📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀭𑀸𑀚𑀺𑀓𑀓𑀡𑁆𑀟-𑀅𑀝𑁆𑀞𑀓𑀣𑀸 (𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 ¶ ¶ ¶ 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁;

𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀸𑀦𑀺;

𑀔𑁂𑀤𑀁 𑀕𑀢𑁄 𑀮𑁄𑀓𑀳𑀺𑀢𑀸𑀬 𑀦𑀸𑀣𑁄;

𑀦𑀫𑁄 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲.

𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀬𑀁;

𑀪𑀯𑀸𑀪𑀯𑀁 𑀕𑀘𑁆𑀙𑀢𑀺 𑀚𑀻𑀯𑀮𑁄𑀓𑁄;

𑀦𑀫𑁄 ¶ 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮-

𑀯𑀺𑀤𑁆𑀥𑀁𑀲𑀺𑀦𑁄 𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲.

𑀕𑀼𑀡𑁂𑀳𑀺 𑀬𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸-

𑀯𑀺𑀫𑀼𑀢𑁆𑀢𑀺𑀜𑀸𑀡𑀧𑁆𑀧𑀪𑀼𑀢𑀻𑀳𑀺 𑀬𑀼𑀢𑁆𑀢𑁄;

𑀔𑁂𑀢𑁆𑀢𑀁 𑀚𑀦𑀸𑀦𑀁 𑀓𑀼𑀲𑀮𑀢𑁆𑀣𑀺𑀓𑀸𑀦𑀁;

𑀢𑀫𑀭𑀺𑀬𑀲𑀗𑁆𑀖𑀁 𑀲𑀺𑀭𑀲𑀸 𑀦𑀫𑀸𑀫𑀺.

𑀇𑀘𑁆𑀘𑁂𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬𑀁;

𑀦𑀫𑀲𑁆𑀲𑀫𑀸𑀦𑁄 𑀭𑀢𑀦𑀢𑁆𑀢𑀬𑀁 𑀬𑀁;

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀯𑀺𑀧𑀼𑀮𑀁 𑀅𑀮𑀢𑁆𑀣𑀁;

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄.

𑀬𑀲𑁆𑀫𑀺𑀁 ¶ 𑀞𑀺𑀢𑁂 𑀲𑀸𑀲𑀦𑀫𑀝𑁆𑀞𑀺𑀢𑀲𑁆𑀲;

𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺 𑀲𑀼𑀲𑀡𑁆𑀞𑀺𑀢𑀲𑁆𑀲;

𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬𑀁 𑀅𑀫𑀺𑀲𑁆𑀲𑀁;

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀁.

𑀓𑀸𑀫𑀜𑁆𑀘 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀺;

𑀜𑀸𑀡𑀫𑁆𑀩𑀼𑀦𑀺𑀤𑁆𑀥𑁄𑀢𑀫𑀮𑀸𑀲𑀯𑁂𑀳𑀺;

𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑁂𑀳𑀺 ¶ ;

𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀺.

𑀲𑀮𑁆𑀮𑁂𑀔𑀺𑀬𑁂 𑀦𑁄𑀲𑀼𑀮𑀪𑀽𑀧𑀫𑁂𑀳𑀺;

𑀫𑀳𑀸𑀯𑀺𑀳𑀸𑀭𑀲𑁆𑀲 𑀥𑀚𑀽𑀧𑀫𑁂𑀳𑀺;

𑀲𑀁𑀯𑀡𑁆𑀡𑀺𑀢𑁄𑀬𑀁 𑀯𑀺𑀦𑀬𑁄 𑀦𑀬𑁂𑀳𑀺;

𑀘𑀺𑀢𑁆𑀢𑁂𑀳𑀺 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑁂𑀳𑀺.

𑀲𑀁𑀯𑀡𑁆𑀡𑀦𑀸 𑀲𑀻𑀳𑀴𑀤𑀻𑀧𑀓𑁂𑀦;

𑀯𑀸𑀓𑁆𑀬𑁂𑀦 𑀏𑀲𑀸 𑀧𑀦 𑀲𑀗𑁆𑀔𑀢𑀢𑁆𑀢𑀸;

𑀦 ¶ 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑀺;

𑀤𑀻𑀧𑀦𑁆𑀢𑀭𑁂 𑀪𑀺𑀓𑁆𑀔𑀼𑀚𑀦𑀲𑁆𑀲 𑀬𑀲𑁆𑀫𑀸.

𑀢𑀲𑁆𑀫𑀸 𑀇𑀫𑀁 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁;

𑀲𑀁𑀯𑀡𑁆𑀡𑀦𑀁 𑀤𑀸𑀦𑀺 𑀲𑀫𑀸𑀭𑀪𑀺𑀲𑁆𑀲𑀁;

𑀅𑀚𑁆𑀛𑁂𑀲𑀦𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀲𑁆𑀲;

𑀣𑁂𑀭𑀲𑁆𑀲 𑀲𑀫𑁆𑀫𑀸 𑀲𑀫𑀦𑀼𑀲𑁆𑀲𑀭𑀦𑁆𑀢𑁄.

𑀲𑀁𑀯𑀡𑁆𑀡𑀦𑀁 𑀢𑀜𑁆𑀘 𑀲𑀫𑀸𑀭𑀪𑀦𑁆𑀢𑁄;

𑀢𑀲𑁆𑀲𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭𑀁;

𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀣𑁂𑀯;

𑀓𑀼𑀭𑀼𑀦𑁆𑀤𑀺𑀦𑀸𑀫𑀸𑀤𑀺𑀲𑀼 𑀯𑀺𑀲𑁆𑀲𑀼𑀢𑀸𑀲𑀼.

𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄;

𑀬𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄;

𑀢𑀢𑁄𑀧𑀺 𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤𑀁;

𑀲𑀁𑀯𑀡𑁆𑀡𑀦𑀁 𑀲𑀫𑁆𑀫 𑀲𑀫𑀸𑀭𑀪𑀺𑀲𑁆𑀲𑀁.

𑀢𑀁 ¶ 𑀫𑁂 𑀦𑀺𑀲𑀸𑀫𑁂𑀦𑁆𑀢𑀼 𑀧𑀲𑀦𑁆𑀦𑀘𑀺𑀢𑁆𑀢𑀸;

𑀣𑁂𑀭𑀸 𑀘 𑀪𑀺𑀓𑁆𑀔𑀽 𑀦𑀯𑀫𑀚𑁆𑀛𑀺𑀫𑀸 𑀘;

𑀥𑀫𑁆𑀫𑀧𑁆𑀧𑀤𑀻𑀧𑀲𑁆𑀲 𑀢𑀣𑀸𑀕𑀢𑀲𑁆𑀲;

𑀲𑀓𑁆𑀓𑀘𑁆𑀘 𑀥𑀫𑁆𑀫𑀁 𑀧𑀢𑀺𑀫𑀸𑀦𑀬𑀦𑁆𑀢𑀸.

𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄;

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸;

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

𑀢𑀲𑁆𑀫𑀸 ¶ 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 ¶ 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁;

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦𑀁.

𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸;

𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸;

𑀯𑀺𑀦𑀺𑀘𑁆𑀙𑀬𑀁 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸;

𑀢𑀦𑁆𑀢𑀺𑀓𑁆𑀓𑀫𑀁 𑀓𑀺𑀜𑁆𑀘𑀺 𑀅𑀯𑁄𑀓𑁆𑀓𑀫𑀺𑀢𑁆𑀯𑀸.

𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁;

𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀧𑀭𑀺𑀤𑀻𑀧𑀬𑀦𑁆𑀢𑀻;

𑀬𑀲𑁆𑀫𑀸 𑀅𑀬𑀁 𑀳𑁂𑀲𑁆𑀲𑀢𑀺 𑀯𑀡𑁆𑀡𑀦𑀸𑀧𑀺;

𑀲𑀓𑁆𑀓𑀘𑁆𑀘 𑀢𑀲𑁆𑀫𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸

𑀢𑀢𑁆𑀣 ¶ 𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀦𑀬𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀦𑀬𑁄 𑀦𑀸𑀫 𑀇𑀥 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀲𑀁𑀯𑀡𑁆𑀡𑀦𑀢𑁆𑀣𑀁 𑀧𑀦𑀲𑁆𑀲 𑀅𑀬𑀁 𑀫𑀸𑀢𑀺𑀓𑀸 𑁋

𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁;

𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀘𑁂𑀢𑀫𑁂𑀢𑀁 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄.

𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄;

𑀤𑀲𑁆𑀲𑀬𑀦𑁆𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀦𑀬𑀲𑁆𑀲𑀢𑁆𑀣𑀯𑀡𑁆𑀡𑀦𑀦𑁆𑀢𑀺.

𑀢𑀢𑁆𑀣 𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸𑀢𑀺 𑀇𑀤𑀁 𑀢𑀸𑀯 𑀯𑀘𑀦𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀢𑁆𑀢𑀩𑁆𑀩𑀫𑁂𑀢𑀁 ¶ ‘‘𑀇𑀤𑀁 𑀯𑀘𑀦𑀁 𑀓𑁂𑀦 𑀯𑀼𑀢𑁆𑀢𑀁, 𑀓𑀤𑀸 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀘 𑀯𑀼𑀢𑁆𑀢’’𑀦𑁆𑀢𑀺? 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 ¶ 𑀦𑀸𑀫 𑀘𑁂𑀲𑀸 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸, 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀁 𑀧𑀦 𑀇𑀥𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂, 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀲𑀗𑁆𑀖𑀢𑁆𑀣𑁂𑀭𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦; 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 𑁋 ‘𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺! 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁭; 𑀤𑀻. 𑀦𑀺. 𑁨.𑁨𑁩𑁨) 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀧𑀸𑀧𑀪𑀺𑀓𑁆𑀔𑀽 𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 ¶ 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀬𑀸𑀯 𑀘 𑀥𑀫𑁆𑀫𑀯𑀺𑀦𑀬𑁄 𑀢𑀺𑀝𑁆𑀞𑀢𑀺 𑀢𑀸𑀯 𑀅𑀦𑀢𑀻𑀢𑀲𑀢𑁆𑀣𑀼𑀓𑀫𑁂𑀯 𑀧𑀸𑀯𑀘𑀦𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄 ¶ , 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’𑀢𑀺 (𑀤𑀻. 𑀦𑀺. 𑁨.𑁨𑁧𑁬).

‘‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀁, 𑀬𑀣𑀬𑀺𑀤𑀁 𑀲𑀸𑀲𑀦𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁.

𑀬𑀁 𑀘𑀸𑀳𑀁 𑀪𑀕𑀯𑀢𑀸 𑁋

‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺 𑀯𑀢𑁆𑀯𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀘𑁂𑀯,

‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺; 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺 𑁋

𑀏𑀯𑀫𑀸𑀤𑀺𑀦𑀸 ¶ 𑀦𑀬𑁂𑀦 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄, 𑀢𑀲𑁆𑀲 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺; 𑀦𑀦𑀼 𑀫𑀁 𑀪𑀕𑀯𑀸 𑀭𑀸𑀚𑀸 𑀯𑀺𑀬 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 ‘𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄 𑀫𑁂 𑀅𑀬𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀫𑀦𑁆𑀢𑁆𑀯𑀸 𑀇𑀫𑀺𑀦𑀸 𑀅𑀲𑀸𑀥𑀸𑀭𑀡𑁂𑀦 𑀅𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀳𑁂𑀲𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺. 𑀬𑀣𑀸𑀳 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁩𑁧) 𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 ¶ ¶ 𑀧𑀭𑀁 𑀆𑀳 𑁋

‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺. 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’’𑀢𑀺. 𑀣𑁂𑀭𑁄 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑁂 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀪𑀺𑀓𑁆𑀔𑀽 𑀅𑀦𑁂𑀓𑀲𑀢𑁂 𑀅𑀦𑁂𑀓𑀲𑀳𑀲𑁆𑀲𑁂 𑀘 𑀯𑀚𑁆𑀚𑁂𑀢𑁆𑀯𑀸 𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀫𑀳𑀸𑀦𑀼𑀪𑀸𑀯𑁂 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑀸 𑀏𑀢𑀤𑀕𑁆𑀕𑀁 𑀆𑀭𑁄𑀧𑀺𑀢𑁂 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀏𑀓𑀽𑀦𑀧𑀜𑁆𑀘𑀲𑀢𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀬𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀓𑁂𑀦𑀽𑀦𑀸𑀧𑀜𑁆𑀘𑀅𑀭𑀳𑀦𑁆𑀢𑀲𑀢𑀸𑀦𑀺 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀓𑀺𑀲𑁆𑀲 𑀧𑀦 𑀣𑁂𑀭𑁄 𑀏𑀓𑁂𑀦𑀽𑀦𑀫𑀓𑀸𑀲𑀻𑀢𑀺? 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀑𑀓𑀸𑀲𑀓𑀭𑀡𑀢𑁆𑀣𑀁. 𑀢𑁂𑀦 𑀳𑀸𑀬𑀲𑁆𑀫𑀢𑀸 𑀲𑀳𑀸𑀧𑀺 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸 𑀥𑀫𑁆𑀫𑀲𑀗𑁆𑀕𑀻𑀢𑀺 𑀓𑀸𑀢𑀼𑀁, 𑀲𑁄 𑀳𑀸𑀬𑀲𑁆𑀫𑀸 𑀲𑁂𑀓𑁆𑀔𑁄 𑀲𑀓𑀭𑀡𑀻𑀬𑁄, 𑀢𑀲𑁆𑀫𑀸 𑀲𑀳𑀸𑀧𑀺 𑀦 𑀲𑀓𑁆𑀓𑀸; 𑀬𑀲𑁆𑀫𑀸 𑀧𑀦𑀲𑁆𑀲 𑀓𑀺𑀜𑁆𑀘𑀺 𑀤𑀲𑀩𑀮𑀤𑁂𑀲𑀺𑀢𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑀁 𑀪𑀕𑀯𑀢𑁄 𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸. 𑀬𑀤𑀺 𑀏𑀯𑀁 𑀲𑁂𑀓𑁆𑀔𑁄𑀧𑀺 𑀲𑀫𑀸𑀦𑁄 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀩𑀳𑀼𑀓𑀸𑀭𑀢𑁆𑀢𑀸 𑀣𑁂𑀭𑁂𑀦 𑀉𑀘𑁆𑀘𑀺𑀦𑀺𑀢𑀩𑁆𑀩𑁄 𑀅𑀲𑁆𑀲. 𑀅𑀣 𑀓𑀲𑁆𑀫𑀸 𑀦 𑀉𑀘𑁆𑀘𑀺𑀦𑀺𑀢𑁄𑀢𑀺 ¶ ? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁄. 𑀣𑁂𑀭𑁄 𑀳𑀺 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄 𑀅𑀳𑁄𑀲𑀺, 𑀢𑀣𑀸 𑀳𑀺 𑀦𑀁 ¶ 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑁂𑀲𑀼 𑀚𑀸𑀢𑁂𑀲𑀼𑀧𑀺 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀓𑀼𑀫𑀸𑀭𑀓𑀯𑀸𑀤𑁂𑀦 𑀑𑀯𑀤𑀢𑀺. 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀘𑀸𑀬𑀁 𑀆𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄. 𑀢𑀢𑁆𑀭 𑀳𑀺 𑀪𑀺𑀓𑁆𑀔𑀽 𑀙𑀦𑁆𑀤𑀸𑀕𑀫𑀦𑀁 𑀯𑀺𑀬 𑀫𑀜𑁆𑀜𑀫𑀸𑀦𑀸 ‘‘𑀩𑀳𑀽 𑀅𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂 𑀪𑀺𑀓𑁆𑀔𑀽 𑀞𑀧𑁂𑀢𑁆𑀯𑀸 𑀆𑀦𑀦𑁆𑀤𑀁 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀁 𑀣𑁂𑀭𑁄 𑀉𑀘𑁆𑀘𑀺𑀦𑀻’’𑀢𑀺 𑀉𑀧𑀯𑀤𑁂𑀬𑁆𑀬𑀼𑀁, 𑀢𑀁 𑀧𑀭𑀽𑀧𑀯𑀸𑀤𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 ‘‘𑀆𑀦𑀦𑁆𑀤𑀁 𑀯𑀺𑀦𑀸 𑀲𑀗𑁆𑀕𑀻𑀢𑀺 ¶ 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀦𑀼𑀫𑀢𑀺𑀬𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀦 𑀉𑀘𑁆𑀘𑀺𑀦𑀺.

𑀅𑀣 𑀲𑀬𑀫𑁂𑀯 𑀪𑀺𑀓𑁆𑀔𑀽 𑀆𑀦𑀦𑁆𑀤𑀲𑁆𑀲𑀢𑁆𑀣𑀸𑀬 𑀣𑁂𑀭𑀁 𑀬𑀸𑀘𑀺𑀁𑀲𑀼. 𑀬𑀣𑀸𑀳 𑁋

‘‘𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄 𑀅𑀪𑀩𑁆𑀩𑁄 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁, 𑀩𑀳𑀼 𑀘𑀸𑀦𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄; 𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀻’’𑀢𑀺 (𑀘𑀽𑀴𑀯. 𑁪𑁩𑁭).

𑀏𑀯𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀉𑀘𑁆𑀘𑀺𑀦𑀺𑀢𑁂𑀦 𑀢𑁂𑀦𑀸𑀬𑀲𑁆𑀫𑀢𑀸 𑀲𑀤𑁆𑀥𑀺𑀁 𑀧𑀜𑁆𑀘 𑀣𑁂𑀭𑀲𑀢𑀸𑀦𑀺 𑀅𑀳𑁂𑀲𑀼𑀁.

𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀫𑀬𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀚𑀕𑀳𑀁 𑀔𑁄 ¶ 𑀫𑀳𑀸𑀕𑁄𑀘𑀭𑀁 𑀧𑀳𑀽𑀢𑀲𑁂𑀦𑀸𑀲𑀦𑀁, 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀦 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺? 𑀇𑀤𑀁 𑀅𑀫𑁆𑀳𑀸𑀓𑀁 𑀣𑀸𑀯𑀭𑀓𑀫𑁆𑀫𑀁, 𑀓𑁄𑀘𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀸𑀯𑁂𑀲𑀺, 𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁.

𑀅𑀣 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼 𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀇𑀤𑀸𑀦𑀺 𑀕𑀺𑀫𑁆𑀳𑀸𑀦𑀁 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄, 𑀉𑀧𑀓𑀝𑁆𑀞𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀫𑀦𑁆𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀭𑀸𑀚𑀕𑀳𑀁, 𑀆𑀯𑀼𑀲𑁄, 𑀕𑀘𑁆𑀙𑀸𑀫𑀸’’𑀢𑀺 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀉𑀧𑀟𑁆𑀠𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑀼𑀓𑀸𑀫𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀕𑀢𑀕𑀢𑀝𑁆𑀞𑀸𑀦𑁂 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺 ¶ 𑁋 ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀓𑀼𑀳𑀺𑀁 𑀲𑀢𑁆𑀣𑀸𑀭𑀁 𑀞𑀧𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 ¶ . 𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀣𑁂𑀭𑁂 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀯𑀺𑀬 𑀫𑀳𑀸𑀧𑀭𑀺𑀤𑁂𑀯𑁄 𑀅𑀳𑁄𑀲𑀺.

𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀢𑀁 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀲𑀩𑀮𑁂𑀦 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀺𑀮𑀸𑀢𑀫𑀸𑀮𑀸𑀓𑀘𑀯𑀭𑀁 ¶ 𑀙𑀟𑁆𑀟𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀪𑀕𑀯𑀢𑁄 𑀞𑀺𑀢𑀓𑀸𑀮𑁂 𑀓𑀭𑀡𑀻𑀬𑀁 𑀯𑀢𑁆𑀢𑀁 𑀲𑀩𑁆𑀩𑀫𑀓𑀸𑀲𑀺. 𑀅𑀣 𑀣𑁂𑀭𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀪𑀼𑀢𑀺 𑀞𑀸𑀦𑀦𑀺𑀲𑀚𑁆𑀚𑀩𑀳𑀼𑀮𑀢𑁆𑀢𑀸 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀁 𑀓𑀸𑀬𑀁 𑀲𑀫𑀲𑁆𑀲𑀸𑀲𑁂𑀢𑀼𑀁 𑀤𑀼𑀢𑀺𑀬𑀤𑀺𑀯𑀲𑁂 𑀔𑀻𑀭𑀯𑀺𑀭𑁂𑀘𑀦𑀁 𑀧𑀺𑀯𑀺𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺. 𑀬𑀁 𑀲𑀦𑁆𑀥𑀸𑀬 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀳𑀺𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋

‘‘𑀅𑀓𑀸𑀮𑁄 𑀔𑁄, 𑀫𑀸𑀡𑀯𑀓, 𑀅𑀢𑁆𑀣𑀺 𑀫𑁂 𑀅𑀚𑁆𑀚 𑀪𑁂𑀲𑀚𑁆𑀚𑀫𑀢𑁆𑀢𑀸 𑀧𑀻𑀢𑀸, 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭).

𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀓𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀕𑀦𑁆𑀢𑁆𑀯𑀸 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄 𑀤𑀻𑀖𑀦𑀺𑀓𑀸𑀬𑁂 𑀲𑀼𑀪𑀲𑀼𑀢𑁆𑀢𑀁𑀦𑀸𑀫 𑀤𑀲𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀅𑀣 𑀣𑁂𑀭𑁄 𑀚𑁂𑀢𑀯𑀦𑀯𑀺𑀳𑀸𑀭𑁂 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀭𑀸𑀚𑀕𑀳𑀁 𑀕𑀢𑁄. 𑀢𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀕𑀢𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸 𑀅𑀳𑁂𑀲𑀼𑀁. 𑀪𑀕𑀯𑀢𑁄 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀘 𑀧𑀭𑀺𑀯𑁂𑀡𑁂 𑀘 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀢𑀢𑁆𑀣 𑀣𑁂𑀭𑀸 𑀪𑀕𑀯𑀢𑁄 𑀯𑀘𑀦𑀧𑀽𑀚𑀦𑀢𑁆𑀣𑀁 𑀢𑀺𑀢𑁆𑀣𑀺𑀬𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 ‘‘𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀢𑁆𑀣𑀭𑀺 𑀞𑀺𑀢𑁂𑀬𑁂𑀯 𑀯𑀺𑀳𑀸𑀭𑁂 𑀧𑀝𑀺𑀚𑀕𑁆𑀕𑀺𑀁𑀲𑀼, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀟𑁆𑀟𑁂𑀲𑀼’’𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘 𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑁋

‘‘𑀅𑀣 ¶ 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 ¶ 𑀯𑀡𑁆𑀡𑀺𑀢𑀁. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫, 𑀫𑀚𑁆𑀛𑀺𑀫𑀁 𑀫𑀸𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁮).

𑀢𑁂 𑀤𑀼𑀢𑀺𑀬𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀧𑀝𑀺𑀧𑀼𑀘𑁆𑀙𑀺. 𑀣𑁂𑀭𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀧𑀝𑀺𑀯𑁂𑀤𑁂𑀲𑀼𑀁. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀳𑀢𑁆𑀣𑀓𑀫𑁆𑀫𑀓𑀸𑀭𑀓𑁂 𑀫𑀦𑀼𑀲𑁆𑀲𑁂 𑀅𑀤𑀸𑀲𑀺. 𑀣𑁂𑀭𑀸 𑀧𑀞𑀫𑀁 𑀫𑀸𑀲𑀁 𑀲𑀩𑁆𑀩𑀯𑀺𑀳𑀸𑀭𑁂 𑀧𑀝𑀺𑀲𑀗𑁆𑀔𑀭𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚, 𑀯𑀺𑀳𑀸𑀭𑀧𑀝𑀺𑀲𑀗𑁆𑀔𑀭𑀡𑀁. 𑀇𑀤𑀸𑀦𑀺 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑁄𑀫𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀯𑀺𑀲𑁆𑀲𑀢𑁆𑀣𑀸 𑀓𑀭𑁄𑀣. 𑀫𑀬𑁆𑀳𑀁 𑀆𑀡𑀸𑀘𑀓𑁆𑀓𑀁, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼. 𑀆𑀡𑀸𑀧𑁂𑀣, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀻’’𑀢𑀺? ‘‘𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀲𑀚𑁆𑀚𑀝𑁆𑀞𑀸𑀦𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺? ‘‘𑀯𑁂𑀪𑀸𑀭𑀧𑀩𑁆𑀩𑀢𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀓𑀸𑀢𑀼𑀁 𑀬𑀼𑀢𑁆𑀢𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑀁 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀢𑁆𑀣𑀫𑁆𑀪𑀲𑁄𑀧𑀸𑀦𑀁 𑀦𑀸𑀦𑀸𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀆𑀓𑀫𑁆𑀫𑀯𑀺𑀘𑀺𑀢𑁆𑀢𑀁 𑀅𑀪𑀺𑀪𑀯𑀦𑁆𑀢𑀫𑀺𑀯 𑀭𑀸𑀚𑀪𑀯𑀦𑀯𑀺𑀪𑀽𑀢𑀺𑀁 𑀅𑀯𑀳𑀲𑀦𑁆𑀢𑀫𑀺𑀯 𑀤𑁂𑀯𑀯𑀺𑀫𑀸𑀦𑀲𑀺𑀭𑀺𑀁 𑀲𑀺𑀭𑀺𑀬𑀸 𑀦𑀺𑀓𑁂𑀢𑀫𑀺𑀯 𑀏𑀓𑀦𑀺𑀧𑀸𑀢𑀢𑀺𑀢𑁆𑀣𑀫𑀺𑀯 𑀘 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀯𑀺𑀳𑀗𑁆𑀕𑀸𑀦𑀁 𑀮𑁄𑀓𑀭𑀸𑀫𑀡𑁂𑀬𑁆𑀬𑀓𑀫𑀺𑀯 𑀲𑀫𑁆𑀧𑀺𑀡𑁆𑀟𑀺𑀢𑀁 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑀁 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀯𑀺𑀥𑀓𑀼𑀲𑀼𑀫𑀤𑀸𑀫-𑀑𑀮𑀫𑁆𑀩𑀓-𑀯𑀺𑀦𑀺𑀕𑁆𑀕𑀮𑀦𑁆𑀢𑀘𑀸𑀭𑀼𑀯𑀺𑀢𑀸𑀦𑀁 ¶ 𑀭𑀢𑀦𑀯𑀺𑀘𑀺𑀢𑁆𑀢𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀫𑀺𑀯 𑀘 𑀦𑀁 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀲𑀤𑀺𑀲𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀫𑀳𑀸𑀫𑀡𑁆𑀟𑀧𑁂 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀕𑁆𑀖𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀲𑀢𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀪𑀸𑀕𑀁 𑀦𑀺𑀲𑁆𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀣𑁂𑀭𑀸𑀲𑀦𑀁 𑀫𑀡𑁆𑀟𑀧𑀫𑀚𑁆𑀛𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀲𑀦𑀸𑀭𑀳𑀁 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀜𑁆𑀘𑁂𑀢𑁆𑀣 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀫𑀫 𑀓𑀺𑀘𑁆𑀘’’𑀦𑁆𑀢𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀜𑁆𑀜𑁄 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 ¶ 𑀯𑀺𑀘𑀭𑀡𑀓𑀪𑀺𑀓𑁆𑀔𑀼 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀏𑀢𑁂 𑀫𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀼 𑁋 ‘‘𑀲𑁆𑀯𑁂, 𑀆𑀯𑀼𑀲𑁄, 𑀲𑀦𑁆𑀦𑀺𑀧𑀸𑀢𑁄 𑀢𑁆𑀯𑀜𑁆𑀘 𑀲𑁂𑀓𑁆𑀔𑁄 𑀲𑀓𑀭𑀡𑀻𑀬𑁄, 𑀢𑁂𑀦 𑀢𑁂 𑀦 𑀬𑀼𑀢𑁆𑀢𑀁 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼𑀁, 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄, 𑀦 𑀔𑁄 𑀧𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀲𑁂𑀓𑁆𑀔𑁄 ¶ 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀓𑀸𑀬𑀕𑀢𑀸𑀬𑀲𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀆𑀯𑀚𑁆𑀚𑁂𑀲𑀺. 𑀤𑁆𑀯𑁂 𑀧𑀸𑀤𑀸 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀫𑁆𑀩𑁄𑀳𑀦𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀘𑀗𑁆𑀓𑀫𑁂𑀦 ¶ 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀦𑀼 𑀫𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚; 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’𑀢𑀺 (𑀤𑀻. 𑀦𑀺. 𑁨.𑁨𑁦𑁭). 𑀩𑀼𑀤𑁆𑀥𑀸𑀦𑀜𑁆𑀘 𑀓𑀣𑀸𑀤𑁄𑀲𑁄 𑀦𑀸𑀫 𑀦𑀢𑁆𑀣𑀺. 𑀫𑀫 𑀅𑀘𑁆𑀘𑀸𑀭𑀤𑁆𑀥𑀁 𑀯𑀻𑀭𑀺𑀬𑀁 𑀢𑁂𑀦 𑀫𑁂 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺. 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀲𑀫𑀣𑀁 𑀬𑁄𑀚𑁂𑀫𑀻’’𑀢𑀺 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀣𑁄𑀓𑀁 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀫𑀜𑁆𑀘𑀓𑁂 𑀉𑀧𑀦𑀸𑀫𑁂𑀲𑀺. 𑀤𑁆𑀯𑁂 𑀧𑀸𑀤𑀸 𑀪𑀽𑀫𑀺𑀢𑁄 𑀫𑀼𑀢𑁆𑀢𑀸, 𑀲𑀻𑀲𑀜𑁆𑀘 𑀩𑀺𑀫𑁆𑀩𑁄𑀳𑀦𑀁 𑀅𑀲𑀫𑁆𑀧𑀢𑁆𑀢𑀁. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀭𑀳𑀺𑀢𑀁 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀁 𑀅𑀳𑁄𑀲𑀺. 𑀢𑁂𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀦𑀺𑀧𑀦𑁆𑀦𑁄 𑀅𑀦𑀺𑀲𑀺𑀦𑁆𑀦𑁄 𑀅𑀝𑁆𑀞𑀺𑀢𑁄 𑀅𑀘𑀗𑁆𑀓𑀫𑀦𑁆𑀢𑁄 ‘‘𑀓𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀸𑀧𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦 𑀕𑀢𑁄. 𑀪𑀺𑀓𑁆𑀔𑀽 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀢𑀢𑁆𑀣 𑀓𑁂𑀳𑀺𑀘𑀺 ‘‘𑀏𑀢𑀫𑀸𑀲𑀦𑀁 𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸’’𑀢𑀺. ‘‘𑀆𑀦𑀦𑁆𑀤𑁄 𑀧𑀦 𑀓𑀼𑀳𑀺𑀁 𑀕𑀢𑁄’’𑀢𑀺? 𑀢𑀲𑁆𑀫𑀺𑀁 𑀲𑀫𑀬𑁂 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀕𑀫𑀦𑀓𑀸𑀮𑁄’’𑀢𑀺. 𑀢𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 ¶ 𑀤𑀲𑁆𑀲𑁂𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀻𑀢𑀺𑀧𑀺 𑀏𑀓𑁂.

𑀏𑀯𑀁 ¶ 𑀦𑀺𑀲𑀺𑀦𑁆𑀦𑁂 𑀢𑀲𑁆𑀫𑀺𑀁 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀓𑀺𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫, 𑀥𑀫𑁆𑀫𑀁 𑀯𑀸 𑀯𑀺𑀦𑀬𑀁 𑀯𑀸’’𑀢𑀺? 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧, 𑀯𑀺𑀦𑀬𑁄 𑀦𑀸𑀫 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀆𑀬𑀼, 𑀯𑀺𑀦𑀬𑁂 𑀞𑀺𑀢𑁂 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺; 𑀢𑀲𑁆𑀫𑀸 𑀧𑀞𑀫𑀁 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺,. ‘‘𑀓𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺? ‘‘𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺’’𑀦𑁆𑀢𑀺. ‘‘𑀓𑀺𑀁 𑀆𑀦𑀦𑁆𑀤𑁄 𑀦𑀧𑁆𑀧𑀳𑁄𑀢𑀻’’𑀢𑀺? ‘‘𑀦𑁄 𑀦𑀧𑁆𑀧𑀳𑁄𑀢𑀺; 𑀅𑀧𑀺 𑀘 𑀔𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀭𑀫𑀸𑀦𑁄𑀬𑁂𑀯 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮). 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺. 𑀢𑀢𑁄 𑀣𑁂𑀭𑁄 𑀯𑀺𑀦𑀬𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺. 𑀉𑀧𑀸𑀮𑀺𑀢𑁆𑀣𑁂𑀭𑁄𑀧𑀺 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬 𑀲𑀫𑁆𑀫𑀦𑁆𑀦𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺.

‘‘𑀆𑀬𑀲𑁆𑀫𑀸𑀧𑀺 𑀉𑀧𑀸𑀮𑀺 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺, 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀢𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑀺 𑁋 ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 ¶ ? ‘‘𑀯𑁂𑀲𑀸𑀮𑀺𑀬𑀁, 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫𑁂’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀧𑀞𑀫𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺; 𑀬𑀣𑀸 𑀘 𑀧𑀞𑀫𑀲𑁆𑀲 𑀢𑀣𑀸 𑀤𑀼𑀢𑀺𑀬𑀲𑁆𑀲 𑀢𑀣𑀸 𑀢𑀢𑀺𑀬𑀲𑁆𑀲 𑀢𑀣𑀸 𑀘𑀢𑀼𑀢𑁆𑀣𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁄 ¶ 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑀁 𑀦𑀸𑀫 𑀇𑀤’’𑀦𑁆𑀢𑀺 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 ‘‘𑀢𑁂𑀭𑀲𑀓’’𑀦𑁆𑀢𑀺 𑀞𑀧𑁂𑀲𑀼𑀁. 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀅𑀦𑀺𑀬𑀢𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀢𑀺𑀁𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀤𑁆𑀯𑁂𑀦𑀯𑀼𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀧𑀜𑁆𑀘𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑁂𑀔𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢 𑀥𑀫𑁆𑀫𑁂 ‘‘𑀅𑀥𑀺𑀓𑀭𑀡𑀲𑀫𑀣𑀸’’𑀢𑀺 𑀞𑀧𑁂𑀲𑀼𑀁.

𑀏𑀯𑀁 ¶ 𑀫𑀳𑀸𑀯𑀺𑀪𑀗𑁆𑀕𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑀁 𑀦𑀸𑀫 𑀇𑀤’’𑀦𑁆𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑀢𑁆𑀢𑀭𑀲𑀓’’𑀦𑁆𑀢𑀺 𑀞𑀧𑁂𑀲𑀼𑀁. 𑀢𑀺𑀁𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀙𑀲𑀝𑁆𑀞𑀺𑀲𑀢𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀧𑀜𑁆𑀘𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑁂𑀔𑀺𑀬𑀸𑀦𑀻’’𑀢𑀺 𑀞𑀧𑁂𑀲𑀼𑀁. 𑀲𑀢𑁆𑀢 𑀥𑀫𑁆𑀫𑁂 ‘‘𑀅𑀥𑀺𑀓𑀭𑀡𑀲𑀫𑀣𑀸’’𑀢𑀺 ¶ 𑀞𑀧𑁂𑀲𑀼𑀁. 𑀏𑀯𑀁 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀁 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀧𑀺 𑀆𑀭𑁄𑀧𑁂𑀲𑀼𑀁. 𑀏𑀯𑀫𑁂𑀢𑀁 𑀲𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑀁 𑀯𑀺𑀦𑀬𑀧𑀺𑀝𑀓𑀁 𑀲𑀗𑁆𑀕𑀳𑀫𑀸𑀭𑀽𑀴𑁆𑀳𑀁 𑀲𑀩𑁆𑀩𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀼𑀘𑁆𑀙𑀺, 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑀬𑁂𑀦𑁂𑀯 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀼. 𑀯𑀺𑀦𑀬𑀲𑀗𑁆𑀕𑀳𑀸𑀯𑀲𑀸𑀦𑁂 𑀉𑀧𑀸𑀮𑀺𑀢𑁆𑀣𑁂𑀭𑁄 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑀸 𑀑𑀭𑁄𑀳𑀺𑀢𑁆𑀯𑀸 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺.

𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀓𑀸𑀫𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀥𑀫𑁆𑀫𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺 𑀓𑀁 𑀧𑀼𑀕𑁆𑀕𑀮𑀁 𑀥𑀼𑀭𑀁 𑀓𑀢𑁆𑀯𑀸 𑀥𑀫𑁆𑀫𑁄 𑀲𑀗𑁆𑀕𑀸𑀬𑀺𑀢𑀩𑁆𑀩𑁄’’𑀢𑀺? 𑀪𑀺𑀓𑁆𑀔𑀽 ‘‘𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀼𑀭𑀁 𑀓𑀢𑁆𑀯𑀸’’𑀢𑀺 𑀆𑀳𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀥𑀫𑁆𑀫𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 ¶ 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸. 𑀅𑀣 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺 𑁋 ‘‘𑀩𑁆𑀭𑀳𑁆𑀫𑀚𑀸𑀮𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀅𑀦𑁆𑀢𑀭𑀸 𑀘, 𑀪𑀦𑁆𑀢𑁂, 𑀭𑀸𑀚𑀕𑀳𑀁 ¶ 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀭𑀸𑀚𑀸𑀕𑀸𑀭𑀓𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁, 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯’’𑀦𑁆𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀯𑀡𑁆𑀡𑀸𑀯𑀡𑁆𑀡𑁂’’𑀢𑀺. 𑀅𑀣 𑀔𑁄 ¶ 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀜𑁆𑀜𑀨𑀮𑀁 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘𑀭𑀸𑀚𑀕𑀳𑁂, 𑀪𑀦𑁆𑀢𑁂, 𑀚𑀻𑀯𑀓𑀫𑁆𑀩𑀯𑀦𑁂’’𑀢𑀺. ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺? ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀸𑀫𑀜𑁆𑀜𑀨𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀜𑁆𑀘 𑀦𑀺𑀓𑀸𑀬𑁂 𑀧𑀼𑀘𑁆𑀙𑀺.

𑀧𑀜𑁆𑀘𑀦𑀺𑀓𑀸𑀬𑀸 𑀦𑀸𑀫 𑁋 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀦𑀸𑀫 𑁋 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁. 𑀢𑀢𑁆𑀣 𑀯𑀺𑀦𑀬𑁄 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀲𑁂𑀲𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀘𑀢𑁆𑀢𑀸𑀭𑁄 𑀘 𑀦𑀺𑀓𑀸𑀬𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁, 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁, 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁; 𑀢𑀣𑀸 𑀧𑀺𑀝𑀓𑀯𑀲𑁂𑀦, 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁, 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁, 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁? 𑀬𑀜𑁆𑀳𑀺 𑀪𑀕𑀯𑀢𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀬𑀸𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀬𑀓𑁆𑀔𑀸𑀤𑀬𑁄 𑀅𑀦𑀼𑀲𑀸𑀲𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀏𑀓𑀭𑀲𑀁 𑀯𑀺𑀫𑀼𑀢𑁆𑀢𑀺𑀭𑀲𑀫𑁂𑀯 𑀳𑁄𑀢𑀺. 𑀏𑀯𑀁 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁.

𑀓𑀣𑀁 ¶ 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀥𑀫𑁆𑀫𑁄 𑀘𑁂𑀯 𑀯𑀺𑀦𑀬𑁄 𑀘𑀸𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄, 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑁄; 𑀢𑁂𑀦𑁂𑀯𑀸𑀳 𑁋 ‘‘𑀬𑀁𑀦𑀽𑀦 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺. ‘‘𑀅𑀳𑀁 ¶ 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘 𑀏𑀯𑀁 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁.

𑀓𑀣𑀁 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁, 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁, 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀢𑀺𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 ¶ 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪);

𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁.

𑀓𑁂𑀘𑀺 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺 𑀔𑀦𑁆𑀥𑀓𑁂 𑀉𑀤𑀸𑀦𑀕𑀸𑀣𑀁 𑀆𑀳𑀼. 𑀏𑀲𑀸 𑀧𑀦 𑀧𑀸𑀝𑀺𑀧𑀤𑀤𑀺𑀯𑀲𑁂 𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑁂𑀦 𑀧𑀘𑁆𑀘𑀬𑀸𑀓𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀉𑀤𑀸𑀦𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀧𑀦 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀅𑀪𑀸𑀲𑀺 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁮) 𑀇𑀤𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁.

𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀬𑀁 𑀯𑀼𑀢𑁆𑀢𑀁 𑀏𑀢𑀁 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀦𑁆𑀢𑀺. 𑀏𑀯𑀁 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀢𑀺𑀯𑀺𑀥𑀁.

𑀓𑀣𑀁 ¶ 𑀧𑀺𑀝𑀓𑀯𑀲𑁂𑀦 𑀢𑀺𑀯𑀺𑀥𑀁? 𑀲𑀩𑁆𑀩𑀫𑁆𑀧𑀺 𑀳𑁂𑀢𑀁 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀺𑀧𑁆𑀧𑀪𑁂𑀤𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀻𑀢𑀜𑁆𑀘 𑀅𑀲𑀗𑁆𑀕𑀻𑀢𑀜𑁆𑀘 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺, 𑀤𑁆𑀯𑁂 𑀯𑀺𑀪𑀗𑁆𑀕𑀸𑀦𑀺, 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸𑀦𑀺, 𑀲𑁄𑀴𑀲𑀧𑀭𑀺𑀯𑀸𑀭𑀸𑀢𑀺 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫.

𑀩𑁆𑀭𑀳𑁆𑀫𑀚𑀸𑀮𑀸𑀤𑀺 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀤𑀻𑀖𑀦𑀺𑀓𑀸𑀬𑁄, 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀺 𑀤𑀺𑀬𑀟𑁆𑀠𑀲𑀢𑀤𑁆𑀯𑁂𑀲𑀼𑀢𑁆𑀢𑀲𑀗𑁆𑀕𑀳𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀺 𑀲𑀢𑁆𑀢𑀲𑀼𑀢𑁆𑀢𑀲𑀳𑀲𑁆𑀲 𑀲𑀢𑁆𑀢𑀲𑀢 𑀤𑁆𑀯𑀸𑀲𑀝𑁆𑀞𑀺𑀲𑀼𑀢𑁆𑀢𑀲𑀗𑁆𑀕𑀳𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀸𑀤𑀺 𑀦𑀯𑀲𑀼𑀢𑁆𑀢𑀲𑀳𑀲𑁆𑀲 𑀧𑀜𑁆𑀘𑀲𑀢 𑀲𑀢𑁆𑀢𑀧𑀜𑁆𑀜𑀸𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀧𑀸𑀞-𑀥𑀫𑁆𑀫𑀧𑀤-𑀉𑀤𑀸𑀦-𑀇𑀢𑀺𑀯𑀼𑀢𑁆𑀢𑀓-𑀲𑀼𑀢𑁆𑀢𑀦𑀺𑀧𑀸𑀢-𑀯𑀺𑀫𑀸𑀦𑀯𑀢𑁆𑀣𑀼-𑀧𑁂𑀢𑀯𑀢𑁆𑀣𑀼-𑀣𑁂𑀭𑀕𑀸𑀣𑀸-𑀣𑁂𑀭𑀻𑀕𑀸𑀣𑀸-𑀚𑀸𑀢𑀓𑀦𑀺𑀤𑁆𑀤𑁂𑀲-𑀧𑀝𑀺𑀲𑀫𑁆𑀪𑀺𑀤𑀸-𑀅𑀧𑀤𑀸𑀦-𑀩𑀼𑀤𑁆𑀥𑀯𑀁𑀲-𑀘𑀭𑀺𑀬𑀸𑀧𑀺𑀝𑀓𑀯𑀲𑁂𑀦 ¶ 𑀧𑀦𑁆𑀦𑀭𑀲𑀧𑁆𑀧𑀪𑁂𑀤𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀦𑀸𑀫.

𑀥𑀫𑁆𑀫𑀲𑀗𑁆𑀕𑀳𑁄, 𑀯𑀺𑀪𑀗𑁆𑀕𑁄, 𑀥𑀸𑀢𑀼𑀓𑀣𑀸, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺, 𑀓𑀣𑀸𑀯𑀢𑁆𑀣𑀼, 𑀬𑀫𑀓𑀁, 𑀧𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫. 𑀢𑀢𑁆𑀣 𑁋

𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸 ¶ , 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄.

𑀯𑀺𑀯𑀺𑀥𑀸 𑀳𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲 𑀧𑀸𑀭𑀸𑀚𑀺𑀓𑀸𑀤𑀺 𑀲𑀢𑁆𑀢𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀫𑀸𑀢𑀺𑀓𑀸 𑀯𑀺𑀪𑀗𑁆𑀕𑀸𑀤𑀺𑀧𑁆𑀧𑀪𑁂𑀤𑀸 𑀦𑀬𑀸, 𑀯𑀺𑀲𑁂𑀲𑀪𑀽𑀢𑀸 𑀘 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀦𑀬𑀸 ¶ , 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀚𑁆𑀛𑀸𑀘𑀸𑀭𑀦𑀺𑀲𑁂𑀥𑀦𑀢𑁄 𑀘𑁂𑀲 𑀓𑀸𑀬𑀁 𑀯𑀸𑀘𑀜𑁆𑀘 𑀯𑀺𑀦𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀦𑀬𑀢𑁆𑀢𑀸 𑀯𑀺𑀲𑁂𑀲𑀦𑀬𑀢𑁆𑀢𑀸 𑀓𑀸𑀬𑀯𑀸𑀘𑀸𑀦𑀜𑁆𑀘 𑀯𑀺𑀦𑀬𑀦𑀢𑁄 ‘‘𑀯𑀺𑀦𑀬𑁄’’𑀢𑀺 𑀅𑀓𑁆𑀔𑀸𑀢𑁄. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸, 𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁, 𑀯𑀺𑀦𑀬𑁄 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄’’𑀢𑀺.

𑀇𑀢𑀭𑀁 𑀧𑀦 𑁋

𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘, 𑀲𑀼𑀢𑁆𑀢𑀦𑁆𑀢𑀺 𑀅𑀓𑁆𑀔𑀸𑀢𑀁.

𑀢𑀜𑁆𑀳𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀲𑀽𑀘𑁂𑀢𑀺, 𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀯𑀢𑀺 𑀘𑁂𑀢𑀁 𑀅𑀢𑁆𑀣𑁂 𑀲𑀲𑁆𑀲𑀫𑀺𑀯 𑀨𑀮𑀁 𑀧𑀲𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀽𑀤𑀢𑀺 𑀘𑁂𑀢𑀁 𑀥𑁂𑀦𑀼𑀯𑀺𑀬 𑀔𑀻𑀭𑀁, 𑀧𑀕𑁆𑀖𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀢𑀲𑀪𑀸𑀕𑀜𑁆𑀘𑁂𑀢𑀁, 𑀬𑀣𑀸 𑀳𑀺 𑀢𑀘𑁆𑀙𑀓𑀸𑀦𑀁 𑀲𑀼𑀢𑁆𑀢𑀁 𑀧𑀫𑀸𑀡𑀁 𑀳𑁄𑀢𑀺; 𑀏𑀯𑀫𑁂𑀢𑀫𑁆𑀧𑀺 𑀯𑀺𑀜𑁆𑀜𑀽𑀦𑀁. 𑀬𑀣𑀸 𑀘 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀦 𑀯𑀺𑀤𑁆𑀥𑀁𑀲𑀺𑀬𑀦𑁆𑀢𑀺; 𑀏𑀯𑀫𑁂𑀢𑁂𑀦 𑀲𑀗𑁆𑀕𑀳𑀺𑀢𑀸 𑀅𑀢𑁆𑀣𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄, 𑀲𑀼𑀯𑀼𑀢𑁆𑀢𑀢𑁄 𑀲𑀯𑀦𑀢𑁄𑀣 𑀲𑀽𑀤𑀦𑀢𑁄;

𑀲𑀼𑀢𑁆𑀢𑀸𑀡𑀸 𑀲𑀼𑀢𑁆𑀢𑀲𑀪𑀸𑀕𑀢𑁄 𑀘, 𑀲𑀼𑀢𑁆𑀢𑀦𑁆𑀢𑀺 𑀅𑀓𑁆𑀔𑀸𑀢’’𑀦𑁆𑀢𑀺.

𑀇𑀢𑀭𑁄 ¶ ¶ 𑀧𑀦 𑁋

𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄.

𑀅𑀬𑀜𑁆𑀳𑀺 ¶ 𑀅𑀪𑀺𑀲𑀤𑁆𑀤𑁄 𑀯𑀼𑀟𑁆𑀠𑀺𑀮𑀓𑁆𑀔𑀡𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸𑀥𑀺𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑁂𑀲 𑁋 ‘‘𑀩𑀸𑀴𑁆𑀳𑀸 𑀫𑁂 𑀆𑀯𑀼𑀲𑁄 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁮𑁯; 𑀲𑀁. 𑀦𑀺. 𑁫.𑁧𑁯𑁫) 𑀯𑀼𑀟𑁆𑀠𑀺𑀬𑀁 𑀆𑀕𑀢𑁄. ‘‘𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁯) 𑀮𑀓𑁆𑀔𑀡𑁂. ‘‘𑀭𑀸𑀚𑀸𑀪𑀺𑀭𑀸𑀚𑀸 𑀫𑀦𑀼𑀚𑀺𑀦𑁆𑀤𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁮) 𑀧𑀽𑀚𑀺𑀢𑁂. ‘‘𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁮𑁫) 𑀧𑀭𑀺𑀘𑁆𑀙𑀺𑀦𑁆𑀦𑁂. 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀲𑀼 (𑀯𑀺. 𑀯. 𑁭𑁫) 𑀅𑀥𑀺𑀓𑁂.

𑀏𑀢𑁆𑀣 𑀘 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬𑁦 𑀆𑀤𑀬𑁄) 𑀦𑀬𑁂𑀦 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀸𑀤𑀻𑀳𑀺 𑀮𑀓𑁆𑀔𑀡𑀻𑀬𑀢𑁆𑀢𑀸 𑀲𑀮𑀓𑁆𑀔𑀡𑀸𑀧𑀺. ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀽𑀚𑀺𑀢𑀸𑀧𑀺 𑀧𑀽𑀚𑀸𑀭𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀧𑀺. ‘‘𑀫𑀳𑀕𑁆𑀕𑀢𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸, 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀓𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀢𑀫𑁂𑀢𑀲𑁆𑀲 𑀯𑀘𑀦𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀯𑀼𑀢𑁆𑀢𑀁 𑁋

‘‘𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄’’𑀢𑀺.

𑀬𑀁 𑀧𑀦𑁂𑀢𑁆𑀣 𑀅𑀯𑀺𑀲𑀺𑀝𑁆𑀞𑀁, 𑀢𑀁 𑁋

𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽, 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼;

𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸, 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀧𑀭𑀺𑀬𑀢𑁆𑀢𑀺𑀧𑀺 ¶ ¶ 𑀳𑀺 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀧𑀺𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓𑀁 𑀆𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁮; 𑀅. 𑀦𑀺. 𑁩.𑁭𑁦) 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀫𑁆𑀧𑀺. 𑀢𑀲𑁆𑀫𑀸 𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽, 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼.

𑀇𑀤𑀸𑀦𑀺 𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸𑀢𑀺. 𑀢𑁂𑀦 𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦 𑀧𑀺𑀝𑀓𑀲𑀤𑁆𑀤𑁂𑀦 𑀲𑀳 ¶ 𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀦𑀬𑁄 𑀘 𑀲𑁄 𑀧𑀺𑀝𑀓𑀜𑁆𑀘 𑀧𑀭𑀺𑀬𑀢𑁆𑀢𑀺𑀪𑀸𑀯𑀢𑁄 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀪𑀸𑀚𑀦𑀢𑁄 𑀘𑀸𑀢𑀺 𑀯𑀺𑀦𑀬𑀧𑀺𑀝𑀓𑀁, 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀲𑀼𑀢𑁆𑀢𑀦𑁆𑀢𑀜𑁆𑀘 𑀢𑀁 𑀧𑀺𑀝𑀓𑀜𑁆𑀘𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀅𑀪𑀺𑀥𑀫𑁆𑀫𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀏𑀯𑀫𑁂𑀢𑁂 𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸.

𑀏𑀯𑀁 𑀜𑀢𑁆𑀯𑀸 𑀘 𑀧𑀼𑀦𑀧𑀺 𑀢𑁂𑀲𑁆𑀯𑁂𑀯 𑀧𑀺𑀝𑀓𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑁋

𑀤𑁂𑀲𑀦𑀸𑀲𑀸𑀲𑀦𑀓𑀣𑀸, 𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭, 𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂.

𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀁 𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂.

𑀢𑀢𑁆𑀭𑀸𑀬𑀁 𑀧𑀭𑀺𑀤𑀻𑀧𑀦𑀸 𑀯𑀺𑀪𑀸𑀯𑀦𑀸 𑀘, 𑀏𑀢𑀸𑀦𑀺 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀬𑀣𑀸𑀓𑁆𑀓𑀫𑀁 𑀆𑀡𑀸 𑀯𑁄𑀳𑀸𑀭 𑀧𑀭𑀫𑀢𑁆𑀣𑀤𑁂𑀲𑀦𑀸 𑀬𑀣𑀸𑀧𑀭𑀸𑀥-𑀬𑀣𑀸𑀦𑀼𑀮𑁄𑀫-𑀬𑀣𑀸𑀥𑀫𑁆𑀫𑀲𑀸𑀲𑀦𑀸𑀦𑀺, 𑀲𑀁𑀯𑀭𑀸𑀲𑀁𑀯𑀭𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑀏𑀢𑁆𑀣 𑀳𑀺 𑀯𑀺𑀦𑀬𑀧𑀺𑀝𑀓𑀁 𑀆𑀡𑀸𑀭𑀳𑁂𑀦 𑀪𑀕𑀯𑀢𑀸 𑀆𑀡𑀸𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀆𑀡𑀸𑀤𑁂𑀲𑀦𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀯𑁄𑀳𑀸𑀭𑀓𑀼𑀲𑀮𑁂𑀦 𑀪𑀕𑀯𑀢𑀸 𑀯𑁄𑀳𑀸𑀭𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀯𑁄𑀳𑀸𑀭𑀤𑁂𑀲𑀦𑀸, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀫𑀢𑁆𑀣𑀓𑀼𑀲𑀮𑁂𑀦 𑀪𑀕𑀯𑀢𑀸 𑀧𑀭𑀫𑀢𑁆𑀣𑀩𑀸𑀳𑀼𑀮𑁆𑀮𑀢𑁄 𑀤𑁂𑀲𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀤𑁂𑀲𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 ¶ 𑀧𑀞𑀫𑀁 𑀬𑁂 𑀢𑁂 𑀧𑀘𑀼𑀭𑀸𑀧𑀭𑀸𑀥𑀸 𑀲𑀢𑁆𑀢𑀸 𑀢𑁂 𑀬𑀣𑀸𑀧𑀭𑀸𑀥𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀧𑀭𑀸𑀥𑀲𑀸𑀲𑀦𑀁, 𑀤𑀼𑀢𑀺𑀬𑀁 𑀅𑀦𑁂𑀓𑀚𑁆𑀛𑀸𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀬𑀣𑀸𑀦𑀼𑀮𑁄𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀁, 𑀢𑀢𑀺𑀬𑀁 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 ‘‘𑀅𑀳𑀁 𑀫𑀫𑀸’’𑀢𑀺 𑀲𑀜𑁆𑀜𑀺𑀦𑁄 𑀲𑀢𑁆𑀢𑀸 𑀬𑀣𑀸𑀥𑀫𑁆𑀫𑀁 𑀏𑀢𑁆𑀣 𑀲𑀸𑀲𑀺𑀢𑀸𑀢𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀣𑀸 ¶ 𑀧𑀞𑀫𑀁 𑀅𑀚𑁆𑀛𑀸𑀘𑀸𑀭𑀧𑀝𑀺𑀧𑀓𑁆𑀔𑀪𑀽𑀢𑁄 𑀲𑀁𑀯𑀭𑀸𑀲𑀁𑀯𑀭𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀲𑀁𑀯𑀭𑀸𑀲𑀁𑀯𑀭𑀓𑀣𑀸, 𑀤𑀼𑀢𑀺𑀬𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸 𑀏𑀢𑁆𑀣 𑀓𑀣𑀺𑀢𑀸𑀢𑀺 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸, 𑀢𑀢𑀺𑀬𑀁 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀏𑀢𑁆𑀣 𑀓𑀣𑀺𑀢𑁄𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀯𑀼𑀘𑁆𑀘𑀢𑀺.

𑀢𑀻𑀲𑀼𑀧𑀺 𑀘 𑀘𑁂𑀢𑁂𑀲𑀼 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸, 𑀢𑀻𑀡𑀺 𑀧𑀳𑀸𑀦𑀸𑀦𑀺, 𑀘𑀢𑀼𑀩𑁆𑀩𑀺𑀥𑁄 𑀘 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀢𑀣𑀸 𑀳𑀺 𑁋 𑀯𑀺𑀦𑀬𑀧𑀺𑀝𑀓𑁂 𑀯𑀺𑀲𑁂𑀲𑁂𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀯𑀺𑀦𑀬𑀧𑀺𑀝𑀓𑁂 𑀘 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲. 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁, 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀸𑀥𑀺𑀲𑁆𑀲. 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬.

𑀧𑀞𑀫𑁂 𑀘 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀇𑀢𑀭𑁂𑀲𑀼 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀸𑀦𑀺. 𑀧𑀞𑀫𑁂 𑀘 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁, 𑀇𑀢𑀭𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀦𑀁.

𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀧𑀸𑀴𑀺. 𑀅𑀢𑁆𑀣𑁄𑀢𑀺 𑀢𑀲𑁆𑀲𑀸𑀬𑁂𑀯𑀢𑁆𑀣𑁄. 𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀫𑀦𑀲𑀸𑀯𑀯𑀢𑁆𑀣𑀸𑀧𑀺𑀢𑀸𑀬 𑀧𑀸𑀴𑀺𑀬𑀸 𑀤𑁂𑀲𑀦𑀸. 𑀧𑀝𑀺𑀯𑁂𑀥𑁄𑀢𑀺 𑀧𑀸𑀴𑀺𑀬𑀸 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸 ¶ 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀏𑀯𑀁 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀥𑀫𑁆𑀫𑁄𑀢𑀺 𑀳𑁂𑀢𑀼. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺. 𑀅𑀢𑁆𑀣𑁄𑀢𑀺 𑀳𑁂𑀢𑀼𑀨𑀮𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺. 𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀯𑁂𑀥𑁄𑀢𑀺 𑀅𑀪𑀺𑀲𑀫𑀬𑁄, 𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀯𑀺𑀲𑀬𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀼 𑀬𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀯𑀸 𑀅𑀢𑁆𑀣𑀚𑀸𑀢𑀁 𑀯𑀸, 𑀬𑀸 𑀘𑀸𑀬𑀁 𑀬𑀣𑀸 𑀬𑀣𑀸 𑀜𑀸𑀧𑁂𑀢𑀩𑁆𑀩𑁄 𑀅𑀢𑁆𑀣𑁄 𑀲𑁄𑀢𑀽𑀦𑀁 𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀢𑀤𑀢𑁆𑀣𑀚𑁄𑀢𑀺𑀓𑀸 𑀤𑁂𑀲𑀦𑀸, 𑀬𑁄 𑀘𑁂𑀢𑁆𑀣 ¶ 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀲𑀗𑁆𑀔𑀸𑀢𑁄 𑀧𑀝𑀺𑀯𑁂𑀥𑁄 𑀲𑀩𑁆𑀩𑀫𑁂𑀢𑀁 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀧𑁆𑀧𑀜𑁆𑀜𑁂𑀳𑀺 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀤𑀼𑀓𑁆𑀔𑁄𑀕𑀸𑀳𑀁 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀜𑁆𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀁. 𑀏𑀯𑀫𑁆𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄𑀧𑀺 𑀕𑀫𑁆𑀪𑀻𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀤𑁂𑀲𑀦𑀸-𑀲𑀸𑀲𑀦𑀓𑀣𑀸 ¶ , 𑀪𑁂𑀤𑀁 𑀢𑁂𑀲𑀼 𑀬𑀣𑀸𑀭𑀳𑀁;

𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀜𑁆𑀘 𑀧𑀭𑀺𑀤𑀻𑀧𑀬𑁂’’𑀢𑀺.

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺.

‘‘𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂’’𑀢𑀺.

𑀏𑀢𑁆𑀣 𑀧𑀦 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀢𑀺𑀯𑀺𑀥𑁄 𑀧𑀭𑀺𑀬𑀢𑁆𑀢𑀺𑀪𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀲𑁆𑀲𑁄 𑀳𑀺 𑀧𑀭𑀺𑀬𑀢𑁆𑀢𑀺𑀬𑁄 𑁋 𑀅𑀮𑀕𑀤𑁆𑀤𑀽𑀧𑀫𑀸, 𑀦𑀺𑀲𑁆𑀲𑀭𑀡𑀢𑁆𑀣𑀸, 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺.

𑀢𑀢𑁆𑀣 𑀬𑀸 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸, 𑀅𑀬𑀁 𑀅𑀮𑀕𑀤𑁆𑀤𑀽𑀧𑀫𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁. 𑀢𑀫𑁂𑀦𑀁 𑀪𑁄𑀕𑁂 𑀯𑀸 𑀦𑀗𑁆𑀕𑀼𑀝𑁆𑀞𑁂 𑀯𑀸 𑀕𑀡𑁆𑀳𑁂𑀬𑁆𑀬. 𑀢𑀲𑁆𑀲 𑀲𑁄 𑀅𑀮𑀕𑀤𑁆𑀤𑁄 𑀧𑀝𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂 𑀟𑀁𑀲𑁂𑀬𑁆𑀬. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀁. 𑀢𑁂 𑀢𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀢𑀁 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺. 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘. 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁮).

𑀬𑀸 ¶ ¶ 𑀧𑀦 𑀲𑀼𑀕𑁆𑀕𑀳𑀺𑀢𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀧𑀽𑀭𑀺𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑁂𑀦 𑀧𑀭𑀺𑀬𑀸𑀧𑀼𑀝𑀸 𑀦 𑀉𑀧𑀸𑀭𑀫𑁆𑀪𑀸𑀤𑀺 𑀳𑁂𑀢𑀼, 𑀅𑀬𑀁 𑀦𑀺𑀲𑁆𑀲𑀭𑀡𑀢𑁆𑀣𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀼𑀕𑁆𑀕𑀳𑀺𑀢𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁯).

𑀬𑀁 𑀧𑀦 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄 𑀧𑀳𑀻𑀦𑀓𑀺𑀮𑁂𑀲𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄 ¶ 𑀓𑁂𑀯𑀮𑀁 𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬 𑀯𑀁𑀲𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀬𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀅𑀬𑀢𑁆𑀢𑀻𑀢𑀺.

𑀯𑀺𑀦𑀬𑁂 𑀧𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀲𑀼𑀢𑁆𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀙 𑀅𑀪𑀺𑀜𑁆𑀜𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄. 𑀅𑀪𑀺𑀥𑀫𑁆𑀫𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀜𑁆𑀘 𑀢𑀢𑁆𑀣𑁂𑀯 𑀧𑀪𑁂𑀤𑀯𑀘𑀦𑀢𑁄. 𑀏𑀯𑀫𑁂𑀢𑁂𑀲𑀼 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀯𑀺𑀚𑁆𑀚𑀸𑀢𑁆𑀢𑀬𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺.

𑀯𑀺𑀦𑀬𑁂 𑀧𑀦 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀜𑁆𑀜𑀸𑀢𑀲𑀼𑀔𑀲𑀫𑁆𑀨𑀲𑁆𑀲𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀨𑀲𑁆𑀲𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑀸𑀤𑀻𑀲𑀼 𑀅𑀦𑀯𑀚𑁆𑀚𑀲𑀜𑁆𑀜𑀻 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁪) 𑀢𑀢𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀲𑀼𑀢𑁆𑀢𑁂 ¶ 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫) 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁬) 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀥𑀫𑁆𑀫𑀘𑀺𑀦𑁆𑀢𑀁 𑀅𑀢𑀺𑀥𑀸𑀯𑀦𑁆𑀢𑁄 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀘𑀺𑀦𑁆𑀢𑁂𑀢𑀺, 𑀢𑀢𑁄 𑀘𑀺𑀢𑁆𑀢𑀓𑁆𑀔𑁂𑀧𑀁 𑀧𑀸𑀧𑀼𑀡𑀸𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀏𑀯𑀫𑁂𑀢𑁂𑀲𑀼 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀬𑀣𑀸𑀓𑁆𑀓𑀫𑁂𑀦 𑀇𑀫𑀁 𑀤𑀼𑀲𑁆𑀲𑀻𑀮𑀪𑀸𑀯𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑀸 𑀘𑀺𑀢𑁆𑀢𑀓𑁆𑀔𑁂𑀧𑀪𑁂𑀤𑀁 𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀁 𑀘𑀸𑀧𑀺 𑀬𑀁 𑀬𑀳𑀺𑀁;

𑀧𑀸𑀧𑀼𑀡𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂’’𑀢𑀺.

𑀅𑀬𑀫𑁆𑀧𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀺𑀝𑀓𑀸𑀦𑀺 𑀜𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦𑁂𑀢𑀁 𑀩𑀼𑀤𑁆𑀥𑀯𑀘𑀦𑀁 𑀢𑀺𑀯𑀺𑀥𑀦𑁆𑀢𑀺 𑀜𑀸𑀢𑀩𑁆𑀩𑀁.

𑀓𑀣𑀁 ¶ 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀤𑀻𑀖𑀦𑀺𑀓𑀸𑀬𑁄, 𑀫𑀚𑁆𑀛𑀺𑀫𑀦𑀺𑀓𑀸𑀬𑁄, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄, 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄, 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀓𑀢𑀫𑁄 𑀤𑀻𑀖𑀦𑀺𑀓𑀸𑀬𑁄? 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺.

𑀘𑀢𑀼𑀢𑁆𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀢𑀺𑀯𑀕𑁆𑀕𑁄 𑀬𑀲𑁆𑀲 𑀲𑀗𑁆𑀕𑀳𑁄;

𑀏𑀲 𑀤𑀻𑀖𑀦𑀺𑀓𑀸𑀬𑁄𑀢𑀺, 𑀧𑀞𑀫𑁄 𑀅𑀦𑀼𑀮𑁄𑀫𑀺𑀓𑁄.

𑀓𑀲𑁆𑀫𑀸 𑀧𑀦𑁂𑀲 𑀤𑀻𑀖𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺? 𑀤𑀻𑀖𑀧𑁆𑀧𑀫𑀸𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀲𑀫𑀽𑀳𑀢𑁄 𑀦𑀺𑀯𑀸𑀲𑀢𑁄 𑀘, 𑀲𑀫𑀽𑀳𑀦𑀺𑀯𑀸𑀲𑀸 𑀳𑀺 𑀦𑀺𑀓𑀸𑀬𑁄𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁; 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸; 𑀧𑁄𑀡𑀺𑀓𑀦𑀺𑀓𑀸𑀬𑁄, 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄’’𑀢𑀺 (𑀲𑀁. 𑀦𑀺. 𑁩.𑁧𑁦𑁦) 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺 𑀲𑀸𑀲𑀦𑀢𑁄 𑀘 𑀮𑁄𑀓𑀢𑁄 𑀘. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀦𑀺𑀓𑀸𑀬𑀪𑀸𑀯𑁂 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄? 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀸𑀦𑀺 𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀺 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀻𑀦𑀺 𑀤𑀺𑀬𑀟𑁆𑀠𑀲𑀢𑀁 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺.

𑀤𑀺𑀬𑀟𑁆𑀠𑀲𑀢𑀁 𑀲𑀼𑀢𑁆𑀢𑀦𑁆𑀢𑀸, 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀺 𑀬𑀢𑁆𑀣 𑀲𑁄;

𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑁄 𑀧𑀜𑁆𑀘-𑀤𑀲𑀯𑀕𑁆𑀕𑀧𑀭𑀺𑀕𑁆𑀕𑀳𑁄.

𑀓𑀢𑀫𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄? 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀺𑀢𑀸𑀦𑀺 𑀑𑀖𑀢𑀭𑀡𑀸𑀤𑀻𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀲𑀼𑀢𑁆𑀢𑀲𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀘 𑀲𑀼𑀢𑁆𑀢𑀸𑀦𑀺.

𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀤𑁆𑀯𑀸𑀲𑀝𑁆𑀞𑀺 𑀘𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀏𑀲𑁄 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄.

𑀓𑀢𑀫𑁄 ¶ 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄? 𑀏𑀓𑁂𑀓𑀅𑀗𑁆𑀕𑀸𑀢𑀺𑀭𑁂𑀓𑀯𑀲𑁂𑀦 𑀞𑀺𑀢𑀸𑀦𑀺 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀸𑀤𑀻𑀦𑀺 𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀲𑀢𑁆𑀢𑀧𑀜𑁆𑀜𑀸𑀲𑀜𑁆𑀘 𑀲𑀼𑀢𑁆𑀢𑀸𑀦𑀺.

𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀲𑀢𑁆𑀢𑀧𑀜𑁆𑀜𑀸𑀲 𑀲𑀼𑀢𑁆𑀢𑀸𑀦𑀺, 𑀲𑀗𑁆𑀔𑁆𑀬𑀸 𑀅𑀗𑁆𑀕𑀼𑀢𑁆𑀢𑀭𑁂 𑀅𑀬𑀁.

𑀓𑀢𑀫𑁄 ¶ 𑀔𑀼𑀤𑁆𑀤𑀓𑀦𑀺𑀓𑀸𑀬𑁄? 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀔𑀼𑀤𑁆𑀤𑀓𑀧𑀸𑀞𑀸𑀤𑀬𑁄 𑀘 𑀧𑀼𑀩𑁆𑀩𑁂 𑀦𑀺𑀤𑀲𑁆𑀲𑀺𑀢𑀸 𑀧𑀦𑁆𑀦𑀭𑀲𑀪𑁂𑀤𑀸 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺.

𑀞𑀧𑁂𑀢𑁆𑀯𑀸 ¶ 𑀘𑀢𑀼𑀭𑁄𑀧𑁂𑀢𑁂, 𑀦𑀺𑀓𑀸𑀬𑁂 𑀤𑀻𑀖𑀆𑀤𑀺𑀓𑁂;

𑀢𑀤𑀜𑁆𑀜𑀁 𑀩𑀼𑀤𑁆𑀥𑀯𑀘𑀦𑀁, 𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑁄 𑀫𑀢𑁄𑀢𑀺.

𑀏𑀯𑀁 𑀦𑀺𑀓𑀸𑀬𑀯𑀲𑁂𑀦 𑀧𑀜𑁆𑀘𑀯𑀺𑀥𑀁.

𑀓𑀣𑀁 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀳𑀺𑀤𑀁 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀫𑀗𑁆𑀕𑀮𑀲𑀼𑀢𑁆𑀢-𑀭𑀢𑀦𑀲𑀼𑀢𑁆𑀢-𑀦𑀸𑀮𑀓𑀲𑀼𑀢𑁆𑀢-𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀺 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄, 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀁, 𑀣𑁂𑀭𑀕𑀸𑀣𑀸, 𑀣𑁂𑀭𑀻𑀕𑀸𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑀸𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺 (𑀤𑀻. 𑀦𑀺. 𑁨.𑁨𑁦𑁯) -𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀽𑀴𑀯𑁂𑀤𑀮𑁆𑀮-𑀫𑀳𑀸𑀯𑁂𑀤𑀮𑁆𑀮-𑀲𑀫𑁆𑀫𑀸𑀤𑀺𑀝𑁆𑀞𑀺-𑀲𑀓𑁆𑀓𑀧𑀜𑁆𑀳-𑀲𑀗𑁆𑀔𑀸𑀭𑀪𑀸𑀚𑀦𑀺𑀬-𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 ¶ 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀗𑁆𑀕𑀯𑀲𑁂𑀦 𑀦𑀯𑀯𑀺𑀥𑀁.

𑀓𑀣𑀁 ¶ 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀁? 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀩𑀼𑀤𑁆𑀥𑀯𑀘𑀦𑀁 𑁋

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭);

𑀏𑀯𑀁 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀬𑀁 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀁 𑀢𑀢𑁆𑀣 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀕𑀡𑀦𑀸. 𑀕𑀸𑀣𑀸𑀩𑀦𑁆𑀥𑁂𑀲𑀼 𑀧𑀜𑁆𑀳𑀸𑀧𑀼𑀘𑁆𑀙𑀦𑀁 ¶ 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄, 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑁄. 𑀅𑀪𑀺𑀥𑀫𑁆𑀫𑁂 𑀏𑀓𑀫𑁂𑀓𑀁 𑀢𑀺𑀓-𑀤𑀼𑀓-𑀪𑀸𑀚𑀦𑀁, 𑀏𑀓𑀫𑁂𑀓𑀜𑁆𑀘 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀁, 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀯𑀺𑀦𑀬𑁂 𑀅𑀢𑁆𑀣𑀺 𑀯𑀢𑁆𑀣𑀼, 𑀅𑀢𑁆𑀣𑀺 𑀫𑀸𑀢𑀺𑀓𑀸, 𑀅𑀢𑁆𑀣𑀺 𑀧𑀤𑀪𑀸𑀚𑀦𑀻𑀬𑀁, 𑀅𑀢𑁆𑀣𑀺 𑀅𑀦𑁆𑀢𑀭𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀆𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀦𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀧𑀭𑀺𑀘𑁆𑀙𑁂𑀤𑁄; 𑀢𑀢𑁆𑀣 𑀏𑀓𑀫𑁂𑀓𑁄 𑀓𑁄𑀝𑁆𑀞𑀸𑀲𑁄, 𑀏𑀓𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀯𑀺𑀥𑀁.

𑀏𑀯𑀫𑁂𑀢𑀁 𑀅𑀪𑁂𑀤𑀢𑁄 𑀭𑀲𑀯𑀲𑁂𑀦 𑀏𑀓𑀯𑀺𑀥𑀁, 𑀪𑁂𑀤𑀢𑁄 𑀥𑀫𑁆𑀫𑀯𑀺𑀦𑀬𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑀸𑀤𑀺𑀪𑁂𑀤𑀁 𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀦 𑀯𑀲𑀻𑀕𑀡𑁂𑀦 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄; 𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀁; 𑀇𑀤𑀁 𑀯𑀺𑀦𑀬𑀧𑀺𑀝𑀓𑀁, 𑀇𑀤𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁; 𑀅𑀬𑀁 𑀤𑀻𑀖𑀦𑀺𑀓𑀸𑀬𑁄…𑀧𑁂… 𑀅𑀬𑀁 𑀔𑀼𑀤𑁆𑀤𑀓𑀦𑀺𑀓𑀸𑀬𑁄; 𑀇𑀫𑀸𑀦𑀺 𑀲𑀼𑀢𑁆𑀢𑀸𑀤𑀻𑀦𑀺 𑀦𑀯𑀗𑁆𑀕𑀸𑀦𑀺, 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀫𑀁 𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀯 𑀲𑀗𑁆𑀕𑀻𑀢𑀁. 𑀦 ¶ 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀉𑀤𑁆𑀤𑀸𑀦𑀲𑀗𑁆𑀕𑀳-𑀯𑀕𑁆𑀕𑀲𑀗𑁆𑀕𑀳𑀧𑁂𑀬𑁆𑀬𑀸𑀮𑀲𑀗𑁆𑀕𑀳-𑀏𑀓𑀓𑀦𑀺𑀧𑀸𑀢-𑀤𑀼𑀓𑀦𑀺𑀧𑀸𑀢𑀸𑀤𑀺𑀦𑀺𑀧𑀸𑀢𑀲𑀗𑁆𑀕𑀳-𑀲𑀁𑀬𑀼𑀢𑁆𑀢𑀲𑀗𑁆𑀕𑀳-𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀺𑀅𑀦𑁂𑀓𑀯𑀺𑀥𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀁 𑀲𑀗𑁆𑀕𑀳𑀧𑁆𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀏𑀯 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀲𑀗𑁆𑀕𑀻𑀢𑀁. 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲 𑁋 ‘‘𑀇𑀤𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀓𑀸𑀮𑀁 𑀧𑀯𑀢𑁆𑀢𑀦𑀲𑀫𑀢𑁆𑀣𑀁 𑀓𑀢’’𑀦𑁆𑀢𑀺 𑀲𑀜𑁆𑀚𑀸𑀢𑀧𑁆𑀧𑀫𑁄𑀤𑀸 𑀲𑀸𑀥𑀼𑀓𑀸𑀭𑀁 𑀯𑀺𑀬 𑀤𑀤𑀫𑀸𑀦𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀫𑁆𑀧𑀺 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺, 𑀅𑀦𑁂𑀓𑀸𑀦𑀺 𑀘 𑀅𑀘𑁆𑀙𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀅𑀬𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀦𑀸𑀫. 𑀬𑀸 𑀮𑁄𑀓𑁂 𑁋

𑀲𑀢𑁂𑀳𑀺 𑀧𑀜𑁆𑀘𑀳𑀺 𑀓𑀢𑀸, 𑀢𑁂𑀦 𑀧𑀜𑁆𑀘𑀲𑀢𑀸𑀢𑀺 𑀘;

𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀘, 𑀣𑁂𑀭𑀺𑀓𑀸𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀇𑀫𑀺𑀲𑁆𑀲𑀸 ¶ 𑀧𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬 𑀯𑀺𑀦𑀬𑀁 𑀧𑀼𑀘𑁆𑀙𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀘𑀦𑀧𑀭𑀺𑀬𑁄𑀲𑀸𑀦𑁂 ‘‘𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺 𑀏𑀢𑁆𑀣 𑀦𑀺𑀤𑀸𑀦𑁂 𑀧𑀼𑀘𑁆𑀙𑀺𑀢𑁂 𑀢𑀁 𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀬𑁂𑀦 𑀘 𑀧𑀜𑁆𑀜𑀢𑁆𑀢𑀁, 𑀬𑀲𑁆𑀫𑀸 𑀘 𑀧𑀜𑁆𑀜𑀢𑁆𑀢𑀁, 𑀲𑀩𑁆𑀩𑀫𑁂𑀢𑀁 𑀓𑀣𑁂𑀢𑀼𑀓𑀸𑀫𑁂𑀦 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 ¶ 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀫𑀺𑀤𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀧𑀦 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 ‘‘𑀇𑀤𑀁 𑀯𑀘𑀦𑀁 𑀓𑁂𑀦 𑀯𑀼𑀢𑁆𑀢𑀁, 𑀓𑀤𑀸 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 ¶ 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀼𑀘𑁆𑀘𑀢𑁂, 𑀬𑀲𑁆𑀫𑀸 𑀅𑀬𑀫𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀦𑀺𑀤𑀸𑀦𑀁 𑀧𑀼𑀝𑁆𑀞𑁄 𑀢𑀲𑁆𑀫𑀸𑀦𑁂𑀦 𑀢𑀁 𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑀺𑀤𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀤𑀦𑁆𑀢𑁂𑀦𑀸𑀧𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸𑀢𑀺 𑀇𑀫𑁂𑀲𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁, 𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀁 𑀘𑁂𑀢𑀫𑁂𑀢𑀁 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄𑀢𑀺 𑀏𑀢𑁂𑀲𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀇𑀤𑀁 𑀯𑀼𑀘𑁆𑀘𑀢𑀺. 𑀢𑀁 𑀧𑀦𑁂𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀧𑀝𑀺𑀫𑀡𑁆𑀟𑀺𑀢𑀦𑀺𑀤𑀸𑀦𑀁 𑀯𑀺𑀦𑀬𑀧𑀺𑀝𑀓𑀁 𑀓𑁂𑀦 𑀥𑀸𑀭𑀺𑀢𑀁, 𑀓𑁂𑀦𑀸𑀪𑀢𑀁, 𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀆𑀤𑀺𑀢𑁄 𑀢𑀸𑀯 𑀇𑀤𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀥𑀸𑀭𑀺𑀢𑀁, 𑀢𑀲𑁆𑀲 𑀲𑀫𑁆𑀫𑀼𑀔𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀙𑀴𑀪𑀺𑀜𑁆𑀜𑀸𑀤𑀺𑀪𑁂𑀤𑁂𑀳𑀺 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺. 𑀓𑁂𑀦𑀸𑀪𑀢𑀦𑁆𑀢𑀺? 𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑀫𑀸𑀤𑀺𑀁 𑀓𑀢𑁆𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀁. 𑀢𑀢𑁆𑀭𑀸𑀬𑀁 ¶ 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑁋

𑀉𑀧𑀸𑀮𑀺 𑀤𑀸𑀲𑀓𑁄 𑀘𑁂𑀯, 𑀲𑁄𑀡𑀓𑁄 𑀲𑀺𑀕𑁆𑀕𑀯𑁄 𑀢𑀣𑀸;

𑀢𑀺𑀲𑁆𑀲𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀘, 𑀧𑀜𑁆𑀘𑁂𑀢𑁂 𑀯𑀺𑀚𑀺𑀢𑀸𑀯𑀺𑀦𑁄.

𑀧𑀭𑀫𑁆𑀧𑀭𑀸𑀬 𑀯𑀺𑀦𑀬𑀁, 𑀤𑀻𑀧𑁂 𑀚𑀫𑁆𑀩𑀼𑀲𑀺𑀭𑀺𑀯𑁆𑀳𑀬𑁂;

𑀅𑀘𑁆𑀙𑀺𑀚𑁆𑀚𑀫𑀸𑀦𑀫𑀸𑀦𑁂𑀲𑀼𑀁, 𑀢𑀢𑀺𑀬𑁄 𑀬𑀸𑀯 𑀲𑀗𑁆𑀕𑀳𑁄.

𑀆𑀬𑀲𑁆𑀫𑀸 ¶ 𑀳𑀺 𑀉𑀧𑀸𑀮𑀺 𑀇𑀫𑀁 𑀯𑀺𑀦𑀬𑀯𑀁𑀲𑀁 𑀯𑀺𑀦𑀬𑀢𑀦𑁆𑀢𑀺𑀁 𑀯𑀺𑀦𑀬𑀧𑀯𑁂𑀡𑀺𑀁 𑀪𑀕𑀯𑀢𑁄

𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲 𑀳𑀸𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀯𑀺𑀦𑀬𑀯𑀁𑀲𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀦𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀓𑀁 𑀅𑀳𑁄𑀲𑀺. 𑀤𑀸𑀲𑀓𑀢𑁆𑀣𑁂𑀭𑁄𑀧𑀺 𑀢𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀺𑀦𑀬𑀁 𑀯𑀸𑀘𑁂𑀲𑀺. 𑀢𑀲𑁆𑀲𑀸𑀧𑀺 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀯 𑀅𑀳𑁄𑀲𑀺. 𑀲𑁄𑀡𑀓𑀢𑁆𑀣𑁂𑀭𑁄𑀧𑀺 𑀤𑀸𑀲𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄𑀧𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀸𑀲𑀓𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀉𑀕𑁆𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀺𑀦𑀬𑀁 𑀯𑀸𑀘𑁂𑀲𑀺. 𑀢𑀲𑁆𑀲𑀸𑀧𑀺 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀔𑀻𑀡𑀸𑀲𑀯𑀸𑀦𑀁 𑀲𑀳𑀲𑁆𑀲𑀫𑁂𑀯 𑀅𑀳𑁄𑀲𑀺. 𑀲𑀺𑀕𑁆𑀕𑀯𑀢𑁆𑀣𑁂𑀭𑁄𑀧𑀺 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺, 𑀲𑁄𑀧𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 ¶ 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀦𑁆𑀢𑀲𑀳𑀲𑁆𑀲𑀲𑁆𑀲 𑀥𑀼𑀭𑀕𑁆𑀕𑀸𑀳𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦𑀸𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀁 𑀧𑀢𑁆𑀢𑀸 𑀧𑀼𑀣𑀼𑀚𑁆𑀚𑀦-𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀦𑁄𑀧𑀺 𑀔𑀻𑀡𑀸𑀲𑀯𑀸𑀧𑀺 𑀏𑀢𑁆𑀢𑀓𑀸𑀦𑀺 ¶ 𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀳𑁂𑀲𑀼𑀁. 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀅𑀢𑀺𑀫𑀳𑀸𑀪𑀺𑀓𑁆𑀔𑀼𑀲𑀫𑀼𑀤𑀸𑀬𑁄 𑀅𑀳𑁄𑀲𑀺. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀧𑀦 𑀆𑀦𑀼𑀪𑀸𑀯𑁄 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀫𑀺𑀤𑀁 𑀯𑀺𑀦𑀬𑀧𑀺𑀝𑀓𑀁 𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀇𑀫𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀯𑀺𑀚𑀸𑀦𑀦𑀢𑁆𑀣𑀁 𑀧𑀦 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀸 𑀳𑀺 𑁋

𑀲𑀗𑁆𑀕𑀸𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀚𑁄𑀢𑀬𑀺𑀢𑁆𑀯𑀸 𑀘 𑀲𑀩𑁆𑀩𑀥𑀺;

𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁, 𑀞𑀢𑁆𑀯𑀸 𑀧𑀜𑁆𑀘𑀲𑀢𑀸𑀧𑀺 𑀢𑁂.

𑀔𑀻𑀡𑀸𑀲𑀯𑀸 ¶ 𑀚𑀼𑀢𑀻𑀫𑀦𑁆𑀢𑁄, 𑀣𑁂𑀭𑀸 𑀓𑀲𑁆𑀲𑀧𑀆𑀤𑀬𑁄;

𑀔𑀻𑀡𑀲𑁆𑀦𑁂𑀳𑀧𑀤𑀻𑀧𑀸𑀯, 𑀦𑀺𑀩𑁆𑀩𑀸𑀬𑀺𑀁𑀲𑀼 𑀅𑀦𑀸𑀮𑀬𑀸.

𑀅𑀣𑀸𑀦𑀼𑀓𑁆𑀓𑀫𑁂𑀦 𑀕𑀘𑁆𑀙𑀦𑁆𑀢𑁂𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 ‘‘𑀓𑀧𑁆𑀧𑀢𑀺 𑀲𑀺𑀗𑁆𑀕𑀻𑀮𑁄𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀚𑀴𑁄𑀕𑀺𑀁 𑀧𑀸𑀢𑀼𑀁, 𑀓𑀧𑁆𑀧𑀢𑀺 𑀅𑀤𑀲𑀓𑀁 𑀦𑀺𑀲𑀻𑀤𑀦𑀁, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀲𑀼𑀁. 𑀢𑁂𑀲𑀁 𑀲𑀼𑀲𑀼𑀦𑀸𑀕𑀧𑀼𑀢𑁆𑀢𑁄 𑀓𑀸𑀴𑀸𑀲𑁄𑀓𑁄 𑀦𑀸𑀫 𑀭𑀸𑀚𑀸 𑀧𑀓𑁆𑀔𑁄 𑀅𑀳𑁄𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀚𑁆𑀚𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 ‘‘𑀯𑁂𑀲𑀸𑀮𑀺𑀓𑀸 𑀓𑀺𑀭 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁 𑀬𑁆𑀯𑀸𑀳𑀁 𑀤𑀲𑀩𑀮𑀲𑁆𑀲 𑀲𑀸𑀲𑀦𑀯𑀺𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬𑀁. 𑀳𑀦𑁆𑀤𑀸𑀳𑀁 𑀅𑀥𑀫𑁆𑀫𑀯𑀸𑀤𑀺𑀦𑁄 ¶ 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 ¶ 𑀤𑀻𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀤𑀳𑀼𑀧𑁄𑀲𑀣𑁂 𑀓𑀁𑀲𑀧𑀸𑀢𑀺𑀁 𑀉𑀤𑀓𑁂𑀦 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑁂 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀤𑁂𑀣𑀸𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀫𑁆𑀧𑀺 𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀫𑀸𑀲𑀓𑀭𑀽𑀧𑀫𑁆𑀧𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀓𑁆𑀔𑀸𑀭𑁂𑀦 𑀓𑀭𑀡𑀻𑀬’’𑀦𑁆𑀢𑀺 𑀲𑀩𑁆𑀩𑀁 𑀢𑀸𑀯 𑀯𑀢𑁆𑀢𑀩𑁆𑀩𑀁, 𑀬𑀸𑀯 ‘‘𑀇𑀫𑀸𑀬 𑀧𑀦 𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀲𑀢𑁆𑀢 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀅𑀬𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺 𑀲𑀢𑁆𑀢𑀲𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀏𑀯𑀁 𑀢𑀲𑁆𑀫𑀺𑀜𑁆𑀘 𑀲𑀦𑁆𑀦𑀺𑀧𑀸𑀢𑁂 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀆𑀬𑀲𑁆𑀫𑀢𑀸 𑀬𑀲𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀸. 𑀢𑁂𑀲𑀁 𑀫𑀚𑁆𑀛𑁂 𑀆𑀬𑀲𑁆𑀫𑀢𑀸 𑀭𑁂𑀯𑀢𑁂𑀦 𑀧𑀼𑀝𑁆𑀞𑁂𑀦 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑁂𑀦 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀢𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀯𑀺𑀦𑀺𑀘𑁆𑀙𑀺𑀢𑀸𑀦𑀺, 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀁. 𑀅𑀣 𑀣𑁂𑀭𑀸 ‘‘𑀧𑀼𑀦 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀢𑀺𑀧𑀺𑀝𑀓𑀥𑀭𑁂 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑁂 𑀲𑀢𑁆𑀢𑀲𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑁂𑀲𑀸𑀮𑀺𑀬𑀁 ¶ 𑀯𑀸𑀮𑀺𑀓𑀸𑀭𑀸𑀫𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀗𑁆𑀕𑀸𑀬𑀺𑀢𑀲𑀤𑀺𑀲𑀫𑁂𑀯 𑀲𑀩𑁆𑀩𑀁 𑀲𑀸𑀲𑀦𑀫𑀮𑀁 𑀲𑁄𑀥𑁂𑀢𑁆𑀯𑀸 𑀧𑀼𑀦 𑀧𑀺𑀝𑀓𑀯𑀲𑁂𑀦 𑀦𑀺𑀓𑀸𑀬𑀯𑀲𑁂𑀦 𑀅𑀗𑁆𑀕𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀘 𑀲𑀩𑁆𑀩𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼. 𑀅𑀬𑀁 𑀲𑀗𑁆𑀕𑀻𑀢𑀺 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀸. 𑀬𑀸 𑀮𑁄𑀓𑁂 𑁋

𑀲𑀢𑁂𑀳𑀺 𑀲𑀢𑁆𑀢𑀳𑀺 𑀓𑀢𑀸, 𑀢𑁂𑀦 𑀲𑀢𑁆𑀢𑀲𑀢𑀸𑀢𑀺 𑀘;

𑀧𑀼𑀩𑁆𑀩𑁂 𑀓𑀢𑀁 𑀉𑀧𑀸𑀤𑀸𑀬, 𑀤𑀼𑀢𑀺𑀬𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑀲𑀸 𑀧𑀦𑀸𑀬𑀁 𑁋

𑀬𑁂𑀳𑀺 𑀣𑁂𑀭𑁂𑀳𑀺 𑀲𑀗𑁆𑀕𑀻𑀢𑀸, 𑀲𑀗𑁆𑀕𑀻𑀢𑀺 𑀢𑁂𑀲𑀼 𑀯𑀺𑀲𑁆𑀲𑀼𑀢𑀸;

𑀲𑀩𑁆𑀩𑀓𑀸𑀫𑀻 𑀘 𑀲𑀸𑀴𑁆𑀳𑁄 𑀘, 𑀭𑁂𑀯𑀢𑁄 𑀔𑀼𑀚𑁆𑀚𑀲𑁄𑀪𑀺𑀢𑁄.

𑀬𑀲𑁄 ¶ 𑀘 𑀲𑀸𑀡𑀲𑀫𑁆𑀪𑀽𑀢𑁄, 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸;

𑀣𑁂𑀭𑀸 𑀆𑀦𑀦𑁆𑀤𑀣𑁂𑀭𑀲𑁆𑀲, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑀣𑀸𑀕𑀢𑀁.

𑀲𑀼𑀫𑀦𑁄 𑀯𑀸𑀲𑀪𑀕𑀸𑀫𑀻 𑀘, 𑀜𑁂𑀬𑁆𑀬𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸;

𑀤𑁆𑀯𑁂 𑀇𑀫𑁂 𑀅𑀦𑀼𑀭𑀼𑀤𑁆𑀥𑀲𑁆𑀲, 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑀣𑀸𑀕𑀢𑀁.

𑀤𑀼𑀢𑀺𑀬𑁄 ¶ 𑀧𑀦 𑀲𑀗𑁆𑀕𑀻𑀢𑁄, 𑀬𑁂𑀳𑀺 𑀣𑁂𑀭𑁂𑀳𑀺 𑀲𑀗𑁆𑀕𑀳𑁄;

𑀲𑀩𑁆𑀩𑁂𑀧𑀺 𑀧𑀦𑁆𑀦𑀪𑀸𑀭𑀸 𑀢𑁂, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸𑀢𑀺.

𑀅𑀬𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺.

𑀏𑀯𑀫𑀺𑀫𑀁 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀣𑁂𑀭𑀸 ‘‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀦𑀸𑀕𑀢𑁂𑀧𑀺 𑀲𑀸𑀲𑀦𑀲𑁆𑀲 𑀏𑀯𑀭𑀽𑀧𑀁 𑀅𑀩𑁆𑀩𑀼𑀤’’𑀦𑁆𑀢𑀺 𑀑𑀮𑁄𑀓𑀬𑀫𑀸𑀦𑀸 𑀇𑀫𑀁 𑀅𑀤𑁆𑀤𑀲𑀁𑀲𑀼 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀧𑀸𑀝𑀮𑀺𑀧𑀼𑀢𑁆𑀢𑁂 𑀥𑀫𑁆𑀫𑀸𑀲𑁄𑀓𑁄 𑀦𑀸𑀫 𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺. 𑀲𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑀬𑀺𑀲𑁆𑀲𑀢𑀺. 𑀢𑀢𑁄 𑀢𑀺𑀢𑁆𑀣𑀺𑀬𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀁 𑀧𑀭𑀺𑀤𑀻𑀧𑁂𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀅𑀩𑁆𑀩𑀼𑀤𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀫𑀬𑀁 𑀏𑀢𑀲𑁆𑀫𑀺𑀁 𑀅𑀩𑁆𑀩𑀼𑀤𑁂 𑀉𑀧𑁆𑀧𑀦𑁆𑀦𑁂 𑀲𑀫𑁆𑀫𑀼𑀔𑀸 𑀪𑀯𑀺𑀲𑁆𑀲𑀸𑀫, 𑀦 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀢𑁂 𑀲𑀩𑁆𑀩𑁂𑀯 𑀢𑀤𑀸 𑀅𑀢𑁆𑀢𑀦𑁄 𑀅𑀲𑀫𑁆𑀫𑀼𑀔𑀪𑀸𑀯𑀁 𑀜𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀓𑀮𑀁 𑀫𑀦𑀼𑀲𑁆𑀲𑀮𑁄𑀓𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀜𑁆𑀘 𑀑𑀮𑁄𑀓𑁂𑀦𑁆𑀢𑀸 𑀦 𑀓𑀜𑁆𑀘𑀺 𑀤𑀺𑀲𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀢𑀺𑀲𑁆𑀲𑀁 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀅𑀤𑁆𑀤𑀲𑀁𑀲𑀼 ¶ 𑀧𑀭𑀺𑀢𑁆𑀢𑀸𑀬𑀼𑀓𑀁 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀪𑀸𑀯𑀺𑀢𑀫𑀕𑁆𑀕𑀁. 𑀤𑀺𑀲𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑀬𑀁 𑀏𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑁂𑀬𑁆𑀬𑀸𑀫, 𑀅𑀤𑁆𑀥𑀸 𑀏𑀲 ¶ 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀲𑁆𑀲𑀢𑀺. 𑀢𑀢𑁄 𑀘 𑀫𑀦𑁆𑀢𑁂𑀳𑀺 𑀧𑀮𑁄𑀪𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀳𑀼𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺.

𑀢𑁂 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑀺𑀲𑁆𑀲𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀅𑀩𑁆𑀩𑀼𑀤𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀫𑀬𑀜𑁆𑀘 𑀲𑀓𑀮𑀁 𑀫𑀦𑀼𑀲𑁆𑀲𑀮𑁄𑀓𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀜𑁆𑀘 𑀑𑀮𑁄𑀓𑀬𑀫𑀸𑀦𑀸 𑀓𑀜𑁆𑀘𑀺 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀯𑀺𑀘𑀺𑀦𑀦𑁆𑀢𑀸 𑀪𑀯𑀦𑁆𑀢𑀫𑁂𑀯 𑀅𑀤𑁆𑀤𑀲𑀸𑀫. 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀧𑀝𑀺𑀜𑁆𑀜𑀁 𑀤𑁂𑀳𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀫𑀳𑀸𑀩𑁆𑀭𑀳𑁆𑀫𑀸, ‘‘𑀅𑀳𑀁 𑀓𑀺𑀭 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀲𑁄𑀥𑁂𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸, ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺. 𑀣𑁂𑀭𑀸 𑀩𑁆𑀭𑀳𑁆𑀫𑀮𑁄𑀓𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀫𑀺𑀁𑀲𑀼.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀘 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑁄 𑀘 𑀤𑁆𑀯𑁂𑀧𑀺 𑀦𑀯𑀓𑀸 𑀳𑁄𑀦𑁆𑀢𑀺 𑀤𑀳𑀭𑀪𑀺𑀓𑁆𑀔𑀽 𑀢𑀺𑀧𑀺𑀝𑀓𑀥𑀭𑀸 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸 𑀔𑀻𑀡𑀸𑀲𑀯𑀸, 𑀢𑁂 𑀢𑀁 𑀅𑀥𑀺𑀓𑀭𑀡𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀣𑁂𑀭𑀸 ‘‘𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀦𑁄 𑀲𑀳𑀸𑀬𑀓𑀸 𑀅𑀳𑀼𑀯𑀢𑁆𑀣, 𑀢𑁂𑀦 𑀯𑁄 𑀇𑀤𑀁 𑀤𑀡𑁆𑀟𑀓𑀫𑁆𑀫𑀁 𑀳𑁄𑀢𑀼 𑁋 ‘𑀢𑀺𑀲𑁆𑀲𑁄 𑀦𑀸𑀫 𑀩𑁆𑀭𑀳𑁆𑀫𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀢𑀁 𑀢𑀼𑀫𑁆𑀳𑀸𑀓𑀁 𑀏𑀓𑁄 𑀦𑀻𑀳𑀭𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼, 𑀏𑀓𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀽’’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑁋

𑀲𑀩𑁆𑀩𑀓𑀸𑀫𑀺𑀧𑁆𑀧𑀪𑀼𑀢𑀬𑁄, 𑀢𑁂𑀧𑀺 𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯 𑀮𑁄𑀓𑀫𑁆𑀳𑀺, 𑀚𑀮𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸.

𑀤𑀼𑀢𑀺𑀬𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸, 𑀯𑀺𑀲𑁄𑀥𑁂𑀢𑁆𑀯𑀸𑀦 𑀲𑀸𑀲𑀦𑀁;

𑀅𑀦𑀸𑀕𑀢𑁂𑀧𑀺 ¶ 𑀓𑀢𑁆𑀯𑀸𑀦, 𑀳𑁂𑀢𑀼𑀁 𑀲𑀤𑁆𑀥𑀫𑁆𑀫𑀲𑀼𑀤𑁆𑀥𑀺𑀬𑀸.

𑀔𑀻𑀡𑀸𑀲𑀯𑀸 ¶ 𑀯𑀲𑀺𑀧𑁆𑀧𑀢𑁆𑀣𑀸, 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸;

𑀅𑀦𑀺𑀘𑁆𑀘𑀢𑀸𑀯𑀲𑀁 𑀣𑁂𑀭𑀸, 𑀢𑁂𑀧𑀺 𑀦𑀸𑀫 𑀉𑀧𑀸𑀕𑀢𑀸.

𑀏𑀯𑀁 𑀅𑀦𑀺𑀘𑁆𑀘𑀢𑀁 𑀚𑀫𑁆𑀫𑀺𑀁, 𑀜𑀢𑁆𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀢𑀁 𑀧𑀢𑁆𑀢𑀼𑀁 𑀯𑀸𑀬𑀫𑁂 𑀥𑀻𑀭𑁄, 𑀬𑀁 𑀦𑀺𑀘𑁆𑀘𑀁 𑀅𑀫𑀢𑀁 𑀧𑀤𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸

𑀢𑀺𑀲𑁆𑀲𑁄𑀧𑀺 𑀔𑁄 𑀫𑀳𑀸𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀺𑀕𑁆𑀕𑀯𑀢𑁆𑀣𑁂𑀭𑁄𑀧𑀺 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀪𑀼𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀏𑀓𑀤𑀺𑀯𑀲𑀫𑁆𑀧𑀺 𑀉𑀴𑀼𑀗𑁆𑀓𑀫𑀢𑁆𑀢𑀁 𑀯𑀸 𑀬𑀸𑀕𑀼𑀁 𑀓𑀝𑀘𑁆𑀙𑀼𑀫𑀢𑁆𑀢𑀁 𑀯𑀸 𑀪𑀢𑁆𑀢𑀁 𑀦𑀸𑀮𑀢𑁆𑀣. 𑀲𑀢𑁆𑀢𑀦𑁆𑀦𑀁 𑀧𑀦 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀓𑀤𑀺𑀯𑀲𑀁 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀘𑀦𑀫𑀢𑁆𑀢𑀁 𑀅𑀮𑀢𑁆𑀣. 𑀢𑀁𑀤𑀺𑀯𑀲𑀫𑁂𑀯 𑀩𑁆𑀭𑀸𑀳𑁆𑀫𑀡𑁄𑀧𑀺 𑀩𑀳𑀺𑀤𑁆𑀥𑀸 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀝𑀺𑀧𑀣𑁂 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀪𑁄 𑀧𑀩𑁆𑀩𑀚𑀺𑀢, 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀆𑀳. ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀅𑀕𑀫𑀺𑀫𑁆𑀳𑀸’’𑀢𑀺. ‘‘𑀅𑀧𑀺 𑀓𑀺𑀜𑁆𑀘𑀺 ¶ 𑀮𑀪𑀺𑀢𑁆𑀣𑀸’’𑀢𑀺? ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀮𑀪𑀺𑀫𑁆𑀳𑀸’’𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀓𑀺𑀜𑁆𑀘𑀺 𑀅𑀤𑀢𑁆𑀣𑀸’’𑀢𑀺? ‘‘𑀦 𑀓𑀺𑀜𑁆𑀘𑀺 𑀅𑀤𑀫𑁆𑀳𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀼𑀢𑀺𑀬𑀤𑀺𑀯𑀲𑁂 𑀖𑀭𑀤𑁆𑀯𑀸𑀭𑁂𑀬𑁂𑀯 𑀦𑀺𑀲𑀻𑀤𑀺 ‘‘𑀅𑀚𑁆𑀚 𑀧𑀩𑁆𑀩𑀚𑀺𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀤𑀼𑀢𑀺𑀬𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀏𑀯𑀫𑀸𑀳 𑁋 ‘‘𑀢𑀼𑀫𑁆𑀳𑁂 𑀳𑀺𑀬𑁆𑀬𑁄 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸𑀬𑁂𑀯 ‘𑀮𑀪𑀺𑀫𑁆𑀳𑀸’𑀢𑀺 𑀅𑀯𑁄𑀘𑀼𑀢𑁆𑀣. 𑀯𑀝𑁆𑀝𑀢𑀺 𑀦𑀼 𑀔𑁄 𑀢𑀼𑀫𑁆𑀳𑀸𑀓𑀁 𑀫𑀼𑀲𑀸𑀯𑀸𑀤𑁄’’𑀢𑀺! 𑀣𑁂𑀭𑁄 𑀆𑀳 𑁋 ‘‘𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀲𑀢𑁆𑀢 𑀯𑀲𑁆𑀲𑀸𑀦𑀺 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀳𑀺𑀬𑁆𑀬𑁄 ‘𑀅𑀢𑀺𑀘𑁆𑀙𑀣𑀸’𑀢𑀺 𑀯𑀘𑀦𑀫𑀢𑁆𑀢𑀁 𑀮𑀪𑀺𑀫𑁆𑀳; 𑀅𑀣𑁂𑀢𑀁 𑀧𑀝𑀺𑀲𑀦𑁆𑀣𑀸𑀭𑀁 𑀉𑀧𑀸𑀤𑀸𑀬 𑀏𑀯𑀫𑀯𑁄𑀘𑀼𑀫𑁆𑀳𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀮𑀪𑀺𑀢𑁆𑀯𑀸 ‘𑀮𑀪𑀺𑀫𑁆𑀳𑀸’𑀢𑀺 𑀧𑀲𑀁𑀲𑀦𑁆𑀢𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 ¶ 𑀮𑀪𑀺𑀢𑁆𑀯𑀸 𑀓𑀲𑁆𑀫𑀸 𑀦 𑀧𑀲𑀁𑀲𑀦𑁆𑀢𑀻’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀝𑀺𑀬𑀸𑀤𑀺𑀢𑀪𑀢𑁆𑀢𑀢𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀺𑀓𑁆𑀔𑀁 𑀢𑀤𑀼𑀧𑀺𑀬𑀜𑁆𑀘 𑀩𑁆𑀬𑀜𑁆𑀚𑀦𑀁 𑀤𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀪𑀺𑀓𑁆𑀔𑀁 𑀲𑀩𑁆𑀩𑀓𑀸𑀮𑀁 𑀢𑀼𑀫𑁆𑀳𑁂 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳 ¶ . 𑀲𑁄 𑀧𑀼𑀦𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀉𑀧𑀲𑀫𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀁 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀢𑀦𑁄 𑀖𑀭𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀭𑀡𑀢𑁆𑀣𑀸𑀬 𑀬𑀸𑀘𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀣𑁄𑀓𑀁 𑀣𑁄𑀓𑀁 𑀩𑀼𑀤𑁆𑀥𑀯𑀘𑀦𑀁 𑀓𑀣𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑁄𑀧𑀺 𑀔𑁄 𑀫𑀸𑀡𑀯𑀓𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄𑀬𑁂𑀯 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀢𑀲𑀼𑀤𑁆𑀥𑀲𑀢𑁆𑀢𑀲𑁆𑀲 𑀆𑀲𑀦𑁂 𑀯𑀸 𑀲𑀬𑀦𑁂 𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀲𑀚𑁆𑀚𑀺𑀢𑀸 𑀯𑀸 𑀦𑀺𑀧𑀚𑁆𑀚𑀺𑀢𑀸 𑀯𑀸 𑀦𑀢𑁆𑀣𑀺. 𑀲𑁄 𑀬𑀤𑀸 𑀆𑀘𑀭𑀺𑀬𑀖𑀭𑀁 𑀕𑀘𑁆𑀙𑀢𑀺, 𑀢𑀤𑀸𑀲𑁆𑀲 𑀫𑀜𑁆𑀘𑀧𑀻𑀞𑀁 𑀲𑁂𑀢𑁂𑀦 𑀯𑀢𑁆𑀣𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀮𑀕𑁆𑀕𑁂𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀬𑁄 𑀤𑀸𑀦𑀺 𑀫𑀸𑀡𑀯𑀓𑀁 𑀧𑀩𑁆𑀩𑀸𑀚𑁂𑀢𑀼𑀁, 𑀘𑀺𑀭𑀜𑁆𑀘 𑀫𑁂 𑀇𑀥𑀸𑀕𑀘𑁆𑀙𑀦𑁆𑀢𑀲𑁆𑀲, 𑀦 𑀘 𑀓𑀸𑀘𑀺 𑀫𑀸𑀡𑀯𑀓𑁂𑀦 𑀲𑀤𑁆𑀥𑀺𑀁 𑀓𑀣𑀸 𑀉𑀧𑁆𑀧𑀚𑁆𑀚𑀢𑀺. 𑀳𑀦𑁆𑀤 𑀤𑀸𑀦𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀧𑀮𑁆𑀮𑀗𑁆𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸 𑀢𑀲𑁆𑀫𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀫𑀸𑀡𑀯𑀓𑀲𑁆𑀲 𑀧𑀮𑁆𑀮𑀗𑁆𑀓𑀁 𑀅𑀜𑁆𑀜𑀁 𑀦 𑀓𑀺𑀜𑁆𑀘𑀺 𑀆𑀲𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀚𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀆𑀲𑀦𑀁 𑀅𑀧𑀲𑁆𑀲𑀦𑁆𑀢𑁄 𑀫𑀸𑀡𑀯𑀓𑀲𑁆𑀲 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀮𑁆𑀮𑀗𑁆𑀓𑁂. 𑀫𑀸𑀡𑀯𑀓𑁄𑀧𑀺 𑀔𑁄 𑀢𑀗𑁆𑀔𑀡𑀜𑁆𑀜𑁂𑀯 𑀆𑀘𑀭𑀺𑀬𑀖𑀭𑀸 𑀆𑀕𑀫𑁆𑀫 𑀣𑁂𑀭𑀁 𑀅𑀢𑁆𑀢𑀦𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 ‘‘𑀓𑁄 𑀫𑀫 𑀧𑀮𑁆𑀮𑀗𑁆𑀓𑀁 𑀲𑀫𑀡𑀲𑁆𑀲 𑀧𑀜𑁆𑀜𑀧𑁂𑀲𑀻’’𑀢𑀺 𑀆𑀳.

𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀽𑀧𑀲𑀦𑁆𑀢𑁂 𑀫𑀸𑀡𑀯𑀓𑀲𑁆𑀲 𑀘𑀡𑁆𑀟𑀺𑀓𑁆𑀓𑀪𑀸𑀯𑁂 𑀏𑀯𑀫𑀸𑀳 𑁋 ‘‘𑀓𑀺𑀁 𑀧𑀦 𑀢𑁆𑀯𑀁, 𑀫𑀸𑀡𑀯𑀓, 𑀓𑀺𑀜𑁆𑀘𑀺 ¶ 𑀫𑀦𑁆𑀢𑀁 𑀚𑀸𑀦𑀸𑀲𑀻’’𑀢𑀺? 𑀫𑀸𑀡𑀯𑀓𑁄 ‘‘𑀪𑁄 𑀧𑀩𑁆𑀩𑀚𑀺𑀢, 𑀫𑀬𑀺 𑀤𑀸𑀦𑀺 𑀫𑀦𑁆𑀢𑁂 𑀅𑀚𑀸𑀦𑀦𑁆𑀢𑁂 𑀅𑀜𑁆𑀜𑁂 𑀓𑁂 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸, 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀧𑀦 𑀫𑀦𑁆𑀢𑀁 𑀚𑀸𑀦𑀸𑀣𑀸’’𑀢𑀺? ‘‘𑀧𑀼𑀘𑁆𑀙, 𑀫𑀸𑀡𑀯𑀓, 𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀫𑀸𑀡𑀯𑀓𑁄 𑀢𑀻𑀲𑀼 𑀯𑁂𑀤𑁂𑀲𑀼 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑁂𑀲𑀼 ¶ 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑁂𑀲𑀼 𑀇𑀢𑀺𑀳𑀸𑀲𑀧𑀜𑁆𑀘𑀫𑁂𑀲𑀼 𑀬𑀸𑀦𑀺 𑀬𑀸𑀦𑀺 𑀕𑀡𑁆𑀞𑀺𑀝𑁆𑀞𑀸𑀦𑀸𑀦𑀺, 𑀬𑁂𑀲𑀁 𑀬𑁂𑀲𑀁 𑀦𑀬𑀁 𑀦𑁂𑀯 𑀅𑀢𑁆𑀢𑀦𑀸 𑀧𑀲𑁆𑀲𑀢𑀺 𑀦𑀸𑀧𑀺𑀲𑁆𑀲 𑀆𑀘𑀭𑀺𑀬𑁄 𑀅𑀤𑁆𑀤𑀲, 𑀢𑁂𑀲𑀼 𑀢𑁂𑀲𑀼 𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀧𑀓𑀢𑀺𑀬𑀸𑀧𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽, 𑀇𑀤𑀸𑀦𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄, 𑀢𑁂𑀦𑀲𑁆𑀲 𑀦𑀢𑁆𑀣𑀺 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄’’𑀢𑀺 𑀢𑀸𑀯𑀤𑁂𑀯 𑀢𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀸𑀡𑀯𑀓𑀁 𑀆𑀳 𑁋 ‘‘𑀫𑀸𑀡𑀯𑀓, 𑀅𑀳𑀁 𑀢𑀬𑀸 𑀩𑀳𑀼𑀁 𑀧𑀼𑀘𑁆𑀙𑀺𑀢𑁄; 𑀅𑀳𑀫𑁆𑀧𑀺 𑀤𑀸𑀦𑀺 𑀢𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫𑀺, 𑀩𑁆𑀬𑀸𑀓𑀭𑀺𑀲𑁆𑀲𑀲𑀺 𑀫𑁂’’𑀢𑀺? ‘‘𑀆𑀫, 𑀪𑁄 𑀧𑀩𑁆𑀩𑀚𑀺𑀢, 𑀧𑀼𑀘𑁆𑀙 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 𑀘𑀺𑀢𑁆𑀢𑀬𑀫𑀓𑁂 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋

‘‘𑀬𑀲𑁆𑀲 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺; 𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺?

𑀫𑀸𑀡𑀯𑁄 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀦𑀸𑀫, 𑀪𑁄 𑀧𑀩𑁆𑀩𑀚𑀺𑀢, 𑀇𑀤’’𑀦𑁆𑀢𑀺 𑀆𑀳. ‘‘𑀩𑀼𑀤𑁆𑀥𑀫𑀦𑁆𑀢𑁄 𑀦𑀸𑀫𑀸𑀬𑀁, 𑀫𑀸𑀡𑀯𑀸’’𑀢𑀺. ‘‘𑀲𑀓𑁆𑀓𑀸 𑀧𑀦𑀸𑀬𑀁, 𑀪𑁄, 𑀫𑀬𑁆𑀳𑀫𑁆𑀧𑀺 𑀤𑀸𑀢𑀼’’𑀦𑁆𑀢𑀺. ‘‘𑀲𑀓𑁆𑀓𑀸 𑀫𑀸𑀡𑀯, 𑀅𑀫𑁆𑀳𑁂𑀳𑀺 𑀕𑀳𑀺𑀢𑀧𑀩𑁆𑀩𑀚𑁆𑀚𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀸𑀢𑀼’’𑀦𑁆𑀢𑀺. 𑀢𑀢𑁄 ¶ 𑀫𑀸𑀡𑀯𑁄 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀅𑀬𑀁 𑀧𑀩𑁆𑀩𑀚𑀺𑀢𑁄 𑀩𑀼𑀤𑁆𑀥𑀫𑀦𑁆𑀢𑀁 𑀦𑀸𑀫 𑀚𑀸𑀦𑀸𑀢𑀺, 𑀦 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑁂𑀢𑀺, 𑀅𑀳𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀦𑁄 𑀧𑀼𑀢𑁆𑀢𑁄 𑀫𑀦𑁆𑀢𑁂 𑀕𑀡𑁆𑀳𑀢𑀼, 𑀕𑀳𑁂𑀢𑁆𑀯𑀸 𑀧𑀼𑀦𑀸𑀕𑀫𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀉𑀕𑁆𑀕𑀡𑁆𑀳, 𑀧𑀼𑀢𑁆𑀢𑀸’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼. 𑀣𑁂𑀭𑁄 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀢𑀸𑀯 𑀆𑀘𑀺𑀓𑁆𑀔𑀺. 𑀲𑁄 𑀢𑀢𑁆𑀣 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀸𑀫𑀡𑁂𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀅𑀪𑀩𑁆𑀩𑁄 𑀤𑀸𑀦𑀺 𑀲𑀸𑀲𑀦𑀢𑁄 𑀦𑀺𑀯𑀢𑁆𑀢𑀺𑀢𑀼𑀁. 𑀲𑀘𑁂 𑀧𑀦𑀲𑁆𑀲𑀸𑀳𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀓𑀣𑁂𑀬𑁆𑀬𑀁, 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑀼𑀁, 𑀲𑀫𑀬𑁄 𑀤𑀸𑀦𑀺 𑀦𑀁 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀼’’𑀦𑁆𑀢𑀺. 𑀢𑀢𑁄 𑀆𑀳 𑁋 ‘‘𑀏𑀳𑀺 𑀢𑁆𑀯𑀁, 𑀲𑀸𑀫𑀡𑁂𑀭, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳. 𑀫𑀫 𑀯𑀘𑀦𑁂𑀦 𑀢𑀜𑁆𑀘 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙; 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀉𑀧𑀚𑁆𑀛𑀸𑀬𑁄 𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’𑀢𑀺. ‘𑀓𑁄 𑀦𑀸𑀫 𑀢𑁂 𑀉𑀧𑀚𑁆𑀛𑀸𑀬𑁄’𑀢𑀺 𑀘 𑀯𑀼𑀢𑁆𑀢𑁂 ‘𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀦𑀸𑀫, 𑀪𑀦𑁆𑀢𑁂’𑀢𑀺 𑀯𑀤𑁂𑀬𑁆𑀬𑀸𑀲𑀺. ‘𑀅𑀳𑀁 𑀓𑁄 𑀦𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀫𑀫 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄 𑀣𑁂𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀲𑀸𑀫𑀡𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 ¶ 𑀆𑀕𑀢𑁄𑀲𑀻’’𑀢𑀺? ‘‘𑀉𑀧𑀚𑁆𑀛𑀸𑀬𑁄 𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’’𑀢𑀺. ‘‘𑀓𑁄 𑀦𑀸𑀫 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺? ‘‘𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀓𑁄 𑀦𑀸𑀫𑀸’’𑀢𑀺? ‘‘𑀫𑀫 𑀉𑀧𑀚𑁆𑀛𑀸𑀬𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀦𑀸𑀫𑀁 𑀚𑀸𑀦𑀸𑀢𑀻’’𑀢𑀺. ‘‘𑀧𑀢𑁆𑀢𑀘𑀻𑀯𑀭𑀁 𑀤𑀸𑀦𑀺 𑀧𑀝𑀺𑀲𑀸𑀫𑁂𑀳𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀫𑀡𑁂𑀭𑁄 𑀧𑀢𑁆𑀢𑀘𑀻𑀯𑀭𑀁 ¶ 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀉𑀤𑀓𑀤𑀦𑁆𑀢𑀧𑁄𑀦𑀁 𑀉𑀧𑀝𑁆𑀞𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀲𑀫𑁆𑀫𑀚𑁆𑀚𑀺𑀢𑀝𑁆𑀞𑀸𑀦𑀁 𑀧𑀼𑀦 𑀲𑀫𑁆𑀫𑀚𑁆𑀚𑀺 ¶ . 𑀢𑀁 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑀓𑀁 𑀆𑀳𑀭𑀺. 𑀢𑀜𑁆𑀘 𑀤𑀦𑁆𑀢𑀓𑀝𑁆𑀞𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀤𑀦𑁆𑀢𑀓𑀝𑁆𑀞𑀁 𑀕𑀡𑁆𑀳𑀺. 𑀏𑀯𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀦 𑀧𑀼𑀘𑁆𑀙𑀺. 𑀲𑀸𑀫𑀡𑁂𑀭𑁄 𑀧𑀼𑀦𑀧𑀺 𑀧𑀼𑀩𑁆𑀩𑁂 𑀓𑀣𑀺𑀢𑀲𑀤𑀺𑀲𑀫𑁂𑀯 𑀓𑀣𑁂𑀲𑀺. 𑀣𑁂𑀭𑁄 ‘‘𑀲𑁄 𑀯𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀓𑀺𑀫𑀢𑁆𑀣𑀁 𑀆𑀕𑀢𑁄𑀲𑀻’’𑀢𑀺 𑀆𑀳. ‘‘𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀢𑁆𑀣𑀸𑀬, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀉𑀕𑁆𑀕𑀡𑁆𑀳 𑀤𑀸𑀦𑀺, 𑀲𑀸𑀫𑀡𑁂𑀭𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀤𑀺𑀯𑀲𑀢𑁄 𑀧𑀪𑀼𑀢𑀺 𑀩𑀼𑀤𑁆𑀥𑀯𑀘𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄𑀯 𑀳𑀼𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬. 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀧𑀦 𑀅𑀯𑀲𑁆𑀲𑀺𑀓𑁄𑀯 𑀲𑀫𑀸𑀦𑁄 𑀢𑀺𑀧𑀺𑀝𑀓𑀥𑀭𑁄 𑀅𑀳𑁄𑀲𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑁂 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀩𑀳𑀽𑀦𑀁 𑀥𑀫𑁆𑀫𑀯𑀺𑀦𑀬𑀁 𑀯𑀸𑀘𑁂𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀭𑀜𑁆𑀜𑁄 𑀏𑀓𑀲𑀢𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀲𑀩𑁆𑀩𑁂 𑀅𑀲𑁄𑀓𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀺𑀓𑀁 𑀢𑀺𑀲𑁆𑀲𑀓𑀼𑀫𑀸𑀭𑀁 𑀞𑀧𑁂𑀢𑁆𑀯𑀸 𑀖𑀸𑀢𑁂𑀲𑀺. 𑀖𑀸𑀢𑁂𑀦𑁆𑀢𑁄 𑀘 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀅𑀦𑀪𑀺𑀲𑀺𑀢𑁆𑀢𑁄𑀯 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀁 𑀧𑀸𑀧𑀼𑀡𑀺 ¶ . 𑀅𑀪𑀺𑀲𑁂𑀓𑀸𑀦𑀼𑀪𑀸𑀯𑁂𑀦 𑀘𑀲𑁆𑀲 𑀇𑀫𑀸 𑀭𑀸𑀚𑀺𑀤𑁆𑀥𑀺𑀬𑁄 𑀆𑀕𑀢𑀸 𑁋 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀆𑀡𑀸 𑀧𑀯𑀢𑁆𑀢𑀢𑀺; 𑀢𑀣𑀸 𑀉𑀧𑀭𑀺 𑀆𑀓𑀸𑀲𑁂 𑀅𑀦𑁄𑀢𑀢𑁆𑀢𑀤𑀳𑀢𑁄 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀲𑁄𑀴𑀲 𑀧𑀸𑀦𑀻𑀬𑀖𑀝𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁂𑀯𑀢𑀸 𑀆𑀳𑀭𑀦𑁆𑀢𑀺, 𑀬𑀢𑁄 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀳𑀼𑀢𑁆𑀯𑀸 𑀅𑀝𑁆𑀞 𑀖𑀝𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺, 𑀤𑁆𑀯𑁂 𑀖𑀝𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀢𑀺𑀧𑀺𑀝𑀓𑀥𑀭𑀪𑀺𑀓𑁆𑀔𑀽𑀦𑀁, 𑀤𑁆𑀯𑁂 𑀖𑀝𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀬, 𑀘𑀢𑁆𑀢𑀸𑀭𑁄 𑀖𑀝𑁂 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺; 𑀤𑁂𑀯𑀢𑀸𑀏𑀯 𑀳𑀺𑀫𑀯𑀦𑁆𑀢𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀦𑀸𑀫 𑀅𑀢𑁆𑀣𑀺 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼𑀓𑀁 𑀭𑀲𑀯𑀦𑁆𑀢𑀁 𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀳𑀭𑀦𑁆𑀢𑀺, 𑀬𑁂𑀦 𑀭𑀜𑁆𑀜𑁄 𑀘 𑀫𑀳𑁂𑀲𑀺𑀬𑀸 𑀘 𑀲𑁄𑀴𑀲𑀦𑁆𑀦𑀜𑁆𑀘 𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀲𑀝𑁆𑀞𑀺𑀫𑀢𑁆𑀢𑀸𑀦𑀜𑁆𑀘 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀤𑁂𑀯𑀲𑀺𑀓𑀁 𑀤𑀦𑁆𑀢𑀧𑁄𑀦𑀓𑀺𑀘𑁆𑀘𑀁 𑀦𑀺𑀧𑁆𑀧𑀚𑁆𑀚𑀢𑀺. 𑀤𑁂𑀯𑀲𑀺𑀓𑀫𑁂𑀯 𑀘𑀲𑁆𑀲 𑀤𑁂𑀯𑀢𑀸 𑀅𑀕𑀤𑀸𑀫𑀮𑀓𑀁 𑀅𑀕𑀤𑀳𑀭𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀜𑁆𑀘 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀦𑁆𑀢𑀺. 𑀢𑀣𑀸 𑀙𑀤𑁆𑀤𑀦𑁆𑀢𑀤𑀳𑀢𑁄 𑀧𑀜𑁆𑀘𑀯𑀡𑁆𑀡𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀧𑀻𑀢𑀓𑀯𑀡𑁆𑀡𑀳𑀢𑁆𑀣𑀧𑀼𑀘𑁆𑀙𑀦𑀧𑀝𑀓𑀁 𑀤𑀺𑀩𑁆𑀩𑀜𑁆𑀘 𑀧𑀸𑀦𑀓𑀁 𑀆𑀳𑀭𑀦𑁆𑀢𑀺. 𑀤𑁂𑀯𑀲𑀺𑀓𑀫𑁂𑀯 𑀧𑀦𑀲𑁆𑀲 𑀦𑁆𑀳𑀸𑀦𑀕𑀦𑁆𑀥𑀁 ¶ 𑀅𑀦𑀼𑀯𑀺𑀮𑁂𑀧𑀦𑀕𑀦𑁆𑀥𑀁 ¶ 𑀧𑀸𑀭𑀼𑀧𑀦𑀢𑁆𑀣𑀸𑀬 𑀅𑀲𑀼𑀢𑁆𑀢𑀫𑀬𑀺𑀓𑀁 𑀲𑀼𑀫𑀦𑀧𑀼𑀧𑁆𑀨𑀧𑀝𑀁 𑀫𑀳𑀸𑀭𑀳𑀜𑁆𑀘 𑀅𑀜𑁆𑀚𑀦𑀁 𑀦𑀸𑀕𑀪𑀯𑀦𑀢𑁄 𑀦𑀸𑀕𑀭𑀸𑀚𑀸𑀦𑁄 𑀆𑀳𑀭𑀦𑁆𑀢𑀺. 𑀙𑀤𑁆𑀤𑀦𑁆𑀢𑀤𑀳𑁂𑀯 ¶ 𑀉𑀝𑁆𑀞𑀺𑀢𑀲𑁆𑀲 𑀲𑀸𑀮𑀺𑀦𑁄 𑀦𑀯 𑀯𑀸𑀳𑀲𑀳𑀲𑁆𑀲𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀼𑀓𑀸 𑀆𑀳𑀭𑀦𑁆𑀢𑀺. 𑀫𑀽𑀲𑀺𑀓𑀸 𑀦𑀺𑀢𑁆𑀣𑀼𑀲𑀓𑀡𑁂 𑀓𑀭𑁄𑀦𑁆𑀢𑀺, 𑀏𑀓𑁄𑀧𑀺 𑀔𑀡𑁆𑀟𑀢𑀡𑁆𑀟𑀼𑀮𑁄 𑀦 𑀳𑁄𑀢𑀺, 𑀭𑀜𑁆𑀜𑁄 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀅𑀬𑀫𑁂𑀯 𑀢𑀡𑁆𑀟𑀼𑀮𑁄 𑀧𑀭𑀺𑀪𑁄𑀕𑀁 𑀕𑀘𑁆𑀙𑀢𑀺. 𑀫𑀥𑀼𑀫𑀓𑁆𑀔𑀺𑀓𑀸 𑀫𑀥𑀼𑀁 𑀓𑀭𑁄𑀦𑁆𑀢𑀺. 𑀓𑀫𑁆𑀫𑀸𑀭𑀲𑀸𑀮𑀸𑀲𑀼 𑀅𑀘𑁆𑀙𑀸 𑀓𑀽𑀝𑀁 𑀧𑀳𑀭𑀦𑁆𑀢𑀺. 𑀓𑀭𑀯𑀻𑀓𑀲𑀓𑀼𑀡𑀸 𑀆𑀕𑀦𑁆𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀯𑀺𑀓𑀽𑀚𑀦𑁆𑀢𑀸 𑀭𑀜𑁆𑀜𑁄 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺.

𑀇𑀫𑀸𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀧𑁂𑀲𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀥𑀺𑀕𑀢𑀭𑀽𑀧𑀤𑀲𑁆𑀲𑀦𑀁 𑀓𑀧𑁆𑀧𑀸𑀬𑀼𑀓𑀁 𑀓𑀸𑀴𑀁 𑀦𑀸𑀫 𑀦𑀸𑀕𑀭𑀸𑀚𑀸𑀦𑀁 𑀆𑀦𑀬𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀦𑁂𑀓𑀲𑀢𑀯𑀡𑁆𑀡𑁂𑀳𑀺 𑀚𑀮𑀚 𑀣𑀮𑀚𑀧𑀼𑀧𑁆𑀨𑁂𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀘 𑀧𑀽𑀚𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀲𑁄𑀴𑀲𑀳𑀺 𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑁂𑀳𑀺 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀦𑁆𑀢𑀜𑀸𑀡𑀲𑁆𑀲 𑀢𑀸𑀯 𑀫𑁂 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀭𑀽𑀧𑀁 𑀇𑀫𑁂𑀲𑀁 𑀅𑀓𑁆𑀔𑀻𑀦𑀁 𑀆𑀧𑀸𑀣𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀦𑀺𑀫𑁆𑀫𑀺𑀢𑀁 𑀲𑀓𑀮𑀲𑀭𑀻𑀭𑀯𑀺𑀧𑁆𑀧𑀓𑀺𑀡𑁆𑀡𑀧𑀼𑀜𑁆𑀜𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀸𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀲𑁆𑀲𑀺𑀭𑀻𑀓𑀢𑀸𑀬 𑀯𑀺𑀓𑀲𑀺𑀢𑀓𑀫𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀧𑀝𑀺𑀫𑀡𑁆𑀟𑀺𑀢𑀫𑀺𑀯 𑀲𑀮𑀺𑀮𑀢𑀮𑀁 𑀢𑀸𑀭𑀸𑀕𑀡𑀭𑀲𑁆𑀫𑀺𑀚𑀸𑀮𑀯𑀺𑀲𑀤𑀯𑀺𑀧𑁆𑀨𑀼𑀭𑀺𑀢𑀲𑁄𑀪𑀸𑀲𑀫𑀼𑀚𑁆𑀚𑀮𑀺𑀢𑀫𑀺𑀯 𑀕𑀕𑀦𑀢𑀮𑀁 𑀦𑀻𑀮𑀧𑀻𑀢𑀮𑁄𑀳𑀺𑀢𑀸𑀤𑀺𑀪𑁂𑀤𑀯𑀺𑀘𑀺𑀢𑁆𑀭𑀯𑀡𑁆𑀡𑀭𑀁𑀲𑀺𑀯𑀺𑀦𑀤𑁆𑀥𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀢𑀸𑀬 ¶ 𑀲𑀜𑁆𑀘𑀸𑀧𑁆𑀧𑀪𑀸𑀦𑀼𑀭𑀸𑀕𑀇𑀦𑁆𑀤𑀥𑀦𑀼𑀯𑀺𑀚𑁆𑀚𑀼𑀮𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀦𑀸𑀦𑀸𑀯𑀺𑀭𑀸𑀕𑀯𑀺𑀫𑀮𑀓𑁂𑀢𑀼𑀫𑀸𑀮𑀸𑀲𑀫𑀼𑀚𑁆𑀚𑀮𑀺𑀢𑀘𑀸𑀭𑀼𑀫𑀢𑁆𑀣𑀓𑀲𑁄𑀪𑀁 𑀦𑀬𑀦𑀭𑀲𑀸𑀬𑀢𑀦𑀫𑀺𑀯 𑀩𑁆𑀭𑀳𑁆𑀫𑀤𑁂𑀯𑀫𑀦𑀼𑀚𑀦𑀸𑀕𑀬𑀓𑁆𑀔𑀕𑀡𑀸𑀦𑀁 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀓𑁆𑀔𑀺𑀧𑀽𑀚𑀁 𑀦𑀸𑀫 𑀅𑀓𑀸𑀲𑀺.

𑀭𑀸𑀚𑀸 𑀓𑀺𑀭 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀻𑀡𑀺𑀬𑁂𑀯 𑀲𑀁𑀯𑀘𑁆𑀙𑀭𑀸𑀦𑀺 𑀩𑀸𑀳𑀺𑀭𑀓𑀧𑀸𑀲𑀡𑁆𑀟𑀁 𑀧𑀭𑀺𑀕𑁆𑀕𑀡𑁆𑀳𑀺. 𑀘𑀢𑀼𑀢𑁆𑀣𑁂 𑀲𑀁𑀯𑀘𑁆𑀙𑀭𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺. 𑀢𑀲𑁆𑀲 𑀓𑀺𑀭 𑀧𑀺𑀢𑀸 𑀩𑀺𑀦𑁆𑀤𑀼𑀲𑀸𑀭𑁄 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀧𑀸𑀲𑀡𑁆𑀟𑀸𑀦𑀜𑁆𑀘 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀲𑁄𑀓𑁄𑀧𑀺 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀤𑀸𑀦𑀁 𑀅𑀢𑁆𑀢𑀦𑁄 𑀅𑀦𑁆𑀢𑁂𑀧𑀼𑀭𑁂 𑀢𑀣𑁂𑀯 𑀤𑀤𑀫𑀸𑀦𑁄 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑁂 𑀉𑀧𑀲𑀫𑀧𑀭𑀺𑀩𑀸𑀳𑀺𑀭𑁂𑀦 𑀆𑀘𑀸𑀭𑁂𑀦 𑀪𑀼𑀜𑁆𑀚𑀫𑀸𑀦𑁂 𑀅𑀲𑀁𑀬𑀢𑀺𑀦𑁆𑀤𑁆𑀭𑀺𑀬𑁂 𑀅𑀯𑀺𑀦𑀻𑀢𑀇𑀭𑀺𑀬𑀸𑀧𑀣𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀈𑀤𑀺𑀲𑀁 𑀤𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀸𑀥𑀼𑀲𑀫𑁆𑀫𑀢𑁂 ¶ 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀅𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀣, 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺. 𑀅𑀫𑀘𑁆𑀘𑀸 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑁂 𑀢𑁂 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀚𑀻𑀯𑀓𑀦𑀺𑀕𑀡𑁆𑀞𑀸𑀤𑀬𑁄 𑀆𑀦𑁂𑀢𑁆𑀯𑀸 ‘‘𑀇𑀫𑁂, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀅𑀭𑀳𑀦𑁆𑀢𑁄’’𑀢𑀺 𑀆𑀳𑀁𑀲𑀼.

𑀅𑀣 ¶ 𑀭𑀸𑀚𑀸 𑀅𑀦𑁆𑀢𑁂𑀧𑀼𑀭𑁂 𑀉𑀘𑁆𑀘𑀸𑀯𑀘𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀆𑀕𑀢𑀸𑀕𑀢𑁂 𑀆𑀳 𑁋 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀣𑀸’’𑀢𑀺 ¶ . 𑀢𑁂𑀲𑀼 𑀏𑀓𑀘𑁆𑀘𑁂 𑀪𑀤𑁆𑀤𑀧𑀻𑀞𑀓𑁂𑀲𑀼, 𑀏𑀓𑀘𑁆𑀘𑁂 𑀨𑀮𑀓𑀧𑀻𑀞𑀓𑁂𑀲𑀼 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀤𑀺𑀲𑁆𑀯𑀸 𑀭𑀸𑀚𑀸 ‘‘𑀦𑀢𑁆𑀣𑀺 𑀦𑁂𑀲𑀁 𑀅𑀦𑁆𑀢𑁄 𑀲𑀸𑀭𑁄’’𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀅𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀁. 𑀓𑁄 𑀧𑀦𑀸𑀬𑀁 𑀦𑀺𑀕𑁆𑀭𑁄𑀥𑁄 𑀦𑀸𑀫? 𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀓𑀺𑀭 𑀤𑀼𑀩𑁆𑀩𑀮𑀓𑀸𑀮𑁂𑀬𑁂𑀯 𑀅𑀲𑁄𑀓𑀓𑀼𑀫𑀸𑀭𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀉𑀚𑁆𑀚𑁂𑀦𑀻𑀭𑀚𑁆𑀚𑀁 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀦𑀕𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀁 𑀅𑀕𑁆𑀕𑀳𑁂𑀲𑀺. 𑀢𑀁𑀤𑀺𑀯𑀲𑀫𑁂𑀯 𑀲𑀼𑀫𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀲𑀼𑀫𑀦𑀸 𑀦𑀸𑀫 𑀤𑁂𑀯𑀻 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀘𑀡𑁆𑀟𑀸𑀮𑀕𑀸𑀫𑀁 𑀲𑀦𑁆𑀥𑀸𑀬 𑀕𑀘𑁆𑀙𑀦𑁆𑀢𑀻 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑀲𑁆𑀲 𑀕𑁂𑀳𑀢𑁄 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 ‘‘𑀇𑀢𑁄 𑀏𑀳𑀺, 𑀲𑀼𑀫𑀦𑁂’’𑀢𑀺 𑀯𑀤𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀫𑀻𑀧𑀁 𑀕𑀢𑀸. 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀏𑀓𑀁 𑀲𑀸𑀮𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 ‘‘𑀏𑀢𑁆𑀣 𑀯𑀲𑀸𑀳𑀻’’𑀢𑀺 𑀅𑀤𑀸𑀲𑀺. 𑀲𑀸 𑀢𑀁 𑀲𑀸𑀮𑀁 𑀧𑀸𑀯𑀺𑀲𑀺. 𑀕𑀢𑀤𑀺𑀯𑀲𑁂𑀬𑁂𑀯 𑀘 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑀸 𑀢𑀲𑁆𑀲 𑀦𑀺𑀕𑁆𑀭𑁄𑀥𑀤𑁂𑀯𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀦𑀺𑀕𑁆𑀭𑁄𑀥𑁄’’ 𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑁄 𑀤𑀺𑀝𑁆𑀞𑀤𑀺𑀯𑀲𑀢𑁄 𑀧𑀪𑀼𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀸𑀫𑀺𑀥𑀻𑀢𑀭𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀦𑀺𑀩𑀤𑁆𑀥𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀭𑀸𑀚𑀥𑀻𑀢𑀸 𑀢𑀢𑁆𑀣 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀲𑀺. 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄𑀧𑀺 ¶ 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑁄. 𑀢𑀤𑀸 𑀫𑀳𑀸𑀯𑀭𑀼𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀅𑀭𑀳𑀸 𑀤𑀸𑀭𑀓𑀲𑁆𑀲 𑀳𑁂𑀢𑀼𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀭𑀓𑁆𑀔𑀺𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀫𑀸𑀦𑁄 ‘‘𑀲𑀢𑁆𑀢𑀯𑀲𑁆𑀲𑀺𑀓𑁄 𑀤𑀸𑀦𑀺 𑀤𑀸𑀭𑀓𑁄, 𑀓𑀸𑀮𑁄 𑀦𑀁 𑀧𑀩𑁆𑀩𑀸𑀚𑁂𑀢𑀼’’𑀦𑁆𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀥𑀻𑀢𑀸𑀬 𑀆𑀭𑁄𑀘𑀸𑀧𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀓𑀼𑀫𑀸𑀭𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀲𑀭𑀻𑀭𑀁 𑀚𑀕𑁆𑀕𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀫𑀸𑀢𑀼𑀉𑀧𑀸𑀲𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀕𑀘𑁆𑀙𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺. 𑀫𑀸𑀢𑀼𑀦𑀺𑀯𑀸𑀲𑀦𑀝𑁆𑀞𑀸𑀦𑀜𑁆𑀘𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺.

𑀢𑁂𑀦 ¶ 𑀘 𑀲𑀫𑀬𑁂𑀦 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀲𑀻𑀳𑀧𑀜𑁆𑀚𑀭𑁂 𑀘𑀗𑁆𑀓𑀫𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀕𑁆𑀭𑁄𑀥𑁄 𑀭𑀸𑀚𑀗𑁆𑀕𑀡𑀁 𑀲𑀫𑁆𑀧𑀸𑀧𑀼𑀡𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀤𑀺𑀯𑀲𑀁 𑀭𑀸𑀚𑀸 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦’’𑀦𑁆𑀢𑀺. 𑀤𑀺𑀲𑁆𑀯𑀸 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀚𑀦𑁄 𑀲𑀩𑁆𑀩𑁄𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑁄. 𑀅𑀬𑀁 𑀧𑀦 𑀤𑀸𑀭𑀓𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀢𑀺𑀯𑀺𑀬 𑀘𑀲𑁆𑀲 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀜𑁆𑀘 𑀲𑁄𑀪𑀢𑀺. 𑀅𑀤𑁆𑀥𑀸 𑀏𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀜𑁆𑀜𑁄 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀲𑀸𑀫𑀡𑁂𑀭𑁂 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀧𑁂𑀫𑀁 𑀲𑀡𑁆𑀞𑀳𑀺. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀳𑀺 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀏𑀲 𑀭𑀜𑁆𑀜𑁄 𑀚𑁂𑀝𑁆𑀞𑀪𑀸𑀢𑀸 𑀯𑀸𑀡𑀺𑀚𑀓𑁄 𑀅𑀳𑁄𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀧𑀼𑀩𑁆𑀩𑁂 𑀯 ¶ 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁 𑀯 𑀬𑀣𑁄𑀤𑀓𑁂’’𑀢𑀺. (𑀚𑀸. 𑁧.𑁨.𑁧𑁭𑁪);

𑀅𑀣 𑀭𑀸𑀚𑀸 𑀲𑀜𑁆𑀚𑀸𑀢𑀧𑁂𑀫𑁄 𑀲𑀩𑀳𑀼𑀫𑀸𑀦𑁄 ‘‘𑀏𑀢𑀁 𑀲𑀸𑀫𑀡𑁂𑀭𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. ‘‘𑀢𑁂 𑀅𑀢𑀺𑀘𑀺𑀭𑀸𑀬𑀦𑁆𑀢𑀻’’𑀢𑀺 𑀧𑀼𑀦 𑀤𑁆𑀯𑁂 𑀢𑀬𑁄 𑀧𑁂𑀲𑁂𑀲𑀺 𑁋 ‘‘𑀢𑀼𑀭𑀺𑀢𑀁 𑀆𑀕𑀘𑁆𑀙𑀢𑀽’’𑀢𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀏𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀢𑀺𑀭𑀽𑀧𑀫𑀸𑀲𑀦𑀁 𑀜𑀢𑁆𑀯𑀸 ‘‘𑀦𑀺𑀲𑀻𑀤𑀣𑀸’’𑀢𑀺 𑀆𑀳. 𑀲𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽’’𑀢𑀺 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀭𑀸𑀚𑀧𑀮𑁆𑀮𑀗𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀸𑀬 𑀭𑀜𑁆𑀜𑁄 𑀆𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀁 𑀧𑀮𑁆𑀮𑀗𑁆𑀓𑀲𑀫𑀻𑀧𑀁 𑀉𑀧𑀕𑀘𑁆𑀙𑀦𑁆𑀢𑀁𑀬𑁂𑀯 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚𑁂𑀯 𑀤𑀸𑀦𑀺 𑀅𑀬𑀁 𑀲𑀸𑀫𑀡𑁂𑀭𑁄 𑀇𑀫𑀲𑁆𑀲 𑀕𑁂𑀳𑀲𑁆𑀲 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀡𑁂𑀭𑁄 𑀭𑀜𑁆𑀜𑁄 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀲𑀩𑁆𑀩𑀁 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀯𑀺𑀓𑀢𑀺𑀁 ¶ 𑀉𑀧𑀦𑀸𑀫𑁂𑀲𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀬𑀸𑀧𑀦𑀻𑀬𑀫𑀢𑁆𑀢𑀓𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀆𑀳 𑁋 ‘‘𑀲𑀢𑁆𑀣𑀸𑀭𑀸 𑀢𑀼𑀫𑁆𑀳𑀸𑀓𑀁 𑀤𑀺𑀦𑁆𑀦𑁄𑀯𑀸𑀤𑀁 𑀚𑀸𑀦𑀸𑀣𑀸’’𑀢𑀺? ‘‘𑀚𑀸𑀦𑀸𑀫𑀺, 𑀫𑀳𑀸𑀭𑀸𑀚, 𑀏𑀓𑀤𑁂𑀲𑁂𑀦𑀸’’𑀢𑀺. ‘‘𑀢𑀸𑀢, 𑀫𑀬𑁆𑀳𑀫𑁆𑀧𑀺 𑀦𑀁 𑀓𑀣𑁂𑀳𑀻’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀅𑀦𑀼𑀭𑀽𑀧𑀁 𑀥𑀫𑁆𑀫𑀧𑀤𑁂 𑀅𑀧𑁆𑀧𑀫𑀸𑀤𑀯𑀕𑁆𑀕𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀅𑀪𑀸𑀲𑀺.

𑀭𑀸𑀚𑀸 𑀧𑀦 ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 𑀲𑀼𑀢𑁆𑀯𑀸𑀯 ‘‘𑀅𑀜𑁆𑀜𑀸𑀢𑀁, 𑀢𑀸𑀢, 𑀧𑀭𑀺𑀬𑁄𑀲𑀸𑀧𑁂𑀳𑀻’’𑀢𑀺 𑀆𑀳. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀘 ‘‘𑀅𑀝𑁆𑀞 𑀢𑁂, 𑀢𑀸𑀢, 𑀥𑀼𑀯𑀪𑀢𑁆𑀢𑀸𑀦𑀺 𑀤𑀫𑁆𑀫𑀻’’𑀢𑀺 𑀆𑀳. 𑀲𑀸𑀫𑀡𑁂𑀭𑁄 𑀆𑀳 𑁋 ‘‘𑀏𑀢𑀸𑀦𑀺 𑀅𑀳𑀁 𑀉𑀧𑀚𑁆𑀛𑀸𑀬𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀉𑀧𑀚𑁆𑀛𑀸𑀬𑁄 𑀦𑀸𑀫𑀸’’𑀢𑀺? ‘‘𑀯𑀚𑁆𑀚𑀸𑀯𑀚𑁆𑀚𑀁 𑀤𑀺𑀲𑁆𑀯𑀸 𑀘𑁄𑀤𑁂𑀢𑀸 𑀲𑀸𑀭𑁂𑀢𑀸 𑀘, 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀜𑁆𑀜𑀸𑀦𑀺𑀧𑀺 𑀢𑁂, 𑀢𑀸𑀢, 𑀅𑀝𑁆𑀞 𑀤𑀫𑁆𑀫𑀻’’𑀢𑀺. ‘‘𑀏𑀢𑀸𑀦𑀺 ¶ 𑀆𑀘𑀭𑀺𑀬𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀆𑀘𑀭𑀺𑀬𑁄 𑀦𑀸𑀫𑀸’’𑀢𑀺? ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀺𑀓𑁆𑀔𑀺𑀢𑀩𑁆𑀩𑀓𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀅𑀜𑁆𑀜𑀸𑀦𑀺𑀧𑀺 𑀢𑁂 𑀅𑀝𑁆𑀞 𑀤𑀫𑁆𑀫𑀻’’𑀢𑀺. ‘‘𑀏𑀢𑀸𑀦𑀺𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁄 𑀅𑀬𑀁, 𑀢𑀸𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀸𑀫𑀸’’𑀢𑀺? ‘‘𑀬𑀁 𑀦𑀺𑀲𑁆𑀲𑀸𑀬 ¶ , 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀜𑁆𑀘 𑀫𑀫 𑀘 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘𑀸’’𑀢𑀺. 𑀭𑀸𑀚𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀼𑀝𑁆𑀞𑀘𑀺𑀢𑁆𑀢𑁄 𑀆𑀳 𑁋 ‘‘𑀅𑀜𑁆𑀜𑀸𑀦𑀺𑀧𑀺 𑀢𑁂, 𑀢𑀸𑀢, 𑀅𑀝𑁆𑀞 𑀤𑀫𑁆𑀫𑀻’’𑀢𑀺. 𑀲𑀸𑀫𑀡𑁂𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑁆𑀯𑀢𑁆𑀢𑀺𑀁𑀲 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀭𑀸𑀚𑀸 ‘‘𑀅𑀜𑁆𑀜𑁂𑀧𑀺 𑀤𑁆𑀯𑀢𑁆𑀢𑀺𑀁𑀲 𑀪𑀺𑀓𑁆𑀔𑀽 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀟𑁆𑀠𑀸𑀧𑁂𑀦𑁆𑀢𑁄 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁 𑀪𑀢𑁆𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁂 𑀕𑀢𑁂𑀦𑁂𑀯 𑀧𑀲𑀸𑀤𑁂𑀦. 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄𑀧𑀺 𑀭𑀸𑀚𑀸𑀦𑀁 𑀲𑀧𑀭𑀺𑀲𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑁄𑀣𑀼𑀚𑁆𑀚𑀦𑀺𑀓𑁂𑀦 𑀧𑀲𑀸𑀤𑁂𑀦 𑀅𑀘𑀮𑀧𑁆𑀧𑀲𑀸𑀤𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀧𑀼𑀦 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀲𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀘𑁂𑀢𑀺𑀬𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦.

𑀏𑀓𑀤𑀺𑀯𑀲𑀁 𑀓𑀺𑀭 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀚𑁆𑀚 𑀲𑀗𑁆𑀖𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 ¶ 𑁋 ‘‘𑀪𑀦𑁆𑀢𑁂, 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀦𑀸𑀫 𑀓𑀺𑀢𑁆𑀢𑀓𑁄 𑀳𑁄𑀢𑀻’’𑀢𑀺? ‘‘𑀅𑀗𑁆𑀕𑀢𑁄, 𑀫𑀳𑀸𑀭𑀸𑀚, 𑀦𑀯𑀗𑁆𑀕𑀸𑀦𑀺, 𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺. 𑀭𑀸𑀚𑀸 𑀥𑀫𑁆𑀫𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀏𑀓𑁂𑀓𑀁 𑀥𑀫𑁆𑀫𑀓𑁆𑀔𑀦𑁆𑀥𑀁 𑀏𑀓𑁂𑀓𑀯𑀺𑀳𑀸𑀭𑁂𑀦 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀫𑁂𑀯 ¶ 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀏𑀣, 𑀪𑀡𑁂, 𑀏𑀓𑀫𑁂𑀓𑀲𑁆𑀫𑀺𑀁 𑀦𑀕𑀭𑁂 𑀏𑀓𑀫𑁂𑀓𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀦𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀣𑀸’’𑀢𑀺. 𑀲𑀬𑀜𑁆𑀘 𑀅𑀲𑁄𑀓𑀸𑀭𑀸𑀫𑁂 𑀅𑀲𑁄𑀓𑀫𑀳𑀸𑀯𑀺𑀳𑀸𑀭𑀢𑁆𑀣𑀸𑀬 𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺. 𑀲𑀗𑁆𑀖𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀁 𑀦𑀸𑀫 𑀫𑀳𑀺𑀤𑁆𑀥𑀺𑀓𑀁 𑀫𑀳𑀸𑀦𑀼𑀪𑀸𑀯𑀁 𑀔𑀻𑀡𑀸𑀲𑀯𑀁 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑀁 𑀅𑀤𑀸𑀲𑀺. 𑀣𑁂𑀭𑁄 𑀬𑀁 𑀬𑀁 𑀦 𑀦𑀺𑀝𑁆𑀞𑀸𑀢𑀺 𑀢𑀁 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀝𑁆𑀞𑀸𑀧𑁂𑀲𑀺. 𑀏𑀯𑀫𑁆𑀧𑀺 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀯𑀺𑀳𑀸𑀭𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀏𑀓𑀤𑀺𑀯𑀲𑀫𑁂𑀯 𑀲𑀩𑁆𑀩𑀦𑀕𑀭𑁂𑀳𑀺 𑀧𑀡𑁆𑀡𑀸𑀦𑀺 𑀆𑀕𑀫𑀺𑀁𑀲𑀼.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀺𑀝𑁆𑀞𑀺𑀢𑀸𑀦𑀺, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀻’’𑀢𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀇𑀢𑁄 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀯𑀺𑀳𑀸𑀭𑀫𑀳𑁄 𑀪𑀯𑀺𑀲𑁆𑀲𑀢𑀺. 𑀲𑀩𑁆𑀩𑁂 𑀅𑀝𑁆𑀞 𑀲𑀻𑀮𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂 𑀘 𑀩𑀳𑀺𑀦𑀕𑀭𑁂 𑀘 𑀯𑀺𑀳𑀸𑀭𑀫𑀳𑀁 𑀧𑀝𑀺𑀬𑀸𑀤𑁂𑀦𑁆𑀢𑀽’’𑀢𑀺. 𑀢𑀢𑁄 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸𑀬 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀤𑁂𑀯𑀮𑁄𑀓𑁂 𑀅𑀫𑀭𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀲𑀺𑀭𑀺𑀢𑁄 𑀅𑀥𑀺𑀓𑀢𑀭𑀲𑀲𑁆𑀲𑀺𑀭𑀻𑀓𑀁 𑀯𑀺𑀬 𑀦𑀕𑀭𑀁 𑀓𑀸𑀢𑀼𑀓𑀸𑀫𑁂𑀦 𑀉𑀲𑁆𑀲𑀸𑀳𑀚𑀸𑀢𑁂𑀦 𑀫𑀳𑀸𑀚𑀦𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀦𑀕𑀭𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀜𑁆𑀘 ¶ 𑀔𑀡𑁂 𑀲𑀦𑁆𑀦𑀺𑀧𑀢𑀺𑀢𑀸 𑀅𑀲𑀻𑀢𑀺 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀳𑁂𑀲𑀼𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀙𑀦𑁆𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀥𑀺𑀓𑀸𑀭𑀁 𑀅𑀦𑀯𑀲𑁂𑀲𑀁 𑀧𑀲𑁆𑀲𑁂𑀬𑁆𑀬 𑀅𑀢𑀺𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀢𑀢𑁄 ¶ 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀁𑀲𑀼. 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑁂 𑀞𑀺𑀢𑁄𑀯 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀲𑀫𑀦𑁆𑀢𑀢𑁄 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀧𑀲𑁆𑀲𑀢𑀺 𑀘𑀢𑀼𑀭𑀸𑀲𑀻𑀢𑀺𑀜𑁆𑀘 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀉𑀴𑀸𑀭𑀸𑀬 𑀯𑀺𑀳𑀸𑀭𑀫𑀳𑀧𑀽𑀚𑀸𑀬 𑀯𑀺𑀭𑁄𑀘𑀫𑀸𑀦𑀸𑀦𑀺. 𑀲𑁄 𑀢𑀁 𑀯𑀺𑀪𑀽𑀢𑀺𑀁 𑀧𑀲𑁆𑀲𑀫𑀸𑀦𑁄 𑀉𑀴𑀸𑀭𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 ‘‘𑀅𑀢𑁆𑀣𑀺 𑀧𑀦 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀏𑀯𑀭𑀽𑀧𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀮𑁄𑀓𑀦𑀸𑀣𑀲𑁆𑀲 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀓𑁄 𑀫𑀳𑀸𑀧𑀭𑀺𑀘𑁆𑀘𑀸𑀕𑀁 𑀧𑀭𑀺𑀘𑁆𑀘𑀚𑀺. 𑀓𑀲𑁆𑀲 ¶ 𑀧𑀭𑀺𑀘𑁆𑀘𑀸𑀕𑁄 𑀫𑀳𑀦𑁆𑀢𑁄𑀢𑀺? 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺. 𑀣𑁂𑀭𑁄 𑀆𑀳 𑁋 ‘‘𑀫𑀳𑀸𑀭𑀸𑀚, 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀧𑀘𑁆𑀘𑀬𑀤𑀸𑀬𑀓𑁄 𑀦𑀸𑀫 𑀢𑀬𑀸 𑀲𑀤𑀺𑀲𑁄 𑀥𑀭𑀫𑀸𑀦𑁂𑀧𑀺 𑀢𑀣𑀸𑀕𑀢𑁂 𑀦 𑀓𑁄𑀘𑀺 𑀅𑀳𑁄𑀲𑀺, 𑀢𑀯𑁂𑀯 𑀧𑀭𑀺𑀘𑁆𑀘𑀸𑀕𑁄 𑀫𑀳𑀸’’𑀢𑀺. 𑀭𑀸𑀚𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀴𑀸𑀭𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀢𑁆𑀣𑀺 𑀓𑀺𑀭 𑀫𑀬𑀸 𑀲𑀤𑀺𑀲𑁄 𑀧𑀘𑁆𑀘𑀬𑀤𑀸𑀬𑀓𑁄, 𑀫𑀬𑁆𑀳𑀁 𑀓𑀺𑀭 𑀧𑀭𑀺𑀘𑁆𑀘𑀸𑀕𑁄 𑀫𑀳𑀸, 𑀅𑀳𑀁 𑀓𑀺𑀭 𑀤𑁂𑀬𑁆𑀬𑀥𑀫𑁆𑀫𑁂𑀦 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀸𑀫𑀺. 𑀓𑀺𑀁 𑀧𑀦𑀸𑀳𑀁 𑀏𑀯𑀁 𑀲𑀢𑀺 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀫𑀺, 𑀦 𑀳𑁄𑀫𑀻’’𑀢𑀺. 𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀪𑀯𑀸𑀫𑀺 𑀦𑀼 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄’’𑀢𑀺?

𑀢𑀢𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀭𑀜𑁆𑀜𑁄 𑀇𑀤𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀧𑀼𑀢𑁆𑀢𑀲𑁆𑀲 𑀫𑀳𑀺𑀦𑁆𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀲𑀘𑁂 𑀅𑀬𑀁 𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀲𑁆𑀲𑀢𑀺 𑀲𑀸𑀲𑀦𑀲𑁆𑀲 𑀅𑀢𑀺𑀯𑀺𑀬 𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀏𑀢𑁆𑀢𑀸𑀯𑀢𑀸 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀺; 𑀅𑀧𑀺𑀘 𑀔𑁄 𑀧𑀘𑁆𑀘𑀬𑀤𑀸𑀬𑀓𑁄𑀢𑀺 𑀯𑀸 𑀉𑀧𑀝𑁆𑀞𑀸𑀓𑁄𑀢𑀺 𑀯𑀸 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑁄𑀧𑀺 𑀳𑀺, 𑀫𑀳𑀸𑀭𑀸𑀚, 𑀧𑀣𑀯𑀺𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀫𑀸𑀡𑀁 𑀧𑀘𑁆𑀘𑀬𑀭𑀸𑀲𑀺𑀁 𑀤𑀤𑁂𑀬𑁆𑀬 𑀲𑁄𑀧𑀺 ‘𑀲𑀸𑀲𑀦𑁂 𑀤𑀸𑀬𑀸𑀤𑁄’𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺. ‘‘𑀅𑀣 𑀓𑀣𑀁 𑀘𑀭𑀳𑀺, 𑀪𑀦𑁆𑀢𑁂, 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀻’’𑀢𑀺? ‘‘𑀬𑁄 𑀳𑀺 𑀓𑁄𑀘𑀺, 𑀫𑀳𑀸𑀭𑀸𑀚, 𑀅𑀟𑁆𑀠𑁄 ¶ 𑀯𑀸 𑀤𑀮𑀺𑀤𑁆𑀤𑁄 𑀯𑀸 𑀅𑀢𑁆𑀢𑀦𑁄 𑀑𑀭𑀲𑀁 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚, 𑀤𑀸𑀬𑀸𑀤𑁄 𑀲𑀸𑀲𑀦𑀲𑁆𑀲𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀲𑁄𑀓𑁄 𑀭𑀸𑀚𑀸 ‘‘𑀅𑀳𑀁 𑀓𑀺𑀭 𑀏𑀯𑀭𑀽𑀧𑀁 𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸𑀧𑀺 𑀦𑁂𑀯 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀲𑀸𑀲𑀦𑁂 𑀤𑀸𑀬𑀸𑀤𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀅𑀤𑁆𑀤𑀲 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀅𑀯𑀺𑀤𑀽𑀭𑁂 𑀞𑀺𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀜𑁆𑀘𑀸𑀧𑀺 𑀅𑀳𑀁 𑀇𑀫𑀁 𑀓𑀼𑀫𑀸𑀭𑀁 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺 𑀑𑀧𑀭𑀚𑁆𑀚𑁂 𑀞𑀧𑁂𑀢𑀼𑀓𑀸𑀫𑁄, 𑀅𑀣 𑀔𑁄 𑀑𑀧𑀭𑀚𑁆𑀚𑀢𑁄𑀧𑀺 𑀧𑀩𑁆𑀩𑀚𑁆𑀚𑀸𑀯 ¶ 𑀉𑀢𑁆𑀢𑀫𑀸’’𑀢𑀺. 𑀢𑀢𑁄 𑀓𑀼𑀫𑀸𑀭𑀁 𑀆𑀳 𑁋 ‘‘𑀲𑀓𑁆𑀔𑀲𑀺 𑀢𑁆𑀯𑀁, 𑀢𑀸𑀢, 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺? 𑀓𑀼𑀫𑀸𑀭𑁄 𑀧𑀓𑀢𑀺𑀬𑀸𑀧𑀺 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀯 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑀺𑀯𑀺𑀬 𑀧𑀸𑀫𑁄𑀚𑁆𑀚𑀚𑀸𑀢𑁄 𑀳𑀼𑀢𑁆𑀯𑀸 𑀆𑀳 𑁋 ‘‘𑀧𑀩𑁆𑀩𑀚𑀸𑀫𑀺, 𑀤𑁂𑀯, 𑀫𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀼𑀫𑁆𑀳𑁂 𑀲𑀸𑀲𑀦𑀤𑀸𑀬𑀸𑀤𑀸 𑀳𑁄𑀣𑀸’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀥𑀻𑀢𑀸 𑀲𑀗𑁆𑀖𑀫𑀺𑀢𑁆𑀢𑀸𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀺𑀢𑀸 𑀳𑁄𑀢𑀺. 𑀢𑀲𑁆𑀲𑀸 𑀘 𑀲𑀸𑀫𑀺𑀓𑁄 𑀅𑀕𑁆𑀕𑀺𑀩𑁆𑀭𑀳𑁆𑀫𑀸 𑀦𑀸𑀫 𑀓𑀼𑀫𑀸𑀭𑁄 𑀬𑀼𑀯𑀭𑀸𑀚𑁂𑀦 𑀢𑀺𑀲𑁆𑀲𑀓𑀼𑀫𑀸𑀭𑁂𑀦 ¶ 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑁆𑀯𑀫𑁆𑀧𑀺, 𑀅𑀫𑁆𑀫, 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀲𑀻’’𑀢𑀺? ‘‘𑀲𑀸𑀥𑀼, 𑀢𑀸𑀢, 𑀲𑀓𑁆𑀓𑁄𑀫𑀻’’𑀢𑀺. 𑀭𑀸𑀚𑀸 𑀧𑀼𑀢𑁆𑀢𑀸𑀦𑀁 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀳𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀏𑀢𑀤𑀯𑁄𑀘 𑁋 ‘‘𑀪𑀦𑁆𑀢𑁂, 𑀇𑀫𑁂 𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀁 𑀲𑀸𑀲𑀦𑁂 𑀤𑀸𑀬𑀸𑀤𑀁 𑀓𑀭𑁄𑀣𑀸’’𑀢𑀺. 𑀲𑀗𑁆𑀖𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀼𑀫𑀸𑀭𑀁 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁂𑀦 𑀫𑀳𑀸𑀤𑁂𑀯𑀢𑁆𑀣𑁂𑀭𑁂𑀦 𑀘 𑀆𑀘𑀭𑀺𑀬𑁂𑀦 𑀧𑀩𑁆𑀩𑀸𑀚𑁂𑀲𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁂𑀦 𑀆𑀘𑀭𑀺𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑀤𑀸 𑀓𑀺𑀭 𑀓𑀼𑀫𑀸𑀭𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀯 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀉𑀧𑀲𑀫𑁆𑀧𑀤𑀲𑀻𑀫𑀫𑀡𑁆𑀟𑀮𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀗𑁆𑀖𑀫𑀺𑀢𑁆𑀢𑀸𑀬𑀧𑀺 𑀭𑀸𑀚𑀥𑀻𑀢𑀸𑀬 𑀆𑀘𑀭𑀺𑀬𑀸 𑀆𑀬𑀼𑀧𑀸𑀮𑀺𑀢𑁆𑀣𑁂𑀭𑀻 𑀦𑀸𑀫, 𑀉𑀧𑀚𑁆𑀛𑀸𑀬𑀸 𑀧𑀦 𑀥𑀫𑁆𑀫𑀧𑀸𑀮𑀺𑀢𑁆𑀣𑁂𑀭𑀻 𑀦𑀸𑀫 𑀅𑀳𑁄𑀲𑀺. 𑀢𑀤𑀸 ¶ 𑀲𑀗𑁆𑀖𑀫𑀺𑀢𑁆𑀢𑀸 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀳𑁄𑀢𑀺. 𑀢𑀁 𑀧𑀩𑁆𑀩𑀚𑀺𑀢𑀫𑀢𑁆𑀢𑀁 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀉𑀪𑀺𑀦𑁆𑀦𑀁 𑀧𑀩𑁆𑀩𑀚𑀺𑀢𑀓𑀸𑀮𑁂 𑀭𑀸𑀚𑀸 𑀙𑀩𑁆𑀩𑀲𑁆𑀲𑀸𑀪𑀺𑀲𑁂𑀓𑁄 𑀳𑁄𑀢𑀺.

𑀅𑀣 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑀢𑁄 𑀧𑀪𑀼𑀢𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀭𑀺𑀬𑀸𑀧𑀼𑀡𑀦𑁆𑀢𑁄 𑀤𑁆𑀯𑁂𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑀁 𑀢𑀺𑀧𑀺𑀝𑀓𑀲𑀗𑁆𑀕𑀳𑀺𑀢𑀁 𑀲𑀸𑀝𑁆𑀞𑀓𑀣𑀁 𑀲𑀩𑁆𑀩𑀁 𑀣𑁂𑀭𑀯𑀸𑀤𑀁 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀫𑁄𑀓𑁆𑀔𑁄 𑀅𑀳𑁄𑀲𑀺. 𑀢𑀤𑀸 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀦𑀯𑀯𑀲𑁆𑀲𑀸𑀪𑀺𑀲𑁂𑀓𑁄 𑀳𑁄𑀢𑀺. 𑀭𑀜𑁆𑀜𑁄 𑀧𑀦 𑀅𑀝𑁆𑀞𑀯𑀲𑁆𑀲𑀸𑀪𑀺𑀲𑁂𑀓𑀓𑀸𑀮𑁂𑀬𑁂𑀯 𑀓𑁄𑀦𑁆𑀢𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀩𑁆𑀬𑀸𑀥𑀺𑀧𑀝𑀺𑀓𑀫𑁆𑀫𑀢𑁆𑀣𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀆𑀳𑀺𑀡𑁆𑀟𑀦𑁆𑀢𑁄 𑀧𑀲𑀢𑀫𑀢𑁆𑀢𑀁 𑀲𑀧𑁆𑀧𑀺𑀁 𑀅𑀮𑀪𑀺𑀢𑁆𑀯𑀸 𑀩𑁆𑀬𑀸𑀥𑀺𑀩𑀮𑁂𑀦 𑀧𑀭𑀺𑀓𑁆𑀔𑀻𑀡𑀸𑀬𑀼𑀲𑀗𑁆𑀔𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀬𑀺 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀏𑀯𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸’’𑀢𑀺 𑀦𑀕𑀭𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺.

𑀢𑁂𑀦 𑀓𑀺𑀭 𑀲𑀫𑀬𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀪𑀸𑀬𑀁 𑀲𑀢𑀲𑀳𑀲𑁆𑀲𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀭𑀜𑁆𑀜𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁄 𑀭𑀸𑀚𑀸 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀤𑁂𑀯𑀲𑀺𑀓𑀁 𑀲𑀢𑀲𑀳𑀲𑁆𑀲𑀁 𑀯𑀺𑀲𑀚𑁆𑀚𑁂𑀲𑀺. 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑁂 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀦𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁 ¶ . 𑀥𑀫𑁆𑀫𑀲𑁆𑀲 ¶ 𑀲𑀢𑀲𑀳𑀲𑁆𑀲𑀁, 𑀢𑀁 𑀥𑀫𑁆𑀫𑀥𑀭𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀉𑀧𑀦𑀻𑀬𑀢𑀺. 𑀲𑀗𑁆𑀖𑀲𑁆𑀲 𑀲𑀢𑀲𑀳𑀲𑁆𑀲𑀁, 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁. 𑀏𑀯𑀁 𑀲𑀸𑀲𑀦𑁂 𑀉𑀴𑀸𑀭𑁄 𑀮𑀸𑀪𑀲𑀓𑁆𑀓𑀸𑀭𑁄 ¶ 𑀦𑀺𑀩𑁆𑀩𑀢𑁆𑀢𑀺.

𑀢𑀺𑀢𑁆𑀣𑀺𑀬𑀸 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀅𑀦𑁆𑀢𑀫𑀲𑁄 𑀖𑀸𑀲𑀘𑁆𑀙𑀸𑀤𑀦𑀫𑁆𑀧𑀺 𑀅𑀮𑀪𑀦𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄’’𑀢𑀺 𑀤𑀻𑀧𑁂𑀦𑁆𑀢𑀺. 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸𑀧𑀺 𑀲𑀬𑀫𑁂𑀯 𑀫𑀼𑀡𑁆𑀟𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑁂𑀲𑀼 𑀯𑀺𑀘𑀭𑀦𑁆𑀢𑀸 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀫𑁆𑀧𑀺 𑀕𑀡𑀓𑀫𑁆𑀫𑀫𑁆𑀧𑀺 𑀧𑀯𑀺𑀲𑀦𑁆𑀢𑀺. 𑀪𑀺𑀓𑁆𑀔𑀽 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀦 𑀓𑀭𑁄𑀦𑁆𑀢𑀺. 𑀢𑀤𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀉𑀧𑁆𑀧𑀦𑁆𑀦𑀁 𑀤𑀸𑀦𑀺 𑀇𑀤𑀁 𑀅𑀥𑀺𑀓𑀭𑀡𑀁, 𑀢𑀁 𑀦𑀘𑀺𑀭𑀲𑁆𑀲𑁂𑀯 𑀓𑀓𑁆𑀔𑀴𑀁 𑀪𑀯𑀺𑀲𑁆𑀲𑀢𑀺. 𑀦 𑀔𑁄 𑀧𑀦𑁂𑀢𑀁 𑀲𑀓𑁆𑀓𑀸 𑀇𑀫𑁂𑀲𑀁 𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀕𑀡𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀨𑀸𑀲𑀼𑀯𑀺𑀳𑀸𑀭𑁂𑀦 𑀯𑀺𑀳𑀭𑀺𑀢𑀼𑀓𑀸𑀫𑁄 𑀅𑀳𑁄𑀕𑀗𑁆𑀕𑀧𑀩𑁆𑀩𑀢𑀁 𑀅𑀕𑀫𑀸𑀲𑀺. 𑀢𑁂𑀧𑀺 𑀔𑁄 𑀢𑀺𑀢𑁆𑀣𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀺 𑀥𑀫𑁆𑀫𑀯𑀺𑀦𑀬𑀸𑀦𑀼𑀮𑁄𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀡𑁆𑀞𑀳𑀦𑁆𑀢𑀸 𑀅𑀦𑁂𑀓𑀭𑀽𑀧𑀁 𑀲𑀸𑀲𑀦𑀲𑁆𑀲 𑀅𑀩𑁆𑀩𑀼𑀤𑀜𑁆𑀘 𑀫𑀮𑀜𑁆𑀘 𑀓𑀡𑁆𑀝𑀓𑀜𑁆𑀘 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀓𑁂𑀘𑀺 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀸𑀢𑀧𑁂𑀦 𑀢𑀸𑀧𑁂𑀦𑁆𑀢𑀺, 𑀓𑁂𑀘𑀺 𑀆𑀤𑀺𑀘𑁆𑀘𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑁂𑀘𑀺 ‘‘𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀯𑁄𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀅𑀓𑀸𑀲𑀺. 𑀅𑀲𑁄𑀓𑀸𑀭𑀸𑀫𑁂 𑀲𑀢𑁆𑀢𑀯𑀲𑁆𑀲𑀸𑀦𑀺 𑀉𑀧𑁄𑀲𑀣𑁄 𑀉𑀧𑀘𑁆𑀙𑀺𑀚𑁆𑀚𑀺. 𑀭𑀜𑁆𑀜𑁄𑀧𑀺 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀏𑀓𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’’𑀢𑀺. 𑀅𑀫𑀘𑁆𑀘𑁄 𑀭𑀸𑀚𑀸𑀦𑀁 𑀧𑀝𑀺𑀧𑀼𑀘𑁆𑀙𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀅𑀜𑁆𑀜𑁂 𑀅𑀫𑀘𑁆𑀘𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀭𑀸𑀚𑀸 𑀫𑀁 ‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑀳𑀺𑀡𑀺. 𑀓𑀣𑀁 𑀦𑀼 𑀔𑁄 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀻’’𑀢𑀺? 𑀢𑁂 𑀆𑀳𑀁𑀲𑀼 ¶ 𑁋 ‘‘𑀫𑀬𑀁 𑀏𑀯𑀁 𑀲𑀮𑁆𑀮𑀓𑁆𑀔𑁂𑀫 𑁋 ‘𑀬𑀣𑀸 𑀦𑀸𑀫 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀸 𑀘𑁄𑀭𑁂 𑀖𑀸𑀢𑁂𑀦𑁆𑀢𑀺, 𑀏𑀯𑀫𑁂𑀯 𑀬𑁂 𑀉𑀧𑁄𑀲𑀣𑀁 𑀦 𑀓𑀭𑁄𑀦𑁆𑀢𑀺, 𑀢𑁂 𑀫𑀸𑀭𑁂𑀢𑀼𑀓𑀸𑀫𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’’𑀢𑀺. 𑀅𑀣 𑀲𑁄 𑀅𑀫𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀳 𑁋 ‘‘𑀅𑀳𑀁 𑀭𑀜𑁆𑀜𑀸 ‘𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑁂𑀲𑀺𑀢𑁄. 𑀓𑀭𑁄𑀣 𑀤𑀸𑀦𑀺, 𑀪𑀦𑁆𑀢𑁂, 𑀉𑀧𑁄𑀲𑀣’’𑀦𑁆𑀢𑀺. 𑀪𑀺𑀓𑁆𑀔𑀽 ‘‘𑀦 𑀫𑀬𑀁 𑀢𑀺𑀢𑁆𑀣𑀺𑀬𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑁄𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀅𑀫𑀘𑁆𑀘𑁄 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀅𑀲𑀺𑀦𑀸 𑀲𑀻𑀲𑀸𑀦𑀺 𑀧𑀸𑀢𑁂𑀢𑀼𑀁 𑀆𑀭𑀤𑁆𑀥𑁄.

𑀅𑀤𑁆𑀤𑀲𑀸 ¶ 𑀔𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀅𑀫𑀘𑁆𑀘𑀁 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀁. 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀦 𑀬𑁄 𑀯𑀸 𑀲𑁄 𑀯𑀸, 𑀭𑀜𑁆𑀜𑁄 𑀏𑀓𑀫𑀸𑀢𑀺𑀓𑁄 𑀪𑀸𑀢𑀸 𑀢𑀺𑀲𑁆𑀲𑀓𑀼𑀫𑀸𑀭𑁄 𑀦𑀸𑀫, 𑀢𑀁 𑀓𑀺𑀭 𑀭𑀸𑀚𑀸 𑀧𑀢𑁆𑀢𑀸𑀪𑀺𑀲𑁂𑀓𑁄 𑀑𑀧𑀭𑀚𑁆𑀚𑁂 𑀞𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀦𑀘𑀸𑀭𑀁 𑀕𑀢𑁄 𑀅𑀤𑁆𑀤𑀲 𑀫𑀳𑀦𑁆𑀢𑀁 𑀫𑀺𑀕𑀲𑀗𑁆𑀖𑀁 𑀘𑀺𑀢𑁆𑀢𑀓𑀻𑀴𑀸𑀬 𑀓𑀻𑀴𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀢𑀸𑀯 𑀢𑀺𑀡𑀪𑀓𑁆𑀔𑀸 𑀫𑀺𑀕𑀸 𑀏𑀯𑀁 𑀓𑀻𑀴𑀦𑁆𑀢𑀺, 𑀇𑀫𑁂 𑀧𑀦 𑀲𑀫𑀡𑀸 ¶ 𑀭𑀸𑀚𑀓𑀼𑀮𑁂 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀤𑀼𑀓𑀸𑀲𑀼 𑀲𑁂𑀬𑁆𑀬𑀸𑀲𑀼 𑀲𑀬𑀫𑀸𑀦𑀸 𑀓𑀺𑀁 𑀦𑀸𑀫 𑀓𑀻𑀴𑀺𑀢𑀁 𑀦 𑀓𑀻𑀴𑀺𑀲𑁆𑀲𑀦𑁆𑀢𑀻’’𑀢𑀺! 𑀲𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀅𑀢𑁆𑀢𑀦𑁄 𑀯𑀺𑀢𑀓𑁆𑀓𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀝𑁆𑀞𑀸𑀦𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀁 𑀓𑀼𑀫𑀸𑀭𑁂𑀦! 𑀳𑀦𑁆𑀤, 𑀦𑀁 𑀏𑀯𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀤𑁆𑀥𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀏𑀳𑀺 𑀲𑀢𑁆𑀢𑀤𑀺𑀯𑀲𑁂𑀦 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙, 𑀢𑀢𑁄 𑀢𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀫𑀭𑀡𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀢𑀫𑀢𑁆𑀣𑀁 𑀲𑀜𑁆𑀜𑀸𑀧𑁂𑀲𑀺. 𑀲𑁄 𑀓𑀺𑀭 𑀓𑀼𑀫𑀸𑀭𑁄 ‘‘𑀲𑀢𑁆𑀢𑀫𑁂 𑀫𑀁 𑀤𑀺𑀯𑀲𑁂 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀦 𑀘𑀺𑀢𑁆𑀢𑀭𑀽𑀧𑀁 𑀦𑁆𑀳𑀸𑀬𑀺, 𑀦 𑀪𑀼𑀜𑁆𑀚𑀺, 𑀦 𑀲𑀼𑀧𑀺, 𑀅𑀢𑀺𑀯𑀺𑀬 𑀮𑀽𑀔𑀲𑀭𑀻𑀭𑁄 𑀅𑀳𑁄𑀲𑀺. 𑀢𑀢𑁄 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀲𑁆𑀲 𑀢𑁆𑀯𑀁 𑀏𑀯𑀭𑀽𑀧𑁄 𑀚𑀸𑀢𑁄’’𑀢𑀺? ‘‘𑀫𑀭𑀡𑀪𑀬𑁂𑀦, 𑀤𑁂𑀯𑀸’’𑀢𑀺. ‘‘𑀅𑀭𑁂, 𑀢𑁆𑀯𑀁 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑀫𑀭𑀡𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ¶ 𑀯𑀺𑀲𑁆𑀲𑀢𑁆𑀣𑁄 𑀦 𑀓𑀻𑀴𑀲𑀺? 𑀪𑀺𑀓𑁆𑀔𑀽 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀩𑀤𑁆𑀥𑀁 𑀫𑀭𑀡𑀁 𑀧𑁂𑀓𑁆𑀔𑀫𑀸𑀦𑀸 𑀓𑀣𑀁 𑀓𑀻𑀴𑀺𑀲𑁆𑀲𑀦𑁆𑀢𑀻’’𑀢𑀺! 𑀢𑀢𑁄 𑀧𑀪𑀼𑀢𑀺 𑀓𑀼𑀫𑀸𑀭𑁄 𑀲𑀸𑀲𑀦𑁂 𑀧𑀲𑀻𑀤𑀺.

𑀲𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀫𑀺𑀕𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀜𑁆𑀜𑁂 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲 𑀬𑁄𑀦𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀅𑀜𑁆𑀜𑀢𑀭𑁂𑀦 𑀳𑀢𑁆𑀣𑀺𑀦𑀸𑀕𑁂𑀦 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀩𑀻𑀚𑀺𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑀧𑀸𑀫𑁄𑀚𑁆𑀚𑀚𑀸𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀅𑀬𑀁 𑀫𑀳𑀸𑀣𑁂𑀭𑁄 𑀯𑀺𑀬 𑀧𑀩𑁆𑀩𑀚𑁂𑀬𑁆𑀬𑀁! 𑀲𑀺𑀬𑀸 𑀦𑀼 𑀔𑁄 𑀲𑁄 𑀤𑀺𑀯𑀲𑁄’’𑀢𑀺. 𑀣𑁂𑀭𑁄 𑀢𑀲𑁆𑀲𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑁂 𑀧𑁄𑀓𑁆𑀔𑀭𑀡𑀺𑀬𑀸 𑀉𑀤𑀓𑀢𑀮𑁂 𑀞𑀢𑁆𑀯𑀸 𑀘𑀻𑀯𑀭𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀜𑁆𑀘 𑀆𑀓𑀸𑀲𑁂 𑀮𑀕𑁆𑀕𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀆𑀭𑀤𑁆𑀥𑁄.

𑀓𑀼𑀫𑀸𑀭𑁄 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑁄 ‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀺𑀢𑁆𑀯𑀸𑀧𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑁄𑀓𑀸𑀭𑀸𑀫𑀕𑀫𑀦𑀻𑀬𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀓𑀼𑀫𑀸𑀭𑀁 𑀙𑀡𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀸𑀬 𑀲𑁂𑀦𑀸𑀬 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑁂𑀲𑀺. ‘‘𑀬𑀼𑀯𑀭𑀸𑀚𑀸 𑀓𑀺𑀭 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀩𑀳𑀽 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀬𑀸𑀤𑁂𑀲𑀼𑀁. 𑀓𑀼𑀫𑀸𑀭𑁄 𑀧𑀥𑀸𑀦𑀖𑀭𑀁 ¶ 𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑁂𑀦. 𑀓𑀼𑀫𑀸𑀭𑀲𑁆𑀲 𑀧𑀦 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀓𑀼𑀫𑀸𑀭𑁄 𑀭𑀜𑁆𑀜𑁄 𑀘𑀢𑀼𑀯𑀲𑁆𑀲𑀸𑀪𑀺𑀲𑁂𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁄. 𑀅𑀣𑀜𑁆𑀜𑁄𑀧𑀺 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀲𑀗𑁆𑀖𑀫𑀺𑀢𑁆𑀢𑀸𑀬 𑀲𑀸𑀫𑀺𑀓𑁄 𑀅𑀕𑁆𑀕𑀺𑀩𑁆𑀭𑀳𑁆𑀫𑀸 𑀦𑀸𑀫 𑀓𑀼𑀫𑀸𑀭𑁄 𑀅𑀢𑁆𑀣𑀺. 𑀲𑀗𑁆𑀖𑀫𑀺𑀢𑁆𑀢𑀸 𑀢𑀁 𑀧𑀝𑀺𑀘𑁆𑀘 𑀏𑀓𑀫𑁂𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄𑀧𑀺 ¶ ‘‘𑀬𑀼𑀯𑀭𑀸𑀚𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀅𑀳𑀫𑁆𑀧𑀺, 𑀤𑁂𑀯, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀘𑀺. ‘‘𑀧𑀩𑁆𑀩𑀚, 𑀢𑀸𑀢𑀸’’𑀢𑀺 𑀘 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑁄 𑀢𑀁𑀤𑀺𑀯𑀲𑀫𑁂𑀯 𑀧𑀩𑁆𑀩𑀚𑀺.

𑀏𑀯𑀁 ¶ 𑀅𑀦𑀼𑀧𑀩𑁆𑀩𑀚𑀺𑀢𑁄, 𑀉𑀴𑀸𑀭𑀯𑀺𑀪𑀯𑁂𑀦 𑀔𑀢𑁆𑀢𑀺𑀬𑀚𑀦𑁂𑀦;

𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸, 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄.

𑀲𑁄 𑀢𑀁 𑀅𑀫𑀘𑁆𑀘𑀁 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀭𑀸𑀚𑀸 𑀣𑁂𑀭𑁂 𑀫𑀸𑀭𑀸𑀧𑁂𑀢𑀼𑀁 𑀧𑀳𑀺𑀡𑁂𑀬𑁆𑀬; 𑀅𑀤𑁆𑀥𑀸 𑀇𑀫𑀲𑁆𑀲𑁂𑀯𑁂𑀢𑀁 𑀅𑀫𑀘𑁆𑀘𑀲𑁆𑀲 𑀤𑀼𑀕𑁆𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀬𑀁 𑀢𑀲𑁆𑀲 𑀆𑀲𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀲𑁄 𑀣𑁂𑀭𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀢𑁆𑀣𑀁 𑀦𑀺𑀧𑀸𑀢𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀤𑁂𑀯, 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀸𑀦𑀁 𑀏𑀢𑁆𑀢𑀓𑀸𑀦𑀁 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀲𑀻𑀲𑀸𑀦𑀺 𑀧𑀸𑀢𑁂𑀲𑀺𑀁; 𑀅𑀣 𑀅𑀬𑁆𑀬𑀲𑁆𑀲 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀧𑀝𑀺𑀧𑀸𑀝𑀺 𑀲𑀫𑁆𑀧𑀢𑁆𑀢𑀸, 𑀓𑀺𑀦𑁆𑀢𑀺 𑀓𑀭𑁄𑀫𑀻’’𑀢𑀺? 𑀭𑀸𑀚𑀸 𑀲𑀼𑀢𑁆𑀯𑀸𑀯 𑁋 ‘‘𑀅𑀭𑁂! 𑀓𑀺𑀁 𑀧𑀦, 𑀢𑁆𑀯𑀁, 𑀫𑀬𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀼𑀁 𑀧𑁂𑀲𑀺𑀢𑁄’’𑀢𑀺 𑀢𑀸𑀯𑀤𑁂𑀯 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀤𑀸𑀳𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀫𑀘𑁆𑀘𑁄 𑀫𑀬𑀸 𑀅𑀦𑀸𑀡𑀢𑁆𑀢𑁄𑀯 𑀏𑀯𑀁 𑀅𑀓𑀸𑀲𑀺, 𑀓𑀲𑁆𑀲 𑀦𑀼 𑀔𑁄 𑀇𑀫𑀺𑀦𑀸 𑀧𑀸𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺? 𑀏𑀓𑀘𑁆𑀘𑁂 𑀣𑁂𑀭𑀸, ‘‘𑀅𑀬𑀁 𑀢𑀯 𑀯𑀘𑀦𑁂𑀦 𑀅𑀓𑀸𑀲𑀺, 𑀢𑀼𑀬𑁆𑀳𑁂𑀢𑀁 𑀧𑀸𑀧’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑁂 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀯𑁄 𑀏𑀢𑀁 𑀧𑀸𑀧’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀘𑀺𑀢𑁆𑀢𑀁 ‘𑀅𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀽’’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀓𑀼𑀲𑀮𑀸𑀥𑀺𑀧𑁆𑀧𑀸𑀬𑁄 𑀅𑀳𑀁 𑀧𑁂𑀲𑁂𑀲𑀺𑀁 𑁋 ‘𑀲𑀫𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁄𑀢𑀽’’’𑀢𑀺. ‘‘𑀲𑀘𑁂 𑀢𑁆𑀯𑀁 𑀓𑀼𑀲𑀮𑀸𑀥𑀺𑀧𑁆𑀧𑀸𑀬𑁄, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀧𑀸𑀧𑀁, 𑀅𑀫𑀘𑁆𑀘𑀲𑁆𑀲𑁂𑀯𑁂𑀢𑀁 𑀧𑀸𑀧’’𑀦𑁆𑀢𑀺. 𑀭𑀸𑀚𑀸 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑀆𑀳 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀓𑁄𑀘𑀺 𑀪𑀺𑀓𑁆𑀔𑀼 𑀫𑀫𑁂𑀢𑀁 𑀤𑁆𑀯𑁂𑀴𑁆𑀳𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫, 𑀲𑁄 ¶ 𑀢𑁂 𑀇𑀫𑀁 𑀤𑁆𑀯𑁂𑀴𑁆𑀳𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀭𑀸𑀚𑀸 𑀢𑀤𑀳𑁂𑀯 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑀣𑀺𑀓𑁂 𑀏𑀓𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁂, 𑀘𑀢𑁆𑀢𑀸𑀭𑁄 𑀘 𑀅𑀫𑀘𑁆𑀘𑁂 𑀏𑀓𑁂𑀓𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 ‘‘𑀣𑁂𑀭𑀁 𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀦𑀸𑀕𑀘𑁆𑀙𑀺 ¶ . 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀭𑀸𑀚𑀸 𑀅𑀝𑁆𑀞 𑀥𑀫𑁆𑀫𑀓𑀣𑀺𑀓𑁂, 𑀅𑀝𑁆𑀞 𑀘 𑀅𑀫𑀘𑁆𑀘𑁂 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂𑀬𑁂𑀯 𑀧𑁂𑀲𑁂𑀲𑀺 𑁋 ‘‘‘𑀭𑀸𑀚𑀸, 𑀪𑀦𑁆𑀢𑁂, 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸𑀯 𑀆𑀕𑀘𑁆𑀙𑀣𑀸’’𑀢𑀺. 𑀢𑁂 𑀢𑀣𑁂𑀯 𑀆𑀳𑀁𑀲𑀼. 𑀤𑀼𑀢𑀺𑀬𑀫𑁆𑀧𑀺 𑀣𑁂𑀭𑁄 𑀦𑀸𑀕𑀘𑁆𑀙𑀺. 𑀭𑀸𑀚𑀸 𑀣𑁂𑀭𑁂 𑀧𑀼𑀘𑁆𑀙𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀳𑀺𑀡𑀺𑀁; 𑀓𑀲𑁆𑀫𑀸 𑀣𑁂𑀭𑁄 𑀦𑀸𑀕𑀘𑁆𑀙𑀢𑀻’’𑀢𑀺? ‘‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀫𑀳𑀸𑀭𑀸𑀚, 𑀦𑀸𑀕𑀘𑁆𑀙𑀢𑀺. 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀆𑀕𑀘𑁆𑀙𑁂𑀬𑁆𑀬 ‘𑀲𑀸𑀲𑀦𑀁, 𑀪𑀦𑁆𑀢𑁂, 𑀑𑀲𑀻𑀤𑀢𑀺, 𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀧𑀕𑁆𑀕𑀳𑀢𑁆𑀣𑀸𑀬 𑀲𑀳𑀸𑀬𑀓𑀸 𑀳𑁄𑀣𑀸’’’𑀢𑀺. 𑀅𑀣 𑀭𑀸𑀚𑀸 𑀢𑀣𑀸 𑀯𑀢𑁆𑀯𑀸 𑀲𑁄𑀴𑀲 𑀥𑀫𑁆𑀫𑀓𑀣𑀺𑀓𑁂, 𑀲𑁄𑀴𑀲 𑀘 𑀅𑀫𑀘𑁆𑀘𑁂 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁂 𑀧𑁂𑀲𑁂𑀲𑀺. 𑀪𑀺𑀓𑁆𑀔𑀽 𑀘 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀫𑀳𑀮𑁆𑀮𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀣𑁂𑀭𑁄 𑀤𑀳𑀭𑁄 𑀦𑀼 𑀔𑁄’’𑀢𑀺? ‘‘𑀫𑀳𑀮𑁆𑀮𑀓𑁄, 𑀫𑀳𑀸𑀭𑀸𑀚𑀸’’𑀢𑀺. ‘‘𑀯𑀬𑁆𑀳𑀁 𑀯𑀸 𑀲𑀺𑀯𑀺𑀓𑀁 𑀯𑀸 𑀅𑀪𑀺𑀭𑀼𑀳𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺? ‘‘𑀦𑀸𑀪𑀺𑀭𑀼𑀳𑀺𑀲𑁆𑀲𑀢𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀣𑁂𑀭𑁄 𑀯𑀲𑀢𑀻’’𑀢𑀺? ‘‘𑀉𑀧𑀭𑀺 𑀕𑀗𑁆𑀕𑀸𑀬, 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀆𑀳 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀢𑀢𑁆𑀣𑁂𑀯 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑁆𑀯𑀻𑀲𑀼𑀧𑀺 𑀢𑀻𑀭𑁂𑀲𑀼 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀣𑁂𑀭𑀁 𑀆𑀦𑁂𑀣𑀸’’𑀢𑀺. 𑀪𑀺𑀓𑁆𑀔𑀽 𑀘 𑀅𑀫𑀘𑁆𑀘𑀸 𑀘 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀭𑁄𑀘𑁂𑀲𑀼𑀁.

𑀣𑁂𑀭𑁄 𑀲𑀼𑀢𑁆𑀯𑀸 ‘‘𑀬𑀁 𑀔𑁄 𑀅𑀳𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑀺𑀢𑁄𑀫𑁆𑀳𑀺. 𑀅𑀬𑀁 𑀤𑀸𑀦𑀺 𑀫𑁂 𑀲𑁄 𑀓𑀸𑀮𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀘𑀫𑁆𑀫𑀔𑀡𑁆𑀟𑀁 𑀕𑀡𑁆𑀳𑀺𑀢𑁆𑀯𑀸𑀯 𑀉𑀝𑁆𑀞𑀳𑀺. 𑀅𑀣 ‘‘𑀣𑁂𑀭𑁄 ¶ 𑀲𑁆𑀯𑁂 𑀧𑀸𑀝𑀮𑀺𑀧𑀼𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀭𑀸𑀚𑀸 𑀲𑀼𑀧𑀺𑀦𑀁 𑀅𑀤𑁆𑀤𑀲. 𑀏𑀯𑀭𑀽𑀧𑁄 𑀲𑀼𑀧𑀺𑀦𑁄 𑀅𑀳𑁄𑀲𑀺 𑁋 ‘‘𑀲𑀩𑁆𑀩𑀲𑁂𑀢𑁄 𑀳𑀢𑁆𑀣𑀺𑀦𑀸𑀕𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀧𑀭𑀸𑀫𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀻’’𑀢𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀲𑀼𑀧𑀺𑀦𑀚𑁆𑀛𑀸𑀬𑀓𑁂 𑀧𑀼𑀘𑁆𑀙𑀺 𑁋 ‘‘𑀫𑀬𑀸 𑀏𑀯𑀭𑀽𑀧𑁄 𑀲𑀼𑀧𑀺𑀦𑁄 𑀤𑀺𑀝𑁆𑀞𑁄, 𑀓𑀺𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺? 𑀏𑀓𑁄 𑀢𑀁, ‘‘𑀫𑀳𑀸𑀭𑀸𑀚, 𑀲𑀫𑀡𑀦𑀸𑀕𑁄 𑀤𑀓𑁆𑀔𑀺𑀡𑀳𑀢𑁆𑀣𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺. 𑀅𑀣 𑀭𑀸𑀚𑀸 𑀢𑀸𑀯𑀤𑁂𑀯 ‘‘𑀣𑁂𑀭𑁄 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀅𑀩𑁆𑀪𑀼𑀕𑁆𑀕𑀘𑁆𑀙𑀦𑁆𑀢𑁄 𑀚𑀸𑀡𑀼𑀫𑀢𑁆𑀢𑁂 𑀉𑀤𑀓𑁂 𑀣𑁂𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀣𑁂𑀭𑀲𑁆𑀲 𑀦𑀸𑀯𑀸𑀢𑁄 𑀑𑀢𑀭𑀦𑁆𑀢𑀲𑁆𑀲 𑀳𑀢𑁆𑀣𑀁 𑀅𑀤𑀸𑀲𑀺. 𑀣𑁂𑀭𑁄 𑀭𑀸𑀚𑀸𑀦𑀁 𑀤𑀓𑁆𑀔𑀺𑀡𑀳𑀢𑁆𑀣𑁂 𑀅𑀕𑁆𑀕𑀳𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀲𑀺𑀕𑁆𑀕𑀸𑀳𑀸 ‘‘𑀣𑁂𑀭𑀲𑁆𑀲 𑀲𑀻𑀲𑀁 𑀧𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀓𑁄𑀲𑀢𑁄 𑀅𑀲𑀺𑀁 𑀅𑀩𑁆𑀩𑀸𑀳𑀺𑀁𑀲𑀼. 𑀓𑀲𑁆𑀫𑀸? 𑀏𑀢𑀁 𑀓𑀺𑀭 𑀘𑀸𑀭𑀺𑀢𑁆𑀢𑀁 𑀭𑀸𑀚𑀓𑀼𑀮𑁂𑀲𑀼 𑁋 ‘‘𑀬𑁄 𑀭𑀸𑀚𑀸𑀦𑀁 𑀳𑀢𑁆𑀣𑁂 𑀕𑀡𑁆𑀳𑀢𑀺 𑀢𑀲𑁆𑀲 𑀅𑀲𑀺𑀦𑀸 𑀲𑀻𑀲𑀁 𑀧𑀸𑀢𑁂𑀢𑀩𑁆𑀩’’𑀦𑁆𑀢𑀺. 𑀭𑀸𑀚𑀸 𑀙𑀸𑀬𑀁𑀬𑁂𑀯 𑀤𑀺𑀲𑁆𑀯𑀸 𑀆𑀳 𑁋 ‘‘𑀧𑀼𑀩𑁆𑀩𑁂𑀧𑀺 𑀅𑀳𑀁 𑀪𑀺𑀓𑁆𑀔𑀽𑀲𑀼 𑀯𑀺𑀭𑀤𑁆𑀥𑀓𑀸𑀭𑀡𑀸 𑀅𑀲𑁆𑀲𑀸𑀤𑀁 𑀦 𑀯𑀺𑀦𑁆𑀤𑀸𑀫𑀺, 𑀫𑀸 𑀔𑁄 𑀣𑁂𑀭𑁂 𑀯𑀺𑀭𑀚𑁆𑀛𑀺𑀢𑁆𑀣𑀸’’𑀢𑀺. 𑀣𑁂𑀭𑁄 𑀧𑀦 𑀓𑀲𑁆𑀫𑀸 𑀭𑀸𑀚𑀸𑀦𑀁 𑀳𑀢𑁆𑀣𑁂 ¶ 𑀅𑀕𑁆𑀕𑀳𑁂𑀲𑀻𑀢𑀺? 𑀬𑀲𑁆𑀫𑀸 𑀭𑀜𑁆𑀜𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑀢𑁆𑀣𑀸𑀬 𑀧𑀓𑁆𑀓𑁄𑀲𑀸𑀧𑀺𑀢𑁄 𑀢𑀲𑁆𑀫𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑁂 𑀅𑀬’’𑀦𑁆𑀢𑀺 𑀅𑀕𑁆𑀕𑀳𑁂𑀲𑀺.

𑀭𑀸𑀚𑀸 𑀣𑁂𑀭𑀁 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀩𑀸𑀳𑀺𑀭𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀣𑁂𑀭𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀝𑀺𑀩𑀮𑁄 𑀦𑀼 𑀔𑁄 𑀣𑁂𑀭𑁄 𑀫𑀫 𑀓𑀗𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀆𑀳. ‘‘𑀓𑀢𑀭𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑁄𑀲𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀧𑀣𑀯𑀻𑀓𑀫𑁆𑀧𑀦𑀁, 𑀪𑀦𑁆𑀢𑁂’’𑀢𑀺. ‘‘𑀲𑀓𑀮𑀧𑀣𑀯𑀻𑀓𑀫𑁆𑀧𑀦𑀁 𑀤𑀝𑁆𑀞𑀼𑀓𑀸𑀫𑁄𑀲𑀺, 𑀫𑀳𑀸𑀭𑀸𑀚, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦’’𑀦𑁆𑀢𑀺? ‘‘𑀓𑀢𑀭𑀁 𑀧𑀦𑁂𑀢𑁆𑀣, 𑀪𑀦𑁆𑀢𑁂, 𑀤𑀼𑀓𑁆𑀓𑀭’’𑀦𑁆𑀢𑀺? ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀓𑀁𑀲𑀧𑀸𑀢𑀺𑀬𑀸 𑀉𑀤𑀓𑀧𑀼𑀡𑁆𑀡𑀸𑀬 𑀲𑀩𑁆𑀩𑀁 𑀉𑀤𑀓𑀁 𑀓𑀫𑁆𑀧𑁂𑀢𑀼𑀁 𑀤𑀼𑀓𑁆𑀓𑀭𑀁; 𑀉𑀤𑀸𑀳𑀼 𑀉𑀧𑀟𑁆𑀠’’𑀦𑁆𑀢𑀺? ‘‘𑀉𑀧𑀟𑁆𑀠𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 𑀤𑀼𑀓𑁆𑀓𑀭’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 ¶ 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀫𑀦𑁆𑀢𑀢𑁄 𑀬𑁄𑀚𑀦𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑁂𑀦 𑀘𑀓𑁆𑀓𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀭𑀣𑁄 𑀢𑀺𑀝𑁆𑀞𑀢𑀼; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀅𑀲𑁆𑀲𑁄 𑀢𑀺𑀝𑁆𑀞𑀢𑀼; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀏𑀓𑁂𑀦 𑀧𑀸𑀤𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀼; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀧𑀟𑁆𑀠𑀪𑀸𑀕𑁂𑀦 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸 𑀏𑀓𑀸 𑀉𑀤𑀓𑀧𑀸𑀢𑀺 ¶ 𑀢𑀺𑀝𑁆𑀞𑀢𑀽’’𑀢𑀺. 𑀭𑀸𑀚𑀸 𑀢𑀣𑀸 𑀓𑀸𑀭𑀸𑀧𑁂𑀲𑀺. 𑀣𑁂𑀭𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀭𑀸𑀚𑀸 𑀧𑀲𑁆𑀲𑀢𑀽’’𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑀧𑀣𑀯𑀻𑀘𑀮𑀦𑀁 𑀅𑀥𑀺𑀝𑁆𑀞𑀳𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀭𑀣𑀲𑁆𑀲 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑁄 𑀧𑀸𑀤𑁄𑀯 𑀘𑀮𑀺, 𑀇𑀢𑀭𑁄 𑀦 𑀘𑀮𑀺. 𑀏𑀯𑀁 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀲𑀼 𑀅𑀲𑁆𑀲𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑀧𑀸𑀤𑀸𑀬𑁂𑀯 𑀘𑀮𑀺𑀁𑀲𑀼, 𑀉𑀧𑀟𑁆𑀠𑀼𑀧𑀟𑁆𑀠𑀁 𑀲𑀭𑀻𑀭𑀜𑁆𑀘. 𑀉𑀢𑁆𑀢𑀭𑀤𑀺𑀲𑀸𑀬 𑀉𑀤𑀓𑀧𑀸𑀢𑀺𑀬𑀸𑀧𑀺 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑀁 𑀉𑀧𑀟𑁆𑀠𑀪𑀸𑀕𑀕𑀢𑀫𑁂𑀯 𑀉𑀤𑀓𑀁 𑀘𑀮𑀺, 𑀅𑀯𑀲𑁂𑀲𑀁 𑀦𑀺𑀘𑁆𑀘𑀮𑀫𑀳𑁄𑀲𑀻𑀢𑀺. 𑀭𑀸𑀚𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀲𑀓𑁆𑀔𑀢𑀺 𑀤𑀸𑀦𑀺 𑀣𑁂𑀭𑁄 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀅𑀫𑀘𑁆𑀘𑀁 ‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀭𑀸𑀧𑁂𑀳𑀻’𑀢𑀺 𑀧𑀳𑀺𑀡𑀺𑀁, 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀏𑀢𑀁 𑀧𑀸𑀧𑀁 𑀓𑀲𑁆𑀲 𑀳𑁄𑀢𑀻’’𑀢𑀺?

‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀘𑀺𑀢𑁆𑀢𑀁 ‘𑀅𑀬𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀖𑀸𑀢𑁂𑀢𑀽’’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀢𑁂, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀧𑀸𑀧’’𑀦𑁆𑀢𑀺. 𑀅𑀣 𑀣𑁂𑀭𑁄 𑀭𑀸𑀚𑀸𑀦𑀁 𑀏𑀢𑀫𑀢𑁆𑀣𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀧𑁂𑀲𑀺 ¶ 𑁋 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺. 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺 (𑀅. 𑀦𑀺. 𑁬.𑁬𑁩).

𑀢𑀫𑁂𑀯𑀢𑁆𑀣𑀁 ¶ 𑀧𑀭𑀺𑀤𑀻𑀧𑁂𑀢𑀼𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑀁 (𑀚𑀸. 𑁧.𑁪.𑁭𑁫) 𑀆𑀳𑀭𑀺 𑁋 ‘‘𑀅𑀢𑀻𑀢𑁂, 𑀫𑀳𑀸𑀭𑀸𑀚, 𑀤𑀻𑀧𑀓𑀢𑀺𑀢𑁆𑀢𑀺𑀭𑁄 𑀢𑀸𑀧𑀲𑀁 𑀧𑀼𑀘𑁆𑀙𑀺 𑁋

‘𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀩𑀳𑀼 𑀆𑀕𑀘𑁆𑀙𑀢𑀻 𑀚𑀦𑁄;

𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄’𑀢𑀺.

𑀢𑀸𑀧𑀲𑁄 𑀆𑀳 𑁋 ‘𑀅𑀢𑁆𑀣𑀺 𑀧𑀦 𑀢𑁂 𑀘𑀺𑀢𑁆𑀢𑀁 𑀫𑀫 𑀲𑀤𑁆𑀤𑁂𑀦 𑀘 𑀭𑀽𑀧𑀤𑀲𑁆𑀲𑀦𑁂𑀦 𑀘 𑀆𑀕𑀦𑁆𑀢𑁆𑀯𑀸 𑀏𑀢𑁂 𑀧𑀓𑁆𑀔𑀺𑀦𑁄 𑀩𑀚𑁆𑀛𑀦𑁆𑀢𑀼 𑀯𑀸 𑀳𑀜𑁆𑀜𑀦𑁆𑀢𑀼 𑀯𑀸’𑀢𑀺? ‘𑀦𑀢𑁆𑀣𑀺, 𑀪𑀦𑁆𑀢𑁂’𑀢𑀺 𑀢𑀺𑀢𑁆𑀢𑀺𑀭𑁄 𑀆𑀳. 𑀢𑀢𑁄 𑀦𑀁 𑀢𑀸𑀧𑀲𑁄 𑀲𑀜𑁆𑀜𑀸𑀧𑁂𑀲𑀺 𑁋 ‘𑀲𑀘𑁂 𑀢𑁂 𑀦𑀢𑁆𑀣𑀺 𑀘𑀺𑀢𑁆𑀢𑀁, 𑀦𑀢𑁆𑀣𑀺 𑀧𑀸𑀧𑀁; 𑀘𑁂𑀢𑀬𑀦𑁆𑀢𑀫𑁂𑀯 𑀳𑀺 𑀧𑀸𑀧𑀁 𑀨𑀼𑀲𑀢𑀺, 𑀦𑀸𑀘𑁂𑀢𑀬𑀦𑁆𑀢𑀁.

‘𑀦 𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’’𑀢𑀺.

𑀏𑀯𑀁 𑀣𑁂𑀭𑁄 𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀭𑀸𑀚𑀼𑀬𑁆𑀬𑀸𑀦𑁂 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀲𑀦𑁆𑀢𑁄 𑀭𑀸𑀚𑀸𑀦𑀁 𑀲𑀫𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀭𑀸𑀚𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀲𑁄𑀓𑀸𑀭𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ¶ 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀏𑀓𑀮𑀤𑁆𑀥𑀺𑀓𑁂 𑀏𑀓𑀮𑀤𑁆𑀥𑀺𑀓𑁂 𑀪𑀺𑀓𑁆𑀔𑀽 𑀏𑀓𑀢𑁄 𑀏𑀓𑀢𑁄 𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀲𑀫𑀽𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁𑀯𑀸𑀤𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? 𑀢𑀢𑁄𑀲𑀲𑁆𑀲𑀢𑀯𑀸𑀤𑀺𑀦𑁄 ‘‘𑀲𑀲𑁆𑀲𑀢𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸…𑀧𑁂… 𑀅𑀦𑁆𑀢𑀸𑀦𑀦𑁆𑀢𑀺𑀓𑀸… 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸… 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸… 𑀲𑀜𑁆𑀜𑀻𑀯𑀸𑀤𑀸… 𑀅𑀲𑀜𑁆𑀜𑀻𑀯𑀸𑀤𑀸… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 ¶ … 𑀉𑀘𑁆𑀙𑁂𑀤𑀯𑀸𑀤𑀸… 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 ‘‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀞𑀫𑀫𑁂𑀯 𑀲𑀫𑀬𑀲𑁆𑀲 𑀉𑀕𑁆𑀕𑀳𑀺𑀢𑀢𑁆𑀢𑀸 ‘‘𑀦𑀬𑀺𑀫𑁂 𑀪𑀺𑀓𑁆𑀔𑀽, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀇𑀫𑁂’’𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀲𑁂𑀢𑀓𑀸𑀦𑀺 𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀸 𑀅𑀳𑁂𑀲𑀼𑀁.

𑀅𑀣𑀜𑁆𑀜𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀫𑀳𑀸𑀭𑀸𑀚𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀯𑀺𑀪𑀚𑁆𑀚𑀯𑀸𑀤𑀻, 𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. 𑀢𑀢𑁄 𑀭𑀸𑀚𑀸 ‘‘𑀲𑀼𑀤𑁆𑀥𑀁 𑀤𑀸𑀦𑀺, 𑀪𑀦𑁆𑀢𑁂, 𑀲𑀸𑀲𑀦𑀁; 𑀓𑀭𑁄𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣’’𑀦𑁆𑀢𑀺 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀸𑀯𑀺𑀲𑀺.

𑀲𑀫𑀕𑁆𑀕𑁄 ¶ 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀭𑀧𑁆𑀧𑀯𑀸𑀤𑀁 𑀫𑀤𑁆𑀤𑀫𑀸𑀦𑁄 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀅𑀪𑀸𑀲𑀺. 𑀢𑀢𑁄 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑀸𑀦𑀁 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀳𑀲𑁆𑀲𑀫𑁂𑀓𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀬𑀲𑀢𑁆𑀣𑁂𑀭𑁄 𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼; 𑀏𑀯𑀫𑁂𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀦𑁆𑀢𑁄 𑀲𑀩𑁆𑀩𑀁 𑀲𑀸𑀲𑀦𑀫𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀅𑀓𑀸𑀲𑀺. 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑀧𑁆𑀧𑀓𑀸𑀭𑀁 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀅𑀬𑀁 𑀲𑀗𑁆𑀕𑀻𑀢𑀺 𑀦𑀯𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀸. 𑀬𑀸 𑀮𑁄𑀓𑁂 𑁋

𑀓𑀢𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦, 𑀢𑀲𑁆𑀫𑀸 𑀲𑀳𑀲𑁆𑀲𑀺𑀓𑀸𑀢𑀺 𑀘;

𑀧𑀼𑀭𑀺𑀫𑀸 𑀤𑁆𑀯𑁂 𑀉𑀧𑀸𑀤𑀸𑀬, 𑀢𑀢𑀺𑀬𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑀅𑀬𑀁 𑀢𑀢𑀺𑀬𑀲𑀗𑁆𑀕𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀘 ‘‘𑀓𑁂𑀦𑀸𑀪𑀢’’𑀦𑁆𑀢𑀺 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 𑀬𑀁 𑀅𑀯𑁄𑀘𑀼𑀫𑁆𑀳 𑁋 ‘‘𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑀫𑀸𑀤𑀺𑀁 𑀓𑀢𑁆𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 ¶ 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺 𑀢𑀸𑀯 𑀆𑀪𑀢𑀁. 𑀢𑀢𑁆𑀭𑀸𑀬𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑁋

‘‘𑀉𑀧𑀸𑀮𑀺 ¶ 𑀤𑀸𑀲𑀓𑁄 𑀘𑁂𑀯, 𑀲𑁄𑀡𑀓𑁄 𑀲𑀺𑀕𑁆𑀕𑀯𑁄 𑀢𑀣𑀸;

𑀢𑀺𑀲𑁆𑀲𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀘, 𑀧𑀜𑁆𑀘𑁂𑀢𑁂 𑀯𑀺𑀚𑀺𑀢𑀸𑀯𑀺𑀦𑁄.

‘‘𑀧𑀭𑀫𑁆𑀧𑀭𑀸𑀬 𑀯𑀺𑀦𑀬𑀁, 𑀤𑀻𑀧𑁂 𑀚𑀫𑁆𑀩𑀼𑀲𑀺𑀭𑀺𑀯𑁆𑀳𑀬𑁂;

𑀅𑀘𑁆𑀙𑀺𑀚𑁆𑀚𑀫𑀸𑀦𑀫𑀸𑀦𑁂𑀲𑀼𑀁, 𑀢𑀢𑀺𑀬𑁄 𑀬𑀸𑀯 𑀲𑀗𑁆𑀕𑀳𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄𑀯 𑀳𑁄𑀢𑀺.

𑀢𑀢𑀺𑀬𑀲𑀗𑁆𑀕𑀳𑀢𑁄 𑀧𑀦 𑀉𑀤𑁆𑀥𑀁 𑀇𑀫𑀁 𑀤𑀻𑀧𑀁 𑀫𑀳𑀺𑀦𑁆𑀤𑀸𑀤𑀻𑀳𑀺 𑀆𑀪𑀢𑀁. 𑀫𑀳𑀺𑀦𑁆𑀤𑀢𑁄 𑀉𑀕𑁆𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 𑀓𑀸𑀮𑀁 𑀅𑀭𑀺𑀝𑁆𑀞𑀢𑁆𑀣𑁂𑀭𑀸𑀤𑀻𑀳𑀺 𑀆𑀪𑀢𑀁. 𑀢𑀢𑁄 𑀬𑀸𑀯𑀚𑁆𑀚𑀢𑀦𑀸 𑀢𑁂𑀲𑀁𑀬𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀫𑁆𑀧𑀭𑀪𑀽𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀢𑀢𑁄 𑀫𑀳𑀺𑀦𑁆𑀤𑁄 𑀇𑀝𑁆𑀝𑀺𑀬𑁄, 𑀉𑀢𑁆𑀢𑀺𑀬𑁄 𑀲𑀫𑁆𑀩𑀮𑁄 𑀢𑀣𑀸;

𑀪𑀤𑁆𑀤𑀦𑀸𑀫𑁄 𑀘 𑀧𑀡𑁆𑀟𑀺𑀢𑁄.

‘‘𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸;

𑀯𑀺𑀦𑀬𑀁 𑀢𑁂 𑀯𑀸𑀘𑀬𑀺𑀁𑀲𑀼, 𑀧𑀺𑀝𑀓𑀁 𑀢𑀫𑁆𑀩𑀧𑀡𑁆𑀡𑀺𑀬𑀸.

‘‘𑀦𑀺𑀓𑀸𑀬𑁂 ¶ 𑀧𑀜𑁆𑀘 𑀯𑀸𑀘𑁂𑀲𑀼𑀁, 𑀲𑀢𑁆𑀢 𑀘𑁂𑀯 𑀧𑀓𑀭𑀡𑁂;

𑀢𑀢𑁄 𑀅𑀭𑀺𑀝𑁆𑀞𑁄 𑀫𑁂𑀥𑀸𑀯𑀻, 𑀢𑀺𑀲𑁆𑀲𑀤𑀢𑁆𑀢𑁄 𑀘 𑀧𑀡𑁆𑀟𑀺𑀢𑁄.

‘‘𑀯𑀺𑀲𑀸𑀭𑀤𑁄 𑀓𑀸𑀴𑀲𑀼𑀫𑀦𑁄, 𑀣𑁂𑀭𑁄 𑀘 𑀤𑀻𑀖𑀦𑀸𑀫𑀓𑁄;

𑀤𑀻𑀖𑀲𑀼𑀫𑀦𑁄 𑀘 𑀧𑀡𑁆𑀟𑀺𑀢𑁄.

‘‘𑀧𑀼𑀦𑀤𑁂𑀯 𑀓𑀸𑀴𑀲𑀼𑀫𑀦𑁄, 𑀦𑀸𑀕𑀢𑁆𑀣𑁂𑀭𑁄 𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀤𑁂𑀯𑀢𑁆𑀣𑁂𑀭𑁄 𑀘 𑀧𑀡𑁆𑀟𑀺𑀢𑁄.

‘‘𑀧𑀼𑀦𑀤𑁂𑀯 𑀲𑀼𑀫𑀦𑁄 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀩𑀳𑀼𑀲𑁆𑀲𑀼𑀢𑁄 𑀘𑀽𑀴𑀦𑀸𑀕𑁄, 𑀕𑀚𑁄𑀯 𑀤𑀼𑀧𑁆𑀧𑀥𑀁𑀲𑀺𑀬𑁄.

‘‘𑀥𑀫𑁆𑀫𑀧𑀸𑀮𑀺𑀢𑀦𑀸𑀫𑁄 ¶ ¶ 𑀘, 𑀭𑁄𑀳𑀡𑁂 𑀲𑀸𑀥𑀼𑀧𑀽𑀚𑀺𑀢𑁄;

𑀢𑀲𑁆𑀲 𑀲𑀺𑀲𑁆𑀲𑁄 𑀫𑀳𑀸𑀧𑀜𑁆𑀜𑁄, 𑀔𑁂𑀫𑀦𑀸𑀫𑁄 𑀢𑀺𑀧𑁂𑀝𑀓𑁄.

‘‘𑀤𑀻𑀧𑁂 𑀢𑀸𑀭𑀓𑀭𑀸𑀚𑀸𑀯, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀣;

𑀉𑀧𑀢𑀺𑀲𑁆𑀲𑁄 𑀘 𑀫𑁂𑀥𑀸𑀯𑀻, 𑀨𑀼𑀲𑁆𑀲𑀤𑁂𑀯𑁄 𑀫𑀳𑀸𑀓𑀣𑀻.

‘‘𑀧𑀼𑀦𑀤𑁂𑀯 𑀲𑀼𑀫𑀦𑁄 𑀫𑁂𑀥𑀸𑀯𑀻, 𑀧𑀼𑀧𑁆𑀨𑀦𑀸𑀫𑁄 𑀩𑀳𑀼𑀲𑁆𑀲𑀼𑀢𑁄;

𑀫𑀳𑀸𑀓𑀣𑀻 𑀫𑀳𑀸𑀲𑀺𑀯𑁄, 𑀧𑀺𑀝𑀓𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄.

‘‘𑀧𑀼𑀦𑀤𑁂𑀯 𑀉𑀧𑀸𑀮𑀺 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀫𑀳𑀸𑀦𑀸𑀕𑁄 𑀫𑀳𑀸𑀧𑀜𑁆𑀜𑁄, 𑀲𑀤𑁆𑀥𑀫𑁆𑀫𑀯𑀁𑀲𑀓𑁄𑀯𑀺𑀤𑁄.

‘‘𑀧𑀼𑀦𑀤𑁂𑀯 𑀅𑀪𑀬𑁄 𑀫𑁂𑀥𑀸𑀯𑀻, 𑀧𑀺𑀝𑀓𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄.

‘‘𑀢𑀲𑁆𑀲 𑀲𑀺𑀲𑁆𑀲𑁄 𑀫𑀳𑀸𑀧𑀜𑁆𑀜𑁄, 𑀧𑀼𑀧𑁆𑀨𑀦𑀸𑀫𑁄 𑀩𑀳𑀼𑀲𑁆𑀲𑀼𑀢𑁄;

𑀲𑀸𑀲𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀚𑀫𑁆𑀩𑀼𑀤𑀻𑀧𑁂 𑀧𑀢𑀺𑀝𑁆𑀞𑀺𑀢𑁄.

‘‘𑀘𑀽𑀴𑀸𑀪𑀬𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀲𑀤𑁆𑀥𑀫𑁆𑀫𑀯𑀁𑀲𑀓𑁄𑀯𑀺𑀤𑁄.

‘‘𑀘𑀽𑀴𑀤𑁂𑀯𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀘 𑀯𑀺𑀲𑀸𑀭𑀤𑁄;

𑀲𑀺𑀯𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻, 𑀯𑀺𑀦𑀬𑁂 𑀲𑀩𑁆𑀩𑀢𑁆𑀣 𑀓𑁄𑀯𑀺𑀤𑁄.

‘‘𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸, 𑀯𑀺𑀦𑀬𑀜𑁆𑀜𑀽 𑀫𑀕𑁆𑀕𑀓𑁄𑀯𑀺𑀤𑀸;

𑀯𑀺𑀦𑀬𑀁 𑀤𑀻𑀧𑁂 𑀧𑀓𑀸𑀲𑁂𑀲𑀼𑀁, 𑀧𑀺𑀝𑀓𑀁 𑀢𑀫𑁆𑀩𑀧𑀡𑁆𑀡𑀺𑀬𑀸’’𑀢𑀺.

𑀢𑀢𑁆𑀭𑀸𑀬𑀁 ¶ 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀇𑀫𑀁 𑀢𑀢𑀺𑀬𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀦𑀸𑀕𑀢𑁂 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑁂𑀬𑁆𑀬𑀸’’𑀢𑀺? 𑀅𑀣𑀲𑁆𑀲 𑀉𑀧𑀧𑀭𑀺𑀓𑁆𑀔𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀔𑁄 𑀚𑀦𑀧𑀤𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀪𑀸𑀭𑀁 𑀓𑀢𑁆𑀯𑀸 𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀲𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀁 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀁 𑀧𑁂𑀲𑁂𑀲𑀺 𑁋 ‘‘𑀢𑁆𑀯𑀁 𑀏𑀢𑀁 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. 𑀫𑀳𑀸𑀤𑁂𑀯𑀢𑁆𑀣𑁂𑀭𑀁 𑀢𑀣𑁂𑀯 𑀯𑀢𑁆𑀯𑀸 𑀫𑀳𑀺𑀁𑀲𑀓𑀫𑀡𑁆𑀟𑀮𑀁 𑀧𑁂𑀲𑁂𑀲𑀺. 𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀯𑀦𑀯𑀸𑀲𑀺𑀁. 𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 ¶ 𑀅𑀧𑀭𑀦𑁆𑀢𑀓𑀁. 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀫𑀳𑀸𑀭𑀝𑁆𑀞𑀁. 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀬𑁄𑀦𑀓𑀮𑁄𑀓𑀁. 𑀫𑀚𑁆𑀛𑀺𑀫𑀢𑁆𑀣𑁂𑀭𑀁 𑀳𑀺𑀫𑀯𑀦𑁆𑀢𑀤𑁂𑀲𑀪𑀸𑀕𑀁. 𑀲𑁄𑀡𑀢𑁆𑀣𑁂𑀭𑀜𑁆𑀘 𑀉𑀢𑁆𑀢𑀭𑀢𑁆𑀣𑁂𑀭𑀜𑁆𑀘 𑀲𑀼𑀯𑀡𑁆𑀡𑀪𑀽𑀫𑀺𑀁. 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀇𑀝𑁆𑀝𑀺𑀬𑀢𑁆𑀣𑁂𑀭𑁂𑀦 𑀉𑀢𑁆𑀢𑀺𑀬𑀢𑁆𑀣𑁂𑀭𑁂𑀦 𑀲𑀫𑁆𑀩𑀮𑀢𑁆𑀣𑁂𑀭𑁂𑀦 𑀪𑀤𑁆𑀤𑀲𑀸𑀮𑀢𑁆𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑁂𑀲𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀣𑀸’’𑀢𑀺. 𑀲𑀩𑁆𑀩𑁂𑀧𑀺 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀧𑀜𑁆𑀘𑀫𑀸 𑀅𑀕𑀫𑀁𑀲𑀼 ‘‘𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀜𑁆𑀘𑀯𑀕𑁆𑀕𑁄 𑀕𑀡𑁄 𑀅𑀮𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀸𑀬𑀸’’𑀢𑀺 𑀫𑀜𑁆𑀜𑀫𑀸𑀦𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑁂 𑀲𑀲𑁆𑀲𑀧𑀸𑀓𑀲𑀫𑀬𑁂 𑀅𑀭𑀯𑀸𑀴𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀓𑀭𑀓𑀯𑀲𑁆𑀲𑀁 𑀦𑀸𑀫 𑀯𑀲𑁆𑀲𑀸𑀧𑁂𑀢𑁆𑀯𑀸 𑀲𑀲𑁆𑀲𑀁 𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑁂𑀢𑀺. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀧𑀦 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀢𑀺 𑀅𑀭𑀯𑀸𑀴𑀤𑀳𑀲𑁆𑀲 𑀉𑀧𑀭𑀺 𑀑𑀢𑀭𑀺𑀢𑁆𑀯𑀸 𑀅𑀭𑀯𑀸𑀴𑀤𑀳𑀧𑀺𑀝𑁆𑀞𑀺𑀬𑀁 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺. 𑀦𑀸𑀕𑀫𑀸𑀡𑀯𑀓𑀸 𑀢𑀁 𑀤𑀺𑀲𑁆𑀯𑀸 𑀅𑀭𑀯𑀸𑀴𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀳𑀸𑀭𑀸𑀚, 𑀏𑀓𑁄 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄 𑀪𑀡𑁆𑀟𑀼 𑀓𑀸𑀲𑀸𑀯𑀯𑀲𑀦𑁄 𑀅𑀫𑁆𑀳𑀸𑀓𑀁 𑀉𑀤𑀓𑀁 𑀤𑀽𑀲𑁂𑀢𑀻’’𑀢𑀺. 𑀦𑀸𑀕𑀭𑀸𑀚𑀸 𑀢𑀸𑀯𑀤𑁂𑀯 𑀓𑁄𑀥𑀸𑀪𑀺𑀪𑀽𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀅𑀦𑁆𑀢𑀮𑀺𑀓𑁆𑀔𑁂 𑀅𑀦𑁂𑀓𑀸𑀦𑀺 𑀪𑀺𑀁𑀲𑀦𑀓𑀸𑀦𑀺 𑀦𑀺𑀫𑁆𑀫𑀺𑀦𑀺. 𑀢𑀢𑁄 𑀢𑀢𑁄 𑀪𑀼𑀲𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀭𑀼𑀓𑁆𑀔𑀸 𑀙𑀺𑀚𑁆𑀚𑀦𑁆𑀢𑀺, 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀢𑀦𑁆𑀢𑀺, 𑀫𑁂𑀖𑀸 𑀕𑀚𑁆𑀚𑀦𑁆𑀢𑀺, 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀅𑀲𑀦𑀺𑀬𑁄 𑀨𑀮𑀦𑁆𑀢𑀺, 𑀪𑀺𑀦𑁆𑀦𑀁 𑀯𑀺𑀬 𑀕𑀕𑀦𑀢𑀮𑀁 𑀉𑀤𑀓𑀁 𑀧𑀕𑁆𑀖𑀭𑀢𑀺. 𑀪𑀬𑀸𑀦𑀓𑀭𑀽𑀧𑀸 ¶ 𑀦𑀸𑀕𑀓𑀼𑀫𑀸𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀲𑀬𑀫𑁆𑀧𑀺 𑀥𑀽𑀫𑀸𑀬𑀢𑀺, 𑀧𑀚𑁆𑀚𑀮𑀢𑀺, 𑀧𑀳𑀭𑀡𑀯𑀼𑀝𑁆𑀞𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. ‘‘𑀓𑁄 𑀅𑀬𑀁 𑀫𑀼𑀡𑁆𑀟𑀓𑁄 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄’’𑀢𑀺𑀆𑀤𑀻𑀳𑀺 𑀨𑀭𑀼𑀲𑀯𑀘𑀦𑁂𑀳𑀺 𑀣𑁂𑀭𑀁 𑀲𑀦𑁆𑀢𑀚𑁆𑀚𑁂𑀲𑀺. ‘‘𑀏𑀣 𑀕𑀡𑁆𑀳𑀣 𑀳𑀦𑀣 ¶ 𑀦𑀺𑀤𑁆𑀥𑀫𑀣 𑀇𑀫𑀁 𑀲𑀫𑀡’’𑀦𑁆𑀢𑀺 𑀦𑀸𑀕𑀩𑀮𑀁 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀲𑀩𑁆𑀩𑀁 𑀢𑀁 𑀪𑀺𑀁𑀲𑀦𑀓𑀁 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀧𑀝𑀺𑀩𑀸𑀳𑀺𑀢𑁆𑀯𑀸 𑀦𑀸𑀕𑀭𑀸𑀚𑀸𑀦𑀁 𑀆𑀳 𑁋

‘‘𑀲𑀤𑁂𑀯𑀓𑁄𑀧𑀺 𑀘𑁂 𑀮𑁄𑀓𑁄, 𑀆𑀕𑀦𑁆𑀢𑁆𑀯𑀸 𑀢𑀸𑀲𑀬𑁂𑀬𑁆𑀬 𑀫𑀁;

𑀦 𑀫𑁂 𑀧𑀝𑀺𑀩𑀮𑁄 𑀅𑀲𑁆𑀲, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁.

‘‘𑀲𑀘𑁂𑀧𑀺 𑀢𑁆𑀯𑀁 𑀫𑀳𑀺𑀁 𑀲𑀩𑁆𑀩𑀁, 𑀲𑀲𑀫𑀼𑀤𑁆𑀤𑀁 𑀲𑀧𑀩𑁆𑀩𑀢𑀁;

𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀦𑀸𑀕, 𑀔𑀺𑀧𑁂𑀬𑁆𑀬𑀸𑀲𑀺 𑀫𑀫𑀽𑀧𑀭𑀺.

‘‘𑀦𑁂𑀯 ¶ 𑀫𑁂 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀚𑀦𑁂𑀢𑀼𑀁 𑀪𑀬𑀪𑁂𑀭𑀯𑀁;

𑀅𑀜𑁆𑀜𑀤𑀢𑁆𑀣𑀼 𑀢𑀯𑁂𑀯𑀲𑁆𑀲, 𑀯𑀺𑀖𑀸𑀢𑁄 𑀉𑀭𑀕𑀸𑀥𑀺𑀧𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀦𑀸𑀕𑀭𑀸𑀚𑀸 𑀯𑀺𑀳𑀢𑀸𑀦𑀼𑀪𑀸𑀯𑁄 𑀦𑀺𑀧𑁆𑀨𑀮𑀯𑀸𑀬𑀸𑀫𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀳𑁄𑀲𑀺. 𑀢𑀁 𑀣𑁂𑀭𑁄 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀤𑁆𑀥𑀺𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀸𑀕𑀲𑀳𑀲𑁆𑀲𑁂𑀳𑀺. 𑀅𑀜𑁆𑀜𑁂𑀧𑀺 𑀩𑀳𑀽 𑀳𑀺𑀫𑀯𑀦𑁆𑀢𑀯𑀸𑀲𑀺𑀦𑁄 𑀬𑀓𑁆𑀔𑀸 𑀘 𑀕𑀦𑁆𑀥𑀩𑁆𑀩𑀸 𑀘 𑀓𑀼𑀫𑁆𑀪𑀡𑁆𑀟𑀸 𑀘 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀧𑀜𑁆𑀘𑀓𑁄𑀧𑀺 𑀬𑀓𑁆𑀔𑁄 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀬𑀓𑁆𑀔𑀺𑀦𑀺𑀬𑀸 𑀧𑀜𑁆𑀘𑀳𑀺 𑀘 𑀧𑀼𑀢𑁆𑀢𑀲𑀢𑁂𑀳𑀺 𑀧𑀞𑀫𑁂 𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀣𑀸𑀬𑀲𑁆𑀫𑀸 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀲𑀩𑁆𑀩𑁂𑀧𑀺 𑀦𑀸𑀕𑀬𑀓𑁆𑀔𑀭𑀓𑁆𑀔𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 𑁋

‘‘𑀫𑀸 𑀤𑀸𑀦𑀺 𑀓𑁄𑀥𑀁 𑀚𑀦𑀬𑀺𑀢𑁆𑀣, 𑀇𑀢𑁄 𑀉𑀤𑁆𑀥𑀁 𑀬𑀣𑀸 𑀧𑀼𑀭𑁂;

𑀲𑀲𑁆𑀲𑀖𑀸𑀢𑀜𑁆𑀘 𑀫𑀸 𑀓𑀢𑁆𑀣, 𑀲𑀼𑀔𑀓𑀸𑀫𑀸 𑀳𑀺 𑀧𑀸𑀡𑀺𑀦𑁄;

𑀓𑀭𑁄𑀣 𑀫𑁂𑀢𑁆𑀢𑀁 𑀲𑀢𑁆𑀢𑁂𑀲𑀼, 𑀯𑀲𑀦𑁆𑀢𑀼 𑀫𑀦𑀼𑀚𑀸 𑀲𑀼𑀔’’𑀦𑁆𑀢𑀺.

𑀢𑁂 ¶ 𑀲𑀩𑁆𑀩𑁂𑀧𑀺 ‘‘𑀲𑀸𑀥𑀼 𑀪𑀦𑁆𑀢𑁂’’𑀢𑀺 𑀣𑁂𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑀁𑀤𑀺𑀯𑀲𑀫𑁂𑀯 𑀘 𑀦𑀸𑀕𑀭𑀸𑀚𑀲𑁆𑀲 𑀧𑀽𑀚𑀸𑀲𑀫𑀬𑁄 𑀳𑁄𑀢𑀺. 𑀅𑀣 𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀭𑀢𑀦𑀫𑀬𑀁 𑀧𑀮𑁆𑀮𑀗𑁆𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀜𑁆𑀜𑀧𑁂𑀲𑀺. 𑀦𑀺𑀲𑀻𑀤𑀺 𑀣𑁂𑀭𑁄 𑀧𑀮𑁆𑀮𑀗𑁆𑀓𑁂. 𑀦𑀸𑀕𑀭𑀸𑀚𑀸𑀧𑀺 𑀣𑁂𑀭𑀁 𑀩𑀻𑀚𑀬𑀫𑀸𑀦𑁄 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀯𑀸𑀲𑀺𑀦𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀦𑀸𑀕𑀭𑀸𑀚𑀢𑁄𑀧𑀺 𑀣𑁂𑀭𑁄 𑀫𑀳𑀺𑀤𑁆𑀥𑀺𑀓𑀢𑀭𑁄’’𑀢𑀺 𑀣𑁂𑀭𑀫𑁂𑀯 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸. 𑀣𑁂𑀭𑁄 𑀢𑁂𑀲𑀁 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺 ¶ . 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀅𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀓𑀼𑀮𑀲𑀢𑀲𑀳𑀲𑁆𑀲𑀁 𑀧𑀩𑁆𑀩𑀚𑀺. 𑀢𑀢𑁄 𑀧𑀪𑀼𑀢𑀺 𑀘 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀸 𑀬𑀸𑀯𑀚𑁆𑀚𑀢𑀦𑀸 𑀓𑀸𑀲𑀸𑀯𑀧𑀚𑁆𑀚𑁄𑀢𑀸 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸 𑀏𑀯.

𑀕𑀦𑁆𑀢𑁆𑀯𑀸 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀁, 𑀇𑀲𑀺 𑀫𑀚𑁆𑀛𑀦𑁆𑀢𑀺𑀓𑁄 𑀢𑀤𑀸;

𑀤𑀼𑀝𑁆𑀞𑀁 𑀦𑀸𑀕𑀁 𑀧𑀲𑀸𑀤𑁂𑀢𑁆𑀯𑀸, 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸 𑀩𑀳𑀽𑀢𑀺.

𑀫𑀳𑀸𑀤𑁂𑀯𑀢𑁆𑀣𑁂𑀭𑁄𑀧𑀺 𑀫𑀳𑀺𑀁𑀲𑀓𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑀢𑁆𑀢𑀸𑀮𑀻𑀲 𑀧𑀸𑀡𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀘𑀓𑁆𑀔𑀼𑀁 𑀧𑀝𑀺𑀮𑀪𑀺𑀁𑀲𑀼, 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀧𑀸𑀡𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼.

𑀕𑀦𑁆𑀢𑁆𑀯𑀸𑀦 ¶ 𑀭𑀝𑁆𑀞𑀁 𑀫𑀳𑀺𑀁𑀲𑀁, 𑀫𑀳𑀸𑀤𑁂𑀯𑁄 𑀫𑀳𑀺𑀤𑁆𑀥𑀺𑀓𑁄;

𑀘𑁄𑀤𑁂𑀢𑁆𑀯𑀸 𑀤𑁂𑀯𑀤𑀽𑀢𑁂𑀳𑀺, 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸 𑀩𑀳𑀽𑀢𑀺.

𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀦 𑀯𑀦𑀯𑀸𑀲𑀺𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀅𑀦𑀫𑀢𑀕𑁆𑀕𑀧𑀭𑀺𑀬𑀸𑀬𑀓𑀣𑀸𑀬 𑀯𑀦𑀯𑀸𑀲𑀺𑀓𑁂 𑀧𑀲𑀸𑀤𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀢𑁆𑀢𑀢𑀺𑀲𑀳𑀲𑁆𑀲𑀫𑀢𑁆𑀢𑀸 ¶ 𑀧𑀩𑁆𑀩𑀚𑀺𑀁𑀲𑀼, 𑀧𑀜𑁆𑀘𑀯𑀺𑀳𑀸𑀭𑀲𑀢𑀸𑀦𑀺 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀕𑀦𑁆𑀢𑁆𑀯𑀸𑀦 𑀭𑀓𑁆𑀔𑀺𑀢𑀢𑁆𑀣𑁂𑀭𑁄, 𑀯𑀦𑀯𑀸𑀲𑀺𑀁 𑀫𑀳𑀺𑀤𑁆𑀥𑀺𑀓𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀢𑀢𑁆𑀣, 𑀤𑁂𑀲𑁂𑀲𑀺 𑀅𑀦𑀫𑀢𑀕𑁆𑀕𑀺𑀬𑀦𑁆𑀢𑀺.

𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀧𑀺 𑀅𑀧𑀭𑀦𑁆𑀢𑀓𑀁 𑀕𑀦𑁆𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀅𑀧𑀭𑀦𑁆𑀢𑀓𑁂 𑀧𑀲𑀸𑀤𑁂𑀢𑁆𑀯𑀸 𑀲𑀢𑁆𑀢𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀺. 𑀔𑀢𑁆𑀢𑀺𑀬𑀓𑀼𑀮𑀢𑁄 𑀏𑀯 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀲𑀫𑀥𑀺𑀓𑀸𑀦𑀺 𑀘 𑀙 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀅𑀧𑀭𑀦𑁆𑀢𑀁 𑀯𑀺𑀕𑀸𑀳𑀺𑀢𑁆𑀯𑀸, 𑀬𑁄𑀦𑀓𑁄 𑀥𑀫𑁆𑀫𑀭𑀓𑁆𑀔𑀺𑀢𑁄;

𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑁂𑀦𑁂𑀢𑁆𑀣, 𑀧𑀲𑀸𑀤𑁂𑀲𑀺 𑀚𑀦𑁂 𑀩𑀳𑀽𑀢𑀺.

𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀦 𑀫𑀳𑀸𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀓𑀣𑀸𑀬 𑀫𑀳𑀸𑀭𑀝𑁆𑀞𑀓𑁂 𑀧𑀲𑀸𑀤𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀭𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀫𑀳𑀸𑀭𑀝𑁆𑀞𑀁 𑀇𑀲𑀺 𑀕𑀦𑁆𑀢𑁆𑀯𑀸, 𑀲𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑁄;

𑀚𑀸𑀢𑀓𑀁 𑀓𑀣𑀬𑀺𑀢𑁆𑀯𑀸𑀦, 𑀧𑀲𑀸𑀤𑁂𑀲𑀺 𑀫𑀳𑀸𑀚𑀦𑀦𑁆𑀢𑀺.

𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀧𑀺 ¶ 𑀬𑁄𑀦𑀓𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀬𑁄𑀦𑀓𑀮𑁄𑀓𑀁 𑀧𑀲𑀸𑀤𑁂𑀢𑁆𑀯𑀸 𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀧𑀸𑀡𑀲𑀢𑀲𑀳𑀲𑁆𑀲𑀲𑁆𑀲 𑀫𑀕𑁆𑀕𑀨𑀮𑀸𑀮𑀗𑁆𑀓𑀸𑀭𑀁 𑀅𑀤𑀸𑀲𑀺. 𑀲𑀦𑁆𑀢𑀺𑀓𑁂 𑀘𑀲𑁆𑀲 𑀤𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀲𑁄𑀧𑀺 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀬𑁄𑀦𑀭𑀝𑁆𑀞𑀁 𑀢𑀤𑀸 𑀕𑀦𑁆𑀢𑁆𑀯𑀸, 𑀲𑁄 𑀫𑀳𑀸𑀭𑀓𑁆𑀔𑀺𑀢𑁄 𑀇𑀲𑀺;

𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑁂𑀦 𑀢𑁂 𑀧𑀲𑀸𑀤𑁂𑀲𑀺 𑀬𑁄𑀦𑀓𑁂𑀢𑀺.

𑀫𑀚𑁆𑀛𑀺𑀫𑀢𑁆𑀣𑁂𑀭𑁄 ¶ ¶ 𑀧𑀦 𑀓𑀲𑁆𑀲𑀧𑀕𑁄𑀢𑁆𑀢𑀢𑁆𑀣𑁂𑀭𑁂𑀦 𑀅𑀴𑀓𑀤𑁂𑀯𑀢𑁆𑀣𑁂𑀭𑁂𑀦 𑀤𑀼𑀦𑁆𑀤𑀼𑀪𑀺𑀲𑁆𑀲𑀭𑀢𑁆𑀣𑁂𑀭𑁂𑀦 𑀫𑀳𑀸𑀤𑁂𑀯𑀢𑁆𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀳𑀺𑀫𑀯𑀦𑁆𑀢𑀤𑁂𑀲𑀪𑀸𑀕𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀢𑀁 𑀤𑁂𑀲𑀁 𑀧𑀲𑀸𑀤𑁂𑀢𑁆𑀯𑀸 𑀅𑀲𑀻𑀢𑀺𑀧𑀸𑀡𑀓𑁄𑀝𑀺𑀬𑁄 𑀫𑀕𑁆𑀕𑀨𑀮𑀭𑀢𑀦𑀸𑀦𑀺 𑀧𑀝𑀺𑀮𑀸𑀪𑁂𑀲𑀺. 𑀧𑀜𑁆𑀘𑀧𑀺 𑀘 𑀣𑁂𑀭𑀸 𑀧𑀜𑁆𑀘 𑀭𑀝𑁆𑀞𑀸𑀦𑀺 𑀧𑀲𑀸𑀤𑁂𑀲𑀼𑀁. 𑀏𑀓𑀫𑁂𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀢𑁂 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀕𑀦𑁆𑀢𑁆𑀯𑀸𑀦 𑀫𑀚𑁆𑀛𑀺𑀫𑀢𑁆𑀣𑁂𑀭𑁄, 𑀳𑀺𑀫𑀯𑀦𑁆𑀢𑀁 𑀧𑀲𑀸𑀤𑀬𑀺;

𑀬𑀓𑁆𑀔𑀲𑁂𑀦𑀁 𑀧𑀓𑀸𑀲𑁂𑀦𑁆𑀢𑁄, 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀦𑁆𑀢𑀺.

𑀲𑁄𑀡𑀢𑁆𑀣𑁂𑀭𑁄𑀧𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀢𑁆𑀣𑁂𑀭𑁂𑀦 𑀲𑀼𑀯𑀡𑁆𑀡𑀪𑀽𑀫𑀺𑀁 𑀅𑀕𑀫𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀢𑁆𑀣 𑀏𑀓𑀸 𑀭𑀓𑁆𑀔𑀲𑀻 𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀚𑀸𑀢𑁂 𑀚𑀸𑀢𑁂 𑀤𑀸𑀭𑀓𑁂 𑀔𑀸𑀤𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀘 𑀭𑀸𑀚𑀓𑀼𑀮𑁂 𑀏𑀓𑁄 𑀤𑀸𑀭𑀓𑁄 𑀚𑀸𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀭𑀓𑁆𑀔𑀲𑀸𑀦𑀁 𑀲𑀳𑀸𑀬𑀓𑁄 𑀏𑀲𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀧𑀳𑀭𑀺𑀢𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀺. 𑀣𑁂𑀭𑁄 ‘‘𑀓𑀺𑀁 𑀢𑀼𑀫𑁆𑀳𑁂 𑀆𑀯𑀼𑀥𑀳𑀢𑁆𑀣𑀸 𑀆𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 𑀆𑀳𑀁𑀲𑀼 𑁋 ‘‘𑀭𑀸𑀚𑀓𑀼𑀮𑁂 𑀚𑀸𑀢𑁂 𑀚𑀸𑀢𑁂 𑀤𑀸𑀭𑀓𑁂 𑀭𑀓𑁆𑀔𑀲𑀸 𑀔𑀸𑀤𑀦𑁆𑀢𑀺, 𑀢𑁂𑀲𑀁 𑀢𑀼𑀫𑁆𑀳𑁂 𑀲𑀳𑀸𑀬𑀓𑀸’’𑀢𑀺. 𑀣𑁂𑀭𑁄 ‘‘𑀦 𑀫𑀬𑀁 𑀭𑀓𑁆𑀔𑀲𑀸𑀦𑀁 𑀲𑀳𑀸𑀬𑀓𑀸, 𑀲𑀫𑀡𑀸 𑀦𑀸𑀫 𑀫𑀬𑀁 𑀯𑀺𑀭𑀢𑀸 𑀧𑀸𑀡𑀸𑀢𑀺𑀧𑀸𑀢𑀸…𑀧𑁂… 𑀯𑀺𑀭𑀢𑀸 𑀫𑀚𑁆𑀚𑀧𑀸𑀦𑀸 𑀏𑀓𑀪𑀢𑁆𑀢𑀺𑀓𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺 𑀆𑀳. 𑀢𑀲𑁆𑀫𑀺𑀁𑀬𑁂𑀯 𑀘 𑀔𑀡𑁂 𑀲𑀸 𑀭𑀓𑁆𑀔𑀲𑀻 𑀲𑀧𑀭𑀺𑀯𑀸𑀭𑀸 𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺 ‘‘𑀭𑀸𑀚𑀓𑀼𑀮𑁂 𑀤𑀸𑀭𑀓𑁄 𑀚𑀸𑀢𑁄 𑀢𑀁 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀲𑀸, 𑀪𑀦𑁆𑀢𑁂, 𑀭𑀓𑁆𑀔𑀲𑀻 𑀆𑀕𑀘𑁆𑀙𑀢𑀻’’𑀢𑀺 𑀪𑀻𑀢𑀸 𑀯𑀺𑀭𑀯𑀺𑀁𑀲𑀼. 𑀣𑁂𑀭𑁄 𑀭𑀓𑁆𑀔𑀲𑁂𑀳𑀺 𑀤𑀺𑀕𑀼𑀡𑁂 𑀅𑀢𑁆𑀢𑀪𑀸𑀯𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑁂𑀳𑀺 𑀅𑀢𑁆𑀢𑀪𑀸𑀯𑁂𑀳𑀺 𑀢𑀁 𑀭𑀓𑁆𑀔𑀲𑀺𑀁 ¶ 𑀲𑀧𑀭𑀺𑀲𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀭𑀺𑀓𑁆𑀔𑀺𑀧𑀺 ¶ . 𑀢𑀲𑁆𑀲𑀸 𑀲𑀧𑀭𑀺𑀲𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀅𑀤𑁆𑀥𑀸 𑀇𑀫𑁂𑀳𑀺 𑀇𑀤𑀁 𑀞𑀸𑀦𑀁 𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀺. 𑀫𑀬𑀁 𑀧𑀦 𑀇𑀫𑁂𑀲𑀁 𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀲𑀩𑁆𑀩𑁂 𑀭𑀓𑁆𑀔𑀲𑀸 𑀪𑀻𑀢𑀸 𑀯𑁂𑀕𑀲𑀸 𑀧𑀮𑀸𑀬𑀺𑀁𑀲𑀼. 𑀣𑁂𑀭𑁄𑀧𑀺 𑀢𑁂 𑀬𑀸𑀯 𑀅𑀤𑀲𑁆𑀲𑀦𑀁 𑀢𑀸𑀯 𑀧𑀮𑀸𑀧𑁂𑀢𑁆𑀯𑀸 𑀤𑀻𑀧𑀲𑁆𑀲 𑀲𑀫𑀦𑁆𑀢𑀢𑁄 𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀦𑁆𑀦𑀺𑀧𑀢𑀺𑀢𑀁 𑀫𑀳𑀸𑀚𑀦𑀓𑀸𑀬𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀧𑀲𑀸𑀤𑁂𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀧𑀦𑁂𑀢𑁆𑀣 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀓𑀼𑀮𑀤𑀸𑀭𑀓𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀓𑀼𑀮𑀥𑀻𑀢𑀸𑀦𑀁 𑀤𑀺𑀬𑀟𑁆𑀠𑀲𑀳𑀲𑁆𑀲𑀁. 𑀏𑀯𑀁 𑀲𑁄 𑀢𑀢𑁆𑀣 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑁄 𑀧𑀪𑀼𑀢𑀺 𑀭𑀸𑀚𑀓𑀼𑀮𑁂 𑀚𑀸𑀢𑀤𑀸𑀭𑀓𑀸𑀦𑀁 𑀲𑁄𑀡𑀼𑀢𑁆𑀢𑀭𑀦𑀸𑀫𑀫𑁂𑀯 𑀓𑀭𑁄𑀦𑁆𑀢𑀺.

𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀦𑁆𑀢𑁆𑀯𑀸𑀦, 𑀲𑁄𑀡𑀼𑀢𑁆𑀢𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀺𑀲𑀸𑀘𑁂 𑀦𑀺𑀤𑁆𑀥𑀫𑁂𑀢𑁆𑀯𑀸𑀦, 𑀩𑁆𑀭𑀳𑁆𑀫𑀚𑀸𑀮𑀁 𑀅𑀤𑁂𑀲𑀺𑀲𑀼𑀦𑁆𑀢𑀺.

𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀧𑀦 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀉𑀧𑀚𑁆𑀛𑀸𑀬𑁂𑀦 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 ¶ 𑀘 𑀅𑀚𑁆𑀛𑀺𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀸𑀮𑁄 𑀦𑀼 𑀔𑁄 𑀫𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀦𑁆𑀢𑀼𑀁 𑀦𑁄’’𑀢𑀺. 𑀅𑀣𑀲𑁆𑀲 𑀯𑀻𑀫𑀁𑀲𑀢𑁄 ‘‘𑀦 𑀢𑀸𑀯 𑀓𑀸𑀮𑁄’’𑀢𑀺 𑀅𑀳𑁄𑀲𑀺. 𑀓𑀺𑀁 𑀧𑀦𑀲𑁆𑀲 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺? 𑀫𑀼𑀝𑀲𑀺𑀯𑀭𑀜𑁆𑀜𑁄 𑀫𑀳𑀮𑁆𑀮𑀓𑀪𑀸𑀯𑀁. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀳𑀮𑁆𑀮𑀓𑁄, 𑀦 𑀲𑀓𑁆𑀓𑀸 𑀇𑀫𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁. 𑀇𑀤𑀸𑀦𑀺 𑀧𑀦𑀲𑁆𑀲 𑀧𑀼𑀢𑁆𑀢𑁄 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺. 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺 𑀲𑀸𑀲𑀦𑀁 𑀧𑀕𑁆𑀕𑀳𑁂𑀢𑀼𑀁. 𑀳𑀦𑁆𑀤 𑀬𑀸𑀯 𑀲𑁄 𑀲𑀫𑀬𑁄 𑀆𑀕𑀘𑁆𑀙𑀢𑀺, 𑀢𑀸𑀯 𑀜𑀸𑀢𑀓𑁂 𑀑𑀮𑁄𑀓𑁂𑀫. 𑀧𑀼𑀦 𑀤𑀸𑀦𑀺 𑀫𑀬𑀁 𑀇𑀫𑀁 𑀚𑀦𑀧𑀤𑀁 𑀆𑀕𑀘𑁆𑀙𑁂𑀬𑁆𑀬𑀸𑀫 𑀯𑀸 𑀦 𑀯𑀸’’𑀢𑀺. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀢𑁂𑀳𑀺 𑀇𑀝𑁆𑀝𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀣𑁂𑀭𑁂𑀳𑀺 𑀲𑀗𑁆𑀖𑀫𑀺𑀢𑁆𑀢𑀸𑀬 𑀧𑀼𑀢𑁆𑀢𑁂𑀦 𑀲𑀼𑀫𑀦𑀲𑀸𑀫𑀡𑁂𑀭𑁂𑀦 𑀪𑀡𑁆𑀟𑀼𑀓𑁂𑀦 ¶ 𑀘 𑀉𑀧𑀸𑀲𑀓𑁂𑀦 𑀲𑀤𑁆𑀥𑀺𑀁 𑀭𑀸𑀚𑀕𑀳𑀦𑀕𑀭𑀧𑀭𑀺𑀯𑀢𑁆𑀢𑀓𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀜𑀸𑀢𑀓𑁂 𑀑𑀮𑁄𑀓𑁂𑀦𑁆𑀢𑁄 𑀙 𑀫𑀸𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀯𑁂𑀤𑀺𑀲𑀦𑀕𑀭𑀁 𑀦𑀸𑀫 𑀲𑀫𑁆𑀧𑀢𑁆𑀢𑁄. 𑀅𑀲𑁄𑀓𑁄 𑀓𑀺𑀭 𑀓𑀼𑀫𑀸𑀭𑀓𑀸𑀮𑁂 𑀚𑀦𑀧𑀤𑀁 𑀮𑀪𑀺𑀢𑁆𑀯𑀸 𑀉𑀚𑁆𑀚𑁂𑀦𑀺𑀁 𑀕𑀘𑁆𑀙𑀦𑁆𑀢𑁄 𑀯𑁂𑀤𑀺𑀲𑀦𑀕𑀭𑀁 𑀧𑀢𑁆𑀯𑀸 𑀯𑁂𑀤𑀺𑀲𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀭𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀢𑀁𑀤𑀺𑀯𑀲𑀫𑁂𑀯 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀉𑀚𑁆𑀚𑁂𑀦𑀺𑀬𑀁 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀯𑀺𑀚𑀸𑀬𑀺. 𑀓𑀼𑀫𑀸𑀭𑀲𑁆𑀲 ¶ 𑀘𑀼𑀤𑁆𑀤𑀲𑀯𑀲𑁆𑀲𑀓𑀸𑀮𑁂 𑀭𑀸𑀚𑀸 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺. 𑀲𑀸 𑀢𑀲𑁆𑀲 𑀫𑀸𑀢𑀸 𑀢𑁂𑀦 𑀲𑀫𑀬𑁂𑀦 𑀜𑀸𑀢𑀺𑀖𑀭𑁂 𑀯𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀸𑀢𑀼 𑀦𑀺𑀯𑁂𑀲𑀦𑀝𑁆𑀞𑀸𑀦𑀁 𑀯𑁂𑀝𑀺𑀲𑀦𑀕𑀭𑀁 𑀦𑀸𑀫 𑀲𑀫𑁆𑀧𑀢𑁆𑀢𑁄’’𑀢𑀺.

𑀲𑀫𑁆𑀧𑀢𑁆𑀢𑀜𑁆𑀘 𑀧𑀦 𑀣𑁂𑀭𑀁 𑀤𑀺𑀲𑁆𑀯𑀸 𑀣𑁂𑀭𑀫𑀸𑀢𑀸 𑀤𑁂𑀯𑀻 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀣𑁂𑀭𑀁 𑀅𑀢𑁆𑀢𑀦𑀸 𑀓𑀢𑀁 𑀯𑁂𑀤𑀺𑀲𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑀁 𑀦𑀸𑀫 𑀆𑀭𑁄𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀇𑀥 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀲𑀫𑀬𑁄 𑀦𑀼 𑀔𑁄 𑀇𑀤𑀸𑀦𑀺 𑀮𑀗𑁆𑀓𑀸𑀤𑀻𑀧𑀁 𑀕𑀦𑁆𑀢𑀼’’𑀦𑁆𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀪𑀯𑀢𑀼 𑀢𑀸𑀯 𑀫𑁂 𑀧𑀺𑀢𑀭𑀸 𑀧𑁂𑀲𑀺𑀢𑀁 𑀅𑀪𑀺𑀲𑁂𑀓𑀁 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄, 𑀭𑀢𑀦𑀢𑁆𑀢𑀬𑀕𑀼𑀡𑀜𑁆𑀘 𑀲𑀼𑀡𑀸𑀢𑀼, 𑀙𑀡𑀢𑁆𑀣𑀜𑁆𑀘 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀲𑁆𑀲𑀓𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀢𑀼, 𑀢𑀤𑀸 𑀢𑀁 𑀢𑀢𑁆𑀣 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. 𑀅𑀣𑀸𑀧𑀭𑀁 𑀏𑀓𑀫𑀸𑀲𑀁 𑀢𑀢𑁆𑀣𑁂𑀯 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀫𑀸𑀲𑀸𑀢𑀺𑀓𑁆𑀓𑀫𑁂𑀦 𑀘 𑀚𑁂𑀝𑁆𑀞𑀫𑀽𑀮𑀫𑀸𑀲𑀧𑀼𑀡𑁆𑀡𑀫𑀸𑀬𑀁 𑀉𑀧𑁄𑀲𑀣𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀸 𑀲𑀩𑁆𑀩𑁂𑀧𑀺 𑁋 ‘‘𑀓𑀸𑀮𑁄 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀕𑀫𑀦𑀸𑀬, 𑀉𑀤𑀸𑀳𑀼 𑀦𑁄’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀫𑀳𑀺𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀼;

𑀇𑀝𑁆𑀝𑀺𑀬𑁄 𑀉𑀢𑁆𑀢𑀺𑀬𑁄 𑀣𑁂𑀭𑁄, 𑀪𑀤𑁆𑀤𑀲𑀸𑀮𑁄 𑀘 𑀲𑀫𑁆𑀩𑀮𑁄.

‘‘𑀲𑀸𑀫𑀡𑁂𑀭𑁄 ¶ 𑀘 𑀲𑀼𑀫𑀦𑁄, 𑀙𑀴𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀪𑀡𑁆𑀟𑀼𑀓𑁄 𑀲𑀢𑁆𑀢𑀫𑁄 𑀢𑁂𑀲𑀁, 𑀤𑀺𑀝𑁆𑀞𑀲𑀘𑁆𑀘𑁄 𑀉𑀧𑀸𑀲𑀓𑁄;

𑀇𑀢𑀺 𑀳𑁂𑀢𑁂 𑀫𑀳𑀸𑀦𑀸𑀕𑀸, 𑀫𑀦𑁆𑀢𑀬𑀺𑀁𑀲𑀼 𑀭𑀳𑁄𑀕𑀢𑀸’’𑀢𑀺.

𑀢𑀤𑀸 ¶ 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀫𑀼𑀝𑀲𑀺𑀯𑀭𑀸𑀚𑀸; 𑀇𑀤𑀸𑀦𑀺 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘 𑀢𑀼𑀫𑁆𑀳𑁂 𑀩𑁆𑀬𑀸𑀓𑀢𑀸 𑁋 ‘𑀅𑀦𑀸𑀕𑀢𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀲𑁆𑀲𑀢𑀻’𑀢𑀺. 𑀢𑀲𑁆𑀫𑀸𑀢𑀺𑀳 𑀯𑁄, 𑀪𑀦𑁆𑀢𑁂, 𑀓𑀸𑀮𑁄 𑀤𑀻𑀧𑀯𑀭𑀁 𑀕𑀫𑀦𑀸𑀬; 𑀅𑀳𑀫𑁆𑀧𑀺 𑀯𑁄 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀓𑀲𑁆𑀫𑀸 𑀧𑀦 𑀲𑀓𑁆𑀓𑁄 𑀏𑀯𑀫𑀸𑀳? 𑀪𑀕𑀯𑀸 𑀓𑀺𑀭𑀲𑁆𑀲 𑀩𑁄𑀥𑀺𑀫𑀽𑀮𑁂𑀬𑁂𑀯 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀅𑀦𑀸𑀕𑀢𑁂 𑀇𑀫𑀲𑁆𑀲 𑀤𑀻𑀧𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘‘𑀢𑀤𑀸 𑀢𑁆𑀯𑀫𑁆𑀧𑀺 𑀲𑀳𑀸𑀬𑁄 𑀪𑀯𑁂𑀬𑁆𑀬𑀸𑀲𑀻’’𑀢𑀺 𑀘 𑀆𑀡𑀸𑀧𑁂𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀲𑀢𑁆𑀢𑀫𑁄 𑀯𑁂𑀝𑀺𑀲𑀓𑀧𑀩𑁆𑀩𑀢𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀫𑀺𑀲𑁆𑀲𑀓𑀧𑀩𑁆𑀩𑀢𑁂 𑀧𑀢𑀺𑀝𑁆𑀞𑀳𑀺. 𑀬𑀁 𑀧𑀦𑁂𑀢𑀭𑀳𑀺 ‘‘𑀘𑁂𑀢𑀺𑀬𑀧𑀩𑁆𑀩𑀢𑁄’’𑀢𑀺𑀧𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀯𑁂𑀝𑀺𑀲𑀕𑀺𑀭𑀺𑀫𑁆𑀳𑀺 ¶ 𑀭𑀸𑀚𑀕𑀳𑁂, 𑀯𑀲𑀺𑀢𑁆𑀯𑀸 𑀢𑀺𑀁𑀲𑀭𑀢𑁆𑀢𑀺𑀬𑁄;

𑀓𑀸𑀮𑁄𑀯 𑀕𑀫𑀦𑀲𑁆𑀲𑀸𑀢𑀺, 𑀕𑀘𑁆𑀙𑀸𑀫 𑀤𑀻𑀧𑀫𑀼𑀢𑁆𑀢𑀫𑀁.

‘‘𑀧𑀴𑀻𑀦𑀸 𑀚𑀫𑁆𑀩𑀼𑀤𑀻𑀧𑀸 𑀢𑁂, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂;

𑀏𑀯𑀫𑀼𑀧𑁆𑀧𑀢𑀺𑀢𑀸 𑀣𑁂𑀭𑀸, 𑀦𑀺𑀧𑀢𑀺𑀁𑀲𑀼 𑀦𑀕𑀼𑀢𑁆𑀢𑀫𑁂.

‘‘𑀧𑀼𑀭𑀢𑁄 𑀧𑀼𑀭𑀲𑁂𑀝𑁆𑀞𑀲𑁆𑀲, 𑀧𑀩𑁆𑀩𑀢𑁂 𑀫𑁂𑀖𑀲𑀦𑁆𑀦𑀺𑀪𑁂;

𑀧𑀢𑀺𑀁𑀲𑀼 𑀲𑀻𑀮𑀓𑀽𑀝𑀫𑁆𑀳𑀺, 𑀳𑀁𑀲𑀸𑀯 𑀦𑀕𑀫𑀼𑀤𑁆𑀥𑀦𑀻’’𑀢𑀺.

𑀏𑀯𑀁 ¶ 𑀇𑀝𑁆𑀝𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀧𑀢𑀺𑀝𑁆𑀞𑀳𑀦𑁆𑀢𑁄 𑀘 𑀆𑀬𑀲𑁆𑀫𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀢𑀺𑀝𑁆𑀞𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀳𑀺 𑀅𑀝𑁆𑀞𑀫𑁂 𑀯𑀲𑁆𑀲𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀫𑀺𑀁𑀬𑁂𑀯 𑀯𑀲𑁆𑀲𑁂 𑀲𑀻𑀳𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀆𑀤𑀺𑀭𑀸𑀚𑀸 𑀯𑀺𑀚𑀬𑀓𑀼𑀫𑀸𑀭𑁄 𑀇𑀫𑀁 𑀤𑀻𑀧𑀫𑀸𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀯𑀸𑀲𑀁 𑀅𑀓𑀸𑀲𑀺. 𑀚𑀫𑁆𑀩𑀼𑀤𑀻𑀧𑁂 𑀉𑀤𑀬𑀪𑀤𑁆𑀤𑀲𑁆𑀲 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀥 𑀯𑀺𑀚𑀬𑁄 𑀓𑀸𑀮𑀫𑀓𑀸𑀲𑀺. 𑀉𑀤𑀬𑀪𑀤𑁆𑀤𑀲𑁆𑀲 𑀧𑀜𑁆𑀘𑀤𑀲𑀫𑁂 𑀯𑀲𑁆𑀲𑁂 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀦𑀸𑀕𑀤𑀸𑀲𑀓𑀭𑀜𑁆𑀜𑁄 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀯𑀲𑁆𑀲𑁂 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀲𑀼𑀲𑀼𑀦𑀸𑀕𑀭𑀜𑁆𑀜𑁄 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀅𑀪𑀬𑀭𑀜𑁆𑀜𑁄 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀅𑀣 𑀅𑀪𑀬𑀲𑁆𑀲 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀧𑀡𑁆𑀟𑀼𑀓𑀸𑀪𑀬𑁄 𑀦𑀸𑀫 𑀤𑀸𑀫𑀭𑀺𑀓𑁄 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀢𑁆𑀣 𑀓𑀸𑀴𑀸𑀲𑁄𑀓𑀲𑁆𑀲 𑀲𑁄𑀴𑀲𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀓𑀲𑁆𑀲 𑀲𑀢𑁆𑀢𑀭𑀲𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀢𑀸𑀦𑀺 𑀳𑁂𑀝𑁆𑀞𑀸 𑀏𑀓𑁂𑀦 𑀯𑀲𑁆𑀲𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀢𑀢𑁆𑀣 ¶ 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀓𑀸𑀪𑀬𑁄 𑀓𑀸𑀮𑀫𑀓𑀸𑀲𑀺. 𑀫𑀼𑀝𑀲𑀺𑀯𑀭𑀸𑀚𑀸 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀢𑁆𑀣 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀫𑀼𑀝𑀲𑀺𑀯𑀭𑀸𑀚𑀸 𑀓𑀸𑀮𑀫𑀓𑀸𑀲𑀺. 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀚𑀸𑀢𑀲𑀢𑁆𑀢𑀼 𑀘𑀢𑀼𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀉𑀤𑀬𑀪𑀤𑁆𑀤𑁄 ¶ 𑀲𑁄𑀴𑀲, 𑀅𑀦𑀼𑀭𑀼𑀤𑁆𑀥𑁄 𑀘 𑀫𑀼𑀡𑁆𑀟𑁄 𑀘 𑀅𑀝𑁆𑀞, 𑀦𑀸𑀕𑀤𑀸𑀲𑀓𑁄 𑀘𑀢𑀼𑀯𑀻𑀲𑀢𑀺, 𑀲𑀼𑀲𑀼𑀦𑀸𑀕𑁄 𑀅𑀝𑁆𑀞𑀸𑀭𑀲, 𑀢𑀲𑁆𑀲𑁂𑀯 𑀧𑀼𑀢𑁆𑀢𑁄 𑀓𑀸𑀴𑀸𑀲𑁄𑀓𑁄 𑀅𑀝𑁆𑀞𑀯𑀻𑀲𑀢𑀺, 𑀢𑀢𑁄 𑀢𑀲𑁆𑀲 𑀧𑀼𑀢𑁆𑀢𑀓𑀸 𑀤𑀲 𑀪𑀸𑀢𑀼𑀓𑀭𑀸𑀚𑀸𑀦𑁄 𑀤𑁆𑀯𑁂𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀢𑁂𑀲𑀁 𑀧𑀘𑁆𑀙𑀢𑁄 𑀦𑀯 𑀦𑀦𑁆𑀤𑀸 𑀤𑁆𑀯𑁂𑀯𑀻𑀲𑀢𑀺𑀫𑁂𑀯, 𑀘𑀦𑁆𑀤𑀕𑀼𑀢𑁆𑀢𑁄 𑀘𑀢𑀼𑀯𑀻𑀲𑀢𑀺, 𑀩𑀺𑀦𑁆𑀤𑀼𑀲𑀸𑀭𑁄 𑀅𑀝𑁆𑀞𑀯𑀻𑀲𑀢𑀺 ¶ . 𑀢𑀲𑁆𑀲𑀸𑀯𑀲𑀸𑀦𑁂 𑀅𑀲𑁄𑀓𑁄 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀼𑀭𑁂 𑀅𑀪𑀺𑀲𑁂𑀓𑀸 𑀘𑀢𑁆𑀢𑀸𑀭𑀺 𑀅𑀪𑀺𑀲𑁂𑀓𑀢𑁄 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀧𑀢𑀺𑀝𑁆𑀞𑀺𑀢𑁄. 𑀏𑀯𑀫𑁂𑀢𑁂𑀦 𑀭𑀸𑀚𑀯𑀁𑀲𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀢𑀺𑀝𑁆𑀞𑀳𑀻’’𑀢𑀺.

𑀢𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀚𑁂𑀝𑁆𑀞𑀫𑀽𑀮𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀭𑀸𑀚𑀸 𑀦𑀓𑁆𑀔𑀢𑁆𑀢𑀁 𑀖𑁄𑀲𑀸𑀧𑁂𑀢𑁆𑀯𑀸 ‘‘𑀙𑀡𑀁 𑀓𑀭𑁄𑀣𑀸’’𑀢𑀺 𑀅𑀫𑀘𑁆𑀘𑁂 𑀘 𑀆𑀡𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀫𑀺𑀲𑁆𑀲𑀓𑀧𑀩𑁆𑀩𑀢𑁄 𑀢𑁂𑀦 𑀧𑀸𑀬𑀸𑀲𑀺 𑀫𑀺𑀕𑀯𑀁 𑀓𑀻𑀴𑀺𑀢𑀼𑀓𑀸𑀫𑁄. 𑀅𑀣 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀏𑀓𑀸 𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀣𑁂𑀭𑁂 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀭𑁄𑀳𑀺𑀢𑀫𑀺𑀕𑀭𑀽𑀧𑀁 𑀕𑀳𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀫𑀸𑀦𑀸 𑀯𑀺𑀬 𑀘𑀭𑀢𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀤𑀸𑀦𑀺 𑀧𑀫𑀢𑁆𑀢𑀁 𑀯𑀺𑀚𑁆𑀛𑀺𑀢𑀼’’𑀦𑁆𑀢𑀺 𑀚𑀺𑀬𑀁 𑀨𑁄𑀝𑁂𑀲𑀺. 𑀫𑀺𑀕𑁄 𑀅𑀫𑁆𑀩𑀢𑁆𑀣𑀮𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺. 𑀭𑀸𑀚𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑁆𑀢𑁄 𑀅𑀫𑁆𑀩𑀢𑁆𑀣𑀮𑀫𑁂𑀯 𑀅𑀪𑀺𑀭𑀼𑀳𑀺. 𑀫𑀺𑀕𑁄𑀧𑀺 𑀣𑁂𑀭𑀸𑀦𑀁 𑀅𑀯𑀺𑀤𑀽𑀭𑁂 𑀅𑀦𑁆𑀢𑀭𑀥𑀸𑀬𑀺. 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀭𑀸𑀚𑀸𑀦𑀁 𑀅𑀯𑀺𑀤𑀽𑀭𑁂 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀫𑀁𑀬𑁂𑀯 𑀭𑀸𑀚𑀸 𑀧𑀲𑁆𑀲𑀢𑀼, 𑀫𑀸 𑀇𑀢𑀭𑁂’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ‘‘𑀢𑀺𑀲𑁆𑀲, 𑀢𑀺𑀲𑁆𑀲, 𑀇𑀢𑁄 𑀏𑀳𑀻’’𑀢𑀺 𑀆𑀳. 𑀭𑀸𑀚𑀸 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀤𑀻𑀧𑁂 𑀚𑀸𑀢𑁄 𑀫𑀁 ‘𑀢𑀺𑀲𑁆𑀲𑀸’𑀢𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ¶ 𑀆𑀮𑀧𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄 𑀪𑀡𑁆𑀟𑀼 𑀓𑀸𑀲𑀸𑀯𑀯𑀲𑀦𑁄 𑀫𑀁 𑀦𑀸𑀫𑁂𑀦 𑀆𑀮𑀧𑀢𑀺, 𑀓𑁄 𑀦𑀼 𑀔𑁄 𑀅𑀬𑀁 𑀪𑀯𑀺𑀲𑁆𑀲𑀢𑀺 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸’’𑀢𑀺? 𑀣𑁂𑀭𑁄 𑀆𑀳 𑁋

‘‘𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸;

𑀢𑀯𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀘 𑀅𑀲𑁄𑀓𑀥𑀫𑁆𑀫𑀭𑀸𑀚𑀸 𑀘 𑀅𑀤𑀺𑀝𑁆𑀞𑀲𑀳𑀸𑀬𑀓𑀸 𑀳𑁄𑀦𑁆𑀢𑀺. 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀲𑁆𑀲 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀙𑀸𑀢𑀧𑀩𑁆𑀩𑀢𑀧𑀸𑀤𑁂 𑀏𑀓𑀫𑁆𑀳𑀺 𑀯𑁂𑀴𑀼𑀕𑀼𑀫𑁆𑀩𑁂 𑀢𑀺𑀲𑁆𑀲𑁄 𑀯𑁂𑀴𑀼𑀬𑀝𑁆𑀞𑀺𑀬𑁄 𑀭𑀣𑀬𑀝𑁆𑀞𑀺𑀧𑁆𑀧𑀫𑀸𑀡𑀸 𑀉𑀧𑁆𑀧𑀚𑁆𑀚𑀺𑀁𑀲𑀼 𑁋 𑀏𑀓𑀸 𑀮𑀢𑀸𑀬𑀝𑁆𑀞𑀺 𑀦𑀸𑀫, 𑀏𑀓𑀸 𑀧𑀼𑀧𑁆𑀨𑀬𑀝𑁆𑀞𑀺 𑀦𑀸𑀫, 𑀏𑀓𑀸 ¶ 𑀲𑀓𑀼𑀡𑀬𑀝𑁆𑀞𑀺 𑀦𑀸𑀫. 𑀢𑀸𑀲𑀼 𑀮𑀢𑀸𑀬𑀝𑁆𑀞𑀺 𑀭𑀚𑀢𑀯𑀡𑁆𑀡𑀸 𑀳𑁄𑀢𑀺, 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀮𑀢𑀸 𑀓𑀜𑁆𑀘𑀦𑀯𑀡𑁆𑀡𑀸 𑀔𑀸𑀬𑀢𑀺. 𑀧𑀼𑀧𑁆𑀨𑀬𑀝𑁆𑀞𑀺𑀬𑀁 𑀧𑀦 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀓𑀸𑀴𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀼𑀯𑀺𑀪𑀢𑁆𑀢𑀯𑀡𑁆𑀝𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀸𑀦𑀺 𑀳𑀼𑀢𑁆𑀯𑀸 𑀔𑀸𑀬𑀦𑁆𑀢𑀺. 𑀲𑀓𑀼𑀡𑀬𑀝𑁆𑀞𑀺𑀬𑀁 𑀳𑀁𑀲𑀓𑀼𑀓𑁆𑀓𑀼𑀝𑀚𑀻𑀯𑀚𑀻𑀯𑀓𑀸𑀤𑀬𑁄 𑀲𑀓𑀼𑀡𑀸 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀘 𑀘𑀢𑀼𑀧𑁆𑀧𑀤𑀸𑀦𑀺 𑀲𑀚𑀻𑀯𑀸𑀦𑀺 𑀯𑀺𑀬 𑀔𑀸𑀬𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀙𑀸𑀢𑀧𑀩𑁆𑀩𑀢𑀧𑀸𑀤𑀫𑁆𑀳𑀺 ¶ , 𑀯𑁂𑀴𑀼𑀬𑀝𑁆𑀞𑀻 𑀢𑀬𑁄 𑀅𑀳𑀼;

𑀲𑁂𑀢𑀸 𑀭𑀚𑀢𑀬𑀝𑁆𑀞𑀻𑀯, 𑀮𑀢𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀸.

‘‘𑀦𑀻𑀮𑀸𑀤𑀺 𑀬𑀸𑀤𑀺𑀲𑀁 𑀧𑀼𑀧𑁆𑀨𑀁, 𑀧𑀼𑀧𑁆𑀨𑀬𑀝𑁆𑀞𑀺𑀫𑁆𑀳𑀺 𑀢𑀸𑀤𑀺𑀲𑀁;

𑀲𑀓𑀼𑀡𑀸 𑀲𑀓𑀼𑀡𑀬𑀝𑁆𑀞𑀺𑀫𑁆𑀳𑀺, 𑀲𑀭𑀽𑀧𑁂𑀦𑁂𑀯 𑀲𑀡𑁆𑀞𑀺𑀢𑀸’’𑀢𑀺.

𑀲𑀫𑀼𑀤𑁆𑀤𑀢𑁄𑀧𑀺𑀲𑁆𑀲 ¶ 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀺 𑀅𑀦𑁂𑀓𑀯𑀺𑀳𑀺𑀢𑀁 𑀭𑀢𑀦𑀁 𑀉𑀧𑁆𑀧𑀚𑁆𑀚𑀺. 𑀢𑀫𑁆𑀩𑀧𑀡𑁆𑀡𑀺𑀬𑀁 𑀧𑀦 𑀅𑀝𑁆𑀞 𑀫𑀼𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀁𑀲𑀼 𑁋 𑀳𑀬𑀫𑀼𑀢𑁆𑀢𑀸, 𑀕𑀚𑀫𑀼𑀢𑁆𑀢𑀸, 𑀭𑀣𑀫𑀼𑀢𑁆𑀢𑀸, 𑀆𑀫𑀮𑀓𑀫𑀼𑀢𑁆𑀢𑀸, 𑀯𑀮𑀬𑀫𑀼𑀢𑁆𑀢𑀸, 𑀅𑀗𑁆𑀕𑀼𑀮𑀺𑀯𑁂𑀞𑀓𑀫𑀼𑀢𑁆𑀢𑀸, 𑀓𑀓𑀼𑀥𑀨𑀮𑀫𑀼𑀢𑁆𑀢𑀸, 𑀧𑀸𑀓𑀢𑀺𑀓𑀫𑀼𑀢𑁆𑀢𑀸𑀢𑀺. 𑀲𑁄 𑀢𑀸 𑀘 𑀬𑀝𑁆𑀞𑀺𑀬𑁄 𑀢𑀸 𑀘 𑀫𑀼𑀢𑁆𑀢𑀸 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀭𑀢𑀦𑀁 𑀅𑀲𑁄𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀅𑀲𑁄𑀓𑁄 𑀧𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀧𑀳𑀺𑀡𑀺 𑁋 𑀙𑀢𑁆𑀢𑀁, 𑀘𑀸𑀫𑀭𑀁, 𑀔𑀕𑁆𑀕𑀁, 𑀫𑁄𑀴𑀺𑀁, 𑀭𑀢𑀦𑀧𑀸𑀤𑀼𑀓𑀁, 𑀅𑀜𑁆𑀜𑀜𑁆𑀘 𑀅𑀪𑀺𑀲𑁂𑀓𑀢𑁆𑀣𑀸𑀬 𑀩𑀳𑀼𑀯𑀺𑀥𑀁 𑀧𑀡𑁆𑀡𑀸𑀓𑀸𑀭𑀁; 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀗𑁆𑀔𑀁, 𑀕𑀗𑁆𑀕𑁄𑀤𑀓𑀁, 𑀯𑀟𑁆𑀠𑀫𑀸𑀦𑀁, 𑀯𑀝𑀁𑀲𑀓𑀁, 𑀪𑀺𑀗𑁆𑀕𑀸𑀭𑀁, 𑀦𑀦𑁆𑀤𑀺𑀬𑀸𑀯𑀝𑁆𑀝𑀁, 𑀲𑀺𑀯𑀺𑀓𑀁, 𑀓𑀜𑁆𑀜𑀁, 𑀓𑀝𑀘𑁆𑀙𑀼𑀁, 𑀅𑀥𑁄𑀯𑀺𑀫𑀁 𑀤𑀼𑀲𑁆𑀲𑀬𑀼𑀕𑀁, 𑀳𑀢𑁆𑀣𑀧𑀼𑀜𑁆𑀙𑀦𑀁, 𑀳𑀭𑀺𑀘𑀦𑁆𑀤𑀦𑀁, 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁, 𑀅𑀜𑁆𑀚𑀦𑀁, 𑀳𑀭𑀻𑀢𑀓𑀁, 𑀆𑀫𑀮𑀓𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀯𑀸𑀮𑀩𑀻𑀚𑀦𑀺𑀫𑀼𑀡𑁆𑀳𑀻𑀲𑀁, 𑀙𑀢𑁆𑀢𑀁 𑀔𑀕𑁆𑀕𑀜𑁆𑀘 𑀧𑀸𑀤𑀼𑀓𑀁;

𑀯𑁂𑀞𑀦𑀁 𑀲𑀸𑀭𑀧𑀸𑀫𑀗𑁆𑀕𑀁, 𑀪𑀺𑀗𑁆𑀕𑀸𑀭𑀁 𑀦𑀦𑁆𑀤𑀺𑀯𑀝𑁆𑀝𑀓𑀁.

‘‘𑀲𑀺𑀯𑀺𑀓𑀁 𑀲𑀗𑁆𑀔𑀁 𑀯𑀝𑀁𑀲𑀜𑁆𑀘, 𑀅𑀥𑁄𑀯𑀺𑀫𑀁 𑀯𑀢𑁆𑀣𑀓𑁄𑀝𑀺𑀓𑀁;

𑀲𑁄𑀯𑀡𑁆𑀡𑀧𑀸𑀢𑀺𑀁 𑀓𑀝𑀘𑁆𑀙𑀼𑀁, 𑀫𑀳𑀕𑁆𑀖𑀁 𑀳𑀢𑁆𑀣𑀧𑀼𑀜𑁆𑀙𑀦𑀁.

‘‘𑀅𑀦𑁄𑀢𑀢𑁆𑀢𑁄𑀤𑀓𑀁 𑀓𑀜𑁆𑀜𑀁, 𑀉𑀢𑁆𑀢𑀫𑀁 𑀳𑀭𑀺𑀘𑀦𑁆𑀤𑀦𑀁;

𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁 ¶ , 𑀅𑀜𑁆𑀚𑀦𑀁 𑀦𑀸𑀕𑀫𑀸𑀳𑀝𑀁.

‘‘𑀳𑀭𑀻𑀢𑀓𑀁 ¶ 𑀆𑀫𑀮𑀓𑀁, 𑀫𑀳𑀕𑁆𑀖𑀁 𑀅𑀫𑀢𑁄𑀲𑀥𑀁;

𑀲𑀝𑁆𑀞𑀺𑀯𑀸𑀳𑀲𑀢𑀁 𑀲𑀸𑀮𑀺𑀁, 𑀲𑀼𑀕𑀦𑁆𑀥𑀁 𑀲𑀼𑀯𑀓𑀸𑀳𑀝𑀁;

𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀁, 𑀧𑀸𑀳𑁂𑀲𑀺 𑀅𑀲𑁄𑀓𑀯𑁆𑀳𑀬𑁄’’𑀢𑀺.

𑀦 𑀓𑁂𑀯𑀮𑀜𑁆𑀘𑁂𑀢𑀁 𑀆𑀫𑀺𑀲𑀧𑀡𑁆𑀡𑀸𑀓𑀸𑀭𑀁, 𑀇𑀫𑀁 𑀓𑀺𑀭 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀫𑁆𑀧𑀺 𑀧𑁂𑀲𑁂𑀲𑀺 𑁋

‘‘𑀅𑀳𑀁 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀉𑀧𑀸𑀲𑀓𑀢𑁆𑀢𑀁 𑀤𑁂𑀲𑁂𑀲𑀺𑀁, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

‘‘𑀇𑀫𑁂𑀲𑀼 ¶ 𑀢𑀻𑀲𑀼 𑀯𑀢𑁆𑀣𑀽𑀲𑀼, 𑀉𑀢𑁆𑀢𑀫𑁂 𑀚𑀺𑀦𑀲𑀸𑀲𑀦𑁂;

𑀢𑁆𑀯𑀫𑁆𑀧𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀲𑀤𑁆𑀥𑀸 𑀲𑀭𑀡𑀫𑀼𑀧𑁂𑀳𑀻’’𑀢𑀺.

𑀲𑁆𑀯𑀸𑀬𑀁 𑀭𑀸𑀚𑀸 𑀢𑀁 𑀤𑀺𑀯𑀲𑀁 𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀪𑀺𑀲𑁂𑀓𑁂𑀦 𑀏𑀓𑀫𑀸𑀲𑀸𑀪𑀺𑀲𑀺𑀢𑁆𑀢𑁄 𑀳𑁄𑀢𑀺.

𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀳𑀺𑀲𑁆𑀲 𑀅𑀪𑀺𑀲𑁂𑀓𑀫𑀓𑀁𑀲𑀼. 𑀲𑁄 𑀅𑀘𑀺𑀭𑀲𑁆𑀲𑀼𑀢𑀁 𑁋 𑀢𑀁 𑀲𑀸𑀲𑀦𑀧𑁆𑀧𑀯𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀢𑀁 𑀣𑁂𑀭𑀲𑁆𑀲 ‘‘𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑁆𑀬𑀸 𑀦𑀼 𑀔𑁄 𑀆𑀕𑀢𑀸’’𑀢𑀺 𑀢𑀸𑀯𑀤𑁂𑀯 𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑀬𑀫𑀸𑀦𑁄. 𑀬𑀣𑀸𑀳 𑁋

‘‘𑀆𑀯𑀼𑀥𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺;

𑀦𑀺𑀲𑀚𑁆𑀚 𑀭𑀸𑀚𑀸 𑀲𑀫𑁆𑀫𑁄𑀤𑀺, 𑀩𑀳𑀼𑀁 𑀅𑀢𑁆𑀣𑀽𑀧𑀲𑀜𑁆𑀳𑀺𑀢’’𑀦𑁆𑀢𑀺.

𑀲𑀫𑁆𑀫𑁄𑀤𑀦𑀻𑀬𑀓𑀣𑀜𑁆𑀘 𑀓𑀼𑀭𑀼𑀫𑀸𑀦𑁂𑀬𑁂𑀯 𑀢𑀲𑁆𑀫𑀺𑀁 𑀢𑀸𑀦𑀺𑀧𑀺 𑀘𑀢𑁆𑀢𑀸𑀮𑀻𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀆𑀕𑀦𑁆𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁. 𑀢𑀤𑀸 𑀣𑁂𑀭𑁄 𑀇𑀢𑀭𑁂𑀧𑀺 𑀙 𑀚𑀦𑁂 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀤𑀸 𑀆𑀕𑀢𑀸’’𑀢𑀺 𑀆𑀳 ¶ . ‘‘𑀫𑀬𑀸 𑀲𑀤𑁆𑀥𑀺𑀁𑀬𑁂𑀯, 𑀫𑀳𑀸𑀭𑀸𑀚𑀸’’𑀢𑀺. ‘‘𑀇𑀤𑀸𑀦𑀺 𑀧𑀦 𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑀸 𑀲𑀫𑀡𑀸 𑀲𑀦𑁆𑀢𑀻’’𑀢𑀺? ‘‘𑀲𑀦𑁆𑀢𑀺, 𑀫𑀳𑀸𑀭𑀸𑀚; 𑀏𑀢𑀭𑀳𑀺 𑀚𑀫𑁆𑀩𑀼𑀤𑀻𑀧𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑁄. 𑀢𑀲𑁆𑀫𑀺𑀁 𑁋

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸𑀢𑀺.

‘‘𑀪𑀦𑁆𑀢𑁂, 𑀓𑁂𑀦 𑀆𑀕𑀢𑀢𑁆𑀣𑀸’’𑀢𑀺? ‘‘𑀦𑁂𑀯, 𑀫𑀳𑀸𑀭𑀸𑀚, 𑀉𑀤𑀓𑁂𑀦 𑀦 𑀣𑀮𑁂𑀦𑀸’’𑀢𑀺. ‘‘𑀭𑀸𑀚𑀸 𑀆𑀓𑀸𑀲𑁂𑀦 ¶ 𑀆𑀕𑀢𑀸’’𑀢𑀺 𑀅𑀜𑁆𑀜𑀸𑀲𑀺. 𑀣𑁂𑀭𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀭𑀜𑁆𑀜𑁄 𑀧𑀜𑁆𑀜𑀸𑀯𑁂𑀬𑀢𑁆𑀢𑀺𑀬’’𑀦𑁆𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 𑀆𑀲𑀦𑁆𑀦𑀁 𑀅𑀫𑁆𑀩𑀭𑀼𑀓𑁆𑀔𑀁 𑀆𑀭𑀩𑁆𑀪 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀸𑀫𑁄 𑀅𑀬𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄’’𑀢𑀺? ‘‘𑀅𑀫𑁆𑀩𑀭𑀼𑀓𑁆𑀔𑁄 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀇𑀫𑀁 𑀧𑀦, 𑀫𑀳𑀸𑀭𑀸𑀚, 𑀅𑀫𑁆𑀩𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀅𑀫𑁆𑀩𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀜𑁆𑀜𑁂𑀧𑀺 𑀩𑀳𑀽 𑀅𑀫𑁆𑀩𑀭𑀼𑀓𑁆𑀔𑀸’’𑀢𑀺. ‘‘𑀇𑀫𑀜𑁆𑀘 𑀅𑀫𑁆𑀩𑀁 𑀢𑁂 𑀘 𑀅𑀫𑁆𑀩𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑁂 𑀭𑀼𑀓𑁆𑀔𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀢𑁂 𑀧𑀦 𑀦 𑀅𑀫𑁆𑀩𑀭𑀼𑀓𑁆𑀔𑀸’’𑀢𑀺. ‘‘𑀅𑀜𑁆𑀜𑁂 𑀅𑀫𑁆𑀩𑁂 𑀘 𑀅𑀦𑀫𑁆𑀩𑁂 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀺 𑀧𑀦 𑀅𑀜𑁆𑀜𑁄 𑀭𑀼𑀓𑁆𑀔𑁄’’𑀢𑀺? ‘‘𑀅𑀬𑀫𑁂𑀯, 𑀪𑀦𑁆𑀢𑁂, 𑀅𑀫𑁆𑀩𑀭𑀼𑀓𑁆𑀔𑁄’’𑀢𑀺. ‘‘𑀲𑀸𑀥𑀼, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁄𑀲𑀺. 𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀜𑀸𑀢𑀓𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀩𑀳𑀽 𑀚𑀦𑀸’’𑀢𑀺. ‘‘𑀢𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁂 𑀓𑁂𑀘𑀺 𑀅𑀜𑁆𑀜𑀸𑀢𑀓𑀸𑀧𑀺 𑀅𑀢𑁆𑀣𑀺, 𑀫𑀳𑀸𑀭𑀸𑀚𑀸’’𑀢𑀺? ‘‘𑀅𑀜𑁆𑀜𑀸𑀢𑀓𑀸, 𑀪𑀦𑁆𑀢𑁂, 𑀜𑀸𑀢𑀓𑁂𑀳𑀺 𑀩𑀳𑀼𑀢𑀭𑀸’’𑀢𑀺. ‘‘𑀢𑀯 𑀜𑀸𑀢𑀓𑁂 𑀘 𑀅𑀜𑁆𑀜𑀸𑀢𑀓𑁂 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺, 𑀫𑀳𑀸𑀭𑀸𑀚𑀸’’𑀢𑀺 ¶ ? ‘‘𑀅𑀳𑀫𑁂𑀯, 𑀅𑀜𑁆𑀜𑀸𑀢𑀓𑁄’’𑀢𑀺. 𑀅𑀣 𑀣𑁂𑀭𑁄 ‘‘𑀧𑀡𑁆𑀟𑀺𑀢𑁄 𑀭𑀸𑀚𑀸 𑀲𑀓𑁆𑀔𑀺𑀲𑁆𑀲𑀢𑀺 𑀥𑀫𑁆𑀫𑀁 𑀅𑀜𑁆𑀜𑀸𑀢𑀼’’𑀦𑁆𑀢𑀺 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺 𑀲𑀤𑁆𑀥𑀺𑀁 𑀘𑀢𑁆𑀢𑀸𑀮𑀻𑀲𑀸𑀬 𑀧𑀸𑀡𑀲𑀳𑀲𑁆𑀲𑁂𑀳𑀺.

𑀢𑀁 𑀔𑀡𑀜𑁆𑀜𑁂𑀯 𑀘 𑀭𑀜𑁆𑀜𑁄 𑀪𑀢𑁆𑀢𑀁 𑀆𑀳𑀭𑀺𑀬𑀺𑀢𑁆𑀣 ¶ . 𑀭𑀸𑀚𑀸 𑀘 𑀲𑀼𑀢𑁆𑀢𑀦𑁆𑀢𑀁 𑀲𑀼𑀡𑀦𑁆𑀢𑁄 𑀏𑀯 𑀅𑀜𑁆𑀜𑀸𑀲𑀺 𑁋 ‘‘𑀦 𑀇𑀫𑁂𑀲𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀪𑁄𑀚𑀦𑀁 𑀓𑀧𑁆𑀧𑀢𑀻’’𑀢𑀺. ‘‘𑀅𑀧𑀼𑀘𑁆𑀙𑀺𑀢𑁆𑀯𑀸 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀼𑀜𑁆𑀚𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀦, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀪𑁄𑀚𑀦𑀁 𑀓𑀧𑁆𑀧𑀢𑀻’’𑀢𑀺. ‘‘𑀓𑀲𑁆𑀫𑀺𑀁 𑀓𑀸𑀮𑁂, 𑀪𑀦𑁆𑀢𑁂, 𑀓𑀧𑁆𑀧𑀢𑀻’’𑀢𑀺? ‘‘𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀕𑀘𑁆𑀙𑀸𑀫, 𑀪𑀦𑁆𑀢𑁂, 𑀦𑀕𑀭’’𑀦𑁆𑀢𑀺? ‘‘𑀅𑀮𑀁, 𑀫𑀳𑀸𑀭𑀸𑀚, 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀯𑀲𑀣, 𑀅𑀬𑀁 𑀤𑀸𑀭𑀓𑁄 𑀆𑀕𑀘𑁆𑀙𑀢𑀽’’𑀢𑀺. ‘‘𑀫𑀳𑀸𑀭𑀸𑀚, 𑀅𑀬𑀁 𑀤𑀸𑀭𑀓𑁄 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀇𑀤𑀸𑀦𑀺 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀲𑁆𑀯𑁂 𑀭𑀣𑀁 𑀧𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀣𑁂𑀭𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀲𑀼𑀫𑀦𑀲𑀸𑀫𑀡𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀲𑀼𑀫𑀦, 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑁂𑀳𑀻’’𑀢𑀺. ‘‘𑀪𑀦𑁆𑀢𑁂, 𑀓𑀺𑀢𑁆𑀢𑀓𑀁 𑀞𑀸𑀦𑀁 𑀲𑀸𑀯𑁂𑀦𑁆𑀢𑁄 𑀖𑁄𑀲𑁂𑀫𑀻’’𑀢𑀺? ‘‘𑀲𑀓𑀮𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀸𑀫𑀡𑁂𑀭𑁄 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀓𑀮𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀲𑀸𑀯𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑁂𑀲𑀺. 𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀢𑁆𑀣𑀺 𑀓𑁄𑀘𑀺 𑀉𑀧𑀤𑁆𑀤𑀯𑁄’’𑀢𑀺. ‘‘𑀦𑀢𑁆𑀣𑀫𑁆𑀳𑀸𑀓𑀁 𑀓𑁄𑀘𑀺 𑀉𑀧𑀤𑁆𑀤𑀯𑁄, 𑀥𑀫𑁆𑀫𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑀸𑀧𑀬𑀺𑀫𑁆𑀳 𑀩𑀼𑀤𑁆𑀥𑀯𑀘𑀦𑀁 𑀓𑀣𑁂𑀢𑀼𑀓𑀸𑀫𑀫𑁆𑀳𑀸’’𑀢𑀺 ¶ . 𑀢𑀜𑁆𑀘 𑀧𑀦 𑀲𑀸𑀫𑀡𑁂𑀭𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁. 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺. 𑀢𑁂𑀦 𑀲𑀤𑁆𑀤𑁂𑀦 𑀫𑀳𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀣𑁂𑀭𑁄 𑀫𑀳𑀦𑁆𑀢𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀤𑀺𑀲𑁆𑀯𑀸 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀩𑀳𑀽 𑀦𑀸𑀕𑀸 ¶ 𑀘 𑀲𑀼𑀧𑀡𑁆𑀡𑀸 𑀘 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀬𑀸𑀤𑀺𑀲𑁄𑀯 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀓𑀣𑀬𑀢𑁄 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀢𑀸𑀤𑀺𑀲𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀺 𑀚𑀸𑀢𑁄. 𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀣𑁂𑀭𑀸𑀦𑀁 ¶ 𑀭𑀣𑀁 𑀧𑁂𑀲𑁂𑀲𑀺. 𑀲𑀸𑀭𑀣𑀻 𑀭𑀣𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀣𑁂𑀭𑀸𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀆𑀕𑀢𑁄, 𑀪𑀦𑁆𑀢𑁂, 𑀭𑀣𑁄; 𑀅𑀪𑀺𑀭𑀼𑀳𑀣 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺. 𑀣𑁂𑀭𑀸 ‘‘𑀦 𑀫𑀬𑀁 𑀭𑀣𑀁 𑀅𑀪𑀺𑀭𑀼𑀳𑀸𑀫; 𑀕𑀘𑁆𑀙 𑀢𑁆𑀯𑀁, 𑀧𑀘𑁆𑀙𑀸 𑀫𑀬𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀧𑀞𑀫𑀓𑀘𑁂𑀢𑀺𑀬𑀝𑁆𑀞𑀸𑀦𑁂 𑀑𑀢𑀭𑀺𑀁𑀲𑀼. 𑀢𑀜𑁆𑀳𑀺 𑀘𑁂𑀢𑀺𑀬𑀁 𑀣𑁂𑀭𑁂𑀳𑀺 𑀧𑀞𑀫𑀁 𑀑𑀢𑀺𑀡𑁆𑀡𑀝𑁆𑀞𑀸𑀦𑁂 𑀓𑀢𑀢𑁆𑀢𑀸𑀬𑁂𑀯 ‘‘𑀧𑀞𑀫𑀓𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀭𑀸𑀚𑀸𑀧𑀺 𑀲𑀸𑀭𑀣𑀺𑀁 𑀧𑁂𑀲𑁂𑀢𑁆𑀯𑀸 ‘‘𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀫𑀡𑁆𑀟𑀧𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀢𑀸𑀯𑀤𑁂𑀯 𑀲𑀩𑁆𑀩𑁂 𑀳𑀝𑁆𑀞𑀢𑀼𑀝𑁆𑀞𑀸 𑀅𑀢𑀺𑀯𑀺𑀬 𑀧𑀸𑀲𑀸𑀤𑀺𑀓𑀁 𑀫𑀡𑁆𑀟𑀧𑀁 𑀧𑀝𑀺𑀬𑀸𑀤𑁂𑀲𑀼𑀁. 𑀧𑀼𑀦 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀳𑀺𑀬𑁆𑀬𑁄 𑀣𑁂𑀭𑁄 𑀲𑀻𑀮𑀓𑁆𑀔𑀦𑁆𑀥𑀁 𑀓𑀣𑀬𑀫𑀸𑀦𑁄 ‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀦 𑀓𑀧𑁆𑀧𑀢𑀻’𑀢𑀺 𑀆𑀳; ‘𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺 𑀦𑀼 𑀔𑁄 𑀅𑀬𑁆𑀬𑀸 𑀆𑀲𑀦𑁂𑀲𑀼, 𑀦 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀻’’’𑀢𑀺? 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀦𑁆𑀢𑀲𑁆𑀲𑁂𑀯 𑀲𑁄 𑀲𑀸𑀭𑀣𑀺 𑀦𑀕𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀢𑀢𑁄 𑀅𑀤𑁆𑀤𑀲 𑀣𑁂𑀭𑁂 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂. 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀆𑀕𑀢𑀸, 𑀤𑁂𑀯, 𑀣𑁂𑀭𑀸’’𑀢𑀺. 𑀭𑀸𑀚𑀸 ‘‘𑀭𑀣𑀁 𑀆𑀭𑀽𑀴𑁆𑀳𑀸’’𑀢𑀺 𑀧𑀼𑀘𑁆𑀙𑀺. ‘‘𑀦 𑀆𑀭𑀽𑀴𑁆𑀳𑀸, 𑀤𑁂𑀯, 𑀅𑀧𑀺 𑀘 𑀫𑀫 𑀧𑀘𑁆𑀙𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀞𑀺𑀢𑀸’’𑀢𑀺. 𑀭𑀸𑀚𑀸 ‘‘𑀭𑀣𑀫𑁆𑀧𑀺 𑀦𑀸𑀪𑀺𑀭𑀽𑀳𑀺𑀁𑀲𑀽’’𑀢𑀺 𑀲𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀅𑀬𑁆𑀬𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀦 𑀳𑀺, 𑀪𑀡𑁂, 𑀣𑁂𑀭𑀸𑀦𑀁 𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀣𑀁 𑀅𑀕𑀫𑀸𑀲𑀺. 𑀅𑀫𑀘𑁆𑀘𑀸 𑀧𑀣𑀯𑀺𑀬𑀁 𑀢𑀝𑁆𑀝𑀺𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀧𑀭𑀺 𑀓𑁄𑀚𑀯𑀓𑀸𑀤𑀻𑀦𑀺 𑀘𑀺𑀢𑁆𑀢𑀢𑁆𑀣𑀭𑀡𑀸𑀦𑀺 𑀧𑀜𑁆𑀜𑀧𑁂𑀲𑀼𑀁. 𑀉𑀧𑁆𑀧𑀸𑀢𑀧𑀸𑀞𑀓𑀸 𑀤𑀺𑀲𑁆𑀯𑀸 ‘‘𑀕𑀳𑀺𑀢𑀸 𑀤𑀸𑀦𑀺 𑀇𑀫𑁂𑀳𑀺 𑀧𑀣𑀯𑀻, 𑀇𑀫𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 ¶ 𑀲𑀸𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀭𑀸𑀚𑀸𑀧𑀺 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀳𑀢𑀺𑀬𑀸 𑀧𑀽𑀚𑀸𑀬 𑀘 𑀲𑀓𑁆𑀓𑀸𑀭𑁂𑀦 𑀘 𑀣𑁂𑀭𑁂 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺. 𑀣𑁂𑀭𑁄 𑀆𑀲𑀦𑀧𑀜𑁆𑀜𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀧𑀣𑀯𑀻 𑀯𑀺𑀬 𑀧𑀢𑁆𑀣𑀝𑀁 𑀦𑀺𑀘𑁆𑀘𑀮𑀜𑁆𑀘 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀭𑀸𑀚𑀸 𑀣𑁂𑀭𑁂 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 ‘‘𑀅𑀦𑀼𑀴𑀸𑀤𑁂𑀯𑀻𑀧𑀫𑀼𑀔𑀸𑀦𑀺 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀣𑁂𑀭𑀸𑀦𑀁 𑀅𑀪𑀺𑀯𑀸𑀤𑀦𑀁 𑀧𑀽𑀚𑀸𑀲𑀓𑁆𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑀽’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀜𑁆𑀜𑁄 𑀲𑀧𑀭𑀺𑀚𑀦𑀲𑁆𑀲 ¶ 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑁂𑀦𑁆𑀢𑁄 𑀧𑁂𑀢𑀯𑀢𑁆𑀣𑀼𑀁 ¶ 𑀯𑀺𑀫𑀸𑀦𑀯𑀢𑁆𑀣𑀼𑀁 𑀲𑀘𑁆𑀘𑀲𑀁𑀬𑀼𑀢𑁆𑀢𑀜𑁆𑀘 𑀓𑀣𑁂𑀲𑀺. 𑀢𑀁 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘𑀧𑀺 𑀇𑀢𑁆𑀣𑀺𑀲𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀁𑀲𑀼.

𑀬𑁂𑀧𑀺 𑀢𑁂 𑀫𑀦𑀼𑀲𑁆𑀲𑀸 𑀧𑀼𑀭𑀺𑀫𑀤𑀺𑀯𑀲𑁂 𑀫𑀺𑀲𑁆𑀲𑀓𑀧𑀩𑁆𑀩𑀢𑁂 𑀣𑁂𑀭𑁂 𑀅𑀤𑁆𑀤𑀲𑀁𑀲𑀼, 𑀢𑁂 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀣𑁂𑀭𑀸𑀦𑀁 𑀕𑀼𑀡𑁂 𑀓𑀣𑁂𑀦𑁆𑀢𑀺. 𑀢𑁂𑀲𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁄 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺. 𑀭𑀸𑀚𑀸 ‘‘𑀓𑀺𑀁 𑀏𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺. ‘‘𑀦𑀸𑀕𑀭𑀸, 𑀤𑁂𑀯, ‘𑀣𑁂𑀭𑁂 𑀤𑀝𑁆𑀞𑀼𑀁 𑀦 𑀮𑀪𑀸𑀫𑀸’𑀢𑀺 𑀯𑀺𑀭𑀯𑀦𑁆𑀢𑀻’’𑀢𑀺. 𑀭𑀸𑀚𑀸 ‘‘𑀲𑀘𑁂 𑀇𑀥 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀡𑁂, 𑀳𑀢𑁆𑀣𑀺𑀲𑀸𑀮𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀸𑀮𑀼𑀓𑀁 𑀆𑀓𑀺𑀭𑀺𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑁂 𑀣𑁂𑀭𑀸𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣𑀸’’𑀢𑀺 𑀆𑀳. 𑀅𑀫𑀘𑁆𑀘𑀸 𑀢𑀣𑀸 𑀅𑀓𑀁𑀲𑀼. 𑀣𑁂𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑀤𑀽𑀢𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀡𑀲𑀳𑀲𑁆𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 ‘‘𑀳𑀢𑁆𑀣𑀺𑀲𑀸𑀮𑀸 𑀅𑀢𑀺𑀲𑀫𑁆𑀩𑀸𑀥𑀸’’𑀢𑀺 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀦𑀦𑁆𑀤𑀦𑀯𑀦𑀼𑀬𑁆𑀬𑀸𑀦𑁂 𑀆𑀲𑀦𑀁 𑀧𑀜𑁆𑀜𑀧𑁂𑀲𑀼𑀁. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀧𑀸𑀡𑀲𑀳𑀲𑁆𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 ¶ 𑀧𑀝𑀺𑀮𑀪𑀺.

𑀏𑀯𑀁 𑀆𑀕𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀣𑁂𑀭𑀲𑁆𑀲 𑀦𑀦𑁆𑀤𑀦𑀯𑀦𑁂 𑀆𑀕𑀢𑀸𑀕𑀢𑀸𑀳𑀺 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑀲𑁆𑀲𑁂𑀯 𑀲𑀸𑀬𑀦𑁆𑀳𑀲𑀫𑀬𑁄 𑀚𑀸𑀢𑁄. 𑀣𑁂𑀭𑁄 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀕𑀘𑁆𑀙𑀸𑀫 𑀤𑀸𑀦𑀺 𑀫𑀺𑀲𑁆𑀲𑀓𑀧𑀩𑁆𑀩𑀢’’𑀦𑁆𑀢𑀺 𑀉𑀝𑁆𑀞𑀳𑀺. 𑀅𑀫𑀘𑁆𑀘𑀸 𑁋 ‘‘𑀓𑀢𑁆𑀣, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀝𑁆𑀞𑀸𑀦’’𑀦𑁆𑀢𑀺. 𑀢𑁂 𑀭𑀜𑁆𑀜𑁄 𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀭𑀸𑀚𑀸𑀦𑀼𑀫𑀢𑁂𑀦 𑀆𑀳𑀁𑀲𑀼 𑁋 ‘‘𑀅𑀓𑀸𑀮𑁄, 𑀪𑀦𑁆𑀢𑁂, 𑀇𑀤𑀸𑀦𑀺 𑀢𑀢𑁆𑀣 𑀕𑀦𑁆𑀢𑀼𑀁; 𑀇𑀤𑀫𑁂𑀯 𑀦𑀦𑁆𑀤𑀦𑀯𑀦𑀼𑀬𑁆𑀬𑀸𑀦𑀁 𑀅𑀬𑁆𑀬𑀸𑀦𑀁 𑀆𑀯𑀸𑀲𑀝𑁆𑀞𑀸𑀦𑀁 𑀳𑁄𑀢𑀽’’𑀢𑀺. ‘‘𑀅𑀮𑀁, 𑀕𑀘𑁆𑀙𑀸𑀫𑀸’’𑀢𑀺. 𑀧𑀼𑀦 𑀭𑀜𑁆𑀜𑁄 𑀯𑀘𑀦𑁂𑀦𑀸𑀳𑀁𑀲𑀼 𑁋 ‘‘𑀭𑀸𑀚𑀸, 𑀪𑀦𑁆𑀢𑁂, 𑀆𑀳 𑁋 ‘𑀏𑀢𑀁 𑀫𑁂𑀖𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀫𑀫 𑀧𑀺𑀢𑀼 𑀲𑀦𑁆𑀢𑀓𑀁 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑀁 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀏𑀢𑁆𑀣 𑀣𑁂𑀭𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀽’’’𑀢𑀺. 𑀯𑀲𑀺𑀁𑀲𑀼 𑀣𑁂𑀭𑀸 𑀫𑁂𑀖𑀯𑀦𑁂 𑀉𑀬𑁆𑀬𑀸𑀦𑁂.

𑀭𑀸𑀚𑀸𑀧𑀺 𑀔𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀣𑁂𑀭𑀲𑁆𑀲 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀲𑀼𑀔𑀲𑀬𑀺𑀢𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑁄’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀓𑀧𑁆𑀧𑀢𑀺, 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀆𑀳𑀭𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫’’𑀦𑁆𑀢𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁 𑀅𑀤𑀸𑀲𑀺. 𑀲𑀳 ¶ 𑀉𑀤𑀓𑀧𑀸𑀢𑁂𑀦 𑀧𑀣𑀯𑀻 𑀓𑀫𑁆𑀧𑀺. 𑀅𑀬𑀁 𑀫𑀳𑀸𑀯𑀺𑀳𑀸𑀭𑁂 𑀧𑀞𑀫𑁄 𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺. 𑀭𑀸𑀚𑀸 𑀪𑀻𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀢𑀻’’𑀢𑀺? ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀤𑀲𑀩𑀮𑀲𑁆𑀲 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺; 𑀇𑀤𑀜𑁆𑀘 𑀧𑀞𑀫𑀁 𑀯𑀺𑀳𑀸𑀭𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀭𑀸𑀚𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ¶ 𑀧𑀲𑀻𑀤𑀺. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂𑀧𑀺 𑀭𑀸𑀚𑀕𑁂𑀳𑁂𑀬𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀦𑀦𑁆𑀤𑀦𑀯𑀦𑁂 𑀅𑀦𑀫𑀢𑀕𑁆𑀕𑀺𑀬𑀸𑀦𑀺 𑀓𑀣𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀟𑁆𑀠𑀦𑀯𑀫𑀸𑀦𑀁 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀢𑁄 𑀧𑀝𑁆𑀞𑀸𑀬 ¶ 𑀘 𑀦𑀦𑁆𑀤𑀦𑀯𑀦𑀁 𑀲𑀸𑀲𑀦𑀲𑁆𑀲 𑀚𑁄𑀢𑀺𑀧𑀸𑀢𑀼𑀪𑀸𑀯𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀚𑁄𑀢𑀺𑀯𑀦’’𑀦𑁆𑀢𑀺 𑀦𑀸𑀫𑀁 𑀮𑀪𑀺. 𑀲𑀢𑁆𑀢𑀫𑁂 𑀧𑀦 𑀤𑀺𑀯𑀲𑁂 𑀣𑁂𑀭𑀸 𑀅𑀦𑁆𑀢𑁂𑀧𑀼𑀭𑁂 𑀭𑀜𑁆𑀜𑁄 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀁 𑀓𑀣𑀬𑀺𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀼.

𑀅𑀣 𑀔𑁄 𑀭𑀸𑀚𑀸 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀣𑁂𑀭𑁄, 𑀅𑀫𑁆𑀳𑁂 𑀕𑀸𑀴𑁆𑀳𑁂𑀦 𑀑𑀯𑀸𑀤𑁂𑀦 𑀑𑀯𑀤𑀢𑀺; 𑀕𑀘𑁆𑀙𑁂𑀬𑁆𑀬 𑀦𑀼 𑀔𑁄’’𑀢𑀺? 𑀅𑀫𑀘𑁆𑀘𑀸 ‘‘𑀢𑀼𑀫𑁆𑀳𑁂𑀳𑀺, 𑀤𑁂𑀯, 𑀣𑁂𑀭𑁄 𑀅𑀬𑀸𑀘𑀺𑀢𑁄 𑀲𑀬𑀫𑁂𑀯 𑀆𑀕𑀢𑁄; 𑀢𑀲𑁆𑀫𑀸 𑀢𑀲𑁆𑀲 𑀅𑀦𑀸𑀧𑀼𑀘𑁆𑀙𑀸𑀯 𑀕𑀫𑀦𑀫𑁆𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑁆𑀯𑁂 𑀘 𑀤𑁂𑀯𑀺𑀬𑁄 𑀆𑀭𑁄𑀧𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀁 𑀅𑀕𑀫𑀸𑀲𑀺 𑀫𑀳𑀜𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦. 𑀕𑀦𑁆𑀢𑁆𑀯𑀸 𑀤𑁂𑀯𑀺𑀬𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀣𑁂𑀭𑀸𑀦𑀁 𑀲𑀫𑀻𑀧𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀭𑀽𑀧𑁄 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀢𑀢𑁄 𑀦𑀁 𑀣𑁂𑀭𑁄 𑀆𑀳 𑁋 ‘‘𑀓𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀏𑀯𑀁 𑀓𑀺𑀮𑀫𑀫𑀸𑀦𑁄 𑀆𑀕𑀢𑁄’’𑀢𑀺? ‘‘‘𑀢𑀼𑀫𑁆𑀳𑁂 𑀫𑀫 𑀕𑀸𑀴𑁆𑀳𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀕𑀦𑁆𑀢𑀼𑀓𑀸𑀫𑀸 𑀦𑀼 𑀔𑁄’𑀢𑀺 𑀚𑀸𑀦𑀦𑀢𑁆𑀣𑀁, 𑀪𑀦𑁆𑀢𑁂’’𑀢𑀺. ‘‘𑀦 𑀫𑀬𑀁, 𑀫𑀳𑀸𑀭𑀸𑀚, 𑀕𑀦𑁆𑀢𑀼𑀓𑀸𑀫𑀸; 𑀅𑀧𑀺𑀘 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁄 𑀦𑀸𑀫𑀸𑀬𑀁 𑀫𑀳𑀸𑀭𑀸𑀚, 𑀢𑀢𑁆𑀭 𑀲𑀫𑀡𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀝𑁆𑀞𑀸𑀦𑀁 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀅𑀭𑀺𑀝𑁆𑀞𑁄 𑀦𑀸𑀫 𑀅𑀫𑀘𑁆𑀘𑁄 𑀧𑀜𑁆𑀘𑀧𑀡𑁆𑀡𑀸𑀲𑀸𑀬 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀭𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑁄 𑀆𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀤𑁂𑀯, 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀡𑁂, 𑀧𑀩𑁆𑀩𑀚𑀲𑁆𑀲𑀽’’𑀢𑀺 𑀭𑀸𑀚𑀸 𑀅𑀦𑀼𑀚𑀸𑀦𑀺𑀢𑁆𑀯𑀸 𑀣𑁂𑀭𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀢𑀤𑀳𑁂𑀯 𑀧𑀩𑁆𑀩𑀸𑀚𑁂𑀲𑀺. 𑀲𑀩𑁆𑀩𑁂 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀭𑀸𑀚𑀸𑀧𑀺 𑀔𑁄 𑀢𑀗𑁆𑀔𑀡𑁂𑀬𑁂𑀯 𑀓𑀡𑁆𑀝𑀓𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀲𑀝𑁆𑀞𑀺𑀬𑀸 𑀮𑁂𑀡𑁂𑀲𑀼 𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀕𑀭𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀧𑀺 𑀣𑁂𑀭𑀸 ¶ 𑀤𑀲𑀪𑀸𑀢𑀺𑀓𑀲𑀫𑀸𑀓𑀼𑀮𑀁 𑀭𑀸𑀚𑀓𑀼𑀮𑀁 𑀧𑀲𑀸𑀤𑁂𑀢𑁆𑀯𑀸 𑀫𑀳𑀸𑀚𑀦𑀁 𑀑𑀯𑀤𑀫𑀸𑀦𑀸 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀯𑀲𑁆𑀲𑀁 𑀯𑀲𑀺𑀁𑀲𑀼. 𑀢𑀤𑀸𑀧𑀺 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀧𑀞𑀫𑀁 𑀯𑀲𑁆𑀲𑀁 𑀉𑀧𑀕𑀢𑀸 𑀤𑁆𑀯𑀸𑀲𑀝𑁆𑀞𑀺 ¶ 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑀳𑀺𑀦𑁆𑀤𑁄 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀉𑀧𑁄𑀲𑀣𑀤𑀺𑀯𑀲𑁂 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀳𑀺 𑀘𑀺𑀭𑀤𑀺𑀝𑁆𑀞𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀦𑀸𑀣𑀯𑀸𑀲𑀁 𑀯𑀲𑀺𑀫𑁆𑀳, 𑀇𑀘𑁆𑀙𑀸𑀫 𑀫𑀬𑀁 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀸𑀫𑀺, 𑀅𑀬𑀜𑁆𑀘 𑀫𑀳𑀸𑀚𑀦𑁄 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀉𑀓𑁆𑀓𑀡𑁆𑀞𑀺𑀢𑀢𑁆𑀣𑀸’’𑀢𑀺? ‘‘𑀘𑀺𑀭𑀤𑀺𑀝𑁆𑀞𑁄 𑀦𑁄, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀢𑁂𑀦𑀫𑁆𑀳 𑀉𑀓𑁆𑀓𑀡𑁆𑀞𑀺𑀢𑀸’’𑀢𑀺. ‘‘𑀦𑀦𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀯𑁄𑀘𑀼𑀢𑁆𑀣 𑁋 ‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’’𑀢𑀺. ‘‘𑀓𑀺𑀜𑁆𑀘𑀸𑀧𑀺, 𑀫𑀳𑀸𑀭𑀸𑀚, 𑀧𑀭𑀺𑀦𑀺𑀩𑁆𑀩𑀼𑀢𑁄; 𑀅𑀣 𑀔𑁆𑀯𑀲𑁆𑀲 𑀲𑀭𑀻𑀭𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀻’’𑀢𑀺. ‘‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂, 𑀣𑀽𑀧𑀧𑀢𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑁂 𑀆𑀓𑀗𑁆𑀔𑀣𑀸𑀢𑀺. 𑀓𑀭𑁄𑀫𑀺 ¶ , 𑀪𑀦𑁆𑀢𑁂, 𑀣𑀽𑀧𑀁, 𑀪𑀽𑀫𑀺𑀪𑀸𑀕𑀁 𑀤𑀸𑀦𑀺 𑀯𑀺𑀘𑀺𑀦𑀸𑀣; 𑀅𑀧𑀺𑀘, 𑀪𑀦𑁆𑀢𑁂, 𑀥𑀸𑀢𑀼𑀬𑁄 𑀓𑀼𑀢𑁄 𑀮𑀘𑁆𑀙𑀸𑀫𑀸’’𑀢𑀺? ‘‘𑀲𑀼𑀫𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀲𑀼𑀫𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀼𑀢𑁄 𑀤𑀸𑀦𑀺, 𑀪𑀦𑁆𑀢𑁂, 𑀥𑀸𑀢𑀼𑀬𑁄 𑀮𑀘𑁆𑀙𑀸𑀫𑀸’’𑀢𑀺? 𑀲𑀼𑀫𑀦𑁄 𑀆𑀳 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀯𑀻𑀣𑀺𑀬𑁄 𑀲𑁄𑀥𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀧𑀼𑀡𑁆𑀡𑀖𑀝𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀧𑀭𑀺𑀚𑀦𑁄 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑁂 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀧𑀭𑀺 𑀘𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀬𑀸𑀳𑀺. 𑀅𑀤𑁆𑀥𑀸 𑀢𑀲𑁆𑀫𑀺𑀁 𑀞𑀸𑀦𑁂 ¶ 𑀥𑀸𑀢𑀼𑀬𑁄 𑀮𑀘𑁆𑀙𑀲𑀻’’𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀣𑁂𑀭𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀭𑀸𑀬𑀲𑁆𑀫𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀲𑀼𑀫𑀦𑀲𑀸𑀫𑀡𑁂𑀭𑀁 𑀆𑀳 𑁋 ‘‘𑀕𑀘𑁆𑀙 𑀢𑁆𑀯𑀁, 𑀲𑀸𑀫𑀡𑁂𑀭, 𑀚𑀫𑁆𑀩𑀼𑀤𑀻𑀧𑁂 𑀢𑀯 𑀅𑀬𑁆𑀬𑀓𑀁 𑀅𑀲𑁄𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀏𑀯𑀁 𑀯𑀤𑁂𑀳𑀺 𑁋 ‘𑀲𑀳𑀸𑀬𑁄 𑀯𑁄, 𑀫𑀳𑀸𑀭𑀸𑀚, 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀦𑁆𑀦𑁄 𑀣𑀽𑀧𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄, 𑀢𑀼𑀫𑁆𑀳𑀸𑀓𑀁 𑀓𑀺𑀭 𑀳𑀢𑁆𑀣𑁂 𑀥𑀸𑀢𑀼 𑀅𑀢𑁆𑀣𑀺 𑀢𑀁 𑀫𑁂 𑀤𑁂𑀣𑀸’𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀳𑀺 𑁋 ‘𑀢𑀼𑀫𑁆𑀳𑀸𑀓𑀁 𑀓𑀺𑀭, 𑀫𑀳𑀸𑀭𑀸𑀚, 𑀳𑀢𑁆𑀣𑁂 𑀤𑁆𑀯𑁂 𑀥𑀸𑀢𑀼𑀬𑁄 𑀅𑀢𑁆𑀣𑀺 𑁋 𑀤𑀓𑁆𑀔𑀺𑀡𑀤𑀸𑀞𑀸 𑀘 𑀤𑀓𑁆𑀔𑀺𑀡𑀓𑁆𑀔𑀓𑀜𑁆𑀘; 𑀢𑀢𑁄 𑀢𑀼𑀫𑁆𑀳𑁂 𑀤𑀓𑁆𑀔𑀺𑀡𑀤𑀸𑀞𑀁 𑀧𑀽𑀚𑁂𑀣, 𑀤𑀓𑁆𑀔𑀺𑀡𑀓𑁆𑀔𑀓𑀁 𑀧𑀦 𑀫𑀬𑁆𑀳𑀁 𑀤𑁂𑀣𑀸’𑀢𑀺. 𑀏𑀯𑀜𑁆𑀘 𑀦𑀁 𑀯𑀤𑁂𑀳𑀺 𑁋 ‘𑀓𑀲𑁆𑀫𑀸 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀳𑀺𑀡𑀺𑀢𑁆𑀯𑀸 𑀧𑀫𑀚𑁆𑀚𑀲𑀻’’’𑀢𑀺?

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑀼𑀫𑀦𑁄 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀤𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀭𑀜𑁆𑀜𑁄 ¶ 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀸𑀫𑀡𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀯𑀭𑀫𑀼𑀢𑁆𑀢𑀲𑀤𑀺𑀲𑀸𑀦𑀁 𑀥𑀸𑀢𑀽𑀦𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀪𑀦𑁆𑀢𑁂 𑀲𑀼𑀫𑀦, 𑀆𑀳𑀺𑀡𑁆𑀟𑀲𑀻’’𑀢𑀺 𑀆𑀳. ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀫𑁆𑀳𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑁂𑀲𑁂𑀢𑁆𑀯𑀸 𑀓𑀲𑁆𑀫𑀸 𑀧𑀫𑀚𑁆𑀚𑀲𑀻’’𑀢𑀺? ‘‘𑀦𑀧𑁆𑀧𑀫𑀚𑁆𑀚𑀸𑀫𑀺, 𑀪𑀦𑁆𑀢𑁂, 𑀯𑀤𑁂𑀳𑀺 𑁋 ‘𑀓𑀺𑀁 𑀓𑀭𑁄𑀫𑀻’’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀳𑀢𑁆𑀣𑁂 𑀤𑁆𑀯𑁂 𑀥𑀸𑀢𑀼𑀬𑁄 𑀅𑀢𑁆𑀣𑀺 𑁋 𑀤𑀓𑁆𑀔𑀺𑀡𑀤𑀸𑀞𑀸 𑀘 𑀤𑀓𑁆𑀔𑀺𑀡𑀓𑁆𑀔𑀓𑀜𑁆𑀘; 𑀢𑀢𑁄 𑀢𑀼𑀫𑁆𑀳𑁂 𑀤𑀓𑁆𑀔𑀺𑀡𑀤𑀸𑀞𑀁 𑀧𑀽𑀚𑁂𑀣, 𑀤𑀓𑁆𑀔𑀺𑀡𑀓𑁆𑀔𑀓𑀁 𑀧𑀦 𑀫𑀬𑁆𑀳𑀁 𑀤𑁂𑀣𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁄𑀚𑀦𑀧𑁆𑀧𑀫𑀸𑀡𑀁 𑀫𑀡𑀺𑀣𑀽𑀧𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀫𑀦𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀔𑁄 𑀫𑀳𑀺𑀦𑁆𑀤𑀧𑀫𑀼𑀔𑀸 𑀲𑀩𑁆𑀩𑁂𑀧𑀺 𑀢𑁂 𑀫𑀳𑀸𑀦𑀸𑀕𑀸 ¶ 𑀅𑀲𑁄𑀓𑀥𑀫𑁆𑀫𑀭𑀸𑀚𑁂𑀦 𑀤𑀺𑀦𑁆𑀦𑀥𑀸𑀢𑀼𑀬𑁄 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀁 𑀆𑀤𑀸𑀬 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀫𑀕𑀫𑀁𑀲𑀼 ¶ . 𑀭𑀸𑀚𑀸𑀧𑀺 𑀔𑁄 𑀲𑀼𑀫𑀦𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀲𑀬𑀁 𑀫𑀗𑁆𑀕𑀮𑀳𑀢𑁆𑀣𑀺𑀫𑀢𑁆𑀣𑀓𑁂 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀫𑀳𑀸𑀦𑀸𑀕𑀯𑀦𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀸𑀢𑀼, 𑀙𑀢𑁆𑀢𑀁 𑀅𑀧𑀦𑀫𑀢𑀼, 𑀫𑀗𑁆𑀕𑀮𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀼, 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀫𑀬𑁆𑀳𑀁 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀢𑀽’’𑀢𑀺. 𑀲𑀳 𑀭𑀜𑁆𑀜𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀙𑀢𑁆𑀢𑀁 𑀅𑀧𑀦𑀫𑀺, 𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺, 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀳𑀺. 𑀭𑀸𑀚𑀸 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑀕𑀢𑁆𑀢𑁄 𑀯𑀺𑀬 𑀧𑀭𑀫𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀥𑀸𑀢𑀼𑀁, 𑀪𑀦𑁆𑀢𑁂, 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀳𑀢𑁆𑀣𑀺𑀓𑀼𑀫𑁆𑀪𑀫𑁆𑀳𑀺𑀬𑁂𑀯 𑀢𑀸𑀯, 𑀫𑀳𑀸𑀭𑀸𑀚, 𑀞𑀧𑁂𑀳𑀻’’𑀢𑀺. 𑀭𑀸𑀚𑀸 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀓𑀼𑀫𑁆𑀪𑁂 𑀞𑀧𑁂𑀲𑀺. 𑀧𑀫𑀼𑀤𑀺𑀢𑁄 𑀦𑀸𑀕𑁄 𑀓𑁄𑀜𑁆𑀘𑀦𑀸𑀤𑀁 𑀦𑀤𑀺. 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. ‘‘𑀧𑀘𑁆𑀘𑀦𑁆𑀢𑁂𑀧𑀺 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀸𑀢𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀫𑀦𑀼𑀲𑁆𑀲𑀸 𑀧𑀫𑁄𑀤𑀺𑀁𑀲𑀼. 𑀏𑀯𑀁 𑀇𑀤𑁆𑀥𑀸𑀦𑀼𑀪𑀸𑀯𑀲𑀺𑀭𑀺𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀻𑀢𑀺𑀁 𑀚𑀦𑀬𑀦𑁆𑀢𑁄 𑁋

𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀯𑀻𑀭𑁄, 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀇𑀥;

𑀆𑀕𑀦𑁆𑀢𑁆𑀯𑀸 𑀤𑁂𑀯𑀮𑁄𑀓𑀫𑁆𑀳𑀸, 𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑀅𑀣𑀲𑁆𑀲 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀅𑀦𑁂𑀓𑀢𑀸𑀴𑀸𑀯𑀘𑀭𑀧𑀭𑀺𑀯𑀸𑀭𑀺𑀢𑁄 𑀅𑀢𑀺𑀯𑀺𑀬 𑀉𑀴𑀸𑀭𑁂𑀦 𑀧𑀽𑀚𑀸𑀲𑀓𑁆𑀓𑀸𑀭𑁂𑀦 𑀲𑀓𑁆𑀓𑀭𑀺𑀬𑀫𑀸𑀦𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄𑀯 𑀳𑀼𑀢𑁆𑀯𑀸, 𑀅𑀧𑀲𑀓𑁆𑀓𑀦𑁆𑀢𑁄 ¶ 𑀬𑀸𑀯 𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑁆𑀯𑀸𑀭𑀁 𑀢𑀸𑀯 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑀮𑀦𑀸𑀕𑀭𑁂𑀦 ¶ 𑀉𑀴𑀸𑀭𑀸𑀬 𑀧𑀽𑀚𑀸𑀬 𑀓𑀭𑀻𑀬𑀫𑀸𑀦𑀸𑀬 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑀽𑀧𑀸𑀭𑀸𑀫𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀫𑀳𑁂𑀚𑀯𑀢𑁆𑀣𑀼 𑀦𑀸𑀫 𑀓𑀺𑀭 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀦 𑀣𑀽𑀧𑀸𑀭𑀸𑀫𑀸𑀪𑀺𑀫𑀼𑀔𑁄𑀬𑁂𑀯 𑀧𑀝𑀺𑀦𑀺𑀯𑀢𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀁 𑀳𑁄𑀢𑀺.

𑀅𑀢𑀻𑀢𑁂 𑀓𑀺𑀭 𑀅𑀬𑀁 𑀤𑀻𑀧𑁄 𑀑𑀚𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀅𑀪𑀬𑁄 𑀦𑀸𑀫, 𑀦𑀕𑀭𑀁 𑀅𑀪𑀬𑀧𑀼𑀭𑀁 𑀦𑀸𑀫, 𑀘𑁂𑀢𑀺𑀬𑀧𑀩𑁆𑀩𑀢𑁄 𑀤𑁂𑀯𑀓𑀽𑀝𑀧𑀩𑁆𑀩𑀢𑁄 𑀦𑀸𑀫, 𑀣𑀽𑀧𑀸𑀭𑀸𑀫𑁄 𑀧𑀝𑀺𑀬𑀸𑀭𑀸𑀫𑁄 𑀦𑀸𑀫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀲𑀸𑀯𑀓𑁄 𑀫𑀳𑀸𑀤𑁂𑀯𑁄 𑀦𑀸𑀫 𑀣𑁂𑀭𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀤𑁂𑀯𑀓𑀽𑀝𑁂 𑀧𑀢𑀺𑀝𑁆𑀞𑀸𑀲𑀺, 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀘𑁂𑀢𑀺𑀬𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀑𑀚𑀤𑀻𑀧𑁂 𑀲𑀢𑁆𑀢𑀸 𑀧𑀚𑁆𑀚𑀭𑀓𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀫𑀸𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀘𑀢𑁆𑀢𑀸𑀮𑀻𑀲𑀸𑀬 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀸𑀯𑀤𑁂𑀯 𑀧𑀚𑁆𑀚𑀭𑀓𑁄 𑀯𑀽𑀧𑀲𑀦𑁆𑀢𑁄. 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀥𑀫𑀓𑀭𑀡𑀁 ¶ 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀬𑀸𑀭𑀸𑀫𑁂 𑀘𑁂𑀢𑀺𑀬𑀁 𑀅𑀓𑀁𑀲𑀼. 𑀫𑀳𑀸𑀤𑁂𑀯𑁄 𑀤𑀻𑀧𑀁 𑀅𑀦𑀼𑀲𑀸𑀲𑀦𑁆𑀢𑁄 𑀯𑀺𑀳𑀸𑀲𑀺.

𑀓𑁄𑀡𑀸𑀕𑀫𑀦𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀅𑀬𑀁 𑀤𑀻𑀧𑁄 𑀯𑀭𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀲𑀫𑁂𑀡𑁆𑀟𑀻 𑀦𑀸𑀫, 𑀦𑀕𑀭𑀁 𑀯𑀟𑁆𑀠𑀫𑀸𑀦𑀁 𑀦𑀸𑀫 ¶ , 𑀧𑀩𑁆𑀩𑀢𑁄 𑀲𑀼𑀯𑀡𑁆𑀡𑀓𑀽𑀝𑁄 𑀦𑀸𑀫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀭𑀤𑀻𑀧𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀳𑁄𑀢𑀺 𑀤𑀼𑀩𑁆𑀪𑀺𑀓𑁆𑀔𑀁 𑀤𑀼𑀲𑁆𑀲𑀲𑁆𑀲𑀁. 𑀲𑀢𑁆𑀢𑀸 𑀙𑀸𑀢𑀓𑀭𑁄𑀕𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀅𑀕𑀫𑀸𑀲𑀺. 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀤𑁂𑀯𑁄 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀺. 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀫𑀳𑀸𑀲𑀼𑀫𑀦𑀁 𑀦𑀸𑀫 𑀣𑁂𑀭𑀁 𑀤𑀻𑀧𑁂 𑀞𑀧𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀁𑀲𑀼.

𑀓𑀲𑁆𑀲𑀧𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀸𑀮𑁂 𑀅𑀬𑀁 𑀤𑀻𑀧𑁄 𑀫𑀡𑁆𑀟𑀤𑀻𑀧𑁄 𑀦𑀸𑀫 𑀅𑀳𑁄𑀲𑀺, 𑀭𑀸𑀚𑀸 𑀚𑀬𑀦𑁆𑀢𑁄 𑀦𑀸𑀫, 𑀦𑀕𑀭𑀁 𑀯𑀺𑀲𑀸𑀮𑀁 𑀦𑀸𑀫, 𑀧𑀩𑁆𑀩𑀢𑁄 𑀲𑀼𑀪𑀓𑀽𑀝𑁄 𑀦𑀸𑀫 ¶ . 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀡𑁆𑀟𑀤𑀻𑀧𑁂 𑀫𑀳𑀸𑀯𑀺𑀯𑀸𑀤𑁄 𑀳𑁄𑀢𑀺. 𑀩𑀳𑀽 𑀲𑀢𑁆𑀢𑀸 𑀓𑀮𑀳𑀯𑀺𑀕𑁆𑀕𑀳𑀚𑀸𑀢𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀲𑁆𑀲𑀧𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑁂. 𑀤𑀺𑀲𑁆𑀯𑀸 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀲𑀩𑁆𑀩𑀦𑀦𑁆𑀤𑀁 𑀦𑀸𑀫 𑀣𑁂𑀭𑀁 𑀤𑀻𑀧𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑀓𑀲𑀸𑀝𑀓𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀁𑀲𑀼. 𑀏𑀯𑀁 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀘𑁂𑀢𑀺𑀬𑀸𑀦𑀺 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀸𑀦𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀦𑀲𑁆𑀲𑀦𑁆𑀢𑀺, 𑀞𑀸𑀦𑀫𑀢𑁆𑀢𑀁 𑀅𑀯𑀲𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀘 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺. 𑀢𑀤𑁂𑀢𑀁 𑀯𑀺𑀦𑀝𑁆𑀞𑁂𑀲𑀼 𑀘𑁂𑀢𑀺𑀬𑁂𑀲𑀼 ¶ 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀓𑀡𑁆𑀝𑀓𑀲𑀫𑀸𑀓𑀺𑀡𑁆𑀡𑀲𑀸𑀔𑁂𑀳𑀺 𑀦𑀸𑀦𑀸𑀕𑀘𑁆𑀙𑁂𑀳𑀺 𑀧𑀭𑀺𑀯𑀼𑀢𑀁 𑀢𑀺𑀝𑁆𑀞𑀢𑀺 𑁋 ‘‘𑀫𑀸 𑀦𑀁 𑀓𑁄𑀘𑀺 𑀉𑀘𑁆𑀙𑀺𑀝𑁆𑀞𑀸𑀲𑀼𑀘𑀺𑀫𑀮𑀓𑀘𑀯𑀭𑁂𑀳𑀺 𑀧𑀤𑀽𑀲𑁂𑀲𑀻’’𑀢𑀺.

𑀅𑀣 𑀔𑁆𑀯𑀲𑁆𑀲 𑀳𑀢𑁆𑀣𑀺𑀦𑁄 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀲𑀩𑁆𑀩𑀕𑀘𑁆𑀙𑁂 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀲𑁄𑀥𑁂𑀢𑁆𑀯𑀸 𑀢𑀁 𑀳𑀢𑁆𑀣𑀢𑀮𑀲𑀤𑀺𑀲𑀁 𑀅𑀓𑀁𑀲𑀼. 𑀳𑀢𑁆𑀣𑀺𑀦𑀸𑀕𑁄 𑀕𑀦𑁆𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀢𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀩𑁄𑀥𑀺𑀭𑀼𑀓𑁆𑀔𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀫𑀢𑁆𑀣𑀓𑀢𑁄 𑀥𑀸𑀢𑀼𑀁 𑀑𑀭𑁄𑀧𑁂𑀢𑀼𑀁 𑀆𑀭𑀪𑀺𑀁𑀲𑀼. 𑀦𑀸𑀕𑁄 𑀑𑀭𑁄𑀧𑁂𑀢𑀼𑀁 𑀦 𑀤𑁂𑀢𑀺. 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦𑀸𑀕𑁄 𑀥𑀸𑀢𑀼𑀁 𑀑𑀭𑁄𑀧𑁂𑀢𑀼𑀁 𑀦 𑀤𑁂𑀢𑀻’’𑀢𑀺? ‘‘𑀆𑀭𑀽𑀴𑁆𑀳𑀁, 𑀫𑀳𑀸𑀭𑀸𑀚, 𑀑𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀅𑀪𑀬𑀯𑀸𑀧𑀺𑀬𑀸 𑀉𑀤𑀓𑀁 ¶ 𑀙𑀺𑀦𑁆𑀦𑀁 𑀳𑁄𑀢𑀺. 𑀲𑀫𑀦𑁆𑀢𑀸 𑀪𑀽𑀫𑀺 𑀨𑀮𑀺𑀢𑀸 𑀳𑁄𑀢𑀺, 𑀲𑀼𑀉𑀤𑁆𑀥𑀭𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸. 𑀢𑀢𑁄 𑀫𑀳𑀸𑀚𑀦𑁄 𑀲𑀻𑀖𑀁 𑀲𑀻𑀖𑀁 𑀫𑀢𑁆𑀢𑀺𑀓𑀁 𑀆𑀳𑀭𑀺𑀢𑁆𑀯𑀸 𑀳𑀢𑁆𑀣𑀺𑀓𑀼𑀫𑁆𑀪𑀧𑁆𑀧𑀫𑀸𑀡𑀁 𑀯𑀢𑁆𑀣𑀼𑀫𑀓𑀸𑀲𑀺. 𑀢𑀸𑀯𑀤𑁂𑀯 𑀘 𑀣𑀽𑀧𑀓𑀭𑀡𑀢𑁆𑀣𑀁 𑀇𑀝𑁆𑀞𑀓𑀸 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀦 𑀬𑀸𑀯 𑀇𑀝𑁆𑀞𑀓𑀸 𑀧𑀭𑀺𑀦𑀺𑀝𑁆𑀞𑀦𑁆𑀢𑀺 𑀢𑀸𑀯 𑀳𑀢𑁆𑀣𑀺𑀦𑀸𑀕𑁄 𑀓𑀢𑀺𑀧𑀸𑀳𑀁 𑀤𑀺𑀯𑀸 𑀩𑁄𑀥𑀺𑀭𑀼𑀓𑁆𑀔𑀝𑁆𑀞𑀸𑀦𑁂 𑀳𑀢𑁆𑀣𑀺𑀲𑀸𑀮𑀸𑀬𑀁 𑀢𑀺𑀝𑁆𑀞𑀢𑀺, 𑀭𑀢𑁆𑀢𑀺𑀁 𑀣𑀽𑀧𑀧𑀢𑀺𑀝𑁆𑀞𑀸𑀦𑀪𑀽𑀫𑀺𑀁 𑀧𑀭𑀺𑀬𑀸𑀬𑀢𑀺. 𑀅𑀣 𑀯𑀢𑁆𑀣𑀼𑀁 𑀘𑀺𑀦𑀸𑀧𑁂𑀢𑁆𑀯𑀸 𑀭𑀸𑀚𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀻𑀤𑀺𑀲𑁄, 𑀪𑀦𑁆𑀢𑁂, 𑀣𑀽𑀧𑁄 𑀓𑀸𑀢𑀩𑁆𑀩𑁄’’𑀢𑀺? ‘‘𑀯𑀻𑀳𑀺𑀭𑀸𑀲𑀺𑀲𑀤𑀺𑀲𑁄, 𑀫𑀳𑀸𑀭𑀸𑀚𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀚𑀗𑁆𑀖𑀧𑁆𑀧𑀫𑀸𑀡𑀁 𑀣𑀽𑀧𑀁 𑀘𑀺𑀦𑀸𑀧𑁂𑀢𑁆𑀯𑀸 𑀥𑀸𑀢𑀼𑀑𑀭𑁄𑀧𑀦𑀢𑁆𑀣𑀸𑀬 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀲𑀓𑀮𑀦𑀕𑀭𑀜𑁆𑀘 𑀚𑀦𑀧𑀤𑁄 𑀘 𑀥𑀸𑀢𑀼𑀫𑀳𑀤𑀲𑁆𑀲𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺. 𑀲𑀦𑁆𑀦𑀺𑀧𑀢𑀺𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀫𑀳𑀸𑀚𑀦𑀓𑀸𑀬𑁂 𑀤𑀲𑀩𑀮𑀲𑁆𑀲 ¶ 𑀥𑀸𑀢𑀼 𑀳𑀢𑁆𑀣𑀺𑀓𑀼𑀫𑁆𑀪𑀢𑁄 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀢𑁂𑀳𑀺 𑀢𑁂𑀳𑀺 𑀥𑀸𑀢𑀼𑀧𑁆𑀧𑀤𑁂𑀲𑁂𑀳𑀺 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀉𑀤𑀓𑀥𑀸𑀭𑀸 𑀘 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀘 𑀧𑀯𑀢𑁆𑀢𑀦𑁆𑀢𑀺, 𑀲𑀸𑀯𑀢𑁆𑀣𑀺𑀬𑀁 𑀓𑀡𑁆𑀟𑀫𑁆𑀩𑀫𑀽𑀮𑁂 𑀪𑀕𑀯𑀢𑀸 𑀤𑀲𑁆𑀲𑀺𑀢𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀫𑁂𑀯 ¶ 𑀧𑀸𑀝𑀺𑀳𑀸𑀭𑀺𑀬𑀁 𑀅𑀳𑁄𑀲𑀺. 𑀢𑀜𑁆𑀘 𑀔𑁄 𑀦𑁂𑀯 𑀣𑁂𑀭𑀸𑀦𑀼𑀪𑀸𑀯𑁂𑀦, 𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦; 𑀅𑀧𑀺𑀘 𑀔𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑁂𑀯. 𑀪𑀕𑀯𑀸 𑀓𑀺𑀭 𑀥𑀭𑀫𑀸𑀦𑁄𑀯 𑀅𑀥𑀺𑀝𑁆𑀞𑀸𑀲𑀺 𑁋 ‘‘𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑁂 𑀫𑀫 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀧𑀢𑀺𑀝𑁆𑀞𑀸𑀦𑀤𑀺𑀯𑀲𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀳𑁄𑀢𑀽’’𑀢𑀺.

‘‘𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺. (𑀅𑀧. 𑀣𑁂𑀭 𑁧.𑁧.𑁮𑁨);

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀺𑀭 𑀇𑀫𑀁 𑀤𑀻𑀧𑀁 𑀥𑀭𑀫𑀸𑀦𑀓𑀸𑀮𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀫𑀸𑀲𑀺. 𑀧𑀞𑀫𑀁 𑁋 𑀬𑀓𑁆𑀔𑀤𑀫𑀦𑀢𑁆𑀣𑀁 𑀏𑀓𑀓𑁄𑀯 𑀆𑀕𑀦𑁆𑀢𑁆𑀯𑀸 𑀬𑀓𑁆𑀔𑁂 𑀤𑀫𑁂𑀢𑁆𑀯𑀸 ‘‘𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀭𑀓𑁆𑀔𑀁 𑀓𑀭𑁄𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀤𑀻𑀧𑀁 𑀆𑀯𑀺𑀚𑁆𑀚𑀺. 𑀤𑀼𑀢𑀺𑀬𑀁 𑁋 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀁 𑀦𑀸𑀕𑀭𑀸𑀚𑀽𑀦𑀁 𑀤𑀫𑀦𑀢𑁆𑀣𑀸𑀬 𑀏𑀓𑀓𑁄𑀯 𑀆𑀕𑀦𑁆𑀢𑁆𑀯𑀸 𑀢𑁂 𑀤𑀫𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑀺𑀬𑀁 𑁋 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀣𑀽𑀧𑀸𑀭𑀸𑀫𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀳𑀸𑀩𑁄𑀥𑀺𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀘 𑀫𑀳𑀺𑀬𑀗𑁆𑀕𑀡𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀼𑀢𑀺𑀬𑀗𑁆𑀕𑀡𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀓𑀮𑁆𑀬𑀸𑀡𑀺𑀬𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀇𑀤𑀫𑀲𑁆𑀲 𑀘𑀢𑀼𑀢𑁆𑀣𑀁 𑀥𑀸𑀢𑀼𑀲𑀭𑀻𑀭𑁂𑀦 𑀆𑀕𑀫𑀦𑀁.

𑀥𑀸𑀢𑀼𑀲𑀭𑀻𑀭𑀢𑁄 ¶ 𑀘 𑀧𑀦𑀲𑁆𑀲 𑀦𑀺𑀓𑁆𑀔𑀦𑁆𑀢𑀉𑀤𑀓𑀨𑀼𑀲𑀺𑀢𑁂𑀳𑀺 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀢𑀮𑁂 𑀦 𑀓𑁄𑀘𑀺 𑀅𑀨𑀼𑀝𑁆𑀞𑁄𑀓𑀸𑀲𑁄 𑀦𑀸𑀫 𑀅𑀳𑁄𑀲𑀺. 𑀏𑀯𑀫𑀲𑁆𑀲 𑀢𑀁 𑀥𑀸𑀢𑀼𑀲𑀭𑀻𑀭𑀁 𑀉𑀤𑀓𑀨𑀼𑀲𑀺𑀢𑁂𑀳𑀺 𑀢𑀫𑁆𑀩𑀧𑀡𑁆𑀡𑀺𑀢𑀮𑀲𑁆𑀲 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀲𑀺 ¶ . 𑀭𑀸𑀚𑀸 𑀲𑀨𑀮𑀁 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑀁 𑀫𑀜𑁆𑀜𑀫𑀸𑀦𑁄 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀥𑀸𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀳 𑀥𑀸𑀢𑀼𑀧𑀢𑀺𑀝𑁆𑀞𑀸𑀧𑀦𑁂𑀦 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀜𑁆𑀘 𑀧𑀦 𑀥𑀸𑀢𑀼𑀧𑀸𑀝𑀺𑀳𑀸𑀭𑀺𑀬𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀪𑀸𑀢𑀸 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺. 𑀘𑁂𑀢𑀭𑀝𑁆𑀞𑀕𑀸𑀫𑀢𑁄 𑀧𑀜𑁆𑀘 𑀤𑀸𑀭𑀓𑀲𑀢𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀢𑀣𑀸 𑀤𑁆𑀯𑀸𑀭𑀫𑀡𑁆𑀟𑀮𑀸𑀤𑀻𑀳𑀺 𑀕𑀸𑀫𑀓𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀘𑀧𑀜𑁆𑀘 ¶ 𑀤𑀸𑀭𑀓𑀲𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀅𑀦𑁆𑀢𑁄𑀦𑀕𑀭𑀢𑁄 𑀘 𑀩𑀳𑀺𑀦𑀕𑀭𑀢𑁄 𑀘 𑀧𑀩𑁆𑀩𑀚𑀺𑀢𑀸𑀦𑀺 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀦𑀺𑀝𑁆𑀞𑀺𑀢𑁂 𑀧𑀦 𑀣𑀽𑀧𑀲𑁆𑀫𑀺𑀁 𑀭𑀸𑀚𑀸 𑀘 𑀭𑀸𑀚𑀪𑀸𑀢𑀺𑀓𑀸 𑀘 𑀤𑁂𑀯𑀺𑀬𑁄 𑀘 𑀤𑁂𑀯𑀦𑀸𑀕𑀬𑀓𑁆𑀔𑀸𑀦𑀫𑁆𑀧𑀺 𑀯𑀺𑀫𑁆𑀳𑀬𑀓𑀭𑀁 𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓𑀁 𑀧𑀽𑀚𑀁 𑀅𑀓𑀁𑀲𑀼. 𑀦𑀺𑀝𑁆𑀞𑀺𑀢𑀸𑀬 𑀧𑀦 𑀥𑀸𑀢𑀼𑀧𑀽𑀚𑀸𑀬 𑀧𑀢𑀺𑀝𑁆𑀞𑀺𑀢𑁂 𑀥𑀸𑀢𑀼𑀯𑀭𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀫𑁂𑀖𑀯𑀦𑀼𑀬𑁆𑀬𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀅𑀦𑀼𑀴𑀸 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀴𑀸, 𑀪𑀦𑁆𑀢𑁂, 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺. ‘‘𑀦, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀫𑀸𑀢𑀼𑀕𑀸𑀫𑀁 𑀧𑀩𑁆𑀩𑀸𑀚𑁂𑀢𑀼𑀁 𑀓𑀧𑁆𑀧𑀢𑀺. 𑀧𑀸𑀝𑀮𑀺𑀧𑀼𑀢𑁆𑀢𑁂 𑀧𑀦 𑀫𑀬𑁆𑀳𑀁 𑀪𑀕𑀺𑀦𑀻 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻 𑀦𑀸𑀫 𑀅𑀢𑁆𑀣𑀺, 𑀢𑀁 𑀧𑀓𑁆𑀓𑁄𑀲𑀸𑀧𑁂𑀳𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦, 𑀫𑀳𑀸𑀭𑀸𑀚, 𑀤𑀻𑀧𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀢𑁄 𑀲𑀭𑀲𑀭𑀁𑀲𑀺𑀚𑀸𑀮𑀯𑀺𑀲𑁆𑀲𑀚𑁆𑀚𑀦𑀓𑁂𑀦 𑀩𑁄𑀥𑀺𑀦𑀸 𑀇𑀥 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀣𑀸 𑀲𑀸𑀲𑀦𑀁 𑀧𑀳𑀺𑀡𑁂𑀬𑁆𑀬𑀸𑀲𑀺 𑀬𑀣𑀸 𑀲𑀗𑁆𑀖𑀫𑀺𑀢𑁆𑀢𑀸 𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄 𑀅𑀭𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀆𑀳 𑁋 ‘‘𑀲𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁, 𑀢𑀸𑀢, 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀦𑀸 𑀲𑀤𑁆𑀥𑀺𑀁 𑀅𑀬𑁆𑀬𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀆𑀦𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀤𑁂𑀯, 𑀲𑀘𑁂 𑀫𑁂 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺𑀲𑁆𑀲𑀲𑀻’’𑀢𑀺. ‘‘𑀕𑀘𑁆𑀙, 𑀢𑀸𑀢 ¶ , 𑀣𑁂𑀭𑀺𑀁 𑀆𑀦𑁂𑀢𑁆𑀯𑀸 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑁄 𑀭𑀜𑁆𑀜𑁄 𑀘 𑀣𑁂𑀭𑀲𑁆𑀲 𑀘 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀏𑀓𑀤𑀺𑀯𑀲𑁂𑀦𑁂𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀫𑁂𑀯 𑀅𑀕𑀫𑀸𑀲𑀺. 𑀅𑀦𑀼𑀴𑀸𑀧𑀺 𑀔𑁄 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀦𑀕𑀭𑀲𑁆𑀲 𑀏𑀓𑀤𑁂𑀲𑁂 𑀉𑀧𑀲𑁆𑀲𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀭𑀺𑀝𑁆𑀞𑁄𑀧𑀺 𑀢𑀁𑀤𑀺𑀯𑀲𑀫𑁂𑀯 𑀭𑀜𑁆𑀜𑁄 𑀲𑀸𑀲𑀦𑀁 𑀅𑀧𑁆𑀧𑁂𑀲𑀺, 𑀏𑀯𑀜𑁆𑀘 𑀅𑀯𑁄𑀘 𑁋 ‘‘𑀧𑀼𑀢𑁆𑀢𑁄 𑀢𑁂, 𑀤𑁂𑀯, 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀏𑀯𑀫𑀸𑀳 𑁋 ‘𑀲𑀳𑀸𑀬𑀓𑀲𑁆𑀲 𑀓𑀺𑀭 𑀢𑁂 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 ¶ , 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀅𑀬𑁆𑀬𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀧𑀳𑀺𑀡𑀣, 𑀅𑀬𑁆𑀬𑀸𑀬𑁂𑀯 𑀘 𑀲𑀤𑁆𑀥𑀺𑀁 𑀫𑀳𑀸𑀩𑁄𑀥𑀺’’’𑀦𑁆𑀢𑀺. 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀬𑁆𑀬𑁂, 𑀢𑀼𑀫𑁆𑀳𑀸𑀓𑀁 𑀪𑀸𑀢𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀫𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺, 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 ¶ 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺, 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀸, 𑀢𑀁 𑀓𑀺𑀭 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀲𑀸 𑀢𑀸𑀯𑀤𑁂𑀯 𑀢𑀼𑀭𑀺𑀢𑀢𑀼𑀭𑀺𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀪𑀸𑀢𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀏𑀯𑀁 𑀧𑀳𑀺𑀡𑀺, ‘𑀭𑀜𑁆𑀜𑁄 𑀓𑀺𑀭 𑀪𑀸𑀢𑀼 𑀚𑀸𑀬𑀸 𑀅𑀦𑀼𑀴𑀸 𑀦𑀸𑀫 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀫𑀬𑁆𑀳𑀁 𑀆𑀕𑀫𑀦𑀁 𑀉𑀤𑀺𑀓𑁆𑀔𑀢𑀺’. 𑀕𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧’’𑀦𑁆𑀢𑀺.

𑀭𑀸𑀚𑀸 𑀆𑀳 𑁋 ‘‘𑀅𑀫𑁆𑀫, 𑀧𑀼𑀢𑁆𑀢𑁄𑀧𑀺 𑀫𑁂 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀦𑀢𑁆𑀢𑀸 𑀘 𑀫𑁂 𑀲𑀼𑀫𑀦𑀲𑀸𑀫𑀡𑁂𑀭𑁄 𑀫𑀁 𑀙𑀺𑀦𑁆𑀦𑀳𑀢𑁆𑀣𑀁 𑀯𑀺𑀬 𑀓𑀭𑁄𑀦𑁆𑀢𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 ¶ 𑀕𑀢𑀸. 𑀢𑀲𑁆𑀲 𑀫𑀬𑁆𑀳𑀁 𑀢𑁂𑀧𑀺 𑀅𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀲𑁄𑀓𑁄 𑀢𑀯 𑀫𑀼𑀔𑀁 𑀧𑀲𑁆𑀲𑀦𑁆𑀢𑀲𑁆𑀲 𑀯𑀽𑀧𑀲𑀫𑁆𑀫𑀢𑀺! 𑀅𑀮𑀁, 𑀅𑀫𑁆𑀫, 𑀫𑀸 𑀢𑁆𑀯𑀁 𑀅𑀕𑀫𑀸𑀲𑀻’’𑀢𑀺. ‘‘𑀪𑀸𑀭𑀺𑀬𑀁 𑀫𑁂, 𑀫𑀳𑀸𑀭𑀸𑀚, 𑀪𑀸𑀢𑀼 𑀯𑀘𑀦𑀁; 𑀅𑀦𑀼𑀴𑀸𑀧𑀺 𑀔𑀢𑁆𑀢𑀺𑀬𑀸 𑀇𑀢𑁆𑀣𑀺𑀲𑀳𑀲𑁆𑀲𑀧𑀭𑀺𑀯𑀼𑀢𑀸 𑀧𑀩𑁆𑀩𑀚𑁆𑀚𑀸𑀧𑀼𑀭𑁂𑀓𑁆𑀔𑀸𑀭𑀸 𑀫𑀁 𑀧𑀝𑀺𑀫𑀸𑀦𑁂𑀢𑀺; 𑀕𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀅𑀫𑁆𑀫, 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀓𑀼𑀢𑁄 𑀭𑀜𑁆𑀜𑁄 𑀫𑀳𑀸𑀩𑁄𑀥𑀺? 𑀭𑀸𑀚𑀸 𑀓𑀺𑀭 𑀢𑀢𑁄 𑀧𑀼𑀩𑁆𑀩𑁂 𑀏𑀯 𑀥𑀸𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀅𑀦𑀸𑀕𑀢𑁂 𑀲𑀼𑀫𑀦𑁂 𑀮𑀗𑁆𑀓𑀸𑀤𑀻𑀧𑀁 𑀫𑀳𑀸𑀩𑁄𑀥𑀺𑀁 𑀧𑁂𑀲𑁂𑀢𑀼𑀓𑀸𑀫𑁄, ‘‘𑀓𑀣𑀁 𑀦𑀼 𑀔𑁄 𑀅𑀲𑀢𑁆𑀣𑀖𑀸𑀢𑀸𑀭𑀳𑀁 𑀫𑀳𑀸𑀩𑁄𑀥𑀺𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀬𑀁 𑀅𑀧𑀲𑁆𑀲𑀦𑁆𑀢𑁄 𑀫𑀳𑀸𑀤𑁂𑀯𑀁 𑀦𑀸𑀫 𑀅𑀫𑀘𑁆𑀘𑀁 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀲𑀦𑁆𑀢𑀺, 𑀤𑁂𑀯, 𑀩𑀳𑀽 𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀕𑀦𑁆𑀢𑀩𑁆𑀩𑀁 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧𑀁 𑀦𑁄’’𑀢𑀺? 𑀲𑀗𑁆𑀖𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺.

𑀣𑁂𑀭𑁄 ‘‘𑀕𑀦𑁆𑀢𑀩𑁆𑀩𑀁, 𑀫𑀳𑀸𑀭𑀸𑀚, 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧’’𑀦𑁆𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀧𑀜𑁆𑀘 𑀫𑀳𑀸𑀅𑀥𑀺𑀝𑁆𑀞𑀸𑀦𑀸𑀦𑀺 𑀓𑀣𑁂𑀲𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀕𑀯𑀸 𑀓𑀺𑀭 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀮𑀗𑁆𑀓𑀸𑀤𑀻𑀧𑁂 𑀫𑀳𑀸𑀩𑁄𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬 ‘‘𑀅𑀲𑁄𑀓𑀫𑀳𑀸𑀭𑀸𑀚𑀸 𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑀢𑁆𑀣𑀁 𑀕𑀫𑀺𑀲𑁆𑀲𑀢𑀺, 𑀢𑀤𑀸 𑀫𑀳𑀸𑀩𑁄𑀥𑀺𑀲𑁆𑀲 𑀤𑀓𑁆𑀔𑀺𑀡𑀲𑀸𑀔𑀸 𑀲𑀬𑀫𑁂𑀯 𑀙𑀺𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀫𑁂𑀓𑀫𑀥𑀺𑀝𑁆𑀞𑀸𑀦𑀁.

𑀢𑀢𑁆𑀣 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀘 ‘‘𑀫𑀳𑀸𑀩𑁄𑀥𑀺 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀤𑀼𑀢𑀺𑀬𑀫𑀥𑀺𑀝𑁆𑀞𑀸𑀦𑀁.

‘‘𑀲𑀢𑁆𑀢𑀫𑁂 ¶ ¶ 𑀤𑀺𑀯𑀲𑁂 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀢𑁄 𑀑𑀭𑀼𑀬𑁆𑀳 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀧𑀢𑁆𑀢𑁂𑀳𑀺 𑀘 𑀨𑀮𑁂𑀳𑀺 𑀘 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀫𑀼𑀜𑁆𑀘𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀢𑀢𑀺𑀬𑀫𑀥𑀺𑀝𑁆𑀞𑀸𑀦𑀁.

‘‘𑀣𑀽𑀧𑀸𑀭𑀸𑀫𑁂 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀘𑁂𑀢𑀺𑀬𑀫𑁆𑀳𑀺 𑀧𑀢𑀺𑀝𑁆𑀞𑀸𑀦𑀤𑀺𑀯𑀲𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀥𑀺𑀝𑁆𑀞𑀸𑀦𑀁.

𑀮𑀗𑁆𑀓𑀸𑀤𑀻𑀧𑀫𑁆𑀳𑀺𑀬𑁂𑀯 𑀫𑁂 𑀤𑁄𑀡𑀫𑀢𑁆𑀢𑀸 𑀥𑀸𑀢𑀼𑀬𑁄 𑀫𑀳𑀸𑀘𑁂𑀢𑀺𑀬𑀫𑁆𑀳𑀺 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 ¶ 𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 𑁋 𑀇𑀤𑀁 𑀧𑀜𑁆𑀘𑀫𑀁 𑀅𑀥𑀺𑀝𑁆𑀞𑀸𑀦𑀦𑁆𑀢𑀺.

𑀭𑀸𑀚𑀸 𑀇𑀫𑀸𑀦𑀺 𑀧𑀜𑁆𑀘 𑀫𑀳𑀸𑀅𑀥𑀺𑀝𑁆𑀞𑀸𑀦𑀸𑀦𑀺 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀢𑀸𑀯 𑀫𑀕𑁆𑀕𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑀢𑁆𑀣𑀸𑀬 𑀩𑀳𑀼𑀁 𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀲𑀺. 𑀢𑀸𑀯𑀤𑁂𑀯 𑀘 𑀭𑀜𑁆𑀜𑁄 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀓𑀫𑁆𑀫𑀸𑀭𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀇𑀫𑀁 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀓𑀝𑀸𑀳𑀁 𑀓𑀭𑁄𑀳𑀻’’𑀢𑀺 𑀆𑀳. ‘‘𑀧𑀫𑀸𑀡𑀁, 𑀤𑁂𑀯, 𑀚𑀸𑀦𑀸𑀣𑀸’’𑀢𑀺? ‘‘𑀢𑁆𑀯𑀫𑁂𑀯, 𑀢𑀸𑀢, 𑀜𑀢𑁆𑀯𑀸 𑀓𑀭𑁄𑀳𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑀁 𑀦𑀺𑀫𑁆𑀫𑀺𑀦𑀺 𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀁 𑀧𑀜𑁆𑀘𑀳𑀢𑁆𑀣𑀼𑀩𑁆𑀩𑁂𑀥𑀁 𑀢𑀺𑀳𑀢𑁆𑀣𑀯𑀺𑀓𑁆𑀔𑀫𑁆𑀪𑀁 𑀅𑀝𑁆𑀞𑀗𑁆𑀕𑀼𑀮𑀩𑀳𑀮𑀁 𑀳𑀢𑁆𑀣𑀺𑀲𑁄𑀡𑁆𑀟𑀧𑁆𑀧𑀫𑀸𑀡𑀫𑀼𑀔𑀯𑀝𑁆𑀝𑀺𑀁. 𑀅𑀣 𑀭𑀸𑀚𑀸 𑀲𑀢𑁆𑀢𑀬𑁄𑀚𑀦𑀸𑀬𑀸𑀫𑀸𑀬 𑀢𑀺𑀬𑁄𑀚𑀦𑀯𑀺𑀢𑁆𑀣𑀸𑀭𑀸𑀬 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀺𑀬𑀲𑀗𑁆𑀖𑀫𑀸𑀤𑀸𑀬 𑀫𑀳𑀸𑀩𑁄𑀥𑀺𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀲𑁂𑀦𑀸 𑀲𑀫𑀼𑀲𑁆𑀲𑀺𑀢𑀥𑀚𑀧𑀝𑀸𑀓𑀁 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀅𑀦𑁂𑀓𑀸𑀮𑀗𑁆𑀓𑀸𑀭𑀧𑀅𑀫𑀡𑁆𑀟𑀺𑀢𑀁 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀁 𑀅𑀦𑁂𑀓𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑀁 𑀫𑀳𑀸𑀩𑁄𑀥𑀺𑀁 𑀧𑀭𑀺𑀓𑁆𑀔𑀺𑀧𑀺. 𑀭𑀸𑀚𑀸 𑀲𑀳𑀲𑁆𑀲𑀫𑀢𑁆𑀢𑁂 𑀕𑀡𑀧𑀸𑀫𑁄𑀓𑁆𑀔𑁂 𑀫𑀳𑀸𑀣𑁂𑀭𑁂 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀢𑀸𑀪𑀺𑀲𑁂𑀓𑀸𑀦𑀁 𑀭𑀸𑀚𑀽𑀦𑀁 𑀲𑀳𑀲𑁆𑀲𑁂𑀦 𑀅𑀢𑁆𑀢𑀸𑀦𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀽𑀮𑁂 𑀞𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀉𑀮𑁆𑀮𑁄𑀓𑁂𑀲𑀺. 𑀫𑀳𑀸𑀩𑁄𑀥𑀺𑀲𑁆𑀲 𑀔𑀦𑁆𑀥𑀜𑁆𑀘 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀸𑀬 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀧𑁆𑀧𑀤𑁂𑀲𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺.

𑀭𑀸𑀚𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀧𑀻𑀢𑀺𑀧𑀸𑀫𑁄𑀚𑁆𑀚𑁄 ‘‘𑀅𑀳𑀁, 𑀪𑀦𑁆𑀢𑁂, 𑀇𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀫𑀳𑀸𑀩𑁄𑀥𑀺𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀫𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀤𑀸𑀲𑀺. 𑀢𑀢𑁄 ¶ 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ¶ 𑀞𑀢𑁆𑀯𑀸 𑀲𑀘𑁆𑀘𑀯𑀘𑀦𑀓𑀺𑀭𑀺𑀬𑀸𑀬 𑀩𑁄𑀥𑀺𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀪𑀽𑀫𑀺𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺𑀲𑁆𑀲 𑀤𑀓𑁆𑀔𑀺𑀡𑀲𑀸𑀔𑀸 𑀢𑀸𑀯 𑀉𑀘𑁆𑀘𑀁 𑀓𑀢𑁆𑀯𑀸 𑀞𑀧𑀺𑀢𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑀧𑀻𑀞𑀲𑁆𑀲 𑀉𑀧𑀭𑀺 𑀲𑀼𑀯𑀡𑁆𑀡𑀓𑀝𑀸𑀳𑀁 𑀞𑀧𑀸𑀧𑁂𑀢𑁆𑀯𑀸 𑀭𑀢𑀦𑀧𑀻𑀞𑀁 𑀆𑀭𑀼𑀬𑁆𑀳 𑀲𑀼𑀯𑀡𑁆𑀡𑀢𑀼𑀮𑀺𑀓𑀁 𑀕𑀳𑁂𑀢𑁆𑀯𑀸 𑀫𑀦𑁄𑀲𑀺𑀮𑀸𑀬 𑀮𑁂𑀔𑀁 𑀓𑀢𑁆𑀯𑀸 ‘‘𑀬𑀤𑀺 𑀫𑀳𑀸𑀩𑁄𑀥𑀺𑀦𑀸 𑀮𑀗𑁆𑀓𑀸𑀤𑀻𑀧𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀁, 𑀬𑀤𑀺 𑀘𑀸𑀳𑀁 𑀩𑀼𑀤𑁆𑀥𑀲𑀸𑀲𑀦𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑁂𑀬𑁆𑀬𑀁, 𑀫𑀳𑀸𑀩𑁄𑀥𑀺 ¶ 𑀲𑀬𑀫𑁂𑀯 𑀇𑀫𑀲𑁆𑀫𑀺𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀑𑀭𑀼𑀬𑁆𑀳 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀲𑀘𑁆𑀘𑀯𑀘𑀦𑀓𑀺𑀭𑀺𑀬𑀫𑀓𑀸𑀲𑀺. 𑀲𑀳 𑀲𑀘𑁆𑀘𑀓𑀺𑀭𑀺𑀬𑀸𑀬 𑀩𑁄𑀥𑀺𑀲𑀸𑀔𑀸 𑀫𑀦𑁄𑀲𑀺𑀮𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂 𑀙𑀺𑀚𑁆𑀚𑀺𑀢𑁆𑀯𑀸 𑀕𑀦𑁆𑀥𑀓𑀮𑀮𑀧𑀽𑀭𑀲𑁆𑀲 𑀲𑀼𑀯𑀡𑁆𑀡𑀓𑀝𑀸𑀳𑀲𑁆𑀲 𑀉𑀧𑀭𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀉𑀩𑁆𑀩𑁂𑀥𑁂𑀦 𑀤𑀲𑀳𑀢𑁆𑀣𑁄 𑀔𑀦𑁆𑀥𑁄 𑀳𑁄𑀢𑀺 𑀘𑀢𑀼𑀳𑀢𑁆𑀣𑀸 𑀧𑀜𑁆𑀘 𑀫𑀳𑀸𑀲𑀸𑀔𑀸 𑀧𑀜𑁆𑀘𑀳𑀺𑀬𑁂𑀯 𑀨𑀮𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸, 𑀔𑀼𑀤𑁆𑀤𑀓𑀲𑀸𑀔𑀸𑀦𑀁 𑀧𑀦 𑀲𑀳𑀲𑁆𑀲𑀁. 𑀅𑀣 𑀭𑀸𑀚𑀸 𑀫𑀽𑀮𑀮𑁂𑀔𑀸𑀬 𑀉𑀧𑀭𑀺 𑀢𑀺𑀯𑀗𑁆𑀕𑀼𑀮𑀧𑁆𑀧𑀤𑁂𑀲𑁂 𑀅𑀜𑁆𑀜𑀁 𑀮𑁂𑀔𑀁 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀢𑀢𑁄 𑀢𑀸𑀯𑀤𑁂𑀯 𑀧𑀼𑀧𑁆𑀨𑀼𑀴𑀓𑀸 𑀳𑀼𑀢𑁆𑀯𑀸 𑀤𑀲 𑀫𑀳𑀸𑀫𑀽𑀮𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀧𑀼𑀦 𑀉𑀧𑀭𑀽𑀧𑀭𑀺 𑀢𑀺𑀯𑀗𑁆𑀕𑀼𑀮𑁂 𑀢𑀺𑀯𑀗𑁆𑀕𑀼𑀮𑁂 𑀅𑀜𑁆𑀜𑀸 𑀦𑀯 𑀮𑁂𑀔𑀸 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀢𑀸𑀳𑀺𑀧𑀺 𑀤𑀲 𑀤𑀲 𑀧𑀼𑀧𑁆𑀨𑀼𑀴𑀓𑀸 𑀳𑀼𑀢𑁆𑀯𑀸 𑀦𑀯𑀼𑀢𑀺 𑀫𑀽𑀮𑀸𑀦𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀧𑀞𑀫𑀓𑀸 𑀤𑀲 𑀫𑀳𑀸𑀫𑀽𑀮𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀓𑁆𑀔𑀦𑁆𑀢𑀸. 𑀇𑀢𑀭𑁂𑀧𑀺 𑀕𑀯𑀓𑁆𑀔𑀚𑀸𑀮𑀲𑀤𑀺𑀲𑀁 𑀅𑀦𑀼𑀲𑀺𑀩𑁆𑀩𑀦𑁆𑀢𑀸 𑀦𑀺𑀓𑁆𑀔𑀦𑁆𑀢𑀸. 𑀏𑀢𑁆𑀢𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀭𑀸𑀚𑀸 𑀭𑀢𑀦𑀧𑀻𑀞𑀫𑀢𑁆𑀣𑀓𑁂 𑀞𑀺𑀢𑁄𑀬𑁂𑀯 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀫𑀳𑀸𑀦𑀸𑀤𑀁 𑀦𑀤𑀺. 𑀅𑀦𑁂𑀓𑀸𑀦𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀸𑀥𑀼𑀓𑀸𑀭𑀫𑀓𑀁𑀲𑀼. 𑀲𑀓𑀮𑀭𑀸𑀚𑀲𑁂𑀦𑀸 𑀉𑀦𑁆𑀦𑀸𑀤𑀺𑀦𑀻 𑀅𑀳𑁄𑀲𑀺. 𑀘𑁂𑀮𑀼𑀓𑁆𑀔𑁂𑀧𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀪𑀽𑀫𑀝𑁆𑀞𑀓𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 ¶ 𑀢𑀸𑀯 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀭𑀜𑁆𑀜𑁄 𑀇𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀲𑀭𑀻𑀭𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲𑁂𑀯 𑀫𑀳𑀸𑀩𑁄𑀥𑀺 𑀫𑀽𑀮𑀲𑀢𑁂𑀦 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀸𑀲𑀺. 𑀤𑀲 𑀫𑀳𑀸𑀫𑀽𑀮𑀸𑀦𑀺 𑀲𑀼𑀯𑀡𑁆𑀡𑀓𑀝𑀸𑀳𑀢𑀮𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼. 𑀅𑀯𑀲𑁂𑀲𑀸𑀦𑀺 𑀦𑀯𑀼𑀢𑀺 𑀔𑀼𑀤𑁆𑀤𑀓𑀫𑀽𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀦𑀓𑀸𑀦𑀺 𑀳𑀼𑀢𑁆𑀯𑀸 𑀕𑀦𑁆𑀥𑀓𑀮𑀮𑁂 𑀑𑀭𑀼𑀬𑁆𑀳 𑀞𑀺𑀢𑀸𑀦𑀺.

𑀏𑀯𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑁂 𑀫𑀳𑀸𑀩𑁄𑀥𑀺𑀫𑁆𑀳𑀺 𑀫𑀳𑀸𑀧𑀣𑀯𑀻 𑀘𑀮𑀺. 𑀆𑀓𑀸𑀲𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀨𑀮𑀺𑀁𑀲𑀼. 𑀧𑀩𑁆𑀩𑀢𑀸𑀦𑀁 𑀦𑀘𑁆𑀘𑁂𑀳𑀺 𑀤𑁂𑀯𑀸𑀦𑀁 𑀲𑀸𑀥𑀼𑀓𑀸𑀭𑁂𑀳𑀺 𑀬𑀓𑁆𑀔𑀸𑀦𑀁 𑀳𑀺𑀗𑁆𑀓𑀸𑀭𑁂𑀳𑀺 𑀅𑀲𑀼𑀭𑀸𑀦𑀁 𑀣𑀼𑀢𑀺𑀚𑀧𑁆𑀧𑁂𑀳𑀺 𑀩𑁆𑀭𑀳𑁆𑀫𑀸𑀦𑀁 𑀅𑀧𑁆𑀨𑁄𑀝𑀦𑁂𑀳𑀺 𑀫𑁂𑀖𑀸𑀦𑀁 𑀕𑀚𑁆𑀚𑀺𑀢𑁂𑀳𑀺 𑀘𑀢𑀼𑀧𑁆𑀧𑀤𑀸𑀦𑀁 𑀭𑀯𑁂𑀳𑀺 𑀧𑀓𑁆𑀔𑀻𑀦𑀁 𑀭𑀼𑀢𑁂𑀳𑀺 𑀲𑀩𑁆𑀩𑀢𑀸𑀴𑀸𑀯𑀘𑀭𑀸𑀦𑀁 ¶ 𑀲𑀓𑀲𑀓𑀧𑀝𑀺𑀪𑀸𑀦𑁂𑀳𑀺 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀢𑀸𑀯 𑀏𑀓𑀓𑁄𑀮𑀸𑀳𑀮𑀁 𑀏𑀓𑀦𑀺𑀦𑁆𑀦𑀸𑀤𑀁 𑀅𑀳𑁄𑀲𑀺. 𑀧𑀜𑁆𑀘𑀲𑀼 𑀲𑀸𑀔𑀸𑀲𑀼 𑀨𑀮𑀢𑁄 𑀨𑀮𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀭𑀢𑀦𑀕𑁄𑀧𑀸𑀦𑀲𑀻𑀯𑀺𑀦𑀤𑁆𑀥𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀩𑁆𑀪𑀼𑀕𑁆𑀕𑀘𑁆𑀙𑀺𑀁𑀲𑀼. 𑀢𑀁 𑀔𑀡𑀢𑁄 𑀘 𑀧𑀦 𑀧𑀪𑀼𑀢𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀦 𑀓𑁄𑀘𑀺 𑀫𑀳𑀸𑀩𑁄𑀥𑀺𑀁 𑀧𑀲𑁆𑀲𑀢𑀺. 𑀭𑀸𑀚𑀸 𑀭𑀢𑀦𑀧𑀻𑀞𑀢𑁄 𑀑𑀭𑀼𑀬𑁆𑀳 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀧𑀽𑀚𑀁 𑀓𑀸𑀭𑁂𑀲𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀤𑀺𑀲𑀸𑀳𑀺 𑀳𑀺𑀫𑀸 𑀘 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀯𑀺𑀕𑀢𑀳𑀺𑀫𑀯𑀮𑀸𑀳𑀓𑁂 𑀯𑀺𑀧𑁆𑀧𑀲𑀦𑁆𑀦𑁂 𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀫𑀳𑀸𑀩𑁄𑀥𑀺 𑀧𑀭𑀺𑀧𑀼𑀡𑁆𑀡𑀔𑀦𑁆𑀥𑀲𑀸𑀔𑀸𑀧𑀲𑀸𑀔𑁄 ¶ 𑀧𑀜𑁆𑀘𑀨𑀮𑀧𑀝𑀺𑀫𑀡𑁆𑀟𑀺𑀢𑁄 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑁄𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀤𑀺𑀲𑁆𑀯𑀸 𑀢𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀲𑀜𑁆𑀚𑀸𑀢𑀧𑀻𑀢𑀺𑀧𑀸𑀫𑁄𑀚𑁆𑀚𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀢𑀭𑀼𑀡𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀫𑀳𑀸𑀩𑁄𑀥𑀺 ¶ 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀯𑀸𑀭𑀡𑀸𑀤𑀺𑀯𑀲𑁂 𑀲𑀸𑀬𑀦𑁆𑀳𑀲𑀫𑀬𑁂 𑀧𑀞𑀫𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀳𑀺𑀫𑀕𑀩𑁆𑀪𑀲𑀢𑁆𑀢𑀸𑀳𑀁 𑀅𑀪𑀺𑀲𑁂𑀓𑀲𑀢𑁆𑀢𑀸𑀳𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀓𑀸𑀴𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀤𑀺𑀯𑀲𑁂 𑀭𑀸𑀚𑀸 𑀏𑀓𑀤𑀺𑀯𑀲𑁂𑀦𑁂𑀯 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑀲𑁆𑀲 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀁 𑀧𑀸𑀘𑀻𑀦𑀫𑀳𑀸𑀲𑀸𑀮𑀫𑀽𑀮𑁂 𑀞𑀧𑁂𑀲𑀺. 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀭𑀲𑀫𑁂 𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀲𑁆𑀲 𑀅𑀪𑀺𑀦𑀯𑀗𑁆𑀓𑀼𑀭𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀢𑁂 𑀤𑀺𑀲𑁆𑀯𑀸𑀧𑀺 𑀧𑀲𑀦𑁆𑀦𑁄 𑀭𑀸𑀚𑀸 𑀧𑀼𑀦 𑀫𑀳𑀸𑀩𑁄𑀥𑀺𑀁 𑀭𑀚𑁆𑀚𑁂𑀦 𑀧𑀽𑀚𑁂𑀦𑁆𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀸𑀪𑀺𑀲𑁂𑀓𑀫𑀤𑀸𑀲𑀺. 𑀢𑀤𑀸 𑀲𑀼𑀫𑀦𑀲𑀸𑀫𑀡𑁂𑀭𑁄 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀥𑀸𑀢𑀼𑀕𑁆𑀕𑀳𑀡𑀢𑁆𑀣𑀁 𑀕𑀢𑁄 𑀫𑀳𑀸𑀩𑁄𑀥𑀺𑀲𑁆𑀲 𑀓𑀢𑁆𑀢𑀺𑀓𑀙𑀡𑀧𑀽𑀚𑀁 𑀅𑀤𑁆𑀤𑀲. 𑀏𑀯𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑀢𑁄 𑀆𑀦𑁂𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑁂 𑀞𑀧𑀺𑀢𑀁 𑀫𑀳𑀸𑀩𑁄𑀥𑀺𑀁 𑀲𑀦𑁆𑀥𑀸𑀬 𑀆𑀳 𑁋 ‘‘𑀢𑁂𑀦 𑀳𑀺, 𑀅𑀫𑁆𑀫, 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀭𑀸𑀚𑀸 𑀫𑀳𑀸𑀩𑁄𑀥𑀺𑀭𑀓𑁆𑀔𑀡𑀢𑁆𑀣𑀸𑀬 𑀅𑀝𑁆𑀞𑀸𑀭𑀲 𑀤𑁂𑀯𑀢𑀸𑀓𑀼𑀮𑀸𑀦𑀺, 𑀅𑀝𑁆𑀞 𑀅𑀫𑀘𑁆𑀘𑀓𑀼𑀮𑀸𑀦𑀺, 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀺, 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑀸𑀦𑀺, 𑀅𑀝𑁆𑀞 𑀕𑁄𑀧𑀓𑀓𑀼𑀮𑀸𑀦𑀺, 𑀅𑀝𑁆𑀞 𑀢𑀭𑀘𑁆𑀙𑀓𑀼𑀮𑀸𑀦𑀺, 𑀅𑀝𑁆𑀞 𑀘 𑀓𑀸𑀮𑀺𑀗𑁆𑀕𑀓𑀼𑀮𑀸𑀦𑀺 𑀤𑀢𑁆𑀯𑀸 𑀉𑀤𑀓𑀲𑀺𑀜𑁆𑀘𑀦𑀢𑁆𑀣𑀸𑀬 𑀘 𑀅𑀝𑁆𑀞 𑀲𑀼𑀯𑀡𑁆𑀡𑀖𑀝𑁂, 𑀅𑀝𑁆𑀞 𑀘 𑀭𑀚𑀢𑀖𑀝𑁂 𑀤𑀢𑁆𑀯𑀸 𑀇𑀫𑀺𑀦𑀸 𑀧𑀭𑀺𑀯𑀸𑀭𑁂𑀦 𑀫𑀳𑀸𑀩𑁄𑀥𑀺𑀁 ¶ 𑀕𑀗𑁆𑀕𑀸𑀬 𑀦𑀸𑀯𑀁 ¶ 𑀆𑀭𑁄𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑁆𑀛𑀸𑀝𑀯𑀺𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀼𑀧𑀼𑀩𑁆𑀩𑁂𑀦 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀢𑀸𑀫𑀮𑀺𑀢𑁆𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁂𑀯𑀦𑀸𑀕𑀫𑀦𑀼𑀲𑁆𑀲𑀸 𑀉𑀴𑀸𑀭𑀁 𑀫𑀳𑀸𑀩𑁄𑀥𑀺𑀧𑀽𑀚𑀁 𑀅𑀓𑀁𑀲𑀼. 𑀭𑀸𑀚𑀸𑀧𑀺 𑀲𑀫𑀼𑀤𑁆𑀤𑀢𑀻𑀭𑁂 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀫𑀳𑀸𑀭𑀚𑁆𑀚𑀁 𑀅𑀤𑀸𑀲𑀺. 𑀇𑀤𑀫𑀲𑁆𑀲 𑀢𑀢𑀺𑀬𑀁 𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀲𑀫𑁆𑀧𑀤𑀸𑀦𑀁 𑀳𑁄𑀢𑀺.

𑀏𑀯𑀁 𑀫𑀳𑀸𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀫𑀸𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑁂 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 𑀦𑀸𑀯𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀫𑁆𑀧𑀺 𑀲𑀧𑀭𑀺𑀯𑀸𑀭𑀁 𑀦𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀁 𑀅𑀫𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀢𑀸𑀢, 𑀫𑀳𑀸𑀩𑁄𑀥𑀺𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 𑀫𑀫 𑀲𑀳𑀸𑀬𑀓𑀲𑁆𑀲 𑀧𑁂𑀲𑁂𑀲𑀺𑀁, 𑀲𑁄𑀧𑀺 𑀏𑀯𑀫𑁂𑀯 𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀢𑀽’’𑀢𑀺. 𑀏𑀯𑀁 𑀲𑀳𑀸𑀬𑀓𑀲𑁆𑀲 𑀲𑀸𑀲𑀦𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀢𑀺 𑀯𑀢𑀭𑁂, 𑀤𑀲𑀩𑀮𑀲𑁆𑀲 𑀲𑀭𑀲𑀭𑀁𑀲𑀺𑀚𑀸𑀮𑀁 𑀯𑀺𑀫𑀼𑀜𑁆𑀘𑀦𑁆𑀢𑁄 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀸𑀧𑀺 𑀔𑁄 𑀫𑀳𑀸𑀩𑁄𑀥𑀺𑀲𑀫𑀸𑀭𑀽𑀴𑁆𑀳𑀸 𑀦𑀸𑀯𑀸 𑀧𑀲𑁆𑀲𑀢𑁄 𑀧𑀲𑁆𑀲𑀢𑁄 𑀫𑀳𑀸𑀭𑀸𑀚𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀧𑀓𑁆𑀔𑀦𑁆𑀢𑀸. 𑀫𑀳𑀸𑀲𑀫𑀼𑀤𑁆𑀤𑁂𑀧𑀺 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀯𑀻𑀘𑀺𑀬𑁄 𑀯𑀽𑀧𑀲𑀦𑁆𑀢𑀸; 𑀧𑀜𑁆𑀘 𑀯𑀡𑁆𑀡𑀸𑀦𑀺 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀢𑀸𑀦𑀺; 𑀅𑀦𑁆𑀢𑀮𑀺𑀓𑁆𑀔𑁂 𑀤𑀺𑀩𑁆𑀩𑀸𑀦𑀺 𑀢𑀽𑀭𑀺𑀬𑀸𑀦𑀺 𑀧𑀯𑀚𑁆𑀚𑀺𑀁𑀲𑀼; 𑀆𑀓𑀸𑀲𑁂 𑀚𑀮𑀚𑀣𑀮𑀚𑀭𑀼𑀓𑁆𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀧𑀯𑀢𑁆𑀢𑀺𑀢𑀸 𑀅𑀢𑀺𑀯𑀺𑀬 𑀉𑀴𑀸𑀭𑀸 𑀧𑀽𑀚𑀸 𑀅𑀳𑁄𑀲𑀺. 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻𑀧𑀺 𑀲𑀼𑀧𑀡𑁆𑀡𑀭𑀽𑀧𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀦𑀸𑀕𑀓𑀼𑀮𑀸𑀦𑀺 𑀲𑀦𑁆𑀢𑀸𑀲𑁂𑀲𑀺. 𑀢𑁂 𑀘 𑀉𑀢𑁆𑀭𑀲𑁆𑀢𑀭𑀽𑀧𑀸 𑀦𑀸𑀕𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀺𑀪𑀽𑀢𑀺𑀁 𑀧𑀲𑁆𑀲𑀺𑀢𑁆𑀯𑀸 𑀣𑁂𑀭𑀺𑀁 𑀬𑀸𑀘𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀦𑀸𑀕𑀪𑀯𑀦𑀁 𑀅𑀢𑀺𑀳𑀭𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 ¶ 𑀦𑀸𑀕𑀭𑀚𑁆𑀚𑁂𑀦 ¶ 𑀧𑀽𑀚𑁂𑀢𑁆𑀯𑀸 𑀧𑀼𑀦 𑀦𑀸𑀯𑀸𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀢𑀁𑀤𑀺𑀯𑀲𑀫𑁂𑀯 𑀦𑀸𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀅𑀕𑀫𑀸𑀲𑀺. 𑀅𑀲𑁄𑀓𑀫𑀳𑀸𑀭𑀸𑀚𑀸𑀧𑀺 𑀫𑀳𑀸𑀩𑁄𑀥𑀺𑀯𑀺𑀬𑁄𑀕𑀤𑀼𑀓𑁆𑀔𑀺𑀢𑁄 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺.

𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑁄 𑀫𑀳𑀸𑀭𑀸𑀚𑀸𑀧𑀺 𑀔𑁄 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲 𑀯𑀘𑀦𑁂𑀦 𑀫𑀸𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀢𑁆𑀢𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀢𑀸𑀯 𑀫𑀕𑁆𑀕𑀁 𑀲𑁄𑀥𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀉𑀢𑁆𑀢𑀭𑀤𑁆𑀯𑀸𑀭𑀲𑀫𑀻𑀧𑁂 𑀲𑀫𑀼𑀤𑁆𑀤𑀲𑀸𑀮𑀯𑀢𑁆𑀣𑀼𑀲𑁆𑀫𑀺𑀁 𑀞𑀺𑀢𑁄𑀬𑁂𑀯 𑀢𑀸𑀬 𑀯𑀺𑀪𑀽𑀢𑀺𑀬𑀸 𑀫𑀳𑀸𑀲𑀫𑀼𑀤𑁆𑀤𑁂 𑀆𑀕𑀘𑁆𑀙𑀦𑁆𑀢𑀁𑀬𑁂𑀯 𑀫𑀳𑀸𑀩𑁄𑀥𑀺𑀁 𑀣𑁂𑀭𑀲𑁆𑀲 ¶ 𑀆𑀦𑀼𑀪𑀸𑀯𑁂𑀦 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀁 𑀫𑀕𑁆𑀕𑀁 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀸𑀧𑁂𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑁂 𑀧𑀼𑀧𑁆𑀨𑀅𑀕𑁆𑀖𑀺𑀬𑀸𑀦𑀺 𑀞𑀧𑁂𑀦𑁆𑀢𑁄 𑀏𑀓𑀸𑀳𑁂𑀦𑁂𑀯 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑀧𑀭𑀺𑀯𑀼𑀢𑁄 𑀧𑀼𑀧𑁆𑀨𑀥𑀽𑀫𑀕𑀦𑁆𑀥𑀯𑀸𑀲𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀭𑀼𑀬𑁆𑀳 ‘‘𑀆𑀕𑀢𑁄 𑀯𑀢𑀭𑁂, 𑀤𑀲𑀩𑀮𑀲𑁆𑀲 𑀲𑀭𑀲𑀭𑀁𑀲𑀺𑀚𑀸𑀮𑀯𑀺𑀲𑁆𑀲𑀚𑁆𑀚𑀦𑀓𑁄 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀫𑀳𑀸𑀩𑁄𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀕𑀢𑁂𑀳𑀺 𑀲𑁄𑀴𑀲𑀳𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀲𑀫𑀼𑀤𑁆𑀤𑀢𑁄 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀭𑀚𑁆𑀚𑁂𑀦 𑀧𑀽𑀚𑁂𑀲𑀺, 𑀲𑁄𑀴𑀲𑀦𑁆𑀦𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀁 𑀭𑀚𑁆𑀚𑀁 𑀯𑀺𑀘𑀸𑀭𑁂𑀲𑀺. 𑀅𑀣 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀫𑀳𑀸𑀩𑁄𑀥𑀺𑀁 𑀆𑀤𑀸𑀬 𑀉𑀴𑀸𑀭𑀁 𑀧𑀽𑀚𑀁 𑀓𑀼𑀭𑀼𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀭𑀸𑀥𑀧𑀼𑀭𑀁 𑀲𑀫𑁆𑀧𑀢𑁆𑀢𑁄. 𑀅𑀦𑀼𑀭𑀸𑀥𑀧𑀼𑀭𑁂𑀧𑀺 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁂 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀫𑀳𑀸𑀩𑁄𑀥𑀺𑀁 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀧𑀯𑁂𑀲𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀅𑀢𑀺𑀳𑀭𑀦𑁆𑀢𑁄 ¶ 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑁂 𑀞𑀸𑀦𑁂 𑀬𑀢𑁆𑀣 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀧𑀼𑀭𑀺𑀫𑀓𑀸 𑀘 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼, 𑀬𑀢𑁆𑀣 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀫𑀳𑀸𑀲𑀺𑀭𑀻𑀲𑀩𑁄𑀥𑀺, 𑀓𑁄𑀦𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀉𑀤𑀼𑀫𑁆𑀩𑀭𑀩𑁄𑀥𑀺, 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀦𑀺𑀕𑁆𑀭𑁄𑀥𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀲𑁆𑀲 𑀢𑀺𑀮𑀓𑀪𑀽𑀢𑁂 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲 𑀯𑀘𑀦𑁂𑀦 𑀧𑀞𑀫𑀫𑁂𑀯 𑀓𑀢𑀪𑀽𑀫𑀺𑀧𑀭𑀺𑀓𑀫𑁆𑀫𑁂 𑀭𑀸𑀚𑀯𑀢𑁆𑀣𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑀝𑁆𑀞𑀸𑀦𑁂 𑀫𑀳𑀸𑀩𑁄𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀓𑀣𑀁? 𑀢𑀸𑀦𑀺 𑀓𑀺𑀭 𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀕𑀢𑀸𑀦𑀺 𑀲𑁄𑀴𑀲 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀺 𑀭𑀸𑀚𑀯𑁂𑀲𑀁 𑀕𑀡𑁆𑀳𑀺𑀁𑀲𑀼. 𑀭𑀸𑀚𑀸 𑀤𑁄𑀯𑀸𑀭𑀺𑀓𑀯𑁂𑀲𑀁 𑀕𑀡𑁆𑀳𑀺. 𑀲𑁄𑀴𑀲 𑀓𑀼𑀮𑀸𑀦𑀺 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑁆𑀯𑀸 𑀑𑀭𑁄𑀧𑀬𑀺𑀁𑀲𑀼. 𑀫𑀳𑀸𑀩𑁄𑀥𑀺 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀼𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀫𑀼𑀜𑁆𑀘𑀺. 𑀭𑀁𑀲𑀺𑀬𑁄 𑀲𑀓𑀮𑀤𑀻𑀧𑀁 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼. 𑀫𑀳𑀸𑀩𑁄𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀸𑀦𑀺 𑀤𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀸 𑀫𑀳𑀸𑀩𑁄𑀥𑀺 𑀅𑀦𑁆𑀢𑀮𑀺𑀓𑁆𑀔𑁂 𑀅𑀝𑁆𑀞𑀸𑀲𑀺. 𑀅𑀢𑁆𑀣𑀗𑁆𑀕𑀫𑀺𑀢𑁂 𑀧𑀦 ¶ 𑀲𑀽𑀭𑀺𑀬𑁂 𑀭𑁄𑀳𑀺𑀡𑀺𑀦𑀓𑁆𑀔𑀢𑁆𑀢𑁂𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺. 𑀲𑀳 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑀸 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺. 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀘 𑀧𑀦 𑀫𑀳𑀸𑀩𑁄𑀥𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀳𑀺𑀫𑀕𑀩𑁆𑀪𑁂 𑀲𑀦𑁆𑀦𑀺𑀲𑀻𑀤𑀺. 𑀮𑁄𑀓𑀲𑁆𑀲 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺. 𑀲𑀢𑁆𑀢𑀫𑁂 ¶ 𑀤𑀺𑀯𑀲𑁂 𑀯𑀺𑀕𑀢𑀯𑀮𑀸𑀳𑀓𑀁 𑀦𑀪𑀁 𑀅𑀳𑁄𑀲𑀺. 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀚𑀮𑀦𑁆𑀢𑀸 𑀯𑀺𑀧𑁆𑀨𑀼𑀭𑀦𑁆𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀫𑀳𑀸𑀩𑁄𑀥𑀺𑀲𑁆𑀲 𑀔𑀦𑁆𑀥𑁄 𑀘 𑀲𑀸𑀔𑀸𑀬𑁄 𑀘 𑀧𑀢𑁆𑀢𑀸𑀦𑀺 ¶ 𑀘 𑀧𑀜𑁆𑀘 𑀨𑀮𑀸𑀦𑀺 𑀘 𑀤𑀲𑁆𑀲𑀺𑀁𑀲𑀼. 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀘 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻 𑀘 𑀭𑀸𑀚𑀸 𑀘 𑀲𑀧𑀭𑀺𑀯𑀸𑀭𑀸 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀬𑁂𑀪𑀼𑀬𑁆𑀬𑁂𑀦 𑀘 𑀲𑀩𑁆𑀩𑁂 𑀤𑀻𑀧𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀉𑀢𑁆𑀢𑀭𑀲𑀸𑀔𑀢𑁄 𑀏𑀓𑀁 𑀨𑀮𑀁 𑀧𑀘𑁆𑀘𑀺𑀢𑁆𑀯𑀸 𑀲𑀸𑀔𑀢𑁄 𑀫𑀼𑀘𑁆𑀘𑀺. 𑀣𑁂𑀭𑁄 𑀳𑀢𑁆𑀣𑀁 𑀉𑀧𑀦𑀸𑀫𑁂𑀲𑀺. 𑀨𑀮𑀁 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀁 𑀣𑁂𑀭𑁄 ‘‘𑀭𑁄𑀧𑀬, 𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀅𑀤𑀸𑀲𑀺. 𑀭𑀸𑀚𑀸 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀫𑀥𑀼𑀭𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀕𑀦𑁆𑀥𑀓𑀮𑀮𑀁 𑀧𑀽𑀭𑁂𑀢𑁆𑀯𑀸 𑀭𑁄𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀆𑀲𑀦𑁆𑀦𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀸 𑀅𑀝𑁆𑀞 𑀢𑀭𑀼𑀡𑀩𑁄𑀥𑀺𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀝𑁆𑀞 𑀢𑀭𑀼𑀡𑀩𑁄𑀥𑀺𑀭𑀼𑀓𑁆𑀔𑁂 𑀲𑁂𑀢𑀘𑁆𑀙𑀢𑁆𑀢𑁂𑀦 𑀧𑀽𑀚𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀤𑀸𑀲𑀺. 𑀢𑀢𑁄 𑀏𑀓𑀁 𑀩𑁄𑀥𑀺𑀭𑀼𑀓𑁆𑀔𑀁 𑀆𑀕𑀫𑀦𑀓𑀸𑀮𑁂 𑀫𑀳𑀸𑀩𑁄𑀥𑀺𑀦𑀸 𑀧𑀞𑀫𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀭𑁄𑀧𑀬𑀺𑀁𑀲𑀼, 𑀏𑀓𑀁 𑀢𑀯𑀓𑁆𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑀸𑀫𑀤𑁆𑀯𑀸𑀭𑁂, 𑀏𑀓𑀁 𑀣𑀽𑀧𑀸𑀭𑀸𑀫𑁂, 𑀏𑀓𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀺𑀳𑀸𑀭𑁂, 𑀏𑀓𑀁 𑀧𑀞𑀫𑀘𑁂𑀢𑀺𑀬𑀝𑁆𑀞𑀸𑀦𑁂, 𑀏𑀓𑀁 𑀘𑁂𑀢𑀺𑀬𑀧𑀩𑁆𑀩𑀢𑁂, 𑀏𑀓𑀁 𑀭𑁄𑀳𑀡𑀚𑀦𑀧𑀤𑀫𑁆𑀳𑀺 𑀓𑀸𑀚𑀭𑀕𑀸𑀫𑁂, 𑀏𑀓𑀁 𑀭𑁄𑀳𑀡𑀚𑀦𑀧𑀤𑀫𑁆𑀳𑀺𑀬𑁂𑀯 𑀘𑀦𑁆𑀤𑀦𑀕𑀸𑀫𑁂. 𑀇𑀢𑀭𑁂𑀲𑀁 𑀘𑀢𑀼𑀦𑁆𑀦𑀁 𑀨𑀮𑀸𑀦𑀁 𑀩𑀻𑀚𑁂𑀳𑀺 𑀚𑀸𑀢𑁂 𑀤𑁆𑀯𑀢𑁆𑀢𑀺𑀁𑀲 𑀩𑁄𑀥𑀺𑀢𑀭𑀼𑀡𑁂 𑀬𑁄𑀚𑀦𑀺𑀬𑀆𑀭𑀸𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑀏𑀯𑀁 𑀧𑀼𑀢𑁆𑀢𑀦𑀢𑁆𑀢𑀼𑀧𑀭𑀫𑁆𑀧𑀭𑀸𑀬 𑀲𑀫𑀦𑁆𑀢𑀸 𑀤𑀻𑀧𑀯𑀸𑀲𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀢𑀺𑀝𑁆𑀞𑀺𑀢𑁂 𑀤𑀲𑀩𑀮𑀲𑁆𑀲 𑀥𑀫𑁆𑀫𑀥𑀚𑀪𑀽𑀢𑁂 𑀫𑀳𑀸𑀩𑁄𑀥𑀺𑀫𑁆𑀳𑀺 ¶ 𑀅𑀦𑀼𑀴𑀸 𑀤𑁂𑀯𑀻 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀲𑀢𑁂𑀳𑀻𑀢𑀺 𑀫𑀸𑀢𑀼𑀕𑀸𑀫𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀭𑀺𑀝𑁆𑀞𑁄𑀧𑀺 𑀔𑁄 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀧𑀜𑁆𑀘𑀳𑀺 𑀧𑀼𑀭𑀺𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀣𑀽𑀧𑀸𑀭𑀸𑀫𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀮𑁄𑀳𑀧𑀸𑀲𑀸𑀤𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀲𑁆𑀲 𑀧𑀼𑀭𑀺𑀲𑀸 𑀧𑀼𑀧𑁆𑀨𑀸𑀦𑀺 𑀅𑀪𑀺𑀳𑀭𑀺𑀁𑀲𑀼. 𑀭𑀸𑀚𑀸 𑀣𑁂𑀭𑀲𑁆𑀲 𑀧𑀼𑀧𑁆𑀨𑀸𑀦𑀺 𑀅𑀤𑀸𑀲𑀺. 𑀣𑁂𑀭𑁄 𑀧𑀼𑀧𑁆𑀨𑁂𑀳𑀺 𑀮𑁄𑀳𑀧𑀸𑀲𑀸𑀤𑀝𑁆𑀞𑀸𑀦𑀁 𑀧𑀽𑀚𑁂𑀲𑀺. 𑀧𑀼𑀧𑁆𑀨𑁂𑀲𑀼 𑀪𑀽𑀫𑀺𑀬𑀁 𑀧𑀢𑀺𑀢𑀫𑀢𑁆𑀢𑁂𑀲𑀼 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀪𑀽𑀫𑀺 𑀘𑀮𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀲𑀗𑁆𑀖𑀲𑁆𑀲 𑀅𑀦𑀸𑀕𑀢𑁂 𑀉𑀧𑁄𑀲𑀣𑀸𑀕𑀸𑀭𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀭𑀸𑀚𑀸 ¶ 𑀧𑀼𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀫𑁆𑀩𑀗𑁆𑀕𑀡𑀝𑁆𑀞𑀸𑀦𑀁 𑀧𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀅𑀢𑀺𑀫𑀥𑀼𑀭𑀭𑀲𑀁 𑀏𑀓𑀁 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀻𑀬𑀺𑀢𑁆𑀣. 𑀭𑀸𑀚𑀸 𑀢𑀁 𑀣𑁂𑀭𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀅𑀤𑀸𑀲𑀺. 𑀣𑁂𑀭𑁄 𑀢𑀢𑁆𑀣𑁂𑀯 ¶ 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀇𑀤𑀁 𑀏𑀢𑁆𑀣𑁂𑀯 𑀭𑁄𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀁 𑀅𑀫𑁆𑀩𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀭𑁄𑀧𑁂𑀢𑁆𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀲𑀳 𑀅𑀫𑁆𑀩𑀩𑀻𑀚𑀭𑁄𑀧𑀦𑁂𑀦 𑀧𑀣𑀯𑀻 𑀅𑀓𑀫𑁆𑀧𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀫𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀲𑀗𑁆𑀖𑀲𑁆𑀲 𑀅𑀦𑀸𑀕𑀢𑁂 ‘𑀅𑀫𑁆𑀩𑀗𑁆𑀕𑀡𑀁’ 𑀦𑀸𑀫 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀭𑀸𑀚𑀸 𑀢𑀢𑁆𑀣 𑀅𑀝𑁆𑀞 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀑𑀓𑀺𑀭𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀢𑁆𑀢𑁄. 𑀢𑀢𑁆𑀣𑀲𑁆𑀲 𑀧𑀼𑀭𑀺𑀲𑀸 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺 𑀅𑀪𑀺𑀳𑀭𑀺𑀁𑀲𑀼. 𑀢𑀸𑀦𑀺 𑀭𑀸𑀚𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺. 𑀢𑀸𑀯𑀤𑁂𑀯 𑀫𑀳𑀸𑀧𑀣𑀯𑀻 𑀲𑀗𑁆𑀓𑀫𑁆𑀧𑀺. 𑀭𑀸𑀚𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀧𑀣𑀯𑀻 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀇𑀫𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀑𑀓𑀸𑀲𑁂 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀲𑀤𑀺𑀲𑁄 𑀫𑀳𑀸𑀣𑀽𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 ¶ 𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺. ‘‘𑀅𑀳𑀫𑁂𑀯 𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺. ‘‘𑀅𑀮𑀁, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀅𑀜𑁆𑀜𑀁 𑀩𑀳𑀼𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀦𑀢𑁆𑀢𑀸 𑀤𑀼𑀝𑁆𑀞𑀕𑀸𑀫𑀡𑀻 𑀅𑀪𑀬𑁄 𑀦𑀸𑀫 𑀓𑀸𑀭𑁂𑀲𑁆𑀲𑀢𑀻’’𑀢𑀺. 𑀅𑀣 𑀭𑀸𑀚𑀸 ‘‘𑀲𑀘𑁂, 𑀪𑀦𑁆𑀢𑁂, 𑀫𑀬𑁆𑀳𑀁 𑀦𑀢𑁆𑀢𑀸 𑀓𑀭𑀺𑀲𑁆𑀲𑀢𑀺, 𑀓𑀢𑀁𑀬𑁂𑀯 𑀫𑀬𑀸’’𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀁 𑀧𑀸𑀲𑀸𑀡𑀢𑁆𑀣𑀫𑁆𑀪𑀁 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀭𑀜𑁆𑀜𑁄 𑀦𑀢𑁆𑀢𑀸 𑀤𑀼𑀝𑁆𑀞𑀕𑀸𑀫𑀡𑀻 𑀅𑀪𑀬𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀣𑀽𑀧𑀁 𑀓𑀭𑁄𑀢𑀽’’𑀢𑀺 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀧𑀢𑀺𑀝𑁆𑀞𑀺𑀢𑀁 𑀦𑀼 𑀔𑁄, 𑀪𑀦𑁆𑀢𑁂, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀸𑀲𑀦’’𑀦𑁆𑀢𑀺? ‘‘𑀧𑀢𑀺𑀝𑁆𑀞𑀺𑀢𑀁, 𑀫𑀳𑀸𑀭𑀸𑀚, 𑀲𑀸𑀲𑀦𑀁; 𑀫𑀽𑀮𑀸𑀦𑀺 𑀧𑀦𑀲𑁆𑀲 𑀦 𑀢𑀸𑀯 𑀑𑀢𑀭𑀦𑁆𑀢𑀻’’𑀢𑀺. ‘‘𑀓𑀤𑀸 𑀧𑀦, 𑀪𑀦𑁆𑀢𑁂 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀺 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀬𑀤𑀸, 𑀫𑀳𑀸𑀭𑀸𑀚, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀚𑀸𑀢𑁄 𑀤𑀸𑀭𑀓𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺𑀬𑁂𑀯 𑀯𑀺𑀦𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀯𑀸𑀘𑁂𑀲𑁆𑀲𑀢𑀺, 𑀢𑀤𑀸 𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀺 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀏𑀤𑀺𑀲𑁄 𑀪𑀺𑀓𑁆𑀔𑀽’’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀳𑀸𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀧𑀝𑀺𑀩𑀮𑁄 𑀏𑀢𑀲𑁆𑀫𑀺𑀁 𑀓𑀫𑁆𑀫𑁂’’𑀢𑀺. ‘‘𑀫𑀬𑀸 𑀏𑀢𑁆𑀣, 𑀪𑀦𑁆𑀢𑁂, 𑀓𑀺𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀫𑀡𑁆𑀟𑀧𑀁, 𑀫𑀳𑀸𑀭𑀸𑀚, 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀫𑁂𑀖𑀯𑀡𑁆𑀡𑀸𑀪𑀬𑀲𑁆𑀲 𑀅𑀫𑀘𑁆𑀘𑀲𑁆𑀲 𑀧𑀭𑀺𑀯𑁂𑀡𑀝𑁆𑀞𑀸𑀦𑁂 𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀅𑀚𑀸𑀢𑀲𑀢𑁆𑀢𑀼𑀫𑀳𑀸𑀭𑀸𑀚𑁂𑀦 𑀓𑀢𑀫𑀡𑁆𑀟𑀧𑀧𑁆𑀧𑀓𑀸𑀭𑀁 𑀭𑀸𑀚𑀸𑀦𑀼𑀪𑀸𑀯𑁂𑀦 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑁂 𑀲𑀓𑀲𑀓𑀲𑀺𑀧𑁆𑀧𑁂𑀲𑀼 𑀧𑀬𑁄𑀚𑁂𑀢𑁆𑀯𑀸 ‘‘𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀭𑀦𑁆𑀢𑀸𑀦𑀺 ¶ 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀓𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀣𑀽𑀧𑀸𑀭𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀽𑀧𑀸𑀭𑀸𑀫𑁂 𑀅𑀝𑁆𑀞𑀲𑀝𑁆𑀞𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑀁 ¶ 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀁 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁄 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀅𑀚𑁆𑀛𑀺𑀝𑁆𑀞𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺. 𑀫𑀳𑀺𑀦𑁆𑀤𑀢𑁆𑀣𑁂𑀭𑀧𑀫𑀼𑀔𑀸 𑀅𑀝𑁆𑀞𑀲𑀝𑁆𑀞𑀺 𑀫𑀳𑀸𑀣𑁂𑀭𑀸 𑀥𑀫𑁆𑀫𑀸𑀲𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀦𑀺𑀲𑀻𑀤𑀺𑀁𑀲𑀼. 𑀭𑀜𑁆𑀜𑁄𑀧𑀺 𑀓𑀦𑀺𑀝𑁆𑀞𑀪𑀸𑀢𑀸 𑀫𑀢𑁆𑀢𑀸𑀪𑀬𑀢𑁆𑀣𑁂𑀭𑁄 𑀦𑀸𑀫 ‘‘𑀥𑀼𑀭𑀕𑁆𑀕𑀸𑀳𑁄 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀸𑀲𑀦𑀫𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀯𑀲𑁂𑀲𑀸𑀧𑀺 𑀪𑀺𑀓𑁆𑀔𑀽 𑀲𑀭𑀸𑀚𑀺𑀓𑀸 𑀘 𑀧𑀭𑀺𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀁𑀲𑀼.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 𑀯𑀺𑀦𑀬𑀦𑀺𑀤𑀸𑀦𑀁 𑀅𑀪𑀸𑀲𑀺. 𑀪𑀸𑀲𑀺𑀢𑁂 𑀘 𑀧𑀦𑀸𑀬𑀲𑁆𑀫𑀢𑀸 𑀅𑀭𑀺𑀝𑁆𑀞𑀢𑁆𑀣𑁂𑀭𑁂𑀦 𑀯𑀺𑀦𑀬𑀦𑀺𑀤𑀸𑀦𑁂 𑀆𑀓𑀸𑀲𑀁 𑀫𑀳𑀸𑀯𑀺𑀭𑀯𑀁 𑀭𑀯𑀺. 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀗𑁆𑀓𑀫𑁆𑀧𑀺. 𑀏𑀯𑀁 𑀅𑀦𑁂𑀓𑁂𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀆𑀬𑀲𑁆𑀫𑀸 𑀅𑀭𑀺𑀝𑁆𑀞𑀢𑁆𑀣𑁂𑀭𑁄 𑀫𑀳𑀸𑀫𑀳𑀺𑀦𑁆𑀤𑀧𑀫𑀼𑀔𑁂𑀳𑀺 𑀅𑀝𑁆𑀞𑀲𑀝𑁆𑀞𑀺𑀬𑀸 𑀧𑀘𑁆𑀘𑁂𑀓𑀕𑀡𑀻𑀳𑀺 𑀔𑀻𑀡𑀸𑀲𑀯𑀫𑀳𑀸𑀣𑁂𑀭𑁂𑀳𑀺 𑀢𑀤𑀜𑁆𑀜𑁂𑀳𑀺 𑀘 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀞𑀫𑀓𑀢𑁆𑀢𑀺𑀓𑀧𑀯𑀸𑀭𑀡𑀸𑀤𑀺𑀯𑀲𑁂 𑀣𑀽𑀧𑀸𑀭𑀸𑀫𑀯𑀺𑀳𑀸𑀭𑀫𑀚𑁆𑀛𑁂 𑀲𑀢𑁆𑀣𑀼 𑀓𑀭𑀼𑀡𑀸𑀕𑀼𑀡𑀤𑀻𑀧𑀓𑀁 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀓𑀭𑀸𑀦𑀁 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀯𑀺𑀧𑁆𑀨𑀦𑁆𑀤𑀺𑀢𑀯𑀺𑀦𑀬𑀦𑀁 𑀯𑀺𑀦𑀬𑀧𑀺𑀝𑀓𑀁 𑀧𑀓𑀸𑀲𑁂𑀲𑀺. 𑀧𑀓𑀸𑀲𑁂𑀢𑁆𑀯𑀸 𑀘 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀫𑀸𑀦𑁄 𑀩𑀳𑀽𑀦𑀁 𑀯𑀸𑀘𑁂𑀢𑁆𑀯𑀸 𑀩𑀳𑀽𑀦𑀁 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑁂𑀧𑀺 𑀔𑁄 𑀫𑀳𑀸𑀫𑀳𑀺𑀦𑁆𑀤𑀧𑁆𑀧𑀫𑀼𑀔𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑁋

‘‘𑀅𑀝𑁆𑀞𑀲𑀝𑁆𑀞𑀺 ¶ 𑀫𑀳𑀸𑀣𑁂𑀭𑀸, 𑀥𑀼𑀭𑀕𑁆𑀕𑀸𑀳𑀸 𑀲𑀫𑀸𑀕𑀢𑀸;

𑀧𑀘𑁆𑀘𑁂𑀓𑀕𑀡𑀺𑀦𑁄 𑀲𑀩𑁆𑀩𑁂, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸.

‘‘𑀔𑀻𑀡𑀸𑀲𑀯𑀸 𑀯𑀲𑀺𑀧𑁆𑀧𑀢𑁆𑀢𑀸, 𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀓𑁄𑀯𑀺𑀤𑀸;

𑀉𑀢𑁆𑀢𑀫𑀢𑁆𑀣𑀫𑀪𑀺𑀜𑁆𑀜𑀸𑀬, 𑀅𑀦𑀼𑀲𑀸𑀲𑀺𑀁𑀲𑀼 𑀭𑀸𑀚𑀺𑀦𑁄.

‘‘𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀦, 𑀑𑀪𑀸𑀲𑁂𑀢𑁆𑀯𑀸 𑀫𑀳𑀺𑀁 𑀇𑀫𑀁;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯, 𑀦𑀺𑀩𑁆𑀩𑀸𑀬𑀺𑀁𑀲𑀼 𑀫𑀳𑁂𑀲𑀬𑁄’’.

𑀢𑁂𑀲𑀁 ¶ 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀧𑀭𑀪𑀸𑀕𑁂 𑀅𑀜𑁆𑀜𑁂𑀧𑀺 𑀢𑁂𑀲𑀁 𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑀺𑀲𑁆𑀲𑀤𑀢𑁆𑀢𑀓𑀸𑀴𑀲𑀼𑀫𑀦-𑀤𑀻𑀖𑀲𑀼𑀫𑀦𑀸𑀤𑀬𑁄 𑀘 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀸𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀇𑀫𑀁 𑀯𑀺𑀦𑀬𑀧𑀺𑀝𑀓𑀁 𑀬𑀸𑀯𑀚𑁆𑀚𑀢𑀦𑀸 𑀆𑀦𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀢𑀺𑀬𑀲𑀗𑁆𑀕𑀳𑀢𑁄 𑀧𑀦 𑀉𑀤𑁆𑀥𑀁 𑀇𑀫𑀁 𑀤𑀻𑀧𑀁 𑀫𑀳𑀺𑀦𑁆𑀤𑀸𑀤𑀻𑀳𑀺 𑀆𑀪𑀢𑀁, 𑀫𑀳𑀺𑀦𑁆𑀤𑀢𑁄 𑀉𑀕𑁆𑀕𑀳𑁂𑀢𑁆𑀯𑀸 𑀓𑀜𑁆𑀘𑀺 ¶ 𑀓𑀸𑀮𑀁 𑀅𑀭𑀺𑀝𑁆𑀞𑀢𑁆𑀣𑁂𑀭𑀸𑀤𑀻𑀳𑀺 𑀆𑀪𑀢𑀁, 𑀢𑀢𑁄 𑀬𑀸𑀯𑀚𑁆𑀚𑀢𑀦𑀸 𑀢𑁂𑀲𑀁𑀬𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀫𑁆𑀧𑀭𑀪𑀽𑀢𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢’’𑀦𑁆𑀢𑀺.

𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀦𑁆𑀢𑀺? 𑀬𑁂𑀲𑀁 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀽𑀦𑀁 𑀯𑀢𑁆𑀢𑀢𑀺, 𑀫𑀡𑀺𑀖𑀝𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀫𑀺𑀯 𑀈𑀲𑀓𑀫𑁆𑀧𑀺 𑀦 𑀧𑀕𑁆𑀖𑀭𑀢𑀺, 𑀏𑀯𑀭𑀽𑀧𑁂𑀲𑀼 𑀅𑀥𑀺𑀫𑀢𑁆𑀢𑀲𑀢𑀺-𑀕𑀢𑀺-𑀥𑀺𑀢𑀺-𑀫𑀦𑁆𑀢𑁂𑀲𑀼 𑀮𑀚𑁆𑀚𑀻𑀲𑀼 𑀓𑀼𑀓𑁆𑀓𑀼𑀘𑁆𑀘𑀓𑁂𑀲𑀼 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀯𑀺𑀦𑀬𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀺𑀓𑁆𑀔𑀸𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑁄 𑁋 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀓𑀼𑀲𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀺𑀬𑁄 𑀳𑁄𑀢𑀺, 𑀢𑀤𑀸𑀬𑀢𑁆𑀢𑀸 𑀳𑀺 𑀦𑁂𑀲𑀁 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀯𑀢𑁆𑀢𑀸𑀦𑀼𑀯𑀢𑁆𑀢𑀧𑀝𑀺𑀧𑀢𑁆𑀢𑀺 𑀆𑀘𑀸𑀭𑀕𑁄𑀘𑀭𑀓𑀼𑀲𑀮𑀢𑀸. 𑀅𑀧𑀺 𑀘𑀲𑁆𑀲 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄; 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺; 𑀯𑀺𑀲𑀸𑀭𑀤𑁄 𑀲𑀗𑁆𑀖𑀫𑀚𑁆𑀛𑁂 𑀯𑁄𑀳𑀭𑀢𑀺; 𑀧𑀘𑁆𑀘𑀢𑁆𑀣𑀺𑀓𑁂 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺; 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 ¶ 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂 𑀧𑀼𑀕𑁆𑀕𑀮𑁂; 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄…𑀧𑁂… 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 (𑀧𑀭𑀺. 𑁩𑁨𑁫).

𑀬𑁂 𑀘𑀸𑀧𑀺 𑀲𑀁𑀯𑀭𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀯𑀺𑀦𑀬𑀥𑀭𑁄 𑀧𑀼𑀕𑁆𑀕𑀮𑁄 𑀢𑁂𑀲𑀁 𑀤𑀸𑀬𑀸𑀤𑁄; 𑀯𑀺𑀦𑀬𑀫𑀽𑀮𑀓𑀢𑁆𑀢𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀁𑀯𑀭𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀬, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬 ¶ , 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸, 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸, 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁 𑁋 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀭𑀺. 𑁩𑁬𑁬). 𑀢𑀲𑁆𑀫𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀆𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀬𑀸 𑀲𑀸 𑀯𑀺𑀦𑀬𑀲𑀁𑀯𑀡𑁆𑀡𑀦𑀢𑁆𑀣𑀁 𑀫𑀸𑀢𑀺𑀓𑀸 𑀞𑀧𑀺𑀢𑀸 𑀢𑀢𑁆𑀣 𑁋

‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸, 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁;

𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀁 𑀘𑁂𑀢𑀫𑁂𑀢𑀁, 𑀯𑀢𑁆𑀯𑀸 𑀯𑀺𑀥𑀺𑀁 𑀢𑀢𑁄’’𑀢𑀺.

𑀇𑀫𑀺𑀲𑁆𑀲𑀸 𑀢𑀸𑀯 𑀕𑀸𑀣𑀸𑀬 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀯𑀺𑀦𑀬𑀲𑁆𑀲 𑀘 𑀩𑀸𑀳𑀺𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀁𑀯𑀡𑁆𑀡𑀺𑀢𑀸 𑀳𑁄𑀢𑀻𑀢𑀺.

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 ¶ ¶ ¶

‘‘𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲, 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄;

𑀤𑀲𑁆𑀲𑀬𑀦𑁆𑀢𑁄 𑀓𑀭𑀺𑀲𑁆𑀲𑀸𑀫𑀺, 𑀯𑀺𑀦𑀬𑀲𑁆𑀲𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀢𑁂𑀦𑀸𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁. 𑀢𑀲𑁆𑀲 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂𑀦𑀧𑀺 𑀅𑀧𑀭𑀪𑀸𑀕𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄. 𑀅𑀧𑀭𑀪𑀸𑀕𑁂 𑀳𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀬𑁂𑀦 𑀲𑀫𑀬𑁂𑀦 𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀺𑀦𑀬𑁂 𑀬𑀼𑀢𑁆𑀢𑀺, 𑀬𑀤𑀺𑀤𑀁 𑀬𑀢𑁆𑀣 𑀬𑀢𑁆𑀣 ‘‘𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 ‘‘𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀸𑀢𑀩𑁆𑀩𑁄𑀢𑀺.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀬𑁂𑀦 𑀲𑀼𑀤𑀺𑀦𑁆𑀦𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺; 𑀬𑀲𑁆𑀫𑀸 𑀧𑀝𑀺𑀲𑁂𑀯𑀺, 𑀢𑀲𑁆𑀫𑀸 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀢𑀸𑀯 𑀧𑀼𑀩𑁆𑀩𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀬𑁂𑀦 𑀲𑀫𑀬𑁂𑀦 𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄 𑀭𑀜𑁆𑀜𑁄 𑀤𑀸𑀭𑀽𑀦𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀻𑀢𑀺 𑀏𑀯𑀁 𑀧𑀘𑁆𑀙𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑁄 𑀢𑁂𑀦𑀸𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑁄. 𑀲𑀫𑀬𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀲𑀫𑀬𑀲𑀤𑁆𑀤𑁄 𑀢𑀸𑀯 𑁋

𑀲𑀫𑀯𑀸𑀬𑁂 ¶ 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼-𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 ¶ 𑀳𑀺𑀲𑁆𑀲 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁪𑁪𑁭) 𑀏𑀯𑀫𑀸𑀤𑀻𑀲𑀼 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺 (𑀅. 𑀦𑀺. 𑁮.𑁨𑁯) 𑀏𑀯𑀫𑀸𑀤𑀻𑀲𑀼 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 ¶ 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺 (𑀧𑀸𑀘𑀺. 𑁩𑁫𑁮) 𑀏𑀯𑀫𑀸𑀤𑀻𑀲𑀼 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺 𑁋 ‘𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 𑁋 𑀪𑀤𑁆𑀤𑀸𑀮𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺 (𑀫. 𑀦𑀺. 𑁨.𑁧𑁩𑁫) 𑀏𑀯𑀫𑀸𑀤𑀻𑀲𑀼 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺 (𑀫. 𑀦𑀺. 𑁨.𑁨𑁬𑁦) 𑀏𑀯𑀫𑀸𑀤𑀻𑀲𑀼 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯);

𑀏𑀯𑀫𑀸𑀤𑀻𑀲𑀼 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁮) 𑀏𑀯𑀫𑀸𑀤𑀻𑀲𑀼 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁨.𑁮) 𑀏𑀯𑀫𑀸𑀤𑀻𑀲𑀼 𑀧𑀝𑀺𑀯𑁂𑀥𑁄 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑀲𑁆𑀫𑀸 𑀬𑁂𑀦 𑀓𑀸𑀮𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑁂𑀦 𑀓𑀸𑀮𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣𑀸𑀳 𑁋 ‘‘𑀅𑀣 𑀓𑀲𑁆𑀫𑀸 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘𑀏𑀓𑀁 𑀲𑀫𑀬’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀪𑀺𑀥𑀫𑁆𑀫𑁂 𑀘 ‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑁂𑀦, 𑀢𑀣𑀸 𑀅𑀓𑀢𑁆𑀯𑀸 𑀇𑀥 ‘𑀢𑁂𑀦 𑀲𑀫𑀬𑁂𑀦𑀸’𑀢𑀺 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺? 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀓𑀣𑀁? 𑀲𑀼𑀢𑁆𑀢𑀦𑁆𑀢𑁂 𑀢𑀸𑀯 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺; 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀪𑀺𑀥𑀫𑁆𑀫𑁂 𑀘 𑀅𑀥𑀺𑀓𑀭𑀡𑀢𑁆𑀣𑁄 ¶ 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀺𑀬𑀢𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 ¶ 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 ¶ 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺; 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀉𑀧𑀬𑁄𑀕𑁂𑀦 𑀪𑀼𑀫𑁆𑀫𑁂𑀦, 𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀬;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀓𑀭𑀡𑁂𑀦𑁂𑀯 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘𑀏𑀓𑀁 𑀲𑀫𑀬’𑀦𑁆𑀢𑀺 𑀯𑀸 ‘𑀬𑀲𑁆𑀫𑀺𑀁 𑀲𑀫𑀬𑁂’𑀢𑀺 𑀯𑀸 ‘𑀢𑁂𑀦 𑀲𑀫𑀬𑁂𑀦𑀸’𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯 𑀅𑀢𑁆𑀣𑁄’’𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀮𑀤𑁆𑀥𑀺𑀬𑀸 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀧𑀭𑀢𑁄 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀯𑁂𑀭𑀜𑁆𑀚𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀦𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀲𑀁 𑀯𑁂𑀭𑀜𑁆𑀚𑀸𑀬𑀁; 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀫𑁂𑀢𑀁, 𑀇𑀥 𑀧𑀦 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁, 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 𑀏𑀢𑁆𑀣 𑀦𑀴𑁂𑀭𑀼 𑀦𑀸𑀫 𑀬𑀓𑁆𑀔𑁄, 𑀧𑀼𑀘𑀺𑀫𑀦𑁆𑀤𑁄𑀢𑀺 ¶ 𑀦𑀺𑀫𑁆𑀩𑀭𑀼𑀓𑁆𑀔𑁄, 𑀫𑀽𑀮𑀦𑁆𑀢𑀺 𑀲𑀫𑀻𑀧𑀁. 𑀅𑀬𑀜𑁆𑀳𑀺 𑀫𑀽𑀮𑀲𑀤𑁆𑀤𑁄 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀻’’𑀢𑀺 (𑀅. 𑀦𑀺. 𑁪.𑁧𑁯𑁫) -𑀆𑀤𑀻𑀲𑀼 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫) -𑀆𑀤𑀻𑀲𑀼 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂. 𑀇𑀥 𑀧𑀦 𑀲𑀫𑀻𑀧𑁂 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀦𑀴𑁂𑀭𑀼𑀬𑀓𑁆𑀔𑁂𑀦 𑀅𑀥𑀺𑀕𑁆𑀕𑀳𑀺𑀢𑀲𑁆𑀲 𑀧𑀼𑀘𑀺𑀫𑀦𑁆𑀤𑀲𑁆𑀲 𑀲𑀫𑀻𑀧𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀓𑀺𑀭 𑀧𑀼𑀘𑀺𑀫𑀦𑁆𑀤𑁄 𑀭𑀫𑀡𑀻𑀬𑁄 𑀧𑀸𑀲𑀸𑀤𑀺𑀓𑁄 𑀅𑀦𑁂𑀓𑁂𑀲𑀁 𑀭𑀼𑀓𑁆𑀔𑀸𑀦𑀁 𑀆𑀥𑀺𑀧𑀘𑁆𑀘𑀁 𑀯𑀺𑀬 𑀓𑀼𑀭𑀼𑀫𑀸𑀦𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀅𑀳𑁄𑀲𑀺. 𑀅𑀣 ¶ 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀕𑀦𑁆𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀯𑀺𑀳𑀭𑀦𑁆𑀢𑁄 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂 𑀳𑁂𑀝𑁆𑀞𑀸𑀪𑀸𑀕𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺.

𑀢𑀢𑁆𑀣 ¶ 𑀲𑀺𑀬𑀸 𑀬𑀤𑀺 𑀢𑀸𑀯 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺, ‘‘𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘‘𑀯𑁂𑀭𑀜𑁆𑀚𑀸𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀢𑁂𑀦𑁂𑀯 𑀲𑀫𑀬𑁂𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀳𑀭𑀺𑀢𑀼𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀯𑁂𑀭𑀜𑁆𑀚𑀸𑀬 𑀲𑀫𑀻𑀧𑁂 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀁 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀯𑁂𑀭𑀜𑁆𑀚𑀸𑀯𑀘𑀦𑀁. 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀦𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀯𑀘𑀦𑀁.

𑀢𑀢𑁆𑀣 𑀯𑁂𑀭𑀜𑁆𑀚𑀸𑀓𑀺𑀢𑁆𑀢𑀦𑁂𑀦 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀪𑀕𑀯𑀢𑁄 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀓𑀺𑀢𑁆𑀢𑀦𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁, 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀕𑁆𑀕𑀳𑀡𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁, 𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀼𑀧𑀸𑀬𑀤𑀲𑁆𑀲𑀦𑀁; 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀁, 𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺𑀁; 𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁 ¶ , 𑀧𑀘𑁆𑀙𑀺𑀫𑁂𑀦 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁; 𑀧𑀼𑀭𑀺𑀫𑁂𑀦 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀢𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀦𑀺𑀭𑀼𑀧𑀮𑁂𑀧𑀦𑀁; 𑀧𑀼𑀭𑀺𑀫𑁂𑀦 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀁, 𑀧𑀘𑁆𑀙𑀺𑀫𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀼𑀬𑁄𑀕𑀦𑀺𑀫𑀺𑀢𑁆𑀢𑀁; 𑀧𑀼𑀭𑀺𑀫𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁, 𑀧𑀘𑁆𑀙𑀺𑀫𑁂𑀦 𑀤𑁂𑀯𑀢𑀸𑀦𑀁; 𑀧𑀼𑀭𑀺𑀫𑁂𑀦 𑀮𑁄𑀓𑁂 𑀚𑀸𑀢𑀲𑁆𑀲 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀁, 𑀧𑀘𑁆𑀙𑀺𑀫𑁂𑀦 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀁; 𑀧𑀼𑀭𑀺𑀫𑁂𑀦 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁦) 𑀯𑀘𑀦𑀢𑁄 𑀬𑀤𑀢𑁆𑀣𑀁 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀁, 𑀧𑀘𑁆𑀙𑀺𑀫𑁂𑀦 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀁. 𑀪𑀕𑀯𑀸 𑀳𑀺 𑀧𑀞𑀫𑀁 𑀮𑀼𑀫𑁆𑀩𑀺𑀦𑀻𑀯𑀦𑁂, 𑀤𑀼𑀢𑀺𑀬𑀁 𑀩𑁄𑀥𑀺𑀫𑀡𑁆𑀟𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀯𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑁄, 𑀢𑁂𑀦𑀲𑁆𑀲 𑀯𑀦𑁂𑀬𑁂𑀯 𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀳𑀢𑀸 ¶ 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸; 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺, 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀕𑀼𑀡𑁂𑀳𑀺𑀧𑀺 𑀫𑀳𑀸 𑀅𑀳𑁄𑀲𑀺, 𑀬𑀲𑁆𑀫𑀸 𑀬𑁄 𑀢𑀢𑁆𑀣 𑀧𑀘𑁆𑀙𑀺𑀫𑀓𑁄 𑀲𑁄 𑀲𑁄𑀢𑀸𑀧𑀦𑁆𑀦𑁄; 𑀲𑀗𑁆𑀔𑁆𑀬𑀸𑀬𑀧𑀺 𑀫𑀳𑀸 𑀧𑀜𑁆𑀘𑀲𑀢𑀲𑀗𑁆𑀔𑁆𑀬𑀢𑁆𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦; 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀲𑀗𑁆𑀖𑀸𑀢𑁂𑀦 𑀲𑀫𑀡𑀕𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻𑀢𑀺 𑀧𑀜𑁆𑀘 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀘𑀫𑀢𑁆𑀢𑀸𑀦𑀺. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑀣𑀸 ‘‘𑀪𑁄𑀚𑀦𑁂 ¶ 𑀫𑀢𑁆𑀢𑀜𑁆𑀜𑀽’’𑀢𑀺 𑀯𑀼𑀢𑁆𑀢𑁂 𑀪𑁄𑀚𑀦𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀧𑀫𑀸𑀡𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀳𑁄𑀢𑀺; 𑀏𑀯𑀫𑀺𑀥𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘 𑀫𑀢𑁆𑀢𑀸 𑀧𑀜𑁆𑀘𑀧𑁆𑀧𑀫𑀸𑀡𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀽𑀦𑀁 𑀲𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀢𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀏𑀢𑁂𑀦 𑀬𑀁 𑀯𑀼𑀢𑁆𑀢𑀁 𑁋 ‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺’’𑀦𑁆𑀢𑀺, 𑀏𑀢𑁆𑀣 𑀢𑀲𑁆𑀲 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀭𑀢𑁄 𑀧𑀦𑀲𑁆𑀲 ¶ ‘‘𑀦𑀺𑀭𑀩𑁆𑀩𑀼𑀤𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀭𑀸𑀤𑀻𑀦𑀯𑁄 𑀅𑀧𑀕𑀢𑀓𑀸𑀴𑀓𑁄 𑀲𑀼𑀤𑁆𑀥𑁄 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄. 𑀇𑀫𑁂𑀲𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀬𑁄 𑀧𑀘𑁆𑀙𑀺𑀫𑀓𑁄 𑀲𑁄 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦 𑀕𑀼𑀡𑀫𑀳𑀢𑁆𑀢𑀁 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀲𑁆𑀲𑁄𑀲𑀻𑀢𑀺 𑀲𑀼𑀡𑀺 𑀉𑀧𑀮𑀪𑀺, 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀸𑀲𑀺. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 𑀅𑀲𑁆𑀲𑁄𑀲𑀺 𑀏𑀯, 𑀦𑀸𑀲𑁆𑀲 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯. 𑀯𑁂𑀭𑀜𑁆𑀚𑀸𑀬𑀁 𑀚𑀸𑀢𑁄, 𑀯𑁂𑀭𑀜𑁆𑀚𑀸𑀬𑀁 𑀪𑀯𑁄, 𑀯𑁂𑀭𑀜𑁆𑀚𑀸 𑀯𑀸 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀯𑁂𑀭𑀜𑁆𑀚𑁄. 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀯𑀲𑁂𑀦 𑀧𑀦𑀸𑀬𑀁 ‘‘𑀉𑀤𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀳𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀯𑀘𑀦𑀁. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀅𑀲𑁆𑀲𑁄𑀲𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 (𑀥. 𑀧. 𑁩𑁮𑁮), 𑀲𑀫𑀺𑀢𑀧𑀸𑀧𑀢𑁆𑀢𑀸 ¶ 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫). 𑀪𑀕𑀯𑀸 𑀘 𑀅𑀦𑀼𑀢𑁆𑀢𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀺𑀢𑀧𑀸𑀧𑁄, 𑀢𑁂𑀦𑀲𑁆𑀲 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀫𑁂𑀢𑀁 𑀦𑀸𑀫𑀁 𑀬𑀤𑀺𑀤𑀁 𑀲𑀫𑀡𑁄𑀢𑀺. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸𑀦𑀁 𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀆𑀮𑀧𑀦𑀫𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀪𑁄𑀯𑀸𑀤𑀻 𑀦𑀸𑀫𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺. (𑀥. 𑀧. 𑁩𑁯𑁬; 𑀲𑀼. 𑀦𑀺. 𑁬𑁨𑁫). 𑀕𑁄𑀢𑀫𑁄𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀓𑀺𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀲𑀫𑀡𑁄 𑀓𑀺𑀭 𑀪𑁄 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁, 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯, 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀢𑀁 𑀔𑁄 𑀧𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 ¶ 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀔𑁄 𑀧𑀦 ¶ 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁄𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄; 𑀲𑁂𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺 𑀏𑀯, 𑀣𑀼𑀢𑀺𑀖𑁄𑀲𑁄 𑀯𑀸.

𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀢𑀸𑀯 𑀬𑁄𑀚𑀦𑀸 𑁋 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀯𑀺𑀦𑀬𑀥𑀭𑀸𑀦𑀁 𑀲𑀼𑀢𑁆𑀢𑀦𑁆𑀢𑀦𑀬𑀓𑁄𑀲𑀮𑁆𑀮𑀢𑁆𑀣𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀜𑁆𑀘 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀺𑀢𑁆𑀣𑀸𑀭𑀦𑀬𑁂𑀦 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑁋 ‘‘𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳’’𑀦𑁆𑀢𑀺𑀆𑀤𑀺; 𑀢𑀢𑁆𑀣 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀓𑀸 𑀳𑀺 𑀲𑁄 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑁄, 𑀫𑀕𑁆𑀕𑁂𑀦 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸𑀢𑀺 𑀆𑀭𑀓𑀢𑁆𑀢𑀸 𑀅𑀭𑀳𑀁; 𑀢𑁂 𑀘𑀸𑀦𑁂𑀦 𑀓𑀺𑀮𑁂𑀲𑀸𑀭𑀬𑁄 𑀫𑀕𑁆𑀕𑁂𑀦 𑀳𑀢𑀸𑀢𑀺 𑀅𑀭𑀻𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀜𑁆𑀘𑁂𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀺𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀭𑀁 𑀚𑀭𑀸𑀫𑀭𑀡𑀦𑁂𑀫𑀺 𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀯𑀭𑀣𑁂 𑀲𑀫𑀸𑀬𑁄𑀚𑀺𑀢𑀁 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁 𑀲𑀁𑀲𑀸𑀭𑀘𑀓𑁆𑀓𑀁, 𑀢𑀲𑁆𑀲𑀸𑀦𑁂𑀦 𑀩𑁄𑀥𑀺𑀫𑀡𑁆𑀟𑁂 ¶ 𑀯𑀻𑀭𑀺𑀬𑀧𑀸𑀤𑁂𑀳𑀺 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑀸 𑀳𑀢𑀸𑀢𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳𑀁.

𑀅𑀣 𑀯𑀸 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀘 𑀅𑀯𑀺𑀚𑁆𑀚𑀸 𑀦𑀸𑀪𑀺, 𑀫𑀽𑀮𑀢𑁆𑀢𑀸; 𑀚𑀭𑀸𑀫𑀭𑀡𑀁 𑀦𑁂𑀫𑀺, 𑀧𑀭𑀺𑀬𑁄𑀲𑀸𑀦𑀢𑁆𑀢𑀸; 𑀲𑁂𑀲𑀸 𑀤𑀲 𑀥𑀫𑁆𑀫𑀸 𑀅𑀭𑀸, 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀢𑁆𑀢𑀸 𑀘. 𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸, 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸 𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸 𑀅𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸 𑀓𑀸𑀫𑀪𑀯𑁂 ¶ 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀓𑀸𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀓𑀸𑀫𑀪𑀯𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀭𑀽𑀧𑀪𑀯𑁂. 𑀅𑀭𑀽𑀧𑀪𑀯𑁂 𑀦𑀸𑀫𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀦𑀸𑀫𑀭𑀽𑀧𑀁 𑀓𑀸𑀫𑀪𑀯𑁂 𑀲𑀴𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀦𑀸𑀫𑀭𑀽𑀧𑀁 𑀭𑀽𑀧𑀪𑀯𑁂 𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀦𑀸𑀫𑀁 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲𑀸𑀬𑀢𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀲𑀴𑀸𑀬𑀢𑀦𑀁 𑀓𑀸𑀫𑀪𑀯𑁂 𑀙𑀩𑁆𑀩𑀺𑀥𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀪𑀯𑁂 𑀢𑀻𑀡𑀺 𑀆𑀬𑀢𑀦𑀸𑀦𑀺 𑀭𑀽𑀧𑀪𑀯𑁂 𑀢𑀺𑀡𑁆𑀡𑀁 𑀨𑀲𑁆𑀲𑀸𑀦𑀁; 𑀅𑀭𑀽𑀧𑀪𑀯𑁂 𑀏𑀓𑀫𑀸𑀬𑀢𑀦𑀁 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀙 𑀨𑀲𑁆𑀲𑀸 𑀓𑀸𑀫𑀪𑀯𑁂 𑀙𑀦𑁆𑀦𑀁 𑀯𑁂𑀤𑀦𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀽𑀧𑀪𑀯𑁂 𑀢𑀬𑁄 𑀢𑀢𑁆𑀣𑁂𑀯 ¶ 𑀢𑀺𑀲𑁆𑀲𑀦𑁆𑀦𑀁; 𑀅𑀭𑀽𑀧𑀪𑀯𑁂 𑀏𑀓𑁄 𑀢𑀢𑁆𑀣𑁂𑀯 𑀏𑀓𑀺𑀲𑁆𑀲𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀪𑀯𑁂 𑀙 𑀯𑁂𑀤𑀦𑀸 𑀓𑀸𑀫𑀪𑀯𑁂 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀽𑀧𑀪𑀯𑁂 𑀢𑀺𑀲𑁆𑀲𑁄 𑀢𑀢𑁆𑀣𑁂𑀯 𑀢𑀺𑀡𑁆𑀡𑀁; 𑀅𑀭𑀽𑀧𑀪𑀯𑁂 𑀏𑀓𑀸 𑀯𑁂𑀤𑀦𑀸 𑀅𑀭𑀽𑀧𑀪𑀯𑁂 𑀏𑀓𑀲𑁆𑀲 𑀢𑀡𑁆𑀳𑀸𑀓𑀸𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀢𑀢𑁆𑀣 𑀲𑀸 𑀲𑀸 𑀢𑀡𑁆𑀳𑀸 𑀢𑀲𑁆𑀲 𑀢𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑁄; 𑀉𑀧𑀸𑀤𑀸𑀦𑀸𑀤𑀬𑁄 𑀪𑀯𑀸𑀤𑀻𑀦𑀁.

𑀓𑀣𑀁? 𑀇𑀥𑁂𑀓𑀘𑁆𑀘𑁄 ‘‘𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺; 𑀤𑀼𑀘𑁆𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀅𑀧𑀸𑀬𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀣𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄, 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺, 𑀧𑀭𑀺𑀧𑀸𑀓𑁄 𑀚𑀭𑀸, 𑀪𑁂𑀤𑁄 𑀫𑀭𑀡𑀁.

𑀅𑀧𑀭𑁄 ¶ ‘‘𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀲𑀼𑀘𑀭𑀺𑀢𑀁 𑀘𑀭𑀢𑀺; 𑀲𑀼𑀘𑀭𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀲𑀕𑁆𑀕𑁂 𑀉𑀧𑀧𑀚𑁆𑀚𑀢𑀺. 𑀢𑀢𑁆𑀣𑀲𑁆𑀲 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄𑀢𑀺 𑀲𑁄 𑀏𑀯 𑀦𑀬𑁄.

𑀅𑀧𑀭𑁄 𑀧𑀦 ‘‘𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀺, 𑀓𑀭𑀼𑀡𑀁… 𑀫𑀼𑀤𑀺𑀢𑀁… 𑀉𑀧𑁂𑀓𑁆𑀔𑀁 𑀪𑀸𑀯𑁂𑀢𑀺, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄𑀢𑀺 𑀲𑁄𑀬𑁂𑀯 𑀦𑀬𑁄.

𑀅𑀧𑀭𑁄 ‘‘𑀅𑀭𑀽𑀧𑀯𑀪𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 ¶ 𑀢𑀣𑁂𑀯 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀲𑀫𑀸𑀧𑀢𑁆𑀢𑀺𑀬𑁄 𑀪𑀸𑀯𑁂𑀢𑀺, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀢𑁆𑀣𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀪𑀯𑁄, 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺, 𑀧𑀭𑀺𑀧𑀸𑀓𑁄 𑀚𑀭𑀸, 𑀪𑁂𑀤𑁄 𑀫𑀭𑀡𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀺 𑀬𑁄𑀚𑀦𑀸𑀲𑀼.

𑀏𑀯𑀁 ‘‘𑀅𑀬𑀁 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁; 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁; 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀏𑀓𑁄 𑀲𑀗𑁆𑀔𑁂𑀧𑁄, 𑀯𑀺𑀜𑁆𑀜𑀸𑀡-𑀦𑀸𑀫𑀭𑀽𑀧-𑀲𑀴𑀸𑀬𑀢𑀦-𑀨𑀲𑁆𑀲-𑀯𑁂𑀤𑀦𑀸 𑀏𑀓𑁄, 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀏𑀓𑁄, 𑀚𑀸𑀢𑀺-𑀚𑀭𑀸-𑀫𑀭𑀡𑀁 𑀏𑀓𑁄. 𑀧𑀼𑀭𑀺𑀫𑀲𑀗𑁆𑀔𑁂𑀧𑁄 𑀘𑁂𑀢𑁆𑀣 𑀅𑀢𑀻𑀢𑁄 𑀅𑀤𑁆𑀥𑀸, 𑀤𑁆𑀯𑁂 𑀫𑀚𑁆𑀛𑀺𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀸𑀕𑀢𑁄. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑀻𑀢𑁂 𑀓𑀫𑁆𑀫𑀯𑀝𑁆𑀝𑀁; 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀏𑀢𑀭𑀳𑀺 𑀯𑀺𑀧𑀸𑀓𑀯𑀝𑁆𑀝𑀁. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀕𑁆𑀕𑀳𑀡𑁂𑀦 ¶ 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀏𑀢𑀭𑀳𑀺 𑀓𑀫𑁆𑀫𑀯𑀝𑁆𑀝𑀁; 𑀚𑀸𑀢𑀺𑀚𑀭𑀸𑀫𑀭𑀡𑀸𑀧𑀤𑁂𑀲𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀁. 𑀢𑁂 𑀆𑀓𑀸𑀭𑀢𑁄 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑁂𑀢𑁆𑀣 𑀅𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀺, 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑀸 𑀏𑀓𑁄, 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑀸 𑀏𑀓𑁄. 𑀇𑀢𑀺 𑀪𑀕𑀯𑀸 𑀏𑀯𑀁 𑀘𑀢𑀼𑀲𑀗𑁆𑀔𑁂𑀧𑀁, 𑀢𑀺𑀬𑀤𑁆𑀥𑀁, 𑀯𑀻𑀲𑀢𑀸𑀓𑀸𑀭𑀁, 𑀢𑀺𑀲𑀦𑁆𑀥𑀺𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺. 𑀇𑀫𑀺𑀦𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀪𑀕𑀯𑀸 𑀢𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀢𑁂𑀲𑀼 ¶ 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀇𑀫𑀲𑁆𑀲 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑁂 𑀳𑀦𑀺 𑀯𑀺𑀳𑀦𑀺 𑀯𑀺𑀤𑁆𑀥𑀁𑀲𑁂𑀲𑀺. 𑀏𑀯𑀫𑁆𑀧𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳𑀁.

𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 ¶ 𑀅𑀭𑀳𑀢𑀺 𑀧𑀽𑀚𑀸𑀯𑀺𑀲𑁂𑀲𑀜𑁆𑀘; 𑀢𑁂𑀦𑁂𑀯 𑀘 𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂 𑀬𑁂 𑀓𑁂𑀘𑀺 𑀫𑀳𑁂𑀲𑀓𑁆𑀔𑀸 𑀤𑁂𑀯𑀫𑀦𑀼𑀲𑁆𑀲𑀸 𑀦 𑀢𑁂 𑀅𑀜𑁆𑀜𑀢𑁆𑀣 𑀧𑀽𑀚𑀁 𑀓𑀭𑁄𑀦𑁆𑀢𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀭𑀢𑀦𑀤𑀸𑀫𑁂𑀦 𑀢𑀣𑀸𑀕𑀢𑀁 𑀧𑀽𑀚𑁂𑀲𑀺, 𑀬𑀣𑀸𑀩𑀮𑀜𑁆𑀘 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀸𑀤𑀬𑁄. 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀧𑀺 𑀘 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀦𑁆𑀢𑀺! 𑀏𑀯𑀁 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀣𑀸 𑀘 𑀮𑁄𑀓𑁂 𑀓𑁂𑀘𑀺 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀩𑀸𑀮𑀸 𑀅𑀲𑀺𑀮𑁄𑀓𑀪𑀬𑁂𑀦 𑀭𑀳𑁄 𑀧𑀸𑀧𑀁 𑀓𑀭𑁄𑀦𑁆𑀢𑀺; 𑀏𑀯𑀫𑁂𑀲 𑀦 𑀓𑀤𑀸𑀘𑀺 𑀓𑀭𑁄𑀢𑀻𑀢𑀺 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀢𑁄𑀧𑀺 𑀅𑀭𑀳𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀆𑀭𑀓𑀢𑁆𑀢𑀸 𑀳𑀢𑀢𑁆𑀢𑀸 𑀘, 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀺;

𑀳𑀢𑀲𑀁𑀲𑀸𑀭𑀘𑀓𑁆𑀓𑀸𑀭𑁄, 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄;

𑀦 𑀭𑀳𑁄 𑀓𑀭𑁄𑀢𑀺 𑀧𑀸𑀧𑀸𑀦𑀺, 𑀅𑀭𑀳𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀣𑀸 𑀳𑁂𑀲 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄, 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀢𑁄 𑀩𑀼𑀤𑁆𑀥𑁄, 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀧𑀭𑀺𑀜𑁆𑀜𑁂𑀬𑁆𑀬𑀢𑁄, 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀧𑀳𑀸𑀢𑀩𑁆𑀩𑀢𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀥𑀫𑁆𑀫𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀢𑁄, 𑀪𑀸𑀯𑁂𑀢𑀩𑁆𑀩𑁂 𑀥𑀫𑁆𑀫𑁂 𑀪𑀸𑀯𑁂𑀢𑀩𑁆𑀩𑀢𑁄. 𑀢𑁂𑀦𑁂𑀯 𑀘𑀸𑀳 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀁 ¶ 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁬𑁩);

𑀅𑀧𑀺𑀘 𑀘𑀓𑁆𑀔𑀼 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦𑀸𑀧𑀺 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄. 𑀏𑀲 𑀦𑀬𑁄 𑀲𑁄𑀢-𑀖𑀸𑀦-𑀚𑀺𑀯𑁆𑀳𑀸-𑀓𑀸𑀬𑀫𑀦𑁂𑀲𑀼𑀧𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀭𑀽𑀧𑀸𑀤𑀻𑀦𑀺 𑀙 𑀆𑀬𑀢𑀦𑀸𑀦𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀙 𑀨𑀲𑁆𑀲𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀬𑁄 𑀙 𑀯𑁂𑀤𑀦𑀸, 𑀭𑀽𑀧𑀲𑀜𑁆𑀜𑀸𑀤𑀬𑁄 𑀙 𑀲𑀜𑁆𑀜𑀸, 𑀭𑀽𑀧𑀲𑀜𑁆𑀘𑁂𑀢𑀦𑀸𑀤𑀬𑁄 𑀙 𑀘𑁂𑀢𑀦𑀸, 𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 ¶ 𑀢𑀡𑁆𑀳𑀸𑀓𑀸𑀬𑀸, 𑀭𑀽𑀧𑀯𑀺𑀢𑀓𑁆𑀓𑀸𑀤𑀬𑁄 𑀙 𑀯𑀺𑀢𑀓𑁆𑀓𑀸, 𑀭𑀽𑀧𑀯𑀺𑀘𑀸𑀭𑀸𑀤𑀬𑁄 𑀙 𑀯𑀺𑀘𑀸𑀭𑀸 ¶ , 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑀲 𑀓𑀲𑀺𑀡𑀸𑀦𑀺, 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄, 𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀤𑀺𑀯𑀲𑁂𑀦 𑀤𑀲 𑀲𑀜𑁆𑀜𑀸, 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀓𑀸𑀫𑀪𑀯𑀸𑀤𑀬𑁄 𑀦𑀯 𑀪𑀯𑀸, 𑀧𑀞𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀬𑁄 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸, 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀧𑀝𑀺𑀮𑁄𑀫𑀢𑁄 𑀚𑀭𑀸𑀫𑀭𑀡𑀸𑀤𑀻𑀦𑀺, 𑀅𑀦𑀼𑀮𑁄𑀫𑀢𑁄 𑀅𑀯𑀺𑀚𑁆𑀚𑀸𑀤𑀻𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀏𑀓𑀧𑀤𑀬𑁄𑀚𑀦𑀸 𑁋 ‘‘𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀚𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘’’𑀦𑁆𑀢𑀺. 𑀏𑀯𑀁 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑁂 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄 𑀅𑀦𑀼𑀩𑀼𑀤𑁆𑀥𑁄 𑀧𑀝𑀺𑀯𑀺𑀤𑁆𑀥𑁄. 𑀢𑁂𑀦 𑀯𑀼𑀢𑁆𑀢𑀁 𑁋 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺.

𑀯𑀺𑀚𑁆𑀚𑀸𑀳𑀺 𑀧𑀦 𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄; 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄𑀧𑀺 𑀯𑀺𑀚𑁆𑀚𑀸, 𑀅𑀝𑁆𑀞𑀧𑀺 𑀯𑀺𑀚𑁆𑀚𑀸. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞 𑀯𑀺𑀚𑁆𑀚𑀸 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁭𑁮 𑀆𑀤𑀬𑁄). 𑀢𑀢𑁆𑀭 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀘 𑀲𑀳 𑀙 𑀅𑀪𑀺𑀜𑁆𑀜𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀼𑀢𑁆𑀢𑀸. 𑀘𑀭𑀡𑀦𑁆𑀢𑀺 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑁂𑀬𑁂𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸, 𑀬𑀲𑁆𑀫𑀸 𑀏𑀢𑁂𑀳𑀺 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁 𑀢𑀲𑁆𑀫𑀸, 𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁨.𑁨𑁪) 𑀯𑀺𑀢𑁆𑀣𑀸𑀭𑁄. 𑀪𑀕𑀯𑀸 𑀇𑀫𑀸𑀳𑀺 𑀯𑀺𑀚𑁆𑀚𑀸𑀳𑀺 𑀇𑀫𑀺𑀦𑀸 𑀘 𑀘𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 ¶ . 𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸, 𑀘𑀭𑀡𑀲𑀫𑁆𑀧𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀁. 𑀲𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀦𑀢𑁆𑀣𑀁 𑀜𑀢𑁆𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑁂 𑀦𑀺𑀬𑁄𑀚𑁂𑀢𑀺, 𑀬𑀣𑀸 𑀢𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 𑀲𑀸𑀯𑀓𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀦𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑀸, 𑀯𑀺𑀚𑁆𑀚𑀸𑀘𑀭𑀡𑀯𑀺𑀧𑀦𑁆𑀦𑀸𑀦𑀜𑁆𑀳𑀺 𑀲𑀸𑀯𑀓𑀸 𑀅𑀢𑁆𑀢𑀦𑁆𑀢𑀧𑀸𑀤𑀬𑁄 𑀯𑀺𑀬.

𑀲𑁄𑀪𑀦𑀕𑀫𑀦𑀢𑁆𑀢𑀸, 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸, 𑀲𑀫𑁆𑀫𑀸𑀕𑀢𑀢𑁆𑀢𑀸, 𑀲𑀫𑁆𑀫𑀸 𑀘 𑀕𑀤𑀢𑁆𑀢𑀸 𑀲𑀼𑀕𑀢𑁄. 𑀕𑀫𑀦𑀫𑁆𑀧𑀺 𑀳𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀪𑀕𑀯𑀢𑁄 𑀲𑁄𑀪𑀦𑀁 𑀧𑀭𑀺𑀲𑀼𑀤𑁆𑀥𑀫𑀦𑀯𑀚𑁆𑀚𑀁 ¶ . 𑀓𑀺𑀁 ¶ 𑀧𑀦 𑀢𑀦𑁆𑀢𑀺? 𑀅𑀭𑀺𑀬𑀫𑀕𑁆𑀕𑁄. 𑀢𑁂𑀦 𑀳𑁂𑀲 𑀕𑀫𑀦𑁂𑀦 𑀔𑁂𑀫𑀁 𑀤𑀺𑀲𑀁 𑀅𑀲𑀚𑁆𑀚𑀫𑀸𑀦𑁄 𑀕𑀢𑁄𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀕𑀢𑁄. 𑀲𑀼𑀦𑁆𑀤𑀭𑀁 𑀘𑁂𑀲 𑀞𑀸𑀦𑀁 𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘 𑀕𑀢𑁄 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺 (𑀫𑀳𑀸𑀦𑀺. 𑁩𑁮). 𑀲𑀫𑁆𑀫𑀸 𑀯𑀸 𑀆𑀕𑀢𑁄 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀩𑁄𑀥𑀺𑀫𑀡𑁆𑀟𑁄 𑀢𑀸𑀯 𑀲𑀫𑀢𑀺𑀁𑀲𑀧𑀸𑀭𑀫𑀺𑀧𑀽𑀭𑀺𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀇𑀫𑁂 𑀘 𑀅𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀆𑀕𑀢𑁄𑀢𑀺 𑀲𑀫𑁆𑀫𑀸𑀕𑀢𑀢𑁆𑀢𑀸𑀧𑀺 𑀲𑀼𑀕𑀢𑁄. 𑀲𑀫𑁆𑀫𑀸 𑀘𑁂𑀲 𑀕𑀤𑀢𑀺, 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀫𑁂𑀯 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄.

𑀢𑀢𑁆𑀭𑀺𑀤𑀁 𑀲𑀸𑀥𑀓𑀲𑀼𑀢𑁆𑀢𑀁 𑁋 ‘‘𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺 (𑀫. 𑀦𑀺. 𑁨.𑁮𑁬). 𑀏𑀯𑀁 𑀲𑀫𑁆𑀫𑀸 𑀕𑀤𑀢𑁆𑀢𑀸𑀧𑀺 𑀲𑀼𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀧𑀦 𑀮𑁄𑀓𑀯𑀺𑀤𑀽. 𑀲𑁄 𑀳𑀺 𑀪𑀕𑀯𑀸 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 ¶ 𑀲𑀩𑁆𑀩𑀣𑀸 𑀮𑁄𑀓𑀁 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀬𑀣𑀸𑀳 𑁋 ‘‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 ¶ 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 ¶ 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀺; 𑀦 𑀘𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀧𑀺 𑀘𑀸𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁.

‘‘𑀕𑀫𑀦𑁂𑀦 𑀦 𑀧𑀢𑁆𑀢𑀩𑁆𑀩𑁄, 𑀮𑁄𑀓𑀲𑁆𑀲𑀦𑁆𑀢𑁄 𑀓𑀼𑀤𑀸𑀘𑀦𑀁;

𑀦 𑀘 𑀅𑀧𑁆𑀧𑀢𑁆𑀯𑀸 𑀮𑁄𑀓𑀦𑁆𑀢𑀁, 𑀤𑀼𑀓𑁆𑀔𑀸 𑀅𑀢𑁆𑀣𑀺 𑀧𑀫𑁄𑀘𑀦𑀁.

‘‘𑀢𑀲𑁆𑀫𑀸 𑀳𑀯𑁂 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄;

𑀮𑁄𑀓𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀫𑀺𑀢𑀸𑀯𑀺 𑀜𑀢𑁆𑀯𑀸;

𑀦𑀸𑀲𑀻𑀲𑀢𑀻 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀅. 𑀦𑀺. 𑁪.𑁪𑁫; 𑀲𑀁. 𑀦𑀺. 𑁧.𑁧𑁦𑁭);

𑀅𑀧𑀺𑀘 𑀢𑀬𑁄 𑀮𑁄𑀓𑀸 𑁋 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄𑀢𑀺; 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀧𑀝𑀺. 𑀫. 𑁧.𑁧𑁧𑁨) 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸’’𑀢𑀺 (𑀤𑀻. 𑀦𑀺. 𑁧.𑁪𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺. (𑀫. 𑀦𑀺. 𑁧.𑁫𑁦𑁩) 𑁋

𑀆𑀕𑀢𑀝𑁆𑀞𑀸𑀦𑁂 𑀑𑀓𑀸𑀲𑀮𑁄𑀓𑁄, 𑀢𑀫𑁆𑀧𑀺 𑀪𑀕𑀯𑀸 𑀲𑀩𑁆𑀩𑀣𑀸 𑀅𑀯𑁂𑀤𑀺. 𑀢𑀣𑀸 𑀳𑀺𑀲𑁆𑀲 𑁋 ‘‘𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑁋 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑁋 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 ¶ . 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺 (𑀧𑀝𑀺. 𑀫. 𑁧.𑁧𑁧𑁨). 𑀅𑀬𑀁 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄.

𑀬𑀲𑁆𑀫𑀸 ¶ 𑀧𑀦𑁂𑀲 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑁂 𑀅𑀪𑀩𑁆𑀩𑁂 𑀲𑀢𑁆𑀢𑁂 𑀚𑀸𑀦𑀸𑀢𑀺, 𑀢𑀲𑁆𑀫𑀸𑀲𑁆𑀲 𑀲𑀢𑁆𑀢𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀬𑀣𑀸 𑀘 𑀲𑀢𑁆𑀢𑀮𑁄𑀓𑁄 ¶ 𑀏𑀯𑀁 𑀑𑀓𑀸𑀲𑀮𑁄𑀓𑁄𑀧𑀺. 𑀢𑀣𑀸 𑀳𑁂𑀲 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀺. 𑀧𑀭𑀺𑀓𑁆𑀔𑁂𑀧𑀢𑁄 𑁋

𑀲𑀩𑁆𑀩𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲 𑀧𑀭𑀺𑀫𑀡𑁆𑀟𑀮𑀁;

𑀤𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺 𑀘.

𑀢𑀢𑁆𑀣 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸.

𑀢𑀲𑁆𑀲𑀸 𑀏𑀯 𑀲𑀦𑁆𑀥𑀸𑀭𑀓𑀁 𑁋

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑁂𑀯 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀚𑀮𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁.

𑀢𑀲𑁆𑀲𑀸𑀧𑀺 𑀲𑀦𑁆𑀥𑀸𑀭𑀓𑁄 𑁋

𑀦𑀯𑀲𑀢𑀲𑀳𑀲𑁆𑀲𑀸𑀦𑀺, 𑀫𑀸𑀮𑀼𑀢𑁄 𑀦𑀪𑀫𑀼𑀕𑁆𑀕𑀢𑁄;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀏𑀲𑀸 𑀮𑁄𑀓𑀲𑁆𑀲 𑀲𑀡𑁆𑀞𑀺𑀢𑀺.

𑀏𑀯𑀁 𑀲𑀡𑁆𑀞𑀺𑀢𑁂 𑀘𑁂𑀢𑁆𑀣 𑀬𑁄𑀚𑀦𑀸𑀦𑀁 𑁋

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁄.

𑀢𑀢𑁄 ¶ 𑀉𑀧𑀟𑁆𑀠𑀼𑀧𑀟𑁆𑀠𑁂𑀦, 𑀧𑀫𑀸𑀡𑁂𑀦 𑀬𑀣𑀸𑀓𑁆𑀓𑀫𑀁;

𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸 𑀤𑀺𑀩𑁆𑀩𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑀸.

𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀻 𑀩𑁆𑀭𑀳𑀸.

𑀏𑀢𑁂 𑀲𑀢𑁆𑀢 𑀫𑀳𑀸𑀲𑁂𑀮𑀸, 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸, 𑀤𑁂𑀯𑀬𑀓𑁆𑀔𑀦𑀺𑀲𑁂𑀯𑀺𑀢𑀸.

𑀬𑁄𑀚𑀦𑀸𑀦𑀁 ¶ 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄;

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄.

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥, 𑀧𑀭𑀺𑀓𑁆𑀔𑁂𑀧𑀸 𑀦𑀕𑀯𑁆𑀳𑀬𑀸;

𑀧𑀜𑁆𑀜𑀸𑀲 𑀬𑁄𑀚𑀦𑀓𑁆𑀔𑀦𑁆𑀥, 𑀲𑀸𑀔𑀸𑀬𑀸𑀫𑀸 𑀲𑀫𑀦𑁆𑀢𑀢𑁄.

𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸;

𑀚𑀫𑁆𑀩𑀽 𑀬𑀲𑁆𑀲𑀸𑀦𑀼𑀪𑀸𑀯𑁂𑀦, 𑀚𑀫𑁆𑀩𑀼𑀤𑀻𑀧𑁄 𑀧𑀓𑀸𑀲𑀺𑀢𑁄.

𑀤𑁆𑀯𑁂 𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄.

𑀢𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀁; 𑀢𑀣𑀸 𑀅𑀲𑀼𑀭𑀪𑀯𑀦𑀁, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄, 𑀚𑀫𑁆𑀩𑀼𑀤𑀻𑀧𑁄 𑀘. 𑀅𑀧𑀭𑀕𑁄𑀬𑀸𑀦𑀁 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀁; 𑀢𑀣𑀸 𑀧𑀼𑀩𑁆𑀩𑀯𑀺𑀤𑁂𑀳𑁄. 𑀉𑀢𑁆𑀢𑀭𑀓𑀼𑀭𑀼 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁄, 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀫𑀳𑀸𑀤𑀻𑀧𑁄 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁄; 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀓𑀁 𑀘𑀓𑁆𑀓𑀯𑀸𑀴𑀁 ¶ , 𑀏𑀓𑀸 𑀮𑁄𑀓𑀥𑀸𑀢𑀼, 𑀢𑀤𑀦𑁆𑀢𑀭𑁂𑀲𑀼 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸. 𑀏𑀯𑀁 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀪𑀕𑀯𑀸 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀺, 𑀅𑀜𑁆𑀜𑀸𑀲𑀺, 𑀧𑀝𑀺𑀯𑀺𑀚𑁆𑀛𑀺. 𑀏𑀯𑀫𑀲𑁆𑀲 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄. 𑀏𑀯𑀫𑁆𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽.

𑀅𑀢𑁆𑀢𑀦𑁄 ¶ 𑀧𑀦 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀢𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄. 𑀢𑀣𑀸 𑀳𑁂𑀲 𑀲𑀻𑀮𑀕𑀼𑀡𑁂𑀦𑀸𑀧𑀺 𑀲𑀩𑁆𑀩𑀁 𑀮𑁄𑀓𑀫𑀪𑀺𑀪𑀯𑀢𑀺, 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸… 𑀯𑀺𑀫𑀼𑀢𑁆𑀢𑀺… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀸𑀧𑀺, 𑀲𑀻𑀮𑀕𑀼𑀡𑁂𑀦𑀸𑀧𑀺 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑁂𑀦𑀸𑀧𑀺. 𑀬𑀣𑀸𑀳 𑁋 ‘‘𑀦 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭’’𑀦𑁆𑀢𑀺 𑀯𑀺𑀢𑁆𑀣𑀸𑀭𑁄.

𑀏𑀯𑀁 ¶ 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧) 𑀘 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺, 𑀤𑀫𑁂𑀢𑀺 𑀯𑀺𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀲𑀤𑀫𑁆𑀫𑀸𑀢𑀺 𑀅𑀤𑀦𑁆𑀢𑀸 𑀤𑀫𑁂𑀢𑀼𑀁 𑀬𑀼𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺. 𑀢𑀣𑀸 𑀳𑀺 𑀪𑀕𑀯𑀢𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀧𑀺 𑀅𑀧𑀮𑀸𑀴𑁄 𑀦𑀸𑀕𑀭𑀸𑀚𑀸, 𑀘𑀽𑀴𑁄𑀤𑀭𑁄, 𑀫𑀳𑁄𑀤𑀭𑁄, 𑀅𑀕𑁆𑀕𑀺𑀲𑀺𑀔𑁄, 𑀥𑀽𑀫𑀲𑀺𑀔𑁄, 𑀥𑀦𑀧𑀸𑀮𑀓𑁄 𑀳𑀢𑁆𑀣𑀻𑀢𑀺 𑀏𑀯𑀫𑀸𑀤𑀬𑁄 𑀤𑀫𑀺𑀢𑀸, 𑀦𑀺𑀩𑁆𑀩𑀺𑀲𑀸 𑀓𑀢𑀸, 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀺𑀢𑀸. 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀲𑀘𑁆𑀘𑀓𑀦𑀺𑀕𑀡𑁆𑀞𑀧𑀼𑀢𑁆𑀢-𑀅𑀫𑁆𑀩𑀝𑁆𑀞𑀫𑀸𑀡𑀯-𑀧𑁄𑀓𑁆𑀔𑀭𑀲𑀸𑀢𑀺-𑀲𑁄𑀡𑀤𑀡𑁆𑀟𑀓𑀽𑀝𑀤𑀦𑁆𑀢𑀸𑀤𑀬𑁄. 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀧𑀺 𑀆𑀴𑀯𑀓-𑀲𑀽𑀘𑀺𑀮𑁄𑀫-𑀔𑀭𑀮𑁄𑀫-𑀬𑀓𑁆𑀔-𑀲𑀓𑁆𑀓𑀤𑁂𑀯𑀭𑀸𑀚𑀸𑀤𑀬𑁄 𑀤𑀫𑀺𑀢𑀸 𑀯𑀺𑀦𑀻𑀢𑀸 𑀯𑀺𑀘𑀺𑀢𑁆𑀭𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀺. ‘‘𑀅𑀳𑀁 𑀔𑁄, 𑀓𑁂𑀲𑀺, 𑀧𑀼𑀭𑀺𑀲𑀤𑀫𑁆𑀫𑀁 𑀲𑀡𑁆𑀳𑁂𑀦𑀧𑀺 𑀯𑀺𑀦𑁂𑀫𑀺, 𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀺, 𑀲𑀡𑁆𑀳𑀨𑀭𑀼𑀲𑁂𑀦𑀧𑀺 𑀯𑀺𑀦𑁂𑀫𑀻’’𑀢𑀺 (𑀅. 𑀦𑀺. 𑁪.𑁧𑁧𑁧) 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀣 𑀯𑀸 𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀘 𑀉𑀢𑁆𑀢𑀭𑀺𑀫𑀕𑁆𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯.

𑀅𑀣 𑀯𑀸 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻𑀢𑀺 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀁 ¶ . 𑀪𑀕𑀯𑀸 𑀳𑀺 𑀢𑀣𑀸 𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀺, 𑀬𑀣𑀸 𑀏𑀓𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀸 𑀅𑀝𑁆𑀞 𑀤𑀺𑀲𑀸 𑀅𑀲𑀚𑁆𑀚𑀫𑀸𑀦𑀸 𑀥𑀸𑀯𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀳𑀢𑁆𑀣𑀺𑀤𑀫𑀓𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀤𑀫𑁆𑀫𑁄 𑀲𑀸𑀭𑀺𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀻’’𑀢𑀺 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁩𑁧𑁨) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀅𑀧𑀺𑀘 𑀲𑀢𑁆𑀣𑀸 𑀯𑀺𑀬𑀸𑀢𑀺 𑀲𑀢𑁆𑀣𑀸, 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. ‘‘𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀘𑁄𑀭𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀯𑀸𑀴𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 ¶ 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀢𑁆𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀚𑀸𑀢𑀺𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁦) 𑀦𑀺𑀤𑁆𑀤𑁂𑀲𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 ¶ 𑀤𑀏𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘. 𑀪𑀕𑀯𑀸 𑀧𑀦 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀅𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑁂𑀦 𑀲𑀢𑁆𑀣𑀸𑀬𑁂𑀯. 𑀢𑁂𑀧𑀺 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀲𑀯𑀦𑁂𑀦 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀸𑀬 𑀏𑀯 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀢𑀺𑀬𑁂 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀪𑀸𑀕𑀺𑀦𑁄 𑀳𑁄𑀦𑁆𑀢𑀺. 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀪𑀕𑀯𑀢𑀺 𑀓𑀺𑀭 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀘𑀫𑁆𑀧𑀸𑀦𑀕𑀭𑀯𑀸𑀲𑀻𑀦𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁂 𑀏𑀓𑁄 𑀫𑀡𑁆𑀟𑀽𑀓𑁄 𑀪𑀕𑀯𑀢𑁄 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀏𑀓𑁄 𑀯𑀘𑁆𑀙𑀧𑀸𑀮𑀓𑁄 𑀤𑀡𑁆𑀟𑀫𑁄𑀮𑀼𑀩𑁆𑀪 𑀢𑀺𑀝𑁆𑀞𑀦𑁆𑀢𑁄 𑀢𑀲𑁆𑀲 𑀲𑀻𑀲𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀢𑀸𑀯𑀤𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀘 𑀢𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀁 𑀅𑀢𑁆𑀢𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀭𑁂, 𑀅𑀳𑀫𑁆𑀧𑀺 𑀦𑀸𑀫 𑀇𑀥 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀺! 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀦𑀸𑀜𑁆𑀜𑀁 𑀓𑀺𑀜𑁆𑀘𑀺 𑀅𑀤𑁆𑀤𑀲, 𑀅𑀜𑁆𑀜𑀢𑁆𑀭 𑀪𑀕𑀯𑀢𑁄 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸. 𑀲𑁄 ¶ 𑀢𑀆𑀯𑀤𑁂𑀯 𑀲𑀳 𑀯𑀺𑀫𑀸𑀦𑁂𑀦 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺. 𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀺 𑁋

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺.

‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀉𑀤𑀓𑁂 𑀯𑀸𑀭𑀺𑀕𑁄𑀘𑀭𑁄;

𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲, 𑀅𑀯𑀥𑀺 𑀯𑀘𑁆𑀙𑀧𑀸𑀮𑀓𑁄’’𑀢𑀺. (𑀯𑀺. 𑀯. 𑁮𑁫𑁭-𑁮𑁫𑁮);

𑀪𑀕𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑁂𑀯𑀧𑀼𑀢𑁆𑀢𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀺𑀢𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀬𑀁 𑀧𑀦 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀜𑁂𑀬𑁆𑀬𑀁 𑀦𑀸𑀫, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀯𑀲𑁂𑀦 𑀩𑀼𑀤𑁆𑀥𑁄. 𑀬𑀲𑁆𑀫𑀸 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀢𑁆𑀢𑀦𑀸𑀧𑀺 𑀩𑀼𑀚𑁆𑀛𑀺, 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀩𑁄𑀥𑁂𑀲𑀺; 𑀢𑀲𑁆𑀫𑀸 𑀏𑀯𑀫𑀸𑀤𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑁄. 𑀇𑀫𑀲𑁆𑀲 𑀘𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀲𑀩𑁆𑀩𑁄𑀧𑀺 𑀦𑀺𑀤𑁆𑀤𑁂𑀲𑀦𑀬𑁄 (𑀫𑀳𑀸𑀦𑀺. 𑁧𑁯𑁨) 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁄 (𑀧𑀝𑀺. 𑀫. 𑁧.𑁧𑁬𑁨) 𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀪𑀕𑀯𑀸𑀢𑀺 ¶ 𑀇𑀤𑀁 𑀧𑀦𑀲𑁆𑀲 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀪𑀕𑀯𑀸𑀢𑀺 ¶ 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀦𑀸𑀫𑀁 𑁋 𑀆𑀯𑀢𑁆𑀣𑀺𑀓𑀁, 𑀮𑀺𑀗𑁆𑀕𑀺𑀓𑀁, 𑀦𑁂𑀫𑀺𑀢𑁆𑀢𑀺𑀓𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫 𑀮𑁄𑀓𑀺𑀬𑀯𑁄𑀳𑀸𑀭𑁂𑀦 ‘‘𑀬𑀤𑀺𑀘𑁆𑀙𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀺𑀩𑀤𑁆𑀤𑁄’’𑀢𑀺 𑀏𑀯𑀫𑀸𑀤𑀺 𑀆𑀯𑀢𑁆𑀣𑀺𑀓𑀁. ‘‘𑀤𑀡𑁆𑀟𑀻 𑀙𑀢𑁆𑀢𑀻 𑀲𑀺𑀔𑀻 𑀓𑀭𑀻’’𑀢𑀺 𑀏𑀯𑀫𑀸𑀤𑀺 𑀮𑀺𑀗𑁆𑀕𑀺𑀓𑀁. ‘‘𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄’’𑀢𑀺 𑀏𑀯𑀫𑀸𑀤𑀺 𑀦𑁂𑀫𑀺𑀢𑁆𑀢𑀺𑀓𑀁. ‘‘𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄’’𑀢𑀺 𑀏𑀯𑀫𑀸𑀤𑀺 𑀯𑀘𑀦𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀇𑀤𑀁 𑀧𑀦 𑀪𑀕𑀯𑀸𑀢𑀺 𑀦𑀸𑀫𑀁 𑀦𑁂𑀫𑀺𑀢𑁆𑀢𑀺𑀓𑀁, 𑀦 𑀫𑀳𑀸𑀫𑀸𑀬𑀸𑀬 𑀦 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀦 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑁂𑀳𑀺 𑀓𑀢𑀁, 𑀦 𑀲𑀓𑁆𑀓𑀲𑀦𑁆𑀢𑀼𑀲𑀺𑀢𑀸𑀤𑀻𑀳𑀺 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁…𑀧𑁂… 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 ¶ 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁪).

𑀬𑀁𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀜𑁆𑀘𑁂𑀢𑀁 𑀦𑀸𑀫𑀁, 𑀢𑁂𑀲𑀁 𑀕𑀼𑀡𑀸𑀦𑀁 𑀧𑀓𑀸𑀲𑀦𑀢𑁆𑀣𑀁 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑀺 𑁋

‘‘𑀪𑀕𑀻 𑀪𑀚𑀻 𑀪𑀸𑀕𑀻 𑀯𑀺𑀪𑀢𑁆𑀢𑀯𑀸 𑀇𑀢𑀺;

𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀕𑀭𑀽𑀢𑀺 𑀪𑀸𑀕𑁆𑀬𑀯𑀸;

𑀩𑀳𑀽𑀳𑀺 𑀜𑀸𑀬𑁂𑀳𑀺 𑀲𑀼𑀪𑀸𑀯𑀺𑀢𑀢𑁆𑀢𑀦𑁄;

𑀪𑀯𑀦𑁆𑀢𑀕𑁄 𑀲𑁄 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀢𑁂𑀲𑀁 𑀢𑁂𑀲𑀁 𑀧𑀤𑀸𑀦𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺.

𑀢𑀢𑁆𑀣 𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀬𑁄𑀢𑀺 𑀏𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 ¶ 𑀕𑀳𑁂𑀢𑁆𑀯𑀸 𑀬𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀪𑀸𑀕𑁆𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀮𑁄𑀪-𑀤𑁄𑀲-𑀫𑁄𑀳-𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭-𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧-𑀓𑁄𑀥𑀽𑀧𑀦𑀸𑀳-𑀫𑀓𑁆𑀔-𑀧𑀴𑀸𑀲𑀇𑀲𑁆𑀲𑀸-𑀫𑀘𑁆𑀙𑀭𑀺𑀬-𑀫𑀸𑀬𑀸𑀲𑀸𑀞𑁂𑀬𑁆𑀬-𑀣𑀫𑁆𑀪-𑀲𑀸𑀭𑀫𑁆𑀪-𑀫𑀸𑀦𑀸𑀢𑀺𑀫𑀸𑀦-𑀫𑀤-𑀧𑀫𑀸𑀤-𑀢𑀡𑁆𑀳𑀸𑀯𑀺𑀚𑁆𑀚𑀸 ¶ 𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮-𑀤𑀼𑀘𑁆𑀘𑀭𑀺𑀢-𑀲𑀁𑀓𑀺𑀮𑁂𑀲-𑀫𑀮-𑀯𑀺𑀲𑀫𑀲𑀜𑁆𑀜𑀸-𑀯𑀺𑀢𑀓𑁆𑀓-𑀧𑀧𑀜𑁆𑀘-𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀆𑀲𑀯-𑀕𑀦𑁆𑀣-𑀑𑀖-𑀬𑁄𑀕𑀸𑀕𑀢𑀺-𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦-𑀧𑀜𑁆𑀘𑀘𑁂𑀢𑁄𑀔𑀻𑀮-𑀯𑀺𑀦𑀺𑀩𑀦𑁆𑀥-𑀦𑀻𑀯𑀭𑀡𑀸𑀪𑀺𑀦𑀦𑁆𑀤𑀦𑀙𑀯𑀺𑀯𑀸𑀤𑀫𑀽𑀮-𑀢𑀡𑁆𑀳𑀸𑀓𑀸𑀬-𑀲𑀢𑁆𑀢𑀸𑀦𑀼𑀲𑀬-𑀅𑀝𑁆𑀞𑀫𑀺𑀘𑁆𑀙𑀢𑁆𑀢-𑀦𑀯𑀢𑀡𑁆𑀳𑀸𑀫𑀽𑀮𑀓-𑀤𑀲𑀸𑀓𑀼𑀲𑀮𑀓𑀫 𑀤𑀺𑀝𑁆𑀞𑀺𑀕𑀢-𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤-𑀲𑀩𑁆𑀩𑀤𑀭𑀣-𑀧𑀭𑀺𑀴𑀸𑀳-𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘 𑀓𑀺𑀮𑁂𑀲-𑀅𑀪𑀺𑀲𑀗𑁆𑀔𑀸𑀭𑀔𑀦𑁆𑀥𑀫𑀘𑁆𑀘𑀼-𑀤𑁂𑀯𑀧𑀼𑀢𑁆𑀢-𑀫𑀸𑀭𑁂 𑀅𑀪𑀜𑁆𑀚𑀺, 𑀢𑀲𑁆𑀫𑀸 𑀪𑀕𑁆𑀕𑀢𑁆𑀢𑀸 𑀏𑀢𑁂𑀲𑀁 𑀧𑀭𑀺𑀲𑁆𑀲𑀬𑀸𑀦𑀁 𑀪𑀕𑁆𑀕𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀆𑀳 𑀘𑁂𑀢𑁆𑀣 𑁋

‘‘𑀪𑀕𑁆𑀕𑀭𑀸𑀕𑁄 𑀪𑀕𑁆𑀕𑀤𑁄𑀲𑁄, 𑀪𑀕𑁆𑀕𑀫𑁄𑀳𑁄 𑀅𑀦𑀸𑀲𑀯𑁄;

𑀪𑀕𑁆𑀕𑀸𑀲𑁆𑀲 𑀧𑀸𑀧𑀓𑀸 𑀥𑀫𑁆𑀫𑀸, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀪𑀸𑀕𑁆𑀬𑀯𑀦𑁆𑀢𑀢𑀸𑀬 ¶ 𑀘𑀲𑁆𑀲 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀥𑀭𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀤𑀻𑀧𑀺𑀢𑀸 𑀳𑁄𑀢𑀺, 𑀪𑀕𑁆𑀕𑀤𑁄𑀲𑀢𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺. 𑀢𑀣𑀸 𑀮𑁄𑀓𑀺𑀬𑀧𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀪𑀺𑀕𑀫𑀦𑀻𑀬𑀢𑀸, 𑀅𑀪𑀺𑀕𑀢𑀸𑀦𑀜𑁆𑀘 𑀦𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄, 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀘 𑀲𑀫𑁆𑀧𑀬𑁄𑀚𑀦𑀲𑀫𑀢𑁆𑀣𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀬𑀲𑁆𑀫𑀸 𑀘 𑀮𑁄𑀓𑁂 𑀇𑀲𑁆𑀲𑀭𑀺𑀬-𑀥𑀫𑁆𑀫-𑀬𑀲-𑀲𑀺𑀭𑀻-𑀓𑀸𑀫-𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀪𑀕𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀧𑀭𑀫𑀜𑁆𑀘𑀲𑁆𑀲 𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁, 𑀅𑀡𑀺𑀫𑀸 𑀮𑀖𑀺𑀫𑀸𑀤𑀺𑀓𑀁 𑀯𑀸 𑀮𑁄𑀓𑀺𑀬𑀲𑀫𑁆𑀫𑀢𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀢𑁆𑀣𑀺 𑀢𑀣𑀸 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀬𑀲𑁄, 𑀭𑀽𑀧𑀓𑀸𑀬𑀤𑀲𑁆𑀲𑀦𑀩𑁆𑀬𑀸𑀯𑀝𑀚𑀦𑀦𑀬𑀦𑀧𑁆𑀧𑀲𑀸𑀤𑀚𑀦𑀦𑀲𑀫𑀢𑁆𑀣𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻, 𑀬𑀁 𑀬𑀁 𑀏𑀢𑁂𑀦 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀁 𑀯𑀸, 𑀢𑀲𑁆𑀲 𑀢𑀲𑁆𑀲 𑀢𑀣𑁂𑀯 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀇𑀘𑁆𑀙𑀺𑀢𑀺𑀘𑁆𑀙𑀺, 𑀢𑀢𑁆𑀣 𑀦𑀺𑀧𑁆𑀨𑀢𑁆𑀢𑀺𑀲𑀜𑁆𑀜𑀺𑀢𑁄 𑀓𑀸𑀫𑁄, 𑀲𑀩𑁆𑀩𑀮𑁄𑀓𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄 𑀘 𑀅𑀢𑁆𑀣𑀺; 𑀢𑀲𑁆𑀫𑀸 𑀇𑀫𑁂𑀳𑀺 𑀪𑀕𑁂𑀳𑀺 𑀬𑀼𑀢𑁆𑀢𑀢𑁆𑀢𑀸𑀧𑀺 𑀪𑀕𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀤𑀻𑀳𑀺 𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂, 𑀔𑀦𑁆𑀥𑀸𑀬𑀢𑀦-𑀥𑀸𑀢𑀼𑀲𑀘𑁆𑀘-𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺 ¶ 𑀯𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑁂, 𑀧𑀻𑀴𑀦-𑀲𑀗𑁆𑀔𑀢-𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀁, 𑀆𑀬𑀽𑀳𑀦-𑀦𑀺𑀤𑀸𑀦-𑀲𑀁𑀬𑁄𑀕-𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑀼𑀤𑀬𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢-𑀅𑀫𑀢𑀝𑁆𑀞𑁂𑀦 ¶ 𑀦𑀺𑀭𑁄𑀥𑀁, 𑀦𑀺𑀬𑁆𑀬𑀸𑀦-𑀳𑁂𑀢𑀼-𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀫𑀕𑁆𑀕𑀁 𑀯𑀺𑀪𑀢𑁆𑀢𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑀺𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀯𑀺𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺 ¶ .

𑀬𑀲𑁆𑀫𑀸 𑀘 𑀏𑀲 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂 𑀲𑀼𑀜𑁆𑀜𑀢𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀺, 𑀢𑀲𑁆𑀫𑀸 𑀪𑀢𑁆𑀢𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀫𑀦𑁂𑀦 𑀯𑀦𑁆𑀢𑀁, 𑀢𑀲𑁆𑀫𑀸 𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪𑀓𑀸𑀭𑀁, 𑀕𑀫𑀦𑀲𑀤𑁆𑀤𑀢𑁄 𑀕𑀓𑀸𑀭𑀁, 𑀯𑀦𑁆𑀢𑀲𑀤𑁆𑀤𑀢𑁄 𑀯𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 𑀆𑀤𑀸𑀬 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀮𑁄𑀓𑁂 ‘‘𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑁂𑀔𑀮𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺 𑀲𑁄 𑀪𑀕𑀯𑀸 𑀇𑀫𑀁 𑀮𑁄𑀓𑀁. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀦𑁆𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀁; 𑀏𑀯𑀁 𑀲𑀳 𑀫𑀸𑀭𑁂𑀦 𑀲𑀫𑀸𑀭𑀓𑀁; 𑀲𑀳 𑀩𑁆𑀭𑀳𑁆𑀫𑀼𑀦𑀸 𑀲𑀩𑁆𑀭𑀳𑁆𑀫𑀓𑀁; 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁; 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀢𑀁 𑀧𑀚𑀁; 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀤𑁂𑀯𑀫𑀦𑀼𑀲𑁆𑀲𑀁. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁, 𑀲𑀫𑀺𑀢𑀧𑀸𑀧-𑀩𑀸𑀳𑀺𑀢𑀧𑀸𑀧-𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘, 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄, 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸, 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁄, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄, 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸.

𑀅𑀧𑀺𑀘𑁂𑀢𑁆𑀣 ¶ 𑀲𑀤𑁂𑀯𑀓𑀯𑀘𑀦𑁂𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 𑀢𑀲𑁆𑀲 𑀪𑀕𑀯𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄. 𑀢𑀢𑁄 𑀬𑁂𑀲𑀁 𑀲𑀺𑀬𑀸 𑁋 ‘‘𑀫𑀸𑀭𑁄 𑀫𑀳𑀸𑀦𑀼𑀪𑀸𑀯𑁄 𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄 𑀯𑀲𑀯𑀢𑁆𑀢𑀻; 𑀓𑀺𑀁 𑀲𑁄𑀧𑀺 𑀏𑀢𑁂𑀦 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀫𑀸𑀭𑀓𑀦𑁆𑀢𑀺 ¶ 𑀅𑀩𑁆𑀪𑀼𑀕𑁆𑀕𑀢𑁄. 𑀬𑁂𑀲𑀁 𑀧𑀦 𑀲𑀺𑀬𑀸 𑁋 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 ¶ 𑀆𑀮𑁄𑀓𑀁 𑀨𑀭𑀢𑀺, 𑀤𑁆𑀯𑀻𑀳𑀺…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺, 𑀅𑀦𑀼𑀢𑁆𑀢𑀭𑀜𑁆𑀘 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀓𑀺𑀁 𑀲𑁄𑀧𑀺 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀢𑀢𑁄 𑀬𑁂𑀲𑀁 𑀲𑀺𑀬𑀸 𑁋 ‘‘𑀧𑀼𑀣𑀽𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸, 𑀓𑀺𑀁 𑀢𑁂𑀧𑀺 𑀲𑀘𑁆𑀙𑀺𑀓𑀢𑀸’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀏𑀯𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀸𑀦𑀁 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀣 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀯𑀲𑁂𑀲𑀫𑀦𑀼𑀲𑁆𑀲𑁂 𑀘 𑀉𑀧𑀸𑀤𑀸𑀬 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑁂𑀲𑀲𑀢𑁆𑀢𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑁄. 𑀅𑀬𑀫𑁂𑀢𑁆𑀣𑀸𑀦𑀼𑀲𑀦𑁆𑀥𑀺𑀓𑁆𑀓𑀫𑁄.

𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀬𑀦𑁆𑀢𑀺 𑀲𑀸𑀫𑀁, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸; 𑀅𑀪𑀺𑀜𑁆𑀜𑀸𑀢𑀺 𑀅𑀪𑀺𑀜𑁆𑀜𑀸𑀬, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀏𑀢𑁂𑀦 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀺. 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀲𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀳𑀺𑀢𑁆𑀯𑀸𑀧𑀺 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀺.

𑀓𑀣𑀁? 𑀏𑀓𑀕𑀸𑀣𑀸𑀧𑀺 𑀳𑀺 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀸 𑀥𑀫𑁆𑀫𑀲𑁆𑀲 𑀧𑀞𑀫𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸, 𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀸, 𑀧𑀘𑁆𑀙𑀺𑀫𑀧𑀸𑀤𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸. 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀧𑀞𑀫𑀸𑀦𑀼𑀲𑀦𑁆𑀥𑀺𑀦𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀲𑀓𑀮𑁄𑀧𑀺 𑀲𑀸𑀲𑀦𑀥𑀫𑁆𑀫𑁄 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑁂𑀦 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 ¶ . 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀸𑀬 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀸𑀯𑀓𑀩𑁄𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀼𑀬𑁆𑀬𑀫𑀸𑀦𑁄 𑀘𑁂𑀲 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄 𑀲𑀯𑀦𑁂𑀦𑀧𑀺 ¶ 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀝𑀺𑀧𑀚𑁆𑀚𑀺𑀬𑀫𑀸𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀧𑀢𑁆𑀢𑀺𑀨𑀮𑁂 𑀦𑀺𑀝𑁆𑀞𑀺𑀢𑁂 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀨𑀮𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀦𑀸𑀣𑀧𑁆𑀧𑀪𑀯𑀢𑁆𑀢𑀸 𑀘 𑀧𑀪𑀯𑀲𑀼𑀤𑁆𑀥𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀅𑀢𑁆𑀣𑀲𑀼𑀤𑁆𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 ¶ , 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀢𑀲𑁆𑀫𑀸 𑀏𑀲𑁄 𑀪𑀕𑀯𑀸 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀦 𑀬𑀲𑁆𑀫𑀸 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀦𑀸𑀦𑀸𑀦𑀬𑁂𑀳𑀺 𑀤𑀻𑀧𑁂𑀢𑀺; 𑀢𑀜𑁆𑀘 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦-𑀯𑀺𑀯𑀭𑀡-𑀯𑀺𑀪𑀚𑀦-𑀉𑀢𑁆𑀢𑀸𑀦𑀻𑀓𑀭𑀡-𑀧𑀜𑁆𑀜𑀢𑁆𑀢𑀺-𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁, 𑀅𑀓𑁆𑀔𑀭𑀧𑀤-𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀕𑀫𑁆𑀪𑀻𑀭𑀢𑀸-𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣𑀁, 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣𑀁, 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀸𑀢𑁆𑀣𑀁, 𑀲𑀤𑁆𑀥𑁂𑀬𑁆𑀬𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀁. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀁, 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁; 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁; 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀲𑁂𑀝𑁆𑀞𑁂𑀳𑀺 𑀘𑀭𑀺𑀢𑀩𑁆𑀩𑀢𑁄 𑀢𑁂𑀲𑀜𑁆𑀘 𑀘𑀭𑀺𑀬𑀪𑀸𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀲𑁆𑀫𑀸 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀬𑀲𑁆𑀫𑀸 𑀲𑀦𑀺𑀤𑀸𑀦𑀁 𑀲𑀉𑀧𑁆𑀧𑀢𑁆𑀢𑀺𑀓𑀜𑁆𑀘 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀁 𑀤𑁂𑀲𑁂𑀢𑀺, 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄 𑀅𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀢𑀸𑀬 𑀘 𑀳𑁂𑀢𑀼𑀤𑀸𑀳𑀭𑀡𑀬𑀼𑀢𑁆𑀢𑀢𑁄 𑀘 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀲𑁄𑀢𑀽𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀦𑀺𑀕𑀫𑀦𑁂𑀦 ¶ 𑀘 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀤𑁂𑀲𑁂𑀢𑀺. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀜𑁆𑀘 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀸𑀢𑁆𑀣𑀁, 𑀧𑀭𑀺𑀬𑀢𑁆𑀢𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀩𑁆𑀬𑀜𑁆𑀚𑀦𑀁, 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 ¶ 𑀧𑀯𑀢𑁆𑀢𑀺𑀢𑁄 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄 𑀘 𑀧𑀭𑀺𑀲𑀼𑀤𑁆𑀥𑀁, 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀘𑀭𑀺𑀬𑀢𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸𑀧𑀺 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀦𑁆𑀢𑀺 𑀬𑀣𑀸𑀭𑀽𑀧𑁄 𑀲𑁄 𑀪𑀯 𑀕𑁄𑀢𑀫𑁄, 𑀏𑀯𑀭𑀽𑀧𑀸𑀦𑀁 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀤𑀸𑀦𑀁 𑀅𑀭𑀳𑀢𑀁. 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑀺𑀢𑁆𑀯𑀸 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻’’𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺.

𑁨. 𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀫𑀸 𑀬𑀢𑁆𑀣 𑀪𑀕𑀯𑀸 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ¶ . 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀦, 𑀏𑀯𑀁 𑀲𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺, 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀸𑀲𑀺. 𑀬𑀸𑀬 𑀘 ‘‘𑀓𑀘𑁆𑀘𑀺, 𑀪𑁄, 𑀕𑁄𑀢𑀫, 𑀔𑀫𑀦𑀻𑀬𑀁; 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀘 𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀁 𑀲𑀫𑁆𑀫𑁄𑀤𑀁 𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 ¶ 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀯𑀸 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 ¶ 𑀲𑀸𑀭𑀡𑀻𑀬𑀁. 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺. 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀲𑀸𑀭𑀡𑀻𑀬𑀁 𑀓𑀣𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑁂𑀦𑀢𑁆𑀣𑁂𑀦 𑀆𑀕𑀢𑁄 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀉𑀧𑀸𑀯𑀺𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀧𑀼𑀭𑀺𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀜𑁆𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁, 𑀅𑀘𑁆𑀘𑀸𑀲𑀦𑁆𑀦𑀁, 𑀉𑀧𑀭𑀺𑀯𑀸𑀢𑀁, 𑀉𑀦𑁆𑀦𑀢𑀧𑁆𑀧𑀤𑁂𑀲𑀁, 𑀅𑀢𑀺𑀲𑀫𑁆𑀫𑀼𑀔𑀁, 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 ¶ 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀏𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀯𑁄𑀘𑀸𑀢𑀺 𑀅𑀪𑀸𑀲𑀺. 𑀲𑀼𑀢𑀁 𑀫𑁂𑀢𑀦𑁆𑀢𑀺 𑀲𑀼𑀢𑀁 𑀫𑁂 𑀏𑀢𑀁, 𑀏𑀢𑀁 𑀫𑀬𑀸 𑀲𑀼𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑁄 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑀇𑀤𑀸𑀦𑀺 𑀬𑀁 𑀢𑁂𑀦 𑀲𑀼𑀢𑀁 𑁋 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀦 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀩𑁆𑀭𑀸𑀳𑁆𑀫𑀡𑁂𑀢𑀺 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂. 𑀚𑀺𑀡𑁆𑀡𑁂𑀢𑀺 𑀚𑀚𑁆𑀚𑀭𑀻𑀪𑀽𑀢𑁂 ¶ 𑀚𑀭𑀸𑀬 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀆𑀧𑀸𑀤𑀺𑀢𑁂. 𑀯𑀼𑀟𑁆𑀠𑁂𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀼𑀟𑁆𑀠𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑁂. 𑀫𑀳𑀮𑁆𑀮𑀓𑁂𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 𑀲𑀫𑀦𑁆𑀦𑀸𑀕𑀢𑁂, 𑀘𑀺𑀭𑀓𑀸𑀮𑀧𑁆𑀧𑀲𑀼𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀕𑀢𑁂𑀢𑀺 𑀅𑀤𑁆𑀥𑀸𑀦𑀁 𑀕𑀢𑁂 ¶ , 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀅𑀢𑀻𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀬𑁄 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑁂, 𑀧𑀘𑁆𑀙𑀺𑀫𑀯𑀬𑁄 𑀦𑀸𑀫 𑀯𑀲𑁆𑀲𑀲𑀢𑀲𑁆𑀲 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄.

𑀅𑀧𑀺𑀘 𑁋 𑀚𑀺𑀡𑁆𑀡𑁂𑀢𑀺 𑀧𑁄𑀭𑀸𑀡𑁂, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀟𑁆𑀠𑁂𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀟𑁆𑀠𑀺𑀬𑀼𑀢𑁆𑀢𑁂. 𑀫𑀳𑀮𑁆𑀮𑀓𑁂𑀢𑀺 𑀯𑀺𑀪𑀯𑀫𑀳𑀢𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂. 𑀅𑀤𑁆𑀥𑀕𑀢𑁂𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑀘𑀭𑀺𑀬𑀸𑀤𑀺𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑁆𑀫 𑀘𑀭𑀫𑀸𑀦𑁂. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀚𑀸𑀢𑀺𑀯𑀼𑀟𑁆𑀠𑀪𑀸𑀯𑀁 𑀅𑀦𑁆𑀢𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀪𑀺𑀯𑀸𑀤𑁂𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 ‘‘𑀦 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀏𑀯𑀫𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 ‘‘𑀦 𑀯𑀦𑁆𑀤𑀢𑀺 𑀯𑀸, 𑀦𑀸𑀲𑀦𑀸 𑀯𑀼𑀝𑁆𑀞𑀳𑀢𑀺 𑀯𑀸, 𑀦𑀸𑀧𑀺 ‘𑀇𑀥 𑀪𑁄𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑀽’𑀢𑀺 𑀏𑀯𑀁 𑀆𑀲𑀦𑁂𑀦 𑀯𑀸 𑀉𑀧𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀏𑀢𑁆𑀣 𑀳𑀺 𑀯𑀸 𑀲𑀤𑁆𑀤𑁄 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂, ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀯𑀁 𑀯𑀢𑁆𑀯𑀸 𑀅𑀣 𑀅𑀢𑁆𑀢𑀦𑁄 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀢𑀬𑀺𑀤𑀁 𑀪𑁄 𑀕𑁄𑀢𑀫 𑀢𑀣𑁂𑀯𑀸’’𑀢𑀺. 𑀬𑀁 𑀢𑀁 𑀫𑀬𑀸 𑀲𑀼𑀢𑀁 𑁋 𑀢𑀁 𑀢𑀣𑁂𑀯, 𑀢𑀁 𑀲𑀯𑀦𑀜𑁆𑀘 𑀫𑁂 𑀤𑀲𑁆𑀲𑀦𑀜𑁆𑀘 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀁 𑀕𑀘𑁆𑀙𑀢𑀺. ‘‘𑀦 𑀳𑀺 𑀪𑀯𑀁 𑀕𑁄𑀢𑀫𑁄…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀲𑀼𑀢𑀁 𑀤𑀺𑀝𑁆𑀞𑁂𑀦 𑀦𑀺𑀕𑀫𑁂𑀢𑁆𑀯𑀸 𑀦𑀺𑀦𑁆𑀤𑀦𑁆𑀢𑁄 𑀆𑀳 𑁋 ‘‘𑀢𑀬𑀺𑀤𑀁 𑀪𑁄 𑀕𑁄𑀢𑀫 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’𑀢𑀺 𑀢𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀓𑀭𑀡𑀁 𑀦 𑀬𑀼𑀢𑁆𑀢𑀫𑁂𑀯.

𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀤𑁄𑀲𑀁 𑀅𑀦𑀼𑀧𑀕𑀫𑁆𑀫 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁂𑀦 𑀢𑀁 𑀅𑀜𑁆𑀜𑀸𑀡𑀁 𑀯𑀺𑀥𑀫𑀺𑀢𑁆𑀯𑀸 ¶ 𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡 ¶ …𑀧𑁂… 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀝𑀺𑀳𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀅𑀦𑀘𑁆𑀙𑀭𑀺𑀬𑀁 𑀯𑀸 𑀏𑀢𑀁, 𑀬𑁆𑀯𑀸𑀳𑀁 𑀅𑀚𑁆𑀚 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀓𑀸𑀭𑀸𑀭𑀳𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺. 𑀅𑀧𑀺𑀘 𑀔𑁄 𑀬𑀤𑀸𑀧𑀸𑀳𑀁 𑀲𑀫𑁆𑀧𑀢𑀺𑀚𑀸𑀢𑁄𑀯 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺𑀁; 𑀢𑀤𑀸𑀧𑀺 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑀫𑀳𑀁 ¶ 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀅𑀣 𑀔𑁄 𑀫𑀁 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁄 𑀔𑀻𑀡𑀸𑀲𑀯𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀢𑁆𑀯𑀁 𑀮𑁄𑀓𑁂 𑀫𑀳𑀸𑀧𑀼𑀭𑀺𑀲𑁄, 𑀢𑁆𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑁄 𑀘 𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘, 𑀦𑀢𑁆𑀣𑀺 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀢𑀺𑀦𑀸𑀫𑁂𑀲𑀺; 𑀢𑀤𑀸𑀧𑀺 𑀘𑀸𑀳𑀁 𑀅𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺𑀁 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺. 𑀏𑀯𑀁 𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀧𑀺 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀭𑀳𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀺, 𑀲𑁆𑀯𑀸𑀳𑀁 𑀇𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀢𑀲𑁆𑀫𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀫𑀸 𑀢𑀣𑀸𑀕𑀢𑁂 𑀏𑀯𑀭𑀽𑀧𑀁 𑀦𑀺𑀧𑀘𑁆𑀘𑀓𑀸𑀭𑀁 𑀧𑀢𑁆𑀣𑀬𑀺𑀢𑁆𑀣. 𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀪𑀺𑀯𑀸𑀤𑁂𑀬𑁆𑀬 𑀯𑀸…𑀧𑁂… 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀧𑀸𑀓𑀲𑀺𑀣𑀺𑀮𑀩𑀦𑁆𑀥𑀦𑀁 𑀯𑀡𑁆𑀝𑀸 𑀧𑀯𑀼𑀢𑁆𑀢𑀢𑀸𑀮𑀨𑀮𑀫𑀺𑀯 𑀕𑀻𑀯𑀢𑁄 𑀧𑀘𑁆𑀙𑀺𑀚𑁆𑀚𑀺𑀢𑁆𑀯𑀸 𑀲𑀳𑀲𑀸𑀯 𑀪𑀽𑀫𑀺𑀬𑀁 𑀯𑀺𑀧𑀢𑁂𑀬𑁆𑀬𑀸𑀢𑀺.

𑁩. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑁄 𑀤𑀼𑀧𑁆𑀧𑀜𑁆𑀜𑀢𑀸𑀬 𑀢𑀣𑀸𑀕𑀢𑀲𑁆𑀲 𑀮𑁄𑀓𑁂 𑀚𑁂𑀝𑁆𑀞𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀓𑁂𑀯𑀮𑀁 𑀢𑀁 𑀯𑀘𑀦𑀁 𑀅𑀲𑀳𑀫𑀸𑀦𑁄 𑀆𑀳 𑁋 ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀮𑁄𑀓𑁂 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀁 ‘‘𑀲𑀸𑀫𑀕𑁆𑀕𑀺𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀦𑀢𑁆𑀣𑀺 ¶ , 𑀢𑀲𑁆𑀫𑀸 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄, 𑀅𑀭𑀲𑀚𑀸𑀢𑀺𑀓𑁄 𑀅𑀭𑀲𑀲𑀪𑀸𑀯𑁄𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀚𑀦𑀦𑀢𑁆𑀣𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀁 𑀧𑀭𑀺𑀳𑀭𑀦𑁆𑀢𑁄 𑀅𑀜𑁆𑀜𑀣𑀸 𑀢𑀲𑁆𑀲 𑀯𑀘𑀦𑀲𑁆𑀲𑀢𑁆𑀣𑀁 𑀅𑀢𑁆𑀢𑀦𑀺 𑀲𑀦𑁆𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀔𑁆𑀯𑁂𑀲 𑀩𑁆𑀭𑀸𑀳𑁆𑀫𑀡 𑀧𑀭𑀺𑀬𑀸𑀬𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀭𑀺𑀬𑀸𑀬𑁄𑀢𑀺 𑀓𑀸𑀭𑀡𑀁; 𑀅𑀬𑀜𑁆𑀳𑀺 𑀧𑀭𑀺𑀬𑀸𑀬𑀲𑀤𑁆𑀤𑁄 𑀤𑁂𑀲𑀦𑀸-𑀯𑀸𑀭-𑀓𑀸𑀭𑀡𑁂𑀲𑀼 𑀯𑀢𑁆𑀢𑀢𑀺. ‘‘𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑁆𑀯𑁂𑀯 𑀦𑀁 𑀥𑀸𑀭𑁂𑀳𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁫) 𑀳𑀺 𑀏𑀲 𑀤𑁂𑀲𑀦𑀸𑀬𑀁 𑀯𑀢𑁆𑀢𑀢𑀺. ‘‘𑀓𑀲𑁆𑀲 𑀦𑀼 𑀔𑁄, 𑀆𑀦𑀦𑁆𑀤, 𑀅𑀚𑁆𑀚 𑀧𑀭𑀺𑀬𑀸𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁯𑁮) 𑀯𑀸𑀭𑁂. ‘‘𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀢𑀼, 𑀬𑀣𑀸𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁬𑁪) 𑀓𑀸𑀭𑀡𑁂. 𑀲𑁆𑀯𑀸𑀬𑀫𑀺𑀥 𑀓𑀸𑀭𑀡𑁂 𑀯𑀢𑁆𑀢𑀢𑀺 ¶ . 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀢𑀁 𑀓𑀸𑀭𑀡𑀁; 𑀬𑁂𑀦 𑀓𑀸𑀭𑀡𑁂𑀦 𑀫𑀁 ‘‘𑀅𑀭𑀲𑀭𑀽𑀧𑁄 ¶ 𑀪𑀯𑀁 𑀕𑁄𑀢𑀫𑁄’’𑀢𑀺 𑀯𑀤𑀫𑀸𑀦𑁄 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀅𑀯𑀺𑀢𑀣𑀯𑀸𑀤𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑁂𑀬𑁆𑀬. 𑀓𑀢𑀫𑁄 𑀧𑀦 𑀲𑁄𑀢𑀺? 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡 𑀭𑀽𑀧𑀭𑀲𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀭𑀲𑀸 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂 𑀢𑁂 𑀚𑀸𑀢𑀺𑀯𑀲𑁂𑀦 𑀯𑀸 𑀉𑀧𑀧𑀢𑁆𑀢𑀺𑀯𑀲𑁂𑀦 𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀦𑁆𑀢𑀸𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀁 𑀭𑀚𑁆𑀚𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺 𑀓𑀸𑀫𑀲𑀼𑀔𑀲𑁆𑀲𑀸𑀤𑀲𑀗𑁆𑀔𑀸𑀢𑀸 𑀭𑀽𑀧𑀭𑀲𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀭𑀲𑀸, 𑀬𑁂 𑀇𑀫𑀁 𑀮𑁄𑀓𑀁 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀆𑀯𑀺𑀜𑁆𑀙𑀦𑁆𑀢𑀺, 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀲𑀸𑀫𑀕𑁆𑀕𑀺𑀬𑀜𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀸𑀫𑀕𑁆𑀕𑀺𑀭𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺. 𑀫𑀬𑁆𑀳𑀁 𑀧𑀳𑀻𑀦𑀸𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀫𑀫𑀸𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄 𑀯𑀸 𑀏𑀲 𑀪𑀕𑀯𑀢𑁄.

𑀢𑀢𑁆𑀣 𑀧𑀳𑀻𑀦𑀸𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀯𑀺𑀕𑀢𑀸 𑀚𑀳𑀺𑀢𑀸 𑀯𑀸. 𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀉𑀘𑁆𑀙𑀺𑀦𑁆𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀫𑀬𑀁 𑀫𑀽𑀮𑀫𑁂𑀢𑁂𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸. 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀣𑀸 𑀳𑀺 𑀢𑀸𑀮𑀭𑀼𑀓𑁆𑀔𑀁 𑀲𑀫𑀽𑀮𑀁 ¶ 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀣𑀼𑀫𑀢𑁆𑀢𑁂 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀓𑀢𑁂 𑀦 𑀧𑀼𑀦 𑀢𑀲𑁆𑀲 𑀢𑀸𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀧𑀜𑁆𑀜𑀸𑀬𑀢𑀺; 𑀏𑀯𑀁 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦 𑀲𑀫𑀽𑀮𑁂 𑀭𑀽𑀧𑀸𑀤𑀺𑀭𑀲𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀲𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀪𑀸𑀯𑁂𑀦 𑀯𑀢𑁆𑀣𑀼𑀫𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀢𑁂 𑀲𑀩𑁆𑀩𑁂𑀧𑀺 𑀢𑁂 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀯𑀺𑀭𑀽𑀴𑁆𑀳𑀺𑀥𑀫𑁆𑀫𑀢𑁆𑀢𑀸 𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀬𑀲𑁆𑀫𑀸 𑀧𑀦 𑀏𑀯𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀳𑁄𑀦𑁆𑀢𑀺, 𑀬𑀣𑀸 𑀦𑁂𑀲𑀁 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀺, 𑀢𑀣𑀸 𑀓𑀢𑀸 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀆𑀳 𑁋 ‘‘𑀅𑀦𑀪𑀸𑀯𑀁𑀓𑀢𑀸’’𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀧𑀤𑀘𑁆𑀙𑁂𑀤𑁄 𑁋 𑀅𑀦𑀼𑀅𑀪𑀸𑀯𑀁 𑀓𑀢𑀸 𑀅𑀦𑀪𑀸𑀯𑀁𑀓𑀢𑀸𑀢𑀺. ‘‘𑀅𑀦𑀪𑀸𑀯𑀁 𑀕𑀢𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀦𑀼𑀅𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀤𑀘𑁆𑀙𑁂𑀤𑁄 𑀅𑀦𑀼𑀅𑀪𑀸𑀯𑀁 𑀕𑀢𑀸 𑀅𑀦𑀪𑀸𑀯𑀁 𑀕𑀢𑀸𑀢𑀺, 𑀬𑀣𑀸 𑀅𑀦𑀼𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸𑀢𑀺. 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀅𑀦𑀸𑀕𑀢𑁂 𑀅𑀦𑀼𑀧𑁆𑀧𑀚𑁆𑀚𑀦𑀓𑀲𑀪𑀸𑀯𑀸. 𑀬𑁂 𑀳𑀺 𑀅𑀪𑀸𑀯𑀁 𑀕𑀢𑀸, 𑀢𑁂 𑀧𑀼𑀦 𑀓𑀣𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺? 𑀢𑁂𑀦𑀸𑀳 𑁋 ‘‘𑀅𑀦𑀪𑀸𑀯𑀁 𑀕𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺.

𑀅𑀬𑀁 𑀔𑁄 𑀩𑁆𑀭𑀸𑀳𑁆𑀫𑀡 𑀧𑀭𑀺𑀬𑀸𑀬𑁄𑀢𑀺 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀸𑀭𑀡𑀁 𑀬𑁂𑀦 𑀫𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 ‘‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺. 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻𑀢𑀺 𑀬𑀜𑁆𑀘 𑀔𑁄 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺, 𑀲𑁄 𑀧𑀭𑀺𑀬𑀸𑀬𑁄 𑀦 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳? 𑀦𑀦𑀼 𑀏𑀯𑀁 𑀯𑀼𑀢𑁆𑀢𑁂 ¶ 𑀬𑁄 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑁄 𑀲𑀸𑀫𑀕𑁆𑀕𑀺𑀭𑀲𑁄 𑀢𑀲𑁆𑀲 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀦 𑀳𑁄𑀢𑀺. 𑀬𑁄 𑀳𑀺 𑀢𑀁 𑀲𑀸𑀫𑀕𑁆𑀕𑀺𑀭𑀲𑀁 𑀓𑀸𑀢𑀼𑀁 𑀪𑀩𑁆𑀩𑁄 𑀳𑀼𑀢𑁆𑀯𑀸 𑀦 𑀓𑀭𑁄𑀢𑀺, 𑀲𑁄 𑀢𑀤𑀪𑀸𑀯𑁂𑀦 𑀅𑀭𑀲𑀭𑀽𑀧𑁄𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀪𑀕𑀯𑀸 𑀧𑀦 𑀅𑀪𑀩𑁆𑀩𑁄𑀯 𑀏𑀢𑀁 𑀓𑀸𑀢𑀼𑀁, 𑀢𑁂𑀦𑀲𑁆𑀲 𑀓𑀭𑀡𑁂 𑀅𑀪𑀩𑁆𑀩𑀢𑀁 𑀧𑀓𑀸𑀲𑁂𑀦𑁆𑀢𑁄 ¶ 𑀆𑀳 𑁋 ‘‘𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺. 𑀬𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀫𑀁 ‘‘𑀅𑀭𑀲𑀭𑀽𑀧𑁄’’𑀢𑀺 𑀯𑀤𑁂𑀲𑀺, 𑀲𑁄 𑀅𑀫𑁆𑀳𑁂𑀲𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄𑀢𑀺.

𑁪. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀅𑀭𑀲𑀭𑀽𑀧𑀢𑀁 𑀆𑀭𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀣𑀸𑀧𑀭𑀁 𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀧𑀭𑀺𑀬𑀸𑀬𑁂𑀲𑀼 𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑀦𑀓𑁆𑀓𑀫𑀁 𑀯𑀺𑀤𑀺𑀢𑁆𑀯𑀸 ¶ 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀓𑀫𑁆𑀫𑀸𑀤𑀺𑀁 𑀮𑁄𑀓𑁂 𑀲𑀸𑀫𑀕𑁆𑀕𑀺𑀧𑀭𑀺𑀪𑁄𑀕𑁄𑀢𑀺 𑀫𑀜𑁆𑀜𑀫𑀸𑀦𑁄 𑀢𑀤𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀦𑀺𑀩𑁆𑀪𑁄𑀕𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑁆𑀯𑀸𑀬𑀁 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸𑀦𑀁 𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄 𑀢𑀤𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁫. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀮𑁄𑀓𑁂 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁 𑀮𑁄𑀓𑀺𑀬𑀸 𑀓𑀭𑁄𑀦𑁆𑀢𑀺 𑀢𑀲𑁆𑀲 𑀅𑀓𑀺𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀕𑀯𑀦𑁆𑀢𑀁 𑀅𑀓𑀺𑀭𑀺𑀬𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦, 𑀬𑀲𑁆𑀫𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀅𑀓𑀺𑀭𑀺𑀬𑀁 𑀯𑀤𑀢𑀺 𑀢𑀲𑁆𑀫𑀸, 𑀢𑀁 𑀅𑀓𑀺𑀭𑀺𑀬𑀯𑀸𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀣 𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢-𑀅𑀤𑀺𑀦𑁆𑀦𑀸𑀤𑀸𑀦-𑀫𑀺𑀘𑁆𑀙𑀸𑀘𑀸𑀭𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀼𑀲𑀸𑀯𑀸𑀤-𑀧𑀺𑀲𑀼𑀡𑀯𑀸𑀘𑀸-𑀨𑀭𑀼𑀲𑀯𑀸𑀘𑀸-𑀲𑀫𑁆𑀨𑀧𑁆𑀧𑀮𑀸𑀧𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀞𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂, 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 ‘‘𑀅𑀦𑁂𑀓𑀯𑀺𑀳𑀺𑀢𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 𑀇𑀫𑀁 ‘‘𑀆𑀕𑀫𑁆𑀫 𑀅𑀬𑀁 𑀮𑁄𑀓𑀢𑀦𑁆𑀢𑀺 𑀮𑁄𑀓𑀧𑀯𑁂𑀡𑀻 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀉𑀘𑁆𑀙𑁂𑀤𑀯𑀸𑀤𑁄𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀤𑁆𑀯𑀻𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀓𑀤𑁄𑀲𑀲𑁆𑀲 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺. 𑀲𑀩𑁆𑀩𑀸𑀓𑀼𑀲𑀮𑀲𑀫𑁆𑀪𑀯𑀲𑁆𑀲 𑀧𑀦 𑀦𑀺𑀭𑀯𑀲𑁂𑀲𑀲𑁆𑀲 𑀫𑁄𑀳𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀘𑁆𑀙𑁂𑀤𑀁 𑀯𑀤𑀢𑀺. 𑀞𑀧𑁂𑀢𑁆𑀯𑀸 𑀢𑁂 𑀢𑀬𑁄, 𑀅𑀯𑀲𑁂𑀲𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀦𑀼𑀭𑀽𑀧𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 ¶ 𑀉𑀘𑁆𑀙𑁂𑀤𑀁 𑀯𑀤𑀢𑀺; 𑀢𑀲𑁆𑀫𑀸 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁭. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 ‘‘𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀤𑀁 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀁, 𑀢𑁂𑀦 𑀢𑀁 𑀦 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀚𑁂𑀕𑀼𑀘𑁆𑀙𑀻𑀢𑀺 𑀆𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀚𑀺𑀕𑀼𑀘𑁆𑀙𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺; 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 ¶ ? 𑀬𑀜𑁆𑀘 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀬𑀜𑁆𑀘 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀬𑀸 𑀘 𑀞𑀧𑁂𑀢𑁆𑀯𑀸 𑀢𑀸𑀦𑀺 ¶ 𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀯𑀲𑁂𑀲𑀸𑀦𑀁 𑀮𑀸𑀫𑀓𑀝𑁆𑀞𑁂𑀦 𑀧𑀸𑀧𑀓𑀸𑀦𑀁 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀚𑁆𑀚𑀦𑀸 𑀲𑀫𑀗𑁆𑀕𑀺𑀪𑀸𑀯𑁄, 𑀢𑀁 𑀲𑀩𑁆𑀩𑀫𑁆𑀧𑀺 𑀕𑀽𑀣𑀁 𑀯𑀺𑀬 𑀫𑀡𑁆𑀟𑀦𑀓𑀚𑀸𑀢𑀺𑀬𑁄 𑀧𑀼𑀭𑀺𑀲𑁄 𑀚𑀺𑀕𑀼𑀘𑁆𑀙𑀢𑀺 𑀳𑀺𑀭𑀻𑀬𑀢𑀺, 𑀢𑀲𑁆𑀫𑀸 𑀢𑀁 𑀚𑁂𑀕𑀼𑀘𑁆𑀙𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀣 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑁮. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀫𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀪𑀕𑀯𑀢𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀬𑀁 𑀇𑀫𑀁 𑀮𑁄𑀓𑀚𑁂𑀝𑁆𑀞𑀓𑀓𑀫𑁆𑀫𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀅𑀣 𑀯𑀸 𑀬𑀲𑁆𑀫𑀸 𑀏𑀢𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑁄𑀢𑀺 𑀢𑀲𑁆𑀫𑀸 𑀅𑀬𑀁 𑀯𑀺𑀦𑁂𑀢𑀩𑁆𑀩𑁄 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀯𑁂𑀦𑀬𑀺𑀓𑁄𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄, 𑀯𑀺𑀦𑀬𑀁 𑀯𑀸 𑀅𑀭𑀳𑀢𑀻𑀢𑀺 𑀯𑁂𑀦𑀬𑀺𑀓𑁄, 𑀦𑀺𑀕𑁆𑀕𑀳𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀸 𑀧𑀦, 𑀬𑀲𑁆𑀫𑀸 𑀭𑀸𑀕𑀸𑀤𑀻𑀦𑀁 𑀯𑀺𑀦𑀬𑀸𑀬 𑀯𑀽𑀧𑀲𑀫𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀯𑁂𑀦𑀬𑀺𑀓𑁄 𑀳𑁄𑀢𑀺. 𑀅𑀬𑀫𑁂𑀯 𑀘𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀦𑀬𑀺𑀓𑁄. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺! 𑀲𑁆𑀯𑀸𑀬𑀁 𑀢𑀁 𑀯𑁂𑀦𑀬𑀺𑀓𑀪𑀸𑀯𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺.

𑁯. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀬𑀲𑁆𑀫𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀲𑀸𑀫𑀻𑀘𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀬𑁄𑀯𑀼𑀟𑁆𑀠𑁂 𑀢𑁄𑀲𑁂𑀦𑁆𑀢𑀺 𑀳𑀸𑀲𑁂𑀦𑁆𑀢𑀺, 𑀅𑀓𑀭𑁄𑀦𑁆𑀢𑀸 𑀧𑀦 𑀢𑀸𑀧𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀦𑁂𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀪𑀕𑀯𑀸 𑀘 𑀢𑀸𑀦𑀺 𑀦 𑀓𑀭𑁄𑀢𑀺; 𑀢𑀲𑁆𑀫𑀸 ‘‘𑀅𑀬𑀁 𑀯𑀬𑁄𑀯𑀼𑀟𑁆𑀠𑁂 𑀢𑀧𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀧𑁆𑀧𑀼𑀭𑀺𑀲𑀸𑀘𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀯𑀸 ‘‘𑀓𑀧𑀡𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀦𑁆𑀢𑀁 𑀢𑀧𑀲𑁆𑀲𑀻𑀢𑀺 𑀆𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀢𑀧𑀢𑀻𑀢𑀺 𑀢𑀧𑁄, 𑀭𑁄𑀲𑁂𑀢𑀺 𑀯𑀺𑀳𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀸𑀫𑀻𑀘𑀺𑀓𑀫𑁆𑀫𑀸𑀓𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀩𑁆𑀬𑀜𑁆𑀚𑀦𑀸𑀦𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀮𑁄𑀓𑁂 𑀓𑀧𑀡𑀧𑀼𑀭𑀺𑀲𑁄 ‘‘𑀢𑀧𑀲𑁆𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀧𑀦 𑀬𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀮𑁄𑀓𑀁 𑀢𑀧𑀦𑀢𑁄 𑀢𑀧𑀦𑀻𑀬𑀸𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀢𑀧𑀲𑁆𑀲𑀻𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀲𑁆𑀫𑀸 𑀢𑀁 𑀢𑀧𑀲𑁆𑀲𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀢𑀧𑀦𑁆𑀢𑀻𑀢𑀺 𑀢𑀧𑀸, 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁂𑀢𑀁 ¶ 𑀅𑀥𑀺𑀯𑀘𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀇𑀥 𑀢𑀧𑁆𑀧𑀢𑀺 𑀧𑁂𑀘𑁆𑀘 𑀢𑀧𑁆𑀧𑀢𑀻’’𑀢𑀺. 𑀢𑀣𑀸 𑀢𑁂 𑀢𑀧𑁂 𑀅𑀲𑁆𑀲𑀺 𑀦𑀺𑀭𑀲𑁆𑀲𑀺 𑀧𑀳𑀸𑀲𑀺 𑀯𑀺𑀤𑁆𑀥𑀁𑀲𑁂𑀲𑀻𑀢𑀺 𑀢𑀧𑀲𑁆𑀲𑀻.

𑁧𑁦. 𑀧𑀼𑀦 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀤𑁂𑀯𑀮𑁄𑀓𑀕𑀩𑁆𑀪𑀲𑀫𑁆𑀧𑀢𑁆𑀢𑀺𑀬𑀸 𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀪𑀕𑀯𑀢𑀺 𑀘𑀲𑁆𑀲 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀪𑀕𑀯𑀦𑁆𑀢𑀁 𑀅𑀧𑀕𑀩𑁆𑀪𑁄𑀢𑀺 𑀆𑀳. 𑀓𑁄𑀥𑀯𑀲𑁂𑀦 𑀯𑀸 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 𑀏𑀯𑀫𑀸𑀳. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀕𑀩𑁆𑀪𑀢𑁄 𑀅𑀧𑀕𑀢𑁄𑀢𑀺 𑀅𑀧𑀕𑀩𑁆𑀪𑁄, 𑀅𑀪𑀩𑁆𑀩𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄, 𑀤𑁂𑀯𑀮𑁄𑀓𑀕𑀩𑁆𑀪𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀆𑀬𑀢𑀺𑀁 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻𑀢𑀺, 𑀳𑀻𑀦𑁄 𑀯𑀸𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑀯𑀸𑀲𑁄 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀢𑁄 𑀧𑀦 𑀬𑀲𑁆𑀫𑀸 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀅𑀧𑀕𑀢𑀸, 𑀢𑀲𑁆𑀫𑀸 𑀲𑁄 𑀢𑀁 𑀅𑀧𑀕𑀩𑁆𑀪𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀧𑀭𑀫𑁆𑀧𑀺 𑀧𑀭𑀺𑀬𑀸𑀬𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀢𑁆𑀭 𑀘 𑀬𑀲𑁆𑀲 𑀔𑁄 𑀩𑁆𑀭𑀸𑀳𑁆𑀫𑀡 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀕𑀢𑁂 𑀕𑀩𑁆𑀪𑀲𑁂𑀬𑁆𑀬𑀸, 𑀧𑀼𑀦𑀩𑁆𑀪𑀯𑁂 𑀘 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦 𑀯𑀺𑀳𑀢𑀓𑀸𑀭𑀡𑀢𑁆𑀢𑀸 𑀧𑀳𑀻𑀦𑀸𑀢𑀺. 𑀕𑀩𑁆𑀪𑀲𑁂𑀬𑁆𑀬𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀚𑀮𑀸𑀩𑀼𑀚𑀬𑁄𑀦𑀺 𑀕𑀳𑀺𑀢𑀸. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀕𑁆𑀕𑀳𑀡𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄𑀧𑀺.

𑀅𑀧𑀺𑀘 𑀕𑀩𑁆𑀪𑀲𑁆𑀲 𑀲𑁂𑀬𑁆𑀬𑀸 𑀕𑀩𑁆𑀪𑀲𑁂𑀬𑁆𑀬𑀸, 𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀯𑀺𑀜𑁆𑀜𑀸𑀡𑀢𑁄 𑀅𑀜𑁆𑀜𑀸 𑀞𑀺𑀢𑀺 𑀅𑀢𑁆𑀣𑀺, 𑀏𑀯𑀫𑀺𑀥𑀸𑀧𑀺 𑀦 𑀕𑀩𑁆𑀪𑀢𑁄 𑀅𑀜𑁆𑀜𑀸 𑀲𑁂𑀬𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀦𑀸𑀫 𑀬𑀲𑁆𑀫𑀸 𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀧𑀺 𑀅𑀢𑁆𑀣𑀺, 𑀇𑀥 𑀘 𑀧𑀼𑀦𑀩𑁆𑀪𑀯𑀪𑀽𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀧𑀼𑀦𑀩𑁆𑀪𑀯𑁄 𑀏𑀯 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺.

𑁧𑁧. 𑀏𑀯𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀭𑀲𑀭𑀽𑀧𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀲𑁆𑀲𑀸𑀫𑀻 ¶ 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀸𑀬 𑀲𑀻𑀢𑀮𑁂𑀦𑁂𑀯 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀬𑀁 𑀥𑀫𑁆𑀫𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 ¶ 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑀺𑀕𑀢𑀯𑀮𑀸𑀳𑀓𑁂 𑀅𑀦𑁆𑀢𑀮𑀺𑀓𑁆𑀔𑁂 𑀲𑀫𑀩𑁆𑀪𑀼𑀕𑁆𑀕𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀭𑀤𑀓𑀸𑀮𑁂 𑀲𑀽𑀭𑀺𑀬𑁄 𑀯𑀺𑀬 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑁄 𑀢𑀸𑀦𑀺𑀬𑁂𑀯 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀅𑀜𑁆𑀜𑀣𑀸 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀦𑀧𑀺 𑀅𑀢𑁆𑀢𑀦𑁄 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀁 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀁, 𑀢𑀸𑀤𑀺𑀕𑀼𑀡𑀮𑀓𑁆𑀔𑀡𑀁 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀁 𑀅𑀓𑀼𑀧𑁆𑀧𑀥𑀫𑁆𑀫𑀢𑀜𑁆𑀘 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀓𑁂𑀯𑀮𑀁 𑀧𑀮𑀺𑀢𑀲𑀺𑀭𑀔𑀡𑁆𑀟𑀤𑀦𑁆𑀢𑀯𑀮𑀺𑀢𑁆𑀢𑀘𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀪𑀸𑀯𑀁 𑀲𑀜𑁆𑀚𑀸𑀦𑀸𑀢𑀺, 𑀦𑁄 𑀘 𑀔𑁄 𑀚𑀸𑀦𑀸𑀢𑀺 𑀅𑀢𑁆𑀢𑀸𑀦𑀁 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁 𑀚𑀭𑀸𑀬 𑀅𑀦𑀼𑀲𑀝𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁 𑀯𑀝𑁆𑀝𑀔𑀸𑀡𑀼𑀪𑀽𑀢𑀁 𑀅𑀚𑁆𑀚 𑀫𑀭𑀺𑀢𑁆𑀯𑀸 𑀧𑀼𑀦 𑀲𑁆𑀯𑁂𑀯 𑀉𑀢𑁆𑀢𑀸𑀦𑀲𑀬𑀦𑀤𑀸𑀭𑀓𑀪𑀸𑀯𑀕𑀫𑀦𑀻𑀬𑀁. 𑀫𑀳𑀦𑁆𑀢𑁂𑀦 𑀔𑁄 𑀧𑀦 𑀉𑀲𑁆𑀲𑀸𑀳𑁂𑀦 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀤𑀲𑁆𑀲 𑀆𑀕𑀫𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺.

𑀢𑀢𑁆𑀣 𑀲𑁂𑀬𑁆𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄; 𑀧𑀻𑀢𑀺 𑀲𑀫𑁆𑀪𑀸𑀯𑀦𑀢𑁆𑀣𑁂; 𑀉𑀪𑀬𑁂𑀦𑀸𑀧𑀺 𑀬𑀣𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀢𑀺 ¶ 𑀤𑀲𑁆𑀲𑁂𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀊𑀦𑀸𑀥𑀺𑀓𑀸𑀦𑀺𑀧𑀺 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀔𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺. 𑀢𑀸𑀦𑀲𑁆𑀲𑀽𑀢𑀺 𑀢𑀸𑀦𑀺 𑀅𑀲𑁆𑀲𑀼, 𑀪𑀯𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀢𑀸𑀬 𑀚𑀦𑁂𑀢𑁆𑀢𑀺𑀬𑀸 𑀓𑀼𑀓𑁆𑀓𑀼𑀝𑀺𑀬𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀬𑀦𑁆𑀢𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀲𑁂𑀤𑀺𑀢𑀸𑀦𑀺, 𑀉𑀲𑁆𑀫𑀻𑀓𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀪𑀸𑀯𑀺𑀢𑀸𑀦𑀺, 𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀢𑀸𑀬 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀺𑀬𑀫𑀸𑀦𑀸𑀦𑀺 𑀦 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺. 𑀬𑁄𑀧𑀺 𑀦𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑁄 𑀲𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺. 𑀓𑀧𑀸𑀮𑀁 𑀢𑀦𑀼𑀓𑀁 𑀳𑁄𑀢𑀺, 𑀧𑀸𑀤𑀦𑀔𑀲𑀺𑀔𑀸 𑀘 𑀫𑀼𑀔𑀢𑀼𑀡𑁆𑀟𑀓𑀜𑁆𑀘 𑀔𑀭𑀁 𑀳𑁄𑀢𑀺, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺, 𑀓𑀧𑀸𑀮𑀲𑁆𑀲 𑀢𑀦𑀼𑀓𑀢𑁆𑀢𑀸 𑀩𑀳𑀺𑀤𑁆𑀥𑀸 ¶ 𑀆𑀮𑁄𑀓𑁄 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀅𑀣 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 ‘‘𑀘𑀺𑀭𑀁 ¶ 𑀯𑀢 𑀫𑀬𑀁 𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸 𑀲𑀫𑁆𑀩𑀸𑀥𑁂 𑀲𑀬𑀺𑀫𑁆𑀳, 𑀅𑀬𑀜𑁆𑀘 𑀩𑀳𑀺 𑀆𑀮𑁄𑀓𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀤𑀸𑀦𑀺 𑀦𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀧𑀸𑀮𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀦𑁆𑀢𑀺. 𑀢𑀢𑁄 𑀢𑀁 𑀓𑀧𑀸𑀮𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀏𑀯𑀁 𑀦𑀺𑀓𑁆𑀔𑀫𑀦𑁆𑀢𑀸𑀦𑀜𑁆𑀘 𑀦𑁂𑀲𑀁 𑀬𑁄 𑀧𑀞𑀫𑀢𑀭𑀁 𑀦𑀺𑀓𑁆𑀔𑀫𑀢𑀺 𑀲𑁄 ‘𑀚𑁂𑀝𑁆𑀞𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀸𑀬 𑀉𑀧𑀫𑀸𑀬 𑀅𑀢𑁆𑀢𑀦𑁄 𑀚𑁂𑀝𑁆𑀞𑀓𑀪𑀸𑀯𑀁 𑀲𑀸𑀥𑁂𑀢𑀼𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺 𑁋 ‘‘𑀬𑁄 𑀦𑀼 𑀔𑁄 𑀢𑁂𑀲𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁…𑀧𑁂… 𑀓𑀺𑀦𑁆𑀢𑀺 𑀲𑁆𑀯𑀲𑁆𑀲 𑀯𑀘𑀦𑀻𑀬𑁄’’𑀢𑀺. 𑀢𑀢𑁆𑀣 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀦𑁆𑀢𑀺 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁. 𑀓𑀺𑀦𑁆𑀢𑀺 𑀲𑁆𑀯𑀲𑁆𑀲 𑀯𑀘𑀦𑀻𑀬𑁄𑀢𑀺 𑀲𑁄 𑀓𑀺𑀦𑁆𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀓𑀺𑀦𑁆𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀚𑁂𑀝𑁆𑀞𑁄𑀢𑀺𑀲𑁆𑀲 𑀪𑁄 𑀕𑁄𑀢𑀫 𑀯𑀘𑀦𑀻𑀬𑁄’’𑀢𑀺. 𑀪𑁄, 𑀕𑁄𑀢𑀫, 𑀲𑁄 𑀚𑁂𑀝𑁆𑀞𑁄 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑁄. 𑀓𑀲𑁆𑀫𑀸𑀢𑀺 𑀘𑁂? 𑀲𑁄 𑀳𑀺 𑀦𑁂𑀲𑀁 𑀚𑁂𑀝𑁆𑀞𑁄, 𑀢𑀲𑁆𑀫𑀸 𑀲𑁄 𑀦𑁂𑀲𑀁 𑀯𑀼𑀟𑁆𑀠𑀢𑀭𑁄𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀪𑀕𑀯𑀸 𑀑𑀧𑀫𑁆𑀫𑀁 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀫𑁂𑀯 𑀔𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺. 𑀬𑀣𑀸 𑀲𑁄 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀚𑁂𑀝𑁆𑀞𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀏𑀯𑀁 𑀅𑀳𑀫𑁆𑀧𑀺 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬. 𑀅𑀯𑀺𑀚𑁆𑀚𑀸𑀕𑀢𑀸𑀬𑀸𑀢𑀺 𑀅𑀯𑀺𑀚𑁆𑀚𑀸 𑀯𑀼𑀘𑁆𑀘𑀢𑀺 𑀅𑀜𑁆𑀜𑀸𑀡𑀁, 𑀢𑀢𑁆𑀣 𑀕𑀢𑀸𑀬. 𑀧𑀚𑀸𑀬𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀢𑀲𑁆𑀫𑀸 𑀏𑀢𑁆𑀣 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀽𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀡𑁆𑀟𑀪𑀽𑀢𑀸𑀬𑀸𑀢𑀺 𑀅𑀡𑁆𑀟𑁂 𑀪𑀽𑀢𑀸𑀬 𑀚𑀸𑀢𑀸𑀬 𑀲𑀜𑁆𑀚𑀸𑀢𑀸𑀬. 𑀬𑀣𑀸 𑀳𑀺 𑀅𑀡𑁆𑀟𑁂 𑀦𑀺𑀩𑁆𑀩𑀢𑁆𑀢𑀸 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑀬𑀁 𑀲𑀩𑁆𑀩𑀸𑀧𑀺 𑀧𑀚𑀸 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀡𑁆𑀟𑀪𑀽𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑁄𑀦𑀤𑁆𑀥𑀸𑀬𑀸𑀢𑀺 𑀢𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑀸𑀬 𑀩𑀤𑁆𑀥𑀸𑀬 𑀯𑁂𑀞𑀺𑀢𑀸𑀬 ¶ . 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸𑀢𑀺 𑀢𑀁 𑀅𑀯𑀺𑀚𑁆𑀚𑀸𑀫𑀬𑀁 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 ¶ . 𑀏𑀓𑁄𑀯 𑀮𑁄𑀓𑁂𑀢𑀺 𑀲𑀓𑀮𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀳𑀫𑁂𑀯 𑀏𑀓𑁄 𑀅𑀤𑀼𑀢𑀺𑀬𑁄. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁; 𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺𑀁; 𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘 ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑀘 𑀆𑀕𑀢𑀝𑁆𑀞𑀸𑀦𑁂𑀲𑀼 𑀳𑀺 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺 ¶ 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀺𑀬𑀪𑀸𑀯𑀁. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦 𑀳𑁄𑀢𑀻𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀁; 𑀧𑀢𑁆𑀢𑁄𑀫𑁆𑀳𑀺 𑀅𑀥𑀺𑀕𑀢𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑀤𑁂𑀢𑀁 𑀪𑀕𑀯𑀢𑀸 ‘‘𑀏𑀯𑀫𑁂𑀯 𑀔𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁, 𑀢𑀁 𑀏𑀯𑀫𑀢𑁆𑀣𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀢𑁆𑀢𑀦𑁄 𑀅𑀡𑁆𑀟𑁂𑀲𑀼 𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁; 𑀏𑀯𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺. 𑀓𑀼𑀓𑁆𑀓𑀼𑀝𑀺𑀬𑀸 ¶ 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀸𑀦𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀡𑁆𑀟𑀓𑀧𑀸𑀮𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀸𑀤𑀦𑀔𑀲𑀺𑀔𑀸𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀔𑀭𑀪𑀸𑀯𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 ¶ 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀭𑀺𑀧𑀸𑀓𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 ¶ 𑀧𑀭𑀺𑀧𑀸𑀓𑀓𑀸𑀮𑁄 𑀯𑀟𑁆𑀠𑀺𑀢𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀲𑀓𑀮𑀩𑀼𑀤𑁆𑀥𑀕𑀼𑀡𑀲𑀘𑁆𑀙𑀺𑀓𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑁆𑀯𑀸𑀳𑀁 𑀩𑁆𑀭𑀸𑀳𑁆𑀫𑀡 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲𑀸𑀢𑀺 𑀲𑁄 𑀅𑀳𑀁 𑀩𑁆𑀭𑀸𑀳𑁆𑀫𑀡 𑀬𑀣𑀸 𑀢𑁂𑀲𑀁 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀞𑀫𑀢𑀭𑀁 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀦𑀺𑀩𑁆𑀪𑀺𑀤𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀚𑁂𑀝𑁆𑀞𑁄 𑀳𑁄𑀢𑀺; 𑀏𑀯𑀁 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬 𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀢𑀭𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀚𑁂𑀝𑁆𑀞𑁄 𑀯𑀼𑀟𑁆𑀠𑀢𑀭𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀲𑀩𑁆𑀩𑀕𑀼𑀡𑁂𑀳𑀺 𑀧𑀦 𑀅𑀧𑁆𑀧𑀝𑀺𑀲𑀫𑀢𑁆𑀢𑀸 𑀲𑁂𑀝𑁆𑀞𑁄𑀢𑀺.

𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀁 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀸𑀬 𑀧𑀝𑀺𑀧𑀤𑀸𑀬 𑀢𑀁 𑀅𑀥𑀺𑀕𑀢𑁄 𑀢𑀁 𑀧𑀝𑀺𑀧𑀤𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀁 𑀯𑀸 𑀪𑀕𑀯𑀢𑁄 𑀅𑀦𑀼𑀢𑁆𑀢𑀭𑀁 ¶ 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀫𑁂𑀯𑀫𑀼𑀧𑁆𑀧𑀦𑁆𑀦𑀁 𑁋 ‘‘𑀓𑀸𑀬 𑀦𑀼 𑀔𑁄 𑀧𑀝𑀺𑀧𑀤𑀸𑀬 𑀇𑀫𑀁 𑀧𑀢𑁆𑀢𑁄’’𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬 ‘‘𑀇𑀫𑀸𑀬𑀸𑀳𑀁 𑀧𑀝𑀺𑀧𑀤𑀸𑀬 𑀇𑀫𑀁 𑀅𑀦𑀼𑀢𑁆𑀢𑀭𑀁 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡 𑀯𑀻𑀭𑀺𑀬𑀁 𑀅𑀳𑁄𑀲𑀻𑀢𑀺 𑀩𑁆𑀭𑀸𑀳𑁆𑀫𑀡, 𑀦 𑀫𑀬𑀸 𑀅𑀬𑀁 𑀅𑀦𑀼𑀢𑁆𑀢𑀭𑁄 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁄 𑀓𑀼𑀲𑀻𑀢𑁂𑀦 𑀫𑀼𑀝𑁆𑀞𑀲𑁆𑀲𑀢𑀺𑀦𑀸 𑀲𑀸𑀭𑀤𑁆𑀥𑀓𑀸𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂𑀦 𑀅𑀥𑀺𑀕𑀢𑁄, 𑀅𑀧𑀺𑀘 𑀔𑁄 𑀢𑀤𑀥𑀺𑀕𑀫𑀸𑀬 𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀅𑀳𑁄𑀲𑀺, 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑁂𑀦 𑀫𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀅𑀳𑁄𑀲𑀺, 𑀧𑀕𑁆𑀕𑀳𑀺𑀢𑀁 𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀤𑁆𑀥𑀢𑁆𑀢𑀸𑀬𑁂𑀯 𑀘 𑀫𑁂 𑀢𑀁 𑀅𑀲𑀮𑁆𑀮𑀻𑀦𑀁 𑀅𑀳𑁄𑀲𑀺. 𑀦 𑀓𑁂𑀯𑀮𑀜𑁆𑀘 𑀯𑀻𑀭𑀺𑀬𑀫𑁂𑀯, 𑀲𑀢𑀺𑀧𑀺 𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀸 𑀅𑀳𑁄𑀲𑀺. 𑀉𑀧𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀘 𑀅𑀲𑀫𑁆𑀫𑀼𑀝𑁆𑀞𑀸. 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀓𑀸𑀬𑁄𑀧𑀺 𑀫𑁂 𑀧𑀲𑁆𑀲𑀤𑁆𑀥𑁄 𑀅𑀳𑁄𑀲𑀺 ¶ . 𑀢𑀢𑁆𑀣 𑀬𑀲𑁆𑀫𑀸 𑀦𑀸𑀫𑀓𑀸𑀬𑁂 𑀧𑀲𑁆𑀲𑀤𑁆𑀥𑁂 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀓𑀸𑀬𑁄 𑀭𑀽𑀧𑀓𑀸𑀬𑁄𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸𑀯 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄𑀢𑀺 𑀯𑀼𑀢𑁆𑀢𑀁. 𑀅𑀲𑀸𑀭𑀤𑁆𑀥𑁄𑀢𑀺 𑀲𑁄 𑀘 𑀔𑁄 𑀧𑀲𑁆𑀲𑀤𑁆𑀥𑀢𑁆𑀢𑀸𑀬𑁂𑀯 𑀅𑀲𑀸𑀭𑀤𑁆𑀥𑁄, 𑀯𑀺𑀕𑀢𑀤𑀭𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺 𑀫𑁂 𑀲𑀫𑁆𑀫𑀸 ¶ 𑀆𑀳𑀺𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺; 𑀲𑀫𑀸𑀳𑀺𑀢𑀢𑁆𑀢𑀸 𑀏𑀯 𑀘 𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸 𑀳𑁄𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸

𑀇𑀤𑀸𑀦𑀺 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀅𑀥𑀺𑀕𑀢𑀁 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀚𑁆𑀚𑀢𑁆𑀢𑀬𑀧𑀭𑀺𑀬𑁄𑀲𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀔𑁄 𑀅𑀳’’𑀦𑁆𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺𑀆𑀤𑀻𑀦𑀁 𑀓𑀺𑀜𑁆𑀘𑀸𑀧𑀺 ‘‘𑀢𑀢𑁆𑀣 𑀓𑀢𑀫𑁂 𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄; 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀸𑀫𑀸. 𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀓𑀸𑀫𑀘𑁆𑀙𑀦𑁆𑀤𑁄…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀢𑀺 𑀇𑀫𑁂𑀳𑀺 𑀘 𑀓𑀸𑀫𑁂𑀳𑀺 𑀇𑀫𑁂𑀳𑀺 𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 ¶ 𑀯𑀺𑀯𑀺𑀢𑁆𑀢𑁄 𑀳𑁄𑀢𑀺 𑀧𑀯𑀺𑀯𑀺𑀢𑁆𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁪) 𑀦𑀬𑁂𑀦 𑀯𑀺𑀪𑀗𑁆𑀕𑁂𑀬𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸𑀧𑀺 𑀅𑀝𑁆𑀞𑀓𑀣𑀸𑀦𑀬𑀁 𑀯𑀺𑀦𑀸 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄𑀢𑀺 𑀅𑀝𑁆𑀞𑀓𑀣𑀸𑀦𑀬𑁂𑀦𑁂𑀯 𑀦𑀁 𑀧𑀓𑀸𑀲𑀬𑀺𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀁 𑁋 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀲𑀓𑁆𑀓𑁂𑀢𑁆𑀯𑀸. 𑀬𑁄 𑀧𑀦𑀸𑀬𑀫𑁂𑀢𑁆𑀣 𑀏𑀯𑀓𑀸𑀭𑁄, 𑀲𑁄 𑀦𑀺𑀬𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀦𑀺𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀁 𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑀁 𑀤𑀻𑀧𑁂𑀢𑀺. 𑀓𑀣𑀁? ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀏𑀯𑀜𑁆𑀳𑀺 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺. 𑀦𑀽𑀦𑀺𑀫𑀲𑁆𑀲 𑀛𑀸𑀦𑀲𑁆𑀲 𑀓𑀸𑀫𑀸 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀬𑁂𑀲𑀼 𑀲𑀢𑀺 𑀇𑀤𑀁 𑀦 𑀧𑀯𑀢𑁆𑀢𑀢𑀺, 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄 𑀯𑀺𑀬, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺, 𑀑𑀭𑀺𑀫𑀢𑀻𑀭𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀫𑀢𑀻𑀭𑀲𑁆𑀲𑁂𑀯, 𑀢𑀲𑁆𑀫𑀸 𑀦𑀺𑀬𑀫𑀁 𑀓𑀭𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸 𑁋 ‘‘𑀓𑀲𑁆𑀫𑀸 𑀧𑀦𑁂𑀲 𑀧𑀼𑀩𑁆𑀩𑀧𑀤𑁂𑀬𑁂𑀯 𑀯𑀼𑀢𑁆𑀢𑁄 𑀦 𑀉𑀢𑁆𑀢𑀭𑀧𑀤𑁂, 𑀓𑀺𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺? 𑀦 ¶ 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀦𑀺𑀲𑁆𑀲𑀭𑀡𑀢𑁄 𑀳𑀺 𑀧𑀼𑀩𑁆𑀩𑀧𑀤𑁂𑀏𑀯 𑀏𑀲 𑀯𑀼𑀢𑁆𑀢𑁄. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀳𑀺 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀘 𑀇𑀤𑀁 𑀛𑀸𑀦𑀁 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀬𑀣𑀸𑀳 𑁋 ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨). 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯) 𑀏𑀢𑁆𑀣 𑀏𑀯𑀓𑀸𑀭𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁 ¶ . 𑀢𑀲𑁆𑀫𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀯𑀁 𑀧𑀤𑀤𑁆𑀯𑀬𑁂𑀧𑀺 𑀏𑀲 𑀤𑀝𑁆𑀞𑀩𑁆𑀩𑁄. 𑀧𑀤𑀤𑁆𑀯𑀬𑁂𑀧𑀺 𑀘 𑀓𑀺𑀜𑁆𑀘𑀸𑀧𑀺 ‘‘𑀯𑀺𑀯𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀘𑀦𑁂𑀦 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄 𑀓𑀸𑀬𑀯𑀺𑀯𑁂𑀓𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸𑀧𑀺 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄𑀢𑀺 𑀢𑀬𑁄 𑀏𑀯 𑀇𑀥 𑀤𑀝𑁆𑀞𑀩𑁆𑀩𑀸. ‘‘𑀓𑀸𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁂 𑀘 𑀦𑀺𑀤𑁆𑀤𑁂𑀲𑁂 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧; 𑀯𑀺𑀪. 𑁯𑁬𑁪) 𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸, 𑀬𑁂 𑀘 𑀢𑀢𑁆𑀣𑁂𑀯 𑀯𑀺𑀪𑀗𑁆𑀕𑁂 𑀘 ‘‘𑀙𑀦𑁆𑀤𑁄 ¶ 𑀓𑀸𑀫𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧) 𑀦𑀬𑁂𑀦 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀺𑀢𑀸 𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀯𑀸 𑀯𑀺𑀯𑀺𑀘𑁆𑀘𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑀭𑀺𑀕𑁆𑀕𑀳𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀘 𑀏𑀢𑁂𑀲𑀁 𑀧𑀞𑀫𑁂𑀦 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁; 𑀧𑀞𑀫𑁂𑀦 𑀮𑁄𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀩𑀸𑀮𑀪𑀸𑀯𑀲𑁆𑀲; 𑀧𑀞𑀫𑁂𑀦 𑀘 𑀧𑀬𑁄𑀕𑀲𑀼𑀤𑁆𑀥𑀺, 𑀤𑀼𑀢𑀺𑀬𑁂𑀦 𑀆𑀲𑀬𑀧𑁄𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀏𑀲 𑀢𑀸𑀯 𑀦𑀬𑁄 ‘‘𑀓𑀸𑀫𑁂𑀳𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂.

𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀙𑀦𑁆𑀤𑁄𑀢𑀺 𑀘 𑀭𑀸𑀕𑁄𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁄 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯 𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀺 ¶ 𑀲𑀫𑀸𑀦𑁄, ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀛𑀸𑀦𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀪𑁂𑀤𑀢𑁄 𑀘𑀲𑁆𑀲 𑀓𑀸𑀫𑀢𑁄𑀢𑀺 𑀅𑀯𑀢𑁆𑀯𑀸 𑀓𑀸𑀫𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 ‘‘𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁪) 𑀉𑀧𑀭𑀺𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺, 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑁂𑀯 𑀧𑀝𑀺𑀧𑀓𑁆𑀔𑀸𑀦𑀺, 𑀯𑀺𑀤𑁆𑀥𑀁𑀲𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲, 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸’’𑀢𑀺 𑀧𑁂𑀝𑀓𑁂 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀻𑀯𑀭𑀡𑀸𑀦𑀁. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 ¶ 𑀧𑀞𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀤𑀼𑀢𑀺𑀬𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀁. 𑀢𑀣𑀸 𑀧𑀞𑀫𑁂𑀦 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲 𑀮𑁄𑀪𑀲𑁆𑀲, 𑀤𑀼𑀢𑀺𑀬𑁂𑀦 ¶ 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀁 𑀤𑁄𑀲𑀫𑁄𑀳𑀸𑀦𑀁. 𑀑𑀖𑀸𑀤𑀻𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀞𑀫𑁂𑀦 𑀓𑀸𑀫𑁄𑀖-𑀓𑀸𑀫𑀬𑁄𑀕-𑀓𑀸𑀫𑀸𑀲𑀯-𑀓𑀸𑀫𑀼𑀧𑀸𑀤𑀸𑀦-𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣-𑀓𑀸𑀫𑀭𑀸𑀕-𑀲𑀁𑀬𑁄𑀚𑀦𑀸𑀦𑀁, 𑀤𑀼𑀢𑀺𑀬𑁂𑀦 𑀅𑀯𑀲𑁂𑀲𑀑𑀖-𑀬𑁄𑀕𑀸𑀲𑀯-𑀉𑀧𑀸𑀤𑀸𑀦-𑀕𑀦𑁆𑀣-𑀲𑀁𑀬𑁄𑀚𑀦𑀸𑀦𑀁. 𑀧𑀞𑀫𑁂𑀦 𑀘 𑀢𑀡𑁆𑀳𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀅𑀯𑀺𑀚𑁆𑀚𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘. 𑀅𑀧𑀺𑀘 𑀧𑀞𑀫𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀅𑀝𑁆𑀞𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁, 𑀤𑀼𑀢𑀺𑀬𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑀧𑁆𑀧𑀓𑀸𑀲𑀦𑀸.

𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄, 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄. 𑀢𑀣𑀸 𑀳𑀺 ‘‘𑀢𑁂𑀦 𑀬𑁄𑀕𑀸𑀯𑀘𑀭𑁄 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀺𑀘𑀭𑀡𑀁 𑀯𑀺𑀘𑀸𑀭𑁄, 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀑𑀴𑀸𑀭𑀺𑀓𑀝𑁆𑀞𑁂𑀦 𑀖𑀡𑁆𑀝𑀸𑀪𑀺𑀖𑀸𑀢𑀲𑀤𑁆𑀤𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫-𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺. 𑀇𑀢𑀺 𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀲𑀳 𑀯𑀢𑁆𑀢𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦 𑀘 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 ¶ 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁫) 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀺𑀯𑁂𑀓𑀚𑀦𑁆𑀢𑀺 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀸, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀺𑀦𑀬𑀢𑀻𑀢𑀺 𑀧𑀻𑀢𑀺, 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸 𑀓𑀸𑀬𑀘𑀺𑀢𑁆𑀢𑀧𑀻𑀦𑀦𑀭𑀲𑀸 ¶ , 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀼𑀔𑀦𑀁 𑀲𑀼𑀔𑀁, 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁, 𑀢𑀁 𑀲𑀸𑀢𑀮𑀓𑁆𑀔𑀡𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀅𑀦𑀼𑀕𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀢𑀺𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺, 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺 𑀢𑀢𑁆𑀣 𑀲𑀼𑀔𑀁, 𑀬𑀢𑁆𑀣 𑀲𑀼𑀔𑀁 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑁄𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺, 𑀯𑀦𑀘𑁆𑀙𑀸𑀬𑀧𑁆𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀧𑀻𑀢𑀺, 𑀇𑀤𑀜𑁆𑀘 𑀲𑀼𑀔𑀁, 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 ‘‘𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀥𑀫𑁆𑀫𑀯𑀺𑀦𑀬𑀸𑀤𑀬𑁄 𑀯𑀺𑀬. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀫𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀁. 𑀬𑀣𑁂𑀯 ¶ 𑀳𑀺 𑀛𑀸𑀦𑀁, 𑀏𑀯𑀁 𑀧𑀻𑀢𑀺𑀲𑀼𑀔𑀁 𑀧𑁂𑀢𑁆𑀣 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀻𑀢𑀺 𑀢𑀲𑁆𑀫𑀸 𑀏𑀓𑀧𑀤𑁂𑀦𑁂𑀯 ‘‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁭) 𑀦𑀬𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀧𑀞𑀫𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁, 𑀇𑀤𑀁 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀧𑀞𑀫𑀁. 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀛𑀸𑀧𑁂𑀢𑀻𑀢𑀺 𑀛𑀸𑀦𑀁, 𑀇𑀫𑀺𑀦𑀸 𑀬𑁄𑀕𑀺𑀦𑁄 𑀛𑀸𑀬𑀦𑁆𑀢𑀻𑀢𑀺𑀧𑀺 𑀛𑀸𑀦𑀁, 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀟𑀳𑀦𑁆𑀢𑀺 𑀕𑁄𑀘𑀭𑀁 𑀯𑀸 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀬𑀁 𑀯𑀸 𑀢𑀁 𑀛𑀸𑀬𑀢𑀺 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀛𑀸𑀦𑀁, 𑀢𑁂𑀦𑁂𑀯 𑀉𑀧𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 ¶ , 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀲𑀳 𑀉𑀧𑀘𑀸𑀭𑁂𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄. 𑀏𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀺 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀚𑁆𑀛𑀸𑀬𑀦𑀓𑀺𑀘𑁆𑀘𑀁 𑀧𑀦 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀮𑀁 𑀧𑀦 𑀦𑀺𑀭𑁄𑀥𑀲𑁆𑀲 𑀢𑀣𑀮𑀓𑁆𑀔𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀛𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀏𑀢𑁆𑀣𑀸𑀳 𑁋 ‘‘𑀓𑀢𑀫𑀁 𑀧𑀦 𑀢𑀁 𑀛𑀸𑀦𑀁 𑀦𑀸𑀫, 𑀬𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁…𑀧𑁂… 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀯𑀁 𑀅𑀧𑀤𑁂𑀲𑀁 𑀅𑀭𑀳𑀢𑀻’’𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀣𑀸 𑀲𑀥𑀦𑁄 𑀲𑀧𑀭𑀺𑀚𑀦𑁄𑀢𑀺𑀆𑀤𑀻𑀲𑀼 𑀞𑀧𑁂𑀢𑁆𑀯𑀸 𑀥𑀦𑀜𑁆𑀘 𑀧𑀭𑀺𑀚𑀦𑀜𑁆𑀘 𑀅𑀜𑁆𑀜𑁄 𑀅𑀧𑀤𑁂𑀲𑀸𑀭𑀳𑁄 𑀳𑁄𑀢𑀺, 𑀏𑀯𑀁 𑀞𑀧𑁂𑀢𑁆𑀯𑀸 𑀯𑀺𑀢𑀓𑁆𑀓𑀸𑀤𑀺𑀥𑀫𑁆𑀫𑁂 𑀅𑀜𑁆𑀜𑀁 𑀅𑀧𑀤𑁂𑀲𑀸𑀭𑀳𑀁 𑀦𑀢𑁆𑀣𑀺. 𑀬𑀣𑀸 𑀧𑀦 𑀲𑀭𑀣𑀸 𑀲𑀧𑀢𑁆𑀢𑀺 𑀲𑁂𑀦𑀸𑀢𑀺 𑀯𑀼𑀢𑁆𑀢𑁂 𑀲𑁂𑀦𑀗𑁆𑀕𑁂𑀲𑀼𑀬𑁂𑀯 𑀲𑁂𑀦𑀸𑀲𑀫𑁆𑀫𑀼𑀢𑀺, 𑀏𑀯𑀫𑀺𑀥 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼𑀬𑁂𑀯 ¶ 𑀛𑀸𑀦𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀧𑀜𑁆𑀘𑀲𑀼? 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄, 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀏𑀢𑁂𑀲𑀼. 𑀏𑀢𑀸𑀦𑁂𑀯 𑀳𑀺𑀲𑁆𑀲 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀯𑀼𑀢𑁆𑀢𑀢𑁆𑀢𑀸 𑀏𑀓𑀕𑁆𑀕𑀢𑀸 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀘𑁂 𑀢𑀜𑁆𑀘 𑀦. 𑀓𑀲𑁆𑀫𑀸? 𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀲𑀸𑀧𑀺 𑀳𑀺 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬𑁂𑀯. 𑀢𑀲𑁆𑀫𑀸 𑀬𑀣𑀸 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺, 𑀏𑀯𑀁 𑀲𑀘𑀺𑀢𑁆𑀢𑁂𑀓𑀕𑁆𑀕𑀢𑀦𑁆𑀢𑀺 𑀇𑀥 𑀅𑀯𑀼𑀢𑁆𑀢𑁂𑀧𑀺 𑀇𑀫𑀺𑀦𑀸 𑀯𑀺𑀪𑀗𑁆𑀕𑀯𑀘𑀦𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀅𑀗𑁆𑀕𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀉𑀤𑁆𑀤𑁂𑀲𑁄 𑀓𑀢𑁄, 𑀲𑁄 𑀏𑀯 𑀢𑁂𑀦 𑀯𑀺𑀪𑀗𑁆𑀕𑁂𑀧𑀺 𑀧𑀓𑀸𑀲𑀺𑀢𑁄𑀢𑀺.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 ¶ 𑀉𑀧𑀕𑀦𑁆𑀢𑁆𑀯𑀸, 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸 𑀯𑀸, 𑀦𑀺𑀧𑁆𑀨𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀏𑀯𑀫𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀳𑀸𑀲𑀺𑀦𑁆𑀢𑀺 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀚𑁆𑀚𑀲𑀗𑁆𑀔𑀸𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀇𑀢𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀛𑀸𑀦𑀲𑀫𑀗𑁆𑀕𑀻 ¶ 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀇𑀭𑀺𑀬𑀁 𑀯𑀼𑀢𑁆𑀢𑀺𑀁 𑀧𑀸𑀮𑀦𑀁 𑀬𑀧𑀦𑀁 𑀬𑀸𑀧𑀦𑀁 𑀘𑀸𑀭𑀁 𑀯𑀺𑀳𑀸𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑁋 ‘‘𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁧𑁨).

𑀓𑀺𑀁 𑀧𑀦 𑀓𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺? 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸. 𑀓𑀢𑀭𑀁? 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁. 𑀅𑀜𑁆𑀜𑁂𑀦 𑀢𑀤𑀢𑁆𑀣𑀺𑀓𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀅𑀜𑁆𑀜𑁂𑀦𑀧𑀺 𑀏𑀢𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀪𑀸𑀯𑁂𑀢𑀩𑁆𑀩𑀁. 𑀢𑁂𑀲𑀁 𑀪𑀸𑀯𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀫𑀢𑁆𑀢𑀫𑁂𑀯 𑀓𑀭𑁄𑀫𑀸𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸

𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀯𑀺𑀢𑀓𑁆𑀓𑀲𑁆𑀲 𑀘 𑀯𑀺𑀘𑀸𑀭𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀽𑀧𑀲𑀫𑀸 𑀲𑀫𑀢𑀺𑀓𑁆𑀓𑀫𑀸; 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀦 𑀲𑀦𑁆𑀢𑀺, 𑀅𑀜𑁆𑀜𑁂𑀬𑁂𑀯 𑀳𑀺 𑀧𑀞𑀫𑀚𑁆𑀛𑀸𑀦𑁂 𑀨𑀲𑁆𑀲𑀸𑀤𑀬𑁄, 𑀅𑀜𑁆𑀜𑁂 𑀇𑀥; 𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑁄 ¶ 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀫𑀥𑀺𑀧𑁆𑀧𑁂𑀢𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁭𑁩) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸. 𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁, 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀬𑀲𑁆𑀫𑀸 𑀯𑀸 𑀢𑀁 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀽𑀧𑀲𑀫𑀦𑁂𑀦 𑀘𑁂𑀢𑁄 𑀲𑀫𑁆𑀧𑀲𑀸𑀤𑀬𑀢𑀺, 𑀢𑀲𑁆𑀫𑀸𑀧𑀺 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄𑀢𑀺 𑀏𑀯𑀁 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 ¶ 𑀘𑁂𑀢𑀲𑁄𑀢𑀺 𑀏𑀢𑀁 𑀏𑀓𑁄𑀤𑀺𑀪𑀸𑀯𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀽𑀴𑁆𑀳𑀢𑁆𑀢𑀸 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀉𑀤𑁂𑀢𑀻𑀢𑀺 ¶ 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀭𑀳𑀢𑁄 𑀯𑀸 𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀉𑀤𑀸𑀬𑀢𑀻𑀢𑀺 𑀉𑀤𑀺, 𑀉𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀏𑀓𑁄 𑀘 𑀲𑁄 𑀉𑀤𑀺 𑀘𑀸𑀢𑀺 𑀏𑀓𑁄𑀤𑀺, 𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀇𑀫𑀁 𑀏𑀓𑁄𑀤𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑀬𑀢𑀻𑀢𑀺 𑀇𑀤𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀏𑀓𑁄𑀤𑀺𑀪𑀸𑀯𑀁. 𑀲𑁄 𑀧𑀦𑀸𑀬𑀁 𑀏𑀓𑁄𑀤𑀺 𑀬𑀲𑁆𑀫𑀸 𑀘𑁂𑀢𑀲𑁄, 𑀦 𑀲𑀢𑁆𑀢𑀲𑁆𑀲 𑀦 𑀚𑀻𑀯𑀲𑁆𑀲, 𑀢𑀲𑁆𑀫𑀸 𑀏𑀢𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀅𑀬𑀜𑁆𑀘 𑀏𑀓𑁄𑀤𑀺𑀦𑀸𑀫𑀓𑁄 𑀲𑀫𑀸𑀥𑀺; 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀲𑀫𑁆𑀧𑀲𑀸𑀤𑀦𑀁 ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀤𑀼𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀫𑀺𑀯 𑀚𑀮𑀁 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀬𑀸𑀧𑀺 𑀲𑀤𑁆𑀥𑀸𑀬 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀦 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸𑀬𑁂𑀯 𑀘𑁂𑀢𑁆𑀣 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄, 𑀢𑀲𑁆𑀫𑀸 𑀏𑀓𑁄𑀤𑀺𑀪𑀸𑀯𑀦𑁆𑀢𑀺𑀧𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦 𑀮𑀤𑁆𑀥𑁄𑀓𑀸𑀲𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀩𑀮𑀯𑀲𑀤𑁆𑀥𑀸𑀲𑀳𑀸𑀬𑀧𑁆𑀧𑀝𑀺𑀮𑀸𑀪𑁂𑀦𑁂𑀯 𑀘 𑀲𑀫𑀸𑀥𑀺𑀧𑀺 𑀧𑀸𑀓𑀝𑁄; 𑀢𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀪𑀗𑁆𑀕𑁂 𑀧𑀦 ‘‘𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄, 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀦𑁂𑀢𑁂𑀦 𑀲𑀤𑁆𑀥𑀺𑀁 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀏𑀢𑀲𑁆𑀫𑀺𑀁 𑀏𑀢𑀲𑁆𑀲 𑀯𑀸 𑀯𑀺𑀢𑀓𑁆𑀓𑁄 𑀦𑀢𑁆𑀣𑀻𑀢𑀺 𑀅𑀯𑀺𑀢𑀓𑁆𑀓𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀯𑀺𑀘𑀸𑀭𑀁. 𑀯𑀺𑀪𑀗𑁆𑀕𑁂𑀧𑀺 (𑀯𑀺𑀪. 𑁫𑁭𑁬) 𑀯𑀼𑀢𑁆𑀢𑀁 ‘‘𑀇𑀢𑀺 𑀅𑀬𑀜𑁆𑀘 𑀯𑀺𑀢𑀓𑁆𑀓𑁄 ¶ 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸 𑀯𑀽𑀧𑀲𑀦𑁆𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀩𑁆𑀪𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀺𑀢𑀸 𑀩𑁆𑀬𑀧𑁆𑀧𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀘 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀇𑀫𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄, 𑀅𑀣 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀫𑁂𑀢𑀁 𑀲𑀺𑀤𑁆𑀥𑁄 𑀯𑀸𑀬𑀫𑀢𑁆𑀣𑁄, 𑀦 𑀧𑀦𑁂𑀢𑀁 𑀢𑀤𑀢𑁆𑀣𑀤𑀻𑀧𑀓𑀁; 𑀦𑀦𑀼 𑀅𑀯𑁄𑀘𑀼𑀫𑁆𑀳 𑁋 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦 𑀑𑀴𑀸𑀭𑀺𑀓𑀲𑁆𑀲 ¶ 𑀅𑀗𑁆𑀕𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀞𑀫𑀚𑁆𑀛𑀸𑀦𑀢𑁄 𑀧𑀭𑁂𑀲𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 ¶ 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺 𑀤𑀻𑀧𑀦𑀢𑁆𑀣𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺.

𑀅𑀧𑀺𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀲𑀫𑁆𑀧𑀲𑀸𑀤𑀦𑀁, 𑀦 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀲𑁆𑀲. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸 𑀏𑀓𑁄𑀤𑀺𑀪𑀸𑀯𑀁 𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀺𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸, 𑀦 𑀧𑀞𑀫𑀚𑁆𑀛𑀸𑀦𑀫𑀺𑀯 𑀘 𑀅𑀗𑁆𑀕𑀧𑀸𑀢𑀼𑀪𑀸𑀯𑀸𑀢𑀺 𑀏𑀯𑀁 𑀲𑀫𑁆𑀧𑀲𑀸𑀤𑀦𑀏𑀓𑁄𑀤𑀺𑀪𑀸𑀯𑀸𑀦𑀁 𑀳𑁂𑀢𑀼𑀧𑀭𑀺𑀤𑀻𑀧𑀓𑀫𑀺𑀤𑀁 𑀯𑀘𑀦𑀁. 𑀢𑀣𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀇𑀤𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀦 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀺𑀬 𑀘 𑀅𑀪𑀸𑀯𑀸𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀤𑀻𑀧𑀓𑀜𑁆𑀘, 𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀧𑀭𑀺𑀤𑀻𑀧𑀓𑀫𑁂𑀯 𑀧𑀦 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀇𑀤𑀁 𑀯𑀘𑀦𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀁 𑀯𑀢𑁆𑀯𑀸𑀧𑀺 𑀧𑀼𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑀲𑀫𑀸𑀥𑀺𑀚𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀯𑀸 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀞𑀫𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀚𑀸𑀢𑀁, 𑀅𑀣 𑀔𑁄 𑀅𑀬𑀫𑁂𑀯 ‘‘𑀲𑀫𑀸𑀥𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑁂𑀦 𑀅𑀢𑀺𑀯𑀺𑀬 𑀅𑀘𑀮𑀢𑁆𑀢𑀸 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀘. 𑀢𑀲𑁆𑀫𑀸 𑀇𑀫𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀇𑀤𑀫𑁂𑀯 ‘‘𑀲𑀫𑀸𑀥𑀺𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀤𑀼𑀢𑀺𑀬𑀁, 𑀇𑀤𑀁 𑀤𑀼𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀤𑀼𑀢𑀺𑀬𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁 𑀳𑁄𑀢𑀺, 𑀏𑀯𑀫𑀺𑀤𑀁 𑀲𑀫𑁆𑀧𑀲𑀸𑀤𑀸𑀤𑀻𑀳𑀺 ‘‘𑀘𑀢𑀼𑀭𑀗𑁆𑀕𑀺𑀓’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑁄, 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁮𑁦). 𑀧𑀭𑀺𑀬𑀸𑀬𑁄𑀬𑁂𑀯 𑀘𑁂𑀲𑁄. 𑀲𑀫𑁆𑀧𑀲𑀸𑀤𑀦𑀁 𑀧𑀦 𑀞𑀧𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀺𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀺𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺? 𑀧𑀻𑀢𑀺, 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁧). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸

𑀧𑀻𑀢𑀺𑀬𑀸 ¶ 𑀘 𑀯𑀺𑀭𑀸𑀕𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀢𑁆𑀣𑀸𑀬𑁂𑀯 𑀧𑀻𑀢𑀺. 𑀯𑀺𑀭𑀸𑀕𑁄𑀢𑀺 𑀢𑀲𑁆𑀲𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 ‘‘𑀘’’ 𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀲𑁄 ¶ 𑀳𑀺 𑀯𑀽𑀧𑀲𑀫𑀁 𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀯𑀸. 𑀢𑀢𑁆𑀣 𑀬𑀤𑀸 𑀯𑀽𑀧𑀲𑀫𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸 𑀘, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀽𑀧𑀲𑀫𑀸 𑀘𑀸𑀢𑀺 𑀏𑀯𑀁 𑀬𑁄𑀚𑀦𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬𑀁 𑀯𑀺𑀭𑀸𑀕𑁄 𑀚𑀺𑀕𑀼𑀘𑁆𑀙𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀸 𑀘 𑀯𑀽𑀧𑀲𑀫𑀸 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀤𑀸 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀲𑁆𑀲𑀸 𑀘 𑀬𑁄𑀚𑀦𑀸𑀬𑀁 𑀯𑀺𑀭𑀸𑀕𑁄 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀸𑀫𑀜𑁆𑀘𑁂𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀯𑀽𑀧𑀲𑀦𑁆𑀢𑀸 𑀇𑀫𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀫𑀕𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘𑁂𑀢𑀁 𑀯𑀼𑀢𑁆𑀢𑀁. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺 𑁋 ‘‘𑀦𑀽𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑁄 𑀫𑀕𑁆𑀕𑁄 𑀇𑀫𑀲𑁆𑀲 𑀛𑀸𑀦𑀲𑁆𑀲𑀸’’𑀢𑀺. 𑀬𑀣𑀸 𑀘 𑀢𑀢𑀺𑀬𑁂 𑀅𑀭𑀺𑀬𑀫𑀕𑁆𑀕𑁂 𑀅𑀧𑁆𑀧𑀳𑀻𑀦𑀸𑀦𑀫𑁆𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸’’𑀢𑀺 (𑀫. 𑀦𑀺. 𑁨.𑁧𑁩𑁨) 𑀏𑀯𑀁 𑀧𑀳𑀸𑀦𑀁 𑀯𑀼𑀘𑁆𑀘𑀫𑀸𑀦𑀁 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑀸𑀦𑀁 𑀉𑀲𑁆𑀲𑀸𑀳𑀚𑀦𑀓𑀁; 𑀏𑀯𑀫𑁂𑀯𑀁 𑀇𑀥 𑀅𑀯𑀽𑀧𑀲𑀦𑁆𑀢𑀸𑀦𑀫𑁆𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀯𑀡𑁆𑀡𑀪𑀡𑀦𑀁 𑀳𑁄𑀢𑀺. 𑀢𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑁋 ‘‘𑀧𑀻𑀢𑀺𑀬𑀸 𑀘 𑀲𑀫𑀢𑀺𑀓𑁆𑀓𑀫𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀜𑁆𑀘 𑀯𑀽𑀧𑀲𑀫𑀸’’𑀢𑀺.

𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺𑀦𑁆𑀢𑀺 𑀏𑀢𑁆𑀣 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀲𑀫𑀁 𑀧𑀲𑁆𑀲𑀢𑀺, 𑀅𑀧𑀓𑁆𑀔𑀧𑀢𑀺𑀢𑀸𑀯 𑀳𑀼𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀬 𑀯𑀺𑀲𑀤𑀸𑀬 𑀯𑀺𑀧𑀼𑀮𑀸𑀬 𑀣𑀸𑀫𑀕𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻 ‘‘𑀉𑀧𑁂𑀓𑁆𑀔𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀤𑀲𑀯𑀺𑀥𑀸 𑀳𑁄𑀢𑀺 𑁋 𑀙𑀴𑀗𑁆𑀕𑀼𑀧𑁂𑀓𑁆𑀔𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸, 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸, 𑀯𑀻𑀭𑀺𑀬𑀼𑀧𑁂𑀓𑁆𑀔𑀸, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀯𑁂𑀤𑀦𑀼𑀧𑁂𑀓𑁆𑀔𑀸, 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸, 𑀛𑀸𑀦𑀼𑀧𑁂𑀓𑁆𑀔𑀸, 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸𑀢𑀺. 𑀏𑀯𑀫𑀬𑀁 𑀤𑀲𑀯𑀺𑀥𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄 𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄, 𑀔𑀦𑁆𑀥𑀲𑀗𑁆𑀕𑀳-𑀏𑀓𑀓𑁆𑀔𑀡𑀓𑀼𑀲𑀮𑀢𑁆𑀢𑀺𑀓𑀲𑀗𑁆𑀔𑁂𑀧𑀯𑀲𑁂𑀦 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀯𑀼𑀘𑁆𑀘𑀫𑀸𑀦𑀸 𑀯𑀺𑀦𑀬𑀦𑀺𑀤𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀓𑀭𑁄𑀢𑀻𑀢𑀺 𑀦 𑀯𑀼𑀢𑁆𑀢𑀸. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢𑀼𑀧𑁂𑀓𑁆𑀔𑀸 𑀫𑀚𑁆𑀛𑀢𑁆𑀢𑀮𑀓𑁆𑀔𑀡𑀸, 𑀅𑀦𑀸𑀪𑁄𑀕𑀭𑀲𑀸, 𑀅𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀻𑀢𑀺𑀯𑀺𑀭𑀸𑀕𑀧𑀤𑀝𑁆𑀞𑀸𑀦𑀸𑀢𑀺.

𑀏𑀢𑁆𑀣𑀸𑀳 ¶ 𑁋 𑀦𑀦𑀼 𑀘𑀸𑀬𑀁 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀳𑁄𑀢𑀺, 𑀲𑀸 𑀘 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀭𑀸𑀧𑀺 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺’’𑀦𑁆𑀢𑀺 𑀏𑀯𑀫𑀬𑀁 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀲𑀸 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺? 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁄. 𑀅𑀧𑀭𑀺𑀩𑁆𑀬𑀢𑁆𑀢𑀜𑁆𑀳𑀺 ¶ 𑀢𑀲𑁆𑀲𑀸 𑀢𑀢𑁆𑀣 𑀓𑀺𑀘𑁆𑀘𑀁, 𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑁆𑀢𑀸. 𑀇𑀥 𑀧𑀦𑀸𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀲𑀺𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸 𑀚𑀸𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀢𑀺.

𑀦𑀺𑀝𑁆𑀞𑀺𑀢𑀸 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺’’𑀦𑁆𑀢𑀺 𑀏𑀢𑀲𑁆𑀲 𑀲𑀩𑁆𑀩𑀲𑁄 𑀅𑀢𑁆𑀣𑀯𑀡𑁆𑀡𑀦𑀸.

𑀇𑀤𑀸𑀦𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀲𑀭𑀢𑀻𑀢𑀺 𑀲𑀢𑁄, 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄. 𑀧𑀼𑀕𑁆𑀕𑀮𑁂𑀦 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀭𑀡𑀮𑀓𑁆𑀔𑀡𑀸 𑀲𑀢𑀺, 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸; 𑀅𑀲𑀫𑁆𑀫𑁄𑀳𑀮𑀓𑁆𑀔𑀡𑀁 𑀲𑀫𑁆𑀧𑀚𑀜𑁆𑀜𑀁, 𑀢𑀻𑀭𑀡𑀭𑀲𑀁, 𑀧𑀯𑀺𑀘𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀼𑀭𑀺𑀫𑀚𑁆𑀛𑀸𑀦𑁂𑀲𑀼𑀧𑀺 𑀅𑀢𑁆𑀣𑀺, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀳𑀺 𑀅𑀲𑀫𑁆𑀧𑀚𑀸𑀦𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀫𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀅𑀧𑁆𑀧𑀦𑀸; 𑀑𑀴𑀸𑀭𑀺𑀓𑀢𑁆𑀢𑀸 𑀧𑀦 𑀢𑁂𑀲𑀁 𑀛𑀸𑀦𑀸𑀦𑀁 𑀪𑀽𑀫𑀺𑀬𑀁 𑀯𑀺𑀬 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀲𑀼𑀔𑀸 𑀳𑁄𑀢𑀺, 𑀅𑀩𑁆𑀬𑀢𑁆𑀢𑀁 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀁. 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀦 𑀲𑀼𑀔𑀼𑀫𑀢𑁆𑀢𑀸 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀔𑀼𑀭𑀥𑀸𑀭𑀸𑀬𑀁 𑀯𑀺𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸𑀬𑁂𑀯 𑀘𑀺𑀢𑁆𑀢𑀲𑁆𑀲 𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀇𑀥𑁂𑀯 𑀯𑀼𑀢𑁆𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀬𑀣𑀸𑀧𑀺 𑀥𑁂𑀦𑀼𑀧𑀕𑁄 𑀯𑀘𑁆𑀙𑁄 𑀥𑁂𑀦𑀼𑀢𑁄 𑀅𑀧𑀦𑀻𑀢𑁄 𑀅𑀭𑀓𑁆𑀔𑀺𑀬𑀫𑀸𑀦𑁄 𑀧𑀼𑀦𑀤𑁂𑀯 𑀥𑁂𑀦𑀼𑀁 𑀉𑀧𑀕𑀘𑁆𑀙𑀢𑀺; 𑀏𑀯𑀫𑀺𑀤𑀁 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀧𑀻𑀢𑀺𑀢𑁄 𑀅𑀧𑀦𑀻𑀢𑀫𑁆𑀧𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀭𑀓𑁆𑀔𑁂𑀦 𑀅𑀭𑀓𑁆𑀔𑀺𑀬𑀫𑀸𑀦𑀁 𑀧𑀼𑀦𑀤𑁂𑀯 𑀧𑀻𑀢𑀺𑀁 𑀉𑀧𑀕𑀘𑁆𑀙𑁂𑀬𑁆𑀬 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸. 𑀲𑀼𑀔𑁂 𑀯𑀸𑀧𑀺 𑀲𑀢𑁆𑀢𑀸 𑀭𑀚𑁆𑀚𑀦𑁆𑀢𑀺, 𑀇𑀤𑀜𑁆𑀘 𑀅𑀢𑀺𑀫𑀥𑀼𑀭𑀁 𑀲𑀼𑀔𑀁, 𑀢𑀢𑁄 𑀧𑀭𑀁 𑀲𑀼𑀔𑀸𑀪𑀸𑀯𑀸 ¶ . 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀼𑀪𑀸𑀯𑁂𑀦 𑀧𑀦𑁂𑀢𑁆𑀣 𑀲𑀼𑀔𑁂 𑀅𑀲𑀸𑀭𑀚𑁆𑀚𑀦𑀸 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀇𑀥𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀺𑀦𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀦𑀸𑀪𑁄𑀕𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀬𑀁 𑀯𑀸 𑀢𑀁 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀁𑀲𑀫𑀼𑀝𑁆𑀞𑀸𑀦𑁂𑀦𑀲𑁆𑀲 𑀬𑀲𑁆𑀫𑀸 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀭𑀽𑀧𑀓𑀸𑀬𑁄 𑀨𑀼𑀝𑁄, 𑀬𑀲𑁆𑀲 ¶ 𑀨𑀼𑀝𑀢𑁆𑀢𑀸 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀺 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺’’𑀦𑁆𑀢𑀺 𑀆𑀳.

𑀇𑀤𑀸𑀦𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀬𑀁𑀛𑀸𑀦𑀳𑁂𑀢𑀼 𑀬𑀁𑀛𑀸𑀦𑀓𑀸𑀭𑀡𑀸 𑀢𑀁 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 ¶ 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀧𑀲𑀁𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀦𑁆𑀢𑀺? ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺. 𑀢𑀁 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀦𑁆𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦 𑀢𑀁 𑀢𑁂 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺? 𑀧𑀲𑀁𑀲𑀸𑀭𑀳𑀢𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀅𑀢𑀺𑀫𑀥𑀼𑀭𑀲𑀼𑀔𑁂 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀧𑀺 𑀢𑀢𑀺𑀬𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀓𑁄, 𑀦 𑀢𑀢𑁆𑀣 𑀲𑀼𑀔𑀸𑀪𑀺𑀲𑀗𑁆𑀕𑁂𑀦 𑀆𑀓𑀟𑁆𑀠𑀻𑀬𑀢𑀺, 𑀬𑀣𑀸 𑀘 𑀧𑀻𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺; 𑀏𑀯𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀲𑀢𑀺𑀫𑀸. 𑀬𑀲𑁆𑀫𑀸 𑀘 𑀅𑀭𑀺𑀬𑀓𑀦𑁆𑀢𑀁 𑀅𑀭𑀺𑀬𑀚𑀦𑀲𑁂𑀯𑀺𑀢𑀫𑁂𑀯 𑀘 𑀅𑀲𑀁𑀓𑀺𑀮𑀺𑀝𑁆𑀞𑀁 𑀲𑀼𑀔𑀁 𑀦𑀸𑀫𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀢𑀲𑁆𑀫𑀸 𑀧𑀲𑀁𑀲𑀸𑀭𑀳𑁄. 𑀇𑀢𑀺 𑀧𑀲𑀁𑀲𑀸𑀭𑀳𑀢𑁄 𑀦𑀁 𑀅𑀭𑀺𑀬𑀸 𑀢𑁂 𑀏𑀯𑀁 𑀧𑀲𑀁𑀲𑀸𑀳𑁂𑀢𑀼𑀪𑀽𑀢𑁂 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀸 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺 𑀏𑀯𑀁 𑀧𑀲𑀁𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀢𑀢𑀺𑀬𑀁. 𑀇𑀤𑀁 𑀢𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀢𑀢𑀺𑀬𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀘 𑀬𑀣𑀸 𑀤𑀼𑀢𑀺𑀬𑀁 𑀲𑀫𑁆𑀧𑀲𑀸𑀤𑀸𑀤𑀻𑀳𑀺 𑀘𑀢𑀼𑀭𑀗𑁆𑀕𑀺𑀓𑀁; 𑀏𑀯𑀫𑀺𑀤𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁯𑁧). 𑀧𑀭𑀺𑀬𑀸𑀬𑁄𑀬𑁂𑀯 𑀘𑁂𑀲𑁄. 𑀉𑀧𑁂𑀓𑁆𑀔𑀸𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀺 𑀧𑀦 𑀞𑀧𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺 ¶ ? 𑀲𑀼𑀔𑀁, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁩). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸

𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀓𑀸𑀬𑀺𑀓𑀲𑀼𑀔𑀲𑁆𑀲 𑀘 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸. 𑀧𑀼𑀩𑁆𑀩𑁂𑀯𑀸𑀢𑀺 𑀢𑀜𑁆𑀘 𑀔𑁄 𑀧𑀼𑀩𑁆𑀩𑁂𑀯, 𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀔𑀡𑁂 ¶ . 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀢𑀺 𑀘𑁂𑀢𑀲𑀺𑀓𑀲𑀼𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀘𑀸𑀢𑀺 𑀇𑀫𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀩𑁆𑀩𑁂𑀯 𑀅𑀢𑁆𑀣𑀗𑁆𑀕𑀫𑀸 𑀧𑀳𑀸𑀦𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀤𑀸 𑀧𑀦 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺? 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂. 𑀲𑁄𑀫𑀦𑀲𑁆𑀲𑀜𑁆𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀢𑀺, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀸𑀦𑀺 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂𑀲𑀼. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀓𑁆𑀓𑀫𑁂𑀦 𑀅𑀯𑀼𑀢𑁆𑀢𑀸𑀦𑀁, 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑁂𑀯 𑀇𑀥𑀸𑀧𑀺 𑀯𑀼𑀢𑁆𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀁 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 ¶ 𑀧𑀦𑁂𑀢𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲𑀼𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁… 𑀲𑀼𑀔𑀺𑀦𑁆𑀤𑁆𑀭𑀺𑀬𑀁… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁦) 𑀏𑀯𑀁 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺? 𑀅𑀢𑀺𑀲𑀬𑀦𑀺𑀭𑁄𑀥𑀢𑁆𑀢𑀸. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀳𑀺 𑀦𑁂𑀲𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼, 𑀦 𑀦𑀺𑀭𑁄𑀥𑁄𑀬𑁂𑀯; 𑀦𑀺𑀭𑁄𑀥𑁄𑀬𑁂𑀯 𑀧𑀦 𑀉𑀧𑀘𑀸𑀭𑀓𑁆𑀔𑀡𑁂, 𑀦𑀸𑀢𑀺𑀲𑀬𑀦𑀺𑀭𑁄𑀥𑁄. 𑀢𑀣𑀸 𑀳𑀺 𑀦𑀸𑀦𑀸𑀯𑀚𑁆𑀚𑀦𑁂 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀟𑀁𑀲𑀫𑀓𑀲𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁂𑀦 𑀯𑀸 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁. 𑀉𑀧𑀘𑀸𑀭𑁂 𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑁂𑀢𑀁 𑀦 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺; 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸. 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀧𑀦 𑀧𑀻𑀢𑀺𑀨𑀭𑀡𑁂𑀦 𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀲𑀼𑀔𑁄𑀓𑁆𑀓𑀦𑁆𑀢𑀓𑀸𑀬𑀲𑁆𑀲 𑀘 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁; 𑀧𑀝𑀺𑀧𑀓𑁆𑀔𑁂𑀦 𑀯𑀺𑀳𑀢𑀢𑁆𑀢𑀸. 𑀦𑀸𑀦𑀸𑀯𑀚𑁆𑀚𑀦𑁂 𑀏𑀯 ¶ 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀬𑀲𑁆𑀫𑀸 𑀏𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑁆𑀧𑀘𑁆𑀘𑀬𑁂𑀧𑀺 𑀓𑀸𑀬𑀓𑀺𑀮𑀫𑀣𑁂 𑀘𑀺𑀢𑁆𑀢𑀼𑀧𑀖𑀸𑀢𑁂 𑀘 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁂 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂. 𑀅𑀧𑁆𑀧𑀳𑀻𑀦𑀸 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺; 𑀅𑀧𑁆𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀦 𑀢𑁆𑀯𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑁂; 𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀓𑀸𑀬𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀢𑀢𑀺𑀬𑀚𑁆𑀛𑀸𑀦𑁂. 𑀢𑀢𑀺𑀬𑀚𑁆𑀛𑀸𑀦𑁂 𑀳𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 ¶ 𑀧𑀻𑀢𑀺 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑀸𑀢𑀺. 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀲𑀦𑁆𑀦𑀢𑁆𑀢𑀸, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀫𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀘 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀢𑀲𑁆𑀫𑀸 𑀏𑀯 𑀘 ‘‘𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺.

𑀏𑀢𑁆𑀣𑀸𑀳 𑁋 ‘‘𑀅𑀣𑁂𑀯𑀁 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲𑀽𑀧𑀘𑀸𑀭𑁂 𑀧𑀳𑀻𑀦𑀸𑀧𑀺 𑀏𑀢𑀸 𑀯𑁂𑀤𑀦𑀸 𑀇𑀥 𑀓𑀲𑁆𑀫𑀸 𑀲𑀫𑀸𑀳𑀭𑀻’’𑀢𑀺? 𑀲𑀼𑀔𑀕𑁆𑀕𑀳𑀡𑀢𑁆𑀣𑀁. 𑀬𑀸 𑀳𑀺 𑀅𑀬𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔’’𑀦𑁆𑀢𑀺 𑀏𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀸 𑀲𑀼𑀔𑀼𑀫𑀸 𑀅𑀢𑀺𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀕𑀳𑁂𑀢𑀼𑀁. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀤𑀼𑀝𑁆𑀞𑀲𑁆𑀲 𑀬𑀣𑀸 𑀯𑀸 𑀢𑀣𑀸 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀕𑁄𑀡𑀲𑁆𑀲 𑀕𑀳𑀡𑀢𑁆𑀣𑀁 𑀕𑁄𑀧𑁄 𑀏𑀓𑀲𑁆𑀫𑀺𑀁 𑀯𑀚𑁂 𑀲𑀩𑁆𑀩𑁂 𑀕𑀸𑀯𑁄 𑀲𑀫𑀸𑀳𑀭𑀢𑀺, 𑀅𑀣𑁂𑀓𑁂𑀓𑀁 𑀦𑀻𑀳𑀭𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁 ‘‘𑀅𑀬𑀁 𑀲𑁄, 𑀕𑀡𑁆𑀳𑀣 𑀦’’𑀦𑁆𑀢𑀺 𑀢𑀫𑁆𑀧𑀺 𑀕𑀸𑀳𑀸𑀧𑀬𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀩𑁆𑀩𑀸 𑀏𑀢𑀸 𑀲𑀫𑀸𑀳𑀭𑀺. 𑀏𑀯𑀜𑁆𑀳𑀺 ¶ 𑀲𑀫𑀸𑀳𑀝𑀸 𑀏𑀢𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀁 𑀦𑁂𑀯 𑀲𑀼𑀔𑀁 𑀦 𑀤𑀼𑀓𑁆𑀔𑀁 𑀦 𑀲𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀁, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀏𑀲𑀸 𑀕𑀸𑀳𑀬𑀺𑀢𑀼𑀁.

𑀅𑀧𑀺𑀘 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀧𑀺 𑀏𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀧𑁆𑀧𑀳𑀸𑀦𑀸𑀤𑀬𑁄 𑀳𑀺 𑀢𑀲𑁆𑀲𑀸 𑀧𑀘𑁆𑀘𑀬𑀸. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 ¶ 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 (𑀫. 𑀦𑀺. 𑁧.𑁪𑁫𑁮). 𑀬𑀣𑀸 𑀯𑀸 𑀅𑀜𑁆𑀜𑀢𑁆𑀣 𑀧𑀳𑀻𑀦𑀸𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄 𑀢𑀢𑀺𑀬𑀫𑀕𑁆𑀕𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀢𑀢𑁆𑀣 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸; 𑀏𑀯𑀁 𑀯𑀡𑁆𑀡𑀪𑀡𑀦𑀢𑁆𑀣𑀫𑁆𑀧𑁂𑀢𑀲𑁆𑀲 𑀛𑀸𑀦𑀲𑁆𑀲𑁂𑀢𑀸 𑀇𑀥 𑀯𑀼𑀢𑁆𑀢𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑀖𑀸𑀢𑁂𑀦 𑀯𑀸 𑀏𑀢𑁆𑀣 𑀭𑀸𑀕𑀤𑁄𑀲𑀸𑀦𑀁 𑀅𑀢𑀺𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑁆𑀧𑁂𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀳𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲, 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲, 𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲. 𑀲𑀼𑀔𑀸𑀤𑀺𑀖𑀸𑀢𑁂𑀦 𑀘 𑀢𑁂 𑀲𑀧𑁆𑀧𑀘𑁆𑀘𑀬𑀸 𑀭𑀸𑀕𑀤𑁄𑀲𑀸 𑀳𑀢𑀸𑀢𑀺 𑀅𑀢𑀺𑀤𑀽𑀭𑁂 𑀳𑁄𑀦𑁆𑀢𑀻𑀢𑀺.

𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀤𑀼𑀓𑁆𑀔𑀸𑀪𑀸𑀯𑁂𑀦 𑀅𑀤𑀼𑀓𑁆𑀔𑀁, 𑀲𑀼𑀔𑀸𑀪𑀸𑀯𑁂𑀦 𑀅𑀲𑀼𑀔𑀁. 𑀏𑀢𑁂𑀦𑁂𑀢𑁆𑀣 𑀤𑀼𑀓𑁆𑀔𑀲𑀼𑀔𑀧𑀝𑀺𑀧𑀓𑁆𑀔𑀪𑀽𑀢𑀁 𑀢𑀢𑀺𑀬𑀯𑁂𑀤𑀦𑀁 𑀤𑀻𑀧𑁂𑀢𑀺, 𑀦 𑀤𑀼𑀓𑁆𑀔𑀲𑀼𑀔𑀸𑀪𑀸𑀯𑀫𑀢𑁆𑀢𑀁. 𑀢𑀢𑀺𑀬𑀯𑁂𑀤𑀦𑀸 𑀦𑀸𑀫 𑁋 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀉𑀧𑁂𑀓𑁆𑀔𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸, 𑀫𑀚𑁆𑀛𑀢𑁆𑀢𑀭𑀲𑀸, 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀼𑀔𑀦𑀺𑀭𑁄𑀥𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀛𑀸𑀦𑁂 𑀲𑀼𑀧𑀭𑀺𑀲𑀼𑀤𑁆𑀥𑀸 𑀲𑀢𑀺. 𑀬𑀸 𑀘 𑀢𑀲𑁆𑀲𑀸 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀲𑀸 𑀉𑀧𑁂𑀓𑁆𑀔𑀸𑀬 𑀓𑀢𑀸 𑀦 𑀅𑀜𑁆𑀜𑁂𑀦; 𑀢𑀲𑁆𑀫𑀸 𑀏𑀢𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀲𑀢𑀺 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀯𑀺𑀲𑀤𑀸 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’’𑀦𑁆𑀢𑀺 (𑀯𑀺𑀪. 𑁫𑁯𑁭). 𑀬𑀸𑀬 𑀘 𑀉𑀧𑁂𑀓𑁆𑀔𑀸𑀬 𑀏𑀢𑁆𑀣 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺 𑀳𑁄𑀢𑀺, 𑀲𑀸 𑀅𑀢𑁆𑀣𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀸𑀬 𑀲𑀢𑀺𑀬𑁂𑀯 𑀧𑀭𑀺𑀲𑀼𑀤𑁆𑀥𑀸, 𑀅𑀧𑀺𑀘 𑀔𑁄 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸; 𑀲𑀢𑀺𑀲𑀻𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀼𑀢𑁆𑀢𑀸.

𑀢𑀢𑁆𑀣 ¶ 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀉𑀧𑁂𑀓𑁆𑀔𑀸 𑀳𑁂𑀝𑁆𑀞𑀸𑀧𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀯𑀺𑀚𑁆𑀚𑀢𑀺, 𑀬𑀣𑀸 𑀧𑀦 𑀤𑀺𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸 𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀸 𑀅𑀮𑀸𑀪𑀸 𑀤𑀺𑀯𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀘𑀦𑁆𑀤𑀮𑁂𑀔𑀸 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀅𑀧𑀭𑀺𑀬𑁄𑀤𑀸𑀢𑀸; 𑀏𑀯𑀫𑀬𑀫𑁆𑀧𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀅𑀮𑀸𑀪𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀧𑀞𑀫𑀸𑀤𑀺𑀚𑁆𑀛𑀸𑀦𑀪𑁂𑀤𑁂𑀲𑀼 𑀅𑀧𑀭𑀺𑀲𑀼𑀤𑁆𑀥𑀸 ¶ 𑀳𑁄𑀢𑀺. 𑀢𑀲𑁆𑀲𑀸 𑀘 ¶ 𑀅𑀧𑀭𑀺𑀲𑀼𑀤𑁆𑀥𑀸𑀬 𑀤𑀺𑀯𑀸 𑀅𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀅𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀼 𑀏𑀓𑀫𑁆𑀧𑀺 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀇𑀥 𑀧𑀦 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀢𑁂𑀚𑀸𑀪𑀺𑀪𑀯𑀸𑀪𑀸𑀯𑀸 𑀲𑀪𑀸𑀕𑀸𑀬 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀭𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑀸 𑀅𑀬𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀘𑀦𑁆𑀤𑀮𑁂𑀔𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀸, 𑀢𑀲𑁆𑀲𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀘𑀦𑁆𑀤𑀮𑁂𑀔𑀸𑀬 𑀧𑀪𑀸 𑀯𑀺𑀬 𑀲𑀳𑀚𑀸𑀢𑀸𑀧𑀺 𑀲𑀢𑀺𑀆𑀤𑀬𑁄 𑀧𑀭𑀺𑀲𑀼𑀤𑁆𑀥𑀸 𑀳𑁄𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀸, 𑀢𑀲𑁆𑀫𑀸 𑀇𑀤𑀫𑁂𑀯 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀘𑀢𑀼𑀢𑁆𑀣𑀁. 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀫𑀸𑀧𑀚𑁆𑀚𑀢𑀻𑀢𑀺𑀧𑀺 𑀘𑀢𑀼𑀢𑁆𑀣𑀁. 𑀛𑀸𑀦𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀢𑀢𑀺𑀬𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀧𑀜𑁆𑀘𑀗𑁆𑀕𑀺𑀓𑀁; 𑀏𑀯𑀫𑀺𑀤𑀁 𑀉𑀧𑁂𑀓𑁆𑀔𑀸𑀤𑀻𑀳𑀺 𑀢𑀺𑀯𑀗𑁆𑀕𑀺𑀓𑀁. 𑀬𑀣𑀸𑀳 𑁋 ‘‘𑀛𑀸𑀦𑀦𑁆𑀢𑀺 𑀉𑀧𑁂𑀓𑁆𑀔𑀸, 𑀲𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺. 𑀧𑀭𑀺𑀬𑀸𑀬𑁄 𑀏𑀯 𑀘𑁂𑀲𑁄. 𑀞𑀧𑁂𑀢𑁆𑀯𑀸 𑀧𑀦 𑀲𑀢𑀺𑀁 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀯𑀗𑁆𑀕𑀺𑀓𑀁 𑀛𑀸𑀦𑀁 𑀳𑁄𑀢𑀺? 𑀉𑀧𑁂𑀓𑁆𑀔𑀸, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀥. 𑀲. 𑁧𑁬𑁫). 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸

𑁧𑁨. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀲𑀜𑁆𑀘𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺, 𑀓𑁂𑀲𑀜𑁆𑀘𑀺 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀳𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 ¶ 𑀇𑀘𑁆𑀘𑁂𑀯𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 ‘‘𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑀬𑀸 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀣𑁂𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀦𑀺𑀭𑁄𑀥𑀧𑀸𑀤𑀓𑀸𑀦𑀺 ¶ 𑀳𑁄𑀦𑁆𑀢𑀺. 𑀬𑁂 𑀧𑀦 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀳𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂𑀲𑀁 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀺 𑀳𑁄𑀦𑁆𑀢𑀺.

𑀪𑀕𑀯𑀢𑀸 ¶ 𑀧𑀦𑀺𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑀁 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀜𑁆𑀘𑁂𑀯 𑀅𑀳𑁄𑀲𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀜𑁆𑀘 𑀦𑀺𑀭𑁄𑀥𑀧𑀸𑀤𑀓𑀜𑁆𑀘 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀜𑁆𑀘 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀲𑀜𑁆𑀘 𑀕𑀼𑀡𑀸𑀦𑀁 𑀤𑀸𑀬𑀓𑀁 𑀅𑀳𑁄𑀲𑀺, 𑀢𑁂𑀲𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑁄𑀢𑀺 𑀲𑁄 𑀅𑀳𑀁. 𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀇𑀫𑀺𑀦𑀸 𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀳𑀺𑀢𑁂𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀧𑀭𑀺𑀲𑀼𑀤𑁆𑀥𑁂𑀢𑀺𑀆𑀤𑀻𑀲𑀼 𑀧𑀦 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦 𑀯𑀺𑀳𑀢𑀭𑀸𑀕𑀸𑀤𑀺𑀅𑀗𑁆𑀕𑀡𑀢𑁆𑀢𑀸 𑀅𑀦𑀗𑁆𑀕𑀡𑁂. 𑀅𑀦𑀗𑁆𑀕𑀡𑀢𑁆𑀢𑀸𑀬𑁂𑀯 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂; 𑀅𑀗𑁆𑀕𑀡𑁂𑀦 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺. 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑁂, 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑁂 𑀯𑀢𑁆𑀢𑀫𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀤𑀼𑀢𑁆𑀢𑀸𑀬𑁂𑀯 𑀘 𑀓𑀫𑁆𑀫𑀦𑀺𑀬𑁂, 𑀓𑀫𑁆𑀫𑀓𑁆𑀔𑀫𑁂 𑀓𑀫𑁆𑀫𑀬𑁄𑀕𑁆𑀕𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼 𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀲𑀼𑀥𑀦𑁆𑀢𑀫𑀺𑀯 𑀲𑀼𑀯𑀡𑁆𑀡𑀁, 𑀢𑀤𑀼𑀪𑀬𑀫𑁆𑀧𑀺 𑀘 𑀲𑀼𑀪𑀸𑀯𑀺𑀢𑀢𑁆𑀢𑀸 𑀏𑀯. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀫𑀼𑀤𑀼 𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁨𑁨).

𑀏𑀢𑁂𑀲𑀼 ¶ 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀞𑀺𑀢𑀢𑁆𑀢𑀸 𑀞𑀺𑀢𑁂. 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂, 𑀅𑀘𑀮𑁂 𑀦𑀺𑀭𑀺𑀜𑁆𑀚𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂, 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂. 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂𑀦 𑀦 𑀇𑀜𑁆𑀚𑀢𑀺, 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀁 𑀓𑁄𑀲𑀚𑁆𑀚𑁂𑀦 𑀦 𑀇𑀜𑁆𑀚𑀢𑀺, 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀁 𑀧𑀫𑀸𑀤𑁂𑀦 𑀦 𑀇𑀜𑁆𑀚𑀢𑀺, 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑁆𑀥𑀘𑁆𑀘𑁂𑀦 𑀦 𑀇𑀜𑁆𑀚𑀢𑀺, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀺, 𑀑𑀪𑀸𑀲𑀕𑀢𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀺. 𑀇𑀫𑁂𑀳𑀺 ¶ 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀅𑀧𑀭𑁄 𑀦𑀬𑁄 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂. 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦 𑀧𑀭𑀺𑀬𑁄𑀤𑀸𑀢𑁂. 𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀘𑀺𑀢𑁆𑀢𑀽𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀅𑀦𑀗𑁆𑀕𑀡𑀯𑀢𑁆𑀣𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑀁. 𑀯𑀲𑀺𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼𑀪𑀽𑀢𑁂. 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑁂𑀦 𑀓𑀫𑁆𑀫𑀦𑀺𑀬𑁂. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀡𑀻𑀢𑀪𑀸𑀯𑀽𑀧𑀕𑀫𑁂𑀦 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 ¶ . 𑀬𑀣𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺; 𑀏𑀯𑀁 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬𑀸𑀢𑀺 𑀏𑀯𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑁂 𑀚𑀸𑀢𑁂 𑀏𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀺 𑀬𑀁 𑀜𑀸𑀡𑀁 𑀢𑀤𑀢𑁆𑀣𑀸𑀬. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑁄𑀢𑀺 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸. 𑀦𑀺𑀯𑀼𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀦𑀺𑀯𑀼𑀢𑁆𑀣𑀸, 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀢𑁆𑀣𑀸, 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀜𑀸𑀡𑀦𑁆𑀢𑀺 𑀢𑀸𑀬 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁. 𑀏𑀯𑀫𑀺𑀫𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀅𑀢𑁆𑀣𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀏𑀢𑀲𑁆𑀲 𑀜𑀸𑀡𑀲𑁆𑀲 𑀅𑀥𑀺𑀕𑀫𑀸𑀬 𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀅𑀪𑀺𑀦𑀻𑀳𑀭𑀺𑀁.

𑀲𑁄𑀢𑀺 ¶ 𑀲𑁄 𑀅𑀳𑀁. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁, 𑀅𑀦𑁂𑀓𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀢𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑀁 𑀪𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦𑀁. 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 𑀏𑀯𑀁 𑀚𑀸𑀢𑀺𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀲𑀭𑀸𑀫𑀺, 𑀅𑀦𑀼𑀤𑁂𑀯 𑀯𑀸 𑀲𑀭𑀸𑀫𑀺, 𑀘𑀺𑀢𑁆𑀢𑁂 ¶ 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀲𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀽𑀭𑀺𑀢𑀧𑀸𑀭𑀫𑀻𑀦𑀜𑁆𑀳𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺, 𑀢𑁂𑀦 𑀢𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑁆𑀯𑀸𑀯 𑀲𑀭𑀦𑁆𑀢𑀺. 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀯 𑀲𑀭𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀧𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀯𑀤𑀸𑀫. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀧𑀸𑀴𑀺𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀆𑀭𑀤𑁆𑀥𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦𑁂𑀯 𑀬𑁆𑀯𑀸𑀬𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀆𑀭𑀤𑁆𑀥𑁄, 𑀢𑀲𑁆𑀲 𑀧𑀓𑀸𑀭𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑀽𑀮𑀁 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁. 𑀏𑀲 𑀦𑀬𑁄 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄𑀢𑀺𑀆𑀤𑀻𑀲𑀼. 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺𑀆𑀤𑀻𑀲𑀼 𑀧𑀦 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀓𑀧𑁆𑀧𑁄, 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀘 𑀲𑀁𑀯𑀝𑁆𑀝𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀕𑀳𑀺𑀢𑁄 𑀳𑁄𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸. 𑀯𑀺𑀯𑀝𑁆𑀝𑁂𑀦 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 ¶ . 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻’’𑀢𑀺 𑀯𑀼𑀢𑁆𑀢𑀸𑀦𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑁋 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀆𑀧𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑁋 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀉𑀤𑀓𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀢𑁂𑀦 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀺𑀬𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀤𑀸𑀧𑀺 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺.

𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥𑀁 𑀳𑁄𑀢𑀺 𑁋 𑀚𑀸𑀢𑀺𑀓𑁆𑀔𑁂𑀢𑁆𑀢𑀁, 𑀆𑀡𑀸𑀓𑁆𑀔𑁂𑀢𑁆𑀢𑀁, 𑀯𑀺𑀲𑀬𑀓𑁆𑀔𑁂𑀢𑁆𑀢𑀜𑁆𑀘. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺, 𑀬𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀆𑀤𑀻𑀲𑀼 𑀓𑀫𑁆𑀧𑀢𑀺. 𑀆𑀡𑀸𑀓𑁆𑀔𑁂𑀢𑁆𑀢𑀁 ¶ 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺. 𑀬𑀢𑁆𑀣 𑀭𑀢𑀦𑀧𑀭𑀺𑀢𑁆𑀢𑀁, 𑀔𑀦𑁆𑀥𑀧𑀭𑀺𑀢𑁆𑀢𑀁, 𑀥𑀚𑀕𑁆𑀕𑀧𑀭𑀺𑀢𑁆𑀢𑀁, 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁, 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀧𑀦 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁, ‘‘𑀬𑀁 ¶ 𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀼𑀢𑁆𑀢𑀁 𑀬𑀢𑁆𑀣 𑀬𑀁 𑀬𑀁 𑀆𑀓𑀗𑁆𑀔𑀢𑀺 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀢𑀺. 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀼 𑀏𑀓𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀦𑀲𑁆𑀲𑀦𑁆𑀢𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑀫𑁆𑀧𑀺 𑀯𑀺𑀦𑀝𑁆𑀞𑀫𑁂𑀯 𑀳𑁄𑀢𑀺; 𑀯𑀺𑀦𑀲𑁆𑀲𑀦𑁆𑀢𑀜𑁆𑀘 𑀏𑀓𑀢𑁄𑀯 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄𑀯 𑀲𑀡𑁆𑀞𑀳𑀢𑀺. 𑀢𑀲𑁆𑀲 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁪) 𑀯𑀼𑀢𑁆𑀢𑀁. 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑀁.

𑀬𑁂 𑀧𑀦𑁂𑀢𑁂 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸 𑀯𑀼𑀢𑁆𑀢𑀸, 𑀏𑀢𑁂𑀲𑀼 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁄 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀲𑀭𑀺. 𑀓𑀣𑀁? ‘‘𑀅𑀫𑀼𑀢𑁆𑀭𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀳𑀁 𑀅𑀫𑀼𑀫𑁆𑀳𑀺 𑀪𑀯𑁂 𑀯𑀸 𑀬𑁄𑀦𑀺𑀬𑀸 𑀯𑀸 𑀕𑀢𑀺𑀬𑀸 𑀯𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺 𑀯𑁂𑀲𑁆𑀲𑀦𑁆𑀢𑀭𑁄 𑀯𑀸 𑀚𑁄𑀢𑀺𑀧𑀸𑀮𑁄 𑀯𑀸. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀪𑀕𑁆𑀕𑀯𑁄 𑀯𑀸 𑀕𑁄𑀢𑀫𑁄 𑀯𑀸. 𑀏𑀯𑀁𑀯𑀡𑁆𑀡𑁄𑀢𑀺 𑀑𑀤𑀸𑀢𑁄 𑀯𑀸 𑀲𑀸𑀫𑁄 𑀯𑀸. 𑀏𑀯𑀫𑀸𑀳𑀸𑀭𑁄𑀢𑀺 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑁂𑀦 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀦𑀁 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀝𑀺𑀲𑀁𑀯𑁂𑀤𑀻. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀯𑀲𑁆𑀲𑀲𑀢𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸.

𑀲𑁄 ¶ 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀲𑁄 𑀅𑀳𑀁 𑀢𑀢𑁄 𑀪𑀯𑀢𑁄 𑀬𑁄𑀦𑀺𑀢𑁄 𑀕𑀢𑀺𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀢𑁄 𑀲𑀢𑁆𑀢𑀸𑀯𑀸𑀲𑀢𑁄 𑀲𑀢𑁆𑀢𑀦𑀺𑀓𑀸𑀬𑀢𑁄 𑀯𑀸 𑀘𑀼𑀢𑁄, 𑀧𑀼𑀦 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀦𑁆𑀢𑀺 𑀅𑀣 𑀢𑀢𑁆𑀭𑀸𑀧𑀺 𑀪𑀯𑁂 𑀬𑁄𑀦𑀺𑀬𑀸 𑀕𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀲𑀢𑁆𑀢𑀸𑀯𑀸𑀲𑁂 𑀲𑀢𑁆𑀢𑀦𑀺𑀓𑀸𑀬𑁂 𑀯𑀸 𑀧𑀼𑀦 𑀅𑀳𑁄𑀲𑀺𑀁. 𑀏𑀯𑀁𑀦𑀸𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣 𑀯𑀸 𑀬𑀲𑁆𑀫𑀸 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀲𑀭𑀡𑀁. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀢𑀲𑁆𑀫𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀫𑀺𑀲𑁆𑀲𑀸 𑀇𑀥𑀽𑀧𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺 𑀢𑀼𑀲𑀺𑀢𑀪𑀯𑀦𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄𑀢𑀺 𑀢𑀢𑁆𑀭𑀸𑀧𑀺 ¶ 𑀢𑀼𑀲𑀺𑀢𑀪𑀯𑀦𑁂 ¶ 𑀲𑁂𑀢𑀓𑁂𑀢𑀼 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺𑀁. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀏𑀓𑀕𑁄𑀢𑁆𑀢𑁄. 𑀏𑀯𑀁𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀏𑀯𑀫𑀸𑀳𑀸𑀭𑁄𑀢𑀺 𑀤𑀺𑀩𑁆𑀩𑀲𑀼𑀥𑀸𑀳𑀸𑀭𑁄. 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀯𑀁 𑀤𑀺𑀩𑁆𑀩𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻. 𑀤𑀼𑀓𑁆𑀔𑀁 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀫𑀢𑁆𑀢𑀫𑁂𑀯. 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄𑀢𑀺 𑀲𑁄 𑀅𑀳𑀁 𑀢𑀢𑁄 𑀢𑀼𑀲𑀺𑀢𑀪𑀯𑀦𑀢𑁄 𑀘𑀼𑀢𑁄. 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀥 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄.

𑀇𑀢𑀻𑀢𑀺 𑀏𑀯𑀁. 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀲𑀉𑀤𑁆𑀤𑁂𑀲𑀁, 𑀯𑀡𑁆𑀡𑀸𑀤𑀺𑀯𑀲𑁂𑀦 𑀲𑀸𑀓𑀸𑀭𑀁. 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀳𑀺 𑀲𑀢𑁆𑀢𑁄 ‘‘𑀤𑀢𑁆𑀢𑁄, 𑀢𑀺𑀲𑁆𑀲𑁄, 𑀕𑁄𑀢𑀫𑁄’’𑀢𑀺 𑀉𑀤𑁆𑀤𑀺𑀲𑀻𑀬𑀢𑀺; 𑀯𑀡𑁆𑀡𑀸𑀤𑀻𑀳𑀺 𑀑𑀤𑀸𑀢𑁄, 𑀲𑀸𑀫𑁄𑀢𑀺 𑀦𑀸𑀦𑀢𑁆𑀢𑀢𑁄 𑀧𑀜𑁆𑀜𑀸𑀬𑀢𑀺; 𑀢𑀲𑁆𑀫𑀸 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄, 𑀇𑀢𑀭𑁂 𑀆𑀓𑀸𑀭𑀸. 𑀓𑀺𑀁 𑀧𑀦 𑀩𑀼𑀤𑁆𑀥𑀸𑀬𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀲𑀭𑀦𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀩𑀼𑀤𑁆𑀥𑀸𑀬𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓-𑀢𑀺𑀢𑁆𑀣𑀺𑀬𑀸𑀧𑀺, 𑀦𑁄 𑀘 𑀔𑁄 𑀅𑀯𑀺𑀲𑁂𑀲𑁂𑀦. 𑀢𑀺𑀢𑁆𑀣𑀺𑀬𑀸 𑀳𑀺 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀧𑁆𑀧𑁂 𑀲𑀭𑀦𑁆𑀢𑀺, 𑀦 𑀢𑀢𑁄 𑀧𑀭𑀁. 𑀓𑀲𑁆𑀫𑀸? 𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀺𑀭𑀳𑀢𑁄 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀳𑁄𑀢𑀺. 𑀲𑀸𑀯𑀓𑁂𑀲𑀼 𑀧𑀦 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀲𑀭𑀦𑁆𑀢𑀺; 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀢𑀲𑀳𑀲𑁆𑀲𑀜𑁆𑀘. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁆𑀢𑀓𑁄 𑀳𑀺 𑀢𑁂𑀲𑀁 𑀅𑀪𑀺𑀦𑀻𑀳𑀸𑀭𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯 𑀇𑀘𑁆𑀙𑀦𑁆𑀢𑀺 𑀢𑀸𑀯 𑀲𑀭𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸 𑀘 𑀔𑀦𑁆𑀥𑀧𑀝𑀺𑀧𑀸𑀝𑀺𑀫𑁂𑀯 𑀲𑀭𑀦𑁆𑀢𑀺. 𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀭𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀦𑁆𑀥𑀸𑀦𑀁 𑀯𑀺𑀬 𑀇𑀘𑁆𑀙𑀺𑀢𑀧𑁆𑀧𑀤𑁂𑀲𑁄𑀓𑁆𑀓𑀫𑀦𑀁 𑀦𑀢𑁆𑀣𑀺. 𑀲𑀸𑀯𑀓𑀸 𑀉𑀪𑀬𑀣𑀸𑀧𑀺 𑀲𑀭𑀦𑁆𑀢𑀺; 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀩𑀼𑀤𑁆𑀥𑀸 𑀧𑀦 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦𑀧𑀺 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀬𑀁 𑀬𑀁 𑀞𑀸𑀦𑀁 𑀆𑀓𑀗𑁆𑀔𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀲𑀭𑀦𑁆𑀢𑀺𑀬𑁂𑀯.

𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀻𑀲𑀼 𑀫𑁂𑀢𑀺 𑀫𑀬𑀸. 𑀯𑀺𑀚𑁆𑀚𑀸𑀢𑀺 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸. 𑀓𑀺𑀁 𑀯𑀺𑀤𑀺𑀢𑀁 ¶ 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲𑀁. 𑀅𑀯𑀺𑀚𑁆𑀚𑀸𑀢𑀺 𑀢𑀲𑁆𑀲𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀼𑀘𑁆𑀘𑀢𑀺. 𑀢𑀫𑁄𑀢𑀺 𑀲𑁆𑀯𑁂𑀯 𑀫𑁄𑀳𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 ¶ ‘‘𑀢𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀮𑁄𑀓𑁄𑀢𑀺 𑀲𑀸𑀬𑁂𑀯𑀯𑀺𑀚𑁆𑀚𑀸 𑀑𑀪𑀸𑀲𑀓𑀭𑀡𑀝𑁆𑀞𑁂𑀦 ‘‘𑀆𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸𑀢𑀺 𑀅𑀬𑀁 𑀅𑀢𑁆𑀣𑁄, 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀁. 𑀬𑁄𑀚𑀦𑀸 ¶ 𑀧𑀦𑁂𑀢𑁆𑀣 𑁋 𑀅𑀬𑀁 𑀔𑁄 𑀫𑁂 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀢𑀲𑁆𑀲 𑀫𑁂 𑀅𑀥𑀺𑀕𑀢𑀯𑀺𑀚𑁆𑀚𑀲𑁆𑀲 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂.

𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂. 𑀢𑀦𑁆𑀢𑀺 𑀦𑀺𑀧𑀸𑀢𑁄. 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲. 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄. 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑀳𑀺𑀢𑀢𑁆𑀢𑀲𑁆𑀲, 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀯𑀺𑀚𑁆𑀚𑀸 𑀯𑀺𑀳𑀜𑁆𑀜𑁂𑀬𑁆𑀬 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀫𑁄 𑀯𑀺𑀳𑀜𑁆𑀜𑁂𑀬𑁆𑀬 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀫𑀫 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄. 𑀏𑀢𑀲𑁆𑀲 𑀫𑁂 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀫𑁂𑀯 𑀨𑀮𑀁 𑀮𑀤𑁆𑀥𑀦𑁆𑀢𑀺.

𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸𑀢𑀺 𑀅𑀬𑀁 𑀔𑁄 𑀫𑀫 𑀩𑁆𑀭𑀸𑀳𑁆𑀫𑀡 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀧𑀞𑀫𑀸 𑀦𑀺𑀓𑁆𑀔𑀦𑁆𑀢𑀺 𑀧𑀞𑀫𑀸 𑀅𑀭𑀺𑀬𑀸𑀚𑀸𑀢𑀺 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸

𑁧𑁩. 𑀲𑁄 𑀏𑀯𑀁…𑀧𑁂… 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬𑀸𑀢𑀺 𑀘𑀼𑀢𑀺𑀬𑀸 𑀘 𑀉𑀧𑀧𑀸𑀢𑁂 𑀘 𑀜𑀸𑀡𑀸𑀬; 𑀬𑁂𑀦 𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘 𑀉𑀧𑀧𑀸𑀢𑁄 𑀘 𑀜𑀸𑀬𑀢𑀺, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀦𑀻𑀳𑀭𑀺𑀁. 𑀲𑁄 𑀤𑀺𑀩𑁆𑀩𑁂𑀦…𑀧𑁂… 𑀧𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀲𑀢𑁆𑀢𑀸𑀦𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺. 𑀢𑁂 𑀳𑀺 𑀘𑀺𑀢𑁆𑀢𑁂 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀢𑁆𑀢𑁂 𑀧𑀲𑁆𑀲𑀦𑁆𑀢𑀺, 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀧𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀺; 𑀢𑀲𑁆𑀫𑀸 𑀢𑀁 ¶ 𑀦 𑀯𑀤𑀸𑀫. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀧𑀸𑀴𑀺𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀲𑁄𑀢𑀺 ¶ 𑀲𑁄 𑀅𑀳𑀁. 𑀤𑀺𑀩𑁆𑀩𑁂𑀦𑀸𑀢𑀺𑀆𑀤𑀻𑀲𑀼 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁 ¶ . 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁, 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼. 𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥𑀁. 𑀬𑁄 𑀳𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀉𑀧𑀧𑀸𑀢𑀁, 𑀲𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀉𑀧𑀧𑀸𑀢𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺 𑀦 𑀘𑀼𑀢𑀺𑀁, 𑀲𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀢𑀤𑀼𑀪𑀬𑀁 𑀧𑀲𑁆𑀲𑀢𑀺, 𑀲𑁄 𑀬𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀁 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀳𑁄𑀢𑀺. 𑀢𑀤𑀼𑀪𑀬𑀜𑁆𑀘 𑀪𑀕𑀯𑀸 𑀅𑀤𑁆𑀤𑀲. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀘𑀼𑀢𑀽𑀧𑀧𑀸𑀢𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀯𑀺𑀲𑀼𑀤𑁆𑀥’’𑀦𑁆𑀢𑀺.

𑀏𑀓𑀸𑀤𑀲𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 𑀯𑀸 𑀯𑀺𑀲𑀼𑀤𑁆𑀥𑀁. 𑀪𑀕𑀯𑀢𑁄 𑀳𑀺 𑀏𑀓𑀸𑀤𑀲𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼. 𑀬𑀣𑀸𑀳 𑁋 ‘‘𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥, ‘𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁. 𑀅𑀫𑀦𑀲𑀺𑀓𑀸𑀭𑁄…𑀧𑁂… 𑀣𑀺𑀦𑀫𑀺𑀤𑁆𑀥𑀁… 𑀙𑀫𑁆𑀪𑀺𑀢𑀢𑁆𑀢𑀁… 𑀉𑀧𑁆𑀧𑀺𑀮𑀁… 𑀤𑀼𑀝𑁆𑀞𑀼𑀮𑁆𑀮𑀁… 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁… 𑀅𑀢𑀺𑀮𑀻𑀦𑀯𑀻𑀭𑀺𑀬𑀁… 𑀅𑀪𑀺𑀚𑀧𑁆𑀧𑀸… 𑀦𑀸𑀦𑀢𑁆𑀢𑀲𑀜𑁆𑀜𑀸… ‘𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀺𑀁. 𑀲𑁄 𑀔𑁄 𑀅𑀳𑀁, 𑀅𑀦𑀼𑀭𑀼𑀤𑁆𑀥, 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀳𑀺 𑀔𑁄 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺. 𑀭𑀽𑀧𑀸𑀦𑀺 𑀳𑀺 𑀔𑁄 𑀧𑀲𑁆𑀲𑀸𑀫𑀺, 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 (𑀫. 𑀦𑀺. 𑁩.𑁨𑁪𑁨-𑁨𑁪𑁩) 𑀏𑀯𑀫𑀸𑀤𑀺. 𑀢𑀤𑁂𑀯𑀁 𑀏𑀓𑀸𑀤𑀲𑀼𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 ¶ 𑀯𑀺𑀲𑀼𑀤𑁆𑀥𑀁.

𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁; 𑀫𑀸𑀦𑀼𑀲𑀓𑀁 𑀯𑀸 𑀫𑀁𑀲𑀘𑀓𑁆𑀔𑀼𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦.

𑀲𑀢𑁆𑀢𑁂 ¶ 𑀧𑀲𑁆𑀲𑀸𑀫𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺. 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀏𑀢𑁆𑀣 𑀘𑀼𑀢𑀺𑀓𑁆𑀔𑀡𑁂 𑀯𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀯𑀸 ¶ 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸, 𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸 𑀇𑀤𑀸𑀦𑀺 𑀘𑀯𑀺𑀲𑁆𑀲𑀦𑁆𑀢𑀺 𑀢𑁂 𑀘𑀯𑀫𑀸𑀦𑀸. 𑀬𑁂 𑀘 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀲𑀫𑁆𑀧𑀢𑀺𑀦𑀺𑀩𑁆𑀩𑀢𑁆𑀢𑀸 𑀯𑀸, 𑀢𑁂 𑀉𑀧𑀧𑀚𑁆𑀚𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀏𑀯𑀭𑀽𑀧𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀧𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀦𑁂𑀢𑀺 𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀳𑀻𑀦𑀸𑀦𑀁 𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀻𑀦𑀁 𑀯𑀲𑁂𑀦 𑀳𑀻𑀴𑀺𑀢𑁂 𑀑𑀳𑀻𑀴𑀺𑀢𑁂 𑀉𑀜𑁆𑀜𑀸𑀢𑁂 𑀅𑀯𑀜𑁆𑀜𑀸𑀢𑁂. 𑀧𑀡𑀻𑀢𑁂𑀢𑀺 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀢𑀩𑁆𑀩𑀺𑀧𑀭𑀻𑀢𑁂. 𑀲𑀼𑀯𑀡𑁆𑀡𑁂𑀢𑀺 𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀸𑀓𑀦𑁆𑀢𑀅𑀫𑀦𑀸𑀧𑀯𑀡𑁆𑀡𑀬𑀼𑀢𑁆𑀢𑁂; 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺𑀧𑀺 𑀅𑀢𑁆𑀣𑁄. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀺𑀕𑀢𑁂, 𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂. 𑀤𑀼𑀕𑁆𑀕𑀢𑁂𑀢𑀺 𑀤𑀼𑀕𑁆𑀕𑀢𑀺𑀕𑀢𑁂, 𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂. 𑀬𑀣𑀸𑀓𑀫𑁆𑀫𑀽𑀧𑀕𑁂𑀢𑀺 𑀬𑀁 𑀬𑀁 𑀓𑀫𑁆𑀫𑀁 𑀉𑀧𑀘𑀺𑀢𑀁 𑀢𑁂𑀦 𑀢𑁂𑀦 𑀉𑀧𑀕𑀢𑁂. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀁; 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀓𑀺𑀘𑁆𑀘𑀁.

𑀢𑀲𑁆𑀲 𑀘 𑀜𑀸𑀡𑀲𑁆𑀲 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑁋 𑀲𑁄 𑀳𑁂𑀝𑁆𑀞𑀸 𑀦𑀺𑀭𑀬𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑁂𑀭𑀬𑀺𑀓𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀦𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀫𑀸𑀦𑁂, 𑀢𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑀻’’𑀢𑀺? 𑀅𑀣𑀲𑁆𑀲 ‘‘𑀇𑀤𑀁 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁 𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀉𑀧𑀭𑀺 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑀦𑁆𑀤𑀦𑀯𑀦-𑀫𑀺𑀲𑁆𑀲𑀓𑀯𑀦-𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀼 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂. 𑀢𑀫𑁆𑀧𑀺 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯. 𑀲𑁄 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀺 𑁋 ‘‘𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑁂 𑀲𑀢𑁆𑀢𑀸 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺? 𑀅𑀣𑀲𑁆𑀲 ‘‘𑀇𑀤𑀁 ¶ 𑀦𑀸𑀫 𑀓𑀢𑁆𑀯𑀸’’𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀦𑀸𑀫. 𑀇𑀫𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘𑀺𑀫𑀲𑁆𑀲, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀤𑀼𑀝𑁆𑀞𑀁 𑀯𑀸 𑀘𑀭𑀺𑀢𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸𑀢𑀺 𑀤𑀼𑀘𑁆𑀘𑀭𑀺𑀢𑀁; 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀏𑀯𑀁 𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸. 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸𑀢𑀺 𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀅𑀦𑁆𑀢𑀫𑀲𑁄 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸𑀦𑀫𑁆𑀧𑀺 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 ¶ 𑀯𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀯𑀸 𑀉𑀧𑀯𑀸𑀤𑀓𑀸; 𑀅𑀓𑁆𑀓𑁄𑀲𑀓𑀸, 𑀕𑀭𑀳𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄, 𑀅𑀲𑁆𑀲𑀫𑀡𑀸 𑀏𑀢𑁂’’𑀢𑀺 𑀯𑀤𑀦𑁆𑀢𑁄 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀉𑀧𑀯𑀤𑀢𑀺. ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀛𑀸𑀦𑀁 𑀯𑀸 𑀯𑀺𑀫𑁄𑀓𑁆𑀔𑁄 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸’’𑀢𑀺 𑀯𑀤𑀦𑁆𑀢𑁄 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀉𑀧𑀯𑀤𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀚𑀸𑀦𑀁 𑀯𑀸 𑀉𑀧𑀯𑀤𑁂𑀬𑁆𑀬 𑀅𑀚𑀸𑀦𑀁 𑀯𑀸, 𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀺. 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀲𑀕𑁆𑀕𑀸𑀯𑀭𑀡𑀁 𑀫𑀕𑁆𑀕𑀸𑀯𑀭𑀡𑀜𑁆𑀘, 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺. 𑀢𑀲𑁆𑀲 𑀘 𑀆𑀯𑀺𑀪𑀸𑀯𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼𑀫𑀼𑀤𑀸𑀳𑀭𑀦𑁆𑀢𑀺 𑁋

‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀺𑀭 𑀕𑀸𑀫𑁂 𑀏𑀓𑁄 𑀣𑁂𑀭𑁄 𑀘 𑀤𑀳𑀭𑀪𑀺𑀓𑁆𑀔𑀼 𑀘 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀢𑁂 𑀧𑀞𑀫𑀖𑀭𑁂𑀬𑁂𑀯 𑀉𑀴𑀼𑀗𑁆𑀓𑀫𑀢𑁆𑀢𑀁 𑀉𑀡𑁆𑀳𑀬𑀸𑀕𑀼𑀁 𑀮𑀪𑀺𑀁𑀲𑀼. 𑀣𑁂𑀭𑀲𑁆𑀲 𑀘 𑀓𑀼𑀘𑁆𑀙𑀺𑀯𑀸𑀢𑁄 𑀅𑀢𑁆𑀣𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘𑀅𑀬𑀁 𑀬𑀸𑀕𑀼 𑀫𑀬𑁆𑀳𑀁 𑀲𑀧𑁆𑀧𑀸𑀬𑀸, 𑀬𑀸𑀯 𑀦 𑀲𑀻𑀢𑀮𑀸 𑀳𑁄𑀢𑀺 𑀢𑀸𑀯 𑀦𑀁 𑀧𑀺𑀯𑀸𑀫𑀻’𑀢𑀺. 𑀲𑁄 𑀫𑀦𑀼𑀲𑁆𑀲𑁂𑀳𑀺 𑀉𑀫𑁆𑀫𑀸𑀭𑀢𑁆𑀣𑀸𑀬 𑀆𑀳𑀝𑁂 𑀤𑀸𑀭𑀼𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀺𑀯𑀺. 𑀇𑀢𑀭𑁄 𑀢𑀁 𑀚𑀺𑀕𑀼𑀘𑁆𑀙𑀺 𑁋 ‘𑀅𑀢𑀺𑀘𑁆𑀙𑀸𑀢𑁄 𑀯𑀢𑀸𑀬𑀁 𑀫𑀳𑀮𑁆𑀮𑀓𑁄 𑀅𑀫𑁆𑀳𑀸𑀓𑀁 𑀮𑀚𑁆𑀚𑀺𑀢𑀩𑁆𑀩𑀓𑀁 𑀅𑀓𑀸𑀲𑀻’𑀢𑀺. 𑀣𑁂𑀭𑁄 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀳𑀭𑀪𑀺𑀓𑁆𑀔𑀼𑀁 𑀆𑀳 𑁋 ‘𑀅𑀢𑁆𑀣𑀺 𑀢𑁂, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸’𑀢𑀺? ‘𑀆𑀫, 𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑁄 𑀅𑀳’𑀦𑁆𑀢𑀺. ‘𑀢𑁂𑀦 𑀳𑀸𑀯𑀼𑀲𑁄, 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀸𑀬𑀸𑀫𑀁 𑀫𑀸 𑀅𑀓𑀸𑀲𑀺, 𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄’𑀢𑀺. 𑀲𑁄 𑀢𑀁 𑀔𑀫𑀸𑀧𑁂𑀲𑀺. 𑀢𑁂𑀦𑀲𑁆𑀲 𑀢𑀁 𑀧𑀸𑀓𑀢𑀺𑀓𑀁 𑀅𑀳𑁄𑀲𑀺’’. 𑀢𑀲𑁆𑀫𑀸 𑀬𑁄 𑀅𑀜𑁆𑀜𑁄𑀧𑀺 𑀅𑀭𑀺𑀬𑀁 𑀉𑀧𑀯𑀤𑀢𑀺, 𑀢𑁂𑀦 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, ‘‘𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀸𑀳𑀻’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦𑀯𑀓𑀢𑀭𑁄 𑀳𑁄𑀢𑀺 ¶ , 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀢𑀼𑀫𑁆𑀳𑁂 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀔𑀫𑀣𑀸’’𑀢𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀦𑀓𑁆𑀔𑀫𑀢𑀺 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺 𑀞𑀺𑀢𑀓𑁂𑀦𑁂𑀯, 𑀲𑀘𑁂 𑀦𑀯𑀓𑀢𑀭𑁄 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀔𑀫𑀢𑀼 𑀫𑁂 𑀲𑁄 𑀆𑀬𑀲𑁆𑀫𑀸’’𑀢𑀺 𑀏𑀯𑀁 𑀯𑀤𑀦𑁆𑀢𑁂𑀦 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸𑀧𑀺 𑀔𑀫𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀓𑀢𑁂 𑀲𑀕𑁆𑀕𑀸𑀯𑀭𑀡𑀜𑁆𑀘 𑀫𑀕𑁆𑀕𑀸𑀯𑀭𑀡𑀜𑁆𑀘 𑀦 𑀳𑁄𑀢𑀺, 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀦𑀸𑀦𑀸𑀯𑀺𑀥𑀓𑀫𑁆𑀫𑀸, 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀽𑀮𑀓𑁂𑀲𑀼 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑁂𑀧𑀺 ¶ 𑀲𑀫𑀸𑀤𑀧𑁂𑀦𑁆𑀢𑀺. 𑀢𑀢𑁆𑀣 𑀯𑀘𑀻𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦𑁂𑀯 𑀅𑀭𑀺𑀬𑀽𑀧𑀯𑀸𑀤𑁂, 𑀫𑀦𑁄𑀤𑀼𑀘𑁆𑀘𑀭𑀺𑀢𑀕𑁆𑀕𑀳𑀡𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑀺𑀢𑀸𑀬𑀧𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀦 𑀯𑀘𑀦𑀁 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀸𑀯𑀚𑁆𑀚𑁄 𑀳𑀺 𑀅𑀭𑀺𑀬𑀽𑀧𑀯𑀸𑀤𑁄 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑁄. 𑀬𑀣𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀁 𑀆𑀭𑀸𑀥𑁂𑀬𑁆𑀬; 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀯𑀁 𑀦𑀺𑀭𑀬𑁂’’𑀢𑀺 (𑀫. 𑀦𑀺. 𑁧.𑁧𑁪𑁯).

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀢𑁄 ¶ 𑀘 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀦𑀢𑁆𑀣𑀺. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀢𑀭𑀁, 𑀬𑀣𑀬𑀺𑀤𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸. 𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂. 𑀅𑀣𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑀸. 𑀧𑀭𑀁 𑀫𑀭𑀡𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀢𑁄 𑀉𑀤𑁆𑀥𑀁. 𑀅𑀧𑀸𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀁. 𑀦𑀺𑀭𑀬𑁄 𑀳𑀺 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀅𑀧𑁂𑀢𑀢𑁆𑀢𑀸, 𑀲𑀼𑀔𑀸𑀦𑀁 ¶ 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸 𑀅𑀧𑀸𑀬𑁄. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺; 𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀤𑀼𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀓𑀸𑀭𑀺𑀦𑁄𑀢𑀺 𑀯𑀺𑀦𑀺𑀧𑀸𑀢𑁄; 𑀯𑀺𑀦𑀲𑁆𑀲𑀦𑁆𑀢𑀸 𑀯𑀸 𑀏𑀢𑁆𑀣 𑀦𑀺𑀧𑀢𑀦𑁆𑀢𑀺 𑀲𑀫𑁆𑀪𑀺𑀚𑁆𑀚𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀸𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄𑀢𑀺 𑀦𑀺𑀭𑀬𑁄.

𑀅𑀣 𑀯𑀸 𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀳𑀺 𑀅𑀧𑀸𑀬𑁄, 𑀲𑀼𑀕𑀢𑀺𑀬𑀸 𑀅𑀧𑁂𑀢𑀢𑁆𑀢𑀸; 𑀦 𑀤𑀼𑀕𑁆𑀕𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀦𑀸𑀕𑀭𑀸𑀚𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀤𑀼𑀕𑁆𑀕𑀢𑀺𑀕𑁆𑀕𑀳𑀡𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀼𑀕𑀢𑀺𑀢𑁄 𑀅𑀧𑁂𑀢𑀢𑁆𑀢𑀸, 𑀤𑀼𑀓𑁆𑀔𑀲𑁆𑀲 𑀘 𑀕𑀢𑀺𑀪𑀽𑀢𑀢𑁆𑀢𑀸; 𑀦 𑀢𑀼 𑀯𑀺𑀦𑀺𑀧𑀸𑀢𑁄 𑀅𑀲𑀼𑀭𑀲𑀤𑀺𑀲𑀁 𑀅𑀯𑀺𑀦𑀺𑀧𑀢𑀺𑀢𑀢𑁆𑀢𑀸. 𑀧𑁂𑀢𑀫𑀳𑀺𑀤𑁆𑀥𑀺𑀓𑀸𑀦𑀜𑁆𑀳𑀺 𑀯𑀺𑀫𑀸𑀦𑀸𑀦𑀺𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀺𑀦𑀺𑀧𑀸𑀢𑀕𑁆𑀕𑀳𑀡𑁂𑀦 𑀅𑀲𑀼𑀭𑀓𑀸𑀬𑀁 𑀤𑀻𑀧𑁂𑀢𑀺. 𑀲𑁄 𑀳𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀅𑀧𑀸𑀬𑁄 𑀘𑁂𑀯 𑀤𑀼𑀕𑁆𑀕𑀢𑀺 𑀘 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀺 𑀘 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀬𑀕𑁆𑀕𑀳𑀡𑁂𑀦 𑀅𑀯𑀻𑀘𑀺-𑀆𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀦𑀺𑀭𑀬𑀫𑁂𑀯 𑀤𑀻𑀧𑁂𑀢𑀺. 𑀉𑀧𑀧𑀦𑁆𑀦𑀸𑀢𑀺 𑀉𑀧𑀕𑀢𑀸, 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 ¶ 𑀧𑀦 𑀯𑀺𑀲𑁂𑀲𑁄 𑁋 𑀏𑀢𑁆𑀣 𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀕𑁆𑀕𑀕𑁆𑀕𑀳𑀡𑁂𑀦 𑀤𑁂𑀯𑀕𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀦𑁆𑀤𑀭𑀸 𑀕𑀢𑀻𑀢𑀺 𑀲𑀼𑀕𑀢𑀺. 𑀭𑀽𑀧𑀸𑀤𑀺𑀯𑀺𑀲𑀬𑁂𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄. 𑀲𑁄 𑀲𑀩𑁆𑀩𑁄𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀯𑀺𑀚𑁆𑀚𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀬𑀣𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀅𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁; 𑀏𑀯𑀫𑀺𑀥 ‘‘𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀼𑀢𑀽𑀧𑀧𑀸𑀢𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸

𑁧𑁪. 𑀲𑁄 ¶ 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀇𑀥 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀢𑁆𑀣𑀸𑀬. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀆𑀲𑀯𑀯𑀺𑀦𑀸𑀲𑀦𑀢𑁄 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀘𑁂𑀢𑀁 𑀜𑀸𑀡𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 ¶ . 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺𑀁. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑀁 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀁 𑀢𑀡𑁆𑀳𑀁 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀬𑀁 𑀞𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺, 𑀢𑀲𑁆𑀲 𑀘 𑀲𑀫𑁆𑀧𑀸𑀧𑀓𑀁 𑀅𑀭𑀺𑀬𑀫𑀕𑁆𑀕𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁 𑀚𑀸𑀦𑀺𑀁 𑀧𑀝𑀺𑀯𑀺𑀚𑁆𑀛𑀺𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑀭𑀽𑀧𑀢𑁄 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂 𑀆𑀲𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄𑀢𑀺 𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀺. 𑀓𑀸𑀫𑀸𑀲𑀯𑀸𑀢𑀺 𑀓𑀸𑀫𑀸𑀲𑀯𑀢𑁄. 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 ¶ 𑀤𑀲𑁆𑀲𑁂𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺𑀁. 𑀢𑁂𑀦 𑀳𑀺 𑀜𑀸𑀡𑁂𑀦 𑀪𑀕𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀻𑀦𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀓𑀢𑀫𑀸 𑀧𑀦 𑀪𑀕𑀯𑀢𑁄 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸, 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸; 𑀦 𑀅𑀦𑀸𑀕𑀢𑀸, 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄; 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸; 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀅𑀩𑁆𑀪𑀜𑁆𑀜𑀸𑀲𑀺𑀁.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑁂𑀓𑁆𑀔𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀯𑀼𑀢𑁆𑀣𑀯𑀸𑀲𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 ¶ 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄 ¶ . 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀏𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁.

𑀇𑀤𑀸𑀦𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀢𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀥𑀺𑀕𑀫𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀬𑀁 𑀔𑁄 𑀫𑁂 𑀩𑁆𑀭𑀸𑀳𑁆𑀫𑀡 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀅𑀬𑀁 𑀔𑁄 𑀫𑀫 𑀩𑁆𑀭𑀸𑀳𑁆𑀫𑀡 𑀆𑀲𑀯𑀸𑀦𑀁 𑀔𑀬𑀜𑀸𑀡𑀫𑀼𑀔𑀢𑀼𑀡𑁆𑀟𑀓𑁂𑀦 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀢𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑀺 𑀢𑀢𑀺𑀬𑀸 𑀅𑀭𑀺𑀬𑀚𑀸𑀢𑀺 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀫𑁆𑀳𑀸 𑀅𑀡𑁆𑀟𑀓𑁄𑀲𑀫𑁆𑀳𑀸 𑀅𑀪𑀺𑀦𑀺𑀩𑁆𑀪𑀺𑀤𑀸 𑀦𑀺𑀓𑁆𑀔𑀦𑁆𑀢𑀺 𑀓𑀼𑀓𑁆𑀓𑀼𑀝𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺? 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀅𑀡𑁆𑀟𑀓𑁄𑀲𑀁

𑀧𑀤𑀸𑀮𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀲𑀓𑀺𑀫𑁂𑀯 𑀚𑀸𑀬𑀢𑀺, 𑀅𑀳𑀁 𑀧𑀦 𑀧𑀼𑀩𑁆𑀩𑁂-𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄, 𑀢𑀢𑁄 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀤𑀼𑀢𑀺𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄, 𑀧𑀼𑀦 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀢𑀢𑀺𑀬𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀯𑀺𑀚𑁆𑀚𑀸𑀬 𑀚𑀸𑀢𑁄; 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄. 𑀲𑀸 𑀘 𑀫𑁂 𑀚𑀸𑀢𑀺 𑀅𑀭𑀺𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀸𑀢𑀺 𑀇𑀤𑀁 𑀤𑀲𑁆𑀲𑁂𑀲𑀺. 𑀏𑀯𑀁 𑀤𑀲𑁆𑀲𑁂𑀦𑁆𑀢𑁄 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁, 𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺 𑀏𑀯𑀁 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀻𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸

𑁧𑁫. 𑀏𑀯𑀁 ¶ 𑀯𑀼𑀢𑁆𑀢𑁂 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀁 𑀪𑀕𑀯𑀢𑀸 𑀮𑁄𑀓𑀸𑀦𑀼𑀓𑀫𑁆𑀧𑀓𑁂𑀦 𑀩𑁆𑀭𑀸𑀳𑁆𑀫𑀡𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀯𑀺𑀦𑀺𑀕𑀽𑀳𑀺𑀢𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑁂 𑀯𑀺𑀚𑁆𑀚𑀢𑁆𑀢𑀬𑀧𑀓𑀸𑀲𑀺𑀓𑀸𑀬 ¶ 𑀥𑀫𑁆𑀫𑀤𑁂𑀲𑀦𑀸𑀬 𑀯𑀼𑀢𑁆𑀢𑁂 𑀧𑀻𑀢𑀺𑀯𑀺𑀧𑁆𑀨𑀸𑀭𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑀘𑀺𑀢𑁆𑀢𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀪𑀕𑀯𑀢𑁄 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 ‘‘𑀈𑀤𑀺𑀲𑀁 𑀦𑀸𑀫𑀸𑀳𑀁 𑀲𑀩𑁆𑀩𑀮𑁄𑀓𑀚𑁂𑀝𑁆𑀞𑀲𑁂𑀝𑁆𑀞𑀁 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀩𑁆𑀩𑀜𑁆𑀜𑀼𑀁 ‘𑀅𑀜𑁆𑀜𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀫𑁆𑀫𑀁 𑀦 𑀓𑀭𑁄𑀢𑀻’𑀢𑀺 𑀅𑀯𑀘𑀁 𑁋 ‘𑀥𑀻𑀭𑀢𑁆𑀣𑀼 𑀯𑀢𑀭𑁂 𑀅𑀜𑁆𑀜𑀸𑀡’’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀕𑀭𑀳𑀺𑀢𑁆𑀯𑀸 ‘‘𑀅𑀬𑀁 𑀤𑀸𑀦𑀺 𑀮𑁄𑀓𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀧𑀼𑀭𑁂𑀚𑀸𑀢𑀝𑁆𑀞𑁂𑀦 𑀚𑁂𑀝𑁆𑀞𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀲𑁂𑀝𑁆𑀞𑁄’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀚𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄 𑀲𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀢𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣𑀸𑀬𑀁 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 ¶ (𑀅. 𑀦𑀺. 𑁮.𑁨𑁦) 𑀳𑀺 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀆𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁦) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥𑀸𑀧𑀺 𑀅𑀩𑁆𑀪𑀦𑀼𑀫𑁄𑀤𑀦𑁂𑀬𑁂𑀯. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑁂, 𑀢𑀲𑁆𑀫𑀸 ‘‘𑀲𑀸𑀥𑀼 𑀲𑀸𑀥𑀼, 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺.

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄’’𑀢𑀺. 𑀪𑀕𑀯𑀢𑁄𑀬𑁂𑀯 𑀯𑀸 𑀯𑀘𑀦𑀁 𑀤𑁆𑀯𑁂 ¶ 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 ¶ 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀅𑀧𑀸𑀣𑀭𑀫𑀡𑀻𑀬𑀢𑁄 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀞𑀧𑀺𑀢𑀁, 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀧𑀝𑀺𑀘𑁆𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀏𑀲 𑀫𑀕𑁆𑀕𑁄𑀢𑀺 ¶ 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻 𑀅𑀟𑁆𑀠𑀭𑀢𑁆𑀢-𑀖𑀦𑀯𑀦𑀲𑀡𑁆𑀟-𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀬𑀁 𑀢𑀸𑀯 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦; 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦; 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦; 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑁂 𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀁 𑀥𑀸𑀭𑁂𑀦𑁆𑀢𑁂𑀦, 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸

𑀏𑀯𑀁 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀏𑀲𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀺; 𑀪𑀯𑀁 𑀫𑁂 𑀕𑁄𑀢𑀫𑁄 𑀲𑀭𑀡𑀁, 𑀧𑀭𑀸𑀬𑀡𑀁, 𑀅𑀖𑀲𑁆𑀲 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀕𑀘𑁆𑀙𑀸𑀫𑀺 𑀪𑀚𑀸𑀫𑀺 𑀲𑁂𑀯𑀸𑀫𑀺 𑀧𑀬𑀺𑀭𑀼𑀧𑀸𑀲𑀸𑀫𑀺 ¶ , 𑀏𑀯𑀁 𑀯𑀸 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄; 𑀢𑀲𑁆𑀫𑀸 ‘‘𑀕𑀘𑁆𑀙𑀸𑀫𑀻’’𑀢𑀺 𑀇𑀫𑀲𑁆𑀲 𑀚𑀸𑀦𑀸𑀫𑀺 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀏𑀢𑁆𑀣 𑀧𑀦 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 ¶ 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄; 𑀲𑁄 𑀅𑀢𑁆𑀣𑀢𑁄 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘. 𑀯𑀼𑀢𑁆𑀢𑀁 𑀳𑁂𑀢𑀁 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪) 𑀯𑀺𑀢𑁆𑀣𑀸𑀭𑁄. 𑀦 𑀓𑁂𑀯𑀮𑀜𑁆𑀘 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀧𑀺 𑀘 𑀔𑁄 𑀅𑀭𑀺𑀬𑀨𑀮𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀙𑀢𑁆𑀢𑀫𑀸𑀡𑀯𑀓𑀯𑀺𑀫𑀸𑀦𑁂 𑁋

‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁, 𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁, 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁭);

𑀏𑀢𑁆𑀣 𑀳𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁. 𑀥𑀫𑁆𑀫𑀫𑀲𑀗𑁆𑀔𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀧𑁆𑀧𑀝𑀺𑀓𑀽𑀮𑀁 𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀦𑁆𑀢𑀺 𑀧𑀺𑀝𑀓𑀢𑁆𑀢𑀬𑁂𑀦 𑀯𑀺𑀪𑀢𑁆𑀢𑀸 ¶ 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄, 𑀲𑁄 𑀅𑀢𑁆𑀣𑀢𑁄 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀲𑁆𑀫𑀺𑀁𑀬𑁂𑀯 𑀯𑀺𑀫𑀸𑀦𑁂 𑁋

‘‘𑀬𑀢𑁆𑀣 𑀘 𑀤𑀺𑀦𑁆𑀦𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀼;

𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂, 𑀲𑀗𑁆𑀖𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁮);

𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀏𑀢𑁆𑀢𑀸𑀯𑀢𑀸 𑀘 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺 𑀧𑀝𑀺𑀯𑁂𑀤𑁂𑀲𑀺.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀓𑀣𑀸

𑀇𑀤𑀸𑀦𑀺 𑀢𑁂𑀲𑁆𑀯𑁂𑀯 𑀢𑀻𑀲𑀼 𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁, 𑀲𑀭𑀡𑀕𑀫𑀦𑀁, 𑀬𑁄 𑀲𑀭𑀡𑀁 𑀕𑀘𑁆𑀙𑀢𑀺,

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄, 𑀲𑀭𑀡𑀕𑀫𑀦𑀨𑀮𑀁, 𑀲𑀁𑀓𑀺𑀮𑁂𑀲𑁄, 𑀪𑁂𑀤𑁄𑀢𑀺 𑀅𑀬𑀁 𑀯𑀺𑀥𑀺 𑀯𑁂𑀤𑀺 𑀢𑀩𑁆𑀩𑁄. 𑀲𑁄 𑀧𑀦 𑀇𑀥 𑀯𑀼𑀘𑁆𑀘𑀫𑀸𑀦𑁄 𑀅𑀢𑀺𑀪𑀸𑀭𑀺𑀬𑀁 𑀯𑀺𑀦𑀬𑀦𑀺𑀤𑀸𑀦𑀁 𑀓𑀭𑁄𑀢𑀻𑀢𑀺 𑀦 𑀯𑀼𑀢𑁆𑀢𑁄. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀯𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀢𑁄 (𑀫. 𑀦𑀺. 𑀅𑀝𑁆𑀞. 𑁧.𑁫𑁬) 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 𑀯𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦) 𑀲𑀭𑀡𑀯𑀡𑁆𑀡𑀦𑀢𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀲𑀭𑀡𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸

𑀉𑀧𑀸𑀲𑀓𑀁 ¶ 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀽𑀢𑀺 𑀫𑀁 𑀪𑀯𑀁 𑀕𑁄𑀢𑀫𑁄 ‘‘𑀉𑀧𑀸𑀲𑀓𑁄 𑀅𑀬’’𑀦𑁆𑀢𑀺 𑀏𑀯𑀁 𑀥𑀸𑀭𑁂𑀢𑀽𑀢𑀺 𑀅𑀢𑁆𑀣𑁄. 𑀉𑀧𑀸𑀲𑀓𑀯𑀺𑀥𑀺𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀓𑁄 𑀉𑀧𑀸𑀲𑀓𑁄, 𑀓𑀲𑁆𑀫𑀸 ¶ 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀫𑀲𑁆𑀲 𑀲𑀻𑀮𑀁, 𑀓𑁄 𑀆𑀚𑀻𑀯𑁄, 𑀓𑀸 𑀯𑀺𑀧𑀢𑁆𑀢𑀺, 𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀅𑀢𑀺𑀪𑀸𑀭𑀺𑀬𑀓𑀭𑀡𑀢𑁄 𑀇𑀥 𑀦 𑀯𑀺𑀪𑀢𑁆𑀢𑀁, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁫𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀏𑀢𑁆𑀣 𑀅𑀬𑀁 𑀅𑀕𑁆𑀕𑀲𑀤𑁆𑀤𑁄 𑀆𑀤𑀺𑀓𑁄𑀝𑀺𑀓𑁄𑀝𑁆𑀞𑀸𑀲𑀲𑁂𑀝𑁆𑀞𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀚𑁆𑀚𑀢𑀕𑁆𑀕𑁂, 𑀲𑀫𑁆𑀫 𑀤𑁄𑀯𑀸𑀭𑀺𑀓, 𑀆𑀯𑀭𑀸𑀫𑀺 𑀤𑁆𑀯𑀸𑀭𑀁 𑀦𑀺𑀕𑀡𑁆𑀞𑀸𑀦𑀁 𑀦𑀺𑀕𑀡𑁆𑀞𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁭𑁦) 𑀳𑀺 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀺. ‘‘𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑁂𑀬𑁆𑀬 (𑀓𑀣𑀸. 𑁪𑁪𑁧), 𑀉𑀘𑁆𑀙𑀕𑁆𑀕𑀁 𑀯𑁂𑀴𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀓𑁄𑀝𑀺𑀬𑀁. ‘‘𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑀥𑀼𑀭𑀕𑁆𑀕𑀁 𑀯𑀸 𑀢𑀺𑀢𑁆𑀢𑀓𑀕𑁆𑀕𑀁 𑀯𑀸 (𑀲𑀁. 𑀦𑀺. 𑁫.𑁩𑁭𑁪) 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀪𑀸𑀚𑁂𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀓𑁄𑀝𑁆𑀞𑀸𑀲𑁂. ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁪) 𑀲𑁂𑀝𑁆𑀞𑁂. 𑀇𑀥 𑀧𑀦𑀸𑀬𑀁 𑀆𑀤𑀺𑀫𑁆𑀳𑀺 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀚𑀤𑀕𑁆𑀕𑁂 𑀇𑀘𑁆𑀘𑁂𑀯 𑀯𑀸 ¶ 𑀧𑀸𑀞𑁄, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑀼𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀉𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀕𑀢𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀼, 𑀅𑀳𑀜𑁆𑀳𑀺 𑀲𑀘𑁂𑀧𑀺 𑀫𑁂 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀦𑁂𑀯 𑀩𑀼𑀤𑁆𑀥𑀁 ‘‘𑀦 𑀩𑀼𑀤𑁆𑀥𑁄’’𑀢𑀺 𑀯𑀸, 𑀥𑀫𑁆𑀫𑀁 ‘‘𑀦 𑀥𑀫𑁆𑀫𑁄’’𑀢𑀺 𑀯𑀸, 𑀲𑀗𑁆𑀖𑀁 ‘‘𑀦 𑀲𑀗𑁆𑀖𑁄’’𑀢𑀺 𑀯𑀸 𑀯𑀤𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀩𑁆𑀭𑀸𑀳𑁆𑀫𑀡𑁄 𑀧𑀸𑀡𑀼𑀧𑁂𑀢𑀁 𑀲𑀭𑀡𑀕𑀢𑀦𑁆𑀢𑀺 𑀧𑀼𑀦 𑀲𑀭𑀡𑀕𑀫𑀦𑀁 𑀯𑀤𑀦𑁆𑀢𑁄 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀧𑀓𑀸𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀧𑀭𑀺𑀲𑀁 𑀉𑀧𑀝𑁆𑀞𑀸𑀢𑀼𑀓𑀸𑀫𑁄 𑀆𑀳 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀧𑀸𑀲𑀓𑀜𑁆𑀘 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼, 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀁, 𑀢𑀬𑁄 𑀫𑀸𑀲𑁂 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀫𑀫 𑀅𑀦𑀼𑀕𑁆𑀕𑀳𑀢𑁆𑀣𑀁 𑀯𑀸𑀲𑀁 𑀲𑀫𑁆𑀧𑀝𑀺𑀘𑁆𑀙𑀢𑀽𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀔𑀦𑁆𑀢𑀺𑀁 𑀘𑀸𑀭𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺; 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀫𑀦𑀲𑀸𑀯 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸𑀢𑀺 𑀅𑀣 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀘𑁂 𑀫𑁂 ¶ 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀥𑀺𑀯𑀸𑀲𑁂𑀬𑁆𑀬, 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀔𑀦𑁆𑀢𑀺𑀁 𑀥𑀸𑀭𑁂𑀲𑀺, 𑀢𑀲𑁆𑀫𑀸 𑀫𑁂 𑀫𑀦𑀲𑀸𑀯 𑀅𑀥𑀺𑀯𑀸𑀲𑁂𑀲𑀻𑀢𑀺 𑀏𑀯𑀁 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑀓𑀼𑀲𑀮𑀢𑀸𑀬 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸, 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀪𑀕𑀯𑀦𑁆𑀢𑀁 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀕𑀢𑀓𑀸𑀮𑀢𑁄 𑀧𑀪𑀼𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑁄𑀢𑀻𑀢𑀺 𑀯𑀺𑀕𑀭𑀳𑀺𑀢𑁆𑀯𑀸𑀧𑀺 𑀇𑀤𑀸𑀦𑀺 𑀯𑀺𑀜𑁆𑀜𑀸𑀢𑀩𑀼𑀤𑁆𑀥𑀕𑀼𑀡𑁄 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀦𑁆𑀤𑀦𑁆𑀢𑁄𑀧𑀺 𑀅𑀢𑀺𑀢𑁆𑀢𑁄𑀬𑁂𑀯 𑀳𑀼𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑁄 𑀢𑀸𑀯 𑀧𑀝𑀺𑀫𑀼𑀔𑁄𑀬𑁂𑀯 𑀅𑀧𑀓𑁆𑀓𑀫𑀺𑀢𑁆𑀯𑀸 𑀤𑀲𑁆𑀲𑀦𑀯𑀺𑀲𑀬𑀁 𑀯𑀺𑀚𑀳𑀦𑀝𑁆𑀞𑀸𑀦𑁂 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸

𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀯𑁂𑀭𑀜𑁆𑀚𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀢𑁄 ¶ , 𑀢𑁂𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺. 𑀤𑀼𑀩𑁆𑀪𑀺𑀓𑁆𑀔𑀸𑀢𑀺 𑀤𑀼𑀮𑁆𑀮𑀪𑀪𑀺𑀓𑁆𑀔𑀸; 𑀲𑀸 𑀧𑀦 𑀤𑀼𑀮𑁆𑀮𑀪𑀪𑀺𑀓𑁆𑀔𑀢𑀸 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸, 𑀢𑀢𑁆𑀣 𑀲𑀼𑀲𑀲𑁆𑀲𑀓𑀸𑀮𑁂𑀧𑀺 𑀅𑀢𑀺𑀲𑀫𑀕𑁆𑀖𑁂𑀧𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑁂 𑀳𑁄𑀢𑀺. 𑀯𑁂𑀭𑀜𑁆𑀚𑀸𑀬𑀁 𑀧𑀦 𑀬𑀲𑁆𑀫𑀸 𑀦 𑀢𑀣𑀸 𑀅𑀳𑁄𑀲𑀺, 𑀅𑀧𑀺𑀘 𑀔𑁄 𑀤𑀼𑀲𑀲𑁆𑀲𑀢𑀸𑀬 𑀙𑀸𑀢𑀓𑀤𑁄𑀲𑁂𑀦 𑀅𑀳𑁄𑀲𑀺 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑀻𑀳𑀺𑀢𑀺𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀤𑁆𑀯𑀺𑀥𑀸 𑀧𑀯𑀢𑁆𑀢𑀈𑀳𑀺𑀢𑀺𑀓𑀸. 𑀈𑀳𑀺𑀢𑀁 𑀦𑀸𑀫 𑀇𑀭𑀺𑀬𑀸 𑀤𑁆𑀯𑀺𑀥𑀸 𑀧𑀯𑀢𑁆𑀢𑀸 𑁋 𑀘𑀺𑀢𑁆𑀢𑀇𑀭𑀺𑀬𑀸, 𑀘𑀺𑀢𑁆𑀢𑀈𑀳𑀸. ‘‘𑀏𑀢𑁆𑀣 𑀮𑀘𑁆𑀙𑀸𑀫 𑀦𑀼 𑀔𑁄 𑀓𑀺𑀜𑁆𑀘𑀺 𑀪𑀺𑀓𑁆𑀔𑀫𑀸𑀦𑀸 𑀦 𑀮𑀘𑁆𑀙𑀸𑀫𑀸’’𑀢𑀺, ‘‘𑀚𑀻𑀯𑀺𑀢𑀼𑀁 𑀯𑀸 𑀲𑀓𑁆𑀔𑀺𑀲𑁆𑀲𑀸𑀫 𑀦𑀼 𑀔𑁄 𑀦𑁄’’𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀯𑀸 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀤𑀼𑀚𑁆𑀚𑀻𑀯𑀺𑀓𑀸, 𑀈𑀳𑀺𑀢𑀁 𑀈𑀳𑀸 𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀚𑀻𑀯𑀺𑀢𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀏𑀓𑀢𑁆𑀣𑀸𑀦𑀺. 𑀢𑀲𑁆𑀫𑀸 𑀤𑀼𑀓𑁆𑀔𑁂𑀦 𑀈𑀳𑀺𑀢𑀁 𑀏𑀢𑁆𑀣 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀅𑀬𑀫𑁂𑀢𑁆𑀣 ¶ 𑀧𑀤𑀢𑁆𑀣𑁄. 𑀲𑁂𑀢𑀝𑁆𑀞𑀺𑀓𑀸𑀢𑀺 𑀲𑁂𑀢𑀓𑀸𑀦𑀺 𑀅𑀝𑁆𑀞𑀻𑀦𑀺 𑀏𑀢𑁆𑀣𑀸𑀢𑀺 𑀲𑁂𑀢𑀝𑁆𑀞𑀺𑀓𑀸. 𑀤𑀺𑀯𑀲𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀫𑀢𑀸𑀦𑀁 𑀓𑀧𑀡𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀘𑁆𑀙𑀢𑁆𑀢𑀓𑀯𑀡𑁆𑀡𑁂𑀳𑀺 𑀅𑀝𑁆𑀞𑀻𑀳𑀺 𑀢𑀢𑁆𑀭 𑀢𑀢𑁆𑀭 𑀧𑀭𑀺𑀓𑀺𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀢𑀝𑁆𑀝𑀺𑀓𑀸𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑁂𑀢𑀸 𑀅𑀝𑁆𑀝𑀺 𑀏𑀢𑁆𑀣𑀸𑀢𑀺 𑀲𑁂𑀢𑀝𑁆𑀝𑀺𑀓𑀸. 𑀅𑀝𑁆𑀝𑀻𑀢𑀺 𑀆𑀢𑀼𑀭𑀢𑀸 𑀩𑁆𑀬𑀸𑀥𑀺 𑀭𑁄𑀕𑁄. 𑀢𑀢𑁆𑀣 𑀘 𑀲𑀲𑁆𑀲𑀸𑀦𑀁 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁂 𑀲𑁂𑀢𑀓𑀭𑁄𑀕𑁂𑀦 𑀉𑀧𑀳𑀢𑀫𑁂𑀯 𑀧𑀘𑁆𑀙𑀺𑀦𑁆𑀦𑀔𑀻𑀭𑀁 𑀅𑀕𑁆𑀕𑀳𑀺𑀢𑀢𑀡𑁆𑀟𑀼𑀮𑀁 𑀧𑀡𑁆𑀟𑀭𑀧𑀡𑁆𑀟𑀭𑀁 𑀲𑀸𑀮𑀺𑀲𑀻𑀲𑀁 𑀯𑀸 𑀬𑀯𑀕𑁄𑀥𑀽𑀫𑀲𑀻𑀲𑀁 𑀯𑀸 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀫𑀸 ‘‘𑀲𑁂𑀢𑀝𑁆𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺.

𑀯𑀧𑁆𑀧𑀓𑀸𑀮𑁂 ¶ 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀧𑀺 𑀯𑀼𑀢𑁆𑀢𑀲𑀲𑁆𑀲𑀁 𑀢𑀢𑁆𑀣 𑀲𑀮𑀸𑀓𑀸 𑀏𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸; 𑀲𑀮𑀸𑀓𑀸𑀬 𑀯𑀸 𑀢𑀢𑁆𑀣 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀢𑁆𑀣 𑀓𑀺𑀭 𑀥𑀜𑁆𑀜𑀯𑀺𑀓𑁆𑀓𑀬𑀓𑀸𑀦𑀁 𑀲𑀦𑁆𑀢𑀺𑀓𑀁 𑀓𑀬𑀓𑁂𑀲𑀼 𑀕𑀢𑁂𑀲𑀼 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑁂 𑀅𑀪𑀺𑀪𑀯𑀺𑀢𑁆𑀯𑀸 𑀩𑀮𑀯𑀫𑀦𑀼𑀲𑁆𑀲𑀸𑀯 𑀥𑀜𑁆𑀜𑀁 𑀓𑀺𑀡𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑀸 𑀅𑀮𑀪𑀫𑀸𑀦𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀥𑀜𑁆𑀜𑀯𑀺𑀓𑁆𑀓𑀬𑀓𑀸 ‘‘𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀥𑀜𑁆𑀜𑀫𑀸𑀧𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀏𑀓𑀧𑀲𑁆𑀲𑁂 𑀯𑀡𑁆𑀡𑀚𑁆𑀛𑀓𑁆𑀔𑀁 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀥𑀜𑁆𑀜𑀢𑁆𑀣𑀺𑀓𑀸 𑀯𑀡𑁆𑀡𑀚𑁆𑀛𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀫𑀽𑀮𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀏𑀢𑁆𑀢𑀓𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀮𑀸𑀓𑀁 𑀮𑀺𑀔𑀺𑀢𑁆𑀯𑀸 𑀤𑁂𑀢𑀺, 𑀢𑁂 𑀢𑀁 𑀕𑀳𑁂𑀢𑁆𑀯𑀸 𑀥𑀜𑁆𑀜𑀫𑀸𑀧𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀺𑀦𑁆𑀦𑀧𑀝𑀺𑀧𑀸𑀝𑀺𑀬𑀸 𑀥𑀜𑁆𑀜𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀲𑀮𑀸𑀓𑀸𑀬 𑀢𑀢𑁆𑀣 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸.

𑀦 ¶ 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀦𑁆𑀢𑀺 𑀧𑀕𑁆𑀕𑀳𑁂𑀦 𑀬𑁄 𑀉𑀜𑁆𑀙𑁄, 𑀢𑁂𑀦 𑀬𑀸𑀧𑁂𑀢𑀼𑀁 𑀦 𑀲𑀼𑀓𑀭𑀸. 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀁 𑀅𑀭𑀺𑀬𑀸 𑀉𑀜𑁆𑀙𑀁 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀢𑁂𑀦 𑀉𑀜𑁆𑀙𑁂𑀦 𑀬𑀸𑀧𑁂𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀸 𑀓𑀺𑀭 𑀢𑀢𑁆𑀣 𑀲𑀢𑁆𑀢𑀝𑁆𑀞𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀏𑀓𑀤𑀺𑀯𑀲𑀫𑁆𑀧𑀺 𑀬𑀸𑀧𑀦𑀫𑀢𑁆𑀢𑀁 𑀦 𑀮𑀪𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀢𑁆𑀢𑀭𑀸𑀧𑀣𑀓𑀸 𑀅𑀲𑁆𑀲𑀯𑀸𑀡𑀺𑀚𑀸…𑀧𑁂… 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀦𑁆𑀢𑀺 𑁋 𑀢𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑁄 𑀢𑁂𑀦 𑀲𑀫𑀬𑁂𑀦. 𑀉𑀢𑁆𑀢𑀭𑀸𑀧𑀣𑀯𑀸𑀲𑀺𑀓𑀸 𑀉𑀢𑁆𑀢𑀭𑀸𑀧𑀣𑀢𑁄 𑀯𑀸 𑀆𑀕𑀢𑀢𑁆𑀢𑀸 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀅𑀲𑁆𑀲𑀯𑀸𑀡𑀺𑀚𑀸 𑀉𑀢𑁆𑀢𑀭𑀸𑀧𑀣𑁂 𑀅𑀲𑁆𑀲𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑁂 ¶ 𑀧𑀜𑁆𑀘 𑀅𑀲𑁆𑀲𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀤𑀺𑀕𑀼𑀡𑀁 𑀢𑀺𑀕𑀼𑀡𑀁 𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑀸 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑀸 𑀢𑁂𑀳𑀺 𑀅𑀢𑁆𑀢𑀦𑁄 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀪𑀽𑀢𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀅𑀲𑁆𑀲𑀲𑀢𑁂𑀳𑀺 𑀯𑁂𑀭𑀜𑁆𑀚𑀁 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑀸 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀦 𑀳𑀺 𑀲𑀓𑁆𑀓𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀉𑀧𑀕𑀘𑁆𑀙𑀦𑁆𑀢𑀸 𑀘 𑀩𑀳𑀺𑀦𑀕𑀭𑁂 𑀉𑀤𑀓𑁂𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑁂 𑀞𑀸𑀦𑁂 𑀅𑀢𑁆𑀢𑀦𑁄 𑀘 𑀯𑀸𑀲𑀸𑀕𑀸𑀭𑀸𑀦𑀺 𑀅𑀲𑁆𑀲𑀸𑀦𑀜𑁆𑀘 𑀫𑀦𑁆𑀤𑀺𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀸𑀦𑀺 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 ‘‘𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀬𑁄’’𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂𑀦𑀸𑀳 𑁋 ‘‘𑀢𑁂𑀳𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀦𑁆𑀢𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀣𑀧𑀢𑁆𑀣𑀧𑀫𑀸𑀡𑀁 𑀧𑀼𑀮𑀓𑀁. 𑀧𑀢𑁆𑀣𑁄 𑀦𑀸𑀫 𑀦𑀸𑀴𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀮𑀁 𑀬𑀸𑀧𑀦𑀸𑀬. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦’’𑀦𑁆𑀢𑀺 (𑀚𑀸. 𑁨.𑁨𑁧.𑁧𑁯𑁨). 𑀧𑀼𑀮𑀓𑀁 𑀦𑀸𑀫 𑀦𑀺𑀢𑁆𑀣𑀼𑀲𑀁 𑀓𑀢𑁆𑀯𑀸 𑀉𑀲𑁆𑀲𑁂𑀤𑁂𑀢𑁆𑀯𑀸 𑀕𑀳𑀺𑀢𑀬𑀯𑀢𑀡𑁆𑀟𑀼𑀮𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀳𑀺 𑀲𑀣𑀼𑀲𑀸 𑀳𑁄𑀦𑁆𑀢𑀺, 𑀧𑀸𑀡𑀓𑀸 𑀯𑀺𑀚𑁆𑀛𑀦𑁆𑀢𑀺, 𑀅𑀤𑁆𑀥𑀸𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀯𑀸𑀡𑀺𑀚𑀸 𑀅𑀤𑁆𑀥𑀸𑀦𑀓𑁆𑀔𑀫𑀁 𑀓𑀢𑁆𑀯𑀸 𑀬𑀯𑀢𑀡𑁆𑀟𑀼𑀮𑀫𑀸𑀤𑀸𑀬 𑀅𑀤𑁆𑀥𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀺 ¶ ‘‘𑀬𑀢𑁆𑀣 𑀅𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀁 𑀢𑀺𑀡𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣𑁂𑀢𑀁 𑀅𑀲𑁆𑀲𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀓𑀲𑁆𑀫𑀸 𑀧𑀦 𑀢𑁂𑀳𑀺 𑀢𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀦 𑀳𑀺 𑀢𑁂 𑀤𑀓𑁆𑀔𑀺𑀡𑀸𑀧𑀣𑀫𑀦𑀼𑀲𑁆𑀲𑀸 𑀯𑀺𑀬 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸, 𑀢𑁂 𑀧𑀦 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸, 𑀥𑀫𑁆𑀫𑀫𑀸𑀫𑀓𑀸, 𑀲𑀗𑁆𑀖𑀫𑀸𑀫𑀓𑀸; 𑀢𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀅𑀤𑁆𑀤𑀲𑀁𑀲𑀼 𑀲𑀢𑁆𑀢𑀝𑁆𑀞 𑀪𑀺𑀓𑁆𑀔𑀽 𑀲𑀼𑀦𑀺𑀯𑀢𑁆𑀣𑁂 𑀲𑀼𑀧𑀸𑀭𑀼𑀢𑁂 ¶ 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁂 𑀲𑀓𑀮𑀫𑁆𑀧𑀺 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀪𑀫𑀸𑀦𑁂. 𑀤𑀺𑀲𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑁆𑀬𑀸 𑀇𑀫𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑁆𑀲𑀁 𑀉𑀧𑀕𑀢𑀸; 𑀙𑀸𑀢𑀓𑀜𑁆𑀘 𑀯𑀢𑁆𑀢𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑀪𑀦𑁆𑀢𑀺, 𑀅𑀢𑀺𑀯𑀺𑀬 𑀓𑀺𑀮𑀫𑀦𑁆𑀢𑀺. 𑀫𑀬𑀜𑁆𑀘𑀫𑁆𑀳 𑀆𑀕𑀦𑁆𑀢𑀼𑀓𑀸, 𑀦 𑀲𑀓𑁆𑀓𑁄𑀫 𑀦𑁂𑀲𑀁 𑀤𑁂𑀯𑀲𑀺𑀓𑀁 𑀬𑀸𑀕𑀼𑀜𑁆𑀘 𑀪𑀢𑁆𑀢𑀜𑁆𑀘 𑀧𑀝𑀺𑀬𑀸𑀤𑁂𑀢𑀼𑀁. 𑀅𑀫𑁆𑀳𑀸𑀓𑀁 𑀧𑀦 𑀅𑀲𑁆𑀲𑀸 𑀲𑀸𑀬𑀜𑁆𑀘 𑀧𑀸𑀢𑁄 𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀢𑁆𑀢𑀁 𑀮𑀪𑀦𑁆𑀢𑀺. 𑀬𑀁𑀦𑀽𑀦 𑀫𑀬𑀁 𑀏𑀓𑀫𑁂𑀓𑀲𑁆𑀲 𑀅𑀲𑁆𑀲𑀲𑁆𑀲 𑀧𑀸𑀢𑀭𑀸𑀲𑀪𑀢𑁆𑀢𑀢𑁄 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀤𑀤𑁂𑀬𑁆𑀬𑀸𑀫. 𑀏𑀯𑀁 𑀅𑀬𑁆𑀬𑀸 𑀘 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺 ¶ , 𑀅𑀲𑁆𑀲𑀸 𑀘 𑀬𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀳𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺.

𑀧𑀜𑁆𑀜𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑀲𑀗𑁆𑀔𑁂𑀧𑁂𑀦 𑀞𑀧𑀺𑀢𑀁. 𑀇𑀤𑀸𑀦𑀺 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀮𑀩𑁆𑀪𑀢𑀺. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸, 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀢𑁂 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑀸 𑀅𑀳𑁂𑀲𑀼𑀁. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸, 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀯𑀸 𑀢𑁂𑀦 𑀯𑀸 𑀳𑀺 𑀧𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀸 𑀆𑀤𑀸𑀬𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀬𑀣𑀸 ‘‘𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧). 𑀧𑀺𑀡𑁆𑀟𑀁 𑀅𑀮𑀪𑀫𑀸𑀦𑀸𑀢𑀺 𑀲𑀓𑀮𑀫𑁆𑀧𑀺 𑀯𑁂𑀭𑀜𑁆𑀚𑀁 𑀘𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀼 𑀧𑀺𑀡𑁆𑀟𑁄, 𑀅𑀦𑁆𑀢𑀫𑀲𑁄 ‘‘𑀅𑀢𑀺𑀘𑁆𑀙𑀣𑀸’’𑀢𑀺 𑀯𑀸𑀘𑀫𑁆𑀧𑀺 𑀅𑀮𑀪𑀫𑀸𑀦𑀸.

𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀆𑀭𑀸𑀫𑀁 𑀆𑀳𑀭𑀺𑀢𑁆𑀯𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑁂 𑀮𑀤𑁆𑀥𑀁 𑀏𑀓𑀫𑁂𑀓𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀕𑀳𑁂𑀢𑁆𑀯𑀸 𑀆𑀭𑀸𑀫𑀁 𑀦𑁂𑀢𑁆𑀯𑀸. 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀣𑁂𑀭𑀸𑀦𑀁 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀺, 𑀬𑁄 𑀦𑁂𑀲𑀁 𑀢𑀁 𑀕𑀳𑁂𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀧𑀘𑁂𑀬𑁆𑀬. 𑀲𑀸𑀫𑀫𑁆𑀧𑀺 𑀧𑀘𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺 𑀦 𑀘 𑀯𑀝𑁆𑀝𑀢𑀺. 𑀢𑁂 𑀏𑀯𑀁 𑀦𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸 𑀘 𑀪𑀯𑀺𑀲𑁆𑀲𑀢𑀺, 𑀲𑀸𑀫𑀧𑀸𑀓𑀧𑀭𑀺𑀫𑁄𑀘𑀦𑀜𑁆𑀘𑀸𑀢𑀺 𑀅𑀝𑁆𑀞 𑀅𑀝𑁆𑀞 ¶ 𑀚𑀦𑀸 𑀯𑀸 𑀤𑀲 𑀤𑀲 𑀚𑀦𑀸 𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀲𑀓𑀁 𑀲𑀓𑀁 𑀧𑀝𑀺𑀯𑀻𑀲𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺 ¶ . 𑀪𑀕𑀯𑀢𑁄 𑀧𑀦 𑀢𑁂 𑀅𑀲𑁆𑀲𑀯𑀸𑀡𑀺𑀚𑀸 𑀧𑀢𑁆𑀣𑀧𑀼𑀮𑀓𑀜𑁆𑀘 𑀤𑁂𑀦𑁆𑀢𑀺, 𑀢𑀤𑀼𑀧𑀺𑀬𑀜𑁆𑀘 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀁. 𑀢𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀳𑀭𑀺𑀢𑁆𑀯𑀸 𑀲𑀺𑀮𑀸𑀬𑀁 𑀧𑀺𑀲𑀢𑀺. 𑀧𑀼𑀜𑁆𑀜𑀯𑀢𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀦 𑀓𑀢𑀁 𑀫𑀦𑀸𑀧𑀫𑁂𑀯 𑀳𑁄𑀢𑀺. 𑀅𑀣 𑀦𑀁 𑀧𑀺𑀲𑀺𑀢𑁆𑀯𑀸 𑀲𑀧𑁆𑀧𑀺𑀆𑀤𑀻𑀳𑀺 𑀲𑀫𑁆𑀫𑀸 𑀬𑁄𑀚𑁂𑀢𑁆𑀯𑀸 𑀪𑀕𑀯𑀢𑁄 ¶ 𑀉𑀧𑀦𑀸𑀫𑁂𑀲𑀺. 𑀅𑀣𑁂𑀢𑁆𑀣 𑀤𑁂𑀯𑀢𑀸 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀦𑁆𑀢𑀺. 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀓𑀸𑀮𑀁 𑀅𑀢𑀺𑀦𑀸𑀫𑁂𑀢𑀺. 𑀦 𑀢𑀢𑁄 𑀧𑀝𑁆𑀞𑀸𑀬 𑀧𑀺𑀡𑁆𑀟𑀸𑀬 𑀘𑀭𑀢𑀺.

𑀓𑀺𑀁 𑀧𑀦𑀸𑀦𑀦𑁆𑀤𑀢𑁆𑀣𑁂𑀭𑁄 𑀢𑀤𑀸 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺? 𑀳𑁄𑀢𑀺, 𑀦𑁄 𑀘 𑀔𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀸. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀺. 𑀓𑀤𑀸𑀘𑀺 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀲𑀺, 𑀓𑀤𑀸𑀘𑀺 𑀦𑀸𑀕𑀺𑀢𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀫𑁂𑀖𑀺𑀬𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀉𑀧𑀯𑀸𑀡𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀲𑀸𑀕𑀢𑀢𑁆𑀣𑁂𑀭𑁄, 𑀓𑀤𑀸𑀘𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄. 𑀢𑁂 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀬𑀤𑀸 𑀇𑀘𑁆𑀙𑀦𑁆𑀢𑀺 𑀢𑀤𑀸 𑀧𑀓𑁆𑀓𑀫𑀦𑁆𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂𑀲𑀼 𑀢𑁂𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑁄𑀢𑀺, 𑀧𑀓𑁆𑀓𑀦𑁆𑀢𑁂𑀲𑀼 𑀲𑀬𑀫𑁂𑀯 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀪𑀕𑀯𑀸𑀧𑀺 𑀓𑀺𑀜𑁆𑀘𑀸𑀧𑀺 𑀫𑁂 𑀜𑀸𑀢𑀺𑀲𑁂𑀝𑁆𑀞𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀦 𑀢𑀸𑀯 𑀮𑀪𑀢𑀺, 𑀅𑀣 𑀔𑁄 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀬𑀫𑁂𑀯 𑀧𑀢𑀺𑀭𑀽𑀧𑁄𑀢𑀺 𑀅𑀥𑀺𑀯𑀸𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀬𑀲𑁆𑀫𑀸 𑀧𑀦𑀸𑀦𑀦𑁆𑀤𑁄 𑀧𑀢𑁆𑀣𑀧𑀼𑀮𑀓𑀁 𑀲𑀺𑀮𑀸𑀬𑀁 𑀧𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺, 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺.

𑀦𑀦𑀼 𑀘 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀚𑀸𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀅𑀢𑁆𑀢𑀦𑀸 𑀅𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑁂 𑀢𑀤𑀸 𑀓𑀲𑁆𑀫𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀦 𑀅𑀤𑀁𑀲𑀼? 𑀅𑀬𑀜𑁆𑀘 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀪𑀕𑀯𑀦𑁆𑀢𑀁 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺, 𑀲𑁄 𑀓𑀲𑁆𑀫𑀸 𑀪𑀕𑀯𑀢𑁄 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀸𑀭𑀸𑀯𑀝𑁆𑀝𑀦𑀸𑀬. 𑀯𑁂𑀭𑀜𑁆𑀚𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀧𑀓𑁆𑀓𑀦𑁆𑀢𑀫𑀢𑁆𑀢𑀫𑁂𑀯 𑀲𑀓𑀮𑀜𑁆𑀘 𑀦𑀕𑀭𑀁 𑀲𑀫𑀦𑁆𑀢𑀸 𑀘 𑀬𑁄𑀚𑀦𑀫𑀢𑁆𑀢𑀁 𑀬𑀢𑁆𑀣 𑀲𑀓𑁆𑀓𑀸 𑀧𑀼𑀭𑁂𑀪𑀢𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑀼𑀁, 𑀢𑀁 𑀲𑀩𑁆𑀩𑀁 𑀫𑀸𑀭𑁄 𑀆𑀯𑀝𑁆𑀝𑁂𑀢𑁆𑀯𑀸 𑀫𑁄𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀫𑀸 𑀦 𑀓𑁄𑀘𑀺 𑀅𑀦𑁆𑀢𑀫𑀲𑁄 𑀲𑀸𑀫𑀻𑀘𑀺𑀓𑀫𑁆𑀫𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣.

𑀓𑀺𑀁 ¶ 𑀧𑀦 𑀪𑀕𑀯𑀸𑀧𑀺 𑀫𑀸𑀭𑀸𑀯𑀝𑁆𑀝𑀦𑀁 𑀅𑀚𑀸𑀦𑀺𑀢𑁆𑀯𑀸𑀯 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀢𑁄𑀢𑀺? 𑀦𑁄 𑀅𑀚𑀸𑀦𑀺𑀢𑁆𑀯𑀸. 𑀅𑀣 𑀓𑀲𑁆𑀫𑀸 𑀘𑀫𑁆𑀧𑀸-𑀲𑀸𑀯𑀢𑁆𑀣𑀺-𑀭𑀸𑀚𑀕𑀳𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦 𑀉𑀧𑀕𑀢𑁄𑀢𑀺? 𑀢𑀺𑀝𑁆𑀞𑀦𑁆𑀢𑀼 𑀘𑀫𑁆𑀧𑀸-𑀲𑀸𑀯𑀢𑁆𑀣𑀺-𑀭𑀸𑀚𑀕𑀳𑀸𑀤𑀻𑀦𑀺, 𑀲𑀘𑁂𑀧𑀺 𑀪𑀕𑀯𑀸 𑀢𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 ¶ 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀢𑀺𑀤𑀲𑀧𑀼𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬, 𑀢𑀫𑁆𑀧𑀺 𑀫𑀸𑀭𑁄 𑀆𑀯𑀝𑁆𑀝𑁂𑀬𑁆𑀬. 𑀲𑁄 𑀓𑀺𑀭 𑀢𑀁 𑀲𑀁𑀯𑀘𑁆𑀙𑀭𑀁 𑀅𑀢𑀺𑀯𑀺𑀬 𑀆𑀖𑀸𑀢𑁂𑀦 ¶ 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀇𑀥 𑀧𑀦 𑀪𑀕𑀯𑀸 𑀇𑀫𑀁 𑀅𑀢𑀺𑀭𑁂𑀓𑀓𑀸𑀭𑀡𑀁 𑀅𑀤𑁆𑀤𑀲 𑁋 ‘‘𑀅𑀲𑁆𑀲𑀯𑀸𑀡𑀺𑀚𑀸 𑀪𑀺𑀓𑁆𑀔𑀽𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀯𑁂𑀭𑀜𑁆𑀚𑀸𑀬𑀫𑁂𑀯 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺.

𑀓𑀺𑀁 𑀧𑀦 𑀫𑀸𑀭𑁄 𑀯𑀸𑀡𑀺𑀚𑀓𑁂 𑀆𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀦𑁄 𑀦 𑀲𑀓𑁆𑀓𑁄𑀢𑀺, 𑀢𑁂 𑀧𑀦 𑀆𑀯𑀝𑁆𑀝𑀺𑀢𑀧𑀭𑀺𑀬𑁄𑀲𑀸𑀦𑁂 𑀆𑀕𑀫𑀺𑀁𑀲𑀼. 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀫𑀸 𑀦 𑀆𑀯𑀝𑁆𑀝𑁂𑀢𑀻𑀢𑀺? 𑀅𑀯𑀺𑀲𑀳𑀢𑀸𑀬. 𑀦 𑀳𑀺 𑀲𑁄 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀝𑀪𑀺𑀓𑁆𑀔𑀸𑀬 𑀦𑀺𑀩𑀤𑁆𑀥𑀤𑀸𑀦𑀲𑁆𑀲 𑀅𑀧𑁆𑀧𑀺𑀢𑀯𑀢𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀯𑀺𑀲𑀳𑀢𑀺. 𑀘𑀢𑀼𑀦𑁆𑀦𑀜𑁆𑀳𑀺 𑀦 𑀲𑀓𑁆𑀓𑀸 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀝𑀪𑀺𑀓𑁆𑀔𑀸𑀲𑀗𑁆𑀔𑁂𑀧𑁂𑀦 𑀯𑀸 𑀦𑀺𑀩𑀤𑁆𑀥𑀤𑀸𑀦𑀲𑁆𑀲 𑀅𑀧𑁆𑀧𑀺𑀢𑀯𑀢𑁆𑀢𑀲𑀗𑁆𑀔𑁂𑀧𑁂𑀦 𑀯𑀸 𑀧𑀭𑀺𑀘𑁆𑀘𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀩𑀼𑀤𑁆𑀥𑀸𑀦𑀁 𑀚𑀻𑀯𑀺𑀢𑀲𑁆𑀲 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀯𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑁂𑀯𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀳𑀺 𑀧𑀪𑀸 𑀢𑀣𑀸𑀕𑀢𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑁆𑀧𑀤𑁂𑀲𑀁 𑀧𑀢𑁆𑀯𑀸 𑀯𑀺𑀳𑀢𑀸𑀦𑀼𑀪𑀸𑀯𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁. 𑀢𑀲𑁆𑀫𑀸 𑀫𑀸𑀭𑁂𑀦 𑀅𑀓𑀢𑀦𑁆𑀢𑀭𑀸𑀬𑀁 𑀪𑀺𑀓𑁆𑀔𑀁 𑀪𑀕𑀯𑀸 𑀲𑀲𑀸𑀯𑀓𑀲𑀗𑁆𑀖𑁄 𑀢𑀤𑀸 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀘 𑀏𑀓𑀤𑀺𑀯𑀲𑀁 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀦𑁆𑀢𑀺 𑀪𑀕𑀯𑀸 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀼𑀲𑀮𑀲𑀗𑁆𑀖𑀝𑁆𑀝𑀚𑀦𑀺𑀢𑀁 𑀉𑀤𑀼𑀓𑁆𑀔𑀮𑀲𑀤𑁆𑀤𑀁 𑀲𑀼𑀡𑀺. 𑀢𑀢𑁄 𑀧𑀭𑀁 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸𑀢𑀺 𑀏𑀯𑀫𑀸𑀤𑀺 𑀬𑀁 𑀧𑀭𑀢𑁄 ‘‘𑀓𑀺𑀦𑁆𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀤𑀼𑀓𑁆𑀔𑀮𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺, 𑀢𑀲𑁆𑀲 𑀧𑀭𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀢𑀣𑀸𑀕𑀢𑀸 𑀦𑀸𑀫 𑀚𑀸𑀦𑀦𑁆𑀢𑀸𑀧𑀺 𑀲𑀘𑁂 𑀢𑀸𑀤𑀺𑀲𑀁 𑀧𑀼𑀘𑁆𑀙𑀸𑀓𑀸𑀭𑀡𑀁 𑀳𑁄𑀢𑀺, 𑀧𑀼𑀘𑁆𑀙𑀦𑁆𑀢𑀺. 𑀲𑀘𑁂 𑀧𑀦 𑀢𑀸𑀤𑀺𑀲𑀁 𑀧𑀼𑀘𑁆𑀙𑀸𑀓𑀸𑀭𑀡𑀁 𑀦𑀢𑁆𑀣𑀺, 𑀚𑀸𑀦𑀦𑁆𑀢𑀸𑀧𑀺 ¶ 𑀦 𑀧𑀼𑀘𑁆𑀙𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀅𑀚𑀸𑀦𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀚𑀸𑀦𑀦𑁆𑀢𑀸𑀧𑀻𑀢𑀺 𑀦 𑀯𑀼𑀢𑁆𑀢𑀁. 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀻𑀢𑀺 𑀲𑀘𑁂 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀲𑁄 𑀓𑀸𑀮𑁄 𑀳𑁄𑀢𑀺, 𑀏𑀯𑀁 𑀢𑀁 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺; 𑀲𑀘𑁂 𑀦 𑀳𑁄𑀢𑀺 ¶ , 𑀏𑀯𑀫𑁆𑀧𑀺 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸𑀯 𑀦 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀧𑀺 𑀘 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀸𑀭𑀡𑀦𑀺𑀲𑁆𑀲𑀺𑀢𑀁, 𑀢𑀤𑁂𑀯 𑀧𑀼𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀲𑁂𑀢𑀼 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀫𑀕𑁆𑀕𑁂𑀦𑁂𑀯 𑀢𑀸𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀖𑀸𑀢𑁄, 𑀲𑀫𑀼𑀘𑁆𑀙𑁂𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀏𑀢𑁆𑀣 𑀬𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫𑀸𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀲𑀼𑀢𑁆𑀢𑀁 𑀯𑀸 𑀧𑀼𑀩𑁆𑀩𑀘𑀭𑀺𑀢𑀓𑀸𑀭𑀡𑀬𑀼𑀢𑁆𑀢𑀁 𑀚𑀸𑀢𑀓𑀁 𑀯𑀸 𑀓𑀣𑀬𑀺𑀲𑁆𑀲𑀸𑀫. 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 ¶ 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺 𑀲𑀸𑀯𑀓𑀸𑀦𑀁 𑀯𑀸 𑀢𑀸𑀬 𑀧𑀼𑀘𑁆𑀙𑀸𑀬 𑀯𑀻𑀢𑀺𑀓𑁆𑀓𑀫𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫 𑀆𑀡𑀁 𑀞𑀧𑁂𑀲𑁆𑀲𑀸𑀫𑀸𑀢𑀺.

𑀅𑀣 𑀔𑁄 𑀪𑀕𑀯𑀸…𑀧𑁂… 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯 𑀳𑀺 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀧𑀝𑀺𑀮𑀸𑀪𑀁 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀁 𑀲𑀸𑀫𑀧𑀸𑀓𑀧𑀭𑀺𑀫𑁄𑀘𑀦𑀜𑁆𑀘 𑀆𑀭𑁄𑀘𑁂𑀦𑁆𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤𑀸’’𑀢𑀺 𑀇𑀤𑀁 𑀧𑀦 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄 𑀆𑀳. 𑀲𑀸𑀥𑀼𑀓𑀸𑀭𑀁 𑀧𑀦 𑀤𑀢𑁆𑀯𑀸 𑀤𑁆𑀯𑀻𑀲𑀼 𑀆𑀓𑀸𑀭𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀺𑀚𑀺𑀢𑀁, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀏𑀯𑀁 𑀤𑀼𑀩𑁆𑀪𑀺𑀓𑁆𑀔𑁂 𑀤𑀼𑀮𑁆𑀮𑀪𑀧𑀺𑀡𑁆𑀟𑁂 𑀇𑀫𑀸𑀬 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸𑀬 𑀇𑀫𑀺𑀦𑀸 𑀘 𑀲𑀮𑁆𑀮𑁂𑀔𑁂𑀦 𑀯𑀺𑀚𑀺𑀢𑀁. 𑀓𑀺𑀁 𑀯𑀺𑀚𑀺𑀢𑀦𑁆𑀢𑀺? 𑀤𑀼𑀩𑁆𑀪𑀺𑀓𑁆𑀔𑀁 𑀯𑀺𑀚𑀺𑀢𑀁, 𑀮𑁄𑀪𑁄 𑀯𑀺𑀚𑀺𑀢𑁄, 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄. 𑀓𑀣𑀁? ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀲𑀫𑀦𑁆𑀢𑀢𑁄 𑀧𑀦 𑀅𑀦𑀦𑁆𑀢𑀭𑀸 𑀕𑀸𑀫𑀦𑀺𑀕𑀫𑀸 𑀨𑀮𑀪𑀸𑀭𑀦𑀫𑀺𑀢𑀲𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀲𑀼𑀮𑀪𑀧𑀺𑀡𑁆𑀟𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀸 𑀇𑀥𑁂𑀯 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀲𑀢𑀻’’𑀢𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀘𑀺𑀦𑁆𑀢𑀸 𑀯𑀸 𑀯𑀺𑀖𑀸𑀢𑁄 𑀯𑀸 𑀦𑀢𑁆𑀣𑀺. 𑀏𑀯𑀁 𑀢𑀸𑀯 𑀤𑀼𑀩𑁆𑀪𑀺𑀓𑁆𑀔𑀁 𑀯𑀺𑀚𑀺𑀢𑀁 𑀅𑀪𑀺𑀪𑀽𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀺𑀢𑀁.

𑀓𑀣𑀁 𑀮𑁄𑀪𑁄 𑀯𑀺𑀚𑀺𑀢𑁄? ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀲𑀫𑀦𑁆𑀢𑀢𑁄 𑀧𑀦 𑀅𑀦𑀦𑁆𑀢𑀭𑀸 𑀕𑀸𑀫𑀦𑀺𑀕𑀫𑀸 𑀨𑀮𑀪𑀸𑀭𑀦𑀫𑀺𑀢𑀲𑀲𑁆𑀲𑀸 𑀲𑀼𑀪𑀺𑀓𑁆𑀔𑀸 𑀲𑀼𑀮𑀪𑀧𑀺𑀡𑁆𑀟𑀸 ¶ . 𑀳𑀦𑁆𑀤 𑀫𑀬𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀮𑁄𑀪𑀯𑀲𑁂𑀦 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 ‘‘𑀧𑀘𑁆𑀙𑀺𑀫𑀺𑀓𑀸𑀬 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀸’’𑀢𑀺 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄. 𑀏𑀯𑀁 𑀮𑁄𑀪𑁄 𑀯𑀺𑀚𑀺𑀢𑁄.

𑀓𑀣𑀁 ¶ 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄? 𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀇𑀫𑁂 𑀘 𑀫𑀦𑀼𑀲𑁆𑀲𑀸 𑀅𑀫𑁆𑀳𑁂 𑀤𑁆𑀯𑁂 𑀢𑀬𑁄 𑀫𑀸𑀲𑁂 𑀯𑀲𑀦𑁆𑀢𑁂𑀧𑀺 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀫𑀜𑁆𑀜𑀦𑁆𑀢𑀺. 𑀬𑀁𑀦𑀽𑀦 𑀫𑀬𑀁 𑀕𑀼𑀡𑀯𑀸𑀡𑀺𑀚𑁆𑀚𑀁 𑀓𑀢𑁆𑀯𑀸 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻…𑀧𑁂… 𑀅𑀲𑀼𑀓𑁄 𑀙𑀴𑀪𑀺𑀜𑁆𑀜𑁄𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀓𑀸𑀲𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀫𑀸’’𑀢𑀺 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀦 𑀉𑀧𑁆𑀧𑀸𑀤𑀺𑀢𑀸. 𑀏𑀯𑀁 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄 𑀅𑀪𑀺𑀪𑀽𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀺𑀢𑁄𑀢𑀺.

𑀅𑀦𑀸𑀕𑀢𑁂 𑀧𑀦 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀮𑀪𑀺𑀢𑁆𑀯𑀸𑀧𑀺 ‘‘𑀓𑀺𑀁 𑀇𑀤𑀁 𑀉𑀢𑁆𑀢𑀡𑁆𑀟𑀼𑀮𑀁 𑀅𑀢𑀺𑀓𑀺𑀮𑀺𑀦𑁆𑀦𑀁 𑀅𑀮𑁄𑀡𑀁 𑀅𑀢𑀺𑀮𑁄𑀡𑀁 𑀅𑀦𑀫𑁆𑀩𑀺𑀮𑀁 𑀅𑀘𑁆𑀘𑀫𑁆𑀩𑀺𑀮𑀁, 𑀓𑁄 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀺, 𑀑𑀜𑁆𑀜𑀸𑀢𑀁 𑀅𑀯𑀜𑁆𑀜𑀸𑀢𑀁 𑀓𑀭𑀺𑀲𑁆𑀲𑀢𑀺. 𑀅𑀣 𑀯𑀸 𑀚𑀦𑀧𑀤𑁄 ¶ 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀤𑀼𑀩𑁆𑀪𑀺𑀓𑁆𑀔𑁄 𑀳𑁄𑀢𑀺. 𑀏𑀓𑀤𑀸 𑀤𑀼𑀩𑁆𑀪𑀺𑀓𑁆𑀔𑁄 𑀳𑁄𑀢𑀺, 𑀏𑀓𑀤𑀸 𑀲𑀼𑀪𑀺𑀓𑁆𑀔𑁄 𑀳𑁄𑀢𑀺. 𑀲𑁆𑀯𑀸𑀬𑀁 𑀬𑀤𑀸 𑀲𑀼𑀪𑀺𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀢𑀼𑀫𑁆𑀳𑀸𑀓𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀔𑀚𑁆𑀚𑀓𑀸𑀤𑀺𑀧𑁆𑀧𑀪𑁂𑀤𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀸𑀮𑀺𑀯𑀺𑀓𑀢𑀺𑀁 𑀫𑀁𑀲𑁄𑀤𑀦𑀜𑁆𑀘 𑀤𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀢𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁 𑀢𑀼𑀫𑁆𑀳𑀸𑀓𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀗𑁆𑀔𑀸𑀢𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑀼𑀪𑀯𑀫𑀸𑀦𑀸𑀯 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀺, 𑀢𑀧𑁆𑀧𑀘𑁆𑀘𑀬𑀁 𑀫𑀸𑀦𑀜𑁆𑀘 𑀑𑀫𑀸𑀦𑀜𑁆𑀘 𑀓𑀭𑀺𑀲𑁆𑀲𑀢𑀺. 𑀓𑀣𑀁? 𑀓𑀲𑁆𑀫𑀸 𑀏𑀢𑁆𑀢𑀓𑀁 𑀧𑀓𑁆𑀓𑀁, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀪𑀸𑀚𑀦𑀸𑀦𑀺 𑀦𑀢𑁆𑀣𑀺, 𑀬𑀢𑁆𑀣 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀬𑁆𑀬𑀸𑀣𑀸𑀢𑀺.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀲𑀻𑀳𑀦𑀸𑀤𑀓𑀣𑀸

𑁧𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺𑀆𑀤𑀻𑀲𑀼 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀫𑀳𑀸 𑀘 𑀲𑁄 𑀕𑀼𑀡𑀫𑀳𑀦𑁆𑀢𑀢𑀸𑀬 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀕𑁄𑀢𑁆𑀢𑁂𑀦𑀸𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 ‘‘𑀏𑀢𑀭𑀳𑀺 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀅𑀯𑁄𑀘? 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 ¶ 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀲𑀢𑁆𑀣𑀸𑀭𑀸𑀧𑀺 𑀫𑀳𑀺𑀤𑁆𑀥𑀺𑀓𑀢𑀸𑀬 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀲𑁄 𑀢𑀁 𑀅𑀢𑁆𑀢𑀦𑁄 𑀫𑀳𑀺𑀤𑁆𑀥𑀺𑀓𑀢𑀁 𑀦𑀺𑀲𑁆𑀲𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸, 𑀪𑀺𑀓𑁆𑀔𑀽 𑀘 𑀓𑀺𑀮𑀫𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀧𑁆𑀧𑀝𑀓𑁄𑀚𑀁 𑀪𑁄𑀚𑁂𑀬𑁆𑀬’’𑀦𑁆𑀢𑀺. 𑀅𑀣𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀧𑀦𑀸𑀳𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀯𑀺𑀳𑀭𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀬𑀸𑀘𑀺𑀢𑁆𑀯𑀸 𑀏𑀯𑀁 𑀓𑀭𑁂𑀬𑁆𑀬𑀁, 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧𑀁; 𑀬𑀼𑀕𑀕𑁆𑀕𑀸𑀳𑁄 𑀯𑀺𑀬 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑀢𑁄 𑀪𑀯𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀸 𑀬𑀸𑀘𑀺𑀢𑀼𑀓𑀸𑀫𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘.

𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀣𑀯𑀺𑀬𑀸 𑀓𑀺𑀭 𑀳𑁂𑀝𑁆𑀞𑀺𑀫𑀢𑀮𑁂 𑀧𑀣𑀯𑀺𑀫𑀡𑁆𑀟𑁄 𑀧𑀣𑀯𑁄𑀚𑁄 𑀧𑀣𑀯𑀺-𑀧𑀧𑁆𑀧𑀝𑀓𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀁, 𑀲𑀸𑀤𑀼𑀭𑀲𑀦𑁆𑀢𑀺 𑀅𑀢𑁆𑀣𑁄. 𑀬𑀣𑁂𑀯 𑀳𑀺 ‘‘𑀢𑀢𑁆𑀭𑀲𑁆𑀲 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘𑀸’’𑀢𑀺 (𑀫. 𑀦𑀺. 𑁨.𑁪𑁮) 𑀏𑀢𑁆𑀣 𑀫𑀥𑀼𑀭𑀨𑀮𑁄𑀢𑀺 𑀅𑀢𑁆𑀣𑁄; 𑀏𑀯𑀫𑀺𑀥𑀸𑀧𑀺 𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀴𑀓𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲 𑀫𑀥𑀼𑀭𑀢𑀸𑀬 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀔𑀼𑀤𑁆𑀤𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀫𑀥𑀼. 𑀅𑀦𑀻𑀴𑀓𑀦𑁆𑀢𑀺 𑀦𑀺𑀫𑁆𑀫𑀓𑁆𑀔𑀺𑀓𑀁 𑀦𑀺𑀫𑁆𑀫𑀓𑁆𑀔𑀺𑀓𑀡𑁆𑀟𑀓𑀁 𑀧𑀭𑀺𑀲𑀼𑀤𑁆𑀥𑀁. 𑀏𑀢𑀁 𑀓𑀺𑀭 𑀫𑀥𑀼 𑀲𑀩𑁆𑀩𑀫𑀥𑀽𑀳𑀺 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀲𑀼𑀭𑀲𑀜𑁆𑀘 𑀑𑀚𑀯𑀦𑁆𑀢𑀜𑁆𑀘. 𑀢𑁂𑀦𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀴𑀓𑀁 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺.

𑀲𑀸𑀥𑀸𑀳𑀁 ¶ , 𑀪𑀦𑁆𑀢𑁂𑀢𑀺 𑀲𑀸𑀥𑀼 𑀅𑀳𑀁, 𑀪𑀦𑁆𑀢𑁂. 𑀏𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑀯𑀘𑀦𑀫𑁂𑀢𑀁. 𑀧𑀣𑀯𑀺𑀧𑀭𑀺𑀯𑀢𑁆𑀢𑀦𑀁 𑀆𑀬𑀸𑀘𑀦𑁆𑀢𑁄 𑀳𑀺 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳. 𑀧𑀭𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀁, 𑀳𑁂𑀝𑁆𑀞𑀺𑀫𑀢𑀮𑀁 𑀉𑀧𑀭𑀺𑀫𑀁 𑀓𑀭𑁂𑀬𑁆𑀬𑀁. 𑀓𑀲𑁆𑀫𑀸? 𑀏𑀯𑀜𑁆𑀳𑀺 𑀓𑀢𑁂 𑀲𑀼𑀔𑁂𑀦 𑀪𑀺𑀓𑁆𑀔𑀽 𑀧𑀧𑁆𑀧𑀝𑀓𑁄𑀚𑀁 𑀧𑀣𑀯𑀺𑀫𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺. 𑀅𑀣 𑀪𑀕𑀯𑀸 𑀅𑀦𑀦𑀼𑀜𑁆𑀜𑀸𑀢𑀼𑀓𑀸𑀫𑁄𑀧𑀺 𑀣𑁂𑀭𑀁 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀧𑀼𑀘𑁆𑀙𑀺 𑁋 ‘‘𑀬𑁂 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀧𑀸𑀡𑀸, 𑀢𑁂 𑀧𑀣𑀯𑀺𑀬𑀸 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀸𑀬 𑀆𑀓𑀸𑀲𑁂 ¶ 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀓𑀣𑀁 𑀓𑀭𑀺𑀲𑁆𑀲𑀲𑀺, 𑀓𑀢𑁆𑀣 𑀞𑀧𑁂𑀲𑁆𑀲𑀲𑀻𑀢𑀺? 𑀅𑀣 𑀣𑁂𑀭𑁄 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀓𑀸𑀳𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀏𑀓𑀁 𑀅𑀳𑀁 𑀪𑀦𑁆𑀢𑁂 𑀳𑀢𑁆𑀣𑀁 𑀬𑀣𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀏𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀺, 𑀧𑀣𑀯𑀺𑀲𑀤𑀺𑀲𑀁 𑀓𑀭𑀺𑀲𑁆𑀲𑀸𑀫𑀺. 𑀏𑀯𑀁 𑀓𑀢𑁆𑀯𑀸 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀏𑀓𑀲𑁆𑀫𑀺𑀁 𑀳𑀢𑁆𑀣𑀢𑀮𑁂 𑀞𑀺𑀢𑁂 𑀧𑀸𑀡𑁂 𑀢𑀢𑁄 𑀤𑀼𑀢𑀺𑀬𑀳𑀢𑁆𑀣𑀢𑀮𑁂 𑀲𑀗𑁆𑀓𑀸𑀫𑁂𑀦𑁆𑀢𑁄 𑀯𑀺𑀬 𑀢𑀢𑁆𑀣 𑀲𑀗𑁆𑀓𑀸𑀫𑁂𑀲𑁆𑀲𑀸𑀫𑀻𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀆𑀬𑀸𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀅𑀮𑀁 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀯𑀺𑀧𑀭𑀻𑀢𑀕𑁆𑀕𑀸𑀳𑀫𑁆𑀧𑀺 𑀲𑀢𑁆𑀢𑀸 𑀲𑀫𑁆𑀧𑀸𑀧𑀼𑀡𑁂𑀬𑁆𑀬𑀼𑀁. 𑀓𑀣𑀁? 𑀅𑀬𑀁 𑀦𑀼 𑀔𑁄 𑀧𑀣𑀯𑀻 ¶ , 𑀉𑀤𑀸𑀳𑀼 𑀦 𑀅𑀬𑀦𑁆𑀢𑀺. 𑀅𑀣 𑀯𑀸 𑀅𑀫𑁆𑀳𑀸𑀓𑀁 𑀦𑀼 𑀔𑁄 𑀅𑀬𑀁 𑀕𑀸𑀫𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀲’’𑀦𑁆𑀢𑀺. 𑀏𑀯𑀁 𑀦𑀺𑀕𑀫𑀚𑀦𑀧𑀤𑀔𑁂𑀢𑁆𑀢𑀸𑀭𑀸𑀫𑀸𑀤𑀻𑀲𑀼. 𑀦 𑀯𑀸 𑀏𑀲 𑀯𑀺𑀧𑀮𑁆𑀮𑀸𑀲𑁄, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀇𑀤𑁆𑀥𑀺𑀫𑀢𑁄 𑀇𑀤𑁆𑀥𑀺𑀯𑀺𑀲𑀬𑁄. 𑀏𑀯𑀁 𑀧𑀦 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀁 𑁋 𑀇𑀤𑀁 𑀤𑀼𑀩𑁆𑀪𑀺𑀓𑁆𑀔𑀁 𑀦𑀸𑀫 𑀦 𑀇𑀤𑀸𑀦𑀺𑀬𑁂𑀯 𑀳𑁄𑀢𑀺, 𑀅𑀦𑀸𑀕𑀢𑁂𑀧𑀺 𑀪𑀯𑀺𑀲𑁆𑀲𑀢𑀺. 𑀢𑀤𑀸 𑀪𑀺𑀓𑁆𑀔𑀽 𑀢𑀸𑀤𑀺𑀲𑀁 𑀇𑀤𑁆𑀥𑀺𑀫𑀦𑁆𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀓𑀼𑀢𑁄 𑀮𑀪𑀺𑀲𑁆𑀲𑀦𑁆𑀢𑀺? 𑀢𑁂 𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀲𑀼𑀓𑁆𑀔𑀯𑀺𑀧𑀲𑁆𑀲𑀓-𑀛𑀸𑀦𑀮𑀸𑀪𑀺-𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀸𑀧𑀺 𑀲𑀫𑀸𑀦𑀸 𑀇𑀤𑁆𑀥𑀺𑀩𑀮𑀸𑀪𑀸𑀯𑀸 𑀧𑀭𑀓𑀼𑀮𑀸𑀦𑀺 𑀧𑀺𑀡𑁆𑀟𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺. 𑀢𑀢𑁆𑀭 𑀫𑀦𑀼𑀲𑁆𑀲𑀸𑀦𑀁 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘‘𑀩𑀼𑀤𑁆𑀥𑀓𑀸𑀮𑁂 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀳𑁂𑀲𑀼𑀁. 𑀢𑁂 𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀇𑀤𑀸𑀦𑀺 𑀧𑀦 𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀼𑀁, 𑀢𑀣𑁂𑀯 𑀓𑀭𑁂𑀬𑁆𑀬𑀼𑀁. 𑀦 𑀅𑀫𑁆𑀳𑀸𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀓𑁆𑀓𑀁 𑀯𑀸 𑀆𑀫𑀁 𑀯𑀸 𑀔𑀸𑀤𑀺𑀢𑀼𑀁 𑀤𑀤𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀁 𑀢𑁂𑀲𑀼𑀬𑁂𑀯 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 ‘‘𑀦𑀢𑁆𑀣𑀺 𑀅𑀭𑀺𑀬𑀧𑀼𑀕𑁆𑀕𑀮𑀸’’𑀢𑀺 𑀇𑀫𑀁 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑁂𑀬𑁆𑀬𑀼𑀁. 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀘 𑀅𑀭𑀺𑀬𑁂 𑀕𑀭𑀳𑀦𑁆𑀢𑀸 𑀉𑀧𑀯𑀤𑀦𑁆𑀢𑀸 𑀅𑀧𑀸𑀬𑀼𑀧𑀕𑀸 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀫𑀸 𑀢𑁂 𑀭𑀼𑀘𑁆𑀘𑀺 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺.

𑀅𑀣 𑀣𑁂𑀭𑁄 𑀇𑀫𑀁 𑀬𑀸𑀘𑀦𑀁 𑀅𑀮𑀪𑀫𑀸𑀦𑁄 𑀅𑀜𑁆𑀜𑀁 𑀬𑀸𑀘𑀦𑁆𑀢𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀫𑁆𑀧𑀺𑀲𑁆𑀲 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀅𑀮𑀁 ¶ 𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁; 𑀅𑀢𑁆𑀣𑁄𑀧𑀺 𑀘𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀧𑀦 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀣𑁂𑀭𑁄 𑀓𑀺𑀁 𑀓𑀭𑁂𑀬𑁆𑀬𑀸𑀢𑀺? 𑀫𑀳𑀸𑀲𑀫𑀼𑀤𑁆𑀤𑀁 𑀏𑀓𑁂𑀦 ¶ 𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀫𑀸𑀢𑀺𑀓𑀸𑀫𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀢𑁄 𑀉𑀢𑁆𑀢𑀭𑀓𑀼𑀭𑀼𑀅𑀪𑀺𑀫𑀼𑀔𑀁 𑀫𑀕𑁆𑀕𑀁 𑀦𑀻𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀓𑀢𑁆𑀯𑀸 𑀤𑀲𑁆𑀲𑁂𑀬𑁆𑀬, 𑀬𑀣𑀸 𑀪𑀺𑀓𑁆𑀔𑀽 𑀕𑁄𑀘𑀭𑀕𑀸𑀫𑀁 𑀯𑀺𑀬 𑀬𑀣𑀸𑀲𑀼𑀔𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑁂𑀬𑁆𑀬𑀼𑀦𑁆𑀢𑀺.

𑀦𑀺𑀝𑁆𑀞𑀺𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀻𑀳𑀦𑀸𑀤𑀓𑀣𑀸.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁧𑁮. 𑀇𑀤𑀸𑀦𑀺 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀫𑀽𑀮𑀢𑁄 𑀧𑀪𑀼𑀢𑀺 𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀲𑀮𑁆𑀮𑀻𑀦𑀲𑁆𑀲 𑀏𑀓𑀻𑀪𑀸𑀯𑀁 𑀕𑀢𑀲𑁆𑀲. 𑀓𑀢𑀫𑁂𑀲𑀸𑀦𑀦𑁆𑀢𑀺 𑀅𑀢𑀻𑀢𑁂𑀲𑀼 𑀯𑀺𑀧𑀲𑁆𑀲𑀻𑀆𑀤𑀻𑀲𑀼 𑀩𑀼𑀤𑁆𑀥𑁂𑀲𑀼 𑀓𑀢𑀫𑁂𑀲𑀁. 𑀘𑀺𑀭𑀁 𑀅𑀲𑁆𑀲 𑀞𑀺𑀢𑀺, 𑀘𑀺𑀭𑀸 𑀯𑀸 𑀅𑀲𑁆𑀲 𑀞𑀺𑀢𑀻𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯.

𑀓𑀺𑀁 𑀧𑀦 𑀣𑁂𑀭𑁄 𑀇𑀫𑀁 𑀅𑀢𑁆𑀢𑀦𑁄 𑀧𑀭𑀺𑀯𑀺𑀢𑀓𑁆𑀓𑀁 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀓𑁆𑀓𑁄𑀢𑀺 𑀘 𑀦 𑀲𑀓𑁆𑀓𑁄𑀢𑀺 𑀘. 𑀅𑀬𑀜𑁆𑀳𑀺 𑀇𑀫𑁂𑀲𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀇𑀫𑁂𑀲𑀁 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀏𑀢𑁆𑀢𑀓𑀁 𑀲𑀓𑁆𑀓𑁄𑀢𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁. 𑀇𑀫𑀺𑀦𑀸 𑀧𑀦 𑀓𑀸𑀭𑀡𑁂𑀦 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀇𑀫𑀺𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀏𑀢𑀁 𑀦 𑀲𑀓𑁆𑀓𑁄𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀏𑀢𑀫𑁆𑀧𑀺 𑀲𑁄𑀴𑀲𑀯𑀺𑀥𑀸𑀬 𑀧𑀜𑁆𑀜𑀸𑀬 𑀫𑀢𑁆𑀣𑀓𑀁 𑀧𑀢𑁆𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀦 𑀪𑀸𑀭𑀺𑀬𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀬𑀁 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀢𑀼𑀮𑀁 𑀙𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑁂𑀦 𑀢𑀼𑀮𑀦𑀲𑀤𑀺𑀲𑀁 𑀳𑁄𑀢𑀻𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀪𑀕𑀯𑀢𑁄 𑀘 𑀲𑀸𑀭𑀺𑀧𑀼𑀢𑁆𑀢 𑀯𑀺𑀧𑀲𑁆𑀲𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁯. 𑀧𑀼𑀦 𑀣𑁂𑀭𑁄 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄 𑀦𑀼 𑀔𑁄 𑀪𑀦𑁆𑀢𑁂𑀢𑀺 𑀓𑀸𑀭𑀡𑀧𑀼𑀘𑁆𑀙𑀸 ¶ , 𑀢𑀲𑁆𑀲 𑀓𑀢𑀫𑁄 𑀦𑀼 𑀔𑁄 𑀪𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀳𑁂𑀢𑀼 𑀧𑀘𑁆𑀘𑀬𑁄𑀢𑀺 𑀉𑀪𑀬𑀫𑁂𑀢𑀁 𑀓𑀸𑀭𑀡𑀸𑀥𑀺𑀯𑀘𑀦𑀁; 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑁂𑀦 𑀢𑀲𑁆𑀲 𑀨𑀮𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀧𑀝𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀅𑀢𑁆𑀣𑀢𑁄 𑀏𑀓𑀫𑁆𑀧𑀺 𑀯𑁄𑀳𑀸𑀭𑀯𑀲𑁂𑀦 𑀘 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀘 𑀢𑀢𑁆𑀭 𑀢𑀢𑁆𑀭 𑀏𑀢𑀁 𑀉𑀪𑀬𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀇𑀤𑀸𑀦𑀺 ¶ 𑀢𑀁 𑀳𑁂𑀢𑀼𑀜𑁆𑀘 𑀧𑀘𑁆𑀘𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀘 𑀲𑀸𑀭𑀺𑀧𑀼𑀢𑁆𑀢 𑀯𑀺𑀧𑀲𑁆𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀦𑁆𑀢𑀺 𑀦 𑀆𑀮𑀲𑀺𑀬𑀓𑀺𑀮𑀸𑀲𑀼𑀦𑁄, 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀆𑀮𑀲𑀺𑀬𑀁 𑀯𑀸 𑀑𑀲𑀦𑁆𑀦𑀯𑀻𑀭𑀺𑀬𑀢𑀸 𑀯𑀸 𑀅𑀢𑁆𑀣𑀺. 𑀩𑀼𑀤𑁆𑀥𑀸 𑀳𑀺 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀲𑁆𑀲 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀲𑀫𑀓𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀦 𑀧𑀭𑀺𑀲𑀸𑀬 𑀅𑀧𑁆𑀧𑀪𑀸𑀯𑀁 𑀤𑀺𑀲𑁆𑀯𑀸 𑀑𑀲𑀦𑁆𑀦𑀯𑀻𑀭𑀺𑀬𑀸 𑀳𑁄𑀦𑁆𑀢𑀺, 𑀦𑀸𑀧𑀺 𑀫𑀳𑀦𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀉𑀲𑁆𑀲𑀦𑁆𑀦𑀯𑀻𑀭𑀺𑀬𑀸. 𑀬𑀣𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀲𑀢𑁆𑀢𑀦𑁆𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑁄 𑀔𑀼𑀤𑁆𑀤𑀓𑁂 𑀯𑀸 𑀫𑀳𑀦𑁆𑀢𑁂 𑀯𑀸 ¶ 𑀧𑀸𑀡𑁂 𑀏𑀓𑀲𑀤𑀺𑀲𑁂𑀦𑁂𑀯 𑀯𑁂𑀕𑁂𑀦 𑀥𑀸𑀯𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘‘𑀫𑀸 𑀫𑁂 𑀚𑀯𑁄 𑀧𑀭𑀺𑀳𑀸𑀬𑀻’’𑀢𑀺. 𑀏𑀯𑀁 𑀩𑀼𑀤𑁆𑀥𑀸 𑀅𑀧𑁆𑀧𑀓𑀸𑀬 𑀯𑀸 𑀫𑀳𑀢𑀺𑀬𑀸 𑀯𑀸 𑀧𑀭𑀺𑀲𑀸𑀬 𑀲𑀫𑀓𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘‘𑀫𑀸 𑀦𑁄 𑀥𑀫𑁆𑀫𑀕𑀭𑀼𑀢𑀸 𑀧𑀭𑀺𑀳𑀸𑀬𑀻’’𑀢𑀺. 𑀥𑀫𑁆𑀫𑀕𑀭𑀼𑀦𑁄 𑀳𑀺 𑀩𑀼𑀤𑁆𑀥𑀸 𑀥𑀫𑁆𑀫𑀕𑀸𑀭𑀯𑀸𑀢𑀺.

𑀬𑀣𑀸 𑀧𑀦 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀏𑀯𑀁 𑀢𑁂 𑀦 𑀤𑁂𑀲𑁂𑀲𑀼𑀁. 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀅𑀧𑁆𑀧𑀭𑀚𑀓𑁆𑀔𑀢𑀸𑀬. 𑀢𑁂𑀲𑀁 𑀓𑀺𑀭 𑀓𑀸𑀮𑁂 𑀤𑀻𑀖𑀸𑀬𑀼𑀓𑀸 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀸 𑀅𑀳𑁂𑀲𑀼𑀁. 𑀢𑁂 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀏𑀓𑀕𑀸𑀣𑀫𑁆𑀧𑀺 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀅𑀪𑀺𑀲𑀫𑁂𑀦𑁆𑀢𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀼𑀁. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀧𑁆𑀧𑀓𑀜𑁆𑀘 𑀦𑁂𑀲𑀁 𑀅𑀳𑁄𑀲𑀺 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀦𑁆𑀢𑀺. 𑀢𑀢𑁆𑀣 𑀲𑀼𑀢𑁆𑀢𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑀧𑀞𑀫𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀅𑀧𑀜𑁆𑀜𑀢𑁆𑀢𑀁 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀸𑀯𑀓𑀸𑀦𑀁 𑀦𑀺𑀤𑁆𑀤𑁄𑀲𑀢𑀸𑀬 𑀤𑁄𑀲𑀸𑀦𑀼𑀭𑀽𑀧𑀢𑁄 𑀧𑀜𑁆𑀜𑀧𑁂𑀢𑀩𑁆𑀩𑀁 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀆𑀡𑀸𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢𑀁. 𑀅𑀦𑀼𑀤𑁆𑀤𑀺𑀝𑁆𑀞𑀁 ¶ 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀅𑀦𑁆𑀯𑀤𑁆𑀥𑀫𑀸𑀲𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀤𑁆𑀤𑀺𑀝𑁆𑀞𑀁 𑀅𑀳𑁄𑀲𑀺. 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀢𑁂 𑀉𑀤𑁆𑀤𑀺𑀲𑀺𑀁𑀲𑀼; 𑀢𑀫𑁆𑀧𑀺 𑀘 𑀦𑁄 𑀅𑀦𑁆𑀯𑀤𑁆𑀥𑀫𑀸𑀲𑀁. 𑀢𑀣𑀸 𑀳𑀺 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀲𑀓𑀺𑀁 𑀲𑀓𑀺𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺; 𑀢𑀜𑁆𑀘 𑀔𑁄 𑀲𑀸𑀫𑀁𑀬𑁂𑀯. 𑀲𑀸𑀯𑀓𑀸 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀲𑀼 𑀦 𑀉𑀤𑁆𑀤𑀺𑀲𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀲𑀦𑀝𑁆𑀞𑀸𑀦𑁂 𑀲𑀩𑁆𑀩𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑁄𑀲𑀣𑀁 𑀅𑀓𑀸𑀲𑀺. 𑀢𑀜𑁆𑀘 𑀔𑁄 𑀲𑀗𑁆𑀖𑀼𑀧𑁄𑀲𑀣𑀫𑁂𑀯; 𑀦 𑀕𑀡𑀼𑀧𑁄𑀲𑀣𑀁, 𑀦 𑀧𑀼𑀕𑁆𑀕𑀮𑀼𑀧𑁄𑀲𑀣𑀁, 𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁, 𑀦 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁.

𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀫𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀺, 𑀪𑀺𑀬𑁆𑀬𑁄𑀧𑀺 𑀯𑀲𑀦𑁆𑀢𑀺. 𑀉𑀧𑁄𑀲𑀣𑀸𑀭𑁄𑀘𑀺𑀓𑀸 𑀤𑁂𑀯𑀢𑀸 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀫𑀸𑀭𑀺𑀲𑀸, 𑀏𑀓𑀁 𑀯𑀲𑁆𑀲𑀁 𑀅𑀢𑀺𑀓𑁆𑀓𑀦𑁆𑀢𑀁, 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀇𑀤𑀁 𑀙𑀝𑁆𑀞𑀁 𑀯𑀲𑁆𑀲𑀁, 𑀆𑀕𑀸𑀫𑀺𑀦𑀺𑀬𑀸 𑀧𑀼𑀡𑁆𑀡𑀫𑀸𑀲𑀺𑀬𑀸 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀉𑀧𑁄𑀲𑀣𑀓𑀭𑀡𑀢𑁆𑀣𑀜𑁆𑀘 𑀕𑀦𑁆𑀢𑀩𑁆𑀩𑀁! 𑀲𑀫𑁆𑀧𑀢𑁆𑀢𑁄 𑀯𑁄 𑀲𑀦𑁆𑀦𑀺𑀧𑀸𑀢𑀓𑀸𑀮𑁄’’𑀢𑀺. 𑀢𑀢𑁄 ¶ 𑀲𑀸𑀦𑀼𑀪𑀸𑀯𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀕𑀘𑁆𑀙𑀦𑁆𑀢𑀺, 𑀇𑀢𑀭𑁂 𑀤𑁂𑀯𑀢𑀸𑀦𑀼𑀪𑀸𑀯𑁂𑀦. 𑀓𑀣𑀁? 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀧𑀸𑀘𑀻𑀦𑀲𑀫𑀼𑀤𑁆𑀤𑀦𑁆𑀢𑁂 𑀯𑀸 𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀦𑁆𑀢𑁂 𑀯𑀸 𑀞𑀺𑀢𑀸 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀕𑀘𑁆𑀙𑀸𑀫𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺; 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀉𑀧𑁄𑀲𑀣𑀕𑁆𑀕𑀁 𑀕𑀢𑀸𑀯 ¶ 𑀳𑁄𑀦𑁆𑀢𑀺. 𑀢𑁂 𑀯𑀺𑀧𑀲𑁆𑀲𑀺𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀸𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑀸𑀬 𑀧𑀭𑀺𑀲𑀸𑀬 𑀇𑀫𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺.

‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸;

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻;

𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀅𑀦𑀼𑀧𑀯𑀸𑀤𑁄 ¶ 𑀅𑀦𑀼𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫);

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑀭𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀇𑀫𑀸 𑀢𑀺𑀲𑁆𑀲𑁄𑀯 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀕𑀸𑀣𑀸𑀬𑁄 𑀳𑁄𑀦𑁆𑀢𑀺. 𑀢𑀸 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀬𑀸𑀯 𑀲𑀸𑀲𑀦𑀧𑀭𑀺𑀬𑀦𑁆𑀢𑀸 𑀉𑀤𑁆𑀤𑁂𑀲𑀫𑀸𑀕𑀘𑁆𑀙𑀦𑁆𑀢𑀺; 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀞𑀫𑀩𑁄𑀥𑀺𑀬𑀁𑀬𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑀢𑁄 𑀧𑀦 𑀧𑀪𑀼𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀉𑀤𑁆𑀤𑀺𑀲𑀻𑀬𑀢𑀺. 𑀢𑀜𑁆𑀘 𑀔𑁄 𑀪𑀺𑀓𑁆𑀔𑀽 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸. 𑀢𑀲𑁆𑀫𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀫𑀢𑁆𑀢𑀫𑁂𑀯 𑀇𑀤𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦 𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂𑀯 𑀤𑀸𑀦𑀺 𑀪𑀺𑀓𑁆𑀔𑀯𑁂 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁮𑁬). 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀇𑀤𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁 𑀅𑀦𑀼𑀤𑁆𑀤𑀺𑀝𑁆𑀞𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀤𑁆𑀤𑀺𑀝𑁆𑀞𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺.

𑀢𑁂𑀲𑀁 ¶ 𑀩𑀼𑀤𑁆𑀥𑀸𑀦𑀦𑁆𑀢𑀺 𑀢𑁂𑀲𑀁 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁. 𑀅𑀦𑁆𑀢𑀭𑀥𑀸𑀦𑁂𑀦𑀸𑀢𑀺 𑀔𑀦𑁆𑀥𑀦𑁆𑀢𑀭𑀥𑀸𑀦𑁂𑀦; 𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀦𑁆𑀢𑀺 𑀬𑁂 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑀸 𑀲𑀫𑁆𑀫𑀼𑀔𑀲𑀸𑀯𑀓𑀸 𑀢𑁂𑀲𑀜𑁆𑀘 𑀔𑀦𑁆𑀥𑀦𑁆𑀢𑀭𑀥𑀸𑀦𑁂𑀦. 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸𑀢𑀺 ¶ 𑀬𑁂 𑀢𑁂𑀲𑀁 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸. 𑀦𑀸𑀦𑀸𑀦𑀸𑀫𑀸𑀢𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄, 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺𑀆𑀤𑀺 𑀦𑀸𑀫𑀯𑀲𑁂𑀦 𑀯𑀺𑀯𑀺𑀥𑀦𑀸𑀫𑀸. 𑀦𑀸𑀦𑀸𑀕𑁄𑀢𑁆𑀢𑀸𑀢𑀺 ‘‘𑀕𑁄𑀢𑀫𑁄, 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺𑀆𑀤𑀺 𑀕𑁄𑀢𑁆𑀢𑀯𑀲𑁂𑀦 𑀯𑀺𑀯𑀺𑀥𑀕𑁄𑀢𑁆𑀢𑀸. 𑀦𑀸𑀦𑀸𑀚𑀘𑁆𑀘𑀸𑀢𑀺 ‘‘𑀔𑀢𑁆𑀢𑀺𑀬𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀚𑀸𑀢𑀺𑀯𑀲𑁂𑀦 𑀦𑀸𑀦𑀸𑀚𑀘𑁆𑀘𑀸. 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀯𑀲𑁂 𑀦𑁂𑀯 𑀉𑀘𑁆𑀘𑀦𑀻𑀘𑀉𑀴𑀸𑀭𑀼𑀴𑀸𑀭𑀪𑁄𑀕𑀸𑀤𑀺𑀓𑀼𑀮𑀯𑀲𑁂𑀦 𑀯𑀸 𑀯𑀺𑀯𑀺𑀥𑀓𑀼𑀮𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑀸.

𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 ¶ 𑀬𑀲𑁆𑀫𑀸 𑀏𑀓𑀦𑀸𑀫𑀸 𑀏𑀓𑀕𑁄𑀢𑁆𑀢𑀸 𑀏𑀓𑀚𑀸𑀢𑀺𑀓𑀸 𑀏𑀓𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀢𑀦𑁆𑀢𑀺 𑀧𑀯𑁂𑀡𑀻’’𑀢𑀺 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀭𑀓𑁆𑀔𑀦𑁆𑀢𑀺, 𑀘𑀺𑀭𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀭𑀺𑀳𑀭𑀦𑁆𑀢𑀺. 𑀇𑀫𑁂 𑀘 𑀢𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀳𑁂𑀞𑁂𑀦𑁆𑀢𑀸 𑀯𑀺𑀮𑁄𑀫𑀁 𑀕𑀡𑁆𑀳𑀦𑁆𑀢𑀸 ‘‘𑀅𑀲𑀼𑀓𑁄 𑀣𑁂𑀭𑁄 𑀚𑀸𑀦𑀺𑀲𑁆𑀲𑀢𑀺, 𑀅𑀲𑀼𑀓𑁄 𑀣𑁂𑀭𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀸 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀦𑁆𑀢𑀭𑀥𑀸𑀧𑁂𑀲𑀼𑀁, 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀭𑀓𑁆𑀔𑀺𑀁𑀲𑀼. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀢𑀲𑁆𑀲𑀢𑁆𑀣𑀲𑁆𑀲 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀁. 𑀯𑀺𑀓𑀺𑀭𑀢𑀻𑀢𑀺 𑀯𑀺𑀓𑁆𑀔𑀺𑀧𑀢𑀺. 𑀯𑀺𑀥𑀫𑀢𑀻𑀢𑀺 𑀞𑀸𑀦𑀦𑁆𑀢𑀭𑀁 𑀦𑁂𑀢𑀺. 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀢𑀺. 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀬𑀣𑀸 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀕𑀦𑁆𑀣𑀺𑀢𑀢𑁆𑀢𑀸 𑀅𑀩𑀤𑁆𑀥𑀢𑁆𑀢𑀸 𑀏𑀯𑀁 𑀯𑀺𑀓𑀺𑀭𑀢𑀺 𑀬𑀣𑀸 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀏𑀯𑀁 𑀯𑀺𑀓𑀺𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀅𑀦𑁆𑀢𑀭𑀥𑀸𑀧𑁂𑀲𑀼𑀦𑁆𑀢𑀺 𑀯𑀕𑁆𑀕𑀲𑀗𑁆𑀕𑀳-𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀻𑀳𑀺 𑀅𑀲𑀗𑁆𑀕𑀡𑁆𑀳𑀦𑁆𑀢𑀸 𑀬𑀁 𑀬𑀁 𑀅𑀢𑁆𑀢𑀦𑁄 𑀭𑀼𑀘𑁆𑀘𑀢𑀺, 𑀢𑀁 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀲𑁂𑀲𑀁 𑀯𑀺𑀦𑀸𑀲𑁂𑀲𑀼𑀁 𑀅𑀤𑀲𑁆𑀲𑀦𑀁 𑀦𑀬𑀺𑀁𑀲𑀼.

𑀅𑀓𑀺𑀮𑀸𑀲𑀼𑀦𑁄 𑀘 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀲𑀸𑀯𑀓𑁂 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀑𑀯𑀤𑀺𑀢𑀼𑀦𑁆𑀢𑀺 𑀅𑀧𑀺𑀘 𑀲𑀸𑀭𑀺𑀧𑀼𑀢𑁆𑀢 𑀢𑁂 𑀩𑀼𑀤𑁆𑀥𑀸 𑀅𑀢𑁆𑀢𑀦𑁄 𑀘𑁂𑀢𑀲𑀸 𑀲𑀸𑀯𑀓𑀸𑀦𑀁 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀑𑀯𑀤𑀺𑀢𑀼𑀁 𑀅𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁, 𑀧𑀭𑀘𑀺𑀢𑁆𑀢𑀁 𑀜𑀢𑁆𑀯𑀸 𑀅𑀦𑀼𑀲𑀸𑀲𑀦𑀺𑀁 𑀦 𑀪𑀸𑀭𑀺𑀬𑀢𑁄 𑀦 𑀧𑀧𑀜𑁆𑀘𑀢𑁄 𑀅𑀤𑁆𑀤𑀲𑀁𑀲𑀼. 𑀪𑀽𑀢𑀧𑀼𑀩𑁆𑀩𑀁 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺 𑀢𑁂𑀲𑀁 𑀅𑀓𑀺𑀮𑀸𑀲𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀺𑀁𑀲𑀦𑀓𑁂𑀢𑀺 𑀪𑀬𑀸𑀦𑀓𑁂 𑀪𑀬𑀚𑀦𑀦𑀓𑁂. 𑀏𑀯𑀁 𑀯𑀺𑀢𑀓𑁆𑀓𑁂𑀣𑀸𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀣. 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑁂 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀏𑀯𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀣. 𑀫𑀸 𑀏𑀯𑀁 𑀫𑀦𑀲𑀸 ¶ 𑀓𑀢𑁆𑀣𑀸𑀢𑀺 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀫𑀸 𑀫𑀦𑀲𑀺 𑀅𑀓𑀭𑀺𑀢𑁆𑀣. 𑀇𑀤𑀁 𑀧𑀚𑀳𑀣𑀸𑀢𑀺 𑀅𑀓𑀼𑀲𑀮𑀁 𑀧𑀚𑀳𑀣. 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸𑀢𑀺 𑀓𑀼𑀲𑀮𑀁 𑀉𑀧𑀲𑀫𑁆𑀧𑀚𑁆𑀚 𑀧𑀝𑀺𑀮𑀪𑀺𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀯𑀺𑀳𑀭𑀣.

𑀅𑀦𑀼𑀧𑀸𑀤𑀸𑀬 ¶ ¶ 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀲𑀜𑁆𑀳𑀺 𑀘𑀺𑀢𑁆𑀢𑀸𑀦𑀺 𑀬𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀺𑀁𑀲𑀼, 𑀦 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀧𑀦 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽’’𑀢𑀺. 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀼𑀝𑁆𑀞𑀫𑀺𑀯 𑀧𑀤𑀼𑀫𑀯𑀦𑀁 𑀯𑀺𑀓𑀲𑀺𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀢𑁆𑀭 𑀲𑀼𑀤𑀁 𑀲𑀸𑀭𑀺𑀧𑀼𑀢𑁆𑀢 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀻𑀢𑀺 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁; 𑀲𑀼𑀤𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄; 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀮𑀧𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀢𑀢𑁆𑀭𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 𑀯𑀦𑀲𑀡𑁆𑀟𑁂’’𑀢𑀺, 𑀢𑀢𑁆𑀭 𑀬𑁄 𑀲𑁄 𑀪𑀺𑀁𑀲𑀦𑀓𑁄𑀢𑀺 𑀯𑀦𑀲𑀡𑁆𑀟𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀺, 𑀪𑀺𑀁𑀲𑀦𑀓𑀺𑀭𑀺𑀬𑀸𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀳𑁄𑀢𑀺? 𑀇𑀤𑀁 𑀳𑁄𑀢𑀺 𑁋 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄…𑀧𑁂… 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺.

𑀅𑀣 𑀯𑀸 𑀢𑀢𑁆𑀭𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀁. 𑀲𑀼𑀇𑀢𑀺 𑀦𑀺𑀧𑀸𑀢𑁄; ‘‘𑀓𑀺𑀁 𑀲𑀼 𑀦𑀸𑀫 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁯) 𑀯𑀺𑀬. 𑀇𑀤𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀦𑀯𑀘𑀦𑀁. 𑀲𑀼𑀇𑀤𑀦𑁆𑀢𑀺 𑀲𑀼𑀤𑀁, 𑀲𑀦𑁆𑀥𑀺𑀯𑀲𑁂𑀦 𑀇𑀓𑀸𑀭𑀮𑁄𑀧𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 (𑀯𑀺𑀪. 𑁨𑁧𑁯), ‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁩) 𑀯𑀺𑀬. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀢𑀲𑁆𑀲 𑀲𑀸𑀭𑀺𑀧𑀼𑀢𑁆𑀢 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀇𑀤𑀁𑀲𑀼 𑀳𑁄𑀢𑀺. 𑀪𑀺𑀁𑀲𑀦𑀓𑀢𑀲𑁆𑀫𑀺𑀦𑁆𑀢𑀺 𑀪𑀺𑀁𑀲𑀦𑀓𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀢𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀁𑀲𑀦𑀓𑀢𑁆𑀢𑀲𑁆𑀫𑀺𑀦𑁆𑀢𑀺𑀬𑁂𑀯 𑀯𑀸 𑀧𑀸𑀞𑁄. ‘‘𑀪𑀺𑀁𑀲𑀦𑀓𑀢𑀸𑀬’’ 𑀇𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀪𑀺𑀁𑀲𑀦𑀓𑀪𑀸𑀯𑁂 𑀇𑀤𑀁𑀲𑀼 𑀳𑁄𑀢𑀺, 𑀪𑀺𑀁𑀲𑀦𑀓𑀪𑀸𑀯𑀦𑀺𑀫𑀺𑀢𑁆𑀢𑀁 𑀪𑀺𑀁𑀲𑀦𑀓𑀪𑀸𑀯𑀳𑁂𑀢𑀼 𑀪𑀺𑀁𑀲𑀦𑀓𑀪𑀸𑀯𑀧𑀘𑁆𑀘𑀬𑀸 𑀇𑀤𑀁𑀲𑀼 𑀳𑁄𑀢𑀺. 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀻𑀢𑀺 𑀩𑀳𑀼𑀢𑀭𑀸𑀦𑀺 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺 𑀉𑀤𑁆𑀥𑀁 𑀫𑀼𑀔𑀸𑀦𑀺 𑀲𑀽𑀘𑀺𑀲𑀤𑀺𑀲𑀸𑀦𑀺 𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀘 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀧𑁆𑀧𑀸𑀦𑀺 𑀦 𑀳𑀁𑀲𑀦𑁆𑀢𑀺. 𑀩𑀳𑀼𑀢𑀭𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀳𑀁𑀲𑀦𑁆𑀢𑀺. 𑀅𑀧𑁆𑀧𑀓𑀸𑀦𑀁 𑀅𑀢𑀺𑀲𑀽𑀭𑀧𑀼𑀭𑀺𑀲𑀸𑀦𑀁 𑀦 𑀳𑀁𑀲𑀦𑁆𑀢𑀺.

𑀇𑀤𑀸𑀦𑀺 ¶ ¶ 𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀽𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀜𑁆𑀘𑁂𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑀲𑁆𑀫𑀸 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀯𑀼𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻𑀢𑀺, 𑀢𑀁 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀲𑁆𑀲𑀕𑀡𑀦𑀸𑀬 𑀳𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀏𑀯𑀫𑀲𑁆𑀲 𑀬𑁆𑀯𑀸𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑀸𑀯𑀓𑁄, 𑀢𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀅𑀝𑁆𑀞𑀸𑀲𑀺. 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀧𑀦 𑀬𑀼𑀕𑀧𑀭𑀫𑁆𑀧𑀭𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀸 𑀦 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀺𑀔𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼. 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼. 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺𑀲𑁆𑀲 𑀢𑀢𑁆𑀢𑀓𑀫𑁂𑀯. 𑀏𑀯𑀁 𑀢𑁂𑀲𑀫𑁆𑀧𑀺 𑀬𑁂 𑀲𑀩𑁆𑀩𑀧𑀘𑁆𑀙𑀺𑀫𑀓𑀸 𑀲𑀸𑀯𑀓𑀸 𑀢𑁂𑀳𑀺 𑀲𑀳 𑀖𑀝𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀺 𑀯𑀻𑀲𑀢𑀺𑀫𑀢𑁆𑀢𑀸𑀦𑀺 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀝𑁆𑀞𑀸𑀲𑀺. 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀧𑀦 𑀬𑀼𑀕𑀧𑀭𑀫𑁆𑀧𑀭𑀸𑀬 𑀆𑀕𑀦𑁆𑀢𑁆𑀯𑀸 𑀤𑁆𑀯𑁂 𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀸 𑀦 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁦. 𑀏𑀯𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑀼𑀢𑁆𑀯𑀸 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑁄𑀢𑀼𑀓𑀸𑀫𑁄 𑀧𑀼𑀦 𑀪𑀕𑀯𑀦𑁆𑀢𑀁 ‘‘𑀓𑁄 𑀧𑀦 𑀪𑀦𑁆𑀢𑁂 𑀳𑁂𑀢𑀽’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀧𑀼𑀘𑁆𑀙𑀺. 𑀪𑀕𑀯𑀸𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑁂𑀧𑀺 𑀘𑁂𑀢𑁆𑀣 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀆𑀬𑀼𑀧𑀭𑀺𑀫𑀸𑀡𑀢𑁄𑀧𑀺 𑀧𑀼𑀭𑀺𑀲𑀬𑀼𑀕𑀢𑁄𑀧𑀺 𑀉𑀪𑀬𑀣𑀸 𑀘𑀺𑀭𑀝𑁆𑀞𑀺𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀓𑀼𑀲𑀦𑁆𑀥𑀲𑁆𑀲 𑀳𑀺 𑀪𑀕𑀯𑀢𑁄 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺; 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀫𑁆𑀧𑀺 𑀦𑁂𑀲𑀁 𑀢𑀢𑁆𑀢𑀓𑀫𑁂𑀯. 𑀩𑀳𑀽𑀦𑀺 𑀘 𑀦𑁂𑀲𑀁 𑀲𑀸𑀯𑀓𑀬𑀼𑀕𑀸𑀦𑀺 𑀧𑀭𑀫𑁆𑀧𑀭𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀯𑀁 𑀢𑁂𑀲𑀁 𑀆𑀬𑀼𑀧𑀭𑀺𑀫𑀸𑀡𑀢𑁄𑀧𑀺 𑀲𑀸𑀯𑀓𑀬𑀼𑀕𑀢𑁄𑀧𑀺 𑀉𑀪𑀬𑀣𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺.

𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀉𑀧𑀟𑁆𑀠𑀸𑀬𑀼𑀓𑀧𑁆𑀧𑀫𑀸𑀡𑁂 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 ¶ 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀅𑀲𑀫𑁆𑀪𑀼𑀡𑀦𑁆𑀢𑁂𑀦 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂, 𑀏𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂, 𑀧𑀜𑁆𑀘𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂𑀧𑀺 𑀯𑀸 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦𑀲𑁆𑀲 𑀩𑀼𑀤𑁆𑀥𑀢𑁆𑀢𑀓𑀸𑀭𑀓𑁂 𑀥𑀫𑁆𑀫𑁂 𑀏𑀲𑀦𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀘𑁂𑀦𑁆𑀢𑀲𑁆𑀲 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 ¶ 𑀜𑀸𑀡𑀁 𑀧𑀭𑀺𑀧𑀸𑀓𑀫𑀕𑀫𑀸𑀲𑀺. 𑀢𑀲𑁆𑀫𑀸 𑀅𑀢𑀺𑀧𑀭𑀺𑀢𑁆𑀢𑀸𑀬𑀼𑀓𑀓𑀸𑀮𑁂 𑀉𑀧𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 𑀲𑀸𑀯𑀓𑀧𑀭𑀫𑁆𑀧𑀭𑀸𑀯𑀲𑁂𑀦 𑀘𑀺𑀭𑀝𑁆𑀞𑀺𑀢𑀺𑀓𑀫𑁆𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀬𑀼𑀧𑀭𑀺𑀫𑀸𑀡𑀯𑀲𑁂𑀦 𑀯𑀲𑁆𑀲𑀕𑀡𑀦𑀸𑀬 𑀦𑀘𑀺𑀭𑀝𑁆𑀞𑀺𑀢𑀺𑀓𑀫𑁂𑀯𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁨𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀏𑀯𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀁 𑀲𑀼𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑁂𑀯 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀳𑁂𑀢𑀽𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀬𑀸𑀘𑀺. 𑀢𑀲𑁆𑀲𑀸 𑀬𑀸𑀘𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 ¶ …𑀧𑁂… 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺. 𑀢𑀢𑁆𑀣 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀓𑁆𑀔𑀫𑀁; 𑀤𑀻𑀖𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀣𑀲𑁆𑀲 𑀪𑀕𑀯𑀸 ‘‘𑀦 𑀢𑀸𑀯𑀸𑀬𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑁄’’𑀢𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀕𑀫𑁂𑀳𑀺 𑀢𑁆𑀯𑀦𑁆𑀢𑀺 𑀢𑀺𑀝𑁆𑀞 𑀢𑀸𑀯 𑀢𑁆𑀯𑀁; 𑀅𑀥𑀺𑀯𑀸𑀲𑁂𑀳𑀺 𑀢𑀸𑀯 𑀢𑁆𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀭𑀢𑁆𑀣𑀯𑀲𑁂𑀦𑁂𑀯𑁂𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀯𑀓𑀸𑀦𑀁 𑀯𑀺𑀲𑀬𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀩𑀼𑀤𑁆𑀥𑀯𑀺𑀲𑀬𑁄𑀯 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀻’’𑀢𑀺 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀢𑀣𑀸𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀢𑀢𑁆𑀣𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀁 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺, 𑀢𑀢𑁆𑀣 𑀢𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀢𑀣𑀸𑀕𑀢𑁄𑀬𑁂𑀯 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀯𑀢𑁆𑀯𑀸 𑀅𑀓𑀸𑀮𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀲𑀽𑀢𑀺 𑀆𑀲𑀯𑀝𑁆𑀞𑀸𑀦𑀻𑀬𑀸. 𑀬𑁂𑀲𑀼 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀤𑀼𑀓𑁆𑀔𑀸𑀲𑀯𑀸 𑀓𑀺𑀮𑁂𑀲𑀸𑀲𑀯𑀸 𑀘 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀦𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀯𑀺𑀲𑁂𑀲𑀪𑀽𑀢𑀸 𑀘 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺𑀬𑁂𑀯, 𑀬𑀲𑁆𑀫𑀸 𑀦𑁂𑀲𑀁 ¶ 𑀢𑁂 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸 𑀬𑀸𑀯 𑀦 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀢𑀸𑀯 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. 𑀬𑀤𑀺 𑀳𑀺 𑀧𑀜𑁆𑀜𑀧𑁂𑀬𑁆𑀬, 𑀧𑀭𑀽𑀧𑀯𑀸𑀤𑀸 𑀧𑀭𑀽𑀧𑀸𑀭𑀫𑁆𑀪𑀸 𑀕𑀭𑀳𑀤𑁄𑀲𑀸 𑀦 𑀧𑀭𑀺𑀫𑀼𑀘𑁆𑀘𑁂𑀬𑁆𑀬.

𑀓𑀣𑀁? 𑀧𑀜𑁆𑀜𑀧𑁂𑀦𑁆𑀢𑁂𑀦 𑀳𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀅𑀤𑀺𑀲𑁆𑀯𑀸𑀯 𑀯𑀻𑀢𑀺𑀓𑁆𑀓𑀫𑀤𑁄𑀲𑀁 𑀇𑀫𑀁 𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 ¶ 𑀧𑀭𑁂 𑀏𑀯𑀁 𑀉𑀧𑀯𑀸𑀤𑀜𑁆𑀘 𑀉𑀧𑀸𑀭𑀫𑁆𑀪𑀜𑁆𑀘 𑀕𑀭𑀳𑀜𑁆𑀘 𑀧𑀯𑀢𑁆𑀢𑁂𑀬𑁆𑀬𑀼𑀁 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑁄 𑀕𑁄𑀢𑀫𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑁂 𑀅𑀦𑁆𑀯𑀸𑀬𑀺𑀓𑁄 𑀯𑀘𑀦𑀓𑀭𑁄𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀓𑁆𑀔𑀸𑀧𑀤𑁂𑀳𑀺 𑀧𑀮𑀺𑀯𑁂𑀞𑁂𑀲𑁆𑀲𑀢𑀺, 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑁆𑀲𑀢𑀺? 𑀦𑀦𑀼 𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀳𑀢𑁆𑀣𑀕𑀢𑀸𑀦𑀺 𑀘 𑀭𑀚𑁆𑀚𑀸𑀦𑀺𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸, 𑀲𑀺𑀓𑁆𑀔𑀸𑀬 𑀢𑀺𑀩𑁆𑀩𑀕𑀸𑀭𑀯𑀸, 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀼 𑀦𑀸𑀫 𑀓𑁄 𑀮𑁄𑀓𑀸𑀫𑀺𑀲𑀪𑀽𑀢𑀁 𑀫𑁂𑀣𑀼𑀦𑀁 𑀯𑀸 𑀧𑀝𑀺𑀲𑁂𑀯𑀺𑀲𑁆𑀲𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀺𑀲𑁆𑀲𑀢𑀺, 𑀧𑀭𑀲𑁆𑀲 𑀯𑀸 𑀇𑀝𑁆𑀞𑀁 𑀓𑀦𑁆𑀢𑀁 𑀅𑀢𑀺𑀫𑀥𑀼𑀭𑀁 𑀚𑀻𑀯𑀺𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀺, 𑀅𑀪𑀽𑀢𑀕𑀼𑀡𑀓𑀣𑀸𑀬 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀲𑁆𑀲𑀢𑀺! 𑀦𑀦𑀼 𑀧𑀸𑀭𑀸𑀚𑀺𑀓𑁂 𑀅𑀧𑀜𑁆𑀜𑀢𑁆𑀢𑁂𑀧𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦𑁂𑀯𑁂𑀢𑀁 𑀧𑀸𑀓𑀝𑀁 𑀓𑀢’’𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀘 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀲𑀢𑁆𑀢𑀸 𑀦 𑀚𑀸𑀦𑁂𑀬𑁆𑀬𑀼𑀁. 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀓𑀼𑀧𑁆𑀧𑁂𑀬𑁆𑀬, 𑀦 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀓𑀼𑀲𑀮𑁄 𑀯𑁂𑀚𑁆𑀚𑁄 𑀓𑀜𑁆𑀘𑀺 𑀅𑀦𑀼𑀧𑁆𑀧𑀦𑁆𑀦𑀕𑀡𑁆𑀟𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀳𑀺 𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀫𑀺𑀁 𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂 𑀫𑀳𑀸𑀕𑀡𑁆𑀟𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 ¶ 𑀧𑀸𑀧𑁂𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀦𑀁 𑀢𑀺𑀓𑀺𑀘𑁆𑀙𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀸𑀘𑀭𑀺𑀬, 𑀢𑁆𑀯𑀁𑀬𑁂𑀯 𑀦𑀁 𑀢𑀺𑀓𑀺𑀘𑁆𑀙𑀲𑁆𑀲𑀽’’𑀢𑀺 𑀯𑀼𑀢𑁆𑀢𑁄 𑀢𑀲𑁆𑀲 𑀅𑀭𑁄𑀕𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀨𑀸𑀮𑁂𑀢𑁆𑀯𑀸 𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀆𑀮𑁂𑀧𑀦𑀩𑀦𑁆𑀥𑀦𑀥𑁄𑀯𑀦𑀸𑀤𑀻𑀳𑀺 𑀢𑀁 𑀧𑀤𑁂𑀲𑀁 𑀲𑀜𑁆𑀙𑀯𑀺𑀁 𑀓𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀯𑀤𑁂𑀬𑁆𑀬 𑁋 ‘‘𑀫𑀳𑀸𑀭𑁄𑀕𑁄 𑀢𑁂 𑀫𑀬𑀸 𑀢𑀺𑀓𑀺𑀘𑁆𑀙𑀺𑀢𑁄, 𑀤𑁂𑀳𑀺 𑀫𑁂 𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺. 𑀲𑁄 𑀢𑀁 ‘‘𑀓𑀺𑀫𑀬𑀁 𑀩𑀸𑀮𑀯𑁂𑀚𑁆𑀚𑁄 𑀯𑀤𑀢𑀺? 𑀓𑀢𑀭𑁄 𑀓𑀺𑀭 𑀫𑁂 𑀇𑀫𑀺𑀦𑀸 𑀭𑁄𑀕𑁄 𑀢𑀺𑀓𑀺𑀘𑁆𑀙𑀺𑀢𑁄? 𑀦𑀦𑀼 𑀫𑁂 𑀅𑀬𑀁 𑀤𑀼𑀓𑁆𑀔𑀜𑁆𑀘 𑀚𑀦𑁂𑀢𑀺, 𑀮𑁄𑀳𑀺𑀢𑀓𑁆𑀔𑀬𑀜𑁆𑀘 𑀫𑀁 𑀧𑀸𑀧𑁂𑀢𑀻’’𑀢𑀺 𑀏𑀯𑀁 𑀉𑀧𑀯𑀤𑁂𑀬𑁆𑀬 𑀘𑁂𑀯 𑀉𑀧𑀸𑀭𑀫𑁆𑀪𑁂𑀬𑁆𑀬 ¶ 𑀘 𑀕𑀭𑀳𑁂𑀬𑁆𑀬 𑀘, 𑀦 𑀘𑀲𑁆𑀲 𑀕𑀼𑀡𑀁 𑀚𑀸𑀦𑁂𑀬𑁆𑀬. 𑀏𑀯𑀫𑁂𑀯 𑀬𑀤𑀺 𑀅𑀦𑀼𑀧𑁆𑀧𑀦𑁆𑀦𑁂 𑀯𑀻𑀢𑀺𑀓𑁆𑀓𑀫𑀤𑁄𑀲𑁂 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬, 𑀧𑀭𑀽𑀧𑀯𑀸𑀤𑀸𑀤𑀻𑀳𑀺 𑀘 𑀦 𑀧𑀭𑀺𑀫𑀼𑀘𑁆𑀘𑁂𑀬𑁆𑀬, 𑀦 𑀘𑀲𑁆𑀲 𑀣𑀸𑀫𑀁 𑀯𑀸 𑀩𑀮𑀁 𑀯𑀸 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀓𑀼𑀧𑁆𑀧𑁂𑀬𑁆𑀬, 𑀦 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁…𑀧𑁂… 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺.

𑀏𑀯𑀁 𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀓𑀸𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁄 𑀘 𑀔𑁄 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸; 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀯𑀸 𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀲𑀫𑀬𑁂 ‘‘𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀤𑀸 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀓𑀲𑁆𑀫𑀸? 𑀢𑁂𑀲𑀁𑀬𑁂𑀯 ‘‘𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁆𑀬𑀁 ¶ 𑀕𑀢𑀸𑀦𑀁 𑀯𑀻𑀢𑀺𑀓𑁆𑀓𑀫𑀤𑁄𑀲𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀏𑀯𑀁 𑀧𑀜𑁆𑀜𑀧𑁂𑀦𑁆𑀢𑁄 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀯𑁂𑀚𑁆𑀚𑁄 𑀉𑀧𑁆𑀧𑀦𑁆𑀦𑀁 𑀕𑀡𑁆𑀟𑀁 𑀨𑀸𑀮𑀦𑀮𑁂𑀧𑀦𑀩𑀦𑁆𑀥𑀦𑀥𑁄𑀯𑀦𑀸𑀤𑀻𑀳𑀺 𑀢𑀺𑀓𑀺𑀘𑁆𑀙𑀦𑁆𑀢𑁄 𑀭𑁄𑀕𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀜𑁆𑀙𑀯𑀺𑀁 𑀓𑀢𑁆𑀯𑀸 𑀦 𑀢𑁆𑀯𑁂𑀯 𑀉𑀧𑀯𑀸𑀤𑀸𑀤𑀺𑀭𑀳𑁄 𑀳𑁄𑀢𑀺, 𑀲𑀓𑁂 𑀘 𑀆𑀘𑀭𑀺𑀬𑀓𑁂 𑀯𑀺𑀤𑀺𑀢𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀸𑀢𑀺; 𑀏𑀯𑀁 𑀦 𑀘 𑀉𑀧𑀯𑀸𑀤𑀸𑀤𑀺𑀭𑀳𑁄 𑀳𑁄𑀢𑀺, 𑀲𑀓𑁂 𑀘 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂 𑀯𑀺𑀤𑀺𑀢𑀸𑀦𑀼𑀪𑀸𑀯𑁄 𑀳𑀼𑀢𑁆𑀯𑀸 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀸𑀢𑀺. 𑀢𑀜𑁆𑀘𑀲𑁆𑀲 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀧𑁆𑀧𑀁 𑀳𑁄𑀢𑀺, 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺.

𑀏𑀯𑀁 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁 𑀉𑀧𑁆𑀧𑀢𑁆𑀢𑀺𑀜𑁆𑀘 𑀓𑀸𑀮𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢 𑀇𑀥𑁂𑀓𑀘𑁆𑀘𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀁 𑀧𑀦 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽, 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀳𑀼𑀓𑀸 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺, 𑀘𑀺𑀭𑀧𑀩𑁆𑀩𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑁆𑀢𑀜𑁆𑀜𑀽𑀳𑀺 𑀫𑀳𑀢𑁆𑀢𑀁 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁; 𑀘𑀺𑀭𑀧𑀩𑁆𑀩𑀚𑀺𑀢𑁂𑀳𑀺 𑀫𑀳𑀦𑁆𑀢𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 ¶ 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀆𑀭𑀩𑁆𑀪 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀳𑀸𑀬𑀲𑁆𑀫𑀸 𑀊𑀦𑀤𑀲𑀯𑀲𑁆𑀲𑁂 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀯𑀲𑁆𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀅𑀣 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂 ¶ , 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁭𑁫). 𑀏𑀯𑀁 𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀧𑀼𑀦 𑀪𑀺𑀓𑁆𑀔𑀽 ‘‘𑀤𑀲𑀯𑀲𑁆𑀲𑀸𑀫𑁆𑀳 𑀤𑀲𑀯𑀲𑁆𑀲𑀸𑀫𑁆𑀳𑀸’’𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁭𑁬) 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺.

𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀦𑁆𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀫𑀳𑀢𑁆𑀢𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀯𑀲𑁂𑀦 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀲𑁂𑀦𑀸𑀲𑀦𑀸𑀦𑀺 𑀧𑀳𑁄𑀦𑁆𑀢𑀺. 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀦 𑀧𑀢𑁆𑀢𑁂 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁’’ ¶ (𑀧𑀸𑀘𑀺. 𑁫𑁧); ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁’’ (𑀧𑀸𑀘𑀺. 𑁧𑁧𑁭𑁧); ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁭𑁫) 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀮𑀸𑀪𑀕𑁆𑀕𑀫𑀳𑀢𑁆𑀢𑀦𑁆𑀢𑀺 𑀮𑀸𑀪𑀲𑁆𑀲 𑀅𑀕𑁆𑀕𑀫𑀳𑀢𑁆𑀢𑀁; 𑀬𑁄 𑀮𑀸𑀪𑀲𑁆𑀲 𑀅𑀕𑁆𑀕𑁄 𑀉𑀢𑁆𑀢𑀫𑁄 𑀫𑀳𑀦𑁆𑀢𑀪𑀸𑀯𑁄, 𑀢𑀁 𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀮𑀸𑀪𑁂𑀦 𑀯𑀸 𑀅𑀕𑁆𑀕𑀫𑀳𑀢𑁆𑀢𑀫𑁆𑀧𑀺, 𑀮𑀸𑀪𑁂𑀦 𑀲𑁂𑀝𑁆𑀞𑀢𑁆𑀢𑀜𑁆𑀘 𑀫𑀳𑀦𑁆𑀢𑀢𑁆𑀢𑀜𑁆𑀘 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀦 𑀮𑀸𑀪𑀁 𑀧𑀝𑀺𑀘𑁆𑀘 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀢𑁆𑀢𑁂 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 ¶ 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀘𑁂𑀮𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁭𑁦). 𑀇𑀤𑀜𑁆𑀳𑀺 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁.

𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀦𑁆𑀢𑀺 𑀩𑀸𑀳𑀼𑀲𑀘𑁆𑀘𑀲𑁆𑀲 𑀫𑀳𑀦𑁆𑀢𑀪𑀸𑀯𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀦 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀏𑀓𑀫𑁆𑀧𑀺 𑀦𑀺𑀓𑀸𑀬𑀁, 𑀤𑁆𑀯𑁂𑀧𑀺…𑀧𑁂… 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀧𑀼𑀕𑁆𑀕𑀮𑀸 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀺. 𑀅𑀣 𑀲𑀢𑁆𑀣𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺…𑀧𑁂… 𑀲𑀫𑀡𑀼𑀤𑁆𑀤𑁂𑀲𑁄𑀧𑀺 𑀘𑁂 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁮) 𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺.

𑀏𑀯𑀁 ¶ 𑀪𑀕𑀯𑀸 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀩𑁆𑀩𑀲𑁄𑀧𑀺 𑀢𑁂𑀲𑀁 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀭𑀩𑁆𑀩𑀼𑀤𑁄 𑀳𑀺 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀭𑀩𑁆𑀩𑀼𑀤𑁄𑀢𑀺 𑀅𑀩𑁆𑀩𑀼𑀤𑀯𑀺𑀭𑀳𑀺𑀢𑁄; 𑀅𑀩𑁆𑀩𑀼𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑁄𑀭𑀸, 𑀦𑀺𑀘𑁆𑀘𑁄𑀭𑁄𑀢𑀺 𑀅𑀢𑁆𑀣𑁄. 𑀘𑁄𑀭𑀸𑀢𑀺 𑀘 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀤𑀼𑀲𑁆𑀲𑀻𑀮𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀳𑀺 𑀅𑀲𑁆𑀲𑀫𑀡𑀸𑀯 𑀳𑀼𑀢𑁆𑀯𑀸 𑀲𑀫𑀡𑀧𑀝𑀺𑀜𑁆𑀜𑀢𑀸𑀬 𑀧𑀭𑁂𑀲𑀁 𑀧𑀘𑁆𑀘𑀬𑁂 𑀘𑁄𑀭𑁂𑀦𑁆𑀢𑀺. 𑀢𑀲𑁆𑀫𑀸 𑀦𑀺𑀭𑀩𑁆𑀩𑀼𑀤𑁄𑀢𑀺 𑀦𑀺𑀘𑁆𑀘𑁄𑀭𑁄, 𑀦𑀺𑀤𑁆𑀤𑀼𑀲𑁆𑀲𑀻𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀭𑀸𑀤𑀻𑀦𑀯𑁄𑀢𑀺 𑀦𑀺𑀭𑀼𑀧𑀤𑁆𑀤𑀯𑁄 𑀦𑀺𑀭𑀼𑀧𑀲𑀕𑁆𑀕𑁄; 𑀤𑀼𑀲𑁆𑀲𑀻𑀮𑀸𑀤𑀻𑀦𑀯𑀭𑀳𑀺𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀕𑀢𑀓𑀸𑀴𑀓𑁄𑀢𑀺 𑀓𑀸𑀴𑀓𑀸 𑀯𑀼𑀘𑁆𑀘𑀦𑁆𑀢𑀺 𑀤𑀼𑀲𑁆𑀲𑀻𑀮𑀸𑀬𑁂𑀯; 𑀢𑁂 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀧𑀺 𑀲𑀫𑀸𑀦𑀸 𑀓𑀸𑀴𑀓𑀥𑀫𑁆𑀫𑀬𑁄𑀕𑀸 𑀓𑀸𑀴𑀓𑀸𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀅𑀪𑀸𑀯𑀸 𑀅𑀧𑀕𑀢𑀓𑀸𑀴𑀓𑁄 ¶ . 𑀅𑀧𑀳𑀢𑀓𑀸𑀴𑀓𑁄𑀢𑀺𑀧𑀺 𑀧𑀸𑀞𑁄. 𑀲𑀼𑀤𑁆𑀥𑁄𑀢𑀺 𑀅𑀧𑀕𑀢𑀓𑀸𑀴𑀓𑀢𑁆𑀢𑀸𑀬𑁂𑀯 𑀲𑀼𑀤𑁆𑀥𑁄 𑀧𑀭𑀺𑀬𑁄𑀤𑀸𑀢𑁄 𑀧𑀪𑀲𑁆𑀲𑀭𑁄. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀸𑀭𑁄 𑀯𑀼𑀘𑁆𑀘𑀦𑁆𑀢𑀺 𑀲𑀻𑀮-𑀲𑀫𑀸𑀥𑀺-𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀕𑀼𑀡𑀸, 𑀢𑀲𑁆𑀫𑀺𑀁 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄.

𑀏𑀯𑀁 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀲𑁄 𑀘𑀲𑁆𑀲 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂𑀲𑀜𑁆𑀳𑀺 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀬𑀸𑀦𑀺𑀫𑀸𑀦𑀺 𑀯𑁂𑀭𑀜𑁆𑀚𑀸𑀬𑀁 ¶ 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀇𑀫𑁂𑀲𑀁 𑀬𑁄 𑀕𑀼𑀡𑀯𑀲𑁂𑀦 𑀧𑀘𑁆𑀙𑀺𑀫𑀓𑁄 𑀲𑀩𑁆𑀩𑀧𑀭𑀺𑀢𑁆𑀢𑀕𑀼𑀡𑁄 𑀪𑀺𑀓𑁆𑀔𑀼, 𑀲𑁄 𑀲𑁄𑀢𑀸𑀧𑀦𑁆𑀦𑁄. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀲𑁄𑀢𑀁 𑀆𑀧𑀦𑁆𑀦𑁄; 𑀲𑁄𑀢𑁄𑀢𑀺 𑀘 𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀬𑀣𑀸𑀳 𑁋

‘‘𑀲𑁄𑀢𑁄 𑀲𑁄𑀢𑁄𑀢𑀺 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑁄𑀢𑀺? 𑀅𑀬𑀫𑁂𑀯 𑀳𑀺, 𑀪𑀦𑁆𑀢𑁂, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺. ‘‘𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄𑀢𑀺 𑀳𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺; 𑀓𑀢𑀫𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑁄𑀢𑀸𑀧𑀦𑁆𑀦𑁄’’𑀢𑀺? ‘‘𑀬𑁄 𑀳𑀺, 𑀪𑀦𑁆𑀢𑁂, 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑁋 𑀲𑁄𑀢𑀸𑀧𑀦𑁆𑀦𑁄. 𑀲𑁄𑀬𑀫𑀸𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁦𑁧). 𑀇𑀥 𑀧𑀦 𑀫𑀕𑁆𑀕𑁂𑀦 𑀨𑀮𑀲𑁆𑀲 𑀦𑀸𑀫𑀁 𑀤𑀺𑀦𑁆𑀦𑀁. 𑀢𑀲𑁆𑀫𑀸 𑀨𑀮𑀝𑁆𑀞𑁄 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀯𑀺𑀦𑀺𑀧𑀸𑀢𑁂𑀢𑀻𑀢𑀺 𑀯𑀺𑀦𑀺𑀧𑀸𑀢𑁄; 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀦 𑀅𑀢𑁆𑀢𑀸𑀦𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑁂 𑀥𑀫𑁆𑀫𑀸 𑀅𑀧𑀸𑀬𑀕𑀫𑀦𑀻𑀬𑀸, 𑀢𑁂𑀲𑀁 𑀧𑀭𑀺𑀓𑁆𑀔𑀬𑀸. 𑀯𑀺𑀦𑀺𑀧𑀢𑀦𑀁 𑀯𑀸 𑀯𑀺𑀦𑀺𑀧𑀸𑀢𑁄, 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀫𑀕𑁆𑀕𑁂𑀦 ¶ 𑀦𑀺𑀬𑀢𑀢𑁆𑀢𑀸 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀧𑀭𑀸 𑀕𑀢𑀺 𑀅𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀉𑀧𑀭𑀺 𑀫𑀕𑁆𑀕𑀢𑁆𑀢𑀬𑀁 𑀅𑀯𑀲𑁆𑀲𑀁 𑀲𑀫𑁆𑀧𑀸𑀧𑀓𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀧𑀝𑀺𑀮𑀤𑁆𑀥𑀧𑀞𑀫𑀫𑀕𑁆𑀕𑀢𑁆𑀢𑀸𑀢𑀺.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸

𑁨𑁨. 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀯𑁂𑀭𑀜𑁆𑀚𑀸𑀬𑀁 𑀢𑀁 𑀯𑀲𑁆𑀲𑀸𑀯𑀸𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀅𑀣 𑀔𑁄 𑀪𑀕𑀯𑀸 ¶ 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀺. 𑀓𑀺𑀦𑁆𑀢𑀺? 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀦𑁆𑀢𑀺 𑀏𑀯𑀫𑀸𑀤𑀺. 𑀆𑀘𑀺𑀡𑁆𑀡𑀦𑁆𑀢𑀺 𑀘𑀭𑀺𑀢𑀁 𑀯𑀢𑁆𑀢𑀁 𑀅𑀦𑀼𑀥𑀫𑁆𑀫𑀢𑀸. 𑀢𑀁 𑀔𑁄 𑀧𑀦𑁂𑀢𑀁 𑀆𑀘𑀺𑀡𑁆𑀡𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀩𑀼𑀤𑁆𑀥𑀸𑀘𑀺𑀡𑁆𑀡𑀁, 𑀲𑀸𑀯𑀓𑀸𑀘𑀺𑀡𑁆𑀡𑀦𑁆𑀢𑀺. 𑀓𑀢𑀫𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁? 𑀇𑀤𑀁 𑀢𑀸𑀯 𑀏𑀓𑀁 𑁋 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑀸 𑀯𑀲𑁆𑀲𑀁 𑀯𑀲𑀦𑁆𑀢𑀺, 𑀦 𑀢𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺. 𑀲𑀸𑀯𑀓𑀸 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀯𑀸 𑀬𑀣𑀸𑀲𑀼𑀔𑀁 𑀧𑀓𑁆𑀓𑀫𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑁋 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 𑀚𑀦𑀲𑀗𑁆𑀕𑀳𑀢𑁆𑀣𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺𑀬𑁂𑀯. 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀘 𑀫𑀳𑀸𑀫𑀡𑁆𑀟𑀮𑀁 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀡𑁆𑀟𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀡𑁆𑀟𑀮𑁂 ¶ 𑀘𑀭𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀫𑀡𑁆𑀟𑀮𑀁 𑀦𑀯𑀬𑁄𑀚𑀦𑀲𑀢𑀺𑀓𑀁, 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀙𑀬𑁄𑀚𑀦𑀲𑀢𑀺𑀓𑀁, 𑀅𑀦𑁆𑀢𑀺𑀫𑀫𑀡𑁆𑀟𑀮𑀁 𑀢𑀺𑀬𑁄𑀚𑀦𑀲𑀢𑀺𑀓𑀁. 𑀬𑀤𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀫𑀳𑀸𑀚𑀦𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀸 𑀥𑀫𑁆𑀫𑀤𑀸𑀦𑁂𑀦 𑀘𑀲𑁆𑀲 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁 𑀯𑀟𑁆𑀠𑁂𑀦𑁆𑀢𑀸 𑀦𑀯𑀳𑀺 𑀫𑀸𑀲𑁂𑀳𑀺 𑀚𑀦𑀧𑀤𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀲𑀘𑁂 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀧𑀯𑀸𑀭𑁂𑀢𑁆𑀯𑀸 𑀫𑀸𑀕𑀲𑀺𑀭𑀲𑁆𑀲 𑀧𑀞𑀫𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀲𑀘𑁂 𑀧𑀦 𑀦𑁂𑀲𑀁 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀅𑀧𑀭𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀸 𑀫𑀸𑀕𑀲𑀺𑀭𑀫𑀸𑀲𑀫𑁆𑀧𑀺 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀨𑀼𑀲𑁆𑀲𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁆𑀢𑀺𑀫𑀫𑀡𑁆𑀟𑀮𑁂 𑀲𑀢𑁆𑀢𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀢𑁂𑀲𑀼 𑀘 𑀫𑀡𑁆𑀟𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀘𑀭𑀦𑁆𑀢𑀸𑀧𑀺 𑀢𑁂 𑀢𑁂 𑀲𑀢𑁆𑀢𑁂 𑀓𑀺𑀮𑁂𑀲𑁂𑀳𑀺 𑀯𑀺𑀬𑁄𑀚𑁂𑀦𑁆𑀢𑀸 ¶ 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀳𑀺 𑀧𑀬𑁄𑀚𑁂𑀦𑁆𑀢𑀸 𑀯𑁂𑀦𑁂𑀬𑁆𑀬𑀯𑀲𑁂𑀦𑁂𑀯 𑀦𑀸𑀦𑀸𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺.

𑀅𑀧𑀭𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁 𑁋 𑀤𑁂𑀯𑀲𑀺𑀓𑀁 𑀧𑀘𑁆𑀘𑀽𑀲𑀲𑀫𑀬𑁂 𑀲𑀦𑁆𑀢𑀁 𑀲𑀼𑀔𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑁂𑀯𑀲𑀺𑀓𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀁, 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑀫𑀯𑀮𑁄𑀓𑀦𑀁.

𑀅𑀧𑀭𑀫𑁆𑀧𑀺 ¶ 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁 𑁋 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀢𑀭𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸, 𑀑𑀢𑀺𑀡𑁆𑀡𑁂 𑀤𑁄𑀲𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀦𑁆𑀢𑀺 𑀇𑀤𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁.

𑀓𑀢𑀫𑀁 𑀲𑀸𑀯𑀓𑀸𑀘𑀺𑀡𑁆𑀡𑀁? 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀦𑁆𑀦𑀺𑀧𑀸𑀢𑁄 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀘 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀁, 𑀯𑀼𑀢𑁆𑀣𑀯𑀲𑁆𑀲𑀸𑀦𑀜𑁆𑀘 𑀅𑀥𑀺𑀕𑀢𑀕𑀼𑀡𑀸𑀭𑁄𑀘𑀦𑀢𑁆𑀣𑀁 𑀉𑀧𑀭𑀺 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀜𑁆𑀘 ¶ . 𑀇𑀤𑀁 𑀲𑀸𑀯𑀓𑀸𑀘𑀺𑀡𑁆𑀡𑀁. 𑀇𑀥 𑀧𑀦 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀸𑀦’’𑀦𑁆𑀢𑀺.

𑀆𑀬𑀸𑀫𑀸𑀢𑀺 𑀆𑀕𑀘𑁆𑀙 𑀬𑀸𑀫. 𑀅𑀧𑀮𑁄𑀓𑁂𑀲𑁆𑀲𑀸𑀫𑀸𑀢𑀺 𑀘𑀸𑀭𑀺𑀓𑀁 𑀘𑀭𑀡𑀢𑁆𑀣𑀸𑀬 𑀆𑀧𑀼𑀘𑁆𑀙𑀺𑀲𑁆𑀲𑀸𑀫. 𑀏𑀯𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑀦𑁆𑀢𑁂𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁; 𑀲𑀢𑁆𑀣𑀼𑀦𑁄 𑀧𑀝𑀺𑀯𑀘𑀦𑀤𑀸𑀦𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀝𑀺𑀅𑀲𑁆𑀲𑁄𑀲𑀺, 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀲𑀼𑀡𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀇𑀥 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀯𑀸 𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀯𑀸 𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀫𑀚𑁆𑀛𑀦𑁆𑀳𑀺𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀦𑀕𑀭𑀯𑀻𑀣𑀺𑀬𑁄 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀳𑀺 𑀭𑀁𑀲𑀻𑀳𑀺 𑀲𑀫𑀼𑀚𑁆𑀚𑁄𑀢𑀬𑀫𑀸𑀦𑁄 𑀬𑁂𑀦 𑀯𑁂𑀭𑀜𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀖𑀭𑀤𑁆𑀯𑀸𑀭𑁂 𑀞𑀺𑀢𑀫𑀢𑁆𑀢𑀫𑁂𑀯 𑀘𑀲𑁆𑀲 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀭𑀺𑀚𑀦𑁄 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀬 𑀫𑀳𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀫𑁆𑀫 ‘‘𑀇𑀢𑁄, 𑀪𑀕𑀯𑀸, 𑀉𑀧𑀲𑀗𑁆𑀓𑀫𑀢𑀽’’𑀢𑀺 𑀆𑀳. 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀦𑀺𑀲𑀻𑀤𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑀸 𑀞𑀺𑀢𑀧𑀤𑁂𑀲𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀅𑀧𑀺𑀘 𑀬𑁄 𑀤𑁂𑀬𑁆𑀬𑀥𑀫𑁆𑀫𑁄, 𑀲𑁄 𑀦 𑀤𑀺𑀦𑁆𑀦𑁄’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 ¶ 𑁋 𑀫𑀬𑀸 𑀦𑀺𑀫𑀦𑁆𑀢𑀺𑀢𑀸𑀦𑀁 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀢𑀼𑀫𑁆𑀳𑀸𑀓𑀁 𑀢𑁂𑀫𑀸𑀲𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀢𑁄 𑀬𑀸𑀕𑀼𑀔𑀚𑁆𑀚𑀓𑀁, 𑀫𑀚𑁆𑀛𑀦𑁆𑀳𑀺𑀓𑁂 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁, 𑀲𑀸𑀬𑀦𑁆𑀳𑁂 𑀅𑀦𑁂𑀓𑀯𑀺𑀥 𑀧𑀸𑀦𑀯𑀺𑀓𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸𑀲𑀓𑁆𑀓𑀸𑀭𑁄𑀢𑀺 𑀏𑀯𑀫𑀸𑀤𑀺𑀓𑁄 𑀬𑁄 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀢𑀩𑁆𑀩𑁄 𑀅𑀲𑁆𑀲, 𑀲𑁄 𑀦 𑀤𑀺𑀦𑁆𑀦𑁄𑀢𑀺. 𑀢𑀜𑁆𑀘 𑀔𑁄 𑀦𑁄 𑀅𑀲𑀦𑁆𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀤𑁂𑀬𑁆𑀬𑀥𑀫𑁆𑀫𑁄 𑀅𑀫𑁆𑀳𑀸𑀓𑀁 𑀦𑁄 𑀅𑀲𑀦𑁆𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀣 ¶ 𑀯𑀸 𑀬𑀁 𑀤𑀸𑀦𑀯𑀢𑁆𑀣𑀼𑀁 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑀤𑁂𑀬𑁆𑀬𑀸𑀫, 𑀢𑀜𑁆𑀘 𑀔𑁄 𑀦𑁄 𑀅𑀲𑀦𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑁄𑀧𑀺 𑀅𑀤𑀸𑀢𑀼𑀓𑀫𑁆𑀬𑀢𑀸𑀢𑀺 𑀅𑀤𑀸𑀢𑀼𑀓𑀸𑀫𑀢𑀸𑀧𑀺 ¶ 𑀦𑁄 𑀦𑀢𑁆𑀣𑀺, 𑀬𑀣𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀁 𑀫𑀘𑁆𑀙𑀭𑀻𑀦𑀁. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀩𑀳𑀼𑀓𑀺𑀘𑁆𑀘𑀸 𑀖𑀭𑀸𑀯𑀸𑀲𑀸𑀢𑀺 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀩𑀳𑀼𑀓𑀺𑀘𑁆𑀘𑀸 𑀖𑀭𑀸𑀯𑀸𑀲𑀸, 𑀢𑀲𑁆𑀫𑀸 𑀏𑀢𑁆𑀣 𑀲𑀦𑁆𑀢𑁂𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀤𑀸𑀢𑀼𑀓𑀫𑁆𑀬𑀢𑀸𑀬 𑀘 𑀢𑀁 𑀓𑀼𑀢𑁄 𑀮𑀩𑁆𑀪𑀸 𑀓𑀼𑀢𑁄 𑀢𑀁 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀬𑀁 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀤𑁂𑀬𑁆𑀬𑀸𑀫𑀸𑀢𑀺 𑀖𑀭𑀸𑀯𑀸𑀲𑀁 𑀕𑀭𑀳𑀦𑁆𑀢𑁄 𑀆𑀳. 𑀲𑁄 𑀓𑀺𑀭 𑀫𑀸𑀭𑁂𑀦 𑀆𑀯𑀝𑁆𑀝𑀺𑀢𑀪𑀸𑀯𑀁 𑀦 𑀚𑀸𑀦𑀸𑀢𑀺, ‘‘𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑁂𑀦 𑀫𑁂 𑀲𑀢𑀺𑀲𑀫𑁆𑀫𑁄𑀲𑁄 𑀚𑀸𑀢𑁄’’𑀢𑀺 𑀫𑀜𑁆𑀜𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀧𑀺𑀘 𑁋 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀬𑀫𑀳𑀁 𑀢𑀼𑀫𑁆𑀳𑀸𑀓𑀁 𑀤𑀤𑁂𑀬𑁆𑀬𑀁, 𑀢𑀁 𑀓𑀼𑀢𑁄 𑀮𑀩𑁆𑀪𑀸? 𑀩𑀳𑀼𑀓𑀺𑀘𑁆𑀘𑀸 𑀳𑀺 𑀖𑀭𑀸𑀯𑀸𑀲𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀬𑀁𑀦𑀽𑀦𑀸𑀳𑀁 𑀬𑀁 𑀫𑁂 𑀢𑀻𑀳𑀺 𑀫𑀸𑀲𑁂𑀳𑀺 𑀤𑀸𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀏𑀓𑀤𑀺𑀯𑀲𑁂𑀦𑁂𑀯 𑀤𑀤𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁆𑀯𑀸𑀢𑀦𑀸𑀬𑀸𑀢𑀺 𑀬𑀁 𑀫𑁂 𑀢𑀼𑀫𑁆𑀳𑁂𑀲𑀼 𑀲𑀓𑁆𑀓𑀸𑀭𑀁 𑀓𑀭𑁄𑀢𑁄 𑀲𑁆𑀯𑁂 𑀪𑀯𑀺𑀲𑁆𑀲𑀢𑀺 𑀧𑀼𑀜𑁆𑀜𑀜𑁆𑀘𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑀜𑁆𑀘, 𑀢𑀤𑀢𑁆𑀣𑀸𑀬. 𑀅𑀣 𑀢𑀣𑀸𑀕𑀢𑁄 ‘‘𑀲𑀘𑁂 𑀅𑀳𑀁 𑀦𑀸𑀥𑀺𑀯𑀸𑀲𑁂𑀬𑁆𑀬𑀁, ‘𑀅𑀬𑀁 𑀢𑁂𑀫𑀸𑀲𑀁 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀓𑀼𑀧𑀺𑀢𑁄 𑀫𑀜𑁆𑀜𑁂, 𑀢𑁂𑀦 𑀫𑁂 𑀬𑀸𑀘𑀺𑀬𑀫𑀸𑀦𑁄 𑀏𑀓𑀪𑀢𑁆𑀢𑀫𑁆𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀢𑁆𑀣𑀺 𑀇𑀫𑀲𑁆𑀫𑀺𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺, 𑀅𑀲𑀩𑁆𑀩𑀜𑁆𑀜𑀽 𑀅𑀬’𑀦𑁆𑀢𑀺 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀘 𑀯𑁂𑀭𑀜𑁆𑀚𑀸𑀯𑀸𑀲𑀺𑀦𑁄 𑀘 𑀕𑀭𑀳𑀺𑀢𑁆𑀯𑀸 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼𑀁, 𑀢𑀁 𑀢𑁂𑀲𑀁 𑀫𑀸 𑀅𑀳𑁄𑀲𑀻’’𑀢𑀺 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀥𑀺𑀯𑀸𑀲𑁂𑀢𑁆𑀯𑀸 𑀘 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 ‘‘𑀅𑀮𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀘𑀺𑀦𑁆𑀢𑀸𑀬𑀸’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀘 𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀢𑀸𑀬 𑀲𑀉𑀲𑁆𑀲𑀸𑀳𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀧𑀓𑁆𑀓𑀦𑁆𑀢𑁂 𑀘 𑀧𑀦 𑀪𑀕𑀯𑀢𑀺 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀢𑁆𑀢𑀤𑀸𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀬𑀁, 𑀪𑀡𑁂, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀪𑀢𑁆𑀢𑀫𑁆𑀧𑀺 𑀦𑀸𑀤𑀫𑁆𑀳. 𑀳𑀦𑁆𑀤, 𑀤𑀸𑀦𑀺 𑀢𑀣𑀸 𑀤𑀸𑀦𑀁 𑀧𑀝𑀺𑀬𑀸𑀤𑁂𑀣 𑀬𑀣𑀸 𑀢𑁂𑀫𑀸𑀲𑀺𑀓𑁄𑀧𑀺 𑀤𑁂𑀬𑁆𑀬𑀥𑀫𑁆𑀫𑁄 𑀲𑁆𑀯𑁂 𑀏𑀓𑀤𑀺𑀯𑀲𑁂𑀦𑁂𑀯 ¶ 𑀤𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀻’’𑀢𑀺. 𑀢𑀢𑁄 𑀧𑀡𑀻𑀢𑀁 ¶ 𑀤𑀸𑀦𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 ¶ 𑀬𑀁 𑀤𑀺𑀯𑀲𑀁 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀆𑀲𑀦𑀝𑁆𑀞𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀕𑀦𑁆𑀥𑀥𑀽𑀫𑀯𑀸𑀲𑀓𑀼𑀲𑀼𑀫𑀯𑀺𑀘𑀺𑀢𑁆𑀭𑀁 𑀫𑀳𑀸𑀧𑀽𑀚𑀁 𑀲𑀚𑁆𑀚𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦…𑀧𑁂… 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁨𑁩. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀦𑁆𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀦𑁆𑀢𑀺 𑀩𑀼𑀤𑁆𑀥𑀧𑀭𑀺𑀡𑀸𑀬𑀓𑀁; 𑀩𑀼𑀤𑁆𑀥𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀢𑁆𑀯𑀸, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸. 𑀲𑀫𑁆𑀧𑀯𑀸𑀭𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀧𑀯𑀸𑀭𑁂𑀢𑁆𑀯𑀸 ‘𑀅𑀮’𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀫𑀼𑀔𑀲𑀜𑁆𑀜𑀸𑀬 𑀯𑀘𑀻𑀪𑁂𑀤𑁂𑀦 𑀘 𑀧𑀝𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁; 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀻𑀢𑀺 𑀢𑀺𑀘𑀻𑀯𑀭𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀇𑀤𑀁 𑀧𑀦 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀁 𑀳𑁄𑀢𑀺 ‘‘𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀻’’𑀢𑀺, 𑀢𑀲𑁆𑀫𑀺𑀜𑁆𑀘 𑀢𑀺𑀘𑀻𑀯𑀭𑁂 𑀏𑀓𑀫𑁂𑀓𑁄 𑀲𑀸𑀝𑀓𑁄 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺. 𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀢𑀺𑀲𑀳𑀲𑁆𑀲𑀕𑁆𑀖𑀦𑀓𑀁 𑀢𑀺𑀘𑀻𑀯𑀭𑀫𑀤𑀸𑀲𑀺 𑀉𑀢𑁆𑀢𑀫𑀁 𑀓𑀸𑀲𑀺𑀓𑀯𑀢𑁆𑀣𑀲𑀤𑀺𑀲𑀁. 𑀏𑀓𑀫𑁂𑀓𑀜𑁆𑀘 𑀪𑀺𑀓𑁆𑀔𑀼𑀁 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑁂𑀦𑀸𑀢𑀺 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑀴𑁂𑀦. 𑀢𑀢𑁆𑀭 𑀏𑀓𑀲𑀸𑀝𑀓𑁄 𑀧𑀜𑁆𑀘𑀲𑀢𑀸𑀦𑀺 𑀅𑀕𑁆𑀖𑀢𑀺. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀺 𑀤𑀼𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀏𑀢𑁆𑀢𑀓𑀫𑁆𑀧𑀺 𑀤𑀢𑁆𑀯𑀸 𑀅𑀢𑀼𑀝𑁆𑀞𑁄 𑀧𑀼𑀦 𑀲𑀢𑁆𑀢𑀝𑁆𑀞𑀲𑀳𑀲𑁆𑀲𑀕𑁆𑀖𑀦𑀓𑁂 𑀅𑀦𑁂𑀓𑀭𑀢𑁆𑀢𑀓𑀫𑁆𑀩𑀮𑁂 𑀘 𑀧𑀝𑁆𑀝𑀼𑀡𑁆𑀡𑀧𑀢𑁆𑀢𑀧𑀝𑁂 𑀘 𑀨𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀤𑀸𑀲𑀺. 𑀲𑀢𑀧𑀸𑀓𑀲𑀳𑀲𑁆𑀲𑀧𑀸𑀓𑀸𑀦𑀜𑁆𑀘 𑀪𑁂𑀲𑀚𑁆𑀚𑀢𑁂𑀮𑀸𑀦𑀁 𑀢𑀼𑀫𑁆𑀩𑀸𑀦𑀺 𑀧𑀽𑀭𑁂𑀢𑁆𑀯𑀸 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀜𑁆𑀚𑀦𑀢𑁆𑀣𑀸𑀬 𑀲𑀳𑀲𑁆𑀲𑀕𑁆𑀖𑀦𑀓𑀁 𑀢𑁂𑀮𑀫𑀤𑀸𑀲𑀺. 𑀓𑀺𑀁 𑀩𑀳𑀼𑀦𑀸, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀦 𑀓𑁄𑀘𑀺 𑀧𑀭𑀺𑀓𑁆𑀔𑀸𑀭𑁄 𑀲𑀫𑀡𑀧𑀭𑀺𑀪𑁄𑀕𑁄 ¶ 𑀅𑀤𑀺𑀦𑁆𑀦𑁄 𑀦𑀸𑀫 𑀅𑀳𑁄𑀲𑀺. 𑀧𑀸𑀴𑀺𑀬𑀁 𑀧𑀦 𑀘𑀻𑀯𑀭𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁.

𑀏𑀯𑀁 𑀫𑀳𑀸𑀬𑀸𑀕𑀁 𑀬𑀚𑀺𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀢𑁂𑀫𑀸𑀲𑀁 𑀫𑀸𑀭𑀸𑀯𑀝𑁆𑀝𑀦𑁂𑀦 𑀥𑀫𑁆𑀫𑀲𑀯𑀦𑀸𑀫𑀢𑀭𑀲𑀧𑀭𑀺𑀪𑁄𑀕𑀧𑀭𑀺𑀳𑀻𑀦𑀁 𑀏𑀓𑀤𑀺𑀯𑀲𑁂𑀦𑁂𑀯 𑀥𑀫𑁆𑀫𑀸𑀫𑀢𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀧𑀼𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀁 𑀓𑀼𑀭𑀼𑀫𑀸𑀦𑁄 𑀥𑀫𑁆𑀫𑀺𑀬𑀸 ¶ 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸…𑀧𑁂… 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀲𑀧𑀼𑀢𑁆𑀢𑀤𑀸𑀭𑁄 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀼𑀦𑀧𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀦𑀼𑀕𑁆𑀕𑀳𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀯𑀤𑀦𑁆𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀦𑀺𑀯𑀢𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸𑀢𑀺 𑀬𑀣𑀸𑀚𑁆𑀛𑀸𑀲𑀬𑀁 𑀬𑀣𑀸𑀭𑀼𑀘𑀺𑀢𑀁 𑀯𑀸𑀲𑀁 𑀯𑀲𑀺𑀢𑁆𑀯𑀸 𑀯𑁂𑀭𑀜𑁆𑀚𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀸𑀬 𑀘𑀭𑀡𑀓𑀸𑀮𑁂 𑀕𑀦𑁆𑀢𑀩𑁆𑀩𑀁 𑀩𑀼𑀤𑁆𑀥𑀯𑀻𑀣𑀺 𑀧𑀳𑀸𑀬 𑀤𑀼𑀩𑁆𑀪𑀺𑀓𑁆𑀔𑀤𑁄𑀲𑁂𑀦 ¶ 𑀓𑀺𑀮𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀚𑀼𑀦𑀸𑀯 𑀫𑀕𑁆𑀕𑁂𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀲𑁄𑀭𑁂𑀬𑁆𑀬𑀸𑀤𑀻𑀦𑀺 𑀅𑀦𑀼𑀧𑀕𑀫𑁆𑀫 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑁂𑀦 𑀅𑀯𑀲𑀭𑀺 𑀢𑀤𑀯𑀲𑀭𑀺. 𑀢𑀢𑁆𑀭𑀸𑀧𑀺 𑀬𑀣𑀸𑀚𑁆𑀛𑀸𑀲𑀬𑀁 𑀯𑀺𑀳𑀭𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀧𑀕𑀫𑁆𑀫 𑀲𑁄𑀭𑁂𑀬𑁆𑀬𑀁…𑀧𑁂… 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀁 𑁋

𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄, 𑀦𑀺𑀤𑀸𑀦𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄;

𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄, 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄 𑀘𑁂𑀯.

𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀢𑁄, 𑀧𑀤𑀢𑁆𑀣𑀢𑁄 𑀧𑀸𑀴𑀺𑀬𑁄𑀚𑀦𑀓𑁆𑀓𑀫𑀢𑁄;

𑀲𑀺𑀓𑁆𑀔𑀸𑀧𑀤𑀦𑀺𑀘𑁆𑀙𑀬𑀢𑁄, 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄.

𑀲𑀫𑁆𑀧𑀲𑁆𑀲𑀢𑀁 𑀦 𑀤𑀺𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀅𑀧𑀸𑀲𑀸𑀤𑀺𑀓𑀁 𑀬𑀢𑁄 𑀏𑀢𑁆𑀣;

𑀯𑀺𑀜𑁆𑀜𑀽𑀦𑀫𑀬𑀁 𑀢𑀲𑁆𑀫𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯.

𑀲𑀁𑀯𑀡𑁆𑀡𑀦𑀸 ¶ 𑀧𑀯𑀢𑁆𑀢𑀸, 𑀯𑀺𑀦𑀬𑀲𑁆𑀲 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦;

𑀯𑀼𑀢𑁆𑀢𑀲𑁆𑀲 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁪. 𑀇𑀢𑁄 ¶ ¶ 𑀧𑀭𑀁 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂𑀢𑀺𑀆𑀤𑀺 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀸𑀦𑀢𑁆𑀣𑀁. 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀁 𑀧𑀳𑀸𑀬 𑀬𑀢𑁆𑀣 𑀬𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀓𑀮𑀦𑁆𑀤𑀕𑀸𑀫𑁄𑀢𑀺 𑀓𑀮𑀦𑁆𑀤𑀓𑀸 𑀯𑀼𑀘𑁆𑀘𑀦𑁆𑀢𑀺 𑀓𑀸𑀴𑀓𑀸, 𑀢𑁂𑀲𑀁 𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀕𑀸𑀫𑁄. 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀕𑀸𑀫𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀭𑀸𑀚𑀲𑀫𑁆𑀫𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀲𑁆𑀲 𑀓𑀮𑀦𑁆𑀤𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑁂𑀧𑀺 𑀓𑀮𑀦𑁆𑀤𑀦𑀸𑀫𑀓𑀸 𑀫𑀦𑀼𑀲𑁆𑀲𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀩𑀳𑀼𑀮𑁂𑀳𑀻𑀢𑀺 𑀩𑀳𑀼𑀓𑁂𑀳𑀺. 𑀲𑀳𑀸𑀬𑀓𑁂𑀳𑀻𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀲𑀳 𑀆𑀬𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀲𑀳𑀸𑀬𑀸, 𑀲𑀳𑀸𑀬𑀸 𑀏𑀯 𑀲𑀳𑀸𑀬𑀓𑀸, 𑀢𑁂𑀳𑀺 𑀲𑀳𑀸𑀬𑀓𑁂𑀳𑀺. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀺𑀦𑀸 𑀓𑀺𑀘𑁆𑀘𑁂𑀦; 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸𑀓𑀺𑀘𑁆𑀘𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀪𑀕𑀯𑀸 𑀳𑀺 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑁂 𑀯𑁂𑀲𑀸𑀮𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸 𑀘𑁂𑀢𑁆𑀣 𑀉𑀴𑀸𑀭𑀸 𑀳𑁄𑀢𑀺. 𑀢𑀤𑀢𑁆𑀣𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀤𑁆𑀤𑀲 𑀔𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀦𑀕𑀭𑀢𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀁 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀳𑀢𑁆𑀣𑀁 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘 𑀦𑀺𑀓𑁆𑀔𑀫𑀦𑁆𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 ‘‘𑀓𑁆𑀯 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘𑀸’’𑀢𑀺. 𑀢𑁂𑀦 𑀳𑀺 ‘‘𑀅𑀳𑀫𑁆𑀧𑀺 𑀕𑀘𑁆𑀙𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄…𑀧𑁂… 𑀤𑁂𑀲𑁂𑀦𑁆𑀢’’𑀦𑁆𑀢𑀺. 𑀤𑀺𑀲𑁆𑀯𑀸𑀦𑀲𑁆𑀲𑀸𑀢𑀺 𑀤𑀺𑀲𑁆𑀯𑀸𑀦 𑀅𑀲𑁆𑀲. 𑀏𑀢𑀤𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸𑀬 𑀘𑁄𑀤𑀺𑀬𑀫𑀸𑀦𑀲𑁆𑀲 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 𑀅𑀳𑁄𑀲𑀺. 𑀓𑀺𑀁 𑀅𑀳𑁄𑀲𑀺? 𑀬𑀁𑀦𑀽𑀦𑀸𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀦𑁆𑀢𑀺 ¶ . 𑀢𑀢𑁆𑀣 𑀬𑀦𑁆𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑀫𑁂𑀢𑀁. 𑀏𑀯𑀁 𑀓𑀺𑀭𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄 ‘‘𑀬𑀫𑀬𑀁 𑀧𑀭𑀺𑀲𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀢𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺.

𑀅𑀣 ¶ 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸𑀢𑀺 𑀇𑀥 𑀓𑀲𑁆𑀫𑀸 ‘‘𑀬𑁂𑀦 𑀪𑀕𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀪𑀕𑀯𑀦𑁆𑀢𑀜𑁆𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀴𑀸𑀭𑀼𑀴𑀸𑀭𑀚𑀦𑀸 𑀫𑀳𑀢𑀻 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸, 𑀢𑀢𑁆𑀭 𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀧𑀘𑁆𑀙𑀸 𑀆𑀕𑀢𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁. 𑀧𑀭𑀺𑀲𑀸𑀬 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀓𑁆𑀓𑀸𑀢𑀺 𑀲𑁄 𑀢𑀁 𑀧𑀭𑀺𑀲𑀁𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 ¶ 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀦 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀳𑁄𑀲𑀺, 𑀅𑀣 𑀔𑁄 𑀪𑀕𑀯𑀢𑁄 𑀲𑀺𑀢𑁆𑀢𑀬𑀽𑀧𑀲𑀁𑀳𑀺𑀢𑀁 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸; 𑀢𑀁 𑀧𑀦𑀲𑁆𑀲 𑀬𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦�