀓𑀲𑁆𑀲 𑀓𑀼𑀓𑁆𑀓𑀼𑀝𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀳𑀼𑀓𑀸𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀕𑀸𑀯𑀻 𑀉𑀲𑀪𑀲𑁆𑀲. 𑀏𑀯𑀁 𑀲𑀤𑁆𑀤𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀕𑀸𑀯𑀻 𑀏𑀯 𑀘 𑀓𑀤𑀸𑀘𑀺 𑀉𑀲𑀪𑀕𑀦𑁆𑀥𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀕𑀦𑁆𑀥𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀇𑀥 ¶ 𑀧𑀦𑀸𑀬𑀁 𑀅𑀚𑁆𑀛𑀸𑀘𑀸𑀭𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀏𑀯𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮).

𑀪𑀼𑀫𑁆𑀫𑀸 ¶ 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀬𑀲𑁆𑀫𑀸 𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄. 𑀲𑀩𑁆𑀩𑀧𑀞𑀫𑀁 𑀳𑀺𑀲𑁆𑀲 𑀢𑀁 𑀧𑀸𑀧𑀁 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺, 𑀢𑀢𑁄 𑀆𑀭𑀓𑁆𑀔𑀤𑁂𑀯𑀢𑀸, 𑀅𑀣𑀜𑁆𑀜𑀸𑀧𑀺 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄 𑀤𑁂𑀯𑀢𑀸. 𑀢𑀲𑁆𑀫𑀸𑀲𑁆𑀲 𑀧𑀭𑀘𑀺𑀢𑁆𑀢𑀯𑀺𑀤𑀽 𑀲𑀓𑀮𑀯𑀦𑀲𑀡𑁆𑀟𑀦𑀺𑀲𑁆𑀲𑀺𑀢𑀸 𑀪𑀼𑀫𑁆𑀫𑀸 𑀤𑁂𑀯𑀸 𑀢𑀁 𑀅𑀚𑁆𑀛𑀸𑀘𑀸𑀭𑀁 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀅𑀦𑀼𑀲𑁆𑀲𑀸𑀯𑁂𑀲𑀼𑀁. 𑀬𑀣𑀸 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀲𑀼𑀡𑀦𑁆𑀢𑀺, 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀼𑀁. 𑀓𑀺𑀦𑁆𑀢𑀺 ¶ ? 𑀦𑀺𑀭𑀩𑁆𑀩𑀼𑀤𑁄 𑀯𑀢, 𑀪𑁄…𑀧𑁂… 𑀆𑀤𑀻𑀦𑀯𑁄 𑀉𑀧𑁆𑀧𑀸𑀤𑀺𑀢𑁄𑀢𑀺. 𑀢𑀲𑁆𑀲𑀢𑁆𑀣𑁄 𑀯𑁂𑀭𑀜𑁆𑀚𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀏𑀢𑁆𑀣 𑀧𑀦 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀅𑀲𑁆𑀲𑁄𑀲𑀼𑀁; 𑀆𑀓𑀸𑀲𑀝𑁆𑀞𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀢𑀺 𑀅𑀲𑀜𑁆𑀜𑀲𑀢𑁆𑀢𑁂 𑀘 𑀅𑀭𑀽𑀧𑀸𑀯𑀘𑀭𑁂 𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀸𑀦𑁄 𑀅𑀲𑁆𑀲𑁄𑀲𑀼𑀁; 𑀲𑀼𑀢𑁆𑀯𑀸 𑀘 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺𑀳 𑀢𑁂𑀦 𑀔𑀡𑁂𑀦𑀸𑀢𑀺 𑀏𑀯𑀁 𑀢𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑀓𑁆𑀔𑀡𑁂𑀦. 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦𑀸𑀢𑀺 𑀅𑀚𑁆𑀛𑀸𑀘𑀸𑀭𑀫𑀼𑀳𑀼𑀢𑁆𑀢𑁂𑀦𑁂𑀯. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸. 𑀅𑀩𑁆𑀪𑀼𑀕𑁆𑀕𑀘𑁆𑀙𑀻𑀢𑀺 𑀅𑀪𑀺𑀉𑀕𑁆𑀕𑀘𑁆𑀙𑀺 𑀅𑀩𑁆𑀪𑀼𑀝𑁆𑀞𑀸𑀲𑀺 𑀏𑀓𑀓𑁄𑀮𑀸𑀳𑀮𑀫𑀳𑁄𑀲𑀻𑀢𑀺.

𑀧𑀼𑀢𑁆𑀢𑀁 𑀯𑀺𑀚𑀸𑀬𑀻𑀢𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑀁 𑀚𑀦𑁂𑀲𑀺. 𑀩𑀻𑀚𑀓𑁄𑀢𑀺 𑀦𑀸𑀫𑀫𑀓𑀁𑀲𑀽𑀢𑀺 𑀦 𑀅𑀜𑁆𑀜𑀁 𑀦𑀸𑀫𑀁 𑀓𑀸𑀢𑀼𑀫𑀤𑀁𑀲𑀼, ‘‘𑀩𑀻𑀚𑀓𑀫𑁆𑀧𑀺 𑀤𑁂𑀳𑀻’’𑀢𑀺 𑀫𑀸𑀢𑀸𑀫𑀳𑀺𑀬𑀸 𑀯𑀼𑀢𑁆𑀢𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 ‘‘𑀩𑀻𑀚𑀓𑁄 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀳𑁄𑀢𑀽’’𑀢𑀺 ‘‘𑀩𑀻𑀚𑀓𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀧𑀼𑀢𑁆𑀢𑀲𑁆𑀲 𑀧𑀦 𑀦𑀸𑀫𑀯𑀲𑁂𑀦𑁂𑀯 𑀘 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺𑀲𑁆𑀲 𑀦𑀸𑀫𑀫𑀓𑀁𑀲𑀼. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀩𑀻𑀚𑀓𑀜𑁆𑀘 𑀩𑀻𑀚𑀓𑀫𑀸𑀢𑀭𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀻𑀚𑀓𑀲𑁆𑀲 𑀓𑀺𑀭 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂 𑀢𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀲𑁄 𑀘 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀉𑀧𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀁𑀲𑀽’’𑀢𑀺.

𑁩𑁭. 𑀏𑀯𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀧𑀩𑁆𑀩𑀚𑁆𑀚𑀸 𑀲𑀨𑀮𑀸 𑀅𑀳𑁄𑀲𑀺. 𑀧𑀺𑀢𑀸 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀳𑀼𑀤𑁂𑀯𑀸𑀢𑀺 ¶ ¶ 𑀅𑀳𑀼 𑀏𑀯, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀳𑁄𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀅𑀚𑁆𑀛𑀸𑀘𑀸𑀭𑀳𑁂𑀢𑀼𑀓𑁄 𑀧𑀘𑁆𑀙𑀸𑀦𑀼𑀢𑀸𑀧𑁄. 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀳𑀺 𑀯𑀺𑀜𑁆𑀜𑀽𑀳𑀺 𑀅𑀓𑀢𑁆𑀢𑀩𑁆𑀩𑀢𑀸𑀬 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀪𑀸𑀯𑀢𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀓𑀢𑀁 𑀅𑀚𑁆𑀛𑀸𑀘𑀸𑀭𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀢𑀁 𑀧𑀝𑀺𑀘𑁆𑀘 𑀯𑀺𑀭𑀽𑀧𑀁 𑀲𑀭𑀡𑀪𑀸𑀯𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀮𑀸𑀪𑀸 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀯𑀢 𑀅𑀮𑀸𑀪𑀸; 𑀬𑁂 𑀛𑀸𑀦𑀸𑀤𑀻𑀦𑀁 𑀕𑀼𑀡𑀸𑀦𑀁 𑀅𑀮𑀸𑀪𑀸 𑀦𑀸𑀫, 𑀢𑁂 𑀫𑀬𑁆𑀳𑀁, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀯𑀢 𑀫𑁂 𑀮𑀸𑀪𑀸𑀢𑀺 𑀬𑁂𑀧𑀺 𑀫𑁂 𑀧𑀝𑀺𑀮𑀤𑁆𑀥𑀸 𑀧𑀩𑁆𑀩𑀚𑁆𑀚𑀲𑀭𑀡𑀕𑀫𑀦𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀕𑀼𑀡𑀸, 𑀢𑁂𑀧𑀺 𑀦𑁂𑀯 𑀫𑀬𑁆𑀳𑀁 𑀮𑀸𑀪𑀸 𑀅𑀚𑁆𑀛𑀸𑀘𑀸𑀭𑀫𑀮𑀻𑀦𑀢𑁆𑀢𑀸. 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀇𑀤𑀁 𑀲𑀸𑀲𑀦𑀁 𑀮𑀤𑁆𑀥𑀫𑁆𑀧𑀺 𑀫𑁂 𑀤𑀼𑀮𑁆𑀮𑀤𑁆𑀥𑀁. 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀏𑀯𑀁 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁. 𑀓𑀲𑁆𑀫𑀸? 𑀬𑀫𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀺𑀲𑁄 𑀅𑀳𑁄𑀲𑀻𑀢𑀺 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀦𑀼𑀓𑁄 𑀅𑀳𑁄𑀲𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁄 ¶ . 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀼𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀪𑀸𑀯𑁄 𑀧𑀡𑁆𑀟𑀼𑀧𑀮𑀸𑀲𑀧𑁆𑀧𑀝𑀺𑀪𑀸𑀕𑁄. 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄𑀢𑀺 𑀧𑀭𑀺𑀬𑀸𑀤𑀺𑀦𑁆𑀦𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀲𑀺𑀭𑀸𑀚𑀸𑀮𑁂𑀦𑁂𑀯 𑀲𑀦𑁆𑀣𑀭𑀺𑀢𑀕𑀢𑁆𑀢𑁄. 𑀅𑀦𑁆𑀢𑁄𑀫𑀦𑁄𑀢𑀺 𑀅𑀦𑀼𑀲𑁄𑀘𑀦𑀯𑀲𑁂𑀦 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀞𑀺𑀢𑀘𑀺𑀢𑁆𑀢𑁄. 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀯𑀲𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀅𑀦𑁆𑀢𑁄𑀫𑀦𑀸𑀬𑁂𑀯. 𑀮𑀻𑀦𑀫𑀦𑁄𑀢𑀺 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀫𑁆𑀫𑀝𑁆𑀞𑀸𑀦𑁂 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑁂 𑀘 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀯𑀺𑀧𑁆𑀨𑀸𑀭𑀺𑀓𑁄 𑀅𑀜𑁆𑀜𑀤𑀢𑁆𑀣𑀼 𑀓𑁄𑀲𑀚𑁆𑀚𑀯𑀲𑁂𑀦𑁂𑀯 𑀮𑀻𑀦𑁄 𑀲𑀗𑁆𑀓𑀼𑀘𑀺𑀢𑁄 𑀫𑀦𑁄 𑀅𑀲𑁆𑀲𑀸𑀢𑀺 𑀮𑀻𑀦𑀫𑀦𑁄. 𑀤𑀼𑀓𑁆𑀔𑀻𑀢𑀺 𑀘𑁂𑀢𑁄𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀻. 𑀤𑀼𑀫𑁆𑀫𑀦𑁄𑀢𑀺 𑀤𑁄𑀲𑁂𑀦 𑀤𑀼𑀝𑁆𑀞𑀫𑀦𑁄, 𑀯𑀺𑀭𑀽𑀧𑀫𑀦𑁄 𑀯𑀸 𑀤𑁄𑀫𑀦𑀲𑁆𑀲𑀸𑀪𑀺𑀪𑀽𑀢𑀢𑀸𑀬. 𑀧𑀚𑁆𑀛𑀸𑀬𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀯𑀳𑀘𑁆𑀙𑀺𑀦𑁆𑀦𑁄 𑀯𑀺𑀬 𑀕𑀤𑁆𑀭𑀪𑁄 𑀢𑀁 𑀢𑀁 𑀘𑀺𑀦𑁆𑀢𑀬𑀺.

𑁩𑁮. 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽𑀢𑀺 𑀢𑀁 𑀏𑀯𑀁𑀪𑀽𑀢𑀁 𑀕𑀡𑀲𑀗𑁆𑀕𑀡𑀺𑀓𑀸𑀧𑀧𑀜𑁆𑀘𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀁 𑀤𑀺𑀲𑁆𑀯𑀸 𑀬𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑀸 𑀓𑀣𑀸𑀨𑀸𑀲𑀼𑀓𑀸 𑀪𑀺𑀓𑁆𑀔𑀽 𑀢𑁂 𑀦𑀁 𑀏𑀢𑀤𑀯𑁄𑀘𑀼𑀁. 𑀧𑀻𑀡𑀺𑀦𑁆𑀤𑁆𑀭𑀺𑀬𑁄𑀢𑀺 𑀧𑀲𑀸𑀤𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀲𑁆𑀲 𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀘𑀓𑁆𑀔𑀼𑀆𑀤𑀺𑀇𑀦𑁆𑀤𑁆𑀭𑀺𑀬𑁄. 𑀲𑁄 𑀤𑀸𑀦𑀺 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀤𑀸𑀦𑀻𑀢𑀺 𑀦𑀺𑀧𑀸𑀢𑁄, 𑀲𑁄 𑀧𑀦 𑀢𑁆𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀘𑁆𑀘𑀺𑀦𑁄 𑀢𑁆𑀯𑀦𑁆𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁 ¶ . 𑀅𑀦𑀪𑀺𑀭𑀢𑁄𑀢𑀺 𑀉𑀓𑁆𑀓𑀡𑁆𑀞𑀺𑀢𑁄; 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀫𑁂𑀯 𑀅𑀦𑀪𑀺𑀭𑀢𑀺𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀦𑀪𑀺𑀭𑀢𑁄’’𑀢𑀺. 𑀅𑀥𑀺𑀓𑀼𑀲𑀮𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀪𑀺𑀭𑀢𑁄𑀯 𑀅𑀳𑀦𑁆𑀢𑀺 ¶ . 𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢𑀦𑁆𑀢𑀺 𑀫𑀬𑀸 𑀓𑀢𑀁 𑀏𑀓𑀁 𑀧𑀸𑀧𑀓𑀫𑁆𑀫𑀁 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺 𑀲𑀁𑀯𑀺𑀚𑁆𑀚𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀅𑀪𑀺𑀫𑀼𑀔𑀁 𑀯𑀺𑀬 𑀫𑁂 𑀢𑀺𑀝𑁆𑀞𑀢𑀺. 𑀅𑀣 𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀅𑀮𑀜𑁆𑀳𑀺 𑀢𑁂, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀓𑀼𑀓𑁆𑀓𑀼𑀘𑁆𑀘𑀸𑀬𑀸𑀢𑀺 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀢𑀼𑀬𑁆𑀳𑁂𑀢𑀁 𑀧𑀸𑀧𑀓𑀫𑁆𑀫𑀁 𑀅𑀮𑀁 𑀲𑀫𑀢𑁆𑀣𑀁 𑀓𑀼𑀓𑁆𑀓𑀼𑀘𑁆𑀘𑀸𑀬; 𑀧𑀝𑀺𑀩𑀮𑀁 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀢𑁆𑀯𑀦𑁆𑀢𑀺 𑀆𑀤𑀺𑀫𑁆𑀳𑀺 𑀬𑁂𑀦 𑀧𑀸𑀧𑁂𑀦 𑀢𑁆𑀯𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀢𑀁 𑀢𑁂 𑀧𑀸𑀧𑀁 𑀅𑀮𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀦𑀁 𑀅𑀦𑀼𑀲𑀸𑀲𑀦𑁆𑀢𑀸 ‘‘𑀦𑀦𑀼 𑀆𑀯𑀼𑀲𑁄 𑀪𑀕𑀯𑀢𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀦𑀦𑀽𑀢𑀺 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑀓𑀸𑀭𑀡𑁂𑀦. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀸𑀕𑀢𑁆𑀣𑀸𑀬. 𑀦𑁄 𑀲𑀭𑀸𑀕𑀸𑀬𑀸𑀢𑀺 𑀦𑁄 𑀭𑀸𑀕𑁂𑀦 𑀭𑀚𑁆𑀚𑀦𑀢𑁆𑀣𑀸𑀬. 𑀪𑀕𑀯𑀢𑀸 𑀳𑀺 ‘‘𑀇𑀫𑀁 𑀫𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀲𑀩𑁆𑀩𑀪𑀯𑀪𑁄𑀕𑁂𑀲𑀼 𑀯𑀺𑀭𑀚𑁆𑀚𑀺𑀲𑁆𑀲𑀦𑁆𑀢𑀺, 𑀦𑁄 𑀭𑀚𑁆𑀚𑀺𑀲𑁆𑀲𑀦𑁆𑀢𑀻’’ 𑀏𑀢𑀤𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀇𑀤𑀁 𑀧𑀦𑁂𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁. 𑀯𑀺𑀲𑀁𑀬𑁄𑀕𑀸𑀬𑀸𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀦𑁄 𑀲𑀁𑀬𑁄𑀕𑀸𑀬𑀸𑀢𑀺 𑀦 𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀅𑀦𑀼𑀧𑀸𑀤𑀸𑀦𑀸𑀬𑀸𑀢𑀺 𑀅𑀕𑁆𑀕𑀳𑀡𑀢𑁆𑀣𑀸𑀬. 𑀦𑁄 𑀲𑀉𑀧𑀸𑀤𑀸𑀦𑀸𑀬𑀸𑀢𑀺 𑀦 𑀲𑀗𑁆𑀕𑀳𑀡𑀢𑁆𑀣𑀸𑀬.

𑀢𑀢𑁆𑀣 ¶ 𑀦𑀸𑀫 𑀢𑁆𑀯𑀦𑁆𑀢𑀺 𑀢𑀲𑁆𑀫𑀺𑀁 𑀦𑀸𑀫 𑀢𑁆𑀯𑀁. 𑀲𑀭𑀸𑀕𑀸𑀬 𑀘𑁂𑀢𑁂𑀲𑁆𑀲𑀲𑀻𑀢𑀺 𑀲𑀳 𑀭𑀸𑀕𑁂𑀦 𑀯𑀢𑁆𑀢𑀫𑀸𑀦𑀸𑀬 𑀫𑁂𑀣𑀼𑀦𑀥𑀫𑁆𑀫𑀸𑀬 𑀘𑁂𑀢𑁂𑀲𑁆𑀲𑀲𑀺 𑀓𑀧𑁆𑀧𑁂𑀲𑁆𑀲𑀲𑀺 𑀧𑀓𑀧𑁆𑀧𑁂𑀲𑁆𑀲𑀲𑀺; 𑀏𑀢𑀤𑀢𑁆𑀣𑀁 𑀯𑀸𑀬𑀫𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀼𑀦 𑀭𑀸𑀕𑀯𑀺𑀭𑀸𑀕𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀭𑀸𑀕𑀯𑀺𑀭𑀸𑀕𑀸𑀬𑀸𑀢𑀺 𑀯𑀸 𑀫𑀤𑀦𑀺𑀫𑁆𑀫𑀤𑀦𑀸𑀬𑀸𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺 ‘‘𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀬𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀭𑀸𑀕𑀯𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀫𑀸𑀦𑀫𑀤-𑀧𑀼𑀭𑀺𑀲𑀫𑀤𑀸𑀤𑀬𑁄 𑀫𑀤𑀸 𑀦𑀺𑀫𑁆𑀫𑀤𑀸 𑀅𑀫𑀤𑀸 𑀳𑁄𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀤𑀦𑀺𑀫𑁆𑀫𑀤𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 ¶ 𑀘 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀸𑀧𑀺 𑀓𑀸𑀫𑀧𑀺𑀧𑀸𑀲𑀸 𑀯𑀺𑀦𑀬𑀁 𑀅𑀩𑁆𑀪𑀢𑁆𑀣𑀁 𑀬𑀸𑀢𑀺, 𑀢𑀲𑁆𑀫𑀸 𑀧𑀺𑀧𑀸𑀲𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀆𑀮𑀬𑀲𑀫𑀼𑀕𑁆𑀖𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀢𑁂𑀪𑀽𑀫𑀓𑀯𑀝𑁆𑀝𑀁 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀼𑀧𑀘𑁆𑀙𑁂𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀲𑁄 𑀢𑀡𑁆𑀳𑀸 𑀔𑀬𑀁 𑀕𑀘𑁆𑀙𑀢𑀺 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀲𑁆𑀫𑀸 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 ¶ 𑀧𑀦𑁂𑀢𑀁 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀘 𑀲𑀢𑁆𑀢𑀸𑀯𑀸𑀲𑁂, 𑀅𑀧𑀭𑀸𑀧𑀭𑀪𑀸𑀯𑀸𑀬 𑀯𑀺𑀦𑀦𑀢𑁄 𑀆𑀩𑀦𑁆𑀥𑀦𑀢𑁄 𑀲𑀁𑀲𑀺𑀩𑁆𑀩𑀦𑀢𑁄 𑀯𑀸𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀦𑀺𑀲𑁆𑀲𑀝𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀸𑀫𑀸𑀦𑀁 𑀧𑀳𑀸𑀦𑀁 𑀅𑀓𑁆𑀔𑀸𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸𑀦𑀁, 𑀓𑀺𑀮𑁂𑀲𑀓𑀸𑀫𑀸𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀓𑀸𑀫𑀲𑀜𑁆𑀜𑀸𑀦𑀁 𑀧𑀭𑀺𑀜𑁆𑀜𑀸𑀢𑀺 𑀲𑀩𑁆𑀩𑀸𑀲𑀫𑁆𑀧𑀺 𑀓𑀸𑀫𑀲𑀜𑁆𑀜𑀸𑀦𑀁 𑀜𑀸𑀢𑀢𑀻𑀭𑀡𑀧𑀳𑀸𑀦𑀯𑀲𑁂𑀦 𑀢𑀺𑀯𑀺𑀥𑀸 𑀧𑀭𑀺𑀜𑁆𑀜𑀸 𑀅𑀓𑁆𑀔𑀸𑀢𑀸. 𑀓𑀸𑀫𑀧𑀺𑀧𑀸𑀲𑀸𑀦𑀦𑁆𑀢𑀺 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸𑀦𑀁 𑀓𑀸𑀫𑁂 𑀯𑀸 𑀧𑀸𑀢𑀼𑀫𑀺𑀘𑁆𑀙𑀸𑀦𑀁. 𑀓𑀸𑀫𑀯𑀺𑀢𑀓𑁆𑀓𑀸𑀦𑀦𑁆𑀢𑀺 𑀓𑀸𑀫𑀼𑀧𑀲𑀜𑁆𑀳𑀺𑀢𑀸𑀦𑀁𑀯𑀺𑀢𑀓𑁆𑀓𑀸𑀦𑀁. 𑀓𑀸𑀫𑀧𑀭𑀺𑀴𑀸𑀳𑀸𑀦𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀸𑀦𑀁 𑀅𑀦𑁆𑀢𑁄𑀤𑀸𑀳𑀸𑀦𑀁. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑀓𑀭𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀯 𑀓𑀣𑀺𑀢𑁄. 𑀲𑀩𑁆𑀩𑀧𑀞𑀫𑁂𑀲𑀼 𑀧𑀦 𑀢𑀻𑀲𑀼 𑀞𑀸𑀦𑁂𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑁂𑀢𑀁 𑀆𑀯𑀼𑀲𑁄𑀢𑀺 𑀦 𑀏𑀢𑀁 𑀆𑀯𑀼𑀲𑁄, 𑀢𑀯 𑀧𑀸𑀧𑀓𑀫𑁆𑀫𑀁 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘 𑀧𑀲𑀸𑀤𑀸𑀬 𑀏𑀯𑀭𑀽𑀧𑀸𑀦𑀁 𑀧𑀲𑀸𑀤𑀢𑁆𑀣𑀸𑀬 𑀦 𑀳𑁄𑀢𑀺. 𑀅𑀣 𑀔𑁆𑀯𑁂𑀢𑀦𑁆𑀢𑀺 𑀅𑀣 𑀔𑁄 𑀏𑀢𑀁. 𑀅𑀣 𑀔𑁄 𑀢𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀜𑁆𑀜𑀣𑀢𑁆𑀢𑀸𑀬𑀸𑀢𑀺 𑀧𑀲𑀸𑀤𑀜𑁆𑀜𑀣𑀸𑀪𑀸𑀯𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀳𑁄𑀢𑀺. 𑀬𑁂 𑀫𑀕𑁆𑀕𑁂𑀦 𑀅𑀦𑀸𑀕𑀢𑀲𑀤𑁆𑀥𑀸, 𑀢𑁂𑀲𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑁄𑀢𑀺 𑁋 ‘‘𑀈𑀤𑀺𑀲𑁂𑀧𑀺 𑀦𑀸𑀫 𑀥𑀫𑁆𑀫𑀯𑀺𑀦𑀬𑁂 𑀫𑀬𑀁 𑀧𑀲𑀦𑁆𑀦𑀸, 𑀬𑀢𑁆𑀣𑁂𑀯𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀪𑀺𑀓𑁆𑀔𑀽’’𑀢𑀺. 𑀬𑁂 𑀧𑀦 𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸, 𑀢𑁂𑀲𑀁 𑀲𑀺𑀦𑁂𑀭𑀼 𑀯𑀺𑀬 𑀯𑀸𑀢𑁂𑀳𑀺 𑀅𑀘𑀮𑁄 𑀧𑀲𑀸𑀤𑁄 𑀈𑀤𑀺𑀲𑁂𑀳𑀺 𑀯𑀢𑁆𑀣𑀽𑀳𑀺 𑀇𑀢𑁄 𑀯𑀸 𑀤𑀸𑀭𑀼𑀡𑀢𑀭𑁂𑀳𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺.

𑁩𑁯. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀪𑀕𑀯𑀢𑁄 𑀏𑀢𑀁 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀁𑀲𑀼 𑀧𑀝𑀺𑀯𑁂𑀤𑀬𑀺𑀁𑀲𑀼. 𑀆𑀭𑁄𑀘𑀬𑀫𑀸𑀦𑀸 ¶ 𑀘 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬 𑀦 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸𑀬 ¶ , 𑀦 𑀢𑀲𑁆𑀲𑀸𑀬𑀲𑁆𑀫𑀢𑁄 𑀅𑀯𑀡𑁆𑀡𑀧𑀓𑀸𑀲𑀦𑀢𑁆𑀣𑀸𑀬, 𑀦 𑀓𑀮𑀺𑀲𑀸𑀲𑀦𑀸𑀭𑁄𑀧𑀦𑀢𑁆𑀣𑀸𑀬, 𑀦𑀸𑀧𑀺 ‘‘𑀇𑀤𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀇𑀫𑀲𑁆𑀲 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀦 𑀤𑀲𑁆𑀲𑀢𑀺, 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑁆𑀲𑀢𑀺 𑀦’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 ‘‘𑀇𑀫𑀁 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀜𑀢𑁆𑀯𑀸 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀺, 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀆𑀡𑀁 𑀞𑀧𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁.

𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂𑀢𑀺 𑀏𑀢𑁆𑀣 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀓𑀸𑀭𑀡𑀢𑁆𑀢𑀸 𑀦𑀺𑀤𑀸𑀦𑀜𑁆𑀘𑁂𑀯 𑀧𑀓𑀭𑀡𑀜𑁆𑀘𑀸𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀦𑀺𑀤𑁂𑀢𑀺 𑀅𑀢𑁆𑀢𑀦𑁄 𑀨𑀮𑀁 ‘‘𑀕𑀡𑁆𑀳𑀸𑀣 𑀦’’𑀦𑁆𑀢𑀺 ¶ 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀅𑀧𑁆𑀧𑁂𑀢𑀺, 𑀧𑀓𑀭𑁄𑀢𑀺 𑀘 𑀦𑀁 𑀓𑀢𑁆𑀢𑀼𑀁 𑀆𑀭𑀪𑀢𑀺, 𑀓𑀭𑁄𑀢𑀺𑀬𑁂𑀯 𑀯𑀸; 𑀢𑀲𑁆𑀫𑀸 𑀦𑀺𑀤𑀸𑀦𑀜𑁆𑀘𑁂𑀯 𑀧𑀓𑀭𑀡𑀜𑁆𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀩𑀼𑀤𑁆𑀥𑁄 𑀪𑀕𑀯𑀸 𑀯𑀺𑀕𑀭𑀳𑀺 𑀦𑀺𑀦𑁆𑀤𑀺; 𑀬𑀣𑀸 𑀢𑀁 𑀯𑀡𑁆𑀡𑀸𑀯𑀡𑁆𑀡𑀸𑀭𑀳𑀸𑀦𑀁 𑀯𑀡𑁆𑀡𑀜𑁆𑀘 𑀅𑀯𑀡𑁆𑀡𑀜𑁆𑀘 𑀪𑀡𑀦𑁆𑀢𑁂𑀲𑀼 𑀅𑀕𑁆𑀕𑀧𑀼𑀕𑁆𑀕𑀮𑁄. 𑀦 𑀳𑀺 𑀪𑀕𑀯𑀢𑁄 𑀲𑀻𑀮𑀯𑀻𑀢𑀺𑀓𑁆𑀓𑀫𑀓𑀭𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀕𑀦𑁆𑀣𑁂𑀦 𑀯𑀸 𑀥𑀼𑀢𑀗𑁆𑀕𑁂𑀦 𑀯𑀸 𑀜𑀸𑀢𑁄 𑀬𑀲𑀲𑁆𑀲𑀻 𑀈𑀤𑀺𑀲𑀁 𑀧𑀼𑀕𑁆𑀕𑀮𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀧𑀺 𑀧𑁂𑀲𑀮𑀁 𑀕𑀼𑀡𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀔𑁄 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑀢𑀺 𑀏𑀯, 𑀧𑀲𑀁𑀲𑀺𑀢𑀩𑁆𑀩𑀜𑁆𑀘 𑀧𑀲𑀁𑀲𑀢𑀺 𑀏𑀯, 𑀅𑀬𑀜𑁆𑀘 𑀕𑀭𑀳𑀺𑀢𑀩𑁆𑀩𑁄; 𑀢𑀲𑁆𑀫𑀸 𑀢𑀁 𑀢𑀸𑀤𑀺𑀮𑀓𑁆𑀔𑀡𑁂 𑀞𑀺𑀢𑁄 𑀅𑀯𑀺𑀓𑀫𑁆𑀧𑀫𑀸𑀦𑁂𑀦 𑀘𑀺𑀢𑁆𑀢𑁂𑀦 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 ‘‘𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺.

𑀢𑀢𑁆𑀣𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑀤𑀺𑀤𑀁 𑀢𑀬𑀸, 𑀫𑁄𑀖𑀧𑀼𑀭𑀺𑀲, 𑀢𑀼𑀘𑁆𑀙𑀫𑀦𑀼𑀲𑁆𑀲 𑀓𑀫𑁆𑀫𑀁 𑀓𑀢𑀁, 𑀢𑀁 𑀲𑀫𑀡𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀸𑀲𑀦𑀸𑀦𑀁 𑀯𑀸 𑀦 𑀅𑀦𑀼𑀘𑁆𑀙𑀯𑀺𑀓𑀁, 𑀢𑁂𑀲𑀁 𑀙𑀯𑀺𑀁 𑀙𑀸𑀬𑀁 𑀲𑀼𑀦𑁆𑀤𑀭𑀪𑀸𑀯𑀁 𑀦 𑀅𑀦𑁆𑀯𑁂𑀢𑀺 𑀦𑀸𑀦𑀼𑀕𑀘𑁆𑀙𑀢𑀺, 𑀅𑀣 𑀔𑁄 𑀆𑀭𑀓𑀸𑀯 𑀢𑁂𑀳𑀺 𑀥𑀫𑁆𑀫𑁂𑀳𑀺. 𑀅𑀦𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀏𑀯 𑀘 𑀅𑀦𑀦𑀼𑀮𑁄𑀫𑀺𑀓𑀁, 𑀢𑁂𑀲𑀁 𑀦 𑀅𑀦𑀼𑀮𑁄𑀫𑁂𑀢𑀺; 𑀅𑀣 𑀔𑁄 𑀯𑀺𑀮𑁄𑀫𑀁 𑀧𑀘𑁆𑀘𑀦𑀻𑀓𑀪𑀸𑀯𑁂 𑀞𑀺𑀢𑀁. 𑀅𑀦𑀦𑀼𑀮𑁄𑀫𑀺𑀓𑀢𑁆𑀢𑀸 𑀏𑀯 𑀘 𑀅𑀧𑁆𑀧𑀢𑀺𑀭𑀽𑀧𑀁, 𑀧𑀢𑀺𑀭𑀽𑀧𑀁 𑀲𑀤𑀺𑀲𑀁 𑀧𑀝𑀺𑀪𑀸𑀕𑀁 𑀦 𑀳𑁄𑀢𑀺, 𑀅𑀣 𑀔𑁄 𑀅𑀲𑀤𑀺𑀲𑀁 𑀅𑀧𑁆𑀧𑀝𑀺𑀪𑀸𑀕𑀫𑁂𑀯. 𑀅𑀧𑁆𑀧𑀢𑀺𑀭𑀽𑀧𑀢𑁆𑀢𑀸 𑀏𑀯 𑀘 𑀅𑀲𑁆𑀲𑀸𑀫𑀡𑀓𑀁, 𑀲𑀫𑀡𑀸𑀦𑀁 ¶ 𑀓𑀫𑁆𑀫𑀁 𑀦 𑀳𑁄𑀢𑀺. 𑀅𑀲𑁆𑀲𑀸𑀫𑀡𑀓𑀢𑁆𑀢𑀸 𑀅𑀓𑀧𑁆𑀧𑀺𑀬𑀁. 𑀬𑀜𑁆𑀳𑀺 𑀲𑀫𑀡𑀓𑀫𑁆𑀫𑀁 𑀦 𑀳𑁄𑀢𑀺, 𑀢𑀁 𑀢𑁂𑀲𑀁 𑀦 𑀓𑀧𑁆𑀧𑀢𑀺. 𑀅𑀓𑀧𑁆𑀧𑀺𑀬𑀢𑁆𑀢𑀸 𑀅𑀓𑀭𑀡𑀻𑀬𑀁. 𑀦 𑀳𑀺 𑀲𑀫𑀡𑀸 𑀬𑀁 𑀦 𑀓𑀧𑁆𑀧𑀢𑀺, 𑀢𑀁 𑀓𑀭𑁄𑀦𑁆𑀢𑀺. 𑀢𑀜𑁆𑀘𑁂𑀢𑀁 𑀢𑀬𑀸 𑀓𑀢𑀁, 𑀢𑀲𑁆𑀫𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑀢𑀁…𑀧𑁂… 𑀅𑀓𑀭𑀡𑀻𑀬𑀦𑁆𑀢𑀺. 𑀓𑀣𑀜𑁆𑀳𑀺 𑀦𑀸𑀫𑀸𑀢𑀺 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦, 𑀓𑀺𑀁 𑀦𑀸𑀫 𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀓𑀸𑀭𑀡𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀧𑀭𑀢𑁄 ‘‘𑀦𑀦𑀼 𑀫𑀬𑀸 𑀫𑁄𑀖𑀧𑀼𑀭𑀺𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀇𑀤𑀸𑀦𑀺 ¶ 𑀬𑀲𑁆𑀫𑀸 𑀬𑀁 𑀢𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑀁 𑀯𑀺𑀧𑀘𑁆𑀘𑀫𑀸𑀦𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀯𑀺𑀧𑀸𑀓𑀁 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀁 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀼𑀁 𑀓𑀢𑀸𑀧𑀭𑀸𑀥𑀁 𑀯𑀺𑀬 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀓𑀸 𑀫𑀸𑀢𑀸𑀧𑀺𑀢𑀭𑁄 𑀤𑀬𑀸𑀮𑀼𑀓𑁂𑀦 𑀘𑀺𑀢𑁆𑀢𑁂𑀦 𑀲𑀼𑀤𑀺𑀦𑁆𑀦𑀁 𑀧𑀭𑀺𑀪𑀸𑀲𑀦𑁆𑀢𑁄 ‘‘𑀯𑀭𑀁 𑀢𑁂 𑀫𑁄𑀖𑀧𑀼𑀭𑀺𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀼 𑀲𑀻𑀖𑀁 𑀏𑀢𑀲𑁆𑀲 𑀯𑀺𑀲𑀁 𑀆𑀕𑀘𑁆𑀙𑀢𑀻𑀢𑀺 𑀆𑀲𑀻𑀯𑀺𑀲𑁄. 𑀖𑁄𑀭𑀁 𑀘𑀡𑁆𑀟𑀫𑀲𑁆𑀲 𑀯𑀺𑀲𑀦𑁆𑀢𑀺 𑀖𑁄𑀭𑀯𑀺𑀲𑁄, 𑀢𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲. ‘‘𑀧𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀏𑀢𑀲𑁆𑀲 ‘‘𑀯𑀭’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 ¶ . 𑀈𑀤𑀺𑀲𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀯𑀭𑀁 𑀧𑀓𑁆𑀔𑀺𑀢𑁆𑀢𑀁; 𑀲𑀘𑁂 𑀧𑀓𑁆𑀔𑀺𑀢𑁆𑀢𑀁 𑀪𑀯𑁂𑀬𑁆𑀬, 𑀯𑀭𑀁 𑀲𑀺𑀬𑀸; 𑀲𑀼𑀦𑁆𑀤𑀭𑀁 𑀲𑀸𑀥𑀼 𑀲𑀼𑀝𑁆𑀞𑀼 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀦 𑀢𑁆𑀯𑁂𑀯𑀸𑀢𑀺 𑀦 𑀢𑀼 𑀏𑀯 𑀯𑀭𑀁 𑀦 𑀲𑀼𑀦𑁆𑀤𑀭𑀫𑁂𑀯 𑀦 𑀲𑀸𑀥𑀼𑀫𑁂𑀯 𑀦 𑀲𑀼𑀝𑁆𑀞𑀼𑀫𑁂𑀯. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀡𑁆𑀳𑀲𑀧𑁆𑀧𑀲𑁆𑀲𑀸𑀢𑀺 𑀓𑀸𑀴𑀲𑀧𑁆𑀧𑀲𑁆𑀲. 𑀅𑀗𑁆𑀕𑀸𑀭𑀓𑀸𑀲𑀼𑀬𑀸𑀢𑀺 𑀅𑀗𑁆𑀕𑀸𑀭𑀧𑀼𑀡𑁆𑀡𑀓𑀽𑀧𑁂, 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀯𑀸. 𑀆𑀤𑀺𑀢𑁆𑀢𑀸𑀬𑀸𑀢𑀺 𑀧𑀤𑀺𑀢𑁆𑀢𑀸𑀬 𑀕𑀳𑀺𑀢𑀅𑀕𑁆𑀕𑀺𑀯𑀡𑁆𑀡𑀸𑀬. 𑀲𑀫𑁆𑀧𑀚𑁆𑀚𑀮𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀸𑀬 𑀅𑀘𑁆𑀘𑀺𑀬𑁄 𑀫𑀼𑀘𑁆𑀘𑀦𑁆𑀢𑀺𑀬𑀸. 𑀲𑀚𑁄𑀢𑀺𑀪𑀽𑀢𑀸𑀬𑀸𑀢𑀺 𑀲𑀧𑁆𑀧𑀪𑀸𑀬. 𑀲𑀫𑀦𑁆𑀢𑀢𑁄 𑀉𑀝𑁆𑀞𑀺𑀢𑀸𑀳𑀺 𑀚𑀸𑀮𑀸𑀳𑀺 𑀏𑀓𑀧𑁆𑀧𑀪𑀸𑀲𑀫𑀼𑀤𑀬𑀪𑀽𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀬𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀯𑀭’’𑀦𑁆𑀢𑀺 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀓𑀢𑀭𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂? 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀬𑁄 𑀢𑀢𑁆𑀣 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀧𑁂𑀬𑁆𑀬, 𑀲𑁄 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀇𑀢𑁄𑀦𑀺𑀤𑀸𑀦𑀜𑁆𑀘 𑀔𑁄…𑀧𑁂… 𑀉𑀧𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑀁 𑀇𑀤𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀧𑀓𑁆𑀔𑀺𑀧𑀦𑀁, 𑀇𑀢𑁄𑀦𑀺𑀤𑀸𑀦𑀁 𑀢𑀲𑁆𑀲 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬; 𑀏𑀯𑀁 𑀓𑀫𑁆𑀫𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀢𑀁 𑀧𑀲𑁆𑀲𑀦𑁆𑀢𑁄 𑀢𑀁 𑀕𑀭𑀳𑀺, 𑀦 𑀢𑀲𑁆𑀲 𑀤𑀼𑀓𑁆𑀔𑀸𑀕𑀫𑀁 𑀇𑀘𑁆𑀙𑀫𑀸𑀦𑁄. 𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀢𑀲𑁆𑀫𑀺𑀁 𑀦𑀸𑀫 𑀏𑀯𑀭𑀽𑀧𑁂 𑀓𑀫𑁆𑀫𑁂 𑀏𑀯𑀁 ¶ 𑀫𑀳𑀸𑀲𑀸𑀯𑀚𑁆𑀚𑁂 𑀲𑀫𑀸𑀦𑁂𑀧𑀺 𑀢𑁆𑀯𑀁. 𑀬𑀁 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀳𑀻𑀴𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁆𑀯𑀦𑁆𑀢𑀺 𑀢𑀁-𑀲𑀤𑁆𑀤𑀲𑁆𑀲 𑀯𑁂𑀯𑀘𑀦𑀁; 𑀤𑁆𑀯𑀻𑀳𑀺𑀧𑀺 𑀬𑀁 𑀯𑀸 𑀢𑀁 𑀯𑀸 𑀳𑀻𑀴𑀺𑀢𑀫𑀯𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀤𑁆𑀥𑀫𑁆𑀫𑀦𑁆𑀢𑀺 𑀅𑀲𑀢𑀁 𑀦𑀻𑀘𑀚𑀦𑀸𑀦𑀁 𑀥𑀫𑁆𑀫𑀁; 𑀢𑁂𑀳𑀺 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀕𑀸𑀫𑀥𑀫𑁆𑀫𑀦𑁆𑀢𑀺 𑀕𑀸𑀫𑀸𑀦𑀁 𑀥𑀫𑁆𑀫𑀁; 𑀕𑀸𑀫𑀯𑀸𑀲𑀺𑀓𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀮𑀥𑀫𑁆𑀫𑀦𑁆𑀢𑀺 𑀧𑀸𑀧𑀥𑀫𑁆𑀫𑁂 𑀯𑀲𑀦𑁆𑀢𑀺 𑀧𑀕𑁆𑀖𑀭𑀦𑁆𑀢𑀻𑀢𑀺 𑀯𑀲𑀮𑀸, 𑀢𑁂𑀲𑀁 𑀯𑀲𑀮𑀸𑀦𑀁 𑀳𑀻𑀦𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁, 𑀯𑀲𑀮𑀁 𑀯𑀸 𑀓𑀺𑀮𑁂𑀲𑀧𑀕𑁆𑀖𑀭𑀡𑀓𑀁 𑀥𑀫𑁆𑀫𑀁. 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀤𑀼𑀝𑁆𑀞𑀼 𑀘 𑀓𑀺𑀮𑁂𑀲𑀤𑀽𑀲𑀺𑀢𑀁 𑀣𑀽𑀮𑀜𑁆𑀘 𑀅𑀲𑀼𑀔𑀼𑀫𑀁, 𑀅𑀦𑀺𑀧𑀼𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀤𑀓𑀦𑁆𑀢𑀺𑀓𑀦𑁆𑀢𑀺 𑀉𑀤𑀓𑀓𑀺𑀘𑁆𑀘𑀁 𑀅𑀦𑁆𑀢𑀺𑀓𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀑𑀤𑀓𑀦𑁆𑀢𑀺𑀓𑁄, 𑀢𑀁 𑀑𑀤𑀓𑀦𑁆𑀢𑀺𑀓𑀁. 𑀭𑀳𑀲𑁆𑀲𑀦𑁆𑀢𑀺 𑀭𑀳𑁄𑀪𑀯𑀁, 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀦𑀓𑀁. 𑀅𑀬𑀜𑁆𑀳𑀺 𑀥𑀫𑁆𑀫𑁄 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀦 𑀲𑀓𑁆𑀓𑀸 𑀆𑀯𑀺 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀯𑀺𑀲𑀬𑁂 𑀓𑀸𑀢𑀼𑀁, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀳𑀲𑁆𑀲’’𑀦𑁆𑀢𑀺. 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀤𑁆𑀯𑀬𑀁 𑀤𑁆𑀯𑀬𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀧𑀺 𑀧𑀸𑀞𑁄. 𑀤𑀬𑀁 𑀤𑀬𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀏𑀢𑀁 ‘‘𑀢𑀢𑁆𑀣 𑀦𑀸𑀫 𑀢𑁆𑀯’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀸𑀫𑀲𑀤𑁆𑀤𑁂𑀦 𑀬𑁄𑀚𑁂𑀢𑀩𑁆𑀩𑀁 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀺 𑀦𑀸𑀫𑀸’’𑀢𑀺.

𑀩𑀳𑀽𑀦𑀁 ¶ 𑀔𑁄…𑀧𑁂… 𑀆𑀤𑀺𑀓𑀢𑁆𑀢𑀸 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀲𑀸𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀢𑁆𑀯𑀁 𑀩𑀳𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀤𑀺𑀓𑀢𑁆𑀢𑀸, 𑀲𑀩𑁆𑀩𑀧𑀞𑀫𑀁 ¶ 𑀓𑀭𑀡𑀢𑁄; 𑀧𑀼𑀩𑁆𑀩𑀗𑁆𑀕𑀫𑁄 𑀲𑀩𑁆𑀩𑀧𑀞𑀫𑀁 𑀏𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀢𑁆𑀢𑀸; 𑀤𑁆𑀯𑀸𑀭𑀁𑀤𑀤𑁄, 𑀉𑀧𑀸𑀬𑀤𑀲𑁆𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀜𑁆𑀳𑀺 𑀮𑁂𑀲𑀁 𑀮𑀤𑁆𑀥𑀸 𑀢𑀯 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀩𑀳𑀽 𑀧𑀼𑀕𑁆𑀕𑀮𑀸 𑀦𑀸𑀦𑀧𑁆𑀧𑀓𑀸𑀭𑀓𑁂 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀧𑀝𑀺𑀲𑁂𑀯𑀦𑀸𑀤𑀺𑀓𑁂 𑀅𑀓𑀼𑀲𑀮𑀥𑀫𑁆𑀫𑁂 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑁂𑀳𑀺 ‘‘𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺, 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺. 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀤𑀼𑀩𑁆𑀪𑀭𑀢𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀲𑀁𑀯𑀭𑀲𑁆𑀲 𑀅𑀯𑀡𑁆𑀡𑀁 𑀦𑀺𑀦𑁆𑀤𑀁 𑀕𑀭𑀳𑀁 𑀪𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀳𑀺 𑀅𑀲𑀁𑀯𑀭𑁂 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀸 𑀤𑀼𑀩𑁆𑀪𑀭𑀢𑀜𑁆𑀘𑁂𑀯 𑀤𑀼𑀧𑁆𑀧𑁄𑀲𑀢𑀜𑁆𑀘 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀤𑀼𑀩𑁆𑀪𑀭𑀢𑀸, 𑀤𑀼𑀧𑁆𑀧𑁄𑀲𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀁𑀯𑀭𑁂 ¶ 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀫𑀳𑀺𑀘𑁆𑀙𑀢𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁂𑀧𑀺 𑀘 𑀧𑀘𑁆𑀘𑀬𑁂 𑀮𑀤𑁆𑀥𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀅𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀓𑁄𑀲𑀚𑁆𑀚𑀸𑀦𑀼𑀕𑀢𑁄 𑀘 𑀳𑁄𑀢𑀺 𑀅𑀝𑁆𑀞𑀓𑀼𑀲𑀻𑀢𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀲𑀗𑁆𑀕𑀡𑀺𑀓𑀸, 𑀘𑁂𑀯 𑀓𑁄𑀲𑀚𑁆𑀚𑀜𑁆𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀪𑀭𑀢𑀸𑀬…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀲𑀼𑀪𑀭𑀢𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀲𑀁𑀯𑀭𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀳𑀺 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀲𑀼𑀪𑀭𑁄 𑀳𑁄𑀢𑀺 𑀲𑀼𑀧𑁄𑀲𑁄, 𑀘𑀢𑀽𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑀢𑀁 𑀦𑀺𑀢𑁆𑀢𑀡𑁆𑀳𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀏𑀓𑀫𑁂𑀓𑀲𑁆𑀫𑀺𑀜𑁆𑀘 𑀧𑀘𑁆𑀘𑀬𑁂 𑀬𑀣𑀸𑀮𑀸𑀪-𑀬𑀣𑀸𑀩𑀮-𑀬𑀣𑀸𑀲𑀸𑀭𑀼𑀧𑁆𑀧𑀯𑀲𑁂𑀦 𑀢𑀺𑀧𑁆𑀧𑀪𑁂𑀤𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀲𑀼𑀪𑀭𑀢𑀸 𑀘𑁂𑀯 𑀲𑀼𑀧𑁄𑀲𑀢𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀘 𑀲𑀦𑁆𑀢𑀼𑀝𑁆𑀞𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀢𑀸𑀬 𑀘𑁂𑀯 𑀦𑀺𑀤𑁆𑀥𑀼𑀦𑀦𑀢𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀲𑀮𑁆𑀮𑁂𑀔𑁄 𑀘 𑀥𑀼𑀢𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀘 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀓𑀸𑀬𑀯𑀸𑀘𑀸𑀦𑀁 𑀅𑀧𑁆𑀧𑀸𑀲𑀸𑀤𑀺𑀓𑀁 𑀅𑀧𑁆𑀧𑀲𑀸𑀤𑀦𑀻𑀬𑀁 𑀅𑀲𑀦𑁆𑀢𑀁 𑀅𑀲𑀸𑀭𑀼𑀧𑁆𑀧𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀸𑀲𑀸𑀤𑀺𑀓𑀁 ¶ 𑀅𑀧𑁆𑀧𑀲𑀸𑀤𑀦𑀻𑀬𑀁 𑀅𑀲𑀦𑁆𑀢𑀁 𑀅𑀲𑀸𑀭𑀼𑀧𑁆𑀧𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀜𑁆𑀘 𑀅𑀦𑀼𑀧𑀕𑀫𑁆𑀫 𑀢𑀩𑁆𑀩𑀺𑀧𑀭𑀻𑀢𑀲𑁆𑀲 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀲𑁆𑀲 𑀘𑁂𑀯 𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀲𑁆𑀲 𑀘 𑀧𑀸𑀲𑀸𑀤𑀺𑀓𑀲𑁆𑀲 𑀧𑀲𑀸𑀤𑀦𑀻𑀬𑀲𑁆𑀲 𑀲𑀦𑁆𑀢𑀲𑁆𑀲 𑀲𑀸𑀭𑀼𑀧𑁆𑀧𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀧𑀸𑀲𑀸𑀤𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 ¶ 𑀧𑀦 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀲𑀩𑁆𑀩𑀓𑀺𑀮𑁂𑀲𑀸𑀧𑀘𑀬𑀪𑀽𑀢𑀸𑀬, 𑀯𑀺𑀯𑀝𑁆𑀝𑀸𑀬, 𑀅𑀝𑁆𑀞𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸 𑀘 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀅𑀧𑀘𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀦𑁆𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀁 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀺, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀜𑁆𑀘𑁂𑀯 𑀅𑀦𑀼𑀮𑁄𑀫𑀺𑀓𑀜𑁆𑀘. 𑀬𑁄 𑀯𑀸 𑀅𑀬𑀁 𑀲𑀼𑀪𑀭𑀢𑀸𑀤𑀻𑀳𑀺 𑀲𑀁𑀯𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀜𑁆𑀘𑁂𑀯 𑀅𑀦𑀼𑀮𑁄𑀫𑀺𑀓𑀜𑁆𑀘 𑀲𑀁𑀯𑀭𑀧𑁆𑀧𑀳𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 ¶ 𑀅𑀲𑀼𑀢𑁆𑀢𑀦𑁆𑀢𑀯𑀺𑀦𑀺𑀩𑀤𑁆𑀥𑀁 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀁 𑀑𑀓𑁆𑀓𑀦𑁆𑀢𑀺𑀓𑀥𑀫𑁆𑀫𑀤𑁂𑀲𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀓𑀺𑀭 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀫𑀸𑀮𑀁 𑀓𑀭𑁄𑀦𑁆𑀢𑁄 𑀯𑀺𑀬, 𑀭𑀢𑀦𑀤𑀸𑀫𑀁 𑀲𑀚𑁆𑀚𑁂𑀦𑁆𑀢𑁄 𑀯𑀺𑀬, 𑀘 𑀬𑁂 𑀧𑀝𑀺𑀓𑁆𑀔𑀺𑀧𑀦𑀸𑀥𑀺𑀧𑁆𑀧𑀸𑀬𑀸 𑀅𑀲𑀁𑀯𑀭𑀸𑀪𑀺𑀭𑀢𑀸 𑀢𑁂 𑀲𑀫𑁆𑀧𑀭𑀸𑀬𑀺𑀓𑁂𑀦 𑀯𑀝𑁆𑀝𑀪𑀬𑁂𑀦 𑀢𑀚𑁆𑀚𑁂𑀦𑁆𑀢𑁄 𑀅𑀦𑁂𑀓𑀧𑁆𑀧𑀓𑀸𑀭𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄, 𑀬𑁂 𑀲𑀺𑀓𑁆𑀔𑀸𑀓𑀸𑀫𑀸 𑀲𑀁𑀯𑀭𑁂 𑀞𑀺𑀢𑀸 𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀅𑀧𑁆𑀧𑁂𑀓𑀘𑁆𑀘𑁂 𑀅𑀦𑀸𑀕𑀸𑀫𑀺-𑀲𑀓𑀤𑀸𑀕𑀸𑀫𑀺-𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀲𑀼 𑀉𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑁂𑀧𑀺 𑀲𑀕𑁆𑀕𑀫𑀕𑁆𑀕𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸’’𑀢𑀺.

𑀢𑁂𑀦 𑀳𑀻𑀢𑀺 𑀢𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸, 𑀧𑀚𑁆𑀚𑀢𑁂 𑀇𑀫𑀺𑀦𑀸𑀢𑀺 𑀧𑀤𑀁, 𑀲𑀺𑀓𑁆𑀔𑀸𑀬 𑀧𑀤𑀁 𑀲𑀺𑀓𑁆𑀔𑀸𑀧𑀤𑀁; 𑀲𑀺𑀓𑁆𑀔𑀸𑀬 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀽𑀮𑀁 𑀦𑀺𑀲𑁆𑀲𑀬𑁄 𑀧𑀢𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁂𑀣𑀼𑀦𑀯𑀺𑀭𑀢𑀺𑀬𑀸 𑀫𑁂𑀣𑀼𑀦𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑁂𑀣𑀼𑀦𑀲𑀁𑀯𑀭𑁄 𑀳𑀺 𑀢𑀤𑀜𑁆𑀜𑁂𑀲𑀁 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀲𑀻𑀮𑀯𑀺𑀧𑀲𑁆𑀲𑀦𑀸𑀛𑀸𑀦𑀫𑀕𑁆𑀕𑀥𑀫𑁆𑀫𑀸𑀦𑀁 𑀯𑀼𑀢𑁆𑀢𑀢𑁆𑀣𑀯𑀲𑁂𑀦 𑀧𑀤𑀢𑁆𑀢𑀸 𑀇𑀥 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑀁 𑀯𑀘𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀬𑁄 𑀢𑀢𑁆𑀣 𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺. 𑀅𑀣 𑀯𑀸 𑀬𑀣𑀸 ‘‘𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀪𑀺𑀚𑁆𑀛𑀸 𑀏𑀓𑁄 𑀥𑀫𑁆𑀫𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄 ¶ 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁄 𑀲𑀺𑀓𑁆𑀔𑀸𑀬 𑀏𑀓𑁄 𑀧𑀤𑁂𑀲𑁄𑀢𑀺𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸𑀢𑀺 𑀤𑀲 𑀓𑀸𑀭𑀡𑀯𑀲𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼 𑀅𑀥𑀺𑀕𑀫𑀦𑀻𑀬𑁂 𑀳𑀺𑀢𑀯𑀺𑀲𑁂𑀲𑁂 𑀧𑀝𑀺𑀘𑁆𑀘 𑀆𑀕𑀫𑁆𑀫 𑀆𑀭𑀩𑁆𑀪, 𑀤𑀲𑀦𑁆𑀦𑀁 𑀳𑀺𑀢𑀯𑀺𑀲𑁂𑀲𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀢𑁂 𑀤𑀲 𑀅𑀢𑁆𑀣𑀯𑀲𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀦𑀸𑀫 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑁄, ‘‘𑀲𑀼𑀝𑁆𑀞𑀼 𑀤𑁂𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁄 ¶ . 𑀬𑁄 𑀘 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀺 ¶ , 𑀢𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀫𑀫 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸, 𑀦 𑀩𑀮𑀓𑁆𑀓𑀸𑀭𑁂𑀦 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀏𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑁋 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺. 𑀲𑀗𑁆𑀖𑀨𑀸𑀲𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀨𑀸𑀲𑀼𑀪𑀸𑀯𑀸𑀬; 𑀲𑀳𑀚𑀻𑀯𑀺𑀢𑀸𑀬 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀤𑀼𑀫𑁆𑀫𑀗𑁆𑀓𑀽 𑀦𑀸𑀫 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀸; 𑀬𑁂 𑀫𑀗𑁆𑀓𑀼𑀢𑀁 𑀆𑀧𑀸𑀤𑀺𑀬𑀫𑀸𑀦𑀸𑀧𑀺 𑀤𑀼𑀓𑁆𑀔𑁂𑀦 𑀆𑀧𑀚𑁆𑀚𑀦𑁆𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀸 𑀯𑀸 𑀓𑀢𑁆𑀯𑀸 𑀯𑀸 𑀦 𑀮𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀦𑀺𑀕𑁆𑀕𑀳𑀢𑁆𑀣𑀸𑀬; 𑀢𑁂 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀅𑀲𑀢𑀺 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀓𑀺𑀁 𑀲𑀼𑀢𑀁 𑁋 𑀓𑀺𑀁 𑀅𑀫𑁆𑀳𑁂𑀳𑀺 𑀓𑀢𑀁; 𑀓𑀢𑀭𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀢𑀫𑀁 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀲𑀗𑁆𑀖𑀁 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺, 𑀲𑀺𑀓𑁆𑀔𑀸𑀧𑀤𑁂 𑀧𑀦 𑀲𑀢𑀺 𑀢𑁂 𑀲𑀗𑁆𑀖𑁄 𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀧𑁂𑀲𑀮𑀸𑀦𑀁 𑀧𑀺𑀬𑀲𑀻𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀧𑀺𑀬𑀲𑀻𑀮𑀸 𑀳𑀺 𑀪𑀺𑀓𑁆𑀔𑀽 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀓𑀺𑀮𑀫𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀫𑀸𑀦𑀸 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀧𑀦 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀜𑀢𑁆𑀯𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀦 𑀓𑀺𑀮𑀫𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀫𑀸𑀦𑀸 𑀦 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀸 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺. 𑀬𑁄 𑀯𑀸 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀏𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄. 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀳𑀺 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺 ¶ , 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺, 𑀪𑀺𑀓𑁆𑀔𑀽 𑀅𑀦𑁂𑀓𑀕𑁆𑀕𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺. 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀺. 𑀏𑀯𑀁 ‘‘𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼 𑀯𑀺𑀳𑀸𑀭𑀸𑀬𑀸’’𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸 𑀅𑀢𑁆𑀣𑁄 ¶ 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀢𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸 𑀧𑀸𑀡𑀺𑀧𑁆𑀧𑀳𑀸𑀭-𑀤𑀡𑁆𑀟𑀧𑁆𑀧𑀳𑀸𑀭-𑀳𑀢𑁆𑀣𑀘𑁆𑀙𑁂𑀤-𑀧𑀸𑀤𑀘𑁆𑀙𑁂𑀤-𑀅𑀓𑀺𑀢𑁆𑀢𑀺-𑀅𑀬𑀲𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀬𑁄 𑀤𑀼𑀓𑁆𑀔𑀯𑀺𑀲𑁂𑀲𑀸. 𑀇𑀢𑀺 𑀇𑀫𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀧𑀺𑀥𑀸𑀦𑀸𑀬 𑀆𑀕𑀫𑀦𑀫𑀕𑁆𑀕𑀣𑀓𑀦𑀸𑀬𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸𑀢𑀺 𑀲𑀫𑁆𑀧𑀭𑀸𑀬𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀓𑀢𑀧𑀸𑀧𑀓𑀫𑁆𑀫𑀫𑀽𑀮𑀓𑀸 𑀲𑀫𑁆𑀧𑀭𑀸𑀬𑁂 𑀦𑀭𑀓𑀸𑀤𑀻𑀲𑀼 𑀧𑀢𑁆𑀢𑀩𑁆𑀩𑀸 𑀤𑀼𑀓𑁆𑀔𑀯𑀺𑀲𑁂𑀲𑀸, 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁆𑀣𑀸𑀬 𑀯𑀽𑀧𑀲𑀫𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀸 𑀬𑁂𑀧𑀺 𑀅𑀧𑁆𑀧𑀲𑀦𑁆𑀦𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑁂 ‘‘𑀬𑀸𑀦𑀺 𑀯𑀢 𑀮𑁄𑀓𑁂 𑀫𑀳𑀸𑀚𑀦𑀲𑁆𑀲 𑀭𑀚𑁆𑀚𑀦-𑀤𑀼𑀲𑁆𑀲𑀦-𑀫𑀼𑀬𑁆𑀳𑀦𑀝𑁆𑀞𑀸𑀦𑀸𑀦𑀺, 𑀢𑁂𑀳𑀺 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀆𑀭𑀓𑀸 𑀯𑀺𑀭𑀢𑀸 𑀯𑀺𑀳𑀭𑀦𑁆𑀢𑀺, 𑀤𑀼𑀓𑁆𑀓𑀭𑀁 𑀯𑀢 𑀓𑀭𑁄𑀦𑁆𑀢𑀺, 𑀪𑀸𑀭𑀺𑀬𑀁 𑀯𑀢 𑀓𑀭𑁄𑀦𑁆𑀢𑀻’’𑀢𑀺 𑀧𑀲𑀸𑀤𑀁 𑀆𑀧𑀚𑁆𑀚𑀦𑁆𑀢𑀺, 𑀯𑀺𑀦𑀬𑀧𑀺𑀝𑀓𑁂 𑀧𑁄𑀢𑁆𑀣𑀓𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓-𑀢𑀺𑀯𑁂𑀤𑀻 𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬𑀸’’𑀢𑀺.

𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀬𑁂𑀧𑀺 𑀲𑀸𑀲𑀦𑁂 𑀧𑀲𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸 𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀯𑀸 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀸 𑀤𑀼𑀓𑁆𑀓𑀭𑀓𑀸𑀭𑀺𑀦𑁄, 𑀬𑁂 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀺𑀦𑀬𑀲𑀁𑀯𑀭𑀁 𑀅𑀦𑀼𑀧𑀸𑀮𑁂𑀦𑁆𑀢𑀻’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬𑀸’’𑀢𑀺.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸𑀢𑀺 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 𑁋 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄𑀢𑀺. 𑀢𑀢𑁆𑀣 𑀧𑀺𑀝𑀓𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 ‘‘𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺, 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀢𑀺 ¶ 𑀅𑀬𑀁 ‘‘𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀅𑀬𑀁 ‘‘𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀲𑁄 𑀲𑀩𑁆𑀩𑁄𑀧𑀺 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀲𑁆𑀲 𑀯𑀺𑀪𑀗𑁆𑀕𑀜𑁆𑀘 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀅𑀜𑁆𑀜𑀜𑁆𑀘 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑀜𑁆𑀘 𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 ¶ 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸’’𑀢𑀺.

𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀲𑀁𑀯𑀭𑀯𑀺𑀦𑀬𑁄 𑀘 𑀧𑀳𑀸𑀦𑀯𑀺𑀦𑀬𑁄 𑀘 𑀲𑀫𑀣𑀯𑀺𑀦𑀬𑁄 𑀘 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄𑀧𑀺 𑀯𑀺𑀦𑀬𑁄 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀲𑀽𑀧𑀢𑁆𑀣𑀫𑁆𑀪𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺.

𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀧𑀤𑀸𑀦𑀺 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀸𑀦𑀺 ¶ . 𑀢𑀢𑁆𑀭𑀸𑀬𑀁 𑀧𑀞𑀫𑀧𑀘𑁆𑀙𑀺𑀫𑀧𑀤𑀬𑁄𑀚𑀦𑀸 𑁋 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺.

𑀅𑀧𑀺 𑀘𑁂𑀢𑁆𑀣 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀨𑀸𑀲𑀼 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀏𑀯𑀁 𑀲𑀗𑁆𑀔𑀮𑀺𑀓𑀦𑀬𑀁; 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀏𑀯𑀜𑁆𑀘 𑀏𑀓𑁂𑀓𑀧𑀤𑀫𑀽𑀮𑀺𑀓𑀁 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁪) 𑁋

‘‘𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀁, 𑀤𑁆𑀯𑁂 𑀘 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺;

𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀺, 𑀅𑀢𑁆𑀣𑀯𑀲𑁂 𑀧𑀓𑀭𑀡𑁂’’𑀢𑀺.

𑀢𑀁 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀁 𑀬𑀲𑁆𑀫𑀸 𑀧𑀭𑀺𑀯𑀸𑀭𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀥 𑀦 𑀯𑀡𑁆𑀡𑀺𑀢𑀦𑁆𑀢𑀺.

𑀏𑀯𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀤𑀻𑀧𑁂𑀦𑁆𑀢𑁄 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀦 𑀫𑀬𑀸 𑀇𑀢𑀺 𑀲𑀦𑁆𑀤𑀲𑁆𑀲𑀺𑀢𑀸𑀦𑀺𑀲𑀁𑀲𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑀘 𑀧𑀭𑀺𑀬𑀸𑀧𑀼𑀡𑁂𑀬𑁆𑀬𑀸𑀣 𑀘 𑀥𑀸𑀭𑁂𑀬𑁆𑀬𑀸𑀣 𑀘 𑀅𑀜𑁆𑀜𑁂𑀲𑀜𑁆𑀘 𑀯𑀸𑀘𑁂𑀬𑁆𑀬𑀸𑀣𑀸𑀢𑀺. 𑀅𑀢𑀺𑀭𑁂𑀓𑀸𑀦𑀬𑀦𑀢𑁆𑀣𑁄 ¶ 𑀳𑀺 𑀏𑀢𑁆𑀣 𑀘 𑀲𑀤𑁆𑀤𑁄, 𑀢𑁂𑀦𑀸𑀬𑀫𑀢𑁆𑀣𑁄 𑀆𑀦𑀻𑀢𑁄 𑀳𑁄𑀢𑀻𑀢𑀺.

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀇𑀫𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀆𑀳. 𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀫𑀓𑁆𑀓𑀝𑀻𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀘, 𑀇𑀤𑀜𑁆𑀘 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀤𑀧𑀸𑀤𑀻𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀁 𑀦𑀺𑀝𑁆𑀞𑀺𑀢𑀁.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸

𑁪𑁦. 𑀇𑀤𑀸𑀦𑀺 ¶ ¶ 𑀬𑀁 𑀢𑀁 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦𑀸𑀢𑀺 𑀫𑀳𑀸𑀯𑀦𑁂 𑀪𑀺𑀓𑁆𑀔𑀽𑀦𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀺𑀕𑀼𑀡𑀸𑀦𑀼𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀸 𑀩𑀳𑀽 𑀫𑀺𑀕𑀫𑁄𑀭𑀓𑀼𑀓𑁆𑀓𑀼𑀝𑀫𑀓𑁆𑀓𑀝𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸 𑀧𑀥𑀸𑀦𑀸𑀕𑀸𑀭𑀝𑁆𑀞𑀸𑀦𑁂𑀲𑀼 𑀯𑀺𑀘𑀭𑀦𑁆𑀢𑀺. 𑀢𑀢𑁆𑀭 𑀏𑀓𑀁 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀸𑀤𑀺𑀦𑀸 𑀉𑀧𑀮𑀸𑀧𑁂𑀢𑁆𑀯𑀸, 𑀲𑀗𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀧𑀝𑀺𑀲𑁂𑀯𑀢𑀻𑀢𑀺 𑀧𑀘𑀼𑀭𑀧𑀝𑀺𑀲𑁂𑀯𑀦𑁄 𑀳𑁄𑀢𑀺; 𑀧𑀘𑀼𑀭𑀢𑁆𑀣𑁂 𑀳𑀺 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀓𑁄 𑀪𑀺𑀓𑁆𑀔𑀼. 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸𑀢𑀺 𑀢𑁂 𑀪𑀺𑀓𑁆𑀔𑀽 𑀆𑀕𑀦𑁆𑀢𑀼𑀓𑀸 𑀩𑀼𑀤𑁆𑀥𑀤𑀲𑁆𑀲𑀦𑀸𑀬 𑀆𑀕𑀢𑀸 𑀧𑀸𑀢𑁄𑀯 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀦𑀺 𑀮𑀪𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀦𑀺 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀯𑀺𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸’’𑀢𑀺. 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀦𑀸𑀫 𑀏𑀓𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀯𑀸 𑀅𑀜𑁆𑀜𑁂𑀲𑀼𑀧𑀺 𑀢𑀸𑀤𑀺𑀲𑀜𑁆𑀜𑁂𑀯 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀸 𑀫𑀓𑁆𑀓𑀝𑀻 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲𑁂𑀯 𑀢𑁂𑀲𑀫𑁆𑀧𑀺 𑀢𑀁 𑀯𑀺𑀓𑀸𑀭𑀁 𑀤𑀲𑁆𑀲𑁂𑀲𑀺.

𑀙𑁂𑀧𑁆𑀧𑀦𑁆𑀢𑀺 𑀦𑀗𑁆𑀕𑀼𑀝𑁆𑀞𑀁. 𑀑𑀟𑁆𑀟𑀻𑀢𑀺 𑀅𑀪𑀺𑀫𑀼𑀔𑀁 𑀞𑀧𑁂𑀲𑀺. 𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀓𑀸𑀲𑀻𑀢𑀺 𑀬𑁂𑀦 𑀦𑀺𑀬𑀸𑀫𑁂𑀦 𑀬𑀸𑀬 𑀓𑀺𑀭𑀺𑀬𑀸𑀬 𑀫𑁂𑀣𑀼𑀦𑀸𑀥𑀺𑀧𑁆𑀧𑀸𑀬𑀁 𑀢𑁂 𑀚𑀸𑀦𑀦𑁆𑀢𑀺 𑀢𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄 ¶ . 𑀲𑁄 𑀪𑀺𑀓𑁆𑀔𑀽𑀢𑀺 𑀬𑀲𑁆𑀲𑀸𑀬𑀁 𑀯𑀺𑀳𑀸𑀭𑁄. 𑀏𑀓𑀫𑀦𑁆𑀢𑀁 𑀦𑀺𑀮𑀻𑀬𑀺𑀁𑀲𑀽𑀢𑀺 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀝𑀺𑀘𑁆𑀙𑀦𑁆𑀦𑀸 𑀅𑀘𑁆𑀙𑀺𑀁𑀲𑀼.

𑁪𑁧. 𑀲𑀘𑁆𑀘𑀁, 𑀆𑀯𑀼𑀲𑁄𑀢𑀺 𑀲𑀳𑁄𑀟𑁆𑀠𑀕𑁆𑀕𑀳𑀺𑀢𑁄 𑀘𑁄𑀭𑁄 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀤𑀺𑀲𑁆𑀯𑀸 𑀘𑁄𑀤𑀺𑀢𑀢𑁆𑀢𑀸 ‘‘𑀓𑀺𑀁 𑀯𑀸 𑀫𑀬𑀸 𑀓𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀘𑁆𑀘𑀁, 𑀆𑀯𑀼𑀲𑁄’’𑀢𑀺 𑀆𑀳. 𑀦𑀦𑀼, 𑀆𑀯𑀼𑀲𑁄, 𑀢𑀣𑁂𑀯 𑀢𑀁 𑀳𑁄𑀢𑀻𑀢𑀺 𑀆𑀯𑀼𑀲𑁄 𑀬𑀣𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑀦𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀧𑀺 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀢𑀣𑁂𑀯 𑀳𑁄𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀳𑀺 𑀤𑀲𑁆𑀲𑀦𑀫𑁆𑀧𑀺 𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀨𑀼𑀲𑀦𑀫𑁆𑀧𑀺 𑀖𑀝𑁆𑀝𑀦𑀫𑁆𑀧𑀺 𑀤𑀼𑀝𑁆𑀞𑀼𑀮𑁆𑀮𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀧𑀺 𑀢𑀁 𑀲𑀩𑁆𑀩𑀁 𑀤𑀼𑀝𑁆𑀞𑀼𑀮𑁆𑀮𑀫𑁂𑀯. 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄? 𑀅𑀮𑁂𑀲𑀝𑁆𑀞𑀸𑀦𑁂 𑀢𑁆𑀯𑀁 𑀮𑁂𑀲𑀁 𑀑𑀟𑁆𑀟𑁂𑀲𑀻𑀢𑀺.

𑁪𑁨. 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑁄 𑀬𑁂𑀯 𑀳𑁄𑀢𑀻𑀢𑀺 𑀤𑀴𑁆𑀳𑀢𑀭𑀁 𑀲𑀺𑀓𑁆𑀔𑀸𑀧𑀤𑀫𑀓𑀸𑀲𑀺. 𑀤𑀼𑀯𑀺𑀥𑀜𑁆𑀳𑀺 ¶ 𑀲𑀺𑀓𑁆𑀔𑀸𑀧𑀤𑀁 𑁋 𑀮𑁄𑀓𑀯𑀚𑁆𑀚𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘. 𑀢𑀢𑁆𑀣 𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀲𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀢𑀢𑁆𑀣 𑀮𑁄𑀓𑀯𑀚𑁆𑀚𑁂 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀭𑀼𑀦𑁆𑀥𑀦𑁆𑀢𑀻 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸 𑀕𑀸𑀴𑁆𑀳𑀢𑀭𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸, 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀅𑀬𑀁 𑀧𑀦 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀘 𑀯𑀼𑀢𑁆𑀢𑀸. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂 𑀅𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀻 𑀫𑁄𑀘𑁂𑀦𑁆𑀢𑀻 𑀤𑁆𑀯𑀸𑀭𑀁 𑀤𑀤𑀫𑀸𑀦𑀸 𑀅𑀧𑀭𑀸𑀧𑀭𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀕𑀡𑀪𑁄𑀚𑀦𑀧𑀭𑀫𑁆𑀧𑀭𑀪𑁄𑀚𑀦𑀸𑀤𑀻𑀲𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄 𑀯𑀺𑀬. ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺 𑀏𑀯𑀭𑀽𑀧𑀸 𑀧𑀦 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀕𑀢𑀺𑀓𑀸𑀯 𑀳𑁄𑀢𑀺. 𑀇𑀤𑀁 𑀧𑀦 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀬𑀲𑁆𑀫𑀸 𑀮𑁄𑀓𑀯𑀚𑁆𑀚𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁; 𑀢𑀲𑁆𑀫𑀸 𑀅𑀬𑀫𑀦𑀼𑀧𑀜𑁆𑀜𑀢𑁆𑀢𑀺 𑀭𑀼𑀦𑁆𑀥𑀦𑁆𑀢𑀻 ¶ 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸 𑀕𑀸𑀴𑁆𑀳𑀢𑀭𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀺.

𑀏𑀯𑀁 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺 ¶ . 𑀢𑀲𑁆𑀲𑀢𑁆𑀣𑁄 𑁋 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀘 𑀇𑀤𑀜𑁆𑀘 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼 𑀉𑀤𑀧𑀸𑀤𑀻𑀢𑀺.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀪𑀸𑀡𑀯𑀸𑀭𑁄

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁩-𑁪𑁪. 𑀇𑀤𑀸𑀦𑀺 𑀬𑀁 𑀢𑀁 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀺 𑀅𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀯𑁂𑀲𑀸𑀮𑀺𑀓𑀸𑀢𑀺 𑀯𑁂𑀲𑀸𑀮𑀺𑀯𑀸𑀲𑀺𑀦𑁄. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀯𑁂𑀲𑀸𑀮𑀺𑀬𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸. 𑀲𑀸𑀲𑀦𑁂 𑀓𑀺𑀭 𑀬𑁄 𑀬𑁄 𑀉𑀧𑀤𑁆𑀤𑀯𑁄 𑀆𑀤𑀻𑀦𑀯𑁄 𑀅𑀩𑁆𑀩𑀼𑀤𑀫𑀼𑀧𑁆𑀧𑀚𑁆𑀚𑀺, 𑀲𑀩𑁆𑀩𑀁 𑀢𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀦𑀺𑀲𑁆𑀲𑀸𑀬. 𑀢𑀣𑀸 𑀳𑀺 𑀤𑁂𑀯𑀤𑀢𑁆𑀢𑁄𑀧𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀧𑀓𑁆𑀔𑁂 𑀮𑀪𑀺𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀏𑀯 𑀘 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀲𑀼𑀁. 𑀇𑀫𑁂𑀧𑀺 𑀢𑁂𑀲𑀁 𑀬𑁂𑀯 𑀏𑀓𑀘𑁆𑀘𑁂 𑀏𑀯𑀁 𑀧𑀜𑁆𑀜𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 ¶ 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀁𑀲𑀼…𑀧𑁂… 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀽𑀢𑀺.

𑀜𑀸𑀢𑀺𑀩𑁆𑀬𑀲𑀦𑁂𑀦𑀧𑀻𑀢𑀺 𑀏𑀢𑁆𑀣 𑀅𑀲𑀦𑀁 𑀩𑁆𑀬𑀲𑀦𑀁 𑀯𑀺𑀓𑁆𑀔𑁂𑀧𑁄 𑀯𑀺𑀤𑁆𑀥𑀁𑀲𑀦𑀁 𑀯𑀺𑀦𑀸𑀲𑁄𑀢𑀺 𑀲𑀩𑁆𑀩𑀫𑁂𑀢𑀁 𑀏𑀓𑀢𑁆𑀣𑀁. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀢𑁂𑀦 𑀜𑀸𑀢𑀺𑀩𑁆𑀬𑀲𑀦𑁂𑀦, 𑀭𑀸𑀚𑀤𑀡𑁆𑀟𑀩𑁆𑀬𑀸𑀥𑀺𑀫𑀭𑀡𑀯𑀺𑀧𑁆𑀧𑀯𑀸𑀲𑀦𑀺𑀫𑀺𑀢𑁆𑀢𑁂𑀦 ¶ 𑀜𑀸𑀢𑀺𑀯𑀺𑀦𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀺. 𑀢𑀢𑀺𑀬𑀧𑀤𑁂 𑀧𑀦 𑀆𑀭𑁄𑀕𑁆𑀬𑀯𑀺𑀦𑀸𑀲𑀓𑁄 𑀭𑁄𑀕𑁄 𑀏𑀯 𑀭𑁄𑀕𑀩𑁆𑀬𑀲𑀦𑀁. 𑀲𑁄 𑀳𑀺 𑀆𑀭𑁄𑀕𑁆𑀬𑀁 𑀩𑁆𑀬𑀲𑀢𑀺 𑀯𑀺𑀓𑁆𑀔𑀺𑀧𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀭𑁄𑀕𑁄𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁, 𑀢𑁂𑀦 𑀭𑁄𑀕𑀩𑁆𑀬𑀲𑀦𑁂𑀦. 𑀨𑀼𑀝𑁆𑀞𑀸𑀢𑀺 𑀅𑀥𑀺𑀧𑀦𑁆𑀦𑀸 𑀅𑀪𑀺𑀪𑀽𑀢𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄.

𑀦 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑀼𑀤𑁆𑀥𑀕𑀭𑀳𑀺𑀦𑁄𑀢𑀺 𑀪𑀦𑁆𑀢𑁂 𑀆𑀦𑀦𑁆𑀤, 𑀫𑀬𑀁 𑀦 𑀩𑀼𑀤𑁆𑀥𑀁 𑀕𑀭𑀳𑀸𑀫, 𑀦 𑀩𑀼𑀤𑁆𑀥𑀲𑁆𑀲 𑀤𑁄𑀲𑀁 𑀤𑁂𑀫. 𑀦 𑀥𑀫𑁆𑀫𑀕𑀭𑀳𑀺𑀦𑁄, 𑀦 𑀲𑀗𑁆𑀖𑀕𑀭𑀳𑀺𑀦𑁄. 𑀅𑀢𑁆𑀢𑀕𑀭𑀳𑀺𑀦𑁄 𑀫𑀬𑀦𑁆𑀢𑀺 𑀅𑀢𑁆𑀢𑀸𑀦𑀫𑁂𑀯 𑀫𑀬𑀁 𑀕𑀭𑀳𑀸𑀫, 𑀅𑀢𑁆𑀢𑀦𑁄 𑀤𑁄𑀲𑀁 𑀤𑁂𑀫. 𑀅𑀮𑀓𑁆𑀔𑀺𑀓𑀸𑀢𑀺 𑀦𑀺𑀲𑁆𑀲𑀺𑀭𑀺𑀓𑀸. 𑀅𑀧𑁆𑀧𑀧𑀼𑀜𑁆𑀜𑀸𑀢𑀺 𑀧𑀭𑀺𑀢𑁆𑀢𑀧𑀼𑀜𑁆𑀜𑀸. 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀯𑀺𑀪𑀢𑁆𑀢𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀯𑀺𑀧𑀲𑁆𑀲𑀓𑀸; 𑀢𑀢𑁄 𑀢𑀢𑁄 𑀆𑀭𑀫𑁆𑀫𑀡𑀢𑁄 𑀯𑀼𑀝𑁆𑀞𑀸𑀬 𑀢𑁂𑀯 𑀥𑀫𑁆𑀫𑁂 𑀯𑀺𑀧𑀲𑁆𑀲𑀫𑀸𑀦𑀸𑀢𑀺 ¶ 𑀅𑀢𑁆𑀣𑁄. 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀦𑁆𑀢𑀺 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑀁 𑀧𑀼𑀩𑁆𑀩𑀭𑀢𑁆𑀢𑀁, 𑀭𑀢𑁆𑀢𑀺𑀬𑀸 𑀅𑀧𑀭𑀁 𑀅𑀧𑀭𑀭𑀢𑁆𑀢𑀁, 𑀧𑀞𑀫𑀬𑀸𑀫𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀦𑁆𑀢𑀺 𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑀓𑀸𑀭𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀦𑀼𑀬𑁄𑀕𑀦𑁆𑀢𑀺 𑀯𑀟𑁆𑀠𑀦𑀸𑀦𑀼𑀬𑁄𑀕𑀁. 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑁂𑀬𑁆𑀬𑀸𑀫𑀸𑀢𑀺 𑀕𑀺𑀳𑀺𑀧𑀮𑀺𑀩𑁄𑀥𑀁 𑀆𑀯𑀸𑀲𑀧𑀮𑀺𑀩𑁄𑀥𑀜𑁆𑀘 𑀧𑀳𑀸𑀬 𑀯𑀺𑀯𑀺𑀢𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀅𑀦𑀜𑁆𑀜𑀓𑀺𑀘𑁆𑀘𑀸 𑀯𑀺𑀳𑀭𑁂𑀬𑁆𑀬𑀸𑀫.

𑀏𑀯𑀫𑀸𑀯𑀼𑀲𑁄𑀢𑀺 𑀣𑁂𑀭𑁄 𑀏𑀢𑁂𑀲𑀁 𑀆𑀲𑀬𑀁 𑀅𑀚𑀸𑀦𑀦𑁆𑀢𑁄 𑀇𑀤𑀁 𑀦𑁂𑀲𑀁 𑀫𑀳𑀸𑀕𑀚𑁆𑀚𑀺𑀢𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀇𑀫𑁂 𑀈𑀤𑀺𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀸𑀥𑀽’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀓𑀸𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦 𑀨𑀮𑀁 𑀢𑀺𑀝𑁆𑀞𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀢𑀁 𑀑𑀓𑀸𑀲𑁄 𑀳𑁄𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦, 𑀢𑀲𑁆𑀫𑀸 ‘‘𑀞𑀸𑀦𑀜𑁆𑀘 𑀅𑀯𑀓𑀸𑀲𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤 ¶ , 𑀅𑀦𑀯𑀓𑀸𑀲𑁄’’𑀢𑀺. 𑀏𑀢𑀁 𑀞𑀸𑀦𑀁 𑀯𑀸 𑀑𑀓𑀸𑀲𑁄 𑀯𑀸 𑀦𑀢𑁆𑀣𑀺. 𑀬𑀁 𑀢𑀣𑀸𑀕𑀢𑁄𑀢𑀺 𑀬𑁂𑀦 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸…𑀧𑁂… 𑀲𑀫𑀽𑀳𑀦𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀪𑀕𑀯𑀸 𑀏𑀢𑁂𑀲𑀁 ‘‘𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀬𑀸𑀘𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀁 𑀤𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑀁 𑀦 𑀲𑀫𑀽𑀳𑀦𑀢𑀺, 𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 ‘‘𑀬𑀤𑀺 𑀳𑀺 𑀏𑀯𑀁 𑀆𑀕𑀢𑁄 𑀉𑀧𑀲𑀫𑁆𑀧𑀤𑀁 𑀮𑀪𑁂𑀬𑁆𑀬, 𑀲𑀸𑀲𑀦𑁂 𑀅𑀕𑀸𑀭𑀯𑁄 𑀪𑀯𑁂𑀬𑁆𑀬. 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀦 𑀞𑀺𑀢𑁄 𑀲𑀕𑀸𑀭𑀯𑁄 𑀘 𑀪𑀯𑀺𑀲𑁆𑀲𑀢𑀺, 𑀅𑀢𑁆𑀢𑀢𑁆𑀣𑀜𑁆𑀘 𑀓𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑀼𑀓𑀫𑁆𑀧𑀫𑀸𑀦𑁄 𑀪𑀕𑀯𑀸 𑀆𑀳 𑁋 ‘‘𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺. 𑀲𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀏𑀯𑀁 𑀆𑀕𑀢𑁄 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀯𑀺𑀧𑀦𑁆𑀦𑀲𑀻𑀮𑀢𑀸𑀬 𑀲𑀸𑀲𑀦𑁂 𑀲𑀕𑀸𑀭𑀯𑁄 ¶ 𑀪𑀯𑀺𑀲𑁆𑀲𑀢𑀺, 𑀲𑁄 𑀲𑀢𑀺 𑀉𑀧𑀦𑀺𑀲𑁆𑀲𑀬𑁂 𑀦𑀘𑀺𑀭𑀲𑁆𑀲𑁂𑀯 𑀉𑀢𑁆𑀢𑀫𑀢𑁆𑀣𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀆𑀳.

𑀏𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀆𑀕𑀢𑁂𑀲𑀼 𑀅𑀦𑀼𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀜𑁆𑀘 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀻𑀡𑀺𑀧𑀺 𑀯𑀢𑁆𑀣𑀽𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺.

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸

𑁪𑁫. 𑀇𑀤𑀸𑀦𑀺𑀲𑁆𑀲 ¶ 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑁄 ‘‘𑀬𑁄 𑀧𑀦𑀸𑀢𑀺, 𑀬𑁄 𑀬𑀸𑀤𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 𑀘 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀓𑀮𑁂 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄 𑁋

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀺𑀦𑀬𑀁, 𑀫𑀳𑀸𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀧𑀼𑀭𑀸.

𑀓𑀢𑀫𑀁 𑀘𑀢𑀼𑀩𑁆𑀩𑀺𑀥𑀁? 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀁, 𑀆𑀘𑀭𑀺𑀬𑀯𑀸𑀤𑀁, 𑀅𑀢𑁆𑀢𑀦𑁄𑀫𑀢𑀺𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀆𑀳𑀘𑁆𑀘𑀧𑀤𑁂𑀦 𑀭𑀲𑁂𑀦 𑀆𑀘𑀭𑀺𑀬𑀯𑀁𑀲𑁂𑀦 𑀅𑀥𑀺𑀧𑁆𑀧𑀸𑀬𑀸’’𑀢𑀺, 𑀏𑀢𑁆𑀣 𑀳𑀺 𑀆𑀳𑀘𑁆𑀘𑀧𑀤𑀦𑁆𑀢𑀺 𑀲𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀭𑀲𑁄𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁, 𑀆𑀘𑀭𑀺𑀬𑀯𑀁𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄, 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀢𑀦𑁄𑀫𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀁𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀺.

𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸; 𑀬𑁂 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂 ¶ , 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺; 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺; 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂 ¶ , 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺; 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺; 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫).

𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀧𑀜𑁆𑀘𑀳𑀺 𑀅𑀭𑀳𑀦𑁆𑀢𑀲𑀢𑁂𑀳𑀺 𑀞𑀧𑀺𑀢𑀸 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀸 𑀑𑀓𑁆𑀓𑀦𑁆𑀢𑀯𑀺𑀦𑀺𑀘𑁆𑀙𑀬𑀧𑁆𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸𑀢𑀦𑁆𑀢𑀺.

𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀼𑀢𑁆𑀢-𑀲𑀼𑀢𑁆𑀢𑀸𑀦𑀼𑀮𑁄𑀫-𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀫𑀸𑀦𑁂𑀦 𑀅𑀢𑁆𑀢𑀦𑁄 𑀅𑀦𑀼𑀩𑀼𑀤𑁆𑀥𑀺𑀬𑀸 𑀦𑀬𑀕𑁆𑀕𑀸𑀳𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀓𑀣𑀦𑀁.

𑀅𑀧𑀺𑀘 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀆𑀕𑀢𑁄 𑀲𑀩𑁆𑀩𑁄𑀧𑀺 𑀣𑁂𑀭𑀯𑀸𑀤𑁄 ‘‘𑀅𑀢𑁆𑀢𑀦𑁄𑀫𑀢𑀺’’ 𑀦𑀸𑀫. 𑀢𑀁 𑀧𑀦 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑀦 𑀤𑀴𑁆𑀳𑀕𑁆𑀕𑀸𑀳𑀁 ¶ 𑀕𑀳𑁂𑀢𑁆𑀯𑀸 𑀯𑁄𑀳𑀭𑀺𑀢𑀩𑁆𑀩𑀁. 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀣𑁂𑀦 𑀧𑀸𑀴𑀺𑀁, 𑀧𑀸𑀴𑀺𑀬𑀸 𑀘 𑀅𑀢𑁆𑀣𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀢𑀢𑁆𑀣 𑀑𑀢𑀭𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀦𑁂𑀯 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀦 𑀕𑀳𑁂𑀢𑀩𑁆𑀩𑀸. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀩𑁆𑀩𑀤𑀼𑀩𑁆𑀩𑀮𑀸. 𑀅𑀢𑁆𑀢𑀦𑁄𑀫𑀢𑀺𑀢𑁄 𑀆𑀘𑀭𑀺𑀬𑀯𑀸𑀤𑁄 𑀩𑀮𑀯𑀢𑀭𑁄.

𑀆𑀘𑀭𑀺𑀬𑀯𑀸𑀤𑁄𑀧𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣 𑀑𑀢𑀭𑀦𑁆𑀢𑁄 𑀲𑀫𑁂𑀦𑁆𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄, 𑀇𑀢𑀭𑁄 𑀦 𑀕𑀳𑁂𑀢𑀩𑁆𑀩𑁄. 𑀆𑀘𑀭𑀺𑀬𑀯𑀸𑀤𑀢𑁄 𑀳𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀩𑀮𑀯𑀢𑀭𑀁.

𑀲𑀼𑀢𑁆𑀢𑀸𑀦𑀼𑀮𑁄𑀫𑀫𑁆𑀧𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀳𑀺 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭𑀁. 𑀲𑀼𑀢𑁆𑀢𑀜𑁆𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀁 𑀩𑀼𑀤𑁆𑀥𑀸𑀦𑀁 𑀞𑀺𑀢𑀓𑀸𑀮𑀲𑀤𑀺𑀲𑀁. 𑀢𑀲𑁆𑀫𑀸 𑀬𑀤𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀸𑀓𑀘𑁆𑀙𑀦𑁆𑀢𑀺, 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑀯𑀸𑀤𑀻 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀁; 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀅𑀦𑁄𑀢𑀭𑀦𑁆𑀢𑁄 𑀅𑀲𑀫𑁂𑀦𑁆𑀢𑁄 𑀘 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄; 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀁 ¶ 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 ¶ 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀲𑀼𑀢𑁆𑀢𑀲𑁆𑀫𑀺𑀁 𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑀁 𑀧𑀸𑀴𑀺𑀆𑀕𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀳𑁂𑀢𑀩𑁆𑀩𑀁. 𑀦𑁄 𑀘𑁂 𑀢𑀣𑀸 𑀧𑀜𑁆𑀜𑀸𑀬𑀢𑀺 𑀦 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀩𑀸𑀳𑀺𑀭𑀓𑀲𑀼𑀢𑁆𑀢𑀁 𑀯𑀸 𑀳𑁄𑀢𑀺 𑀲𑀺𑀮𑁄𑀓𑁄 𑀯𑀸 𑀅𑀜𑁆𑀜𑀁 𑀯𑀸 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀕𑀼𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑁄 𑀆𑀕𑀢𑀁, 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 ¶ 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑁄. 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 ¶ 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄; 𑀇𑀢𑀭𑁄 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀕𑀳𑀡𑀫𑁂𑀯 ¶ 𑀩𑀮𑀺𑀬𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀘 𑀔𑁂𑀧𑁄 𑀯𑀸 𑀕𑀭𑀳𑀸 𑀯𑀸 𑀦 𑀓𑀸𑀢𑀩𑁆𑀩𑀸𑀢𑀺.

𑀅𑀣 ¶ 𑀧𑀦𑀸𑀬𑀁 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺. 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀢𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺. 𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀢𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀅𑀦𑁂𑀦 𑀅𑀢𑁆𑀢𑀦𑁄 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 𑀤𑀴𑁆𑀳𑀁 𑀆𑀤𑀸𑀬 𑀦 𑀞𑀸𑀢𑀩𑁆𑀩𑀁. ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁄𑀬𑁂𑀯 𑀲𑀸𑀥𑀼, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀯𑀺𑀦𑀬𑀜𑁆𑀳𑀺 𑀧𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀘𑀸𑀭𑀡𑀫𑀸𑀕𑀫𑁆𑀫 𑀭𑀼𑀦𑁆𑀥𑀺𑀢𑀩𑁆𑀩𑀁, 𑀕𑀸𑀴𑁆𑀳𑀁 𑀓𑀢𑁆𑀢𑀩𑁆𑀩𑀁, 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀕𑀭𑀼𑀓𑀪𑀸𑀯𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 ‘‘𑀓𑀧𑁆𑀧𑀺𑀬’’𑀦𑁆𑀢𑀺. 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀅𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀅𑀬𑀁 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀕𑀳𑀡𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀣𑀸 𑀘𑀸𑀬𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀓𑀧𑁆𑀧𑀺𑀬𑁂 𑀘 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄; 𑀏𑀯𑀁 𑀅𑀦𑀸𑀧𑀢𑁆𑀢𑀺𑀆𑀧𑀢𑁆𑀢𑀺𑀯𑀸𑀤𑁂 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀤𑁂 𑀘, 𑀮𑀳𑀼𑀓𑀕𑀭𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀘𑀸𑀧𑀺 ¶ 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀫𑀢𑁆𑀢𑀁𑀬𑁂𑀯 𑀳𑀺 𑀏𑀢𑁆𑀣 𑀦𑀸𑀦𑀁, 𑀬𑁄𑀚𑀦𑀸𑀦𑀬𑁂 𑀦𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀁.

𑀏𑀯𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀯𑀺𑀦𑀺𑀘𑁆𑀙𑀬𑁂 𑀉𑀧𑁆𑀧𑀦𑁆𑀦𑁂 𑀬𑁄 𑀲𑀼𑀢𑁆𑀢-𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀲𑀼 𑀅𑀢𑀺𑀭𑁂𑀓𑀓𑀸𑀭𑀡𑀁 𑀮𑀪𑀢𑀺, 𑀢𑀲𑁆𑀲 𑀯𑀸𑀤𑁂 𑀞𑀸𑀢𑀩𑁆𑀩𑀁. 𑀲𑀩𑁆𑀩𑀲𑁄 𑀧𑀦 𑀓𑀸𑀭𑀡𑀁 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀦𑁆𑀢𑁂𑀦 𑀲𑀼𑀢𑁆𑀢𑀁 𑀦 𑀚𑀳𑀺𑀢𑀩𑁆𑀩𑀁, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀓𑀮𑁂 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀅𑀬𑀁 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄.

𑀇𑀫𑀜𑁆𑀘 ¶ ¶ 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀯𑀺𑀦𑀬𑀁 𑀜𑀢𑁆𑀯𑀸𑀧𑀺 𑀯𑀺𑀦𑀬𑀥𑀭𑁂𑀦 𑀧𑀼𑀕𑁆𑀕𑀮𑁂𑀦 𑀢𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀻𑀡𑀺 𑀳𑀺 𑀯𑀺𑀦𑀬𑀥𑀭𑀲𑁆𑀲 𑀮𑀓𑁆𑀔𑀡𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? ‘‘𑀲𑀼𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀺 𑀲𑀼𑀧𑁆𑀧𑀯𑀢𑁆𑀢𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀢𑁆𑀢𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀢𑁄’’𑀢𑀺 𑀇𑀤𑀫𑁂𑀓𑀁 𑀮𑀓𑁆𑀔𑀡𑀁. ‘‘𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀺 𑀅𑀲𑀁𑀳𑀻𑀭𑁄’’𑀢𑀺 𑀇𑀤𑀁 𑀤𑀼𑀢𑀺𑀬𑀁. ‘‘𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀼𑀫𑀦𑀲𑀺𑀓𑀢𑀸 𑀲𑀽𑀧𑀥𑀸𑀭𑀺𑀢𑀸’’𑀢𑀺 𑀇𑀤𑀁 𑀢𑀢𑀺𑀬𑀁.

𑀢𑀢𑁆𑀣 𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀢𑀜𑁆𑀘𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀆𑀕𑀢𑀁. 𑀲𑀼𑀧𑁆𑀧𑀯𑀢𑁆𑀢𑀻𑀢𑀺 𑀲𑀼𑀝𑁆𑀞𑀼 𑀧𑀯𑀢𑁆𑀢𑀁 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁. 𑀲𑀼𑀢𑁆𑀢𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀢𑁄𑀢𑀺 𑀧𑀸𑀴𑀺𑀢𑁄 𑀘 𑀧𑀭𑀺𑀧𑀼𑀘𑁆𑀙𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀳𑁄𑀢𑀺, 𑀓𑀗𑁆𑀔𑀘𑁆𑀙𑁂𑀤𑀁 𑀓𑀢𑁆𑀯𑀸 𑀉𑀕𑁆𑀕𑀳𑀺𑀢𑀁.

𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀻𑀢𑀺 𑀯𑀺𑀦𑀬𑁂 𑀮𑀚𑁆𑀚𑀻𑀪𑀸𑀯𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀮𑀚𑁆𑀚𑀻 𑀳𑀺 𑀩𑀳𑀼𑀲𑁆𑀲𑀼𑀢𑁄𑀧𑀺 𑀲𑀫𑀸𑀦𑁄 𑀮𑀸𑀪𑀕𑀭𑀼𑀢𑀸𑀬 𑀢𑀦𑁆𑀢𑀺𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀢𑁆𑀯𑀸 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀉𑀧𑀤𑁆𑀤𑀯𑀁 𑀓𑀭𑁄𑀢𑀺. 𑀲𑀗𑁆𑀖𑀪𑁂𑀤𑀫𑁆𑀧𑀺 𑀲𑀗𑁆𑀖𑀭𑀸𑀚𑀺𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀺. 𑀮𑀚𑁆𑀚𑀻 𑀧𑀦 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀢𑀦𑁆𑀢𑀺𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀥𑀫𑁆𑀫𑀫𑁂𑀯 𑀯𑀺𑀦𑀬𑀫𑁂𑀯 𑀘 𑀤𑀻𑀧𑁂𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀞𑀧𑁂𑀢𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀫𑀳𑀸𑀣𑁂𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀼𑀁 𑁋 ‘‘𑀅𑀦𑀸𑀕𑀢𑁂 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀬𑁄 𑀮𑀚𑁆𑀚𑀻, 𑀲𑁄 𑀯𑀺𑀦𑀬𑀁 𑀅𑀯𑀺𑀚𑀳𑀦𑁆𑀢𑁄 𑀅𑀯𑁄𑀓𑁆𑀓𑀫𑀦𑁆𑀢𑁄 𑀮𑀚𑁆𑀚𑀻𑀪𑀸𑀯𑁂𑀦 𑀯𑀺𑀦𑀬𑁂 𑀞𑀺𑀢𑁄 𑀳𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺. 𑀅𑀲𑀁𑀳𑀻𑀭𑁄𑀢𑀺 𑀲𑀁𑀳𑀻𑀭𑁄 𑀦𑀸𑀫 𑀬𑁄 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀳𑁂𑀝𑁆𑀞𑀢𑁄 𑀯𑀸 𑀉𑀧𑀭𑀺𑀢𑁄 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀯𑀺𑀢𑁆𑀣𑀼𑀦𑀢𑀺 𑀯𑀺𑀧𑁆𑀨𑀦𑁆𑀤𑀢𑀺 𑀲𑀦𑁆𑀢𑀺𑀝𑁆𑀞𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀬𑀁 𑀬𑀁 𑀧𑀭𑁂𑀦 𑀯𑀼𑀘𑁆𑀘𑀢𑀺 𑀢𑀁 𑀢𑀁 𑀅𑀦𑀼𑀚𑀸𑀦𑀸𑀢𑀺; 𑀲𑀓𑀯𑀸𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀯𑀸𑀤𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬 𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 ¶ 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀦 𑀯𑀺𑀢𑁆𑀣𑀼𑀦𑀢𑀺 𑀦 𑀯𑀺𑀧𑁆𑀨𑀦𑁆𑀤𑀢𑀺, 𑀏𑀓𑁂𑀓𑀮𑁄𑀫𑀁 𑀲𑀡𑁆𑀟𑀸𑀲𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 ‘‘𑀏𑀯𑀁 𑀫𑀬𑀁 𑀯𑀤𑀸𑀫; 𑀏𑀯𑀁 𑀦𑁄 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’’𑀢𑀺 ¶ 𑀯𑀺𑀲𑁆𑀲𑀚𑁆𑀚𑁂𑀢𑀺; 𑀬𑀫𑁆𑀳𑀺 𑀧𑀸𑀴𑀺 𑀘 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄 𑀘 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀅𑀕𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀁𑀳𑀻𑀭𑁄’’𑀢𑀺.

𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺 𑀣𑁂𑀭𑀧𑀭𑀫𑁆𑀧𑀭𑀸 𑀯𑀁𑀲𑀧𑀭𑀫𑁆𑀧𑀭𑀸 𑀘𑀲𑁆𑀲 𑀲𑀼𑀝𑁆𑀞𑀼 𑀕𑀳𑀺𑀢𑀸 𑀳𑁄𑀢𑀺. 𑀲𑀼𑀫𑀦𑀲𑀺𑀓𑀢𑀸𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺𑀓𑀢𑀸; 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀉𑀚𑁆𑀚𑀮𑀺𑀢𑀧𑀤𑀻𑀧𑁄 𑀯𑀺𑀬 𑀳𑁄𑀢𑀺. 𑀲𑀽𑀧𑀥𑀸𑀭𑀺𑀢𑀸𑀢𑀺 𑀲𑀼𑀝𑁆𑀞𑀼 ¶ 𑀉𑀧𑀥𑀸𑀭𑀺𑀢𑀸 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀢𑁄 𑀅𑀢𑁆𑀣𑀢𑁄 𑀓𑀸𑀭𑀡𑀢𑁄 𑀘 𑀉𑀧𑀥𑀸𑀭𑀺𑀢𑀸; 𑀅𑀢𑁆𑀢𑀦𑁄 𑀫𑀢𑀺𑀁 𑀧𑀳𑀸𑀬 𑀆𑀘𑀭𑀺𑀬𑀲𑀼𑀤𑁆𑀥𑀺𑀬𑀸 𑀯𑀢𑁆𑀢𑀸 𑀳𑁄𑀢𑀺 ‘‘𑀫𑀬𑁆𑀳𑀁 𑀆𑀘𑀭𑀺𑀬𑁄 𑀅𑀲𑀼𑀓𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀲𑁄 𑀅𑀲𑀼𑀓𑀲𑁆𑀲𑀸’’𑀢𑀺 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀬𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀻𑀢𑀺 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀢𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀤𑀸𑀲𑀓𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲, 𑀲𑁄𑀡𑀓𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀸𑀲𑀓𑀢𑁆𑀣𑁂𑀭𑀲𑁆𑀲, 𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑁄𑀡𑀓𑀢𑁆𑀣𑁂𑀭𑀲𑁆𑀲, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀕𑁆𑀕𑀯𑀢𑁆𑀣𑁂𑀭𑀲𑁆𑀲 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀘𑀸𑀢𑀺. 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀏𑀯𑀁 𑀉𑀕𑁆𑀕𑀳𑀺𑀢𑀸 𑀳𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀅𑀯𑀲𑁆𑀲𑀁 𑀤𑁆𑀯𑁂 𑀢𑀬𑁄 𑀧𑀭𑀺𑀯𑀝𑁆𑀝𑀸 𑀉𑀕𑁆𑀕𑀳𑁂𑀢𑀩𑁆𑀩𑀸. 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀳𑀺 𑀦𑀬𑁂𑀦 𑀬𑀣𑀸 𑀆𑀘𑀭𑀺𑀬𑁄 𑀘 𑀆𑀘𑀭𑀺𑀬𑀸𑀘𑀭𑀺𑀬𑁄 𑀘 𑀧𑀸𑀴𑀺𑀜𑁆𑀘 𑀧𑀭𑀺𑀧𑀼𑀘𑁆𑀙𑀜𑁆𑀘 𑀯𑀤𑀦𑁆𑀢𑀺, 𑀢𑀣𑀸 𑀜𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀫𑁂𑀳𑀺 𑀘 𑀧𑀦 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀯𑀺𑀦𑀬𑀥𑀭𑁂𑀦 𑀯𑀢𑁆𑀣𑀼𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀙? 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁, 𑀫𑀸𑀢𑀺𑀓𑀸 𑀑𑀮𑁄𑀓𑁂𑀢𑀩𑁆𑀩𑀸, 𑀧𑀤𑀪𑀸𑀚𑀦𑀻𑀬𑀁 𑀑𑀮𑁄𑀓𑁂𑀢𑀩𑁆𑀩𑀁, 𑀢𑀺𑀓𑀧𑀭𑀺𑀘𑁆𑀙𑁂𑀤𑁄 𑀑𑀮𑁄𑀓𑁂𑀢𑀩𑁆𑀩𑁄, 𑀅𑀦𑁆𑀢𑀭𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸, 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸𑀢𑀺.

𑀯𑀢𑁆𑀣𑀼𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ¶ 𑀳𑀺 ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁; 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭) 𑀏𑀯𑀁 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺. 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀫𑀸𑀢𑀺𑀓𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁨) 𑀦𑀬𑁂𑀦 ¶ 𑀧𑀜𑁆𑀘𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀧𑀤𑀪𑀸𑀚𑀦𑀻𑀬𑀁 ¶ 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀓𑁆𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀬𑁂𑀪𑀼𑀬𑁆𑀬𑁂𑀦 𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁯 𑀆𑀤𑀬𑁄, 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀦𑀬𑁂𑀦 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀧𑀤𑀪𑀸𑀚𑀦𑀻𑀬𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀢𑀺𑀓𑀧𑀭𑀺𑀘𑁆𑀙𑁂𑀤𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀢𑀺𑀓𑀤𑀼𑀓𑁆𑀓𑀝𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀆𑀧𑀢𑁆𑀢𑀺𑀁 𑀢𑀺𑀓𑀧𑀭𑀺𑀘𑁆𑀙𑁂𑀤𑁂 𑀧𑀲𑁆𑀲𑀢𑀺, 𑀲𑁄 𑀢𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁫𑁫) 𑀏𑀯𑀁 𑀬𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀅𑀦𑁆𑀢𑀭𑀸𑀧𑀢𑁆𑀢𑀺 𑀳𑁄𑀢𑀺 𑀢𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁭𑁨 𑀆𑀤𑀬𑁄) 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁 𑀅𑀦𑀸𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑁄𑀯𑀺𑀤𑁄 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁄, 𑀩𑀼𑀤𑁆𑀥𑁂𑀦 𑀲𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀲𑀤𑀺𑀲𑁄 𑀳𑁄𑀢𑀺. 𑀢𑀁 𑀘𑁂𑀯𑀁 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀓𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑁂𑀬𑁆𑀬; 𑀢𑁂𑀦 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀅𑀦𑀸𑀧𑀢𑁆𑀢𑀺 𑀳𑁄𑀢𑀺, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀆𑀧𑀢𑁆𑀢𑀺 𑀳𑁄𑀢𑀺, ‘‘𑀆𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀸 𑀤𑁂𑀲𑀦𑀸𑀕𑀸𑀫𑀺𑀦𑀻 𑀘𑁂, ‘‘𑀤𑁂𑀲𑀦𑀸𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀘𑁂, ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀣𑀲𑁆𑀲 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 ¶ 𑀤𑀺𑀲𑁆𑀲𑀢𑀺, ‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻’’𑀢𑀺 𑀦 𑀢𑀸𑀯 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀫𑁂𑀣𑀼𑀦𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀳𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀘 𑀑𑀴𑀸𑀭𑀺𑀓𑁄. 𑀅𑀤𑀺𑀦𑁆𑀦𑀸𑀤𑀸𑀦𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀯𑀻𑀢𑀺𑀓𑁆𑀓𑀫𑀸 𑀧𑀦 𑀲𑀼𑀔𑀼𑀫𑀸 𑀘𑀺𑀢𑁆𑀢𑀮𑀳𑀼𑀓𑀸. 𑀢𑁂 𑀲𑀼𑀔𑀼𑀫𑁂𑀦𑁂𑀯 𑀆𑀧𑀚𑁆𑀚𑀢𑀺 ¶ , 𑀲𑀼𑀔𑀼𑀫𑁂𑀦 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀯𑀺𑀲𑁂𑀲𑁂𑀦 𑀢𑀁𑀯𑀢𑁆𑀣𑀼𑀓𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀧𑀢𑁆𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀘𑀲𑁆𑀲 𑀆𑀘𑀭𑀺𑀬𑁄 𑀥𑀭𑀢𑀺, 𑀢𑀢𑁄 𑀢𑁂𑀦 𑀲𑁄 𑀪𑀺𑀓𑁆𑀔𑀼 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀁 ¶ 𑀧𑀼𑀘𑁆𑀙𑀸’’𑀢𑀺 𑀧𑁂𑀲𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀧𑀼𑀦 𑀆𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀲𑀼𑀢𑁆𑀢𑀢𑁄 𑀦𑀬𑀢𑁄 𑀑𑀮𑁄𑀓𑁂𑀢𑁆𑀯𑀸 ‘𑀲𑀢𑁂𑀓𑀺𑀘𑁆𑀙𑁄’𑀢𑀺 𑀫𑀁 𑀆𑀳𑀸’’𑀢𑀺 𑀯𑀤𑀢𑀺, 𑀢𑀢𑁄 𑀅𑀦𑁂𑀦 𑀲𑁄 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀬𑀁 𑀆𑀘𑀭𑀺𑀬𑁄 𑀪𑀡𑀢𑀺 𑀢𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀧𑀦𑀲𑁆𑀲 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀧𑀦 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 𑁋 ‘‘𑀅𑀫𑁆𑀳𑁂𑀳𑀺 𑀲𑀳 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀕𑀡𑀧𑀸𑀫𑁄𑀓𑁆𑀔𑁄, 𑀢𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀸𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄𑀧𑀺 𑀦𑀢𑁆𑀣𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀡𑁆𑀟𑀺𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 𑁋 ‘‘𑀅𑀲𑀼𑀓𑀤𑀳𑀭𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀸𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀤𑀳𑀭𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸𑀯 𑀉𑀧𑀝𑁆𑀞𑀸𑀢𑀺, 𑀢𑁂𑀦𑀸𑀧𑀺 ‘‘𑀧𑀸𑀭𑀸𑀚𑀺𑀓𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀤𑀼𑀮𑁆𑀮𑀪𑁄 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀢𑀢𑁄 𑀤𑀼𑀮𑁆𑀮𑀪𑀢𑀭𑀸 ¶ 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀯𑀺𑀯𑀺𑀢𑁆𑀢𑀁 𑀑𑀓𑀸𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀢𑀸𑀯 𑀫𑀦𑀲𑀺 𑀓𑀭𑁄𑀳𑀻’’𑀢𑀺. 𑀲𑀘𑁂 𑀢𑀲𑁆𑀲 𑀅𑀭𑁄𑀕𑀁 𑀲𑀻𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀖𑀝𑀬𑀢𑀺, 𑀲𑀗𑁆𑀔𑀸𑀭𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀺𑀬 𑀘𑀺𑀢𑁆𑀢𑀫𑁆𑀧𑀺 𑀏𑀓𑀕𑁆𑀕𑀁 𑀳𑁄𑀢𑀺, 𑀤𑀺𑀯𑀲𑀁 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀲𑁄 𑀤𑀺𑀯𑀲𑀸𑀢𑀺𑀓𑁆𑀓𑀫𑁂 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀻𑀤𑀺𑀲𑀸 𑀢𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻’’𑀢𑀺. 𑀆𑀭𑁄𑀘𑀺𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀩𑁆𑀩𑀚𑁆𑀚𑀸 𑀦𑀸𑀫 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸𑀬, 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀻’’𑀢𑀺.

𑀬𑀲𑁆𑀲 𑀧𑀦 𑀲𑀻𑀮𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀖𑀝𑀬𑀢𑀺, 𑀧𑀢𑁄𑀤𑀸𑀪𑀺𑀢𑀼𑀦𑁆𑀦𑀁 𑀯𑀺𑀬 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀕𑁆𑀕𑀺𑀦𑀸 𑀟𑀬𑁆𑀳𑀢𑀺, 𑀢𑀢𑁆𑀢𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀯𑀼𑀝𑁆𑀞𑀸𑀢𑀺. 𑀲𑁄 ¶ 𑀆𑀕𑀢𑁄 ‘‘𑀓𑀸 𑀢𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀆𑀭𑁄𑀘𑀺𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 ‘‘𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄. 𑀲𑀩𑁆𑀩𑀧𑀞𑀫𑀜𑁆𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺, 𑀅𑀣𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀧𑀭𑀘𑀺𑀢𑁆𑀢𑀯𑀺𑀤𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑀸 𑀘 𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀢𑁆𑀯𑀁𑀬𑁂𑀯 𑀤𑀸𑀦𑀺 𑀢𑀯 𑀲𑁄𑀢𑁆𑀣𑀺𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀦𑀺𑀝𑁆𑀞𑀺𑀢𑀸 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸

𑀯𑀺𑀦𑀬𑀥𑀭𑀲𑁆𑀲 𑀘 𑀮𑀓𑁆𑀔𑀡𑀸𑀤𑀺𑀓𑀣𑀸.

𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀁 𑀯𑀼𑀢𑁆𑀢𑀁 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄𑀢𑀺𑀆𑀤𑀺. 𑀏𑀢𑁆𑀣 𑀬𑁄 𑀧𑀦𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀧𑀤𑀁; 𑀬𑁄 𑀬𑀸𑀤𑀺𑀲𑁄𑀢𑀺𑀆𑀤𑀻𑀦𑀺 𑀢𑀲𑁆𑀲 𑀯𑀺𑀪𑀚𑀦𑀧𑀤𑀸𑀦𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁; 𑀬𑁄𑀢𑀺 𑀅𑀢𑁆𑀣𑀧𑀤𑀁; 𑀢𑀜𑁆𑀘 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀤𑀻𑀧𑀓𑀁 𑀬𑁄 𑀲𑀤𑁆𑀤𑀫𑁂𑀯 𑀆𑀳. 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀧𑀦𑀸𑀢𑀺 𑀬𑁄 𑀬𑁄𑀓𑁄𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀬𑁄 𑀬𑁄𑀓𑁄𑀘𑀺 𑀦𑀸𑀫, 𑀲𑁄 𑀅𑀯𑀲𑁆𑀲𑀁 𑀮𑀺𑀗𑁆𑀕-𑀬𑀼𑀢𑁆𑀢-𑀚𑀸𑀢𑀺-𑀦𑀸𑀫-𑀕𑁄𑀢𑁆𑀢-𑀲𑀻𑀮-𑀯𑀺𑀳𑀸𑀭-𑀕𑁄𑀘𑀭𑀯𑀬𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀢𑀣𑀸 𑀜𑀸𑀧𑁂𑀢𑀼𑀁 𑀢𑀁 𑀧𑀪𑁂𑀤𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀸𑀤𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀤𑀺𑀲𑁄𑀢𑀺 𑀮𑀺𑀗𑁆𑀕𑀯𑀲𑁂𑀦 𑀬𑀸𑀤𑀺𑀲𑁄 𑀯𑀸 𑀢𑀸𑀤𑀺𑀲𑁄 𑀯𑀸 𑀳𑁄𑀢𑀼; 𑀤𑀻𑀖𑁄 𑀯𑀸 𑀭𑀲𑁆𑀲𑁄 𑀯𑀸 𑀓𑀸𑀴𑁄 𑀯𑀸 𑀑𑀤𑀸𑀢𑁄 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀺 𑀯𑀸 𑀓𑀺𑀲𑁄 𑀯𑀸 𑀣𑀽𑀮𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀬𑀼𑀢𑁆𑀢𑁄𑀢𑀺 𑀬𑁄𑀕𑀯𑀲𑁂𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀬𑀼𑀢𑁆𑀢𑁄 𑀳𑁄𑀢𑀼; 𑀦𑀯𑀓𑀫𑁆𑀫𑀬𑀼𑀢𑁆𑀢𑁄 𑀯𑀸 𑀉𑀤𑁆𑀤𑁂𑀲𑀬𑀼𑀢𑁆𑀢𑁄 𑀯𑀸 𑀯𑀸𑀲𑀥𑀼𑀭𑀬𑀼𑀢𑁆𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀚𑀘𑁆𑀘𑁄𑀢𑀺 𑀚𑀸𑀢𑀺𑀯𑀲𑁂𑀦 𑀬𑀁𑀚𑀘𑁆𑀘𑁄 𑀯𑀸 𑀢𑀁𑀚𑀘𑁆𑀘𑁄 𑀯𑀸 𑀳𑁄𑀢𑀼; 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀸𑀫𑁄𑀢𑀺 𑀦𑀸𑀫𑀯𑀲𑁂𑀦 𑀬𑀣𑀸𑀦𑀸𑀫𑁄 𑀯𑀸 𑀢𑀣𑀸𑀦𑀸𑀫𑁄 𑀯𑀸 𑀳𑁄𑀢𑀼; 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀯𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀕𑁄𑀢𑁆𑀢𑁄𑀢𑀺 𑀕𑁄𑀢𑁆𑀢𑀯𑀲𑁂𑀦 𑀬𑀣𑀸𑀕𑁄𑀢𑁆𑀢𑁄 𑀯𑀸 𑀢𑀣𑀸𑀕𑁄𑀢𑁆𑀢𑁄 𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀳𑁄𑀢𑀼; 𑀓𑀘𑁆𑀘𑀸𑀬𑀦𑁄 𑀯𑀸 𑀯𑀸𑀲𑀺𑀝𑁆𑀞𑁄 𑀯𑀸 𑀓𑁄𑀲𑀺𑀬𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀲𑀻𑀮𑁄𑀢𑀺 𑀲𑀻𑀮𑁂𑀲𑀼 𑀬𑀣𑀸𑀲𑀻𑀮𑁄 𑀯𑀸 𑀢𑀣𑀸𑀲𑀻𑀮𑁄 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀲𑀻𑀮𑁄 𑀯𑀸 𑀉𑀤𑁆𑀤𑁂𑀲𑀲𑀻𑀮𑁄 𑀯𑀸 𑀯𑀸𑀲𑀥𑀼𑀭𑀲𑀻𑀮𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀺𑀳𑀸𑀭𑀻𑀢𑀺 𑀯𑀺𑀳𑀸𑀭𑁂𑀲𑀼𑀧𑀺 𑀬𑀣𑀸𑀯𑀺𑀳𑀸𑀭𑀻 𑀯𑀸 𑀢𑀣𑀸𑀯𑀺𑀳𑀸𑀭𑀻 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀯𑀺𑀳𑀸𑀭𑀻 𑀯𑀸 𑀉𑀤𑁆𑀤𑁂𑀲𑀯𑀺𑀳𑀸𑀭𑀻 𑀯𑀸 𑀯𑀸𑀲𑀥𑀼𑀭𑀯𑀺𑀳𑀸𑀭𑀻 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀕𑁄𑀘𑀭𑁄𑀢𑀺 𑀕𑁄𑀘𑀭𑁂𑀲𑀼𑀧𑀺 𑀬𑀣𑀸𑀕𑁄𑀘𑀭𑁄 𑀯𑀸 𑀢𑀣𑀸𑀕𑁄𑀘𑀭𑁄 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀕𑁄𑀘𑀭𑁄 ¶ 𑀯𑀸 𑀉𑀤𑁆𑀤𑁂𑀲𑀕𑁄𑀘𑀭𑁄 𑀯𑀸 𑀯𑀸𑀲𑀥𑀼𑀭𑀕𑁄𑀘𑀭𑁄 𑀯𑀸𑀢𑀺 𑀅𑀢𑁆𑀣𑁄. 𑀣𑁂𑀭𑁄 𑀯𑀸𑀢𑀺 𑀆𑀤𑀻𑀲𑀼 𑀯𑀬𑁄𑀯𑀼𑀟𑁆𑀠𑀸𑀤𑀻𑀲𑀼 𑀬𑁄 𑀯𑀸 𑀲𑁄 𑀯𑀸 𑀳𑁄𑀢𑀼; 𑀧𑀭𑀺𑀧𑀼𑀡𑁆𑀡𑀤𑀲𑀯𑀲𑁆𑀲𑀢𑀸𑀬 𑀣𑁂𑀭𑁄 𑀯𑀸 𑀊𑀦𑀧𑀜𑁆𑀘𑀯𑀲𑁆𑀲𑀢𑀸𑀬 𑀦𑀯𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀢𑀸𑀬 ¶ 𑀫𑀚𑁆𑀛𑀺𑀫𑁄 𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀔𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀲𑁄 𑀯𑀼𑀘𑁆𑀘𑀢𑀺 ‘‘𑀬𑁄 𑀧𑀦𑀸’’𑀢𑀺.

𑀪𑀺𑀓𑁆𑀔𑀼𑀦𑀺𑀤𑁆𑀤𑁂𑀲𑁂 𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀓𑁄; 𑀮𑀪𑀦𑁆𑀢𑁄 𑀯𑀸 𑀅𑀮𑀪𑀦𑁆𑀢𑁄 𑀯𑀸 𑀅𑀭𑀺𑀬𑀸𑀬 𑀬𑀸𑀘𑀦𑀸𑀬 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄 𑀦𑀸𑀫. 𑀬𑁄 𑀳𑀺 𑀓𑁄𑀘𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 ¶ 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼; 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀪𑁂𑀤𑁂𑀦 𑀪𑀺𑀦𑁆𑀦𑀁 𑀧𑀝𑀁 𑀥𑀸𑀭𑁂𑀢𑀻𑀢𑀺 𑀪𑀺𑀦𑁆𑀦𑀧𑀝𑀥𑀭𑁄. 𑀢𑀢𑁆𑀣 𑀲𑀢𑁆𑀣𑀓𑀘𑁆𑀙𑁂𑀤𑀦𑁂𑀦 𑀅𑀕𑁆𑀖𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀲𑁆𑀲𑀕𑁆𑀖𑀦𑀓𑁄𑀧𑀺 𑀳𑀺 𑀧𑀝𑁄 𑀲𑀢𑁆𑀣𑀓𑁂𑀦 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀦𑁄 𑀪𑀺𑀦𑁆𑀦𑀕𑁆𑀖𑁄 𑀳𑁄𑀢𑀺. 𑀧𑀼𑀭𑀺𑀫𑀕𑁆𑀖𑀢𑁄 𑀉𑀧𑀟𑁆𑀠𑀫𑁆𑀧𑀺 𑀦 𑀅𑀕𑁆𑀖𑀢𑀺. 𑀲𑀼𑀢𑁆𑀢𑀲𑀁𑀲𑀺𑀩𑁆𑀩𑀦𑁂𑀦 𑀨𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀲𑀫𑁆𑀨𑀲𑁆𑀲𑁄𑀧𑀺 𑀳𑀺 𑀧𑀝𑁄 𑀲𑀼𑀢𑁆𑀢𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑁄 𑀪𑀺𑀦𑁆𑀦𑀨𑀲𑁆𑀲𑁄 𑀳𑁄𑀢𑀺. 𑀔𑀭𑀲𑀫𑁆𑀨𑀲𑁆𑀲𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀽𑀘𑀺𑀫𑀮𑀸𑀤𑀻𑀳𑀺 𑀯𑀡𑁆𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀧𑀭𑀺𑀲𑀼𑀤𑁆𑀥𑁄𑀧𑀺 𑀳𑀺 𑀧𑀝𑁄 𑀲𑀽𑀘𑀺𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀲𑀽𑀘𑀺𑀫𑀮𑁂𑀦, 𑀳𑀢𑁆𑀣𑀲𑁂𑀤𑀫𑀮𑀚𑀮𑁆𑀮𑀺𑀓𑀸𑀳𑀺, 𑀅𑀯𑀲𑀸𑀦𑁂 𑀭𑀚𑀦𑀓𑀧𑁆𑀧𑀓𑀭𑀡𑁂𑀳𑀺 𑀘 𑀪𑀺𑀦𑁆𑀦𑀯𑀡𑁆𑀡𑁄 𑀳𑁄𑀢𑀺; 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀢𑀺. 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀪𑀺𑀦𑁆𑀦𑀧𑀝𑀥𑀸𑀭𑀡𑀢𑁄 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼. 𑀕𑀺𑀳𑀺𑀯𑀢𑁆𑀣𑀯𑀺𑀲𑀪𑀸𑀕𑀸𑀦𑀁 𑀯𑀸 𑀓𑀸𑀲𑀸𑀯𑀸𑀦𑀁 𑀥𑀸𑀭𑀡𑀫𑀢𑁆𑀢𑁂𑀦𑁂𑀯 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼.

𑀲𑀫𑀜𑁆𑀜𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀯𑁄𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀜𑁆𑀜𑀸𑀬 𑀏𑀯 𑀳𑀺 𑀏𑀓𑀘𑁆𑀘𑁄 ‘‘𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀦𑀺𑀫𑀦𑁆𑀢𑀦𑀸𑀤𑀺𑀫𑁆𑀳𑀺 𑀪𑀺𑀓𑁆𑀔𑀽𑀲𑀼 𑀕𑀡𑀺𑀬𑀫𑀸𑀦𑁂𑀲𑀼 𑀲𑀸𑀫𑀡𑁂𑀭𑁂𑀧𑀺 𑀕𑀳𑁂𑀢𑁆𑀯𑀸 ‘‘𑀲𑀢𑀁 𑀪𑀺𑀓𑁆𑀔𑀽 𑀲𑀳𑀲𑁆𑀲𑀁 𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀝𑀺𑀚𑀸𑀦𑀦𑁂𑀦 𑀧𑀝𑀺𑀜𑁆𑀜𑀸𑀬𑀧𑀺 𑀳𑀺 𑀏𑀓𑀘𑁆𑀘𑁄 ‘‘𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀲 ‘‘𑀓𑁄 𑀏𑀢𑁆𑀣𑀸𑀢𑀺? 𑀅𑀳𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀽’’𑀢𑀺 (𑀅. 𑀦𑀺. 𑁧𑁦.𑁯𑁬) 𑀏𑀯𑀫𑀸𑀤𑀻𑀲𑀼 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄 ¶ . 𑀅𑀬𑀁 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀸 𑀥𑀫𑁆𑀫𑀺𑀓𑀸 𑀧𑀝𑀺𑀜𑁆𑀜𑀸. 𑀭𑀢𑁆𑀢𑀺𑀪𑀸𑀕𑁂 𑀧𑀦 𑀤𑀼𑀲𑁆𑀲𑀻𑀮𑀸𑀧𑀺 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀥𑀫𑁆𑀫𑀺𑀓𑀸𑀬 𑀧𑀝𑀺𑀜𑁆𑀜𑀸𑀬 𑀅𑀪𑀽𑀢𑀸𑀬 ‘‘𑀫𑀬𑀁 𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑀺.

𑀏𑀳𑀺 ¶ 𑀪𑀺𑀓𑁆𑀔𑀽𑀢𑀺 𑀏𑀳𑀺 𑀪𑀺𑀓𑁆𑀔𑀼 𑀦𑀸𑀫 𑀪𑀕𑀯𑀢𑁄 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀪𑀸𑀯𑀁 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀁 𑀧𑀢𑁆𑀢𑁄. 𑀪𑀕𑀯𑀸 𑀳𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀭𑀢𑁆𑀢𑀧𑀁𑀲𑀼𑀓𑀽𑀮𑀦𑁆𑀢𑀭𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀏𑀳𑀺, 𑀪𑀺𑀓𑁆𑀔𑀼, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀤𑀢𑀺. 𑀢𑀲𑁆𑀲 𑀲𑀳𑁂𑀯 𑀪𑀕𑀯𑀢𑁄 𑀯𑀘𑀦𑁂𑀦 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀭𑀼𑀳𑀢𑀺. 𑀪𑀡𑁆𑀟𑀼 𑀓𑀸𑀲𑀸𑀬𑀯𑀲𑀦𑁄 𑀳𑁄𑀢𑀺. 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑁂 𑀞𑀧𑁂𑀢𑁆𑀯𑀸 𑀯𑀸𑀫𑀁𑀲𑀓𑀽𑀝𑁂 𑀆𑀲𑀢𑁆𑀢𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑁋

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑀏𑀯𑀁 ¶ 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑁂𑀳𑀺𑀬𑁂𑀯 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀸𑀘𑀭𑀺𑀬𑀓𑁄 𑀩𑀼𑀤𑁆𑀥𑀼𑀧𑀚𑁆𑀛𑀸𑀬𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀫𑀸𑀦𑁄𑀬𑁂𑀯 𑀢𑀺𑀝𑁆𑀞𑀢𑀺. 𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀏𑀯 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸𑀦𑀺 𑀘 𑀲𑀳𑀲𑁆𑀲𑀼𑀧𑀭𑀺 𑀏𑀓𑀘𑀢𑁆𑀢𑀸𑀮𑀻𑀲𑀼𑀢𑁆𑀢𑀭𑀸𑀦𑀺 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀳𑁂𑀲𑀼𑀁; 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀜𑁆𑀘 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸, 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄, 𑀢𑀲𑁆𑀲 𑀧𑀭𑀺𑀯𑀸𑀭𑀸 𑀘𑀢𑀼𑀧𑀡𑁆𑀡𑀸𑀲 𑀲𑀳𑀸𑀬𑀓𑀸, 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑀸, 𑀲𑀳𑀲𑁆𑀲𑀧𑀼𑀭𑀸𑀡𑀚𑀝𑀺𑀮𑀸, 𑀲𑀤𑁆𑀥𑀺𑀁 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀓𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀻𑀡𑀺 𑀲𑀢𑀁 𑀲𑀳𑀲𑁆𑀲𑀜𑁆𑀘, 𑀘𑀢𑁆𑀢𑀸𑀮𑀻𑀲𑀁 𑀧𑀼𑀦𑀸𑀧𑀭𑁂;

𑀏𑀓𑁄 𑀘 𑀣𑁂𑀭𑁄 𑀲𑀧𑁆𑀧𑀜𑁆𑀜𑁄, 𑀲𑀩𑁆𑀩𑁂 𑀢𑁂 𑀏𑀳𑀺𑀪𑀺𑀓𑁆𑀔𑀼𑀓𑀸’’𑀢𑀺.

𑀦 𑀓𑁂𑀯𑀮𑀜𑁆𑀘 𑀏𑀢𑁂 𑀏𑀯, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀢𑀺𑀲𑀢𑀧𑀭𑀺𑀯𑀸𑀭𑁄 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄, 𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀳𑀸𑀓𑀧𑁆𑀧𑀺𑀦𑁄, 𑀤𑀲𑀲𑀳𑀲𑁆𑀲𑀸 ¶ 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀓𑀼𑀮𑀧𑀼𑀢𑁆𑀢𑀸, 𑀲𑁄𑀴𑀲𑀲𑀳𑀲𑁆𑀲𑀸 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀢𑀺 𑀏𑀯𑀫𑀸𑀤𑀬𑁄. 𑀢𑁂 𑀧𑀦 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀺𑀬𑀁 𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦 𑀯𑀼𑀢𑁆𑀢𑀸. 𑀇𑀫𑁂 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀸𑀢𑀺.

‘‘𑀲𑀢𑁆𑀢𑀯𑀻𑀲 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺𑀬𑁂𑀯 𑀲𑀢𑀸𑀦𑀺 𑀘;

𑀏𑀢𑁂𑀧𑀺 𑀲𑀩𑁆𑀩𑁂 𑀲𑀗𑁆𑀔𑀸𑀢𑀸, 𑀲𑀩𑁆𑀩𑁂 𑀢𑁂 𑀏𑀳𑀺𑀪𑀺𑀓𑁆𑀔𑀼𑀓𑀸’’𑀢𑀺.

𑀢𑀻𑀳𑀺 ¶ 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑁄. 𑀅𑀬𑀜𑁆𑀳𑀺 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀅𑀝𑁆𑀞𑀯𑀺𑀥𑀸 𑁋 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸, 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸, 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸𑀢𑀺. 𑀢𑀢𑁆𑀣 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀘 𑀯𑀼𑀢𑁆𑀢𑀸 𑀏𑀯.

𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀼 𑀘𑀸’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀁𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’𑀢𑀺. 𑀏𑀯𑀁 𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ¶ 𑁋 ‘𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀺 𑀦 𑀯𑀺𑀚𑀳𑀺𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀇𑀫𑀺𑀦𑀸 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀲𑁄𑀧𑀸𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀪𑀕𑀯𑀸 𑀓𑀺𑀭 𑀧𑀼𑀩𑁆𑀩𑀸𑀭𑀸𑀫𑁂 𑀅𑀦𑀼𑀘𑀗𑁆𑀓𑀫𑀦𑁆𑀢𑀁 𑀲𑁄𑀧𑀸𑀓𑀲𑀸𑀫𑀡𑁂𑀭𑀁 ‘‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸’𑀢𑀺 𑀯𑀸, 𑀲𑁄𑀧𑀸𑀓, ‘𑀭𑀽𑀧𑀲𑀜𑁆𑀜𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 ¶ , 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 𑀤𑀲 𑀅𑀲𑀼𑀪𑀦𑀺𑀲𑁆𑀲𑀺𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄 𑀢𑁂 𑀩𑁆𑀬𑀸𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀲𑁄𑀧𑀸𑀓𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀢𑁆𑀢𑀯𑀲𑁆𑀲𑁄𑀳𑀁, 𑀪𑀕𑀯𑀸’’𑀢𑀺. ‘‘𑀲𑁄𑀧𑀸𑀓, 𑀢𑁆𑀯𑀁 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀻’’𑀢𑀺 𑀆𑀭𑀤𑁆𑀥𑀘𑀺𑀢𑁆𑀢𑁄 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺. 𑀅𑀬𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸.

𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀫𑀳𑀸𑀧𑀚𑀸𑀧𑀢𑀺𑀬𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀲𑁆𑀲 𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸 𑀦𑀸𑀫 𑀅𑀟𑁆𑀠𑀓𑀸𑀲𑀺𑀬𑀸 𑀕𑀡𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀫𑁆𑀫𑁂𑀳𑀺 𑀉𑀧𑀲𑀫𑁆𑀧𑀤𑀸.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸 ¶ 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀏𑀢𑀭𑀳𑀺 𑀉𑀧𑀲𑀫𑁆𑀧𑀤𑀸. 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 ‘‘𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀫𑀬𑀸 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀁 𑀅𑀚𑁆𑀚𑀢𑀕𑁆𑀕𑁂 𑀧𑀝𑀺𑀓𑁆𑀔𑀺𑀧𑀸𑀫𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁬𑁯) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀸𑀬 𑀇𑀫𑀸𑀬 𑀉𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀤𑁆𑀭𑁄𑀢𑀺 𑀅𑀧𑀸𑀧𑀓𑁄. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀳𑀺 𑀬𑀸𑀯 𑀅𑀭𑀳𑀸, 𑀢𑀸𑀯 𑀪𑀤𑁆𑀭𑁂𑀦 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀪𑀤𑁆𑀭𑁄 𑀪𑀺𑀓𑁆𑀔𑀽’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀲𑀸𑀭𑁄𑀢𑀺 𑀢𑁂𑀳𑀺𑀬𑁂𑀯 𑀲𑀻𑀮𑀲𑀸𑀭𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀻𑀮𑀲𑀫𑀦𑁆𑀦𑀸𑀕𑀫𑁂𑀦 𑀦𑀻𑀮𑁄 𑀧𑀝𑁄 𑀯𑀺𑀬 ‘‘𑀲𑀸𑀭𑁄 𑀪𑀺𑀓𑁆𑀔𑀽’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀕𑀢𑀓𑀺𑀮𑁂𑀲𑀨𑁂𑀕𑁆𑀕𑀼𑀪𑀸𑀯𑀢𑁄 𑀯𑀸 𑀔𑀻𑀡𑀸𑀲𑀯𑁄𑀯 ‘‘𑀲𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀔𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 ¶ 𑀅𑀭𑀺𑀬𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀔𑀸. 𑀢𑁂𑀲𑀼 𑀬𑁄 𑀓𑁄𑀘𑀺 ‘‘𑀲𑁂𑀔𑁄 𑀪𑀺𑀓𑁆𑀔𑀽’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀲𑀺𑀓𑁆𑀔𑀢𑀻𑀢𑀺 𑀅𑀲𑁂𑀔𑁄. 𑀲𑁂𑀓𑁆𑀔𑀥𑀫𑁆𑀫𑁂 𑀅𑀢𑀺𑀓𑁆𑀓𑀫𑁆𑀫 𑀅𑀕𑁆𑀕𑀨𑀮𑁂 𑀞𑀺𑀢𑁄, 𑀢𑀢𑁄 𑀉𑀢𑁆𑀢𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑁄 ‘‘𑀅𑀲𑁂𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀆𑀕𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀆𑀳𑀝𑀢𑁆𑀢𑀸, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀢𑁄 𑀏𑀓𑀲𑁆𑀫𑀺𑀁 𑀓𑀫𑁆𑀫𑁂 𑀲𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁂𑀦. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 ¶ 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸 𑀓𑀸𑀢𑀩𑁆𑀩𑁂𑀦. 𑀓𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀺𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦. 𑀅𑀓𑀼𑀧𑁆𑀧𑁂𑀦𑀸𑀢𑀺 𑀯𑀢𑁆𑀣𑀼-𑀜𑀢𑁆𑀢𑀺-𑀅𑀦𑀼𑀲𑁆𑀲𑀸𑀯𑀦-𑀲𑀻𑀫𑀸-𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀓𑁄𑀧𑁂𑀢𑀩𑁆𑀩𑀢𑀁 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀜𑁆𑀘 𑀉𑀧𑀕𑀢𑁂𑀦. 𑀞𑀸𑀦𑀸𑀭𑀳𑁂𑀦𑀸𑀢𑀺 𑀓𑀸𑀭𑀡𑀸𑀭𑀳𑁂𑀦 𑀲𑀢𑁆𑀣𑀼𑀲𑀸𑀲𑀦𑀸𑀭𑀳𑁂𑀦. 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄, 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺 𑀉𑀧𑀭𑀺𑀪𑀸𑀯𑁄, 𑀢𑀜𑁆𑀘𑁂𑀲 𑀬𑀣𑀸𑀯𑀼𑀢𑁆𑀢𑁂𑀦 𑀓𑀫𑁆𑀫𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀏𑀓𑀫𑁂𑀯 𑀆𑀕𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑀩𑁆𑀩𑀸𑀦𑀻𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀸𑀦𑀺 𑀘 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’’𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀔𑀦𑁆𑀥𑀓𑀢𑁄 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑀢𑁄 𑀘 𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 𑀓𑀣𑀺𑀢𑀸𑀦𑀺. 𑀢𑀸𑀦𑀺 𑀫𑀬𑀁 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀘 ¶ 𑀦 𑀪𑀸𑀭𑀺𑀬𑀸 𑀪𑀯𑀺𑀲𑁆𑀲𑀢𑀺; 𑀬𑀣𑀸𑀞𑀺𑀢𑀸𑀬 𑀘 𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀪𑀯𑀺𑀲𑁆𑀲𑀢𑀺. 𑀢𑀸𑀦𑀺 𑀘 𑀞𑀸𑀦𑀸𑀦𑀺 𑀅𑀲𑀼𑀜𑁆𑀜𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺; 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑁄𑀫.

𑀢𑀢𑁆𑀭𑀸𑀢𑀺 𑀢𑁂𑀲𑀼 ‘‘𑀪𑀺𑀓𑁆𑀔𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀬𑁆𑀯𑀸𑀬𑀁 𑀪𑀺𑀓𑁆𑀔𑀽𑀢𑀺 𑀬𑁄 𑀅𑀬𑀁 𑀪𑀺𑀓𑁆𑀔𑀼. 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦…𑀧𑁂… 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄. 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺 𑀅𑀬𑀁 𑀇𑀫𑀲𑁆𑀫𑀺𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺 𑀅𑀢𑁆𑀣𑁂 ‘‘𑀪𑀺𑀓𑁆𑀔𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀢𑀭𑁂 𑀧𑀦 ‘‘𑀪𑀺𑀓𑁆𑀔𑀓𑁄’’𑀢𑀺 𑀆𑀤𑀬𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸. 𑀢𑁂𑀲𑀼 𑀘 ‘‘𑀪𑀺𑀓𑁆𑀔𑀓𑁄’’𑀢𑀺 𑀆𑀤𑀬𑁄 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀸, ‘‘𑀲𑀫𑀜𑁆𑀜𑀸𑀬 𑀪𑀺𑀓𑁆𑀔𑀼, 𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽’’𑀢𑀺 𑀇𑀫𑁂 𑀤𑁆𑀯𑁂 𑀅𑀪𑀺𑀮𑀸𑀧𑀯𑀲𑁂𑀦 𑀯𑀼𑀢𑁆𑀢𑀸, ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀩𑀼𑀤𑁆𑀥𑁂𑀦 𑀉𑀧𑀚𑁆𑀛𑀸𑀬𑁂𑀦 𑀧𑀝𑀺𑀮𑀤𑁆𑀥𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀭𑀡𑀕𑀫𑀦𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀬 𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀯𑀼𑀢𑁆𑀢𑁄, ‘‘𑀪𑀤𑁆𑀭𑁄’’𑀢𑀺𑀆𑀤𑀬𑁄 𑀕𑀼𑀡𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀁 𑀦𑀺𑀝𑁆𑀞𑀺𑀢𑀁.

𑀲𑀺𑀓𑁆𑀔𑀸𑀲𑀸𑀚𑀻𑀯𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀇𑀤𑀁 𑀧𑀤𑀁 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀢𑁄 𑀅𑀯𑀺𑀪𑀚𑀺𑀢𑁆𑀯𑀸𑀯 𑀬𑀁 𑀲𑀺𑀓𑁆𑀔𑀜𑁆𑀘 𑀲𑀸𑀚𑀻𑀯𑀜𑁆𑀘 𑀲𑀫𑀸𑀧𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀺𑀓𑁆𑀔𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸. 𑀢𑀺𑀲𑁆𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 ¶ . 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀢𑀺 𑀅𑀥𑀺𑀓𑀁 𑀉𑀢𑁆𑀢𑀫𑀁 𑀲𑀻𑀮𑀦𑁆𑀢𑀺 𑀅𑀥𑀺𑀲𑀻𑀮𑀁; 𑀅𑀥𑀺𑀲𑀻𑀮𑀜𑁆𑀘 𑀢𑀁 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸 𑀘𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀏𑀲 𑀦𑀬𑁄 𑀅𑀥𑀺𑀘𑀺𑀢𑁆𑀢-𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀼.

𑀓𑀢𑀫𑀁 𑀧𑀦𑁂𑀢𑁆𑀣 𑀲𑀻𑀮𑀁, 𑀓𑀢𑀫𑀁 𑀅𑀥𑀺𑀲𑀻𑀮𑀁, 𑀓𑀢𑀫𑀁 𑀘𑀺𑀢𑁆𑀢𑀁, 𑀓𑀢𑀫𑀁 𑀅𑀥𑀺𑀘𑀺𑀢𑁆𑀢𑀁, 𑀓𑀢𑀫𑀸 𑀧𑀜𑁆𑀜𑀸, 𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀲𑀻𑀮𑀁 𑀢𑀸𑀯 𑀲𑀻𑀮𑀫𑁂𑀯. 𑀢𑀜𑁆𑀳𑀺 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀮𑁄𑀓𑁂 𑀧𑀯𑀢𑁆𑀢𑀢𑀺. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀲𑁆𑀫𑀺𑀁 𑀲𑀻𑀮𑁂 𑀩𑀼𑀤𑁆𑀥𑀸𑀧𑀺 𑀲𑀸𑀯𑀓𑀸𑀧𑀺 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀦𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀓𑀫𑁆𑀫𑀯𑀸𑀤𑀺𑀦𑁄 𑀘 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀓𑁆𑀓𑀯𑀢𑁆𑀢𑀻 𑀘 𑀫𑀳𑀸𑀭𑀸𑀚𑀸𑀦𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀲𑀫𑀸𑀤𑀧𑁂𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀧𑀡𑁆𑀟𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀸𑀤𑀺𑀬𑀦𑁆𑀢𑀺. 𑀢𑁂 𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀧𑀦 ‘‘𑀅𑀥𑀺𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀳𑀺 𑀲𑀽𑀭𑀺𑀬𑁄 𑀯𑀺𑀬 𑀧𑀚𑁆𑀚𑁄𑀢𑀸𑀦𑀁 𑀲𑀺𑀦𑁂𑀭𑀼 𑀯𑀺𑀬 𑀧𑀩𑁆𑀩𑀢𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀲𑀻𑀮𑀸𑀦𑀁 ¶ 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀘 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀦 𑀳𑀺 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑁄 𑀲𑀢𑁆𑀢𑁄 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀩𑀼𑀤𑁆𑀥𑀸𑀬𑁂𑀯 𑀧𑀦 𑀲𑀩𑁆𑀩𑀲𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀅𑀚𑁆𑀛𑀸𑀘𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀢𑀁 𑀲𑀻𑀮𑀲𑀁𑀯𑀭𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀢𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺.

𑀓𑀸𑀫𑀸𑀯𑀘𑀭𑀸𑀦𑀺 𑀧𑀦 𑀅𑀝𑁆𑀞 𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀮𑁄𑀓𑀺𑀬𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀘𑀺𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀦𑀼𑀧𑁆𑀧𑀸𑀤𑁂 𑀘𑀲𑁆𑀲 𑀧𑀯𑀢𑁆𑀢𑀺, 𑀲𑀫𑀸𑀤𑀧𑀦𑀁 𑀲𑀫𑀸𑀤𑀸𑀦𑀜𑁆𑀘 𑀲𑀻𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀦 ‘‘𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀅𑀥𑀺𑀲𑀻𑀮𑀁 𑀯𑀺𑀬 𑀲𑀻𑀮𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀘 𑀳𑁄𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺.

‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 (𑀥. 𑀲. 𑁧𑁩𑁭𑁧; 𑀯𑀺𑀪. 𑁭𑁯𑁩; 𑀫. 𑀦𑀺. 𑁩.𑁯𑁨) -𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀦 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀧𑀜𑁆𑀜𑀸, 𑀲𑀸 𑀳𑀺 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 ¶ 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀮𑁄𑀓𑁂 ¶ 𑀧𑀯𑀢𑁆𑀢𑀢𑀺. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑀲𑀸𑀯𑀓𑀸𑀧𑀺 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀦𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀓𑀫𑁆𑀫𑀯𑀸𑀤𑀺𑀦𑁄 𑀘 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀓𑁆𑀓𑀯𑀢𑁆𑀢𑀻 𑀘 𑀫𑀳𑀸𑀭𑀸𑀚𑀸𑀦𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀲𑀫𑀸𑀤𑀧𑁂𑀦𑁆𑀢𑀺. 𑀲𑀸𑀫𑀫𑁆𑀧𑀺 𑀧𑀡𑁆𑀟𑀺𑀢𑀸 𑀲𑀢𑁆𑀢𑀸 𑀲𑀫𑀸𑀤𑀺𑀬𑀦𑁆𑀢𑀺. 𑀢𑀣𑀸 𑀳𑀺 𑀅𑀗𑁆𑀓𑀼𑀭𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀯𑁂𑀮𑀸𑀫𑁄, 𑀯𑁂𑀲𑁆𑀲𑀦𑁆𑀢𑀭𑁄, 𑀅𑀜𑁆𑀜𑁂 𑀘 𑀩𑀳𑀽 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀫𑀳𑀸𑀤𑀸𑀦𑀸𑀦𑀺 𑀅𑀤𑀁𑀲𑀼. 𑀢𑁂 𑀢𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀢𑀺𑀮𑀓𑁆𑀔𑀡𑀸𑀓𑀸𑀭𑀧𑀭𑀺𑀘𑁆𑀙𑁂𑀤𑀓𑀁 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 ‘‘𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀳𑀺 𑀅𑀥𑀺𑀲𑀻𑀮-𑀅𑀥𑀺𑀘𑀺𑀢𑁆𑀢𑀸𑀦𑀺 𑀯𑀺𑀬 𑀲𑀻𑀮𑀘𑀺𑀢𑁆𑀢𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀧𑀜𑁆𑀜𑀸𑀦𑀁 𑀅𑀥𑀺𑀓𑀸 𑀘𑁂𑀯 𑀉𑀢𑁆𑀢𑀫𑀸 𑀘, 𑀦 𑀘 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀮𑁄𑀓𑁂 𑀧𑀯𑀢𑁆𑀢𑀢𑀺. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸, 𑀲𑀸 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻𑀢𑀺.

𑀢𑀢𑁆𑀭𑀸𑀢𑀺 𑀢𑀸𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼. 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀢𑀺 𑀬𑀸 𑀅𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀲𑀗𑁆𑀔𑀸𑀢𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀏𑀢𑀁 𑀲𑀸𑀚𑀻𑀯𑀁 𑀦𑀸𑀫𑀸𑀢𑀺 𑀏𑀢𑀁 𑀲𑀩𑁆𑀩𑀫𑁆𑀧𑀺 ¶ 𑀪𑀕𑀯𑀢𑀸 𑀯𑀺𑀦𑀬𑁂 𑀞𑀧𑀺𑀢𑀁 𑀲𑀺𑀓𑁆𑀔𑀸𑀧𑀤𑀁, 𑀬𑀲𑁆𑀫𑀸 𑀏𑀢𑁆𑀣 𑀦𑀸𑀦𑀸𑀤𑁂𑀲𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀪𑀺𑀓𑁆𑀔𑀽 𑀲𑀳 𑀚𑀻𑀯𑀦𑁆𑀢𑀺 𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀸𑀚𑀻𑀯’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀻𑀢𑀺 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸 ‘‘𑀬𑀣𑀸𑀲𑀺𑀓𑁆𑀔𑀸𑀧𑀤𑀁 𑀦𑀼 𑀔𑁄 𑀲𑀺𑀓𑁆𑀔𑀸𑀫𑀺 𑀦 𑀲𑀺𑀓𑁆𑀔𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀑𑀮𑁄𑀓𑁂𑀦𑁆𑀢𑁄 𑀲𑀺𑀓𑁆𑀔𑀢𑀺. 𑀦 𑀓𑁂𑀯𑀮𑀜𑁆𑀘𑀸𑀬𑀫𑁂𑀢𑀲𑁆𑀫𑀺𑀁 𑀲𑀸𑀚𑀻𑀯𑀲𑀗𑁆𑀔𑀸𑀢𑁂 𑀲𑀺𑀓𑁆𑀔𑀸𑀧𑀤𑁂𑀬𑁂𑀯 𑀲𑀺𑀓𑁆𑀔𑀢𑀺, 𑀲𑀺𑀓𑁆𑀔𑀸𑀬𑀧𑀺 𑀲𑀺𑀓𑁆𑀔𑀢𑀺, ‘‘𑀏𑀢𑀁 𑀲𑀸𑀚𑀻𑀯𑀁 𑀦𑀸𑀫𑀸’’𑀢𑀺 𑀇𑀫𑀲𑁆𑀲 𑀧𑀦 𑀅𑀦𑀦𑁆𑀢𑀭𑀲𑁆𑀲 𑀧𑀤𑀲𑁆𑀲 𑀯𑀲𑁂𑀦 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀢𑀁 𑀏𑀯𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀢𑀲𑁆𑀲𑀸 𑀘 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀢𑀺, 𑀢𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀺𑀓𑁆𑀔𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀇𑀤𑀫𑁆𑀧𑀺 𑀅𑀦𑀦𑁆𑀢𑀭𑀲𑁆𑀲 𑀲𑀸𑀚𑀻𑀯𑀧𑀤𑀲𑁆𑀲𑁂𑀯 𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑁄 𑀲𑀺𑀓𑁆𑀔𑀫𑁆𑀧𑀺 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄𑀢𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀧𑀤𑀪𑀸𑀚𑀦𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀁 ¶ 𑀳𑁄𑀢𑀺.

𑀲𑀺𑀓𑁆𑀔𑀸𑀲𑀸𑀚𑀻𑀯𑀧𑀤𑀪𑀸𑀚𑀦𑀻𑀬𑀁 𑀦𑀺𑀝𑁆𑀞𑀺𑀢𑀁.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑀲𑀺𑀓𑁆𑀔𑀁 ¶ 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀲𑀺𑀓𑁆𑀔𑀜𑁆𑀘 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀩𑁆𑀩𑀮𑀪𑀸𑀯𑀜𑁆𑀘 𑀅𑀧𑁆𑀧𑀓𑀸𑀲𑁂𑀢𑁆𑀯𑀸. 𑀬𑀲𑁆𑀫𑀸 𑀘 𑀤𑀼𑀩𑁆𑀩𑀮𑁆𑀬𑁂 𑀆𑀯𑀺𑀓𑀢𑁂𑀧𑀺 𑀲𑀺𑀓𑁆𑀔𑀸 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺, 𑀲𑀺𑀓𑁆𑀔𑀸𑀬 𑀧𑀦 𑀧𑀘𑁆𑀘𑀓𑁆𑀔𑀸𑀢𑀸𑀬 𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀦 𑀓𑁄𑀘𑀺 𑀯𑀺𑀲𑁂𑀲𑀢𑁆𑀣𑁄 𑀮𑀩𑁆𑀪𑀢𑀺. 𑀬𑀣𑀸 𑀧𑀦 ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 𑀤𑀺𑀭𑀢𑁆𑀢𑀯𑀘𑀦𑁂𑀦 𑀦 𑀓𑁄𑀘𑀺 𑀯𑀺𑀲𑁂𑀲𑀢𑁆𑀣𑁄 𑀮𑀩𑁆𑀪𑀢𑀺, 𑀓𑁂𑀯𑀮𑀁 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀫𑀼𑀔𑀸𑀭𑀽𑀴𑁆𑀳𑀢𑀸𑀬 𑀏𑀢𑀁 𑀯𑀼𑀢𑁆𑀢𑀁. 𑀏𑀯𑀫𑀺𑀤𑀫𑁆𑀧𑀺 𑀯𑁄𑀳𑀸𑀭𑀯𑀲𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀫𑀼𑀔𑀸𑀭𑀽𑀴𑁆𑀳𑀢𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀯𑀸 𑀪𑀕𑀯𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀧𑀭𑀺𑀯𑀸𑀭𑀓𑀧𑀤𑀯𑀺𑀭𑀳𑀺𑀢𑀜𑁆𑀳𑀺 𑀏𑀓𑀫𑁂𑀯 𑀅𑀢𑁆𑀣𑀧𑀤𑀁 𑀯𑀼𑀘𑁆𑀘𑀫𑀸𑀦𑀁 𑀧𑀭𑀺𑀯𑀸𑀭𑀯𑀺𑀭𑀳𑀺𑀢𑁄 𑀭𑀸𑀚𑀸 𑀯𑀺𑀬, 𑀯𑀢𑁆𑀣𑀸𑀮𑀗𑁆𑀓𑀸𑀭𑀯𑀺𑀭𑀳𑀺𑀢𑁄 𑀯𑀺𑀬 𑀘 𑀧𑀼𑀭𑀺𑀲𑁄 𑀦 𑀲𑁄𑀪𑀢𑀺; 𑀧𑀭𑀺𑀯𑀸𑀭𑀓𑁂𑀦 𑀧𑀦 𑀅𑀢𑁆𑀣𑀸𑀦𑀼𑀮𑁄𑀫𑁂𑀦 𑀲𑀳𑀸𑀬𑀧𑀤𑁂𑀦 𑀲𑀤𑁆𑀥𑀺𑀁 𑀢𑀁 𑀲𑁄𑀪𑀢𑀻𑀢𑀺.

𑀬𑀲𑁆𑀫𑀸 ¶ 𑀯𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀆𑀳.

𑀢𑀢𑁆𑀣 𑀲𑀺𑀬𑀸 𑀬𑀲𑁆𑀫𑀸 𑀦 𑀲𑀩𑁆𑀩𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁, 𑀢𑀲𑁆𑀫𑀸 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀦𑀺𑀬𑀫𑀦𑀢𑁆𑀣𑀁 ‘‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺, 𑀢𑀜𑁆𑀘 𑀦; 𑀓𑀲𑁆𑀫𑀸? 𑀅𑀢𑁆𑀣𑀸𑀦𑀼𑀓𑁆𑀓𑀫𑀸𑀪𑀸𑀯𑀢𑁄. ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀯𑀼𑀘𑁆𑀘𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸 𑀇𑀤𑀫𑁂𑀯 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺.

𑀅𑀧𑀺𑀘 𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀧𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺.

𑀇𑀤𑀸𑀦𑀺 ¶ 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀸𑀦𑀁 𑀯𑀺𑀲𑁂𑀲𑀸𑀯𑀺𑀲𑁂𑀲𑀁 ¶ 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀮𑀓𑁆𑀔𑀡𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀺 𑀪𑀺𑀓𑁆𑀔𑀯𑁂𑀢𑀺𑀆𑀤𑀻𑀦𑀺 𑀤𑁆𑀯𑁂 𑀫𑀸𑀢𑀺𑀓𑀸𑀧𑀤𑀸𑀦𑀺; 𑀢𑀸𑀦𑀺 𑀯𑀺𑀪𑀚𑀦𑁆𑀢𑁄 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀓𑀣𑀦𑁆𑀢𑀺 𑀓𑁂𑀦 𑀆𑀓𑀸𑀭𑁂𑀦. 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑀸𑀢𑀺 𑀤𑀼𑀩𑁆𑀩𑀮𑁆𑀬𑀲𑁆𑀲 𑀆𑀯𑀺𑀓𑀫𑁆𑀫𑀜𑁆𑀘. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀉𑀓𑁆𑀓𑀡𑁆𑀞𑀺𑀢𑁄𑀢𑀺 𑀅𑀦𑀪𑀺𑀭𑀢𑀺𑀬𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀺𑀘𑁆𑀙𑀚𑀻𑀯𑀺𑀓𑀧𑁆𑀧𑀢𑁆𑀢𑁄. 𑀅𑀣 𑀯𑀸 𑀅𑀚𑁆𑀚 𑀬𑀸𑀫𑀺, 𑀲𑁆𑀯𑁂 𑀬𑀸𑀫𑀺, 𑀇𑀢𑁄 𑀬𑀸𑀫𑀺, 𑀏𑀢𑁆𑀣 𑀬𑀸𑀫𑀻𑀢𑀺 𑀉𑀤𑁆𑀥𑀁 𑀓𑀡𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀫𑀸𑀦𑁄, 𑀯𑀺𑀓𑁆𑀔𑀺𑀢𑁆𑀢𑁄 𑀅𑀦𑁂𑀓𑀕𑁆𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀪𑀺𑀭𑀢𑁄𑀢𑀺 𑀲𑀸𑀲𑀦𑁂 𑀅𑀪𑀺𑀭𑀢𑀺𑀯𑀺𑀭𑀳𑀺𑀢𑁄.

𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄𑀢𑀺 𑀲𑀫𑀡𑀪𑀸𑀯𑀢𑁄 𑀅𑀧𑀕𑀦𑁆𑀢𑀼𑀓𑀸𑀫𑁄. 𑀪𑀺𑀓𑁆𑀔𑀼𑀪𑀸𑀯𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑁂𑀦. 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁬𑁨) 𑀧𑀦 𑀬𑀣𑀸𑀮𑀓𑁆𑀔𑀡𑀁 𑀓𑀭𑀡𑀯𑀘𑀦𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀝𑁆𑀝𑀻𑀬𑀫𑀸𑀦𑁄𑀢𑀺 𑀅𑀝𑁆𑀝𑀁 𑀧𑀻𑀴𑀺𑀢𑀁 𑀤𑀼𑀓𑁆𑀔𑀺𑀢𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀆𑀘𑀭𑀫𑀸𑀦𑁄; 𑀢𑁂𑀦 𑀯𑀸 𑀪𑀺𑀓𑁆𑀔𑀼𑀪𑀸𑀯𑁂𑀦 𑀅𑀝𑁆𑀝𑁄 𑀓𑀭𑀺𑀬𑀫𑀸𑀦𑁄 𑀧𑀻𑀴𑀺𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀳𑀭𑀸𑀬𑀫𑀸𑀦𑁄𑀢𑀺 𑀮𑀚𑁆𑀚𑀫𑀸𑀦𑁄. 𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀅𑀲𑀼𑀘𑀺𑀁 𑀯𑀺𑀬 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄. 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄𑀢𑀺𑀆𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺𑀬𑁂𑀯. 𑀬𑀁𑀦𑀽𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀬𑀁𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀘𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬𑀁, 𑀲𑀸𑀥𑀼 𑀯𑀢 𑀫𑁂 𑀲𑀺𑀬𑀸’’𑀢𑀺. 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 ¶ 𑀇𑀫𑀫𑀢𑁆𑀣𑀁 𑀏𑀢𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀩𑁆𑀬𑀜𑁆𑀚𑀦𑁂𑀳𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀤𑀢𑀺 𑀘𑁂𑀯, 𑀬𑀲𑁆𑀲 𑀘 𑀯𑀤𑀢𑀺, 𑀢𑀁 𑀯𑀺𑀜𑁆𑀜𑀸𑀧𑁂𑀢𑀺 𑀚𑀸𑀦𑀸𑀧𑁂𑀢𑀺. 𑀏𑀯𑀫𑁆𑀧𑀻𑀢𑀺 𑀉𑀧𑀭𑀺𑀫𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀢𑁄 𑀧𑀺𑀓𑀸𑀭𑁄. 𑀏𑀯𑀫𑁆𑀧𑀺 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸, 𑀅𑀜𑁆𑀜𑀣𑀸𑀧𑀺.

𑀇𑀤𑀸𑀦𑀺 𑀢𑀁 𑀅𑀜𑁆𑀜𑀣𑀸𑀧𑀺 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀲𑀺𑀓𑁆𑀔𑀸𑀬 𑀘 𑀅𑀧𑁆𑀧𑀘𑁆𑀘𑀓𑁆𑀔𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀧𑀤𑀢𑁄 𑀧𑀦𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬𑀁, 𑀥𑀫𑁆𑀫𑀁, 𑀲𑀗𑁆𑀖𑀁, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀧𑀤𑀸𑀦𑀺 ¶ 𑀧𑀘𑁆𑀘𑀓𑁆𑀔𑀸𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀸𑀦𑀺.

𑀕𑀺𑀳𑀻 𑀅𑀲𑁆𑀲𑀦𑁆𑀢𑀺𑀆𑀤𑀻𑀦𑀺 ‘‘𑀕𑀺𑀳𑀻, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄, 𑀢𑀺𑀢𑁆𑀣𑀺𑀬𑁄, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄, 𑀅𑀲𑁆𑀲𑀫𑀡𑁄, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’’𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 ‘‘𑀅𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀪𑀸𑀯𑀯𑀺𑀓𑀧𑁆𑀧𑀸𑀓𑀸𑀭𑁂𑀦 𑀯𑀼𑀢𑁆𑀢𑀸𑀦𑀺. 𑀏𑀯𑀁 ‘‘𑀬𑀁𑀦𑀽𑀦𑀸𑀳’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀤𑁆𑀯𑀸𑀯𑀻𑀲𑀢𑀺 𑀧𑀤𑀸𑀦𑀺.

𑁪𑁬. 𑀬𑀣𑀸 ¶ 𑀘 𑀏𑀢𑀸𑀦𑀺, 𑀏𑀯𑀁 ‘‘𑀬𑀤𑀺 𑀧𑀦𑀸𑀳𑀁, 𑀅𑀧𑀸𑀳𑀁, 𑀳𑀦𑁆𑀤𑀸𑀳𑀁, 𑀳𑁄𑀢𑀺 𑀫𑁂’’𑀢𑀺 𑀇𑀫𑁂𑀲𑀼 𑀏𑀓𑀫𑁂𑀓𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀤𑁆𑀯𑀸𑀯𑀻𑀲𑀢𑀻𑀢𑀺 𑀲𑀩𑁆𑀩𑀸𑀦𑁂𑀯 𑀲𑀢𑀜𑁆𑀘 𑀤𑀲 𑀘 𑀧𑀤𑀸𑀦𑀺 𑀳𑁄𑀦𑁆𑀢𑀺.

𑁪𑁭. 𑀢𑀢𑁄 𑀧𑀭𑀁 𑀲𑀭𑀺𑀢𑀩𑁆𑀩𑀯𑀢𑁆𑀣𑀼𑀤𑀲𑁆𑀲𑀦𑀦𑀬𑁂𑀦 𑀧𑀯𑀢𑁆𑀢𑀸𑀦𑀺 ‘‘𑀫𑀸𑀢𑀭𑀁 𑀲𑀭𑀸𑀫𑀻’’𑀢𑀺𑀆𑀤𑀻𑀦𑀺 𑀲𑀢𑁆𑀢𑀭𑀲 𑀧𑀤𑀸𑀦𑀺. 𑀢𑀢𑁆𑀣 𑀔𑁂𑀢𑁆𑀢𑀦𑁆𑀢𑀺 𑀲𑀸𑀮𑀺𑀔𑁂𑀢𑁆𑀢𑀸𑀤𑀺𑀁. 𑀯𑀢𑁆𑀣𑀼𑀦𑁆𑀢𑀺 𑀢𑀺𑀡𑀧𑀡𑁆𑀡𑀲𑀸𑀓𑀨𑀮𑀸𑀨𑀮𑀲𑀫𑀼𑀝𑁆𑀞𑀸𑀦𑀝𑁆𑀞𑀸𑀦𑀁. 𑀲𑀺𑀧𑁆𑀧𑀦𑁆𑀢𑀺 𑀓𑀼𑀫𑁆𑀪𑀓𑀸𑀭𑀧𑁂𑀲𑀓𑀸𑀭𑀲𑀺𑀧𑁆𑀧𑀸𑀤𑀺𑀓𑀁.

𑁪𑁮. 𑀢𑀢𑁄 𑀧𑀭𑀁 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 ‘‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’’𑀢𑀺𑀆𑀤𑀻𑀦𑀺 𑀦𑀯 𑀧𑀤𑀸𑀦𑀺.

𑁪𑁯. 𑀢𑀢𑁄 𑀧𑀭𑀁 𑀲𑀦𑀺𑀲𑁆𑀲𑀬𑀲𑀧𑁆𑀧𑀢𑀺𑀝𑁆𑀞𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 ‘‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀲𑁄𑀴𑀲 𑀧𑀤𑀸𑀦𑀺.

𑁫𑁦. 𑀢𑀢𑁄 𑀧𑀭𑀁 𑀏𑀓𑀪𑀢𑁆𑀢𑀏𑀓𑀲𑁂𑀬𑁆𑀬𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 ‘‘𑀤𑀼𑀓𑁆𑀓𑀭’’𑀦𑁆𑀢𑀺𑀆𑀤𑀻𑀦𑀺 𑀅𑀝𑁆𑀞 𑀧𑀤𑀸𑀦𑀺.

𑀢𑀢𑁆𑀣 ¶ 𑀤𑀼𑀓𑁆𑀓𑀭𑀦𑁆𑀢𑀺 𑀏𑀓𑀪𑀢𑁆𑀢𑀸𑀤𑀻𑀦𑀁 𑀓𑀭𑀡𑁂 𑀤𑀼𑀓𑁆𑀓𑀭𑀢𑀁 𑀤𑀲𑁆𑀲𑁂𑀢𑀺. 𑀦 𑀲𑀼𑀓𑀭𑀦𑁆𑀢𑀺 𑀲𑀼𑀓𑀭𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀯𑀁 𑀤𑀼𑀘𑁆𑀘𑀭𑀁 𑀦 𑀲𑀼𑀘𑀭𑀦𑁆𑀢𑀺 𑀏𑀢𑁆𑀣. 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀢𑀢𑁆𑀣 𑀉𑀲𑁆𑀲𑀸𑀳𑀸𑀪𑀸𑀯𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑀺. 𑀦 𑀯𑀺𑀲𑀳𑀸𑀫𑀻𑀢𑀺 𑀅𑀲𑀬𑁆𑀳𑀢𑀁 𑀤𑀲𑁆𑀲𑁂𑀢𑀺. 𑀦 𑀭𑀫𑀸𑀫𑀻𑀢𑀺 𑀭𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑀸𑀪𑀺𑀭𑀫𑀸𑀫𑀻𑀢𑀺 𑀅𑀪𑀺𑀭𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀇𑀫𑀸𑀦𑀺 𑀘 𑀧𑀜𑁆𑀜𑀸𑀲, 𑀧𑀼𑀭𑀺𑀫𑀸𑀦𑀺 𑀘 𑀤𑀲𑀼𑀢𑁆𑀢𑀭𑀲𑀢𑀦𑁆𑀢𑀺 𑀲𑀝𑁆𑀞𑀺𑀲𑀢𑀁 𑀧𑀤𑀸𑀦𑀺 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀯𑀸𑀭𑁂 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁧. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀸𑀭𑁂𑀧𑀺 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂’’𑀢𑀺 𑀆𑀤𑀺 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀧𑀤𑀢𑁄 𑀧𑀦𑁂𑀢𑁆𑀣𑀸𑀧𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀥𑀫𑁆𑀫𑀁, 𑀲𑀗𑁆𑀖𑀁, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀧𑀤𑀸𑀦𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀘𑀦𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀸𑀦𑀺. 𑀲𑀩𑁆𑀩𑀧𑀤𑁂𑀲𑀼 𑀘 ‘‘𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀬𑀫𑀢𑁆𑀣𑁄 𑁋 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀤𑀢𑀺, 𑀬𑀲𑁆𑀲 𑀘 𑀯𑀤𑀢𑀺 𑀢𑀁 𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦 ‘‘𑀅𑀬𑀁 𑀲𑀸𑀲𑀦𑀁 𑀚𑀳𑀺𑀢𑀼𑀓𑀸𑀫𑁄 𑀲𑀸𑀲𑀦𑀢𑁄 ¶ 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀘𑀚𑀺𑀢𑀼𑀓𑀸𑀫𑁄 𑀇𑀫𑀁 𑀯𑀸𑀓𑁆𑀬𑀪𑁂𑀤𑀁 𑀓𑀭𑁄𑀢𑀻’’𑀢𑀺 𑀯𑀺𑀜𑁆𑀜𑀸𑀧𑁂𑀢𑀺 𑀲𑀸𑀯𑁂𑀢𑀺 𑀚𑀸𑀦𑀸𑀧𑁂𑀢𑀺.

𑀲𑀘𑁂 ¶ 𑀧𑀦𑀸𑀬𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀓𑁆𑀔𑀸𑀫𑀺 𑀩𑀼𑀤𑁆𑀥’’𑀦𑁆𑀢𑀺 𑀯𑀸 𑀯𑀤𑁂𑀬𑁆𑀬. 𑀫𑀺𑀮𑀓𑁆𑀔𑀪𑀸𑀲𑀸𑀲𑀼 𑀯𑀸 𑀅𑀜𑁆𑀜𑀢𑀭𑀪𑀸𑀲𑀸𑀬 𑀢𑀫𑀢𑁆𑀣𑀁 𑀯𑀤𑁂𑀬𑁆𑀬. ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀸 ‘‘𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀸 𑀯𑀤𑁂𑀬𑁆𑀬, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀪𑀗𑁆𑀕𑁂 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀤𑀼𑀢𑀺𑀬𑀁 𑀛𑀸𑀦’’𑀦𑁆𑀢𑀺 𑀯𑀤𑀢𑀺, 𑀲𑀘𑁂 𑀬𑀲𑁆𑀲 𑀯𑀤𑀢𑀺 𑀲𑁄 ‘‘𑀅𑀬𑀁 𑀪𑀺𑀓𑁆𑀔𑀼𑀪𑀸𑀯𑀁 𑀘𑀚𑀺𑀢𑀼𑀓𑀸𑀫𑁄 𑀏𑀢𑀫𑀢𑁆𑀣𑀁 𑀯𑀤𑀢𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, 𑀯𑀺𑀭𑀤𑁆𑀥𑀁 𑀦𑀸𑀫 𑀦𑀢𑁆𑀣𑀺; 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀁, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀓𑁆𑀓𑀢𑁆𑀢𑀸 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸 𑀯𑀸 𑀘𑀼𑀢𑀲𑀢𑁆𑀢𑁄 𑀯𑀺𑀬 𑀘𑀼𑀢𑁄𑀯 𑀳𑁄𑀢𑀺 𑀲𑀸𑀲𑀦𑀸.

𑀲𑀘𑁂 𑀧𑀦 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀺’’𑀦𑁆𑀢𑀺 𑀯𑀸, ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸, ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀸𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑁂𑀳𑀺 𑀯𑀤𑀢𑀺, 𑀤𑀽𑀢𑀁 𑀯𑀸 𑀧𑀳𑀺𑀡𑀸𑀢𑀺, 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑀺, 𑀅𑀓𑁆𑀔𑀭𑀁 𑀯𑀸 𑀙𑀺𑀦𑁆𑀤𑀢𑀺, 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀁 𑀧𑀦 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀲𑀻𑀲𑀁 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁 𑀯𑀘𑀻𑀪𑁂𑀤𑀁 ¶ 𑀓𑀭𑁄𑀦𑁆𑀢𑀲𑁆𑀲𑁂𑀯 𑀲𑀻𑀲𑀁 𑀏𑀢𑀺. 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁄𑀧𑀺 𑀘 𑀬𑀤𑀺 ‘‘𑀅𑀬𑀫𑁂𑀯 𑀚𑀸𑀦𑀸𑀢𑀽’’𑀢𑀺 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀢𑀜𑁆𑀘 𑀲𑁄𑀬𑁂𑀯 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀲𑁄 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑁄 𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀤𑁆𑀯𑀺𑀦𑁆𑀦𑀁 𑀞𑀺𑀢𑀝𑁆𑀞𑀸𑀦𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀬𑀫𑁂𑀢𑁆𑀯𑀸 ‘‘𑀏𑀢𑁂𑀲𑀁 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺, 𑀢𑁂𑀲𑀼 𑀏𑀓𑀲𑁆𑀫𑀺𑀁 𑀚𑀸𑀦𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀚𑀸𑀦𑀦𑁆𑀢𑁂𑀲𑀼𑀧𑀺 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀲𑀫𑁆𑀩𑀳𑀼𑀮𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀘𑁂 𑀧𑀦 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀲𑀪𑀸𑀕𑁂 𑀪𑀺𑀓𑁆𑀔𑀽 𑀧𑀭𑀺𑀲𑀗𑁆𑀓𑀫𑀸𑀦𑁄 ‘‘𑀬𑁄 𑀓𑁄𑀘𑀺 𑀚𑀸𑀦𑀸𑀢𑀽’’𑀢𑀺 𑀉𑀘𑁆𑀘𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀤𑀢𑀺, 𑀢𑀜𑁆𑀘 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀦𑀯𑀓𑀫𑁆𑀫𑀺𑀓𑁄 𑀯𑀸 𑀅𑀜𑁆𑀜𑁄 𑀯𑀸 𑀲𑀫𑀬𑀜𑁆𑀜𑀽 𑀧𑀼𑀭𑀺𑀲𑁄 𑀲𑀼𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑁄 𑀅𑀬𑀁 𑀲𑀫𑀡𑁄 𑀕𑀺𑀳𑀺𑀪𑀸𑀯𑀁 ¶ 𑀧𑀢𑁆𑀣𑁂𑀢𑀺, 𑀲𑀸𑀲𑀦𑀢𑁄 𑀘𑀼𑀢𑁄’’𑀢𑀺 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀢𑀗𑁆𑀔𑀡𑀜𑁆𑀜𑁂𑀯 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑀼𑀚𑁆𑀚𑀸𑀦𑀁, 𑀲𑀘𑁂 𑀆𑀯𑀚𑁆𑀚𑀦𑀲𑀫𑀬𑁂 𑀚𑀸𑀦𑀸𑀢𑀺; 𑀬𑀣𑀸 𑀧𑀓𑀢𑀺𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀓𑀗𑁆𑀔𑀦𑁆𑀢𑁄 𑀘𑀺𑀭𑁂𑀦 𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘 𑀉𑀧𑀭𑀺 𑀅𑀪𑀽𑀢𑀸𑀭𑁄𑀘𑀦𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸-𑀅𑀢𑁆𑀢𑀓𑀸𑀫𑀤𑀼𑀝𑁆𑀞𑀤𑁄𑀲𑀪𑀽𑀢𑀸-𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀸𑀦𑀺 𑀘 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺. 𑀆𑀯𑀚𑁆𑀚𑀦𑀲𑀫𑀬𑁂 𑀜𑀸𑀢𑁂 𑀏𑀯 𑀲𑀻𑀲𑀁 𑀏𑀦𑁆𑀢𑀺, ‘‘𑀓𑀺𑀁 𑀅𑀬𑀁 𑀪𑀡𑀢𑀻’’𑀢𑀺 𑀓𑀗𑁆𑀔𑀢𑀸 ¶ 𑀘𑀺𑀭𑁂𑀦 𑀜𑀸𑀢𑁂 𑀲𑀻𑀲𑀁 𑀦 𑀏𑀦𑁆𑀢𑀺. 𑀬𑀣𑀸 𑀘𑀸𑀬𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀧𑀤𑁂 𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑁄; 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀘 𑀬𑀤𑀸 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀢𑀤𑀸 ‘‘𑀬𑀁𑀦𑀽𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺𑀆𑀤𑀻𑀦𑀺 𑀅𑀯𑀤𑀢𑀸𑀧𑀺 𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑀫𑁂𑀯 𑀳𑁄𑀢𑀺; 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀧𑀤𑀸𑀦𑀁 𑀅𑀯𑀲𑀸𑀦𑁂 𑀯𑀼𑀢𑁆𑀢𑀁 𑁋 ‘‘𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸’’𑀢𑀺.

𑀢𑀢𑁄 𑀧𑀭𑀁 𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀏𑀢𑁆𑀣 𑀲𑀘𑁂𑀧𑀺 ‘‘𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀕𑀺𑀳𑀻 𑀳𑁄𑀫𑀻’’𑀢𑀺 𑀯𑀸 ‘‘𑀕𑀺𑀳𑀻 𑀚𑀸𑀢𑁄𑀫𑁆𑀳𑀻’’𑀢𑀺 𑀯𑀸 ‘‘𑀕𑀺𑀳𑀺𑀫𑁆𑀳𑀻’’𑀢𑀺 𑀯𑀸 𑀯𑀤𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀘𑁂 𑀧𑀦 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀯𑀸 ‘‘𑀚𑀸𑀦𑀸𑀳𑀻’’𑀢𑀺 𑀯𑀸 ‘‘𑀲𑀜𑁆𑀚𑀸𑀦𑀸𑀳𑀻’’𑀢𑀺 𑀯𑀸 ‘‘𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀸 𑀯𑀤𑀢𑀺, 𑀅𑀭𑀺𑀬𑀓𑁂𑀦 𑀯𑀸 𑀯𑀤𑀢𑀺 𑀫𑀺𑀮𑀓𑁆𑀔𑀓𑁂𑀦 𑀯𑀸; 𑀏𑀯𑀫𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀼𑀢𑁆𑀢𑁂 ¶ 𑀬𑀲𑁆𑀲 𑀯𑀤𑀢𑀺, 𑀲𑀘𑁂 𑀲𑁄 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 ‘‘𑀉𑀧𑀸𑀲𑀓𑁄’’𑀢𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀧𑀤𑁂𑀲𑀼. 𑀏𑀯𑀁 𑀇𑀫𑀸𑀦𑀺 𑀘 𑀅𑀝𑁆𑀞, 𑀧𑀼𑀭𑀺𑀫𑀸𑀦𑀺 𑀘 𑀘𑀼𑀤𑁆𑀤𑀲𑀸𑀢𑀺 𑀤𑁆𑀯𑀸𑀯𑀻𑀲𑀢𑀺 𑀧𑀤𑀸𑀦𑀺 𑀳𑁄𑀦𑁆𑀢𑀺.

𑁫𑁨. 𑀇𑀢𑁄 𑀧𑀭𑀁 𑀧𑀼𑀭𑀺𑀫𑀸𑀦𑁂𑀯 𑀘𑀼𑀤𑁆𑀤𑀲 𑀧𑀤𑀸𑀦𑀺 ‘‘𑀅𑀮𑀁 𑀫𑁂, 𑀓𑀺𑀦𑁆𑀦𑀼 𑀫𑁂, 𑀦 𑀫𑀫𑀢𑁆𑀣𑁄, 𑀲𑀼𑀫𑀼𑀢𑁆𑀢𑀸𑀳’’𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀙𑀧𑁆𑀧𑀜𑁆𑀜𑀸𑀲 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀮𑀦𑁆𑀢𑀺 𑀳𑁄𑀢𑀼, 𑀧𑀭𑀺𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁𑀦𑀼 𑀫𑁂𑀢𑀺 𑀓𑀺𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀓𑀺𑀁 𑀓𑀭𑀡𑀻𑀬𑀁, 𑀓𑀺𑀁 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑀫𑀢𑁆𑀣𑁄𑀢𑀺 𑀦𑀢𑁆𑀣𑀺 𑀫𑀫 𑀅𑀢𑁆𑀣𑁄. 𑀲𑀼𑀫𑀼𑀢𑁆𑀢𑀸𑀳𑀦𑁆𑀢𑀺 𑀲𑀼𑀫𑀼𑀢𑁆𑀢𑁄 𑀅𑀳𑀁. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀁 𑀇𑀫𑀸𑀦𑀺 𑀘 𑀙𑀧𑁆𑀧𑀜𑁆𑀜𑀸𑀲 𑀧𑀼𑀭𑀺𑀫𑀸𑀦𑀺 𑀘 𑀤𑁆𑀯𑀸𑀯𑀻𑀲𑀢𑀻𑀢𑀺 𑀅𑀝𑁆𑀞𑀲𑀢𑁆𑀢𑀢𑀺 𑀧𑀤𑀸𑀦𑀺 𑀲𑀭𑀽𑀧𑁂𑀦𑁂𑀯 ¶ 𑀯𑀼𑀢𑁆𑀢𑀸𑀦𑀺.

𑁫𑁩. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀯𑁂𑀯𑀘𑀦𑁂𑀳𑀺𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀻𑀢𑀺 𑀧𑀸𑀴𑀺𑀬𑀁 ‘‘𑀩𑀼𑀤𑁆𑀥’’𑀦𑁆𑀢𑀺𑀆𑀤𑀻𑀦𑀺 𑀆𑀕𑀢𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀬𑀸𑀦𑀺 𑀅𑀜𑁆𑀜𑀸𑀦𑀺 𑀅𑀢𑁆𑀣𑀺. 𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀺 𑀯𑀸𑀢𑀺 𑀩𑀼𑀤𑁆𑀥𑀲𑁆𑀲 𑀯𑀸 𑀧𑀭𑀺𑀬𑀸𑀬𑀦𑀸𑀫𑀸𑀦𑀺…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀲𑁆𑀲 𑀯𑀸. 𑀢𑀢𑁆𑀣 𑀯𑀡𑁆𑀡𑀧𑀝𑁆𑀞𑀸𑀦𑁂 𑀆𑀕𑀢𑀁 𑀦𑀸𑀫𑀲𑀳𑀲𑁆𑀲𑀁 𑀉𑀧𑀸𑀮𑀺𑀕𑀸𑀣𑀸𑀲𑀼 (𑀫. 𑀦𑀺. 𑁨.𑁭𑁬) 𑀦𑀸𑀫𑀲𑀢𑀁 𑀅𑀜𑁆𑀜𑀸𑀦𑀺 𑀘 𑀕𑀼𑀡𑀢𑁄 𑀮𑀩𑁆𑀪𑀫𑀸𑀦𑀸𑀦𑀺 𑀦𑀸𑀫𑀸𑀦𑀺 ‘‘𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀸𑀦𑀺𑀧𑀺 𑀥𑀫𑁆𑀫𑀲𑁆𑀲 𑀦𑀸𑀫𑀸𑀦𑀺 𑀥𑀫𑁆𑀫𑀯𑁂𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀬𑀣𑀸𑀭𑀼𑀢𑀫𑁂𑀯. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 ¶ 𑀧𑀘𑁆𑀘𑀓𑁆𑀔𑀸𑀫𑀺, 𑀅𑀦𑀦𑁆𑀢𑀩𑀼𑀤𑁆𑀥𑀺𑀁, 𑀅𑀦𑁄𑀫𑀩𑀼𑀤𑁆𑀥𑀺𑀁, 𑀩𑁄𑀥𑀺𑀧𑀜𑁆𑀜𑀸𑀡𑀁, 𑀥𑀻𑀭𑀁, 𑀯𑀺𑀕𑀢𑀫𑁄𑀳𑀁, 𑀧𑀪𑀺𑀦𑁆𑀦𑀔𑀻𑀮𑀁, 𑀯𑀺𑀚𑀺𑀢𑀯𑀺𑀚𑀬𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀩𑀼𑀤𑁆𑀥𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁.

𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁, 𑀬𑀣𑀸𑀭𑀼𑀢𑀫𑁂𑀯. ‘‘𑀲𑁆𑀯𑀸𑀓𑁆𑀔𑀸𑀢𑀁 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀦𑁆𑀤𑀺𑀝𑁆𑀞𑀺𑀓𑀁, 𑀅𑀓𑀸𑀮𑀺𑀓𑀁, 𑀏𑀳𑀺𑀧𑀲𑁆𑀲𑀺𑀓𑀁, 𑀑𑀧𑀦𑁂𑀬𑁆𑀬𑀺𑀓𑀁, 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀺 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺. 𑀅𑀲𑀗𑁆𑀔𑀢𑀁 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺; 𑀯𑀺𑀭𑀸𑀕𑀁, 𑀦𑀺𑀭𑁄𑀥𑀁, 𑀅𑀫𑀢𑀁 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀤𑀻𑀖𑀦𑀺𑀓𑀸𑀬𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀩𑁆𑀭𑀳𑁆𑀫𑀚𑀸𑀮𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑀁, 𑀫𑀽𑀮𑀧𑀭𑀺𑀬𑀸𑀬𑀁, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁, 𑀑𑀖𑀢𑀭𑀡𑀁, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀁, 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀁, 𑀔𑀼𑀤𑁆𑀤𑀓𑀦𑀺𑀓𑀸𑀬𑀁, 𑀚𑀸𑀢𑀓𑀁, 𑀅𑀪𑀺𑀥𑀫𑁆𑀫𑀁, 𑀓𑀼𑀲𑀮𑀁 𑀥𑀫𑁆𑀫𑀁, 𑀅𑀓𑀼𑀲𑀮𑀁 𑀥𑀫𑁆𑀫𑀁, 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁, 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀇𑀤𑁆𑀥𑀺𑀧𑀸𑀤𑀁, 𑀇𑀦𑁆𑀤𑁆𑀭𑀺𑀬𑀁, 𑀩𑀮𑀁, 𑀩𑁄𑀚𑁆𑀛𑀗𑁆𑀕𑀁, 𑀫𑀕𑁆𑀕𑀁, 𑀨𑀮𑀁, 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀏𑀓𑀥𑀫𑁆𑀫𑀓𑁆𑀔𑀦𑁆𑀥𑀲𑁆𑀲𑀧𑀺 ¶ 𑀦𑀸𑀫𑀁 𑀥𑀫𑁆𑀫𑀯𑁂𑀯𑀘𑀦𑀫𑁂𑀯. 𑀏𑀯𑀁 𑀥𑀫𑁆𑀫𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀁 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀁, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑀁, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀁 𑀲𑀗𑁆𑀖𑀁, 𑀘𑀢𑀼𑀧𑀼𑀭𑀺𑀲𑀬𑀼𑀕𑀁 𑀲𑀗𑁆𑀖𑀁, 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀲𑀗𑁆𑀖𑀁, 𑀆𑀳𑀼𑀦𑁂𑀬𑁆𑀬𑀁 𑀲𑀗𑁆𑀖𑀁, 𑀧𑀸𑀳𑀼𑀦𑁂𑀬𑁆𑀬𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁, 𑀅𑀜𑁆𑀚𑀮𑀺𑀓𑀭𑀡𑀻𑀬𑀁, 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀗𑁆𑀖𑀯𑁂𑀯𑀘𑀦𑁂𑀦 ¶ 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀪𑀺𑀓𑁆𑀔𑀼𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀁, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀺𑀓𑁆𑀔𑀸𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀯𑀺𑀦𑀬𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀪𑀺𑀓𑁆𑀔𑀼𑀯𑀺𑀦𑀬𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀪𑀺𑀓𑁆𑀔𑀼𑀦𑀻𑀯𑀺𑀦𑀬𑀁, 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁, 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀁 𑀧𑀸𑀭𑀸𑀚𑀺𑀓𑀁, 𑀲𑀗𑁆𑀖𑀸𑀤𑀺𑀲𑁂𑀲𑀁, 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀤𑀼𑀓𑁆𑀓𑀝𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀯𑀺𑀦𑀬𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀧𑀸𑀢𑀺𑀫𑁄𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀁 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀉𑀤𑁆𑀤𑁂𑀲𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁, 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 ¶ , 𑀧𑀞𑀫𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁, 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀼𑀤𑁆𑀤𑁂𑀲𑀁, 𑀅𑀦𑀦𑁆𑀢𑀩𑀼𑀤𑁆𑀥𑀺𑀉𑀤𑁆𑀤𑁂𑀲𑀁, 𑀅𑀦𑁄𑀫𑀩𑀼𑀤𑁆𑀥𑀺𑀉𑀤𑁆𑀤𑁂𑀲𑀁, 𑀩𑁄𑀥𑀺𑀧𑀜𑁆𑀜𑀸𑀡𑀼𑀤𑁆𑀤𑁂𑀲𑀁, 𑀥𑀻𑀭𑀼𑀤𑁆𑀤𑁂𑀲𑀁, 𑀯𑀺𑀕𑀢𑀫𑁄𑀳𑀼𑀤𑁆𑀤𑁂𑀲𑀁, 𑀧𑀪𑀺𑀦𑁆𑀦𑀔𑀻𑀮𑀼𑀤𑁆𑀤𑁂𑀲𑀁, 𑀯𑀺𑀚𑀺𑀢𑀯𑀺𑀚𑀬𑀼𑀤𑁆𑀤𑁂𑀲𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀉𑀤𑁆𑀤𑁂𑀲𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀉𑀧𑀚𑁆𑀛𑀸𑀬𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀬𑁄 𑀫𑀁 𑀧𑀩𑁆𑀩𑀸𑀚𑁂𑀲𑀺, 𑀬𑁄 𑀫𑀁 𑀉𑀧𑀲𑀫𑁆𑀧𑀸𑀤𑁂𑀲𑀺, 𑀬𑀲𑁆𑀲 𑀫𑀽𑀮𑁂𑀦𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀬𑀲𑁆𑀲 𑀫𑀽𑀮𑁂𑀦𑀸𑀳𑀁 𑀉𑀧𑀲𑀫𑁆𑀧𑀦𑁆𑀦𑁄, 𑀬𑀲𑁆𑀲𑀫𑀽𑀮𑀺𑀓𑀸 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸, 𑀬𑀲𑁆𑀲𑀫𑀽𑀮𑀺𑀓𑀸 𑀫𑀬𑁆𑀳𑀁 𑀉𑀧𑀲𑀫𑁆𑀧𑀤𑀸 𑀢𑀸𑀳𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀬𑁄 𑀫𑀁 𑀧𑀩𑁆𑀩𑀸𑀚𑁂𑀲𑀺, 𑀬𑁄 𑀫𑀁 𑀅𑀦𑀼𑀲𑁆𑀲𑀸𑀯𑁂𑀲𑀺, 𑀬𑀸𑀳𑀁 𑀦𑀺𑀲𑁆𑀲𑀸𑀬 𑀯𑀲𑀸𑀫𑀺, 𑀬𑀸𑀳𑀁 𑀉𑀤𑁆𑀤𑀺𑀲𑀸𑀧𑁂𑀫𑀺, 𑀬𑀸𑀳𑀁 ¶ 𑀧𑀭𑀺𑀧𑀼𑀘𑁆𑀙𑀸𑀫𑀺, 𑀬𑁄 𑀫𑀁 𑀉𑀤𑁆𑀤𑀺𑀲𑀢𑀺, 𑀬𑁄 𑀫𑀁 𑀧𑀭𑀺𑀧𑀼𑀘𑁆𑀙𑀸𑀧𑁂𑀢𑀺 𑀢𑀸𑀳𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀆𑀘𑀭𑀺𑀬𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀬𑀸𑀳𑀁 𑀧𑀩𑁆𑀩𑀸𑀚𑁂𑀲𑀺𑀁, 𑀬𑀸𑀳𑀁 𑀉𑀧𑀲𑀫𑁆𑀧𑀸𑀤𑁂𑀲𑀺𑀁, 𑀫𑀬𑁆𑀳𑀁 𑀫𑀽𑀮𑁂𑀦 𑀬𑁄 𑀧𑀩𑁆𑀩𑀚𑀺𑀢𑁄, 𑀫𑀬𑁆𑀳𑀁 𑀫𑀽𑀮𑁂𑀦 𑀬𑁄 𑀉𑀧𑀲𑀫𑁆𑀧𑀦𑁆𑀦𑁄, 𑀫𑀬𑁆𑀳𑀁𑀫𑀽𑀮𑀺𑀓𑀸 𑀬𑀲𑁆𑀲 𑀧𑀩𑁆𑀩𑀚𑁆𑀚𑀸, 𑀫𑀬𑁆𑀳𑀁 𑀫𑀽𑀮𑀺𑀓𑀸 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀢𑀸𑀳𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑁂𑀯𑀘𑀦𑁂𑀦 ¶ 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀬𑀸𑀳𑀁 𑀧𑀩𑁆𑀩𑀸𑀚𑁂𑀲𑀺𑀁, 𑀬𑀸𑀳𑀁 𑀅𑀦𑀼𑀲𑁆𑀲𑀸𑀯𑁂𑀲𑀺𑀁, 𑀬𑁄 𑀫𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀬𑁄 𑀫𑀁 𑀉𑀤𑁆𑀤𑀺𑀲𑀸𑀧𑁂𑀢𑀺, 𑀬𑁄 𑀫𑀁 𑀧𑀭𑀺𑀧𑀼𑀘𑁆𑀙𑀢𑀺, 𑀬𑀲𑁆𑀲𑀸𑀳𑀁 𑀉𑀤𑁆𑀤𑀺𑀲𑀸𑀫𑀺, 𑀬𑀸𑀳𑀁 𑀧𑀭𑀺𑀧𑀼𑀘𑁆𑀙𑀸𑀧𑁂𑀫𑀺 𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑁄 𑀬𑀁 𑀧𑀩𑁆𑀩𑀸𑀚𑁂𑀲𑀺, 𑀬𑀁 𑀉𑀧𑀲𑀫𑁆𑀧𑀸𑀤𑁂𑀲𑀺, 𑀬𑁄 𑀢𑀲𑁆𑀲 𑀫𑀽𑀮𑁂𑀦 𑀧𑀩𑁆𑀩𑀚𑀺𑀢𑁄, 𑀬𑁄 𑀢𑀲𑁆𑀲 𑀫𑀽𑀮𑁂𑀦 𑀉𑀧𑀲𑀫𑁆𑀧𑀦𑁆𑀦𑁄, 𑀬𑀲𑁆𑀲 𑀢𑀫𑁆𑀫𑀽𑀮𑀺𑀓𑀸 𑀧𑀩𑁆𑀩𑀚𑁆𑀚𑀸, 𑀬𑀲𑁆𑀲 𑀢𑀫𑁆𑀫𑀽𑀮𑀺𑀓𑀸 𑀉𑀧𑀲𑀫𑁆𑀧𑀤𑀸 𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀫𑀸𑀦𑀸𑀘𑀭𑀺𑀬𑀓𑀁 ¶ 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀫𑀬𑁆𑀳𑀁 𑀆𑀘𑀭𑀺𑀬𑁄 𑀬𑀁 𑀧𑀩𑁆𑀩𑀸𑀚𑁂𑀲𑀺, 𑀬𑀁 𑀅𑀦𑀼𑀲𑁆𑀲𑀸𑀯𑁂𑀲𑀺, 𑀬𑁄 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀬𑁄 𑀢𑀁 𑀉𑀤𑁆𑀤𑀺𑀲𑀸𑀧𑁂𑀢𑀺 𑀧𑀭𑀺𑀧𑀼𑀘𑁆𑀙𑀢𑀺, 𑀬𑀲𑁆𑀲 𑀫𑁂 𑀆𑀘𑀭𑀺𑀬𑁄 𑀉𑀤𑁆𑀤𑀺𑀲𑀢𑀺, 𑀬𑀁 𑀧𑀭𑀺𑀧𑀼𑀘𑁆𑀙𑀸𑀧𑁂𑀢𑀺 𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀫𑀸𑀦𑀸𑀘𑀭𑀺𑀬𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀬𑁂𑀦𑀸𑀳𑀁 𑀲𑀤𑁆𑀥𑀺𑀁 𑀅𑀥𑀺𑀲𑀻𑀮𑀁 𑀲𑀺𑀓𑁆𑀔𑀸𑀫𑀺, 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀁 𑀲𑀺𑀓𑁆𑀔𑀸𑀫𑀺 𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀆𑀕𑀸𑀭𑀺𑀓𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀓𑀲𑁆𑀲𑀓𑁄, 𑀯𑀸𑀡𑀺𑀚𑁄, 𑀕𑁄𑀭𑀓𑁆𑀔𑁄, 𑀑𑀓𑀮𑁆𑀮𑀓𑁄, 𑀫𑁄𑀴𑀺𑀩𑀤𑁆𑀥𑁄, 𑀓𑀸𑀫𑀕𑀼𑀡𑀺𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀕𑀺𑀳𑀺𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀉𑀧𑀸𑀲𑀓𑁄𑀢𑀺 ¶ 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀤𑁆𑀯𑁂𑀯𑀸𑀘𑀺𑀓𑁄 𑀉𑀧𑀸𑀲𑀓𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀢𑁂𑀯𑀸𑀘𑀺𑀓𑁄 𑀉𑀧𑀸𑀲𑀓𑁄, 𑀩𑀼𑀤𑁆𑀥𑀁 𑀲𑀭𑀡𑀕𑀫𑀦𑀺𑀓𑁄, 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀭𑀡𑀕𑀫𑀦𑀺𑀓𑁄, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀺𑀓𑁄 𑀤𑀲𑀲𑀺𑀓𑁆𑀔𑀸𑀧𑀤𑀺𑀓𑁄 𑀉𑀧𑀸𑀲𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀉𑀧𑀸𑀲𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀆𑀭𑀸𑀫𑀺𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀓𑀧𑁆𑀧𑀺𑀬𑀓𑀸𑀭𑀓𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄, 𑀅𑀧𑁆𑀧𑀳𑀭𑀺𑀢𑀓𑀸𑀭𑀓𑁄, 𑀬𑀸𑀕𑀼𑀪𑀸𑀚𑀓𑁄, 𑀨𑀮𑀪𑀸𑀚𑀓𑁄, 𑀔𑀚𑁆𑀚𑀓𑀪𑀸𑀚𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀆𑀭𑀸𑀫𑀺𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀲𑀸𑀫𑀡𑁂𑀭𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀓𑀼𑀫𑀸𑀭𑀓𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀘𑁂𑀮𑁆𑀮𑀓𑁄, 𑀘𑁂𑀝𑀓𑁄, 𑀫𑁄𑀴𑀺𑀕𑀮𑁆𑀮𑁄, 𑀲𑀫𑀡𑀼𑀤𑁆𑀤𑁂𑀲𑁄’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀲𑀸𑀫𑀡𑁂𑀭𑀯𑁂𑀘𑀦𑁂𑀦 ¶ 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀢𑀺𑀢𑁆𑀣𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀦𑀺𑀕𑀡𑁆𑀞𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀆𑀚𑀻𑀯𑀓𑁄, 𑀢𑀸𑀧𑀲𑁄, 𑀧𑀭𑀺𑀩𑁆𑀩𑀸𑀚𑀓𑁄, 𑀧𑀡𑁆𑀟𑀭𑀗𑁆𑀕𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀢𑀺𑀢𑁆𑀣𑀺𑀬𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀢𑀺𑀢𑁆𑀣𑀺𑀬𑀲𑀸𑀯𑀓𑁄𑀢𑀺 ¶ 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀦𑀺𑀕𑀡𑁆𑀞𑀲𑀸𑀯𑀓𑁄𑀢𑀺 𑀫𑀁 𑀥𑀸𑀭𑁂𑀳𑀺’’ 𑀆𑀚𑀻𑀯𑀓 𑀢𑀸𑀧𑀲 𑀧𑀭𑀺𑀩𑁆𑀩𑀸𑀚𑀓 𑀧𑀡𑁆𑀟𑀭𑀗𑁆𑀕𑀲𑀸𑀯𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀏𑀯𑀁 𑀢𑀺𑀢𑁆𑀣𑀺𑀬𑀲𑀸𑀯𑀓𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀅𑀲𑁆𑀲𑀫𑀡𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀤𑀼𑀲𑁆𑀲𑀻𑀮𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀧𑀸𑀧𑀥𑀫𑁆𑀫𑁄, 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄, 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀅𑀦𑁆𑀢𑁄𑀧𑀽𑀢𑀺, 𑀅𑀯𑀲𑁆𑀲𑀼𑀢𑁄, 𑀓𑀲𑀫𑁆𑀩𑀼𑀚𑀸𑀢𑁄, 𑀓𑁄𑀡𑁆𑀞𑁄’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀅𑀲𑁆𑀲𑀫𑀡𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀦 𑀯𑁂𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁. ‘‘𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀼𑀢𑁆𑀢𑁄𑀢𑀺 𑀫𑀁 𑀥𑀸𑀭𑁂𑀳𑀺, 𑀦 𑀅𑀦𑀦𑁆𑀢𑀩𑀼𑀤𑁆𑀥𑀺𑀧𑀼𑀢𑁆𑀢𑁄, 𑀦 𑀅𑀦𑁄𑀫𑀩𑀼𑀤𑁆𑀥𑀺𑀧𑀼𑀢𑁆𑀢𑁄, 𑀦 𑀩𑁄𑀥𑀺𑀧𑀜𑁆𑀜𑀸𑀡𑀧𑀼𑀢𑁆𑀢𑁄, 𑀦 𑀥𑀻𑀭𑀧𑀼𑀢𑁆𑀢𑁄, 𑀦 𑀯𑀺𑀕𑀢𑀫𑁄𑀳𑀧𑀼𑀢𑁆𑀢𑁄, 𑀦 𑀧𑀪𑀺𑀦𑁆𑀦𑀔𑀻𑀮𑀧𑀼𑀢𑁆𑀢𑁄 ¶ , 𑀦 𑀯𑀺𑀚𑀺𑀢𑀯𑀺𑀚𑀬𑀧𑀼𑀢𑁆𑀢𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀯𑁂𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺.

𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀻𑀢𑀺 𑀢𑁂𑀳𑀺 ‘‘𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀺 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀦𑀁 𑀯𑁂𑀯𑀘𑀦𑁂𑀳𑀺. 𑀯𑁂𑀯𑀘𑀦𑀸𑀦𑀺 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀓𑀸𑀭𑀡𑀢𑁆𑀢𑀸 𑀆𑀓𑀸𑀭𑀸𑀦𑀺, 𑀩𑀼𑀤𑁆𑀥𑀸𑀤𑀻𑀦𑀁 𑀲𑀡𑁆𑀞𑀸𑀦𑀤𑀻𑀧𑀦𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑀡𑁆𑀞𑀸𑀦𑀢𑁆𑀢𑀸 𑀏𑀯 𑀯𑀸 𑀮𑀺𑀗𑁆𑀕𑀸𑀦𑀺, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁄 𑀫𑀦𑀼𑀲𑁆𑀲𑀸𑀦𑀁 𑀢𑀺𑀮𑀓𑀸𑀤𑀻𑀦𑀺 𑀯𑀺𑀬 𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀔𑁄 𑀪𑀺𑀓𑁆𑀔𑀯𑁂𑀢𑀺 𑀇𑀢𑁄 𑀧𑀭𑀁 𑀅𑀜𑁆𑀜𑀲𑁆𑀲 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄 𑀦𑀺𑀬𑀫𑁂𑀦𑁆𑀢𑁄 𑀆𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄, 𑀏𑀯𑀫𑁂𑀯 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘, 𑀦 𑀇𑀢𑁄 𑀧𑀭𑀁 𑀓𑀸𑀭𑀡𑀫𑀢𑁆𑀣𑀻𑀢𑀺.

𑁫𑁪. 𑀏𑀯𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑁆𑀧𑀘𑁆𑀘𑀓𑁆𑀔𑀸𑀦𑁂 𑀅𑀲𑀫𑁆𑀫𑁄𑀳𑀢𑁆𑀣𑀁 𑀢𑀲𑁆𑀲𑁂𑀯 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀮𑀓𑁆𑀔𑀡𑀲𑁆𑀲 𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀳𑀺 𑀆𑀓𑀸𑀭𑁂𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀉𑀫𑁆𑀫𑀢𑁆𑀢𑀓𑁄𑀢𑀺 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀸 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀯𑀸 𑀬𑁄 𑀓𑁄𑀘𑀺 𑀯𑀺𑀧𑀭𑀻𑀢𑀲𑀜𑁆𑀜𑁄, 𑀲𑁄 𑀲𑀘𑁂 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 ¶ 𑀳𑁄𑀢𑀺 𑀲𑀺𑀓𑁆𑀔𑀸. 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀢𑀺 𑀢𑀸𑀤𑀺𑀲𑀲𑁆𑀲𑁂𑀯 𑀉𑀫𑁆𑀫𑀢𑁆𑀢𑀓𑀲𑁆𑀲; 𑀢𑀸𑀤𑀺𑀲𑀲𑁆𑀲 𑀳𑀺 𑀲𑀦𑁆𑀢𑀺𑀓𑁂 𑀲𑀘𑁂 𑀧𑀓𑀢𑀢𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀉𑀫𑁆𑀫𑀢𑁆𑀢𑀓𑁄 𑀦 𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀼𑀘𑁆𑀘𑀢𑀺. 𑀧𑀼𑀭𑀺𑀫𑀧𑀤𑁂 𑀧𑀦 𑀉𑀫𑁆𑀫𑀢𑁆𑀢𑀓𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁 ‘‘𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀸 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀯𑀸’’𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑁄 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺 ¶ . 𑀏𑀯𑀁 𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀢𑀫𑁆𑀳𑀺 𑀅𑀚𑀸𑀦𑀦𑁆𑀢𑁂 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺.

𑀯𑁂𑀤𑀦𑀸𑀝𑁆𑀝𑁄𑀢𑀺 𑀩𑀮𑀯𑀢𑀺𑀬𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀫𑀼𑀘𑁆𑀙𑀸𑀧𑀭𑁂𑀢𑁄; 𑀢𑁂𑀦 𑀯𑀺𑀮𑀧𑀦𑁆𑀢𑁂𑀦 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀢𑀫𑁆𑀳𑀺 𑀅𑀚𑀸𑀦𑀦𑁆𑀢𑁂 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺.

𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂𑀢𑀺 𑀪𑀼𑀫𑁆𑀫𑀤𑁂𑀯𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀓𑀦𑀺𑀝𑁆𑀞𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀢𑀺 𑀦𑀸𑀕𑀫𑀸𑀡𑀯𑀓𑀲𑁆𑀲 𑀯𑀸 𑀲𑀼𑀧𑀡𑁆𑀡𑀫𑀸𑀡𑀯𑀓𑀲𑁆𑀲 𑀯𑀸 𑀓𑀺𑀦𑁆𑀦𑀭-𑀳𑀢𑁆𑀣𑀺-𑀫𑀓𑁆𑀓𑀝𑀸𑀤𑀻𑀦𑀁 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 ¶ . 𑀢𑀢𑁆𑀭 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀲𑀦𑁆𑀢𑀺𑀓𑁂 𑀅𑀚𑀸𑀦𑀦𑀪𑀸𑀯𑁂𑀦 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀢𑀺 𑀆𑀳. 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀅𑀢𑀺𑀔𑀺𑀧𑁆𑀧𑀁 𑀚𑀸𑀦𑀦𑀪𑀸𑀯𑁂𑀦. 𑀤𑁂𑀯𑀢𑀸 𑀦𑀸𑀫 𑀫𑀳𑀸𑀧𑀜𑁆𑀜𑀸 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀅𑀢𑀺𑀔𑀺𑀧𑁆𑀧𑀁 𑀚𑀸𑀦𑀦𑁆𑀢𑀺, 𑀘𑀺𑀢𑁆𑀢𑀜𑁆𑀘 𑀦𑀸𑀫𑁂𑀢𑀁 𑀮𑀳𑀼𑀧𑀭𑀺𑀯𑀢𑁆𑀢𑀁. 𑀢𑀲𑁆𑀫𑀸 𑀘𑀺𑀢𑁆𑀢𑀮𑀳𑀼𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀯𑀲𑁂𑀦𑁂𑀯 ‘‘𑀫𑀸 𑀅𑀢𑀺𑀔𑀺𑀧𑁆𑀧𑀁 𑀯𑀺𑀦𑀸𑀲𑁄 𑀅𑀳𑁄𑀲𑀻’’𑀢𑀺 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀧𑀝𑀺𑀓𑁆𑀔𑀺𑀧𑀺.

𑀫𑀦𑀼𑀲𑁆𑀲𑁂𑀲𑀼 𑀧𑀦 𑀦𑀺𑀬𑀫𑁄 𑀦𑀢𑁆𑀣𑀺. 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀪𑀸𑀕𑀲𑁆𑀲 𑀯𑀸 𑀯𑀺𑀲𑀪𑀸𑀕𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀯𑀺𑀜𑁆𑀜𑀼𑀲𑁆𑀲 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀦 𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀺𑀬𑀓𑀁 𑀦𑀸𑀫 𑀅𑀭𑀺𑀬𑀯𑁄𑀳𑀸𑀭𑁄, 𑀫𑀸𑀕𑀥𑀪𑀸𑀲𑀸. 𑀫𑀺𑀮𑀓𑁆𑀔𑀓𑀁 𑀦𑀸𑀫 𑀬𑁄 𑀓𑁄𑀘𑀺 𑀅𑀦𑀭𑀺𑀬𑀓𑁄 𑀅𑀦𑁆𑀥𑀤𑀫𑀺𑀴𑀸𑀤𑀺. 𑀲𑁄 𑀘 𑀦 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀪𑀸𑀲𑀦𑁆𑀢𑀭𑁂 𑀯𑀸 𑀅𑀦𑀪𑀺𑀜𑁆𑀜𑀢𑀸𑀬, 𑀩𑀼𑀤𑁆𑀥𑀲𑀫𑀬𑁂 𑀯𑀸 𑀅𑀓𑁄𑀯𑀺𑀤𑀢𑀸𑀬 ‘‘𑀇𑀤𑀁 𑀦𑀸𑀫 𑀅𑀢𑁆𑀣𑀁 𑀏𑀲 𑀪𑀡𑀢𑀻’’𑀢𑀺 𑀦𑀧𑁆𑀧𑀝𑀺𑀯𑀺𑀚𑀸𑀦𑀸𑀢𑀺. 𑀤𑀯𑀸𑀬𑀸𑀢𑀺 𑀲𑀳𑀲𑀸 𑀅𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑁄 𑀲𑀳𑀲𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀪𑀡𑀢𑀺. 𑀭𑀯𑀸𑀬𑀸𑀢𑀺 𑀭𑀯𑀸𑀪𑀜𑁆𑀜𑁂𑀦, ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑁄. 𑀧𑀼𑀭𑀺𑀫𑁂𑀦 ¶ 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀧𑀼𑀭𑀺𑀫𑀁 𑀧𑀡𑁆𑀟𑀺𑀢𑀲𑁆𑀲𑀸𑀧𑀺 𑀲𑀳𑀲𑀸𑀯𑀲𑁂𑀦 𑀅𑀜𑁆𑀜𑀪𑀡𑀦𑀁. 𑀇𑀤𑀁 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀅𑀧𑀓𑀢𑀜𑁆𑀜𑀼𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑀲𑁆𑀲 ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀪𑀡𑀦𑀁.

𑀅𑀲𑀸𑀯𑁂𑀢𑀼𑀓𑀸𑀫𑁄 𑀲𑀸𑀯𑁂𑀢𑀻𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀸𑀴𑀺𑀁 𑀯𑀸𑀘𑁂𑀢𑀺 𑀧𑀭𑀺𑀧𑀼𑀘𑁆𑀙𑀢𑀺 𑀉𑀕𑁆𑀕𑀡𑁆𑀳𑀸𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺 𑀯𑀡𑁆𑀡𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀸𑀯𑁂𑀢𑀼𑀓𑀸𑀫𑁄 𑀲𑀸𑀯𑁂𑀢𑀻’’𑀢𑀺. 𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀻𑀢𑀺 𑀤𑀼𑀩𑁆𑀩𑀮𑀪𑀸𑀯𑀁 𑀆𑀯𑀺𑀓𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑁄 𑀯𑀘𑀻𑀪𑁂𑀤𑀁 𑀦 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀸𑀯𑁂𑀢𑀼𑀓𑀸𑀫𑁄 ¶ 𑀦 𑀲𑀸𑀯𑁂𑀢𑀻’’𑀢𑀺. 𑀅𑀯𑀺𑀜𑁆𑀜𑀼𑀲𑁆𑀲 𑀲𑀸𑀯𑁂𑀢𑀻𑀢𑀺 𑀫𑀳𑀮𑁆𑀮𑀓𑀲𑁆𑀲 𑀯𑀸 𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑀲𑁆𑀲, 𑀕𑀭𑀼𑀫𑁂𑀥𑀲𑁆𑀲 𑀯𑀸 𑀲𑀫𑀬𑁂 𑀅𑀓𑁄𑀯𑀺𑀤𑀲𑁆𑀲, 𑀕𑀸𑀫𑀤𑀸𑀭𑀓𑀸𑀦𑀁 𑀯𑀸 𑀅𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀸𑀦𑀁 𑀲𑀸𑀯𑁂𑀢𑀺. 𑀯𑀺𑀜𑁆𑀜𑀼𑀲𑁆𑀲 𑀦 𑀲𑀸𑀯𑁂𑀢𑀻𑀢𑀺 𑀧𑀡𑁆𑀟𑀺𑀢𑀲𑁆𑀲 𑀜𑀸𑀢𑀼𑀁 𑀲𑀫𑀢𑁆𑀣𑀲𑁆𑀲 𑀦 𑀲𑀸𑀯𑁂𑀢𑀺. 𑀲𑀩𑁆𑀩𑀲𑁄 𑀯𑀸 𑀧𑀦𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 𑀬𑁂𑀦 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀢𑀢𑁄 𑀏𑀓𑀫𑁆𑀧𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀦 𑀲𑀸𑀯𑁂𑀢𑀺. 𑀏𑀯𑀁 𑀔𑁄𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀦𑀮𑀓𑁆𑀔𑀡𑀁 𑀦𑀺𑀬𑀫𑁂𑀢𑀺. 𑀅𑀬𑀁 𑀳𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀏𑀯𑀫𑁂𑀯 𑀲𑀺𑀓𑁆𑀔𑀸 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀫𑀽𑀮𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁫𑁫. 𑀇𑀤𑀸𑀦𑀺 ¶ ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸𑀢𑀺 𑀇𑀤𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀉𑀤𑁆𑀤𑁂𑀲𑀧𑀤𑀁. 𑀅𑀲𑀤𑁆𑀥𑀫𑁆𑀫𑁄𑀢𑀺 𑀅𑀲𑀢𑀁 𑀦𑀻𑀘𑀚𑀦𑀸𑀦𑀁 𑀥𑀫𑁆𑀫𑁄. 𑀕𑀸𑀫𑀥𑀫𑁆𑀫𑁄𑀢𑀺 𑀕𑀸𑀫𑀯𑀸𑀲𑀻𑀦𑀁 𑀲𑁂𑀯𑀦𑀥𑀫𑁆𑀫𑁄. 𑀯𑀲𑀮𑀥𑀫𑁆𑀫𑁄𑀢𑀺 𑀯𑀲𑀮𑀸𑀦𑀁 𑀥𑀫𑁆𑀫𑁄; 𑀓𑀺𑀮𑁂𑀲𑀯𑀲𑁆𑀲𑀦𑀢𑁄 𑀯𑀸 𑀲𑀬𑀫𑁂𑀯 𑀯𑀲𑀮𑁄 𑀥𑀫𑁆𑀫𑁄𑀢𑀺 𑀯𑀲𑀮𑀥𑀫𑁆𑀫𑁄. 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀤𑀼𑀝𑁆𑀞𑀼𑀜𑁆𑀘 𑀓𑀺𑀮𑁂𑀲𑁂𑀳𑀺 𑀤𑀼𑀝𑁆𑀞𑀢𑁆𑀢𑀸, 𑀣𑀽𑀮𑀜𑁆𑀘 𑀅𑀦𑀺𑀧𑀼𑀡𑀪𑀸𑀯𑀢𑁄𑀢𑀺 𑀤𑀼𑀝𑁆𑀞𑀼𑀮𑁆𑀮𑀁. 𑀇𑀢𑁄 𑀧𑀝𑁆𑀞𑀸𑀬 𑀘 𑀢𑀻𑀲𑀼 𑀧𑀤𑁂𑀲𑀼 ‘‘𑀬𑁄 𑀲𑁄’’𑀢𑀺 𑀇𑀤𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀬𑀁 𑀢’’𑀦𑁆𑀢𑀺 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁 𑁋 ‘‘𑀬𑀁 𑀢𑀁 𑀤𑀼𑀝𑁆𑀞𑀼𑀮𑁆𑀮𑀁, 𑀬𑀁 𑀢𑀁 𑀑𑀤𑀓𑀦𑁆𑀢𑀺𑀓𑀁, 𑀬𑀁 𑀢𑀁 𑀭𑀳𑀲𑁆𑀲’’𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀁 𑀤𑀲𑁆𑀲𑀦𑀫𑁆𑀧𑀺 𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀨𑀼𑀲𑀦𑀫𑁆𑀧𑀺 𑀖𑀝𑁆𑀝𑀦𑀫𑁆𑀧𑀺 𑀤𑀼𑀝𑁆𑀞𑀼𑀮𑁆𑀮𑀁, 𑀢𑀲𑁆𑀫𑀸𑀧𑀺 𑀢𑀁 𑀓𑀫𑁆𑀫𑀁 𑀤𑀼𑀝𑁆𑀞𑀼𑀮𑁆𑀮𑀁. 𑀬𑀁 𑀢𑀁 𑀤𑀼𑀝𑁆𑀞𑀼𑀮𑁆𑀮𑀁 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄. 𑀉𑀤𑀓𑀁 𑀅𑀲𑁆𑀲 𑀅𑀦𑁆𑀢𑁂 𑀲𑀼𑀤𑁆𑀥𑀢𑁆𑀣𑀁 𑀆𑀤𑀻𑀬𑀢𑀻𑀢𑀺 𑀉𑀤𑀓𑀦𑁆𑀢𑀁, 𑀉𑀤𑀓𑀦𑁆𑀢𑀫𑁂𑀯 𑀑𑀤𑀓𑀦𑁆𑀢𑀺𑀓𑀁; 𑀬𑀁 𑀢𑀁 𑀑𑀤𑀓𑀦𑁆𑀢𑀺𑀓𑀁 ¶ , 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄. 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀓𑀢𑁆𑀢𑀩𑁆𑀩𑀢𑀸𑀬 𑀭𑀳𑀲𑁆𑀲𑀁. 𑀬𑀁 𑀢𑀁 𑀭𑀳𑀲𑁆𑀲𑀁, 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁆𑀯𑀬𑁂𑀦 𑀤𑁆𑀯𑀬𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀢𑀢𑁆𑀣 𑀬𑁄𑀚𑀦𑀸 𑁋 ‘‘𑀬𑀸 𑀲𑀸 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺 𑀲𑁄 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸’’𑀢𑀺. 𑀇𑀥 𑀧𑀦 𑀢𑀁 𑀲𑀩𑁆𑀩𑀁 𑀏𑀓𑀚𑁆𑀛𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀏𑀲𑁄 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫𑀸’’𑀢𑀺. 𑀓𑀺𑀁 𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄𑀢𑀺? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺, 𑀢𑀁 𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄𑀢𑀺.

𑀧𑀝𑀺𑀲𑁂𑀯𑀢𑀺 𑀦𑀸𑀫𑀸𑀢𑀺 𑀇𑀤𑀁 ‘‘𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑁂𑀦𑀸𑀓𑀸𑀭𑁂𑀦 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸𑀓𑀸𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀫𑀸𑀢𑀺𑀓𑀸𑀧𑀤𑀁. 𑀬𑁄 𑀦𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀬𑁄 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂𑀦 ¶ 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁, 𑀇𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀫𑀸𑀡𑁂𑀦 𑀏𑀓𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑁂 𑀅𑀮𑁆𑀮𑁄𑀓𑀸𑀲𑁂 𑀧𑀯𑁂𑀲𑁂𑀢𑀺, 𑀏𑀲𑁄 𑀧𑀝𑀺𑀲𑁂𑀯𑀢𑀺 𑀦𑀸𑀫; 𑀏𑀢𑁆𑀢𑀓𑁂𑀦 𑀲𑀻𑀮𑀪𑁂𑀤𑀁 𑀧𑀸𑀧𑀼𑀡𑀸𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺.

𑀏𑀢𑁆𑀣 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺, 𑀯𑁂𑀫𑀚𑁆𑀛𑀜𑁆𑀘𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺, 𑀫𑀚𑁆𑀛𑀁, 𑀉𑀧𑀭𑀺𑀘𑀸𑀢𑀺 𑀙. 𑀢𑀲𑁆𑀫𑀸 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀳𑁂𑀝𑁆𑀞𑀸 𑀧𑀯𑁂𑀲𑁂𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀉𑀧𑀭𑀺𑀢𑁄 𑀧𑀯𑁂𑀲𑁂𑀦𑁆𑀢𑁄𑀧𑀺, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 ¶ 𑀧𑀯𑁂𑀲𑁂𑀦𑁆𑀢𑁄𑀧𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀫𑀚𑁆𑀛𑁂𑀦 𑀧𑀯𑁂𑀲𑁂𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀦 𑀳𑁂𑀝𑁆𑀞𑀸𑀪𑀸𑀕𑁂𑀦 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀉𑀧𑀭𑀺𑀪𑀸𑀕𑁂𑀦 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀧𑀺, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀧𑀺, 𑀫𑀚𑁆𑀛𑁂𑀦𑁂𑀯 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀧𑀺 𑀲𑀫𑀜𑁆𑀙𑀺𑀢𑀗𑁆𑀕𑀼𑀮𑀺𑀁 𑀯𑀺𑀬 𑀫𑀚𑁆𑀛𑀺𑀫𑀧𑀩𑁆𑀩𑀧𑀺𑀝𑁆𑀞𑀺𑀬𑀸 𑀲𑀗𑁆𑀓𑁄𑀘𑁂𑀢𑁆𑀯𑀸 𑀉𑀧𑀭𑀺𑀪𑀸𑀕𑁂𑀦 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀢𑀢𑁆𑀣 𑀢𑀼𑀮𑀸𑀤𑀡𑁆𑀟𑀲𑀤𑀺𑀲𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺, 𑀫𑀚𑁆𑀛𑀜𑁆𑀘𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺; 𑀲𑀗𑁆𑀓𑁄𑀘𑁂𑀢𑁆𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺, 𑀉𑀧𑀭𑀺𑀪𑀸𑀕𑀫𑀚𑁆𑀛𑀜𑁆𑀘𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺 𑁋 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂 𑀤𑀲 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺.

𑀦𑀺𑀫𑀺𑀢𑁆𑀢𑁂 𑀚𑀸𑀢𑀁 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀘𑀫𑁆𑀫𑀔𑀻𑀮𑀁 𑀯𑀸 𑀧𑀺𑀴𑀓𑀁 𑀯𑀸 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀫𑀢𑀘𑀫𑁆𑀫𑀁 𑀯𑀸 𑀲𑀼𑀓𑁆𑀔𑀧𑀺𑀴𑀓𑀁 𑀯𑀸 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 ¶ 𑀤𑀼𑀓𑁆𑀓𑀝𑀲𑁆𑀲. 𑀫𑁂𑀣𑀼𑀦𑀲𑁆𑀲𑀸𑀤𑁂𑀦 𑀮𑁄𑀫𑀁 𑀯𑀸 𑀅𑀗𑁆𑀕𑀼𑀮𑀺-𑀅𑀗𑁆𑀕𑀼𑀝𑁆𑀞𑀩𑀻𑀚𑀸𑀤𑀻𑀦𑀺 𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀅𑀬𑀜𑁆𑀘 𑀫𑁂𑀣𑀼𑀦𑀓𑀣𑀸 𑀦𑀸𑀫 𑀬𑀲𑁆𑀫𑀸 𑀤𑀼𑀝𑁆𑀞𑀼𑀮𑁆𑀮𑀸 𑀓𑀣𑀸 𑀅𑀲𑀩𑁆𑀪𑀺𑀓𑀣𑀸, 𑀢𑀲𑁆𑀫𑀸 𑀏𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀺𑀦𑀬𑁂 𑀈𑀤𑀺𑀲𑀁 𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑀜𑁆𑀘 𑀲𑀫𑀡𑀲𑀜𑁆𑀜𑀜𑁆𑀘 𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀲𑀫𑀓𑀸𑀭𑀼𑀡𑀺𑀓𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀓𑀭𑀼𑀡𑀸𑀕𑀼𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀲𑁄 𑀳𑀺 𑀦𑀸𑀫 𑀪𑀕𑀯𑀸 𑀲𑀩𑁆𑀩𑀲𑁄 𑀓𑀸𑀫𑁂𑀳𑀺 𑀯𑀺𑀦𑀺𑀯𑀢𑁆𑀢𑀫𑀸𑀦𑀲𑁄𑀧𑀺 𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬 𑀈𑀤𑀺𑀲𑀁 𑀓𑀣𑀁 𑀓𑀣𑁂𑀲𑀺. ‘‘𑀅𑀳𑁄 𑀲𑀢𑁆𑀣𑀼 𑀓𑀭𑀼𑀡𑀸𑀕𑀼𑀡𑁄’’𑀢𑀺 𑀏𑀯𑀁 𑀮𑁄𑀓𑀦𑀸𑀣𑀲𑁆𑀲 𑀓𑀭𑀼𑀡𑀸𑀕𑀼𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀅𑀧𑀺𑀘 𑀬𑀤𑀺 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀈𑀤𑀺𑀲𑀁 𑀓𑀣𑀁 𑀦 𑀓𑀣𑁂𑀬𑁆𑀬, 𑀓𑁄 𑀚𑀸𑀦𑁂𑀬𑁆𑀬 ‘‘𑀏𑀢𑁆𑀢𑀓𑁂𑀲𑀼

𑀞𑀸𑀦𑁂𑀲𑀼 𑀧𑀸𑀭𑀸𑀚𑀺𑀓𑀁, 𑀏𑀢𑁆𑀢𑀓𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀢𑁆𑀢𑀓𑁂𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀡𑀦𑁆𑀢𑁂𑀦𑀧𑀺 𑀓𑀣𑁂𑀦𑁆𑀢𑁂𑀦𑀧𑀺 𑀩𑀻𑀚𑀓𑁂𑀦 𑀫𑀼𑀔𑀁 𑀅𑀧𑀺𑀥𑀸𑀬 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀫𑀸𑀦𑁂𑀦 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺 𑀈𑀤𑀺𑀲𑀁 𑀓𑀣𑀺𑀢’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀕𑀩𑁆𑀪𑀺𑀢𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁂𑀦 𑀲𑀢𑁆𑀣𑀼𑀧𑀝𑀺𑀪𑀸𑀕𑁂𑀦 𑀳𑀼𑀢𑁆𑀯𑀸 𑀓𑀣𑁂𑀢𑀩𑁆𑀩𑀦𑁆𑀢𑀺.

𑀫𑀽𑀮𑀧𑀜𑁆𑀜𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀸𑀭𑁂 ¶ 𑁋 𑀅𑀦𑁆𑀢𑀫𑀲𑁄𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦. 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀢𑀺𑀭𑀘𑁆𑀙𑀸𑀦𑁂𑀲𑀼 𑀕𑀢𑀸𑀬𑀧𑀺. 𑀧𑀕𑁂𑀯 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀢𑀺 𑀧𑀞𑀫𑀢𑀭𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀬 𑀇𑀢𑁆𑀣𑀺𑀬𑀸. 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸 𑀏𑀯 𑀘𑁂𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀢𑀺𑀭𑀘𑁆𑀙𑀸𑀦𑀕𑀢𑀸𑀢𑀺 𑀕𑀳𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀧𑀭𑀺𑀘𑁆𑀙𑁂𑀤𑁄 𑁋

𑀅𑀧𑀤𑀸𑀦𑀁 𑀅𑀳𑀺 𑀫𑀘𑁆𑀙𑀸, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀓𑀼𑀓𑁆𑀓𑀼𑀝𑀻;

𑀘𑀢𑀼𑀧𑁆𑀧𑀤𑀸𑀦𑀁 𑀫𑀚𑁆𑀚𑀸𑀭𑀻, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑀸𑀢𑀺.

𑀢𑀢𑁆𑀣 ¶ 𑀅𑀳𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀅𑀚𑀕𑀭𑀕𑁄𑀦𑀲𑀸𑀤𑀺𑀪𑁂𑀤𑀸 𑀤𑀻𑀖𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀤𑀻𑀖𑀚𑀸𑀢𑀻𑀲𑀼 𑀬𑀢𑁆𑀣 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀓𑁆𑀓𑀸 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑀼𑀁, 𑀲𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼. 𑀅𑀯𑀲𑁂𑀲𑀸 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀘𑁆𑀙𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀫𑀘𑁆𑀙𑀓𑀘𑁆𑀙𑀧𑀫𑀡𑁆𑀟𑀽𑀓𑀸𑀤𑀺𑀪𑁂𑀤𑀸 𑀑𑀤𑀓𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀤𑀻𑀖𑀚𑀸𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀢𑀗𑁆𑀕𑀫𑀼𑀔𑀫𑀡𑁆𑀟𑀽𑀓𑀸 𑀦𑀸𑀫 𑀳𑁄𑀦𑁆𑀢𑀺 𑀢𑁂𑀲𑀁 𑀫𑀼𑀔𑀲𑀡𑁆𑀞𑀸𑀦𑀁 𑀫𑀳𑀦𑁆𑀢𑀁, 𑀙𑀺𑀤𑁆𑀤𑀁 𑀅𑀧𑁆𑀧𑀓𑀁, 𑀢𑀢𑁆𑀣 𑀧𑀯𑁂𑀲𑀦𑀁 𑀦𑀧𑁆𑀧𑀳𑁄𑀢𑀺; 𑀫𑀼𑀔𑀲𑀡𑁆𑀞𑀸𑀦𑀁 𑀧𑀦 𑀯𑀡𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀁 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀓𑁆𑀓𑀼𑀝𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀓𑀸𑀓𑀓𑀧𑁄𑀢𑀸𑀤𑀺𑀪𑁂𑀤𑀸 𑀧𑀓𑁆𑀔𑀺𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁. 𑀫𑀚𑁆𑀚𑀸𑀭𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀭𑀼𑀓𑁆𑀔𑀲𑀼𑀦𑀔-𑀫𑀼𑀗𑁆𑀕𑀼𑀲-𑀕𑁄𑀥𑀸𑀤𑀺𑀪𑁂𑀤𑀸 𑀘𑀢𑀼𑀧𑁆𑀧𑀤𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁.

𑀧𑀸𑀭𑀸𑀚𑀺𑀓𑁄𑀢𑀺 𑀧𑀭𑀸𑀚𑀺𑀢𑁄, 𑀧𑀭𑀸𑀚𑀬𑀁 𑀆𑀧𑀦𑁆𑀦𑁄. 𑀅𑀬𑀜𑁆𑀳𑀺 𑀧𑀸𑀭𑀸𑀚𑀺𑀓𑀲𑀤𑁆𑀤𑁄 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀺𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁩) 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑁬𑁭) 𑀏𑀯𑀁 𑀆𑀧𑀢𑁆𑀢𑀺𑀬𑀁. ‘‘𑀦 𑀫𑀬𑀁 𑀧𑀸𑀭𑀸𑀚𑀺𑀓𑀸, 𑀬𑁄 𑀅𑀯𑀳𑀝𑁄 𑀲𑁄 𑀧𑀸𑀭𑀸𑀚𑀺𑀓𑁄’’𑀢𑀺 (𑀧𑀸𑀭𑀸. 𑁧𑁫𑁫) 𑀏𑀯𑀁 𑀧𑀼𑀕𑁆𑀕𑀮𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁮𑁪) 𑀧𑀦 𑀥𑀫𑁆𑀫𑁂 𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀓𑀢𑁆𑀣𑀘𑀺 𑀆𑀧𑀢𑁆𑀢𑀺 ¶ , 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀲𑁄 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀬𑁄 𑀢𑀁 𑀅𑀢𑀺𑀓𑁆𑀓𑀫𑀢𑀺, 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀺 𑀧𑀦 𑀬𑁄 𑀦𑀁 𑀅𑀚𑁆𑀛𑀸𑀧𑀚𑁆𑀚𑀢𑀺, 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀸’’𑀢𑀺 ¶ 𑀯𑀼𑀘𑁆𑀘𑀢𑀺. 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 ¶ 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀧𑀭𑀺𑀯𑀸𑀭𑁂𑀧𑀺 𑁋

‘‘𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀘𑀼𑀢𑁄 𑀧𑀭𑀤𑁆𑀥𑁄 𑀪𑀝𑁆𑀞𑁄 𑀘, 𑀲𑀤𑁆𑀥𑀫𑁆𑀫𑀸 𑀳𑀺 𑀦𑀺𑀭𑀗𑁆𑀓𑀢𑁄;

𑀲𑀁𑀯𑀸𑀲𑁄𑀧𑀺 𑀢𑀳𑀺𑀁 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. (𑀧𑀭𑀺. 𑁩𑁩𑁯);

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀆𑀧𑀢𑁆𑀢𑀺𑀜𑁆𑀘 𑀆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀘𑀼𑀢𑁄 𑀳𑁄𑀢𑀻𑀢𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀧𑀭𑀺𑀪𑀝𑁆𑀞𑁄 𑀙𑀺𑀦𑁆𑀦𑁄 𑀧𑀭𑀸𑀚𑀺𑀢𑁄 𑀲𑀸𑀲𑀦𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺. 𑀓𑀺𑀦𑁆𑀢𑀺? ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺.

𑀲𑀳 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀯𑀸𑀲𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀯𑀸𑀲𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀏𑀓𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀤𑁆𑀥𑀺𑀁 𑀬𑁄𑀚𑀦𑀸𑀬 𑀯𑀡𑁆𑀡𑀦𑀸 𑁋 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀁 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀳𑀺 𑀧𑀓𑀢𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀓𑀢𑁆𑀢𑀩𑁆𑀩𑀢𑁆𑀢𑀸 𑀏𑀓𑀓𑀫𑁆𑀫𑀁 𑀦𑀸𑀫. 𑀢𑀣𑀸 𑀧𑀜𑁆𑀘𑀯𑀺𑀥𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀏𑀓𑀢𑁄 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸 𑀏𑀓𑀼𑀤𑁆𑀤𑁂𑀲𑁄 𑀦𑀸𑀫. 𑀧𑀜𑁆𑀜𑀢𑁆𑀢𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫. 𑀏𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀮𑀚𑁆𑀚𑀺𑀦𑁄 𑀏𑀢𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀲𑀳 𑀯𑀲𑀦𑁆𑀢𑀺, 𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 ‘‘𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫𑀸’’𑀢𑀺 𑀆𑀳. 𑀲𑁄 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑀁𑀯𑀸𑀲𑁄 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀧𑀸𑀭𑀸𑀚𑀺𑀓𑁄 𑀧𑀼𑀕𑁆𑀕𑀮𑁄 𑀅𑀲𑀁𑀯𑀸𑀲𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁫𑁬. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀁 ‘‘𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑁂𑀦𑀸𑀓𑀸𑀭𑁂𑀦 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸𑀓𑀸𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀲𑁂𑀯𑀢𑀺 𑀦𑀸𑀫𑀸’’𑀢𑀺 𑀇𑀤𑀁 𑀫𑀸𑀢𑀺𑀓𑀸𑀧𑀤𑀁 𑀞𑀧𑁂𑀢𑁆𑀯𑀸 ‘‘𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑁂𑀦 𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀇𑀢𑁆𑀣𑀺𑀬𑀸 ¶ 𑀏𑀯 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, 𑀦 𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀏𑀯, 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸𑀦𑀜𑁆𑀘 𑀇𑀢𑁆𑀣𑀻𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀯𑀢𑁆𑀣𑀼𑀫𑁂𑀯 𑀦 𑀳𑁄𑀢𑀺; 𑀢𑀲𑁆𑀫𑀸 𑀬𑀁 𑀬𑀁 𑀯𑀢𑁆𑀣𑀼 𑀳𑁄𑀢𑀺, 𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀺 𑀯𑀢𑁆𑀣𑀽𑀦𑀺 𑀳𑁄𑀦𑁆𑀢𑀺, 𑀢𑁂 𑀲𑀢𑁆𑀢𑁂 𑀯𑀢𑁆𑀯𑀸 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀸𑀦𑀺 𑀯𑀢𑁆𑀣𑀽𑀦𑀺 𑀆𑀳.

𑀢𑀢𑁆𑀣 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀧𑀡𑁆𑀟𑀓𑀸, 𑀢𑀬𑁄 𑀧𑀼𑀭𑀺𑀲𑀸𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀁 ¶ 𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀸 𑀤𑁆𑀯𑀸𑀤𑀲 𑀲𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀸 𑀧𑀸𑀓𑀝𑀸 𑀏𑀯 ¶ . 𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀪𑁂𑀤𑁄 𑀧𑀩𑁆𑀩𑀚𑁆𑀚𑀸𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺.

𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀻𑀲𑀼 𑀫𑀕𑁆𑀕𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀩𑁆𑀩𑁂 𑀏𑀯 𑀘𑁂𑀢𑁂 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑀸, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀢𑀬𑁄𑀢𑀺 𑀦𑀯; 𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀤𑀻𑀦𑀁 𑀦𑀯; 𑀫𑀦𑀼𑀲𑁆𑀲𑀧𑀡𑁆𑀟𑀓𑀸𑀤𑀻𑀦𑀁 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙; 𑀢𑀣𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀦𑁆𑀢𑀺 𑀲𑀫𑀢𑀺𑀁𑀲 𑀫𑀕𑁆𑀕𑀸 𑀳𑁄𑀦𑁆𑀢𑀺. 𑀏𑀢𑁂𑀲𑀼 𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁫𑁭. 𑀆𑀧𑀚𑁆𑀚𑀦𑁆𑀢𑁄 𑀧𑀦 𑀬𑀲𑁆𑀫𑀸 𑀲𑁂𑀯𑀦𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀦 𑀯𑀺𑀦𑀸 𑀢𑁂𑀦; 𑀢𑀲𑁆𑀫𑀸 𑀢𑀁 𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀫𑁂𑀣𑀼𑀦𑀲𑁂𑀯𑀦𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀲𑁂𑀯𑀦𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀯𑀘𑁆𑀘𑀫𑀕𑁆𑀕𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀯𑀘𑁆𑀘𑀁 𑀦𑀺𑀓𑁆𑀔𑀫𑀢𑀺 𑀢𑀁 𑀫𑀕𑁆𑀕𑀁 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀲𑁆𑀲. 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀸 𑀅𑀲𑁆𑀲 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀆𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀦𑀁 𑀳𑁄𑀢𑀺. 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀧𑀸𑀭𑀸𑀚𑀺𑀓𑀥𑀫𑁆𑀫𑀲𑁆𑀲. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁫𑁮. 𑀏𑀯𑀁 𑀲𑁂𑀯𑀦𑀘𑀺𑀢𑁆𑀢𑁂𑀦𑁂𑀯 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀁 𑀧𑀯𑁂𑀲𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀅𑀢𑁆𑀢𑀽𑀧𑀓𑁆𑀓𑀫𑁂𑀦𑁂𑀯, 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺 𑀳𑁄𑀢𑀺 ¶ . 𑀢𑀢𑁆𑀭𑀸𑀧𑀺 𑀘 𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲, 𑀦 𑀇𑀢𑀭𑀲𑁆𑀲. 𑀢𑀲𑁆𑀫𑀸 𑀬𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀓𑀸 𑀧𑀭𑀽𑀧𑀓𑁆𑀓𑀫𑁂𑀦 𑀧𑀯𑁂𑀲𑀦𑁂𑀧𑀺 𑀲𑀢𑀺 𑀦 𑀲𑀸𑀤𑀺𑀬𑀦𑁆𑀢𑀺, 𑀢𑁂𑀲𑀁 𑀭𑀓𑁆𑀔𑀡𑀢𑁆𑀣𑀁 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑀸, 𑀪𑀺𑀓𑁆𑀔𑀽 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸; 𑀯𑀺𑀲𑀪𑀸𑀕𑀸𑀦𑀁 𑀯𑁂𑀭𑀺𑀪𑀺𑀓𑁆𑀔𑀽𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸𑀢𑀺 𑀇𑀲𑁆𑀲𑀸𑀧𑀓𑀢𑀸 𑀢𑀁 𑀪𑀺𑀓𑁆𑀔𑀼𑀁 𑀦𑀸𑀲𑁂𑀢𑀼𑀓𑀸𑀫𑀸 𑀆𑀫𑀺𑀲𑁂𑀦 𑀯𑀸 𑀉𑀧𑀮𑀸𑀧𑁂𑀢𑁆𑀯𑀸 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀯𑀸 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀓𑀜𑁆𑀘𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 ¶ 𑀭𑀢𑁆𑀢𑀺𑀪𑀸𑀕𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀲𑀦𑁄𑀓𑀸𑀲𑀁 ¶ 𑀆𑀦𑁂𑀢𑁆𑀯𑀸. 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀻𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀳𑀢𑁆𑀣𑀧𑀸𑀤𑀲𑀻𑀲𑀸𑀤𑀻𑀲𑀼 𑀲𑀼𑀕𑁆𑀕𑀳𑀺𑀢𑀁 𑀦𑀺𑀧𑁆𑀧𑀭𑀺𑀧𑁆𑀨𑀦𑁆𑀤𑀁 𑀕𑀳𑁂𑀢𑁆𑀯𑀸 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺; 𑀲𑀫𑁆𑀧𑀬𑁄𑀚𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑁄 𑀘𑁂𑀢𑀺𑀆𑀤𑀻𑀲𑀼 𑀲𑁄 𑀘𑁂 𑀪𑀺𑀓𑁆𑀔𑀼 𑀯𑀘𑁆𑀘𑀫𑀕𑁆𑀕𑀩𑁆𑀪𑀦𑁆𑀢𑀭𑀁 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀲𑁆𑀲 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀧𑀯𑀺𑀝𑁆𑀞𑀓𑀸𑀮𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀞𑀺𑀢𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀞𑀸𑀦𑀧𑁆𑀧𑀢𑁆𑀢𑀓𑀸𑀮𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀦𑀻𑀳𑀭𑀡𑀓𑀸𑀮𑁂 𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀤𑀺𑀬𑀦𑁆𑀢𑁄 ‘‘𑀫𑀫 𑀯𑁂𑀭𑀺𑀲𑀫𑀡𑁂𑀳𑀺 𑀇𑀤𑀁 𑀓𑀢’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀮𑀪𑀢𑀺, 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀫𑁂𑀯 𑀆𑀧𑀚𑁆𑀚𑀢𑀺. 𑀬𑀣𑀸 𑀘 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺; 𑀏𑀯𑀁 𑀧𑀼𑀭𑀺𑀫𑀁 𑀏𑀓𑀁 𑀅𑀲𑀸𑀤𑀺𑀬𑀺𑀢𑁆𑀯𑀸 𑀢𑀻𑀡𑀺 𑀲𑀸𑀤𑀺𑀬𑀦𑁆𑀢𑁄𑀧𑀺, 𑀤𑁆𑀯𑁂 𑀅𑀲𑀸𑀤𑀺𑀬𑀺𑀢𑁆𑀯𑀸 𑀤𑁆𑀯𑁂 𑀲𑀸𑀤𑀺𑀬𑀦𑁆𑀢𑁄𑀧𑀺, 𑀢𑀻𑀡𑀺 𑀅𑀲𑀸𑀤𑀺𑀬𑀺𑀢𑁆𑀯𑀸 𑀏𑀓𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀆𑀧𑀚𑁆𑀚𑀢𑀺𑀬𑁂𑀯. 𑀲𑀩𑁆𑀩𑀲𑁄 𑀧𑀦 𑀅𑀲𑀸𑀤𑀺𑀬𑀦𑁆𑀢𑁄 𑀆𑀲𑀻𑀯𑀺𑀲𑀫𑀼𑀔𑀁 𑀯𑀺𑀬 𑀅𑀗𑁆𑀕𑀸𑀭𑀓𑀸𑀲𑀼𑀁 𑀯𑀺𑀬 𑀘 𑀧𑀯𑀺𑀝𑁆𑀞𑀁 𑀅𑀗𑁆𑀕𑀚𑀸𑀢𑀁 𑀫𑀜𑁆𑀜𑀫𑀸𑀦𑁄 𑀦𑀸𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺…𑀧𑁂… 𑀉𑀤𑁆𑀥𑀭𑀡𑀁 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺. 𑀇𑀫𑀜𑁆𑀳𑀺 𑀏𑀯𑀭𑀽𑀧𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀁 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀘 𑀲𑀩𑁆𑀩𑀸𑀬𑀢𑀦𑀸𑀦𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀺𑀬 𑀘 𑀯𑀥𑀓𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀲𑁆𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀭𑀓𑁆𑀔𑀦𑁆𑀢𑁄 𑀪𑀕𑀯𑀸 𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘𑀲𑁆𑀲 𑀫𑀦𑁄𑀭𑀣𑀯𑀺𑀖𑀸𑀢𑀁 ¶ 𑀓𑀭𑁄𑀦𑁆𑀢𑁄 𑀇𑀫𑀁 ‘‘𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀻’’𑀢𑀺𑀆𑀤𑀺𑀓𑀁 𑀘𑀢𑀼𑀓𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀞𑀧𑁂𑀲𑀻𑀢𑀺.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸

𑁫𑁯-𑁬𑁦. 𑀏𑀯𑀁 𑀧𑀞𑀫𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀇𑀢𑁆𑀣𑀺𑀁 𑀆𑀦𑁂𑀢𑁆𑀯𑀸 𑀦 𑀓𑁂𑀯𑀮𑀁 𑀯𑀘𑁆𑀘𑀫𑀕𑁆𑀕𑁂𑀦𑁂𑀯 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺, 𑀅𑀣 𑀔𑁄 𑀧𑀲𑁆𑀲𑀸𑀯𑀫𑀕𑁆𑀕𑁂𑀦𑀧𑀺 𑀫𑀼𑀔𑁂𑀦𑀧𑀺. 𑀇𑀢𑁆𑀣𑀺𑀁 𑀆𑀦𑁂𑀢𑁆𑀯𑀸𑀧𑀺 𑀘 𑀓𑁂𑀘𑀺 𑀚𑀸𑀕𑀭𑀦𑁆𑀢𑀺𑀁 𑀆𑀦𑁂𑀦𑁆𑀢𑀺, 𑀓𑁂𑀘𑀺 𑀲𑀼𑀢𑁆𑀢𑀁, 𑀓𑁂𑀘𑀺 𑀫𑀢𑁆𑀢𑀁, 𑀓𑁂𑀘𑀺 𑀉𑀫𑁆𑀫𑀢𑁆𑀢𑀁, 𑀓𑁂𑀘𑀺 𑀧𑀫𑀢𑁆𑀢𑀁 𑀅𑀜𑁆𑀜𑀯𑀺𑀳𑀺𑀢𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀓𑁂𑀘𑀺 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁, 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀅𑀓𑁆𑀔𑀸𑀬𑀺𑀢𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁, 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀸 𑀦𑀸𑀫 𑀬𑀲𑁆𑀲𑀸 𑀦𑀺𑀫𑀺𑀢𑁆𑀢𑁂 𑀯𑀘𑁆𑀘𑀫𑀕𑁆𑀕𑁂 𑀧𑀲𑁆𑀲𑀸𑀯𑀫𑀕𑁆𑀕𑁂 𑀫𑀼𑀔𑁂 𑀯𑀸 𑀩𑀳𑀼𑀢𑀭𑁄 𑀑𑀓𑀸𑀲𑁄 𑀅𑀓𑁆𑀔𑀸𑀬𑀺𑀢𑁄 𑀳𑁄𑀢𑀺. 𑀓𑁂𑀘𑀺 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁, 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀸 𑀦𑀸𑀫 𑀬𑀲𑁆𑀲𑀸 𑀯𑀘𑁆𑀘𑀫𑀕𑁆𑀕𑀸𑀤𑀺𑀓𑁂 𑀦𑀺𑀫𑀺𑀢𑁆𑀢𑁂 𑀩𑀳𑀼𑀁 𑀔𑀸𑀬𑀺𑀢𑀁 ¶ 𑀳𑁄𑀢𑀺, 𑀅𑀧𑁆𑀧𑀁 𑀅𑀓𑁆𑀔𑀸𑀬𑀺𑀢𑀁. 𑀦 𑀓𑁂𑀯𑀮𑀜𑁆𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀫𑁂𑀯 𑀆𑀦𑁂𑀦𑁆𑀢𑀺, 𑀅𑀣 𑀔𑁄 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀫𑁆𑀧𑀺. 𑀦 𑀓𑁂𑀯𑀮𑀜𑁆𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀇𑀢𑁆𑀣𑀺𑀫𑁂𑀯, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀫𑁆𑀧𑀺 𑀧𑀡𑁆𑀟𑀓𑀫𑁆𑀧𑀺 𑀧𑀼𑀭𑀺𑀲𑀫𑁆𑀧𑀺 𑀆𑀦𑁂𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀅𑀜𑁆𑀜𑀸𑀦𑀺𑀧𑀺 𑀘𑀢𑀼𑀓𑁆𑀓𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀚𑀸𑀕𑀭𑀦𑁆𑀢𑀺’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀸𑀴𑀺𑀬𑀸 𑀅𑀲𑀫𑁆𑀫𑁄𑀳𑀢𑁆𑀣𑀁 𑀯𑀼𑀢𑁆𑀢𑀘𑀢𑀼𑀓𑁆𑀓𑀸𑀦𑀺 𑀏𑀯𑀁 𑀲𑀗𑁆𑀔𑁆𑀬𑀸𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀢𑀻𑀡𑀺 𑀲𑀼𑀤𑁆𑀥𑀺𑀓𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀚𑀸𑀕𑀭𑀦𑁆𑀢𑀻𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀲𑀼𑀢𑁆𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀫𑀢𑁆𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀉𑀫𑁆𑀫𑀢𑁆𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀧𑀫𑀢𑁆𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀫𑀢𑀅𑀓𑁆𑀔𑀸𑀬𑀺𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀘𑀢𑀼𑀓𑁆𑀓𑀸𑀦𑀺, 𑀢𑀻𑀡𑀺 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀘𑀢𑀼𑀓𑁆𑀓𑀸𑀦𑀻𑀢𑀺 𑀲𑀢𑁆𑀢𑀯𑀻𑀲𑀢𑀺 𑀘𑀢𑀼𑀓𑁆𑀓𑀸𑀦𑀺. 𑀢𑀣𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸; 𑀢𑀣𑀸 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀢𑀺 𑀇𑀢𑁆𑀣𑀺𑀯𑀸𑀭𑁂 𑀏𑀓𑀸𑀲𑀻𑀢𑀺 𑀘𑀢𑀼𑀓𑁆𑀓𑀸𑀦𑀺. 𑀬𑀣𑀸 𑀘 𑀇𑀢𑁆𑀣𑀺𑀯𑀸𑀭𑁂 𑀏𑀯𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀸𑀭𑁂. 𑀧𑀡𑁆𑀟𑀓𑀧𑀼𑀭𑀺𑀲𑀯𑀸𑀭𑁂𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀘𑀢𑀼𑀧𑀡𑁆𑀡𑀸𑀲 𑀘𑀢𑀼𑀧𑀡𑁆𑀡𑀸𑀲 𑀳𑁄𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑁂𑀲𑀢𑀸𑀦𑀺, 𑀲𑀢𑁆𑀢𑀢𑀺 𑀘 𑀘𑀢𑀼𑀓𑁆𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺𑀬𑁂𑀯.

𑀲𑀩𑁆𑀩𑀯𑀸𑀭𑁂𑀲𑀼 ¶ 𑀧𑀦𑁂𑀢𑁆𑀣 ‘‘𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁 𑀔𑀸𑀬𑀺𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀓𑀺𑀭 𑀤𑁆𑀯𑁂 𑀯𑀺𑀦𑀬𑀥𑀭𑀸 𑀲𑀫𑀸𑀦𑀸𑀘𑀭𑀺𑀬𑀓𑀸 𑀣𑁂𑀭𑀸 𑀅𑀳𑁂𑀲𑀼𑀁 𑁋 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀘, 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀘. 𑀢𑁂 𑀫𑀳𑀸𑀪𑀬𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑀬𑀧𑀺𑀝𑀓𑀁 𑀧𑀭𑀺𑀳𑀭𑀦𑁆𑀢𑀸 𑀭𑀓𑁆𑀔𑀺𑀁𑀲𑀼. 𑀢𑁂𑀲𑀼 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀩𑁆𑀬𑀢𑁆𑀢𑀢𑀭𑁄. 𑀢𑀲𑁆𑀲𑀸𑀧𑀺 𑀤𑁆𑀯𑁂 𑀅𑀦𑁆𑀢𑁂𑀯𑀸𑀲𑀺𑀓𑀸 𑀅𑀳𑁂𑀲𑀼𑀁 𑁋 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀘 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀘. 𑀢𑁂𑀲𑀼 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀦𑀓𑁆𑀔𑀢𑁆𑀢𑀼𑀁 𑀯𑀺𑀦𑀬𑀧𑀺𑀝𑀓𑀁 𑀅𑀲𑁆𑀲𑁄𑀲𑀺, 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀯𑀓𑁆𑀔𑀢𑁆𑀢𑀼𑀁, 𑀯𑀺𑀲𑀼𑀜𑁆𑀘 𑀏𑀓𑀓𑁄𑀯 𑀦𑀯𑀓𑁆𑀔𑀢𑁆𑀢𑀼𑀦𑁆𑀢𑀺 𑀅𑀝𑁆𑀞𑀸𑀭𑀲𑀓𑁆𑀔𑀢𑁆𑀢𑀼𑀁 𑀅𑀲𑁆𑀲𑁄𑀲𑀺; 𑀅𑀬𑀫𑁂𑀯 𑀢𑁂𑀲𑀼 𑀩𑁆𑀬𑀢𑁆𑀢𑀢𑀭𑁄 ¶ . 𑀢𑁂𑀲𑀼 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀦𑀯𑀓𑁆𑀔𑀢𑁆𑀢𑀼𑀁 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀧𑀭𑀕𑀗𑁆𑀕𑀁 𑀅𑀕𑀫𑀸𑀲𑀺. 𑀢𑀢𑁄 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳 𑁋 ‘‘𑀲𑀽𑀭𑁄 𑀯𑀢, 𑀭𑁂, 𑀏𑀲 𑀯𑀺𑀦𑀬𑀥𑀭𑁄 𑀬𑁄 𑀥𑀭𑀫𑀸𑀦𑀓𑀁𑀬𑁂𑀯 𑀆𑀘𑀭𑀺𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀲𑀺𑀢𑀩𑁆𑀩𑀁 𑀫𑀜𑁆𑀜𑀢𑀺. 𑀦𑀦𑀼 𑀆𑀘𑀭𑀺𑀬𑁂 𑀥𑀭𑀫𑀸𑀦𑁂 𑀯𑀺𑀦𑀬𑀧𑀺𑀝𑀓𑀜𑁆𑀘 𑀅𑀝𑁆𑀞𑀓𑀣𑀸 𑀘 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀕𑀳𑁂𑀢𑁆𑀯𑀸𑀧𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀦𑀺𑀘𑁆𑀘𑀓𑀸𑀮𑀁 𑀲𑁄𑀢𑀩𑁆𑀩𑀁, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀚𑁆𑀛𑀸𑀬𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀯𑀺𑀦𑀬𑀕𑀭𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑀸𑀦𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂 𑀇𑀫𑀁 𑀧𑀤𑁂𑀲𑀁 𑀯𑀡𑁆𑀡𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂 𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺? 𑀣𑁂𑀭𑁄 𑀆𑀳 𑁋 ‘‘𑀆𑀯𑀼𑀲𑁄, 𑀩𑀼𑀤𑁆𑀥𑀸 𑀦𑀸𑀫 𑀧𑀸𑀭𑀸𑀚𑀺𑀓𑀁 ¶ 𑀧𑀜𑁆𑀜𑀧𑁂𑀦𑁆𑀢𑀸 𑀦 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀦𑀯𑀲𑁂𑀲𑀁𑀬𑁂𑀯 𑀓𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀫𑁂𑀯 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀮𑁄𑀓𑀯𑀚𑁆𑀚𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀢𑀲𑁆𑀫𑀸 𑀬𑀤𑀺 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀁 𑀪𑀯𑁂𑀬𑁆𑀬, 𑀧𑀜𑁆𑀜𑀧𑁂𑀬𑁆𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀧𑀦𑁂𑀢𑁆𑀣 𑀦 𑀤𑀺𑀲𑁆𑀲𑀢𑀺, 𑀣𑀼𑀮𑁆𑀮𑀘𑁆𑀘𑀬𑀫𑁂𑀯 𑀤𑀺𑀲𑁆𑀲𑀢𑀻’’𑀢𑀺.

𑀅𑀧𑀺𑀘 𑀫𑀢𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 𑀪𑀕𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑁂 𑀞𑀧𑁂𑀲𑀺 ‘‘𑀢𑀢𑁄 𑀧𑀭𑀁 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀢𑀼𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀧𑀜𑁆𑀜𑀧𑁂𑀦𑁆𑀢𑁄 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑁂 𑀞𑀧𑁂𑀲𑀺 ‘‘𑀢𑀢𑁄 𑀧𑀭𑀁 𑀣𑀼𑀮𑁆𑀮𑀘𑁆𑀘𑀬𑀁 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀢𑀼𑀦𑁆𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀸𑀬𑀺𑀢𑀸𑀔𑀸𑀬𑀺𑀢𑀜𑁆𑀘 𑀦𑀸𑀫𑁂𑀢𑀁 𑀫𑀢𑀲𑀭𑀻𑀭𑀲𑁆𑀫𑀺𑀁𑀬𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀚𑀻𑀯𑀫𑀸𑀦𑁂. 𑀚𑀻𑀯𑀫𑀸𑀦𑁂 𑀳𑀺 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀺 𑀙𑀯𑀺𑀫𑀁𑀲𑁂 𑀯𑀸 𑀦𑁆𑀳𑀸𑀭𑀼𑀫𑁆𑀳𑀺 ¶ 𑀯𑀸 𑀲𑀢𑀺 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀺. 𑀬𑀤𑀺𑀧𑀺 𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀔𑀸𑀬𑀺𑀢𑀁 𑀙𑀯𑀺𑀘𑀫𑁆𑀫𑀁 𑀦𑀢𑁆𑀣𑀺, 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀯𑁂𑀲𑀦𑀁 𑀚𑀸𑀬𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀦 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀢𑀘𑁆𑀙𑁂𑀢𑁆𑀯𑀸 𑀉𑀧𑁆𑀧𑀸𑀝𑀺𑀢𑁂 𑀯𑀡𑀲𑀗𑁆𑀔𑁂𑀧𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀦𑀺𑀫𑀺𑀢𑁆𑀢𑀢𑁄 𑀧𑀢𑀺𑀢𑀸𑀬 𑀫𑀁𑀲𑀧𑁂𑀲𑀺𑀬𑀸 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀫𑀢𑀲𑀭𑀻𑀭𑁂 𑀧𑀦 𑀬𑀤𑀺𑀧𑀺 𑀲𑀩𑁆𑀩𑀁 𑀲𑀭𑀻𑀭𑀁 𑀔𑀸𑀬𑀺𑀢𑀁 𑀳𑁄𑀢𑀺, 𑀬𑀤𑀺𑀧𑀺 𑀅𑀓𑁆𑀔𑀸𑀬𑀺𑀢𑀁, 𑀢𑀬𑁄 𑀧𑀦 𑀫𑀕𑁆𑀕𑀸 𑀅𑀓𑁆𑀔𑀸𑀬𑀺𑀢𑀸, 𑀢𑁂𑀲𑀼 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 ¶ 𑀧𑀸𑀭𑀸𑀚𑀺𑀓𑀁. 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂 𑀘 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑁂 𑀘 𑀣𑀼𑀮𑁆𑀮𑀘𑁆𑀘𑀬𑀁.

𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀅𑀓𑁆𑀔𑀺𑀦𑀸𑀲𑀓𑀡𑁆𑀡𑀘𑁆𑀙𑀺𑀤𑁆𑀤𑀯𑀢𑁆𑀣𑀺𑀓𑁄𑀲𑁂𑀲𑀼 𑀲𑀢𑁆𑀣𑀓𑀸𑀤𑀻𑀳𑀺 𑀓𑀢𑀯𑀡𑁂 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀅𑀯𑀲𑁂𑀲𑀲𑀭𑀻𑀭𑁂 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁. 𑀫𑀢𑁂 𑀅𑀮𑁆𑀮𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑀁, 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑀁. 𑀬𑀤𑀸 𑀧𑀦 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀺 𑀓𑀼𑀣𑀺𑀢𑀁 𑀦𑀻𑀮𑀫𑀓𑁆𑀔𑀺𑀓𑀲𑀫𑀸𑀓𑀺𑀡𑁆𑀡𑀁 𑀓𑀺𑀫𑀺𑀓𑀼𑀮𑀲𑀫𑀸𑀓𑀼𑀮𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀕𑀴𑀺𑀢𑀧𑀼𑀩𑁆𑀩𑀓𑀼𑀡𑀧𑀪𑀸𑀯𑁂𑀦 𑀉𑀧𑀕𑀦𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁, 𑀢𑀤𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀜𑁆𑀘 𑀯𑀺𑀚𑀳𑀢𑀺; 𑀢𑀸𑀤𑀺𑀲𑁂 𑀲𑀭𑀻𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀓𑁆𑀓𑀫𑀢𑁄 𑀤𑀼𑀓𑁆𑀓𑀝𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀳𑀢𑁆𑀣𑀺-𑀅𑀲𑁆𑀲-𑀕𑁄𑀡-𑀕𑀤𑁆𑀭𑀪-𑀑𑀝𑁆𑀞𑀫𑀳𑀺𑀁𑀲𑀸𑀤𑀻𑀦𑀁 𑀦𑀸𑀲𑀸𑀬 𑀣𑀼𑀮𑁆𑀮𑀘𑁆𑀘𑀬𑀁. 𑀯𑀢𑁆𑀣𑀺𑀓𑁄𑀲𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼 𑀤𑀼𑀓𑁆𑀓𑀝𑀁, 𑀅𑀯𑀲𑁂𑀲𑀲𑀭𑀻𑀭𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀫𑀢𑀸𑀦𑀁 𑀅𑀮𑁆𑀮𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑀁, 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑀁.

𑀓𑀼𑀣𑀺𑀢𑀓𑀼𑀡𑀧𑁂 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲 𑀯𑀢𑁆𑀣𑀺𑀓𑁄𑀲𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀤𑀼𑀓𑁆𑀓𑀝𑀁. 𑀫𑁂𑀣𑀼𑀦𑀭𑀸𑀕𑁂𑀦 ¶ 𑀇𑀢𑁆𑀣𑀺𑀬𑀸 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦 𑀙𑀼𑀧𑀢𑀺 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 ‘‘𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀓𑀡𑁆𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀕𑀻𑀯𑀸𑀬𑀧𑀺 𑀕𑀡𑁆𑀳𑀦𑁆𑀢𑀺, 𑀙𑁂𑀧𑁆𑀧𑀸𑀬𑀧𑀺 𑀕𑀡𑁆𑀳𑀦𑁆𑀢𑀺, 𑀧𑀺𑀝𑁆𑀞𑀺𑀫𑁆𑀧𑀺 𑀅𑀪𑀺𑀭𑀼𑀳𑀦𑁆𑀢𑀺, 𑀭𑀢𑁆𑀢𑀘𑀺𑀢𑁆𑀢𑀸𑀧𑀺 𑀅𑀗𑁆𑀕𑀚𑀸𑀢𑀁 𑀙𑀼𑀧𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁫𑁨) 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 ¶ (𑀫𑀳𑀸𑀯. 𑁨𑁫𑁨). 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀁𑀲𑀦𑁆𑀤𑀺𑀢𑁆𑀯𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀢𑀣𑀸 𑀕𑀳𑁂𑀢𑀩𑁆𑀩𑀁. 𑀓𑀣𑀜𑁆𑀘 ¶ 𑀦 𑀯𑀺𑀭𑀼𑀚𑁆𑀛𑀢𑀺? 𑀬𑀁 𑀢𑀸𑀯 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦 𑀙𑀼𑀧𑀢𑀻’’𑀢𑀺. 𑀢𑀢𑁆𑀭 𑀓𑀺𑀭 𑀦𑀺𑀫𑀺𑀢𑁆𑀢𑀫𑀼𑀔𑀁 𑀫𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. ‘‘𑀫𑁂𑀣𑀼𑀦𑀭𑀸𑀕𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀧𑀺 𑀅𑀬𑀫𑁂𑀯 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀧𑀓𑀢𑀺𑀫𑀼𑀔𑁂𑀦 𑀫𑁂𑀣𑀼𑀦𑀼𑀧𑀓𑁆𑀓𑀫𑁄 𑀳𑁄𑀢𑀺. 𑀔𑀦𑁆𑀥𑀓𑁂𑀧𑀺 𑀬𑁂 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀦𑁆𑀢𑀸 𑀫𑁂𑀣𑀼𑀦𑀭𑀸𑀕𑁂𑀦 𑀅𑀗𑁆𑀕𑀚𑀸𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀁𑀲𑀼, 𑀢𑁂 𑀲𑀦𑁆𑀥𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑀣𑀸 𑀳𑀺 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀓𑁂𑀘𑀺 𑀧𑀦𑀸𑀳𑀼 ‘‘𑀔𑀦𑁆𑀥𑀓𑁂𑀧𑀺 𑀫𑀼𑀔𑁂𑀦𑁂𑀯 𑀙𑀼𑀧𑀦𑀁 𑀲𑀦𑁆𑀥𑀸𑀬 𑀑𑀴𑀸𑀭𑀺𑀓𑀢𑁆𑀢𑀸 𑀓𑀫𑁆𑀫𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀁 𑀲𑀦𑁆𑀥𑀸𑀬𑀪𑀸𑀲𑀺𑀢𑀁 𑀕𑀳𑁂𑀢𑁆𑀯𑀸𑀯 𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦 𑀙𑀼𑀧𑀢𑀺 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀪𑁄𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼 𑀬𑁄 𑀬𑀼𑀢𑁆𑀢𑀢𑀭𑁄 𑀲𑁄 𑀕𑀳𑁂𑀢𑀩𑁆𑀩𑁄. 𑀯𑀺𑀦𑀬𑀜𑁆𑀜𑀽 𑀧𑀦 𑀧𑀼𑀭𑀺𑀫𑀁 𑀧𑀲𑀁𑀲𑀦𑁆𑀢𑀺. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀧𑀦 𑀧𑀓𑀢𑀺𑀫𑀼𑀔𑁂𑀦 𑀯𑀸 𑀦𑀺𑀫𑀺𑀢𑁆𑀢𑀫𑀼𑀔𑁂𑀦 𑀯𑀸 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀙𑀼𑀧𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀧𑀲𑁆𑀲𑀸𑀯𑀫𑀕𑁆𑀕𑀁 𑀦𑀺𑀫𑀺𑀢𑁆𑀢𑀫𑀼𑀔𑁂𑀦 𑀙𑀼𑀧𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀣𑀼𑀮𑁆𑀮𑀘𑁆𑀘𑀬𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀤𑀼𑀓𑁆𑀓𑀝𑀦𑁆𑀢𑀺.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀣𑀸

𑁬𑁧-𑁬𑁨. 𑀏𑀯𑀁 𑀪𑀕𑀯𑀸 𑀧𑀝𑀺𑀧𑀦𑁆𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀓𑁆𑀔𑀡𑀢𑁆𑀣𑀁 𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀬𑁂 𑀅𑀦𑀸𑀕𑀢𑁂 𑀧𑀸𑀧𑀪𑀺𑀓𑁆𑀔𑀽 ‘𑀲𑀦𑁆𑀣𑀢𑀁 𑀇𑀫𑀁 𑀦 𑀓𑀺𑀜𑁆𑀘𑀺 𑀉𑀧𑀸𑀤𑀺𑀦𑁆𑀦𑀓𑀁 𑀉𑀧𑀸𑀤𑀺𑀦𑁆𑀦𑀓𑁂𑀦 𑀨𑀼𑀲𑀢𑀺, 𑀓𑁄 𑀏𑀢𑁆𑀣 𑀤𑁄𑀲𑁄’𑀢𑀺 𑀲𑀜𑁆𑀘𑀺𑀘𑁆𑀘 𑀮𑁂𑀲𑀁 𑀑𑀟𑁆𑀟𑁂𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀏𑀯 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀢𑁂𑀲𑀼 𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑁂𑀲𑀼 𑀏𑀓𑀫𑁂𑀓𑀁 𑀘𑀢𑀼𑀓𑁆𑀓𑀁 𑀘𑀢𑀽𑀳𑀺 𑀲𑀦𑁆𑀣𑀢𑀸𑀤𑀺𑀪𑁂𑀤𑁂𑀳𑀺 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀲𑀦𑁆𑀣𑀢𑀸𑀬 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑁂𑀦 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀫𑀼𑀔𑁂𑀦 ¶ 𑀅𑀲𑀦𑁆𑀣𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀻𑀢𑀺 𑀇𑀫𑀺𑀦𑀸 ¶ 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀦𑁆𑀣𑀢𑀸 𑀦𑀸𑀫 𑀬𑀲𑁆𑀲𑀸 𑀢𑀻𑀲𑀼 ¶ 𑀫𑀕𑁆𑀕𑁂𑀲𑀼 𑀬𑁄 𑀓𑁄𑀘𑀺 𑀫𑀕𑁆𑀕𑁄 𑀧𑀮𑀺𑀯𑁂𑀞𑁂𑀢𑁆𑀯𑀸 𑀯𑀸 𑀅𑀦𑁆𑀢𑁄 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀯𑀸𑀓𑀧𑀝𑁆𑀝𑁂𑀦 𑀯𑀸 𑀘𑀫𑁆𑀫𑁂𑀦 𑀯𑀸 𑀢𑀺𑀧𑀼𑀲𑀻𑀲𑀸𑀤𑀻𑀦𑀁 𑀧𑀝𑁆𑀝𑁂𑀦 𑀯𑀸 𑀧𑀝𑀺𑀘𑁆𑀙𑀦𑁆𑀦𑁄. 𑀲𑀦𑁆𑀣𑀢𑁄 𑀦𑀸𑀫 𑀬𑀲𑁆𑀲 𑀅𑀗𑁆𑀕𑀚𑀸𑀢𑀁 𑀢𑁂𑀲𑀁𑀬𑁂𑀯 𑀯𑀢𑁆𑀣𑀸𑀤𑀻𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀢𑁆𑀣 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑀺𑀬𑀢𑀼, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀉𑀧𑀸𑀤𑀺𑀦𑁆𑀦𑀓𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁, 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀉𑀧𑀸𑀤𑀺𑀦𑁆𑀦𑀓𑀁, 𑀲𑀘𑁂 𑀬𑀢𑁆𑀢𑀓𑁂 𑀧𑀯𑀺𑀝𑁆𑀞𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀢𑀓𑀁 𑀧𑀯𑀺𑀲𑀢𑀺, 𑀲𑀩𑁆𑀩𑀢𑁆𑀣 𑀲𑀸𑀤𑀺𑀬𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑀁; 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀲𑀘𑁂 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀔𑀸𑀡𑀼𑀁 𑀓𑀢𑁆𑀯𑀸 𑀲𑀦𑁆𑀣𑀢𑀁, 𑀔𑀸𑀡𑀼𑀁 𑀖𑀝𑁆𑀝𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀔𑀸𑀡𑀼𑀁 𑀓𑀢𑁆𑀯𑀸 𑀲𑀦𑁆𑀣𑀢𑀁, 𑀔𑀸𑀡𑀼𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀉𑀪𑀬𑀁 𑀔𑀸𑀡𑀼𑀁 𑀓𑀢𑁆𑀯𑀸 𑀲𑀦𑁆𑀣𑀢𑀁, 𑀔𑀸𑀡𑀼𑀦𑀸 𑀔𑀸𑀡𑀼𑀁 𑀖𑀝𑁆𑀝𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀯𑁂𑀴𑀼𑀦𑀴𑀧𑀩𑁆𑀩𑀸𑀤𑀻𑀦𑀁 𑀓𑀺𑀜𑁆𑀘𑀺 𑀧𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑀁 𑀘𑁂𑀧𑀺 𑀨𑀼𑀲𑀦𑁆𑀢𑁄 𑀢𑀺𑀮𑀨𑀮𑀫𑀢𑁆𑀢𑀁 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀧𑀭𑀺𑀪𑀸𑀕𑀁 𑀘𑁂𑀧𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀓𑀧𑀲𑁆𑀲𑀁 𑀘𑁂𑀧𑀺 𑀨𑀼𑀲𑀦𑁆𑀢𑁄 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀘𑀢𑁆𑀢𑀸𑀭𑀺𑀧𑀺 𑀧𑀲𑁆𑀲𑀸𑀦𑀺 𑀅𑀨𑀼𑀲𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀢𑀲𑁆𑀲 𑀢𑀮𑀁 𑀘𑁂𑀧𑀺 𑀨𑀼𑀲𑀢𑀺, 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀧𑀲𑁆𑀲𑁂𑀲𑀼 𑀯𑀸 𑀢𑀮𑁂 𑀯𑀸 𑀅𑀨𑀼𑀲𑀦𑁆𑀢𑁄 𑀆𑀓𑀸𑀲𑀕𑀢𑀫𑁂𑀯 𑀓𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀢𑀺, 𑀤𑀼𑀓𑁆𑀓𑀝𑀁. 𑀩𑀳𑀺𑀤𑁆𑀥𑀸 𑀔𑀸𑀡𑀼𑀓𑁂 𑀨𑀼𑀲𑀢𑀺 𑀤𑀼𑀓𑁆𑀓𑀝𑀫𑁂𑀯. 𑀬𑀣𑀸 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀘𑀢𑀼𑀓𑁆𑀓𑀪𑁂𑀤𑀯𑀡𑁆𑀡𑀦𑀸

𑁬𑁩-𑁬𑁪. 𑀏𑀯𑀁 𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀺𑀓𑁂 𑀪𑀺𑀓𑁆𑀔𑀼𑀲𑁆𑀲 𑀏𑀯 𑀲𑀦𑁆𑀢𑀺𑀓𑁂 𑀆𑀦𑁂𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀼𑀫𑁆𑀧𑀺 𑀢𑀸𑀲𑀁 𑀲𑀦𑁆𑀢𑀺𑀓𑁂 𑀆𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀧𑀼𑀦𑀧𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀯𑀲𑁂𑀦 𑀘𑀢𑀼𑀓𑁆𑀓𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀘𑀢𑀼𑀓𑁆𑀓𑀪𑁂𑀤𑀓𑀣𑀸

𑁬𑁫. 𑀬𑀲𑁆𑀫𑀸 ¶ ¶ ¶ 𑀧𑀦 𑀦 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀏𑀯 𑀏𑀯𑀁 𑀓𑀭𑁄𑀦𑁆𑀢𑀺, 𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸𑀤𑀬𑁄𑀧𑀺 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀸𑀚𑀸𑀦𑁄 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸. 𑀢𑁂 𑀘 𑀲𑀬𑀁 𑀆𑀦𑁂𑀦𑁆𑀢𑀸𑀧𑀺 𑀅𑀜𑁆𑀜𑁂𑀳𑀺 𑀆𑀡𑀸𑀧𑁂𑀦𑁆𑀢𑀸𑀧𑀺 𑀆𑀦𑁂𑀦𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑁄𑀭𑀸 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀘𑁄𑀭𑀧𑀘𑁆𑀘𑀢𑁆𑀣𑀺𑀓𑀸. 𑀥𑀼𑀢𑁆𑀢𑀸𑀢𑀺 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀔𑀺𑀟𑁆𑀟𑀸𑀧𑀲𑀼𑀢𑀸 𑀦𑀸𑀕𑀭𑀺𑀓𑀓𑁂𑀭𑀸𑀝𑀺𑀬𑀧𑀼𑀭𑀺𑀲𑀸, 𑀇𑀢𑁆𑀣𑀺𑀥𑀼𑀢𑁆𑀢𑀲𑀼𑀭𑀸𑀥𑀼𑀢𑁆𑀢𑀸𑀤𑀬𑁄 𑀯𑀸; 𑀥𑀼𑀢𑁆𑀢𑀸 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀥𑀼𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸. 𑀕𑀦𑁆𑀥𑀦𑁆𑀢𑀺 𑀳𑀤𑀬𑀁 𑀯𑀼𑀘𑁆𑀘𑀢𑀺, 𑀢𑀁 𑀉𑀧𑁆𑀧𑀸𑀝𑁂𑀦𑁆𑀢𑀻𑀢𑀺 𑀉𑀧𑁆𑀧𑀮𑀕𑀦𑁆𑀥𑀸, 𑀉𑀧𑁆𑀧𑀮𑀕𑀦𑁆𑀥𑀸 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀉𑀧𑁆𑀧𑀮𑀕𑀦𑁆𑀥𑀧𑀘𑁆𑀘𑀢𑁆𑀣𑀺𑀓𑀸. 𑀏𑀢𑁂 𑀓𑀺𑀭 𑀦 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀦𑁆𑀢𑀺, 𑀧𑀦𑁆𑀣𑀖𑀸𑀢𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀺. 𑀢𑁂 𑀓𑀫𑁆𑀫𑀲𑀺𑀤𑁆𑀥𑀺𑀁 𑀧𑀢𑁆𑀣𑀬𑀫𑀸𑀦𑀸 𑀤𑁂𑀯𑀢𑀸𑀦𑀁 𑀆𑀬𑀸𑀘𑁂𑀢𑁆𑀯𑀸 𑀢𑀸𑀲𑀁 𑀩𑀮𑀺𑀓𑀫𑁆𑀫𑀢𑁆𑀣𑀁 𑀫𑀦𑀼𑀲𑁆𑀲𑀸𑀦𑀁 𑀳𑀤𑀬𑀁 𑀉𑀧𑁆𑀧𑀸𑀝𑁂𑀦𑁆𑀢𑀺. 𑀲𑀩𑁆𑀩𑀓𑀸𑀮𑁂 𑀘 𑀫𑀦𑀼𑀲𑁆𑀲𑀸 𑀤𑀼𑀮𑁆𑀮𑀪𑀸. 𑀪𑀺𑀓𑁆𑀔𑀽 𑀧𑀦 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸 𑀲𑀼𑀮𑀪𑀸 𑀳𑁄𑀦𑁆𑀢𑀺. 𑀢𑁂 𑀲𑀻𑀮𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 ‘‘𑀲𑀻𑀮𑀯𑀢𑁄 𑀯𑀥𑁄 𑀦𑀸𑀫 𑀪𑀸𑀭𑀺𑀬𑁄 𑀳𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀲𑁆𑀲 𑀲𑀻𑀮𑀯𑀺𑀦𑀸𑀲𑀦𑀢𑁆𑀣𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀺𑀓𑁂 𑀯𑀸 𑀆𑀦𑁂𑀦𑁆𑀢𑀺; 𑀢𑀁 𑀯𑀸 𑀢𑀢𑁆𑀣 𑀦𑁂𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀇𑀫𑁂𑀲𑀼 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀸𑀴𑀺𑀬𑀁 𑀧𑀦 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺.

𑀲𑀩𑁆𑀩𑀸𑀓𑀸𑀭𑁂𑀦 𑀘𑀢𑀼𑀓𑁆𑀓𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁬𑁬. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺, 𑀏𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 ‘‘𑀫𑀕𑁆𑀕𑁂𑀦 𑀫𑀕𑁆𑀕’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀕𑁆𑀕𑁂𑀦 𑀫𑀕𑁆𑀕𑀦𑁆𑀢𑀺 𑀇𑀢𑁆𑀣𑀺𑀬𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑁂𑀦 𑀫𑀕𑁆𑀕𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑀺 𑀅𑀣 𑀯𑀸 𑀲𑀫𑁆𑀪𑀺𑀦𑁆𑀦𑁂𑀲𑀼 𑀤𑁆𑀯𑀻𑀲𑀼 𑀫𑀕𑁆𑀕𑁂𑀲𑀼 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀯𑀘𑁆𑀘𑀫𑀕𑁆𑀕𑀁 𑀯𑀘𑁆𑀘𑀫𑀕𑁆𑀕𑁂𑀦 𑀯𑀸 𑀧𑀲𑁆𑀲𑀸𑀯𑀫𑀕𑁆𑀕𑀁 𑀧𑀯𑁂𑀲𑁂𑀢𑀺. 𑀫𑀕𑁆𑀕𑁂𑀦 𑀅𑀫𑀕𑁆𑀕𑀦𑁆𑀢𑀺 𑀧𑀲𑁆𑀲𑀸𑀯𑀸𑀤𑀺𑀫𑀕𑁆𑀕𑁂𑀦 𑀧𑀯𑁂𑀲𑁂𑀢𑁆𑀯𑀸 𑀢𑀲𑁆𑀲 𑀲𑀸𑀫𑀦𑁆𑀢𑀸 𑀯𑀡𑁂𑀦 𑀦𑀻𑀳𑀭𑀢𑀺. 𑀅𑀫𑀕𑁆𑀕𑁂𑀦 𑀫𑀕𑁆𑀕𑀦𑁆𑀢𑀺 𑀫𑀕𑁆𑀕𑀲𑀸𑀫𑀦𑁆𑀢𑁂𑀦 𑀯𑀡𑁂𑀦 ¶ 𑀧𑀯𑁂𑀲𑁂𑀢𑁆𑀯𑀸 𑀫𑀕𑁆𑀕𑁂𑀦 𑀦𑀻𑀳𑀭𑀢𑀺. 𑀅𑀫𑀕𑁆𑀕𑁂𑀦 𑀅𑀫𑀕𑁆𑀕𑀦𑁆𑀢𑀺 𑀤𑁆𑀯𑀻𑀲𑀼 𑀲𑀫𑁆𑀪𑀺𑀦𑁆𑀦𑀯𑀡𑁂𑀲𑀼 𑀏𑀓𑁂𑀦 𑀯𑀡𑁂𑀦 𑀧𑀯𑁂𑀲𑁂𑀢𑁆𑀯𑀸 𑀤𑀼𑀢𑀺𑀬𑁂𑀦 𑀦𑀻𑀳𑀭𑀢𑀺. 𑀇𑀫𑀲𑁆𑀲 ¶ 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀡𑀲𑀗𑁆𑀔𑁂𑀧𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀬𑀁 𑀧𑀭𑀢𑁄 𑀯𑀓𑁆𑀔𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺, 𑀢𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 ¶ ‘‘𑀪𑀺𑀓𑁆𑀔𑀼 𑀲𑀼𑀢𑁆𑀢𑀪𑀺𑀓𑁆𑀔𑀼𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁄 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺 𑀲𑁄 ‘‘𑀲𑀼𑀢𑁆𑀢𑀫𑁆𑀳𑀺 𑀫𑀬𑀺 𑀏𑀲𑁄 𑀯𑀺𑀧𑁆𑀧𑀝𑀺𑀧𑀚𑁆𑀚𑀺, 𑀦𑀸𑀳𑀁 𑀚𑀸𑀦𑀸𑀫𑀻’’𑀢𑀺 𑀦 𑀫𑀼𑀘𑁆𑀘𑀢𑀺. 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸𑀢𑀺 𑀘𑁂𑀢𑁆𑀣 𑀤𑁆𑀯𑁂𑀧𑀺 𑀮𑀺𑀗𑁆𑀕𑀦𑀸𑀲𑀦𑁂𑀦 𑀦𑀸𑀲𑁂𑀢𑀩𑁆𑀩𑀸. 𑀢𑀢𑁆𑀭 𑀤𑀽𑀲𑀓𑀲𑁆𑀲 𑀧𑀝𑀺𑀜𑁆𑀜𑀸𑀓𑀭𑀡𑀁 𑀦𑀢𑁆𑀣𑀺, 𑀤𑀽𑀲𑀺𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀢𑀩𑁆𑀩𑁄. 𑀲𑀘𑁂 𑀦 𑀲𑀸𑀤𑀺𑀬𑀢𑀺, 𑀦 𑀦𑀸𑀲𑁂𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑀸𑀫𑀡𑁂𑀭𑀯𑀸𑀭𑁂𑀧𑀺.

𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀢𑀁 𑀢𑀁 𑀆𑀧𑀢𑁆𑀢𑀺𑀜𑁆𑀘 𑀅𑀦𑀸𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑀸𑀦𑀦𑁆𑀢𑁄 𑀦𑀸𑀫 𑀬𑁄 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄 𑀧𑀭𑁂𑀦 𑀓𑀢𑀁 𑀉𑀧𑀓𑁆𑀓𑀫𑀫𑁆𑀧𑀺 𑀦 𑀚𑀸𑀦𑀸𑀢𑀺 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀪𑀺𑀓𑁆𑀔𑀼 𑀯𑀺𑀬. 𑀏𑀯𑀭𑀽𑀧𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘‘𑀦𑀸𑀳𑀁 𑀪𑀕𑀯𑀸 𑀚𑀸𑀦𑀸𑀫𑀻’𑀢𑀺; ‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀚𑀸𑀦𑀦𑁆𑀢𑀲𑁆𑀲𑀸’’’𑀢𑀺 (𑀧𑀸𑀭𑀸. 𑁭𑁫). 𑀅𑀲𑀸𑀤𑀺𑀬𑀦𑁆𑀢𑁄 𑀦𑀸𑀫 𑀬𑁄 𑀚𑀸𑀦𑀺𑀢𑁆𑀯𑀸𑀧𑀺 𑀦 𑀲𑀸𑀤𑀺𑀬𑀢𑀺, 𑀢𑀢𑁆𑀣𑁂𑀯 𑀲𑀳𑀲𑀸 𑀯𑀼𑀝𑁆𑀞𑀺𑀢𑀪𑀺𑀓𑁆𑀔𑀼 𑀯𑀺𑀬. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘‘𑀦𑀸𑀳𑀁 𑀪𑀕𑀯𑀸 𑀲𑀸𑀤𑀺𑀬𑀺’𑀦𑁆𑀢𑀺. ‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺.

𑀉𑀫𑁆𑀫𑀢𑁆𑀢𑀓𑁄 𑀦𑀸𑀫 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄. 𑀤𑀼𑀯𑀺𑀥𑀜𑁆𑀳𑀺 𑀧𑀺𑀢𑁆𑀢𑀁 𑁋 𑀩𑀤𑁆𑀥𑀧𑀺𑀢𑁆𑀢𑀁, 𑀅𑀩𑀤𑁆𑀥𑀧𑀺𑀢𑁆𑀢𑀜𑁆𑀘𑀸𑀢𑀺. 𑀢𑀢𑁆𑀣 𑀅𑀩𑀤𑁆𑀥𑀧𑀺𑀢𑁆𑀢𑀁 𑀮𑁄𑀳𑀺𑀢𑀁 𑀯𑀺𑀬 𑀲𑀩𑁆𑀩𑀗𑁆𑀕𑀕𑀢𑀁, 𑀢𑀫𑁆𑀳𑀺 𑀓𑀼𑀧𑀺𑀢𑁂 𑀲𑀢𑁆𑀢𑀸𑀦𑀁 𑀓𑀡𑁆𑀟𑀼𑀓𑀘𑁆𑀙𑀼𑀲𑀭𑀻𑀭𑀓𑀫𑁆𑀧𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬 𑀯𑀽𑀧𑀲𑀫𑀦𑁆𑀢𑀺. 𑀩𑀤𑁆𑀥𑀧𑀺𑀢𑁆𑀢𑀁 𑀧𑀦 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀁. 𑀢𑀫𑁆𑀳𑀺 𑀓𑀼𑀧𑀺𑀢𑁂 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀙𑀟𑁆𑀟𑁂𑀢𑁆𑀯𑀸 𑀅𑀲𑀸𑀭𑀼𑀧𑁆𑀧𑀸𑀘𑀸𑀭𑀁 𑀘𑀭𑀦𑁆𑀢𑀺. 𑀮𑀳𑀼𑀓𑀕𑀭𑀼𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀤𑁆𑀤𑀦𑁆𑀢𑀸𑀧𑀺 𑀦 𑀚𑀸𑀦𑀦𑁆𑀢𑀺. 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬𑀧𑀺 𑀅𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺. 𑀏𑀯𑀭𑀽𑀧𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀔𑀺𑀢𑁆𑀢𑀘𑀺𑀢𑁆𑀢𑁄 𑀦𑀸𑀫 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁄 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀼𑀘𑁆𑀘𑀢𑀺. 𑀬𑀓𑁆𑀔𑀸 𑀓𑀺𑀭 𑀪𑁂𑀭𑀯𑀸𑀦𑀺 𑀯𑀸 𑀆𑀭𑀫𑁆𑀫𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 ¶ 𑀳𑀤𑀬𑀭𑀽𑀧𑀁 𑀯𑀸 𑀫𑀤𑁆𑀤𑀦𑁆𑀢𑀸 𑀲𑀢𑁆𑀢𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑁂 𑀓𑀭𑁄𑀦𑁆𑀢𑀺. 𑀏𑀯𑀭𑀽𑀧𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀲𑀁 𑀧𑀦 𑀉𑀪𑀺𑀦𑁆𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀦𑀺𑀘𑁆𑀘𑀫𑁂𑀯 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺, 𑀧𑀓𑀢𑀺𑀲𑀜𑁆𑀜𑀁 𑀦 𑀮𑀪𑀢𑀺. 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 ¶ 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑀢𑀺𑀲𑀜𑁆𑀜𑀁 𑀧𑀝𑀺𑀮𑀪𑀢𑀻𑀢𑀺. 𑀇𑀥 𑀧𑀦 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀯𑀸 𑀳𑁄𑀢𑀼 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀸, 𑀬𑁄 𑀲𑀩𑁆𑀩𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀅𑀕𑁆𑀕𑀺𑀫𑁆𑀧𑀺 𑀲𑀼𑀯𑀡𑁆𑀡𑀫𑁆𑀧𑀺 𑀕𑀽𑀣𑀫𑁆𑀧𑀺 𑀘𑀦𑁆𑀤𑀦𑀫𑁆𑀧𑀺 𑀏𑀓𑀲𑀤𑀺𑀲𑀁 𑀫𑀤𑁆𑀤𑀦𑁆𑀢𑁄𑀯 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀜𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺𑀬𑁂𑀯.

𑀯𑁂𑀤𑀦𑀸𑀝𑁆𑀝𑁄 ¶ 𑀦𑀸𑀫 𑀬𑁄 𑀅𑀥𑀺𑀫𑀢𑁆𑀢𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀆𑀢𑀼𑀭𑁄 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀏𑀯𑀭𑀽𑀧𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀆𑀤𑀺𑀓𑀫𑁆𑀫𑀺𑀓𑁄 𑀦𑀸𑀫 𑀬𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀆𑀤𑀺𑀪𑀽𑀢𑁄. 𑀇𑀥 𑀧𑀦 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀫𑀓𑁆𑀓𑀝𑀻𑀲𑀫𑀡𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸

𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 𑀓𑁄𑀲𑀮𑁆𑀮𑀢𑁆𑀣𑀁 𑀇𑀤𑀁 𑀧𑀓𑀺𑀡𑁆𑀡𑀓𑀁𑀯𑁂𑀤𑀺𑀢𑀩𑁆𑀩𑀁 𑁋

‘‘𑀲𑀫𑀼𑀝𑁆𑀞𑀸𑀦𑀜𑁆𑀘 𑀓𑀺𑀭𑀺𑀬𑀸, 𑀅𑀣𑁄 𑀲𑀜𑁆𑀜𑀸 𑀲𑀘𑀺𑀢𑁆𑀢𑀓𑀁;

𑀮𑁄𑀓𑀯𑀚𑁆𑀚𑀜𑁆𑀘 𑀓𑀫𑁆𑀫𑀜𑁆𑀘, 𑀓𑀼𑀲𑀮𑀁 𑀯𑁂𑀤𑀦𑀸𑀬 𑀘𑀸’’𑀢𑀺.

𑀢𑀢𑁆𑀣 ‘‘𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀙 𑀲𑀺𑀓𑁆𑀔𑀸𑀧𑀤𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑀸𑀦𑀺 𑀧𑀭𑀺𑀯𑀸𑀭𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀫𑀸𑀲𑀢𑁄 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 𑁋 𑀅𑀢𑁆𑀣𑀺 𑀙𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀥𑀼𑀭𑀦𑀺𑀓𑁆𑀔𑁂𑀧𑀸𑀤𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺.

𑀢𑀢𑁆𑀭𑀸𑀧𑀺 𑀓𑀺𑀜𑁆𑀘𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀜𑁆𑀘𑀺 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀜𑁆𑀘𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀜𑁆𑀘𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄, 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀜𑁆𑀘𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺.

𑀢𑀢𑁆𑀭𑀸𑀧𑀺 𑀅𑀢𑁆𑀣𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀢𑁆𑀣𑀺 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀢𑀢𑁆𑀣 𑀬𑀁 𑀘𑀺𑀢𑁆𑀢𑀗𑁆𑀕𑀁 𑀮𑀪𑀢𑀺𑀬𑁂𑀯, 𑀢𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁; 𑀇𑀢𑀭𑀁 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁.

𑀧𑀼𑀦 ¶ 𑀅𑀢𑁆𑀣𑀺 𑀲𑀘𑀺𑀢𑁆𑀢𑀓𑀁, 𑀅𑀢𑁆𑀣𑀺 𑀅𑀘𑀺𑀢𑁆𑀢𑀓𑀁. 𑀬𑀁 𑀲𑀳𑁂𑀯 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺, 𑀢𑀁 𑀲𑀘𑀺𑀢𑁆𑀢𑀓𑀁; 𑀬𑀁 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺, 𑀢𑀁 𑀅𑀘𑀺𑀢𑁆𑀢𑀓𑀁 ¶ . 𑀢𑀁 𑀲𑀩𑁆𑀩𑀫𑁆𑀧𑀺 𑀮𑁄𑀓𑀯𑀚𑁆𑀚𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀤𑀼𑀯𑀺𑀥𑀁. 𑀢𑁂𑀲𑀁 𑀮𑀓𑁆𑀔𑀡𑀁 𑀯𑀼𑀢𑁆𑀢𑀫𑁂𑀯.

𑀓𑀫𑁆𑀫𑀓𑀼𑀲𑀮𑀯𑁂𑀤𑀦𑀸𑀯𑀲𑁂𑀦𑀸𑀧𑀺 ¶ 𑀘𑁂𑀢𑁆𑀣 𑀅𑀢𑁆𑀣𑀺 𑀲𑀺𑀓𑁆𑀔𑀸𑀧𑀤𑀁 𑀓𑀸𑀬𑀓𑀫𑁆𑀫𑀁, 𑀅𑀢𑁆𑀣𑀺 𑀯𑀘𑀻𑀓𑀫𑁆𑀫𑀁. 𑀢𑀢𑁆𑀣 𑀬𑀁 𑀓𑀸𑀬𑀤𑁆𑀯𑀸𑀭𑀺𑀓𑀁, 𑀢𑀁 𑀓𑀸𑀬𑀓𑀫𑁆𑀫𑀁; 𑀬𑀁 𑀯𑀘𑀻𑀤𑁆𑀯𑀸𑀭𑀺𑀓𑀁, 𑀢𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀁. 𑀤𑁆𑀯𑀢𑁆𑀢𑀺𑀁𑀲𑁂𑀯 𑀳𑀺 𑀆𑀧𑀢𑁆𑀢𑀺𑀲𑀫𑀉𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀦𑀺 𑁋 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀸𑀦𑀺, 𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀓𑀼𑀲𑀮𑀢𑁄 𑀘 𑀓𑀺𑀭𑀺𑀬𑀢𑁄 𑀘 𑀤𑁆𑀯𑁂 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀻𑀢𑀺. 𑀢𑁂𑀲𑀼 𑀬𑀁 𑀓𑀼𑀲𑀮𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺, 𑀢𑀁 𑀓𑀼𑀲𑀮𑀁; 𑀇𑀢𑀭𑁂𑀳𑀺 𑀇𑀢𑀭𑀁. 𑀅𑀢𑁆𑀣𑀺 𑀘 𑀲𑀺𑀓𑁆𑀔𑀸𑀧𑀤𑀁 𑀢𑀺𑀯𑁂𑀤𑀦𑀁, 𑀅𑀢𑁆𑀣𑀺 𑀤𑁆𑀯𑀺𑀯𑁂𑀤𑀦𑀁, 𑀅𑀢𑁆𑀣𑀺 𑀏𑀓𑀯𑁂𑀤𑀦𑀁. 𑀢𑀢𑁆𑀣 𑀬𑀁 𑀆𑀧𑀚𑁆𑀚𑀦𑁆𑀢𑁄 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀜𑁆𑀜𑀢𑀭𑀯𑁂𑀤𑀦𑀸𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺, 𑀢𑀁 𑀢𑀺𑀯𑁂𑀤𑀦𑀁; 𑀬𑀁 𑀆𑀧𑀚𑁆𑀚𑀦𑁆𑀢𑁄 𑀲𑀼𑀔𑀲𑀫𑀗𑁆𑀕𑀻 𑀯𑀸 𑀉𑀧𑁂𑀓𑁆𑀔𑀸𑀲𑀫𑀗𑁆𑀕𑀻 𑀯𑀸 𑀆𑀧𑀚𑁆𑀚𑀢𑀺, 𑀢𑀁 𑀤𑁆𑀯𑀺𑀯𑁂𑀤𑀦𑀁; 𑀬𑀁 𑀆𑀧𑀚𑁆𑀚𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻𑀬𑁂𑀯 𑀆𑀧𑀚𑁆𑀚𑀢𑀺, 𑀢𑀁 𑀏𑀓𑀯𑁂𑀤𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑁋

‘‘𑀲𑀫𑀼𑀝𑁆𑀞𑀸𑀦𑀜𑁆𑀘 𑀓𑀺𑀭𑀺𑀬𑀸, 𑀅𑀣𑁄 𑀲𑀜𑁆𑀜𑀸 𑀲𑀘𑀺𑀢𑁆𑀢𑀓𑀁;

𑀮𑁄𑀓𑀯𑀚𑁆𑀚𑀜𑁆𑀘 𑀓𑀫𑁆𑀫𑀜𑁆𑀘, 𑀓𑀼𑀲𑀮𑀁 𑀯𑁂𑀤𑀦𑀸𑀬 𑀘𑀸’’𑀢𑀺.

𑀇𑀫𑀁 𑀧𑀓𑀺𑀡𑁆𑀡𑀓𑀁 𑀯𑀺𑀤𑀺𑀢𑁆𑀯𑀸 𑀢𑁂𑀲𑀼 𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀼𑀝𑁆𑀞𑀸𑀦𑀢𑁄 𑀏𑀓𑀲𑀫𑀼𑀝𑁆𑀞𑀸𑀦𑀁. 𑀅𑀗𑁆𑀕𑀯𑀲𑁂𑀦 𑀤𑀼𑀓𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀜𑁆𑀘 𑀓𑀭𑁄𑀦𑁆𑀢𑁄𑀬𑁂𑀯 𑀳𑀺 𑀏𑀢𑀁 𑀆𑀧𑀚𑁆𑀚𑀢𑀺. 𑀫𑁂𑀣𑀼𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀓𑀸𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀫𑁂𑀣𑀼𑀦𑀘𑀺𑀢𑁆𑀢𑁂𑀦𑁂𑀯 𑀦𑀁 𑀆𑀧𑀚𑁆𑀚𑀢𑀺, 𑀦 𑀯𑀺𑀦𑀸 𑀘𑀺𑀢𑁆𑀢𑁂𑀦𑀸𑀢𑀺 𑀲𑀘𑀺𑀢𑁆𑀢𑀓𑀁. 𑀭𑀸𑀕𑀯𑀲𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀮𑁄𑀓𑀯𑀚𑁆𑀚𑀁. 𑀓𑀸𑀬𑀤𑁆𑀯𑀸𑀭𑁂𑀦𑁂𑀯 𑀲𑀫𑀼𑀝𑁆𑀞𑀸𑀦𑀢𑁄 𑀓𑀸𑀬𑀓𑀫𑁆𑀫𑀁. 𑀘𑀺𑀢𑁆𑀢𑀁 𑀧𑀦𑁂𑀢𑁆𑀣 𑀅𑀗𑁆𑀕𑀫𑀢𑁆𑀢𑀁 𑀳𑁄𑀢𑀺, 𑀦 𑀢𑀲𑁆𑀲 𑀯𑀲𑁂𑀦 𑀓𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺. 𑀮𑁄𑀪𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀲𑀼𑀔𑀲𑀫𑀗𑁆𑀕𑀻 𑀯𑀸 𑀉𑀧𑁂𑀓𑁆𑀔𑀸𑀲𑀫𑀗𑁆𑀕𑀻 𑀯𑀸 𑀢𑀁 𑀆𑀧𑀚𑁆𑀚𑀢𑀻𑀢𑀺 𑀤𑁆𑀯𑀺𑀯𑁂𑀤𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀆𑀧𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀧𑀦 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼𑀤𑁂𑀲𑀦𑀸 𑀆𑀭𑀽𑀴𑁆𑀳𑀸, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁.

𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀫𑀓𑁆𑀓𑀝𑀻 ¶ ¶ 𑀯𑀚𑁆𑀚𑀺𑀧𑀼𑀢𑁆𑀢𑀸 𑀘…𑀧𑁂… 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀫𑀺𑀕𑁄𑀢𑀺 𑀇𑀤𑀁 𑀓𑀺𑀁? 𑀇𑀫𑀸 𑀯𑀺𑀦𑀻𑀢𑀯𑀢𑁆𑀣𑀽𑀦𑀁 𑀪𑀕𑀯𑀢𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀉𑀤𑁆𑀤𑀸𑀦𑀕𑀸𑀣𑀸 𑀦𑀸𑀫. 𑀢𑀸𑀦𑀺 𑀯𑀢𑁆𑀣𑀽𑀦𑀺 ‘‘𑀲𑀼𑀔𑀁 𑀯𑀺𑀦𑀬𑀥𑀭𑀸 ¶ 𑀉𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸𑀦𑀺. 𑀯𑀢𑁆𑀣𑀼𑀕𑀸𑀣𑀸 𑀧𑀦 𑀥𑀭𑀫𑀸𑀦𑁂𑀬𑁂𑀯 𑀪𑀕𑀯𑀢𑀺 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀞𑀧𑀺𑀢𑀸 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀆𑀬𑀢𑀺𑀁 𑀯𑀺𑀦𑀬𑀥𑀭𑀸 𑀯𑀺𑀦𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀤𑀼𑀢𑀺𑀬𑀸𑀤𑀻𑀦𑀜𑁆𑀘 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀤𑀼𑀢𑀺𑀬𑀸𑀤𑀻𑀦𑀺. 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀳𑀺 𑀲𑀺𑀧𑁆𑀧𑀺𑀓𑀸𑀦𑀁 𑀧𑀝𑀺𑀘𑁆𑀙𑀦𑁆𑀦𑀓𑀭𑀽𑀧𑀸𑀦𑀺 𑀯𑀺𑀬 𑀯𑀺𑀦𑀬𑀥𑀭𑀸𑀦𑀁 𑀧𑀝𑀺𑀘𑁆𑀙𑀦𑁆𑀦𑀓𑀯𑀢𑁆𑀣𑀽𑀦𑀺 𑀳𑁄𑀦𑁆𑀢𑀻𑀢𑀺.

𑁬𑁭. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁𑀬𑁂𑀯 𑀯𑀼𑀢𑁆𑀢𑀢𑁆𑀣𑀸𑀦𑀺. 𑀢𑀢𑀺𑀬𑁂 𑀯𑀢𑁆𑀣𑀼𑀫𑁆𑀳𑀺 𑀕𑀺𑀳𑀺𑀮𑀺𑀗𑁆𑀕𑁂𑀦𑀸𑀢𑀺 𑀕𑀺𑀳𑀺𑀯𑁂𑀲𑁂𑀦 𑀑𑀤𑀸𑀢𑀯𑀢𑁆𑀣𑁄 𑀳𑀼𑀢𑁆𑀯𑀸. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁄 𑀧𑀭𑁂𑀲𑀼 𑀲𑀢𑁆𑀢𑀲𑀼 𑀯𑀢𑁆𑀣𑀽𑀲𑀼 𑀓𑀼𑀲𑀘𑀻𑀭𑀦𑁆𑀢𑀺 𑀓𑀼𑀲𑁂 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀁. 𑀯𑀸𑀓𑀘𑀻𑀭𑀁 𑀦𑀸𑀫 𑀢𑀸𑀧𑀲𑀸𑀦𑀁 𑀯𑀓𑁆𑀓𑀮𑀁. 𑀨𑀮𑀓𑀘𑀻𑀭𑀁 𑀦𑀸𑀫 𑀨𑀮𑀓𑀲𑀡𑁆𑀞𑀸𑀦𑀸𑀦𑀺 𑀨𑀮𑀓𑀸𑀦𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀘𑀻𑀭𑀁. 𑀓𑁂𑀲𑀓𑀫𑁆𑀩𑀮𑁄𑀢𑀺 𑀓𑁂𑀲𑁂𑀳𑀺 𑀢𑀦𑁆𑀢𑁂 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑁄. 𑀯𑀸𑀮𑀓𑀫𑁆𑀩𑀮𑁄𑀢𑀺 𑀘𑀫𑀭𑀯𑀸𑀮𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑁄. 𑀉𑀮𑀽𑀓𑀧𑀓𑁆𑀔𑀺𑀓𑀦𑁆𑀢𑀺 𑀉𑀮𑀽𑀓𑀲𑀓𑀼𑀡𑀲𑁆𑀲 𑀧𑀓𑁆𑀔𑁂𑀳𑀺 𑀓𑀢𑀦𑀺𑀯𑀸𑀲𑀦𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀲𑀮𑁄𑀫𑀁 𑀲𑀔𑀼𑀭𑀁 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀤𑁆𑀯𑀸𑀤𑀲𑀫𑁂 𑀯𑀢𑁆𑀣𑀼𑀫𑁆𑀳𑀺 𑀲𑀸𑀭𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀸𑀭𑀢𑁆𑀢𑁄; 𑀢𑀁 𑀭𑀸𑀕𑀁 𑀜𑀢𑁆𑀯𑀸 𑀪𑀕𑀯𑀸 ‘‘𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀆𑀳.

𑁬𑁮. 𑀢𑁂𑀭𑀲𑀫𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀮𑀯𑀡𑁆𑀡𑀸𑀢𑀺 𑀲𑀸 𑀣𑁂𑀭𑀻 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀥𑀻𑀢𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸. 𑀢𑀲𑁆𑀲𑀸 𑀧𑀓𑀢𑀺𑀬𑀸𑀧𑀺 𑀅𑀢𑀺𑀤𑀲𑁆𑀲𑀦𑀻𑀬𑀸 𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑀸 𑀓𑀸𑀬𑀘𑁆𑀙𑀯𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦 ¶ 𑀓𑀺𑀮𑁂𑀲𑀲𑀦𑁆𑀢𑀸𑀧𑀲𑁆𑀲 𑀅𑀪𑀸𑀯𑁂𑀦 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀲𑀸 𑀢𑀸𑀬𑁂𑀯 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 ‘‘𑀉𑀧𑁆𑀧𑀮𑀯𑀡𑁆𑀡𑀸’’𑀢𑀺 𑀦𑀸𑀫𑀁 𑀮𑀪𑀺. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀕𑀺𑀳𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑀢𑁆𑀢𑀘𑀺𑀢𑁆𑀢𑁄; 𑀲𑁄 𑀓𑀺𑀭 𑀢𑀲𑁆𑀲𑀸 𑀜𑀸𑀢𑀺𑀤𑀸𑀭𑀓𑁄 𑀳𑁄𑀢𑀺. 𑀅𑀣 𑀔𑁄𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄; 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑀸𑀦𑀦𑁆𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀯𑀸 𑀩𑀸𑀳𑀺𑀭𑀢𑁄 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀸𑀦𑀜𑁆𑀳𑀺 𑀧𑀞𑀫𑀁 𑀅𑀦𑁆𑀥𑀓𑀸𑀭𑀁 𑀳𑁄𑀢𑀺. 𑀲𑁄 𑀬𑀸𑀯𑀲𑁆𑀲𑀸 𑀢𑀁 𑀅𑀦𑁆𑀥𑀓𑀸𑀭𑀁 𑀦 𑀦𑀲𑁆𑀲𑀢𑀺, 𑀢𑀸𑀯𑀤𑁂𑀯 ¶ 𑀏𑀯𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀤𑀽𑀲𑁂𑀲𑀻𑀢𑀺 𑀧𑀥𑀁𑀲𑁂𑀲𑀺. 𑀣𑁂𑀭𑀻 𑀧𑀦 𑀅𑀦𑀯𑀚𑁆𑀚𑀸 𑀅𑀢𑁆𑀢𑀦𑁄 𑀲𑀫𑀡𑀲𑀜𑁆𑀜𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀲𑀸𑀤𑀺𑀬𑀦𑁆𑀢𑀻 𑀦𑀺𑀲𑀻𑀤𑀺 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀸𑀫𑀝𑁆𑀞𑀸 𑀅𑀕𑁆𑀕𑀺𑀓𑁆𑀔𑀦𑁆𑀥-𑀲𑀺𑀮𑀸𑀣𑀫𑁆𑀪-𑀔𑀤𑀺𑀭𑀲𑀸𑀭𑀔𑀸𑀡𑀼𑀓𑀸 𑀯𑀺𑀬. 𑀲𑁄𑀧𑀺 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀧𑀽𑀭𑁂𑀢𑁆𑀯𑀸 𑀕𑀢𑁄. 𑀢𑀲𑁆𑀲𑀸 𑀣𑁂𑀭𑀺𑀬𑀸 𑀤𑀲𑁆𑀲𑀦𑀧𑀣𑀁 𑀯𑀺𑀚𑀳𑀦𑁆𑀢𑀲𑁆𑀲𑁂𑀯 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼𑀧𑀩𑁆𑀩𑀢𑀁 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑀸𑀧𑀺 𑀢𑀁 𑀧𑀸𑀧𑀧𑀼𑀭𑀺𑀲𑀁 𑀩𑁆𑀬𑀸𑀫𑀫𑀢𑁆𑀢𑀓𑀴𑁂𑀯𑀭𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀬 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀫𑀤𑀸𑀲𑀺. 𑀲𑁄 𑀢𑀗𑁆𑀔𑀡𑀜𑁆𑀜𑁂𑀯 𑀅𑀯𑀻𑀘𑀺𑀚𑀸𑀮𑀸𑀦𑀁 𑀇𑀦𑁆𑀥𑀦𑀪𑀸𑀯𑀁 𑀅𑀕𑀫𑀸𑀲𑀺. 𑀪𑀕𑀯𑀸 𑀢𑀁 𑀲𑀼𑀢𑁆𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀸𑀤𑀺𑀬𑀦𑁆𑀢𑀺𑀬𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑀺𑀁 𑀲𑀦𑁆𑀥𑀸𑀬 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀯𑀸𑀭𑀺 ¶ 𑀧𑁄𑀓𑁆𑀔𑀭𑀧𑀢𑁆𑀢𑁂𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀬𑁄 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀼, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁦𑁧);

𑁬𑁯. 𑀘𑀼𑀤𑁆𑀤𑀲𑀫𑁂 𑀯𑀢𑁆𑀣𑀼𑀫𑁆𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑀭𑀢𑁆𑀢𑀺𑀪𑀸𑀕𑁂 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀫𑀲𑁆𑀲𑀼𑀤𑀸𑀞𑀺𑀓𑀸𑀤𑀺 𑀲𑀩𑁆𑀩𑀁 𑀅𑀦𑁆𑀢𑀭𑀳𑀺𑀢𑀁 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀉𑀧𑁆𑀧𑀦𑁆𑀦𑀁. 𑀢𑀫𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤𑀦𑁆𑀢𑀺 𑀧𑀼𑀩𑁆𑀩𑁂 𑀕𑀳𑀺𑀢𑀉𑀧𑀚𑁆𑀛𑀸𑀬𑀫𑁂𑀯 𑀧𑀼𑀩𑁆𑀩𑁂 𑀓𑀢𑀉𑀧𑀲𑀫𑁆𑀧𑀤𑀫𑁂𑀯 𑀅𑀦𑀼𑀚𑀸𑀦𑀸𑀫𑀺. 𑀧𑀼𑀦 𑀉𑀧𑀚𑁆𑀛𑀸 𑀦 𑀕𑀳𑁂𑀢𑀩𑁆𑀩𑀸; 𑀉𑀧𑀲𑀫𑁆𑀧𑀤𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀸𑀦𑀺𑀬𑁂𑀯 ¶ 𑀯𑀲𑁆𑀲𑀸𑀦𑀻𑀢𑀺 𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀢𑁄 𑀧𑀪𑀼𑀢𑀺 𑀬𑀸𑀯 𑀯𑀲𑁆𑀲𑀕𑀡𑀦𑀸, 𑀢𑀁𑀬𑁂𑀯 𑀯𑀲𑁆𑀲𑀕𑀡𑀦𑀁 𑀅𑀦𑀼𑀚𑀸𑀦𑀸𑀫𑀺. 𑀦 𑀇𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀕𑀡𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀫𑀺𑀢𑀼𑀁 𑀲𑀗𑁆𑀕𑀦𑁆𑀢𑀼𑀁 𑀲𑀫𑀗𑁆𑀕𑀻 𑀪𑀯𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀧𑁆𑀧𑀢𑀺𑀭𑀽𑀧𑀁 𑀤𑀸𑀦𑀺𑀲𑁆𑀲𑀸 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀯𑀲𑀺𑀢𑀼𑀁, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀯𑀲𑀢𑀽𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸𑀢𑀺 𑀬𑀸 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄 𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑁄 𑀯𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀸𑀥𑀸𑀭𑀡𑀸. 𑀢𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀼𑀦𑁆𑀢𑀺 𑀢𑀸 𑀲𑀩𑁆𑀩𑀸𑀧𑀺 𑀪𑀺𑀓𑁆𑀔𑀼𑀦𑀻𑀳𑀺 𑀓𑀸𑀢𑀩𑁆𑀩𑀁 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑀸 𑀧𑀦 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺-𑀆𑀤𑀺𑀓𑀸 𑀆𑀧𑀢𑁆𑀢𑀺𑀬𑁄, 𑀢𑀸𑀳𑀺 𑀅𑀦𑀸𑀧𑀢𑁆𑀢𑀺. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦 𑀢𑀸 𑀆𑀧𑀢𑁆𑀢𑀺𑀬𑁄 𑀯𑀼𑀝𑁆𑀞𑀺𑀢𑀸𑀯 𑀳𑁄𑀦𑁆𑀢𑀺. 𑀧𑀼𑀦 𑀧𑀓𑀢𑀺𑀮𑀺𑀗𑁆𑀕𑁂 𑀉𑀧𑁆𑀧𑀦𑁆𑀦𑁂𑀧𑀺 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄.

𑀅𑀬𑀁 ¶ 𑀧𑀦 𑀧𑀸𑀴𑀺𑀫𑀼𑀢𑁆𑀢𑁄 𑀑𑀓𑁆𑀓𑀦𑁆𑀢𑀺𑀓𑀯𑀺𑀦𑀺𑀘𑁆𑀙𑀬𑁄 𑁋 𑀇𑀫𑁂𑀲𑀼 𑀢𑀸𑀯 𑀤𑁆𑀯𑀻𑀲𑀼 𑀮𑀺𑀗𑁆𑀕𑁂𑀲𑀼 𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀢𑁆𑀢𑀫𑀁, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀳𑀻𑀦𑀁; 𑀢𑀲𑁆𑀫𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀤𑀼𑀩𑁆𑀩𑀮𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺. 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀁 𑀉𑀪𑀬𑀫𑁆𑀧𑀺 𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀼𑀲𑀮𑁂𑀦 𑀧𑀝𑀺𑀮𑀩𑁆𑀪𑀢𑀺.

𑀢𑀢𑁆𑀣 𑀲𑀘𑁂 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀢𑁄 𑀲𑀚𑁆𑀛𑀸𑀬𑀁 𑀯𑀸 𑀥𑀫𑁆𑀫𑀲𑀸𑀓𑀘𑁆𑀙𑀁 𑀯𑀸 𑀓𑀢𑁆𑀯𑀸 𑀏𑀓𑀸𑀕𑀸𑀭𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀸𑀦𑀁 𑀏𑀓𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀺. 𑀲𑁄 𑀘𑁂 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀭𑀢𑁆𑀢𑀺𑀪𑀸𑀕𑁂𑀬𑁂𑀯 𑀇𑀢𑀭𑀲𑁆𑀲 𑀆𑀭𑁄𑀘𑁂𑀬𑁆𑀬, 𑀢𑁂𑀦 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑁄 𑁋 ‘‘𑀳𑁄𑀢𑀼, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣. 𑀯𑀝𑁆𑀝𑀲𑁆𑀲𑁂𑀯𑁂𑀲𑁄 𑀤𑁄𑀲𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁆𑀯𑀸𑀭𑀁 𑀤𑀺𑀦𑁆𑀦𑀁, 𑀪𑀺𑀓𑁆𑀔𑀼 𑀯𑀸 𑀳𑁄𑀢𑀼 𑀪𑀺𑀓𑁆𑀔𑀼𑀦𑀻 𑀯𑀸, 𑀅𑀦𑀸𑀯𑀝𑁄 𑀥𑀫𑁆𑀫𑁄 ¶ 𑀅𑀯𑀸𑀭𑀺𑀢𑁄 𑀲𑀕𑁆𑀕𑀫𑀕𑁆𑀕𑁄’’𑀢𑀺. 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀘 𑀏𑀯𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀢𑀼𑀫𑁆𑀳𑁂𑀳𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀢𑁆𑀣𑀺 ¶ 𑀯𑁄 𑀓𑀸𑀘𑀺 𑀲𑀦𑁆𑀤𑀺𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺. 𑀲𑀘𑀲𑁆𑀲𑀸 𑀳𑁄𑀦𑁆𑀢𑀺 𑀢𑀸𑀤𑀺𑀲𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀢𑁆𑀣𑀻𑀢𑀺, 𑀦𑁄 𑀘𑁂 𑀳𑁄𑀦𑁆𑀢𑀺 𑀦𑀢𑁆𑀣𑀻𑀢𑀺 𑀯𑀢𑁆𑀯𑀸 𑀲𑁄 𑀪𑀺𑀓𑁆𑀔𑀼 𑀯𑀢𑁆𑀢𑀩𑁆𑀩𑁄 𑁋 ‘‘𑀫𑀫 𑀲𑀗𑁆𑀕𑀳𑀁 𑀓𑀭𑁄𑀣; 𑀇𑀤𑀸𑀦𑀺 𑀫𑀁 𑀧𑀞𑀫𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑁂𑀣𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀯𑀸 𑀲𑀦𑁆𑀤𑀺𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀤𑀺𑀝𑁆𑀞𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀦𑁆𑀢𑁂𑀦 𑀘 𑀦 𑀏𑀓𑀓𑁂𑀦 𑀕𑀦𑁆𑀢𑀩𑁆𑀩𑀁. 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀚𑁄𑀢𑀺𑀓𑀜𑁆𑀘 𑀓𑀢𑁆𑀢𑀭𑀤𑀡𑁆𑀟𑀜𑁆𑀘 𑀕𑀳𑁂𑀢𑁆𑀯𑀸 𑀲𑀁𑀯𑀺𑀤𑀳𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸 ‘‘𑀫𑀬𑀁 𑀅𑀲𑀼𑀓𑀁 𑀦𑀸𑀫 𑀞𑀸𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀕𑀸𑀫𑁂 𑀤𑀽𑀭𑁂 𑀯𑀺𑀳𑀸𑀭𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀸𑀫𑀦𑁆𑀢𑀭-𑀦𑀤𑀻𑀧𑀸𑀭-𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲-𑀕𑀡𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀲𑀼𑀓𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁, 𑀲𑀗𑁆𑀕𑀳𑀁 𑀤𑀸𑀦𑀺𑀲𑁆𑀲 𑀓𑀭𑁄𑀣𑀸’’𑀢𑀺. 𑀢𑀸 𑀘𑁂 ‘‘𑀲𑀸𑀥𑀼, 𑀅𑀬𑁆𑀬𑀸, 𑀇𑀤𑀸𑀦𑀺 𑀫𑀬𑀫𑁆𑀧𑀺 𑀲𑀚𑁆𑀛𑀸𑀬𑀺𑀲𑁆𑀲𑀸𑀫, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀯𑀢𑁆𑀯𑀸 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀆𑀭𑀸𑀥𑀺𑀓𑀸 𑀘 𑀳𑁄𑀦𑁆𑀢𑀺 𑀲𑀗𑁆𑀕𑀸𑀳𑀺𑀓𑀸 𑀮𑀚𑁆𑀚𑀺𑀦𑀺𑀬𑁄, 𑀢𑀸 𑀓𑁄𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀘𑁂, 𑀕𑀸𑀫𑀦𑁆𑀢𑀭-𑀦𑀤𑀻𑀧𑀸𑀭-𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲-𑀕𑀡𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀮𑀚𑁆𑀚𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀦 𑀲𑀗𑁆𑀕𑀸𑀳𑀺𑀓𑀸𑀬𑁄; 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀮𑀩𑁆𑀪𑀢𑀺. 𑀲𑀘𑁂𑀧𑀺 𑀅𑀮𑀚𑁆𑀚𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀲𑀗𑁆𑀕𑀳𑀁 𑀧𑀦 𑀓𑀭𑁄𑀦𑁆𑀢𑀺; 𑀢𑀸𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀮𑀩𑁆𑀪𑀢𑀺. 𑀲𑀘𑁂 𑀮𑀚𑁆𑀚𑀺𑀦𑀺𑀬𑁄 𑀘 𑀲𑀗𑁆𑀕𑀸𑀳𑀺𑀓𑀸 ¶ 𑀘, 𑀜𑀸𑀢𑀺𑀓𑀸 𑀦 𑀳𑁄𑀦𑁆𑀢𑀺, 𑀆𑀲𑀦𑁆𑀦𑀕𑀸𑀫𑁂 𑀧𑀦 𑀅𑀜𑁆𑀜𑀸 𑀜𑀸𑀢𑀺𑀓𑀸𑀬𑁄 𑀳𑁄𑀦𑁆𑀢𑀺 𑀧𑀝𑀺𑀚𑀕𑁆𑀕𑀦𑀺𑀓𑀸, 𑀢𑀸𑀲𑀫𑁆𑀧𑀺 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀕𑀦𑁆𑀢𑁆𑀯𑀸 𑀲𑀘𑁂 𑀪𑀺𑀓𑁆𑀔𑀼𑀪𑀸𑀯𑁂𑀧𑀺 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑁄, 𑀧𑀢𑀺𑀭𑀽𑀧𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀫𑀸𑀢𑀺𑀓𑀸 𑀯𑀸 𑀯𑀺𑀦𑀬𑁄 𑀯𑀸 𑀉𑀕𑁆𑀕𑀳𑀺𑀢𑁄 𑀲𑀼𑀕𑁆𑀕𑀳𑀺𑀢𑁄, 𑀧𑀼𑀦 𑀉𑀕𑁆𑀕𑀡𑁆𑀳𑀦𑀓𑀸𑀭𑀡𑀁 𑀦𑀢𑁆𑀣𑀺. 𑀲𑀘𑁂 𑀪𑀺𑀓𑁆𑀔𑀼𑀪𑀸𑀯𑁂 𑀧𑀭𑀺𑀲𑀸𑀯𑀘𑀭𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀉𑀧𑀲𑀫𑁆𑀧𑀦𑁆𑀦𑀸 𑀲𑀽𑀧𑀲𑀫𑁆𑀧𑀦𑁆𑀦𑀸. 𑀅𑀜𑁆𑀜𑀲𑁆𑀲 ¶ 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀧𑀼𑀩𑁆𑀩𑁂 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀳𑀺𑀧𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀲𑀸𑀫𑀡𑁂𑀭𑁂𑀦𑀸𑀧𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀉𑀧𑀚𑁆𑀛𑀸 𑀕𑀳𑁂𑀢𑀩𑁆𑀩𑀸.

𑀬𑀁 𑀧𑀦𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁂 𑀅𑀥𑀺𑀝𑁆𑀞𑀺𑀢𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀢𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀗𑁆𑀓𑀘𑁆𑀘𑀺𑀓𑀸 𑀘 𑀉𑀤𑀓𑀲𑀸𑀝𑀺𑀓𑀸 𑀘 𑀕𑀳𑁂𑀢𑀩𑁆𑀩𑀸. 𑀬𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀯𑀸 𑀅𑀢𑀺𑀭𑁂𑀓𑀧𑀢𑁆𑀢𑁄 𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀦𑀬𑀓𑀫𑁆𑀫𑀁 𑀯𑀺𑀚𑀳𑀢𑀺, 𑀧𑀼𑀦 𑀓𑀸𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺𑀧𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀦𑁆𑀢𑀺. 𑀲𑀘𑁂 𑀧𑀝𑀺𑀕𑁆𑀕𑀳𑀡𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀺. 𑀬𑀁 𑀧𑀦 𑀪𑀺𑀓𑁆𑀔𑀼𑀓𑀸𑀮𑁂 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺. 𑀬𑀁 𑀉𑀪𑀺𑀦𑁆𑀦𑀁 𑀲𑀸𑀥𑀸𑀭𑀡𑀁 𑀅𑀯𑀺𑀪𑀚𑀺𑀢𑁆𑀯𑀸 𑀞𑀧𑀺𑀢𑀁, 𑀢𑀁 𑀧𑀓𑀢𑀢𑁆𑀢𑁄 𑀭𑀓𑁆𑀔𑀢𑀺. 𑀬𑀁 𑀧𑀦 𑀯𑀺𑀪𑀢𑁆𑀢𑀁 𑀏𑀢𑀲𑁆𑀲𑁂𑀯 𑀲𑀦𑁆𑀢𑀓𑀁, 𑀢𑀁 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀢𑁂𑀮𑀁 ¶ 𑀫𑀥𑀼𑀁 𑀨𑀸𑀡𑀺𑀢𑀜𑁆𑀘𑀸𑀧𑀺 𑀲𑀧𑁆𑀧𑀺𑀁;

𑀲𑀸𑀫𑀁 𑀕𑀳𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂𑀬𑁆𑀬;

𑀅𑀯𑀻𑀢𑀺𑀯𑀢𑁆𑀢𑁂 𑀲𑀢𑁆𑀢𑀸𑀳𑁂;

𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁦);

𑀇𑀤𑀜𑁆𑀳𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦, 𑀓𑀸𑀮𑀁𑀓𑀺𑀭𑀺𑀬𑀸𑀬, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦, 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀦𑁂𑀦, 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦 𑀘 𑀯𑀺𑀚𑀳𑀢𑀺. 𑀢𑀲𑁆𑀫𑀸 𑀲𑀘𑁂𑀧𑀺 𑀳𑀭𑀻𑀢𑀓𑀔𑀡𑁆𑀟𑀫𑁆𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀫𑀢𑁆𑀣𑀺, 𑀲𑀩𑁆𑀩𑀫𑀲𑁆𑀲 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀪𑀺𑀓𑁆𑀔𑀼𑀯𑀺𑀳𑀸𑀭𑁂 𑀧𑀦 𑀬𑀁𑀓𑀺𑀜𑁆𑀘𑀺𑀲𑁆𑀲𑀸 𑀲𑀦𑁆𑀢𑀓𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ¶ 𑀯𑀸 𑀞𑀧𑀺𑀢𑀁, 𑀲𑀩𑁆𑀩𑀲𑁆𑀲 𑀲𑀸𑀯 𑀇𑀲𑁆𑀲𑀭𑀸, 𑀆𑀳𑀭𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀬𑀁 𑀧𑀦𑁂𑀢𑁆𑀣 𑀣𑀸𑀯𑀭𑀁 𑀢𑀲𑁆𑀲𑀸 𑀲𑀦𑁆𑀢𑀓𑀁 𑀲𑁂𑀦𑀸𑀲𑀦𑀁 𑀯𑀸 𑀉𑀧𑀭𑁄𑀧𑀓𑀸 𑀯𑀸, 𑀢𑁂 𑀬𑀲𑁆𑀲𑀺𑀘𑁆𑀙𑀢𑀺 𑀢𑀲𑁆𑀲 𑀤𑀸𑀢𑀩𑁆𑀩𑀸. 𑀢𑁂𑀭𑀲𑀲𑀼 𑀲𑀫𑁆𑀫𑀼𑀢𑀻𑀲𑀼 ¶ 𑀬𑀸 𑀪𑀺𑀓𑁆𑀔𑀼𑀓𑀸𑀮𑁂 𑀮𑀤𑁆𑀥𑀸 𑀲𑀫𑁆𑀫𑀼𑀢𑀺, 𑀲𑀩𑁆𑀩𑀸 𑀲𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀧𑀼𑀭𑀺𑀫𑀺𑀓𑀸𑀬 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀲𑁂𑀦𑀸𑀲𑀦𑁂 𑀕𑀳𑀺𑀢𑁂 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘𑀲𑁆𑀲𑀸 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀲𑀘𑁂 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸𑀬 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀢𑀺, 𑀧𑀼𑀦 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀘𑀺𑀡𑁆𑀡𑀫𑀸𑀦𑀢𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀢𑀺, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀼𑀲𑀮𑀯𑀺𑀧𑀸𑀓𑁂 𑀧𑀭𑀺𑀓𑁆𑀔𑀻𑀡𑁂 𑀧𑀓𑁆𑀔𑀫𑀸𑀦𑀢𑁆𑀢𑀓𑀸𑀮𑁂 𑀧𑀼𑀦𑀤𑁂𑀯 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀘𑀺𑀡𑁆𑀡𑁂 𑀧𑀓𑁆𑀔𑀫𑀸𑀦𑀢𑁆𑀢𑁂 𑀧𑀭𑀺𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽𑀳𑀺 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀅𑀦𑀦𑁆𑀢𑀭𑁂 𑀪𑀺𑀓𑁆𑀔𑀼𑀦𑀺𑀬𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀯𑀢𑁆𑀣𑀼𑀫𑁆𑀳𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀘𑁂𑀧𑀺 𑀪𑀺𑀓𑁆𑀔𑀼𑀦𑀺𑀓𑀸𑀮𑁂 𑀆𑀧𑀦𑁆𑀦𑀸 𑀲𑀜𑁆𑀘𑀭𑀺𑀢𑁆𑀢𑀸𑀧𑀢𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀧𑀭𑀺𑀯𑀸𑀲𑀤𑀸𑀦𑀁 𑀦𑀢𑁆𑀣𑀺, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑀺𑀬𑀸 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀦 𑀢𑁂𑀦𑀢𑁆𑀣𑁄, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀘𑀺𑀡𑁆𑀡𑀫𑀸𑀦𑀢𑁆𑀢𑀸𑀬 𑀧𑀭𑀺𑀯𑀢𑁆𑀢𑀢𑀺, 𑀧𑀼𑀦 𑀫𑀸𑀦𑀢𑁆𑀢𑀁 𑀅𑀤𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀅𑀩𑁆𑀪𑁂𑀢𑀩𑁆𑀩𑁄. 𑀅𑀣 𑀪𑀺𑀓𑁆𑀔𑀽𑀳𑀺 𑀫𑀸𑀦𑀢𑁆𑀢𑁂 𑀅𑀤𑀺𑀦𑁆𑀦𑁂 𑀧𑀼𑀦 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀪𑀺𑀓𑁆𑀔𑀼𑀦𑀻𑀳𑀺 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀅𑀣 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑀲𑁆𑀲 𑀧𑀼𑀦 𑀧𑀭𑀺𑀯𑀢𑁆𑀢𑀢𑀺, 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀘𑀺𑀡𑁆𑀡𑀫𑀸𑀦𑀢𑁆𑀢𑀲𑁆𑀲 𑀧𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀚𑀸𑀢𑁂 𑀪𑀺𑀓𑁆𑀔𑀼𑀦𑀻𑀳𑀺 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 ¶ . 𑀧𑀼𑀦 𑀧𑀭𑀺𑀯𑀢𑁆𑀢𑁂 𑀘 𑀮𑀺𑀗𑁆𑀕𑁂 𑀪𑀺𑀓𑁆𑀔𑀼𑀦𑀺𑀪𑀸𑀯𑁂 𑀞𑀺𑀢𑀸𑀬𑀧𑀺 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸, 𑀢𑀸 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀏𑀯𑀸𑀢𑀺.

𑁭𑁦. 𑀇𑀢𑁄 𑀧𑀭𑀸𑀦𑀺 ‘‘𑀫𑀸𑀢𑀼𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺𑀬𑁂𑀯.

𑁭𑁧. 𑀫𑀼𑀤𑀼𑀧𑀺𑀝𑁆𑀞𑀺𑀓𑀯𑀢𑁆𑀣𑀼𑀫𑁆𑀳𑀺 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀦𑀝𑀧𑀼𑀩𑁆𑀩𑀓𑁄. 𑀢𑀲𑁆𑀲 𑀲𑀺𑀧𑁆𑀧𑀓𑁄𑀲𑀮𑁆𑀮𑀢𑁆𑀣𑀁 𑀧𑀭𑀺𑀓𑀫𑁆𑀫𑀓𑀢𑀸 ¶ 𑀧𑀺𑀝𑁆𑀞𑀺 𑀫𑀼𑀤𑀼𑀓𑀸 𑀅𑀳𑁄𑀲𑀺. 𑀢𑀲𑁆𑀫𑀸 𑀏𑀯𑀁 𑀓𑀸𑀢𑀼𑀁 𑀅𑀲𑀓𑁆𑀔𑀺.

𑀮𑀫𑁆𑀩𑀻𑀯𑀢𑁆𑀣𑀼𑀫𑁆𑀳𑀺 ¶ 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀗𑁆𑀕𑀚𑀸𑀢𑀁 𑀤𑀻𑀖𑀁 𑀳𑁄𑀢𑀺 𑀮𑀫𑁆𑀩𑀢𑀺, 𑀢𑀲𑁆𑀫𑀸 𑀮𑀫𑁆𑀩𑀻𑀢𑀺 𑀯𑀼𑀢𑁆𑀢𑁄.

𑀇𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀯𑀡𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀸𑀦𑁂𑀯. 𑀮𑁂𑀧𑀘𑀺𑀢𑁆𑀢𑀯𑀢𑁆𑀣𑀼𑀫𑁆𑀳𑀺 𑀮𑁂𑀧𑀘𑀺𑀢𑁆𑀢𑀁 𑀦𑀸𑀫 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀁.

𑀤𑀸𑀭𑀼𑀥𑀻𑀢𑀮𑀺𑀓𑀯𑀢𑁆𑀣𑀼𑀫𑁆𑀳𑀺 𑀤𑀸𑀭𑀼𑀥𑀻𑀢𑀮𑀺𑀓𑀸 𑀦𑀸𑀫 𑀓𑀝𑁆𑀞𑀭𑀽𑀧𑀁. 𑀬𑀣𑀸 𑀘 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀤𑀦𑁆𑀢𑀭𑀽𑀧-𑀧𑁄𑀢𑁆𑀣𑀓𑀭𑀽𑀧-𑀮𑁄𑀳𑀭𑀽𑀧𑀸𑀤𑀻𑀲𑀼 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀲𑀼 𑀇𑀢𑁆𑀣𑀺𑀭𑀽𑀧𑁂𑀲𑀼 𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀼 𑀯𑀸 𑀫𑀸 𑀯𑀸, 𑀤𑀼𑀓𑁆𑀓𑀝𑀫𑁂𑀯. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀢𑀣𑁂𑀯 𑀤𑀼𑀓𑁆𑀓𑀝𑀁. 𑀫𑁄𑀘𑀦𑀭𑀸𑀕𑁂𑀦 𑀧𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀫𑀼𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺.

𑁭𑁨. 𑀲𑀼𑀦𑁆𑀤𑀭𑀯𑀢𑁆𑀣𑀼𑀫𑁆𑀳𑀺 𑀅𑀬𑀁 𑀲𑀼𑀦𑁆𑀤𑀭𑁄 𑀦𑀸𑀫 𑀭𑀸𑀚𑀕𑀳𑁂 𑀓𑀼𑀮𑀤𑀸𑀭𑀓𑁄 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄; 𑀅𑀢𑁆𑀢𑀪𑀸𑀯𑀲𑁆𑀲 𑀅𑀪𑀺𑀭𑀽𑀧𑀢𑀸𑀬 ‘‘𑀲𑀼𑀦𑁆𑀤𑀭𑁄’’𑀢𑀺 𑀦𑀸𑀫𑀁 𑀮𑀪𑀺. 𑀢𑀁 𑀭𑀣𑀺𑀓𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀙𑀦𑁆𑀤𑀭𑀸𑀕𑀸 𑀲𑀸 𑀇𑀢𑁆𑀣𑀻 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀅𑀓𑀸𑀲𑀺. 𑀣𑁂𑀭𑁄 𑀧𑀦 𑀅𑀦𑀸𑀕𑀸𑀫𑀻. 𑀢𑀲𑁆𑀫𑀸 𑀲𑁄 𑀦 𑀲𑀸𑀤𑀺𑀬𑀺. 𑀅𑀜𑁆𑀜𑁂𑀲𑀁 𑀧𑀦 𑀅𑀯𑀺𑀲𑀬𑁄 𑀏𑀲𑁄.

𑀇𑀢𑁄 𑀧𑀭𑁂𑀲𑀼 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀢𑁂 𑀪𑀺𑀓𑁆𑀔𑀽 𑀚𑀴𑀸 𑀤𑀼𑀫𑁆𑀫𑁂𑀥𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀁𑀲𑀼.

𑁭𑁩. 𑀅𑀓𑁆𑀔𑀸𑀬𑀺𑀢𑀸𑀤𑀻𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀤𑁆𑀯𑀻𑀲𑀼 𑀙𑀺𑀦𑁆𑀦𑀲𑀻𑀲𑀯𑀢𑁆𑀣𑀽𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀯𑀺𑀯𑀝𑁂 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑁄 𑀲𑀘𑁂 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀉𑀪𑀬𑀧𑀲𑁆𑀲𑁂𑀳𑀺 𑀯𑀸 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀘𑀢𑀽𑀳𑀺𑀧𑀺 𑀧𑀲𑁆𑀲𑁂𑀳𑀺 𑀅𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀢𑀸𑀮𑀼𑀓𑀁 𑀙𑀼𑀧𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺 𑀢𑀸𑀮𑀼𑀓𑀜𑁆𑀘 𑀅𑀙𑀼𑀧𑀦𑁆𑀢𑁄 𑀆𑀓𑀸𑀲𑀕𑀢𑀫𑁂𑀯 ¶ 𑀓𑀢𑁆𑀯𑀸 𑀧𑀯𑁂𑀲𑁂𑀢𑀺 𑀘 𑀦𑀻𑀳𑀭𑀢𑀺 𑀘, 𑀤𑀼𑀓𑁆𑀓𑀝𑀁. 𑀬𑀤𑀺 𑀧𑀦 𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸, 𑀅𑀦𑁆𑀢𑁄𑀫𑀼𑀔𑁂 𑀑𑀓𑀸𑀲𑁄 𑀦𑀢𑁆𑀣𑀺, 𑀤𑀦𑁆𑀢𑀸 𑀘 𑀩𑀳𑀺 𑀑𑀝𑁆𑀞𑀫𑀁𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑀸, 𑀢𑀢𑁆𑀣 𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑀁 𑀅𑀮𑁆𑀮𑁄𑀓𑀸𑀲𑀁 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑁆𑀧𑀸𑀝𑀺𑀢𑁂 𑀧𑀦 𑀑𑀝𑁆𑀞𑀫𑀁𑀲𑁂 𑀤𑀦𑁆𑀢𑁂𑀲𑀼𑀬𑁂𑀯 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀬𑁄𑀧𑀺 𑀤𑀦𑁆𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 ¶ , 𑀦 𑀲𑀓𑁆𑀓𑀸 𑀑𑀝𑁆𑀞𑁂𑀳𑀺 𑀧𑀺𑀤𑀳𑀺𑀢𑀼𑀁. 𑀢𑀢𑁆𑀣 𑀉𑀧𑀓𑁆𑀓𑀫𑀦𑁆𑀢𑁂𑀧𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸𑀬 𑀉𑀧𑀓𑁆𑀓𑀫𑀦𑁆𑀢𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀧𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸𑀬 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀬𑀤𑀺 𑀧𑀦 𑀩𑀳𑀺𑀚𑀺𑀯𑁆𑀳𑀸𑀬 𑀧𑀮𑀺𑀯𑁂𑀞𑁂𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑀁 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑀭𑀺𑀕𑀻𑀯𑀸𑀬 ¶ 𑀙𑀺𑀦𑁆𑀦𑀲𑀻𑀲𑀲𑁆𑀲𑀧𑀺 𑀅𑀥𑁄𑀪𑀸𑀕𑁂𑀦 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀸𑀮𑀼𑀓𑀁 𑀙𑀼𑀧𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯.

𑀅𑀝𑁆𑀞𑀺𑀓𑀯𑀢𑁆𑀣𑀼𑀫𑁆𑀳𑀺 𑀲𑀼𑀲𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀅𑀝𑁆𑀞𑀺𑀓𑀸𑀦𑀺 𑀲𑀗𑁆𑀓𑀟𑁆𑀠𑀦𑁆𑀢𑀲𑁆𑀲𑀸𑀧𑀺, 𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀫𑀼𑀘𑁆𑀘𑀢𑀼 𑀯𑀸 𑀫𑀸 𑀯𑀸, 𑀤𑀼𑀓𑁆𑀓𑀝𑀫𑁂𑀯. 𑀫𑁄𑀘𑀦𑀭𑀸𑀕𑁂𑀦 𑀧𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀫𑀼𑀘𑁆𑀘𑀦𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀫𑀼𑀘𑁆𑀘𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯.

𑀦𑀸𑀕𑀻𑀯𑀢𑁆𑀣𑀼𑀫𑁆𑀳𑀺 𑀦𑀸𑀕𑀫𑀸𑀡𑀯𑀺𑀓𑀸 𑀯𑀸 𑀳𑁄𑀢𑀼 𑀓𑀺𑀦𑁆𑀦𑀭𑀻𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀸, 𑀲𑀩𑁆𑀩𑀢𑁆𑀣 𑀧𑀸𑀭𑀸𑀚𑀺𑀓𑀁.

𑀬𑀓𑁆𑀔𑀻𑀯𑀢𑁆𑀣𑀼𑀫𑁆𑀳𑀺 𑀲𑀩𑁆𑀩𑀸𑀧𑀺 𑀤𑁂𑀯𑀢𑀸 𑀬𑀓𑁆𑀔𑀻𑀬𑁂𑀯.

𑀧𑁂𑀢𑀻𑀯𑀢𑁆𑀣𑀼𑀫𑁆𑀳𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀺𑀧𑁂𑀢𑀺𑀬𑁄 𑀅𑀮𑁆𑀮𑀻𑀬𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸. 𑀯𑀺𑀫𑀸𑀦𑀧𑁂𑀢𑀺𑀬𑁄 𑀧𑀦 𑀅𑀢𑁆𑀣𑀺; 𑀬𑀸𑀲𑀁 𑀓𑀸𑀴𑀧𑀓𑁆𑀔𑁂 𑀅𑀓𑀼𑀲𑀮𑀁 𑀯𑀺𑀧𑀘𑁆𑀘𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀤𑁂𑀯𑀢𑀸 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀺. 𑀏𑀯𑀭𑀽𑀧𑀸𑀬 𑀧𑁂𑀢𑀺𑀬𑀸 𑀯𑀸 𑀬𑀓𑁆𑀔𑀺𑀬𑀸 𑀯𑀸 𑀲𑀘𑁂 𑀤𑀲𑁆𑀲𑀦-𑀕𑀳𑀡-𑀆𑀫𑀲𑀦-𑀨𑀼𑀲𑀦-𑀖𑀝𑁆𑀝𑀦𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣𑀸𑀧𑀺 𑀤𑀲𑁆𑀲𑀦𑀁 𑀦𑀢𑁆𑀣𑀺, 𑀇𑀢𑀭𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀣 𑀤𑀲𑁆𑀲𑀦𑀕𑀳𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀆𑀫𑀲𑀦𑀨𑀼𑀲𑀦𑀖𑀝𑁆𑀝𑀦𑁂𑀳𑀺 𑀧𑀜𑁆𑀜𑀸𑀬𑀫𑀸𑀦𑁂𑀳𑀺 𑀢𑀁 𑀧𑀼𑀕𑁆𑀕𑀮𑀁 𑀯𑀺𑀲𑀜𑁆𑀜𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀬𑀁 𑀅𑀯𑀺𑀲𑀬𑁄 𑀦𑀸𑀫. 𑀢𑀲𑁆𑀫𑀸 𑀏𑀢𑁆𑀣 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀧𑀡𑁆𑀟𑀓𑀯𑀢𑁆𑀣𑀼 𑀧𑀸𑀓𑀝𑀫𑁂𑀯.

𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑁄 𑀔𑀸𑀡𑀼𑀓𑀡𑁆𑀝𑀓𑀫𑀺𑀯 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀦 𑀯𑁂𑀤𑀬𑀢𑀺. 𑀅𑀯𑁂𑀤𑀬𑀦𑁆𑀢𑀲𑁆𑀲𑀸𑀧𑀺 𑀲𑁂𑀯𑀦𑀘𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺.

𑀙𑀼𑀧𑀺𑀢𑀫𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 ¶ 𑀬𑁄 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼𑀕𑀸𑀫𑀁 ¶ 𑀕𑀡𑁆𑀳𑀺𑀢𑁆𑀯𑀸 𑀫𑁂𑀣𑀼𑀦𑁂 𑀯𑀺𑀭𑀚𑁆𑀚𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀤𑀼𑀓𑁆𑀓𑀝𑀫𑁂𑀯𑀲𑁆𑀲 𑀳𑁄𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀳𑀺 𑀧𑀼𑀩𑁆𑀩𑀧𑀬𑁄𑀕𑀸 𑀳𑀢𑁆𑀣𑀕𑁆𑀕𑀸𑀳𑀸𑀤𑀬𑁄 𑀬𑀸𑀯 𑀲𑀻𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀤𑀼𑀓𑁆𑀓𑀝𑁂 𑀢𑀺𑀝𑁆𑀞𑀦𑁆𑀢𑀺. 𑀲𑀻𑀲𑁂 𑀧𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀳𑀺 𑀤𑀼𑀓𑁆𑀓𑀝𑀫𑁂𑀯 𑀲𑀸𑀫𑀦𑁆𑀢𑀁. 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀣𑀼𑀮𑁆𑀮𑀘𑁆𑀘𑀬𑀁. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀥𑀫𑁆𑀫𑁂 𑀯𑀺𑀭𑀚𑁆𑀚𑀺𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺.

𑁭𑁪. 𑀪𑀤𑁆𑀤𑀺𑀬𑀯𑀢𑁆𑀣𑀼𑀲𑁆𑀫𑀺𑀁 ¶ 𑀪𑀤𑁆𑀤𑀺𑀬𑀁 𑀦𑀸𑀫 𑀢𑀁 𑀦𑀕𑀭𑀁. 𑀚𑀸𑀢𑀺𑀬𑀸𑀯𑀦𑀁 𑀦𑀸𑀫 𑀚𑀸𑀢𑀺𑀧𑀼𑀧𑁆𑀨𑀕𑀼𑀫𑁆𑀩𑀸𑀦𑀁 𑀉𑀲𑁆𑀲𑀦𑁆𑀦𑀢𑀸𑀬 𑀏𑀯𑀁 𑀮𑀤𑁆𑀥𑀦𑀸𑀫𑀁; 𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲 𑀉𑀧𑀘𑀸𑀭𑁂 𑀯𑀦𑀁 𑀳𑁄𑀢𑀺. 𑀲𑁄 𑀢𑀢𑁆𑀣 𑀦𑀺𑀧𑀦𑁆𑀦𑁄 𑀢𑁂𑀦 𑀯𑀸𑀢𑀼𑀧𑀢𑁆𑀣𑀫𑁆𑀪𑁂𑀦 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀏𑀓𑀭𑀲𑀁 𑀪𑀯𑀗𑁆𑀕𑀫𑁂𑀯 𑀯𑀢𑁆𑀢𑀢𑀺. 𑀓𑀺𑀮𑀺𑀦𑁆𑀦𑀁 𑀧𑀲𑁆𑀲𑀺𑀢𑁆𑀯𑀸𑀢𑀺 𑀅𑀲𑀼𑀘𑀺𑀓𑀺𑀮𑀺𑀝𑁆𑀞𑀁 𑀧𑀲𑁆𑀲𑀺𑀢𑁆𑀯𑀸.

𑁭𑁫. 𑀇𑀢𑁄 𑀧𑀭𑀸𑀦𑀺 𑀲𑀸𑀤𑀺𑀬𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀯𑀢𑁆𑀣𑀽𑀦𑀺, 𑀅𑀚𑀸𑀦𑀦𑀯𑀢𑁆𑀣𑀼 𑀘𑀸𑀢𑀺 𑀧𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁭𑁬. 𑀤𑁆𑀯𑀻𑀲𑀼 𑀅𑀲𑀸𑀤𑀺𑀬𑀦𑀯𑀢𑁆𑀣𑀽𑀲𑀼 𑀲𑀳𑀲𑀸 𑀯𑀼𑀝𑁆𑀞𑀸𑀲𑀻𑀢𑀺 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑁄 𑀯𑀺𑀬 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄 𑀯𑀺𑀬 𑀘 𑀢𑀼𑀭𑀺𑀢𑀁 𑀯𑀼𑀝𑁆𑀞𑀸𑀲𑀺. 𑀅𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑁂𑀲𑀻𑀢𑀺 𑀅𑀧𑁆𑀧𑀫𑀢𑁆𑀢𑁄 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀔𑀺𑀧𑁆𑀧𑀁 𑀯𑀼𑀝𑁆𑀞𑀳𑀦𑁆𑀢𑁄𑀯 𑀅𑀓𑁆𑀓𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀯𑀝𑁆𑀝𑁂𑀦𑁆𑀢𑁄 𑀧𑀭𑀺𑀯𑀝𑁆𑀝𑁂𑀦𑁆𑀢𑁄 𑀯𑀺𑀳𑁂𑀞𑁂𑀦𑁆𑀢𑁄 𑀧𑀸𑀢𑁂𑀲𑀺. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀲𑀗𑁆𑀕𑀸𑀫𑀲𑀻𑀲𑀬𑁄𑀥𑁄 𑀪𑀺𑀓𑁆𑀔𑀼.

𑁭𑁭. 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀯𑀢𑁆𑀣𑀼𑀫𑁆𑀳𑀺 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦𑀸𑀢𑀺 𑀤𑀺𑀯𑀸 𑀦𑀺𑀧𑀚𑁆𑀚𑀦𑁆𑀢𑁂𑀦. 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘‘𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀦 𑀯𑀼𑀢𑁆𑀢𑀸. 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀤𑁄𑀲𑁂𑀦 𑀧𑀦 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀪𑀕𑀯𑀢𑁄 𑀳𑀺 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀻𑀳𑀺 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸. ‘‘𑀅𑀢𑁆𑀣𑀸𑀧𑀢𑁆𑀢𑀺 𑀤𑀺𑀯𑀸 𑀆𑀧𑀚𑁆𑀚𑀢𑀺 𑀦𑁄 𑀭𑀢𑁆𑀢𑀺’’𑀦𑁆𑀢𑀺 (𑀧𑀭𑀺. 𑁩𑁨𑁩) 𑀇𑀫𑀺𑀦𑀸𑀧𑀺 𑀘𑁂𑀢𑀁 𑀲𑀺𑀤𑁆𑀥𑀁.

𑀓𑀻𑀤𑀺𑀲𑀁 ¶ 𑀧𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑀩𑁆𑀩𑀁, 𑀓𑀻𑀤𑀺𑀲𑀁 𑀦 𑀲𑀁𑀯𑀭𑀺𑀢𑀩𑁆𑀩𑀁? 𑀭𑀼𑀓𑁆𑀔𑀧𑀤𑀭𑀯𑁂𑀴𑀼𑀧𑀤𑀭𑀓𑀺𑀮𑀜𑁆𑀚𑀧𑀡𑁆𑀡𑀸𑀤𑀻𑀦𑀁 ¶ 𑀬𑁂𑀦 𑀓𑁂𑀦𑀘𑀺 𑀓𑀯𑀸𑀝𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀼𑀓𑁆𑀔𑀮𑁂 𑀉𑀧𑀭𑀺 𑀉𑀢𑁆𑀢𑀭𑀧𑀸𑀲𑀓𑁂 𑀘 𑀧𑀯𑁂𑀲𑁂𑀢𑁆𑀯𑀸 𑀓𑀢𑀁 𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀫𑁂𑀯 𑀲𑀁𑀯𑀭𑀺𑀢𑀩𑁆𑀩𑀁. 𑀅𑀜𑁆𑀜𑀁 𑀕𑁄𑀭𑀽𑀧𑀸𑀦𑀁 𑀯𑀚𑁂𑀲𑀼 𑀯𑀺𑀬 𑀭𑀼𑀓𑁆𑀔𑀲𑀽𑀘𑀺𑀓𑀡𑁆𑀝𑀓𑀤𑁆𑀯𑀸𑀭𑀁, 𑀕𑀸𑀫𑀣𑀓𑀦𑀓𑀁 𑀘𑀓𑁆𑀓𑀮𑀓𑀬𑀼𑀢𑁆𑀢𑀤𑁆𑀯𑀸𑀭𑀁, 𑀨𑀮𑀓𑁂𑀲𑀼 𑀯𑀸 𑀓𑀺𑀝𑀺𑀓𑀸𑀲𑀼 𑀯𑀸 𑀤𑁆𑀯𑁂 𑀢𑀻𑀡𑀺 𑀘𑀓𑁆𑀓𑀮𑀓𑀸𑀦𑀺 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀲𑀁𑀲𑀭𑀡𑀓𑀺𑀝𑀺𑀓𑀤𑁆𑀯𑀸𑀭𑀁, 𑀆𑀧𑀡𑁂𑀲𑀼 𑀯𑀺𑀬 𑀓𑀢𑀁 𑀉𑀕𑁆𑀖𑀸𑀝𑀦𑀓𑀺𑀝𑀺𑀓𑀤𑁆𑀯𑀸𑀭𑀁, 𑀤𑁆𑀯𑀻𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀯𑁂𑀡𑀼𑀲𑀮𑀸𑀓𑀸 𑀕𑁄𑀧𑁆𑀨𑁂𑀢𑁆𑀯𑀸 𑀧𑀡𑁆𑀡𑀓𑀼𑀝𑀻𑀲𑀼 𑀓𑀢𑀁 𑀲𑀮𑀸𑀓𑀳𑀢𑁆𑀣𑀓𑀤𑁆𑀯𑀸𑀭𑀁, 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀦𑁆𑀢𑀺 𑀏𑀯𑀭𑀽𑀧𑀁 𑀤𑁆𑀯𑀸𑀭𑀁 𑀦 𑀲𑀁𑀯𑀭𑀺𑀢𑀩𑁆𑀩𑀁. 𑀧𑀢𑁆𑀢𑀳𑀢𑁆𑀣𑀲𑁆𑀲 𑀓𑀯𑀸𑀝𑀧𑁆𑀧𑀡𑀸𑀫𑀦𑁂 𑀧𑀦 ¶ 𑀏𑀓𑀁 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀫𑁂𑀯 𑀅𑀦𑀸𑀧𑀢𑁆𑀢𑀺𑀓𑀭𑀁, 𑀅𑀯𑀲𑁂𑀲𑀸𑀦𑀺 𑀧𑀡𑀸𑀫𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑀲𑁆𑀲 𑀧𑀦 𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀫𑁂𑀯 𑀆𑀧𑀢𑁆𑀢𑀺𑀓𑀭𑀁, 𑀲𑁂𑀲𑀸𑀦𑀺 𑀲𑀁𑀯𑀭𑀺𑀢𑁆𑀯𑀸 𑀯𑀸 𑀅𑀲𑀁𑀯𑀭𑀺𑀢𑁆𑀯𑀸 𑀯𑀸 𑀦𑀺𑀧𑀦𑁆𑀦𑀲𑁆𑀲 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀲𑀁𑀯𑀭𑀺𑀢𑁆𑀯𑀸 𑀧𑀦 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀏𑀢𑀁 𑀯𑀢𑁆𑀢𑀁.

𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀁 𑀧𑀦 𑀓𑀺𑀢𑁆𑀢𑀓𑁂𑀦 𑀲𑀁𑀯𑀼𑀢𑀁 𑀳𑁄𑀢𑀺? 𑀲𑀽𑀘𑀺𑀖𑀝𑀺𑀓𑀸𑀤𑀻𑀲𑀼 𑀤𑀺𑀦𑁆𑀦𑀸𑀲𑀼 𑀲𑀁𑀯𑀼𑀢𑀫𑁂𑀯 𑀳𑁄𑀢𑀺. 𑀅𑀧𑀺𑀘 𑀔𑁄 𑀲𑀽𑀘𑀺𑀫𑀢𑁆𑀢𑁂𑀧𑀺 𑀤𑀺𑀦𑁆𑀦𑁂 𑀯𑀝𑁆𑀝𑀢𑀺. 𑀖𑀝𑀺𑀓𑀫𑀢𑁆𑀢𑁂𑀧𑀺 𑀤𑀺𑀦𑁆𑀦𑁂 𑀯𑀝𑁆𑀝𑀢𑀺. 𑀤𑁆𑀯𑀸𑀭𑀩𑀸𑀳𑀁 𑀨𑀼𑀲𑀺𑀢𑁆𑀯𑀸 𑀧𑀺𑀳𑀺𑀢𑀫𑀢𑁆𑀢𑁂𑀧𑀺 𑀯𑀝𑁆𑀝𑀢𑀺. 𑀈𑀲𑀓𑀁 𑀅𑀨𑀼𑀲𑀺𑀢𑁂𑀧𑀺 𑀯𑀝𑁆𑀝𑀢𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀯𑀺𑀥𑀺𑀦𑀸 𑀬𑀸𑀯𑀢𑀸 𑀲𑀻𑀲𑀁 𑀦𑀧𑁆𑀧𑀯𑀺𑀲𑀢𑀺 𑀢𑀸𑀯𑀢𑀸 𑀅𑀨𑀼𑀲𑀺𑀢𑁂𑀧𑀺 𑀯𑀝𑁆𑀝𑀢𑀻𑀢𑀺. 𑀲𑀘𑁂 𑀩𑀳𑀽𑀦𑀁 𑀯𑀴𑀜𑁆𑀚𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 ‘‘𑀤𑁆𑀯𑀸𑀭𑀁, 𑀆𑀯𑀼𑀲𑁄, 𑀚𑀕𑁆𑀕𑀸𑀳𑀻’’𑀢𑀺 𑀯𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, ‘‘𑀏𑀢𑁂 𑀤𑁆𑀯𑀸𑀭𑀁 𑀚𑀕𑁆𑀕𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀉𑀧𑀸𑀲𑀓𑀫𑁆𑀧𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀸, ‘𑀏𑀲 𑀚𑀕𑁆𑀕𑀺𑀲𑁆𑀲𑀢𑀻’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀯𑀮𑀁 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀫𑀸𑀢𑀼𑀕𑀸𑀫𑀁 𑀯𑀸 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀤𑁆𑀯𑀸𑀭𑀲𑁆𑀲 ¶ 𑀉𑀤𑀼𑀓𑁆𑀔𑀮𑀁 𑀯𑀸 𑀉𑀢𑁆𑀢𑀭𑀧𑀸𑀲𑀓𑁄 𑀯𑀸 𑀪𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀅𑀝𑁆𑀞𑀧𑀺𑀢𑁄 𑀯𑀸, 𑀲𑀁𑀯𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀯𑀓𑀫𑁆𑀫𑀢𑁆𑀣𑀁 𑀯𑀸 𑀧𑀦 𑀇𑀝𑁆𑀞𑀓𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀤𑀻𑀦𑀁 𑀯𑀸 𑀭𑀸𑀲𑀺 𑀅𑀦𑁆𑀢𑁄𑀤𑁆𑀯𑀸𑀭𑁂 𑀓𑀢𑁄 𑀳𑁄𑀢𑀺, 𑀅𑀝𑁆𑀝𑀁 𑀯𑀸 𑀩𑀦𑁆𑀥𑀦𑁆𑀢𑀺, 𑀬𑀣𑀸 𑀲𑀁𑀯𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀏𑀯𑀭𑀽𑀧𑁂 𑀅𑀦𑁆𑀢𑀭𑀸𑀬𑁂 𑀲𑀢𑀺 𑀅𑀲𑀁𑀯𑀭𑀺𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀓𑀯𑀸𑀝𑀁 𑀦𑀢𑁆𑀣𑀺, 𑀮𑀤𑁆𑀥𑀓𑀧𑁆𑀧𑀫𑁂𑀯. 𑀉𑀧𑀭𑀺 𑀲𑀬𑀦𑁆𑀢𑁂𑀦 𑀦𑀺𑀲𑁆𑀲𑁂𑀡𑀺𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀦𑀺𑀲𑁆𑀲𑁂𑀡𑀺𑀫𑀢𑁆𑀣𑀓𑁂 𑀣𑀓𑀦𑀓𑀁 𑀳𑁄𑀢𑀺, 𑀣𑀓𑁂𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀕𑀩𑁆𑀪𑁂 𑀦𑀺𑀧𑀚𑁆𑀚𑀦𑁆𑀢𑁂𑀦 𑀕𑀩𑁆𑀪𑀤𑁆𑀯𑀸𑀭𑀁 𑀯𑀸 𑀧𑀫𑀼𑀔𑀤𑁆𑀯𑀸𑀭𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀏𑀓𑀓𑀼𑀝𑁆𑀝𑀓𑁂 𑀕𑁂𑀳𑁂 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑀸𑀭𑀸𑀦𑀺 𑀓𑀢𑁆𑀯𑀸 𑀯𑀴𑀜𑁆𑀚𑀦𑁆𑀢𑀺, 𑀤𑁆𑀯𑁂𑀧𑀺 𑀤𑁆𑀯𑀸𑀭𑀸𑀦𑀺 𑀚𑀕𑁆𑀕𑀺𑀢𑀩𑁆𑀩𑀸𑀦𑀺.

𑀢𑀺𑀪𑀽𑀫𑀓𑁂𑀧𑀺 𑀧𑀸𑀲𑀸𑀤𑁂 𑀤𑁆𑀯𑀸𑀭𑀁 𑀚𑀕𑁆𑀕𑀺𑀢𑀩𑁆𑀩𑀫𑁂𑀯. 𑀲𑀘𑁂 𑀪𑀺𑀓𑁆𑀔𑀸𑀘𑀸𑀭𑀸 𑀧𑀝𑀺𑀓𑁆𑀓𑀫𑁆𑀫 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑀁 𑀧𑀸𑀲𑀸𑀤𑀁 𑀩𑀳𑀽 𑀪𑀺𑀓𑁆𑀔𑀽 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀁 𑀧𑀯𑀺𑀲𑀦𑁆𑀢𑀺, 𑀲𑀗𑁆𑀖𑀢𑁆𑀣𑁂𑀭𑁂𑀦 𑀤𑁆𑀯𑀸𑀭𑀧𑀸𑀮𑀲𑁆𑀲 ‘‘𑀤𑁆𑀯𑀸𑀭𑀁 𑀚𑀕𑁆𑀕𑀸𑀳𑀻’’𑀢𑀺 𑀯𑀢𑁆𑀯𑀸 𑀯𑀸 ‘‘𑀤𑁆𑀯𑀸𑀭𑀚𑀕𑁆𑀕𑀦𑀁 𑀏𑀢𑀲𑁆𑀲 𑀪𑀸𑀭𑁄’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀩𑁆𑀩𑀁 ¶ . 𑀬𑀸𑀯 𑀲𑀗𑁆𑀖𑀦𑀯𑀓𑁂𑀦 𑀏𑀯𑀫𑁂𑀯 𑀓𑀢𑁆𑀢𑀩𑁆𑀩𑀁. 𑀧𑀼𑀭𑁂 𑀧𑀯𑀺𑀲𑀦𑁆𑀢𑀸𑀦𑀁 ‘‘𑀤𑁆𑀯𑀸𑀭𑀚𑀕𑁆𑀕𑀦𑀁 𑀦𑀸𑀫 𑀧𑀘𑁆𑀙𑀺𑀫𑀸𑀦𑀁 𑀪𑀸𑀭𑁄’’𑀢𑀺 𑀏𑀯𑀁 𑀆𑀪𑁄𑀕𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀦𑀸𑀧𑀼𑀘𑁆𑀙𑀸 𑀯𑀸 𑀆𑀪𑁄𑀕𑀁 𑀯𑀸 𑀅𑀓𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀅𑀲𑀁𑀯𑀼𑀢𑀤𑁆𑀯𑀸𑀭𑁂 𑀩𑀳𑀺 𑀯𑀸 𑀦𑀺𑀧𑀚𑁆𑀚𑀦𑁆𑀢𑀸𑀦𑀁 𑀆𑀧𑀢𑁆𑀢𑀺. 𑀕𑀩𑁆𑀪𑁂 𑀯𑀸 𑀩𑀳𑀺 𑀯𑀸 𑀦𑀺𑀧𑀚𑁆𑀚𑀦𑀓𑀸𑀮𑁂𑀧𑀺 ‘‘𑀤𑁆𑀯𑀸𑀭𑀚𑀕𑁆𑀕𑀦𑀁 𑀦𑀸𑀫 𑀫𑀳𑀸𑀤𑁆𑀯𑀸𑀭𑁂 𑀤𑁆𑀯𑀸𑀭𑀧𑀸𑀮𑀲𑁆𑀲 𑀪𑀸𑀭𑁄’’𑀢𑀺 ¶ 𑀆𑀪𑁄𑀕𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀮𑁄𑀳𑀧𑀸𑀲𑀸𑀤𑀸𑀤𑀻𑀲𑀼 𑀆𑀓𑀸𑀲𑀢𑀮𑁂 𑀦𑀺𑀧𑀚𑁆𑀚𑀦𑁆𑀢𑁂𑀦𑀸𑀧𑀺 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑀩𑁆𑀩𑀫𑁂𑀯.

𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀇𑀤𑀁 𑀤𑀺𑀯𑀸𑀧𑀝𑀺𑀲𑀮𑁆𑀮𑀻𑀬𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀲𑀤𑁆𑀯𑀸𑀭𑀩𑀦𑁆𑀥𑁂 𑀞𑀸𑀦𑁂 𑀓𑀣𑀺𑀢𑀁. 𑀢𑀲𑁆𑀫𑀸 𑀅𑀩𑁆𑀪𑁄𑀓𑀸𑀲𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀫𑀡𑁆𑀟𑀧𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀤𑁆𑀯𑀸𑀭𑀩𑀦𑁆𑀥𑁂 𑀦𑀺𑀧𑀚𑁆𑀚𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀫𑀳𑀸𑀧𑀭𑀺𑀯𑁂𑀡𑀁 𑀳𑁄𑀢𑀺, 𑀫𑀳𑀸𑀩𑁄𑀥𑀺𑀬𑀗𑁆𑀕𑀡𑀮𑁄𑀳𑀧𑀸𑀲𑀸𑀤𑀗𑁆𑀕𑀡𑀲𑀤𑀺𑀲𑀁 𑀩𑀳𑀽𑀦𑀁 𑀑𑀲𑀭𑀡𑀝𑁆𑀞𑀸𑀦𑀁, 𑀬𑀢𑁆𑀣 𑀤𑁆𑀯𑀸𑀭𑀁 𑀲𑀁𑀯𑀼𑀢𑀫𑁆𑀧𑀺 𑀲𑀁𑀯𑀼𑀢𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑀸 𑀧𑀸𑀓𑀸𑀭𑀁 𑀆𑀭𑀼𑀳𑀺𑀢𑁆𑀯𑀸𑀧𑀺 𑀯𑀺𑀘𑀭𑀦𑁆𑀢𑀺, 𑀢𑀢𑁆𑀣 𑀲𑀁𑀯𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 ¶ 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀉𑀝𑁆𑀞𑀳𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀲𑀼𑀧𑀢𑀺, 𑀆𑀧𑀢𑁆𑀢𑀺. 𑀬𑁄 𑀧𑀦 ‘‘𑀅𑀭𑀼𑀡𑁂 𑀉𑀕𑁆𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀭𑀢𑁆𑀢𑀺𑀁 𑀦𑀺𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀘 𑀦 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀏𑀯𑀁 𑀦𑀺𑀧𑀚𑁆𑀚𑀦𑁆𑀢𑁄 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁.

𑀬𑁄 𑀧𑀦 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀚𑀕𑁆𑀕𑀺𑀢𑁆𑀯𑀸 𑀅𑀤𑁆𑀥𑀸𑀦𑀁 𑀯𑀸 𑀕𑀦𑁆𑀢𑁆𑀯𑀸 𑀤𑀺𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑁄 𑀧𑀸𑀤𑁂 𑀪𑀽𑀫𑀺𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀦𑀺𑀤𑁆𑀤𑀸𑀯𑀲𑁂𑀦 𑀦𑀺𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀑𑀓𑁆𑀓𑀦𑁆𑀢𑀦𑀺𑀤𑁆𑀤𑁄 𑀅𑀚𑀸𑀦𑀦𑁆𑀢𑁄𑀧𑀺 𑀧𑀸𑀤𑁂 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑀲𑁆𑀲𑀸𑀬 𑀲𑀼𑀧𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑁄𑀧𑀺 𑀘 ‘‘𑀦𑀺𑀤𑁆𑀤𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀘𑀗𑁆𑀓𑀫𑀦𑁆𑀢𑁄 𑀧𑀢𑀺𑀢𑁆𑀯𑀸 𑀲𑀳𑀲𑀸𑀯 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀬𑁄 𑀧𑀦 𑀧𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺.

𑀓𑁄 𑀫𑀼𑀘𑁆𑀘𑀢𑀺, 𑀓𑁄 𑀦 𑀫𑀼𑀘𑁆𑀘𑀢𑀻𑀢𑀺? 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀸𑀯 ‘‘𑀏𑀓𑀪𑀗𑁆𑀕𑁂𑀦 𑀦𑀺𑀧𑀦𑁆𑀦𑀓𑁄𑀬𑁂𑀯 𑀫𑀼𑀘𑁆𑀘𑀢𑀺. 𑀧𑀸𑀤𑁂 𑀧𑀦 𑀪𑀽𑀫𑀺𑀢𑁄 𑀫𑁄𑀘𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀬𑀓𑁆𑀔𑀕𑀳𑀺𑀢𑀓𑁄𑀧𑀺 𑀯𑀺𑀲𑀜𑁆𑀜𑀻𑀪𑀽𑀢𑁄𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄𑀯 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁄 𑀘𑀗𑁆𑀓𑀫𑀦𑁆𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀢𑀺𑀢𑁄 𑀢𑀢𑁆𑀣𑁂𑀯 𑀲𑀼𑀧𑀢𑀺, 𑀢𑀲𑁆𑀲𑀸𑀧𑀺 𑀅𑀯𑀺𑀲𑀬𑀢𑁆𑀢𑀸 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺. 𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀦 𑀓𑀣𑀬𑀦𑁆𑀢𑀺. 𑀢𑀲𑁆𑀫𑀸 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀦 𑀚𑀦𑀸 𑀆𑀧𑀢𑁆𑀢𑀺𑀢𑁄 𑀫𑀼𑀘𑁆𑀘𑀦𑁆𑀢𑀺𑀬𑁂𑀯, 𑀬𑁄 𑀘 𑀬𑀓𑁆𑀔𑀕𑀳𑀺𑀢𑀓𑁄, 𑀬𑁄 𑀘 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄’’𑀢𑀺.

𑁭𑁮. 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀫𑁆𑀳𑀺 ¶ ¶ 𑀅𑀦𑀸𑀧𑀢𑁆𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀬𑀲𑁆𑀫𑀸 𑀲𑀼𑀧𑀺𑀦𑀦𑁆𑀢𑁂 𑀅𑀯𑀺𑀲𑀬𑀢𑁆𑀢𑀸 𑀏𑀯𑀁 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀪𑀕𑀯𑀢𑀸 𑀅𑀯𑀺𑀦𑀺𑀘𑁆𑀙𑀺𑀢𑀧𑀼𑀩𑁆𑀩𑀫𑁆𑀧𑀺 𑀇𑀫𑀁 𑀯𑀢𑁆𑀣𑀼𑀁 𑀦𑀬𑀕𑁆𑀕𑀸𑀳𑁂𑀦 𑀯𑀺𑀦𑀺𑀘𑁆𑀙𑀺𑀦𑀺. 𑀪𑀕𑀯𑀸𑀧𑀺 𑀘 𑀲𑀼𑀢𑁆𑀯𑀸 ‘‘𑀲𑀼𑀓𑀣𑀺𑀢𑀁, 𑀪𑀺𑀓𑁆𑀔𑀯𑁂, 𑀉𑀧𑀸𑀮𑀺𑀦𑀸; 𑀅𑀧𑀤𑁂 𑀧𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬, 𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀉𑀧𑀸𑀮𑀺 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮). 𑀇𑀢𑁄 𑀧𑀭𑀸𑀦𑀺 ¶ 𑀲𑀼𑀧𑀩𑁆𑀩𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁮𑁦. 𑀪𑀺𑀓𑁆𑀔𑀼𑀦𑀻𑀲𑀫𑁆𑀧𑀬𑁄𑀚𑀦𑀸𑀤𑀻𑀲𑀼 𑀢𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸 𑀔𑀺𑀟𑁆𑀟𑀸𑀧𑀲𑀼𑀢𑀸 𑀅𑀢𑁆𑀢𑀦𑁄 𑀅𑀦𑀸𑀘𑀸𑀭𑁂𑀦 𑀏𑀯𑀁 𑀅𑀓𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀘 𑀮𑀺𑀘𑁆𑀙𑀯𑀻𑀦𑀁 𑀯𑀺𑀦𑀸𑀲𑁄 𑀏𑀯 𑀉𑀤𑀧𑀸𑀤𑀺.

𑁮𑁨. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀫𑁆𑀳𑀺 𑀤𑀲𑁆𑀲𑀦𑀁 𑀅𑀕𑀫𑀸𑀲𑀻𑀢𑀺 𑀅𑀦𑀼𑀓𑀫𑁆𑀧𑀸𑀬 ‘‘𑀢𑀁 𑀤𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀲𑀸 𑀅𑀢𑁆𑀢𑀦𑁄 𑀘 𑀤𑀸𑀭𑀓𑀸𑀦𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀦𑀸𑀣𑀪𑀸𑀯𑀁 𑀲𑀁𑀯𑀡𑁆𑀡𑁂𑀲𑀺. 𑀅𑀦𑀧𑁂𑀓𑁆𑀔𑀜𑁆𑀘 𑀦𑀁 𑀜𑀢𑁆𑀯𑀸 𑀓𑀼𑀧𑀺𑀢𑀸 ‘‘𑀏𑀳𑀺 𑀯𑀺𑀩𑁆𑀪𑀫𑀸𑀳𑀻’’𑀢𑀺 𑀩𑀮𑀓𑁆𑀓𑀸𑀭𑁂𑀦 𑀅𑀕𑁆𑀕𑀳𑁂𑀲𑀺. 𑀲𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀧𑀝𑀺𑀓𑁆𑀓𑀫𑀦𑁆𑀢𑁄 𑀚𑀭𑀸𑀤𑀼𑀩𑁆𑀩𑀮𑀢𑀸𑀬 𑀉𑀢𑁆𑀢𑀸𑀦𑁄 𑀧𑀭𑀺𑀧𑀢𑀺. 𑀢𑀢𑁄 𑀲𑀸 𑀅𑀢𑁆𑀢𑀦𑁄 𑀫𑀦𑀁 𑀅𑀓𑀸𑀲𑀺. 𑀲𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀻 𑀲𑀫𑀼𑀘𑁆𑀙𑀺𑀦𑁆𑀦𑀓𑀸𑀫𑀭𑀸𑀕𑁄 𑀢𑀲𑁆𑀫𑀸 𑀦 𑀲𑀸𑀤𑀺𑀬𑀻𑀢𑀺.

𑁮𑁩. 𑀫𑀺𑀕𑀧𑁄𑀢𑀓𑀯𑀢𑁆𑀣𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀁 𑁋

𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄, 𑀦𑀺𑀤𑀸𑀦𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄;

𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄, 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄 𑀘𑁂𑀯.

𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀢𑁄, 𑀧𑀤𑀢𑁆𑀣𑀢𑁄 𑀧𑀸𑀴𑀺𑀬𑁄𑀚𑀦𑀓𑁆𑀓𑀫𑀢𑁄;

𑀲𑀺𑀓𑁆𑀔𑀸𑀧𑀤𑀦𑀺𑀘𑁆𑀙𑀬𑀢𑁄, 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄.

𑀲𑀫𑁆𑀧𑀲𑁆𑀲𑀢𑀁 ¶ ¶ 𑀦 𑀤𑀺𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀅𑀧𑀸𑀲𑀸𑀤𑀺𑀓𑀁 𑀬𑀢𑁄 𑀏𑀢𑁆𑀣;

𑀯𑀺𑀜𑁆𑀜𑀽𑀦𑀫𑀬𑀁 𑀢𑀲𑁆𑀫𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯.

𑀲𑀁𑀯𑀡𑁆𑀡𑀦𑀸 𑀧𑀯𑀢𑁆𑀢𑀸, 𑀯𑀺𑀦𑀬𑀲𑁆𑀲 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦;

𑀯𑀼𑀢𑁆𑀢𑀲𑁆𑀲 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺.

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁

𑀤𑀼𑀢𑀺𑀬𑀁 ¶ 𑀅𑀤𑀼𑀢𑀺𑀬𑁂𑀦, 𑀬𑀁 𑀚𑀺𑀦𑁂𑀦 𑀧𑀓𑀸𑀲𑀺𑀢𑀁;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀲𑀩𑁆𑀩𑀁 𑀯𑀚𑁆𑀚𑀬𑀺𑀢𑁆𑀯𑀸𑀦, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁮𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺 𑀢𑀢𑁆𑀣 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂, 𑀢𑀜𑁆𑀳𑀺 𑀫𑀦𑁆𑀥𑀸𑀢𑀼-𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀢𑁂𑀳𑀺! 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺. 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀲𑀁 𑀯𑀲𑀦𑁆𑀢𑀯𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀦𑀝𑁆𑀞𑀸𑀦𑀫𑀸𑀳 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺. 𑀲𑁄 𑀘 𑀕𑀺𑀚𑁆𑀛𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀯𑀲𑀺𑀁𑀲𑀼, 𑀕𑀺𑀚𑁆𑀛𑀲𑀤𑀺𑀲𑀸𑀦𑀺 𑀯𑀸 𑀢𑀲𑁆𑀲 𑀓𑀽𑀝𑀸𑀦𑀺; 𑀢𑀲𑁆𑀫𑀸 𑀕𑀺𑀚𑁆𑀛𑀓𑀽𑀝𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀩𑀳𑀼𑀮𑀸𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀲𑀗𑁆𑀖𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀬𑁄 𑀢𑀬𑁄 𑀏𑀯, 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀩𑀳𑀼𑀮𑀸. 𑀇𑀥 𑀧𑀦 𑀢𑁂 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀫𑁆𑀩𑀳𑀼𑀮𑀸𑀢𑀺 ¶ 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀦𑀸𑀢𑀺𑀯𑀺𑀲𑁆𑀲𑀸𑀲𑀺𑀓𑀸 𑀦 𑀤𑀴𑁆𑀳𑀫𑀺𑀢𑁆𑀢𑀸; 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀢𑁆𑀢𑀸 𑀳𑀺 𑀢𑁂 𑀲𑀦𑁆𑀤𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀫𑁆𑀪𑀢𑁆𑀢𑀸𑀢𑀺 𑀅𑀢𑀺𑀯𑀺𑀲𑁆𑀲𑀸𑀲𑀺𑀓𑀸 𑀤𑀴𑁆𑀳𑀫𑀺𑀢𑁆𑀢𑀸; 𑀢𑁂 ¶ 𑀳𑀺 𑀲𑀼𑀝𑁆𑀞𑀼 𑀪𑀢𑁆𑀢𑀸 ¶ 𑀪𑀚𑀫𑀸𑀦𑀸 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸𑀢𑀺 𑀓𑀢𑁆𑀯𑀸 ‘‘𑀲𑀫𑁆𑀪𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀲𑀺𑀕𑀺𑀮𑀺𑀧𑀲𑁆𑀲𑁂𑀢𑀺 𑀇𑀲𑀺𑀕𑀺𑀮𑀺 𑀦𑀸𑀫 𑀧𑀩𑁆𑀩𑀢𑁄, 𑀢𑀲𑁆𑀲 𑀧𑀲𑁆𑀲𑁂. 𑀧𑀼𑀩𑁆𑀩𑁂 𑀓𑀺𑀭 𑀧𑀜𑁆𑀘𑀲𑀢𑀫𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀸𑀲𑀺𑀓𑁄𑀲𑀮𑀸𑀤𑀻𑀲𑀼 𑀚𑀦𑀧𑀤𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀢𑁂 𑀧𑀯𑀺𑀲𑀦𑁆𑀢𑁂𑀯 𑀧𑀲𑁆𑀲𑀦𑁆𑀢𑀺 𑀦 𑀦𑀺𑀓𑁆𑀔𑀫𑀦𑁆𑀢𑁂. 𑀢𑀢𑁄 𑀆𑀳𑀁𑀲𑀼 𑁋 ‘‘𑀅𑀬𑀁 𑀧𑀩𑁆𑀩𑀢𑁄 𑀇𑀫𑁂 𑀇𑀲𑀬𑁄 𑀕𑀺𑀮𑀢𑀻’’𑀢𑀺. 𑀢𑀤𑀼𑀧𑀸𑀤𑀸𑀬 𑀢𑀲𑁆𑀲 ‘‘𑀇𑀲𑀺𑀕𑀺𑀮𑀺’’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺, 𑀢𑀲𑁆𑀲 𑀧𑀲𑁆𑀲𑁂 𑀧𑀩𑁆𑀩𑀢𑀧𑀸𑀤𑁂.

𑀢𑀺𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸𑀢𑀺 𑀢𑀺𑀡𑀘𑁆𑀙𑀤𑀦𑀸 𑀲𑀤𑁆𑀯𑀸𑀭𑀩𑀦𑁆𑀥𑀸 𑀓𑀼𑀝𑀺𑀬𑁄 𑀓𑀢𑁆𑀯𑀸. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀳𑀺 𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀦𑁆𑀦𑁂𑀬𑁂𑀯 𑀲𑀤𑁆𑀯𑀸𑀭𑀩𑀦𑁆𑀥𑁂 𑀲𑁂𑀦𑀸𑀲𑀦𑁂 𑀉𑀧𑀕𑀦𑁆𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪). 𑀢𑀲𑁆𑀫𑀸 𑀯𑀲𑁆𑀲𑀓𑀸𑀮𑁂 𑀲𑀘𑁂 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀮𑀪𑀢𑀺, 𑀳𑀢𑁆𑀣𑀓𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑁂𑀦 𑀲𑀸𑀫𑀫𑁆𑀧𑀺 𑀓𑀸𑀢𑀩𑁆𑀩𑀁. 𑀦 𑀢𑁆𑀯𑁂𑀯 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀬𑀫𑀦𑀼𑀥𑀫𑁆𑀫𑀢𑀸. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀢𑀺𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀺𑀓𑀯𑀢𑁆𑀢𑀸𑀦𑀺 𑀘 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀅𑀥𑀺𑀝𑁆𑀞𑀸𑀬 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀫𑀸𑀦𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼.

𑀆𑀬𑀲𑁆𑀫𑀸𑀧𑀺 𑀥𑀦𑀺𑀬𑁄𑀢𑀺 𑀦 𑀓𑁂𑀯𑀮𑀁 𑀢𑁂 𑀣𑁂𑀭𑀸𑀯 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀧𑀺. 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄𑀢𑀺 𑀓𑀼𑀫𑁆𑀪𑀓𑀸𑀭𑀲𑁆𑀲 𑀧𑀼𑀢𑁆𑀢𑁄; 𑀢𑀲𑁆𑀲 𑀳𑀺 𑀦𑀸𑀫𑀁 𑀥𑀦𑀺𑀬𑁄, 𑀧𑀺𑀢𑀸 𑀓𑀼𑀫𑁆𑀪𑀓𑀸𑀭𑁄, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄’’𑀢𑀺. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀻𑀢𑀺 𑀢𑁂𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂𑀬𑁂𑀯 𑀢𑀺𑀡𑀓𑀼𑀝𑀺𑀓𑀁 𑀓𑀭𑀺𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺. 𑀯𑀲𑁆𑀲𑀁𑀯𑀼𑀢𑁆𑀣𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀯𑀼𑀢𑁆𑀣𑀯𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 ¶ 𑀯𑀲𑁆𑀲𑀁𑀯𑀼𑀢𑁆𑀣𑀸 𑀳𑀼𑀢𑁆𑀯𑀸.

𑀢𑀺𑀡𑀓𑀼𑀝𑀺𑀬𑁄 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀦 𑀤𑀡𑁆𑀟𑀫𑀼𑀕𑁆𑀕𑀭𑀸𑀤𑀻𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸, 𑀯𑀢𑁆𑀢𑀲𑀻𑀲𑁂𑀦 𑀧𑀦 𑀢𑀺𑀡𑀜𑁆𑀘 𑀤𑀸𑀭𑀼𑀯𑀮𑁆𑀮𑀺-𑀆𑀤𑀻𑀦𑀺 𑀘 𑀑𑀭𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀳𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀓𑀼𑀝𑀺 𑀓𑀢𑀸 𑀳𑁄𑀢𑀺, 𑀢𑁂𑀦 𑀲𑀘𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀢𑁂 𑀆𑀧𑀼𑀘𑁆𑀙𑀺𑀢𑀩𑁆𑀩𑀸. ‘‘𑀲𑀘𑁂 𑀇𑀫𑀁 𑀓𑀼𑀝𑀺𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀓𑁄𑀘𑀺 𑀯𑀲𑀺𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀬𑁂𑀦 𑀅𑀭𑀜𑁆𑀜𑁂 𑀯𑀸 𑀓𑀢𑀸 𑀳𑁄𑀢𑀺 ¶ , 𑀧𑀝𑀺𑀚𑀕𑁆𑀕𑀦𑀓𑀁 𑀯𑀸 𑀦 𑀮𑀪𑀢𑀺, 𑀢𑁂𑀦 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀭𑀺𑀪𑁄𑀕𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀭𑀜𑁆𑀜𑁂 𑀓𑀼𑀝𑀺𑀬𑁄 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑀓𑀁 𑀅𑀮𑀪𑀦𑁆𑀢𑀸 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀗𑁆𑀕𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀞𑀧𑀺𑀢𑀁 𑀢𑀁 𑀉𑀧𑀘𑀺𑀓𑀸𑀳𑀺 𑀦 𑀔𑀚𑁆𑀚𑀢𑀺 ¶ , 𑀅𑀦𑁄𑀯𑀲𑁆𑀲𑀓𑀜𑁆𑀘 𑀳𑁄𑀢𑀺, 𑀢𑀣𑀸 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸.

𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀽𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀸𑀦𑀼𑀓𑀽𑀮𑀁 𑀚𑀦𑀧𑀤𑀁 𑀅𑀕𑀫𑀁𑀲𑀼. 𑀆𑀬𑀲𑁆𑀫𑀸 𑀧𑀦 𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀯𑀲𑀻𑀢𑀺𑀆𑀤𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀸𑀯𑀢𑀢𑀺𑀬𑀓𑀦𑁆𑀢𑀺 𑀬𑀸𑀯𑀢𑀢𑀺𑀬𑀯𑀸𑀭𑀁. 𑀅𑀦𑀯𑀬𑁄𑀢𑀺 𑀅𑀦𑀼𑀅𑀯𑀬𑁄, 𑀲𑀦𑁆𑀥𑀺𑀯𑀲𑁂𑀦 𑀉𑀓𑀸𑀭𑀮𑁄𑀧𑁄. 𑀅𑀦𑀼 𑀅𑀦𑀼 𑀅𑀯𑀬𑁄, 𑀬𑀁 𑀬𑀁 𑀓𑀼𑀫𑁆𑀪𑀓𑀸𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀅𑀦𑀽𑀦𑁄 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀲𑀓𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂. 𑀆𑀘𑀭𑀺𑀬𑀓𑁂𑀢𑀺 𑀆𑀘𑀭𑀺𑀬𑀓𑀫𑁆𑀫𑁂. 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑁂𑀢𑀺 𑀓𑀼𑀫𑁆𑀪𑀓𑀸𑀭𑀸𑀦𑀁 𑀓𑀫𑁆𑀫𑁂; 𑀓𑀼𑀫𑁆𑀪𑀓𑀸𑀭𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀓𑀁 𑀆𑀘𑀭𑀺𑀬𑀓𑀁 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄𑀢𑀺 𑀧𑀭𑀺𑀲𑀼𑀤𑁆𑀥𑀲𑀺𑀧𑁆𑀧𑁄. 𑀅𑀦𑀯𑀬𑀢𑁆𑀢𑁂𑀧𑀺 𑀲𑀢𑀺 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀲𑀺𑀧𑁆𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀦𑁆𑀢𑀺 𑀧𑀺𑀝𑁆𑀞𑀲𑀗𑁆𑀖𑀸𑀝𑀓𑀓𑀯𑀸𑀝𑀲𑀽𑀘𑀺𑀖𑀝𑀺𑀓𑀯𑀸𑀢𑀧𑀸𑀦𑀓𑀯𑀸𑀝𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀪𑀺𑀢𑁆𑀢𑀺𑀙𑀤𑀦𑀺𑀝𑁆𑀞𑀓𑀣𑀫𑁆𑀪𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀕𑁂𑀳𑀲𑀫𑁆𑀪𑀸𑀭𑀁 𑀫𑀢𑁆𑀢𑀺𑀓𑀸𑀫𑀬𑀫𑁂𑀯 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀕𑁄𑀫𑀬𑀜𑁆𑀘 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀢𑀁 𑀓𑀼𑀝𑀺𑀓𑀁 𑀧𑀘𑀻𑀢𑀺 𑀢𑀁 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀢𑁆𑀯𑀸 𑀧𑀸𑀡𑀺𑀓𑀸𑀬 𑀖𑀁𑀲𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑁂𑀮𑀢𑀫𑁆𑀩𑀫𑀢𑁆𑀢𑀺𑀓𑀸𑀬 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀢𑀺𑀡𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀬𑀣𑀸 𑀧𑀓𑁆𑀓𑀸 𑀲𑀼𑀧𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀧𑀘𑀺. 𑀏𑀯𑀁 𑀧𑀓𑁆𑀓𑀸 𑀘 𑀧𑀦 𑀲𑀸 𑀅𑀳𑁄𑀲𑀺 𑀓𑀼𑀝𑀺𑀓𑀸 ¶ . 𑀅𑀪𑀺𑀭𑀽𑀧𑀸𑀢𑀺 𑀲𑀼𑀭𑀽𑀧𑀸. 𑀧𑀸𑀲𑀸𑀤𑀺𑀓𑀸𑀢𑀺 𑀧𑀲𑀸𑀤𑀚𑀦𑀺𑀓𑀸. 𑀮𑁄𑀳𑀺𑀢𑀺𑀓𑀸𑀢𑀺 𑀮𑁄𑀳𑀺𑀢𑀯𑀡𑁆𑀡𑀸. 𑀓𑀺𑀗𑁆𑀓𑀡𑀺𑀓𑀲𑀤𑁆𑀤𑁄𑀢𑀺 𑀓𑀺𑀗𑁆𑀓𑀡𑀺𑀓𑀚𑀸𑀮𑀲𑁆𑀲 𑀲𑀤𑁆𑀤𑁄. 𑀬𑀣𑀸 𑀓𑀺𑀭 𑀦𑀸𑀦𑀸𑀭𑀢𑀦𑁂𑀳𑀺 𑀓𑀢𑀲𑁆𑀲 𑀓𑀺𑀗𑁆𑀓𑀡𑀺𑀓𑀚𑀸𑀮𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺, 𑀏𑀯𑀁 𑀢𑀲𑁆𑀲𑀸 𑀓𑀼𑀝𑀺𑀓𑀸𑀬 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀤𑀻𑀳𑀺 𑀧𑀯𑀺𑀝𑁆𑀞𑁂𑀦 𑀯𑀸𑀢𑁂𑀦 𑀲𑀫𑀸𑀳𑀢𑀸𑀬 𑀲𑀤𑁆𑀤𑁄 𑀅𑀳𑁄𑀲𑀺. 𑀏𑀢𑁂𑀦𑀲𑁆𑀲𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀼𑀧𑀓𑁆𑀓𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀺𑀗𑁆𑀓𑀡𑀺𑀓𑀸’’𑀢𑀺 𑀓𑀁𑀲𑀪𑀸𑀚𑀦𑀁, 𑀢𑀲𑁆𑀫𑀸 𑀬𑀣𑀸 𑀅𑀪𑀺𑀳𑀢𑀲𑁆𑀲 𑀓𑀁𑀲𑀪𑀸𑀚𑀦𑀲𑁆𑀲 𑀲𑀤𑁆𑀤𑁄, 𑀏𑀯𑀫𑀲𑁆𑀲𑀸 𑀯𑀸𑀢𑀧𑁆𑀧𑀳𑀢𑀸𑀬 𑀲𑀤𑁆𑀤𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.

𑁮𑁫. 𑀓𑀺𑀁 ¶ 𑀏𑀢𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀚𑀸𑀦𑀦𑁆𑀢𑁄𑀯 𑀪𑀕𑀯𑀸 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸𑀬 𑀓𑀼𑀝𑀺𑀓𑀸𑀬 𑀓𑀭𑀡𑀪𑀸𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀓𑀼𑀝𑀺𑀓𑀁 𑀓𑀭𑀺𑀲𑁆𑀲𑀢𑀻𑀢𑀺 𑀇𑀤𑀁 𑀅𑀢𑀻𑀢𑀢𑁆𑀣𑁂 𑀅𑀦𑀸𑀕𑀢𑀯𑀘𑀦𑀁; 𑀅𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀦 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀧𑀸𑀡𑁂𑀲𑀼 𑀅𑀦𑀼𑀤𑁆𑀤𑀬𑀸 𑀅𑀦𑀼𑀓𑀫𑁆𑀧𑀸 𑀅𑀯𑀺𑀳𑁂𑀲𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀦𑀼𑀤𑁆𑀤𑀬𑀸𑀢𑀺 𑀅𑀦𑀼𑀭𑀓𑁆𑀔𑀡𑀸; 𑀏𑀢𑁂𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀓𑀫𑁆𑀧𑀸𑀢𑀺 𑀧𑀭𑀤𑀼𑀓𑁆𑀔𑁂𑀦 𑀘𑀺𑀢𑁆𑀢𑀓𑀫𑁆𑀧𑀦𑀸. 𑀅𑀯𑀺𑀳𑁂𑀲𑀸𑀢𑀺 𑀅𑀯𑀺𑀳𑀺𑀁𑀲𑀦𑀸; 𑀏𑀢𑁂𑀳𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀪𑀺𑀓𑁆𑀔𑀯𑁂 ¶ , 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀧𑀣𑀯𑀻𑀔𑀡𑀦𑀘𑀺𑀓𑁆𑀔𑀮𑁆𑀮𑀫𑀤𑁆𑀤𑀦𑀅𑀕𑁆𑀕𑀺𑀤𑀸𑀦𑁂𑀲𑀼 𑀩𑀳𑀽 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂 𑀧𑀸𑀡𑁂 𑀩𑁆𑀬𑀸𑀩𑀸𑀥𑁂𑀦𑁆𑀢𑀲𑁆𑀲 𑀯𑀺𑀦𑀸𑀲𑁂𑀦𑁆𑀢𑀲𑁆𑀲 𑀢𑁂𑀲𑀼 𑀧𑀸𑀡𑁂𑀲𑀼 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀧𑀼𑀩𑁆𑀩𑀪𑀸𑀕𑀫𑀢𑁆𑀢𑀸𑀧𑀺 𑀅𑀦𑀼𑀤𑁆𑀤𑀬𑀸 𑀅𑀦𑀼𑀓𑀫𑁆𑀧𑀸 𑀅𑀯𑀺𑀳𑁂𑀲𑀸 𑀦 𑀳𑀺 𑀦𑀸𑀫 𑀪𑀯𑀺𑀲𑁆𑀲𑀢𑀺 𑀅𑀧𑁆𑀧𑀫𑀢𑁆𑀢𑀓𑀸𑀧𑀺 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀻𑀢𑀺 𑀧𑀘𑁆𑀙𑀺𑀫𑁄 𑀚𑀦𑀲𑀫𑀽𑀳𑁄 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀪𑀸𑀯𑀁 𑀫𑀸 𑀆𑀧𑀚𑁆𑀚𑀺. ‘‘𑀩𑀼𑀤𑁆𑀥𑀓𑀸𑀮𑁂𑀧𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀓𑀢𑀁, 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀸𑀦𑀁 𑀦𑀢𑁆𑀣𑀺 𑀤𑁄𑀲𑁄’’𑀢𑀺 𑀫𑀜𑁆𑀜𑀺𑀢𑁆𑀯𑀸 𑀇𑀫𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀫𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑁂 𑀖𑀁𑀲𑀺𑀢𑀩𑁆𑀩𑁂 𑀏𑀯𑀁 𑀫𑀜𑁆𑀜𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 ¶ 𑀥𑀦𑀺𑀬𑀁 𑀕𑀭𑀳𑀺𑀢𑁆𑀯𑀸 𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺𑀓𑀸 𑀓𑀸𑀢𑀩𑁆𑀩𑀸𑀢𑀺 𑀆𑀬𑀢𑀺𑀁 𑀢𑀸𑀤𑀺𑀲𑀸𑀬 𑀓𑀼𑀝𑀺𑀓𑀸𑀬 𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀺; 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘 ‘‘𑀬𑁄 𑀓𑀭𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺𑀓𑀸𑀓𑀭𑀡𑁂 𑀆𑀧𑀢𑁆𑀢𑀺𑀁 𑀞𑀧𑁂𑀲𑀺. 𑀢𑀲𑁆𑀫𑀸 𑀬𑁄𑀧𑀺 𑀧𑀣𑀯𑀻𑀔𑀡𑀦𑀸𑀤𑀺𑀦𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀢𑀸𑀤𑀺𑀲𑀁 𑀓𑀼𑀝𑀺𑀓𑀁 𑀓𑀭𑁄𑀢𑀺, 𑀲𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑀣𑀯𑀻𑀔𑀡𑀦𑀸𑀤𑀻𑀳𑀺 𑀧𑀦 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑁄 𑀬𑀁 𑀬𑀁 𑀯𑀢𑁆𑀣𑀼𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀥𑀦𑀺𑀬𑀢𑁆𑀣𑁂𑀭𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀓𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀤𑀩𑁆𑀩𑀲𑀫𑁆𑀪𑀸𑀭𑀫𑀺𑀲𑁆𑀲𑀓𑀸 𑀧𑀦 𑀬𑀣𑀸 𑀯𑀸 𑀢𑀣𑀸 𑀯𑀸 𑀫𑀺𑀲𑁆𑀲𑀸 𑀳𑁄𑀢𑀼, 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀫𑀢𑁆𑀢𑀺𑀓𑀸𑀫𑀬𑀸𑀯 𑀦 𑀯𑀝𑁆𑀝𑀢𑀺. 𑀲𑀸𑀧𑀺 𑀇𑀝𑁆𑀞𑀓𑀸𑀳𑀺 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁂𑀧𑁂𑀦 𑀓𑀢𑀸 𑀯𑀝𑁆𑀝𑀢𑀺. 𑀏𑀯𑀁 𑀪𑀦𑁆𑀢𑁂𑀢𑀺 𑀔𑁄…𑀧𑁂… 𑀢𑀁 𑀓𑀼𑀝𑀺𑀁 𑀪𑀺𑀦𑁆𑀤𑀺𑀁𑀲𑀽𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀝𑁆𑀞𑁂𑀳𑀺 𑀘 𑀧𑀸𑀲𑀸𑀡𑁂𑀳𑀺 𑀘 𑀢𑀁 𑀓𑀼𑀝𑀺𑀓𑀁 𑀯𑀺𑀓𑀺𑀭𑀦𑁆𑀢𑀸 𑀪𑀺𑀦𑁆𑀤𑀺𑀁𑀲𑀼.

𑀅𑀣 ¶ 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀥𑀦𑀺𑀬𑁄 𑀏𑀓𑀧𑀲𑁆𑀲𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀆𑀕𑀦𑁆𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 ‘‘𑀓𑀺𑀲𑁆𑀲 𑀫𑁂 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀓𑀼𑀝𑀺𑀁 𑀪𑀺𑀦𑁆𑀤𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀕𑀯𑀸 𑀪𑁂𑀤𑀸𑀧𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀼𑀩𑁆𑀩𑀘𑀢𑀸𑀬 𑀲𑀫𑁆𑀧𑀝𑀺𑀘𑁆𑀙𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀇𑀫𑀺𑀦𑀸 𑀅𑀢𑀺𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀁 𑀓𑀢𑀁 𑀓𑀼𑀝𑀺𑀓𑀁 𑀪𑁂𑀤𑀸𑀧𑁂𑀲𑀺, 𑀦𑀦𑀼 𑀏𑀢𑀲𑁆𑀲𑁂𑀢𑁆𑀣 𑀯𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀅𑀣 𑀔𑁄 𑀦𑀁 𑀪𑀕𑀯𑀸 𑀅𑀓𑀧𑁆𑀧𑀺𑀬𑀸𑀢𑀺 𑀪𑀺𑀦𑁆𑀤𑀸𑀧𑁂𑀲𑀺, 𑀢𑀺𑀢𑁆𑀣𑀺𑀬𑀥𑀚𑁄𑀢𑀺 𑀪𑀺𑀦𑁆𑀤𑀸𑀧𑁂𑀲𑀺. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑁋 𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬, 𑀧𑀢𑁆𑀢𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀸𑀬, 𑀲𑁂𑀦𑀸𑀲𑀦𑀩𑀸𑀳𑀼𑀮𑁆𑀮𑀧𑀅𑀲𑁂𑀥𑀦𑀸𑀬𑀸𑀢𑀺𑀆𑀤𑀻𑀦𑀺. 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀬𑁄 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀯𑀺𑀦𑀬𑀜𑁆𑀜𑀽 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀅𑀓𑀧𑁆𑀧𑀺𑀬𑀁 𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀪𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀅𑀦𑀼𑀧𑀯𑀚𑁆𑀚𑁄 ¶ , 𑀲𑁄 𑀦𑁂𑀯 𑀘𑁄𑀤𑁂𑀢𑀩𑁆𑀩𑁄 𑀦 𑀲𑀸𑀭𑁂𑀢𑀩𑁆𑀩𑁄; 𑀦 𑀢𑀁 𑀮𑀩𑁆𑀪𑀸 𑀯𑀢𑁆𑀢𑀼𑀁 ‘‘𑀫𑀫 𑀧𑀭𑀺𑀓𑁆𑀔𑀸𑀭𑁄 𑀢𑀬𑀸 𑀦𑀸𑀲𑀺𑀢𑁄, 𑀢𑀁 𑀫𑁂 𑀤𑁂𑀳𑀻’’𑀢𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄

𑀢𑀢𑁆𑀭𑀸𑀬𑀁 ¶ 𑀧𑀸𑀴𑀺𑀫𑀼𑀢𑁆𑀢𑀓𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑁄 𑁋 𑀓𑁂𑀘𑀺 𑀢𑀸𑀮𑀧𑀡𑁆𑀡𑀘𑁆𑀙𑀢𑁆𑀢𑀁 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀦𑁆𑀢𑀸 𑀯𑀡𑁆𑀡𑀫𑀝𑁆𑀞𑀁 𑀓𑀭𑁄𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺. 𑀏𑀓𑀯𑀡𑁆𑀡𑁂𑀦 𑀧𑀦 𑀦𑀻𑀮𑁂𑀦 𑀯𑀸 𑀧𑀻𑀢𑀓𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑁂𑀦 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀲𑀺𑀩𑁆𑀩𑀺𑀢𑀼𑀁 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀁 𑀲𑀮𑀸𑀓𑀧𑀜𑁆𑀚𑀭𑀁 𑀯𑀸 𑀯𑀺𑀦𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀜𑁆𑀘 𑀔𑁄 𑀣𑀺𑀭𑀓𑀭𑀡𑀢𑁆𑀣𑀁, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬. 𑀙𑀢𑁆𑀢𑀧𑀡𑁆𑀡𑀓𑁂𑀲𑀼 𑀫𑀓𑀭𑀤𑀦𑁆𑀢𑀓𑀁 𑀯𑀸 𑀅𑀟𑁆𑀠𑀘𑀦𑁆𑀤𑀓𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀙𑀢𑁆𑀢𑀤𑀡𑁆𑀟𑁂 𑀕𑁂𑀳𑀣𑀫𑁆𑀪𑁂𑀲𑀼 𑀯𑀺𑀬 𑀖𑀝𑀓𑁄 𑀯𑀸 𑀯𑀸𑀴𑀭𑀽𑀧𑀓𑀁 𑀯𑀸 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀲𑀩𑁆𑀩𑀢𑁆𑀣 𑀆𑀭𑀕𑁆𑀕𑁂𑀦 𑀮𑁂𑀔𑀸 𑀤𑀺𑀦𑁆𑀦𑀸 𑀳𑁄𑀢𑀺, 𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀁. 𑀮𑁂𑀔𑀸𑀧𑀺 𑀖𑀁𑀲𑀺𑀢𑁆𑀯𑀸 𑀯𑀸 𑀅𑀧𑀦𑁂𑀢𑀩𑁆𑀩𑀸, 𑀲𑀼𑀢𑁆𑀢𑀓𑁂𑀦 𑀯𑀸 𑀤𑀡𑁆𑀟𑁄 𑀯𑁂𑀞𑁂𑀢𑀩𑁆𑀩𑁄. 𑀤𑀡𑁆𑀟𑀩𑀼𑀦𑁆𑀤𑁂 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑀁 𑀯𑀝𑁆𑀝𑀢𑀺. 𑀯𑀸𑀢𑀧𑁆𑀧𑀳𑀸𑀭𑁂𑀦 𑀅𑀘𑀮𑀦𑀢𑁆𑀣𑀁 𑀙𑀢𑁆𑀢𑀫𑀡𑁆𑀟𑀮𑀺𑀓𑀁 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀮𑁂𑀔𑀁 𑀞𑀧𑁂𑀦𑁆𑀢𑀺, 𑀲𑀸 𑀯𑀝𑁆𑀝𑀢𑀺.

𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀺 𑀲𑀢𑀧𑀤𑀻𑀲𑀤𑀺𑀲𑀁 𑀲𑀺𑀩𑁆𑀩𑀦𑁆𑀢𑀸 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀞𑀧𑁂𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀧𑀝𑁆𑀝𑀫𑀼𑀔𑁂 𑀯𑀸 𑀧𑀭𑀺𑀬𑀦𑁆𑀢𑁂 ¶ 𑀯𑀸 𑀯𑁂𑀡𑀺𑀁 𑀯𑀸 𑀲𑀗𑁆𑀔𑀮𑀺𑀓𑀁 𑀯𑀸, 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀧𑀓𑀢𑀺𑀲𑀽𑀘𑀺𑀓𑀫𑁆𑀫𑀫𑁂𑀯 𑀯𑀝𑁆𑀝𑀢𑀺. 𑀕𑀡𑁆𑀞𑀺𑀓𑀧𑀝𑁆𑀝𑀓𑀜𑁆𑀘 𑀧𑀸𑀲𑀓𑀧𑀝𑁆𑀝𑀜𑁆𑀘 𑀅𑀝𑁆𑀞𑀓𑁄𑀡𑀫𑁆𑀧𑀺 𑀲𑁄𑀴𑀲𑀓𑁄𑀡𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀣 𑀅𑀕𑁆𑀖𑀺𑀬𑀕𑀬𑀫𑀼𑀕𑁆𑀕𑀭𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑀺, 𑀓𑀓𑁆𑀓𑀝𑀓𑁆𑀔𑀻𑀦𑀺 𑀉𑀓𑁆𑀓𑀺𑀭𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀘𑀢𑀼𑀓𑁄𑀡𑀫𑁂𑀯 𑀯𑀝𑁆𑀝𑀢𑀺. 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸 𑀘 𑀘𑀻𑀯𑀭𑁂 𑀭𑀢𑁆𑀢𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀦𑁆𑀢𑀺. 𑀓𑀜𑁆𑀚𑀺𑀓𑀧𑀺𑀝𑁆𑀞𑀔𑀮𑀺𑀆𑀤𑀻𑀲𑀼 𑀘𑀻𑀯𑀭𑀁 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑀻𑀯𑀭𑀓𑀫𑁆𑀫𑀓𑀸𑀮𑁂 𑀧𑀦 𑀳𑀢𑁆𑀣𑀫𑀮𑀲𑀽𑀘𑀺𑀫𑀮𑀸𑀤𑀻𑀦𑀁 𑀥𑁄𑀯𑀦𑀢𑁆𑀣𑀁 𑀓𑀺𑀮𑀺𑀝𑁆𑀞𑀓𑀸𑀮𑁂 𑀘 𑀥𑁄𑀯𑀦𑀢𑁆𑀣𑀁 𑀯𑀝𑁆𑀝𑀢𑀺. 𑀕𑀦𑁆𑀥𑀁 𑀯𑀸 𑀮𑀸𑀔𑀁 𑀯𑀸 𑀢𑁂𑀮𑀁 ¶ 𑀯𑀸 𑀭𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀲𑀗𑁆𑀔𑁂𑀦 𑀯𑀸 𑀫𑀡𑀺𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀦 𑀖𑀝𑁆𑀝𑁂𑀢𑀩𑁆𑀩𑀁. 𑀪𑀽𑀫𑀺𑀬𑀁 𑀚𑀸𑀡𑀼𑀓𑀸𑀦𑀺 𑀦𑀺𑀳𑀦𑁆𑀢𑁆𑀯𑀸 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀤𑁄𑀡𑀺𑀬𑀫𑁆𑀧𑀺 𑀦 𑀖𑀁𑀲𑀺𑀢𑀩𑁆𑀩𑀁. 𑀤𑁄𑀡𑀺𑀬𑀁 𑀯𑀸 𑀨𑀮𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀅𑀦𑁆𑀢𑁂 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀧𑀳𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺; 𑀢𑀫𑁆𑀧𑀺 𑀫𑀼𑀝𑁆𑀞𑀺𑀦𑀸 𑀦 𑀓𑀸𑀢𑀩𑁆𑀩𑀁. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀤𑁄𑀡𑀺𑀬𑀫𑁆𑀧𑀺 𑀦 𑀞𑀧𑁂𑀲𑀼𑀁. 𑀏𑀓𑁄 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀅𑀧𑀭𑁄 𑀳𑀢𑁆𑀣𑁂 𑀓𑀢𑁆𑀯𑀸 𑀳𑀢𑁆𑀣𑁂𑀦 𑀧𑀳𑀭𑀢𑀺. 𑀘𑀻𑀯𑀭𑀲𑁆𑀲 𑀓𑀡𑁆𑀡𑀲𑀼𑀢𑁆𑀢𑀓𑀁 𑀦 𑀯𑀝𑁆𑀝𑀢𑀺, 𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀬𑀁 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓’’𑀦𑁆𑀢𑀺 ¶ (𑀫𑀳𑀸𑀯. 𑁩𑁪𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀅𑀦𑀼𑀯𑀸𑀢𑁂 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀁 𑀭𑀚𑀦𑀓𑀸𑀮𑁂 𑀮𑀕𑁆𑀕𑀦𑀢𑁆𑀣𑀸𑀬. 𑀕𑀡𑁆𑀞𑀺𑀓𑁂𑀧𑀺 𑀲𑁄𑀪𑀸𑀓𑀭𑀡𑀢𑁆𑀣𑀁 𑀮𑁂𑀔𑀸 𑀯𑀸 𑀧𑀺𑀴𑀓𑀸 𑀯𑀸 𑀦 𑀯𑀝𑁆𑀝𑀢𑀺, 𑀦𑀸𑀲𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀧𑀢𑁆𑀢𑁂 𑀯𑀸 𑀣𑀸𑀮𑀓𑁂 𑀯𑀸 𑀆𑀭𑀕𑁆𑀕𑁂𑀦 𑀮𑁂𑀔𑀁 𑀓𑀭𑁄𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀁 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀧𑀘𑀦𑁆𑀢𑀺 𑁋 ‘‘𑀫𑀡𑀺𑀯𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺, 𑀦 𑀯𑀝𑁆𑀝𑀢𑀺; 𑀢𑁂𑀮𑀯𑀡𑁆𑀡𑁄 𑀧𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀫𑀡𑁆𑀟𑀮𑁂 𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀫𑀓𑀭𑀤𑀦𑁆𑀢𑀓𑀁 𑀧𑀦 𑀯𑀝𑁆𑀝𑀢𑀺.

𑀥𑀫𑀓𑀭𑀡𑀙𑀢𑁆𑀢𑀓𑀲𑁆𑀲 𑀉𑀧𑀭𑀺 𑀯𑀸 𑀳𑁂𑀝𑁆𑀞𑀸 𑀯𑀸 𑀥𑀫𑀓𑀭𑀡𑀓𑀼𑀘𑁆𑀙𑀺𑀬𑀁 𑀯𑀸 𑀮𑁂𑀔𑀸 𑀦 𑀯𑀝𑁆𑀝𑀢𑀺, 𑀙𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀁 𑀧𑀦𑀲𑁆𑀲 𑀮𑁂𑀔𑀸 𑀯𑀝𑁆𑀝𑀢𑀺.

𑀓𑀸𑀬𑀩𑀦𑁆𑀥𑀦𑀲𑁆𑀲 𑀲𑁄𑀪𑀦𑀢𑁆𑀣𑀁 𑀢𑀳𑀺𑀁 𑀢𑀳𑀺𑀁 𑀤𑀺𑀕𑀼𑀡𑀁 𑀲𑀼𑀢𑁆𑀢𑀁 𑀓𑁄𑀝𑁆𑀝𑁂𑀦𑁆𑀢𑀺, 𑀓𑀓𑁆𑀓𑀝𑀘𑁆𑀙𑀻𑀦𑀺 𑀉𑀝𑁆𑀞𑀧𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀉𑀪𑁄𑀲𑀼 𑀧𑀦 𑀅𑀦𑁆𑀢𑁂𑀲𑀼 𑀤𑀲𑀸𑀫𑀼𑀔𑀲𑁆𑀲 𑀣𑀺𑀭𑀪𑀸𑀯𑀸𑀬 𑀤𑀺𑀕𑀼𑀡𑀁 𑀓𑁄𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀲𑀸𑀫𑀼𑀔𑁂 𑀧𑀦 𑀖𑀝𑀓𑀁 𑀯𑀸 𑀫𑀓𑀭𑀫𑀼𑀔𑀁 𑀯𑀸 𑀤𑁂𑀟𑁆𑀟𑀼𑀪𑀲𑀻𑀲𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀢𑀢𑁆𑀣 𑀅𑀘𑁆𑀙𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀻𑀦𑀺 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀉𑀚𑀼𑀓𑀫𑁂𑀯 𑀧𑀦 𑀫𑀘𑁆𑀙𑀓𑀡𑁆𑀝𑀓𑀁 𑀯𑀸 𑀔𑀚𑁆𑀚𑀼𑀭𑀺𑀧𑀢𑁆𑀢𑀓𑀁 𑀯𑀸 𑀫𑀝𑁆𑀞𑀧𑀝𑁆𑀝𑀺𑀓𑀁 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀼𑀁 ¶ 𑀯𑀝𑁆𑀝𑀢𑀺. 𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸 𑀏𑀓𑀸 𑀯𑀝𑁆𑀝𑀢𑀺, 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺𑀧𑀺 𑀯𑀝𑁆𑀝𑀦𑁆𑀢𑀺; 𑀢𑀢𑁄 ¶ 𑀧𑀭𑀁 𑀦 𑀯𑀝𑁆𑀝𑀦𑁆𑀢𑀺. 𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀁 𑀏𑀓𑀫𑁂𑀯 𑀯𑀝𑁆𑀝𑀢𑀺. 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀤𑀲𑀸 𑀧𑀦 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀸𑀧𑀺 𑀯𑀝𑁆𑀝𑀢𑀺. 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀺.

𑀓𑀸𑀬𑀩𑀦𑁆𑀥𑀦𑀯𑀺𑀥𑁂 𑀅𑀝𑁆𑀞𑀫𑀗𑁆𑀕𑀮𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀦 𑀯𑀝𑁆𑀝𑀢𑀺, 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀺𑀥𑀓𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀣𑀺𑀭𑀓𑀭𑀡𑀢𑁆𑀣𑀸𑀬 𑀖𑀝𑀓𑀁 𑀓𑀭𑁄𑀦𑁆𑀢𑀺, 𑀅𑀬𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀜𑁆𑀚𑀦𑀺𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑀘𑀢𑀼𑀧𑁆𑀧𑀤𑀲𑀓𑀼𑀡𑀭𑀽𑀧𑀁 𑀯𑀸 𑀫𑀸𑀮𑀸𑀓𑀫𑁆𑀫-𑀮𑀢𑀸𑀓𑀫𑁆𑀫𑀫𑀓𑀭𑀤𑀦𑁆𑀢𑀓-𑀕𑁄𑀫𑀼𑀢𑁆𑀢𑀓𑀅𑀟𑁆𑀠𑀘𑀦𑁆𑀤𑀓𑀸𑀤𑀺𑀪𑁂𑀤𑀁 𑀯𑀸 𑀯𑀺𑀓𑀸𑀭𑀭𑀽𑀧𑀁 𑀦 𑀯𑀝𑁆𑀝𑀢𑀺. 𑀖𑀁𑀲𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀣𑀸 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀲𑀼𑀢𑁆𑀢𑁂𑀦 𑀯𑁂𑀞𑁂𑀢𑁆𑀯𑀸 𑀯𑀴𑀜𑁆𑀚𑁂𑀢𑀩𑁆𑀩𑀸. 𑀉𑀚𑀼𑀓𑀫𑁂𑀯 𑀧𑀦 𑀘𑀢𑀼𑀭𑀁𑀲𑀸 𑀯𑀸 𑀅𑀝𑁆𑀞𑀁𑀲𑀸 𑀯𑀸 𑀲𑁄𑀴𑀲𑀁𑀲𑀸 𑀯𑀸 𑀅𑀜𑁆𑀚𑀦𑀻 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀢𑁄 𑀧𑀺𑀲𑁆𑀲𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀯𑀝𑁆𑀝𑀮𑁂𑀔𑀸𑀬𑁄 𑀯𑀝𑁆𑀝𑀦𑁆𑀢𑀺. 𑀕𑀻𑀯𑀸𑀬𑀫𑁆𑀧𑀺𑀲𑁆𑀲𑀸 𑀧𑀺𑀥𑀸𑀦𑀓𑀩𑀦𑁆𑀥𑀦𑀢𑁆𑀣𑀁 𑀏𑀓𑀸 𑀯𑀝𑁆𑀝𑀮𑁂𑀔𑀸 𑀯𑀝𑁆𑀝𑀢𑀺.

𑀅𑀜𑁆𑀚𑀦𑀺𑀲𑀮𑀸𑀓𑀸𑀬𑀧𑀺 ¶ 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀚𑀦𑀺𑀢𑁆𑀣𑀯𑀺𑀓𑀸𑀬𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀦𑀸𑀦𑀸𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀏𑀲𑁂𑀯 𑀦𑀬𑁄 𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑁂𑀧𑀺. 𑀓𑀼𑀜𑁆𑀘𑀺𑀓𑀸𑀬 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀢𑀣𑀸 𑀲𑀺𑀧𑀸𑀝𑀺𑀓𑀸𑀬𑀁. 𑀏𑀓𑀯𑀡𑁆𑀡𑀲𑀼𑀢𑁆𑀢𑁂𑀦 𑀧𑀦𑁂𑀢𑁆𑀣 𑀬𑁂𑀦 𑀓𑁂𑀦𑀘𑀺 𑀲𑀺𑀩𑁆𑀩𑀺𑀢𑀼𑀁 𑀯𑀝𑁆𑀝𑀢𑀺.

𑀆𑀭𑀓𑀡𑁆𑀝𑀓𑁂𑀧𑀺 𑀯𑀝𑁆𑀝𑀫𑀡𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺. 𑀕𑀻𑀯𑀸𑀬𑀁 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀺. 𑀧𑀺𑀧𑁆𑀨𑀮𑀺𑀓𑁂𑀧𑀺 𑀫𑀡𑀺𑀓𑀁 𑀯𑀸 𑀧𑀺𑀴𑀓𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀉𑀝𑁆𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀡𑁆𑀟𑀓𑁂 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀺. 𑀦𑀔𑀘𑁆𑀙𑁂𑀤𑀦𑀁 𑀯𑀮𑀺𑀢𑀓𑀁𑀬𑁂𑀯 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀺. 𑀉𑀢𑁆𑀢𑀭𑀸𑀭𑀡𑀺𑀬𑀁 𑀯𑀸 𑀅𑀥𑀭𑀸𑀭𑀡𑀺𑀬𑀁 𑀯𑀸 𑀅𑀭𑀡𑀺𑀥𑀦𑀼𑀓𑁂 𑀯𑀸 ¶ 𑀉𑀧𑀭𑀺𑀧𑁂𑀮𑁆𑀮𑀦𑀤𑀡𑁆𑀟𑀓𑁂 𑀯𑀸 𑀫𑀸𑀮𑀸𑀓𑀫𑁆𑀫𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀧𑁂𑀮𑁆𑀮𑀦𑀤𑀡𑁆𑀟𑀓𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀫𑀡𑁆𑀟𑀮𑀁 𑀳𑁄𑀢𑀺, 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀲𑀽𑀘𑀺𑀲𑀡𑁆𑀟𑀸𑀲𑀁 𑀓𑀭𑁄𑀦𑁆𑀢𑀺, 𑀬𑁂𑀦 𑀲𑀽𑀘𑀺𑀁 𑀟𑀁𑀲𑀸𑀧𑁂𑀢𑁆𑀯𑀸 𑀖𑀁𑀲𑀦𑁆𑀢𑀺, 𑀢𑀢𑁆𑀣 𑀫𑀓𑀭𑀫𑀼𑀔𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀲𑀽𑀘𑀺𑀟𑀁𑀲𑀦𑀢𑁆𑀣𑀁 𑀧𑀦 𑀫𑀼𑀔𑀫𑀢𑁆𑀢𑀁 𑀳𑁄𑀢𑀺, 𑀢𑀁 𑀯𑀝𑁆𑀝𑀢𑀺.

𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺𑀬𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀉𑀚𑀼𑀓𑀫𑁂𑀯 𑀓𑀧𑁆𑀧𑀺𑀬𑀮𑁄𑀳𑁂𑀦 𑀉𑀪𑁄𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀘𑀢𑀼𑀭𑀁𑀲𑀁 𑀯𑀸 𑀅𑀝𑁆𑀞𑀁𑀲𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀢𑁆𑀢𑀭𑀤𑀡𑁆𑀟𑁂𑀧𑀺 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀯𑀝𑁆𑀝𑀮𑁂𑀔𑀸 𑀉𑀧𑀭𑀺 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀫𑀢𑁆𑀢𑀜𑁆𑀘 𑀯𑀝𑁆𑀝𑀢𑀺.

𑀢𑁂𑀮𑀪𑀸𑀚𑀦𑁂𑀲𑀼 ¶ 𑀯𑀺𑀲𑀸𑀡𑁂 𑀯𑀸 𑀦𑀸𑀴𑀺𑀬𑀁 𑀯𑀸 𑀅𑀮𑀸𑀩𑀼𑀓𑁂 𑀯𑀸 𑀆𑀫𑀡𑁆𑀟𑀲𑀸𑀭𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀇𑀢𑁆𑀣𑀺𑀭𑀽𑀧𑀁 𑀧𑀼𑀭𑀺𑀲𑀭𑀽𑀧𑀜𑁆𑀘 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺.

𑀫𑀜𑁆𑀘𑀧𑀻𑀞𑁂 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂 𑀪𑀽𑀫𑀢𑁆𑀣𑀭𑀡𑁂 𑀧𑀸𑀤𑀧𑀼𑀜𑁆𑀙𑀦𑁂 𑀘𑀗𑁆𑀓𑀫𑀦𑀪𑀺𑀲𑀺𑀬𑀸 𑀲𑀫𑁆𑀫𑀼𑀜𑁆𑀚𑀦𑀺𑀬𑀁 𑀓𑀘𑀯𑀭𑀙𑀟𑁆𑀟𑀦𑀓𑁂 𑀭𑀚𑀦𑀤𑁄𑀡𑀺𑀓𑀸𑀬 𑀧𑀸𑀦𑀻𑀬𑀉𑀴𑀼𑀗𑁆𑀓𑁂 𑀧𑀸𑀦𑀻𑀬𑀖𑀝𑁂 𑀧𑀸𑀤𑀓𑀣𑀮𑀺𑀓𑀸𑀬 𑀨𑀮𑀓𑀧𑀻𑀞𑀓𑁂 𑀯𑀮𑀬𑀸𑀥𑀸𑀭𑀓𑁂 𑀤𑀡𑁆𑀟𑀸𑀥𑀸𑀭𑀓𑁂𑀧𑀢𑁆𑀢𑀧𑀺𑀥𑀸𑀦𑁂 𑀢𑀸𑀮𑀯𑀡𑁆𑀝𑁂 𑀯𑀻𑀚𑀦𑁂𑀢𑀺 𑁋 𑀏𑀢𑁂𑀲𑀼 𑀲𑀩𑁆𑀩𑀁 𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂 𑀧𑀦 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀓𑀯𑀸𑀝𑀸𑀤𑀻𑀲𑀼 𑀲𑀩𑁆𑀩𑀭𑀢𑀦𑀫𑀬𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺.

𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸. 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀲𑀻𑀫𑀸𑀬 𑀭𑀸𑀚𑀯𑀮𑁆𑀮𑀪𑁂𑀳𑀺 𑀓𑀢𑀲𑁂𑀦𑀸𑀲𑀦𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀬𑁂 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸 𑀅𑀫𑁆𑀳𑀸𑀓𑀁 𑀲𑀻𑀫𑀸𑀬 𑀲𑁂𑀦𑀸𑀲𑀦𑀁 𑀓𑀭𑁄𑀣𑀸’’𑀢𑀺. 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑁂𑀯, 𑀧𑀼𑀦𑀧𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸 𑀏𑀯𑀁 𑀅𑀓𑀢𑁆𑀣, 𑀫𑀸 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑀸𑀬𑀫𑀓𑀢𑁆𑀣, 𑀫𑀸 𑀲𑀸𑀫𑀕𑁆𑀕𑀺𑀁 ¶ 𑀪𑀺𑀦𑁆𑀤𑀺𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀓𑀢𑀫𑁆𑀧𑀺 𑀓𑀢𑀝𑁆𑀞𑀸𑀦𑁂 𑀦 𑀞𑀲𑁆𑀲𑀢𑀻’’𑀢𑀺. 𑀲𑀘𑁂 𑀩𑀮𑀓𑁆𑀓𑀸𑀭𑁂𑀦 𑀓𑀭𑁄𑀦𑁆𑀢𑀺𑀬𑁂𑀯, 𑀬𑀤𑀸 𑀢𑁂𑀲𑀁 𑀮𑀚𑁆𑀚𑀺𑀧𑀭𑀺𑀲𑀸 𑀉𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀲𑀓𑁆𑀓𑀸 ¶ 𑀘 𑀳𑁄𑀢𑀺 𑀮𑀤𑁆𑀥𑀼𑀁 𑀥𑀫𑁆𑀫𑀺𑀓𑁄 𑀯𑀺𑀦𑀺𑀘𑁆𑀙𑀬𑁄, 𑀢𑀤𑀸 𑀢𑁂𑀲𑀁 𑀧𑁂𑀲𑁂𑀢𑀩𑁆𑀩𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀆𑀯𑀸𑀲𑀁 𑀳𑀭𑀣𑀸’’𑀢𑀺. 𑀲𑀘𑁂 𑀬𑀸𑀯 𑀢𑀢𑀺𑀬𑀁 𑀧𑁂𑀲𑀺𑀢𑁂 𑀳𑀭𑀦𑁆𑀢𑀺, 𑀲𑀸𑀥𑀼; 𑀦𑁄 𑀘𑁂 𑀳𑀭𑀦𑁆𑀢𑀺, 𑀞𑀧𑁂𑀢𑁆𑀯𑀸 𑀩𑁄𑀥𑀺𑀜𑁆𑀘 𑀘𑁂𑀢𑀺𑀬𑀜𑁆𑀘 𑀅𑀯𑀲𑁂𑀲𑀲𑁂𑀦𑀸𑀲𑀦𑀸𑀦𑀺 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀦𑁄 𑀘 𑀔𑁄 𑀅𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑁂𑀳𑀺, 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀙𑀤𑀦-𑀕𑁄𑀧𑀸𑀦𑀲𑀻-𑀇𑀝𑁆𑀞𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀢𑁂𑀲𑀁 𑀧𑁂𑀲𑁂𑀢𑀩𑁆𑀩𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀤𑀩𑁆𑀩𑀲𑀫𑁆𑀪𑀸𑀭𑁂 𑀳𑀭𑀣𑀸’’𑀢𑀺. 𑀲𑀘𑁂 𑀳𑀭𑀦𑁆𑀢𑀺, 𑀲𑀸𑀥𑀼; 𑀦𑁄 𑀘𑁂 𑀳𑀭𑀦𑁆𑀢𑀺, 𑀅𑀣 𑀢𑁂𑀲𑀼 𑀤𑀩𑁆𑀩𑀲𑀫𑁆𑀪𑀸𑀭𑁂𑀲𑀼 𑀳𑀺𑀫𑀯𑀲𑁆𑀲𑀯𑀸𑀢𑀸𑀢𑀧𑀸𑀤𑀻𑀳𑀺 𑀧𑀽𑀢𑀺𑀪𑀽𑀢𑁂𑀲𑀼 𑀯𑀸 𑀘𑁄𑀭𑁂𑀳𑀺 𑀯𑀸 𑀳𑀝𑁂𑀲𑀼 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑁂𑀲𑀼 𑀲𑀻𑀫𑀲𑀸𑀫𑀺𑀓𑀸 𑀪𑀺𑀓𑁆𑀔𑀽 𑀅𑀦𑀼𑀧𑀯𑀚𑁆𑀚𑀸, 𑀦 𑀮𑀩𑁆𑀪𑀸 𑀘𑁄𑀤𑁂𑀢𑀼𑀁 ‘‘𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀤𑀩𑁆𑀩𑀲𑀫𑁆𑀪𑀸𑀭𑀸 𑀦𑀸𑀲𑀺𑀢𑀸’’𑀢𑀺 𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀕𑀻𑀯𑀸’’𑀢𑀺 𑀯𑀸. 𑀬𑀁 𑀧𑀦 𑀲𑀻𑀫𑀲𑀸𑀫𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀁, 𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀻𑀢𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑀦𑀺𑀝𑁆𑀞𑀺𑀢𑁄.

𑁮𑁬. 𑀏𑀯𑀁 𑀪𑀺𑀦𑁆𑀦𑀸𑀬 𑀧𑀦 𑀓𑀼𑀝𑀺𑀓𑀸𑀬 𑀥𑀦𑀺𑀬𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀜𑁆𑀘 𑀧𑀼𑀦 𑀓𑀼𑀝𑀺𑀓𑀭𑀡𑀢𑁆𑀣𑀸𑀬 𑀉𑀲𑁆𑀲𑀸𑀳𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ¶ 𑀤𑀸𑀭𑀼𑀕𑀳𑁂 𑀕𑀡𑀓𑁄𑀢𑀺 𑀭𑀜𑁆𑀜𑁄 𑀤𑀸𑀭𑀼𑀪𑀡𑁆𑀟𑀸𑀕𑀸𑀭𑁂 𑀤𑀸𑀭𑀼𑀕𑁄𑀧𑀓𑁄. 𑀤𑁂𑀯𑀕𑀳𑀤𑀸𑀭𑀽𑀦𑀻𑀢𑀺 𑀤𑁂𑀯𑁂𑀦 𑀕𑀳𑀺𑀢𑀤𑀸𑀭𑀽𑀦𑀺. 𑀭𑀸𑀚𑀧𑀝𑀺𑀕𑁆𑀕𑀳𑀺𑀢𑀪𑀽𑀢𑀸𑀦𑀺 𑀤𑀸𑀭𑀽𑀦𑀻𑀢𑀺 𑀅𑀢𑁆𑀣𑁄. 𑀦𑀕𑀭𑀧𑀝𑀺𑀲𑀗𑁆𑀔𑀸𑀭𑀺𑀓𑀸𑀦𑀻𑀢𑀺 𑀦𑀕𑀭𑀲𑁆𑀲 𑀧𑀝𑀺𑀲𑀗𑁆𑀔𑀸𑀭𑀽𑀧𑀓𑀭𑀡𑀸𑀦𑀺. 𑀆𑀧𑀤𑀢𑁆𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀺𑀤𑀸𑀳𑁂𑀦 𑀯𑀸 𑀧𑀼𑀭𑀸𑀡𑀪𑀸𑀯𑁂𑀦 𑀯𑀸 𑀧𑀝𑀺𑀭𑀸𑀚𑀽𑀧𑀭𑀼𑀦𑁆𑀥𑀦𑀸𑀤𑀺𑀦𑀸 𑀯𑀸 𑀕𑁄𑀧𑀼𑀭𑀝𑁆𑀝𑀸𑀮𑀓𑀭𑀸𑀚𑀦𑁆𑀢𑁂𑀧𑀼𑀭𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀁 𑀯𑀺𑀧𑀢𑁆𑀢𑀺 𑀆𑀧𑀤𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀢𑁆𑀣𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀤𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀓𑀼𑀝𑀺𑀬𑀸 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀺𑀜𑁆𑀘𑀺 𑀅𑀕𑁆𑀕𑁂 𑀓𑀺𑀜𑁆𑀘𑀺 𑀫𑀚𑁆𑀛𑁂 𑀓𑀺𑀜𑁆𑀘𑀺 𑀫𑀽𑀮𑁂 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑁄𑀦𑁆𑀢𑁄 𑀙𑁂𑀤𑀸𑀧𑁂𑀲𑀺.

𑁮𑁭. 𑀯𑀲𑁆𑀲𑀓𑀸𑀭𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁. 𑀫𑀕𑀥𑀫𑀳𑀸𑀫𑀢𑁆𑀢𑁄𑀢𑀺 𑀫𑀕𑀥𑀭𑀝𑁆𑀞𑁂 𑀫𑀳𑀸𑀫𑀢𑁆𑀢𑁄, 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀫𑀕𑀥𑀭𑀜𑁆𑀜𑁄 𑀯𑀸 𑀫𑀳𑀸𑀫𑀢𑁆𑀢𑁄; 𑀫𑀳𑀸𑀅𑀫𑀘𑁆𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀲𑀜𑁆𑀜𑀸𑀬𑀫𑀸𑀦𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄. 𑀪𑀡𑁂𑀢𑀺 𑀇𑀲𑁆𑀲𑀭𑀸𑀦𑀁 𑀦𑀻𑀘𑀝𑁆𑀞𑀸𑀦𑀺𑀓𑀧𑀼𑀭𑀺𑀲𑀸𑀮𑀧𑀦𑀁. 𑀩𑀦𑁆𑀥𑀁 𑀆𑀡𑀸𑀧𑁂𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀧𑀓𑀢𑀺𑀬𑀸𑀧𑀺 ¶ 𑀢𑀲𑁆𑀫𑀺𑀁 𑀇𑀲𑁆𑀲𑀸𑀧𑀓𑀢𑁄𑀯. 𑀲𑁄 𑀭𑀜𑁆𑀜𑁄 ‘‘𑀆𑀡𑀸𑀧𑁂𑀳𑀻’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀲𑁆𑀫𑀸 ‘‘𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺 𑀭𑀜𑁆𑀜𑁄 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀦𑀁 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀩𑀦𑁆𑀥𑀁 𑀓𑀢𑁆𑀯𑀸 𑀆𑀡𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀩𑀦𑁆𑀥𑀁 𑀆𑀡𑀸𑀧𑁂𑀲𑀺. 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀅𑀢𑁆𑀢𑀦𑀸 𑀮𑁂𑀲𑁂𑀦 𑀤𑀸𑀭𑀽𑀦𑀁 𑀳𑀝𑀪𑀸𑀯𑀁 𑀜𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲 𑀤𑀸𑀭𑀽𑀦𑀁 𑀓𑀸𑀭𑀡𑀸 𑀭𑀸𑀚𑀓𑀼𑀮𑀢𑁄 𑀯𑀥𑀁 𑀯𑀸 𑀩𑀦𑁆𑀥𑀁 𑀯𑀸 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀅𑀳𑀫𑁂𑀯 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 ¶ 𑀦𑀺𑀘𑁆𑀘𑀓𑀸𑀮𑀁 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁄𑀬𑁂𑀯 𑀯𑀺𑀘𑀭𑀢𑀺. 𑀢𑀲𑁆𑀫𑀸 𑀢𑀔𑀡𑀜𑁆𑀜𑁂𑀯 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄’’𑀢𑀺. 𑀤𑀸𑀭𑀽𑀦𑀁 𑀓𑀺𑀘𑁆𑀘𑀸𑀢𑀺 𑀤𑀸𑀭𑀽𑀦𑀁 𑀓𑀸𑀭𑀡𑀸. 𑀧𑀼𑀭𑀸𑀳𑀁 𑀳𑀜𑁆𑀜𑀸𑀫𑀻𑀢𑀺 𑀅𑀳𑀁 𑀧𑀼𑀭𑀸 𑀳𑀜𑁆𑀜𑀸𑀫𑀺; 𑀬𑀸𑀯 𑀅𑀳𑀁 𑀦 𑀳𑀜𑁆𑀜𑀸𑀫𑀺, 𑀢𑀸𑀯 𑀢𑁆𑀯𑀁 𑀏𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑁮𑁮. 𑀇𑀗𑁆𑀖, 𑀪𑀦𑁆𑀢𑁂, 𑀲𑀭𑀸𑀧𑁂𑀳𑀻𑀢𑀺 𑀏𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀞𑀫𑀸𑀪𑀺𑀲𑀺𑀢𑁆𑀢𑁄𑀢𑀺 𑀅𑀪𑀺𑀲𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀞𑀫𑀁. 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 ‘‘𑀤𑀺𑀦𑁆𑀦𑀜𑁆𑀜𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀇𑀫𑀁 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀅𑀪𑀺𑀲𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀞𑀫𑀫𑁂𑀯 𑀬𑀁 𑀢𑁆𑀯𑀁 𑀅𑀪𑀸𑀲𑀺, 𑀢𑀁 𑀲𑀬𑀫𑁂𑀯 𑀪𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀲𑀭𑀲𑀺, 𑀦 𑀲𑀭𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀚𑀸𑀦𑁄 𑀓𑀺𑀭 𑀅𑀪𑀺𑀲𑀺𑀢𑁆𑀢𑀫𑀢𑁆𑀢𑀸𑀬𑁂𑀯 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀦𑁆𑀢𑀺 𑁋 ‘‘𑀤𑀺𑀦𑁆𑀦𑀜𑁆𑀜𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀢𑀁 𑀲𑀦𑁆𑀥𑀸𑀬 𑀏𑀲 𑀯𑀤𑀢𑀺. 𑀢𑁂𑀲𑀁 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺 ¶ 𑀢𑁂𑀲𑀁 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸𑀦𑀁 𑀲𑀫𑀺𑀢𑀩𑀸𑀳𑀺𑀢𑀧𑀸𑀧𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀳𑀭𑀡𑀁 𑀲𑀦𑁆𑀥𑀸𑀬 𑀫𑀬𑀸 𑀏𑀢𑀁 𑀪𑀸𑀲𑀺𑀢𑀁; 𑀦 𑀢𑀼𑀫𑁆𑀳𑀸𑀤𑀺𑀲𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀔𑁄 𑀅𑀭𑀜𑁆𑀜𑁂 𑀅𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀜𑁆𑀘 𑀢𑀺𑀡𑀓𑀝𑁆𑀞𑁄𑀤𑀓𑀁 𑀬𑀁 𑀅𑀭𑀜𑁆𑀜𑁂 𑀅𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺; 𑀏𑀢𑀁 𑀲𑀦𑁆𑀥𑀸𑀬 𑀫𑀬𑀸 𑀪𑀸𑀲𑀺𑀢𑀦𑁆𑀢𑀺 𑀤𑀻𑀧𑁂𑀢𑀺.

𑀮𑁄𑀫𑁂𑀦 𑀢𑁆𑀯𑀁 𑀫𑀼𑀢𑁆𑀢𑁄𑀲𑀻𑀢𑀺 𑀏𑀢𑁆𑀣 𑀮𑁄𑀫𑀫𑀺𑀯 𑀮𑁄𑀫𑀁, 𑀓𑀺𑀁 𑀧𑀦 𑀢𑀁? 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀦𑀸𑀫 𑀥𑀼𑀢𑁆𑀢𑀸 ‘‘𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀕𑁆𑀖𑀮𑁄𑀫𑀁 𑀏𑀴𑀓𑀁 𑀕𑀡𑁆𑀳𑁂𑀬𑁆𑀬𑀼𑀁. 𑀢𑀫𑁂𑀦𑀁 𑀅𑀜𑁆𑀜𑁄 𑀯𑀺𑀜𑁆𑀜𑀼𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀏𑀴𑀓𑀲𑁆𑀲 𑀫𑀁𑀲𑀁 𑀓𑀳𑀸𑀧𑀡𑀫𑀢𑁆𑀢𑀁 ¶ 𑀅𑀕𑁆𑀖𑀢𑀺. 𑀮𑁄𑀫𑀸𑀦𑀺 𑀧𑀦 𑀮𑁄𑀫𑀯𑀸𑀭𑁂 𑀮𑁄𑀫𑀯𑀸𑀭𑁂 𑀅𑀦𑁂𑀓𑁂 𑀓𑀳𑀸𑀧𑀡𑁂 𑀅𑀕𑁆𑀖𑀦𑁆𑀢𑀻’’𑀢𑀺 𑀤𑁆𑀯𑁂 𑀅𑀮𑁄𑀫𑀓𑁂 𑀏𑀴𑀓𑁂 𑀤𑀢𑁆𑀯𑀸 𑀕𑀡𑁆𑀳𑁂𑀬𑁆𑀬. 𑀏𑀯𑀁 𑀲𑁄 𑀏𑀴𑀓𑁄 𑀯𑀺𑀜𑁆𑀜𑀼𑀧𑀼𑀭𑀺𑀲𑀫𑀸𑀕𑀫𑁆𑀫 𑀮𑁄𑀫𑁂𑀦 𑀫𑀼𑀘𑁆𑀘𑁂𑀬𑁆𑀬. 𑀏𑀯𑀫𑁂𑀯 𑀢𑁆𑀯𑀁 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀥𑀩𑀦𑁆𑀥𑀦𑀸𑀭𑀳𑁄. 𑀬𑀲𑁆𑀫𑀸 𑀧𑀦 𑀅𑀭𑀳𑀤𑁆𑀥𑀚𑁄 𑀲𑀩𑁆𑀪𑀺 𑀅𑀯𑀚𑁆𑀛𑀭𑀽𑀧𑁄, 𑀢𑁆𑀯𑀜𑁆𑀘 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀬𑀁 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀪𑀽𑀢𑀁 𑀅𑀭𑀳𑀤𑁆𑀥𑀚𑀁 𑀥𑀸𑀭𑁂𑀲𑀺. 𑀢𑀲𑁆𑀫𑀸 𑀢𑁆𑀯𑀁 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀮𑁄𑀫𑁂𑀦 𑀏𑀴𑀓𑁄 𑀯𑀺𑀬 𑀯𑀺𑀜𑁆𑀜𑀼𑀧𑀼𑀭𑀺𑀲𑀫𑀸𑀕𑀫𑁆𑀫 𑀫𑀼𑀢𑁆𑀢𑁄𑀲𑀻𑀢𑀺.

𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀭𑀜𑁆𑀜𑁄 𑀧𑀭𑀺𑀲𑀢𑀺 𑀪𑀸𑀲𑀫𑀸𑀦𑀲𑁆𑀲 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘 𑀲𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺, 𑀅𑀯𑀚𑁆𑀛𑀸𑀬𑀦𑁆𑀢𑀺, 𑀅𑀯𑀚𑀸𑀦𑀦𑁆𑀢𑀸 𑀢𑀁 𑀛𑀸𑀬𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀺𑀬𑁆𑀬𑀦𑁆𑀢𑀻𑀢𑀺 𑀢𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺. 𑀯𑀺𑀧𑀸𑀘𑁂𑀦𑁆𑀢𑀻𑀢𑀺 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀭𑀦𑁆𑀢𑀺; 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀦𑁆𑀢𑀸 𑀉𑀚𑁆𑀛𑀸𑀬𑀦𑁆𑀢𑀺. ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜’’𑀦𑁆𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑀸 𑀔𑀺𑀬𑁆𑀬𑀦𑁆𑀢𑀺. ‘‘𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸’’𑀢𑀺𑀆𑀤𑀻𑀦𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦𑁆𑀢𑀸 𑀯𑀺𑀧𑀸𑀘𑁂𑀦𑁆𑀢𑀻𑀢𑀺. 𑀏𑀢𑁂𑀦 𑀦𑀬𑁂𑀦 𑀇𑀫𑁂𑀲𑀁 𑀧𑀤𑀸𑀦𑀁 𑀇𑀢𑁄 ¶ 𑀧𑀭𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀧𑀤𑀸𑀦𑀼𑀭𑀽𑀧𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀲𑁂𑀝𑁆𑀞𑀘𑀸𑀭𑀺𑀦𑁄. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄. 𑀩𑁆𑀭𑀳𑁆𑀫𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀪𑀸𑀯𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀭𑀜𑁆𑀜𑁄 𑀤𑀸𑀭𑀽𑀦𑀻𑀢𑀺𑀆𑀤𑀺𑀫𑁆𑀳𑀺 ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀢𑀻’’𑀢𑀺 𑀅𑀬𑀁 𑀉𑀚𑁆𑀛𑀸𑀬𑀦𑀢𑁆𑀣𑁄. 𑀬𑀁 𑀧𑀦𑁂𑀢𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀜𑁆𑀜𑁄 𑀤𑀸𑀭𑀽𑀦𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀯𑀘𑀦𑀪𑁂𑀤𑁂 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀳𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀸𑀡𑀯𑁄𑀳𑀸𑀭𑀺𑀓𑁄 ¶ 𑀫𑀳𑀸𑀫𑀢𑁆𑀢𑁄𑀢𑀺 𑀪𑀺𑀓𑁆𑀔𑀼𑀪𑀸𑀯𑀢𑁄 𑀧𑀼𑀭𑀸𑀡𑁂 𑀕𑀺𑀳𑀺𑀓𑀸𑀮𑁂 𑀯𑀺𑀦𑀺𑀘𑁆𑀙𑀬𑀯𑁄𑀳𑀸𑀭𑁂 𑀦𑀺𑀬𑀼𑀢𑁆𑀢𑀢𑁆𑀢𑀸 ‘‘𑀯𑁄𑀳𑀸𑀭𑀺𑀓𑁄’’𑀢𑀺 𑀲𑀗𑁆𑀔𑀁 𑀕𑀢𑁄 𑀫𑀳𑀸𑀅𑀫𑀘𑁆𑀘𑁄.

𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀸 𑀲𑀸𑀫𑀁𑀬𑁂𑀯 𑀮𑁄𑀓𑀯𑁄𑀳𑀸𑀭𑀫𑁆𑀧𑀺 𑀚𑀸𑀦𑀸𑀢𑀺, 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀚𑀸𑀦𑀸𑀢𑀺 𑁋 ‘‘𑀧𑀼𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀏𑀢𑁆𑀢𑀓𑁂𑀦 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀏𑀢𑁆𑀢𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀢𑁆𑀢𑀓𑁂𑀦 𑀤𑀼𑀓𑁆𑀓𑀝’’𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀘𑁂 𑀅𑀜𑁆𑀜𑁂𑀳𑀺 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 ¶ 𑀲𑀤𑁆𑀥𑀺𑀁 𑀅𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀸𑀤𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀬𑁆𑀬, 𑀢𑁂𑀦𑀲𑁆𑀲 𑀲𑀺𑀬𑀼𑀁 𑀯𑀢𑁆𑀢𑀸𑀭𑁄 ‘‘𑀲𑀻𑀮𑀲𑀁𑀯𑀭𑁄 𑀦𑀸𑀫 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀫𑀳𑀸𑀧𑀣𑀯𑀻-𑀲𑀫𑀼𑀤𑁆𑀤-𑀆𑀓𑀸𑀲𑀸𑀦𑀺 𑀯𑀺𑀬 𑀅𑀢𑀺𑀯𑀺𑀢𑁆𑀣𑀺𑀡𑁆𑀡𑁄, 𑀓𑀣𑀜𑁆𑀳𑀺 𑀦𑀸𑀫 𑀪𑀕𑀯𑀸 𑀧𑀸𑀤𑀫𑀢𑁆𑀢𑀓𑁂𑀦 𑀦𑀸𑀲𑁂𑀲𑀻’’𑀢𑀺! 𑀢𑀢𑁄 𑀢𑀣𑀸𑀕𑀢𑀲𑁆𑀲 𑀜𑀸𑀡𑀩𑀮𑀁 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀸𑀧𑀤𑀁 𑀓𑁄𑀧𑁂𑀬𑁆𑀬𑀼𑀁, 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀬𑀣𑀸𑀞𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬. 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 𑀧𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀲𑁄 𑀉𑀧𑀯𑀸𑀤𑁄 𑀦 𑀳𑁄𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀏𑀯𑀁 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑁋 ‘‘𑀇𑀫𑁂𑀳𑀺 𑀦𑀸𑀫 𑀅𑀕𑀸𑀭𑀺𑀓𑀸𑀧𑀺 𑀧𑀸𑀤𑀫𑀢𑁆𑀢𑁂𑀦 𑀘𑁄𑀭𑀁 𑀳𑀦𑀦𑁆𑀢𑀺𑀧𑀺 𑀩𑀦𑁆𑀥𑀦𑁆𑀢𑀺𑀧𑀺 𑀧𑀩𑁆𑀩𑀸𑀚𑁂𑀦𑁆𑀢𑀺𑀧𑀺. 𑀓𑀲𑁆𑀫𑀸 𑀪𑀕𑀯𑀸 𑀧𑀩𑁆𑀩𑀚𑀺𑀢𑀁 𑀦 𑀦𑀸𑀲𑁂𑀲𑁆𑀲𑀢𑀺; 𑀬𑁂𑀦 𑀧𑀭𑀲𑀦𑁆𑀢𑀓𑀁 𑀢𑀺𑀡𑀲𑀮𑀸𑀓𑀫𑀢𑁆𑀢𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺! 𑀢𑀣𑀸𑀕𑀢𑀲𑁆𑀲 𑀘 𑀜𑀸𑀡𑀩𑀮𑀁 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀧𑀜𑁆𑀜𑀢𑁆𑀢𑀫𑁆𑀧𑀺 𑀘 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀧𑁆𑀧𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀞𑀸𑀦𑁂 𑀞𑀲𑁆𑀲𑀢𑀺. 𑀢𑀲𑁆𑀫𑀸 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 𑀲𑀩𑁆𑀩𑀸𑀯𑀦𑁆𑀢𑀁 𑀧𑀭𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀅𑀣 𑀔𑁄 𑀪𑀕𑀯𑀸 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 ‘‘𑀓𑀺𑀢𑁆𑀢𑀓𑁂𑀦 𑀔𑁄 𑀪𑀺𑀓𑁆𑀔𑀼 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑀢𑀺 𑀯𑀸 𑀩𑀦𑁆𑀥𑀢𑀺 𑀯𑀸 𑀧𑀩𑁆𑀩𑀸𑀚𑁂𑀢𑀺 𑀯𑀸’’𑀢𑀺.

𑀢𑀢𑁆𑀣 𑀫𑀸𑀕𑀥𑁄𑀢𑀺 𑀫𑀕𑀥𑀸𑀦𑀁 𑀇𑀲𑁆𑀲𑀭𑁄. 𑀲𑁂𑀦𑀺𑀬𑁄𑀢𑀺 𑀲𑁂𑀦𑀸𑀬 𑀲𑀫𑁆𑀧𑀦𑁆𑀦𑁄. 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀧𑀩𑁆𑀩𑀸𑀚𑁂𑀢𑀺 𑀯𑀸𑀢𑀺 𑀭𑀝𑁆𑀞𑀢𑁄 𑀦𑀺𑀓𑁆𑀔𑀸𑀫𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄𑀢𑀺 𑀢𑀤𑀸 𑀭𑀸𑀚𑀕𑀳𑁂 𑀯𑀻𑀲𑀢𑀺𑀫𑀸𑀲𑀓𑁄 𑀓𑀳𑀸𑀧𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄. 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 ‘‘𑀧𑀸𑀤𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀧𑁄𑀭𑀸𑀡𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀯𑀲𑁂𑀦, 𑀦 𑀇𑀢𑀭𑁂𑀲𑀁 𑀭𑀼𑀤𑁆𑀭𑀤𑀸𑀫𑀓𑀸𑀤𑀻𑀦𑀁. 𑀢𑁂𑀦 𑀳𑀺 𑀧𑀸𑀤𑁂𑀦 𑀅𑀢𑀻𑀢𑀩𑀼𑀤𑁆𑀥𑀸𑀧𑀺 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀼𑀁, 𑀅𑀦𑀸𑀕𑀢𑀸𑀧𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀯𑀸 𑀧𑀸𑀭𑀸𑀚𑀺𑀓𑁂 𑀯𑀸 𑀦𑀸𑀦𑀢𑁆𑀢𑀁 ¶ 𑀦𑀢𑁆𑀣𑀺. 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀺 ¶ . 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺. 𑀇𑀢𑁄 𑀊𑀦𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀕𑀯𑀸𑀧𑀺 𑀥𑀦𑀺𑀬𑀁 ¶ 𑀯𑀺𑀕𑀭𑀳𑀺𑀢𑁆𑀯𑀸 𑀧𑀸𑀤𑁂𑀦𑁂𑀯 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀭𑀚𑀓𑀪𑀡𑁆𑀟𑀺𑀓𑀯𑀢𑁆𑀣𑀼 𑀉𑀤𑀧𑀸𑀤𑀺, 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑀘 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀫𑁆𑀩𑀦𑁆𑀥𑁄 𑀘 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀇𑀥, 𑀏𑀯𑀁 𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑀁 𑀬𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀤𑀺 𑀳𑀺 𑀬𑀁 𑀬𑀁 𑀯𑀼𑀢𑁆𑀢𑀦𑀬𑀁, 𑀢𑀁 𑀢𑀁 𑀧𑀼𑀦𑀧𑀺 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀓𑀤𑀸 𑀯𑀡𑁆𑀡𑀦𑀸𑀬 𑀅𑀦𑁆𑀢𑀁 𑀕𑀫𑀺𑀲𑁆𑀲𑀸𑀫! 𑀢𑀲𑁆𑀫𑀸 𑀬𑀁 𑀬𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀲𑀸𑀥𑀼𑀓𑀁 𑀉𑀧𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀼𑀩𑁆𑀩𑀁 𑀧𑀦 𑀬𑀁𑀓𑀺𑀜𑁆𑀘𑀺 𑀅𑀦𑀼𑀢𑁆𑀢𑀸𑀦𑀢𑁆𑀣𑀁, 𑀢𑀁 𑀲𑀩𑁆𑀩𑀁 𑀫𑀬𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁦. 𑀭𑀚𑀓𑀢𑁆𑀣𑀭𑀡𑀁 𑀕𑀦𑁆𑀢𑁆𑀯𑀸𑀢𑀺 𑀭𑀚𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸; 𑀢𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀭𑀚𑀓𑀸 𑀯𑀢𑁆𑀣𑀸𑀦𑀺 𑀅𑀢𑁆𑀣𑀭𑀦𑁆𑀢𑀺, 𑀢𑀲𑁆𑀫𑀸 𑀭𑀚𑀓𑀢𑁆𑀣𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀭𑀚𑀓𑀪𑀡𑁆𑀟𑀺𑀓𑀦𑁆𑀢𑀺 𑀭𑀚𑀓𑀸𑀦𑀁 𑀪𑀡𑁆𑀟𑀺𑀓𑀁; 𑀭𑀚𑀓𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀏𑀓𑁂𑀓𑀁 𑀪𑀡𑁆𑀟𑀺𑀓𑀁 𑀩𑀦𑁆𑀥𑀦𑁆𑀢𑀺. 𑀢𑀢𑁄 𑀏𑀓𑀁 𑀪𑀡𑁆𑀟𑀺𑀓𑀁 𑀢𑁂𑀲𑀁 𑀧𑀫𑀸𑀤𑁂𑀦 𑀅𑀧𑀲𑁆𑀲𑀦𑁆𑀢𑀸𑀦𑀁 𑀅𑀯𑀳𑀭𑀺𑀢𑁆𑀯𑀸 𑀣𑁂𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁯𑁨. 𑀕𑀸𑀫𑁄 𑀦𑀸𑀫𑀸𑀢𑀺 𑀏𑀯𑀫𑀸𑀤𑀺 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀘 𑀅𑀭𑀜𑁆𑀜𑀲𑁆𑀲 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀺𑀁 𑀕𑀸𑀫𑁂 𑀏𑀓𑀸 𑀏𑀯 𑀓𑀼𑀝𑀺, 𑀏𑀓𑀁 𑀕𑁂𑀳𑀁 𑀲𑁂𑀬𑁆𑀬𑀣𑀸𑀧𑀺 𑀫𑀮𑀬𑀚𑀦𑀧𑀤𑁂; 𑀅𑀬𑀁 𑀏𑀓𑀓𑀼𑀝𑀺𑀓𑁄 𑀕𑀸𑀫𑁄 𑀦𑀸𑀫. 𑀏𑀢𑁂𑀦 𑀦𑀬𑁂𑀦 𑀅𑀧𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀫𑀦𑀼𑀲𑁆𑀲𑁄 𑀦𑀸𑀫 𑀬𑁄 𑀲𑀩𑁆𑀩𑀲𑁄 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀪𑀸𑀯𑁂𑀦 𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄; 𑀬𑀢𑁄 𑀯𑀸 𑀫𑀦𑀼𑀲𑁆𑀲𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀼𑀦𑀧𑀺 𑀆𑀕𑀦𑁆𑀢𑀼𑀓𑀸𑀫𑀸 𑀏𑀯 𑀅𑀧𑀓𑁆𑀓𑀦𑁆𑀢𑀸. 𑀧𑀭𑀺𑀓𑁆𑀔𑀺𑀢𑁆𑀢𑁄 𑀦𑀸𑀫 𑀇𑀝𑁆𑀞𑀓𑀧𑀸𑀓𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀓𑀡𑁆𑀝𑀓𑀲𑀸𑀔𑀸𑀳𑀺𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀕𑁄𑀦𑀺𑀲𑀸𑀤𑀺𑀦𑀺𑀯𑀺𑀝𑁆𑀞𑁄 𑀦𑀸𑀫 𑀯𑀻𑀣𑀺𑀲𑀦𑁆𑀦𑀺𑀯𑁂𑀲𑀸𑀤𑀺𑀯𑀲𑁂𑀦 𑀅𑀦𑀺𑀯𑀺𑀲𑀺𑀢𑁆𑀯𑀸 𑀬𑀣𑀸 𑀕𑀸𑀯𑁄 𑀢𑀢𑁆𑀣 𑀢𑀢𑁆𑀣 𑀤𑁆𑀯𑁂 𑀢𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀏𑀯𑀁 ¶ 𑀢𑀢𑁆𑀣 𑀢𑀢𑁆𑀣 ¶ ¶ 𑀤𑁆𑀯𑁂 𑀢𑀻𑀡𑀺 𑀖𑀭𑀸𑀦𑀺 𑀓𑀢𑁆𑀯𑀸 𑀦𑀺𑀯𑀺𑀝𑁆𑀞𑁄. 𑀲𑀢𑁆𑀣𑁄𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀸𑀫𑀽𑀧𑀘𑀸𑀭𑁄𑀢𑀺𑀆𑀤𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲𑀸𑀢𑀺 𑀬𑀲𑁆𑀲 𑀕𑀸𑀫𑀲𑁆𑀲 𑀅𑀦𑀼𑀭𑀸𑀥𑀧𑀼𑀭𑀲𑁆𑀲𑁂𑀯 𑀤𑁆𑀯𑁂 𑀇𑀦𑁆𑀤𑀔𑀻𑀮𑀸, 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀺𑀫𑁂 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲; 𑀢𑀲𑁆𑀲 𑀳𑀺 𑀩𑀸𑀳𑀺𑀭𑁄 𑀇𑀦𑁆𑀤𑀔𑀻𑀮𑁄 𑀆𑀪𑀺𑀥𑀫𑁆𑀫𑀺𑀓𑀦𑀬𑁂𑀦 𑀅𑀭𑀜𑁆𑀜𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀬𑀲𑁆𑀲 𑀧𑀦 𑀏𑀓𑁄, 𑀢𑀲𑁆𑀲 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑁂 𑀞𑀺𑀢𑀲𑁆𑀲. 𑀬𑀢𑁆𑀭𑀸𑀧𑀺 𑀳𑀺 𑀇𑀦𑁆𑀤𑀔𑀻𑀮𑁄 𑀦𑀢𑁆𑀣𑀺, 𑀢𑀢𑁆𑀭 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑀫𑁂𑀯 ‘‘𑀇𑀦𑁆𑀤𑀔𑀻𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑁂 𑀞𑀺𑀢𑀲𑁆𑀲𑀸’’𑀢𑀺. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲, 𑀦𑁄 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲, 𑀦𑁂𑀯 𑀅𑀧𑁆𑀧𑀣𑀸𑀫𑀲𑁆𑀲, 𑀦 𑀫𑀳𑀸𑀣𑀸𑀫𑀲𑁆𑀲; 𑀫𑀚𑁆𑀛𑀺𑀫𑀣𑀸𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀬𑀣𑀸 𑀫𑀸𑀢𑀼𑀕𑀸𑀫𑁄 𑀓𑀸𑀓𑁂 𑀉𑀟𑁆𑀟𑀸𑀧𑁂𑀦𑁆𑀢𑁄 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀢𑀺, 𑀬𑀣𑀸 𑀘 𑀉𑀤𑀓𑀼𑀓𑁆𑀔𑁂𑀧𑁂 𑀉𑀤𑀓𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀅𑀔𑀺𑀧𑀺𑀢𑁆𑀯𑀸 𑀬𑀣𑀸 𑀢𑀭𑀼𑀡𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑀸 𑀩𑀸𑀳𑀁 𑀧𑀲𑀸𑀭𑁂𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀝𑁆𑀞𑀸𑀦𑀁. 𑀧𑀢𑀺𑀢𑁄 𑀧𑀦 𑀮𑀼𑀞𑀺𑀢𑁆𑀯𑀸 𑀬𑀢𑁆𑀣 𑀕𑀘𑁆𑀙𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀼𑀧𑁆𑀧𑀧𑀸𑀢𑁄 𑀯𑀸 𑀫𑀼𑀲𑀮𑀧𑀸𑀢𑁄 𑀯𑀸 𑀖𑀭𑀽𑀧𑀘𑀸𑀭𑁄 𑀦𑀸𑀫. 𑀢𑀲𑁆𑀫𑀺𑀁 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀢𑀸𑀤𑀺𑀲𑀫𑁂𑀯. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀖𑀭𑀁 𑀦𑀸𑀫, 𑀖𑀭𑀽𑀧𑀘𑀸𑀭𑁄 𑀦𑀸𑀫, 𑀕𑀸𑀫𑁄 𑀦𑀸𑀫, 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑀁 𑀖𑀭𑀁 𑀦𑀸𑀫. 𑀬𑀁 𑀧𑀦 𑀤𑁆𑀯𑀸𑀭𑁂 𑀞𑀺𑀢𑁄 𑀫𑀸𑀢𑀼𑀕𑀸𑀫𑁄 𑀪𑀸𑀚𑀦𑀥𑁄𑀯𑀦𑀉𑀤𑀓𑀁 𑀙𑀟𑁆𑀟𑁂𑀢𑀺, 𑀢𑀲𑁆𑀲 𑀧𑀢𑀦𑀝𑁆𑀞𑀸𑀦𑀜𑁆𑀘 𑀫𑀸𑀢𑀼𑀕𑀸𑀫𑁂𑀦𑁂𑀯 𑀅𑀦𑁆𑀢𑁄𑀕𑁂𑀳𑁂 𑀞𑀺𑀢𑁂𑀦 𑀧𑀓𑀢𑀺𑀬𑀸 𑀩𑀳𑀺 𑀔𑀺𑀢𑁆𑀢𑀲𑁆𑀲 𑀲𑀼𑀧𑁆𑀧𑀲𑁆𑀲 ¶ 𑀯𑀸 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀯𑀸 𑀧𑀢𑀦𑀝𑁆𑀞𑀸𑀦𑀜𑁆𑀘, 𑀖𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀻𑀲𑀼 𑀓𑁄𑀡𑁂𑀲𑀼 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀞𑀧𑁂𑀢𑁆𑀯𑀸 𑀕𑁄𑀭𑀽𑀧𑀸𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀁 𑀓𑀢𑀧𑀭𑀺𑀓𑁆𑀔𑁂𑀧𑁄 𑀘 𑀅𑀬𑀁 𑀲𑀩𑁆𑀩𑁄𑀧𑀺 𑀖𑀭𑀽𑀧𑀘𑀸𑀭𑁄 𑀦𑀸𑀫. 𑀢𑀲𑁆𑀫𑀺𑀁 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀕𑀸𑀫𑁄 𑀦𑀸𑀫. 𑀢𑀢𑁄 𑀅𑀜𑁆𑀜𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 ¶ 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀧𑀫𑀸𑀡𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀲𑁄 𑀧𑀫𑀸𑀡𑀢𑁄 𑀤𑀝𑁆𑀞𑀩𑁆𑀩𑁄.

𑀬𑀜𑁆𑀘𑁂𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀯𑀺𑀭𑀼𑀤𑁆𑀥𑀫𑀺𑀯 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀜𑁆𑀳𑀺 𑁋 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀁 𑀮𑁂𑀟𑁆𑀟𑀼𑀧𑀸𑀢𑀁 𑀕𑀸𑀫𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀕𑀸𑀫𑀽𑀧𑀘𑀸𑀭𑁄 𑀯𑀼𑀢𑁆𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀘𑁆𑀘𑀫𑁂𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 ¶ , 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀫𑁂𑀯 𑀯𑀺𑀤𑀺𑀢𑁄. 𑀢𑀲𑁆𑀫𑀸 𑀬𑀣𑀸 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀖𑀭𑀽𑀧𑀘𑀸𑀭𑀮𑀓𑁆𑀔𑀡𑀁 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀲𑁂𑀦 𑀕𑀳𑀺𑀢𑀁. 𑀏𑀯𑀁 𑀲𑁂𑀲𑀫𑁆𑀧𑀺 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀇𑀥 𑀕𑀸𑀫𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘. 𑀢𑀢𑁆𑀭 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀧𑀭𑀺𑀘𑁆𑀙𑁂𑀤𑁄. 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀲𑀼𑀁 𑀧𑀭𑀺𑀘𑁆𑀙𑁂𑀤𑀁 𑀅𑀯𑀢𑁆𑀯𑀸 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑁄 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀸 𑀢𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀕𑀸𑀫𑀧𑀭𑀺𑀘𑁆𑀙𑁂𑀤𑁂 𑀘 𑀤𑀲𑁆𑀲𑀺𑀢𑁂 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀼𑀦 ‘‘𑀢𑀢𑁆𑀣 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀦 𑀯𑀼𑀢𑁆𑀢𑀁. 𑀬𑁄 𑀧𑀦 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁𑀬𑁂𑀯 ‘‘𑀕𑀸𑀫𑀽𑀧𑀘𑀸𑀭𑁄’’𑀢𑀺 𑀯𑀤𑀢𑀺, 𑀢𑀲𑁆𑀲 𑀖𑀭𑀽𑀧𑀘𑀸𑀭𑁄 𑀕𑀸𑀫𑁄𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀖𑀭𑀁, 𑀖𑀭𑀽𑀧𑀘𑀸𑀭𑁄, 𑀕𑀸𑀫𑁄 ¶ , 𑀕𑀸𑀫𑀽𑀧𑀘𑀸𑀭𑁄𑀢𑀺 𑀏𑀲 𑀯𑀺𑀪𑀸𑀕𑁄 𑀲𑀗𑁆𑀓𑀭𑀻𑀬𑀢𑀺. 𑀅𑀲𑀗𑁆𑀓𑀭𑀢𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼. 𑀢𑀲𑁆𑀫𑀸 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀕𑀸𑀫𑁄 𑀘 𑀕𑀸𑀫𑀽𑀧𑀘𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀧𑀺 𑀘 𑀕𑀸𑀫𑁄 𑀧𑀼𑀩𑁆𑀩𑁂 𑀫𑀳𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀓𑀼𑀮𑁂𑀲𑀼 𑀦𑀝𑁆𑀞𑁂𑀲𑀼 𑀅𑀧𑁆𑀧𑀓𑁄 𑀳𑁄𑀢𑀺, 𑀲𑁄 𑀖𑀭𑀽𑀧𑀘𑀸𑀭𑀢𑁄 𑀮𑁂𑀟𑁆𑀟𑀼𑀧𑀸𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀧𑀭𑀺𑀘𑁆𑀙𑁂𑀤𑁄 𑀧𑀦𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀫𑀸𑀡𑀫𑁂𑀯𑀸𑀢𑀺.

𑀅𑀭𑀜𑁆𑀜𑀁 𑀦𑀸𑀫 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸𑀢𑀺 𑀇𑀫𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂 𑀅𑀯𑀲𑁂𑀲𑀁 ‘‘𑀅𑀭𑀜𑁆𑀜𑀁’’ ¶ 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀅𑀭𑀜𑁆𑀜𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁. 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑁂 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀯𑀼𑀢𑁆𑀢𑀁. 𑀢𑀁 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸 𑀧𑀜𑁆𑀘𑀥𑀦𑀼𑀲𑀢𑀧𑁆𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀪𑀕𑀯𑀢𑀸 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑁂𑀦 ‘‘𑀖𑀭𑀁, 𑀖𑀭𑀽𑀧𑀘𑀸𑀭𑁄, 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄 𑀅𑀭𑀜𑁆𑀜’’𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀧𑀜𑁆𑀘 𑀓𑁄𑀝𑁆𑀞𑀸𑀲𑀸 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀖𑀭𑁂 𑀯𑀸 𑀖𑀭𑀽𑀧𑀘𑀸𑀭𑁂 𑀯𑀸 𑀕𑀸𑀫𑁂 𑀯𑀸 𑀕𑀸𑀫𑀽𑀧𑀘𑀸𑀭𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀧𑀸𑀤𑀕𑁆𑀖𑀦𑀓𑀢𑁄 𑀧𑀝𑁆𑀞𑀸𑀬 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁 𑀅𑀯𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ¶ ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀅𑀤𑀺𑀦𑁆𑀦𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀓𑀧𑁆𑀧𑀺𑀬𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁, 𑀢𑀤𑁂𑀢𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁. 𑀅𑀢𑁆𑀢𑀦𑁄 𑀳𑀢𑁆𑀣𑀢𑁄 𑀯𑀸 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀯𑀸 𑀦 𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀅𑀦𑀺𑀲𑁆𑀲𑀝𑁆𑀞𑀁. 𑀬𑀣𑀸𑀞𑀸𑀦𑁂 𑀞𑀺𑀢𑀫𑁆𑀧𑀺 𑀅𑀦𑀧𑁂𑀓𑁆𑀔𑀢𑀸𑀬 𑀦 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀅𑀧𑀭𑀺𑀘𑁆𑀘𑀢𑁆𑀢𑀁. 𑀆𑀭𑀓𑁆𑀔𑀲𑀁𑀯𑀺𑀥𑀸𑀦𑁂𑀦 𑀭𑀓𑁆𑀔𑀺𑀢𑀢𑁆𑀢𑀸 𑀭𑀓𑁆𑀔𑀺𑀢𑀁. 𑀫𑀜𑁆𑀚𑀽𑀲𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑁄𑀧𑀺𑀢𑀢𑁆𑀢𑀸 𑀕𑁄𑀧𑀺𑀢𑀁. ‘‘𑀫𑀫 𑀇𑀤’’𑀦𑁆𑀢𑀺 𑀢𑀡𑁆𑀳𑀸𑀫𑀫𑀢𑁆𑀢𑁂𑀦 𑀫𑀫𑀸𑀬𑀺𑀢𑀢𑁆𑀢𑀸 𑀫𑀫𑀸𑀬𑀺𑀢𑀁. 𑀢𑀸𑀳𑀺 𑀅𑀧𑀭𑀺𑀘𑁆𑀘𑀸𑀕𑀭𑀓𑁆𑀔𑀡𑀕𑁄𑀧𑀦𑀸𑀳𑀺 ¶ 𑀢𑁂𑀳𑀺 𑀪𑀡𑁆𑀟𑀲𑀸𑀫𑀺𑀓𑁂𑀳𑀺 𑀧𑀭𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁. 𑀏𑀢𑀁 𑀅𑀤𑀺𑀦𑁆𑀦𑀁 𑀦𑀸𑀫.

𑀣𑁂𑀬𑁆𑀬𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀣𑁂𑀦𑁄𑀢𑀺 𑀘𑁄𑀭𑁄, 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁; 𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀲𑀗𑁆𑀔𑀸, 𑀲𑀗𑁆𑀔𑀸𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁; 𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁦) 𑀯𑀺𑀬. 𑀣𑁂𑀬𑁆𑀬𑀜𑁆𑀘 𑀢𑀁 𑀲𑀗𑁆𑀔𑀸𑀢𑀜𑁆𑀘𑀸𑀢𑀺 𑀣𑁂𑀬𑁆𑀬𑀲𑀗𑁆𑀔𑀸𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀢𑁆𑀣𑀢𑁄 𑀤𑀝𑁆𑀞𑀩𑁆𑀩𑀁. 𑀬𑁄 𑀘 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀆𑀤𑀺𑀬𑀢𑀺, 𑀲𑁄 𑀬𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀤𑀺𑀬𑁂𑀬𑁆𑀬 ¶ , 𑀳𑀭𑁂𑀬𑁆𑀬, 𑀅𑀯𑀳𑀭𑁂𑀬𑁆𑀬, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬, 𑀞𑀸𑀦𑀸 𑀘𑀸𑀯𑁂𑀬𑁆𑀬, 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀧𑀞𑀫𑀧𑀤𑀁 𑀅𑀪𑀺𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀧𑀤𑀁 𑀅𑀜𑁆𑀜𑁂𑀲𑀁 𑀪𑀡𑁆𑀟𑀁 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀯𑀲𑁂𑀦, 𑀢𑀢𑀺𑀬𑀧𑀤𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦, 𑀘𑀢𑀼𑀢𑁆𑀣𑀁 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦, 𑀧𑀜𑁆𑀘𑀫𑀁 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀸𑀤𑀺𑀯𑀲𑁂𑀦, 𑀙𑀝𑁆𑀞𑀁 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀸 𑀲𑀼𑀗𑁆𑀓𑀖𑀸𑀢𑀯𑀲𑁂𑀦 𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑀏𑀓𑀪𑀡𑁆𑀟𑀯𑀲𑁂𑀦𑀧𑀺 𑀦𑀸𑀦𑀸𑀪𑀡𑁆𑀟𑀯𑀲𑁂𑀦𑀧𑀺 𑀳𑁄𑀢𑀺. 𑀏𑀓𑀪𑀡𑁆𑀟𑀯𑀲𑁂𑀦 𑀘 𑀲𑀯𑀺𑀜𑁆𑀜𑀸𑀡𑀓𑁂𑀦𑁂𑀯 𑀮𑀩𑁆𑀪𑀢𑀺, 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀫𑀺𑀲𑁆𑀲𑀓𑁂𑀦.

𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀆𑀤𑀺𑀬𑁂𑀬𑁆𑀬𑀸𑀢𑀺 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀳𑀭𑁂𑀬𑁆𑀬𑀸𑀢𑀺 ¶ 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀲𑀻𑀲𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀔𑀦𑁆𑀥𑀁 𑀑𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀅𑀯𑀳𑀭𑁂𑀬𑁆𑀬𑀸𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 ¶ .

𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬𑀸𑀢𑀺 ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀞𑀸𑀦𑀸 𑀘𑀸𑀯𑁂𑀬𑁆𑀬𑀸𑀢𑀺 𑀣𑀮𑀝𑁆𑀞𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀣 𑀯𑀸 𑀧𑀞𑀫𑀁 𑀧𑀸𑀤𑀁 𑀲𑀼𑀗𑁆𑀓𑀖𑀸𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑁋 𑀅𑀬𑀫𑁂𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸.

𑀏𑀓𑀪𑀡𑁆𑀟𑀯𑀲𑁂𑀦 ¶ 𑀧𑀦 𑀲𑀲𑁆𑀲𑀸𑀫𑀺𑀓𑀁 𑀤𑀸𑀲𑀁 𑀯𑀸 𑀢𑀺𑀭𑀘𑁆𑀙𑀸𑀦𑀁 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀪𑀺𑀬𑁄𑀕𑀸𑀤𑀺𑀦𑀸 𑀦𑀬𑁂𑀦 𑀆𑀤𑀺𑀬𑀢𑀺 𑀯𑀸 𑀳𑀭𑀢𑀺 𑀯𑀸 𑀅𑀯𑀳𑀭𑀢𑀺 𑀯𑀸 𑀇𑀭𑀺𑀬𑀸𑀧𑀣𑀁 𑀯𑀸 𑀯𑀺𑀓𑁄𑀧𑁂𑀢𑀺, 𑀞𑀸𑀦𑀸 𑀯𑀸 𑀘𑀸𑀯𑁂𑀢𑀺, 𑀧𑀭𑀺𑀘𑁆𑀙𑁂𑀤𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀢𑀺 𑁋 𑀅𑀬𑀫𑁂𑀢𑁆𑀣 𑀏𑀓𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸

𑀅𑀧𑀺𑀘 𑀇𑀫𑀸𑀦𑀺 𑀙 𑀧𑀤𑀸𑀦𑀺 𑀯𑀡𑁆𑀡𑁂𑀦𑁆𑀢𑁂𑀦 𑀧𑀜𑁆𑀘 𑀧𑀜𑁆𑀘𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀏𑀯𑀁 𑀯𑀡𑁆𑀡𑀬𑀢𑀸 𑀳𑀺 𑀇𑀤𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀁 𑀲𑀼𑀯𑀡𑁆𑀡𑀺𑀢𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀞𑀸𑀦𑁂 𑀲𑀩𑁆𑀩𑀅𑀝𑁆𑀞𑀓𑀣𑀸 𑀆𑀓𑀼𑀮𑀸 𑀮𑀼𑀴𑀺𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸. 𑀢𑀣𑀸 𑀳𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀬𑀸𑀦𑀺 𑀢𑀸𑀦𑀺 𑀧𑀸𑀴𑀺𑀬𑀁 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀯𑀳𑀸𑀭𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀏𑀓𑀁 𑀧𑀜𑁆𑀘𑀓𑀁 𑀤𑀲𑁆𑀲𑀺𑀢𑀁, 𑀓𑀢𑁆𑀣𑀘𑀺 ‘‘𑀙𑀳𑀸𑀓𑀸𑀭𑁂𑀳𑀻’’𑀢𑀺 𑀆𑀕𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 ¶ 𑀤𑀲𑁆𑀲𑀺𑀢𑀸𑀦𑀺. 𑀏𑀢𑀸𑀦𑀺 𑀘 𑀧𑀜𑁆𑀘𑀓𑀸𑀦𑀺 𑀦 𑀳𑁄𑀦𑁆𑀢𑀺. 𑀬𑀢𑁆𑀣 𑀳𑀺 𑀏𑀓𑁂𑀓𑁂𑀦 𑀧𑀤𑁂𑀦 𑀅𑀯𑀳𑀸𑀭𑁄 𑀲𑀺𑀚𑁆𑀛𑀢𑀺, 𑀢𑀁 𑀧𑀜𑁆𑀘𑀓𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀏𑀓𑁄𑀬𑁂𑀯 𑀅𑀯𑀳𑀸𑀭𑁄. 𑀬𑀸𑀦𑀺 𑀘 𑀢𑀢𑁆𑀣 𑀮𑀩𑁆𑀪𑀫𑀸𑀦𑀸𑀦𑀺𑀬𑁂𑀯 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀢𑁂𑀲𑀫𑁆𑀧𑀺 𑀦 𑀲𑀩𑁆𑀩𑁂𑀲𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀏𑀯𑀫𑀺𑀫𑀲𑁆𑀫𑀺𑀁 𑀞𑀸𑀦𑁂 𑀲𑀩𑁆𑀩𑀅𑀝𑁆𑀞𑀓𑀣𑀸 𑀆𑀓𑀼𑀮𑀸 𑀮𑀼𑀴𑀺𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸. 𑀢𑀲𑁆𑀫𑀸 𑀧𑀜𑁆𑀘 𑀧𑀜𑁆𑀘𑀓𑁂𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑀺𑀬𑀫𑀸𑀦𑀸 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸.

𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀦𑀸𑀫 𑁋 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁, 𑀏𑀓𑀪𑀡𑁆𑀟𑀧𑀜𑁆𑀘𑀓𑀁, 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁, 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁 ¶ , 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺. 𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘 ‘‘𑀆𑀤𑀺𑀬𑁂𑀬𑁆𑀬, 𑀳𑀭𑁂𑀬𑁆𑀬, 𑀅𑀯𑀳𑀭𑁂𑀬𑁆𑀬, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬, 𑀞𑀸𑀦𑀸 𑀘𑀸𑀯𑁂𑀬𑁆𑀬𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀢𑀸𑀦𑀺 𑀧𑀼𑀩𑁆𑀩𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀁 𑀧𑀦𑁂𑀢𑀁 ‘‘𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 𑀙𑀝𑁆𑀞𑀁 𑀧𑀤𑀁, 𑀢𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀲𑁆𑀲 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀲𑁆𑀲 𑀘 𑀲𑀸𑀥𑀸𑀭𑀡𑀁. 𑀢𑀲𑁆𑀫𑀸 𑀢𑀁 𑀢𑀢𑀺𑀬𑀧𑀜𑁆𑀘𑀫𑁂𑀲𑀼 𑀧𑀜𑁆𑀘𑀓𑁂𑀲𑀼 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀁 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘.

𑀓𑀢𑀫𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁? 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀅𑀢𑁆𑀣𑀲𑀸𑀥𑀓𑁄, 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀦𑀸𑀫 𑀧𑀭𑀲𑁆𑀲 𑀪𑀡𑁆𑀟𑀁 𑀲𑀳𑀢𑁆𑀣𑀸 𑀅𑀯𑀳𑀭𑀢𑀺. 𑀆𑀡𑀢𑁆𑀢𑀺𑀓𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 ¶ 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁄 𑀦𑀸𑀫 𑀅𑀦𑁆𑀢𑁄𑀲𑀼𑀗𑁆𑀓𑀖𑀸𑀢𑁂 𑀞𑀺𑀢𑁄 𑀩𑀳𑀺𑀲𑀼𑀗𑁆𑀓𑀖𑀸𑀢𑀁 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺, 𑀇𑀫𑀺𑀦𑀸 𑀘 𑀲𑀤𑁆𑀥𑀺𑀁 ‘‘𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀤𑀬𑁄𑀚𑀦𑀁 𑀮𑀪𑀢𑀺. 𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑁄 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀅𑀯𑀳𑀸𑀭𑀓𑁄 𑀧𑀦 𑀅𑀯𑀳𑀝𑀓𑀸𑀮𑁂. 𑀅𑀬𑀁 𑀅𑀢𑁆𑀣𑀲𑀸𑀥𑀓𑁄. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁.

𑀓𑀢𑀫𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁? 𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀧𑀼𑀩𑁆𑀩𑀧𑀬𑁄𑀕𑁄, 𑀲𑀳𑀧𑀬𑁄𑀕𑁄, 𑀲𑀁𑀯𑀺𑀤𑀸𑀯𑀳𑀸𑀭𑁄, 𑀲𑀗𑁆𑀓𑁂𑀢𑀓𑀫𑁆𑀫𑀁, 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀞𑀸𑀦𑀸 𑀘𑀸𑀯𑀦𑀯𑀲𑁂𑀦 𑀲𑀳𑀧𑀬𑁄𑀕𑁄. 𑀇𑀢𑀭𑁂 𑀧𑀦 𑀢𑀬𑁄 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁧𑁮-𑁧𑁨𑁦) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀤𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁.

𑀓𑀢𑀫𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁? 𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 ¶ , 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄𑀢𑀺. 𑀢𑁂 𑀧𑀜𑁆𑀘𑀧𑀺 ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 𑀣𑁂𑀬𑁆𑀬𑀘𑀺𑀢𑁆𑀢𑁄 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀭𑀸. 𑁧𑁩𑁮) 𑀏𑀢𑀲𑁆𑀫𑀺𑀁 𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀇𑀤𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁. 𑀏𑀯𑀫𑀺𑀫𑀸𑀦𑀺 𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀧𑀜𑁆𑀘𑀓𑁂𑀲𑀼 𑀓𑀼𑀲𑀮𑁂𑀦 𑀯𑀺𑀦𑀬𑀥𑀭𑁂𑀦 𑀑𑀢𑀺𑀡𑁆𑀡𑀁 𑀯𑀢𑁆𑀣𑀼𑀁 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 ¶ 𑀧𑀜𑁆𑀘 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀬𑀸𑀦𑀺 𑀲𑀦𑁆𑀥𑀸𑀬 𑀧𑁄𑀭𑀸𑀡𑀸 𑀆𑀳𑀼 𑁋

‘‘𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀤𑁂𑀲𑀜𑁆𑀘, 𑀅𑀕𑁆𑀖𑀁 𑀧𑀭𑀺𑀪𑁄𑀕𑀧𑀜𑁆𑀘𑀫𑀁;

𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺, 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄’’𑀢𑀺.

𑀢𑀢𑁆𑀣 𑀯𑀢𑁆𑀣𑀼𑀦𑁆𑀢𑀺 𑀪𑀡𑁆𑀟𑀁; 𑀅𑀯𑀳𑀸𑀭𑀓𑁂𑀦 𑀳𑀺 ‘‘𑀫𑀬𑀸 𑀇𑀤𑀁 𑀦𑀸𑀫 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀯 𑀢𑀁 𑀪𑀡𑁆𑀟𑀁 𑀲𑀲𑁆𑀲𑀸𑀫𑀺𑀓𑀁 𑀯𑀸 𑀅𑀲𑁆𑀲𑀸𑀫𑀺𑀓𑀁 𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀲𑀲𑁆𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑀸𑀦𑀁 𑀲𑀸𑀮𑀬𑀪𑀸𑀯𑁄 𑀯𑀸 𑀦𑀺𑀭𑀸𑀮𑀬𑀪𑀸𑀯𑁄 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀲𑀁 𑀲𑀸𑀮𑀬𑀓𑀸𑀮𑁂 𑀅𑀯𑀳𑀝𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺 𑀓𑀸𑀢𑀩𑁆𑀩𑀸. 𑀲𑀘𑁂 𑀦𑀺𑀭𑀸𑀮𑀬𑀓𑀸𑀮𑁂 ¶ , 𑀦 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀡𑁆𑀟𑀲𑀸𑀫𑀺𑀓𑁂𑀲𑀼 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀸𑀫𑀻𑀘𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀪𑀸𑀢𑀺𑀬𑀭𑀸𑀚𑀓𑀸𑀮𑁂 𑀓𑀺𑀭 𑀫𑀳𑀸𑀘𑁂𑀢𑀺𑀬𑀧𑀽𑀚𑀸𑀬 𑀤𑀓𑁆𑀔𑀺𑀡𑀤𑀺𑀲𑀢𑁄 𑀏𑀓𑁄 𑀪𑀺𑀓𑁆𑀔𑀼 𑀲𑀢𑁆𑀢𑀳𑀢𑁆𑀣𑀁 𑀧𑀡𑁆𑀟𑀼𑀓𑀸𑀲𑀸𑀯𑀁 𑀅𑀁𑀲𑁂 𑀓𑀭𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀧𑀸𑀯𑀺𑀲𑀺; 𑀢𑀗𑁆𑀔𑀡𑀫𑁂𑀯 𑀘 𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀆𑀕𑀢𑁄. 𑀢𑀢𑁆𑀣 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀳𑀸𑀚𑀦𑀲𑀫𑁆𑀫𑀤𑁆𑀤𑁄 𑀅𑀳𑁄𑀲𑀺. 𑀅𑀣 𑀲𑁄 𑀪𑀺𑀓𑁆𑀔𑀼 𑀚𑀦𑀲𑀫𑁆𑀫𑀤𑁆𑀤𑀧𑀻𑀴𑀺𑀢𑁄 𑀅𑀁𑀲𑀢𑁄 𑀧𑀢𑀦𑁆𑀢𑀁 𑀓𑀸𑀲𑀸𑀯𑀁 𑀅𑀤𑀺𑀲𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄; 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀓𑀸𑀲𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑁄 𑀈𑀤𑀺𑀲𑁂 𑀚𑀦𑀲𑀫𑁆𑀫𑀤𑁆𑀤𑁂 𑀓𑀸𑀲𑀸𑀯𑀁 𑀮𑀘𑁆𑀙𑀢𑀺, 𑀦 𑀤𑀸𑀦𑀺 𑀢𑀁 𑀫𑀬𑁆𑀳’’𑀦𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀢𑁄. 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀓𑀸𑀲𑀸𑀯𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀅𑀲𑁆𑀲𑀫𑀡𑁄 𑀤𑀸𑀦𑀺𑀫𑁆𑀳𑀺, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 ‘‘𑀯𑀺𑀦𑀬𑀥𑀭𑁂 𑀧𑀼𑀘𑁆𑀙𑀺𑀢𑁆𑀯𑀸 𑀜𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀭𑁄 𑀯𑀺𑀦𑀬𑀸𑀘𑀭𑀺𑀬𑀧𑀸𑀫𑁄𑀓𑁆𑀔𑁄 𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑁂𑀦 𑀪𑀝𑁆𑀞𑁂 ¶ 𑀚𑀦𑀓𑀸𑀬𑁂 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀤𑀸𑀦𑀺 𑀏𑀢𑁆𑀣 𑀑𑀓𑀸𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀲𑀘𑁂 𑀓𑀸𑀲𑀸𑀯𑀲𑀸𑀫𑀺𑀓𑀁 𑀪𑀺𑀓𑁆𑀔𑀼𑀁 𑀆𑀦𑁂𑀬𑁆𑀬𑀸𑀲𑀺, 𑀲𑀓𑁆𑀓𑀸 ¶ 𑀪𑀯𑁂𑀬𑁆𑀬 𑀢𑀯 𑀧𑀢𑀺𑀝𑁆𑀞𑀸 𑀓𑀸𑀢𑀼’’𑀦𑁆𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑀁 𑀤𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺? ‘‘𑀢𑀳𑀺𑀁 𑀢𑀳𑀺𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀳𑀻’’𑀢𑀺. 𑀲𑁄 𑀧𑀜𑁆𑀘𑀧𑀺 𑀫𑀳𑀸𑀯𑀺𑀳𑀸𑀭𑁂 𑀑𑀮𑁄𑀓𑁂𑀢𑁆𑀯𑀸 𑀦𑁂𑀯 𑀅𑀤𑁆𑀤𑀓𑁆𑀔𑀺. 𑀢𑀢𑁄 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀓𑀢𑀭𑀸𑀬 𑀤𑀺𑀲𑀸𑀬 𑀩𑀳𑀽 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀤𑀓𑁆𑀔𑀺𑀡𑀤𑀺𑀲𑀸𑀬, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀓𑀸𑀲𑀸𑀯𑀁 𑀤𑀻𑀖𑀢𑁄 𑀘 𑀢𑀺𑀭𑀺𑀬𑀜𑁆𑀘 𑀫𑀺𑀦𑀺𑀢𑁆𑀯𑀸 𑀞𑀧𑁂𑀳𑀺. 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀯𑀺𑀳𑀸𑀭𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀺𑀦𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀢𑀯𑁂𑀤𑀁 𑀓𑀸𑀲𑀸𑀯’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀼𑀳𑀺𑀁 𑀢𑁂 𑀧𑀸𑀢𑀺𑀢’’𑀦𑁆𑀢𑀺? 𑀲𑁄 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀧𑀦 𑀢𑁂𑀦 𑀓𑀢𑀁 𑀥𑀼𑀭𑀦𑀺𑀓𑁆𑀔𑁂𑀧𑀁 𑀲𑀼𑀢𑁆𑀯𑀸 𑀇𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀬𑀸 𑀇𑀤𑀁 𑀓𑀼𑀳𑀺𑀁 𑀤𑀺𑀲𑁆𑀯𑀸 𑀕𑀳𑀺𑀢’’𑀦𑁆𑀢𑀺? 𑀲𑁄𑀧𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀘𑁂 𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀁 𑀅𑀪𑀯𑀺𑀲𑁆𑀲, 𑀅𑀦𑀸𑀧𑀢𑁆𑀢𑀺𑀬𑁂𑀯 𑀢𑁂 𑀅𑀲𑁆𑀲. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄𑀲𑀺. 𑀢𑀁 𑀤𑁂𑀲𑁂𑀢𑁆𑀯𑀸 𑀅𑀦𑀸𑀧𑀢𑁆𑀢𑀺𑀓𑁄 𑀳𑁄𑀳𑀺. 𑀇𑀤𑀜𑁆𑀘 𑀓𑀸𑀲𑀸𑀯𑀁 𑀅𑀢𑁆𑀢𑀦𑁄 ¶ 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀻𑀢𑀺. 𑀏𑀯𑀁 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁.

𑀓𑀸𑀮𑁄𑀢𑀺 𑀅𑀯𑀳𑀸𑀭𑀓𑀸𑀮𑁄. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀲𑀫𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀫𑀳𑀕𑁆𑀖𑀁. 𑀢𑀲𑁆𑀫𑀸 𑀢𑀁 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀏𑀯𑀁 𑀓𑀸𑀮𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀤𑁂𑀲𑁄𑀢𑀺 𑀅𑀯𑀳𑀸𑀭𑀤𑁂𑀲𑁄. 𑀢𑀜𑁆𑀳𑀺 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀤𑁂𑀲𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀳𑀺 𑀪𑀡𑁆𑀟𑀁 𑀲𑀫𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁.

𑀇𑀫𑀲𑁆𑀲𑀸𑀧𑀺 𑀘 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀓𑀺𑀭 𑀏𑀓𑁄 𑀪𑀺𑀓𑁆𑀔𑀼 𑀲𑀼𑀲𑀡𑁆𑀞𑀸𑀦𑀁 𑀦𑀸𑀴𑀺𑀓𑁂𑀭𑀁 𑀮𑀪𑀺𑀢𑁆𑀯𑀸 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀣𑀸𑀮𑀓𑀲𑀤𑀺𑀲𑀁 𑀫𑀦𑁄𑀭𑀫𑀁 𑀧𑀸𑀦𑀻𑀬𑀣𑀸𑀮𑀓𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀁 𑀅𑀕𑀫𑀸𑀲𑀺. 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀲𑀫𑀼𑀤𑁆𑀤𑀁 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀯𑀲𑀦𑁆𑀢𑁄 𑀢𑀁 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀆𑀕𑀢𑁄. 𑀢𑀲𑁆𑀲 𑀢𑀢𑁆𑀣 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀢𑀁 ¶ 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑀸𑀮𑀓𑀲𑀸𑀫𑀺𑀓𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀓𑀼𑀢𑁄 𑀢𑁂 𑀇𑀤𑀁 𑀮𑀤𑁆𑀥’’𑀦𑁆𑀢𑀺? ‘‘𑀅𑀦𑁆𑀢𑀭𑀲𑀫𑀼𑀤𑁆𑀤𑀢𑁄 𑀫𑁂 𑀆𑀦𑀻𑀢’’𑀦𑁆𑀢𑀺. 𑀲𑁄 𑀢𑀁 ‘‘𑀦𑁂𑀢𑀁 𑀢𑀯 𑀲𑀦𑁆𑀢𑀓𑀁, 𑀣𑁂𑀬𑁆𑀬𑀸𑀬 𑀢𑁂 𑀕𑀳𑀺𑀢’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀆𑀓𑀟𑁆𑀠𑀺. 𑀢𑀢𑁆𑀣 𑀘 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼. 𑀢𑀢𑁆𑀣 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀲𑀫𑀻𑀧𑁂 𑀲𑀦𑁆𑀦𑀺𑀧𑀸𑀢𑀁 𑀓𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀆𑀭𑀪𑀺𑀁𑀲𑀼. 𑀯𑀺𑀦𑀬𑀥𑀭𑀢𑁆𑀣𑁂𑀭𑀸 𑀅𑀯𑀳𑀸𑀭𑀁 𑀲𑀜𑁆𑀜𑀸𑀧𑁂𑀲𑀼𑀁.

𑀢𑀲𑁆𑀫𑀺𑀜𑁆𑀘 ¶ 𑀲𑀦𑁆𑀦𑀺𑀧𑀸𑀢𑁂 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀯𑀺𑀦𑀬𑀓𑀼𑀲𑀮𑁄 𑀳𑁄𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀇𑀫𑀺𑀦𑀸 𑀇𑀤𑀁 𑀣𑀸𑀮𑀓𑀁 𑀓𑀼𑀳𑀺𑀁 𑀅𑀯𑀳𑀝’’𑀦𑁆𑀢𑀺? ‘‘𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀅𑀯𑀳𑀝’’𑀦𑁆𑀢𑀺. ‘‘𑀢𑀢𑁆𑀭𑀺𑀤𑀁 𑀓𑀺𑀁 𑀅𑀕𑁆𑀖𑀢𑀻’’𑀢𑀺? ‘‘𑀦 𑀓𑀺𑀜𑁆𑀘𑀺 𑀅𑀕𑁆𑀖𑀢𑀺. 𑀢𑀢𑁆𑀭 𑀳𑀺 𑀦𑀸𑀴𑀺𑀓𑁂𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀔𑀸𑀤𑀺𑀢𑁆𑀯𑀸 𑀓𑀧𑀸𑀮𑀁 𑀙𑀟𑁆𑀟𑁂𑀦𑁆𑀢𑀺, 𑀤𑀸𑀭𑀼𑀅𑀢𑁆𑀣𑀁 𑀧𑀦 𑀨𑀭𑀢𑀻’’𑀢𑀺. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀓𑀺𑀁 𑀅𑀕𑁆𑀖𑀢𑀻’’𑀢𑀺? ‘‘𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀸𑀲𑀓𑁂𑀦 𑀯𑀸 𑀊𑀦𑀫𑀸𑀲𑀓𑁂𑀦 𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 ‘‘𑀲𑀸𑀥𑀼! 𑀲𑀸𑀥𑀼! 𑀲𑀼𑀓𑀣𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢’’𑀦𑁆𑀢𑀺 𑀏𑀓𑀲𑀸𑀥𑀼𑀓𑀸𑀭𑁄 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀸𑀢𑀺𑀬𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸 𑀲𑀼𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀫𑀬𑀺 𑀲𑀦𑁆𑀢𑁂 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀻𑀦𑀫𑁆𑀧𑀺 ¶ 𑀕𑀺𑀳𑀻𑀦𑀫𑁆𑀧𑀺 𑀅𑀥𑀺𑀓𑀭𑀡𑀁 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀅𑀢𑀺𑀝𑁆𑀞𑀫𑀸𑀦𑀁 𑀭𑀸𑀚𑀸𑀡𑀸𑀬 𑀞𑀧𑁂𑀫𑀻’’𑀢𑀺. 𑀏𑀯𑀁 𑀤𑁂𑀲𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀅𑀕𑁆𑀖𑁄𑀢𑀺 𑀪𑀡𑁆𑀟𑀕𑁆𑀖𑁄. 𑀦𑀯𑀪𑀡𑁆𑀟𑀲𑁆𑀲 𑀳𑀺 𑀬𑁄 𑀅𑀕𑁆𑀖𑁄 𑀳𑁄𑀢𑀺, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺; 𑀬𑀣𑀸 𑀦𑀯𑀥𑁄𑀢𑁄 𑀧𑀢𑁆𑀢𑁄 𑀅𑀝𑁆𑀞 𑀯𑀸 𑀤𑀲 𑀯𑀸 𑀅𑀕𑁆𑀖𑀢𑀺, 𑀲𑁄 𑀧𑀘𑁆𑀙𑀸 𑀪𑀺𑀦𑁆𑀦𑁄 𑀯𑀸 𑀙𑀺𑀤𑁆𑀤𑁄 𑀯𑀸 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀅𑀧𑁆𑀧𑀕𑁆𑀖𑁄 𑀳𑁄𑀢𑀺 𑀢𑀲𑁆𑀫𑀸 𑀦 𑀲𑀩𑁆𑀩𑀤𑀸 𑀪𑀡𑁆𑀟𑀁 𑀧𑀓𑀢𑀺𑀅𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀅𑀕𑁆𑀖𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀧𑀭𑀺𑀪𑁄𑀕𑁄𑀢𑀺 𑀪𑀡𑁆𑀟𑀧𑀭𑀺𑀪𑁄𑀕𑁄. 𑀧𑀭𑀺𑀪𑁄𑀕𑁂𑀦𑀸𑀧𑀺 𑀳𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺. 𑀢𑀲𑁆𑀫𑀸 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀲𑀘𑁂 𑀓𑁄𑀘𑀺 𑀓𑀲𑁆𑀲𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀸𑀲𑀺𑀁 𑀳𑀭𑀢𑀺, 𑀢𑀢𑁆𑀭 𑀯𑀸𑀲𑀺𑀲𑀸𑀫𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ¶ 𑁋 ‘‘𑀢𑀬𑀸 𑀅𑀬𑀁 𑀯𑀸𑀲𑀺 𑀓𑀺𑀢𑁆𑀢𑀓𑁂𑀦 𑀓𑀻𑀢𑀸’’𑀢𑀺? ‘‘𑀧𑀸𑀤𑁂𑀦, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀓𑀺𑀡𑀺𑀢𑁆𑀯𑀸𑀯 𑀞𑀧𑀺𑀢𑀸, 𑀉𑀤𑀸𑀳𑀼 𑀢𑀁 𑀯𑀴𑀜𑁆𑀚𑁂𑀲𑀻’’𑀢𑀺? 𑀲𑀘𑁂 𑀯𑀤𑀢𑀺 ‘‘𑀏𑀓𑀤𑀺𑀯𑀲𑀁 𑀫𑁂 𑀤𑀦𑁆𑀢𑀓𑀝𑁆𑀞𑀁 𑀯𑀸 𑀭𑀚𑀦𑀙𑀮𑁆𑀮𑀺𑀁 𑀯𑀸 𑀧𑀢𑁆𑀢𑀧𑀘𑀦𑀓𑀤𑀸𑀭𑀼𑀁 𑀯𑀸 𑀙𑀺𑀦𑁆𑀦𑀁, 𑀖𑀁𑀲𑀺𑀢𑁆𑀯𑀸 𑀯𑀸 𑀦𑀺𑀲𑀺𑀢𑀸’’𑀢𑀺. 𑀅𑀣𑀲𑁆𑀲𑀸 𑀧𑁄𑀭𑀸𑀡𑁄 𑀅𑀕𑁆𑀖𑁄 𑀪𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀯𑀸𑀲𑀺𑀬𑀸 𑀏𑀯𑀁 𑀅𑀜𑁆𑀚𑀦𑀺𑀬𑀸 𑀯𑀸 𑀅𑀜𑁆𑀚𑀦𑀺𑀲𑀮𑀸𑀓𑀸𑀬 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀯𑀸 𑀧𑀮𑀸𑀮𑁂𑀦 𑀯𑀸 𑀣𑀼𑀲𑁂𑀳𑀺 𑀯𑀸 𑀇𑀝𑁆𑀞𑀓𑀘𑀼𑀡𑁆𑀡𑁂𑀦 𑀯𑀸 𑀏𑀓𑀯𑀸𑀭𑀁 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑀫𑀢𑁆𑀢𑁂𑀦𑀸𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀺𑀧𑀼𑀫𑀡𑁆𑀟𑀮𑀲𑁆𑀲 𑀫𑀓𑀭𑀤𑀦𑁆𑀢𑀘𑁆𑀙𑁂𑀤𑀦𑁂𑀦𑀸𑀧𑀺 𑀧𑀭𑀺𑀫𑀚𑁆𑀚𑀺𑀢𑀫𑀢𑁆𑀢𑁂𑀦𑀸𑀧𑀺, 𑀉𑀤𑀓𑀲𑀸𑀝𑀺𑀓𑀸𑀬 𑀲𑀓𑀺𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀦𑀸𑀧𑀺 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀲𑀻𑀲𑁂 𑀯𑀸 𑀞𑀧𑀦𑀫𑀢𑁆𑀢𑁂𑀦𑀸𑀧𑀺, 𑀢𑀡𑁆𑀟𑀼𑀮𑀸𑀤𑀻𑀦𑀁 𑀧𑀧𑁆𑀨𑁄𑀝𑀦𑁂𑀦𑀸𑀧𑀺 𑀢𑀢𑁄 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀧𑀦𑀬𑀦𑁂𑀦𑀸𑀧𑀺, 𑀅𑀦𑁆𑀢𑀫𑀲𑁄 𑀏𑀓𑀁 𑀧𑀸𑀲𑀸𑀡𑀲𑀓𑁆𑀔𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀸𑀧𑀺, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀪𑀸𑀚𑀦𑀦𑁆𑀢𑀭𑀧𑀅𑀯𑀢𑁆𑀢𑀦𑁂𑀦𑀸𑀧𑀺, 𑀅𑀦𑁆𑀢𑀫𑀲𑁄 𑀢𑀢𑁄 𑀫𑀓𑁆𑀔𑀺𑀓𑀁 𑀯𑀸 𑀓𑀺𑀧𑀺𑀮𑁆𑀮𑀺𑀓𑀁 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀸𑀧𑀺, 𑀕𑀼𑀴𑀧𑀺𑀡𑁆𑀟𑀓𑀲𑁆𑀲 𑀫𑀥𑀼𑀭𑀪𑀸𑀯𑀚𑀸𑀦𑀦𑀢𑁆𑀣𑀁 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀡𑀼𑀫𑀢𑁆𑀢𑀁 𑀕𑀳𑀺𑀢𑀫𑀢𑁆𑀢𑁂𑀦𑀸𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀲𑁆𑀫𑀸 ¶ 𑀬𑀁𑀓𑀺𑀜𑁆𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀺𑀓𑁂𑀳𑀺 𑀧𑀭𑀺𑀪𑁄𑀕𑁂𑀦 𑀊𑀦𑀁 𑀓𑀢𑀁 𑀳𑁄𑀢𑀺, 𑀦 𑀢𑀁 𑀅𑀯𑀳𑀝𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑁂𑀦 𑀓𑀸𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀪𑁄𑀕𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀏𑀯𑀁 𑀇𑀫𑀸𑀦𑀺 𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄, 𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀧𑀢𑁆𑀢𑀺𑀁 𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀆𑀧𑀢𑁆𑀢𑀺𑀁 𑀬𑀣𑀸𑀞𑀸𑀦𑁂 𑀞𑀧𑁂𑀬𑁆𑀬𑀸𑀢𑀺.

𑀦𑀺𑀝𑁆𑀞𑀺𑀢𑁄 ‘‘𑀆𑀤𑀺𑀬𑁂𑀬𑁆𑀬…𑀧𑁂… 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺.

𑀇𑀫𑁂𑀲𑀁 𑀧𑀤𑀸𑀦𑀁 𑀯𑀺𑀦𑀺𑀘𑁆𑀙𑀬𑁄.

𑀇𑀤𑀸𑀦𑀺 ¶ 𑀬𑀤𑀺𑀤𑀁 ‘‘𑀬𑀣𑀸𑀭𑀽𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑁂’’𑀢𑀺𑀆𑀤𑀻𑀦𑀺 𑀯𑀺𑀪𑀚𑀦𑁆𑀢𑁂𑀦 ‘‘𑀬𑀣𑀸𑀭𑀽𑀧𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀭𑀽𑀧𑀦𑁆𑀢𑀺 𑀬𑀣𑀸𑀚𑀸𑀢𑀺𑀓𑀁. 𑀢𑀁 𑀧𑀦 𑀬𑀲𑁆𑀫𑀸 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸’’𑀢𑀺 𑀆𑀳. 𑀢𑀢𑁆𑀣 𑀧𑀸𑀤𑁂𑀦 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀸𑀤𑀸𑀭𑀳𑁂𑀦 ¶ 𑀧𑀸𑀤𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁. 𑀅𑀢𑀺𑀭𑁂𑀓𑀧𑀸𑀤𑁂𑀦 𑀉𑀪𑀬𑀫𑁆𑀧𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀧𑀣𑀩𑁆𑀬𑀸 𑀭𑀸𑀚𑀸𑀢𑀺 𑀲𑀓𑀮𑀧𑀣𑀯𑀺𑀬𑀸 𑀭𑀸𑀚𑀸 𑀤𑀻𑀧𑀘𑀓𑁆𑀓𑀯𑀢𑁆𑀢𑀻 𑀅𑀲𑁄𑀓𑀲𑀤𑀺𑀲𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀏𑀓𑀤𑀻𑀧𑁂 𑀭𑀸𑀚𑀸, 𑀲𑀻𑀳𑀴𑀭𑀸𑀚𑀲𑀤𑀺𑀲𑁄. 𑀧𑀤𑁂𑀲𑀭𑀸𑀚𑀸𑀢𑀺 𑀏𑀓𑀤𑀻𑀧𑀲𑁆𑀲 𑀧𑀤𑁂𑀲𑀺𑀲𑁆𑀲𑀭𑁄, 𑀩𑀺𑀫𑁆𑀩𑀺𑀲𑀸𑀭-𑀧𑀲𑁂𑀦𑀤𑀺-𑀆𑀤𑀬𑁄 𑀯𑀺𑀬. 𑀫𑀡𑁆𑀟𑀮𑀺𑀓𑀸 𑀦𑀸𑀫 𑀬𑁂 𑀤𑀻𑀧𑀧𑀤𑁂𑀲𑁂𑀧𑀺 𑀏𑀓𑀫𑁂𑀓𑀁 𑀫𑀡𑁆𑀟𑀮𑀁 𑀪𑀼𑀜𑁆𑀚𑀦𑁆𑀢𑀺. 𑀅𑀦𑁆𑀢𑀭𑀪𑁄𑀕𑀺𑀓𑀸 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀅𑀦𑁆𑀢𑀭𑀸 𑀓𑀢𑀺𑀧𑀬𑀕𑀸𑀫𑀲𑀸𑀫𑀺𑀓𑀸. 𑀅𑀓𑁆𑀔𑀤𑀲𑁆𑀲𑀸𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀦𑀓𑀸, 𑀢𑁂 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀘𑁄𑀭𑀸𑀦𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀚𑁆𑀚𑀸𑀤𑀺𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑁂 𑀧𑀦 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀸 𑀅𑀫𑀘𑁆𑀘𑀸 𑀯𑀸 𑀭𑀸𑀚𑀓𑀼𑀫𑀸𑀭𑀸 𑀯𑀸 𑀓𑀢𑀸𑀧𑀭𑀸𑀥𑀸 𑀳𑁄𑀦𑁆𑀢𑀺, 𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺, 𑀕𑀭𑀼𑀓𑀁 𑀞𑀸𑀦𑀁 𑀲𑀬𑀁 𑀦 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀫𑀳𑀸𑀫𑀢𑁆𑀢𑀸𑀢𑀺 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀸 𑀫𑀳𑀸𑀅𑀫𑀘𑁆𑀘𑀸; 𑀢𑁂𑀧𑀺 𑀢𑀢𑁆𑀣 𑀢𑀢𑁆𑀣 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀬𑁂 𑀯𑀸 𑀧𑀦𑀸𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀭𑀸𑀚𑀓𑀼𑀮𑀦𑀺𑀲𑁆𑀲𑀺𑀢𑀸 𑀯𑀸 𑀲𑀓𑀺𑀲𑁆𑀲𑀭𑀺𑀬𑀦𑀺𑀲𑁆𑀲𑀺𑀢𑀸 𑀯𑀸 𑀳𑀼𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀭𑀸𑀚𑀸𑀦𑁄’’𑀢𑀺 𑀤𑀲𑁆𑀲𑁂𑀢𑀺.

𑀳𑀦𑁂𑀬𑁆𑀬𑀼𑀦𑁆𑀢𑀺 𑀧𑁄𑀣𑁂𑀬𑁆𑀬𑀼𑀜𑁆𑀘𑁂𑀯 𑀙𑀺𑀦𑁆𑀤𑁂𑀬𑁆𑀬𑀼𑀜𑁆𑀘. 𑀧𑀩𑁆𑀩𑀸𑀚𑁂𑀬𑁆𑀬𑀼𑀦𑁆𑀢𑀺 𑀦𑀻𑀳𑀭𑁂𑀬𑁆𑀬𑀼𑀁. 𑀘𑁄𑀭𑁄𑀲𑀻𑀢𑀺 𑀏𑀯𑀫𑀸𑀤𑀻𑀦𑀺 𑀘 𑀯𑀢𑁆𑀯𑀸 𑀧𑀭𑀺𑀪𑀸𑀲𑁂𑀬𑁆𑀬𑀼𑀁; 𑀢𑁂𑀦𑁂𑀯𑀸𑀳 𑁋 ‘‘𑀧𑀭𑀺𑀪𑀸𑀲𑁄 𑀏𑀲𑁄’’𑀢𑀺. 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬𑀸𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀉𑀧𑀸𑀤𑀸𑀬. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀧𑀤𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑁯𑁩. 𑀏𑀯𑀁 ¶ 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀁 𑀆𑀤𑀺𑀬𑁂𑀬𑁆𑀬𑀸𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀲𑀗𑁆𑀔𑁂𑀧𑀢𑁄 𑀆𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑁂𑀧𑀢𑁄𑀏𑀯 ‘‘𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸’’𑀢𑀺 𑀆𑀤𑀸𑀢𑀩𑁆𑀩𑀪𑀡𑁆𑀟𑀁 𑀤𑀲𑁆𑀲𑀺𑀢𑀁, 𑀢𑀁 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀁, 𑀬𑀣𑀸 𑀬𑀣𑀸 𑀆𑀤𑀸𑀦𑀁 𑀕𑀘𑁆𑀙𑀢𑀺, 𑀅𑀦𑀸𑀕𑀢𑁂 ¶ 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀦𑀺𑀭𑀼𑀦𑁆𑀥𑀦𑀢𑁆𑀣𑀁 𑀢𑀣𑀸 𑀢𑀣𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀪𑀽𑀫𑀝𑁆𑀞𑀁 ¶ 𑀣𑀮𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 ‘‘𑀪𑀽𑀫𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀯𑀺𑀪𑀗𑁆𑀕𑀁 𑀆𑀳.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀫𑀝𑁆𑀞𑀓𑀣𑀸

𑁯𑁪. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀦𑀺𑀔𑀸𑀢𑀦𑁆𑀢𑀺 𑀪𑀽𑀫𑀺𑀬𑀁 𑀔𑀡𑀺𑀢𑁆𑀯𑀸 𑀞𑀧𑀺𑀢𑀁. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀁𑀲𑀼𑀇𑀝𑁆𑀞𑀓𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀁. 𑀪𑀽𑀫𑀝𑁆𑀞𑀁 𑀪𑀡𑁆𑀟𑀁…𑀧𑁂… 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀢𑀁 𑀏𑀯𑀁 𑀦𑀺𑀔𑀡𑀺𑀢𑁆𑀯𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀸 𑀞𑀧𑀺𑀢𑀢𑁆𑀢𑀸 𑀪𑀽𑀫𑀺𑀬𑀁 𑀞𑀺𑀢𑀁 𑀪𑀡𑁆𑀟𑀁 𑀬𑁄 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀉𑀧𑀸𑀬𑁂𑀦 𑀜𑀢𑁆𑀯𑀸 ‘‘𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀲𑁄 𑀪𑀡𑁆𑀟𑀝𑁆𑀞𑀸𑀦𑀁 𑀅𑀧𑁆𑀧𑀢𑁆𑀯𑀸𑀧𑀺 𑀲𑀩𑁆𑀩𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀲𑀼 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀣𑀁? 𑀲𑁄 𑀳𑀺 𑀢𑀲𑁆𑀲 𑀆𑀳𑀭𑀡𑀢𑁆𑀣𑀸𑀬 𑀉𑀝𑁆𑀞𑀳𑀦𑁆𑀢𑁄 𑀬𑀁 𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀨𑀦𑁆𑀤𑀸𑀧𑁂𑀢𑀺, 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀳𑀢𑁆𑀣𑀯𑀸𑀭𑁂 𑀳𑀢𑁆𑀣𑀯𑀸𑀭𑁂 𑀤𑀼𑀓𑁆𑀓𑀝𑀁. ‘‘𑀫𑀳𑀦𑁆𑀢𑀁 𑀦𑀺𑀥𑀸𑀦𑀁 𑀦 𑀲𑀓𑁆𑀓𑀸 𑀏𑀓𑁂𑀦 𑀆𑀳𑀭𑀺𑀢𑀼𑀁, 𑀤𑀼𑀢𑀺𑀬𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀲𑁆𑀲𑀘𑀺 𑀲𑀳𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀧𑀤𑀯𑀸𑀭𑁂 𑀘 𑀳𑀢𑁆𑀣𑀯𑀸𑀭𑁂 𑀘 𑀤𑀼𑀓𑁆𑀓𑀝𑀁. 𑀤𑁆𑀯𑀸𑀭𑀧𑀺𑀤𑀳𑀦𑁂 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀕𑀫𑀦𑀲𑁆𑀲 𑀅𑀦𑀼𑀧𑀓𑀸𑀭𑁂 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀲 𑀦𑀺𑀧𑀦𑁆𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀸’’𑀢𑀺 𑀧𑀓𑁆𑀓𑁄𑀲𑀢𑀺, 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀯𑀤𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀉𑀝𑁆𑀞𑀳𑀢𑀺, 𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀉𑀝𑁆𑀞𑀳𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑀁 𑀕𑀘𑁆𑀙𑀢𑀺, 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀲𑁄 𑀢𑀁 𑀧𑀼𑀘𑁆𑀙𑀢𑀺 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀓𑀼𑀳𑀺𑀁, 𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀧𑀓𑁆𑀓𑁄𑀲𑀸𑀳𑀻’’𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑀩𑁆𑀩𑁂 𑀲𑀫𑀸𑀕𑀢𑁂 𑀤𑀺𑀲𑁆𑀯𑀸 ‘‘𑀫𑀬𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀏𑀯𑀭𑀽𑀧𑁄 𑀦𑀺𑀥𑀺 𑀉𑀧𑀮𑀤𑁆𑀥𑁄, 𑀕𑀘𑁆𑀙𑀸𑀫 𑀢𑀁 𑀕𑀳𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫, 𑀲𑀼𑀔𑀜𑁆𑀘 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀫𑁂𑀯.

𑀏𑀯𑀁 𑀮𑀤𑁆𑀥𑀲𑀳𑀸𑀬𑁄 𑀓𑀼𑀤𑀸𑀮𑀁 𑀧𑀭𑀺𑀬𑁂𑀲𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀓𑀼𑀤𑀸𑀮𑁄 𑀅𑀢𑁆𑀣𑀺, ‘‘𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀘 𑀕𑀡𑁆𑀳𑀦𑁆𑀢𑁄 𑀘 𑀆𑀳𑀭𑀦𑁆𑀢𑁄 𑀘 𑀲𑀩𑁆𑀩𑀢𑁆𑀣 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 ¶ . 𑀲𑀘𑁂 𑀦𑀢𑁆𑀣𑀺, 𑀅𑀜𑁆𑀜𑀁 ¶ 𑀪𑀺𑀓𑁆𑀔𑀼𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀕𑀦𑁆𑀢𑁆𑀯𑀸 𑀬𑀸𑀘𑀢𑀺, 𑀬𑀸𑀘𑀦𑁆𑀢𑁄 𑀘 𑀲𑀘𑁂 ‘‘𑀓𑀼𑀤𑀸𑀮𑀁 𑀫𑁂 𑀤𑁂𑀳𑀺, 𑀓𑀼𑀤𑀸𑀮𑁂𑀦 𑀫𑁂 𑀅𑀢𑁆𑀣𑁄 ¶ , 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀫𑀢𑁆𑀣𑀺, 𑀢𑀁 𑀓𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀼𑀲𑀸 𑀅𑀪𑀡𑀦𑁆𑀢𑁄 𑀬𑀸𑀘𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑀘𑁂 ‘‘𑀫𑀸𑀢𑀺𑀓𑀸 𑀲𑁄𑀥𑁂𑀢𑀩𑁆𑀩𑀸 𑀅𑀢𑁆𑀣𑀺, 𑀯𑀺𑀳𑀸𑀭𑁂 𑀪𑀽𑀫𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀫𑀼𑀲𑀸𑀧𑀺 𑀪𑀡𑀢𑀺, 𑀬𑀁 𑀬𑀁 𑀯𑀘𑀦𑀁 𑀫𑀼𑀲𑀸, 𑀢𑀢𑁆𑀣 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁 𑀦𑀸𑀫 𑀅𑀢𑁆𑀣𑀺. 𑀲𑀘𑁂 𑀧𑀦 𑀓𑀼𑀤𑀸𑀮𑀲𑁆𑀲 𑀤𑀡𑁆𑀟𑁄 𑀦𑀢𑁆𑀣𑀺, ‘‘𑀤𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀲𑀺𑀁 𑀯𑀸 𑀨𑀭𑀲𑀼𑀁 𑀯𑀸 𑀦𑀺𑀲𑁂𑀢𑀺, 𑀢𑀤𑀢𑁆𑀣𑀸𑀬 𑀕𑀘𑁆𑀙𑀢𑀺, 𑀕𑀦𑁆𑀢𑁆𑀯𑀸 𑀲𑀼𑀓𑁆𑀔𑀓𑀝𑁆𑀞𑀁 𑀙𑀺𑀦𑁆𑀤𑀢𑀺 𑀢𑀘𑁆𑀙𑀢𑀺 𑀆𑀓𑁄𑀝𑁂𑀢𑀺, 𑀲𑀩𑁆𑀩𑀢𑁆𑀣 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁. 𑀅𑀮𑁆𑀮𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁄 𑀧𑀭𑀁 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀢𑀢𑁆𑀣 𑀚𑀸𑀢𑀓𑀓𑀝𑁆𑀞𑀮𑀢𑀸𑀙𑁂𑀤𑀦𑀢𑁆𑀣𑀁 𑀯𑀸𑀲𑀺𑀨𑀭𑀲𑀼𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀯𑀸𑀲𑀺𑀨𑀭𑀲𑀼𑀓𑀼𑀤𑀸𑀮𑁂 𑀬𑀸𑀘𑀦𑁆𑀢𑀸 𑀆𑀲𑀗𑁆𑀓𑀺𑀢𑀸 𑀪𑀯𑀺𑀲𑁆𑀲𑀸𑀫, 𑀮𑁄𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀭𑁄𑀫𑀸’’𑀢𑀺. 𑀢𑀢𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀮𑁄𑀳𑀩𑀻𑀚𑀢𑁆𑀣𑀁 𑀧𑀣𑀯𑀺𑀁 𑀔𑀡𑀦𑁆𑀢𑀺, 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑁂𑀳𑀺 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀺. 𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀸𑀦𑀺𑀬𑁂𑀯. 𑀩𑀻𑀚𑀁 𑀧𑀦 𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁.

𑀧𑀺𑀝𑀓𑀧𑀭𑀺𑀬𑁂𑀲𑀦𑁂𑀧𑀺 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀁. 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀺𑀝𑀓𑀁 𑀓𑀸𑀢𑀼𑀓𑀸𑀫𑀢𑀸𑀬 𑀯𑀮𑁆𑀮𑀺𑀘𑁆𑀙𑁂𑀤𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀯𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀭𑀺𑀬𑀺𑀝𑁆𑀞𑀲𑀳𑀸𑀬𑀓𑀼𑀤𑀸𑀮𑀧𑀺𑀝𑀓𑁄 𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀕𑀘𑁆𑀙𑀦𑁆𑀢𑁄 ‘‘𑀇𑀫𑀁 𑀦𑀺𑀥𑀺𑀁 𑀮𑀤𑁆𑀥𑀸 𑀩𑀼𑀤𑁆𑀥𑀧𑀽𑀚𑀁 𑀯𑀸 𑀥𑀫𑁆𑀫𑀧𑀽𑀚𑀁 𑀯𑀸 𑀲𑀗𑁆𑀖𑀪𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀲𑀮𑀁 𑀉𑀧𑁆𑀧𑀸𑀤𑁂𑀢𑀺, 𑀓𑀼𑀲𑀮𑀘𑀺𑀢𑁆𑀢𑁂𑀦 𑀕𑀫𑀦𑁂 𑀅𑀦𑀸𑀧𑀢𑁆𑀢𑀺. 𑀓𑀲𑁆𑀫𑀸? ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 ¶ 𑀯𑀸…𑀧𑁂… 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀦𑀺𑀥𑀸𑀦𑀝𑁆𑀞𑀸𑀦𑀁 𑀕𑀫𑀦𑀢𑁆𑀣𑀸𑀬 𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀪𑀽𑀢𑀕𑀸𑀫𑀁 𑀙𑀺𑀦𑁆𑀤𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀼𑀓𑁆𑀔𑀓𑀝𑁆𑀞𑀁 𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀁.

𑀢𑀢𑁆𑀣𑀚𑀸𑀢𑀓𑀦𑁆𑀢𑀺 𑀘𑀺𑀭𑀦𑀺𑀳𑀺𑀢𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀚𑀸𑀢𑀓𑀁. 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸𑀢𑀺 𑀦 𑀓𑁂𑀯𑀮𑀁 𑀓𑀝𑁆𑀞𑀮𑀢𑀫𑁂𑀯, 𑀬𑀁𑀓𑀺𑀜𑁆𑀘𑀺 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑀅𑀝𑁆𑀞𑀯𑀺𑀥𑀁 ¶ 𑀳𑁂𑀢𑀁 𑀤𑀼𑀓𑁆𑀓𑀝𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀣𑁂𑀭𑁂𑀳𑀺 𑀤𑀲𑁆𑀲𑀺𑀢𑀁 𑁋 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 ¶ , 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁, 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁, 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁, 𑀯𑀺𑀦𑀬𑀤𑀼𑀓𑁆𑀓𑀝𑀁, 𑀜𑀸𑀢𑀤𑀼𑀓𑁆𑀓𑀝𑀁, 𑀜𑀢𑁆𑀢𑀺𑀤𑀼𑀓𑁆𑀓𑀝𑀁, 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀦𑁆𑀢𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀢𑁆𑀣 𑀳𑀺 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁, 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀺. ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀢𑁆𑀣 𑀧𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀓𑀲𑁆𑀫𑀸? 𑀅𑀯𑀳𑀸𑀭𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸𑀢𑀺. 𑀬𑀁 𑀧𑀦 𑀤𑀲𑀯𑀺𑀥𑀁 𑀭𑀢𑀦𑀁, 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁, 𑀲𑀩𑁆𑀩𑀜𑁆𑀘 𑀆𑀯𑀼𑀥𑀪𑀡𑁆𑀟𑀸𑀤𑀺𑀁 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀓𑀤𑀮𑀺𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀢𑀢𑁆𑀣𑀚𑀸𑀢𑀓𑀨𑀮𑀸𑀦𑀺 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀧𑀦 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀧𑀢𑁆𑀢𑁂 𑀭𑀚𑁂 𑀧𑀢𑀺𑀢𑁂 𑀧𑀢𑁆𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀥𑁄𑀯𑀺𑀢𑁆𑀯𑀸 𑀯𑀸 𑀢𑀢𑁆𑀣 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀺𑀦𑀬𑀤𑀼𑀓𑁆𑀓𑀝𑀁 𑀦𑀸𑀫. ‘‘𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁯) 𑀇𑀤𑀁 𑀜𑀸𑀢𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀏𑀓𑀸𑀤𑀲𑀲𑀼 𑀲𑀫𑀦𑀼𑀪𑀸𑀲𑀦𑀸𑀲𑀼 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑁪𑁧𑁪) 𑀯𑀼𑀢𑁆𑀢𑀁, 𑀇𑀤𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀦𑀸𑀫. ‘‘𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁭) 𑀇𑀤𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀤𑀁 𑀧𑀦 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀁𑀓𑀺𑀜𑁆𑀘𑀺 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻’’𑀢𑀺.

𑀲𑀘𑁂 𑀧𑀦𑀲𑁆𑀲 𑀢𑀢𑁆𑀣𑀚𑀸𑀢𑀓𑁂 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀫𑁆𑀳𑀺 𑀙𑀺𑀦𑁆𑀦𑁂𑀧𑀺 ¶ 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀙𑁂𑀤𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀔𑀡𑀢𑀺, 𑀙𑁂𑀤𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀔𑀡𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑁄𑀧𑀺 𑀳𑀺 𑀇𑀥 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀔𑀡𑀺𑀢𑁆𑀯𑀸 𑀓𑀼𑀫𑁆𑀪𑀺𑀫𑀽𑀮𑀁 𑀧𑀢𑁆𑀢𑀲𑁆𑀲𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀔𑀡𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺.

𑀩𑁆𑀬𑀽𑀳𑀢𑀺 𑀯𑀸𑀢𑀺 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀯𑀺𑀬𑀽𑀳𑀢𑀺, 𑀏𑀓𑀧𑀲𑁆𑀲𑁂 𑀭𑀸𑀲𑀺𑀁 𑀓𑀭𑁄𑀢𑀺, 𑀔𑀡𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀜𑁆𑀘 𑀧𑀁𑀲𑀼𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀜𑁆𑀚𑀁 𑀓𑀭𑁄𑀦𑁆𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦 𑀭𑀸𑀲𑀺𑀁 𑀓𑀢𑁆𑀯𑀸𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀢𑀺, 𑀮𑀚𑁆𑀚𑀺𑀥𑀫𑁆𑀫𑀁 𑀆𑀧𑀚𑁆𑀚𑀢𑀺 ¶ , 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀉𑀤𑁆𑀥𑀭𑀢𑀺 𑀯𑀸𑀢𑀺 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀳𑀺 𑀧𑀸𑀢𑁂𑀢𑀺, 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀁𑀲𑀼𑀁 𑀧𑀦 𑀓𑀼𑀤𑀸𑀮𑁂𑀦 𑀯𑀸 𑀳𑀢𑁆𑀣𑁂𑀳𑀺 𑀯𑀸 𑀧𑀘𑁆𑀙𑀺𑀬𑀸 𑀯𑀸 𑀢𑀳𑀺𑀁 𑀢𑀳𑀺𑀁 𑀧𑀸𑀢𑁂𑀦𑁆𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦 𑀲𑀩𑁆𑀩𑀁 𑀧𑀁𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀓𑀼𑀫𑁆𑀪𑀺𑀁 𑀣𑀮𑀝𑁆𑀞𑀁 𑀓𑀢𑁆𑀯𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑀁 ¶ 𑀆𑀧𑀚𑁆𑀚𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀓𑀼𑀫𑁆𑀪𑀺𑀁 𑀆𑀫𑀲𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀫𑀲𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀆𑀫𑀲𑀺𑀢𑁆𑀯𑀸𑀧𑀺 𑀘 𑀮𑀚𑁆𑀚𑀺𑀥𑀫𑁆𑀫𑀁 𑀆𑀧𑀚𑁆𑀚𑀦𑁆𑀢𑁄 𑀆𑀫𑀲𑀦𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀲𑀉𑀲𑁆𑀲𑀸𑀳𑁄𑀯 𑀓𑀼𑀫𑁆𑀪𑀺𑀁 𑀨𑀦𑁆𑀤𑀸𑀧𑁂𑀢𑀺, 𑀆𑀫𑀲𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀣𑀼𑀮𑁆𑀮𑀘𑁆𑀘𑀬𑁂 𑀧𑀢𑀺𑀝𑁆𑀞𑀸𑀢𑀺.

𑀢𑀢𑁆𑀭𑀸𑀬𑀁 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀢𑁆𑀣𑁄 𑁋 𑀧𑀞𑀫𑀁 𑀢𑀸𑀯𑁂𑀢𑁆𑀣 𑀤𑀼𑀝𑁆𑀞𑀼 𑀓𑀢𑀁 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀓𑀺𑀘𑁆𑀘𑀁 𑀯𑀺𑀭𑀸𑀥𑁂𑀢𑁆𑀯𑀸 𑀓𑀢𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀅𑀣 𑀯𑀸 𑀤𑀼𑀝𑁆𑀞𑀁 𑀓𑀢𑀁, 𑀯𑀺𑀭𑀽𑀧𑀸 𑀲𑀸 𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀓𑀺𑀭𑀺𑀬𑀸𑀦𑀁 𑀫𑀚𑁆𑀛𑁂 𑀦 𑀲𑁄𑀪𑀢𑀻𑀢𑀺 𑀏𑀯𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀤𑀼𑀓𑁆𑀓𑀝𑀁 𑀇𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘, 𑀔𑀮𑀺𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝𑀁.

‘‘𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂 𑀧𑀸𑀧𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

𑀤𑀼𑀓𑁆𑀓𑀝𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀇𑀢𑀭𑀁 ¶ 𑀧𑀦 𑀣𑀽𑀮𑀢𑁆𑀢𑀸, 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬𑀁. ‘‘𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺’’ (𑀲𑀁. 𑀦𑀺. 𑁧.𑁪𑁯), ‘‘𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁬𑁬; 𑀦𑁂𑀢𑁆𑀢𑀺. 𑁯𑁧) 𑀯𑀺𑀬 𑀘𑁂𑀢𑁆𑀣 𑀲𑀁𑀬𑁄𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀩𑁆𑀩𑁂𑀲𑀼 𑀳𑀺 𑀅𑀘𑁆𑀘𑀬𑁂𑀲𑀼 𑀢𑁂𑀦 𑀲𑀫𑁄 𑀣𑀽𑀮𑁄 𑀅𑀘𑁆𑀘𑀬𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀣𑀽𑀮𑀢𑁆𑀢𑀸 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀓𑀲𑁆𑀲 𑀫𑀽𑀮𑁂 𑀬𑁄 𑀤𑁂𑀲𑁂𑀢𑀺, 𑀬𑁄 𑀘 𑀢𑀁 𑀧𑀝𑀺𑀕𑁆𑀕𑀡𑁆𑀳𑀢𑀺;

𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 ¶ 𑀘 𑀧𑀬𑁄𑀕𑁂 𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀨𑀦𑁆𑀤𑀸𑀧𑁂𑀢𑁆𑀯𑀸𑀧𑀺 𑀘 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀳𑀧𑀬𑁄𑀕𑀢𑁄 𑀧𑀝𑁆𑀞𑀸𑀬𑁂𑀯 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀆𑀧𑀢𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀳𑀧𑀬𑁄𑀕𑀁 𑀧𑀦 𑀅𑀓𑀢𑁆𑀯𑀸 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁂𑀦 𑀬𑀸 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸 𑀆𑀧𑀦𑁆𑀦𑀸, 𑀲𑀩𑁆𑀩𑀸 𑀢𑀸 𑀤𑁂𑀲𑁂𑀢𑀩𑁆𑀩𑀸. 𑀲𑀳𑀧𑀬𑁄𑀕𑁂 𑀘 𑀢𑀢𑁆𑀣𑀚𑀸𑀢𑀓𑀘𑁆𑀙𑁂𑀤𑀦𑁂 𑀩𑀳𑀼𑀓𑀸𑀦𑀺𑀧𑀺 𑀤𑀼𑀓𑁆𑀓𑀝𑀸𑀦𑀺 𑀧𑀁𑀲𑀼𑀔𑀡𑀦𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀏𑀓𑀁 𑀔𑀡𑀦𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀔𑀡𑀦𑁂 ¶ 𑀩𑀳𑀼𑀓𑀸𑀦𑀺𑀧𑀺 𑀯𑀺𑀬𑀽𑀳𑀦𑀁, 𑀯𑀺𑀬𑀽𑀳𑀦𑁂 𑀩𑀳𑀼𑀓𑀸𑀦𑀺𑀧𑀺 𑀉𑀤𑁆𑀥𑀭𑀡𑀁, 𑀉𑀤𑁆𑀥𑀭𑀡𑁂 𑀩𑀳𑀼𑀓𑀸𑀦𑀺𑀧𑀺 𑀆𑀫𑀲𑀦𑀁, 𑀆𑀫𑀲𑀦𑁂 𑀩𑀳𑀼𑀓𑀸𑀦𑀺𑀧𑀺 𑀨𑀦𑁆𑀤𑀸𑀧𑀦𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀧𑀁𑀲𑀼𑀔𑀡𑀦𑀸𑀤𑀻𑀲𑀼 𑀘 𑀮𑀚𑁆𑀚𑀺𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀼, 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸𑀧𑀢𑁆𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀘 𑀦𑀸𑀫𑁂𑀲𑀸 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀧𑀸𑀭𑀸. 𑁪𑁧𑁪) 𑀏𑀯𑀁 𑀅𑀦𑀼𑀲𑀸𑀯𑀦𑀸𑀲𑀼𑀢𑁆𑀢𑁂𑀲𑀼𑀬𑁂𑀯 𑀆𑀕𑀢𑀸. 𑀇𑀥 𑀧𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀸𑀢𑀺.

𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀬𑁄 𑀧𑀦 𑀨𑀦𑁆𑀤𑀸𑀧𑁂𑀢𑁆𑀯𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀯 𑀢𑀁 𑀓𑀼𑀫𑁆𑀪𑀺𑀁 𑀞𑀸𑀦𑀢𑁄 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀞𑀸𑀦𑀸 𑀘𑀸𑀯𑀦𑀜𑁆𑀘𑁂𑀢𑁆𑀣 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀓𑀼𑀫𑁆𑀪𑀺𑀁 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑁄 𑀇𑀫𑀺𑀦𑀸 𑀅𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 ¶ 𑀧𑀸𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑁂𑀯 𑀕𑀳𑁂𑀢𑁆𑀯𑀸 𑀧𑀭𑀢𑁄 𑀧𑁂𑀮𑁆𑀮𑁂𑀦𑁆𑀢𑁄 𑀧𑀸𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀇𑀫𑀺𑀦𑀸 𑀅𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀅𑀧𑀦𑀸𑀫𑁂𑀦𑁆𑀢𑁄 𑀯𑀸𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑀓𑁆𑀔𑀺𑀡𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀤𑀓𑁆𑀔𑀺𑀡𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀸𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀪𑀽𑀫𑀺𑀢𑁄 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀔𑀡𑀺𑀢𑁆𑀯𑀸 𑀳𑁂𑀝𑁆𑀞𑀢𑁄 𑀑𑀲𑀻𑀤𑁂𑀦𑁆𑀢𑁄 𑀩𑀼𑀦𑁆𑀤𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀔𑀯𑀝𑁆𑀝𑀺𑀬𑀸 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸𑀬 𑀓𑀼𑀫𑁆𑀪𑀺𑀬𑀸. 𑀬𑀤𑀺 𑀧𑀦 𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀬𑀸 𑀧𑀸𑀲𑀁 𑀓𑀢𑁆𑀯𑀸 𑀮𑁄𑀳𑀔𑀸𑀡𑀼𑀁 𑀯𑀸 𑀔𑀤𑀺𑀭𑀲𑀸𑀭𑀸𑀤𑀺𑀔𑀸𑀡𑀼𑀁 𑀯𑀸 𑀧𑀣𑀯𑀺𑀬𑀁 𑀆𑀓𑁄𑀝𑁂𑀢𑁆𑀯𑀸 𑀢𑀢𑁆𑀣 𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀏𑀓𑀸𑀬 𑀲𑀗𑁆𑀔𑀮𑀺𑀓𑀸𑀬 𑀩𑀤𑁆𑀥𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀽𑀳𑀺 𑀲𑀗𑁆𑀔𑀮𑀺𑀓𑀸𑀳𑀺 𑀩𑀤𑁆𑀥𑀸𑀬 𑀧𑀜𑁆𑀘 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺.

𑀢𑀢𑁆𑀣 ¶ 𑀏𑀓𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸 𑀧𑀞𑀫𑀁 𑀔𑀸𑀡𑀼𑀓𑀁 𑀯𑀸 𑀉𑀤𑁆𑀥𑀭𑀢𑀺, 𑀲𑀗𑁆𑀔𑀮𑀺𑀓𑀁 𑀯𑀸 𑀙𑀺𑀦𑁆𑀤𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑁄 𑀓𑀼𑀫𑁆𑀪𑀺𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑁄 𑀔𑀸𑀡𑀼𑀓𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀲𑀗𑁆𑀔𑀮𑀺𑀓𑀁 𑀯𑀸 𑀙𑀺𑀦𑁆𑀤𑀢𑀺, 𑀧𑀸𑀭𑀸𑀚𑀺𑀓𑀁. 𑀏𑀢𑁂𑀦 𑀉𑀧𑀸𑀬𑁂𑀦 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼 𑀩𑀤𑁆𑀥𑀓𑀼𑀫𑁆𑀪𑀺𑀬𑀸𑀧𑀺 𑀧𑀘𑁆𑀙𑀺𑀫𑁂 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀁. 𑀲𑁂𑀲𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀘𑁂 𑀔𑀸𑀡𑀼 𑀦𑀢𑁆𑀣𑀺, 𑀲𑀗𑁆𑀔𑀮𑀺𑀓𑀸𑀬 𑀅𑀕𑁆𑀕𑁂 𑀯𑀮𑀬𑀁 𑀓𑀢𑁆𑀯𑀸 𑀢𑀢𑁆𑀣𑀚𑀸𑀢𑀓𑁂 𑀫𑀽𑀮𑁂 𑀧𑀯𑁂𑀲𑀺𑀢𑀁 𑀳𑁄𑀢𑀺, 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀘𑁆𑀙𑀸 𑀫𑀽𑀮𑀁 𑀙𑁂𑀢𑁆𑀯𑀸 𑀯𑀮𑀬𑀁 𑀦𑀻𑀳𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀫𑀽𑀮𑀁 𑀅𑀘𑁆𑀙𑁂𑀢𑁆𑀯𑀸 𑀯𑀮𑀬𑀁 ¶ 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀫𑀽𑀮𑀢𑁄 𑀅𑀦𑀻𑀳𑀭𑀺𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑁂𑀘𑀺 ¶ 𑀧𑀦 𑀦𑀺𑀫𑀺𑀢𑁆𑀢𑀢𑁆𑀣𑀸𑀬 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀸𑀤𑀻𑀦𑀺 𑀭𑁄𑀧𑁂𑀦𑁆𑀢𑀺, 𑀫𑀽𑀮𑀸𑀦𑀺 𑀓𑀼𑀫𑁆𑀪𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺, ‘‘𑀫𑀽𑀮𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀫𑁆𑀪𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀙𑀺𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀢𑁆𑀯𑀸 𑀓𑀼𑀫𑁆𑀪𑀺𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀫𑀽𑀮𑀸𑀦𑀺 𑀙𑀺𑀦𑁆𑀤𑀢𑁄𑀯 𑀮𑀼𑀞𑀺𑀢𑁆𑀯𑀸 𑀓𑀼𑀫𑁆𑀪𑀻 𑀦𑀺𑀦𑁆𑀦𑀝𑁆𑀞𑀸𑀦𑀁 𑀕𑀢𑀸, 𑀭𑀓𑁆𑀔𑀢𑀺 𑀢𑀸𑀯. 𑀕𑀢𑀝𑁆𑀞𑀸𑀦𑀢𑁄 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀙𑀺𑀦𑁆𑀦𑁂𑀲𑀼 𑀫𑀽𑀮𑁂𑀲𑀼 𑀏𑀓𑀫𑀽𑀮𑀫𑀢𑁆𑀢𑁂𑀦 𑀓𑀼𑀫𑁆𑀪𑀻 𑀢𑀺𑀝𑁆𑀞𑀢𑀺, 𑀲𑁄 𑀘 𑀢𑀁 ‘‘𑀇𑀫𑀲𑁆𑀫𑀺𑀁 𑀫𑀽𑀮𑁂 𑀙𑀺𑀦𑁆𑀦𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀙𑀺𑀦𑁆𑀤𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀏𑀓𑀫𑀽𑀮𑁂𑀦𑁂𑀯 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑁄 𑀯𑀺𑀬 𑀞𑀺𑀢𑀸 𑀳𑁄𑀢𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀮𑀕𑁆𑀕𑀦𑀓𑀁 𑀦𑀢𑁆𑀣𑀺, 𑀢𑀲𑁆𑀫𑀺𑀫𑁆𑀧𑀺 𑀫𑀽𑀮𑁂 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀫𑀳𑀸𑀧𑀸𑀲𑀸𑀡𑁄 𑀞𑀧𑀺𑀢𑁄 𑀳𑁄𑀢𑀺, 𑀢𑀁 𑀤𑀡𑁆𑀟𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀧𑀦𑁂𑀢𑀼𑀓𑀸𑀫𑁄 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀚𑀸𑀢𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀁. 𑀢𑀲𑁆𑀲𑀸 𑀲𑀫𑀻𑀧𑁂 𑀚𑀸𑀢𑀓𑀁 𑀙𑁂𑀢𑁆𑀯𑀸 𑀆𑀳𑀭𑀢𑀺, 𑀅𑀢𑀢𑁆𑀣𑀚𑀸𑀢𑀓𑀢𑁆𑀢𑀸 𑀢𑀁 𑀙𑀺𑀦𑁆𑀤𑀢𑁄 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀢𑁆𑀢𑀦𑁄 𑀪𑀸𑀚𑀦𑀦𑁆𑀢𑀺 𑀲𑀘𑁂 𑀧𑀦 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀼𑀫𑁆𑀪𑀺𑀕𑀢𑀪𑀡𑁆𑀟𑀕𑁆𑀕𑀳𑀡𑀢𑁆𑀣𑀁 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑁆𑀯𑀸 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀘𑁆𑀙𑁂𑀤𑁄 𑀘𑁂𑀢𑁆𑀣 𑀧𑀸𑀭𑀸𑀚𑀺𑀓𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀊𑀦𑀧𑀜𑁆𑀘𑀫𑀸𑀲𑀓𑀫𑁆𑀧𑀺 𑀆𑀫𑀲𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺𑀬𑁂𑀯.

𑀨𑀦𑁆𑀤𑀸𑀧𑁂𑀢𑀻𑀢𑀺 ¶ 𑀏𑀢𑁆𑀣 𑀬𑀸𑀯 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑀺, 𑀢𑀸𑀯 𑀨𑀦𑁆𑀤𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺 𑀘 𑀇𑀢𑁄 𑀘𑀺𑀢𑁄 𑀘 𑀅𑀧𑀩𑁆𑀬𑀽𑀳𑀦𑁆𑀢𑁄𑀧𑀺 𑀨𑀦𑁆𑀤𑀸𑀧𑁂𑀢𑀺𑀬𑁂𑀯, 𑀲𑁄 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀏𑀓𑀸𑀩𑀤𑁆𑀥𑀪𑀸𑀯𑁄 𑀙𑀺𑀦𑁆𑀦𑁄, 𑀓𑀼𑀫𑁆𑀪𑀺𑀕𑀢𑀁 𑀓𑀼𑀫𑁆𑀪𑀺𑀬𑀫𑁂𑀯, 𑀪𑀸𑀚𑀦𑀕𑀢𑀫𑁆𑀧𑀺 𑀪𑀸𑀚𑀦𑁂𑀬𑁂𑀯 𑀳𑁄𑀢𑀺, 𑀢𑀤𑀸 𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀓𑀢𑁆𑀯𑀸 𑀓𑀼𑀫𑁆𑀪𑀺𑀢𑁄 𑀅𑀦𑀻𑀳𑀢𑁂𑀧𑀺 𑀘 𑀪𑀸𑀚𑀦𑁂 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻𑀢𑀺 𑀏𑀢𑁆𑀣 𑀬𑀣𑀸 𑀅𑀗𑁆𑀕𑀼𑀮𑀦𑁆𑀢𑀭𑁂𑀳𑀺 𑀦𑀺𑀓𑁆𑀔𑀦𑁆𑀢𑀓𑀳𑀸𑀧𑀡𑀸 𑀓𑀼𑀫𑁆𑀪𑀺𑀕𑀢𑁂 𑀓𑀳𑀸𑀧𑀡𑁂 𑀦 𑀲𑀫𑁆𑀨𑀼𑀲𑀦𑁆𑀢𑀺, 𑀏𑀯𑀁 𑀫𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁄 𑀫𑀼𑀝𑁆𑀞𑀺𑀁 𑀙𑀺𑀦𑁆𑀤𑀢𑀺 𑀦𑀸𑀫; 𑀲𑁄𑀧𑀺 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑀲𑀼𑀢𑁆𑀢𑀸𑀭𑀽𑀴𑁆𑀳𑀦𑁆𑀢𑀺 𑀲𑀼𑀢𑁆𑀢𑁂 𑀆𑀭𑀽𑀴𑁆𑀳𑀁; 𑀲𑀼𑀢𑁆𑀢𑁂𑀦 𑀆𑀯𑀼𑀢𑀲𑁆𑀲𑀸𑀧𑀺 𑀲𑀼𑀢𑁆𑀢𑀫𑀬𑀲𑁆𑀲𑀸𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁 ¶ . 𑀧𑀸𑀫𑀗𑁆𑀕𑀸𑀤𑀻𑀦𑀺𑀳𑀺 𑀲𑁄𑀯𑀡𑁆𑀡𑀫𑀬𑀸𑀦𑀺𑀧𑀺 𑀳𑁄𑀦𑁆𑀢𑀺 𑀭𑀽𑀧𑀺𑀬𑀫𑀬𑀸𑀦𑀺𑀧𑀺 𑀲𑀼𑀢𑁆𑀢𑀫𑀬𑀸𑀦𑀺𑀧𑀺, 𑀫𑀼𑀢𑁆𑀢𑀸𑀯𑀮𑀺𑀆𑀤𑀬𑁄𑀧𑀺 𑀏𑀢𑁆𑀣𑁂𑀯 ¶ 𑀲𑀗𑁆𑀕𑀳𑀁 𑀕𑀢𑀸. 𑀯𑁂𑀞𑀦𑀦𑁆𑀢𑀺 𑀲𑀻𑀲𑀯𑁂𑀞𑀦𑀧𑀝𑁄 𑀯𑀼𑀘𑁆𑀘𑀢𑀺. 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀸𑀫𑀗𑁆𑀕𑀸𑀤𑀻𑀦𑀺 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀝𑁆𑀞𑀁 𑀅𑀓𑀭𑁄𑀦𑁆𑀢𑁄 𑀉𑀘𑁆𑀘𑀸𑀭𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁.

𑀖𑀁𑀲𑀦𑁆𑀢𑁄 𑀦𑀻𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀲𑀫𑀢𑀺𑀢𑁆𑀢𑀺𑀓𑀁 𑀓𑀼𑀫𑁆𑀪𑀺𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀯𑀸 𑀏𑀓𑀁 𑀓𑁄𑀝𑀺𑀁 𑀩𑀼𑀦𑁆𑀤𑁂 𑀏𑀓𑀁 𑀓𑁄𑀝𑀺𑀁 𑀫𑀼𑀔𑀯𑀝𑁆𑀝𑀺𑀬𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀯𑀸 𑀖𑀁𑀲𑀦𑁆𑀢𑀲𑁆𑀲 𑀦𑀻𑀳𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁. 𑀓𑀼𑀫𑁆𑀪𑀺𑀫𑀼𑀔𑀸 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀬𑀁 𑀧𑀦 𑀉𑀧𑀟𑁆𑀠𑀓𑀼𑀫𑁆𑀪𑀺𑀬𑀁 𑀯𑀸 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀁 𑀯𑀸 𑀞𑀧𑀺𑀢𑀁, 𑀢𑀲𑁆𑀲 𑀅𑀢𑁆𑀢𑀦𑁄 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀓𑀮𑀸 𑀓𑀼𑀫𑁆𑀪𑀻, 𑀢𑀲𑁆𑀫𑀸 𑀢𑀁 𑀖𑀁𑀲𑀦𑁆𑀢𑀲𑁆𑀲𑀸𑀧𑀺 𑀦𑀻𑀳𑀭𑀢𑁄 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑁂 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀼𑀫𑁆𑀪𑀺𑀬𑀸 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬 𑀯𑀸 𑀊𑀦𑀸𑀬 𑀯𑀸 𑀉𑀚𑀼𑀓𑀫𑁂𑀯 𑀉𑀤𑁆𑀥𑀭𑀦𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀸 𑀫𑀼𑀢𑁆𑀢𑀫𑀢𑁆𑀢𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀞𑀧𑀺𑀢𑀁 𑀬𑀁𑀓𑀺𑀜𑁆𑀘𑀺 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀁 𑀪𑀡𑁆𑀟𑀁 𑀲𑀓𑀮𑀓𑀼𑀫𑁆𑀪𑀺𑀬𑀁 𑀘𑀸𑀭𑁂𑀦𑁆𑀢𑀲𑁆𑀲, 𑀧𑀸𑀫𑀗𑁆𑀕𑀸𑀤𑀺𑀜𑁆𑀘 𑀖𑀁𑀲𑀺𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀬𑀸𑀯 𑀫𑀼𑀔𑀯𑀝𑁆𑀝𑀺𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀢𑀲𑁆𑀲 𑀳𑀺 𑀲𑀩𑁆𑀩𑀸𑀧𑀺 𑀓𑀼𑀫𑁆𑀪𑀻 𑀞𑀸𑀦𑀦𑁆𑀢𑀺 𑀲𑀗𑁆𑀔𑁂𑀧𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀞𑀧𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁, 𑀦 𑀲𑀓𑀮𑀸 𑀓𑀼𑀫𑁆𑀪𑀻. 𑀢𑀲𑁆𑀫𑀸 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀡𑀁. 𑀇𑀢𑀭𑀁 𑀧𑀦 𑀆𑀓𑀸𑀲𑀕𑀢𑀁 𑀅𑀓𑀭𑁄𑀦𑁆𑀢𑀲𑁆𑀲 𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀘𑀻𑀯𑀭𑀯𑁂𑀞𑀦𑀓𑀦𑀬𑁂𑀦 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀳𑀺 𑀆𑀕𑀢𑁂 𑀕𑀭𑀼𑀓𑁂 𑀞𑀸𑀢𑀩𑁆𑀩𑀁, 𑀏𑀲𑀸 𑀯𑀺𑀦𑀬𑀥𑀫𑁆𑀫𑀢𑀸. 𑀅𑀧𑀺𑀘 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 ¶ 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀯𑀘𑀦𑀢𑁄 𑀧𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀞𑀺𑀢𑀲𑁆𑀲 𑀦 𑀲𑀩𑁆𑀩𑀸 𑀓𑀼𑀫𑁆𑀪𑀻 𑀞𑀸𑀦𑀦𑁆𑀢𑀺.

𑀲𑀧𑁆𑀧𑀺𑀆𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀧𑀺𑀯𑀢𑁄 𑀏𑀓𑀧𑀬𑁄𑀕𑁂𑀦 𑀧𑀻𑀢𑀫𑀢𑁆𑀢𑁂 ¶ 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀅𑀬𑀁 𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄 𑁋 ‘‘𑀫𑀼𑀔𑀁 𑀅𑀦𑀧𑀦𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀺𑀯𑀢𑁄 𑀲𑀘𑁂 𑀧𑀭𑀕𑀮𑀕𑀢𑀁 𑀧𑀸𑀤𑀁 𑀦 𑀅𑀕𑁆𑀖𑀢𑀺, 𑀫𑀼𑀔𑀕𑀢𑁂𑀦 𑀲𑀤𑁆𑀥𑀺𑀁 𑀅𑀕𑁆𑀖𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀓𑀡𑁆𑀞𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀘𑁂𑀧𑀺 𑀑𑀝𑁆𑀞𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀑𑀝𑁆𑀞𑁂 𑀧𑀺𑀤𑀳𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑁆𑀧𑀮𑀤𑀡𑁆𑀟𑀯𑁂𑀴𑀼𑀦𑀸𑀴𑀺𑀦𑀴𑀦𑀸𑀴𑀺𑀆𑀤𑀻𑀳𑀺 𑀧𑀺𑀯𑀦𑁆𑀢𑀲𑁆𑀲𑀸𑀧𑀺 𑀲𑀘𑁂 𑀧𑀭𑀕𑀮𑀕𑀢𑀫𑁂𑀯 𑀧𑀸𑀤𑀁 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀲𑀳 𑀫𑀼𑀔𑀕𑀢𑁂𑀦 𑀅𑀕𑁆𑀖𑀢𑀺, 𑀦 𑀢𑀸𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀉𑀧𑁆𑀧𑀮𑀤𑀡𑁆𑀟𑀸𑀤𑀺𑀕𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀪𑀸𑀯𑀁 𑀓𑁄𑀧𑁂𑀢𑁆𑀯𑀸 𑀑𑀝𑁆𑀞𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀧𑁆𑀧𑀮𑀤𑀡𑁆𑀟𑀸𑀤𑀺𑀕𑀢𑁂𑀦 𑀲𑀤𑁆𑀥𑀺𑀁 𑀅𑀕𑁆𑀖𑀢𑀺, 𑀉𑀧𑁆𑀧𑀮𑀤𑀡𑁆𑀟𑀸𑀤𑀻𑀦𑀁 𑀩𑀼𑀦𑁆𑀤𑁂 𑀅𑀗𑁆𑀕𑀼𑀮𑀺𑀬𑀸𑀧𑀺 𑀧𑀺𑀳𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀸𑀤𑀕𑁆𑀖𑀦𑀓𑁂 𑀧𑀭𑀕𑀮𑀁 𑀅𑀧𑁆𑀧𑀯𑀺𑀝𑁆𑀞𑁂 𑀉𑀧𑁆𑀧𑀮𑀤𑀡𑁆𑀟𑀸𑀤𑀻𑀲𑀼 𑀘 𑀫𑀼𑀔𑁂 𑀘 𑀅𑀢𑀺𑀭𑁂𑀓𑀧𑀸𑀤𑀸𑀭𑀳𑀫𑁆𑀧𑀺 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀭𑀓𑁆𑀔𑀢𑀺𑀬𑁂𑀯𑀸’’𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀬𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺 ¶ , 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀇𑀫𑀁 𑀦𑀬𑀁 𑀪𑀚𑀢𑀺, 𑀢𑀲𑁆𑀫𑀸 𑀲𑀼𑀤𑀲𑁆𑀲𑀺𑀢𑀫𑁂𑀯. 𑀏𑀲 𑀢𑀸𑀯 𑀏𑀓𑀸𑀩𑀤𑁆𑀥𑁂 𑀦𑀬𑁄.

𑀲𑀘𑁂 𑀧𑀦 𑀳𑀢𑁆𑀣𑁂𑀦 𑀯𑀸 𑀧𑀢𑁆𑀢𑁂𑀦 𑀯𑀸 𑀣𑀸𑀮𑀓𑀸𑀤𑀺𑀦𑀸 𑀯𑀸 𑀓𑁂𑀦𑀘𑀺 𑀪𑀸𑀚𑀦𑁂𑀦 𑀕𑀳𑁂𑀢𑁆𑀯𑀸 𑀧𑀺𑀯𑀢𑀺, 𑀬𑀫𑁆𑀳𑀺 𑀧𑀬𑁄𑀕𑁂 𑀧𑀸𑀤𑀕𑁆𑀖𑀦𑀓𑀁 𑀧𑀽𑀭𑁂𑀢𑀺, 𑀢𑀫𑁆𑀳𑀺 𑀕𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀣 𑀫𑀳𑀕𑁆𑀖𑀁 𑀳𑁄𑀢𑀺, 𑀲𑀺𑀧𑁆𑀧𑀺𑀓𑀸𑀬𑀧𑀺 𑀏𑀓𑀧𑀬𑁄𑀕𑁂𑀦𑁂𑀯 𑀧𑀸𑀤𑀕𑁆𑀖𑀦𑀓𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀓𑀼𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀪𑀸𑀚𑀦𑀁 𑀧𑀦 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀉𑀤𑁆𑀥𑀸𑀭𑁂𑀦 𑀯𑀸 𑀧𑀸𑀭𑀸𑀚𑀺𑀓𑀁. 𑀬𑀤𑀸 𑀧𑀦 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀅𑀘𑁆𑀙𑀁 𑀢𑁂𑀮𑀲𑀤𑀺𑀲𑀫𑁂𑀯 𑀫𑀥𑀼𑀨𑀸𑀡𑀺𑀢𑀁 𑀯𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀯𑁂𑀲𑁂𑀢𑀺, 𑀢𑀤𑀸 𑀢𑁂𑀲𑀁 𑀅𑀘𑁆𑀙𑀢𑀸𑀬 𑀏𑀓𑀸𑀩𑀤𑁆𑀥𑀢𑀸 𑀦𑀢𑁆𑀣𑀻𑀢𑀺 𑀧𑀸𑀤𑀕𑁆𑀖𑀦𑀓𑁂 𑀫𑀼𑀔𑀯𑀝𑁆𑀝𑀺𑀢𑁄 𑀕𑀴𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀧𑀘𑀺𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀫𑀥𑀼𑀨𑀸𑀡𑀺𑀢𑀁 𑀲𑀺𑀮𑁂𑀲𑁄 𑀯𑀺𑀬 𑀘𑀺𑀓𑁆𑀓𑀦𑀁 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀬𑁄𑀕𑁆𑀕𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂 𑀓𑀼𑀓𑁆𑀓𑀼𑀘𑁆𑀘𑁂 𑀏𑀓𑀸𑀩𑀤𑁆𑀥𑀫𑁂𑀯 𑀳𑀼𑀢𑁆𑀯𑀸 𑀧𑀝𑀺𑀦𑀻𑀳𑀭𑀺𑀢𑀼𑀁 ¶ 𑀲𑀓𑁆𑀓𑁄𑀢𑀺, 𑀏𑀢𑀁 𑀫𑀼𑀔𑀯𑀝𑁆𑀝𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀸𑀚𑀦𑁂 𑀧𑀯𑀺𑀝𑁆𑀞𑀫𑁆𑀧𑀺 𑀩𑀸𑀳𑀺𑀭𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀢𑁆𑀢𑀸 𑀭𑀓𑁆𑀔𑀢𑀺, 𑀫𑀼𑀔𑀯𑀝𑁆𑀝𑀺𑀢𑁄 𑀙𑀺𑀦𑁆𑀦𑀫𑀢𑁆𑀢𑁂 𑀧𑀦 𑀧𑀸𑀭𑀸𑀚𑀺𑀓𑀁. 𑀬𑁄𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 ¶ 𑀧𑀭𑀲𑁆𑀲 𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀅𑀯𑀲𑁆𑀲𑀧𑀺𑀯𑀦𑀓𑀁 𑀬𑀁𑀓𑀺𑀜𑁆𑀘𑀺 𑀤𑀼𑀓𑀽𑀮𑀲𑀸𑀝𑀓𑀁 𑀯𑀸 𑀘𑀫𑁆𑀫𑀔𑀡𑁆𑀟𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 ‘‘𑀇𑀤𑀸𑀦𑀺 𑀢𑁂𑀮𑀁 𑀆𑀓𑀺𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀧𑀓𑁆𑀔𑀺𑀧𑀢𑀺, 𑀢𑀁 𑀘𑁂 𑀢𑀢𑁆𑀣 𑀢𑁂𑀮𑁂 𑀆𑀓𑀺𑀡𑁆𑀡𑁂 𑀧𑀜𑁆𑀘𑀫𑀸𑀲𑀓𑀅𑀕𑁆𑀖𑀦𑀓𑀁 𑀧𑀺𑀯𑀢𑀺, 𑀧𑀻𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀁 𑀧𑀦 𑀢𑀢𑁆𑀣𑁂𑀯 𑀲𑀼𑀓𑁆𑀔𑀢𑀴𑀸𑀓𑁂 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀅𑀯𑀳𑀸𑀭𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀢𑀲𑁆𑀲 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁.

𑀧𑀭𑀲𑁆𑀲 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀪𑀡𑁆𑀟𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀢𑁂𑀮𑁂 𑀆𑀓𑀺𑀡𑁆𑀡𑁂 ‘‘𑀲𑀘𑁂 𑀅𑀬𑀁 𑀚𑀸𑀦𑀺𑀲𑁆𑀲𑀢𑀺, 𑀫𑀁 𑀧𑀮𑀺𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀪𑀻𑀢𑁄 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁 𑀧𑀻𑀢𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀭𑁂 𑀆𑀳𑀭𑀸𑀧𑁂𑀦𑁆𑀢𑁂 𑀪𑀡𑁆𑀟𑀤𑁂𑀬𑁆𑀬𑀁. 𑀪𑀡𑁆𑀟𑀤𑁂𑀬𑁆𑀬𑀁 𑀦𑀸𑀫 𑀬𑀁 𑀧𑀭𑀲𑁆𑀲 𑀦𑀝𑁆𑀞𑀁, 𑀢𑀲𑁆𑀲 𑀫𑀽𑀮𑀁 𑀯𑀸 𑀢𑀤𑁂𑀯 𑀯𑀸 𑀪𑀡𑁆𑀟𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦𑁄 𑀘𑁂 𑀤𑁂𑀢𑀺, 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀭𑀲𑁆𑀲 𑀓𑀼𑀫𑁆𑀪𑀺𑀬𑀸 𑀅𑀜𑁆𑀜𑁄 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀆𑀓𑀺𑀭𑀢𑀺, 𑀢𑀢𑁆𑀭 𑀘𑀸𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑁂𑀮𑀧𑀺𑀯𑀦𑀓𑀁 𑀪𑀡𑁆𑀟𑀁 𑀧𑀓𑁆𑀔𑀺𑀧𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀢𑁆𑀢𑀦𑁄 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 ¶ 𑀧𑀭𑀲𑁆𑀲 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀆𑀓𑀺𑀭𑀡𑀪𑀸𑀯𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀡𑁆𑀟𑀁 𑀦𑀺𑀓𑁆𑀔𑀺𑀧𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀼𑀤𑁆𑀥𑀘𑀺𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 𑀉𑀤𑁆𑀥𑀭𑀢𑀺, 𑀦𑁂𑀯 𑀅𑀯𑀳𑀸𑀭𑁄, 𑀦 𑀕𑀻𑀯𑀸; 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. ‘‘‘𑀓𑀺𑀲𑁆𑀲 𑀫𑀫 𑀓𑀼𑀫𑁆𑀪𑀺𑀬𑀁 𑀢𑁂𑀮𑀁 𑀆𑀓𑀺𑀭𑀲𑀻’𑀢𑀺 𑀓𑀼𑀧𑀺𑀢𑁄 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀦𑁄 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑀢𑀺 ¶ 𑀢𑁂𑀮𑀁 𑀕𑀴𑁂𑀢𑀼𑀓𑀸𑀫𑁄, 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑁂𑀯 𑀚𑀚𑁆𑀚𑀭𑀁 𑀓𑀭𑁄𑀢𑀺 ‘‘𑀲𑀯𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀸𑀤𑀕𑁆𑀖𑀦𑀓𑁂 𑀲𑀯𑀺𑀢𑁆𑀯𑀸 𑀕𑀢𑁂 𑀧𑀸𑀭𑀸𑀚𑀺𑀓𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑁂𑀯 𑀙𑀺𑀤𑁆𑀤𑀁 𑀓𑀭𑁄𑀢𑀺 𑀑𑀫𑀝𑁆𑀞𑀁 𑀯𑀸 𑀉𑀫𑁆𑀫𑀝𑁆𑀞𑀁 𑀯𑀸 𑀯𑁂𑀫𑀝𑁆𑀞𑀁 𑀯𑀸, 𑀇𑀤𑀁 𑀧𑀦 𑀲𑀫𑁆𑀫𑁄𑀳𑀝𑁆𑀞𑀸𑀦𑀁; 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑁂𑀓𑁆𑀔𑁂𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀑𑀫𑀝𑁆𑀞𑀁 𑀦𑀸𑀫 𑀅𑀥𑁄𑀫𑀼𑀔𑀙𑀺𑀤𑁆𑀤𑀁; 𑀉𑀫𑁆𑀫𑀝𑁆𑀞𑀁 𑀦𑀸𑀫 𑀉𑀤𑁆𑀥𑀁𑀫𑀼𑀔𑀙𑀺𑀤𑁆𑀤𑀁; 𑀯𑁂𑀫𑀝𑁆𑀞𑀁 𑀦𑀸𑀫 𑀉𑀴𑀼𑀗𑁆𑀓𑀲𑁆𑀲𑁂𑀯 𑀉𑀚𑀼𑀕𑀢𑀙𑀺𑀤𑁆𑀤𑀁. 𑀢𑀢𑁆𑀭 𑀑𑀫𑀝𑁆𑀞𑀲𑁆𑀲 𑀩𑀳𑀺 𑀧𑀝𑁆𑀞𑀸𑀬 𑀓𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀢𑁂𑀮𑁂 𑀕𑀴𑀺𑀢𑁂 𑀩𑀳𑀺 𑀅𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀢𑁄 𑀕𑀴𑀺𑀢𑀫𑀢𑁆𑀢𑀫𑁂𑀯 𑀩𑀳𑀺𑀕𑀢𑀁 𑀦𑀸𑀫 ¶ 𑀳𑁄𑀢𑀺, 𑀦 𑀓𑀼𑀫𑁆𑀪𑀺𑀕𑀢𑀲𑀗𑁆𑀔𑁆𑀬𑀁 𑀮𑀪𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀓𑀢𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀫𑁆𑀫𑀝𑁆𑀞𑀲𑁆𑀲 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀜𑁆𑀳𑀺 𑀬𑀸𑀯 𑀩𑀸𑀳𑀺𑀭𑀦𑁆𑀢𑀢𑁄 𑀦 𑀕𑀴𑀢𑀺, 𑀢𑀸𑀯 𑀓𑀼𑀫𑁆𑀪𑀺𑀕𑀢𑀫𑁂𑀯 𑀳𑁄𑀢𑀺. ‘‘𑀯𑁂𑀫𑀝𑁆𑀞𑀲𑁆𑀲 𑀘 𑀓𑀧𑀸𑀮𑀫𑀚𑁆𑀛𑀢𑁄 𑀕𑀴𑀺𑀢𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀧𑀦 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀝𑁆𑀞𑀸𑀬 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀓𑀢𑀙𑀺𑀤𑁆𑀤𑁂 𑀢𑀴𑀸𑀓𑀲𑁆𑀲 𑀘 𑀫𑀭𑀺𑀬𑀸𑀤𑀪𑁂𑀤𑁂𑀦 𑀲𑀫𑁂𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀓𑀢𑁂 𑀧𑀦 𑀩𑀸𑀳𑀺𑀭𑀦𑁆𑀢𑁂𑀦, 𑀩𑀳𑀺 𑀧𑀝𑁆𑀞𑀸𑀬 𑀓𑀢𑁂 𑀅𑀩𑁆𑀪𑀦𑁆𑀢𑀭𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀤𑀫𑁂𑀢𑁆𑀣 𑀬𑀼𑀢𑁆𑀢𑀁. 𑀬𑁄 𑀧𑀦 ‘‘𑀯𑀝𑁆𑀝𑀺𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀼𑀫𑁆𑀪𑀺𑀬𑀸 𑀆𑀥𑀸𑀭𑀓𑀁 𑀯𑀸 𑀉𑀧𑀢𑁆𑀣𑀫𑁆𑀪𑀦𑀮𑁂𑀟𑁆𑀟𑀼𑀓𑁂 𑀯𑀸 𑀅𑀧𑀦𑁂𑀢𑀺, 𑀯𑀝𑁆𑀝𑀺𑀢𑁆𑀯𑀸 𑀕𑀢𑀸𑀬 𑀧𑀸𑀭𑀸𑀚𑀺𑀓𑀁. 𑀢𑁂𑀮𑀸𑀓𑀺𑀭𑀡𑀪𑀸𑀯𑀁 𑀧𑀦 𑀜𑀢𑁆𑀯𑀸 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀚𑀚𑁆𑀚𑀭𑀪𑀸𑀯𑁂 𑀯𑀸 𑀙𑀺𑀤𑁆𑀤𑁂𑀲𑀼 𑀯𑀸 𑀓𑀢𑁂𑀲𑀼 𑀧𑀘𑁆𑀙𑀸 𑀦𑀺𑀓𑁆𑀔𑀦𑁆𑀢𑀢𑁂𑀮𑀧𑁆𑀧𑀫𑀸𑀡𑁂𑀦 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀓𑀢𑁆𑀣𑀘𑀺 𑀧𑀸𑀭𑀸𑀚𑀺𑀓𑀦𑁆𑀢𑀺𑀧𑀺 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁.

𑀧𑀭𑀺𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀓𑀣𑀮𑀁 𑀯𑀸 𑀧𑀸𑀲𑀸𑀡𑀁 𑀯𑀸 ‘‘𑀧𑀢𑀺𑀢𑁆𑀯𑀸 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀢𑀢𑁄 𑀢𑁂𑀮𑀁 𑀧𑀕𑁆𑀖𑀭𑀺𑀲𑁆𑀲𑀢𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀼𑀩𑁆𑀩𑀦𑁆𑀥𑀁 𑀯𑀸 𑀓𑀭𑁄𑀢𑀺, 𑀤𑀼𑀝𑁆𑀞𑀧𑀺𑀢𑀁 𑀯𑀸 𑀞𑀧𑁂𑀢𑀺, 𑀅𑀯𑀲𑁆𑀲𑀧𑀢𑀦𑀓𑀁 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀓𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀓𑀭𑁄𑀢𑀺, 𑀢𑀁 𑀧𑀘𑁆𑀙𑀸 𑀧𑀼𑀡𑁆𑀡𑀓𑀸𑀮𑁂 𑀧𑀢𑀺𑀢𑁆𑀯𑀸 𑀪𑀺𑀦𑁆𑀤𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀪𑀡𑁆𑀟𑀲𑁆𑀲 𑀦𑀢𑁆𑀣𑀺𑀓𑀸𑀮𑁂 ¶ 𑀓𑀢𑀧𑀬𑁄𑀕𑀢𑁆𑀢𑀸 𑀆𑀤𑀺𑀢𑁄𑀯 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺. 𑀪𑀡𑁆𑀟𑀯𑀺𑀦𑀸𑀲𑀤𑁆𑀯𑀸𑀭𑀲𑁆𑀲 𑀧𑀦 𑀓𑀢𑀢𑁆𑀢𑀸 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺. 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀅𑀤𑀤𑀢𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀉𑀚𑀼𑀓𑀁 𑀓𑀭𑁄𑀢𑀺 ‘‘𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀫𑀺𑀲𑁆𑀲𑀢𑀺, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀸𑀧𑁂𑀲𑁆𑀲𑀢𑀻’’𑀢𑀺 ¶ ; 𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀘𑁆𑀙𑀢𑀼, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀢𑀼, 𑀉𑀚𑀼𑀓𑀭𑀡𑀓𑀸𑀮𑁂 𑀧𑀸𑀭𑀸𑀚𑀺𑀓𑀁. 𑀈𑀤𑀺𑀲𑀸 𑀳𑀺 𑀧𑀬𑁄𑀕𑀸 𑀧𑀼𑀩𑁆𑀩𑀧𑀬𑁄𑀕𑀸𑀯𑀳𑀸𑀭𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀢𑀸𑀬 𑀧𑀘𑁆𑀙𑀸 𑀉𑀤𑀓𑁂 𑀆𑀕𑀢𑁂 𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀘𑁆𑀙𑀢𑀼, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀢𑀼, 𑀪𑀡𑁆𑀟𑀤𑁂𑀬𑁆𑀬𑀁. 𑀓𑀲𑁆𑀫𑀸? 𑀞𑀸𑀦𑀸 𑀘𑀸𑀯𑀦𑀧𑀬𑁄𑀕𑀲𑁆𑀲 𑀅𑀪𑀸𑀯𑀸. 𑀢𑀲𑁆𑀲 𑀮𑀓𑁆𑀔𑀡𑀁 𑀦𑀸𑀯𑀝𑁆𑀞𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀢𑀢𑁆𑀣𑁂𑀯 𑀪𑀺𑀦𑁆𑀤𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀁 𑁋 ‘‘𑀪𑀺𑀦𑁆𑀤𑀢𑀺 𑀯𑀸𑀢𑀺 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀢𑀺. 𑀙𑀟𑁆𑀟𑁂𑀢𑀺 𑀯𑀸𑀢𑀺 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀆𑀓𑀺𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀧𑁂𑀢𑀺. 𑀛𑀸𑀧𑁂𑀢𑀺 𑀯𑀸𑀢𑀺 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀛𑀸𑀧𑁂𑀢𑀺. 𑀅𑀧𑀭𑀺𑀪𑁄𑀕𑀁 ¶ 𑀯𑀸 𑀓𑀭𑁄𑀢𑀻𑀢𑀺 𑀅𑀔𑀸𑀤𑀺𑀢𑀩𑁆𑀩𑀁 𑀯𑀸 𑀅𑀧𑀸𑀢𑀩𑁆𑀩𑀁 𑀯𑀸 𑀓𑀭𑁄𑀢𑀺; 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀺𑀲𑀁 𑀯𑀸 𑀉𑀘𑁆𑀙𑀺𑀝𑁆𑀞𑀁 𑀯𑀸 𑀓𑀼𑀡𑀧𑀁 𑀯𑀸 𑀧𑀸𑀢𑁂𑀲𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝𑀁, 𑀩𑀼𑀤𑁆𑀥𑀯𑀺𑀲𑀬𑁄 𑀦𑀸𑀫𑁂𑀲𑁄. 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀝𑀁, 𑀆𑀳𑀭𑀸𑀧𑁂𑀦𑁆𑀢𑁂 𑀧𑀦 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀤𑁆𑀯𑀬𑀁 𑀦 𑀲𑀫𑁂𑀢𑀺. 𑀢𑀜𑁆𑀳𑀺 𑀓𑀼𑀫𑁆𑀪𑀺𑀚𑀚𑁆𑀚𑀭𑀓𑀭𑀡𑁂𑀦 𑀘 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀮𑀓𑁆𑀔𑀡𑀁. 𑀧𑀘𑁆𑀙𑀺𑀫𑀁 𑀧𑀦 𑀤𑁆𑀯𑀬𑀁 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁂𑀦𑀸𑀧𑀺 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀺 𑁋 ‘‘𑀅𑀝𑁆𑀞𑀓𑀣𑀸𑀬𑀁 𑀓𑀺𑀭 ‘𑀞𑀸𑀦𑀸 𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’𑀦𑁆𑀢𑀺 𑀇𑀤𑀁 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀞𑀸𑀦𑀸 𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄𑀬𑁂𑀯 𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀸 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀯𑀸 𑀛𑀸𑀧𑁂𑀬𑁆𑀬𑀧𑀺, 𑀅𑀧𑀭𑀺𑀪𑁄𑀕𑀫𑁆𑀧𑀺 𑀓𑀭𑁂𑀬𑁆𑀬. 𑀧𑀼𑀭𑀺𑀫𑀤𑁆𑀯𑀬𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀸 𑀞𑀸𑀦𑀸 𑀘𑀸𑀯𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀧𑀸𑀴𑀺𑀬𑀁 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦; 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄. 𑀧𑀸𑀴𑀺𑀬𑀜𑁆𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑀧𑀓𑁆𑀔𑁂 ‘‘𑀪𑀺𑀦𑁆𑀤𑀢𑀺 𑀯𑀸𑀢𑀺 ¶ 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀢𑀺, 𑀙𑀟𑁆𑀟𑁂𑀢𑀺 𑀯𑀸𑀢𑀺 𑀢𑀢𑁆𑀣 𑀯𑀫𑀢𑀺 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀙𑀟𑁆𑀟𑁂𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀤𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀢𑀺𑀡𑀚𑁆𑀛𑀸𑀧𑀓𑁄 𑀯𑀺𑀬 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀯 𑀓𑁂𑀯𑀮𑀁 𑀪𑀺𑀦𑁆𑀤𑀢𑀺, 𑀪𑀺𑀦𑁆𑀦𑀢𑁆𑀢𑀸 𑀧𑀦 𑀢𑁂𑀮𑀸𑀤𑀻𑀦𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀬𑀁 𑀯𑀸 𑀧𑀦𑁂𑀢𑁆𑀣 𑀧𑀢𑁆𑀣𑀺𑀦𑁆𑀦𑀁, 𑀢𑀁 𑀏𑀓𑀸𑀩𑀤𑁆𑀥𑀫𑁂𑀯 𑀢𑀺𑀝𑁆𑀞𑀢𑀺. 𑀅𑀙𑀟𑁆𑀟𑁂𑀢𑀼𑀓𑀸𑀫𑁄𑀬𑁂𑀯 𑀘 𑀓𑁂𑀯𑀮𑀁 𑀢𑀢𑁆𑀣 𑀉𑀤𑀓𑀯𑀸𑀮𑀺𑀓𑀸𑀤𑀻𑀦𑀺 𑀆𑀓𑀺𑀭𑀢𑀺, 𑀆𑀓𑀺𑀡𑁆𑀡𑀢𑁆𑀢𑀸 𑀧𑀦 𑀢𑁂𑀮𑀁 𑀙𑀟𑁆𑀟𑀻𑀬𑀢𑀺. 𑀢𑀲𑁆𑀫𑀸 𑀯𑁄𑀳𑀸𑀭𑀯𑀲𑁂𑀦 ‘‘𑀪𑀺𑀦𑁆𑀤𑀢𑀺 𑀯𑀸 𑀙𑀟𑁆𑀟𑁂𑀢𑀺 𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑁂 𑀧𑀦 𑀇𑀢𑀭𑀣𑀸𑀧𑀺 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀓𑀣𑀺𑀬𑀫𑀸𑀦𑁂 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸 𑀘 𑀧𑀼𑀩𑁆𑀩𑀸𑀧𑀭𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀘 𑀲𑀦𑁆𑀢𑁄𑀲𑀁 𑀅𑀓𑀢𑁆𑀯𑀸 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀪𑀽𑀫𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀣𑀮𑀝𑁆𑀞𑀓𑀣𑀸

𑁯𑁫. 𑀣𑀮𑀝𑁆𑀞𑁂 ¶ 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀪𑀽𑀫𑀺𑀢𑀮𑁂 𑀯𑀸 𑀧𑀸𑀲𑀸𑀡𑀢𑀮𑀧𑀩𑁆𑀩𑀢𑀢𑀮𑀸𑀤𑀻𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀞𑀧𑀺𑀢𑀁 𑀣𑀮𑀝𑁆𑀞𑀦𑁆𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀘𑁂 𑀭𑀸𑀲𑀺𑀓𑀢𑀁 𑀳𑁄𑀢𑀺, 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀪𑀸𑀚𑀦𑀕𑀢𑀓𑀭𑀡𑀫𑀼𑀝𑁆𑀞𑀺𑀘𑁆𑀙𑁂𑀤𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀏𑀓𑀸𑀩𑀤𑁆𑀥𑀁 𑀲𑀺𑀮𑁂𑀲𑀦𑀺𑀬𑁆𑀬𑀸𑀲𑀸𑀤𑀺 𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀕𑀭𑀼𑀓𑀁 𑀳𑁄𑀢𑀺 𑀪𑀸𑀭𑀩𑀤𑁆𑀥𑀁 𑀮𑁄𑀳𑀧𑀺𑀡𑁆𑀟𑀺-𑀕𑀼𑀴𑀧𑀺𑀡𑁆𑀟𑀺-𑀢𑁂𑀮𑀫𑀥𑀼𑀖𑀝𑀸𑀤𑀺 𑀯𑀸, 𑀓𑀼𑀫𑁆𑀪𑀺𑀬𑀁 𑀞𑀸𑀦𑀸𑀘𑀸𑀯𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀗𑁆𑀔𑀮𑀺𑀓𑀩𑀤𑁆𑀥𑀲𑁆𑀲 𑀘 𑀞𑀸𑀦𑀪𑁂𑀤𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀧𑀸𑀯𑀸𑀭𑀢𑁆𑀣𑀭𑀡𑀲𑀸𑀝𑀓𑀸𑀤𑀺𑀁 𑀉𑀚𑀼𑀓𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀧𑀸𑀭𑀺𑀫𑀦𑁆𑀢𑁂 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀲𑀩𑁆𑀩𑀤𑀺𑀲𑀸𑀲𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀢𑀺, 𑀓𑁂𑀲𑀕𑁆𑀕𑀫𑀢𑁆𑀢𑀁 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀣𑀮𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀓𑀸𑀲𑀝𑁆𑀞𑀓𑀣𑀸

𑁯𑁬. 𑀆𑀓𑀸𑀲𑀝𑁆𑀞𑁂 ¶ 𑀫𑁄𑀭𑀲𑁆𑀲 𑀙𑀳𑀺 𑀆𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀭𑀢𑁄 𑀫𑀼𑀔𑀢𑀼𑀡𑁆𑀟𑀓𑁂𑀦, 𑀧𑀘𑁆𑀙𑀢𑁄 𑀓𑀮𑀸𑀧𑀕𑁆𑀕𑁂𑀦, 𑀉𑀪𑀬𑀧𑀲𑁆𑀲𑁂𑀲𑀼 𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀳𑀺, 𑀅𑀥𑁄 𑀧𑀸𑀤𑀦𑀔𑀲𑀺𑀔𑀸𑀬, 𑀉𑀤𑁆𑀥𑀁 𑀲𑀺𑀔𑀕𑁆𑀕𑁂𑀦𑀸𑀢𑀺. 𑀪𑀺𑀓𑁆𑀔𑀼 ‘‘𑀲𑀲𑁆𑀲𑀸𑀫𑀺𑀓𑀁 𑀆𑀓𑀸𑀲𑀝𑁆𑀞𑀁 𑀫𑁄𑀭𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀢𑁄 𑀯𑀸 𑀢𑀺𑀝𑁆𑀞𑀢𑀺, 𑀳𑀢𑁆𑀣𑀁 𑀯𑀸 𑀧𑀲𑀸𑀭𑁂𑀢𑀺, 𑀫𑁄𑀭𑁄 𑀆𑀓𑀸𑀲𑁂𑀬𑁂𑀯 𑀧𑀓𑁆𑀔𑁂 𑀘𑀸𑀭𑁂𑀢𑀺, 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀢𑀁 𑀅𑀨𑀦𑁆𑀤𑁂𑀦𑁆𑀢𑁄 𑀳𑀢𑁆𑀣𑁂𑀦 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁄 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀳𑀢𑁆𑀣𑁂𑀦 𑀧𑀦 𑀕𑀳𑁂𑀢𑁆𑀯𑀸 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑀮𑀸𑀧𑀕𑁆𑀕𑀁, 𑀓𑀮𑀸𑀧𑀕𑁆𑀕𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀔𑀢𑀼𑀡𑁆𑀟𑀓𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀯𑀸𑀫𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀤𑀓𑁆𑀔𑀺𑀡𑀧𑀓𑁆𑀔𑀧𑀭𑀺𑀬𑀦𑁆𑀢𑀁, 𑀤𑀓𑁆𑀔𑀺𑀡𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀯𑀸𑀫𑀧𑀓𑁆𑀔𑀧𑀭𑀺𑀬𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀧𑀸𑀤𑀦𑀔𑀲𑀺𑀔𑀸𑀬 𑀨𑀼𑀝𑁆𑀞𑁄𑀓𑀸𑀲𑀁 𑀲𑀺𑀔𑀕𑁆𑀕𑀁, 𑀲𑀺𑀔𑀕𑁆𑀕𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀧𑀸𑀤𑀦𑀔𑀲𑀺𑀔𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁.

𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀫𑁄𑀭𑁄 𑀲𑀻𑀲𑀸𑀤𑀻𑀲𑀼 𑀬𑀲𑁆𑀫𑀺𑀁 𑀅𑀗𑁆𑀕𑁂 𑀦𑀺𑀮𑀻𑀬𑀢𑀺, 𑀢𑀁 𑀢𑀲𑁆𑀲 𑀞𑀸𑀦𑀁. 𑀢𑀲𑁆𑀫𑀸 𑀢𑀁 𑀳𑀢𑁆𑀣𑁂 𑀦𑀺𑀮𑀻𑀦𑀁 𑀇𑀢𑁄 𑀘𑀺𑀢𑁄 𑀘 𑀓𑀭𑁄𑀦𑁆𑀢𑁄𑀧𑀺 𑀨𑀦𑁆𑀤𑀸𑀧𑁂𑀢𑀺𑀬𑁂𑀯, 𑀬𑀤𑀺 𑀧𑀦 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁 ¶ . 𑀇𑀢𑀭𑀁 𑀳𑀢𑁆𑀣𑀁 𑀉𑀧𑀦𑁂𑀢𑀺, 𑀫𑁄𑀭𑁄 𑀲𑀬𑀫𑁂𑀯 𑀉𑀟𑁆𑀟𑁂𑀢𑁆𑀯𑀸 𑀢𑀢𑁆𑀣 𑀦𑀺𑀮𑀻𑀬𑀢𑀺, 𑀅𑀦𑀸𑀧𑀢𑁆𑀢𑀺 ¶ . 𑀅𑀗𑁆𑀕𑁂 𑀦𑀺𑀮𑀻𑀦𑀪𑀸𑀯𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀏𑀓𑀁 𑀧𑀤𑀯𑀸𑀭𑀁 𑀕𑀘𑁆𑀙𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁.

𑀪𑀽𑀫𑀺𑀬𑀁 𑀞𑀺𑀢𑀫𑁄𑀭𑁄 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀸𑀤𑀸𑀦𑀁 𑀓𑀮𑀸𑀧𑀲𑁆𑀲 𑀘 𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀺 𑀮𑀪𑀢𑀺. 𑀢𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀬𑀸𑀯 𑀏𑀓𑀫𑁆𑀧𑀺 𑀞𑀸𑀦𑀁 𑀧𑀣𑀯𑀺𑀁 𑀨𑀼𑀲𑀢𑀺, 𑀢𑀸𑀯 𑀣𑀼𑀮𑁆𑀮𑀘𑁆𑀘𑀬𑀁. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀣𑀯𑀺𑀬𑀸 𑀫𑁄𑀘𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀜𑁆𑀚𑀭𑁂 𑀞𑀺𑀢𑀁 𑀲𑀳 𑀧𑀜𑁆𑀚𑀭𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀧𑀸𑀤𑀁 𑀦 𑀅𑀕𑁆𑀖𑀢𑀺, 𑀲𑀩𑁆𑀩𑀢𑁆𑀣 𑀅𑀕𑁆𑀖𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀘𑀭𑀦𑁆𑀢𑀁 𑀫𑁄𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀤𑀲𑀸 𑀩𑀳𑀺𑀯𑀢𑁆𑀣𑀼𑀁 𑀦𑀻𑀳𑀭𑀦𑁆𑀢𑁄 𑀤𑁆𑀯𑀸𑀭𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀚𑁂 𑀞𑀺𑀢𑀩𑀮𑀻𑀩𑀤𑁆𑀤𑀲𑁆𑀲 𑀳𑀺 𑀯𑀚𑁄 𑀯𑀺𑀬 𑀅𑀦𑁆𑀢𑁄𑀯𑀢𑁆𑀣𑀼 𑀢𑀲𑁆𑀲 𑀞𑀸𑀦𑀁. 𑀳𑀢𑁆𑀣𑁂𑀦 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀦𑁆𑀢𑁄𑀕𑀸𑀫𑁂 𑀘𑀭𑀦𑁆𑀢𑀫𑁆𑀧𑀺 𑀕𑀸𑀫𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 ¶ . 𑀲𑀬𑀫𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑁂 𑀯𑀸 𑀯𑀢𑁆𑀣𑀽𑀧𑀘𑀸𑀭𑁂 𑀯𑀸 𑀘𑀭𑀦𑁆𑀢𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁄 𑀓𑀝𑁆𑀞𑁂𑀦 𑀯𑀸 𑀓𑀣𑀮𑀸𑀬 𑀯𑀸 𑀉𑀢𑁆𑀭𑀸𑀲𑁂𑀢𑁆𑀯𑀸 𑀅𑀝𑀯𑀺𑀫𑀼𑀔𑀁 𑀓𑀭𑁄𑀢𑀺, 𑀫𑁄𑀭𑁄 𑀉𑀟𑁆𑀟𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀯𑀸 𑀙𑀤𑀦𑀧𑀺𑀝𑁆𑀞𑁂 𑀯𑀸 𑀦𑀺𑀮𑀻𑀬𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀅𑀝𑀯𑀺𑀫𑀼𑀔𑁂 𑀉𑀟𑁆𑀟𑁂𑀢𑀺 𑀯𑀸 𑀕𑀘𑁆𑀙𑀢𑀺 𑀯𑀸 ‘‘𑀅𑀝𑀯𑀺𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂 𑀅𑀲𑀢𑀺 𑀧𑀣𑀯𑀺𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀟𑁆𑀟𑀺𑀢𑀫𑀢𑁆𑀢𑁂 𑀯𑀸 𑀤𑀼𑀢𑀺𑀬𑀧𑀤𑀯𑀸𑀭𑁂 𑀯𑀸 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀳𑁄𑀢𑀺. 𑀓𑀧𑀺𑀜𑁆𑀚𑀭𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀝𑀓𑀁 𑀯𑀸𑀢𑀺 𑀯𑀸𑀢𑀯𑁂𑀕𑀼𑀓𑁆𑀔𑀺𑀢𑁆𑀢𑀁 𑀧𑀣𑀯𑀺𑀢𑀮𑁂 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀫𑀺𑀯 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀔𑀮𑀺𑀩𑀤𑁆𑀥𑀁 𑀲𑀸𑀝𑀓𑀁 𑀅𑀪𑀺𑀫𑀼𑀔𑀸𑀕𑀢𑀁 𑀳𑀢𑁆𑀣𑁂𑀦 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀡𑁆𑀳𑀸𑀢𑀺, 𑀇𑀢𑁄 𑀘𑀺𑀢𑁄 𑀘 𑀞𑀸𑀦𑀁 𑀅𑀯𑀺𑀓𑁄𑀧𑁂𑀦𑁆𑀢𑁄𑀬𑁂𑀯 𑀕𑀫𑀦𑀼𑀧𑀘𑁆𑀙𑁂𑀤𑁂 𑀤𑀼𑀓𑁆𑀓𑀝𑀁. 𑀞𑀸𑀦𑀸𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄 𑀘𑀸𑀮𑁂𑀢𑀺, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀘𑀲𑁆𑀲 𑀫𑁄𑀭𑀲𑁆𑀲𑁂𑀯 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀩𑀤𑁆𑀥𑀲𑀸𑀝𑀓𑁄 𑀧𑀦 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀳𑀺𑀢𑀫𑀢𑁆𑀢𑁂𑀯 𑀤𑀼𑀢𑀺𑀬𑁂𑀦𑀦𑁆𑀢𑁂𑀦 𑀧𑀢𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀲 𑀤𑁆𑀯𑁂 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺 𑁋 𑀳𑀢𑁆𑀣𑁄 𑀘𑁂𑀯 𑀪𑀽𑀫𑀺 𑀘. 𑀢𑀁 𑀬𑀣𑀸𑀕𑀳𑀺𑀢𑀫𑁂𑀯 𑀧𑀞𑀫𑀁 𑀕𑀳𑀺𑀢𑁄𑀓𑀸𑀲𑀧𑁆𑀧𑀤𑁂𑀲𑀢𑁄 𑀘𑀸𑀮𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀪𑀽𑀫𑀺𑀢𑁄 𑀤𑀼𑀢𑀺𑀬𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 ¶ 𑀯𑀸 𑀪𑀽𑀫𑀺𑀢𑁄 𑀉𑀤𑁆𑀥𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀕𑀳𑀺𑀢𑁄𑀓𑀸𑀲𑀧𑁆𑀧𑀤𑁂𑀲𑀢𑁄 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀕𑀳𑀡𑀁 𑀯𑀸 𑀅𑀫𑀼𑀜𑁆𑀘𑀦𑁆𑀢𑁄 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀑𑀦𑀸𑀫𑁂𑀢𑁆𑀯𑀸 𑀪𑀽𑀫𑀺𑀕𑀢𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑁂𑀞𑀦𑁂𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀳𑀺𑀭𑀜𑁆𑀜𑀁 ¶ 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀙𑀺𑀚𑁆𑀚𑀫𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀭𑁄𑀦𑁆𑀢𑀸𑀦𑀁 𑀕𑀻𑀯𑁂𑀬𑁆𑀬𑀓𑀸𑀤𑀺𑀧𑀺𑀴𑀦𑁆𑀥𑀦𑀁 𑀯𑀸 𑀲𑀼𑀯𑀡𑁆𑀡𑀲𑀮𑀸𑀓𑀁 𑀙𑀺𑀦𑁆𑀤𑀦𑁆𑀢𑀸𑀦𑀁 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀲𑀼𑀯𑀡𑁆𑀡𑀔𑀡𑁆𑀟𑀁 𑀯𑀸 𑀙𑀺𑀚𑁆𑀚𑀫𑀸𑀦𑀁 𑀧𑀢𑀢𑀺, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀆𑀓𑀸𑀲𑁂𑀦 𑀆𑀕𑀘𑁆𑀙𑀦𑁆𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀕𑀳𑀡𑀫𑁂𑀯 𑀞𑀸𑀦𑀁. 𑀕𑀳𑀺𑀢𑀧𑁆𑀧𑀤𑁂𑀲𑀢𑁄 ¶ 𑀳𑀢𑁆𑀣𑀁 𑀅𑀧𑀦𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀘𑀻𑀯𑀭𑁂 𑀧𑀢𑀺𑀢𑀁 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀬𑀸𑀢𑀺, 𑀤𑀼𑀢𑀺𑀬𑁂 𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀧𑀢𑁆𑀢𑁂 𑀧𑀢𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀲𑁂 𑀯𑀸 𑀫𑀼𑀔𑁂 𑀯𑀸 𑀧𑀸𑀤𑁂 𑀯𑀸 𑀧𑀢𑀺𑀝𑁆𑀞𑀺𑀢𑀁 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀕𑁆𑀕𑀳𑁂𑀢𑁆𑀯𑀸𑀯 𑀬𑀸𑀢𑀺, 𑀤𑀼𑀢𑀺𑀬𑁂 𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀢𑀢𑀺, 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀩𑁆𑀩𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀢𑁆𑀢𑀘𑀻𑀯𑀭𑀁 𑀯𑀸𑀢𑀺.

𑀆𑀓𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀳𑀸𑀲𑀝𑁆𑀞𑀓𑀣𑀸

𑁯𑁭. 𑀯𑁂𑀳𑀸𑀲𑀝𑁆𑀞𑁂 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀞𑀧𑀺𑀢𑀁 𑀪𑀡𑁆𑀟𑀁 𑀆𑀫𑀸𑀲𑀁 𑀯𑀸 𑀳𑁄𑀢𑀼 𑀅𑀦𑀸𑀫𑀸𑀲𑀁 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀫𑀜𑁆𑀘𑀧𑀻𑀞𑁂𑀲𑀼 𑀞𑀧𑀺𑀢𑀪𑀡𑁆𑀟𑁂𑀲𑀼 𑀧𑀦𑁂𑀢𑁆𑀣 𑀣𑀮𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀘𑁂 𑀔𑀮𑀺𑀬𑀸 𑀩𑀤𑁆𑀥𑀲𑀸𑀝𑀓𑁄 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀧𑀢𑁆𑀣𑀝𑁄 𑀫𑀚𑁆𑀛𑁂𑀦 𑀫𑀜𑁆𑀘𑀢𑀮𑀁 𑀦 𑀨𑀼𑀲𑀢𑀺, 𑀫𑀜𑁆𑀘𑀧𑀸𑀤𑁂𑀯 𑀨𑀼𑀲𑀢𑀺, 𑀢𑁂𑀲𑀁 𑀯𑀲𑁂𑀦 𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀤𑀸𑀦𑀁 𑀉𑀧𑀭𑀺 𑀨𑀼𑀝𑁆𑀞𑁄𑀓𑀸𑀲𑀫𑁂𑀯 𑀳𑀺 𑀅𑀢𑀺𑀓𑁆𑀓𑀫𑀺𑀢𑀫𑀢𑁆𑀢𑁂𑀦 𑀢𑀢𑁆𑀣 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀳 𑀫𑀜𑁆𑀘𑀧𑀻𑀞𑁂𑀳𑀺 𑀳𑀭𑀦𑁆𑀢𑀲𑁆𑀲 𑀧𑀦 𑀫𑀜𑁆𑀘𑀧𑀻𑀞𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦 𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀻𑀯𑀭𑀯𑀁𑀲𑁂 𑀯𑀸𑀢𑀺 𑀘𑀻𑀯𑀭𑀞𑀧𑀦𑀢𑁆𑀣𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂 𑀯𑀁𑀲𑁂 𑀯𑀸 𑀓𑀝𑁆𑀞𑀤𑀡𑁆𑀟𑀓𑁂 𑀯𑀸. 𑀢𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀩𑁆𑀩𑁄 𑀘𑀻𑀯𑀭𑀯𑀁𑀲𑁄. 𑀢𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀁 𑀪𑁄𑀕𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀸𑀭𑀢𑁄 𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀑𑀭𑀢𑁄 𑀘𑀻𑀯𑀭𑁂𑀦 𑀯𑀁𑀲𑀲𑁆𑀲 𑀨𑀼𑀝𑁆𑀞𑀧𑁆𑀧𑀤𑁂𑀲𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 ¶ 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀓𑀟𑁆𑀠𑀦𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑁂𑀯 𑀧𑀦 𑀘𑀻𑀯𑀭𑀯𑀁𑀲𑁂 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀲𑀸𑀭𑁂𑀦𑁆𑀢𑀲𑁆𑀲 𑀯𑀸𑀫𑀦𑁆𑀢𑁂𑀦 𑀤𑀓𑁆𑀔𑀺𑀡𑀦𑁆𑀢𑀝𑁆𑀞𑀸𑀦𑀁 𑀤𑀓𑁆𑀔𑀺𑀡𑀦𑁆𑀢𑁂𑀦 𑀯𑀸 𑀯𑀸𑀫𑀦𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀤𑀲𑀤𑁆𑀯𑀸𑀤𑀲𑀗𑁆𑀕𑀼𑀮𑀫𑀢𑁆𑀢𑀲𑀸𑀭𑀡𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀓𑁂𑀲𑀕𑁆𑀕𑀫𑀢𑁆𑀢𑀼𑀓𑁆𑀔𑀺𑀧𑀦𑁂𑀦 𑀧𑀸𑀭𑀸𑀚𑀺𑀓𑀁. 𑀘𑀻𑀯𑀭𑀯𑀁𑀲𑀁 ¶ 𑀨𑀼𑀲𑀦𑁆𑀢𑀁 𑀯𑀸 𑀅𑀨𑀼𑀲𑀦𑁆𑀢𑀁 𑀯𑀸 𑀭𑀚𑁆𑀚𑀼𑀓𑁂𑀦 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀁 𑀫𑁄𑀘𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀫𑀼𑀢𑁆𑀢𑀫𑀢𑁆𑀢𑀫𑁂𑀯 𑀳𑀺 𑀢𑀁 ‘‘𑀞𑀸𑀦𑀸 𑀘𑀼𑀢’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀯𑀁𑀲𑁂 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀺𑀩𑁆𑀩𑁂𑀞𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀯𑀮𑀬𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀯𑀮𑀬𑀁 𑀙𑀺𑀦𑁆𑀤𑀢𑀺 𑀯𑀸 𑀫𑁄𑀘𑁂𑀢𑀺 𑀯𑀸 𑀏𑀓𑀁 𑀯𑀸 𑀯𑀁𑀲𑀓𑁄𑀝𑀺𑀁 𑀫𑁄𑀘𑁂𑀢𑁆𑀯𑀸 𑀦𑀻𑀳𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁 ¶ . 𑀙𑀺𑀦𑁆𑀦𑀫𑀢𑁆𑀢𑁂 𑀫𑀼𑀢𑁆𑀢𑀫𑀢𑁆𑀢𑁂 𑀦𑀻𑀳𑀝𑀫𑀢𑁆𑀢𑁂 𑀘 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀅𑀓𑀢𑁆𑀯𑀸𑀯 𑀘𑀻𑀯𑀭𑀯𑀁𑀲𑁂 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀯𑀮𑀬𑀲𑁆𑀲 𑀳𑀺 𑀲𑀩𑁆𑀩𑁄𑀧𑀺 𑀘𑀻𑀯𑀭𑀯𑀁𑀲𑁄 𑀞𑀸𑀦𑀁. 𑀓𑀲𑁆𑀫𑀸? 𑀢𑀢𑁆𑀣 𑀲𑀁𑀲𑀭𑀡𑀥𑀫𑁆𑀫𑀢𑀸𑀬. 𑀬𑀤𑀸 𑀧𑀦 𑀦𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀲𑀸𑀭𑁂𑀢𑁆𑀯𑀸 𑀞𑀧𑀺𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁. 𑀢𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 𑀏𑀓𑁂𑀦𑀦𑁆𑀢𑁂𑀦 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀲 𑀘𑀻𑀯𑀭𑀯𑀁𑀲𑁂 𑀘 𑀪𑀽𑀫𑀺𑀬𑀜𑁆𑀘 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦 𑀤𑁆𑀯𑁂 𑀞𑀸𑀦𑀸𑀦𑀺. 𑀢𑀢𑁆𑀣 𑀪𑀽𑀫𑀺𑀬𑀁 𑀏𑀓𑁂𑀦𑀦𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑁂 𑀅𑀩𑀤𑁆𑀥𑀲𑀸𑀝𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀻𑀯𑀭𑀭𑀚𑁆𑀚𑀼𑀬𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀗𑁆𑀓𑀼𑀲𑀓𑁂 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀪𑀡𑁆𑀟𑀁 𑀧𑀦 𑀪𑁂𑀲𑀚𑁆𑀚𑀖𑀝𑁄 𑀯𑀸 𑀪𑁂𑀲𑀚𑁆𑀚𑀢𑁆𑀣𑀯𑀺𑀓𑀸 𑀯𑀸 𑀲𑀘𑁂 𑀪𑀺𑀢𑁆𑀢𑀺𑀁 𑀯𑀸 𑀪𑀽𑀫𑀺𑀁 𑀯𑀸 𑀅𑀨𑀼𑀲𑀺𑀢𑁆𑀯𑀸 𑀞𑀧𑀺𑀢𑀁 𑀮𑀕𑁆𑀕𑀦𑀓𑀁 𑀖𑀁𑀲𑀦𑁆𑀢𑀲𑁆𑀲 𑀦𑀻𑀳𑀭𑀢𑁄 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀮𑀕𑁆𑀕𑀦𑀓𑀁 𑀩𑀤𑁆𑀥𑀁 𑀳𑁄𑀢𑀺, 𑀩𑀼𑀦𑁆𑀤𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀁 𑀳𑁄𑀢𑀺, 𑀧𑀞𑀫𑀁 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀦𑀻𑀳𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑁆𑀯𑀸 𑀧𑀘𑁆𑀙𑀸 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀪𑀸𑀭𑀺𑀬𑀁 𑀪𑀡𑁆𑀟𑀁 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀁 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀢𑀺, 𑀧𑀼𑀦 𑀪𑀺𑀢𑁆𑀢𑀺𑀁 𑀅𑀫𑁄𑀘𑁂𑀢𑁆𑀯𑀸𑀧𑀺 𑀅𑀗𑁆𑀓𑀼𑀲𑀢𑁄 𑀦𑀻𑀳𑀝𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀜𑁆𑀳𑀺 𑀞𑀸𑀦𑀁 𑀦 𑀳𑁄𑀢𑀺. 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀦 𑀤𑁆𑀯𑁂 𑀏𑀯 𑀞𑀸𑀦𑀸𑀦𑀺. 𑀢𑀢𑁆𑀣 𑀯𑀼𑀢𑁆𑀢𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄 ¶ . 𑀬𑀁 ¶ 𑀧𑀦 𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀕𑁆𑀕𑀺𑀢𑀁 𑀳𑁄𑀢𑀺, 𑀢𑀁 𑀲𑀺𑀓𑁆𑀓𑀸𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀲𑀳 𑀲𑀺𑀓𑁆𑀓𑀸𑀬 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀪𑀽𑀫𑀺𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦 𑀘𑁂𑀢𑁆𑀣 𑀞𑀸𑀦𑀪𑁂𑀤𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀢𑁆𑀢𑀺𑀔𑀻𑀮𑁄𑀢𑀺 𑀉𑀚𑀼𑀓𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀬𑀁 𑀆𑀓𑁄𑀝𑀺𑀢𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀏𑀯 𑀯𑀸; 𑀦𑀸𑀕𑀤𑀦𑁆𑀢𑁄 𑀧𑀦 𑀯𑀗𑁆𑀓𑁄 𑀆𑀓𑁄𑀝𑀺𑀢𑁄 𑀏𑀯. 𑀢𑁂𑀲𑀼 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀁 𑀅𑀗𑁆𑀓𑀼𑀲𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀤𑁆𑀯𑀻𑀲𑀼 𑀢𑀻𑀲𑀼 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀁 𑀓𑀼𑀦𑁆𑀢𑀁 𑀯𑀸 𑀪𑀺𑀦𑁆𑀤𑀺𑀯𑀸𑀮𑀁 𑀯𑀸 𑀅𑀕𑁆𑀕𑁂 𑀯𑀸 𑀩𑀼𑀦𑁆𑀤𑁂 𑀯𑀸 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀏𑀓𑀫𑁂𑀓𑀲𑁆𑀲 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀁 𑀞𑀸𑀦𑀁 𑀳𑁄𑀢𑀺, 𑀦 𑀲𑀩𑁆𑀩𑁂 𑀔𑀻𑀮𑀸 𑀯𑀸 𑀦𑀸𑀕𑀤𑀦𑁆𑀢𑀸 𑀯𑀸. 𑀪𑀺𑀢𑁆𑀢𑀺𑀅𑀪𑀺𑀫𑀼𑀔𑁄 𑀞𑀢𑁆𑀯𑀸 𑀫𑀚𑁆𑀛𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀧𑀸𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀭𑀢𑁄 𑀧𑁂𑀮𑁆𑀮𑁂𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀁 𑀪𑀺𑀢𑁆𑀢𑀺𑀁 𑀖𑀁𑀲𑀦𑁆𑀢𑁄 𑀆𑀓𑀟𑁆𑀠𑀢𑀺, 𑀅𑀕𑁆𑀕𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀩𑀼𑀦𑁆𑀤𑀁, 𑀩𑀼𑀦𑁆𑀤𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀅𑀕𑁆𑀕𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 ¶ . 𑀪𑀺𑀢𑁆𑀢𑀺𑀅𑀪𑀺𑀫𑀼𑀔𑁄 𑀞𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀁 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁.

𑀭𑀼𑀓𑁆𑀔𑁂 𑀯𑀸 𑀮𑀕𑁆𑀕𑀺𑀢𑀦𑁆𑀢𑀺 𑀢𑀸𑀮𑀭𑀼𑀓𑁆𑀔𑀸𑀤𑀻𑀲𑀼 𑀆𑀭𑁄𑀧𑁂𑀢𑁆𑀯𑀸 𑀮𑀕𑁆𑀕𑀺𑀢𑁂 𑀅𑀗𑁆𑀓𑀼𑀲𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀚𑀸𑀢𑀓𑀁 𑀧𑀦 𑀢𑀸𑀮𑀧𑀺𑀡𑁆𑀟𑀺𑀁 𑀘𑀸𑀮𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀲𑁆𑀫𑀺𑀁 𑀨𑀮𑁂 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀺𑀡𑁆𑀟𑀺𑀁 𑀙𑀺𑀦𑁆𑀤𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀕𑁆𑀕𑁂𑀦 𑀧𑀡𑁆𑀡𑀦𑁆𑀢𑀭𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀸 𑀤𑁆𑀯𑁂 𑀞𑀸𑀦𑀸𑀦𑀺 𑀮𑀪𑀢𑀺 𑁋 𑀞𑀧𑀺𑀢𑀝𑁆𑀞𑀸𑀦𑀜𑁆𑀘 𑀯𑀡𑁆𑀝𑀝𑁆𑀞𑀸𑀦𑀜𑁆𑀘; 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 ‘‘𑀙𑀺𑀦𑁆𑀦𑀫𑀢𑁆𑀢𑀸 𑀧𑀢𑀫𑀸𑀦𑀸 𑀲𑀤𑁆𑀤𑀁 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀲𑀬𑀁 𑀅𑀕𑁆𑀕𑁂𑀦 𑀧𑀡𑁆𑀡𑀦𑁆𑀢𑀭𑀁 𑀆𑀭𑁄𑀧𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 ¶ . 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀜𑁆𑀳𑀺 𑀞𑀸𑀦𑀁 𑀦 𑀳𑁄𑀢𑀺. 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀩𑁆𑀩𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀢𑁆𑀢𑀸𑀥𑀸𑀭𑀓𑁂𑀧𑀻𑀢𑀺 𑀏𑀢𑁆𑀣 𑀭𑀼𑀓𑁆𑀔𑀸𑀥𑀸𑀭𑀓𑁄 𑀯𑀸 𑀳𑁄𑀢𑀼 𑀯𑀮𑀬𑀸𑀥𑀸𑀭𑀓𑁄 𑀯𑀸 𑀤𑀡𑁆𑀟𑀸𑀥𑀸𑀭𑀓𑁄 𑀯𑀸 𑀬𑀁𑀓𑀺𑀜𑁆𑀘𑀺 𑀧𑀢𑁆𑀢𑀝𑁆𑀞𑀧𑀦𑀓𑀁 𑀧𑀘𑁆𑀙𑀺𑀓𑀸𑀧𑀺 𑀳𑁄𑀢𑀼 𑀧𑀢𑁆𑀢𑀸𑀥𑀸𑀭𑀓𑁄 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀞𑀧𑀺𑀢𑀧𑀢𑁆𑀢𑀲𑁆𑀲 𑀧𑀢𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑁄 𑀏𑀯 ¶ 𑀞𑀸𑀦𑀁. 𑀢𑀢𑁆𑀣 𑀭𑀼𑀓𑁆𑀔𑀸𑀥𑀸𑀭𑀓𑁂 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺. 𑀢𑀢𑁆𑀣 𑀞𑀺𑀢𑀁 𑀧𑀢𑁆𑀢𑀁 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀢𑁄 𑀓𑀼𑀢𑁄𑀘𑀺 𑀓𑀟𑁆𑀠𑀦𑁆𑀢𑁄 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀓𑁆𑀔𑀺𑀧𑀢𑁄 𑀧𑀸𑀭𑀸𑀚𑀺𑀓𑀁. 𑀲𑀳𑀸𑀥𑀸𑀭𑀓𑁂𑀦 𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀯𑁂𑀳𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀤𑀓𑀝𑁆𑀞𑀓𑀣𑀸

𑁯𑁮. 𑀉𑀤𑀓𑀝𑁆𑀞𑁂 𑁋 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻𑀢𑀺 𑀭𑀸𑀚𑀪𑀬𑀸𑀤𑀺𑀪𑀻𑀢𑁂𑀳𑀺 𑀉𑀤𑀓𑁂𑀦 𑀅𑀯𑀺𑀦𑀲𑁆𑀲𑀦𑀥𑀫𑁆𑀫𑁂𑀲𑀼 𑀢𑀫𑁆𑀩𑀮𑁄𑀳𑀪𑀸𑀚𑀦𑀸𑀤𑀻𑀲𑀼 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀅𑀲𑀦𑁆𑀤𑀦𑀓𑁂 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄𑀬𑁂𑀯 𑀞𑀸𑀦𑀁, 𑀦 𑀲𑀩𑁆𑀩𑀁 𑀉𑀤𑀓𑀁. 𑀕𑀘𑁆𑀙𑀢𑀺 𑀯𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀅𑀕𑀫𑁆𑀪𑀻𑀭𑁂 𑀉𑀤𑀓𑁂 𑀧𑀤𑀲𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀕𑀫𑁆𑀪𑀻𑀭𑁂 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂𑀳𑀺 𑀯𑀸 𑀧𑀤𑀯𑀸𑀭𑁂𑀳𑀺 𑀯𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 𑀓𑀼𑀫𑁆𑀪𑀺𑀕𑀳𑀡𑀢𑁆𑀣𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑁂𑀲𑀼. 𑀲𑀘𑁂 𑀧𑀦 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺 𑀉𑀤𑀓𑀲𑀧𑁆𑀧𑀁 𑀯𑀸 𑀯𑀸𑀴𑀫𑀘𑁆𑀙𑀁 𑀯𑀸 𑀤𑀺𑀲𑁆𑀯𑀸 𑀪𑀻𑀢𑁄 𑀧𑀮𑀸𑀬𑀢𑀺, 𑀅𑀦𑀸𑀧𑀢𑁆𑀢𑀺. 𑀆𑀫𑀲𑀦𑀸𑀤𑀻𑀲𑀼 𑀪𑀽𑀫𑀺𑀕𑀢𑀸𑀬 𑀓𑀼𑀫𑁆𑀪𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀓𑀟𑁆𑀠𑀢𑀺, 𑀇𑀥 𑀓𑀤𑁆𑀤𑀫𑁂 𑀑𑀲𑀸𑀭𑁂𑀢𑀺. 𑀏𑀯𑀁 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺.

𑀉𑀧𑁆𑀧𑀮𑀸𑀤𑀻𑀲𑀼 𑀬𑀲𑁆𑀫𑀺𑀁 𑀧𑀼𑀧𑁆𑀨𑁂 𑀯𑀢𑁆𑀣𑀼𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀧𑁆𑀧𑀮𑀚𑀸𑀢𑀺𑀓𑀸𑀦𑀜𑁆𑀘𑁂𑀢𑁆𑀣 𑀬𑀸𑀯 𑀏𑀓𑀲𑁆𑀫𑀺𑀫𑁆𑀧𑀺 𑀧𑀲𑁆𑀲𑁂 𑀯𑀸𑀓𑁄 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀧𑀤𑀼𑀫𑀚𑀸𑀢𑀺𑀓𑀸𑀦𑀁 𑀧𑀦 𑀤𑀡𑁆𑀟𑁂 𑀙𑀺𑀦𑁆𑀦𑁂 𑀅𑀩𑁆𑀪𑀦𑁆𑀢𑀭𑁂 𑀲𑀼𑀢𑁆𑀢𑀁 𑀅𑀘𑁆𑀙𑀺𑀦𑁆𑀦𑀫𑁆𑀧𑀺 𑀦 𑀭𑀓𑁆𑀔𑀢𑀺. 𑀲𑀸𑀫𑀺𑀓𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀬𑀁 𑀯𑀢𑁆𑀣𑀼𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀉𑀤𑁆𑀥𑀝𑁂 ¶ 𑀧𑀸𑀭𑀸𑀚𑀺𑀓𑀁. 𑀳𑀢𑁆𑀣𑀓𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀬𑀲𑁆𑀫𑀺𑀁 𑀳𑀢𑁆𑀣𑀓𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀉𑀤𑁆𑀥𑀝𑁂 𑀧𑀸𑀭𑀸𑀚𑀺𑀓𑀁. 𑀪𑀸𑀭𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀪𑀸𑀭𑀁 𑀙𑀦𑁆𑀦𑀁 𑀆𑀓𑀸𑀭𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀪𑀽𑀫𑀝𑁆𑀞𑀓𑀼𑀫𑁆𑀪𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀸𑀚𑀺𑀓𑀁. 𑀤𑀻𑀖𑀦𑀸𑀴𑀸𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀧𑀼𑀧𑁆𑀨𑁂𑀲𑀼 𑀯𑀸 𑀦𑀸𑀴𑁂𑀲𑀼 𑀯𑀸 ¶ 𑀯𑁂𑀡𑀺𑀁 𑀓𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀭𑀚𑁆𑀚𑀼𑀓𑁂𑀲𑀼 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸, 𑀢𑁂𑀲𑀁 𑀤𑀻𑀖𑀢𑁄 𑀧𑀼𑀧𑁆𑀨𑀕𑁆𑀕𑁂𑀦 𑀘 𑀦𑀸𑀴𑀦𑁆𑀢𑁂𑀦 𑀘 𑀢𑀺𑀭𑀺𑀬𑀁 𑀧𑀭𑀺𑀬𑀦𑁆𑀢𑁂𑀳𑀺 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀉𑀤𑁆𑀥𑀁 𑀉𑀧𑀭𑀺 𑀞𑀺𑀢𑀲𑁆𑀲 𑀧𑀺𑀝𑁆𑀞𑀺𑀬𑀸𑀢𑀺 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀸 𑀘𑀸𑀯𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁄𑀧𑀺 𑀉𑀤𑀓𑀧𑀺𑀝𑁆𑀞𑀺𑀬𑀁 𑀞𑀧𑀺𑀢𑀧𑀼𑀧𑁆𑀨𑀓𑀮𑀸𑀧𑀁 𑀉𑀤𑀓𑀁 𑀘𑀸𑀮𑁂𑀢𑁆𑀯𑀸 𑀯𑀻𑀘𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀦 𑀧𑀭𑀺𑀓𑀧𑁆𑀧𑁂𑀢𑀺 ‘‘𑀏𑀢𑁆𑀣 𑀕𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺, 𑀭𑀓𑁆𑀔𑀢𑀺 𑀢𑀸𑀯; 𑀕𑀢𑀝𑁆𑀞𑀸𑀦𑁂 𑀧𑀦 𑀉𑀤𑁆𑀥𑀭𑀢𑁄 𑀧𑀸𑀭𑀸𑀚𑀺𑀓𑀁. 𑀉𑀤𑀓𑀢𑁄 𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀧𑀼𑀧𑁆𑀨𑀲𑁆𑀲 𑀲𑀓𑀮𑀫𑀼𑀤𑀓𑀁 𑀞𑀸𑀦𑀁, 𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀚𑀼𑀓𑀁 𑀉𑀤𑁆𑀥𑀭𑀦𑁆𑀢𑀲𑁆𑀲 𑀦𑀸𑀴𑀦𑁆𑀢𑁂 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀤𑀓𑀢𑁄 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀼𑀧𑁆𑀨𑁂 𑀕𑀳𑁂𑀢𑁆𑀯𑀸 𑀅𑀧𑀦𑀸𑀫𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀉𑀧𑁆𑀧𑀸𑀝𑁂𑀢𑀺, 𑀦 𑀉𑀤𑀓𑀁 𑀞𑀸𑀦𑀁, 𑀉𑀧𑁆𑀧𑀸𑀝𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀓𑀮𑀸𑀧𑀩𑀤𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀉𑀤𑀓𑀝𑁆𑀞𑀸𑀦𑁂 𑀯𑀸 𑀭𑀼𑀓𑁆𑀔𑁂 𑀯𑀸 𑀕𑀘𑁆𑀙𑁂 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀩𑀦𑁆𑀥𑀦𑀁 𑀅𑀫𑁄𑀘𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀭𑁄𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀩𑀦𑁆𑀥𑀦𑁂 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀧𑀘𑁆𑀙𑀸 𑀳𑀭𑀢𑀺, 𑀏𑀢𑁆𑀣 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀇𑀤𑀁 𑀉𑀪𑀬𑀁 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀧𑀤𑀼𑀫𑀺𑀦𑀺𑀬𑀁 𑀧𑀼𑀧𑁆𑀨𑀸𑀦𑀺 𑀲𑀳 𑀧𑀤𑀼𑀫𑀺𑀦𑀺𑀁𑀬𑀸 𑀕𑀡𑁆𑀳𑀺𑀢𑀼𑀓𑀸𑀫𑀲𑁆𑀲 𑀧𑀼𑀧𑁆𑀨𑀦𑀸𑀴𑁂𑀳𑀺 𑀘 𑀧𑀢𑁆𑀢𑀦𑀸𑀴𑁂𑀳𑀺 𑀘 𑀨𑀼𑀝𑁆𑀞𑀉𑀤𑀓𑀯𑀲𑁂𑀦 𑀉𑀤𑁆𑀥𑀜𑁆𑀘𑁂𑀯 𑀢𑀺𑀭𑀺𑀬𑀜𑁆𑀘 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀦𑀲𑁆𑀲 𑀧𑀤𑀼𑀫𑀺𑀦𑀺𑀁 𑀅𑀦𑀼𑀧𑁆𑀧𑀸𑀝𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀸 𑀧𑀢𑁆𑀢𑀸𑀦𑀺 𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀧𑁆𑀧𑀸𑀝𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀧𑀼𑀧𑁆𑀨𑀧𑀢𑁆𑀢𑀦𑀸𑀴𑁂 𑀞𑀸𑀦𑀢𑁄 𑀅𑀘𑀸𑀯𑁂𑀢𑁆𑀯𑀸𑀧𑀺 𑀧𑀞𑀫𑀁 𑀧𑀤𑀼𑀫𑀺𑀦𑀺𑀁 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀧𑀼𑀧𑁆𑀨𑀧𑀢𑁆𑀢𑀦𑀸𑀴𑁂𑀲𑀼 𑀞𑀸𑀦𑀸 𑀘𑀸𑀯𑀺𑀢𑁂𑀲𑀼 𑀧𑀸𑀭𑀸𑀚𑀺𑀓𑀁. 𑀉𑀧𑁆𑀧𑀸𑀝𑀺𑀢𑀸𑀬 𑀧𑀤𑀼𑀫𑀺𑀦𑀺𑀬𑀸 𑀧𑀼𑀧𑁆𑀨𑀁 𑀕𑀡𑁆𑀳𑀦𑁆𑀢𑁄 𑀧𑀦 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 ¶ 𑀓𑀸𑀭𑁂𑀢𑀩𑁆𑀩𑁄. 𑀩𑀳𑀺 𑀞𑀧𑀺𑀢𑁂 𑀭𑀸𑀲𑀺𑀓𑀢𑀓𑀮𑀸𑀧𑀩𑀤𑁆𑀥𑀪𑀸𑀭𑀩𑀤𑁆𑀥𑀧𑀼𑀧𑁆𑀨𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀲𑀁 ¶ 𑀯𑀸 𑀫𑀼𑀴𑀸𑀮𑀁 𑀯𑀸 𑀬𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀁 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀓𑀤𑁆𑀤𑀫𑁂 𑀨𑀼𑀝𑁆𑀞𑁄𑀓𑀸𑀲𑀯𑀲𑁂𑀦 𑀘𑁂𑀢𑁆𑀣 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀲𑀼𑀔𑀼𑀫𑀫𑁆𑀧𑀺 𑀫𑀽𑀮𑀁 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀪𑀺𑀲𑀧𑀩𑁆𑀩𑁂 𑀚𑀸𑀢𑀁 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀳𑁄𑀢𑀺, 𑀢𑀫𑁆𑀧𑀺 𑀭𑀓𑁆𑀔𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀪𑀺𑀲𑀕𑀡𑁆𑀞𑀺𑀫𑁆𑀳𑀺 𑀧𑀦 𑀓𑀡𑁆𑀝𑀓𑁄 𑀳𑁄𑀢𑀺 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸𑀦𑀁 𑀫𑀼𑀔𑀧𑀺𑀴𑀓𑀸 𑀯𑀺𑀬, 𑀅𑀬𑀁 𑀅𑀤𑀻𑀖𑀢𑁆𑀢𑀸 𑀦 𑀭𑀓𑁆𑀔𑀢𑀺. 𑀲𑁂𑀲𑀁 𑀉𑀧𑁆𑀧𑀮𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀘𑁆𑀙𑀓𑀘𑁆𑀙𑀧𑀸𑀦𑀁 ¶ 𑀲𑀲𑁆𑀲𑀸𑀫𑀺𑀓𑀸𑀦𑀁 𑀯𑀸𑀧𑀺𑀆𑀤𑀻𑀲𑀼 𑀲𑀓𑀮𑀫𑀼𑀤𑀓𑀁 𑀞𑀸𑀦𑀁. 𑀢𑀲𑁆𑀫𑀸 𑀬𑁄 𑀧𑀝𑀺𑀚𑀕𑁆𑀕𑀦𑀝𑁆𑀞𑀸𑀦𑁂 𑀲𑀲𑁆𑀲𑀸𑀫𑀺𑀓𑀁 𑀫𑀘𑁆𑀙𑀁 𑀩𑀴𑀺𑀲𑁂𑀦 𑀯𑀸 𑀚𑀸𑀮𑁂𑀦 𑀯𑀸 𑀓𑀼𑀫𑀦𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀬𑁂𑀦 𑀫𑀘𑁆𑀙𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀤𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀓𑁄𑀘𑀺 𑀫𑀘𑁆𑀙𑁄 𑀕𑀬𑁆𑀳𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀢𑀺, 𑀆𑀓𑀸𑀲𑀁 𑀯𑀸 𑀉𑀧𑁆𑀧𑀢𑀢𑀺, 𑀢𑀻𑀭𑁂 𑀯𑀸 𑀧𑀢𑀢𑀺, 𑀆𑀓𑀸𑀲𑁂 𑀯𑀸 𑀞𑀺𑀢𑀁 𑀢𑀻𑀭𑁂 𑀯𑀸 𑀧𑀢𑀺𑀢𑀁 𑀕𑀡𑁆𑀳𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀘𑁆𑀙𑀧𑀫𑁆𑀧𑀺 𑀩𑀳𑀺 𑀕𑁄𑀘𑀭𑀢𑁆𑀣𑀁 𑀕𑀢𑀁 𑀕𑀡𑁆𑀳𑀢𑁄 𑀏𑀲𑁂𑀯 𑀦𑀬𑁄. 𑀉𑀤𑀓𑀝𑁆𑀞𑀁 𑀧𑀦 𑀉𑀤𑀓𑀸 𑀫𑁄𑀘𑀬𑀢𑁄 𑀧𑀸𑀭𑀸𑀚𑀺𑀓𑀁.

𑀢𑁂𑀲𑀼 𑀢𑁂𑀲𑀼 𑀧𑀦 𑀚𑀦𑀧𑀤𑁂𑀲𑀼 𑀲𑀩𑁆𑀩𑀲𑀸𑀥𑀸𑀭𑀡𑀲𑁆𑀲 𑀫𑀳𑀸𑀢𑀴𑀸𑀓𑀲𑁆𑀲 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑀲𑀸𑀥𑀸𑀭𑀡𑀫𑁂𑀯 𑀓𑀼𑀦𑁆𑀦𑀤𑀻𑀲𑀤𑀺𑀲𑀁 𑀉𑀤𑀓𑀯𑀸𑀳𑀓𑀁 𑀔𑀡𑀦𑁆𑀢𑀺. 𑀢𑀢𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄 𑀦𑀻𑀳𑀭𑀺𑀢𑁆𑀯𑀸 𑀫𑀸𑀢𑀺𑀓𑀸𑀓𑁄𑀝𑀺𑀬𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀴𑀜𑁆𑀚𑀦𑀢𑁆𑀣𑀸𑀬 𑀆𑀯𑀸𑀝𑁂 𑀔𑀡𑀦𑁆𑀢𑀺. 𑀢𑁂𑀲𑀁 𑀧𑀦 𑀬𑀤𑀸 𑀉𑀤𑀓𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀆𑀯𑀸𑀝𑁂 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄 𑀉𑀤𑀓𑀯𑀸𑀳𑀓𑀜𑁆𑀘 𑀲𑁄𑀥𑁂𑀢𑁆𑀯𑀸 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀉𑀕𑁆𑀖𑀸𑀝𑁂𑀦𑁆𑀢𑀺. 𑀢𑀢𑁄 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀫𑀘𑁆𑀙𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀆𑀯𑀸𑀝𑁂 𑀧𑀢𑁆𑀯𑀸 𑀯𑀲𑀦𑁆𑀢𑀺. 𑀢𑀢𑁆𑀣 𑀢𑀴𑀸𑀓𑁂 𑀘 𑀉𑀤𑀓𑀯𑀸𑀳𑀓𑁂𑀲𑀼 𑀘 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁂 𑀦 𑀯𑀸𑀭𑁂𑀦𑁆𑀢𑀺. 𑀔𑀼𑀤𑁆𑀤𑀓𑀸𑀲𑀼 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀸𑀢𑀺𑀓𑀸𑀲𑀼 ¶ 𑀉𑀤𑀓𑀆𑀯𑀸𑀝𑁂𑀲𑀼 𑀘 𑀧𑀯𑀺𑀝𑁆𑀞𑀫𑀘𑁆𑀙𑁂 𑀕𑀡𑁆𑀳𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀯𑀸𑀭𑁂𑀦𑁆𑀢𑀺; 𑀢𑀢𑁆𑀣 𑀬𑁄 𑀢𑀴𑀸𑀓𑁂 𑀯𑀸 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂 𑀯𑀸 𑀉𑀤𑀓𑀯𑀸𑀳𑀓𑁂 𑀯𑀸 𑀫𑀘𑁆𑀙𑁂 𑀕𑀡𑁆𑀳𑀸𑀢𑀺, 𑀅𑀯𑀳𑀸𑀭𑁂𑀦 𑀲𑁄 𑀦 𑀓𑀸𑀭𑁂𑀢𑀩𑁆𑀩𑁄. 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀲𑀼 𑀧𑀦 𑀆𑀯𑀸𑀝𑁂𑀲𑀼 𑀯𑀸 𑀧𑀯𑀺𑀝𑁆𑀞𑀁 𑀕𑀡𑁆𑀳𑀦𑁆𑀢𑁄 𑀕𑀳𑀺𑀢𑀲𑁆𑀲 𑀅𑀕𑁆𑀖𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀢𑀢𑁄 𑀕𑀬𑁆𑀳𑀫𑀸𑀦𑁄 𑀫𑀘𑁆𑀙𑁄 𑀆𑀓𑀸𑀲𑁂 𑀯𑀸 𑀉𑀧𑁆𑀧𑀢𑀢𑀺, 𑀢𑀻𑀭𑁂 𑀯𑀸 𑀧𑀢𑀢𑀺, 𑀢𑀁 𑀆𑀓𑀸𑀲𑀝𑁆𑀞𑀁 𑀯𑀸 𑀢𑀻𑀭𑀝𑁆𑀞𑀁 𑀯𑀸 𑀉𑀤𑀓𑀯𑀺𑀦𑀺𑀫𑀼𑀢𑁆𑀢𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀝𑁆𑀞𑀸𑀦𑁂 𑀞𑀺𑀢𑀲𑁆𑀲𑁂𑀯 𑀢𑁂 𑀲𑀸𑀫𑀺𑀓𑀸. 𑀏𑀯𑀭𑀽𑀧𑀸 𑀳𑀺 𑀢𑀢𑁆𑀣 𑀓𑀢𑀺𑀓𑀸. 𑀓𑀘𑁆𑀙𑀧𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀘𑁂 𑀧𑀦 𑀫𑀘𑁆𑀙𑁄 𑀕𑀬𑁆𑀳𑀫𑀸𑀦𑁄 𑀆𑀯𑀸𑀝𑀢𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀁 𑀆𑀭𑀼𑀳𑀢𑀺, 𑀢𑀢𑁆𑀣 𑀦𑀁 𑀕𑀡𑁆𑀳𑀢𑁄𑀧𑀺 𑀅𑀯𑀳𑀸𑀭𑁄𑀬𑁂𑀯. 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀢𑁄 𑀧𑀦 𑀉𑀤𑀓𑀯𑀸𑀳𑀓𑀁, 𑀢𑀢𑁄 𑀘 𑀢𑀴𑀸𑀓𑀁 𑀆𑀭𑀽𑀴𑁆𑀳𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀬𑁄 𑀆𑀯𑀸𑀝𑀢𑁄 𑀪𑀢𑁆𑀢𑀲𑀺𑀢𑁆𑀣𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀅𑀯𑀳𑀸𑀭𑁄𑀯. 𑀢𑀢𑁄 𑀧𑀦 𑀧𑀮𑁄𑀪𑁂𑀢𑁆𑀯𑀸 𑀉𑀤𑀓𑀯𑀸𑀳𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ¶ 𑀓𑀼𑀢𑁄𑀘𑀺𑀤𑁂𑀯 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀢𑁄 ¶ 𑀫𑀘𑁆𑀙𑁂 𑀆𑀦𑁂𑀢𑁆𑀯𑀸 𑀧𑀘𑁆𑀙𑀺𑀫𑀯𑀢𑁆𑀣𑀼𑀪𑀸𑀕𑁂 𑀉𑀤𑀓𑀸𑀯𑀸𑀝𑁂 𑀔𑀺𑀧𑀺𑀢𑁆𑀯𑀸 𑀧𑁄𑀲𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑁂 𑀢𑀻𑀡𑀺 𑀉𑀢𑁆𑀢𑀭𑀺𑀪𑀗𑁆𑀕𑀢𑁆𑀣𑀸𑀬 𑀫𑀸𑀭𑁂𑀦𑁆𑀢𑀺. 𑀏𑀯𑀭𑀽𑀧𑀁 𑀫𑀘𑁆𑀙𑀁 𑀉𑀤𑀓𑁂 𑀯𑀸 𑀆𑀓𑀸𑀲𑁂 𑀯𑀸 𑀢𑀻𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀏𑀯. 𑀓𑀘𑁆𑀙𑀧𑁂𑀧𑀺 𑀏𑀲𑁂𑀯 𑀦𑀬𑁄.

𑀦𑀺𑀤𑀸𑀖𑀓𑀸𑀮𑁂 𑀧𑀦 𑀦𑀤𑀺𑀬𑀸 𑀲𑁄𑀢𑁂 𑀧𑀘𑁆𑀙𑀺𑀦𑁆𑀦𑁂 𑀓𑀢𑁆𑀣𑀘𑀺 𑀦𑀺𑀦𑁆𑀦𑀝𑁆𑀞𑀸𑀦𑁂 𑀉𑀤𑀓𑀁 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀫𑀘𑁆𑀙𑀸𑀦𑀁 𑀯𑀺𑀦𑀸𑀲𑀸𑀬 𑀫𑀤𑀦𑀨𑀮𑀯𑀲𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀫𑀘𑁆𑀙𑀸 𑀢𑀸𑀦𑀺 𑀔𑀸𑀤𑀦𑁆𑀢𑀸 𑀫𑀭𑀺𑀢𑁆𑀯𑀸 𑀉𑀢𑁆𑀢𑀸𑀦𑀸 𑀉𑀤𑀓𑁂 𑀧𑁆𑀮𑀯𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀬𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀬𑀸𑀯 𑀲𑀸𑀫𑀺𑀓𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀢𑀸𑀯𑀺𑀫𑁂 𑀫𑀘𑁆𑀙𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀅𑀕𑁆𑀖𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀆𑀳𑀭𑀸𑀧𑁂𑀦𑁆𑀢𑁂 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁. 𑀫𑀘𑁆𑀙𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀫𑀦𑀼𑀲𑁆𑀲𑀸 𑀪𑀸𑀚𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀬𑀸𑀯 ‘‘𑀧𑀼𑀦𑀧𑀺 𑀆𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀮𑀬𑀸 𑀳𑁄𑀦𑁆𑀢𑀺, 𑀢𑀸𑀯 𑀢𑁂 𑀲𑀲𑁆𑀲𑀸𑀫𑀺𑀓𑀫𑀘𑁆𑀙𑀸𑀯. 𑀬𑀤𑀸 𑀧𑀦 𑀢𑁂 ‘‘𑀅𑀮𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀦𑀺𑀭𑀸𑀮𑀬𑀸 𑀧𑀓𑁆𑀓𑀫𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑀣𑀸 𑀘 𑀫𑀘𑁆𑀙𑀓𑀘𑁆𑀙𑀧𑁂𑀲𑀼, 𑀏𑀯𑀁 𑀲𑀩𑁆𑀩𑀸𑀬𑀧𑀺 ¶ 𑀑𑀤𑀓𑀚𑀸𑀢𑀺𑀬𑀸 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀉𑀤𑀓𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀯𑀝𑁆𑀞𑀓𑀣𑀸

𑁯𑁯. 𑀦𑀸𑀯𑀝𑁆𑀞𑁂 𑁋 𑀧𑀞𑀫𑀁 𑀢𑀸𑀯 𑀦𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀯𑀸 𑀦𑀸𑀫 𑀬𑀸𑀬 𑀢𑀭𑀢𑀻’’𑀢𑀺 𑀆𑀳. 𑀢𑀲𑁆𑀫𑀸 𑀇𑀥 𑀅𑀦𑁆𑀢𑀫𑀲𑁄 𑀭𑀚𑀦𑀤𑁄𑀡𑀺𑀓𑀸𑀧𑀺 𑀯𑁂𑀡𑀼𑀓𑀮𑀸𑀧𑀓𑁄𑀧𑀺 ‘‘𑀦𑀸𑀯𑀸’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑁂 𑀧𑀦 𑀥𑀼𑀯𑀦𑀸𑀯𑀸 𑀅𑀦𑁆𑀢𑁄 𑀔𑀡𑀺𑀢𑁆𑀯𑀸 𑀯𑀸 𑀨𑀮𑀓𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀓𑀢𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀢𑀺𑀡𑁆𑀡𑀁 𑀯𑀸𑀳𑀦𑀺𑀓𑀸 𑀏𑀯 𑀯𑀝𑁆𑀝𑀢𑀺. 𑀇𑀥 𑀧𑀦 𑀏𑀓𑀲𑁆𑀲𑀧𑀺 𑀯𑀸𑀳𑀦𑀺𑀓𑀸 ‘‘𑀦𑀸𑀯𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀦𑀸𑀯𑀸𑀬 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀸; 𑀢𑀲𑁆𑀲 𑀅𑀯𑀳𑀸𑀭𑀮𑀓𑁆𑀔𑀡𑀁 𑀣𑀮𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀯𑀁 𑀅𑀯𑀳𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀫𑁆𑀳𑀺 𑀘 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀕𑀫𑀦𑀆𑀫𑀲𑀦𑀨𑀦𑁆𑀤𑀸𑀧𑀦𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀩𑀦𑁆𑀥𑀦𑀁 𑀫𑁄𑀘𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀬𑀸 𑀩𑀦𑁆𑀥𑀦𑁂 𑀫𑀼𑀢𑁆𑀢𑀫𑀢𑁆𑀢𑁂 𑀞𑀸𑀦𑀸 𑀦 𑀘𑀯𑀢𑀺, 𑀢𑀲𑁆𑀲𑀸 𑀩𑀦𑁆𑀥𑀦𑀁 𑀬𑀸𑀯 ¶ 𑀦 𑀫𑀼𑀢𑁆𑀢𑀁 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀁. 𑀫𑀼𑀢𑁆𑀢𑁂 𑀧𑀦 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑀫𑁆𑀧𑀺 𑀳𑁄𑀢𑀺, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 𑀘𑀡𑁆𑀟𑀲𑁄𑀢𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀦𑀸𑀯𑀸𑀬 𑀏𑀓𑀁 𑀞𑀸𑀦𑀁 𑀩𑀦𑁆𑀥𑀦𑀫𑁂𑀯 ¶ , 𑀢𑀲𑁆𑀫𑀺𑀁 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀢𑁆𑀣 𑀬𑀼𑀢𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯. 𑀯𑀺𑀧𑁆𑀧𑀦𑀝𑁆𑀞𑀸 𑀦𑀸𑀯𑀸 𑀧𑀦 𑀬𑀁 𑀬𑀁 𑀉𑀤𑀓𑀧𑁆𑀧𑀤𑁂𑀲𑀁 𑀨𑀭𑀺𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺, 𑀲𑁆𑀯𑀸𑀲𑁆𑀲𑀸 𑀞𑀸𑀦𑀁. 𑀢𑀲𑁆𑀫𑀸 𑀢𑀁 𑀉𑀤𑁆𑀥𑀁 𑀯𑀸 𑀉𑀘𑁆𑀘𑀸𑀭𑁂𑀦𑁆𑀢𑀲𑁆𑀲, 𑀅𑀥𑁄 𑀯𑀸 𑀑𑀧𑀺𑀮𑀸𑀧𑁂𑀦𑁆𑀢𑀲𑁆𑀲, 𑀘𑀢𑀽𑀲𑀼 𑀯𑀸 𑀤𑀺𑀲𑀸𑀲𑀼 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀦𑀺𑀘𑁆𑀘𑀮𑁂 𑀉𑀤𑀓𑁂 𑀅𑀩𑀦𑁆𑀥𑀦𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑀦𑀸𑀯𑀁 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀯𑀸 𑀓𑀟𑁆𑀠𑀦𑁆𑀢𑀲𑁆𑀲 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑁂𑀦 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀤𑀓𑀢𑁄 𑀫𑁄𑀘𑀺𑀢𑁂 𑀅𑀥𑁄 𑀦𑀸𑀯𑀸𑀢𑀮𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀔𑀯𑀝𑁆𑀝𑀺𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀻𑀭𑁂 𑀩𑀦𑁆𑀥𑀺𑀢𑁆𑀯𑀸 𑀦𑀺𑀘𑁆𑀘𑀮𑁂 ¶ 𑀉𑀤𑀓𑁂 𑀞𑀧𑀺𑀢𑀦𑀸𑀯𑀸𑀬 𑀩𑀦𑁆𑀥𑀦𑀜𑁆𑀘 𑀞𑀺𑀢𑁄𑀓𑀸𑀲𑁄 𑀘𑀸𑀢𑀺 𑀤𑁆𑀯𑁂 𑀞𑀸𑀦𑀸𑀦𑀺. 𑀢𑀁 𑀧𑀞𑀫𑀁 𑀩𑀦𑁆𑀥𑀦𑀸 𑀫𑁄𑀘𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀙𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀧𑀘𑁆𑀙𑀸 𑀩𑀦𑁆𑀥𑀦𑀫𑁄𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀣𑀮𑁂 𑀉𑀲𑁆𑀲𑀸𑀤𑁂𑀢𑁆𑀯𑀸 𑀉𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀦𑀸𑀯𑀸𑀬 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁. 𑀢𑀲𑁆𑀲𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀦𑀸𑀯𑀸𑀬 𑀧𑀦 𑀫𑀼𑀔𑀯𑀝𑁆𑀝𑀺𑀬𑀸 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁, 𑀢𑀲𑁆𑀲𑀸𑀧𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑀁 𑀜𑀢𑁆𑀯𑀸 𑀬𑀢𑁄 𑀓𑀼𑀢𑁄𑀘𑀺 𑀨𑀼𑀝𑁆𑀞𑁄𑀓𑀸𑀲𑀁 𑀉𑀤𑁆𑀥𑀜𑁆𑀘 𑀓𑁂𑀲𑀕𑁆𑀕𑀫𑀢𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀣𑀮𑁂 𑀧𑀦 𑀉𑀲𑁆𑀲𑀸𑀤𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀤𑀸𑀭𑀼𑀖𑀝𑀺𑀓𑀸𑀦𑀁 𑀉𑀧𑀭𑀺 𑀞𑀧𑀺𑀢𑀦𑀸𑀯𑀸𑀬 𑀤𑀸𑀭𑀼𑀖𑀝𑀺𑀓𑀸𑀦𑀁 𑀨𑀼𑀝𑁆𑀞𑁄𑀓𑀸𑀲𑁄𑀬𑁂𑀯 𑀞𑀸𑀦𑀁, 𑀢𑀲𑁆𑀫𑀸 𑀢𑀢𑁆𑀣 𑀫𑀜𑁆𑀘𑀧𑀸𑀤𑀫𑀢𑁆𑀣𑀓𑁂𑀲𑀼𑀬𑁂𑀯 𑀧𑀢𑁆𑀣𑀝𑀩𑀤𑁆𑀥𑀲𑀸𑀝𑀓𑁂 𑀦𑀸𑀕𑀤𑀦𑁆𑀢𑁂𑀲𑀼 𑀞𑀧𑀺𑀢𑀪𑀺𑀦𑁆𑀤𑀺𑀯𑀸𑀮𑁂 𑀘 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁄𑀢𑁆𑀢𑀩𑀤𑁆𑀥𑀸𑀬 𑀧𑀦 𑀦𑀸𑀯𑀸𑀬 𑀲𑀝𑁆𑀞𑀺𑀲𑀢𑁆𑀢𑀢𑀺𑀩𑁆𑀬𑀸𑀫𑀧𑁆𑀧𑀫𑀸𑀡𑀁 𑀬𑁄𑀢𑁆𑀢𑀁 𑀅𑀫𑁄𑀘𑁂𑀢𑁆𑀯𑀸𑀯 𑀆𑀓𑀟𑁆𑀠𑀺𑀢𑁆𑀯𑀸

𑀧𑀣𑀯𑀺𑀮𑀕𑁆𑀕𑀁 𑀓𑀢𑁆𑀯𑀸 𑀲𑀳 𑀬𑁄𑀢𑁆𑀢𑁂𑀦 𑀣𑀮𑁂 𑀞𑀧𑀺𑀢𑀸𑀬 𑀦𑀸𑀯𑀸𑀬 ¶ 𑀦 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑀫𑁂𑀯 𑀞𑀸𑀦𑀁. 𑀅𑀣 𑀔𑁄 𑀬𑁄𑀢𑁆𑀢𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀸𑀯𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑁄 𑀢𑀸𑀯 𑀤𑀻𑀖𑀢𑁄, 𑀢𑀺𑀭𑀺𑀬𑀁 𑀧𑀦 𑀦𑀸𑀯𑀸𑀬 𑀘 𑀬𑁄𑀢𑁆𑀢𑀲𑁆𑀲 𑀘 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀧𑀭𑀺𑀬𑀦𑁆𑀢𑀧𑁆𑀧𑀫𑀸𑀡𑀁 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀤𑀻𑀖𑀢𑁄 𑀯𑀸 𑀢𑀺𑀭𑀺𑀬𑀢𑁄 𑀯𑀸 𑀓𑀟𑁆𑀠𑀦𑁆𑀢𑀲𑁆𑀲 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑁂𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀦𑁆𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂, 𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀁 𑀲𑀳 𑀬𑁄𑀢𑁆𑀢𑁂𑀦 𑀧𑀣𑀯𑀺𑀢𑁄 𑀫𑁄𑀘𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀬𑁄 𑀧𑀦 𑀢𑀺𑀢𑁆𑀣𑁂 𑀞𑀺𑀢𑀦𑀸𑀯𑀁 𑀆𑀭𑀼𑀳𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀭𑀺𑀢𑁆𑀢𑁂𑀦 𑀯𑀸 𑀨𑀺𑀬𑁂𑀦 𑀯𑀸 𑀧𑀸𑀚𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀙𑀢𑁆𑀢𑀁 𑀯𑀸 𑀧𑀡𑀸𑀫𑁂𑀢𑁆𑀯𑀸 𑀘𑀻𑀯𑀭𑀁 𑀯𑀸 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀮𑀗𑁆𑀓𑀸𑀭𑀲𑀤𑀺𑀲𑀁 𑀓𑀢𑁆𑀯𑀸 𑀯𑀸𑀢𑀁 𑀕𑀡𑁆𑀳𑀸𑀧𑁂𑀢𑀺, 𑀩𑀮𑀯𑀸 𑀘 𑀯𑀸𑀢𑁄 𑀆𑀕𑀫𑁆𑀫 𑀦𑀸𑀯𑀁 𑀳𑀭𑀢𑀺, 𑀯𑀸𑀢𑁂𑀦𑁂𑀯 𑀲𑀸 𑀳𑀝𑀸 𑀳𑁄𑀢𑀺; 𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄. 𑀧𑀬𑁄𑀕𑁄 𑀅𑀢𑁆𑀣𑀺, 𑀲𑁄 𑀧𑀦 𑀞𑀸𑀦𑀸 𑀘𑀸𑀯𑀦𑀧𑀬𑁄𑀕𑁄 ¶ 𑀦 𑀳𑁄𑀢𑀺. 𑀬𑀤𑀺 𑀧𑀦 𑀢𑀁 𑀦𑀸𑀯𑀁 𑀏𑀯𑀁 𑀕𑀘𑁆𑀙𑀦𑁆𑀢𑀺𑀁 𑀧𑀓𑀢𑀺𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀤𑀺𑀲𑀸𑀪𑀸𑀕𑀁 𑀦𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀬𑀫𑁂𑀯 𑀬𑀁𑀓𑀺𑀜𑁆𑀘𑀺 ¶ 𑀕𑀸𑀫𑀢𑀺𑀢𑁆𑀣𑀁 𑀲𑀫𑁆𑀧𑀢𑁆𑀢𑀁 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁄𑀯 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀦𑁂𑀯 𑀅𑀢𑁆𑀣𑀺 𑀅𑀯𑀳𑀸𑀭𑁄. 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺.

𑀦𑀸𑀯𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑀸𑀦𑀝𑁆𑀞𑀓𑀣𑀸

𑁧𑁦𑁦. 𑀬𑀸𑀦𑀝𑁆𑀞𑁂 𑁋 𑀬𑀸𑀦𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀦𑀁 𑀦𑀸𑀫 𑀯𑀬𑁆𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀭𑀺 𑀫𑀡𑁆𑀟𑀧𑀲𑀤𑀺𑀲𑀁 𑀧𑀤𑀭𑀘𑁆𑀙𑀦𑁆𑀦𑀁 𑀲𑀩𑁆𑀩𑀧𑀮𑀺𑀕𑀼𑀡𑁆𑀞𑀺𑀫𑀁 𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑀁 𑀯𑀬𑁆𑀳𑀁. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀕𑁄𑀧𑀸𑀦𑀲𑀺𑀬𑁄 𑀤𑀢𑁆𑀯𑀸 𑀕𑀭𑀼𑀴𑀧𑀓𑁆𑀔𑀓𑀦𑀬𑁂𑀦 𑀓𑀢𑀸 𑀲𑀦𑁆𑀤𑀫𑀸𑀦𑀺𑀓𑀸. 𑀭𑀣𑁄 𑀘 𑀲𑀓𑀝𑀜𑁆𑀘 𑀧𑀸𑀓𑀝𑀫𑁂𑀯. 𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀯𑀺𑀜𑁆𑀜𑀸𑀡𑀓𑀁 𑀯𑀸 𑀅𑀯𑀺𑀜𑁆𑀜𑀸𑀡𑀓𑀁 𑀯𑀸 𑀭𑀸𑀲𑀺𑀆𑀤𑀺𑀯𑀲𑁂𑀦 𑀞𑀧𑀺𑀢𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀦𑀸𑀯𑀝𑁆𑀞𑁂 𑀘 𑀣𑀮𑀝𑁆𑀞𑁂 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀸𑀦𑀝𑁆𑀞𑀁 𑀢𑀡𑁆𑀟𑀼𑀮𑀸𑀤𑀺𑀪𑀡𑁆𑀟𑀁 𑀧𑀺𑀝𑀓𑁂𑀦 𑀕𑀡𑁆𑀳𑀢𑁄 𑀧𑀺𑀝𑀓𑁂 𑀅𑀦𑀼𑀓𑁆𑀔𑀺𑀢𑁆𑀢𑁂𑀧𑀺 𑀧𑀺𑀝𑀓𑀁 𑀅𑀧𑀳𑀭𑀺𑀢𑁆𑀯𑀸 𑀢𑀡𑁆𑀟𑀼𑀮𑀸𑀤𑀻𑀦𑀁 𑀏𑀓𑀸𑀩𑀤𑁆𑀥𑀪𑀸𑀯𑁂 𑀯𑀺𑀓𑁄𑀧𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀣𑀮𑀝𑁆𑀞𑀸𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀬𑀸𑀦𑀁 ¶ 𑀅𑀯𑀳𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀫𑁆𑀳𑀺 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀤𑀼𑀓𑀬𑀼𑀢𑁆𑀢𑀲𑁆𑀲 𑀬𑀸𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑁄𑀡𑀸𑀦𑀁 𑀅𑀝𑁆𑀞 𑀧𑀸𑀤𑀸, 𑀤𑁆𑀯𑁂 𑀘 𑀘𑀓𑁆𑀓𑀸𑀦𑀻𑀢𑀺 𑀤𑀲 𑀞𑀸𑀦𑀸𑀦𑀺. 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀥𑀼𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀚𑀬𑀢𑁄 𑀕𑁄𑀡𑀸𑀦𑀁 𑀧𑀸𑀤𑀼𑀤𑁆𑀥𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀘𑀓𑁆𑀓𑀸𑀦𑀁 𑀧𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀧𑁆𑀧𑀤𑁂𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀕𑁄𑀡𑀸 ‘‘𑀦𑀸𑀬𑀁 𑀅𑀫𑁆𑀳𑀸𑀓𑀁 𑀲𑀸𑀫𑀺𑀓𑁄’’𑀢𑀺 𑀜𑀢𑁆𑀯𑀸 𑀥𑀼𑀭𑀁 𑀙𑀟𑁆𑀟𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺 𑀯𑀸 𑀨𑀦𑁆𑀤𑀦𑁆𑀢𑀺 𑀯𑀸, 𑀭𑀓𑁆𑀔𑀢𑀺 𑀢𑀸𑀯. 𑀕𑁄𑀡𑁂 𑀧𑀼𑀦 𑀉𑀚𑀼𑀓𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀥𑀼𑀭𑀁 𑀆𑀭𑁄𑀧𑁂𑀢𑁆𑀯𑀸 𑀤𑀴𑁆𑀳𑀁 𑀬𑁄𑀚𑁂𑀢𑁆𑀯𑀸 𑀧𑀸𑀘𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀚𑁂𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀁 𑀧𑀸𑀤𑀼𑀤𑁆𑀥𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀘𑀓𑁆𑀓𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁.

𑀲𑀘𑁂𑀧𑀺 𑀲𑀓𑀤𑁆𑀤𑀫𑁂 𑀫𑀕𑁆𑀕𑁂 𑀏𑀓𑀁 𑀘𑀓𑁆𑀓𑀁 𑀓𑀤𑁆𑀤𑀫𑁂 𑀮𑀕𑁆𑀕𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀘𑀓𑁆𑀓𑀁 𑀕𑁄𑀡𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀸 𑀧𑀯𑀢𑁆𑀢𑁂𑀦𑁆𑀢𑀺, 𑀏𑀓𑀲𑁆𑀲 𑀞𑀺𑀢𑀢𑁆𑀢𑀸 𑀦 𑀢𑀸𑀯 𑀅𑀯𑀳𑀸𑀭𑁄 𑀳𑁄𑀢𑀺 ¶ . 𑀕𑁄𑀡𑁂 𑀧𑀦 𑀧𑀼𑀦 𑀉𑀚𑀼𑀓𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀧𑀸𑀚𑁂𑀦𑁆𑀢𑀲𑁆𑀲 𑀞𑀺𑀢𑀘𑀓𑁆𑀓𑁂 𑀓𑁂𑀲𑀕𑁆𑀕𑀫𑀢𑁆𑀢𑀁 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀘𑀢𑀼𑀬𑀼𑀢𑁆𑀢𑀓𑀲𑁆𑀲 𑀧𑀦 𑀅𑀝𑁆𑀞𑀸𑀭𑀲 𑀞𑀸𑀦𑀸𑀦𑀺, 𑀅𑀝𑁆𑀞𑀬𑀼𑀢𑁆𑀢𑀓𑀲𑁆𑀲 𑀘𑀢𑀼𑀢𑁆𑀢𑀺𑀁𑀲𑀸𑀢𑀺 𑁋 𑀏𑀢𑁂𑀦𑀼𑀧𑀸𑀬𑁂𑀦 𑀬𑀼𑀢𑁆𑀢𑀬𑀸𑀦𑀲𑁆𑀲 𑀞𑀸𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀁 𑀧𑀦 𑀅𑀬𑀼𑀢𑁆𑀢𑀓𑀁 𑀥𑀼𑀭𑁂 𑀏𑀓𑀸𑀬 𑀧𑀘𑁆𑀙𑀢𑁄 𑀘 𑀤𑁆𑀯𑀻𑀳𑀺 𑀉𑀧𑀢𑁆𑀣𑀫𑁆𑀪𑀺𑀦𑀻𑀳𑀺 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀞𑀧𑀺𑀢𑀁, 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀧𑀢𑁆𑀣𑀫𑁆𑀪𑀺𑀦𑀻𑀦𑀁 𑀘𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀧𑀜𑁆𑀘 𑀞𑀸𑀦𑀸𑀦𑀺. 𑀲𑀘𑁂 𑀥𑀼𑀭𑁂 𑀉𑀧𑀢𑁆𑀣𑀫𑁆𑀪𑀺𑀦𑀻 𑀳𑁂𑀝𑁆𑀞𑀸𑀪𑀸𑀕𑁂 ¶ 𑀓𑀧𑁆𑀧𑀓𑀢𑀸 𑀳𑁄𑀢𑀺, 𑀙 𑀞𑀸𑀦𑀸𑀦𑀺. 𑀧𑀘𑁆𑀙𑀢𑁄 𑀧𑀦 𑀅𑀦𑀼𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀥𑀼𑀭𑁂 𑀉𑀧𑀢𑁆𑀣𑀫𑁆𑀪𑀺𑀢𑀲𑁆𑀲𑁂𑀯 𑀉𑀧𑀢𑁆𑀣𑀫𑁆𑀪𑀺𑀦𑀻𑀯𑀲𑁂𑀦 𑀢𑀻𑀡𑀺 𑀯𑀸 𑀘𑀢𑁆𑀢𑀸𑀭𑀺 𑀯𑀸 𑀞𑀸𑀦𑀸𑀦𑀺. 𑀥𑀼𑀭𑁂𑀦 𑀨𑀮𑀓𑀲𑁆𑀲 𑀯𑀸 𑀤𑀸𑀭𑀼𑀓𑀲𑁆𑀲 𑀯𑀸 𑀉𑀧𑀭𑀺 𑀞𑀧𑀺𑀢𑀲𑁆𑀲 𑀢𑀻𑀡𑀺 𑀞𑀸𑀦𑀸𑀦𑀺. 𑀢𑀣𑀸 𑀧𑀣𑀯𑀺𑀬𑀁 𑀞𑀧𑀺𑀢𑀲𑁆𑀲. 𑀢𑀁 𑀥𑀼𑀭𑀁𑀓𑀟𑁆𑀠𑀺𑀢𑁆𑀯𑀸 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀘𑀓𑁆𑀓𑀸𑀦𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀓𑁂𑀲𑀕𑁆𑀕𑀫𑀢𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀘𑀓𑁆𑀓𑀸𑀦𑀺 𑀅𑀧𑀦𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀓𑁆𑀔𑀲𑀻𑀲𑁂𑀳𑀺 𑀤𑀸𑀭𑀽𑀦𑀁 𑀉𑀧𑀭𑀺 𑀞𑀧𑀺𑀢𑀲𑁆𑀲 𑀤𑁆𑀯𑁂 𑀞𑀸𑀦𑀸𑀦𑀺. 𑀢𑀁 𑀓𑀟𑁆𑀠𑀦𑁆𑀢𑁄 𑀯𑀸 𑀉𑀓𑁆𑀔𑀺𑀧𑀦𑁆𑀢𑁄 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀪𑀽𑀫𑀺𑀬𑀁 𑀞𑀧𑀺𑀢𑀲𑁆𑀲 𑀥𑀼𑀭𑁂𑀦 𑀘 𑀘𑀢𑀽𑀳𑀺 𑀘 𑀅𑀓𑁆𑀔𑀼𑀤𑁆𑀥𑀻𑀳𑀺 𑀧𑀢𑀺𑀝𑁆𑀞𑀺𑀢𑀯𑀲𑁂𑀦 𑀧𑀜𑁆𑀘 𑀞𑀸𑀦𑀸𑀦𑀺. 𑀢𑀁 𑀥𑀼𑀭𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑀢𑁄 𑀉𑀤𑁆𑀥𑀻𑀦𑀁 𑀧𑀘𑁆𑀙𑀺𑀫𑀦𑁆𑀢𑁂𑀳𑀺 𑀧𑀼𑀭𑀺𑀫𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀻𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑀢𑁄 𑀉𑀤𑁆𑀥𑀻𑀦𑀁 𑀧𑀼𑀭𑀺𑀫𑀦𑁆𑀢𑁂𑀳𑀺 𑀧𑀘𑁆𑀙𑀺𑀫𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀲𑁆𑀲𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑀢𑁄 𑀉𑀤𑁆𑀥𑀻𑀦𑀁𑀬𑁂𑀯 𑀢𑀺𑀭𑀺𑀬𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀲𑁆𑀲 𑀅𑀢𑀺𑀓𑁆𑀓𑀫𑁂𑀦 𑀧𑀸𑀭𑀸𑀚𑀺𑀓𑀁. 𑀫𑀚𑁆𑀛𑁂 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀁 𑀧𑀣𑀯𑀺𑀢𑁄 ¶ 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀣 𑀉𑀤𑁆𑀥𑀺𑀔𑀸𑀡𑀼𑀓𑀸 𑀦 𑀳𑁄𑀦𑁆𑀢𑀺, 𑀲𑀫𑀫𑁂𑀯 𑀩𑀸𑀳𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀓𑁆𑀔𑀲𑀻𑀲𑀸𑀦𑀺 𑀧𑀯𑁂𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀳𑁂𑀝𑁆𑀞𑀺𑀫𑀢𑀮𑀲𑁆𑀲 𑀲𑀫𑀦𑁆𑀢𑀸 𑀲𑀩𑁆𑀩𑀁 𑀧𑀣𑀯𑀺𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀉𑀤𑁆𑀥𑀜𑁆𑀘 𑀨𑀼𑀝𑁆𑀞𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀪𑀽𑀫𑀺𑀬𑀁 𑀦𑀸𑀪𑀺𑀬𑀸 𑀞𑀧𑀺𑀢𑀘𑀓𑁆𑀓𑀲𑁆𑀲 𑀏𑀓𑀫𑁂𑀯 𑀞𑀸𑀦𑀁, 𑀢𑀲𑁆𑀲 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀭𑀺𑀘𑁆𑀙𑁂𑀤𑁄. 𑀦𑁂𑀫𑀺𑀧𑀲𑁆𑀲𑁂𑀦 𑀘 𑀦𑀸𑀪𑀺𑀬𑀸 𑀘 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀤𑁆𑀯𑁂 𑀞𑀸𑀦𑀸𑀦𑀺. 𑀦𑁂𑀫𑀺𑀬𑀸 𑀉𑀝𑁆𑀞𑀺𑀢𑀪𑀸𑀕𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀪𑀽𑀫𑀺𑀬𑀁 𑀨𑀼𑀲𑀸𑀧𑁂𑀢𑁆𑀯𑀸 𑀅𑀭𑁂𑀲𑀼 ¶ 𑀯𑀸 𑀦𑁂𑀫𑀺𑀬𑀸 𑀯𑀸 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀁 𑀞𑀸𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀞𑀺𑀢𑁂𑀧𑀺 𑀅𑀯𑀲𑁂𑀲𑀝𑁆𑀞𑀸𑀦𑁂 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀘𑀓𑁆𑀓𑀲𑁆𑀲𑀸𑀧𑀺 𑀤𑁆𑀯𑁂 𑀞𑀸𑀦𑀸𑀦𑀺. 𑀢𑀢𑁆𑀣 𑀧𑀞𑀫𑀁 𑀪𑀺𑀢𑁆𑀢𑀺𑀢𑁄 𑀫𑁄𑀘𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀧𑀣𑀯𑀺𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀼𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀪𑀽𑀫𑀺𑀢𑁄 𑀫𑁄𑀘𑁂𑀦𑁆𑀢𑀲𑁆𑀲 𑀧𑀦 𑀲𑀘𑁂 𑀪𑀺𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀦 𑀓𑀼𑀧𑁆𑀧𑀢𑀺, 𑀏𑀲𑁂𑀯 𑀦𑀬𑁄. 𑀅𑀣 𑀅𑀭𑁂𑀲𑀼 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀓𑀟𑁆𑀠𑀦𑁆𑀢𑀲𑁆𑀲 𑀪𑀺𑀢𑁆𑀢𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁄𑀓𑀸𑀲𑀲𑁆𑀲 𑀉𑀧𑀭𑀺𑀫𑁄 𑀅𑀦𑁆𑀢𑁄 𑀳𑁂𑀝𑁆𑀞𑀺𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀧𑀸𑀭𑀸𑀚𑀺𑀓𑀁. 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂 𑀬𑀸𑀦𑁂 𑀬𑀸𑀦𑀲𑀸𑀫𑀺𑀓𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀑𑀭𑁄𑀳𑀺𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁄 𑀆𑀭𑀓𑁆𑀔𑀲𑀼𑀜𑁆𑀜𑀁 𑀧𑀲𑁆𑀲𑀺𑀢𑁆𑀯𑀸, ‘‘𑀬𑀸𑀦𑀁 𑀅𑀯𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀭𑁄𑀳𑀢𑀺, 𑀢𑀲𑁆𑀲 𑀧𑀬𑁄𑀕𑀁 𑀯𑀺𑀦𑀸𑀬𑁂𑀯 𑀕𑁄𑀡𑀸 𑀕𑀳𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑀸, 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀲𑁂𑀲𑀁 𑀦𑀸𑀯𑀸𑀬𑀁 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺.

𑀬𑀸𑀦𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀭𑀝𑁆𑀞𑀓𑀣𑀸

𑁧𑁦𑁧. 𑀇𑀢𑁄 ¶ 𑀧𑀭𑀁 𑀪𑀸𑀭𑁄𑀬𑁂𑀯 𑀪𑀸𑀭𑀝𑁆𑀞𑀁. 𑀲𑁄 𑀲𑀻𑀲𑀪𑀸𑀭𑀸𑀤𑀺𑀯𑀲𑁂𑀦 𑀘𑀢𑀼𑀥𑀸 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀲𑀻𑀲𑀪𑀸𑀭𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀻𑀲𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀻𑀲𑀲𑁆𑀲 𑀢𑀸𑀯 𑀧𑀼𑀭𑀺𑀫𑀕𑀮𑁂 𑀕𑀮𑀯𑀸𑀝𑀓𑁄, 𑀧𑀺𑀝𑁆𑀞𑀺𑀕𑀮𑁂 𑀓𑁂𑀲𑀜𑁆𑀘𑀺 𑀓𑁂𑀲𑀦𑁆𑀢𑁂 𑀆𑀯𑀝𑁆𑀝𑁄 𑀳𑁄𑀢𑀺, 𑀕𑀮𑀲𑁆𑀲𑁂𑀯 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑁂𑀲𑀜𑁆𑀘𑀺 𑀓𑁂𑀲𑀸 𑀑𑀭𑀼𑀬𑁆𑀳 𑀚𑀸𑀬𑀦𑁆𑀢𑀺, 𑀬𑁂 𑀓𑀡𑁆𑀡𑀘𑀽𑀴𑀺𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀥𑁄𑀪𑀸𑀕𑁄 𑀘𑀸𑀢𑀺 𑀅𑀬𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀉𑀧𑀭𑀺 𑀲𑀻𑀲𑀁. 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀲𑀻𑀲𑀪𑀸𑀭𑁄 𑀦𑀸𑀫.

𑀉𑀪𑁄𑀲𑀼 ¶ 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀓𑀧𑁆𑀧𑀭𑁂𑀳𑀺 𑀧𑀝𑁆𑀞𑀸𑀬 𑀉𑀧𑀭𑀺, 𑀧𑀺𑀝𑁆𑀞𑀺𑀕𑀮𑀸𑀯𑀢𑁆𑀢𑀢𑁄 𑀘 𑀕𑀮𑀯𑀸𑀝𑀓𑀢𑁄 𑀘 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀸𑀯𑀢𑁆𑀢𑀢𑁄 𑀘 𑀉𑀭𑀧𑀭𑀺𑀘𑁆𑀙𑁂𑀤𑀫𑀚𑁆𑀛𑁂 𑀳𑀤𑀬𑀆𑀯𑀸𑀝𑀢𑁄 𑀘 𑀧𑀝𑁆𑀞𑀸𑀬 𑀉𑀧𑀭𑀺 𑀔𑀦𑁆𑀥𑁄. 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀔𑀦𑁆𑀥𑀪𑀸𑀭𑁄 𑀦𑀸𑀫.

𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀸𑀯𑀢𑁆𑀢𑀢𑁄 𑀧𑀦 𑀳𑀤𑀬𑀆𑀯𑀸𑀝𑀢𑁄 𑀘 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀬𑀸𑀯 𑀧𑀸𑀤𑀦𑀔𑀲𑀺𑀔𑀸, 𑀅𑀬𑀁 𑀓𑀝𑀺𑀧𑀭𑀺𑀘𑁆𑀙𑁂𑀤𑁄. 𑀏𑀢𑁆𑀣𑀦𑁆𑀢𑀭𑁂 𑀲𑀫𑀦𑁆𑀢𑀢𑁄 𑀲𑀭𑀻𑀭𑁂 𑀞𑀺𑀢𑀪𑀸𑀭𑁄 𑀓𑀝𑀺𑀪𑀸𑀭𑁄 𑀦𑀸𑀫.

𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀧𑀦 𑀳𑁂𑀝𑁆𑀞𑀸 𑀬𑀸𑀯 𑀳𑀢𑁆𑀣𑀦𑀔𑀲𑀺𑀔𑀸, 𑀅𑀬𑀁 𑀑𑀮𑀫𑁆𑀩𑀓𑀧𑀭𑀺𑀘𑁆𑀙𑁂𑀤𑁄. 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀑𑀮𑀫𑁆𑀩𑀓𑁄 𑀦𑀸𑀫.

𑀇𑀤𑀸𑀦𑀺 𑀲𑀻𑀲𑁂 𑀪𑀸𑀭𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀅𑀧𑀼𑀩𑁆𑀩𑀯𑀺𑀦𑀺𑀘𑁆𑀙𑀬𑁄 ¶ 𑁋 𑀬𑁄 𑀪𑀺𑀓𑁆𑀔𑀼 ‘‘𑀇𑀤𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀬𑀸𑀳𑀻’’𑀢𑀺 𑀲𑀸𑀫𑀺𑀓𑁂𑀳𑀺 𑀅𑀦𑀸𑀡𑀢𑁆𑀢𑁄 𑀲𑀬𑀫𑁂𑀯 ‘‘𑀫𑀬𑁆𑀳𑀁 𑀇𑀤𑀁 𑀦𑀸𑀫 𑀤𑁂𑀣, 𑀅𑀳𑀁 𑀯𑁄 𑀪𑀡𑁆𑀟𑀁 𑀯𑀳𑀸𑀫𑀻’’𑀢𑀺 𑀢𑁂𑀲𑀁 𑀪𑀡𑁆𑀟𑀁 𑀲𑀻𑀲𑁂𑀦 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀁 𑀪𑀡𑁆𑀟𑀁 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀬𑀣𑀸𑀯𑀼𑀢𑁆𑀢𑀲𑀻𑀲𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀸𑀫𑁂𑀦𑁆𑀢𑁄𑀯 𑀇𑀢𑁄 𑀘𑀺𑀢𑁄 𑀘 𑀖𑀁𑀲𑀦𑁆𑀢𑁄 𑀲𑀸𑀭𑁂𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀢𑀺𑀧𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀔𑀦𑁆𑀥𑀁 𑀑𑀭𑁄𑀧𑀺𑀢𑀫𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 𑀲𑀸𑀫𑀺𑀓𑀸𑀦𑀁 ‘‘𑀯𑀳𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀅𑀦𑀸𑀡𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁. 𑀔𑀦𑁆𑀥𑀁 𑀧𑀦 𑀅𑀦𑁄𑀭𑁄𑀧𑁂𑀢𑁆𑀯𑀸𑀧𑀺 𑀲𑀻𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀁 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀬𑀫𑀓𑀪𑀸𑀭𑀲𑁆𑀲 𑀧𑀦 𑀏𑀓𑁄 𑀪𑀸𑀭𑁄 𑀲𑀻𑀲𑁂 𑀧𑀢𑀺𑀝𑁆𑀞𑀸𑀢𑀺, 𑀏𑀓𑁄 𑀧𑀺𑀝𑁆𑀞𑀺𑀬𑀁, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀞𑀸𑀦𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀲𑀼𑀤𑁆𑀥𑀲𑀻𑀲𑀪𑀸𑀭𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀬𑁄 𑀘𑀸𑀬𑀁 𑀲𑀻𑀲𑀪𑀸𑀭𑁂 𑀯𑀼𑀢𑁆𑀢𑁄, 𑀔𑀦𑁆𑀥𑀪𑀸𑀭𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀳𑀢𑁆𑀣𑁂 𑀪𑀸𑀭𑀦𑁆𑀢𑀺 𑀏𑀢𑁆𑀣 𑀧𑀦 𑀳𑀢𑁆𑀣𑁂𑀦 𑀕𑀳𑀺𑀢𑀢𑁆𑀢𑀸 𑀑𑀮𑀫𑁆𑀩𑀓𑁄 ‘‘𑀳𑀢𑁆𑀣𑁂 𑀪𑀸𑀭𑁄’’𑀢𑀺 𑀯𑀼𑀢𑁆𑀢𑁄.

𑀲𑁄 𑀧𑀞𑀫𑀁𑀬𑁂𑀯 𑀪𑀽𑀫𑀺𑀢𑁄 𑀯𑀸 𑀕𑀳𑀺𑀢𑁄 𑀳𑁄𑀢𑀼, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀲𑀻𑀲𑀸𑀤𑀻𑀳𑀺 𑀯𑀸, ‘‘𑀳𑀢𑁆𑀣𑁂 𑀪𑀸𑀭𑁄’’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 ¶ . 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀸𑀤𑀺𑀲𑀁 𑀕𑀳𑀦𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀪𑀽𑀫𑀺𑀬𑀁 𑀯𑀸 𑀕𑀘𑁆𑀙𑀸𑀤𑀻𑀲𑀼 𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀪𑀽𑀫𑀺𑀢𑁄 𑀕𑀡𑁆𑀳𑀸𑀢𑀻𑀢𑀺 𑀏𑀢𑁆𑀣 𑀧𑀦 𑀢𑁂𑀲𑀁 𑀪𑀸𑀭𑀸𑀦𑀁 𑀬𑀁𑀓𑀺𑀜𑁆𑀘𑀺 𑀧𑀸𑀢𑀭𑀸𑀲𑀸𑀤𑀺𑀓𑀸𑀭𑀡𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀤𑁆𑀥𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀦𑁆𑀢𑀺.

𑀪𑀸𑀭𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀸𑀫𑀝𑁆𑀞𑀓𑀣𑀸

𑁧𑁦𑁨. 𑀆𑀭𑀸𑀫𑀝𑁆𑀞𑁂𑀧𑀺 ¶ 𑁋 𑀆𑀭𑀸𑀫𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀨𑀮𑀸𑀭𑀸𑀫𑁄’’𑀢𑀺 𑀆𑀳. 𑀢𑁂𑀲𑀼 𑀯𑀲𑁆𑀲𑀺𑀓𑀸𑀤𑀻𑀦𑀁 𑀧𑀼𑀧𑁆𑀨𑀦𑀓𑁄 𑀧𑀼𑀧𑁆𑀨𑀸𑀭𑀸𑀫𑁄. 𑀅𑀫𑁆𑀩𑀨𑀮𑀸𑀤𑀻𑀦𑀁 𑀨𑀮𑀦𑀓𑁄 𑀨𑀮𑀸𑀭𑀸𑀫𑁄. 𑀆𑀭𑀸𑀫𑁂 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀪𑀽𑀫𑀝𑁆𑀞𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁄 𑀏𑀯.

𑀢𑀢𑁆𑀣𑀚𑀸𑀢𑀓𑁂 𑀧𑀦 𑀫𑀽𑀮𑀦𑁆𑀢𑀺 𑀉𑀲𑀻𑀭𑀳𑀺𑀭𑀺𑀯𑁂𑀭𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀫𑀽𑀮𑀁, 𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀸 𑀉𑀧𑁆𑀧𑀸𑀝𑀺𑀢𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑁂𑀦 𑀫𑀽𑀮𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀕𑀳𑀺𑀢𑁂 ¶ 𑀧𑀸𑀭𑀸𑀚𑀺𑀓𑀁. 𑀓𑀦𑁆𑀤𑁄𑀧𑀺 𑀫𑀽𑀮𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀘𑁂𑀢𑁆𑀣 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀅𑀘𑁆𑀙𑀺𑀦𑁆𑀦𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀪𑀺𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀘𑀦𑁆𑀢𑀺 𑀪𑁂𑀲𑀚𑁆𑀚𑀢𑁆𑀣𑀸𑀬 𑀯𑀸 𑀭𑀚𑀦𑀢𑁆𑀣𑀸𑀬 𑀯𑀸 𑀉𑀧𑀬𑁄𑀕𑀕𑀫𑀦𑀽𑀧𑀕𑀁 𑀬𑀁𑀓𑀺𑀜𑁆𑀘𑀺 𑀭𑀼𑀓𑁆𑀔𑀢𑁆𑀢𑀘𑀁; 𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀸 𑀉𑀧𑁆𑀧𑀸𑀝𑀺𑀢𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀫𑀽𑀮𑁂 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀸𑀚𑀺𑀓𑀁. 𑀧𑀼𑀧𑁆𑀨𑀦𑁆𑀢𑀺 𑀯𑀲𑁆𑀲𑀺𑀓𑀫𑀮𑁆𑀮𑀺𑀓𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀁, 𑀢𑀁 𑀑𑀘𑀺𑀦𑀺𑀢𑁆𑀯𑀸 𑀯𑀸 𑀑𑀘𑀺𑀦𑀺𑀢𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀮𑀧𑀤𑀼𑀫𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀸𑀚𑀺𑀓𑀁. 𑀧𑀼𑀧𑁆𑀨𑀸𑀦𑀫𑁆𑀧𑀺 𑀳𑀺 𑀯𑀡𑁆𑀝𑀁 𑀯𑀸 𑀩𑀦𑁆𑀥𑀦𑀁 𑀯𑀸 𑀅𑀘𑁆𑀙𑀺𑀦𑁆𑀦𑀁 𑀭𑀓𑁆𑀔𑀢𑀺. 𑀯𑀡𑁆𑀝𑀩𑁆𑀪𑀦𑁆𑀢𑀭𑁂 𑀧𑀦 𑀓𑁂𑀲𑀜𑁆𑀘𑀺 𑀲𑀽𑀘𑀺𑀓𑀸 𑀳𑁄𑀢𑀺, 𑀲𑀸 𑀦 𑀭𑀓𑁆𑀔𑀢𑀺. 𑀨𑀮𑀦𑁆𑀢𑀺 𑀅𑀫𑁆𑀩𑀨𑀮𑀢𑀸𑀮𑀨𑀮𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺, 𑀢𑀁 𑀭𑀼𑀓𑁆𑀔𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀭𑀼𑀓𑁆𑀔𑁂 𑀮𑀕𑁆𑀕𑀺𑀢𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀅𑀧𑀦𑁂𑀢𑁆𑀯𑀸 𑀞𑀧𑀺𑀢𑀁 𑀪𑀽𑀫𑀝𑁆𑀞𑀸𑀤𑀺𑀲𑀗𑁆𑀕𑀳𑀺𑀢𑀫𑁂𑀯.

𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀻𑀢𑀺 𑀧𑀭𑀲𑀦𑁆𑀢𑀓𑀁 ‘‘𑀫𑀫 𑀲𑀦𑁆𑀢𑀓𑁄 𑀅𑀬’’𑀦𑁆𑀢𑀺 𑀫𑀼𑀲𑀸 𑀪𑀡𑀺𑀢𑁆𑀯𑀸 𑀅𑀪𑀺𑀬𑀼𑀜𑁆𑀚𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀁. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀢𑀸𑀬 𑀩𑀮𑀯𑀦𑀺𑀲𑁆𑀲𑀺𑀢𑀸𑀤𑀺𑀪𑀸𑀯𑁂𑀦 𑀯𑀸 𑀆𑀭𑀸𑀫𑀲𑀸𑀫𑀺𑀓𑀲𑁆𑀲 𑀲𑀁𑀲𑀬𑀁 𑀚𑀦𑁂𑀢𑀺. 𑀓𑀣𑀁? 𑀢𑀜𑁆𑀳𑀺 𑀢𑀣𑀸 𑀯𑀺𑀦𑀺𑀘𑁆𑀙𑀬𑀧𑁆𑀧𑀲𑀼𑀢𑀁 𑀤𑀺𑀲𑁆𑀯𑀸 𑀲𑀸𑀫𑀺𑀓𑁄 𑀘𑀺𑀦𑁆𑀢𑁂𑀢𑀺 𑁋 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀇𑀫𑀁 𑀆𑀭𑀸𑀫𑀁 𑀅𑀢𑁆𑀢𑀦𑁄 𑀓𑀸𑀢𑀼𑀁, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄’’𑀢𑀺. 𑀏𑀯𑀁 𑀢𑀲𑁆𑀲 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑁂𑀦 𑀉𑀧𑁆𑀧𑀸𑀤𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺.

𑀥𑀼𑀭𑀁 ¶ 𑀦𑀺𑀓𑁆𑀔𑀺𑀧𑀢𑀻𑀢𑀺 𑀬𑀤𑀸 𑀧𑀦 𑀲𑀸𑀫𑀺𑀓𑁄 ‘‘𑀅𑀬𑀁 𑀣𑀤𑁆𑀥𑁄 𑀓𑀓𑁆𑀔𑀴𑁄 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬, 𑀅𑀮𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀆𑀭𑀸𑀫𑁂𑀦𑀸’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀅𑀪𑀺𑀬𑀼𑀜𑁆𑀚𑀓𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀲𑀬𑀫𑁆𑀧𑀺 𑀓𑀢𑀥𑀼𑀭𑀦𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀅𑀣 𑀘 𑀧𑀦 𑀲𑀸𑀫𑀺𑀓𑁂𑀦 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑁂𑀧𑀺 𑀅𑀪𑀺𑀬𑀼𑀜𑁆𑀚𑀓𑁄 𑀥𑀼𑀭𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 ‘‘𑀇𑀫𑀁 𑀲𑀼𑀝𑁆𑀞𑀼 𑀧𑀻𑀴𑁂𑀢𑁆𑀯𑀸 𑀫𑀫 𑀆𑀡𑀸𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀺𑀗𑁆𑀓𑀸𑀭𑀧𑁆𑀧𑀝𑀺𑀲𑁆𑀲𑀸𑀯𑀺𑀪𑀸𑀯𑁂 ¶ 𑀦𑀁 𑀞𑀧𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀢𑀩𑁆𑀩𑀪𑀸𑀯𑁂 𑀲𑀉𑀲𑁆𑀲𑀸𑀳𑁄 𑀳𑁄𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀅𑀣𑀸𑀧𑀺 𑀅𑀪𑀺𑀬𑀼𑀜𑁆𑀚𑀓𑁄 ‘‘𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ¶ 𑀦 𑀤𑀸𑀦𑀺 𑀦𑀁 𑀇𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀸𑀫𑀺𑀓𑁄 𑀧𑀦 𑀦 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀧𑀓𑁆𑀔𑀁 𑀧𑀭𑀺𑀬𑁂𑀲𑀢𑀺, 𑀓𑀸𑀮𑀁 𑀆𑀕𑀫𑁂𑀢𑀺, ‘‘𑀮𑀚𑁆𑀚𑀺𑀧𑀭𑀺𑀲𑀁 𑀢𑀸𑀯 𑀮𑀪𑀸𑀫𑀺, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦 𑀕𑀳𑀡𑁂𑀬𑁂𑀯 𑀲𑀉𑀲𑁆𑀲𑀸𑀳𑁄 𑀳𑁄𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀬𑀤𑀸 𑀧𑀦 𑀲𑁄𑀧𑀺 ‘‘𑀦 𑀤𑀲𑁆𑀲𑀸𑀫𑀻’’𑀢𑀺, 𑀲𑀸𑀫𑀺𑀓𑁄𑀧𑀺 ‘‘𑀦 𑀮𑀘𑁆𑀙𑀸𑀫𑀻’’𑀢𑀺 𑁋 𑀏𑀯𑀁 𑀉𑀪𑁄𑀧𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀢𑀤𑀸 𑀅𑀪𑀺𑀬𑀼𑀜𑁆𑀚𑀓𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀦 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀓𑀼𑀭𑀼𑀫𑀸𑀦𑁄 𑀅𑀦𑀺𑀝𑁆𑀞𑀺𑀢𑁂 𑀯𑀺𑀦𑀺𑀘𑁆𑀙𑀬𑁂 𑀲𑀸𑀫𑀺𑀓𑁂𑀦𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀓𑀢𑁂 𑀅𑀢𑁆𑀢𑀦𑁄 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯 𑀢𑀢𑁄 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀕𑀡𑁆𑀳𑀸𑀢𑀺, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

𑀥𑀫𑁆𑀫𑀁 𑀘𑀭𑀦𑁆𑀢𑁄𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀸 𑀭𑀸𑀚𑀓𑀼𑀮𑁂 𑀯𑀸 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑁄. 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀺𑀓𑀸𑀦𑀁 𑀉𑀓𑁆𑀓𑁄𑀘𑀁 𑀤𑀢𑁆𑀯𑀸 𑀓𑀽𑀝𑀲𑀓𑁆𑀔𑀺𑀁 𑀑𑀢𑀸𑀭𑁂𑀢𑁆𑀯𑀸 𑀆𑀭𑀸𑀫𑀲𑀸𑀫𑀺𑀓𑀁 𑀚𑀺𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀦 𑀓𑁂𑀯𑀮𑀁 𑀢𑀲𑁆𑀲𑁂𑀯, 𑀲𑀜𑁆𑀘𑀺𑀘𑁆𑀘 𑀢𑀲𑁆𑀲 𑀅𑀢𑁆𑀣𑀲𑀸𑀥𑀦𑁂 𑀧𑀯𑀢𑁆𑀢𑀸𑀦𑀁 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀸𑀦𑀫𑁆𑀧𑀺 𑀓𑀽𑀝𑀲𑀓𑁆𑀔𑀻𑀦𑀫𑁆𑀧𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀏𑀢𑁆𑀣 𑀘 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀧𑀭𑀸𑀚𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀳𑀺 𑀅𑀧𑀭𑀸𑀚𑀺𑀢𑁄𑀯 𑀳𑁄𑀢𑀺. 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀧𑀭𑀚𑁆𑀚𑀢𑀻𑀢𑀺 𑀲𑀘𑁂𑀧𑀺 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀲𑀬𑀁 𑀧𑀭𑀸𑀚𑀬𑀁 𑀧𑀸𑀧𑀼𑀡𑀸𑀢𑀺; 𑀏𑀯𑀫𑁆𑀧𑀺 𑀫𑀼𑀲𑀸𑀯𑀸𑀤𑁂𑀦 𑀲𑀸𑀫𑀺𑀓𑀸𑀦𑀁 𑀧𑀻𑀴𑀸𑀓𑀭𑀡𑀧𑀘𑁆𑀘𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀻𑀢𑀺.

𑀆𑀭𑀸𑀫𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀳𑀸𑀭𑀝𑁆𑀞𑀓𑀣𑀸

𑁧𑁦𑁩. 𑀯𑀺𑀳𑀸𑀭𑀝𑁆𑀞𑁂𑀧𑀺 𑁋 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀪𑀺𑀬𑁄𑀕𑁂𑀧𑀺 𑀘𑁂𑀢𑁆𑀣 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀁 𑀯𑀺𑀳𑀸𑀭𑀁 𑀯𑀸 𑀧𑀭𑀺𑀯𑁂𑀡𑀁 𑀯𑀸 𑀆𑀯𑀸𑀲𑀁 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀔𑀼𑀤𑁆𑀤𑀓𑀫𑁆𑀧𑀺 𑀅𑀪𑀺𑀬𑀼𑀜𑁆𑀚𑀢𑁄 𑀅𑀪𑀺𑀬𑁄𑀕𑁄 𑀦 𑀭𑀼𑀳𑀢𑀺. 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀦 𑀳𑁂𑀢𑁆𑀣 𑀲𑀩𑁆𑀩𑁂 𑀘𑀸𑀢𑀼𑀤𑁆𑀤𑀺𑀲𑀸 𑀪𑀺𑀓𑁆𑀔𑀽 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀻𑀢𑀺 ¶ . 𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀓𑁆𑀓𑁄𑀢𑀺 ¶ 𑀢𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑀼𑀁. 𑀢𑀲𑁆𑀫𑀸 𑀢𑀢𑁆𑀣 𑀆𑀭𑀸𑀫𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀯𑀺𑀳𑀸𑀭𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀔𑁂𑀢𑁆𑀢𑀝𑁆𑀞𑀓𑀣𑀸

𑁧𑁦𑁪. 𑀔𑁂𑀢𑁆𑀢𑀝𑁆𑀞𑁂𑀧𑀺 ¶ 𑁋 𑀔𑁂𑀢𑁆𑀢𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀔𑁂𑀢𑁆𑀢𑀁 𑀦𑀸𑀫 𑀬𑀢𑁆𑀣 𑀧𑀼𑀩𑁆𑀩𑀡𑁆𑀡𑀁 𑀯𑀸 𑀅𑀧𑀭𑀡𑁆𑀡𑀁 𑀯𑀸 𑀚𑀸𑀬𑀢𑀻’’𑀢𑀺 𑀆𑀳. 𑀢𑀢𑁆𑀣 𑀧𑀼𑀩𑁆𑀩𑀡𑁆𑀡𑀦𑁆𑀢𑀺 𑀲𑀸𑀮𑀺𑀆𑀤𑀻𑀦𑀺 𑀲𑀢𑁆𑀢 𑀥𑀜𑁆𑀜𑀸𑀦𑀺; 𑀅𑀧𑀭𑀡𑁆𑀡𑀦𑁆𑀢𑀺 𑀫𑀼𑀕𑁆𑀕𑀫𑀸𑀲𑀸𑀤𑀻𑀦𑀺; 𑀉𑀘𑁆𑀙𑀼𑀔𑁂𑀢𑁆𑀢𑀸𑀤𑀺𑀓𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀁. 𑀇𑀥𑀸𑀧𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣𑀚𑀸𑀢𑀓𑁂 𑀧𑀦 𑀲𑀸𑀮𑀺𑀲𑀻𑀲𑀸𑀤𑀻𑀦𑀺 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀯𑀸 𑀏𑀓𑀫𑁂𑀓𑀁 𑀳𑀢𑁆𑀣𑁂𑀦𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀅𑀲𑀺𑀢𑁂𑀦 𑀮𑀸𑀬𑀺𑀢𑁆𑀯𑀸 𑀯𑀸 𑀩𑀳𑀽𑀦𑀺 𑀏𑀓𑀢𑁄 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀲𑁆𑀫𑀺𑀁 𑀩𑀻𑀚𑁂 𑀯𑀸 𑀲𑀻𑀲𑁂 𑀯𑀸 𑀫𑀼𑀝𑁆𑀞𑀺𑀬𑀁 𑀯𑀸 𑀫𑀼𑀕𑁆𑀕𑀫𑀸𑀲𑀸𑀤𑀺𑀨𑀮𑁂 𑀯𑀸 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑁄𑀘𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀘𑁆𑀙𑀺𑀚𑁆𑀚𑀫𑀸𑀦𑁄 𑀧𑀦 𑀤𑀡𑁆𑀟𑀓𑁄 𑀯𑀸 𑀯𑀸𑀓𑁄 𑀯𑀸 𑀢𑀘𑁄 𑀯𑀸 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀭𑀓𑁆𑀔𑀢𑀺.

𑀯𑀻𑀳𑀺𑀦𑀸𑀴𑀁 𑀤𑀻𑀖𑀫𑁆𑀧𑀺 𑀳𑁄𑀢𑀺, 𑀬𑀸𑀯 𑀅𑀦𑁆𑀢𑁄𑀦𑀸𑀴𑀢𑁄 𑀯𑀻𑀳𑀺𑀲𑀻𑀲𑀤𑀡𑁆𑀟𑀓𑁄 𑀦 𑀦𑀺𑀓𑁆𑀔𑀫𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀦𑀸𑀴𑀢𑁄 𑀤𑀡𑁆𑀟𑀓𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀦𑀺𑀓𑁆𑀔𑀦𑁆𑀢𑁂 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀲𑀺𑀢𑁂𑀦 𑀮𑀸𑀬𑀺𑀢𑁆𑀯𑀸 𑀕𑀡𑁆𑀳𑀢𑁄 𑀧𑀦 𑀫𑀼𑀝𑁆𑀞𑀺𑀕𑀢𑁂𑀲𑀼 𑀳𑁂𑀝𑁆𑀞𑀸 𑀙𑀺𑀦𑁆𑀦𑁂𑀲𑀼𑀧𑀺 𑀲𑀘𑁂 𑀲𑀻𑀲𑀸𑀦𑀺 𑀚𑀝𑀺𑀢𑀸𑀦𑀺, 𑀭𑀓𑁆𑀔𑀦𑁆𑀢𑀺 𑀢𑀸𑀯. 𑀯𑀺𑀚𑀝𑁂𑀢𑁆𑀯𑀸 𑀧𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀓𑁆𑀔𑀺𑀧𑀢𑁄 𑀲𑀘𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀸𑀫𑀺𑀓𑁂𑀳𑀺 𑀧𑀦 𑀮𑀸𑀬𑀺𑀢𑁆𑀯𑀸 𑀞𑀧𑀺𑀢𑀁 𑀲𑀪𑀼𑀲𑀁 𑀯𑀸 𑀅𑀪𑀼𑀲𑀁 𑀯𑀸 𑀓𑀢𑁆𑀯𑀸 𑀕𑀡𑁆𑀳𑀢𑁄 𑀬𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀭𑀺𑀓𑀧𑁆𑀧𑁂𑀢𑀺 ‘‘𑀇𑀤𑀁 𑀫𑀤𑁆𑀤𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑀸𑀭𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀓𑁆𑀔𑀢𑀺 𑀢𑀸𑀯. 𑀫𑀤𑁆𑀤𑀦𑀧𑀧𑁆𑀨𑁄𑀝𑀦𑁂𑀲𑀼 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀧𑀘𑁆𑀙𑀸 𑀪𑀸𑀚𑀦𑀕𑀢𑁂 𑀓𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀪𑀺𑀬𑁄𑀕𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁄 𑀏𑀯.

𑀔𑀻𑀮𑀲𑀗𑁆𑀓𑀫𑀦𑀸𑀤𑀻𑀲𑀼 𑀧𑀣𑀯𑀻 𑀦𑀸𑀫 𑀅𑀦𑀕𑁆𑀖𑀸. 𑀢𑀲𑁆𑀫𑀸 𑀲𑀘𑁂 𑀏𑀓𑁂𑀦𑁂𑀯 𑀔𑀻𑀮𑁂𑀦 𑀇𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑀁 𑀲𑀸𑀫𑀺𑀓𑀸𑀦𑀁 𑀧𑀲𑁆𑀲𑀦𑁆𑀢𑀸𑀦𑀁 𑀯𑀸 𑀅𑀧𑀲𑁆𑀲𑀦𑁆𑀢𑀸𑀦𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀔𑀻𑀮𑁂 𑀦𑀸𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀲𑀗𑁆𑀓𑀸𑀫𑀺𑀢𑀫𑀢𑁆𑀢𑁂 𑀢𑀲𑁆𑀲 𑀘, 𑀬𑁂 𑀘𑀲𑁆𑀲 𑀏𑀓𑀘𑁆𑀙𑀦𑁆𑀤𑀸, 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 ¶ 𑀤𑁆𑀯𑀻𑀳𑀺 𑀔𑀻𑀮𑁂𑀳𑀺 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀧𑀞𑀫𑁂 𑀔𑀻𑀮𑁂 𑀣𑀼𑀮𑁆𑀮𑀘𑁆𑀘𑀬𑀁; 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀢𑀻𑀳𑀺 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀧𑀞𑀫𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀢𑀺𑀬𑁂 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀩𑀳𑀼𑀓𑁂𑀲𑀼𑀧𑀺 𑀅𑀯𑀲𑀸𑀦𑁂 𑀤𑁆𑀯𑁂 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀤𑀼𑀓𑁆𑀓𑀝𑀁, 𑀅𑀯𑀲𑀸𑀦𑁂 ¶ ¶ 𑀤𑁆𑀯𑀺𑀦𑁆𑀦𑀁 𑀏𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦. 𑀏𑀯𑀁 𑀲𑀩𑁆𑀩𑀢𑁆𑀣.

𑀭𑀚𑁆𑀚𑀼𑀁 𑀯𑀸𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀇𑀤’’𑀦𑁆𑀢𑀺 𑀜𑀸𑀧𑁂𑀢𑀼𑀓𑀸𑀫𑁄 𑀭𑀚𑁆𑀚𑀼𑀁 𑀯𑀸 𑀧𑀲𑀸𑀭𑁂𑀢𑀺, 𑀬𑀝𑁆𑀞𑀺𑀁 𑀯𑀸 𑀧𑀸𑀢𑁂𑀢𑀺, 𑀤𑀼𑀓𑁆𑀓𑀝𑀁. ‘‘𑀇𑀤𑀸𑀦𑀺 𑀤𑁆𑀯𑀻𑀳𑀺 𑀧𑀬𑁄𑀕𑁂𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀧𑀞𑀫𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁.

𑀯𑀢𑀺𑀁 𑀯𑀸𑀢𑀺 𑀧𑀭𑀲𑁆𑀲 𑀔𑁂𑀢𑁆𑀢𑀁 𑀧𑀭𑀺𑀓𑁆𑀔𑁂𑀧𑀯𑀲𑁂𑀦 𑀅𑀢𑁆𑀢𑀦𑁄 𑀓𑀸𑀢𑀼𑀓𑀸𑀫𑁄 𑀤𑀸𑀭𑀽𑀦𑀺 𑀦𑀺𑀔𑀡𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀓𑀲𑁆𑀫𑀺𑀁 𑀅𑀦𑀸𑀕𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀫𑀺𑀁 𑀆𑀕𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀢𑀢𑁆𑀢𑀓𑁂𑀦 𑀅𑀲𑀓𑁆𑀓𑁄𑀦𑁆𑀢𑁄 𑀲𑀸𑀔𑀸𑀧𑀭𑀺𑀯𑀸𑀭𑁂𑀦𑁂𑀯 𑀅𑀢𑁆𑀢𑀦𑁄 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀸𑀔𑀸𑀧𑀸𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀬𑁂𑀦 𑀬𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀞𑀫𑀧𑀬𑁄𑀕𑁂𑀳𑀺 𑀤𑀼𑀓𑁆𑀓𑀝𑀁. 𑀅𑀯𑀲𑀸𑀦𑁂 𑀤𑁆𑀯𑀺𑀦𑁆𑀦𑀁 𑀏𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀫𑀭𑀺𑀬𑀸𑀤𑀁 𑀯𑀸𑀢𑀺 𑀧𑀭𑀲𑁆𑀲 𑀔𑁂𑀢𑁆𑀢𑀁 ‘‘𑀫𑀫 𑀇𑀤’’𑀦𑁆𑀢𑀺 𑀜𑀸𑀧𑁂𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀔𑁂𑀢𑁆𑀢𑀫𑀭𑀺𑀬𑀸𑀤𑀁

𑀓𑁂𑀤𑀸𑀭𑀧𑀸𑀴𑀺𑀁 𑀬𑀣𑀸 𑀧𑀭𑀲𑁆𑀲 𑀔𑁂𑀢𑁆𑀢𑀁 𑀅𑀢𑀺𑀓𑁆𑀓𑀫𑀢𑀺, 𑀏𑀯𑀁 𑀲𑀗𑁆𑀓𑀸𑀫𑁂𑀢𑀺, 𑀧𑀁𑀲𑀼𑀫𑀢𑁆𑀢𑀺𑀓𑀸𑀤𑀻𑀳𑀺 𑀯𑀸 𑀯𑀟𑁆𑀠𑁂𑀢𑁆𑀯𑀸 𑀯𑀺𑀢𑁆𑀣𑀢𑀁 𑀓𑀭𑁄𑀢𑀺, 𑀅𑀓𑀢𑀁 𑀯𑀸 𑀧𑀦 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀧𑀼𑀭𑀺𑀫𑀧𑀬𑁄𑀕𑁂𑀳𑀺 𑀤𑀼𑀓𑁆𑀓𑀝𑀁. 𑀤𑁆𑀯𑀺𑀦𑁆𑀦𑀁 𑀧𑀘𑁆𑀙𑀺𑀫𑀸𑀦𑀁 𑀏𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀦 𑀧𑀸𑀭𑀸𑀚𑀺𑀓𑀦𑁆𑀢𑀺.

𑀔𑁂𑀢𑁆𑀢𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀣𑀼𑀝𑁆𑀞𑀓𑀣𑀸

𑁧𑁦𑁫. 𑀯𑀢𑁆𑀣𑀼𑀝𑁆𑀞𑁂𑀧𑀺 𑁋 𑀯𑀢𑁆𑀣𑀼𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀯𑀢𑁆𑀣𑀼 𑀦𑀸𑀫 ‘‘𑀆𑀭𑀸𑀫𑀯𑀢𑁆𑀣𑀼 𑀯𑀺𑀳𑀸𑀭𑀯𑀢𑁆𑀣𑀽’’𑀢𑀺 𑀆𑀳. 𑀢𑀢𑁆𑀣 𑀩𑀻𑀚𑀁 𑀯𑀸 𑀉𑀧𑀭𑁄𑀧𑀓𑁂 𑀯𑀸 𑀅𑀭𑁄𑀧𑁂𑀢𑁆𑀯𑀸𑀯 𑀓𑁂𑀯𑀮𑀁 𑀪𑀽𑀫𑀺𑀁 𑀲𑁄𑀥𑁂𑀢𑁆𑀯𑀸 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀧𑀼𑀧𑁆𑀨𑀸𑀭𑀸𑀫𑀸𑀤𑀻𑀦𑀁 𑀅𑀢𑁆𑀣𑀸𑀬 𑀞𑀧𑀺𑀢𑁄 𑀪𑀽𑀫𑀺𑀪𑀸𑀕𑁄 𑀆𑀭𑀸𑀫𑀯𑀢𑁆𑀣𑀼 𑀦𑀸𑀫. 𑀏𑀢𑁂𑀦𑁂𑀯 𑀦𑀬𑁂𑀦 𑀏𑀓𑀯𑀺𑀳𑀸𑀭𑀧𑀭𑀺𑀯𑁂𑀡𑀆𑀯𑀸𑀲𑀸𑀦𑀁 𑀅𑀢𑁆𑀣𑀸𑀬 𑀞𑀧𑀺𑀢𑁄 𑀪𑀽𑀫𑀺𑀪𑀸𑀕𑁄 𑀯𑀺𑀳𑀸𑀭𑀯𑀢𑁆𑀣𑀼 𑀦𑀸𑀫. 𑀬𑁄𑀧𑀺 𑀧𑀼𑀩𑁆𑀩𑁂 𑀆𑀭𑀸𑀫𑁄 ¶ 𑀘 𑀯𑀺𑀳𑀸𑀭𑁄 𑀘 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀯𑀺𑀦𑀲𑁆𑀲𑀺𑀢𑁆𑀯𑀸 𑀪𑀽𑀫𑀺𑀫𑀢𑁆𑀢𑁄 𑀞𑀺𑀢𑁄, 𑀆𑀭𑀸𑀫𑀯𑀺𑀳𑀸𑀭𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀲𑁄𑀧𑀺 𑀆𑀭𑀸𑀫𑀯𑀺𑀳𑀸𑀭𑀯𑀢𑁆𑀣𑀼𑀲𑀗𑁆𑀕𑀳𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀔𑁂𑀢𑁆𑀢𑀝𑁆𑀞𑁂 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯𑀸𑀢𑀺.

𑀯𑀢𑁆𑀣𑀼𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁬. 𑀕𑀸𑀫𑀝𑁆𑀞𑁂 ¶ 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀼𑀢𑁆𑀢𑀫𑁂𑀯.

𑀅𑀭𑀜𑁆𑀜𑀝𑁆𑀞𑀓𑀣𑀸

𑁧𑁦𑁭. 𑀅𑀭𑀜𑁆𑀜𑀝𑁆𑀞𑁂 ¶ 𑁋 𑀅𑀭𑀜𑁆𑀜𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀜𑁆𑀜𑀁 𑀦𑀸𑀫 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀲𑁆𑀫𑀸 𑀅𑀭𑀜𑁆𑀜𑀁 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺; 𑀇𑀥 𑀧𑀦 𑀬𑀁 𑀧𑀭𑀺𑀕𑁆𑀕𑀳𑀺𑀢𑀁 𑀲𑀸𑀭𑀓𑁆𑀔𑀁, 𑀬𑀢𑁄 𑀦 𑀯𑀺𑀦𑀸 𑀫𑀽𑀮𑁂𑀦 𑀓𑀝𑁆𑀞𑀮𑀢𑀸𑀤𑀻𑀦𑀺 𑀕𑀳𑁂𑀢𑀼𑀁 𑀮𑀩𑁆𑀪𑀦𑁆𑀢𑀺, 𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 ‘‘𑀬𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀦 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑁄 𑀅𑀭𑀜𑁆𑀜𑀲𑁆𑀲 𑀮𑀓𑁆𑀔𑀡𑀁. 𑀬𑀁 𑀧𑀦 𑀅𑀢𑁆𑀢𑀦𑁄 𑀅𑀭𑀜𑁆𑀜𑀮𑀓𑁆𑀔𑀡𑁂𑀦 𑀅𑀭𑀜𑁆𑀜𑀁 𑀫𑀦𑀼𑀲𑁆𑀲𑀸𑀦𑀜𑁆𑀘 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀭𑀜𑁆𑀜’’𑀦𑁆𑀢𑀺. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀆𑀭𑀸𑀫𑀝𑁆𑀞𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑁄.

𑀢𑀢𑁆𑀣𑀚𑀸𑀢𑀓𑁂𑀲𑀼 𑀧𑀦𑁂𑀢𑁆𑀣 𑀏𑀓𑀲𑁆𑀫𑀺𑀫𑁆𑀧𑀺 𑀫𑀳𑀕𑁆𑀖𑀭𑀼𑀓𑁆𑀔𑁂 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀮𑀢𑀁 𑀯𑀸𑀢𑀺 𑀏𑀢𑁆𑀣 𑀘 𑀯𑁂𑀢𑁆𑀢𑁄𑀧𑀺 𑀮𑀢𑀸𑀧𑀺 𑀮𑀢𑀸 𑀏𑀯; 𑀢𑀢𑁆𑀣 𑀬𑁄 𑀯𑁂𑀢𑁆𑀢𑁄 𑀯𑀸 𑀮𑀢𑀸 𑀯𑀸 𑀤𑀻𑀖𑀸 𑀳𑁄𑀢𑀺, 𑀫𑀳𑀸𑀭𑀼𑀓𑁆𑀔𑁂 𑀘 𑀕𑀘𑁆𑀙𑁂 𑀘 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀸 𑀯𑁂𑀞𑁂𑀢𑁆𑀯𑀸 𑀯𑀸 𑀕𑀢𑀸, 𑀲𑀸 𑀫𑀽𑀮𑁂 𑀙𑀺𑀦𑁆𑀦𑀸𑀧𑀺 𑀅𑀯𑀳𑀸𑀭𑀁 𑀦 𑀚𑀦𑁂𑀢𑀺 𑀅𑀕𑁆𑀕𑁂 𑀙𑀺𑀦𑁆𑀦𑀸𑀧𑀺, 𑀬𑀤𑀸 𑀧𑀦 𑀅𑀕𑁆𑀕𑁂𑀧𑀺 𑀫𑀽𑀮𑁂𑀧𑀺 𑀙𑀺𑀦𑁆𑀦𑀸 𑀳𑁄𑀢𑀺, 𑀢𑀤𑀸 𑀅𑀯𑀳𑀸𑀭𑀁 𑀚𑀦𑁂𑀢𑀺. 𑀲𑀘𑁂 𑀧𑀦 𑀯𑁂𑀞𑁂𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺, 𑀯𑁂𑀞𑁂𑀢𑁆𑀯𑀸 𑀞𑀺𑀢𑀸 𑀧𑀦 𑀭𑀼𑀓𑁆𑀔𑀢𑁄 𑀫𑁄𑀘𑀺𑀢𑀫𑀢𑁆𑀢𑀸 𑀅𑀯𑀳𑀸𑀭𑀁 𑀚𑀦𑁂𑀢𑀺.

𑀢𑀺𑀡𑀁 𑀯𑀸𑀢𑀺 𑀏𑀢𑁆𑀣 𑀢𑀺𑀡𑀁 𑀯𑀸 𑀳𑁄𑀢𑀼 𑀧𑀡𑁆𑀡𑀁 𑀯𑀸, 𑀲𑀩𑁆𑀩𑀁 𑀢𑀺𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁; 𑀢𑀁 𑀕𑁂𑀳𑀘𑁆𑀙𑀤𑀦𑀸𑀤𑀻𑀦𑀫𑀢𑁆𑀣𑀸𑀬 𑀧𑀭𑁂𑀳𑀺 𑀙𑀺𑀦𑁆𑀦𑀁 𑀯𑀸 𑀅𑀢𑁆𑀢𑀦𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀦 𑀓𑁂𑀯𑀮𑀜𑁆𑀘 𑀢𑀺𑀡𑀧𑀡𑁆𑀡𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀯𑀸𑀓𑀙𑀮𑁆𑀮𑀺 𑀆𑀤𑀺, 𑀬𑀢𑁆𑀣 𑀲𑀸𑀫𑀺𑀓𑀸 𑀲𑀸𑀮𑀬𑀸, 𑀢𑀁 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑁄 𑀅𑀤𑁆𑀥𑀕𑀢𑁄𑀧𑀺 𑀭𑀼𑀓𑁆𑀔𑁄 𑀦 𑀕𑀳𑁂𑀢𑀩𑁆𑀩𑁄. 𑀬𑁄 𑀧𑀦 𑀅𑀕𑁆𑀕𑁂 𑀘 𑀫𑀽𑀮𑁂 𑀘 𑀙𑀺𑀦𑁆𑀦𑁄 𑀳𑁄𑀢𑀺, 𑀲𑀸𑀔𑀸𑀧𑀺𑀲𑁆𑀲 𑀧𑀽𑀢𑀺𑀓𑀸 ¶ 𑀚𑀸𑀢𑀸, 𑀙𑀮𑁆𑀮𑀺𑀬𑁄𑀧𑀺 𑀕𑀴𑀺𑀢𑀸, ‘‘𑀅𑀬𑀁 𑀲𑀸𑀫𑀺𑀓𑁂𑀳𑀺 𑀙𑀟𑁆𑀟𑀺𑀢𑁄’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀮𑀓𑁆𑀔𑀡𑀘𑁆𑀙𑀺𑀦𑁆𑀦𑀲𑁆𑀲𑀸𑀧𑀺 𑀬𑀤𑀸 𑀮𑀓𑁆𑀔𑀡𑀁 𑀙𑀮𑁆𑀮𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀁 𑀳𑁄𑀢𑀺, 𑀢𑀤𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀕𑁂𑀳𑀸𑀤𑀻𑀦𑀁 𑀅𑀢𑁆𑀣𑀸𑀬 𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀬𑀤𑀸 𑀢𑀸𑀦𑀺 𑀓𑀢𑀸𑀦𑀺 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀘 𑀳𑁄𑀦𑁆𑀢𑀺, 𑀤𑀸𑀭𑀽𑀦𑀺𑀧𑀺 𑀅𑀭𑀜𑁆𑀜𑁂 𑀯𑀲𑁆𑀲𑁂𑀦 𑀘 𑀆𑀢𑀧𑁂𑀦 𑀘 𑀯𑀺𑀦𑀲𑁆𑀲𑀦𑁆𑀢𑀺, 𑀈𑀤𑀺𑀲𑀸𑀦𑀺𑀧𑀺 𑀤𑀺𑀲𑁆𑀯𑀸 ‘‘𑀙𑀟𑁆𑀟𑀺𑀢𑀸𑀦𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀭𑀜𑁆𑀜𑀲𑀸𑀫𑀺𑀓𑀸 𑀏𑀢𑁂𑀲𑀁 𑀅𑀦𑀺𑀲𑁆𑀲𑀭𑀸. 𑀬𑁂𑀳𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀢𑁆𑀯𑀸 ¶ 𑀙𑀺𑀦𑁆𑀦𑀸𑀦𑀺, 𑀢𑁂 𑀏𑀯 𑀇𑀲𑁆𑀲𑀭𑀸, 𑀢𑁂𑀳𑀺 𑀘 𑀢𑀸𑀦𑀺 𑀙𑀟𑁆𑀟𑀺𑀢𑀸𑀦𑀺, 𑀦𑀺𑀭𑀸𑀮𑀬𑀸 𑀢𑀢𑁆𑀣 𑀚𑀸𑀢𑀸𑀢𑀺.

𑀬𑁄𑀧𑀺 ¶ 𑀪𑀺𑀓𑁆𑀔𑀼 𑀧𑀞𑀫𑀁𑀬𑁂𑀯 𑀅𑀭𑀜𑁆𑀜𑀧𑀸𑀮𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑁂 𑀭𑀼𑀓𑁆𑀔𑁂 𑀕𑀸𑀳𑀸𑀧𑁂𑀢𑀺, 𑀢𑀲𑁆𑀲 𑀢𑁂𑀲𑀁 𑀆𑀭𑀓𑁆𑀔𑀝𑁆𑀞𑀸𑀦𑀁 𑀅𑀕𑀦𑁆𑀢𑁆𑀯𑀸𑀧𑀺 𑀬𑀣𑀸𑀭𑀼𑀘𑀺𑀢𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀣𑀸𑀧𑀺 𑀧𑀯𑀺𑀲𑀦𑁆𑀢𑁄 𑀅𑀤𑀢𑁆𑀯𑀸 ‘‘𑀦𑀺𑀓𑁆𑀔𑀫𑀦𑁆𑀢𑁄 𑀤𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑁂 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀢𑁂𑀲𑀁 𑀤𑀸𑀢𑀩𑁆𑀩𑀁 𑀤𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺 𑀏𑀯. 𑀅𑀣𑀸𑀧𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑀲𑁆𑀲𑀸𑀫𑀻’’𑀢𑀺, ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀤𑀸𑀢𑀩𑁆𑀩𑀫𑁂𑀯. 𑀲𑀘𑁂 𑀓𑁄𑀘𑀺 𑀅𑀢𑁆𑀢𑀦𑁄 𑀥𑀦𑀁 𑀤𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀕𑀦𑁆𑀢𑀼𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀮𑀤𑁆𑀥𑀓𑀧𑁆𑀧𑀫𑁂𑀯, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀇𑀲𑁆𑀲𑀭𑀚𑀸𑀢𑀺𑀓𑁄 𑀥𑀦𑀁 𑀅𑀤𑀢𑁆𑀯𑀸𑀯 ‘‘𑀪𑀺𑀓𑁆𑀔𑀽𑀦𑀁 𑀪𑀸𑀕𑀁 𑀫𑀸 𑀕𑀡𑁆𑀳𑀣𑀸’’𑀢𑀺 𑀯𑀸𑀭𑁂𑀢𑀺, 𑀅𑀭𑀜𑁆𑀜𑀧𑀸𑀮𑀸 𑀘 ‘‘𑀫𑀬𑀁 𑀪𑀺𑀓𑁆𑀔𑀽𑀦𑀁 𑀢𑀸𑀧𑀲𑀸𑀦𑀜𑁆𑀘 𑀪𑀸𑀕𑀁 𑀅𑀕𑀡𑁆𑀳𑀦𑁆𑀢𑀸 𑀓𑀼𑀢𑁄 𑀮𑀘𑁆𑀙𑀸𑀫, 𑀤𑁂𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀺, 𑀤𑀸𑀢𑀩𑁆𑀩𑀫𑁂𑀯.

𑀬𑁄 𑀧𑀦 𑀅𑀭𑀜𑁆𑀜𑀧𑀸𑀮𑁂𑀲𑀼 𑀦𑀺𑀤𑁆𑀤𑀸𑀬𑀦𑁆𑀢𑁂𑀲𑀼 𑀯𑀸 𑀓𑀻𑀴𑀸𑀧𑀲𑀼𑀢𑁂𑀲𑀼 𑀯𑀸 𑀓𑀢𑁆𑀣𑀘𑀺 𑀧𑀓𑁆𑀓𑀦𑁆𑀢𑁂𑀲𑀼 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀅𑀭𑀜𑁆𑀜𑀧𑀸𑀮𑀸’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸𑀧𑀺 𑀅𑀤𑀺𑀲𑁆𑀯𑀸 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀬𑁄𑀧𑀺 𑀆𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑀸 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀅𑀲𑁆𑀲𑀢𑀺𑀬𑀸 𑀅𑀢𑀺𑀓𑁆𑀓𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀬𑀲𑁆𑀲𑀸𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀢𑀲𑁆𑀲 𑀘𑁄𑀭𑁄 𑀯𑀸 𑀳𑀢𑁆𑀣𑀻 𑀯𑀸 𑀯𑀸𑀴𑀫𑀺𑀕𑁄 𑀯𑀸 𑀫𑀳𑀸𑀫𑁂𑀖𑁄 𑀯𑀸 𑀯𑀼𑀝𑁆𑀞𑀳𑀢𑀺, 𑀲𑁄 𑀘 𑀢𑀫𑁆𑀳𑀸 𑀉𑀧𑀤𑁆𑀤𑀯𑀸 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀬 𑀲𑀳𑀲𑀸 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀭𑀓𑁆𑀔𑀢𑀺 𑀢𑀸𑀯, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀇𑀤𑀁 𑀧𑀦 𑀅𑀭𑀜𑁆𑀜𑁂 𑀆𑀭𑀓𑁆𑀔𑀝𑁆𑀞𑀸𑀦𑀁 𑀦𑀸𑀫 𑀲𑀼𑀗𑁆𑀓𑀖𑀸𑀢𑀢𑁄𑀧𑀺 𑀕𑀭𑀼𑀓𑀢𑀭𑀁. 𑀲𑀼𑀗𑁆𑀓𑀖𑀸𑀢𑀲𑁆𑀲 𑀳𑀺 𑀧𑀭𑀺𑀘𑁆𑀙𑁂𑀤𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀤𑀽𑀭𑀢𑁄𑀯 𑀧𑀭𑀺𑀳𑀭𑀦𑁆𑀢𑁄 𑀤𑀼𑀓𑁆𑀓𑀝𑀫𑁂𑀯 𑀆𑀧𑀚𑁆𑀚𑀢𑀺. 𑀇𑀤𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀦𑁆𑀢𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀢𑀲𑁆𑀫𑀸 𑀏𑀢𑁆𑀣 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺.

𑀅𑀭𑀜𑁆𑀜𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀤𑀓𑀓𑀣𑀸

𑁧𑁦𑁮. 𑀉𑀤𑀓𑁂 ¶ 𑀧𑀦 𑁋 𑀪𑀸𑀚𑀦𑀕𑀢𑀦𑁆𑀢𑀺 𑀉𑀤𑀓𑀤𑀼𑀮𑁆𑀮𑀪𑀓𑀸𑀮𑁂 𑀉𑀤𑀓𑀫𑀡𑀺𑀓𑀸𑀤𑀻𑀲𑀼 𑀪𑀸𑀚𑀦𑁂𑀲𑀼 𑀲𑀗𑁆𑀕𑁄𑀧𑁂𑀢𑁆𑀯𑀸 𑀞𑀧𑀺𑀢𑀁; 𑀢𑀁 𑀬𑀲𑁆𑀫𑀺𑀁 𑀪𑀸𑀚𑀦𑁂 𑀞𑀧𑀺𑀢𑀁 𑀳𑁄𑀢𑀺, 𑀢𑀁 𑀪𑀸𑀚𑀦𑀁 𑀆𑀯𑀺𑀜𑁆𑀙𑀺𑀢𑁆𑀯𑀸 𑀯𑀸 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀯𑀸 𑀢𑀢𑁆𑀣 𑀧𑁄𑀓𑁆𑀔𑀭𑀡𑀻𑀢𑀴𑀸𑀓𑁂𑀲𑀼 𑀘 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑁆𑀯𑀸 ¶ 𑀕𑀡𑁆𑀳𑀦𑁆𑀢𑀲𑁆𑀲 𑀲𑀧𑁆𑀧𑀺𑀢𑁂𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀭𑀺𑀬𑀸𑀤𑀘𑁆𑀙𑁂𑀤𑀦𑁂 𑀧𑀦 𑀢𑀢𑁆𑀣 𑀚𑀸𑀢𑀓𑀪𑀽𑀢𑀕𑀸𑀫𑁂𑀦 𑀲𑀤𑁆𑀥𑀺𑀫𑁆𑀧𑀺 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀁. 𑀢𑀜𑁆𑀘 𑀧𑀦 𑀧𑀳𑀸𑀭𑁂 𑀧𑀳𑀸𑀭𑁂 𑀳𑁄𑀢𑀺. 𑀅𑀦𑁆𑀢𑁄𑀞𑀢𑁆𑀯𑀸 𑀩𑀳𑀺𑀫𑀼𑀔𑁄 𑀙𑀺𑀦𑁆𑀤𑀦𑁆𑀢𑁄 𑀩𑀳𑀺 𑀅𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀩𑀳𑀺 𑀞𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁄 𑀙𑀺𑀦𑁆𑀤𑀦𑁆𑀢𑁄 ¶ 𑀅𑀦𑁆𑀢𑁄𑀅𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀦𑁆𑀢𑁄 𑀘 𑀩𑀳𑀺 𑀘 𑀙𑀺𑀦𑁆𑀤𑀺𑀢𑁆𑀯𑀸 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀢𑀁 𑀙𑀺𑀦𑁆𑀤𑀦𑁆𑀢𑁄 𑀫𑀚𑁆𑀛𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀸𑀯𑁄 𑀧𑀓𑁆𑀓𑁄𑀲𑀢𑀺, 𑀕𑀸𑀫𑀤𑀸𑀭𑀓𑁂𑀳𑀺 𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑀺, 𑀢𑀸 𑀆𑀕𑀦𑁆𑀢𑁆𑀯𑀸 𑀔𑀼𑀭𑁂𑀳𑀺 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀦𑁆𑀢𑀺, 𑀢𑁂𑀦𑁂𑀯 𑀙𑀺𑀦𑁆𑀦𑀸 𑀳𑁄𑀢𑀺. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀸𑀯𑁄 𑀉𑀤𑀓𑁂 𑀧𑀯𑁂𑀲𑁂𑀢𑀺, 𑀕𑀸𑀫𑀤𑀸𑀭𑀓𑁂𑀳𑀺 𑀯𑀸 𑀧𑀯𑁂𑀲𑀸𑀧𑁂𑀢𑀺, 𑀢𑀸𑀳𑀺 𑀉𑀝𑁆𑀞𑀸𑀧𑀺𑀢𑀯𑀻𑀘𑀺𑀬𑁄 𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑀸𑀫𑀤𑀸𑀭𑀓𑁂 𑀯𑀸 ‘‘𑀉𑀤𑀓𑁂 𑀓𑀻𑀴𑀣𑀸’’𑀢𑀺 𑀯𑀤𑀢𑀺, 𑀓𑀻𑀴𑀦𑁆𑀢𑁂 𑀯𑀸 𑀉𑀢𑁆𑀭𑀸𑀲𑁂𑀢𑀺, 𑀢𑁂𑀳𑀺 𑀉𑀝𑁆𑀞𑀸𑀧𑀺𑀢𑀯𑀻𑀘𑀺𑀬𑁄𑀧𑀺 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀅𑀦𑁆𑀢𑁄𑀉𑀤𑀓𑁂 𑀚𑀸𑀢𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑀺𑀦𑁆𑀤𑀸𑀧𑁂𑀢𑀺, 𑀢𑁂𑀦𑀧𑀺 𑀧𑀢𑀦𑁆𑀢𑁂𑀦 𑀉𑀝𑁆𑀞𑀸𑀧𑀺𑀢𑀯𑀻𑀘𑀺𑀬𑁄 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀦𑁂𑀯 𑀙𑀺𑀦𑁆𑀦𑀸 𑀳𑁄𑀢𑀺. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀸𑀬 𑀢𑀴𑀸𑀓𑀢𑁄 𑀦𑀺𑀩𑁆𑀩𑀳𑀦𑀉𑀤𑀓𑀁 𑀯𑀸 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀯𑀸 𑀧𑀺𑀤𑀳𑀢𑀺, 𑀅𑀜𑁆𑀜𑀢𑁄 𑀕𑀘𑁆𑀙𑀦𑁆𑀢𑀁 𑀯𑀸 𑀉𑀤𑀓𑀁 𑀬𑀣𑀸 𑀏𑀢𑁆𑀣 𑀧𑀯𑀺𑀲𑀢𑀺, 𑀏𑀯𑀁 𑀧𑀸𑀴𑀺𑀁 𑀯𑀸 𑀩𑀦𑁆𑀥𑀢𑀺, 𑀫𑀸𑀢𑀺𑀓𑀁 𑀯𑀸 𑀉𑀚𑀼𑀓𑀁 𑀓𑀭𑁄𑀢𑀺, 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀞𑀺𑀢𑀁 𑀅𑀢𑁆𑀢𑀦𑁄 𑀢𑀴𑀸𑀓𑀁 𑀯𑀸 𑀪𑀺𑀦𑁆𑀤𑀢𑀺, 𑀉𑀲𑁆𑀲𑀦𑁆𑀦𑀁 𑀉𑀤𑀓𑀁 𑀫𑀭𑀺𑀬𑀸𑀤𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑁂𑀦𑁂𑀯 𑀙𑀺𑀦𑁆𑀦𑀸 𑀳𑁄𑀢𑀺. 𑀲𑀩𑁆𑀩𑀢𑁆𑀣 𑀦𑀺𑀓𑁆𑀔𑀦𑁆𑀢𑀉𑀤𑀓𑀕𑁆𑀖𑀸𑀦𑀼𑀭𑀽𑀧𑁂𑀦 𑀅𑀯𑀳𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄.

𑀦𑀺𑀤𑁆𑀥𑀫𑀦𑀧𑀦𑀸𑀴𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀢𑁂𑀦 𑀫𑀭𑀺𑀬𑀸𑀤𑀸𑀬 𑀤𑀼𑀩𑁆𑀩𑀮𑀸𑀬 𑀓𑀢𑀸𑀬 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸 𑀅𑀦𑀸𑀡𑀢𑁆𑀢𑁂𑀳𑀺 𑀕𑀸𑀫𑀤𑀸𑀭𑀓𑁂𑀳𑀺 𑀆𑀭𑁄𑀧𑀺𑀢𑀸 𑀯𑀸 𑀕𑀸𑀯𑀺𑀬𑁄 𑀔𑀼𑀭𑁂𑀳𑀺 𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀦𑁆𑀢𑀺, 𑀅𑀢𑁆𑀢𑀦𑁄𑀬𑁂𑀯 𑀥𑀫𑁆𑀫𑀢𑀸𑀬 𑀅𑀦𑀸𑀡𑀢𑁆𑀢𑁂𑀳𑀺 𑀯𑀸 𑀕𑀸𑀫𑀤𑀸𑀭𑀓𑁂𑀳𑀺 𑀉𑀤𑀓𑁂 𑀧𑀯𑁂𑀲𑀺𑀢𑀸 𑀯𑀻𑀘𑀺𑀬𑁄 𑀉𑀝𑁆𑀞𑀸𑀧𑁂𑀦𑁆𑀢𑀺, 𑀕𑀸𑀫𑀤𑀸𑀭𑀓𑀸 𑀯𑀸 𑀲𑀬𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀓𑀻𑀴𑀦𑁆𑀢𑀸 𑀉𑀝𑁆𑀞𑀸𑀧𑁂𑀦𑁆𑀢𑀺 𑀅𑀦𑁆𑀢𑁄𑀉𑀤𑀓𑁂 𑀯𑀸 𑀭𑀼𑀓𑁆𑀔𑁄 𑀅𑀜𑁆𑀜𑁂𑀦 𑀙𑀺𑀚𑁆𑀚𑀫𑀸𑀦𑁄 ¶ 𑀧𑀢𑀺𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀺, 𑀉𑀝𑁆𑀞𑀸𑀧𑀺𑀢𑀸 𑀯𑀻𑀘𑀺𑀬𑁄 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀦𑁆𑀢𑀺, 𑀲𑀘𑁂𑀧𑀺 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀲𑀼𑀓𑁆𑀔𑀢𑀴𑀸𑀓𑀲𑁆𑀲 𑀉𑀤𑀓𑀦𑀺𑀩𑁆𑀩𑀳𑀦𑀝𑁆𑀞𑀸𑀦𑀁 ¶ 𑀯𑀸 𑀉𑀤𑀓𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀯𑀸 𑀧𑀺𑀤𑀳𑀢𑀺, 𑀅𑀜𑁆𑀜𑀢𑁄 𑀕𑀫𑀦𑀫𑀕𑁆𑀕𑁂 𑀯𑀸 𑀧𑀸𑀴𑀺𑀁 𑀩𑀦𑁆𑀥𑀢𑀺, 𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸 𑀉𑀚𑀼𑀓𑀁 𑀓𑀭𑁄𑀢𑀺, 𑀧𑀘𑁆𑀙𑀸 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀢𑀺, 𑀲𑀩𑁆𑀩𑀢𑁆𑀣 𑀪𑀡𑁆𑀟𑀤𑁂𑀬𑁆𑀬𑀁.

𑀬𑁄 𑀧𑀦 𑀦𑀺𑀤𑀸𑀖𑁂 𑀲𑀼𑀓𑁆𑀔𑀯𑀸𑀧𑀺𑀬𑀸 𑀫𑀭𑀺𑀬𑀸𑀤𑀁 𑀬𑀸𑀯 𑀢𑀮𑀁 𑀧𑀸𑀧𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀧𑀘𑁆𑀙𑀸 𑀤𑁂𑀯𑁂 𑀯𑀼𑀝𑁆𑀞𑁂 𑀆𑀕𑀢𑀸𑀕𑀢𑀁 𑀉𑀤𑀓𑀁 𑀧𑀮𑀸𑀬𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀬𑀢𑁆𑀢𑀓𑀁 𑀢𑀧𑁆𑀧𑀘𑁆𑀘𑀬𑀸 𑀲𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀸𑀤𑀫𑀢𑁆𑀢𑀕𑁆𑀖𑀦𑀓𑀫𑁆𑀧𑀺 𑀅𑀤𑁂𑀦𑁆𑀢𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀅𑀲𑁆𑀲𑀫𑀡𑁄 𑀳𑁄𑀢𑀺.

𑀬𑀁 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀁 𑀢𑀴𑀸𑀓𑀁 𑀳𑁄𑀢𑀺; 𑀢𑀴𑀸𑀓𑁂 𑀉𑀤𑀓𑀲𑁆𑀲 𑀲𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑀸 𑀇𑀲𑁆𑀲𑀭𑀸. 𑀳𑁂𑀝𑁆𑀞𑀢𑁄 𑀧𑀦𑀲𑁆𑀲 𑀲𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀲𑀲𑁆𑀲𑀧𑀸𑀮𑀦𑀢𑁆𑀣𑀁 𑀢𑀴𑀸𑀓𑀢𑁄 𑀫𑀳𑀸𑀫𑀸𑀢𑀺𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑁂𑀢𑁆𑀢𑀫𑀚𑁆𑀛𑁂𑀦 𑀬𑀸𑀢𑀺, 𑀲𑀸𑀧𑀺 𑀲𑀤𑀸 𑀲𑀦𑁆𑀤𑀦𑀓𑀸𑀮𑁂 𑀲𑀩𑁆𑀩𑀲𑀸𑀥𑀸𑀭𑀡𑀸. 𑀢𑀢𑁄 𑀧𑀦 𑀔𑀼𑀤𑁆𑀤𑀓𑀫𑀸𑀢𑀺𑀓𑀸 𑀦𑀻𑀳𑀭𑀺𑀢𑁆𑀯𑀸 ¶ 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑁂𑀤𑀸𑀭𑁂𑀲𑀼 𑀉𑀤𑀓𑀁 𑀧𑀯𑁂𑀲𑁂𑀦𑁆𑀢𑀺. 𑀢𑀁 𑀅𑀜𑁆𑀜𑁂𑀲𑀁 𑀕𑀳𑁂𑀢𑀼𑀁 𑀦 𑀤𑁂𑀦𑁆𑀢𑀺. 𑀦𑀺𑀤𑀸𑀖𑀲𑀫𑀬𑁂𑀯 𑀉𑀤𑀓𑁂 𑀫𑀦𑁆𑀤𑀻𑀪𑀽𑀢𑁂 𑀯𑀸𑀭𑁂𑀦 𑀉𑀤𑀓𑀁 𑀤𑁂𑀦𑁆𑀢𑀺, 𑀬𑁄 𑀉𑀤𑀓𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀦 𑀮𑀪𑀢𑀺, 𑀢𑀲𑁆𑀲 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀦𑁆𑀢𑀺; 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀯𑀸𑀭𑁂 𑀅𑀜𑁆𑀜𑁄 𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀧𑀭𑁂𑀲𑀁 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀢𑁄 𑀯𑀸 𑀓𑁂𑀤𑀸𑀭𑀢𑁄 𑀯𑀸 𑀉𑀤𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀫𑀸𑀢𑀺𑀓𑀁 𑀯𑀸 𑀓𑁂𑀤𑀸𑀭𑀁 𑀯𑀸 𑀧𑀯𑁂𑀲𑁂𑀢𑀺, 𑀅𑀝𑀯𑀺𑀫𑀼𑀔𑀁 𑀯𑀸 𑀯𑀸𑀳𑁂𑀢𑀺, 𑀅𑀯𑀳𑀸𑀭𑁄 𑀯𑀲𑁆𑀲 𑀳𑁄𑀢𑀺.

𑀬𑁄𑀧𑀺 ‘‘𑀘𑀺𑀭𑁂𑀦 𑀫𑁂 𑀉𑀤𑀓𑀯𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀜𑁆𑀘 𑀲𑀲𑁆𑀲𑀁 𑀫𑀺𑀮𑀸𑀬𑀢𑀻’’𑀢𑀺 𑀧𑀭𑁂𑀲𑀁 𑀓𑁂𑀤𑀸𑀭𑁂

𑀧𑀯𑀺𑀲𑀦𑁆𑀢𑀲𑁆𑀲 𑀉𑀤𑀓𑀲𑁆𑀲 𑀧𑀯𑀺𑀲𑀦𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑁂𑀤𑀸𑀭𑀁 𑀧𑀯𑁂𑀲𑁂𑀢𑀺, 𑀅𑀯𑀳𑀸𑀭𑁄 𑀏𑀯. 𑀲𑀘𑁂 𑀧𑀦 𑀢𑀴𑀸𑀓𑀢𑁄 𑀅𑀦𑀺𑀕𑁆𑀕𑀢𑁂 𑀧𑀭𑁂𑀲𑀁 𑀫𑀸𑀢𑀺𑀓𑀸𑀫𑀼𑀔𑀁 𑀅𑀲𑀫𑁆𑀧𑀢𑁆𑀢𑁂𑀯 𑀉𑀤𑀓𑁂 𑀲𑀼𑀓𑁆𑀔𑀫𑀸𑀢𑀺𑀓𑀁𑀬𑁂𑀯 𑀬𑀣𑀸 𑀆𑀕𑀘𑁆𑀙𑀦𑁆𑀢𑀁 𑀉𑀤𑀓𑀁 𑀅𑀜𑁆𑀜𑁂𑀲𑀁 𑀓𑁂𑀤𑀸𑀭𑁂 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀓𑁂𑀤𑀸𑀭𑀁 𑀧𑀯𑀺𑀲𑀢𑀺, 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀩𑀦𑁆𑀥𑀢𑀺. 𑀅𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸, 𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸, 𑀪𑀡𑁆𑀟𑀤𑁂𑀬𑁆𑀬𑀁. 𑀢𑀴𑀸𑀓𑀁 𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀦𑀺𑀤𑁆𑀥𑀫𑀦𑀧𑀦𑀸𑀴𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑁂𑀤𑀸𑀭𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀦𑀢𑁆𑀣𑀺 ¶ 𑀅𑀯𑀳𑀸𑀭𑁄. 𑀓𑀲𑁆𑀫𑀸? 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀔𑁂𑀢𑁆𑀢𑀲𑁆𑀲 𑀓𑀢𑀢𑁆𑀢𑀸. 𑀓𑀼𑀭𑀼𑀦𑁆𑀤𑀺𑀬𑀸𑀤𑀻𑀲𑀼 𑀧𑀦 ‘‘𑀅𑀯𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 ¶ ‘‘𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀤𑁂𑀲𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀲𑀫𑁂𑀢𑀺. 𑀢𑀲𑁆𑀫𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯 𑀬𑀼𑀢𑁆𑀢𑀦𑁆𑀢𑀺.

𑀉𑀤𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀦𑁆𑀢𑀧𑁄𑀦𑀓𑀣𑀸

𑁧𑁦𑁯. 𑀤𑀦𑁆𑀢𑀧𑁄𑀡𑀁 𑀆𑀭𑀸𑀫𑀝𑁆𑀞𑀓𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑁄 𑀲𑀗𑁆𑀖𑀲𑁆𑀲 𑀯𑁂𑀢𑀦𑀪𑀢𑁄 𑀳𑀼𑀢𑁆𑀯𑀸 𑀤𑁂𑀯𑀲𑀺𑀓𑀁 𑀯𑀸 𑀧𑀓𑁆𑀔𑀫𑀸𑀲𑀯𑀸𑀭𑁂𑀦 𑀯𑀸 𑀤𑀦𑁆𑀢𑀓𑀝𑁆𑀞𑀁 𑀆𑀳𑀭𑀢𑀺, 𑀲𑁄 𑀢𑀁 𑀆𑀳𑀭𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀬𑀸𑀯 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀺, 𑀢𑀸𑀯 𑀢𑀲𑁆𑀲𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣𑀚𑀸𑀢𑀓𑀁 𑀧𑀦 𑀕𑀭𑀼𑀪𑀡𑁆𑀟𑀁, 𑀢𑀫𑁆𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀏𑀲𑁂𑀯 𑀦𑀬𑁄 𑀕𑀡𑀧𑀼𑀕𑁆𑀕𑀮𑀕𑀺𑀳𑀺𑀫𑀦𑀼𑀲𑁆𑀲𑀲𑀦𑁆𑀢𑀓𑁂𑀧𑀺 𑀙𑀺𑀦𑁆𑀦𑀓𑁂 𑀅𑀘𑁆𑀙𑀺𑀦𑁆𑀦𑀓𑁂 𑀘. 𑀢𑁂𑀲𑀁 𑀆𑀭𑀸𑀫𑀼𑀬𑁆𑀬𑀸𑀦𑀪𑀽𑀫𑀻𑀲𑀼 𑀚𑀸𑀢𑀁 𑀲𑀸𑀫𑀡𑁂𑀭𑀸 𑀯𑀸𑀭𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀦𑁆𑀢𑀓𑀝𑁆𑀞𑀁 𑀆𑀳𑀭𑀦𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀫𑁆𑀧𑀺 𑀆𑀳𑀭𑀦𑁆𑀢𑀺, 𑀢𑀁 𑀬𑀸𑀯 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀁 𑀦 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑀺, 𑀢𑀸𑀯 𑀲𑀩𑁆𑀩𑀁 𑀢𑁂𑀲𑀁𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀬𑀤𑀸 𑀧𑀦 𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀦𑀺𑀓𑁆𑀔𑀺𑀧𑀦𑁆𑀢𑀺, ‘‘𑀬𑀣𑀸𑀲𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺; 𑀢𑀢𑁄 𑀧𑀝𑁆𑀞𑀸𑀬 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀯𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩𑀁. 𑀬𑁄 𑀳𑀺 𑀤𑁂𑀯𑀲𑀺𑀓𑀁 𑀲𑀗𑁆𑀖𑀫𑀚𑁆𑀛𑁂 𑀑𑀲𑀭𑀢𑀺, 𑀢𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀫𑁂𑀯 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 ¶ 𑀤𑁂𑀯𑀲𑀺𑀓𑀁 𑀦 𑀑𑀲𑀭𑀢𑀺, 𑀧𑀥𑀸𑀦𑀖𑀭𑁂 𑀯𑀲𑀺𑀢𑁆𑀯𑀸 𑀥𑀫𑁆𑀫𑀲𑀯𑀦𑁂 𑀯𑀸 𑀉𑀧𑁄𑀲𑀣𑀕𑁆𑀕𑁂 𑀯𑀸 𑀤𑀺𑀲𑁆𑀲𑀢𑀺, 𑀢𑁂𑀦 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘𑀤𑀦𑁆𑀢𑀓𑀝𑁆𑀞𑀸𑀦𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀔𑀻𑀡𑁂𑀲𑀼 𑀲𑀘𑁂 𑀧𑀼𑀦𑀧𑀺 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀩𑀳𑀽𑀦𑀺 𑀳𑁄𑀦𑁆𑀢𑀺𑀬𑁂𑀯, 𑀧𑀼𑀦𑀧𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀬𑀤𑀺 𑀧𑀦 𑀧𑀫𑀸𑀡𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀳𑀭𑀢𑀺, 𑀢𑁂𑀲𑀼 𑀅𑀓𑁆𑀔𑀻𑀡𑁂𑀲𑀼𑀬𑁂𑀯 𑀫𑀸𑀴𑀓𑁂 𑀔𑀻𑀬𑀦𑁆𑀢𑀺, 𑀢𑀢𑁄 𑀓𑁂𑀘𑀺 𑀣𑁂𑀭𑀸 ‘‘𑀬𑁂𑀳𑀺 𑀕𑀳𑀺𑀢𑀸𑀦𑀺, 𑀢𑁂 𑀧𑀝𑀺𑀆𑀳𑀭𑀦𑁆𑀢𑀽’’𑀢𑀺 𑀯𑀤𑁂𑀬𑁆𑀬𑀼𑀁, 𑀓𑁂𑀘𑀺 ‘‘𑀔𑀸𑀤𑀦𑁆𑀢𑀼, 𑀧𑀼𑀦 𑀲𑀸𑀫𑀡𑁂𑀭𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀯𑀺𑀯𑀸𑀤𑀧𑀭𑀺𑀳𑀭𑀡𑀢𑁆𑀣𑀁 ¶ 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀕𑀳𑀡𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺. 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀤𑀦𑁆𑀢𑀧𑁄𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀦𑀧𑁆𑀧𑀢𑀺𑀓𑀣𑀸

𑁧𑁧𑁦. 𑀯𑀦𑀲𑁆𑀲 ¶ 𑀧𑀢𑀻𑀢𑀺 𑀯𑀦𑀧𑁆𑀧𑀢𑀺; 𑀯𑀦𑀚𑁂𑀝𑁆𑀞𑀓𑀭𑀼𑀓𑁆𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀲𑀩𑁆𑀩𑁄𑀧𑀺 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀭𑀼𑀓𑁆𑀔𑁄 𑀅𑀥𑀺𑀧𑁆𑀧𑁂𑀢𑁄 𑀅𑀫𑁆𑀩𑀮𑀩𑀼𑀚𑀧𑀦𑀲𑀸𑀤𑀺𑀓𑁄. 𑀬𑀢𑁆𑀣 𑀯𑀸 𑀧𑀦 𑀫𑀭𑀺𑀘𑀯𑀮𑁆𑀮𑀺𑀆𑀤𑀻𑀦𑀺 𑀆𑀭𑁄𑀧𑁂𑀦𑁆𑀢𑀺, 𑀲𑁄 𑀙𑀺𑀚𑁆𑀚𑀫𑀸𑀦𑁄 𑀲𑀘𑁂 𑀏𑀓𑀸𑀬𑀧𑀺 𑀙𑀮𑁆𑀮𑀺𑀬𑀸 𑀯𑀸 𑀯𑀸𑀓𑁂𑀦 𑀯𑀸 𑀲𑀓𑀮𑀺𑀓𑀸𑀬 𑀯𑀸 𑀨𑁂𑀕𑁆𑀕𑀼𑀦𑀸 𑀯𑀸 𑀲𑀫𑁆𑀩𑀤𑁆𑀥𑁄𑀯 𑀳𑀼𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀢𑀺, 𑀭𑀓𑁆𑀔𑀢𑀺 𑀢𑀸𑀯.

𑀬𑁄 𑀧𑀦 𑀙𑀺𑀦𑁆𑀦𑁄𑀧𑀺 𑀯𑀮𑁆𑀮𑀻𑀳𑀺 𑀯𑀸 𑀲𑀸𑀫𑀦𑁆𑀢𑀭𑀼𑀓𑁆𑀔𑀲𑀸𑀔𑀸𑀳𑀺 𑀯𑀸 𑀲𑀫𑁆𑀩𑀤𑁆𑀥𑁄 𑀲𑀦𑁆𑀥𑀸𑀭𑀺𑀢𑀢𑁆𑀢𑀸 𑀉𑀚𑀼𑀓𑀫𑁂𑀯 𑀢𑀺𑀝𑁆𑀞𑀢𑀺, 𑀧𑀢𑀦𑁆𑀢𑁄 𑀯𑀸 𑀪𑀽𑀫𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀧𑀭𑀺𑀳𑀸𑀭𑁄, 𑀅𑀯𑀳𑀸𑀭𑁄 𑀏𑀯 𑀳𑁄𑀢𑀺. 𑀬𑁄𑀧𑀺 𑀓𑀓𑀘𑁂𑀦 𑀙𑀺𑀦𑁆𑀦𑁄 𑀅𑀘𑁆𑀙𑀺𑀦𑁆𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀣𑁂𑀯 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀧𑀦 𑀭𑀼𑀓𑁆𑀔𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀘𑀸𑀮𑁂𑀢𑁆𑀯𑀸 𑀧𑀸𑀢𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀘𑀸𑀮𑀸𑀧𑁂𑀢𑀺; 𑀅𑀜𑁆𑀜𑀁 𑀯𑀸𑀲𑁆𑀲 𑀲𑀦𑁆𑀢𑀺𑀓𑁂 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀧𑀭𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀭𑀸𑀧𑁂𑀢𑀺; 𑀫𑀓𑁆𑀓𑀝𑁂 𑀯𑀸 𑀧𑀭𑀺𑀧𑀸𑀢𑁂𑀢𑁆𑀯𑀸 𑀢𑀢𑁆𑀣 𑀆𑀭𑁄𑀧𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀆𑀭𑁄𑀧𑀸𑀧𑁂𑀢𑀺; 𑀯𑀕𑁆𑀕𑀼𑀮𑀺𑀬𑁄 𑀯𑀸 𑀢𑀢𑁆𑀣 𑀆𑀭𑁄𑀧𑁂𑀢𑀺, 𑀧𑀭𑁂𑀦 𑀯𑀸 𑀆𑀭𑁄𑀧𑀸𑀧𑁂𑀢𑀺; 𑀢𑀸 𑀢𑀁 𑀭𑀼𑀓𑁆𑀔𑀁 𑀧𑀸𑀢𑁂𑀦𑁆𑀢𑀺, 𑀢𑀲𑁆𑀲𑁂𑀯 𑀅𑀯𑀳𑀸𑀭𑁄.

𑀲𑀘𑁂 𑀧𑀦 𑀢𑁂𑀦 𑀭𑀼𑀓𑁆𑀔𑁂 𑀤𑀼𑀩𑁆𑀩𑀮𑁂 𑀓𑀢𑁂 𑀅𑀜𑁆𑀜𑁄 𑀅𑀦𑀸𑀡𑀢𑁆𑀢𑁄 𑀏𑀯 𑀢𑀁 𑀘𑀸𑀮𑁂𑀢𑁆𑀯𑀸 𑀧𑀸𑀢𑁂𑀢𑀺,

𑀭𑀼𑀓𑁆𑀔𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀓𑁆𑀓𑀝𑀸 𑀯𑀸 𑀯𑀕𑁆𑀕𑀼𑀮𑀺𑀬𑁄 𑀯𑀸 𑀆𑀭𑁄𑀳𑀦𑁆𑀢𑀺, 𑀧𑀭𑁄 𑀯𑀸 𑀅𑀦𑀸𑀡𑀢𑁆𑀢𑁄 𑀆𑀭𑁄𑀧𑁂𑀢𑀺, 𑀲𑀬𑀁 𑀯𑀸 𑀏𑀲 𑀯𑀸𑀢𑀫𑀼𑀔𑀁 𑀲𑁄𑀥𑁂𑀢𑀺, 𑀩𑀮𑀯𑀯𑀸𑀢𑁄 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀧𑀸𑀢𑁂𑀢𑀺; 𑀲𑀩𑁆𑀩𑀢𑁆𑀣 𑀪𑀡𑁆𑀟𑀤𑁂𑀬𑁆𑀬𑀁. 𑀯𑀸𑀢𑀫𑀼𑀔𑀲𑁄𑀥𑀦𑀁 𑀧𑀦𑁂𑀢𑁆𑀣 𑀅𑀲𑀫𑁆𑀧𑀢𑁆𑀢𑁂 𑀯𑀸𑀢𑁂 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀸𑀤𑀻𑀳𑀺 ¶ 𑀲𑀫𑁂𑀢𑀺, 𑀦𑁄 𑀅𑀜𑁆𑀜𑀣𑀸. 𑀭𑀼𑀓𑁆𑀔𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀲𑀢𑁆𑀣𑁂𑀦 𑀯𑀸 𑀆𑀓𑁄𑀝𑁂𑀢𑀺, 𑀅𑀕𑁆𑀕𑀺𑀁 𑀯𑀸 𑀤𑁂𑀢𑀺, 𑀫𑀡𑁆𑀟𑀼𑀓𑀓𑀡𑁆𑀝𑀓𑀁 𑀯𑀸 𑀯𑀺𑀲𑀁 𑀯𑀸 𑀆𑀓𑁄𑀝𑁂𑀢𑀺, 𑀬𑁂𑀦 𑀲𑁄 𑀫𑀭𑀢𑀺, 𑀲𑀩𑁆𑀩𑀢𑁆𑀣 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸𑀢𑀺.

𑀯𑀦𑀧𑁆𑀧𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀳𑀭𑀡𑀓𑀓𑀣𑀸

𑁧𑁧𑁧. 𑀳𑀭𑀡𑀓𑁂 ¶ ¶ 𑁋 𑀅𑀜𑁆𑀜𑀲𑁆𑀲 𑀳𑀭𑀡𑀓𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀻𑀢𑀺 𑀧𑀭𑀁 𑀲𑀻𑀲𑀪𑀸𑀭𑀸𑀤𑀻𑀳𑀺 𑀪𑀡𑁆𑀟𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀆𑀫𑀲𑀢𑀺, 𑀏𑀢𑁆𑀢𑀸𑀯𑀢𑀸 𑀅𑀲𑁆𑀲 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀻𑀢𑀺 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀁 𑀓𑀭𑁄𑀢𑀺, 𑀲𑀸𑀫𑀺𑀓𑁄 𑀦 𑀫𑀼𑀜𑁆𑀘𑀢𑀺, 𑀢𑁂𑀦𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀳𑀢𑁆𑀣𑀢𑁄 𑀫𑁄𑀘𑁂𑀢𑀺, 𑀢𑁂𑀦𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀢𑀁 𑀪𑀡𑁆𑀟𑀲𑀸𑀫𑀺𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀧𑀼𑀦 𑀢𑀁 𑀪𑀡𑁆𑀟𑀁 𑀫𑁄𑀘𑀸𑀧𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬, 𑀪𑀺𑀓𑁆𑀔𑀼 𑀧𑀞𑀫𑀕𑁆𑀕𑀳𑀡𑁂𑀦𑁂𑀯 𑀧𑀸𑀭𑀸𑀚𑀺𑀓𑁄. 𑀲𑀻𑀲𑀢𑁄 𑀯𑀸 𑀓𑀡𑁆𑀡𑀢𑁄 𑀯𑀸 𑀕𑀻𑀯𑀢𑁄 𑀯𑀸 𑀳𑀢𑁆𑀣𑀢𑁄 𑀯𑀸 𑀅𑀮𑀗𑁆𑀓𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀫𑁄𑀘𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀲𑀻𑀲𑀸𑀤𑀻𑀳𑀺 𑀫𑁄𑀘𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀳𑀢𑁆𑀣𑁂 𑀧𑀦 𑀯𑀮𑀬𑀁 𑀯𑀸 𑀓𑀝𑀓𑀁 𑀯𑀸 𑀅𑀦𑀻𑀳𑀭𑀺𑀢𑁆𑀯𑀸 𑀅𑀕𑁆𑀕𑀩𑀸𑀳𑀁 𑀖𑀁𑀲𑀦𑁆𑀢𑁄𑀯 𑀅𑀧𑀭𑀸𑀧𑀭𑀁 𑀯𑀸 𑀲𑀸𑀭𑁂𑀢𑀺, 𑀆𑀓𑀸𑀲𑀕𑀢𑀁 𑀯𑀸 𑀓𑀭𑁄𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀭𑀼𑀓𑁆𑀔𑀫𑀽𑀮𑀘𑀻𑀯𑀭𑀯𑀁𑀲𑁂𑀲𑀼 𑀯𑀮𑀬𑀫𑀺𑀯 𑀦 𑀧𑀸𑀭𑀸𑀚𑀺𑀓𑀁 𑀚𑀦𑁂𑀢𑀺. 𑀓𑀲𑁆𑀫𑀸? 𑀲𑀯𑀺𑀜𑁆𑀜𑀸𑀡𑀓𑀢𑁆𑀢𑀸. 𑀲𑀯𑀺𑀜𑁆𑀜𑀸𑀡𑀓𑀓𑁄𑀝𑁆𑀞𑀸𑀲𑀕𑀢𑀜𑁆𑀳𑀺 𑀬𑀸𑀯 𑀢𑀢𑁄 𑀦 𑀦𑀻𑀳𑀝𑀁, 𑀢𑀸𑀯 𑀢𑀢𑁆𑀣𑁂𑀯 𑀳𑁄𑀢𑀺. 𑀏𑀲𑁂𑀯 𑀦𑀬𑁄 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀧𑀸𑀤𑀓𑀝𑀓𑀓𑀝𑀽𑀧𑀕𑀧𑀺𑀴𑀦𑁆𑀥𑀦𑁂𑀲𑀼.

𑀬𑁄 𑀧𑀦 𑀧𑀭𑀲𑁆𑀲 𑀦𑀺𑀯𑀢𑁆𑀣𑀲𑀸𑀝𑀓𑀁 𑀅𑀘𑁆𑀙𑀺𑀦𑁆𑀤𑀢𑀺, 𑀧𑀭𑁄 𑀘 𑀲𑀮𑀚𑁆𑀚𑀺𑀢𑀸𑀬 𑀲𑀳𑀲𑀸 𑀦 𑀫𑀼𑀜𑁆𑀘𑀢𑀺, 𑀏𑀓𑁂𑀦𑀦𑁆𑀢𑁂𑀦 𑀘𑁄𑀭𑁄 𑀓𑀟𑁆𑀠𑀢𑀺, 𑀏𑀓𑁂𑀦𑀦𑁆𑀢𑁂𑀦 𑀧𑀭𑁄, 𑀭𑀓𑁆𑀔𑀢𑀺 𑀢𑀸𑀯. 𑀧𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀣𑀸𑀧𑀺 𑀢𑀁 𑀓𑀟𑁆𑀠𑀦𑁆𑀢𑀲𑁆𑀲 𑀙𑀺𑀚𑁆𑀚𑀺𑀢𑁆𑀯𑀸 𑀏𑀓𑀤𑁂𑀲𑁄 𑀳𑀢𑁆𑀣𑀕𑀢𑁄 𑀳𑁄𑀢𑀺, 𑀲𑁄 𑀘 𑀧𑀸𑀤𑀁 𑀅𑀕𑁆𑀖𑀢𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀳𑀪𑀡𑁆𑀟𑀳𑀸𑀭𑀓𑀦𑁆𑀢𑀺 ‘‘𑀲𑀪𑀡𑁆𑀟𑀳𑀸𑀭𑀓𑀁 𑀪𑀡𑁆𑀟𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀢𑁄 𑀬𑀸𑀳𑀻’’𑀢𑀺 𑀪𑀡𑁆𑀟𑀳𑀸𑀭𑀓𑀁 𑀢𑀚𑁆𑀚𑁂𑀢𑀺, 𑀲𑁄 𑀪𑀻𑀢𑁄 𑀘𑁄𑀭𑁂𑀦 𑀅𑀥𑀺𑀧𑁆𑀧𑁂𑀢𑀤𑀺𑀲𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀏𑀓𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀘𑁄𑀭𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁; 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁. 𑀧𑀸𑀢𑀸𑀧𑁂𑀢𑀻𑀢𑀺 𑀅𑀣𑀸𑀧𑀺 𑀘𑁄𑀭𑁄 𑀪𑀡𑁆𑀟𑀳𑀸𑀭𑀓𑀲𑁆𑀲 𑀳𑀢𑁆𑀣𑁂 𑀆𑀯𑀼𑀥𑀁 𑀤𑀺𑀲𑁆𑀯𑀸 𑀲𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀧𑀸𑀢𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀓𑀸𑀫𑁄 𑀏𑀓𑀫𑀦𑁆𑀢𑀁 𑀧𑀝𑀺𑀓𑁆𑀓𑀫𑁆𑀫 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀧𑀸𑀢𑀸𑀧𑁂𑀢𑀺, 𑀧𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀧𑀸𑀢𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺𑀆𑀤𑀺 𑀧𑀦 𑀧𑀭𑀺𑀓𑀧𑁆𑀧𑀯𑀲𑁂𑀦 ¶ 𑀯𑀼𑀢𑁆𑀢𑀁. 𑀬𑁄 𑀳𑀺 𑀪𑀡𑁆𑀟𑀁 𑀧𑀸𑀢𑀸𑀧𑁂𑀢𑁆𑀯𑀸 ‘‘𑀬𑀁 𑀫𑀫 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀧𑀸𑀢𑀸𑀧𑁂𑀢𑀺, 𑀢𑀲𑁆𑀲 𑀧𑀸𑀢𑀸𑀧𑀦𑁂 𑀘 𑀆𑀫𑀲𑀦𑁂 ¶ 𑀘 𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀸𑀤𑀕𑁆𑀖𑀦𑀓𑀲𑁆𑀲 𑀞𑀸𑀦𑀸 𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀁. 𑀢𑀁 𑀧𑀘𑁆𑀙𑀸 𑀧𑀝𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀫𑀼𑀜𑁆𑀘𑀢𑁄𑀧𑀺 𑀦𑀢𑁆𑀣𑀺𑀬𑁂𑀯 𑀲𑀫𑀡𑀪𑀸𑀯𑁄. 𑀬𑁄𑀧𑀺 𑀪𑀡𑁆𑀟𑀳𑀸𑀭𑀓𑀁 ¶ 𑀅𑀢𑀺𑀓𑁆𑀓𑀫𑀦𑁆𑀢𑀁 𑀤𑀺𑀲𑁆𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 ‘‘𑀢𑀺𑀝𑁆𑀞, 𑀢𑀺𑀝𑁆𑀞, 𑀪𑀡𑁆𑀟𑀁 𑀧𑀸𑀢𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀸𑀢𑀸𑀧𑁂𑀢𑀺, 𑀢𑀲𑁆𑀲𑀸𑀧𑀺 𑀢𑁂𑀦 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀬𑁄 𑀧𑀦 ‘‘𑀢𑀺𑀝𑁆𑀞 𑀢𑀺𑀝𑁆𑀞𑀸’’𑀢𑀺 𑀯𑀤𑀢𑀺, ‘‘𑀧𑀸𑀢𑁂𑀳𑀻’’𑀢𑀺 𑀦 𑀯𑀤𑀢𑀺; 𑀇𑀢𑀭𑁄 𑀘 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀘𑁂 𑀏𑀲 𑀫𑀁 𑀧𑀸𑀧𑀼𑀡𑁂𑀬𑁆𑀬, 𑀖𑀸𑀢𑁂𑀬𑁆𑀬𑀸𑀧𑀺 𑀫’’ 𑀦𑁆𑀢𑀺 𑀲𑀸𑀮𑀬𑁄𑀯 𑀳𑀼𑀢𑁆𑀯𑀸 𑀢𑀁 𑀪𑀡𑁆𑀟𑀁 𑀕𑀳𑀦𑀝𑁆𑀞𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑀫𑀢𑀺, 𑀧𑀸𑀢𑀦𑀧𑀘𑁆𑀘𑀬𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀆𑀕𑀦𑁆𑀢𑁆𑀯𑀸 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀫𑀬𑀸 𑀧𑀸𑀢𑀸𑀧𑁂𑀦𑁆𑀢𑁂𑀦𑁂𑀯 𑀇𑀤𑀁 𑀫𑀫 𑀲𑀦𑁆𑀢𑀓𑀁 𑀓𑀢’’𑀦𑁆𑀢𑀺 𑀢𑀢𑁄 𑀦𑀁 𑀲𑀓𑀲𑀜𑁆𑀜𑀸𑀬 𑀕𑀡𑁆𑀳𑀸𑀢𑀺; 𑀕𑀳𑀡𑁂 𑀭𑀓𑁆𑀔𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀤𑁂𑀦𑁆𑀢𑀲𑁆𑀲 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. ‘‘𑀲𑁄 𑀇𑀫𑀁 𑀙𑀟𑁆𑀟𑁂𑀢𑁆𑀯𑀸 𑀕𑀢𑁄, 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀤𑀸𑀦𑀺 𑀇𑀤’’𑀦𑁆𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀡𑁆𑀳𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀧𑀦 𑀲𑀸𑀫𑀺𑀓𑁄 ‘‘𑀢𑀺𑀝𑁆𑀞 𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦𑁂𑀯 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀦 𑀤𑀸𑀦𑀺 𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀦𑀺𑀭𑀸𑀮𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀢𑀺, 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂 𑀤𑀼𑀓𑁆𑀓𑀝𑀁. 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀁, 𑀅𑀤𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀢𑀲𑁆𑀲 𑀧𑀬𑁄𑀕𑁂𑀦 𑀙𑀟𑁆𑀟𑀺𑀢𑀢𑁆𑀢𑀸𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀼 𑀧𑀦 𑀯𑀺𑀘𑀸𑀭𑀡𑀸 𑀏𑀯 𑀦𑀢𑁆𑀣𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀓𑀲𑀜𑁆𑀜𑀸𑀬 𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀯𑀸 𑀕𑀡𑁆𑀳𑀦𑁆𑀢𑁂𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀳𑀭𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀺𑀥𑀺𑀓𑀣𑀸

𑁧𑁧𑁨. 𑀉𑀧𑀦𑀺𑀥𑀺𑀫𑁆𑀳𑀺 𑁋 𑀦𑀸𑀳𑀁 𑀕𑀡𑁆𑀳𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀁. ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣? 𑀦𑁂𑀯𑀺𑀤𑀁 𑀫𑀬𑁆𑀳𑀁 𑀅𑀦𑀼𑀭𑀽𑀧𑀁, 𑀦 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. ‘‘𑀭𑀳𑁄 𑀫𑀬𑀸 𑀏𑀢𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀁, 𑀦 ¶ 𑀅𑀜𑁆𑀜𑁄 𑀓𑁄𑀘𑀺 𑀚𑀸𑀦𑀸𑀢𑀺, ‘𑀤𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀦𑁄’’’𑀢𑀺 𑀲𑀸𑀫𑀺𑀓𑁄 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀲 𑀨𑀭𑀼𑀲𑀸𑀤𑀺𑀪𑀸𑀯𑀁 𑀤𑀺𑀲𑁆𑀯𑀸 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑀢𑁆𑀭 𑀲𑀘𑀸𑀬𑀁 𑀪𑀺𑀓𑁆𑀔𑀼 ‘‘𑀓𑀺𑀮𑀫𑁂𑀢𑁆𑀯𑀸 𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯. 𑀲𑀘𑁂𑀧𑀺 𑀲𑁄 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄, 𑀪𑀡𑁆𑀟𑀲𑁆𑀲𑀸𑀫𑀺𑀓𑁄 𑀧𑀦 𑀕𑀳𑀡𑁂 𑀲𑀉𑀲𑁆𑀲𑀸𑀳𑁄 ¶ , 𑀭𑀓𑁆𑀔𑀢𑁂𑀯. 𑀬𑀤𑀺 𑀧𑀦 𑀲𑁄 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄 𑀪𑀡𑁆𑀟𑀲𑀸𑀫𑀺𑀓𑁄𑀧𑀺 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀁 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁 ¶ . 𑀬𑀤𑀺𑀧𑀺 𑀫𑀼𑀔𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀘𑀺𑀢𑁆𑀢𑁂𑀦 𑀧𑀦 𑀅𑀤𑀸𑀢𑀼𑀓𑀸𑀫𑁄, 𑀏𑀯𑀫𑁆𑀧𑀺 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀢𑀁 𑀧𑀦 𑀉𑀧𑀦𑀺𑀥𑀺 𑀦𑀸𑀫 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑁂𑀳𑀺 𑀞𑀧𑀺𑀢𑀪𑀡𑁆𑀟𑀁, 𑀅𑀕𑀼𑀢𑁆𑀢𑀤𑁂𑀲𑀢𑁄 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑀦𑀢𑁆𑀣𑀸𑀬 𑀳𑀭𑀢𑁄 𑀅𑀦𑀸𑀧𑀢𑁆𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀧𑀺 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀯𑀓𑀸𑀮𑀺𑀓𑀕𑁆𑀕𑀳𑀡𑁂𑀧𑀺 𑀢𑀣𑁂𑀯. 𑀥𑀫𑁆𑀫𑀁 𑀘𑀭𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀡𑁆𑀡𑀦𑀸.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀧𑀢𑁆𑀢𑀘𑀢𑀼𑀓𑁆𑀓𑀸𑀤𑀺𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑁄 𑁋 𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀧𑀭𑀲𑁆𑀲 𑀫𑀳𑀕𑁆𑀖𑁂 𑀧𑀢𑁆𑀢𑁂 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀳𑀭𑀺𑀢𑀼𑀓𑀸𑀫𑁄 𑀞𑀧𑀺𑀢𑀝𑁆𑀞𑀸𑀦𑀫𑀲𑁆𑀲 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀧𑀢𑁆𑀢𑀁 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀞𑀧𑁂𑀲𑀺. 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀯𑀸𑀘𑀸𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀫𑀸𑀦𑀁 𑀫𑀳𑀸𑀣𑁂𑀭𑀫𑀸𑀳 𑁋 ‘‘𑀯𑀦𑁆𑀤𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀏𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼, 𑀓𑀸𑀮𑀲𑁆𑀲𑁂𑀯𑀫𑁆𑀳𑀺 𑀕𑀦𑁆𑀢𑀼𑀓𑀸𑀫𑁄, 𑀅𑀲𑀼𑀓𑀲𑁆𑀫𑀺𑀜𑁆𑀘 𑀫𑁂 𑀞𑀸𑀦𑁂 𑀈𑀤𑀺𑀲𑁂𑀦 𑀦𑀸𑀫 𑀅𑀁𑀲𑀩𑀤𑁆𑀥𑀓𑁂𑀦 𑀈𑀤𑀺𑀲𑀸𑀬 𑀧𑀢𑁆𑀢𑀢𑁆𑀣𑀯𑀺𑀓𑀸𑀬 𑀧𑀢𑁆𑀢𑁄 𑀞𑀧𑀺𑀢𑁄. 𑀲𑀸𑀥𑀸𑀳𑀁, 𑀪𑀦𑁆𑀢𑁂, 𑀢𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀣𑁂𑀭𑁄 𑀧𑀯𑀺𑀲𑀺𑀢𑁆𑀯𑀸 𑀢𑀁 𑀕𑀡𑁆𑀳𑀺. 𑀉𑀤𑁆𑀥𑀸𑀭𑁂𑀬𑁂𑀯 𑀘𑁄𑀭𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀆𑀕𑀦𑁆𑀢𑁆𑀯𑀸 ‘‘𑀓𑁄𑀲𑀺 𑀢𑁆𑀯𑀁 𑀅𑀯𑁂𑀮𑀸𑀬 𑀆𑀕𑀢𑁄’’𑀢𑀺 ¶ 𑀯𑀼𑀢𑁆𑀢𑁄 𑀪𑀻𑀢𑁄 𑀧𑀮𑀸𑀬𑀢𑀺, 𑀧𑀸𑀭𑀸𑀚𑀺𑀓𑀁 𑀧𑀢𑁆𑀯𑀸𑀯 𑀧𑀮𑀸𑀬𑀢𑀺. 𑀣𑁂𑀭𑀲𑁆𑀲 𑀧𑀦 𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀣𑁂𑀭𑁄 ‘‘𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀕𑀡𑁆𑀳𑀺, 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀅𑀜𑁆𑀜𑀁 𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀺, 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀆𑀡𑀢𑁆𑀢𑀲𑀤𑀺𑀲𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀺.

𑀢𑀁 𑀫𑀜𑁆𑀜𑀫𑀸𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀅𑀤𑀸𑀲𑀺, 𑀘𑁄𑀭𑀲𑁆𑀲 𑀲𑀸𑀫𑀺𑀓𑁂𑀦 𑀤𑀺𑀦𑁆𑀦𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁. 𑀢𑀁 𑀫𑀜𑁆𑀜𑀫𑀸𑀦𑁄 𑀘𑁄𑀭𑀲𑁆𑀲𑁂𑀯 𑀧𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀅𑀤𑀸𑀲𑀺, 𑀇𑀥𑀸𑀧𑀺 𑀘𑁄𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯. 𑀲𑀩𑁆𑀩𑀢𑁆𑀣 𑀣𑁂𑀭𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀧𑀭𑁄 ¶ ‘‘𑀧𑀢𑁆𑀢𑀁 𑀘𑁄𑀭𑁂𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀦𑀺𑀤𑁆𑀤𑀸𑀬𑀫𑀸𑀦𑀁 𑀣𑁂𑀭𑀁 𑀯𑀦𑁆𑀤𑀺. ‘‘𑀓𑁄 𑀅𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘𑀅𑀳𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀪𑀺𑀓𑁆𑀔𑀼, 𑀏𑀓𑀁 𑀢𑀸𑀯 𑀫𑁂 𑀧𑀢𑁆𑀢𑀁 𑀤𑁂𑀣, 𑀕𑀸𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀪𑁂𑀲𑀚𑁆𑀚𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 ‘‘𑀇𑀥 𑀕𑀺𑀮𑀸𑀦𑁄 𑀦𑀢𑁆𑀣𑀺, 𑀘𑁄𑀭𑁄 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀇𑀫𑀁 𑀳𑀭𑀢𑀽’’𑀢𑀺 𑀅𑀢𑁆𑀢𑀦𑁄 𑀯𑁂𑀭𑀺𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. ‘‘𑀯𑁂𑀭𑀺𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑁄’’𑀢𑀺 𑀲𑀜𑁆𑀜𑀸𑀬 𑀅𑀜𑁆𑀜𑀲𑁆𑀲 𑀧𑀢𑁆𑀢𑀁 𑀉𑀤𑁆𑀥𑀭𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 ‘‘𑀯𑁂𑀭𑀺𑀲𑁆𑀲𑀸𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀘𑁄𑀭𑀲𑁆𑀲𑁂𑀯 𑀧𑀢𑁆𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑁂𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀣𑁂𑀭𑀲𑁆𑀲 𑀧𑀸𑀭𑀸𑀚𑀺𑀓𑀁, 𑀘𑁄𑀭𑀲𑁆𑀲 ¶ 𑀤𑀼𑀓𑁆𑀓𑀝𑀁. 𑀅𑀣 ‘‘𑀯𑁂𑀭𑀺𑀲𑁆𑀲𑀸𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀤𑁂𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀓𑀝𑀁.

𑀏𑀓𑁄 𑀫𑀳𑀸𑀣𑁂𑀭𑁄 𑀉𑀧𑀝𑁆𑀞𑀸𑀓𑀁 𑀤𑀳𑀭𑀪𑀺𑀓𑁆𑀔𑀼𑀁 ‘‘𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳, 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀤𑀳𑀭𑁄 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀘𑁂 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀆𑀡𑀢𑁆𑀢𑀺𑀬𑀸 𑀕𑀳𑀺𑀢𑀢𑁆𑀢𑀸. 𑀲𑀘𑁂 𑀧𑀦 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀅𑀝𑀯𑀺𑀁 𑀧𑀯𑀺𑀲𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀣 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀧𑀮𑀸𑀬𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀅𑀣𑀸𑀧𑀺 𑀫𑀳𑀸𑀣𑁂𑀭𑀲𑁆𑀲 𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀝𑁆𑀞𑀸𑀦𑀢𑁄 𑀕𑀸𑀫𑀸𑀪𑀺𑀫𑀼𑀔𑁄 𑀧𑀮𑀸𑀬𑀢𑀺, 𑀕𑀸𑀫𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀉𑀪𑁄𑀧𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸 ¶ 𑀕𑀳𑁂𑀢𑁆𑀯𑀸 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀣𑁂𑀭𑁄 𑀘 𑀧𑀼𑀦𑀧𑀺 𑀢𑀁 𑀯𑀤𑀢𑀺 𑁋 ‘‘𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳, 𑀯𑀺𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀢𑀢𑁆𑀭 𑀘𑁂 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑁄𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀅𑀝𑀯𑀺𑀁 𑀧𑀯𑀺𑀲𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀸𑀫𑀸𑀪𑀺𑀫𑀼𑀔𑁄 𑀏𑀯 𑀧𑀮𑀸𑀬𑀢𑀺, 𑀕𑀸𑀫𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀧𑀼𑀭𑀢𑁄 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀧𑀮𑀸𑀬𑀺𑀢𑁆𑀯𑀸 𑀯𑀺𑀳𑀸𑀭𑁂 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀅𑀯𑀽𑀧𑀲𑀦𑁆𑀢𑁂𑀦𑁂𑀯 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑀺, 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀬𑁄 𑀧𑀦 𑀅𑀦𑀸𑀡𑀢𑁆𑀢𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑀡𑀸𑀤𑀻𑀲𑀼𑀧𑀺 𑀧𑀸𑀭𑀸𑀚𑀺𑀓𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀬𑁄 𑀧𑀦 ‘‘𑀅𑀲𑀼𑀓𑀁 𑀦𑀸𑀫 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀻𑀯𑀭𑀁 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀯𑀸 𑀏𑀳𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑀡𑀸𑀤𑀻𑀲𑀼 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀫𑀕𑁆𑀕𑀸 𑀑𑀓𑁆𑀓𑀫𑀦𑁂 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 ¶ 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀚𑀻𑀭𑀸𑀧𑁂𑀢𑀺, 𑀘𑁄𑀭𑀸 𑀯𑀸 𑀢𑀲𑁆𑀲 𑀢𑀁 𑀳𑀭𑀦𑁆𑀢𑀺, 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀘𑁆𑀙𑀢𑁄𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀧𑀦 𑀅𑀦𑀸𑀡𑀢𑁆𑀢𑁄 𑀣𑁂𑀭𑁂𑀦 𑀦𑀺𑀫𑀺𑀢𑁆𑀢𑁂 𑀯𑀸 𑀓𑀢𑁂 𑀲𑀬𑀫𑁂𑀯 𑀯𑀸 𑀓𑀺𑀮𑀺𑀝𑁆𑀞𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀤𑁂𑀣, 𑀪𑀦𑁆𑀢𑁂, 𑀘𑀻𑀯𑀭𑀁; 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀭𑀚𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺; 𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑀡𑀸𑀤𑀻𑀲𑀼 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀅𑀦𑀸𑀡𑀢𑁆𑀢𑀺𑀬𑀸 𑀕𑀳𑀺𑀢𑀢𑁆𑀢𑀸. 𑀫𑀕𑁆𑀕𑀸 𑀑𑀓𑁆𑀓𑀫𑀢𑁄𑀧𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀫𑁂𑀯 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑁄𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀬𑀢𑁆𑀣 𑀕𑀢𑁄, 𑀢𑀢𑁆𑀣 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀳𑀸𑀭𑁂 𑀯𑀸 𑀢𑀫𑁂𑀯 𑀯𑀺𑀳𑀸𑀭𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀲𑁆𑀲 𑀏𑀓𑀧𑀲𑁆𑀲𑁂 𑀯𑀸 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀲𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 ¶ 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀚𑀻𑀭𑀸𑀧𑁂𑀢𑀺, 𑀘𑁄𑀭𑀸 𑀯𑀸 𑀢𑀲𑁆𑀲 𑀢𑀁 𑀳𑀭𑀦𑁆𑀢𑀺, 𑀬𑀣𑀸 𑀯𑀸 𑀢𑀣𑀸 𑀯𑀸 𑀦𑀲𑁆𑀲𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑁄 𑀧𑀦 𑀧𑀸𑀭𑀸𑀚𑀺𑀓𑀁.

𑀬𑁄 𑀧𑀦 𑀣𑁂𑀭𑁂𑀦 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 ‘‘𑀤𑁂𑀣, 𑀪𑀦𑁆𑀢𑁂, 𑀅𑀳𑀁 𑀭𑀚𑀺𑀢𑁆𑀯𑀸 ¶ 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀢𑁆𑀣 𑀕𑀦𑁆𑀢𑁆𑀯𑀸, 𑀪𑀦𑁆𑀢𑁂, 𑀭𑀚𑀸𑀫𑀻’’𑀢𑀺 𑀧𑀼𑀘𑁆𑀙𑀢𑀺. 𑀣𑁂𑀭𑁄 𑀘 𑀦𑀁 ‘‘𑀬𑀢𑁆𑀣 𑀇𑀘𑁆𑀙𑀲𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀭𑀚𑀸𑀳𑀻’’𑀢𑀺 𑀯𑀤𑀢𑀺, 𑀅𑀬𑀁 ‘‘𑀯𑀺𑀲𑁆𑀲𑀝𑁆𑀞𑀤𑀽𑀢𑁄’’ 𑀦𑀸𑀫. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀮𑀸𑀬𑀦𑁆𑀢𑁄𑀧𑀺 𑀦 𑀅𑀯𑀳𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀧𑀮𑀸𑀬𑀢𑁄𑀧𑀺 𑀧𑀭𑀺𑀪𑁄𑀕𑁂𑀦 𑀯𑀸 𑀅𑀜𑁆𑀜𑀣𑀸 𑀯𑀸 𑀦𑀸𑀲𑀬𑀢𑁄𑀧𑀺 𑀪𑀡𑁆𑀟𑀤𑁂𑀬𑁆𑀬𑀫𑁂𑀯 𑀳𑁄𑀢𑀺. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀧𑀳𑀺𑀡𑀢𑀺 𑁋 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀅𑀲𑀼𑀓𑀪𑀺𑀓𑁆𑀔𑀼𑀲𑁆𑀲 𑀤𑁂𑀳𑀻’’𑀢𑀺, 𑀢𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 ‘‘𑀅𑀲𑀼𑀓𑀁 𑀦𑀸𑀫 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀻𑀯𑀭𑀁 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀯𑀸 𑀏𑀳𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀧𑀭𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀺𑀢𑀼𑀓𑀸𑀫𑁄 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑁋 ‘‘𑀓𑁄 𑀦𑀼 𑀔𑁄 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺, 𑀢𑀢𑁆𑀭 𑀘𑁂 𑀏𑀓𑁄 𑁋 ‘‘𑀤𑁂𑀣, 𑀪𑀦𑁆𑀢𑁂, 𑀅𑀳𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 ‘‘𑀤𑁂𑀣, 𑀪𑀦𑁆𑀢𑁂, 𑀘𑀻𑀯𑀭𑀁, 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀭𑀚𑀺𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑁄 𑀯𑀺𑀦𑀺𑀘𑁆𑀙𑀬𑁄. 𑀣𑁂𑀭𑁂𑀦 𑀘𑀻𑀯𑀭𑀢𑁆𑀣𑀸𑀬 𑀯𑀢𑁆𑀣𑀁 𑀮𑀪𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀓𑀼𑀮𑁂 𑀞𑀧𑀺𑀢𑀁 𑀳𑁄𑀢𑀺. 𑀅𑀣𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀢𑁆𑀣𑀁 𑀳𑀭𑀺𑀢𑀼𑀓𑀸𑀫𑁄 𑀢𑀢𑁆𑀭 𑀕𑀦𑁆𑀢𑁆𑀯𑀸 ‘‘𑀢𑀁 𑀓𑀺𑀭 𑀯𑀢𑁆𑀣𑀁 𑀤𑁂𑀣𑀸’’𑀢𑀺 𑀣𑁂𑀭𑁂𑀦 𑀧𑁂𑀲𑀺𑀢𑁄 𑀯𑀺𑀬 𑀯𑀤𑀢𑀺; 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀉𑀧𑀸𑀲𑀓𑁂𑀦 𑀞𑀧𑀺𑀢𑀁 𑀉𑀧𑀸𑀲𑀺𑀓𑀸 𑀯𑀸, 𑀉𑀧𑀸𑀲𑀺𑀓𑀸𑀬 𑀞𑀧𑀺𑀢𑀁 ¶ 𑀉𑀧𑀸𑀲𑀓𑁄 𑀯𑀸 𑀅𑀜𑁆𑀜𑁄 𑀯𑀸, 𑀓𑁄𑀘𑀺 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀺, 𑀉𑀤𑁆𑀥𑀸𑀭𑁂𑀬𑁂𑀯𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁂𑀳𑀺 ‘‘𑀇𑀫𑀁 𑀣𑁂𑀭𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀁 𑀞𑀧𑀺𑀢𑀁 𑀳𑁄𑀢𑀺. 𑀅𑀣𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑀁 𑀳𑀭𑀺𑀢𑀼𑀓𑀸𑀫𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀓𑀺𑀭 𑀯𑀢𑁆𑀣𑀁 𑀤𑀸𑀢𑀼𑀓𑀸𑀫𑀢𑁆𑀣, 𑀢𑀁 𑀤𑁂𑀣𑀸’’𑀢𑀺 𑀯𑀤𑀢𑀺. 𑀢𑁂 𑀘𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀫𑀬𑀁, 𑀪𑀦𑁆𑀢𑁂, 𑀪𑁄𑀚𑁂𑀢𑁆𑀯𑀸 𑀤𑀲𑁆𑀲𑀸𑀫𑀸𑀢𑀺 𑀞𑀧𑀬𑀺𑀫𑁆𑀳, 𑀳𑀦𑁆𑀤 𑀕𑀡𑁆𑀳𑀸𑀳𑀻’’𑀢𑀺 𑀤𑁂𑀦𑁆𑀢𑀺. 𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁, 𑀪𑀡𑁆𑀟𑀤𑁂𑀬𑁆𑀬𑀜𑁆𑀘 𑀳𑁄𑀢𑀺.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀯𑀢𑁆𑀯𑀸 𑀕𑀸𑀫𑀁 𑀕𑀘𑁆𑀙𑀢𑀺, ‘‘𑀇𑀢𑁆𑀣𑀦𑁆𑀦𑀸𑀫𑁄 𑀫𑀫 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀞𑀧𑁂𑀬𑁆𑀬𑀸𑀲𑀻’’𑀢𑀺. ‘‘𑀲𑀸𑀥𑀽’’𑀢𑀺 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀦𑁆𑀦𑀁 𑀫𑀳𑀕𑁆𑀖𑀲𑀸𑀝𑀓𑀁 𑀅𑀢𑁆𑀢𑀦𑀸 𑀮𑀤𑁆𑀥𑁂𑀦 𑀅𑀧𑁆𑀧𑀕𑁆𑀖𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀞𑀧𑁂𑀢𑁆𑀯𑀸 𑀢𑁂𑀦 𑀆𑀕𑀢𑁂𑀦 𑀅𑀢𑁆𑀢𑀦𑁄 𑀫𑀳𑀕𑁆𑀖𑀲𑀸𑀝𑀓𑀲𑁆𑀲 𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀯𑀸 𑀅𑀜𑀢𑁆𑀯𑀸 𑀯𑀸 ‘‘𑀤𑁂𑀳𑀺 𑀫𑁂 𑀯𑀲𑁆𑀲𑀸𑀯𑀸𑀲𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀢𑀯 𑀣𑀽𑀮𑀲𑀸𑀝𑀓𑁄 𑀮𑀤𑁆𑀥𑁄, 𑀫𑀬𑁆𑀳𑀁 𑀧𑀦 𑀲𑀸𑀝𑀓𑁄 𑀫𑀳𑀕𑁆𑀖𑁄, 𑀤𑁆𑀯𑁂𑀧𑀺 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀞𑀧𑀺𑀢𑀸, 𑀧𑀯𑀺𑀲𑀺𑀢𑁆𑀯𑀸 ¶ 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺. 𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀣𑀽𑀮𑀲𑀸𑀝𑀓𑁂 𑀕𑀳𑀺𑀢𑁂 𑀇𑀢𑀭𑀲𑁆𑀲 𑀇𑀢𑀭𑀁 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀅𑀣𑀸𑀧𑀺 𑀢𑀲𑁆𑀲 𑀲𑀸𑀝𑀓𑁂 ¶ 𑀅𑀢𑁆𑀢𑀦𑁄 𑀦𑀸𑀫𑀁 𑀅𑀢𑁆𑀢𑀦𑁄 𑀘 𑀲𑀸𑀝𑀓𑁂 𑀢𑀲𑁆𑀲 𑀦𑀸𑀫𑀁 𑀮𑀺𑀔𑀺𑀢𑁆𑀯𑀸 ‘‘𑀕𑀘𑁆𑀙 𑀦𑀸𑀫𑀁 𑀯𑀸𑀘𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀢𑀢𑁆𑀭𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀅𑀢𑁆𑀢𑀦𑀸 𑀘 𑀢𑁂𑀦 𑀘 𑀮𑀤𑁆𑀥𑀲𑀸𑀝𑀓𑁂 𑀏𑀓𑀢𑁄 𑀞𑀧𑁂𑀢𑁆𑀯𑀸 𑀢𑀁 𑀏𑀯𑀁 𑀯𑀤𑀢𑀺 𑁋 ‘‘𑀢𑀬𑀸 𑀘 𑀫𑀬𑀸 𑀘 𑀮𑀤𑁆𑀥𑀲𑀸𑀝𑀓𑀸 𑀤𑁆𑀯𑁂𑀧𑀺 𑀅𑀦𑁆𑀢𑁄𑀕𑀩𑁆𑀪𑁂 𑀞𑀧𑀺𑀢𑀸, 𑀕𑀘𑁆𑀙 𑀬𑀁 𑀇𑀘𑁆𑀙𑀲𑀺, 𑀢𑀁 𑀯𑀺𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀘 𑀮𑀚𑁆𑀚𑀸𑀬 𑀆𑀯𑀸𑀲𑀺𑀓𑁂𑀦 𑀮𑀤𑁆𑀥𑀁 𑀣𑀽𑀮𑀲𑀸𑀝𑀓𑀫𑁂𑀯 𑀕𑀡𑁆𑀳𑁂𑀬𑁆𑀬, 𑀢𑀢𑁆𑀭𑀸𑀯𑀸𑀲𑀺𑀓𑀲𑁆𑀲 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀸𑀯𑀲𑁂𑀲𑀁 𑀇𑀢𑀭𑀁 𑀕𑀡𑁆𑀳𑀢𑁄 𑀅𑀦𑀸𑀧𑀢𑁆𑀢𑀺. 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑀫𑀻𑀧𑁂 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 ‘‘𑀏𑀢𑁂 𑀲𑀗𑁆𑀕𑁄𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀕𑀘𑁆𑀙𑀢𑀺. 𑀲𑀘𑁂 𑀦𑀁 𑀆𑀯𑀸𑀲𑀺𑀓𑀸 𑀲𑀗𑁆𑀕𑁄𑀧𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀦𑀝𑁆𑀞𑁂 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂𑀧𑀺 𑀲𑁄 ‘‘𑀇𑀤𑀁, 𑀪𑀦𑁆𑀢𑁂, 𑀞𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺, 𑀇𑀢𑀭𑁂 𑀘 𑀲𑀓𑀺𑀘𑁆𑀘𑀧𑁆𑀧𑀲𑀼𑀢𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀏𑀲𑁂𑀯 𑀦𑀬𑁄. 𑀅𑀣𑀸𑀧𑀺 𑀢𑁂 ‘‘𑀇𑀤𑀁, 𑀪𑀦𑁆𑀢𑁂, 𑀞𑀧𑁂𑀣𑀸’’𑀢𑀺 𑀯𑀼𑀢𑁆𑀢𑀸 ‘‘𑀫𑀬𑀁 𑀩𑁆𑀬𑀸𑀯𑀝𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀇𑀢𑀭𑁄 𑀘 ‘‘𑀅𑀯𑀲𑁆𑀲𑀁 𑀞𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀢𑁂𑀦 𑀬𑀸𑀘𑀺𑀢𑀸 𑀯𑀸 𑀅𑀬𑀸𑀘𑀺𑀢𑀸 𑀯𑀸 ‘‘𑀫𑀬𑀁 𑀞𑀧𑁂𑀲𑁆𑀲𑀸𑀫, 𑀢𑁆𑀯𑀁 𑀕𑀘𑁆𑀙𑀸’’𑀢𑀺 𑀯𑀤𑀦𑁆𑀢𑀺; 𑀢𑀁 𑀲𑀗𑁆𑀕𑁄𑀧𑀺𑀢𑀩𑁆𑀩𑀁. 𑀦𑁄 𑀘𑁂 𑀲𑀗𑁆𑀕𑁄𑀧𑁂𑀦𑁆𑀢𑀺, 𑀦𑀝𑁆𑀞𑁂 𑀕𑀻𑀯𑀸. 𑀓𑀲𑁆𑀫𑀸? 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸.

𑀬𑁄 ¶ 𑀪𑀺𑀓𑁆𑀔𑀼 𑀪𑀡𑁆𑀟𑀸𑀕𑀸𑀭𑀺𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀏𑀯 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀺 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀅𑀧𑀺𑀤𑀳𑀺𑀢𑁆𑀯𑀸 𑀢𑁂𑀲𑀫𑁆𑀧𑀺 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀤𑀽𑀭𑁂 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺; 𑀢𑀸𑀦𑀺 𑀘𑁂 𑀘𑁄𑀭𑀸 𑀳𑀭𑀦𑁆𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. 𑀬𑁄 𑀧𑀦 𑀪𑀺𑀓𑁆𑀔𑀽𑀳𑀺 ‘‘𑀑𑀭𑁄𑀧𑁂𑀣, 𑀪𑀦𑁆𑀢𑁂, 𑀧𑀢𑁆𑀢𑀘𑀻𑀯𑀭𑀸𑀦𑀺; 𑀓𑀸𑀮𑁄 𑀲𑀮𑀸𑀓𑀕𑁆𑀕𑀳𑀡𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁄 ‘‘𑀲𑀫𑀸𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀲𑀫𑀸𑀕𑀢𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀧𑀢𑁆𑀢𑀘𑀻𑀯𑀭𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀤𑁆𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀤𑁆𑀯𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀢𑁆𑀭 𑀘𑁂𑀓𑁄 𑀅𑀮𑀲𑀚𑀸𑀢𑀺𑀓𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀲𑀼 𑀕𑀢𑁂𑀲𑀼 𑀧𑀘𑁆𑀙𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀦𑁆𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 ¶ 𑀉𑀤𑀓𑀝𑁆𑀞𑀸𑀦𑀁 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀘𑁆𑀙𑀢𑀺, 𑀢𑀁 𑀔𑀡𑀁 𑀤𑀺𑀲𑁆𑀯𑀸 𑀘𑁄𑀭𑀸 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀳𑀭𑀦𑁆𑀢𑀺, 𑀲𑀼𑀳𑀝𑀁. 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺.

𑀲𑀘𑁂𑀧𑀺 𑀓𑁄𑀘𑀺 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀪𑀡𑁆𑀟𑀸𑀕𑀸𑀭𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀦𑀝𑁆𑀞𑁂 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀝𑁆𑀞𑀸𑀦𑁂 𑀞𑀧𑀺𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀞𑀧𑁂𑀢𑀺, 𑀦𑀝𑁆𑀞𑁂 𑀢𑀲𑁆𑀲 𑀕𑀻𑀯𑀸. 𑀲𑀘𑁂𑀧𑀺 𑀞𑀧𑀺𑀢𑀪𑀺𑀓𑁆𑀔𑀼𑀦𑀸 ‘‘𑀫𑀬𑀸, 𑀪𑀦𑁆𑀢𑁂, 𑀈𑀤𑀺𑀲𑁄 𑀦𑀸𑀫 𑀧𑀭𑀺𑀓𑁆𑀔𑀸𑀭𑁄 𑀞𑀧𑀺𑀢𑁄, 𑀉𑀧𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀼𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. ‘‘𑀦𑀸𑀳𑀁 𑀚𑀸𑀦𑀸𑀫𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀦 𑀦𑀢𑁆𑀣𑀺 𑀕𑀻𑀯𑀸. 𑀬𑁄𑀧𑀺 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀞𑀧𑁂𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀜𑁆𑀘 𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀺 ¶ , 𑀦𑀝𑁆𑀞𑀁 𑀲𑀼𑀦𑀝𑁆𑀞𑀫𑁂𑀯. 𑀲𑀘𑁂 𑀢𑀁 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀜𑁆𑀜𑀢𑁆𑀭 𑀞𑀧𑁂𑀢𑀺, 𑀦𑀝𑁆𑀞𑁂 𑀕𑀻𑀯𑀸. 𑀲𑀘𑁂 𑀪𑀡𑁆𑀟𑀸𑀕𑀸𑀭𑀁 𑀲𑀼𑀕𑀼𑀢𑁆𑀢𑀁, 𑀲𑀩𑁆𑀩𑁄 𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘 𑀧𑀭𑀺𑀓𑁆𑀔𑀸𑀭𑁄 𑀢𑀢𑁆𑀣𑁂𑀯 𑀞𑀧𑀻𑀬𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀘 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀯𑀸 𑀲𑁄𑀢𑀼𑀁, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀓𑀢𑁆𑀣𑀘𑀺 𑀕𑀘𑁆𑀙𑀢𑀺, 𑀢𑀁 𑀔𑀡𑀁 𑀤𑀺𑀲𑁆𑀯𑀸 𑀬𑀢𑁆𑀢𑀓𑀁 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸. 𑀪𑀡𑁆𑀟𑀸𑀕𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀘𑀗𑁆𑀓𑀫𑀦𑁆𑀢𑀲𑁆𑀲 𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀲𑀫𑀡𑀥𑀫𑁆𑀫𑀸𑀦𑀼𑀬𑁄𑀕𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀩𑁆𑀬𑀸𑀯𑀝𑀲𑁆𑀲 𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀧𑀻𑀴𑀺𑀢𑀲𑁆𑀲𑀸𑀧𑀺 𑀢𑀢𑁄 𑀢𑀢𑁆𑀣𑁂𑀯 𑀉𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂 𑀩𑀳𑀺 𑀕𑀘𑁆𑀙𑀢𑁄 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀧𑀫𑀢𑁆𑀢𑀲𑁆𑀲 𑀲𑀢𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀯𑀺𑀯𑀝𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀯𑀸 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀢𑁆𑀢𑀓𑀁 𑀢𑀲𑁆𑀲 𑀧𑀫𑀸𑀤𑀧𑀘𑁆𑀘𑀬𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀕𑀻𑀯𑀸. 𑀉𑀡𑁆𑀳𑀲𑀫𑀬𑁂 𑀧𑀦 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀘𑁆𑀘𑀸𑀭𑀧𑀻𑀴𑀺𑀢𑀲𑁆𑀲 𑀧𑀦 ¶ 𑀢𑀲𑁆𑀫𑀺𑀁 𑀉𑀧𑀘𑀸𑀭𑁂 𑀅𑀲𑀢𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀕𑀺𑀮𑀸𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀅𑀯𑀺𑀲𑀬𑁄; 𑀢𑀲𑁆𑀫𑀸 𑀕𑀻𑀯𑀸 𑀦 𑀳𑁄𑀢𑀺.

𑀬𑁄 𑀧𑀦 𑀅𑀦𑁆𑀢𑁄 𑀉𑀡𑁆𑀳𑀧𑀻𑀴𑀺𑀢𑁄 𑀤𑁆𑀯𑀸𑀭𑀁 𑀲𑀼𑀕𑀼𑀢𑁆𑀢𑀁 𑀓𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀘𑁄𑀭𑀸 𑀘 𑀦𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀯𑀤𑀦𑁆𑀢𑀺, 𑀬𑀸𑀯 𑀢𑀢𑀺𑀬𑀁 𑀦 𑀯𑀺𑀯𑀭𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀢𑁂 𑀘𑁄𑀭𑀸 ‘‘𑀲𑀘𑁂 𑀦 𑀯𑀺𑀯𑀭𑀲𑀺, 𑀢𑀜𑁆𑀘 𑀫𑀸𑀭𑁂𑀲𑁆𑀲𑀸𑀫, 𑀤𑁆𑀯𑀸𑀭𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 ¶ 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀨𑀭𑀲𑀼𑀆𑀤𑀻𑀦𑀺 𑀉𑀓𑁆𑀔𑀺𑀧𑀦𑁆𑀢𑀺. ‘‘𑀫𑀬𑀺 𑀘 𑀫𑀢𑁂 𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑁂 𑀯𑀺𑀦𑀝𑁆𑀞𑁂 𑀕𑀼𑀡𑁄 𑀦𑀢𑁆𑀣𑀻’’𑀢𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀥𑀸𑀧𑀺 𑀅𑀯𑀺𑀲𑀬𑀢𑁆𑀢𑀸 𑀕𑀻𑀯𑀸 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀲𑀘𑁂 𑀓𑁄𑀘𑀺 𑀆𑀕𑀦𑁆𑀢𑀼𑀓𑁄 𑀓𑀼𑀜𑁆𑀘𑀺𑀓𑀁 𑀯𑀸 𑀤𑁂𑀢𑀺, 𑀤𑁆𑀯𑀸𑀭𑀁 𑀯𑀸 𑀯𑀺𑀯𑀭𑀢𑀺, 𑀬𑀢𑁆𑀢𑀓𑀁 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸. 𑀲𑀗𑁆𑀖𑁂𑀦 𑀪𑀡𑁆𑀟𑀸𑀕𑀸𑀭𑀕𑀼𑀢𑁆𑀢𑀢𑁆𑀣𑀸𑀬 𑀲𑀽𑀘𑀺𑀬𑀦𑁆𑀢𑀓𑀜𑁆𑀘 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀸 𑀘 𑀬𑁄𑀚𑁂𑀢𑁆𑀯𑀸 𑀤𑀺𑀦𑁆𑀦𑀸 𑀳𑁄𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀖𑀝𑀺𑀓𑀫𑀢𑁆𑀢𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀘𑁄𑀭𑀸 𑀯𑀺𑀯𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. 𑀲𑀽𑀘𑀺𑀬𑀦𑁆𑀢𑀓𑀜𑁆𑀘 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀜𑁆𑀘 𑀬𑁄𑀚𑁂𑀢𑁆𑀯𑀸 𑀦𑀺𑀧𑀦𑁆𑀦𑀁 𑀧𑀦𑁂𑀢𑀁 𑀲𑀘𑁂 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 ‘‘𑀯𑀺𑀯𑀭𑀸’’𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀏𑀯𑀁 𑀕𑀼𑀢𑁆𑀢𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁂 𑀧𑀦 𑀲𑀘𑁂 𑀪𑀺𑀢𑁆𑀢𑀺𑀁 𑀯𑀸 𑀙𑀤𑀦𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀳𑀭𑀦𑁆𑀢𑀺, 𑀦 𑀢𑀲𑁆𑀲 𑀕𑀻𑀯𑀸. 𑀲𑀘𑁂 𑀪𑀡𑁆𑀟𑀸𑀕𑀸𑀭𑁂 𑀅𑀜𑁆𑀜𑁂𑀧𑀺 𑀣𑁂𑀭𑀸 𑀯𑀲𑀦𑁆𑀢𑀺, 𑀯𑀺𑀯𑀝𑁂 𑀤𑁆𑀯𑀸𑀭𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀢𑁂𑀲𑀼 𑀕𑀢𑁂𑀲𑀼 𑀤𑁆𑀯𑀸𑀭𑀁 𑀦 𑀚𑀕𑁆𑀕𑀢𑀺, 𑀲𑀘𑁂 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀯𑀳𑀭𑀻𑀬𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀇𑀲𑁆𑀲𑀭𑀢𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀕𑀻𑀯𑀸. 𑀣𑁂𑀭𑁂𑀳𑀺 𑀧𑀦 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺.

𑀬𑀤𑀺 𑀪𑀡𑁆𑀟𑀸𑀕𑀸𑀭𑀺𑀓𑁄 ‘‘𑀢𑀼𑀫𑁆𑀳𑁂 𑀩𑀳𑀺 𑀞𑀢𑁆𑀯𑀸𑀯 𑀢𑀼𑀫𑁆𑀳𑀸𑀓𑀁 𑀧𑀭𑀺𑀓𑁆𑀔𑀸𑀭𑀁 𑀕𑀡𑁆𑀳𑀣, 𑀫𑀸 𑀧𑀯𑀺𑀲𑀺𑀢𑁆𑀣𑀸’’𑀢𑀺 𑀯𑀤𑀢𑀺, 𑀢𑁂𑀲𑀜𑁆𑀘 𑀏𑀓𑁄 𑀮𑁄𑀮𑀫𑀳𑀸𑀣𑁂𑀭𑁄 𑀲𑀸𑀫𑀡𑁂𑀭𑁂𑀳𑀺 𑀘𑁂𑀯 𑀉𑀧𑀝𑁆𑀞𑀸𑀓𑁂𑀳𑀺 𑀘 𑀲𑀤𑁆𑀥𑀺𑀁 𑀪𑀡𑁆𑀟𑀸𑀕𑀸𑀭𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀢𑀺 𑀘𑁂𑀯 𑀦𑀺𑀧𑀚𑁆𑀚𑀢𑀺 𑀘, 𑀬𑀢𑁆𑀢𑀓𑀁 𑀪𑀡𑁆𑀟𑀁 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸. 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀦 𑀅𑀯𑀲𑁂𑀲𑀢𑁆𑀣𑁂𑀭𑁂𑀳𑀺 𑀘 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀅𑀣 𑀪𑀡𑁆𑀟𑀸𑀕𑀸𑀭𑀺𑀓𑁄𑀯 𑀮𑁄𑀮𑀲𑀸𑀫𑀡𑁂𑀭𑁂 𑀘 𑀉𑀧𑀝𑁆𑀞𑀸𑀓𑁂 𑀘 𑀕𑀳𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑁂 𑀦𑀺𑀲𑀻𑀤𑀢𑀺 𑀘𑁂𑀯 𑀦𑀺𑀧𑀚𑁆𑀚𑀢𑀺 𑀘, 𑀬𑀁 𑀢𑀢𑁆𑀣 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀕𑀻𑀯𑀸. 𑀢𑀲𑁆𑀫𑀸 𑀪𑀡𑁆𑀟𑀸𑀕𑀸𑀭𑀺𑀓𑁂𑀦𑁂𑀯 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀅𑀯𑀲𑁂𑀲𑁂𑀳𑀺 𑀅𑀧𑁆𑀧𑁂𑀯 𑀭𑀼𑀓𑁆𑀔𑀫𑀽𑀮𑁂 𑀯𑀲𑀺𑀢𑀩𑁆𑀩𑀁, 𑀦 𑀘 𑀪𑀡𑁆𑀟𑀸𑀕𑀸𑀭𑁂𑀢𑀺.

𑀬𑁂 ¶ 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀯𑀲𑀦𑀕𑀩𑁆𑀪𑁂𑀲𑀼 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑁂 𑀦𑀝𑁆𑀞𑁂 𑀬𑁂𑀳𑀺 𑀞𑀧𑀺𑀢𑁄, 𑀢𑁂𑀲𑀁𑀬𑁂𑀯 𑀕𑀻𑀯𑀸. 𑀇𑀢𑀭𑁂𑀳𑀺 𑀧𑀦 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀲𑀗𑁆𑀖𑁄 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀳𑀸𑀭𑁂𑀬𑁂𑀯 𑀬𑀸𑀕𑀼𑀪𑀢𑁆𑀢𑀁 𑀤𑀸𑀧𑁂𑀢𑀺, 𑀲𑁄 𑀘 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀕𑀸𑀫𑀁 𑀕𑀘𑁆𑀙𑀢𑀺, 𑀦𑀝𑁆𑀞𑀁 𑀢𑀲𑁆𑀲𑁂𑀯 ¶ 𑀕𑀻𑀯𑀸. 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑁂𑀳𑀺 𑀅𑀢𑀺𑀭𑁂𑀓𑀘𑀻𑀯𑀭𑀭𑀓𑁆𑀔𑀡𑀢𑁆𑀣𑀸𑀬 𑀞𑀧𑀺𑀢𑀯𑀺𑀳𑀸𑀭𑀯𑀸𑀭𑀺𑀓𑀲𑁆𑀲𑀸𑀧𑀺 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑀁 𑀯𑀸 𑀮𑀪𑀫𑀸𑀦𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑁄 𑀬𑀁 𑀢𑀢𑁆𑀣 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀬 𑀬𑀁 𑀢𑀲𑁆𑀲 𑀧𑀫𑀸𑀤𑀧𑁆𑀧𑀘𑁆𑀘𑀬𑀸 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸.

𑀲𑀘𑁂 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀅𑀜𑁆𑀜𑀁 𑀧𑀤𑁂𑀲𑀁 𑀭𑀓𑁆𑀔𑀺𑀢𑀼𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀓𑁆𑀔𑀺𑀢𑁆𑀢𑀁 𑀳𑀭𑀦𑁆𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀕𑀻𑀯𑀸 𑀦 𑀳𑁄𑀢𑀺. 𑀈𑀤𑀺𑀲𑁂 𑀧𑀦 𑀯𑀺𑀳𑀸𑀭𑁂 𑀯𑁂𑀫𑀚𑁆𑀛𑁂 𑀲𑀩𑁆𑀩𑁂𑀲𑀁 𑀑𑀲𑀭𑀡𑀝𑁆𑀞𑀸𑀦𑁂 𑀧𑀭𑀺𑀓𑁆𑀔𑀸𑀭𑁂 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀯𑀺𑀳𑀸𑀭𑀯𑀸𑀭𑀺𑀓𑀸 𑀯𑀸 𑀤𑁆𑀯𑁂 𑀢𑀬𑁄 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀢𑁂𑀲𑀁 𑀅𑀧𑁆𑀧𑀫𑀢𑁆𑀢𑀸𑀦𑀁 𑀇𑀢𑁄 𑀘𑀺𑀢𑁄 𑀘 𑀭𑀓𑁆𑀔𑀢𑀁𑀬𑁂𑀯 𑀓𑀺𑀜𑁆𑀘𑀺 𑀦𑀲𑁆𑀲𑀢𑀺, 𑀕𑀻𑀯𑀸 𑀦 𑀳𑁄𑀢𑀺. 𑀯𑀺𑀳𑀸𑀭𑀯𑀸𑀭𑀺𑀓𑁂 𑀩𑀦𑁆𑀥𑀺𑀢𑁆𑀯𑀸 𑀳𑀭𑀺𑀢𑀪𑀡𑁆𑀟𑀫𑁆𑀧𑀺 𑀘𑁄𑀭𑀸𑀦𑀁 𑀧𑀝𑀺𑀧𑀣𑀁 𑀕𑀢𑁂𑀲𑀼 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀳𑀭𑀺𑀢𑀪𑀡𑁆𑀟𑀫𑁆𑀧𑀺 𑀦 𑀢𑁂𑀲𑀁 𑀕𑀻𑀯𑀸. 𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁 𑀯𑀺𑀳𑀸𑀭𑁂 𑀤𑀸𑀢𑀩𑁆𑀩𑀁 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑁄 𑀯𑀸 𑀦 𑀳𑁄𑀢𑀺, 𑀢𑁂𑀳𑀺 𑀧𑀢𑁆𑀢𑀩𑁆𑀩𑀮𑀸𑀪𑀢𑁄 𑀅𑀢𑀺𑀭𑁂𑀓𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸, 𑀢𑁂𑀲𑀁 𑀧𑀳𑁄𑀦𑀓𑀪𑀢𑁆𑀢𑀲𑀮𑀸𑀓𑀸 𑀘 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸 𑀧𑀦 𑀦 𑀞𑀧𑁂𑀢𑀩𑁆𑀩𑀸, 𑀫𑀦𑀼𑀲𑁆𑀲𑀸 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺, ‘‘𑀯𑀺𑀳𑀸𑀭𑀯𑀸𑀭𑀺𑀓𑀸𑀬𑁂𑀯 𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀢𑁂𑀲𑀁 𑀲𑀪𑀸𑀕𑀸 𑀲𑀮𑀸𑀓𑀪𑀢𑁆𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀤𑁂𑀦𑁆𑀢𑀺, 𑀯𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑁄 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸, 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀦𑀺 𑀘 𑀮𑀪𑀫𑀸𑀦𑁄𑀯 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀬 𑀲𑀩𑁆𑀩𑀁 𑀦𑀝𑁆𑀞𑀁 𑀕𑀻𑀯𑀸 𑀳𑁄𑀢𑀺. 𑀲𑀘𑁂 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀧𑀸𑀮𑀸𑀦𑀁 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑁄 𑀯𑀸 𑀦𑀢𑁆𑀣𑀺, 𑀪𑀺𑀓𑁆𑀔𑀽 𑀯𑀺𑀳𑀸𑀭𑀯𑀸𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀚𑀕𑁆𑀕𑁂𑀦𑁆𑀢𑀺, 𑀲𑀫𑁆𑀧𑀢𑁆𑀢𑀯𑀸𑀭𑀁 𑀅𑀕𑁆𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺, 𑀬𑀣𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀓𑀭𑁄𑀦𑁆𑀢𑀺, 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀪𑀺𑀓𑁆𑀔𑀽𑀳𑀺 𑀧𑀦 𑀅𑀲𑀳𑀸𑀬𑀓𑀲𑁆𑀲 𑀯𑀸 𑀅𑀢𑁆𑀢𑀤𑀼𑀢𑀺𑀬𑀲𑁆𑀲 𑀯𑀸 𑀬𑀲𑁆𑀲 𑀲𑀪𑀸𑀕𑁄 𑀪𑀺𑀓𑁆𑀔𑀼 𑀪𑀢𑁆𑀢𑀁 𑀆𑀦𑁂𑀢𑁆𑀯𑀸 𑀤𑀸𑀢𑀸 𑀦𑀢𑁆𑀣𑀺, 𑀏𑀯𑀭𑀽𑀧𑀲𑁆𑀲 𑀯𑀸𑀭𑁄 𑀦 𑀧𑀸𑀧𑁂𑀢𑀩𑁆𑀩𑁄.

𑀬𑀫𑁆𑀧𑀺 ¶ ¶ 𑀧𑀸𑀓𑀯𑀢𑁆𑀢𑀢𑁆𑀣𑀸𑀬 𑀯𑀺𑀳𑀸𑀭𑁂 𑀞𑀧𑁂𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑀻𑀯𑀦𑁆𑀢𑁂𑀦 𑀞𑀸𑀢𑀩𑁆𑀩𑀁. 𑀬𑁄 𑀢𑀁 𑀦 𑀉𑀧𑀚𑀻𑀯𑀢𑀺 ¶ , 𑀲𑁄 𑀯𑀸𑀭𑀁 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀨𑀮𑀸𑀨𑀮𑀢𑁆𑀣𑀸𑀬𑀧𑀺 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀁 𑀞𑀧𑁂𑀦𑁆𑀢𑀺, 𑀚𑀕𑁆𑀕𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀨𑀮𑀯𑀸𑀭𑁂𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀬𑁄 𑀢𑀸𑀦𑀺 𑀔𑀸𑀤𑀢𑀺, 𑀢𑁂𑀦 𑀞𑀸𑀢𑀩𑁆𑀩𑀁. 𑀅𑀦𑀼𑀧𑀚𑀻𑀯𑀦𑁆𑀢𑁄 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀫𑀜𑁆𑀘𑀧𑀻𑀞𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀡𑀢𑁆𑀣𑀸𑀬𑀧𑀺 𑀞𑀧𑁂𑀦𑁆𑀢𑀺, 𑀆𑀯𑀸𑀲𑁂 𑀯𑀲𑀦𑁆𑀢𑁂𑀦 𑀞𑀸𑀢𑀩𑁆𑀩𑀁. 𑀅𑀩𑁆𑀪𑁄𑀓𑀸𑀲𑀺𑀓𑁄 𑀧𑀦 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄.

𑀏𑀓𑁄 𑀦𑀯𑀓𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀧𑀦 𑀩𑀳𑀽𑀦𑀁 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀢𑀺, 𑀧𑀸𑀴𑀺𑀁 𑀯𑀡𑁆𑀡𑁂𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀲𑀗𑁆𑀖𑀲𑁆𑀲 𑀪𑀸𑀭𑀁 𑀦𑀺𑀢𑁆𑀣𑀭𑀢𑀺, 𑀅𑀬𑀁 𑀮𑀸𑀪𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀧𑀺 𑀆𑀯𑀸𑀲𑁂 𑀯𑀲𑀦𑁆𑀢𑁄𑀧𑀺 𑀯𑀸𑀭𑀁 𑀦 𑀕𑀸𑀳𑁂𑀢𑀩𑁆𑀩𑁄. ‘‘𑀧𑀼𑀭𑀺𑀲𑀯𑀺𑀲𑁂𑀲𑁄 𑀦𑀸𑀫 𑀜𑀸𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺.

𑀉𑀧𑁄𑀲𑀣𑀸𑀕𑀸𑀭𑀧𑀝𑀺𑀫𑀸𑀖𑀭𑀚𑀕𑁆𑀕𑀓𑀲𑁆𑀲 𑀧𑀦 𑀤𑀺𑀕𑀼𑀡𑀁 𑀬𑀸𑀕𑀼𑀪𑀢𑁆𑀢𑀁 𑀤𑁂𑀯𑀲𑀺𑀓𑀁 𑀢𑀡𑁆𑀟𑀼𑀮𑀦𑀸𑀴𑀺 𑀲𑀁𑀯𑀘𑁆𑀙𑀭𑁂 𑀢𑀺𑀘𑀻𑀯𑀭𑀁, 𑀤𑀲𑀯𑀻𑀲𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀜𑁆𑀘 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀲𑁆𑀲 𑀢𑀁 𑀮𑀪𑀫𑀸𑀦𑀲𑁆𑀲𑁂𑀯 𑀧𑀫𑀸𑀤𑁂𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸. 𑀩𑀦𑁆𑀥𑀺𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦 𑀅𑀘𑁆𑀙𑀺𑀦𑁆𑀦𑀁 𑀧𑀦 𑀦 𑀕𑀻𑀯𑀸. 𑀢𑀢𑁆𑀣 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀲𑀦𑁆𑀢𑀓𑁂𑀦 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂𑀦 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀞𑀧𑀺𑀢𑀁 𑀳𑁄𑀢𑀺, 𑀢𑀁 𑀘𑁂𑀢𑀺𑀬𑀲𑀦𑁆𑀢𑀓𑁂 𑀭𑀓𑁆𑀔𑀸𑀧𑀺𑀢𑁂 𑀭𑀓𑁆𑀔𑀺𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀯𑀝𑁆𑀝𑀢𑀺. 𑀧𑀓𑁆𑀔𑀯𑀸𑀭𑁂𑀦 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀦𑀺 𑀭𑀓𑁆𑀔𑀢𑁄𑀧𑀺 𑀧𑀫𑀸𑀤𑀯𑀲𑁂𑀦 𑀦𑀝𑁆𑀞𑀁 𑀕𑀻𑀯𑀸𑀬𑁂𑀯𑀸𑀢𑀺.

𑀉𑀧𑀦𑀺𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀗𑁆𑀓𑀖𑀸𑀢𑀓𑀣𑀸

𑁧𑁧𑁩. 𑀲𑀼𑀗𑁆𑀓𑀁 𑀢𑀢𑁄 𑀳𑀦𑀦𑁆𑀢𑀻𑀢𑀺 𑀲𑀼𑀗𑁆𑀓𑀖𑀸𑀢𑀁; 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀢𑀢𑁄 𑀲𑀼𑀗𑁆𑀓𑀸𑀭𑀳𑀁 𑀪𑀡𑁆𑀟𑀁 𑀲𑀼𑀗𑁆𑀓𑀁 𑀅𑀤𑀢𑁆𑀯𑀸 𑀦𑀻𑀳𑀭𑀦𑁆𑀢𑀸 𑀭𑀜𑁆𑀜𑁄 𑀲𑀼𑀗𑁆𑀓𑀁 𑀳𑀦𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭 𑀧𑀯𑀺𑀲𑀺𑀢𑁆𑀯𑀸𑀢𑀺 𑀢𑀢𑁆𑀭 𑀧𑀩𑁆𑀩𑀢𑀔𑀡𑁆𑀟𑀸𑀤𑀻𑀲𑀼 𑀭𑀜𑁆𑀜𑀸 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀲𑀼𑀗𑁆𑀓𑀝𑁆𑀞𑀸𑀦𑁂 𑀧𑀯𑀺𑀲𑀺𑀢𑁆𑀯𑀸. 𑀭𑀸𑀚𑀕𑁆𑀕𑀁 𑀪𑀡𑁆𑀟𑀦𑁆𑀢𑀺 𑀭𑀸𑀚𑀸𑀭𑀳𑀁 𑀪𑀡𑁆𑀟𑀁; 𑀬𑀢𑁄 𑀭𑀜𑁆𑀜𑁄 𑀧𑀜𑁆𑀘𑀫𑀸𑀲𑀓𑀁 ¶ 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀲𑀼𑀗𑁆𑀓𑀁 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀚𑀓𑀦𑁆𑀢𑀺𑀧𑀺 ¶ 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀣𑁂𑀬𑁆𑀬𑀘𑀺𑀢𑁆𑀢𑁄𑀢𑀺 ‘‘𑀇𑀢𑁄 𑀭𑀜𑁆𑀜𑁄 𑀲𑀼𑀗𑁆𑀓𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀪𑀡𑁆𑀟𑀁 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀞𑀧𑀺𑀢𑀝𑁆𑀞𑀸𑀦𑀢𑁄 𑀕𑀳𑁂𑀢𑁆𑀯𑀸 𑀣𑀯𑀺𑀓𑀸𑀬 𑀯𑀸 𑀧𑀓𑁆𑀔𑀺𑀧𑀢𑀺, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀯𑀸 ¶ 𑀊𑀭𑀼𑀦𑀸 𑀲𑀤𑁆𑀥𑀺𑀁 𑀩𑀦𑁆𑀥𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀼𑀗𑁆𑀓𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀞𑀸𑀦𑀸𑀘𑀸𑀯𑀦𑀁 𑀦 𑀳𑁄𑀢𑀺. 𑀲𑀼𑀗𑁆𑀓𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁.

𑀩𑀳𑀺𑀲𑀼𑀗𑁆𑀓𑀖𑀸𑀢𑀁 𑀧𑀸𑀢𑁂𑀢𑀻𑀢𑀺 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀯𑀺𑀳𑀺𑀢𑀪𑀸𑀯𑀁 𑀧𑀲𑁆𑀲𑀺𑀢𑁆𑀯𑀸 𑀅𑀦𑁆𑀢𑁄 𑀞𑀺𑀢𑁄𑀯 𑀩𑀳𑀺 𑀧𑀢𑀦𑀢𑁆𑀣𑀸𑀬 𑀔𑀺𑀧𑀢𑀺. 𑀢𑀜𑁆𑀘𑁂 𑀅𑀯𑀲𑁆𑀲𑀁 𑀧𑀢𑀦𑀓𑀁, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀜𑁆𑀘𑁂 𑀭𑀼𑀓𑁆𑀔𑁂 𑀯𑀸 𑀔𑀸𑀡𑀼𑀫𑁆𑀳𑀺 𑀯𑀸 𑀧𑀝𑀺𑀳𑀢𑀁 𑀩𑀮𑀯𑀯𑀸𑀢𑀯𑁂𑀕𑀼𑀓𑁆𑀔𑀺𑀢𑁆𑀢𑀁 𑀯𑀸 𑀳𑀼𑀢𑁆𑀯𑀸 𑀧𑀼𑀦 𑀅𑀦𑁆𑀢𑁄𑀬𑁂𑀯 𑀧𑀢𑀢𑀺, 𑀭𑀓𑁆𑀔𑀢𑀺. 𑀧𑀼𑀦 𑀕𑀡𑁆𑀳𑀺𑀢𑁆𑀯𑀸 𑀔𑀺𑀧𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀯𑀝𑁆𑀝𑀦𑁆𑀢𑀁 𑀧𑀼𑀦 𑀅𑀦𑁆𑀢𑁄 𑀧𑀯𑀺𑀲𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀼𑀭𑀼𑀦𑁆𑀤𑀻𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀲𑀘𑁂 𑀩𑀳𑀺 𑀧𑀢𑀺𑀢𑀁 𑀞𑀢𑁆𑀯𑀸 𑀯𑀝𑁆𑀝𑀦𑁆𑀢𑀁 𑀧𑀯𑀺𑀲𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀅𑀢𑀺𑀝𑁆𑀞𑀫𑀸𑀦𑀁𑀬𑁂𑀯 𑀯𑀝𑁆𑀝𑀺𑀢𑁆𑀯𑀸 𑀧𑀯𑀺𑀲𑀢𑀺 𑀭𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑁆𑀢𑁄 𑀞𑀢𑁆𑀯𑀸 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀯𑀝𑁆𑀝𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀯𑀝𑁆𑀝𑀸𑀧𑁂𑀢𑀺, 𑀲𑀘𑁂 𑀅𑀝𑁆𑀞𑀢𑁆𑀯𑀸 𑀯𑀝𑁆𑀝𑀫𑀸𑀦𑀁 𑀕𑀢𑀁, 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺 𑀕𑀘𑁆𑀙𑀦𑁆𑀢𑀁 𑀭𑀓𑁆𑀔𑀢𑀺, ‘‘𑀯𑀝𑁆𑀝𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀅𑀜𑁆𑀜𑁄 𑀦𑀁 𑀯𑀝𑁆𑀝𑁂𑀲𑁆𑀲𑀢𑀻’’𑀢𑀺 𑀯𑀸 𑀅𑀦𑁆𑀢𑁄 𑀞𑀧𑀺𑀢𑀁 𑀧𑀘𑁆𑀙𑀸 𑀲𑀬𑀁 𑀯𑀸 𑀯𑀝𑁆𑀝𑀫𑀸𑀦𑀁 𑀅𑀜𑁆𑀜𑁂𑀦 𑀯𑀸 𑀯𑀝𑁆𑀝𑀺𑀢𑀁 𑀩𑀳𑀺 𑀕𑀘𑁆𑀙𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀞𑀧𑀺𑀢𑁂 𑀧𑀦 𑀢𑀣𑀸 𑀕𑀘𑁆𑀙𑀦𑁆𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀤𑁆𑀯𑁂 𑀧𑀼𑀝𑀓𑁂 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀲𑀼𑀗𑁆𑀓𑀝𑁆𑀞𑀸𑀦𑀲𑀻𑀫𑀦𑁆𑀢𑀭𑁂 𑀞𑀧𑁂𑀢𑀺, 𑀓𑀺𑀜𑁆𑀘𑀸𑀧𑀺 𑀩𑀳𑀺𑀧𑀼𑀝𑀓𑁂 𑀲𑀼𑀗𑁆𑀓𑀁 𑀧𑀸𑀤𑀁 𑀅𑀕𑁆𑀖𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀢𑀸𑀬 𑀧𑀦 𑀅𑀦𑁆𑀢𑁄 𑀧𑀼𑀝𑀓𑁄 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀩𑀳𑀺 𑀞𑀧𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀓𑀸𑀚𑁂𑀧𑀺 𑀏𑀓𑀩𑀤𑁆𑀥𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀅𑀩𑀦𑁆𑀥𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀞𑀧𑀺𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀁.

𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸 𑀅𑀲𑁆𑀲𑀧𑀺𑀝𑁆𑀞𑀺𑀆𑀤𑀻𑀲𑀼 𑀯𑀸 𑀞𑀧𑁂𑀢𑀺 ‘‘𑀩𑀳𑀺 𑀦𑀻𑀳𑀭𑀺𑀲𑁆𑀲𑀢𑀻’’𑀢𑀺 𑀦𑀻𑀳𑀝𑁂𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀺. 𑀓𑀲𑁆𑀫𑀸? ‘‘𑀅𑀢𑁆𑀭 𑀧𑀯𑀺𑀝𑁆𑀞𑀲𑁆𑀲 ¶ 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀤𑀜𑁆𑀘 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀺𑀢𑀁, 𑀦 𑀘 𑀢𑁂𑀦 𑀦𑀻𑀢𑀁, 𑀢𑀲𑁆𑀫𑀸 𑀦𑁂𑀯 𑀪𑀡𑁆𑀟𑀤𑁂𑀬𑁆𑀬𑀁 𑀦 𑀧𑀸𑀭𑀸𑀚𑀺𑀓𑀁.

𑀞𑀺𑀢𑀬𑀸𑀦𑀸𑀤𑀻𑀲𑀼 𑀞𑀧𑀺𑀢𑁂 𑀯𑀺𑀦𑀸 𑀢𑀲𑁆𑀲 𑀧𑀬𑁄𑀕𑀁 𑀕𑀢𑁂𑀲𑀼 𑀣𑁂𑀬𑁆𑀬𑀘𑀺𑀢𑁆𑀢𑁂𑀧𑀺 𑀲𑀢𑀺 𑀦𑁂𑀯𑀢𑁆𑀣𑀺 𑀅𑀯𑀳𑀸𑀭𑁄. 𑀬𑀤𑀺 𑀧𑀦 𑀞𑀧𑁂𑀢𑁆𑀯𑀸 𑀬𑀸𑀦𑀸𑀤𑀻𑀦𑀺 𑀧𑀸𑀚𑁂𑀦𑁆𑀢𑁄 𑀅𑀢𑀺𑀓𑁆𑀓𑀸𑀫𑁂𑀢𑀺 ¶ , 𑀳𑀢𑁆𑀣𑀺𑀲𑀼𑀢𑁆𑀢𑀸𑀤𑀻𑀲𑀼 𑀯𑀸 𑀓𑀢𑀧𑀭𑀺𑀘𑀬𑀢𑁆𑀢𑀸 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀏𑀳𑀺, 𑀭𑁂’’𑀢𑀺 𑀧𑀓𑁆𑀓𑁄𑀲𑀢𑀺, 𑀲𑀻𑀫𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑀁 𑀳𑀭𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺, 𑀇𑀥 𑀧𑀸𑀭𑀸𑀚𑀺𑀓𑀁. 𑀢𑀢𑁆𑀭 𑀅𑀜𑁆𑀜𑀲𑁆𑀲 𑀬𑀸𑀦𑁂 𑀯𑀸 𑀪𑀡𑁆𑀟𑁂 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀥 𑀅𑀦𑀸𑀧𑀢𑁆𑀢𑀺.

𑀲𑀼𑀗𑁆𑀓𑀝𑁆𑀞𑀸𑀦𑁂 ¶ 𑀲𑀼𑀗𑁆𑀓𑀁 𑀤𑀢𑁆𑀯𑀸𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁄 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺 ‘‘𑀲𑀘𑁂 ‘𑀲𑀼𑀗𑁆𑀓𑀁 𑀤𑁂𑀳𑀻’𑀢𑀺 𑀯𑀓𑁆𑀔𑀦𑁆𑀢𑀺, 𑀤𑀲𑁆𑀲𑀸𑀫𑀺; 𑀦𑁄 𑀘𑁂 𑀯𑀓𑁆𑀔𑀦𑁆𑀢𑀺, 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑀁 𑀤𑀺𑀲𑁆𑀯𑀸 𑀏𑀓𑁄 𑀲𑀼𑀗𑁆𑀓𑀺𑀓𑁄 ‘‘𑀏𑀲𑁄 𑀪𑀺𑀓𑁆𑀔𑀼 𑀕𑀘𑁆𑀙𑀢𑀺, 𑀕𑀡𑁆𑀳𑀣 𑀦𑀁 𑀲𑀼𑀗𑁆𑀓’’𑀦𑁆𑀢𑀺 𑀯𑀤𑀢𑀺, 𑀅𑀧𑀭𑁄 ‘‘𑀓𑀼𑀢𑁄 𑀧𑀩𑁆𑀩𑀚𑀺𑀢𑀲𑁆𑀲 𑀲𑀼𑀗𑁆𑀓𑀁, 𑀕𑀘𑁆𑀙𑀢𑀽’’𑀢𑀺 𑀯𑀤𑀢𑀺, 𑀮𑀤𑁆𑀥𑀓𑀧𑁆𑀧𑀁 𑀳𑁄𑀢𑀺, 𑀕𑀦𑁆𑀢𑀩𑁆𑀩𑀁. ‘‘𑀪𑀺𑀓𑁆𑀔𑀽𑀦𑀁 𑀲𑀼𑀗𑁆𑀓𑀁 𑀅𑀤𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀕𑀡𑁆𑀳 𑀉𑀧𑀸𑀲𑀓𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀪𑀺𑀓𑁆𑀔𑀼𑀲𑁆𑀲 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑁂𑀳𑀺 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀢𑁂𑀦, 𑀕𑀘𑁆𑀙𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀮𑀤𑁆𑀥𑀓𑀧𑁆𑀧𑀫𑁂𑀯. 𑀲𑀘𑁂𑀧𑀺 𑀲𑀼𑀗𑁆𑀓𑀺𑀓𑀸 𑀦𑀺𑀤𑁆𑀤𑀸𑀬𑀦𑁆𑀢𑀺 𑀯𑀸, 𑀚𑀽𑀢𑀁 𑀯𑀸 𑀓𑀻𑀴𑀦𑁆𑀢𑀺, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀕𑀢𑀸, 𑀅𑀬𑀜𑁆𑀘 ‘‘𑀓𑀼𑀳𑀺𑀁 𑀲𑀼𑀗𑁆𑀓𑀺𑀓𑀸’’𑀢𑀺 𑀧𑀓𑁆𑀓𑁄𑀲𑀺𑀢𑁆𑀯𑀸𑀧𑀺 𑀦 𑀧𑀲𑁆𑀲𑀢𑀺, 𑀮𑀤𑁆𑀥𑀓𑀧𑁆𑀧𑀫𑁂𑀯. 𑀲𑀘𑁂𑀧𑀺 𑀲𑀼𑀗𑁆𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀜𑁆𑀜𑀯𑀺𑀳𑀺𑀢𑁄, 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀦𑁆𑀢𑁄 𑀯𑀸 𑀲𑀚𑁆𑀛𑀸𑀬𑀦𑁆𑀢𑁄 𑀯𑀸 𑀫𑀦𑀲𑀺𑀓𑀸𑀭𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀯𑀸 𑀘𑁄𑀭𑀳𑀢𑁆𑀣𑀺𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀲𑀳𑀲𑀸 𑀯𑀼𑀝𑁆𑀞𑀸𑀬 𑀲𑀫𑀦𑀼𑀩𑀤𑁆𑀥𑁄 𑀯𑀸, 𑀫𑀳𑀸𑀫𑁂𑀖𑀁 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀧𑀼𑀭𑀢𑁄 𑀲𑀸𑀮𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀮𑀤𑁆𑀥𑀓𑀧𑁆𑀧𑀫𑁂𑀯.

𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀻𑀢𑀺 𑀏𑀢𑁆𑀣 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀧𑀭𑀺𑀳𑀭𑀢𑀺, 𑀅𑀯𑀳𑀸𑀭𑁄𑀬𑁂𑀯𑀸𑀢𑀺

𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁𑀧𑀦 ‘‘‘𑀧𑀭𑀺𑀳𑀭𑀦𑁆𑀢𑀁 𑀭𑀸𑀚𑀧𑀼𑀭𑀺𑀲𑀸 𑀯𑀺𑀳𑁂𑀞𑁂𑀦𑁆𑀢𑀻’𑀢𑀺 𑀓𑁂𑀯𑀮𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀘𑀸𑀭𑀁 ¶ 𑀑𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀳𑀭𑀢𑁄 𑀤𑀼𑀓𑁆𑀓𑀝𑀁, 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀳𑀭𑀢𑁄 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀏𑀢𑁆𑀣 𑀤𑁆𑀯𑀻𑀳𑀺 𑀮𑁂𑀟𑁆𑀟𑀼𑀧𑀸𑀢𑁂𑀳𑀺 𑀉𑀧𑀘𑀸𑀭𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺.

𑀲𑀼𑀗𑁆𑀓𑀖𑀸𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀡𑀓𑀣𑀸

𑁧𑁧𑁪. 𑀇𑀢𑁄 𑀧𑀭𑀲𑁆𑀫𑀺𑀁 𑀏𑀓𑀁𑀲𑁂𑀦 𑀅𑀯𑀳𑀸𑀭𑀧𑁆𑀧𑀳𑁄𑀦𑀓𑀧𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀧𑀸𑀡𑁄’’𑀢𑀺 𑀆𑀳. 𑀢𑀫𑁆𑀧𑀺 𑀪𑀼𑀚𑀺𑀲𑁆𑀲𑀁 𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀬𑁄𑀧𑀺 ¶ 𑀪𑀼𑀚𑀺𑀲𑁆𑀲𑁄 𑀫𑀸𑀢𑀭𑀸 𑀯𑀸 𑀧𑀺𑀢𑀭𑀸 𑀯𑀸 𑀆𑀞𑀧𑀺𑀢𑁄 𑀳𑁄𑀢𑀺, 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀢𑁆𑀯𑀸 𑀧𑀜𑁆𑀜𑀸𑀲𑀁 𑀯𑀸 𑀲𑀝𑁆𑀞𑀺𑀁 𑀯𑀸 𑀅𑀕𑁆𑀕𑀳𑁂𑀲𑀺, 𑀢𑀫𑁆𑀧𑀺 𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺; 𑀥𑀦𑀁 𑀧𑀦 𑀕𑀢𑀝𑁆𑀞𑀸𑀦𑁂 𑀯𑀟𑁆𑀠𑀢𑀺. 𑀅𑀦𑁆𑀢𑁄𑀚𑀸𑀢𑀓-𑀥𑀦𑀓𑁆𑀓𑀻𑀢-𑀓𑀭𑀫𑀭𑀸𑀦𑀻𑀢𑀧𑁆𑀧𑀪𑁂𑀤𑀁 𑀧𑀦 𑀤𑀸𑀲𑀁𑀬𑁂𑀯 𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀳𑁄𑀢𑀺. 𑀢𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀧𑀸𑀡𑁄 𑀦𑀸𑀫 𑀫𑀦𑀼𑀲𑁆𑀲𑀧𑀸𑀡𑁄 𑀯𑀼𑀘𑁆𑀘𑀢𑀻’’𑀢𑀺. 𑀏𑀢𑁆𑀣 𑀘 𑀕𑁂𑀳𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀤𑀸𑀲𑀲𑁆𑀲 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑀓𑁄, 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄, 𑀧𑀭𑀤𑁂𑀲𑀢𑁄 𑀧𑀳𑀭𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀤𑀸𑀲𑀩𑁆𑀬𑀁 𑀉𑀧𑀕𑀫𑀺𑀢𑁄 𑀓𑀭𑀫𑀭𑀸𑀦𑀻𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀭𑀽𑀧𑀁 𑀧𑀸𑀡𑀁 ‘‘𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑁄 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀓𑀸𑀫𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀓𑁂𑀲𑁂𑀲𑀼 𑀯𑀸 𑀳𑀢𑁆𑀣𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀓𑀟𑁆𑀠𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄.

𑀧𑀤𑀲𑀸 ¶ 𑀦𑁂𑀲𑁆𑀲𑀸𑀫𑀻𑀢𑀺 𑀢𑀚𑁆𑀚𑁂𑀦𑁆𑀢𑁄 𑀯𑀸 𑀧𑀳𑀭𑀦𑁆𑀢𑁄 𑀯𑀸 ‘‘𑀇𑀢𑁄 𑀕𑀘𑁆𑀙𑀸𑀳𑀻’’𑀢𑀺 𑀯𑀤𑀢𑀺, 𑀢𑁂𑀦 𑀯𑀼𑀢𑁆𑀢𑀤𑀺𑀲𑀸𑀪𑀸𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀢𑀺𑀬𑀧𑀤𑀯𑀸𑀭𑁂𑀦 𑀧𑀸𑀭𑀸𑀚𑀺𑀓𑀁. 𑀬𑁂𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑀁. 𑀪𑀺𑀓𑁆𑀔𑀼 𑀤𑀸𑀲𑀁 𑀤𑀺𑀲𑁆𑀯𑀸 𑀲𑀼𑀔𑀤𑀼𑀓𑁆𑀔𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 ‘‘𑀕𑀘𑁆𑀙, 𑀧𑀮𑀸𑀬𑀺𑀢𑁆𑀯𑀸 𑀲𑀼𑀔𑀁 𑀚𑀻𑀯𑀸’’𑀢𑀺 𑀯𑀤𑀢𑀺, 𑀲𑁄 𑀘𑁂 𑀧𑀮𑀸𑀬𑀢𑀺, 𑀤𑀼𑀢𑀺𑀬𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀢𑀁 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀆𑀕𑀢𑀁 𑀅𑀜𑁆𑀜𑁄 ‘‘𑀧𑀮𑀸𑀬𑀸’’𑀢𑀺 𑀯𑀤𑀢𑀺, 𑀲𑀘𑁂 𑀪𑀺𑀓𑁆𑀔𑀼𑀲𑀢𑀁 𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀲𑀫𑀻𑀧𑀫𑀸𑀕𑀢𑀁 𑀯𑀤𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀬𑁄 𑀧𑀦 𑀯𑁂𑀕𑀲𑀸 𑀧𑀮𑀸𑀬𑀦𑁆𑀢𑀁𑀬𑁂𑀯 ‘‘𑀧𑀮𑀸𑀬, 𑀬𑀸𑀯 𑀢𑀁 ¶ 𑀲𑀸𑀫𑀺𑀓𑀸 𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀪𑀡𑀢𑀺, 𑀅𑀦𑀸𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀲𑀘𑁂 𑀧𑀦 𑀲𑀡𑀺𑀓𑀁 𑀕𑀘𑁆𑀙𑀦𑁆𑀢𑀁 𑀪𑀡𑀢𑀺, 𑀲𑁄 𑀘 𑀢𑀲𑁆𑀲 𑀯𑀘𑀦𑁂𑀦 𑀲𑀻𑀖𑀁 𑀕𑀘𑁆𑀙𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀁 𑀕𑀸𑀫𑀁 𑀯𑀸 𑀤𑁂𑀲𑀁 𑀯𑀸 𑀕𑀢𑀁 𑀤𑀺𑀲𑁆𑀯𑀸 𑀢𑀢𑁄𑀧𑀺 𑀧𑀮𑀸𑀧𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯.

𑀅𑀤𑀺𑀦𑁆𑀦𑀸𑀤𑀸𑀦𑀁 𑀦𑀸𑀫 𑀧𑀭𑀺𑀬𑀸𑀬𑁂𑀦 𑀫𑀼𑀘𑁆𑀘𑀢𑀺. 𑀬𑁄 𑀳𑀺 𑀏𑀯𑀁 𑀯𑀤𑀢𑀺 𑁋 ‘‘𑀢𑁆𑀯𑀁 𑀇𑀥 𑀓𑀺𑀁 𑀓𑀭𑁄𑀲𑀺,

𑀓𑀺𑀁 𑀢𑁂 𑀧𑀮𑀸𑀬𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀸, 𑀓𑀺𑀁 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀲𑀼𑀔𑀁 𑀚𑀻𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀸, 𑀤𑀸𑀲𑀤𑀸𑀲𑀺𑀬𑁄 𑀧𑀮𑀸𑀬𑀺𑀢𑁆𑀯𑀸 𑀅𑀫𑀼𑀓𑀁 𑀦𑀸𑀫 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀲𑀼𑀔𑀁 𑀚𑀻𑀯𑀦𑁆𑀢𑀻’’𑀢𑀺 𑀯𑀸, 𑀲𑁄 𑀘 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀮𑀸𑀬𑀢𑀺, 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀬𑁄𑀧𑀺 ‘‘𑀫𑀬𑀁 𑀅𑀫𑀼𑀓𑀁 𑀦𑀸𑀫 𑀧𑀤𑁂𑀲𑀁 𑀕𑀘𑁆𑀙𑀸𑀫, 𑀢𑀢𑁆𑀭𑀸𑀕𑀢𑀸 𑀲𑀼𑀔𑀁 𑀚𑀻𑀯𑀦𑁆𑀢𑀺, 𑀅𑀫𑁆𑀳𑁂𑀳𑀺 𑀘 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀺 𑀧𑀸𑀣𑁂𑀬𑁆𑀬𑀸𑀤𑀻𑀳𑀺 𑀓𑀺𑀮𑀫𑀣𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀲𑀼𑀔𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺 ¶ 𑀫𑀕𑁆𑀕𑀕𑀫𑀦𑀯𑀲𑁂𑀦, 𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦; 𑀦𑁂𑀯𑀢𑁆𑀣𑀺 𑀅𑀯𑀳𑀸𑀭𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀘𑁄𑀭𑁂𑀲𑀼 𑀉𑀝𑁆𑀞𑀺𑀢𑁂𑀲𑀼 ‘‘𑀅𑀭𑁂! 𑀘𑁄𑀭𑀸 𑀉𑀝𑁆𑀞𑀺𑀢𑀸, 𑀯𑁂𑀕𑁂𑀦 𑀧𑀮𑀸𑀬, 𑀏𑀳𑀺 𑀬𑀸𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀘𑁄𑀭𑀦𑁆𑀢𑀭𑀸𑀬 𑀫𑁄𑀘𑀦𑀢𑁆𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀅𑀯𑀳𑀸𑀭𑀁 𑀦 𑀯𑀤𑀦𑁆𑀢𑀻𑀢𑀺.

𑀧𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀤𑀓𑀣𑀸

𑀅𑀧𑀤𑁂𑀲𑀼 𑀅𑀳𑀺 𑀦𑀸𑀫 𑀲𑀲𑁆𑀲𑀸𑀫𑀺𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑀸𑀤𑀻𑀳𑀺 𑀕𑀳𑀺𑀢𑀲𑀧𑁆𑀧𑁄; 𑀬𑀁 𑀓𑀻𑀴𑀸𑀧𑁂𑀦𑁆𑀢𑀸

𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀓𑀳𑀸𑀧𑀡𑀫𑁆𑀧𑀺 𑀮𑀪𑀦𑁆𑀢𑀺, 𑀫𑀼𑀜𑁆𑀘𑀦𑁆𑀢𑀸𑀧𑀺 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀕𑀳𑁂𑀢𑁆𑀯𑀸𑀯 𑀫𑀼𑀜𑁆𑀘𑀦𑁆𑀢𑀺. 𑀢𑁂 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 𑀲𑀧𑁆𑀧𑀓𑀭𑀡𑁆𑀟𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺 𑀯𑀸, 𑀓𑀢𑁆𑀣𑀘𑀺 𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀘𑁂 𑀲𑁄 𑀪𑀺𑀓𑁆𑀔𑀼 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀁 𑀓𑀭𑀡𑁆𑀟𑀁 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀓𑀭𑀡𑁆𑀟𑀓𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀲𑀧𑁆𑀧𑀁 𑀕𑀻𑀯𑀸𑀬 𑀕𑀡𑁆𑀳𑀸𑀢𑀺, 𑀤𑀼𑀓𑁆𑀓𑀝𑀁. 𑀉𑀤𑁆𑀥𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀚𑀼𑀓𑀁 𑀓𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲 𑀓𑀭𑀡𑁆𑀟𑀢𑀮𑀢𑁄 𑀲𑀧𑁆𑀧𑀲𑁆𑀲 𑀦𑀗𑁆𑀕𑀼𑀝𑁆𑀞𑁂 𑀓𑁂𑀲𑀕𑁆𑀕𑀫𑀢𑁆𑀢𑁂 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀖𑀁𑀲𑀺𑀢𑁆𑀯𑀸 𑀓𑀟𑁆𑀠𑀦𑁆𑀢𑀲𑁆𑀲 𑀦𑀗𑁆𑀕𑀼𑀝𑁆𑀞𑁂 𑀫𑀼𑀔𑀯𑀝𑁆𑀝𑀺𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 ¶ . 𑀓𑀭𑀡𑁆𑀟𑀫𑀼𑀔𑀁 𑀈𑀲𑀓𑀁 𑀯𑀺𑀯𑀭𑀺𑀢𑁆𑀯𑀸 𑀧𑀳𑀸𑀭𑀁 𑀯𑀸 𑀤𑀢𑁆𑀯𑀸 ‘‘𑀏𑀳𑀺, 𑀭𑁂’’𑀢𑀺 𑀦𑀸𑀫𑁂𑀦 𑀧𑀓𑁆𑀓𑁄𑀲𑀺𑀢𑁆𑀯𑀸 𑀦𑀺𑀓𑁆𑀔𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁 ¶ . 𑀢𑀣𑁂𑀯 𑀯𑀺𑀯𑀭𑀺𑀢𑁆𑀯𑀸 𑀫𑀡𑁆𑀟𑀽𑀓𑀲𑀤𑁆𑀤𑀁 𑀯𑀸 𑀫𑀽𑀲𑀺𑀓𑀲𑀤𑁆𑀤𑀁 𑀯𑀸 𑀮𑀸𑀚𑀸𑀯𑀺𑀓𑀺𑀭𑀡𑀁 𑀯𑀸 𑀓𑀢𑁆𑀯𑀸 𑀦𑀸𑀫𑁂𑀦 𑀧𑀓𑁆𑀓𑁄𑀲𑀢𑀺, 𑀅𑀘𑁆𑀙𑀭𑀁 𑀯𑀸 𑀧𑀳𑀭𑀢𑀺, 𑀏𑀯𑀁 𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁. 𑀫𑀼𑀔𑀁 𑀅𑀯𑀺𑀯𑀭𑀺𑀢𑁆𑀯𑀸𑀧𑀺 𑀏𑀯𑀁 𑀓𑀢𑁂 𑀙𑀸𑀢𑁄 𑀲𑀧𑁆𑀧𑁄 𑀲𑀻𑀲𑁂𑀦 𑀓𑀭𑀡𑁆𑀟𑀧𑀼𑀝𑀁 𑀆𑀳𑀘𑁆𑀘 𑀑𑀓𑀸𑀲𑀁 𑀓𑀢𑁆𑀯𑀸 𑀧𑀮𑀸𑀬𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀘𑁂 𑀧𑀦 𑀫𑀼𑀔𑁂 𑀯𑀺𑀯𑀭𑀺𑀢𑁂 𑀲𑀬𑀫𑁂𑀯 𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀅𑀣𑀸𑀧𑀺 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀅𑀯𑀺𑀯𑀭𑀺𑀢𑁆𑀯𑀸 𑀯𑀸 𑀓𑁂𑀯𑀮𑀁 𑀫𑀡𑁆𑀟𑀽𑀓𑀫𑀽𑀲𑀺𑀓𑀲𑀤𑁆𑀤𑀁 𑀮𑀸𑀚𑀸𑀯𑀺𑀓𑀺𑀭𑀡𑀫𑁂𑀯 𑀘 𑀓𑀭𑁄𑀢𑀺, 𑀦 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑁄𑀲𑀢𑀺, 𑀦 𑀅𑀘𑁆𑀙𑀭𑀁 𑀯𑀸 𑀧𑀳𑀭𑀢𑀺, 𑀲𑀧𑁆𑀧𑁄 𑀘 𑀙𑀸𑀢𑀢𑁆𑀢𑀸 ‘‘𑀫𑀡𑁆𑀟𑀽𑀓𑀸𑀤𑀻𑀦𑀺 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀫𑀘𑁆𑀙𑁄 𑀓𑁂𑀯𑀮𑀁 𑀇𑀥 𑀅𑀧𑀤𑀕𑁆𑀕𑀳𑀡𑁂𑀦 𑀆𑀕𑀢𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀉𑀤𑀓𑀝𑁆𑀞𑁂 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀅𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀺𑀧𑀤𑀓𑀣𑀸

𑁧𑁧𑁫. 𑀤𑁆𑀯𑀺𑀧𑀤𑁂𑀲𑀼 ¶ 𑁋 𑀬𑁂 𑀅𑀯𑀳𑀭𑀺𑀢𑀼𑀁 𑀲𑀓𑁆𑀓𑀸, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀸 𑀧𑀓𑁆𑀔𑀚𑀸𑀢𑀸’’𑀢𑀺 𑀆𑀳. 𑀤𑁂𑀯𑀢𑀸 𑀧𑀦 𑀅𑀯𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀧𑀓𑁆𑀔𑀸 𑀚𑀸𑀢𑀸 𑀏𑀢𑁂𑀲𑀦𑁆𑀢𑀺 𑀧𑀓𑁆𑀔𑀚𑀸𑀢𑀸. 𑀢𑁂 𑀮𑁄𑀫𑀧𑀓𑁆𑀔𑀸 𑀘𑀫𑁆𑀫𑀧𑀓𑁆𑀔𑀸 𑀅𑀝𑁆𑀞𑀺𑀧𑀓𑁆𑀔𑀸𑀢𑀺 𑀢𑀺𑀯𑀺𑀥𑀸. 𑀢𑀢𑁆𑀣 𑀫𑁄𑀭𑀓𑀼𑀓𑁆𑀓𑀼𑀝𑀸𑀤𑀬𑁄 𑀮𑁄𑀫𑀧𑀓𑁆𑀔𑀸, 𑀯𑀕𑁆𑀕𑀼𑀮𑀺𑀆𑀤𑀬𑁄 𑀘𑀫𑁆𑀫𑀧𑀓𑁆𑀔𑀸, 𑀪𑀫𑀭𑀸𑀤𑀬𑁄 𑀅𑀝𑁆𑀞𑀺𑀧𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀲𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑀸 𑀘 𑀧𑀓𑁆𑀔𑀚𑀸𑀢𑀸 𑀘 𑀓𑁂𑀯𑀮𑀁 𑀇𑀥 𑀤𑁆𑀯𑀺𑀧𑀤𑀕𑁆𑀕𑀳𑀡𑁂𑀦 𑀆𑀕𑀢𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀆𑀓𑀸𑀲𑀝𑁆𑀞𑁂 𑀘 𑀧𑀸𑀡𑁂 𑀘 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀤𑁆𑀯𑀺𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀧𑁆𑀧𑀤𑀓𑀣𑀸

𑁧𑁧𑁬. 𑀘𑀢𑀼𑀧𑁆𑀧𑀤𑁂𑀲𑀼 𑁋 𑀧𑀲𑀼𑀓𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀯𑀲𑁂𑀲𑀸 𑀲𑀩𑁆𑀩𑀸 𑀘𑀢𑀼𑀧𑁆𑀧𑀤𑀚𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀳𑀢𑁆𑀣𑀺𑀆𑀤𑀬𑁄 𑀧𑀸𑀓𑀝𑀸𑀬𑁂𑀯. 𑀢𑀢𑁆𑀣 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀢𑁆𑀣𑀺𑀁 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀬𑁄 𑀧𑀦 𑀫𑀳𑀸𑀩𑀮𑁄 𑀩𑀮𑀫𑀤𑁂𑀦 𑀢𑀭𑀼𑀡𑀁 𑀪𑀺𑀗𑁆𑀓𑀘𑁆𑀙𑀸𑀧𑀁 𑀦𑀸𑀪𑀺𑀫𑀽𑀮𑁂 𑀲𑀻𑀲𑁂𑀦 𑀉𑀘𑁆𑀘𑀸𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀤𑁂, 𑀲𑁄𑀡𑁆𑀟𑀁 𑀘 𑀪𑀽𑀫𑀺𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀳𑀢𑁆𑀣𑀻 𑀧𑀦 𑀓𑁄𑀘𑀺 𑀳𑀢𑁆𑀣𑀺𑀲𑀸𑀮𑀸𑀬𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 ¶ 𑀳𑁄𑀢𑀺, 𑀓𑁄𑀘𑀺 𑀅𑀩𑀤𑁆𑀥𑁄𑀯 𑀢𑀺𑀝𑁆𑀞𑀢𑀺, 𑀓𑁄𑀘𑀺 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 ¶ 𑀢𑀺𑀝𑁆𑀞𑀢𑀺, 𑀓𑁄𑀘𑀺 𑀭𑀸𑀚𑀗𑁆𑀕𑀡𑁂 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀳𑀢𑁆𑀣𑀺𑀲𑀸𑀮𑀸𑀬𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀲𑁆𑀲 𑀕𑀻𑀯𑀸𑀩𑀦𑁆𑀥𑀦𑀜𑁆𑀘 𑀘𑀢𑁆𑀢𑀸𑀭𑁄 𑀘 𑀧𑀸𑀤𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀕𑀻𑀯𑀸𑀬 𑀘 𑀏𑀓𑀲𑁆𑀫𑀺𑀜𑁆𑀘 𑀧𑀸𑀤𑁂 𑀅𑀬𑀲𑀗𑁆𑀔𑀮𑀺𑀓𑀸𑀬 𑀩𑀤𑁆𑀥𑀲𑁆𑀲 𑀙 𑀞𑀸𑀦𑀸𑀦𑀺. 𑀕𑀻𑀯𑀸𑀬 𑀘 𑀤𑁆𑀯𑀻𑀲𑀼 𑀘 𑀧𑀸𑀤𑁂𑀲𑀼 𑀩𑀤𑁆𑀥𑀲𑁆𑀲 𑀲𑀢𑁆𑀢 𑀞𑀸𑀦𑀸𑀦𑀺. 𑀢𑁂𑀲𑀁 𑀯𑀲𑁂𑀦 𑀨𑀦𑁆𑀤𑀸𑀧𑀦𑀞𑀸𑀦𑀸𑀘𑀸𑀯𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀩𑀤𑁆𑀥𑀲𑁆𑀲 𑀲𑀓𑀮𑀸 𑀳𑀢𑁆𑀣𑀺𑀲𑀸𑀮𑀸 𑀞𑀸𑀦𑀁. 𑀢𑀢𑁄 𑀅𑀢𑀺𑀓𑁆𑀓𑀫𑀦𑁂, 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀞𑀺𑀢𑀲𑁆𑀲 𑀲𑀓𑀮𑀁 𑀅𑀦𑁆𑀢𑁄𑀯𑀢𑁆𑀣𑀼𑀫𑁂𑀯 𑀞𑀸𑀦𑀁. 𑀢𑀲𑁆𑀲 𑀯𑀢𑁆𑀣𑀼𑀤𑁆𑀯𑀸𑀭𑀸𑀢𑀺𑀓𑁆𑀓𑀫𑀦𑁂 𑀧𑀸𑀭𑀸𑀚𑀺𑀓𑀁. 𑀭𑀸𑀚𑀗𑁆𑀕𑀡𑁂 𑀞𑀺𑀢𑀲𑁆𑀲 𑀲𑀓𑀮𑀦𑀕𑀭𑀁 𑀞𑀸𑀦𑀁. 𑀢𑀲𑁆𑀲 𑀦𑀕𑀭𑀤𑁆𑀯𑀸𑀭𑀸𑀢𑀺𑀓𑁆𑀓𑀫𑀦𑁂 𑀧𑀸𑀭𑀸𑀚𑀺𑀓𑀁. 𑀩𑀳𑀺𑀦𑀕𑀭𑁂 𑀞𑀺𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀢𑀁 𑀳𑀭𑀦𑁆𑀢𑁄 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀦𑀺𑀧𑀦𑁆𑀦𑀲𑁆𑀲 𑀏𑀓𑀫𑁂𑀯 𑀞𑀸𑀦𑀁. 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀉𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀉𑀝𑁆𑀞𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀲𑁆𑀲𑁂𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀲𑀘𑁂 𑀧𑀦 𑀲𑁄 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀩𑀤𑁆𑀥𑁄 𑀳𑁄𑀢𑀺, 𑀅𑀝𑁆𑀞 𑀞𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀑𑀝𑁆𑀞𑁂𑀧𑀺.

𑀕𑁄𑀡𑁄𑀧𑀺 ¶ 𑀓𑁄𑀘𑀺 𑀕𑁂𑀳𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺. 𑀓𑁄𑀘𑀺 𑀅𑀩𑀤𑁆𑀥𑁄𑀯 𑀢𑀺𑀝𑁆𑀞𑀢𑀺, 𑀓𑁄𑀘𑀺 𑀧𑀦 𑀯𑀚𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀓𑁄𑀘𑀺 𑀅𑀩𑀤𑁆𑀥𑁄𑀯 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀕𑁂𑀳𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀩𑀦𑁆𑀥𑀦𑀜𑁆𑀘𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺; 𑀅𑀩𑀤𑁆𑀥𑀲𑁆𑀲 𑀲𑀓𑀮𑀁 𑀕𑁂𑀳𑀁. 𑀯𑀚𑁂𑀧𑀺 𑀩𑀤𑁆𑀥𑀲𑁆𑀲 𑀧𑀜𑁆𑀘 𑀞𑀸𑀦𑀸𑀦𑀺. 𑀅𑀩𑀤𑁆𑀥𑀲𑁆𑀲 𑀲𑀓𑀮𑁄 𑀯𑀚𑁄. 𑀢𑀁 𑀯𑀚𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀳𑀭𑀦𑁆𑀢𑁄 𑀔𑀡𑁆𑀟𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀤𑁆𑀯𑀸𑀭𑀁 𑀯𑀸 𑀯𑀺𑀯𑀭𑀺𑀢𑁆𑀯𑀸 𑀯𑀚𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀞𑀺𑀢𑁄 𑀦𑀸𑀫𑁂𑀦 𑀧𑀓𑁆𑀓𑁄𑀲𑀺𑀢𑁆𑀯𑀸 𑀦𑀺𑀓𑁆𑀔𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀸𑀔𑀸𑀪𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀸𑀭𑀁 𑀅𑀯𑀺𑀯𑀭𑀺𑀢𑁆𑀯𑀸 𑀯𑀚𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑀁 𑀘𑀸𑀮𑁂𑀢𑁆𑀯𑀸 𑀧𑀓𑁆𑀓𑁄𑀲𑀢𑀺, 𑀕𑁄𑀡𑁄 𑀙𑀸𑀢𑀢𑀸𑀬 𑀯𑀚𑀁 𑀮𑀗𑁆𑀖𑁂𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀘𑁂 𑀧𑀦 𑀤𑁆𑀯𑀸𑀭𑁂 𑀯𑀺𑀯𑀭𑀺𑀢𑁂 𑀯𑀚𑁂 𑀯𑀸 𑀪𑀺𑀦𑁆𑀦𑁂 𑀲𑀬𑀫𑁂𑀯 𑀦𑀺𑀓𑁆𑀔𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀅𑀯𑀺𑀯𑀭𑀺𑀢𑁆𑀯𑀸 𑀯𑀸 𑀯𑀚𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀅𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀓𑁂𑀯𑀮𑀁 𑀲𑀸𑀔𑀸𑀪𑀗𑁆𑀕𑀁 ¶ 𑀘𑀸𑀮𑁂𑀢𑀺, 𑀦 𑀧𑀓𑁆𑀓𑁄𑀲𑀢𑀺, 𑀕𑁄𑀡𑁄 𑀙𑀸𑀢𑀢𑀸𑀬 𑀧𑀤𑀲𑀸 𑀯𑀸 𑀮𑀗𑁆𑀖𑁂𑀢𑁆𑀯𑀸 𑀯𑀸 𑀦𑀺𑀓𑁆𑀔𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀏𑀓𑁄 𑀫𑀚𑁆𑀛𑁂 𑀕𑀸𑀫𑁂 𑀩𑀤𑁆𑀥𑁄 𑀞𑀺𑀢𑁄, 𑀏𑀓𑁄 𑀦𑀺𑀧𑀦𑁆𑀦𑁄. 𑀞𑀺𑀢𑀕𑁄𑀡𑀲𑁆𑀲 𑀧𑀜𑁆𑀘 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀧𑀦𑁆𑀦𑀲𑁆𑀲 𑀤𑁆𑀯𑁂 𑀞𑀸𑀦𑀸𑀦𑀺; 𑀢𑁂𑀲𑀁 𑀯𑀲𑁂𑀦 𑀨𑀦𑁆𑀤𑀸𑀧𑀦𑀞𑀸𑀦𑀸𑀘𑀸𑀯𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑁄 𑀧𑀦 𑀦𑀺𑀧𑀦𑁆𑀦𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀖𑀸𑀢𑁂𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀦 𑀤𑁆𑀯𑀸𑀭𑀬𑀼𑀢𑁆𑀢𑁂 𑀕𑀸𑀫𑁂 𑀞𑀺𑀢𑀕𑁄𑀡𑀲𑁆𑀲 𑀲𑀓𑀮𑀕𑀸𑀫𑁄 𑀞𑀸𑀦𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀞𑀺𑀢𑀲𑁆𑀲 𑀯𑀸 𑀘𑀭𑀦𑁆𑀢𑀲𑁆𑀲 𑀯𑀸 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀕𑀤𑁆𑀭𑀪𑀧𑀲𑀼𑀓𑀸𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀘𑀢𑀼𑀧𑁆𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀳𑀼𑀧𑁆𑀧𑀤𑀓𑀣𑀸

𑁧𑁧𑁭. 𑀩𑀳𑀼𑀧𑁆𑀧𑀤𑁂𑀲𑀼 ¶ 𑁋 𑀲𑀘𑁂 𑀏𑀓𑀸𑀬 𑀲𑀢𑀧𑀤𑀺𑀬𑀸 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀁 𑀧𑀤𑀲𑀸 𑀦𑁂𑀦𑁆𑀢𑀲𑁆𑀲 𑀦𑀯𑀦𑀯𑀼𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀦𑀺, 𑀏𑀓𑀁 𑀧𑀸𑀭𑀸𑀚𑀺𑀓𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀩𑀳𑀼𑀧𑁆𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀑𑀘𑀭𑀓𑀓𑀣𑀸

𑁧𑁧𑁮. 𑀑𑀘𑀭𑀢𑀻𑀢𑀺 ¶ 𑀑𑀘𑀭𑀓𑁄, 𑀢𑀢𑁆𑀣 𑀢𑀢𑁆𑀣 𑀅𑀦𑁆𑀢𑁄 𑀅𑀦𑀼𑀧𑀯𑀺𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀘𑀭𑀺𑀢𑁆𑀯𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀘𑀺𑀓𑁆𑀔𑀢𑀻𑀢𑀺 𑀧𑀭𑀓𑀼𑀮𑁂𑀲𑀼 𑀯𑀸 𑀯𑀺𑀳𑀸𑀭𑀸𑀤𑀻𑀲𑀼 𑀯𑀸 𑀤𑀼𑀝𑁆𑀞𑀧𑀺𑀢𑀁 𑀅𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁 𑀪𑀡𑁆𑀟𑀁 𑀅𑀜𑁆𑀜𑀲𑁆𑀲 𑀘𑁄𑀭𑀓𑀫𑁆𑀫𑀁 𑀓𑀸𑀢𑀼𑀁 𑀧𑀝𑀺𑀩𑀮𑀲𑁆𑀲 𑀆𑀭𑁄𑀘𑁂𑀢𑀺. 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀅𑀯𑀲𑁆𑀲𑀁 𑀳𑀸𑀭𑀺𑀬𑁂 𑀪𑀡𑁆𑀟𑁂 𑀑𑀘𑀭𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀇𑀢𑀭𑀲𑁆𑀲 𑀞𑀸𑀦𑀸𑀘𑀸𑀯𑀦𑁂𑀢𑀺 𑀏𑀯𑀁 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲. 𑀬𑁄 𑀧𑀦 ‘‘𑀧𑀼𑀭𑀺𑀲𑁄 𑀕𑁂𑀳𑁂 𑀦𑀢𑁆𑀣𑀺, 𑀪𑀡𑁆𑀟𑀁 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀤𑁂𑀲𑁂 𑀞𑀧𑀺𑀢𑀁 𑀅𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁, 𑀤𑁆𑀯𑀸𑀭𑀁 𑀅𑀲𑀁𑀯𑀼𑀢𑀁, 𑀕𑀢𑀫𑀢𑁆𑀢𑁂𑀦𑁂𑀯 𑀲𑀓𑁆𑀓𑀸 𑀳𑀭𑀺𑀢𑀼𑀁, 𑀦𑀢𑁆𑀣𑀺 𑀦𑀸𑀫 𑀓𑁄𑀘𑀺 𑀧𑀼𑀭𑀺𑀲𑀓𑀸𑀭𑀽𑀧𑀚𑀻𑀯𑀻, 𑀬𑁄 𑀢𑀁 𑀕𑀦𑁆𑀢𑁆𑀯𑀸 𑀳𑀭𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀬𑀸𑀬𑀓𑀣𑀁 𑀓𑀭𑁄𑀢𑀺, 𑀢𑀜𑁆𑀘 𑀲𑀼𑀢𑁆𑀯𑀸 𑀅𑀜𑁆𑀜𑁄 ‘‘𑀅𑀳𑀁 𑀤𑀸𑀦𑀺 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀳𑀭𑀢𑀺, 𑀢𑀲𑁆𑀲 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀁, 𑀇𑀢𑀭𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀬𑀸𑀬𑁂𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀢𑁄 𑀫𑀼𑀘𑁆𑀘𑀢𑀻𑀢𑀺.

𑀑𑀘𑀭𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀑𑀡𑀺𑀭𑀓𑁆𑀔𑀓𑀣𑀸

𑀑𑀡𑀺𑀁 𑀭𑀓𑁆𑀔𑀢𑀻𑀢𑀺 𑀑𑀡𑀺𑀭𑀓𑁆𑀔𑁄. 𑀬𑁄 𑀧𑀭𑁂𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀆𑀪𑀢𑀁 𑀪𑀡𑁆𑀟𑀁 ‘‘𑀇𑀤𑀁

𑀢𑀸𑀯, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀑𑀮𑁄𑀓𑁂𑀣, 𑀬𑀸𑀯 𑀅𑀳𑀁 𑀇𑀤𑀁 𑀦𑀸𑀫 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁄 ¶ 𑀭𑀓𑁆𑀔𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀑𑀡𑀺𑀭𑀓𑁆𑀔𑁄 𑀦𑀸𑀫 𑀆𑀳𑀝𑀁 𑀪𑀡𑁆𑀟𑀁 𑀕𑁄𑀧𑁂𑀦𑁆𑀢𑁄’’𑀢𑀺. 𑀢𑀢𑁆𑀣 𑀑𑀡𑀺𑀭𑀓𑁆𑀔𑁄 𑀬𑁂𑀪𑀼𑀬𑁆𑀬𑁂𑀦 𑀩𑀦𑁆𑀥𑀺𑀢𑁆𑀯𑀸 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀪𑀡𑁆𑀟𑀁 𑀅𑀫𑁄𑀘𑁂𑀢𑁆𑀯𑀸𑀯 𑀳𑁂𑀝𑁆𑀞𑀸 𑀧𑀲𑀺𑀩𑁆𑀩𑀓𑀁 𑀯𑀸 𑀧𑀼𑀝𑀓𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀓𑀺𑀜𑁆𑀘𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀺𑀩𑁆𑀩𑀦𑀸𑀤𑀺𑀁 𑀧𑀼𑀦 𑀧𑀸𑀓𑀢𑀺𑀓𑀁 𑀓𑀭𑁄𑀢𑀺, ‘‘𑀏𑀯𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀫𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀭𑀼𑀧𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀑𑀡𑀺𑀭𑀓𑁆𑀔𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸

𑀲𑀁𑀯𑀺𑀥𑀸𑀬 ¶ ¶ 𑀅𑀯𑀳𑀸𑀭𑁄 𑀲𑀁𑀯𑀺𑀤𑀸𑀯𑀳𑀸𑀭𑁄; 𑀅𑀜𑁆𑀜𑀫𑀜𑁆𑀜𑀲𑀜𑁆𑀜𑀢𑁆𑀢𑀺𑀬𑀸 𑀓𑀢𑀸𑀯𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀺𑀤𑀳𑀺𑀢𑁆𑀯𑀸𑀢𑀺 𑀏𑀓𑀘𑁆𑀙𑀦𑁆𑀤𑀢𑀸𑀬 𑀏𑀓𑀚𑁆𑀛𑀸𑀲𑀬𑀢𑀸𑀬 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 ‘‘𑀅𑀲𑀼𑀓𑀁 𑀦𑀸𑀫 𑀕𑁂𑀳𑀁 𑀕𑀦𑁆𑀢𑁆𑀯𑀸, 𑀙𑀤𑀦𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀲𑀦𑁆𑀥𑀺𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀪𑀡𑁆𑀟𑀁 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺. 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀧𑀭𑀺𑀯𑀸𑀭𑁂𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬, 𑀕𑀭𑀼𑀪𑀡𑁆𑀟𑀁 𑀅𑀯𑀸𑀳𑀭𑀼𑀁;

𑀢𑀬𑁄 𑀧𑀸𑀭𑀸𑀚𑀺𑀓𑀸, 𑀏𑀓𑁄 𑀦 𑀧𑀸𑀭𑀸𑀚𑀺𑀓𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀢𑀲𑁆𑀲𑀸𑀬𑀁 𑀅𑀢𑁆𑀣𑁄 𑁋 𑀘𑀢𑁆𑀢𑀸𑀭𑁄 𑀚𑀦𑀸 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸 𑀙𑀫𑀸𑀲𑀓𑀁 𑀕𑀭𑀼𑀪𑀡𑁆𑀟𑀁 𑀆𑀳𑀭𑀺𑀢𑀼𑀓𑀸𑀫𑀸 𑀚𑀸𑀢𑀸. 𑀢𑀢𑁆𑀣 𑀆𑀘𑀭𑀺𑀬𑁄 ‘‘𑀢𑁆𑀯𑀁 𑀏𑀓𑀁 𑀫𑀸𑀲𑀓𑀁 𑀳𑀭, 𑀢𑁆𑀯𑀁 𑀏𑀓𑀁, 𑀢𑁆𑀯𑀁 𑀏𑀓𑀁, 𑀅𑀳𑀁 𑀢𑀬𑁄 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀧𑀦 𑀧𑀞𑀫𑁄 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀢𑀬𑁄 𑀳𑀭𑀣, 𑀢𑁆𑀯𑀁 𑀏𑀓𑀁 𑀳𑀭, 𑀢𑁆𑀯𑀁 𑀏𑀓𑀁, 𑀅𑀳𑀁 𑀏𑀓𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑁂𑀧𑀺 𑀤𑁆𑀯𑁂 𑀏𑀯𑀫𑁂𑀯 𑀆𑀳𑀁𑀲𑀼. 𑀢𑀢𑁆𑀣 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀏𑀓𑀫𑁂𑀓𑀲𑁆𑀲 𑀏𑀓𑁂𑀓𑁄 𑀫𑀸𑀲𑀓𑁄 𑀲𑀸𑀳𑀢𑁆𑀣𑀺𑀓𑁄 𑀳𑁄𑀢𑀺, 𑀢𑁂𑀦 𑀦𑁂𑀲𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄; 𑀧𑀜𑁆𑀘 𑀆𑀡𑀢𑁆𑀢𑀺𑀓𑀸, 𑀢𑁂𑀳𑀺 𑀢𑀺𑀡𑁆𑀡𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀆𑀘𑀭𑀺𑀬𑀲𑁆𑀲 𑀧𑀦 𑀢𑀬𑁄 𑀲𑀸𑀳𑀢𑁆𑀣𑀺𑀓𑀸, 𑀢𑁂𑀳𑀺𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀬𑁄 𑀆𑀡𑀢𑁆𑀢𑀺𑀓𑀸, 𑀢𑁂𑀳𑀺𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲, 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲 ¶ 𑀅𑀗𑁆𑀕𑀁 𑀦 𑀳𑁄𑀢𑀺. 𑀲𑀸𑀳𑀢𑁆𑀣𑀺𑀓𑀁 𑀧𑀦 𑀲𑀸𑀳𑀢𑁆𑀣𑀺𑀓𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑀁, 𑀆𑀡𑀢𑁆𑀢𑀺𑀓𑀁 𑀆𑀡𑀢𑁆𑀢𑀺𑀓𑁂𑀦𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬…𑀧𑁂… 𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺.

𑀅𑀧𑀺𑀘 𑀲𑀁𑀯𑀺𑀤𑀸𑀯𑀳𑀸𑀭𑁂 𑀅𑀲𑀫𑁆𑀫𑁄𑀳𑀢𑁆𑀣𑀁 ‘‘𑀏𑀓𑀪𑀡𑁆𑀟𑀁 𑀏𑀓𑀝𑁆𑀞𑀸𑀦𑀁, 𑀏𑀓𑀪𑀡𑁆𑀟𑀁 𑀦𑀸𑀦𑀸𑀞𑀸𑀦𑀁; 𑀦𑀸𑀦𑀸𑀪𑀡𑁆𑀟𑀁 𑀏𑀓𑀝𑁆𑀞𑀸𑀦𑀁, 𑀦𑀸𑀦𑀸𑀪𑀡𑁆𑀟𑀁 𑀦𑀸𑀦𑀸𑀞𑀸𑀦’’𑀦𑁆𑀢𑀺 𑀇𑀤𑀫𑁆𑀧𑀺 𑀘𑀢𑀼𑀓𑁆𑀓𑀁 𑀅𑀢𑁆𑀣𑀢𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀢𑀢𑁆𑀣 𑀏𑀓𑀪𑀡𑁆𑀟𑀁 𑀏𑀓𑀝𑁆𑀞𑀸𑀦𑀦𑁆𑀢𑀺 𑀏𑀓𑀓𑀼𑀮𑀲𑁆𑀲 𑀆𑀧𑀡𑀨𑀮𑀓𑁂 𑀧𑀜𑁆𑀘𑀫𑀸𑀲𑀓𑀁 𑀪𑀡𑁆𑀟𑀁 𑀤𑀼𑀝𑁆𑀞𑀧𑀺𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘‘𑀕𑀘𑁆𑀙𑁂𑀢𑀁 𑀆𑀳𑀭𑀸’’𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀏𑀓𑀪𑀡𑁆𑀟𑀁 ¶ 𑀦𑀸𑀦𑀸𑀞𑀸𑀦𑀦𑁆𑀢𑀺 𑀏𑀓𑀓𑀼𑀮𑀲𑁆𑀲 𑀧𑀜𑁆𑀘𑀲𑀼 𑀆𑀧𑀡𑀨𑀮𑀓𑁂𑀲𑀼 𑀏𑀓𑁂𑀓𑀫𑀸𑀲𑀓𑀁 𑀤𑀼𑀝𑁆𑀞𑀧𑀺𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘‘𑀕𑀘𑁆𑀙𑁂𑀢𑁂 𑀆𑀳𑀭𑀸’’𑀢𑀺, 𑀧𑀜𑁆𑀘𑀫𑀲𑁆𑀲 𑀫𑀸𑀲𑀓𑀲𑁆𑀲 𑀉𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀦𑀸𑀦𑀸𑀪𑀡𑁆𑀟𑀁 𑀏𑀓𑀝𑁆𑀞𑀸𑀦𑀦𑁆𑀢𑀺 𑀩𑀳𑀽𑀦𑀁 𑀲𑀦𑁆𑀢𑀓𑀁 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀪𑀡𑁆𑀟𑀁 ¶ 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑀼𑀝𑁆𑀞𑀧𑀺𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘‘𑀕𑀘𑁆𑀙𑁂𑀢𑀁 𑀆𑀳𑀭𑀸’’𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀦𑀸𑀦𑀸𑀪𑀡𑁆𑀟𑀁 𑀦𑀸𑀦𑀸𑀞𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀓𑀼𑀮𑀸𑀦𑀁 𑀧𑀜𑁆𑀘𑀲𑀼 𑀆𑀧𑀡𑀨𑀮𑀓𑁂𑀲𑀼 𑀏𑀓𑁂𑀓𑀫𑀸𑀲𑀓𑀁 𑀤𑀼𑀝𑁆𑀞𑀧𑀺𑀢𑀁 𑀤𑀺𑀲𑁆𑀯𑀸 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘‘𑀕𑀘𑁆𑀙𑁂𑀢𑁂 𑀆𑀳𑀭𑀸’’𑀢𑀺, 𑀧𑀜𑁆𑀘𑀫𑀲𑁆𑀲 𑀫𑀸𑀲𑀓𑀲𑁆𑀲 𑀉𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀦𑁆𑀢𑀺.

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸

𑁧𑁧𑁯. 𑀲𑀗𑁆𑀓𑁂𑀢𑀓𑀫𑁆𑀫𑀦𑁆𑀢𑀺 𑀲𑀜𑁆𑀚𑀸𑀦𑀦𑀓𑀫𑁆𑀫𑀁; 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀜𑁆𑀜𑀸𑀡𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀅𑀚𑁆𑀚 𑀯𑀸 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀼, 𑀲𑁆𑀯𑁂 𑀯𑀸, 𑀅𑀦𑀸𑀕𑀢𑁂 𑀯𑀸 𑀲𑀁𑀯𑀘𑁆𑀙𑀭𑁂, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄; 𑀉𑀪𑀺𑀦𑁆𑀦𑀫𑁆𑀧𑀺 𑀑𑀘𑀭𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 ‘‘𑀅𑀚𑁆𑀚 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀲𑁆𑀯𑁂 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀺, ‘‘𑀅𑀚𑁆𑀚𑀸’’𑀢𑀺 𑀦𑀺𑀬𑀸𑀫𑀺𑀢𑀁 𑀢𑀁 𑀲𑀗𑁆𑀓𑁂𑀢𑀁 𑀅𑀢𑀺𑀓𑁆𑀓𑀫𑁆𑀫 𑀧𑀘𑁆𑀙𑀸 𑀅𑀯𑀳𑀝𑀁 𑀳𑁄𑀢𑀺. 𑀲𑀘𑁂 ‘‘𑀲𑁆𑀯𑁂 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀅𑀚𑁆𑀚 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀺 ¶ , ‘‘𑀲𑁆𑀯𑁂’’𑀢𑀺 𑀦𑀺𑀬𑀸𑀫𑀺𑀢𑀁 𑀢𑀁 𑀲𑀗𑁆𑀓𑁂𑀢𑀁 𑀅𑀧𑁆𑀧𑀢𑁆𑀯𑀸 𑀧𑀼𑀭𑁂 𑀅𑀯𑀳𑀝𑀁 𑀳𑁄𑀢𑀺; 𑀏𑀯𑀁 𑀅𑀯𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. ‘‘𑀲𑁆𑀯𑁂 𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀳𑁂𑀯 𑀯𑀸 𑀲𑁆𑀯𑁂 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀳𑀭𑀦𑁆𑀢𑁄𑀧𑀺 𑀢𑀁 𑀲𑀗𑁆𑀓𑁂𑀢𑀁 𑀧𑀼𑀭𑁂 𑀘 𑀧𑀘𑁆𑀙𑀸 𑀘 𑀳𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀧𑀘𑁆𑀙𑀸𑀪𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼𑀧𑀺. 𑀧𑀼𑀭𑀺𑀫𑀬𑀸𑀫-𑀫𑀚𑁆𑀛𑀺𑀫𑀬𑀸𑀫-𑀧𑀘𑁆𑀙𑀺𑀫𑀬𑀸𑀫-𑀓𑀸𑀴𑀚𑀼𑀡𑁆𑀳-𑀫𑀸𑀲-𑀉𑀢𑀼-𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦𑀸𑀧𑀺 𑀘𑁂𑀢𑁆𑀣 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀼𑀭𑁂𑀪𑀢𑁆𑀢𑀁 𑀳𑀭𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀭𑁂𑀪𑀢𑁆𑀢𑀫𑁂𑀯 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀬𑀫𑀦𑁆𑀢𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀁 𑀳𑁄𑀢𑀺; 𑀏𑀢𑁆𑀣 𑀓𑀣𑀦𑁆𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀧𑀼𑀭𑁂𑀪𑀢𑁆𑀢𑀧𑀬𑁄𑀕𑁄𑀯 𑀏𑀲𑁄, 𑀢𑀲𑁆𑀫𑀸 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀯𑀺𑀲𑀗𑁆𑀓𑁂𑀢𑀁, 𑀢𑀲𑁆𑀫𑀸 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀻’’𑀢𑀺.

𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸

𑁧𑁨𑁦. 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 ¶ 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀓𑀲𑁆𑀲𑀘𑀺 𑀦𑀺𑀫𑀺𑀢𑁆𑀢𑀲𑁆𑀲 𑀓𑀭𑀡𑀁, 𑀢𑀁 ‘‘𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀥𑀸 𑀯𑀼𑀢𑁆𑀢𑀁. 𑀅𑀜𑁆𑀜𑀫𑁆𑀧𑀺 𑀧𑀦𑁂𑀢𑁆𑀣 𑀳𑀢𑁆𑀣𑀮𑀗𑁆𑀖𑀦-𑀧𑀸𑀡𑀺𑀧𑁆𑀧𑀳𑀸𑀭𑀅𑀗𑁆𑀕𑀼𑀮𑀺𑀨𑁄𑀝𑀦-𑀕𑀻𑀯𑀼𑀦𑁆𑀦𑀸𑀫𑀦-𑀉𑀓𑁆𑀓𑀸𑀲𑀦𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 ¶ 𑀲𑀗𑁆𑀕𑀳𑁂𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀲𑀗𑁆𑀓𑁂𑀢𑀓𑀫𑁆𑀫𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀡𑀢𑁆𑀢𑀺𑀓𑀣𑀸

𑁧𑁨𑁧. 𑀇𑀤𑀸𑀦𑀺 𑀏𑀢𑁂𑀲𑁆𑀯𑁂𑀯 𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀦𑁆𑀢𑀺 𑀲𑁄 𑀅𑀯𑀳𑀸𑀭𑀓𑁄 𑀬𑀁 𑀆𑀡𑀸𑀧𑀓𑁂𑀦 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀁 𑀏𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀢𑀫𑁂𑀯 𑀅𑀯𑀳𑀭𑀢𑀺, 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀲𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀦𑁆𑀢𑀺 𑀬𑀁 𑀅𑀯𑀳𑀭𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀏𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀧𑀺𑀢𑀁 𑀅𑀯𑀳𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀢𑀦𑁆𑀢𑀺 𑀆𑀡𑀸𑀧𑀓𑁂𑀦 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀯𑀼𑀢𑁆𑀢𑀪𑀡𑁆𑀟𑀁 𑀅𑀧𑁆𑀧𑀕𑁆𑀖𑀁, 𑀇𑀤𑀁 𑀅𑀜𑁆𑀜𑀁 𑀢𑀲𑁆𑀲𑁂𑀯 𑀲𑀫𑀻𑀧𑁂 𑀞𑀧𑀺𑀢𑀁 𑀲𑀸𑀭𑀪𑀡𑁆𑀟𑀦𑁆𑀢𑀺 𑀏𑀯𑀁 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀢𑀫𑁂𑀯 𑀅𑀯𑀳𑀭𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀁 𑀅𑀜𑁆𑀜𑀁 𑀢𑀲𑁆𑀲𑁂𑀯 𑀲𑀫𑀻𑀧𑁂 𑀞𑀧𑀺𑀢𑀁 𑀲𑀸𑀭𑀪𑀡𑁆𑀟𑀦𑁆𑀢𑀺 ¶ 𑀫𑀜𑁆𑀜𑀢𑀺, 𑀢𑀜𑁆𑀘𑁂 𑀅𑀜𑁆𑀜𑀫𑁂𑀯 𑀳𑁄𑀢𑀺, 𑀢𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁.

𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀸𑀢𑀺𑀆𑀤𑀻𑀲𑀼 𑀏𑀓𑁄 𑀆𑀘𑀭𑀺𑀬𑁄 𑀢𑀬𑁄 𑀩𑀼𑀤𑁆𑀥𑀭𑀓𑁆𑀔𑀺𑀢-𑀥𑀫𑁆𑀫𑀭𑀓𑁆𑀔𑀺𑀢-𑀲𑀗𑁆𑀖𑀭𑀓𑁆𑀔𑀺𑀢𑀦𑀸𑀫𑀓𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀻𑀢𑀺 𑀆𑀘𑀭𑀺𑀬𑁄 𑀓𑀺𑀜𑁆𑀘𑀺 𑀪𑀡𑁆𑀟𑀁 𑀓𑀢𑁆𑀣𑀘𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲 𑀳𑀭𑀡𑀢𑁆𑀣𑀸𑀬 𑀩𑀼𑀤𑁆𑀥𑀭𑀓𑁆𑀔𑀺𑀢𑀁 𑀆𑀡𑀸𑀧𑁂𑀢𑀺. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀸𑀢𑀺 𑀕𑀘𑁆𑀙 𑀢𑁆𑀯𑀁, 𑀩𑀼𑀤𑁆𑀥𑀭𑀓𑁆𑀔𑀺𑀢, 𑀏𑀢𑀫𑀢𑁆𑀣𑀁 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀧𑀸𑀯𑀤. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀢𑀽𑀢𑀺 𑀥𑀫𑁆𑀫𑀭𑀓𑁆𑀔𑀺𑀢𑁄𑀧𑀺 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀧𑀸𑀯𑀤𑀢𑀼. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀢𑀽𑀢𑀺 𑀏𑀯𑀁 𑀢𑀬𑀸 𑀆𑀡𑀢𑁆𑀢𑁂𑀦 𑀥𑀫𑁆𑀫𑀭𑀓𑁆𑀔𑀺𑀢𑁂𑀦 𑀆𑀡𑀢𑁆𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀢𑀼, 𑀲𑁄 𑀳𑀺 𑀅𑀫𑁆𑀳𑁂𑀲𑀼 𑀯𑀻𑀭𑀚𑀸𑀢𑀺𑀓𑁄 𑀧𑀝𑀺𑀩𑀮𑁄 𑀇𑀫𑀲𑁆𑀫𑀺𑀁 𑀓𑀫𑁆𑀫𑁂𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀢𑀸𑀯 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀲𑀸 𑀆𑀡𑀢𑁆𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 ¶ 𑀕𑀘𑁆𑀙𑀢𑀺, 𑀬𑀁 𑀧𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀢𑀤𑁂𑀯 𑀳𑁄𑀢𑀺. 𑀅𑀣 𑀢𑀁 𑀪𑀡𑁆𑀟𑀁 𑀅𑀯𑀲𑁆𑀲𑀁 𑀳𑀸𑀭𑀺𑀬𑀁 𑀳𑁄𑀢𑀺, 𑀬𑀁 𑀧𑀭𑀢𑁄 ‘‘𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀇𑀫𑀲𑁆𑀲 𑀢𑀗𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀬𑀁 𑀬𑀼𑀢𑁆𑀢𑀺 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀸.

𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀻𑀢𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲, 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀁 𑀯𑀤𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀺𑀭 𑀪𑀡𑁆𑀟𑀁 𑀅𑀯𑀳𑀭, 𑀢𑁆𑀯𑀁 𑀓𑀺𑀭 𑀅𑀫𑁆𑀳𑁂𑀲𑀼 𑀘 𑀯𑀻𑀭𑀧𑀼𑀭𑀺𑀲𑁄’’’𑀢𑀺 ¶ 𑀆𑀭𑁄𑀘𑁂𑀢𑀺, 𑀏𑀯𑀁 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀅𑀯𑀳𑀸𑀭𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀲𑀸𑀥𑀼 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀆𑀘𑀭𑀺𑀬𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀳𑀸𑀚𑀦𑁄 𑀳𑀺 𑀢𑁂𑀦 𑀧𑀸𑀧𑁂 𑀦𑀺𑀬𑁄𑀚𑀺𑀢𑁄𑀢𑀺. 𑀲𑁄 𑀢𑀁 𑀪𑀡𑁆𑀟𑀦𑁆𑀢𑀺 𑀲𑁄 𑀘𑁂 𑀲𑀗𑁆𑀖𑀭𑀓𑁆𑀔𑀺𑀢𑁄 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀧𑀸𑀭𑀸𑀚𑀺𑀓𑀁. 𑀦 𑀓𑁂𑀯𑀮𑀜𑁆𑀘 𑀘𑀢𑀼𑀦𑁆𑀦𑀁, 𑀏𑀢𑁂𑀦 𑀉𑀧𑀸𑀬𑁂𑀦 𑀯𑀺𑀲𑀗𑁆𑀓𑁂𑀢𑀁 𑀅𑀓𑀢𑁆𑀯𑀸 𑀧𑀭𑀫𑁆𑀧𑀭𑀸𑀬 𑀆𑀡𑀸𑀧𑁂𑀦𑁆𑀢𑀁 𑀲𑀫𑀡𑀲𑀢𑀁 𑀲𑀫𑀡𑀲𑀳𑀲𑁆𑀲𑀁 𑀯𑀸 𑀳𑁄𑀢𑀼, 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀫𑁂𑀯.

𑀤𑀼𑀢𑀺𑀬𑀯𑀸𑀭𑁂 𑁋 𑀲𑁄 𑀅𑀜𑁆𑀜𑀁 𑀆𑀡𑀸𑀧𑁂𑀢𑀻𑀢𑀺 𑀲𑁄 𑀆𑀘𑀭𑀺𑀬𑁂𑀦 𑀆𑀡𑀢𑁆𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀁 𑀅𑀤𑀺𑀲𑁆𑀯𑀸 𑀯𑀸 𑀅𑀯𑀢𑁆𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀫𑀸𑀳 𑁋 ‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀺𑀭 𑀪𑀡𑁆𑀟𑀁 𑀅𑀯𑀳𑀭𑀸’’’𑀢𑀺 𑀆𑀡𑀸𑀧𑁂𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀆𑀡𑀢𑁆𑀢𑀺𑀬𑀸 𑀢𑀸𑀯 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀫𑀽𑀮𑀝𑁆𑀞𑀲𑁆𑀲𑁂𑀯 ¶ 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑁄 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑀲𑁆𑀲 𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲, 𑀅𑀯𑀳𑀸𑀭𑀓𑀲𑁆𑀲 𑀘 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀫𑀽𑀮𑀝𑁆𑀞𑀲𑁆𑀲 𑀧𑀦 𑀆𑀘𑀭𑀺𑀬𑀲𑁆𑀲 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑁂𑀦 𑀅𑀦𑀸𑀧𑀢𑁆𑀢𑀺. 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀅𑀚𑀸𑀦𑀦𑀢𑀸𑀬 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀸𑀧𑀢𑁆𑀢𑀺. 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀧𑀦 𑀤𑁆𑀯𑀺𑀦𑁆𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀦𑀝𑁆𑀞𑁄.

𑀇𑀢𑁄 𑀧𑀭𑁂𑀲𑀼 𑀘𑀢𑀽𑀲𑀼 𑀆𑀡𑀢𑁆𑀢𑀺𑀯𑀸𑀭𑁂𑀲𑀼 𑀧𑀞𑀫𑁂 𑀢𑀸𑀯 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀪𑀡𑁆𑀟𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀆𑀭𑀓𑁆𑀔𑀁 𑀤𑀺𑀲𑁆𑀯𑀸 𑀅𑀯𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸𑀢𑀺 𑀓𑀺𑀁 𑀅𑀚𑁆𑀚𑁂𑀯 𑀅𑀯𑀳𑀝𑀁 𑀳𑁄𑀢𑀺? 𑀕𑀘𑁆𑀙 𑀬𑀤𑀸 𑀲𑀓𑁆𑀓𑁄𑀲𑀺 𑀢𑀤𑀸 𑀦𑀁 𑀅𑀯𑀳𑀭𑀸𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀼𑀦 𑀆𑀡𑀢𑁆𑀢𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀢𑀁 𑀪𑀡𑁆𑀟𑀁 𑀅𑀯𑀲𑁆𑀲𑀁 𑀳𑀸𑀭𑀺𑀬𑀁 𑀳𑁄𑀢𑀺, 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀦𑀸𑀫 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸, 𑀢𑀲𑁆𑀫𑀸 ¶ 𑀅𑀬𑀁 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄. 𑀲𑀘𑁂𑀧𑀺 𑀅𑀯𑀳𑀸𑀭𑀓𑁄 𑀲𑀝𑁆𑀞𑀺𑀯𑀲𑁆𑀲𑀸𑀢𑀺𑀓𑁆𑀓𑀫𑁂𑀦 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑁄 𑀘 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀢𑀺; 𑀅𑀲𑁆𑀲𑀫𑀡𑁄𑀯 𑀳𑀼𑀢𑁆𑀯𑀸 𑀓𑀸𑀮𑀁 𑀯𑀸 𑀓𑀭𑀺𑀲𑁆𑀲𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀺𑀲𑁆𑀲𑀢𑀺, 𑀅𑀯𑀳𑀸𑀭𑀓𑀲𑁆𑀲 𑀧𑀦 𑀅𑀯𑀳𑀸𑀭𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁.

𑀤𑀼𑀢𑀺𑀬𑀯𑀸𑀭𑁂 𑁋 𑀬𑀲𑁆𑀫𑀸 𑀢𑀁 𑀲𑀡𑀺𑀓𑀁 𑀯𑀸 𑀪𑀡𑀦𑁆𑀢𑁄 𑀢𑀲𑁆𑀲 𑀯𑀸 𑀩𑀥𑀺𑀭𑀢𑀸𑀬 ‘‘𑀫𑀸 𑀅𑀯𑀳𑀭𑀻’’𑀢𑀺

𑀏𑀢𑀁 𑀯𑀘𑀦𑀁 𑀦 𑀲𑀸𑀯𑁂𑀢𑀺, 𑀢𑀲𑁆𑀫𑀸 𑀫𑀽𑀮𑀝𑁆𑀞𑁄 𑀦 𑀫𑀼𑀢𑁆𑀢𑁄. 𑀢𑀢𑀺𑀬𑀯𑀸𑀭𑁂 𑁋 𑀧𑀦 𑀲𑀸𑀯𑀺𑀢𑀢𑁆𑀢𑀸 𑀫𑀼𑀢𑁆𑀢𑁄. 𑀘𑀢𑀼𑀢𑁆𑀣𑀯𑀸𑀭𑁂 ¶ 𑁋 𑀢𑁂𑀦 𑀘 𑀲𑀸𑀯𑀺𑀢𑀢𑁆𑀢𑀸, 𑀇𑀢𑀭𑁂𑀦 𑀘 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀑𑀭𑀢𑀢𑁆𑀢𑀸 𑀉𑀪𑁄𑀧𑀺 𑀫𑀼𑀢𑁆𑀢𑀸𑀢𑀺.

𑀆𑀡𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀪𑁂𑀤𑀁

𑁧𑁨𑁨. 𑀇𑀤𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀞𑀸𑀦𑀸 𑀘𑀸𑀯𑀦𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀅𑀗𑁆𑀕𑀁 𑀯𑀢𑁆𑀣𑀼𑀪𑁂𑀤𑁂𑀦 𑀘 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺; 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 ‘‘𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀦 𑀢𑀢𑁄 𑀊𑀦𑁂𑀳𑀻𑀢𑀺. 𑀢𑀢𑁆𑀭𑀺𑀫𑁂 𑀧𑀜𑁆𑀘 𑀆𑀓𑀸𑀭𑀸 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸 ¶ , 𑀧𑀭𑀺𑀓𑁆𑀔𑀸𑀭𑀲𑁆𑀲 𑀕𑀭𑀼𑀓𑀪𑀸𑀯𑁄, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀞𑀸𑀦𑀸𑀘𑀸𑀯𑀦𑀦𑁆𑀢𑀺. 𑀇𑀢𑁄 𑀧𑀭𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀯𑀸𑀭𑁂𑀳𑀺 𑀮𑀳𑀼𑀓𑁂 𑀧𑀭𑀺𑀓𑁆𑀔𑀸𑀭𑁂 𑀯𑀢𑁆𑀣𑀼𑀪𑁂𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀤𑀲𑁆𑀲𑀺𑀢𑀁.

𑁧𑁨𑁫. ‘‘𑀙𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀯𑀸𑀭𑀢𑁆𑀢𑀬𑁂 𑀧𑀦 𑀦 𑀲𑀓𑀲𑀜𑁆𑀜𑀺𑀢𑀸, 𑀦 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀺𑀢𑀸, 𑀦 𑀢𑀸𑀯𑀓𑀸𑀮𑀺𑀓𑀢𑀸, 𑀧𑀭𑀺𑀓𑁆𑀔𑀸𑀭𑀲𑁆𑀲 𑀕𑀭𑀼𑀓𑀪𑀸𑀯𑁄, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀞𑀸𑀦𑀸𑀘𑀸𑀯𑀦𑀦𑁆𑀢𑀺 𑀏𑀯𑀁 𑀙 𑀆𑀓𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀢𑁆𑀣𑀼𑀪𑁂𑀤𑁂𑀦 𑀧𑀦𑁂𑀢𑁆𑀣𑀸𑀧𑀺 𑀧𑀞𑀫𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑁂𑀲𑀼 𑀧𑀦 𑀢𑀻𑀲𑀼 𑀯𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀧𑀺 𑀯𑀢𑁆𑀣𑀼𑀪𑁂𑀤𑁂 𑀯𑀢𑁆𑀣𑀼𑀲𑁆𑀲 𑀧𑀭𑁂𑀳𑀺 𑀅𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀢𑀢𑁆𑀭 𑀬𑀤𑁂𑀢𑀁 ‘‘𑀦 ¶ 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀯𑀸 𑀳𑁄𑀢𑀼 𑀙𑀟𑁆𑀟𑀺𑀢𑀁 𑀙𑀺𑀦𑁆𑀦𑀫𑀽𑀮𑀓𑀁 𑀅𑀲𑁆𑀲𑀸𑀫𑀺𑀓𑀯𑀢𑁆𑀣𑀼, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀸, 𑀉𑀪𑀬𑀫𑁆𑀧𑀺 ‘‘𑀦 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢’’𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀸 𑀘 𑀅𑀢𑁆𑀣𑀺, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀘 𑀕𑀳𑀺𑀢𑀁, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸𑀢𑀺.

𑀆𑀧𑀢𑁆𑀢𑀺𑀪𑁂𑀤𑀁 𑀦𑀺𑀝𑁆𑀞𑀺𑀢𑀁.

𑀅𑀦𑀸𑀧𑀢𑁆𑀢𑀺𑀪𑁂𑀤𑀁

𑁧𑁩𑁧. 𑀏𑀯𑀁 𑀯𑀢𑁆𑀣𑀼𑀯𑀲𑁂𑀦 𑀘 𑀘𑀺𑀢𑁆𑀢𑀯𑀲𑁂𑀦 𑀘 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺 𑀲𑀲𑀜𑁆𑀜𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀲𑀜𑁆𑀜𑀺𑀲𑁆𑀲𑀸𑀢𑀺 𑀲𑀓𑀲𑀜𑁆𑀜𑀺𑀲𑁆𑀲, ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 ¶ 𑀇𑀤𑀁 𑀪𑀡𑁆𑀟’’𑀦𑁆𑀢𑀺 𑀏𑀯𑀁 𑀲𑀲𑀜𑁆𑀜𑀺𑀲𑁆𑀲 𑀧𑀭𑀪𑀡𑁆𑀟𑀫𑁆𑀧𑀺 𑀕𑀡𑁆𑀳𑀢𑁄 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺, 𑀕𑀳𑀺𑀢𑀁 𑀧𑀦 𑀧𑀼𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀲𑀸𑀫𑀺𑀓𑁂𑀳𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀦 𑀤𑁂𑀢𑀺, 𑀢𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁.

𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀁 𑀧𑀦 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁 𑁋 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 𑀘, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄’’𑀢𑀺 (𑀫𑀳𑀸𑀯. 𑁩𑁫𑁬). 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀓𑀫𑀺𑀢𑁆𑀢𑁄, 𑀲𑀫𑁆𑀪𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄, 𑀆𑀮𑀧𑀺𑀢𑁄𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀚𑀻𑀯𑀢𑀻𑀢𑀺 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀲𑀬𑀺𑀢𑁄𑀧𑀺 𑀬𑀸𑀯 ¶ 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺. 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄𑀢𑀺 𑀕𑀳𑀺𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺, 𑀏𑀯𑀭𑀽𑀧𑀲𑁆𑀲 𑀲𑀦𑁆𑀢𑀓𑀁 ‘‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘𑁂𑀢𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀧𑀦 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀭𑀼𑀳𑀢𑀺 𑁋 𑀲𑀦𑁆𑀤𑀺𑀝𑁆𑀞𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄; 𑀲𑀫𑁆𑀪𑀢𑁆𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄; 𑀆𑀮𑀧𑀺𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄𑀢𑀺.

𑀬𑁄 𑀧𑀦 𑀦 𑀚𑀻𑀯𑀢𑀺, 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺; 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀁. 𑀤𑀤𑀫𑀸𑀦𑁂𑀦 𑀘 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁. 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 ¶ 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄, 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄𑀧𑀺 𑀅𑀤𑀸𑀢𑀼𑀓𑀸𑀫𑁄 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀺, 𑀲𑁄𑀧𑀺 𑀧𑀼𑀦 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀧𑀦 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀕𑀳𑀺𑀢𑀁 𑀯𑀸 𑀧𑀭𑀺𑀪𑀼𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀕𑀳𑀺𑀢𑀁 𑀯𑀸 𑀳𑁄𑀢𑀼 𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀫𑀬𑀸 𑀧𑀦 𑀢𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀞𑀧𑀺𑀢𑀁, 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀢𑀺. 𑀅𑀬𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀺.

𑀢𑀸𑀯𑀓𑀸𑀮𑀺𑀓𑁂𑀢𑀺 ‘‘𑀧𑀝𑀺𑀤𑀲𑁆𑀲𑀸𑀫𑀺 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀸𑀯𑀓𑀸𑀮𑀺𑀓𑁂𑀧𑀺 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺. 𑀕𑀳𑀺𑀢𑀁 𑀧𑀦 𑀲𑀘𑁂 𑀪𑀡𑁆𑀟𑀲𑀸𑀫𑀺𑀓𑁄 𑀧𑀼𑀕𑁆𑀕𑀮𑁄 𑀯𑀸 𑀕𑀡𑁄 𑀯𑀸 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀳𑁄𑀢𑀽’’𑀢𑀺 𑀅𑀦𑀼𑀚𑀸𑀦𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀅𑀦𑀼𑀚𑀸𑀦𑀸𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀲𑀦𑁆𑀢𑀓𑀁 𑀧𑀦 𑀧𑀝𑀺𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀺.

𑀧𑁂𑀢𑀧𑀭𑀺𑀕𑁆𑀕𑀳𑁂𑀢𑀺 𑀏𑀢𑁆𑀣 𑀧𑀦 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑀧𑀦𑁆𑀦𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀸𑀧𑀺 ¶ 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄 𑀤𑁂𑀯𑀸𑀧𑀺 𑀲𑀩𑁆𑀩𑁂 ‘‘𑀧𑁂𑀢𑀸’’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑁂𑀲𑀁 𑀧𑀭𑀺𑀕𑁆𑀕𑀳𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺 𑀳𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀧𑀡𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀘 𑀪𑀺𑀓𑁆𑀔𑀼 𑀢𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀘𑀻𑀯𑀭𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀫𑁆𑀧𑀺 𑀲𑀸𑀝𑀓𑀁 ¶ 𑀢𑀲𑁆𑀲 ‘‘𑀫𑀸 𑀕𑀡𑁆𑀳, 𑀫𑀸 𑀕𑀡𑁆𑀳𑀸’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺. 𑀤𑁂𑀯𑀢𑀸 𑀧𑀦 𑀉𑀤𑁆𑀤𑀺𑀲𑁆𑀲 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀭𑀼𑀓𑁆𑀔𑀸𑀤𑀻𑀲𑀼 𑀮𑀕𑁆𑀕𑀺𑀢𑀲𑀸𑀝𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀧𑀭𑀺𑀕𑁆𑀕𑀳𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺 𑀳𑀺 𑀦𑀸𑀕𑀭𑀸𑀚𑀸 𑀯𑀸 𑀲𑀼𑀧𑀡𑁆𑀡𑀫𑀸𑀡𑀯𑀓𑁄 𑀯𑀸 𑀫𑀦𑀼𑀲𑁆𑀲𑀭𑀽𑀧𑁂𑀦 𑀆𑀧𑀡𑀁 𑀧𑀲𑀸𑀭𑁂𑀢𑀺, 𑀢𑀢𑁄 𑀘𑀲𑁆𑀲 𑀲𑀦𑁆𑀢𑀓𑀁 𑀓𑁄𑀘𑀺 𑀪𑀺𑀓𑁆𑀔𑀼 𑀧𑀼𑀭𑀺𑀫𑀦𑀬𑁂𑀦𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺. 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀫𑀺𑀕𑀫𑀳𑀺𑀁𑀲𑀸𑀤𑀬𑁄 𑀯𑀥𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀆𑀤𑀺𑀢𑁄𑀯 𑀦 𑀯𑀸𑀭𑁂𑀢𑀩𑁆𑀩𑁄. 𑀅𑀦𑀢𑁆𑀣𑀫𑁆𑀧𑀺 𑀳𑀺 𑀓𑀭𑁂𑀬𑁆𑀬. 𑀬𑀤𑀺 𑀧𑀦 𑀣𑁄𑀓𑁂 𑀔𑀸𑀬𑀺𑀢𑁂 𑀯𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀯𑀸𑀭𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀤𑀬𑁄𑀧𑀺 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀧𑀸𑀢𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲𑀸𑀢𑀺 𑀅𑀲𑁆𑀲𑀸𑀫𑀺𑀓𑀁 ‘‘𑀇𑀤𑀁 𑀧𑀁𑀲𑀼𑀓𑀽𑀮’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀲𑁆𑀲𑀸𑀧𑀺 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀢𑀁 𑀲𑀲𑁆𑀲𑀸𑀫𑀺𑀓𑀁 𑀳𑁄𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀁 ¶ . 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀇𑀥 𑀥𑀦𑀺𑀬𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀧𑀦 𑀭𑀚𑀓𑀪𑀡𑁆𑀟𑀺𑀓𑀸𑀤𑀺𑀘𑁄𑀭𑀸𑀦𑀁 𑀙𑀩𑁆𑀩𑀕𑁆𑀕𑀺𑀬𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯𑀸𑀢𑀺.

𑀅𑀦𑀸𑀧𑀢𑁆𑀢𑀺𑀪𑁂𑀤𑀁 𑀦𑀺𑀝𑁆𑀞𑀺𑀢𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸

𑀲𑀫𑀼𑀝𑁆𑀞𑀸𑀦𑀜𑁆𑀘 𑀓𑀺𑀭𑀺𑀬𑀸, 𑀅𑀣𑁄 𑀲𑀜𑁆𑀜𑀸 𑀲𑀘𑀺𑀢𑁆𑀢𑀓𑀁;

𑀮𑁄𑀓𑀯𑀚𑁆𑀚𑀜𑁆𑀘 𑀓𑀫𑁆𑀫𑀜𑁆𑀘, 𑀓𑀼𑀲𑀮𑀁 𑀯𑁂𑀤𑀦𑀸𑀬 𑀘𑀸𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀧𑀓𑀺𑀡𑁆𑀡𑀓𑁂 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀲𑀸𑀳𑀢𑁆𑀣𑀺𑀓𑀁 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀆𑀡𑀢𑁆𑀢𑀺𑀓𑀁 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀁 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀜𑁆𑀘, 𑀓𑀭𑁄𑀦𑁆𑀢𑁄𑀬𑁂𑀯 𑀳𑀺 𑀏𑀢𑀁 𑀆𑀧𑀚𑁆𑀚𑀢𑀺 𑀦 𑀅𑀓𑀭𑁄𑀦𑁆𑀢𑁄. ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁 ¶ , 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀼𑀝𑁆𑀞𑁄 𑀯𑀸 𑀪𑀻𑀢𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀢𑀁 𑀆𑀧𑀚𑁆𑀚𑀢𑀻𑀢𑀺 𑀢𑀺𑀯𑁂𑀤𑀦𑀦𑁆𑀢𑀺 𑀲𑀩𑁆𑀩𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁩𑁨. 𑀯𑀺𑀦𑀻𑀢𑀯𑀢𑁆𑀣𑀼𑀓𑀣𑀸𑀲𑀼 ¶ 𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀫𑁂𑀯.

𑀤𑀼𑀢𑀺𑀬𑀯𑀢𑁆𑀣𑀼𑀫𑁆𑀳𑀺 𑁋 𑀘𑀺𑀢𑁆𑀢𑀁 𑀦𑀸𑀫 𑀧𑀼𑀣𑀼𑀚𑁆𑀚𑀦𑀸𑀦𑀁 𑀭𑀸𑀕𑀸𑀤𑀺𑀯𑀲𑁂𑀦 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀥𑀸𑀯𑀢𑀺 𑀲𑀦𑁆𑀥𑀸𑀯𑀢𑀺 𑀯𑀺𑀥𑀸𑀯𑀢𑀺. 𑀲𑀘𑁂 𑀪𑀕𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀪𑁂𑀤𑀁 𑀯𑀺𑀦𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀆𑀧𑀢𑁆𑀢𑀺𑀁 𑀧𑀜𑁆𑀜𑀧𑁂𑀬𑁆𑀬, 𑀓𑁄 𑀲𑀓𑁆𑀓𑀼𑀡𑁂𑀬𑁆𑀬 𑀅𑀦𑀸𑀧𑀢𑁆𑀢𑀺𑀓𑀁 𑀅𑀢𑁆𑀢𑀸𑀦𑀁 𑀓𑀸𑀢𑀼𑀁! 𑀢𑁂𑀦𑀸𑀳 𑁋 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂’’𑀢𑀺. 𑀘𑀺𑀢𑁆𑀢𑀯𑀲𑀺𑀓𑁂𑀦 𑀧𑀦 𑀦 𑀪𑀯𑀺𑀢𑀩𑁆𑀩𑀁, 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀩𑁆𑀩𑀫𑁂𑀯𑀸𑀢𑀺.

𑁧𑁩𑁩-𑁪. 𑀆𑀫𑀲𑀦-𑀨𑀦𑁆𑀤𑀸𑀧𑀦-𑀞𑀸𑀦𑀸𑀘𑀸𑀯𑀦𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀢𑀢𑁄 𑀧𑀭𑀸𑀦𑀺 𑀘 𑀣𑁂𑀬𑁆𑀬𑀘𑀺𑀢𑁆𑀢𑁄 𑀪𑀽𑀫𑀺𑀢𑁄 𑀅𑀕𑁆𑀕𑀳𑁂𑀲𑀻𑀢𑀺 𑀯𑀢𑁆𑀣𑀼𑀧𑀭𑀺𑀬𑁄𑀲𑀸𑀦𑀸𑀦𑀺.

𑁧𑁩𑁫. 𑀦𑀺𑀭𑀼𑀢𑁆𑀢𑀺𑀧𑀣𑀯𑀢𑁆𑀣𑀼𑀲𑁆𑀫𑀺𑀁 𑁧.𑁩𑁨𑁯 𑀆𑀤𑀺𑀬𑀻𑀢𑀺 𑀕𑀡𑁆𑀳𑀺, ‘‘𑀘𑁄𑀭𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀭𑀸𑀫𑀲𑀺. 𑀇𑀢𑀭𑁄 𑀧𑀦 ‘‘𑀓𑁂𑀦 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀬𑀸 𑀅𑀯𑀳𑀝’’𑀦𑁆𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀬𑀤𑀺 𑀳𑀺 𑀇𑀢𑀭𑁂𑀦 ‘‘𑀓𑁂𑀦 𑀕𑀳𑀺𑀢𑀁, 𑀓𑁂𑀦 𑀅𑀧𑀦𑀻𑀢𑀁, 𑀓𑁂𑀦 𑀞𑀧𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀪𑀯𑀺𑀲𑁆𑀲, 𑀅𑀣 𑀅𑀬𑀫𑁆𑀧𑀺 ‘‘𑀫𑀬𑀸 𑀕𑀳𑀺𑀢𑀁, 𑀅𑀧𑀦𑀻𑀢𑀁, 𑀞𑀧𑀺𑀢’’𑀦𑁆𑀢𑀺 𑀯𑀸 𑀯𑀤𑁂𑀬𑁆𑀬. 𑀫𑀼𑀔𑀁 𑀦𑀸𑀫 𑀪𑀼𑀜𑁆𑀚𑀦𑀢𑁆𑀣𑀸𑀬 𑀘 𑀓𑀣𑀦𑀢𑁆𑀣𑀸𑀬 𑀘 𑀓𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑀁 𑀧𑀦 𑀯𑀺𑀦𑀸 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀦𑀺𑀭𑀼𑀢𑁆𑀢𑀺𑀧𑀣𑁂’’𑀢𑀺. 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑁂 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀁 𑀯𑁂𑀞𑀦𑀯𑀢𑁆𑀣𑀼 𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁩𑁭. 𑀅𑀪𑀺𑀦𑁆𑀦𑀲𑀭𑀻𑀭𑀯𑀢𑁆𑀣𑀼𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑁄𑀢𑀺 𑀲𑀸𑀝𑀓𑀢𑀡𑁆𑀳𑀸𑀬 𑀢𑀲𑁆𑀫𑀺𑀁𑀬𑁂𑀯 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀦𑀸𑀤𑀺𑀬𑀦𑁆𑀢𑁄𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑁄, 𑀆𑀤𑀭𑀁 𑀯𑀸 𑀅𑀓𑀭𑁄𑀦𑁆𑀢𑁄. 𑀢𑀁 𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑁂𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀭𑀻𑀭𑀁 𑀉𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀁 𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸’’𑀢𑀺. 𑀤𑁆𑀯𑀸𑀭𑀁 𑀣𑀓𑁂𑀲𑀻𑀢𑀺 𑀪𑀺𑀓𑁆𑀔𑀼𑀲𑁆𑀲 𑀲𑀼𑀲𑀸𑀦𑀲𑀫𑀻𑀧𑁂𑀬𑁂𑀯 𑀯𑀺𑀳𑀸𑀭𑁄, 𑀢𑀲𑁆𑀫𑀸 𑀪𑀻𑀭𑀼𑀓𑀚𑀸𑀢𑀺𑀓𑁄 𑀪𑀺𑀓𑁆𑀔𑀼 𑀔𑀺𑀧𑁆𑀧𑀫𑁂𑀯 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 ¶ 𑀤𑁆𑀯𑀸𑀭𑀁 𑀣𑀓𑁂𑀲𑀺. 𑀢𑀢𑁆𑀣𑁂𑀯 𑀧𑀭𑀺𑀧𑀢𑀻𑀢𑀺 𑀤𑁆𑀯𑀸𑀭𑁂 𑀣𑀓𑀺𑀢𑁂 𑀧𑁂𑀢𑁄 𑀲𑀸𑀝𑀓𑁂 𑀦𑀺𑀭𑀸𑀮𑀬𑁄 𑀳𑀼𑀢𑁆𑀯𑀸 𑀢𑀁 𑀲𑀭𑀻𑀭𑀁 𑀧𑀳𑀸𑀬 𑀬𑀣𑀸𑀓𑀫𑁆𑀫𑀁 𑀕𑀢𑁄, 𑀢𑀲𑁆𑀫𑀸 𑀢𑀁 𑀲𑀭𑀻𑀭𑀁 𑀢𑀢𑁆𑀣𑁂𑀯 𑀧𑀭𑀺𑀧𑀢𑀺, 𑀧𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀦𑁆𑀦𑁂 𑀲𑀭𑀻𑀭𑁂𑀢𑀺 𑀅𑀩𑁆𑀪𑀼𑀡𑁆𑀳𑁂 𑀅𑀮𑁆𑀮𑀲𑀭𑀻𑀭𑁂 𑀧𑀁𑀲𑀼𑀓𑀽𑀮𑀁 𑀦 𑀕𑀳𑁂𑀢𑀩𑁆𑀩𑀁, 𑀕𑀡𑁆𑀳𑀦𑁆𑀢𑀲𑁆𑀲 𑀏𑀯𑀭𑀽𑀧𑀸 𑀉𑀧𑀤𑁆𑀤𑀯𑀸 𑀳𑁄𑀦𑁆𑀢𑀺, 𑀤𑀼𑀓𑁆𑀓𑀝𑀜𑁆𑀘 𑀆𑀧𑀚𑁆𑀚𑀢𑀺. 𑀪𑀺𑀦𑁆𑀦𑁂 𑀧𑀦 ¶ 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀪𑀺𑀦𑁆𑀦𑀁 𑀳𑁄𑀢𑀺? 𑀓𑀸𑀓-𑀓𑀼𑀮𑀮-𑀲𑁄𑀡-𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀤𑀸𑀞𑀸𑀬 𑀯𑀸 𑀈𑀲𑀓𑀁 𑀨𑀸𑀮𑀺𑀢𑀫𑀢𑁆𑀢𑁂𑀦𑀸𑀧𑀺. 𑀬𑀲𑁆𑀲 𑀧𑀦 𑀧𑀢𑀢𑁄 𑀖𑀁𑀲𑀦𑁂𑀦 𑀙𑀯𑀺𑀫𑀢𑁆𑀢𑀁 𑀙𑀺𑀦𑁆𑀦𑀁 𑀳𑁄𑀢𑀺, 𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀦𑀁, 𑀏𑀢𑀁 𑀅𑀪𑀺𑀦𑁆𑀦𑀫𑁂𑀯; 𑀘𑀫𑁆𑀫𑁂 𑀧𑀦 𑀙𑀺𑀦𑁆𑀦𑁂 𑀪𑀺𑀦𑁆𑀦𑀁. 𑀬𑀲𑁆𑀲𑀸𑀧𑀺 𑀲𑀚𑀻𑀯𑀓𑀸𑀮𑁂𑀬𑁂𑀯 𑀧𑀪𑀺𑀦𑁆𑀦𑀸 𑀕𑀡𑁆𑀟𑀓𑀼𑀝𑁆𑀞𑀧𑀺𑀴𑀓𑀸 𑀯𑀸 𑀯𑀡𑁄 𑀯𑀸 𑀳𑁄𑀢𑀺, 𑀇𑀤𑀫𑁆𑀧𑀺 𑀪𑀺𑀦𑁆𑀦𑀁. 𑀢𑀢𑀺𑀬𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑁂𑀦 𑀓𑀼𑀡𑀧𑀪𑀸𑀯𑀁 𑀉𑀧𑀕𑀢𑀫𑁆𑀧𑀺 𑀪𑀺𑀦𑁆𑀦𑀫𑁂𑀯. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀅𑀪𑀺𑀦𑁆𑀦𑁂𑀧𑀺 𑀲𑀼𑀲𑀸𑀦𑀕𑁄𑀧𑀓𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀫𑀦𑀼𑀲𑁆𑀲𑁂𑀳𑀺 𑀕𑀸𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀦𑁄 𑀘𑁂 𑀅𑀜𑁆𑀜𑀁 𑀮𑀪𑀢𑀺, 𑀲𑀢𑁆𑀣𑀓𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀺𑀲𑀪𑀸𑀕𑀲𑀭𑀻𑀭𑁂 𑀧𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑀡𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀻𑀲𑁂 𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑀁 𑀯𑀸 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀓𑀣𑀸

𑁧𑁩𑁮. 𑀢𑀤𑀦𑀦𑁆𑀢𑀭𑁂 ¶ 𑀯𑀢𑁆𑀣𑀼𑀲𑁆𑀫𑀺𑀁 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀻𑀢𑀺 𑀧𑀼𑀩𑁆𑀩𑁂 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀦𑀸𑀫𑀫𑀢𑁆𑀢𑁂𑀦 𑀤𑀲𑁆𑀲𑀺𑀢𑁂𑀲𑀼 𑀣𑁂𑀬𑁆𑀬𑀸𑀯𑀳𑀸𑀭-𑀧𑀲𑀬𑁆𑀳𑀸𑀯𑀳𑀸𑀭-𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀧𑀅𑀘𑁆𑀙𑀦𑁆𑀦𑀸𑀯𑀳𑀸𑀭-𑀓𑀼𑀲𑀸𑀯𑀳𑀸𑀭𑁂𑀲𑀼 𑀓𑀼𑀲𑀸𑀯𑀳𑀸𑀭𑁂𑀦 𑀅𑀯𑀳𑀭𑀻𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀁 𑀧𑀦 𑀅𑀯𑀳𑀸𑀭𑀸𑀦𑀁 𑀏𑀯𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀬𑁄 𑀳𑀺 𑀓𑁄𑀘𑀺 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁄 𑀅𑀯𑀳𑀭𑀢𑀺, 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 ‘‘𑀣𑁂𑀬𑁆𑀬𑀸𑀯𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑁄 𑀧𑀦 𑀧𑀭𑁂 𑀧𑀲𑀬𑁆𑀳 𑀩𑀮𑀲𑀸 𑀅𑀪𑀺𑀪𑀼𑀬𑁆𑀬, 𑀅𑀣 𑀯𑀸 𑀧𑀦 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀧𑀦𑁆𑀣𑀖𑀸𑀢-𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀤𑀸𑀫𑀭𑀺𑀓𑀘𑁄𑀭𑀸 𑀯𑀺𑀬 𑀓𑁄𑀥𑀯𑀲𑁂𑀦 𑀧𑀭𑀖𑀭𑀯𑀺𑀮𑁄𑀧𑀁 𑀓𑀭𑁄𑀦𑁆𑀢𑀸 𑀅𑀢𑁆𑀢𑀦𑁄 𑀧𑀢𑁆𑀢𑀩𑀮𑀺𑀢𑁄 𑀘 𑀅𑀥𑀺𑀓𑀁 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸 𑀭𑀸𑀚-𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀺𑀬; 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 ‘‘𑀧𑀲𑀬𑁆𑀳𑀸𑀯𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ¶ 𑀕𑀡𑁆𑀳𑀢𑁄 𑀧𑀦 𑀅𑀯𑀳𑀸𑀭𑁄 ‘‘𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀪𑀡𑁆𑀟𑀧𑀭𑀺𑀓𑀧𑁆𑀧-𑀑𑀓𑀸𑀲𑀧𑀭𑀺𑀓𑀧𑁆𑀧𑀯𑀲𑁂𑀦 𑀤𑀼𑀯𑀺𑀥𑁄 ¶ . 𑀢𑀢𑁆𑀭𑀸𑀬𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑁄 𑁋 𑀇𑀥𑁂𑀓𑀘𑁆𑀘𑁄 𑀲𑀸𑀝𑀓𑀢𑁆𑀣𑀺𑀓𑁄 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀺; 𑀲𑀘𑁂 𑀲𑀼𑀢𑁆𑀢𑀁, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀸𑀢𑀺, 𑀲𑀸𑀝𑀓𑁄 𑀘𑁂 𑀢𑀢𑁆𑀭 𑀳𑁄𑀢𑀺, 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀼𑀢𑁆𑀢𑀁 𑀘𑁂 𑀳𑁄𑀢𑀺, 𑀭𑀓𑁆𑀔𑀢𑀺. 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀦 𑀆𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀺, 𑀭𑀓𑁆𑀔𑀢𑀺𑀬𑁂𑀯. ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸𑀧𑀺 ‘‘𑀬𑀁 𑀮𑀤𑁆𑀥𑀁, 𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. ‘‘𑀘𑁄𑀭𑁄, 𑀘𑁄𑀭𑁄’’𑀢𑀺 𑀲𑀸𑀫𑀺𑀓𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑁄 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀢𑀺, 𑀭𑀓𑁆𑀔𑀢𑀺. 𑀲𑀸𑀫𑀺𑀓𑀸 𑀢𑀁 𑀤𑀺𑀲𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀜𑁆𑀜𑁄 𑀘𑁂 𑀓𑁄𑀘𑀺 𑀕𑀡𑁆𑀳𑀸𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀅𑀣 𑀦𑀺𑀯𑀢𑁆𑀢𑁂𑀲𑀼 𑀲𑀸𑀫𑀺𑀓𑁂𑀲𑀼 𑀲𑀬𑀫𑁂𑀯 𑀢𑀁 𑀤𑀺𑀲𑁆𑀯𑀸 ‘‘𑀧𑀕𑁂𑀯𑁂𑀢𑀁 𑀫𑀬𑀸 𑀦𑀻𑀳𑀝𑀁, 𑀫𑀫 𑀤𑀸𑀦𑀺 𑀲𑀦𑁆𑀢𑀓’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀭𑀓𑁆𑀔𑀢𑀺; 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. ‘‘𑀲𑀘𑁂 𑀲𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀺; 𑀲𑀘𑁂 𑀲𑀸𑀝𑀓𑁄, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑀘𑁂 ¶ 𑀲𑀧𑁆𑀧𑀺 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀺; 𑀲𑀘𑁂 𑀢𑁂𑀮𑀁, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 ‘‘𑀲𑀸𑀝𑀓𑀢𑁆𑀣𑀺𑀓𑁄𑀧𑀺 𑀲𑀸𑀝𑀓𑀧𑀲𑀺𑀩𑁆𑀩𑀓𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀩𑀳𑀺 𑀞𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 ‘𑀲𑀸𑀝𑀓𑁄 𑀅𑀬’𑀦𑁆𑀢𑀺 𑀤𑀺𑀲𑁆𑀯𑀸 𑀕𑀘𑁆𑀙𑀦𑁆𑀢𑁄 𑀧𑀤𑀼𑀤𑁆𑀥𑀸𑀭𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸 𑀧𑀭𑀺𑀓𑀧𑁆𑀧𑁄 𑀤𑀺𑀲𑁆𑀲𑀢𑀺, 𑀤𑀺𑀲𑁆𑀯𑀸 𑀳𑀝𑀢𑁆𑀢𑀸 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦 𑀤𑀺𑀲𑁆𑀲𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀁 𑀧𑀭𑀺𑀓𑀧𑁆𑀧𑀺𑀢𑀁 𑀢𑀁 𑀅𑀤𑀺𑀝𑁆𑀞𑀁 𑀧𑀭𑀺𑀓𑀧𑁆𑀧𑀺𑀢𑀪𑀸𑀯𑁂 𑀞𑀺𑀢𑀁𑀬𑁂𑀯 𑀉𑀤𑁆𑀥𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀤𑀺𑀲𑁆𑀲𑀢𑀺. ‘‘𑀢𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀅𑀯𑀳𑀭𑀻’’𑀢𑀺 𑀧𑀸𑀴𑀺𑀬𑀸 𑀘 𑀲𑀫𑁂𑀢𑀻𑀢𑀺. 𑀢𑀢𑁆𑀣 𑀬𑁆𑀯𑀸𑀬𑀁 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀧𑀭𑀺𑀓𑀧𑁆𑀧𑁄, 𑀅𑀬𑀁 ‘‘𑀪𑀡𑁆𑀟𑀧𑀭𑀺𑀓𑀧𑁆𑀧𑁄’’ 𑀦𑀸𑀫.

𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀇𑀥𑁂𑀓𑀘𑁆𑀘𑁄 𑀮𑁄𑀮𑀪𑀺𑀓𑁆𑀔𑀼 𑀧𑀭𑀧𑀭𑀺𑀯𑁂𑀡𑀁 𑀯𑀸 𑀓𑀼𑀮𑀖𑀭𑀁 𑀯𑀸 𑀅𑀭𑀜𑁆𑀜𑁂 𑀓𑀫𑁆𑀫𑀦𑁆𑀢𑀲𑀸𑀮𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁂𑀦 𑀦𑀺𑀲𑀺𑀦𑁆𑀦𑁄 𑀓𑀺𑀜𑁆𑀘𑀺 𑀮𑁄𑀪𑀦𑁂𑀬𑁆𑀬𑀁 𑀧𑀭𑀺𑀓𑁆𑀔𑀸𑀭𑀁 𑀑𑀮𑁄𑀓𑁂𑀢𑀺, 𑀑𑀮𑁄𑀓𑁂𑀦𑁆𑀢𑁄 𑀘 𑀧𑀦 𑀤𑀺𑀲𑁆𑀯𑀸 𑀤𑁆𑀯𑀸𑀭𑀧𑀫𑀼𑀔𑀳𑁂𑀝𑁆𑀞𑀸𑀧𑀸𑀲𑀸𑀤𑀧𑀭𑀺𑀯𑁂𑀡𑀤𑁆𑀯𑀸𑀭𑀓𑁄𑀝𑁆𑀞𑀓𑀭𑀼𑀓𑁆𑀔𑀫𑀽𑀮𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 ‘‘𑀲𑀘𑁂 𑀫𑀁 𑀏𑀢𑁆𑀣𑀦𑁆𑀢𑀭𑁂 ¶ 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀤𑀝𑁆𑀞𑀼𑀓𑀸𑀫𑀢𑀸𑀬 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀯𑀺𑀬 𑀏𑀢𑁂𑀲𑀁𑀬𑁂𑀯 𑀤𑀲𑁆𑀲𑀸𑀫𑀺; 𑀦𑁄 𑀘𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑀺. 𑀢𑀲𑁆𑀲 𑀢𑀁 𑀆𑀤𑀸𑀬 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀧𑀘𑀸𑀭𑀲𑀻𑀫𑀁 𑀧𑀭𑀺𑀓𑀧𑁆𑀧𑁂𑀢𑀺, 𑀢𑀤𑀪𑀺𑀫𑀼𑀔𑁄𑀯 𑀕𑀘𑁆𑀙𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀯𑀸 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀅𑀲𑀢𑀺𑀬𑀸 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀅𑀣𑀸𑀧𑀺𑀲𑁆𑀲 𑀢𑀁 𑀞𑀸𑀦𑀁 𑀧𑀢𑁆𑀢𑀲𑁆𑀲 𑀘𑁄𑀭𑁄 𑀯𑀸 𑀳𑀢𑁆𑀣𑀻 𑀯𑀸 𑀯𑀸𑀴𑀫𑀺𑀕𑁄 ¶ 𑀯𑀸 𑀫𑀳𑀸𑀫𑁂𑀖𑁄 𑀯𑀸 𑀯𑀼𑀝𑁆𑀞𑀳𑀢𑀺, 𑀲𑁄 𑀘 𑀢𑀫𑁆𑀳𑀸 𑀉𑀧𑀤𑁆𑀤𑀯𑀸 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀬 𑀲𑀳𑀲𑀸 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀬𑀲𑁆𑀫𑀸 𑀫𑀽𑀮𑁂𑀯 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑀺𑀢𑀁, 𑀢𑀲𑁆𑀫𑀸 𑀦 𑀭𑀓𑁆𑀔𑀢𑀺, 𑀅𑀯𑀳𑀸𑀭𑁄𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀢𑀸𑀯 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀲𑀘𑁂𑀧𑀺 𑀲𑁄 𑀅𑀦𑁆𑀢𑁄𑀧𑀭𑀺𑀘𑁆𑀙𑁂𑀤𑁂 𑀳𑀢𑁆𑀣𑀺𑀁 𑀯𑀸 𑀅𑀲𑁆𑀲𑀁 𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀁 𑀦𑁂𑀯 𑀧𑀸𑀚𑁂𑀢𑀺, 𑀦 𑀧𑀸𑀚𑀸𑀧𑁂𑀢𑀺; 𑀧𑀭𑀺𑀘𑁆𑀙𑁂𑀤𑁂 𑀅𑀢𑀺𑀓𑁆𑀓𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭 𑀬𑁆𑀯𑀸𑀬𑀁 ‘‘𑀲𑀘𑁂 𑀫𑀁 𑀏𑀢𑁆𑀣𑀦𑁆𑀢𑀭𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀤𑀝𑁆𑀞𑀼𑀓𑀸𑀫𑀢𑀸𑀬 𑀕𑀳𑁂𑀢𑁆𑀯𑀸 ¶ 𑀯𑀺𑀘𑀭𑀦𑁆𑀢𑁄 𑀯𑀺𑀬 𑀏𑀢𑁂𑀲𑀁𑀬𑁂𑀯 𑀤𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑁄 𑀧𑀭𑀺𑀓𑀧𑁆𑀧𑁄, 𑀅𑀬𑀁 ‘‘𑀑𑀓𑀸𑀲𑀧𑀭𑀺𑀓𑀧𑁆𑀧𑁄’’ 𑀦𑀸𑀫.

𑀏𑀯𑀫𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀭𑀺𑀓𑀧𑁆𑀧𑀸𑀦𑀁 𑀯𑀲𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 ‘‘𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀦 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄. 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀪𑀺𑀓𑁆𑀔𑀼 𑀫𑀦𑀼𑀲𑁆𑀲𑀸𑀦𑀁 𑀉𑀬𑁆𑀬𑀸𑀦𑀸𑀤𑀻𑀲𑀼 𑀓𑀻𑀴𑀦𑁆𑀢𑀸𑀦𑀁 𑀯𑀸 𑀧𑀯𑀺𑀲𑀦𑁆𑀢𑀸𑀦𑀁 𑀯𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀁 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀑𑀦𑀫𑀺𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀺, ‘𑀓𑀺𑀁 𑀲𑀫𑀡𑁄 𑀕𑀡𑁆𑀳𑀸𑀢𑀻’𑀢𑀺 𑀫𑀁 𑀚𑀸𑀦𑀺𑀢𑁆𑀯𑀸 𑀯𑀺𑀳𑁂𑀞𑁂𑀬𑁆𑀬𑀼’’𑀦𑁆𑀢𑀺 𑀧𑀁𑀲𑀼𑀦𑀸 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺 𑁋 ‘‘𑀧𑀘𑁆𑀙𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀲 𑀏𑀢𑁆𑀢𑀸𑀯𑀢𑀸 𑀉𑀤𑁆𑀥𑀸𑀭𑁄 𑀦𑀢𑁆𑀣𑀻𑀢𑀺 𑀦 𑀢𑀸𑀯 𑀅𑀯𑀳𑀸𑀭𑁄 𑀳𑁄𑀢𑀺. 𑀬𑀤𑀸 𑀧𑀦 𑀢𑁂 𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀢𑀁 𑀪𑀡𑁆𑀟𑀓𑀁 𑀯𑀺𑀘𑀺𑀦𑀦𑁆𑀢𑀸𑀧𑀺 𑀅𑀧𑀲𑁆𑀲𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀅𑀦𑁆𑀥𑀓𑀸𑀭𑁄, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀮𑀬𑀸 𑀏𑀯 𑀕𑀢𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲 𑀢𑀁 𑀉𑀤𑁆𑀥𑀭𑀢𑁄 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. ‘‘𑀧𑀝𑀺𑀘𑁆𑀙𑀦𑁆𑀦𑀓𑀸𑀮𑁂𑀬𑁂𑀯 ¶ 𑀢𑀁 𑀫𑀫 𑀲𑀦𑁆𑀢𑀓’’𑀦𑁆𑀢𑀺 𑀲𑀓𑀲𑀜𑁆𑀜𑀸𑀬 𑀯𑀸 ‘‘𑀕𑀢𑀸 𑀤𑀸𑀦𑀺 𑀢𑁂, 𑀙𑀟𑁆𑀟𑀺𑀢𑀪𑀡𑁆𑀟𑀁 𑀇𑀤’’𑀦𑁆𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁. 𑀢𑁂𑀲𑀼 𑀤𑀼𑀢𑀺𑀬𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀢𑁂𑀲𑀼𑀧𑀺 𑀕𑀳𑀺𑀢𑀁 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀲 𑀧𑀬𑁄𑀕𑁂𑀦 𑀢𑁂𑀳𑀺 𑀦 𑀤𑀺𑀝𑁆𑀞𑀁, 𑀬𑁄 𑀧𑀦 𑀢𑀣𑀸𑀭𑀽𑀧𑀁 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀬𑀣𑀸𑀞𑀸𑀦𑁂 𑀞𑀺𑀢𑀁𑀬𑁂𑀯 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀓𑀤𑁆𑀤𑀫𑁂 𑀯𑀸 𑀯𑀸𑀮𑀺𑀓𑀸𑀬 𑀯𑀸 𑀧𑀯𑁂𑀲𑁂𑀢𑀺, 𑀢𑀲𑁆𑀲 𑀧𑀯𑁂𑀲𑀺𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁.

𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀧𑀦 𑀅𑀯𑀳𑀭𑀡𑀁 ‘‘𑀓𑀼𑀲𑀸𑀯𑀳𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀪𑀺𑀓𑁆𑀔𑀼 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸 𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀲𑁆𑀲 𑀲𑀫𑀻𑀧𑁂 𑀞𑀺𑀢𑀁 𑀅𑀧𑁆𑀧𑀕𑁆𑀖𑀢𑀭𑀁 𑀯𑀸 𑀫𑀳𑀕𑁆𑀖𑀢𑀭𑀁 𑀯𑀸 𑀲𑀫𑀲𑀫𑀁 𑀯𑀸 𑀅𑀕𑁆𑀖𑁂𑀦 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀳𑀭𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀢𑀺𑀢𑀁 𑀓𑀼𑀲𑀤𑀡𑁆𑀟𑀓𑀁 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑁄 𑀉𑀤𑁆𑀥𑀭𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀺, 𑀭𑀓𑁆𑀔𑀢𑁂𑀯. 𑀬𑀤𑀸 𑀧𑀦 𑀢𑀲𑁆𑀫𑀺𑀁 𑀧𑀢𑀺𑀢𑁂 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀢𑁄 𑀧𑀭𑀲𑁆𑀲 𑀓𑀼𑀲𑀤𑀡𑁆𑀟𑀓𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀲𑀘𑁂 𑀧𑀞𑀫𑀢𑀭𑀁 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑀤𑀡𑁆𑀟𑀓𑀁 𑀉𑀤𑁆𑀥𑀭𑀢𑀺 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 ¶ 𑀧𑀸𑀢𑁂𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀺 ¶ , 𑀧𑀸𑀢𑀦𑁂 𑀭𑀓𑁆𑀔𑀢𑀺. 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀢𑁄 𑀧𑀦 𑀅𑀢𑁆𑀢𑀦𑁄 𑀓𑀼𑀲𑀤𑀡𑁆𑀟𑀓𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀸𑀭𑁂𑀬𑁂𑀯 𑀭𑀓𑁆𑀔𑀢𑀺. 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀲𑀘𑁂 𑀧𑀦 𑀤𑁆𑀯𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼 𑀧𑀢𑀺𑀢𑀤𑀡𑁆𑀟𑀓𑁂 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺, 𑀢𑀢𑁄 𑀅𑀯𑀲𑁂𑀲𑀪𑀺𑀓𑁆𑀔𑀽𑀲𑀼 𑀕𑀢𑁂𑀲𑀼 𑀇𑀢𑀭𑁄 ‘‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀤𑀡𑁆𑀟𑀓𑁄 𑀦 𑀧𑀜𑁆𑀜𑀸𑀬𑀢𑀻’𑀢𑀺. ‘𑀫𑀬𑁆𑀳𑀫𑁆𑀧𑀺, 𑀆𑀯𑀼𑀲𑁄, 𑀦 𑀧𑀜𑁆𑀜𑀸𑀬𑀢𑀻’𑀢𑀺. ‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀸𑀕𑁄’𑀢𑀺? ‘𑀅𑀬𑀁 𑀢𑀼𑀬𑁆𑀳𑀁 𑀪𑀸𑀕𑁄’’’𑀢𑀺 𑀅𑀢𑁆𑀢𑀦𑁄 𑀪𑀸𑀕𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀺𑀁 𑀯𑀺𑀯𑀤𑀺𑀢𑁆𑀯𑀸 𑀯𑀸 𑀅𑀯𑀺𑀯𑀤𑀺𑀢𑁆𑀯𑀸 𑀯𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀢𑁂 𑀇𑀢𑀭𑁄 𑀢𑀲𑁆𑀲 𑀪𑀸𑀕𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂𑀧𑀺 𑀢𑁂𑀦 ‘‘𑀅𑀳𑀁 𑀫𑀫 𑀪𑀸𑀕𑀁 𑀢𑀼𑀬𑁆𑀳𑀁 𑀦 𑀤𑁂𑀫𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀪𑀸𑀕𑀁 𑀜𑀢𑁆𑀯𑀸 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀸𑀬𑀁 𑀫𑀫𑀸’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀢𑀲𑁆𑀲𑁂𑀯 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀇𑀢𑀭𑁄 ‘‘𑀅𑀬𑀁 𑀢𑀼𑀬𑁆𑀳𑀁 𑀪𑀸𑀕𑁄, 𑀅𑀬𑀁 𑀫𑀬𑁆𑀳𑀁 𑀪𑀸𑀕𑁄𑀢𑀺 𑀓𑀺𑀁 𑀇𑀫𑀺𑀦𑀸 𑀯𑀺𑀯𑀸𑀤𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀸 𑀧𑀢𑁆𑀢𑁄 𑀳𑁄𑀢𑀼, 𑀢𑀼𑀫𑁆𑀳𑀸𑀓𑀁 𑀯𑀸, 𑀬𑁄 𑀯𑀭𑀪𑀸𑀕𑁄 𑀢𑀁 𑀢𑀼𑀫𑁆𑀳𑁂 ¶ 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀤𑀺𑀦𑁆𑀦𑀓𑀁 𑀦𑀸𑀫 𑀕𑀳𑀺𑀢𑀁 𑀳𑁄𑀢𑀺, 𑀦𑀢𑁆𑀣𑁂𑀢𑁆𑀣 𑀅𑀯𑀳𑀸𑀭𑁄. 𑀲𑀘𑁂𑀧𑀺 𑀲𑁄 𑀯𑀺𑀯𑀸𑀤𑀪𑀻𑀭𑀼𑀓𑁄 𑀪𑀺𑀓𑁆𑀔𑀼 ‘‘𑀬𑀁 𑀢𑀼𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀭𑀪𑀸𑀕𑀁 𑀞𑀧𑁂𑀢𑁆𑀯𑀸 𑀮𑀸𑀫𑀓𑀁𑀬𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀢𑁄 𑀇𑀢𑀭𑀲𑁆𑀲 𑀯𑀺𑀘𑀺𑀦𑀺𑀢𑀸𑀯𑀲𑁂𑀲𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑁂𑀯𑀸𑀢𑀺.

𑀅𑀝𑁆𑀞𑀓𑀣𑀸𑀲𑀼𑀧𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀼𑀲𑀲𑀗𑁆𑀓𑀸𑀫𑀦𑀯𑀲𑁂𑀦 𑀘𑀻𑀯𑀭𑀪𑀸𑀚𑀦𑀻𑀬𑀫𑁂𑀯 𑀏𑀓𑀁 𑀆𑀕𑀢𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀧𑀦 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀜𑁆𑀘 𑀪𑀸𑀚𑀦𑀻𑀬𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀜𑁆𑀘 𑀯𑀢𑁆𑀯𑀸 𑀘𑀻𑀯𑀭𑀓𑁆𑀔𑀦𑁆𑀥𑀓𑁂‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀻𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁; 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺 (𑀫𑀳𑀸𑀯. 𑁩𑁩𑁭) 𑀇𑀤𑀁 𑀚𑀻𑀯𑀓𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀘𑀻𑀯𑀭𑀓𑀣𑀸, 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀁 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁, 𑀇𑀘𑁆𑀙𑀦𑁆𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀁 𑀓𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁫) 𑀇𑀤𑀁 𑀲𑀼𑀢𑁆𑀢𑀫𑀸𑀤𑀺𑀁 𑀓𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀓𑀣𑀸, 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂𑀬𑁂𑀯 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀺𑀫𑀁 𑀫𑀳𑀸𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺 𑁋 ‘𑀇𑀥 𑀫𑀬𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀸’𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑁂’’𑀢𑀺 (𑀘𑀽𑀴𑀯. 𑁩𑁧𑁬) 𑀇𑀤𑀁 𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀕𑀢𑀲𑁂𑀦𑀸𑀲𑀦𑀓𑀣𑀸, 𑀢𑀤𑀯𑀲𑀸𑀦𑁂 𑀘 𑀲𑀧𑁆𑀧𑀺𑀆𑀤𑀺𑀪𑁂𑀲𑀚𑁆𑀚𑀓𑀣𑀸 𑀯𑀺𑀢𑁆𑀣𑀸𑀭𑁂𑀦 ¶ 𑀓𑀣𑀺𑀢𑀸. 𑀫𑀬𑀁 𑀧𑀦 𑀢𑀁 𑀲𑀩𑁆𑀩𑀁 𑀆𑀕𑀢𑀸𑀕𑀢𑀝𑁆𑀞𑀸𑀦𑁂𑀬𑁂𑀯 𑀓𑀣𑀬𑀺𑀲𑁆𑀲𑀸𑀫; 𑀏𑀯𑀁 𑀓𑀣𑀦𑁂 𑀓𑀸𑀭𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯.

𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁩𑁯. 𑀇𑀢𑁄 ¶ 𑀧𑀭𑀁 𑀚𑀦𑁆𑀢𑀸𑀖𑀭𑀯𑀢𑁆𑀣𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁪𑁦. 𑀧𑀜𑁆𑀘𑀲𑀼 𑀯𑀺𑀖𑀸𑀲𑀯𑀢𑁆𑀣𑀽𑀲𑀼 𑀢𑁂 𑀪𑀺𑀓𑁆𑀔𑀽 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀯𑀺𑀖𑀸𑀲𑀁 𑀧𑀦 𑀕𑀡𑁆𑀳𑀦𑁆𑀢𑁂𑀦 𑀔𑀸𑀤𑀺𑀢𑀸𑀯𑀲𑁂𑀲𑀁 𑀙𑀟𑁆𑀟𑀺𑀢𑀁 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀲𑀓𑁆𑀓𑁄𑀢𑀺 𑀔𑀸𑀤𑀦𑁆𑀢𑁂 ¶ 𑀙𑀟𑁆𑀟𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁, 𑀏𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀸𑀬 𑀧𑀦 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀘 𑀦 𑀕𑀳𑁂𑀢𑀩𑁆𑀩𑀁.

𑁧𑁪𑁧. 𑀑𑀤𑀦𑀔𑀸𑀤𑀦𑀻𑀬𑀧𑀽𑀯𑀉𑀘𑁆𑀙𑀼𑀢𑀺𑀫𑁆𑀩𑀭𑀽𑀲𑀓𑀪𑀸𑀚𑀦𑀻𑀬𑀯𑀢𑁆𑀣𑀽𑀲𑀼 𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻𑀢𑀺 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀆𑀳. 𑀅𑀫𑀽𑀮𑀓𑀁 𑀅𑀕𑁆𑀕𑀳𑁂𑀲𑀻𑀢𑀺 𑀲𑀸𑀫𑀺𑀓𑁂𑀲𑀼 𑀤𑁂𑀦𑁆𑀢𑁂𑀲𑀼 𑀏𑀯𑀁 𑀅𑀕𑁆𑀕𑀳𑁂𑀲𑀺. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀁 𑀅𑀕𑁆𑀕𑀳𑁂𑀲𑀺; 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀆𑀧𑀢𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀬𑁄 𑀧𑀦𑀸𑀦𑁂𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀳; 𑀧𑀭𑀢𑁄 𑀢𑁂𑀓𑀝𑀼𑀮𑀬𑀸𑀕𑀼𑀯𑀢𑁆𑀣𑀼𑀫𑁆𑀳𑀺 𑀯𑀺𑀬. 𑀕𑀳𑀡𑁂 𑀧𑀦 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀲𑀫𑁆𑀫𑀢𑁂𑀦 𑀯𑀸 𑀆𑀡𑀢𑁆𑀢𑁂𑀳𑀺 𑀯𑀸 𑀆𑀭𑀸𑀫𑀺𑀓𑀸𑀤𑀻𑀳𑀺 𑀤𑀺𑀬𑁆𑀬𑀫𑀸𑀦𑀁, 𑀕𑀺𑀳𑀻𑀦𑀜𑁆𑀘 𑀲𑀦𑁆𑀢𑀓𑀁 𑀲𑀸𑀫𑀺𑀓𑁂𑀦 𑀯𑀸 𑀆𑀡𑀢𑁆𑀢𑁂𑀦 𑀯𑀸 𑀤𑀺𑀬𑁆𑀬𑀫𑀸𑀦𑀁 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀢𑁄 𑀪𑀡𑁆𑀟𑀤𑁂𑀬𑁆𑀬𑀁. 𑀅𑀜𑁆𑀜𑁂𑀦 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀲𑀫𑁆𑀫𑀢𑁂𑀦 𑀯𑀸 𑀅𑀦𑀸𑀡𑀢𑁆𑀢𑁂𑀦 𑀯𑀸 𑀤𑀺𑀬𑁆𑀬𑀫𑀸𑀦𑁂 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑁄 𑀧𑀢𑁆𑀢𑀘𑀢𑀼𑀓𑁆𑀓𑁂 𑀯𑀺𑀬 𑀢𑀲𑁆𑀲𑀼𑀤𑁆𑀥𑀸𑀭𑁂𑀬𑁂𑀯 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀇𑀢𑀭𑁂𑀳𑀺 𑀤𑀺𑀬𑁆𑀬𑀫𑀸𑀦𑀁 𑀏𑀯𑀁 𑀕𑀡𑁆𑀳𑀢𑁄 𑀪𑀡𑁆𑀟𑀤𑁂𑀬𑁆𑀬𑀁. 𑀲𑀸𑀫𑀺𑀓𑁂𑀦 𑀧𑀦 ‘‘𑀇𑀫𑀲𑁆𑀲 𑀤𑁂𑀳𑀻’’𑀢𑀺 𑀤𑀸𑀧𑀺𑀢𑀁 𑀯𑀸 𑀲𑀬𑀁 𑀤𑀺𑀦𑁆𑀦𑀁 𑀯𑀸 𑀲𑀼𑀤𑀺𑀦𑁆𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀩𑁆𑀩𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑀢𑁄 𑀲𑀸𑀭𑁄.

𑁧𑁪𑁨-𑁩. 𑀑𑀤𑀦𑀺𑀬𑀖𑀭𑀸𑀤𑀺𑀯𑀢𑁆𑀣𑀽𑀲𑀼 𑁋 𑀑𑀤𑀦𑀺𑀬𑀖𑀭𑀁 𑀦𑀸𑀫 𑀯𑀺𑀓𑁆𑀓𑀸𑀬𑀺𑀓𑀪𑀢𑁆𑀢𑀧𑀘𑀦𑀖𑀭𑀁. 𑀲𑀽𑀦𑀖𑀭𑀁 𑀦𑀸𑀫 𑀯𑀺𑀓𑁆𑀓𑀸𑀬𑀺𑀓𑀫𑀁𑀲𑀧𑀘𑀦𑀖𑀭𑀁. 𑀧𑀽𑀯𑀖𑀭𑀁 𑀦𑀸𑀫 𑀯𑀺𑀓𑁆𑀓𑀸𑀬𑀺𑀓𑀔𑀚𑁆𑀚𑀓𑀧𑀘𑀦𑀖𑀭𑀁. 𑀲𑁂𑀲𑀫𑁂𑀢𑁆𑀣, 𑀧𑀭𑀺𑀓𑁆𑀔𑀸𑀭𑀯𑀢𑁆𑀣𑀽𑀲𑀼 𑀘 𑀧𑀸𑀓𑀝𑀫𑁂𑀯.

𑁧𑁪𑁪. 𑀧𑀻𑀞𑀯𑀢𑁆𑀣𑀼𑀲𑁆𑀫𑀺𑀁 ¶ 𑁋 𑀲𑁄 𑀪𑀺𑀓𑁆𑀔𑀼 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀏𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀓𑀸𑀫𑁂𑀲𑀺. 𑀢𑁂𑀦𑀲𑁆𑀲 𑀲𑀗𑁆𑀓𑀸𑀫𑀦𑁂 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀲𑀗𑁆𑀓𑀸𑀫𑁂𑀢𑁆𑀯𑀸 𑀧𑀦 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀢𑁄 𑀕𑀳𑀡𑁂 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀏𑀯𑀁 𑀳𑀭𑀦𑁆𑀢𑁄 𑀘 𑀬𑀤𑀺 𑀧𑀻𑀞𑀓𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀣𑀯𑀺𑀓𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀅𑀣 ¶ 𑀧𑀻𑀞𑀓𑁂𑀧𑀺 𑀅𑀢𑁆𑀣𑀺, 𑀉𑀪𑁄 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀪𑀺𑀲𑀺𑀆𑀤𑀻𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀧𑀸𑀓𑀝𑀸𑀦𑁂𑀯.

𑁧𑁪𑁬. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀸𑀤𑀻𑀲𑀼 ¶ 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁. 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀧𑀝𑀺𑀯𑀺𑀲𑁄 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀤𑀸𑀬𑀓𑀸 ‘‘𑀩𑀳𑀺𑀉𑀧𑀘𑀸𑀭𑀝𑁆𑀞𑀸𑀦𑀫𑁆𑀧𑀺 𑀪𑀦𑁆𑀢𑁂, 𑀪𑀸𑀕𑀁 𑀕𑀡𑁆𑀳𑀣, 𑀆𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀅𑀦𑁆𑀢𑁄𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁪𑁮-𑁯. 𑀲𑀢𑁆𑀢𑀲𑀼 𑀅𑀫𑁆𑀩𑀘𑁄𑀭𑀓𑀸𑀤𑀺𑀯𑀢𑁆𑀣𑀽𑀲𑀼 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑁄𑀕𑁂 𑀧𑀸𑀭𑀸𑀚𑀺𑀓𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀸𑀫𑀺𑀓𑀸𑀧𑀺 𑀲𑀸𑀮𑀬𑀸, 𑀘𑁄𑀭𑀸𑀧𑀺 𑀲𑀸𑀮𑀬𑀸, 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀔𑀸𑀤𑀦𑁆𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀅𑀯𑀳𑀸𑀭𑁄, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀸𑀫𑀺𑀓𑀸 𑀲𑀸𑀮𑀬𑀸, 𑀘𑁄𑀭𑀸 𑀦𑀺𑀭𑀸𑀮𑀬𑀸, 𑀏𑀲𑁂𑀯 𑀦𑀬𑁄. 𑀲𑀸𑀫𑀺𑀓𑀸 𑀦𑀺𑀭𑀸𑀮𑀬𑀸, 𑀘𑁄𑀭𑀸 𑀲𑀸𑀮𑀬𑀸; ‘‘𑀧𑀼𑀦 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀳𑀦𑀝𑁆𑀞𑀸𑀦𑁂 𑀔𑀺𑀧𑀺𑀢𑁆𑀯𑀸 𑀕𑀢𑀸, 𑀏𑀲𑁂𑀯 𑀦𑀬𑁄. 𑀉𑀪𑁄𑀧𑀺 𑀦𑀺𑀭𑀸𑀮𑀬𑀸, 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀔𑀸𑀤𑀢𑁄 𑀅𑀦𑀸𑀧𑀢𑁆𑀢𑀺, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀼𑀓𑁆𑀓𑀝𑀁.

𑀲𑀗𑁆𑀖𑀲𑁆𑀲 𑀅𑀫𑁆𑀩𑀸𑀤𑀻𑀲𑀼 𑀧𑀦 𑀲𑀗𑁆𑀖𑀸𑀭𑀸𑀫𑁂 𑀚𑀸𑀢𑀁 𑀯𑀸 𑀳𑁄𑀢𑀼, 𑀆𑀦𑁂𑀢𑁆𑀯𑀸 𑀤𑀺𑀦𑁆𑀦𑀁 𑀯𑀸 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀯𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀧𑀘𑁆𑀘𑀦𑁆𑀢𑁂 𑀘𑁄𑀭𑀼𑀧𑀤𑁆𑀤𑀯𑁂𑀦 𑀕𑀸𑀫𑁂𑀲𑀼 𑀯𑀼𑀝𑁆𑀞𑀳𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀧𑀺 𑀯𑀺𑀳𑀸𑀭𑁂 𑀙𑀟𑁆𑀟𑁂𑀢𑁆𑀯𑀸 ‘‘𑀧𑀼𑀦 𑀆𑀯𑀲𑀦𑁆𑀢𑁂 𑀚𑀦𑀧𑀤𑁂 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀉𑀲𑁆𑀲𑀸𑀳𑀸𑀯 𑀕𑀘𑁆𑀙𑀦𑁆𑀢𑀺. 𑀪𑀺𑀓𑁆𑀔𑀽 𑀢𑀸𑀤𑀺𑀲𑀁 𑀯𑀺𑀳𑀸𑀭𑀁 𑀧𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀸𑀤𑀻𑀦𑀺 ‘‘𑀙𑀟𑁆𑀟𑀺𑀢𑀓𑀸𑀦𑀻’’𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺; 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀅𑀯𑀳𑀸𑀭𑁄 𑀳𑁄𑀢𑀺, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄.

𑀫𑀳𑀸𑀧𑀘𑁆𑀘𑀭𑀺𑀬𑀁 ¶ 𑀧𑀦 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀜𑁆𑀘 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀧𑀦 𑀨𑀮𑀸𑀨𑀮𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀆𑀕𑀢𑀸𑀦𑀸𑀕𑀢𑀸𑀦𑀁 𑀲𑀦𑁆𑀢𑀓𑀢𑁆𑀢𑀸’’𑀢𑀺. 𑀕𑀡𑀲𑀦𑁆𑀢𑀓𑁂 𑀧𑀦 𑀧𑀼𑀕𑁆𑀕𑀮𑀺𑀓𑁂 𑀘 𑀲𑀉𑀲𑁆𑀲𑀸𑀳𑀫𑀢𑁆𑀢𑀫𑁂𑀯 𑀧𑀫𑀸𑀡𑀁. 𑀲𑀘𑁂 𑀧𑀦 𑀢𑀢𑁄 𑀅𑀫𑁆𑀩𑀧𑀓𑁆𑀓𑀸𑀤𑀺𑀁 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀤𑁂𑀢𑀺, 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑁂𑀦𑁆𑀢𑁄 𑀅𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀗𑁆𑀖𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀁 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 ¶ 𑀤𑀤𑀢𑁄 𑀤𑀼𑀓𑁆𑀓𑀝𑀁, 𑀇𑀲𑁆𑀲𑀭𑀯𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁. 𑀦𑁄 𑀘𑁂 𑀯𑀢𑁆𑀣𑀼 𑀧𑀳𑁄𑀢𑀺, 𑀅𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀩𑀳𑀺 𑀉𑀧𑀘𑀸𑀭𑀲𑀻𑀫𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀇𑀲𑁆𑀲𑀭𑀯𑀢𑀸𑀬 𑀧𑀭𑀺𑀪𑀼𑀜𑁆𑀚𑀢𑁄 𑀕𑀻𑀯𑀸. 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀔𑀸𑀤𑀺𑀢𑀁 𑀲𑀼𑀔𑀸𑀤𑀺𑀢𑀁. 𑀖𑀡𑁆𑀝𑀺𑀁 𑀅𑀧𑀳𑀭𑀺𑀢𑁆𑀯𑀸 𑀓𑀸𑀮𑀫𑁂𑀯 𑀖𑁄𑀲𑁂𑀢𑁆𑀯𑀸, 𑀖𑀡𑁆𑀝𑀺𑀫𑁂𑀯 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀅𑀖𑁄𑀲𑁂𑀢𑁆𑀯𑀸, 𑀖𑀡𑁆𑀝𑀺𑀫𑁆𑀧𑀺 𑀅𑀧𑀳𑀭𑀺𑀢𑁆𑀯𑀸 𑀓𑀸𑀮𑀫𑁆𑀧𑀺 𑀅𑀖𑁄𑀲𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀦𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀔𑀸𑀤𑀺𑀢𑀫𑁆𑀧𑀺 𑀲𑀼𑀔𑀸𑀤𑀺𑀢𑀫𑁂𑀯. 𑀧𑀼𑀧𑁆𑀨𑀸𑀭𑀸𑀫𑀯𑀢𑁆𑀣𑀼𑀤𑁆𑀯𑀬𑀁 𑀧𑀸𑀓𑀝𑀫𑁂𑀯.

𑁧𑁫𑁦. 𑀯𑀼𑀢𑁆𑀢𑀯𑀸𑀤𑀓𑀯𑀢𑁆𑀣𑀼𑀢𑁆𑀢𑀬𑁂 ¶ 𑀯𑀼𑀢𑁆𑀢𑁄 𑀯𑀚𑁆𑀚𑁂𑀫𑀻𑀢𑀺 𑀢𑀬𑀸 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀢𑀯 𑀯𑀘𑀦𑁂𑀦 𑀯𑀤𑀸𑀫𑀻’’𑀢𑀺 𑀅𑀢𑁆𑀣𑁄. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀦 𑀘, 𑀪𑀺𑀓𑁆𑀔𑀯𑁂, ‘‘𑀯𑀼𑀢𑁆𑀢𑁄 𑀯𑀚𑁆𑀚𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 ‘‘𑀅𑀳𑀁 𑀢𑀬𑀸 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀯 𑀯𑀘𑀦𑁂𑀦 𑀯𑀤𑀸𑀫𑀻’’𑀢𑀺 𑀏𑀯𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀢𑀯 𑀯𑀘𑀦𑁂𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀼𑀢𑁆𑀢𑁄 𑀯𑀚𑁆𑀚𑁂𑀳𑀻𑀢𑀺 𑀫𑀬𑀸 𑀯𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀯𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼𑀧𑀺 𑀘 𑀤𑁆𑀯𑀻𑀲𑀼 𑀯𑀢𑁆𑀣𑀽𑀲𑀼 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀉𑀧𑀸𑀭𑀫𑁆𑀪𑀸 𑀫𑀼𑀢𑁆𑀢𑁄 𑀳𑁄𑀢𑀻𑀢𑀺.

𑁧𑁫𑁧-𑁨. 𑀫𑀡𑀺𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀫𑀚𑁆𑀛𑀺𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑁋 𑀦𑀸𑀳𑀁 𑀅𑀓𑀮𑁆𑀮𑀓𑁄𑀢𑀺 𑀦𑀸𑀳𑀁 𑀕𑀺𑀮𑀸𑀦𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁧𑁫𑁩. 𑀲𑀽𑀓𑀭𑀯𑀢𑁆𑀣𑀼𑀤𑁆𑀯𑀬𑁂 𑁋 𑀓𑀺𑀜𑁆𑀘𑀸𑀧𑀺 𑀧𑀞𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑀸𑀢𑀚𑁆𑀛𑀢𑁆𑀢𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀫𑁄𑀘𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀲𑀸𑀫𑀺𑀓𑁂𑀲𑀼 𑀧𑀦 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁, 𑀢𑀸𑀯 𑀫𑀳𑀦𑁆𑀢𑁄 𑀯𑀸 𑀫𑀢𑀲𑀽𑀓𑀭𑁄 𑀆𑀳𑀭𑀺𑀢𑁆𑀯𑀸 𑀤𑀸𑀢𑀩𑁆𑀩𑁄, 𑀢𑀤𑀕𑁆𑀖𑀦𑀓𑀁 𑀯𑀸 𑀪𑀡𑁆𑀟𑀁. 𑀲𑀘𑁂 𑀧𑀸𑀲𑀲𑀸𑀫𑀺𑀓𑁂 𑀓𑀼𑀳𑀺𑀜𑁆𑀘𑀺𑀧𑀺 𑀦 𑀧𑀲𑁆𑀲𑀢𑀺, 𑀧𑀸𑀲𑀲𑀸𑀫𑀦𑁆𑀢𑀸 𑀢𑀤𑀕𑁆𑀖𑀦𑀓𑀁 𑀲𑀸𑀝𑀓𑀁 𑀯𑀸 𑀓𑀸𑀲𑀸𑀯𑀁 𑀯𑀸 𑀣𑀸𑀮𑀓𑀁 𑀯𑀸 𑀬𑀣𑀸 𑀢𑁂 𑀆𑀕𑀢𑀸 ¶ 𑀧𑀲𑁆𑀲𑀦𑁆𑀢𑀺, 𑀈𑀤𑀺𑀲𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀏𑀢𑁆𑀣 𑀘 𑀓𑁄𑀘𑀺 𑀲𑀽𑀓𑀭𑁄 𑀧𑀸𑀲𑀁 𑀧𑀸𑀤𑁂𑀦 𑀓𑀟𑁆𑀠𑀺𑀢𑁆𑀯𑀸 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀲𑁂 𑀞𑀸𑀦𑀸𑀘𑀸𑀯𑀦𑀥𑀫𑁆𑀫𑁂𑀦 𑀞𑀸𑀦𑁂𑀦 𑀞𑀺𑀢𑁄 𑀳𑁄𑀢𑀺 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀦𑀸𑀯𑀸 ¶ 𑀯𑀺𑀬. 𑀓𑁄𑀘𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑁄, 𑀓𑁄𑀘𑀺 𑀦𑀺𑀧𑀦𑁆𑀦𑁄, 𑀓𑁄𑀘𑀺 𑀓𑀽𑀝𑀧𑀸𑀲𑁂𑀦 𑀩𑀤𑁆𑀥𑁄 𑀳𑁄𑀢𑀺. 𑀓𑀽𑀝𑀧𑀸𑀲𑁄 𑀦𑀸𑀫 𑀬𑀲𑁆𑀲 𑀅𑀦𑁆𑀢𑁂 𑀥𑀦𑀼𑀓𑀁 𑀯𑀸 𑀅𑀗𑁆𑀓𑀼𑀲𑀓𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀤𑀡𑁆𑀟𑀓𑁄 𑀩𑀤𑁆𑀥𑁄 𑀳𑁄𑀢𑀺, 𑀬𑁄 𑀢𑀢𑁆𑀣 𑀢𑀢𑁆𑀣 𑀭𑀼𑀓𑁆𑀔𑀸𑀤𑀻𑀲𑀼 𑀮𑀕𑁆𑀕𑀺𑀢𑁆𑀯𑀸 𑀲𑀽𑀓𑀭𑀲𑁆𑀲 𑀕𑀫𑀦𑀁 𑀦𑀺𑀯𑀸𑀭𑁂𑀢𑀺. 𑀢𑀢𑁆𑀭 𑀧𑀸𑀲𑀁 𑀓𑀟𑁆𑀠𑀺𑀢𑁆𑀯𑀸 𑀞𑀺𑀢𑀲𑁆𑀲 𑀏𑀓𑀫𑁂𑀯 𑀞𑀸𑀦𑀁 𑀧𑀸𑀲𑀩𑀦𑁆𑀥𑀦𑀁, 𑀲𑁄 𑀳𑀺 𑀧𑀸𑀲𑁂 𑀫𑀼𑀢𑁆𑀢𑀫𑀢𑁆𑀢𑁂 𑀯𑀸 𑀙𑀺𑀦𑁆𑀦𑀫𑀢𑁆𑀢𑁂 𑀯𑀸 𑀧𑀮𑀸𑀬𑀢𑀺. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀞𑀺𑀢𑀲𑁆𑀲 𑀩𑀦𑁆𑀥𑀦𑀜𑁆𑀘 𑀘𑀢𑁆𑀢𑀸𑀭𑁄 𑀘 𑀧𑀸𑀤𑀸𑀢𑀺 𑀧𑀜𑁆𑀘 𑀞𑀸𑀦𑀸𑀦𑀺. 𑀦𑀺𑀧𑀦𑁆𑀦𑀲𑁆𑀲 𑀩𑀦𑁆𑀥𑀦𑀜𑁆𑀘 𑀲𑀬𑀦𑀜𑁆𑀘𑀸𑀢𑀺 𑀤𑁆𑀯𑁂 𑀞𑀸𑀦𑀸𑀦𑀺. 𑀓𑀽𑀝𑀧𑀸𑀲𑀩𑀤𑁆𑀥𑀲𑁆𑀲 𑀬𑀢𑁆𑀣 𑀬𑀢𑁆𑀣 𑀕𑀘𑁆𑀙𑀢𑀺, 𑀢𑀁 𑀢𑀤𑁂𑀯 𑀞𑀸𑀦𑀁. 𑀢𑀲𑁆𑀫𑀸 𑀢𑀁 𑀢𑀢𑁄 𑀢𑀢𑁄 𑀫𑁄𑀘𑁂𑀦𑁆𑀢𑀸 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀲𑀢𑀫𑁆𑀧𑀺 𑀪𑀺𑀓𑁆𑀔𑀽 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀁 𑀤𑀺𑀲𑁆𑀯𑀸 𑀏𑀓𑀫𑁂𑀯 𑀤𑀸𑀲𑀁 𑀧𑀮𑀸𑀧𑁂𑀦𑁆𑀢𑁄 𑀯𑀺𑀬.

𑀧𑀼𑀭𑀺𑀫𑀸𑀦𑀁 𑀧𑀦 𑀢𑀺𑀡𑁆𑀡𑀁 𑀘𑀢𑀼𑀧𑁆𑀧𑀤𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀨𑀦𑁆𑀤𑀸𑀧𑀦𑀞𑀸𑀦𑀸𑀘𑀸𑀯𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀼𑀦𑀔𑀤𑀝𑁆𑀞𑀁 𑀲𑀽𑀓𑀭𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀓𑀸𑀭𑀼𑀜𑁆𑀜𑀸𑀥𑀺𑀧𑁆𑀧𑀸𑀬𑁂𑀦 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁. 𑀧𑀸𑀲𑀝𑁆𑀞𑀸𑀦𑀁 𑀧𑀦 𑀲𑀼𑀦𑀔𑀲𑀫𑀻𑀧𑀁 𑀯𑀸 𑀅𑀲𑀫𑁆𑀧𑀢𑁆𑀢𑀁 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀧𑀞𑀫𑀫𑁂𑀯 𑀧𑀮𑀸𑀧𑁂𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀬𑁄𑀧𑀺 𑀩𑀤𑁆𑀥𑀲𑀽𑀓𑀭𑀲𑁆𑀲 𑀖𑀸𑀲𑀜𑁆𑀘 𑀧𑀸𑀦𑀻𑀬𑀜𑁆𑀘 𑀤𑀢𑁆𑀯𑀸 𑀩𑀮𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀢𑀺 𑁋 ‘‘𑀉𑀢𑁆𑀭𑀲𑁆𑀢𑁄 ¶ 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺; 𑀲𑁄 𑀘𑁂 𑀧𑀮𑀸𑀬𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀸𑀲𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁂𑀦 𑀧𑀮𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀧𑀦 𑀖𑀸𑀲𑀜𑁆𑀘 𑀧𑀸𑀦𑀻𑀬𑀜𑁆𑀘 𑀤𑀢𑁆𑀯𑀸 𑀕𑀘𑁆𑀙𑀢𑀺, ‘‘𑀩𑀮𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺; 𑀲𑁄 𑀘𑁂 𑀧𑀮𑀸𑀬𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀧𑀸𑀲𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀲𑀲𑀦𑁆𑀢𑀺𑀓𑁂 𑀲𑀢𑁆𑀣𑀁 𑀯𑀸 𑀅𑀕𑁆𑀕𑀺𑀁 𑀯𑀸 𑀞𑀧𑁂𑀢𑀺 ‘‘𑀙𑀺𑀦𑁆𑀦𑁂 𑀯𑀸 𑀤𑀟𑁆𑀠𑁂 𑀯𑀸 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺. 𑀲𑀽𑀓𑀭𑁄 𑀧𑀸𑀲𑀁 𑀘𑀸𑀮𑁂𑀦𑁆𑀢𑁄 𑀙𑀺𑀦𑁆𑀦𑁂 𑀯𑀸 𑀤𑀟𑁆𑀠𑁂 𑀯𑀸 𑀧𑀮𑀸𑀬𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀧𑀸𑀲𑀁 𑀬𑀝𑁆𑀞𑀺𑀬𑀸 𑀲𑀳 𑀧𑀸𑀢𑁂𑀢𑀺, 𑀧𑀘𑁆𑀙𑀸 𑀲𑀽𑀓𑀭𑁄 𑀢𑀁 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺 ¶ , 𑀪𑀡𑁆𑀟𑀤𑁂𑀬𑁆𑀬𑀁. 𑀲𑀽𑀓𑀭𑁄 𑀅𑀤𑀽𑀳𑀮𑀧𑀸𑀲𑀸𑀡𑁂𑀳𑀺 𑀅𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀁 𑀧𑀮𑀸𑀧𑁂𑀢𑀼𑀓𑀸𑀫𑀲𑁆𑀲 𑀅𑀤𑀽𑀳𑀮𑀁 𑀓𑀸𑀭𑀼𑀜𑁆𑀜𑁂𑀦 𑀉𑀓𑁆𑀔𑀺𑀧𑀢𑁄 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀅𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀁 𑀅𑀤𑀽𑀳𑀮𑀁 ¶ 𑀧𑀸𑀢𑁂𑀢𑀺, 𑀧𑀘𑁆𑀙𑀸 𑀲𑀽𑀓𑀭𑁄 𑀢𑀁 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀑𑀧𑀸𑀢𑁂 𑀧𑀢𑀺𑀢𑀲𑀽𑀓𑀭𑀫𑁆𑀧𑀺 𑀓𑀸𑀭𑀼𑀜𑁆𑀜𑁂𑀦 𑀉𑀤𑁆𑀥𑀭𑀢𑁄 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁. 𑀑𑀧𑀸𑀢𑀁 𑀧𑀽𑀭𑁂𑀢𑁆𑀯𑀸 𑀦𑀸𑀲𑁂𑀢𑀺, 𑀧𑀘𑁆𑀙𑀸 𑀲𑀽𑀓𑀭𑁄 𑀢𑀁 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀲𑀽𑀮𑁂 𑀯𑀺𑀤𑁆𑀥𑀁 𑀓𑀸𑀭𑀼𑀜𑁆𑀜𑁂𑀦 𑀉𑀤𑁆𑀥𑀭𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁. 𑀲𑀽𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁.

𑀯𑀺𑀳𑀸𑀭𑀪𑀽𑀫𑀺𑀬𑀁 𑀧𑀦 𑀧𑀸𑀲𑁂 𑀯𑀸 𑀅𑀤𑀽𑀳𑀮𑀁 𑀯𑀸 𑀑𑀟𑁆𑀟𑁂𑀦𑁆𑀢𑀸 𑀯𑀸𑀭𑁂𑀢𑀩𑁆𑀩𑀸 𑁋 ‘‘𑀫𑀺𑀕𑀭𑀽𑀧𑀸𑀦𑀁 𑀧𑀝𑀺𑀲𑀭𑀡𑀝𑁆𑀞𑀸𑀦𑀫𑁂𑀢𑀁, 𑀫𑀸 𑀇𑀥 𑀏𑀯𑀁 𑀓𑀭𑁄𑀣𑀸’’𑀢𑀺. 𑀲𑀘𑁂 ‘‘𑀳𑀭𑀸𑀧𑁂𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀺, 𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀲𑀬𑀁 𑀳𑀭𑀦𑁆𑀢𑀺, 𑀲𑀼𑀦𑁆𑀤𑀭𑀫𑁂𑀯. 𑀅𑀣 𑀦𑁂𑀯 𑀳𑀭𑀦𑁆𑀢𑀺, 𑀦 𑀳𑀭𑀺𑀢𑀼𑀁 𑀤𑁂𑀦𑁆𑀢𑀺, 𑀭𑀓𑁆𑀔𑀁 𑀬𑀸𑀘𑀺𑀢𑁆𑀯𑀸 𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸 𑀲𑀲𑁆𑀲𑀭𑀓𑁆𑀔𑀡𑀓𑀸𑀮𑁂 𑀔𑁂𑀢𑁆𑀢𑁂𑀲𑀼 𑀧𑀸𑀲𑁂 𑀘 𑀅𑀤𑀽𑀳𑀮𑀧𑀸𑀲𑀸𑀡𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑀺 𑁋 ‘‘𑀫𑀁𑀲𑀁 𑀔𑀸𑀤𑀦𑁆𑀢𑀸 𑀲𑀲𑁆𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. 𑀯𑀻𑀢𑀺𑀯𑀢𑁆𑀢𑁂 𑀲𑀲𑁆𑀲𑀓𑀸𑀮𑁂 𑀢𑁂𑀲𑀼 𑀅𑀦𑀸𑀮𑀬𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀢𑀢𑁆𑀣 𑀩𑀤𑁆𑀥𑀁 𑀯𑀸 𑀧𑀢𑀺𑀢𑀁 𑀯𑀸 𑀫𑁄𑀘𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀫𑀺𑀕𑀯𑀢𑁆𑀣𑀼𑀤𑁆𑀯𑀬𑁂𑀧𑀺 𑀲𑀽𑀓𑀭𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀫𑀘𑁆𑀙𑀯𑀢𑁆𑀣𑀼𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀓𑀼𑀫𑀻𑀦𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀧𑀘𑁆𑀙𑀸𑀧𑀼𑀝𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀸 𑀧𑀲𑁆𑀲𑁂𑀦 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀯𑀸 𑀓𑀼𑀫𑀻𑀦𑀢𑁄 𑀫𑀘𑁆𑀙𑁂 𑀧𑁄𑀣𑁂𑀢𑁆𑀯𑀸 𑀧𑀮𑀸𑀧𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀏𑀯𑀁 𑀧𑀮𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁. 𑀲𑀳 𑀓𑀼𑀫𑀻𑀦𑁂𑀦 𑀉𑀤𑁆𑀥𑀭𑀢𑁄𑀧𑀺 𑀧𑀸𑀭𑀸𑀚𑀺𑀓𑀁. 𑀓𑁂𑀯𑀮𑀁 𑀓𑀼𑀫𑀻𑀦𑀫𑀼𑀔𑀁 𑀯𑀺𑀯𑀭𑀢𑀺, 𑀧𑀘𑁆𑀙𑀸𑀧𑀼𑀝𑀓𑀁 𑀫𑀼𑀜𑁆𑀘𑀢𑀺, 𑀙𑀺𑀤𑁆𑀤𑀁 𑀯𑀸 𑀓𑀭𑁄𑀢𑀺, 𑀫𑀘𑁆𑀙𑀸 𑀧𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀮𑀸𑀬𑀦𑁆𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀏𑀯𑀁 𑀓𑀢𑁆𑀯𑀸 𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀤𑀲𑁆𑀲𑁂𑀢𑀺, 𑀫𑀘𑁆𑀙𑀸 𑀕𑁄𑀘𑀭𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀫𑀼𑀔𑀁 𑀅𑀯𑀺𑀯𑀭𑀺𑀢𑁆𑀯𑀸 𑀧𑀘𑁆𑀙𑀸𑀧𑀼𑀝𑀓𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 ¶ 𑀧𑀲𑁆𑀲𑁂𑀦 𑀙𑀺𑀤𑁆𑀤𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀤𑀲𑁆𑀲𑁂𑀢𑀺, 𑀫𑀘𑁆𑀙𑀸 𑀧𑀦 𑀙𑀸𑀢𑀚𑁆𑀛𑀢𑁆𑀢𑀸 𑀲𑀻𑀲𑁂𑀦 𑀧𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀓𑀢𑁆𑀯𑀸 𑀕𑁄𑀘𑀭𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀢𑀼𑀘𑁆𑀙𑀓𑀼𑀫𑀻𑀦𑀲𑁆𑀲 𑀫𑀼𑀔𑀁 𑀯𑀸 𑀯𑀺𑀯𑀭𑀢𑀺, 𑀧𑀘𑁆𑀙𑀸𑀧𑀼𑀝𑀓𑀁 𑀯𑀸 𑀫𑀼𑀜𑁆𑀘𑀢𑀺, 𑀙𑀺𑀤𑁆𑀤𑀁 𑀯𑀸 𑀓𑀭𑁄𑀢𑀺, 𑀆𑀕𑀢𑀸𑀕𑀢𑀸 𑀫𑀘𑁆𑀙𑀸 𑀤𑁆𑀯𑀸𑀭𑀁 𑀧𑀢𑁆𑀢𑀸 ¶ 𑀧𑀼𑀝𑀓𑀙𑀺𑀤𑁆𑀤𑁂𑀳𑀺 𑀧𑀮𑀸𑀬𑀦𑁆𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀢𑀼𑀘𑁆𑀙𑀓𑀼𑀫𑀻𑀦𑀁 𑀕𑀳𑁂𑀢𑁆𑀯𑀸 𑀕𑀼𑀫𑁆𑀩𑁂 𑀔𑀺𑀧𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸𑀢𑀺. 𑀬𑀸𑀦𑁂 𑀪𑀡𑁆𑀟𑀁 𑀧𑀻𑀞𑁂 𑀣𑀯𑀺𑀓𑀸𑀬 𑀲𑀤𑀺𑀲𑀁.

𑀫𑀁𑀲𑀧𑁂𑀲𑀺𑀯𑀢𑁆𑀣𑀼𑀫𑁆𑀳𑀺 ¶ 𑁋 𑀲𑀘𑁂 𑀆𑀓𑀸𑀲𑁂 𑀕𑀡𑁆𑀳𑀸𑀢𑀺, 𑀕𑀳𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀢𑀁 𑀙𑀳𑀸𑀓𑀸𑀭𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀸𑀦𑀸𑀘𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀤𑀸𑀭𑀼𑀕𑁄𑀧𑀸𑀮𑀓𑀭𑀚𑀓𑀲𑀸𑀝𑀓𑀯𑀢𑁆𑀣𑀽𑀲𑀼 𑀘 𑀅𑀫𑁆𑀩𑀘𑁄𑀭𑀓𑀸𑀤𑀺𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁.

𑁧𑁫𑁫. 𑀓𑀼𑀫𑁆𑀪𑀺𑀯𑀢𑁆𑀣𑀼𑀲𑁆𑀫𑀺𑀁 𑁋 𑀬𑁄 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀅𑀧𑀸𑀤𑀕𑁆𑀖𑀦𑀓𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀦 𑀧𑀼𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀁𑀯𑀭𑁂 𑀞𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑀸𑀤𑀻𑀲𑀼𑀧𑀺 𑀧𑀼𑀦 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀏𑀯𑀫𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀩𑁆𑀩𑀫𑁆𑀧𑀺 𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀦𑁂𑀯𑀢𑁆𑀣𑀺 𑀧𑀸𑀭𑀸𑀚𑀺𑀓𑀁. 𑀤𑀼𑀓𑁆𑀓𑀝𑀁 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀸 𑀆𑀧𑀚𑁆𑀚𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀏𑀯𑀫𑁂𑀯𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀧𑀦 𑀅𑀓𑀢𑁆𑀯𑀸 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀢𑁄 𑀬𑀲𑁆𑀫𑀺𑀁 𑀤𑀺𑀯𑀲𑁂 𑀧𑀸𑀤𑀕𑁆𑀖𑀦𑀓𑀁 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀁.

𑀲𑀁𑀯𑀺𑀤𑀸𑀯𑀳𑀸𑀭𑀯𑀢𑁆𑀣𑀽𑀦𑀺 𑀲𑀁𑀯𑀺𑀤𑀸𑀯𑀳𑀸𑀭𑁂, 𑀫𑀼𑀝𑁆𑀞𑀺𑀯𑀢𑁆𑀣𑀽𑀦𑀺 𑀑𑀤𑀦𑀺𑀬𑀖𑀭𑀸𑀤𑀺𑀯𑀢𑁆𑀣𑀽𑀲𑀼 𑀤𑁆𑀯𑁂 𑀯𑀺𑀖𑀸𑀲𑀯𑀢𑁆𑀣𑀽𑀦𑀺 𑀅𑀫𑁆𑀩𑀘𑁄𑀭𑀓𑀸𑀤𑀺𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀢𑀺𑀡𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁫𑁬. 𑀅𑀫𑁆𑀩𑀪𑀸𑀚𑀸𑀧𑀦𑀸𑀤𑀺𑀯𑀢𑁆𑀣𑀽𑀲𑀼 𑀢𑁂 𑀪𑀺𑀓𑁆𑀔𑀽 𑀏𑀓𑀁 𑀕𑀸𑀫𑀓𑀸𑀯𑀸𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑀼𑀓𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀪𑀺𑀓𑁆𑀔𑀽 𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑀸𑀧𑀺 𑀢𑁂𑀲𑀼 𑀆𑀕𑀢𑁂𑀲𑀼 ‘‘𑀣𑁂𑀭𑀸𑀦𑀁 𑀨𑀮𑀸𑀦𑀺 𑀤𑁂𑀣𑀸’’𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂 𑀦 𑀅𑀯𑁄𑀘𑀼𑀁. 𑀅𑀣 𑀢𑁂 𑀪𑀺𑀓𑁆𑀔𑀽 ‘‘𑀓𑀺𑀁 𑀲𑀗𑁆𑀖𑀺𑀓𑀁 𑀅𑀫𑁆𑀳𑀸𑀓𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑀸𑀧𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀯𑀲𑁆𑀲𑀕𑁆𑀕𑁂𑀦 𑀪𑀸𑀕𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀢𑁂𑀦 𑀦𑁂𑀲𑀁 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑁄𑀕𑀢𑁆𑀣𑀸𑀬𑀸’’𑀢𑀺 𑀆𑀳. 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀬𑀢𑁆𑀣 𑀆𑀯𑀸𑀲𑀺𑀓𑀸 𑀆𑀕𑀦𑁆𑀢𑀼𑀓𑀸𑀦𑀁 𑀦 𑀤𑁂𑀦𑁆𑀢𑀺, 𑀨𑀮𑀯𑀸𑀭𑁂 𑀘 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀤𑀺𑀲𑁆𑀯𑀸 𑀘𑁄𑀭𑀺𑀓𑀸𑀬 𑀅𑀢𑁆𑀢𑀦𑀸𑀯 𑀔𑀸𑀤𑀦𑁆𑀢𑀺, 𑀢𑀢𑁆𑀣 𑀆𑀕𑀦𑁆𑀢𑀼𑀓𑁂𑀳𑀺 ¶ 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀬𑀢𑁆𑀣 𑀧𑀦 𑀆𑀯𑀸𑀲𑀺𑀓𑀸 𑀭𑀼𑀓𑁆𑀔𑁂 𑀭𑀓𑁆𑀔𑀺𑀢𑁆𑀯𑀸 𑀨𑀮𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 ¶ 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺, 𑀅𑀦𑀺𑀲𑁆𑀲𑀭𑀸 𑀢𑀢𑁆𑀣 𑀆𑀕𑀦𑁆𑀢𑀼𑀓𑀸. 𑀬𑁂𑀧𑀺 𑀭𑀼𑀓𑁆𑀔𑀸 𑀘𑀻𑀯𑀭𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸, 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 𑀅𑀦𑀺𑀲𑁆𑀲𑀭𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑀧𑀘𑁆𑀘𑀬𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑁂𑀲𑀼𑀧𑀺.

𑀬𑁂 ¶ 𑀧𑀦 𑀢𑀣𑀸 𑀅𑀦𑀺𑀬𑀫𑀺𑀢𑀸, 𑀆𑀯𑀸𑀲𑀺𑀓𑀸 𑀘 𑀢𑁂 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀘𑁄𑀭𑀺𑀓𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀦 𑀢𑁂𑀲𑀼 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀁. 𑀬𑁂 𑀨𑀮𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀺𑀦𑁆𑀦𑀸, 𑀆𑀯𑀸𑀲𑀺𑀓𑀸𑀧𑀺 𑀦𑁂 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺, 𑀢𑁂𑀲𑀼𑀬𑁂𑀯 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀢𑀁 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀁. 𑀬𑀁 𑀧𑀦𑁂𑀢𑁆𑀣 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀁, 𑀢𑀁 𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀪𑀡𑁆𑀟𑀤𑁂𑀬𑁆𑀬𑀜𑁆𑀘𑀸’’𑀢𑀺.

𑀑𑀤𑀺𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀘𑀻𑀯𑀭𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀓𑀺𑀮𑀫𑀦𑁆𑀢𑀺, 𑀘𑀻𑀯𑀭𑀁 𑀧𑀦 𑀲𑀼𑀮𑀪𑀁, 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑁂𑀦 𑀯𑀸 𑀓𑀺𑀮𑀫𑀦𑁆𑀢𑁂𑀲𑀼 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀢𑀤𑀢𑁆𑀣𑀸𑀬𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀑𑀤𑀺𑀲𑁆𑀲 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀕𑀺𑀮𑀸𑀦𑀧𑀘𑁆𑀘𑀬𑀢𑁆𑀣𑀸𑀬 𑀘 𑀤𑀺𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀑𑀤𑀺𑀲𑁆𑀲 𑀲𑁂𑀦𑀸𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀁 𑀧𑀦 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀢𑀁 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀢𑀤𑀢𑁆𑀣𑀫𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀦 𑀬𑀸𑀧𑁂𑀦𑁆𑀢𑀺. 𑀏𑀢𑁆𑀣 𑀭𑀸𑀚𑀭𑁄𑀕𑀘𑁄𑀭𑀪𑀬𑀸𑀤𑀻𑀳𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀸𑀦𑀁 𑀯𑀺𑀳𑀸𑀭𑀸 𑀧𑀮𑀼𑀚𑁆𑀚𑀦𑁆𑀢𑀺, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀓𑁂 𑀯𑀺𑀦𑀸𑀲𑁂𑀦𑁆𑀢𑀺, 𑀲𑁂𑀦𑀸𑀲𑀦𑀧𑀘𑁆𑀘𑀬𑀁 𑀧𑀦 𑀦𑀺𑀲𑁆𑀲𑀸𑀬 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀏𑀯𑀭𑀽𑀧𑁂 𑀓𑀸𑀮𑁂 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀧𑀺 𑀲𑁂𑀦𑀸𑀲𑀦𑀚𑀕𑁆𑀕𑀦𑀢𑁆𑀣𑀸𑀬 𑀧𑀭𑀺𑀪𑁄𑀕𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 𑀇𑀢𑀭𑀸𑀦𑀺 𑀮𑀸𑀫𑀓𑀓𑁄𑀝𑀺𑀬𑀸 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩𑀁 ¶ .

𑀬𑁄 𑀧𑀦 𑀆𑀭𑀸𑀫𑁄 𑀘𑀢𑀼𑀧𑁆𑀧𑀘𑁆𑀘𑀬𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑁄, 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑁂𑀦 𑀧𑀦 𑀧𑀘𑁆𑀘𑀬𑁂𑀦 𑀊𑀦𑀁, 𑀢𑀤𑀢𑁆𑀣𑀁 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀭𑀸𑀫𑁄 𑀚𑀕𑁆𑀕𑀺𑀢𑀩𑁆𑀩𑁄, 𑀯𑁂𑀢𑀦𑀁 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁂 𑀧𑀦 𑀯𑁂𑀢𑀦𑀁 𑀮𑀪𑀺𑀢𑁆𑀯𑀸 𑀆𑀭𑀸𑀫𑁂𑀬𑁂𑀯 𑀕𑁂𑀳𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸 𑀭𑀓𑁆𑀔𑀦𑁆𑀢𑀺, 𑀢𑁂 𑀘𑁂 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀸𑀴𑀺𑀓𑁂𑀭𑀁 𑀯𑀸 𑀢𑀸𑀮𑀧𑀓𑁆𑀓𑀁 𑀯𑀸 𑀤𑁂𑀦𑁆𑀢𑀺, 𑀬𑀁 𑀢𑁂𑀲𑀁 𑀲𑀗𑁆𑀖𑁂𑀦 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺 𑁋 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀏𑀢𑁆𑀢𑀓𑀁 𑀦𑀸𑀫 𑀔𑀸𑀤𑀣𑀸’’𑀢𑀺 𑀢𑀤𑁂𑀯 𑀢𑁂 𑀤𑀸𑀢𑀼𑀁 𑀮𑀪𑀦𑁆𑀢𑀺; 𑀢𑀢𑁄 𑀉𑀢𑁆𑀢𑀭𑀺 𑀢𑁂𑀲𑀁 𑀤𑀤𑀦𑁆𑀢𑀸𑀦𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀬𑁄 ¶ ¶ 𑀧𑀦 𑀆𑀭𑀸𑀫𑀁 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘𑀢𑀼𑀧𑁆𑀧𑀘𑁆𑀘𑀬𑀢𑁆𑀣𑀸𑀬 𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑁂𑀢𑀺, 𑀅𑀬𑀁 𑀩𑀳𑀼𑀓𑀫𑁆𑀧𑀺 𑀤𑀸𑀢𑀼𑀁 𑀮𑀪𑀢𑀺. 𑀘𑁂𑀢𑀺𑀬𑀲𑁆𑀲 𑀧𑀤𑀻𑀧𑀢𑁆𑀣𑀸𑀬 𑀯𑀸 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀯𑀸 𑀤𑀺𑀦𑁆𑀦𑁄 𑀆𑀭𑀸𑀫𑁄𑀧𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄; 𑀯𑁂𑀢𑀦𑀁 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀯𑁂𑀢𑀦𑀜𑁆𑀘 𑀧𑀦𑁂𑀢𑁆𑀣 𑀘𑁂𑀢𑀺𑀬𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀖𑀲𑀦𑁆𑀢𑀓𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀢𑀫𑁆𑀧𑀺 𑀆𑀭𑀸𑀫𑀁 𑀯𑁂𑀢𑀦𑁂𑀦 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀦𑀜𑁆𑀘 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀤𑀸𑀬𑀓𑀸𑀦𑀜𑁆𑀘 𑀢𑀢𑁆𑀣 𑀚𑀸𑀢𑀓𑀨𑀮𑀤𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀫𑁆𑀩𑀧𑀸𑀮𑀓𑀸𑀤𑀺𑀯𑀢𑁆𑀣𑀽𑀲𑀼 𑁋 𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀕𑁄𑀧𑀓𑀲𑁆𑀲 𑀤𑀸𑀦𑁂𑀢𑀺 𑀏𑀢𑁆𑀣 𑀓𑀢𑀭𑀁 𑀧𑀦 𑀕𑁄𑀧𑀓𑀤𑀸𑀦𑀁 𑀯𑀝𑁆𑀝𑀢𑀺, 𑀓𑀢𑀭𑀁 𑀦 𑀯𑀝𑁆𑀝𑀢𑀻𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀬𑀁 𑀕𑁄𑀧𑀓𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺 𑁋 ‘𑀏𑀢𑁆𑀢𑀓𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀕𑀡𑁆𑀳𑀸’𑀢𑀺 𑀢𑀤𑁂𑀯 𑀯𑀝𑁆𑀝𑀢𑀺; 𑀢𑀢𑁄 𑀉𑀢𑁆𑀢𑀭𑀺 𑀦 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀺𑀁 𑀕𑁄𑀧𑀓𑀸𑀦𑀁 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀯𑀸 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀅𑀢𑁆𑀣𑀺, 𑀏𑀢𑁂𑀲𑀁 𑀳𑀢𑁆𑀣𑁂 𑀯𑀺𑀲𑁆𑀲𑀝𑁆𑀞𑀓𑀲𑁆𑀲 𑀏𑀢𑁂 𑀇𑀲𑁆𑀲𑀭𑀸, 𑀢𑀲𑁆𑀫𑀸 𑀬𑀁 𑀢𑁂 𑀤𑁂𑀦𑁆𑀢𑀺 𑀢𑀁 𑀩𑀳𑀼𑀓𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀆𑀭𑀸𑀫𑀁 𑀯𑀸 𑀅𑀜𑁆𑀜𑀁 𑀯𑀸 𑀨𑀮𑀸𑀨𑀮𑀁 𑀤𑀸𑀭𑀓𑀸 𑀭𑀓𑁆𑀔𑀦𑁆𑀢𑀺, 𑀢𑁂𑀳𑀺 𑀤𑀺𑀦𑁆𑀦𑀁 𑀯𑀝𑁆𑀝𑀢𑀺 ¶ . 𑀆𑀳𑀭𑀸𑀧𑁂𑀢𑁆𑀯𑀸 𑀧𑀦 𑀦 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀺𑀓𑁂 𑀧𑀦 𑀘𑁂𑀢𑀺𑀬𑀲𑀦𑁆𑀢𑀓𑁂 𑀘 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀲𑁆𑀲𑁂𑀯 𑀤𑀸𑀦𑀁 𑀯𑀝𑁆𑀝𑀢𑀺. 𑀯𑁂𑀢𑀦𑁂𑀦 𑀭𑀓𑁆𑀔𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀪𑀸𑀕𑀫𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀬𑀁 𑀕𑀺𑀳𑀻𑀦𑀁 𑀆𑀭𑀸𑀫𑀭𑀓𑁆𑀔𑀓𑀸 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺, 𑀏𑀢𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀦 𑀆𑀭𑀸𑀫𑀕𑁄𑀧𑀓𑀸 𑀬𑀁 𑀅𑀢𑁆𑀢𑀦𑁄 𑀪𑀢𑀺𑀬𑀸 𑀔𑀡𑁆𑀟𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀢𑀁 𑀯𑀝𑁆𑀝𑀢𑀺. 𑀬𑁄𑀧𑀺 𑀉𑀧𑀟𑁆𑀠𑀸𑀭𑀸𑀫𑀁 𑀯𑀸 𑀓𑁂𑀘𑀺𑀤𑁂𑀯 𑀭𑀼𑀓𑁆𑀔𑁂 𑀯𑀸 𑀪𑀢𑀺𑀁 𑀮𑀪𑀺𑀢𑁆𑀯𑀸 𑀭𑀓𑁆𑀔𑀢𑀺, 𑀢𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀭𑀼𑀓𑁆𑀔𑀢𑁄𑀬𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀲𑁆𑀲 𑀧𑀦 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑀁 𑀧𑀦 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁, 𑀅𑀢𑁆𑀣𑀢𑁄 𑀏𑀓𑀫𑁂𑀯; 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀤𑀸𑀭𑀼𑀯𑀢𑁆𑀣𑀼𑀫𑁆𑀳𑀺 𑁋 𑀢𑀸𑀯𑀓𑀸𑀮𑀺𑀓𑁄 𑀅𑀳𑀁 𑀪𑀕𑀯𑀸𑀢𑀺 𑀢𑀸𑀯𑀓𑀸𑀮𑀺𑀓𑀘𑀺𑀢𑁆𑀢𑁄 𑀅𑀳𑀁 𑀪𑀕𑀯𑀸𑀢𑀺 𑀯𑀢𑁆𑀢𑀼𑀓𑀸𑀫𑁂𑀦 𑀯𑀼𑀢𑁆𑀢𑀁, 𑀢𑀸𑀯𑀓𑀸𑀮𑀺𑀓𑀘𑀺𑀢𑁆𑀢𑁄𑀢𑀺 ‘‘𑀧𑀼𑀦 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁𑀘𑀺𑀢𑁆𑀢𑁄 𑀅𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀸 ‘‘𑀢𑀸𑀯𑀓𑀸𑀮𑀺𑀓𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀳.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀲𑀗𑁆𑀖𑁄 𑀲𑀗𑁆𑀖𑀺𑀓𑀁 𑀓𑀫𑁆𑀫𑀁 𑀓𑀸𑀭𑁂𑀢𑀺 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸, 𑀢𑀢𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑀸𑀯𑀓𑀸𑀮𑀺𑀓𑀁 𑀳𑀭𑀺𑀢𑀩𑁆𑀩𑀁. 𑀬𑁄 𑀧𑀦 𑀲𑀗𑁆𑀖𑀺𑀓𑁄 𑀤𑀩𑁆𑀩𑀲𑀫𑁆𑀪𑀸𑀭𑁄 𑀅𑀕𑀼𑀢𑁆𑀢𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 ¶ 𑀢𑁂𑀫𑁂𑀢𑀺, 𑀆𑀢𑀧𑁂𑀦 𑀲𑀼𑀓𑁆𑀔𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀯𑀸𑀲𑁂 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀗𑁆𑀖𑁄 𑀆𑀳𑀭𑀸𑀧𑁂𑀦𑁆𑀢𑁄 𑀅𑀜𑁆𑀜𑁂𑀦 𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀫𑀽𑀮𑁂𑀦 𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺 𑀲𑀜𑁆𑀜𑀸𑀧𑁂𑀢𑀼𑀁, ‘‘𑀲𑀗𑁆𑀖𑀺𑀓𑁂𑀦, 𑀪𑀦𑁆𑀢𑁂, 𑀓𑀢𑀁 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀴𑀜𑁆𑀚𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁂𑀦𑀸𑀲𑀦𑀲𑁆𑀲 𑀧𑀦 𑀅𑀬𑀫𑁂𑀯 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄. 𑀲𑀘𑁂𑀧𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑁄 𑀯𑀸 𑀭𑀼𑀓𑁆𑀔𑀢𑁆𑀣𑀫𑁆𑀪𑁄 𑀯𑀸 ¶ 𑀓𑀯𑀸𑀝𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀦𑀧𑁆𑀧𑀳𑁄𑀢𑀺, 𑀲𑀗𑁆𑀖𑀺𑀓𑀁 𑀢𑀸𑀯𑀓𑀸𑀮𑀺𑀓𑀁 𑀆𑀳𑀭𑀺𑀢𑁆𑀯𑀸 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀤𑀩𑁆𑀩𑀲𑀫𑁆𑀪𑀸𑀭𑁂𑀲𑀽𑀢𑀺.

𑀉𑀤𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀬𑀤𑀸 ¶ 𑀉𑀤𑀓𑀁 𑀤𑀼𑀮𑁆𑀮𑀪𑀁 𑀳𑁄𑀢𑀺, 𑀬𑁄𑀚𑀦𑀢𑁄𑀧𑀺 𑀅𑀟𑁆𑀠𑀬𑁄𑀚𑀦𑀢𑁄𑀧𑀺 𑀆𑀳𑀭𑀻𑀬𑀢𑀺, 𑀏𑀯𑀭𑀽𑀧𑁂 𑀧𑀭𑀺𑀕𑁆𑀕𑀳𑀺𑀢𑀉𑀤𑀓𑁂 𑀅𑀯𑀳𑀸𑀭𑁄. 𑀬𑀢𑁄𑀧𑀺 𑀆𑀳𑀭𑀺𑀫𑀢𑁄 𑀯𑀸 𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀞𑀺𑀢𑀢𑁄 𑀯𑀸 𑀓𑁂𑀯𑀮𑀁 𑀬𑀸𑀕𑀼𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀧𑀸𑀦𑀻𑀬𑀧𑀭𑀺𑀪𑁄𑀕𑀜𑁆𑀘 𑀓𑀭𑁄𑀦𑁆𑀢𑀺, 𑀦 𑀅𑀜𑁆𑀜𑀁 𑀫𑀳𑀸𑀧𑀭𑀺𑀪𑁄𑀕𑀁, 𑀢𑀫𑁆𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄. 𑀬𑀢𑁄 𑀧𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀖𑀝𑁂 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀥𑁄𑀯𑀺𑀢𑀼𑀁, 𑀩𑁄𑀥𑀺𑀭𑀼𑀓𑁆𑀔𑁂 𑀲𑀺𑀜𑁆𑀘𑀺𑀢𑀼𑀁 𑀉𑀤𑀓𑀧𑀽𑀚𑀁 𑀓𑀸𑀢𑀼𑀁, 𑀭𑀚𑀦𑀁 𑀧𑀘𑀺𑀢𑀼𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀓𑀢𑀺𑀓𑀯𑀲𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀢𑀺𑀭𑁂𑀓𑀁 𑀕𑀡𑁆𑀳𑀦𑁆𑀢𑁄, 𑀫𑀢𑁆𑀢𑀺𑀓𑀸𑀤𑀻𑀦𑀺 𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀓𑁆𑀔𑀺𑀧𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄.

𑀲𑀘𑁂 𑀆𑀯𑀸𑀲𑀺𑀓𑀸 𑀓𑀢𑀺𑀓𑀯𑀢𑁆𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀪𑀡𑁆𑀟𑀓𑀁 𑀥𑁄𑀯𑀺𑀢𑀼𑀁 𑀯𑀸 𑀭𑀚𑀺𑀢𑀼𑀁 𑀯𑀸 𑀦 𑀤𑁂𑀦𑁆𑀢𑀺, 𑀅𑀢𑁆𑀢𑀦𑀸 𑀧𑀦 𑀅𑀜𑁆𑀜𑁂𑀲𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀓𑀢𑀺𑀓𑀸𑀬 𑀦 𑀞𑀸𑀢𑀩𑁆𑀩𑀁. 𑀬𑀢𑁆𑀢𑀓𑀁 𑀢𑁂 𑀥𑁄𑀯𑀦𑁆𑀢𑀺, 𑀢𑀢𑁆𑀢𑀓𑀁 𑀥𑁄𑀯𑀺𑀢𑀩𑁆𑀩𑀁. 𑀲𑀘𑁂 𑀲𑀗𑁆𑀖𑀲𑁆𑀲 𑀤𑁆𑀯𑁂 𑀢𑀺𑀲𑁆𑀲𑁄 𑀧𑁄𑀓𑁆𑀔𑀭𑀡𑀺𑀬𑁄 𑀯𑀸 𑀉𑀤𑀓𑀲𑁄𑀡𑁆𑀟𑀺𑀬𑁄 𑀯𑀸 𑀳𑁄𑀦𑁆𑀢𑀺, 𑀓𑀢𑀺𑀓𑀸 𑀘 𑀓𑀢𑀸 ‘‘𑀏𑀢𑁆𑀣 𑀦𑁆𑀳𑀸𑀬𑀺𑀢𑀩𑁆𑀩𑀁, 𑀇𑀢𑁄 𑀧𑀸𑀦𑀻𑀬𑀁 𑀕𑀳𑁂𑀢𑀩𑁆𑀩𑀁, 𑀇𑀥 𑀲𑀩𑁆𑀩𑀧𑀭𑀺𑀪𑁄𑀕𑁄 𑀓𑀸𑀢𑀩𑁆𑀩𑁄’’𑀢𑀺. 𑀓𑀢𑀺𑀓𑀯𑀢𑁆𑀢𑁂𑀦𑁂𑀯 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁. 𑀬𑀢𑁆𑀣 𑀓𑀢𑀺𑀓𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀩𑁆𑀩𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑀻𑀢𑀺.

𑀫𑀢𑁆𑀢𑀺𑀓𑀸𑀯𑀢𑁆𑀣𑀼𑀲𑁆𑀫𑀺𑀁 𑁋 𑀬𑀢𑁆𑀣 𑀫𑀢𑁆𑀢𑀺𑀓𑀸 𑀤𑀼𑀮𑁆𑀮𑀪𑀸 𑀳𑁄𑀢𑀺, 𑀦𑀸𑀦𑀧𑁆𑀧𑀓𑀸𑀭𑀸 𑀯𑀸 𑀯𑀡𑁆𑀡𑀫𑀢𑁆𑀢𑀺𑀓𑀸 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑀸, 𑀢𑀢𑁆𑀣 𑀣𑁄𑀓𑀸𑀧𑀺 𑀧𑀜𑁆𑀘𑀫𑀸𑀲𑀓𑀁 𑀅𑀕𑁆𑀖𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁. 𑀲𑀗𑁆𑀖𑀺𑀓𑁂 𑀧𑀦 𑀓𑀫𑁆𑀫𑁂 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀦𑀺𑀝𑁆𑀞𑀺𑀢𑁂 𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀥𑀸𑀬𑀧𑀺 𑀘𑀺𑀢𑁆𑀢𑀓𑀫𑁆𑀫𑀯𑀡𑁆𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀺𑀡𑀯𑀢𑁆𑀣𑀽𑀲𑀼 ¶ 𑁋 𑀛𑀸𑀧𑀺𑀢𑀢𑀺𑀡𑁂 𑀞𑀸𑀦𑀸𑀘𑀸𑀯𑀦𑀲𑁆𑀲 𑀅𑀪𑀸𑀯𑀸 𑀤𑀼𑀓𑁆𑀓𑀝𑀁, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀲𑀗𑁆𑀖𑁄 𑀢𑀺𑀡𑀯𑀢𑁆𑀣𑀼𑀁 𑀚𑀕𑁆𑀕𑀺𑀢𑁆𑀯𑀸 𑀲𑀗𑁆𑀖𑀺𑀓𑀁 𑀆𑀯𑀸𑀲𑀁 𑀙𑀸𑀤𑁂𑀢𑀺, 𑀧𑀼𑀦 𑀓𑀤𑀸𑀘𑀺 𑀚𑀕𑁆𑀕𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣𑀜𑁆𑀜𑁄 𑀏𑀓𑁄 𑀪𑀺𑀓𑁆𑀔𑀼 𑀯𑀢𑁆𑀢𑀲𑀻𑀲𑁂𑀦 𑀚𑀕𑁆𑀕𑀢𑀺, 𑀲𑀗𑁆𑀖𑀲𑁆𑀲𑁂𑀯𑁂𑀢𑀁. 𑀦𑁄 𑀘𑁂 𑀚𑀕𑁆𑀕𑀢𑀺, 𑀲𑀗𑁆𑀖𑁂𑀦𑁂𑀓𑁄 ¶ 𑀪𑀺𑀓𑁆𑀔𑀼 𑀯𑀢𑁆𑀢𑀩𑁆𑀩𑁄 ‘‘𑀚𑀕𑁆𑀕𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑁄 𑀘𑁂 𑀪𑀸𑀕𑀁 𑀇𑀘𑁆𑀙𑀢𑀺, 𑀪𑀸𑀕𑀁 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀪𑀸𑀕𑀁 𑀯𑀟𑁆𑀠𑁂𑀢𑀺, 𑀤𑀸𑀢𑀩𑁆𑀩𑀫𑁂𑀯. 𑀯𑀟𑁆𑀠𑁂𑀢𑀺𑀬𑁂𑀯, ‘‘𑀕𑀘𑁆𑀙 𑀚𑀕𑁆𑀕𑀺𑀢𑁆𑀯𑀸 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑁂𑀦𑀸𑀲𑀦𑀁 𑀙𑀸𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀓𑀲𑁆𑀫𑀸? 𑀦𑀝𑁆𑀞𑁂 𑀅𑀢𑁆𑀣𑁄 𑀦𑀢𑁆𑀣𑀺. 𑀤𑀤𑀦𑁆𑀢𑁂𑀳𑀺 𑀧𑀦 𑀲𑀯𑀢𑁆𑀣𑀼𑀓𑀁 𑀦 𑀤𑀸𑀢𑀩𑁆𑀩𑀁 ¶ , 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺; 𑀢𑀺𑀡𑀫𑀢𑁆𑀢𑀁 𑀧𑀦 𑀤𑀸𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀘𑁂 𑀚𑀕𑁆𑀕𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀙𑀸𑀤𑁂𑀦𑁆𑀢𑁂 𑀧𑀼𑀦 𑀲𑀗𑁆𑀖𑁄 𑀚𑀕𑁆𑀕𑀺𑀢𑀼𑀁 𑀧𑀳𑁄𑀢𑀺, ‘‘𑀢𑁆𑀯𑀁 𑀫𑀸 𑀚𑀕𑁆𑀕𑀺, 𑀲𑀗𑁆𑀖𑁄 𑀚𑀕𑁆𑀕𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄𑀢𑀺.

𑀫𑀜𑁆𑀘𑀸𑀤𑀻𑀦𑀺 𑀲𑀢𑁆𑀢 𑀯𑀢𑁆𑀣𑀽𑀦𑀺 𑀧𑀸𑀓𑀝𑀸𑀦𑁂𑀯. 𑀧𑀸𑀴𑀺𑀬𑀁 𑀧𑀦 𑀅𑀦𑀸𑀕𑀢𑀫𑁆𑀧𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑀁 𑀯𑀸 𑀭𑀼𑀓𑁆𑀔𑀢𑁆𑀣𑀫𑁆𑀪𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀧𑀸𑀤𑀕𑁆𑀖𑀦𑀓𑀁 𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀧𑀥𑀸𑀦𑀖𑀭𑀸𑀤𑀻𑀲𑀼 𑀙𑀟𑁆𑀟𑀺𑀢𑀧𑀢𑀺𑀢𑀸𑀦𑀁 𑀧𑀭𑀺𑀯𑁂𑀡𑀸𑀤𑀻𑀦𑀁 𑀓𑀼𑀝𑁆𑀝𑀫𑁆𑀧𑀺 𑀧𑀸𑀓𑀸𑀭𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀇𑀝𑁆𑀞𑀓𑀸𑀤𑀻𑀦𑀺 𑀅𑀯𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸? 𑀲𑀗𑁆𑀖𑀺𑀓𑀁 𑀦𑀸𑀫 𑀓𑀤𑀸𑀘𑀺 𑀅𑀚𑁆𑀛𑀸𑀯𑀲𑀦𑁆𑀢𑀺, 𑀓𑀤𑀸𑀘𑀺 𑀦 𑀅𑀚𑁆𑀛𑀸𑀯𑀲𑀦𑁆𑀢𑀺. 𑀧𑀘𑁆𑀘𑀦𑁆𑀢𑁂 𑀘𑁄𑀭𑀪𑀬𑁂𑀦 𑀚𑀦𑀧𑀤𑁂 𑀯𑀼𑀝𑁆𑀞𑀳𑀦𑁆𑀢𑁂 𑀙𑀟𑁆𑀟𑀺𑀢𑀯𑀺𑀳𑀸𑀭𑀸𑀤𑀻𑀲𑀼 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁂 𑀧𑀦 𑀢𑀢𑁄 𑀢𑀸𑀯𑀓𑀸𑀮𑀺𑀓𑀁 𑀳𑀭𑀦𑁆𑀢𑀺, 𑀧𑀼𑀦 𑀆𑀯𑀲𑀺𑀢𑁂𑀲𑀼 𑀘 𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽 𑀆𑀳𑀭𑀸𑀧𑁂𑀦𑁆𑀢𑀺, 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀢𑀢𑁄 𑀆𑀳𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀓𑀢𑀁 𑀳𑁄𑀢𑀺, 𑀢𑀁 𑀯𑀸 𑀢𑀤𑀕𑁆𑀖𑀦𑀓𑀁 𑀯𑀸 𑀤𑀸𑀢𑀩𑁆𑀩𑀫𑁂𑀯. ‘‘𑀧𑀼𑀦 𑀆𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀮𑀬𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁂𑀲𑀼 𑀚𑀦𑀧𑀤𑁂𑀲𑀼 𑀕𑀡𑀲𑀦𑁆𑀢𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀕𑀳𑀺𑀢𑀁 𑀳𑁄𑀢𑀺; 𑀢𑁂 𑀘𑁂 𑀅𑀦𑀼𑀚𑀸𑀦𑀦𑁆𑀢𑀺, 𑀧𑀝𑀺𑀓𑀫𑁆𑀫𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀗𑁆𑀖𑀺𑀓𑀁 𑀧𑀦 𑀕𑀭𑀼𑀪𑀡𑁆𑀟𑀁, 𑀢𑀲𑁆𑀫𑀸 𑀧𑀝𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀫𑁂𑀯.

𑁧𑁫𑁭. 𑀯𑀺𑀳𑀸𑀭𑀧𑀭𑀺𑀪𑁄𑀕𑀯𑀢𑁆𑀣𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀯𑀓𑀸𑀮𑀺𑀓𑀁 𑀳𑀭𑀺𑀢𑀼𑀦𑁆𑀢𑀺 𑀏𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀢𑀸𑀯𑀓𑀸𑀮𑀺𑀓𑀁 𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀏𑀓𑀫𑁆𑀧𑀺 𑀤𑁆𑀯𑁂𑀧𑀺 𑀫𑀸𑀲𑁂 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀕𑀢𑀸𑀕𑀢𑀸𑀦𑀁 𑀯𑀼𑀟𑁆𑀠𑀢𑀭𑀸𑀦𑀁 𑀤𑁂𑀢𑀺, 𑀦𑀧𑁆𑀧𑀝𑀺𑀩𑀸𑀳𑀢𑀺 ¶ , 𑀢𑀲𑁆𑀲 𑀢𑀲𑁆𑀫𑀺𑀁 𑀦𑀝𑁆𑀞𑁂𑀧𑀺 𑀚𑀺𑀡𑁆𑀡𑁂𑀧𑀺 𑀘𑁄𑀭𑀸𑀯𑀳𑀝𑁂𑀧𑀺 𑀕𑀻𑀯𑀸 𑀦 𑀳𑁄𑀢𑀺. 𑀯𑀲𑀺𑀢𑁆𑀯𑀸 𑀧𑀦 𑀕𑀘𑁆𑀙𑀦𑁆𑀢𑁂𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀬𑁄 𑀧𑀦 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀕𑀢𑀸𑀕𑀢𑀸𑀦𑀁 𑀯𑀼𑀟𑁆𑀠𑀢𑀭𑀸𑀦𑀁 𑀦 ¶ 𑀤𑁂𑀢𑀺, 𑀢𑀲𑁆𑀫𑀺𑀁 𑀦𑀝𑁆𑀞𑁂 𑀢𑀲𑁆𑀲 𑀕𑀻𑀯𑀸 𑀳𑁄𑀢𑀺. 𑀅𑀜𑁆𑀜𑀁 𑀧𑀦 𑀆𑀯𑀸𑀲𑀁 𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀲𑀘𑁂 𑀢𑀢𑁆𑀣 𑀯𑀼𑀟𑁆𑀠𑀢𑀭𑁄 𑀆𑀕𑀦𑁆𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀢𑀺, ‘‘𑀫𑀬𑀸 𑀇𑀤𑀁 𑀅𑀲𑀼𑀓𑀸𑀯𑀸𑀲𑀢𑁄 𑀦𑀸𑀫 𑀆𑀳𑀝𑀁, 𑀕𑀘𑁆𑀙𑀸𑀫𑀺, 𑀦𑀁 𑀧𑀸𑀓𑀢𑀺𑀓𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑁄 𑀪𑀺𑀓𑁆𑀔𑀼 ‘‘𑀅𑀳𑀁 𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀢𑀲𑁆𑀲 𑀪𑀸𑀭𑀁 𑀓𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀘𑀫𑁆𑀧𑀸𑀯𑀢𑁆𑀣𑀼𑀫𑁆𑀳𑀺 𑁋 𑀢𑁂𑀓𑀝𑀼𑀮𑀬𑀸𑀕𑀽𑀢𑀺 𑀢𑀺𑀮𑀢𑀡𑁆𑀟𑀼𑀮𑀫𑀼𑀕𑁆𑀕𑁂𑀳𑀺 𑀯𑀸 𑀢𑀺𑀮𑀢𑀡𑁆𑀟𑀼𑀮𑀫𑀸𑀲𑁂𑀳𑀺 𑀯𑀸 𑀢𑀺𑀮𑀢𑀡𑁆𑀟𑀼𑀮𑀓𑀼𑀮𑀢𑁆𑀣𑁂𑀳𑀺 𑀯𑀸 𑀢𑀺𑀮𑀢𑀡𑁆𑀟𑀼𑀮𑁂𑀳𑀺 𑀲𑀤𑁆𑀥𑀺𑀁 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀧𑀭𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀻𑀳𑀺 𑀓𑀢𑀸, 𑀏𑀢𑀁 𑀓𑀺𑀭 𑀇𑀫𑁂𑀳𑀺 𑀢𑀻𑀳𑀺 𑀘𑀢𑀼𑀪𑀸𑀕𑀉𑀤𑀓𑀲𑀫𑁆𑀪𑀺𑀦𑁆𑀦𑁂 𑀔𑀻𑀭𑁂 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀓𑀭𑁄𑀦𑁆𑀢𑀺.

𑀭𑀸𑀚𑀕𑀳𑀯𑀢𑁆𑀣𑀼𑀫𑁆𑀳𑀺 ¶ 𑁋 𑀫𑀥𑀼𑀕𑁄𑀴𑀓𑁄𑀢𑀺 𑀅𑀢𑀺𑀭𑀲𑀓𑀧𑀽𑀯𑁄 𑀯𑀼𑀘𑁆𑀘𑀢𑀺; ‘‘𑀫𑀥𑀼𑀲𑀻𑀲𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀢𑁆𑀣𑀼𑀤𑁆𑀯𑀬𑁂𑀧𑀺 𑀑𑀤𑀦𑀪𑀸𑀚𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁫𑁮. 𑀅𑀚𑁆𑀚𑀼𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀏𑀢𑀤𑀯𑁄𑀘𑀸𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀅𑀯𑁄𑀘. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀆𑀬𑀲𑁆𑀫𑀢𑁄 𑀅𑀚𑁆𑀚𑀼𑀓𑀲𑁆𑀲 𑀧𑀓𑁆𑀔𑁄𑀢𑀺 𑀦 𑀅𑀕𑀢𑀺𑀕𑀫𑀦𑀯𑀲𑁂𑀦 𑀧𑀓𑁆𑀔𑁄, 𑀅𑀧𑀺 𑀘 𑀔𑁄 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀸𑀬 𑀮𑀚𑁆𑀚𑀻𑀅𑀦𑀼𑀕𑁆𑀕𑀳𑁂𑀦 𑀯𑀺𑀦𑀬𑀸𑀦𑀼𑀕𑁆𑀕𑀳𑁂𑀦 𑀘 𑀣𑁂𑀭𑁄 𑀧𑀓𑁆𑀔𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁧𑁫𑁯. 𑀩𑀸𑀭𑀸𑀡𑀲𑀻𑀯𑀢𑁆𑀣𑀼𑀲𑁆𑀫𑀺𑀁 𑁋 𑀘𑁄𑀭𑁂𑀳𑀺 𑀉𑀧𑀤𑁆𑀤𑀼𑀢𑀦𑁆𑀢𑀺 𑀘𑁄𑀭𑁂𑀳𑀺 𑀯𑀺𑀮𑀼𑀢𑁆𑀢𑀁. 𑀇𑀤𑁆𑀥𑀺𑀬𑀸 𑀆𑀦𑁂𑀢𑁆𑀯𑀸 𑀧𑀸𑀲𑀸𑀤𑁂 𑀞𑀧𑁂𑀲𑀻𑀢𑀺 𑀣𑁂𑀭𑁄 𑀓𑀺𑀭 𑀢𑀁 𑀓𑀼𑀮𑀁 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 𑀆𑀯𑀝𑁆𑀝𑀦𑁆𑀢𑀁 𑀯𑀺𑀯𑀝𑁆𑀝𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀓𑀼𑀮𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀧𑀲𑀸𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸 ‘‘𑀢𑁂𑀲𑀁𑀬𑁂𑀯 𑀧𑀸𑀲𑀸𑀤𑀁 𑀤𑀸𑀭𑀓𑀸𑀦𑀁 𑀲𑀫𑀻𑀧𑁂 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀤𑀸𑀭𑀓𑀸 ‘‘𑀅𑀫𑁆𑀳𑀸𑀓𑀁 𑀧𑀸𑀲𑀸𑀤𑁄’’𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀁𑀲𑀼. 𑀢𑀢𑁄 𑀣𑁂𑀭𑁄 𑀇𑀤𑁆𑀥𑀺𑀁 𑀧𑀝𑀺𑀲𑀁𑀳𑀭𑀺, 𑀧𑀸𑀲𑀸𑀤𑁄𑀧𑀺 ¶ 𑀲𑀓𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀯𑁄𑀳𑀸𑀭𑀯𑀲𑁂𑀦 𑀧𑀦 𑀯𑀼𑀢𑁆𑀢𑀁 ‘‘𑀢𑁂 𑀤𑀸𑀭𑀓𑁂 𑀇𑀤𑁆𑀥𑀺𑀬𑀸 𑀆𑀦𑁂𑀢𑁆𑀯𑀸 𑀧𑀸𑀲𑀸𑀤𑁂 𑀞𑀧𑁂𑀲𑀻’’𑀢𑀺. 𑀇𑀤𑁆𑀥𑀺𑀯𑀺𑀲𑀬𑁂𑀢𑀺 𑀈𑀤𑀺𑀲𑀸𑀬 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀧𑀦 𑀦 𑀯𑀝𑁆𑀝𑀢𑀺.

𑁧𑁬𑁦-𑁧. 𑀅𑀯𑀲𑀸𑀦𑁂 𑀯𑀢𑁆𑀣𑀼𑀤𑁆𑀯𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀸𑀬𑀁 ¶ 𑀅𑀦𑀼𑀲𑀸𑀲𑀦𑀻 𑁋

𑀤𑀼𑀢𑀺𑀬𑀁 𑀅𑀤𑀼𑀢𑀺𑀬𑁂𑀦, 𑀬𑀁 𑀚𑀺𑀦𑁂𑀦 𑀧𑀓𑀸𑀲𑀺𑀢𑀁;

𑀧𑀭𑀸𑀚𑀺𑀢𑀓𑀺𑀮𑁂𑀲𑁂𑀦, 𑀧𑀸𑀭𑀸𑀚𑀺𑀓𑀫𑀺𑀤𑀁 𑀇𑀥.

𑀲𑀺𑀓𑁆𑀔𑀸𑀧𑀤𑀁 𑀲𑀫𑀁 𑀢𑁂𑀦, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀯𑀺𑀚𑁆𑀚𑀢𑀺;

𑀅𑀦𑁂𑀓𑀦𑀬𑀯𑁄𑀓𑀺𑀡𑁆𑀡𑀁, 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁.

𑀢𑀲𑁆𑀫𑀸 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂, 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸;

𑀯𑀺𑀦𑀬𑀸𑀦𑀼𑀕𑁆𑀕𑀳𑁂𑀦𑁂𑀢𑁆𑀣, 𑀓𑀭𑁄𑀦𑁆𑀢𑁂𑀦 𑀯𑀺𑀦𑀺𑀘𑁆𑀙𑀬𑀁.

𑀧𑀸𑀴𑀺𑀁 ¶ 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀲𑀸𑀥𑀺𑀧𑁆𑀧𑀸𑀬𑀫𑀲𑁂𑀲𑀢𑁄;

𑀑𑀕𑀬𑁆𑀳 𑀅𑀧𑁆𑀧𑀫𑀢𑁆𑀢𑁂𑀦, 𑀓𑀭𑀡𑀻𑀬𑁄 𑀯𑀺𑀦𑀺𑀘𑁆𑀙𑀬𑁄.

𑀆𑀧𑀢𑁆𑀢𑀺𑀤𑀲𑁆𑀲𑀦𑀼𑀲𑁆𑀲𑀸𑀳𑁄, 𑀦 𑀓𑀢𑁆𑀢𑀩𑁆𑀩𑁄 𑀓𑀼𑀤𑀸𑀘𑀦𑀁;

𑀧𑀲𑁆𑀲𑀺𑀲𑁆𑀲𑀸𑀫𑀺 𑀅𑀦𑀸𑀧𑀢𑁆𑀢𑀺-𑀫𑀺𑀢𑀺 𑀓𑀬𑀺𑀭𑀸𑀣 𑀫𑀸𑀦𑀲𑀁.

𑀧𑀲𑁆𑀲𑀺𑀢𑁆𑀯𑀸𑀧𑀺 𑀘 𑀆𑀧𑀢𑁆𑀢𑀺𑀁, 𑀅𑀯𑀢𑁆𑀯𑀸𑀯 𑀧𑀼𑀦𑀧𑁆𑀧𑀼𑀦𑀁;

𑀯𑀻𑀫𑀁𑀲𑀺𑀢𑁆𑀯𑀸𑀣 𑀯𑀺𑀜𑁆𑀜𑀽𑀳𑀺, 𑀲𑀁𑀲𑀦𑁆𑀤𑀺𑀢𑁆𑀯𑀸 𑀘 𑀢𑀁 𑀯𑀤𑁂.

𑀓𑀧𑁆𑀧𑀺𑀬𑁂𑀧𑀺 𑀘 𑀯𑀢𑁆𑀣𑀼𑀲𑁆𑀫𑀺𑀁, 𑀘𑀺𑀢𑁆𑀢𑀲𑁆𑀲 𑀮𑀳𑀼𑀯𑀢𑁆𑀢𑀺𑀦𑁄;

𑀯𑀲𑁂𑀦 𑀲𑀸𑀫𑀜𑁆𑀜𑀕𑀼𑀡𑀸, 𑀘𑀯𑀦𑁆𑀢𑀻𑀥 𑀧𑀼𑀣𑀼𑀚𑁆𑀚𑀦𑀸.

𑀢𑀲𑁆𑀫𑀸 𑀧𑀭𑀧𑀭𑀺𑀓𑁆𑀔𑀸𑀭𑀁, 𑀆𑀲𑀻𑀯𑀺𑀲𑀫𑀺𑀯𑁄𑀭𑀕𑀁;

𑀅𑀕𑁆𑀕𑀺𑀁 𑀯𑀺𑀬 𑀘 𑀲𑀫𑁆𑀧𑀲𑁆𑀲𑀁, 𑀦𑀸𑀫𑀲𑁂𑀬𑁆𑀬 𑀯𑀺𑀘𑀓𑁆𑀔𑀡𑁄𑀢𑀺.

𑀧𑀸𑀭𑀸𑀚𑀺𑀓𑀓𑀡𑁆𑀟-𑀅𑀝𑁆𑀞𑀓𑀣𑀸𑀬

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀭𑀸𑀚𑀺𑀓𑀓𑀡𑁆𑀟-𑀅𑀝𑁆𑀞𑀓𑀣𑀸 (𑀤𑀼𑀢𑀺𑀬𑁄 𑀪𑀸𑀕𑁄)

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑀢𑀢𑀺𑀬𑀁 ¶ ¶ ¶ 𑀢𑀻𑀳𑀺 𑀲𑀼𑀤𑁆𑀥𑁂𑀦, 𑀬𑀁 𑀩𑀼𑀤𑁆𑀥𑁂𑀦 𑀯𑀺𑀪𑀸𑀯𑀺𑀢𑀁;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀲𑁆𑀲𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸

𑁧𑁬𑁨. 𑀢𑁂𑀦 ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀏𑀢𑁆𑀣 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀯𑁄𑀳𑀸𑀭𑁂 𑀦𑀕𑀭𑁂. 𑀢𑀜𑁆𑀳𑀺 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀘 𑀦𑀕𑀭𑀁 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑁂𑀬𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑁂𑀧𑀼𑀮𑁆𑀮𑀁 𑀧𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦 𑀫𑀸𑀳 𑁋 ‘‘𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺, 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 ¶ 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀅𑀲𑀼𑀪𑀸𑀓𑀸𑀭𑀲𑀦𑁆𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀁 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀺𑀬𑀓𑀣𑀁 𑀓𑀣𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂. ¶ … 𑀫𑀼𑀢𑁆𑀢’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀘𑀦𑁆𑀤𑀦𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀽𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀻𑀦𑀺 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺. 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀁 𑀅𑀲𑁆𑀲𑀺𑀭𑀻𑀓𑀤𑀲𑁆𑀲𑀦𑀁 𑀓𑁂𑀲𑀮𑁄𑀫𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺𑀁𑀬𑁂𑀯 𑀧𑀲𑁆𑀲𑀢𑀺. 𑀢𑀲𑁆𑀫𑀸 𑀦 𑀏𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀓𑀭𑀡𑀻𑀬𑁄. 𑀬𑁂𑀧𑀺 𑀳𑀺 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀚𑀸𑀢𑀸 𑀓𑁂𑀲𑀸 𑀦𑀸𑀫, 𑀢𑁂𑀧𑀺 𑀅𑀲𑀼𑀪𑀸 𑀘𑁂𑀯 𑀅𑀲𑀼𑀘𑀺𑀦𑁄 𑀘 𑀧𑀝𑀺𑀓𑁆𑀓𑀽𑀮𑀸 𑀘. 𑀲𑁄 𑀘 𑀦𑁂𑀲𑀁 𑀅𑀲𑀼𑀪𑀸𑀲𑀼𑀘𑀺𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀯𑀡𑁆𑀡𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀮𑁄𑀫𑀸𑀤𑀻𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁮𑁨) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀕𑀯𑀸 𑀏𑀓𑀫𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺.

𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀯𑀲𑁂𑀦 𑀅𑀲𑀼𑀪𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀪𑀸𑀚𑀦𑀻𑀬𑁂𑀦 𑀢𑀁 𑀯𑀺𑀪𑀚𑀦𑁆𑀢𑁄 𑀯𑀡𑁆𑀡𑁂𑀦𑁆𑀢𑁄 𑀲𑀁𑀯𑀡𑁆𑀡𑁂𑀦𑁆𑀢𑁄 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺. 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀬𑀸 𑀅𑀬𑀁 𑀓𑁂𑀲𑀸𑀤𑀻𑀲𑀼 𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀽𑀲𑀼 𑀅𑀲𑀼𑀪𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀨𑀸𑀢𑀺𑀓𑀫𑁆𑀫𑀁, 𑀢𑀲𑁆𑀲𑀸 𑀅𑀲𑀼𑀪𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀲𑀼𑀪𑀪𑀸𑀯𑀦𑀸𑀪𑀺𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂 ¶ , 𑀪𑀺𑀓𑁆𑀔𑀼 𑀓𑁂𑀲𑀸𑀤𑀻𑀲𑀼 𑀯𑀸 𑀯𑀢𑁆𑀣𑀽𑀲𑀼 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀁 𑀛𑀸𑀦𑀁 ¶ 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀫𑀜𑁆𑀚𑀽𑀲𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀢𑀢𑁆𑀭𑀺𑀫𑀸𑀦𑀺 ¶ 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀤𑀲 𑀮𑀓𑁆𑀔𑀡𑀸𑀦𑀺 𑁋 𑀧𑀸𑀭𑀺𑀧𑀦𑁆𑀣𑀺𑀓𑀢𑁄 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺, 𑀫𑀚𑁆𑀛𑀺𑀫𑀲𑁆𑀲 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀧𑀓𑁆𑀔𑀦𑁆𑀤𑀦𑀁, 𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸𑀢𑀺.

𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑁋 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 ¶ , 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘’.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺 ¶ . 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀞𑀫𑀁 𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀘𑀢𑀼𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘. ‘‘𑀏𑀯𑀁 𑀢𑀺𑀯𑀺𑀥𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀓𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 ¶ 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀜𑁆𑀘𑁂𑀯 𑀳𑁄𑀢𑀺 𑀯𑀺𑀘𑀸𑀭𑀲𑀫𑁆𑀧𑀦𑁆𑀦𑀜𑁆𑀘 𑀧𑀻𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀼𑀔𑀲𑀫𑁆𑀧𑀦𑁆𑀦𑀜𑁆𑀘 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀜𑁆𑀘 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀜𑁆𑀘 𑀲𑀢𑀺𑀲𑀫𑁆𑀧𑀦𑁆𑀦𑀜𑁆𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀜𑁆𑀘𑀸’’𑀢𑀺 (𑀧𑀝𑀺. 𑀭𑁄. 𑁧.𑁧𑁫𑁮).

𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 ‘‘𑀏𑀯𑀫𑁆𑀧𑀺 𑀇𑀢𑁆𑀣𑀫𑁆𑀧𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸 𑀆𑀤𑀺𑀲𑀦𑁆𑀢𑁄 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀦𑀺𑀲𑀁𑀲𑀁 𑀓𑀣𑁂𑀢𑀺, 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀪𑀺𑀓𑁆𑀔𑀼𑀦𑁄 ¶ 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀝𑁆𑀝𑀢𑀺, 𑀦 𑀲𑀫𑁆𑀧𑀲𑀸𑀭𑀻𑀬𑀢𑀻’’𑀢𑀺 (𑀅. 𑀦𑀺. 𑁭.𑁪𑁯).

𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀅𑀳𑀁 𑀪𑀺𑀓𑁆𑀔𑀯𑁂 𑀏𑀓𑀁 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁 𑀦𑀺𑀮𑀻𑀬𑀺𑀢𑀼𑀁 𑀏𑀓𑁄𑀯 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑀸 𑀧𑀬𑀼𑀢𑁆𑀢𑀯𑀸𑀘𑀁 𑀅𑀓𑀢𑁆𑀯𑀸 𑀫𑀫𑀢𑁆𑀣𑀸𑀬 𑀲𑀤𑁆𑀥𑁂𑀲𑀼 𑀓𑀼𑀮𑁂𑀲𑀼 𑀧𑀝𑀺𑀬𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀁 𑀦𑀻𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀉𑀧𑀦𑀸𑀫𑁂𑀢𑀺, 𑀢𑀁 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀦𑀫𑁆𑀳𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺.

𑀓𑀲𑁆𑀫𑀸 𑀧𑀦 𑀏𑀯𑀫𑀸𑀳𑀸𑀢𑀺? 𑀅𑀢𑀻𑀢𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀫𑀳𑀢𑀻𑀳𑀺 𑀤𑀡𑁆𑀟𑀯𑀸𑀕𑀼𑀭𑀸𑀳𑀺 𑀅𑀭𑀜𑁆𑀜𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀏𑀓𑀢𑁄𑀬𑁂𑀯 𑀬𑀸𑀯𑀚𑀻𑀯𑀁 𑀫𑀺𑀕𑀧𑀓𑁆𑀔𑀺𑀖𑀸𑀢𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀺𑀭𑀬𑁂 𑀉𑀧𑀧𑀦𑁆𑀦𑀸; 𑀢𑁂 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀓𑁂𑀦𑀘𑀺𑀤𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀦𑁆𑀦𑀸 𑀓𑀮𑁆𑀬𑀸𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀩𑁆𑀩𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀁𑀲𑀼; 𑀢𑁂𑀲𑀁 𑀢𑀢𑁄 𑀫𑀽𑀮𑀸𑀓𑀼𑀲𑀮𑀓𑀫𑁆𑀫𑀢𑁄 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀅𑀧𑀭𑀸𑀧𑀭𑀘𑁂𑀢𑀦𑀸 𑀢𑀲𑁆𑀫𑀺𑀁 𑀅𑀤𑁆𑀥𑀫𑀸𑀲𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀘 𑀧𑀭𑀽𑀧𑀓𑁆𑀓𑀫𑁂𑀦 𑀘 𑀚𑀻𑀯𑀢𑀼𑀧𑀘𑁆𑀙𑁂𑀤𑀸𑀬 𑀑𑀓𑀸𑀲𑀫𑀓𑀸𑀲𑀺, 𑀢𑀁 𑀪𑀕𑀯𑀸 𑀅𑀤𑁆𑀤𑀲. 𑀓𑀫𑁆𑀫𑀯𑀺𑀧𑀸𑀓𑁄 𑀦𑀸𑀫 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀁. 𑀢𑁂𑀲𑀼 𑀘 𑀪𑀺𑀓𑁆𑀔𑀽𑀲𑀼 𑀧𑀼𑀣𑀼𑀚𑁆𑀚𑀦𑀸𑀧𑀺 𑀅𑀢𑁆𑀣𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀅𑀦𑀸𑀕𑀸𑀫𑀻𑀔𑀻𑀡𑀸𑀲𑀯𑀸𑀧𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸, 𑀇𑀢𑀭𑁂 𑀅𑀭𑀺𑀬𑀲𑀸𑀯𑀓𑀸 ¶ 𑀦𑀺𑀬𑀢𑀕𑀢𑀺𑀓𑀸 𑀲𑀼𑀕𑀢𑀺𑀧𑀭𑀸𑀬𑀡𑀸, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀕𑀢𑀺 𑀅𑀦𑀺𑀬𑀢𑀸. 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀇𑀫𑁂 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁂𑀦 𑀫𑀭𑀡𑀪𑀬𑀪𑀻𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀕𑀢𑀺𑀁 𑀯𑀺𑀲𑁄𑀥𑁂𑀢𑀼𑀁, 𑀳𑀦𑁆𑀤 𑀦𑁂𑀲𑀁 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀫𑀺. 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑁂 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀢𑀸𑀬 𑀕𑀢𑀺𑀯𑀺𑀲𑁄𑀥𑀦𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀦𑁂𑀲𑀁 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸 𑀲𑀸𑀢𑁆𑀣𑀺𑀓𑀸 ¶ 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁄 𑀢𑁂𑀲𑀁 𑀅𑀦𑀼𑀕𑁆𑀕𑀳𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀲𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦, 𑀦𑁄 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀸𑀥𑀺𑀧𑁆𑀧𑀸𑀬𑁂𑀦. 𑀓𑀣𑁂𑀢𑁆𑀯𑀸 𑀘 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑀁 𑀇𑀫𑀁 𑀅𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀽 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, ‘𑀅𑀚𑁆𑀚 𑀏𑀓𑁄 𑀪𑀺𑀓𑁆𑀔𑀼 𑀫𑀢𑁄, 𑀅𑀚𑁆𑀚 𑀤𑁆𑀯𑁂…𑀧𑁂… 𑀅𑀚𑁆𑀚 𑀤𑀲𑀸’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑁆𑀲𑀦𑁆𑀢𑀺. 𑀅𑀬𑀜𑁆𑀘 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀲𑀓𑁆𑀓𑀸 𑀫𑀬𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀧𑀝𑀺𑀩𑀸𑀳𑀺𑀢𑀼𑀁. 𑀲𑁆𑀯𑀸𑀳𑀁 𑀢𑀁 𑀲𑀼𑀢𑁆𑀯𑀸𑀧𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺? 𑀓𑀺𑀁 𑀫𑁂 𑀅𑀦𑀢𑁆𑀣𑀓𑁂𑀦 𑀅𑀦𑀬𑀩𑁆𑀬𑀲𑀦𑁂𑀦 𑀲𑀼𑀢𑁂𑀦? 𑀳𑀦𑁆𑀤𑀸𑀳𑀁 𑀪𑀺𑀓𑁆𑀔𑀽𑀦𑀁 𑀅𑀤𑀲𑁆𑀲𑀦𑀁 𑀉𑀧𑀕𑀘𑁆𑀙𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀢𑀺𑀲𑀮𑁆𑀮𑀻𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸’’𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁 𑀏𑀯𑀁 𑀯𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁄’’𑀢𑀺. 𑀧𑀭𑁂 𑀓𑀺𑀭 𑀪𑀕𑀯𑀦𑁆𑀢𑀁 𑀉𑀧𑀯𑀤𑀺𑀲𑁆𑀲𑀦𑁆𑀢𑀺 𑁋 ‘‘𑀅𑀬𑀁 ‘𑀲𑀩𑁆𑀩𑀜𑁆𑀜𑀽, 𑀅𑀳𑀁 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀻’𑀢𑀺 𑀧𑀝𑀺𑀚𑀸𑀦𑀫𑀸𑀦𑁄 𑀅𑀢𑁆𑀢𑀦𑁄𑀧𑀺 𑀲𑀸𑀯𑀓𑁂 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑁂𑀦𑁆𑀢𑁂 𑀦𑀺𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀺𑀫𑀜𑁆𑀜𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? 𑀢𑀢𑁆𑀣 𑀧𑀡𑁆𑀟𑀺𑀢𑀸 𑀯𑀓𑁆𑀔𑀦𑁆𑀢𑀺 𑁋 ‘‘𑀪𑀕𑀯𑀸 𑀧𑀝𑀺𑀲𑀮𑁆𑀮𑀸𑀦𑀫𑀦𑀼𑀬𑀼𑀢𑁆𑀢𑁄 𑀦𑀬𑀺𑀫𑀁 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀓𑁄𑀘𑀺𑀲𑁆𑀲 𑀆𑀭𑁄𑀘𑀬𑀺𑀢𑀸𑀧𑀺 𑀦𑀢𑁆𑀣𑀺, 𑀲𑀘𑁂 𑀚𑀸𑀦𑁂𑀬𑁆𑀬 𑀅𑀤𑁆𑀥𑀸 𑀦𑀺𑀯𑀸𑀭𑁂𑀬𑁆𑀬𑀸’’𑀢𑀺. 𑀇𑀤𑀁 𑀧𑀦 𑀇𑀘𑁆𑀙𑀸𑀫𑀢𑁆𑀢𑀁, 𑀧𑀞𑀫𑀫𑁂𑀯𑁂𑀢𑁆𑀣 𑀓𑀸𑀭𑀡𑀁. 𑀦𑀸𑀲𑁆𑀲𑀼𑀥𑀸𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀼𑀥𑀸’’𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄; 𑀦𑁂𑀯 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁂𑀓𑁂𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀯𑁄𑀓𑀸𑀭𑁄 𑀅𑀲𑁆𑀲𑀸𑀢𑀺 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁄; 𑀅𑀦𑁂𑀓𑀸𑀓𑀸𑀭𑀯𑁄𑀓𑀺𑀡𑁆𑀡𑁄 𑀅𑀦𑁂𑀓𑀓𑀸𑀭𑀡𑀲𑀫𑁆𑀫𑀺𑀲𑁆𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄 𑀲𑁄? 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀢𑀁 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀝𑁆𑀝𑀻𑀬𑀦𑁆𑀢𑀻𑀢𑀺 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀸 𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺 ¶ . 𑀳𑀭𑀸𑀬𑀦𑁆𑀢𑀻𑀢𑀺 𑀮𑀚𑁆𑀚𑀦𑁆𑀢𑀺. 𑀚𑀺𑀕𑀼𑀘𑁆𑀙𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀚𑀺𑀕𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀫𑀡𑁆𑀟𑀦𑀓𑀧𑀓𑀢𑀺𑀓𑁄. 𑀲𑀻𑀲𑀁𑀦𑁆𑀳𑀸𑀢𑁄𑀢𑀺 ¶ 𑀲𑀻𑀲𑁂𑀦 𑀲𑀤𑁆𑀥𑀺𑀁 𑀦𑁆𑀳𑀸𑀢𑁄. 𑀤𑀳𑀭𑁄 𑀬𑀼𑀯𑀸𑀢𑀺 𑀘𑁂𑀢𑁆𑀣 𑀤𑀳𑀭𑀯𑀘𑀦𑁂𑀦 𑀧𑀞𑀫𑀬𑁄𑀩𑁆𑀩𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀬𑁄𑀩𑁆𑀩𑀦𑁂 𑀳𑀺 𑀲𑀢𑁆𑀢𑀸 𑀯𑀺𑀲𑁂𑀲𑁂𑀦 𑀫𑀡𑁆𑀟𑀦𑀓𑀚𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀲𑀻𑀲𑀁𑀦𑁆𑀳𑀸𑀢𑁄𑀢𑀺 𑀇𑀫𑀺𑀦𑀸 𑀫𑀡𑁆𑀟𑀦𑀸𑀦𑀼𑀬𑁄𑀕𑀓𑀸𑀮𑀁. 𑀬𑀼𑀯𑀸𑀧𑀺 𑀳𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀁𑀓𑀺𑀮𑀺𑀝𑁆𑀞𑀲𑀭𑀻𑀭𑁄 𑀦 ¶ 𑀫𑀡𑁆𑀟𑀦𑀸𑀦𑀼𑀬𑀼𑀢𑁆𑀢𑁄 𑀳𑁄𑀢𑀺; 𑀲𑀻𑀲𑀁𑀦𑁆𑀳𑀸𑀢𑁄 𑀧𑀦 𑀲𑁄 𑀫𑀡𑁆𑀟𑀦𑀫𑁂𑀯𑀸𑀦𑀼𑀬𑀼𑀜𑁆𑀚𑀢𑀺. 𑀅𑀳𑀺𑀓𑀼𑀡𑀧𑀸𑀤𑀻𑀦𑀺 𑀤𑀝𑁆𑀞𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀓𑁂𑀦𑀘𑀺𑀤𑁂𑀯 𑀧𑀘𑁆𑀘𑀢𑁆𑀣𑀺𑀓𑁂𑀦 𑀆𑀦𑁂𑀢𑁆𑀯𑀸 𑀓𑀡𑁆𑀞𑁂 𑀩𑀤𑁆𑀥𑁂𑀦 𑀧𑀝𑀺𑀫𑀼𑀓𑁆𑀓𑁂𑀦 𑀬𑀣𑀸 𑀅𑀝𑁆𑀝𑀻𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀢𑁂 𑀪𑀺𑀓𑁆𑀔𑀽 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸 𑀳𑀭𑀸𑀬𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀢𑀁 𑀓𑀼𑀡𑀧𑀁 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀢𑀸𑀬 𑀅𑀢𑁆𑀢𑀦𑁄 𑀓𑀸𑀬𑀁 𑀧𑀭𑀺𑀘𑁆𑀘𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀲𑀢𑁆𑀣𑀁 𑀆𑀤𑀸𑀬 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺. ‘‘𑀢𑁆𑀯𑀁 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺; 𑀅𑀳𑀁 𑀢’’𑀦𑁆𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺.

𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀦𑁆𑀢𑀺 𑀫𑀺𑀕𑀮𑀡𑁆𑀟𑀺𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁; 𑀲𑀫𑀡𑀓𑀼𑀢𑁆𑀢𑀓𑁄𑀢𑀺 𑀲𑀫𑀡𑀯𑁂𑀲𑀥𑀸𑀭𑀓𑁄. 𑀲𑁄 𑀓𑀺𑀭 𑀲𑀺𑀔𑀸𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀻𑀲𑀁 𑀫𑀼𑀡𑁆𑀟𑁂𑀢𑁆𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀅𑀁𑀲𑁂 𑀓𑀢𑁆𑀯𑀸 𑀯𑀺𑀳𑀸𑀭𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀺𑀖𑀸𑀲𑀸𑀤𑀪𑀸𑀯𑁂𑀦 𑀚𑀻𑀯𑀢𑀺. 𑀢𑀫𑁆𑀧𑀺 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀦𑁄𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀲𑀸𑀥𑀼 𑀆𑀯𑀼𑀲𑁄 𑀅𑀫𑁆𑀳𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀅𑀭𑀺𑀬𑀸 𑀦𑁂𑀯 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑀺𑀁𑀲𑀼 𑀦 𑀲𑀫𑀸𑀤𑀧𑁂𑀲𑀼𑀁, 𑀦 𑀲𑀫𑀦𑀼𑀜𑁆𑀜𑀸 𑀅𑀳𑁂𑀲𑀼𑀁. 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀲𑀩𑁆𑀩𑀫𑀓𑀁𑀲𑀼. 𑀮𑁄𑀳𑀺𑀢𑀓𑀦𑁆𑀢𑀺 𑀮𑁄𑀳𑀺𑀢𑀫𑀓𑁆𑀔𑀺𑀢𑀁. 𑀬𑁂𑀦 𑀯𑀕𑁆𑀕𑀼𑀫𑀼𑀤𑀸𑀦𑀤𑀻𑀢𑀺 𑀯𑀕𑁆𑀕𑀼𑀫𑀢𑀸 𑀮𑁄𑀓𑀲𑁆𑀲 𑀧𑀼𑀜𑁆𑀜𑀲𑀫𑁆𑀫𑀢𑀸 𑀦𑀤𑀻. 𑀲𑁄𑀧𑀺 𑀓𑀺𑀭 ‘‘𑀢𑀁 𑀧𑀸𑀧𑀁 𑀢𑀢𑁆𑀣 𑀧𑀯𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀕𑀢𑁄, 𑀦𑀤𑀺𑀬𑀸 𑀆𑀦𑀼𑀪𑀸𑀯𑁂𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀁 𑀧𑀳𑀻𑀦𑀁 𑀦𑀸𑀫 𑀦𑀢𑁆𑀣𑀺.

𑁧𑁬𑁩. 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀢𑁂𑀲𑀼 𑀓𑀺𑀭 𑀪𑀺𑀓𑁆𑀔𑀽𑀲𑀼 𑀓𑁂𑀦𑀘𑀺𑀧𑀺 𑀓𑀸𑀬𑀯𑀺𑀓𑀸𑀭𑁄 𑀯𑀸 ¶ 𑀯𑀘𑀻𑀯𑀺𑀓𑀸𑀭𑁄 𑀯𑀸 𑀦 𑀓𑀢𑁄, 𑀲𑀩𑁆𑀩𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀁 𑀅𑀦𑀼𑀲𑁆𑀲𑀭𑀢𑁄 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺𑀬𑁂𑀯. 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀢𑀲𑁆𑀲𑁂𑀯 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀲𑀪𑀸𑀯𑀦𑀺𑀬𑀫𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 ¶ . 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀦 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺. 𑀅𑀮𑀸𑀪𑀸 𑀯𑀢 𑀫𑁂𑀢𑀺𑀆𑀤𑀺 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀮𑀸𑀪𑀸 𑀯𑀢 𑀫𑁂𑀢𑀺 𑀆𑀬𑀢𑀺𑀁 𑀤𑀸𑀦𑀺 𑀫𑀫 𑀳𑀺𑀢𑀲𑀼𑀔𑀮𑀸𑀪𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺. ‘‘𑀦 𑀯𑀢 𑀫𑁂 𑀮𑀸𑀪𑀸’’𑀢𑀺𑀇𑀫𑀺𑀦𑀸 𑀧𑀦 𑀢𑀫𑁂𑀯𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂𑀧𑀺 𑀓𑁄𑀘𑀺 ‘‘𑀮𑀸𑀪𑀸 𑀢𑁂’’𑀢𑀺 𑀯𑀤𑁂𑀬𑁆𑀬, 𑀢𑀁 𑀫𑀺𑀘𑁆𑀙𑀸, 𑀦 𑀯𑀢 𑀫𑁂 𑀮𑀸𑀪𑀸𑀢𑀺. 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀓𑀼𑀲𑀮𑀸𑀦𑀼𑀪𑀸𑀯𑁂𑀦 𑀮𑀤𑁆𑀥𑀫𑁆𑀧𑀺 𑀇𑀤𑀁 𑀫𑀦𑀼𑀲𑁆𑀲𑀢𑁆𑀢𑀁 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂. 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺𑀇𑀫𑀺𑀦𑀸 𑀧𑀦 𑀢𑀫𑁂𑀯𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂𑀧𑀺 𑀓𑁄𑀘𑀺 ‘‘𑀲𑀼𑀮𑀤𑁆𑀥𑀁 𑀢𑁂’’𑀢𑀺 𑀯𑀤𑁂𑀬𑁆𑀬, 𑀢𑀁 𑀫𑀺𑀘𑁆𑀙𑀸; 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺. 𑀅𑀧𑀼𑀜𑁆𑀜𑀁 𑀧𑀲𑀼𑀢𑀦𑁆𑀢𑀺 𑀅𑀧𑀼𑀜𑁆𑀜𑀁 𑀉𑀧𑀘𑀺𑀢𑀁 𑀚𑀦𑀺𑀢𑀁 𑀯𑀸. 𑀓𑀲𑁆𑀫𑀸𑀢𑀺 𑀘𑁂? 𑀬𑁄𑀳𑀁 𑀪𑀺𑀓𑁆𑀔𑀽…𑀧𑁂… 𑀯𑁄𑀭𑁄𑀧𑁂𑀲𑀺𑀦𑁆𑀢𑀺 ¶ . 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀅𑀳𑀁 𑀲𑀻𑀮𑀯𑀦𑁆𑀢𑁂 𑀢𑀸𑀬 𑀏𑀯 𑀲𑀻𑀮𑀯𑀦𑁆𑀢𑀢𑀸𑀬 𑀓𑀮𑁆𑀬𑀸𑀡𑀥𑀫𑁆𑀫𑁂 𑀉𑀢𑁆𑀢𑀫𑀥𑀫𑁆𑀫𑁂 𑀲𑁂𑀝𑁆𑀞𑀥𑀫𑁆𑀫𑁂 𑀪𑀺𑀓𑁆𑀔𑀽 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺𑀦𑁆𑀢𑀺.

𑀅𑀜𑁆𑀜𑀢𑀭𑀸 𑀫𑀸𑀭𑀓𑀸𑀬𑀺𑀓𑀸𑀢𑀺 𑀦𑀸𑀫𑀯𑀲𑁂𑀦 𑀅𑀧𑀸𑀓𑀝𑀸 𑀏𑀓𑀸 𑀪𑀼𑀫𑁆𑀫𑀤𑁂𑀯𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀸𑀭𑀧𑀓𑁆𑀔𑀺𑀓𑀸 𑀫𑀸𑀭𑀲𑁆𑀲𑀦𑀼𑀯𑀢𑁆𑀢𑀺𑀓𑀸 ‘‘𑀏𑀯𑀫𑀬𑀁 𑀫𑀸𑀭𑀥𑁂𑀬𑁆𑀬𑀁 𑀫𑀸𑀭𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑀬𑀫𑀸𑀦𑀸 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀧𑀣𑀯𑀻𑀢𑀮𑁂 𑀘𑀗𑁆𑀓𑀫𑀫𑀸𑀦𑀸 𑀯𑀺𑀬 𑀆𑀕𑀦𑁆𑀢𑁆𑀯𑀸 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀏𑀢𑀤𑀯𑁄𑀘. 𑀲𑀸𑀥𑀼 𑀲𑀸𑀥𑀽𑀢𑀺 𑀲𑀫𑁆𑀧𑀳𑀁𑀲𑀦𑀢𑁆𑀣𑁂 𑀦𑀺𑀧𑀸𑀢𑁄; 𑀢𑀲𑁆𑀫𑀸 𑀏𑀯 𑀤𑁆𑀯𑀺𑀯𑀘𑀦𑀁 ¶ 𑀓𑀢𑀁. 𑀅𑀢𑀺𑀡𑁆𑀡𑁂 𑀢𑀸𑀭𑁂𑀲𑀻𑀢𑀺 𑀲𑀁𑀲𑀸𑀭𑀢𑁄 𑀅𑀢𑀺𑀡𑁆𑀡𑁂 𑀇𑀫𑀺𑀦𑀸 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁂𑀦 𑀢𑀸𑀭𑁂𑀲𑀺 𑀧𑀭𑀺𑀫𑁄𑀘𑁂𑀲𑀻𑀢𑀺. 𑀅𑀬𑀁 𑀓𑀺𑀭 𑀏𑀢𑀺𑀲𑁆𑀲𑀸 𑀤𑁂𑀯𑀢𑀸𑀬 𑀩𑀸𑀮𑀸𑀬 𑀤𑀼𑀫𑁆𑀫𑁂𑀥𑀸𑀬 𑀮𑀤𑁆𑀥𑀺 ‘‘𑀬𑁂 𑀦 𑀫𑀢𑀸, 𑀢𑁂 𑀲𑀁𑀲𑀸𑀭𑀢𑁄 𑀦 𑀫𑀼𑀢𑁆𑀢𑀸. 𑀬𑁂 𑀫𑀢𑀸, 𑀢𑁂 𑀫𑀼𑀢𑁆𑀢𑀸’’𑀢𑀺. 𑀢𑀲𑁆𑀫𑀸 𑀲𑀁𑀲𑀸𑀭𑀫𑁄𑀘𑀓𑀫𑀺𑀮𑀓𑁆𑀔𑀸 𑀯𑀺𑀬 𑀏𑀯𑀁𑀮𑀤𑁆𑀥𑀺𑀓𑀸 𑀳𑀼𑀢𑁆𑀯𑀸 𑀢𑀫𑁆𑀧𑀺 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑀻 𑀏𑀯𑀫𑀸𑀳. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑀢𑀸𑀯 𑀪𑀼𑀲𑀁 𑀉𑀧𑁆𑀧𑀦𑁆𑀦𑀯𑀺𑀧𑁆𑀧𑀝𑀺𑀲𑀸𑀭𑁄𑀧𑀺 𑀢𑀁 𑀤𑁂𑀯𑀢𑀸𑀬 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀤𑁂𑀯𑀢𑀸 𑀏𑀯𑀫𑀸𑀳 𑁋 𑀅𑀤𑁆𑀥𑀸 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀏𑀯𑀫𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀮𑀸𑀪𑀸 𑀓𑀺𑀭 𑀫𑁂’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄. 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀻𑀢𑀺 𑀢𑀁 𑀢𑀁 𑀯𑀺𑀳𑀸𑀭𑀜𑁆𑀘 𑀧𑀭𑀺𑀯𑁂𑀡𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀢𑀺 𑁋 ‘‘𑀓𑁄 𑀅𑀢𑀺𑀡𑁆𑀡𑁄, 𑀓𑀁 𑀢𑀸𑀭𑁂𑀫𑀻’’𑀢𑀺?

𑀳𑁄𑀢𑀺𑀬𑁂𑀯 ¶ 𑀪𑀬𑀦𑁆𑀢𑀺 𑀫𑀭𑀡𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀳𑁄𑀢𑀺. 𑀳𑁄𑀢𑀺 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀳𑀤𑀬𑀫𑀁𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀲𑁆𑀫𑀸 𑀲𑀭𑀻𑀭𑀘𑀮𑀦𑀁 𑀳𑁄𑀢𑀺; 𑀅𑀢𑀺𑀪𑀬𑁂𑀦 𑀣𑀤𑁆𑀥𑀲𑀭𑀻𑀭𑀢𑁆𑀢𑀦𑁆𑀢𑀺𑀧𑀺 𑀏𑀓𑁂, 𑀣𑀫𑁆𑀪𑀺𑀢𑀢𑁆𑀢𑀜𑁆𑀳𑀺 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀫𑀳𑀁𑀲𑁄𑀢𑀺 𑀉𑀤𑁆𑀥𑀁𑀞𑀺𑀢𑀮𑁄𑀫𑀢𑀸, 𑀔𑀻𑀡𑀸𑀲𑀯𑀸 𑀧𑀦 𑀲𑀢𑁆𑀢𑀲𑀼𑀜𑁆𑀜𑀢𑀸𑀬 𑀲𑀼𑀤𑀺𑀝𑁆𑀞𑀢𑁆𑀢𑀸 𑀫𑀭𑀡𑀓𑀲𑀢𑁆𑀢𑀫𑁂𑀯 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀲𑀩𑁆𑀩𑀫𑁆𑀧𑁂𑀢𑀁 𑀦𑀸𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀫𑁆𑀧𑀺 𑀪𑀺𑀓𑁆𑀔𑀼𑀁 𑀤𑁆𑀯𑁂𑀧𑀺…𑀧𑁂… 𑀲𑀝𑁆𑀞𑀺𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑁧𑁬𑁪. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀏𑀓𑀻𑀪𑀸𑀯𑀢𑁄 𑀯𑀼𑀝𑁆𑀞𑀺𑀢𑁄 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀓𑀺𑀁 𑀦𑀼 𑀔𑁄 𑀆𑀦𑀦𑁆𑀤 𑀢𑀦𑀼𑀪𑀽𑀢𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀆𑀦𑀦𑁆𑀤 𑀇𑀢𑁄 𑀧𑀼𑀩𑁆𑀩𑁂 𑀩𑀳𑀽 𑀪𑀺𑀓𑁆𑀔𑀽 𑀏𑀓𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀕𑀡𑁆𑀳𑀦𑁆𑀢𑀺 𑀲𑀚𑁆𑀛𑀸𑀬𑀦𑁆𑀢𑀺, 𑀏𑀓𑀧𑀚𑁆𑀚𑁄𑀢𑁄 𑀯𑀺𑀬 𑀆𑀭𑀸𑀫𑁄 𑀤𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀦 𑀅𑀤𑁆𑀥𑀫𑀸𑀲𑀫𑀢𑁆𑀢𑀲𑁆𑀲 𑀅𑀘𑁆𑀘𑀬𑁂𑀦 ¶ 𑀢𑀦𑀼𑀪𑀽𑀢𑁄 𑀯𑀺𑀬 𑀢𑀦𑀼𑀓𑁄 𑀫𑀦𑁆𑀤𑁄 ¶ 𑀅𑀧𑁆𑀧𑀓𑁄 𑀯𑀺𑀭𑀴𑀯𑀺𑀭𑀴𑁄 𑀯𑀺𑀬 𑀚𑀸𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀓𑀺𑀦𑁆𑀦𑀼 𑀔𑁄 𑀓𑀸𑀭𑀡𑀁, 𑀓𑀺𑀁 𑀤𑀺𑀲𑀸𑀲𑀼 𑀧𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽𑀢𑀺?

𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀫𑁆𑀫𑀯𑀺𑀧𑀸𑀓𑁂𑀦 𑀢𑁂𑀲𑀁 𑀚𑀻𑀯𑀺𑀢𑀓𑁆𑀔𑀬𑀧𑁆𑀧𑀢𑁆𑀢𑀺𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀧𑀘𑁆𑀘𑀬𑀸 𑀧𑀦 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀢𑀣𑀸 𑀳𑀺 𑀧𑀦 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀁 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀦𑁆𑀢𑁄 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀸𑀥𑀼 𑀪𑀦𑁆𑀢𑁂 𑀪𑀕𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀢𑀼, 𑀬𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬; 𑀫𑀳𑀸𑀲𑀫𑀼𑀤𑁆𑀤𑀁 𑀑𑀭𑁄𑀳𑀡𑀢𑀺𑀢𑁆𑀣𑀸𑀦𑀺 𑀯𑀺𑀬 𑀳𑀺 𑀅𑀜𑁆𑀜𑀸𑀦𑀺𑀧𑀺 𑀤𑀲𑀸𑀦𑀼𑀲𑁆𑀲𑀢𑀺𑀤𑀲𑀓𑀲𑀺𑀡𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀸𑀧𑀸𑀦𑀲𑀢𑀺𑀧𑁆𑀧𑀪𑁂𑀤𑀸𑀦𑀺 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑁄𑀭𑁄𑀳𑀡𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀦𑁆𑀢𑀺. 𑀢𑁂𑀲𑀼 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀪𑀕𑀯𑀸 𑀢𑀣𑀸 𑀓𑀸𑀢𑀼𑀓𑀸𑀫𑁄 𑀣𑁂𑀭𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 ‘‘𑀢𑁂𑀦𑀳𑀸𑀦𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀦𑁆𑀢𑀸 𑀕𑀸𑀯𑀼𑀢𑁂𑀧𑀺 𑀅𑀤𑁆𑀥𑀬𑁄𑀚𑀦𑁂𑀧𑀺 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 ¶ , 𑀢𑁂 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀕𑀦𑁆𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀤𑀳𑀭𑀪𑀺𑀓𑁆𑀔𑀽 𑀧𑀳𑀺𑀡𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀦𑀯𑀲𑁂𑀲𑁂 𑀪𑀺𑀓𑁆𑀔𑀽 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀫𑀽𑀳𑀁 𑀓𑀢𑁆𑀯𑀸. 𑀬𑀲𑁆𑀲 𑀤𑀸𑀦𑀺 𑀪𑀦𑁆𑀢𑁂 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀏𑀲 𑀓𑀸𑀮𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀓𑀸𑀢𑀼𑀁, 𑀅𑀦𑀼𑀲𑀸𑀲𑀦𑀺𑀁 𑀤𑀸𑀢𑀼𑀁, 𑀇𑀤𑀸𑀦𑀺 𑀬𑀲𑁆𑀲 𑀢𑀼𑀫𑁆𑀳𑁂 𑀓𑀸𑀮𑀁 𑀚𑀸𑀦𑀸𑀣, 𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸

𑁧𑁬𑁫. 𑀅𑀣 𑀔𑁄 𑀪𑀕𑀯𑀸…𑀧𑁂… 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂𑀢𑀺 𑀆𑀫𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀆𑀘𑀺𑀓𑁆𑀔𑀺𑀢𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 ¶ 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻’’𑀢𑀺 𑀆𑀳.

𑀇𑀤𑀸𑀦𑀺 𑀬𑀲𑁆𑀫𑀸 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀧𑀡𑀻𑀢𑀓𑀫𑁆𑀫𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀫𑁂𑀯 𑀅𑀬𑀁 𑀧𑀸𑀴𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀸𑀓𑁆𑀓𑀫𑀁 𑀏𑀢𑁆𑀣 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀢𑁆𑀭 ‘‘𑀅𑀬𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂’’𑀢𑀺 𑀇𑀫𑀲𑁆𑀲 𑀢𑀸𑀯 𑀧𑀤𑀲𑁆𑀲 𑀅𑀬𑀁 𑀬𑁄𑀚𑀦𑀸 𑁋 𑀪𑀺𑀓𑁆𑀔𑀯𑁂 𑀦 𑀓𑁂𑀯𑀮𑀁 𑀅𑀲𑀼𑀪𑀪𑀸𑀯𑀦𑀸𑀬𑁂𑀯 𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀧𑀺𑀘 𑀅𑀬𑀫𑁆𑀧𑀺 𑀔𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺…𑀧𑁂… 𑀯𑀽𑀧𑀲𑀫𑁂𑀢𑀻𑀢𑀺.

𑀅𑀬𑀁 ¶ 𑀧𑀦𑁂𑀢𑁆𑀣 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀆𑀦𑀦𑁆𑀢𑀺 𑀅𑀲𑁆𑀲𑀸𑀲𑁄, 𑀦𑁄 𑀧𑀲𑁆𑀲𑀸𑀲𑁄. 𑀅𑀧𑀸𑀦𑀦𑁆𑀢𑀺 𑀧𑀲𑁆𑀲𑀸𑀲𑁄, 𑀦𑁄 𑀅𑀲𑁆𑀲𑀸𑀲𑁄. 𑀅𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺, 𑀧𑀲𑁆𑀲𑀸𑀲𑀯𑀲𑁂𑀦 𑀉𑀧𑀝𑁆𑀞𑀸𑀦𑀁 𑀲𑀢𑀺. 𑀬𑁄 𑀅𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀺, 𑀬𑁄 𑀧𑀲𑁆𑀲𑀲𑀢𑀺 𑀢𑀲𑁆𑀲𑀼𑀧𑀝𑁆𑀞𑀸𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁬𑁦).

𑀲𑀫𑀸𑀥𑀻𑀢𑀺 𑀢𑀸𑀬 𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸; 𑀲𑀫𑀸𑀥𑀺𑀲𑀻𑀲𑁂𑀦 𑀘𑀸𑀬𑀁 𑀤𑁂𑀲𑀦𑀸, 𑀦 𑀲𑀢𑀺𑀲𑀻𑀲𑁂𑀦. 𑀢𑀲𑁆𑀫𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀬𑀼𑀢𑁆𑀢𑁄 𑀲𑀫𑀸𑀥𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀯𑀸 𑀲𑀫𑀸𑀥𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀘. 𑀩𑀳𑀼𑀮𑀻𑀓𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 ¶ 𑀓𑀢𑁄. 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸𑀢𑀺 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑁂𑀯, 𑀉𑀪𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀬𑀜𑁆𑀳𑀺 𑀬𑀣𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀓𑁂𑀯𑀮𑀁 𑀧𑀝𑀺𑀯𑁂𑀥𑀯𑀲𑁂𑀦 𑀲𑀦𑁆𑀢𑀜𑁆𑀘 𑀧𑀡𑀻𑀢𑀜𑁆𑀘 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸 𑀘 𑀆𑀭𑀫𑁆𑀫𑀡𑀯𑀲𑁂𑀦 𑀦𑁂𑀯 𑀲𑀦𑁆𑀢𑀁 𑀦 𑀧𑀡𑀻𑀢𑀁, 𑀦 𑀏𑀯𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀲𑀦𑁆𑀢𑁄 𑀯𑀸 𑀅𑀧𑁆𑀧𑀡𑀻𑀢𑁄 𑀯𑀸, 𑀅𑀧𑀺𑀘 𑀔𑁄 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺 𑀆𑀭𑀫𑁆𑀫𑀡𑀧𑁆𑀧𑀡𑀻𑀢𑀢𑀸𑀬𑀧𑀺 𑀧𑀡𑀻𑀢𑁄 𑀅𑀢𑀺𑀢𑁆𑀢𑀺𑀓𑀭𑁄 𑀅𑀗𑁆𑀕𑀧𑁆𑀧𑀡𑀻𑀢𑀢𑀸𑀬𑀧𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸’’𑀢𑀺.

𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄 𑀅𑀦𑀸𑀲𑀺𑀢𑁆𑀢𑀓𑁄 𑀅𑀩𑁆𑀩𑁄𑀓𑀺𑀡𑁆𑀡𑁄 ¶ 𑀧𑀸𑀝𑁂𑀓𑁆𑀓𑁄 𑀆𑀯𑁂𑀡𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀧𑀭𑀺𑀓𑀫𑁆𑀫𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀦𑁆𑀢𑀢𑀸 𑀆𑀤𑀺𑀫𑀦𑀲𑀺𑀓𑀸𑀭𑀢𑁄 𑀧𑀪𑀼𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀦𑁆𑀢𑁄 𑀘 𑀧𑀡𑀻𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 𑀅𑀲𑁂𑀘𑀦𑀓𑁄𑀢𑀺 𑀅𑀦𑀸𑀲𑀺𑀢𑁆𑀢𑀓𑁄 𑀑𑀚𑀯𑀦𑁆𑀢𑁄 𑀲𑀪𑀸𑀯𑁂𑀦𑁂𑀯 𑀫𑀥𑀼𑀭𑁄𑀢𑀺 𑀯𑀤𑀦𑁆𑀢𑀺. 𑀏𑀯𑀫𑀬𑀁 𑀅𑀲𑁂𑀘𑀦𑀓𑁄 𑀘 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑁂 𑀅𑀯𑀺𑀓𑁆𑀔𑀫𑁆𑀪𑀺𑀢𑁂. 𑀧𑀸𑀧𑀓𑁂𑀢𑀺 𑀮𑀸𑀫𑀓𑁂. 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂 𑀥𑀫𑁆𑀫𑁂. 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀔𑀡𑁂𑀦𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀺, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸 𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀻𑀢𑀺𑀧𑀺 𑀅𑀢𑁆𑀣𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺 ¶ 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀆𑀲𑀸𑀴𑁆𑀳𑀫𑀸𑀲𑁂. 𑀊𑀳𑀢𑀁 𑀭𑀚𑁄𑀚𑀮𑁆𑀮𑀦𑁆𑀢𑀺 𑀅𑀤𑁆𑀥𑀫𑀸𑀲𑁂 𑀯𑀸𑀢𑀸𑀢𑀧𑀲𑀼𑀓𑁆𑀔𑀸𑀬 𑀕𑁄𑀫𑀳𑀺𑀁𑀲𑀸𑀤𑀺𑀧𑀸𑀤𑀧𑁆𑀧𑀳𑀸𑀭𑀲𑀫𑁆𑀪𑀺𑀦𑁆𑀦𑀸𑀬 𑀧𑀣𑀯𑀺𑀬𑀸 𑀉𑀤𑁆𑀥𑀁 𑀳𑀢𑀁 𑀊𑀳𑀢𑀁 𑀆𑀓𑀸𑀲𑁂 𑀲𑀫𑀼𑀝𑁆𑀞𑀺𑀢𑀁 𑀭𑀚𑀜𑁆𑀘 𑀭𑁂𑀡𑀼𑀜𑁆𑀘. 𑀫𑀳𑀸 𑀅𑀓𑀸𑀮𑀫𑁂𑀖𑁄𑀢𑀺 𑀲𑀩𑁆𑀩𑀁 𑀦𑀪𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 𑀆𑀲𑀸𑀴𑁆𑀳𑀚𑀼𑀡𑁆𑀳𑀧𑀓𑁆𑀔𑁂 𑀲𑀓𑀮𑀁 𑀅𑀤𑁆𑀥𑀫𑀸𑀲𑀁 𑀯𑀲𑁆𑀲𑀦𑀓𑀫𑁂𑀖𑁄. 𑀲𑁄 𑀳𑀺 𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀓𑀸𑀮𑀫𑁂𑀖𑁄𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻𑀢𑀺 𑀔𑀡𑁂𑀦𑁂𑀯 ¶ 𑀅𑀤𑀲𑁆𑀲𑀦𑀁 𑀦𑁂𑀢𑀺, 𑀧𑀣𑀯𑀺𑀬𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀫𑁂𑀢𑀁. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀤𑀸𑀦𑀺 𑀓𑀣𑀁 𑀪𑀸𑀯𑀺𑀢𑁄 𑀘 𑀪𑀺𑀓𑁆𑀔𑀯𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀏𑀢𑁆𑀣 𑀓𑀣𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀪𑀸𑀯𑀺𑀢𑁄 𑀘 𑀪𑀺𑀓𑁆𑀔𑀯𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀝𑁆𑀞𑀥𑀫𑁆𑀫𑀦𑀺𑀤𑀲𑁆𑀲𑀦𑀁 ¶ . 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂 𑀓𑁂𑀦𑀧𑀓𑀸𑀭𑁂𑀦 𑀓𑁂𑀦𑀸𑀓𑀸𑀭𑁂𑀦 𑀓𑁂𑀦 𑀯𑀺𑀥𑀺𑀦𑀸 𑀪𑀸𑀯𑀺𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀓𑁂𑀦𑀧𑀓𑀸𑀭𑁂𑀦 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯…𑀧𑁂… 𑀯𑀽𑀧𑀲𑀫𑁂𑀢𑀻𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀇𑀥 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀯𑁂 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀅𑀬𑀜𑁆𑀳𑁂𑀢𑁆𑀣 𑀇𑀥𑀲𑀤𑁆𑀤𑁄 𑀲𑀩𑁆𑀩𑀧𑁆𑀧𑀓𑀸𑀭𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄 𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯). 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀽’’𑀢𑀺.

𑀅𑀭𑀜𑁆𑀜𑀕𑀢𑁄 𑀯𑀸…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸𑀢𑀺 𑀇𑀤𑀫𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦𑀁. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀦𑀼𑀯𑀺𑀲𑀝𑀁 𑀘𑀺𑀢𑁆𑀢𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀆𑀭𑀫𑁆𑀫𑀡𑀁 𑀅𑀪𑀺𑀭𑀼𑀳𑀺𑀢𑀼𑀁 𑀦 𑀇𑀘𑁆𑀙𑀢𑀺. 𑀓𑀽𑀝𑀕𑁄𑀡𑀬𑀼𑀢𑁆𑀢𑀭𑀣𑁄 𑀯𑀺𑀬 𑀉𑀧𑁆𑀧𑀣𑀫𑁂𑀯 𑀥𑀸𑀯𑀢𑀺. 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑁄𑀧𑁄 𑀓𑀽𑀝𑀥𑁂𑀦𑀼𑀬𑀸 𑀲𑀩𑁆𑀩𑀁 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀯𑀟𑁆𑀠𑀺𑀢𑀁 𑀓𑀽𑀝𑀯𑀘𑁆𑀙𑀁 𑀤𑀫𑁂𑀢𑀼𑀓𑀸𑀫𑁄 𑀥𑁂𑀦𑀼𑀢𑁄 𑀅𑀧𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀫𑀳𑀦𑁆𑀢𑀁 𑀣𑀫𑁆𑀪𑀁 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀣 𑀬𑁄𑀢𑁆𑀢𑁂𑀦 𑀩𑀦𑁆𑀥𑁂𑀬𑁆𑀬. 𑀅𑀣𑀲𑁆𑀲 𑀲𑁄 𑀯𑀘𑁆𑀙𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀫𑁂𑀯 𑀣𑀫𑁆𑀪𑀁 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸; 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑀧𑀸𑀦𑀯𑀟𑁆𑀠𑀺𑀢𑀁 𑀤𑀼𑀝𑁆𑀞𑀘𑀺𑀢𑁆𑀢𑀁 𑀤𑀫𑁂𑀢𑀼𑀓𑀸𑀫𑁂𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀅𑀭𑀜𑁆𑀜𑀁 𑀯𑀸…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀁 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀢𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀣𑀫𑁆𑀪𑁂 𑀲𑀢𑀺𑀬𑁄𑀢𑁆𑀢𑁂𑀦 𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸𑀧𑀺 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀁 𑀅𑀮𑀪𑀫𑀸𑀦𑀁 ¶ 𑀲𑀢𑀺𑀬𑁄𑀢𑁆𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀢𑀫𑁂𑀯𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀉𑀧𑀦𑀺𑀲𑀻𑀤𑀢𑀺 𑀘𑁂𑀯 𑀉𑀧𑀦𑀺𑀧𑀚𑁆𑀚𑀢𑀺 𑀘. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸 ¶ ¶ 𑀣𑀫𑁆𑀪𑁂 𑀦𑀺𑀩𑀦𑁆𑀥𑁂𑀬𑁆𑀬, 𑀯𑀘𑁆𑀙𑀁 𑀤𑀫𑁆𑀫𑀁 𑀦𑀭𑁄 𑀇𑀥;

𑀩𑀦𑁆𑀥𑁂𑀬𑁆𑀬𑁂𑀯𑀁 𑀲𑀓𑀁 𑀘𑀺𑀢𑁆𑀢𑀁, 𑀲𑀢𑀺𑀬𑀸𑀭𑀫𑁆𑀫𑀡𑁂 𑀤𑀴𑁆𑀳’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁭; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀏𑀯𑀫𑀲𑁆𑀲𑁂𑀢𑀁 𑀲𑁂𑀦𑀸𑀲𑀦𑀁 𑀪𑀸𑀯𑀦𑀸𑀦𑀼𑀭𑀽𑀧𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀤𑀫𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀆𑀥𑀺𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦’’𑀦𑁆𑀢𑀺.

𑀅𑀣 𑀯𑀸 𑀬𑀲𑁆𑀫𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀪𑁂𑀤𑁂 𑀫𑀼𑀤𑁆𑀥𑀪𑀽𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀲𑀤𑁆𑀤𑀲𑀫𑀸𑀓𑀼𑀮𑀁 𑀕𑀸𑀫𑀦𑁆𑀢𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀦 𑀲𑀼𑀓𑀭𑀁 𑀲𑀫𑁆𑀧𑀸𑀤𑁂𑀢𑀼𑀁, 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀛𑀸𑀦𑀲𑁆𑀲. 𑀅𑀕𑀸𑀫𑀓𑁂 𑀧𑀦 𑀅𑀭𑀜𑁆𑀜𑁂 𑀲𑀼𑀓𑀭𑀁 𑀬𑁄𑀕𑀸𑀯𑀘𑀭𑁂𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀘 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀫𑀸𑀲𑁆𑀲 𑀅𑀦𑀼𑀭𑀽𑀧𑀁𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳.

𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀳𑀺 𑀪𑀕𑀯𑀸, 𑀲𑁄 𑀬𑀣𑀸 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀦𑀕𑀭𑀪𑀽𑀫𑀺𑀁 𑀧𑀲𑁆𑀲𑀺𑀢𑁆𑀯𑀸 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀦𑀕𑀭𑀁 𑀫𑀸𑀧𑁂𑀣𑀸’’𑀢𑀺 𑀉𑀧𑀤𑀺𑀲𑀢𑀺, 𑀲𑁄𑀢𑁆𑀣𑀺𑀦𑀸 𑀘 𑀦𑀕𑀭𑁂 𑀦𑀺𑀝𑁆𑀞𑀺𑀢𑁂 𑀭𑀸𑀚𑀓𑀼𑀮𑀢𑁄 𑀫𑀳𑀸𑀲𑀓𑁆𑀓𑀸𑀭𑀁 𑀮𑀪𑀢𑀺; 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑀲𑁆𑀲 𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀉𑀧𑀤𑀺𑀲𑀢𑀺. 𑀢𑀢𑁄 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁂𑀦 𑀬𑁄𑀕𑀺𑀦𑀸 𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 ‘‘𑀤𑀻𑀧𑀺𑀲𑀤𑀺𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀫𑀳𑀸𑀤𑀻𑀧𑀺𑀭𑀸𑀚𑀸 𑀅𑀭𑀜𑁆𑀜𑁂 𑀢𑀺𑀡𑀕𑀳𑀦𑀁 𑀯𑀸 𑀯𑀦𑀕𑀳𑀦𑀁 𑀯𑀸 𑀧𑀩𑁆𑀩𑀢𑀕𑀳𑀦𑀁 𑀯𑀸 𑀦𑀺𑀲𑁆𑀲𑀸𑀬 ¶ 𑀦𑀺𑀮𑀻𑀬𑀺𑀢𑁆𑀯𑀸 𑀯𑀦𑀫𑀳𑀺𑀁𑀲𑀕𑁄𑀓𑀡𑁆𑀡𑀲𑀽𑀓𑀭𑀸𑀤𑀬𑁄 𑀫𑀺𑀕𑁂 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯𑀸𑀬𑀁 𑀅𑀭𑀜𑁆𑀜𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀪𑀺𑀓𑁆𑀔𑀼 𑀬𑀣𑀸𑀓𑁆𑀓𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑁂 𑀘𑁂𑀯 𑀅𑀭𑀺𑀬𑀨𑀮𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸𑀧𑀺 ¶ 𑀤𑀻𑀧𑀺𑀓𑁄 𑀦𑀸𑀫, 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀢𑀻 𑀫𑀺𑀕𑁂;

𑀢𑀣𑁂𑀯𑀸𑀬𑀁 𑀩𑀼𑀤𑁆𑀥𑀧𑀼𑀢𑁆𑀢𑁄, 𑀬𑀼𑀢𑁆𑀢𑀬𑁄𑀕𑁄 𑀯𑀺𑀧𑀲𑁆𑀲𑀓𑁄;

𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀕𑀡𑁆𑀳𑀸𑀢𑀺 𑀨𑀮𑀫𑀼𑀢𑁆𑀢𑀫’’𑀦𑁆𑀢𑀺. (𑀫𑀺. 𑀧. 𑁬.𑁧.𑁫);

𑀢𑁂𑀦𑀲𑁆𑀲 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀁 𑀅𑀭𑀜𑁆𑀜𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀅𑀭𑀜𑁆𑀜𑀕𑀢𑁄 𑀯𑀸𑀢𑀺 𑀅𑀭𑀜𑁆𑀜𑀦𑁆𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀘 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁩) 𑀘 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀲𑀼 𑀅𑀭𑀜𑁆𑀜𑁂𑀲𑀼 𑀅𑀦𑀼𑀭𑀽𑀧𑀁 𑀬𑀁𑀓𑀺𑀜𑁆𑀘𑀺 𑀧𑀯𑀺𑀯𑁂𑀓𑀲𑀼𑀔𑀁 𑀅𑀭𑀜𑁆𑀜𑀁 𑀕𑀢𑁄. 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸𑀢𑀺 𑀭𑀼𑀓𑁆𑀔𑀲𑀫𑀻𑀧𑀁 𑀕𑀢𑁄. 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸𑀢𑀺 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑁄𑀓𑀸𑀲𑀁 𑀕𑀢𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀜𑁆𑀘 𑀭𑀼𑀓𑁆𑀔𑀫𑀽𑀮𑀜𑁆𑀘 𑀅𑀯𑀲𑁂𑀲𑀲𑀢𑁆𑀢𑀯𑀺𑀥𑀲𑁂𑀦𑀸𑀲𑀦𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑀲𑁆𑀲 𑀉𑀢𑀼𑀢𑁆𑀢𑀬𑀸𑀦𑀼𑀓𑀽𑀮𑀁 𑀥𑀸𑀢𑀼𑀘𑀭𑀺𑀬𑀸𑀦𑀼𑀓𑀽𑀮𑀜𑁆𑀘 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀉𑀧𑀤𑀺𑀲𑀺𑀢𑁆𑀯𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀁 𑀲𑀦𑁆𑀢𑀫𑀺𑀭𑀺𑀬𑀸𑀧𑀣𑀁 𑀉𑀧𑀤𑀺𑀲𑀦𑁆𑀢𑁄 ‘‘𑀦𑀺𑀲𑀻𑀤𑀢𑀻’’𑀢𑀺 𑀆𑀳. 𑀅𑀣𑀲𑁆𑀲 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀦𑀲𑀼𑀔𑀢𑀁 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀆𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 ¶ 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸, 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑁆𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀧𑀡𑀫𑀦𑀧𑁆𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺. 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺.

𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸. 𑀅𑀣 𑀯𑀸 ‘‘𑀧𑀭𑀻’’𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄; ‘‘𑀫𑀼𑀔’’𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄; ‘‘𑀲𑀢𑀻’’𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁪-𑁧𑁬𑁫) 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁄 𑁋 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸’’𑀢𑀺. 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀜𑁆𑀘 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀁 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄 𑀲𑀢𑁄𑀏𑀯 𑀅𑀲𑁆𑀲𑀲𑀢𑀺, 𑀲𑀢𑁄 𑀧𑀲𑁆𑀲𑀲𑀢𑀺, 𑀲𑀢𑁄𑀓𑀸𑀭𑀻 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 ¶ 𑀬𑁂𑀳𑀸𑀓𑀸𑀭𑁂𑀳𑀺 𑀲𑀢𑁄𑀓𑀸𑀭𑀻 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋 ‘‘𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄 𑀧𑀲𑁆𑀲𑀲𑀢𑀻’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀪𑀗𑁆𑀕𑁂 𑁋

‘‘𑀩𑀸𑀢𑁆𑀢𑀺𑀁𑀲𑀸𑀬 ¶ 𑀆𑀓𑀸𑀭𑁂𑀳𑀺 𑀲𑀢𑁄𑀓𑀸𑀭𑀻 𑀳𑁄𑀢𑀺. 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀢𑁄𑀓𑀸𑀭𑀻 𑀳𑁄𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀢𑁄𑀓𑀸𑀭𑀻 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁬𑁫).

𑀢𑀢𑁆𑀣 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄𑀢𑀺 𑀤𑀻𑀖𑀁 𑀯𑀸 𑀅𑀲𑁆𑀲𑀸𑀲𑀁 𑀧𑀯𑀢𑁆𑀢𑁂𑀦𑁆𑀢𑁄. ‘‘𑀅𑀲𑁆𑀲𑀸𑀲𑁄’’𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑀯𑀸𑀢𑁄. ‘‘𑀧𑀲𑁆𑀲𑀸𑀲𑁄’’𑀢𑀺 𑀅𑀦𑁆𑀢𑁄 𑀧𑀯𑀺𑀲𑀦𑀯𑀸𑀢𑁄. 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀲𑀼 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁.

𑀢𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 ¶ 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀞𑀫𑀁 𑀅𑀩𑁆𑀪𑀦𑁆𑀢𑀭𑀯𑀸𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺. 𑀧𑀘𑁆𑀙𑀸 𑀩𑀸𑀳𑀺𑀭𑀯𑀸𑀢𑁄 𑀲𑀼𑀔𑀼𑀫𑀁 𑀭𑀚𑀁 𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀦𑁆𑀢𑁄 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀩𑁆𑀩𑀸𑀬𑀢𑀺. 𑀏𑀯𑀁 𑀢𑀸𑀯 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦 𑀢𑁂𑀲𑀁 𑀤𑀻𑀖𑀭𑀲𑁆𑀲𑀢𑀸, 𑀲𑀸 𑀅𑀤𑁆𑀥𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀑𑀓𑀸𑀲𑀤𑁆𑀥𑀸𑀦𑀁 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀸 𑀯𑀸 ‘‘𑀤𑀻𑀖𑀫𑀼𑀤𑀓𑀁 𑀤𑀻𑀖𑀸 𑀯𑀸𑀮𑀺𑀓𑀸, 𑀭𑀲𑁆𑀲𑀫𑀼𑀤𑀓𑀁 𑀭𑀲𑁆𑀲𑀸 𑀯𑀸𑀮𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀳𑀢𑁆𑀣𑀺𑀲𑀭𑀻𑀭𑁂 𑀅𑀳𑀺𑀲𑀭𑀻𑀭𑁂 𑀘 𑀢𑁂𑀲𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀲𑀡𑀺𑀓𑀁 𑀧𑀽𑀭𑁂𑀢𑁆𑀯𑀸 𑀲𑀡𑀺𑀓𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀻𑀖𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀦𑀔𑀲𑀲𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀭𑀲𑁆𑀲𑀁 𑀅𑀤𑁆𑀥𑀸𑀦𑀁 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀲𑀻𑀖𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀫𑀸 ‘‘𑀭𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀧𑀦 𑀓𑁂𑀘𑀺 𑀳𑀢𑁆𑀣𑀺𑀅𑀳𑀺𑀆𑀤𑀬𑁄 𑀯𑀺𑀬 𑀓𑀸𑀮𑀤𑁆𑀥𑀸𑀦𑀯𑀲𑁂𑀦 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑀺 𑀘 𑀧𑀲𑁆𑀲𑀲𑀦𑁆𑀢𑀺 𑀘. 𑀓𑁂𑀘𑀺 𑀲𑀼𑀦𑀔𑀲𑀲𑀸𑀤𑀬𑁄 𑀯𑀺𑀬 𑀭𑀲𑁆𑀲𑀁. 𑀢𑀲𑁆𑀫𑀸 𑀢𑁂𑀲𑀁 𑀓𑀸𑀮𑀯𑀲𑁂𑀦 𑀤𑀻𑀖𑀫𑀤𑁆𑀥𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 𑀢𑁂 𑀤𑀻𑀖𑀸. 𑀇𑀢𑁆𑀢𑀭𑀫𑀤𑁆𑀥𑀸𑀦𑀁 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 ‘‘𑀭𑀲𑁆𑀲𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀦𑀯𑀳𑀸𑀓𑀸𑀭𑁂𑀳𑀺 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑁄 𑀘 𑀧𑀲𑁆𑀲𑀲𑀦𑁆𑀢𑁄 𑀘 ‘‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀺 𑀧𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀧𑀚𑀸𑀦𑀢𑁄 𑀘𑀲𑁆𑀲 𑀏𑀓𑁂𑀦𑀸𑀓𑀸𑀭𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀓𑀣𑀁 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 ¶ 𑀧𑀚𑀸𑀦𑀸𑀢𑀺? 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 ¶ 𑀅𑀲𑁆𑀲𑀲𑀢𑀺, 𑀤𑀻𑀖𑀁 𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀧𑀲𑁆𑀲𑀲𑀢𑀺, 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀙𑀦𑁆𑀤𑁄 ¶ 𑀉𑀧𑁆𑀧𑀚𑁆𑀚𑀢𑀺; 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺, 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀧𑀲𑁆𑀲𑀲𑀢𑀺, 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀙𑀦𑁆𑀤𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺; 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺, 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀧𑀲𑁆𑀲𑀸𑀲𑀁…𑀧𑁂… 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀺. 𑀧𑀸𑀫𑁄𑀚𑁆𑀚𑀯𑀲𑁂𑀦 𑀢𑀢𑁄 𑀲𑀼𑀔𑀼𑀫𑀢𑀭𑀁 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑁄𑀧𑀺 𑀧𑀲𑁆𑀲𑀲𑀢𑁄𑀧𑀺 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀁 𑀯𑀺𑀯𑀢𑁆𑀢𑀢𑀺, 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀺. 𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄; 𑀉𑀧𑀝𑁆𑀞𑀸𑀦𑀁 𑀲𑀢𑀺; 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁; 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺; 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸’’𑀢𑀺 (𑀧𑀝𑀺. 𑀫. 𑁧.𑁧𑁬𑁬).

𑀏𑀲𑁂𑀯 𑀦𑀬𑁄 𑀭𑀲𑁆𑀲𑀧𑀤𑁂𑀧𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀬𑀣𑀸 𑀏𑀢𑁆𑀣 ‘𑀤𑀻𑀖𑀁 𑀅𑀲𑁆𑀲𑀸𑀲𑀁 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂’𑀢𑀺 𑀯𑀼𑀢𑁆𑀢𑀁; 𑀏𑀯𑀫𑀺𑀥 ‘𑀭𑀲𑁆𑀲𑀁 𑀅𑀲𑁆𑀲𑀸𑀲𑀁 𑀇𑀢𑁆𑀢𑀭𑀲𑀗𑁆𑀔𑀸𑀢𑁂 𑀅𑀲𑁆𑀲𑀲𑀢𑀻’’𑀢𑀺 𑀆𑀕𑀢𑀁. 𑀢𑀲𑁆𑀫𑀸 𑀢𑀲𑁆𑀲 𑀯𑀲𑁂𑀦 𑀬𑀸𑀯 ‘‘𑀢𑁂𑀦 𑀯𑀼𑀘𑁆𑀘𑀢𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸’’𑀢𑀺 𑀢𑀸𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀫𑀬𑀁 𑀅𑀤𑁆𑀥𑀸𑀦𑀯𑀲𑁂𑀦 𑀇𑀢𑁆𑀢𑀭𑀯𑀲𑁂𑀦 𑀘 𑀇𑀫𑁂𑀳𑀸𑀓𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀚𑀸𑀦𑀦𑁆𑀢𑁄 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀧𑀚𑀸𑀦𑀢𑁄 𑀘𑀲𑁆𑀲 𑁋

‘‘𑀤𑀻𑀖𑁄 𑀭𑀲𑁆𑀲𑁄 𑀘 𑀅𑀲𑁆𑀲𑀸𑀲𑁄;

𑀧𑀲𑁆𑀲𑀸𑀲𑁄𑀧𑀺 𑀘 𑀢𑀸𑀤𑀺𑀲𑁄;

𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀯𑀢𑁆𑀢𑀦𑁆𑀢𑀺;

𑀦𑀸𑀲𑀺𑀓𑀕𑁆𑀕𑁂𑀯 𑀪𑀺𑀓𑁆𑀔𑀼𑀦𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁯; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 ¶ ¶ 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀲𑀓𑀮𑀲𑁆𑀲 𑀅𑀲𑁆𑀲𑀸𑀲𑀓𑀸𑀬𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀅𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺. 𑀲𑀓𑀮𑀲𑁆𑀲 𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘; 𑀢𑀲𑁆𑀫𑀸 ‘‘𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀯𑀺𑀲𑀝𑁂 𑀅𑀲𑁆𑀲𑀸𑀲𑀓𑀸𑀬𑁂 𑀧𑀲𑁆𑀲𑀸𑀲𑀓𑀸𑀬𑁂 𑀯𑀸 𑀆𑀤𑀺 𑀧𑀸𑀓𑀝𑁄 𑀳𑁄𑀢𑀺, 𑀦 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁. 𑀲𑁄 𑀆𑀤𑀺𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀫𑀚𑁆𑀛𑀁 𑀧𑀸𑀓𑀝𑀁 𑀳𑁄𑀢𑀺, 𑀦 𑀆𑀤𑀺𑀧𑀭𑀺𑀬𑁄𑀲𑀸𑀦𑀁. 𑀲𑁄 𑀫𑀚𑁆𑀛𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀆𑀤𑀺𑀧𑀭𑀺𑀬𑁄𑀲𑀸𑀦𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀦 𑀆𑀤𑀺𑀫𑀚𑁆𑀛𑀁. 𑀲𑁄 𑀧𑀭𑀺𑀬𑁄𑀲𑀸𑀦𑀁𑀬𑁂𑀯 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀆𑀤𑀺𑀫𑀚𑁆𑀛𑁂 𑀓𑀺𑀮𑀫𑀢𑀺. 𑀏𑀓𑀲𑁆𑀲 𑀲𑀩𑁆𑀩𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺, 𑀲𑁄 𑀲𑀩𑁆𑀩𑀫𑁆𑀧𑀺 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀓𑀢𑁆𑀣𑀘𑀺 𑀓𑀺𑀮𑀫𑀢𑀺. 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺.

𑀢𑀢𑁆𑀣 𑀲𑀺𑀓𑁆𑀔𑀢𑀻𑀢𑀺 𑀏𑀯𑀁 𑀖𑀝𑀢𑀺 𑀯𑀸𑀬𑀫𑀢𑀺. 𑀬𑁄 𑀯𑀸 𑀢𑀣𑀸𑀪𑀽𑀢𑀲𑁆𑀲 𑀲𑀁𑀯𑀭𑁄; 𑀅𑀬𑀫𑁂𑀢𑁆𑀣 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺; 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀧𑀜𑁆𑀜𑀸; 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀺𑀓𑁆𑀔𑀢𑀺 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀬𑀲𑁆𑀫𑀸 𑀧𑀼𑀭𑀺𑀫𑀦𑀬𑁂 𑀓𑁂𑀯𑀮𑀁 𑀅𑀲𑁆𑀲𑀲𑀺𑀢𑀩𑁆𑀩𑀁 𑀧𑀲𑁆𑀲𑀲𑀺𑀢𑀩𑁆𑀩𑀫𑁂𑀯 𑀘, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁; 𑀇𑀢𑁄 𑀧𑀝𑁆𑀞𑀸𑀬 𑀧𑀦 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀻𑀲𑀼 𑀬𑁄𑀕𑁄 𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀢𑀢𑁆𑀣 ‘‘𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺 𑀧𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺’’𑀘𑁆𑀘𑁂𑀯 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀧𑀸𑀴𑀺𑀁 𑀯𑀢𑁆𑀯𑀸 𑀇𑀢𑁄 𑀧𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑀲𑁆𑀲 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀺𑀦𑁄 𑀆𑀓𑀸𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀅𑀦𑀸𑀕𑀢𑀯𑀘𑀦𑀯𑀲𑁂𑀦 𑀧𑀸𑀴𑀺 𑀆𑀭𑁄𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀑𑀴𑀸𑀭𑀺𑀓𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 ¶ 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀢𑀢𑁆𑀭𑁂𑀯𑀁 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀘 𑀧𑀲𑁆𑀲𑀤𑁆𑀥𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘 𑀲𑀤𑀭𑀣𑀸 𑀳𑁄𑀦𑁆𑀢𑀺. 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀘𑀺𑀢𑁆𑀢𑀸𑀦𑀁 𑀑𑀴𑀸𑀭𑀺𑀓𑀢𑁆𑀢𑁂 ¶ 𑀅𑀯𑀽𑀧𑀲𑀦𑁆𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀑𑀴𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀩𑀮𑀯𑀢𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦𑀸𑀲𑀺𑀓𑀸 𑀦𑀧𑁆𑀧𑀳𑁄𑀢𑀺, 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄𑀧𑀺 𑀧𑀲𑁆𑀲𑀲𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀬𑀤𑀸 𑀧𑀦𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑁂 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀯𑀽𑀧𑀲𑀦𑁆𑀢𑀸. 𑀢𑁂𑀲𑀼 𑀯𑀽𑀧𑀲𑀦𑁆𑀢𑁂𑀲𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀼𑀔𑀼𑀫𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑀲𑁆𑀲 𑀥𑀸𑀯𑀺𑀢𑁆𑀯𑀸 𑀧𑀩𑁆𑀩𑀢𑀸 𑀯𑀸 𑀑𑀭𑁄𑀳𑀺𑀢𑁆𑀯𑀸 𑀫𑀳𑀸𑀪𑀸𑀭𑀁 𑀯𑀸 𑀲𑀻𑀲𑀢𑁄 𑀑𑀭𑁄𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 𑀑𑀴𑀸𑀭𑀺𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀳𑁄𑀦𑁆𑀢𑀺, 𑀦𑀸𑀲𑀺𑀓𑀸 𑀦𑀧𑁆𑀧𑀳𑁄𑀢𑀺, 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄𑀧𑀺 𑀧𑀲𑁆𑀲𑀲𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺. 𑀬𑀤𑀸 𑀧𑀦𑁂𑀲 𑀢𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀅𑀮𑁆𑀮𑀲𑀸𑀝𑀓𑀁 𑀳𑀤𑀬𑁂 𑀓𑀢𑁆𑀯𑀸 𑀲𑀻𑀢𑀸𑀬 𑀙𑀸𑀬𑀸𑀬 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀣𑀲𑁆𑀲 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀼𑀔𑀼𑀫𑀸 𑀳𑁄𑀦𑁆𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁄 𑀦𑀢𑁆𑀣𑀻’’𑀢𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸. 𑀏𑀯𑀫𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑁄 𑀘…𑀧𑁂… 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺𑀲𑁆𑀲 𑀧𑀼𑀩𑁆𑀩𑁂 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 ‘‘𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀫𑀻’’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺, 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀦 𑀅𑀢𑁆𑀣𑀺. 𑀢𑁂𑀦𑀲𑁆𑀲 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑀢𑁄 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀔𑀼𑀫𑁄 𑀳𑁄𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀸𑀭𑀤𑁆𑀥𑁂 𑀓𑀸𑀬𑁂 𑀘𑀺𑀢𑁆𑀢𑁂 𑀘, 𑀅𑀥𑀺𑀫𑀢𑁆𑀢𑀁 𑀧𑀯𑀢𑁆𑀢𑀢𑀺;

𑀅𑀲𑀸𑀭𑀤𑁆𑀥𑀫𑁆𑀳𑀺 𑀓𑀸𑀬𑀫𑁆𑀳𑀺, 𑀲𑀼𑀔𑀼𑀫𑀁 𑀲𑀫𑁆𑀧𑀯𑀢𑁆𑀢𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁨𑁦; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀧𑀭𑀺𑀕𑁆𑀕𑀳𑁂𑀧𑀺 𑀑𑀴𑀸𑀭𑀺𑀓𑁄, 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂 𑀲𑀼𑀔𑀼𑀫𑁄; 𑀢𑀲𑁆𑀫𑀺𑀫𑁆𑀧𑀺 𑀑𑀴𑀸𑀭𑀺𑀓𑁄 𑀧𑀞𑀫𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀧𑀞𑀫𑀚𑁆𑀛𑀸𑀦𑁂 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀤𑀼𑀢𑀺𑀬𑀚𑁆𑀛𑀸𑀦𑁂 𑀘 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 ¶ 𑀑𑀴𑀸𑀭𑀺𑀓𑁄, 𑀢𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀼𑀫𑁄. 𑀢𑀢𑀺𑀬𑀚𑁆𑀛𑀸𑀦𑁂 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀅𑀢𑀺𑀲𑀼𑀔𑀼𑀫𑁄 𑀅𑀧𑁆𑀧𑀯𑀢𑁆𑀢𑀺𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀇𑀤𑀁 𑀢𑀸𑀯 𑀤𑀻𑀖𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 ¶ 𑀫𑀢𑀁.

𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 ‘‘𑀧𑀞𑀫𑀚𑁆𑀛𑀸𑀦𑁂 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀲𑀼𑀔𑀼𑀫𑁄’’𑀢𑀺 𑀏𑀯𑀁 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀢𑁄 𑀉𑀧𑀭𑀽𑀧𑀭𑀺𑀚𑁆𑀛𑀸𑀦𑀽𑀧𑀘𑀸𑀭𑁂𑀧𑀺 𑀲𑀼𑀔𑀼𑀫𑀢𑀭𑀁 𑀇𑀘𑁆𑀙𑀦𑁆𑀢𑀺. 𑀲𑀩𑁆𑀩𑁂𑀲𑀁𑀬𑁂𑀯 𑀧𑀦 𑀫𑀢𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀬𑀁 𑀢𑀸𑀯 𑀲𑀫𑀣𑁂 𑀦𑀬𑁄.

𑀯𑀺𑀧𑀲𑁆𑀲𑀦𑀸𑀬𑀁 ¶ 𑀧𑀦 𑀅𑀧𑀭𑀺𑀕𑁆𑀕𑀳𑁂 𑀧𑀯𑀢𑁆𑀢𑁄 𑀓𑀸𑀬𑀲𑀗𑁆𑀔𑀸𑀭𑁄 𑀑𑀴𑀸𑀭𑀺𑀓𑁄, 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀉𑀧𑀸𑀤𑀸𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀲𑀓𑀮𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀅𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄. 𑀲𑁄𑀧𑀺 𑀑𑀴𑀸𑀭𑀺𑀓𑁄, 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀲𑀼𑀔𑀼𑀫𑁄. 𑀲𑁄𑀧𑀺 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸𑀬 𑀑𑀴𑀸𑀭𑀺𑀓𑁄, 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀲𑀼𑀔𑀼𑀫𑁄. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀧𑀲𑁆𑀲𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁂𑀢𑁆𑀣 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀘 𑀧𑀲𑁆𑀲𑀤𑁆𑀥𑀺 𑀘 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀧𑀦𑀲𑁆𑀲 𑀲𑀤𑁆𑀥𑀺𑀁 𑀘𑁄𑀤𑀦𑀸𑀲𑁄𑀥𑀦𑀸𑀳𑀺 𑀏𑀯𑀫𑀢𑁆𑀣𑁄 𑀯𑀼𑀢𑁆𑀢𑁄 𑁋 ‘‘𑀓𑀣𑀁 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀢𑀺? 𑀓𑀢𑀫𑁂 𑀓𑀸𑀬𑀲𑀗𑁆𑀔𑀸𑀭𑀸? 𑀤𑀻𑀖𑀁 𑀅𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸 𑀓𑀸𑀬𑀲𑀗𑁆𑀔𑀸𑀭𑀸, 𑀢𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀲𑀺𑀓𑁆𑀔𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸…𑀧𑁂… 𑀭𑀲𑁆𑀲𑀁 𑀅𑀲𑁆𑀲𑀸𑀲𑀸…𑀧𑁂… 𑀭𑀲𑁆𑀲𑀁 𑀧𑀲𑁆𑀲𑀸𑀲𑀸… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀸… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀸 𑀓𑀸𑀬𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸 𑀓𑀸𑀬𑀲𑀗𑁆𑀔𑀸𑀭𑀸, 𑀢𑁂 𑀓𑀸𑀬𑀲𑀗𑁆𑀔𑀸𑀭𑁂 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀦𑀺𑀭𑁄𑀥𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀲𑀺𑀓𑁆𑀔𑀢𑀺.

𑀬𑀣𑀸𑀭𑀽𑀧𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺 𑀬𑀸 𑀓𑀸𑀬𑀲𑁆𑀲 𑀆𑀦𑀫𑀦𑀸 𑀯𑀺𑀦𑀫𑀦𑀸 𑀲𑀦𑁆𑀦𑀫𑀦𑀸 ¶ 𑀧𑀡𑀫𑀦𑀸 𑀇𑀜𑁆𑀚𑀦𑀸 𑀨𑀦𑁆𑀤𑀦𑀸 𑀘𑀮𑀦𑀸 𑀓𑀫𑁆𑀧𑀦𑀸 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 ¶ 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀬𑀣𑀸𑀭𑀽𑀧𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺 𑀬𑀸 𑀓𑀸𑀬𑀲𑁆𑀲 𑀦 𑀆𑀦𑀫𑀦𑀸 𑀦 𑀯𑀺𑀦𑀫𑀦𑀸 𑀦 𑀲𑀦𑁆𑀦𑀫𑀦𑀸 𑀦 𑀧𑀡𑀫𑀦𑀸 𑀅𑀦𑀺𑀜𑁆𑀚𑀦𑀸 𑀅𑀨𑀦𑁆𑀤𑀦𑀸 𑀅𑀘𑀮𑀦𑀸 𑀅𑀓𑀫𑁆𑀧𑀦𑀸, 𑀲𑀦𑁆𑀢𑀁 𑀲𑀼𑀔𑀼𑀫𑀁 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺.

𑀇𑀢𑀺 ¶ 𑀓𑀺𑀭 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺, 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀦 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀦 𑀦 𑀳𑁄𑀢𑀺, 𑀦 𑀘 𑀦𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀇𑀢𑀺 𑀓𑀺𑀭 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀢𑀜𑁆𑀘 𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀬𑀣𑀸 𑀓𑀣𑀁 𑀯𑀺𑀬? 𑀲𑁂𑀬𑁆𑀬𑀣𑀸𑀧𑀺 𑀓𑀁𑀲𑁂 𑀆𑀓𑁄𑀝𑀺𑀢𑁂 𑀧𑀞𑀫𑀁 𑀑𑀴𑀸𑀭𑀺𑀓𑀸 𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑀺, 𑀑𑀴𑀸𑀭𑀺𑀓𑀸𑀦𑀁 𑀲𑀤𑁆𑀤𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀑𑀴𑀸𑀭𑀺𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀓𑀸 𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑀺, 𑀲𑀼𑀔𑀼𑀫𑀓𑀸𑀦𑀁 𑀲𑀤𑁆𑀤𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀲𑀼𑀔𑀼𑀫𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀺 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺; 𑀏𑀯𑀫𑁂𑀯 𑀧𑀞𑀫𑀁 𑀑𑀴𑀸𑀭𑀺𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀑𑀴𑀸𑀭𑀺𑀓𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀲𑀼𑀔𑀼𑀫𑀓𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀫𑀦𑀲𑀺𑀓𑀢𑀢𑁆𑀢𑀸 ¶ 𑀲𑀽𑀧𑀥𑀸𑀭𑀺𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑁂𑀧𑀺 𑀲𑀼𑀔𑀼𑀫𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀺 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺.

𑀏𑀯𑀁 ¶ 𑀲𑀦𑁆𑀢𑁂 𑀯𑀸𑀢𑀽𑀧𑀮𑀤𑁆𑀥𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀳𑁄𑀢𑀺, 𑀢𑀜𑁆𑀘 𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀯𑀼𑀝𑁆𑀞𑀳𑀦𑁆𑀢𑀺𑀧𑀺.

𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄, 𑀉𑀧𑀝𑁆𑀞𑀸𑀦𑀁 𑀲𑀢𑀺, 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁 𑀦𑁄 𑀲𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘, 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺 (𑀧𑀝𑀺. 𑀫. 𑁧.𑁧𑁭𑁧).

𑀅𑀬𑀁 𑀢𑀸𑀯𑁂𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀧𑀞𑀫𑀘𑀢𑀼𑀓𑁆𑀓𑀲𑁆𑀲 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀇𑀤𑀫𑁂𑀯 𑀘𑀢𑀼𑀓𑁆𑀓𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺 𑀏𑀢𑁆𑀣 𑀧𑀢𑁆𑀢𑀚𑁆𑀛𑀸𑀦𑀲𑁆𑀲 𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀤𑀝𑁆𑀞𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 ¶ 𑀧𑀸𑀧𑀼𑀡𑀺𑀢𑀼𑀓𑀸𑀫𑁂𑀦 𑀩𑀼𑀤𑁆𑀥𑀧𑀼𑀢𑁆𑀢𑁂𑀦 𑀬𑀁 𑀓𑀸𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 𑀇𑀥𑁂𑀯 𑀢𑀸𑀯 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀲𑁂𑀦 𑀆𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀩𑁆𑀩𑀺𑀥𑀁 𑀢𑀸𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀺𑀯𑀺𑀥𑀸 𑀯𑀺𑀲𑁄𑀥𑀦𑀸 𑁋 𑀅𑀦𑀸𑀧𑀚𑁆𑀚𑀦𑀁, 𑀆𑀧𑀦𑁆𑀦𑀯𑀼𑀝𑁆𑀞𑀸𑀦𑀁, 𑀓𑀺𑀮𑁂𑀲𑁂𑀳𑀺 𑀘 𑀅𑀧𑁆𑀧𑀢𑀺𑀧𑀻𑀴𑀦𑀁. 𑀏𑀯𑀁 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀳𑀺 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺. 𑀬𑀫𑁆𑀧𑀺𑀤𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀆𑀘𑀭𑀺𑀬𑀯𑀢𑁆𑀢𑀁 𑀚𑀦𑁆𑀢𑀸𑀖𑀭𑀯𑀢𑁆𑀢𑀁 𑀉𑀧𑁄𑀲𑀣𑀸𑀕𑀸𑀭𑀯𑀢𑁆𑀢𑀁 𑀤𑁆𑀯𑁂𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲𑀯𑀺𑀥𑀁 𑀫𑀳𑀸𑀯𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀲𑀸𑀥𑀼𑀓𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀬𑁄 𑀳𑀺 ‘‘𑀅𑀳𑀁 𑀲𑀻𑀮𑀁 𑀭𑀓𑁆𑀔𑀸𑀫𑀺, 𑀓𑀺𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀦 𑀓𑀫𑁆𑀫’’𑀦𑁆𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 ¶ 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑁂 𑀧𑀦 𑀧𑀭𑀺𑀧𑀽𑀭𑁂 𑀲𑀻𑀮𑀁 𑀧𑀭𑀺𑀧𑀽𑀭𑀢𑀺, 𑀲𑀻𑀮𑁂 𑀧𑀭𑀺𑀧𑀽𑀭𑁂 𑀲𑀫𑀸𑀥𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀥𑀫𑁆𑀫𑀁 𑀅𑀧𑀭𑀺𑀧𑀽𑀭𑁂𑀢𑁆𑀯𑀸 ‘𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁫.𑁨𑁧) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀢𑁂𑀦 𑀬𑀫𑁆𑀧𑀺𑀤𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀲𑀸𑀥𑀼𑀓𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀢𑀢𑁄 𑁋

‘‘𑀆𑀯𑀸𑀲𑁄 ¶ 𑀘 𑀓𑀼𑀮𑀁 𑀮𑀸𑀪𑁄, 𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄, 𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀬𑁄 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀲𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄.

𑀏𑀯𑀁 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀜𑁆𑀘. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀪𑀺𑀓𑁆𑀔𑀼𑀲𑀗𑁆𑀖𑀸𑀤𑀻𑀲𑀼 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀘 𑀅𑀲𑀼𑀪𑀲𑀜𑁆𑀜𑀸𑀢𑀺𑀧𑀺 𑀏𑀓𑁂. 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀢𑀸𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸; 𑀢𑀢𑁄 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼, 𑀢𑀢𑁄 𑀕𑁄𑀘𑀭𑀕𑀸𑀫𑁂 𑀇𑀲𑁆𑀲𑀭𑀚𑀦𑁂, 𑀢𑀢𑁄 𑀢𑀢𑁆𑀣 𑀫𑀦𑀼𑀲𑁆𑀲𑁂 𑀉𑀧𑀸𑀤𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼. 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸𑀬 𑀲𑀳𑀯𑀸𑀲𑀻𑀦𑀁 𑀫𑀼𑀤𑀼𑀘𑀺𑀢𑁆𑀢𑀢𑀁 𑀚𑀦𑁂𑀢𑀺, 𑀅𑀣𑀲𑁆𑀲 𑀲𑀼𑀔𑀲𑀁𑀯𑀸𑀲𑀢𑀸 𑀳𑁄𑀢𑀺. 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀸𑀳𑀺 𑀤𑁂𑀯𑀢𑀸𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄 𑀳𑁄𑀢𑀺. 𑀕𑁄𑀘𑀭𑀕𑀸𑀫𑁂 𑀇𑀲𑁆𑀲𑀭𑀚𑀦𑁂 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀳𑀺 𑀇𑀲𑁆𑀲𑀭𑁂𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀭𑀓𑁆𑀔𑀺𑀢𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀫𑁂𑀢𑁆𑀢𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 𑀅𑀧𑀭𑀺𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑁄 𑀳𑁄𑀢𑀺.

𑀫𑀭𑀡𑀲𑁆𑀲𑀢𑀺𑀬𑀸 𑀧𑀦 ‘‘𑀅𑀯𑀲𑁆𑀲𑀁 𑀫𑀭𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑁂𑀲𑀦𑀁 𑀧𑀳𑀸𑀬 𑀉𑀧𑀭𑀽𑀧𑀭𑀺𑀯𑀟𑁆𑀠𑀫𑀸𑀦𑀲𑀁𑀯𑁂𑀕𑁄 ¶ ¶ 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑁄𑀢𑀺. 𑀅𑀲𑀼𑀪𑀲𑀜𑁆𑀜𑀸𑀬 𑀤𑀺𑀩𑁆𑀩𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀢𑀡𑁆𑀳𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀢𑁂𑀦𑀲𑁆𑀲𑁂𑀢𑀁 𑀢𑀬𑀁 𑀏𑀯𑀁 𑀩𑀳𑀽𑀧𑀓𑀸𑀭𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀓𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀲𑁆𑀲 𑀘 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀧𑀦 𑀬𑀁 𑀬𑀲𑁆𑀲 𑀘𑀭𑀺𑀢𑀸𑀦𑀼𑀓𑀽𑀮𑀁, 𑀢𑀁 𑀢𑀲𑁆𑀲 𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 ‘‘𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀇𑀤𑀫𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 ‘‘𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀻𑀮𑀯𑀺𑀲𑁄𑀥𑀦𑀓𑀣𑀁 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀓𑀣𑀜𑁆𑀘 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀁 𑀯𑀺𑀲𑀼𑀤𑁆𑀥𑀲𑀻𑀮𑁂𑀦 𑀧𑀦 𑀉𑀧𑀘𑁆𑀙𑀺𑀦𑁆𑀦𑀧𑀮𑀺𑀩𑁄𑀥𑁂𑀦 𑀘 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁂𑀦 𑀇𑀫𑀺𑀦𑀸𑀯 𑀓𑀫𑁆𑀫𑀝𑁆𑀞𑀸𑀦𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀩𑀼𑀤𑁆𑀥𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀁 𑀅𑀮𑀪𑀦𑁆𑀢𑁂𑀦 𑀅𑀦𑀸𑀕𑀸𑀫𑀺𑀲𑁆𑀲, 𑀢𑀫𑁆𑀧𑀺 ¶ 𑀅𑀮𑀪𑀦𑁆𑀢𑁂𑀦 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀺𑀲𑁆𑀲, 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑀺𑀦𑀺𑀘𑁆𑀙𑀬𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀅𑀭𑀳𑀦𑁆𑀢𑀸𑀤𑀬𑁄 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀆𑀘𑀺𑀓𑁆𑀔𑀦𑁆𑀢𑀺. 𑀅𑀬𑀁 𑀧𑀦 𑀕𑀳𑀦𑀧𑀤𑁂𑀲𑁂 𑀫𑀳𑀸𑀳𑀢𑁆𑀣𑀺𑀧𑀣𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀲𑀩𑁆𑀩𑀢𑁆𑀣 𑀅𑀲𑀫𑁆𑀫𑀽𑀴𑁆𑀳𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑀸 𑀯𑀺𑀦𑀬𑀸𑀘𑀸𑀭𑀲𑀫𑁆𑀧𑀦𑁆𑀦𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀸𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑀲𑁆𑀲 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀢𑁆𑀭𑀺𑀫𑁂 𑀧𑀜𑁆𑀘 𑀲𑀦𑁆𑀥𑀬𑁄 ¶ 𑁋 𑀉𑀕𑁆𑀕𑀳𑁄, 𑀧𑀭𑀺𑀧𑀼𑀘𑁆𑀙𑀸, 𑀉𑀧𑀝𑁆𑀞𑀸𑀦𑀁, 𑀅𑀧𑁆𑀧𑀦𑀸, 𑀮𑀓𑁆𑀔𑀡𑀦𑁆𑀢𑀺. 𑀢𑀢𑁆𑀣 ‘‘𑀉𑀕𑁆𑀕𑀳𑁄’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, ‘‘𑀧𑀭𑀺𑀧𑀼𑀘𑁆𑀙𑀸’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀭𑀺𑀧𑀼𑀘𑁆𑀙𑀦𑀸, ‘‘𑀉𑀧𑀝𑁆𑀞𑀸𑀦𑀁’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀁, ‘‘𑀅𑀧𑁆𑀧𑀦𑀸’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀦𑀸, ‘‘𑀮𑀓𑁆𑀔𑀡𑀁’’ 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀓𑁆𑀔𑀡𑀁. ‘‘𑀏𑀯𑀁𑀮𑀓𑁆𑀔𑀡𑀫𑀺𑀤𑀁 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀽𑀧𑀥𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀦𑀸𑀧𑀺 𑀦 𑀓𑀺𑀮𑀫𑀢𑀺, 𑀆𑀘𑀭𑀺𑀬𑀫𑁆𑀧𑀺 𑀦 𑀯𑀺𑀳𑁂𑀞𑁂𑀢𑀺; 𑀢𑀲𑁆𑀫𑀸 𑀣𑁄𑀓𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀩𑀳𑀼𑀓𑀸𑀮𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀏𑀯𑀁 𑀧𑀜𑁆𑀘𑀲𑀦𑁆𑀥𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀢𑀢𑁆𑀣 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀢𑀢𑁆𑀣𑁂𑀯 𑀯𑀲𑀺𑀢𑀩𑁆𑀩𑀁. 𑀦𑁄 𑀘𑁂 𑀢𑀢𑁆𑀣 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀫𑀦𑁆𑀤𑀧𑀜𑁆𑀜𑁄 𑀬𑁄𑀚𑀦𑀧𑀭𑀫𑀁 𑀕𑀦𑁆𑀢𑁆𑀯𑀸, 𑀲𑀘𑁂 𑀢𑀺𑀓𑁆𑀔𑀧𑀜𑁆𑀜𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀭𑀲𑀲𑁂𑀦𑀸𑀲𑀦𑀤𑁄𑀲𑀯𑀺𑀯𑀚𑁆𑀚𑀺𑀢𑀁, 𑀧𑀜𑁆𑀘𑀲𑁂𑀦𑀸𑀲𑀦𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀉𑀧𑀕𑀫𑁆𑀫 𑀢𑀢𑁆𑀣 𑀯𑀲𑀦𑁆𑀢𑁂𑀦 𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦 ¶ 𑀓𑀢𑀪𑀢𑁆𑀢𑀓𑀺𑀘𑁆𑀘𑁂𑀦 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀆𑀘𑀭𑀺𑀬𑀼𑀕𑁆𑀕𑀳𑀢𑁄 𑀏𑀓𑀧𑀤𑀫𑁆𑀧𑀺 𑀅𑀲𑀫𑁆𑀫𑀼𑀲𑁆𑀲𑀦𑁆𑀢𑁂𑀦 𑀇𑀤𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀫𑀁 𑀓𑀣𑀸𑀫𑀕𑁆𑀕𑀁 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀕𑀳𑁂𑀢𑀩𑁆𑀩𑁄.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀇𑀤𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀢𑀢𑁆𑀭𑀸𑀬𑀁 𑀫𑀦𑀲𑀺𑀓𑀸𑀭𑀯𑀺𑀥𑀺 𑁋

‘‘𑀕𑀡𑀦𑀸 𑀅𑀦𑀼𑀩𑀦𑁆𑀥𑀦𑀸, 𑀨𑀼𑀲𑀦𑀸 𑀞𑀧𑀦𑀸 𑀲𑀮𑁆𑀮𑀓𑁆𑀔𑀡𑀸;

𑀯𑀺𑀯𑀝𑁆𑀝𑀦𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀢𑁂𑀲𑀜𑁆𑀘 𑀧𑀝𑀺𑀧𑀲𑁆𑀲𑀦𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁨𑁩; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

‘‘𑀕𑀡𑀦𑀸’’𑀢𑀺 ¶ 𑀕𑀡𑀦𑀸𑀬𑁂𑀯. ‘‘𑀅𑀦𑀼𑀩𑀦𑁆𑀥𑀦𑀸’’𑀢𑀺 𑀅𑀦𑀼𑀯𑀳𑀦𑀸. ‘‘𑀨𑀼𑀲𑀦𑀸’’𑀢𑀺 𑀨𑀼𑀝𑁆𑀞𑀝𑁆𑀞𑀸𑀦𑀁. ‘‘𑀞𑀧𑀦𑀸’’𑀢𑀺 𑀅𑀧𑁆𑀧𑀦𑀸. ‘‘𑀲𑀮𑁆𑀮𑀓𑁆𑀔𑀡𑀸’’𑀢𑀺 ¶ 𑀯𑀺𑀧𑀲𑁆𑀲𑀦𑀸. ‘‘𑀯𑀺𑀯𑀝𑁆𑀝𑀦𑀸’’𑀢𑀺 𑀫𑀕𑁆𑀕𑁄. ‘‘𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀨𑀮𑀁. ‘‘𑀢𑁂𑀲𑀜𑁆𑀘 𑀧𑀝𑀺𑀧𑀲𑁆𑀲𑀦𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀢𑁆𑀣 𑀇𑀫𑀺𑀦𑀸 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑁂𑀦 𑀧𑀞𑀫𑀁 𑀕𑀡𑀦𑀸𑀬 𑀇𑀤𑀁 𑀓𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀕𑀡𑁂𑀦𑁆𑀢𑁂𑀦 𑀘 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀞𑀧𑁂𑀢𑀩𑁆𑀩𑀁, 𑀤𑀲𑀦𑁆𑀦𑀁 𑀉𑀧𑀭𑀺 𑀦 𑀦𑁂𑀢𑀩𑁆𑀩𑀁, 𑀅𑀦𑁆𑀢𑀭𑁂 𑀔𑀡𑁆𑀟𑀁 𑀦 𑀤𑀲𑁆𑀲𑁂𑀢𑀩𑁆𑀩𑀁. 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀞𑀧𑁂𑀦𑁆𑀢𑀲𑁆𑀲 𑀳𑀺 𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀧𑁆𑀨𑀦𑁆𑀤𑀢𑀺, 𑀲𑀫𑁆𑀩𑀸𑀥𑁂 𑀯𑀚𑁂 𑀲𑀦𑁆𑀦𑀺𑀭𑀼𑀤𑁆𑀥𑀕𑁄𑀕𑀡𑁄 𑀯𑀺𑀬. 𑀤𑀲𑀦𑁆𑀦𑀁 𑀉𑀧𑀭𑀺 𑀦𑁂𑀦𑁆𑀢𑀲𑁆𑀲 𑀕𑀡𑀦𑀸𑀦𑀺𑀲𑁆𑀲𑀺𑀢𑁄𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀦𑁆𑀢𑀭𑀸 𑀔𑀡𑁆𑀟𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 ‘‘𑀲𑀺𑀔𑀸𑀧𑁆𑀧𑀢𑁆𑀢𑀁 𑀦𑀼 𑀔𑁄 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀦𑁄’’𑀢𑀺 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺. 𑀢𑀲𑁆𑀫𑀸 𑀏𑀢𑁂 𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀕𑀡𑁂𑀢𑀩𑁆𑀩𑀁.

𑀕𑀡𑁂𑀦𑁆𑀢𑁂𑀦 𑀘 𑀧𑀞𑀫𑀁 𑀤𑀦𑁆𑀥𑀕𑀡𑀦𑀸𑀬 𑀥𑀜𑁆𑀜𑀫𑀸𑀧𑀓𑀕𑀡𑀦𑀸𑀬 𑀕𑀡𑁂𑀢𑀩𑁆𑀩𑀁. 𑀥𑀜𑁆𑀜𑀫𑀸𑀧𑀓𑁄 𑀳𑀺 𑀦𑀸𑀴𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀏𑀓’’𑀦𑁆𑀢𑀺 𑀯𑀢𑁆𑀯𑀸 𑀑𑀓𑀺𑀭𑀢𑀺. 𑀧𑀼𑀦 𑀧𑀽𑀭𑁂𑀦𑁆𑀢𑁄 𑀓𑀺𑀜𑁆𑀘𑀺 𑀓𑀘𑀯𑀭𑀁 𑀤𑀺𑀲𑁆𑀯𑀸 𑀢𑀁 𑀙𑀟𑁆𑀟𑁂𑀦𑁆𑀢𑁄 ‘‘𑀏𑀓𑀁 𑀏𑀓’’𑀦𑁆𑀢𑀺 𑀯𑀤𑀢𑀺. 𑀏𑀲 𑀦𑀬𑁄 ‘‘𑀤𑁆𑀯𑁂 𑀤𑁆𑀯𑁂’’𑀢𑀺𑀆𑀤𑀻𑀲𑀼. 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑁄 𑀉𑀧𑀝𑁆𑀞𑀸𑀢𑀺 𑀢𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀁 𑀏𑀓’’𑀦𑁆𑀢𑀺 𑀆𑀤𑀺𑀁𑀓𑀢𑁆𑀯𑀸 𑀬𑀸𑀯 ‘‘𑀤𑀲 𑀤𑀲𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀫𑀸𑀦𑀁 𑀉𑀧𑀮𑀓𑁆𑀔𑁂𑀢𑁆𑀯𑀸𑀯 𑀕𑀡𑁂𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀕𑀡𑀬𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀅𑀣𑀸𑀦𑁂𑀦 𑀢𑀁 𑀤𑀦𑁆𑀥𑀕𑀡𑀦𑀁 𑀥𑀜𑁆𑀜𑀫𑀸𑀧𑀓𑀕𑀡𑀦𑀁 𑀧𑀳𑀸𑀬 𑀲𑀻𑀖𑀕𑀡𑀦𑀸𑀬 𑀕𑁄𑀧𑀸𑀮𑀓𑀕𑀡𑀦𑀸𑀬 𑀕𑀡𑁂𑀢𑀩𑁆𑀩𑀁 ¶ . 𑀙𑁂𑀓𑁄 𑀳𑀺 𑀕𑁄𑀧𑀸𑀮𑀓𑁄 𑀲𑀓𑁆𑀔𑀭𑀸𑀬𑁄 𑀉𑀘𑁆𑀙𑀗𑁆𑀕𑁂𑀦 𑀕𑀳𑁂𑀢𑁆𑀯𑀸 𑀭𑀚𑁆𑀚𑀼𑀤𑀡𑁆𑀟𑀳𑀢𑁆𑀣𑁄 𑀧𑀸𑀢𑁄𑀯 𑀯𑀚𑀁 𑀕𑀦𑁆𑀢𑁆𑀯𑀸 𑀕𑀸𑀯𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀮𑀺𑀖𑀢𑁆𑀣𑀫𑁆𑀪𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑁄 𑀤𑁆𑀯𑀸𑀭𑀁 𑀧𑀢𑁆𑀢𑀁 𑀧𑀢𑁆𑀢𑀁𑀬𑁂𑀯 𑀕𑀸𑀯𑀁 ‘‘𑀏𑀓𑁄 𑀤𑁆𑀯𑁂’’𑀢𑀺 𑀲𑀓𑁆𑀔𑀭𑀁 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀕𑀡𑁂𑀢𑀺. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑁆𑀩𑀸𑀥𑁂 𑀑𑀓𑀸𑀲𑁂 𑀤𑀼𑀓𑁆𑀔𑀁 𑀯𑀼𑀢𑁆𑀣𑀕𑁄𑀕𑀡𑁄 ¶ 𑀦𑀺𑀓𑁆𑀔𑀫𑀦𑁆𑀢𑁄 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀖𑀁𑀲𑀦𑁆𑀢𑁄 𑀯𑁂𑀕𑁂𑀦 𑀯𑁂𑀕𑁂𑀦 𑀧𑀼𑀜𑁆𑀚𑁄 𑀧𑀼𑀜𑁆𑀚𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺. 𑀲𑁄 𑀯𑁂𑀕𑁂𑀦 𑀯𑁂𑀕𑁂𑀦 ‘‘𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀲𑀸’’𑀢𑀺 𑀕𑀡𑁂𑀢𑀺𑀬𑁂𑀯. 𑀏𑀯𑀫𑀺𑀫𑀲𑁆𑀲𑀸𑀧𑀺 𑀧𑀼𑀭𑀺𑀫𑀦𑀬𑁂𑀦 𑀕𑀡𑀬𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀺. 𑀢𑀢𑁄 𑀢𑁂𑀦 ‘‘𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀘𑀭𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀕𑁆𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀤𑁆𑀯𑀸𑀭𑀧𑁆𑀧𑀢𑁆𑀢𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 ¶ , 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀙, 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀙 𑀲𑀢𑁆𑀢…𑀧𑁂… 𑀅𑀝𑁆𑀞… 𑀦𑀯… 𑀤𑀲𑀸’’𑀢𑀺 𑀲𑀻𑀖𑀁 𑀲𑀻𑀖𑀁 𑀕𑀡𑁂𑀢𑀩𑁆𑀩𑀫𑁂𑀯. 𑀕𑀡𑀦𑀸𑀧𑀝𑀺𑀩𑀤𑁆𑀥𑁂 𑀳𑀺 𑀓𑀫𑁆𑀫𑀝𑁆𑀞𑀸𑀦𑁂 𑀕𑀡𑀦𑀸𑀩𑀮𑁂𑀦𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺 𑀅𑀭𑀺𑀢𑁆𑀢𑀽𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀘𑀡𑁆𑀟𑀲𑁄𑀢𑁂 𑀦𑀸𑀯𑀸𑀞𑀧𑀦𑀫𑀺𑀯.

𑀢𑀲𑁆𑀲𑁂𑀯𑀁 𑀲𑀻𑀖𑀁 𑀲𑀻𑀖𑀁 𑀕𑀡𑀬𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀅𑀣 ‘‘𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀯𑀸𑀢𑀁 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀕𑁂𑀦 𑀯𑁂𑀕𑁂𑀦 𑀕𑀡𑁂𑀢𑀩𑁆𑀩𑀁. 𑀅𑀦𑁆𑀢𑁄𑀧𑀯𑀺𑀲𑀦𑀯𑀸𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀧𑀯𑁂𑀲𑀬𑀢𑁄 𑀅𑀩𑁆𑀪𑀦𑁆𑀢𑀭𑀁 𑀯𑀸𑀢𑀩𑁆𑀪𑀸𑀳𑀢𑀁 𑀫𑁂𑀤𑀧𑀽𑀭𑀺𑀢𑀁 𑀯𑀺𑀬 𑀳𑁄𑀢𑀺, 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀦𑀻𑀳𑀭𑀢𑁄 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺. 𑀨𑀼𑀝𑁆𑀞𑁄𑀓𑀸𑀲𑁂 𑀧𑀦 𑀲𑀢𑀺𑀁 𑀞𑀧𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲𑁂𑀯 𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀢𑁄 ¶ 𑀘 𑀩𑀳𑀺 𑀘 𑀯𑀸𑀢𑀁 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀕𑁂𑀦 𑀯𑁂𑀕𑁂𑀦 𑀕𑀡𑁂𑀢𑀩𑁆𑀩’’𑀦𑁆𑀢𑀺.

𑀓𑀻𑀯 𑀘𑀺𑀭𑀁 𑀧𑀦𑁂𑀢𑀁 𑀕𑀡𑁂𑀢𑀩𑁆𑀩𑀦𑁆𑀢𑀺? 𑀬𑀸𑀯 𑀯𑀺𑀦𑀸 𑀕𑀡𑀦𑀸𑀬 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑁂 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺. 𑀩𑀳𑀺 𑀯𑀺𑀲𑀝𑀯𑀺𑀢𑀓𑁆𑀓𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑁂 𑀲𑀢𑀺 𑀲𑀡𑁆𑀞𑀧𑀦𑀢𑁆𑀣𑀁𑀬𑁂𑀯 𑀳𑀺 𑀕𑀡𑀦𑀸𑀢𑀺.

𑀏𑀯𑀁 𑀕𑀡𑀦𑀸𑀬 𑀫𑀦𑀲𑀺𑀓𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑀸𑀬 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀦𑀼𑀩𑀦𑁆𑀥𑀦𑀸 𑀦𑀸𑀫 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀕𑀫𑀦𑀁; 𑀢𑀜𑁆𑀘 𑀔𑁄 𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀼𑀕𑀫𑀦𑀯𑀲𑁂𑀦. 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑀲𑁆𑀲 𑀳𑀺 𑀦𑀸𑀪𑀺 𑀆𑀤𑀺, 𑀳𑀤𑀬𑀁 𑀫𑀚𑁆𑀛𑀁, 𑀦𑀸𑀲𑀺𑀓𑀕𑁆𑀕𑀁 𑀧𑀭𑀺𑀬𑁄𑀲𑀸𑀦𑀁. 𑀅𑀩𑁆𑀪𑀦𑁆𑀢𑀭𑀧𑀯𑀺𑀲𑀦𑀯𑀸𑀢𑀲𑁆𑀲 𑀦𑀸𑀲𑀺𑀓𑀕𑁆𑀕𑀁 𑀆𑀤𑀺, 𑀳𑀤𑀬𑀁 𑀫𑀚𑁆𑀛𑀁, 𑀦𑀸𑀪𑀺 𑀧𑀭𑀺𑀬𑁄𑀲𑀸𑀦𑀁. 𑀢𑀜𑁆𑀘𑀲𑁆𑀲 𑀅𑀦𑀼𑀕𑀘𑁆𑀙𑀢𑁄 𑀯𑀺𑀓𑁆𑀔𑁂𑀧𑀕𑀢𑀁 𑀘𑀺𑀢𑁆𑀢𑀁 𑀲𑀸𑀭𑀤𑁆𑀥𑀸𑀬 𑀘𑁂𑀯 𑀳𑁄𑀢𑀺 𑀇𑀜𑁆𑀚𑀦𑀸𑀬 𑀘. 𑀬𑀣𑀸𑀳 𑁋

‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 ¶ 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘. 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺 (𑀧𑀝𑀺. 𑀫. 𑁧.𑁧𑁫𑁭).

𑀢𑀲𑁆𑀫𑀸 𑀅𑀦𑀼𑀩𑀦𑁆𑀥𑀦𑀸𑀬 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀧𑀺𑀘 𑀔𑁄 𑀨𑀼𑀲𑀦𑀸𑀯𑀲𑁂𑀦 𑀘 𑀞𑀧𑀦𑀸𑀯𑀲𑁂𑀦 𑀘 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀯𑀲𑁂𑀦 ¶ 𑀯𑀺𑀬 𑀳𑀺 𑀨𑀼𑀲𑀦𑀸𑀞𑀧𑀦𑀸𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺. 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀧𑀦 𑀕𑀡𑁂𑀦𑁆𑀢𑁄 𑀕𑀡𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀺. 𑀢𑀢𑁆𑀣𑁂𑀯 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀢𑁂 𑀲𑀢𑀺𑀬𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀅𑀧𑁆𑀧𑀦𑀸𑀯𑀲𑁂𑀦 𑀘 ¶ 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 ‘‘𑀅𑀦𑀼𑀩𑀦𑁆𑀥𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀞𑀧𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑀗𑁆𑀕𑀼𑀴𑀤𑁄𑀯𑀸𑀭𑀺𑀓𑁄𑀧𑀫𑀸𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀓𑀓𑀘𑁄𑀧𑀫𑀸𑀬 𑀘 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀧𑀗𑁆𑀕𑀼𑀴𑁄𑀧𑀫𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀗𑁆𑀕𑀼𑀴𑁄 𑀤𑁄𑀮𑀸𑀬 𑀓𑀻𑀴𑀢𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀤𑁄𑀮𑀁 𑀔𑀺𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑁄𑀮𑀢𑁆𑀣𑀫𑁆𑀪𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀓𑀫𑁂𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀘 𑀕𑀘𑁆𑀙𑀦𑁆𑀢𑀲𑁆𑀲 𑀘 𑀤𑁄𑀮𑀸𑀨𑀮𑀓𑀲𑁆𑀲 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑀜𑁆𑀘 𑀧𑀲𑁆𑀲𑀢𑀺, 𑀦 𑀘 𑀉𑀪𑁄𑀓𑁄𑀝𑀺𑀫𑀚𑁆𑀛𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀩𑁆𑀬𑀸𑀯𑀝𑁄 𑀳𑁄𑀢𑀺. 𑀏𑀯𑀫𑁂𑀯𑀸𑀬𑀁 𑀪𑀺𑀓𑁆𑀔𑀼 𑀲𑀢𑀺𑀯𑀲𑁂𑀦 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑀫𑁆𑀪𑀫𑀽𑀮𑁂 𑀞𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀤𑁄𑀮𑀁 𑀔𑀺𑀧𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀫𑀺𑀢𑁆𑀢𑁂 𑀲𑀢𑀺𑀬𑀸 𑀦𑀺𑀲𑀺𑀦𑁆𑀦𑁄 𑀓𑀫𑁂𑀦 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀨𑀼𑀝𑁆𑀞𑀝𑁆𑀞𑀸𑀦𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀦𑁆𑀢𑁄 𑀢𑀢𑁆𑀣 𑀘 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀧𑀲𑁆𑀲𑀢𑀺, 𑀦 𑀘 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀩𑁆𑀬𑀸𑀯𑀝𑁄 𑀳𑁄𑀢𑀺. 𑀅𑀬𑀁 𑀧𑀗𑁆𑀕𑀼𑀴𑁄𑀧𑀫𑀸.

𑀅𑀬𑀁 𑀧𑀦 𑀤𑁄𑀯𑀸𑀭𑀺𑀓𑁄𑀧𑀫𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀤𑁄𑀯𑀸𑀭𑀺𑀓𑁄 𑀦𑀕𑀭𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀼𑀭𑀺𑀲𑁂 ‘𑀓𑁄 𑀢𑁆𑀯𑀁, 𑀓𑀼𑀢𑁄 𑀯𑀸 𑀆𑀕𑀢𑁄, 𑀓𑀼𑀳𑀺𑀁 𑀯𑀸 𑀕𑀘𑁆𑀙𑀲𑀺, 𑀓𑀺𑀁 𑀯𑀸 𑀢𑁂 𑀳𑀢𑁆𑀣𑁂’𑀢𑀺 𑀦 𑀯𑀻𑀫𑀁𑀲𑀢𑀺, 𑀦 𑀳𑀺 𑀢𑀲𑁆𑀲 𑀢𑁂 𑀪𑀸𑀭𑀸. 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀤𑁆𑀯𑀸𑀭𑀧𑁆𑀧𑀢𑁆𑀢𑀁𑀬𑁂𑀯 𑀧𑀦 𑀯𑀻𑀫𑀁𑀲𑀢𑀺; 𑀏𑀯𑀫𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑁄 𑀧𑀯𑀺𑀝𑁆𑀞𑀯𑀸𑀢𑀸 𑀘 𑀩𑀳𑀺 𑀦𑀺𑀓𑁆𑀔𑀦𑁆𑀢𑀯𑀸𑀢𑀸 𑀘 𑀦 𑀪𑀸𑀭𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀧𑁆𑀧𑀢𑁆𑀢𑀸 𑀤𑁆𑀯𑀸𑀭𑀧𑁆𑀧𑀢𑁆𑀢𑀸𑀬𑁂𑀯 𑀪𑀸𑀭𑀸𑀢𑀺. 𑀅𑀬𑀁 𑀤𑁄𑀯𑀸𑀭𑀺𑀓𑁄𑀧𑀫𑀸.

𑀓𑀓𑀘𑁄𑀧𑀫𑀸 𑀧𑀦 𑀆𑀤𑀺𑀢𑁄𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀺𑀫𑀺𑀢𑁆𑀢𑀁 ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸𑀦𑀼𑀧𑀮𑀩𑁆𑀪𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺. (𑀧𑀝𑀺. 𑀫. 𑁧.𑁧𑁫𑁯);

𑀓𑀣𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺 ¶ ? 𑀲𑁂𑀬𑁆𑀬𑀣𑀸𑀧𑀺 𑀭𑀼𑀓𑁆𑀔𑁄 𑀲𑀫𑁂 ¶ 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄, 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀓𑀓𑀘𑁂𑀦 𑀙𑀺𑀦𑁆𑀤𑁂𑀬𑁆𑀬, 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺.

𑀬𑀣𑀸 𑀭𑀼𑀓𑁆𑀔𑁄 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀦𑀺𑀓𑁆𑀔𑀺𑀢𑁆𑀢𑁄; 𑀏𑀯𑀁 𑀉𑀧𑀦𑀺𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀁. 𑀬𑀣𑀸 𑀓𑀓𑀘𑀤𑀦𑁆𑀢𑀸; 𑀏𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀬𑀣𑀸 𑀭𑀼𑀓𑁆𑀔𑁂 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀫𑀦𑀲𑀺 𑀓𑀭𑁄𑀢𑀺, 𑀦 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺.

𑀧𑀥𑀸𑀦𑀦𑁆𑀢𑀺 𑀓𑀢𑀫𑀁 𑀧𑀥𑀸𑀦𑀁? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑁋 𑀇𑀤𑀁 𑀧𑀥𑀸𑀦𑀁. 𑀓𑀢𑀫𑁄 𑀧𑀬𑁄𑀕𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀯𑀺𑀢𑀓𑁆𑀓𑀸 𑀯𑀽𑀧𑀲𑀫𑁆𑀫𑀦𑁆𑀢𑀺 𑁋 𑀅𑀬𑀁 𑀧𑀬𑁄𑀕𑁄. 𑀓𑀢𑀫𑁄 𑀯𑀺𑀲𑁂𑀲𑁄? 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀺 𑁋 𑀅𑀬𑀁 𑀯𑀺𑀲𑁂𑀲𑁄. 𑀏𑀯𑀁 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀦 𑀘𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀦 𑀘 𑀘𑀺𑀢𑁆𑀢𑀁 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀧𑀬𑁄𑀕𑀜𑁆𑀘 𑀲𑀸𑀥𑁂𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺.

‘‘𑀆𑀦𑀸𑀧𑀸𑀦𑀲𑁆𑀲𑀢𑀻 ¶ 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄 𑀇𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺. (𑀧𑀝𑀺. 𑀫. 𑁧.𑁧𑁬𑁦);

𑀅𑀬𑀁 𑀓𑀓𑀘𑁄𑀧𑀫𑀸. 𑀇𑀥 𑀧𑀦𑀲𑁆𑀲 𑀆𑀕𑀢𑀸𑀕𑀢𑀯𑀲𑁂𑀦 𑀅𑀫𑀦𑀲𑀺𑀓𑀸𑀭𑀫𑀢𑁆𑀢𑀫𑁂𑀯 𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀢𑁄 𑀓𑀲𑁆𑀲𑀘𑀺 𑀦𑀘𑀺𑀭𑁂𑀦𑁂𑀯 𑀦𑀺𑀫𑀺𑀢𑁆𑀢𑀜𑁆𑀘 ¶ 𑀉𑀧𑁆𑀧𑀚𑁆𑀚𑀢𑀺, 𑀅𑀯𑀲𑁂𑀲𑀚𑁆𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑀸 𑀞𑀧𑀦𑀸 𑀘 𑀲𑀫𑁆𑀧𑀚𑁆𑀚𑀢𑀺. 𑀓𑀲𑁆𑀲𑀘𑀺 𑀧𑀦 𑀕𑀡𑀦𑀸𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀭𑀓𑀸𑀮𑀢𑁄𑀧𑀪𑀼𑀢𑀺 𑀅𑀦𑀼𑀓𑁆𑀓𑀫𑀢𑁄 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀯𑀲𑁂𑀦 𑀓𑀸𑀬𑀤𑀭𑀣𑁂 𑀯𑀽𑀧𑀲𑀦𑁆𑀢𑁂 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀮𑀳𑀼𑀓𑀁 𑀳𑁄𑀢𑀺, 𑀲𑀭𑀻𑀭𑀁 𑀆𑀓𑀸𑀲𑁂 𑀮𑀗𑁆𑀖𑀦𑀸𑀓𑀸𑀭𑀧𑁆𑀧𑀢𑁆𑀢𑀁 ¶ 𑀯𑀺𑀬 𑀳𑁄𑀢𑀺. 𑀬𑀣𑀸 𑀲𑀸𑀭𑀤𑁆𑀥𑀓𑀸𑀬𑀲𑁆𑀲 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀦𑀺𑀲𑀻𑀤𑀢𑁄 𑀫𑀜𑁆𑀘𑀧𑀻𑀞𑀁 𑀑𑀦𑀫𑀢𑀺, 𑀯𑀺𑀓𑀽𑀚𑀢𑀺, 𑀧𑀘𑁆𑀘𑀢𑁆𑀣𑀭𑀡𑀁 𑀯𑀮𑀺𑀁 𑀕𑀡𑁆𑀳𑀸𑀢𑀺. 𑀅𑀲𑀸𑀭𑀤𑁆𑀥𑀓𑀸𑀬𑀲𑁆𑀲 𑀧𑀦 𑀦𑀺𑀲𑀻𑀤𑀢𑁄 𑀦𑁂𑀯 𑀫𑀜𑁆𑀘𑀧𑀻𑀞𑀁 𑀑𑀦𑀫𑀢𑀺, 𑀦 𑀯𑀺𑀓𑀽𑀚𑀢𑀺, 𑀦 𑀧𑀘𑁆𑀘𑀢𑁆𑀣𑀭𑀡𑀁 𑀯𑀮𑀺𑀁 𑀕𑀡𑁆𑀳𑀸𑀢𑀺, 𑀢𑀽𑀮𑀧𑀺𑀘𑀼𑀧𑀽𑀭𑀺𑀢𑀁 𑀯𑀺𑀬 𑀫𑀜𑁆𑀘𑀧𑀻𑀞𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀲𑀸𑀭𑀤𑁆𑀥𑁄 𑀓𑀸𑀬𑁄 𑀮𑀳𑀼𑀓𑁄 𑀳𑁄𑀢𑀺; 𑀏𑀯𑀫𑁂𑀯 𑀕𑀡𑀦𑀸𑀯𑀲𑁂𑀦 𑀫𑀦𑀲𑀺𑀓𑀸𑀭𑀓𑀸𑀮𑀢𑁄𑀧𑀪𑀼𑀢𑀺 𑀅𑀦𑀼𑀓𑁆𑀓𑀫𑀢𑁄 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀯𑀲𑁂𑀦 𑀓𑀸𑀬𑀤𑀭𑀣𑁂 𑀯𑀽𑀧𑀲𑀦𑁆𑀢𑁂 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀮𑀳𑀼𑀓𑀁 𑀳𑁄𑀢𑀺, 𑀲𑀭𑀻𑀭𑀁 𑀆𑀓𑀸𑀲𑁂 𑀮𑀗𑁆𑀖𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺.

𑀢𑀲𑁆𑀲 𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑀼𑀤𑁆𑀥𑁂 𑀲𑀼𑀔𑀼𑀫𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀭𑀼𑀤𑁆𑀥𑁂 𑀅𑀧𑀭𑀸𑀧𑀭𑀁 𑀢𑀢𑁄 𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺𑀬𑁂𑀯. 𑀓𑀣𑀁? 𑀬𑀣𑀸 𑀧𑀼𑀭𑀺𑀲𑁄 𑀫𑀳𑀢𑀺𑀬𑀸 𑀮𑁄𑀳𑀲𑀮𑀸𑀓𑀸𑀬 𑀓𑀁𑀲𑀢𑀸𑀴𑀁 𑀆𑀓𑁄𑀝𑁂𑀬𑁆𑀬, 𑀏𑀓𑀧𑁆𑀧𑀳𑀸𑀭𑁂𑀦 𑀫𑀳𑀸𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀑𑀴𑀸𑀭𑀺𑀓𑀲𑀤𑁆𑀤𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀬𑁆𑀬, 𑀦𑀺𑀭𑀼𑀤𑁆𑀥𑁂 𑀑𑀴𑀸𑀭𑀺𑀓𑁂 𑀲𑀤𑁆𑀤𑁂 𑀅𑀣 𑀧𑀘𑁆𑀙𑀸 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀭𑀼𑀤𑁆𑀥𑁂 𑀅𑀧𑀭𑀸𑀧𑀭𑀁 𑀢𑀢𑁄 𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑁂𑀯; 𑀏𑀯𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀓𑀁𑀲𑁂 𑀆𑀓𑁄𑀝𑀺𑀢𑁂’’𑀢𑀺 (𑀧𑀝𑀺. 𑀫. 𑁧.𑁧𑁭𑁧) 𑀯𑀺𑀢𑁆𑀣𑀸𑀭𑁄.

𑀬𑀣𑀸 𑀳𑀺 𑀅𑀜𑁆𑀜𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀉𑀧𑀭𑀽𑀧𑀭𑀺 𑀯𑀺𑀪𑀽𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀉𑀧𑀭𑀽𑀧𑀭𑀺 𑀪𑀸𑀯𑁂𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 𑀲𑀼𑀔𑀼𑀫𑀢𑁆𑀢𑀁 ¶ 𑀕𑀘𑁆𑀙𑀢𑀺, 𑀉𑀧𑀝𑁆𑀞𑀸𑀦𑀫𑁆𑀧𑀺 𑀦 𑀉𑀧𑀕𑀘𑁆𑀙𑀢𑀺. 𑀏𑀯𑀁 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀝𑁆𑀞𑀸𑀬𑀸𑀲𑀦𑀸 𑀘𑀫𑁆𑀫𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀓𑀺𑀁 𑀓𑀸𑀢𑀩𑁆𑀩𑀁? ‘‘𑀆𑀘𑀭𑀺𑀬𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀦𑀝𑁆𑀞𑀁 𑀤𑀸𑀦𑀺 𑀫𑁂 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀸 𑀦 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀇𑀭𑀺𑀬𑀸𑀧𑀣𑀁 ¶ 𑀯𑀺𑀓𑁄𑀧𑁂𑀢𑁆𑀯𑀸 𑀕𑀘𑁆𑀙𑀢𑁄 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀯𑀦𑀯𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸𑀦𑀺𑀲𑀺𑀦𑁆𑀦𑁂𑀦𑁂𑀯 𑀤𑁂𑀲𑀢𑁄 𑀆𑀳𑀭𑀺𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀆𑀳𑀭𑀡𑀽𑀧𑀸𑀬𑁄. 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀦𑀼𑀧𑀝𑁆𑀞𑀳𑀦𑀪𑀸𑀯𑀁 𑀜𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀇𑀫𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀸𑀫 𑀓𑀢𑁆𑀣 𑀅𑀢𑁆𑀣𑀺, 𑀓𑀢𑁆𑀣 𑀦𑀢𑁆𑀣𑀺, 𑀓𑀲𑁆𑀲 𑀯𑀸 𑀅𑀢𑁆𑀣𑀺, 𑀓𑀲𑁆𑀲 𑀯𑀸 𑀦𑀢𑁆𑀣𑀻’’𑀢𑀺. 𑀅𑀣𑁂𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀸 ‘‘𑀇𑀫𑁂 𑀅𑀦𑁆𑀢𑁄𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀢𑁆𑀣𑀺, 𑀉𑀤𑀓𑁂 𑀦𑀺𑀫𑀼𑀕𑁆𑀕𑀸𑀦𑀁 𑀦𑀢𑁆𑀣𑀺, 𑀢𑀣𑀸 𑀅𑀲𑀜𑁆𑀜𑀻𑀪𑀽𑀢𑀸𑀦𑀁 𑀫𑀢𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀸𑀦𑀁 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻𑀦𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 ¶ 𑀜𑀢𑁆𑀯𑀸 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀧𑀝𑀺𑀘𑁄𑀤𑁂𑀢𑀩𑁆𑀩𑁄 𑁋 ‘‘𑀦𑀦𑀼 𑀢𑁆𑀯𑀁, 𑀧𑀡𑁆𑀟𑀺𑀢, 𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄, 𑀦 𑀉𑀤𑀓𑁂 𑀦𑀺𑀫𑀼𑀕𑁆𑀕𑁄, 𑀦 𑀅𑀲𑀜𑁆𑀜𑀻𑀪𑀽𑀢𑁄, 𑀦 𑀫𑀢𑁄, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀆𑀧𑀦𑁆𑀦𑁄, 𑀦 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻, 𑀦 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀅𑀢𑁆𑀣𑀺𑀬𑁂𑀯 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀫𑀦𑁆𑀤𑀧𑀜𑁆𑀜𑀢𑀸𑀬 𑀧𑀦 𑀧𑀭𑀺𑀕𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺. 𑀅𑀣𑀸𑀦𑁂𑀦 𑀧𑀓𑀢𑀺𑀨𑀼𑀝𑁆𑀞𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀇𑀫𑁂 𑀳𑀺 𑀤𑀻𑀖𑀦𑀸𑀲𑀺𑀓𑀲𑁆𑀲 𑀦𑀸𑀲𑀸 𑀧𑀼𑀝𑀁 𑀖𑀝𑁆𑀝𑁂𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀺, 𑀭𑀲𑁆𑀲𑀦𑀸𑀲𑀺𑀓𑀲𑁆𑀲 𑀉𑀢𑁆𑀢𑀭𑁄𑀝𑁆𑀞𑀁. 𑀢𑀲𑁆𑀫𑀸𑀦𑁂𑀦 𑀇𑀫𑀁 𑀦𑀸𑀫 𑀞𑀸𑀦𑀁 𑀖𑀝𑁆𑀝𑁂𑀦𑁆𑀢𑀻𑀢𑀺 𑀦𑀺𑀫𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑀩𑁆𑀩𑀁. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁧𑁪𑁯; 𑀲𑀁. 𑀦𑀺. 𑁫.𑁯𑁯𑁨). 𑀓𑀺𑀜𑁆𑀘𑀸𑀧𑀺 𑀳𑀺 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀇𑀢𑁄 𑀅𑀜𑁆𑀜𑀁 𑀧𑀦 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀸𑀓𑀝𑀁 𑀳𑁄𑀢𑀺. 𑀇𑀤𑀁 𑀧𑀦 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀕𑀭𑀼𑀓𑀁 𑀕𑀭𑀼𑀓𑀪𑀸𑀯𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀫𑀳𑀸𑀧𑀼𑀭𑀺𑀲𑀸𑀦𑀫𑁂𑀯 𑀫𑀦𑀲𑀺𑀓𑀸𑀭𑀪𑀽𑀫𑀺𑀪𑀽𑀢𑀁, 𑀦 𑀘𑁂𑀯 𑀇𑀢𑁆𑀢𑀭𑀁, 𑀦 𑀘 𑀇𑀢𑁆𑀢𑀭𑀲𑀢𑁆𑀢𑀲𑀫𑀸𑀲𑁂𑀯𑀺𑀢𑀁. 𑀬𑀣𑀸 𑀬𑀣𑀸 𑀫𑀦𑀲𑀺 𑀓𑀭𑀻𑀬𑀢𑀺, 𑀢𑀣𑀸 𑀢𑀣𑀸 𑀲𑀦𑁆𑀢𑀜𑁆𑀘𑁂𑀯 ¶ 𑀳𑁄𑀢𑀺 𑀲𑀼𑀔𑀼𑀫𑀜𑁆𑀘. 𑀢𑀲𑁆𑀫𑀸 𑀏𑀢𑁆𑀣 𑀩𑀮𑀯𑀢𑀻 𑀲𑀢𑀺 𑀘 𑀧𑀜𑁆𑀜𑀸 𑀘 𑀇𑀘𑁆𑀙𑀺𑀢𑀩𑁆𑀩𑀸.

𑀬𑀣𑀸 𑀳𑀺 𑀫𑀝𑁆𑀞𑀲𑀸𑀝𑀓𑀲𑁆𑀲 𑀢𑀼𑀦𑁆𑀦𑀓𑀭𑀡𑀓𑀸𑀮𑁂 𑀲𑀽𑀘𑀺𑀧𑀺 𑀲𑀼𑀔𑀼𑀫𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀽𑀘𑀺𑀧𑀸𑀲𑀯𑁂𑀥𑀦𑀫𑁆𑀧𑀺 𑀢𑀢𑁄 𑀲𑀼𑀔𑀼𑀫𑀢𑀭𑀁; 𑀏𑀯𑀫𑁂𑀯 𑀫𑀝𑁆𑀞𑀲𑀸𑀝𑀓𑀲𑀤𑀺𑀲𑀲𑁆𑀲 𑀇𑀫𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸𑀓𑀸𑀮𑁂 𑀲𑀽𑀘𑀺𑀧𑀝𑀺𑀪𑀸𑀕𑀸 𑀲𑀢𑀺𑀧𑀺 𑀲𑀽𑀘𑀺𑀧𑀸𑀲𑀯𑁂𑀥𑀦𑀧𑀝𑀺𑀪𑀸𑀕𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸𑀧𑀺 𑀩𑀮𑀯𑀢𑀻 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀸𑀳𑀺 𑀘 𑀧𑀦 𑀲𑀢𑀺𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀜𑁆𑀜𑀢𑁆𑀭 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀬𑀣𑀸 𑀧𑀦 𑀓𑀲𑁆𑀲𑀓𑁄 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀩𑀮𑀺𑀩𑀤𑁆𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑁄𑀘𑀭𑀸𑀪𑀺𑀫𑀼𑀔𑁂 𑀓𑀢𑁆𑀯𑀸 𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑁄 𑀯𑀺𑀲𑁆𑀲𑀫𑁂𑀬𑁆𑀬, 𑀅𑀣𑀲𑁆𑀲 𑀢𑁂 𑀩𑀮𑀺𑀩𑀤𑁆𑀤𑀸 𑀯𑁂𑀕𑁂𑀦 𑀅𑀝𑀯𑀺𑀁 𑀧𑀯𑀺𑀲𑁂𑀬𑁆𑀬𑀼𑀁. 𑀬𑁄 𑀳𑁄𑀢𑀺 𑀙𑁂𑀓𑁄 𑀓𑀲𑁆𑀲𑀓𑁄 𑀲𑁄 𑀧𑀼𑀦 𑀢𑁂 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀼𑀓𑀸𑀫𑁄 𑀦 𑀢𑁂𑀲𑀁 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀅𑀝𑀯𑀺𑀁 𑀆𑀳𑀺𑀡𑁆𑀟𑀢𑀺. 𑀅𑀣 ¶ 𑀔𑁄 𑀭𑀲𑁆𑀫𑀺𑀜𑁆𑀘 𑀧𑀢𑁄𑀤𑀜𑁆𑀘 𑀕𑀳𑁂𑀢𑁆𑀯𑀸 𑀉𑀚𑀼𑀓𑀫𑁂𑀯 𑀢𑁂𑀲𑀁 𑀦𑀺𑀧𑀸𑀢𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀦𑀺𑀧𑀚𑁆𑀚𑀢𑀺 𑀯𑀸. 𑀅𑀣 𑀢𑁂 𑀕𑁄𑀡𑁂 𑀤𑀺𑀯𑀲𑀪𑀸𑀕𑀁 𑀘𑀭𑀺𑀢𑁆𑀯𑀸 𑀦𑀺𑀧𑀸𑀢𑀢𑀺𑀢𑁆𑀣𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀞𑀺𑀢𑁂 𑀤𑀺𑀲𑁆𑀯𑀸 𑀭𑀲𑁆𑀫𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀧𑀢𑁄𑀤𑁂𑀦 𑀯𑀺𑀚𑁆𑀛𑀦𑁆𑀢𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑁆𑀯𑀸 𑀧𑀼𑀦 𑀓𑀫𑁆𑀫𑀁 𑀓𑀭𑁄𑀢𑀺; 𑀏𑀯𑀫𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀜𑁆𑀜𑀢𑁆𑀭 ¶ 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀲𑀢𑀺𑀭𑀲𑁆𑀫𑀺𑀁 𑀧𑀦 𑀧𑀜𑁆𑀜𑀸𑀧𑀢𑁄𑀤𑀜𑁆𑀘 𑀕𑀳𑁂𑀢𑁆𑀯𑀸 𑀧𑀓𑀢𑀺𑀨𑀼𑀝𑁆𑀞𑁄𑀓𑀸𑀲𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺𑀲𑁆𑀲 𑀫𑀦𑀲𑀺𑀓𑀭𑁄𑀢𑁄 𑀦𑀘𑀺𑀭𑀲𑁆𑀲𑁂𑀯 𑀢𑁂 𑀉𑀧𑀝𑁆𑀞𑀳𑀦𑁆𑀢𑀺, 𑀦𑀺𑀧𑀸𑀢𑀢𑀺𑀢𑁆𑀣𑁂 𑀯𑀺𑀬 𑀕𑁄𑀡𑀸. 𑀢𑀢𑁄 𑀢𑁂𑀦 𑀲𑀢𑀺𑀭𑀲𑁆𑀫𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀬𑁄𑀚𑁂𑀢𑁆𑀯𑀸 𑀧𑀜𑁆𑀜𑀸𑀧𑀢𑁄𑀤𑁂𑀦 𑀯𑀺𑀚𑁆𑀛𑀦𑁆𑀢𑁂𑀦 𑀧𑀼𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁; 𑀢𑀲𑁆𑀲𑁂𑀯𑀫𑀦𑀼𑀬𑀼𑀜𑁆𑀚𑀢𑁄 𑀦𑀘𑀺𑀭𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. 𑀢𑀁 𑀧𑀦𑁂𑀢𑀁 𑀦 𑀲𑀩𑁆𑀩𑁂𑀲𑀁 𑀏𑀓𑀲𑀤𑀺𑀲𑀁 𑀳𑁄𑀢𑀺 ¶ ; 𑀅𑀧𑀺𑀘 𑀔𑁄 𑀓𑀲𑁆𑀲𑀘𑀺 𑀲𑀼𑀔𑀲𑀫𑁆𑀨𑀲𑁆𑀲𑀁 𑀉𑀧𑁆𑀧𑀸𑀤𑀬𑀫𑀸𑀦𑁄 𑀢𑀽𑀮𑀧𑀺𑀘𑀼 𑀯𑀺𑀬, 𑀓𑀧𑁆𑀧𑀸𑀲𑀧𑀺𑀘𑀼 𑀯𑀺𑀬, 𑀯𑀸𑀢𑀥𑀸𑀭𑀸 𑀯𑀺𑀬 𑀘 𑀉𑀧𑀝𑁆𑀞𑀸𑀢𑀻𑀢𑀺 𑀏𑀓𑀘𑁆𑀘𑁂 𑀆𑀳𑀼.

𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑁋 𑀇𑀤𑀜𑁆𑀳𑀺 𑀓𑀲𑁆𑀲𑀘𑀺 𑀢𑀸𑀭𑀓𑀭𑀽𑀧𑀁 𑀯𑀺𑀬, 𑀫𑀡𑀺𑀕𑀼𑀴𑀺𑀓𑀸 𑀯𑀺𑀬, 𑀫𑀼𑀢𑁆𑀢𑀸𑀕𑀼𑀴𑀺𑀓𑀸 𑀯𑀺𑀬 𑀘 𑀓𑀲𑁆𑀲𑀘𑀺 𑀔𑀭𑀲𑀫𑁆𑀨𑀲𑁆𑀲𑀁 𑀳𑀼𑀢𑁆𑀯𑀸 𑀓𑀧𑁆𑀧𑀸𑀲𑀝𑁆𑀞𑀺 𑀯𑀺𑀬, 𑀲𑀸𑀭𑀤𑀸𑀭𑀼𑀲𑀽𑀘𑀺 𑀯𑀺𑀬 𑀘 𑀓𑀲𑁆𑀲𑀘𑀺 𑀤𑀻𑀖𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬, 𑀓𑀼𑀲𑀼𑀫𑀤𑀸𑀫𑀁 𑀯𑀺𑀬, 𑀥𑀽𑀫𑀲𑀺𑀔𑀸 𑀯𑀺𑀬 𑀘 𑀓𑀲𑁆𑀲𑀘𑀺 𑀯𑀺𑀢𑁆𑀣𑀢 𑀫𑀓𑁆𑀓𑀝𑀓𑀲𑀼𑀢𑁆𑀢𑀁 𑀯𑀺𑀬, 𑀯𑀮𑀸𑀳𑀓𑀧𑀝𑀮𑀁 𑀯𑀺𑀬, 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬, 𑀭𑀣𑀘𑀓𑁆𑀓𑀁 𑀯𑀺𑀬, 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀘 𑀉𑀧𑀝𑁆𑀞𑀸𑀢𑀺. 𑀢𑀜𑁆𑀘 𑀧𑀦𑁂𑀢𑀁 𑀬𑀣𑀸 𑀲𑀫𑁆𑀩𑀳𑀼𑀮𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀼𑀢𑁆𑀢𑀦𑁆𑀢𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀼𑀫𑁆𑀳𑀸𑀓𑀁 𑀓𑀻𑀤𑀺𑀲𑀁 𑀳𑀼𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑁄 ‘‘𑀫𑀬𑁆𑀳𑀁 𑀫𑀳𑀢𑀻 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻’’𑀢𑀺 𑀆𑀳. 𑀅𑀧𑀭𑁄 ‘‘𑀫𑀬𑁆𑀳𑀁 𑀏𑀓𑀸 𑀯𑀦𑀭𑀸𑀚𑀺 𑀯𑀺𑀬’’. 𑀅𑀜𑁆𑀜𑁄 ‘‘𑀫𑀬𑁆𑀳𑀁 𑀲𑀻𑀢𑀘𑁆𑀙𑀸𑀬𑁄 𑀲𑀸𑀔𑀸𑀲𑀫𑁆𑀧𑀦𑁆𑀦𑁄 𑀨𑀮𑀪𑀸𑀭𑀪𑀭𑀺𑀢𑀭𑀼𑀓𑁆𑀔𑁄 𑀯𑀺𑀬𑀸’’𑀢𑀺. 𑀢𑁂𑀲𑀜𑁆𑀳𑀺 𑀢𑀁 𑀏𑀓𑀫𑁂𑀯 𑀲𑀼𑀢𑁆𑀢𑀁 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀏𑀓𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀺. 𑀲𑀜𑁆𑀜𑀚𑀜𑁆𑀳𑀺 𑀏𑀢𑀁 𑀲𑀜𑁆𑀜𑀸𑀦𑀺𑀤𑀸𑀦𑀁 𑀲𑀜𑁆𑀜𑀸𑀧𑁆𑀧𑀪𑀯𑀁 𑀢𑀲𑁆𑀫𑀸 𑀲𑀜𑁆𑀜𑀸𑀦𑀸𑀦𑀢𑀸𑀬 𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀅𑀜𑁆𑀜𑀫𑁂𑀯 𑀅𑀲𑁆𑀲𑀸𑀲𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀧𑀲𑁆𑀲𑀸𑀲𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀬𑀲𑁆𑀲 𑀳𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦𑁂𑀯 𑀅𑀧𑁆𑀧𑀦𑀁 𑀦 𑀉𑀧𑀘𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀬𑀲𑁆𑀲 𑀧𑀦𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀜𑁆𑀘 𑀉𑀧𑀘𑀸𑀭𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀺𑀫𑀺𑀢𑁆𑀢𑀁 ¶ ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸𑀦𑀼𑀧𑀮𑀩𑁆𑀪𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲;

𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂, 𑀪𑀸𑀯𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁩𑁧);

𑀏𑀯𑀁 ¶ 𑀉𑀧𑀝𑁆𑀞𑀺𑀢𑁂 𑀧𑀦 𑀦𑀺𑀫𑀺𑀢𑁆𑀢𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀘𑀭𑀺𑀬𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑁋 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀦𑀸𑀫 𑀉𑀧𑀝𑁆𑀞𑀸𑀢𑀻’’𑀢𑀺. 𑀆𑀘𑀭𑀺𑀬𑁂𑀦 𑀧𑀦 ‘‘𑀏𑀢𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀸 ‘‘𑀦 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀁. ‘‘𑀏𑀯𑀁 𑀳𑁄𑀢𑀺, 𑀆𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀧𑀦 ‘‘𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀯𑁄𑀲𑀸𑀦𑀁 𑀆𑀧𑀚𑁆𑀚𑁂𑀬𑁆𑀬; ‘‘𑀦 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀭𑀸𑀲𑁄 𑀯𑀺𑀲𑀻𑀤𑁂𑀬𑁆𑀬. 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀅𑀯𑀢𑁆𑀯𑀸 𑀫𑀦𑀲𑀺𑀓𑀸𑀭𑁂𑀬𑁂𑀯 𑀦𑀺𑀬𑁄𑀚𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀢𑀸𑀯 𑀤𑀻𑀖𑀪𑀸𑀡𑀓𑀸. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦𑀸𑀳𑀼 𑁋 ‘‘𑀦𑀺𑀫𑀺𑀢𑁆𑀢𑀫𑀺𑀤𑀁, 𑀆𑀯𑀼𑀲𑁄, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀭𑁄𑀳𑀺 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺. 𑀅𑀣𑀸𑀦𑁂𑀦 𑀦𑀺𑀫𑀺𑀢𑁆𑀢𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀏𑀯𑀫𑀲𑁆𑀲𑀸𑀬𑀁 𑀇𑀢𑁄 𑀧𑀪𑀼𑀢𑀺 𑀞𑀧𑀦𑀸𑀯𑀲𑁂𑀦 𑀪𑀸𑀯𑀦𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀦𑀺𑀫𑀺𑀢𑁆𑀢𑁂 𑀞𑀧𑀬𑀁 𑀘𑀺𑀢𑁆𑀢𑀁, 𑀦𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑀬𑀁;

𑀥𑀻𑀭𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁩𑁨; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩);

𑀢𑀲𑁆𑀲𑁂𑀯𑀁 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯 𑀲𑀢𑀺 𑀉𑀧𑀝𑁆𑀞𑀺𑀢𑀸𑀬𑁂𑀯, 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀫𑁂𑀯. 𑀇𑀤𑀜𑁆𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀦𑀸𑀫 𑀳𑁄𑀳𑀺 𑁋 𑀉𑀧𑀘𑀸𑀭𑀪𑀽𑀫𑀺𑀬𑀁 𑀯𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦, 𑀧𑀝𑀺𑀮𑀸𑀪𑀪𑀽𑀫𑀺𑀬𑀁 𑀯𑀸 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦. 𑀢𑀢𑁆𑀣 ‘‘𑀉𑀧𑀘𑀸𑀭𑀪𑀽𑀫𑀻’’𑀢𑀺 𑀉𑀧𑀘𑀸𑀭𑀲𑀫𑀸𑀥𑀺; ‘‘𑀧𑀝𑀺𑀮𑀸𑀪𑀪𑀽𑀫𑀻’’𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺. 𑀢𑁂𑀲𑀁 𑀓𑀺𑀁 𑀦𑀸𑀦𑀸𑀓𑀭𑀡𑀁? 𑀉𑀧𑀘𑀸𑀭𑀲𑀫𑀸𑀥𑀺 𑀓𑀼𑀲𑀮𑀯𑀻𑀣𑀺𑀬𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀅𑀧𑁆𑀧𑀦𑀸𑀲𑀫𑀸𑀥𑀺 𑀤𑀺𑀯𑀲𑀪𑀸𑀕𑁂 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑀺𑀯𑀲𑀪𑀸𑀕𑀫𑁆𑀧𑀺 𑀓𑀼𑀲𑀮𑀯𑀻𑀣𑀺𑀬𑀁 𑀚𑀯𑀢𑀺, 𑀦 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀫𑀸𑀥𑀻𑀲𑀼 𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺 ¶ . 𑀅𑀣𑀸𑀦𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀦𑁂𑀯 𑀯𑀡𑁆𑀡𑀢𑁄 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀦 𑀮𑀓𑁆𑀔𑀡𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀅𑀧𑀺𑀘 𑀔𑁄 𑀔𑀢𑁆𑀢𑀺𑀬𑀫𑀳𑁂𑀲𑀺𑀬𑀸 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑁄 𑀯𑀺𑀬 𑀓𑀲𑁆𑀲𑀓𑁂𑀦 𑀲𑀸𑀮𑀺𑀬𑀯𑀕𑀩𑁆𑀪𑁄 𑀯𑀺𑀬 𑀘 𑀅𑀧𑁆𑀧𑀫𑀢𑁆𑀢𑁂𑀦 𑀭𑀓𑁆𑀔𑀺𑀢𑀩𑁆𑀩𑀁; 𑀭𑀓𑁆𑀔𑀺𑀢𑀁 𑀳𑀺𑀲𑁆𑀲 𑀨𑀮𑀤𑀁 𑀳𑁄𑀢𑀺.

‘‘𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀢𑁄 𑀮𑀤𑁆𑀥, 𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀺;

𑀆𑀭𑀓𑁆𑀔𑀫𑁆𑀳𑀺 𑀅𑀲𑀦𑁆𑀢𑀫𑁆𑀳𑀺, 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀢𑁆𑀭𑀸𑀬𑀁 ¶ 𑀭𑀓𑁆𑀔𑀡𑀽𑀧𑀸𑀬𑁄 𑁋 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀯𑀸𑀲𑁄, 𑀕𑁄𑀘𑀭𑁄, 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄, 𑀪𑁄𑀚𑀦𑀁, 𑀉𑀢𑀼, 𑀇𑀭𑀺𑀬𑀸𑀧𑀣𑁄𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀅𑀲𑀧𑁆𑀧𑀸𑀬𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀢𑀸𑀦𑁂𑀯 𑀲𑀢𑁆𑀢 𑀲𑀧𑁆𑀧𑀸𑀬𑀸𑀦𑀺 𑀲𑁂𑀯𑀦𑁆𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀏𑀯𑀁 ¶ 𑀲𑀧𑁆𑀧𑀸𑀬𑀲𑁂𑀯𑀦𑁂𑀦 𑀦𑀺𑀫𑀺𑀢𑁆𑀢𑀁 𑀣𑀺𑀭𑀁 𑀓𑀢𑁆𑀯𑀸 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀕𑀫𑀬𑀺𑀢𑁆𑀯𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀧𑀕𑁆𑀕𑀳𑁂𑀢𑀩𑁆𑀩 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀧𑀕𑁆𑀕𑀡𑁆𑀳𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀦𑀺𑀕𑁆𑀕𑀡𑁆𑀳𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀅𑀚𑁆𑀛𑀼𑀧𑁂𑀓𑁆𑀔𑀦𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑀸𑀦𑀺 𑀤𑀲 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀅𑀯𑀺𑀚𑀳𑀦𑁆𑀢𑁂𑀦 𑀬𑁄𑀕𑁄 𑀓𑀭𑀡𑀻𑀬𑁄.

𑀢𑀲𑁆𑀲𑁂𑀯𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀇𑀤𑀸𑀦𑀺 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀜𑁆𑀘 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺, 𑀬𑁂𑀲𑀁 𑀧𑀞𑀫𑀁 𑀧𑀭𑀺𑀓𑀫𑁆𑀫𑀁, 𑀤𑀼𑀢𑀺𑀬𑀁 𑀉𑀧𑀘𑀸𑀭𑀁, 𑀢𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼 ¶ , 𑀧𑀜𑁆𑀘𑀫𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀁. 𑀧𑀞𑀫𑀁 𑀯𑀸 𑀧𑀭𑀺𑀓𑀫𑁆𑀫𑀜𑁆𑀘𑁂𑀯 𑀉𑀧𑀘𑀸𑀭𑀜𑁆𑀘, 𑀤𑀼𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼, 𑀘𑀢𑀼𑀢𑁆𑀣𑀁 𑀅𑀧𑁆𑀧𑀦𑀸𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀫𑁂𑀯 𑀳𑀺 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀦 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀯𑀸 𑀆𑀲𑀦𑁆𑀦𑀪𑀯𑀗𑁆𑀕𑀧𑀸𑀢𑀢𑁆𑀢𑀸.

𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀓𑀼𑀲𑀮𑀸 𑀥𑀫𑁆𑀫𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀯𑀸 𑀅𑀧𑁆𑀧𑁂𑀢𑀻’’𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀧𑀦 𑀭𑀽𑀧𑀸𑀯𑀘𑀭𑀁. 𑀏𑀯𑀫𑀦𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁, 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁, 𑀢𑀺𑀯𑀺𑀥𑀓𑀮𑁆𑀬𑀸𑀡𑀁, 𑀧𑀞𑀫𑀚𑁆𑀛𑀸𑀦𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀯𑀺𑀢𑀓𑁆𑀓𑀸𑀤𑀬𑁄 𑀯𑀽𑀧𑀲𑀫𑁂𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀸𑀧𑀼𑀡𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀞𑀧𑀦𑀸𑀯𑀲𑁂𑀦 𑀪𑀸𑀯𑀦𑀸𑀬 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸. 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀘𑁆𑀙𑀦𑁆𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀏𑀯𑀁 𑀧𑀢𑁆𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑁄 𑀧𑀦𑁂𑀢𑁆𑀣 𑀪𑀺𑀓𑁆𑀔𑀼 𑀲𑀮𑁆𑀮𑀓𑁆𑀔𑀡𑀸𑀯𑀺𑀯𑀝𑁆𑀝𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀼𑀓𑀸𑀫𑁄 𑀢𑀤𑁂𑀯 𑀛𑀸𑀦𑀁 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀲𑀺𑀧𑁆𑀧𑀢𑁆𑀢𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀅𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀭𑀽𑀧𑀁, 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀅𑀭𑀽𑀧𑀦𑁆𑀢𑀺 𑀭𑀽𑀧𑀸𑀭𑀽𑀧𑀁 ¶ 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺. 𑀓𑀣𑀁? 𑀲𑁄 𑀳𑀺 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑁆𑀲𑀬𑀁 𑀳𑀤𑀬𑀯𑀢𑁆𑀣𑀼𑀁 𑀢𑀁 𑀦𑀺𑀲𑁆𑀲𑀬𑀸𑀦𑀺 𑀘 𑀪𑀽𑀢𑀸𑀦𑀺 𑀢𑁂𑀲𑀜𑁆𑀘 𑀦𑀺𑀲𑁆𑀲𑀬𑀁 𑀲𑀓𑀮𑀫𑁆𑀧𑀺 ¶ 𑀓𑀭𑀚𑀓𑀸𑀬𑀁 𑀧𑀲𑁆𑀲𑀢𑀺. 𑀢𑀢𑁄 ‘‘𑀛𑀸𑀦𑀗𑁆𑀕𑀸𑀦𑀺 𑀅𑀭𑀽𑀧𑀁, 𑀯𑀢𑁆𑀣𑀸𑀤𑀻𑀦𑀺 𑀭𑀽𑀧’’𑀦𑁆𑀢𑀺 𑀭𑀽𑀧𑀸𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺.

𑀅𑀣 𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑁂𑀲𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀣𑀯𑀻𑀥𑀸𑀢𑀼𑀆𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀸𑀦𑀺 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀫𑁆𑀫𑀡𑀁 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀯𑀸 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 ¶ 𑀯𑀺𑀜𑁆𑀜𑀸𑀡𑀜𑁆𑀘 𑀧𑀲𑁆𑀲𑀢𑀺. 𑀢𑀢𑁄 ‘‘𑀪𑀽𑀢𑀸𑀤𑀻𑀦𑀺 𑀭𑀽𑀧𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀯𑀺𑀜𑁆𑀜𑀸𑀡𑀁 𑀅𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀅𑀣 𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀼𑀤𑀬𑁄 𑀓𑀭𑀚𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘𑀸𑀢𑀺 𑀧𑀲𑁆𑀲𑀢𑀺. 𑀬𑀣𑀸 𑀳𑀺 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸 𑀥𑀫𑀫𑀸𑀦𑀸𑀬 𑀪𑀲𑁆𑀢𑀜𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀯𑀸𑀢𑁄 𑀲𑀜𑁆𑀘𑀭𑀢𑀺; 𑀏𑀯𑀫𑁂𑀯 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀧𑀝𑀺𑀘𑁆𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀢𑀺. 𑀢𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀘 𑀓𑀸𑀬𑀜𑁆𑀘 𑀭𑀽𑀧𑀁, 𑀘𑀺𑀢𑁆𑀢𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀅𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺.

𑀏𑀯𑀁 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀢𑀺, 𑀧𑀭𑀺𑀬𑁂𑀲𑀦𑁆𑀢𑁄 𑀘 𑀢𑀁 𑀤𑀺𑀲𑁆𑀯𑀸 𑀢𑀻𑀲𑀼𑀧𑀺 𑀅𑀤𑁆𑀥𑀸𑀲𑀼 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺𑀁 𑀆𑀭𑀩𑁆𑀪 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀦𑁆𑀦𑁂 𑀑𑀪𑀸𑀲𑀸𑀤𑀬𑁄 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂 𑀧𑀳𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀝𑀺𑀧𑀤𑀸𑀜𑀸𑀡𑀁 ‘‘𑀫𑀕𑁆𑀕𑁄’’𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀉𑀤𑀬𑀁 𑀧𑀳𑀸𑀬 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀧𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂𑀦 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂𑀲𑀼 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀬𑀣𑀸𑀓𑁆𑀓𑀫𑀁 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑁂 𑀧𑀸𑀧𑀼𑀡𑀺𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀸𑀬 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀘𑀲𑁆𑀲 𑀕𑀡𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑁄𑀲𑀸𑀦𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸 𑀘 𑀲𑀫𑀢𑁆𑀢𑀸 𑀳𑁄𑀢𑀻𑀢𑀺.

𑀅𑀬𑀁 𑀲𑀩𑁆𑀩𑀸𑀓𑀸𑀭𑀢𑁄 𑀧𑀞𑀫𑀘𑀢𑀼𑀓𑁆𑀓𑀯𑀡𑁆𑀡𑀦𑀸.

𑀇𑀢𑀭𑁂𑀲𑀼 𑀧𑀦 𑀢𑀻𑀲𑀼 𑀘𑀢𑀼𑀓𑁆𑀓𑁂𑀲𑀼 𑀬𑀲𑁆𑀫𑀸 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁄 𑀦𑀸𑀫 𑀦𑀢𑁆𑀣𑀺; 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀸𑀦𑀬𑁂𑀦𑁂𑀯 𑀦𑁂𑀲𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀻𑀢𑀺𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑁋 𑀆𑀭𑀫𑁆𑀫𑀡𑀢𑁄 ¶ 𑀘 𑀅𑀲𑀫𑁆𑀫𑁄𑀳𑀢𑁄 𑀘.

𑀓𑀣𑀁 ¶ ¶ 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸.

𑀓𑀣𑀁 𑀅𑀲𑀫𑁆𑀫𑁄𑀳𑀢𑁄? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦…𑀧𑁂… 𑀭𑀲𑁆𑀲𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀭𑀲𑁆𑀲𑀁 𑀧𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀯𑀲𑁂𑀦… 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀸𑀲𑀯𑀲𑁂𑀦… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀆𑀯𑀚𑁆𑀚𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀚𑀸𑀦𑀢𑁄… 𑀧𑀲𑁆𑀲𑀢𑁄… 𑀧𑀘𑁆𑀘𑀯𑁂𑀓𑁆𑀔𑀢𑁄… 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀢𑁄… 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑁄… 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄… 𑀲𑀢𑀺𑀁 𑀉𑀧𑀝𑁆𑀞𑀸𑀧𑀬𑀢𑁄… 𑀘𑀺𑀢𑁆𑀢𑀁 𑀲𑀫𑀸𑀤𑀳𑀢𑁄… 𑀧𑀜𑁆𑀜𑀸𑀬 𑀧𑀚𑀸𑀦𑀢𑁄… 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀢𑁄… 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀢𑁄… 𑀧𑀳𑀸𑀢𑀩𑁆𑀩𑀁 𑀧𑀚𑀳𑀢𑁄… 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀬𑀢𑁄… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀏𑀯𑀁 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁭𑁨).

𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀁. 𑀢𑀺𑀡𑁆𑀡𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀲𑀼𑀔𑀧𑀝𑀺𑀲𑀁𑀯𑁂𑀤𑀺𑀢𑀸 𑀘𑀢𑀼𑀦𑁆𑀦𑀫𑁆𑀧𑀺 𑀯𑀲𑁂𑀦 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀯𑁂𑀤𑀦𑀸𑀤𑀬𑁄 𑀤𑁆𑀯𑁂 𑀔𑀦𑁆𑀥𑀸. 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀺𑀧𑀤𑁂 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑀼𑀔𑀦𑁆𑀢𑀺 𑀤𑁆𑀯𑁂 𑀲𑀼𑀔𑀸𑀦𑀺 𑁋 𑀓𑀸𑀬𑀺𑀓𑀜𑁆𑀘 𑀲𑀼𑀔𑀁 𑀘𑁂𑀢𑀲𑀺𑀓𑀜𑁆𑀘𑀸’’𑀢𑀺 ¶ 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀁. 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑁆𑀢𑀺 𑀑𑀴𑀸𑀭𑀺𑀓𑀁 𑀑𑀴𑀸𑀭𑀺𑀓𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄, 𑀦𑀺𑀭𑁄𑀥𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀯𑀺𑀢𑁆𑀣𑀸𑀭𑀢𑁄 𑀓𑀸𑀬𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀧𑀻𑀢𑀺𑀧𑀤𑁂 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀲𑀼𑀔𑀧𑀤𑁂 𑀲𑀭𑀽𑀧𑁂𑀦𑁂𑀯 𑀯𑁂𑀤𑀦𑀸 ¶ . 𑀤𑁆𑀯𑀻𑀲𑀼 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑀼 ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸’’𑀢𑀺 (𑀧𑀝𑀺. 𑀫. 𑁧.𑁧𑁭𑁪; 𑀫. 𑀦𑀺. 𑁧.𑁪𑁬𑁩) 𑀯𑀘𑀦𑀢𑁄 ¶ 𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀢𑀺. 𑀏𑀯𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀦𑀬𑁂𑀦 𑀇𑀤𑀁 𑀘𑀢𑀼𑀓𑁆𑀓𑀁 𑀪𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀫𑁄𑀤𑁂𑀦𑁆𑀢𑁄 𑀧𑀫𑁄𑀤𑁂𑀦𑁆𑀢𑁄 𑀳𑀸𑀲𑁂𑀦𑁆𑀢𑁄 𑀧𑀳𑀸𑀲𑁂𑀦𑁆𑀢𑁄 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀪𑀺𑀧𑁆𑀧𑀫𑁄𑀤𑁄 𑀳𑁄𑀢𑀺 𑁋 𑀲𑀫𑀸𑀥𑀺𑀯𑀲𑁂𑀦 𑀘 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘.

𑀓𑀣𑀁 𑀲𑀫𑀸𑀥𑀺𑀯𑀲𑁂𑀦? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀺. 𑀓𑀣𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺; 𑀏𑀯𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀧𑀻𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 ‘‘𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀸𑀤𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀦𑁆𑀢𑁄 𑀲𑀫𑀁 𑀞𑀧𑁂𑀦𑁆𑀢𑁄 𑀢𑀸𑀦𑀺 𑀯𑀸 𑀧𑀦 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀘𑀺𑀢𑁆𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀉𑀧𑁆𑀧𑀚𑁆𑀚𑀢𑀺 𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸; 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀯𑀲𑁂𑀦𑀧𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀦𑁆𑀢𑁄 𑀲𑀫𑀁 𑀞𑀧𑁂𑀦𑁆𑀢𑁄 ‘‘𑀲𑀫𑀸𑀤𑀳𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄, 𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺, 𑀢𑀢𑀺𑀬𑁂𑀦 𑀧𑀻𑀢𑀺𑀬𑀸, 𑀘𑀢𑀼𑀢𑁆𑀣𑁂𑀦 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄. 𑀢𑀸𑀦𑀺 𑀯𑀸 𑀧𑀦 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ¶ 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀘𑀺𑀢𑁆𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺. 𑀲𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀸𑀢𑁄, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀸𑀢𑁄, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀢𑁄, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀢𑁄, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘. 𑀢𑁂𑀦 𑀯𑀼𑀢𑁆𑀢𑀁 ¶ 𑁋 ‘‘𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺. 𑀏𑀯𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀇𑀤𑀁 𑀘𑀢𑀼𑀓𑁆𑀓𑀁 𑀪𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀧𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀢𑀸𑀯 𑀅𑀦𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀦𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸 ¶ , 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸. ‘‘𑀅𑀦𑀺𑀘𑁆𑀘𑀢𑀸’’𑀢𑀺 𑀢𑁂𑀲𑀜𑁆𑀜𑁂𑀯 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀁 𑀳𑀼𑀢𑁆𑀯𑀸 𑀅𑀪𑀸𑀯𑁄 𑀯𑀸 𑀦𑀺𑀩𑁆𑀩𑀢𑁆𑀢𑀸𑀦𑀁 𑀢𑁂𑀦𑁂𑀯𑀸𑀓𑀸𑀭𑁂𑀦 𑀅𑀞𑀢𑁆𑀯𑀸 𑀔𑀡𑀪𑀗𑁆𑀕𑁂𑀦 𑀪𑁂𑀤𑁄𑀢𑀺 𑀅𑀢𑁆𑀣𑁄. ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀢𑀲𑁆𑀲𑀸 𑀅𑀦𑀺𑀘𑁆𑀘𑀢𑀸𑀬 𑀯𑀲𑁂𑀦 𑀭𑀽𑀧𑀸𑀤𑀻𑀲𑀼 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀧𑀲𑁆𑀲𑀦𑀸; ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻’’𑀢𑀺 𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄; 𑀢𑀲𑁆𑀫𑀸 𑀏𑀯𑀁 𑀪𑀽𑀢𑁄 𑀅𑀲𑁆𑀲𑀲𑀦𑁆𑀢𑁄 𑀘 𑀧𑀲𑁆𑀲𑀲𑀦𑁆𑀢𑁄 𑀘 𑀇𑀥 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺, 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀦 𑀤𑁆𑀯𑁂 𑀯𑀺𑀭𑀸𑀕𑀸 𑁋 𑀔𑀬𑀯𑀺𑀭𑀸𑀕𑁄 𑀘 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄 𑀘. 𑀢𑀢𑁆𑀣 ‘‘𑀔𑀬𑀯𑀺𑀭𑀸𑀕𑁄’’𑀢𑀺 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑁄; ‘‘𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄’’𑀢𑀺 𑀦𑀺𑀩𑁆𑀩𑀸𑀦𑀁; ‘‘𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀢𑀤𑀼𑀪𑀬𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑁄 𑀘. 𑀢𑀸𑀬 𑀤𑀼𑀯𑀺𑀥𑀸𑀬𑀧𑀺 𑀅𑀦𑀼𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀅𑀲𑁆𑀲𑀲𑀦𑁆𑀢𑁄 𑀘 𑀧𑀲𑁆𑀲𑀲𑀦𑁆𑀢𑁄 𑀘 ‘‘𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣𑀸𑀧𑀺 𑀤𑁆𑀯𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑁋 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘. 𑀧𑀝𑀺𑀦𑀺𑀲𑁆𑀲𑀕𑁆𑀕𑁄𑀬𑁂𑀯 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸; 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀧𑀲𑁆𑀲𑀦𑀸 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺, 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 ¶ 𑀘 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀺, 𑀆𑀭𑀫𑁆𑀫𑀡𑀓𑀭𑀡𑁂𑀦 𑀘 𑀦𑀺𑀩𑁆𑀩𑀸𑀦𑁂 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀪𑀬𑀫𑁆𑀧𑀺 𑀧𑀦 𑀧𑀼𑀭𑀺𑀫𑀧𑀼𑀭𑀺𑀫𑀜𑀸𑀡𑀸𑀦𑀁 𑀅𑀦𑀼𑀅𑀦𑀼 𑀧𑀲𑁆𑀲𑀦𑀢𑁄 𑀅𑀦𑀼𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀤𑀼𑀯𑀺𑀥𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀅𑀲𑁆𑀲𑀲𑀦𑁆𑀢𑁄 𑀘 𑀧𑀲𑁆𑀲𑀲𑀦𑁆𑀢𑁄 𑀘 𑀧𑀝𑀺𑀦𑀺𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀪𑀸𑀯𑀺𑀢𑁄𑀢𑀺 𑀏𑀯𑀁 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀪𑀸𑀯𑀺𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁭. 𑀅𑀣 ¶ 𑀔𑁄 𑀪𑀕𑀯𑀸𑀢𑀺𑀆𑀤𑀺𑀫𑁆𑀳𑀺 𑀧𑀦 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄. 𑀏𑀯𑀁 𑀪𑀕𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀬 𑀪𑀺𑀓𑁆𑀔𑀽 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀣 𑀬𑀁 𑀢𑀁 𑀢𑀢𑀺𑀬𑀧𑀸𑀭𑀸𑀚𑀺𑀓𑀧𑀜𑁆𑀜𑀢𑁆𑀢𑀺𑀬𑀸 𑀦𑀺𑀤𑀸𑀦𑀜𑁆𑀘𑁂𑀯 ¶ 𑀧𑀓𑀭𑀡𑀜𑁆𑀘 𑀉𑀧𑁆𑀧𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁, 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀬𑀲𑁆𑀫𑀸 𑀢𑀢𑁆𑀣 𑀅𑀢𑁆𑀢𑀦𑀸 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁 𑀫𑀺𑀕𑀮𑀡𑁆𑀟𑀺𑀓𑁂𑀦 𑀘 𑀯𑁄𑀭𑁄𑀧𑀸𑀧𑀦𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀦 𑀳𑁄𑀢𑀺; 𑀢𑀲𑁆𑀫𑀸 𑀢𑀁 𑀞𑀧𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀫𑁂𑀯 𑀕𑀳𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀭𑀺𑀬𑀧𑀼𑀕𑁆𑀕𑀮𑀫𑀺𑀲𑁆𑀲𑀓𑀢𑁆𑀢𑀸 𑀧𑀦𑁂𑀢𑁆𑀣 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀢𑁂 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀯𑀢𑁆𑀣𑀼 𑀉𑀤𑀧𑀸𑀤𑀺, 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁬𑁮. 𑀢𑀢𑁆𑀣 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸𑀢𑀺 𑀙𑀦𑁆𑀤𑀭𑀸𑀕𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸; 𑀲𑀸𑀭𑀢𑁆𑀢𑀸 𑀅𑀧𑁂𑀓𑁆𑀔𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀫𑀸𑀢𑀺 𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀫𑀭𑀡𑀲𑁆𑀲 ¶ 𑀕𑀼𑀡𑀁 𑀯𑀡𑁆𑀡𑁂𑀫; 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀫𑀸𑀢𑀺. 𑀓𑀢𑀓𑀮𑁆𑀬𑀸𑀡𑁄𑀢𑀺𑀆𑀤𑀻𑀲𑀼 𑀅𑀬𑀁 𑀧𑀤𑀢𑁆𑀣𑁄 𑁋 𑀓𑀮𑁆𑀬𑀸𑀡𑀁 𑀲𑀼𑀘𑀺𑀓𑀫𑁆𑀫𑀁 𑀓𑀢𑀁 𑀢𑀬𑀸𑀢𑀺 𑀢𑁆𑀯𑀁 𑀔𑁄 𑀅𑀲𑀺 𑀓𑀢𑀓𑀮𑁆𑀬𑀸𑀡𑁄. 𑀢𑀣𑀸 𑀓𑀼𑀲𑀮𑀁 𑀅𑀦𑀯𑀚𑁆𑀚𑀓𑀫𑁆𑀫𑀁 𑀓𑀢𑀁 𑀢𑀬𑀸𑀢𑀺 𑀓𑀢𑀓𑀼𑀲𑀮𑁄. 𑀫𑀭𑀡𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀬𑀸 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀢𑀺 𑀪𑀬𑀲𑀗𑁆𑀔𑀸𑀢𑀸 𑀪𑀻𑀭𑀼𑀢𑀸, 𑀢𑀢𑁄 𑀢𑀸𑀬𑀦𑀁 𑀭𑀓𑁆𑀔𑀡𑀓𑀫𑁆𑀫𑀁 𑀓𑀢𑀁 𑀢𑀬𑀸𑀢𑀺 𑀓𑀢𑀪𑀻𑀭𑀼𑀢𑁆𑀢𑀸𑀡𑁄 𑀧𑀸𑀧𑀁. 𑀮𑀸𑀫𑀓𑀓𑀫𑁆𑀫𑀁 𑀅𑀓𑀢𑀁 𑀢𑀬𑀸𑀢𑀺 𑀅𑀓𑀢𑀧𑀸𑀧𑁄. 𑀮𑀼𑀤𑁆𑀤𑀁 𑀤𑀸𑀭𑀼𑀡𑀁 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀁 𑀅𑀓𑀢𑀁 𑀢𑀬𑀸𑀢𑀺 𑀅𑀓𑀢𑀮𑀼𑀤𑁆𑀤𑁄. 𑀓𑀺𑀩𑁆𑀩𑀺𑀲𑀁 𑀲𑀸𑀳𑀲𑀺𑀓𑀓𑀫𑁆𑀫𑀁 𑀮𑁄𑀪𑀸𑀤𑀺𑀓𑀺𑀮𑁂𑀲𑀼𑀲𑁆𑀲𑀤𑀁 𑀅𑀓𑀢𑀁 𑀢𑀬𑀸𑀢𑀺 𑀅𑀓𑀢𑀓𑀺𑀩𑁆𑀩𑀺𑀲𑁄. 𑀓𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑀺? 𑀬𑀲𑁆𑀫𑀸 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀓𑀢𑀁 𑀢𑀬𑀸 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀢𑀬𑀸 𑀧𑀸𑀧𑀁; 𑀢𑁂𑀦 𑀢𑀁 𑀯𑀤𑀸𑀫 𑁋 ‘‘𑀓𑀺𑀁 𑀢𑀼𑀬𑁆𑀳𑀁 𑀇𑀫𑀺𑀦𑀸 𑀭𑁄𑀕𑀸𑀪𑀺𑀪𑀽𑀢𑀢𑁆𑀢𑀸 𑀮𑀸𑀫𑀓𑁂𑀦 𑀧𑀸𑀧𑀓𑁂𑀦 𑀤𑀼𑀓𑁆𑀔𑀩𑀳𑀼𑀮𑀢𑁆𑀢𑀸 𑀤𑀼𑀚𑁆𑀚𑀻𑀯𑀺𑀢𑁂𑀦’’. 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄𑀢𑀺 𑀢𑀯 𑀫𑀭𑀡𑀁 𑀚𑀻𑀯𑀺𑀢𑀸 𑀲𑀼𑀦𑁆𑀤𑀭𑀢𑀭𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀢𑁄 𑀢𑁆𑀯𑀁 𑀓𑀸𑀮𑀗𑁆𑀓𑀢𑁄 𑀓𑀢𑀓𑀸𑀮𑁄 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀫𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀲𑁆𑀲 𑀪𑁂𑀤𑀸…𑀧𑁂… 𑀉𑀧𑀧𑀚𑁆𑀚𑀺𑀲𑁆𑀲𑀲𑀺. 𑀏𑀯𑀁 𑀉𑀧𑀧𑀦𑁆𑀦𑁄 𑀘 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀤𑁂𑀯𑀮𑁄𑀓𑁂 ¶ 𑀉𑀧𑁆𑀧𑀦𑁆𑀦𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀓𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀼𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀭𑀺𑀲𑁆𑀲𑀲𑀺 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑁄𑀥𑀸𑀦𑀕𑀢𑁄 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀘𑀭𑀺𑀲𑁆𑀲𑀲𑀺, 𑀯𑀺𑀘𑀭𑀺𑀲𑁆𑀲𑀲𑀺 𑀅𑀪𑀺𑀭𑀫𑀺𑀲𑁆𑀲𑀲𑀺 𑀯𑀸𑀢𑀺 𑀅𑀢𑁆𑀣𑁄.

𑁧𑁬𑁯. 𑀅𑀲𑀧𑁆𑀧𑀸𑀬𑀸𑀦𑀻𑀢𑀺 𑀅𑀳𑀺𑀢𑀸𑀦𑀺 𑀅𑀯𑀼𑀟𑁆𑀠𑀺𑀓𑀭𑀸𑀦𑀺 𑀬𑀸𑀦𑀺 𑀔𑀺𑀧𑁆𑀧𑀫𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀲𑀜𑁆𑀘𑀺𑀘𑁆𑀘𑀸𑀢𑀺 ¶ 𑀅𑀬𑀁 ‘‘𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺 𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀲𑁆𑀲 𑀲𑀜𑁆𑀘𑀺𑀘𑁆𑀘𑀧𑀤𑀲𑁆𑀲 𑀉𑀤𑁆𑀥𑀸𑀭𑁄. 𑀢𑀢𑁆𑀣 𑀲𑀦𑁆𑀢𑀺 𑀉𑀧𑀲𑀕𑁆𑀕𑁄, 𑀢𑁂𑀦 𑀲𑀤𑁆𑀥𑀺𑀁 𑀉𑀲𑁆𑀲𑀼𑀓𑁆𑀓𑀯𑀘𑀦𑀫𑁂𑀢𑀁 𑀲𑀜𑁆𑀘𑀺𑀘𑁆𑀘𑀸𑀢𑀺 ¶ ; 𑀢𑀲𑁆𑀲 𑀲𑀜𑁆𑀘𑁂𑀢𑁂𑀢𑁆𑀯𑀸 𑀲𑀼𑀝𑁆𑀞𑀼 𑀘𑁂𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀬𑁄 𑀲𑀜𑁆𑀘𑀺𑀘𑁆𑀘 𑀯𑁄𑀭𑁄𑀧𑁂𑀢𑀺, 𑀲𑁄 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀳𑁄𑀢𑀺, 𑀢𑀜𑁆𑀘𑀲𑁆𑀲 𑀯𑁄𑀭𑁄𑀧𑀦𑀁 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀦𑀦𑁆𑀢𑁄𑀢𑀺 ‘‘𑀧𑀸𑀡𑁄’’𑀢𑀺 𑀚𑀸𑀦𑀦𑁆𑀢𑁄. 𑀲𑀜𑁆𑀚𑀸𑀦𑀦𑁆𑀢𑁄𑀢𑀺 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀲𑀜𑁆𑀚𑀸𑀦𑀦𑁆𑀢𑁄; 𑀢𑁂𑀦𑁂𑀯 𑀧𑀸𑀡𑀚𑀸𑀦𑀦𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀘𑁆𑀘𑀸𑀢𑀺 𑀯𑀥𑀓𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀉𑀧𑀓𑁆𑀓𑀫𑀯𑀲𑁂𑀦 𑀫𑀤𑁆𑀤𑀦𑁆𑀢𑁄 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸. 𑀯𑀻𑀢𑀺𑀓𑁆𑀓𑀫𑁄𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀬𑁄 𑀯𑀻𑀢𑀺𑀓𑁆𑀓𑀫𑁄 𑀅𑀬𑀁 𑀲𑀜𑁆𑀘𑀺𑀘𑁆𑀘𑀲𑀤𑁆𑀤𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑀼𑀔𑀼𑀫𑀅𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀁 𑀘𑀺𑀢𑁆𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀚𑀸𑀢𑀁. 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀘𑀦𑁂𑀦 𑀘𑁂𑀢𑁆𑀣 𑀲𑀓𑀮𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀢𑀜𑁆𑀘 𑀧𑀞𑀫𑀁 𑀘𑀺𑀢𑁆𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀢𑁂𑀦 𑀲𑀳 𑀦𑀺𑀩𑁆𑀩𑀢𑁆𑀢𑀜𑁆𑀘 𑀓𑀮𑀮𑀭𑀽𑀧𑀦𑁆𑀢𑀺 𑀅𑀬𑀁 𑀲𑀩𑁆𑀩𑀧𑀞𑀫𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄. 𑀢𑀢𑁆𑀣 ‘‘𑀓𑀮𑀮𑀭𑀽𑀧’’𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀯𑀲𑁂𑀦 ¶ 𑀲𑀫𑀢𑀺𑀁𑀲 𑀭𑀽𑀧𑀸𑀦𑀺, 𑀦𑀧𑀼𑀁𑀲𑀓𑀸𑀦𑀁 𑀓𑀸𑀬𑀯𑀢𑁆𑀣𑀼𑀤𑀲𑀓𑀯𑀲𑁂𑀦 𑀯𑀻𑀲𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀮𑀮𑀭𑀽𑀧𑀁 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑁂𑀦 𑀅𑀁𑀲𑀼𑀦𑀸 𑀉𑀤𑁆𑀥𑀝𑀢𑁂𑀮𑀩𑀺𑀦𑁆𑀤𑀼𑀫𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀺𑀮𑀢𑁂𑀮𑀲𑁆𑀲 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁 𑀓𑀮𑀮𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀪. 𑀅𑀝𑁆𑀞. 𑁨𑁬 𑀧𑀓𑀺𑀡𑁆𑀡𑀓𑀓𑀣𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫);

𑀏𑀯𑀁 𑀧𑀭𑀺𑀢𑁆𑀢𑀓𑀁 𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀓𑀢𑀺𑀬𑀸 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲 𑀲𑀢𑁆𑀢𑀲𑁆𑀲 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀼𑀩𑁆𑀩𑁂𑀦 ¶ 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄 𑀏𑀲𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫.

𑀚𑀻𑀯𑀺𑀢𑀸 ¶ 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀓𑀮𑀮𑀓𑀸𑀮𑁂𑀧𑀺 𑀢𑀸𑀧𑀦𑀫𑀤𑁆𑀤𑀦𑁂𑀳𑀺 𑀯𑀸 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦 𑀯𑀸 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀓𑁆𑀓𑀫𑁂𑀦 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀦𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀏𑀢𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀉𑀧𑀭𑁄𑀥𑁂𑀢𑀺 𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑁂𑀡𑀺𑀖𑀝𑀦𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑁄 𑀉𑀧𑀭𑁄𑀥𑁂𑀦𑁆𑀢𑁄 𑀘 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀉𑀧𑀭𑁄𑀥𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺𑀧𑀤𑁂𑀦 𑀤𑀲𑁆𑀲𑀺𑀢𑁄. 𑀯𑀺𑀓𑁄𑀧𑁂𑀢𑀻𑀢𑀺 𑀯𑀺𑀬𑁄𑀚𑁂𑀢𑀺.

𑀢𑀢𑁆𑀣 𑀤𑀼𑀯𑀺𑀥𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘. 𑀢𑁂𑀲𑀼 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀉𑀧𑀓𑁆𑀓𑀫𑁄 𑀦𑀢𑁆𑀣𑀺, 𑀢𑀁 𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀧𑀦 𑀅𑀢𑁆𑀣𑀺, 𑀢𑀁 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸. 𑀢𑀁 𑀧𑀦 𑀯𑁄𑀭𑁄𑀧𑁂𑀦𑁆𑀢𑁄 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀯𑁄𑀭𑁄𑀧𑁂𑀢𑀺. 𑀢𑁂𑀦𑁂𑀯 𑀳𑀺 𑀲𑀤𑁆𑀥𑀺𑀁 𑀢𑀁 𑀦𑀺𑀭𑀼𑀚𑁆𑀛𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄. 𑀢𑀁 𑀧𑀦 𑀯𑁄𑀭𑁄𑀧𑁂𑀦𑁆𑀢𑁄 𑀓𑀺𑀁 𑀅𑀢𑀻𑀢𑀁 𑀯𑁄𑀭𑁄𑀧𑁂𑀢𑀺, 𑀅𑀦𑀸𑀕𑀢𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺? 𑀦𑁂𑀯 𑀅𑀢𑀻𑀢𑀁, 𑀦 𑀅𑀦𑀸𑀕𑀢𑀁, 𑀢𑁂𑀲𑀼 𑀳𑀺 𑀏𑀓𑀁 𑀦𑀺𑀭𑀼𑀤𑁆𑀥𑀁 𑀏𑀓𑀁 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀉𑀪𑀧𑀫𑁆𑀧𑀺 𑀅𑀲𑀦𑁆𑀢𑀁, 𑀅𑀲𑀦𑁆𑀢𑀢𑁆𑀢𑀸 𑀉𑀧𑀓𑁆𑀓𑀫𑁄 𑀦𑀢𑁆𑀣𑀺, 𑀉𑀧𑀓𑁆𑀓𑀫𑀲𑁆𑀲 𑀦𑀢𑁆𑀣𑀺𑀢𑀸𑀬 𑀏𑀓𑀫𑁆𑀧𑀺 𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺; 𑀦 𑀚𑀻𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺, 𑀦 𑀚𑀻𑀯𑀺𑀢𑁆𑀣; 𑀦 𑀚𑀻𑀯𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣; 𑀦 𑀚𑀻𑀯𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀦𑀺. 𑁧𑁦).

𑀢𑀲𑁆𑀫𑀸 ¶ 𑀬𑀢𑁆𑀣 𑀚𑀻𑀯𑀢𑀺 𑀢𑀢𑁆𑀣 𑀉𑀧𑀓𑁆𑀓𑀫𑁄 𑀬𑀼𑀢𑁆𑀢𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑁄𑀭𑁄𑀧𑁂𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀦𑀸𑀫𑁂𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀢𑀺𑀯𑀺𑀥𑀁. 𑀢𑀢𑁆𑀣 ‘‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁’’ 𑀦𑀸𑀫 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀲𑀫𑀗𑁆𑀕𑀺, 𑀢𑀁 𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀓𑀲𑁆𑀫𑀸? 𑀲𑀬𑀫𑁂𑀯 𑀦𑀺𑀭𑀼𑀚𑁆𑀛𑀦𑀢𑁄. ‘‘𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁’’ 𑀦𑀸𑀫 𑀲𑀢𑁆𑀢𑀝𑁆𑀞𑀚𑀯𑀦𑀯𑀸𑀭𑀫𑀢𑁆𑀢𑀁 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀓𑀁, 𑀬𑀸𑀯 𑀯𑀸 𑀉𑀡𑁆𑀳𑀢𑁄 𑀆𑀕𑀦𑁆𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀅𑀦𑁆𑀥𑀓𑀸𑀭𑀁 𑀳𑁄𑀢𑀺, 𑀲𑀻𑀢𑀢𑁄 𑀯𑀸 𑀆𑀕𑀦𑁆𑀢𑁆𑀯𑀸 𑀑𑀯𑀭𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀬𑀸𑀯 𑀯𑀺𑀲𑀪𑀸𑀕𑀉𑀢𑀼𑀧𑀸𑀢𑀼𑀪𑀸𑀯𑁂𑀦 𑀧𑀼𑀭𑀺𑀫𑀓𑁄 𑀉𑀢𑀼 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀏𑀢𑁆𑀣𑀦𑁆𑀢𑀭𑁂 ‘‘𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 ¶ . 𑀧𑀝𑀺𑀲𑀦𑁆𑀥𑀺𑀢𑁄 𑀧𑀦 𑀬𑀸𑀯 𑀘𑀼𑀢𑀺, 𑀏𑀢𑀁 ‘‘𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁’’ 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸. 𑀓𑀣𑀁? 𑀢𑀲𑁆𑀫𑀺𑀜𑁆𑀳𑀺 𑀉𑀧𑀓𑁆𑀓𑀫𑁂 𑀓𑀢𑁂 𑀮𑀤𑁆𑀥𑀼𑀧𑀓𑁆𑀓𑀫𑀁 𑀚𑀻𑀯𑀺𑀢𑀦𑀯𑀓𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀤𑀼𑀩𑁆𑀩𑀮𑀲𑁆𑀲 𑀧𑀭𑀺𑀳𑀻𑀦𑀯𑁂𑀕𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁄 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀮𑀁 𑀅𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀦𑀺𑀭𑀼𑀚𑁆𑀛𑀢𑀺 ¶ . 𑀏𑀯𑀁 𑀢𑀤𑀼𑀪𑀬𑀫𑁆𑀧𑀺 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑀤𑁂𑀯 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀧𑀸𑀡𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀡𑁄’’𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀅𑀢𑀺𑀧𑀸𑀢𑁂𑀦𑁆𑀢𑁄 ‘‘𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. ‘‘𑀧𑀸𑀡𑀸𑀢𑀺𑀧𑀸𑀢𑁄’’𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀁 𑀧𑀬𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀸 𑀯𑀥𑀓𑀘𑁂𑀢𑀦𑀸 ‘‘𑀧𑀸𑀡𑀸𑀢𑀺𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑀻’’𑀢𑀺 𑀯𑀼𑀢𑁆𑀢𑀘𑁂𑀢𑀦𑀸𑀲𑀫𑀗𑁆𑀕𑀺 𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑁄’’𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀙𑀧𑀬𑁄𑀕𑀸 𑁋 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀣𑀸𑀯𑀭𑁄, 𑀯𑀺𑀚𑁆𑀚𑀸𑀫𑀬𑁄, 𑀇𑀤𑁆𑀥𑀺𑀫𑀬𑁄𑀢𑀺.

𑀢𑀢𑁆𑀣 ‘‘𑀲𑀸𑀳𑀢𑁆𑀣𑀺𑀓𑁄’’𑀢𑀺 𑀲𑀬𑀁 𑀫𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁. ‘‘𑀆𑀡𑀢𑁆𑀢𑀺𑀓𑁄’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 ‘‘𑀏𑀯𑀁 𑀯𑀺𑀚𑁆𑀛𑀺𑀢𑁆𑀯𑀸 𑀯𑀸 𑀧𑀳𑀭𑀺𑀢𑁆𑀯𑀸 𑀯𑀸 𑀫𑀸𑀭𑁂𑀳𑀻’’𑀢𑀺 𑀆𑀡𑀸𑀧𑀦𑀁. ‘‘𑀦𑀺𑀲𑁆𑀲𑀕𑁆𑀕𑀺𑀬𑁄’’𑀢𑀺 𑀤𑀽𑀭𑁂 𑀞𑀺𑀢𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀉𑀲𑀼𑀲𑀢𑁆𑀢𑀺𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀁. ‘‘𑀣𑀸𑀯𑀭𑁄’’𑀢𑀺 𑀅𑀲𑀜𑁆𑀘𑀸𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀑𑀧𑀸𑀢𑀅𑀧𑀲𑁆𑀲𑁂𑀦𑀉𑀧𑀦𑀺𑀓𑁆𑀔𑀺𑀧𑀦𑀁 𑀪𑁂𑀲𑀚𑁆𑀚𑀲𑀁𑀯𑀺𑀥𑀸𑀦𑀁. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀭𑀢𑁄 𑀧𑀸𑀴𑀺𑀯𑀡𑁆𑀡𑀦𑀸𑀬𑀫𑁂𑀯 𑀯𑀺𑀢𑁆𑀣𑀸𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀦𑁆𑀢𑀺.

𑀯𑀺𑀚𑁆𑀚𑀸𑀫𑀬𑀇𑀤𑁆𑀥𑀺𑀫𑀬𑀸 ¶ 𑀧𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸. 𑀢𑁂 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀔𑁂𑀧𑀢𑁄 𑀳𑀺 𑀫𑀸𑀭𑀡𑀢𑁆𑀣𑀁 𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀁 𑀯𑀺𑀚𑁆𑀚𑀸𑀫𑀬𑁄 𑀧𑀬𑁄𑀕𑁄. 𑀅𑀝𑁆𑀞𑀓𑀣𑀸𑀲𑀼 ¶ 𑀧𑀦 ‘‘𑀓𑀢𑀫𑁄 𑀯𑀺𑀚𑁆𑀚𑀸𑀫𑀬𑁄 𑀧𑀬𑁄𑀕𑁄? 𑀆𑀣𑀩𑁆𑀩𑀡𑀺𑀓𑀸 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀺; 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂 𑀲𑀗𑁆𑀕𑀸𑀫𑁂 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀧𑀝𑀺𑀲𑁂𑀦𑀸𑀬 𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀼 𑀈𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑀤𑁆𑀤𑀯𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀭𑁄𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀧𑀚𑁆𑀚𑀭𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀲𑀽𑀘𑀺𑀓𑀁 𑀓𑀭𑁄𑀦𑁆𑀢𑀺, 𑀯𑀺𑀲𑀽𑀘𑀺𑀓𑀁 𑀓𑀭𑁄𑀦𑁆𑀢𑀺, 𑀧𑀓𑁆𑀔𑀦𑁆𑀤𑀺𑀬𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀆𑀣𑀩𑁆𑀩𑀡𑀺𑀓𑀸 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀺. 𑀯𑀺𑀚𑁆𑀚𑀸𑀥𑀸𑀭𑀸 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂…𑀧𑁂… 𑀧𑀓𑁆𑀔𑀦𑁆𑀤𑀺𑀬𑀁 𑀓𑀭𑁄𑀦𑁆𑀢𑀻’’𑀢𑀺 𑀏𑀯𑀁 𑀯𑀺𑀚𑁆𑀚𑀸𑀫𑀬𑀁 𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀆𑀣𑀩𑁆𑀩𑀡𑀺𑀓𑁂𑀳𑀺 𑀘 𑀯𑀺𑀚𑁆𑀚𑀸𑀥𑀭𑁂𑀳𑀺 𑀘 𑀫𑀸𑀭𑀺𑀢𑀸𑀦𑀁 𑀩𑀳𑀽𑀦𑀺 𑀯𑀢𑁆𑀣𑀽𑀦𑀺 𑀯𑀼𑀢𑁆𑀢𑀸𑀦𑀺, 𑀓𑀺𑀁 𑀢𑁂𑀳𑀺! 𑀇𑀤𑀜𑁆𑀳𑁂𑀢𑁆𑀣 𑀮𑀓𑁆𑀔𑀡𑀁 𑀫𑀸𑀭𑀡𑀸𑀬 𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀁 𑀯𑀺𑀚𑁆𑀚𑀸𑀫𑀬𑁄 𑀧𑀬𑁄𑀕𑁄𑀢𑀺.

𑀓𑀫𑁆𑀫𑀯𑀺𑀧𑀸𑀓𑀚𑀸𑀬 𑀇𑀤𑁆𑀥𑀺𑀬𑀸 𑀧𑀬𑁄𑀚𑀦𑀁 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄. 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺 𑀘 𑀦𑀸𑀫𑁂𑀲𑀸 𑀦𑀸𑀕𑀸𑀦𑀁 𑀦𑀸𑀕𑀺𑀤𑁆𑀥𑀺, 𑀲𑀼𑀧𑀡𑁆𑀡𑀸𑀦𑀁 𑀲𑀼𑀧𑀡𑁆𑀡𑀺𑀤𑁆𑀥𑀺, 𑀬𑀓𑁆𑀔𑀸𑀦𑀁 𑀬𑀓𑁆𑀔𑀺𑀤𑁆𑀥𑀺, 𑀤𑁂𑀯𑀸𑀦𑀁 𑀤𑁂𑀯𑀺𑀤𑁆𑀥𑀺, 𑀭𑀸𑀚𑀽𑀦𑀁 𑀭𑀸𑀚𑀺𑀤𑁆𑀥𑀻𑀢𑀺 ¶ 𑀩𑀳𑀼𑀯𑀺𑀥𑀸. 𑀢𑀢𑁆𑀣 𑀤𑀺𑀝𑁆𑀞𑀤𑀝𑁆𑀞𑀨𑀼𑀝𑁆𑀞𑀯𑀺𑀲𑀸𑀦𑀁 𑀦𑀸𑀕𑀸𑀦𑀁 𑀤𑀺𑀲𑁆𑀯𑀸 𑀟𑀁𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀘 𑀧𑀭𑀽𑀧𑀖𑀸𑀢𑀓𑀭𑀡𑁂 ‘‘𑀦𑀸𑀕𑀺𑀤𑁆𑀥𑀺’’ 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀧𑀡𑁆𑀡𑀸𑀦𑀁 𑀫𑀳𑀸𑀲𑀫𑀼𑀤𑁆𑀤𑀢𑁄 𑀤𑁆𑀯𑀢𑁆𑀢𑀺𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑀦𑀸𑀕𑀼𑀤𑁆𑀥𑀭𑀡𑁂 ‘‘𑀲𑀼𑀧𑀡𑁆𑀡𑀺𑀤𑁆𑀥𑀺’’ 𑀯𑁂𑀤𑀺𑀢𑀩𑁆𑀩𑀸. 𑀬𑀓𑁆𑀔𑀸 𑀧𑀦 𑀦𑁂𑀯 𑀆𑀕𑀘𑁆𑀙𑀦𑁆𑀢𑀸 𑀦 𑀧𑀳𑀭𑀦𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀳𑀺 𑀧𑀳𑀝𑀲𑀢𑁆𑀢𑀸 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀫𑀭𑀦𑁆𑀢𑀺, 𑀢𑀢𑁆𑀭 𑀢𑁂𑀲𑀁 ‘‘𑀬𑀓𑁆𑀔𑀺𑀤𑁆𑀥𑀺’’ 𑀤𑀝𑁆𑀞𑀩𑁆𑀩𑀸. 𑀯𑁂𑀲𑁆𑀲𑀯𑀡𑀲𑁆𑀲 𑀲𑁄𑀢𑀸𑀧𑀦𑁆𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀦𑀬𑀦𑀸𑀯𑀼𑀥𑁂𑀦 𑀑𑀮𑁄𑀓𑀺𑀢𑀓𑀼𑀫𑁆𑀪𑀡𑁆𑀟𑀸𑀦𑀁 𑀫𑀭𑀡𑁂 𑀅𑀜𑁆𑀜𑁂𑀲𑀜𑁆𑀘 𑀤𑁂𑀯𑀸𑀦𑀁 𑀬𑀣𑀸𑀲𑀓𑀁 𑀇𑀤𑁆𑀥𑀸𑀦𑀼𑀪𑀸𑀯𑁂 ‘‘𑀤𑁂𑀯𑀺𑀤𑁆𑀥𑀺’’ 𑀯𑁂𑀤𑀺𑀢𑀩𑁆𑀩𑀸. 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀧𑀭𑀺𑀲𑀲𑁆𑀲 𑀆𑀓𑀸𑀲𑀕𑀫𑀦𑀸𑀤𑀻𑀲𑀼, 𑀅𑀲𑁄𑀓𑀲𑁆𑀲 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀬𑁄𑀚𑀦𑁂 𑀆𑀡𑀸𑀧𑀯𑀢𑁆𑀢𑀦𑀸𑀤𑀻𑀲𑀼, 𑀧𑀺𑀢𑀼𑀭𑀜𑁆𑀜𑁄 𑀘 𑀲𑀻𑀳𑀴𑀦𑀭𑀺𑀦𑁆𑀤𑀲𑁆𑀲 𑀤𑀸𑀞𑀸𑀓𑁄𑀝𑀦𑁂𑀦 𑀘𑀽𑀴𑀲𑀼𑀫𑀦𑀓𑀼𑀝𑀼𑀫𑁆𑀩𑀺𑀬𑀲𑁆𑀲𑀫𑀭𑀡𑁂 ¶ ‘‘𑀭𑀸𑀚𑀺𑀤𑁆𑀥𑀺’’ 𑀤𑀝𑁆𑀞𑀩𑁆𑀩𑀸𑀢𑀺.

𑀓𑁂𑀘𑀺 𑀧𑀦 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀜𑁆𑀜𑀺𑀲𑁆𑀲𑀸 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀧𑀸𑀧𑀓𑁂𑀦 𑀫𑀦𑀲𑀸𑀅𑀦𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺 ‘𑀅𑀳𑁄 𑀯𑀢𑀸𑀬𑀁 𑀓𑀼𑀘𑁆𑀙𑀺𑀕𑀢𑁄 𑀕𑀩𑁆𑀪𑁄 𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀫𑁂𑀬𑁆𑀬𑀸’𑀢𑀺. 𑀏𑀯𑀫𑁆𑀧𑀺 𑀪𑀺𑀓𑁆𑀔𑀯𑁂 𑀓𑀼𑀮𑀼𑀫𑁆𑀩𑀲𑁆𑀲 𑀉𑀧𑀖𑀸𑀢𑁄 𑀳𑁄𑀢𑀻’’𑀢𑀺 𑀆𑀤𑀺𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸𑀧𑀺 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀯𑀤𑀦𑁆𑀢𑀺; 𑀲𑀳 𑀧𑀭𑀽𑀧𑀖𑀸𑀢𑀓𑀭𑀡𑁂𑀦 𑀘 𑀆𑀤𑀺𑀢𑁆𑀢𑀖𑀭𑀽𑀧𑀭𑀺𑀔𑀺𑀢𑁆𑀢𑀲𑁆𑀲 ¶ 𑀉𑀤𑀓𑀖𑀝𑀲𑁆𑀲 𑀪𑁂𑀤𑀦𑀫𑀺𑀯 𑀇𑀤𑁆𑀥𑀺𑀯𑀺𑀦𑀸𑀲𑀜𑁆𑀘 𑀇𑀘𑁆𑀙𑀦𑁆𑀢𑀺; 𑀢𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀫𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀼𑀲𑀮𑀯𑁂𑀤𑀦𑀸𑀯𑀺𑀢𑀓𑁆𑀓𑀧𑀭𑀺𑀢𑁆𑀢𑀢𑁆𑀢𑀺𑀓𑁂𑀳𑀺 𑀦 𑀲𑀫𑁂𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀦𑀸𑀫 𑀓𑀼𑀲𑀮𑀢𑁆𑀢𑀺𑀓𑁂 𑀓𑀼𑀲𑀮𑀸 𑀘𑁂𑀯 𑀅𑀩𑁆𑀬𑀸𑀓𑀢𑀸 𑀘, 𑀧𑀸𑀡𑀸𑀢𑀺𑀧𑀸𑀢𑁄 𑀅𑀓𑀼𑀲𑀮𑁄. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁄. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄. 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 𑀫𑀳𑀕𑁆𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀧𑀭𑀺𑀢𑁆𑀢𑁄𑀢𑀺.

𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀏𑀢𑁆𑀣 𑀳𑀭𑀢𑀻𑀢𑀺 𑀳𑀸𑀭𑀓𑀁. 𑀓𑀺𑀁 𑀳𑀭𑀢𑀺? 𑀚𑀻𑀯𑀺𑀢𑀁. 𑀅𑀣 𑀯𑀸 𑀳𑀭𑀺𑀢𑀩𑁆𑀩𑀦𑁆𑀢𑀺 𑀳𑀸𑀭𑀓𑀁; 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓𑀁. 𑀅𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀬𑀣𑀸 𑀮𑀪𑀢𑀺 𑀢𑀣𑀸 𑀓𑀭𑁂𑀬𑁆𑀬; 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀣𑀸𑀯𑀭𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀇𑀢𑀭𑀣𑀸 𑀳𑀺 𑀧𑀭𑀺𑀬𑀺𑀝𑁆𑀞𑀫𑀢𑁆𑀢𑁂𑀦𑁂𑀯 𑀧𑀸𑀭𑀸𑀚𑀺𑀓𑁄 𑀪𑀯𑁂𑀬𑁆𑀬; 𑀦 𑀘𑁂𑀢𑀁 𑀬𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀁 𑀏𑀢𑁆𑀣 𑀣𑀸𑀯𑀭𑀧𑁆𑀧𑀬𑁄𑀕𑀲𑀗𑁆𑀕𑀳𑀺𑀢𑀁 𑀲𑀢𑁆𑀣𑀁, 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀺𑀁 𑀯𑀸…𑀧𑁂… 𑀭𑀚𑁆𑀚𑀼𑀁 𑀯𑀸’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀬𑀁𑀓𑀺𑀜𑁆𑀘𑀺 𑀲𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀮𑀕𑀼𑀴𑀧𑀸𑀲𑀸𑀡𑀯𑀺𑀲𑀭𑀚𑁆𑀚𑀽𑀦𑀜𑁆𑀘 𑀚𑀻𑀯𑀺𑀢𑀯𑀺𑀦𑀸𑀲𑀦𑀪𑀸𑀯𑀢𑁄 𑀲𑀢𑁆𑀣𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀭𑀡𑀯𑀡𑁆𑀡𑀁 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 ‘‘𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 ¶ 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦, 𑀬𑁄 𑀢𑁆𑀯𑀁 𑀦 𑀮𑀪𑀲𑀺 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 ‘‘𑀢𑁆𑀯𑀁 𑀔𑁄𑀲𑀺 𑀉𑀧𑀸𑀲𑀓 𑀓𑀢𑀓𑀮𑁆𑀬𑀸𑀡𑁄…𑀧𑁂… 𑀅𑀓𑀢𑀁 𑀢𑀬𑀸 𑀧𑀸𑀧𑀁, 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄, 𑀇𑀢𑁄 𑀢𑁆𑀯𑀁 𑀓𑀸𑀮𑀗𑁆𑀓𑀢𑁄 𑀧𑀭𑀺𑀘𑀭𑀺𑀲𑁆𑀲𑀲𑀺 𑀅𑀘𑁆𑀙𑀭𑀸𑀧𑀭𑀺𑀯𑀼𑀢𑁄 𑀦𑀦𑁆𑀤𑀦𑀯𑀦𑁂 𑀲𑀼𑀔𑀧𑁆𑀧𑀢𑁆𑀢𑁄 𑀯𑀺𑀳𑀭𑀺𑀲𑁆𑀲𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑁂 𑀯𑀡𑁆𑀡𑀁 𑀪𑀡𑀦𑁆𑀢𑁄𑀧𑀺 𑀫𑀭𑀡𑀯𑀡𑁆𑀡𑀫𑁂𑀯 𑀲𑀁𑀯𑀡𑁆𑀡𑁂𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁 𑁋 ‘‘𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀫𑀭𑀡𑁂 𑀯𑀡𑁆𑀡𑀁 𑀪𑀡𑀢𑀻’’𑀢𑀺.

𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬𑀸𑀢𑀺 𑀫𑀭𑀡𑀢𑁆𑀣𑀸𑀬 𑀉𑀧𑀸𑀬𑀁 𑀕𑀸𑀳𑀸𑀧𑁂𑀬𑁆𑀬. 𑀲𑀢𑁆𑀣𑀁 𑀯𑀸 𑀆𑀳𑀭𑀸𑀢𑀺 𑀆𑀤𑀻𑀲𑀼 𑀘 𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁 ‘‘𑀲𑁄𑀩𑁆𑀪𑁂 𑀯𑀸 𑀦𑀭𑀓𑁂 𑀯𑀸 𑀧𑀧𑀸𑀢𑁂 𑀯𑀸 𑀧𑀧𑀢𑀸’’𑀢𑀺𑀆𑀤𑀺, 𑀢𑀁 𑀲𑀩𑁆𑀩𑀁 𑀧𑀭𑀢𑁄 𑀯𑀼𑀢𑁆𑀢𑀦𑀬𑀢𑁆𑀢𑀸 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀭𑀽𑀧𑁂𑀦𑁂𑀯 𑀯𑀢𑁆𑀢𑀼𑀁.

𑀇𑀢𑀺 ¶ 𑀘𑀺𑀢𑁆𑀢𑀫𑀦𑁄𑀢𑀺 𑀇𑀢𑀺𑀘𑀺𑀢𑁆𑀢𑁄 𑀇𑀢𑀺𑀫𑀦𑁄; ‘‘𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀫𑀭𑀡𑀘𑀺𑀢𑁆𑀢𑁄 𑀫𑀭𑀡𑀫𑀦𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀫𑀦𑁄 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀉𑀪𑀬𑀫𑁆𑀧𑀺 𑀏𑀓𑀫𑁂𑀯, 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀢𑁄 𑀅𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀘𑀺𑀢𑁆𑀢𑀁 𑀢𑀁 𑀫𑀦𑁄, 𑀬𑀁 𑀫𑀦𑁄 𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀺𑀲𑀤𑁆𑀤𑀁 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀦 𑀢𑀸𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀅𑀥𑀺𑀓𑀸𑀭𑀯𑀲𑁂𑀦 𑀇𑀢𑀺𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 ‘‘𑀇𑀢𑀺𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 𑀏𑀯𑀁 𑀅𑀯𑀼𑀢𑁆𑀢𑀫𑁆𑀧𑀺 𑀅𑀥𑀺𑀓𑀸𑀭𑀢𑁄 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺𑀲𑁆𑀲 𑀢𑀫𑁂𑀯𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀭𑀡𑀲𑀜𑁆𑀜𑀻’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀘𑁂𑀢𑁆𑀣 ‘‘𑀲𑀗𑁆𑀓𑀧𑁆𑀧𑁄’’𑀢𑀺 𑀦𑀬𑀺𑀤𑀁 𑀯𑀺𑀢𑀓𑁆𑀓𑀲𑁆𑀲 𑀦𑀸𑀫𑀁. 𑀅𑀣 𑀔𑁄 𑀲𑀁𑀯𑀺𑀤𑀳𑀦𑀫𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀘 𑀲𑀁𑀯𑀺𑀤𑀳𑀦𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀜𑁆𑀜𑀸𑀘𑁂𑀢𑀦𑀸𑀥𑀺𑀧𑁆𑀧𑀸𑀬𑁂𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀘𑀺𑀢𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀓𑁄 𑀲𑀗𑁆𑀓𑀧𑁆𑀧𑁄 𑀅𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺𑀲𑁆𑀲 𑀧𑀤𑀪𑀸𑀚𑀦𑀫𑁆𑀧𑀺 ¶ 𑀲𑀜𑁆𑀜𑀸𑀘𑁂𑀢𑀦𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀺𑀢𑀓𑁆𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀘𑁆𑀘𑀸𑀯𑀘𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀫𑀳𑀦𑁆𑀢𑀸𑀫𑀳𑀦𑁆𑀢𑁂𑀳𑀺 𑀉𑀧𑀸𑀬𑁂𑀳𑀺. 𑀢𑀢𑁆𑀣 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑁂 𑀢𑀸𑀯 𑀚𑀻𑀯𑀺𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀅𑀯𑀘𑀸𑀓𑀸𑀭𑀢𑀸 𑀫𑀭𑀡𑁂 𑀯𑀡𑁆𑀡𑀪𑀡𑀦𑀯𑀲𑁂𑀦 𑀉𑀘𑁆𑀘𑀸𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀤𑀧𑀦𑁂 𑀧𑀦 𑀫𑀼𑀝𑁆𑀞𑀺𑀚𑀸𑀡𑀼𑀦𑀺𑀧𑁆𑀨𑁄𑀝𑀦𑀸𑀤𑀻𑀳𑀺 𑀫𑀭𑀡𑀲𑀫𑀸𑀤𑀧𑀦𑀯𑀲𑁂𑀦 𑀉𑀘𑁆𑀘𑀸𑀓𑀸𑀭𑀢𑀸, 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀔𑁂 𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀭𑀡𑀸𑀤𑀺𑀲𑀫𑀸𑀤𑀧𑀦𑀯𑀲𑁂𑀦 𑀅𑀯𑀘𑀸𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑁄𑀩𑁆𑀪𑁂 𑀯𑀸 𑀦𑀭𑀓𑁂 𑀯𑀸 𑀧𑀧𑀸𑀢𑁂 𑀯𑀸𑀢𑀺 𑀏𑀢𑁆𑀣 𑀲𑁄𑀩𑁆𑀪𑁄 𑀦𑀸𑀫 𑀲𑀫𑀦𑁆𑀢𑀢𑁄 𑀙𑀺𑀦𑁆𑀦𑀢𑀝𑁄 𑀕𑀫𑁆𑀪𑀻𑀭𑁄 𑀆𑀯𑀸𑀝𑁄. 𑀦𑀭𑀓𑁄 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀨𑀮𑀦𑁆𑀢𑀺𑀬𑀸 𑀪𑀽𑀫𑀺𑀬𑀸 𑀲𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑀸 𑀫𑀳𑀸𑀤𑀭𑀻, 𑀬𑀢𑁆𑀣 𑀳𑀢𑁆𑀣𑀻𑀧𑀺 𑀧𑀢𑀦𑁆𑀢𑀺, 𑀘𑁄𑀭𑀸𑀧𑀺 𑀦𑀺𑀮𑀻𑀦𑀸 𑀢𑀺𑀝𑁆𑀞𑀦𑁆𑀢𑀺. 𑀧𑀧𑀸𑀢𑁄𑀢𑀺 𑀧𑀩𑁆𑀩𑀢𑀦𑁆𑀢𑀭𑁂 𑀯𑀸 𑀣𑀮𑀦𑁆𑀢𑀭𑁂 𑀯𑀸 𑀏𑀓𑀢𑁄 𑀙𑀺𑀦𑁆𑀦𑁄 ¶ 𑀳𑁄𑀢𑀺. 𑀧𑀼𑀭𑀺𑀫𑁂 𑀉𑀧𑀸𑀤𑀸𑀬𑀸𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀅𑀤𑀺𑀦𑁆𑀦𑀜𑁆𑀘 𑀆𑀤𑀺𑀬𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁂 𑀧𑀼𑀕𑁆𑀕𑀮𑁂 𑀉𑀧𑀸𑀤𑀸𑀬. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑁧𑁭𑁪. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀧𑀤𑀪𑀸𑀚𑀦𑀻𑀬𑀫𑁆𑀳𑀺 𑀲𑀗𑁆𑀔𑁂𑀧𑁂𑀦𑁂𑀯 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑀺𑀢𑀁, 𑀦 𑀯𑀺𑀢𑁆𑀣𑀸𑀭𑁂𑀦 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀢𑀦𑁆𑀢𑀺 𑀞𑀧𑀺𑀢𑀸. 𑀲𑀗𑁆𑀔𑁂𑀧𑀤𑀲𑁆𑀲𑀺𑀢𑁂 𑀘 𑀅𑀢𑁆𑀣𑁂 𑀦 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 ¶ 𑀪𑀺𑀓𑁆𑀔𑀽 𑀦𑀬𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀸𑀕𑀢𑁂 𑀘 𑀧𑀸𑀧𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀑𑀓𑀸𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀜𑁆𑀘 𑀲𑀩𑁆𑀩𑀸𑀓𑀸𑀭𑁂𑀦 𑀦𑀬𑀕𑁆𑀕𑀳𑀡𑀢𑁆𑀣𑀁 𑀅𑀦𑀸𑀕𑀢𑁂 𑀘 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀑𑀓𑀸𑀲𑀧𑀝𑀺𑀩𑀸𑀳𑀦𑀢𑁆𑀣𑀁 𑀧𑀼𑀦 ‘‘𑀲𑀸𑀫𑀁 𑀅𑀥𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀫𑀦𑁆𑀢𑀺 𑀲𑀬𑀁 𑀳𑀦𑀢𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀚𑀸𑀡𑀼𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦. 𑀓𑀸𑀬𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀓𑀸𑀬𑀢𑁄 𑀅𑀫𑁄𑀘𑀺𑀢𑁂𑀦 𑀅𑀲𑀺𑀆𑀤𑀺𑀦𑀸 𑀧𑀳𑀭𑀡𑁂𑀦. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀓𑀸𑀬𑀢𑁄 𑀘 𑀓𑀸𑀬𑀧𑀝𑀺𑀩𑀤𑁆𑀥𑀢𑁄 𑀘 𑀫𑁄𑀘𑀺𑀢𑁂𑀦 𑀉𑀲𑀼𑀲𑀢𑁆𑀢𑀺𑀆𑀤𑀺𑀦𑀸. 𑀏𑀢𑁆𑀢𑀸𑀯𑀢𑀸 𑀲𑀸𑀳𑀢𑁆𑀣𑀺𑀓𑁄 ¶ 𑀘 𑀦𑀺𑀲𑁆𑀲𑀕𑁆𑀕𑀺𑀬𑁄 𑀘𑀸𑀢𑀺 𑀤𑁆𑀯𑁂 𑀧𑀬𑁄𑀕𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀏𑀓𑀫𑁂𑀓𑁄 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀉𑀤𑁆𑀤𑁂𑀲𑀺𑀓𑁂 𑀬𑀁 𑀉𑀤𑁆𑀤𑀺𑀲𑁆𑀲 𑀧𑀳𑀭𑀢𑀺, 𑀢𑀲𑁆𑀲𑁂𑀯 𑀫𑀭𑀡𑁂𑀦 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. ‘‘𑀬𑁄 𑀓𑁄𑀘𑀺 𑀫𑀭𑀢𑀽’’𑀢𑀺 𑀏𑀯𑀁 𑀅𑀦𑀼𑀤𑁆𑀤𑁂𑀲𑀺𑀓𑁂 𑀧𑀳𑀸𑀭𑀧𑁆𑀧𑀘𑁆𑀘𑀬𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀭𑀡𑁂𑀦 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀉𑀪𑀬𑀣𑀸𑀧𑀺 𑀘 𑀧𑀳𑀭𑀺𑀢𑀫𑀢𑁆𑀢𑁂 𑀯𑀸 𑀫𑀭𑀢𑀼 𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦, 𑀧𑀳𑀭𑀺𑀢𑀫𑀢𑁆𑀢𑁂𑀬𑁂𑀯 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀘 𑀧𑀳𑀸𑀭𑀁 𑀤𑀢𑁆𑀯𑀸 𑀢𑁂𑀦 𑀅𑀫𑀢𑀲𑁆𑀲 𑀧𑀼𑀦 𑀅𑀜𑁆𑀜𑀘𑀺𑀢𑁆𑀢𑁂𑀦 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀘𑁆𑀙𑀸𑀧𑀺 𑀬𑀤𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀫𑀭𑀢𑀺, 𑀢𑀤𑀸 𑀏𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄. 𑀅𑀣 𑀤𑀼𑀢𑀺𑀬𑀧𑁆𑀧𑀳𑀸𑀭𑁂𑀦 𑀫𑀭𑀢𑀺, 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀉𑀪𑀬𑁂𑀳𑀺 𑀫𑀢𑁂𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄. 𑀉𑀪𑀬𑁂𑀳𑀺 𑀅𑀫𑀢𑁂 𑀦𑁂𑀯𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀏𑀲 𑀦𑀬𑁄 𑀩𑀳𑀽𑀳𑀺𑀧𑀺 𑀏𑀓𑀲𑁆𑀲 𑀧𑀳𑀸𑀭𑁂 𑀤𑀺𑀦𑁆𑀦𑁂. 𑀢𑀢𑁆𑀭𑀸𑀧𑀺 𑀳𑀺 𑀬𑀲𑁆𑀲 𑀧𑀳𑀸𑀭𑁂𑀦 𑀫𑀭𑀢𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄 𑀳𑁄𑀢𑀻𑀢𑀺.

𑀓𑀫𑁆𑀫𑀸𑀧𑀢𑁆𑀢𑀺𑀩𑁆𑀬𑀢𑁆𑀢𑀺𑀪𑀸𑀯𑀢𑁆𑀣𑀜𑁆𑀘𑁂𑀢𑁆𑀣 𑀏𑀴𑀓𑀘𑀢𑀼𑀓𑁆𑀓𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀏𑀴𑀓𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀧𑀦𑁆𑀦𑀁 𑀉𑀧𑀥𑀸𑀭𑁂𑀢𑀺 ‘‘𑀭𑀢𑁆𑀢𑀺𑀁 𑀆𑀕𑀦𑁆𑀢𑁆𑀯𑀸 𑀯𑀥𑀺𑀲𑁆𑀲𑀸𑀫𑀻’’𑀢𑀺. 𑀏𑀴𑀓𑀲𑁆𑀲 𑀘 𑀦𑀺𑀧𑀦𑁆𑀦𑁄𑀓𑀸𑀲𑁂 𑀢𑀲𑁆𑀲 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀭𑀳𑀸 𑀯𑀸 𑀧𑀡𑁆𑀟𑀼𑀓𑀸𑀲𑀸𑀯𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀆𑀕𑀦𑁆𑀢𑁆𑀯𑀸 ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀭𑀳𑀦𑁆𑀢𑀁 𑀯𑀸 𑀫𑀸𑀭𑁂𑀢𑀺. ‘‘𑀇𑀫𑀁 𑀯𑀢𑁆𑀣𑀼𑀁 𑀫𑀸𑀭𑁂𑀫𑀻’’𑀢𑀺 𑀘𑁂𑀢𑀦𑀸𑀬 𑀅𑀢𑁆𑀣𑀺𑀪𑀸𑀯𑀢𑁄 𑀖𑀸𑀢𑀓𑁄 𑀘 𑀳𑁄𑀢𑀺, 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘 𑀨𑀼𑀲𑀢𑀺, 𑀧𑀸𑀭𑀸𑀚𑀺𑀓𑀜𑁆𑀘 𑀆𑀧𑀚𑁆𑀚𑀢𑀺 ¶ . 𑀅𑀜𑁆𑀜𑁄 𑀓𑁄𑀘𑀺 𑀆𑀕𑀦𑁆𑀢𑀼𑀓𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺 ¶ , ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀢𑀁 𑀫𑀸𑀭𑁂𑀢𑀺, 𑀖𑀸𑀢𑀓𑁄 𑀘 𑀳𑁄𑀢𑀺 𑀧𑀸𑀭𑀸𑀚𑀺𑀓𑀜𑁆𑀘 𑀆𑀧𑀚𑁆𑀚𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺. 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀢𑀁 𑀫𑀸𑀭𑁂𑀢𑀺 𑀖𑀸𑀢𑀓𑁄𑀯 𑀳𑁄𑀢𑀺, 𑀦 𑀘𑀸𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺, 𑀦 𑀘 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁 𑀧𑀦 𑀳𑁄𑀢𑀺. 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀧𑀦𑁆𑀦𑁄 𑀦𑀢𑁆𑀣𑀺, 𑀏𑀴𑀓𑁄𑀯 𑀳𑁄𑀢𑀺 𑀢𑀁 𑀫𑀸𑀭𑁂𑀢𑀺, 𑀖𑀸𑀢𑀓𑁄 𑀘 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀆𑀧𑀚𑁆𑀚𑀢𑀺. ‘‘𑀫𑀸𑀢𑀸𑀧𑀺𑀢𑀼𑀅𑀭𑀳𑀦𑁆𑀢𑀸𑀦𑀁 𑀅𑀜𑁆𑀜𑀢𑀭𑀁 ¶ 𑀫𑀸𑀭𑁂𑀫𑀻’’𑀢𑀺 𑀢𑁂𑀲𑀁𑀬𑁂𑀯 𑀅𑀜𑁆𑀜𑀢𑀭𑀁 𑀫𑀸𑀭𑁂𑀢𑀺, 𑀖𑀸𑀢𑀓𑁄 𑀘 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺, 𑀧𑀸𑀭𑀸𑀚𑀺𑀓𑀜𑁆𑀘 𑀆𑀧𑀚𑁆𑀚𑀢𑀺. ‘‘𑀢𑁂𑀲𑀁 𑀅𑀜𑁆𑀜𑀢𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀁 𑀫𑀸𑀭𑁂𑀢𑀺, 𑀬𑀓𑁆𑀔𑀁 𑀯𑀸 𑀧𑁂𑀢𑀁 𑀯𑀸 𑀫𑀸𑀭𑁂𑀢𑀺, 𑀏𑀴𑀓𑀁 𑀯𑀸 𑀫𑀸𑀭𑁂𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀘𑁂𑀢𑀦𑀸 𑀤𑀸𑀭𑀼𑀡𑀸 𑀳𑁄𑀢𑀻𑀢𑀺.

𑀅𑀜𑁆𑀜𑀸𑀦𑀺𑀧𑀺 𑀏𑀢𑁆𑀣 𑀧𑀮𑀸𑀮𑀧𑀼𑀜𑁆𑀚𑀸𑀤𑀺𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑁄 𑀳𑀺 ‘‘𑀮𑁄𑀳𑀺𑀢𑀓𑀁 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀧𑀮𑀸𑀮𑀧𑀼𑀜𑁆𑀚𑁂 𑀧𑀯𑁂𑀲𑁂𑀦𑁆𑀢𑁄 𑀢𑀢𑁆𑀣 𑀦𑀺𑀧𑀦𑁆𑀦𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀭𑀳𑀦𑁆𑀢𑀁 𑀯𑀸 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑀁 𑀯𑀸 𑀬𑀓𑁆𑀔𑀁 𑀯𑀸 𑀧𑁂𑀢𑀁 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀁 𑀯𑀸 𑀫𑀸𑀭𑁂𑀢𑀺, 𑀯𑁄𑀳𑀸𑀭𑀯𑀲𑁂𑀦 ‘‘𑀖𑀸𑀢𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀯𑀥𑀓𑀘𑁂𑀢𑀦𑀸𑀬 𑀧𑀦 𑀅𑀪𑀸𑀯𑀢𑁄 𑀦𑁂𑀯 𑀓𑀫𑁆𑀫𑀁 𑀨𑀼𑀲𑀢𑀺, 𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀬𑁄 𑀧𑀦 𑀏𑀯𑀁 𑀧𑀯𑁂𑀲𑁂𑀦𑁆𑀢𑁄 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀲𑀢𑁆𑀢𑁄 𑀫𑀜𑁆𑀜𑁂 𑀅𑀩𑁆𑀪𑀦𑁆𑀢𑀭𑀕𑀢𑁄 𑀫𑀭𑀢𑀽’’𑀢𑀺 𑀧𑀯𑁂𑀲𑁂𑀢𑁆𑀯𑀸 𑀫𑀸𑀭𑁂𑀢𑀺, 𑀢𑀲𑁆𑀲 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀅𑀦𑀼𑀭𑀽𑀧𑁂𑀦 𑀓𑀫𑁆𑀫𑀩𑀤𑁆𑀥𑁄 𑀘 𑀆𑀧𑀢𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀢𑀢𑁆𑀣 𑀦𑀺𑀤𑀳𑀦𑀢𑁆𑀣𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀯𑀦𑀧𑁆𑀧𑀕𑀼𑀫𑁆𑀩𑀸𑀤𑀻𑀲𑀼 𑀔𑀺𑀧𑀦𑁆𑀢𑀲𑁆𑀲𑀸𑀧𑀺.

𑀬𑁄𑀧𑀺 ‘‘𑀘𑁄𑀭𑀁 𑀫𑀸𑀭𑁂𑀫𑀻’’𑀢𑀺 𑀘𑁄𑀭𑀯𑁂𑀲𑁂𑀦 𑀕𑀘𑁆𑀙𑀦𑁆𑀢𑀁 𑀧𑀺𑀢𑀭𑀁 𑀫𑀸𑀭𑁂𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺, 𑀧𑀸𑀭𑀸𑀚𑀺𑀓𑁄 𑀘 𑀳𑁄𑀢𑀺. 𑀬𑁄 𑀧𑀦 𑀧𑀭𑀲𑁂𑀦𑀸𑀬 𑀅𑀜𑁆𑀜𑀜𑁆𑀘 𑀬𑁄𑀥𑀁 𑀧𑀺𑀢𑀭𑀜𑁆𑀘 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀬𑁄𑀥𑀲𑁆𑀲 𑀉𑀲𑀼𑀁 𑀔𑀺𑀧𑀢𑀺, ‘‘𑀏𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀫𑀫 𑀧𑀺𑀢𑀭𑀁 𑀯𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀢𑁂 𑀧𑀺𑀢𑀼𑀖𑀸𑀢𑀓𑁄 𑀳𑁄𑀢𑀺. ‘‘𑀬𑁄𑀥𑁂 𑀯𑀺𑀤𑁆𑀥𑁂 𑀫𑀫 𑀧𑀺𑀢𑀸 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺 𑀔𑀺𑀧𑀢𑀺, 𑀉𑀲𑀼 𑀅𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀫𑀸𑀭𑁂𑀢𑀺, 𑀯𑁄𑀳𑀸𑀭𑀯𑀲𑁂𑀦 ‘‘𑀧𑀺𑀢𑀼𑀖𑀸𑀢𑀓𑁄’’𑀢𑀺 𑀯𑀼𑀘𑁆𑀘𑀢𑀺; 𑀆𑀦𑀦𑁆𑀢𑀭𑀺𑀬𑀁 𑀧𑀦 𑀦𑀢𑁆𑀣𑀻𑀢𑀺.

𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀫𑀻𑀧𑁂 𑀞𑀢𑁆𑀯𑀸. 𑀆𑀡𑀸𑀧𑁂𑀢𑀻𑀢𑀺 𑀉𑀤𑁆𑀤𑀺𑀲𑁆𑀲 𑀯𑀸 𑀅𑀦𑀼𑀤𑁆𑀤𑀺𑀲𑁆𑀲 𑀯𑀸 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀧𑀭𑀲𑁂𑀦𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀬 𑀅𑀦𑀼𑀤𑁆𑀤𑀺𑀲𑁆𑀲𑁂𑀯 ‘‘𑀏𑀯𑀁 𑀯𑀺𑀚𑁆𑀛 ¶ , 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺 𑀆𑀡𑀢𑁆𑀢𑁂 𑀬𑀢𑁆𑀢𑀓𑁂 𑀆𑀡𑀢𑁆𑀢𑁄 𑀖𑀸𑀢𑁂𑀢𑀺, 𑀢𑀢𑁆𑀢𑀓𑀸 𑀉𑀪𑀺𑀦𑁆𑀦𑀁 𑀧𑀸𑀡𑀸𑀢𑀺𑀧𑀸𑀢𑀸. 𑀲𑀘𑁂 𑀢𑀢𑁆𑀣 𑀆𑀡𑀸𑀧𑀓𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀳𑁄𑀦𑁆𑀢𑀺, 𑀆𑀦𑀦𑁆𑀢𑀭𑀺𑀬𑀫𑁆𑀧𑀺 𑀨𑀼𑀲𑀢𑀺. 𑀲𑀘𑁂 𑀆𑀡𑀢𑁆𑀢𑀲𑁆𑀲𑁂𑀯 𑀫𑀸𑀢𑀸𑀧𑀺𑀢𑀭𑁄, 𑀲𑁄𑀯 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺. 𑀲𑀘𑁂 ¶ 𑀅𑀭𑀳𑀸 𑀳𑁄𑀢𑀺, 𑀉𑀪𑁄𑀧𑀺 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀦𑁆𑀢𑀺. 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀦 ‘‘𑀏𑀢𑀁 𑀤𑀻𑀖𑀁 𑀭𑀲𑁆𑀲𑀁 𑀭𑀢𑁆𑀢𑀓𑀜𑁆𑀘𑀼𑀓𑀁 𑀦𑀻𑀮𑀓𑀜𑁆𑀘𑀼𑀓𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀯𑀺𑀚𑁆𑀛 𑀧𑀳𑀭 𑀖𑀸𑀢𑁂𑀳𑀻’’𑀢𑀺 ¶ 𑀆𑀡𑀢𑁆𑀢𑁂 𑀲𑀘𑁂 𑀲𑁄 𑀢𑀫𑁂𑀯 𑀖𑀸𑀢𑁂𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑁄; 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀘 𑀆𑀦𑀦𑁆𑀢𑀭𑀺𑀬𑀁. 𑀲𑀘𑁂 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀏𑀢𑁂𑀦 𑀆𑀡𑀢𑁆𑀢𑀺𑀓𑁄 𑀧𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀢𑀢𑁆𑀣 𑁋

𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀑𑀓𑀸𑀲𑀁, 𑀆𑀯𑀼𑀥𑀁 𑀇𑀭𑀺𑀬𑀸𑀧𑀣𑀁;

𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺, 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄.

𑀅𑀧𑀭𑁄 𑀦𑀬𑁄 𑁋

𑀯𑀢𑁆𑀣𑀼 𑀓𑀸𑀮𑁄 𑀘 𑀑𑀓𑀸𑀲𑁄, 𑀆𑀯𑀼𑀥𑀁 𑀇𑀭𑀺𑀬𑀸𑀧𑀣𑁄;

𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀇𑀫𑁂, 𑀙 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸.

𑀢𑀢𑁆𑀣 ‘‘𑀯𑀢𑁆𑀣𑀽’’𑀢𑀺 𑀫𑀸𑀭𑁂𑀢𑀩𑁆𑀩𑁄 𑀲𑀢𑁆𑀢𑁄. ‘‘𑀓𑀸𑀮𑁄’’𑀢𑀺 𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀸𑀤𑀺𑀓𑀸𑀮𑁄 𑀘 𑀬𑁄𑀩𑁆𑀩𑀦𑀣𑀸𑀯𑀭𑀺𑀬𑀸𑀤𑀺𑀓𑀸𑀮𑁄 𑀘. ‘‘𑀑𑀓𑀸𑀲𑁄’’𑀢𑀺 𑀕𑀸𑀫𑁄 𑀯𑀸 𑀯𑀦𑀁 𑀯𑀸 𑀕𑁂𑀳𑀤𑁆𑀯𑀸𑀭𑀁 𑀯𑀸 𑀕𑁂𑀳𑀫𑀚𑁆𑀛𑀁 𑀯𑀸 𑀭𑀣𑀺𑀓𑀸 𑀯𑀸 𑀲𑀺𑀗𑁆𑀖𑀸𑀝𑀓𑀁 𑀯𑀸𑀢𑀺 𑀏𑀯𑀫𑀸𑀤𑀺. ‘‘𑀆𑀯𑀼𑀥’’𑀦𑁆𑀢𑀺 𑀅𑀲𑀺 𑀯𑀸 𑀉𑀲𑀼 𑀯𑀸 𑀲𑀢𑁆𑀢𑀺 𑀯𑀸𑀢𑀺 𑀏𑀯𑀫𑀸𑀤𑀺. ‘‘𑀇𑀭𑀺𑀬𑀸𑀧𑀣𑁄’’𑀢𑀺 𑀫𑀸𑀭𑁂𑀢𑀩𑁆𑀩𑀲𑁆𑀲 𑀕𑀫𑀦𑀁 𑀯𑀸 𑀦𑀺𑀲𑀚𑁆𑀚𑀸 𑀯𑀸𑀢𑀺 𑀏𑀯𑀫𑀸𑀤𑀺. ‘‘𑀓𑀺𑀭𑀺𑀬𑀸𑀯𑀺𑀲𑁂𑀲𑁄’’𑀢𑀺 𑀯𑀺𑀚𑁆𑀛𑀦𑀁 𑀯𑀸 𑀙𑁂𑀤𑀦𑀁 𑀯𑀸 𑀪𑁂𑀤𑀦𑀁 𑀯𑀸 𑀲𑀗𑁆𑀔𑀫𑀼𑀡𑁆𑀟𑀓𑀁 𑀯𑀸𑀢𑀺 𑀏𑀯𑀫𑀸𑀤𑀺.

𑀬𑀤𑀺 𑀳𑀺 𑀯𑀢𑁆𑀣𑀼𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 ‘‘𑀬𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀢𑀢𑁄 𑀅𑀜𑁆𑀜𑀁 𑀫𑀸𑀭𑁂𑀢𑀺, ‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀸 𑀆𑀡𑀢𑁆𑀢𑁄 𑀧𑀘𑁆𑀙𑀢𑁄 𑀯𑀸 𑀧𑀲𑁆𑀲𑀢𑁄 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀧𑀤𑁂𑀲𑁂 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑀺. 𑀆𑀡𑀸𑀧𑀓𑀲𑁆𑀲 𑀦𑀢𑁆𑀣𑀺 𑀓𑀫𑁆𑀫𑀩𑀦𑁆𑀥𑁄; 𑀆𑀡𑀢𑁆𑀢𑀲𑁆𑀲𑁂𑀯 𑀓𑀫𑁆𑀫𑀩𑀦𑁆𑀥𑁄. 𑀅𑀣 𑀯𑀢𑁆𑀣𑀼𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀬𑀣𑀸𑀡𑀢𑁆𑀢𑀺𑀬𑀸 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀆𑀡𑀢𑁆𑀢𑀲𑁆𑀲 𑀘 𑀫𑀸𑀭𑀡𑀓𑁆𑀔𑀡𑁂𑀢𑀺 𑀉𑀪𑀬𑁂𑀲𑀫𑁆𑀧𑀺 𑀓𑀫𑁆𑀫𑀩𑀦𑁆𑀥𑁄. 𑀯𑀢𑁆𑀣𑀼𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀓𑀫𑁆𑀫𑀯𑀺𑀲𑁂𑀲𑁄 𑀘 𑀆𑀧𑀢𑁆𑀢𑀺𑀯𑀺𑀲𑁂𑀲𑁄 𑀘 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯 𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀮𑁂 ¶ 𑀧𑀦 𑀬𑁄 ‘‘𑀅𑀚𑁆𑀚 𑀲𑁆𑀯𑁂’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 ¶ 𑀬𑀤𑀸 𑀓𑀤𑀸𑀘𑀺 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. 𑀬𑁄 𑀧𑀦 ‘‘𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁂’’𑀢𑀺 𑀯𑀼𑀢𑁆𑀢𑁄 𑀫𑀚𑁆𑀛𑀦𑁆𑀳𑁂 𑀯𑀸 𑀲𑀸𑀬𑀦𑁆𑀳𑁂 𑀯𑀸 𑀲𑁆𑀯𑁂 𑀯𑀸 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀺. 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺, 𑀆𑀡𑀸𑀧𑀓𑀲𑁆𑀲 𑀦𑀢𑁆𑀣𑀺 𑀓𑀫𑁆𑀫𑀩𑀦𑁆𑀥𑁄. 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀫𑀚𑁆𑀛𑀦𑁆𑀳𑁂 𑀚𑀸𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀓𑀸𑀮𑀧𑁆𑀧𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀑𑀓𑀸𑀲𑁂𑀧𑀺 ¶ 𑀬𑁄 ‘‘𑀏𑀢𑀁 𑀕𑀸𑀫𑁂 𑀞𑀺𑀢𑀁 𑀫𑀸𑀭𑁂𑀳𑀻’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀢𑁆𑀢𑁄 𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. 𑀬𑁄 𑀧𑀦 ‘‘𑀕𑀸𑀫𑁂𑀬𑁂𑀯𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀆𑀡𑀢𑁆𑀢𑁄 𑀯𑀦𑁂 𑀫𑀸𑀭𑁂𑀢𑀺, 𑀢𑀣𑀸 ‘‘𑀯𑀦𑁂’’𑀢𑀺 𑀆𑀡𑀢𑁆𑀢𑁄 𑀕𑀸𑀫𑁂 𑀫𑀸𑀭𑁂𑀢𑀺. ‘‘𑀅𑀦𑁆𑀢𑁄𑀕𑁂𑀳𑀤𑁆𑀯𑀸𑀭𑁂’’𑀢𑀺 𑀆𑀡𑀢𑁆𑀢𑁄 𑀕𑁂𑀳𑀫𑀚𑁆𑀛𑁂 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑁄𑀓𑀸𑀲𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀆𑀯𑀼𑀥𑁂𑀧𑀺 𑀬𑁄 ‘‘𑀅𑀲𑀺𑀦𑀸 𑀯𑀸 𑀉𑀲𑀼𑀦𑀸 𑀯𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀆𑀯𑀼𑀥𑁂𑀦 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀬𑁂𑀦 𑀓𑁂𑀦𑀘𑀺 𑀆𑀯𑀼𑀥𑁂𑀦 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. 𑀬𑁄 𑀧𑀦 ‘‘𑀅𑀲𑀺𑀦𑀸’’𑀢𑀺 𑀯𑀼𑀢𑁆𑀢𑁄 𑀉𑀲𑀼𑀦𑀸, ‘‘𑀇𑀫𑀺𑀦𑀸 𑀯𑀸 𑀅𑀲𑀺𑀦𑀸’’𑀢𑀺 𑀯𑀼𑀢𑁆𑀢𑁄 𑀅𑀜𑁆𑀜𑁂𑀦 𑀅𑀲𑀺𑀦𑀸 𑀫𑀸𑀭𑁂𑀢𑀺. 𑀏𑀢𑀲𑁆𑀲𑁂𑀯 𑀯𑀸 𑀅𑀲𑀺𑀲𑁆𑀲 ‘‘𑀇𑀫𑀸𑀬 𑀥𑀸𑀭𑀸𑀬 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀇𑀢𑀭𑀸𑀬 𑀯𑀸 𑀥𑀸𑀭𑀸𑀬 𑀢𑀮𑁂𑀦 𑀯𑀸 𑀢𑀼𑀡𑁆𑀟𑁂𑀦 𑀯𑀸 𑀣𑀭𑀼𑀦𑀸 𑀯𑀸 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀆𑀯𑀼𑀥𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀭𑀺𑀬𑀸𑀧𑀣𑁂 𑀧𑀦 𑀬𑁄 ‘‘𑀏𑀢𑀁 𑀕𑀘𑁆𑀙𑀦𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀯𑀤𑀢𑀺, 𑀆𑀡𑀢𑁆𑀢𑁄 𑀘 𑀦𑀁 𑀲𑀘𑁂 𑀕𑀘𑁆𑀙𑀦𑁆𑀢𑀁 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. ‘‘𑀕𑀘𑁆𑀙𑀦𑁆𑀢𑀫𑁂𑀯 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀧𑀦 𑀲𑀘𑁂 𑀦𑀺𑀲𑀺𑀦𑁆𑀦𑀁 𑀫𑀸𑀭𑁂𑀢𑀺. ‘‘𑀦𑀺𑀲𑀺𑀦𑁆𑀦𑀫𑁂𑀯 𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀕𑀘𑁆𑀙𑀦𑁆𑀢𑀁 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀇𑀭𑀺𑀬𑀸𑀧𑀣𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀧𑀺 𑀬𑁄 ‘‘𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀺𑀚𑁆𑀛𑀺𑀢𑁆𑀯𑀸𑀯 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. 𑀬𑁄 𑀧𑀦 ‘‘𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀓𑀺𑀭𑀺𑀬𑀸𑀯𑀺𑀲𑁂𑀲𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁄 𑀧𑀦 𑀮𑀺𑀗𑁆𑀕𑀯𑀲𑁂𑀦 ‘‘𑀤𑀻𑀖𑀁 𑀭𑀲𑁆𑀲𑀁 𑀓𑀸𑀴𑀁 𑀑𑀤𑀸𑀢𑀁 𑀓𑀺𑀲𑀁 𑀣𑀽𑀮𑀁 𑀫𑀸𑀭𑁂𑀳𑀻’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀺, 𑀆𑀡𑀢𑁆𑀢𑁄 𑀘 𑀬𑀁𑀓𑀺𑀜𑁆𑀘𑀺 𑀢𑀸𑀤𑀺𑀲𑀁 ¶ 𑀫𑀸𑀭𑁂𑀢𑀺, 𑀦𑀢𑁆𑀣𑀺 ¶ 𑀯𑀺𑀲𑀗𑁆𑀓𑁂𑀢𑁄 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀦 𑀲𑁄 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀆𑀡𑀸𑀧𑁂𑀢𑀺, 𑀆𑀡𑀢𑁆𑀢𑁄 𑀘 ‘‘𑀅𑀬𑀫𑁂𑀯 𑀈𑀤𑀺𑀲𑁄’’𑀢𑀺 𑀆𑀡𑀸𑀧𑀓𑀫𑁂𑀯 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀤𑀼𑀓𑁆𑀓𑀝𑀁, 𑀯𑀥𑀓𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀆𑀡𑀸𑀧𑀓𑁄 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀆𑀡𑀸𑀧𑁂𑀢𑀺, 𑀇𑀢𑀭𑁄 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺, 𑀯𑀥𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀑𑀓𑀸𑀲𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸. 𑀲𑀘𑁂 𑀧𑀦 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀆𑀡𑀸𑀧𑁂𑀦𑁆𑀢𑁄𑀧𑀺 𑀑𑀓𑀸𑀲𑀁 𑀦𑀺𑀬𑀫𑁂𑀢𑀺, ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀣𑁂𑀭𑀸𑀲𑀦𑁂 𑀯𑀸 𑀦𑀯𑀸𑀲𑀦𑁂 𑀯𑀸 𑀫𑀚𑁆𑀛𑀺𑀫𑀸𑀲𑀦𑁂 𑀯𑀸 𑀦𑀺𑀲𑀺𑀦𑁆𑀦𑀁 𑀏𑀯𑀭𑀽𑀧𑀁 𑀦𑀸𑀫 𑀫𑀸𑀭𑁂𑀳𑀻’’𑀢𑀺. 𑀢𑀢𑁆𑀣 𑀘 𑀅𑀜𑁆𑀜𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀘𑁂 𑀆𑀡𑀢𑁆𑀢𑁄 𑀢𑀁 𑀫𑀸𑀭𑁂𑀢𑀺, 𑀦𑁂𑀯 𑀯𑀥𑀓𑁄 𑀫𑀼𑀘𑁆𑀘𑀢𑀺 𑀦 𑀆𑀡𑀸𑀧𑀓𑁄. 𑀓𑀲𑁆𑀫𑀸? 𑀑𑀓𑀸𑀲𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸. 𑀲𑀘𑁂 𑀧𑀦 𑀦𑀺𑀬𑀫𑀺𑀢𑁄𑀓𑀸𑀲𑀢𑁄 ¶ 𑀅𑀜𑁆𑀜𑀢𑁆𑀭 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀻𑀢𑀺 𑀅𑀬𑀁 𑀦𑀬𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀲𑀼𑀝𑁆𑀞𑀼 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀏𑀢𑁆𑀣 𑀦 𑀅𑀦𑀸𑀤𑀭𑀺𑀬𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀅𑀥𑀺𑀝𑁆𑀞𑀸𑀬𑀸𑀢𑀺 𑀫𑀸𑀢𑀺𑀓𑀸𑀯𑀲𑁂𑀦 𑀆𑀡𑀢𑁆𑀢𑀺𑀓𑀧𑀬𑁄𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 𑀬𑁂 𑀤𑀽𑀢𑁂𑀦𑀸𑀢𑀺 𑀇𑀫𑀲𑁆𑀲 𑀫𑀸𑀢𑀺𑀓𑀸𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀻’’𑀢𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑁂𑀲𑀼 𑀲𑁄 𑀢𑀁 𑀫𑀜𑁆𑀜𑀫𑀸𑀦𑁄𑀢𑀺 𑀲𑁄 𑀆𑀡𑀢𑁆𑀢𑁄 𑀬𑁄 𑀆𑀡𑀸𑀧𑀓𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀅𑀓𑁆𑀔𑀸𑀢𑁄, 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀫𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀦𑁆𑀢𑀺 ‘‘𑀬𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀢𑀦𑁆𑀢𑀺 𑀬𑁄 𑀆𑀡𑀸𑀧𑀓𑁂𑀦 𑀯𑀼𑀢𑁆𑀢𑁄, 𑀢𑀲𑁆𑀲 𑀩𑀮𑀯𑀲𑀳𑀸𑀬𑀁 𑀲𑀫𑀻𑀧𑁂 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀩𑀮𑁂𑀦𑀸𑀬𑀁 𑀕𑀚𑁆𑀚𑀢𑀺, 𑀇𑀫𑀁 𑀢𑀸𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀧𑀳𑀭𑀦𑁆𑀢𑁄 𑀇𑀢𑀭𑀫𑁂𑀯 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 ‘‘𑀲𑀳𑀸𑀬𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀇𑀫𑀁 𑀢𑀸𑀯𑀲𑁆𑀲 𑀲𑀳𑀸𑀬𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀲𑀳𑀸𑀬𑀫𑁂𑀯 𑀯𑁄𑀭𑁄𑀧𑁂𑀢𑀺, 𑀢𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁.

𑀤𑀽𑀢𑀧𑀭𑀫𑁆𑀧𑀭𑀸𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀸𑀢𑀺𑀆𑀤𑀻𑀲𑀼 𑀏𑀓𑁄 𑀆𑀘𑀭𑀺𑀬𑁄 𑀢𑀬𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀥𑀫𑁆𑀫𑀭𑀓𑁆𑀔𑀺𑀢𑀲𑀗𑁆𑀖𑀭𑀓𑁆𑀔𑀺𑀢𑀦𑀸𑀫𑀓𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 ¶ 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀻𑀢𑀺 𑀆𑀘𑀭𑀺𑀬𑁄 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 ¶ 𑀫𑀸𑀭𑀸𑀧𑁂𑀢𑀼𑀓𑀸𑀫𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀩𑀼𑀤𑁆𑀥𑀭𑀓𑁆𑀔𑀺𑀢𑀁 𑀆𑀡𑀸𑀧𑁂𑀢𑀺. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀸𑀢𑀺 𑀕𑀘𑁆𑀙 𑀢𑁆𑀯𑀁, 𑀩𑀼𑀤𑁆𑀥𑀭𑀓𑁆𑀔𑀺𑀢, 𑀏𑀢𑀫𑀢𑁆𑀣𑀁 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀧𑀸𑀯𑀤. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀢𑀽𑀢𑀺 𑀥𑀫𑁆𑀫𑀭𑀓𑁆𑀔𑀺𑀢𑁄𑀧𑀺 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀧𑀸𑀯𑀤𑀢𑀼. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀽𑀢𑀺 𑀏𑀯𑀁 𑀢𑀬𑀸 𑀆𑀡𑀢𑁆𑀢𑁂𑀦 𑀥𑀫𑁆𑀫𑀭𑀓𑁆𑀔𑀺𑀢𑁂𑀦 𑀆𑀡𑀢𑁆𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑁄 𑀇𑀢𑁆𑀣𑀦𑁆𑀦𑀸𑀫𑀁 𑀧𑀼𑀕𑁆𑀕𑀮𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼; 𑀲𑁄 𑀳𑀺 𑀅𑀫𑁆𑀳𑁂𑀲𑀼 𑀯𑀻𑀭𑀚𑀸𑀢𑀺𑀓𑁄 𑀧𑀝𑀺𑀩𑀮𑁄 𑀇𑀫𑀲𑁆𑀫𑀺𑀁 𑀓𑀫𑁆𑀫𑁂𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀢𑀸𑀯 𑀤𑀼𑀓𑁆𑀓𑀝𑀁. 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀻𑀢𑀺 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲, 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀁 𑀯𑀤𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀺𑀭 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’𑀢𑀺. 𑀢𑁆𑀯𑀁 𑀓𑀺𑀭 𑀅𑀫𑁆𑀳𑁂𑀲𑀼 𑀯𑀻𑀭𑀧𑀼𑀭𑀺𑀲𑁄’’𑀢𑀺 𑀆𑀭𑁄𑀘𑁂𑀢𑀺; 𑀏𑀯𑀁 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀲𑀸𑀥𑀼 𑀯𑁄𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂 𑀆𑀘𑀭𑀺𑀬𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀫𑀳𑀸𑀚𑀦𑁄 𑀳𑀺 𑀢𑁂𑀦 𑀧𑀸𑀧𑁂 𑀦𑀺𑀬𑁄𑀚𑀺𑀢𑁄𑀢𑀺. 𑀲𑁄 𑀢𑀦𑁆𑀢𑀺 𑀲𑁄 𑀘𑁂 𑀲𑀗𑁆𑀖𑀭𑀓𑁆𑀔𑀺𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀧𑀸𑀭𑀸𑀚𑀺𑀓𑀁. 𑀦 𑀓𑁂𑀯𑀮𑀜𑁆𑀘 ¶ 𑀘𑀢𑀼𑀦𑁆𑀦𑀁, 𑀏𑀢𑁂𑀦𑀽𑀧𑀸𑀬𑁂𑀦 𑀯𑀺𑀲𑀗𑁆𑀓𑁂𑀢𑀁 𑀅𑀓𑀢𑁆𑀯𑀸 𑀧𑀭𑀫𑁆𑀧𑀭𑀸𑀬 𑀆𑀡𑀸𑀧𑁂𑀦𑁆𑀢𑀁 𑀲𑀫𑀡𑀲𑀢𑀁 𑀲𑀫𑀡𑀲𑀳𑀲𑁆𑀲𑀁 𑀯𑀸 𑀳𑁄𑀢𑀼 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀫𑁂𑀯.

𑀯𑀺𑀲𑀓𑁆𑀓𑀺𑀬𑀤𑀽𑀢𑀧𑀤𑀦𑀺𑀤𑁆𑀤𑁂𑀲𑁂 𑀲𑁄 𑀅𑀜𑁆𑀜𑀁 𑀆𑀡𑀸𑀧𑁂𑀢𑀻𑀢𑀺 𑀲𑁄 𑀆𑀘𑀭𑀺𑀬𑁂𑀦 𑀆𑀡𑀢𑁆𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀁 𑀅𑀤𑀺𑀲𑁆𑀯𑀸 𑀯𑀸 𑀅𑀯𑀢𑁆𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀏𑀯𑀫𑀸𑀳 𑁋 ‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀺𑀭 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺 𑀯𑀺𑀲𑀗𑁆𑀓𑁂𑀢𑀁 𑀓𑀭𑁄𑀦𑁆𑀢𑁄 𑀆𑀡𑀸𑀧𑁂𑀢𑀺. 𑀯𑀺𑀲𑀗𑁆𑀓𑁂𑀢𑀓𑀭𑀡𑁂𑀦𑁂𑀯 𑀳𑀺 𑀏𑀲 ‘‘𑀯𑀺𑀲𑀓𑁆𑀓𑀺𑀬𑀤𑀽𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀆𑀡𑀢𑁆𑀢𑀺𑀬𑀸 𑀢𑀸𑀯 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀫𑀽𑀮𑀝𑁆𑀞𑀲𑁆𑀲𑁂𑀯 ¶ 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸, 𑀲𑀜𑁆𑀘𑀭𑀺𑀢𑁆𑀢 𑀧𑀝𑀺𑀕𑁆𑀕𑀳𑀡𑀫𑀭𑀡𑀸𑀪𑀺𑀦𑀦𑁆𑀤𑀦𑁂𑀲𑀼𑀧𑀺 𑀘 𑀆𑀧𑀢𑁆𑀢𑀺 𑀳𑁄𑀢𑀺, 𑀫𑀭𑀡𑀧𑀝𑀺𑀕𑁆𑀕𑀳𑀡𑁂 𑀓𑀣𑀁 𑀦 𑀲𑀺𑀬𑀸 𑀢𑀲𑁆𑀫𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀫𑀽𑀮𑀝𑁆𑀞𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀧𑀺 𑀘𑁂𑀢𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀯𑁂𑀤𑀺𑀢𑀩𑁆𑀩𑀫𑁂𑀯; 𑀑𑀓𑀸𑀲𑀸𑀪𑀸𑀯𑁂𑀦 𑀧𑀦 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀬𑁄 ¶ 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑁂𑀧𑀻𑀢𑀺.

𑀲𑀘𑁂 𑀧𑀦 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀯𑁄𑀭𑁄𑀧𑀓𑀲𑁆𑀲 𑀘 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀫𑀽𑀮𑀝𑁆𑀞𑀲𑁆𑀲 𑀧𑀦 𑀆𑀘𑀭𑀺𑀬𑀲𑁆𑀲 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑁂𑀦 𑀅𑀦𑀸𑀧𑀢𑁆𑀢𑀺. 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀅𑀚𑀸𑀦𑀦𑀢𑀸𑀬 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀸𑀧𑀢𑁆𑀢𑀺. 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀧𑀦 𑀤𑁆𑀯𑀺𑀦𑁆𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀦𑀝𑁆𑀞𑁄𑀢𑀺.

𑀕𑀢𑀧𑀘𑁆𑀘𑀸𑀕𑀢𑀤𑀽𑀢𑀦𑀺𑀤𑁆𑀤𑁂𑀲𑁂 𑁋 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀢𑀲𑁆𑀲 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀩𑁆𑀩𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑁆𑀢𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀬𑀤𑀸 𑀲𑀓𑁆𑀓𑁄𑀲𑀺 𑀢𑀤𑀸𑀢𑀺 𑀓𑀺𑀁 𑀅𑀚𑁆𑀚𑁂𑀯 𑀫𑀸𑀭𑀺𑀢𑁄 𑀫𑀸𑀭𑀺𑀢𑁄 𑀳𑁄𑀢𑀺, 𑀕𑀘𑁆𑀙 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀼𑀦 𑀆𑀡𑀢𑁆𑀢𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀅𑀯𑀲𑁆𑀲𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀩𑁆𑀩𑁄 𑀳𑁄𑀢𑀺, 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸, 𑀢𑀲𑁆𑀫𑀸 𑀅𑀬𑀁 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄. 𑀲𑀘𑁂𑀧𑀺 𑀯𑀥𑀓𑁄 𑀲𑀝𑁆𑀞𑀺𑀯𑀲𑁆𑀲𑀸𑀢𑀺𑀓𑁆𑀓𑀫𑁂𑀦 𑀢𑀁 𑀯𑀥𑀢𑀺, 𑀆𑀡𑀸𑀧𑀓𑁄 𑀘 𑀅𑀦𑁆𑀢𑀭𑀸𑀯 𑀓𑀸𑀮𑀗𑁆𑀓𑀭𑁄𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀢𑀺, 𑀅𑀲𑁆𑀲𑀫𑀡𑁄𑀯 𑀳𑀼𑀢𑁆𑀯𑀸 𑀓𑀸𑀮𑀜𑁆𑀘 𑀓𑀭𑀺𑀲𑁆𑀲𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀺𑀲𑁆𑀲𑀢𑀺. 𑀲𑀘𑁂 𑀆𑀡𑀸𑀧𑀓𑁄 𑀕𑀺𑀳𑀺𑀓𑀸𑀮𑁂 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀭𑀳𑀦𑁆𑀢𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀆𑀡𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀢𑀺, 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂 𑀆𑀡𑀢𑁆𑀢𑁄 𑀢𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀕𑀺𑀳𑀺𑀓𑀸𑀮𑁂𑀬𑁂𑀯 𑀫𑀸𑀢𑀼𑀖𑀸𑀢𑀓𑁄 𑀧𑀺𑀢𑀼𑀖𑀸𑀢𑀓𑁄 𑀅𑀭𑀳𑀦𑁆𑀢𑀖𑀸𑀢𑀓𑁄 𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑁂𑀯𑀲𑁆𑀲 𑀧𑀩𑁆𑀩𑀚𑁆𑀚𑀸 ¶ , 𑀦 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺. 𑀲𑀘𑁂𑀧𑀺 𑀫𑀸𑀭𑁂𑀢𑀩𑁆𑀩𑀧𑀼𑀕𑁆𑀕𑀮𑁄 𑀆𑀡𑀢𑁆𑀢𑀺𑀓𑁆𑀔𑀡𑁂 𑀧𑀼𑀣𑀼𑀚𑁆𑀚𑀦𑁄, 𑀬𑀤𑀸 ¶ 𑀧𑀦 𑀦𑀁 𑀆𑀡𑀢𑁆𑀢𑁄 𑀫𑀸𑀭𑁂𑀢𑀺 𑀢𑀤𑀸 𑀅𑀭𑀳𑀸 𑀳𑁄𑀢𑀺, 𑀆𑀡𑀢𑁆𑀢𑀢𑁄 𑀯𑀸 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸 𑀤𑀼𑀓𑁆𑀔𑀫𑀽𑀮𑀺𑀓𑀁 𑀲𑀤𑁆𑀥𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯𑀸𑀩𑀸𑀥𑁂𑀦 𑀓𑀸𑀮𑀁𑀓𑀭𑁄𑀢𑀺, 𑀆𑀡𑀸𑀧𑀓𑁄 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀅𑀭𑀳𑀦𑁆𑀢𑀖𑀸𑀢𑀓𑁄. 𑀯𑀥𑀓𑁄 𑀧𑀦 𑀲𑀩𑁆𑀩𑀢𑁆𑀣 𑀉𑀧𑀓𑁆𑀓𑀫𑀓𑀭𑀡𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄𑀢𑀺.

𑀇𑀤𑀸𑀦𑀺 𑀬𑁂 𑀲𑀩𑁆𑀩𑁂𑀲𑀼𑀬𑁂𑀯 𑀇𑀫𑁂𑀲𑀼 𑀤𑀽𑀢𑀯𑀲𑁂𑀦 𑀯𑀼𑀢𑁆𑀢𑀫𑀸𑀢𑀺𑀓𑀸𑀧𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀤𑀲𑁆𑀲𑀦𑀢𑁆𑀣𑀁

𑀯𑀼𑀢𑁆𑀢𑀸 𑀢𑀬𑁄 𑀯𑀸𑀭𑀸, 𑀢𑁂𑀲𑀼 𑀧𑀞𑀫𑀯𑀸𑀭𑁂 𑀢𑀸𑀯 𑁋 𑀬𑀲𑁆𑀫𑀸 𑀢𑀁 𑀲𑀡𑀺𑀓𑀁 𑀯𑀸 𑀪𑀡𑀦𑁆𑀢𑁄 𑀢𑀲𑁆𑀲 𑀯𑀸 𑀩𑀥𑀺𑀭𑀢𑀸𑀬 ‘‘𑀫𑀸 𑀖𑀸𑀢𑁂𑀳𑀻’’𑀢𑀺 ¶ 𑀏𑀢𑀁 𑀯𑀘𑀦𑀁 𑀦 𑀲𑀸𑀯𑁂𑀢𑀺, 𑀢𑀲𑁆𑀫𑀸 𑀫𑀽𑀮𑀝𑁆𑀞𑁄 𑀦 𑀫𑀼𑀢𑁆𑀢𑁄. 𑀤𑀼𑀢𑀺𑀬𑀯𑀸𑀭𑁂 𑁋 𑀲𑀸𑀯𑀺𑀢𑀢𑁆𑀢𑀸 𑀫𑀼𑀢𑁆𑀢𑁄. 𑀢𑀢𑀺𑀬𑀯𑀸𑀭𑁂 𑀧𑀦 𑀢𑁂𑀦 𑀘 𑀲𑀸𑀯𑀺𑀢𑀢𑁆𑀢𑀸 𑀇𑀢𑀭𑁂𑀦 𑀘 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀑𑀭𑀢𑀢𑁆𑀢𑀸 𑀉𑀪𑁄𑀧𑀺 𑀫𑀼𑀢𑁆𑀢𑀸𑀢𑀺.

𑀤𑀽𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁭𑁫. 𑀅𑀭𑀳𑁄 𑀭𑀳𑁄𑀲𑀜𑁆𑀜𑀻𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀅𑀭𑀳𑁄𑀢𑀺 𑀲𑀫𑁆𑀫𑀼𑀔𑁂. 𑀭𑀳𑁄𑀢𑀺 𑀧𑀭𑀫𑁆𑀫𑀼𑀔𑁂. 𑀢𑀢𑁆𑀣 𑀬𑁄 𑀉𑀧𑀝𑁆𑀞𑀸𑀦𑀓𑀸𑀮𑁂 𑀯𑁂𑀭𑀺𑀪𑀺𑀓𑁆𑀔𑀼𑀫𑁆𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁂𑀬𑁂𑀯 𑀅𑀦𑁆𑀥𑀓𑀸𑀭𑀤𑁄𑀲𑁂𑀦 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀳𑁄 𑀯𑀢 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲, 𑀘𑁄𑀭𑀸𑀧𑀺 𑀦𑀸𑀫 𑀢𑀁 𑀦 𑀳𑀦𑀦𑁆𑀢𑀺, 𑀲𑀧𑁆𑀧𑁄 𑀯𑀸 𑀦 𑀟𑀁𑀲𑀢𑀺, 𑀦 𑀲𑀢𑁆𑀣𑀁 𑀯𑀸 𑀯𑀺𑀲𑀁 𑀯𑀸 𑀆𑀳𑀭𑀢𑀻’’𑀢𑀺 𑀢𑀲𑁆𑀲 𑀫𑀭𑀡𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀈𑀤𑀺𑀲𑀸𑀦𑀺 𑀯𑀘𑀦𑀸𑀦𑀺 𑀉𑀮𑁆𑀮𑀧𑀢𑀺, 𑀅𑀬𑀁 𑀅𑀭𑀳𑁄 𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑀦𑀸𑀫. 𑀲𑀫𑁆𑀫𑀼𑀔𑁂𑀯 𑀢𑀲𑁆𑀫𑀺𑀁 𑀧𑀭𑀫𑁆𑀫𑀼𑀔𑀲𑀜𑁆𑀜𑀻𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀢𑀁 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀧𑀼𑀦 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀢𑁂𑀧𑀺 𑀢𑀲𑁆𑀫𑀺𑀁 ‘‘𑀇𑀥𑁂𑀯 𑀲𑁄 𑀦𑀺𑀲𑀺𑀦𑁆𑀦𑁄’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀮𑁆𑀮𑀧𑀢𑀺, 𑀅𑀬𑀁 𑀭𑀳𑁄 𑀅𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑀦𑀸𑀫. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀅𑀭𑀳𑁄 𑀅𑀭𑀳𑁄𑀲𑀜𑁆𑀜𑀻 𑀘 𑀭𑀳𑁄 𑀭𑀳𑁄𑀲𑀜𑁆𑀜𑀻 𑀘 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀦𑁆𑀦𑀫𑁆𑀧𑀺 𑀘 𑀏𑀢𑁂𑀲𑀁 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ¶ 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀸𑀬 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀓𑀸𑀬𑁂𑀦 𑀲𑀁𑀯𑀡𑁆𑀡𑀦𑀸𑀤𑀺𑀫𑀸𑀢𑀺𑀓𑀸𑀦𑀺𑀤𑁆𑀤𑁂𑀲𑁂𑀲𑀼 𑁋 𑀓𑀸𑀬𑁂𑀦 𑀯𑀺𑀓𑀸𑀭𑀁 𑀓𑀭𑁄𑀢𑀻𑀢𑀺 𑀬𑀣𑀸 𑀲𑁄 𑀚𑀸𑀦𑀸𑀢𑀺 ‘‘𑀲𑀢𑁆𑀣𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀯𑀺𑀲𑀁 𑀯𑀸 𑀔𑀸𑀤𑀺𑀢𑁆𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀲𑁄𑀩𑁆𑀪𑀸𑀤𑀻𑀲𑀼 𑀯𑀸 𑀧𑀧𑀢𑀺𑀢𑁆𑀯𑀸 𑀬𑁄 𑀫𑀭𑀢𑀺 𑀲𑁄 𑀓𑀺𑀭 𑀥𑀦𑀁 𑀯𑀸 𑀮𑀪𑀢𑀺, 𑀬𑀲𑀁 𑀯𑀸 𑀮𑀪𑀢𑀺, 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀅𑀬𑀫𑀢𑁆𑀣𑁄 𑀏𑀢𑁂𑀦 𑀯𑀼𑀢𑁆𑀢𑁄’’𑀢𑀺 𑀢𑀣𑀸 𑀳𑀢𑁆𑀣𑀫𑀼𑀤𑁆𑀤𑀸𑀤𑀻𑀳𑀺 𑀤𑀲𑁆𑀲𑁂𑀢𑀺. 𑀯𑀸𑀘𑀸𑀬 𑀪𑀡𑀢𑀻𑀢𑀺 𑀢𑀫𑁂𑀯𑀢𑁆𑀣𑀁 𑀯𑀸𑀓𑁆𑀬𑀪𑁂𑀤𑀁 𑀓𑀢𑁆𑀯𑀸 𑀪𑀡𑀢𑀺. 𑀢𑀢𑀺𑀬𑀯𑀸𑀭𑁄 𑀉𑀪𑀬𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀩𑁆𑀩𑀢𑁆𑀣 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀲𑀁𑀯𑀡𑁆𑀡𑀓𑀲𑁆𑀲 ¶ 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀁 𑀉𑀤𑁆𑀤𑀺𑀲𑁆𑀲 𑀲𑀁𑀯𑀡𑁆𑀡𑀦𑀸 𑀓𑀢𑀸, 𑀢𑀲𑁆𑀫𑀺𑀁 𑀫𑀢𑁂 𑀲𑀁𑀯𑀡𑁆𑀡𑀦𑀓𑁆𑀔𑀡𑁂𑀬𑁂𑀯 𑀲𑀁𑀯𑀡𑁆𑀡𑀓𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑁄 𑀢𑀁 𑀦 𑀚𑀸𑀦𑀸𑀢𑀺 𑀅𑀜𑁆𑀜𑁄 𑀜𑀢𑁆𑀯𑀸 ‘‘𑀮𑀤𑁆𑀥𑁄 𑀯𑀢 𑀫𑁂 𑀲𑀼𑀔𑀼𑀧𑁆𑀧𑀢𑁆𑀢𑀺𑀉𑀧𑀸𑀬𑁄’’𑀢𑀺 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀉𑀤𑁆𑀤𑀺𑀲𑁆𑀲 𑀲𑀁𑀯𑀡𑁆𑀡𑀦𑀸𑀬 𑀓𑀢𑀸𑀬 𑀏𑀓𑁄 𑀜𑀢𑁆𑀯𑀸 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀤𑁆𑀯𑁂𑀧𑀺 𑀫𑀭𑀦𑁆𑀢𑀺, 𑀧𑀸𑀭𑀸𑀚𑀺𑀓𑀜𑁆𑀘 𑀅𑀓𑀼𑀲𑀮𑀭𑀸𑀲𑀺 𑀘. 𑀏𑀲 𑀦𑀬𑁄 𑀲𑀫𑁆𑀩𑀳𑀼𑀮𑁂𑀲𑀼. 𑀅𑀦𑀼𑀤𑁆𑀤𑀺𑀲𑁆𑀲 ¶ 𑀫𑀭𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀺, 𑀬𑁄 𑀬𑁄 𑀢𑀁 𑀲𑀁𑀯𑀡𑁆𑀡𑀦𑀁 𑀜𑀢𑁆𑀯𑀸 𑀫𑀭𑀢𑀺, 𑀲𑀩𑁆𑀩𑁄 𑀢𑁂𑀦 𑀫𑀸𑀭𑀺𑀢𑁄 𑀳𑁄𑀢𑀺.

𑀤𑀽𑀢𑁂𑀦 𑀲𑀁𑀯𑀡𑁆𑀡𑀦𑀸𑀬𑀁 ‘‘𑀅𑀲𑀼𑀓𑀁 𑀦𑀸𑀫 𑀕𑁂𑀳𑀁 𑀯𑀸 𑀕𑀸𑀫𑀁 𑀯𑀸 𑀕𑀦𑁆𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀏𑀯𑀁 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀳𑀻’’𑀢𑀺 𑀲𑀸𑀲𑀦𑁂 𑀆𑀭𑁄𑀘𑀺𑀢𑀫𑀢𑁆𑀢𑁂 𑀤𑀼𑀓𑁆𑀓𑀝𑀁. 𑀬𑀲𑁆𑀲𑀢𑁆𑀣𑀸𑀬 𑀧𑀳𑀺𑀢𑁄 𑀢𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂𑀦 𑀧𑀸𑀭𑀸𑀚𑀺𑀓𑀁. 𑀤𑀽𑀢𑁄 ‘‘𑀜𑀸𑀢𑁄 𑀤𑀸𑀦𑀺 𑀅𑀬𑀁 𑀲𑀕𑁆𑀕𑀫𑀕𑁆𑀕𑁄’’𑀢𑀺 𑀢𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀢𑀺𑀲𑁆𑀲 𑀯𑀸 𑀲𑀸𑀮𑁄𑀳𑀺𑀢𑀲𑁆𑀲 𑀯𑀸 𑀆𑀭𑁄𑀘𑁂𑀢𑀺, 𑀢𑀲𑁆𑀫𑀺𑀁 𑀫𑀢𑁂 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺, 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. 𑀤𑀽𑀢𑁄 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀲𑀬𑀁 𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀁 𑀓𑀢𑁆𑀯𑀸 𑀫𑀭𑀢𑀺, 𑀯𑀺𑀲𑀗𑁆𑀓𑁂𑀢𑁄𑀯. 𑀅𑀦𑀼𑀤𑁆𑀤𑀺𑀲𑁆𑀲 𑀧𑀦 𑀲𑀸𑀲𑀦𑁂 𑀆𑀭𑁄𑀘𑀺𑀢𑁂 𑀬𑀢𑁆𑀢𑀓𑀸 𑀤𑀽𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀬 𑀫𑀭𑀦𑁆𑀢𑀺, 𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸. 𑀲𑀘𑁂 𑀫𑀸𑀢𑀸𑀧𑀺𑀢𑀭𑁄 𑀫𑀭𑀦𑁆𑀢𑀺, 𑀆𑀦𑀦𑁆𑀢𑀭𑀺𑀬𑀫𑁆𑀧𑀺 𑀳𑁄𑀢𑀺.

𑁧𑁭𑁬. 𑀮𑁂𑀔𑀸𑀲𑀁𑀯𑀡𑁆𑀡𑀦𑀸𑀬 𑁋 𑀮𑁂𑀔𑀁 𑀙𑀺𑀦𑁆𑀤𑀢𑀻𑀢𑀺 𑀧𑀡𑁆𑀡𑁂 𑀯𑀸 𑀧𑁄𑀢𑁆𑀣𑀓𑁂 𑀯𑀸 𑀅𑀓𑁆𑀔𑀭𑀸𑀦𑀺 𑀮𑀺𑀔𑀢𑀺 𑁋 ‘‘𑀬𑁄 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀧𑀧𑀸𑀢𑁂 𑀯𑀸 𑀧𑀧𑀢𑀺𑀢𑁆𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀅𑀕𑁆𑀕𑀺𑀧𑁆𑀧𑀯𑁂𑀲𑀦𑀉𑀤𑀓𑀧𑁆𑀧𑀯𑁂𑀲𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 ¶ 𑀫𑀭𑀢𑀺, 𑀲𑁄 𑀇𑀤𑀜𑁆𑀘𑀺𑀤𑀜𑁆𑀘 𑀮𑀪𑀢𑀻’’𑀢𑀺 𑀯𑀸 ‘‘𑀢𑀲𑁆𑀲 𑀥𑀫𑁆𑀫𑁄 𑀳𑁄𑀢𑀻’’𑀢𑀺 𑀯𑀸𑀢𑀺. 𑀏𑀢𑁆𑀣𑀸𑀧𑀺 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀉𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑁂 𑀧𑀦 𑀬𑀁 𑀉𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑀁 𑀢𑀲𑁆𑀲𑁂𑀯 𑀫𑀭𑀡𑁂𑀦 𑀧𑀸𑀭𑀸𑀚𑀺𑀓𑀁. 𑀩𑀳𑀽 𑀉𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑁂 𑀬𑀢𑁆𑀢𑀓𑀸 𑀫𑀭𑀦𑁆𑀢𑀺, 𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸. 𑀫𑀸𑀢𑀸𑀧𑀺𑀢𑀽𑀦𑀁 𑀫𑀭𑀡𑁂𑀦 𑀆𑀦𑀦𑁆𑀢𑀭𑀺𑀬𑀁. 𑀅𑀦𑀼𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀩𑀳𑀽 𑀫𑀭𑀦𑁆𑀢𑀻’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀧𑁄𑀢𑁆𑀣𑀓𑀁 𑀛𑀸𑀧𑁂𑀢𑁆𑀯𑀸 𑀯𑀸 𑀬𑀣𑀸 𑀯𑀸 𑀅𑀓𑁆𑀔𑀭𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺 𑀢𑀣𑀸 𑀓𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀘𑁂 𑀲𑁄 𑀧𑀭𑀲𑁆𑀲 𑀧𑁄𑀢𑁆𑀣𑀓𑁄 𑀳𑁄𑀢𑀺, 𑀉𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑁄 𑀯𑀸 𑀳𑁄𑀢𑀺 𑀅𑀦𑀼𑀤𑁆𑀤𑀺𑀲𑁆𑀲 𑀮𑀺𑀔𑀺𑀢𑁄 𑀯𑀸, 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀘𑁂 𑀫𑀽𑀮𑁂𑀦 𑀓𑀻𑀢𑁄 𑀳𑁄𑀢𑀺, 𑀧𑁄𑀢𑁆𑀣𑀓𑀲𑁆𑀲𑀸𑀫𑀺𑀓𑀸𑀦𑀁 𑀧𑁄𑀢𑁆𑀣𑀓𑀁, 𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢𑀁, 𑀢𑁂𑀲𑀁 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀘𑁂 𑀲𑀫𑁆𑀩𑀳𑀼𑀮𑀸 ‘‘𑀫𑀭𑀡𑀯𑀡𑁆𑀡𑀁 𑀮𑀺𑀔𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀏𑀓𑁄 𑀢𑀸𑀮𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑁆𑀯𑀸 𑀧𑀡𑁆𑀡𑀁 𑀙𑀺𑀦𑁆𑀤𑀢𑀺, 𑀏𑀓𑁄 𑀆𑀳𑀭𑀢𑀺, 𑀏𑀓𑁄 𑀧𑁄𑀢𑁆𑀣𑀓𑀁 𑀓𑀭𑁄𑀢𑀺, 𑀏𑀓𑁄 𑀮𑀺𑀔𑀢𑀺, 𑀏𑀓𑁄 𑀲𑀘𑁂 𑀓𑀡𑁆𑀝𑀓𑀮𑁂𑀔𑀸 𑀳𑁄𑀢𑀺, 𑀫𑀲𑀺𑀁 𑀫𑀓𑁆𑀔𑁂𑀢𑀺, 𑀫𑀲𑀺𑀁 𑀫𑀓𑁆𑀔𑁂𑀢𑁆𑀯𑀸 𑀢𑀁 𑀧𑁄𑀢𑁆𑀣𑀓𑀁 𑀲𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀯 ¶ 𑀲𑀪𑀸𑀬𑀁 𑀯𑀸 𑀆𑀧𑀡𑁂 𑀯𑀸 𑀬𑀢𑁆𑀣 𑀯𑀸 𑀧𑀦 𑀮𑁂𑀔𑀸𑀤𑀲𑁆𑀲𑀦𑀓𑁄𑀢𑀽𑀳𑀮𑀓𑀸 𑀩𑀳𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀢𑁆𑀣 𑀞𑀧𑁂𑀦𑁆𑀢𑀺. 𑀢𑀁 𑀯𑀸𑀘𑁂𑀢𑁆𑀯𑀸 𑀲𑀘𑁂𑀧𑀺 𑀏𑀓𑁄 𑀫𑀭𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀩𑀳𑀼𑀓𑀸 𑀫𑀭𑀦𑁆𑀢𑀺, 𑀯𑀼𑀢𑁆𑀢𑀲𑀤𑀺𑀲𑁄𑀯 𑀦𑀬𑁄. 𑀯𑀺𑀧𑁆𑀧𑀝𑀺𑀲𑀸𑀭𑁂 ¶ 𑀧𑀦 𑀉𑀧𑁆𑀧𑀦𑁆𑀦𑁂 𑀢𑀁 𑀧𑁄𑀢𑁆𑀣𑀓𑀁 𑀲𑀘𑁂𑀧𑀺 𑀫𑀜𑁆𑀚𑀽𑀲𑀸𑀬𑀁 𑀕𑁄𑀧𑁂𑀦𑁆𑀢𑀺, 𑀅𑀜𑁆𑀜𑁄 𑀘 𑀢𑀁 𑀤𑀺𑀲𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀧𑀼𑀦 𑀩𑀳𑀽𑀦𑀁 𑀤𑀲𑁆𑀲𑁂𑀢𑀺, 𑀦𑁂𑀯 𑀫𑀼𑀘𑁆𑀘𑀦𑁆𑀢𑀺. 𑀢𑀺𑀝𑁆𑀞𑀢𑀼 𑀫𑀜𑁆𑀚𑀽𑀲𑀸, 𑀲𑀘𑁂𑀧𑀺 𑀢𑀁 𑀧𑁄𑀢𑁆𑀣𑀓𑀁 𑀦𑀤𑀺𑀬𑀁 𑀯𑀸 𑀲𑀫𑀼𑀤𑁆𑀤𑁂 𑀯𑀸 𑀔𑀺𑀧𑀦𑁆𑀢𑀺 𑀯𑀸 𑀥𑁄𑀯𑀦𑁆𑀢𑀺 𑀯𑀸 𑀔𑀡𑁆𑀟𑀸𑀔𑀡𑁆𑀟𑀁 𑀯𑀸 𑀙𑀺𑀦𑁆𑀤𑀦𑁆𑀢𑀺, 𑀅𑀕𑁆𑀕𑀺𑀫𑁆𑀳𑀺 𑀯𑀸 𑀛𑀸𑀧𑁂𑀦𑁆𑀢𑀺, 𑀬𑀸𑀯 𑀲𑀗𑁆𑀖𑀝𑁆𑀝𑀺𑀢𑁂𑀧𑀺 𑀤𑀼𑀤𑁆𑀥𑁄𑀢𑁂 𑀯𑀸 𑀤𑀼𑀚𑁆𑀛𑀸𑀧𑀺𑀢𑁂 𑀯𑀸 𑀧𑀢𑁆𑀢𑁂 𑀅𑀓𑁆𑀔𑀭𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀸𑀯 𑀦 𑀫𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀧𑀦 𑀅𑀓𑁆𑀔𑀭𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺 𑀢𑀣𑁂𑀯 𑀓𑀢𑁂 𑀫𑀼𑀘𑁆𑀘𑀦𑁆𑀢𑀻𑀢𑀺.

𑀇𑀤𑀸𑀦𑀺 ¶ 𑀣𑀸𑀯𑀭𑀧𑀬𑁄𑀕𑀲𑁆𑀲 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁂𑀲𑀼 𑀑𑀧𑀸𑀢𑀸𑀤𑀺𑀫𑀸𑀢𑀺𑀓𑀸𑀦𑀺𑀤𑁆𑀤𑁂𑀲𑁂𑀲𑀼 𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑁆𑀲 𑀑𑀧𑀸𑀢𑀁 𑀔𑀦𑀢𑀻𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀓𑀜𑁆𑀘𑀺 𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀬𑀢𑁆𑀣 𑀲𑁄 𑀏𑀓𑀢𑁄 𑀯𑀺𑀘𑀭𑀢𑀺, 𑀢𑀢𑁆𑀣 𑀆𑀯𑀸𑀝𑀁 𑀔𑀦𑀢𑀺, 𑀔𑀦𑀦𑁆𑀢𑀲𑁆𑀲 𑀢𑀸𑀯 𑀲𑀘𑁂𑀧𑀺 𑀚𑀸𑀢𑀧𑀣𑀯𑀺𑀬𑀸 𑀔𑀦𑀢𑀺, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑀢𑁆𑀢𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀬𑀁 𑀉𑀤𑁆𑀤𑀺𑀲𑁆𑀲 𑀔𑀦𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂𑀦 𑀧𑀸𑀭𑀸𑀚𑀺𑀓𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀢𑀺𑀢𑁆𑀯𑀸 𑀫𑀢𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀦𑀼𑀤𑁆𑀤𑀺𑀲𑁆𑀲 ‘‘𑀬𑁄 𑀓𑁄𑀘𑀺 𑀫𑀭𑀺𑀲𑁆𑀲𑀢𑀻’’𑀢𑀺 𑀔𑀢𑁄 𑀳𑁄𑀢𑀺, 𑀬𑀢𑁆𑀢𑀓𑀸 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀺, 𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸. 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀽𑀲𑀼 𑀘 𑀆𑀦𑀦𑁆𑀢𑀭𑀺𑀬𑀁 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀲𑀼 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺.

𑀩𑀳𑀽 𑀢𑀢𑁆𑀣 𑀘𑁂𑀢𑀦𑀸; 𑀓𑀢𑀫𑀸𑀬 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺? 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀁 𑁋 ‘‘𑀆𑀯𑀸𑀝𑀁 𑀕𑀫𑁆𑀪𑀻𑀭𑀢𑁄 𑀘 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀘 𑀔𑀦𑀺𑀢𑁆𑀯𑀸 𑀧𑀫𑀸𑀡𑁂 𑀞𑀧𑁂𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀧𑀁𑀲𑀼𑀧𑀘𑁆𑀙𑀺𑀁 𑀉𑀤𑁆𑀥𑀭𑀦𑁆𑀢𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀧𑀺𑀓𑀸 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀲𑀤𑀺𑀲𑀸. 𑀲𑀘𑁂𑀧𑀺 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀧𑀢𑀺𑀢𑁆𑀯𑀸 𑀅𑀯𑀲𑁆𑀲𑀁 𑀫𑀭𑀡𑀓𑀲𑀢𑁆𑀢𑁄 𑀳𑁄𑀢𑀺, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬𑀫𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀜𑁆𑀘 𑁋 ‘‘𑀇𑀫𑀲𑁆𑀫𑀺𑀁 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀓𑀼𑀤𑁆𑀤𑀸𑀮𑀧𑁆𑀧𑀳𑀸𑀭𑁂 𑀤𑀺𑀦𑁆𑀦𑁂 𑀲𑀘𑁂 𑀓𑁄𑀘𑀺 𑀢𑀢𑁆𑀣 𑀧𑀓𑁆𑀔𑀮𑀺𑀢𑁄 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸 𑀧𑀦 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀏𑀓𑁄 ¶ ‘‘𑀑𑀧𑀸𑀢𑀁 𑀔𑀦𑀺𑀢𑁆𑀯𑀸 𑀅𑀲𑀼𑀓𑀁 𑀦𑀸𑀫 𑀆𑀦𑁂𑀢𑁆𑀯𑀸 𑀇𑀥 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀲𑁄 𑀢𑀁 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀢𑀺, 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀅𑀜𑁆𑀜𑀁 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀢𑀺, 𑀲𑀬𑀁 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀅𑀜𑁆𑀜𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀲𑀩𑁆𑀩𑀢𑁆𑀣 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺, 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. ‘‘𑀅𑀲𑀼𑀓𑁄 𑀅𑀲𑀼𑀓𑀁 𑀆𑀦𑁂𑀢𑁆𑀯𑀸 𑀇𑀥 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀔𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀫𑀭𑀺𑀢𑀼𑀓𑀸𑀫𑀸 𑀇𑀥 𑀫𑀭𑀺𑀲𑁆𑀲𑀦𑁆𑀢𑀻𑀢𑀺 𑀔𑀦𑀢𑀺, 𑀏𑀓𑀲𑁆𑀲 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀩𑀳𑀼𑀦𑁆𑀦𑀁 𑀫𑀭𑀡𑁂 𑀅𑀓𑀼𑀲𑀮𑀭𑀸𑀲𑀺 ¶ , 𑀫𑀸𑀢𑀸𑀧𑀺𑀢𑀽𑀦𑀁 𑀫𑀭𑀡𑁂 𑀆𑀦𑀦𑁆𑀢𑀭𑀺𑀬𑀁, 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀲𑀼 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺.

‘‘𑀬𑁂 𑀓𑁂𑀘𑀺 𑀫𑀸𑀭𑁂𑀢𑀼𑀓𑀸𑀫𑀸, 𑀢𑁂 𑀇𑀥 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀔𑀦𑀢𑀺, 𑀢𑀢𑁆𑀣 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺 ¶ , 𑀏𑀓𑀲𑁆𑀫𑀺𑀁 𑀫𑀢𑁂 𑀧𑀸𑀭𑀸𑀚𑀺𑀓𑀁, 𑀩𑀳𑀽𑀲𑀼 𑀅𑀓𑀼𑀲𑀮𑀭𑀸𑀲𑀺, 𑀆𑀦𑀦𑁆𑀢𑀭𑀺𑀬𑀸𑀤𑀺𑀯𑀢𑁆𑀣𑀽𑀲𑀼 𑀆𑀦𑀦𑁆𑀢𑀭𑀺𑀬𑀸𑀤𑀻𑀦𑀺. 𑀇𑀥𑁂𑀯 𑀅𑀭𑀳𑀦𑁆𑀢𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀧𑀼𑀭𑀺𑀫𑀦𑀬𑁂 𑀧𑀦 ‘‘𑀢𑁂𑀲𑀁 𑀫𑀭𑀺𑀢𑀼𑀓𑀸𑀫𑀢𑀸𑀬 𑀧𑀢𑀦𑀁 𑀦𑀢𑁆𑀣𑀻’’𑀢𑀺 𑀢𑁂 𑀦 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀤𑁆𑀯𑀻𑀲𑀼𑀧𑀺 𑀦𑀬𑁂𑀲𑀼 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀺𑀢𑁆𑀯𑀸 𑀫𑀢𑁂 𑀯𑀺𑀲𑀗𑁆𑀓𑁂𑀢𑁄. ‘‘𑀬𑁂 𑀓𑁂𑀘𑀺 𑀅𑀢𑁆𑀢𑀦𑁄 𑀯𑁂𑀭𑀺𑀓𑁂 𑀏𑀢𑁆𑀣 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀔𑀦𑀢𑀺, 𑀢𑀢𑁆𑀣 𑀘 𑀯𑁂𑀭𑀺𑀓𑀸 𑀯𑁂𑀭𑀺𑀓𑁂 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀫𑀸𑀭𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀩𑀳𑀽𑀲𑀼 𑀅𑀓𑀼𑀲𑀮𑀭𑀸𑀲𑀺, 𑀫𑀸𑀢𑀭𑀺 𑀯𑀸 𑀧𑀺𑀢𑀭𑀺 𑀯𑀸 𑀅𑀭𑀳𑀦𑁆𑀢𑁂 𑀯𑀸 𑀯𑁂𑀭𑀺𑀓𑁂𑀳𑀺 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀫𑀸𑀭𑀺𑀢𑁂 𑀆𑀦𑀦𑁆𑀢𑀭𑀺𑀬𑀁. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀺𑀢𑁆𑀯𑀸 𑀫𑀢𑁂𑀲𑀼 𑀯𑀺𑀲𑀗𑁆𑀓𑁂𑀢𑁄.

𑀬𑁄 𑀧𑀦 ‘‘𑀫𑀭𑀺𑀢𑀼𑀓𑀸𑀫𑀸 𑀯𑀸 𑀅𑀫𑀭𑀺𑀢𑀼𑀓𑀸𑀫𑀸 𑀯𑀸 𑀫𑀸𑀭𑁂𑀢𑀼𑀓𑀸𑀫𑀸 𑀯𑀸 𑀅𑀫𑀸𑀭𑁂𑀢𑀼𑀓𑀸𑀫𑀸 𑀯𑀸 𑀬𑁂 𑀓𑁂𑀘𑀺 𑀏𑀢𑁆𑀣 𑀧𑀢𑀺𑀢𑀸 𑀯𑀸 𑀧𑀸𑀢𑀺𑀢𑀸 𑀯𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀩𑁆𑀩𑀣𑀸𑀧𑀺 𑀅𑀦𑀼𑀤𑁆𑀤𑀺𑀲𑁆𑀲𑁂𑀯 𑀔𑀦𑀢𑀺. 𑀬𑁄 𑀬𑁄 𑀫𑀭𑀢𑀺 𑀢𑀲𑁆𑀲 𑀢𑀲𑁆𑀲 𑀫𑀭𑀡𑁂𑀦 𑀬𑀣𑀸𑀦𑀼𑀭𑀽𑀧𑀁 𑀓𑀫𑁆𑀫𑀜𑁆𑀘 𑀨𑀼𑀲𑀢𑀺, 𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀢𑀺. 𑀲𑀘𑁂 𑀕𑀩𑁆𑀪𑀺𑀦𑀻 𑀧𑀢𑀺𑀢𑁆𑀯𑀸 𑀲𑀕𑀩𑁆𑀪𑀸 𑀫𑀭𑀢𑀺, 𑀤𑁆𑀯𑁂 𑀧𑀸𑀡𑀸𑀢𑀺𑀧𑀸𑀢𑀸. 𑀕𑀩𑁆𑀪𑁄𑀬𑁂𑀯 𑀯𑀺𑀦𑀲𑁆𑀲𑀢𑀺, 𑀏𑀓𑁄. 𑀕𑀩𑁆𑀪𑁄 𑀦 𑀯𑀺𑀦𑀲𑁆𑀲𑀢𑀺, 𑀫𑀸𑀢𑀸 𑀫𑀭𑀢𑀺, 𑀏𑀓𑁄𑀬𑁂𑀯. 𑀘𑁄𑀭𑁂𑀳𑀺 𑀅𑀦𑀼𑀩𑀤𑁆𑀥𑁄 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀑𑀧𑀸𑀢𑀔𑀦𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁. 𑀘𑁄𑀭𑀸 𑀢𑀢𑁆𑀣 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀢𑀢𑁆𑀣 𑀧𑀢𑀺𑀢𑀁 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀲𑁆𑀫𑀸? 𑀑𑀧𑀸𑀢𑁂 𑀧𑀢𑀺𑀢𑀧𑁆𑀧𑀬𑁄𑀕𑁂𑀦 𑀕𑀳𑀺𑀢𑀢𑁆𑀢𑀸. 𑀑𑀧𑀸𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀓𑀼𑀧𑀺𑀢𑁂𑀦 𑀢𑁂𑀦𑁂𑀯𑀸𑀩𑀸𑀥𑁂𑀦 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀑𑀧𑀸𑀢𑁂 𑀧𑀢𑀦𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀭𑁄𑀕𑁂𑀦 𑀕𑀺𑀮𑀸𑀦𑀲𑁆𑀲𑁂𑀯 𑀅𑀜𑁆𑀜𑁄 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀑𑀧𑀸𑀢𑀭𑁄𑀕𑁄 𑀩𑀮𑀯𑀢𑀭𑁄 ¶ 𑀳𑁄𑀢𑀺, 𑀢𑁂𑀦 𑀫𑀢𑁂𑀧𑀺 𑀑𑀧𑀸𑀢𑀔𑀡𑀓𑁄 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀭𑁄𑀕𑁄 𑀩𑀮𑀯𑀸 𑀳𑁄𑀢𑀺, 𑀢𑁂𑀦 𑀫𑀢𑁂 𑀫𑀼𑀘𑁆𑀘𑀢𑀺. 𑀉𑀪𑁄𑀳𑀺 𑀫𑀢𑁂 𑀦 𑀫𑀼𑀘𑁆𑀘𑀢𑀺. 𑀑𑀧𑀸𑀢𑁂 𑀑𑀧𑀧𑀸𑀢𑀺𑀓𑀫𑀦𑀼𑀲𑁆𑀲𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑁆𑀲 𑀔𑀢𑁂 𑀬𑀓𑁆𑀔𑀸𑀤𑀻𑀲𑀼 𑀧𑀢𑀺𑀢𑁆𑀯𑀸 𑀫𑀢𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀬𑀓𑁆𑀔𑀸𑀤𑀬𑁄 ¶ 𑀉𑀤𑁆𑀤𑀺𑀲𑁆𑀲 𑀔𑀢𑁂 𑀫𑀦𑀼𑀲𑁆𑀲𑀸𑀤𑀻𑀲𑀼 𑀫𑀭𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀓𑁆𑀔𑀸𑀤𑀬𑁄 𑀉𑀤𑁆𑀤𑀺𑀲𑁆𑀲 𑀔𑀦𑀦𑁆𑀢𑀲𑁆𑀲 𑀧𑀦 𑀔𑀦𑀦𑁂𑀧𑀺 𑀢𑁂𑀲𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀫𑀭𑀡𑁂 𑀯𑀢𑁆𑀣𑀼𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀸. 𑀅𑀦𑀼𑀤𑁆𑀤𑀺𑀲𑁆𑀲 𑀔𑀢𑁂 𑀑𑀧𑀸𑀢𑁂 𑀬𑀓𑁆𑀔𑀭𑀽𑀧𑁂𑀦 𑀯𑀸 𑀧𑁂𑀢𑀭𑀽𑀧𑁂𑀦 𑀯𑀸 𑀧𑀢𑀢𑀺, 𑀢𑀺𑀭𑀘𑁆𑀙𑀸𑀦𑀭𑀽𑀧𑁂𑀦 𑀫𑀭𑀢𑀺, 𑀧𑀢𑀦𑀭𑀽𑀧𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀫𑀭𑀡𑀭𑀽𑀧𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄. 𑀢𑀺𑀭𑀘𑁆𑀙𑀸𑀦𑀭𑀽𑀧𑁂𑀦 𑀧𑀢𑀺𑀢𑁆𑀯𑀸 𑀬𑀓𑁆𑀔𑀧𑁂𑀢𑀭𑀽𑀧𑁂𑀦 𑀫𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀑𑀧𑀸𑀢𑀔𑀦𑀓𑁄 𑀑𑀧𑀸𑀢𑀁 𑀅𑀜𑁆𑀜𑀲𑁆𑀲 𑀯𑀺𑀓𑁆𑀓𑀺𑀡𑀸𑀢𑀺 𑀯𑀸 𑀫𑀼𑀥𑀸 𑀯𑀸 𑀤𑁂𑀢𑀺, 𑀬𑁄 𑀬𑁄 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀘 𑀓𑀫𑁆𑀫𑀩𑀦𑁆𑀥𑁄 𑀘. 𑀬𑁂𑀦 𑀮𑀤𑁆𑀥𑁄 𑀲𑁄 𑀦𑀺𑀤𑁆𑀤𑁄𑀲𑁄. 𑀅𑀣 𑀲𑁄𑀧𑀺 ‘‘𑀏𑀯𑀁 ¶ 𑀧𑀢𑀺𑀢𑀸 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀼𑀉𑀤𑁆𑀥𑀭𑀸 𑀯𑀸 𑀦 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀁 𑀑𑀧𑀸𑀢𑀁 𑀕𑀫𑁆𑀪𑀻𑀭𑀢𑀭𑀁 𑀯𑀸 𑀉𑀢𑁆𑀢𑀸𑀦𑀢𑀭𑀁 𑀯𑀸 𑀤𑀻𑀖𑀢𑀭𑀁 𑀯𑀸 𑀭𑀲𑁆𑀲𑀢𑀭𑀁 𑀯𑀸 𑀯𑀺𑀢𑁆𑀣𑀢𑀢𑀭𑀁 𑀯𑀸 𑀲𑀫𑁆𑀩𑀸𑀥𑀢𑀭𑀁 𑀯𑀸 𑀓𑀭𑁄𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀆𑀧𑀢𑁆𑀢𑀺 𑀘 𑀓𑀫𑁆𑀫𑀩𑀦𑁆𑀥𑁄 𑀘. 𑀩𑀳𑀽 𑀫𑀭𑀦𑁆𑀢𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀑𑀧𑀸𑀢𑀁 𑀧𑀁𑀲𑀼𑀦𑀸 𑀧𑀽𑀭𑁂𑀢𑀺, 𑀲𑀘𑁂 𑀓𑁄𑀘𑀺 𑀧𑀁𑀲𑀼𑀫𑁆𑀳𑀺 𑀧𑀢𑀺𑀢𑁆𑀯𑀸 𑀫𑀭𑀢𑀺, 𑀧𑀽𑀭𑁂𑀢𑁆𑀯𑀸𑀧𑀺 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀤𑁆𑀤𑀫𑁄 𑀳𑁄𑀢𑀺, 𑀢𑀢𑁆𑀣 𑀮𑀕𑁆𑀕𑀺𑀢𑁆𑀯𑀸 𑀫𑀢𑁂𑀧𑀺. 𑀭𑀼𑀓𑁆𑀔𑁄 𑀯𑀸 𑀧𑀢𑀦𑁆𑀢𑁄 𑀯𑀸𑀢𑁄 𑀯𑀸 𑀯𑀲𑁆𑀲𑁄𑀤𑀓𑀁 𑀯𑀸 𑀧𑀁𑀲𑀼𑀁 𑀳𑀭𑀢𑀺, 𑀓𑀦𑁆𑀤𑀫𑀽𑀮𑀢𑁆𑀣𑀁 𑀯𑀸 𑀧𑀣𑀯𑀺𑀁 𑀔𑀦𑀦𑁆𑀢𑀸 𑀢𑀢𑁆𑀣 𑀆𑀯𑀸𑀝𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀲𑀘𑁂 𑀓𑁄𑀘𑀺 𑀮𑀕𑁆𑀕𑀺𑀢𑁆𑀯𑀸 𑀯𑀸 𑀧𑀢𑀺𑀢𑁆𑀯𑀸 𑀯𑀸 𑀫𑀭𑀢𑀺, 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀧𑀦 𑀑𑀓𑀸𑀲𑁂 𑀫𑀳𑀦𑁆𑀢𑀁 𑀢𑀴𑀸𑀓𑀁 𑀯𑀸 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀓𑀸𑀭𑁂𑀢𑁆𑀯𑀸 𑀘𑁂𑀢𑀺𑀬𑀁 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑁄𑀥𑀺𑀁 𑀯𑀸 𑀭𑁄𑀧𑁂𑀢𑁆𑀯𑀸 𑀆𑀯𑀸𑀲𑀁 𑀯𑀸 𑀲𑀓𑀝𑀫𑀕𑁆𑀕𑀁 𑀯𑀸 𑀓𑀸𑀭𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀬𑀤𑀸𑀧𑀺 𑀣𑀺𑀭𑀁 𑀓𑀢𑁆𑀯𑀸 𑀧𑀽𑀭𑀺𑀢𑁂 𑀑𑀧𑀸𑀢𑁂 𑀭𑀼𑀓𑁆𑀔𑀸𑀤𑀻𑀦𑀁 𑀫𑀽𑀮𑀸𑀦𑀺 𑀫𑀽𑀮𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑀸𑀦𑀺 𑀳𑁄𑀦𑁆𑀢𑀺 ¶ , 𑀚𑀸𑀢𑀧𑀣𑀯𑀻 𑀚𑀸𑀢𑀸, 𑀢𑀤𑀸𑀧𑀺 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀦𑀤𑀻 𑀆𑀕𑀦𑁆𑀢𑁆𑀯𑀸 𑀑𑀧𑀸𑀢𑀁 𑀳𑀭𑀢𑀺, 𑀏𑀯𑀫𑁆𑀧𑀺 𑀫𑀼𑀘𑁆𑀘𑀢𑀻𑀢𑀺. 𑀅𑀬𑀁 𑀢𑀸𑀯 𑀑𑀧𑀸𑀢𑀓𑀣𑀸.

𑀑𑀧𑀸𑀢𑀲𑁆𑀲𑁂𑀯 𑀧𑀦 𑀅𑀦𑀼𑀮𑁄𑀫𑁂𑀲𑀼 𑀧𑀸𑀲𑀸𑀤𑀻𑀲𑀼𑀧𑀺 𑀬𑁄 𑀢𑀸𑀯 𑀧𑀸𑀲𑀁 𑀑𑀟𑁆𑀟𑁂𑀢𑀺 ‘‘𑀏𑀢𑁆𑀣 𑀩𑀚𑁆𑀛𑀺𑀢𑁆𑀯𑀸 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀯𑀲𑁆𑀲𑀁 𑀩𑀚𑁆𑀛𑀦𑀓𑀲𑀢𑁆𑀢𑀸𑀦𑀁 𑀯𑀲𑁂𑀦 ¶ 𑀳𑀢𑁆𑀣𑀸 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀸𑀦𑀦𑁆𑀢𑀭𑀺𑀬𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀤𑁆𑀤𑀺𑀲𑁆𑀲 𑀓𑀢𑁂 𑀬𑀁 𑀉𑀤𑁆𑀤𑀺𑀲𑁆𑀲 𑀑𑀟𑁆𑀟𑀺𑀢𑁄, 𑀢𑀢𑁄 𑀅𑀜𑁆𑀜𑁂𑀲𑀁 𑀩𑀦𑁆𑀥𑀦𑁂 𑀅𑀦𑀸𑀧𑀢𑁆𑀢𑀺. 𑀧𑀸𑀲𑁂 𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸 𑀤𑀺𑀦𑁆𑀦𑁂𑀧𑀺 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀦𑁆𑀥𑁄. 𑀲𑀘𑁂 𑀬𑁂𑀦 𑀮𑀤𑁆𑀥𑁄 𑀲𑁄 𑀉𑀕𑁆𑀕𑀮𑀺𑀢𑀁 𑀯𑀸 𑀧𑀸𑀲𑀁 𑀲𑀡𑁆𑀞𑀧𑁂𑀢𑀺, 𑀧𑀲𑁆𑀲𑁂𑀦 𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀯𑀢𑀺𑀁 𑀓𑀢𑁆𑀯𑀸 𑀲𑀫𑁆𑀫𑀼𑀔𑁂 𑀧𑀯𑁂𑀲𑁂𑀢𑀺, 𑀣𑀤𑁆𑀥𑀢𑀭𑀁 𑀯𑀸 𑀧𑀸𑀲𑀬𑀝𑁆𑀞𑀺𑀁 𑀞𑀧𑁂𑀢𑀺, 𑀤𑀴𑁆𑀳𑀢𑀭𑀁 𑀯𑀸 𑀧𑀸𑀲𑀭𑀚𑁆𑀚𑀼𑀁 𑀩𑀦𑁆𑀥𑀢𑀺, 𑀣𑀺𑀭𑀢𑀭𑀁 𑀯𑀸 𑀔𑀸𑀡𑀼𑀓𑀁 𑀯𑀸 𑀆𑀓𑁄𑀝𑁂𑀢𑀺, 𑀉𑀪𑁄𑀧𑀺 𑀦 𑀫𑀼𑀘𑁆𑀘𑀦𑁆𑀢𑀺. 𑀲𑀘𑁂 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀸𑀲𑀁 𑀉𑀕𑁆𑀕𑀮𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀧𑀼𑀦 𑀅𑀜𑁆𑀜𑁂 𑀲𑀡𑁆𑀞𑀧𑁂𑀦𑁆𑀢𑀺, 𑀩𑀤𑁆𑀥𑀸 𑀩𑀤𑁆𑀥𑀸 𑀫𑀭𑀦𑁆𑀢𑀺, 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺.

𑀲𑀘𑁂 𑀧𑀦 𑀢𑁂𑀦 𑀧𑀸𑀲𑀬𑀝𑁆𑀞𑀺 𑀲𑀬𑀁 𑀅𑀓𑀢𑀸 𑀳𑁄𑀢𑀺, 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀢𑀢𑁆𑀣𑀚𑀸𑀢𑀓𑀬𑀝𑁆𑀞𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀬𑀁 𑀓𑀢𑀬𑀝𑁆𑀞𑀺𑀁 𑀧𑀦 𑀕𑁄𑀧𑁂𑀦𑁆𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀬𑀤𑀺 𑀳𑀺 𑀢𑀁 𑀅𑀜𑁆𑀜𑁄 𑀕𑀡𑁆𑀳𑀺𑀢𑁆𑀯𑀸 𑀧𑀸𑀲𑀁 𑀲𑀡𑁆𑀞𑀧𑁂𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀫𑀭𑀦𑁆𑀢𑁂𑀲𑀼 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀢𑀁 𑀛𑀸𑀧𑁂𑀢𑁆𑀯𑀸 𑀅𑀮𑀸𑀢𑀁 𑀓𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀢𑁂𑀦 𑀅𑀮𑀸𑀢𑁂𑀦 𑀧𑀳𑀸𑀭𑀁 𑀮𑀤𑁆𑀥𑀸 𑀫𑀭𑀦𑁆𑀢𑁂𑀲𑀼𑀧𑀺 𑀦 𑀫𑀼𑀘𑁆𑀘𑀢𑀺. 𑀲𑀩𑁆𑀩𑀲𑁄 𑀧𑀦 𑀛𑀸𑀧𑁂𑀢𑁆𑀯𑀸 𑀯𑀸 𑀦𑀸𑀲𑁂𑀢𑁆𑀯𑀸 𑀯𑀸 𑀫𑀼𑀘𑁆𑀘𑀢𑀺, 𑀧𑀸𑀲𑀭𑀚𑁆𑀚𑀼𑀫𑁆𑀧𑀺 𑀅𑀜𑁆𑀜𑁂𑀳𑀺 𑀘 𑀯𑀝𑁆𑀝𑀺𑀢𑀁 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀭𑀚𑁆𑀚𑀼𑀓𑁂 𑀮𑀪𑀺𑀢𑁆𑀯𑀸 𑀲𑀬𑀁 𑀯𑀝𑁆𑀝𑀺𑀢𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀯𑀸𑀓𑁂 𑀮𑀪𑀺𑀢𑁆𑀯𑀸 𑀯𑀝𑁆𑀝𑀺𑀢𑀁 𑀳𑀻𑀭𑀁 𑀳𑀻𑀭𑀁 𑀓𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀭𑀜𑁆𑀜𑀢𑁄 𑀧𑀦 𑀲𑀬𑀁 𑀯𑀸𑀓𑁂 𑀆𑀳𑀭𑀺𑀢𑁆𑀯𑀸 𑀯𑀝𑁆𑀝𑀺𑀢𑀁 𑀕𑁄𑀧𑁂𑀦𑁆𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀲𑀩𑁆𑀩𑀲𑁄 𑀧𑀦 𑀛𑀸𑀧𑁂𑀢𑁆𑀯𑀸 𑀯𑀸 𑀦𑀸𑀲𑁂𑀢𑁆𑀯𑀸 𑀯𑀸 𑀫𑀼𑀘𑁆𑀘𑀢𑀺.

𑀅𑀤𑀽𑀳𑀮𑀁 ¶ 𑀲𑀚𑁆𑀚𑁂𑀦𑁆𑀢𑁄 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀅𑀤𑀽𑀳𑀮𑀫𑀜𑁆𑀘𑀁 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑁂 𑀆𑀭𑁄𑀧𑁂𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀲𑀩𑁆𑀩𑀲𑀚𑁆𑀚𑀁 𑀓𑀢𑁆𑀯𑀸 𑀳𑀢𑁆𑀣𑀢𑁄 ¶ 𑀫𑀼𑀢𑁆𑀢𑀫𑀢𑁆𑀢𑁂 𑀅𑀯𑀲𑁆𑀲𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀩𑁆𑀩𑀓𑀲𑀢𑁆𑀢𑀸𑀦𑀁 𑀯𑀲𑁂𑀦 𑀉𑀤𑁆𑀤𑀺𑀲𑁆𑀲𑀓𑀸𑀦𑀼𑀤𑁆𑀤𑀺𑀲𑁆𑀲𑀓𑀸𑀦𑀼𑀭𑀽𑀧𑁂𑀦 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀤𑀽𑀳𑀮𑁂 𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸 𑀤𑀺𑀦𑁆𑀦𑁂𑀧𑀺 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀲𑀘𑁂 𑀬𑁂𑀦 𑀮𑀤𑁆𑀥𑀁 𑀲𑁄 𑀧𑀢𑀺𑀢𑀁 𑀯𑀸 𑀉𑀓𑁆𑀔𑀺𑀧𑀢𑀺, 𑀅𑀜𑁆𑀜𑁂𑀧𑀺 𑀧𑀸𑀲𑀸𑀡𑁂 𑀆𑀭𑁄𑀧𑁂𑀢𑁆𑀯𑀸 𑀕𑀭𑀼𑀓𑀢𑀭𑀁 𑀯𑀸 𑀓𑀭𑁄𑀢𑀺, 𑀧𑀲𑁆𑀲𑁂𑀦 𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀯𑀢𑀺𑀁 𑀓𑀢𑁆𑀯𑀸 𑀅𑀤𑀽𑀳𑀮𑁂 𑀧𑀯𑁂𑀲𑁂𑀢𑀺, 𑀉𑀪𑁄𑀧𑀺 𑀦 𑀫𑀼𑀘𑁆𑀘𑀦𑁆𑀢𑀺. 𑀲𑀘𑁂𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀅𑀤𑀽𑀳𑀮𑀁 𑀧𑀸𑀢𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑁄 𑀲𑀡𑁆𑀞𑀧𑁂𑀢𑀺, 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀧𑀸𑀲𑀸𑀡𑁂 𑀧𑀦 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀤𑀽𑀳𑀮𑀧𑀸𑀤𑁂 𑀘 𑀧𑀸𑀲𑀬𑀝𑁆𑀞𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑀝𑁆𑀞𑀸𑀦𑁂 𑀯𑀸 𑀞𑀧𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀯𑀸 𑀫𑀼𑀘𑁆𑀘𑀢𑀺.

𑀲𑀽𑀮𑀁 𑀭𑁄𑀧𑁂𑀦𑁆𑀢𑀲𑁆𑀲𑀸𑀧𑀺 𑀲𑀩𑁆𑀩𑀲𑀚𑁆𑀚𑀁 𑀓𑀢𑁆𑀯𑀸 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀲𑀽𑀮𑀫𑀼𑀔𑁂 𑀧𑀢𑀺𑀢𑁆𑀯𑀸 𑀅𑀯𑀲𑁆𑀲𑀁 𑀫𑀭𑀡𑀓𑀲𑀢𑁆𑀢𑀸𑀦𑀁 𑀯𑀲𑁂𑀦 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀸𑀦𑀼𑀭𑀽𑀧𑀢𑁄 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 ¶ 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀽𑀮𑁂 𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸 𑀤𑀺𑀦𑁆𑀦𑁂𑀧𑀺 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀲𑀘𑁂 𑀬𑁂𑀦 𑀮𑀤𑁆𑀥𑀁 𑀲𑁄 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀔𑀺𑀡𑀢𑀭𑀁 𑀯𑀸 𑀓𑀭𑁄𑀢𑀺, ‘‘𑀤𑀼𑀓𑁆𑀔𑀁 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀓𑀼𑀡𑁆𑀞𑀢𑀭𑀁 𑀯𑀸 𑀓𑀭𑁄𑀢𑀺, ‘‘𑀉𑀘𑁆𑀘’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀘𑀢𑀭𑀁 𑀯𑀸 ‘‘𑀦𑀻𑀘’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀘𑁆𑀘𑀢𑀭𑀁 𑀯𑀸 𑀧𑀼𑀦 𑀭𑁄𑀧𑁂𑀢𑀺, 𑀯𑀗𑁆𑀓𑀁 𑀯𑀸 𑀉𑀚𑀼𑀓𑀁 𑀅𑀢𑀺𑀉𑀚𑀼𑀓𑀁 𑀯𑀸 𑀈𑀲𑀓𑀁 𑀧𑁄𑀡𑀁 𑀓𑀭𑁄𑀢𑀺, 𑀉𑀪𑁄𑀧𑀺 𑀦 𑀫𑀼𑀘𑁆𑀘𑀦𑁆𑀢𑀺. 𑀲𑀘𑁂 𑀧𑀦 ‘‘𑀅𑀝𑁆𑀞𑀸𑀦𑁂 𑀞𑀺𑀢’’𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀺, 𑀢𑀁 𑀘𑁂 𑀫𑀸𑀭𑀡𑀢𑁆𑀣𑀸𑀬 𑀆𑀤𑀺𑀢𑁄 𑀧𑀪𑀼𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀦 𑀓𑀢𑀫𑁂𑀯 𑀮𑀪𑀺𑀢𑁆𑀯𑀸 𑀭𑁄𑀧𑀺𑀢𑁂 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀸𑀲𑀬𑀝𑁆𑀞𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑀝𑁆𑀞𑀸𑀦𑁂 𑀯𑀸 𑀞𑀧𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀯𑀸 𑀫𑀼𑀘𑁆𑀘𑀢𑀺.

𑁧𑁭𑁭. 𑀅𑀧𑀲𑁆𑀲𑁂𑀦𑁂 𑀲𑀢𑁆𑀣𑀁 𑀯𑀸𑀢𑀺 𑀏𑀢𑁆𑀣 𑀅𑀧𑀲𑁆𑀲𑁂𑀦𑀁 𑀦𑀸𑀫 𑀦𑀺𑀘𑁆𑀘𑀧𑀭𑀺𑀪𑁄𑀕𑁄 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀅𑀧𑀲𑁆𑀲𑁂𑀦𑀨𑀮𑀓𑀁 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀦𑁆𑀢𑀲𑁆𑀲 𑀅𑀧𑀲𑁆𑀲𑁂𑀦𑀓𑀢𑁆𑀣𑀫𑁆𑀪𑁄 𑀯𑀸 𑀢𑀢𑁆𑀣𑀚𑀸𑀢𑀓𑀭𑀼𑀓𑁆𑀔𑁄 𑀯𑀸 𑀘𑀗𑁆𑀓𑀫𑁂 𑀅𑀧𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀲𑁆𑀲 𑀆𑀮𑀫𑁆𑀩𑀦𑀭𑀼𑀓𑁆𑀔𑁄 𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀯𑀸 𑀲𑀩𑁆𑀩𑀫𑁆𑀧𑁂𑀢𑀁 𑀅𑀧𑀲𑁆𑀲𑀬𑀦𑀻𑀬𑀝𑁆𑀞𑁂𑀦 𑀅𑀧𑀲𑁆𑀲𑁂𑀦𑀁 ¶ 𑀦𑀸𑀫; 𑀢𑀲𑁆𑀫𑀺𑀁 𑀅𑀧𑀲𑁆𑀲𑁂𑀦𑁂 𑀬𑀣𑀸 𑀅𑀧𑀲𑁆𑀲𑀬𑀦𑁆𑀢𑀁 𑀯𑀺𑀚𑁆𑀛𑀢𑀺 𑀯𑀸 𑀙𑀺𑀦𑁆𑀤𑀢𑀺 𑀯𑀸 𑀢𑀣𑀸 𑀓𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀲𑀢𑁆𑀢𑀺𑀆𑀭𑀓𑀡𑁆𑀝𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀲𑀢𑁆𑀣𑀁 𑀞𑀧𑁂𑀢𑀺, 𑀤𑀼𑀓𑁆𑀓𑀝𑀁. 𑀥𑀼𑀯𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀦𑀺𑀭𑀸𑀲𑀗𑁆𑀓𑀲𑁆𑀲 𑀦𑀺𑀲𑀻𑀤𑀢𑁄 𑀯𑀸 𑀦𑀺𑀧𑀚𑁆𑀚𑀢𑁄 𑀯𑀸 𑀅𑀧𑀲𑁆𑀲𑀬𑀦𑁆𑀢𑀲𑁆𑀲 𑀯𑀸 𑀲𑀢𑁆𑀣𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂𑀦 𑀧𑀸𑀭𑀸𑀚𑀺𑀓𑀁. 𑀢𑀁 𑀘𑁂 𑀅𑀜𑁆𑀜𑁄𑀧𑀺 𑀢𑀲𑁆𑀲 𑀯𑁂𑀭𑀺𑀪𑀺𑀓𑁆𑀔𑀼 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀫𑀜𑁆𑀜𑁂 𑀫𑀭𑀡𑀢𑁆𑀣𑀸𑀬 𑀇𑀤𑀁 𑀦𑀺𑀔𑀺𑀢𑁆𑀢𑀁, 𑀲𑀸𑀥𑀼 𑀲𑀼𑀝𑁆𑀞𑀼 𑀫𑀭𑀢𑀽’’𑀢𑀺 𑀅𑀪𑀺𑀦𑀦𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀲𑁄𑀧𑀺 𑀢𑀢𑁆𑀣 ‘‘𑀏𑀯𑀁 𑀓𑀢𑁂 𑀲𑀼𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀺𑀔𑀺𑀡𑀢𑀭𑀸𑀤𑀺𑀓𑀭𑀡𑁂𑀦 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 ‘‘𑀅𑀝𑁆𑀞𑀸𑀦𑁂 𑀞𑀺𑀢’’𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀺 𑀢𑀤𑀢𑁆𑀣𑀫𑁂𑀯 𑀓𑀢𑁆𑀯𑀸 𑀞𑀧𑀺𑀢𑁂 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺. 𑀧𑀸𑀓𑀢𑀺𑀓𑀁 𑀮𑀪𑀺𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺, 𑀫𑀼𑀘𑁆𑀘𑀢𑀺. 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀢𑀺𑀔𑀺𑀡𑀢𑀭𑀁 𑀞𑀧𑁂𑀢𑀺 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑁂𑀯.

𑀯𑀺𑀲𑀫𑀓𑁆𑀔𑀦𑁂𑀧𑀺 𑀬𑀸𑀯 𑀫𑀭𑀡𑀸𑀪𑀺𑀦𑀦𑁆𑀤𑀦𑁂 𑀤𑀼𑀓𑁆𑀓𑀝𑀁 𑀢𑀸𑀯 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀲𑁄𑀧𑀺 𑀔𑀼𑀤𑁆𑀤𑀓𑀁 𑀯𑀺𑀲𑀫𑀡𑁆𑀟𑀮𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀦𑁆𑀢𑀢𑀭𑀁 𑀯𑀸 𑀓𑀭𑁄𑀢𑀺 ¶ , 𑀫𑀳𑀦𑁆𑀢𑀁 𑀯𑀸 ‘‘𑀅𑀢𑀺𑀭𑁂𑀓𑀁 𑀳𑁄𑀢𑀻’’𑀢𑀺 𑀔𑀼𑀤𑁆𑀤𑀓𑀁 𑀓𑀭𑁄𑀢𑀺, 𑀢𑀦𑀼𑀓𑀁 𑀯𑀸 𑀩𑀳𑀮𑀁; 𑀩𑀳𑀮𑀁 𑀯𑀸 𑀢𑀦𑀼𑀓𑀁 𑀓𑀭𑁄𑀢𑀺, 𑀅𑀕𑁆𑀕𑀺𑀦𑀸 𑀢𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀲𑀜𑁆𑀘𑀸𑀭𑁂𑀢𑀺, 𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁. ‘‘𑀇𑀤𑀁 𑀅𑀞𑀸𑀦𑁂 𑀞𑀺𑀢’’𑀦𑁆𑀢𑀺 𑀲𑀩𑁆𑀩𑀫𑁂𑀯 𑀢𑀘𑁆𑀙𑁂𑀢𑁆𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀺, 𑀅𑀢𑁆𑀢𑀦𑀸 𑀪𑁂𑀲𑀚𑁆𑀚𑀸𑀦𑀺 𑀬𑁄𑀚𑁂𑀢𑁆𑀯𑀸 𑀓𑀢𑁂 𑀫𑀽𑀮𑀝𑁆𑀞𑁄 𑀦 𑀫𑀼𑀘𑁆𑀘𑀢𑀺 ¶ , 𑀅𑀢𑁆𑀢𑀦𑀸 𑀅𑀓𑀢𑁂 𑀫𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀲𑁄 ‘‘𑀇𑀤𑀁 𑀯𑀺𑀲𑀁 𑀅𑀢𑀺𑀧𑀭𑀺𑀢𑁆𑀢’’𑀦𑁆𑀢𑀺 𑀅𑀜𑁆𑀜𑀫𑁆𑀧𑀺 𑀆𑀦𑁂𑀢𑁆𑀯𑀸 𑀧𑀓𑁆𑀔𑀺𑀧𑀢𑀺, 𑀬𑀲𑁆𑀲 𑀯𑀺𑀲𑁂𑀦 𑀫𑀭𑀢𑀺, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀪𑀺𑀦𑁆𑀦𑀫𑁆𑀧𑀺 𑀲𑀦𑁆𑀢𑀓𑁂𑀦 𑀫𑀭𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. ‘‘𑀇𑀤𑀁 𑀯𑀺𑀲𑀁 𑀦𑀺𑀩𑁆𑀩𑀺𑀲’’𑀦𑁆𑀢𑀺 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀲𑀫𑁂𑀯 𑀞𑀧𑁂𑀢𑀺, 𑀢𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺.

𑀤𑀼𑀩𑁆𑀩𑀮𑀁 𑀯𑀸 𑀓𑀭𑁄𑀢𑀻𑀢𑀺 ¶ 𑀫𑀜𑁆𑀘𑀧𑀻𑀞𑀁 𑀅𑀝𑀦𑀺𑀬𑀸 𑀳𑁂𑀝𑁆𑀞𑀸𑀪𑀸𑀕𑁂 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀮𑁂𑀳𑀺 𑀯𑀸 𑀭𑀚𑁆𑀚𑀼𑀓𑁂𑀳𑀺 𑀯𑀸 𑀬𑁂𑀳𑀺 𑀯𑀻𑀢𑀁 𑀳𑁄𑀢𑀺, 𑀢𑁂 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀸𑀯𑀲𑁂𑀲𑀫𑁂𑀯 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀢𑀺 ‘‘𑀏𑀢𑁆𑀣 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺. 𑀅𑀧𑀲𑁆𑀲𑁂𑀦𑀨𑀮𑀓𑀸𑀤𑀻𑀦𑀫𑁆𑀧𑀺 𑀘𑀗𑁆𑀓𑀫𑁂 𑀆𑀮𑀫𑁆𑀩𑀦𑀭𑀼𑀓𑁆𑀔𑀨𑀮𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀧𑀭𑀪𑀸𑀕𑀁 𑀙𑀺𑀦𑁆𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀢𑀺, 𑀲𑁄𑀩𑁆𑀪𑀸𑀤𑀻𑀲𑀼 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀧𑀲𑁆𑀲𑁂𑀦𑀨𑀮𑀓𑀁 𑀯𑀸 𑀆𑀦𑁂𑀢𑁆𑀯𑀸 𑀞𑀧𑁂𑀢𑀺, 𑀬𑀣𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀫𑀢𑁆𑀢𑁄 𑀯𑀸 𑀅𑀧𑀲𑁆𑀲𑀺𑀢𑀫𑀢𑁆𑀢𑁄 𑀯𑀸 𑀧𑀢𑀢𑀺, 𑀲𑁄𑀩𑁆𑀪𑀸𑀤𑀻𑀲𑀼 𑀯𑀸 𑀲𑀜𑁆𑀘𑀭𑀡𑀲𑁂𑀢𑀼 𑀳𑁄𑀢𑀺, 𑀢𑀁 𑀤𑀼𑀩𑁆𑀩𑀮𑀁 𑀓𑀭𑁄𑀢𑀺; 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀓𑀭𑀡𑁂 𑀤𑀼𑀓𑁆𑀓𑀝𑀁. 𑀇𑀢𑀭𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀪𑀺𑀓𑁆𑀔𑀼𑀁 𑀆𑀦𑁂𑀢𑁆𑀯𑀸 𑀲𑁄𑀩𑁆𑀪𑀸𑀤𑀻𑀦𑀁 𑀢𑀝𑁂 𑀞𑀧𑁂𑀢𑀺 ‘‘𑀤𑀺𑀲𑁆𑀯𑀸 𑀪𑀬𑁂𑀦 𑀓𑀫𑁆𑀧𑁂𑀦𑁆𑀢𑁄 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀤𑀼𑀓𑁆𑀓𑀝𑀁. 𑀲𑁄 𑀢𑀢𑁆𑀣𑁂𑀯 𑀧𑀢𑀢𑀺, 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀲𑀬𑀁 𑀯𑀸 𑀧𑀸𑀢𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀧𑀸𑀢𑀸𑀧𑁂𑀢𑀺, 𑀅𑀜𑁆𑀜𑁄 𑀅𑀯𑀼𑀢𑁆𑀢𑁄 𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀸𑀢𑁂𑀢𑀺, 𑀅𑀫𑀦𑀼𑀲𑁆𑀲𑁄 𑀧𑀸𑀢𑁂𑀢𑀺, 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀢𑀢𑀺, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀢𑀢𑁆𑀢𑀺, 𑀲𑀩𑁆𑀩𑀢𑁆𑀣 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀢𑀲𑁆𑀲 𑀧𑀬𑁄𑀕𑁂𑀦 𑀲𑁄𑀩𑁆𑀪𑀸𑀤𑀺𑀢𑀝𑁂 𑀞𑀺𑀢𑀢𑁆𑀢𑀸.

𑀉𑀧𑀦𑀺𑀓𑁆𑀔𑀺𑀧𑀦𑀁 𑀦𑀸𑀫 𑀲𑀫𑀻𑀧𑁂 𑀦𑀺𑀓𑁆𑀔𑀺𑀧𑀦𑀁. 𑀢𑀢𑁆𑀣 ‘‘𑀬𑁄 𑀇𑀫𑀺𑀦𑀸 𑀅𑀲𑀺𑀦𑀸 𑀫𑀢𑁄 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀫𑀭𑀡𑀢𑁆𑀣𑀺𑀓𑀸 𑀫𑀭𑀦𑁆𑀢𑀼, 𑀫𑀸𑀭𑀡𑀢𑁆𑀣𑀺𑀓𑀸 𑀫𑀸𑀭𑁂𑀦𑁆𑀢𑀽’’𑀢𑀺 𑀯𑀸 𑀯𑀢𑁆𑀯𑀸 𑀅𑀲𑀺𑀁 𑀉𑀧𑀦𑀺𑀓𑁆𑀔𑀺𑀧𑀢𑀺, 𑀢𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀦𑁂 𑀤𑀼𑀓𑁆𑀓𑀝𑀁. 𑀫𑀭𑀺𑀢𑀼𑀓𑀸𑀫𑁄 𑀯𑀸 𑀢𑁂𑀦 𑀅𑀢𑁆𑀢𑀸𑀦𑀁 𑀧𑀳𑀭𑀢𑀼 ¶ , 𑀫𑀸𑀭𑁂𑀢𑀼𑀓𑀸𑀫𑁄 𑀯𑀸 𑀅𑀜𑁆𑀜𑀁 𑀧𑀳𑀭𑀢𑀼, 𑀉𑀪𑀬𑀣𑀸𑀧𑀺 𑀧𑀭𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 ¶ 𑀉𑀧𑀦𑀺𑀓𑁆𑀔𑁂𑀧𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀅𑀦𑀼𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑁂 𑀩𑀳𑀽𑀦𑀁 𑀫𑀭𑀡𑁂 𑀅𑀓𑀼𑀲𑀮𑀭𑀸𑀲𑀺. 𑀧𑀸𑀭𑀸𑀚𑀺𑀓𑀸𑀤𑀺𑀯𑀢𑁆𑀣𑀽𑀲𑀼 𑀧𑀸𑀭𑀸𑀚𑀺𑀓𑀸𑀤𑀻𑀦𑀺. 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀅𑀲𑀺𑀁 𑀕𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑁄 𑀳𑁄𑀢𑀺, 𑀅𑀲𑀺𑀲𑁆𑀲𑀸𑀫𑀺𑀓𑀸𑀦𑀁 𑀅𑀲𑀺𑀁, 𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢𑀁, 𑀢𑁂𑀲𑀁 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀘𑁂 𑀮𑁄𑀳𑀧𑀺𑀡𑁆𑀟𑀺𑀁 𑀯𑀸 𑀨𑀸𑀮𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀕𑀳𑁂𑀢𑁆𑀯𑀸 𑀅𑀲𑀺 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺, 𑀬𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀓𑀸𑀭𑀺𑀢𑁄, 𑀢𑀤𑁂𑀯 𑀓𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀘𑁂 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 ¶ 𑀓𑀸𑀭𑀺𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀨𑀸𑀮𑀁 𑀓𑀭𑁄𑀢𑀺, 𑀨𑀸𑀮𑁂𑀦 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸 𑀫𑀭𑀦𑁆𑀢𑁂𑀲𑀼𑀧𑀺 𑀧𑀸𑀡𑀸𑀢𑀺𑀧𑀸𑀢𑀢𑁄 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀮𑁄𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀧𑀦𑀢𑁆𑀣𑀫𑁂𑀯 𑀓𑀸𑀭𑀺𑀢𑁄 𑀳𑁄𑀢𑀺, 𑀅𑀭𑁂𑀦 𑀖𑀁𑀲𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑁂 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀲𑀁𑀯𑀡𑁆𑀡𑀦𑀸𑀧𑁄𑀢𑁆𑀣𑀓𑁄 𑀯𑀺𑀬 𑀩𑀳𑀽𑀳𑀺 𑀏𑀓𑀚𑁆𑀛𑀸𑀲𑀬𑁂𑀳𑀺 𑀓𑀢𑁄 𑀳𑁄𑀢𑀺, 𑀧𑁄𑀢𑁆𑀣𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀩𑀦𑁆𑀥𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑀢𑁆𑀢𑀺𑀪𑁂𑀡𑁆𑀟𑀻𑀲𑀼. 𑀮𑀕𑀼𑀴𑁂 𑀧𑀸𑀲𑀬𑀝𑁆𑀞𑀺𑀲𑀤𑀺𑀲𑁄 𑀯𑀺𑀦𑀺𑀘𑁆𑀙𑀬𑁄. 𑀢𑀣𑀸 𑀧𑀸𑀲𑀸𑀡𑁂. 𑀲𑀢𑁆𑀣𑁂 𑀅𑀲𑀺𑀲𑀤𑀺𑀲𑁄𑀯. 𑀯𑀺𑀲𑀁 𑀯𑀸𑀢𑀺 𑀯𑀺𑀲𑀁 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀯𑀢𑁆𑀣𑀼𑀯𑀲𑁂𑀦 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀸𑀦𑀼𑀭𑀽𑀧𑀢𑁄 𑀧𑀸𑀭𑀸𑀚𑀺𑀓𑀸𑀤𑀺𑀯𑀢𑁆𑀣𑀽𑀲𑀼 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀺𑀡𑀺𑀢𑁆𑀯𑀸 𑀞𑀧𑀺𑀢𑁂 𑀧𑀼𑀭𑀺𑀫𑀦𑀬𑁂𑀦 𑀧𑀝𑀺𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀬𑀁 𑀪𑁂𑀲𑀚𑁆𑀚𑁂𑀳𑀺 𑀬𑁄𑀚𑀺𑀢𑁂 𑀅𑀯𑀺𑀲𑀁 𑀓𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀭𑀚𑁆𑀚𑀼𑀬𑀸 𑀧𑀸𑀲𑀭𑀚𑁆𑀚𑀼𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀪𑁂𑀲𑀚𑁆𑀚𑁂 𑁋 𑀬𑁄 𑀪𑀺𑀓𑁆𑀔𑀼 𑀯𑁂𑀭𑀺𑀪𑀺𑀓𑁆𑀔𑀼𑀲𑁆𑀲 𑀧𑀚𑁆𑀚𑀭𑀓𑁂 𑀯𑀸 𑀯𑀺𑀲𑀪𑀸𑀕𑀭𑁄𑀕𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀅𑀲𑀧𑁆𑀧𑀸𑀬𑀸𑀦𑀺𑀧𑀺 𑀲𑀧𑁆𑀧𑀺𑀆𑀤𑀻𑀦𑀺 𑀲𑀧𑁆𑀧𑀸𑀬𑀸𑀦𑀻𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀤𑁂𑀢𑀺, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀦𑁆𑀤𑀫𑀽𑀮𑀨𑀮𑀁 𑀢𑀲𑁆𑀲 𑀏𑀯𑀁 𑀪𑁂𑀲𑀚𑁆𑀚𑀤𑀸𑀦𑁂 𑀤𑀼𑀓𑁆𑀓𑀝𑀁. 𑀧𑀭𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀫𑀭𑀡𑁂 𑀘 𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀦𑀺, 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀆𑀦𑀦𑁆𑀢𑀭𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁭𑁮. 𑀭𑀽𑀧𑀽𑀧𑀳𑀸𑀭𑁂 𑁋 𑀉𑀧𑀲𑀁𑀳𑀭𑀢𑀻𑀢𑀺 𑀧𑀭𑀁 𑀯𑀸 𑀅𑀫𑀦𑀸𑀧𑀭𑀽𑀧𑀁 𑀢𑀲𑁆𑀲 𑀲𑀫𑀻𑀧𑁂 𑀞𑀧𑁂𑀢𑀺, 𑀅𑀢𑁆𑀢𑀦𑀸 𑀯𑀸 𑀬𑀓𑁆𑀔𑀧𑁂𑀢𑀸𑀤𑀺𑀯𑁂𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀉𑀧𑀲𑀁𑀳𑀸𑀭𑀫𑀢𑁆𑀢𑁂 𑀤𑀼𑀓𑁆𑀓𑀝𑀁. 𑀧𑀭𑀲𑁆𑀲 𑀢𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀬𑀼𑀧𑁆𑀧𑀢𑁆𑀢𑀺𑀬𑀁 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀡𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀢𑀤𑁂𑀯 𑀭𑀽𑀧𑀁 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀁 𑀳𑁄𑀢𑀺, 𑀅𑀮𑀸𑀪𑀓𑁂𑀦 𑀘 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀺, 𑀯𑀺𑀲𑀗𑁆𑀓𑁂𑀢𑁄. 𑀫𑀦𑀸𑀧𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀦 𑀯𑀺𑀲𑁂𑀲𑁂𑀦 ¶ 𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀭𑀽𑀧𑀁 𑀧𑀼𑀭𑀺𑀲𑀸𑀦𑀜𑁆𑀘 𑀇𑀢𑁆𑀣𑀺𑀭𑀽𑀧𑀁 𑀫𑀦𑀸𑀧𑀁 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑀲𑀁𑀳𑀭𑀢𑀺, 𑀤𑀺𑀝𑁆𑀞𑀫𑀢𑁆𑀢𑀓𑀫𑁂𑀯 𑀓𑀭𑁄𑀢𑀺, 𑀅𑀢𑀺𑀘𑀺𑀭𑀁 𑀧𑀲𑁆𑀲𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺, 𑀇𑀢𑀭𑁄 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀢𑀺 ¶ , 𑀯𑀺𑀲𑀗𑁆𑀓𑁂𑀢𑁄. 𑀅𑀣 𑀧𑀦 𑀉𑀢𑁆𑀢𑀲𑀺𑀢𑁆𑀯𑀸 𑀯𑀸 𑀅𑀮𑀸𑀪𑀓𑁂𑀦 𑀯𑀸𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 ‘‘𑀓𑁂𑀯𑀮𑀁 𑀧𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀁𑀳𑀭𑀢𑀺, 𑀉𑀢𑁆𑀢𑀲𑀺𑀢𑁆𑀯𑀸 𑀯𑀸 𑀲𑀼𑀲𑁆𑀲𑀺𑀢𑁆𑀯𑀸 𑀯𑀸 𑀫𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀏𑀢𑁂𑀦𑁂𑀯𑀽𑀧𑀸𑀬𑁂𑀦 𑀲𑀤𑁆𑀤𑀽𑀧𑀳𑀸𑀭𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀅𑀫𑀦𑀼𑀲𑁆𑀲𑀲𑀤𑁆𑀤𑀸𑀤𑀬𑁄 𑀉𑀢𑁆𑀭𑀸𑀲𑀚𑀦𑀓𑀸 𑀅𑀫𑀦𑀸𑀧𑀲𑀤𑁆𑀤𑀸, 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀺𑀲𑀤𑁆𑀤𑀫𑀥𑀼𑀭𑀕𑀦𑁆𑀥𑀩𑁆𑀩𑀲𑀤𑁆𑀤𑀸𑀤𑀬𑁄 𑀘𑀺𑀢𑁆𑀢𑀲𑁆𑀲𑀸𑀤𑀓𑀭𑀸 𑀫𑀦𑀸𑀧𑀲𑀤𑁆𑀤𑀸. 𑀳𑀺𑀫𑀯𑀦𑁆𑀢𑁂 𑀯𑀺𑀲𑀭𑀼𑀓𑁆𑀔𑀸𑀦𑀁 𑀫𑀽𑀮𑀸𑀤𑀺𑀕𑀦𑁆𑀥𑀸 𑀓𑀼𑀡𑀧𑀕𑀦𑁆𑀥𑀸 𑀘 𑀅𑀫𑀦𑀸𑀧𑀕𑀦𑁆𑀥𑀸, 𑀓𑀸𑀴𑀸𑀦𑀼𑀲𑀸𑀭𑀻𑀫𑀽𑀮𑀕𑀦𑁆𑀥𑀸𑀤𑀬𑁄 𑀫𑀦𑀸𑀧𑀕𑀦𑁆𑀥𑀸 ¶ . 𑀧𑀝𑀺𑀓𑀽𑀮𑀫𑀽𑀮𑀭𑀲𑀸𑀤𑀬𑁄 𑀅𑀫𑀦𑀸𑀧𑀭𑀲𑀸, 𑀅𑀧𑁆𑀧𑀝𑀺𑀓𑀽𑀮𑀫𑀽𑀮𑀭𑀲𑀸𑀤𑀬𑁄 𑀫𑀦𑀸𑀧𑀭𑀲𑀸. 𑀯𑀺𑀲𑀨𑀲𑁆𑀲𑀫𑀳𑀸𑀓𑀘𑁆𑀙𑀼𑀨𑀲𑁆𑀲𑀸𑀤𑀬𑁄 𑀅𑀫𑀦𑀸𑀧𑀨𑁄𑀝𑁆𑀞𑀩𑁆𑀩𑀸, 𑀘𑀻𑀦𑀧𑀝𑀳𑀁𑀲𑀧𑀼𑀧𑁆𑀨𑀢𑀽𑀮𑀺𑀓𑀨𑀲𑁆𑀲𑀸𑀤𑀬𑁄 𑀫𑀦𑀸𑀧𑀨𑁄𑀝𑁆𑀞𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀽𑀧𑀳𑀸𑀭𑁂 𑁋 𑀥𑀫𑁆𑀫𑁄𑀢𑀺 𑀤𑁂𑀲𑀦𑀸𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁂𑀲𑀦𑀸𑀯𑀲𑁂𑀦 𑀯𑀸 𑀦𑀺𑀭𑀬𑁂 𑀘 𑀲𑀕𑁆𑀕𑁂 𑀘 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀪𑁂𑀤𑀁 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯. 𑀦𑁂𑀭𑀬𑀺𑀓𑀲𑁆𑀲𑀸𑀢𑀺 𑀪𑀺𑀦𑁆𑀦𑀲𑀁𑀯𑀭𑀲𑁆𑀲 𑀓𑀢𑀧𑀸𑀧𑀲𑁆𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀲𑁆𑀲 𑀲𑀢𑁆𑀢𑀲𑁆𑀲 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀭𑀡𑀸𑀤𑀺𑀦𑀺𑀭𑀬𑀓𑀣𑀁 𑀓𑀣𑁂𑀢𑀺. 𑀢𑀁 𑀘𑁂 𑀲𑀼𑀢𑁆𑀯𑀸 𑀲𑁄 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀢𑀺, 𑀓𑀣𑀺𑀓𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀲𑁄 𑀲𑀼𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀺. ‘‘𑀇𑀤𑀁 𑀲𑀼𑀢𑁆𑀯𑀸 𑀏𑀯𑀭𑀽𑀧𑀁 𑀧𑀸𑀧𑀁 𑀦 𑀓𑀭𑀺𑀲𑁆𑀲𑀢𑀺 𑀑𑀭𑀫𑀺𑀲𑁆𑀲𑀢𑀺 𑀯𑀺𑀭𑀫𑀺𑀲𑁆𑀲𑀢𑀻’’𑀢𑀺 𑀦𑀺𑀭𑀬𑀓𑀣𑀁 𑀓𑀣𑁂𑀢𑀺, 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀕𑁆𑀕𑀓𑀣𑀦𑁆𑀢𑀺 𑀤𑁂𑀯𑀦𑀸𑀝𑀓𑀸𑀤𑀻𑀦𑀁 𑀦𑀦𑁆𑀤𑀦𑀯𑀦𑀸𑀤𑀻𑀦𑀜𑁆𑀘 𑀲𑀫𑁆𑀧𑀢𑁆𑀢𑀺𑀓𑀣𑀁; 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀲𑀕𑁆𑀕𑀸𑀥𑀺𑀫𑀼𑀢𑁆𑀢𑁄 𑀲𑀻𑀖𑀁 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀓𑀸𑀫𑁄 𑀲𑀢𑁆𑀣𑀸𑀳𑀭𑀡𑀯𑀺𑀲𑀔𑀸𑀤𑀦𑀆𑀳𑀸𑀭𑀼𑀧𑀘𑁆𑀙𑁂𑀤-𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀦𑁆𑀦𑀺𑀭𑀼𑀦𑁆𑀥𑀦𑀸𑀤𑀻𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀓𑀣𑀺𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀭𑀢𑀺 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀲𑁄 𑀲𑀼𑀢𑁆𑀯𑀸𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀺 ¶ . ‘‘𑀇𑀫𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀣𑁂𑀢𑀺, 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀅𑀥𑀺𑀫𑀼𑀢𑁆𑀢𑁄 𑀓𑀸𑀮𑀁𑀓𑀭𑁄𑀢𑀺, 𑀅𑀦𑀸𑀧𑀢𑁆𑀢𑀺.

𑁧𑁭𑁯. 𑀆𑀘𑀺𑀓𑁆𑀔𑀦𑀸𑀬𑀁 𑁋 𑀧𑀼𑀝𑁆𑀞𑁄 𑀪𑀡𑀢𑀻𑀢𑀺 ‘‘𑀪𑀦𑁆𑀢𑁂 𑀓𑀣𑀁 𑀫𑀢𑁄 𑀥𑀦𑀁 𑀯𑀸 𑀮𑀪𑀢𑀺 𑀲𑀕𑁆𑀕𑁂 𑀯𑀸 𑀉𑀧𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑁄 𑀪𑀡𑀢𑀺.

𑀅𑀦𑀼𑀲𑀸𑀲𑀦𑀺𑀬𑀁 𑁋 𑀅𑀧𑀼𑀝𑁆𑀞𑁄𑀢𑀺 𑀏𑀯𑀁 𑀅𑀧𑀼𑀘𑁆𑀙𑀺𑀢𑁄 𑀲𑀸𑀫𑀜𑁆𑀜𑁂𑀯 𑀪𑀡𑀢𑀺.

𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 ¶ 𑀅𑀤𑀺𑀦𑁆𑀦𑀸𑀤𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀅𑀘𑁂𑀢𑁂𑀢𑁆𑀯𑀸 𑀓𑀢𑁂𑀦 𑀉𑀧𑀓𑁆𑀓𑀫𑁂𑀦 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀯𑀓𑁆𑀔𑀢𑀺 𑀘 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 ‘‘𑀇𑀫𑀺𑀦𑀸 𑀅𑀬𑀁 𑀫𑀭𑀺𑀲𑁆𑀲𑀢𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀯𑀓𑁆𑀔𑀢𑀺 𑀘 𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺. 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀫𑀭𑀡𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲. 𑀬𑁂𑀦 𑀳𑀺 𑀉𑀧𑀓𑁆𑀓𑀫𑁂𑀦 𑀧𑀭𑁄 𑀫𑀭𑀢𑀺, 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀢𑀲𑁆𑀫𑀺𑀁 𑀫𑀸𑀭𑀺𑀢𑁂𑀧𑀺 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀯𑀓𑁆𑀔𑀢𑀺 ¶ 𑀘 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀸 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀪𑀺𑀓𑁆𑀔𑀽, 𑀢𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀓𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑁋 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁; 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀁. 𑀲𑀘𑁂𑀧𑀺 𑀳𑀺 𑀲𑀺𑀭𑀺𑀲𑀬𑀦𑀁 𑀆𑀭𑀽𑀴𑁆𑀳𑁄 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀭𑀸𑀚𑀸 ‘‘𑀘𑁄𑀭𑁄 𑀤𑁂𑀯 𑀆𑀦𑀻𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀕𑀘𑁆𑀙𑀣 𑀦𑀁 𑀫𑀸𑀭𑁂𑀣𑀸’’𑀢𑀺 𑀳𑀲𑀫𑀸𑀦𑁄𑀯 𑀪𑀡𑀢𑀺, 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑁂𑀯 𑀪𑀡𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀯𑁄𑀓𑀺𑀡𑁆𑀡𑀢𑁆𑀢𑀸 ¶ 𑀧𑀦 𑀅𑀦𑀼𑀧𑁆𑀧𑀩𑀦𑁆𑀥𑀸𑀪𑀸𑀯𑀸 𑀘 𑀤𑀼𑀚𑁆𑀚𑀸𑀦𑀫𑁂𑀢𑀁 𑀧𑀼𑀣𑀼𑀚𑁆𑀚𑀦𑁂𑀳𑀻𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁮𑁦. 𑀯𑀺𑀦𑀻𑀢𑀯𑀢𑁆𑀣𑀼𑀓𑀣𑀸𑀲𑀼 𑀧𑀞𑀫𑀯𑀢𑁆𑀣𑀼𑀲𑁆𑀫𑀺𑀁 𑁋 𑀓𑀸𑀭𑀼𑀜𑁆𑀜𑁂𑀦𑀸𑀢𑀺 𑀢𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀫𑀳𑀦𑁆𑀢𑀁 𑀕𑁂𑀮𑀜𑁆𑀜𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀻𑀮𑀯𑀸 𑀢𑁆𑀯𑀁 𑀓𑀢𑀓𑀼𑀲𑀮𑁄, 𑀓𑀲𑁆𑀫𑀸 𑀫𑀻𑀬𑀫𑀸𑀦𑁄 𑀪𑀸𑀬𑀲𑀺, 𑀦𑀦𑀼 𑀲𑀻𑀮𑀯𑀢𑁄 𑀲𑀕𑁆𑀕𑁄 𑀦𑀸𑀫 𑀫𑀭𑀡𑀫𑀢𑁆𑀢𑀧𑀝𑀺𑀩𑀤𑁆𑀥𑁄𑀬𑁂𑀯𑀸’’𑀢𑀺 𑀏𑀯𑀁 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀼𑀁. 𑀲𑁄𑀧𑀺 𑀪𑀺𑀓𑁆𑀔𑀼 𑀢𑁂𑀲𑀁 𑀲𑀁𑀯𑀡𑁆𑀡𑀦𑀸𑀬 ¶ 𑀆𑀳𑀸𑀭𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀦𑁆𑀢𑀭𑀸𑀯 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀸 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸. 𑀯𑁄𑀳𑀸𑀭𑀯𑀲𑁂𑀦 𑀧𑀦 𑀯𑀼𑀢𑁆𑀢𑀁 ‘‘𑀓𑀸𑀭𑀼𑀜𑁆𑀜𑁂𑀦 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀼’’𑀦𑁆𑀢𑀺. 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀧𑀡𑁆𑀟𑀺𑀢𑁂𑀦 𑀪𑀺𑀓𑁆𑀔𑀼𑀦𑀸 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀫𑀭𑀡𑀯𑀡𑁆𑀡𑁄 𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑁄. 𑀲𑀘𑁂 𑀳𑀺 𑀢𑀲𑁆𑀲 𑀲𑀁𑀯𑀡𑁆𑀡𑀦𑀁 𑀲𑀼𑀢𑁆𑀯𑀸 𑀆𑀳𑀸𑀭𑀽𑀧𑀘𑁆𑀙𑁂𑀤𑀸𑀤𑀺𑀦𑀸 𑀉𑀧𑀓𑁆𑀓𑀫𑁂𑀦 𑀏𑀓𑀚𑀯𑀦𑀯𑀸𑀭𑀸𑀯𑀲𑁂𑀲𑁂𑀧𑀺 𑀆𑀬𑀼𑀲𑁆𑀫𑀺𑀁 𑀅𑀦𑁆𑀢𑀭𑀸 𑀓𑀸𑀮𑀁𑀓𑀭𑁄𑀢𑀺, 𑀇𑀫𑀺𑀦𑀸𑀯 𑀫𑀸𑀭𑀺𑀢𑁄 𑀳𑁄𑀢𑀺. 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀅𑀦𑀼𑀲𑀺𑀝𑁆𑀞𑀺 𑀤𑀸𑀢𑀩𑁆𑀩𑀸 𑁋 ‘‘𑀲𑀻𑀮𑀯𑀢𑁄 𑀦𑀸𑀫 𑀅𑀦𑀘𑁆𑀙𑀭𑀺𑀬𑀸 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀯𑀺𑀳𑀸𑀭𑀸𑀤𑀻𑀲𑀼 𑀆𑀲𑀢𑁆𑀢𑀺𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑀕𑀢𑀁 𑀥𑀫𑁆𑀫𑀕𑀢𑀁 𑀲𑀗𑁆𑀖𑀕𑀢𑀁 𑀓𑀸𑀬𑀕𑀢𑀜𑁆𑀘 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁂 𑀅𑀧𑁆𑀧𑀫𑀸𑀤𑁄 𑀓𑀸𑀢𑀩𑁆𑀩𑁄’’𑀢𑀺. 𑀫𑀭𑀡𑀯𑀡𑁆𑀡𑁂 𑀘 𑀲𑀁𑀯𑀡𑁆𑀡𑀺𑀢𑁂𑀧𑀺 𑀬𑁄 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀓𑀜𑁆𑀘𑀺 𑀉𑀧𑀓𑁆𑀓𑀫𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀣𑀸𑀬𑀼𑀦𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀫𑀭𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀲𑀁𑀯𑀡𑁆𑀡𑀓𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑁋 𑀦 𑀘 𑀪𑀺𑀓𑁆𑀔𑀯𑁂 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀻𑀤𑀺𑀲𑀁 𑀆𑀲𑀦𑀁 𑀧𑀝𑀺𑀯𑁂𑀓𑁆𑀔𑀺𑀢𑀩𑁆𑀩𑀁 ¶ , 𑀓𑀻𑀤𑀺𑀲𑀁 𑀦 𑀧𑀝𑀺𑀯𑁂𑀓𑁆𑀔𑀺𑀢𑀩𑁆𑀩𑀁? 𑀬𑀁 𑀲𑀼𑀤𑁆𑀥𑀁 𑀆𑀲𑀦𑀫𑁂𑀯 𑀳𑁄𑀢𑀺 𑀅𑀧𑀘𑁆𑀘𑀢𑁆𑀣𑀭𑀡𑀓𑀁, 𑀬𑀜𑁆𑀘 𑀆𑀕𑀦𑁆𑀢𑁆𑀯𑀸 𑀞𑀺𑀢𑀸𑀦𑀁 𑀧𑀲𑁆𑀲𑀢𑀁𑀬𑁂𑀯 𑀅𑀢𑁆𑀣𑀭𑀻𑀬𑀢𑀺, 𑀢𑀁 𑀦𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 ¶ , 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀦𑀼𑀲𑁆𑀲𑀸 𑀲𑀬𑀁 𑀳𑀢𑁆𑀣𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 ‘‘𑀇𑀥 𑀪𑀦𑁆𑀢𑁂 𑀦𑀺𑀲𑀻𑀤𑀣𑀸’’𑀢𑀺 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀧𑀞𑀫𑀫𑁂𑀯𑀸𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀧𑀘𑁆𑀙𑀸 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀲𑀗𑁆𑀓𑀫𑀦𑁆𑀢𑀺, 𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀫𑁆𑀧𑀺 𑀢𑀦𑀼𑀓𑁂𑀦 𑀯𑀢𑁆𑀣𑁂𑀦 𑀬𑀣𑀸 𑀢𑀮𑀁 𑀤𑀺𑀲𑁆𑀲𑀢𑀺, 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀁 𑀧𑀦 𑀧𑀝𑀺𑀓𑀘𑁆𑀘𑁂𑀯 𑀧𑀸𑀯𑀸𑀭𑀓𑁄𑀚𑀯𑀸𑀤𑀻𑀳𑀺 𑀅𑀢𑁆𑀣𑀢𑀁 𑀳𑁄𑀢𑀺, 𑀢𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀖𑀦𑀲𑀸𑀝𑀓𑁂𑀦𑀸𑀧𑀺 𑀅𑀢𑁆𑀣𑀢𑁂 𑀬𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀺, 𑀢𑀁 𑀦𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁.

𑀫𑀼𑀲𑀮𑀯𑀢𑁆𑀣𑀼𑀲𑁆𑀫𑀺𑀁 𑁋 𑀅𑀲𑀜𑁆𑀘𑀺𑀘𑁆𑀘𑁄𑀢𑀺 𑀅𑀯𑀥𑀓𑀘𑁂𑀢𑀦𑁄 𑀯𑀺𑀭𑀤𑁆𑀥𑀧𑀬𑁄𑀕𑁄 𑀳𑀺 𑀲𑁄. 𑀢𑁂𑀦𑀸𑀳 ‘‘𑀅𑀲𑀜𑁆𑀘𑀺𑀘𑁆𑀘𑁄 𑀅𑀳’’𑀦𑁆𑀢𑀺. 𑀉𑀤𑀼𑀓𑁆𑀔𑀮𑀯𑀢𑁆𑀣𑀼 𑀉𑀢𑁆𑀢𑀸𑀦𑀫𑁂𑀯. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀯𑀢𑁆𑀣𑀽𑀲𑀼𑀧𑀞𑀫𑀯𑀢𑁆𑀣𑀼𑀲𑁆𑀫𑀺𑀁 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀝𑀺𑀩𑀦𑁆𑀥𑀁 𑀫𑀸 𑀅𑀓𑀸𑀲𑀻’’𑀢𑀺 𑀧𑀡𑀸𑀫𑁂𑀲𑀺. 𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑀗𑁆𑀖𑀫𑀚𑁆𑀛𑁂𑀧𑀺 𑀕𑀡𑀫𑀚𑁆𑀛𑁂𑀧𑀺 ‘‘𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀢𑁂𑀦 𑀯𑀘𑀦𑁂𑀦 𑀅𑀝𑁆𑀝𑀻𑀬𑀫𑀸𑀦𑁄 ‘‘𑀫𑀭𑀢𑀼 𑀅𑀬’’𑀦𑁆𑀢𑀺 𑀧𑀡𑀸𑀫𑁂𑀲𑀺. 𑀢𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑁋 𑀢𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦 𑀣𑀼𑀮𑁆𑀮𑀘𑁆𑀘𑀬𑀁.

𑁧𑁮𑁧. 𑀢𑀢𑁄 ¶ 𑀧𑀭𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑀸𑀭𑀸𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀲𑁄 𑀪𑀺𑀓𑁆𑀔𑀼 𑀅𑀕𑁆𑀕𑀧𑀺𑀡𑁆𑀟𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸𑀯 𑀪𑀼𑀜𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀓𑀸𑀭𑀺𑀓𑀁 𑀅𑀤𑀸𑀲𑀻’’𑀢𑀺. 𑀅𑀕𑁆𑀕𑀓𑀸𑀭𑀺𑀓𑀦𑁆𑀢𑀺 𑀅𑀕𑁆𑀕𑀓𑀺𑀭𑀺𑀬𑀁; 𑀧𑀞𑀫𑀁 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀁 𑀅𑀕𑁆𑀕𑀕𑁆𑀕𑀁 𑀯𑀸 𑀧𑀡𑀻𑀢𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀸 𑀧𑀦 𑀢𑀲𑁆𑀲 𑀤𑀸𑀦𑀲𑀗𑁆𑀔𑀸𑀢𑀸 𑀅𑀕𑁆𑀕𑀓𑀺𑀭𑀺𑀬𑀸, 𑀲𑀸 𑀦 𑀲𑀓𑁆𑀓𑀸 𑀤𑀸𑀢𑀼𑀁, 𑀧𑀺𑀡𑁆𑀟𑀧𑀸𑀢𑀜𑁆𑀳𑀺 𑀲𑁄 𑀣𑁂𑀭𑀸𑀲𑀦𑀢𑁄 ¶ 𑀧𑀝𑁆𑀞𑀸𑀬 𑀅𑀤𑀸𑀲𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀢𑁂 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀭𑀺𑀪𑀼𑀢𑁆𑀢𑀧𑀺𑀡𑁆𑀟𑀧𑀸𑀢𑀸 𑀪𑀺𑀓𑁆𑀔𑀽; 𑀢𑁂 𑀓𑀺𑀭 𑀲𑀩𑁆𑀩𑁂𑀧𑀺 𑀓𑀸𑀮𑀫𑀓𑀁𑀲𑀼. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀲𑁆𑀲𑀤𑁆𑀥𑁂𑀲𑀼 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂𑀲𑀼 𑀓𑀼𑀮𑁂𑀲𑀼 𑀲𑀓𑁆𑀓𑀘𑁆𑀘𑀁 𑀧𑀡𑀻𑀢𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀭𑁂𑀲𑀁 𑀤𑀸𑀢𑀩𑁆𑀩𑀁. 𑀬𑀫𑁆𑀧𑀺 𑀆𑀪𑀺𑀤𑁄𑀲𑀺𑀓𑀁 𑀪𑀢𑁆𑀢𑀁 𑀯𑀸 𑀔𑀚𑁆𑀚𑀓𑀁 𑀯𑀸 𑀢𑀢𑁄 𑀮𑀪𑀢𑀺, 𑀢𑀫𑁆𑀧𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀧𑀺𑀳𑀺𑀢𑀯𑀢𑁆𑀣𑀼𑀫𑁆𑀧𑀺 𑀳𑀺 𑀲𑀧𑁆𑀧𑀯𑀺𑀘𑁆𑀙𑀺𑀓𑀸𑀤𑀻𑀳𑀺 𑀅𑀥𑀺𑀲𑀬𑀺𑀢𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀢𑀸𑀦𑀺 𑀓𑀼𑀮𑀸𑀦𑀺 𑀤𑁂𑀦𑁆𑀢𑀺. 𑀕𑀦𑁆𑀥𑀳𑀮𑀺𑀤𑁆𑀤𑀸𑀤𑀺𑀫𑀓𑁆𑀔𑀺𑀢𑁄𑀧𑀺 𑀢𑀢𑁄 𑀧𑀺𑀡𑁆𑀟𑀧𑀸𑀢𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑀭𑀻𑀭𑁂 𑀭𑁄𑀕𑀝𑁆𑀞𑀸𑀦𑀸𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀞𑀧𑀺𑀢𑀪𑀢𑁆𑀢𑀫𑁆𑀧𑀺 𑀳𑀺 𑀢𑀸𑀦𑀺 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺.

𑀯𑀻𑀫𑀁𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀯𑀻𑀫𑀁𑀲𑀫𑀸𑀦𑁄 𑀤𑁆𑀯𑁂 𑀯𑀻𑀫𑀁𑀲𑀢𑀺 𑁋 ‘‘𑀲𑀓𑁆𑀓𑁄𑀢𑀺 𑀦𑀼 𑀔𑁄 𑀇𑀫𑀁 𑀫𑀸𑀭𑁂𑀢𑀼𑀁 𑀦𑁄’’𑀢𑀺 𑀯𑀺𑀲𑀁 𑀯𑀸 𑀯𑀻𑀫𑀁𑀲𑀢𑀺, ‘‘𑀫𑀭𑁂𑀬𑁆𑀬 𑀦𑀼 𑀔𑁄 𑀅𑀬𑀁 𑀇𑀫𑀁 𑀯𑀺𑀲𑀁 𑀔𑀸𑀤𑀺𑀢𑁆𑀯𑀸 𑀦𑁄’’𑀢𑀺 𑀧𑀼𑀕𑁆𑀕𑀮𑀁 𑀯𑀸. 𑀉𑀪𑀬𑀣𑀸𑀧𑀺 𑀯𑀻𑀫𑀁𑀲𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑁂 𑀫𑀭𑀢𑀼 𑀯𑀸 𑀫𑀸 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁. ‘‘𑀇𑀤𑀁 𑀯𑀺𑀲𑀁 𑀏𑀢𑀁 𑀫𑀸𑀭𑁂𑀢𑀽’’𑀢𑀺 𑀯𑀸 ¶ ‘‘𑀇𑀤𑀁 𑀯𑀺𑀲𑀁 𑀔𑀸𑀤𑀺𑀢𑁆𑀯𑀸 𑀅𑀬𑀁 𑀫𑀭𑀢𑀽’’𑀢𑀺 𑀯𑀸 𑀏𑀯𑀁 𑀤𑀺𑀦𑁆𑀦𑁂 𑀧𑀦 𑀲𑀘𑁂 𑀫𑀭𑀢𑀺, 𑀧𑀸𑀭𑀸𑀚𑀺𑀓𑀁; 𑀦𑁄 𑀘𑁂, 𑀣𑀼𑀮𑁆𑀮𑀘𑁆𑀘𑀬𑀁.

𑁧𑁮𑁨-𑁩. 𑀇𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀲𑀺𑀮𑀸𑀯𑀢𑁆𑀣𑀽𑀦𑀺 𑀢𑀻𑀡𑀺 𑀇𑀝𑁆𑀞𑀓𑀯𑀸𑀲𑀺𑀕𑁄𑀧𑀸𑀦𑀲𑀻𑀯𑀢𑁆𑀣𑀽𑀦𑀺 𑀘 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀦 𑀓𑁂𑀯𑀮𑀜𑁆𑀘 𑀲𑀺𑀮𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀅𑀬𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑁄 𑀳𑁄𑀢𑀺, 𑀤𑀡𑁆𑀟𑀫𑀼𑀕𑁆𑀕𑀭𑀦𑀺𑀔𑀸𑀤𑀦𑀯𑁂𑀫𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑀫𑁆𑀧𑀺 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀝𑀓𑀯𑀢𑁆𑀣𑀽𑀲𑀼 𑁋 𑀅𑀝𑁆𑀝𑀓𑁄𑀢𑀺 𑀯𑁂𑀳𑀸𑀲𑀫𑀜𑁆𑀘𑁄 𑀯𑀼𑀘𑁆𑀘𑀢𑀺; 𑀬𑀁 𑀲𑁂𑀢𑀓𑀫𑁆𑀫𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀻𑀦𑀁 𑀅𑀢𑁆𑀣𑀸𑀬 𑀩𑀦𑁆𑀥𑀦𑁆𑀢𑀺. 𑀢𑀢𑁆𑀣 𑀆𑀯𑀼𑀲𑁄 𑀅𑀢𑁆𑀭𑀝𑁆𑀞𑀺𑀢𑁄 𑀩𑀦𑁆𑀥𑀸𑀳𑀻𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀬𑀢𑁆𑀭 𑀞𑀺𑀢𑁄 𑀧𑀢𑀺𑀢𑁆𑀯𑀸 𑀔𑀸𑀡𑀼𑀦𑀸 𑀯𑀸 𑀪𑀺𑀚𑁆𑀚𑁂𑀬𑁆𑀬, 𑀲𑁄𑀩𑁆𑀪𑀧𑀧𑀸𑀢𑀸𑀤𑀻𑀲𑀼 𑀯𑀸 𑀫𑀭𑁂𑀬𑁆𑀬 ¶ , 𑀢𑀸𑀤𑀺𑀲𑀁 𑀞𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀣 𑀘 𑀓𑁄𑀘𑀺 𑀉𑀧𑀭𑀺𑀞𑀸𑀦𑀁 𑀦𑀺𑀬𑀸𑀫𑁂𑀢𑀺 ‘‘𑀇𑀢𑁄 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀓𑁄𑀘𑀺 𑀳𑁂𑀝𑁆𑀞𑀸 𑀞𑀸𑀦𑀁 ‘‘𑀇𑀥 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀓𑁄𑀘𑀺 𑀉𑀪𑀬𑀫𑁆𑀧𑀺 ‘‘𑀇𑀢𑁄 𑀇𑀥 𑀧𑀢𑀺𑀢𑁆𑀯𑀸 ¶ 𑀫𑀭𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀭 𑀬𑁄 𑀉𑀧𑀭𑀺 𑀦𑀺𑀬𑀫𑀺𑀢𑀝𑁆𑀞𑀸𑀦𑀸 𑀅𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁄 𑀧𑀢𑀢𑀺, 𑀳𑁂𑀝𑁆𑀞𑀸 𑀦𑀺𑀬𑀫𑀺𑀢𑀝𑁆𑀞𑀸𑀦𑁂 𑀯𑀸 𑀅𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀢𑀢𑀺, 𑀉𑀪𑀬𑀦𑀺𑀬𑀸𑀫𑁂 𑀯𑀸 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀯𑀺𑀭𑀸𑀥𑁂𑀢𑁆𑀯𑀸 𑀧𑀢𑀢𑀺, 𑀢𑀲𑁆𑀫𑀺𑀁 𑀫𑀢𑁂 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀯𑀺𑀳𑀸𑀭𑀘𑁆𑀙𑀸𑀤𑀦𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑀪𑀺𑀭𑀢𑀺𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀲𑀫𑀼𑀤𑀸𑀘𑀸𑀭𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀸𑀲𑀦𑁂 𑀅𑀦𑀪𑀺𑀭𑀢𑁄 𑀕𑀺𑀳𑀺𑀪𑀸𑀯𑀸𑀪𑀺𑀫𑀼𑀔𑁄 𑀚𑀸𑀢𑁄. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀸𑀯 𑀲𑀻𑀮𑀪𑁂𑀤𑀁 𑀦 𑀧𑀸𑀧𑀼𑀡𑀸𑀫𑀺 𑀢𑀸𑀯 𑀫𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀢𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀧𑀸𑀢𑁂 𑀧𑀧𑀢𑀦𑁆𑀢𑁄 𑀅𑀜𑁆𑀜𑀢𑀭𑀁 𑀯𑀺𑀮𑀻𑀯𑀓𑀸𑀭𑀁 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀯𑀺𑀮𑀻𑀯𑀓𑀸𑀭𑀦𑁆𑀢𑀺 𑀯𑁂𑀡𑀼𑀓𑀸𑀭𑀁. 𑀦 𑀘 𑀪𑀺𑀓𑁆𑀔𑀯𑁂 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀦 𑀅𑀢𑁆𑀢𑀸 𑀧𑀸𑀢𑁂𑀢𑀩𑁆𑀩𑁄. 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀦 𑀓𑁂𑀯𑀮𑀁 𑀦 𑀧𑀸𑀢𑁂𑀢𑀩𑁆𑀩𑀁, 𑀅𑀜𑁆𑀜𑁂𑀦𑀧𑀺 𑀬𑁂𑀦 𑀓𑁂𑀦𑀘𑀺 𑀉𑀧𑀓𑁆𑀓𑀫𑁂𑀦 𑀅𑀦𑁆𑀢𑀫𑀲𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑁂𑀦𑀧𑀺 𑀦 𑀫𑀸𑀭𑁂𑀢𑀩𑁆𑀩𑁄. 𑀬𑁄𑀧𑀺 𑀳𑀺 𑀕𑀺𑀮𑀸𑀦𑁄 𑀯𑀺𑀚𑁆𑀚𑀫𑀸𑀦𑁂 𑀪𑁂𑀲𑀚𑁆𑀚𑁂 𑀘 𑀉𑀧𑀝𑁆𑀞𑀸𑀓𑁂𑀲𑀼 𑀘 𑀫𑀭𑀺𑀢𑀼𑀓𑀸𑀫𑁄 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀬𑀲𑁆𑀲 𑀧𑀦 𑀫𑀳𑀸𑀆𑀩𑀸𑀥𑁄 𑀘𑀺𑀭𑀸𑀦𑀼𑀩𑀤𑁆𑀥𑁄, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀳𑀦𑁆𑀢𑀸 𑀓𑀺𑀮𑀫𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺 ‘‘𑀓𑀤𑀸 𑀦𑀼 𑀔𑁄 𑀕𑀺𑀮𑀸𑀦𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀅𑀝𑁆𑀝𑀻𑀬𑀦𑁆𑀢𑀺. 𑀲𑀘𑁂 𑀲𑁄 ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑁄𑀧𑀺 𑀦 𑀢𑀺𑀝𑁆𑀞𑀢𑀺, 𑀪𑀺𑀓𑁆𑀔𑀽 𑀘 𑀓𑀺𑀮𑀫𑀦𑁆𑀢𑀻’’𑀢𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀪𑁂𑀲𑀚𑁆𑀚𑀁 𑀦 𑀲𑁂𑀯𑀢𑀺 𑀯𑀝𑁆𑀝𑀢𑀺. 𑀬𑁄 𑀧𑀦 ‘‘𑀅𑀬𑀁 𑀭𑁄𑀕𑁄 𑀔𑀭𑁄, 𑀆𑀬𑀼𑀲𑀗𑁆𑀔𑀸𑀭𑀸 𑀦 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀜𑁆𑀘 𑀫𑁂 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀉𑀧𑀘𑁆𑀙𑀺𑀦𑁆𑀤𑀢𑀺 𑀯𑀝𑁆𑀝𑀢𑀺𑀬𑁂𑀯. 𑀅𑀕𑀺𑀮𑀸𑀦𑀲𑁆𑀲𑀸𑀧𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀲𑁆𑀲 ‘‘𑀆𑀳𑀸𑀭𑀧𑀭𑀺𑀬𑁂𑀲𑀦𑀁 𑀦𑀸𑀫 𑀧𑀧𑀜𑁆𑀘𑁄, 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀅𑀦𑀼𑀬𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 ¶ 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀝𑁆𑀝𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀺. 𑀲𑀪𑀸𑀕𑀸𑀦𑀜𑁆𑀳𑀺 ¶ 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀲𑀺𑀮𑀸𑀯𑀢𑁆𑀣𑀼𑀲𑁆𑀫𑀺𑀁 𑁋 𑀤𑀯𑀸𑀬𑀸𑀢𑀺 𑀤𑀯𑁂𑀦 𑀳𑀲𑁆𑀲𑁂𑀦; 𑀔𑀺𑀟𑁆𑀟𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀺𑀮𑀸𑀢𑀺 𑀧𑀸𑀲𑀸𑀡𑁄; 𑀦 𑀓𑁂𑀯𑀮𑀜𑁆𑀘 𑀧𑀸𑀲𑀸𑀡𑁄, 𑀅𑀜𑁆𑀜𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀤𑀸𑀭𑀼𑀔𑀡𑁆𑀟𑀁 𑀯𑀸 𑀇𑀝𑁆𑀞𑀓𑀸𑀔𑀡𑁆𑀟𑀁 𑀯𑀸 𑀳𑀢𑁆𑀣𑁂𑀦 𑀯𑀸 𑀬𑀦𑁆𑀢𑁂𑀦 𑀯𑀸 𑀧𑀯𑀺𑀚𑁆𑀛𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀸𑀲𑀸𑀡𑀸𑀤𑀬𑁄 𑀳𑀲𑀦𑁆𑀢𑀸 𑀳𑀲𑀦𑁆𑀢𑀸 𑀧𑀯𑀝𑁆𑀝𑁂𑀦𑁆𑀢𑀺𑀧𑀺 𑀔𑀺𑀧𑀦𑁆𑀢𑀺𑀧𑀺 𑀉𑀓𑁆𑀔𑀺𑀧𑀦𑁆𑀢𑀺𑀧𑀺 𑀓𑀫𑁆𑀫𑀲𑀫𑀬𑁄𑀢𑀺 𑀯𑀝𑁆𑀝𑀢𑀺. 𑀅𑀜𑁆𑀜𑀫𑁆𑀧𑀺 𑀈𑀤𑀺𑀲𑀁 𑀦𑀯𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀸 𑀪𑀡𑁆𑀟𑀓𑀁 𑀯𑀸 𑀥𑁄𑀯𑀦𑁆𑀢𑀸 𑀭𑀼𑀓𑁆𑀔𑀁 𑀯𑀸 𑀥𑁄𑀯𑀦𑀤𑀡𑁆𑀟𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀯𑀺𑀚𑁆𑀛𑀦𑁆𑀢𑀺, 𑀯𑀝𑁆𑀝𑀢𑀺. 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀸𑀮𑀸𑀤𑀻𑀲𑀼 𑀓𑀸𑀓𑁂 𑀯𑀸 𑀲𑁄𑀡𑁂 𑀯𑀸 𑀓𑀝𑁆𑀞𑀁 𑀯𑀸 𑀓𑀣𑀮𑀁 𑀯𑀸 𑀔𑀺𑀧𑀺𑀢𑁆𑀯𑀸 𑀧𑀮𑀸𑀧𑁂𑀢𑀺, 𑀯𑀝𑁆𑀝𑀢𑀺.

𑁧𑁮𑁪. 𑀲𑁂𑀤𑀦𑀸𑀤𑀺𑀯𑀢𑁆𑀣𑀽𑀦𑀺 ¶ 𑀲𑀩𑁆𑀩𑀸𑀦𑁂𑀯 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀏𑀢𑁆𑀣 𑀘 𑀅𑀳𑀁 𑀓𑀼𑀓𑁆𑀓𑀼𑀘𑁆𑀘𑀓𑁄𑀢𑀺 𑀦 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩𑀁, 𑀳𑀺𑀢𑀓𑀸𑀫𑀢𑀸𑀬 𑀲𑀩𑁆𑀩𑀁 𑀕𑀺𑀮𑀸𑀦𑀲𑁆𑀲 𑀩𑀮𑀸𑀩𑀮𑀜𑁆𑀘 𑀭𑀼𑀘𑀺𑀜𑁆𑀘 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀜𑁆𑀘 𑀉𑀧𑀮𑀓𑁆𑀔𑁂𑀢𑁆𑀯𑀸 𑀓𑀸𑀢𑀩𑁆𑀩𑀁.

𑁧𑁮𑁫. 𑀚𑀸𑀭𑀕𑀩𑁆𑀪𑀺𑀦𑀺𑀯𑀢𑁆𑀣𑀼𑀲𑁆𑀫𑀺𑀁 𑁋 𑀧𑀯𑀼𑀢𑁆𑀣𑀧𑀢𑀺𑀓𑀸𑀢𑀺 𑀧𑀯𑀸𑀲𑀁 𑀕𑀢𑀧𑀢𑀺𑀓𑀸. 𑀕𑀩𑁆𑀪𑀧𑀸𑀢𑀦𑀦𑁆𑀢𑀺 𑀬𑁂𑀦 𑀧𑀭𑀺𑀪𑀼𑀢𑁆𑀢𑁂𑀦 𑀕𑀩𑁆𑀪𑁄 𑀧𑀢𑀢𑀺, 𑀢𑀸𑀤𑀺𑀲𑀁 𑀪𑁂𑀲𑀚𑁆𑀚𑀁. 𑀤𑁆𑀯𑁂 𑀧𑀚𑀸𑀧𑀢𑀺𑀓𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀕𑀩𑁆𑀪𑀫𑀤𑁆𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 ‘‘𑀫𑀤𑁆𑀤𑀺𑀢𑁆𑀯𑀸 𑀧𑀸𑀢𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀫𑀤𑁆𑀤𑀸𑀧𑁂𑀢𑁆𑀯𑀸 𑀧𑀸𑀢𑁂𑀢𑀺, 𑀯𑀺𑀲𑀗𑁆𑀓𑁂𑀢𑀁. ‘‘𑀫𑀤𑁆𑀤𑀸𑀧𑁂𑀢𑁆𑀯𑀸 𑀧𑀸𑀢𑀸𑀧𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀬𑀁 𑀫𑀤𑁆𑀤𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀯𑀺𑀲𑀗𑁆𑀓𑁂𑀢𑀫𑁂𑀯. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀧𑀭𑀺𑀬𑀸𑀬𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 ‘‘𑀕𑀩𑁆𑀪𑁄 𑀦𑀸𑀫 𑀫𑀤𑁆𑀤𑀺𑀢𑁂 𑀧𑀢𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀸 𑀲𑀬𑀁 𑀯𑀸 𑀫𑀤𑁆𑀤𑀢𑀼, 𑀅𑀜𑁆𑀜𑁂𑀦 𑀯𑀸 𑀫𑀤𑁆𑀤𑀸𑀧𑁂𑀢𑁆𑀯𑀸 𑀧𑀸𑀢𑁂𑀢𑀼, 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺; 𑀧𑀸𑀭𑀸𑀚𑀺𑀓𑀫𑁂𑀯 𑀢𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑀯𑀜𑁆𑀛𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑁋 𑀯𑀜𑁆𑀛𑀺𑀢𑁆𑀣𑀻 𑀦𑀸𑀫 𑀬𑀸 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺. 𑀕𑀩𑁆𑀪𑀁 𑀅𑀕𑀡𑁆𑀳𑀦𑀓𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀬𑀲𑁆𑀲𑀸 𑀧𑀦 𑀕𑀳𑀺𑀢𑁄𑀧𑀺 𑀕𑀩𑁆𑀪𑁄 𑀦 𑀲𑀡𑁆𑀞𑀸𑀢𑀺, 𑀢𑀁𑀬𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀉𑀢𑀼𑀲𑀫𑀬𑁂 𑀓𑀺𑀭 𑀲𑀩𑁆𑀩𑀺𑀢𑁆𑀣𑀺𑀬𑁄 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀬𑀸 𑀧𑀦𑀸𑀬𑀁 ‘‘𑀯𑀜𑁆𑀛𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 ¶ 𑀅𑀓𑀼𑀲𑀮𑀯𑀺𑀧𑀸𑀓𑁄 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀢𑁂 𑀧𑀭𑀺𑀢𑁆𑀢𑀓𑀼𑀲𑀮𑀯𑀺𑀧𑀸𑀓𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀅𑀓𑀼𑀲𑀮𑀯𑀺𑀧𑀸𑀓𑁂𑀦 𑀅𑀥𑀺𑀪𑀽𑀢𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀅𑀪𑀺𑀦𑀯𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀳𑀺 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀕𑀩𑁆𑀪𑁄 𑀦 𑀲𑀡𑁆𑀞𑀸𑀢𑀺 𑁋 𑀯𑀸𑀢𑁂𑀦 𑀯𑀸 𑀧𑀸𑀡𑀓𑁂𑀳𑀺 𑀯𑀸. 𑀯𑀸𑀢𑁄 𑀲𑁄𑀲𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀢𑀺, 𑀧𑀸𑀡𑀓𑀸 𑀔𑀸𑀤𑀺𑀢𑁆𑀯𑀸. 𑀢𑀲𑁆𑀲 𑀧𑀦 𑀯𑀸𑀢𑀲𑁆𑀲 𑀧𑀸𑀡𑀓𑀸𑀦𑀁 𑀯𑀸 𑀧𑀝𑀺𑀖𑀸𑀢𑀸𑀬 𑀪𑁂𑀲𑀚𑁆𑀚𑁂 𑀓𑀢𑁂 𑀕𑀩𑁆𑀪𑁄 𑀲𑀡𑁆𑀞𑀳𑁂𑀬𑁆𑀬; 𑀲𑁄 𑀪𑀺𑀓𑁆𑀔𑀼 𑀢𑀁 𑀅𑀓𑀢𑁆𑀯𑀸 𑀅𑀜𑁆𑀜𑀁 𑀔𑀭𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀢𑁂𑀦 𑀲𑀸 𑀓𑀸𑀮𑀫𑀓𑀸𑀲𑀺. 𑀪𑀕𑀯𑀸 𑀪𑁂𑀲𑀚𑁆𑀚𑀲𑁆𑀲 𑀓𑀝𑀢𑁆𑀢𑀸 𑀤𑀼𑀓𑁆𑀓𑀝𑀁 𑀧𑀜𑁆𑀜𑀸𑀧𑁂𑀲𑀺.

𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 ¶ 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀆𑀕𑀢𑀸𑀕𑀢𑀲𑁆𑀲 𑀧𑀭𑀚𑀦𑀲𑁆𑀲 𑀪𑁂𑀲𑀚𑁆𑀚𑀁 𑀦 𑀓𑀸𑀢𑀩𑁆𑀩𑀁, 𑀓𑀭𑁄𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑀜𑁆𑀘𑀦𑁆𑀦𑀁 𑀧𑀦 𑀲𑀳𑀥𑀫𑁆𑀫𑀺𑀓𑀸𑀦𑀁 𑀓𑀸𑀢𑀩𑁆𑀩𑀁 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸𑀢𑀺. 𑀲𑀫𑀲𑀻𑀮𑀲𑀤𑁆𑀥𑀸𑀧𑀜𑁆𑀜𑀸𑀦𑀜𑁆𑀳𑀺 𑀏𑀢𑁂𑀲𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀬𑀼𑀢𑁆𑀢𑀸𑀦𑀁 𑀪𑁂𑀲𑀚𑁆𑀚𑀁 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺, 𑀓𑀭𑁄𑀦𑁆𑀢𑁂𑀦 𑀘 𑀲𑀘𑁂 𑀢𑁂𑀲𑀁 𑀅𑀢𑁆𑀣𑀺, 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀅𑀢𑁆𑀢𑀦𑁄𑀧𑀺 𑀦𑀢𑁆𑀣𑀺, 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀮𑀪𑀦𑁆𑀢𑁂𑀦 𑀕𑀺𑀮𑀸𑀦𑀲𑁆𑀲 𑀅𑀢𑁆𑀣𑀸𑀬 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀆𑀳𑀭𑀺𑀢𑁆𑀯𑀸 𑀓𑀸𑀢𑀩𑁆𑀩𑀁.

𑀅𑀧𑀭𑁂𑀲𑀫𑁆𑀧𑀺 ¶ 𑀧𑀜𑁆𑀘𑀦𑁆𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑁋 𑀫𑀸𑀢𑀼, 𑀧𑀺𑀢𑀼, 𑀢𑀤𑀼𑀧𑀝𑁆𑀞𑀸𑀓𑀸𑀦𑀁, 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲, 𑀧𑀡𑁆𑀟𑀼𑀧𑀮𑀸𑀲𑀲𑁆𑀲𑀸𑀢𑀺. 𑀧𑀡𑁆𑀟𑀼𑀧𑀮𑀸𑀲𑁄 𑀦𑀸𑀫 𑀬𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀬𑀸𑀯 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀬𑀸𑀤𑀺𑀬𑀢𑀺 𑀢𑀸𑀯 𑀯𑀺𑀳𑀸𑀭𑁂 𑀯𑀲𑀢𑀺. 𑀢𑁂𑀲𑀼 𑀲𑀘𑁂 𑀫𑀸𑀢𑀸𑀧𑀺𑀢𑀭𑁄 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺, 𑀦 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀭𑀚𑁆𑀚𑁂𑀧𑀺 𑀞𑀺𑀢𑀸 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀪𑁂𑀲𑀚𑁆𑀚𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸𑀦𑀁 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁, 𑀬𑁄𑀚𑁂𑀢𑀼𑀁 𑀅𑀚𑀸𑀦𑀦𑁆𑀢𑀸𑀦𑀁 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀬 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀫𑀸𑀢𑀭𑀁 𑀯𑀺𑀳𑀸𑀭𑁂 𑀆𑀦𑁂𑀢𑁆𑀯𑀸 𑀚𑀕𑁆𑀕𑀢𑀺, 𑀲𑀩𑁆𑀩𑀁 𑀧𑀭𑀺𑀓𑀫𑁆𑀫𑀁 𑀅𑀦𑀸𑀫𑀲𑀦𑁆𑀢𑁂𑀦 𑀓𑀸𑀢𑀩𑁆𑀩𑀁. 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀲𑀳𑀢𑁆𑀣𑀸 𑀤𑀸𑀢𑀩𑁆𑀩𑀁. 𑀧𑀺𑀢𑀸 𑀧𑀦 𑀬𑀣𑀸 𑀲𑀸𑀫𑀡𑁂𑀭𑁄 𑀏𑀯𑀁 𑀲𑀳𑀢𑁆𑀣𑁂𑀦 𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀸𑀤𑀻𑀦𑀺 ¶ 𑀓𑀢𑁆𑀯𑀸 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀬𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀉𑀧𑀝𑁆𑀞𑀳𑀦𑁆𑀢𑀺 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀸𑀫 𑀬𑁄 𑀯𑁂𑀢𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀤𑀸𑀭𑀽𑀦𑀺 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀬𑀸𑀯 𑀜𑀸𑀢𑀓𑀸 𑀦 𑀧𑀲𑁆𑀲𑀦𑁆𑀢𑀺 𑀢𑀸𑀯 𑀪𑁂𑀲𑀚𑁆𑀚𑀁 𑀓𑀸𑀢𑀩𑁆𑀩𑀁. 𑀬𑁄 𑀧𑀦 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀓𑁄𑀯 𑀳𑀼𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀢𑀲𑁆𑀲 𑀪𑁂𑀲𑀚𑁆𑀚𑀁 𑀓𑀸𑀢𑀩𑁆𑀩𑀫𑁂𑀯. 𑀧𑀡𑁆𑀟𑀼𑀧𑀮𑀸𑀲𑁂𑀧𑀺 𑀲𑀸𑀫𑀡𑁂𑀭𑁂 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀅𑀧𑀭𑁂𑀲𑀫𑁆𑀧𑀺 𑀤𑀲𑀦𑁆𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑁋 𑀚𑁂𑀝𑁆𑀞𑀪𑀸𑀢𑀼, 𑀓𑀦𑀺𑀝𑁆𑀞𑀪𑀸𑀢𑀼, 𑀚𑁂𑀝𑁆𑀞𑀪𑀕𑀺𑀦𑀺𑀬𑀸, 𑀓𑀦𑀺𑀝𑁆𑀞𑀪𑀕𑀺𑀦𑀺𑀬𑀸, 𑀘𑀽𑀴𑀫𑀸𑀢𑀼𑀬𑀸, 𑀫𑀳𑀸𑀫𑀸𑀢𑀼𑀬𑀸, 𑀘𑀽𑀴𑀧𑀺𑀢𑀼𑀦𑁄, 𑀫𑀳𑀸𑀧𑀺𑀢𑀼𑀦𑁄, 𑀧𑀺𑀢𑀼𑀘𑁆𑀙𑀸𑀬, 𑀫𑀸𑀢𑀼𑀮𑀲𑁆𑀲𑀸𑀢𑀺. 𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀢𑁂𑀲𑀁𑀬𑁂𑀯 𑀲𑀦𑁆𑀢𑀓𑀁 𑀪𑁂𑀲𑀚𑁆𑀚𑀁 𑀕𑀳𑁂𑀢𑁆𑀯𑀸 𑀓𑁂𑀯𑀮𑀁 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀦𑀧𑁆𑀧𑀳𑁄𑀦𑁆𑀢𑀺, 𑀬𑀸𑀘𑀦𑁆𑀢𑀺 𑀘 ‘‘𑀤𑁂𑀣 𑀦𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀝𑀺𑀤𑀲𑁆𑀲𑀸𑀫𑀸’’𑀢𑀺 𑀢𑀸𑀯𑀓𑀸𑀮𑀺𑀓𑀁 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀦 𑀬𑀸𑀘𑀦𑁆𑀢𑀺, ‘‘𑀅𑀫𑁆𑀳𑀸𑀓𑀁 𑀪𑁂𑀲𑀚𑁆𑀚𑀁 𑀅𑀢𑁆𑀣𑀺, 𑀢𑀸𑀯𑀓𑀸𑀮𑀺𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀯𑀸 ‘‘𑀬𑀤𑀸 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀢𑀤𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀆𑀪𑁄𑀕𑀁 𑀯𑀸 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀝𑀺𑀤𑁂𑀦𑁆𑀢𑀺, 𑀕𑀳𑁂𑀢𑀩𑁆𑀩𑀁, 𑀦𑁄 𑀘𑁂 𑀤𑁂𑀦𑁆𑀢𑀺, 𑀦 𑀘𑁄𑀤𑁂𑀢𑀩𑁆𑀩𑀸. 𑀏𑀢𑁂 𑀤𑀲 𑀜𑀸𑀢𑀓𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀦 𑀓𑀸𑀢𑀩𑁆𑀩𑀁.

𑀏𑀢𑁂𑀲𑀁 ¶ 𑀧𑀼𑀢𑁆𑀢𑀧𑀭𑀫𑁆𑀧𑀭𑀸𑀬 𑀧𑀦 𑀬𑀸𑀯 𑀲𑀢𑁆𑀢𑀫𑁄 𑀓𑀼𑀮𑀧𑀭𑀺𑀯𑀝𑁆𑀝𑁄 𑀢𑀸𑀯 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀅𑀓𑀢𑀯𑀺𑀜𑁆𑀜𑀢𑁆𑀢𑀺 𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀺. 𑀲𑀘𑁂 𑀪𑀸𑀢𑀼𑀚𑀸𑀬𑀸 𑀪𑀕𑀺𑀦𑀺𑀲𑀸𑀫𑀺𑀓𑁄 𑀯𑀸 𑀕𑀺𑀮𑀸𑀦𑀸 𑀳𑁄𑀦𑁆𑀢𑀺, 𑀜𑀸𑀢𑀓𑀸 𑀘𑁂, 𑀢𑁂𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀜𑁆𑀜𑀸𑀢𑀓𑀸 𑀘𑁂, 𑀪𑀸𑀢𑀼 𑀘 𑀪𑀕𑀺𑀦𑀺𑀬𑀸 𑀘 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁, ‘‘𑀢𑀼𑀫𑁆𑀳𑀸𑀓𑀁 𑀚𑀕𑁆𑀕𑀦𑀝𑁆𑀞𑀸𑀦𑁂 𑀤𑁂𑀣𑀸’’𑀢𑀺. 𑀅𑀣 𑀯𑀸 𑀢𑁂𑀲𑀁 𑀧𑀼𑀢𑁆𑀢𑀸𑀦𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁, ‘‘𑀢𑀼𑀫𑁆𑀳𑀸𑀓𑀁 𑀫𑀸𑀢𑀸𑀧𑀺𑀢𑀽𑀦𑀁 ¶ 𑀤𑁂𑀣𑀸’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀁 𑀅𑀢𑁆𑀣𑀸𑀬 𑀘 𑀲𑀸𑀫𑀡𑁂𑀭𑁂𑀳𑀺 𑀅𑀭𑀜𑁆𑀜𑀢𑁄 𑀪𑁂𑀲𑀚𑁆𑀚𑀁 𑀆𑀳𑀭𑀸𑀧𑁂𑀦𑁆𑀢𑁂𑀦 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑀺 𑀯𑀸 𑀆𑀳𑀭𑀸𑀧𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀆𑀳𑀭𑀸𑀧𑁂𑀢𑁆𑀯𑀸 ¶ 𑀤𑀸𑀢𑀩𑁆𑀩𑀁. 𑀢𑁂𑀳𑀺𑀧𑀺 ‘‘𑀉𑀧𑀚𑁆𑀛𑀸𑀬𑀲𑁆𑀲 𑀆𑀳𑀭𑀸𑀫𑀸’’𑀢𑀺 𑀯𑀢𑁆𑀢𑀲𑀻𑀲𑁂𑀦 𑀆𑀳𑀭𑀺𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀕𑀺𑀮𑀸𑀦𑀸 𑀯𑀺𑀳𑀸𑀭𑀁 𑀆𑀕𑀘𑁆𑀙𑀦𑁆𑀢𑀺, 𑀉𑀧𑀚𑁆𑀛𑀸𑀬𑁄 𑀘 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀓𑀁 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁. 𑀦𑁄 𑀘𑁂 𑀅𑀢𑁆𑀣𑀺, 𑀅𑀢𑁆𑀢𑀦𑁄 𑀪𑁂𑀲𑀚𑁆𑀚𑀁 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀅𑀢𑁆𑀢𑀦𑁄𑀧𑀺 𑀅𑀲𑀦𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑁂𑀦𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀫𑀸𑀢𑀸𑀧𑀺𑀢𑀽𑀲𑀼 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑁂𑀲𑀼𑀧𑀺. 𑀅𑀜𑁆𑀜𑁄𑀧𑀺 𑀬𑁄 𑀆𑀕𑀦𑁆𑀢𑀼𑀓𑁄 𑀯𑀸 𑀘𑁄𑀭𑁄 𑀯𑀸 𑀬𑀼𑀤𑁆𑀥𑀧𑀭𑀸𑀚𑀺𑀢𑁄 𑀇𑀲𑁆𑀲𑀭𑁄 𑀯𑀸 𑀜𑀸𑀢𑀓𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁄 𑀓𑀧𑀡𑁄 𑀯𑀸 𑀕𑀫𑀺𑀬𑀫𑀦𑀼𑀲𑁆𑀲𑁄 𑀯𑀸 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀢𑀺, 𑀲𑀩𑁆𑀩𑁂𑀲𑀁 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀪𑁂𑀲𑀚𑁆𑀚𑀁 𑀓𑀸𑀢𑀩𑁆𑀩𑀁.

𑀲𑀤𑁆𑀥𑀁 𑀓𑀼𑀮𑀁 𑀳𑁄𑀢𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀬𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀺𑀬𑀁, 𑀢𑀢𑁆𑀭 𑀘𑁂 𑀓𑁄𑀘𑀺 𑀕𑀺𑀮𑀸𑀦𑁄 𑀳𑁄𑀢𑀺, 𑀢𑀲𑁆𑀲𑀢𑁆𑀣𑀸𑀬 𑀯𑀺𑀲𑁆𑀲𑀸𑀲𑁂𑀦 ‘‘𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀪𑀦𑁆𑀢𑁂 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦𑁂𑀯 𑀤𑀸𑀢𑀩𑁆𑀩𑀁 𑀦 𑀓𑀸𑀢𑀩𑁆𑀩𑀁. 𑀅𑀣 𑀧𑀦 𑀓𑀧𑁆𑀧𑀺𑀬𑀁 𑀜𑀢𑁆𑀯𑀸 𑀏𑀯𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀪𑀦𑁆𑀢𑁂, 𑀅𑀲𑀼𑀓𑀲𑁆𑀲 𑀦𑀸𑀫 𑀭𑁄𑀕𑀲𑁆𑀲 𑀓𑀺𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀫𑀸𑀢𑀸 𑀕𑀺𑀮𑀸𑀦𑀸, 𑀪𑁂𑀲𑀚𑁆𑀚𑀁 𑀢𑀸𑀯 𑀆𑀘𑀺𑀓𑁆𑀔𑀣𑀸’’𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑁂 𑀧𑀦 𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀅𑀜𑁆𑀜𑀫𑀜𑁆𑀜𑀁 𑀧𑀦 𑀓𑀣𑀸 𑀓𑀸𑀢𑀩𑁆𑀩𑀸 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀇𑀫𑀲𑁆𑀫𑀺𑀁 𑀭𑁄𑀕𑁂 𑀓𑀺𑀁 𑀪𑁂𑀲𑀚𑁆𑀚𑀁 𑀓𑀭𑀺𑀁𑀲𑀽’’𑀢𑀺? ‘‘𑀇𑀤𑀜𑁆𑀘𑀺𑀤𑀜𑁆𑀘 𑀪𑀦𑁆𑀢𑁂’’𑀢𑀺. 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀫𑀸𑀢𑀼 𑀪𑁂𑀲𑀚𑁆𑀚𑀁 𑀓𑀭𑁄𑀢𑀺, 𑀯𑀝𑁆𑀝𑀢𑁂𑀯.

𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄𑀧𑀺 𑀓𑀺𑀭 𑀯𑀲𑀪𑀭𑀜𑁆𑀜𑁄 𑀤𑁂𑀯𑀺𑀬𑀸 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 ‘‘𑀦 𑀚𑀸𑀦𑀸𑀫𑀻’’𑀢𑀺 𑀅𑀯𑀢𑁆𑀯𑀸 𑀏𑀯𑀫𑁂𑀯 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀼𑀮𑁆𑀮𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀪𑁂𑀲𑀚𑁆𑀚𑀫𑀓𑀁𑀲𑀼. 𑀯𑀽𑀧𑀲𑀦𑁆𑀢𑁂 𑀘 𑀭𑁄𑀕𑁂 𑀢𑀺𑀘𑀻𑀯𑀭𑁂𑀦 𑀢𑀻𑀳𑀺 𑀘 𑀓𑀳𑀸𑀧𑀡𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑁂𑀲𑀚𑁆𑀚𑀘𑀗𑁆𑀓𑁄𑀝𑀓𑀁 𑀧𑀽𑀭𑁂𑀢𑁆𑀯𑀸 ¶ 𑀆𑀳𑀭𑀺𑀢𑁆𑀯𑀸 ¶ 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀆𑀘𑀭𑀺𑀬𑀪𑀸𑀕𑁄 𑀦𑀸𑀫𑀸𑀬’’𑀦𑁆𑀢𑀺 𑀓𑀧𑁆𑀧𑀺𑀬𑀯𑀲𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀧𑀽𑀚𑀁 𑀅𑀓𑀸𑀲𑀺. 𑀏𑀯𑀁 𑀢𑀸𑀯 𑀪𑁂𑀲𑀚𑁆𑀚𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀧𑀭𑀺𑀢𑁆𑀢𑁂 ¶ 𑀧𑀦 ‘‘𑀕𑀺𑀮𑀸𑀦𑀲𑁆𑀲 𑀧𑀭𑀺𑀢𑁆𑀢𑀁 𑀓𑀭𑁄𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀦 𑀓𑀸𑀢𑀩𑁆𑀩𑀁, ‘‘𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀓𑀸𑀢𑀩𑁆𑀩𑀁. 𑀲𑀘𑁂 𑀧𑀺𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀦 𑀚𑀸𑀦𑀦𑁆𑀢𑀺, 𑀅𑀓𑀬𑀺𑀭𑀫𑀸𑀦𑁂 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀓𑀸𑀢𑀩𑁆𑀩𑀁; ‘‘𑀧𑀭𑀺𑀢𑁆𑀢𑁄𑀤𑀓𑀁 𑀧𑀭𑀺𑀢𑁆𑀢𑀲𑀼𑀢𑁆𑀢𑀁 𑀓𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀢𑁂𑀲𑀁𑀬𑁂𑀯 𑀉𑀤𑀓𑀁 𑀳𑀢𑁆𑀣𑁂𑀦 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀧𑀭𑀺𑀫𑀚𑁆𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑀢𑁄 𑀉𑀤𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀸 𑀲𑀼𑀢𑁆𑀢𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀁. 𑀫𑀦𑀼𑀲𑁆𑀲𑀸 𑀉𑀤𑀓𑀜𑁆𑀘 𑀲𑀼𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀯𑀤𑀦𑁆𑀢𑀺, 𑀓𑀸𑀢𑀩𑁆𑀩𑀁. 𑀦𑁄 𑀘𑁂 𑀚𑀸𑀦𑀦𑁆𑀢𑀺, 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀪𑀺𑀓𑁆𑀔𑀽𑀦𑀁 𑀦𑀺𑀲𑀺𑀦𑁆𑀦𑀸𑀦𑀁 𑀧𑀸𑀤𑁂𑀲𑀼 𑀉𑀤𑀓𑀁 𑀆𑀓𑀺𑀭𑀺𑀢𑁆𑀯𑀸 𑀲𑀼𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 ‘‘𑀧𑀭𑀺𑀢𑁆𑀢𑀁 𑀓𑀭𑁄𑀣, 𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀦 𑀧𑀸𑀤𑀸 𑀅𑀧𑀦𑁂𑀢𑀩𑁆𑀩𑀸. 𑀫𑀦𑀼𑀲𑁆𑀲𑀸 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀅𑀦𑁆𑀢𑁄𑀕𑀸𑀫𑁂 𑀕𑀺𑀮𑀸𑀦𑀲𑁆𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀧𑁂𑀲𑁂𑀦𑁆𑀢𑀺, ‘‘𑀧𑀭𑀺𑀢𑁆𑀢𑀁 𑀪𑀡𑀦𑁆𑀢𑀽’’𑀢𑀺 𑀪𑀡𑀺𑀢𑀩𑁆𑀩𑀁. 𑀅𑀦𑁆𑀢𑁄𑀕𑀸𑀫𑁂 𑀭𑀸𑀚𑀕𑁂𑀳𑀸𑀤𑀻𑀲𑀼 𑀭𑁄𑀕𑁂 𑀯𑀸 𑀉𑀧𑀤𑁆𑀤𑀯𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀪𑀡𑀸𑀧𑁂𑀦𑁆𑀢𑀺, 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀸𑀤𑀻𑀦𑀺 𑀪𑀡𑀺𑀢𑀩𑁆𑀩𑀸𑀦𑀺. ‘‘𑀆𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀲𑁆𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀦𑁆𑀢𑀼, 𑀥𑀫𑁆𑀫𑀁 𑀓𑀣𑁂𑀦𑁆𑀢𑀼. 𑀭𑀸𑀚𑀦𑁆𑀢𑁂𑀧𑀼𑀭𑁂 𑀯𑀸 𑀅𑀫𑀘𑁆𑀘𑀕𑁂𑀳𑁂 𑀯𑀸 𑀆𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀦𑁆𑀢𑀼, 𑀥𑀫𑁆𑀫𑀁 𑀓𑀣𑁂𑀦𑁆𑀢𑀽’’𑀢𑀺 𑀧𑁂𑀲𑀺𑀢𑁂𑀧𑀺 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀸𑀢𑀩𑁆𑀩𑀸𑀦𑀺, 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄. ‘‘𑀫𑀢𑀸𑀦𑀁 𑀧𑀭𑀺𑀯𑀸𑀭𑀢𑁆𑀣𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑀓𑁆𑀓𑁄𑀲𑀦𑁆𑀢𑀺, 𑀦 𑀕𑀦𑁆𑀢𑀩𑁆𑀩𑀁. 𑀲𑀻𑀯𑀣𑀺𑀓𑀤𑀲𑁆𑀲𑀦𑁂 𑀅𑀲𑀼𑀪𑀤𑀲𑁆𑀲𑀦𑁂 𑀘 𑀫𑀭𑀡𑀲𑁆𑀲𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀧𑀭𑀺𑀢𑁆𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀧𑀺𑀡𑁆𑀟𑀧𑀸𑀢𑁂 𑀧𑀦 𑁋 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄 𑀓𑀲𑁆𑀲 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀤𑀸𑀢𑀩𑁆𑀩𑁄? 𑀫𑀸𑀢𑀸𑀧𑀺𑀢𑀼𑀦𑀁 𑀢𑀸𑀯 𑀤𑀸𑀢𑀩𑁆𑀩𑁄. 𑀲𑀘𑁂𑀧𑀺 𑀓𑀳𑀸𑀧𑀡𑀕𑁆𑀖𑀦𑀓𑁄 𑀳𑁄𑀢𑀺, 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦𑀢𑁆𑀣𑀺. 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀲𑁆𑀲𑀸𑀢𑀺 ¶ 𑀏𑀢𑁂𑀲𑀫𑁆𑀧𑀺 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀧𑀡𑁆𑀟𑀼𑀧𑀮𑀸𑀲𑀲𑁆𑀲 𑀣𑀸𑀮𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀆𑀕𑀸𑀭𑀺𑀓𑀸𑀦𑀁 𑀫𑀸𑀢𑀸𑀧𑀺𑀢𑀼𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀩𑁆𑀩𑀚𑀺𑀢𑀧𑀭𑀺𑀪𑁄𑀕𑁄 𑀳𑀺 𑀆𑀕𑀸𑀭𑀺𑀓𑀸𑀦𑀁 𑀘𑁂𑀢𑀺𑀬𑀝𑁆𑀞𑀸𑀦𑀺𑀬𑁄. 𑀅𑀧𑀺𑀘 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄 𑀦𑀸𑀫𑁂𑀲 𑀲𑀫𑁆𑀧𑀢𑁆𑀢𑀲𑁆𑀲 𑀤𑀸𑀫𑀭𑀺𑀓𑀘𑁄𑀭𑀲𑁆𑀲𑀸𑀧𑀺 𑀇𑀲𑁆𑀲𑀭𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄. 𑀓𑀲𑁆𑀫𑀸? 𑀢𑁂 𑀳𑀺 𑀅𑀤𑀻𑀬𑀫𑀸𑀦𑁂𑀧𑀺 ‘‘𑀦 𑀤𑁂𑀦𑁆𑀢𑀻’’𑀢𑀺 𑀆𑀫𑀲𑀺𑀢𑁆𑀯𑀸 𑀤𑀻𑀬𑀫𑀸𑀦𑁂𑀧𑀺 ‘‘𑀉𑀘𑁆𑀙𑀺𑀝𑁆𑀞𑀓𑀁 𑀤𑁂𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀦𑁆𑀢𑀺. 𑀓𑀼𑀤𑁆𑀥𑀸 𑀚𑀻𑀯𑀺𑀢𑀸𑀧𑀺 𑀯𑁄𑀭𑁄𑀧𑁂𑀦𑁆𑀢𑀺, 𑀲𑀸𑀲𑀦𑀲𑁆𑀲𑀸𑀧𑀺 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀺. 𑀭𑀚𑁆𑀚𑀁 ¶ 𑀧𑀢𑁆𑀣𑀬𑀫𑀸𑀦𑀲𑁆𑀲 𑀯𑀺𑀘𑀭𑀢𑁄 𑀘𑁄𑀭𑀦𑀸𑀕𑀲𑁆𑀲 𑀯𑀢𑁆𑀣𑀼 𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. 𑀏𑀯𑀁 𑀧𑀺𑀡𑁆𑀟𑀧𑀸𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀧𑀝𑀺𑀲𑀦𑁆𑀣𑀸𑀭𑁄 𑀧𑀦 𑀓𑀲𑁆𑀲 𑀓𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀓𑀸𑀢𑀩𑁆𑀩𑁄? 𑀧𑀝𑀺𑀲𑀦𑁆𑀣𑀸𑀭𑁄 𑀦𑀸𑀫 𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲 ¶ 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀕𑀦𑁆𑀢𑀼𑀓𑀲𑁆𑀲 𑀯𑀸 𑀤𑀮𑀺𑀤𑁆𑀤𑀲𑁆𑀲 𑀯𑀸 𑀘𑁄𑀭𑀲𑁆𑀲 𑀯𑀸 𑀇𑀲𑁆𑀲𑀭𑀲𑁆𑀲 𑀯𑀸 𑀓𑀸𑀢𑀩𑁆𑀩𑁄𑀬𑁂𑀯. 𑀓𑀣𑀁? 𑀆𑀕𑀦𑁆𑀢𑀼𑀓𑀁 𑀢𑀸𑀯 𑀔𑀻𑀡𑀧𑀭𑀺𑀩𑁆𑀩𑀬𑀁 𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀧𑀸𑀦𑀻𑀬𑀁 𑀤𑀸𑀢𑀩𑁆𑀩𑀁, 𑀧𑀸𑀤𑀫𑀓𑁆𑀔𑀦𑀢𑁂𑀮𑀁 𑀤𑀸𑀢𑀩𑁆𑀩𑀁. 𑀓𑀸𑀮𑁂 𑀆𑀕𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀁, 𑀯𑀺𑀓𑀸𑀮𑁂 𑀆𑀕𑀢𑀲𑁆𑀲 𑀲𑀘𑁂 𑀢𑀡𑁆𑀟𑀼𑀮𑀸 𑀅𑀢𑁆𑀣𑀺; 𑀢𑀡𑁆𑀟𑀼𑀮𑀸 𑀤𑀸𑀢𑀩𑁆𑀩𑀸. 𑀅𑀯𑁂𑀮𑀸𑀬𑀁 𑀲𑀫𑁆𑀧𑀢𑁆𑀢𑁄 ‘‘𑀕𑀘𑁆𑀙𑀸𑀳𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀬𑀦𑀝𑁆𑀞𑀸𑀦𑀁 𑀤𑀸𑀢𑀩𑁆𑀩𑀁. 𑀲𑀩𑁆𑀩𑀁 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑁂𑀯 𑀓𑀸𑀢𑀩𑁆𑀩𑀁. ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀘𑀢𑀼𑀧𑀘𑁆𑀘𑀬𑀤𑀸𑀬𑀓𑀸 𑀏𑀯𑀁 𑀲𑀗𑁆𑀕𑀳𑁂 𑀓𑀬𑀺𑀭𑀫𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀧𑀲𑀻𑀤𑀺𑀢𑁆𑀯𑀸 𑀉𑀧𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀘𑁄𑀭𑀸𑀦𑀁 𑀧𑀦 𑀲𑀗𑁆𑀖𑀺𑀓𑀫𑁆𑀧𑀺 𑀤𑀸𑀢𑀩𑁆𑀩𑀁.

𑀧𑀝𑀺𑀲𑀦𑁆𑀣𑀸𑀭𑀸𑀦𑀺𑀲𑀁𑀲𑀤𑀻𑀧𑀦𑀢𑁆𑀣𑀜𑁆𑀘 𑀘𑁄𑀭𑀦𑀸𑀕𑀯𑀢𑁆𑀣𑀼, 𑀪𑀸𑀢𑀭𑀸 𑀲𑀤𑁆𑀥𑀺𑀁 𑀚𑀫𑁆𑀩𑀼𑀤𑀻𑀧𑀕𑀢𑀲𑁆𑀲 𑀫𑀳𑀸𑀦𑀸𑀕𑀭𑀜𑁆𑀜𑁄 𑀯𑀢𑁆𑀣𑀼, 𑀧𑀺𑀢𑀼𑀭𑀸𑀚𑀲𑁆𑀲 𑀭𑀚𑁆𑀚𑁂 𑀘𑀢𑀼𑀦𑁆𑀦𑀁 𑀅𑀫𑀘𑁆𑀘𑀸𑀦𑀁 𑀯𑀢𑁆𑀣𑀼, 𑀅𑀪𑀬𑀘𑁄𑀭𑀯𑀢𑁆𑀣𑀽𑀢𑀺 𑀏𑀯𑀫𑀸𑀤𑀻𑀦𑀺 𑀩𑀳𑀽𑀦𑀺 ¶ 𑀯𑀢𑁆𑀣𑀽𑀦𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀦𑀺.

𑀢𑀢𑁆𑀭𑀸𑀬𑀁 𑀏𑀓𑀯𑀢𑁆𑀣𑀼𑀤𑀻𑀧𑀦𑀸 𑁋 𑀲𑀻𑀳𑀴𑀤𑀻𑀧𑁂 𑀓𑀺𑀭 𑀅𑀪𑀬𑁄 𑀦𑀸𑀫 𑀘𑁄𑀭𑁄 𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑁄 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀁 𑀉𑀩𑁆𑀩𑀸𑀲𑁂𑀢𑁆𑀯𑀸 𑀯𑀲𑀢𑀺. 𑀅𑀦𑀼𑀭𑀸𑀥𑀧𑀼𑀭𑀯𑀸𑀲𑀺𑀦𑁄 𑀓𑀤𑀫𑁆𑀩𑀦𑀤𑀺𑀁 𑀦 𑀉𑀢𑁆𑀢𑀭𑀦𑁆𑀢𑀺, 𑀘𑁂𑀢𑀺𑀬𑀕𑀺𑀭𑀺𑀫𑀕𑁆𑀕𑁂 𑀚𑀦𑀲𑀜𑁆𑀘𑀸𑀭𑁄 𑀉𑀧𑀘𑁆𑀙𑀺𑀦𑁆𑀦𑁄. 𑀅𑀣𑁂𑀓𑀤𑀺𑀯𑀲𑀁 𑀘𑁄𑀭𑁄 ‘‘𑀘𑁂𑀢𑀺𑀬𑀕𑀺𑀭𑀺𑀁 𑀯𑀺𑀮𑀼𑀫𑁆𑀧𑀺𑀲𑁆𑀲𑀸𑀫𑀻’’𑀢𑀺 𑀅𑀕𑀫𑀸𑀲𑀺. 𑀆𑀭𑀸𑀫𑀺𑀓𑀸 𑀤𑀺𑀲𑁆𑀯𑀸 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 ‘‘𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀘𑁄𑀭𑀸𑀦𑀁 𑀤𑁂𑀣, 𑀢𑀡𑁆𑀟𑀼𑀮𑀸 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀆𑀳𑀝𑀸 𑀢𑀡𑁆𑀟𑀼𑀮𑀸 𑀘 𑀧𑀢𑁆𑀢𑀲𑀸𑀓𑀜𑁆𑀘 𑀕𑁄𑀭𑀲𑁄 𑀘𑀸’’𑀢𑀺. ‘‘𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀘𑁄𑀭𑀸𑀦𑀁 𑀤𑁂𑀣𑀸’’𑀢𑀺. 𑀆𑀭𑀸𑀫𑀺𑀓𑀸 𑀢𑀣𑀸 𑀓𑀭𑀺𑀁𑀲𑀼. 𑀘𑁄𑀭𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 ‘‘𑀓𑁂𑀦𑀸𑀬𑀁 𑀧𑀝𑀺𑀲𑀦𑁆𑀣𑀸𑀭𑁄 𑀓𑀢𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁂𑀦 𑀅𑀪𑀬𑀢𑁆𑀣𑁂𑀭𑁂𑀦𑀸’’𑀢𑀺. 𑀘𑁄𑀭𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀫𑀬𑀁 𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 ¶ 𑀘 𑀲𑀦𑁆𑀢𑀓𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀸𑀢𑀺 𑀆𑀕𑀢𑀸, 𑀢𑀼𑀫𑁆𑀳𑀸𑀓𑀁 𑀧𑀦 𑀇𑀫𑀺𑀦𑀸 𑀧𑀝𑀺𑀲𑀦𑁆𑀣𑀸𑀭𑁂𑀦𑀫𑁆𑀳 𑀧𑀲𑀦𑁆𑀦𑀸, 𑀅𑀚𑁆𑀚 𑀧𑀝𑁆𑀞𑀸𑀬 𑀯𑀺𑀳𑀸𑀭𑁂 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸 𑀅𑀫𑁆𑀳𑀸𑀓𑀁 𑀆𑀬𑀢𑁆𑀢𑀸 𑀳𑁄𑀢𑀼, 𑀦𑀸𑀕𑀭𑀸 𑀆𑀕𑀦𑁆𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀼, 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑀽’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀦𑀸𑀕𑀭𑁂 𑀤𑀸𑀦𑀁 𑀤𑀸𑀢𑀼𑀁 𑀆𑀕𑀘𑁆𑀙𑀦𑁆𑀢𑁂 𑀦𑀤𑀻𑀢𑀻𑀭𑁂𑀬𑁂𑀯 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀭𑀓𑁆𑀔𑀦𑁆𑀢𑀸 𑀯𑀺𑀳𑀸𑀭𑀁 𑀦𑁂𑀦𑁆𑀢𑀺, 𑀯𑀺𑀳𑀸𑀭𑁂𑀧𑀺 𑀤𑀸𑀦𑀁 𑀤𑁂𑀦𑁆𑀢𑀸𑀦𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀧𑀺 𑀪𑀺𑀓𑁆𑀔𑀽𑀦𑀁 𑀪𑀼𑀢𑁆𑀢𑀸𑀯𑀲𑁂𑀲𑀁 𑀘𑁄𑀭𑀸𑀦𑀁 𑀤𑁂𑀦𑁆𑀢𑀺. 𑀕𑀫𑀦𑀓𑀸𑀮𑁂𑀧𑀺 𑀢𑁂 𑀘𑁄𑀭𑀸 𑀦𑀤𑀻𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀔𑀻𑀬𑀦𑀓𑀓𑀣𑀸 𑀉𑀧𑁆𑀧𑀦𑁆𑀦𑀸 ‘‘𑀣𑁂𑀭𑁄 𑀇𑀲𑁆𑀲𑀭𑀯𑀢𑀸𑀬 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀘𑁄𑀭𑀸𑀦𑀁 𑀅𑀤𑀸𑀲𑀻’’𑀢𑀺. 𑀣𑁂𑀭𑁄 𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀘𑁄𑀭𑀸 𑀲𑀗𑁆𑀖𑀲𑁆𑀲 𑀧𑀓𑀢𑀺𑀯𑀝𑁆𑀝𑀜𑁆𑀘 𑀘𑁂𑀢𑀺𑀬𑀲𑀦𑁆𑀢𑀓𑀜𑁆𑀘 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀫𑀺𑀁𑀲𑀼. 𑀅𑀣 𑀦𑁂𑀲𑀁 𑀫𑀬𑀸 𑀏𑀯𑀁 𑀦 𑀳𑀭𑀺𑀲𑁆𑀲𑀦𑁆𑀢𑀻𑀢𑀺 ¶ 𑀏𑀢𑁆𑀢𑀓𑁄 𑀦𑀸𑀫 𑀧𑀝𑀺𑀲𑀦𑁆𑀣𑀸𑀭𑁄 𑀓𑀢𑁄, 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀕𑁆𑀖𑀸𑀧𑁂𑀣. 𑀢𑁂𑀦 𑀓𑀸𑀭𑀡𑁂𑀦 𑀅𑀯𑀺𑀮𑀼𑀢𑁆𑀢𑀁 𑀪𑀡𑁆𑀟𑀁 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀕𑁆𑀖𑀸𑀧𑁂𑀣𑀸𑀢𑀺. 𑀢𑀢𑁄 𑀲𑀩𑁆𑀩𑀫𑁆𑀧𑀺 𑀣𑁂𑀭𑁂𑀦 𑀤𑀺𑀦𑁆𑀦𑀓𑀁 𑀘𑁂𑀢𑀺𑀬𑀖𑀭𑁂 𑀏𑀓𑀁 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀁 ¶ 𑀦 𑀅𑀕𑁆𑀖𑀢𑀺. 𑀢𑀢𑁄 𑀆𑀳𑀁𑀲𑀼 𑁋 ‘‘𑀣𑁂𑀭𑁂𑀦 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀼𑀓𑀢𑁄 𑀘𑁄𑀤𑁂𑀢𑀼𑀁 𑀯𑀸 𑀲𑀸𑀭𑁂𑀢𑀼𑀁 𑀯𑀸 𑀦 𑀮𑀩𑁆𑀪𑀸, 𑀕𑀻𑀯𑀸 𑀯𑀸 𑀅𑀯𑀳𑀸𑀭𑁄 𑀯𑀸 𑀦𑀢𑁆𑀣𑀻’’𑀢𑀺. 𑀏𑀯𑀁 𑀫𑀳𑀸𑀦𑀺𑀲𑀁𑀲𑁄 𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑁄 𑀧𑀡𑁆𑀟𑀺𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺.

𑁧𑁮𑁭. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀉𑀢𑁆𑀢𑀦𑁆𑀢𑁄𑀢𑀺 𑀓𑀺𑀮𑀫𑀦𑁆𑀢𑁄. 𑀅𑀦𑀲𑁆𑀲𑀸𑀲𑀓𑁄𑀢𑀺 𑀦𑀺𑀭𑀲𑁆𑀲𑀸𑀲𑁄. 𑀇𑀫𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁 𑀲𑀸 ‘‘𑀔𑀼𑀤𑁆𑀤𑀓𑁂𑀲𑀼 𑀦𑀺𑀤𑀺𑀝𑁆𑀞𑀸’’𑀢𑀺 𑀇𑀥 𑀦 𑀯𑀼𑀢𑁆𑀢𑀸.

𑀢𑀤𑀦𑀦𑁆𑀢𑀭𑁂 𑀯𑀢𑁆𑀣𑀼𑀲𑁆𑀫𑀺𑀁 𑁋 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀓𑁆𑀓𑀫𑀺𑀢𑁆𑀯𑀸. 𑀲𑁄 𑀓𑀺𑀭 𑀢𑁂𑀳𑀺 𑀆𑀓𑀟𑁆𑀠𑀺𑀬𑀫𑀸𑀦𑁄 𑀧𑀢𑀺𑀢𑁄. 𑀏𑀓𑁄 𑀢𑀲𑁆𑀲 𑀉𑀤𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑁂𑀲𑀸𑀧𑀺 𑀧𑀦𑁆𑀦𑀭𑀲 𑀚𑀦𑀸 𑀧𑀣𑀯𑀺𑀬𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀤𑀽𑀳𑀮𑀧𑀸𑀲𑀸𑀡𑀸 𑀯𑀺𑀬 𑀫𑀺𑀕𑀁 𑀫𑀸𑀭𑁂𑀲𑀼𑀁. 𑀬𑀲𑁆𑀫𑀸 𑀧𑀦 𑀢𑁂 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑀸, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀸; 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀦 𑀯𑀼𑀢𑁆𑀢𑀁.

𑀪𑀽𑀢𑀯𑁂𑀚𑁆𑀚𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀬𑀓𑁆𑀔𑀁 𑀫𑀸𑀭𑁂𑀲𑀻𑀢𑀺 𑀪𑀽𑀢𑀯𑀺𑀚𑁆𑀚𑀸𑀓𑀧𑀸𑀞𑀓𑀸 𑀬𑀓𑁆𑀔𑀕𑀳𑀺𑀢𑀁 𑀫𑁄𑀘𑁂𑀢𑀼𑀓𑀸𑀫𑀸 𑀬𑀓𑁆𑀔𑀁 𑀆𑀯𑀸𑀳𑁂𑀢𑁆𑀯𑀸 𑀫𑀼𑀜𑁆𑀘𑀸𑀢𑀺 𑀯𑀤𑀦𑁆𑀢𑀺. 𑀦𑁄 𑀘𑁂 𑀫𑀼𑀜𑁆𑀘𑀢𑀺, 𑀧𑀺𑀝𑁆𑀞𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀭𑀽𑀧𑀁 𑀓𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀺, 𑀬𑀁 𑀬𑀁 𑀢𑀲𑁆𑀲 𑀙𑀺𑀚𑁆𑀚𑀢𑀺 𑀢𑀁 𑀢𑀁 𑀬𑀓𑁆𑀔𑀲𑁆𑀲 𑀙𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀲𑀻𑀲𑁂 𑀙𑀺𑀦𑁆𑀦𑁂 𑀬𑀓𑁆𑀔𑁄𑀧𑀺 𑀫𑀭𑀢𑀺 ¶ . 𑀏𑀯𑀁 𑀲𑁄𑀧𑀺 𑀫𑀸𑀭𑁂𑀲𑀺; 𑀢𑀲𑁆𑀫𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘 𑀬𑀓𑁆𑀔𑀫𑁂𑀯, 𑀬𑁄𑀧𑀺 𑀳𑀺 𑀲𑀓𑁆𑀓𑀁 𑀤𑁂𑀯𑀭𑀸𑀚𑀁 𑀫𑀸𑀭𑁂𑀬𑁆𑀬, 𑀲𑁄𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯 𑀆𑀧𑀚𑁆𑀚𑀢𑀺.

𑀯𑀸𑀴𑀬𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁 𑁋 𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀸𑀴𑁄 𑀘𑀡𑁆𑀟𑁄 𑀬𑀓𑁆𑀔𑁄 𑀯𑀲𑀢𑀺, 𑀢𑀁 𑀯𑀺𑀳𑀸𑀭𑀁. 𑀬𑁄 𑀳𑀺 𑀏𑀯𑀭𑀽𑀧𑀁 𑀯𑀺𑀳𑀸𑀭𑀁 𑀅𑀚𑀸𑀦𑀦𑁆𑀢𑁄 𑀓𑁂𑀯𑀮𑀁 𑀯𑀲𑀦𑀢𑁆𑀣𑀸𑀬 𑀧𑁂𑀲𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀬𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀧𑁂𑀲𑁂𑀢𑀺, 𑀲𑁄 𑀇𑀢𑀭𑀲𑁆𑀲 𑀫𑀭𑀡𑁂𑀦 𑀧𑀸𑀭𑀸𑀚𑀺𑀓𑀁, 𑀅𑀫𑀭𑀡𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀬𑀣𑀸 𑀘 𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁; 𑀏𑀯𑀁 𑀬𑀢𑁆𑀣 𑀯𑀸𑀴𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀫𑀺𑀕𑀸 𑀯𑀸 𑀅𑀚𑀕𑀭𑀓𑀡𑁆𑀳𑀲𑀧𑁆𑀧𑀸𑀤𑀬𑁄 𑀤𑀻𑀖𑀚𑀸𑀢𑀺𑀓𑀸 𑀯𑀸 𑀯𑀲𑀦𑁆𑀢𑀺, 𑀢𑀁 𑀯𑀸𑀴𑀯𑀺𑀳𑀸𑀭𑀁 𑀧𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁄. 𑀬𑀣𑀸 𑀘 𑀪𑀺𑀓𑁆𑀔𑀼𑀁 𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁 𑀧𑁂𑀲𑁂𑀦𑁆𑀢𑀲𑁆𑀲; 𑀏𑀯𑀁 𑀯𑀸𑀴𑀬𑀓𑁆𑀔𑀫𑁆𑀧𑀺 𑀪𑀺𑀓𑁆𑀔𑀼𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲𑁂𑀯 𑀦𑀬𑁄 𑀯𑀸𑀴𑀓𑀦𑁆𑀢𑀸𑀭𑀸𑀤𑀺𑀯𑀢𑁆𑀣𑀽𑀲𑀼𑀧𑀺. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀬𑀲𑁆𑀫𑀺𑀁 𑀓𑀦𑁆𑀢𑀸𑀭𑁂 𑀯𑀸𑀴𑀫𑀺𑀕𑀸 𑀯𑀸 𑀤𑀻𑀖𑀚𑀸𑀢𑀺𑀓𑀸 𑀯𑀸 𑀅𑀢𑁆𑀣𑀺, 𑀲𑁄 𑀯𑀸𑀴𑀓𑀦𑁆𑀢𑀸𑀭𑁄. 𑀬𑀲𑁆𑀫𑀺𑀁 𑀘𑁄𑀭𑀸 𑀅𑀢𑁆𑀣𑀺, 𑀲𑁄 𑀘𑁄𑀭𑀓𑀦𑁆𑀢𑀸𑀭𑁄𑀢𑀺 𑀏𑀯𑀁 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀜𑁆𑀘 𑀦𑀸𑀫𑁂𑀢𑀁 𑀲𑀡𑁆𑀳𑀁, 𑀧𑀭𑀺𑀬𑀸𑀬𑀓𑀣𑀸𑀬 𑀦 𑀫𑀼𑀘𑁆𑀘𑀢𑀺; 𑀢𑀲𑁆𑀫𑀸 𑀬𑁄 𑀯𑀤𑁂𑀬𑁆𑀬 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀘𑁄𑀭𑁄 𑀦𑀺𑀲𑀺𑀦𑁆𑀦𑁄 ¶ , 𑀬𑁄 𑀢𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀭𑀢𑀺, 𑀲𑁄 𑀭𑀸𑀚𑀢𑁄 𑀲𑀓𑁆𑀓𑀸𑀭𑀯𑀺𑀲𑁂𑀲𑀁 𑀮𑀪𑀢𑀻’’𑀢𑀺. 𑀢𑀲𑁆𑀲 𑀘𑁂𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁄𑀘𑀺 𑀦𑀁 𑀕𑀦𑁆𑀢𑁆𑀯𑀸 𑀫𑀸𑀭𑁂𑀢𑀺, 𑀅𑀬𑀁 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺.

𑁧𑁮𑁮. 𑀢𑀁 𑀫𑀜𑁆𑀜𑀫𑀸𑀦𑁄𑀢𑀺 𑀆𑀤𑀻𑀲𑀼 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀯𑁂𑀭𑀺𑀪𑀺𑀓𑁆𑀔𑀼𑀁 𑀫𑀸𑀭𑁂𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑁂 𑀤𑀺𑀯𑀸 𑀫𑀸𑀭𑁂𑀦𑁆𑀢𑀲𑁆𑀲 𑀦 𑀲𑀼𑀓𑀭𑀁 𑀪𑀯𑁂𑀬𑁆𑀬 𑀲𑁄𑀢𑁆𑀣𑀺𑀦𑀸 𑀕𑀦𑁆𑀢𑀼𑀁, 𑀭𑀢𑁆𑀢𑀺𑀁 𑀦𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀢𑁆𑀢𑀺𑀁 𑀆𑀕𑀫𑁆𑀫 𑀩𑀳𑀽𑀦𑀁 𑀲𑀬𑀺𑀢𑀝𑁆𑀞𑀸𑀦𑁂 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀫𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀅𑀧𑀭𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁, 𑀅𑀧𑀭𑁄 𑀅𑀜𑁆𑀜𑀁 𑀢𑀲𑁆𑀲𑁂𑀯 𑀲𑀳𑀸𑀬𑀁 𑀫𑀜𑁆𑀜𑀫𑀸𑀦𑁄 𑀢𑀁, 𑀅𑀧𑀭𑁄 𑀅𑀜𑁆𑀜𑀁 𑀢𑀲𑁆𑀲𑁂𑀯 𑀲𑀳𑀸𑀬𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀢𑀲𑁆𑀲 𑀲𑀳𑀸𑀬𑀫𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀭𑀸𑀚𑀺𑀓𑀫𑁂𑀯.

𑀅𑀫𑀦𑀼𑀲𑁆𑀲𑀕𑀳𑀺𑀢𑀯𑀢𑁆𑀣𑀽𑀲𑀼 𑀧𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀓𑁆𑀔𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀳𑀸𑀭𑀁 𑀅𑀤𑀸𑀲𑀺, 𑀇𑀢𑀭𑁄 ‘‘𑀦 𑀤𑀸𑀦𑀸𑀬𑀁 𑀯𑀺𑀭𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁄, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 ¶ . 𑀏𑀢𑁆𑀣 𑀘 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀦 𑀏𑀢𑁆𑀢𑀓𑁂𑀦𑁂𑀯 𑀅𑀫𑀦𑀼𑀲𑁆𑀲𑀕𑀳𑀺𑀢𑀲𑁆𑀲 𑀧𑀳𑀸𑀭𑁄 𑀤𑀸𑀢𑀩𑁆𑀩𑁄, 𑀢𑀸𑀮𑀧𑀡𑁆𑀡𑀁 𑀧𑀦 𑀧𑀭𑀺𑀢𑁆𑀢𑀲𑀼𑀢𑁆𑀢𑀁 𑀯𑀸 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀩𑀦𑁆𑀥𑀺𑀢𑀩𑁆𑀩𑀁, 𑀭𑀢𑀦𑀲𑀼𑀢𑁆𑀢𑀸𑀤𑀻𑀦𑀺 𑀧𑀭𑀺𑀢𑁆𑀢𑀸𑀦𑀺 𑀪𑀡𑀺𑀢𑀩𑁆𑀩𑀸𑀦𑀺, ‘‘𑀫𑀸 𑀲𑀻𑀮𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀯𑀺𑀳𑁂𑀞𑁂𑀳𑀻’’𑀢𑀺 𑀥𑀫𑁆𑀫𑀓𑀣𑀸 𑀓𑀸𑀢𑀩𑁆𑀩𑀸𑀢𑀺. 𑀲𑀕𑁆𑀕𑀓𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺. 𑀬𑀜𑁆𑀳𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀼𑀢𑁆𑀢𑀫𑁂𑀯.

𑁧𑁮𑁯. 𑀭𑀼𑀓𑁆𑀔𑀘𑁆𑀙𑁂𑀤𑀦𑀯𑀢𑁆𑀣𑀼 𑀅𑀝𑁆𑀝𑀩𑀦𑁆𑀥𑀦𑀯𑀢𑁆𑀣𑀼𑀲𑀤𑀺𑀲𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑁄 𑀭𑀼𑀓𑁆𑀔𑁂𑀦 𑀑𑀢𑁆𑀣𑀢𑁄𑀧𑀺 𑀦 𑀫𑀭𑀢𑀺 ¶ , 𑀲𑀓𑁆𑀓𑀸 𑀘 𑀳𑁄𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀭𑀼𑀓𑁆𑀔𑀁 𑀙𑁂𑀢𑁆𑀯𑀸 𑀧𑀣𑀯𑀺𑀁 𑀯𑀸 𑀔𑀦𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁, 𑀳𑀢𑁆𑀣𑁂 𑀘𑀲𑁆𑀲 𑀯𑀸𑀲𑀺 𑀯𑀸 𑀓𑀼𑀞𑀸𑀭𑀻 𑀯𑀸 𑀅𑀢𑁆𑀣𑀺, 𑀢𑁂𑀦 𑀅𑀧𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁, 𑀦 𑀘 𑀭𑀼𑀓𑁆𑀔𑁄 𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀧𑀣𑀯𑀻 𑀯𑀸 𑀔𑀡𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺, 𑀩𑀼𑀤𑁆𑀥𑀲𑁆𑀲 𑀆𑀡𑀁 𑀪𑀜𑁆𑀚𑀢𑀺, 𑀦 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀲𑀻𑀮𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀅𑀧𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁, 𑀦 𑀘 𑀲𑀻𑀮𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦 𑀏𑀯𑀁 𑀓𑀸𑀢𑀩𑁆𑀩𑀁. 𑀅𑀜𑁆𑀜𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀣𑀯𑀺𑀁 𑀯𑀸 𑀔𑀦𑀺𑀢𑁆𑀯𑀸 𑀢𑀁 𑀦𑀻𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀉𑀤𑀼𑀓𑁆𑀔𑀮𑀬𑀦𑁆𑀢𑀓𑁂𑀦 𑀭𑀼𑀓𑁆𑀔𑀁 𑀧𑀯𑀝𑁆𑀝𑁂𑀢𑁆𑀯𑀸 𑀦𑀻𑀳𑀭𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀁𑀬𑁂𑀯 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀤𑀼𑀓𑁆𑀔𑀮𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀅𑀜𑁆𑀜𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄. 𑀲𑁄𑀩𑁆𑀪𑀸𑀤𑀻𑀲𑀼 𑀧𑀢𑀺𑀢𑀲𑁆𑀲𑀸𑀧𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀉𑀢𑁆𑀢𑀸𑀭𑀡𑁂 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑀸 𑀪𑀽𑀢𑀕𑀸𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀻 𑀦 𑀓𑀸𑀢𑀩𑁆𑀩𑀸, 𑀅𑀜𑁆𑀜𑁂𑀲𑀁 𑀓𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁧𑁯𑁦. 𑀤𑀸𑀬𑀸𑀮𑀺𑀫𑁆𑀧𑀦𑀯𑀢𑁆𑀣𑀽𑀲𑀼 𑁋 𑀤𑀸𑀬𑀁 𑀆𑀮𑀺𑀫𑁆𑀧𑁂𑀲𑀼𑀦𑁆𑀢𑀺 𑀯𑀦𑁂 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀏𑀢𑁆𑀣 𑀧𑀦 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀯𑀲𑁂𑀦 𑀧𑀸𑀭𑀸𑀚𑀺𑀓𑀸𑀦𑀦𑁆𑀢𑀭𑀺𑀬𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀯𑀢𑁆𑀣𑀽𑀦𑀁 𑀅𑀦𑀼𑀭𑀽𑀧𑀢𑁄 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀅𑀓𑀼𑀲𑀮𑀭𑀸𑀲𑀺𑀪𑀸𑀯𑁄 ¶ 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀮𑁆𑀮𑀢𑀺𑀡𑀯𑀦𑀧𑁆𑀧𑀕𑀼𑀫𑁆𑀩𑀸𑀤𑀬𑁄 𑀟𑀬𑁆𑀳𑀦𑁆𑀢𑀽’’𑀢𑀺 𑀆𑀮𑀺𑀫𑁆𑀧𑁂𑀦𑁆𑀢𑀲𑁆𑀲 𑀘 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀤𑀩𑁆𑀩𑀽𑀧𑀓𑀭𑀡𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀆𑀮𑀺𑀫𑁆𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀬𑀁𑀓𑀺𑀜𑁆𑀘𑀺 𑀅𑀮𑁆𑀮𑀲𑀼𑀓𑁆𑀔𑀁 𑀲𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀁 𑀟𑀬𑁆𑀳𑀢𑀽’’𑀢𑀺 𑀆𑀮𑀺𑀫𑁆𑀧𑁂𑀦𑁆𑀢𑀲𑁆𑀲 𑀯𑀢𑁆𑀣𑀼𑀯𑀲𑁂𑀦 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀝𑀕𑁆𑀕𑀺𑀤𑀸𑀦𑀁 𑀧𑀦 𑀧𑀭𑀺𑀢𑁆𑀢𑀓𑀭𑀡𑀜𑁆𑀘 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀅𑀭𑀜𑁆𑀜𑁂 𑀯𑀦𑀓𑀫𑁆𑀫𑀺𑀓𑁂𑀳𑀺 𑀯𑀸 𑀤𑀺𑀦𑁆𑀦𑀁 𑀲𑀬𑀁 𑀯𑀸 𑀉𑀝𑁆𑀞𑀺𑀢𑀁 𑀅𑀕𑁆𑀕𑀺𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀢𑀺𑀡𑀓𑀼𑀝𑀺𑀬𑁄 𑀫𑀸 ¶ 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀢𑀲𑁆𑀲 𑀅𑀕𑁆𑀕𑀺𑀦𑁄 𑀧𑀝𑀺𑀅𑀕𑁆𑀕𑀺𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀬𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑁄 𑀅𑀕𑁆𑀕𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀭𑀼𑀧𑀸𑀤𑀸𑀦𑁄 𑀦𑀺𑀩𑁆𑀩𑀸𑀢𑀺. 𑀧𑀭𑀺𑀢𑁆𑀢𑀫𑁆𑀧𑀺 ¶ 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀢𑀺𑀡𑀓𑀼𑀝𑀺𑀓𑀸𑀦𑀁 𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦𑀁 𑀧𑀭𑀺𑀔𑀸𑀔𑀡𑀦𑀁 𑀯𑀸, 𑀬𑀣𑀸 𑀆𑀕𑀢𑁄 𑀅𑀕𑁆𑀕𑀺 𑀉𑀧𑀸𑀤𑀸𑀦𑀁 𑀅𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑀸𑀢𑀺. 𑀏𑀢𑀜𑁆𑀘 𑀲𑀩𑁆𑀩𑀁 𑀉𑀝𑁆𑀞𑀺𑀢𑁂𑀬𑁂𑀯 𑀅𑀕𑁆𑀕𑀺𑀲𑁆𑀫𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀼𑀝𑁆𑀞𑀺𑀢𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑀁. 𑀉𑀤𑀓𑁂𑀦 𑀧𑀦 𑀦𑀺𑀩𑁆𑀩𑀸𑀧𑁂𑀦𑁆𑀢𑁂𑀳𑀺 𑀅𑀧𑁆𑀧𑀸𑀡𑀓𑀫𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

𑁧𑁯𑁧. 𑀆𑀖𑀸𑀢𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀬𑀣𑀸 𑀏𑀓𑀧𑁆𑀧𑀳𑀸𑀭𑀯𑀘𑀦𑁂; 𑀏𑀯𑀁 ‘‘𑀤𑁆𑀯𑀻𑀳𑀺 𑀧𑀳𑀸𑀭𑁂𑀳𑀻’’𑀢𑀺 𑀆𑀤𑀺𑀯𑀘𑀦𑁂𑀲𑀼𑀧𑀺 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀤𑁆𑀯𑀻𑀳𑀻’’𑀢𑀺 𑀯𑀼𑀢𑁆𑀢𑁂 𑀘 𑀏𑀓𑁂𑀦 𑀧𑀳𑀸𑀭𑁂𑀦 𑀫𑀸𑀭𑀺𑀢𑁂𑀧𑀺 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀁, 𑀢𑀻𑀳𑀺 𑀫𑀸𑀭𑀺𑀢𑁂 𑀧𑀦 𑀯𑀺𑀲𑀗𑁆𑀓𑁂𑀢𑀁. 𑀇𑀢𑀺 𑀬𑀣𑀸𑀧𑀭𑀺𑀘𑁆𑀙𑁂𑀤𑁂 𑀯𑀸 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀯𑀸 𑀅𑀯𑀺𑀲𑀗𑁆𑀓𑁂𑀢𑀁, 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀲𑀗𑁆𑀓𑁂𑀢𑀁 𑀳𑁄𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺, 𑀯𑀥𑀓𑀲𑁆𑀲𑁂𑀯 𑀤𑁄𑀲𑁄. 𑀬𑀣𑀸 𑀘 𑀧𑀳𑀸𑀭𑁂𑀲𑀼; 𑀏𑀯𑀁 𑀧𑀼𑀭𑀺𑀲𑁂𑀲𑀼𑀧𑀺 ‘‘𑀏𑀓𑁄 𑀫𑀸𑀭𑁂𑀢𑀽’’𑀢𑀺 𑀯𑀼𑀢𑁆𑀢𑁂 𑀏𑀓𑁂𑀦𑁂𑀯 𑀫𑀸𑀭𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀤𑁆𑀯𑀻𑀳𑀺 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑀁. ‘‘𑀤𑁆𑀯𑁂 𑀫𑀸𑀭𑁂𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀫𑀸𑀭𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀢𑀻𑀳𑀺 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑁄 𑀲𑀗𑁆𑀕𑀸𑀫𑁂 𑀯𑁂𑀕𑁂𑀦 𑀥𑀸𑀯𑀢𑁄 𑀧𑀼𑀭𑀺𑀲𑀲𑁆𑀲 𑀲𑀻𑀲𑀁 𑀅𑀲𑀺𑀦𑀸 𑀙𑀺𑀦𑁆𑀤𑀢𑀺, 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀥𑀸𑀯𑀢𑀺, 𑀢𑀫𑀜𑁆𑀜𑁄 𑀧𑀳𑀭𑀺𑀢𑁆𑀯𑀸 𑀧𑀸𑀢𑁂𑀲𑀺, 𑀓𑀲𑁆𑀲 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀢𑁆𑀢𑁂 𑀉𑀧𑀟𑁆𑀠𑀸 𑀣𑁂𑀭𑀸 ‘‘𑀕𑀫𑀦𑀽𑀧𑀘𑁆𑀙𑁂𑀤𑀓𑀲𑁆𑀲𑀸’’𑀢𑀺 𑀆𑀳𑀁𑀲𑀼. 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 ‘‘𑀲𑀻𑀲𑀘𑁆𑀙𑁂𑀤𑀓𑀲𑁆𑀲𑀸’’𑀢𑀺. 𑀏𑀯𑀭𑀽𑀧𑀸𑀦𑀺𑀧𑀺 𑀯𑀢𑁆𑀣𑀽𑀦𑀺 𑀇𑀫𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀢𑁆𑀣𑀤𑀻𑀧𑀦𑁂 𑀯𑀢𑁆𑀢𑀩𑁆𑀩𑀸𑀦𑀻𑀢𑀺.

𑁧𑁯𑁨. 𑀢𑀓𑁆𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀢𑀓𑁆𑀓𑀁 𑀧𑀸𑀬𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀬𑀁 𑀯𑀸 𑀢𑀁 𑀯𑀸 𑀢𑀓𑁆𑀓𑀁 𑀧𑀸𑀬𑁂𑀢𑁆𑀯𑀸 𑀫𑀸𑀭𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀕𑁄𑀢𑀓𑁆𑀓𑀁 𑀫𑀳𑀺𑀁𑀲𑀢𑀓𑁆𑀓𑀁 𑀅𑀚𑀺𑀓𑀸𑀢𑀓𑁆𑀓’’𑀦𑁆𑀢𑀺 𑀯𑀸, ‘‘𑀲𑀻𑀢𑀁 𑀉𑀡𑁆𑀳𑀁 𑀥𑀽𑀧𑀺𑀢𑀁 𑀅𑀥𑀽𑀧𑀺𑀢’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀬𑀁 𑀯𑀼𑀢𑁆𑀢𑀁, 𑀢𑀢𑁄 𑀅𑀜𑁆𑀜𑀁 𑀧𑀸𑀬𑁂𑀢𑁆𑀯𑀸 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑀁.

𑀮𑁄𑀡𑀲𑁄𑀯𑀻𑀭𑀓𑀯𑀢𑁆𑀣𑀼𑀲𑁆𑀫𑀺𑀁 ¶ 𑁋 𑀮𑁄𑀡𑀲𑁄𑀯𑀻𑀭𑀓𑀁 𑀦𑀸𑀫 𑀲𑀩𑁆𑀩𑀭𑀲𑀸𑀪𑀺𑀲𑀗𑁆𑀔𑀢𑀁 𑀏𑀓𑀁 𑀪𑁂𑀲𑀚𑁆𑀚𑀁. 𑀢𑀁 𑀓𑀺𑀭 𑀓𑀭𑁄𑀦𑁆𑀢𑀸 ¶ 𑀳𑀭𑀻𑀢𑀓𑀸𑀫𑀮𑀓𑀯𑀺𑀪𑀻𑀢𑀓𑀓𑀲𑀸𑀯𑁂 𑀲𑀩𑁆𑀩𑀥𑀜𑁆𑀜𑀸𑀦𑀺 𑀲𑀩𑁆𑀩𑀅𑀧𑀭𑀡𑁆𑀡𑀸𑀦𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀥𑀜𑁆𑀜𑀸𑀦𑀁 𑀑𑀤𑀦𑀁 𑀓𑀤𑀮𑀺𑀨𑀮𑀸𑀤𑀻𑀦𑀺 𑀲𑀩𑁆𑀩𑀨𑀮𑀸𑀦𑀺 𑀯𑁂𑀢𑁆𑀢𑀓𑁂𑀢𑀓𑀔𑀚𑁆𑀚𑀽𑀭𑀺𑀓𑀴𑀻𑀭𑀸𑀤𑀬𑁄 𑀲𑀩𑁆𑀩𑀓𑀴𑀻𑀭𑁂 𑀫𑀘𑁆𑀙𑀫𑀁𑀲𑀔𑀡𑁆𑀟𑀸𑀦𑀺 𑀅𑀦𑁂𑀓𑀸𑀦𑀺 𑀘 𑀫𑀥𑀼𑀨𑀸𑀡𑀺𑀢𑀲𑀺𑀦𑁆𑀥𑀯𑀮𑁄𑀡𑀦𑀺𑀓𑀝𑀼𑀓𑀸𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 ¶ 𑀓𑀼𑀫𑁆𑀪𑀺𑀫𑀼𑀔𑀁 𑀮𑀺𑀫𑁆𑀧𑀺𑀢𑁆𑀯𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀲𑀁𑀯𑀘𑁆𑀙𑀭𑀸𑀦𑀺 𑀞𑀧𑁂𑀦𑁆𑀢𑀺, 𑀢𑀁 𑀧𑀭𑀺𑀧𑀘𑁆𑀘𑀺𑀢𑁆𑀯𑀸 𑀚𑀫𑁆𑀩𑀼𑀭𑀲𑀯𑀡𑁆𑀡𑀁 𑀳𑁄𑀢𑀺. 𑀯𑀸𑀢𑀓𑀸𑀲𑀓𑀼𑀝𑁆𑀞𑀧𑀡𑁆𑀟𑀼𑀪𑀕𑀦𑁆𑀤𑀭𑀸𑀤𑀻𑀦𑀁 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀪𑀼𑀢𑁆𑀢𑀸𑀦𑀜𑁆𑀘 𑀉𑀢𑁆𑀢𑀭𑀧𑀸𑀦𑀁 𑀪𑀢𑁆𑀢𑀚𑀻𑀭𑀡𑀓𑀪𑁂𑀲𑀚𑁆𑀚𑀁 𑀢𑀸𑀤𑀺𑀲𑀁 𑀦𑀢𑁆𑀣𑀺. 𑀢𑀁 𑀧𑀦𑁂𑀢𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀕𑀺𑀮𑀸𑀦𑀸𑀦𑀁 𑀧𑀸𑀓𑀢𑀺𑀓𑀫𑁂𑀯, 𑀅𑀕𑀺𑀮𑀸𑀦𑀸𑀦𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀧𑀸𑀦𑀧𑀭𑀺𑀪𑁄𑀕𑁂𑀦𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑀘𑀢𑀼𑀲𑀘𑁆𑀘𑀯𑀺𑀤𑀽 ¶ 𑀲𑀢𑁆𑀣𑀸, 𑀘𑀢𑀼𑀢𑁆𑀣𑀁 𑀬𑀁 𑀧𑀓𑀸𑀲𑀬𑀺;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀲𑁆𑀲𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀕𑀺𑀳𑀻𑀦𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑁂𑀫𑀸𑀢𑀺 𑀕𑀺𑀳𑀻𑀦𑀁 𑀔𑁂𑀢𑁆𑀢𑁂𑀲𑀼 𑀘𑁂𑀯 𑀆𑀭𑀸𑀫𑀸𑀤𑀻𑀲𑀼 𑀘 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀥𑀺𑀝𑁆𑀞𑀸𑀫; ‘‘𑀏𑀯𑀁 𑀓𑀸𑀢𑀩𑁆𑀩𑀁, 𑀏𑀯𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀆𑀘𑀺𑀓𑁆𑀔𑀸𑀫 𑀘𑁂𑀯 𑀅𑀦𑀼𑀲𑀸𑀲𑀸𑀫 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀽𑀢𑁂𑀬𑁆𑀬𑀦𑁆𑀢𑀺 𑀤𑀽𑀢𑀓𑀫𑁆𑀫𑀁. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁂 𑀉𑀢𑁆𑀢𑀺𑀡𑁆𑀡𑀥𑀫𑁆𑀫𑀲𑁆𑀲; 𑀫𑀦𑀼𑀲𑁆𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀢𑁆𑀢𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀯𑀸 𑀧𑀸𑀧𑀦𑀓𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀯𑀸 𑀲𑁂𑀝𑁆𑀞𑀧𑀼𑀭𑀺𑀲𑀸𑀦𑀁 𑀛𑀸𑀬𑀻𑀦𑀜𑁆𑀘 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀲𑁆𑀲. 𑀅𑀲𑀼𑀓𑁄 𑀪𑀺𑀓𑁆𑀔𑀽𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑀸 𑀏𑀯𑀁 𑀫𑀦𑁆𑀢𑀬𑀺𑀢𑁆𑀯𑀸 𑀧𑀘𑁆𑀙𑀸 𑀕𑀺𑀳𑀻𑀦𑀁 𑀪𑀸𑀲𑀦𑁆𑀢𑀸 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀥𑀫𑁆𑀫𑀭𑀓𑁆𑀔𑀺𑀢𑁄 𑀤𑀼𑀢𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦𑁂𑀯 𑀯𑀡𑁆𑀡𑀁 𑀪𑀸𑀲𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀏𑀲𑁄𑀬𑁂𑀯 𑀔𑁄 𑀆𑀯𑀼𑀲𑁄 𑀲𑁂𑀬𑁆𑀬𑁄𑀢𑀺 𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀁 𑀤𑀽𑀢𑁂𑀬𑁆𑀬𑀳𑀭𑀡𑀜𑁆𑀘 𑀩𑀳𑀼𑀲𑀧𑀢𑁆𑀢𑀁 𑀫𑀳𑀸𑀲𑀫𑀸𑀭𑀫𑁆𑀪𑀁 𑀦 𑀘 𑀲𑀫𑀡𑀲𑀸𑀭𑀼𑀧𑁆𑀧𑀁. 𑀢𑀢𑁄 𑀧𑀦 𑀉𑀪𑀬𑀢𑁄𑀧𑀺 ¶ 𑀏𑀲𑁄 𑀏𑀯 𑀲𑁂𑀬𑁆𑀬𑁄 𑀧𑀸𑀲𑀁𑀲𑀢𑀭𑁄 𑀲𑀼𑀦𑁆𑀤𑀭𑀢𑀭𑁄 𑀬𑁄 𑀅𑀫𑁆𑀳𑀸𑀓𑀁 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀘𑀗𑁆𑀓𑀫𑀦𑁆𑀢𑀁 𑀯𑀸 𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀸 𑀅𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀸 𑀕𑀺𑀳𑀻𑀦𑀁 ‘‘𑀅𑀬𑀁 ¶ 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑁄 𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀅𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 ¶ 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀲𑁄 𑀏𑀯 𑀲𑁂𑀬𑁆𑀬𑁄𑀢𑀺. 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀧𑀦 𑀅𑀲𑀢𑀺 𑀦 𑀏𑀢𑁂𑀳𑀺 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀪𑀸𑀲𑀺𑀢𑁄𑀯 𑀬𑀲𑁆𑀫𑀸 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 ‘‘𑀬𑁄 𑀏𑀯𑀁 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑁂𑀬𑁆𑀬𑁄’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑀁 𑀧𑀦 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑁧𑁯𑁪. 𑀯𑀡𑁆𑀡𑀯𑀸 𑀅𑀳𑁂𑀲𑀼𑀦𑁆𑀢𑀺 𑀅𑀜𑁆𑀜𑁄𑀬𑁂𑀯 𑀦𑁂𑀲𑀁 𑀅𑀪𑀺𑀦𑀯𑁄 𑀲𑀭𑀻𑀭𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄 𑀅𑀳𑁂𑀲𑀼𑀁. 𑀧𑀻𑀡𑀺𑀦𑁆𑀤𑁆𑀭𑀺𑀬𑀸𑀢𑀺 𑀧𑀜𑁆𑀘𑀳𑀺 𑀧𑀲𑀸𑀤𑁂𑀳𑀺 𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀫𑀺𑀮𑀸𑀢𑀪𑀸𑀯𑁂𑀦 𑀧𑀻𑀡𑀺𑀦𑁆𑀤𑁆𑀭𑀺𑀬𑀸. 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀡𑁆𑀡𑀯𑀦𑁆𑀢𑁄 𑀲𑀭𑀻𑀭𑀯𑀡𑁆𑀡𑀢𑁄 𑀧𑀦 𑀦𑁂𑀲𑀁 𑀫𑀼𑀔𑀯𑀡𑁆𑀡𑁄 𑀅𑀥𑀺𑀓𑀢𑀭𑀁 𑀧𑀲𑀦𑁆𑀦𑁄; 𑀅𑀘𑁆𑀙𑁄 𑀅𑀦𑀸𑀯𑀺𑀮𑁄 𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸𑀢𑀺 𑀬𑁂𑀦 𑀘 𑀢𑁂 𑀫𑀳𑀸𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀲𑀤𑀺𑀲𑁂𑀦 𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄, 𑀢𑀸𑀤𑀺𑀲𑁄 𑀅𑀜𑁆𑀜𑁂𑀲𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑁄 𑀅𑀢𑁆𑀣𑀺. 𑀬𑀣𑀸 𑀧𑀦 𑀇𑀫𑁂𑀲𑀁; 𑀏𑀯𑀁 𑀦 𑀢𑁂𑀲𑀁 𑀙𑀯𑀺𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸’’𑀢𑀺. 𑀇𑀢𑀺𑀳 𑀢𑁂 𑀪𑀺𑀓𑁆𑀔𑀽 𑀦𑁂𑀯 𑀉𑀤𑁆𑀤𑁂𑀲𑀁 𑀦 𑀧𑀭𑀺𑀧𑀼𑀘𑁆𑀙𑀁 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸. 𑀅𑀣 𑀔𑁄 𑀓𑀼𑀳𑀓𑀢𑀸𑀬 𑀅𑀪𑀽𑀢𑀕𑀼𑀡𑀲𑀁𑀯𑀡𑁆𑀡𑀦𑀸𑀬 𑀮𑀤𑁆𑀥𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦𑀺𑀤𑁆𑀤𑀸𑀭𑀸𑀫𑀢𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀜𑁆𑀘 𑀅𑀦𑀼𑀬𑀼𑀜𑁆𑀚𑀦𑁆𑀢𑀸 𑀇𑀫𑀁 𑀲𑀭𑀻𑀭𑀲𑁄𑀪𑀁 𑀧𑀸𑀧𑀼𑀡𑀺𑀁𑀲𑀼, 𑀬𑀣𑀸 𑀢𑀁 𑀩𑀸𑀮𑀸 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑀸𑀢𑀺.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸𑀢𑀺 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀯𑀸𑀲𑀺𑀦𑁄. 𑀓𑀘𑁆𑀘𑀺 𑀪𑀺𑀓𑁆𑀔𑀯𑁂 𑀔𑀫𑀦𑀻𑀬𑀦𑁆𑀢𑀺 𑀪𑀺𑀓𑁆𑀔𑀯𑁂 𑀓𑀘𑁆𑀘𑀺 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀔𑀫𑀦𑀻𑀬𑀁 𑀲𑀓𑁆𑀓𑀸 𑀔𑀫𑀺𑀢𑀼𑀁 𑀲𑀳𑀺𑀢𑀼𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀓𑀘𑁆𑀘𑀺 𑀬𑀸𑀧𑀦𑀻𑀬𑀦𑁆𑀢𑀺 𑀓𑀘𑁆𑀘𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀬𑀸𑀧𑁂𑀢𑀼𑀁 𑀕𑀫𑁂𑀢𑀼𑀁 𑀲𑀓𑁆𑀓𑀸, 𑀦 𑀓𑀺𑀜𑁆𑀘𑀺 𑀅𑀦𑁆𑀢𑀭𑀸𑀬𑀁 𑀤𑀲𑁆𑀲𑁂𑀢𑀻𑀢𑀺. 𑀓𑀼𑀘𑁆𑀙𑀺 𑀧𑀭𑀺𑀓𑀦𑁆𑀢𑁄𑀢𑀺 𑀓𑀼𑀘𑁆𑀙𑀺 𑀧𑀭𑀺𑀓𑀦𑁆𑀢𑀺𑀢𑁄 𑀯𑀭𑀁 𑀪𑀯𑁂𑀬𑁆𑀬; ‘‘𑀧𑀭𑀺𑀓𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀏𑀯𑀁 ¶ 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂𑀳𑀺 𑀓𑀢𑀓𑀫𑁆𑀫𑀁 𑀘𑁄𑀭𑀓𑀫𑁆𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀆𑀬𑀢𑀺𑀁 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀅𑀓𑀭𑀡𑀢𑁆𑀣𑀁 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑁧𑁯𑁫. 𑀆𑀫𑀦𑁆𑀢𑁂𑀢𑁆𑀯𑀸 ¶ 𑀘 𑀧𑀦 ‘‘𑀧𑀜𑁆𑀘𑀺𑀫𑁂 𑀪𑀺𑀓𑁆𑀔𑀯𑁂 𑀫𑀳𑀸𑀘𑁄𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀅𑀢𑁆𑀣𑀺 𑀘𑁂𑀯 𑀉𑀧𑀮𑀩𑁆𑀪𑀦𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀏𑀯𑀁 𑀳𑁄𑀢𑀻𑀢𑀺 ¶ 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀦𑁆𑀢𑀺 𑀏𑀢𑁆𑀣 𑀲𑀼𑀇𑀢𑀺 𑀦𑀺𑀧𑀸𑀢𑁄; 𑀓𑀼𑀤𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀲𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀲𑀁 𑀯𑀟𑁆𑀠𑁂𑀦𑁆𑀢𑁄 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀧𑀘𑁆𑀘𑀦𑁆𑀢𑀺𑀫𑀕𑀸𑀫𑀯𑀺𑀮𑁄𑀧𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀢𑁆𑀯𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀧𑀭𑀺𑀲𑁄 𑀳𑀼𑀢𑁆𑀯𑀸 𑀕𑀸𑀫𑁂𑀧𑀺 𑀅𑀕𑀸𑀫𑁂, 𑀚𑀦𑀧𑀤𑁂𑀧𑀺 𑀅𑀚𑀦𑀧𑀤𑁂 𑀓𑀭𑁄𑀦𑁆𑀢𑁄 𑀳𑀦𑀦𑁆𑀢𑁄 𑀖𑀸𑀢𑁂𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀙𑁂𑀤𑀸𑀧𑁂𑀦𑁆𑀢𑁄 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄.

𑀇𑀢𑀺 𑀩𑀸𑀳𑀺𑀭𑀓𑀫𑀳𑀸𑀘𑁄𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀲𑀤𑀺𑀲𑁂 𑀲𑀸𑀲𑀦𑁂 𑀧𑀜𑁆𑀘 𑀫𑀳𑀸𑀘𑁄𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀯 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀪𑀺𑀓𑁆𑀔𑀼𑀦𑁄𑀢𑀺 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼 𑀫𑀽𑀮𑀘𑁆𑀙𑀺𑀦𑁆𑀦𑁄 𑀧𑀸𑀭𑀸𑀚𑀺𑀓𑀧𑁆𑀧𑀢𑁆𑀢𑁄 ‘‘𑀧𑀸𑀧𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑁄 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀤𑁆𑀤𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 ‘‘𑀧𑀸𑀧𑀪𑀺𑀓𑁆𑀔𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲𑀸𑀧𑀺 𑀩𑀸𑀳𑀺𑀭𑀓𑀘𑁄𑀭𑀲𑁆𑀲 𑀯𑀺𑀬 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀳𑁄𑀢𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀢𑀢𑁆𑀣 𑀲𑀓𑁆𑀓𑀢𑁄𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄. 𑀕𑀭𑀼𑀓𑀢𑁄𑀢𑀺 𑀕𑀭𑀼𑀓𑀸𑀭𑀧𑁆𑀧𑀢𑁆𑀢𑁄. 𑀫𑀸𑀦𑀺𑀢𑁄𑀢𑀺 𑀫𑀦𑀲𑀸 𑀧𑀺𑀬𑀸𑀬𑀺𑀢𑁄. 𑀧𑀽𑀚𑀺𑀢𑁄𑀢𑀺 𑀘𑀢𑀼𑀧𑀘𑁆𑀘𑀬𑀸𑀪𑀺𑀳𑀸𑀭𑀧𑀽𑀚𑀸𑀬 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀅𑀧𑀘𑀺𑀢𑀺𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀭𑀺𑀢𑁆𑀯𑀸 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑀧𑀡𑀻𑀢𑁂 𑀓𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀲𑀓𑁆𑀓𑀢𑁄. 𑀬𑀲𑁆𑀫𑀺𑀁 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀬𑀁 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺, 𑀲𑁄 𑀫𑀸𑀦𑀺𑀢𑁄. 𑀬𑀲𑁆𑀲 𑀲𑀩𑁆𑀩𑀫𑁆𑀧𑁂𑀢𑀁 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀬𑀲𑁆𑀲 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀯𑀲𑁂𑀦 ¶ 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀅𑀧𑀘𑀺𑀢𑁄. 𑀇𑀫𑀲𑁆𑀲 𑀘 𑀧𑀦 𑀲𑀩𑁆𑀩𑀫𑁆𑀧𑀺 𑀇𑀫𑀁 𑀮𑁄𑀓𑀸𑀫𑀺𑀲𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀏𑀯𑀁 𑀳𑁄𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀲𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀺𑀓𑁆𑀔𑀸𑀬 𑀅𑀢𑀺𑀩𑁆𑀩𑀕𑀸𑀭𑀯𑁂 𑀉𑀤𑁆𑀥𑀢𑁂 𑀉𑀦𑁆𑀦𑀴𑁂 𑀘𑀧𑀮𑁂 𑀫𑀼𑀔𑀭𑁂 𑀯𑀺𑀓𑀺𑀡𑁆𑀡𑀯𑀸𑀘𑁂 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑁂 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀓𑁂 𑀮𑀸𑀪𑀕𑀭𑀼𑀓𑁂 𑀧𑀸𑀧𑀪𑀺𑀓𑁆𑀔𑀽 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀸𑀤𑀻𑀦𑀺 𑀓𑀼𑀳𑀓𑀯𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀣𑁂𑀭𑁄 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀫𑁆𑀫 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀫𑀸𑀦𑁄 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀦𑀺𑀕𑁆𑀕𑀢𑁄’’𑀢𑀺 𑀮𑁄𑀓𑀲𑀫𑁆𑀫𑀢𑀲𑁂𑀦𑀸𑀲𑀦𑀲𑀁𑀯𑀡𑁆𑀡𑀦𑀸𑀤𑀻𑀳𑀺 ¶ 𑀉𑀧𑀸𑀬𑁂𑀳𑀺 𑀮𑁄𑀓𑀁 𑀧𑀭𑀺𑀧𑀸𑀘𑁂𑀢𑀼𑀁 𑀧𑀝𑀺𑀩𑀮𑁂𑀳𑀺 𑀚𑀸𑀢𑀓𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑁂𑀳𑀺 𑀲𑀭𑀲𑀫𑁆𑀧𑀦𑁆𑀦𑁂𑀳𑀺 𑀧𑀸𑀧𑀪𑀺𑀓𑁆𑀔𑀽𑀳𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀕𑀼𑀡𑁄 𑀳𑀼𑀢𑁆𑀯𑀸 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄…𑀧𑁂… 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀬𑀁 𑀪𑀺𑀓𑁆𑀔𑀯𑁂 𑀧𑀞𑀫𑁄 𑀫𑀳𑀸𑀘𑁄𑀭𑁄𑀢𑀺 𑀅𑀬𑀁 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀘𑁄𑀭𑀓𑁄 𑀯𑀺𑀬 𑀦 𑀏𑀓𑀁 𑀓𑀼𑀮𑀁 𑀦 𑀤𑁆𑀯𑁂, 𑀅𑀣 𑀔𑁄 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀕𑀳𑀡𑀢𑁄 ‘‘𑀧𑀞𑀫𑁄 𑀫𑀳𑀸𑀘𑁄𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁂 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀸 𑀯𑀸 𑀆𑀪𑀺𑀥𑀫𑁆𑀫𑀺𑀓𑀸 𑀯𑀸 𑀯𑀺𑀦𑀬𑀥𑀭𑀸 𑀯𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀘𑀸𑀭𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀸 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑀸 𑀅𑀦𑀼𑀫𑁄𑀤𑀦𑀸𑀬 𑀥𑀫𑁆𑀫𑀓𑀣𑀸𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀢𑁆𑀢𑀺𑀬𑀸 𑀘 𑀮𑁄𑀓𑀁 𑀧𑀲𑀸𑀤𑁂𑀦𑁆𑀢𑀸 𑀚𑀦𑀧𑀤𑀘𑀸𑀭𑀺𑀓𑀁 ¶ 𑀘𑀭𑀦𑁆𑀢𑀺 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀅𑀧𑀘𑀺𑀢𑀸, 𑀢𑁂 ‘‘𑀢𑀦𑁆𑀢𑀺𑀧𑀯𑁂𑀡𑀺𑀖𑀝𑀦𑀓𑀸 𑀲𑀸𑀲𑀦𑀚𑁄𑀢𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀦𑁆𑀢𑀺 𑀢𑀣𑀸𑀕𑀢𑁂𑀦 𑀧𑀝𑀺𑀯𑀺𑀤𑁆𑀥𑀁 𑀧𑀘𑁆𑀘𑀓𑁆𑀔𑀓𑀢𑀁 𑀚𑀸𑀦𑀸𑀧𑀺𑀢𑀁 𑀯𑀸. 𑀅𑀢𑁆𑀢𑀦𑁄 𑀤𑀳𑀢𑀻𑀢𑀺 𑀧𑀭𑀺𑀲𑀫𑀚𑁆𑀛𑁂 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀧𑀲𑀸𑀤𑀦𑀻𑀬𑀁 𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀯𑀲𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁂𑀦 𑀯𑀺𑀜𑁆𑀜𑀽𑀚𑀦𑁂𑀦 ‘‘𑀅𑀳𑁄, 𑀪𑀦𑁆𑀢𑁂, 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸 𑀘 𑀲𑀼𑀧𑀭𑀺𑀲𑀼𑀤𑁆𑀥𑀸, 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀓𑁄 𑀅𑀫𑁆𑀳𑀸𑀤𑀺𑀲𑁂 𑀉𑀕𑁆𑀕𑀳𑀸𑀧𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀆𑀘𑀭𑀺𑀬𑀁 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 ¶ 𑀧𑀝𑀺𑀯𑀺𑀤𑁆𑀥𑀁 𑀲𑀬𑀫𑁆𑀪𑀼𑀜𑀸𑀡𑀸𑀥𑀺𑀕𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀯𑁂𑀤𑁂𑀢𑀺. 𑀅𑀬𑀁 𑀢𑀣𑀸𑀕𑀢𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀢𑁆𑀣𑁂𑀦𑀓𑁄 𑀤𑀼𑀢𑀺𑀬𑁄 𑀫𑀳𑀸𑀘𑁄𑀭𑁄.

𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀁. 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀲𑁂𑀝𑁆𑀞𑀘𑀭𑀺𑀬𑀁 𑀘𑀭𑀦𑁆𑀢𑀁; 𑀅𑀜𑁆𑀜𑀫𑁆𑀧𑀺 𑀯𑀸 𑀅𑀦𑀸𑀕𑀸𑀫𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀻𑀮𑀯𑀦𑁆𑀢𑀁 𑀧𑀼𑀣𑀼𑀚𑁆𑀚𑀦𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀯𑀢𑁆𑀣𑀼𑀓𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁. 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀯𑀤𑀢𑀺 𑀘𑁄𑀤𑁂𑀢𑀺; 𑀅𑀬𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑀫𑀓𑁆𑀔𑀻 𑀅𑀭𑀺𑀬𑀕𑀼𑀡𑀢𑁆𑀣𑁂𑀦𑀓𑁄 𑀢𑀢𑀺𑀬𑁄 𑀫𑀳𑀸𑀘𑁄𑀭𑁄.

𑀕𑀭𑀼𑀪𑀡𑁆𑀟𑀸𑀦𑀺 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀻𑀢𑀺 𑀬𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑁂 ‘‘𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬 𑀕𑀭𑀼𑀪𑀡𑁆𑀟𑀁 𑀅𑀯𑀸𑀳𑀭𑀼’’𑀦𑁆𑀢𑀺 (𑀧𑀭𑀺. 𑁪𑁭𑁯) 𑀏𑀢𑁆𑀣 𑀧𑀜𑁆𑀘𑀫𑀸𑀲𑀓𑀕𑁆𑀖𑀦𑀓𑀁 ‘‘𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀦 𑀏𑀯𑀁. 𑀅𑀣 𑀔𑁄 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 ¶ 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼…𑀧𑁂… 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 𑀯𑀘𑀦𑀢𑁄 𑀅𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀕𑀭𑀼𑀪𑀡𑁆𑀟𑀸𑀦𑀺. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑁂𑀪𑀗𑁆𑀕𑀺𑀬𑀸𑀦𑀺 𑀦 𑀯𑀺𑀪𑀚𑀺𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀸𑀦𑀺𑀧𑀺 𑀅𑀯𑀺𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼…𑀧𑁂… 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 (𑀘𑀽𑀴𑀯. 𑁩𑁨𑁨) 𑀯𑀘𑀦𑀢𑁄 𑀅𑀯𑁂𑀪𑀗𑁆𑀕𑀺𑀬𑀢𑁆𑀢𑀸 𑀲𑀸𑀥𑀸𑀭𑀡𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀺. 𑀆𑀭𑀸𑀫𑁄 𑀆𑀭𑀸𑀫𑀯𑀢𑁆𑀣𑀽𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀻’’𑀢𑀺 𑀔𑀦𑁆𑀥𑀓𑁂 𑀆𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀫𑁂𑀯 ¶ 𑀪𑀡𑀺𑀲𑁆𑀲𑀸𑀫. 𑀢𑁂𑀳𑀺 𑀕𑀺𑀳𑀻 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀸𑀦𑀺 𑀤𑀢𑁆𑀯𑀸 𑀤𑀢𑁆𑀯𑀸 𑀕𑀺𑀳𑀻𑀁 𑀲𑀗𑁆𑀕𑀡𑁆𑀳𑀸𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺. 𑀉𑀧𑀮𑀸𑀧𑁂𑀢𑀻𑀢𑀺 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄’’𑀢𑀺 𑀏𑀯𑀁 𑀮𑀧𑀦𑀓𑁂 𑀅𑀦𑀼𑀩𑀦𑁆𑀥𑀦𑀓𑁂 𑀲𑀲𑁆𑀦𑁂𑀳𑁂 𑀓𑀭𑁄𑀢𑀺. 𑀅𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀜𑁆𑀘 ¶ 𑀕𑀭𑀼𑀧𑀭𑀺𑀓𑁆𑀔𑀸𑀭𑀁 𑀢𑀣𑀸𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸 𑀕𑀺𑀳𑀺 𑀲𑀗𑁆𑀕𑀡𑁆𑀳𑀦𑀓𑁄 𑀘𑀢𑀼𑀢𑁆𑀣𑁄 𑀫𑀳𑀸𑀘𑁄𑀭𑁄. 𑀲𑁄 𑀘 𑀧𑀦𑀸𑀬𑀁 𑀇𑀫𑀁 𑀕𑀭𑀼𑀪𑀡𑁆𑀟𑀁 𑀓𑀼𑀮𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑁄 𑀘 𑀳𑁄𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀪𑀺𑀪𑀯𑀺𑀢𑁆𑀯𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄𑀢𑀺 𑀅𑀬𑀁 𑀇𑀫𑁂𑀲𑀁 𑀘𑁄𑀭𑀸𑀦𑀁 𑀚𑁂𑀝𑁆𑀞𑀘𑁄𑀭𑁄; 𑀇𑀫𑀺𑀦𑀸 𑀲𑀤𑀺𑀲𑁄 𑀘𑁄𑀭𑁄 𑀦𑀸𑀫 𑀦𑀢𑁆𑀣𑀺, 𑀬𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀸𑀢𑀻𑀢𑀁 𑀅𑀢𑀺𑀲𑀡𑁆𑀳𑀲𑀼𑀔𑀼𑀫𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀣𑁂𑀦𑁂𑀢𑀺. 𑀓𑀺𑀁 𑀧𑀦 𑀲𑀓𑁆𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀯𑀺𑀬 𑀯𑀜𑁆𑀘𑁂𑀢𑁆𑀯𑀸 𑀣𑁂𑀦𑁂𑀢𑁆𑀯𑀸 𑀕𑀳𑁂𑀢𑀼𑀦𑁆𑀢𑀺? 𑀦 𑀲𑀓𑁆𑀓𑀸, 𑀢𑁂𑀦𑁂𑀯𑀸𑀳 𑁋 ‘‘𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺. 𑀅𑀬𑀜𑁆𑀳𑀺 𑀅𑀢𑁆𑀢𑀦𑀺 𑀅𑀲𑀦𑁆𑀢𑀁 𑀢𑀁 𑀥𑀫𑁆𑀫𑀁 𑀓𑁂𑀯𑀮𑀁 ‘‘𑀅𑀢𑁆𑀣𑀺 𑀫𑀬𑁆𑀳𑀁 𑀏𑀲𑁄’’𑀢𑀺 𑀉𑀮𑁆𑀮𑀧𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀞𑀸𑀦𑀸 𑀘𑀸𑀯𑁂𑀢𑀼𑀁, 𑀅𑀢𑁆𑀢𑀦𑀺 𑀯𑀸 𑀲𑀁𑀯𑀺𑀚𑁆𑀚𑀫𑀸𑀦𑀁 𑀓𑀸𑀢𑀼𑀁. 𑀅𑀣 𑀓𑀲𑁆𑀫𑀸 𑀘𑁄𑀭𑁄𑀢𑀺 𑀯𑀼𑀢𑁆𑀢𑁄𑀢𑀺? 𑀬𑀲𑁆𑀫𑀸 𑀢𑀁 𑀉𑀮𑁆𑀮𑀧𑀺𑀢𑁆𑀯𑀸 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂 𑀕𑀡𑁆𑀳𑀸𑀢𑀺. 𑀏𑀯𑀜𑁆𑀳𑀺 𑀕𑀡𑁆𑀳𑀢𑀸 𑀢𑁂 𑀧𑀘𑁆𑀘𑀬𑀸 𑀲𑀼𑀔𑀼𑀫𑁂𑀦 𑀉𑀧𑀸𑀬𑁂𑀦 𑀯𑀜𑁆𑀘𑁂𑀢𑁆𑀯𑀸 𑀣𑁂𑀦𑁂𑀢𑁆𑀯𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀣𑁂𑀬𑁆𑀬𑀸𑀬 𑀯𑁄 𑀪𑀺𑀓𑁆𑀔𑀯𑁂 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 𑁋 𑀬𑀁 𑀅𑀯𑁄𑀘𑀼𑀫𑁆𑀳 𑁋 ‘‘𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 ¶ . 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀏𑀢𑀁 𑀅𑀯𑁄𑀘𑀼𑀫𑁆𑀳𑀸𑀢𑀺 𑀘𑁂. ‘‘𑀣𑁂𑀬𑁆𑀬𑀸𑀬 𑀯𑁄 𑀪𑀺𑀓𑁆𑀔𑀯𑁂 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺 𑀪𑀺𑀓𑁆𑀔𑀯𑁂 𑀬𑀲𑁆𑀫𑀸 𑀲𑁄 𑀢𑁂𑀦 𑀭𑀝𑁆𑀞𑀧𑀺𑀡𑁆𑀟𑁄 𑀣𑁂𑀬𑁆𑀬𑀸𑀬 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀳𑀺 𑀯𑁄𑀓𑀸𑀭𑁄 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫-𑁩𑁬) 𑀯𑀺𑀬 ¶ 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀢𑀲𑁆𑀫𑀸 ‘‘𑀢𑀼𑀫𑁆𑀳𑁂𑀳𑀺 𑀪𑀼𑀢𑁆𑀢𑁄’’𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀦 𑀤𑀝𑁆𑀞𑀩𑁆𑀩𑁄.

𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀕𑀸𑀣𑀸𑀳𑀺 𑀯𑀺𑀪𑀽𑀢𑀢𑀭𑀁 𑀓𑀭𑁄𑀦𑁆𑀢𑁄 ‘‘𑀅𑀜𑁆𑀜𑀣𑀸 𑀲𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀣𑀸 𑀲𑀦𑁆𑀢𑀦𑁆𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁂𑀦 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀦𑁆𑀢𑀁. 𑀅𑀜𑁆𑀜𑀣𑀸 𑀬𑁄 𑀧𑀯𑁂𑀤𑀬𑁂𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁂𑀦 𑀅𑀜𑁆𑀜𑁂𑀦 𑀆𑀓𑀸𑀭𑁂𑀦 𑀬𑁄 𑀧𑀯𑁂𑀤𑁂𑀬𑁆𑀬. ‘‘𑀧𑀭𑀫𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀅𑀢𑁆𑀣𑀺 𑀫𑁂 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀏𑀯𑀁 𑀚𑀸𑀦𑀸𑀧𑁂𑀬𑁆𑀬. 𑀧𑀯𑁂𑀤𑁂𑀢𑁆𑀯𑀸 𑀘 𑀧𑀦 𑀢𑀸𑀬 𑀧𑀯𑁂𑀤𑀦𑀸𑀬 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀅𑀭𑀳𑀸 𑀯𑀺𑀬 𑀪𑀼𑀜𑁆𑀚𑀢𑀺. 𑀦𑀺𑀓𑀘𑁆𑀘 𑀓𑀺𑀢𑀯𑀲𑁆𑀲𑁂𑀯 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀦𑁆𑀢𑀺 𑀦𑀺𑀓𑀘𑁆𑀘𑀸𑀢𑀺 𑀯𑀜𑁆𑀘𑁂𑀢𑁆𑀯𑀸 𑀅𑀜𑁆𑀜𑀣𑀸 𑀲𑀦𑁆𑀢𑀁 𑀅𑀜𑁆𑀜𑀣𑀸 𑀤𑀲𑁆𑀲𑁂𑀢𑁆𑀯𑀸. 𑀅𑀕𑀼𑀫𑁆𑀩𑀅𑀕𑀘𑁆𑀙𑀪𑀽𑀢𑀫𑁂𑀯 𑀲𑀸𑀔𑀸𑀧𑀮𑀸𑀲𑀧𑀮𑁆𑀮𑀯𑀸𑀤𑀺𑀘𑁆𑀙𑀸𑀤𑀦𑁂𑀦 𑀕𑀼𑀫𑁆𑀩𑀫𑀺𑀯 𑀕𑀘𑁆𑀙𑀫𑀺𑀯 𑀘 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸. 𑀓𑀺𑀢𑀯𑀲𑁆𑀲𑁂𑀯𑀸𑀢𑀺 𑀯𑀜𑁆𑀘𑀓𑀲𑁆𑀲 𑀓𑁂𑀭𑀸𑀝𑀺𑀓𑀲𑁆𑀲 𑀕𑀼𑀫𑁆𑀩𑀕𑀘𑁆𑀙𑀲𑀜𑁆𑀜𑀸𑀬 𑀅𑀭𑀜𑁆𑀜𑁂 𑀆𑀕𑀢𑀸𑀕𑀢𑁂 𑀲𑀓𑀼𑀡𑁂 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑀧𑁆𑀧𑀓𑀲𑁆𑀲 𑀲𑀸𑀓𑀼𑀡𑀺𑀓𑀲𑁆𑀲𑁂𑀯. 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀦𑁆𑀢𑀺 𑀢𑀲𑁆𑀲𑀸𑀧𑀺 𑀅𑀦𑀭𑀳𑀦𑁆𑀢𑀲𑁆𑀲𑁂𑀯 𑀲𑀢𑁄 𑀅𑀭𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀮𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀢𑁄; 𑀬𑀁 𑀢𑀁 𑀪𑀼𑀢𑁆𑀢𑀁 𑀢𑀁 𑀬𑀣𑀸 𑀲𑀸𑀓𑀼𑀡𑀺𑀓𑀓𑀺𑀢𑀯𑀲𑁆𑀲 𑀦𑀺𑀓𑀘𑁆𑀘 ¶ 𑀯𑀜𑁆𑀘𑁂𑀢𑁆𑀯𑀸 𑀲𑀓𑀼𑀡𑀕𑁆𑀕𑀳𑀡𑀁, 𑀏𑀯𑀁 𑀫𑀦𑀼𑀲𑁆𑀲𑁂 𑀯𑀜𑁆𑀘𑁂𑀢𑁆𑀯𑀸 𑀮𑀤𑁆𑀥𑀲𑁆𑀲 𑀪𑁄𑀚𑀦𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀣𑁂𑀬𑁆𑀬𑁂𑀦 𑀪𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑀇𑀫𑀁 𑀧𑀦 𑀅𑀢𑁆𑀣𑀯𑀲𑀁 𑀅𑀚𑀸𑀦𑀦𑁆𑀢𑀸 𑀬𑁂 𑀏𑀯𑀁 𑀪𑀼𑀜𑁆𑀚𑀦𑁆𑀢𑀺, 𑀓𑀸𑀲𑀸𑀯𑀓𑀡𑁆𑀞𑀸…𑀧𑁂… 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂 𑀓𑀸𑀲𑀸𑀯𑀓𑀡𑁆𑀞𑀸𑀢𑀺 𑀓𑀸𑀲𑀸𑀯𑁂𑀦 𑀯𑁂𑀞𑀺𑀢𑀓𑀡𑁆𑀞𑀸. 𑀏𑀢𑁆𑀢𑀓𑀫𑁂𑀯 𑀅𑀭𑀺𑀬𑀤𑁆𑀥𑀚𑀥𑀸𑀭𑀡𑀫𑀢𑁆𑀢𑀁, 𑀲𑁂𑀲𑀁 𑀲𑀸𑀫𑀜𑁆𑀜𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸’’𑀢𑀺 (𑀫. 𑀦𑀺. 𑁩.𑁩𑁮𑁦) 𑀏𑀯𑀁 𑀯𑀼𑀢𑁆𑀢𑀤𑀼𑀲𑁆𑀲𑀻𑀮𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀧𑀥𑀫𑁆𑀫𑀸𑀢𑀺 𑀮𑀸𑀫𑀓𑀥𑀫𑁆𑀫𑀸. 𑀅𑀲𑀜𑁆𑀜𑀢𑀸𑀢𑀺 𑀓𑀸𑀬𑀸𑀤𑀻𑀳𑀺 𑀅𑀲𑀜𑁆𑀜𑀢𑀸. 𑀧𑀸𑀧𑀸𑀢𑀺 𑀮𑀸𑀫𑀓𑀧𑀼𑀕𑁆𑀕𑀮𑀸. 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀓𑀭𑀡𑀓𑀸𑀮𑁂 𑀆𑀤𑀻𑀦𑀯𑀁 𑀅𑀤𑀺𑀲𑁆𑀯𑀸 𑀓𑀢𑁂𑀳𑀺 𑀧𑀭𑀯𑀜𑁆𑀘𑀦𑀸𑀤𑀻𑀳𑀺 𑀧𑀸𑀧𑀓𑀫𑁆𑀫𑁂𑀳𑀺. 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂𑀢𑀺 𑀦𑀺𑀭𑀲𑁆𑀲𑀸𑀤𑀁 𑀤𑀼𑀕𑁆𑀕𑀢𑀺𑀁 𑀢𑁂 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀲𑁆𑀫𑀸 𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑀸𑀬𑀁 𑀤𑀼𑀲𑁆𑀲𑀻𑀮𑁄 𑀅𑀲𑀜𑁆𑀜𑀢𑁄 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑁄 ¶ 𑀓𑀼𑀳𑀦𑀸𑀬 𑀮𑁄𑀓𑀁 𑀯𑀜𑁆𑀘𑀓𑁄 𑀧𑀼𑀕𑁆𑀕𑀮𑁄 𑀢𑀢𑁆𑀢𑀁 𑀅𑀕𑁆𑀕𑀺𑀲𑀺𑀔𑀽𑀧𑀫𑀁 𑀅𑀬𑁄𑀕𑀼𑀴𑀁 𑀪𑀼𑀜𑁆𑀚𑁂𑀬𑁆𑀬 ¶ 𑀅𑀚𑁆𑀛𑁄𑀳𑀭𑁂𑀬𑁆𑀬, 𑀢𑀲𑁆𑀲 𑀬𑀜𑁆𑀘𑁂𑀢𑀁 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑁂𑀬𑁆𑀬, 𑀬𑀜𑁆𑀘𑁂𑀢𑀁 𑀅𑀬𑁄𑀕𑀼𑀴𑀁, 𑀢𑁂𑀲𑀼 𑀤𑁆𑀯𑀻𑀲𑀼 𑀅𑀬𑁄𑀕𑀼𑀴𑁄𑀯 𑀪𑀼𑀢𑁆𑀢𑁄 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄 𑀧𑀡𑀻𑀢𑀢𑀭𑁄 𑀘 𑀪𑀯𑁂𑀬𑁆𑀬, 𑀦 𑀳𑀺 𑀅𑀬𑁄𑀕𑀼𑀴𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀭𑀸𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦𑀸𑀧𑀺 𑀤𑀼𑀚𑁆𑀚𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺. 𑀏𑀯𑀁 𑀧𑀝𑀺𑀮𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀭𑀝𑁆𑀞𑀧𑀺𑀡𑁆𑀟𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀭𑀸𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀅𑀬𑀜𑁆𑀳𑀺 𑀓𑁄𑀝𑀺𑀧𑁆𑀧𑀢𑁆𑀢𑁄 𑀫𑀺𑀘𑁆𑀙𑀸𑀚𑀻𑀯𑁄𑀢𑀺.

𑀏𑀯𑀁 𑀧𑀸𑀧𑀓𑀺𑀭𑀺𑀬𑀸𑀬 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻𑀦𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀣 𑀔𑁄 𑀪𑀕𑀯𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬…𑀧𑁂… 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀘 𑀯𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀪𑀺𑀚𑀸𑀦’’𑀦𑁆𑀢𑀺 𑀆𑀤𑀺𑀫𑀸𑀳.

𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑁆𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀅𑀥𑀺𑀫𑀸𑀦𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁 𑀏𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺.

𑀅𑀥𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁬. 𑀢𑀢𑁆𑀣 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀦𑁄𑀢𑀺 𑀅𑀭𑀳𑀢𑁆𑀢𑁂 𑀜𑀸𑀡𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑁂𑀬𑁂𑀯 ‘‘𑀤𑀺𑀝𑁆𑀞𑀁 𑀅𑀫𑁆𑀳𑁂𑀳𑀺 𑀅𑀭𑀳𑀢𑁆𑀢’’𑀦𑁆𑀢𑀺 𑀤𑀺𑀝𑁆𑀞𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸. 𑀏𑀲 𑀦𑀬𑁄 𑀅𑀧𑁆𑀧𑀢𑁆𑀢𑀸𑀤𑀻𑀲𑀼. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 ¶ 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀧𑁆𑀧𑀢𑁆𑀢𑁂. 𑀅𑀦𑀥𑀺𑀕𑀢𑁂𑀢𑀺 𑀫𑀕𑁆𑀕𑀪𑀸𑀯𑀦𑀸𑀬 𑀅𑀦𑀥𑀺𑀕𑀢𑁂; 𑀅𑀧𑁆𑀧𑀝𑀺𑀮𑀤𑁆𑀥𑁂𑀢𑀺𑀧𑀺 𑀅𑀢𑁆𑀣𑁄. 𑀅𑀲𑀘𑁆𑀙𑀺𑀓𑀢𑁂𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁂 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀅𑀧𑁆𑀧𑀘𑁆𑀘𑀓𑁆𑀔𑀓𑀢𑁂. 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀥𑀺𑀕𑀢𑀫𑀸𑀦𑁂𑀦; ‘‘𑀅𑀥𑀺𑀕𑀢𑀸 𑀫𑀬’’𑀦𑁆𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀅𑀥𑀺𑀓𑀫𑀸𑀦𑁂𑀦 𑀯𑀸 𑀣𑀤𑁆𑀥𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀁𑀲𑀼; ‘‘𑀧𑀢𑁆𑀢𑀁 𑀆𑀯𑀼𑀲𑁄 𑀅𑀫𑁆𑀳𑁂𑀳𑀺 𑀅𑀭𑀳𑀢𑁆𑀢𑀁, 𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀲𑀁 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸 𑀓𑁂𑀯𑀮𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀣𑀸𑀭𑀽𑀧𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀭𑀸𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺; 𑀭𑀸𑀕𑀢𑁆𑀣𑀸𑀬 𑀦𑀫𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀇𑀢𑀭𑁂𑀲𑀼.

𑀢𑀜𑁆𑀘 ¶ 𑀔𑁄 𑀏𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀢𑀜𑁆𑀘 𑀔𑁄 𑀏𑀢𑀁 𑀢𑁂𑀲𑀁 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀆𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑁂 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺; 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀓𑀲𑁆𑀲 ¶ 𑀧𑀦𑀸𑀬𑀁 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀺 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄. 𑀢𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 ‘‘𑀅𑀳𑀁 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 𑀅𑀥𑀺𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀤𑀼𑀲𑁆𑀲𑀻𑀮𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺, 𑀲𑁄 𑀳𑀺 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀸𑀲𑁄𑀯. 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀼𑀤𑁆𑀥𑀲𑀫𑀣𑀮𑀸𑀪𑀺𑀁 𑀯𑀸 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀯𑀸 𑀅𑀦𑁆𑀢𑀭𑀸 𑀞𑀧𑁂𑀢𑀺, 𑀲𑁄 𑀳𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀺𑀢𑁆𑀯𑀸 ‘‘𑀅𑀳𑀁 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀸 ‘‘𑀲𑀓𑀤𑀸𑀕𑀸𑀫𑀻’’𑀢𑀺 𑀯𑀸 ‘‘𑀅𑀦𑀸𑀕𑀸𑀫𑀻’’𑀢𑀺 𑀯𑀸 𑀫𑀜𑁆𑀜𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀧𑀦 𑀅𑀭𑀳𑀢𑁆𑀢𑁂𑀬𑁂𑀯 𑀞𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀺𑀩𑀮𑁂𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀗𑁆𑀔𑀸𑀭𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀲𑀝𑁆𑀞𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀅𑀲𑀻𑀢𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀘𑀸𑀭𑁄 𑀳𑁄𑀢𑀺. 𑀲𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑀭𑀸 𑀅𑀞𑀢𑁆𑀯𑀸𑀯 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀫𑀜𑁆𑀜𑀢𑀻𑀢𑀺.

𑀲𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭. 𑀅𑀦𑀪𑀺𑀚𑀸𑀦𑀦𑁆𑀢𑀺 𑀦 𑀅𑀪𑀺𑀚𑀸𑀦𑀁. 𑀬𑀲𑁆𑀫𑀸 𑀧𑀦𑀸𑀬𑀁 𑀅𑀦𑀪𑀺𑀚𑀸𑀦𑀁 𑀲𑀫𑀼𑀤𑀸𑀘𑀭𑀢𑀺, 𑀲𑁆𑀯𑀲𑁆𑀲 𑀲𑀦𑁆𑀢𑀸𑀦𑁂 ¶ 𑀅𑀦𑀼𑀧𑁆𑀧𑀦𑁆𑀦𑁄 𑀜𑀸𑀡𑁂𑀦 𑀘 𑀅𑀲𑀘𑁆𑀙𑀺𑀓𑀢𑁄𑀢𑀺 𑀅𑀪𑀽𑀢𑁄 𑀳𑁄𑀢𑀺. 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀅𑀲𑀦𑁆𑀢𑀁 𑀅𑀪𑀽𑀢𑀁 𑀅𑀲𑀁𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀚𑀸𑀦𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁 ¶ .

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀁. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀺 𑀢𑀁 𑀉𑀧𑀦𑁂𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀉𑀧𑀦𑁂𑀢𑀻𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑁄, 𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁; 𑀏𑀯𑀁 𑀓𑀢𑁆𑀯𑀸 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑀲𑁆𑀫𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀛𑀸𑀦𑀁 𑀯𑀺𑀫𑁄𑀓𑁆𑀔𑀁 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁…𑀧𑁂… 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻𑀢𑀺 𑀏𑀯𑀁 𑀛𑀸𑀦𑀸𑀤𑀬𑁄 𑀅𑀦𑁂𑀓𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀅𑀢𑁆𑀢𑀼𑀧𑀦𑀸𑀬𑀺𑀓𑀪𑀸𑀯𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀉𑀧𑀦𑁂𑀢𑀻’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀁 𑀅𑀓𑀸𑀲𑀺. 𑀢𑀢𑁆𑀣 ‘‘𑀏𑀢𑁂 𑀥𑀫𑁆𑀫𑀸 𑀫𑀬𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄 𑀅𑀢𑁆𑀢𑀦𑀺 𑀉𑀧𑀦𑁂𑀢𑀺. ‘‘𑀅𑀳𑀁 𑀏𑀢𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄 𑀅𑀢𑁆𑀢𑀸𑀦𑀁 𑀢𑁂𑀲𑀼 𑀉𑀧𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀫𑀺𑀯 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁. 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀉𑀢𑁆𑀢𑀫𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁. 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀢𑁆𑀣, 𑀛𑀸𑀦𑀸𑀤𑀺𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀮𑀁 𑀯𑀸 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑀲𑁆𑀲𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄, 𑀢𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀏𑀯𑀁 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑁂𑀦 𑀜𑀸𑀡𑀤𑀲𑁆𑀲𑀦𑁂𑀦 𑀲𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀤𑀲𑁆𑀲𑀦𑀦𑁆𑀢𑀺 𑀬𑀁 𑀜𑀸𑀡𑀁 𑀢𑀁 𑀤𑀲𑁆𑀲𑀦𑀁; 𑀬𑀁 𑀤𑀲𑁆𑀲𑀦𑀁 𑀢𑀁 𑀜𑀸𑀡’’𑀦𑁆𑀢𑀺 𑀯𑀺𑀚𑁆𑀚𑀸𑀲𑀻𑀲𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸 𑀧𑀦𑁂𑀢𑁆𑀣 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 ‘‘𑀜𑀸𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 𑀆𑀭𑁄𑀘𑁂𑀬𑁆𑀬. 𑀇𑀢𑁆𑀣𑀺𑀬𑀸 𑀯𑀸𑀢𑀺𑀆𑀤𑀺 𑀧𑀦 𑀆𑀭𑁄𑀘𑁂𑀢𑀩𑁆𑀩𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀏𑀢𑁂𑀲𑀜𑁆𑀳𑀺 𑀆𑀭𑁄𑀘𑀺𑀢𑁂 𑀆𑀭𑁄𑀘𑀺𑀢𑀁 𑀳𑁄𑀢𑀺 𑀦 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀸𑀦𑀁, 𑀦𑀸𑀧𑀺 𑀧𑁂𑀢𑀬𑀓𑁆𑀔𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺. 𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻𑀢𑀺 𑀲𑀫𑀼𑀤𑀸𑀘𑀭𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀫𑁂𑀢𑀁. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 ‘‘𑀚𑀸𑀦𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂, 𑀧𑀲𑁆𑀲𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂’’𑀢𑀺 𑀇𑀤𑀁 𑀢𑁂𑀲𑀼 𑀛𑀸𑀦𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀚𑀸𑀦𑀦𑀧𑀲𑁆𑀲𑀦𑀸𑀦𑀁 𑀧𑀯𑀢𑁆𑀢𑀺𑀤𑀻𑀧𑀦𑀁, ‘‘𑀅𑀢𑁆𑀣𑀺 𑀘 𑀫𑁂 𑀏𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑀪𑀸𑀯𑀤𑀻𑀧𑀦𑀁 ¶ .

𑁧𑁯𑁮. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀆𑀧𑀢𑁆𑀢𑀺𑀧𑀝𑀺𑀚𑀸𑀦𑀦𑀲𑀫𑀬𑀤𑀲𑁆𑀲𑀦𑀫𑁂𑀢𑀁. 𑀅𑀬𑀁 𑀧𑀦 𑀆𑀭𑁄𑀘𑀺𑀢𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀦𑁆𑀦𑁄 𑀬𑀲𑁆𑀫𑀸 𑀧𑀭𑁂𑀦 𑀘𑁄𑀤𑀺𑀢𑁄 𑀯𑀸 𑀅𑀘𑁄𑀤𑀺𑀢𑁄 ¶ 𑀯𑀸 𑀧𑀝𑀺𑀚𑀸𑀦𑀸𑀢𑀺; 𑀢𑀲𑁆𑀫𑀸 ‘‘𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁂 𑀢𑀸𑀯 𑁋 𑀓𑀺𑀁 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀅𑀥𑀺𑀕𑀫𑀧𑀼𑀘𑁆𑀙𑀸; 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀼, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀲𑀼 𑀯𑀸 𑀓𑀺𑀁 𑀢𑀬𑀸 𑀅𑀥𑀺𑀕𑀢𑀦𑁆𑀢𑀺. 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀉𑀧𑀸𑀬𑀧𑀼𑀘𑁆𑀙𑀸. 𑀅𑀬𑀜𑁆𑀳𑀺 𑀏𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀓𑀺𑀁 𑀢𑀬𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 ¶ 𑀥𑀼𑀭𑀁 𑀓𑀢𑁆𑀯𑀸 𑀅𑀥𑀺𑀕𑀢𑀁, 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸? 𑀓𑀺𑀁 𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦? 𑀢𑀣𑀸 𑀓𑀺𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀅𑀭𑀽𑀧𑁂? 𑀓𑀺𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀩𑀳𑀺𑀤𑁆𑀥𑀸𑀢𑀺? 𑀓𑀤𑀸 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀓𑀸𑀮𑀧𑀼𑀘𑁆𑀙𑀸. 𑀧𑀼𑀩𑁆𑀩𑀡𑁆𑀳𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺? 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀑𑀓𑀸𑀲𑀧𑀼𑀘𑁆𑀙𑀸. 𑀓𑀢𑀭𑀲𑁆𑀫𑀺𑀁 𑀑𑀓𑀸𑀲𑁂, 𑀓𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑁂, 𑀤𑀺𑀯𑀸𑀝𑁆𑀞𑀸𑀦𑁂, 𑀭𑀼𑀓𑁆𑀔𑀫𑀽𑀮𑁂, 𑀫𑀡𑁆𑀟𑀧𑁂, 𑀓𑀢𑀭𑀲𑁆𑀫𑀺𑀁 𑀯𑀸 𑀯𑀺𑀳𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀧𑀳𑀻𑀦𑀓𑀺𑀮𑁂𑀲𑀧𑀼𑀘𑁆𑀙𑀸. 𑀓𑀢𑀭𑀫𑀕𑁆𑀕𑀯𑀚𑁆𑀛𑀸 𑀢𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀧𑀝𑀺𑀮𑀤𑁆𑀥𑀥𑀫𑁆𑀫𑀧𑀼𑀘𑁆𑀙𑀸. 𑀧𑀞𑀫𑀫𑀕𑁆𑀕𑀸𑀤𑀻𑀲𑀼 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀢𑁆𑀯𑀁 𑀮𑀸𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀫𑀸 𑀇𑀤𑀸𑀦𑀺 𑀘𑁂𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀲𑁄 𑀏𑀢𑁆𑀢𑀸𑀯𑀢𑀸𑀯 𑀲𑀓𑁆𑀓𑀸𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀁 𑀛𑀸𑀦𑀁, 𑀉𑀤𑀸𑀳𑀼 𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺? 𑀬𑁄 𑀳𑀺 𑀬𑁂𑀦 𑀅𑀥𑀺𑀕𑀢𑁄 𑀥𑀫𑁆𑀫𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀤𑀁 𑀦𑀸𑀫 𑀫𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼 𑀓𑀺𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀝𑁆𑀞𑀢𑀺𑀁𑀲𑀸𑀬 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀽𑀧𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑁂𑀲𑀼 ¶ 𑀯𑀸 𑀥𑀫𑁆𑀫𑁂𑀲𑀼 𑀓𑁂𑀦 𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸’’𑀢𑀺 𑀬𑁄 𑀳𑀺 𑀬𑀲𑁆𑀲𑀸𑀪𑀺𑀦𑀺𑀯𑁂𑀲𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀬𑀁 𑀦𑀸𑀫 𑀫𑁂 𑀅𑀪𑀺𑀦𑀺𑀯𑁂𑀲𑁄 𑀏𑀯𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀤𑀸 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀼𑀩𑁆𑀩𑀡𑁆𑀳𑁂, 𑀉𑀤𑀸𑀳𑀼 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀮𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀅𑀥𑀺𑀕𑀢𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑁆𑀣 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀤𑀺𑀯𑀸𑀝𑁆𑀞𑀸𑀦𑁂, 𑀉𑀤𑀸𑀳𑀼 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑁄𑀓𑀸𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀫𑁂 𑀑𑀓𑀸𑀲𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀞𑀫𑀫𑀕𑁆𑀕𑀯𑀚𑁆𑀛𑀸, 𑀉𑀤𑀸𑀳𑀼 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀯𑀚𑁆𑀛𑀸’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑀘𑁂 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄 ¶ , ‘‘𑀓𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲, 𑀉𑀤𑀸𑀳𑀼 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸’’𑀢𑀺 𑀲𑀩𑁆𑀩𑁂𑀲𑀁 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑀸 ¶ 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑀘𑁂 ‘‘𑀇𑀫𑁂𑀲𑀁 𑀦𑀸𑀫𑀸𑀳𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀯𑀤𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁, 𑀩𑀳𑀼𑀲𑁆𑀲𑀼𑀢𑀸 𑀳𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸 𑀪𑀺𑀓𑁆𑀔𑀽 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺.

𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀧𑀝𑀺𑀧𑀤𑀸 𑀲𑁄𑀥𑁂𑀢𑀩𑁆𑀩𑀸. 𑀬𑀤𑀺 𑀆𑀕𑀫𑀦𑀧𑀝𑀺𑀧𑀤𑀸 𑀦 𑀲𑀼𑀚𑁆𑀛𑀢𑀺, ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀦 𑀮𑀩𑁆𑀪𑀢𑀻’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀬𑀤𑀺 𑀧𑀦𑀲𑁆𑀲 𑀆𑀕𑀫𑀦𑀧𑀝𑀺𑀧𑀤𑀸 𑀲𑀼𑀚𑁆𑀛𑀢𑀺, ‘‘𑀤𑀻𑀖𑀭𑀢𑁆𑀢𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑁄 𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺; 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁬) 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺.

𑀅𑀧𑀺𑀘 𑀔𑁄 𑀦 𑀏𑀢𑁆𑀢𑀓𑁂𑀦𑀸𑀧𑀺 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀲𑀢𑁄 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀉𑀢𑁆𑀢𑀸𑀲𑁂𑀢𑀩𑁆𑀩𑁄. 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀅𑀲𑀦𑀺𑀬𑀸𑀧𑀺 𑀫𑀢𑁆𑀣𑀓𑁂 ¶ 𑀧𑀢𑀫𑀸𑀦𑀸𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀦 𑀳𑁄𑀢𑀺. 𑀲𑀘𑀲𑁆𑀲 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺, ‘‘𑀦 𑀢𑁆𑀯𑀁 𑀅𑀭𑀳𑀸’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀳𑀼𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀦𑁆𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑁂𑀲𑀺𑀢𑀁 𑀲𑀓𑁆𑀓𑀸𑀭𑀁 𑀅𑀭𑀳𑀢𑀻𑀢𑀺.

𑀧𑀸𑀧𑀺𑀘𑁆𑀙𑁄𑀢𑀺 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀤𑀼𑀲𑁆𑀲𑀻𑀮𑁄𑀯 𑀲𑀫𑀸𑀦𑁄 𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀇𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁫𑁧) 𑀦𑀬𑁂𑀦 𑀯𑀼𑀢𑁆𑀢𑀸 𑀧𑀸𑀧𑀺𑀘𑁆𑀙𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀇𑀘𑁆𑀙𑀸𑀧𑀓𑀢𑁄𑀢𑀺 𑀢𑀸𑀬 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀅𑀧𑀓𑀢𑁄 𑀅𑀪𑀺𑀪𑀽𑀢𑁄 𑀧𑀸𑀭𑀸𑀚𑀺𑀓𑁄 𑀳𑀼𑀢𑁆𑀯𑀸.

𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄𑀢𑀺 𑀅𑀢𑁆𑀢𑀦𑁄 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀫𑀸𑀦𑁄 𑀇𑀘𑁆𑀙𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀪𑀩𑁆𑀩𑁄 𑀛𑀸𑀦𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼𑀁, 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘𑁂𑀯 𑀳𑁄𑀢𑀺 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻’’𑀢𑀺 ¶ (𑀥. 𑀧. 𑁩𑁧𑁧). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚’’𑀦𑁆𑀢𑀺 (𑀥. 𑀧. 𑁩𑁧𑁩). 𑀇𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺 ¶ . 𑀬𑀲𑁆𑀫𑀸 𑀧𑀦 𑀕𑀺𑀳𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀳𑀼𑀢𑁆𑀯𑀸 𑀤𑀸𑀦𑀲𑀭𑀡𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀲𑀕𑁆𑀕𑀫𑀕𑁆𑀕𑀁 𑀯𑀸 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀳𑀺 𑀫𑁄𑀓𑁆𑀔𑀫𑀕𑁆𑀕𑀁 𑀯𑀸 𑀆𑀭𑀸𑀥𑁂𑀢𑀼𑀁 𑀪𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀕𑀺𑀳𑀺𑀆𑀤𑀺𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀦𑀢𑁄 ‘‘𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀘𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀕𑀺𑀳𑀻 𑀯𑀸 𑀳𑁄𑀢𑀼𑀓𑀸𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀏𑀯𑀁 𑀪𑀡𑁂𑀬𑁆𑀬. 𑀓𑀣𑀁? ‘‘𑀅𑀚𑀸𑀦𑀫𑁂𑀯𑀁 𑀆𑀯𑀼𑀲𑁄 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀻’’𑀢𑀺. 𑀧𑀤𑀪𑀸𑀚𑀦𑁂 𑀧𑀦 ‘‘𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀤𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀬𑀣𑀸 𑀯𑀤𑀦𑁆𑀢𑁄 ‘‘𑀅𑀚𑀸𑀦𑀫𑁂𑀯𑀁 𑀆𑀯𑀼𑀲𑁄 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀳𑀁 𑀏𑀢𑁂 𑀥𑀫𑁆𑀫𑁂 𑀚𑀸𑀦𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺𑀦𑁆𑀢𑀺 𑀅𑀳𑀁 𑀯𑀘𑀦𑀢𑁆𑀣𑀯𑀺𑀭𑀳𑀢𑁄 𑀢𑀼𑀘𑁆𑀙𑀁 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀢𑁄 𑀫𑀼𑀲𑀸 𑀯𑀺𑀮𑀧𑀺𑀁, 𑀅𑀪𑀡𑀺𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀅𑀜𑁆𑀜𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑁂 𑀉𑀧𑀸𑀤𑀸𑀬𑀸𑀢𑀺 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀧𑀸𑀭𑀸𑀚𑀺𑀓𑀸𑀦𑀺 𑀆𑀧𑀦𑁆𑀦𑁂 𑀧𑀼𑀕𑁆𑀕𑀮𑁂 𑀉𑀧𑀸𑀤𑀸𑀬. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁯𑁯. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀧𑀤𑀪𑀸𑀚𑀦𑀻𑀬𑀫𑁆𑀳𑀺 ‘‘𑀛𑀸𑀦𑀁 𑀯𑀺𑀫𑁄𑀓𑁆𑀔𑀁 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁…𑀧𑁂… 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑁂𑀯 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀤𑀲𑁆𑀲𑀺𑀢𑁄, 𑀦 𑀯𑀺𑀢𑁆𑀣𑀸𑀭𑁂𑀦 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀢𑀦𑁆𑀢𑀺 𑀞𑀧𑀺𑀢𑀸. 𑀲𑀗𑁆𑀔𑁂𑀧𑀤𑀲𑁆𑀲𑀺𑀢𑁂 𑀘 𑀅𑀢𑁆𑀣𑁂 𑀦 𑀲𑀩𑁆𑀩𑁂 𑀲𑀩𑁆𑀩𑀸𑀓𑀸𑀭𑁂𑀦 𑀦𑀬𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀬𑀕𑁆𑀕𑀳𑀡𑀢𑁆𑀣𑀁 𑀧𑀼𑀦 𑀢𑀤𑁂𑀯 𑀧𑀤𑀪𑀸𑀚𑀦𑀁 𑀫𑀸𑀢𑀺𑀓𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀛𑀸𑀦𑀦𑁆𑀢𑀺 𑀧𑀞𑀫𑀁 𑀛𑀸𑀦𑀁, 𑀤𑀼𑀢𑀺𑀬𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀺𑀧𑀺 𑀅𑀲𑀼𑀪𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀚𑁆𑀛𑀸𑀦𑀫𑁆𑀧𑀺 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀫𑁂𑀯. 𑀢𑀲𑁆𑀫𑀸 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀧𑀺…𑀧𑁂… 𑀘𑀢𑀼𑀢𑁆𑀣𑀁 𑀚𑁆𑀛𑀸𑀦𑀁, 𑀫𑁂𑀢𑁆𑀢𑀸𑀛𑀸𑀦𑀁, 𑀉𑀧𑁂𑀓𑁆𑀔𑀸𑀛𑀸𑀦𑀁 𑀅𑀲𑀼𑀪𑀚𑁆𑀛𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀚𑁆𑀛𑀸𑀦𑀁 ¶ , 𑀮𑁄𑀓𑀺𑀬𑀚𑁆𑀛𑀸𑀦𑀁, 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀧𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀝𑁆𑀞𑀼 ¶ 𑀫𑀼𑀢𑁆𑀢𑁄 𑀯𑀺𑀯𑀺𑀥𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑁄𑀢𑀺 𑀯𑀺𑀫𑁄𑀓𑁆𑀔𑁄. 𑀲𑁄 𑀧𑀦𑀸𑀬𑀁 𑀭𑀸𑀕𑀤𑁄𑀲𑀫𑁄𑀳𑁂𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑁄. 𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑀺𑀢𑁆𑀢𑁂𑀳𑀺 𑀅𑀦𑀺𑀫𑀺𑀢𑁆𑀢𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑁄. 𑀭𑀸𑀕𑀤𑁄𑀲𑀫𑁄𑀳𑀧𑀡𑀺𑀥𑀻𑀦𑀁 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀢𑀺 𑀆𑀭𑀫𑁆𑀫𑀡𑁂 𑀞𑀧𑁂𑀢𑀻𑀢𑀺 𑀲𑀫𑀸𑀥𑀺. 𑀅𑀭𑀺𑀬𑁂𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀲𑀫𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀯𑀺𑀫𑁄𑀓𑁆𑀔𑀢𑁆𑀢𑀺𑀓𑁂𑀦 𑀘 𑀲𑀫𑀸𑀥𑀺𑀢𑁆𑀢𑀺𑀓𑁂𑀦 𑀘 𑀅𑀭𑀺𑀬𑀫𑀕𑁆𑀕𑁄𑀯 ¶ 𑀯𑀼𑀢𑁆𑀢𑁄. 𑀲𑀫𑀸𑀧𑀢𑁆𑀢𑀺𑀢𑁆𑀢𑀺𑀓𑁂𑀦 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺. 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀧𑀤𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀇𑀫𑀲𑁆𑀲 𑀮𑀸𑀪𑀻𑀫𑁆𑀳𑀻’’𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺.

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼, 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺. 𑀢𑀢𑁆𑀣 𑀏𑀓𑀺𑀲𑁆𑀲𑀸𑀧𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀇𑀫𑀺𑀲𑁆𑀲𑀸 𑀯𑀺𑀚𑁆𑀚𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀪𑀡𑀦𑁆𑀢𑁄𑀧𑀺 ‘𑀢𑀺𑀲𑁆𑀲𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀪𑀡𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀪𑀸𑀯𑀦𑀸𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀁 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀧𑀺 ‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀁 𑀢𑀢𑁆𑀣 𑀏𑀓𑁂𑀓𑀥𑀫𑁆𑀫𑀯𑀲𑁂𑀦𑀸𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁 𑀢𑀫𑁆𑀧𑀺 𑀲𑀫𑁂𑀢𑀺. 𑀓𑀲𑁆𑀫𑀸? 𑀫𑀕𑁆𑀕𑀓𑁆𑀔𑀡𑀼𑀧𑁆𑀧𑀦𑁆𑀦𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀧𑀺 𑀏𑀓𑁂𑀓𑀨𑀮𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀕𑀲𑁆𑀲 𑀧𑀳𑀸𑀦𑀦𑁆𑀢𑀺𑀆𑀤𑀺𑀢𑁆𑀢𑀺𑀓𑁂 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀧𑀦 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀯𑀺𑀦𑀸 𑀦𑀢𑁆𑀣𑀺, 𑀢𑀢𑀺𑀬𑀫𑀕𑁆𑀕𑁂𑀦 𑀳𑀺 𑀓𑀸𑀫𑀭𑀸𑀕𑀤𑁄𑀲𑀸𑀦𑀁 𑀧𑀳𑀸𑀦𑀁, 𑀘𑀢𑀼𑀢𑁆𑀣𑁂𑀦 𑀫𑁄𑀳𑀲𑁆𑀲, 𑀢𑀲𑁆𑀫𑀸 ‘‘𑀭𑀸𑀕𑁄 𑀫𑁂 𑀧𑀳𑀻𑀦𑁄’’𑀢𑀺𑀆𑀤𑀻𑀦𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁.

𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸𑀢𑀺𑀆𑀤𑀺𑀢𑁆𑀢𑀺𑀓𑁂 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀭𑀸𑀕𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯.

𑀲𑀼𑀜𑁆𑀜𑀸𑀕𑀸𑀭𑀧𑀤𑀪𑀸𑀚𑀦𑁂 ¶ 𑀧𑀦 𑀬𑀲𑁆𑀫𑀸 𑀛𑀸𑀦𑁂𑀦 𑀅𑀖𑀝𑁂𑀢𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀦𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀧𑀞𑀫𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀛𑀸𑀦𑁂𑀦 𑀖𑀝𑁂𑀢𑁆𑀯𑀸 ‘‘𑀇𑀫𑀺𑀦𑀸 ¶ 𑀦𑀸𑀫 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻’’𑀢𑀺 𑀯𑀤𑀢𑀺, 𑀅𑀬𑀫𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀸 ¶ 𑀘 ‘‘𑀜𑀸𑀡’’𑀦𑁆𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁪 𑀆𑀤𑀬𑁄) 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀯𑀺𑀚𑁆𑀚𑀸𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀺𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀘𑁂𑀢𑁄𑀧𑀭𑀺𑀬𑀜𑀸𑀡𑀪𑁂𑀤𑀸 𑀧𑀜𑁆𑀘 𑀯𑀺𑀚𑁆𑀚𑀸 𑀦 𑀆𑀕𑀢𑀸, 𑀢𑀸𑀲𑀼 𑀏𑀓𑀸 𑀯𑀺𑀧𑀲𑁆𑀲𑀦𑀸𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀦 𑀳𑁄𑀢𑀺, 𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺𑀧𑀺 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀮𑀸𑀪𑀻𑀫𑁆𑀳𑀻’’𑀢𑀺𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀧𑀦 𑀪𑀡𑀢𑀺 𑁋 ‘‘𑀇𑀢𑀭𑀸𑀧𑀺 𑀘𑀢𑀲𑁆𑀲𑁄 𑀯𑀺𑀚𑁆𑀚𑀸 𑀜𑀸𑀡𑁂𑀦 𑀅𑀖𑀝𑀺𑀢𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀽 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘𑀫𑀦𑁄𑀫𑀬𑀲𑁆𑀲 𑀮𑀸𑀪𑀻𑀫𑁆𑀳𑀺, 𑀇𑀤𑁆𑀥𑀺𑀯𑀺𑀥𑀲𑁆𑀲, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸, 𑀘𑁂𑀢𑁄𑀧𑀭𑀺𑀬𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻’’𑀢𑀺. 𑀢𑀁 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁 𑁋 ‘‘𑀆𑀘𑀭𑀺𑀬𑁄 𑀦 𑀆𑀪𑀺𑀥𑀫𑁆𑀫𑀺𑀓𑁄 𑀪𑀼𑀫𑁆𑀫𑀦𑁆𑀢𑀭𑀁 𑀦 𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑀸 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁄𑀯 𑀫𑀳𑀕𑁆𑀕𑀢𑀥𑀫𑁆𑀫𑁄, 𑀛𑀸𑀦𑁂𑀦𑁂𑀯 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀫𑀦𑁄𑀫𑀬𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀸 ‘𑀫𑀦𑁄𑀫𑀬𑀜𑀸𑀡𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀯𑀤𑀢𑀼 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀦𑀺𑀩𑁆𑀩𑀸𑀦𑀁 𑀧𑀸𑀴𑀺𑀬𑀸 𑀅𑀦𑀸𑀕𑀢𑀁, 𑀅𑀣 𑀔𑁄 ‘‘𑀦𑀺𑀩𑁆𑀩𑀸𑀦𑀁 𑀫𑁂 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀯𑀸 𑀯𑀤𑀢𑁄 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀲𑁆𑀫𑀸? 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀢𑀣𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀁 𑀧𑀝𑀺𑀯𑀺𑀤𑁆𑀥𑀸𑀦𑀺 𑀫𑀬𑀸’’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀲𑁆𑀫𑀸? 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄𑀢𑀺 𑀳𑀺 𑀫𑀕𑁆𑀕𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀲𑁆𑀫𑀸 𑀧𑀦 ‘‘𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑁆𑀭𑀺𑀬𑀢𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀏𑀢𑁂𑀲𑀼 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀘𑀢𑀽𑀲𑀼 𑀨𑀮𑁂𑀲𑀼 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁪𑁬) 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸, ‘‘𑀦𑀺𑀭𑀼𑀢𑁆𑀢𑀺…𑀧𑁂… 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 ¶ 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸 ‘‘𑀮𑁄𑀓𑀺𑀬𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀦 𑀢𑀸𑀯 𑀲𑀻𑀲𑀁 𑀑𑀢𑀭𑀢𑀺. ‘‘𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀫𑁆𑀳𑀻𑀢𑀺 𑀅𑀯𑀺𑀲𑁂𑀲𑁂𑀦𑀸𑀧𑀺 𑀯𑀤𑀢𑁄 ¶ 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀫𑁆𑀧𑀺 ‘‘𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀢𑁆𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀏𑀢𑁆𑀢𑀸𑀯𑀢𑀸 𑀲𑀻𑀲𑀁 𑀦 𑀑𑀢𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀺𑀘𑀸𑀭𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀧𑀫𑀸𑀡𑀁 𑀓𑀸𑀢𑀼𑀦𑁆𑀢𑀺.

‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀸 ‘‘𑀮𑀸𑀪𑀻𑀫𑁆𑀳𑀸𑀳𑀁 𑀢𑀲𑁆𑀲𑀸’’𑀢𑀺 𑀯𑀸 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀦𑁂𑀯 𑀮𑁄𑀓𑀺𑀬𑀢𑁆𑀢𑀸 𑀦 𑀮𑁄𑀓𑀼𑀢𑁆𑀢𑀭𑀢𑁆𑀢𑀸𑀢𑀺. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑀺𑀭𑁄𑀥𑀁 𑀦𑀸𑀫 𑀅𑀦𑀸𑀕𑀸𑀫𑀻 𑀯𑀸 𑀔𑀻𑀡𑀸𑀲𑀯𑁄 𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀁 𑀅𑀜𑁆𑀜𑀢𑀭𑁄𑀢𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀲𑁄 𑀘 𑀦𑀁 𑀢𑀣𑀸 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀅𑀢𑀻𑀢𑀪𑀯𑁂 ¶ 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑁄𑀢𑀸𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀅𑀢𑀻𑀢𑀓𑁆𑀔𑀦𑁆𑀥𑀸𑀦𑀜𑁆𑀳𑀺 𑀧𑀭𑀸𑀫𑀝𑁆𑀞𑀢𑁆𑀢𑀸 𑀲𑀻𑀲𑀁 𑀦 𑀑𑀢𑀭𑀢𑀻𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑀻𑀢𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸 𑀇𑀥 𑀧𑀦 ‘‘𑀅𑀢𑁆𑀣𑀺 𑀅𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀢𑀢𑁆𑀣𑁂𑀯 ‘‘𑀅𑀢𑀻𑀢𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀓𑀣𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀓𑀣𑁂𑀦𑁆𑀢𑀲𑁆𑀲𑁂𑀯 𑀳𑁄𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁦𑁦. 𑀏𑀯𑀁 𑀛𑀸𑀦𑀸𑀤𑀻𑀦𑀺 𑀤𑀲 𑀫𑀸𑀢𑀺𑀓𑀸𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀦𑁆𑀢𑁄 𑀬𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀪𑀡𑀢𑀺, 𑀢𑀲𑁆𑀲 𑀅𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀯𑀺𑀢𑁆𑀣𑀸𑀭𑀲𑁆𑀲 𑀯𑀲𑁂𑀦 𑀘𑀓𑁆𑀓𑀧𑁂𑀬𑁆𑀬𑀸𑀮𑀁 𑀩𑀦𑁆𑀥𑀦𑁆𑀢𑁄 𑀉𑀮𑁆𑀮𑀧𑀦𑀸𑀓𑀸𑀭𑀜𑁆𑀘 𑀆𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑁆𑀥𑀺𑀓𑀯𑀸𑀭𑁄 𑀯𑀢𑁆𑀢𑀼𑀓𑀸𑀫𑀯𑀸𑀭𑁄 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑁄𑀢𑀺 𑀢𑀬𑁄 𑀫𑀳𑀸𑀯𑀸𑀭𑀸. 𑀢𑁂𑀲𑀼 ¶ 𑀲𑀼𑀤𑁆𑀥𑀺𑀓𑀯𑀸𑀭𑁂 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑁄𑀳𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀧𑀤𑀁, 𑀢𑀸𑀯 𑀏𑀓𑀫𑁂𑀓𑀲𑁆𑀫𑀺𑀁 𑀧𑀤𑁂 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄, 𑀮𑀸𑀪𑀻𑀫𑁆𑀳𑀺, 𑀯𑀲𑀻𑀫𑁆𑀳𑀺, 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀇𑀫𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀏𑀓𑀫𑁂𑀓𑀁 𑀧𑀤𑀁 𑀢𑀻𑀳𑀸𑀓𑀸𑀭𑁂𑀳𑀺, 𑀘𑀢𑀽𑀳𑀺, 𑀧𑀜𑁆𑀘𑀳𑀺, 𑀙𑀳𑀺, 𑀲𑀢𑁆𑀢𑀳𑀸𑀓𑀸𑀭𑁂𑀳𑀻𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀬𑁄𑀚𑁂𑀢𑁆𑀯𑀸 𑀲𑀼𑀤𑁆𑀥𑀺𑀓𑀦𑀬𑁄 𑀦𑀸𑀫 𑀯𑀼𑀢𑁆𑀢𑁄. 𑀢𑀢𑁄 𑀧𑀞𑀫𑀜𑁆𑀘 𑀛𑀸𑀦𑀁, 𑀤𑀼𑀢𑀺𑀬𑀜𑁆𑀘 𑀛𑀸𑀦𑀦𑁆𑀢𑀺 𑀏𑀯𑀁 𑀧𑀞𑀫𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀓𑀁 ¶ 𑀧𑀤𑀁 𑀖𑀝𑁂𑀦𑁆𑀢𑁂𑀦 𑀲𑀩𑁆𑀩𑀧𑀤𑀸𑀦𑀺 𑀖𑀝𑁂𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀔𑀡𑁆𑀟𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀦 𑀬𑁄𑀚𑀺𑀢𑀁, 𑀢𑀲𑁆𑀫𑀸 ‘‘𑀔𑀡𑁆𑀟𑀘𑀓𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁, 𑀢𑀢𑀺𑀬𑀜𑁆𑀘 𑀛𑀸𑀦𑀦𑁆𑀢𑀺 𑀏𑀯𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀓𑀁 𑀧𑀤𑀁 𑀖𑀝𑁂𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀩𑀤𑁆𑀥𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀬𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁, 𑀏𑀯𑀁 𑀢𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺𑀧𑀺 𑀲𑀤𑁆𑀥𑀺𑀁, 𑀏𑀓𑀫𑁂𑀓𑀁 𑀧𑀤𑀁 𑀖𑀝𑁂𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀅𑀜𑁆𑀜𑀸𑀦𑀺𑀧𑀺 𑀏𑀓𑀽𑀦𑀢𑀺𑀁𑀲 𑀩𑀤𑁆𑀥𑀘𑀓𑁆𑀓𑀸𑀦𑀺 𑀯𑀢𑁆𑀯𑀸 𑀏𑀓𑀫𑀽𑀮𑀓𑀦𑀬𑁄 𑀦𑀺𑀝𑁆𑀞𑀸𑀧𑀺𑀢𑁄. 𑀧𑀸𑀞𑁄 𑀧𑀦 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑁄, 𑀲𑁄 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀘 𑀏𑀓𑀫𑀽𑀮𑀓𑁄, 𑀏𑀯𑀁 𑀤𑀼𑀫𑀽𑀮𑀓𑀸𑀤𑀬𑁄𑀧𑀺 𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀸 𑀘𑀢𑀼𑀦𑁆𑀦𑀁 𑀲𑀢𑀸𑀦𑀁 𑀉𑀧𑀭𑀺 𑀧𑀜𑁆𑀘𑀢𑀺𑀁𑀲 𑀦𑀬𑀸 𑀯𑀼𑀢𑁆𑀢𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁆𑀯𑀺𑀫𑀽𑀮𑀓𑀸 𑀏𑀓𑀽𑀦𑀢𑀺𑀁𑀲, 𑀢𑀺𑀫𑀽𑀮𑀓𑀸 𑀅𑀝𑁆𑀞𑀯𑀻𑀲, 𑀘𑀢𑀼𑀫𑀽𑀮𑀓𑀸 𑀲𑀢𑁆𑀢𑀯𑀻𑀲; 𑀏𑀯𑀁 𑀧𑀜𑁆𑀘𑀫𑀽𑀮𑀓𑀸𑀤𑀬𑁄𑀧𑀺 𑀏𑀓𑁂𑀓𑀁 𑀊𑀦𑀁 𑀓𑀢𑁆𑀯𑀸 𑀬𑀸𑀯 𑀢𑀺𑀁𑀲𑀫𑀽𑀮𑀓𑀸, 𑀢𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀞𑁂 𑀧𑀦 𑀢𑁂𑀲𑀁 𑀦𑀸𑀫𑀫𑁆𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀇𑀤𑀁 𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀢𑀺𑀁𑀲𑀫𑀽𑀮𑀓𑀦𑀬𑁄 𑀏𑀓𑁄 𑀤𑀲𑁆𑀲𑀺𑀢𑁄. 𑀬𑀲𑁆𑀫𑀸 𑀘 𑀲𑀼𑀜𑁆𑀜𑀸𑀕𑀸𑀭𑀧𑀤𑀁 𑀛𑀸𑀦𑁂𑀦 𑀅𑀖𑀝𑀺𑀢𑀁 𑀲𑀻𑀲𑀁 𑀦 𑀑𑀢𑀭𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 ¶ 𑀫𑁄𑀳𑀸 𑀘𑀺𑀢𑁆𑀢𑀁 ¶ 𑀯𑀺𑀦𑀻𑀯𑀭𑀡𑀧𑀤𑀧𑀭𑀺𑀬𑁄𑀲𑀸𑀦𑀸𑀬𑁂𑀯 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀖𑀝𑁂𑀢𑁆𑀯𑀸 𑀯𑀸 𑀅𑀖𑀝𑁂𑀢𑁆𑀯𑀸 𑀯𑀸 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀮𑁆𑀮𑀧𑀢𑁄 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺.

𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁂 𑀘 𑀧𑀦𑁂𑀢𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑁂 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀅𑀗𑁆𑀕𑀪𑀽𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺. 𑀪𑀡𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀫𑀸𑀦𑀲𑁆𑀲 𑀳𑁄𑀢𑀺. 𑀪𑀡𑀺𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀺𑀢𑁂 𑀅𑀲𑁆𑀲 𑀳𑁄𑀢𑀺, 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀡𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀯𑀢𑁄 𑀦𑀺𑀝𑁆𑀞𑀺𑀢𑀯𑀘𑀦𑀲𑁆𑀲 𑀳𑁄𑀢𑀻𑀢𑀺. 𑀬𑁄 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂𑀧𑀺 𑀚𑀸𑀦𑀸𑀢𑀺, 𑀪𑀡𑀦𑁆𑀢𑁄𑀧𑀺 𑀚𑀸𑀦𑀸𑀢𑀺, 𑀧𑀘𑁆𑀙𑀸𑀧𑀺 𑀚𑀸𑀦𑀸𑀢𑀺, ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀲𑁄 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀧𑀼𑀘𑁆𑀙𑀸 𑀢𑀸𑀯 𑀳𑁄𑀢𑀺 ‘‘‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺, ‘𑀫𑀼𑀲𑀸 𑀫𑀬𑀸 𑀪𑀡𑀺𑀢’𑀦𑁆𑀢𑀺 𑀧𑀘𑁆𑀙𑀸𑀪𑀸𑀕𑁄 𑀦𑀢𑁆𑀣𑀺, 𑀯𑀼𑀢𑁆𑀢𑀫𑀢𑁆𑀢𑀫𑁂𑀯 𑀳𑀺 𑀓𑁄𑀘𑀺 𑀧𑀫𑀼𑀲𑁆𑀲𑀢𑀺, 𑀓𑀺𑀁 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀦 𑀳𑁄𑀢𑀻’’𑀢𑀺? 𑀲𑀸 𑀏𑀯𑀁 𑀅𑀝𑁆𑀞𑀓𑀣𑀸𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑀸 𑁋 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀘 𑀪𑀡𑀦𑁆𑀢𑀲𑁆𑀲 ¶ ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘 𑀚𑀸𑀦𑀢𑁄 𑀧𑀘𑁆𑀙𑀸𑀪𑀸𑀕𑁂 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀁. 𑀲𑀘𑁂𑀧𑀺 𑀦 𑀳𑁄𑀢𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀧𑀼𑀭𑀺𑀫𑀫𑁂𑀯 𑀳𑀺 𑀅𑀗𑁆𑀕𑀤𑁆𑀯𑀬𑀁 𑀧𑀫𑀸𑀡𑀁. 𑀬𑀲𑁆𑀲𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀪𑀡𑀦𑁆𑀢𑁄 𑀧𑀦 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀸𑀢𑀺, 𑀪𑀡𑀺𑀢𑁂𑀧𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀚𑀸𑀦𑀸𑀢𑀺, 𑀲𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀼𑀩𑁆𑀩𑀪𑀸𑀕𑁄 𑀳𑀺 𑀧𑀫𑀸𑀡𑀢𑀭𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀯𑀸 𑀪𑀡𑀺𑀢𑀁 𑀯𑀸 𑀭𑀯𑀸 𑀪𑀡𑀺𑀢𑀁 𑀯𑀸 𑀳𑁄𑀢𑀻’’𑀢𑀺.

𑀏𑀢𑁆𑀣 𑀘 𑀢𑀁𑀜𑀸𑀡𑀢𑀸 𑀘 𑀜𑀸𑀡𑀲𑀫𑁄𑀥𑀸𑀦𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀢𑀁𑀜𑀸𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀢𑀺 ¶ 𑀬𑁂𑀦 𑀘𑀺𑀢𑁆𑀢𑁂𑀦 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀚𑀸𑀦𑀸𑀢𑀺, 𑀢𑁂𑀦𑁂𑀯 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀘 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀏𑀓𑀘𑀺𑀢𑁆𑀢𑁂𑀦𑁂𑀯 𑀢𑀻𑀲𑀼 𑀔𑀡𑁂𑀲𑀼 𑀚𑀸𑀦𑀸𑀢𑀻𑀢𑀺 𑀅𑀬𑀁 𑀢𑀁𑀜𑁆𑀜𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸, 𑀦 𑀳𑀺 𑀲𑀓𑁆𑀓𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀁 𑀬𑀣𑀸 𑀦 𑀲𑀓𑁆𑀓𑀸 𑀢𑁂𑀦𑁂𑀯 𑀅𑀲𑀺𑀦𑀸 𑀲𑁄 𑀅𑀲𑀺 𑀙𑀺𑀦𑁆𑀤𑀺𑀢𑀼𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀦 𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀫𑀸𑀡𑀁 𑀧𑀼𑀩𑁆𑀩𑀪𑀸𑀕𑁄𑀯, 𑀢𑀲𑁆𑀫𑀺𑀁 𑀲𑀢𑀺 𑀦 𑀳𑁂𑀲𑁆𑀲𑀢𑀺;

𑀲𑁂𑀲𑀤𑁆𑀯𑀬𑀦𑁆𑀢𑀺 𑀦𑀢𑁆𑀣𑁂𑀢, 𑀫𑀺𑀢𑀺 𑀯𑀸𑀘𑀸 𑀢𑀺𑀯𑀗𑁆𑀕𑀺𑀓𑀸’’𑀢𑀺.

‘‘𑀜𑀸𑀡𑀲𑀫𑁄𑀥𑀸𑀦𑀁 ¶ 𑀧𑀭𑀺𑀘𑁆𑀘𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀦𑀸𑀫 𑁋

𑀅𑀦𑀺𑀭𑀼𑀤𑁆𑀥𑀫𑁆𑀳𑀺 𑀧𑀞𑀫𑁂, 𑀦 𑀉𑀧𑁆𑀧𑀚𑁆𑀚𑀢𑀺 𑀧𑀘𑁆𑀙𑀺𑀫𑀁;

𑀦𑀺𑀭𑀦𑁆𑀢𑀭𑀼𑀧𑁆𑀧𑀚𑁆𑀚𑀦𑀢𑁄, 𑀏𑀓𑀁 𑀯𑀺𑀬 𑀧𑀓𑀸𑀲𑀢𑀺.

𑀇𑀢𑁄 𑀧𑀭𑀁 𑀧𑀦 𑀬𑁆𑀯𑀸𑀬𑀁 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀢𑀺, 𑀬𑀲𑁆𑀫𑀸 𑀲𑁄 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀳𑀺 𑀅𑀢𑁆𑀣𑁂𑀯𑀸𑀬𑀁 𑀮𑀤𑁆𑀥𑀺. 𑀢𑀣𑀸 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀏𑀯𑀫𑀲𑁆𑀲 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘. 𑀏𑀯𑀁𑀲𑀪𑀸𑀯𑀫𑁂𑀯 𑀘𑀲𑁆𑀲 𑀘𑀺𑀢𑁆𑀢𑀁 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺. 𑀬𑀤𑀸 𑀧𑀦 𑀫𑀼𑀲𑀸 𑀯𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀢𑀁 𑀤𑀺𑀝𑁆𑀞𑀺𑀁 𑀯𑀸 𑀤𑀺𑀝𑁆𑀞𑀺𑀬𑀸 𑀲𑀳 𑀔𑀦𑁆𑀢𑀺𑀁 𑀯𑀸 𑀤𑀺𑀝𑁆𑀞𑀺𑀔𑀦𑁆𑀢𑀻𑀳𑀺 𑀲𑀤𑁆𑀥𑀺𑀁 𑀭𑀼𑀘𑀺𑀁 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀻𑀳𑀺 𑀲𑀤𑁆𑀥𑀺𑀁 𑀪𑀸𑀯𑀁 𑀯𑀸 𑀯𑀺𑀦𑀺𑀥𑀸𑀬 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀪𑀽𑀢𑀁 𑀓𑀢𑁆𑀯𑀸 𑀪𑀡𑀢𑀺, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀅𑀗𑁆𑀕𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 𑀘 ‘‘𑀅𑀝𑁆𑀞𑀗𑁆𑀕𑀺𑀓𑁄 ¶ 𑀫𑀼𑀲𑀸𑀯𑀸𑀤𑁄’’𑀢𑀺 (𑀧𑀝𑀺. 𑁩𑁨𑁮) 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀸𑀬 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁 𑀅𑀜𑁆𑀜𑁄𑀧𑀺 𑀇𑀥 ‘‘𑀅𑀝𑁆𑀞𑀳𑀸𑀓𑀸𑀭𑁂𑀳𑀻’’𑀢𑀺 𑀏𑀓𑁄 ¶ 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀏𑀢𑁆𑀣 𑀘 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀦𑁆𑀢𑀺 𑀩𑀮𑀯𑀥𑀫𑁆𑀫𑀯𑀺𑀦𑀺𑀥𑀸𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀢𑀢𑁄 𑀤𑀼𑀩𑁆𑀩𑀮𑀤𑀼𑀩𑁆𑀩𑀮𑀸𑀦𑀁 𑀯𑀺𑀦𑀺𑀥𑀸𑀦𑀯𑀲𑁂𑀦. 𑀯𑀺𑀦𑀺𑀥𑀸𑀬 𑀲𑀜𑁆𑀜𑀦𑁆𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀲𑀩𑁆𑀩𑀤𑀼𑀩𑁆𑀩𑀮𑀥𑀫𑁆𑀫𑀯𑀺𑀦𑀺𑀥𑀸𑀦𑀁. 𑀲𑀜𑁆𑀜𑀸𑀫𑀢𑁆𑀢𑀫𑁆𑀧𑀺 𑀦𑀸𑀫 𑀅𑀯𑀺𑀦𑀺𑀥𑀸𑀬 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀲𑁆𑀫𑀸 𑀧𑀦 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑀯𑀘𑀦𑁂𑀦 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀻𑀦𑀺 𑀅𑀢𑀻𑀢𑀯𑀢𑁆𑀢𑀫𑀸𑀦𑀧𑀤𑀸𑀦𑁂𑀯 𑀧𑀸𑀞𑁂 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁦𑁭. 𑀇𑀢𑁄 𑀧𑀭𑀁 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑁂 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀦 𑀳𑁂𑀢𑁆𑀣 𑀢𑀁 𑀅𑀢𑁆𑀣𑀺 𑁋 𑀬𑀁 𑀇𑀫𑀺𑀦𑀸 𑀯𑀺𑀦𑀺𑀘𑁆𑀙𑀬𑁂𑀦 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀯𑀺𑀜𑁆𑀜𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀭𑀸𑀕𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁. 𑀲𑁆𑀯𑀸𑀬𑀁 𑀯𑀼𑀘𑁆𑀘𑀢𑀺 𑁋 𑀏𑀢𑁆𑀣 𑀳𑀺 𑀘𑀢𑁆𑀢𑁄𑀢𑀺 𑀇𑀤𑀁 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀦𑁆𑀢𑁄𑀢𑀺 𑀇𑀤𑀁 𑀧𑀼𑀦 𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀫𑀼𑀢𑁆𑀢𑁄𑀢𑀺 𑀇𑀤𑀁 𑀲𑀦𑁆𑀢𑀢𑀺𑀢𑁄 𑀯𑀺𑀫𑁄𑀘𑀦𑀯𑀲𑁂𑀦. 𑀧𑀳𑀻𑀦𑁄𑀢𑀺 𑀇𑀤𑀁 𑀫𑀼𑀢𑁆𑀢𑀲𑁆𑀲𑀸𑀧𑀺 𑀓𑁆𑀯𑀘𑀺 𑀅𑀦𑀯𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦. 𑀧𑀝𑀺𑀦𑀺𑀲𑁆𑀲𑀝𑁆𑀞𑁄𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦. 𑀉𑀓𑁆𑀔𑁂𑀝𑀺𑀢𑁄𑀢𑀺 𑀇𑀤𑀁 𑀅𑀭𑀺𑀬𑀫𑀕𑁆𑀕𑁂𑀦 𑀉𑀢𑁆𑀢𑀸𑀲𑀺𑀢𑀢𑁆𑀢𑀸 𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 ¶ . 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀇𑀤𑀁 𑀲𑀼𑀝𑁆𑀞𑀼 𑀉𑀢𑁆𑀢𑀸𑀲𑁂𑀢𑁆𑀯𑀸 𑀅𑀡𑀼𑀲𑀳𑀕𑀢𑀲𑁆𑀲𑀸𑀧𑀺 𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸

𑁨𑁧𑁫. 𑀯𑀢𑁆𑀢𑀼𑀓𑀸𑀫𑀯𑀸𑀭𑁂𑀧𑀺 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀻𑀦𑀁 𑀅𑀢𑁆𑀣𑁄, 𑀯𑀸𑀭𑀧𑁂𑀬𑁆𑀬𑀸𑀮𑀧𑁆𑀧𑀪𑁂𑀤𑁄 𑀘 𑀲𑀩𑁆𑀩𑁄 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀬𑀁 ‘‘𑀫𑀬𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀁 𑀯𑀢𑁆𑀢𑀼𑀓𑀸𑀫𑁂𑀦 𑀅𑀜𑁆𑀜𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀢𑁆𑀣𑀺 𑀫𑀬𑁆𑀳𑀁 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀑𑀓𑀸𑀲𑀕𑀯𑁂𑀲𑀓𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀑𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀬𑀣𑁂𑀯 𑀳𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀧𑀤𑁂𑀲𑀼 𑀬𑀁 𑀯𑀸 𑀢𑀁 𑀯𑀸 𑀯𑀤𑀦𑁆𑀢𑁄𑀧𑀺 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄𑀯 ¶ 𑀳𑁄𑀢𑀺; 𑀏𑀯𑀁 ¶ 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀤𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀯𑀢𑁆𑀢𑀼𑀓𑀸𑀫𑁄 𑀢𑀢𑁄 𑀅𑀜𑁆𑀜𑀁 𑀬𑀁 𑀯𑀸 𑀢𑀁 𑀯𑀸 𑀯𑀤𑀦𑁆𑀢𑁄𑀧𑀺 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺. 𑀲𑀘𑁂 𑀬𑀲𑁆𑀲 𑀯𑀤𑀢𑀺, 𑀲𑁄 𑀢𑀫𑀢𑁆𑀣𑀁 𑀢𑀗𑁆𑀔𑀡𑀜𑁆𑀜𑁂𑀯 𑀚𑀸𑀦𑀸𑀢𑀺. 𑀚𑀸𑀦𑀦𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀑𑀢𑀭𑀢𑀺. 𑀇𑀤𑀁 𑀅𑀪𑀽𑀢𑀸𑀭𑁄𑀘𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀑𑀢𑀭𑀢𑀺. 𑀬𑁄 𑀳𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺𑀧𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁄𑀧𑀦𑁂𑀳𑀺 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀘 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺. 𑀅𑀣 𑀧𑀦 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀦 𑀚𑀸𑀦𑀸𑀢𑀺 ‘‘𑀓𑀺 𑀅𑀬𑀁 𑀪𑀡𑀢𑀻’’𑀢𑀺, 𑀲𑀁𑀲𑀬𑀁 𑀯𑀸 𑀆𑀧𑀚𑁆𑀚𑀢𑀺, 𑀘𑀺𑀭𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑀸 𑀧𑀘𑁆𑀙𑀸 𑀚𑀸𑀦𑀸𑀢𑀺, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺. 𑀬𑁄 𑀧𑀦 𑀛𑀸𑀦𑀸𑀤𑀻𑀦𑀺 𑀅𑀢𑁆𑀢𑀦𑁄 𑀅𑀥𑀺𑀕𑀫𑀯𑀲𑁂𑀦 𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀯𑀸 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 𑀛𑀸𑀦𑀦𑁆𑀢𑀺 𑀯𑀸 𑀯𑀺𑀫𑁄𑀓𑁆𑀔𑁄𑀢𑀺 𑀯𑀸 𑀯𑀘𑀦𑀫𑀢𑁆𑀢𑀫𑁂𑀯 𑀲𑀼𑀢𑀁 𑀳𑁄𑀢𑀺, 𑀲𑁄𑀧𑀺 𑀢𑁂𑀦 𑀯𑀼𑀢𑁆𑀢𑁂 ‘‘𑀛𑀸𑀦𑀁 𑀓𑀺𑀭 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀏𑀲 𑀯𑀤𑀢𑀻’’𑀢𑀺 𑀬𑀤𑀺 𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, 𑀚𑀸𑀦𑀸𑀢𑀺𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀯𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀲𑁂𑀲𑁄 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀩𑀳𑀽𑀦𑀁 𑀯𑀸 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀯𑀺𑀲𑁂𑀲𑁄 𑀲𑀩𑁆𑀩𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑀓𑀣𑀸

𑁨𑁨𑁦. 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑁂𑀧𑀺 ¶ 𑁋 𑀲𑀩𑁆𑀩𑀁 𑀯𑀸𑀭𑀧𑁂𑀬𑁆𑀬𑀸𑀮𑀪𑁂𑀤𑀁 𑀧𑀼𑀩𑁆𑀩𑁂 𑀆𑀕𑀢𑀧𑀤𑀸𑀦𑀜𑁆𑀘 𑀅𑀢𑁆𑀣𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀢𑁆𑀯𑀸 𑀧𑀸𑀴𑀺𑀓𑁆𑀓𑀫𑁄 𑀢𑀸𑀯 𑀏𑀯𑀁 𑀚𑀸𑀦𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀬𑁄 𑀢𑁂 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀻’’𑀢𑀺 𑀇𑀫𑁂 𑀧𑀜𑁆𑀘 𑀧𑀘𑁆𑀘𑀢𑁆𑀢𑀯𑀘𑀦𑀯𑀸𑀭𑀸, ‘‘𑀬𑁂𑀦 𑀢𑁂 𑀯𑀺𑀳𑀸𑀭𑁄 𑀧𑀭𑀺𑀪𑀼𑀢𑁆𑀢𑁄’’𑀢𑀺𑀆𑀤𑀬𑁄 𑀧𑀜𑁆𑀘 𑀓𑀭𑀡𑀯𑀘𑀦𑀯𑀸𑀭𑀸, ‘‘𑀬𑀁 𑀢𑁆𑀯𑀁 𑀆𑀕𑀫𑁆𑀫 𑀯𑀺𑀳𑀸𑀭𑀁 𑀅𑀤𑀸𑀲𑀻’’𑀢𑀺𑀆𑀤𑀬𑁄 𑀧𑀜𑁆𑀘 𑀉𑀧𑀬𑁄𑀕𑀯𑀘𑀦𑀯𑀸𑀭𑀸 𑀯𑀼𑀢𑁆𑀢𑀸 ¶ , 𑀢𑁂𑀲𑀁 𑀯𑀲𑁂𑀦 𑀇𑀥 𑀯𑀼𑀢𑁆𑀢𑁂𑀦 𑀲𑀼𑀜𑁆𑀜𑀸𑀕𑀸𑀭𑀧𑀤𑁂𑀦 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 ¶ 𑀯𑀸𑀭𑀧𑁂𑀬𑁆𑀬𑀸𑀮𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑁄 𑀢𑁂 𑀯𑀺𑀳𑀸𑀭𑁂, 𑀬𑁂𑀦 𑀢𑁂 𑀯𑀺𑀳𑀸𑀭𑁄, 𑀬𑀁 𑀢𑁆𑀯𑀁 𑀆𑀕𑀫𑁆𑀫 𑀯𑀺𑀳𑀸𑀭’’𑀦𑁆𑀢𑀺 𑀏𑀯𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀦 ‘‘𑀅𑀳’’𑀦𑁆𑀢𑀺 𑀘 𑀅𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂𑀧𑀺 𑀇𑀥 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀅𑀦𑀸𑀧𑀢𑁆𑀢𑀺𑀪𑁂𑀤𑀓𑀣𑀸

𑀏𑀯𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺 𑀅𑀥𑀺𑀫𑀸𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀥𑀺𑀕𑀢𑀫𑀸𑀦𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀓𑁄𑀳𑀜𑁆𑀜𑁂 𑀇𑀘𑁆𑀙𑀸𑀘𑀸𑀭𑁂 𑀅𑀞𑀢𑁆𑀯𑀸 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀏𑀯. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽. 𑀢𑁂𑀲𑀁 𑀅𑀦𑀸𑀧𑀢𑁆𑀢𑀻𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀳𑀢𑁆𑀣𑀫𑀼𑀤𑁆𑀤𑀸𑀬 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀘𑀻𑀪𑁂𑀤𑁂𑀦 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀉𑀪𑀬𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀁 𑀳𑀲𑀦𑁆𑀢𑁄𑀧𑀺 𑀳𑀺 𑀲𑁄𑀫𑀦𑀲𑁆𑀲𑀺𑀓𑁄 𑀉𑀮𑁆𑀮𑀧𑀢𑀺 𑀪𑀸𑀬𑀦𑁆𑀢𑁄𑀧𑀺 𑀫𑀚𑁆𑀛𑀢𑁆𑀢𑁄𑀧𑀻𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁨𑁩. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑁋 𑀅𑀥𑀺𑀫𑀸𑀦𑀯𑀢𑁆𑀣𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 ¶ 𑁋 𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸. 𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻𑀢𑀺 𑀏𑀯𑀁 𑀅𑀭𑀜𑁆𑀜𑁂 𑀯𑀲𑀦𑁆𑀢𑀁 𑀫𑀁 𑀚𑀦𑁄 𑀅𑀭𑀳𑀢𑁆𑀢𑁂 𑀯𑀸 𑀲𑁂𑀓𑁆𑀔𑀪𑀽𑀫𑀺𑀬𑀁 𑀯𑀸 𑀲𑀫𑁆𑀪𑀸𑀯𑁂𑀲𑁆𑀲𑀢𑀺, 𑀢𑀢𑁄 𑀮𑁄𑀓𑀲𑁆𑀲 𑀲𑀓𑁆𑀓𑀢𑁄 𑀪𑀯𑀺𑀲𑁆𑀲𑀸𑀫𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀡𑀺𑀥𑀸𑀬 ‘‘𑀅𑀭𑀜𑁆𑀜𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀢𑀣𑀸 𑀅𑀭𑀜𑁆𑀜𑁂 𑀓𑀼𑀝𑀺𑀓𑀭𑀡𑀘𑀗𑁆𑀓𑀫𑀦𑀦𑀺𑀲𑀻𑀤𑀦𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀸𑀤𑀻𑀲𑀼 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀲𑁆𑀫𑀸 𑀏𑀯𑀁 ¶ 𑀅𑀭𑀜𑁆𑀜𑁂 𑀦 𑀯𑀲𑀺𑀢𑀩𑁆𑀩𑀁. 𑀏𑀯𑀁 𑀯𑀲𑀦𑁆𑀢𑁄 𑀳𑀺 𑀲𑀫𑁆𑀪𑀸𑀯𑀦𑀁 𑀮𑀪𑀢𑀼 𑀯𑀸 𑀫𑀸 𑀯𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁄 ¶ ‘‘𑀥𑀼𑀢𑀗𑁆𑀕𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀕𑀸𑀫𑀦𑁆𑀢𑁂 𑀫𑁂 𑀯𑀲𑀢𑁄 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺, 𑀅𑀭𑀜𑁆𑀜𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 ‘‘𑀅𑀤𑁆𑀥𑀸 𑀅𑀭𑀜𑁆𑀜𑁂 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀜𑁆𑀜𑀢𑀭𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀅𑀭𑀜𑁆𑀜𑀯𑀸𑀲𑁄 𑀦𑀸𑀫 𑀪𑀕𑀯𑀢𑀸 𑀧𑀲𑀢𑁆𑀣𑁄, 𑀫𑀬𑀺 𑀘 𑀅𑀭𑀜𑁆𑀜𑁂 𑀯𑀲𑀦𑁆𑀢𑁂 𑀩𑀳𑀽 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀕𑀸𑀫𑀦𑁆𑀢𑀁 𑀳𑀺𑀢𑁆𑀯𑀸 𑀆𑀭𑀜𑁆𑀜𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀏𑀯𑀁 𑀅𑀦𑀯𑀚𑁆𑀚𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀯𑀲𑀺𑀢𑀩𑁆𑀩𑀁.

𑀢𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀦𑀺 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀓𑀺𑀘𑁆𑀘𑀢𑁄 𑀧𑀪𑀼𑀢𑀺 𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀁 𑀢𑀸𑀯 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀲𑀫𑁆𑀪𑀸𑀯𑀦𑀁 𑀮𑀪𑀢𑀼 𑀯𑀸 𑀫𑀸 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀔𑀦𑁆𑀥𑀓𑀯𑀢𑁆𑀢𑀲𑁂𑀔𑀺𑀬𑀯𑀢𑁆𑀢𑀧𑀭𑀺𑀧𑀽𑀭𑀡𑀢𑁆𑀣𑀁 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁 𑀯𑀸 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀻𑀳𑀺 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀅𑀦𑀼𑀧𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀦𑁆𑀢𑀺.

𑀘𑀢𑀼𑀢𑁆𑀣𑀧𑀜𑁆𑀘𑀫𑀯𑀢𑁆𑀣𑀽𑀲𑀼 𑁋 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀅𑀳’’𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀅𑀢𑁆𑀢𑀼𑀧𑀦𑀸𑀬𑀺𑀓𑀫𑁂𑀯 𑀳𑀺 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁.

𑀧𑀡𑀺𑀥𑀸𑀬 𑀘𑀗𑁆𑀓𑀫𑀻𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀲𑀁𑀬𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸𑀢𑀺𑀧𑀺 ‘‘𑀤𑀲 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸’’𑀢𑀺𑀧𑀺 ‘‘𑀏𑀓𑀁 𑀲𑀁𑀬𑁄𑀚𑀦𑀁 𑀧𑀳𑀻𑀦’’𑀦𑁆𑀢𑀺𑀧𑀺 𑀯𑀤𑀢𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀆𑀭𑁄𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁.

𑁨𑁨𑁪. 𑀭𑀳𑁄𑀯𑀢𑁆𑀣𑀽𑀲𑀼 𑁋 𑀭𑀳𑁄 𑀉𑀮𑁆𑀮𑀧𑀢𑀻𑀢𑀺 ‘‘𑀭𑀳𑁄𑀕𑀢𑁄 𑀅𑀭𑀳𑀸 𑀅𑀳’’𑀦𑁆𑀢𑀺 𑀯𑀤𑀢𑀺, 𑀦 𑀫𑀦𑀲𑀸 𑀘𑀺𑀦𑁆𑀢𑀺𑀢𑀫𑁂𑀯 𑀓𑀭𑁄𑀢𑀺. 𑀢𑁂𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑀯𑀺𑀳𑀸𑀭𑀯𑀢𑁆𑀣𑀼 ¶ 𑀉𑀧𑀝𑁆𑀞𑀸𑀦𑀯𑀢𑁆𑀣𑀼 𑀘 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁨𑁫. 𑀦 𑀤𑀼𑀓𑁆𑀓𑀭𑀯𑀢𑁆𑀣𑀼𑀲𑁆𑀫𑀺𑀁 𑁋 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀮𑀤𑁆𑀥𑀺 𑁋 ‘‘𑀅𑀭𑀺𑀬𑀧𑀼𑀕𑁆𑀕𑀮𑀸𑀯 𑀪𑀕𑀯𑀢𑁄 𑀲𑀸𑀯𑀓𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀬𑁂 𑀔𑁄 𑀢𑁂 𑀪𑀕𑀯𑀢𑁄 𑀲𑀸𑀯𑀓𑀸 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼’’𑀦𑁆𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀻𑀮𑀯𑀢𑀸 ¶ 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂𑀦 𑀦 𑀤𑀼𑀓𑁆𑀓𑀭𑀁 𑀅𑀜𑁆𑀜𑀁 𑀩𑁆𑀬𑀸𑀓𑀸𑀢𑀼𑀁, 𑀧𑀝𑀺𑀩𑀮𑁄 𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀅𑀳’’𑀦𑁆𑀢𑀺 𑀆𑀳.

𑀯𑀻𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 ¶ 𑀆𑀭𑀸𑀥𑀦𑀻𑀬𑁄𑀢𑀺 𑀲𑀓𑁆𑀓𑀸 𑀆𑀭𑀸𑀥𑁂𑀢𑀼𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀘𑁆𑀘𑀼𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 ‘‘𑀬𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀪𑀸𑀬𑁂𑀬𑁆𑀬. 𑀫𑀬𑁆𑀳𑀁 𑀧𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀓𑀸𑀦𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀲𑀻𑀮𑀸𑀦𑀺, 𑀲𑁆𑀯𑀸𑀳𑀁 𑀓𑀺𑀁 𑀫𑀭𑀡𑀲𑁆𑀲 𑀪𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀫𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘‘𑀦𑀸𑀳𑀁 𑀆𑀯𑀼𑀲𑁄 𑀫𑀘𑁆𑀘𑀼𑀦𑁄 𑀪𑀸𑀬𑀸𑀫𑀻’’𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀯𑀻𑀭𑀺𑀬𑀯𑀢𑁆𑀣𑀼𑀲𑀤𑀺𑀲𑀸𑀦𑁂𑀯.

𑀯𑁂𑀤𑀦𑀸𑀯𑀢𑁆𑀣𑀽𑀲𑀼𑀧𑀞𑀫𑀲𑁆𑀫𑀺𑀁 𑀢𑀸𑀯 𑀲𑁄 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀁 𑀞𑀢𑁆𑀯𑀸 ‘‘𑀦𑀸𑀯𑀼𑀲𑁄 𑀲𑀓𑁆𑀓𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀅𑀥𑀺𑀯𑀸𑀲𑁂𑀢𑀼’’𑀦𑁆𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀤𑀼𑀢𑀺𑀬𑁂 𑀧𑀦 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀓𑀢𑁆𑀯𑀸 ‘‘𑀦𑀸𑀯𑀼𑀲𑁄 𑀲𑀓𑁆𑀓𑀸 𑀧𑀼𑀣𑀼𑀚𑁆𑀚𑀦𑁂𑀦𑀸’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁.

𑁨𑁨𑁬. 𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀽𑀲𑀼𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀦 𑀓𑁂𑀯𑀮𑀁 ‘‘𑀆𑀬𑀦𑁆𑀢𑀼 𑀪𑁄𑀦𑁆𑀢𑁄 𑀅𑀭𑀳𑀦𑁆𑀢𑁄’’𑀢𑀺 𑀆𑀳. 𑀬𑀁 𑀬𑀁 𑀧𑀦𑀲𑁆𑀲 𑀯𑀘𑀦𑀁 𑀫𑀼𑀔𑀢𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀲𑀩𑁆𑀩𑀁 ‘‘𑀅𑀭𑀳𑀦𑁆𑀢𑀸𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣, 𑀧𑀸𑀤𑁄𑀤𑀓𑀁 𑀤𑁂𑀣, 𑀅𑀭𑀳𑀦𑁆𑀢𑁄 𑀧𑀸𑀤𑁂 𑀥𑁄𑀯𑀦𑁆𑀢𑀽’’𑀢𑀺 𑀅𑀭𑀳𑀦𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀁𑀬𑁂𑀯. 𑀢𑀁 𑀧𑀦𑀲𑁆𑀲 𑀧𑀲𑀸𑀤𑀪𑀜𑁆𑀜𑀁 𑀲𑀤𑁆𑀥𑀸𑀘𑀭𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀩𑀮𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀲𑁆𑀲 𑀯𑀘𑀦𑀁. 𑀢𑀲𑁆𑀫𑀸 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑀸𑀤𑀪𑀜𑁆𑀜𑁂’’𑀢𑀺 𑀆𑀳. 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦 𑀳𑀝𑁆𑀞𑀢𑀼𑀝𑁆𑀞𑁂𑀦𑁂𑀯 𑀧𑀘𑁆𑀘𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, ‘‘𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀺𑀓𑀁 𑀧𑀝𑀺𑀧𑀤𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀅𑀜𑁆𑀜𑀩𑁆𑀬𑀸𑀓𑀭𑀡𑀯𑀢𑁆𑀣𑀽𑀦𑀺𑀲𑀁𑀬𑁄𑀚𑀦𑀯𑀢𑁆𑀣𑀼𑀲𑀤𑀺𑀲𑀸𑀦𑁂𑀯. 𑀅𑀕𑀸𑀭𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀕𑀺𑀳𑀺𑀪𑀸𑀯𑁂 𑀅𑀦𑀢𑁆𑀣𑀺𑀓𑀢𑀸𑀬 ¶ 𑀅𑀦𑀧𑁂𑀓𑁆𑀔𑀢𑀸𑀬 ‘‘𑀅𑀪𑀩𑁆𑀩𑁄 𑀔𑁄 𑀆𑀯𑀼𑀲𑁄 𑀫𑀸𑀤𑀺𑀲𑁄’’𑀢𑀺 𑀆𑀳, 𑀦 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂𑀦. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁨𑁨𑁭. 𑀆𑀯𑀝𑀓𑀸𑀫𑀯𑀢𑁆𑀣𑀼𑀲𑁆𑀫𑀺𑀁 ¶ 𑀲𑁄 𑀪𑀺𑀓𑁆𑀔𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀘 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀮𑁄𑀓𑀺𑀬𑁂𑀦𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀦𑀺𑀭𑀧𑁂𑀓𑁆𑀔𑁄. 𑀢𑀲𑁆𑀫𑀸 ‘‘𑀆𑀯𑀝𑀸 𑀫𑁂 𑀆𑀯𑀼𑀲𑁄 𑀓𑀸𑀫𑀸’’𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀘 𑀆𑀯𑀝𑀸𑀢𑀺 ¶ 𑀆𑀯𑀸𑀭𑀺𑀢𑀸 𑀦𑀺𑀯𑀸𑀭𑀺𑀢𑀸, 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀪𑀺𑀭𑀢𑀺𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀲𑀸𑀲𑀦𑁂 𑀅𑀦𑀼𑀓𑁆𑀓𑀡𑁆𑀞𑀺𑀢𑀪𑀸𑀯𑁂𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀘 𑀅𑀪𑀺𑀭𑀢𑀪𑀸𑀯𑁂𑀦 ‘‘𑀅𑀪𑀺𑀭𑀢𑁄 𑀅𑀳𑀁 𑀆𑀯𑀼𑀲𑁄 𑀧𑀭𑀫𑀸𑀬 𑀅𑀪𑀺𑀭𑀢𑀺𑀬𑀸’’𑀢𑀺 𑀆𑀳, 𑀦 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂𑀦. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀬𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀆𑀯𑀸𑀲𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀲𑀻𑀫𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸𑀬 𑀓𑀢𑀺𑀓𑀸𑀬 𑀬𑁄 ‘‘𑀫𑀁 𑀅𑀭𑀳𑀸𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀢𑀫𑁆𑀳𑀸 𑀞𑀸𑀦𑀸 𑀧𑀞𑀫𑀁 𑀧𑀓𑁆𑀓𑀫𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑁄 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀺𑀘𑁆𑀘𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀁 𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀢𑀸𑀤𑀺𑀲𑁂𑀦 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺𑀲𑁆𑀲 𑀏𑀯𑀁 𑀕𑀢𑀲𑁆𑀲 𑀧𑀘𑁆𑀙𑀸 𑀇𑀘𑁆𑀙𑀸𑀘𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀦 𑀤𑀸𑀦𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺 𑀏𑀯𑀁 𑀫𑀁 𑀅𑀭𑀳𑀸𑀢𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀬𑁄𑀧𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀳𑀼𑀢𑁆𑀯𑀸 𑀘𑁄𑀭𑀸𑀤𑀻𑀳𑀺 𑀯𑀸 𑀅𑀦𑀼𑀩𑀤𑁆𑀥𑁄 𑀫𑁂𑀖𑀁 𑀯𑀸 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀅𑀦𑁄𑀯𑀲𑁆𑀲𑀓𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺. 𑀬𑀸𑀦𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀺, 𑀧𑀤𑀕𑀫𑀦𑁂𑀦𑁂𑀯 𑀆𑀧𑀚𑁆𑀚𑀢𑀺. 𑀢𑀫𑁆𑀧𑀺 𑀬𑁂𑀳𑀺 𑀲𑀳 𑀓𑀢𑀺𑀓𑀸 𑀓𑀢𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀧𑀼𑀩𑁆𑀩𑀁𑀅𑀘𑀭𑀺𑀫𑀁 𑀕𑀘𑁆𑀙𑀦𑁆𑀢𑁄 𑀦𑀸𑀧𑀚𑁆𑀚𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑀸 𑀳𑀺 𑀲𑀩𑁆𑀩𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀺. 𑀲𑀘𑁂𑀧𑀺 𑀫𑀡𑁆𑀟𑀧𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀬𑁄 𑀏𑀢𑁆𑀣 𑀦𑀺𑀲𑀻𑀤𑀢𑀺 𑀯𑀸 𑀘𑀗𑁆𑀓𑀫𑀢𑀺 𑀯𑀸, 𑀢𑀁 𑀅𑀭𑀳𑀸𑀢𑀺 𑀚𑀸𑀦𑀺𑀲𑁆𑀲𑀸𑀫’’ 𑀧𑀼𑀧𑁆𑀨𑀸𑀦𑀺 𑀯𑀸 𑀞𑀧𑁂𑀢𑁆𑀯𑀸 ‘‘𑀬𑁄 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑀁 𑀓𑀭𑀺𑀲𑁆𑀲𑀢𑀺, 𑀢𑀁 𑀅𑀭𑀳𑀸𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺, 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀘𑁂𑀧𑀺 𑀉𑀧𑀸𑀲𑀓𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀳𑀸𑀭𑁄 𑀯𑀸 𑀓𑀢𑁄 𑀳𑁄𑀢𑀺, 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀞𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, ‘‘𑀬𑁂 𑀅𑀭𑀳𑀦𑁆𑀢𑁄 𑀢𑁂 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀼, 𑀘𑀻𑀯𑀭𑀸𑀤𑀻𑀦𑀺 𑀘 𑀕𑀡𑁆𑀳𑀦𑁆𑀢𑀽’’𑀢𑀺. 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀯𑀲𑀦𑁆𑀢𑀲𑁆𑀲 𑀯𑀸 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯 ¶ . 𑀏𑀢𑀁 𑀧𑀦 𑀅𑀥𑀫𑁆𑀫𑀺𑀓𑀓𑀢𑀺𑀓𑀯𑀢𑁆𑀢𑀁 ¶ , 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 ‘‘𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 ¶ 𑀲𑀩𑁆𑀩𑁂𑀯 𑀆𑀭𑀜𑁆𑀜𑀓𑀸 𑀳𑁄𑀦𑁆𑀢𑀼, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀺𑀅𑀯𑀲𑁂𑀲𑀥𑀼𑀢𑀗𑁆𑀕𑀥𑀭𑀸 𑀯𑀸 𑀅𑀣 𑀯𑀸 𑀲𑀩𑁆𑀩𑁂𑀯 𑀔𑀻𑀡𑀸𑀲𑀯𑀸 𑀳𑁄𑀦𑁆𑀢𑀽’’𑀢𑀺 𑀏𑀯𑀫𑀸𑀤𑀺. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀳𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀤𑀼𑀩𑁆𑀩𑀮𑀸 𑀅𑀧𑁆𑀧𑀣𑀸𑀫𑀸 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀅𑀦𑀼𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑀫𑁆𑀧𑀺 𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. ‘‘𑀇𑀫𑀁 𑀢𑁂𑀫𑀸𑀲𑀁 𑀲𑀩𑁆𑀩𑁂𑀳𑁂𑀯 𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀁, 𑀫𑀽𑀕𑀩𑁆𑀩𑀢𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀩𑀳𑀺 𑀲𑀻𑀫𑀝𑁆𑀞𑀲𑁆𑀲𑀸𑀧𑀺 𑀲𑀗𑁆𑀖𑀮𑀸𑀪𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀧𑀦 𑀦 𑀓𑀸𑀢𑀩𑁆𑀩𑀫𑁂𑀯.

𑁨𑁨𑁮. 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀘 𑀮𑀓𑁆𑀔𑀡𑁄𑀢𑀺 𑀮𑀓𑁆𑀔𑀡𑀢𑁆𑀣𑁂𑀭𑁄 𑀯𑀼𑀢𑁆𑀢𑁄, 𑀏𑀲 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀏𑀓𑁄 𑀫𑀳𑀸𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑁂𑀲 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁂𑀦 𑀩𑁆𑀭𑀳𑁆𑀫𑀲𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀮𑀓𑁆𑀔𑀡𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄.

𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀫𑀦𑁆𑀤𑀳𑀲𑀺𑀢𑀁 𑀧𑀸𑀢𑀼𑀅𑀓𑀸𑀲𑀺, 𑀧𑀓𑀸𑀲𑀬𑀺 𑀤𑀲𑁆𑀲𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦 𑀤𑀺𑀲𑁆𑀯𑀸 𑀣𑁂𑀭𑁄 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀉𑀧𑀭𑀺 𑀧𑀸𑀴𑀺𑀬𑀁 𑀆𑀕𑀢𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀏𑀓𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀲𑀢𑁆𑀢𑀁 𑀤𑀺𑀲𑁆𑀯𑀸, 𑀢𑀜𑁆𑀘 𑀔𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸, 𑀦 𑀧𑀲𑀸𑀤𑀘𑀓𑁆𑀔𑀼𑀦𑀸. 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀳𑀺 𑀏𑀢𑁂 𑀅𑀢𑁆𑀢𑀪𑀸𑀯𑀸 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀏𑀯𑀭𑀽𑀧𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂 𑀓𑀸𑀢𑀩𑁆𑀩𑁂 𑀓𑀲𑁆𑀫𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀅𑀢𑁆𑀢𑀦𑁄 𑀘 𑀩𑀼𑀤𑁆𑀥𑀜𑀸𑀡𑀲𑁆𑀲 𑀘 𑀲𑀫𑁆𑀧𑀢𑁆𑀢𑀺𑀲𑀫𑀦𑀼𑀲𑁆𑀲𑀭𑀡𑀢𑁄. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀣𑁂𑀭𑁄 ‘‘𑀅𑀤𑀺𑀝𑁆𑀞𑀲𑀘𑁆𑀘𑁂𑀦 𑀦𑀸𑀫 𑀧𑀼𑀕𑁆𑀕𑀮𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀸 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀫𑀼𑀢𑁆𑀢𑁄 𑀅𑀳𑀁, 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂’’𑀢𑀺 𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀅𑀳𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 ¶ 𑀜𑀸𑀡𑀲𑀫𑁆𑀧𑀢𑁆𑀢𑀺, 𑀬𑁄 ‘𑀓𑀫𑁆𑀫𑀯𑀺𑀧𑀸𑀓𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄; 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄’𑀢𑀺 (𑀅. 𑀦𑀺. 𑁪.𑁭𑁭) 𑀤𑁂𑀲𑁂𑀲𑀺, 𑀧𑀘𑁆𑀘𑀓𑁆𑀔𑀁 𑀯𑀢 𑀓𑀢𑁆𑀯𑀸 𑀩𑀼𑀤𑁆𑀥𑀸 𑀤𑁂𑀲𑁂𑀦𑁆𑀢𑀺, 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀥𑀸𑀢𑀽’’𑀢𑀺 𑀏𑀯𑀁 𑀩𑀼𑀤𑁆𑀥𑀜𑀸𑀡𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀭𑀺𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺. 𑀬𑀲𑁆𑀫𑀸 𑀧𑀦 𑀔𑀻𑀡𑀸𑀲𑀯𑀸 𑀦𑀸𑀫 𑀦 𑀅𑀓𑀸𑀭𑀡𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀮𑀓𑁆𑀔𑀡𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀓𑁄 𑀦𑀼 𑀔𑁄 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀬𑁂𑀳𑀺 𑀅𑀬𑀁 𑀉𑀧𑀧𑀢𑁆𑀢𑀺 𑀲𑀸𑀫𑀁 𑀅𑀤𑀺𑀝𑁆𑀞𑀸, 𑀢𑁂 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀩𑁆𑀬𑀸𑀓𑀸𑀢𑀼𑀓𑀸𑀫𑀢𑀸𑀬 ‘‘𑀅𑀓𑀸𑀮𑁄 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀼𑀝𑁆𑀞𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 ¶ 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀦𑁆𑀢𑀺 𑀲𑁂𑀢𑀁 𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑀁. 𑀕𑀺𑀚𑁆𑀛𑀸𑀧𑀺 𑀓𑀸𑀓𑀸𑀧𑀺 𑀓𑀼𑀮𑀮𑀸𑀧𑀻𑀢𑀺 𑀏𑀢𑁂𑀧𑀺 𑀬𑀓𑁆𑀔𑀕𑀺𑀚𑁆𑀛𑀸 𑀘𑁂𑀯 𑀬𑀓𑁆𑀔𑀓𑀸𑀓𑀸 𑀘 𑀬𑀓𑁆𑀔𑀓𑀼𑀮𑀮𑀸 𑀘 𑀧𑀘𑁆𑀘𑁂𑀢𑀩𑁆𑀩𑀸. 𑀧𑀸𑀓𑀢𑀺𑀓𑀸𑀦𑀁 𑀧𑀦 𑀕𑀺𑀚𑁆𑀛𑀸𑀤𑀻𑀦𑀁 𑀆𑀧𑀸𑀣𑀫𑁆𑀧𑀺 𑀏𑀢𑀁 𑀭𑀽𑀧𑀁 𑀦𑀸𑀕𑀘𑁆𑀙𑀢𑀺. 𑀅𑀦𑀼𑀧𑀢𑀺𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀯𑀺𑀢𑀼𑀟𑁂𑀦𑁆𑀢𑀻𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀯𑀺𑀢𑀼𑀤𑁂𑀦𑁆𑀢𑀻𑀢𑀺 𑀯𑀸 𑀧𑀸𑀞𑁄, 𑀅𑀲𑀺𑀥𑀸𑀭𑀽𑀧𑀫𑁂𑀳𑀺 𑀢𑀺𑀔𑀺𑀡𑁂𑀳𑀺 𑀮𑁄𑀳𑀢𑀼𑀡𑁆𑀟𑁂𑀳𑀺 𑀯𑀺𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀲𑀼𑀤𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀅𑀝𑁆𑀝𑀲𑁆𑀲𑀭𑀁 𑀆𑀢𑀼𑀭𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀯𑀦𑀢𑁆𑀣𑀁 𑀓𑀺𑀭 𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀢𑀸𑀤𑀺𑀲𑀸 𑀅𑀢𑁆𑀢𑀪𑀸𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀲𑀸𑀤𑀼𑀲𑁆𑀲𑀤𑀸 𑀘 𑀳𑁄𑀦𑁆𑀢𑀺 𑀧𑀓𑁆𑀓𑀕𑀡𑁆𑀟𑀲𑀤𑀺𑀲𑀸; 𑀢𑀲𑁆𑀫𑀸 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀩𑀮𑀯𑀯𑁂𑀤𑀦𑀸𑀢𑀼𑀭𑀸 𑀢𑀸𑀤𑀺𑀲𑀁 𑀲𑀭𑀫𑀓𑀸𑀲𑀻𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀯𑀝𑁆𑀝𑀕𑀸𑀫𑀺𑀓𑀲𑀢𑁆𑀢𑀸 𑀦𑀸𑀫 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀦 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀥𑀫𑁆𑀫𑀲𑀁𑀯𑁂𑀕𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀫𑀬𑁆𑀳𑀁 𑀆𑀯𑀼𑀲𑁄 𑀏𑀢𑀤𑀳𑁄𑀲𑀺; 𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄’’𑀢𑀺𑀆𑀤𑀺𑀫𑀸𑀳.

𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀬𑁂𑀲𑀁 𑀲𑀸 𑀧𑁂𑀢𑀽𑀧𑀧𑀢𑁆𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 ¶ . 𑀪𑀕𑀯𑀸 𑀧𑀦 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼 𑀪𑀽𑀢𑀁 𑀚𑀸𑀢𑀁 𑀉𑀧𑁆𑀧𑀦𑁆𑀦𑀁 𑀢𑁂𑀲𑀦𑁆𑀢𑀺 𑀘𑀓𑁆𑀔𑀼𑀪𑀽𑀢𑀸; 𑀪𑀽𑀢𑀘𑀓𑁆𑀔𑀼𑀓𑀸 𑀉𑀧𑁆𑀧𑀦𑁆𑀦𑀘𑀓𑁆𑀔𑀼𑀓𑀸, 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀬𑀢𑁆𑀭𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀭𑀸𑀬𑀫𑀢𑁆𑀣𑀬𑁄𑀚𑀦𑀸; 𑀬𑀲𑁆𑀫𑀸 𑀦𑀸𑀫 𑀲𑀸𑀯𑀓𑁄𑀧𑀺 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀯𑀸 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀯𑁄𑀘𑀼𑀫𑁆𑀳 𑁋 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺.

𑀧𑀼𑀩𑁆𑀩𑁂𑀯 𑀫𑁂 𑀲𑁄 𑀪𑀺𑀓𑁆𑀔𑀯𑁂 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀝𑀺𑀯𑁂𑀥𑁂𑀦 𑀅𑀧𑁆𑀧𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑀦𑀺𑀓𑀸𑀬𑁂 𑀪𑀯𑀕𑀢𑀺𑀬𑁄𑀦𑀺𑀞𑀺𑀢𑀺𑀦𑀺𑀯𑀸𑀲𑁂 𑀘 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁂𑀦 𑀫𑀬𑀸 𑀧𑀼𑀩𑁆𑀩𑁂𑀯 𑀲𑁄 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀯𑀤𑀢𑀺.

𑀕𑁄𑀖𑀸𑀢𑀓𑁄𑀢𑀺 ¶ 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀅𑀝𑁆𑀞𑀺𑀢𑁄 𑀫𑀁𑀲𑀁 𑀫𑁄𑀘𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀓𑀧𑁆𑀧𑀦𑀓𑀲𑀢𑁆𑀢𑁄. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸𑀢𑀺 𑀢𑀲𑁆𑀲 𑀦𑀸𑀦𑀸𑀘𑁂𑀢𑀦𑀸𑀳𑀺 𑀆𑀬𑀽𑀳𑀺𑀢𑀲𑁆𑀲 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀲𑁆𑀲. 𑀢𑀢𑁆𑀭 𑀳𑀺 𑀬𑀸𑀬 𑀘𑁂𑀢𑀦𑀸𑀬 𑀦𑀭𑀓𑁂 𑀧𑀝𑀺𑀲𑀦𑁆𑀥𑀺 𑀚𑀦𑀺𑀢𑀸, 𑀢𑀲𑁆𑀲𑀸 𑀯𑀺𑀧𑀸𑀓𑁂 𑀧𑀭𑀺𑀓𑁆𑀔𑀻𑀡𑁂 𑀅𑀯𑀲𑁂𑀲𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀼𑀦 𑀧𑁂𑀢𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀓𑀫𑁆𑀫𑀲𑀪𑀸𑀕𑀢𑀸𑀬 𑀯𑀸 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀯𑀸 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 ¶ 𑀯𑀺𑀧𑀸𑀓𑀸𑀯𑀲𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀘 𑀲𑀢𑁆𑀢𑁄 𑀏𑀯𑀁 𑀉𑀧𑀧𑀦𑁆𑀦𑁄. 𑀢𑁂𑀦𑀸𑀳 𑁋 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀢𑀲𑁆𑀲 𑀓𑀺𑀭 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀦𑀺𑀫𑁆𑀫𑀁𑀲𑀓𑀢𑀸𑀦𑀁 𑀕𑀼𑀦𑁆𑀦𑀁 𑀅𑀝𑁆𑀞𑀺𑀭𑀸𑀲𑀺 𑀏𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀢𑀁 𑀓𑀫𑁆𑀫𑀁 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑁄 𑀚𑀸𑀢𑁄.

𑁨𑁨𑁯. 𑀫𑀁𑀲𑀧𑁂𑀲𑀺𑀯𑀢𑁆𑀣𑀼𑀲𑁆𑀫𑀺𑀁 ¶ 𑀕𑁄𑀖𑀸𑀢𑀓𑁄𑀢𑀺 𑀕𑁄𑀫𑀁𑀲𑀧𑁂𑀲𑀺𑀬𑁄 𑀓𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀯𑀮𑁆𑀮𑀽𑀭𑀯𑀺𑀓𑁆𑀓𑀬𑁂𑀦 𑀅𑀦𑁂𑀓𑀸𑀦𑀺 𑀯𑀲𑁆𑀲𑀸𑀦𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑁂𑀲𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑁂𑀲𑀺𑀧𑁂𑀢𑁄 𑀚𑀸𑀢𑁄.

𑀫𑀁𑀲𑀧𑀺𑀡𑁆𑀟𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀲𑀓𑀼𑀡𑁂 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑀓𑀸𑀮𑁂 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂 𑀫𑀁𑀲𑀧𑀺𑀡𑁆𑀟𑀫𑀢𑁆𑀢𑁂 𑀓𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑀺𑀡𑁆𑀟𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑀺𑀡𑁆𑀟𑀧𑁂𑀢𑁄 𑀚𑀸𑀢𑁄.

𑀦𑀺𑀘𑁆𑀙𑀯𑀺𑀯𑀢𑁆𑀣𑀼𑀲𑁆𑀫𑀺𑀁 𑀢𑀲𑁆𑀲 𑀑𑀭𑀩𑁆𑀪𑀺𑀓𑀲𑁆𑀲 𑀏𑀴𑀓𑁂 𑀯𑀥𑀺𑀢𑁆𑀯𑀸 𑀦𑀺𑀘𑁆𑀘𑀫𑁆𑀫𑁂 𑀓𑀢𑁆𑀯𑀸 𑀓𑀧𑁆𑀧𑀺𑀢𑀚𑀻𑀯𑀺𑀓𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀘𑁆𑀘𑀫𑁆𑀫𑀁 𑀏𑀴𑀓𑀲𑀭𑀻𑀭𑀁 𑀦𑀺𑀫𑀺𑀢𑁆𑀢𑀫𑀳𑁄𑀲𑀺. 𑀲𑁄 𑀦𑀺𑀘𑁆𑀙𑀯𑀺𑀧𑁂𑀢𑁄 𑀚𑀸𑀢𑁄.

𑀅𑀲𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀽𑀓𑀭𑀺𑀓𑁄 𑀤𑀻𑀖𑀭𑀢𑁆𑀢𑀁 𑀦𑀺𑀯𑀸𑀧𑀧𑀼𑀝𑁆𑀞𑁂 𑀲𑀽𑀓𑀭𑁂 𑀅𑀲𑀺𑀦𑀸 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀪𑀸𑀯𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀲𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀲𑀢𑁆𑀢𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀫𑀸𑀕𑀯𑀺𑀓𑁄 𑀏𑀓𑀁 𑀫𑀺𑀕𑀜𑁆𑀘 𑀲𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀯𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀺𑀕𑀲𑁆𑀲 𑀲𑀫𑀻𑀧𑀁 𑀆𑀕𑀢𑀸𑀕𑀢𑁂 𑀫𑀺𑀕𑁂 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀢𑀲𑁆𑀲 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀦𑀓𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀢𑁆𑀢𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀉𑀲𑀼𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 ¶ 𑀓𑀸𑀭𑀡𑀺𑀓𑁄𑀢𑀺 𑀭𑀸𑀚𑀸𑀧𑀭𑀸𑀥𑀺𑀓𑁂 𑀅𑀦𑁂𑀓𑀸𑀳𑀺 𑀓𑀸𑀭𑀡𑀸𑀳𑀺 𑀧𑀻𑀴𑁂𑀢𑁆𑀯𑀸 𑀅𑀯𑀲𑀸𑀦𑁂 𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑀡𑀓𑀧𑀼𑀭𑀺𑀲𑁄. 𑀲𑁄 𑀓𑀺𑀭 𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀤𑁆𑀥𑁄 𑀫𑀭𑀢𑀻𑀢𑀺 𑀜𑀢𑁆𑀯𑀸𑀯 𑀯𑀺𑀚𑁆𑀛𑀢𑀺. 𑀢𑀲𑁆𑀲𑁂𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀭𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀢𑀢𑁄 𑀧𑀓𑁆𑀓𑀸𑀯𑀲𑁂𑀲𑁂𑀦 𑀇𑀥𑀽𑀧𑀧𑀢𑁆𑀢𑀺𑀓𑀸𑀮𑁂 𑀉𑀲𑀼𑀦𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀉𑀲𑀼𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀭𑀣𑀻𑀢𑀺 𑀅𑀲𑁆𑀲𑀤𑀫𑀓𑁄. 𑀕𑁄𑀤𑀫𑀓𑁄𑀢𑀺𑀧𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀢𑁄𑀤𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀤𑀼𑀢𑀺𑀬𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 ¶ 𑀲𑀽𑀘𑀓𑁄𑀢𑀺 𑀧𑁂𑀲𑀼𑀜𑁆𑀜𑀓𑀸𑀭𑀓𑁄 ¶ . 𑀲𑁄 𑀓𑀺𑀭 𑀫𑀦𑀼𑀲𑁆𑀲𑁂 𑀅𑀜𑁆𑀜𑀫𑀜𑁆𑀜𑀜𑁆𑀘 𑀪𑀺𑀦𑁆𑀤𑀺. 𑀭𑀸𑀚𑀓𑀼𑀮𑁂 𑀘 ‘‘𑀇𑀫𑀲𑁆𑀲 𑀇𑀫𑀁 𑀦𑀸𑀫 𑀅𑀢𑁆𑀣𑀺, 𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀲𑀽𑀘𑁂𑀢𑁆𑀯𑀸 𑀲𑀽𑀘𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺. 𑀢𑀲𑁆𑀫𑀸 𑀬𑀣𑀸𑀦𑁂𑀦 𑀲𑀽𑀘𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀪𑀺𑀦𑁆𑀦𑀸, 𑀢𑀣𑀸 𑀲𑀽𑀘𑀻𑀳𑀺 𑀪𑁂𑀤𑀦𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀼𑀁 𑀓𑀫𑁆𑀫𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀅𑀡𑁆𑀟𑀪𑀸𑀭𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀕𑀸𑀫𑀓𑀽𑀝𑁄𑀢𑀺 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄. 𑀢𑀲𑁆𑀲 𑀓𑀫𑁆𑀫𑀲𑀪𑀸𑀕𑀢𑀸𑀬 𑀓𑀼𑀫𑁆𑀪𑀫𑀢𑁆𑀢𑀸 𑀫𑀳𑀸𑀖𑀝𑀧𑁆𑀧𑀫𑀸𑀡𑀸 𑀅𑀡𑁆𑀟𑀸 𑀅𑀳𑁂𑀲𑀼𑀁. 𑀲𑁄 𑀳𑀺 𑀬𑀲𑁆𑀫𑀸 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦 𑀞𑀸𑀦𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀯𑀺𑀦𑀺𑀘𑁆𑀙𑀬𑁂𑀦 𑀧𑀸𑀓𑀝𑀁 𑀤𑁄𑀲𑀁 𑀓𑀭𑁄𑀦𑁆𑀢𑁄 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀅𑀓𑀸𑀲𑀺. 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀧𑀸𑀓𑀝𑀁 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀤𑀡𑁆𑀟𑀁 𑀧𑀝𑁆𑀞𑀧𑁂𑀦𑁆𑀢𑁄 𑀧𑀭𑁂𑀲𑀁 𑀅𑀲𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑁂𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑀁 𑀅𑀲𑀬𑁆𑀳𑀪𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂𑀦 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀯𑀺𑀲𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑁂 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸 𑀅𑀳𑁄𑀲𑀻𑀢𑀺.

𑀧𑀸𑀭𑀤𑀸𑀭𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀢𑁆𑀢𑁄 𑀧𑀭𑀲𑁆𑀲 𑀭𑀓𑁆𑀔𑀺𑀢𑀁 𑀕𑁄𑀧𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀫𑀻𑀴𑁆𑀳𑀲𑀼𑀔𑁂𑀦 𑀓𑀸𑀫𑀲𑀼𑀔𑁂𑀦 𑀘𑀺𑀢𑁆𑀢𑀁 𑀭𑀫𑀬𑀺𑀢𑁆𑀯𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀽𑀣𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑀼𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄. 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀸𑀓𑀝𑀫𑁂𑀯.

𑁨𑁩𑁦. 𑀦𑀺𑀘𑁆𑀙𑀯𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀬𑀲𑁆𑀫𑀸 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄, 𑀲𑀸 𑀘 𑀢𑀁 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀓𑀁 𑀨𑀲𑁆𑀲𑀁 𑀣𑁂𑀦𑁂𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀭𑀢𑀺𑀁 ¶ 𑀉𑀧𑁆𑀧𑀸𑀤𑁂𑀲𑀺, 𑀢𑀲𑁆𑀫𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸 𑀥𑀁𑀲𑀺𑀢𑁆𑀯𑀸 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀅𑀦𑀼𑀪𑀯𑀺𑀢𑀼𑀁 𑀦𑀺𑀘𑁆𑀙𑀯𑀺𑀢𑁆𑀣𑀻 𑀳𑀼𑀢𑁆𑀯𑀸 𑀉𑀧𑀧𑀦𑁆𑀦𑀸.

𑀫𑀗𑁆𑀕𑀼𑀮𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀫𑀗𑁆𑀕𑀼𑀮𑀺𑀦𑁆𑀢𑀺 ¶ 𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙𑀁, 𑀲𑀸 𑀓𑀺𑀭 𑀇𑀓𑁆𑀔𑀡𑀺𑀓𑀸𑀓𑀫𑁆𑀫𑀁 𑀬𑀓𑁆𑀔𑀤𑀸𑀲𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀏𑀯𑀁 𑀩𑀮𑀺𑀓𑀫𑁆𑀫𑁂 𑀓𑀢𑁂 𑀅𑀬𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀚𑀦𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀯𑀜𑁆𑀘𑀦𑀸𑀬 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀁 𑀤𑀼𑀤𑁆𑀤𑀺𑀝𑁆𑀞𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀧𑁂𑀲𑀺, 𑀢𑀲𑁆𑀫𑀸 𑀢𑀸𑀬 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀁 𑀣𑁂𑀦𑀺𑀢𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀸 𑀤𑀼𑀤𑁆𑀤𑀲𑁆𑀲𑀦𑀲𑁆𑀲 𑀕𑀸𑀳𑀺𑀢𑀢𑁆𑀢𑀸 𑀤𑀼𑀤𑁆𑀤𑀲𑀺𑀓𑀸 𑀯𑀺𑀭𑀽𑀧𑀸 𑀩𑀻𑀪𑀘𑁆𑀙𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸.

𑀑𑀓𑀺𑀮𑀺𑀦𑀺𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺𑀦𑁆𑀢𑀺 𑀲𑀸 𑀓𑀺𑀭 𑀅𑀗𑁆𑀕𑀸𑀭𑀘𑀺𑀢𑀓𑁂 𑀦𑀺𑀧𑀦𑁆𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀓𑁆𑀓𑀸 𑀘𑁂𑀯 𑀳𑁄𑀢𑀺 𑀔𑀭𑁂𑀦 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀸; 𑀑𑀓𑀺𑀮𑀺𑀦𑀻 𑀘 𑀓𑀺𑀮𑀺𑀦𑁆𑀦𑀲𑀭𑀻𑀭𑀸 𑀩𑀺𑀦𑁆𑀤𑀼𑀩𑀺𑀦𑁆𑀤𑀽𑀦𑀺 𑀳𑀺𑀲𑁆𑀲𑀸 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺. 𑀑𑀓𑀺𑀭𑀺𑀦𑀻 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀸, 𑀢𑀲𑁆𑀲𑀸 𑀳𑀺 𑀳𑁂𑀝𑁆𑀞𑀢𑁄𑀧𑀺 𑀓𑀺𑀁𑀲𑀼𑀓𑀧𑀼𑀧𑁆𑀨𑀯𑀡𑁆𑀡𑀸 𑀅𑀗𑁆𑀕𑀸𑀭𑀸, 𑀉𑀪𑀬𑀧𑀲𑁆𑀲𑁂𑀲𑀼𑀧𑀺 ¶ , 𑀆𑀓𑀸𑀲𑀢𑁄𑀧𑀺𑀲𑁆𑀲𑀸 𑀉𑀧𑀭𑀺 𑀅𑀗𑁆𑀕𑀸𑀭𑀸 𑀧𑀢𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺’’𑀦𑁆𑀢𑀺. 𑀲𑀸 𑀇𑀲𑁆𑀲𑀸𑀧𑀓𑀢𑀸 𑀲𑀧𑀢𑁆𑀢𑀺𑀁 𑀅𑀗𑁆𑀕𑀸𑀭𑀓𑀝𑀸𑀳𑁂𑀦 𑀑𑀓𑀺𑀭𑀻𑀢𑀺 𑀢𑀲𑁆𑀲𑀸 𑀓𑀺𑀭 𑀓𑀮𑀺𑀗𑁆𑀕𑀭𑀜𑁆𑀜𑁄 𑀏𑀓𑀸 𑀦𑀸𑀝𑀓𑀺𑀦𑀻 𑀅𑀗𑁆𑀕𑀸𑀭𑀓𑀝𑀸𑀳𑀁 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀕𑀢𑁆𑀢𑀢𑁄 𑀉𑀤𑀓𑀜𑁆𑀘 𑀧𑀼𑀜𑁆𑀙𑀢𑀺, 𑀧𑀸𑀡𑀺𑀦𑀸 𑀘 𑀲𑁂𑀤𑀁 𑀓𑀭𑁄𑀢𑀺. 𑀭𑀸𑀚𑀸𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀓𑀣𑀜𑁆𑀘 𑀓𑀭𑁄𑀢𑀺, 𑀧𑀭𑀺𑀢𑀼𑀝𑁆𑀞𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀕𑁆𑀕𑀫𑀳𑁂𑀲𑀻 𑀢𑀁 𑀅𑀲𑀳𑀫𑀸𑀦𑀸 𑀇𑀲𑁆𑀲𑀸𑀧𑀓𑀢𑀸 𑀳𑀼𑀢𑁆𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀢𑀁 𑀅𑀗𑁆𑀕𑀸𑀭𑀓𑀝𑀸𑀳𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀉𑀧𑀭𑀺 𑀅𑀗𑁆𑀕𑀸𑀭𑁂 𑀑𑀓𑀺𑀭𑀺. 𑀲𑀸 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀸𑀤𑀺𑀲𑀁𑀬𑁂𑀯 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀯𑀺𑀢𑀼𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸.

𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀲𑁆𑀫𑀺𑀁 ¶ 𑀲𑁄 𑀭𑀜𑁆𑀜𑁄 𑀆𑀡𑀸𑀬 𑀤𑀻𑀖𑀭𑀢𑁆𑀢𑀁 𑀘𑁄𑀭𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀧𑀪𑀺𑀓𑁆𑀔𑀽𑀢𑀺 𑀮𑀸𑀫𑀓𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀮𑁄𑀓𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀅𑀲𑀁 𑀬𑀢𑁄 𑀪𑀺𑀦𑁆𑀦𑀸𑀚𑀻𑀯𑁄 𑀘𑀺𑀢𑁆𑀢𑀓𑁂𑀴𑀺𑀁 𑀓𑀻𑀴𑀦𑁆𑀢𑁄 𑀯𑀺𑀘𑀭𑀺. 𑀢𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀪𑀺𑀓𑁆𑀔𑀼𑀲𑀤𑀺𑀲𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀼𑀦𑀻-𑀲𑀺𑀓𑁆𑀔𑀫𑀸𑀦𑀸-𑀲𑀸𑀫𑀡𑁂𑀭-𑀲𑀸𑀫𑀡𑁂𑀭𑀻𑀯𑀢𑁆𑀣𑀽𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑁨𑁩𑁧. 𑀢𑀧𑁄𑀤𑀸𑀯𑀢𑁆𑀣𑀼𑀲𑁆𑀫𑀺𑀁 ¶ 𑀅𑀘𑁆𑀙𑁄𑀤𑀓𑁄𑀢𑀺 𑀧𑀲𑀦𑁆𑀦𑁄𑀤𑀓𑁄. 𑀲𑀻𑀢𑁄𑀤𑀓𑁄𑀢𑀺 𑀲𑀻𑀢𑀮𑀉𑀤𑀓𑁄. 𑀲𑀸𑀢𑁄𑀤𑀓𑁄𑀢𑀺 𑀫𑀥𑀼𑀭𑁄𑀤𑀓𑁄. 𑀲𑁂𑀢𑀓𑁄𑀢𑀺 𑀧𑀭𑀺𑀲𑀼𑀤𑁆𑀥𑁄 𑀦𑀺𑀲𑁆𑀲𑁂𑀯𑀸𑀮𑀧𑀡𑀓𑀓𑀤𑁆𑀤𑀫𑁄. 𑀲𑀼𑀧𑁆𑀧𑀢𑀺𑀢𑁆𑀣𑁄𑀢𑀺 𑀲𑀼𑀦𑁆𑀤𑀭𑁂𑀳𑀺 𑀢𑀺𑀢𑁆𑀣𑁂𑀳𑀺 𑀉𑀧𑀧𑀦𑁆𑀦𑁄. 𑀭𑀫𑀡𑀻𑀬𑁄𑀢𑀺 𑀭𑀢𑀺𑀚𑀦𑀓𑁄. 𑀘𑀓𑁆𑀓𑀫𑀢𑁆𑀢𑀸𑀦𑀻𑀢𑀺 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀸𑀦𑀺. 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺 𑀢𑀢𑁆𑀭𑀸 𑀲𑀦𑁆𑀢𑀢𑁆𑀢𑀸 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺. 𑀬𑀢𑀸𑀬𑀁 𑀪𑀺𑀓𑁆𑀔𑀯𑁂𑀢𑀺 𑀬𑀢𑁄 𑀅𑀬𑀁 𑀪𑀺𑀓𑁆𑀔𑀯𑁂. 𑀲𑁄 𑀤𑀳𑁄𑀢𑀺 𑀲𑁄 𑀭𑀳𑀤𑁄. 𑀓𑀼𑀢𑁄 𑀧𑀦𑀸𑀬𑀁 𑀲𑀦𑁆𑀤𑀢𑀻𑀢𑀺? 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀪𑀼𑀫𑁆𑀫𑀝𑁆𑀞𑀓𑀦𑀸𑀕𑀸𑀦𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀦𑀸𑀕𑀪𑀯𑀦𑀁 𑀤𑁂𑀯𑀮𑁄𑀓𑀲𑀤𑀺𑀲𑀁 𑀫𑀡𑀺𑀫𑀬𑁂𑀦 𑀢𑀮𑁂𑀦 𑀆𑀭𑀸𑀫𑀼𑀬𑁆𑀬𑀸𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁; 𑀢𑀢𑁆𑀣 𑀦𑀸𑀕𑀸𑀦𑀁 𑀓𑀻𑀴𑀦𑀝𑁆𑀞𑀸𑀦𑁂 𑀲𑁄 𑀉𑀤𑀓𑀤𑀳𑁄, 𑀢𑀢𑁄 𑀅𑀬𑀁 𑀢𑀧𑁄𑀤𑀸 𑀲𑀦𑁆𑀤𑀢𑀺. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻𑀢𑀺 𑀭𑀸𑀚𑀕𑀳𑀦𑀕𑀭𑀁 𑀓𑀺𑀭 𑀆𑀯𑀺𑀜𑁆𑀚𑁂𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺.

𑀬𑀼𑀤𑁆𑀥𑀯𑀢𑁆𑀣𑀼𑀲𑁆𑀫𑀺𑀁 ¶ 𑀦𑀦𑁆𑀤𑀻 𑀘𑀭𑀢𑀻𑀢𑀺 𑀯𑀺𑀚𑀬𑀪𑁂𑀭𑀻 𑀆𑀳𑀺𑀡𑁆𑀟𑀢𑀺. 𑀭𑀸𑀚𑀸 𑀆𑀯𑀼𑀲𑁄 𑀮𑀺𑀘𑁆𑀙𑀯𑀻𑀳𑀻𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀘 𑀭𑀢𑁆𑀢𑀺𑀝𑁆𑀞𑀸𑀦𑁂 𑀘 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀮𑀺𑀘𑁆𑀙𑀯𑀬𑁄 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸, 𑀭𑀸𑀚𑀸 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀳𑀸𑀭𑀁 𑀤𑁂𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀸𑀚𑀸𑀦𑀁 𑀧𑀭𑀸𑀚𑀺𑀢𑀁 𑀧𑀮𑀸𑀬𑀫𑀸𑀦𑀁 𑀅𑀤𑁆𑀤𑀲. 𑀢𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀭𑀸𑀚𑀸 𑀆𑀯𑀼𑀲𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁄 𑀮𑀺𑀘𑁆𑀙𑀯𑀻𑀳𑀺 𑀧𑀪𑀕𑁆𑀕𑁄’’𑀢𑀺 ¶ 𑀆𑀳. 𑀲𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀳𑀸𑀢𑀺 𑀧𑀭𑀸𑀚𑀺𑀓𑀓𑀸𑀮𑁂 𑀆𑀯𑀚𑁆𑀚𑀺𑀢𑁆𑀯𑀸 𑀬𑀁 𑀤𑀺𑀝𑁆𑀞𑀁 𑀢𑀁 𑀪𑀡𑀦𑁆𑀢𑁄 𑀲𑀘𑁆𑀘𑀁 𑀆𑀳.

𑁨𑁩𑁨. 𑀦𑀸𑀕𑁄𑀕𑀸𑀳𑀯𑀢𑁆𑀣𑀼𑀲𑁆𑀫𑀺𑀁 𑀲𑀧𑁆𑀧𑀺𑀦𑀺𑀓𑀸𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬. 𑀆𑀦𑁂𑀜𑁆𑀚𑀁 𑀲𑀫𑀸𑀥𑀺𑀦𑁆𑀢𑀺 𑀅𑀦𑁂𑀚𑀁 𑀅𑀘𑀮𑀁 𑀓𑀸𑀬𑀯𑀸𑀘𑀸𑀯𑀺𑀧𑁆𑀨𑀦𑁆𑀤𑀯𑀺𑀭𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀁. 𑀦𑀸𑀕𑀸𑀦𑀦𑁆𑀢𑀺 𑀳𑀢𑁆𑀣𑀻𑀦𑀁. 𑀑𑀕𑀬𑁆𑀳 𑀉𑀢𑁆𑀢𑀭𑀦𑁆𑀢𑀸𑀦𑀦𑁆𑀢𑀺 𑀑𑀕𑀬𑁆𑀳 𑀑𑀕𑀸𑀳𑁂𑀢𑁆𑀯𑀸 𑀧𑀼𑀦 𑀉𑀢𑁆𑀢𑀭𑀦𑁆𑀢𑀸𑀦𑀁. 𑀢𑁂 𑀓𑀺𑀭 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑁄𑀡𑁆𑀟𑀸𑀬 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀮𑁄𑀮𑁂𑀦𑁆𑀢𑀸 𑀉𑀢𑁆𑀢𑀭𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀑𑀕𑀬𑁆𑀳 𑀉𑀢𑁆𑀢𑀭𑀦𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀜𑁆𑀘𑀁 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑀸𑀦𑀁. 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀦𑁆𑀢𑀺 𑀢𑀁 ¶ 𑀓𑁄𑀜𑁆𑀘𑀦𑀸𑀤𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀁. 𑀅𑀢𑁆𑀣𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺 𑀲𑁄 𑀘 𑀔𑁄 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑀺 𑀏𑀲𑁄 𑀲𑀫𑀸𑀥𑀺 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀲𑁄 𑀘 𑀔𑁄 𑀧𑀭𑀺𑀲𑀼𑀤𑁆𑀥𑁄 𑀦 𑀳𑁄𑀢𑀺. 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀤𑀳𑀼𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀸𑀘𑀺𑀡𑁆𑀡𑀯𑀲𑀻𑀪𑀸𑀯𑁄 ¶ 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀓𑁂 𑀥𑀫𑁆𑀫𑁂 𑀦 𑀲𑀼𑀝𑁆𑀞𑀼 𑀧𑀭𑀺𑀲𑁄𑀥𑁂𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀁 𑀲𑀜𑁆𑀜𑀸𑀫𑀢𑁆𑀢𑀓𑀫𑁂𑀯 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀛𑀸𑀦𑀗𑁆𑀕𑁂𑀳𑀺 𑀯𑀼𑀝𑁆𑀞𑀸𑀬 𑀦𑀸𑀕𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀲𑁆𑀲𑁄𑀲𑀺’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀣𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺; 𑀲𑁄 𑀘 𑀔𑁄 𑀅𑀧𑀭𑀺𑀲𑀼𑀤𑁆𑀥𑁄’’𑀢𑀺.

𑀲𑁄𑀪𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑀁, 𑀆𑀯𑀼𑀲𑁄, 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀆𑀳. 𑀇𑀢𑀭𑀣𑀸 𑀳𑀺 𑀅𑀦𑀘𑁆𑀙𑀭𑀺𑀬𑀁 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀦𑀸𑀦𑀸𑀯𑀚𑁆𑀚𑀦𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀢𑀻𑀢𑁂 𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀭𑀡𑀦𑁆𑀢𑀺 𑀦 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀧𑀦𑁂𑀲 ‘‘𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺 𑀆𑀳, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼. 𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑁄𑀪𑀺𑀢𑀲𑁆𑀲, 𑀲𑀸 𑀘 𑀔𑁄 𑀏𑀓𑀸𑀬𑁂𑀯 𑀚𑀸𑀢𑀻𑀢𑀺 𑀬𑀁 𑀲𑁄𑀪𑀺𑀢𑁄 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀆𑀳, 𑀅𑀢𑁆𑀣𑁂𑀲𑀸 𑀚𑀸𑀢𑀺 𑀲𑁄𑀪𑀺𑀢𑀲𑁆𑀲, 𑀲𑀸 𑀘 𑀔𑁄 𑀏𑀓𑀸𑀬𑁂𑀯 𑀅𑀦𑀦𑁆𑀢𑀭𑀸 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀣𑀁 𑀧𑀦𑀸𑀬𑀁 𑀏𑀢𑀁 𑀅𑀦𑀼𑀲𑁆𑀲𑀭𑀻𑀢𑀺? 𑀅𑀬𑀁 𑀓𑀺𑀭 𑀧𑀜𑁆𑀘𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀉𑀧𑀭𑀺 𑀢𑀺𑀢𑁆𑀣𑀸𑀬𑀢𑀦𑁂

𑀧𑀩𑁆𑀩𑀚𑀺𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀯𑀲𑀸𑀦𑁂 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀝𑀺𑀲𑀦𑁆𑀥𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀭𑀁 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀫𑁂𑀯 𑀅𑀤𑁆𑀤𑀲. 𑀅𑀣 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 ¶ 𑀅𑀲𑀓𑁆𑀓𑁄𑀦𑁆𑀢𑁄 𑀦𑀬𑀢𑁄 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀅𑀤𑁆𑀥𑀸𑀅𑀳𑀁 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀏𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀧𑀦𑀸𑀦𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺 𑀧𑀝𑀺𑀯𑀺𑀤𑁆𑀥𑀸, 𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀸 𑀦𑀁 𑀪𑀕𑀯𑀸 ¶ 𑀇𑀫𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀬𑀤𑀺𑀤𑀁 𑀲𑁄𑀪𑀺𑀢𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁭).

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁨𑁩𑁩. 𑀉𑀤𑁆𑀤𑀺𑀝𑁆𑀞𑀸 ¶ 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺 𑀇𑀤𑀁 𑀇𑀥 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀫𑁂𑀯. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀘𑀢𑀼𑀯𑀻𑀲𑀢𑀺? 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀢𑀸𑀯 𑀪𑀺𑀓𑁆𑀔𑀽𑀦𑀁 𑀘𑀢𑁆𑀢𑀸𑀭𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀅𑀝𑁆𑀞. 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑀸, 𑀢𑁂𑀲𑀼 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄, 𑀅𑀪𑀩𑁆𑀩𑀸 𑀳𑀺 𑀢𑁂 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀸𑀬 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑁆𑀢𑀸𑀢𑀺. 𑀧𑀩𑁆𑀩𑀚𑁆𑀚𑀸𑀧𑀺 𑀦𑁂𑀲𑀁 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀧𑀺 𑀧𑀸𑀭𑀸𑀚𑀺𑀓𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀲𑀗𑁆𑀖𑀪𑁂𑀤𑀓𑁄𑀢𑀺 𑀇𑀫𑁂 𑀅𑀝𑁆𑀞 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀯𑀺𑀧𑀦𑁆𑀦𑀢𑁆𑀢𑀸 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀢𑀸𑀢𑀺 𑀧𑀸𑀭𑀸𑀚𑀺𑀓𑀸𑀯. 𑀢𑁂𑀲𑀼 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄𑀯. 𑀇𑀢𑀭𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀪𑀬𑀫𑁆𑀧𑀺 𑀯𑀸𑀭𑀺𑀢𑀁. 𑀢𑁂 𑀳𑀺 𑀅𑀦𑀦𑁆𑀢𑀭𑀪𑀯𑁂 𑀦𑀭𑀓𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸. 𑀇𑀢𑀺 𑀇𑀫𑁂 𑀘 𑀏𑀓𑀸𑀤𑀲, 𑀧𑀼𑀭𑀺𑀫𑀸 𑀘 𑀅𑀝𑁆𑀞𑀸𑀢𑀺 𑀏𑀓𑀽𑀦𑀯𑀻𑀲𑀢𑀺. 𑀢𑁂 𑀕𑀺𑀳𑀺𑀮𑀺𑀗𑁆𑀕𑁂 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀯𑀻𑀲𑀢𑀺. 𑀲𑀸 𑀳𑀺 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑀁 𑀅𑀓𑀢𑁆𑀯𑀸𑀧𑀺 𑀏𑀢𑁆𑀢𑀸𑀯𑀢𑀸𑀯 𑀅𑀲𑁆𑀲𑀫𑀡𑀻𑀢𑀺 𑀇𑀫𑀸𑀦𑀺 𑀢𑀸𑀯 𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺.

𑀅𑀧𑀭𑀸𑀦𑀺𑀧𑀺 𑁋 𑀮𑀫𑁆𑀩𑀻, 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀏𑀢𑀸𑀦𑀺 𑀳𑀺 𑀬𑀲𑁆𑀫𑀸 𑀉𑀪𑀺𑀦𑁆𑀦𑀁 𑀭𑀸𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀽𑀧𑀕𑀢𑀸𑀦𑀁 𑀥𑀫𑁆𑀫𑁄 ‘‘𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 ¶ 𑀅𑀧𑁆𑀧𑀝𑀺𑀲𑁂𑀯𑀺𑀢𑁆𑀯𑀸𑀬𑁂𑀯 𑀓𑁂𑀯𑀮𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀯𑁂𑀲𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀘𑀢𑁆𑀢𑀸𑀭𑀺 ¶ 𑀧𑀼𑀭𑀺𑀫𑀸𑀦𑀺 𑀘 𑀯𑀻𑀲𑀢𑀻𑀢𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀦 𑀮𑀪𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀦𑁆𑀢𑀺 𑀉𑀧𑁄𑀲𑀣-𑀧𑀯𑀸𑀭𑀡-𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲-𑀲𑀗𑁆𑀖𑀓𑀫𑁆𑀫𑀧𑁆𑀧𑀪𑁂𑀤𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀮𑀪𑀢𑀺. 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀧𑀺 𑀢𑀣𑁂𑀯 𑀅𑀲𑀁𑀯𑀸𑀲𑁄 𑀳𑁄𑀢𑀺. 𑀦𑀢𑁆𑀣𑀺 𑀢𑀲𑁆𑀲 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 ¶ 𑀉𑀧𑁄𑀲𑀣𑀧𑀯𑀸𑀭𑀡𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑀗𑁆𑀖𑀓𑀫𑁆𑀫𑀧𑁆𑀧𑀪𑁂𑀤𑁄 𑀲𑀁𑀯𑀸𑀲𑁄𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀮𑀪𑀢𑀺. 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀆𑀬𑀲𑁆𑀫𑀦𑁆𑀢𑁂 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀧𑀼𑀘𑁆𑀙𑀸𑀫𑀺. 𑀓𑀘𑁆𑀘𑀺𑀢𑁆𑀣𑀸𑀢𑀺 𑀓𑀘𑁆𑀘𑀺 𑀏𑀢𑁆𑀣; 𑀏𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸𑀢𑀺 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸 𑀅𑀢𑁆𑀣, 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀁 ¶ ¶ 𑀧𑀸𑀭𑀸𑀚𑀺𑀓𑀓𑀡𑁆𑀟𑀲𑁆𑀲, 𑀲𑀗𑁆𑀕𑀻𑀢𑀁 𑀲𑀫𑀦𑀦𑁆𑀢𑀭𑀁;

𑀢𑀲𑁆𑀲 𑀢𑁂𑀭𑀲𑀓𑀲𑁆𑀲𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸.

𑁨𑁩𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑁂𑀬𑁆𑀬𑀲𑀓𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻𑀢𑀺 𑀏𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁. 𑀲𑁂𑀬𑁆𑀬𑀲𑀓𑁄𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀫𑀁. 𑀅𑀦𑀪𑀺𑀭𑀢𑁄𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀓𑀸𑀫𑀭𑀸𑀕𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀫𑀸𑀦𑁄 𑀦 𑀧𑀦 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄. 𑀲𑁄 𑀢𑁂𑀦 𑀓𑀺𑀲𑁄 𑀳𑁄𑀢𑀻𑀢𑀺 𑀲𑁄 𑀲𑁂𑀬𑁆𑀬𑀲𑀓𑁄 𑀢𑁂𑀦 𑀅𑀦𑀪𑀺𑀭𑀢𑀪𑀸𑀯𑁂𑀦 𑀓𑀺𑀲𑁄 𑀳𑁄𑀢𑀺.

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻𑀢𑀺 𑀏𑀢𑁆𑀣 𑀉𑀤𑀸𑀬𑀻𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁, 𑀅𑀬𑀜𑁆𑀳𑀺 𑀲𑁂𑀬𑁆𑀬𑀲𑀓𑀲𑁆𑀲 𑀉𑀧𑀚𑁆𑀛𑀸𑀬𑁄 𑀮𑀸𑀴𑀼𑀤𑀸𑀬𑀻 𑀦𑀸𑀫 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑁄 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑁄 𑀮𑁄𑀮𑀪𑀺𑀓𑁆𑀔𑀼. 𑀓𑀘𑁆𑀘𑀺 𑀦𑁄 𑀢𑁆𑀯𑀦𑁆𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁. 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀸𑀢𑀺𑀆𑀤𑀻𑀲𑀼 𑀬𑀸𑀯𑀢𑀸 𑀅𑀢𑁆𑀣𑁄𑀢𑀺 𑀬𑀸𑀯𑀤𑀢𑁆𑀣𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯𑀢𑀸 𑀢𑁂 𑀪𑁄𑀚𑀦𑁂𑀦 𑀅𑀢𑁆𑀣𑁄 𑀬𑀢𑁆𑀢𑀓𑀁 𑀢𑁆𑀯𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀪𑀼𑀜𑁆𑀚, 𑀬𑀢𑁆𑀢𑀓𑀁 𑀓𑀸𑀮𑀁 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀲𑀼𑀧𑀺𑀢𑀼𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀲𑀼𑀧, 𑀫𑀢𑁆𑀢𑀺𑀓𑀸𑀤𑀻𑀳𑀺 𑀓𑀸𑀬𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀖𑀁𑀲𑀺𑀢𑁆𑀯𑀸 𑀬𑀢𑁆𑀢𑀓𑀁 𑀦𑁆𑀳𑀸𑀦𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀦𑁆𑀳𑀸𑀬, 𑀉𑀤𑁆𑀤𑁂𑀲𑁂𑀦 𑀯𑀸 𑀧𑀭𑀺𑀧𑀼𑀘𑁆𑀙𑀸𑀬 𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀓𑀫𑁆𑀫𑀝𑁆𑀞𑀸𑀦𑁂𑀦 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺. 𑀬𑀤𑀸 𑀢𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀯 ¶ 𑀓𑀸𑀫𑀭𑀸𑀕𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀓𑀸𑀫𑀭𑀸𑀕𑁄 𑀘𑀺𑀢𑁆𑀢𑀁 𑀥𑀁𑀲𑁂𑀢𑀺 𑀧𑀥𑀁𑀲𑁂𑀢𑀺 𑀯𑀺𑀓𑁆𑀔𑀺𑀧𑀢𑀺 𑀘𑁂𑀯 𑀫𑀺𑀮𑀸𑀧𑁂𑀢𑀺 𑀘. 𑀢𑀤𑀸 𑀳𑀢𑁆𑀣𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀁 𑀫𑁄𑀘𑁂𑀳𑀻𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀢𑁆𑀣𑁂𑀦 𑀯𑀸𑀬𑀫𑀺𑀢𑁆𑀯𑀸 𑀅𑀲𑀼𑀘𑀺𑀫𑁄𑀘𑀦𑀁 𑀓𑀭𑁄𑀳𑀺, 𑀏𑀯𑀜𑁆𑀳𑀺 𑀢𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀪𑀯𑀺𑀲𑁆𑀲𑀢𑀺. 𑀇𑀢𑀺 𑀢𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀲𑀸𑀲𑀺 𑀬𑀣𑀸 𑀢𑀁 𑀩𑀸𑀮𑁄 𑀩𑀸𑀮𑀁 𑀫𑀕𑁄 𑀫𑀕𑀁.

𑁨𑁩𑁫. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀬 𑀦𑀺𑀤𑁆𑀤𑀁 𑀑𑀢𑀭𑀦𑁆𑀢𑀸𑀦𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀅𑀩𑁆𑀬𑀸𑀓𑀢𑁄 ¶ 𑀪𑀯𑀗𑁆𑀕𑀯𑀸𑀭𑁄 𑀧𑀯𑀢𑁆𑀢𑀢𑀺, 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀸𑀭𑁄 𑀕𑀴𑀢𑀺, 𑀢𑀣𑀸𑀧𑀺 𑀲𑀬𑀦𑀓𑀸𑀮𑁂 𑀫𑀦𑀲𑀺𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀤𑀺𑀯𑀸 𑀲𑀼𑀧𑀦𑁆𑀢𑁂𑀦 𑀬𑀸𑀯 𑀦𑁆𑀳𑀸𑀢𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀓𑁂𑀲𑀸 𑀦 𑀲𑀼𑀓𑁆𑀔𑀦𑁆𑀢𑀺 𑀢𑀸𑀯 𑀲𑀼𑀧𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀲𑀉𑀲𑁆𑀲𑀸𑀳𑁂𑀦 𑀲𑀼𑀧𑀺𑀢𑀩𑁆𑀩𑀁. 𑀭𑀢𑁆𑀢𑀺𑀁 𑀲𑀼𑀧𑀦𑁆𑀢𑁂𑀦 𑀏𑀢𑁆𑀢𑀓𑀁 𑀦𑀸𑀫 𑀭𑀢𑁆𑀢𑀺𑀪𑀸𑀕𑀁 𑀲𑀼𑀧𑀺𑀢𑁆𑀯𑀸 𑀘𑀦𑁆𑀤𑁂𑀦 𑀯𑀸 𑀢𑀸𑀭𑀓𑀸𑀬 𑀯𑀸 𑀇𑀤𑀁 𑀦𑀸𑀫 𑀞𑀸𑀦𑀁 𑀧𑀢𑁆𑀢𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀲𑀉𑀲𑁆𑀲𑀸𑀳𑁂𑀦 𑀲𑀼𑀧𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀘 𑀤𑀲𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀓𑀁 𑀅𑀜𑁆𑀜𑀁 𑀯𑀸 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺𑀢𑀩𑁆𑀩𑀸. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀅𑀯𑀺𑀚𑀳𑀺𑀢𑁆𑀯𑀸𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀧𑀦 𑀪𑀺𑀓𑁆𑀔𑀽 𑀩𑀸𑀮𑀸 𑀮𑁄𑀮𑀸 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑀸 𑀦 𑀏𑀯𑀫𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦’’𑀦𑁆𑀢𑀺.

𑀅𑀢𑁆𑀣𑀺 𑀘𑁂𑀢𑁆𑀣 𑀘𑁂𑀢𑀦𑀸 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 𑀘 𑀲𑀼𑀧𑀺𑀦𑀦𑁆𑀢𑁂 𑀅𑀲𑁆𑀲𑀸𑀤𑀘𑁂𑀢𑀦𑀸 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺. 𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀘𑁂𑀢𑀦𑀸; 𑀲𑀸 𑀘 𑀔𑁄 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀪𑀺𑀓𑁆𑀔𑀯𑁂 𑀏𑀲𑀸 𑀅𑀲𑁆𑀲𑀸𑀤𑀘𑁂𑀢𑀦𑀸 𑀅𑀢𑁆𑀣𑀺, 𑀲𑀸 𑀘 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸, 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀺. 𑀇𑀢𑀺 𑀪𑀕𑀯𑀸 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀦𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣, 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀲𑀸𑀦𑀼𑀧𑀜𑁆𑀜𑀢𑁆𑀢𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺.

𑁨𑁩𑁬-𑁨𑁩𑁭. 𑀢𑀢𑁆𑀣 𑀲𑀁𑀯𑀺𑀚𑁆𑀚𑀢𑀺 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀲𑀜𑁆𑀘𑁂𑀢𑀦𑀸, 𑀲𑀜𑁆𑀘𑁂𑀢𑀦𑀸𑀯 𑀲𑀜𑁆𑀘𑁂𑀢𑀦𑀺𑀓𑀸, 𑀲𑀜𑁆𑀘𑁂𑀢𑀦𑀸 𑀯𑀸 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀸. 𑀬𑀲𑁆𑀫𑀸 𑀧𑀦 𑀬𑀲𑁆𑀲 𑀲𑀜𑁆𑀘𑁂𑀢𑀦𑀺𑀓𑀸 ¶ 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺 𑀲𑁄 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀳𑁄𑀢𑀺, 𑀲𑀸 𑀘𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀦𑀦𑁆𑀢𑁄𑀢𑀺 𑀉𑀧𑀓𑁆𑀓𑀫𑀸𑀫𑀻𑀢𑀺 𑀚𑀸𑀦𑀦𑁆𑀢𑁄. 𑀲𑀜𑁆𑀚𑀸𑀦𑀦𑁆𑀢𑁄𑀢𑀺 𑀲𑀼𑀓𑁆𑀓𑀁 𑀫𑁄𑀘𑁂𑀫𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑁄, 𑀢𑁂𑀦𑁂𑀯 𑀉𑀧𑀓𑁆𑀓𑀫𑀚𑀸𑀦𑀦𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀘𑁆𑀘𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀉𑀧𑀓𑁆𑀓𑀫𑀯𑀲𑁂𑀦 𑀫𑀤𑁆𑀤𑀦𑁆𑀢𑁄 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸. 𑀯𑀻𑀢𑀺𑀓𑁆𑀓𑀫𑁄𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀬𑁄 𑀯𑀻𑀢𑀺𑀓𑁆𑀓𑀫𑁄 𑀅𑀬𑀁 𑀲𑀜𑁆𑀘𑁂𑀢𑀦𑀺𑀓𑀸𑀲𑀤𑁆𑀤𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 ¶ 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀏𑀢𑁆𑀣 𑀬𑀲𑁆𑀲 𑀲𑀼𑀓𑁆𑀓𑀲𑁆𑀲 𑀯𑀺𑀲𑁆𑀲𑀝𑁆𑀞𑀺 𑀢𑀁 𑀢𑀸𑀯 𑀲𑀗𑁆𑀔𑁆𑀬𑀸𑀢𑁄 𑀯𑀡𑁆𑀡𑀪𑁂𑀤𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀓𑁆𑀓𑀦𑁆𑀢𑀺 𑀤𑀲 𑀲𑀼𑀓𑁆𑀓𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀓𑁆𑀓𑀸𑀦𑀁 𑀆𑀲𑀬𑀪𑁂𑀤𑀢𑁄 𑀥𑀸𑀢𑀼𑀦𑀸𑀦𑀢𑁆𑀢𑀢𑁄 𑀘 𑀦𑀻𑀮𑀸𑀤𑀺𑀯𑀡𑁆𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁆𑀲𑀝𑁆𑀞𑀻𑀢𑀺 𑀯𑀺𑀲𑁆𑀲𑀕𑁆𑀕𑁄, 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀞𑀸𑀦𑀸𑀘𑀸𑀯𑀦𑀁 𑀳𑁄𑀢𑀺, 𑀢𑁂𑀦𑀸𑀳 𑁋 ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄 𑀘𑀸𑀯𑀦𑀸 ¶ 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀯𑀢𑁆𑀣𑀺𑀲𑀻𑀲𑀁 𑀓𑀝𑀺 𑀓𑀸𑀬𑁄𑀢𑀺 𑀢𑀺𑀥𑀸 𑀲𑀼𑀓𑁆𑀓𑀲𑁆𑀲 𑀞𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑀺, 𑀏𑀓𑁄 𑀓𑀺𑀭𑀸𑀘𑀭𑀺𑀬𑁄 ‘‘𑀯𑀢𑁆𑀣𑀺𑀲𑀻𑀲𑀁 𑀲𑀼𑀓𑁆𑀓𑀲𑁆𑀲 𑀞𑀸𑀦’’𑀦𑁆𑀢𑀺 𑀆𑀳. 𑀏𑀓𑁄 ‘‘𑀓𑀝𑀻’’𑀢𑀺, 𑀏𑀓𑁄 ‘‘𑀲𑀓𑀮𑁄 𑀓𑀸𑀬𑁄’’𑀢𑀺, 𑀢𑁂𑀲𑀼 𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀁. 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀜𑁆𑀳𑀺 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁄 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑁄 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀩𑀤𑁆𑀥𑀧𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑀲𑁆𑀲 𑀘 𑀞𑀸𑀦𑀫𑁂𑀯. 𑀢𑀣𑀸 𑀳𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀸𑀪𑀺𑀪𑀽𑀢𑀸𑀦𑀁 𑀳𑀢𑁆𑀣𑀻𑀦𑀁 𑀉𑀪𑁄𑀳𑀺 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀲𑀫𑁆𑀪𑀯𑁄 𑀦𑀺𑀓𑁆𑀔𑀫𑀢𑀺, 𑀫𑀳𑀸𑀲𑁂𑀦𑀭𑀸𑀚𑀸 𑀘 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀲𑀫𑁆𑀪𑀯𑀯𑁂𑀕𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑁂𑀦 𑀩𑀸𑀳𑀼𑀲𑀻𑀲𑀁 𑀨𑀸𑀮𑁂𑀢𑁆𑀯𑀸 𑀯𑀡𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀁 𑀲𑀫𑁆𑀪𑀯𑀁 𑀤𑀲𑁆𑀲𑁂𑀲𑀻𑀢𑀺.

𑀏𑀢𑁆𑀣 𑀧𑀦 𑀧𑀞𑀫𑀲𑁆𑀲 𑀆𑀘𑀭𑀺𑀬𑀲𑁆𑀲 𑀯𑀸𑀤𑁂 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄 𑀬𑀢𑁆𑀢𑀓𑀁 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬 𑀢𑀢𑁆𑀢𑀓𑁂 𑀅𑀲𑀼𑀘𑀺𑀫𑁆𑀳𑀺 𑀯𑀢𑁆𑀣𑀺𑀲𑀻𑀲𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 ¶ 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀼𑀢𑀺𑀬𑀲𑁆𑀲 𑀯𑀸𑀤𑁂 𑀢𑀣𑁂𑀯 𑀓𑀝𑀺𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂, 𑀢𑀢𑀺𑀬𑀲𑁆𑀲 𑀯𑀸𑀤𑁂 𑀢𑀣𑁂𑀯 𑀲𑀓𑀮𑀓𑀸𑀬𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣 𑀅𑀥𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀺. 𑀢𑀲𑁆𑀫𑀸 𑀞𑀸𑀦𑀸 𑀘𑀸𑀯𑀦𑀫𑀢𑁆𑀢𑁂𑀦𑁂𑀯𑁂𑀢𑁆𑀣 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀔𑁄 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀳𑀢𑁆𑀣𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀕𑀢𑁆𑀢𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀲𑀘𑁂𑀧𑀺 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀬𑀁 𑀲𑀩𑁆𑀩𑀸𑀘𑀭𑀺𑀬𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄.

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀏𑀢𑁆𑀣 𑀲𑀼𑀧𑀺𑀦𑁄 𑀏𑀯 𑀲𑀼𑀧𑀺𑀦𑀦𑁆𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀘 𑀧𑀦 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀢𑀺 ¶ 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺.

𑀢𑀢𑁆𑀣 𑀧𑀺𑀢𑁆𑀢𑀸𑀤𑀻𑀦𑀁 𑀔𑁄𑀪𑀓𑀭𑀡𑀧𑀘𑁆𑀘𑀬𑀬𑁄𑀕𑁂𑀦 𑀔𑀼𑀪𑀺𑀢𑀥𑀸𑀢𑀼𑀓𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀘 𑀦𑀸𑀦𑀸𑀯𑀺𑀥𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑁋 𑀧𑀩𑁆𑀩𑀢𑀸 𑀧𑀢𑀦𑁆𑀢𑁄 𑀯𑀺𑀬, 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬, 𑀯𑀸𑀴𑀫𑀺𑀕𑀳𑀢𑁆𑀣𑀻𑀘𑁄𑀭𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑁄 𑀯𑀺𑀬 𑀳𑁄𑀢𑀺. 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀩𑁆𑀩𑁂 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀺. 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀉𑀧𑀲𑀁𑀳𑀭𑀦𑁆𑀢𑀺, 𑀲𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀢𑀺. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀅𑀦𑀢𑁆𑀣𑀲𑁆𑀲 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲𑀫𑀸𑀢𑀸 ¶ 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁, 𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 (𑀅. 𑀦𑀺. 𑁫.𑁧𑁯𑁬), 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂𑀢𑀺.

𑀢𑀢𑁆𑀣 𑀬𑀁 𑀥𑀸𑀢𑀼𑀓𑁆𑀔𑁄𑀪𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀘 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺 𑀦 𑀢𑀁 𑀲𑀘𑁆𑀘𑀁 𑀳𑁄𑀢𑀺. 𑀬𑀁 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀧𑀲𑁆𑀲𑀢𑀺 𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺 𑀅𑀮𑀻𑀓𑀁 𑀯𑀸, 𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸 𑀉𑀧𑀸𑀬𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑀸 𑀯𑀺𑀧𑀭𑀻𑀢𑀫𑁆𑀧𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺 ¶ 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀢𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀫𑀽𑀮𑀓𑀸𑀭𑀡𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀺 𑀲𑀼𑀧𑀺𑀦𑀪𑁂𑀤𑁄 𑀳𑁄𑀢𑀺𑀬𑁂𑀯.

𑀢𑀜𑁆𑀘 𑀧𑀦𑁂𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀼𑀧𑀺𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀯 𑀧𑀲𑁆𑀲𑀦𑁆𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸, 𑀅𑀲𑁂𑀓𑁆𑀔𑀸 𑀧𑀦 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸. 𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀧𑀝𑀺𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺, 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀓𑁄 𑀦𑀸𑀫 𑀧𑀲𑁆𑀲𑀢𑀺; 𑀏𑀯𑀜𑁆𑀘 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀻𑀢𑀺, 𑀦 𑀅𑀪𑀸𑀯𑁄. 𑀓𑀲𑁆𑀫𑀸 ¶ ? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺. 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺; 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀢𑁂𑀦𑀸𑀬𑀁 𑀲𑀼𑀧𑀺𑀦𑁄 𑀓𑀼𑀲𑀮𑁄𑀧𑀺 𑀳𑁄𑀢𑀺 𑀅𑀓𑀼𑀲𑀮𑁄𑀧𑀺 𑀅𑀩𑁆𑀬𑀸𑀓𑀢𑁄𑀧𑀺. 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀺𑀬𑀯𑀦𑁆𑀤𑀦𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀤𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑁄, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀅𑀓𑀼𑀲𑀮𑁄, 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂 𑀅𑀩𑁆𑀬𑀸𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀧𑀯𑀢𑁆𑀢𑁂 𑀧𑀦 𑀅𑀜𑁆𑀜𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀁 𑀤𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺? 𑀅𑀣 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸𑀯 𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸. 𑀢𑁂𑀦𑀸𑀳 𑁋 ‘‘𑀞𑀧𑁂𑀢𑁆𑀯𑀸 𑀲𑀼𑀧𑀺𑀦𑀦𑁆𑀢’’𑀦𑁆𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀇𑀫𑀲𑁆𑀲 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀁. 𑀢𑀲𑁆𑀫𑀸 𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 ¶ , 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀬𑀁 𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀸𑀬 𑀆𑀤𑀺𑀢𑁄 𑀲𑁂𑀲𑁂 𑀘 𑀫𑀚𑁆𑀛𑁂 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀦 𑀯𑀸 𑀲𑀳 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀸𑀬 𑀲𑀗𑁆𑀖𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀦 𑀳𑁂𑀢𑁆𑀣 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀯𑀺𑀦𑀸 𑀲𑀗𑁆𑀖𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺. 𑀩𑁆𑀬𑀜𑁆𑀚𑀦𑀁 𑀧𑀦 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀅𑀩𑁆𑀪𑁂𑀢𑀺 𑀦 𑀲𑀫𑁆𑀩𑀳𑀼𑀮𑀸 𑀦 𑀏𑀓𑀧𑀼𑀕𑁆𑀕𑀮𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀇𑀤𑀫𑀲𑁆𑀲 𑀧𑀤𑀪𑀸𑀚𑀦𑀁 𑁋

‘‘𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑀗𑁆𑀖𑁄𑀯 𑀤𑁂𑀢𑀺 𑀧𑀭𑀺𑀯𑀸𑀲𑀁, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺;

𑀫𑀸𑀦𑀢𑁆𑀢𑀁 𑀤𑁂𑀢𑀺 𑀅𑀩𑁆𑀪𑁂𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯) 𑁋

𑀧𑀭𑀺𑀯𑀸𑀭𑁂 ¶ 𑀯𑀘𑀦𑀓𑀸𑀭𑀡𑀜𑁆𑀘 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀦𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀸𑀦𑀺, 𑀢𑀢𑁆𑀣𑁂𑀯 𑀦𑁂𑀲𑀁 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫.

𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲𑀸𑀢𑀺 𑀢𑀲𑁆𑀲 𑀏𑀯 𑀆𑀧𑀢𑁆𑀢𑀺𑀲𑀫𑀽𑀳𑀲𑁆𑀲. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀏𑀓𑀸𑀯 𑀆𑀧𑀢𑁆𑀢𑀺, 𑀭𑀽𑀴𑁆𑀳𑀺𑀲𑀤𑁆𑀤𑁂𑀦 𑀧𑀦 𑀅𑀯𑀬𑀯𑁂 𑀲𑀫𑀽𑀳𑀯𑁄𑀳𑀸𑀭𑁂𑀦 𑀯𑀸 ‘‘𑀦𑀺𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁄 𑁋 ‘‘𑀏𑀓𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀇𑀫𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀉𑀧𑀸𑀬𑀜𑁆𑀘 𑀓𑀸𑀮𑀜𑁆𑀘 𑀅𑀥𑀺𑀧𑁆𑀧𑀸𑀬𑀜𑁆𑀘 𑀅𑀥𑀺𑀧𑁆𑀧𑀸𑀬𑀯𑀢𑁆𑀣𑀼𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀫𑁄𑀘𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀉𑀧𑀸𑀬𑁄 𑀤𑀲𑁆𑀲𑀺𑀢𑁄, 𑀅𑀚𑁆𑀛𑀢𑁆𑀢𑀭𑀽𑀧𑁂 𑀯𑀸 𑀫𑁄𑀘𑁂𑀬𑁆𑀬 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀉𑀪𑀬𑀢𑁆𑀣 𑀯𑀸 𑀆𑀓𑀸𑀲𑁂 𑀯𑀸 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄, 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀉𑀧𑀸𑀬𑁄 𑀦𑀢𑁆𑀣𑀺. 𑀢𑀢𑁆𑀣 𑀭𑀽𑀧𑁂 𑀖𑀝𑁆𑀝𑁂𑀢𑁆𑀯𑀸 𑀫𑁄𑀘𑁂𑀦𑁆𑀢𑁄𑀧𑀺 𑀭𑀽𑀧𑁂𑀦 𑀖𑀝𑁆𑀝𑁂𑀢𑁆𑀯𑀸 𑀫𑁄𑀘𑁂𑀦𑁆𑀢𑁄𑀧𑀺 𑀭𑀽𑀧𑁂 𑀫𑁄𑀘𑁂𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑁂 𑀳𑀺 ¶ 𑀲𑀢𑀺 𑀲𑁄 𑀫𑁄𑀘𑁂𑀢𑀺 𑀦 𑀭𑀽𑀧𑀁 𑀅𑀮𑀪𑀺𑀢𑁆𑀯𑀸. 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀳𑀺 𑀧𑀦 𑀧𑀜𑁆𑀘𑀳𑀺 𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀺𑀓𑀸𑀮𑁂𑀲𑀼 𑀳𑀺 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺, 𑀬𑀲𑁆𑀲 𑀓𑀫𑁆𑀫𑀦𑀺𑀬𑀢𑁆𑀢𑁂 𑀲𑀢𑀺 𑀫𑁄𑀘𑁂𑀢𑀺. 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀓𑀸𑀮𑁄 𑀦𑀢𑁆𑀣𑀺, 𑀦 𑀳𑀺 𑀯𑀺𑀦𑀸 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀳𑀺 𑀧𑀼𑀩𑁆𑀩𑀡𑁆𑀳𑀸𑀤𑀬𑁄 𑀓𑀸𑀮𑀪𑁂𑀤𑀸 𑀫𑁄𑀘𑀦𑁂 𑀦𑀺𑀫𑀺𑀢𑁆𑀢𑀁 𑀳𑁄𑀦𑁆𑀢𑀺.

𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀳𑀺 ¶ 𑀤𑀲𑀳𑀺 𑀅𑀥𑀺𑀧𑁆𑀧𑀸𑀬𑁄 𑀤𑀲𑁆𑀲𑀺𑀢𑁄, 𑀏𑀯𑀭𑀽𑀧𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑀪𑁂𑀤𑁂𑀦 𑀫𑁄𑀘𑁂𑀢𑀺 𑀦 𑀅𑀜𑁆𑀜𑀣𑀸. 𑀦𑀻𑀮𑀸𑀤𑀻𑀳𑀺 𑀧𑀦 𑀤𑀲𑀳𑀺 𑀦𑀯𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁, 𑀯𑀻𑀫𑀁𑀲𑀦𑁆𑀢𑁄 𑀳𑀺 𑀦𑀻𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀯𑀲𑁂𑀦 𑀯𑀻𑀫𑀁𑀲𑀢𑀺 𑀦 𑀢𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺.

𑁨𑁩𑁮. 𑀇𑀢𑁄 𑀧𑀭𑀁 𑀧𑀦 𑀇𑀫𑁂𑀲𑀁𑀬𑁂𑀯 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀦𑀁 𑀧𑀤𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂𑀢𑀺 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑁂 𑀭𑀽𑀧𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑁂 𑀭𑀽𑀧𑁂𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑀸𑀤𑀺𑀪𑁂𑀤𑁂 𑀭𑀽𑀧𑁂. 𑀩𑀳𑀺𑀤𑁆𑀥𑀸 𑀉𑀧𑀸𑀤𑀺𑀦𑁆𑀦𑁂𑀢𑀺 𑀧𑀭𑀲𑁆𑀲 𑀢𑀸𑀤𑀺𑀲𑁂𑀬𑁂𑀯. 𑀅𑀦𑀼𑀧𑀸𑀤𑀺𑀦𑁆𑀦𑁂𑀢𑀺 𑀢𑀸𑀴𑀘𑁆𑀙𑀺𑀤𑁆𑀤𑀸𑀤𑀺𑀪𑁂𑀤𑁂. 𑀢𑀤𑀼𑀪𑀬𑁂𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀭𑀽𑀧𑁂, 𑀉𑀪𑀬𑀖𑀝𑁆𑀝𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀘 𑀅𑀦𑀼𑀧𑀸𑀤𑀺𑀦𑁆𑀦𑀭𑀽𑀧𑁂𑀦 𑀘 𑀏𑀓𑀢𑁄 𑀖𑀝𑁆𑀝𑀦𑁂𑀧𑀺 𑀮𑀩𑁆𑀪𑀢𑀺. 𑀆𑀓𑀸𑀲𑁂 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀓𑁂𑀦𑀘𑀺 𑀭𑀽𑀧𑁂𑀦 𑀅𑀖𑀝𑁆𑀝𑁂𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀓𑀝𑀺𑀓𑀫𑁆𑀧𑀦𑀧𑀬𑀑𑀕𑁂𑀦 𑀅𑀗𑁆𑀕𑀚𑀸𑀢𑀁 𑀘𑀸𑀮𑁂𑀦𑁆𑀢𑀲𑁆𑀲.

𑀭𑀸𑀕𑀽𑀧𑀢𑁆𑀣𑀫𑁆𑀪𑁂𑀢𑀺 ¶ 𑀭𑀸𑀕𑀲𑁆𑀲 𑀩𑀮𑀯𑀪𑀸𑀯𑁂, 𑀭𑀸𑀕𑁂𑀦 𑀯𑀸 𑀅𑀗𑁆𑀕𑀚𑀸𑀢𑀲𑁆𑀲 𑀉𑀧𑀢𑁆𑀣𑀫𑁆𑀪𑁂, 𑀣𑀤𑁆𑀥𑀪𑀸𑀯𑁂 𑀲𑀜𑁆𑀚𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀦𑀺𑀬𑀁 𑀳𑁄𑀢𑀻𑀢𑀺 𑀫𑁄𑀘𑀦𑀓𑀫𑁆𑀫𑀓𑁆𑀔𑀫𑀁 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀉𑀧𑀓𑁆𑀓𑀫𑀸𑀭𑀳𑀁 𑀳𑁄𑀢𑀺.

𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂𑀢𑀺 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦 𑀅𑀗𑁆𑀕𑀚𑀸𑀢𑁂 𑀉𑀧𑀢𑁆𑀣𑀫𑁆𑀪𑁂. 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸 𑀦𑀸𑀫 𑀮𑁄𑀫𑀲𑀧𑀸𑀡𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀮𑁄𑀫𑁂𑀳𑀺 𑀨𑀼𑀝𑁆𑀞𑀁 𑀅𑀗𑁆𑀕𑀚𑀸𑀢𑀁 𑀓𑀡𑁆𑀟𑀼𑀁 𑀕𑀳𑁂𑀢𑁆𑀯𑀸 𑀣𑀤𑁆𑀥𑀁 𑀳𑁄𑀢𑀺, 𑀢𑀢𑁆𑀣 𑀬𑀲𑁆𑀫𑀸 𑀢𑀸𑀦𑀺 𑀮𑁄𑀫𑀸𑀦𑀺 𑀅𑀗𑁆𑀕𑀚𑀸𑀢𑀁 𑀟𑀁𑀲𑀦𑁆𑀢𑀸𑀦𑀺 𑀯𑀺𑀬 𑀯𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀮𑁄𑀫𑀯𑁂𑀥𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁩𑁯. 𑀅𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀅𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀺. 𑀲𑀼𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀫𑁄𑀘𑀦𑁂𑀦 𑀘 𑀫𑀼𑀘𑁆𑀘𑀦𑀼𑀧𑁆𑀧𑀢𑁆𑀢𑀺𑀬𑀸 𑀫𑀼𑀢𑁆𑀢𑀧𑀘𑁆𑀘𑀬𑀸 𑀘 𑀬𑀸 𑀲𑀼𑀔𑀸 𑀯𑁂𑀤𑀦𑀸 𑀳𑁄𑀢𑀺, 𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀁 𑀪𑀯𑀺𑀲𑁆𑀲𑀢𑀻𑀢𑀺 ¶ 𑀇𑀤𑀁 𑀫𑁂 𑀫𑁄𑀘𑀺𑀢𑀁 𑀓𑀺𑀜𑁆𑀘𑀺𑀤𑁂𑀯 𑀪𑁂𑀲𑀚𑁆𑀚𑀁 𑀪𑀯𑀺𑀲𑁆𑀲𑀢𑀺. 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑀲𑁆𑀲𑀸𑀫𑀺. 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀤𑁂𑀦𑁆𑀢𑀲𑁆𑀲 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺. 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫𑀺. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀫𑀦𑁆𑀢𑀧𑀤𑀁 𑀯𑀢𑁆𑀯𑀸 𑀤𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀫𑁄𑀘𑁂𑀢𑁆𑀯𑀸 𑀓𑀻𑀝𑀸𑀤𑀻𑀦𑀁 𑀤𑀺𑀦𑁆𑀦𑀤𑀸𑀦𑁂𑀦 𑀯𑀸 𑀧𑀼𑀜𑁆𑀜𑁂𑀦 𑀯𑀸 𑀬𑀜𑁆𑀜𑁂𑀦 𑀯𑀸 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺. 𑀩𑀻𑀚𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀮𑀯𑀁𑀲𑀗𑁆𑀓𑀼𑀭𑀲𑁆𑀲 𑀤𑀸𑀭𑀓𑀲𑁆𑀲 𑀩𑀻𑀚𑀁 𑀪𑀯𑀺𑀲𑁆𑀲𑀢𑀺, ‘‘𑀇𑀫𑀺𑀦𑀸 𑀩𑀻𑀚𑁂𑀦 𑀧𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀫𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀢𑁆𑀣𑀸𑀬𑀸𑀢𑀺 𑀚𑀸𑀦𑀦𑀢𑁆𑀣𑀸𑀬. 𑀦𑀻𑀮𑀁 𑀪𑀯𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀚𑀸𑀦𑀺𑀲𑁆𑀲𑀸𑀫𑀺 𑀢𑀸𑀯 𑀓𑀺𑀁 𑀫𑁂 𑀫𑁄𑀘𑀺𑀢𑀁 𑀦𑀻𑀮𑀁 𑀪𑀯𑀺𑀲𑁆𑀲𑀢𑀺 𑀧𑀻𑀢𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀡𑁆𑀡𑀦𑁆𑀢𑀺 ¶ 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁄𑀢𑀺 𑀔𑀺𑀟𑁆𑀟𑀸𑀧𑀲𑀼𑀢𑁄, 𑀢𑁂𑀦 𑀢𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀓𑀻𑀴𑀦𑁆𑀢𑁄 𑀫𑁄𑀘𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁪𑁦. 𑀇𑀤𑀸𑀦𑀺 𑀬𑀤𑀺𑀤𑀁 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀫𑁄𑀘𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀬𑀣𑀸 𑀫𑁄𑀘𑁂𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑁂𑀲𑀜𑁆𑀘 𑀧𑀤𑀸𑀦𑀁 𑀯𑀲𑁂𑀦 𑀬𑀢𑁆𑀢𑀓𑁄 𑀆𑀧𑀢𑁆𑀢𑀺𑀪𑁂𑀤𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀘𑁂𑀢𑁂𑀢𑀻𑀢𑀺 𑀫𑁄𑀘𑀦𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀸𑀬 𑀘𑁂𑀢𑀦𑀸𑀬 𑀫𑀼𑀘𑁆𑀘𑀢𑀽𑀢𑀺 𑀘𑁂𑀢𑁂𑀢𑀺. 𑀉𑀧𑀓𑁆𑀓𑀫𑀢𑀻𑀢𑀺 𑀢𑀤𑀦𑀼𑀭𑀽𑀧𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀫𑀼𑀘𑁆𑀘𑀢𑀻𑀢𑀺 𑀏𑀯𑀁 𑀘𑁂𑀢𑁂𑀦𑁆𑀢𑀲𑁆𑀲 𑀢𑀤𑀦𑀼𑀭𑀽𑀧𑁂𑀦 𑀯𑀸𑀬𑀸𑀫𑁂𑀦 𑀯𑀸𑀬𑀫𑀢𑁄 𑀲𑀼𑀓𑁆𑀓𑀁 𑀞𑀸𑀦𑀸 𑀘𑀯𑀢𑀺. 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀩𑀳𑀺𑀤𑁆𑀥𑀸𑀭𑀽𑀧𑁂𑀢𑀺𑀆𑀤𑀻𑀲𑀼𑀧𑀺 𑀅𑀯𑀲𑁂𑀲𑁂𑀲𑀼 𑀅𑀝𑁆𑀞𑀯𑀻𑀲𑀢𑀺𑀬𑀸 𑀧𑀤𑁂𑀲𑀼.

𑀏𑀢𑁆𑀣 𑀧𑀦 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀽𑀧𑁂 𑀢𑀸𑀯 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀆𑀭𑁄𑀕𑁆𑀬𑀢𑁆𑀣𑀸𑀬 𑀦𑀻𑀮𑀁 𑀫𑁄𑀘𑁂𑀦𑁆𑀢𑀲𑁆𑀲 𑀏𑀓𑀸 𑀆𑀧𑀢𑁆𑀢𑀺, 𑀅𑀚𑁆𑀛𑀢𑁆𑀢𑀭𑀽𑀧𑁂𑀬𑁂𑀯 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀆𑀭𑁄𑀕𑁆𑀬𑀢𑁆𑀣𑀸𑀬 𑀧𑀻𑀢𑀸𑀤𑀻𑀦𑀁 𑀫𑁄𑀘𑀦𑀯𑀲𑁂𑀦 𑀅𑀧𑀭𑀸 𑀦𑀯𑀸𑀢𑀺 𑀤𑀲. 𑀬𑀣𑀸 𑀘 𑀆𑀭𑁄𑀕𑁆𑀬𑀢𑁆𑀣𑀸𑀬 𑀤𑀲, 𑀏𑀯𑀁 𑀲𑀼𑀔𑀸𑀤𑀻𑀦𑀁 𑀦𑀯𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑀸𑀬 𑀏𑀓𑁂𑀓𑀧𑀤𑁂 𑀤𑀲 𑀤𑀲 𑀓𑀢𑁆𑀯𑀸 𑀦𑀯𑀼𑀢𑀺, 𑀇𑀢𑀺 𑀇𑀫𑀸 𑀘 𑀦𑀯𑀼𑀢𑀺 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀢𑀸𑀯 𑀲𑀢𑀁. 𑀬𑀣𑀸 𑀧𑀦 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀏𑀯𑀁 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀼𑀧𑀺 𑀘𑀢𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀉𑀧𑀢𑁆𑀣𑀫𑁆𑀪𑁂 𑀲𑀢𑀁 ¶ 𑀲𑀢𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺, 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀼𑀭𑀺𑀫𑀜𑁆𑀘 𑀏𑀓𑀦𑁆𑀢𑀺 𑀅𑀚𑁆𑀛𑀢𑁆𑀢𑀭𑀽𑀧𑁂 𑀢𑀸𑀯 𑀧𑀜𑁆𑀘𑀦𑁆𑀦𑀁 𑀉𑀧𑀢𑁆𑀣𑀫𑁆𑀪𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀲𑀢𑀸𑀦𑀺. 𑀬𑀣𑀸 𑀘 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀜𑁆𑀘, 𑀏𑀯𑀁 𑀩𑀳𑀺𑀤𑁆𑀥𑀸𑀭𑀽𑀧𑁂 𑀧𑀜𑁆𑀘, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀧𑀜𑁆𑀘, 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲 𑀧𑀜𑁆𑀘𑀸𑀢𑀺 𑀲𑀩𑁆𑀩𑀸𑀦𑀺𑀧𑀺 𑀘𑀢𑀼𑀦𑁆𑀦𑀁 𑀧𑀜𑁆𑀘𑀓𑀸𑀦𑀁 𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀢𑀸𑀯 𑀤𑀲𑀲𑀼 𑀧𑀤𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀳𑁂𑀝𑁆𑀞𑀸 𑀯𑀸 𑀕𑀳𑁂𑀢𑁆𑀯𑀸 𑀉𑀧𑀭𑀺 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀧𑀭𑀺 𑀯𑀸 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀪𑀢𑁄 𑀯𑀸 𑀕𑀳𑁂𑀢𑁆𑀯𑀸 𑀫𑀚𑁆𑀛𑁂 𑀞𑀧𑁂𑀦𑁆𑀢𑀲𑁆𑀲, 𑀫𑀚𑁆𑀛𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀪𑀢𑁄 𑀳𑀭𑀦𑁆𑀢𑀲𑁆𑀲, 𑀲𑀩𑁆𑀩𑀫𑀽𑀮𑀁 𑀯𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀘𑁂𑀢𑀦𑀽𑀧𑀓𑁆𑀓𑀫𑀫𑁄𑀘𑀦𑁂 𑀲𑀢𑀺 𑀯𑀺𑀲𑀗𑁆𑀓𑁂𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘𑀸’’𑀢𑀺 𑀔𑀡𑁆𑀟𑀘𑀓𑁆𑀓𑀩𑀤𑁆𑀥𑀘𑀓𑁆𑀓𑀸𑀤𑀺𑀪𑁂𑀤𑀯𑀺𑀘𑀺𑀢𑁆𑀢𑀁 𑀧𑀸𑀴𑀺𑀫𑀸𑀳.

𑀢𑀢𑁆𑀣 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀪𑁂𑀲𑀚𑁆𑀚𑀢𑁆𑀣𑀜𑁆𑀘𑀸 𑀢𑀺 𑀏𑀯𑀁 𑀆𑀭𑁄𑀕𑁆𑀬𑀧𑀤𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀫𑁂𑀓𑀁 𑀔𑀡𑁆𑀟𑀘𑀓𑁆𑀓𑀁. 𑀲𑀼𑀔𑀧𑀤𑀸𑀤𑀻𑀦𑀺 𑀲𑀩𑁆𑀩𑀧𑀤𑁂𑀳𑀺 ¶ 𑀬𑁄𑀚𑁂𑀢𑁆𑀯𑀸 𑀬𑀸𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑀻𑀢𑀸𑀦𑀦𑁆𑀢𑀭𑀧𑀤𑀁 𑀢𑀸𑀯 𑀆𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀦𑀯 𑀩𑀤𑁆𑀥𑀘𑀓𑁆𑀓𑀸𑀦𑀻𑀢𑀺 𑀏𑀯𑀁 𑀏𑀓𑁂𑀓𑀫𑀽𑀮𑀓𑀸𑀦𑀺 𑀤𑀲 𑀘𑀓𑁆𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀤𑀼𑀫𑀽𑀮𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀫𑁄𑀳𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀧𑀸𑀓𑀝𑁄𑀬𑁂𑀯.

𑀬𑀣𑀸 ¶ 𑀘 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀧𑀤𑁂𑀲𑀼, 𑀏𑀯𑀁 𑀦𑀻𑀮𑀸𑀤𑀻𑀲𑀼𑀧𑀺 ‘‘𑀦𑀻𑀮𑀜𑁆𑀘 𑀧𑀻𑀢𑀓𑀜𑁆𑀘 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀲 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀅𑀲𑀫𑁆𑀫𑁄𑀳𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀧𑀸𑀓𑀝𑁄𑀬𑁂𑀯.

𑀧𑀼𑀦 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀦𑀻𑀮𑀜𑁆𑀘 𑀆𑀭𑁄𑀕𑁆𑀬𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘 𑀦𑀻𑀮𑀜𑁆𑀘 𑀧𑀻𑀢𑀓𑀜𑁆𑀘𑀸𑀢𑀺 𑀏𑀓𑁂𑀦𑁂𑀓𑀁 𑀤𑁆𑀯𑀻𑀳𑀺 𑀤𑁆𑀯𑁂…𑀧𑁂… 𑀤𑀲𑀳𑀺 𑀤𑀲𑀸𑀢𑀺 𑀏𑀯𑀁 𑀧𑀼𑀭𑀺𑀫𑀧𑀤𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀏𑀓𑀁 𑀫𑀺𑀲𑁆𑀲𑀓𑀘𑀓𑁆𑀓𑀁 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀲𑁆𑀫𑀸 ‘‘𑀦𑀻𑀮𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁂𑀢𑁆𑀯𑀸 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀧𑀻𑀢𑀓𑀸𑀤𑀻𑀲𑀼 𑀫𑀼𑀢𑁆𑀢𑁂𑀲𑀼𑀧𑀺 𑀧𑀻𑀢𑀓𑀸𑀤𑀺𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀇𑀢𑀭𑁂𑀲𑀼 𑀫𑀼𑀢𑁆𑀢𑁂𑀲𑀼𑀧𑀺 𑀦𑁂𑀯𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄 ¶ , 𑀢𑀲𑁆𑀫𑀸 𑀏𑀢𑀫𑁆𑀧𑀺 𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀻𑀮𑀁 𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀧𑀻𑀢𑀓𑀁 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀁 𑀲𑀩𑁆𑀩𑀧𑀘𑁆𑀙𑀺𑀫𑀧𑀤𑀁 𑀦𑀻𑀮𑀸𑀤𑀻𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀓𑀼𑀘𑁆𑀙𑀺𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀧𑀻𑀢𑀓𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀏𑀓𑁂𑀦 𑀦𑀻𑀮𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀺𑀝𑁆𑀞𑀺𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀮𑁄𑀳𑀺𑀢𑀓𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀏𑀓𑁂𑀦 𑀧𑀻𑀢𑀓𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀼𑀢𑀺𑀬𑀁 𑀧𑀺𑀝𑁆𑀞𑀺𑀘𑀓𑁆𑀓𑀁 𑀯𑀼𑀢𑁆𑀢𑀁. 𑀏𑀯𑀁 𑀮𑁄𑀳𑀺𑀢𑀓𑀧𑀤𑀸𑀤𑀻𑀳𑀺 𑀲𑀤𑁆𑀥𑀺𑀁 𑀇𑀢𑀭𑀸𑀦𑀺 𑀦𑀯 𑀦𑀯 𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀸𑀦𑀺𑀧𑀺 𑀅𑀝𑁆𑀞 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀁 𑀤𑀲𑀕𑀢𑀺𑀓𑀁 𑀧𑀺𑀝𑁆𑀞𑀺𑀘𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀔𑀡𑁆𑀟𑀘𑀓𑁆𑀓𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀘𑀓𑁆𑀓𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀕𑀭𑀼𑀓𑀸𑀧𑀢𑁆𑀢𑀺𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀗𑁆𑀕𑀯𑀲𑁂𑀦𑁂𑀯 𑀕𑀭𑀼𑀓𑀸𑀧𑀢𑁆𑀢𑀺𑀜𑁆𑀘 𑀮𑀳𑀼𑀓𑀸𑀧𑀢𑁆𑀢𑀺𑀜𑁆𑀘 𑀅𑀦𑀸𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀭𑀸𑀕𑀸𑀤𑀺𑀉𑀧𑀢𑁆𑀣𑀫𑁆𑀪𑁂 𑀲𑀢𑀺 𑀆𑀭𑁄𑀕𑁆𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀘𑁂𑀢𑁂𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀫𑁄𑀘𑀦𑁂 𑀢𑀺𑀯𑀗𑁆𑀕𑀲𑀫𑁆𑀧𑀦𑁆𑀦𑀸 𑀕𑀭𑀼𑀓𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀤𑀼𑀢𑀺𑀬𑁂𑀦 𑀦𑀬𑁂𑀦 𑀘𑁂𑀢𑁂𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀘 𑀫𑁄𑀘𑀦𑁂 𑀅𑀲𑀢𑀺 𑀤𑀼𑀯𑀗𑁆𑀕𑀲𑀫𑁆𑀧𑀦𑁆𑀦𑀸 𑀮𑀳𑀼𑀓𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀦𑀬𑁂𑀳𑀺 𑀅𑀦𑀸𑀧𑀢𑁆𑀢𑀺.

𑀅𑀬𑀁 𑀧𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄 ¶ . 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀢𑁂𑀦 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸, 𑀯𑀺𑀦𑀬𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁. 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀭𑁄𑀦𑁆𑀢𑁄 𑀳𑀺 𑀭𑁄𑀕𑀦𑀺𑀤𑀸𑀦𑀁 𑀅𑀚𑀸𑀦𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀯𑁂𑀚𑁆𑀚𑁄 𑀯𑀺𑀬 𑀯𑀺𑀖𑀸𑀢𑀜𑁆𑀘 ¶ 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀧𑀼𑀕𑁆𑀕𑀮𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀲𑀮𑁆𑀮𑀓𑁆𑀔𑀡𑀯𑀺𑀥𑀺 𑁋 𑀓𑀼𑀓𑁆𑀓𑀼𑀘𑁆𑀘𑁂𑀦 𑀆𑀕𑀢𑁄 𑀪𑀺𑀓𑁆𑀔𑀼 𑀬𑀸𑀯𑀢𑀢𑀺𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀓𑀢𑀭𑁂𑀦 𑀧𑀬𑁄𑀕𑁂𑀦 𑀓𑀢𑀭𑁂𑀦 𑀭𑀸𑀕𑁂𑀦 𑀆𑀧𑀦𑁆𑀦𑁄𑀲𑀻’’𑀢𑀺. 𑀲𑀘𑁂 𑀧𑀞𑀫𑀁 𑀅𑀜𑁆𑀜𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀜𑁆𑀜𑀁 𑀯𑀤𑀢𑀺 𑀦 𑀏𑀓𑀫𑀕𑁆𑀕𑁂𑀦 𑀓𑀣𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀢𑁆𑀯𑀁 𑀦 𑀏𑀓𑀫𑀕𑁆𑀕𑁂𑀦 𑀓𑀣𑁂𑀲𑀺 𑀧𑀭𑀺𑀳𑀭𑀲𑀺, 𑀦 𑀲𑀓𑁆𑀓𑀸 𑀢𑀯 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀕𑀘𑁆𑀙 𑀲𑁄𑀢𑁆𑀣𑀺𑀁 𑀕𑀯𑁂𑀲𑀸’’𑀢𑀺. 𑀲𑀘𑁂 𑀧𑀦 𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀏𑀓𑀫𑀕𑁆𑀕𑁂𑀦𑁂𑀯 𑀓𑀣𑁂𑀢𑀺, 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺, 𑀅𑀣𑀲𑁆𑀲 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀏𑀓𑀸𑀤𑀲𑀦𑁆𑀦𑀁 𑀭𑀸𑀕𑀸𑀦𑀁 𑀯𑀲𑁂𑀦 𑀏𑀓𑀸𑀤𑀲 𑀧𑀬𑁄𑀕𑀸 𑀲𑀫𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀢𑁆𑀭𑀺𑀫𑁂 ¶ 𑀏𑀓𑀸𑀤𑀲 𑀭𑀸𑀕𑀸 𑁋 𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬𑀦𑁆𑀢𑀺. 𑀢𑀢𑁆𑀣 𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑁂 𑀅𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑁂 𑀅𑀲𑁆𑀲𑀸𑀤𑁄 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑁂 𑀅𑀲𑁆𑀲𑀸𑀤𑁄 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑁂 𑀅𑀲𑁆𑀲𑀸𑀤𑁄 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑁂 𑀅𑀲𑁆𑀲𑀸𑀤𑁄 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑁂 𑀅𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀸𑀬 𑀅𑀲𑁆𑀲𑀸𑀤𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀸𑀬 𑀅𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀁 𑀧𑁂𑀫𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀨𑀮𑀸𑀤𑀺 𑀯𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀆𑀳𑀝𑀁. 𑀏𑀢𑁆𑀣 𑀘 𑀦𑀯𑀳𑀺 𑀧𑀤𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄. 𑀏𑀓𑁂𑀦 𑀧𑀤𑁂𑀦 𑀲𑀭𑀽𑀧𑁂𑀦𑁂𑀯, 𑀏𑀓𑁂𑀦 𑀧𑀤𑁂𑀦 𑀯𑀢𑁆𑀣𑀼𑀦𑀸 𑀯𑀼𑀢𑁆𑀢𑁄, 𑀯𑀦𑀪𑀗𑁆𑀕𑁄 𑀳𑀺 𑀭𑀸𑀕𑀲𑁆𑀲 𑀯𑀢𑁆𑀣𑀼 𑀦 𑀭𑀸𑀕𑁄𑀬𑁂𑀯.

𑀏𑀢𑁂𑀲𑀁 𑀧𑀦 𑀭𑀸𑀕𑀸𑀦𑀁 𑀯𑀲𑁂𑀦 𑀏𑀯𑀁 𑀧𑀬𑁄𑀕𑀸 𑀲𑀫𑀯𑁂𑀓𑁆𑀔𑀺𑀢𑀩𑁆𑀩𑀸 𑁋 𑀫𑁄𑀘𑀦𑀲𑁆𑀲𑀸𑀤𑁂 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀘𑁂𑀢𑁂𑀦𑁆𑀢𑁄 𑀘𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀘 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀣𑁂𑀯 𑀘𑁂𑀢𑁂𑀦𑁆𑀢𑁄 𑀘 𑀅𑀲𑁆𑀲𑀸𑀤𑁂𑀦𑁆𑀢𑁄 𑀘 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀧𑀦 𑀲𑀬𑀦𑀓𑀸𑀮𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀊𑀭𑀼𑀦𑀸 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀅𑀗𑁆𑀕𑀚𑀸𑀢𑀁 𑀕𑀸𑀴𑁆𑀳𑀁 𑀧𑀻𑀴𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀲𑀉𑀲𑁆𑀲𑀸𑀳𑁄𑀯 𑀲𑀼𑀧𑀢𑀺, 𑀲𑀼𑀧𑀦𑁆𑀢𑀲𑁆𑀲 𑀘𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀲𑀼𑀪𑀫𑀦𑀲𑀺𑀓𑀸𑀭𑁂𑀦 𑀯𑀽𑀧𑀲𑀫𑁂𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁄 𑀲𑀼𑀧𑀢𑀺, 𑀲𑀼𑀧𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀫𑀼𑀘𑁆𑀘𑀦𑀲𑁆𑀲𑀸𑀤𑁂 ¶ 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀉𑀧𑀓𑁆𑀓𑀫𑀢𑀺, 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀫𑀼𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 ¶ 𑀫𑀼𑀘𑁆𑀘𑀫𑀸𑀦𑁂 ‘‘𑀫𑀸 𑀓𑀸𑀲𑀸𑀯𑀁 𑀯𑀸 𑀲𑁂𑀦𑀸𑀲𑀦𑀁 𑀯𑀸 𑀤𑀼𑀲𑁆𑀲𑀻’’𑀢𑀺 𑀅𑀗𑁆𑀕𑀚𑀸𑀢𑀁 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀫𑀼𑀢𑁆𑀢𑀲𑁆𑀲𑀸𑀤𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀢𑁆𑀢𑁂 𑀞𑀸𑀦𑀸 𑀘𑀼𑀢𑁂 𑀅𑀲𑀼𑀘𑀺𑀫𑁆𑀳𑀺 𑀧𑀘𑁆𑀙𑀸 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀯𑀺𑀦𑀸 𑀉𑀧𑀓𑁆𑀓𑀫𑁂𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀦 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀫𑁂𑀣𑀼𑀦𑀲𑁆𑀲𑀸𑀤𑁂 𑀫𑁂𑀣𑀼𑀦𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀕𑀡𑁆𑀳𑀸𑀢𑀺, 𑀢𑁂𑀦 𑀧𑀬𑁄𑀕𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 ¶ 𑀧𑀬𑁄𑀕𑀢𑁆𑀢𑀸 𑀧𑀦 𑀢𑀸𑀤𑀺𑀲𑁂 𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀲𑀻𑀲𑀁 𑀧𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀫𑁂𑀣𑀼𑀦𑀭𑀸𑀕𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀨𑀲𑁆𑀲𑀲𑁆𑀲𑀸𑀤𑁂 𑀤𑀼𑀯𑀺𑀥𑁄 𑀨𑀲𑁆𑀲𑁄 𑁋 𑀅𑀚𑁆𑀛𑀢𑁆𑀢𑀺𑀓𑁄, 𑀩𑀸𑀳𑀺𑀭𑁄 𑀘. 𑀅𑀚𑁆𑀛𑀢𑁆𑀢𑀺𑀓𑁂 𑀢𑀸𑀯 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁 𑀣𑀤𑁆𑀥𑀁 𑀫𑀼𑀤𑀼𑀓𑀦𑁆𑀢𑀺 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀯𑀸 𑀮𑁄𑀮𑀪𑀸𑀯𑁂𑀦 𑀯𑀸 𑀓𑀻𑀴𑀸𑀧𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀓𑀻𑀴𑀸𑀧𑁂𑀦𑁆𑀢𑁄 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀩𑀸𑀳𑀺𑀭𑀨𑀲𑁆𑀲𑁂 𑀧𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀫𑀗𑁆𑀕𑀸𑀦𑀺 𑀧𑀭𑀸𑀫𑀲𑀢𑁄 𑀘𑁂𑀯 𑀆𑀮𑀺𑀗𑁆𑀕𑀢𑁄 𑀘 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺. 𑀲𑀘𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺 𑀯𑀺𑀲𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂 𑀤𑀤𑁆𑀤𑀼𑀓𑀘𑁆𑀙𑀼𑀧𑀺𑀴𑀓𑀧𑀸𑀡𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀓𑀡𑁆𑀟𑀼𑀯𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂 𑀦𑁂𑀯 𑀓𑀡𑁆𑀟𑀼𑀯𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀤𑀲𑁆𑀲𑀦𑀲𑁆𑀲𑀸𑀤𑁂 𑀤𑀲𑁆𑀲𑀦𑀲𑁆𑀲𑀸𑀤𑁂𑀦 𑀧𑀼𑀦𑀧𑁆𑀧𑀼𑀦𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁄𑀓𑀸𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁄𑀓𑀸𑀲𑀼𑀧𑀦𑀺𑀚𑁆𑀛𑀸𑀦𑁂 𑀧𑀦 ¶ 𑀤𑀼𑀓𑁆𑀓𑀝𑀁. 𑀲𑀘𑁂 𑀤𑀲𑁆𑀲𑀦𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀦𑀺𑀲𑀚𑁆𑀚𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑀭𑀸𑀕𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀭𑀳𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀧𑀦 𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀯𑀸𑀘𑀲𑁆𑀲𑀸𑀤𑁂 ¶ 𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀫𑁂𑀣𑀼𑀦𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺. 𑀲𑀘𑁂 𑀯𑀸𑀘𑀲𑁆𑀲𑀸𑀤𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀕𑁂𑀳𑀲𑁆𑀲𑀺𑀢𑀧𑁂𑀫𑁂 𑀫𑀸𑀢𑀭𑀁 𑀯𑀸 𑀫𑀸𑀢𑀼𑀧𑁂𑀫𑁂𑀦 𑀪𑀕𑀺𑀦𑀺𑀁 𑀯𑀸 𑀪𑀕𑀺𑀦𑀺𑀧𑁂𑀫𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀭𑀸𑀫𑀲𑀢𑁄 ¶ 𑀘𑁂𑀯 𑀆𑀮𑀺𑀗𑁆𑀕𑀢𑁄 𑀘 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀧𑀦 𑀨𑀼𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀲𑀘𑁂 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀯𑀦𑀪𑀗𑁆𑀕𑁂 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀜𑁆𑀜𑀫𑀜𑁆𑀜𑀁 𑀓𑀺𑀜𑁆𑀘𑀺𑀤𑁂𑀯 𑀢𑀫𑁆𑀩𑀽𑀮𑀕𑀦𑁆𑀥𑀧𑀼𑀧𑁆𑀨𑀯𑀸𑀲𑀸𑀤𑀺𑀧𑁆𑀧𑀓𑀸𑀭𑀁 𑀧𑀡𑁆𑀡𑀸𑀓𑀸𑀭𑀁 𑀫𑀺𑀢𑁆𑀢𑀲𑀦𑁆𑀣𑀯𑀪𑀸𑀯𑀲𑁆𑀲 𑀤𑀴𑁆𑀳𑀪𑀸𑀯𑀢𑁆𑀣𑀸𑀬 𑀧𑁂𑀲𑁂𑀦𑁆𑀢𑀺 𑀅𑀬𑀁 𑀯𑀦𑀪𑀗𑁆𑀕𑁄 𑀦𑀸𑀫. 𑀢𑀜𑁆𑀘𑁂 𑀫𑀸𑀢𑀼𑀕𑀸𑀫𑁄 𑀓𑀲𑁆𑀲𑀘𑀺 𑀲𑀁𑀲𑀝𑁆𑀞𑀯𑀺𑀳𑀸𑀭𑀺𑀓𑀲𑁆𑀲 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀦𑁄 𑀧𑁂𑀲𑁂𑀢𑀺, 𑀢𑀲𑁆𑀲 𑀘 ‘‘𑀅𑀲𑀼𑀓𑀸𑀬 𑀦𑀸𑀫 𑀇𑀤𑀁 𑀧𑁂𑀲𑀺𑀢’’𑀦𑁆𑀢𑀺 𑀲𑀸𑀭𑀢𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀳𑀢𑁆𑀣𑁂𑀳𑀺 𑀢𑀁 𑀯𑀦𑀪𑀗𑁆𑀕𑀁 𑀓𑀻𑀴𑀸𑀧𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀯𑀦𑀪𑀗𑁆𑀕𑁂 𑀲𑀸𑀭𑀢𑁆𑀢𑁄 𑀧𑀼𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀉𑀧𑀓𑁆𑀓𑀫𑀦𑁆𑀢𑁂𑀧𑀺 𑀦 𑀫𑀼𑀘𑁆𑀘𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁.

𑀏𑀯𑀫𑁂𑀢𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀭𑀸𑀕𑀸𑀦𑀁 𑀯𑀲𑁂𑀦 𑀇𑀫𑁂 𑀏𑀓𑀸𑀤𑀲 𑀧𑀬𑁄𑀕𑁂 𑀲𑀫𑁂𑀯𑁂𑀓𑁆𑀔𑀺𑀢𑁆𑀯𑀸 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀕𑀭𑀼𑀓𑀸 𑀳𑁄𑀢𑀺 ‘‘𑀕𑀭𑀼𑀓𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀲𑀘𑁂 𑀮𑀳𑀼𑀓𑀸 𑀳𑁄𑀢𑀺 ‘‘𑀮𑀳𑀼𑀓𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀢𑀤𑀦𑀼𑀭𑀽𑀧𑀜𑁆𑀘 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀓𑀢𑀁 𑀲𑀼𑀓𑀢𑀁 𑀳𑁄𑀢𑀺 𑀭𑁄𑀕𑀦𑀺𑀤𑀸𑀦𑀁 𑀜𑀢𑁆𑀯𑀸 𑀯𑁂𑀚𑁆𑀚𑁂𑀦 𑀓𑀢𑀪𑁂𑀲𑀚𑁆𑀚𑀫𑀺𑀯, 𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

𑁨𑁬𑁨. 𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀻𑀢𑀺𑀆𑀤𑀻𑀲𑀼 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀘𑀦𑀲𑁆𑀲𑀸𑀤𑀧𑀻𑀴𑀺𑀢𑁄 ‘‘𑀅𑀳𑁄 𑀯𑀢 ¶ 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦 𑀘𑁂𑀢𑁂𑀢𑀺, 𑀨𑀲𑁆𑀲𑀲𑁆𑀲𑀸𑀤𑁂𑀦 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁂𑀦 𑀯𑀸 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀢𑀣𑁂𑀯 𑀦 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀫𑁄𑀘𑀦𑀢𑁆𑀣𑀸𑀬 𑀦 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦𑀲𑁆𑀲 𑀯𑀺𑀢𑀓𑁆𑀓𑀬𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺 𑀇𑀤𑀁 𑀆𑀕𑀢𑀫𑁂𑀯 𑀳𑁄𑀢𑀺, ‘‘𑀦 𑀘𑁂𑀢𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺.

𑀅𑀦𑀸𑀧𑀢𑁆𑀢𑀺 ¶ 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀲𑀼𑀢𑁆𑀢𑀲𑁆𑀲 𑀲𑀼𑀧𑀺𑀦𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀯𑀺𑀬 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀦𑀺 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀺𑀬 𑀲𑀼𑀧𑀺𑀦𑀦𑁆𑀢𑁂𑀦𑁂𑀯 𑀓𑀸𑀭𑀡𑁂𑀦 𑀬𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀼𑀧𑀺𑀦𑁂 𑀧𑀦 ¶ 𑀉𑀧𑁆𑀧𑀦𑁆𑀦𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸𑀬 𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺, 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀳𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁 𑀓𑀻𑀴𑀸𑀧𑁂𑀢𑀩𑁆𑀩𑀁, 𑀓𑀸𑀲𑀸𑀯𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀡𑀢𑁆𑀣𑀁 𑀧𑀦 𑀳𑀢𑁆𑀣𑀧𑀼𑀝𑁂𑀦 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀬𑀲𑁆𑀲 𑀪𑁂𑀲𑀚𑁆𑀚𑁂𑀦 𑀯𑀸 𑀦𑀺𑀫𑀺𑀢𑁆𑀢𑀁 𑀆𑀮𑀺𑀫𑁆𑀧𑀦𑁆𑀢𑀲𑁆𑀲 𑀉𑀘𑁆𑀘𑀸𑀭𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀫𑀼𑀘𑁆𑀘𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀇𑀥 𑀲𑁂𑀬𑁆𑀬𑀲𑀓𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀸, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀁, 𑀲𑀼𑀔𑀫𑀚𑁆𑀛𑀢𑁆𑀢𑀤𑁆𑀯𑀬𑁂𑀦𑀸𑀢𑀺.

𑁨𑁬𑁩. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀲𑀼𑀧𑀺𑀦𑀯𑀢𑁆𑀣𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀯𑀺𑀢𑀓𑁆𑀓𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀕𑁂𑀳𑀲𑁆𑀲𑀺𑀢𑀓𑀸𑀫𑀯𑀺𑀢𑀓𑁆𑀓𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀅𑀣 𑀔𑁄 𑀯𑀺𑀢𑀓𑁆𑀓𑀕𑀢𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀉𑀡𑁆𑀳𑁄𑀤𑀓𑀯𑀢𑁆𑀣𑀽𑀲𑀼 𑀧𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀤𑀼𑀢𑀺𑀬𑁂 𑀲𑁄 𑀪𑀺𑀓𑁆𑀔𑀼 𑀫𑁄𑀘𑁂𑀢𑀼𑀓𑀸𑀫𑁄 𑀉𑀡𑁆𑀳𑁄𑀤𑀓𑁂𑀦 𑀦𑀺𑀫𑀺𑀢𑁆𑀢𑀁 𑀧𑀳𑀭𑀺𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀦𑁆𑀳𑀸𑀬𑀺, 𑀢𑁂𑀦𑀲𑁆𑀲 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀢𑀺𑀬𑁂 𑀉𑀧𑀓𑁆𑀓𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁. 𑀪𑁂𑀲𑀚𑁆𑀚𑀓𑀡𑁆𑀟𑀼𑀯𑀦𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁬𑁪. 𑀫𑀕𑁆𑀕𑀯𑀢𑁆𑀣𑀽𑀲𑀼 ¶ 𑀧𑀞𑀫𑀲𑁆𑀲 𑀣𑀼𑀮𑀊𑀭𑀼𑀓𑀲𑁆𑀲 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀫𑁆𑀩𑀸𑀥𑀝𑁆𑀞𑀸𑀦𑁂 𑀖𑀝𑁆𑀝𑀦𑀸𑀬 𑀅𑀲𑀼𑀘𑀺 𑀫𑀼𑀘𑁆𑀘𑀺, 𑀢𑀲𑁆𑀲 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀤𑀼𑀢𑀺𑀬𑀲𑁆𑀲 𑀢𑀣𑁂𑀯 𑀫𑀼𑀘𑁆𑀘𑀺, 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀢𑀢𑀺𑀬𑀲𑁆𑀲 𑀦 𑀫𑀼𑀘𑁆𑀘𑀺, 𑀉𑀧𑀓𑁆𑀓𑀫𑀲𑀩𑁆𑀪𑀸𑀯𑀢𑁄 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀫𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦 𑀉𑀧𑁆𑀧𑀦𑁆𑀦𑁂 𑀧𑀭𑀺𑀴𑀸𑀳𑁂 𑀦 𑀕𑀦𑁆𑀢𑀩𑁆𑀩𑀁, 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀲𑀼𑀪𑀸𑀤𑀺𑀫𑀦𑀲𑀺𑀓𑀸𑀭𑁂𑀦 𑀘𑀺𑀢𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀞𑀺𑀢𑁄 𑀯𑀺𑀦𑁄𑀤𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩𑀁.

𑀯𑀢𑁆𑀣𑀺𑀯𑀢𑁆𑀣𑀽𑀲𑀼 𑀢𑁂 𑀪𑀺𑀓𑁆𑀔𑀽 𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 ¶ 𑀕𑀸𑀫𑀤𑀸𑀭𑀓𑀸 𑀯𑀺𑀬 𑀧𑀲𑁆𑀲𑀸𑀯𑀫𑀓𑀁𑀲𑀼. 𑀚𑀦𑁆𑀢𑀸𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀉𑀤𑀭𑀁 𑀢𑀸𑀧𑁂𑀦𑁆𑀢𑀲𑁆𑀲 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀫𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀘𑀸𑀮𑀦𑀯𑀲𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀝𑁆𑀞𑀸𑀦𑁂 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑁨𑁬𑁫. 𑀊𑀭𑀼𑀖𑀝𑁆𑀝𑀸𑀧𑀦𑀯𑀢𑁆𑀣𑀽𑀲𑀼 𑀬𑁂𑀲𑀁 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀢𑁂 𑀅𑀗𑁆𑀕𑀚𑀸𑀢𑀫𑁆𑀧𑀺 𑀨𑀼𑀲𑀸𑀧𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀯𑀁 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀸𑀫𑀡𑁂𑀭𑀸𑀤𑀺𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁨𑁬𑁬. 𑀓𑀸𑀬𑀢𑁆𑀣𑀫𑁆𑀪𑀦𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀁 𑀣𑀫𑁆𑀪𑁂𑀦𑁆𑀢𑀲𑁆𑀲𑀸𑀢𑀺 𑀘𑀺𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸 𑀦𑀯𑀓𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀆𑀮𑀲𑀺𑀬𑀯𑀺𑀫𑁄𑀘𑀦𑀢𑁆𑀣𑀁 𑀯𑀺𑀚𑀫𑁆𑀪𑁂𑀦𑁆𑀢𑀲𑁆𑀲.

𑀉𑀧𑀦𑀺𑀚𑁆𑀛𑀸𑀬𑀦𑀯𑀢𑁆𑀣𑀼𑀲𑁆𑀫𑀺𑀁 𑀲𑀘𑁂𑀧𑀺 𑀧𑀝𑀲𑀢𑀁 𑀦𑀺𑀯𑀢𑁆𑀣𑀸 𑀳𑁄𑀢𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀞𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀅𑀦𑀺𑀯𑀢𑁆𑀣𑀸𑀦𑀁 𑀕𑀸𑀫𑀤𑀸𑀭𑀺𑀓𑀸𑀦𑀁 𑀦𑀺𑀫𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀦 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑁂 𑀏𑀲𑁂𑀯 𑀦𑀬𑁄. 𑀇𑀢𑁄 𑀘𑀺𑀢𑁄 𑀘 𑀅𑀯𑀺𑀮𑁄𑀓𑁂𑀢𑁆𑀯𑀸 𑀧𑀦 𑀤𑀺𑀯𑀲𑀫𑁆𑀧𑀺 𑀏𑀓𑀧𑀬𑁄𑀕𑁂𑀦 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀏𑀓𑀫𑁂𑀯 𑀤𑀼𑀓𑁆𑀓𑀝𑀁. 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀯𑀲𑁂𑀦 𑀧𑀦 𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀳𑀲𑀸 𑀉𑀧𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀼𑀦 𑀧𑀝𑀺𑀲𑀗𑁆𑀔𑀸𑀬 𑀲𑀁𑀯𑀭𑁂 𑀢𑀺𑀝𑁆𑀞𑀢𑁄 𑀅𑀦𑀸𑀧𑀢𑁆𑀢𑀺, 𑀢𑀁 𑀲𑀁𑀯𑀭𑀁 𑀧𑀳𑀸𑀬 𑀧𑀼𑀦 𑀉𑀧𑀦𑀺𑀚𑁆𑀛𑀸𑀬𑀢𑁄 𑀤𑀼𑀓𑁆𑀓𑀝𑀫𑁂𑀯.

𑁨𑁬𑁭. 𑀢𑀸𑀴𑀘𑁆𑀙𑀺𑀤𑁆𑀤𑀸𑀤𑀺𑀯𑀢𑁆𑀣𑀽𑀦𑀺 ¶ 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀦𑁆𑀳𑀸𑀦𑀯𑀢𑁆𑀣𑀽𑀲𑀼 𑀬𑁂 𑀉𑀤𑀓𑀲𑁄𑀢𑀁 𑀦𑀺𑀫𑀺𑀢𑁆𑀢𑁂𑀦 𑀧𑀳𑀭𑀺𑀁𑀲𑀼 𑀢𑁂𑀲𑀁 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀉𑀤𑀜𑁆𑀚𑀮𑀯𑀢𑁆𑀣𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀉𑀤𑀜𑁆𑀚𑀮𑀦𑁆𑀢𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑁄 𑀯𑀼𑀘𑁆𑀘𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑁄 𑀧𑀭𑀸𑀦𑀺 𑀲𑀩𑁆𑀩𑀸𑀦𑁂𑀯 𑀉𑀤𑀓𑁂 𑀥𑀸𑀯𑀦𑀸𑀤𑀺𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀧𑀼𑀧𑁆𑀨𑀸𑀯𑀴𑀺𑀬𑀯𑀢𑁆𑀣𑀽𑀲𑀼 𑀲𑀘𑁂𑀧𑀺 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀓𑀻𑀴𑀦𑀧𑀘𑁆𑀘𑀬𑀸 𑀧𑀦 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁯. 𑀢𑁂𑀦 ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀅𑀭𑀜𑁆𑀜𑁂 𑀯𑀺𑀳𑀭𑀢𑀻𑀢𑀺 𑀦 𑀆𑀯𑁂𑀡𑀺𑀓𑁂 𑀅𑀭𑀜𑁆𑀜𑁂, 𑀚𑁂𑀢𑀯𑀦𑀯𑀺𑀳𑀸𑀭𑀲𑁆𑀲𑁂𑀯 𑀧𑀘𑁆𑀘𑀦𑁆𑀢𑁂 𑀏𑀓𑀧𑀲𑁆𑀲𑁂. 𑀫𑀚𑁆𑀛𑁂 𑀕𑀩𑁆𑀪𑁄𑀢𑀺 𑀢𑀲𑁆𑀲 𑀘 𑀯𑀺𑀳𑀸𑀭𑀲𑁆𑀲 𑀫𑀚𑁆𑀛𑁂 𑀕𑀩𑁆𑀪𑁄 𑀳𑁄𑀢𑀺. 𑀲𑀫𑀦𑁆𑀢𑀸 𑀧𑀭𑀺𑀬𑀸𑀕𑀸𑀭𑁄𑀢𑀺 𑀲𑀫𑀦𑁆𑀢𑀸 𑀧𑀦𑀲𑁆𑀲 𑀫𑀡𑁆𑀟𑀮𑀫𑀸𑀴𑀧𑀭𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀲𑁄 𑀓𑀺𑀭 𑀫𑀚𑁆𑀛𑁂 𑀘𑀢𑀼𑀭𑀲𑁆𑀲𑀁 𑀕𑀩𑁆𑀪𑀁 𑀓𑀢𑁆𑀯𑀸 𑀩𑀳𑀺 𑀫𑀡𑁆𑀟𑀮𑀫𑀸𑀴𑀧𑀭𑀺𑀓𑁆𑀔𑁂𑀧𑁂𑀦 𑀓𑀢𑁄, 𑀬𑀣𑀸 𑀲𑀓𑁆𑀓𑀸 𑀳𑁄𑀢𑀺 𑀅𑀦𑁆𑀢𑁄𑀬𑁂𑀯 𑀆𑀯𑀺𑀜𑁆𑀙𑀦𑁆𑀢𑁂𑀳𑀺 𑀯𑀺𑀘𑀭𑀺𑀢𑀼𑀁.

𑀲𑀼𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀼𑀝𑁆𑀞 𑀞𑀧𑀺𑀢𑀁, 𑀬𑀣𑀸 𑀬𑀣𑀸 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀞𑀧𑀺𑀢𑀁 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺 𑀮𑁄𑀓𑀭𑀜𑁆𑀚𑀓𑀁 𑀢𑀣𑀸 𑀢𑀣𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢𑀁, 𑀯𑀢𑁆𑀢𑀲𑀻𑀲𑁂𑀦 𑀳𑀺 𑀲𑁄𑀁 𑀏𑀓𑀓𑀺𑀘𑁆𑀘𑀫𑁆𑀧𑀺 𑀦 𑀓𑀭𑁄𑀢𑀺. 𑀏𑀓𑀘𑁆𑀘𑁂 𑀯𑀸𑀢𑀧𑀸𑀦𑁂 𑀯𑀺𑀯𑀭𑀦𑁆𑀢𑁄𑀢𑀺 𑀬𑁂𑀲𑀼 𑀯𑀺𑀯𑀝𑁂𑀲𑀼 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀢𑀸𑀦𑀺 𑀯𑀺𑀯𑀭𑀦𑁆𑀢𑁄 𑀬𑁂𑀲𑀼 𑀯𑀺𑀯𑀝𑁂𑀲𑀼 𑀆𑀮𑁄𑀓𑁄 𑀳𑁄𑀢𑀺 𑀢𑀸𑀦𑀺 𑀣𑀓𑁂𑀦𑁆𑀢𑁄.

𑀏𑀯𑀁 𑀯𑀼𑀢𑁆𑀢𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀸𑀢𑀺 𑀏𑀯𑀁 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀲𑀁𑀲𑀺𑀢𑁆𑀯𑀸 𑀯𑀼𑀢𑁆𑀢𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 ‘‘𑀧𑀲𑀦𑁆𑀦𑁄 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀫𑀜𑁆𑀜𑁂’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀕𑀽𑀳𑀺𑀢𑀩𑁆𑀩𑀫𑁆𑀧𑀺 𑀢𑀁 𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀸𑀭𑀁 𑀧𑀓𑀸𑀲𑁂𑀦𑁆𑀢𑀻 𑀓𑁂𑀯𑀮𑀁 𑀢𑀲𑁆𑀲 𑀲𑀤𑁆𑀥𑀸𑀯𑀺𑀖𑀸𑀢𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀏𑀢𑀁 ‘‘𑀓𑀼𑀢𑁄 𑀢𑀲𑁆𑀲 𑀉𑀴𑀸𑀭𑀢𑁆𑀢𑀢𑀸’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀢𑀢𑁆𑀣 𑀉𑀴𑀸𑀭𑁄 𑀅𑀢𑁆𑀢𑀸 𑀅𑀲𑁆𑀲𑀸𑀢𑀺 𑀉𑀴𑀸𑀭𑀢𑁆𑀢𑀸, 𑀉𑀴𑀸𑀭𑀢𑁆𑀢𑀦𑁄 𑀪𑀸𑀯𑁄 𑀉𑀝𑁆𑀞𑀸𑀭𑀢𑁆𑀢𑀢𑀸. 𑀓𑀼𑀮𑀺𑀢𑁆𑀣𑀻𑀳𑀻𑀢𑀺𑀆𑀤𑀻𑀲𑀼 𑀓𑀼𑀮𑀺𑀢𑁆𑀣𑀺𑀬𑁄 𑀦𑀸𑀫 𑀖𑀭𑀲𑁆𑀲𑀸𑀫𑀺𑀦𑀺𑀬𑁄. 𑀓𑀼𑀮𑀥𑀻𑀢𑀭𑁄 𑀦𑀸𑀫 𑀧𑀼𑀭𑀺𑀲𑀦𑁆𑀢𑀭𑀕𑀢𑀸 𑀓𑀼𑀮𑀥𑀻𑀢𑀭𑁄 ¶ . 𑀓𑀼𑀮𑀓𑀼𑀫𑀸𑀭𑀺𑀬𑁄 𑀦𑀸𑀫 𑀅𑀦𑀺𑀯𑀺𑀝𑁆𑀞𑀸 𑀯𑀼𑀘𑁆𑀘𑀦𑁆𑀢𑀺. 𑀓𑀼𑀮𑀲𑀼𑀡𑁆𑀳𑀸 𑀦𑀸𑀫 𑀧𑀭𑀓𑀼𑀮𑀢𑁄 𑀆𑀦𑀻𑀢𑀸 𑀓𑀼𑀮𑀤𑀸𑀭𑀓𑀸𑀦𑀁 𑀯𑀥𑀼𑀬𑁄.

𑁨𑁭𑁦. 𑀑𑀢𑀺𑀡𑁆𑀡𑁄𑀢𑀺 𑀬𑀓𑁆𑀔𑀸𑀤𑀻𑀳𑀺 𑀯𑀺𑀬 𑀲𑀢𑁆𑀢𑀸 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀦 𑀭𑀸𑀕𑁂𑀦 𑀑𑀢𑀺𑀡𑁆𑀡𑁄, 𑀓𑀽𑀧𑀸𑀤𑀻𑀦𑀺 𑀯𑀺𑀬 𑀲𑀢𑁆𑀢𑀸 𑀅𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀭𑀚𑀦𑀻𑀬𑁂 𑀞𑀸𑀦𑁂 𑀭𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀭𑀸𑀕𑀁 𑀑𑀢𑀺𑀡𑁆𑀡𑁄, 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀭𑀸𑀕𑀲𑀫𑀗𑁆𑀕𑀺𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 ‘‘𑀑𑀢𑀺𑀡𑁆𑀡𑁄 𑀦𑀸𑀫 𑀲𑀸𑀭𑀢𑁆𑀢𑁄 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀲𑀸𑀭𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀼𑀝𑁆𑀞𑀼 𑀭𑀢𑁆𑀢𑁄. 𑀅𑀧𑁂𑀓𑁆𑀔𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀧𑁂𑀓𑁆𑀔𑀸𑀬 𑀅𑀧𑁂𑀓𑁆𑀔𑀯𑀸. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑁂𑀯 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀯𑀺𑀧𑀭𑀺𑀡𑀢𑁂𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀪𑀯𑀗𑁆𑀕𑀲𑀦𑁆𑀢𑀢𑀺𑀲𑀗𑁆𑀔𑀸𑀢𑀁 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀣𑀸 𑀧𑀯𑀢𑁆𑀢𑁂𑀦, 𑀯𑀺𑀭𑀽𑀧𑀁 𑀯𑀸 𑀧𑀭𑀺𑀡𑀢𑁂𑀦 ¶ 𑀯𑀺𑀭𑀽𑀧𑀁 𑀧𑀭𑀺𑀯𑀢𑁆𑀢𑁂𑀦, 𑀬𑀣𑀸 𑀧𑀭𑀺𑀯𑀢𑁆𑀢𑀫𑀸𑀦𑀁 𑀯𑀺𑀭𑀽𑀧𑀁 𑀳𑁄𑀢𑀺 𑀏𑀯𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁧. 𑀬𑀲𑁆𑀫𑀸 𑀧𑀦𑁂𑀢𑀁 𑀭𑀸𑀕𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀯𑀺𑀧𑀭𑀺𑀡𑀢𑀦𑁆𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀢𑁆𑀯𑀸 𑀅𑀦𑁆𑀢𑁂 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘 𑀭𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀆𑀳.

𑀢𑀤𑀳𑀼𑀚𑀸𑀢𑀸𑀢𑀺 𑀢𑀁𑀤𑀺𑀯𑀲𑀁 𑀚𑀸𑀢𑀸 𑀚𑀸𑀢𑀫𑀢𑁆𑀢𑀸 𑀅𑀮𑁆𑀮𑀫𑀁𑀲𑀧𑁂𑀲𑀺𑀯𑀡𑁆𑀡𑀸, 𑀏𑀯𑀭𑀽𑀧𑀸𑀬𑀧𑀺 𑀳𑀺 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀁, 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀳𑁄𑀢𑀺. 𑀧𑀕𑁂𑀯𑀸𑀢𑀺 𑀧𑀞𑀫𑀫𑁂𑀯.

𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀓𑀸𑀬𑀲𑀫𑁆𑀧𑀬𑁄𑀕𑀁 𑀓𑀸𑀬𑀫𑀺𑀲𑁆𑀲𑀻𑀪𑀸𑀯𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀬𑀲𑁆𑀫𑀸 𑀧𑀦𑁂𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀬𑁄 𑀲𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫 𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀺, 𑀭𑀸𑀕𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀲𑀜𑁆𑀜𑀫𑀯𑁂𑀮𑀁 𑀆𑀘𑀸𑀭𑁄, 𑀢𑀲𑁆𑀫𑀸𑀲𑁆𑀲 𑀲𑀗𑁆𑀔𑁂𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑀫𑀸𑀳.

𑀳𑀢𑁆𑀣𑀕𑁆𑀕𑀸𑀳𑀁 𑀯𑀸𑀢𑀺𑀆𑀤𑀺𑀪𑁂𑀤𑀁 𑀧𑀦𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀤𑀲𑁆𑀲𑀦𑀁. 𑀢𑀢𑁆𑀣 𑀳𑀢𑁆𑀣𑀸𑀤𑀻𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺𑀫𑀸𑀳 𑀢𑀢𑁆𑀣 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬𑀸𑀢𑀺 𑀤𑀼𑀢𑀺𑀬𑀁. 𑀫𑀳𑀸𑀲𑀦𑁆𑀥𑀺𑀁 𑀉𑀧𑀸𑀤𑀸𑀬. 𑀅𑀜𑁆𑀜𑀢𑁆𑀣 𑀧𑀦 𑀫𑀡𑀺𑀩𑀦𑁆𑀥𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸 𑀳𑀢𑁆𑀣𑁄 𑀇𑀥 𑀲𑀤𑁆𑀥𑀺𑀁 𑀅𑀕𑁆𑀕𑀩𑀸𑀳𑀸𑀬 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑁂𑀢𑁄.

𑀲𑀼𑀤𑁆𑀥𑀓𑁂𑀲𑀸 𑀯𑀸𑀢𑀺 𑀲𑀼𑀢𑁆𑀢𑀸𑀤𑀻𑀳𑀺 𑀅𑀫𑀺𑀲𑁆𑀲𑀸 𑀲𑀼𑀤𑁆𑀥𑀸 𑀓𑁂𑀲𑀸𑀬𑁂𑀯. 𑀯𑁂𑀡𑀻𑀢𑀺 𑀢𑀻𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀢𑀓𑁂𑀲𑀓𑀮𑀸𑀧𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀼𑀢𑁆𑀢𑀫𑀺𑀲𑁆𑀲𑀸𑀢𑀺 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀓𑁂𑀲𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀸𑀮𑀸𑀫𑀺𑀲𑁆𑀲𑀸𑀢𑀺 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀢𑀻𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 ¶ 𑀓𑀢𑀸, 𑀅𑀯𑀺𑀦𑀤𑁆𑀥𑁄𑀧𑀺 𑀯𑀸 𑀓𑁂𑀯𑀮𑀁 𑀧𑀼𑀧𑁆𑀨𑀫𑀺𑀲𑁆𑀲𑀓𑁄 𑀓𑁂𑀲𑀓𑀮𑀸𑀧𑁄 𑀇𑀥 ‘‘𑀯𑁂𑀡𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀭𑀜𑁆𑀜𑀫𑀺𑀲𑁆𑀲𑀸𑀢𑀺 𑀓𑀳𑀸𑀧𑀡𑀫𑀸𑀮𑀸𑀬 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀲𑀼𑀯𑀡𑁆𑀡𑀫𑀺𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀘𑀻𑀭𑀓𑁂𑀳𑀺 𑀯𑀸 𑀧𑀸𑀫𑀗𑁆𑀕𑀸𑀤𑀻𑀳𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀼𑀢𑁆𑀢𑀸𑀫𑀺𑀲𑁆𑀲𑀸𑀢𑀺 𑀫𑀼𑀢𑁆𑀢𑀸𑀯𑀮𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀫𑀡𑀺𑀫𑀺𑀲𑁆𑀲𑀸𑀢𑀺 𑀲𑀼𑀢𑁆𑀢𑀸𑀭𑀽𑀴𑁆𑀳𑁂𑀳𑀺 𑀫𑀡𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀸. 𑀏𑀢𑀸𑀲𑀼 𑀳𑀺 𑀬𑀁𑀓𑀺𑀜𑁆𑀘𑀺 𑀯𑁂𑀡𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯. ‘‘𑀅𑀳𑀁 𑀫𑀺𑀲𑁆𑀲𑀓𑀯𑁂𑀡𑀺𑀁 𑀅𑀕𑁆𑀕𑀳𑁂𑀲𑀺’’𑀦𑁆𑀢𑀺 𑀯𑀤𑀦𑁆𑀢𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀯𑁂𑀡𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀓𑁂𑀲𑀸𑀧𑀺 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀏𑀓𑀫𑁆𑀧𑀺 𑀓𑁂𑀲𑀁 𑀕𑀡𑁆𑀳𑀸𑀢𑀺 𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯.

𑀳𑀢𑁆𑀣𑀜𑁆𑀘 ¶ 𑀯𑁂𑀡𑀺𑀜𑁆𑀘 𑀞𑀧𑁂𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀮𑀓𑁆𑀔𑀡𑀁 𑀳𑀢𑁆𑀣𑀜𑁆𑀘 𑀲𑀩𑁆𑀩𑀧𑁆𑀧𑀓𑀸𑀭𑀜𑁆𑀘 𑀯𑁂𑀡𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀭𑀻𑀭𑀁 ‘‘𑀅𑀗𑁆𑀕’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀳𑀢𑁆𑀣𑀸𑀤𑀻𑀲𑀼 𑀳𑀢𑁆𑀣𑀲𑁆𑀲 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄, 𑀯𑁂𑀡𑀺𑀬𑀸 𑀕𑀳𑀡𑀁 𑀯𑁂𑀡𑀺𑀕𑁆𑀕𑀸𑀳𑁄, 𑀅𑀯𑀲𑁂𑀲𑀲𑀲𑀭𑀻𑀭𑀲𑁆𑀲 𑀧𑀭𑀸𑀫𑀲𑀦𑀁 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁, 𑀬𑁄 𑀢𑀁 𑀳𑀢𑁆𑀣𑀕𑁆𑀕𑀸𑀳𑀁 𑀯𑀸 𑀯𑁂𑀡𑀺𑀕𑁆𑀕𑀸𑀳𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺. 𑀅𑀬𑀁 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑁄.

𑁨𑁭𑁨. 𑀬𑀲𑁆𑀫𑀸 𑀧𑀦 𑀬𑁄 𑀘 𑀳𑀢𑁆𑀣𑀕𑁆𑀕𑀸𑀳𑁄 𑀬𑁄 𑀘 𑀯𑁂𑀡𑀺𑀕𑁆𑀕𑀸𑀳𑁄 𑀬𑀜𑁆𑀘 𑀅𑀯𑀲𑁂𑀲𑀲𑁆𑀲 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀢𑀁 𑀲𑀩𑁆𑀩𑀫𑁆𑀧𑀺 𑀪𑁂𑀤𑀢𑁄 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀫𑀲𑀦𑀸 𑀧𑀭𑀸𑀫𑀲𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀆𑀫𑀲𑀦𑀸 𑀦𑀸𑀫 𑀆𑀫𑀝𑁆𑀞𑀫𑀢𑁆𑀢𑀸’’𑀢𑀺 𑀬𑀜𑁆𑀘 ‘‘𑀙𑀼𑀧𑀦𑀁 𑀦𑀸𑀫 𑀨𑀼𑀝𑁆𑀞𑀫𑀢𑁆𑀢’’𑀦𑁆𑀢𑀺, 𑀇𑀫𑁂𑀲𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀆𑀫𑀲𑀦𑀸𑀢𑀺 𑀆𑀫𑀚𑁆𑀚𑀦𑀸 𑀨𑀼𑀝𑁆𑀞𑁄𑀓𑀸𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀢𑀢𑁆𑀣𑁂𑀯 𑀲𑀗𑁆𑀖𑀝𑁆𑀝𑀦𑀸. 𑀅𑀬𑀜𑁆𑀳𑀺 ‘‘𑀆𑀫𑀝𑁆𑀞𑀫𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀙𑀼𑀧𑀦𑀦𑁆𑀢𑀺 𑀅𑀲𑀗𑁆𑀖𑀝𑁆𑀝𑁂𑀢𑁆𑀯𑀸 𑀨𑀼𑀝𑁆𑀞𑀫𑀢𑁆𑀢𑀁.

𑀬𑀫𑁆𑀧𑀺 ¶ 𑀉𑀫𑁆𑀫𑀲𑀦𑀸𑀬 𑀘 𑀉𑀮𑁆𑀮𑀗𑁆𑀖𑀦𑀸𑀬 𑀘 𑀦𑀺𑀤𑁆𑀤𑁂𑀲𑁂 ‘‘𑀉𑀤𑁆𑀥𑀁 𑀉𑀘𑁆𑀘𑀸𑀭𑀡𑀸’’𑀢𑀺 𑀏𑀓𑀫𑁂𑀯 𑀧𑀤𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀞𑀫𑀁 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀇𑀢𑁆𑀣𑀺𑀬𑀸 𑀓𑀸𑀬𑁂 𑀉𑀤𑁆𑀥𑀁 𑀧𑁂𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀉𑀓𑁆𑀔𑀺𑀧𑀦𑀯𑀲𑁂𑀦, 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁨𑁭𑁩. 𑀇𑀤𑀸𑀦𑀺 ¶ 𑀬𑁆𑀯𑀸𑀬𑀁 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀲𑁄 𑀲𑀸𑀭𑀢𑁆𑀢𑁄 𑀘 𑀇𑀢𑁆𑀣𑀺𑀲𑀜𑁆𑀜𑀻 𑀘 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀸𑀬𑁂𑀦. 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀣 𑀯𑀸 𑀏𑀢𑀁 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀳𑀢𑁆𑀣𑀸𑀤𑀺𑀪𑁂𑀤𑀁 𑀓𑀸𑀬𑀁. 𑀆𑀫𑀲𑀢𑀺 𑀧𑀭𑀸𑀫𑀲𑀢𑀻𑀢𑀺 𑀏𑀢𑁂𑀲𑀼 𑀘𑁂 𑀏𑀓𑁂𑀦𑀸𑀧𑀺 𑀆𑀓𑀸𑀭𑁂𑀦 𑀅𑀚𑁆𑀛𑀸𑀘𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀢𑀢𑁆𑀣 𑀲𑀓𑀺𑀁 𑀆𑀫𑀲𑀢𑁄 𑀏𑀓𑀸 𑀆𑀧𑀢𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀫𑀲𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀧𑀭𑀸𑀫𑀲𑀦𑁆𑀢𑁄𑀧𑀺 𑀲𑀘𑁂 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀇𑀢𑁄 𑀘𑀺𑀢𑁄 𑀘 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀯𑀸 𑀓𑀸𑀬𑀁 𑀯𑀸 𑀲𑀜𑁆𑀘𑁄𑀧𑁂𑀢𑀺 𑀳𑀭𑀢𑀺 𑀧𑁂𑀲𑁂𑀢𑀺 𑀤𑀺𑀯𑀲𑀫𑁆𑀧𑀺 𑀧𑀭𑀸𑀫𑀲𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀧𑀭𑀸𑀫𑀲𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺.

𑀑𑀫𑀲𑀦𑁆𑀢𑁄𑀧𑀺 ¶ 𑀲𑀘𑁂 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀇𑀢𑁆𑀣𑀺𑀬𑀸 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀁 𑀑𑀫𑀲𑀢𑀺 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀉𑀤𑀭𑀸𑀤𑀻𑀲𑀼 𑀢𑀁 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀑𑀫𑀲𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀉𑀫𑁆𑀫𑀲𑀦𑀸𑀬𑀧𑀺 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀫𑁆𑀫𑀲𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄.

𑀑𑀮𑀗𑁆𑀖𑀦𑀸𑀬 𑀫𑀸𑀢𑀼𑀕𑀸𑀫𑀁 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀘𑀼𑀫𑁆𑀩𑀦𑀸𑀤𑀻𑀲𑀼 𑀬𑀁 𑀅𑀚𑁆𑀛𑀸𑀘𑀸𑀭𑀁 𑀇𑀘𑁆𑀙𑀢𑀺 𑀢𑀁 𑀓𑀢𑁆𑀯𑀸 𑀫𑀼𑀜𑁆𑀘𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀉𑀝𑁆𑀞𑀺𑀢𑀁 𑀧𑀼𑀦𑀧𑁆𑀧𑀼𑀦𑀁 𑀦𑀸𑀫𑀬𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀉𑀮𑁆𑀮𑀗𑁆𑀖𑀦𑀸𑀬𑀧𑀺 𑀓𑁂𑀲𑁂𑀲𑀼 𑀯𑀸 𑀳𑀢𑁆𑀣𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑀬𑀢𑁄 𑀏𑀲𑁂𑀯 𑀦𑀬𑁄.

𑀆𑀓𑀟𑁆𑀠𑀦𑀸𑀬 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑁄 𑀬𑀸𑀯 𑀦 𑀫𑀼𑀜𑁆𑀘𑀢𑀺 𑀢𑀸𑀯 𑀏𑀓𑀸𑀯 𑀆𑀧𑀢𑁆𑀢𑀺. 𑀫𑀼𑀜𑁆𑀘𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀧𑀢𑀺𑀓𑀟𑁆𑀠𑀦𑀸𑀬𑀧𑀺 𑀧𑀭𑀫𑁆𑀫𑀼𑀔𑀁 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑁆𑀧𑀡𑀸𑀫𑀬𑀢𑁄 𑀏𑀲𑁂𑀯 𑀦𑀬𑁄.

𑀅𑀪𑀺𑀦𑀺𑀕𑁆𑀕𑀡𑁆𑀳𑀦𑀸𑀬 ¶ 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀫𑁆𑀧𑀺 𑀕𑀘𑁆𑀙𑀢𑁄 𑀏𑀓𑀸𑀯 𑀆𑀧𑀢𑁆𑀢𑀺. 𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀕𑀡𑁆𑀳𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀨𑀼𑀲𑀢𑁄 𑀘 𑀆𑀮𑀺𑀗𑁆𑀕𑀢𑁄 𑀘 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀻𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 ¶ 𑀧𑀦𑀸𑀳 𑁋 ‘‘𑀫𑀽𑀮𑀕𑁆𑀕𑀳𑀡𑀫𑁂𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀬𑀸𑀯 𑀦 𑀫𑀼𑀜𑁆𑀘𑀢𑀺 𑀢𑀸𑀯 𑀏𑀓𑀸 𑀏𑀯 𑀆𑀧𑀢𑁆𑀢𑀻’’𑀢𑀺.

𑀅𑀪𑀺𑀦𑀺𑀧𑁆𑀧𑀻𑀴𑀦𑀸𑀬 𑀯𑀢𑁆𑀣𑁂𑀦 𑀯𑀸 𑀆𑀪𑀭𑀡𑁂𑀦 𑀯𑀸 𑀲𑀤𑁆𑀥𑀺𑀁 𑀧𑀻𑀴𑀬𑀢𑁄 𑀅𑀗𑁆𑀕𑀁 𑀅𑀨𑀼𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀨𑀼𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀏𑀓𑀧𑀬𑁄𑀕𑁂𑀦 𑀏𑀓𑀸 𑀆𑀧𑀢𑁆𑀢𑀺, 𑀦𑀸𑀦𑀸𑀧𑀬𑁄𑀕𑁂𑀦 𑀦𑀸𑀦𑀸.

𑀕𑀳𑀡𑀙𑀼𑀧𑀦𑁂𑀲𑀼 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀅𑀓𑀭𑁄𑀦𑁆𑀢𑁄𑀧𑀺 𑀕𑀳𑀺𑀢𑀫𑀢𑁆𑀢𑀨𑀼𑀝𑁆𑀞𑀫𑀢𑁆𑀢𑁂𑀦𑀸𑀧𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀆𑀫𑀲𑀦𑀸𑀤𑀻𑀲𑀼 𑀏𑀓𑁂𑀦𑀸𑀧𑀺 𑀆𑀓𑀸𑀭𑁂𑀦 𑀅𑀚𑁆𑀛𑀸𑀘𑀸𑀭𑀢𑁄 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀯𑁂𑀫𑀢𑀺𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀯𑁂𑀫𑀢𑀺𑀓𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀧𑀼𑀭𑀺𑀲𑁂 𑀧𑀼𑀭𑀺𑀲𑀲𑀜𑁆𑀜𑀺𑀲𑁆𑀲𑀸𑀧𑀺 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀇𑀢𑁆𑀣𑀺𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑁂𑀧𑀺 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀓𑁆𑀓𑀝𑀫𑁂𑀯𑀸𑀢𑀺. 𑀇𑀫𑀸 𑀏𑀓𑀫𑀽𑀮𑀓𑀦𑀬𑁂 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 ‘‘𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀼𑀢𑁆𑀢𑁂 𑀤𑀼𑀫𑀽𑀮𑀓𑀦𑀬𑁂𑀧𑀺 ¶ 𑀤𑀺𑀕𑀼𑀡𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀤𑁆𑀯𑀻𑀲𑀼 𑀇𑀢𑁆𑀣𑀻𑀲𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸; 𑀏𑀯𑀁 𑀲𑀫𑁆𑀩𑀳𑀼𑀮𑀸𑀲𑀼 𑀲𑀫𑁆𑀩𑀳𑀼𑀮𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁄 𑀳𑀺 𑀏𑀓𑀢𑁄 𑀞𑀺𑀢𑀸 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀲𑁄 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀨𑀼𑀝𑁆𑀞𑀸 𑀢𑀸𑀲𑀁 𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀫𑀚𑁆𑀛𑀕𑀢𑀸𑀦𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂. 𑀢𑀸 𑀳𑀺 𑀢𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺. 𑀬𑁄 𑀧𑀦 𑀲𑀫𑁆𑀩𑀳𑀼𑀮𑀸𑀦𑀁 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀓𑁂𑀲𑁂 𑀯𑀸 𑀏𑀓𑀢𑁄 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁄 𑀅𑀗𑁆𑀕𑀼𑀮𑀺𑀬𑁄 𑀘 𑀓𑁂𑀲𑁂 𑀘 𑀅𑀕𑀡𑁂𑀢𑁆𑀯𑀸 𑀇𑀢𑁆𑀣𑀺𑀬𑁄 𑀕𑀡𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀓𑀸𑀭𑁂𑀢𑀩𑁆𑀩𑁄. 𑀬𑀸𑀲𑀜𑁆𑀘 𑀇𑀢𑁆𑀣𑀻𑀦𑀁 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀓𑁂𑀲𑀸 𑀯𑀸 𑀫𑀚𑁆𑀛𑀕𑀢𑀸 𑀳𑁄𑀦𑁆𑀢𑀺, 𑀢𑀸𑀲𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀢𑀸 𑀳𑀺 𑀢𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸 𑀧𑀦 𑀇𑀢𑁆𑀣𑀺𑀬𑁄 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀳𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀸𑀲𑀁𑀬𑁂𑀯 ¶ 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑀕𑀢𑀸𑀦𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀅𑀨𑀼𑀝𑁆𑀞𑀸𑀲𑀼 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀧𑀸𑀴𑀺𑀬𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀦 ¶ 𑀆𑀫𑀲𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑁄 𑀧𑀼𑀭𑀺𑀫𑀦𑀬𑁄𑀬𑁂𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑁄 𑀤𑀺𑀲𑁆𑀲𑀢𑀺.

𑀬𑁄 𑀳𑀺 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸𑀲𑀼 𑀇𑀢𑁆𑀣𑀻𑀲𑀼 𑀲𑀫𑀲𑀸𑀭𑀸𑀕𑁄 𑀏𑀓𑀁 𑀳𑀢𑁆𑀣𑁂 𑀕𑀡𑁆𑀳𑀸𑀢𑀺, 𑀲𑁄 𑀕𑀳𑀺𑀢𑀺𑀢𑁆𑀣𑀺𑀬𑀸 𑀯𑀲𑁂𑀦 𑀏𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑀼𑀮𑁆𑀮𑀘𑁆𑀘𑀬𑁂. 𑀲𑀘𑁂 𑀲𑁄 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀯𑀢𑁆𑀣𑁂 𑀯𑀸 𑀧𑀼𑀧𑁆𑀨𑁂 𑀯𑀸 𑀕𑀡𑁆𑀳𑀸𑀢𑀺, 𑀲𑀩𑁆𑀩𑀸𑀲𑀁 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀆𑀧𑀚𑁆𑀚𑀢𑀺. 𑀬𑀣𑁂𑀯 𑀳𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀲𑀩𑁆𑀩𑀸𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺, 𑀢𑀣𑀸 𑀇𑀥𑀸𑀧𑀺 𑀲𑀩𑁆𑀩𑀸𑀧𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀝𑁆𑀞𑀸 𑀳𑁄𑀦𑁆𑀢𑀺. 𑀲𑀘𑁂 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀢𑁆𑀣𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀭 𑀘𑁂𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀞𑀫𑀁 𑀇𑀢𑁆𑀣𑀺𑀁 𑀳𑀢𑁆𑀣𑁂 𑀕𑀡𑁆𑀳𑀸𑀢𑀺 𑀕𑀳𑀺𑀢𑀸𑀬 𑀯𑀲𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀲𑀩𑁆𑀩𑀸𑀲𑀜𑁆𑀳𑀺 𑀢𑀸𑀲𑀁 𑀢𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀝𑁆𑀞𑀁 𑀳𑁄𑀢𑀺. 𑀲𑀘𑁂 𑀧𑀦 𑀲𑁄𑀧𑀺 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀬𑁂𑀯 𑀕𑀡𑁆𑀳𑀸𑀢𑀺 𑀢𑀲𑁆𑀲𑀸 𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺, 𑀇𑀢𑀭𑀸𑀲𑀁 𑀕𑀡𑀦𑀸𑀬 𑀅𑀦𑀦𑁆𑀢𑀭𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀸𑀦𑀺.

𑀬𑁄 𑀧𑀦 𑀖𑀦𑀯𑀢𑁆𑀣𑀦𑀺𑀯𑀢𑁆𑀣𑀁 𑀇𑀢𑁆𑀣𑀺𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀢𑁆𑀣𑁂 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀯𑀺𑀭𑀴𑀯𑀢𑁆𑀣𑀦𑀺𑀯𑀢𑁆𑀣𑀁 𑀖𑀝𑁆𑀝𑁂𑀢𑀺, 𑀢𑀢𑁆𑀭 𑀘𑁂 𑀯𑀢𑁆𑀣𑀦𑁆𑀢𑀭𑁂𑀳𑀺 𑀇𑀢𑁆𑀣𑀺𑀬𑀸 𑀯𑀸 𑀦𑀺𑀓𑁆𑀔𑀦𑁆𑀢𑀮𑁄𑀫𑀸𑀦𑀺 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑁄 𑀯𑀸 𑀧𑀯𑀺𑀝𑁆𑀞𑀮𑁄𑀫𑀸𑀦𑀺 𑀇𑀢𑁆𑀣𑀺𑀁 𑀨𑀼𑀲𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀮𑁄𑀫𑀸𑀦𑀺𑀬𑁂𑀯 𑀯𑀸 𑀮𑁄𑀫𑀸𑀦𑀺 𑀨𑀼𑀲𑀦𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀉𑀧𑀸𑀤𑀺𑀦𑁆𑀦𑀓𑁂𑀦 ¶ 𑀳𑀺 𑀓𑀫𑁆𑀫𑀚𑀭𑀽𑀧𑁂𑀦 𑀉𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦𑀧𑀺 𑀓𑁂𑀦𑀘𑀺 𑀓𑁂𑀲𑀸𑀤𑀺𑀦𑀸 𑀉𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀯𑀸 𑀨𑀼𑀲𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺𑀬𑁂𑀯.

𑀢𑀢𑁆𑀣 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄, 𑀏𑀓𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺. 𑀲𑀗𑁆𑀖𑀺𑀓𑀫𑀜𑁆𑀘𑁂 𑀧𑀦 𑀅𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀮𑁄𑀫𑀸𑀦𑀺 𑀕𑀡𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 ¶ , 𑀢𑀤𑁂𑀯 𑀬𑀼𑀢𑁆𑀢𑀁. 𑀇𑀢𑁆𑀣𑀺𑀯𑀲𑁂𑀦 𑀳𑀺 𑀅𑀬𑀁 𑀆𑀧𑀢𑁆𑀢𑀺, 𑀦 𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺.

𑀏𑀢𑁆𑀣𑀸𑀳 ¶ ‘‘𑀬𑁄 𑀧𑀦 ‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀕𑀡𑁆𑀳𑀸𑀢𑀺, ‘𑀓𑀸𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀸𑀢𑀺, 𑀲𑁄 𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 ‘‘𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸’’𑀢𑀺 𑀯𑀤𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀮𑀤𑁆𑀥𑀺 𑁋

‘‘𑀯𑀢𑁆𑀣𑀼 𑀲𑀜𑁆𑀜𑀸 𑀘 𑀭𑀸𑀕𑁄 𑀘, 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸;

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂, 𑀕𑀭𑀼𑀓𑀁 𑀢𑁂𑀦 𑀓𑀸𑀭𑀬𑁂’’𑀢𑀺.

𑀏𑀢𑁆𑀣 ‘‘𑀯𑀢𑁆𑀣𑀽’’𑀢𑀺 𑀇𑀢𑁆𑀣𑀻. ‘‘𑀲𑀜𑁆𑀜𑀸’’𑀢𑀺 𑀇𑀢𑁆𑀣𑀺𑀲𑀜𑁆𑀜𑀸. ‘‘𑀭𑀸𑀕𑁄’’𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄. ‘‘𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸’’𑀢𑀺 𑀓𑀸𑀬𑀲𑀁𑀲𑀕𑁆𑀕𑀨𑀲𑁆𑀲𑀚𑀸𑀦𑀦𑀸. 𑀢𑀲𑁆𑀫𑀸 𑀬𑁄 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀻 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑁄𑀧𑀺 𑀓𑀸𑀬𑀁 𑀨𑀼𑀲𑀢𑀺, 𑀕𑀭𑀼𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁𑀬𑁂𑀯 𑀆𑀧𑀚𑁆𑀚𑀢𑀺. 𑀇𑀢𑀭𑁄𑀧𑀺 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋

‘‘𑀲𑀜𑁆𑀜𑀸𑀬 𑀯𑀺𑀭𑀸𑀕𑀺𑀢𑀫𑁆𑀳𑀺, 𑀕𑀳𑀡𑁂 𑀘 𑀯𑀺𑀭𑀸𑀕𑀺𑀢𑁂;

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂, 𑀕𑀭𑀼𑀓𑀁 𑀢𑀢𑁆𑀣 𑀦 𑀤𑀺𑀲𑁆𑀲𑀢𑀻’’𑀢𑀺.

𑀅𑀲𑁆𑀲𑀸𑀧𑀸𑀬𑀁 𑀮𑀤𑁆𑀥𑀺 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀘 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑀜𑁆𑀜𑀸 𑀉𑀧𑁆𑀧𑀸𑀤𑀺𑀢𑀸, 𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀕𑀳𑀡𑀫𑁆𑀧𑀺 𑀯𑀺𑀭𑀸𑀕𑀺𑀢𑀁 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀇𑀢𑁆𑀣𑀻 𑀕𑀳𑀺𑀢𑀸, 𑀢𑀲𑁆𑀫𑀸 𑀏𑀢𑁆𑀣 𑀇𑀢𑁆𑀣𑀺𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀤𑀺𑀲𑁆𑀲𑀢𑀺, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀤𑀺𑀲𑁆𑀲𑀢𑀺, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀨𑀼𑀝𑁆𑀞𑀢𑁆𑀢𑀸 𑀧𑀦 𑀤𑀼𑀓𑁆𑀓𑀝𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀳𑀺 𑀇𑀫𑀁 𑀦𑀸𑀫 𑀯𑀢𑁆𑀣𑀼𑀁 𑀨𑀼𑀲𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀫𑁂𑀯𑀸𑀢𑀺.

𑀇𑀤𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀇𑀤𑀁 𑀘𑀢𑀼𑀓𑁆𑀓𑀫𑀸𑀳. ‘‘𑀲𑀸𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀸𑀭𑀢𑁆𑀢𑀁 𑀕𑀡𑁆𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄, ‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀺𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀁, ‘𑀲𑀸𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀺𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀁, ‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀸𑀭𑀢𑁆𑀢𑀁 𑀕𑀡𑁆𑀳𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀫𑀸𑀳? 𑀅𑀣 𑀔𑁄 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁄𑀬𑁂𑀯𑁂𑀢𑁆𑀣 ‘‘𑀇𑀢𑁆𑀣𑀺 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 ¶ 𑀆𑀫𑀲𑀢𑀺 𑀧𑀭𑀸𑀫𑀲𑀢𑀺…𑀧𑁂… 𑀕𑀡𑁆𑀳𑀸𑀢𑀺 𑀙𑀼𑀧𑀢𑀺 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 ‘‘𑀬𑁄 𑀳𑀺 𑀏𑀓𑀢𑁄 𑀞𑀺𑀢𑀸 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁄 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀨𑀼𑀝𑁆𑀞𑀸 𑀢𑀸𑀲𑀁 𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀫𑀚𑁆𑀛𑀕𑀢𑀸𑀦𑀁 ¶ 𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑁂’’𑀢𑀺𑀆𑀤𑀻𑀳𑀺 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁂𑀳𑀺 𑀘 𑀲𑀫𑁂𑀢𑀺. 𑀬𑀤𑀺 𑀳𑀺 𑀲𑀜𑁆𑀜𑀸𑀤𑀺𑀯𑀺𑀭𑀸𑀕𑁂𑀦 𑀯𑀺𑀭𑀸𑀕𑀺𑀢𑀁 𑀦𑀸𑀫 𑀪𑀯𑁂𑀬𑁆𑀬 ‘‘𑀧𑀡𑁆𑀟𑀓𑁄 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀜𑁆𑀘 𑀳𑁄𑀢𑀺 𑀓𑀸𑀬𑀲𑀜𑁆𑀜𑀻 𑀘𑀸’’𑀢𑀺𑀆𑀤𑀺𑀦𑀸𑀧𑀺 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀺𑀲𑁂𑀲𑀁 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀲𑁄 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀸𑀬 𑀲𑀢𑀺 𑀇𑀢𑁆𑀣𑀺𑀁 𑀆𑀫𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀬𑀼𑀚𑁆𑀚𑀢𑀺.

𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀦𑀻𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀬𑀺𑀢𑀸𑀬 𑀓𑀸𑀴𑀺𑀢𑁆𑀣𑀺𑀬𑀸 𑀓𑀸𑀬𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; ‘𑀓𑀸𑀬𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀦𑀻𑀮𑀁 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁; ‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; ‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀦𑀻𑀮𑀁 𑀖𑀝𑁆𑀝𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺. 𑀬𑁄𑀧𑀸𑀬𑀁 ‘‘𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀣𑀼𑀫𑀺𑀲𑁆𑀲𑀓𑀦𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀫𑁆𑀧𑀺 𑀯𑀢𑁆𑀣𑀼 𑀲𑀜𑁆𑀜𑀸𑀯𑀺𑀫𑀢𑀺𑀯𑀲𑁂𑀦 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺𑀬𑁄 𑀧𑀸𑀴𑀺𑀬𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑁂𑀦𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑁂 𑀧𑀦 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀢𑁄 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑁂 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀓𑀸𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀓𑀆𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑁂 𑀘 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀓𑀸𑀬𑀯𑀸𑀭𑀸𑀤𑀻𑀲𑀼 𑀘𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯.

‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘 𑀇𑀢𑁆𑀣𑀻 𑀘 𑀦𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑁂𑀦 𑀓𑀸𑀬’’𑀦𑁆𑀢𑀺𑀆𑀤𑀺𑀯𑀸𑀭𑁄 𑀧𑀦 𑀪𑀺𑀓𑁆𑀔𑀼𑀫𑁆𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀇𑀢𑁆𑀣𑀻 𑀘 𑀦𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀲𑀸𑀭𑀢𑁆𑀢𑀸 𑀇𑀢𑁆𑀣𑀻 𑀢𑀲𑁆𑀲 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀯𑀸 𑀦𑀺𑀧𑀦𑁆𑀦𑁄𑀓𑀸𑀲𑀁 𑀯𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀢𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀁 𑀆𑀫𑀲𑀢𑀺…𑀧𑁂… 𑀙𑀼𑀧𑀢𑀺. 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀏𑀯𑀁 𑀢𑀸𑀬 𑀆𑀫𑀝𑁆𑀞𑁄 𑀯𑀸 𑀙𑀼𑀧𑀺𑀢𑁄 𑀯𑀸 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀲𑀘𑁂 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀢𑁆𑀣𑀁 𑀈𑀲𑀓𑀫𑁆𑀧𑀺 𑀓𑀸𑀬𑀁 𑀘𑀸𑀮𑁂𑀢𑀺 𑀨𑀦𑁆𑀤𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺.

𑀤𑁆𑀯𑁂 ¶ 𑀇𑀢𑁆𑀣𑀺𑀬𑁄𑀢𑀺 𑀏𑀢𑁆𑀣 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺, 𑀇𑀢𑁆𑀣𑀺𑀬𑀸 𑀘 𑀧𑀡𑁆𑀟𑀓𑁂 𑀘 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀲𑀳 𑀤𑀼𑀓𑁆𑀓𑀝𑀁 ¶ . 𑀏𑀢𑁂𑀦 𑀉𑀧𑀸𑀬𑁂𑀦 𑀬𑀸𑀯 ‘‘𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀫𑀲𑀢𑀺, 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀢𑀸𑀯 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 ¶ 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀦𑀸 𑀦𑀺𑀲𑁆𑀲𑀝𑁆𑀞𑀁 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀇𑀢𑁆𑀣𑀺𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀧𑀳𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀓𑀸𑀬𑁂𑀦 𑀯𑀺𑀓𑀸𑀭𑀁 𑀓𑀭𑁄𑀢𑀺, 𑀅𑀗𑁆𑀕𑀼𑀮𑀺𑀁 𑀯𑀸 𑀘𑀸𑀮𑁂𑀢𑀺, 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀢𑀺, 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀢𑀺, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 𑀯𑀺𑀓𑀸𑀭𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺. 𑀅𑀬𑀫𑁆𑀧𑀺 𑀓𑀸𑀬𑁂𑀦 𑀯𑀸𑀬𑀫𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀤𑁆𑀯𑀻𑀲𑀼 𑀇𑀢𑁆𑀣𑀻𑀲𑀼 𑀤𑁆𑀯𑁂, 𑀇𑀢𑁆𑀣𑀻𑀧𑀡𑁆𑀟𑀓𑁂𑀲𑀼𑀧𑀺 𑀤𑁆𑀯𑁂 𑀏𑀯 𑀤𑀼𑀓𑁆𑀓𑀝𑁂 𑀆𑀧𑀚𑁆𑀚𑀢𑀺.

𑁨𑁭𑁯. 𑀏𑀯𑀁 𑀯𑀢𑁆𑀣𑀼𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀮𑀓𑁆𑀔𑀡𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀆𑀧𑀢𑁆𑀢𑀺𑀪𑁂𑀤𑀜𑁆𑀘 𑀅𑀦𑀸𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂 𑀇𑀢𑁆𑀣𑀺𑀬𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀤𑀼𑀢𑀺𑀬𑁂 𑀦𑀬𑁂 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀫𑀲𑀦𑁂 𑀯𑀺𑀬 𑀯𑀸𑀬𑀫𑀺𑀢𑁆𑀯𑀸 𑀅𑀙𑀼𑀧𑀦𑁂 𑀯𑀺𑀬 𑀘 𑀨𑀲𑁆𑀲𑀲𑁆𑀲 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑀢𑁄 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀢𑀢𑀺𑀬𑁂 𑀓𑀸𑀬𑁂𑀦 𑀅𑀯𑀸𑀬𑀫𑀢𑁄 𑀅𑀦𑀸𑀧𑀢𑁆𑀢𑀺. 𑀬𑁄 𑀳𑀺 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀦𑀺𑀘𑁆𑀘𑀮𑁂𑀦 𑀓𑀸𑀬𑁂𑀦 𑀓𑁂𑀯𑀮𑀁 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀲𑀸𑀤𑀺𑀬𑀢𑀺 𑀅𑀦𑀼𑀪𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀺. 𑀘𑀢𑀼𑀢𑁆𑀣𑁂 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀫𑀲𑀦𑁂 𑀯𑀺𑀬 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸𑀧𑀺 𑀦𑀢𑁆𑀣𑀺, 𑀓𑁂𑀯𑀮𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀲𑀼 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀏𑀢𑁆𑀣 𑀧𑀦 𑀬𑁄 𑀇𑀢𑁆𑀣𑀺𑀬𑀸 𑀕𑀳𑀺𑀢𑁄 𑀢𑀁 𑀅𑀢𑁆𑀢𑀦𑁄 𑀲𑀭𑀻𑀭𑀸 𑀫𑁄𑀘𑁂𑀢𑀼𑀓𑀸𑀫𑁄 𑀧𑀝𑀺𑀧𑁆𑀧𑀡𑀸𑀫𑁂𑀢𑀺 𑀯𑀸 𑀧𑀳𑀭𑀢𑀺 𑀯𑀸 𑀅𑀬𑀁 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀉𑀢𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀢𑀺, 𑀅𑀬𑀁 𑀓𑀸𑀬𑁂𑀦 𑀯𑀸𑀬𑀫𑀢𑀺 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀢𑀸𑀤𑀺𑀲𑀁 𑀤𑀻𑀖𑀚𑀸𑀢𑀺𑀁 𑀓𑀸𑀬𑁂 𑀆𑀭𑀽𑀴𑁆𑀳𑀁 𑀤𑀺𑀲𑁆𑀯𑀸 ‘‘𑀲𑀡𑀺𑀓𑀁 𑀕𑀘𑁆𑀙𑀢𑀼 𑀖𑀝𑁆𑀝𑀺𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 ¶ 𑀦 𑀖𑀝𑁆𑀝𑁂𑀢𑀺, 𑀇𑀢𑁆𑀣𑀺𑀫𑁂𑀯 𑀯𑀸 𑀅𑀗𑁆𑀕𑀁 𑀨𑀼𑀲𑀫𑀸𑀦𑀁 𑀜𑀢𑁆𑀯𑀸 ‘‘𑀏𑀲𑀸 ‘𑀅𑀦𑀢𑁆𑀣𑀺𑀓𑁄 𑀅𑀬𑀁 𑀫𑀬𑀸’𑀢𑀺 𑀲𑀬𑀫𑁂𑀯 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀩𑀮𑀯𑀺𑀢𑁆𑀣𑀺𑀬𑀸 𑀯𑀸 𑀕𑀸𑀴𑁆𑀳𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀕𑀳𑀺𑀢𑁄 𑀤𑀳𑀭𑀪𑀺𑀓𑁆𑀔𑀼 𑀧𑀮𑀸𑀬𑀺𑀢𑀼𑀓𑀸𑀫𑁄𑀧𑀺 𑀲𑀼𑀝𑁆𑀞𑀼 𑀕𑀳𑀺𑀢𑀢𑁆𑀢𑀸 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀬𑀁 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺. 𑀬𑁄 𑀧𑀦 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀆𑀕𑀘𑁆𑀙𑀢𑀼 ¶ 𑀢𑀸𑀯 𑀢𑀢𑁄 𑀦𑀁 𑀧𑀳𑀭𑀺𑀢𑁆𑀯𑀸 𑀯𑀸 𑀧𑀡𑀸𑀫𑁂𑀢𑁆𑀯𑀸 ¶ 𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀬𑀁 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁦. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀁 𑀨𑀼𑀲𑀺𑀲𑁆𑀲𑀸𑀫𑀻𑀢𑀺 𑀅𑀘𑁂𑀢𑁂𑀢𑁆𑀯𑀸, 𑀏𑀯𑀜𑁆𑀳𑀺 𑀅𑀘𑁂𑀢𑁂𑀢𑁆𑀯𑀸 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑁂 𑀨𑀼𑀝𑁆𑀞𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀨𑀼𑀲𑀸𑀫𑀻𑀢𑀺 𑀲𑀢𑀺 𑀦𑀢𑁆𑀣𑀺, 𑀏𑀯𑀁 𑀅𑀲𑀢𑀺𑀬𑀸 𑀳𑀢𑁆𑀣𑀧𑀸𑀤𑀧𑀲𑀸𑀭𑀡𑀸𑀤𑀺𑀓𑀸𑀮𑁂 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀤𑀸𑀭𑀓𑀯𑁂𑀲𑁂𑀦 𑀞𑀺𑀢𑀁 𑀤𑀸𑀭𑀺𑀓𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀨𑀼𑀲𑀢𑀺, 𑀏𑀯𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀨𑀼𑀲𑀢𑁄 𑀅𑀦𑀸𑀧𑀢𑁆𑀢𑀺.

𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀁 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀢𑀲𑁆𑀲 𑀩𑀸𑀳𑀸𑀧𑀭𑀫𑁆𑀧𑀭𑀸𑀬 𑀦𑀻𑀢𑀪𑀺𑀓𑁆𑀔𑀼𑀲𑁆𑀲 𑀯𑀺𑀬 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀯𑀼𑀢𑁆𑀢𑀦𑀬𑀸𑀏𑀯. 𑀇𑀥 𑀧𑀦 𑀉𑀤𑀸𑀬𑀺𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀁, 𑀲𑀼𑀔𑀫𑀚𑁆𑀛𑀢𑁆𑀢𑀤𑁆𑀯𑀬𑁂𑀦𑀸𑀢𑀺.

𑁨𑁮𑁧. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑁋 𑀫𑀸𑀢𑀼𑀬𑀸 𑀫𑀸𑀢𑀼𑀧𑁂𑀫𑁂𑀦𑀸𑀢𑀺 𑀫𑀸𑀢𑀼𑀧𑁂𑀫𑁂𑀦 𑀫𑀸𑀢𑀼𑀬𑀸 𑀓𑀸𑀬𑀁 𑀆𑀫𑀲𑀺. 𑀏𑀲 𑀦𑀬𑁄 𑀥𑀻𑀢𑀼𑀪𑀕𑀺𑀦𑀺𑀯𑀢𑁆𑀣𑀽𑀲𑀼. 𑀢𑀢𑁆𑀣 𑀬𑀲𑁆𑀫𑀸 𑀫𑀸𑀢𑀸 𑀯𑀸 𑀳𑁄𑀢𑀼 𑀥𑀻𑀢𑀸 𑀯𑀸 𑀇𑀢𑁆𑀣𑀻 𑀦𑀸𑀫 𑀲𑀩𑁆𑀩𑀸𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀸𑀭𑀺𑀧𑀦𑁆𑀣𑀺𑀓𑀸𑀯. 𑀢𑀲𑁆𑀫𑀸 ‘‘𑀅𑀬𑀁 𑀫𑁂 𑀫𑀸𑀢𑀸 𑀅𑀬𑀁 𑀥𑀻𑀢𑀸 𑀅𑀬𑀁 𑀫𑁂 𑀪𑀕𑀺𑀦𑀻’’𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀆𑀫𑀲𑀢𑁄𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁.

𑀇𑀫𑀁 𑀧𑀦 𑀪𑀕𑀯𑀢𑁄 𑀆𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀲𑀘𑁂𑀧𑀺 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀫𑀸𑀢𑀭𑀁 𑀧𑀲𑁆𑀲𑀢𑀺 𑀦𑁂𑀯 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀩𑁆𑀩𑀸. 𑀧𑀡𑁆𑀟𑀺𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦𑀸𑀯𑀸 𑀯𑀸 𑀨𑀮𑀓𑀁 ¶ 𑀯𑀸 𑀓𑀤𑀮𑀺𑀓𑁆𑀔𑀦𑁆𑀥𑁄 𑀯𑀸 𑀤𑀸𑀭𑀼𑀓𑁆𑀔𑀦𑁆𑀥𑁄 𑀯𑀸 𑀉𑀧𑀲𑀁𑀳𑀭𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀓𑀸𑀲𑀸𑀯𑀫𑁆𑀧𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀧𑀼𑀭𑀢𑁄 𑀞𑀧𑁂𑀢𑀩𑁆𑀩𑀁, ‘‘𑀏𑀢𑁆𑀣 ¶ ¶ 𑀕𑀡𑁆𑀳𑀸𑀳𑀻’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀸. 𑀕𑀳𑀺𑀢𑁂 𑀧𑀭𑀺𑀓𑁆𑀔𑀸𑀭𑀁 𑀓𑀟𑁆𑀠𑀸𑀫𑀻𑀢𑀺 𑀓𑀟𑁆𑀠𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀪𑀸𑀬𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑀸. 𑀲𑀘𑁂 𑀪𑀸𑀬𑀫𑀸𑀦𑀸 𑀧𑀼𑀢𑁆𑀢𑀲𑁆𑀲 𑀲𑀳𑀲𑀸 𑀔𑀦𑁆𑀥𑁂 𑀯𑀸 𑀅𑀪𑀺𑀭𑀼𑀳𑀢𑀺, 𑀳𑀢𑁆𑀣𑁂 𑀯𑀸 𑀕𑀡𑁆𑀳𑀸𑀢𑀺, 𑀦 ‘‘𑀅𑀧𑁂𑀳𑀺 𑀫𑀳𑀮𑁆𑀮𑀺𑀓𑁂’’𑀢𑀺 𑀦𑀺𑀤𑁆𑀥𑀼𑀦𑀺𑀢𑀩𑁆𑀩𑀸, 𑀣𑀮𑀁 𑀧𑀸𑀧𑁂𑀢𑀩𑁆𑀩𑀸. 𑀓𑀤𑁆𑀤𑀫𑁂 𑀮𑀕𑁆𑀕𑀸𑀬𑀧𑀺 𑀓𑀽𑀧𑁂 𑀧𑀢𑀺𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀧𑀺 𑀳𑀺 𑀬𑁄𑀢𑁆𑀢𑀁 𑀯𑀸 𑀯𑀢𑁆𑀣𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀉𑀤𑁆𑀥𑀭𑀺𑀢𑀩𑁆𑀩𑀸, 𑀦𑀢𑁆𑀯𑁂𑀯 𑀆𑀫𑀲𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀫𑁂𑀯 𑀅𑀦𑀸𑀫𑀸𑀲𑀁, 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀫𑁆𑀧𑀺 𑀆𑀪𑀭𑀡𑀪𑀡𑁆𑀟𑀫𑁆𑀧𑀺 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀢𑀸𑀴𑀧𑀡𑁆𑀡𑀫𑀼𑀤𑁆𑀤𑀺𑀓𑀁 𑀯𑀸 𑀉𑀧𑀸𑀤𑀸𑀬 𑀅𑀦𑀸𑀫𑀸𑀲𑀫𑁂𑀯, 𑀢𑀜𑁆𑀘 𑀔𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀺𑀴𑀦𑁆𑀥𑀦𑀢𑁆𑀣𑀸𑀬 𑀞𑀧𑀺𑀢𑀫𑁂𑀯. 𑀲𑀘𑁂 𑀧𑀦 𑀦𑀺𑀯𑀸𑀲𑀦𑀁 𑀯𑀸 𑀧𑀸𑀭𑀼𑀧𑀦𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑀻𑀯𑀭𑀢𑁆𑀣𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺 𑀯𑀝𑁆𑀝𑀢𑀺. 𑀆𑀪𑀭𑀡𑀪𑀡𑁆𑀟𑁂𑀲𑀼 𑀧𑀦 𑀲𑀻𑀲𑀧𑀲𑀸𑀥𑀦𑀓𑀤𑀦𑁆𑀢𑀲𑀽𑀘𑀺𑀆𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑀁 ‘‘𑀇𑀫𑀁 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀣𑀸’’𑀢𑀺 𑀤𑀺𑀬𑁆𑀬𑀫𑀸𑀦𑀁 𑀲𑀺𑀧𑀸𑀝𑀺𑀓𑀸𑀲𑀽𑀘𑀺𑀆𑀤𑀺𑀉𑀧𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁. 𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀸𑀤𑀺𑀫𑀬𑀁 𑀧𑀦 𑀅𑀦𑀸𑀫𑀸𑀲𑀫𑁂𑀯 𑀤𑀻𑀬𑁆𑀬𑀫𑀸𑀦𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀜𑁆𑀘 𑀏𑀢𑀸𑀲𑀁 𑀲𑀭𑀻𑀭𑀽𑀧𑀕𑀫𑁂𑀯 𑀅𑀦𑀸𑀫𑀸𑀲𑀁, 𑀇𑀢𑁆𑀣𑀺𑀲𑀡𑁆𑀞𑀸𑀦𑁂𑀦 𑀓𑀢𑀁 𑀓𑀝𑁆𑀞𑀭𑀽𑀧𑀫𑁆𑀧𑀺 𑀤𑀦𑁆𑀢𑀭𑀽𑀧𑀫𑁆𑀧𑀺 𑀅𑀬𑀭𑀽𑀧𑀫𑁆𑀧𑀺 𑀮𑁄𑀳𑀭𑀽𑀧𑀫𑁆𑀧𑀺 𑀢𑀺𑀧𑀼𑀭𑀽𑀧𑀫𑁆𑀧𑀺 𑀧𑁄𑀢𑁆𑀣𑀓𑀭𑀽𑀧𑀫𑁆𑀧𑀺 𑀲𑀩𑁆𑀩𑀭𑀢𑀦𑀭𑀽𑀧𑀫𑁆𑀧𑀺 𑀅𑀦𑁆𑀢𑀫𑀲𑁄 𑀧𑀺𑀝𑁆𑀞𑀫𑀬𑀭𑀽𑀧𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀦 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀽’’𑀢𑀺 𑀮𑀪𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑀦𑀫𑀬𑀁 𑀅𑀯𑀲𑁂𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀓𑀭𑀡𑀸𑀭𑀳𑀁 𑀉𑀧𑀓𑀭𑀡𑁂 𑀧𑀭𑀺𑀪𑁄𑀕𑀸𑀭𑀳𑀁 𑀧𑀭𑀺𑀪𑁄𑀕𑁂 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑀬𑀣𑀸 𑀘 𑀇𑀢𑁆𑀣𑀺𑀭𑀽𑀧𑀓𑀁; 𑀏𑀯𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀥𑀜𑁆𑀜𑀁 𑀅𑀦𑀸𑀫𑀸𑀲𑀁. 𑀢𑀲𑁆𑀫𑀸 𑀔𑁂𑀢𑁆𑀢𑀫𑀚𑁆𑀛𑁂𑀦 𑀕𑀘𑁆𑀙𑀢𑀸 𑀢𑀢𑁆𑀣𑀚𑀸𑀢𑀓𑀫𑁆𑀧𑀺 𑀥𑀜𑁆𑀜𑀨𑀮𑀁 𑀦 𑀆𑀫𑀲𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀖𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀥𑀜𑁆𑀜𑀁 𑀧𑀲𑀸𑀭𑀺𑀢𑀁 𑀳𑁄𑀢𑀺 𑀧𑀲𑁆𑀲𑁂𑀦 𑀘 𑀫𑀕𑁆𑀕𑁄 𑀅𑀢𑁆𑀣𑀺 ¶ 𑀦 𑀫𑀤𑁆𑀤𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀕𑀫𑀦𑀫𑀕𑁆𑀕𑁂 𑀅𑀲𑀢𑀺 𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩𑀁. 𑀅𑀦𑁆𑀢𑀭𑀖𑀭𑁂 𑀥𑀜𑁆𑀜𑀲𑁆𑀲 𑀉𑀧𑀭𑀺 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑁂𑀦𑁆𑀢𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀆𑀲𑀦𑀲𑀸𑀮𑀸𑀬𑀁 𑀥𑀜𑁆𑀜𑀁 𑀆𑀓𑀺𑀭𑀦𑁆𑀢𑀺, 𑀲𑀘𑁂 𑀲𑀓𑁆𑀓𑀸 𑀳𑁄𑀢𑀺 𑀳𑀭𑀸𑀧𑁂𑀢𑀼𑀁 𑀳𑀭𑀸𑀧𑁂𑀢𑀩𑁆𑀩𑀁, 𑀦𑁄 𑀘𑁂 𑀏𑀓𑀫𑀦𑁆𑀢𑀁 𑀥𑀜𑁆𑀜𑀁 𑀅𑀫𑀤𑁆𑀤𑀦𑁆𑀢𑁂𑀦 𑀧𑀻𑀞𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀑𑀓𑀸𑀲𑁄 𑀦 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀥𑀜𑁆𑀜𑀫𑀚𑁆𑀛𑁂𑀬𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀢𑀢𑁆𑀣𑀚𑀸𑀢𑀓𑀸𑀦𑀺 𑀫𑀼𑀕𑁆𑀕𑀫𑀸𑀲𑀸𑀤𑀻𑀦𑀺 𑀅𑀧𑀭𑀡𑁆𑀡𑀸𑀦𑀺𑀧𑀺 𑀢𑀸𑀮𑀧𑀦𑀲𑀸𑀤𑀻𑀦𑀺 𑀯𑀸 𑀨𑀮𑀸𑀦𑀺 𑀓𑀻𑀴𑀦𑁆𑀢𑁂𑀦 𑀦 𑀆𑀫𑀲𑀺𑀢𑀩𑁆𑀩𑀸𑀦𑀺. 𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀜𑁆𑀜𑁂 𑀧𑀦 𑀭𑀼𑀓𑁆𑀔𑀢𑁄 𑀧𑀢𑀺𑀢𑀸𑀦𑀺 𑀨𑀮𑀸𑀦𑀺 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑀫𑀼𑀢𑁆𑀢𑀸 ¶ , 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀴𑀁, 𑀭𑀚𑀢𑀁, 𑀚𑀸𑀢𑀭𑀽𑀧𑀁, 𑀮𑁄𑀳𑀺𑀢𑀗𑁆𑀓𑁄, 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 ¶ 𑀇𑀫𑁂𑀲𑀼 𑀤𑀲𑀲𑀼 𑀭𑀢𑀦𑁂𑀲𑀼 𑀫𑀼𑀢𑁆𑀢𑀸 𑀅𑀥𑁄𑀢𑀸 𑀅𑀦𑀺𑀯𑀺𑀤𑁆𑀥𑀸 𑀬𑀣𑀸𑀚𑀸𑀢𑀸𑀯 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀸 𑀅𑀦𑀸𑀫𑀸𑀲𑀸𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀫𑀼𑀢𑁆𑀢𑀸 𑀥𑁄𑀢𑀸𑀧𑀺 𑀅𑀥𑁄𑀢𑀸𑀧𑀺 𑀅𑀦𑀸𑀫𑀸𑀲𑀸 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀼𑀝𑁆𑀞𑀭𑁄𑀕𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀫𑀲𑁄 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄𑀧𑀺 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀪𑁂𑀤𑁄 𑀫𑀡𑀺 𑀥𑁄𑀢𑀯𑀺𑀤𑁆𑀥𑀯𑀝𑁆𑀝𑀺𑀢𑁄 𑀅𑀦𑀸𑀫𑀸𑀲𑁄, 𑀬𑀣𑀸𑀚𑀸𑀢𑁄 𑀧𑀦 𑀆𑀓𑀭𑀫𑀼𑀢𑁆𑀢𑁄 𑀧𑀢𑁆𑀢𑀸𑀤𑀺𑀪𑀡𑁆𑀟𑀫𑀽𑀮𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑁄. 𑀲𑁄𑀧𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀧𑀘𑀺𑀢𑁆𑀯𑀸 𑀓𑀢𑁄 𑀓𑀸𑀘𑀫𑀡𑀺𑀬𑁂𑀯𑁂𑀓𑁄 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑁄. 𑀯𑁂𑀴𑀼𑀭𑀺𑀬𑁂𑀧𑀺 𑀫𑀡𑀺𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀗𑁆𑀔𑁄 𑀥𑀫𑀦𑀲𑀗𑁆𑀔𑁄 𑀘 𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄 𑀅𑀦𑀸𑀫𑀸𑀲𑁄. 𑀧𑀸𑀦𑀻𑀬𑀲𑀗𑁆𑀔𑁄 𑀥𑁄𑀢𑁄𑀧𑀺 𑀅𑀥𑁄𑀢𑁄𑀧𑀺 𑀆𑀫𑀸𑀲𑁄𑀯 𑀲𑁂𑀲𑀜𑁆𑀘 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀪𑀡𑁆𑀟𑀫𑀽𑀮𑀢𑁆𑀣𑀸𑀬𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀺𑀮𑀸 𑀥𑁄𑀢𑀯𑀺𑀤𑁆𑀥𑀸 𑀭𑀢𑀦𑀲𑀁𑀬𑀼𑀢𑁆𑀢𑀸 𑀫𑀼𑀕𑁆𑀕𑀯𑀡𑁆𑀡𑀸𑀯 𑀅𑀦𑀸𑀫𑀸𑀲𑀸. 𑀲𑁂𑀲𑀸 𑀲𑀢𑁆𑀣𑀓𑀦𑀺𑀲𑀸𑀦𑀸𑀤𑀺𑀅𑀢𑁆𑀣𑀸𑀬 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀭𑀢𑀦𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀢𑀸𑀢𑀺 𑀯𑀤𑀦𑁆𑀢𑀺. 𑀧𑀯𑀸𑀴𑀁 𑀥𑁄𑀢𑀯𑀺𑀤𑁆𑀥𑀁 𑀅𑀦𑀸𑀫𑀸𑀲𑀁. 𑀲𑁂𑀲𑀁 𑀆𑀫𑀸𑀲𑀁 𑀪𑀡𑁆𑀟𑀫𑀽𑀮𑀢𑁆𑀣𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 ¶ 𑀧𑀦 ‘‘𑀥𑁄𑀢𑀫𑁆𑀧𑀺 𑀅𑀥𑁄𑀢𑀫𑁆𑀧𑀺 𑀲𑀩𑁆𑀩𑀁 𑀅𑀦𑀸𑀫𑀸𑀲𑀁, 𑀦 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘 𑀓𑀢𑀪𑀡𑁆𑀟𑀫𑁆𑀧𑀺 𑀅𑀓𑀢𑀪𑀡𑁆𑀟𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀅𑀦𑀸𑀫𑀸𑀲𑀜𑁆𑀘 𑀅𑀲𑀫𑁆𑀧𑀝𑀺𑀘𑁆𑀙𑀺𑀬𑀜𑁆𑀘, 𑀉𑀢𑁆𑀢𑀭𑀭𑀸𑀚𑀧𑀼𑀢𑁆𑀢𑁄 𑀓𑀺𑀭 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀧𑁂𑀲𑁂𑀲𑀺. 𑀣𑁂𑀭𑁄 ‘‘𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀘𑁂𑀢𑀺𑀬𑀖𑀭𑁂 𑀲𑀼𑀯𑀡𑁆𑀡𑀧𑀤𑀼𑀫𑀲𑀼𑀯𑀡𑁆𑀡𑀩𑀼𑀩𑁆𑀩𑀼𑀴𑀓𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀏𑀢𑀸𑀦𑀺𑀧𑀺 𑀅𑀦𑀸𑀫𑀸𑀲𑀸𑀦𑀺. 𑀘𑁂𑀢𑀺𑀬𑀖𑀭𑀕𑁄𑀧𑀓𑀸 𑀧𑀦 𑀭𑀽𑀧𑀺𑀬𑀙𑀟𑁆𑀟𑀓𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀓𑁂𑀴𑀸𑀧𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀅𑀦𑀼𑀜𑁆𑀜𑀸𑀢𑀁. 𑀆𑀭𑀓𑀽𑀝𑀮𑁄𑀳𑀫𑁆𑀧𑀺 𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯 𑀅𑀦𑀸𑀫𑀸𑀲𑀦𑁆𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑁄, 𑀢𑀲𑁆𑀫𑀸 𑀚𑀸𑀢𑀭𑀽𑀧𑀭𑀚𑀢𑀫𑀬𑀸 𑀲𑀩𑁆𑀩𑁂𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀆𑀫𑀸𑀲𑀸. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂 𑀭𑀢𑀦𑀫𑀡𑁆𑀟𑀧𑁂 ¶ 𑀓𑀭𑁄𑀦𑁆𑀢𑀺 𑀨𑀮𑀺𑀓𑀢𑁆𑀣𑀫𑁆𑀪𑁂 𑀭𑀢𑀦𑀤𑀸𑀫𑀧𑀢𑀺𑀫𑀡𑁆𑀟𑀺𑀢𑁂, 𑀢𑀢𑁆𑀣 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀺.

𑀮𑁄𑀳𑀺𑀢𑀗𑁆𑀓𑀫𑀲𑀸𑀭𑀕𑀮𑁆𑀮𑀸 𑀥𑁄𑀢𑀯𑀺𑀤𑁆𑀥𑀸 𑀅𑀦𑀸𑀫𑀸𑀲𑀸, 𑀇𑀢𑀭𑁂 𑀆𑀫𑀸𑀲𑀸, 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀥𑁄𑀢𑀸𑀧𑀺 𑀅𑀥𑁄𑀢𑀸𑀧𑀺 𑀲𑀩𑁆𑀩𑀲𑁄 𑀅𑀦𑀸𑀫𑀸𑀲𑀸 𑀦 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀁 𑀆𑀯𑀼𑀥𑀪𑀡𑁆𑀟𑀁 𑀅𑀦𑀸𑀫𑀸𑀲𑀁, 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀤𑀻𑀬𑁆𑀬𑀫𑀸𑀦𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀢𑁆𑀣𑀯𑀡𑀺𑀚𑁆𑀚𑀸 ¶ 𑀦𑀸𑀫 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀥𑀦𑀼𑀤𑀡𑁆𑀟𑁄𑀧𑀺 𑀥𑀦𑀼𑀚𑀺𑀬𑀸𑀧𑀺 𑀧𑀢𑁄𑀤𑁄𑀧𑀺 𑀅𑀗𑁆𑀓𑀼𑀲𑁄𑀧𑀺 𑀅𑀦𑁆𑀢𑀫𑀲𑁄 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺𑀧𑀺 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀲𑀘𑁂 𑀓𑁂𑀦𑀘𑀺 𑀯𑀺𑀳𑀸𑀭𑁂 𑀲𑀢𑁆𑀢𑀺 𑀯𑀸 𑀢𑁄𑀫𑀭𑁄 𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀯𑀺𑀳𑀸𑀭𑀁 𑀚𑀕𑁆𑀕𑀦𑁆𑀢𑁂𑀦 ‘‘𑀳𑀭𑀦𑁆𑀢𑀽’’𑀢𑀺 𑀲𑀸𑀫𑀺𑀓𑀸𑀦𑀁 𑀧𑁂𑀲𑁂𑀢𑀩𑁆𑀩𑀁. 𑀲𑀘𑁂 𑀦 𑀳𑀭𑀦𑁆𑀢𑀺, 𑀢𑀁 𑀅𑀘𑀸𑀮𑁂𑀦𑁆𑀢𑁂𑀦 𑀯𑀺𑀳𑀸𑀭𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄. 𑀬𑀼𑀤𑁆𑀥𑀪𑀽𑀫𑀺𑀬𑀁 𑀧𑀢𑀺𑀢𑀁 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀢𑁄𑀫𑀭𑀁 𑀯𑀸 𑀤𑀺𑀲𑁆𑀯𑀸 𑀧𑀸𑀲𑀸𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀅𑀲𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀓𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀇𑀢𑀭𑀸𑀦𑀺𑀧𑀺 𑀯𑀺𑀬𑁄𑀚𑁂𑀢𑁆𑀯𑀸 ¶ 𑀓𑀺𑀜𑁆𑀘𑀺 𑀲𑀢𑁆𑀣𑀓𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀓𑀺𑀜𑁆𑀘𑀺 𑀓𑀢𑁆𑀢𑀭𑀤𑀡𑁆𑀟𑀸𑀤𑀺𑀅𑀢𑁆𑀣𑀸𑀬. ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺 𑀤𑀻𑀬𑁆𑀬𑀫𑀸𑀦𑀁 𑀧𑀦 ‘‘𑀯𑀺𑀦𑀸𑀲𑁂𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺.

𑀫𑀘𑁆𑀙𑀚𑀸𑀮𑀧𑀓𑁆𑀔𑀺𑀚𑀸𑀮𑀸𑀤𑀻𑀦𑀺𑀧𑀺 𑀨𑀮𑀓𑀚𑀸𑀮𑀺𑀓𑀸𑀤𑀻𑀦𑀺 𑀲𑀭𑀧𑀭𑀺𑀢𑁆𑀢𑀸𑀦𑀸𑀦𑀻𑀧𑀺 𑀲𑀩𑁆𑀩𑀸𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀮𑀩𑁆𑀪𑀫𑀸𑀦𑁂𑀲𑀼 𑀧𑀦 𑀚𑀸𑀮𑀁 𑀢𑀸𑀯 ‘‘𑀆𑀲𑀦𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀉𑀧𑀭𑀺 𑀩𑀦𑁆𑀥𑀺𑀲𑁆𑀲𑀸𑀫𑀺, 𑀙𑀢𑁆𑀢𑀁 𑀯𑀸 𑀯𑁂𑀞𑁂𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀧𑀭𑀺𑀢𑁆𑀢𑀸𑀦𑀁 𑀲𑀩𑁆𑀩𑀫𑁆𑀧𑀺 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀽𑀧𑀭𑁄𑀥𑀦𑀺𑀯𑀸𑀭𑀡𑀜𑁆𑀳𑀺 𑀏𑀢𑀁 𑀦 𑀉𑀧𑀭𑁄𑀥𑀓𑀭𑀦𑁆𑀢𑀺 𑀨𑀮𑀓𑀁 𑀤𑀦𑁆𑀢𑀓𑀝𑁆𑀞𑀪𑀸𑀚𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺 𑀯𑀻𑀡𑀸𑀪𑁂𑀭𑀺𑀆𑀤𑀻𑀦𑀺 𑀅𑀦𑀸𑀫𑀸𑀲𑀸𑀦𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀪𑁂𑀭𑀺𑀲𑀗𑁆𑀖𑀸𑀝𑁄𑀧𑀺 𑀯𑀻𑀡𑀸𑀲𑀗𑁆𑀖𑀸𑀝𑁄𑀧𑀺 𑀢𑀼𑀘𑁆𑀙𑀧𑁄𑀓𑁆𑀔𑀭𑀫𑁆𑀧𑀺 𑀫𑀼𑀔𑀯𑀝𑁆𑀝𑀺𑀬𑀁 𑀆𑀭𑁄𑀧𑀺𑀢𑀘𑀫𑁆𑀫𑀫𑁆𑀧𑀺 𑀯𑀻𑀡𑀸𑀤𑀡𑁆𑀟𑀓𑁄𑀧𑀺 𑀲𑀩𑁆𑀩𑀁 𑀅𑀦𑀸𑀫𑀸𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀦𑀳𑀺𑀢𑀼𑀁 𑀯𑀸 𑀑𑀦𑀳𑀸𑀧𑁂𑀢𑀼𑀁 𑀯𑀸 𑀯𑀸𑀤𑁂𑀢𑀼𑀁 𑀯𑀸 𑀯𑀸𑀤𑀸𑀧𑁂𑀢𑀼𑀁 𑀯𑀸 𑀦 𑀮𑀩𑁆𑀪𑀢𑀺𑀬𑁂𑀯. 𑀘𑁂𑀢𑀺𑀬𑀗𑁆𑀕𑀡𑁂 𑀧𑀽𑀚𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀁 𑀤𑀺𑀲𑁆𑀯𑀸𑀧𑀺 𑀅𑀘𑀸𑀮𑁂𑀢𑁆𑀯𑀸𑀯 𑀅𑀦𑁆𑀢𑀭𑀦𑁆𑀢𑀭𑁂 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁, 𑀓𑀘𑀯𑀭𑀙𑀟𑁆𑀟𑀦𑀓𑀸𑀮𑁂 𑀧𑀦 𑀓𑀘𑀯𑀭𑀦𑀺𑀬𑀸𑀫𑁂𑀦𑁂𑀯 𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬 𑀮𑀩𑁆𑀪𑀫𑀸𑀦𑁂𑀲𑀼 𑀧𑀦 𑀯𑀻𑀡𑀸𑀤𑁄𑀡𑀺𑀓𑀜𑁆𑀘 𑀪𑁂𑀭𑀺𑀧𑁄𑀓𑁆𑀔𑀭𑀜𑁆𑀘 𑀤𑀦𑁆𑀢𑀓𑀝𑁆𑀞𑀪𑀸𑀚𑀦𑀁 ¶ 𑀓𑀭𑀺𑀲𑁆𑀲𑀸𑀫 𑀘𑀫𑁆𑀫𑀁 𑀲𑀢𑁆𑀣𑀓𑀓𑁄𑀲𑀓𑀦𑁆𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀉𑀧𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀢𑀣𑀸 𑀢𑀣𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀯𑀢𑁆𑀣𑀼 𑀉𑀢𑁆𑀢𑀸𑀦𑀫𑁂𑀯. 𑀬𑀓𑁆𑀔𑀺𑀯𑀢𑁆𑀣𑀼𑀲𑁆𑀫𑀺𑀁 𑀲𑀘𑁂𑀧𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀢𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀧𑀡𑁆𑀟𑀓𑀯𑀢𑁆𑀣𑀼 𑀘 𑀲𑀼𑀢𑁆𑀢𑀺𑀢𑁆𑀣𑀺𑀯𑀢𑁆𑀣𑀼 𑀘 𑀧𑀸𑀓𑀝𑀫𑁂𑀯. 𑀫𑀢𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀓𑀸𑀮𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀢𑁄 𑀧𑀭𑀁 𑀤𑀼𑀓𑁆𑀓𑀝𑀁. 𑀢𑀺𑀭𑀘𑁆𑀙𑀸𑀦𑀕𑀢𑀯𑀢𑁆𑀣𑀼𑀲𑁆𑀫𑀺𑀁 ¶ 𑀦𑀸𑀕𑀫𑀸𑀡𑀯𑀺𑀓𑀸𑀬𑀧𑀺 𑀲𑀼𑀧𑀡𑁆𑀡𑀫𑀸𑀡𑀯𑀺𑀓𑀸𑀬𑀧𑀺 𑀓𑀺𑀦𑁆𑀦𑀭𑀺𑀬𑀸𑀧𑀺 𑀕𑀸𑀯𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀤𑀸𑀭𑀼𑀥𑀻𑀢𑀮𑀺𑀓𑀸𑀯𑀢𑁆𑀣𑀼𑀲𑁆𑀫𑀺𑀁 ¶ 𑀦 𑀓𑁂𑀯𑀮𑀁 𑀤𑀸𑀭𑀼𑀦𑀸 𑀏𑀯, 𑀅𑀦𑁆𑀢𑀫𑀲𑁄 𑀘𑀺𑀢𑁆𑀢𑀓𑀫𑁆𑀫𑀮𑀺𑀔𑀺𑀢𑁂𑀧𑀺 𑀇𑀢𑁆𑀣𑀺𑀭𑀽𑀧𑁂 𑀤𑀼𑀓𑁆𑀓𑀝𑀫𑁂𑀯.

𑁨𑁮𑁨. 𑀲𑀫𑁆𑀧𑀻𑀴𑀦𑀯𑀢𑁆𑀣𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀗𑁆𑀓𑀫𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀧𑀤𑀺𑀓𑀲𑀗𑁆𑀓𑀫𑁄 𑀯𑀸 𑀳𑁄𑀢𑀼 𑀲𑀓𑀝𑀫𑀕𑁆𑀕𑀲𑀗𑁆𑀓𑀫𑁄 𑀯𑀸, 𑀘𑀸𑀮𑁂𑀲𑁆𑀲𑀸𑀫𑀻𑀢𑀺 𑀧𑀬𑁄𑀕𑁂 𑀓𑀢𑀫𑀢𑁆𑀢𑁂𑀯 𑀘𑀸𑀮𑁂𑀢𑀼 𑀯𑀸 𑀫𑀸 𑀯𑀸, 𑀤𑀼𑀓𑁆𑀓𑀝𑀁. 𑀫𑀕𑁆𑀕𑀯𑀢𑁆𑀣𑀼 𑀧𑀸𑀓𑀝𑀫𑁂𑀯. 𑀭𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁 𑀭𑀼𑀓𑁆𑀔𑁄 𑀫𑀳𑀦𑁆𑀢𑁄 𑀯𑀸 𑀳𑁄𑀢𑀼 𑀫𑀳𑀸𑀚𑀫𑁆𑀩𑀼𑀧𑁆𑀧𑀫𑀸𑀡𑁄 𑀔𑀼𑀤𑁆𑀤𑀓𑁄 𑀯𑀸, 𑀢𑀁 𑀘𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀼 𑀯𑀸 𑀫𑀸 𑀯𑀸, 𑀧𑀬𑁄𑀕𑀫𑀢𑁆𑀢𑁂𑀦 𑀤𑀼𑀓𑁆𑀓𑀝𑀁. 𑀦𑀸𑀯𑀸𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀭𑀚𑁆𑀚𑀯𑀢𑁆𑀣𑀼𑀲𑁆𑀫𑀺𑀁 𑀬𑀁 𑀭𑀚𑁆𑀚𑀼𑀁 𑀆𑀯𑀺𑀜𑁆𑀙𑀦𑁆𑀢𑁄 𑀞𑀸𑀦𑀸 𑀘𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀸 𑀫𑀳𑀸𑀭𑀚𑁆𑀚𑀼 𑀳𑁄𑀢𑀺, 𑀈𑀲𑀓𑀫𑁆𑀧𑀺 𑀞𑀸𑀦𑀸 𑀦 𑀘𑀮𑀢𑀺, 𑀢𑀢𑁆𑀣 𑀤𑀼𑀓𑁆𑀓𑀝𑀁. 𑀤𑀡𑁆𑀟𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀽𑀫𑀺𑀬𑀁 𑀧𑀢𑀺𑀢𑀫𑀳𑀸𑀭𑀼𑀓𑁆𑀔𑁄𑀧𑀺 𑀳𑀺 𑀤𑀡𑁆𑀟𑀕𑁆𑀕𑀳𑀡𑁂𑀦𑁂𑀯 𑀇𑀥 𑀕𑀳𑀺𑀢𑁄. 𑀧𑀢𑁆𑀢𑀯𑀢𑁆𑀣𑀼 𑀧𑀸𑀓𑀝𑀫𑁂𑀯. 𑀯𑀦𑁆𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀇𑀢𑁆𑀣𑀻 𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀯𑀸𑀭𑁂𑀢𑀩𑁆𑀩𑀸 𑀧𑀸𑀤𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀸, 𑀦𑀺𑀘𑁆𑀘𑀮𑁂𑀦 𑀯𑀸 𑀪𑀯𑀺𑀢𑀩𑁆𑀩𑀁. 𑀦𑀺𑀘𑁆𑀘𑀮𑀲𑁆𑀲 𑀳𑀺 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀯𑀲𑀸𑀦𑁂 𑀕𑀳𑀡𑀯𑀢𑁆𑀣𑀼𑀧𑀸𑀓𑀝𑀫𑁂𑀯𑀸𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀆𑀤𑀺𑀲𑁆𑀲𑀸𑀢𑀺 𑀅𑀧𑀤𑀺𑀲𑀺𑀢𑁆𑀯𑀸. 𑀯𑀡𑁆𑀡𑀫𑁆𑀧𑀺 𑀪𑀡𑀢𑀻𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀙𑀺𑀦𑁆𑀦𑀺𑀓𑀸𑀢𑀺 𑀙𑀺𑀦𑁆𑀦𑀑𑀢𑁆𑀢𑀧𑁆𑀧𑀸. 𑀥𑀼𑀢𑁆𑀢𑀺𑀓𑀸𑀢𑀺 𑀲𑀞𑀸. 𑀅𑀳𑀺𑀭𑀺𑀓𑀸𑀬𑁄𑀢𑀺 𑀦𑀺𑀮𑁆𑀮𑀚𑁆𑀚𑀸 ¶ . 𑀉𑀳𑀲𑀦𑁆𑀢𑀻𑀢𑀺 𑀲𑀺𑀢𑀁 𑀓𑀢𑁆𑀯𑀸 𑀫𑀦𑁆𑀤𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀉𑀮𑁆𑀮𑀧𑀦𑁆𑀢𑀻𑀢𑀺 ‘‘𑀅𑀳𑁄 𑀅𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀘𑁆𑀘𑀓𑀭𑀡𑀺𑀁 𑀦𑀸𑀦𑀸𑀯𑀺𑀥𑀁 𑀧𑀮𑁄𑀪𑀦𑀓𑀣𑀁 𑀓𑀣𑁂𑀦𑁆𑀢𑀺. 𑀉𑀚𑁆𑀚𑀕𑁆𑀖𑀦𑁆𑀢𑀻𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑀺. 𑀉𑀧𑁆𑀧𑀡𑁆𑀟𑁂𑀦𑁆𑀢𑀻𑀢𑀺 ‘‘𑀧𑀡𑁆𑀟𑀓𑁄 𑀅𑀬𑀁, 𑀦𑀸𑀬𑀁 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺.

𑁨𑁮𑁫. 𑀲𑀸𑀭𑀢𑁆𑀢𑁄𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦 𑀲𑀸𑀭𑀢𑁆𑀢𑁄. 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀦𑀬𑀫𑁂𑀯, 𑀓𑁂𑀯𑀮𑀁 𑀇𑀥 𑀯𑀸𑀘𑀲𑁆𑀲𑀸𑀤𑀭𑀸𑀕𑁄 𑀬𑁄𑀚𑁂𑀢𑀩𑁆𑀩𑁄. 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀻𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀁 𑀫𑀸𑀢𑀼𑀕𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀼𑀕𑀸𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀦𑁆𑀢𑀺 𑀬𑀸 𑀧𑀡𑁆𑀟𑀺𑀢𑀸 𑀲𑀸𑀢𑁆𑀣𑀓𑀦𑀺𑀭𑀢𑁆𑀣𑀓𑀓𑀣𑀁 𑀅𑀲𑀤𑁆𑀥𑀫𑁆𑀫𑀲𑀤𑁆𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀜𑁆𑀘 𑀚𑀸𑀦𑀺𑀢𑀼𑀁 𑀧𑀝𑀺𑀩𑀮𑀸, 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀬𑀸 𑀧𑀦 𑀫𑀳𑀮𑁆𑀮𑀺𑀓𑀸𑀧𑀺 𑀩𑀸𑀮𑀸 𑀏𑀮𑀫𑀽𑀕𑀸 𑀅𑀬𑀁 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀑𑀪𑀸𑀲𑁂𑀬𑁆𑀬𑀸𑀢𑀺 ¶ 𑀅𑀯𑀪𑀸𑀲𑁂𑀬𑁆𑀬 𑀦𑀸𑀦𑀸𑀧𑁆𑀧𑀓𑀸𑀭𑀓𑀁 𑀅𑀲𑀤𑁆𑀥𑀫𑁆𑀫𑀯𑀘𑀦𑀁 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀯𑀁 𑀑𑀪𑀸𑀲𑀦𑁆𑀢𑀲𑁆𑀲 𑀬𑁄 𑀲𑁄 𑀑𑀪𑀸𑀲𑁄 𑀦𑀸𑀫, 𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀺 𑀭𑀸𑀕𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀲𑀜𑁆𑀜𑀫𑀯𑁂𑀮𑀁 𑀆𑀘𑀸𑀭𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀪𑀸𑀲𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀬𑀼𑀯𑀸 𑀬𑀼𑀯𑀢𑀺𑀦𑁆𑀢𑀺 𑀅𑀢𑁆𑀣𑁄.

𑀤𑁆𑀯𑁂 𑀫𑀕𑁆𑀕𑁂 𑀆𑀤𑀺𑀲𑁆𑀲𑀸𑀢𑀺𑀆𑀤𑀺 𑀬𑁂𑀦𑀸𑀓𑀸𑀭𑁂𑀦 𑀑𑀪𑀸𑀲𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑁂 𑀫𑀕𑁆𑀕𑁂𑀢𑀺 𑀯𑀘𑁆𑀘𑀫𑀕𑁆𑀕𑀜𑁆𑀘 𑀧𑀲𑁆𑀲𑀸𑀯𑀫𑀕𑁆𑀕𑀜𑁆𑀘. 𑀲𑁂𑀲𑀁 𑀉𑀤𑁆𑀤𑁂𑀲𑁂 𑀢𑀸𑀯 𑀧𑀸𑀓𑀝𑀫𑁂𑀯. 𑀦𑀺𑀤𑁆𑀤𑁂𑀲𑁂 𑀧𑀦 𑀣𑁄𑀫𑁂𑀢𑀻𑀢𑀺 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀦 𑀢𑀸𑀯 𑀲𑀻𑀲𑀁 𑀏𑀢𑀺. ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀈𑀤𑀺𑀲𑁄 𑀢𑁂𑀦 𑀦𑀸𑀫 𑀈𑀤𑀺𑀲𑁂𑀦 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀲𑀻𑀲𑀁 𑀏𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀻𑀢𑀺 𑀇𑀫𑀸𑀦𑀺 𑀧𑀦 𑀣𑁄𑀫𑀦𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺.

𑀔𑀼𑀁𑀲𑁂𑀢𑀻𑀢𑀺 𑀯𑀸𑀘𑀸𑀧𑀢𑁄𑀤𑁂𑀦 𑀖𑀝𑁆𑀝𑁂𑀢𑀺. 𑀯𑀫𑁆𑀪𑁂𑀢𑀻𑀢𑀺 𑀅𑀧𑀲𑀸𑀤𑁂𑀢𑀺. 𑀕𑀭𑀳𑀢𑀻𑀢𑀺 𑀤𑁄𑀲𑀁 𑀤𑁂𑀢𑀺. 𑀧𑀭𑀢𑁄 𑀧𑀦 𑀧𑀸𑀴𑀺𑀬𑀸 𑀆𑀕𑀢𑁂𑀳𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀳𑀺 ¶ 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀖𑀝𑀺𑀢𑁂 𑀲𑀻𑀲𑀁 𑀦 𑀏𑀢𑀺, 𑀖𑀝𑀺𑀢𑁂𑀧𑀺 𑀢𑁂𑀲𑀼 𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀤𑁂𑀳𑀺 𑀫𑁂𑀢𑀺 𑀬𑀸𑀘𑀦𑀸𑀬𑀧𑀺 𑀏𑀢𑁆𑀢𑀓𑁂𑀦𑁂𑀯 𑀲𑀻𑀲𑀁 𑀦 𑀏𑀢𑀺, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀏𑀯𑀁 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀆𑀬𑀸𑀘𑀦𑀯𑀘𑀦𑁂𑀲𑀼𑀧𑀺 𑀏𑀢𑁆𑀢𑀓𑁂𑀦𑁂𑀯 ¶ 𑀲𑀻𑀲𑀁 𑀦 𑀏𑀢𑀺, ‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀢𑀯 𑀫𑀸𑀢𑀭𑀺 𑀧𑀲𑀦𑁆𑀦𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 𑀫𑁂𑀣𑀼𑀦𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀇𑀢𑀭𑀣𑀸. 𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻𑀢𑀺 𑀧𑀝𑀺𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀘𑀺𑀓𑁆𑀔𑀦𑀸𑀬 𑀧𑀼𑀝𑁆𑀞𑁄 𑀪𑀡𑀢𑀻𑀢𑀺 ‘‘𑀓𑀣𑀁 𑀤𑀤𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀳𑁄𑀢𑀻’’𑀢𑀺 𑀏𑀯𑀁 𑀧𑀼𑀝𑁆𑀞𑁄 𑀆𑀘𑀺𑀓𑁆𑀔𑀢𑀺. 𑀏𑀢𑁆𑀣 𑀘 ‘‘𑀏𑀯𑀁 ¶ 𑀤𑁂𑀳𑀺 𑀏𑀯𑀁 𑀤𑀤𑀫𑀸𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀻𑀲𑀁 𑀦 𑀏𑀢𑀺. ‘‘𑀫𑁂𑀣𑀼𑀦𑀥𑀫𑁆𑀫𑀁 𑀏𑀯𑀁 𑀤𑁂𑀳𑀺 𑀏𑀯𑀁 𑀉𑀧𑀦𑁂𑀳𑀺 𑀏𑀯𑀁 𑀫𑁂𑀣𑀼𑀦𑀥𑀫𑁆𑀫𑀁 𑀤𑀤𑀫𑀸𑀦𑀸 𑀉𑀧𑀦𑀬𑀫𑀸𑀦𑀸 𑀧𑀺𑀬𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀦𑀼𑀲𑀸𑀲𑀦𑀻𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑁆𑀓𑁄𑀲𑀦𑀺𑀤𑁆𑀤𑁂𑀲𑁂 𑁋 𑀅𑀦𑀺𑀫𑀺𑀢𑁆𑀢𑀸𑀲𑀻𑀢𑀺 𑀦𑀺𑀫𑀺𑀢𑁆𑀢𑀭𑀳𑀺𑀢𑀸𑀲𑀺, 𑀓𑀼𑀜𑁆𑀘𑀺𑀓𑀧𑀡𑀸𑀮𑀺𑀫𑀢𑁆𑀢𑀫𑁂𑀯 𑀢𑀯 𑀤𑀓𑀲𑁄𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀻𑀢𑀺 𑀢𑀯 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀅𑀧𑀭𑀺𑀧𑀼𑀡𑁆𑀡𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁄𑀳𑀺𑀢𑀸𑀢𑀺 𑀲𑀼𑀓𑁆𑀔𑀲𑁄𑀢𑀸. 𑀥𑀼𑀯𑀮𑁄𑀳𑀺𑀢𑀸𑀢𑀺 𑀦𑀺𑀘𑁆𑀘𑀮𑁄𑀳𑀺𑀢𑀸 𑀓𑀺𑀮𑀺𑀦𑁆𑀦𑀤𑀓𑀲𑁄𑀢𑀸. 𑀥𑀼𑀯𑀘𑁄𑀴𑀸𑀢𑀺 𑀦𑀺𑀘𑁆𑀘𑀧𑀓𑁆𑀔𑀺𑀢𑁆𑀢𑀸𑀡𑀺𑀘𑁄𑀴𑀸, 𑀲𑀤𑀸 𑀆𑀡𑀺𑀘𑁄𑀴𑀓𑀁 𑀲𑁂𑀯𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀕𑁆𑀖𑀭𑀦𑁆𑀢𑀻𑀢𑀺 𑀲𑀯𑀦𑁆𑀢𑀻; 𑀲𑀤𑀸 𑀢𑁂 𑀫𑀼𑀢𑁆𑀢𑀁 𑀲𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀔𑀭𑀡𑀻𑀢𑀺 𑀩𑀳𑀺𑀦𑀺𑀓𑁆𑀔𑀦𑁆𑀢𑀆𑀡𑀺𑀫𑀁𑀲𑀸. 𑀇𑀢𑁆𑀣𑀺𑀧𑀡𑁆𑀟𑀓𑀸𑀢𑀺 𑀅𑀦𑀺𑀫𑀺𑀢𑁆𑀢𑀸𑀯 𑀯𑀼𑀘𑁆𑀘𑀢𑀺. 𑀯𑁂𑀧𑀼𑀭𑀺𑀲𑀺𑀓𑀸𑀢𑀺 𑀲𑀫𑀲𑁆𑀲𑀼𑀤𑀸𑀞𑀺𑀓𑀸 𑀧𑀼𑀭𑀺𑀲𑀭𑀽𑀧𑀸 ¶ 𑀇𑀢𑁆𑀣𑀻. 𑀲𑀫𑁆𑀪𑀺𑀦𑁆𑀦𑀸𑀢𑀺 𑀲𑀫𑁆𑀪𑀺𑀦𑁆𑀦𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂𑀦 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀘𑀸𑀢𑀺 𑀉𑀪𑁄𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸.

𑀇𑀫𑁂𑀲𑀼 𑀘 𑀧𑀦 𑀏𑀓𑀸𑀤𑀲𑀲𑀼 𑀧𑀤𑁂𑀲𑀼 𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀫𑀸𑀦𑀺𑀬𑁂𑀯 𑀢𑀻𑀡𑀺 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀲𑀻𑀲𑀁 𑀏𑀦𑁆𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀢𑀻𑀡𑀺 𑀧𑀼𑀭𑀺𑀫𑀸𑀦𑀺 𑀘 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀤𑀸𑀦𑀺 𑀢𑀻𑀡𑀻𑀢𑀺 𑀙 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀆𑀧𑀢𑁆𑀢𑀺𑀓𑀭𑀸𑀦𑀺. 𑀲𑁂𑀲𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀢𑀺𑀆𑀤𑀻𑀦𑀺 ‘‘𑀅𑀦𑀺𑀫𑀺𑀢𑁆𑀢𑁂 ¶ 𑀫𑁂𑀣𑀼𑀦𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀫𑁂𑀣𑀼𑀦𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑀸𑀦𑁂𑀯 𑀆𑀧𑀢𑁆𑀢𑀺𑀓𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁮𑁬. 𑀇𑀤𑀸𑀦𑀺 𑀬𑁆𑀯𑀸𑀬𑀁 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀑𑀪𑀸𑀲𑀢𑀺, 𑀢𑀲𑁆𑀲 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀆𑀤𑀺𑀲𑁆𑀲 𑀏𑀢𑁂𑀲𑀁 𑀯𑀡𑁆𑀡𑀪𑀡𑀦𑀸𑀤𑀻𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀅𑀢𑁆𑀣𑁄 𑀓𑀸𑀬𑀲𑀁𑀲𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀥𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀅𑀓𑁆𑀔𑀓𑀁 𑀧𑀦 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀏𑀢𑁆𑀣𑁂𑀯 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬. 𑀦 𑀳𑀺 𑀩𑀼𑀤𑁆𑀥𑀸 𑀕𑀭𑀼𑀓𑀸𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀢𑁆𑀣𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀆𑀪𑀭𑀡𑀁 𑀯𑀸.

𑁨𑁮𑁭. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 ¶ 𑀅𑀦𑀺𑀫𑀺𑀢𑁆𑀢𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲, 𑀅𑀝𑁆𑀞𑀓𑀣𑀁 𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀲𑁆𑀲.

𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀯𑀸. 𑀏𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀧𑀼𑀭𑀓𑁆𑀔𑀢𑁆𑀯𑀸 𑀪𑀡𑀦𑁆𑀢𑀲𑁆𑀲 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀘 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺.

𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀅𑀦𑀺𑀫𑀺𑀢𑁆𑀢𑀸𑀲𑀺 𑀉𑀪𑀢𑁆𑀢𑁄𑀩𑁆𑀬𑀜𑁆𑀚𑀦𑀸𑀲𑀺 𑀅𑀧𑁆𑀧𑀫𑀸𑀤𑀁 𑀇𑀤𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀸 𑀦 𑀳𑁄𑀳𑀺𑀲𑀻’’𑀢𑀺 𑀏𑀯𑀁 𑀅𑀦𑀼𑀲𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀪𑀡𑀦𑁆𑀢𑀲𑁆𑀲 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑁄 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀧𑀓𑀢𑀺𑀯𑀸𑀘𑀦𑀸𑀫𑀕𑁆𑀕𑀁 𑀧𑀳𑀸𑀬 𑀳𑀲𑀦𑁆𑀢𑁄 𑀳𑀲𑀦𑁆𑀢𑁄 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀡𑀢𑀺, 𑀢𑀲𑁆𑀲 ¶ 𑀆𑀧𑀢𑁆𑀢𑀺𑀬𑁂𑀯. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀥 𑀆𑀤𑀺𑀓𑀫𑁆𑀫𑀺𑀓𑁄 𑀉𑀤𑀸𑀬𑀺𑀢𑁆𑀣𑁂𑀭𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁 ¶ , 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑁨𑁮𑁮. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀮𑁄𑀳𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑀸 𑀮𑁄𑀳𑀺𑀢𑀓𑀁 𑀦𑀺𑀫𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳 𑁋 𑀇𑀢𑀭𑀸 𑀦 𑀅𑀜𑁆𑀜𑀸𑀲𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁.

𑀓𑀓𑁆𑀓𑀲𑀮𑁄𑀫𑀦𑁆𑀢𑀺 𑀭𑀲𑁆𑀲𑀮𑁄𑀫𑁂𑀳𑀺 𑀩𑀳𑀼𑀮𑁄𑀫𑀁. 𑀆𑀓𑀺𑀡𑁆𑀡𑀮𑁄𑀫𑀦𑁆𑀢𑀺 𑀚𑀝𑀺𑀢𑀮𑁄𑀫𑀁. 𑀔𑀭𑀮𑁄𑀫𑀦𑁆𑀢𑀺 𑀣𑀤𑁆𑀥𑀮𑁄𑀫𑀁. 𑀤𑀻𑀖𑀮𑁄𑀫𑀦𑁆𑀢𑀺 𑀅𑀭𑀲𑁆𑀲𑀮𑁄𑀫𑀁. 𑀲𑀩𑁆𑀩𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁮𑁯. 𑀯𑀸𑀧𑀺𑀢𑀁 𑀔𑁄 𑀢𑁂𑀢𑀺 𑀅𑀲𑀤𑁆𑀥𑀫𑁆𑀫𑀁 𑀲𑀦𑁆𑀥𑀸𑀬𑀸𑀳, 𑀲𑀸 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢𑀦𑁆𑀢𑀺 𑀆𑀳. 𑀧𑀝𑀺𑀯𑀼𑀢𑁆𑀢𑀁 𑀦𑀸𑀫 𑀉𑀤𑀓𑀯𑀧𑁆𑀧𑁂 𑀩𑀻𑀚𑁂𑀳𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂 𑀧𑀸𑀡𑀓𑁂𑀳𑀺 𑀯𑀺𑀦𑀸𑀲𑀺𑀢𑀩𑀻𑀚𑁂 𑀯𑀸 𑀑𑀓𑀸𑀲𑁂 𑀧𑀼𑀦 𑀩𑀻𑀚𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑀓𑁂𑀦 𑀆𑀲𑀺𑀢𑁆𑀢𑀁, 𑀣𑀮𑀯𑀧𑁆𑀧𑁂 𑀯𑀺𑀲𑀫𑀧𑀢𑀺𑀢𑀸𑀦𑀁 𑀯𑀸 𑀩𑀻𑀚𑀸𑀦𑀁 𑀲𑀫𑀓𑀭𑀡𑀢𑁆𑀣𑀸𑀬 𑀧𑀼𑀦 𑀅𑀝𑁆𑀞𑀤𑀦𑁆𑀢𑀓𑁂𑀦 𑀲𑀫𑀻𑀓𑀢𑀁, 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀏𑀲𑀸 𑀆𑀳.

𑀫𑀕𑁆𑀕𑀯𑀢𑁆𑀣𑀼𑀲𑁆𑀫𑀺𑀁 ¶ 𑀫𑀕𑁆𑀕𑁄 𑀲𑀁𑀲𑀻𑀤𑀢𑀻𑀢𑀺 𑀅𑀗𑁆𑀕𑀚𑀸𑀢𑀫𑀕𑁆𑀕𑀁 𑀲𑀦𑁆𑀥𑀸𑀬𑀸𑀳. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑀼𑀮𑀽𑀧𑀓𑁄𑀢𑀺 𑀓𑀼𑀮𑀧𑀬𑀺𑀭𑀼𑀧𑀸𑀲𑀦𑀓𑁄 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀸𑀬 𑀓𑀼𑀮𑀽𑀧𑀲𑀗𑁆𑀓𑀫𑀦𑁂 𑀦𑀺𑀘𑁆𑀘𑀧𑁆𑀧𑀬𑀼𑀢𑁆𑀢𑁄.

𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 ¶ 𑀘𑀻𑀯𑀭𑀜𑁆𑀘 𑀧𑀺𑀡𑁆𑀟𑀧𑀸𑀢𑀜𑁆𑀘 𑀲𑁂𑀦𑀸𑀲𑀦𑀜𑁆𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀜𑁆𑀘. 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀘𑁂𑀢𑁆𑀣 𑀧𑀢𑀺𑀓𑀭𑀡𑀢𑁆𑀣𑁂𑀦 𑀧𑀘𑁆𑀘𑀬𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀪𑁂𑀲𑀚𑁆𑀚𑀁. 𑀕𑀺𑀮𑀸𑀦𑀧𑀘𑁆𑀘𑀬𑁄𑀯 𑀪𑁂𑀲𑀚𑁆𑀚𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁, 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀪𑀺𑀲𑀓𑁆𑀓𑀓𑀫𑁆𑀫𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀓𑁆𑀔𑀸𑀭𑁄𑀢𑀺 𑀧𑀦 ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁬𑁭) 𑀧𑀭𑀺𑀯𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀭𑀣𑁄 ¶ 𑀲𑀻𑀲𑀧𑀭𑀺𑀓𑁆𑀔𑀸𑀭𑁄 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀅𑀮𑀗𑁆𑀓𑀸𑀭𑁄. ‘‘𑀬𑁂 𑀘𑀺𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 (𑀭𑁄. 𑀦𑀺. 𑁧.𑁧.𑁧𑁯𑁧) 𑀲𑀫𑁆𑀪𑀸𑀭𑁄. 𑀇𑀥 𑀧𑀦 𑀲𑀫𑁆𑀪𑀸𑀭𑁄𑀧𑀺 𑀧𑀭𑀺𑀯𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺 𑀚𑀻𑀯𑀺𑀢𑀯𑀺𑀦𑀸𑀲𑀓𑀸𑀩𑀸𑀥𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀭𑀓𑁆𑀔𑀡𑀢𑁄, 𑀲𑀫𑁆𑀪𑀸𑀭𑁄𑀧𑀺 𑀬𑀣𑀸 𑀘𑀺𑀭𑀁 𑀧𑀯𑀢𑁆𑀢𑀢𑀺 𑀏𑀯𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀜𑁆𑀘 𑀢𑀁 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄, 𑀢𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀲𑀮𑀦𑁆𑀢𑀺 𑀳𑀻𑀦𑀁 𑀮𑀸𑀫𑀓𑀁. 𑀅𑀣 𑀯𑀸 𑀯𑀲𑁆𑀲𑀢𑀻𑀢𑀺 𑀯𑀲𑀮𑁄, 𑀧𑀕𑁆𑀖𑀭𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀯𑀲𑀮𑀁, 𑀅𑀲𑀼𑀘𑀺𑀧𑀕𑁆𑀖𑀭𑀡𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀝𑁆𑀞𑀼𑀳𑀺𑀢𑁆𑀯𑀸𑀢𑀺 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸.

𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻𑀢𑀺 𑀅𑀳𑀁 𑀓𑀲𑁆𑀲𑀸 𑀅𑀜𑁆𑀜𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀓𑁂𑀦 𑀪𑁄𑀕𑁂𑀦 𑀯𑀸 𑀅𑀮𑀗𑁆𑀓𑀸𑀭𑁂𑀦 𑀯𑀸 𑀭𑀽𑀧𑁂𑀦 𑀯𑀸 𑀧𑀭𑀺𑀳𑀸𑀬𑀸𑀫𑀺, 𑀓𑀸 𑀦𑀸𑀫 𑀫𑀬𑀸 𑀉𑀢𑁆𑀢𑀭𑀺𑀢𑀭𑀸𑀢𑀺 𑀤𑀻𑀧𑁂𑀢𑀺.

𑁨𑁯𑁧. 𑀲𑀦𑁆𑀢𑀺𑀓𑁂𑀢𑀺 𑀉𑀧𑀘𑀸𑀭𑁂 𑀞𑀢𑁆𑀯𑀸 𑀲𑀸𑀫𑀦𑁆𑀢𑀸 𑀅𑀯𑀺𑀤𑀽𑀭𑁂, 𑀧𑀤𑀪𑀸𑀚𑀦𑁂𑀧𑀺 𑀅𑀬𑀫𑁂𑀯𑀅𑀢𑁆𑀣𑁄 𑀤𑀻𑀧𑀺𑀢𑁄 ¶ . 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑀸 𑀯𑀸 𑀓𑀸𑀫𑀺𑀢𑀸 𑀇𑀘𑁆𑀙𑀺𑀢𑀸𑀢𑀺 𑀅𑀢𑁆𑀢𑀓𑀸𑀫𑀸, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬. 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀸𑀢𑀺 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀬𑁆𑀬.

𑀢𑀢𑁆𑀭 ¶ 𑀬𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀓𑀸𑀫𑁄 𑀘𑁂𑀯 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄, 𑀲𑁂𑀲𑀁 𑀩𑁆𑀬𑀜𑁆𑀚𑀦𑀁. ‘‘𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀥𑀺𑀧𑁆𑀧𑀸𑀬𑁄 𑀘𑁂𑀯 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄, 𑀲𑁂𑀲𑀁 𑀩𑁆𑀬𑀜𑁆𑀚𑀦𑀁. 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺. ‘‘𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀚𑀸𑀦𑀺𑀲𑁆𑀲𑀦𑁆𑀢𑀺 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀓𑀸𑀫𑀺𑀢𑀝𑁆𑀞𑁂𑀦 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺.

𑀇𑀤𑀸𑀦𑀺 ¶ 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀸𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀤𑁆𑀤𑁂𑀲𑀢𑁄𑀧𑀺 𑀦𑀺𑀤𑁆𑀤𑁂𑀲𑀢𑁄𑀧𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄 𑀘 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀘 𑁋 𑀏𑀢𑀤𑀕𑁆𑀕𑀁…𑀧𑁂… 𑀧𑀭𑀺𑀘𑀭𑁂𑀬𑁆𑀬𑀸𑀢𑀺 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬, 𑀢𑀲𑁆𑀲𑀸 𑀏𑀯𑀁 𑀫𑀸𑀤𑀺𑀲𑀁 𑀧𑀭𑀺𑀘𑀭𑀦𑁆𑀢𑀺𑀬𑀸 𑀬𑀸 𑀅𑀬𑀁 𑀧𑀸𑀭𑀺𑀘𑀭𑀺𑀬𑀸 𑀦𑀸𑀫, 𑀏𑀢𑀤𑀕𑁆𑀕𑀁 𑀧𑀸𑀭𑀺𑀘𑀭𑀺𑀬𑀸𑀦𑀦𑁆𑀢𑀺.

𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀯𑀁 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑁄 𑀘 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀦𑁂𑀯 𑀯𑀘𑀦𑁂𑀦 𑀬𑁄 𑀪𑀸𑀲𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀇𑀥𑀸𑀦𑀺 𑀬𑀲𑁆𑀫𑀸 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦𑁂𑀯 𑀪𑀸𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄, 𑀢𑁆𑀯𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀅𑀭𑀳𑀢𑀺 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀲𑁆𑀲 𑀤𑀸𑀢𑀼𑀁 𑀲𑀫𑀚𑀸𑀢𑀺𑀓𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀯𑀘𑀦𑁂𑀳𑀺 𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀫𑀸𑀦𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀢𑁆𑀣𑀺. ‘‘𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺𑀓𑁂 𑀧𑀦 𑀩𑀳𑀽𑀧𑀺 𑀧𑀭𑀺𑀬𑀸𑀬𑁂 𑀯𑀢𑁆𑀯𑀸 ‘‘𑀅𑀭𑀳𑀲𑀺 𑀢𑁆𑀯𑀁 𑀫𑀬𑁆𑀳𑀁 𑀫𑁂𑀣𑀼𑀦𑀥𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺 𑀏𑀯𑀁 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀦𑁂𑀯 𑀪𑀸𑀲𑀫𑀸𑀦𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀇𑀢𑁆𑀣𑀻 ¶ 𑀘 𑀳𑁄𑀢𑀻𑀢𑀺𑀆𑀤𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀥 𑀉𑀤𑀸𑀬𑀺𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀺 𑀲𑀩𑁆𑀩𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀤𑀺𑀲𑀁. 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁬. 𑀢𑁂𑀦 ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀁. 𑀢𑀢𑁆𑀣 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸 𑀕𑀢𑀺𑀫𑀦𑁆𑀢𑀸. 𑀩𑁆𑀬𑀢𑁆𑀢𑀸𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀉𑀧𑀸𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀬𑀜𑁆𑀜𑀽 𑀯𑀺𑀲𑀸𑀭𑀤𑀸. 𑀫𑁂𑀥𑀸𑀯𑀺𑀦𑀻𑀢𑀺 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀓𑀭𑁄𑀢𑀺. 𑀤𑀓𑁆𑀔𑀸𑀢𑀺 𑀙𑁂𑀓𑀸. 𑀅𑀦𑀮𑀲𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀸. 𑀙𑀦𑁆𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀸.

𑀓𑀺𑀲𑁆𑀫𑀺𑀁 𑀯𑀺𑀬𑀸𑀢𑀺 𑀓𑀺𑀘𑁆𑀙𑀁 𑀯𑀺𑀬 𑀓𑀺𑀮𑁂𑀲𑁄 𑀯𑀺𑀬, 𑀳𑀺𑀭𑀺 𑀯𑀺𑀬 𑀅𑀫𑁆𑀳𑀸𑀓𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀫𑀸𑀭𑀺𑀓𑀸𑀬 𑀯𑀢𑁆𑀢𑀼𑀦𑁆𑀢𑀺 ‘‘𑀇𑀫𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣𑀸’’𑀢𑀺 𑀓𑀼𑀫𑀸𑀭𑀺𑀓𑀸𑀬 𑀓𑀸𑀭𑀡𑀸 𑀯𑀢𑁆𑀢𑀼𑀁.

𑀆𑀯𑀸𑀳𑀸𑀤𑀻𑀲𑀼 𑀆𑀯𑀸𑀳𑁄𑀢𑀺 𑀤𑀸𑀭𑀓𑀲𑁆𑀲 𑀧𑀭𑀓𑀼𑀮𑀢𑁄 𑀤𑀸𑀭𑀺𑀓𑀸𑀬 ¶ 𑀆𑀳𑀭𑀡𑀁. 𑀯𑀺𑀯𑀸𑀳𑁄𑀢𑀺 𑀅𑀢𑁆𑀢𑀦𑁄 𑀤𑀸𑀭𑀺𑀓𑀸𑀬 𑀧𑀭𑀓𑀼𑀮𑀧𑁂𑀲𑀦𑀁. 𑀯𑀸𑀭𑁂𑀬𑁆𑀬𑀦𑁆𑀢𑀺 ‘‘𑀤𑁂𑀣 𑀦𑁄 𑀤𑀸𑀭𑀓𑀲𑁆𑀲 𑀤𑀸𑀭𑀺𑀓’’𑀦𑁆𑀢𑀺 𑀬𑀸𑀘𑀦𑀁, 𑀤𑀺𑀯𑀲𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀭𑀡𑀁 𑀯𑀸.

𑁨𑁯𑁭. 𑀧𑀼𑀭𑀸𑀡𑀕𑀡𑀓𑀺𑀬𑀸𑀢𑀺 𑀏𑀓𑀲𑁆𑀲 𑀕𑀡𑀓𑀲𑁆𑀲 𑀪𑀭𑀺𑀬𑀸𑀬, 𑀲𑀸 𑀢𑀲𑁆𑀫𑀺𑀁 𑀚𑀻𑀯𑀫𑀸𑀦𑁂 𑀕𑀡𑀓𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀫𑀢𑁂 𑀧𑀦 𑀧𑀼𑀭𑀸𑀡𑀕𑀡𑀓𑀻𑀢𑀺 𑀲𑀗𑁆𑀔𑀁 𑀕𑀢𑀸. 𑀢𑀺𑀭𑁄𑀕𑀸𑀫𑁄𑀢𑀺 𑀩𑀳𑀺𑀕𑀸𑀫𑁄, 𑀅𑀜𑁆𑀜𑁄 𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀲𑁆𑀲𑀸𑀢𑀺 𑀉𑀤𑀸𑀬𑀺𑀲𑁆𑀲 𑀇𑀫𑀁 𑀲𑀜𑁆𑀘𑀭𑀺𑀢𑁆𑀢𑀓𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀪𑀸𑀯𑀁 𑀚𑀸𑀦𑀦𑀓𑀫𑀦𑀼𑀲𑁆𑀲𑀸.

𑀲𑀼𑀡𑀺𑀲𑀪𑁄𑀕𑁂𑀦𑀸𑀢𑀺 𑀬𑁂𑀦 𑀪𑁄𑀕𑁂𑀦 𑀲𑀼𑀡𑀺𑀲𑀸 𑀪𑀼𑀜𑁆𑀚𑀺𑀢𑀩𑁆𑀩𑀸 𑀳𑁄𑀢𑀺 𑀭𑀦𑁆𑀥𑀸𑀧𑀦𑀧𑀘𑀸𑀧𑀦𑀧𑀅𑀯𑁂𑀲𑀦𑀸𑀤𑀺𑀦𑀸, 𑀢𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦𑀸𑀢𑀺 𑀫𑀸𑀲𑀸𑀢𑀺𑀓𑁆𑀓𑀫𑁂 𑀬𑁂𑀦 𑀪𑁄𑀕𑁂𑀦 𑀤𑀸𑀲𑀻 𑀪𑀼𑀜𑁆𑀚𑀺𑀢𑀩𑁆𑀩𑀸 𑀳𑁄𑀢𑀺 𑀔𑁂𑀢𑁆𑀢𑀓𑀫𑁆𑀫𑀓𑀘𑀯𑀭𑀙𑀟𑁆𑀟𑀦𑀉𑀤𑀓𑀸𑀳𑀭𑀡𑀸𑀤𑀺𑀦𑀸, 𑀢𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀤𑀼𑀕𑁆𑀕𑀢𑀸𑀢𑀺 𑀤𑀮𑀺𑀤𑁆𑀤𑀸, 𑀬𑀢𑁆𑀣 𑀯𑀸 𑀕𑀢𑀸 𑀤𑀼𑀕𑁆𑀕𑀢𑀸 𑀳𑁄𑀢𑀺 𑀢𑀸𑀤𑀺𑀲𑀁 𑀓𑀼𑀮𑀁 𑀕𑀢𑀸. 𑀫𑀸𑀬𑁆𑀬𑁄 𑀇𑀫𑀁 𑀓𑀼𑀫𑀸𑀭𑀺𑀓𑀦𑁆𑀢𑀺 𑀫𑀸 𑀅𑀬𑁆𑀬𑁄 𑀇𑀫𑀁 𑀓𑀼𑀫𑀸𑀭𑀺𑀓𑀁. 𑀆𑀳𑀸𑀭𑀽𑀧𑀳𑀸𑀭𑁄𑀢𑀺 𑀆𑀳𑀸𑀭𑁄 𑀘 𑀉𑀧𑀳𑀸𑀭𑁄 𑀘 𑀕𑀳𑀡𑀜𑁆𑀘 𑀤𑀸𑀦𑀜𑁆𑀘, 𑀦 𑀅𑀫𑁆𑀳𑁂𑀳𑀺 ¶ 𑀓𑀺𑀜𑁆𑀘𑀺 𑀆𑀳𑀝𑀁 𑀦 𑀉𑀧𑀸𑀳𑀝𑀁 𑀢𑀬𑀸 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑁄 𑀯𑁄𑀳𑀸𑀭𑁄 𑀅𑀫𑁆𑀳𑀸𑀓𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀲𑀫𑀡𑁂𑀦 𑀪𑀯𑀺𑀢𑀩𑁆𑀩𑀁 𑀅𑀩𑁆𑀬𑀸𑀯𑀝𑁂𑀦, 𑀲𑀫𑀡𑁄 𑀅𑀲𑁆𑀲 𑀲𑀼𑀲𑀫𑀡𑁄𑀢𑀺 𑀲𑀫𑀡𑁂𑀦 𑀦𑀸𑀫 𑀈𑀤𑀺𑀲𑁂𑀲𑀼 𑀓𑀫𑁆𑀫𑁂𑀲𑀼 𑀅𑀩𑁆𑀬𑀸𑀯𑀝𑁂𑀦 𑀅𑀩𑁆𑀬𑀸𑀧𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 ¶ 𑀪𑀯𑀦𑁆𑀢𑁄 𑀳𑀺 𑀲𑀫𑀡𑁄 𑀲𑀼𑀲𑀫𑀡𑁄 𑀅𑀲𑁆𑀲𑀸𑀢𑀺, 𑀏𑀯𑀁 𑀦𑀁 𑀅𑀧𑀲𑀸𑀤𑁂𑀢𑁆𑀯𑀸 ‘‘𑀕𑀘𑁆𑀙 𑀢𑁆𑀯𑀁 𑀦 𑀫𑀬𑀁 𑀢𑀁 𑀚𑀸𑀦𑀸𑀫𑀸’’𑀢𑀺 𑀆𑀳𑀁𑀲𑀼.

𑁨𑁯𑁮. 𑀲𑀚𑁆𑀚𑀺𑀢𑁄𑀢𑀺 𑀲𑀩𑁆𑀩𑀽𑀧𑀓𑀭𑀡𑀲𑀫𑁆𑀧𑀦𑁆𑀦𑁄 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄 𑀯𑀸.

𑁩𑁦𑁦. 𑀥𑀼𑀢𑁆𑀢𑀸𑀢𑀺 𑀇𑀢𑁆𑀣𑀺𑀥𑀼𑀢𑁆𑀢𑀸. 𑀧𑀭𑀺𑀘𑀸𑀭𑁂𑀦𑁆𑀢𑀸𑀢𑀺 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀇𑀢𑁄 𑀘𑀺𑀢𑁄 𑀘 𑀲𑀫𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀦𑁆𑀢𑀸, 𑀓𑀻𑀴𑀦𑁆𑀢𑀸 𑀅𑀪𑀺𑀭𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀩𑁆𑀪𑀼𑀢𑀫𑀓𑀁𑀲𑀽𑀢𑀺 𑀬𑀤𑀺 𑀓𑀭𑀺𑀲𑁆𑀲𑀢𑀺 𑀢𑁆𑀯𑀁 𑀏𑀢𑁆𑀢𑀓𑀁 𑀚𑀺𑀢𑁄, 𑀬𑀤𑀺 𑀦 𑀓𑀭𑀺𑀲𑁆𑀲𑀢𑀺 𑀅𑀳𑀁 𑀏𑀢𑁆𑀢𑀓𑀦𑁆𑀢𑀺 𑀧𑀡𑀫𑀓𑀁𑀲𑀼. 𑀪𑀺𑀓𑁆𑀔𑀽𑀦𑀁 𑀧𑀦 𑀅𑀩𑁆𑀪𑀼𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁄 𑀓𑀭𑁄𑀢𑀺 𑀧𑀭𑀸𑀚𑀺𑀢𑁂𑀦 𑀤𑀸𑀢𑀩𑁆𑀩𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀤𑀸𑀬𑀻 𑀢𑀗𑁆𑀔𑀡𑀺𑀓𑀦𑁆𑀢𑀺 𑀏𑀢𑁆𑀣 𑀢𑀗𑁆𑀔𑀡𑁄𑀢𑀺 𑀅𑀘𑀺𑀭𑀓𑀸𑀮𑁄 ¶ 𑀯𑀼𑀘𑁆𑀘𑀢𑀺. 𑀢𑀗𑁆𑀔𑀡𑀺𑀓𑀦𑁆𑀢𑀺 𑀅𑀘𑀺𑀭𑀓𑀸𑀮𑀸𑀥𑀺𑀓𑀸𑀭𑀺𑀓𑀁.

𑁩𑁦𑁧. 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀜𑁆𑀘𑀭𑀡𑀪𑀸𑀯𑀁 𑀲𑀫𑀸𑀧𑀚𑁆𑀚𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀓𑁂𑀦𑀘𑀺 𑀧𑁂𑀲𑀺𑀢𑁂𑀦 𑀓𑀢𑁆𑀣𑀘𑀺 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀧𑀭𑀢𑁄 𑀘 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺’’𑀦𑁆𑀢𑀺 𑀆𑀤𑀺𑀯𑀘𑀦𑀢𑁄 𑀇𑀥 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀳𑀺𑀢𑁄 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀧𑀳𑀺𑀢𑁄 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀦𑁆𑀢𑀺 𑀏𑀢𑁆𑀣 𑀆𑀭𑁄𑀘𑁂𑀬𑁆𑀬𑀸𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀢𑀺, 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀢𑀁 𑀢𑁂𑀲𑀁 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀅𑀚𑁆𑀛𑀸𑀲𑀬𑀁 𑀙𑀦𑁆𑀤𑀁 𑀭𑀼𑀘𑀺𑀁 𑀆𑀭𑁄𑀘𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀬𑀢𑁆𑀢𑀦𑁂𑀢𑀺 𑀚𑀸𑀬𑀸𑀪𑀸𑀯𑁂. 𑀚𑀸𑀭𑀢𑁆𑀢𑀦𑁂𑀢𑀺 𑀚𑀸𑀭𑀪𑀸𑀯𑁂. 𑀧𑀼𑀭𑀺𑀲𑀲𑁆𑀲 𑀳𑀺 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀆𑀭𑁄𑀘𑁂𑀢𑀺, 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀺; 𑀅𑀧𑀺𑀘 𑀧𑀼𑀭𑀺𑀲𑀲𑁆𑀲𑁂𑀯 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀯𑀸 𑀆𑀭𑁄𑀘𑁂𑀢𑀺 𑀦𑀺𑀩𑀤𑁆𑀥𑀪𑀭𑀺𑀬𑀸𑀪𑀸𑀯𑁂, 𑀚𑀸𑀭𑀢𑁆𑀢𑀦𑁂 𑀯𑀸 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑁂. 𑀬𑀲𑁆𑀫𑀸 𑀧𑀦𑁂𑀢𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀢𑁆𑀯𑀁 𑀓𑀺𑀭𑀲𑁆𑀲 𑀚𑀸𑀬𑀸 𑀪𑀯𑀺𑀲𑁆𑀲𑀲𑀻’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀯𑀢𑁆𑀢𑀩𑁆𑀩𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀬𑀢𑁆𑀢𑀦𑁂 𑀯𑀸𑀢𑀺 𑀚𑀸𑀬𑀸 𑀪𑀯𑀺𑀲𑁆𑀲𑀲𑀺, 𑀚𑀸𑀭𑀢𑁆𑀢𑀦𑁂 ¶ 𑀯𑀸𑀢𑀺 𑀚𑀸𑀭𑀻 𑀪𑀯𑀺𑀲𑁆𑀲𑀲𑀻’’𑀢𑀺 𑀅𑀲𑁆𑀲 𑀧𑀤𑀪𑀸𑀚𑀦𑀁 ¶ 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀘 𑀉𑀧𑀸𑀬𑁂𑀦 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑀦𑁂𑀧𑀺 𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀲𑀺, 𑀚𑀸𑀭𑁄 𑀪𑀯𑀺𑀲𑁆𑀲𑀲𑀻𑀢𑀺 𑀯𑀢𑁆𑀢𑀩𑁆𑀩𑀢𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑀸 𑀅𑀬𑀁 𑀢𑀗𑁆𑀔𑀡𑁂 𑀫𑀼𑀳𑀼𑀢𑁆𑀢𑀫𑀢𑁆𑀢𑁂 𑀧𑀝𑀺𑀲𑀁𑀯𑀲𑀺𑀢𑀩𑁆𑀩𑀢𑁄 𑀢𑀗𑁆𑀔𑀡𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀧𑀺 ‘‘𑀫𑀼𑀳𑀼𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 ‘‘𑀫𑀼𑀳𑀼𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁦𑁩. 𑀇𑀤𑀸𑀦𑀺 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺’’𑀦𑁆𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 𑀇𑀢𑁆𑀣𑀺𑀬𑁄 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀼 𑀲𑀜𑁆𑀘𑀭𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀲 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀸𑀢𑀼𑀭𑀓𑁆𑀔𑀺𑀢𑀸𑀢𑀺 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸. 𑀬𑀣𑀸 𑀧𑀼𑀭𑀺𑀲𑁂𑀦 𑀲𑀁𑀯𑀸𑀲𑀁 𑀦 𑀓𑀧𑁆𑀧𑁂𑀢𑀺, 𑀏𑀯𑀁 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀫𑀸𑀢𑀸 𑀭𑀓𑁆𑀔𑀢𑀺 ¶ 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺. 𑀢𑀢𑁆𑀣 𑀭𑀓𑁆𑀔𑀢𑀻𑀢𑀺 𑀓𑀢𑁆𑀣𑀘𑀺 𑀕𑀦𑁆𑀢𑀼𑀁 𑀦 𑀤𑁂𑀢𑀺. 𑀕𑁄𑀧𑁂𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀦 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑀺. 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀻𑀢𑀺 𑀲𑁂𑀭𑀺𑀯𑀺𑀳𑀸𑀭𑀫𑀲𑁆𑀲𑀸 𑀦𑀺𑀲𑁂𑀥𑁂𑀦𑁆𑀢𑀻 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸 𑀅𑀓𑀸𑀲𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀲𑀁 𑀢𑀲𑁆𑀲𑀸 𑀉𑀧𑀭𑀺 𑀯𑀢𑁆𑀢𑁂𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀬𑁄𑀧𑀺 𑀜𑀸𑀢𑀩𑁆𑀩𑀸. 𑀕𑁄𑀢𑁆𑀢𑀁 𑀯𑀸 𑀥𑀫𑁆𑀫𑁄 𑀯𑀸 𑀦 𑀭𑀓𑁆𑀔𑀢𑀺, 𑀲𑀕𑁄𑀢𑁆𑀢𑁂𑀳𑀺 𑀧𑀦 𑀲𑀳𑀥𑀫𑁆𑀫𑀺𑀓𑁂𑀳𑀺 𑀘 𑀏𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀺 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀘 𑀭𑀓𑁆𑀔𑀺𑀢𑀸 ‘‘𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀤𑀸𑀦𑀁 ‘‘𑀲𑀕𑁄𑀢𑁆𑀢𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀲𑀳 𑀆𑀭𑀓𑁆𑀔𑁂𑀦𑀸𑀢𑀺 𑀲𑀸𑀭𑀓𑁆𑀔𑀸. 𑀲𑀳 𑀧𑀭𑀺𑀤𑀡𑁆𑀟𑁂𑀦𑀸𑀢𑀺 𑀲𑀧𑀭𑀺𑀤𑀡𑁆𑀟𑀸. 𑀢𑀸𑀲𑀁 𑀦𑀺𑀤𑁆𑀤𑁂𑀲𑀸 𑀧𑀸𑀓𑀝𑀸𑀯. 𑀇𑀫𑀸𑀲𑀼 𑀤𑀲𑀲𑀼 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀫𑁂𑀯 𑀧𑀼𑀭𑀺𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀻𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀦 𑀇𑀢𑀭𑀸𑀲𑀁.

𑀥𑀦𑀓𑁆𑀓𑀻𑀢𑀸𑀤𑀻𑀲𑀼 𑀅𑀧𑁆𑀧𑁂𑀦 𑀯𑀸 𑀩𑀳𑀼𑀦𑀸 𑀯𑀸 𑀥𑀦𑁂𑀦 𑀓𑀻𑀢𑀸 𑀥𑀦𑀓𑁆𑀓𑀻𑀢𑀸. 𑀬𑀲𑁆𑀫𑀸 𑀧𑀦 𑀲𑀸 𑀦 𑀓𑀻𑀢𑀫𑀢𑁆𑀢𑀸 𑀏𑀯 𑀲𑀁𑀯𑀸𑀲𑀢𑁆𑀣𑀸𑀬 𑀧𑀦 𑀓𑀻𑀢𑀢𑁆𑀢𑀸 𑀪𑀭𑀺𑀬𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁.

𑀙𑀦𑁆𑀤𑁂𑀦 ¶ 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀲𑀢𑀻𑀢𑀺 𑀙𑀦𑁆𑀤𑀯𑀸𑀲𑀺𑀦𑀻. 𑀬𑀲𑁆𑀫𑀸 𑀧𑀦 𑀲𑀸 𑀦 𑀅𑀢𑁆𑀢𑀦𑁄 𑀙𑀦𑁆𑀤𑀫𑀢𑁆𑀢𑁂𑀦𑁂𑀯 ¶ 𑀪𑀭𑀺𑀬𑀸 𑀳𑁄𑀢𑀺 𑀧𑀼𑀭𑀺𑀲𑁂𑀦 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀪𑁄𑀕𑁂𑀦 𑀯𑀲𑀢𑀻𑀢𑀺 𑀪𑁄𑀕𑀯𑀸𑀲𑀺𑀦𑀻. 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀖𑀭𑀽𑀧𑀓𑀭𑀡𑀁 𑀮𑀪𑀺𑀢𑁆𑀯𑀸 𑀪𑀭𑀺𑀬𑀸𑀪𑀸𑀯𑀁 𑀕𑀘𑁆𑀙𑀦𑁆𑀢𑀺𑀬𑀸 𑀚𑀦𑀧𑀤𑀺𑀢𑁆𑀣𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀧𑀝𑁂𑀦 𑀯𑀲𑀢𑀻𑀢𑀺 𑀧𑀝𑀯𑀸𑀲𑀺𑀦𑀻. 𑀦𑀺𑀯𑀸𑀲𑀦𑀫𑀢𑁆𑀢𑀫𑁆𑀧𑀺 𑀧𑀸𑀯𑀼𑀭𑀡𑀫𑀢𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 𑀪𑀭𑀺𑀬𑀸𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀺𑀬𑀸 𑀤𑀮𑀺𑀤𑁆𑀤𑀺𑀢𑁆𑀣𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀑𑀤𑀧𑀢𑁆𑀢𑀓𑀺𑀦𑀻𑀢𑀺 𑀉𑀪𑀺𑀦𑁆𑀦𑀁 𑀏𑀓𑀺𑀲𑁆𑀲𑀸 𑀉𑀤𑀓𑀧𑀸𑀢𑀺𑀬𑀸 𑀳𑀢𑁆𑀣𑁂 𑀑𑀢𑀸𑀭𑁂𑀢𑁆𑀯𑀸 ‘‘𑀇𑀤𑀁 𑀉𑀤𑀓𑀁 𑀯𑀺𑀬 𑀲𑀁𑀲𑀝𑁆𑀞𑀸 𑀅𑀪𑁂𑀚𑁆𑀚𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑀸𑀬 𑀯𑁄𑀳𑀸𑀭𑀦𑀸𑀫𑀫𑁂𑀢𑀁, 𑀦𑀺𑀤𑁆𑀤𑁂𑀲𑁂𑀧𑀺𑀲𑁆𑀲 ‘‘𑀢𑀸𑀬 𑀲𑀳 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀢𑀁 𑀯𑀸𑀲𑁂𑀢𑀻’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀑𑀪𑀝𑀁 𑀑𑀭𑁄𑀧𑀺𑀢𑀁 𑀘𑀼𑀫𑁆𑀩𑀝𑀫𑀲𑁆𑀲𑀸𑀢𑀺 𑀑𑀪𑀝𑀘𑀼𑀫𑁆𑀩𑀝𑀸, 𑀓𑀝𑁆𑀞𑀳𑀸𑀭𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀸, 𑀬𑀲𑁆𑀲𑀸 𑀲𑀻𑀲𑀢𑁄 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀖𑀭𑁂 𑀯𑀸𑀲𑁂𑀢𑀺, 𑀢𑀲𑁆𑀲𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑀤𑀸𑀲𑀻 𑀘𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀤𑀸𑀲𑀻 𑀘 𑀳𑁄𑀢𑀺 𑀪𑀭𑀺𑀬𑀸 𑀘.

𑀓𑀫𑁆𑀫𑀓𑀸𑀭𑀻 𑀦𑀸𑀫 𑀕𑁂𑀳𑁂 𑀪𑀢𑀺𑀬𑀸 𑀓𑀫𑁆𑀫𑀁 ¶ 𑀓𑀭𑁄𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀓𑁄𑀘𑀺 𑀖𑀭𑀸𑀯𑀸𑀲𑀁 𑀓𑀧𑁆𑀧𑁂𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘𑀸’’𑀢𑀺.

𑀥𑀚𑁂𑀦 𑀆𑀳𑀝𑀸 𑀥𑀚𑀸𑀳𑀝𑀸, 𑀉𑀲𑁆𑀲𑀺𑀢𑀤𑁆𑀥𑀚𑀸𑀬 𑀲𑁂𑀦𑀸𑀬 𑀕𑀦𑁆𑀢𑁆𑀯𑀸 𑀧𑀭𑀯𑀺𑀲𑀬𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀆𑀦𑀻𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀓𑁄𑀘𑀺 𑀪𑀭𑀺𑀬𑀁 𑀓𑀭𑁄𑀢𑀺, 𑀅𑀬𑀁 𑀥𑀚𑀸𑀳𑀝𑀸 𑀦𑀸𑀫. 𑀫𑀼𑀳𑀼𑀢𑁆𑀢𑀺𑀓𑀸 𑀯𑀼𑀢𑁆𑀢𑀦𑀬𑀸𑀏𑀯, 𑀏𑀢𑀸𑀲𑀁 𑀤𑀲𑀦𑁆𑀦𑀫𑁆𑀧𑀺 𑀧𑀼𑀭𑀺𑀲𑀦𑁆𑀢𑀭𑀕𑀫𑀦𑁂 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺. 𑀧𑀼𑀭𑀺𑀲𑀸𑀦𑀁 𑀧𑀦 𑀯𑀻𑀲𑀢𑀺𑀬𑀸𑀧𑀺 𑀏𑀢𑀸𑀲𑀼 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀪𑀺𑀓𑁆𑀔𑀼𑀦𑁄 𑀘 𑀲𑀜𑁆𑀘𑀭𑀺𑀢𑁆𑀢𑀁 𑀳𑁄𑀢𑀻𑀢𑀺.

𑁩𑁦𑁫. 𑀇𑀤𑀸𑀦𑀺 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻𑀢𑀺𑀆𑀤𑀻𑀲𑀼 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺, 𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀘𑀦𑀁 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺 𑀯𑀸 ‘‘𑀳𑁄𑀢𑀽’’𑀢𑀺 𑀯𑀸 ‘‘𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀻𑀲𑀓𑀫𑁆𑀧𑀦𑀸𑀤𑀻𑀳𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀯𑀻𑀫𑀁𑀲𑀢𑀻𑀢𑀺 ¶ ¶ 𑀏𑀯𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀢𑁂𑀦 𑀆𑀭𑁄𑀘𑀺𑀢𑁂 𑀲𑀸 𑀇𑀢𑁆𑀣𑀻 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸 𑀧𑀝𑀺𑀓𑁆𑀔𑀺𑀧𑀢𑀼 𑀯𑀸 𑀮𑀚𑁆𑀚𑀸𑀬 𑀯𑀸 𑀢𑀼𑀡𑁆𑀳𑀻 𑀳𑁄𑀢𑀼, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑀺.

𑀏𑀢𑁆𑀢𑀸𑀯𑀢𑀸 𑀇𑀫𑀸𑀬 𑀧𑀝𑀺𑀕𑁆𑀕𑀳𑀡𑀸𑀭𑁄𑀘𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺. 𑀲𑀸 𑀧𑀦 𑀢𑀲𑁆𑀲 𑀪𑀭𑀺𑀬𑀸 𑀳𑁄𑀢𑀼 𑀯𑀸 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀲𑀘𑁂 𑀧𑀦 𑀲𑁄 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑁄 𑀢𑀁 𑀅𑀤𑀺𑀲𑁆𑀯𑀸 𑀢𑀲𑁆𑀲𑀸 𑀫𑀸𑀢𑀼𑀬𑀸 𑀢𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺, 𑀩𑀳𑀺𑀤𑁆𑀥𑀸 𑀯𑀺𑀫𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 𑀫𑀸𑀢𑀸 𑀯𑀸 𑀳𑁄𑀢𑀼 𑀧𑀺𑀢𑀸 𑀯𑀸 𑀅𑀦𑁆𑀢𑀫𑀲𑁄 𑀕𑁂𑀳𑀤𑀸𑀲𑀻𑀧𑀺 𑀅𑀜𑁆𑀜𑁄 𑀯𑀸𑀧𑀺 𑀬𑁄 𑀓𑁄𑀘𑀺 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀺, 𑀢𑀲𑁆𑀲 𑀯𑀼𑀢𑁆𑀢𑁂𑀧𑀺 𑀯𑀺𑀫𑀝𑁆𑀞𑀁 𑀦𑀸𑀫 𑀦 𑀳𑁄𑀢𑀺, 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀆𑀧𑀢𑁆𑀢𑀺𑀬𑁂𑀯.

𑀦𑀦𑀼 𑀬𑀣𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀤𑁂𑀬𑁆𑀬 𑀧𑀘𑁆𑀘𑀓𑁆𑀔𑀸𑀢𑀸𑀯𑀲𑁆𑀲 𑀲𑀺𑀓𑁆𑀔𑀸. 𑀬𑀣𑀸 𑀯𑀸 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀤𑁂𑀬𑁆𑀬 𑀆𑀧𑀦𑁆𑀦𑁄𑀯𑀲𑁆𑀲 ¶ 𑀧𑀸𑀭𑀸𑀚𑀺𑀓𑀁. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀆𑀳. 𑀢𑀁 𑀧𑀦𑁂𑀢𑀁 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑁆𑀢𑁂𑀯𑀸𑀲𑀺𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀢𑀲𑁆𑀫𑀸 𑀲𑀼𑀪𑀸𑀲𑀺𑀢𑀁.

𑀬𑀣𑀸 𑀘 ‘‘𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀢𑀼𑀁 𑀲𑀫𑀢𑁆𑀣𑀸𑀦𑀁 𑀫𑀸𑀢𑀸𑀤𑀻𑀦𑀫𑁆𑀧𑀺 𑀯𑀤𑀢𑁄 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀏𑀯𑀫𑁂𑀯 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀙𑀦𑁆𑀤𑀯𑀸𑀲𑀺𑀦𑀺𑀆𑀤𑀻𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀸 𑀅𑀯𑀼𑀢𑁆𑀢𑁂𑀲𑀼𑀧𑀺 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀚𑀸𑀬𑀸 𑀧𑀚𑀸𑀧𑀢𑀺 𑀧𑀼𑀢𑁆𑀢𑀫𑀸𑀢𑀸 𑀖𑀭𑀡𑀻 𑀖𑀭𑀲𑀸𑀫𑀺𑀦𑀻 𑀪𑀢𑁆𑀢𑀭𑀦𑁆𑀥𑀺𑀓𑀸 𑀲𑀼𑀲𑁆𑀲𑀽𑀲𑀺𑀓𑀸 𑀧𑀭𑀺𑀘𑀸𑀭𑀺𑀓𑀸’’𑀢𑀺𑀏𑀯𑀫𑀸𑀤𑀻𑀲𑀼 𑀲𑀁𑀯𑀸𑀲𑀧𑀭𑀺𑀤𑀻𑀧𑀓𑁂𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀸 𑀯𑀤𑀦𑁆𑀢𑀲𑁆𑀲𑀸𑀧𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. ‘‘𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺 𑀧𑁂𑀲𑀺𑀢𑀲𑁆𑀲 𑀧𑀦 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀲𑀼 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀤𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑀁. 𑀏𑀲 𑀦𑀬𑁄 ‘‘𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼𑀧𑀺.

𑀓𑁂𑀯𑀮𑀜𑁆𑀳𑁂𑀢𑁆𑀣 ¶ 𑀏𑀓𑀫𑀽𑀮𑀓𑀤𑀼𑀫𑀽𑀮𑀓𑀸𑀤𑀺𑀯𑀲𑁂𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺, 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀫𑀽𑀮𑀝𑁆𑀞𑀸𑀦𑀜𑁆𑀘 𑀯𑀲𑁂𑀦 𑀧𑁂𑀬𑁆𑀬𑀸𑀮𑀪𑁂𑀤𑁄𑀬𑁂𑀯 𑀯𑀺𑀲𑁂𑀲𑁄 ¶ . 𑀲𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦𑀸𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀆𑀤𑀭𑀁 𑀓𑀭𑀺𑀫𑁆𑀳.

𑁩𑁩𑁮. 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀆𑀤𑀻𑀲𑀼 𑀧𑀦 𑀤𑁆𑀯𑀻𑀲𑀼 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑀆𑀤𑀺𑀧𑀤𑁂𑀦 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀫𑀚𑁆𑀛𑁂 𑀤𑁆𑀯𑀻𑀳𑀺 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀦𑁆𑀢𑁂 𑀏𑀓𑁂𑀦 𑀏𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀆𑀤𑀺𑀧𑀤𑁂𑀦 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀚𑁆𑀛𑁂 𑀤𑁆𑀯𑀻𑀳𑀺 𑀏𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀅𑀦𑁆𑀢𑁂 𑀏𑀓𑁂𑀦 𑀅𑀗𑁆𑀕𑀸𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀆𑀡𑀸𑀧𑀓𑀲𑁆𑀲 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀯𑀻𑀫𑀁𑀲𑀢𑀻𑀢𑀺 𑀧𑀳𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀭𑁄𑀘𑁂𑀢𑀺. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀫𑀽𑀮𑀝𑁆𑀞𑀲𑁆𑀲 𑀆𑀭𑁄𑀘𑁂𑀢𑀺.

𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀭𑁄𑀘𑁂𑀢𑁆𑀯𑀸 𑀏𑀢𑁆𑀢𑁄𑀯 𑀧𑀓𑁆𑀓𑀫𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀻𑀢𑀺 𑀧𑀼𑀭𑀺𑀲𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀕𑀦𑁆𑀢𑁆𑀯𑀸 𑀩𑁆𑀭𑀽𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀯𑀸 𑀅𑀧𑁆𑀧𑀫𑀼𑀲𑁆𑀲𑀺𑀢𑁆𑀯𑀸 𑀯𑀸 ¶ 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀏𑀢𑁆𑀢𑀸𑀯𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀦𑀁 𑀲𑀸 𑀇𑀢𑁆𑀣𑀻 𑀲𑀬𑀫𑁂𑀯 𑀯𑀤𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀉𑀧𑀝𑁆𑀞𑀸𑀓𑁄 𑀫𑀁 𑀕𑁂𑀳𑁂 𑀓𑀸𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀯𑀢𑁆𑀯𑀸 𑀘 ‘‘𑀅𑀳𑀁 𑀢𑀲𑁆𑀲 𑀪𑀭𑀺𑀬𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀦 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀉𑀝𑁆𑀞𑀸𑀬𑀸𑀲𑀦𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀏𑀢𑁆𑀢𑀸𑀯𑀢𑀸 ‘‘𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀦 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀓𑁂𑀯𑀮𑀁 𑀲𑀸𑀲𑀦𑀸𑀭𑁄𑀘𑀦𑀓𑀸𑀮𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺𑀬𑁂𑀯, 𑀇𑀢𑀭𑀁 𑀧𑀦 𑀤𑁆𑀯𑀬𑀁 𑀦 𑀓𑀭𑁄𑀢𑀺.

𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀻𑀢𑀺 𑀓𑁄𑀘𑀺 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀯𑀸 𑀢𑀣𑀸𑀭𑀽𑀧𑀺𑀁 𑀓𑀣𑀁 𑀓𑀣𑁂𑀢𑀺, 𑀪𑀺𑀓𑁆𑀔𑀼 𑀢𑁂𑀦 𑀅𑀧𑁆𑀧𑀳𑀺𑀢𑁄𑀧𑀺 𑀧𑀳𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀢𑀲𑁆𑀲𑀸 𑀭𑀼𑀘𑀺𑀁 𑀯𑀸 𑀅𑀭𑀼𑀘𑀺𑀁 𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀲 𑀆𑀭𑁄𑀘𑁂𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀅𑀧𑀘𑁆𑀘𑀸𑀳𑀭𑀦𑁆𑀢𑁄 ¶ ‘‘𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀕𑀢𑁄 𑀅𑀯𑀻𑀫𑀁𑀲𑀺𑀢𑁆𑀯𑀸 𑀢𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀞𑀫𑀘𑀢𑀼𑀓𑁆𑀓𑀲𑁆𑀲 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 ‘‘𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀧𑀤𑀁 𑀧𑀸𑀓𑀝𑀫𑁂𑀯.

𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀡𑀸𑀧𑁂𑀢𑀻𑀢𑀺𑀆𑀤𑀺𑀦𑀬𑀸 𑀧𑀸𑀓𑀝𑀸𑀬𑁂𑀯. 𑀬𑀣𑀸 𑀧𑀦 𑀲𑀫𑁆𑀩𑀳𑀼𑀮𑀸𑀧𑀺 𑀏𑀓𑀯𑀢𑁆𑀣𑀼𑀫𑁆𑀳𑀺 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀏𑀓𑀲𑁆𑀲𑀧𑀺 𑀲𑀫𑁆𑀩𑀳𑀼𑀮𑀯𑀢𑁆𑀣𑀽𑀲𑀼 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 ¶ 𑀆𑀡𑀸𑀧𑁂𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀸𑀲𑀸𑀤𑁂 𑀲𑀝𑁆𑀞𑀺𑀫𑀢𑁆𑀢𑀸 𑀯𑀸 𑀲𑀢𑁆𑀢𑀢𑀺𑀫𑀢𑁆𑀢𑀸 𑀯𑀸 𑀇𑀢𑁆𑀣𑀺𑀬𑁄 𑀞𑀺𑀢𑀸 𑀢𑀸 𑀯𑀤𑁂𑀳𑀺, 𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄’’𑀢𑀺. 𑀲𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀢𑀁 𑀲𑀸𑀲𑀦𑀁 𑀧𑀘𑁆𑀘𑀸𑀳𑀭𑀢𑀺. 𑀬𑀢𑁆𑀢𑀓𑀸 𑀇𑀢𑁆𑀣𑀺𑀬𑁄 𑀢𑀢𑁆𑀢𑀓𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂𑀧𑀺 𑁋

‘‘𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦, 𑀯𑀸𑀘𑀸𑀬 𑀪𑀡𑀺𑀢𑁂𑀦 𑀘;

𑀲𑀩𑁆𑀩𑀸𑀦𑀺 𑀕𑀭𑀼𑀓𑀸𑀦𑀺 𑀲𑀧𑁆𑀧𑀝𑀺𑀓𑀫𑁆𑀫𑀸𑀦𑀺;

𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁦);

𑀇𑀫𑀁 ¶ 𑀓𑀺𑀭 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀅𑀬𑀁 𑀧𑀜𑁆𑀳𑁄 𑀯𑀼𑀢𑁆𑀢𑁄. 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀘𑁂𑀢𑁆𑀣 ‘‘𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀭𑁄𑀦𑁆𑀢𑁄 𑀧𑀦 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀆𑀧𑀚𑁆𑀚𑀢𑀻𑀢𑀺. 𑀬𑀣𑀸 𑀘 𑀏𑀓𑁂𑀦 𑀧𑁂𑀲𑀺𑀢𑀲𑁆𑀲 𑀏𑀓𑀲𑁆𑀲 𑀲𑀫𑁆𑀩𑀳𑀼𑀮𑀸𑀲𑀼 𑀇𑀢𑁆𑀣𑀻𑀲𑀼 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄, 𑀏𑀯𑀁 𑀏𑀓𑁄 𑀧𑀼𑀭𑀺𑀲𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀺, 𑀲𑀩𑁆𑀩𑁂𑀲𑀁 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀓𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀺, 𑀇𑀢𑁆𑀣𑀺𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀧𑀼𑀭𑀺𑀲𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀏𑀓𑀺𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀫𑁆𑀩𑀳𑀼𑀮𑀸 𑀧𑀼𑀭𑀺𑀲𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀦𑁆𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀏𑀲 𑀦𑀬𑁄 ‘‘𑀏𑀓𑀸 𑀇𑀢𑁆𑀣𑀻 𑀏𑀓𑀁 𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀏𑀢𑁆𑀣 𑀘 𑀲𑀪𑀸𑀕𑀯𑀺𑀪𑀸𑀕𑀢𑀸 𑀦𑀸𑀫 𑀅𑀧𑁆𑀧𑀫𑀸𑀡𑀁, 𑀫𑀸𑀢𑀸𑀧𑀺𑀢𑀼𑀦𑀫𑁆𑀧𑀺 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀲𑀜𑁆𑀘𑀭𑀺𑀢𑁆𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯.

𑀧𑀼𑀭𑀺𑀲𑁄 ¶ 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑀕𑀘𑁆𑀙 𑀪𑀦𑁆𑀢𑁂𑀢𑀺 𑀘𑀢𑀼𑀓𑁆𑀓𑀁 𑀅𑀗𑁆𑀕𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀘𑁆𑀙𑀺𑀫𑀧𑀤𑁂 𑀅𑀦𑁆𑀢𑁂𑀯𑀸𑀲𑀻 𑀯𑀻𑀫𑀁𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀢𑁆𑀢𑁄𑀯 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀢𑀺. 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺 𑀆𑀘𑀭𑀺𑀬𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀘 𑀯𑀻𑀫𑀁𑀲𑀸𑀧𑀺𑀢𑀢𑁆𑀢𑀸 𑀘 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀻𑀫𑀁𑀲𑀺𑀢𑀢𑁆𑀢𑀸 𑀘 𑀧𑀘𑁆𑀘𑀸𑀳𑀝𑀢𑁆𑀢𑀸 𑀘 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁩𑁩𑁯. 𑀕𑀘𑁆𑀙𑀦𑁆𑀢𑁄 𑀲𑀫𑁆𑀧𑀸𑀤𑁂𑀢𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑁂𑀯 𑀯𑀻𑀫𑀁𑀲𑀢𑀺 𑀘. 𑀆𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺. 𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀆𑀕𑀘𑁆𑀙𑀦𑁆𑀢𑁄 𑀲𑀫𑁆𑀧𑀸𑀤𑁂𑀢𑀻𑀢𑀺 ¶ 𑀯𑀻𑀫𑀁𑀲𑀢𑀺 𑀘𑁂𑀯 𑀧𑀘𑁆𑀘𑀸𑀳𑀭𑀢𑀺 𑀘. 𑀏𑀯𑀁 𑀉𑀪𑀬𑀢𑁆𑀣 𑀤𑁆𑀯𑀻𑀳𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑀺𑀬𑀧𑀤𑁂 𑀆𑀧𑀢𑁆𑀢𑀺, 𑀘𑀢𑀼𑀢𑁆𑀣𑁂 𑀅𑀦𑀸𑀧𑀢𑁆𑀢𑀺.

𑁩𑁪𑁦. 𑀅𑀦𑀸𑀧𑀢𑁆𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑀺 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀯𑀺𑀧𑁆𑀧𑀓𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀼𑀓𑀸𑀦𑀁 ¶ 𑀪𑀢𑁆𑀢𑀯𑁂𑀢𑀦𑀢𑁆𑀣𑀸𑀬 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀳𑀺𑀡𑁂𑀬𑁆𑀬, 𑀉𑀁𑀧𑀸𑀲𑀺𑀓𑀸 𑀯𑀸 𑀉𑀧𑀸𑀲𑀓𑀲𑁆𑀲, 𑀏𑀯𑀭𑀽𑀧𑁂𑀦 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀘𑁂𑀢𑀺𑀬𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀺𑀮𑀸𑀦𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀉𑀧𑀸𑀲𑀓𑁂𑀦 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀉𑀧𑀸𑀲𑀺𑀓𑀸𑀬 𑀯𑀸 𑀉𑀧𑀸𑀲𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀆𑀤𑀺𑀓𑀫𑁆𑀫𑀺𑀓𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀙𑀲𑀫𑀼𑀝𑁆𑀞𑀸𑀦𑀁, 𑀲𑀻𑀲𑀼𑀓𑁆𑀔𑀺𑀧𑀦𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀏𑀯 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 ‘‘𑀇𑀢𑁆𑀣𑀦𑁆𑀦𑀸𑀫𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀆𑀕𑀢𑀁 𑀯𑀢𑁆𑀯𑀸 𑀢𑀲𑁆𑀲𑀸 𑀕𑀢𑀸𑀬 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀆𑀕𑀢𑁂 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀯𑀸𑀘𑀸𑀬 ‘‘𑀲𑀸𑀥𑀽’’𑀢𑀺 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦 𑀢𑀲𑁆𑀲𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀕𑀫𑀦𑀓𑀸𑀮𑁂 𑀢𑀁 𑀤𑀺𑀲𑁆𑀯𑀸 𑀯𑀘𑀻𑀪𑁂𑀤𑁂𑀦𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑁂𑀦𑁂𑀯 ¶ 𑀓𑀭𑀡𑀻𑀬𑁂𑀦 𑀢𑀢𑁄 𑀅𑀧𑀓𑁆𑀓𑀫𑁆𑀫 𑀓𑀤𑀸𑀘𑀺𑀤𑁂𑀯 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀯𑀸𑀘𑀢𑁄𑀯 𑀲𑀫𑀼𑀝𑁆𑀞𑀸𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀦 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀣𑀁? 𑀲𑀘𑁂 𑀳𑀺𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀼𑀚𑁆𑀛𑀺𑀢𑁆𑀯𑀸 𑀅𑀮𑀁𑀯𑀘𑀦𑀻𑀬𑀸 𑀳𑁄𑀦𑁆𑀢𑀺, 𑀢𑀜𑁆𑀘 𑀪𑀺𑀓𑁆𑀔𑀼𑀁 𑀖𑀭𑀁 𑀉𑀧𑀕𑀢𑀁 𑀣𑁂𑀭𑀧𑀺𑀢𑀸 𑀯𑀤𑀢𑀺 ‘‘𑀫𑀸𑀢𑀸 𑀢𑁂 𑀢𑀸𑀢 𑀫𑀁 𑀫𑀳𑀮𑁆𑀮𑀓𑀁 𑀙𑀟𑁆𑀟𑁂𑀢𑁆𑀯𑀸 𑀜𑀸𑀢𑀺𑀓𑀼𑀮𑀁 𑀕𑀢𑀸, 𑀕𑀘𑁆𑀙 𑀢𑀁 𑀫𑀁 𑀉𑀧𑀝𑁆𑀞𑀸𑀢𑀼𑀁 𑀧𑁂𑀲𑁂𑀳𑀻’’𑀢𑀺. 𑀲𑁄 𑀘𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀢𑁆𑀯𑀸 𑀧𑀼𑀦 𑀧𑀺𑀢𑀼𑀦𑁄 𑀢𑀲𑁆𑀲𑀸 𑀆𑀕𑀫𑀦𑀁 𑀯𑀸 𑀅𑀦𑀸𑀕𑀫𑀦𑀁 𑀯𑀸 𑀆𑀭𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀇𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀺.

𑀧𑀡𑁆𑀡𑀢𑁆𑀢𑀺𑀁 𑀧𑀦 𑀚𑀸𑀦𑀺𑀢𑁆𑀯𑀸 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀺. 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘𑁂𑀢𑁆𑀣 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺, 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺.

𑁩𑁪𑁧. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 ¶ 𑀆𑀤𑀺𑀢𑁄 𑀯𑀢𑁆𑀣𑀼𑀧𑀜𑁆𑀘𑀓𑁂 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀁.

𑀓𑀮𑀳𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀅𑀓𑀸𑀲𑀻𑀢𑀺 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 ¶ 𑀧𑀼𑀦 𑀕𑁂𑀳𑀕𑀫𑀦𑀻𑀬𑀁

𑀅𑀓𑀸𑀲𑀺. 𑀦𑀸𑀮𑀁𑀯𑀘𑀦𑀻𑀬𑀸𑀢𑀺 𑀦 𑀧𑀭𑀺𑀘𑁆𑀘𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀸 𑀳𑀺 𑀬𑀣𑀸 𑀬𑀣𑀸 𑀬𑁂𑀲𑀼 𑀬𑁂𑀲𑀼 𑀚𑀦𑀧𑀤𑁂𑀲𑀼 𑀧𑀭𑀺𑀘𑁆𑀘𑀢𑁆𑀢𑀸 𑀧𑀭𑀺𑀘𑁆𑀘𑀢𑁆𑀢𑀸𑀯 𑀳𑁄𑀢𑀺, 𑀪𑀭𑀺𑀬𑀸𑀪𑀸𑀯𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀬𑀁 ‘‘𑀅𑀮𑀁𑀯𑀘𑀦𑀻𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀏𑀲𑀸 𑀧𑀦 𑀦 𑀅𑀮𑀁𑀯𑀘𑀦𑀻𑀬𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀓𑀮𑀳𑀁 𑀓𑀢𑁆𑀯𑀸 𑀕𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂 𑀬𑀓𑁆𑀔𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑀼𑀝𑁆𑀞𑀼𑀮𑁆𑀮𑀸𑀤𑀻𑀲𑀼𑀧𑀺 𑀬𑀓𑁆𑀔𑀺𑀧𑁂𑀢𑀺𑀬𑁄 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦𑁂𑀢𑀁 𑀦 𑀯𑀺𑀘𑀸𑀭𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀆𑀴𑀯𑀓𑀸𑀢𑀺 𑀆𑀴𑀯𑀺𑀭𑀝𑁆𑀞𑁂 𑀚𑀸𑀢𑀸 𑀤𑀸𑀭𑀓𑀸 𑀆𑀴𑀯𑀓𑀸 𑀦𑀸𑀫, 𑀢𑁂 𑀧𑀩𑁆𑀩𑀚𑀺𑀢𑀓𑀸𑀮𑁂𑀧𑀺 ‘‘𑀆𑀴𑀯𑀓𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀴𑀯𑀓𑀸 𑀪𑀺𑀓𑁆𑀔𑀽’’𑀢𑀺. 𑀲𑀜𑁆𑀜𑀸𑀘𑀺𑀓𑀸𑀬𑁄𑀢𑀺 ¶ 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑀽𑀧𑀓𑀭𑀡𑀸𑀬𑁄. 𑀓𑀸𑀭𑀸𑀧𑁂𑀦𑁆𑀢𑀻𑀢𑀺 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀢𑁂 𑀓𑀺𑀭 𑀲𑀸𑀲𑀦𑁂 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘 𑀕𑀦𑁆𑀣𑀥𑀼𑀭𑀜𑁆𑀘𑀸𑀢𑀺 𑀤𑁆𑀯𑁂𑀧𑀺 𑀥𑀼𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀦𑀯𑀓𑀫𑁆𑀫𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀅𑀲𑁆𑀲𑀸𑀫𑀺𑀓𑀸𑀬𑁄𑀢𑀺 𑀅𑀦𑀺𑀲𑁆𑀲𑀭𑀸𑀬𑁄, 𑀓𑀸𑀭𑁂𑀢𑀸 𑀤𑀸𑀬𑀓𑁂𑀦 𑀯𑀺𑀭𑀳𑀺𑀢𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀬𑁄𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀆𑀭𑀤𑁆𑀥𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑀺𑀓𑀸𑀬𑁄𑀢𑀺 ‘‘𑀏𑀢𑁆𑀢𑀓𑁂𑀦 𑀦𑀺𑀝𑁆𑀞𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀸𑀬𑁄, 𑀯𑀼𑀤𑁆𑀥𑀺𑀧𑁆𑀧𑀫𑀸𑀡𑀸𑀬𑁄 𑀯𑀸 𑀫𑀳𑀦𑁆𑀢𑀧𑁆𑀧𑀫𑀸𑀡𑀸𑀬𑁄𑀢𑀺 𑀅𑀢𑁆𑀣𑁄.

𑀬𑀸𑀘𑀦𑀸 𑀏𑀯 𑀩𑀳𑀼𑀮𑀸 𑀏𑀢𑁂𑀲𑀁 𑀫𑀦𑁆𑀤𑀁 𑀅𑀜𑁆𑀜𑀁 𑀓𑀫𑁆𑀫𑀦𑁆𑀢𑀺 𑀬𑀸𑀘𑀦𑀩𑀳𑀼𑀮𑀸. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀢𑁄 𑀧𑀦𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 ‘‘𑀧𑀼𑀭𑀺𑀲𑀁 𑀤𑁂𑀣, 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀧𑀼𑀭𑀺𑀲𑀁 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀳𑀸𑀬𑀢𑁆𑀣𑀸𑀬 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 ‘‘𑀧𑀼𑀭𑀺𑀲𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀲𑀢𑁆𑀣𑀓𑀭𑀦𑁆𑀢𑀺 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑀁 𑀳𑀢𑁆𑀣𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀁 𑀦𑀸𑀫 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 ¶ 𑀞𑀧𑁂𑀢𑁆𑀯𑀸 𑀫𑀺𑀕𑀮𑀼𑀤𑁆𑀤𑀓𑀫𑀘𑁆𑀙𑀩𑀦𑁆𑀥𑀓𑀸𑀤𑀻𑀦𑀁 𑀲𑀓𑀓𑀫𑁆𑀫𑀁 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀓𑀧𑁆𑀧𑀺𑀬𑀁. ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣 𑀓𑁂𑀦 𑀓𑀫𑁆𑀫’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀯𑀸 𑀅𑀧𑀼𑀘𑁆𑀙𑀺𑀢𑁂 𑀯𑀸 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀲𑀓𑀓𑀫𑁆𑀫𑀁 𑀦 𑀬𑀸𑀘𑀺𑀢𑀩𑁆𑀩𑀸, ‘‘𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸; 𑀏𑀯𑀁 ¶ 𑀬𑀸𑀘𑀺𑀢𑀸 𑀳𑀺 𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀺𑀕𑁂𑀧𑀺 𑀫𑀸𑀭𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀼𑀁. 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀯𑀺𑀳𑀸𑀭𑁂 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀩𑁆𑀩𑀸. 𑀨𑀸𑀮𑀦𑀗𑁆𑀕𑀮𑀸𑀤𑀻𑀦𑀺 𑀉𑀧𑀓𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀓𑀲𑀺𑀢𑀼𑀁 𑀯𑀸 𑀯𑀧𑀺𑀢𑀼𑀁 𑀯𑀸 𑀮𑀸𑀬𑀺𑀢𑀼𑀁 𑀯𑀸 𑀕𑀘𑁆𑀙𑀦𑁆𑀢𑀁 𑀲𑀓𑀺𑀘𑁆𑀘𑀧𑀲𑀼𑀢𑀫𑁆𑀧𑀺 𑀓𑀲𑁆𑀲𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑁂𑀯. 𑀬𑁄 𑀧𑀦 𑀯𑀺𑀖𑀸𑀲𑀸𑀤𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀦𑀺𑀓𑁆𑀓𑀫𑁆𑀫𑁄 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀸 𑀯𑀺𑀳𑀭𑀢𑀺, 𑀏𑀯𑀭𑀽𑀧𑀁 𑀅𑀬𑀸𑀘𑀺𑀢𑁆𑀯𑀸𑀧𑀺 ‘‘𑀏𑀳𑀺 𑀭𑁂 𑀇𑀤𑀁 𑀯𑀸 𑀇𑀤𑀁 𑀯𑀸 𑀓𑀭𑁄𑀳𑀻’’𑀢𑀺 𑀬𑀤𑀺𑀘𑁆𑀙𑀓𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀳𑀢𑁆𑀣𑀓𑀫𑁆𑀫𑀲𑁆𑀲 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀁 𑀇𑀫𑀁 𑀦𑀬𑀁 𑀓𑀣𑁂𑀦𑁆𑀢𑀺. 𑀲𑀘𑁂 𑀳𑀺 𑀪𑀺𑀓𑁆𑀔𑀼 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀣𑀫𑁆𑀪𑀢𑁆𑀣𑀸𑀬 𑀧𑀸𑀲𑀸𑀡𑀓𑁄𑀝𑁆𑀝𑀓𑀸𑀦𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 ‘‘𑀳𑀢𑁆𑀣𑀓𑀫𑁆𑀫𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺 𑀉𑀧𑀸𑀲𑀓𑀸’’𑀢𑀺. 𑀓𑀺𑀁 𑀓𑀸𑀢𑀩𑁆𑀩𑀁, 𑀪𑀦𑁆𑀢𑁂,𑀢𑀺? 𑀧𑀸𑀲𑀸𑀡𑀢𑁆𑀣𑀫𑁆𑀪𑀸 𑀉𑀤𑁆𑀥𑀭𑀺𑀢𑁆𑀯𑀸 𑀤𑀸𑀢𑀩𑁆𑀩𑀸𑀢𑀺. 𑀲𑀘𑁂 𑀢𑁂 𑀉𑀤𑁆𑀥𑀭𑀺𑀢𑁆𑀯𑀸 ¶ 𑀯𑀸 𑀤𑁂𑀦𑁆𑀢𑀺, 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑁂 𑀅𑀢𑁆𑀢𑀦𑁄 𑀣𑀫𑁆𑀪𑁂 𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀳𑀢𑁆𑀣𑀓𑀫𑁆𑀫𑀁 𑀓𑀸𑀢𑀼𑀁 𑀔𑀡𑁄 𑀦𑀢𑁆𑀣𑀺, 𑀅𑀜𑁆𑀜𑀁 𑀉𑀤𑁆𑀥𑀭𑀸𑀧𑁂𑀣, 𑀢𑀲𑁆𑀲 𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 ‘‘𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀉𑀤𑁆𑀥𑀝𑀫𑀦𑀼𑀲𑁆𑀲𑀸𑀦𑀁 𑀫𑀽𑀮𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀧𑀸𑀲𑀸𑀤𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀓𑀻𑀦𑀁 𑀲𑀦𑁆𑀢𑀺𑀓𑀁 𑀇𑀝𑁆𑀞𑀓𑀢𑁆𑀣𑀸𑀬 𑀇𑀝𑁆𑀞𑀓𑀯𑀟𑁆𑀠𑀓𑀻𑀦𑀁 𑀙𑀤𑀦𑀢𑁆𑀣𑀸𑀬 𑀕𑁂𑀳𑀘𑁆𑀙𑀸𑀤𑀓𑀸𑀦𑀁 𑀘𑀺𑀢𑁆𑀢𑀓𑀫𑁆𑀫𑀢𑁆𑀣𑀸𑀬 𑀘𑀺𑀢𑁆𑀢𑀓𑀸𑀭𑀸𑀦𑀦𑁆𑀢𑀺 𑀬𑁂𑀦 𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀸𑀬 𑀢𑁂𑀲𑀁 𑀢𑁂𑀲𑀁 𑀲𑀺𑀧𑁆𑀧𑀓𑀸𑀭𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀘 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀮𑀤𑁆𑀥𑀫𑁆𑀧𑀺 𑀲𑀩𑁆𑀩𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀭𑀜𑁆𑀜𑀢𑁄 𑀆𑀳𑀭𑀸𑀧𑁂𑀦𑁆𑀢𑁂𑀦 𑀘 𑀲𑀩𑁆𑀩𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀆𑀳𑀭𑀸𑀧𑁂𑀢𑀩𑁆𑀩𑀁.

𑀦 𑀓𑁂𑀯𑀮𑀜𑁆𑀘 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁂𑀦 𑀫𑀜𑁆𑀘𑀧𑀻𑀞𑀧𑀢𑁆𑀢𑀧𑀭𑀺𑀲𑁆𑀲𑀸𑀯𑀦𑀥𑀫𑀓𑀭𑀓𑀘𑀻𑀯𑀭𑀸𑀤𑀻𑀦𑀺 ¶ 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸𑀧𑀺 𑀤𑀸𑀭𑀼𑀮𑁄𑀳𑀲𑀼𑀢𑁆𑀢𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀢𑁂 𑀢𑁂 𑀲𑀺𑀧𑁆𑀧𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀘 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀮𑀤𑁆𑀥𑀫𑁆𑀧𑀺 𑀲𑀩𑁆𑀩𑀁 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀪𑀢𑁆𑀢𑀯𑁂𑀢𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀢𑀣𑁂𑀯 𑀧𑀸𑀘𑁂𑀢𑁆𑀯𑀸 𑀦𑀯𑀧𑀓𑁆𑀓𑀲𑁆𑀲 𑀧𑀢𑁆𑀢𑀲𑁆𑀲 𑀧𑀼𑀜𑁆𑀙𑀦𑀢𑁂𑀮𑀢𑁆𑀣𑀸𑀬 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁂𑀦 ‘‘𑀪𑀺𑀓𑁆𑀔𑀸𑀬 𑀆𑀕𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑁂 𑀯𑀸 𑀆𑀦𑀻𑀢𑁂 𑀳𑀢𑁆𑀣𑁂𑀦 𑀧𑀢𑁆𑀢𑁄 𑀧𑀺𑀥𑀸𑀢𑀩𑁆𑀩𑁄. 𑀲𑀘𑁂 𑀉𑀧𑀸𑀲𑀺𑀓𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀢𑀺, ‘‘𑀦𑀯𑀧𑀓𑁆𑀓𑁄 𑀧𑀢𑁆𑀢𑁄 𑀧𑀼𑀜𑁆𑀙𑀦𑀢𑁂𑀮𑁂𑀦 𑀅𑀢𑁆𑀣𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑀸 ‘‘𑀤𑁂𑀳𑀺, 𑀪𑀦𑁆𑀢𑁂’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑁂𑀮𑁂𑀦 𑀧𑀼𑀜𑁆𑀙𑀺𑀢𑁆𑀯𑀸 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑀲𑁆𑀲 𑀯𑀸 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺, 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀪𑀺𑀓𑁆𑀔𑀽 ¶ 𑀧𑀕𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀆𑀲𑀦𑀁 𑀅𑀧𑀲𑁆𑀲𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀭 𑀘𑁂 𑀉𑀧𑀸𑀲𑀓𑀸 𑀪𑀺𑀓𑁆𑀔𑀽 𑀞𑀺𑀢𑁂 𑀤𑀺𑀲𑁆𑀯𑀸 𑀲𑀬𑀫𑁂𑀯 𑀆𑀲𑀦𑀸𑀦𑀺 𑀆𑀳𑀭𑀸𑀧𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀸 𑀕𑀢𑀸𑀦𑀫𑁆𑀧𑀺 𑀦𑀝𑁆𑀞𑀁 𑀕𑀻𑀯𑀸 𑀦 𑀳𑁄𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀫𑀦𑀁 𑀧𑀦 𑀯𑀢𑁆𑀢𑀁. 𑀲𑀘𑁂 𑀪𑀺𑀓𑁆𑀔𑀽𑀳𑀺 ‘‘𑀆𑀲𑀦𑀸𑀦𑀺 𑀆𑀳𑀭𑀣𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀆𑀳𑀝𑀸𑀦𑀺 𑀳𑁄𑀦𑁆𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁. 𑀅𑀦𑀸𑀧𑀼𑀘𑁆𑀙𑀸 𑀕𑀢𑀸𑀦𑀁 𑀯𑀢𑁆𑀢𑀪𑁂𑀤𑁄 𑀘 𑀦𑀝𑁆𑀞𑀜𑁆𑀘 𑀕𑀻𑀯𑀸𑀢𑀺. 𑀅𑀢𑁆𑀣𑀭𑀡𑀓𑁄𑀚𑀯𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀓𑁆𑀔𑀺𑀓𑀸𑀬𑁄 ¶ 𑀩𑀳𑀼𑀓𑀸 𑀳𑁄𑀦𑁆𑀢𑀺, ‘‘𑀫𑀓𑁆𑀔𑀺𑀓𑀸𑀩𑀻𑀚𑀦𑀺𑀁 𑀆𑀳𑀭𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀘𑀺𑀫𑀦𑁆𑀤𑀲𑀸𑀔𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀆𑀲𑀦𑀲𑀸𑀮𑀸𑀬 𑀉𑀤𑀓𑀪𑀸𑀚𑀦𑀁 𑀭𑀺𑀢𑁆𑀢𑀁 𑀳𑁄𑀢𑀺, ‘‘𑀥𑀫𑀓𑀭𑀡𑀁 𑀕𑀡𑁆𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀥𑀫𑀓𑀭𑀓𑀜𑁆𑀳𑀺 𑀭𑀺𑀢𑁆𑀢𑀪𑀸𑀚𑀦𑁂 𑀧𑀓𑁆𑀔𑀺𑀧𑀦𑁆𑀢𑁄 𑀪𑀺𑀦𑁆𑀤𑁂𑀬𑁆𑀬 ‘‘𑀦𑀤𑀺𑀁 𑀯𑀸 𑀢𑀴𑀸𑀓𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀦 𑀉𑀤𑀓𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀕𑁂𑀳𑀢𑁄 𑀆𑀳𑀭𑀸’’𑀢𑀺 𑀦𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀆𑀳𑀝𑀁 ¶ 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀆𑀲𑀦𑀲𑀸𑀮𑀸𑀬𑀁 𑀯𑀸 𑀅𑀭𑀜𑁆𑀜𑀓𑁂 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑀁 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀬𑀁𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀪𑀗𑁆𑀕𑀸𑀭𑀳𑀁 𑀧𑀢𑁆𑀢𑀁 𑀯𑀸 𑀨𑀮𑀁 𑀯𑀸 𑀲𑀘𑁂 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀆𑀳𑀭𑀸𑀧𑁂𑀢𑀺, 𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀮𑀚𑁆𑀚𑀻𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀳𑀢𑁆𑀣𑀓𑀫𑁆𑀫𑀁 𑀦 𑀓𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀼𑀭𑀺𑀲𑀢𑁆𑀣𑀓𑀭𑁂 𑀦𑀬𑁄.

𑀕𑁄𑀡𑀁 𑀧𑀦 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀸𑀯𑀓𑀸𑀮𑀺𑀓𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀝𑁆𑀝𑀢𑀺. 𑀏𑀯𑀁 𑀆𑀳𑀭𑀸𑀧𑀺𑀢𑀜𑁆𑀘 𑀕𑁄𑀡𑀁 𑀭𑀓𑁆𑀔𑀺𑀢𑁆𑀯𑀸 𑀚𑀕𑁆𑀕𑀺𑀢𑁆𑀯𑀸 𑀲𑀸𑀫𑀺𑀓𑀸 𑀧𑀝𑀺𑀘𑁆𑀙𑀸𑀧𑁂𑀢𑀩𑁆𑀩𑀸. 𑀲𑀘𑀲𑁆𑀲 𑀧𑀸𑀤𑁄 𑀯𑀸 𑀲𑀺𑀗𑁆𑀕𑀁 𑀯𑀸 𑀪𑀺𑀚𑁆𑀚𑀢𑀺 𑀯𑀸 𑀦𑀲𑁆𑀲𑀢𑀺 𑀯𑀸 𑀲𑀸𑀫𑀺𑀓𑀸 𑀘𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀕𑀻𑀯𑀸 𑀳𑁄𑀢𑀺. 𑀲𑀘𑁂 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀆𑀭𑀸𑀫𑀺𑀓𑀸𑀦𑀁 𑀆𑀘𑀺𑀓𑁆𑀔𑀣 𑀚𑀕𑁆𑀕𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁.

‘‘𑀲𑀓𑀝𑀁 𑀤𑁂𑀣𑀸’’𑀢𑀺𑀧𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀜𑁆𑀜𑀢𑁆𑀢𑀺𑀏𑀯 𑀳𑁄𑀢𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀦 𑀯𑀝𑁆𑀝𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑁂𑀫𑀺𑀬𑀸𑀤𑀻𑀦𑀺 𑀪𑀺𑀚𑁆𑀚𑀦𑁆𑀢𑀺 𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀦𑀝𑁆𑀞𑁂 𑀕𑀻𑀯𑀸 𑀳𑁄𑀢𑀺. ‘‘𑀢𑀼𑀫𑁆𑀳𑀸𑀓𑀫𑁂𑀯 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀤𑀸𑀭𑀼𑀪𑀡𑁆𑀟𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀯𑀸𑀲𑀺𑀨𑀭𑀲𑀼𑀓𑀼𑀞𑀸𑀭𑀻𑀓𑀼𑀤𑀸𑀮𑀦𑀺𑀔𑀸𑀤𑀦𑁂𑀲𑀼. 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼. 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀼𑀬𑁂𑀯 𑀘 𑀯𑀮𑁆𑀮𑀺𑀆𑀤𑀻𑀲𑀼 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀦 𑀢𑀢𑁄 𑀑𑀭𑀁.

𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 ¶ 𑀧𑀦 𑀬𑀁𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀭𑀓𑁆𑀔𑀺𑀢𑀕𑁄𑀧𑀺𑀢𑀝𑁆𑀞𑀸𑀦𑁂𑀬𑁂𑀯 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀤𑁆𑀯𑀻𑀲𑀼 𑀧𑀘𑁆𑀘𑀬𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀧𑀦 ‘‘𑀆𑀳𑀭 𑀤𑁂𑀳𑀻’’𑀢𑀺 𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀺 ¶ , 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀢𑀢𑁆𑀣 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸 𑀅𑀜𑁆𑀜𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑁂𑀦𑀸𑀲𑀦𑀁 𑀇𑀘𑁆𑀙𑀢𑁄 ‘‘𑀇𑀫𑀲𑁆𑀫𑀺𑀁 𑀯𑀢 𑀑𑀓𑀸𑀲𑁂 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀬𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀦𑀼𑀭𑀽𑀧’’𑀦𑁆𑀢𑀺 𑀯𑀸𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀯𑀘𑀦𑀁 𑀧𑀭𑀺𑀓𑀣𑀸 𑀦𑀸𑀫. ‘‘𑀉𑀧𑀸𑀲𑀓𑀸 𑀢𑀼𑀫𑁆𑀳𑁂 𑀓𑀼𑀳𑀺𑀁 𑀯𑀲𑀣𑀸’’𑀢𑀺? ‘‘𑀧𑀸𑀲𑀸𑀤𑁂, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀪𑀺𑀓𑁆𑀔𑀽𑀦𑀁 𑀧𑀦 𑀉𑀧𑀸𑀲𑀓𑀸 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀁 𑀑𑀪𑀸𑀲𑁄 𑀦𑀸𑀫. 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀭𑀚𑁆𑀚𑀼𑀁 𑀧𑀲𑀸𑀭𑁂𑀢𑀺, 𑀔𑀻𑀮𑁂 𑀆𑀓𑁄𑀝𑀸𑀧𑁂𑀢𑀺. ‘‘𑀓𑀺𑀁 𑀇𑀤𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀇𑀥 𑀆𑀯𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀸𑀤𑀺𑀓𑀭𑀡𑀁 𑀧𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫. 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦 𑀯𑀺𑀜𑁆𑀜𑀢𑁆𑀢𑀺𑀧𑀺 𑀯𑀝𑁆𑀝𑀢𑀺, 𑀧𑀕𑁂𑀯 𑀧𑀭𑀺𑀓𑀣𑀸𑀤𑀻𑀦𑀺.

𑀫𑀦𑀼𑀲𑁆𑀲𑀸 𑀉𑀧𑀤𑁆𑀤𑀼𑀢𑀸 𑀬𑀸𑀘𑀦𑀸𑀬 𑀉𑀧𑀤𑁆𑀤𑀼𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀸𑀬 𑀬𑀸𑀘𑀦𑀸𑀬 𑀘 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘 𑀧𑀻𑀴𑀺𑀢𑀸. 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀻𑀢𑀺 ‘‘𑀓𑀺𑀁 𑀦𑀼 𑀆𑀳𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀉𑀩𑁆𑀩𑁂𑀕𑀁 𑀇𑀜𑁆𑀚𑀦𑀁 𑀘𑀮𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀉𑀢𑁆𑀢𑀲𑀦𑁆𑀢𑀺𑀧𑀻𑀢𑀺 𑀅𑀳𑀺𑀁 𑀯𑀺𑀬 𑀤𑀺𑀲𑁆𑀯𑀸 𑀲𑀳𑀲𑀸 𑀢𑀲𑀺𑀢𑁆𑀯𑀸 𑀉𑀓𑁆𑀓𑀫𑀦𑁆𑀢𑀺. 𑀧𑀮𑀸𑀬𑀦𑁆𑀢𑀺𑀧𑀻𑀢𑀺 𑀤𑀽𑀭𑀢𑁄𑀯 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑁆𑀢𑀺. 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀬𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀢𑀁 𑀧𑀳𑀸𑀬 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀸𑀫𑀁 𑀯𑀸 𑀤𑀓𑁆𑀔𑀺𑀡𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺.

𑁩𑁪𑁪. 𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂𑀢𑀺 𑀇𑀢𑀺 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀜𑁆𑀘 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀧𑀼𑀦𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑁄𑀲𑀁 𑀧𑀸𑀓𑀝𑀁 𑀓𑀼𑀭𑀼𑀫𑀸𑀦𑁄 𑀇𑀫𑀺𑀦𑀸 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀫𑀡𑀺𑀓𑀡𑁆𑀞𑁄𑀢𑀺 𑀲𑁄 𑀓𑀺𑀭 𑀦𑀸𑀕𑀭𑀸𑀚𑀸 𑀲𑀩𑁆𑀩𑀓𑀸𑀫𑀤𑀤𑀁 𑀫𑀳𑀕𑁆𑀖𑀁 𑀫𑀡𑀺𑀁 𑀓𑀡𑁆𑀞𑁂 𑀧𑀺𑀮𑀦𑁆𑀥𑀺𑀢𑁆𑀯𑀸 𑀘𑀭𑀢𑀺, 𑀢𑀲𑁆𑀫𑀸 ‘‘𑀫𑀡𑀺𑀓𑀡𑁆𑀞𑁄’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀲𑁄 𑀓𑀺𑀭 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀇𑀲𑀻𑀦𑀁 𑀓𑀦𑀺𑀝𑁆𑀞𑁄 𑀇𑀲𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀦𑀸𑀕𑀭𑀸𑀚𑀸 𑀦𑀤𑀺𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀤𑁂𑀯𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀢𑀁 𑀤𑁂𑀯𑀯𑀡𑁆𑀡𑀁 𑀧𑀳𑀸𑀬 𑀲𑀓𑀯𑀡𑁆𑀡𑀫𑁂𑀯 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀇𑀲𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀙𑀢𑁆𑀢𑀁 𑀯𑀺𑀬 𑀥𑀸𑀭𑀬𑀫𑀸𑀦𑁄 𑀫𑀼𑀳𑀼𑀢𑁆𑀢𑀁 𑀞𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀻’’𑀢𑀺. 𑀫𑀡𑀺𑀫𑀲𑁆𑀲 𑀓𑀡𑁆𑀞𑁂 𑀧𑀺𑀮𑀦𑁆𑀥𑀦𑀦𑁆𑀢𑀺 𑀫𑀡𑀺𑀁 𑀅𑀲𑁆𑀲 𑀓𑀡𑁆𑀞𑁂 𑀧𑀺𑀮𑀦𑁆𑀥𑀺𑀢𑀁, 𑀆𑀫𑀼𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀢𑁂𑀦 𑀤𑁂𑀯𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀢𑀸𑀧𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀝𑁆𑀞𑀸𑀲𑀺.

𑀫𑀫𑀦𑁆𑀦𑀧𑀸𑀦𑀦𑁆𑀢𑀺 ¶ 𑀫𑀫 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘. 𑀯𑀺𑀧𑀼𑀮𑀦𑁆𑀢𑀺 𑀩𑀳𑀼𑀮𑀁. 𑀉𑀴𑀸𑀭𑀦𑁆𑀢𑀺 𑀧𑀡𑀻𑀢𑀁 ¶ . 𑀅𑀢𑀺𑀬𑀸𑀘𑀓𑁄𑀲𑀻𑀢𑀺 ¶ 𑀅𑀢𑀺𑀯𑀺𑀬 𑀬𑀸𑀘𑀓𑁄, 𑀅𑀲𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀲𑀽𑀢𑀺 𑀢𑀭𑀼𑀡𑁄, 𑀣𑀸𑀫𑀲𑀫𑁆𑀧𑀦𑁆𑀦𑁄 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀧𑀼𑀭𑀺𑀲𑁄. 𑀲𑀓𑁆𑀔𑀭𑀸 𑀯𑀼𑀘𑁆𑀘𑀢𑀺 𑀓𑀸𑀴𑀲𑀺𑀮𑀸, 𑀢𑀢𑁆𑀣 𑀥𑁄𑀢𑁄 𑀅𑀲𑀺 ‘‘𑀲𑀓𑁆𑀔𑀭𑀥𑁄𑀢𑁄 𑀦𑀸𑀫𑀸’’𑀢𑀺 𑀯𑀼𑀘𑁆𑀘𑀢𑀺, 𑀲𑀓𑁆𑀔𑀭𑀥𑁄𑀢𑁄 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀲𑀓𑁆𑀔𑀭𑀥𑁄𑀢𑀧𑀸𑀡𑀺, 𑀧𑀸𑀲𑀸𑀡𑁂 𑀥𑁄𑀢𑀦𑀺𑀲𑀺𑀢𑀔𑀕𑁆𑀕𑀳𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀲𑁄 𑀅𑀲𑀺𑀳𑀢𑁆𑀣𑁄 𑀧𑀼𑀭𑀺𑀲𑁄 𑀢𑀸𑀲𑁂𑀬𑁆𑀬, 𑀏𑀯𑀁 𑀢𑀸𑀲𑁂𑀲𑀺 𑀫𑀁 𑀲𑁂𑀮𑀁 𑀬𑀸𑀘𑀫𑀸𑀦𑁄, 𑀫𑀡𑀺𑀁 𑀬𑀸𑀘𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀦 𑀢𑀁 𑀬𑀸𑀘𑁂𑀢𑀺 𑀢𑀁 𑀦 𑀬𑀸𑀘𑁂𑀬𑁆𑀬. 𑀓𑀢𑀭𑀁? 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂𑀢𑀺 𑀬𑀁 𑀅𑀲𑁆𑀲 𑀲𑀢𑁆𑀢𑀲𑁆𑀲 𑀧𑀺𑀬𑀦𑁆𑀢𑀺 𑀚𑀸𑀦𑁂𑀬𑁆𑀬.

𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀪𑀽𑀢𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀅𑀫𑀦𑀸𑀧𑀸𑀢𑀺 𑀓𑀺𑀫𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀁.

𑁩𑁪𑁫. 𑀲𑀓𑀼𑀡𑀲𑀗𑁆𑀖𑀲𑁆𑀲 𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄𑀢𑀺 𑀲𑁄 𑀓𑀺𑀭 𑀲𑀓𑀼𑀡𑀲𑀗𑁆𑀖𑁄 𑀧𑀞𑀫𑀬𑀸𑀫𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀦𑀺𑀭𑀦𑁆𑀢𑀭𑀁 𑀲𑀤𑁆𑀤𑀫𑁂𑀯 𑀓𑀭𑁄𑀢𑀺, 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀲𑀤𑁆𑀤𑁂𑀦 𑀧𑀻𑀴𑀺𑀢𑁄 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦𑀸𑀳 𑁋 ‘‘𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻𑀢𑀺 𑀏𑀢𑁆𑀣 𑀦𑀺𑀲𑀺𑀦𑁆𑀦𑁄 𑀲𑁄 𑀪𑀺𑀓𑁆𑀔𑀼 𑀦 𑀆𑀕𑀘𑁆𑀙𑀢𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺. 𑀢𑁂𑀦𑀸𑀳 𑁋 ‘‘𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻’’𑀢𑀺, 𑀓𑀼𑀢𑁄 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀳𑀁 𑀪𑀕𑀯𑀸 𑀆𑀕𑀘𑁆𑀙𑀸𑀫𑀻𑀢𑀺 𑀏𑀢𑁆𑀣𑀸𑀧𑀺 𑀲𑁄 𑀏𑀯 𑀦𑀬𑁄. 𑀉𑀩𑁆𑀩𑀸𑀴𑁆𑀳𑁄𑀢𑀺 𑀧𑀻𑀴𑀺𑀢𑁄, 𑀉𑀓𑁆𑀓𑀡𑁆𑀞𑀸𑀧𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀲𑀓𑀼𑀡𑀲𑀗𑁆𑀖𑁄 ‘‘𑀪𑀺𑀓𑁆𑀔𑀼 𑀧𑀢𑁆𑀢𑀁 𑀬𑀸𑀘𑀢𑀻’’𑀢𑀺 𑀏𑀢𑁆𑀣 𑀦 𑀢𑁂 𑀲𑀓𑀼𑀡𑀸 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀚𑀸𑀦𑀦𑁆𑀢𑀺, 𑀪𑀕𑀯𑀸 𑀧𑀦 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀬𑀣𑀸 𑀚𑀸𑀦𑀦𑁆𑀢𑀺 𑀢𑀣𑀸 𑀅𑀓𑀸𑀲𑀺.

𑁩𑁪𑁬. 𑀅𑀧𑀸𑀳𑀁 𑀢𑁂 𑀦 𑀚𑀸𑀦𑀸𑀫𑀻𑀢𑀺 𑀅𑀧𑀺 𑀅𑀳𑀁 𑀢𑁂 𑀚𑀦𑁂 ‘‘𑀓𑁂 𑀯𑀸 𑀇𑀫𑁂, 𑀓𑀲𑁆𑀲 𑀯𑀸 𑀇𑀫𑁂’’𑀢𑀺 𑀦 𑀚𑀸𑀦𑀸𑀫𑀺. 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀻𑀢𑀺 𑀲𑀫𑀸𑀕𑀦𑁆𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀬𑀸𑀘𑀦𑁆𑀢𑀺. 𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀻𑀢𑀺 𑀬𑁄 𑀬𑀸𑀘𑀢𑀺 𑀲𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄𑀢𑀺 𑀬𑀸𑀘𑀦𑁆𑀢𑀺 𑀬𑀸𑀘𑀺𑀢𑀁 𑀯𑀼𑀘𑁆𑀘𑀢𑀺, 𑀬𑀸𑀘𑀺𑀢𑀫𑀢𑁆𑀣𑀁 𑀅𑀤𑀤𑀦𑁆𑀢𑁄𑀧𑀺 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀅𑀣 𑀯𑀸 𑀬𑀸𑀘𑀦𑁆𑀢𑀺 𑀬𑀸𑀘𑀦𑁆𑀢𑀲𑁆𑀲, 𑀅𑀤𑀤𑀫𑀧𑁆𑀧𑀺𑀬𑁄𑀢𑀺 ¶ 𑀅𑀤𑁂𑀦𑁆𑀢𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺. 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽𑀢𑀺 𑀫𑀸 𑀫𑁂 𑀅𑀧𑁆𑀧𑀺𑀬𑀪𑀸𑀯𑁄 𑀅𑀳𑀼, 𑀅𑀳𑀁 𑀯𑀸 𑀢𑀯, 𑀢𑁆𑀯𑀁 𑀯𑀸 𑀫𑀫 𑀯𑀺𑀤𑁂𑀲𑁆𑀲𑁄 𑀅𑀧𑁆𑀧𑀺𑀬𑁄 𑀫𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁩𑁪𑁭. 𑀤𑀼𑀲𑁆𑀲𑀁𑀳𑀭𑀸𑀦𑀻𑀢𑀺 ¶ 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀤𑀼𑀓𑁆𑀔𑁂𑀦 𑀲𑀁𑀳𑀭𑀡𑀻𑀬𑀸𑀦𑀺.

𑁩𑁪𑁮-𑁯. 𑀲𑀜𑁆𑀜𑀸𑀘𑀺𑀓𑀸𑀬 𑀧𑀦 𑀪𑀺𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀧𑀯𑀢𑁆𑀢𑀺𑀢𑀬𑀸𑀘𑀦𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀲𑀜𑁆𑀜𑀸𑀘𑀺𑀓𑀸𑀬𑀸’’𑀢𑀺 𑀅𑀢𑁆𑀢𑀦𑁄 ¶ 𑀬𑀸𑀘𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀬𑀁 𑀬𑀸𑀘𑀺𑀢𑀓𑁂𑀳𑀺 𑀉𑀧𑀓𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑀸 𑀲𑀬𑀁𑀬𑀸𑀘𑀺𑀢𑀓𑁂𑀳𑀺 𑀓𑀬𑀺𑀭𑀫𑀸𑀦𑀸 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀓𑀬𑀺𑀭𑀫𑀸𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀅𑀢𑁆𑀣𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀉𑀮𑁆𑀮𑀺𑀢𑁆𑀢𑀸𑀢𑀺 𑀅𑀦𑁆𑀢𑁄𑀮𑀺𑀢𑁆𑀢𑀸. 𑀅𑀯𑀮𑀺𑀢𑁆𑀢𑀸𑀢𑀺 𑀩𑀳𑀺𑀮𑀺𑀢𑁆𑀢𑀸. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀢𑀺 𑀅𑀦𑁆𑀢𑀭𑀩𑀸𑀳𑀺𑀭𑀮𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀓𑀸𑀭𑀸𑀧𑁂𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀜𑁆𑀳𑀺 𑀩𑁆𑀬𑀜𑁆𑀚𑀦𑀁 𑀲𑀫𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀭𑁄𑀦𑁆𑀢𑁄 𑀯𑀸 𑀳𑁄𑀢𑀼 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸 𑀉𑀪𑁄𑀧𑁂𑀢𑁂 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸𑀢𑀺 𑀯𑀤𑁂𑀬𑁆𑀬, 𑀩𑁆𑀬𑀜𑁆𑀚𑀦𑀁 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬, 𑀦 𑀳𑀺 𑀓𑀸𑀭𑀸𑀧𑁂𑀦𑁆𑀢𑁄 𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀫𑀢𑁆𑀢𑀫𑁂𑀯𑁂𑀢𑁆𑀣 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 ‘‘𑀫𑀬𑁆𑀳𑀁 𑀏𑀲𑀸’’𑀢𑀺 𑀏𑀯𑀁 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀬𑀲𑁆𑀫𑀸 𑀧𑀦 𑀬𑀲𑁆𑀲𑀸 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀲𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸’’𑀢𑀺 𑀆𑀳. 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸𑀢𑀺 𑀧𑀫𑀸𑀡𑀬𑀼𑀢𑁆𑀢𑀸 𑀓𑀸𑀭𑁂𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀦𑁆𑀢𑀺 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀇𑀤𑀁 𑀧𑀫𑀸𑀡𑀁. 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺 𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 ¶ 𑀯𑀺𑀤𑀢𑁆𑀣𑀺𑀬𑁄 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀺. 𑀩𑀸𑀳𑀺𑀭𑀺𑀫𑁂𑀦 𑀫𑀸𑀦𑁂𑀦𑀸𑀢𑀺 𑀓𑀼𑀝𑀺𑀬𑀸 𑀩𑀳𑀺𑀓𑀼𑀝𑁆𑀝𑀫𑀸𑀦𑁂𑀦 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄, 𑀫𑀺𑀦𑀦𑁆𑀢𑁂𑀦 𑀧𑀦 𑀲𑀩𑁆𑀩𑀧𑀞𑀫𑀁 𑀤𑀺𑀦𑁆𑀦𑁄 𑀫𑀳𑀸𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁄 𑀦 𑀕𑀳𑁂𑀢𑀩𑁆𑀩𑁄. 𑀣𑀼𑀲𑀧𑀺𑀡𑁆𑀟𑀧𑀭𑀺𑀬𑀦𑁆𑀢𑁂𑀦 𑀫𑀺𑀦𑀺𑀢𑀩𑁆𑀩𑀁. 𑀣𑀼𑀲𑀧𑀺𑀡𑁆𑀟𑀲𑁆𑀲𑀉𑀧𑀭𑀺 𑀲𑁂𑀢𑀓𑀫𑁆𑀫𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀘𑁂 𑀣𑀼𑀲𑀧𑀺𑀡𑁆𑀟𑁂𑀦 𑀅𑀦𑀢𑁆𑀣𑀺𑀓𑁄 𑀫𑀳𑀸𑀫𑀢𑁆𑀢𑀺𑀓𑀸𑀬 𑀏𑀯 𑀦𑀺𑀝𑁆𑀞𑀸𑀧𑁂𑀢𑀺, 𑀫𑀳𑀸𑀫𑀢𑁆𑀢𑀺𑀓𑀸𑀯 𑀧𑀭𑀺𑀘𑁆𑀙𑁂𑀤𑁄.

𑀢𑀺𑀭𑀺𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀲𑀢𑁆𑀢𑀸𑀢𑀺 𑀲𑀢𑁆𑀢 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑁄. 𑀅𑀦𑁆𑀢𑀭𑀸𑀢𑀺 𑀇𑀫𑀲𑁆𑀲 𑀧𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 ¶ , ‘‘𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺, 𑀓𑀼𑀝𑁆𑀝𑀲𑁆𑀲 𑀩𑀳𑀺 𑀅𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀅𑀦𑁆𑀢𑁂𑀦 𑀫𑀺𑀦𑀺𑀬𑀫𑀸𑀦𑁂 𑀢𑀺𑀭𑀺𑀬𑀁 𑀲𑀢𑁆𑀢 ¶ 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑁄 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑁄 𑀧𑀦 𑀮𑁂𑀲𑀁 𑀑𑀟𑁆𑀟𑁂𑀦𑁆𑀢𑁄 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀫𑁂𑀯 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀻𑀖𑀢𑁄 𑀏𑀓𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀁 𑀅𑀝𑁆𑀞 𑀯𑀺𑀤𑀢𑁆𑀣𑀺𑀬𑁄, 𑀤𑀻𑀖𑀢𑁄 𑀯𑀸 𑀢𑁂𑀭𑀲 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄 𑀓𑀭𑁂𑀬𑁆𑀬, 𑀦 𑀯𑀝𑁆𑀝𑀢𑀺. 𑀏𑀓𑀢𑁄𑀪𑀸𑀕𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀳𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺. 𑀢𑀺𑀝𑁆𑀞𑀢𑀼 𑀯𑀺𑀤𑀢𑁆𑀣𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑀻𑀖𑀢𑁄 𑀯𑀸 𑀳𑀸𑀧𑁂𑀢𑁆𑀯𑀸 𑀢𑀺𑀭𑀺𑀬𑀁 𑀢𑀺𑀭𑀺𑀬𑀢𑁄 𑀯𑀸 𑀳𑀸𑀧𑁂𑀢𑁆𑀯𑀸 𑀤𑀻𑀖𑀁 𑀯𑀟𑁆𑀠𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄 𑀧𑀦 𑀯𑀸𑀤𑁄 𑀉𑀪𑀢𑁄 𑀯𑀟𑁆𑀠𑀦𑁂? 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀆𑀬𑀸𑀫𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁩𑁫𑁩). 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀸 𑀏𑀯 𑀧𑀦 𑀯𑀝𑁆𑀝𑀢𑀺. 𑀬𑀸 𑀧𑀦 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀸𑀧𑀺 𑀳𑁄𑀢𑀺 𑀢𑀺𑀭𑀺𑀬𑀁 𑀢𑀺𑀳𑀢𑁆𑀣𑀸 𑀯𑀸 𑀊𑀦𑀓𑀘𑀢𑀼𑀳𑀢𑁆𑀣𑀸 𑀯𑀸 𑀬𑀢𑁆𑀣 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄 𑀇𑀢𑁄 𑀘𑀺𑀢𑁄 𑀘 𑀦 𑀧𑀭𑀺𑀯𑀢𑁆𑀢𑀢𑀺, 𑀅𑀬𑀁 𑀓𑀼𑀝𑀻𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀯𑀼𑀢𑁆𑀢𑀸, 𑀢𑀢𑁄 𑀳𑁂𑀝𑁆𑀞𑀸 𑀅𑀓𑀼𑀝𑀺. 𑀧𑀫𑀸𑀡𑀺𑀓𑀸𑀧𑀺 𑀧𑀦 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀯𑀸 𑀲𑀸𑀭𑀫𑁆𑀪𑀸 𑀯𑀸 𑀅𑀧𑀭𑀺𑀓𑁆𑀓𑀫𑀦𑀸 𑀯𑀸 𑀦 𑀯𑀝𑁆𑀝𑀢𑀺. 𑀧𑀫𑀸𑀡𑀺𑀓𑀸 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀅𑀦𑀸𑀭𑀫𑁆𑀪𑀸 𑀲𑀧𑀭𑀺𑀓𑁆𑀓𑀫𑀦𑀸𑀯 𑀯𑀝𑁆𑀝𑀢𑀺. 𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀺 𑀘𑀢𑀼𑀳𑀢𑁆𑀣𑀁 𑀧𑀜𑁆𑀘𑀳𑀢𑁆𑀣𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀯 𑀓𑀸𑀭𑁂𑀢𑀩𑁆𑀩𑀸. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀜𑁆𑀘 𑀧𑀦 𑀓𑀭𑁄𑀦𑁆𑀢𑁄 𑀮𑁂𑀧𑀧𑀭𑀺𑀬𑁄𑀲𑀸𑀦𑁂 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀢𑀢𑁆𑀣 𑀮𑁂𑀧𑁄 𑀘 𑀅𑀮𑁂𑀧𑁄 𑀘 𑀮𑁂𑀧𑁄𑀓𑀸𑀲𑁄 𑀘 𑀅𑀮𑁂𑀧𑁄𑀓𑀸𑀲𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀮𑁂𑀧𑁄𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀫𑀢𑁆𑀢𑀺𑀓𑀸𑀮𑁂𑀧𑁄 𑀘 𑀲𑀼𑀥𑀸𑀮𑁂𑀧𑁄 𑀘. 𑀞𑀧𑁂𑀢𑁆𑀯𑀸 𑀧𑀦 𑀇𑀫𑁂 𑀤𑁆𑀯𑁂 𑀮𑁂𑀧𑁂 𑀅𑀯𑀲𑁂𑀲𑁄 𑀪𑀲𑁆𑀫𑀕𑁄𑀫𑀬𑀸𑀤𑀺𑀪𑁂𑀤𑁄 𑀮𑁂𑀧𑁄, 𑀅𑀮𑁂𑀧𑁄. 𑀲𑀘𑁂𑀧𑀺 𑀓𑀮𑀮𑀮𑁂𑀧𑁄 𑀳𑁄𑀢𑀺, 𑀅𑀮𑀧𑁄 𑀏𑀯. 𑀮𑁂𑀧𑁄𑀓𑀸𑀲𑁄𑀢𑀺 𑀪𑀺𑀢𑁆𑀢𑀺𑀬𑁄 𑀘𑁂𑀯 𑀙𑀤𑀦𑀜𑁆𑀘, 𑀞𑀧𑁂𑀢𑁆𑀯𑀸 ¶ 𑀧𑀦 𑀪𑀺𑀢𑁆𑀢𑀺𑀘𑁆𑀙𑀤𑀦𑁂 𑀅𑀯𑀲𑁂𑀲𑁄 𑀣𑀫𑁆𑀪𑀢𑀼𑀮𑀸𑀧𑀺𑀝𑁆𑀞𑀲𑀗𑁆𑀖𑀸𑀝𑀯𑀸𑀢𑀧𑀸𑀦𑀥𑀽𑀫𑀘𑁆𑀙𑀺𑀤𑁆𑀤𑀸𑀤𑀺 𑀅𑀮𑁂𑀧𑀸𑀭𑀳𑁄 𑀑𑀓𑀸𑀲𑁄 𑀲𑀩𑁆𑀩𑁄𑀧𑀺 𑀅𑀮𑁂𑀧𑁄𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀓𑀼𑀝𑀺𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀢𑁆𑀣𑀸𑀬 𑀪𑀺𑀓𑁆𑀔𑀽 𑀦𑁂𑀢𑀩𑁆𑀩𑀸. 𑀢𑁂𑀦 𑀓𑀼𑀝𑀺𑀓𑀸𑀭𑀓𑁂𑀦𑀸𑀢𑀺𑀆𑀤𑀺 𑀧𑀦 𑀬𑁂𑀦 𑀯𑀺𑀥𑀺𑀦𑀸 𑀢𑁂 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸𑀢𑀺 𑀦 𑀯𑀺𑀲𑀫𑀁 𑀅𑀭𑀜𑁆𑀜𑀁 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 ¶ , 𑀓𑀼𑀝𑀺𑀯𑀢𑁆𑀣𑀼𑀁 𑀧𑀦 𑀧𑀞𑀫𑀫𑁂𑀯 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀲𑀻𑀫𑀫𑀡𑁆𑀟𑀮𑀲𑀤𑀺𑀲𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀦𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑀗𑁆𑀖𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀅𑀲𑁆𑀲. 𑀧𑀭𑀢𑁄 𑀧𑀦 ‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸’’𑀢𑀺 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁. 𑀦𑁄 𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀲𑁆𑀲𑀳𑀢𑀻𑀢𑀺 𑀲𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀦 𑀇𑀘𑁆𑀙𑀢𑀺, 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀉𑀬𑁆𑀬𑀼𑀢𑁆𑀢𑀸 𑀢𑁂 𑀢𑁂 ¶ 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺. 𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀦𑁆𑀢𑀺 𑀲𑀉𑀧𑀤𑁆𑀤𑀯𑀁 𑀅𑀦𑀼𑀧𑀤𑁆𑀤𑀯𑀁. 𑀲𑀧𑀭𑀺𑀓𑁆𑀓𑀫𑀦𑀁 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀲𑀉𑀧𑀘𑀸𑀭𑀁 𑀅𑀦𑀼𑀧𑀘𑀸𑀭𑀁.

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀧𑀢𑁆𑀢𑁄 𑀓𑀸𑀮𑁄 𑀇𑀫𑀲𑁆𑀲 𑀑𑀮𑁄𑀓𑀦𑀲𑁆𑀲𑀸𑀢𑀺 𑀧𑀢𑁆𑀢𑀓𑀸𑀮𑀁, 𑀧𑀢𑁆𑀢𑀓𑀸𑀮𑀫𑁂𑀯 𑀧𑀢𑁆𑀢𑀓𑀮𑁆𑀮𑀁. 𑀇𑀤𑀜𑁆𑀘 𑀯𑀢𑁆𑀣𑀼𑀁𑀑𑀮𑁄𑀓𑀦𑀢𑁆𑀣𑀸𑀬 𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀅𑀦𑀼𑀲𑀸𑀯𑀦𑀸𑀦𑀬𑁂𑀦 𑀑𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀢𑁄 𑀧𑀦 𑀯𑀢𑁆𑀣𑀼𑀤𑁂𑀲𑀦𑀸𑀓𑀫𑁆𑀫𑀁 𑀬𑀣𑀸𑀯𑀼𑀢𑁆𑀢𑀸𑀬 𑀏𑀯 𑀜𑀢𑁆𑀢𑀺𑀬𑀸 𑀘 𑀅𑀦𑀼𑀲𑀸𑀯𑀦𑀸𑀬 𑀘 𑀓𑀸𑀢𑀩𑁆𑀩𑀁, 𑀑𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑁩𑁫𑁩. 𑀓𑀺𑀧𑀺𑀮𑁆𑀮𑀺𑀓𑀸𑀦𑀦𑁆𑀢𑀺 𑀭𑀢𑁆𑀢𑀓𑀸𑀴𑀧𑀺𑀗𑁆𑀕𑀮𑀸𑀤𑀺𑀪𑁂𑀤𑀸𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀓𑀺𑀧𑀺𑀮𑁆𑀮𑀺𑀓𑀸𑀦𑀁. 𑀓𑀺𑀧𑀻𑀮𑁆𑀮𑀓𑀸𑀦𑀦𑁆𑀢𑀺𑀧𑀺 𑀧𑀸𑀞𑁄. 𑀆𑀲𑀬𑁄𑀢𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁, 𑀬𑀣𑀸 𑀘 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀏𑀯𑀁 𑀉𑀧𑀘𑀺𑀓𑀸𑀤𑀻𑀦𑀫𑁆𑀧𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀆𑀲𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣 𑀧𑀦 𑀢𑁂 𑀕𑁄𑀘𑀭𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀸𑀤𑀺𑀲𑁄 𑀲𑀜𑁆𑀘𑀭𑀡𑀧𑁆𑀧𑀤𑁂𑀲𑁄 𑀅𑀯𑀸𑀭𑀺𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀅𑀧𑀦𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀸𑀦𑀺 𑀢𑀸𑀯 𑀙 𑀞𑀸𑀦𑀸𑀦𑀺𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺.

𑀳𑀢𑁆𑀣𑀻𑀦𑀁 𑀯𑀸𑀢𑀺 𑀳𑀢𑁆𑀣𑀻𑀦𑀁 𑀧𑀦 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀫𑁆𑀧𑀺 𑀦𑀺𑀩𑀤𑁆𑀥𑀕𑁄𑀘𑀭𑀝𑁆𑀞𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀲𑀻𑀳𑀸𑀤𑀻𑀦𑀁 𑀆𑀲𑀬𑁄 𑀘 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑁆𑀢𑀸𑀦𑀁 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄 𑀘 𑀦 𑀯𑀝𑁆𑀝𑀢𑀺. 𑀏𑀢𑁂𑀲𑀁 𑀕𑁄𑀘𑀭𑀪𑀽𑀫𑀺 𑀦 𑀕𑀳𑀺𑀢𑀸. 𑀬𑁂𑀲𑀁 𑀓𑁂𑀲𑀜𑁆𑀘𑀻𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀯𑀸𑀴𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 ¶ . 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀕𑁆𑀬𑀢𑁆𑀣𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀲𑁂𑀲𑀸𑀦𑀺 𑀦𑀸𑀦𑀸𑀉𑀧𑀤𑁆𑀤𑀯𑁂𑀳𑀺 𑀲𑀉𑀧𑀤𑁆𑀤𑀯𑀸𑀦𑀺. 𑀢𑀢𑁆𑀣 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀼𑀩𑁆𑀩𑀡𑁆𑀡𑀁 𑀦𑀺𑀲𑁆𑀲𑀺𑀢𑀁 𑀲𑀢𑁆𑀢𑀦𑁆𑀦𑀁 ¶ 𑀥𑀜𑁆𑀜𑀸𑀦𑀁 𑀯𑀺𑀭𑀼𑀳𑀦𑀓𑀔𑁂𑀢𑁆𑀢𑀲𑀸𑀫𑀦𑁆𑀢𑀸 𑀞𑀺𑀢𑀁. 𑀏𑀲𑁂𑀯 𑀦𑀬𑁄 𑀅𑀧𑀭𑀡𑁆𑀡𑀦𑀺𑀲𑁆𑀲𑀺𑀢𑀸𑀤𑀻𑀲𑀼𑀧𑀺. 𑀏𑀢𑁆𑀣 𑀧𑀦 𑀅𑀩𑁆𑀪𑀸𑀖𑀸𑀢𑀦𑁆𑀢𑀺 𑀓𑀸𑀭𑀡𑀸𑀖𑀭𑀁 𑀯𑁂𑀭𑀺𑀖𑀭𑀁, 𑀘𑁄𑀭𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀓𑀢𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼.

𑀆𑀖𑀸𑀢𑀦𑀦𑁆𑀢𑀺 𑀥𑀫𑁆𑀫𑀕𑀦𑁆𑀥𑀺𑀓𑀸 𑀯𑀼𑀘𑁆𑀘𑀢𑀺. 𑀲𑀼𑀲𑀸𑀦𑀦𑁆𑀢𑀺 𑀫𑀳𑀸𑀲𑀼𑀲𑀸𑀦𑀁. 𑀲𑀁𑀲𑀭𑀡𑀦𑁆𑀢𑀺 𑀅𑀦𑀺𑀩𑁆𑀩𑀺𑀚𑁆𑀛𑀕𑀫𑀦𑀻𑀬𑁄 𑀕𑀢𑀧𑀘𑁆𑀘𑀸𑀕𑀢𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀦 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦𑀸𑀢𑀺 𑀤𑁆𑀯𑀻𑀳𑀺 𑀩𑀮𑀺𑀩𑀤𑁆𑀤𑁂𑀳𑀺 𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀏𑀓𑀁 𑀘𑀓𑁆𑀓𑀁 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀏𑀓𑀁 𑀩𑀳𑀺 𑀓𑀢𑁆𑀯𑀸 𑀆𑀯𑀺𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀘𑀢𑀽𑀳𑀺 𑀬𑀼𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀦𑁆𑀢𑀺 𑀦𑀺𑀲𑁆𑀲𑁂𑀡𑀺𑀬𑀁 𑀞𑀢𑁆𑀯𑀸 𑀕𑁂𑀳𑀁 𑀙𑀸𑀤𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀆𑀯𑀺𑀚𑁆𑀚𑀺𑀢𑀼𑀁. 𑀇𑀢𑀺 𑀏𑀯𑀭𑀽𑀧𑁂 𑀲𑀸𑀭𑀫𑁆𑀪𑁂 𑀘 𑀅𑀧𑀭𑀺𑀓𑁆𑀓𑀫𑀦𑁂 𑀘 𑀞𑀸𑀦𑁂 ¶ 𑀦 𑀓𑀸𑀭𑁂𑀢𑀩𑁆𑀩𑀸. 𑀅𑀦𑀸𑀭𑀫𑁆𑀪𑁂 𑀧𑀦 𑀲𑀧𑀭𑀺𑀓𑁆𑀓𑀫𑀦𑁂 𑀓𑀸𑀭𑁂𑀢𑀩𑁆𑀩𑀸, 𑀢𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀧𑀼𑀦 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫𑀸𑀢𑀺 𑀏𑀯𑀫𑀸𑀤𑀺 ‘‘𑀲𑀸𑀭𑀫𑁆𑀪𑁂 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀸𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀁𑀬𑀸𑀘𑀺𑀓𑀸𑀤𑀻𑀦𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀸 𑀓𑀼𑀝𑀺𑀁 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀭𑀜𑁆𑀜𑀢𑁄 𑀭𑀼𑀓𑁆𑀔𑀸 𑀳𑀭𑀡𑀢𑁆𑀣𑀸𑀬 𑀯𑀸𑀲𑀺𑀁 𑀯𑀸 𑀨𑀭𑀲𑀼𑀁 𑀯𑀸 𑀦𑀺𑀲𑁂𑀢𑀺 𑀤𑀼𑀓𑁆𑀓𑀝𑀁, 𑀅𑀭𑀜𑁆𑀜𑀁 𑀧𑀯𑀺𑀲𑀢𑀺 𑀤𑀼𑀓𑁆𑀓𑀝𑀁, 𑀢𑀢𑁆𑀣 𑀅𑀮𑁆𑀮𑀢𑀺𑀡𑀸𑀦𑀺 𑀙𑀺𑀦𑁆𑀤𑀢𑀺 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀼𑀓𑁆𑀔𑀸𑀦𑀺 𑀙𑀺𑀦𑁆𑀤𑀢𑀺 𑀤𑀼𑀓𑁆𑀓𑀝𑀁. 𑀭𑀼𑀓𑁆𑀔𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀽𑀫𑀺𑀁 𑀲𑁄𑀥𑁂𑀢𑀺 𑀔𑀡𑀢𑀺, 𑀧𑀁𑀲𑀼𑀁 𑀉𑀤𑁆𑀥𑀭𑀢𑀺, 𑀘𑀺𑀦𑀸𑀢𑀺; 𑀏𑀯𑀁 𑀬𑀸𑀯 𑀧𑀸𑀘𑀻𑀭𑀁 𑀩𑀦𑁆𑀥𑀢𑀺 𑀢𑀸𑀯 𑀧𑀼𑀩𑁆𑀩𑀧𑀬𑁄𑀕𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀼𑀩𑁆𑀩𑀧𑀬𑁄𑀕𑁂 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁, 𑀢𑀢𑁄 𑀧𑀝𑁆𑀞𑀸𑀬 𑀲𑀳𑀧𑀬𑁄𑀕𑁄 𑀦𑀸𑀫. 𑀢𑀢𑁆𑀣 𑀣𑀫𑁆𑀪𑁂𑀳𑀺 𑀓𑀸𑀢𑀩𑁆𑀩𑀸𑀬 𑀣𑀫𑁆𑀪𑀁 𑀉𑀲𑁆𑀲𑀸𑀧𑁂𑀢𑀺, 𑀤𑀼𑀓𑁆𑀓𑀝𑀁. 𑀇𑀝𑁆𑀞𑀓𑀸𑀳𑀺 𑀘𑀺𑀦𑀺𑀢𑀩𑁆𑀩𑀸𑀬 ¶ 𑀇𑀝𑁆𑀞𑀓𑀁 𑀆𑀘𑀺𑀦𑀸𑀢𑀺, 𑀤𑀼𑀓𑁆𑀓𑀝𑀁. 𑀏𑀯𑀁 𑀬𑀁 𑀬𑀁 𑀉𑀧𑀓𑀭𑀡𑀁 𑀬𑁄𑀚𑁂𑀢𑀺, 𑀲𑀩𑁆𑀩𑀢𑁆𑀣 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂 𑀳𑀢𑁆𑀣𑀯𑀸𑀭𑁂 𑀢𑀤𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁. 𑀏𑀯𑀁 𑀓𑀢𑀁 𑀧𑀦 𑀤𑀸𑀭𑀼𑀓𑀼𑀝𑁆𑀝𑀺𑀓𑀁 𑀯𑀸 𑀇𑀝𑁆𑀞𑀓𑀓𑀼𑀝𑁆𑀝𑀺𑀓𑀁 𑀯𑀸 𑀲𑀺𑀮𑀸𑀓𑀼𑀝𑁆𑀝𑀺𑀓𑀁 𑀯𑀸 𑀅𑀦𑁆𑀢𑀫𑀲𑁄 𑀧𑀡𑁆𑀡𑀲𑀸𑀮𑀫𑁆𑀧𑀺 𑀲𑀪𑀺𑀢𑁆𑀢𑀺𑀘𑁆𑀙𑀤𑀦𑀁 𑀮𑀺𑀫𑁆𑀧𑀺𑀲𑁆𑀲𑀸𑀫𑀻𑀢𑀺 ¶ 𑀲𑀼𑀥𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀬𑀸𑀯 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀁. 𑀏𑀢𑀁 𑀧𑀦 𑀤𑀼𑀓𑁆𑀓𑀝𑀁 𑀫𑀳𑀸𑀮𑁂𑀧𑁂𑀦𑁂𑀯 𑀯𑀝𑁆𑀝𑀢𑀺, 𑀲𑁂𑀢𑀭𑀢𑁆𑀢𑀯𑀡𑁆𑀡𑀓𑀭𑀡𑁂 𑀯𑀸 𑀘𑀺𑀢𑁆𑀢𑀓𑀫𑁆𑀫𑁂 𑀯𑀸 𑀅𑀦𑀸𑀧𑀢𑁆𑀢𑀺.

𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂𑀢𑀺 𑀬𑁄 𑀲𑀩𑁆𑀩𑀧𑀘𑁆𑀙𑀺𑀫𑁄 𑀏𑀓𑁄 𑀮𑁂𑀧𑀧𑀺𑀡𑁆𑀟𑁄, 𑀢𑀁 𑀏𑀓𑀁 𑀧𑀺𑀡𑁆𑀟𑀁 𑀅𑀲𑀫𑁆𑀧𑀢𑁆𑀢𑁂 𑀓𑀼𑀝𑀺𑀓𑀫𑁆𑀫𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑁂𑀳𑀺 𑀦𑀺𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻𑀢𑀺 𑀢𑁂𑀲𑀼 𑀧𑀞𑀫𑀧𑀺𑀡𑁆𑀟𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺.

𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂𑀢𑀺 𑀬𑀁 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀓𑀼𑀝𑀺𑀓𑀫𑁆𑀫𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀯𑀲𑀸𑀦𑀧𑀺𑀡𑁆𑀟𑁂 𑀆𑀕𑀢𑁂 𑀤𑀺𑀦𑁆𑀦𑁂 𑀞𑀧𑀺𑀢𑁂 𑀮𑁂𑀧𑀲𑁆𑀲 𑀖𑀝𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀏𑀯𑀁 𑀮𑁂𑀫𑁆𑀧𑀦𑁆𑀢𑀲𑁆𑀲 𑀘 𑀅𑀦𑁆𑀢𑁄𑀮𑁂𑀧𑁂 𑀯𑀸 𑀅𑀦𑁆𑀢𑁄𑀮𑁂𑀧𑁂𑀦 𑀲𑀤𑁆𑀥𑀺𑀁 𑀪𑀺𑀢𑁆𑀢𑀺𑀜𑁆𑀘 𑀙𑀤𑀦𑀜𑁆𑀘 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀖𑀝𑀺𑀢𑁂 𑀩𑀳𑀺𑀮𑁂𑀧𑁂 𑀯𑀸 𑀩𑀳𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀧𑀦 𑀤𑁆𑀯𑀸𑀭𑀩𑀤𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸𑀯 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀢𑀺, 𑀢𑀲𑁆𑀫𑀺𑀜𑁆𑀘 𑀢𑀲𑁆𑀲𑁄𑀓𑀸𑀲𑀁 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀯𑀸 𑀅𑀯𑀟𑁆𑀠𑁂𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀮𑁂𑀧𑁄 𑀦 𑀖𑀝𑀻𑀬𑀢𑀺 𑀭𑀓𑁆𑀔𑀢𑀺 𑀢𑀸𑀯, 𑀧𑀼𑀦 𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀦 𑀖𑀝𑀺𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀢𑀁 𑀞𑀧𑀺𑀬𑀫𑀸𑀦𑀁 ¶ 𑀧𑀞𑀫𑀁 𑀤𑀺𑀦𑁆𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀦𑀺𑀭𑀦𑁆𑀢𑀭𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀁 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁂𑀦 𑀅𑀧𑁆𑀧𑀢𑁆𑀢𑀘𑁆𑀙𑀤𑀦𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀁 𑀮𑀺𑀫𑁆𑀧𑀢𑀺, 𑀅𑀦𑀸𑀧𑀢𑁆𑀢𑀺. 𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀧𑀸𑀲𑀸𑀡𑀓𑀼𑀝𑁆𑀝𑀁 𑀓𑀢𑁆𑀯𑀸 𑀢𑀁 𑀅𑀮𑀺𑀫𑁆𑀧𑀺𑀢𑁆𑀯𑀸 𑀉𑀧𑀭𑀺 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀺𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀇𑀝𑁆𑀞𑀓𑀓𑀼𑀝𑁆𑀝𑀺𑀓𑀸𑀬 𑀇𑀝𑁆𑀞𑀓𑀸𑀳𑀺𑀬𑁂𑀯 𑀯𑀸𑀢𑀧𑀸𑀦𑁂 ¶ 𑀘 𑀥𑀽𑀫𑀦𑁂𑀢𑁆𑀢𑀸𑀦𑀺 𑀘 𑀓𑀭𑁄𑀢𑀺, 𑀮𑁂𑀧𑀖𑀝𑀦𑁂𑀦𑁂𑀯 𑀆𑀧𑀢𑁆𑀢𑀺. 𑀧𑀡𑁆𑀡𑀲𑀸𑀮𑀁 𑀮𑀺𑀫𑁆𑀧𑀢𑀺, 𑀮𑁂𑀧𑀖𑀝𑀦𑁂𑀦𑁂𑀯 𑀆𑀧𑀢𑁆𑀢𑀺. 𑀢𑀢𑁆𑀣 𑀆𑀮𑁄𑀓𑀢𑁆𑀣𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀻𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀲𑀘𑁂 ‘‘𑀯𑀸𑀢𑀧𑀸𑀦𑀁 𑀮𑀤𑁆𑀥𑀸 𑀏𑀢𑁆𑀣 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀓𑀭𑁄𑀢𑀺, 𑀯𑀸𑀢𑀧𑀸𑀦𑁂 𑀞𑀧𑀺𑀢𑁂 𑀮𑁂𑀧𑀖𑀝𑀦𑁂𑀦 𑀆𑀧𑀢𑁆𑀢𑀺. 𑀲𑀘𑁂 𑀫𑀢𑁆𑀢𑀺𑀓𑀸𑀬 𑀓𑀼𑀝𑁆𑀝𑀁 𑀓𑀭𑁄𑀢𑀺, 𑀙𑀤𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀦𑁂 𑀆𑀧𑀢𑁆𑀢𑀺. 𑀏𑀓𑁄 𑀏𑀓𑀧𑀺𑀡𑁆𑀟𑀸𑀯𑀲𑁂𑀲𑀁 𑀓𑀢𑁆𑀯𑀸 𑀞𑀧𑁂𑀢𑀺, 𑀅𑀜𑁆𑀜𑁄 𑀢𑀁 𑀤𑀺𑀲𑁆𑀯𑀸 ‘‘𑀤𑀼𑀓𑁆𑀓𑀢𑀁 𑀇𑀤’’𑀦𑁆𑀢𑀺 𑀯𑀢𑁆𑀢𑀲𑀻𑀲𑁂𑀦 𑀮𑀺𑀫𑁆𑀧𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑁩𑁫𑁪. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀣 𑀲𑀸𑀭𑀫𑁆𑀪𑀸𑀬 𑀤𑀼𑀓𑁆𑀓𑀝𑀁, 𑀅𑀧𑀭𑀺𑀓𑁆𑀓𑀫𑀦𑀸𑀬 𑀤𑀼𑀓𑁆𑀓𑀝𑀁 ¶ , 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀏𑀢𑁂𑀲𑀁 𑀯𑀲𑁂𑀦 𑀯𑁄𑀫𑀺𑀲𑁆𑀲𑀓𑀸𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁩𑁫𑁫. 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺𑀆𑀤𑀻𑀲𑀼 𑀘 𑀤𑁆𑀯𑀻𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁧. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄. 𑀲𑁄𑀢𑀺 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀪𑀺𑀓𑁆𑀔𑀼. 𑀯𑀺𑀧𑁆𑀧𑀓𑀢𑁂𑀢𑀺 𑀅𑀦𑀺𑀝𑁆𑀞𑀺𑀢𑁂 𑀓𑀼𑀝𑀺𑀓𑀫𑁆𑀫𑁂. 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸𑀢𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑀚𑀺𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸𑀢𑀺 𑀓𑀺𑀢𑁆𑀢𑀓𑁂𑀦 𑀪𑀺𑀦𑁆𑀦𑀸 𑀳𑁄𑀢𑀺, 𑀲𑀘𑁂 𑀣𑀫𑁆𑀪𑀸 𑀪𑀽𑀫𑀺𑀬𑀁 𑀦𑀺𑀔𑀸𑀢𑀸, 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀞𑀧𑀺𑀢𑀸, 𑀅𑀧𑀦𑁂𑀢𑀩𑁆𑀩𑀸. 𑀇𑀝𑁆𑀞𑀓𑀘𑀺𑀢𑀸𑀬 𑀬𑀸𑀯 𑀫𑀗𑁆𑀕𑀮𑀺𑀝𑁆𑀞𑀓𑀸 𑀢𑀸𑀯 𑀓𑀼𑀝𑁆𑀝𑀸 𑀅𑀧𑀘𑀺𑀦𑀺𑀢𑀩𑁆𑀩𑀸. 𑀲𑀗𑁆𑀔𑁂𑀧𑀢𑁄 𑀪𑀽𑀫𑀺𑀲𑀫𑀁 𑀓𑀢𑁆𑀯𑀸 𑀯𑀺𑀦𑀸𑀲𑀺𑀢𑀸 𑀪𑀺𑀦𑁆𑀦𑀸 𑀳𑁄𑀢𑀺, 𑀪𑀽𑀫𑀺𑀢𑁄 𑀉𑀧𑀭𑀺 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂𑀧𑀺 𑀞𑀺𑀢𑁂 𑀅𑀪𑀺𑀦𑁆𑀦𑀸𑀯. 𑀲𑁂𑀲𑀁 𑀲𑀩𑁆𑀩𑀘𑀢𑀼𑀓𑁆𑀓𑁂𑀲𑀼 𑀧𑀸𑀓𑀝𑀫𑁂𑀯. 𑀦 𑀳𑁂𑀢𑁆𑀣 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺, 𑀬𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀲𑀺𑀬𑀸.

𑁩𑁬𑁩. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀢𑁆𑀢𑀦𑀸 𑀆𑀭𑀤𑁆𑀥𑀁 𑀓𑀼𑀝𑀺𑀁. 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺 ¶ 𑀫𑀳𑀸𑀫𑀢𑁆𑀢𑀺𑀓𑀸𑀬 𑀯𑀸 𑀣𑀼𑀲𑀫𑀢𑁆𑀢𑀺𑀓𑀸𑀬 𑀯𑀸 𑀬𑀸𑀬 𑀓𑀢𑀁 𑀧𑀭𑀺𑀬𑁄𑀲𑀺𑀢𑀪𑀸𑀯𑀁 𑀧𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀬 𑀅𑀯𑀲𑀸𑀦𑀧𑀺𑀡𑁆𑀟𑀁 𑀤𑁂𑀦𑁆𑀢𑁄 𑀧𑀭𑀺𑀬𑁄𑀲𑀸𑀧𑁂𑀢𑀺 ¶ .

𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁄𑀯 𑀅𑀢𑁆𑀣𑀸𑀬 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀅𑀢𑁆𑀢𑀦𑀸 𑀯𑀸 𑀳𑀺 𑀯𑀺𑀧𑁆𑀧𑀓𑀢𑀸 𑀳𑁄𑀢𑀼 𑀧𑀭𑁂𑀳𑀺 𑀯𑀸 𑀉𑀪𑀬𑁂𑀳𑀺 𑀯𑀸, 𑀢𑀁 𑀘𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀢𑁆𑀢𑀦𑀸 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀧𑀭𑁂𑀳𑀺 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘𑀸𑀢𑀺 𑀬𑀼𑀕𑀦𑀤𑁆𑀥𑀁 𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀓𑀼𑀭𑀼𑀦𑁆𑀤𑀺𑀬𑀁𑀧𑀦 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 ‘𑀏𑀓𑀢𑁄 𑀯𑀲𑀺𑀲𑁆𑀲𑀸𑀫𑀸’𑀢𑀺 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀢𑀺 𑀢𑀸𑀯, 𑀅𑀯𑀺𑀪𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. ‘𑀇𑀤𑀁 𑀞𑀸𑀦𑀁 𑀢𑀯, 𑀇𑀤𑀁 𑀫𑀫𑀸’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀓𑀭𑁄𑀦𑁆𑀢𑀺 𑀆𑀧𑀢𑁆𑀢𑀺. 𑀲𑀸𑀫𑀡𑁂𑀭𑁄 𑀘 𑀪𑀺𑀓𑁆𑀔𑀼 𑀘 𑀏𑀓𑀢𑁄 𑀓𑀭𑁄𑀦𑁆𑀢𑀺, 𑀬𑀸𑀯 𑀅𑀯𑀺𑀪𑀢𑁆𑀢𑀸 𑀢𑀸𑀯 𑀭𑀓𑁆𑀔𑀢𑀺. 𑀧𑀼𑀭𑀺𑀫𑀦𑀬𑁂𑀦 𑀯𑀺𑀪𑀚𑀺𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀻’’𑀢𑀺.

𑁩𑁬𑁪. 𑀅𑀦𑀸𑀧𑀢𑁆𑀢𑀺 ¶ 𑀮𑁂𑀡𑁂𑀢𑀺𑀆𑀤𑀻𑀲𑀼 𑀮𑁂𑀡𑀁 𑀫𑀳𑀦𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦 𑀳𑁂𑀢𑁆𑀣 𑀮𑁂𑀧𑁄 𑀖𑀝𑀻𑀬𑀢𑀺. 𑀕𑀼𑀳𑀫𑁆𑀧𑀺 𑀇𑀝𑁆𑀞𑀓𑀸𑀕𑀼𑀳𑀁 𑀯𑀸 𑀲𑀺𑀮𑀸𑀕𑀼𑀳𑀁 𑀯𑀸 𑀤𑀸𑀭𑀼𑀕𑀼𑀳𑀁 𑀯𑀸 𑀪𑀽𑀫𑀺𑀕𑀼𑀳𑀁 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀢𑀺𑀡𑀓𑀼𑀝𑀺𑀓𑀸𑀬𑀸𑀢𑀺 𑀲𑀢𑁆𑀢𑀪𑀽𑀫𑀺𑀓𑁄𑀧𑀺 𑀧𑀸𑀲𑀸𑀤𑁄 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑁄 ‘‘𑀢𑀺𑀡𑀓𑀼𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀦𑁆𑀢𑀺 𑀙𑀤𑀦𑀁 𑀤𑀡𑁆𑀟𑀓𑁂𑀳𑀺 𑀚𑀸𑀮𑀩𑀤𑁆𑀥𑀁 𑀓𑀢𑁆𑀯𑀸 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀙𑀸𑀤𑀺𑀢𑀓𑀼𑀝𑀺𑀓𑀸𑀯 𑀯𑀼𑀢𑁆𑀢𑀸, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀫𑀳𑀦𑁆𑀢𑀫𑁆𑀧𑀺 𑀢𑀺𑀡𑀘𑁆𑀙𑀤𑀦𑀕𑁂𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄 𑀏𑀯 𑀳𑀺 𑀓𑀼𑀝𑀺𑀬𑀸 𑀮𑀓𑁆𑀔𑀡𑀁, 𑀲𑁄 𑀘 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀗𑁆𑀓𑀫𑀦𑀲𑀸𑀮𑀸𑀬𑀁 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁨𑁬𑁦) 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺, 𑀢𑀲𑁆𑀫𑀸 𑀉𑀪𑀢𑁄 𑀧𑀓𑁆𑀔𑀁 𑀯𑀸 𑀓𑀽𑀝𑀩𑀤𑁆𑀥𑀁 𑀯𑀸 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀬𑀁 ‘‘𑀇𑀫𑀁 𑀏𑀢𑀲𑁆𑀲 𑀕𑁂𑀳𑀲𑁆𑀲 𑀙𑀤𑀦’’𑀦𑁆𑀢𑀺 𑀙𑀤𑀦𑀲𑀗𑁆𑀔𑁂𑀧𑁂𑀦 𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀪𑀺𑀢𑁆𑀢𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀮𑁂𑀧𑁂 𑀖𑀝𑀺𑀢𑁂 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀘𑁆𑀙𑀤𑀦𑀲𑁆𑀲 𑀕𑁂𑀳𑀲𑁆𑀲 𑀮𑁂𑀧𑀭𑀓𑁆𑀔𑀡𑀢𑁆𑀣𑀁 𑀉𑀧𑀭𑀺 𑀢𑀺𑀡𑁂𑀦 𑀙𑀸𑀤𑁂𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀢𑀺𑀡𑀓𑀼𑀝𑀺 𑀦𑀸𑀫 𑀦 𑀳𑁄𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀧𑀘𑁆𑀘𑀬𑀸𑀯 𑀅𑀦𑀸𑀧𑀢𑁆𑀢𑀺, 𑀉𑀤𑀸𑀳𑀼 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀧𑀘𑁆𑀘𑀬𑀸𑀧𑀻𑀢𑀺 𑀲𑀩𑁆𑀩𑀢𑁆𑀣𑀸𑀧𑀺 ¶ 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀳𑀺 𑀢𑀸𑀤𑀺𑀲𑀁 𑀓𑀼𑀝𑀺𑀁 𑀲𑀦𑁆𑀥𑀸𑀬 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀁 𑁋

‘‘𑀪𑀺𑀓𑁆𑀔𑀼 ¶ 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺;

𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁;

𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀓𑀼𑀝𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀓𑀼𑀝𑀺𑀁 𑀅𑀜𑁆𑀜𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑀁 𑀧𑀦 ‘‘𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬 𑀅𑀓𑀭𑀡𑀧𑀘𑁆𑀘𑀬𑀸 𑀯𑀼𑀢𑁆𑀢𑀁.

𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀅𑀕𑀸𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀚𑀦𑁆𑀢𑀸𑀖𑀭𑀁 𑀯𑀸 𑀪𑁄𑀚𑀦𑀲𑀸𑀮𑀸 𑀯𑀸 𑀅𑀕𑁆𑀕𑀺𑀲𑀸𑀮𑀸 𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀓𑀸𑀭𑁂𑀢𑀺, 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺𑀲𑁆𑀲 𑀳𑁄𑀢𑀺 ‘‘𑀉𑀧𑁄𑀲𑀣𑀸𑀕𑀸𑀭𑀜𑁆𑀘 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀺 𑀚𑀦𑁆𑀢𑀸𑀖𑀭𑀜𑁆𑀘 𑀪𑁄𑀚𑀦𑀲𑀸𑀮𑀸 ¶ 𑀘 𑀅𑀕𑁆𑀕𑀺𑀲𑀸𑀮𑀸 𑀘 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀭𑀺𑀢𑁂𑀧𑀺 𑀆𑀦𑀸𑀧𑀢𑁆𑀢𑀺𑀬𑁂𑀯. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀸𑀲𑀸𑀕𑀸𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀸𑀦𑀜𑁆𑀘 𑀆𑀴𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀙𑀲𑀫𑀼𑀝𑁆𑀞𑀸𑀦𑀁 𑀓𑀺𑀭𑀺𑀬𑀜𑁆𑀘 𑀓𑀺𑀭𑀺𑀬𑀸𑀓𑀺𑀭𑀺𑀬𑀜𑁆𑀘, 𑀇𑀤𑀜𑁆𑀳𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀭𑁄𑀢𑁄 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀯𑀢𑁆𑀣𑀼𑀁 𑀅𑀤𑁂𑀲𑀸𑀧𑁂𑀢𑁆𑀯𑀸 𑀓𑀭𑁄𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁫. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀖𑁄𑀲𑀺𑀢𑀸𑀭𑀸𑀫𑁂𑀢𑀺 𑀖𑁄𑀲𑀺𑀢𑀲𑁆𑀲 𑀆𑀭𑀸𑀫𑁂. 𑀖𑁄𑀲𑀺𑀢𑀦𑀸𑀫𑀓𑁂𑀦 𑀓𑀺𑀭 𑀲𑁂𑀝𑁆𑀞𑀺𑀦𑀸 𑀲𑁄 𑀓𑀸𑀭𑀺𑀢𑁄, 𑀢𑀲𑁆𑀫𑀸 ‘‘𑀖𑁄𑀲𑀺𑀢𑀸𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀙𑀦𑁆𑀦𑀲𑁆𑀲𑀸𑀢𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀸𑀓𑀙𑀦𑁆𑀦𑀲𑁆𑀲. 𑀯𑀺𑀳𑀸𑀭𑀯𑀢𑁆𑀣𑀼𑀁, 𑀪𑀦𑁆𑀢𑁂, 𑀚𑀸𑀦𑀸𑀳𑀻𑀢𑀺 𑀯𑀺𑀳𑀸𑀭𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁, 𑀪𑀦𑁆𑀢𑁂, 𑀚𑀸𑀦𑀸𑀳𑀺. 𑀏𑀢𑁆𑀣 𑀘 𑀯𑀺𑀳𑀸𑀭𑁄𑀢𑀺 𑀦 𑀲𑀓𑀮𑀯𑀺𑀳𑀸𑀭𑁄, 𑀏𑀓𑁄 𑀆𑀯𑀸𑀲𑁄, 𑀢𑁂𑀦𑁂𑀯𑀸𑀳 𑁋 ‘‘𑀅𑀬𑁆𑀬𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺.

𑀘𑁂𑀢𑀺𑀬𑀭𑀼𑀓𑁆𑀔𑀦𑁆𑀢𑀺 ¶ ¶ 𑀏𑀢𑁆𑀣 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑀺𑀬𑀁, 𑀧𑀽𑀚𑀸𑀭𑀳𑀸𑀦𑀁 𑀤𑁂𑀯𑀝𑁆𑀞𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀘𑁂𑀢𑀺𑀬’’𑀦𑁆𑀢𑀺 𑀲𑀫𑁆𑀫𑀢𑀁 𑀭𑀼𑀓𑁆𑀔𑀁 𑀘𑁂𑀢𑀺𑀬𑀭𑀼𑀓𑁆𑀔𑀁. 𑀕𑀸𑀫𑁂𑀦 𑀧𑀽𑀚𑀺𑀢𑀁 𑀕𑀸𑀫𑀲𑁆𑀲 𑀯𑀸 𑀧𑀽𑀚𑀺𑀢𑀦𑁆𑀢𑀺 𑀕𑀸𑀫𑀧𑀽𑀚𑀺𑀢𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀧𑀺𑀘𑁂𑀢𑁆𑀣 𑀚𑀦𑀧𑀤𑁄𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀏𑀓𑁂𑀓𑁄 𑀓𑁄𑀝𑁆𑀞𑀸𑀲𑁄. 𑀭𑀝𑁆𑀞𑀦𑁆𑀢𑀺 𑀲𑀓𑀮𑀭𑀚𑁆𑀚𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀓𑀮𑀭𑀚𑁆𑀚𑀫𑁆𑀧𑀺 𑀳𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀽𑀚𑀁 𑀓𑀭𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀝𑁆𑀞𑀧𑀽𑀚𑀺𑀢’’𑀦𑁆𑀢𑀺. 𑀏𑀓𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀚𑀻𑀯𑀲𑀜𑁆𑀜𑀺𑀦𑁄𑀢𑀺 𑀲𑀢𑁆𑀢𑀲𑀜𑁆𑀜𑀺𑀦𑁄.

𑁩𑁬𑁬. 𑀫𑀳𑀮𑁆𑀮𑀓𑀦𑁆𑀢𑀺 𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀁𑀬𑀸𑀘𑀺𑀓𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄. 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄 ¶ , 𑀢𑀁 𑀫𑀳𑀮𑁆𑀮𑀓𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀢𑀁 𑀧𑀫𑀸𑀡𑀫𑀳𑀢𑁆𑀢𑀁 𑀲𑀲𑁆𑀲𑀸𑀫𑀺𑀓𑀢𑁆𑀢𑀸𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀫𑀳𑀮𑁆𑀮𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀲𑁆𑀲𑀸𑀫𑀺𑀓𑁄 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺. 𑀲𑀲𑁆𑀲𑀸𑀫𑀺𑀓𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑁄 𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑁄 𑀘 𑀯𑀺𑀲𑁂𑀲𑁄, 𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑀸 𑀘 𑀘𑀢𑀼𑀓𑁆𑀓𑀧𑀸𑀭𑀺𑀳𑀸𑀦𑀻𑀢𑀺.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁, 𑀢𑀁 𑀓𑀺𑀭 𑀯𑁂𑀴𑀼𑀳𑀺 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁 𑀢𑁂𑀦 ‘‘𑀯𑁂𑀴𑀼𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼 𑀢𑁂𑀦 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧’’𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄, 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀲𑀼𑀧𑀺, 𑀧𑀭𑀺𑀚𑀦𑁄𑀧𑀺𑀲𑁆𑀲 𑀲𑀼𑀢𑁆𑀢𑁄 𑀭𑀸𑀚𑀸𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺, 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄, 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀓𑀸𑀴𑀓𑀸𑀬 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 ¶ 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀦𑀜𑁆𑀘 𑀖𑁄𑀲𑀸𑀧𑁂𑀲𑀺 ¶ , 𑀢𑀲𑁆𑀫𑀸 𑀢𑀁 𑀢𑀢𑁄𑀧𑀪𑀼𑀢𑀺 𑀓𑀮𑀦𑁆𑀤𑀓𑀦𑀺𑀯𑀸𑀧𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁. 𑀓𑀮𑀦𑁆𑀤𑀓𑀸𑀢𑀺 𑀳𑀺 𑀓𑀸𑀴𑀓𑀸𑀦𑀁 𑀏𑀢𑀁 𑀦𑀸𑀫𑀁.

𑀤𑀩𑁆𑀩𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀫𑀮𑁆𑀮𑀧𑀼𑀢𑁆𑀢𑁄𑀢𑀺 𑀫𑀮𑁆𑀮𑀭𑀸𑀚𑀲𑁆𑀲 𑀧𑀼𑀢𑁆𑀢𑁄. 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁 ¶ 𑀦𑀸𑀫 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀙 𑀅𑀪𑀺𑀜𑁆𑀜𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀢𑀺 𑀇𑀤𑀁 𑀕𑀼𑀡𑀚𑀸𑀢𑀁, 𑀢𑀁 𑀲𑀩𑁆𑀩𑀁 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀦𑀢𑁆𑀣𑀺 𑀘𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼, 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺, 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸 𑀇𑀤𑀸𑀦𑀺𑀲𑁆𑀲 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁 𑀦𑀢𑁆𑀣𑀺. 𑀓𑀢𑀲𑁆𑀲 𑀯𑀸 𑀧𑀢𑀺𑀘𑀬𑁄𑀢𑀺 𑀢𑀲𑁆𑀲𑁂𑀯 𑀓𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀧𑀼𑀦 𑀯𑀟𑁆𑀠𑀦𑀫𑁆𑀧𑀺 𑀦𑀢𑁆𑀣𑀺, 𑀥𑁄𑀢𑀲𑁆𑀲 𑀯𑀺𑀬 𑀯𑀢𑁆𑀣𑀲𑁆𑀲 𑀧𑀝𑀺𑀥𑁄𑀯𑀦𑀁 𑀧𑀺𑀲𑀺𑀢𑀲𑁆𑀲 𑀯𑀺𑀬 𑀕𑀦𑁆𑀥𑀲𑁆𑀲 𑀧𑀝𑀺𑀧𑀺𑀲𑀦𑀁, 𑀧𑀼𑀧𑁆𑀨𑀺𑀢𑀲𑁆𑀲 𑀯𑀺𑀬 𑀘 𑀧𑀼𑀧𑁆𑀨𑀲𑁆𑀲 𑀧𑀝𑀺𑀧𑀼𑀧𑁆𑀨𑀦𑀦𑁆𑀢𑀺. 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀢𑀢𑁄 𑀢𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀲𑀮𑁆𑀮𑀻𑀦𑀲𑁆𑀲, 𑀏𑀓𑀻𑀪𑀸𑀯𑀁 𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀦𑁆𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀇𑀫𑀁 𑀅𑀦𑁆𑀢𑀺𑀫𑀲𑀭𑀻𑀭𑀁 𑀥𑀸𑀭𑁂𑀫𑀺, 𑀢𑀜𑁆𑀘 𑀔𑁄 𑀯𑀸𑀢𑀫𑀼𑀔𑁂 𑀞𑀺𑀢 𑀧𑀤𑀻𑀧𑁄 𑀯𑀺𑀬 𑀅𑀦𑀺𑀘𑁆𑀘𑀢𑀸𑀫𑀼𑀔𑁂 𑀞𑀺𑀢𑀁, 𑀦𑀘𑀺𑀭𑀲𑁆𑀲𑁂𑀯 𑀦𑀺𑀩𑁆𑀩𑀸𑀬𑀦𑀥𑀫𑁆𑀫𑀁 𑀬𑀸𑀯 𑀦 𑀦𑀺𑀩𑁆𑀩𑀸𑀬𑀢𑀺 𑀢𑀸𑀯 𑀓𑀺𑀦𑁆𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀢𑀺𑀭𑁄𑀭𑀝𑁆𑀞𑁂𑀲𑀼 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀦𑁆𑀢𑀁 𑀅𑀤𑀺𑀲𑁆𑀯𑀸𑀯 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀪𑀕𑀯𑀦𑁆𑀢𑀁 ‘𑀧𑀲𑁆𑀲𑀺𑀲𑁆𑀲𑀸𑀫 𑀘𑁂𑀯 𑀯𑀦𑁆𑀤𑀺𑀲𑁆𑀲𑀸𑀫 𑀘𑀸’𑀢𑀺 𑀤𑀽𑀭𑀢𑁄𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀬𑁂𑀲𑀁 𑀲𑁂𑀦𑀸𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀢𑁂 𑀲𑀺𑀮𑀸𑀧𑀝𑁆𑀝𑀓𑁂𑀧𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀳𑁄𑀫𑀺 𑀔𑁄 𑀧𑀦𑀸𑀳𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 ¶ 𑀇𑀘𑁆𑀙𑀸𑀯𑀲𑁂𑀦 𑀧𑀸𑀲𑀸𑀤𑀯𑀺𑀳𑀸𑀭𑀅𑀟𑁆𑀠𑀬𑁄𑀕𑀸𑀤𑀻𑀦𑀺 𑀫𑀜𑁆𑀘𑀧𑀻𑀞𑀓𑀢𑁆𑀣𑀭𑀡𑀸𑀤𑀻𑀦𑀺 𑀘 𑀲𑁂𑀦𑀸𑀲𑁂𑀦𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀸𑀢𑀼𑀁. 𑀧𑀼𑀦𑀤𑀺𑀯𑀲𑁂 𑀘𑁂𑀢𑁆𑀣 𑀏𑀓𑀘𑁆𑀘𑁂 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀭𑀽𑀧𑀸 𑀳𑁄𑀦𑁆𑀢𑀺, 𑀢𑁂 𑀕𑀸𑀭𑀯𑁂𑀦 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀞𑀢𑁆𑀯𑀸 𑀪𑀢𑁆𑀢𑀸𑀦𑀺𑀧𑀺 𑀦 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺, 𑀅𑀳𑀁 𑀔𑁄 𑀧𑀦 𑀦𑁂𑀲𑀁 𑀪𑀢𑁆𑀢𑀸𑀦𑀺𑀧𑀺 𑀉𑀤𑁆𑀤𑀺𑀲𑀺𑀢𑀼𑀁 𑀧𑀳𑁄𑀫𑀻’’𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀲𑁆𑀲 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀦𑁆𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺.

𑀦𑀦𑀼 𑀘 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀲𑁆𑀲𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀬𑀼𑀢𑁆𑀢𑀸𑀦𑀺, 𑀅𑀬𑀜𑁆𑀘 𑀔𑀻𑀡𑀸𑀲𑀯𑁄 𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑁄, 𑀇𑀫𑀲𑁆𑀲 𑀓𑀲𑁆𑀫𑀸 𑀇𑀫𑀸𑀦𑀺 𑀧𑀝𑀺𑀪𑀁𑀲𑀽𑀢𑀺? 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀘𑁄𑀤𑀺𑀢𑀢𑁆𑀢𑀸. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀓𑀺𑀭 ¶ 𑀇𑀫𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺𑀬𑁂𑀯. 𑀅𑀬𑀜𑁆𑀘 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀇𑀫𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 ¶ 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁂 𑀅𑀳𑀫𑁆𑀧𑀺 𑀇𑀢𑁆𑀣𑀦𑁆𑀦𑀸𑀫𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀯𑀺𑀬 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀘 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀢𑁆𑀯𑀁 𑀤𑀩𑁆𑀩𑁄 𑀦𑀸𑀫 𑀫𑀮𑁆𑀮𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀲𑀺, 𑀇𑀫𑀜𑁆𑀘 𑀞𑀸𑀦𑀦𑁆𑀢𑀭𑀁 𑀮𑀘𑁆𑀙𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑀢𑁄𑀧𑀪𑀼𑀢𑀺 𑀤𑀸𑀦𑀲𑀻𑀮𑀸𑀤𑀻𑀦𑀺 𑀧𑀽𑀭𑀬𑀫𑀸𑀦𑁄 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀢𑁂𑀦 𑀪𑀕𑀯𑀢𑀸 𑀩𑁆𑀬𑀸𑀓𑀢𑀲𑀤𑀺𑀲𑀫𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀅𑀣𑀲𑁆𑀲 𑀭𑀳𑁄𑀕𑀢𑀲𑁆𑀲 ‘‘𑀓𑀺𑀦𑁆𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀢𑀸𑀬 𑀧𑀼𑀩𑁆𑀩𑀧𑀢𑁆𑀣𑀦𑀸𑀬 𑀘𑁄𑀤𑀺𑀢𑀢𑁆𑀢𑀸 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀝𑀺𑀪𑀁𑀲𑀽𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀅𑀦𑀺𑀲𑁆𑀲𑀭𑁄𑀲𑁆𑀫𑀺 𑀅𑀢𑁆𑀢𑀦𑀺, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀸𑀫𑀺, 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑀺𑀲𑁆𑀲𑀢𑀺 ¶ , 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄…𑀧𑁂… 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺. 𑀅𑀣 𑀦𑀁 𑀪𑀕𑀯𑀸 ‘‘𑀲𑀸𑀥𑀼 𑀲𑀸𑀥𑀼 𑀤𑀩𑁆𑀩𑀸’’𑀢𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀬𑀲𑁆𑀫𑀸 𑀅𑀭𑀳𑀢𑀺 𑀏𑀯𑀭𑀽𑀧𑁄 𑀅𑀕𑀢𑀺𑀕𑀫𑀦𑀧𑀭𑀺𑀩𑀸𑀳𑀺𑀭𑁄 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀯𑀺𑀘𑀸𑀭𑁂𑀢𑀼𑀁, 𑀢𑀲𑁆𑀫𑀸 ‘‘𑀢𑁂𑀦 𑀳𑀺 𑀢𑁆𑀯𑀁 𑀤𑀩𑁆𑀩 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀳𑀺 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀸’’𑀢𑀺 𑀆𑀳. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀢𑀺𑀅𑀲𑁆𑀲𑁄𑀲𑀺 𑀅𑀪𑀺𑀫𑀼𑀔𑁄 𑀅𑀲𑁆𑀲𑁄𑀲𑀺, 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀞𑀫𑀁 𑀤𑀩𑁆𑀩𑁄 𑀬𑀸𑀘𑀺𑀢𑀩𑁆𑀩𑁄𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀬𑀸𑀘𑀸𑀧𑁂𑀢𑀺? 𑀕𑀭𑀳𑀫𑁄𑀘𑀦𑀢𑁆𑀣𑀁. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ‘‘𑀅𑀦𑀸𑀕𑀢𑁂 𑀤𑀩𑁆𑀩𑀲𑁆𑀲 𑀇𑀫𑀁 𑀞𑀸𑀦𑀁 𑀦𑀺𑀲𑁆𑀲𑀸𑀬 𑀫𑁂𑀢𑁆𑀢𑀺𑀬𑀪𑀼𑀫𑀚𑀓𑀸𑀦𑀁 𑀯𑀲𑁂𑀦 𑀫𑀳𑀸𑀉𑀧𑀤𑁆𑀤𑀯𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁆𑀭 𑀓𑁂𑀘𑀺 𑀕𑀭𑀳𑀺𑀲𑁆𑀲𑀦𑁆𑀢𑀺 ‘𑀅𑀬𑀁 𑀢𑀼𑀡𑁆𑀳𑀻𑀪𑀽𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀈𑀤𑀺𑀲𑀁 𑀞𑀸𑀦𑀁 𑀯𑀺𑀘𑀸𑀭𑁂𑀢𑀻’𑀢𑀺. 𑀢𑀢𑁄 𑀅𑀜𑁆𑀜𑁂 𑀯𑀓𑁆𑀔𑀦𑁆𑀢𑀺 ‘𑀓𑁄 𑀇𑀫𑀲𑁆𑀲 𑀤𑁄𑀲𑁄 𑀏𑀢𑁂𑀳𑁂𑀯 𑀬𑀸𑀘𑀺𑀢𑁆𑀯𑀸 𑀞𑀧𑀺𑀢𑁄’𑀢𑀺 𑀏𑀯𑀁 𑀕𑀭𑀳𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀕𑀭𑀳𑀫𑁄𑀘𑀦𑀢𑁆𑀣𑀁 𑀬𑀸𑀘𑀸𑀧𑁂𑀢𑁆𑀯𑀸𑀧𑀺 𑀧𑀼𑀦 𑀬𑀲𑁆𑀫𑀸 𑀅𑀲𑀫𑁆𑀫𑀢𑁂 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂 𑀓𑀺𑀜𑁆𑀘𑀺 𑀓𑀣𑀬𑀫𑀸𑀦𑁂 𑀔𑀺𑀬𑁆𑀬𑀦𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀅𑀬𑀁 𑀓𑀲𑁆𑀫𑀸 𑀲𑀗𑁆𑀖𑀫𑀚𑁆𑀛𑁂 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀢𑀺, 𑀇𑀲𑁆𑀲𑀭𑀺𑀬𑀁 𑀤𑀲𑁆𑀲𑁂𑀢𑀻’’𑀢𑀺. 𑀲𑀫𑁆𑀫𑀢𑁂 𑀧𑀦 𑀓𑀣𑁂𑀦𑁆𑀢𑁂 ¶ ‘‘𑀫𑀸𑀬𑀲𑁆𑀫𑀦𑁆𑀢𑁄 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣, 𑀲𑀫𑁆𑀫𑀢𑁄 𑀅𑀬𑀁, 𑀓𑀣𑁂𑀢𑀼 𑀬𑀣𑀸𑀲𑀼𑀔’’𑀦𑁆𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺. 𑀅𑀲𑀫𑁆𑀫𑀢𑀜𑁆𑀘 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀲𑁆𑀲 𑀮𑀳𑀼𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀸. 𑀲𑀫𑁆𑀫𑀢𑀁 𑀧𑀦 𑀅𑀩𑁆𑀪𑀸𑀘𑀺𑀓𑁆𑀔𑀢𑁄 𑀕𑀭𑀼𑀓𑀢𑀭𑀸 ¶ 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀺. 𑀅𑀣 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀕𑀭𑀼𑀓𑀪𑀸𑀯𑁂𑀦 𑀯𑁂𑀭𑀻𑀳𑀺𑀧𑀺 𑀤𑀼𑀧𑁆𑀧𑀥𑀁𑀲𑀺𑀬𑀢𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀫𑀦𑁆𑀦𑀸𑀧𑁂𑀢𑀼𑀁 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀧𑀦 𑀤𑁆𑀯𑁂 𑀲𑀫𑁆𑀫𑀼𑀢𑀺𑀬𑁄 𑀏𑀓𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺? 𑀦 𑀓𑁂𑀯𑀮𑀁 𑀤𑁆𑀯𑁂, 𑀲𑀘𑁂 𑀧𑀳𑁄𑀢𑀺, 𑀢𑁂𑀭𑀲𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀅𑀧𑁆𑀧𑀳𑁄𑀦𑁆𑀢𑀸𑀦𑀁 𑀧𑀦 𑀏𑀓𑀸𑀧𑀺 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁩𑁮𑁨. 𑀲𑀪𑀸𑀕𑀸𑀦𑀦𑁆𑀢𑀺 𑀕𑀼𑀡𑀲𑀪𑀸𑀕𑀸𑀦𑀁, 𑀦 𑀫𑀺𑀢𑁆𑀢𑀲𑀦𑁆𑀣𑀯𑀲𑀪𑀸𑀕𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀢𑁆𑀢𑀦𑁆𑀢𑀺𑀓𑀸 𑀢𑁂𑀲𑀁 𑀏𑀓𑀚𑁆𑀛’’𑀦𑁆𑀢𑀺𑀆𑀤𑀺 ¶ . 𑀬𑀸𑀯𑀢𑀺𑀓𑀸 𑀳𑀺 𑀲𑀼𑀢𑁆𑀢𑀦𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀏𑀓𑀢𑁄 𑀢𑁂𑀲𑀁 𑀅𑀦𑀼𑀭𑀽𑀧𑀫𑁂𑀯 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺; 𑀏𑀯𑀁 𑀲𑁂𑀲𑀸𑀦𑀁. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸𑀢𑀺 𑀓𑀸𑀬𑀲𑁆𑀲 𑀤𑀴𑁆𑀳𑀻𑀪𑀸𑀯𑀓𑀭𑀡𑀩𑀳𑀼𑀮𑀸, 𑀓𑀸𑀬𑀧𑁄𑀲𑀦𑀩𑀳𑀼𑀮𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀬𑀧𑀺𑀫𑁂 𑀆𑀬𑀲𑁆𑀫𑀦𑁆𑀢𑁄 𑀭𑀢𑀺𑀬𑀸𑀢𑀺 𑀇𑀫𑀸𑀬 𑀲𑀕𑁆𑀕𑀫𑀕𑁆𑀕𑀲𑁆𑀲 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀭𑀢𑀺𑀬𑀸. 𑀅𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺.

𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯𑀸𑀮𑁄𑀓𑁂𑀦𑀸𑀢𑀺 𑀢𑁂𑀚𑁄𑀓𑀲𑀺𑀡𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀅𑀗𑁆𑀕𑀼𑀮𑀺𑀚𑀮𑀦𑀁 𑀅𑀥𑀺𑀝𑁆𑀞𑀸𑀬 𑀢𑁂𑀦𑁂𑀯 𑀢𑁂𑀚𑁄𑀥𑀸𑀢𑀼𑀲𑀫𑀸𑀧𑀢𑁆𑀢𑀺𑀚𑀦𑀺𑀢𑁂𑀦 𑀅𑀗𑁆𑀕𑀼𑀮𑀺𑀚𑀸𑀮𑀸𑀮𑁄𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑁄 𑀦𑀘𑀺𑀭𑀲𑁆𑀲𑁂𑀯 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀁 𑀲𑀼𑀢𑁆𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀸 𑀅𑀧𑀺𑀲𑀼 𑀪𑀺𑀓𑁆𑀔𑀽 𑀲𑀜𑁆𑀘𑀺𑀘𑁆𑀘 𑀯𑀺𑀓𑀸𑀮𑁂 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀲𑀜𑁆𑀘𑀺𑀘𑁆𑀘 𑀤𑀽𑀭𑁂 𑀅𑀧𑀤𑀺𑀲𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀸𑀯 𑀤𑀽𑀭𑁂 𑀅𑀧𑀤𑀺𑀲𑀦𑁆𑀢𑀺. 𑀓𑀣𑀁? ‘‘𑀅𑀫𑁆𑀳𑀸𑀓𑀁 𑀆𑀯𑀼𑀲𑁄 𑀤𑀩𑁆𑀩 𑀕𑀺𑀚𑁆𑀛𑀓𑀽𑀝𑁂’’𑀢𑀺 𑀇𑀫𑀺𑀦𑀸 𑀦𑀬𑁂𑀦.

𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀻𑀢𑀺 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀲𑀬𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀩𑀳𑀽 𑀳𑁄𑀦𑁆𑀢𑀺, 𑀩𑀳𑀽 𑀅𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀸𑀢𑀺. 𑀲𑀩𑁆𑀩𑁂 𑀅𑀢𑁆𑀢𑀦𑀸 𑀲𑀤𑀺𑀲𑀸 𑀏𑀯 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑀅𑀬𑀁 𑀫𑀜𑁆𑀘𑁄𑀢𑀺𑀆𑀤𑀻𑀲𑀼 𑀧𑀦 𑀣𑁂𑀭𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺 𑀯𑀤𑀦𑁆𑀢𑁂 𑀦𑀺𑀫𑁆𑀫𑀺𑀢𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀕𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺 𑀯𑀤𑀦𑁆𑀢𑀺; 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀅𑀬𑀜𑁆𑀳𑀺 𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸 𑁋

‘‘𑀏𑀓𑀲𑁆𑀫𑀺𑀁 ¶ 𑀪𑀸𑀲𑀫𑀸𑀦𑀲𑁆𑀫𑀺𑀁, 𑀲𑀩𑁆𑀩𑁂 𑀪𑀸𑀲𑀦𑁆𑀢𑀺 𑀦𑀺𑀫𑁆𑀫𑀺𑀢𑀸;

𑀏𑀓𑀲𑁆𑀫𑀺𑀁 𑀢𑀼𑀡𑁆𑀳𑀺𑀫𑀸𑀲𑀻𑀦𑁂, 𑀲𑀩𑁆𑀩𑁂 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺 𑀢𑁂’’𑀢𑀺.

𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀭𑀺𑀧𑀽𑀭𑀦𑁆𑀢𑀺, 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀧𑀽𑀭𑁂𑀦𑁆𑀢𑀺. 𑀢𑁂𑀦 𑀦𑀺𑀫𑁆𑀫𑀺𑀢𑀸𑀦𑀁 𑀅𑀯𑀢𑁆𑀣𑀼𑀓𑀯𑀘𑀦𑀁 𑀦 𑀳𑁄𑀢𑀺.

𑀲𑁂𑀦𑀸𑀲𑀦𑀁 ¶ 𑀧𑀜𑁆𑀜𑀧𑁂𑀢𑁆𑀯𑀸 𑀧𑀼𑀦𑀤𑁂𑀯 𑀯𑁂𑀴𑀼𑀯𑀦𑀁 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀓𑀣𑀁 𑀓𑀣𑁂𑀦𑁆𑀢𑁄 𑀦 𑀦𑀺𑀲𑀻𑀤𑀢𑀺, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀘𑁆𑀙𑀢𑀺.

𑁩𑁮𑁩. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀢𑀺 𑀫𑁂𑀢𑁆𑀢𑀺𑀬𑁄 𑀘𑁂𑀯 𑀪𑀽𑀫𑀚𑀓𑁄 𑀘, 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀅𑀕𑁆𑀕𑀧𑀼𑀭𑀺𑀲𑀸 𑀏𑀢𑁂. 𑀮𑀸𑀫𑀓𑀸𑀦𑀺 𑀘 𑀪𑀢𑁆𑀢𑀸𑀦𑀻𑀢𑀺 𑀲𑁂𑀦𑀸𑀲𑀦𑀸𑀦𑀺 ¶ 𑀢𑀸𑀯 𑀦𑀯𑀓𑀸𑀦𑀁 𑀮𑀸𑀫𑀓𑀸𑀦𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀦𑀘𑁆𑀙𑀭𑀺𑀬𑀫𑁂𑀢𑀁. 𑀪𑀢𑁆𑀢𑀸𑀦𑀺 𑀧𑀦 𑀲𑀮𑀸𑀓𑀸𑀬𑁄 𑀧𑀘𑁆𑀙𑀺𑀬𑀁 𑀯𑀸 𑀘𑀻𑀯𑀭𑀪𑁄𑀕𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀮𑁄𑀴𑁂𑀢𑁆𑀯𑀸 𑀏𑀓𑀫𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑀸𑀦𑀺𑀧𑀺 𑀢𑁂𑀲𑀁 𑀫𑀦𑁆𑀤𑀧𑀼𑀜𑀢𑀸𑀬 𑀮𑀸𑀫𑀓𑀸𑀦𑀺 𑀲𑀩𑁆𑀩𑀧𑀘𑁆𑀙𑀺𑀫𑀸𑀦𑁂𑀯 𑀧𑀸𑀧𑀼𑀡𑀦𑁆𑀢𑀺. 𑀬𑀫𑁆𑀧𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀏𑀢𑁂𑀲𑀁 𑀧𑀢𑁆𑀢𑀤𑀺𑀯𑀲𑁂 𑀮𑀸𑀫𑀓𑀁 𑀯𑀸 𑀳𑁄𑀢𑀺, 𑀏𑀢𑁂 𑀯𑀸 𑀤𑀺𑀲𑁆𑀯𑀸𑀯 𑀧𑀡𑀻𑀢𑀁 𑀅𑀤𑀢𑁆𑀯𑀸 𑀮𑀸𑀫𑀓𑀫𑁂𑀯 𑀤𑁂𑀦𑁆𑀢𑀺.

𑀅𑀪𑀺𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀁 𑀲𑀼𑀲𑀚𑁆𑀚𑀺𑀢𑀁, 𑀲𑀼𑀲𑀫𑁆𑀧𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀪𑀢𑁆𑀢𑀁. 𑀩𑀺𑀮𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀓𑀤𑀼𑀢𑀺𑀬𑀁.

𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄𑀢𑀺 𑀓𑀮𑁆𑀬𑀸𑀡𑀁 𑀲𑀼𑀦𑁆𑀤𑀭𑀁 𑀅𑀢𑀺𑀯𑀺𑀬 𑀧𑀡𑀻𑀢𑀁 𑀪𑀢𑁆𑀢𑀫𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀪𑀢𑁆𑀢𑀺𑀓𑁄, 𑀧𑀡𑀻𑀢𑀤𑀸𑀬𑀓𑀢𑁆𑀢𑀸 𑀪𑀢𑁆𑀢𑁂𑀦𑁂𑀯 𑀧𑀜𑁆𑀜𑀸𑀢𑁄. 𑀘𑀢𑀼𑀓𑁆𑀓𑀪𑀢𑁆𑀢𑀁 𑀤𑁂𑀢𑀻𑀢𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀤𑁂𑀢𑀺, 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦 𑀧𑀦 ‘‘𑀘𑀢𑀼𑀓𑁆𑀓𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀧𑀭𑀺𑀯𑀺𑀲𑀢𑀻𑀢𑀺 𑀲𑀩𑁆𑀩𑀓𑀫𑁆𑀫𑀦𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀧𑀭𑀺𑀯𑀺𑀲𑀢𑀺. 𑀑𑀤𑀦𑁂𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀑𑀤𑀦𑀳𑀢𑁆𑀣𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂 𑀑𑀤𑀦𑀁 𑀤𑁂𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀓𑀭𑀡𑀢𑁆𑀣𑁂𑀬𑁂𑀯 𑀓𑀭𑀡𑀯𑀘𑀦𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀽𑀧𑀸𑀤𑀻𑀲𑀼.

𑀲𑁆𑀯𑀸𑀢𑀦𑀸𑀬𑀸𑀢𑀺 𑀲𑁆𑀯𑁂 𑀪𑀯𑁄 𑀪𑀢𑁆𑀢𑀧𑀭𑀺𑀪𑁄𑀕𑁄 𑀲𑁆𑀯𑀸𑀢𑀦𑁄 𑀢𑀲𑁆𑀲𑀢𑁆𑀣𑀸𑀬, 𑀲𑁆𑀯𑀸𑀢𑀦𑀸𑀬 𑀲𑁆𑀯𑁂 𑀓𑀢𑁆𑀢𑀩𑁆𑀩𑀲𑁆𑀲 𑀪𑀢𑁆𑀢𑀧𑀭𑀺𑀪𑁄𑀕𑀲𑁆𑀲𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀧𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺. 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀔𑁄 𑀕𑀳𑀧𑀢𑀻𑀢𑀺 𑀇𑀤𑀁 𑀣𑁂𑀭𑁄 𑀅𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀆𑀳. 𑀏𑀯𑀁𑀩𑀮𑀯𑀢𑀻 𑀳𑀺 𑀢𑁂𑀲𑀁 ¶ 𑀫𑀦𑁆𑀤𑀧𑀼𑀜𑁆𑀜𑀢𑀸, 𑀬𑀁 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀅𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀬𑁂 𑀚𑁂𑀢𑀺 𑀏𑀢𑁆𑀣 𑀚𑁂𑀢𑀺 𑀤𑀸𑀲𑀺𑀁 𑀆𑀮𑀧𑀢𑀺.

𑀳𑀺𑀬𑁆𑀬𑁄 𑀔𑁄 𑀆𑀯𑀼𑀲𑁄 𑀅𑀫𑁆𑀳𑀸𑀓𑀦𑁆𑀢𑀺 𑀭𑀢𑁆𑀢𑀺𑀁 𑀲𑀫𑁆𑀫𑀦𑁆𑀢𑀬𑀫𑀸𑀦𑀸 𑀅𑀢𑀻𑀢𑀁 𑀤𑀺𑀯𑀲𑀪𑀸𑀕𑀁 𑀲𑀦𑁆𑀥𑀸𑀬 ‘‘𑀳𑀺𑀬𑁆𑀬𑁄’’𑀢𑀺 𑀯𑀤𑀦𑁆𑀢𑀺. 𑀦 𑀘𑀺𑀢𑁆𑀢𑀭𑀽𑀧𑀦𑁆𑀢𑀺 𑀦 𑀘𑀺𑀢𑁆𑀢𑀸𑀦𑀼𑀭𑀽𑀧𑀁, 𑀬𑀣𑀸 𑀧𑀼𑀩𑁆𑀩𑁂 𑀬𑀢𑁆𑀢𑀓𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀢𑀓𑀁 𑀲𑀼𑀧𑀦𑁆𑀢𑀺, 𑀦 𑀏𑀯𑀁 𑀲𑀼𑀧𑀺𑀁𑀲𑀼, 𑀅𑀧𑁆𑀧𑀓𑀫𑁂𑀯 𑀲𑀼𑀧𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑁂𑀢𑀺 ¶ 𑀯𑁂𑀴𑀼𑀯𑀦𑀯𑀺𑀳𑀸𑀭𑀲𑁆𑀲 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂. 𑀧𑀢𑁆𑀢𑀓𑁆𑀔𑀦𑁆𑀥𑀸𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑀸 𑀔𑀦𑁆𑀥𑀝𑁆𑀞𑀺𑀓𑀁 𑀦𑀸𑀫𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀧𑀚𑁆𑀛𑀸𑀬𑀦𑁆𑀢𑀸𑀢𑀺 𑀧𑀥𑀽𑀧𑀸𑀬𑀦𑁆𑀢𑀸.

𑀬𑀢𑁄 𑀦𑀺𑀯𑀸𑀢𑀁 ¶ 𑀢𑀢𑁄 𑀲𑀯𑀸𑀢𑀦𑁆𑀢𑀺 𑀬𑀢𑁆𑀣 𑀦𑀺𑀯𑀸𑀢𑀁 𑀅𑀧𑁆𑀧𑀓𑁄𑀧𑀺 𑀯𑀸𑀢𑁄 𑀦𑀢𑁆𑀣𑀺, 𑀢𑀢𑁆𑀣 𑀫𑀳𑀸𑀯𑀸𑀢𑁄 𑀉𑀝𑁆𑀞𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑀓𑀁 𑀫𑀜𑁆𑀜𑁂 𑀆𑀤𑀺𑀢𑁆𑀢𑀦𑁆𑀢𑀺 𑀉𑀤𑀓𑀁 𑀯𑀺𑀬 𑀆𑀤𑀺𑀢𑁆𑀢𑀁.

𑁩𑁮𑁪. 𑀲𑀭𑀲𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀓𑀢𑁆𑀢𑀸𑀢𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀲𑀭𑀲𑀺. 𑀅𑀣 𑀯𑀸 𑀲𑀭𑀲𑀺 𑀢𑁆𑀯𑀁 𑀤𑀩𑁆𑀩 𑀏𑀯𑀭𑀽𑀧𑀁 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳, 𑀓𑀢𑁆𑀢𑀸 𑀥𑀸𑀲𑀺 𑀏𑀯𑀭𑀽𑀧𑀁, 𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 ‘‘𑀓𑀢𑁆𑀯𑀸’’𑀢𑀺 𑀧𑀞𑀦𑁆𑀢𑀺 𑀢𑁂𑀲𑀁 𑀉𑀚𑀼𑀓𑀫𑁂𑀯.

𑀬𑀣𑀸 𑀫𑀁 𑀪𑀦𑁆𑀢𑁂 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀣𑁂𑀭𑁄 𑀓𑀺𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀪𑀦𑁆𑀢𑁂 𑀲𑀩𑁆𑀩𑀜𑁆𑀜𑀽, 𑀅𑀳𑀜𑁆𑀘 𑀔𑀻𑀡𑀸𑀲𑀯𑁄, 𑀦𑀢𑁆𑀣𑀺 𑀫𑀬𑁆𑀳𑀁 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀸, 𑀢𑀁 𑀫𑀁 𑀪𑀕𑀯𑀸 𑀚𑀸𑀦𑀸𑀢𑀺, 𑀢𑀢𑁆𑀭𑀸𑀳𑀁 𑀓𑀺𑀁 𑀯𑀓𑁆𑀔𑀸𑀫𑀺, 𑀬𑀣𑀸 𑀫𑀁 𑀪𑀕𑀯𑀸 𑀚𑀸𑀦𑀸𑀢𑀺 𑀢𑀣𑁂𑀯𑀸𑀳𑀁 𑀤𑀝𑁆𑀞𑀩𑁆𑀩𑁄𑀢𑀺.

𑀦 𑀔𑁄 𑀤𑀩𑁆𑀩 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀏𑀢𑁆𑀣 𑀦 𑀔𑁄 𑀤𑀩𑁆𑀩 𑀧𑀡𑁆𑀟𑀺𑀢𑀸 𑀬𑀣𑀸 𑀢𑁆𑀯𑀁 𑀧𑀭𑀧𑁆𑀧𑀘𑁆𑀘𑀬𑁂𑀦 𑀦𑀺𑀩𑁆𑀩𑁂𑀞𑁂𑀲𑀺, 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀺; 𑀅𑀧𑀺 𑀘 𑀔𑁄 𑀬𑀤𑁂𑀯 𑀲𑀸𑀫𑀁 𑀜𑀸𑀢𑀁 𑀢𑁂𑀦 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀘𑁂 𑀢𑀬𑀸 𑀓𑀢𑀁 𑀓𑀢𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀦 𑀳𑀺 𑀲𑀓𑁆𑀓𑀸 𑀧𑀭𑀺𑀲𑀩𑀮𑁂𑀦 𑀯𑀸 𑀧𑀓𑁆𑀔𑀼𑀧𑀢𑁆𑀣𑀫𑁆𑀪𑁂𑀦 𑀯𑀸 𑀅𑀓𑀸𑀭𑀓𑁄 𑀓𑀸𑀭𑀓𑁄 𑀓𑀸𑀢𑀼𑀁, 𑀓𑀸𑀭𑀓𑁄 𑀯𑀸 𑀅𑀓𑀸𑀭𑀓𑁄 𑀓𑀸𑀢𑀼𑀁, 𑀢𑀲𑁆𑀫𑀸 𑀬𑀁 𑀲𑀬𑀁 𑀓𑀢𑀁 𑀯𑀸 𑀅𑀓𑀢𑀁 𑀯𑀸 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀚𑀸𑀦𑀦𑁆𑀢𑁄𑀧𑀺 ‘‘𑀅𑀳𑀁 𑀚𑀸𑀦𑀸𑀫𑀺, 𑀔𑀻𑀡𑀸𑀲𑀯𑁄 𑀢𑁆𑀯𑀁; 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀤𑁄𑀲𑁄, 𑀅𑀬𑀁 𑀪𑀺𑀓𑁆𑀔𑀼𑀦𑀻 ¶ 𑀫𑀼𑀲𑀸𑀯𑀸𑀤𑀺𑀦𑀻’’𑀢𑀺 𑀦𑀸𑀯𑁄𑀘𑀸𑀢𑀺? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬. 𑀲𑀘𑁂 𑀳𑀺 𑀪𑀕𑀯𑀸 𑀬𑀁 𑀬𑀁 𑀚𑀸𑀦𑀸𑀢𑀺 𑀢𑀁 𑀢𑀁 𑀯𑀤𑁂𑀬𑁆𑀬, 𑀅𑀜𑁆𑀜𑁂𑀦 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁂𑀦 𑀧𑀼𑀝𑁆𑀞𑁂𑀦 ‘‘𑀅𑀳𑀁 𑀚𑀸𑀦𑀸𑀫𑀺 𑀢𑁆𑀯𑀁 𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀢𑁄 𑀲𑁄 𑀧𑀼𑀕𑁆𑀕𑀮𑁄 ‘‘𑀅𑀬𑀁 𑀧𑀼𑀩𑁆𑀩𑁂 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀫𑀁 𑀅𑀲𑀼𑀤𑁆𑀥𑀁 𑀓𑀭𑁄𑀢𑀺; 𑀓𑀲𑁆𑀲 𑀤𑀸𑀦𑀺 𑀓𑀺𑀁 𑀯𑀤𑀸𑀫𑀺, 𑀬𑀢𑁆𑀭 𑀲𑀢𑁆𑀣𑀸𑀧𑀺 𑀲𑀸𑀯𑀓𑁂𑀲𑀼 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺; 𑀓𑀼𑀢𑁄 𑀇𑀫𑀲𑁆𑀲 𑀲𑀩𑁆𑀩𑀜𑁆𑀜𑀼𑀪𑀸𑀯𑁄’’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 𑀇𑀫𑀸𑀬 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀚𑀸𑀦𑀦𑁆𑀢𑁄𑀧𑀺 𑀦𑀸𑀯𑁄𑀘.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑀉𑀧𑀯𑀸𑀤𑀧𑀭𑀺𑀯𑀚𑁆𑀚𑀦𑀢𑁄𑀧𑀺 𑀦𑀸𑀯𑁄𑀘. 𑀬𑀤𑀺 𑀳𑀺 𑀪𑀕𑀯𑀸 𑀏𑀯𑀁 ¶ 𑀯𑀤𑁂𑀬𑁆𑀬, 𑀏𑀯𑀁 𑀉𑀧𑀯𑀸𑀤𑁄 𑀪𑀯𑁂𑀬𑁆𑀬 ‘‘𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀪𑀸𑀭𑀺𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀦 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄’’𑀢𑀺. 𑀇𑀤𑀜𑁆𑀘 𑀯𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀫𑀜𑁆𑀜𑀫𑀸𑀦𑀸 ‘‘𑀩𑀼𑀤𑁆𑀥𑀓𑀸𑀮𑁂𑀧𑀺 𑀲𑀓𑁆𑀔𑀺𑀦𑀸 𑀲𑀼𑀤𑁆𑀥𑀺 𑀯𑀸 𑀅𑀲𑀼𑀤𑁆𑀥𑀺 ¶ 𑀯𑀸 𑀳𑁄𑀢𑀺 𑀫𑀬𑀁 𑀚𑀸𑀦𑀸𑀫, 𑀅𑀬𑀁 𑀧𑀼𑀕𑁆𑀕𑀮𑁄 𑀅𑀲𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀸𑀧𑀪𑀺𑀓𑁆𑀔𑀽 𑀮𑀚𑁆𑀚𑀺𑀫𑁆𑀧𑀺 𑀯𑀺𑀦𑀸𑀲𑁂𑀬𑁆𑀬𑀼𑀦𑁆𑀢𑀺. 𑀅𑀧𑀺𑀘 𑀅𑀦𑀸𑀕𑀢𑁂𑀧𑀺 𑀪𑀺𑀓𑁆𑀔𑀽 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 ‘‘𑀲𑀘𑁂 𑀢𑀬𑀸 𑀓𑀢𑀁, ‘𑀓𑀢’𑀦𑁆𑀢𑀺 𑀯𑀤𑁂𑀳𑀻’’𑀢𑀺 𑀮𑀚𑁆𑀚𑀻𑀦𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀦𑀬𑀮𑀓𑁆𑀔𑀡𑁂 𑀢𑀦𑁆𑀢𑀺𑀁 𑀞𑀧𑁂𑀦𑁆𑀢𑁄 ‘‘𑀅𑀳𑀁 𑀚𑀸𑀦𑀸𑀫𑀻’’𑀢𑀺 𑀅𑀯𑀢𑁆𑀯𑀸𑀯 ‘‘𑀲𑀘𑁂 𑀢𑀬𑀸 𑀓𑀢𑀁, ‘𑀓𑀢’𑀦𑁆𑀢𑀺 𑀯𑀤𑁂𑀳𑀻’’𑀢𑀺 𑀆𑀳.

𑀦𑀸𑀪𑀺𑀚𑀸𑀦𑀸𑀫𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀸𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀦 𑀅𑀪𑀺𑀚𑀸𑀦𑀸𑀫𑀺, 𑀦 𑀧𑀝𑀺𑀲𑁂𑀯𑀺𑀢𑀸 𑀅𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀝𑀺𑀲𑁂𑀯𑀺𑀢𑀸 𑀳𑀼𑀢𑁆𑀯𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀦 𑀚𑀸𑀦𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂 𑀧𑀦 ‘‘𑀧𑀝𑀺𑀲𑁂𑀯𑀺𑀢𑁆𑀯𑀸’’𑀢𑀺 𑀧𑀞𑀦𑁆𑀢𑀺 𑀢𑁂𑀲𑀁 𑀉𑀚𑀼𑀓𑀫𑁂𑀯. 𑀧𑀕𑁂𑀯 𑀚𑀸𑀕𑀭𑁄𑀢𑀺 𑀚𑀸𑀕𑀭𑀦𑁆𑀢𑁄 𑀧𑀦 𑀧𑀞𑀫𑀁𑀬𑁂𑀯 𑀦 𑀚𑀸𑀦𑀸𑀫𑀻𑀢𑀺.

𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 𑀬𑀲𑁆𑀫𑀸 𑀤𑀩𑁆𑀩𑀲𑁆𑀲 𑀘 𑀇𑀫𑀺𑀲𑁆𑀲𑀸 𑀘 𑀯𑀘𑀦𑀁 𑀦 𑀖𑀝𑀻𑀬𑀢𑀺 𑀢𑀲𑁆𑀫𑀸 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀢𑀺𑀲𑁆𑀲𑁄 𑀦𑀸𑀲𑀦𑀸 𑁋 𑀮𑀺𑀗𑁆𑀕𑀦𑀸𑀲𑀦𑀸, 𑀲𑀁𑀯𑀸𑀲𑀦𑀸𑀲𑀦𑀸, 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀢𑀺. 𑀢𑀸𑀲𑀼 ‘‘𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁬𑁬) 𑀅𑀬𑀁 ‘‘𑀮𑀺𑀗𑁆𑀕𑀦𑀸𑀲𑀦𑀸’’. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀬𑀁 ‘‘𑀲𑀁𑀯𑀸𑀲𑀦𑀸𑀲𑀦𑀸’’. ‘‘𑀘𑀭 ¶ 𑀧𑀺𑀭𑁂 𑀯𑀺𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑁪𑁨𑁯) 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀬𑀁 ‘‘𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸’’. 𑀇𑀥 𑀧𑀦 𑀮𑀺𑀗𑁆𑀕𑀦𑀸𑀲𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺.

𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀻𑀧𑁂𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀓𑀸𑀭𑀺𑀓𑀸 𑀅𑀤𑁆𑀥𑀸 𑀅𑀜𑁆𑀜𑁂𑀳𑀺 𑀉𑀬𑁆𑀬𑁄𑀚𑀺𑀢𑀸, 𑀢𑀲𑁆𑀫𑀸 𑀬𑁂𑀳𑀺 𑀉𑀬𑁆𑀬𑁄𑀚𑀺𑀢𑀸 𑀇𑀫𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣 𑀕𑀯𑁂𑀲𑀣 𑀚𑀸𑀦𑀸𑀣𑀸’’𑀢𑀺.

𑀓𑀺𑀁 𑀧𑀦 𑀪𑀕𑀯𑀢𑀸 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸 𑀅𑀧𑁆𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸𑀢𑀺, 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸, 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺 𑀲𑀤𑁄𑀲𑁄? 𑀅𑀣 𑀅𑀧𑁆𑀧𑀝𑀺𑀜𑁆𑀜𑀸𑀬, 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀺 𑀦𑀺𑀤𑁆𑀤𑁄𑀲𑁄.

𑀪𑀸𑀢𑀺𑀬𑀭𑀸𑀚𑀓𑀸𑀮𑁂𑀧𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀜𑁆𑀘 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀜𑁆𑀘 ¶ 𑀣𑁂𑀭𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀧𑀤𑁂 𑀯𑀺𑀯𑀸𑀤𑁄 𑀅𑀳𑁄𑀲𑀺. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻’’𑀢𑀺 ¶ 𑀯𑀤𑀦𑁆𑀢𑀺. 𑀧𑀜𑁆𑀳𑁄 𑀦 𑀙𑀺𑀚𑁆𑀚𑀢𑀺. 𑀭𑀸𑀚𑀸 𑀲𑀼𑀢𑁆𑀯𑀸 𑀣𑁂𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀤𑀻𑀖𑀓𑀸𑀭𑀸𑀬𑀦𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀁 𑀅𑀫𑀘𑁆𑀘𑀁 ‘‘𑀣𑁂𑀭𑀸𑀦𑀁 𑀓𑀣𑀁 𑀲𑀼𑀡𑀸𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑁄 𑀓𑀺𑀭 𑀧𑀡𑁆𑀟𑀺𑀢𑁄 𑀪𑀸𑀲𑀦𑁆𑀢𑀭𑀓𑀼𑀲𑀮𑁄 𑀲𑁄 𑀆𑀳 𑁋 ‘‘𑀯𑀤𑀦𑁆𑀢𑀼 𑀢𑀸𑀯 𑀣𑁂𑀭𑀸 𑀲𑀼𑀢𑁆𑀢’’𑀦𑁆𑀢𑀺. 𑀢𑀢𑁄 𑀅𑀪𑀬𑀕𑀺𑀭𑀺𑀣𑁂𑀭𑀸 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀤𑀺𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸’’𑀢𑀺. 𑀅𑀫𑀘𑁆𑀘𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺 𑀲𑀤𑁄𑀲𑁄’’𑀢𑀺 𑀆𑀳. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀤𑀺𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺. 𑀅𑀫𑀘𑁆𑀘𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀺 𑀦𑀺𑀤𑁆𑀤𑁄𑀲𑁄’’𑀢𑀺 𑀆𑀳. 𑀓𑀺𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀁? 𑀬𑀁 𑀧𑀘𑁆𑀙𑀸 𑀯𑀼𑀢𑁆𑀢𑀁 𑀯𑀺𑀘𑀸𑀭𑀺𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄; 𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀼𑀓𑁆𑀓𑀝𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸, 𑀧𑀼𑀭𑀺𑀫𑀦𑀬𑁂 𑀢𑀸𑀯 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀬𑀼𑀚𑁆𑀚𑀢𑀺. 𑀬𑀣𑀸 𑀲𑀢𑀺𑀧𑀺 𑀫𑀼𑀲𑀸𑀯𑀸𑀤𑁂 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑀢𑀺𑀧𑀺 𑀘 𑀫𑀼𑀲𑀸𑀯𑀸𑀤𑁂 𑀅𑀲𑀼𑀤𑁆𑀥𑀁 𑀲𑀼𑀤𑁆𑀥𑀤𑀺𑀝𑁆𑀞𑀺𑀦𑁄 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀑𑀫𑀲𑀯𑀸𑀤𑁂𑀦𑁂𑀯 ¶ 𑀧𑀸𑀘𑀺𑀢𑁆𑀢𑀺𑀬𑀁, 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀦; 𑀏𑀯𑀁 𑀇𑀥𑀸𑀧𑀺 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀬𑀼𑀚𑁆𑀚𑀢𑀺, 𑀤𑀼𑀓𑁆𑀓𑀝𑀫𑁂𑀯 𑀬𑀼𑀢𑁆𑀢𑀁. 𑀧𑀘𑁆𑀙𑀺𑀫𑀦𑀬𑁂𑀧𑀺 𑀫𑀼𑀲𑀸𑀯𑀸𑀤𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀺, 𑀯𑀘𑀦𑀧𑁆𑀧𑀫𑀸𑀡𑀢𑁄 𑀳𑀺 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀘 𑀑𑀫𑀲𑀯𑀸𑀤𑁄. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺𑀯𑀘𑀦𑀁 𑀦𑀢𑁆𑀣𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀘𑀦𑀫𑀢𑁆𑀣𑀺, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀺.

𑀢𑀢𑁆𑀭 𑀧𑀦 𑀇𑀤𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 𑀅𑀲𑀢𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀲𑁆𑀫𑀺𑀁 𑀲𑀢𑀺 𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺? 𑀢𑀢𑁆𑀭 𑀬𑀲𑁆𑀫𑀸 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁂 𑀲𑀺𑀤𑁆𑀥𑁂𑀧𑀺 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑀦𑁂 𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 ¶ 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀑𑀓𑀸𑀲𑁄 𑀦 𑀤𑀺𑀲𑁆𑀲𑀢𑀺, 𑀦 𑀘 𑀲𑀓𑁆𑀓𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀼𑀦𑁆𑀢𑀺 𑀧𑀼𑀭𑀺𑀫𑀦𑀬𑁄𑀯𑁂𑀢𑁆𑀣 𑀧𑀭𑀺𑀲𑀼𑀤𑁆𑀥𑀢𑀭𑁄 𑀔𑀸𑀬𑀢𑀺. 𑀢𑀣𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀺𑀁 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀪𑀺𑀓𑁆𑀔𑀼𑀁 𑀅𑀦𑀼𑀤𑁆𑀥𑀁𑀲𑁂𑀢𑀺 𑀤𑀼𑀓𑁆𑀓𑀝𑀁, 𑀢𑀢𑁆𑀭 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀝𑁆𑀞𑀸𑀦𑀕𑀸𑀫𑀻 𑀤𑀼𑀓𑁆𑀓𑀝𑀁, 𑀤𑁂𑀲𑀦𑀸𑀕𑀸𑀫𑀻 𑀏𑀢𑁂𑀳𑀺 𑀦𑀸𑀲𑀦𑀸 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦 𑀲𑀸 𑀧𑀓𑀢𑀺𑀬𑀸𑀯 𑀤𑀼𑀲𑁆𑀲𑀻𑀮𑀸 𑀧𑀸𑀧𑀪𑀺𑀓𑁆𑀔𑀼𑀦𑀻 𑀇𑀤𑀸𑀦𑀺 𑀘 𑀲𑀬𑀫𑁂𑀯 ‘‘𑀤𑀼𑀲𑁆𑀲𑀻𑀮𑀸𑀫𑁆𑀳𑀻’’𑀢𑀺 𑀯𑀤𑀢𑀺 𑀢𑀲𑁆𑀫𑀸 𑀦𑀁 𑀪𑀕𑀯𑀸 𑀅𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀦𑀸𑀲𑁂𑀲𑀻𑀢𑀺.

𑀅𑀣 ¶ 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀢𑀺 𑀏𑀯𑀁 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣, 𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀪𑀕𑀯𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀤𑁂𑀣 𑀤𑀸𑀦𑀺 𑀇𑀫𑀺𑀲𑁆𑀲𑀸 𑀲𑁂𑀢𑀓𑀸𑀦𑀻’’𑀢𑀺 𑀦𑀸𑀲𑀺𑀬𑀫𑀸𑀦𑀁 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀤𑀺𑀲𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀢𑀁 𑀫𑁄𑀘𑁂𑀢𑀼𑀓𑀸𑀫𑀢𑀸𑀬 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀆𑀯𑀺𑀓𑀭𑀺𑀁𑀲𑀼, 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁮𑁫-𑁬. 𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀤𑀽𑀲𑀺𑀢𑁄 𑀘𑁂𑀯 𑀤𑀽𑀲𑀓𑁄 𑀘. 𑀉𑀧𑁆𑀧𑀦𑁆𑀦𑁂 𑀳𑀺 𑀤𑁄𑀲𑁂 𑀧𑀼𑀕𑁆𑀕𑀮𑁄 𑀢𑁂𑀦 𑀤𑁄𑀲𑁂𑀦 𑀤𑀽𑀲𑀺𑀢𑁄 𑀳𑁄𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀺𑀢𑁄, 𑀢𑀲𑁆𑀫𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀜𑁆𑀘 𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 ‘‘𑀤𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 ‘‘𑀤𑀼𑀝𑁆𑀞𑁄 𑀤𑁄𑀲𑁄’’𑀢𑀺 𑀏𑀓𑀲𑁆𑀲𑁂𑀯𑁂𑀢𑀁 𑀧𑀼𑀕𑁆𑀕𑀮𑀲𑁆𑀲 𑀆𑀓𑀸𑀭𑀦𑀸𑀦𑀢𑁆𑀢𑁂𑀦 𑀦𑀺𑀤𑀲𑁆𑀲𑀦𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀤𑀽𑀲𑀺𑀢𑁄 𑀘𑁂𑀯 ¶ 𑀤𑀽𑀲𑀓𑁄 𑀘𑀸’’𑀢𑀺 𑀢𑀢𑁆𑀣 𑀲𑀤𑁆𑀤𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀲𑁄 ‘‘𑀤𑀼𑀝𑁆𑀞𑁄 𑀤𑁄𑀲𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄 𑀧𑀝𑀺𑀖𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀓𑀼𑀧𑀺𑀢𑀸𑀤𑀺𑀪𑀸𑀯𑁂 𑀞𑀺𑀢𑁄𑀯 𑀳𑁄𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀓𑀼𑀧𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀧𑀺𑀢𑁄𑀢𑀺 𑀓𑀼𑀧𑁆𑀧𑀪𑀸𑀯𑀁 𑀧𑀓𑀢𑀺𑀢𑁄 𑀘𑀯𑀦𑀪𑀸𑀯𑀁 𑀧𑀢𑁆𑀢𑁄. 𑀅𑀦𑀢𑁆𑀢𑀫𑀦𑁄𑀢𑀺 𑀦 𑀲𑀓𑀫𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀅𑀝𑁆𑀞𑀺𑀢𑀘𑀺𑀢𑁆𑀢𑁄; 𑀅𑀧𑀺𑀘 𑀧𑀻𑀢𑀺𑀲𑀼𑀔𑁂𑀳𑀺 𑀦 𑀅𑀢𑁆𑀢𑀫𑀦𑁄 𑀦 𑀅𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀦𑀢𑁆𑀢𑀫𑀦𑁄. 𑀅𑀦𑀪𑀺𑀭𑀤𑁆𑀥𑁄𑀢𑀺 𑀦 𑀲𑀼𑀔𑀺𑀢𑁄 𑀦 𑀯𑀸 𑀧𑀲𑀸𑀤𑀺𑀢𑁄𑀢𑀺 𑀅𑀦𑀪𑀺𑀭𑀤𑁆𑀥𑁄. 𑀧𑀝𑀺𑀖𑁂𑀦 𑀆𑀳𑀢𑀁 𑀘𑀺𑀢𑁆𑀢𑀫𑀲𑁆𑀲𑀸𑀢𑀺 𑀆𑀳𑀢𑀘𑀺𑀢𑁆𑀢𑁄. 𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀘𑀺𑀢𑁆𑀢𑀓𑀘𑀯𑀭𑀲𑀗𑁆𑀔𑀸𑀢𑀁 𑀧𑀝𑀺𑀖𑀔𑀻𑀮𑀁 ¶ 𑀚𑀸𑀢𑀫𑀲𑁆𑀲𑀸𑀢𑀺 𑀔𑀺𑀮𑀚𑀸𑀢𑁄. 𑀅𑀧𑁆𑀧𑀢𑀻𑀢𑁄𑀢𑀺 𑀦𑀧𑁆𑀧𑀢𑀻𑀢𑁄 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀯𑀚𑁆𑀚𑀺𑀢𑁄, 𑀦 𑀅𑀪𑀺𑀲𑀝𑁄𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀅𑀧𑁆𑀧𑀢𑀻𑀢𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀘 𑀓𑁄𑀧𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀢𑁂𑀦 𑀘 𑀓𑁄𑀧𑁂𑀦𑀸𑀢𑀺 𑀬𑁂𑀦 𑀤𑀼𑀝𑁆𑀞𑁄𑀢𑀺 𑀘 𑀓𑀼𑀧𑀺𑀢𑁄𑀢𑀺 𑀘 𑀯𑀼𑀢𑁆𑀢𑁄 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀦𑀢𑁄 𑀏𑀓𑀸𑀓𑀸𑀭𑀁 𑀳𑁄𑀢𑀺. 𑀢𑁂𑀦 𑀘 𑀤𑁄𑀲𑁂𑀦𑀸𑀢𑀺 𑀬𑁂𑀦 ‘‘𑀤𑁄𑀲𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑁂𑀯 𑀤𑀲𑁆𑀲𑁂𑀢𑀺.

𑀢𑀸𑀬 𑀘 𑀅𑀦𑀢𑁆𑀢𑀫𑀦𑀢𑀸𑀬𑀸𑀢𑀺 𑀬𑀸𑀬 ‘‘𑀅𑀦𑀢𑁆𑀢𑀫𑀦𑁄’’𑀢𑀺 𑀯𑀼𑀢𑁆𑀢𑁄. 𑀢𑀸𑀬 𑀘 𑀅𑀦𑀪𑀺𑀭𑀤𑁆𑀥𑀺𑀬𑀸𑀢𑀺 𑀬𑀸𑀬 ‘‘𑀅𑀦𑀪𑀺𑀭𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺.

𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀏𑀢𑁆𑀣 𑀦𑀸𑀲𑁆𑀲 𑀫𑀽𑀮𑀦𑁆𑀢𑀺 𑀅𑀫𑀽𑀮𑀓𑀁, 𑀢𑀁 𑀧𑀦𑀲𑁆𑀲 𑀅𑀫𑀽𑀮𑀓𑀢𑁆𑀢𑀁 𑀬𑀲𑁆𑀫𑀸 𑀘𑁄𑀤𑀓𑀯𑀲𑁂𑀦 𑀅𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀤𑀺𑀢𑀓𑀯𑀲𑁂𑀦. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀤𑀪𑀸𑀚𑀦𑁂 ‘‘𑀅𑀫𑀽𑀮𑀓𑀁 𑀦𑀸𑀫 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺 𑀆𑀳. 𑀢𑁂𑀦 𑀇𑀫𑀁 𑀤𑀻𑀧𑁂𑀢𑀺 ‘‘𑀬𑀁 𑀧𑀸𑀭𑀸𑀚𑀺𑀓𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑀦 𑀧𑀭𑀺𑀲𑀗𑁆𑀓𑀺𑀢𑀁 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 ¶ 𑀅𑀪𑀸𑀯𑀢𑁄 𑀅𑀫𑀽𑀮𑀓𑀁 𑀦𑀸𑀫, 𑀢𑀁 𑀧𑀦 𑀲𑁄 𑀆𑀧𑀦𑁆𑀦𑁄 𑀯𑀸 𑀳𑁄𑀢𑀼 𑀅𑀦𑀸𑀧𑀦𑁆𑀦𑁄 𑀯𑀸 𑀏𑀢𑀁 𑀇𑀥 𑀅𑀧𑁆𑀧𑀫𑀸𑀡𑀦𑁆𑀢𑀺.

𑀢𑀢𑁆𑀣 𑀅𑀤𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀤𑀺𑀝𑁆𑀞𑀁. 𑀅𑀲𑀼𑀢𑀁 𑀦𑀸𑀫 𑀢𑀣𑁂𑀯 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑀁 𑀦 𑀲𑀼𑀢𑀁. 𑀅𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀘𑀺𑀢𑁆𑀢𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀁.

‘‘𑀤𑀺𑀝𑁆𑀞𑀁’’ ¶ 𑀦𑀸𑀫 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀝𑁆𑀞𑀁. ‘‘𑀲𑀼𑀢𑀁’’ 𑀦𑀸𑀫 𑀢𑀣𑁂𑀯 𑀲𑀼𑀢𑀁. ‘‘𑀧𑀭𑀺𑀲𑀗𑁆𑀓𑀺𑀢’’𑀫𑁆𑀧𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀧𑀭𑀺𑀲𑀗𑁆𑀓𑀺𑀢𑀁. 𑀢𑀢𑁆𑀣 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀫𑁂𑀯, 𑀧𑀭𑁂𑀳𑀺 𑀤𑀺𑀝𑁆𑀞𑀁 𑀅𑀢𑁆𑀢𑀦𑀸 𑀲𑀼𑀢𑀁, 𑀧𑀭𑁂𑀳𑀺 𑀲𑀼𑀢𑀁, 𑀧𑀭𑁂𑀳𑀺 𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀇𑀤𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀦𑀸 𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺.

𑀧𑀭𑀺𑀲𑀗𑁆𑀓𑀺𑀢𑀁 𑀧𑀦 𑀢𑀺𑀯𑀺𑀥𑀁 𑁋 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁, 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀏𑀓𑁄 𑀪𑀺𑀓𑁆𑀔𑀼 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀦 𑀕𑀸𑀫𑀲𑀫𑀻𑀧𑁂 𑀏𑀓𑀁 𑀕𑀼𑀫𑁆𑀩𑀁 𑀧𑀯𑀺𑀝𑁆𑀞𑁄, 𑀅𑀜𑁆𑀜𑀢𑀭𑀸𑀧𑀺 𑀇𑀢𑁆𑀣𑀻 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀯𑀢𑁆𑀢𑀸, 𑀦𑀸𑀧𑀺 𑀪𑀺𑀓𑁆𑀔𑀼 𑀇𑀢𑁆𑀣𑀺𑀁 𑀅𑀤𑁆𑀤𑀲; 𑀦 𑀇𑀢𑁆𑀣𑀻 𑀪𑀺𑀓𑁆𑀔𑀼𑀁, 𑀅𑀤𑀺𑀲𑁆𑀯𑀸𑀯 𑀉𑀪𑁄𑀧𑀺 𑀬𑀣𑀸𑀭𑀼𑀘𑀺𑀁 𑀧𑀓𑁆𑀓𑀦𑁆𑀢𑀸, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀪𑀺𑀦𑁆𑀦𑀁 𑀢𑀢𑁄 𑀦𑀺𑀓𑁆𑀔𑀫𑀦𑀁 ¶ 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂𑀲𑀁 𑀓𑀢𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀇𑀥𑁂𑀓𑀘𑁆𑀘𑁄 𑀅𑀦𑁆𑀥𑀓𑀸𑀭𑁂 𑀯𑀸 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀑𑀓𑀸𑀲𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑁄 𑀢𑀸𑀤𑀺𑀲𑀁 𑀧𑀝𑀺𑀲𑀦𑁆𑀣𑀸𑀭𑀯𑀘𑀦𑀁 𑀲𑀼𑀡𑀸𑀢𑀺, 𑀲𑀫𑀻𑀧𑁂 𑀅𑀜𑁆𑀜𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 ‘‘𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀦 𑀚𑀸𑀦𑀸𑀢𑀺, 𑀲𑁄 ‘‘𑀅𑀤𑁆𑀥𑀸 𑀇𑀫𑁂𑀲𑀁 𑀓𑀢𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀢𑀺, 𑀇𑀤𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀲𑀫𑁆𑀩𑀳𑀼𑀮𑀸 𑀥𑀼𑀢𑁆𑀢𑀸 𑀭𑀢𑁆𑀢𑀺𑀪𑀸𑀕𑁂 𑀧𑀼𑀧𑁆𑀨𑀕𑀦𑁆𑀥𑀫𑀁𑀲𑀲𑀼𑀭𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀏𑀓𑀁 𑀧𑀘𑁆𑀘𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑁂 𑀯𑀸 𑀪𑁄𑀚𑀦𑀲𑀸𑀮𑀸𑀤𑀻𑀲𑀼 𑀯𑀸 𑀬𑀣𑀸𑀲𑀼𑀔𑀁 𑀓𑀻𑀴𑀺𑀢𑁆𑀯𑀸 𑀧𑀼𑀧𑁆𑀨𑀸𑀤𑀻𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀕𑀢𑀸, 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑀺𑀤𑀁 𑀓𑀫𑁆𑀫’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑀺. 𑀢𑀢𑁆𑀭 𑀘 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀧𑀕𑁂𑀯 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀢𑁆𑀢𑀲𑀻𑀲𑁂𑀦 𑀫𑀡𑁆𑀟𑀧𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁂𑀦 𑀧𑀼𑀧𑁆𑀨𑀸𑀤𑀻𑀦𑀺 𑀆𑀫𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀉𑀧𑀝𑁆𑀞𑀸𑀓𑀓𑀼𑀮𑀢𑁄 𑀆𑀪𑀢𑁂𑀳𑀺 𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸 𑀓𑀢𑀸 𑀳𑁄𑀢𑀺, 𑀓𑁂𑀦𑀘𑀺 𑀪𑁂𑀲𑀚𑁆𑀚𑀢𑁆𑀣𑀁 𑀅𑀭𑀺𑀝𑁆𑀞𑀁 𑀧𑀻𑀢𑀁 𑀳𑁄𑀢𑀺, 𑀅𑀣 𑀢𑁂 ‘‘𑀓𑀲𑁆𑀲𑀺𑀤𑀁 𑀓𑀫𑁆𑀫’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑀸 ¶ 𑀪𑀺𑀓𑁆𑀔𑀽 𑀢𑁂𑀲𑀁 𑀳𑀢𑁆𑀣𑀕𑀦𑁆𑀥𑀜𑁆𑀘 𑀫𑀼𑀔𑀕𑀦𑁆𑀥𑀜𑁆𑀘 𑀖𑀸𑀬𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀧𑀭𑀺𑀲𑀗𑁆𑀓𑀦𑁆𑀢𑀺, 𑀇𑀤𑀁 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫.

𑀢𑀢𑁆𑀣 𑀤𑀺𑀝𑁆𑀞𑀁 𑀅𑀢𑁆𑀣𑀺 𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀅𑀫𑀽𑀮𑀓𑀁; 𑀤𑀺𑀝𑁆𑀞𑀫𑁂𑀯 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀲𑀜𑁆𑀜𑀸𑀅𑀫𑀽𑀮𑀓𑀁. 𑀏𑀲 𑀦𑀬𑁄 𑀲𑀼𑀢𑁂𑀧𑀺. 𑀧𑀭𑀺𑀲𑀗𑁆𑀓𑀺𑀢𑁂 𑀧𑀦 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀅𑀢𑁆𑀣𑀺 𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀅𑀫𑀽𑀮𑀓𑀁; 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀫𑁂𑀯 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀁 ¶ , 𑀅𑀢𑁆𑀣𑀺 𑀲𑀜𑁆𑀜𑀸𑀅𑀫𑀽𑀮𑀓𑀁. 𑀏𑀲 𑀦𑀬𑁄 𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑁂𑀲𑀼. 𑀢𑀢𑁆𑀣 𑀤𑀺𑀝𑁆𑀞𑀁 𑀲𑀫𑀽𑀮𑀓𑀁 𑀦𑀸𑀫 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸𑀯 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀯𑀤𑀢𑀺, 𑀅𑀫𑀽𑀮𑀓𑀁 𑀦𑀸𑀫 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀅𑀤𑀺𑀲𑁆𑀯𑀸 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀯𑀤𑀢𑀺. 𑀤𑀺𑀝𑁆𑀞𑀫𑁂𑀯 𑀲𑀜𑁆𑀜𑀸𑀲𑀫𑀽𑀮𑀓𑀁 𑀦𑀸𑀫 𑀤𑀺𑀲𑁆𑀯𑀸𑀯 𑀤𑀺𑀝𑁆𑀞𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀲𑀜𑁆𑀜𑀸𑀅𑀫𑀽𑀮𑀓𑀁 𑀦𑀸𑀫 𑀧𑀼𑀩𑁆𑀩𑁂 𑀧𑀸𑀭𑀸𑀚𑀺𑀓𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 𑀧𑀘𑁆𑀙𑀸 𑀅𑀤𑀺𑀝𑁆𑀞𑀲𑀜𑁆𑀜𑀻 𑀚𑀸𑀢𑁄, 𑀲𑁄 𑀲𑀜𑁆𑀜𑀸𑀬 𑀅𑀫𑀽𑀮𑀓𑀁 𑀓𑀢𑁆𑀯𑀸 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀘𑁄𑀤𑁂𑀢𑀺. 𑀏𑀢𑁂𑀦 𑀦𑀬𑁂𑀦 𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀺𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀲𑀩𑁆𑀩𑀧𑁆𑀧𑀓𑀸𑀭𑁂𑀡𑀸𑀧𑀺 𑀲𑀫𑀽𑀮𑀓𑁂𑀦 𑀯𑀸 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀅𑀫𑀽𑀮𑀓𑁂𑀦 𑀯𑀸 𑀧𑀦 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲𑁂𑀯 ¶ 𑀆𑀧𑀢𑁆𑀢𑀺.

𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀥𑀁𑀲𑁂𑀬𑁆𑀬 𑀧𑀥𑀁𑀲𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬. 𑀢𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑁄𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑁄𑀧𑀺 𑀓𑀭𑁄𑀢𑀺𑀬𑁂𑀯, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀘𑁄𑀤𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀲𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀘𑁄𑀤𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼 𑀆𑀡𑀸𑀧𑁂𑀢𑀺, 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀢𑀁 𑀘𑁄𑀤𑁂𑀢𑀺, 𑀘𑁄𑀤𑀸𑀧𑀓𑀲𑁆𑀲𑁂𑀯 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀣 𑀲𑁄𑀧𑀺 ‘‘𑀫𑀬𑀸 𑀤𑀺𑀝𑁆𑀞𑀁 𑀲𑀼𑀢𑀁 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀘𑁄𑀤𑀦𑀸𑀧𑁆𑀧𑀪𑁂𑀤𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀏𑀓𑀯𑀢𑁆𑀣𑀼𑀏𑀓𑀘𑁄𑀤𑀓𑀸𑀤𑀺𑀘𑀢𑀼𑀓𑁆𑀓𑀁 𑀢𑀸𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀓𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀏𑀓𑀁 𑀯𑀢𑁆𑀣𑀼 𑀏𑀓𑁄 𑀘𑁄𑀤𑀓𑁄. 𑀲𑀫𑁆𑀩𑀳𑀼𑀮𑀸 𑀏𑀓𑀁 𑀏𑀓𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑀺, 𑀧𑀜𑁆𑀘𑀲𑀢𑀸 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀧𑁆𑀧𑀫𑀼𑀔𑀸 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀫𑀺𑀯, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀏𑀓𑀁 𑀯𑀢𑁆𑀣𑀼 𑀦𑀸𑀦𑀸𑀘𑁄𑀤𑀓𑀸. 𑀏𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀺 𑀘𑁄𑀤𑁂𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀸𑀦𑀸𑀯𑀢𑁆𑀣𑀽𑀦𑀺 𑀏𑀓𑁄 𑀘𑁄𑀤𑀓𑁄. 𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀺 𑀘𑁄𑀤𑁂𑀦𑁆𑀢𑀺, 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀸𑀦𑀸𑀯𑀢𑁆𑀣𑀽𑀦𑀺 𑀦𑀸𑀦𑀸𑀘𑁄𑀤𑀓𑀸.

𑀘𑁄𑀤𑁂𑀢𑀼𑀁 ¶ ¶ 𑀧𑀦 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀻𑀢𑀺? 𑀤𑀼𑀩𑁆𑀩𑀮𑀘𑁄𑀤𑀓𑀯𑀘𑀦𑀁 𑀢𑀸𑀯 𑀕𑀳𑁂𑀢𑁆𑀯𑀸 𑀓𑁄𑀘𑀺 𑀦 𑀮𑀪𑀢𑀺. 𑀤𑀼𑀩𑁆𑀩𑀮𑀘𑁄𑀤𑀓𑁄 𑀦𑀸𑀫 𑀲𑀫𑁆𑀩𑀳𑀼𑀮𑁂𑀲𑀼 𑀓𑀣𑀸𑀲𑀮𑁆𑀮𑀸𑀧𑁂𑀦 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁄 𑀏𑀓𑀁 𑀆𑀭𑀩𑁆𑀪 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀓𑀣𑁂𑀢𑀺, 𑀅𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸 𑀇𑀢𑀭𑀲𑁆𑀲 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀫𑀁 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀲𑀻’’𑀢𑀺 𑀯𑀤𑀢𑀺. 𑀲𑁄 ‘‘𑀦𑀸𑀳𑀁 𑀏𑀯𑀭𑀽𑀧𑀁 𑀚𑀸𑀦𑀸𑀫𑀺, 𑀓𑀣𑀸𑀧𑀯𑀢𑁆𑀢𑀺𑀬𑀁 𑀧𑀦 𑀫𑀬𑀸 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀺, 𑀲𑀘𑁂 𑀅𑀳𑀁 𑀢𑀯 𑀇𑀫𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀚𑀸𑀦𑁂𑀬𑁆𑀬𑀁, 𑀏𑀢𑁆𑀢𑀓𑀫𑁆𑀧𑀺 𑀦 𑀓𑀣𑁂𑀬𑁆𑀬’’𑀦𑁆𑀢𑀺 𑀅𑀬𑀁 𑀤𑀼𑀩𑁆𑀩𑀮𑀘𑁄𑀤𑀓𑁄. 𑀢𑀲𑁆𑀲𑁂𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀕𑀳𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀘𑁄𑀤𑁂𑀢𑀼𑀁 𑀦 𑀮𑀪𑀢𑀺. 𑀏𑀢𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀫𑁂𑀯 𑀘𑁄𑀤𑁂𑀢𑀼𑀁 ¶ 𑀮𑀪𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀧𑀜𑁆𑀘𑀧𑀺 𑀲𑀳𑀥𑀫𑁆𑀫𑀺𑀓𑀸 𑀮𑀪𑀦𑁆𑀢𑀻’’𑀢𑀺 𑀆𑀳. 𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀧𑀦 ‘‘𑀦 𑀓𑁄𑀘𑀺 𑀦 𑀮𑀪𑀢𑀻’’𑀢𑀺 𑀯𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺…𑀧𑁂… 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀘𑁄𑀤𑁂𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀫𑀸𑀳𑀭𑀺. 𑀢𑀺𑀡𑁆𑀡𑀫𑁆𑀧𑀺 𑀣𑁂𑀭𑀸𑀦𑀁 𑀯𑀸𑀤𑁂 𑀘𑀼𑀤𑀺𑀢𑀓𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄.

𑀅𑀬𑀁 𑀧𑀦 𑀘𑁄𑀤𑀦𑀸 𑀦𑀸𑀫 𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀦 𑀏𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀲𑀫𑀻𑀧𑁂 𑀞𑀢𑁆𑀯𑀸𑀯 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀯𑀘𑀻𑀪𑁂𑀤𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲𑁂𑀯 𑀲𑀻𑀲𑀁 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀫𑁂𑀯 𑀳𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀏𑀢𑀺, 𑀇𑀤𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁 𑀅𑀪𑀽𑀢𑀸𑀭𑁄𑀘𑀦𑀜𑁆𑀘 𑀏𑀢𑀺𑀬𑁂𑀯. 𑀬𑁄 𑀧𑀦 𑀤𑁆𑀯𑀺𑀦𑁆𑀦𑀁 𑀞𑀺𑀢𑀝𑁆𑀞𑀸𑀦𑁂 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀘𑁄𑀤𑁂𑀢𑀺, 𑀲𑁄 𑀘𑁂 𑀚𑀸𑀦𑀸𑀢𑀺, 𑀲𑀻𑀲𑀁 𑀏𑀢𑀺. 𑀇𑀢𑀭𑁄 𑀚𑀸𑀦𑀸𑀢𑀺, 𑀲𑀻𑀲𑀁 𑀦 𑀏𑀢𑀺. 𑀤𑁆𑀯𑁂𑀧𑀺 𑀦𑀺𑀬𑀫𑁂𑀢𑁆𑀯𑀸 𑀘𑁄𑀤𑁂𑀢𑀺, 𑀏𑀓𑁄 𑀯𑀸 𑀚𑀸𑀦𑀸𑀢𑀼 𑀤𑁆𑀯𑁂 𑀯𑀸, 𑀲𑀻𑀲𑀁 𑀏𑀢𑀺𑀬𑁂𑀯. 𑀏𑀲𑀯 𑀦𑀬𑁄 𑀲𑀫𑁆𑀩𑀳𑀼𑀮𑁂𑀲𑀼. 𑀢𑀗𑁆𑀔𑀡𑁂𑀬𑁂𑀯 𑀘 𑀚𑀸𑀦𑀦𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀲𑀫𑀬𑁂𑀦 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀢𑁂 𑀧𑀦 𑀜𑀸𑀢𑀫𑁂𑀯 𑀳𑁄𑀢𑀺. 𑀧𑀘𑁆𑀙𑀸 𑀘𑁂 𑀚𑀸𑀦𑀸𑀢𑀺, 𑀲𑀻𑀲𑀁 𑀦 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀪𑀽𑀢𑀸𑀭𑁄𑀘𑀦𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸-𑀅𑀢𑁆𑀢𑀓𑀸𑀫-𑀤𑀼𑀝𑁆𑀞𑀤𑁄𑀲𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀩𑁆𑀩𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺.

𑀏𑀯𑀁 𑀓𑀸𑀬𑀯𑀸𑀘𑀸𑀯𑀲𑁂𑀦 𑀘𑀸𑀬𑀁 𑀤𑀼𑀯𑀺𑀥𑀸𑀧𑀺 𑀘𑁄𑀤𑀦𑀸. 𑀧𑀼𑀦 𑀤𑀺𑀝𑁆𑀞𑀘𑁄𑀤𑀦𑀸, 𑀲𑀼𑀢𑀘𑁄𑀤𑀦𑀸, 𑀧𑀭𑀺𑀲𑀗𑁆𑀓𑀺𑀢𑀘𑁄𑀤𑀦𑀸𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀅𑀧𑀭𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑁋 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸𑀢𑀺. 𑀢𑀢𑁆𑀣 𑀕𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀯𑀲𑁂𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑀸𑀧𑀺 ¶ 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑁋 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸, 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸, 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄, 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀣, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀣, 𑀫𑀦𑀼𑀲𑁆𑀲𑀁 𑀖𑀸𑀢𑀬𑀺𑀢𑁆𑀣, 𑀅𑀪𑀽𑀢𑀁 𑀆𑀭𑁄𑀘𑀬𑀺𑀢𑁆𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸. 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸. 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 ‘‘𑀦𑀢𑁆𑀣𑀺 ¶ 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸; 𑀏𑀢𑁆𑀢𑀸𑀯𑀢𑀸 𑀧𑀦 𑀲𑀻𑀲𑀁 𑀦 𑀏𑀢𑀺, ‘‘𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺. 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫-𑀩𑀻𑀚𑀦𑀸𑀤𑀺𑀓𑀫𑁆𑀫𑀸𑀦𑀁 𑀅𑀓𑀭𑀡𑀁. 𑀢𑀁 𑀧𑀝𑀺𑀧𑀸𑀝𑀺𑀬𑀸 𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀢𑁄 𑀏𑀓𑀲𑁆𑀲 𑀅𑀓𑀢𑁆𑀯𑀸 𑀲𑁂𑀲𑀸𑀦𑀁 𑀓𑀭𑀡𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀘𑁄𑀤𑀦𑀸 𑀦𑀸𑀫 𑀳𑁄𑀢𑀺, 𑀆𑀧𑀢𑁆𑀢𑀺 𑀧𑀦 𑀲𑀻𑀲𑀁 𑀦 𑀏𑀢𑀺. ‘‘𑀓𑀲𑁆𑀫𑀸 𑀫𑀫 𑀯𑀦𑁆𑀤𑀦𑀸𑀤𑀻𑀦𑀺 𑀦 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀧𑀦 ‘‘𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺. 𑀬𑀸𑀕𑀼𑀪𑀢𑁆𑀢𑀸𑀤𑀺𑀦𑀸 𑀧𑀦 𑀬𑀁 𑀇𑀘𑁆𑀙𑀢𑀺 𑀢𑀁 𑀆𑀧𑀼𑀘𑁆𑀙𑀢𑀺, 𑀦 𑀢𑀸𑀯𑀢𑀸 𑀘𑁄𑀤𑀦𑀸 𑀳𑁄𑀢𑀺.

𑀅𑀧𑀭𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 ‘‘𑀏𑀓𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 𑀏𑀓𑀁 𑀥𑀫𑁆𑀫𑀺𑀓’’𑀦𑁆𑀢𑀺 𑀆𑀤𑀺𑀁 ‘‘𑀓𑀢𑁆𑀯𑀸 𑀬𑀸𑀯 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺 𑀤𑀲 𑀥𑀫𑁆𑀫𑀺𑀓𑀸𑀦𑀻’’𑀢𑀺 (𑀘𑀽𑀴𑀯. 𑁩𑁮𑁭) 𑀏𑀯𑀁 𑀅𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲 𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲𑀸𑀢𑀺 𑀤𑀲𑀼𑀢𑁆𑀢𑀭𑀲𑀢𑀁 𑀘𑁄𑀤𑀦𑀸 𑀯𑀼𑀢𑁆𑀢𑀸. 𑀢𑀸 𑀤𑀺𑀝𑁆𑀞𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀲𑀼𑀢𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀧𑀭𑀺𑀲𑀗𑁆𑀓𑀺𑀢𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀦𑁆𑀢𑀺 𑀢𑀺𑀁𑀲𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀬𑁂𑀦 𑀘𑁄𑀤𑁂𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀘𑁄𑀤𑁂𑀦𑁆𑀢𑀲𑁆𑀲, 𑀓𑀸𑀬𑀯𑀸𑀘𑀸𑀳𑀺 𑀘𑁄𑀤𑁂𑀦𑁆𑀢𑀲𑁆𑀲𑀸𑀢𑀺 𑀢𑀺𑀕𑀼𑀡𑀸𑀦𑀺 𑀓𑀢𑀸𑀦𑀺 𑀦𑀯𑀼𑀢𑀸𑀦𑀺 𑀦𑀯 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑀲𑁆𑀲𑀸𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀢𑀢𑁆𑀢𑀓𑀸𑀦𑁂𑀯𑀸𑀢𑀺 𑀯𑀻𑀲𑀢𑀺𑀊𑀦𑀸𑀦𑀺 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀧𑀼𑀦 𑀤𑀺𑀝𑁆𑀞𑀸𑀤𑀺𑀪𑁂𑀤𑁂 𑀲𑀫𑀽𑀮𑀓𑀸𑀫𑀽𑀮𑀓𑀯𑀲𑁂𑀦 𑀅𑀦𑁂𑀓𑀲𑀳𑀲𑁆𑀲𑀸 𑀘𑁄𑀤𑀦𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀲𑁆𑀫𑀺𑀁 ¶ 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀬 ‘‘𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁩𑁯𑁮) 𑀘 ‘‘𑀘𑁄𑀤𑀓𑁂𑀦 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁩𑁯𑁯) 𑀘 𑀏𑀯𑀁 𑀉𑀧𑀸𑀮𑀺𑀧𑀜𑁆𑀘𑀓𑀸𑀤𑀻𑀲𑀼 𑀯𑀼𑀢𑁆𑀢𑀸𑀦𑀺 𑀩𑀳𑀽𑀦𑀺 𑀲𑀼𑀢𑁆𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀸𑀤𑀸𑀦𑀮𑀓𑁆𑀔𑀡𑀜𑁆𑀘 𑀘𑁄𑀤𑀓𑀯𑀢𑁆𑀢𑀜𑁆𑀘 𑀘𑀼𑀤𑀺𑀢𑀓𑀯𑀢𑁆𑀢𑀜𑁆𑀘 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀜𑁆𑀘 𑀅𑀦𑀼𑀯𑀺𑀚𑁆𑀚𑀓𑀯𑀢𑁆𑀢𑀜𑁆𑀘 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑀺𑀢𑀁, 𑀢𑀁 𑀫𑀬𑀁 𑀬𑀣𑀸𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀲𑀼 ¶ 𑀧𑀦 𑀇𑀫𑀸𑀲𑀼 𑀘𑁄𑀤𑀦𑀸𑀲𑀼 𑀬𑀸𑀬 𑀓𑀸𑀬𑀘𑀺 ¶ 𑀘𑁄𑀤𑀦𑀸𑀬 𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑀘𑁄𑀤𑀓𑀸 𑀯𑀢𑁆𑀢𑀩𑁆𑀩𑀸 ‘‘𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀺𑀦𑀺𑀘𑁆𑀙𑀬𑁂𑀦 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀣𑀸’’𑀢𑀺. 𑀲𑀘𑁂 ‘‘𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀗𑁆𑀖𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀣 𑀧𑀦 ‘‘𑀯𑀺𑀦𑀺𑀘𑁆𑀙𑀺𑀦𑀣 𑀢𑀸𑀯, 𑀪𑀦𑁆𑀢𑁂, 𑀲𑀘𑁂 𑀅𑀫𑁆𑀳𑀸𑀓𑀁 𑀔𑀫𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺. ‘‘𑀘𑁂𑀢𑀺𑀬𑀁 𑀢𑀸𑀯 𑀯𑀦𑁆𑀤𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀻𑀖𑀲𑀼𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀢𑁂 𑀘𑁂 𑀘𑀺𑀭𑀭𑀢𑁆𑀢𑀁 𑀓𑀺𑀮𑀦𑁆𑀢𑀸 𑀧𑀓𑁆𑀓𑀦𑁆𑀢𑀧𑀭𑀺𑀲𑀸 𑀉𑀧𑀘𑁆𑀙𑀺𑀦𑁆𑀦𑀧𑀓𑁆𑀔𑀸 𑀳𑀼𑀢𑁆𑀯𑀸 𑀧𑀼𑀦 𑀬𑀸𑀘𑀦𑁆𑀢𑀺, 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀸 𑀦𑀺𑀫𑁆𑀫𑀤𑀸 𑀳𑁄𑀦𑁆𑀢𑀺 𑀢𑀤𑀸 𑀦𑁂𑀲𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀳𑀺 𑀘 𑀲𑀘𑁂 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀧𑀭𑀺𑀲𑀸 𑀉𑀩𑁆𑀩𑀸𑀳𑀺𑀓𑀸𑀬 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀩𑀸𑀮𑀼𑀲𑁆𑀲𑀦𑁆𑀦𑀸 𑀳𑁄𑀢𑀺 𑀧𑀭𑀺𑀲𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀪𑀸𑀕𑁂 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀣𑀸’’𑀢𑀺 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀢𑀺, 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁.

𑀢𑀢𑁆𑀣 𑀘 ‘‘𑀥𑀫𑁆𑀫𑁄’’𑀢𑀺 𑀪𑀽𑀢𑀁 𑀯𑀢𑁆𑀣𑀼. ‘‘𑀯𑀺𑀦𑀬𑁄’’𑀢𑀺 𑀘𑁄𑀤𑀦𑀸 𑀲𑀸𑀭𑀡𑀸 𑀘. ‘‘𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀢𑀲𑁆𑀫𑀸 𑀘𑁄𑀤𑀓𑁂𑀦 𑀯𑀢𑁆𑀣𑀼𑀲𑁆𑀫𑀺𑀁 𑀆𑀭𑁄𑀘𑀺𑀢𑁂 𑀘𑀼𑀤𑀺𑀢𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀦𑁆𑀢𑀫𑁂𑀢𑀁, 𑀦𑁄’’𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀘 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸𑀬 𑀘 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀢𑀢𑁆𑀭 𑀘𑁂 𑀅𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀅𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀦𑀸𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀻’’𑀢𑀺? 𑀅𑀤𑁆𑀥𑀸 𑀲𑁄 𑀯𑀓𑁆𑀔𑀢𑀺 𑁋 ‘‘𑀓𑀺𑀫𑀺𑀤𑀁, 𑀪𑀦𑁆𑀢𑁂, 𑀓𑀺𑀫𑁆𑀳𑀺 𑀦𑀁 𑀦𑀸𑀫𑀸’’𑀢𑀺. 𑀢𑁆𑀯𑀁 𑀓𑀺𑀫𑁆𑀳𑀺 𑀦𑀫𑁆𑀧𑀺 𑀦 𑀚𑀸𑀦𑀸𑀲𑀺, 𑀦 𑀬𑀼𑀢𑁆𑀢𑀁 𑀢𑀬𑀸 𑀏𑀯𑀭𑀽𑀧𑁂𑀦 𑀩𑀸𑀮𑁂𑀦 𑀧𑀭𑀁 𑀘𑁄𑀤𑁂𑀢𑀼𑀦𑁆𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄 𑀦𑀸𑀲𑁆𑀲 𑀅𑀦𑀼𑀬𑁄𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑁄 𑀅𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 ¶ 𑀩𑁆𑀬𑀢𑁆𑀢𑁄 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺 𑀏𑀢𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀮𑀚𑁆𑀚𑀺𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀲𑀘𑁂 𑀮𑀚𑁆𑀚𑀻 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀦 𑀲𑀓𑁆𑀓𑁄𑀢𑀺 𑀅𑀦𑀼𑀬𑁄𑀕𑀁 𑀤𑀸𑀢𑀼𑀁. 𑀢𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄 𑁋 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀆𑀤𑀻𑀲𑀼 ¶ 𑀯𑀸 𑀏𑀓𑀺𑀲𑁆𑀲𑀸’’𑀢𑀺. 𑀓𑀲𑁆𑀫𑀸 𑀧𑀦 𑀇𑀫𑀲𑁆𑀲𑁂𑀯 𑀏𑀯𑀁 𑀦𑀬𑁄 𑀤𑀸𑀢𑀩𑁆𑀩𑁄, 𑀦 𑀇𑀢𑀭𑀲𑁆𑀲? 𑀦𑀦𑀼 𑀦 𑀬𑀼𑀢𑁆𑀢𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑀢𑀺𑀕𑀫𑀦𑀦𑁆𑀢𑀺? 𑀦 𑀬𑀼𑀢𑁆𑀢𑀫𑁂𑀯. 𑀇𑀤𑀁 𑀧𑀦 𑀅𑀕𑀢𑀺𑀕𑀫𑀦𑀁 𑀦 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀦𑀸𑀫 𑀏𑀲𑁄 𑀅𑀮𑀚𑁆𑀚𑀺𑀦𑀺𑀕𑁆𑀕𑀳𑀢𑁆𑀣𑀸𑀬 𑀳𑀺 𑀮𑀚𑁆𑀚𑀺𑀧𑀕𑁆𑀕𑀳𑀢𑁆𑀣𑀸𑀬 𑀘 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀭 𑀅𑀮𑀚𑁆𑀚𑀻 𑀦𑀬𑀁 𑀮𑀪𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀏𑀳𑀻𑀢𑀺, 𑀮𑀚𑁆𑀚𑀻 𑀧𑀦 𑀦𑀬𑀁 𑀮𑀪𑀺𑀢𑁆𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦, 𑀲𑀼𑀢𑁂 𑀲𑀼𑀢𑀲𑀦𑁆𑀢𑀸𑀦𑁂𑀦 𑀧𑀢𑀺𑀝𑁆𑀞𑀸𑀬 𑀓𑀣𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀯𑀝𑁆𑀝𑀢𑀺. 𑀲𑀘𑁂 𑀧𑀦 ¶ 𑀲𑁄 𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀩𑁆𑀬𑀢𑁆𑀢𑁄, 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀮𑀚𑁆𑀚𑀻 𑀘 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀅𑀮𑀚𑁆𑀚𑀺𑀲𑁆𑀲 𑀧𑀝𑀺𑀜𑁆𑀜𑀸𑀬 𑀏𑀯 𑀓𑀸𑀢𑀩𑁆𑀩𑀁.

𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀓𑀺𑀭 𑀮𑁄𑀳𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀁 𑀓𑀣𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀲𑀫𑀬𑁂 𑀤𑁆𑀯𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀓𑀣𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀓𑁄 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺. 𑀅𑀣 𑀅𑀧𑁆𑀧𑀸𑀯𑀲𑁂𑀲𑁂 𑀧𑀞𑀫𑀬𑀸𑀫𑁂 𑀣𑁂𑀭𑀲𑁆𑀲 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 ‘‘𑀅𑀬𑀁 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀬𑀁 𑀧𑀦 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀩𑀳𑀽𑀦𑀺 𑀘 𑀯𑀢𑁆𑀣𑀽𑀦𑀺 𑀑𑀲𑀝𑀸𑀦𑀺 𑀅𑀤𑁆𑀥𑀸 𑀏𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑀼𑀤𑁆𑀥𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀩𑀻𑀚𑀦𑀻𑀤𑀡𑁆𑀟𑀓𑁂𑀦 𑀧𑀸𑀤𑀓𑀣𑀮𑀺𑀓𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 ‘‘𑀅𑀳𑀁 𑀆𑀯𑀼𑀲𑁄 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑁄 𑀅𑀜𑁆𑀜𑁂𑀦 𑀯𑀺𑀦𑀺𑀘𑁆𑀙𑀺𑀦𑀸𑀧𑁂𑀳𑀻’’𑀢𑀺 𑀆𑀳. 𑀓𑀲𑁆𑀫𑀸 𑀪𑀦𑁆𑀢𑁂𑀢𑀺? 𑀣𑁂𑀭𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀘𑀼𑀤𑀺𑀢𑀓𑀧𑀼𑀕𑁆𑀕𑀮𑀲𑁆𑀲 𑀓𑀸𑀬𑁂 𑀟𑀸𑀳𑁄 𑀉𑀝𑁆𑀞𑀺𑀢𑁄, 𑀢𑀢𑁄 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀼𑀭𑀽𑀧𑁂𑀦 𑀯𑀺𑀦𑀬𑀥𑀭𑁂𑀦 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀘𑁄𑀤𑀓𑁂𑀦 𑀘 𑀈𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀘𑀺𑀭𑀁 𑀓𑀺𑀮𑀫𑀺𑀢𑀢𑁆𑀣 𑀫𑀬𑀸’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀏𑀯𑀁 𑀮𑀚𑁆𑀚𑀺𑀦𑀸 𑀘𑁄𑀤𑀺𑀬𑀫𑀸𑀦𑁄 𑀅𑀮𑀚𑁆𑀚𑀻 𑀩𑀳𑀽𑀲𑀼𑀧𑀺 𑀯𑀢𑁆𑀣𑀽𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀲𑁄 𑀦𑁂𑀯 ‘‘𑀲𑀼𑀤𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑁄 𑀦 ‘‘𑀅𑀲𑀼𑀤𑁆𑀥𑁄’’𑀢𑀺. 𑀚𑀻𑀯𑀫𑀢𑀓𑁄 𑀦𑀸𑀫 𑀆𑀫𑀓𑀧𑀽𑀢𑀺𑀓𑁄 𑀦𑀸𑀫 𑀘𑁂𑀲.

𑀲𑀘𑁂 ¶ 𑀧𑀦𑀲𑁆𑀲 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀯𑀢𑁆𑀣𑀼𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁 ¶ . 𑀢𑀣𑀸 𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀅𑀮𑀚𑁆𑀚𑀻𑀬𑁂𑀯 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀆𑀯𑀼𑀲𑁄 𑀢𑀯 𑀯𑀘𑀦𑁂𑀦𑀸𑀬𑀁 𑀓𑀺𑀁 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀇𑀢𑀭𑀫𑁆𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀉𑀪𑁄𑀧𑀺 ‘‘𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸, 𑀲𑀻𑀮𑀢𑁆𑀣𑀸𑀬 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑁄 𑀦 𑀓𑀸𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀅𑀢𑁆𑀣𑀸𑀬 𑀧𑀦 𑀧𑀢𑀺𑀭𑀽𑀧𑀁 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀓𑀸𑀢𑀩𑁆𑀩𑁄.

𑀅𑀣 𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀯𑀺𑀯𑀸𑀤𑁄 𑀘 𑀦𑁂𑀲𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀫𑀢𑁆𑀢𑀓𑁄 𑀳𑁄𑀢𑀺, 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀧𑀦𑁂𑀢𑁆𑀣 𑀘𑀼𑀤𑀺𑀢𑀓𑁂𑀦 𑀲𑀳𑀲𑀸 𑀯𑀺𑀭𑀤𑁆𑀥𑀁 𑀳𑁄𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀺. 𑀲𑁄 𑀘 𑀧𑀓𑁆𑀔𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, ‘‘𑀫𑀬𑀁 𑀲𑀤𑁆𑀤𑀳𑀸𑀫, 𑀫𑀬𑀁 𑀲𑀤𑁆𑀤𑀳𑀸𑀫𑀸’’𑀢𑀺 𑀩𑀳𑀽 𑀉𑀝𑁆𑀞𑀳𑀦𑁆𑀢𑀺. 𑀲𑁄 𑀢𑁂𑀲𑀁 𑀧𑀝𑀺𑀜𑁆𑀜𑀸𑀬 𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭𑀁 𑀲𑀼𑀤𑁆𑀥𑁄 𑀳𑁄𑀢𑀼. 𑀅𑀣 𑀧𑀦 𑀯𑀺𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀯𑀺𑀦𑀺𑀘𑁆𑀙𑀬𑁄 𑀦 𑀤𑀸𑀢𑀩𑁆𑀩𑁄.

𑀏𑀯𑀁 ¶ 𑀬𑀸𑀬 𑀓𑀸𑀬𑀘𑀺 𑀘𑁄𑀤𑀦𑀸𑀬 𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀧𑀝𑀺𑀧𑀢𑁆𑀢𑀺𑀁 𑀜𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀘𑁄𑀤𑀦𑀸𑀬 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀚𑀸𑀦𑀦𑀢𑁆𑀣𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀤𑀻𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑀘𑁄𑀤𑀦𑀸𑀬 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀘𑁄𑀤𑀦𑀸𑀬 ‘‘𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄, 𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲’’𑀦𑁆𑀢𑀺 𑀏𑀯𑀁 𑀑𑀓𑀸𑀲𑀓𑀫𑁆𑀫𑀁 𑀆𑀤𑀺, 𑀑𑀢𑀺𑀡𑁆𑀡𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀫𑀚𑁆𑀛𑁂, 𑀆𑀧𑀢𑁆𑀢𑀺𑀬𑀁 𑀯𑀸 𑀅𑀦𑀸𑀧𑀢𑁆𑀢𑀺𑀬𑀁 𑀯𑀸 𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀫𑀣𑁄 𑀧𑀭𑀺𑀬𑁄𑀲𑀸𑀦𑀁.

𑀘𑁄𑀤𑀦𑀸𑀬 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀯𑀢𑁆𑀣𑀽𑀦𑀺, 𑀓𑀢𑀺 𑀪𑀽𑀫𑀺𑀬𑁄? 𑀘𑁄𑀤𑀦𑀸𑀬 𑀤𑁆𑀯𑁂 𑀫𑀽𑀮𑀸𑀦𑀺 𑁋 𑀲𑀫𑀽𑀮𑀺𑀓𑀸 𑀯𑀸 𑀅𑀫𑀽𑀮𑀺𑀓𑀸 𑀯𑀸; 𑀢𑀻𑀡𑀺 𑀯𑀢𑁆𑀣𑀽𑀦𑀺 𑁋 𑀤𑀺𑀝𑁆𑀞𑀁, 𑀲𑀼𑀢𑀁, 𑀧𑀭𑀺𑀲𑀗𑁆𑀓𑀺𑀢𑀁; 𑀧𑀜𑁆𑀘 𑀪𑀽𑀫𑀺𑀬𑁄 𑁋 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺. 𑀇𑀫𑀸𑀬 𑀘 𑀧𑀦 𑀘𑁄𑀤𑀦𑀸𑀬 𑀘𑁄𑀤𑀓𑁂𑀦 𑀧𑀼𑀕𑁆𑀕𑀮𑁂𑀦 ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀦𑀼 𑀔𑁄𑀫𑁆𑀳𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁯𑁯) 𑀦𑀬𑁂𑀦 𑀉𑀧𑀸𑀮𑀺𑀧𑀜𑁆𑀘𑀓𑁂 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀘𑀼𑀤𑀺𑀢𑀓𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺.

𑀅𑀧𑁆𑀧𑁂𑀯 ¶ 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬𑀦𑁆𑀢𑀺 𑀅𑀧𑀺 ¶ 𑀏𑀯 𑀦𑀸𑀫 𑀦𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀲𑁂𑀝𑁆𑀞𑀘𑀭𑀺𑀬𑀸 𑀘𑀸𑀯𑁂𑀬𑁆𑀬𑀁, ‘‘𑀲𑀸𑀥𑀼 𑀯𑀢𑀲𑁆𑀲 𑀲𑀘𑀸𑀳𑀁 𑀇𑀫𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦 ‘‘𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀇𑀫𑀲𑁆𑀲𑁂𑀯 𑀧𑀭𑀺𑀬𑀸𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀪𑀸𑀯𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀔𑀡𑀸𑀤𑀻𑀦𑀺 𑀲𑀫𑀬𑀯𑁂𑀯𑀘𑀦𑀸𑀦𑀺. 𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀯𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀫𑀺𑀁 𑀮𑀬𑁂 𑀢𑀲𑁆𑀫𑀺𑀁 𑀫𑀼𑀳𑀼𑀢𑁆𑀢𑁂 𑀯𑀻𑀢𑀺𑀯𑀢𑁆𑀢𑁂. 𑀪𑀼𑀫𑁆𑀫𑀧𑁆𑀧𑀢𑁆𑀢𑀺𑀬𑀸 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁.

𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀦𑀺𑀤𑁆𑀤𑁂𑀲𑁂 𑀬𑁂𑀦 𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑀺𑀢𑁄 𑀳𑁄𑀢𑀻𑀢𑀺 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀲𑀼 𑀬𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑁄 𑀅𑀦𑀼𑀤𑁆𑀥𑀁𑀲𑀺𑀢𑁄 𑀅𑀪𑀺𑀪𑀽𑀢𑁄 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄𑀢𑀺 𑀢𑀲𑁆𑀫𑀺𑀁 𑀘𑁄𑀤𑀓𑁂𑀦 𑀯𑀼𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀘𑁄𑀤𑀓𑁄 𑀅𑀦𑀼𑀯𑀺𑀚𑁆𑀚𑀓𑁂𑀦 ‘‘𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀯𑀺𑀚𑁆𑀚𑀺𑀬𑀫𑀸𑀦𑁄 𑀯𑀻𑀫𑀁𑀲𑀺𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁄.

𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀦𑀺𑀤𑁆𑀤𑁂𑀲𑁂 𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄𑀢𑀺 𑀅𑀦𑀼𑀯𑀺𑀚𑁆𑀚𑀓𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺, 𑀅𑀣 𑀯𑀸 𑀤𑀺𑀝𑁆𑀞𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀓𑁂𑀦𑀘𑀺 𑀅𑀯𑀼𑀘𑁆𑀘𑀫𑀸𑀦𑁄. 𑀏𑀢𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀧𑀭𑀢𑁄 ¶ ‘‘𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀻’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀏𑀯𑀁 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺 𑀧𑀝𑀺𑀚𑀸𑀦𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀇𑀤𑀜𑁆𑀘 𑀅𑀫𑀽𑀮𑀓𑀪𑀸𑀯𑀲𑁆𑀲 𑀧𑀸𑀓𑀝𑀓𑀸𑀮𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀁 𑀧𑀦 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀢𑀺.

𑀇𑀤𑀸𑀦𑀺 ‘‘𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀅𑀫𑀽𑀮𑀓𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸 𑀅𑀧𑀼𑀩𑁆𑀩𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀓𑀭𑀡𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀝𑁆𑀞𑁂𑀦 𑀏𑀓𑀫𑁆𑀧𑀺 𑀯𑀢𑁆𑀣𑀼𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀯𑀺𑀯𑀸𑀤𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑁄 𑀧𑀦 𑀲𑁄 𑀅𑀥𑀺𑀓𑀭𑀡𑀝𑁆𑀞𑁄, 𑀬𑁂𑀦𑁂𑀢𑀁 𑀏𑀓𑀁 𑀳𑁄𑀢𑀻𑀢𑀺? 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸. 𑀢𑀲𑁆𑀫𑀸 𑀬𑀁 𑀅𑀥𑀺𑀓𑀺𑀘𑁆𑀘 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬 𑀲𑀫𑀣𑀸 𑀯𑀢𑁆𑀢𑀦𑁆𑀢𑀺, 𑀢𑀁 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀓𑀣𑀸𑀲𑀼 ¶ 𑀧𑀦 𑀯𑀼𑀢𑁆𑀢𑀁 𑁋 ‘‘𑀅𑀥𑀺𑀓𑀭𑀡𑀦𑁆𑀢𑀺 𑀓𑁂𑀘𑀺 𑀕𑀸𑀳𑀁 𑀯𑀤𑀦𑁆𑀢𑀺, 𑀓𑁂𑀘𑀺 𑀘𑁂𑀢𑀦𑀁, 𑀓𑁂𑀘𑀺 ¶ 𑀅𑀓𑁆𑀔𑀦𑁆𑀢𑀺𑀁 𑀓𑁂𑀘𑀺 𑀯𑁄𑀳𑀸𑀭𑀁, 𑀓𑁂𑀘𑀺 𑀧𑀡𑁆𑀡𑀢𑁆𑀢𑀺’’𑀦𑁆𑀢𑀺. 𑀧𑀼𑀦 𑀏𑀯𑀁 𑀯𑀺𑀘𑀸𑀭𑀺𑀢𑀁 ‘‘𑀬𑀤𑀺 𑀕𑀸𑀳𑁄 𑀅𑀥𑀺𑀓𑀭𑀡𑀁 𑀦𑀸𑀫, 𑀏𑀓𑁄 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑁄 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀼𑀦 𑀘𑀚𑀢𑀺, 𑀢𑀲𑁆𑀲 𑀢𑀁 𑀅𑀥𑀺𑀓𑀭𑀡𑀁 𑀲𑀫𑀣𑀧𑁆𑀧𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀬𑀤𑀺 𑀘𑁂𑀢𑀦𑀸 𑀅𑀥𑀺𑀓𑀭𑀡𑀁, ‘‘𑀇𑀤𑀁 𑀅𑀢𑁆𑀢𑀸𑀤𑀸𑀦𑀁 𑀕𑀡𑁆𑀳𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀸 𑀘𑁂𑀢𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀬𑀤𑀺 𑀅𑀓𑁆𑀔𑀦𑁆𑀢𑀺 𑀅𑀥𑀺𑀓𑀭𑀡𑀁, 𑀅𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸𑀧𑀺 𑀅𑀧𑀭𑀪𑀸𑀕𑁂 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀫𑀸𑀦𑁄 𑀯𑀸 𑀔𑀫𑀸𑀧𑀺𑀢𑁄 𑀯𑀸 𑀘𑀚𑀢𑀺. 𑀬𑀤𑀺 𑀯𑁄𑀳𑀸𑀭𑁄 𑀅𑀥𑀺𑀓𑀭𑀡𑀁, 𑀓𑀣𑁂𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀼𑀡𑁆𑀳𑀻 𑀳𑁄𑀢𑀺 𑀦𑀺𑀭𑀯𑁄, 𑀏𑀯𑀫𑀲𑁆𑀲 𑀢𑀁 𑀅𑀥𑀺𑀓𑀭𑀡𑀁 𑀲𑀫𑀣𑀧𑁆𑀧𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺.

𑀢𑀁 𑀧𑀦𑁂𑀢𑀁 ‘‘𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸…𑀧𑁂… 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀦𑁆𑀢𑀺 𑀘 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀢𑁂 𑀧𑀡𑁆𑀡𑀢𑁆𑀢𑀺𑀬𑀸 𑀓𑀼𑀲𑀮𑀸𑀤𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑀺, 𑀦 𑀘 ‘‘𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸’’𑀢𑀺 𑀏𑀢𑁆𑀣 𑀆𑀕𑀢𑁄 𑀧𑀸𑀭𑀸𑀚𑀺𑀓𑀥𑀫𑁆𑀫𑁄 𑀧𑀡𑁆𑀡𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? 𑀅𑀘𑁆𑀘𑀦𑁆𑀢𑀅𑀓𑀼𑀲𑀮𑀢𑁆𑀢𑀸. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀧𑀭𑀺. 𑁩𑁦𑁩).

𑀬𑀜𑁆𑀘𑁂𑀢𑀁 ‘‘𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸’’𑀢𑀺 𑀏𑀢𑁆𑀣 𑀅𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀁 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲𑁂𑀯𑀸𑀬𑀁 ‘‘𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻’’𑀢𑀺 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀦 𑀧𑀡𑁆𑀡𑀢𑁆𑀢𑀺𑀬𑀸 𑀦 𑀳𑀺 𑀅𑀜𑁆𑀜𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 ¶ 𑀅𑀜𑁆𑀜𑀁 𑀧𑀝𑀺𑀦𑀺𑀤𑁆𑀤𑀺𑀲𑀢𑀺. 𑀬𑀲𑁆𑀫𑀸 𑀧𑀦 𑀬𑀸𑀬 𑀧𑀡𑁆𑀡𑀢𑁆𑀢𑀺𑀬𑀸 𑀬𑁂𑀦 𑀅𑀪𑀺𑀮𑀸𑀧𑁂𑀦 𑀘𑁄𑀤𑀓𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀜𑁆𑀜𑀢𑁆𑀢𑁄, 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀅𑀫𑀽𑀮𑀓𑀢𑁆𑀢𑀸 𑀲𑀸𑀧𑀺 𑀧𑀜𑁆𑀜𑀢𑁆𑀢𑀺 𑀅𑀫𑀽𑀮𑀺𑀓𑀸 𑀳𑁄𑀢𑀺, 𑀅𑀥𑀺𑀓𑀭𑀡𑁂 𑀧𑀯𑀢𑁆𑀢𑀢𑁆𑀢𑀸 𑀘 𑀅𑀥𑀺𑀓𑀭𑀡𑀁. 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀡𑁆𑀡𑀢𑁆𑀢𑀺 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀬𑀲𑁆𑀫𑀸 𑀯𑀸 𑀬𑀁 𑀅𑀫𑀽𑀮𑀓𑀁 𑀦𑀸𑀫 𑀅𑀥𑀺𑀓𑀭𑀡𑀁 𑀢𑀁 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀅𑀢𑁆𑀣𑀺. 𑀢𑀲𑁆𑀫𑀸𑀧𑀺 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀢𑀜𑁆𑀘 𑀔𑁄 𑀇𑀥𑁂𑀯 𑀦 𑀲𑀩𑁆𑀩𑀢𑁆𑀣. 𑀦 𑀳𑀺 𑀯𑀺𑀯𑀸𑀤𑀸𑀤𑀻𑀦𑀁 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀁. 𑀅𑀥𑀺𑀓𑀭𑀡𑀝𑁆𑀞𑁄 𑀧𑀦 𑀢𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸. 𑀇𑀢𑀺 𑀇𑀫𑀺𑀦𑀸 𑀅𑀥𑀺𑀓𑀭𑀡𑀝𑁆𑀞𑁂𑀦 𑀇𑀥𑁂𑀓𑀘𑁆𑀘𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑁄 𑀘𑁂𑀯 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼 ¶ .

𑀢𑀢𑁆𑀣 ¶ ‘‘𑀇𑀥 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸’’𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. ‘‘𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀏𑀯𑀁 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. ‘‘𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡’’𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀬𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. ‘‘𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’’𑀦𑁆𑀢𑀺 (𑀘𑀽𑀴𑀯. 𑁨𑁧𑁫) 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀲𑁂𑀲𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀏𑀢𑁆𑀢𑀓𑀸 𑀳𑀺 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑀸. 𑀢𑁂𑀲𑀼 𑀧𑀸𑀭𑀸𑀚𑀺𑀓𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀤𑀺𑀝𑁆𑀞𑀸𑀤𑀻𑀳𑀺 𑀫𑀽𑀮𑁂𑀳𑀺 𑀅𑀫𑀽𑀮𑀓𑀜𑁆𑀘𑁂𑀯 𑀅𑀥𑀺𑀓𑀭𑀡𑀁 𑀳𑁄𑀢𑀺. 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺, 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺 ‘‘𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀅𑀬𑀁 𑀢𑀸𑀯𑀲𑁆𑀲 𑀲𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑁄.

𑁩𑁮𑁭. 𑀇𑀤𑀸𑀦𑀺 𑀬𑀸𑀦𑀺 𑀢𑀸𑀦𑀺 𑀲𑀗𑁆𑀔𑁂𑀧𑀢𑁄 𑀤𑀺𑀝𑁆𑀞𑀸𑀤𑀻𑀦𑀺 𑀘𑁄𑀤𑀦𑀸𑀯𑀢𑁆𑀣𑀽𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀺𑀝𑁆𑀞𑀲𑁆𑀲 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀝𑁆𑀞𑀲𑁆𑀲 𑀳𑁄𑀢𑀻𑀢𑀺 𑀅𑀤𑀺𑀝𑁆𑀞𑁄 𑀅𑀲𑁆𑀲 𑀳𑁄𑀢𑀺. 𑀏𑀢𑁂𑀦 𑀘𑁄𑀤𑀓𑁂𑀦 𑀅𑀤𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀅𑀲𑀼𑀢𑀲𑁆𑀲 𑀳𑁄𑀢𑀻𑀢𑀺𑀆𑀤𑀻𑀲𑀼𑀧𑀺.

𑀤𑀺𑀝𑁆𑀞𑁄 𑀫𑀬𑀸𑀢𑀺 𑀤𑀺𑀝𑁆𑀞𑁄𑀲𑀺 𑀫𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀼𑀢𑁄 𑀫𑀬𑀸𑀢𑀺𑀆𑀤𑀻𑀲𑀼𑀧𑀺. 𑀲𑁂𑀲𑀁 𑀅𑀤𑀺𑀝𑁆𑀞𑀫𑀽𑀮𑀓𑁂 ¶ 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀺𑀝𑁆𑀞𑀫𑀽𑀮𑀓𑁂 𑀧𑀦 𑀢𑀜𑁆𑀘𑁂 𑀘𑁄𑀤𑁂𑀢𑀺 ‘‘𑀲𑀼𑀢𑁄 𑀫𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀤𑀻𑀦𑀁 𑀆𑀪𑀸𑀯𑁂𑀦 𑀅𑀫𑀽𑀮𑀓𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀘 𑀇𑀫𑀲𑁆𑀫𑀺𑀁 𑀘𑁄𑀤𑀓𑀯𑀸𑀭𑁂 𑀬𑀣𑀸 𑀇𑀥𑀸𑀕𑀢𑁂𑀲𑀼 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺 𑀇𑀫𑁂𑀲𑀼 𑀯𑀘𑀦𑁂𑀲𑀼 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀏𑀯𑀁 ¶ 𑀅𑀜𑁆𑀜𑀢𑁆𑀭 𑀆𑀕𑀢𑁂𑀲𑀼 ‘‘𑀤𑀼𑀲𑁆𑀲𑀻𑀮𑁄, 𑀧𑀸𑀧𑀥𑀫𑁆𑀫𑁄, 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 ¶ , 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀅𑀦𑁆𑀢𑁄𑀧𑀽𑀢𑀺, 𑀅𑀯𑀲𑁆𑀲𑀼𑀢𑁄, 𑀓𑀲𑀫𑁆𑀩𑀼𑀚𑀸𑀢𑁄’’𑀢𑀺 𑀇𑀫𑁂𑀲𑀼𑀧𑀺 𑀯𑀘𑀦𑁂𑀲𑀼 𑀏𑀓𑁂𑀓𑀲𑁆𑀲 𑀯𑀲𑁂𑀦 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺𑀬𑁂𑀯.

‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀇𑀫𑀸𑀦𑀺 𑀧𑀦 𑀲𑀼𑀤𑁆𑀥𑀸𑀦𑀺 𑀲𑀻𑀲𑀁 𑀦 𑀏𑀦𑁆𑀢𑀺, ‘‘𑀤𑀼𑀲𑁆𑀲𑀻𑀮𑁄𑀲𑀺 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸’’𑀢𑀺 𑀏𑀯𑀁 𑀤𑀼𑀲𑁆𑀲𑀻𑀮𑀸𑀤𑀺𑀧𑀤𑁂𑀲𑀼 𑀧𑀦 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀧𑀤𑁂𑀲𑀼 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀖𑀝𑀺𑀢𑀸𑀦𑁂𑀯 𑀲𑀻𑀲𑀁 𑀏𑀦𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀓𑀭𑀸𑀦𑀺 𑀳𑁄𑀦𑁆𑀢𑀺.

𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀦 𑀓𑁂𑀯𑀮𑀁 𑀇𑀥 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀦𑀺 ‘𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄’𑀢𑀺𑀆𑀤𑀺𑀧𑀤𑀸𑀦𑁂𑀯 𑀲𑀻𑀲𑀁 𑀏𑀦𑁆𑀢𑀺, ‘𑀓𑁄𑀡𑁆𑀞𑁄𑀲𑀺 𑀫𑀳𑀸𑀲𑀸𑀫𑀡𑁂𑀭𑁄𑀲𑀺, 𑀫𑀳𑀸𑀉𑀧𑀸𑀲𑀓𑁄𑀲𑀺, 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀲𑀺, 𑀦𑀺𑀕𑀡𑁆𑀞𑁄𑀲𑀺, 𑀆𑀚𑀻𑀯𑀓𑁄𑀲𑀺, 𑀢𑀸𑀧𑀲𑁄𑀲𑀺, 𑀧𑀭𑀺𑀩𑁆𑀩𑀸𑀚𑀓𑁄𑀲𑀺, 𑀧𑀡𑁆𑀟𑀓𑁄𑀲𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀲𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀫𑀸𑀢𑀼𑀖𑀸𑀢𑀓𑁄𑀲𑀺, 𑀧𑀺𑀢𑀼𑀖𑀸𑀢𑀓𑁄𑀲𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄𑀲𑀺, 𑀲𑀗𑁆𑀖𑀪𑁂𑀤𑀓𑁄𑀲𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄𑀲𑀺, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀑𑀲𑀻’𑀢𑀺 𑀇𑀫𑀸𑀦𑀺𑀧𑀺 𑀲𑀻𑀲𑀁 𑀏𑀦𑁆𑀢𑀺𑀬𑁂𑀯𑀸’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄𑀬𑁂𑀯 𑀘 ‘‘𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄𑀢𑀺𑀆𑀤𑀻𑀲𑀼 𑀬𑀤𑀕𑁆𑀕𑁂𑀦 𑀯𑁂𑀫𑀢𑀺𑀓𑁄 𑀢𑀤𑀕𑁆𑀕𑁂𑀦 𑀦𑁄 𑀓𑀧𑁆𑀧𑁂𑀢𑀺, 𑀬𑀤𑀕𑁆𑀕𑁂𑀦 𑀦𑁄 𑀓𑀧𑁆𑀧𑁂𑀢𑀺 𑀢𑀤𑀕𑁆𑀕𑁂𑀦 𑀦𑀲𑁆𑀲𑀭𑀢𑀺, 𑀬𑀤𑀕𑁆𑀕𑁂𑀦 𑀦𑀲𑁆𑀲𑀭𑀢𑀺 𑀢𑀤𑀕𑁆𑀕𑁂𑀦 𑀧𑀫𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀤𑀢𑀺.

𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 𑀏𑀓𑁂𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀧𑀸𑀝𑁂𑀓𑁆𑀓𑀁 𑀦𑀬𑀁 𑀤𑀲𑁆𑀲𑁂𑀢𑀺. 𑀓𑀣𑀁? 𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄𑀢𑀺 𑀅𑀬𑀁 𑀢𑀸𑀯 𑀤𑀲𑁆𑀲𑀦𑁂 𑀯𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺 𑀧𑀼𑀕𑁆𑀕𑀮𑁂 𑀯𑀸, 𑀢𑀢𑁆𑀣 ‘‘𑀤𑀺𑀝𑁆𑀞𑁄 𑀦𑀼𑀔𑁄 𑀫𑀬𑀸 𑀦 𑀤𑀺𑀝𑁆𑀞𑁄’’𑀢𑀺 𑀏𑀯𑀁 𑀤𑀲𑁆𑀲𑀦𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺. ‘‘𑀅𑀬𑀁 𑀦𑀼𑀔𑁄 𑀫𑀬𑀸 𑀤𑀺𑀝𑁆𑀞𑁄 𑀅𑀜𑁆𑀜𑁄’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀏𑀯𑀁 𑀤𑀲𑁆𑀲𑀦𑀁 𑀯𑀸 𑀦𑁄 𑀓𑀧𑁆𑀧𑁂𑀢𑀺 𑀧𑀼𑀕𑁆𑀕𑀮𑀁 𑀯𑀸, 𑀤𑀲𑁆𑀲𑀦𑀁 𑀯𑀸 𑀦𑀲𑁆𑀲𑀭𑀢𑀺 𑀧𑀼𑀕𑁆𑀕𑀮𑀁 𑀯𑀸, 𑀤𑀲𑁆𑀲𑀦𑀁 𑀯𑀸 𑀧𑀫𑀼𑀝𑁆𑀞𑁄 𑀳𑁄𑀢𑀺 𑀧𑀼𑀕𑁆𑀕𑀮𑀁 𑀯𑀸. 𑀏𑀢𑁆𑀣 𑀘 𑀯𑁂𑀫𑀢𑀺𑀓𑁄𑀢𑀺 𑀯𑀺𑀫𑀢𑀺𑀚𑀸𑀢𑁄. 𑀦𑁄 𑀓𑀧𑁆𑀧𑁂𑀢𑀻𑀢𑀺 𑀦 𑀲𑀤𑁆𑀤𑀳𑀢𑀺. 𑀦𑀲𑁆𑀲𑀭𑀢𑀻𑀢𑀺 𑀅𑀲𑀸𑀭𑀺𑀬𑀫𑀸𑀦𑁄 𑀦𑀲𑁆𑀲𑀭𑀢𑀺. 𑀬𑀤𑀸 𑀧𑀦 𑀢𑀁 ¶ ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀪𑀦𑁆𑀢𑁂 𑀞𑀸𑀦𑁂 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂’’𑀢𑀺 𑀲𑀸𑀭𑁂𑀦𑁆𑀢𑀺 𑀢𑀤𑀸 𑀲𑀭𑀢𑀺. 𑀧𑀫𑀼𑀝𑁆𑀞𑁄𑀢𑀺 ¶ 𑀬𑁄 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀲𑀸𑀭𑀺𑀬𑀫𑀸𑀦𑁄𑀧𑀺 𑀦𑀲𑁆𑀲𑀭𑀢𑀺𑀬𑁂𑀯𑀸𑀢𑀺 ¶ . 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀘𑁄𑀤𑀸𑀧𑀓𑀯𑀸𑀭𑁄𑀧𑀺 𑀯𑁂𑀤𑀺𑀢𑀩𑁆𑀩𑁄, 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀫𑀬𑀸’’𑀢𑀺 𑀧𑀭𑀺𑀳𑀻𑀦𑀁, 𑀲𑁂𑀲𑀁 𑀘𑁄𑀤𑀓𑀯𑀸𑀭𑀲𑀤𑀺𑀲𑀫𑁂𑀯.

𑁩𑁮𑁯. 𑀢𑀢𑁄 𑀧𑀭𑀁 𑀆𑀧𑀢𑁆𑀢𑀺𑀪𑁂𑀤𑀁 𑀅𑀦𑀸𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀤𑁆𑀥𑁂 𑀲𑀼𑀤𑁆𑀥𑀤𑀺𑀝𑁆𑀞𑀻’’𑀢𑀺𑀆𑀤𑀺𑀓𑀁 𑀘𑀢𑀼𑀓𑁆𑀓𑀁 𑀞𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀧𑀤𑀁 𑀘𑀢𑀽𑀳𑀺 𑀘𑀢𑀽𑀳𑀺 𑀪𑁂𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀦𑀬𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀓𑁂𑀯𑀮𑀁 𑀳𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑁋 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄, 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄, 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄, 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄, 𑀉𑀧𑁄𑀲𑀣𑀧𑀯𑀸𑀭𑀡𑀝𑁆𑀞𑀧𑀦𑀸𑀥𑀺𑀧𑁆𑀧𑀸𑀬𑁄, 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁄, 𑀥𑀫𑁆𑀫𑀓𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀧𑀼𑀭𑀺𑀫𑁂𑀲𑀼 𑀘𑀢𑀽𑀲𑀼 𑀅𑀥𑀺𑀧𑁆𑀧𑀸𑀬𑁂𑀲𑀼 𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀘 𑀲𑀫𑁆𑀫𑀼𑀔𑀸 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀲𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀲𑀫𑁆𑀫𑀼𑀔𑀸 𑀏𑀯 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁂𑀦 ‘𑀢𑁆𑀯𑀁 𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀁 𑀧𑀝𑀺𑀓𑀭𑁄𑀳𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀑𑀓𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑁂𑀯 𑀧𑀦 ‘‘𑀉𑀧𑁄𑀲𑀣𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀞𑀧𑀦𑀓𑁆𑀔𑁂𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩𑀁. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬’’𑀢𑀺 𑀏𑀢𑀲𑁆𑀫𑀺𑀜𑁆𑀳𑀺 𑀭𑁂-𑀓𑀸𑀭𑁂 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀞𑀧𑁂𑀢𑀼𑀁 𑀮𑀩𑁆𑀪𑀢𑀺. 𑀢𑀢𑁄 𑀧𑀭𑀁 𑀧𑀦 𑀬𑁆𑀬-𑀓𑀸𑀭𑁂 𑀧𑀢𑁆𑀢𑁂 𑀦 𑀮𑀩𑁆𑀪𑀢𑀺. 𑀏𑀲 𑀦𑀬𑁄 𑀧𑀯𑀸𑀭𑀡𑀸𑀬. 𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑀸𑀧𑀺 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀢𑁆𑀣𑁂𑀢𑀁 𑀢𑀯𑀸’’𑀢𑀺 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺.

𑀥𑀫𑁆𑀫𑀓𑀣𑀺𑀓𑀲𑁆𑀲𑀸𑀧𑀺 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀬𑁄 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀅𑀲𑁆𑀲𑀫𑀡𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁄𑀤𑀺𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀑𑀤𑀺𑀲𑁆𑀲 𑀦𑀺𑀬𑀫𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 ¶ 𑀘 𑀅𑀲𑁆𑀲𑀫𑀡𑁄 𑀅𑀦𑀼𑀧𑀸𑀲𑀓𑁄’’𑀢𑀺 𑀓𑀣𑁂𑀢𑀺, 𑀥𑀫𑁆𑀫𑀸𑀲𑀦𑀢𑁄 𑀑𑀭𑁄𑀳𑀺𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀬𑀁 𑀧𑀦 𑀢𑀢𑁆𑀣 𑀢𑀢𑁆𑀣 ‘‘𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀳𑀺 𑀓𑁄𑀘𑀺 𑀅𑀦𑁄𑀓𑀸𑀲𑁄 𑀦𑀸𑀫 𑀅𑀢𑁆𑀣𑀺, 𑀬𑀫𑁄𑀓𑀸𑀲𑀁 ¶ 𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀑𑀓𑀸𑀲𑀁 𑀧𑀦 𑀅𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.