📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀲𑀸𑀭𑀢𑁆𑀣𑀤𑀻𑀧𑀦𑀻-𑀝𑀻𑀓𑀸 (𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀫𑀳𑀸𑀓𑀸𑀭𑀼𑀡𑀺𑀓𑀁 ¶ ¶ 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘 𑀯𑀺𑀫𑀮𑀁 𑀯𑀭𑀁;

𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀜𑁆𑀘, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀦𑀺𑀭𑀗𑁆𑀕𑀡𑀁.

𑀉𑀴𑀸𑀭𑀧𑀼𑀜𑁆𑀜𑀢𑁂𑀚𑁂𑀦, 𑀓𑀢𑁆𑀯𑀸 𑀲𑀢𑁆𑀢𑀼𑀯𑀺𑀫𑀤𑁆𑀤𑀦𑀁;

𑀧𑀢𑁆𑀢𑀭𑀚𑁆𑀚𑀸𑀪𑀺𑀲𑁂𑀓𑁂𑀦, 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀺𑀦𑀸.

𑀦𑀺𑀲𑁆𑀲𑀸𑀬 ¶ 𑀲𑀻𑀳𑀴𑀺𑀦𑁆𑀤𑁂𑀦, 𑀬𑀁 𑀧𑀭𑀓𑁆𑀓𑀫𑀩𑀸𑀳𑀼𑀦𑀸;

𑀓𑀢𑁆𑀯𑀸 𑀦𑀺𑀓𑀸𑀬𑀲𑀸𑀫𑀕𑁆𑀕𑀺𑀁, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢𑀁.

𑀓𑀲𑁆𑀲𑀧𑀁 𑀢𑀁 𑀫𑀳𑀸𑀣𑁂𑀭𑀁, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀬𑀓𑀁;

𑀤𑀻𑀧𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺, 𑀲𑀸𑀲𑀦𑁄𑀤𑀬𑀓𑀸𑀭𑀓𑀁.

𑀧𑀝𑀺𑀧𑀢𑁆𑀢𑀺𑀧𑀭𑀸𑀥𑀻𑀦𑀁, 𑀲𑀤𑀸𑀭𑀜𑁆𑀜𑀦𑀺𑀯𑀸𑀲𑀺𑀦𑀁;

𑀧𑀸𑀓𑀝𑀁 𑀕𑀕𑀦𑁂 𑀘𑀦𑁆𑀤-𑀫𑀡𑁆𑀟𑀮𑀁 𑀯𑀺𑀬 𑀲𑀸𑀲𑀦𑁂.

𑀲𑀗𑁆𑀖𑀲𑁆𑀲 𑀧𑀺𑀢𑀭𑀁 𑀯𑀦𑁆𑀤𑁂, 𑀯𑀺𑀦𑀬𑁂 𑀲𑀼𑀯𑀺𑀲𑀸𑀭𑀤𑀁;

𑀬𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄𑀳𑀁, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄𑀲𑁆𑀫𑀺 𑀲𑀸𑀲𑀦𑁂.

𑀅𑀦𑀼𑀣𑁂𑀭𑀁 𑀫𑀳𑀸𑀧𑀼𑀜𑁆𑀜𑀁, 𑀲𑀼𑀫𑁂𑀥𑀁 𑀲𑀼𑀢𑀺𑀯𑀺𑀲𑁆𑀲𑀼𑀢𑀁;

𑀅𑀯𑀺𑀔𑀡𑁆𑀟𑀺𑀢𑀲𑀻𑀮𑀸𑀤𑀺-𑀧𑀭𑀺𑀲𑀼𑀤𑁆𑀥𑀕𑀼𑀡𑁄𑀤𑀬𑀁.

𑀩𑀳𑀼𑀲𑁆𑀲𑀼𑀢𑀁 𑀲𑀢𑀺𑀫𑀦𑁆𑀢𑀁, 𑀤𑀦𑁆𑀢𑀁 𑀲𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀦𑀫𑀸𑀫𑀺 𑀲𑀺𑀭𑀲𑀸 𑀥𑀻𑀭𑀁, 𑀕𑀭𑀼𑀁 𑀫𑁂 𑀕𑀡𑀯𑀸𑀘𑀓𑀁.

𑀆𑀕𑀢𑀸𑀕𑀫𑀢𑀓𑁆𑀓𑁂𑀲𑀼 ¶ , 𑀲𑀤𑁆𑀤𑀲𑀢𑁆𑀣𑀦𑀬𑀜𑁆𑀜𑀼𑀲𑀼;

𑀬𑀲𑁆𑀲𑀦𑁆𑀢𑁂𑀯𑀸𑀲𑀺𑀪𑀺𑀓𑁆𑀔𑀽𑀲𑀼, 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑀯𑀺𑀦𑀬𑀝𑁆𑀞𑀓𑀣𑀸𑀬𑀸𑀳𑀁, 𑀮𑀻𑀦𑀲𑀸𑀭𑀢𑁆𑀣𑀤𑀻𑀧𑀦𑀺𑀁;

𑀓𑀭𑀺𑀲𑁆𑀲𑀸𑀫𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀧𑀭𑀺𑀧𑀼𑀡𑁆𑀡𑀫𑀦𑀸𑀓𑀼𑀮𑀁.

𑀧𑁄𑀭𑀸𑀡𑁂𑀳𑀺 𑀓𑀢𑀁 𑀬𑀁 𑀢𑀼, 𑀮𑀻𑀦𑀢𑁆𑀣𑀲𑁆𑀲 𑀧𑀓𑀸𑀲𑀦𑀁;

𑀦 𑀢𑀁 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀽𑀦𑀁, 𑀅𑀢𑁆𑀣𑀁 𑀲𑀸𑀥𑁂𑀢𑀺 𑀲𑀩𑁆𑀩𑀲𑁄.

𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀸𑀬, 𑀲𑀻𑀳𑀴𑀸𑀬 𑀦𑀺𑀭𑀼𑀢𑁆𑀢𑀺𑀬𑀸;

𑀕𑀡𑁆𑀞𑀺𑀧𑀤𑁂𑀲𑁆𑀯𑀦𑁂𑀓𑁂𑀲𑀼, 𑀮𑀺𑀔𑀺𑀢𑀁 𑀓𑀺𑀜𑁆𑀘𑀺 𑀓𑀢𑁆𑀣𑀘𑀺.

𑀫𑀸𑀕𑀥𑀺𑀓𑀸𑀬 ¶ 𑀪𑀸𑀲𑀸𑀬, 𑀆𑀭𑀪𑀺𑀢𑁆𑀯𑀸𑀧𑀺 𑀓𑁂𑀦𑀘𑀺;

𑀪𑀸𑀲𑀦𑁆𑀢𑀭𑁂𑀳𑀺 𑀲𑀫𑁆𑀫𑀺𑀲𑁆𑀲𑀁, 𑀮𑀺𑀔𑀺𑀢𑀁 𑀓𑀺𑀜𑁆𑀘𑀺𑀤𑁂𑀯 𑀘.

𑀅𑀲𑀸𑀭𑀕𑀦𑁆𑀣𑀪𑀸𑀭𑁄𑀧𑀺, 𑀢𑀢𑁆𑀣𑁂𑀯 𑀩𑀳𑀼 𑀤𑀺𑀲𑁆𑀲𑀢𑀺;

𑀆𑀓𑀼𑀮𑀜𑁆𑀘 𑀓𑀢𑀁 𑀬𑀢𑁆𑀣, 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁆𑀧𑀺 𑀅𑀢𑁆𑀣𑀢𑁄.

𑀢𑀢𑁄 𑀅𑀧𑀭𑀺𑀧𑀼𑀡𑁆𑀡𑁂𑀦, 𑀢𑀸𑀤𑀺𑀲𑁂𑀦𑁂𑀢𑁆𑀣 𑀲𑀩𑁆𑀩𑀲𑁄;

𑀓𑀣𑀫𑀢𑁆𑀣𑀁 𑀯𑀺𑀚𑀸𑀦𑀦𑁆𑀢𑀺, 𑀦𑀸𑀦𑀸𑀤𑁂𑀲𑀦𑀺𑀯𑀸𑀲𑀺𑀦𑁄.

𑀪𑀸𑀲𑀦𑁆𑀢𑀭𑀁 𑀢𑀢𑁄 𑀳𑀺𑀢𑁆𑀯𑀸, 𑀲𑀸𑀭𑀫𑀸𑀤𑀸𑀬 𑀲𑀩𑁆𑀩𑀲𑁄;

𑀅𑀦𑀸𑀓𑀼𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀦𑁆𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑀼𑀓𑀸𑀫𑁄 𑀢𑀲𑁆𑀲 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀲𑀸𑀥𑁂𑀢𑀺. 𑀏𑀢𑁆𑀣 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 𑀯𑀡𑁆𑀡𑀬𑀦𑁆𑀢𑀺 𑁋

‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀣 𑀯𑀸 𑀫𑀗𑁆𑀕𑀮𑀪𑀸𑀯𑀢𑁄 ¶ , 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺.

𑀫𑀬𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀬𑁄𑀚𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀳𑀺 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀇𑀘𑁆𑀘𑁂𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬𑀁 ¶ ,

𑀦𑀫𑀲𑁆𑀲𑀫𑀸𑀦𑁄 𑀭𑀢𑀦𑀢𑁆𑀢𑀬𑀁 𑀬𑀁;

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀯𑀺𑀧𑀼𑀮𑀁 𑀅𑀮𑀢𑁆𑀣𑀁,

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄’’𑀢𑀺.

𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑁂𑀦 𑀘𑁂𑀢𑁆𑀣 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄, 𑀢𑀸𑀬 𑀧𑀜𑁆𑀜𑀸𑀧𑀸𑀝𑀯𑀜𑁆𑀘 𑀭𑀸𑀕𑀸𑀤𑀺𑀫𑀮𑀯𑀺𑀥𑀫𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁧.𑁧𑁧).

𑀢𑀲𑁆𑀫𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑁂𑀦 𑀯𑀺𑀓𑁆𑀔𑀸𑀮𑀺𑀢𑀫𑀮𑀸𑀬 𑀧𑀜𑁆𑀜𑀸𑀬 𑀧𑀸𑀝𑀯𑀲𑀺𑀤𑁆𑀥𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑀲𑁆𑀲 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀧𑀸𑀝𑀯𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀁 𑁋

‘‘𑀏𑀯𑀁 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁧𑁧.𑁧𑁧.).

𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁯; 𑀫𑀺. 𑀧. 𑁨.𑁧.𑁧𑁪). 𑀢𑀢𑁄 𑀏𑀯𑀁 𑀧𑀝𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀫𑀳𑀢𑁆𑀢𑀓𑀢𑀁 ¶ 𑀔𑁂𑀤𑀫𑀪𑀺𑀪𑀼𑀬𑁆𑀬 𑀅𑀦𑀦𑁆𑀢𑀭𑀸𑀬𑁂𑀦 𑀲𑀁𑀯𑀡𑁆𑀡𑀦𑀁 𑀲𑀫𑀸𑀧𑀬𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣’’𑀦𑁆𑀢𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀟𑁆𑀠𑀦𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀢𑀦𑀢𑁆𑀢𑀬𑀧𑀡𑀸𑀫𑁂𑀦 𑀳𑀺 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲 ¶ , 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺. (𑀥. 𑀧. 𑁧𑁦𑁯);

𑀢𑀢𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀼𑀟𑁆𑀠𑀺𑀬𑀸 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀫𑀺𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣’’𑀦𑁆𑀢𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀕𑀸𑀭𑀯𑀲𑁆𑀲 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑀸𑀯𑀳𑀢𑁆𑀢𑀸. 𑀅𑀧𑀭𑀺𑀳𑀸𑀦𑀸𑀯𑀳𑀜𑁆𑀳𑀺 𑀢𑀻𑀲𑀼𑀧𑀺 𑀭𑀢𑀦𑁂𑀲𑀼 𑀕𑀸𑀭𑀯𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸 𑀥𑀫𑁆𑀫𑀕𑀸𑀭𑀯𑀢𑀸 𑀲𑀗𑁆𑀖𑀕𑀸𑀭𑀯𑀢𑀸 𑀲𑀺𑀓𑁆𑀔𑀸𑀕𑀸𑀭𑀯𑀢𑀸 𑀲𑀫𑀸𑀥𑀺𑀕𑀸𑀭𑀯𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑁄𑀯𑀘𑀲𑁆𑀲𑀢𑀸’’𑀢𑀺 (𑀅. 𑀦𑀺. 𑁭.𑁩𑁪).

𑀳𑁄𑀢𑁂𑀯 𑀘 𑀢𑀢𑁄 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑁂𑀦 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑀭𑀺𑀲𑀫𑀸𑀧𑀦𑀁.

𑀅𑀣 𑀯𑀸 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸𑀬 𑀧𑀼𑀜𑁆𑀜𑀸𑀢𑀺𑀲𑀬𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀧𑀼𑀜𑁆𑀜𑀸𑀢𑀺𑀲𑀬𑀢𑁆𑀢𑀁 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

‘‘𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀥. 𑀧. 𑁧𑁯𑁫-𑁧𑁯𑁬; 𑀅𑀧. 𑀣𑁂𑀭 𑁧.𑁧𑁦.𑁧-𑁨);

𑀧𑀼𑀜𑁆𑀜𑀸𑀢𑀺𑀲𑀬𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀲𑀫𑀸𑀧𑀦𑀼𑀧𑀸𑀬𑁄. 𑀬𑀣𑀸𑀳 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦);

𑀉𑀧𑀸𑀬𑁂𑀲𑀼 ¶ 𑀘 𑀧𑀝𑀺𑀧𑀦𑁆𑀦𑀲𑁆𑀲 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀁. 𑀭𑀢𑀦𑀢𑁆𑀢𑀬𑀧𑀽𑀚𑀸 𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀁𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 ¶ 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀁 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀦 𑀲𑀧𑁆𑀧𑀬𑁄𑀚𑀦𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀕𑀯𑀢𑁄 𑀯𑀦𑁆𑀤𑀦𑀁 𑀓𑀸𑀢𑀼𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 ‘‘𑀬𑁄 𑀓𑀧𑁆𑀧…𑀧𑁂… 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲𑀸’’𑀢𑀺 𑀆𑀳. 𑀏𑀢𑁆𑀣 𑀧𑀦 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀬𑀲𑁆𑀫𑀸 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀢𑀲𑁆𑀫𑀸 𑀓𑀭𑀼𑀡𑀸𑀧𑁆𑀧𑀥𑀸𑀦𑀫𑁂𑀯 𑀪𑀕𑀯𑀢𑁄 𑀣𑁄𑀫𑀦𑀁 𑀆𑀭𑀤𑁆𑀥𑀁. 𑀏𑀲𑀸 𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸. 𑀢𑁂𑀦𑁂𑀯 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀁, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀼, 𑀧𑀜𑁆𑀜𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑀧𑀜𑁆𑀜𑀸𑀧𑁆𑀧𑀥𑀸𑀦𑀜𑁆𑀘 𑀣𑁄𑀫𑀦𑀁 𑀆𑀭𑀤𑁆𑀥𑀁. 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀸𑀥𑀺𑀫𑀼𑀢𑁆𑀢𑀺𑀘𑀭𑀺𑀬𑀸𑀤𑀺𑀪𑁂𑀤𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀳𑀺 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀢𑀤𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀕𑀫𑁆𑀪𑀻𑀭𑀫𑀢𑁆𑀣𑀧𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀘 𑀓𑁂𑀯𑀮𑀁 𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄.

𑀯𑀺𑀦𑀬𑀤𑁂𑀲𑀦𑀸 𑀧𑀦 𑀆𑀲𑀬𑀸𑀤𑀺𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀓𑀭𑀼𑀡𑀸𑀬 𑀧𑀸𑀓𑀢𑀺𑀓𑀲𑀢𑁆𑀢𑁂𑀦𑀧𑀺 𑀅𑀲𑁄𑀢𑀩𑁆𑀩𑀸𑀭𑀳𑀁 𑀲𑀼𑀡𑀦𑁆𑀢𑁄 𑀅𑀧𑀼𑀘𑁆𑀙𑀺𑀢𑀩𑁆𑀩𑀸𑀭𑀳𑀁 𑀧𑀼𑀘𑁆𑀙𑀦𑁆𑀢𑁄 𑀅𑀯𑀢𑁆𑀢𑀩𑁆𑀩𑀸𑀭𑀳𑀜𑁆𑀘 𑀯𑀤𑀦𑁆𑀢𑁄 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻𑀢𑀺 𑀓𑀭𑀼𑀡𑀸𑀧𑁆𑀧𑀥𑀸𑀦𑀸. 𑀢𑀣𑀸 𑀳𑀺 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺 ‘‘𑀲𑀺𑀔𑀭𑀡𑀻𑀲𑀻’’𑀢𑀺𑀆𑀤𑀻𑀦𑀺 𑀯𑀘𑀦𑀸𑀦𑀺 𑀬𑀣𑀸𑀧𑀭𑀸𑀥𑀜𑁆𑀘 𑀕𑀭𑀳𑀯𑀘𑀦𑀸𑀦𑀺 𑀯𑀺𑀦𑀬𑀧𑀺𑀝𑀓𑀤𑁂𑀲𑀦𑀸𑀬 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺, 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀸𑀧𑁂𑀓𑁆𑀔𑀸𑀬 𑀯𑁂𑀭𑀜𑁆𑀚𑀸𑀤𑀻𑀲𑀼 𑀲𑀸𑀭𑀻𑀭𑀺𑀓𑀜𑁆𑀘 𑀔𑁂𑀤𑀫𑀦𑀼𑀪𑁄𑀲𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀪𑀽𑀫𑀦𑁆𑀢𑀭𑀧𑀘𑁆𑀘𑀬𑀸𑀓𑀸𑀭𑀲𑀫𑀬𑀦𑁆𑀢𑀭𑀓𑀣𑀸𑀦𑀁 𑀯𑀺𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀜𑁆𑀜𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀢𑀺𑀲𑀬𑀓𑀺𑀘𑁆𑀘𑀯𑀢𑀻, 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁 𑀧𑀦 𑀢𑀢𑁄𑀧𑀺 𑀅𑀥𑀺𑀓𑀦𑁆𑀢𑀺 ¶ 𑀓𑀭𑀼𑀡𑀸𑀧𑁆𑀧𑀥𑀸𑀦𑀸 𑀯𑀺𑀦𑀬𑀤𑁂𑀲𑀦𑀸. 𑀓𑀭𑀼𑀡𑀸𑀩𑁆𑀬𑀸𑀧𑀸𑀭𑀸𑀥𑀺𑀓𑀢𑀸𑀬 𑀳𑀺 𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑀸. 𑀢𑀲𑁆𑀫𑀸 𑀆𑀭𑀫𑁆𑀪𑀸𑀦𑀼𑀭𑀽𑀧𑀁 𑀓𑀭𑀼𑀡𑀸𑀧𑁆𑀧𑀥𑀸𑀦𑀫𑁂𑀯 𑀏𑀢𑁆𑀣 𑀣𑁄𑀫𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀭𑀼𑀡𑀸𑀕𑁆𑀕𑀳𑀡𑁂𑀦 ¶ 𑀘 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑀸 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 𑀢𑀁𑀫𑀽𑀮𑀓𑀢𑁆𑀢𑀸 𑀲𑁂𑀲𑀩𑀼𑀤𑁆𑀥𑀕𑀼𑀡𑀸𑀦𑀁. 𑀫𑀳𑀸𑀓𑀭𑀼𑀡𑀸𑀬 𑀯𑀸 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀅𑀜𑁆𑀜𑀢𑀭𑀢𑁆𑀢𑀸 𑀢𑀁𑀲𑀳𑀘𑀭𑀺𑀢𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀫𑁆𑀧𑀺 𑀕𑀳𑀡𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀦𑀬𑀢𑁄 𑀤𑀲𑁆𑀲𑀺𑀢𑀸𑀯 𑀳𑁄𑀦𑁆𑀢𑀺. 𑀏𑀲𑁄𑀬𑁂𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑁄. 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫);

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀦𑀸 𑀓𑀭𑀼𑀡𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀬𑁄𑀢𑀺 𑀅𑀦𑀺𑀬𑀫𑀯𑀘𑀦𑀁. 𑀢𑀲𑁆𑀲 ‘‘𑀦𑀸𑀣𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀦𑀸 𑀧𑀦 𑀬𑀸𑀬 𑀓𑀭𑀼𑀡𑀸𑀬 𑀲𑁄 ‘‘𑀫𑀳𑀸𑀓𑀸𑀭𑀼𑀡𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀓𑀧𑁆𑀧𑀓𑁄𑀝𑀺𑀕𑀡𑀦𑀸𑀬𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀁 𑀮𑁄𑀓𑀳𑀺𑀢𑀢𑁆𑀣𑀸𑀬 𑀅𑀢𑀺𑀤𑀼𑀓𑁆𑀓𑀭𑀁 𑀓𑀭𑁄𑀦𑁆𑀢𑀲𑁆𑀲 𑀪𑀕𑀯𑀢𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀤𑀲𑁆𑀲𑁂𑀢𑀺. 𑀓𑀭𑀼𑀡𑀸𑀬 𑀩𑀮𑁂𑀦𑁂𑀯 𑀳𑀺 𑀲𑁄 𑀪𑀕𑀯𑀸 𑀳𑀢𑁆𑀣𑀕𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀧𑀳𑀸𑀬 𑀲𑀁𑀲𑀸𑀭𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑀁 𑀲𑀢𑁆𑀢𑀦𑀺𑀓𑀸𑀬𑀁 𑀢𑀢𑁄 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀘𑀺𑀦𑁆𑀢𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀬𑀦𑀚𑀻𑀯𑀺𑀢𑀧𑀼𑀢𑁆𑀢𑀪𑀭𑀺𑀬𑀤𑀸𑀦𑀸𑀤𑀺𑀓𑀁 𑀅𑀢𑀺𑀤𑀼𑀓𑁆𑀓𑀭𑀫𑀓𑀸𑀲𑀺. 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀦𑁆𑀢𑀺 𑀓𑀧𑁆𑀧𑀓𑁄𑀝𑀺𑀕𑀡𑀦𑀸𑀬𑀧𑀺 ‘‘𑀏𑀢𑁆𑀢𑀓𑀸 𑀓𑀧𑁆𑀧𑀓𑁄𑀝𑀺𑀬𑁄’’𑀢𑀺 𑀧𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀸𑀮𑀁, 𑀓𑀧𑁆𑀧𑀓𑁄𑀝𑀺𑀕𑀡𑀦𑀯𑀲𑁂𑀦𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 ¶ 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀧𑁆𑀧𑀓𑁄𑀝𑀺𑀯𑀲𑁂𑀦𑁂𑀯 𑀳𑀺 𑀲𑁄 𑀓𑀸𑀮𑁄 𑀅𑀧𑁆𑀧𑀫𑁂𑀬𑁆𑀬𑁄, 𑀅𑀲𑀗𑁆𑀔𑁆𑀬𑁂𑀬𑁆𑀬𑀯𑀲𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀬𑁂𑀯. ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺 𑀅𑀧𑀺𑀲𑀤𑁆𑀤𑁄 𑀓𑀧𑁆𑀧𑀓𑁄𑀝𑀺𑀯𑀲𑁂𑀦𑀧𑀺 𑀢𑀸𑀯 𑀧𑀫𑁂𑀢𑀼𑀁 𑀦 𑀲𑀓𑁆𑀓𑀸, 𑀧𑀕𑁂𑀯 𑀯𑀲𑁆𑀲𑀕𑀡𑀦𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮’’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 ‘‘𑀫𑀸𑀲𑀫𑀥𑀻𑀢𑁂, 𑀤𑀺𑀯𑀲𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀸𑀦𑀻𑀢𑀺 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄. 𑀏𑀯𑀫𑀢𑀺𑀤𑀼𑀓𑁆𑀓𑀭𑀸𑀦𑀺 ¶ 𑀓𑀭𑁄𑀦𑁆𑀢𑁄 𑀓𑀺𑀁 𑀯𑀺𑀦𑁆𑀤𑀻𑀢𑀺 𑀘𑁂? 𑀔𑁂𑀤𑀁 𑀕𑀢𑁄, 𑀓𑀸𑀬𑀺𑀓𑀁 𑀔𑁂𑀤𑀫𑀼𑀧𑀕𑀢𑁄, 𑀧𑀭𑀺𑀲𑁆𑀲𑀫𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄, 𑀤𑀼𑀓𑁆𑀔𑀫𑀦𑀼𑀪𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀜𑁆𑀳𑀺 𑀔𑀺𑀚𑁆𑀚𑀢𑀺 𑀲𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 ‘‘𑀔𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀳𑀺𑀢𑀸𑀬𑀸𑀢𑀺 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀝𑁆𑀝𑀤𑀼𑀓𑁆𑀔𑁂𑀦 𑀅𑀘𑁆𑀘𑀦𑁆𑀢𑀧𑀻𑀴𑀺𑀢𑀁 𑀲𑀢𑁆𑀢𑀮𑁄𑀓𑀁 𑀢𑀫𑁆𑀳𑀸 𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑀪𑀸𑀕𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀢𑁆𑀢𑀮𑁄𑀓𑀲𑁆𑀲 𑀳𑀺𑀢𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲 𑀘 ‘‘𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀳𑀺𑀢𑀸𑀬 𑀔𑁂𑀤𑀁 𑀕𑀢𑁄𑀢𑀺 𑀬𑁄𑀚𑀦𑀸𑀬𑀧𑀺 𑀦𑀢𑁆𑀣𑀺 𑀤𑁄𑀲𑁄. 𑀫𑀳𑀸𑀕𑀡𑁆𑀞𑀺𑀧𑀤𑁂𑀧𑀺 𑀳𑀺 ‘‘𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄 𑀔𑁂𑀤𑀁 𑀕𑀢𑁄, 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀮𑁄𑀓𑀳𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀬𑀁 𑀧𑀦 𑀏𑀯𑀁 𑀬𑁄𑀚𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁂𑀦 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀦 𑀳𑀺 𑀪𑀕𑀯𑀸 𑀮𑁄𑀓𑀳𑀺𑀢𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀫𑀦𑀼𑀪𑀯𑀢𑀺. 𑀦 𑀳𑀺 𑀓𑀲𑁆𑀲𑀘𑀺 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀮𑁄𑀓𑀲𑁆𑀲 𑀉𑀧𑀓𑀸𑀭𑀁 𑀆𑀯𑀳𑀢𑀻’’𑀢𑀺, 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀏𑀯𑀁 𑀬𑁄𑀚𑀦𑀸𑀬𑀧𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀪𑀕𑀯𑀢𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀮𑁄𑀓𑀳𑀺𑀢𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀦 𑀢𑀼 𑀤𑀼𑀓𑁆𑀔𑀸𑀦𑀼𑀪𑀯𑀦𑁂𑀦𑁂𑀯 𑀮𑁄𑀓𑀳𑀺𑀢𑀲𑀺𑀤𑁆𑀥𑀻𑀢𑀺. 𑀧𑀞𑀫𑀁 𑀯𑀼𑀢𑁆𑀢𑀬𑁄𑀚𑀦𑀸𑀬𑀧𑀺 𑀳𑀺 𑀦 𑀤𑀼𑀓𑁆𑀓𑀭𑀓𑀭𑀡𑀫𑀢𑁆𑀢𑁂𑀦 𑀮𑁄𑀓𑀳𑀺𑀢𑀲𑀺𑀤𑁆𑀥𑀺. 𑀦 𑀳𑀺 𑀤𑀼𑀓𑁆𑀓𑀭𑀁 𑀓𑀭𑁄𑀦𑁆𑀢𑁄 𑀓𑀜𑁆𑀘𑀺 𑀲𑀢𑁆𑀢𑀁 𑀫𑀕𑁆𑀕𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀣 𑀔𑁄 𑀢𑀸𑀤𑀺𑀲𑀁 𑀅𑀢𑀺𑀤𑀼𑀓𑁆𑀓𑀭𑀁 𑀓𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀲𑀘𑁆𑀙𑀺𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀬 𑀫𑀕𑁆𑀕𑀨𑀮𑀸𑀤𑀻𑀲𑀼 𑀲𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀮𑁄𑀓𑀲𑁆𑀲 𑀳𑀺𑀢𑀁 𑀲𑀸𑀥𑁂𑀢𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀳𑀺𑀢𑀓𑀭𑀡𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀁𑀯𑀺𑀲𑀬𑀲𑁆𑀲𑁂𑀯 𑀲𑀢𑁆𑀢𑀮𑁄𑀓𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀁𑀯𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑀢𑁆𑀣𑁄𑀧𑀺 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀬𑀁 ¶ 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀲𑀢𑁆𑀢𑀮𑁄𑀓𑀜𑁆𑀘 𑀚𑀸𑀢𑀺𑀮𑁄𑀓𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀁, 𑀅𑀢𑀺𑀓𑁆𑀓𑀦𑁆𑀢𑀧𑀭𑀮𑁄𑀓𑀸𑀦𑀁 𑀯𑀸 𑀉𑀘𑁆𑀙𑀺𑀦𑁆𑀦𑀮𑁄𑀓𑀲𑀫𑀼𑀤𑀬𑀸𑀦𑀁 𑀇𑀥 𑀚𑀸𑀢𑀺𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀸𑀢𑀜𑁆𑀘 𑀳𑀺𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀮𑁄𑀓𑀲𑁆𑀲, 𑀮𑁄𑀓𑀸𑀦𑀁, 𑀮𑁄𑀓𑁂 𑀯𑀸 𑀳𑀺𑀢𑀦𑁆𑀢𑀺 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀮𑁄𑀓𑀳𑀺𑀢𑀫𑀺𑀘𑁆𑀘𑁂𑀯𑀸𑀳𑀸’’𑀢𑀺, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀆𑀢𑀳𑀺𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀯𑀺𑀲𑀬𑀢𑁆𑀢𑀸, 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑁂𑀦𑁂𑀯 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸.

𑀲𑀩𑁆𑀩𑀢𑁆𑀣 ‘‘𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑁂 ‘‘𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀓𑀸𑀭𑁂𑀦𑀸’’𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀫𑀳𑀸𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 ‘‘𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 ‘‘𑀘𑀽𑀴𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀲𑀽’’𑀢𑀺 ¶ 𑀕𑀳𑁂𑀢𑀩𑁆𑀩𑀁. 𑀓𑁂𑀯𑀮𑀁 ‘‘𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀕𑀥𑀪𑀸𑀲𑀸𑀬 𑀮𑀺𑀔𑀺𑀢𑁂 𑀕𑀡𑁆𑀞𑀺𑀧𑀤𑁂’’𑀢𑀺 𑀕𑀳𑁂𑀢𑀩𑁆𑀩𑀁.

𑀦𑀸𑀣𑁄𑀢𑀺 𑀮𑁄𑀓𑀧𑀝𑀺𑀲𑀭𑀡𑁄, 𑀮𑁄𑀓𑀲𑀸𑀫𑀻 𑀮𑁄𑀓𑀦𑀸𑀬𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀅𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀏𑀓𑀧𑀝𑀺𑀲𑀭𑀡𑁄 𑀧𑀢𑀺𑀝𑁆𑀞𑀸. 𑀅𑀣 𑀯𑀸 𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀆𑀲𑀻𑀲𑀢𑀺 𑀧𑀢𑁆𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀣𑀢𑀺 𑀯𑁂𑀦𑁂𑀬𑁆𑀬𑀕𑀢𑁂 𑀓𑀺𑀮𑁂𑀲𑁂 𑀉𑀧𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄, 𑀦𑀸𑀣𑀢𑀻𑀢𑀺 𑀯𑀸 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀳𑀺 ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁭) 𑀲𑀢𑁆𑀢𑀸𑀦𑀁 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀺𑀢𑁆𑀯𑀸𑀧𑀺 𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀢𑁂 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺. 𑀧𑀭𑀫𑁂𑀦 𑀯𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑁄𑀧𑀺 𑀘𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀬𑁄 𑀓𑀭𑀼𑀡𑀸𑀬 𑀓𑀫𑁆𑀧𑀺𑀢𑀳𑀤𑀬𑀢𑁆𑀢𑀸 𑀮𑁄𑀓𑀳𑀺𑀢𑀢𑁆𑀣𑀁 𑀅𑀢𑀺𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀅𑀦𑁂𑀓𑀧𑁆𑀧𑀓𑀸𑀭𑀁 𑀢𑀸𑀤𑀺𑀲𑀁 𑀲𑀁𑀲𑀸𑀭𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀆𑀕𑀢𑁄, 𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀭𑀢𑀻𑀢𑀺 ¶ 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁂𑀲𑀼 𑀯𑀸 𑀓𑀺𑀭𑀻𑀬𑀢𑀺 𑀧𑀲𑀸𑀭𑀻𑀬𑀢𑀻𑀢𑀺 𑀓𑀭𑀼𑀡𑀸. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑁂𑀢𑀺, 𑀯𑀺𑀦𑀸𑀲𑁂𑀢𑀺 𑀯𑀸 𑀧𑀭𑀲𑁆𑀲 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀸𑀥𑁂𑀢𑀻𑀢𑀺. 𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 𑀓𑀸𑀭𑀼𑀡𑀺𑀓𑁄 𑀬𑀣𑀸 ‘‘𑀤𑁄𑀯𑀸𑀭𑀺𑀓𑁄’’𑀢𑀺. 𑀬𑀣𑀸 𑀳𑀺 𑀤𑁆𑀯𑀸𑀭𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀯𑀢𑁆𑀢𑀫𑀸𑀦𑁄𑀧𑀺 𑀤𑁆𑀯𑀸𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑁄 𑀧𑀼𑀭𑀺𑀲𑁄 𑀤𑁆𑀯𑀸𑀭𑀸𑀦𑀢𑀺𑀯𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄𑀢𑀺 ‘‘𑀤𑁄𑀯𑀸𑀭𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀪𑀕𑀯𑀸 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑀢𑁄 𑀅𑀜𑁆𑀜𑀢𑁆𑀣 𑀯𑀢𑁆𑀢𑀫𑀸𑀦𑁄𑀧𑀺 𑀓𑀭𑀼𑀡𑀸𑀦𑀢𑀺𑀯𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 ‘‘𑀓𑀸𑀭𑀼𑀡𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀸 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀮𑁄𑀓𑀦𑀸𑀣𑀸 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀦𑁆𑀢𑁄 𑀓𑀸𑀭𑀼𑀡𑀺𑀓𑁄𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄. 𑀲𑀢𑀺𑀧𑀺 𑀪𑀕𑀯𑀢𑁄 𑀢𑀤𑀜𑁆𑀜𑀕𑀼𑀡𑀸𑀦𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁂 𑀓𑀸𑀭𑀼𑀡𑀺𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 𑀓𑀭𑀼𑀡𑀸𑀯𑀲𑁂𑀦𑁂𑀢𑁆𑀣 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸 𑀯𑀼𑀢𑁆𑀢𑀸 𑀳𑁄𑀢𑀺.

𑀅𑀣 ¶ 𑀯𑀸 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀁 𑀲𑀻𑀮𑀁 𑀧𑀓𑀢𑀺 𑀏𑀢𑀲𑁆𑀲𑀸𑀢𑀺 𑀓𑀸𑀭𑀼𑀡𑀺𑀓𑁄, 𑀧𑀣𑀯𑀻𑀨𑀲𑁆𑀲𑀸𑀤𑀬𑁄 𑀯𑀺𑀬 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀸 𑀓𑀭𑀼𑀡𑀸𑀬𑀦𑀲𑀪𑀸𑀯𑁄 𑀲𑀪𑀸𑀯𑀪𑀽𑀢𑀓𑀭𑀼𑀡𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀅𑀣 𑀯𑀸 𑀫𑀳𑀸𑀯𑀺𑀲𑀬𑀢𑀸𑀬 𑀫𑀳𑀸𑀦𑀼𑀪𑀸𑀯𑀢𑀸𑀬 𑀫𑀳𑀸𑀩𑀮𑀢𑀸𑀬 𑀘 𑀫𑀳𑀢𑀻 𑀓𑀭𑀼𑀡𑀸𑀢𑀺 𑀫𑀳𑀸𑀓𑀭𑀼𑀡𑀸. 𑀪𑀕𑀯𑀢𑁄 𑀳𑀺 𑀓𑀭𑀼𑀡𑀸 𑀦𑀺𑀭𑀯𑀲𑁂𑀲𑁂𑀲𑀼 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀸 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀧𑀯𑀢𑁆𑀢𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀜𑁆𑀘 𑀫𑀳𑀦𑁆𑀢𑀫𑁂𑀯 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀏𑀓𑀦𑁆𑀢𑀢𑁄 𑀦𑀺𑀧𑁆𑀨𑀸𑀤𑁂𑀢𑀺, 𑀫𑀳𑀸𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀫𑀳𑀢𑀻 𑀧𑀲𑀢𑁆𑀣𑀸 𑀓𑀭𑀼𑀡𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄. 𑀧𑀽𑀚𑀸𑀯𑀘𑀦𑁄 𑀳𑁂𑀢𑁆𑀣 𑀫𑀳𑀦𑁆𑀢𑀲𑀤𑁆𑀤𑁄 ‘‘𑀫𑀳𑀸𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀲𑀢𑁆𑀣𑀸 𑀘 𑀪𑀕𑀯𑀢𑁄 𑀓𑀭𑀼𑀡𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀧𑀺 𑀧𑀯𑀢𑁆𑀢𑀺𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸𑀢𑀺.

𑀏𑀯𑀁 ¶ 𑀓𑀭𑀼𑀡𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀅𑀲𑀫𑁆𑀩𑀼𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀫𑁆𑀩𑀼𑀥𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 𑀅𑀲𑀫𑁆𑀩𑀼𑀚𑁆𑀛𑀦𑁆𑀢𑁄 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀬𑀣𑀸𑀲𑀪𑀸𑀯𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼𑀅𑀢𑁆𑀣𑁄 𑀳𑁂𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 ‘‘𑀧𑀞𑀦𑁆𑀢𑁄 𑀦𑀺𑀲𑀻𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀦𑁆𑀢𑀺 𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀁𑀲𑀺𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁧). 𑀢𑁂𑀦 𑀏𑀯𑀁 𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑁂𑀦 𑀩𑀼𑀤𑁆𑀥𑁂𑀦 𑀦𑀺𑀲𑁂𑀯𑀺𑀢𑀁 𑀕𑁄𑀘𑀭𑀸𑀲𑁂𑀯𑀦𑀸𑀪𑀸𑀯𑀦𑀸𑀲𑁂𑀯𑀦𑀸𑀳𑀺 𑀬𑀣𑀸𑀭𑀳𑀁 𑀦𑀺𑀲𑁂𑀯𑀺𑀢𑀁 𑀅𑀦𑀼𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀦𑀺𑀩𑁆𑀩𑀸𑀦𑀁 𑀕𑁄𑀘𑀭𑀸𑀲𑁂𑀯𑀦𑀸𑀯𑀲𑁂𑀦𑁂𑀯 𑀦𑀺𑀲𑁂𑀯𑀺𑀢𑀁, 𑀫𑀕𑁆𑀕𑁄 𑀧𑀦 𑀅𑀢𑁆𑀢𑀦𑀸 𑀪𑀸𑀯𑀺𑀢𑁄 𑀘 𑀪𑀸𑀯𑀦𑀸𑀲𑁂𑀯𑀦𑀸𑀯𑀲𑁂𑀦 𑀲𑁂𑀯𑀺𑀢𑁄, 𑀧𑀭𑁂𑀳𑀺 𑀉𑀧𑁆𑀧𑀸𑀤𑀺𑀢𑀸𑀦𑀺 𑀧𑀦 𑀫𑀕𑁆𑀕𑀨𑀮𑀸𑀦𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀺𑀦𑀸 𑀬𑀤𑀸 𑀧𑀭𑀺𑀚𑀸𑀦𑀸𑀢𑀺, 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀢𑀤𑀸 𑀕𑁄𑀘𑀭𑀸𑀲𑁂𑀯𑀦𑀸𑀯𑀲𑁂𑀦𑀧𑀺 ¶ 𑀲𑁂𑀯𑀺𑀢𑀸𑀦𑀺 𑀳𑁄𑀦𑁆𑀢𑀺𑀬𑁂𑀯. 𑀏𑀢𑁆𑀣 𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀧𑀭𑀺𑀬𑀸𑀬𑀢𑁄 𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀡𑁂 𑀲𑀢𑀺 𑀲𑁄𑀧𑀺 𑀤𑁂𑀲𑀦𑀸𑀲𑀫𑁆𑀫𑀲𑀦𑀜𑀸𑀡𑀕𑁄𑀘𑀭𑀢𑀸𑀬 𑀕𑁄𑀘𑀭𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑁄𑀢𑀺 𑀲𑀓𑁆𑀓𑀸 𑀕𑀳𑁂𑀢𑀼𑀁. ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀬𑀁 𑀅𑀲𑀫𑁆𑀩𑀼𑀥𑀁 𑀅𑀲𑀫𑁆𑀩𑀼𑀚𑁆𑀛𑀦𑁆𑀢𑁄 𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀺 ¶ 𑀘 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀪𑀯𑀸𑀪𑀯𑀁 𑀕𑀘𑁆𑀙𑀢𑀺, 𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑀯𑀺𑀦𑀬𑁄 𑀧𑀦 𑀢𑀤𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀦 𑀘𑀺𑀭𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁨.𑁧𑁮𑁫; 𑀲𑀁. 𑀦𑀺. 𑁧.𑁧𑁮𑁫);

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑁂𑀳𑀺𑀧𑀺 𑀕𑁄𑀘𑀭𑀸𑀲𑁂𑀯𑀦𑀸𑀤𑀺𑀦𑀸 𑀲𑁂𑀯𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 ‘‘𑀩𑀼𑀤𑁆𑀥𑀦𑀺𑀲𑁂𑀯𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀲𑀸𑀫𑀜𑁆𑀜𑀢𑁄 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄.

𑀪𑀯𑀸𑀪𑀯𑀦𑁆𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄, 𑀪𑀯𑀢𑁄 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀯𑀸𑀪𑀯𑀦𑁆𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀳𑀻𑀦𑀧𑀡𑀻𑀢𑀯𑀲𑁂𑀦 𑀘 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀜𑁆𑀘 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀤𑁆𑀥𑀢𑁆𑀣𑁄𑀧𑀺 𑀳𑀺 𑀅-𑀓𑀸𑀭𑁄 𑀤𑀺𑀲𑁆𑀲𑀢𑀺 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀸 𑀅𑀪𑀯𑁄𑀢𑀺 𑀫𑀳𑀸𑀪𑀯𑁄 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀪𑀯𑁄 𑀘 𑀅𑀪𑀯𑁄 𑀘 𑀪𑀯𑀸𑀪𑀯𑁄. 𑀢𑀁 𑀪𑀯𑀸𑀪𑀯𑀁. 𑀕𑀘𑁆𑀙𑀢𑀻𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀚𑀻𑀯𑀮𑁄𑀓𑁄𑀢𑀺 𑀲𑀢𑁆𑀢𑀮𑁄𑀓𑁄. 𑀚𑀻𑀯𑀕𑁆𑀕𑀳𑀡𑁂𑀦 𑀳𑀺 𑀲𑀗𑁆𑀔𑀸𑀭𑀪𑀸𑀚𑀦𑀮𑁄𑀓𑀁 𑀦𑀺𑀯𑀢𑁆𑀢𑁂𑀢𑀺 𑀢𑀲𑁆𑀲 𑀪𑀯𑀸𑀪𑀯𑀕𑀫𑀦𑀸𑀲𑀫𑁆𑀪𑀯𑀢𑁄. 𑀦𑀫𑁄 𑀅𑀢𑁆𑀣𑀽𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄𑀢𑀺 𑀥𑀫𑁆𑀫𑀯𑀺𑀲𑁂𑀲𑀦𑀁. 𑀢𑀢𑁆𑀣 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀧𑀽𑀭𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀅𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀢𑀁 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸, 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀢𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸, 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀩𑁆𑀩𑀬𑁄𑀦𑀺𑀕𑀢𑀺𑀪𑀯𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 ¶ 𑀯𑀸 𑀅𑀯𑀺𑀚𑁆𑀚𑀸, 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀔𑀦𑁆𑀥𑀸𑀤𑀻𑀲𑀼 𑀦 𑀚𑀯𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸. 𑀲𑀸 𑀆𑀤𑀺 𑀬𑁂𑀲𑀁 𑀢𑀡𑁆𑀳𑀸𑀤𑀻𑀦𑀁 𑀢𑁂 𑀅𑀯𑀺𑀚𑁆𑀚𑀸𑀤𑀬𑁄, 𑀢𑁂𑀬𑁂𑀯 ¶ 𑀓𑀺𑀮𑀺𑀲𑁆𑀲𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸𑀢𑀺 𑀓𑀺𑀮𑁂𑀲𑀸, 𑀢𑁂𑀬𑁂𑀯 𑀘 𑀲𑀢𑁆𑀢𑀸𑀦𑀁 𑀩𑀦𑁆𑀥𑀦𑀝𑁆𑀞𑁂𑀦 𑀚𑀸𑀮𑀲𑀤𑀺𑀲𑀸𑀢𑀺 𑀚𑀸𑀮𑀁, 𑀢𑀁 𑀯𑀺𑀤𑁆𑀥𑀁𑀲𑁂𑀢𑀺 𑀲𑀩𑁆𑀩𑀲𑁄 𑀯𑀺𑀦𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀻. 𑀦𑀦𑀼 𑀘𑁂𑀢𑁆𑀣 𑀲𑀧𑀭𑀺𑀬𑀢𑁆𑀢𑀺𑀓𑁄 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀢𑁆𑀣 𑀘 𑀫𑀕𑁆𑀕𑁄𑀬𑁂𑀯 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑁂𑀢𑀺, 𑀦𑁂𑀢𑀭𑁂𑀢𑀺 𑀘𑁂? 𑀯𑀼𑀘𑁆𑀘𑀢𑁂. 𑀫𑀕𑁆𑀕𑀲𑁆𑀲𑀧𑀺 𑀦𑀺𑀩𑁆𑀩𑀸𑀦𑀫𑀸𑀕𑀫𑁆𑀫 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀢𑁄 𑀦𑀺𑀩𑁆𑀩𑀸𑀦𑀫𑁆𑀧𑀺 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑁂𑀢𑀺 𑀦𑀸𑀫, 𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀺𑀘𑁆𑀘𑀁 𑀨𑀮𑁂𑀦 𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀨𑀮𑀫𑁆𑀧𑀺 ‘‘𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀦 𑀓𑁄𑀘𑀺 𑀤𑁄𑀲𑁄.

𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀅𑀦𑀺𑀬𑀫𑀺𑀢𑀲𑁆𑀲 𑀦𑀺𑀬𑀫𑀯𑀘𑀦𑀁. 𑀢𑀢𑁆𑀣 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄.

‘‘𑀬𑁂 𑀓𑁂𑀘𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭) 𑁋

𑀳𑀺 𑀯𑀼𑀢𑁆𑀢𑀁. 𑀲𑀁𑀲𑀸𑀭𑀤𑀼𑀓𑁆𑀔𑁂 𑀯𑀸 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀤𑀺𑀯𑀲𑁂𑀦 𑀲𑀁𑀲𑀸𑀭𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀧𑀸𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀜𑁆𑀘𑁂𑀢𑁆𑀣 𑀥𑀸𑀭𑀡𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁄 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀺, 𑀅𑀭𑀺𑀬𑀨𑀮𑀁 𑀧𑀦 𑀢𑀁𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀢𑀤𑀦𑀼𑀕𑀼𑀡𑀢𑀸𑀬, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀢𑀤𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀁 𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀥𑀫𑁆𑀫𑁄𑀬𑁂𑀯 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀯𑀭𑁄 𑀧𑀯𑀭𑁄 𑀅𑀦𑀼𑀢𑁆𑀢𑀭𑁄𑀢𑀺 𑀥𑀫𑁆𑀫𑀯𑀭𑁄, 𑀢𑀲𑁆𑀲 𑀥𑀫𑁆𑀫𑀯𑀭𑀲𑁆𑀲 𑀦𑀫𑁄 𑀅𑀢𑁆𑀣𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀅𑀫𑁆𑀳𑁂𑀳𑀺 𑀲𑀸𑀭𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀧𑀧𑀜𑁆𑀘𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀇𑀥 𑀦 𑀤𑀲𑁆𑀲𑀺𑀢𑀁, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀲𑀸𑀭𑀢𑁆𑀣𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀬𑀢𑁆𑀣 𑀧𑀦 𑀓𑁂𑀦𑀘𑀺 𑀅𑀘𑁆𑀘𑀦𑁆𑀢𑀯𑀺𑀭𑀼𑀤𑁆𑀥𑀁 𑀮𑀺𑀔𑀺𑀢𑀁, 𑀢𑀫𑁆𑀧𑀺 𑀓𑀢𑁆𑀣𑀘𑀺 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀏𑀢𑁆𑀣 𑀘 ‘‘𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀻𑀳𑀺 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀥𑀫𑁆𑀫𑀯𑀭𑀲𑁆𑀲𑀸’’𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑀢𑁄 𑀧𑀭𑀺𑀧𑀼𑀡𑁆𑀡𑀢𑀸𑀬. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀧𑀪𑀸𑀯𑀲𑀫𑁆𑀧𑀤𑀁.

𑀏𑀯𑀁 ¶ ¶ 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀕𑀼𑀡𑁂𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀕𑀼𑀡𑁂𑀳𑀻’’𑀢𑀺 𑀧𑀤𑀲𑁆𑀲 ‘‘𑀬𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀤𑀸𑀦𑀺 𑀬𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀮𑀲𑀫𑀸𑀥𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺 ‘‘𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀥𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺. 𑀲𑀫𑀸𑀥𑀺𑀲𑀻𑀲𑁂𑀦 𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀬𑁄 𑀯𑀼𑀢𑁆𑀢𑀸. 𑀧𑀜𑁆𑀜𑀸𑀢𑀺 𑀫𑀕𑁆𑀕𑀧𑀜𑁆𑀜𑀸. 𑀯𑀺𑀫𑀼𑀢𑁆𑀢𑀺 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀜𑁆𑀘 𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 ‘‘𑀯𑀺𑀫𑀼𑀢𑁆𑀢𑀺𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑀧𑀭𑀺𑀬𑀸𑀬𑁂𑀦 𑀧𑀪𑀼𑀢𑀺𑀲𑀤𑁆𑀤𑁂𑀦 𑀯𑀸 𑀯𑀺𑀫𑀼𑀢𑁆𑀢𑀺𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀁. 𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀕𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀲𑀻𑀮𑀸𑀤𑀬𑁄 𑀕𑀼𑀡𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀬𑀣𑀸𑀲𑀫𑁆𑀪𑀯𑀁 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀲𑀻𑀮𑀸𑀤𑀬𑁄 𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀬𑀣𑀸𑀲𑀫𑁆𑀪𑀯𑀁 𑀮𑀩𑁆𑀪𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁂 ‘𑀅𑀭𑀺𑀬𑀲𑀗𑁆𑀖’𑀦𑁆𑀢𑀺 𑀯𑀘𑀦𑀢𑁄 𑀲𑀻𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀮𑁄𑀓𑀼𑀢𑁆𑀢𑀭𑀸𑀯𑀸’’𑀢𑀺, 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀺𑀬𑀕𑀼𑀡𑁂𑀳𑀺𑀧𑀺 𑀣𑁄𑀫𑀦𑀸𑀬 𑀓𑁄𑀘𑀺 𑀤𑁄𑀲𑁄 𑀤𑀺𑀲𑁆𑀲𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑀧𑀺 𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀣𑁄𑀫𑀦𑀸 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀭𑀺𑀬𑀲𑀗𑁆𑀖𑀲𑁆𑀲𑀸𑀢𑀺.

𑀓𑀼𑀲𑀮𑀢𑁆𑀣𑀺𑀓𑀸𑀦𑀁 𑀚𑀦𑀸𑀦𑀁 𑀧𑀼𑀜𑁆𑀜𑀲𑁆𑀲 𑀯𑀼𑀤𑁆𑀥𑀺𑀬𑀸 𑀔𑁂𑀢𑁆𑀢𑀲𑀤𑀺𑀲𑀢𑁆𑀢𑀸 𑀔𑁂𑀢𑁆𑀢𑀦𑁆𑀢𑀺 𑀆𑀳 ‘‘𑀔𑁂𑀢𑁆𑀢𑀁 𑀚𑀦𑀸𑀦𑀁 𑀓𑀼𑀲𑀮𑀢𑁆𑀣𑀺𑀓𑀸𑀦’’𑀦𑁆𑀢𑀺. 𑀔𑀺𑀢𑁆𑀢𑀁 𑀩𑀻𑀚𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀢𑀸𑀬𑀢𑀻𑀢𑀺 𑀳𑀺 𑀔𑁂𑀢𑁆𑀢𑀁, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀯𑀺𑀭𑀼𑀳𑀦𑀪𑀽𑀫𑀺, 𑀢𑀁𑀲𑀤𑀺𑀲𑀢𑁆𑀢𑀸 𑀅𑀭𑀺𑀬𑀲𑀗𑁆𑀖𑁄𑀧𑀺 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀧𑀼𑀩𑁆𑀩𑁂 ‘‘𑀬𑁄’’𑀢𑀺 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀲𑁆𑀲 𑀦𑀺𑀬𑀫𑀯𑀘𑀦𑀁. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀏𑀢𑁆𑀣 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸. 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄 𑀲𑀫𑀽𑀳𑁄𑀢𑀺 𑀅𑀭𑀺𑀬𑀲𑀗𑁆𑀖𑁄. 𑀅𑀣 𑀯𑀸 𑀅𑀭𑀺𑀬𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑁄 𑀘 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄𑀢𑀺 𑀅𑀭𑀺𑀬𑀲𑀗𑁆𑀖𑁄, 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀦𑀫𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 ¶ 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 𑀆𑀳 ‘‘𑀇𑀘𑁆𑀘𑁂𑀯’’𑀫𑀺𑀘𑁆𑀘𑀸𑀤𑀺. 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀘𑁆𑀘𑀦𑁆𑀢𑀁 𑀏𑀓𑀦𑁆𑀢𑁂𑀦 𑀦𑀫𑀲𑁆𑀲𑀦𑁂𑀬𑁆𑀬𑀁 𑀦𑀫𑀲𑁆𑀲𑀺𑀢𑀩𑁆𑀩𑀁 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀫𑀸𑀦𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀯𑀦𑁆𑀤𑀫𑀸𑀦𑁄 𑀅𑀳𑀁 𑀯𑀺𑀧𑀼𑀮𑀁 𑀬𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀮𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀩𑀼𑀤𑁆𑀥𑀸𑀤𑀬𑁄 ¶ 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺.

‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀭𑀸𑀲𑀺𑀁 𑀧𑀼𑀜𑁆𑀜𑀧𑁆𑀧𑀯𑀢𑁆𑀢𑀁 𑀯𑀸’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀸𑀪𑀺𑀦𑀺𑀲𑀁𑀲’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀦𑀤𑀺𑀁, 𑀧𑀼𑀜𑁆𑀜𑀧𑁆𑀧𑀯𑀸𑀳𑀦𑁆𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀜𑁆𑀳𑀺 𑀧𑀼𑀜𑁆𑀜𑀁 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀲𑀸𑀭𑀢𑁆𑀣𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁦𑁨𑁭) 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 ‘𑀇𑀢𑀺𑀧𑀺 ¶ 𑀲𑁄 𑀪𑀕𑀯𑀸…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺, 𑀅𑀬𑀁 𑀧𑀞𑀫𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁨𑁭) 𑁋

𑀏𑀯𑀫𑀸𑀤𑀺𑀓𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸𑀢𑀺 𑀧𑀼𑀜𑁆𑀜𑀦𑀤𑀺𑀬𑁄 𑀓𑀼𑀲𑀮𑀦𑀤𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀨𑀮’’𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 ¶ . 𑀦 𑀳𑀺 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀫𑀸𑀦𑁄 𑀢𑀲𑁆𑀫𑀺𑀁 𑀔𑀡𑁂 𑀧𑀼𑀜𑁆𑀜𑀨𑀮𑀁 𑀅𑀮𑀢𑁆𑀣, 𑀓𑀺𑀦𑁆𑀢𑀼 𑀅𑀦𑀧𑁆𑀧𑀓𑀁 𑀧𑀼𑀜𑁆𑀜𑀭𑀸𑀲𑀺𑀁 𑀢𑀤𑀸 𑀅𑀮𑀪𑀺, 𑀢𑀲𑁆𑀲 𑀘 𑀨𑀮𑀁 𑀧𑀭𑀮𑁄𑀓𑀪𑀸𑀕𑀻, 𑀤𑀺𑀝𑁆𑀞𑀥𑀫𑁆𑀫𑁂 𑀢𑀼 𑀅𑀦𑁆𑀢𑀭𑀸𑀬𑀯𑀺𑀖𑀸𑀢𑁄 𑀢𑀲𑁆𑀲 𑀘 𑀧𑀼𑀜𑁆𑀜𑀲𑁆𑀲 𑀆𑀦𑀺𑀲𑀁𑀲𑀫𑀢𑁆𑀢𑀓𑀁, ‘‘𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀘 𑀧𑀼𑀜𑁆𑀜𑀨𑀮𑁂 𑀅𑀦𑀼𑀧𑁆𑀧𑀦𑁆𑀦𑁂 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑀪𑀸𑀯𑁄 𑀦 𑀲𑀺𑀚𑁆𑀛𑀢𑀺, 𑀦 𑀘𑁂𑀢𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀢𑀲𑁆𑀲 𑀫𑀳𑀢𑁄 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀆𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀅𑀣𑀸𑀧𑀺 𑀧𑀡𑀸𑀫𑀓𑀺𑀭𑀺𑀬𑀸𑀬 𑀚𑀦𑀺𑀢𑀢𑁆𑀢𑀸 𑀧𑀼𑀜𑁆𑀜𑀫𑁂𑀯 𑀧𑀼𑀜𑁆𑀜𑀨𑀮𑀦𑁆𑀢𑀺 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀲𑁄 𑀘 𑀧𑀼𑀜𑁆𑀜𑀧𑁆𑀧𑀯𑀸𑀳𑁄 𑀦 𑀅𑀧𑁆𑀧𑀫𑀢𑁆𑀢𑀓𑁄, 𑀅𑀣 𑀔𑁄 𑀫𑀳𑀦𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀼𑀮’’𑀦𑁆𑀢𑀺, 𑀫𑀳𑀦𑁆𑀢𑀁 𑀅𑀦𑀧𑁆𑀧𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑀢𑁆𑀣𑀦𑁆𑀢𑀺 𑀅𑀮𑀪𑀺𑀁, 𑀧𑀸𑀧𑀼𑀡𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀆𑀦𑀼𑀪𑀸𑀯𑁂𑀦 𑀩𑀮𑁂𑀦. 𑀳𑀢𑀦𑁆𑀢𑀭𑀸𑀬𑁄𑀢𑀺 𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀧𑀡𑀸𑀫𑀧𑀬𑁄𑀚𑀦𑁂 𑀯𑀼𑀢𑁆𑀢𑀯𑀺𑀥𑀺𑀦𑀸 𑀳𑀢𑁄 𑀯𑀺𑀤𑁆𑀥𑀲𑁆𑀢𑁄 𑀅𑀦𑁆𑀢𑀭𑀸𑀬𑁄 𑀉𑀧𑀤𑁆𑀤𑀯𑁄 𑀅𑀲𑁆𑀲𑀸𑀢𑀺 𑀳𑀢𑀦𑁆𑀢𑀭𑀸𑀬𑁄. 𑀅𑀲𑁆𑀲 ‘‘𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀳𑀢𑀦𑁆𑀢𑀭𑀸𑀬𑁄 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀳𑀦𑀦𑁂 𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺.

𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀢𑀸𑀯 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀫𑀽𑀮𑀧𑀢𑀺𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀫𑁆𑀧𑀺 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀞𑀺𑀢𑁂’’𑀢𑀺𑀆𑀤𑀺. 𑀅𑀝𑁆𑀞𑀺𑀢𑀲𑁆𑀲 𑀲𑀼𑀲𑀡𑁆𑀞𑀺𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀬𑀲𑁆𑀫𑀺𑀁 ¶ 𑀞𑀺𑀢𑁂 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀦𑀬𑀧𑀺𑀝𑀓𑁂. 𑀞𑀺𑀢𑁂𑀢𑀺 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀽𑀦𑀁 𑀳𑀼𑀢𑁆𑀯𑀸 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀦𑁆𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀸𑀲𑀦𑀁. 𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑁂 𑀅𑀦𑁆𑀢𑀤𑁆𑀯𑀬𑁂 𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 (𑀲𑀁. 𑀦𑀺. 𑁧.𑁧) 𑀳𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘𑀢𑁆𑀣𑁄 𑀢𑀻𑀲𑀼𑀧𑀺 𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑁄𑀬𑁂𑀯. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀧𑀺 𑀪𑀕𑀯𑀢𑁄’’𑀢𑀺 𑀯𑀼𑀢𑁆𑀢𑀁.

𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀢𑁂𑀲𑀼𑀬𑁂𑀯 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺. 𑀲𑀼𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀸𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀫𑀦𑀯𑀲𑁂𑀦 ¶ 𑀲𑀼𑀲𑀡𑁆𑀞𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀦 𑀅𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀬𑀣𑀸𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀭𑀽𑀧𑀓𑀸𑀬𑁂𑀦 𑀲𑀼𑀲𑀡𑁆𑀞𑀺𑀢𑁄, 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑀢𑁆𑀢𑀸 𑀢𑀸𑀤𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀦𑀸𑀫𑀓𑀸𑀬𑁂𑀦𑀧𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀲𑀢𑁆𑀢𑁂𑀲𑀼 𑀲𑀼𑀝𑁆𑀞𑀼 𑀲𑀫𑁆𑀫𑀸 𑀘 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁂𑀦 𑀯𑀸 𑀲𑀼𑀲𑀡𑁆𑀞𑀺𑀢𑀲𑁆𑀲. 𑀲𑀼𑀲𑀡𑁆𑀞𑀺𑀢𑀢𑁆𑀢𑀸 𑀳𑁂𑀲 𑀓𑁂𑀯𑀮𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀅𑀧𑀦𑁂𑀢𑀼𑀓𑀸𑀫𑁄 𑀳𑀺𑀢𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀫𑀼𑀤𑀺𑀢𑁄 𑀅𑀧𑀓𑁆𑀔𑀧𑀢𑀺𑀢𑁄 𑀘 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀲𑀸𑀭𑀼𑀧𑁆𑀧𑀸𑀬 𑀣𑀼𑀢𑀺𑀬𑀸 𑀣𑁄𑀫𑁂𑀦𑁆𑀢𑁄 𑀆𑀳 ‘𑀲𑀼𑀲𑀡𑁆𑀞𑀺𑀢𑀲𑁆𑀲𑀸’’’𑀢𑀺 𑀯𑀢𑁆𑀯𑀸 ‘‘𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑀸𑀥𑀺𑀓𑀸𑀭𑀸𑀦𑀼𑀭𑀽𑀧𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀬𑀣𑀸𑀯𑀼𑀢𑁆𑀢𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀤𑀺𑀅𑀦𑁆𑀢𑀤𑁆𑀯𑀬𑁂 𑀅𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀲𑀫𑁆𑀫𑀸 𑀞𑀺𑀢𑀢𑁆𑀢𑀸 𑀲𑀼𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸 𑀓𑀢𑀸 𑀳𑁄𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑁆𑀢𑀤𑁆𑀯𑀬𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀬𑁂𑀯 𑀬𑁂𑀪𑀼𑀬𑁆𑀬𑁂𑀦 𑀧𑀓𑀸𑀲𑀦𑀢𑁄.

𑀢𑀦𑁆𑀢𑀺 𑀧𑀼𑀩𑁆𑀩𑁂 ‘‘𑀬𑀲𑁆𑀫𑀺’’𑀦𑁆𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀦𑀺𑀬𑀫𑀯𑀘𑀦𑀁, 𑀢𑀲𑁆𑀲 ‘‘𑀯𑀺𑀦𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀅𑀦𑀸𑀓𑀼𑀮𑀁 𑀓𑀢𑁆𑀯𑀸 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀲𑁆𑀲 𑀓𑀸𑀮𑀫𑀢𑁆𑀢𑀲𑁆𑀲𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂𑀦𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀓𑁂𑀯𑀮𑀁 𑀩𑀼𑀤𑁆𑀥𑀯𑀺𑀲𑀬𑀁 𑀯𑀺𑀦𑀬𑀧𑀺𑀝𑀓𑀁 𑀅𑀢𑁆𑀢𑀦𑁄 ¶ 𑀩𑀮𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀜𑁆𑀜𑁂𑀳𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 ‘‘𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯’’𑀦𑁆𑀢𑀺 𑀆𑀳. 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑁄 𑀦𑀸𑀫 𑀅𑀢𑁆𑀣𑀢𑁄 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑀸 𑀅𑀝𑁆𑀞𑀓𑀣𑀸, 𑀢𑀢𑁄𑀬𑁂𑀯 𑀘 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑁄 𑀅𑀝𑁆𑀞𑀓𑀣𑀸’’𑀢𑀺 𑀲𑀩𑁆𑀩𑀢𑁆𑀣 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑀁 𑀅𑀝𑁆𑀞𑀓𑀣𑀁 𑀦𑀺𑀲𑁆𑀲𑀸𑀬 𑀯𑀡𑁆𑀡𑀬𑀺𑀲𑁆𑀲𑀁, 𑀦 𑀅𑀢𑁆𑀢𑀦𑁄𑀬𑁂𑀯 𑀩𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 ‘‘𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼 𑀧𑀼𑀦 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀓𑀺𑀁 𑀧𑀬𑁄𑀚𑀦’’𑀦𑁆𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀲𑁆𑀲 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀅𑀦𑀽𑀦𑀪𑀸𑀯𑀁 𑀅𑀢𑁆𑀢𑀦𑁄 𑀘 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀦𑁆𑀢𑀺 𑀏𑀓𑀦𑁆𑀢𑁂𑀦, 𑀬𑀣𑀺𑀘𑁆𑀙𑀓𑀁 𑀯𑀸, 𑀲𑀩𑁆𑀩𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 ‘‘𑀲𑀁𑀯𑀡𑁆𑀡𑀺𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀁 𑀲𑀁𑀯𑀡𑁆𑀡𑀺𑀢𑁄𑀬𑁂𑀯, 𑀦𑁄 𑀦 𑀲𑀁𑀯𑀡𑁆𑀡𑀺𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀳𑀺 𑀧𑀦 𑀲𑁄 𑀯𑀺𑀦𑀬𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻’’𑀢𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀬𑁄 𑀧𑀼𑀩𑁆𑀩𑀸𑀘𑀭𑀺𑀬𑀸 𑀏𑀯 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀢𑁆𑀢𑀫𑀝𑁆𑀞𑁂𑀦 𑀘 𑀆𑀲𑀪𑀸, 𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀸 𑀧𑀦𑁂𑀢𑁂 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀆𑀳 ‘‘𑀜𑀸𑀡𑀫𑁆𑀩𑀽’’𑀢𑀺𑀆𑀤𑀺. 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀦 𑀅𑀫𑁆𑀩𑀼𑀦𑀸 ¶ 𑀲𑀮𑀺𑀮𑁂𑀦 𑀦𑀺𑀤𑁆𑀥𑁄𑀢𑀸𑀦𑀺 𑀦𑀺𑀲𑁆𑀲𑁂𑀲𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀥𑁄𑀢𑀸𑀦𑀺 𑀯𑀺𑀓𑁆𑀔𑀸𑀮𑀺𑀢𑀸𑀦𑀺 𑀯𑀺𑀲𑁄𑀥𑀺𑀢𑀸𑀦𑀺 𑀭𑀸𑀕𑀸𑀤𑀻𑀦𑀺 𑀢𑀻𑀡𑀺 𑀫𑀮𑀸𑀦𑀺 𑀓𑀸𑀫𑀸𑀲𑀯𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀬𑁂𑀳𑀺 𑀢𑁂 𑀜𑀸𑀡𑀫𑁆𑀩𑀼𑀦𑀺𑀤𑁆𑀥𑀸𑀢𑀫𑀮𑀸𑀲𑀯𑀸, 𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘 𑀦 𑀓𑁂𑀯𑀮𑀁 𑀏𑀢𑁂𑀲𑀼 𑀆𑀘𑀭𑀺𑀬𑀪𑀸𑀯𑁄𑀬𑁂𑀯, 𑀅𑀣 𑀔𑁄 𑀭𑀸𑀕𑀸𑀤𑀺𑀫𑀮𑀭𑀳𑀺𑀢𑀸 𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀲𑀢𑁆𑀢𑀸 𑀏𑀢𑁂𑀢𑀺 𑀤𑀲𑁆𑀲𑁂𑀢𑀺.

𑀔𑀻𑀡𑀸𑀲𑀯𑀪𑀸𑀯𑁂𑀧𑀺 𑀦 𑀏𑀢𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸, 𑀅𑀣 𑀔𑁄 𑀏𑀯𑀭𑀽𑀧𑁂𑀳𑀺𑀧𑀺 𑀆𑀦𑀼𑀪𑀸𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑁂𑀳𑀻’’𑀢𑀺. 𑀯𑀺𑀲𑀼𑀤𑁆𑀥𑀸 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑀸 𑀯𑀺𑀚𑁆𑀚𑀸 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀬𑁂𑀲𑀁 𑀢𑁂 𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑀸, 𑀢𑁂𑀳𑀺. 𑀏𑀓𑀤𑁂𑀲𑁂𑀦 𑀧𑀝𑀺𑀲𑀫𑁆𑀪𑀺𑀤𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀭𑀺𑀬𑀸𑀦𑀫𑁂𑀯 𑀅𑀪𑀸𑀯𑀢𑁄 𑀏𑀢𑁂𑀳𑀺 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀼𑀢𑀭𑀮𑀤𑁆𑀥𑀧𑁆𑀧𑀪𑁂𑀤𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀤𑁆𑀥𑀕𑁆𑀕𑀳𑀡𑀁 𑀓𑀢𑀁. 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀸. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀜𑁆𑀘𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀅𑀝𑁆𑀞 𑀯𑀺𑀚𑁆𑀚𑀸 𑀧𑀦 𑁋

‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀺 ¶ ,

𑀇𑀤𑁆𑀥𑀺𑀧𑁆𑀧𑀪𑁂𑀤𑁄𑀧𑀺 𑀘 𑀤𑀺𑀩𑁆𑀩𑀲𑁄𑀢𑀁;

𑀧𑀭𑀲𑁆𑀲 𑀘𑁂𑀢𑁄𑀧𑀭𑀺𑀬𑀸𑀬𑀜𑀸𑀡𑀁,

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀕𑀢𑀜𑁆𑀘 𑀜𑀸𑀡𑀁;

𑀤𑀺𑀩𑁆𑀩𑀜𑁆𑀘 𑀘𑀓𑁆𑀔𑀸𑀲𑀯𑀲𑀗𑁆𑀔𑀬𑁄 𑀘,

𑀏𑀢𑀸𑀦𑀺 𑀜𑀸𑀡𑀸𑀦𑀺 𑀇𑀥𑀝𑁆𑀞 𑀯𑀺𑀚𑁆𑀚𑀸’’𑀢𑀺. 𑁋

𑀏𑀯𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀕𑁆𑀕𑀳𑀺𑀢𑀸 𑀙 𑀅𑀪𑀺𑀜𑁆𑀜𑀸𑀬𑁂𑀯. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀳𑁂𑀢𑀼𑀨𑀮𑀸𑀦𑀼𑀭𑀽𑀧𑀁 𑀯𑁄𑀳𑀸𑀭𑁂𑀲𑀼 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀇𑀤𑀁 𑀜𑀸𑀡𑀁 𑀇𑀫𑀫𑀢𑁆𑀣𑀁 𑀚𑁄𑀢𑀬𑀢𑀻𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀧𑀯𑀢𑁆𑀢𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀏𑀢𑀸𑀲𑀁 𑀧𑀦 𑀯𑀺𑀢𑁆𑀣𑀸𑀭𑀓𑀣𑀸 𑀅𑀢𑀺𑀧𑀧𑀜𑁆𑀘𑀪𑀸𑀯𑀢𑁄 𑀇𑀥 𑀦 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀲𑀤𑁆𑀥𑀫𑁆𑀫𑁂𑀲𑀼 𑀙𑁂𑀓𑀪𑀸𑀯𑀢𑁄 𑀆𑀳 ‘‘𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀻’’𑀢𑀺. ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀥𑀫𑁆𑀫𑁂𑀲𑀼 𑀅𑀪𑀺𑀬𑁄𑀕𑀯𑀲𑁂𑀦 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀮𑀤𑁆𑀥𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀲𑀸𑀢𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀻𑀢𑀺 𑀧𑀺𑀝𑀓𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲 𑀲𑀁𑀯𑀡𑁆𑀡𑀦𑁂 𑀲𑀩𑁆𑀩𑀲𑁄 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀓𑁄𑀯𑀺𑀤𑁂𑀳𑀺 𑀙𑁂𑀓𑁂𑀳𑀺, 𑀓𑀼𑀲𑀮𑁂𑀳𑀻𑀢𑀺 𑀅𑀢𑁆𑀣𑁄.

𑀓𑀺𑀮𑁂𑀲𑀚𑀸𑀮𑀁 ¶ 𑀧𑀭𑀺𑀓𑁆𑀔𑀸𑀭𑀩𑀸𑀳𑀼𑀮𑁆𑀮𑀁 𑀯𑀸 𑀲𑀁𑀮𑀺𑀔𑀢𑀺 𑀢𑀦𑀼𑀁 𑀓𑀭𑁄𑀢𑀻𑀢𑀺 𑀲𑀮𑁆𑀮𑁂𑀔𑁄. 𑀇𑀥 𑀧𑀦 𑀔𑀻𑀡𑀸𑀲𑀯𑀸𑀥𑀺𑀓𑀸𑀭𑀢𑁆𑀢𑀸 𑀧𑀭𑀺𑀓𑁆𑀔𑀸𑀭𑀩𑀸𑀳𑀼𑀮𑁆𑀮𑀲𑁆𑀲 𑀲𑀮𑁆𑀮𑀺𑀔𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀢𑀢𑁄𑀬𑁂𑀯 𑀘 𑀕𑀡𑁆𑀞𑀺𑀧𑀤𑁂 ‘‘𑀲𑀮𑁆𑀮𑁂𑀔𑀺𑀬𑁂 𑀧𑀭𑀺𑀫𑀺𑀢𑀧𑀭𑀺𑀓𑁆𑀔𑀸𑀭𑀯𑀼𑀢𑁆𑀢𑀺𑀬𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀮𑁆𑀮𑁂𑀔𑀲𑁆𑀲 𑀪𑀸𑀯𑁄 𑀲𑀮𑁆𑀮𑁂𑀔𑀺𑀬𑀁, 𑀢𑀲𑁆𑀫𑀺𑀁 𑀲𑀮𑁆𑀮𑁂𑀔𑀺𑀬𑁂, 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄𑀲𑀼𑀮𑀪𑀽𑀧𑀫𑁂𑀳𑀻𑀢𑀺 𑀅𑀲𑀼𑀮𑀪𑀽𑀧𑀫𑁂𑀳𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀼𑀓𑀲𑀤𑀺𑀲𑀸𑀢𑀺 𑀢𑁂𑀲𑀁 𑀉𑀧𑀫𑀸𑀬 𑀅𑀦𑀼𑀘𑁆𑀙𑀯𑀺𑀓𑀧𑀼𑀕𑁆𑀕𑀮𑀸𑀦𑀁 𑀤𑀼𑀮𑁆𑀮𑀪𑀢𑁆𑀢𑀸 𑀦𑀢𑁆𑀣𑀺 𑀲𑀼𑀮𑀪𑀸 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀦𑁄𑀲𑀼𑀮𑀪𑀽𑀧𑀫𑀸. 𑀫𑀳𑀸𑀯𑀺𑀳𑀸𑀭𑀲𑁆𑀲𑀸𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑀅𑀪𑀬𑀕𑀺𑀭𑀺𑀲𑁂𑀲𑀦𑀺𑀓𑀸𑀬𑀤𑁆𑀯𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀥𑀚𑀽𑀧𑀫𑁂𑀳𑀻𑀢𑀺 𑀭𑀣𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀓𑀁 𑀭𑀣𑁂 𑀩𑀤𑁆𑀥𑀥𑀚𑀁 𑀯𑀺𑀬 𑀅𑀚𑀸𑀦𑀦𑁆𑀢𑀸𑀦𑀁 ‘‘𑀅𑀲𑀼𑀓𑁂𑀳𑀺 𑀘 𑀅𑀲𑀼𑀓𑁂𑀳𑀺 𑀘 𑀣𑁂𑀭𑁂𑀳𑀺 𑀦𑀺𑀯𑀸𑀲𑀺𑀢𑁄 ¶ 𑀫𑀳𑀸𑀯𑀺𑀳𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀫𑀳𑀸𑀯𑀺𑀳𑀸𑀭𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁆𑀢𑀸 𑀫𑀳𑀸𑀯𑀺𑀳𑀸𑀭𑀲𑁆𑀲 𑀥𑀚𑀽𑀧𑀫𑁂𑀳𑀺. 𑀲𑀁𑀯𑀡𑁆𑀡𑀺𑀢𑁄𑀢𑀺 𑀲𑀫𑁆𑀫𑀸 𑀅𑀦𑀽𑀦𑀁 𑀓𑀢𑁆𑀯𑀸 𑀯𑀡𑁆𑀡𑀺𑀢𑁄. 𑀲𑀁𑀯𑀡𑁆𑀡𑀺𑀢𑁄 𑀅𑀬𑀁 𑀯𑀺𑀦𑀬𑁄𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀘𑀺𑀢𑁆𑀢𑁂𑀳𑀺 𑀦𑀬𑁂𑀳𑀻𑀢𑀺 𑀅𑀦𑁂𑀓𑀧𑁆𑀧𑀪𑁂𑀤𑀦𑀬𑀢𑁆𑀢𑀸 𑀯𑀺𑀘𑀺𑀢𑁆𑀢𑁂𑀳𑀺 𑀦𑀬𑁂𑀳𑀺. 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑁂𑀳𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀯𑀭𑀁 𑀅𑀦𑀼𑀕𑀢𑁂𑀳𑀺, 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀕𑀢𑁂𑀳𑀺 𑀦𑀬𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀩𑀼𑀤𑁆𑀥𑀯𑀭𑀁 𑀅𑀦𑀼𑀕𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄.

𑀏𑀯𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀅𑀦𑀽𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀯𑀡𑁆𑀡𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀺𑀲𑀺𑀝𑁆𑀞𑁂𑀳𑀺 𑀅𑀬𑀁 𑀯𑀺𑀦𑀬𑁄 𑀲𑀩𑁆𑀩𑀲𑁄 𑀯𑀡𑁆𑀡𑀺𑀢𑁄, 𑀢𑀣𑀸𑀧𑀺 𑀢𑁂𑀲𑀁 𑀏𑀲𑀸 𑀲𑀁𑀯𑀡𑁆𑀡𑀦𑀸 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀪𑀸𑀲𑀸𑀬 𑀲𑀗𑁆𑀔𑀢𑀢𑁆𑀢𑀸 𑀭𑀘𑀺𑀢𑀢𑁆𑀢𑀸 𑀤𑀻𑀧𑀦𑁆𑀢𑀭𑁂 𑀪𑀺𑀓𑁆𑀔𑀼𑀚𑀦𑀲𑁆𑀲 𑀲𑀻𑀳𑀴𑀤𑀻𑀧𑀢𑁄 𑀅𑀜𑁆𑀜𑀤𑀻𑀧𑀯𑀸𑀲𑀺𑀦𑁄 𑀪𑀺𑀓𑁆𑀔𑀼𑀕𑀡𑀲𑁆𑀲 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀬𑀲𑁆𑀫𑀸 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀺 𑀦 𑀲𑀫𑁆𑀧𑀸𑀤𑁂𑀢𑀺 𑀦 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀇𑀫𑀁 𑀲𑀁𑀯𑀡𑁆𑀡𑀦𑀁 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀺𑀭𑀺𑀢𑁆𑀣𑁂𑀭𑁂𑀦 𑀅𑀚𑁆𑀛𑀺𑀝𑁆𑀞𑁄 𑀇𑀤𑀸𑀦𑀺 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀲𑀁𑀯𑀡𑁆𑀡𑀺𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀲𑀁𑀯𑀡𑁆𑀡𑀦𑀸, 𑀅𑀝𑁆𑀞𑀓𑀣𑀸. 𑀲𑀸 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦𑁂𑀯 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀢𑁆𑀢𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁄𑀬𑁂𑀯 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀽𑀢𑁄 𑀓𑀣𑀸𑀫𑀕𑁆𑀕𑁄. 𑀲𑁄𑀬𑁂𑀯 𑀘 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀪𑀢𑁄, 𑀧𑀘𑁆𑀙𑀸 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑁄. 𑀢𑁂𑀦𑀸𑀳 ‘‘𑀲𑀻𑀳𑀴𑀤𑀻𑀧𑀓𑁂𑀦𑀸’’𑀢𑀺𑀆𑀤𑀺. 𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄. 𑀢𑀁𑀯𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸𑀦𑀁 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲𑀧𑀺 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀺𑀁 𑀲𑀻𑀳𑀴𑀤𑀻𑀧𑁂 𑀪𑀽𑀢𑀢𑁆𑀢𑀸 𑀲𑀻𑀳𑀴𑀤𑀻𑀧𑀓𑁂𑀦 𑀯𑀸𑀓𑁆𑀬𑁂𑀦 𑀯𑀘𑀦𑁂𑀦, 𑀲𑀻𑀳𑀴𑀪𑀸𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀦𑁆𑀢𑀺 𑀧𑀸𑀴𑀺𑀦𑀬𑀲𑁆𑀲 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸, 𑀫𑀸𑀕𑀥𑀪𑀸𑀲𑀸𑀬 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀅𑀚𑁆𑀛𑁂𑀲𑀦𑀦𑁆𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀭𑀼𑀢𑀭𑀁 𑀧𑀬𑁄𑀚𑀦𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀅𑀚𑁆𑀛𑁂𑀲𑀦𑀸, 𑀢𑀁 𑀅𑀚𑁆𑀛𑁂𑀲𑀦𑀁, 𑀆𑀬𑀸𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲 ‘‘𑀲𑀫𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀅𑀚𑁆𑀛𑁂𑀲𑀦𑀦𑁆𑀢𑀺 ¶ 𑀆𑀳 ‘‘𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀲𑁆𑀲 𑀣𑁂𑀭𑀲𑁆𑀲𑀸’’𑀢𑀺. 𑀩𑀼𑀤𑁆𑀥𑀲𑀺𑀭𑀻𑀢𑀺 𑀅𑀯𑁆𑀳𑀬𑁄 𑀦𑀸𑀫𑀁 𑀬𑀲𑁆𑀲 𑀲𑁄𑀬𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑁄, 𑀢𑀲𑁆𑀲, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀣𑁂𑀭𑀲𑁆𑀲 𑀅𑀚𑁆𑀛𑁂𑀲𑀦𑀁 𑀲𑀫𑁆𑀫𑀸 𑀆𑀤𑀭𑁂𑀦 𑀲𑀫𑀦𑀼𑀲𑁆𑀲𑀭𑀦𑁆𑀢𑁄 𑀳𑀤𑀬𑁂 𑀞𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀁𑀯𑀡𑁆𑀡𑀦𑀁 𑀢𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀜𑁆𑀘 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀲𑀁𑀯𑀡𑁆𑀡𑀦𑀁 𑀲𑀫𑀸𑀭𑀪𑀦𑁆𑀢𑁄 𑀲𑀓𑀮𑀸𑀬𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀇𑀥 𑀕𑀳𑁂𑀢𑀩𑁆𑀩𑀢𑁄 𑀫𑀳𑀸𑀅𑀝𑁆𑀞𑀓𑀣𑀁 𑀢𑀲𑁆𑀲𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀬 𑀲𑀁𑀯𑀡𑁆𑀡𑀦𑀸𑀬 𑀲𑀭𑀻𑀭𑀁 𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀣𑁂𑀯 𑀓𑀼𑀭𑀼𑀦𑁆𑀤𑀻𑀦𑀸𑀫𑀸𑀤𑀻𑀲𑀼 𑀯𑀺𑀲𑁆𑀲𑀼𑀢𑀸𑀲𑀼 𑀅𑀝𑁆𑀞𑀓𑀣𑀸𑀲𑀼 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀢𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄 𑀅𑀦𑁆𑀢𑁄𑀕𑀥𑀢𑁆𑀣𑁂𑀭𑀯𑀸𑀤𑀁 𑀓𑀢𑁆𑀯𑀸 𑀲𑀁𑀯𑀡𑁆𑀡𑀦𑀁 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀢𑁆𑀣𑁄 𑀓𑀣𑀺𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸𑀬𑁂𑀯 𑀅𑀝𑁆𑀞𑀓𑀣𑀸 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁭; 𑁨.𑁮) 𑀯𑀺𑀬. 𑀫𑀳𑀸𑀧𑀘𑁆𑀘𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀭𑀻𑀢𑀺 𑀉𑀴𑀼𑀫𑁆𑀧𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀢𑁆𑀢𑀸 𑀢𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀓𑀼𑀭𑀼𑀦𑁆𑀤𑀺𑀯𑀮𑁆𑀮𑀺𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀓𑀢𑀢𑁆𑀢𑀸 𑀓𑀼𑀭𑀼𑀦𑁆𑀤𑀻𑀢𑀺 𑀦𑀸𑀫𑀁 𑀚𑀸𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀅𑀦𑁆𑀥𑀓𑀝𑁆𑀞𑀓𑀣𑀁 𑀲𑀗𑁆𑀔𑁂𑀧𑀝𑁆𑀞𑀓𑀣𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀲𑁆𑀲𑀼𑀢𑀸𑀲𑀽𑀢𑀺 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀸𑀲𑀼, 𑀧𑀸𑀓𑀝𑀸𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀼𑀢𑁆𑀢𑀫𑀢𑁆𑀣𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 𑀇𑀤𑀁 𑀯𑀼𑀢𑁆𑀢𑀁 ‘‘𑀬𑀼𑀢𑁆𑀢𑀫𑀢𑁆𑀣𑀦𑁆𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀝𑁆𑀞𑀸𑀦𑀲𑁆𑀲 𑀬𑀼𑀢𑁆𑀢𑀫𑀢𑁆𑀣𑀁, 𑀦 𑀧𑀦 𑀢𑀢𑁆𑀣 𑀅𑀬𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦𑁂𑀢𑁆𑀣 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁂𑀦 𑀯𑀺𑀦𑀬𑀬𑀼𑀢𑁆𑀢𑀺𑀬𑀸 𑀯𑀸 𑀬𑀼𑀢𑁆𑀢𑀫𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼𑀧𑀺 𑀓𑀢𑁆𑀣𑀘𑀺 𑀅𑀬𑀼𑀢𑁆𑀢𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀉𑀧𑀭𑀺 𑀯𑀺𑀪𑀸𑀯𑀦𑀢𑁄. ‘‘𑀅𑀝𑁆𑀞𑀓𑀣𑀁𑀬𑁂𑀯 𑀕𑀳𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀣𑁂𑀭𑀯𑀸𑀤𑀸𑀦𑀁 𑀩𑀸𑀳𑀺𑀭𑀪𑀸𑀯𑁄 𑀲𑀺𑀬𑀸𑀢𑀺 𑀢𑁂𑀧𑀺 𑀅𑀦𑁆𑀢𑁄𑀓𑀢𑁆𑀢𑀼𑀓𑀸𑀫𑁄 ‘‘𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤’’𑀦𑁆𑀢𑀺 𑀆𑀳, 𑀣𑁂𑀭𑀯𑀸𑀤𑁂𑀧𑀺 𑀅𑀦𑁆𑀢𑁄𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀡𑁆𑀡𑀦𑀦𑁆𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀢𑀼 ‘‘𑀲𑀁𑀯𑀡𑁆𑀡𑀦’’𑀦𑁆𑀢𑀺 𑀯𑀘𑀦𑀁 𑀢𑀢𑁆𑀣𑁂𑀯 ‘‘𑀲𑀫𑀸𑀭𑀪𑀦𑁆𑀢𑁄’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀪𑀸𑀯𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀢𑀽𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀫𑁂’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀢𑀁 𑀫𑀫 𑀲𑀁𑀯𑀡𑁆𑀡𑀦𑀁 𑀥𑀫𑁆𑀫𑀧𑀤𑀻𑀧𑀲𑁆𑀲 𑀢𑀣𑀸𑀕𑀢𑀲𑁆𑀲 ¶ 𑀥𑀫𑁆𑀫𑀁 𑀲𑀸𑀲𑀦𑀥𑀫𑁆𑀫𑀁 𑀧𑀸𑀴𑀺𑀥𑀫𑁆𑀫𑀁 𑀯𑀸 𑀲𑀓𑁆𑀓𑀘𑁆𑀘𑀁 𑀧𑀝𑀺𑀫𑀸𑀦𑀬𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸, 𑀅𑀘𑀺𑀭𑀧𑀩𑁆𑀩𑀚𑀺𑀢𑀢𑁆𑀢𑀸 𑀦𑀯𑀸, 𑀢𑁂𑀲𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑀸 𑀘 𑀪𑀺𑀓𑁆𑀔𑀽 𑀧𑀲𑀦𑁆𑀦𑀘𑀺𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀧𑁆𑀧𑀬𑁄𑀚𑀦𑀢𑁆𑀢𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀯𑀺𑀥𑀺𑀦𑀸 𑀧𑀫𑀸𑀡𑀢𑁆𑀢𑀸 𑀘 𑀲𑀤𑁆𑀤𑀳𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀘𑀺𑀢𑁆𑀢𑀸 𑀇𑀲𑁆𑀲𑀸𑀧𑀓𑀢𑀸 𑀅𑀳𑀼𑀢𑁆𑀯𑀸 𑀦𑀺𑀲𑀸𑀫𑁂𑀦𑁆𑀢𑀼 𑀲𑀼𑀡𑀦𑁆𑀢𑀽𑀢𑀺. 𑀢𑀢𑁆𑀣 𑀥𑀫𑁆𑀫𑀧𑁆𑀧𑀤𑀻𑀧𑀲𑁆𑀲𑀸𑀢𑀺 𑀥𑀫𑁆𑀫𑁄𑀬𑁂𑀯 𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀧𑀤𑀻𑀧𑀲𑀤𑀺𑀲𑀢𑁆𑀢𑀸 𑀧𑀤𑀻𑀧𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀧𑀤𑀻𑀧𑁄, 𑀪𑀕𑀯𑀸. 𑀢𑀲𑁆𑀲 𑀥𑀫𑁆𑀫𑀧𑀤𑀻𑀧𑀲𑁆𑀲.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀫𑀸𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑁂𑀯 𑀩𑀼𑀤𑁆𑀥𑁂𑀦 𑀬𑁄 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄, 𑀲𑁄 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀬𑁂𑀳𑀺 𑀧𑀼𑀢𑁆𑀢𑁂𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀳𑀺 𑀢𑀣𑁂𑀯 𑀜𑀸𑀢𑁄, 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸 𑀲𑀻𑀳𑀴𑀝𑁆𑀞𑀓𑀣𑀸𑀘𑀭𑀺𑀬𑀸 𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀽𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀯𑀺𑀦𑀬𑁄𑀢𑀺 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀏𑀢𑁆𑀢𑀸𑀯𑀢𑀸 𑀘 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀲𑀓𑀮𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀯𑀼𑀢𑁆𑀢𑁄𑀢𑀺 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑀦𑀸𑀫 𑀢𑀦𑁆𑀢𑀺𑀧𑀤𑀁 𑀅𑀢𑁆𑀣𑀺, 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄𑀧𑀺 𑀪𑀸𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀸 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀬𑁂𑀯 𑀳𑀺 𑀅𑀝𑁆𑀞𑀓𑀣𑀸. 𑀢𑀣𑁂𑀯 𑀜𑀸𑀢𑁄𑀢𑀺 𑀬𑀣𑁂𑀯 𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑁄, 𑀢𑀣𑁂𑀯 𑀏𑀓𑀧𑀤𑀫𑁆𑀧𑀺 𑀏𑀓𑀓𑁆𑀔𑀭𑀫𑁆𑀧𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀜𑁆𑀘 𑀅𑀯𑀺𑀓𑁄𑀧𑁂𑀢𑁆𑀯𑀸 𑀜𑀸𑀢𑁄 𑀯𑀺𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸𑀢𑀺 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑀸. 𑀅𑀝𑁆𑀞𑀓𑀣𑀸 𑀅𑀓𑀁𑀲𑀽𑀢𑀺 𑀅𑀝𑁆𑀞𑀓𑀣𑀸𑀬𑁄 𑀅𑀓𑀁𑀲𑀼. 𑀓𑀢𑁆𑀣𑀘𑀺 ‘‘𑀅𑀝𑁆𑀞𑀓𑀣𑀸𑀫𑀓𑀁𑀲𑀽’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀢𑁆𑀣𑀸𑀧𑀺 𑀲𑁄𑀬𑁂𑀯𑀢𑁆𑀣𑁄, 𑀫-𑀓𑀸𑀭𑁄 𑀧𑀦 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀝𑁆𑀞𑀓𑀣𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀳𑁂𑀢𑀼𑀅𑀢𑁆𑀣𑀲𑁆𑀲 ¶ ‘‘𑀢𑀲𑁆𑀫𑀸’’𑀢𑀺 𑀇𑀫𑀺𑀦𑀸𑀬𑁂𑀯 𑀧𑀓𑀸𑀲𑀺𑀢𑀢𑁆𑀢𑀸. 𑀬𑀤𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀧𑀫𑀸𑀡𑀁, 𑀏𑀯𑀁 𑀲𑀢𑀺 𑀢𑀢𑁆𑀣 𑀧𑀫𑀸𑀤𑀮𑁂𑀔𑀸𑀧𑀺 𑀧𑀫𑀸𑀡𑀁 𑀲𑀺𑀬𑀸𑀢𑀺 𑀆𑀳 ‘‘𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔’’𑀦𑁆𑀢𑀺. 𑀢𑀢𑁆𑀣 𑀧𑀫𑀸𑀤𑀮𑁂𑀔𑀦𑁆𑀢𑀺 𑀅𑀧𑀭𑀪𑀸𑀕𑁂 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀓𑀸𑀮𑁂 𑀧𑀫𑀚𑁆𑀚𑀺𑀢𑁆𑀯𑀸 𑀮𑀺𑀔𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀫𑀸𑀤𑀧𑀸𑀞𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀫𑀸𑀤𑁂𑀦 𑀲𑀢𑀺𑀁 𑀅𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 ‘‘𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑀤𑀺𑀲𑀁 𑀬𑀁 𑀮𑀺𑀔𑀺𑀢𑀁, 𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀲𑀩𑁆𑀩𑀁 𑀧𑀫𑀸𑀡𑀦𑁆𑀢𑀺. 𑀯𑀓𑁆𑀔𑀢𑀺 𑀳𑀺 𑀢𑀢𑁆𑀣 𑁋

‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ¶ 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁 𑀦𑀸𑀫 𑀅𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪).

𑀓𑁂𑀲𑀁 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁 𑀇𑀥 𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀧𑀼𑀦 ‘‘𑀬𑀲𑁆𑀫𑀸’’𑀢𑀺 𑀯𑀘𑀦𑀲𑁆𑀲 𑀓𑁄 𑀲𑀫𑁆𑀩𑀦𑁆𑀥𑁄𑀢𑀺 𑀘𑁂? 𑀏𑀢𑁆𑀣 𑀢𑀸𑀯 𑀫𑀳𑀸𑀕𑀡𑁆𑀞𑀺𑀧𑀤𑁂 𑀕𑀡𑁆𑀞𑀺𑀧𑀤𑁂 𑀘 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 𑀇𑀤𑀁 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀧𑀫𑀸𑀡𑀁, 𑀢𑀲𑁆𑀫𑀸 𑀦𑀺𑀲𑀸𑀫𑁂𑀦𑁆𑀢𑀼 𑀧𑀲𑀦𑁆𑀦𑀘𑀺𑀢𑁆𑀢𑀸’’𑀢𑀺. 𑀏𑀯𑀫𑀲𑁆𑀲 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀫𑁆𑀧𑀺 𑀧𑀫𑀸𑀡𑀫𑁂𑀯𑀸𑀢𑀺 𑀧𑀸𑀞𑀲𑁂𑀲𑀁 𑀓𑀢𑁆𑀯𑀸 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄 𑀯𑀤𑀢𑀺. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀢𑁆𑀣 ‘‘𑀬𑀲𑁆𑀫𑀸’’𑀢𑀺 𑀯𑀘𑀦𑀲𑁆𑀲 𑀧𑀞𑀫𑀁 𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀧𑀫𑀸𑀡𑀦𑁆𑀢𑀺 𑀲𑀸𑀥𑀺𑀢𑀢𑁆𑀢𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 𑀲𑀁𑀯𑀡𑁆𑀡𑀦𑀸 𑀓𑁂𑀯𑀮𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀪𑀺𑀦𑁆𑀦𑀸, 𑀅𑀢𑁆𑀣𑀢𑁄 𑀧𑀦 𑀅𑀝𑁆𑀞𑀓𑀣𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀙𑀸 𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀦 𑀇𑀥 𑀯𑀼𑀢𑁆𑀢𑀫𑁆𑀧𑀺 𑀓𑀲𑁆𑀫𑀸 𑀧𑀫𑀸𑀡𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀯𑀘𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀏𑀲𑀸𑀧𑀺 𑀅𑀝𑁆𑀞𑀓𑀣𑀸𑀬𑁂𑀯, 𑀢𑀲𑁆𑀫𑀸 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀫𑀸𑀓𑀼𑀮𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀜𑁆𑀘 𑀓𑀢𑁆𑀯𑀸 𑀕𑀡𑁆𑀞𑀺𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀅𑀦𑀸𑀓𑀼𑀮𑀯𑀘𑀦𑁄 𑀘 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄. 𑀦 𑀳𑀺 𑀲𑁄 𑀏𑀯𑀫𑀸𑀓𑀼𑀮𑀁 𑀓𑀢𑁆𑀯𑀸 𑀯𑀢𑁆𑀢𑀼𑀫𑀭𑀳𑀢𑀺, 𑀢𑀲𑁆𑀫𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀫𑀦𑀸𑀓𑀼𑀮𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀘 𑀓𑀢𑁆𑀯𑀸 𑀬𑀣𑀸𑀞𑀺𑀢𑀲𑁆𑀲 𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀓𑀣𑀁? 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺 𑀦𑀸𑀫 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀅𑀬𑀁 𑀧𑀦 ¶ 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀓𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀬𑀲𑁆𑀫𑀸 𑀘 𑀅𑀬𑀁 𑀲𑀁𑀯𑀡𑁆𑀡𑀦𑀸𑀧𑀺 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑀢𑁆𑀢𑀯𑀺𑀲𑀺𑀝𑁆𑀞𑀸, 𑀅𑀢𑁆𑀣𑀢𑁄 𑀧𑀦 𑀅𑀪𑀺𑀦𑁆𑀦𑀸𑀯, 𑀢𑀢𑁄𑀬𑁂𑀯 𑀘 𑀧𑀫𑀸𑀡𑀪𑀽𑀢𑀸 𑀳𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀆𑀤𑀭𑀁 𑀓𑀢𑁆𑀯𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺. 𑀢𑀣𑀸 𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀧𑀫𑀸𑀡𑀪𑀸𑀯𑁄, 𑀇𑀫𑀺𑀲𑁆𑀲𑀸 𑀘 𑀲𑀁𑀯𑀡𑁆𑀡𑀦𑀸𑀬 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑀢𑁆𑀢𑀯𑀺𑀲𑀺𑀝𑁆𑀞𑀸𑀬 𑀅𑀢𑁆𑀣𑀢𑁄 𑀢𑀢𑁄 𑀅𑀪𑀺𑀦𑁆𑀦𑀪𑀸𑀯𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀳𑁂𑀢𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀓𑁂𑀯𑀮𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀲𑀢𑀺𑀧𑀺 𑀧𑀫𑀸𑀡𑀪𑀸𑀯𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀢𑀢𑁄 𑀪𑀺𑀦𑁆𑀦𑀸 𑀅𑀢𑁆𑀣𑀢𑁄 𑀅𑀜𑁆𑀜𑀸𑀬𑁂𑀯 𑀘 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀯𑀢𑁆𑀢𑀼𑀫𑀭𑀳𑀢𑀺, 𑀦𑀸𑀧𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀢𑀢𑁄𑀅𑀪𑀺𑀦𑁆𑀦𑀪𑀸𑀯𑁂𑀧𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀅𑀲𑀢𑀺 𑀧𑀫𑀸𑀡𑀪𑀸𑀯𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 ¶ 𑀯𑀢𑁆𑀢𑀼𑀁 𑀬𑀼𑀢𑁆𑀢𑀭𑀽𑀧𑀸 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀫𑁆𑀧𑁂𑀢𑀁 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀳𑁂𑀢𑀽𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸𑀢𑀺 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸. 𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀧𑀜𑁆𑀘𑀺𑀢𑀁 ‘‘𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽’’𑀢𑀺 (𑀧𑀸𑀭𑀸. 𑁪𑁫) 𑀏𑀢𑁆𑀣 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀬 𑀢𑀸𑀤𑀺𑀲𑀁 𑀯𑀺𑀢𑁆𑀣𑀸𑀭𑀫𑀕𑁆𑀕𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀏𑀢𑁆𑀣 𑀘 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀏𑀓𑀫𑁂𑀯 𑀆𑀕𑀢𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑀩𑁆𑀩𑀸𑀦𑀻𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀸𑀦𑀺 𑀘 ‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀔𑀦𑁆𑀥𑀓𑀢𑁄 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑀢𑁄 𑀘 𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 𑀓𑀣𑀺𑀢𑀸𑀦𑀺. 𑀢𑀸𑀦𑀺 𑀫𑀬𑀁 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀘 𑀦 𑀪𑀸𑀭𑀺𑀬𑀸 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀞𑀺𑀢𑀸𑀬 𑀘 𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀪𑀯𑀺𑀲𑁆𑀲𑀢𑀺, 𑀢𑀸𑀦𑀺 𑀘 𑀞𑀸𑀦𑀸𑀦𑀺 𑀅𑀲𑀼𑀜𑁆𑀜𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑁄𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸).

𑀯𑀺𑀦𑀺𑀘𑁆𑀙𑀬𑀁 ¶ 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸𑀢𑀺 𑀢𑀁𑀢𑀁𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑀁 𑀅𑀲𑁂𑀲𑀬𑀺𑀢𑁆𑀯𑀸 𑀲𑁂𑀲𑀁 𑀅𑀓𑀢𑁆𑀯𑀸, 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀡𑁆𑀡𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀆𑀕𑀢𑀁 𑀧𑀸𑀴𑀺𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀁𑀯𑀡𑁆𑀡𑀦𑀢𑁄 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀡𑁆𑀡𑀺𑀢𑀁 𑀬𑀣𑀸𑀞𑀸𑀦𑁂𑀬𑁂𑀯 𑀲𑀁𑀯𑀡𑁆𑀡𑀦𑀢𑁄 𑀘 𑀯𑀼𑀢𑁆𑀢𑀁 ‘‘𑀢𑀦𑁆𑀢𑀺𑀓𑁆𑀓𑀫𑀁 𑀓𑀺𑀜𑁆𑀘𑀺 𑀅𑀯𑁄𑀓𑁆𑀓𑀫𑀺𑀢𑁆𑀯𑀸’’𑀢𑀺, 𑀓𑀺𑀜𑁆𑀘𑀺 𑀧𑀸𑀴𑀺𑀓𑁆𑀓𑀫𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 𑀆𑀕𑀢𑀸𑀦𑀫𑁆𑀧𑀺 𑀯𑀘𑀦𑀸𑀦𑀫𑀢𑁆𑀣𑀁. 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 ‘‘𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀯𑁂𑀭𑀜𑁆𑀚𑀓𑀡𑁆𑀟𑀸𑀤𑀻𑀲𑀼 𑀛𑀸𑀦𑀓𑀣𑀸𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀆𑀥𑀺𑀆𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀯𑀘𑀦𑀸𑀦𑀫𑀢𑁆𑀣𑀁 𑀢𑀁𑀢𑀁𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀲𑀩𑁆𑀩𑀲𑁄 𑀧𑀭𑀺𑀤𑀻𑀧𑀬𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁂𑀲𑁆𑀲𑀢𑀻𑀢𑀺 𑀪𑀯𑀺𑀲𑁆𑀲𑀢𑀺, 𑀓𑀭𑀺𑀬𑀺𑀲𑁆𑀲𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀞𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀧𑀭𑀺𑀤𑀻𑀧𑀬𑀦𑁆𑀢𑀻 𑀅𑀬𑀁 𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀯𑀡𑁆𑀡𑀦𑀸𑀬 𑀯𑀲𑁂𑀦 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀙𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 ¶ 𑀧𑀦 𑀳𑁂𑀝𑁆𑀞𑀸𑀯𑀼𑀢𑁆𑀢𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀁 𑀓𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀧𑀭𑀺𑀤𑀻𑀧𑀬𑀦𑁆𑀢𑀻 𑀅𑀬𑀁 𑀯𑀡𑁆𑀡𑀦𑀸 𑀅𑀫𑁆𑀳𑁂𑀳𑀺 𑀓𑀭𑀺𑀬𑀺𑀲𑁆𑀲𑀢𑀻𑀢𑀺 𑀏𑀯𑀁 𑀆𑀘𑀭𑀺𑀬𑀯𑀲𑁂𑀦 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀡𑁆𑀡𑀦𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 ‘‘𑀢𑀲𑁆𑀫𑀸𑀧𑀺 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀯𑀺𑀲𑁂𑀲𑀁 𑀧𑀫𑀸𑀡𑀪𑀸𑀯𑀜𑁆𑀘 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀧𑀻’’𑀢𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀧𑀦 𑀦 𑀓𑁂𑀯𑀮𑀁 𑀅𑀬𑀁 𑀯𑀡𑁆𑀡𑀦𑀸 𑀳𑁂𑀲𑁆𑀲𑀢𑀺, 𑀅𑀣 𑀔𑁄 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀧𑀺 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀅𑀧𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀬𑀲𑁆𑀫𑀸 𑀘 𑀅𑀬𑀁 𑀯𑀡𑁆𑀡𑀦𑀸𑀧𑀺 𑀢𑀢𑁄 𑀅𑀪𑀺𑀦𑁆𑀦𑀢𑁆𑀢𑀸 𑀧𑀫𑀸𑀡𑀪𑀽𑀢𑀸𑀬𑁂𑀯 𑀳𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸

𑀇𑀤𑀸𑀦𑀺 ¶ ¶ ‘‘𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀲𑁆𑀲 𑀩𑀳𑀼𑀯𑀺𑀥𑀢𑁆𑀢𑀸 𑀇𑀥 𑀲𑀁𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑁄 𑀢𑀸𑀯 𑀯𑀺𑀦𑀬𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀕𑀸𑀣𑀸𑀲𑀼. 𑀢𑀸𑀯-𑀲𑀤𑁆𑀤𑁄 𑀧𑀞𑀫𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀧𑀞𑀫𑀁 𑀯𑀺𑀦𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑀲𑁆𑀲 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀯𑀯𑀢𑁆𑀣𑀧𑁂𑀢𑀩𑁆𑀩𑁄𑀢𑀺 𑀦𑀺𑀬𑀫𑁂𑀢𑀩𑁆𑀩𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀻𑀢𑀺 𑀬𑀲𑁆𑀫𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑁄, 𑀢𑁂𑀦 𑀳𑁂𑀢𑀼𑀦𑀸 𑀏𑀢𑀁 ‘‘𑀯𑀺𑀦𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀓𑀁 𑀦𑀺𑀬𑀸𑀫𑀓𑀯𑀘𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀯𑀺𑀦𑀬𑀲𑁆𑀲. 𑀫𑀸𑀢𑀺𑀓𑀸𑀢𑀺 𑀉𑀤𑁆𑀤𑁂𑀲𑁄. 𑀲𑁄 𑀳𑀺 𑀦𑀺𑀤𑁆𑀤𑁂𑀲𑀧𑀤𑀸𑀦𑀁 𑀚𑀦𑀦𑀻𑀞𑀸𑀦𑁂 𑀞𑀺𑀢𑀢𑁆𑀢𑀸 𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺 𑀯𑀡𑁆𑀡𑁂𑀢𑀩𑁆𑀩𑀫𑀢𑁆𑀣𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀁 𑀬𑁂𑀦𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀺𑀤𑀸𑀦𑀯𑀘𑀦𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀦𑀬𑀧𑀺𑀝𑀓𑀁 𑀬𑁂𑀦 𑀧𑀼𑀕𑁆𑀕𑀮𑁂𑀦 𑀯𑀼𑀢𑁆𑀢𑀁, 𑀬𑀲𑁆𑀫𑀺𑀁 𑀓𑀸𑀮𑁂 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀓𑀸𑀭𑀡𑀸 𑀯𑀼𑀢𑁆𑀢𑀁, 𑀬𑁂𑀦 𑀥𑀸𑀭𑀺𑀢𑀁, 𑀬𑁂𑀦 𑀘 𑀆𑀪𑀢𑀁, 𑀬𑁂𑀲𑀼 𑀧𑀢𑀺𑀝𑁆𑀞𑀺𑀢𑀁, 𑀏𑀢𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀯𑀢𑁆𑀯𑀸 𑀢𑀢𑁄 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀧𑀸𑀞𑀲𑁆𑀲 𑀅𑀢𑁆𑀣𑀁 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑀬𑀦𑁆𑀢𑁄 𑀯𑀺𑀦𑀬𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀏𑀢𑁆𑀣 𑀘 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸’’𑀢𑀺 𑀇𑀤𑀁 𑀯𑀘𑀦𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀺𑀤𑀸𑀦𑀯𑀘𑀦𑀫𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑁄𑀧𑀺 𑀯𑀺𑀲𑀼𑀁 𑀅𑀯𑀢𑁆𑀯𑀸 ‘‘𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, ‘𑀇𑀤𑀫𑀯𑁄𑀘𑀸’𑀢𑀺 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡’’𑀦𑁆𑀢𑀺 𑀘 𑀯𑀘𑀦𑀢𑁄 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺𑀧𑀺 𑀲𑀢𑁆𑀣𑀼𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁆𑀢𑀸 𑀢𑀤𑀦𑁆𑀢𑁄𑀕𑀥𑀸𑀦𑁂𑀯𑀸𑀢𑀺 𑀦𑀺𑀤𑀸𑀦𑀲𑁆𑀲𑀧𑀺 𑀯𑀺𑀦𑀬𑀧𑀸𑀴𑀺𑀬𑀁𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸’’𑀢𑀺 𑀇𑀤𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀲𑀫𑁆𑀩𑀦𑁆𑀥𑀁𑀬𑁂𑀯 𑀓𑀢𑁆𑀯𑀸 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀫𑀸𑀢𑀺𑀓𑀸𑀬 𑀳𑀺 ‘‘𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀯𑀺𑀦𑀬𑀧𑀺𑀝𑀓𑀁𑀬𑁂𑀯 𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺.

𑀇𑀤𑀸𑀦𑀺 𑀧𑀦 𑀢𑀁 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀯𑀼𑀢𑁆𑀢𑀁 𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀫𑀸𑀢𑀺𑀓𑀸𑀧𑀤𑁂𑀲𑀼. 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺. 𑀇𑀤𑀦𑁆𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀯𑀘𑀦𑀁 ¶ . 𑀳𑀺-𑀲𑀤𑁆𑀤𑁄 𑀬𑀲𑁆𑀫𑀸𑀢𑀺 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄, 𑀬𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀁 𑀦 𑀳𑁄𑀢𑀺, 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑀁 ¶ 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀆𑀳𑀘𑁆𑀘 𑀪𑀸𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀥𑀭𑀫𑀸𑀦𑀓𑀸𑀮𑁂 𑀯𑀼𑀢𑁆𑀢𑀯𑀘𑀦𑀁 𑀦 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀢𑀤𑀼𑀪𑀬𑀫𑁆𑀧𑀺 𑀅𑀢𑁆𑀣𑀢𑁄 𑀲𑀫𑀸𑀦𑀫𑁂𑀯. 𑀇𑀤𑀸𑀦𑀺 𑀧𑀜𑁆𑀳𑀓𑀭𑀡𑀁 𑀯𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀬𑀣𑀸𑀯𑀼𑀢𑁆𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀆𑀬𑀲𑁆𑀫𑀢𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀧𑀼𑀕𑁆𑀕𑀮𑀁 𑀦𑀺𑀬𑀫𑁂𑀢𑀺, ‘‘𑀢𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀓𑀸𑀮𑀁 𑀦𑀺𑀬𑀫𑁂𑀢𑀺. 𑀢𑀜𑁆𑀘 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀯𑀘𑀦𑀁 𑀓𑀸𑀮𑀢𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀢𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀢𑀲𑁆𑀲𑀸 𑀢𑀦𑁆𑀢𑀺𑀆𑀭𑀼𑀴𑁆𑀳𑀸𑀬 𑀇𑀥 𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸𑀢𑀺 𑀘-𑀲𑀤𑁆𑀤𑁄 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀢𑁆𑀢𑀩𑁆𑀩𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀜𑁆𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁, 𑀏𑀲𑀸 𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀜𑁆𑀜𑀸𑀲𑀢𑁆𑀣𑁄 𑀯𑀸 𑀘-𑀲𑀤𑁆𑀤𑁄. 𑀉𑀧𑀜𑁆𑀜𑀸𑀲𑁄𑀢𑀺 𑀘 𑀯𑀸𑀓𑁆𑀬𑀸𑀭𑀫𑁆𑀪𑁄 𑀯𑀼𑀘𑁆𑀘𑀢𑀺. 𑀏𑀲𑀸 𑀳𑀺 𑀕𑀦𑁆𑀣𑀓𑀸𑀭𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀧𑀼𑀦 𑀧𑀭𑀁 𑀯𑀢𑁆𑀢𑀼𑀫𑀸𑀭𑀪𑀦𑁆𑀢𑀸𑀦𑀁 𑀘𑀲𑀤𑁆𑀤𑀧𑁆𑀧𑀬𑁄𑀕𑁄. 𑀬𑀁 𑀧𑀦 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀸𑀧𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺. 𑀢𑀤𑁂𑀯 𑀢𑀲𑁆𑀲 𑀕𑀦𑁆𑀣𑀓𑁆𑀓𑀫𑁂 𑀅𑀓𑁄𑀯𑀺𑀤𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑁂𑀢𑁆𑀣 𑀘𑀲𑀤𑁆𑀤𑁂𑀦 𑀅𑀢𑀺𑀭𑁂𑀓𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀘𑁂𑀢𑁆𑀣 𑀏𑀢𑀤𑀢𑁆𑀣𑁄𑀬𑁂𑀯 𑀘-𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀦 𑀓𑀢𑁆𑀢𑀩𑁆𑀩𑁄𑀬𑁂𑀯 𑀧𑀞𑀫𑀲𑀤𑁆𑀤𑁂𑀦𑁂𑀯 𑀅𑀜𑁆𑀜𑀸𑀲𑀁 𑀤𑀼𑀢𑀺𑀬𑀸𑀤𑀺𑀲𑀗𑁆𑀕𑀻𑀢𑀻𑀦𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑀲𑁆𑀲 𑀤𑀻𑀧𑀺𑀢𑀢𑁆𑀢𑀸. 𑀤𑀼𑀢𑀺𑀬𑀸𑀤𑀺𑀁 𑀉𑀧𑀸𑀤𑀸𑀬 𑀳𑀺 𑀧𑀞𑀫𑀲𑀤𑁆𑀤𑀧𑁆𑀧𑀬𑁄𑀕𑁄 𑀤𑀻𑀖𑀸𑀤𑀺𑀁 𑀉𑀧𑀸𑀤𑀸𑀬 𑀭𑀲𑁆𑀲𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄 𑀯𑀺𑀬. 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺. 𑀏𑀢𑁂𑀦 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀼𑀢𑁆𑀢𑀸𑀦𑀜𑁆𑀘 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀞𑀧𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁 ¶ 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺. 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀦𑁆𑀢𑀺 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁, 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀦𑀺𑀤𑀸𑀦𑀓𑁄𑀲𑀮𑁆𑀮𑀁, 𑀢𑀤𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀭𑀡𑀸𑀤𑀺𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀅𑀜𑁆𑀜𑀸𑀲𑀼 𑀪𑀕𑀯𑀢𑁄 𑀓𑀺𑀭𑀺𑀬𑀸𑀲𑀼 ‘‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀬 𑀅𑀦𑀼𑀮𑁄𑀫𑀦𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀓𑀺𑀭𑀺𑀬𑀸 ¶ 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀥𑀫𑁆𑀫𑁄𑀬𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 𑁋

‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦).

𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂𑀢𑀺 𑀓𑀢𑀁 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀁 𑀩𑀼𑀤𑁆𑀥𑀓𑀺𑀘𑁆𑀘𑀁 𑀬𑁂𑀦, 𑀢𑀲𑁆𑀫𑀺𑀁 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀦 𑀩𑀼𑀤𑁆𑀥𑀓𑀢𑁆𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀲𑁂𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀬𑁂𑀯 𑀳𑀺 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺. 𑀦𑀦𑀼 𑀘 𑀲𑀸𑀯𑀓𑁂𑀳𑀺 𑀯𑀺𑀦𑀻𑀢𑀸𑀧𑀺 𑀯𑀺𑀦𑁂𑀬𑁆𑀬𑀸 𑀪𑀕𑀯𑀢𑀸𑀬𑁂𑀯 𑀯𑀺𑀦𑀻𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀳𑀺 𑀲𑀸𑀯𑀓𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀯𑀓𑀯𑀺𑀦𑁂𑀬𑁆𑀬𑀸 𑀘 𑀦 𑀢𑀸𑀯 𑀯𑀺𑀦𑀻𑀢𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀢𑁂𑀲𑀁 𑀯𑀺𑀦𑀬𑀦𑀽𑀧𑀸𑀬𑀲𑁆𑀲 𑀲𑀸𑀯𑀓𑁂𑀲𑀼 𑀞𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋

‘‘𑀦 𑀢𑀸𑀯𑀸𑀳𑀁 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀦 𑀪𑀺𑀓𑁆𑀔𑀽 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁬𑁮).

‘‘𑀓𑀼𑀲𑀺𑀦𑀸𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀤𑁂𑀲𑀓𑀸𑀮𑀯𑀺𑀲𑁂𑀲𑀤𑀲𑁆𑀲𑀦𑀁, ‘‘𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀕𑀸𑀳𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀮𑁄𑀓𑁂 ¶ 𑀚𑀸𑀢𑀲𑀁𑀯𑀟𑁆𑀠𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀲𑀼𑀧𑀸𑀓𑀝𑀓𑀭𑀡𑀢𑁆𑀣𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀤𑀸𑀭𑀧𑀭𑀺𑀕𑁆𑀕𑀳𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀻𑀢𑀺. 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀉𑀧𑀯𑀢𑁆𑀢𑀦𑀪𑀽𑀢𑀁 𑀫𑀮𑁆𑀮𑀭𑀸𑀚𑀽𑀦𑀁 𑀲𑀸𑀮𑀯𑀦𑀼𑀬𑁆𑀬𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀉𑀬𑁆𑀬𑀸𑀦𑀢𑁄 𑀉𑀧𑁂𑀘𑁆𑀘 𑀯𑀢𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀢𑁆𑀢𑀦𑀦𑁆𑀢𑀺 𑀲𑀸𑀮𑀯𑀦𑀁 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁, 𑀏𑀯𑀁 𑀢𑀁 𑀉𑀬𑁆𑀬𑀸𑀦𑀁 𑀓𑀼𑀲𑀺𑀦𑀸𑀭𑀸𑀬 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬 𑀳𑁄𑀢𑀺. 𑀬𑀣𑀸 𑀘 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀢𑀁 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂𑀢𑀺 𑀬𑀫𑀓𑀲𑀸𑀮𑀸𑀦𑀁 𑀯𑁂𑀫𑀚𑁆𑀛𑁂. 𑀢𑀢𑁆𑀣 ¶ 𑀓𑀺𑀭 𑀪𑀕𑀯𑀢𑁄 𑀧𑀜𑁆𑀜𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀲𑁆𑀲 𑀏𑀓𑀸 𑀲𑀸𑀮𑀧𑀦𑁆𑀢𑀺 𑀲𑀻𑀲𑀪𑀸𑀕𑁂 𑀳𑁄𑀢𑀺, 𑀏𑀓𑀸 𑀧𑀸𑀤𑀪𑀸𑀕𑁂, 𑀢𑀢𑁆𑀭𑀸𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲, 𑀢𑀲𑁆𑀫𑀸 ‘‘𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀅𑀧𑀺 𑀘 ‘‘𑀬𑀫𑀓𑀲𑀸𑀮𑀸 𑀦𑀸𑀫 𑀫𑀽𑀮𑀓𑁆𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀲𑀸𑀮𑀸’’𑀢𑀺𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀉𑀧𑀸𑀤𑀻𑀬𑀢𑁂 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 𑀉𑀧𑀸𑀤𑀺, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀲𑁄 𑀧𑀦 𑀉𑀧𑀸𑀤𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀁 𑀅𑀦𑁄𑀲𑁆𑀲𑀝𑁆𑀞𑁄, 𑀇𑀥 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀑𑀲𑁆𑀲𑀝𑁆𑀞𑁄 𑀦𑀺𑀲𑁂𑀲𑀺𑀢𑁄𑀢𑀺 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀉𑀧𑀸𑀤𑀺𑀲𑁂𑀲𑁄𑀢𑀺 𑀓𑀢𑁆𑀯𑀸. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘𑁂𑀢𑁆𑀣 𑀦𑀺𑀩𑁆𑀩𑀼𑀢𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀧𑀭𑀺𑀦𑀺𑀩𑁆𑀩𑀸𑀦𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑁂, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁, 𑀧𑀭𑀺𑀦𑀺𑀩𑁆𑀩𑀸𑀦𑀳𑁂𑀢𑀼 𑀲𑀦𑁆𑀦𑀺𑀧𑀢𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑁆𑀲 𑀣𑁂𑀭𑁄 𑀲𑀗𑁆𑀖𑀢𑁆𑀣𑁂𑀭𑁄. 𑀲𑁄 𑀧𑀦 𑀲𑀗𑁆𑀖𑁄 𑀓𑀺𑀁𑀧𑀭𑀺𑀫𑀸𑀡𑁄𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑀸 𑀳𑀺 𑀈𑀤𑀺𑀲𑁂𑀲𑀼 𑀲𑀫𑀸𑀲𑁄 𑀳𑁄𑀢𑀺𑀬𑁂𑀯 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀕𑀭𑀼𑀓𑀼𑀮’’𑀦𑁆𑀢𑀺. 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀘 𑀲𑀗𑁆𑀖𑀢𑁆𑀣𑁂𑀭𑀸𑀦𑀁𑀬𑁂𑀯 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁. 𑀢𑀤𑀸 𑀳𑀺 ‘‘𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀏𑀢𑁆𑀢𑀓𑀸’’𑀢𑀺 𑀧𑀫𑀸𑀡𑀭𑀳𑀺𑀢𑀸. 𑀢𑀣𑀸 𑀳𑀺 𑀯𑁂𑀴𑀼𑀯𑀕𑀸𑀫𑁂 𑀯𑁂𑀤𑀦𑀸𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 ‘‘𑀦 𑀘𑀺𑀭𑁂𑀦 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 𑀧𑀓𑁆𑀓𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀕𑀡𑀦𑀁 𑀯𑀻𑀢𑀺𑀯𑀢𑁆𑀢𑁄 𑀲𑀗𑁆𑀖𑁄 𑀅𑀳𑁄𑀲𑀺. 𑀆𑀬𑀲𑁆𑀫𑀸 ¶ 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀫𑀳𑀸𑀓𑀲𑁆𑀲𑀧𑁄𑀢𑀺 𑀫𑀳𑀦𑁆𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑁄 𑀓𑀲𑁆𑀲𑀧𑁄𑀢𑀺 𑀫𑀳𑀸𑀓𑀲𑁆𑀲𑀧𑁄, 𑀅𑀧𑀺𑀘 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀁 𑀉𑀧𑀸𑀤𑀸𑀬 𑀅𑀬𑀁 𑀫𑀳𑀸𑀣𑁂𑀭𑁄 ‘‘𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀓𑀺𑀫𑀢𑁆𑀣𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀆𑀳 ‘‘𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺𑀆𑀤𑀺. 𑀲𑀢𑁆𑀢 𑀅𑀳𑀸𑀦𑀺 𑀲𑀫𑀸𑀳𑀝𑀸𑀦𑀺 𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀕𑀯𑀸, 𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀼𑀪𑀤𑁆𑀤𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀯𑀼𑀟𑁆𑀠𑀓𑀸𑀮𑁂 𑀧𑀦 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀮𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀧𑀜𑁆𑀘𑀫𑀢𑁆𑀢𑁂𑀲𑀼 𑀪𑀺𑀓𑁆𑀔𑀼𑀲𑀢𑁂𑀲𑀼 𑀅𑀯𑀻𑀢𑀭𑀸𑀕𑁂 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀝𑁆𑀞𑀆𑀚𑀻𑀯𑀓𑀲𑁆𑀲 ¶ 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀦𑁆𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳.

𑀓𑀲𑁆𑀫𑀸 𑀧𑀦 𑀲𑁄 𑀏𑀯𑀫𑀸𑀳? 𑀪𑀕𑀯𑀢𑀺 𑀆𑀖𑀸𑀢𑁂𑀦. 𑀅𑀬𑀁 𑀓𑀺𑀭 𑀲𑁄 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁩) 𑀆𑀕𑀢𑁂 𑀆𑀢𑀼𑀫𑀸𑀯𑀢𑁆𑀣𑀼𑀲𑁆𑀫𑀺𑀁 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑀺 𑀓𑀼𑀲𑀺𑀦𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀆𑀢𑀼𑀫𑀁 𑀕𑀘𑁆𑀙𑀦𑁆𑀢𑁂 ‘‘𑀪𑀕𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀆𑀕𑀢𑀓𑀸𑀮𑁂 ‘‘𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀏𑀢𑀤𑀯𑁄𑀘 ‘‘𑀪𑀕𑀯𑀸 𑀓𑀺𑀭 𑀢𑀸𑀢𑀸 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀢𑀸𑀢𑀸 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸𑀯𑀸𑀧𑀓𑁂𑀦 𑀅𑀦𑀼𑀖𑀭𑀓𑀁 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀣, 𑀮𑁄𑀡𑀫𑁆𑀧𑀺 𑀢𑁂𑀮𑀫𑁆𑀧𑀺 𑀢𑀡𑁆𑀟𑀼𑀮𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 𑀲𑀁𑀳𑀭𑀣, 𑀪𑀕𑀯𑀢𑁄 𑀆𑀕𑀢𑀲𑁆𑀲 𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣 𑀪𑀕𑀯𑀢𑀺 𑀆𑀢𑀼𑀫𑀁 𑀆𑀕𑀦𑁆𑀢𑁆𑀯𑀸 𑀪𑀼𑀲𑀸𑀕𑀸𑀭𑀓𑀁 𑀧𑀯𑀺𑀝𑁆𑀞𑁂 𑀲𑀼𑀪𑀤𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀕𑀸𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀳𑀢𑁆𑀣𑀓𑀫𑁆𑀫𑀫𑀢𑁆𑀢𑀁 𑀫𑁂 𑀤𑁂𑀣𑀸’’𑀢𑀺 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂 ¶ 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀡𑁆𑀳𑀣𑀸’’𑀢𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑁂 𑀉𑀤𑁆𑀥𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀓𑀸𑀴𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀸𑀤𑀺𑀲𑀫𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀓𑀭𑁄𑀣𑀸’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀯𑀺𑀘𑀸𑀭𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁄𑀚𑁆𑀚𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀢𑀩𑁆𑀩𑀬𑀸𑀕𑀼, 𑀢𑀢𑁆𑀣 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀧𑀼𑀧𑁆𑀨𑀨𑀮𑀭𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀧𑀯𑀺𑀲𑀢𑀺, 𑀓𑀻𑀴𑀺𑀢𑀼𑀓𑀸𑀫𑀸𑀦𑀁 𑀲𑀻𑀲𑀫𑀓𑁆𑀔𑀦𑀬𑁄𑀕𑁆𑀕𑀸 𑀳𑁄𑀢𑀺 𑀲𑀼𑀕𑀦𑁆𑀥𑀕𑀦𑁆𑀥𑀸.

𑀅𑀣 𑀪𑀕𑀯𑀸 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀢𑀼𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀪𑀕𑀯𑀸 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀬𑀸 𑀓𑀲𑁆𑀲 𑀬𑀸𑀕𑀼 𑀧𑀝𑀺𑀬𑀸𑀤𑀺𑀢𑀸’’𑀢𑀺. 𑀲𑁄 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁂𑀳𑁂𑀯 𑀢𑁂𑀳𑀺 𑀓𑀸𑀴𑀓𑀓𑀸𑀲𑀸𑀯𑁂𑀳𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀩𑁆𑀩𑀺𑀜𑁆𑀘 𑀓𑀝𑀘𑁆𑀙𑀼𑀜𑁆𑀘 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀸 𑀯𑀺𑀬 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀝𑀺𑀕𑁆𑀕𑀡𑁆𑀳𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀬𑀸𑀕𑀼’’𑀦𑁆𑀢𑀺 𑀆𑀳. 𑀢𑀢𑁄 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁩) 𑀆𑀕𑀢𑀦𑀬𑁂𑀦 𑀪𑀕𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀯𑀺𑀕𑀭𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀧𑀦𑀲𑀺𑀓𑁆𑀔𑀸𑀧𑀤𑀁 𑀔𑀼𑀭𑀪𑀡𑁆𑀟𑀧𑀭𑀺𑀳𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀬𑁄 𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑁂𑀳𑁂𑀯 𑀯𑀻𑀢𑀺𑀦𑀸𑀫𑀺𑀢𑀸, 𑀇𑀤𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀅𑀓𑀧𑁆𑀧𑀺𑀬𑀁, 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀁 𑀇𑀫𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑁂𑀓𑀸𑀦𑀺 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑀸𑀦𑀺 𑀅𑀧𑀸𑀬𑁂𑀲𑁆𑀯𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀅𑀧𑁂𑀣 𑀫𑀸 𑀕𑀡𑁆𑀳𑀣𑀸’’𑀢𑀺 𑀪𑀺𑀓𑁆𑀔𑀸𑀘𑀸𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺, 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀺𑀜𑁆𑀘𑀺 𑀕𑀳𑀺𑀢𑀁.

𑀲𑀼𑀪𑀤𑁆𑀤𑁄 ¶ 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀅𑀬𑀁 ‘𑀲𑀩𑁆𑀩𑀁 𑀚𑀸𑀦𑀸𑀫𑀻’𑀢𑀺 𑀆𑀳𑀺𑀡𑁆𑀟𑀢𑀺, 𑀲𑀘𑁂 𑀦 𑀕𑀳𑁂𑀢𑀼𑀓𑀸𑀫𑁄 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑀅𑀲𑁆𑀲, 𑀧𑀓𑁆𑀓𑀸𑀳𑀸𑀭𑁄 𑀦𑀸𑀫 𑀲𑀩𑁆𑀩𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑁄 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑁂𑀬𑁆𑀬, 𑀇𑀤𑀜𑁆𑀘 𑀫𑀫 𑀬𑀸𑀯𑀚𑀻𑀯𑀁 𑀧𑀭𑀺𑀬𑀢𑁆𑀢𑀁 𑀅𑀲𑁆𑀲, 𑀲𑀩𑁆𑀩𑀁 𑀢𑁂𑀦 𑀦𑀸𑀲𑀺𑀢𑀁, 𑀅𑀳𑀺𑀢𑀓𑀸𑀫𑁄 𑀅𑀬𑀁 𑀫𑀬𑁆𑀳’’𑀦𑁆𑀢𑀺 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑀩𑀮𑁂 𑀥𑀭𑀫𑀸𑀦𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀅𑀬𑀁 𑀉𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀸𑀧𑀼𑀭𑀺𑀲𑁄, 𑀲𑀘𑁂 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫𑀺, 𑀫𑀫𑀁𑀬𑁂𑀯 𑀲𑀦𑁆𑀢𑀚𑁆𑀚𑁂𑀲𑁆𑀲𑀢𑀻’’𑀢𑀺. 𑀲𑁆𑀯𑀸𑀬𑀁 𑀅𑀚𑁆𑀚 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑁄 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑁄 ¶ 𑀯𑀺𑀬 𑀳𑀝𑁆𑀞𑀢𑀼𑀝𑁆𑀞𑁄 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀢𑀁 𑀲𑀼𑀢𑁆𑀯𑀸 𑀳𑀤𑀬𑁂 𑀧𑀳𑀸𑀭𑀁 𑀯𑀺𑀬 𑀫𑀢𑁆𑀣𑀓𑁂 𑀧𑀢𑀺𑀢𑀲𑀼𑀓𑁆𑀓𑀸𑀲𑀦𑀺𑀁 𑀯𑀺𑀬 𑀫𑀜𑁆𑀜𑀺, 𑀥𑀫𑁆𑀫𑀲𑀁𑀯𑁂𑀕𑁄 𑀘𑀲𑁆𑀲 𑀉𑀧𑁆𑀧𑀚𑁆𑀚𑀺 ‘‘𑀲𑀢𑁆𑀢𑀸𑀳𑀫𑀢𑁆𑀢𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸, 𑀅𑀚𑁆𑀚𑀸𑀧𑀺𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀥𑀭𑀢𑀺𑀬𑁂𑀯, 𑀤𑀼𑀓𑁆𑀔𑁂𑀦 𑀪𑀕𑀯𑀢𑀸 𑀆𑀭𑀸𑀥𑀺𑀢𑀲𑀸𑀲𑀦𑁂 𑀦𑀸𑀫 𑀏𑀯𑀁 𑀮𑀳𑀼𑀁 𑀫𑀳𑀦𑁆𑀢𑀁 𑀧𑀸𑀧𑀓𑀲𑀝𑀁 𑀓𑀡𑁆𑀝𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀮𑀁 𑀔𑁄 𑀧𑀦𑁂𑀲 𑀧𑀸𑀧𑁄 𑀯𑀟𑁆𑀠𑀫𑀸𑀦𑁄 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂 𑀲𑀳𑀸𑀬𑁂 𑀮𑀪𑀺𑀢𑁆𑀯𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑀼’’𑀦𑁆𑀢𑀺.

𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀫𑀳𑀮𑁆𑀮𑀓𑀁 𑀇𑀥𑁂𑀯 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀙𑀸𑀭𑀺𑀓𑀸𑀬 𑀑𑀓𑀺𑀭𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀸 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀭𑀻𑀭𑁂 𑀥𑀭𑀫𑀸𑀦𑁂𑀬𑁂𑀯 𑀲𑀸𑀯𑀓𑀸 𑀯𑀺𑀯𑀤𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀥𑀺𑀯𑀸𑀲𑁂𑀫𑀺 𑀢𑀸𑀯. 𑀪𑀕𑀯𑀢𑀸 𑀳𑀺 𑀤𑁂𑀲𑀺𑀢𑀥𑀫𑁆𑀫𑁄 𑀅𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑁄, 𑀢𑀢𑁆𑀣 𑀬𑀣𑀸 𑀯𑀸𑀢𑁂𑀦 𑀧𑀳𑀝𑀧𑀼𑀧𑁆𑀨𑀸𑀦𑀺 𑀬𑀢𑁄 𑀯𑀸 𑀢𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀸𑀦𑀁 𑀯𑀲𑁂𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀯𑀺𑀦𑀬𑁂 𑀏𑀓𑀁 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀼𑀢𑁆𑀢𑁂 𑀏𑀓𑁄 𑀤𑁆𑀯𑁂 𑀧𑀜𑁆𑀳𑀯𑀸𑀭𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀅𑀪𑀺𑀥𑀫𑁆𑀫𑁂 𑀏𑀓𑀁 𑀤𑁆𑀯𑁂 𑀪𑀽𑀫𑀦𑁆𑀢𑀭𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀫𑀽𑀮𑁂 𑀦𑀝𑁆𑀞𑁂 𑀧𑀺𑀲𑀸𑀘𑀲𑀤𑀺𑀲𑀸 𑀪𑀯𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀢𑀺 𑀤𑀴𑁆𑀳𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀦𑀺𑀘𑁆𑀘𑀮𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑀢𑁆𑀣𑀜𑁆𑀳𑀺 𑀪𑀕𑀯𑀸 𑀫𑀬𑁆𑀳𑀁 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺, 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀓𑀸𑀲𑀺, 𑀓𑀸𑀬𑀢𑁄 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺, 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀲𑀸𑀲𑀦𑀭𑀢𑀦𑀁 𑀧𑀝𑀺𑀘𑁆𑀙𑀸𑀧𑁂𑀲𑀺, 𑀫𑀸𑀤𑀺𑀲𑁂 𑀪𑀺𑀓𑁆𑀔𑀼𑀫𑁆𑀳𑀺 𑀢𑀺𑀝𑁆𑀞𑀫𑀸𑀦𑁂 𑀅𑀬𑀁 𑀧𑀸𑀧𑁄 𑀲𑀸𑀲𑀦𑁂 𑀯𑀟𑁆𑀠𑀺𑀁 𑀫𑀸 𑀅𑀮𑀢𑁆𑀣𑀼, 𑀬𑀸𑀯 𑀅𑀥𑀫𑁆𑀫𑁄 𑀦 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀦 𑀧𑀝𑀺𑀩𑀸𑀳𑀻𑀬𑀢𑀺, 𑀅𑀯𑀺𑀦𑀬𑁄 𑀦 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀦 𑀧𑀝𑀺𑀩𑀸𑀳𑀻𑀬𑀢𑀺, 𑀅𑀥𑀫𑁆𑀫𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀅𑀯𑀺𑀦𑀬𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀺, 𑀢𑀢𑁄 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀣𑀸𑀬𑀁 𑀧𑀸𑀧𑁄 𑀲𑀬𑀫𑁂𑀯 𑀦𑀺𑀕𑁆𑀕𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀸𑀲𑀦𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄 ‘‘𑀏𑀯𑀁 𑀦𑀸𑀫 𑀫𑀬𑁆𑀳𑀁 𑀘𑀺𑀢𑁆𑀢𑀁 ¶ 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 ¶ 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀣 𑀧𑀘𑁆𑀙𑀸 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂…𑀧𑁂… 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺.

𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀆𑀯𑀼𑀲𑁄𑀢𑀺 𑀧𑀭𑀺𑀤𑁂𑀯𑀦𑁆𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀫𑀸 𑀲𑁄𑀘𑀺𑀢𑁆𑀣𑀸𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀫𑀸 𑀲𑁄𑀘𑀺𑀢𑁆𑀣. 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣𑀸𑀢𑀺 𑀯𑀸𑀘𑀸𑀬 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣 ‘‘𑀧𑀭𑀺𑀤𑁂𑀯𑀦𑀁 𑀯𑀺𑀮𑀸𑀧𑁄’’𑀢𑀺 𑀯𑀘𑀦𑀢𑁄. 𑀇𑀤𑀸𑀦𑀺 𑀅𑀲𑁄𑀘𑀦𑀸𑀤𑀻𑀲𑀼 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀫𑀳𑀸𑀲𑀫𑀡𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁, 𑀢𑀢𑁄 𑀫𑀳𑀸𑀲𑀫𑀡𑀢𑁄 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸 𑀫𑀬𑀦𑁆𑀢𑀺 𑀅𑀢𑁆𑀣𑁄, 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 𑀢𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀫𑀸𑀢𑀺 𑀯𑀸 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀅𑀳𑀼𑀫𑁆𑀳𑀸𑀢𑀺 𑀅𑀢𑁆𑀣𑁄, 𑀅𑀦𑀼𑀲𑁆𑀲𑀭𑀦𑁆𑀢𑁄 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀥𑀫𑁆𑀫𑀲𑀁𑀯𑁂𑀕𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀸𑀓𑀸𑀭𑀲𑀡𑁆𑀞𑀺𑀢𑀁;

𑀜𑀸𑀡𑀫𑁄𑀳𑀺𑀢𑀪𑀸𑀭𑀸𑀦𑀁, 𑀥𑀫𑁆𑀫𑀲𑀁𑀯𑁂𑀕𑀲𑀜𑁆𑀜𑀺𑀢’’𑀦𑁆𑀢𑀺.

𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀳𑁂𑀢𑀼. 𑀔𑁄𑀢𑀺 𑀅𑀯𑀥𑀸𑀭𑀡𑁂, 𑀏𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑁂𑀯, 𑀦𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑀁 𑀧𑀸𑀧𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀯𑀸, 𑀬𑁂𑀦 𑀓𑀸𑀭𑀡𑁂𑀦 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀢𑀤𑁂𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀪𑀺𑀓𑁆𑀔𑀽𑀢𑀺 𑀧𑀸𑀧𑀺𑀓𑀸𑀬 𑀮𑀸𑀫𑀺𑀓𑀸𑀬 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀽. 𑀅𑀢𑀻𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀢𑁆𑀣𑀸 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑀻𑀢𑀲𑀢𑁆𑀣𑀼𑀓𑀁, 𑀧𑀸𑀯𑀘𑀦𑀁. 𑀧𑀥𑀸𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁, 𑀥𑀫𑁆𑀫𑀯𑀺𑀦𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸𑀢𑀺 𑀅𑀮𑀚𑁆𑀚𑀻𑀧𑀓𑁆𑀔𑀁 𑀮𑀪𑀺𑀢𑁆𑀯𑀸. 𑀦 𑀘𑀺𑀭𑀲𑁆𑀲𑁂𑀯𑀸𑀢𑀺 𑀦 𑀘𑀺𑀭𑁂𑀦𑁂𑀯. 𑀬𑀸𑀯 𑀘 𑀥𑀫𑁆𑀫𑀯𑀺𑀦𑀬𑁄 𑀢𑀺𑀝𑁆𑀞𑀢𑀻𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀢𑀺𑀝𑁆𑀞𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽 𑀑𑀯𑀤𑀦𑁆𑀢𑁂𑀦 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄𑀢𑀺 𑀥𑀫𑁆𑀫𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘. 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀕𑀳𑀺𑀢𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀅𑀪𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸, 𑀢𑀲𑁆𑀲𑁂𑀯 𑀧𑀓𑀸𑀭𑀢𑁄 𑀜𑀸𑀧𑀦𑀁 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀞𑀧𑀦𑀁 𑀧𑀜𑁆𑀜𑀸𑀧𑀦𑀁, 𑀢𑀲𑁆𑀫𑀸 𑀥𑀫𑁆𑀫𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘𑀸𑀢𑀺 ¶ 𑀯𑀼𑀢𑁆𑀢𑁄. 𑀧𑀜𑁆𑀜𑀢𑁆𑀢𑁄𑀢𑀺 𑀘 𑀞𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘. 𑀯𑀺𑀦𑀬𑀢𑀦𑁆𑀢𑀺𑀲𑀗𑁆𑀕𑀳𑀺𑀢𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀓𑀸𑀬𑀯𑀸𑀘𑀸𑀦𑀁 𑀯𑀺𑀦𑀬𑀦𑀢𑁄 ¶ 𑀯𑀺𑀦𑀬𑁄𑀢𑀺 𑀮𑀤𑁆𑀥𑀸𑀥𑀺𑀯𑀘𑀦𑀲𑁆𑀲 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸, 𑀢𑀲𑁆𑀲𑁂𑀯 𑀧𑀓𑀸𑀭𑀢𑁄 𑀜𑀸𑀧𑀦𑀁 𑀅𑀲𑀗𑁆𑀓𑀭𑀢𑁄 𑀞𑀧𑀦𑀁 𑀧𑀜𑁆𑀜𑀸𑀧𑀦𑀁, 𑀢𑀲𑁆𑀫𑀸 𑀯𑀺𑀦𑀬𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺.

𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦𑀸𑀢𑀺 𑀲𑁄 𑀥𑀫𑁆𑀫𑀯𑀺𑀦𑀬𑁄 𑀢𑀼𑀫𑁆𑀳𑀸𑀓𑀁 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀬𑀸 𑀯𑁄 𑀞𑀺𑀢𑁂𑀦𑁂𑀯 ‘‘𑀇𑀤𑀁 𑀮𑀳𑀼𑀓𑀁, 𑀇𑀤𑀁 𑀕𑀭𑀼𑀓𑀁, 𑀇𑀤𑀁 𑀲𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀅𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀮𑁄𑀓𑀯𑀚𑁆𑀚𑀁, 𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀅𑀬𑀁 𑀆𑀧𑀢𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀺, 𑀅𑀬𑀁 𑀕𑀡𑀲𑁆𑀲, 𑀅𑀬𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀻’’𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑀸𑀯𑀲𑁂𑀦 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁 𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑁄 𑀉𑀪𑀢𑁄𑀯𑀺𑀪𑀗𑁆𑀕𑁄 𑀫𑀳𑀸𑀯𑀺𑀦𑀬𑁄 𑀦𑀸𑀫 𑀤𑁂𑀲𑀺𑀢𑁄, 𑀢𑀁 𑀲𑀓𑀮𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺 ‘‘𑀇𑀤𑀁 𑀯𑁄 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀯𑁄 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀪𑀸𑀕𑁂𑀦 𑀅𑀦𑀼𑀲𑀸𑀲𑀦𑀢𑁄. 𑀞𑀺𑀢𑁂𑀦𑁂𑀯 𑀘 𑀫𑀬𑀸 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀢𑁂𑀦 𑀢𑁂𑀦 𑀯𑀺𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀧𑀓𑀸𑀭𑁂𑀦 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺 𑀢𑀁𑀢𑀁𑀘𑀭𑀺𑀬𑀸𑀦𑀼𑀭𑀽𑀧𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀲𑀸𑀲𑀦𑀢𑁄. 𑀞𑀺𑀢𑁂𑀦𑁂𑀯 𑀘 𑀫𑀬𑀸 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀘𑁂𑀢𑀦𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺, 𑀢𑀢𑁆𑀭𑀸𑀧𑀺 𑀏𑀢𑁆𑀢𑀓𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀅𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀮𑁄𑀓𑀺𑀬𑀸, 𑀏𑀢𑁆𑀢𑀓𑀸 𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀇𑀫𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺, 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁂𑀦 𑀜𑀸𑀬𑀫𑀸𑀦𑀁 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑀸𑀯𑀳𑀢𑁆𑀢𑀸 𑀲𑀢𑁆𑀣𑀸𑀭𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺. 𑀇𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀪𑀸𑀲𑀺𑀢𑀁 𑀮𑀧𑀺𑀢𑀁, 𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀧𑀜𑁆𑀘 𑀦𑀺𑀓𑀸𑀬𑀸, 𑀦𑀯𑀗𑁆𑀕𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀫𑀳𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 ¶ 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀳𑀁 𑀏𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀸𑀫𑀺, 𑀅𑀳𑀜𑁆𑀘 𑀧𑀦𑀺𑀤𑀸𑀦𑀺 𑀏𑀓𑁄𑀯 𑀑𑀯𑀤𑀸𑀫𑀺 𑀅𑀦𑀼𑀲𑀸𑀲𑀸𑀫𑀺, 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀢𑀼𑀫𑁆𑀳𑁂 𑀑𑀯𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑀸𑀲𑀺𑀲𑁆𑀲𑀦𑁆𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄𑀢𑀺.

𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀁 𑀲𑀸𑀲𑀦𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀕𑀸𑀫𑀻𑀢𑀺 𑀅𑀤𑁆𑀥𑀦𑀺𑀬𑀁, 𑀅𑀤𑁆𑀥𑀸𑀦𑀓𑁆𑀔𑀫𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 ¶ 𑀘𑀺𑀭𑀁 𑀞𑀺𑀢𑀺 𑀏𑀢𑀲𑁆𑀲𑀸𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀲𑀸𑀲𑀦𑀁, 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀇𑀤𑀁 𑀲𑀸𑀲𑀦𑀁 𑀤𑀻𑀖𑀫𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀁, 𑀢𑀢𑁄𑀬𑁂𑀯 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀲𑁆𑀲, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀦𑁆𑀢𑀺.

𑀇𑀤𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀢𑁆𑀢𑀦𑁄 𑀓𑀢𑀁 𑀅𑀦𑀼𑀕𑁆𑀕𑀳𑀯𑀺𑀲𑁂𑀲𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀬𑀜𑁆𑀘𑀸𑀳𑀁 𑀪𑀕𑀯𑀢𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀬𑀜𑁆𑀘𑀸𑀳’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀦𑀼𑀕𑁆𑀕𑀳𑀺𑀢𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸, 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸 𑀏𑀢𑀁, 𑀢𑁂𑀦 ‘‘𑀅𑀦𑀼𑀕𑁆𑀕𑀳𑀺𑀢𑁄’’𑀢𑀺 𑀏𑀢𑁆𑀣 𑀅𑀦𑀼𑀕𑁆𑀕𑀡𑁆𑀳𑀦𑀁 𑀧𑀭𑀸𑀫𑀲𑀢𑀺. 𑀥𑀸𑀭𑁂𑀲𑁆𑀲𑀲𑀻𑀢𑀺𑀆𑀤𑀺𑀓𑀁 𑀧𑀦 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀜𑁆𑀜𑀢𑁆𑀢𑀲𑀗𑁆𑀖𑀸𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀢𑀁 𑀘𑀻𑀯𑀭𑀁 𑀯𑀺𑀓𑀲𑀺𑀢𑀧𑀤𑀼𑀫𑀧𑀼𑀧𑁆𑀨𑀯𑀡𑁆𑀡𑁂𑀦 𑀧𑀸𑀡𑀺𑀦𑀸 𑀅𑀦𑁆𑀢𑀭𑁂 𑀧𑀭𑀸𑀫𑀲𑀦𑁆𑀢𑁄 𑀆𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁫𑁪) 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦𑁂𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑁋

‘‘𑀅𑀣 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁 ‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀦𑀺𑀲𑀻𑀤𑀢𑀼, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. 𑀦𑀺𑀲𑀻𑀤𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀦𑀺𑀲𑀚𑁆𑀚 𑀔𑁄 𑀫𑀁, 𑀆𑀯𑀼𑀲𑁄, 𑀪𑀕𑀯𑀸 𑀏𑀢𑀤𑀯𑁄𑀘 ‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁 𑀓𑀲𑁆𑀲𑀧 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀻’𑀢𑀺. ‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’𑀢𑀺. ‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁 𑀓𑀲𑁆𑀲𑀧 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺. ‘𑀥𑀸𑀭𑁂𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 ¶ 𑀦𑀺𑀩𑁆𑀩𑀲𑀦𑀸𑀦𑀻’𑀢𑀺. 𑀲𑁄 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀪𑀕𑀯𑀢𑁄 𑀧𑀸𑀤𑀸𑀲𑀺𑀁, 𑀅𑀳𑀁 𑀧𑀦 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀺 𑀧𑀝𑀺𑀧𑀚𑁆𑀚𑀺’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪).

𑀢𑀢𑁆𑀣 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁪) 𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀦𑁆𑀢𑀺 𑀫𑀼𑀤𑀼𑀓𑀸 𑀔𑁄 𑀢𑁂 𑀅𑀬𑀁. 𑀓𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺? 𑀣𑁂𑀭𑁂𑀦 𑀲𑀳 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑀢𑀸𑀬. 𑀓𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑁄 𑀚𑀸𑀢𑁄𑀢𑀺? 𑀣𑁂𑀭𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀢𑀼𑀓𑀸𑀫𑀢𑀸𑀬. 𑀓𑀺𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀏𑀯𑀁 𑀧𑀦𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂 𑀦 𑀘𑀺𑀭𑀁 𑀞𑀲𑁆𑀲𑀦𑁆𑀢𑀺, 𑀓𑀲𑁆𑀲𑀧𑁄 𑀧𑀦 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑁄, ‘𑀲𑁄 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁 𑀯𑀲𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀫 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀓𑀸𑀮𑀁 𑀧𑀯𑀢𑁆𑀢𑀦𑀓𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀅𑀢𑁆𑀢𑀦𑁄 𑀦𑀁 𑀞𑀸𑀦𑁂 𑀞𑀧𑁂𑀫𑀺, 𑀏𑀯𑀁 𑀪𑀺𑀓𑁆𑀔𑀽 𑀓𑀲𑁆𑀲𑀧𑀲𑁆𑀲 𑀲𑀼𑀲𑁆𑀲𑀽𑀲𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀘𑀻𑀯𑀭𑀲𑁆𑀲 ¶ 𑀯𑀸 𑀧𑀢𑁆𑀢𑀲𑁆𑀲 𑀯𑀸 𑀯𑀡𑁆𑀡𑁂 𑀓𑀣𑀺𑀢𑁂 ‘‘𑀇𑀫𑀁 𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀣𑀸’’𑀢𑀺 𑀘𑀸𑀭𑀺𑀢𑁆𑀢𑀫𑁂𑀯, 𑀢𑀲𑁆𑀫𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀆𑀳. 𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁 𑀓𑀲𑁆𑀲𑀧𑀸𑀢𑀺 𑀓𑀲𑁆𑀲𑀧 𑀢𑁆𑀯𑀁 𑀇𑀫𑀸𑀦𑀺 𑀧𑀭𑀺𑀪𑁄𑀕𑀚𑀺𑀡𑁆𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀧𑀸𑀭𑀼𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀯𑀤𑀢𑀺. 𑀢𑀜𑁆𑀘 𑀔𑁄 𑀦 𑀓𑀸𑀬𑀩𑀮𑀁 𑀲𑀦𑁆𑀥𑀸𑀬, 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁 𑀧𑀦 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀇𑀫𑀁 𑀘𑀻𑀯𑀭𑀁 𑀧𑀼𑀡𑁆𑀡𑀁 𑀦𑀸𑀫 𑀤𑀸𑀲𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀢𑀼𑀫𑁆𑀩𑀫𑀢𑁆𑀢𑁂𑀳𑀺 𑀧𑀸𑀡𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀢𑁂 𑀧𑀸𑀡𑀓𑁂 𑀯𑀺𑀥𑀼𑀦𑀺𑀢𑁆𑀯𑀸 𑀫𑀳𑀸𑀅𑀭𑀺𑀬𑀯𑀁𑀲𑁂 𑀞𑀢𑁆𑀯𑀸 𑀅𑀕𑁆𑀕𑀳𑁂𑀲𑀺𑀁, 𑀢𑀲𑁆𑀲 𑀫𑁂 𑀇𑀫𑀁 𑀘𑀻𑀯𑀭𑀁 𑀕𑀳𑀺𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀫𑀳𑀸𑀧𑀣𑀯𑀻 𑀫𑀳𑀸𑀭𑀯𑀁 𑀯𑀺𑀭𑀯𑀫𑀸𑀦𑀸 𑀓𑀫𑁆𑀧𑀺𑀢𑁆𑀣, 𑀆𑀓𑀸𑀲𑀁 𑀢𑀝𑀢𑀝𑀸𑀬𑀺, 𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼 ‘‘𑀇𑀫𑀁 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦 𑀚𑀸𑀢𑀺𑀆𑀭𑀜𑁆𑀜𑀺𑀓𑁂𑀦 𑀚𑀸𑀢𑀺𑀏𑀓𑀸𑀲𑀦𑀺𑀓𑁂𑀦 𑀚𑀸𑀢𑀺𑀲𑀧𑀤𑀸𑀦𑀘𑀸𑀭𑀺𑀓𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀢𑁆𑀯𑀁 𑀇𑀫𑀲𑁆𑀲 𑀘𑀻𑀯𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. 𑀣𑁂𑀭𑁄𑀧𑀺 𑀅𑀢𑁆𑀢𑀦𑀸 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺. 𑀲𑁄 𑀢𑀁 𑀅𑀢𑀓𑁆𑀓𑀬𑀺𑀢𑁆𑀯𑀸 ‘‘𑀅𑀳𑀫𑁂𑀢𑀁 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑁂𑀦 𑀲𑀼𑀕𑀢𑀘𑀻𑀯𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀓𑀸𑀫𑁄 ‘‘𑀥𑀸𑀭𑁂𑀲𑁆𑀲𑀸𑀫𑀳𑀁 𑀪𑀦𑁆𑀢𑁂’’𑀢𑀺 𑀆𑀳. 𑀧𑀝𑀺𑀧𑀚𑁆𑀚𑀺𑀦𑁆𑀢𑀺 𑀧𑀝𑀺𑀧𑀦𑁆𑀦𑁄𑀲𑀺𑀁. 𑀏𑀯𑀁 𑀧𑀦 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀣𑁂𑀭𑁂𑀦 𑀧𑀸𑀭𑀼𑀢𑀘𑀻𑀯𑀭𑀁 𑀪𑀕𑀯𑀸 𑀧𑀸𑀭𑀼𑀧𑀺, 𑀲𑀢𑁆𑀣𑀼 𑀘𑀻𑀯𑀭𑀁 𑀣𑁂𑀭𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀦𑁆𑀦𑀤𑀦𑁆𑀢𑀻 𑀓𑀫𑁆𑀧𑀺𑀢𑁆𑀣.

𑀲𑀸𑀡𑀸𑀦𑀺 ¶ 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀫𑀢𑀓𑀴𑁂𑀯𑀭𑀁 𑀧𑀭𑀺𑀯𑁂𑀞𑁂𑀢𑁆𑀯𑀸 𑀙𑀟𑁆𑀟𑀺𑀢𑀸𑀦𑀺 𑀢𑀼𑀫𑁆𑀩𑀫𑀢𑁆𑀢𑁂 𑀓𑀺𑀫𑀻 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀳𑀺𑀢𑀸𑀦𑀺 𑀲𑀸𑀡𑀯𑀸𑀓𑀫𑀬𑀸𑀦𑀺 𑀧𑀁𑀲𑀼𑀓𑀽𑀮𑀘𑀻𑀯𑀭𑀸𑀦𑀺. 𑀭𑀣𑀺𑀓𑀲𑀼𑀲𑀸𑀦𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀁𑀲𑀽𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀢𑁂𑀲𑀼 𑀧𑀁𑀲𑀼𑀓𑀽𑀮𑀫𑀺𑀯𑀸𑀢𑀺 𑀧𑀁𑀲𑀼𑀓𑀽𑀮𑀁. 𑀅𑀣 𑀯𑀸 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀦𑁆𑀢𑀺 𑀧𑀁𑀲𑀼𑀓𑀽𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀩𑁆𑀩𑀲𑀦𑀸𑀦𑀻𑀢𑀺 𑀦𑀺𑀝𑁆𑀞𑀺𑀢𑀯𑀲𑀦𑀓𑀺𑀘𑁆𑀘𑀸𑀦𑀺, 𑀧𑀭𑀺𑀪𑁄𑀕𑀚𑀺𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 ‘‘𑀓𑀺𑀜𑁆𑀘𑀸𑀧𑀺 𑀏𑀓𑀫𑁂𑀯 𑀢𑀁 𑀘𑀻𑀯𑀭𑀁, 𑀅𑀦𑁂𑀓𑀸𑀯𑀬𑀯𑀢𑁆𑀢𑀸 𑀧𑀦 𑀩𑀳𑀼𑀯𑀘𑀦𑀁 𑀓𑀢’’𑀦𑁆𑀢𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑀸 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀲𑁆𑀲 𑀘-𑀲𑀤𑁆𑀤𑀲𑁆𑀲 𑀧𑀬𑁄𑀕𑁂 𑀓𑀸𑀫𑀸𑀘𑀸𑀭𑀢𑁆𑀢𑀸 ‘‘𑀅𑀢𑁆𑀢𑀦𑀸’’𑀢𑀺 𑀦 𑀯𑀼𑀢𑁆𑀢𑀁. ‘‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁, 𑀓𑀲𑁆𑀲𑀧, 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀻’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑀸𑀯 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁄 𑀯𑀺𑀜𑁆𑀜𑀸𑀬𑀢𑀺, 𑀦𑀸𑀜𑁆𑀜𑁂𑀦. 𑀦 𑀳𑀺 𑀓𑁂𑀯𑀮𑀁 𑀲𑀤𑁆𑀤𑀢𑁄𑀬𑁂𑀯 𑀲𑀩𑁆𑀩𑀢𑁆𑀣 𑀅𑀢𑁆𑀣𑀦𑀺𑀘𑁆𑀙𑀬𑁄 𑀪𑀯𑀺𑀲𑁆𑀲𑀢𑀺 𑀅𑀢𑁆𑀣𑀧𑀓𑀭𑀡𑀸𑀤𑀺𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀲𑁆𑀲 𑀦𑀺𑀬𑀫𑁂𑀢𑀩𑁆𑀩𑀢𑁆𑀢𑀸. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦𑁂𑀢𑁆𑀣 𑀇𑀤𑀁 𑀯𑀼𑀢𑁆𑀢𑀁 ‘‘𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸𑀢𑀺 𑀇𑀥 𑀅𑀢𑁆𑀢𑀦𑀸𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀘𑀻𑀯𑀭𑁂 𑀅𑀢𑁆𑀢𑀦𑀸 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀬𑀲𑁆𑀲 ¶ 𑀬𑁂𑀦 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑀫𑁆𑀧𑀺 𑀘 𑀢𑀲𑁆𑀲 𑀢𑀁;

𑀅𑀢𑁆𑀣𑀢𑁄 𑀳𑁆𑀬𑀲𑀫𑀸𑀦𑀸𑀦𑀁, 𑀆𑀲𑀦𑁆𑀦𑀢𑁆𑀢𑀫𑀓𑀸𑀭𑀡’’𑀦𑁆𑀢𑀺.

𑀅𑀣 𑀯𑀸 𑀪𑀕𑀯𑀢𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀪𑀕𑀯𑀢𑀸 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀻𑀬𑀁 𑀏𑀓𑀲𑁆𑀲𑀧𑀺 𑀓𑀭𑀡𑀦𑀺𑀤𑁆𑀤𑁂𑀲𑀲𑁆𑀲 𑀲𑀳𑀬𑁄𑀕𑀓𑀢𑁆𑀢𑀼𑀢𑁆𑀣𑀚𑁄𑀢𑀓𑀢𑁆𑀢𑀲𑀫𑁆𑀪𑀯𑀢𑁄𑀢𑀺. 𑀲𑀩𑁆𑀩𑀢𑁆𑀣 ‘‘𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀓𑀸𑀭𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀫𑀸𑀦𑀁 𑀥𑀸𑀭𑀡𑀫𑁂𑀢𑀲𑁆𑀲𑀸𑀢𑀺 𑀲𑀸𑀥𑀸𑀭𑀡𑁄, 𑀧𑀭𑀺𑀪𑁄𑀕𑁄. 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀘𑁂𑀯 𑀲𑀫𑀲𑀫𑀝𑁆𑀞𑀧𑀦𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀤𑀸𑀦𑀺 (𑀲𑀁. 𑀦𑀺. 𑁨.𑁧𑁫𑁨) 𑁋

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 ¶ 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀸𑀫𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀫𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁 ¶ , 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁 ¶ , 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺…𑀧𑁂… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀫𑀺, 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀫𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀫𑀺, 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀸𑀫𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂, 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀫𑀺 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂, 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀸𑀫𑀺 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁, 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀸𑀫𑀺 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄, 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀸𑀫𑀺 𑀧𑀭𑀺𑀫𑀚𑁆𑀚𑀸𑀫𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀫𑀺. 𑀓𑀲𑁆𑀲𑀧𑁄𑀧𑀺 𑀪𑀺𑀓𑁆𑀔𑀯𑁂 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀅𑀳𑀁 ¶ , 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀫𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸…𑀧𑁂… 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘.

‘‘𑀅𑀳𑀁 ¶ , 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺, 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀫𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀫𑀺, 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺, 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁, 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 ¶ 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 ¶ 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀓𑀲𑁆𑀲𑀧𑁄𑀧𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁨) 𑁋

𑀏𑀯𑀁 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑀢𑁆𑀣𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 𑀆𑀕𑀢𑀁 𑀧𑀸𑀴𑀺𑀫𑀺𑀫𑀁 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀆𑀤𑀺𑀕𑁆𑀕𑀳𑀡𑁂𑀦 𑀘 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺.

𑀢𑀢𑁆𑀣 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀻𑀢𑀺 𑀬𑀸𑀯𑀤𑁂𑀯 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁄𑀬𑁂𑀯 𑀳𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 ‘‘𑀬𑀸𑀯𑀤𑁂𑀢𑀺 𑀬𑀸𑀯𑀤𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀻𑀢𑀺 ¶ 𑀬𑀸𑀯𑀤𑁂𑀯 𑀇𑀘𑁆𑀙𑀸𑀫𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀢𑀢𑁆𑀣 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀬𑀸𑀯𑀤𑁂𑀯𑀸𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀬𑀸𑀯𑀤𑁂𑀢𑀺 𑀇𑀤𑀁 𑀧𑀤’’𑀦𑁆𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀬𑀸𑀯𑀤𑁂𑀯𑀸’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀬𑀸𑀦𑀺 𑀧𑀦 𑀇𑀢𑁄 𑀧𑀭𑀁 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀛𑀸𑀦𑀸𑀦𑀺, ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, ‘‘𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, ‘‘𑀅𑀦𑁂𑀓𑀯𑀺𑀳𑀺𑀢𑀁 ¶ 𑀇𑀤𑁆𑀥𑀺𑀯𑀺𑀥’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀜𑁆𑀜𑀸 𑀘 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀅𑀦𑀼𑀧𑀤𑀯𑀡𑁆𑀡𑀦𑀸𑀬 𑀘𑁂𑀯 𑀪𑀸𑀯𑀦𑀸𑀯𑀺𑀥𑀸𑀦𑁂𑀦 𑀘 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁯-𑁭𑁦) 𑀲𑀩𑁆𑀩𑀲𑁄 𑀯𑀺𑀢𑁆𑀣𑀸𑀭𑀺𑀢𑀁. 𑀇𑀥𑀸𑀧𑀺 𑀘 𑀯𑁂𑀭𑀜𑁆𑀚𑀓𑀡𑁆𑀟𑁂 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀛𑀸𑀦𑀸𑀦𑀺 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀢𑀢𑁆𑀣𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂𑀢𑀺 𑀏𑀢𑁆𑀣 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸 𑀦𑀸𑀫 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀪𑀸𑀯𑀢𑁄 𑀏𑀯𑀁𑀲𑀜𑁆𑀜𑀺𑀢𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀳 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀙𑀴𑀪𑀺𑀜𑁆𑀜𑀸 𑀦𑀸𑀫 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄𑀢𑀺 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀲𑀩𑁆𑀩𑀸 𑀅𑀪𑀺𑀜𑁆𑀜𑀸𑀬𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄. 𑀅𑀣 𑀯𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄, 𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄. 𑀲𑁄 𑀳𑀺 𑀯𑀺𑀦𑀸 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀧𑀓𑀢𑀺𑀬𑀸𑀯 𑀫𑀦𑀼𑀲𑁆𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑁄 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀯𑀳𑀢𑁄 𑀯𑀸 ‘‘𑀫𑀦𑀼𑀲𑁆𑀲𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀉𑀢𑁆𑀢𑀭𑀺 𑀧𑀦 𑀛𑀸𑀦𑀸𑀤𑀻𑀦𑀺 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸𑀢𑀺 𑀅𑀳𑀁 𑀬𑀢𑁆𑀢𑀓𑀁 𑀓𑀸𑀮𑀁 𑀬𑀢𑁆𑀢𑀓𑁂 𑀯𑀸 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂 𑀅𑀪𑀺𑀜𑁆𑀜𑀸𑀬𑁄 𑀘 𑀯𑀴𑀜𑁆𑀚𑁂𑀫𑀺, 𑀢𑀣𑀸 𑀓𑀲𑁆𑀲𑀧𑁄𑀧𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀓𑀢𑁆𑀯𑀸 𑀞𑀧𑀦𑁂𑀦. 𑀇𑀤𑀜𑁆𑀘 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀲𑀁𑀲𑀸𑀫𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀸 𑀯𑀺𑀬 𑀤𑁂𑀯𑀲𑀺𑀓𑀁 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀤𑀺𑀯𑀲𑁂𑀦 𑀯𑀸 𑀅𑀪𑀺𑀜𑁆𑀜𑀸𑀬𑁄 𑀯𑀴𑀜𑁆𑀚𑁂𑀢𑀺. 𑀏𑀢𑁆𑀣 𑀘 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑁋

‘‘𑀑𑀯𑀤 ¶ 𑀓𑀲𑁆𑀲𑀧 𑀪𑀺𑀓𑁆𑀔𑀽, 𑀓𑀭𑁄𑀳𑀺 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁, 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸, 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺 (𑀲𑀁. 𑀦𑀺. 𑁨.𑁧𑁪𑁯).

𑀏𑀯𑀫𑁆𑀧𑀺 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀸𑀦𑁂 𑀞𑀧𑁂𑀢𑀺𑀬𑁂𑀯, 𑀢𑀲𑁆𑀲 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀭 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 ‘‘𑀢𑀲𑁆𑀲𑀸𑀢𑀺 𑀢𑀲𑁆𑀲 𑀅𑀦𑀼𑀕𑁆𑀕𑀳𑀲𑁆𑀲𑀸’’𑀢𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀲𑁆𑀲 𑀫𑁂𑀢𑀺 𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑁄𑀢𑁆𑀣𑀓𑁂𑀲𑀼 𑀳𑀺 𑀓𑀢𑁆𑀣𑀘𑀺 ‘‘𑀢𑀲𑁆𑀲 𑀫𑁂’’𑀢𑀺 𑀧𑀸𑀞𑁄𑀬𑁂𑀯 𑀤𑀺𑀲𑁆𑀲𑀢𑀺, 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀺𑀁 𑀦𑀸𑀫 𑀢𑀲𑁆𑀲 𑀫𑁂 𑀆𑀡𑀡𑁆𑀬𑀁 𑀅𑀡𑀡𑀪𑀸𑀯𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀦𑀼 𑀫𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀯𑀲𑁂𑀦 𑀯𑀺𑀪𑀸𑀯𑁂𑀢𑀺. 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀘𑀻𑀯𑀭𑀲𑁆𑀲 𑀦𑀺𑀤𑀲𑁆𑀲𑀦𑀯𑀲𑁂𑀦 𑀓𑀯𑀘𑀲𑁆𑀲 𑀕𑀳𑀡𑀁 𑀓𑀢𑀁, 𑀲𑀫𑀸𑀧𑀢𑁆𑀢𑀺𑀬𑀸 ¶ 𑀦𑀺𑀤𑀲𑁆𑀲𑀦𑀯𑀲𑁂𑀦 𑀇𑀲𑁆𑀲𑀭𑀺𑀬𑀁 𑀕𑀳𑀺𑀢𑀁. 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀦𑁆𑀢𑀺 𑀓𑀼𑀮𑀯𑀁𑀲𑀲𑁆𑀲 𑀓𑀼𑀮𑀧𑁆𑀧𑀯𑁂𑀡𑀺𑀬𑀸 𑀧𑀢𑀺𑀝𑁆𑀞𑀸𑀧𑀓𑀁. ‘‘𑀫𑁂 𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄’’𑀢𑀺 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑀸 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄, 𑀫𑁂 𑀲𑀤𑁆𑀥𑀫𑁆𑀫𑀯𑀁𑀲𑀲𑁆𑀲 𑀧𑀢𑀺𑀝𑁆𑀞𑀸𑀧𑀓𑁄 𑀧𑀯𑀢𑁆𑀢𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 𑀅𑀦𑀼𑀕𑁆𑀕𑀳𑁂𑀲𑀻𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀏𑀓𑀲𑁆𑀫𑀺𑀁 𑀲𑀫𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀯𑀸𑀬𑀸𑀢𑀺 𑀧𑀸𑀯𑀸𑀦𑀕𑀭𑀢𑁄, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀼𑀲𑀺𑀦𑀸𑀭𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑁄𑀢𑀺 𑀘 𑀤𑀻𑀖𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀤𑀻𑀖𑀧𑀭𑀺𑀬𑀸𑀬𑁄 𑀳𑁂𑀢𑁆𑀣 𑀅𑀤𑁆𑀥𑀸𑀦𑀲𑀤𑁆𑀤𑁄. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀲𑀫𑀡𑀕𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀫𑀢𑁆𑀢𑁂𑀳𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑀁 𑀯𑀺𑀪𑀸𑀯𑁂𑀢𑀺. 𑀫𑀢𑁆𑀢-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀫𑀸𑀡𑀯𑀘𑀦𑁄 ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀇𑀥 𑀆𑀦𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀢𑁄 ¶ 𑀧𑀭𑀦𑁆𑀢𑀺 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁄 𑀧𑀭’’𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑀢𑁄 𑀧𑀭𑀦𑁆𑀢𑀺 𑀲𑀼𑀪𑀤𑁆𑀤𑀓𑀡𑁆𑀟𑀢𑁄 𑀧𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀯𑁂𑀢𑁆𑀣 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺 𑀦𑁄 𑀢𑀓𑁆𑀓𑁄. 𑀅𑀬𑀫𑁂𑀯 𑀳𑀺 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑁄, 𑀬𑀤𑀺𑀤𑀁 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀻’’𑀢𑀺𑀆𑀤𑀺, 𑀢𑀲𑁆𑀫𑀸 𑀉𑀲𑁆𑀲𑀸𑀳𑀚𑀦𑀦𑀢𑁄 𑀧𑀭𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑀲𑁆𑀲 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀧𑀸𑀴𑀺𑀓𑁆𑀓𑀫𑁄 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀁.

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀆𑀚𑀻𑀯𑀓𑁄 𑀓𑀼𑀲𑀺𑀦𑀸𑀭𑀸𑀬 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀢𑀁 𑀆𑀚𑀻𑀯𑀓𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀢𑀁 𑀆𑀚𑀻𑀯𑀓𑀁 𑀏𑀢𑀤𑀯𑁄𑀘𑀁 ‘𑀅𑀧𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’𑀢𑀺 ¶ ? ‘𑀆𑀫, 𑀆𑀯𑀼𑀲𑁄, 𑀚𑀸𑀦𑀸𑀫𑀺. 𑀅𑀚𑁆𑀚 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀢𑀢𑁄 𑀫𑁂 𑀇𑀤𑀁 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑀺𑀢𑀦𑁆𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺 𑀆𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀦𑁆𑀢𑀺, ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢’𑀦𑁆𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀯𑀻𑀢𑀭𑀸𑀕𑀸, 𑀢𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 ‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’’𑀢𑀺.

‘‘𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀁 𑁋 ‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀦𑀦𑁆𑀯𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣, 𑀆𑀯𑀼𑀲𑁄, 𑀮𑀩𑁆𑀪𑀸, 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

‘‘𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦, 𑀆𑀯𑀼𑀲𑁄, 𑀲𑀼𑀪𑀤𑁆𑀤𑁄 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀯𑀼𑀲𑁄 𑀲𑀼𑀪𑀤𑁆𑀤𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 ‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦, 𑀉𑀧𑀤𑁆𑀤𑀼𑀢𑀸 𑀘 𑀫𑀬𑀁 𑀳𑁄𑀫’ ‘𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺, ‘𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫, 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫, 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺. 𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀻𑀬𑀢𑀺, 𑀅𑀯𑀺𑀦𑀬𑁄 𑀧𑀼𑀭𑁂 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀻𑀬𑀢𑀺, 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀧𑀼𑀭𑁂 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺.

‘‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀓𑁂𑀦𑀽𑀦𑀧𑀜𑁆𑀘𑀅𑀭𑀳𑀦𑁆𑀢𑀲𑀢𑀸𑀦𑀺 𑀉𑀘𑁆𑀘𑀺𑀦𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 ‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄, 𑀅𑀪𑀩𑁆𑀩𑁄 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁, 𑀩𑀳𑀼 𑀘𑀸𑀦𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽’’’𑀢𑀺𑀆𑀤𑀺 (𑀘𑀽𑀴𑀯. 𑁪𑁩𑁭).

𑀢𑀲𑁆𑀫𑀸 𑀢𑀢𑁄 𑀧𑀭𑀦𑁆𑀢𑀺 𑀏𑀢𑁆𑀣 𑀲𑀼𑀪𑀤𑁆𑀤𑀓𑀡𑁆𑀟𑀢𑁄 𑀧𑀭𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀇𑀫𑀺𑀦𑀸 ‘‘𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫, 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀢𑀁 𑀧𑀭𑀺𑀬𑀦𑁆𑀢𑀁 ¶ 𑀲𑀼𑀪𑀤𑁆𑀤𑀓𑀡𑁆𑀟𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑁂𑀲𑀁 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑀧𑁆𑀧𑀯𑀢𑁆𑀢𑀁 𑀧𑀸𑀴𑀺𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀻𑀢𑀺 𑀏𑀢𑁆𑀣 𑀅𑀥𑀫𑁆𑀫𑁄 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀥𑀫𑁆𑀫𑁄. 𑀧𑀼𑀭𑁂 𑀤𑀺𑀧𑁆𑀧𑀢𑀻𑀢𑀺 𑀅𑀧𑀺 𑀦𑀸𑀫 𑀤𑀺𑀧𑁆𑀧𑀢𑀺. 𑀅𑀣 𑀯𑀸 𑀬𑀸𑀯 𑀅𑀥𑀫𑁆𑀫𑁄 𑀥𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑁂𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀦𑁆𑀦𑁂 𑀳𑀺 𑀅𑀦𑀸𑀕𑀢𑁂 𑀅𑀬𑀁 𑀧𑀼𑀭𑁂𑀲𑀤𑁆𑀤𑁄. 𑀤𑀺𑀧𑁆𑀧𑀢𑀻𑀢𑀺 ¶ 𑀤𑀺𑀧𑁆𑀧𑀺𑀲𑁆𑀲𑀢𑀺. 𑀧𑀼𑀭𑁂-𑀲𑀤𑁆𑀤𑀬𑁄𑀕𑁂𑀦 𑀳𑀺 𑀅𑀦𑀸𑀕𑀢𑀢𑁆𑀣𑁂 𑀅𑀬𑀁 𑀯𑀢𑁆𑀢𑀫𑀸𑀦𑀧𑀬𑁄𑀕𑁄 𑀬𑀣𑀸 ‘‘𑀧𑀼𑀭𑀸 𑀯𑀲𑁆𑀲𑀢𑀺 𑀤𑁂𑀯𑁄’’𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀡𑁆𑀡𑀬𑀦𑁆𑀢𑀺 ‘‘𑀧𑀼𑀭𑁂𑀢𑀺 𑀧𑀘𑁆𑀙𑀸 𑀅𑀦𑀸𑀕𑀢𑁂 𑀬𑀣𑀸 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀕𑀦𑁆𑀢𑀩𑁆𑀩𑀫𑀕𑁆𑀕𑁄 ‘𑀧𑀼𑀭𑁂’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀇𑀥 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀅𑀯𑀺𑀦𑀬𑁄𑀢𑀺 𑀧𑀳𑀸𑀦𑀯𑀺𑀦𑀬𑀲𑀁𑀯𑀭𑀯𑀺𑀦𑀬𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀯𑀺𑀦𑀬𑁄. ‘‘𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀇𑀢𑀺-𑀲𑀤𑁆𑀤𑁄𑀧𑀺 𑀏𑀢𑁆𑀣 𑀤𑀝𑁆𑀞𑀩𑁆𑀩𑁄, ‘‘𑀢𑀢𑁄 𑀧𑀭𑀁 𑀆𑀳𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 𑀇𑀢𑀺-𑀲𑀤𑁆𑀤𑁄 𑀦 𑀤𑀺𑀲𑁆𑀲𑀢𑀺, 𑀧𑀸𑀴𑀺𑀬𑀁 𑀧𑀦 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀜𑁆𑀘 𑀅𑀢𑁆𑀣𑁂𑀯 𑀇𑀢𑀺-𑀲𑀤𑁆𑀤𑁄.

𑀢𑁂𑀦 𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀘𑁆𑀘𑀺𑀦𑀦𑁂 𑀉𑀬𑁆𑀬𑁄𑀚𑁂𑀦𑁆𑀢𑀸 𑀳𑀺 𑀢𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀏𑀯𑀫𑀸𑀳𑀁𑀲𑀼. 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽𑀢𑀺 𑀲𑀗𑁆𑀕𑀻𑀢𑀺𑀬𑀸 𑀅𑀦𑀼𑀭𑀽𑀧𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀸𑀢𑀽𑀢𑀺 𑀅𑀢𑁆𑀣𑁄. ‘‘𑀲𑀓𑀮𑀦𑀯𑀗𑁆𑀕…𑀧𑁂… 𑀧𑀭𑀺𑀕𑁆𑀕𑀳𑁂𑀲𑀻’’𑀢𑀺 𑀏𑀢𑁂𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀧𑀭𑀺𑀬𑀦𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀲𑀢𑀺𑀧𑀺 𑀆𑀕𑀫𑀸𑀥𑀺𑀕𑀫𑀲𑀩𑁆𑀪𑀸𑀯𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀢𑁂𑀯𑀺𑀚𑁆𑀚𑀸𑀤𑀺𑀕𑀼𑀡𑀬𑀼𑀢𑁆𑀢𑀸𑀦𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀬𑀸 𑀉𑀓𑁆𑀓𑀁𑀲𑀕𑀢𑀢𑁆𑀢𑀸 𑀲𑀗𑁆𑀕𑀻𑀢𑀺𑀬𑀸 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑁂𑀢𑀺 𑀲𑀓𑀮𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀦𑀯𑀗𑁆𑀕𑀁 𑀏𑀢𑁆𑀣, 𑀏𑀢𑀲𑁆𑀲 𑀯𑀸 𑀅𑀢𑁆𑀣𑀻𑀢𑀺 𑀲𑀓𑀮𑀦𑀯𑀗𑁆𑀕𑀁, 𑀲𑀢𑁆𑀣𑀼𑀲𑀸𑀲𑀦𑀁. 𑀅𑀢𑁆𑀣𑀓𑀸𑀫𑁂𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀧𑀼𑀭𑀺𑀲𑀢𑁆𑀢𑀧𑀭𑀺𑀬𑀢𑁆𑀢𑀪𑀸𑀯𑀢𑁄 𑀘 𑀧𑀭𑀺𑀬𑀢𑁆𑀢𑀻𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀲𑀗𑁆𑀔𑀸𑀢𑀁 𑀧𑀭𑀺𑀬𑀢𑁆𑀢𑀺𑀁 𑀥𑀸𑀭𑁂𑀦𑁆𑀢𑀻𑀢𑀺 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑀸, 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀘 𑀅𑀯𑀺𑀳𑀢𑀢𑁆𑀢𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀯𑀸 𑀚𑀦𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀤𑀼𑀯𑀺𑀥𑀸 𑀧𑀼𑀣𑀼𑀚𑁆𑀚𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀢𑀺. 𑀢𑀢𑁆𑀣 𑀬𑁂𑀲𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀥𑀸𑀭𑀡𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀦𑀢𑁆𑀣𑀺, 𑀢𑁂 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸. 𑀬𑁂𑀲𑀁 𑀢𑀸𑀦𑀺 𑀅𑀢𑁆𑀣𑀺, 𑀢𑁂 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸. 𑀢𑁂 𑀇𑀥 ‘‘𑀧𑀼𑀣𑀼𑀚𑁆𑀚𑀦𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀫𑀣𑀪𑀸𑀯𑀦𑀸𑀲𑀺𑀦𑁂𑀳𑀸𑀪𑀸𑀯𑁂𑀦 𑀲𑀼𑀓𑁆𑀔𑀸 𑀮𑀽𑀔𑀸 𑀅𑀲𑀺𑀦𑀺𑀤𑁆𑀥𑀸 𑀯𑀺𑀧𑀲𑁆𑀲𑀦𑀸 𑀏𑀢𑁂𑀲𑀦𑁆𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸.

𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂𑀢𑀺 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀧𑀺𑀝𑀓𑀁, 𑀢𑀺𑀧𑀺𑀝𑀓𑀲𑀗𑁆𑀔𑀸𑀢𑀁 𑀦𑀯𑀗𑁆𑀕𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑀁 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀁 𑀥𑀸𑀭𑁂𑀦𑁆𑀢𑀻𑀢𑀺 𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑀸, 𑀢𑀸𑀤𑀺𑀲𑁂𑀢𑀺 ¶ 𑀅𑀢𑁆𑀣𑁄. 𑀅𑀦𑀼 𑀅𑀦𑀼 𑀢𑀁𑀲𑀫𑀗𑁆𑀕𑀻𑀦𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀦𑀼𑀪𑀸𑀯𑁄, 𑀅𑀦𑀼𑀪𑀸𑀯𑁄 ¶ 𑀏𑀯 𑀆𑀦𑀼𑀪𑀸𑀯𑁄, 𑀧𑀪𑀸𑀯𑁄. 𑀫𑀳𑀦𑁆𑀢𑁄 𑀆𑀦𑀼𑀪𑀸𑀯𑁄 𑀬𑁂𑀲𑀁 𑀢𑁂 𑀫𑀳𑀸𑀦𑀼𑀪𑀸𑀯𑀸. 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑁂𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀬𑁂𑀯 𑀢𑁂𑀯𑀺𑀚𑁆𑀚𑀸, 𑀢𑀸 𑀆𑀤𑀺 𑀬𑁂𑀲𑀁 𑀙𑀴𑀪𑀺𑀜𑁆𑀜𑀸𑀤𑀻𑀦𑀁 𑀢𑁂 𑀢𑁂𑀯𑀺𑀚𑁆𑀚𑀸𑀤𑀬𑁄, 𑀢𑁂 𑀪𑁂𑀤𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀪𑀺𑀦𑁆𑀦𑀸 𑀏𑀢𑁂𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸, 𑀔𑀻𑀡𑀸𑀲𑀯𑀸, 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑁂𑀯𑀺𑀚𑁆𑀚𑁄, 𑀲𑁄 𑀆𑀤𑀺 𑀬𑁂𑀲𑀁 𑀙𑀴𑀪𑀺𑀜𑁆𑀜𑀸𑀤𑀻𑀦𑀁 𑀢𑁂 𑀢𑁂𑀯𑀺𑀚𑁆𑀚𑀸𑀤𑀬𑁄, 𑀢𑁂 𑀪𑁂𑀤𑀸 𑀬𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀢𑁂 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸, 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀬𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀬𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀇𑀤𑀁 ‘‘𑀅𑀣 𑀔𑁄 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁩𑁭) 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀲𑁆𑀲 𑀧𑀦𑀸𑀢𑀺 𑀓𑀲𑁆𑀫𑀸 𑀧𑀦. 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄, 𑀅𑀣 𑀯𑀸 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀸, 𑀲𑀸𑀬𑁂𑀯 𑀢𑀲𑁆𑀲 𑀲𑀻𑀮𑀦𑁆𑀢𑀺 𑀲𑁂𑀓𑁆𑀔𑁄. 𑀲𑁄 𑀳𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀘 𑀢𑀤𑀥𑀺𑀫𑀼𑀢𑁆𑀢𑀢𑁆𑀢𑀸 𑀘 𑀏𑀓𑀦𑁆𑀢𑁂𑀦 𑀲𑀺𑀓𑁆𑀔𑀦𑀲𑀻𑀮𑁄 𑀦 𑀅𑀲𑁂𑀓𑁆𑀔𑁄 𑀯𑀺𑀬 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀢𑀢𑁆𑀣 𑀧𑀝𑀺𑀧𑀲𑁆𑀲𑀤𑁆𑀥𑀼𑀲𑁆𑀲𑀸𑀳𑁄, 𑀦𑀸𑀧𑀺 𑀯𑀺𑀲𑁆𑀲𑀝𑁆𑀞𑀲𑀺𑀓𑁆𑀔𑁄 𑀧𑀘𑀼𑀭𑀚𑀦𑁄 𑀯𑀺𑀬 𑀢𑀢𑁆𑀣 𑀅𑀦𑀥𑀺𑀫𑀼𑀢𑁆𑀢𑁄. 𑀅𑀣 𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄, 𑀢𑀢𑁆𑀣 𑀯𑀸 𑀪𑀯𑁄𑀢𑀺 𑀲𑁂𑀓𑁆𑀔𑁄. 𑀅𑀣 𑀯𑀸 𑀇𑀓𑁆𑀔𑀢𑀺 𑀏𑀢𑀸𑀬𑀸𑀢𑀺 𑀇𑀓𑁆𑀔𑀸, 𑀫𑀕𑁆𑀕𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀳 𑀇𑀓𑁆𑀔𑀸𑀬𑀸𑀢𑀺 𑀲𑁂𑀓𑁆𑀔𑁄. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀲𑁆𑀲 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀲𑀳 𑀓𑀭𑀡𑀻𑀬𑁂𑀦𑀸𑀢𑀺 𑀲𑀓𑀭𑀡𑀻𑀬𑁄. 𑀅𑀲𑁆𑀲𑀸𑀢𑀺 𑀅𑀦𑁂𑀦. 𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀦𑀦𑀼 𑀘 𑁋

‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄;

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄’’𑀢𑀺. (𑀣𑁂𑀭𑀕𑀸. 𑁧𑁦𑁨𑁭) 𑁋

𑀯𑀼𑀢𑁆𑀢𑀢𑁆𑀢𑀸 𑀓𑀣𑀫𑁂𑀢𑀁 𑀬𑀼𑀚𑁆𑀚𑀢𑀻𑀢𑀺? 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄𑀢𑀺 𑀯𑀼𑀢𑁆𑀢𑀫𑁆𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄. 𑀩𑀳𑀼𑀓𑀸𑀭𑀢𑁆𑀢𑀸𑀢𑀺 𑀩𑀳𑀼𑀉𑀧𑀓𑀸𑀭𑀢𑁆𑀢𑀸. 𑀉𑀧𑀓𑀸𑀭𑀯𑀘𑀦𑁄 𑀳𑁂𑀢𑁆𑀣 𑀓𑀸𑀭𑀲𑀤𑁆𑀤𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬.

𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄𑀢𑀺 𑀅𑀢𑀺𑀯𑀺𑀬 𑀯𑀺𑀲𑁆𑀲𑀸𑀲𑀺𑀓𑁄. 𑀦𑀦𑁆𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁, ‘‘𑀑𑀯𑀤𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀦𑀯𑀓𑀸𑀬 𑀧𑀭𑀺𑀲𑀸𑀬 𑀯𑀺𑀩𑁆𑀪𑀫𑀦𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀏𑀯𑀫𑀸𑀳 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺. 𑀢𑀣𑀸 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀲𑀢𑁆𑀣𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀢𑀼𑀫𑁆𑀳𑁂 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀕𑀳𑁂 𑀲𑀦𑁆𑀦𑀺𑀧𑀢𑀣𑀸’’𑀢𑀺 𑀯𑀢𑁆𑀯𑀸 ¶ 𑀅𑀢𑁆𑀢𑀦𑀸 𑀭𑀸𑀚𑀕𑀳𑀁 𑀕𑀢𑁄. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀤𑀓𑁆𑀔𑀺𑀡𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀢𑀺𑀁𑀲𑀫𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀬𑁂𑀪𑀼𑀬𑁆𑀬𑁂𑀦 𑀓𑀼𑀫𑀸𑀭𑀪𑀽𑀢𑀸 𑀏𑀓𑀯𑀲𑁆𑀲𑀺𑀓𑀤𑀼𑀯𑀲𑁆𑀲𑀺𑀓𑀪𑀺𑀓𑁆𑀔𑀽 𑀘𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀘 𑀯𑀺𑀩𑁆𑀪𑀫𑀺𑀁𑀲𑀼. 𑀓𑀲𑁆𑀫𑀸 𑀧𑀦𑁂𑀢𑁂 𑀧𑀩𑁆𑀩𑀚𑀺𑀢𑀸, 𑀓𑀲𑁆𑀫𑀸 𑀯𑀺𑀩𑁆𑀪𑀫𑀺𑀁𑀲𑀽𑀢𑀺? 𑀢𑁂𑀲𑀁 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼𑀯𑀺𑀲𑁆𑀲𑀸𑀲𑀺𑀓𑁄 𑀅𑀝𑁆𑀞 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫, 𑀲𑁄 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀫𑀬𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀢𑀸𑀯 𑀓𑀸𑀭𑀡𑁂𑀦 𑀦𑁂𑀲𑀁 𑀜𑀸𑀢𑀓𑀸 𑀢𑁂 𑀧𑀩𑁆𑀩𑀸𑀚𑁂𑀲𑀼𑀁. 𑀲𑀢𑁆𑀣𑀭𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑁂𑀲𑀁 𑀲𑀸 𑀧𑀢𑁆𑀣𑀦𑀸 𑀉𑀧𑀘𑁆𑀙𑀺𑀦𑁆𑀦𑀸, 𑀅𑀣 𑀦𑁂 𑀏𑀓𑀤𑀺𑀯𑀲𑁂𑀦𑁂𑀯 𑀉𑀧𑁆𑀧𑀩𑁆𑀩𑀸𑀚𑁂𑀲𑀼𑀁.

𑀅𑀣 𑀆𑀦𑀦𑁆𑀤𑀢𑁆𑀣𑁂𑀭𑀁 𑀤𑀓𑁆𑀔𑀺𑀡𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀭𑀸𑀚𑀕𑀳𑀫𑀸𑀕𑀢𑀁 𑀤𑀺𑀲𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀏𑀯𑀫𑀸𑀳 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 𑁋

‘‘𑀅𑀣 𑀓𑀺𑀜𑁆𑀘𑀭𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺, 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀑𑀮𑀼𑀚𑁆𑀚𑀢𑀺 𑀔𑁄 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀭𑀺𑀲𑀸, 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸, 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺.

‘‘𑀅𑀧𑀺 𑀫𑁂 𑀪𑀦𑁆𑀢𑁂 𑀓𑀲𑁆𑀲𑀧 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀸𑀦𑀺 𑀚𑀸𑀢𑀸𑀦𑀺, 𑀅𑀣 𑀘 𑀧𑀦 𑀫𑀬𑀁 𑀅𑀚𑁆𑀚𑀸𑀧𑀺 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸𑀢𑀺. 𑀢𑀣𑀸 𑀳𑀺 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺, 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀑𑀮𑀼𑀚𑁆𑀚𑀢𑀺 𑀔𑁄 ¶ 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀭𑀺𑀲𑀸, 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸, 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪).

𑀢𑀢𑁆𑀣 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁪) 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂𑀘𑀭𑀲𑀻𑀢𑀺 𑀲𑀲𑁆𑀲𑀁 𑀖𑀸𑀢𑁂𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻𑀢𑀺 𑀓𑀼𑀮𑀸𑀦𑀺 𑀉𑀧𑀖𑀸𑀢𑁂𑀦𑁆𑀢𑁄 𑀯𑀺𑀬 𑀳𑀦𑀦𑁆𑀢𑁄 𑀯𑀺𑀬 𑀆𑀳𑀦𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀑𑀮𑀼𑀚𑁆𑀚𑀢𑀻𑀢𑀺 𑀧𑀮𑀼𑀚𑁆𑀚𑀢𑀺 𑀪𑀺𑀚𑁆𑀚𑀢𑀺. 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸𑀢𑀺, 𑀆𑀯𑀼𑀲𑁄, 𑀏𑀯𑀁 𑀏𑀢𑁂 𑀢𑀼𑀬𑁆𑀳𑀁 𑀧𑀸𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀦𑀯𑀓𑀸 𑀏𑀓𑀯𑀲𑁆𑀲𑀺𑀓𑀤𑀼𑀯𑀲𑁆𑀲𑀺𑀓𑀤𑀳𑀭𑀸 𑀘𑁂𑀯 𑀲𑀸𑀫𑀡𑁂𑀭𑀸 𑀘 ¶ 𑀧𑀮𑀼𑀚𑁆𑀚𑀦𑁆𑀢𑀺. 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀅𑀬𑀁 𑀓𑀼𑀫𑀸𑀭𑀓𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀯𑀢 𑀚𑀸𑀦𑀸𑀢𑀻𑀢𑀺 𑀣𑁂𑀭𑀁 𑀢𑀚𑁆𑀚𑁂𑀦𑁆𑀢𑁄 𑀆𑀳. 𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸𑀢𑀺 𑀓𑀼𑀫𑀸𑀭𑀓𑀯𑀸𑀤𑀢𑁄 𑀦 𑀫𑀼𑀘𑁆𑀘𑀸𑀫. 𑀢𑀣𑀸 𑀳𑀺 𑀧𑀦 𑀢𑁆𑀯𑀦𑁆𑀢𑀺 𑀇𑀤𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩𑀢𑀸𑀬 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀢𑁆𑀯𑀁 𑀇𑀫𑁂𑀳𑀺 𑀦𑀯𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀭𑀳𑀺𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀲𑀺, 𑀢𑀲𑁆𑀫𑀸 𑀓𑀼𑀫𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀘𑀭𑀦𑁆𑀢𑁄 ‘‘𑀓𑀼𑀫𑀸𑀭𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀲𑀻𑀢𑀺.

‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀤𑀧𑀽𑀭𑀡𑁂. 𑀯𑀸-𑀲𑀤𑁆𑀤𑁄 𑀳𑀺 𑀉𑀧𑀫𑀸𑀦𑀲𑀫𑀼𑀘𑁆𑀘𑀬𑀲𑀁𑀲𑀬𑀯𑀯𑀲𑁆𑀲𑀕𑁆𑀕𑀧𑀤𑀧𑀽𑀭𑀡𑀯𑀺𑀓𑀧𑁆𑀧𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁬𑁩) 𑀉𑀧𑀫𑀸𑀦𑁂 𑀤𑀺𑀲𑁆𑀲𑀢𑀺, 𑀲𑀤𑀺𑀲𑀪𑀸𑀯𑁂𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁨𑁧𑁩) 𑀲𑀫𑀼𑀘𑁆𑀘𑀬𑁂. ‘‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁬) 𑀲𑀁𑀲𑀬𑁂. ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁮𑁧) 𑀯𑀯𑀲𑁆𑀲𑀕𑁆𑀕𑁂. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁭𑁦; 𑀲𑀁. 𑀦𑀺. 𑁨.𑁧𑁩) 𑀯𑀺𑀓𑀧𑁆𑀧𑁂𑀢𑀺. 𑀇𑀥 𑀧𑀦 𑀧𑀤𑀧𑀽𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯 𑀘 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀯𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁂𑀦 ‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫𑁪) 𑀧𑀤𑀧𑀽𑀭𑀡𑁂’’𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁪) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀅𑀬𑀁 𑀓𑀼𑀫𑀸𑀭𑀓𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀯𑀢 𑀚𑀸𑀦𑀸𑀢𑀻𑀢𑀺 𑀣𑁂𑀭𑀁 𑀢𑀚𑁆𑀚𑁂𑀦𑁆𑀢𑁄 𑀆𑀳𑀸’’𑀢𑀺. 𑀏𑀢𑁆𑀣𑀸𑀧𑀺 𑀯𑀢𑀸𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀦 𑀯𑀸𑀬𑀦𑁆𑀢𑀺 𑀏𑀢𑁆𑀣 𑀯𑀸𑀢𑀺 𑀯𑀺𑀪𑀸𑀲𑀸, 𑀅𑀜𑁆𑀜𑀸𑀲𑀺𑀧𑀺 𑀦 𑀅𑀜𑁆𑀜𑀸𑀲𑀺𑀧𑀻𑀢𑀺 𑀅𑀢𑁆𑀣𑁄’’𑀢𑀺 ¶ . 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑁂𑀢𑁆𑀣 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦𑀸𑀜𑁆𑀜𑀸𑀲𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀸𑀢𑀺 𑀏𑀯𑀁 𑀲𑀢𑀺. 𑀙𑀦𑁆𑀤𑀸𑀕𑀫𑀦𑀁 𑀯𑀺𑀬𑀸𑀢𑀺 𑀏𑀢𑁆𑀣 𑀙𑀦𑁆𑀤𑀸 𑀆𑀕𑀫𑀦𑀁 𑀯𑀺𑀬𑀸𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄, 𑀙𑀦𑁆𑀤𑁂𑀦 𑀆𑀕𑀫𑀦𑀁 𑀧𑀯𑀢𑁆𑀢𑀦𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄, 𑀙𑀦𑁆𑀤𑁂𑀦 𑀅𑀓𑀢𑁆𑀢𑀩𑁆𑀩𑀓𑀭𑀡𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀦𑁆𑀤𑀁 𑀯𑀸 𑀆𑀕𑀘𑁆𑀙𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦𑀸𑀢𑀺 𑀙𑀦𑁆𑀤𑀸𑀕𑀫𑀦𑀁, 𑀢𑀣𑀸 𑀧𑀯𑀢𑁆𑀢𑁄 𑀅𑀧𑀸𑀬𑀕𑀫𑀦𑀻𑀬𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀅𑀣 𑀯𑀸 𑀅𑀦𑀦𑀼𑀭𑀽𑀧𑀁 𑀕𑀫𑀦𑀁 𑀅𑀕𑀫𑀦𑀁, 𑀙𑀦𑁆𑀤𑁂𑀦 𑀅𑀕𑀫𑀦𑀁 𑀙𑀦𑁆𑀤𑀸𑀕𑀫𑀦𑀁, 𑀙𑀦𑁆𑀤𑁂𑀦 𑀲𑀺𑀦𑁂𑀳𑁂𑀦 𑀅𑀦𑀦𑀼𑀭𑀽𑀧𑀁 𑀕𑀫𑀦𑀁 𑀧𑀯𑀢𑁆𑀢𑀦𑀁 𑀅𑀓𑀢𑁆𑀢𑀩𑁆𑀩𑀓𑀭𑀡𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀢𑀺 𑀅𑀲𑁂𑀓𑁆𑀔𑀪𑀽𑀢𑀸 𑀧𑀝𑀺𑀲𑀫𑁆𑀪𑀺𑀤𑀸 𑀅𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸, 𑀢𑀁 𑀧𑀢𑁆𑀢𑁂, 𑀧𑀝𑀺𑀮𑀤𑁆𑀥𑀅𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑁂𑀢𑀺 𑀅𑀢𑁆𑀣𑁄. 𑀅𑀦𑀼𑀫𑀢𑀺𑀬𑀸𑀢𑀺 𑀅𑀦𑀼𑀜𑁆𑀜𑀸𑀬, 𑀬𑀸𑀘𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄’’𑀢𑀺 𑀇𑀤𑀁 𑀦 𑀲𑁂𑀓𑁆𑀔𑀸𑀦𑀁 𑀅𑀕𑀢𑀺𑀕𑀫𑀦𑀲𑀩𑁆𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀅𑀲𑁂𑀓𑁆𑀔𑀸𑀦𑀁𑀬𑁂𑀯 𑀧𑀦 𑀉𑀘𑁆𑀘𑀺𑀦𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀞𑀫𑀫𑀕𑁆𑀕𑁂𑀦𑁂𑀯 𑀳𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 ¶ 𑀲𑁂𑀓𑁆𑀔𑁄, 𑀢𑀣𑀸𑀧𑀺 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀧𑀦 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄, 𑀢𑀣𑀸𑀧𑀺 𑀅𑀪𑀩𑁆𑀩𑁄 𑀅𑀕𑀢𑀺𑀁 𑀕𑀦𑁆𑀢𑀼𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀪𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀦 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀢𑀲𑁆𑀲 𑀅𑀭𑀳𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀚𑁆𑀚𑀫𑀸𑀦𑁂 𑀕𑀼𑀡𑁂 𑀓𑀣𑁂𑀦𑁆𑀢𑀺. 𑀢𑀢𑁆𑀣 𑀙𑀦𑁆𑀤𑀸𑀢𑀺 𑀙𑀦𑁆𑀤𑁂𑀦, 𑀲𑀺𑀦𑁂𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀕𑀢𑀺𑀁 𑀕𑀦𑁆𑀢𑀼𑀦𑁆𑀢𑀺 𑀅𑀕𑀦𑁆𑀢𑀩𑁆𑀩𑀁 𑀕𑀦𑁆𑀢𑀼𑀁, 𑀅𑀓𑀢𑁆𑀢𑀩𑁆𑀩𑀁 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀪𑀡𑁆𑀟𑀪𑀸𑀚𑀦𑀻𑀬𑁂 𑀘 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀘 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀪𑀡𑁆𑀟𑀪𑀸𑀚𑀦𑀻𑀬𑁂 𑀢𑀸𑀯 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀫𑀦𑀸𑀧𑁂 𑀪𑀡𑁆𑀟𑁂 𑀲𑀫𑁆𑀧𑀢𑁆𑀢𑁂 𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀫𑀦𑀸𑀧𑀁 𑀤𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀧𑀦 𑀅𑀪𑀸𑀭𑀪𑀽𑀢𑀸𑀦𑀁 𑀫𑀦𑀸𑀧𑁂 𑀪𑀡𑁆𑀟𑁂 𑀲𑀫𑁆𑀧𑀢𑁆𑀢𑁂 𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀫𑀦𑀸𑀧𑀁 𑀤𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀪𑀡𑁆𑀟𑁂𑀲𑀼 𑀪𑀸𑀚𑀦𑀻𑀬𑀯𑀢𑁆𑀣𑀼𑀜𑁆𑀘 𑀞𑀺𑀢𑀺𑀓𑀜𑁆𑀘 𑀅𑀚𑀸𑀦𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑀼𑀔𑀭𑀸𑀦𑀁 𑀯𑀸 𑀭𑀸𑀚𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀁 𑀯𑀸 ‘‘𑀇𑀫𑁂 𑀫𑁂 𑀅𑀫𑀦𑀸𑀧𑁂 𑀪𑀡𑁆𑀟𑁂 𑀤𑀺𑀦𑁆𑀦𑁂 𑀅𑀦𑀢𑁆𑀣𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀪𑀬𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀫𑀦𑀸𑀧𑀁 𑀤𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀏𑀯𑀁 𑀦 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀲𑀁 𑀢𑀼𑀮𑀸𑀪𑀽𑀢𑁄 𑀧𑀫𑀸𑀡𑀪𑀽𑀢𑁄 𑀫𑀚𑁆𑀛𑀢𑁆𑀢𑁄𑀯 𑀳𑀼𑀢𑁆𑀯𑀸 𑀬𑀁 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀢𑀤𑁂𑀯 𑀢𑀲𑁆𑀲 𑀤𑁂𑀢𑀺, 𑀅𑀬𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀦𑀸𑀫. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀧𑀦 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀲𑁆𑀲 𑀕𑀭𑀼𑀓𑀸𑀧𑀢𑁆𑀢𑀺𑀁 𑀮𑀳𑀼𑀓𑀸𑀧𑀢𑁆𑀢𑀺𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀇𑀢𑀭𑀲𑁆𑀲 𑀮𑀳𑀼𑀓𑀸𑀧𑀢𑁆𑀢𑀺𑀁 𑀕𑀭𑀼𑀓𑀸𑀧𑀢𑁆𑀢𑀺𑀁 ¶ 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀧𑀦 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀜𑁆𑀘 𑀅𑀚𑀸𑀦𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑀼𑀔𑀭𑀲𑁆𑀲 𑀯𑀸 𑀭𑀸𑀚𑀧𑀽𑀚𑀺𑀢𑀲𑁆𑀲 𑀯𑀸 ‘‘𑀅𑀬𑀁 𑀫𑁂 𑀕𑀭𑀼𑀓𑀁 𑀓𑀢𑁆𑀯𑀸 𑀆𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑀲𑁆𑀲 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀕𑀭𑀼𑀓𑀫𑁂𑀯 𑀮𑀳𑀼𑀓𑀸𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀲𑀩𑁆𑀩𑁂𑀲𑀁 𑀬𑀣𑀸𑀪𑀽𑀢𑀫𑁂𑀯 𑀓𑀣𑁂𑀲𑀺, 𑀅𑀬𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀕𑀢𑀺𑀕𑀫𑀦𑀁 𑀦 𑀕𑀘𑁆𑀙𑀢𑀺 𑀦𑀸𑀫. 𑀣𑁂𑀭𑁄𑀧𑀺 𑀢𑀸𑀤𑀺𑀲𑁄 𑀘𑀢𑀼𑀦𑁆𑀦𑀫𑁆𑀧𑀺 𑀅𑀕𑀢𑀺𑀕𑀫𑀦𑀸𑀦𑀁 𑀧𑀞𑀫𑀫𑀕𑁆𑀕𑁂𑀦𑁂𑀯 𑀧𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀕𑀸𑀬𑀦𑀯𑀲𑁂𑀦 𑀥𑀫𑁆𑀫𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀲𑀫𑁆𑀧𑀢𑁆𑀢𑁂 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀜𑁆𑀜𑀣𑀸 𑀅𑀓𑀣𑁂𑀢𑁆𑀯𑀸 𑀬𑀣𑀸𑀪𑀽𑀢𑀫𑁂𑀯 𑀓𑀣𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀪𑀩𑁆𑀩𑁄…𑀧𑁂… 𑀅𑀕𑀢𑀺𑀁 𑀕𑀦𑁆𑀢𑀼’’𑀦𑁆𑀢𑀺. 𑀧𑀭𑀺𑀬𑀢𑁆𑀢𑁄𑀢𑀺 𑀅𑀥𑀻𑀢𑁄, 𑀉𑀕𑁆𑀕𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀉𑀘𑁆𑀘𑀺𑀦𑀺𑀢𑁂𑀦𑀸𑀢𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀦. 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 𑀧𑀭𑀺𑀯𑀺𑀢𑀓𑁆𑀓𑀦𑀁 𑀅𑀳𑁄𑀲𑀺. 𑀭𑀸𑀚𑀕𑀳𑀁 𑀔𑁄 𑀫𑀳𑀸𑀕𑁄𑀘𑀭𑀦𑁆𑀢𑀺 𑀏𑀢𑁆𑀣 ‘‘𑀭𑀸𑀚𑀕𑀳𑀦𑁆𑀢𑀺 𑀭𑀸𑀚𑀕𑀳𑀲𑀸𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬 𑀕𑁄𑀘𑀭𑁄, 𑀪𑀺𑀓𑁆𑀔𑀸𑀘𑀭𑀡𑀝𑁆𑀞𑀸𑀦𑀁. 𑀲𑁄 𑀫𑀳𑀦𑁆𑀢𑁄 𑀅𑀲𑁆𑀲, 𑀏𑀢𑁆𑀣𑀸𑀢𑀺 𑀯𑀸 𑀫𑀳𑀸𑀕𑁄𑀘𑀭𑀁, 𑀭𑀸𑀚𑀕𑀳𑀁. 𑀣𑀸𑀯𑀭𑀓𑀫𑁆𑀫𑀦𑁆𑀢𑀺 𑀘𑀺𑀭𑀝𑁆𑀞𑀸𑀬𑀺𑀓𑀫𑁆𑀫𑀁. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀲𑀼𑀪𑀤𑁆𑀤𑀲𑀤𑀺𑀲𑁄. 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺 𑀦𑀺𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀸𑀯𑁂𑀲𑀻𑀢𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 ¶ 𑀲𑀫𑁆𑀫𑀦𑁆𑀦𑁂𑀬𑁆𑀬 ‘𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩’𑀦𑁆𑀢𑀺, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄, 𑀲𑀗𑁆𑀖𑁄 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀫𑁆𑀫𑀦𑁆𑀦𑀢𑀺 ‘𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩’𑀦𑁆𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀫𑁆𑀫𑀼𑀢𑀺 ‘𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩’𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸𑀦𑀺 𑀲𑀗𑁆𑀖𑁂𑀦 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 ‘𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 ¶ 𑀯𑀲𑀺𑀢𑀩𑁆𑀩’𑀦𑁆𑀢𑀺, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀘𑀽𑀴𑀯. 𑁪𑁩𑁭) 𑁋

𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀸𑀯𑁂𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩’’𑀦𑁆𑀢𑀺.

𑀅𑀬𑀁 𑀧𑀦 𑀓𑀫𑁆𑀫𑀯𑀸𑀘𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀏𑀓𑀯𑀻𑀲𑀢𑀺𑀫𑁂 𑀤𑀺𑀯𑀲𑁂 𑀓𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸) ‘‘𑀅𑀬𑀁 𑀧𑀦 𑀓𑀫𑁆𑀫𑀯𑀸𑀘𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀏𑀓𑀯𑀻𑀲𑀢𑀺𑀫𑁂 𑀤𑀺𑀯𑀲𑁂 𑀓𑀢𑀸. 𑀪𑀕𑀯𑀸 𑀳𑀺 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀧𑀘𑁆𑀘𑀽𑀲𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀣𑀲𑁆𑀲 𑀲𑀢𑁆𑀢𑀸𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼. 𑀏𑀯𑀁 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸 𑀦𑀸𑀫 𑀅𑀳𑁂𑀲𑀼𑀁. 𑀢𑀢𑁄 𑀲𑀢𑁆𑀢𑀸𑀳𑀁 𑀘𑀺𑀢𑀓𑀸𑀬 𑀅𑀕𑁆𑀕𑀺𑀦𑀸 𑀛𑀸𑀬𑀺, 𑀲𑀢𑁆𑀢𑀸𑀳𑀁 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑀲𑀸𑀮𑀸𑀬𑀁 𑀥𑀸𑀢𑀼𑀧𑀽𑀚𑀁 𑀓𑀭𑀺𑀁𑀲𑀽𑀢𑀺 𑀏𑀓𑀯𑀻𑀲𑀢𑀺 𑀤𑀺𑀯𑀲𑀸 𑀕𑀢𑀸. 𑀚𑁂𑀝𑁆𑀞𑀫𑀽𑀮𑀲𑀼𑀓𑁆𑀓𑀧𑀓𑁆𑀔𑀧𑀜𑁆𑀘𑀫𑀺𑀬𑀁 𑀧𑀦 𑀥𑀸𑀢𑀼𑀬𑁄 𑀪𑀸𑀚𑀬𑀺𑀁𑀲𑀼. 𑀏𑀢𑀲𑁆𑀫𑀺𑀁 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀓𑀢𑀁 𑀅𑀦𑀸𑀘𑀸𑀭𑀁 𑀆𑀭𑁄𑀘𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀅𑀬𑀁 𑀓𑀫𑁆𑀫𑀯𑀸𑀘𑀸 𑀓𑀢𑀸. 𑀇𑀫𑀜𑁆𑀘 𑀧𑀦 𑀓𑀫𑁆𑀫𑀯𑀸𑀘𑀁 𑀓𑀢𑁆𑀯𑀸 𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘𑀆𑀯𑀼𑀲𑁄 𑀇𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀘𑀢𑁆𑀢𑀸𑀮𑀻𑀲𑀤𑀺𑀯𑀲𑀸 𑀑𑀓𑀸𑀲𑁄, 𑀢𑀢𑁄 𑀧𑀭𑀁 𑀅𑀬𑀁 𑀦𑀸𑀫 𑀦𑁄 𑀧𑀮𑀺𑀩𑁄𑀥𑁄 𑀅𑀢𑁆𑀣𑀻𑀢𑀺 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀸, 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀬𑀲𑁆𑀲 𑀭𑁄𑀕𑀧𑀮𑀺𑀩𑁄𑀥𑁄 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀧𑀮𑀺𑀩𑁄𑀥𑁄 𑀯𑀸 𑀫𑀸𑀢𑀸𑀧𑀺𑀢𑀼𑀧𑀮𑀺𑀩𑁄𑀥𑁄 𑀯𑀸 𑀅𑀢𑁆𑀣𑀺, 𑀧𑀢𑁆𑀢𑀁 𑀯𑀸 𑀧𑀦 𑀧𑀘𑀺𑀢𑀩𑁆𑀩𑀁 𑀘𑀻𑀯𑀭𑀁 𑀯𑀸 𑀓𑀸𑀢𑀩𑁆𑀩𑀁, 𑀲𑁄 𑀢𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀭𑀡𑀻𑀬𑀁 𑀓𑀭𑁄𑀢𑀽’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀜𑁆𑀘𑀲𑀢𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀕𑀢𑁄, 𑀅𑀜𑁆𑀜𑁂𑀧𑀺 𑀫𑀳𑀸𑀣𑁂𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀁 𑀕𑀳𑁂𑀢𑁆𑀯𑀸 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 ¶ 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀢𑀼𑀓𑀸𑀫𑀸 𑀢𑀁 𑀢𑀁 𑀤𑀺𑀲𑀁 𑀧𑀓𑁆𑀓𑀦𑁆𑀢𑀸. 𑀧𑀼𑀡𑁆𑀡𑀢𑁆𑀣𑁂𑀭𑁄 𑀧𑀦 𑀲𑀢𑁆𑀢𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 ‘𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀆𑀕𑀢𑀸𑀕𑀢𑀁 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀻’𑀢𑀺 𑀓𑀼𑀲𑀺𑀦𑀸𑀭𑀸𑀬𑀫𑁂𑀯 𑀅𑀝𑁆𑀞𑀸𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀣𑀸 𑀧𑀼𑀩𑁆𑀩𑁂 𑀅𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲, 𑀏𑀯𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀧𑀺 𑀪𑀕𑀯𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀕𑀘𑁆𑀙𑀢𑁄 𑀧𑀦𑀲𑁆𑀲 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸’’𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 ¶ 𑀢𑀻𑀲𑀼 𑀲𑀢𑁆𑀢𑀸𑀳𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀏𑀓𑀯𑀻𑀲𑀢𑀺𑀫𑁂 𑀤𑀺𑀯𑀲𑁂 𑀇𑀫𑀁 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀣𑁂𑀭𑁄 𑀭𑀸𑀚𑀕𑀳𑀁 𑀧𑀓𑁆𑀓𑀦𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀦 𑀇𑀥 𑀫𑀗𑁆𑀕𑀮𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 (𑀔𑀼. 𑀧𑀸. 𑀅𑀝𑁆𑀞. 𑁫.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) ‘‘𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼 𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁? 𑀲𑀢𑁆𑀢𑀲𑀼 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀕𑀳𑀺𑀢𑁂𑀲𑀼 𑀢𑀤𑀯𑀺𑀦𑀸𑀪𑀸𑀯𑀢𑁄 𑀫𑀚𑁆𑀛𑁂 𑀘𑀺𑀢𑀓𑀸𑀬 𑀛𑀸𑀧𑀦𑀲𑀢𑁆𑀢𑀸𑀳𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀅𑀧𑁆𑀧𑀓𑀜𑁆𑀳𑀺 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀸𑀬𑁄 𑀅𑀧𑁆𑀧𑀓𑁂𑀦 𑀅𑀥𑀺𑀓𑁄𑀧𑀺 𑀅𑀦𑀥𑀺𑀓𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀟𑁆𑀠𑀫𑀸𑀲𑀢𑁄 𑀅𑀥𑀺𑀓𑁂𑀧𑀺 𑀧𑀜𑁆𑀘 𑀤𑀺𑀯𑀲𑁂 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀲𑀻𑀢𑀺𑀔𑀦𑁆𑀥𑀓𑀯𑀢𑁆𑀢𑀸𑀦𑀁 𑀓𑀢𑁆𑀣𑀘𑀺 𑀅𑀲𑀻𑀢𑀺𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀘𑀦𑀁 𑀯𑀺𑀬. 𑀢𑀣𑀸 𑀅𑀧𑁆𑀧𑀓𑁂𑀦 𑀊𑀦𑁄𑀧𑀺 𑀘 𑀲𑀫𑀼𑀤𑀸𑀬𑁄 𑀅𑀦𑀽𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀤𑀺𑀬𑀟𑁆𑀠𑀫𑀸𑀲𑀢𑁄 𑀊𑀦𑁂𑀧𑀺 𑀧𑀜𑁆𑀘 𑀤𑀺𑀯𑀲𑁂 𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀘 𑀯𑀼𑀢𑁆𑀢𑀁. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀜𑁆𑀳𑀺 (𑀯𑀺𑀪. 𑀅𑀝𑁆𑀞. 𑁩𑁫𑁬) 𑀙𑀫𑀸𑀲𑀢𑁄 𑀊𑀦𑁂𑀧𑀺 𑀅𑀟𑁆𑀠𑀫𑀸𑀲𑁂 ‘‘𑀙 𑀫𑀸𑀲𑁂 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀬. 𑀢𑀢𑁆𑀣 𑀳𑀺 𑀢𑀘𑀧𑀜𑁆𑀘𑀓𑀸𑀤𑀻𑀲𑀼 𑀘𑀢𑀽𑀲𑀼 𑀧𑀜𑁆𑀘𑀓𑁂𑀲𑀼 𑀤𑁆𑀯𑀻𑀲𑀼 𑀘 𑀙𑀓𑁆𑀓𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀦𑀼𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀢𑀣𑀸 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀜𑁆𑀘𑀓𑀙𑀓𑁆𑀓𑁂𑀳𑀺 𑀲𑀤𑁆𑀥𑀺𑀁 𑀅𑀦𑀼𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀜𑁆𑀘𑀸𑀳𑀦𑁆𑀢𑀺 𑀏𑀯𑀁 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀁 𑀏𑀓𑀢𑁄 𑀢𑀺𑀧𑀜𑁆𑀘𑀸𑀳𑀜𑁆𑀘 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀙𑀫𑀸𑀲𑀁 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄𑀢𑀺 𑀯𑀘𑀦𑀁 𑀯𑀺𑀬. 𑀢𑀢𑁆𑀣 𑀳𑀺 𑀯𑀓𑁆𑀓𑀧𑀜𑁆𑀘𑀓𑀸𑀤𑀻𑀲𑀼 𑀢𑀻𑀲𑀼 𑀧𑀜𑁆𑀘𑀓𑁂𑀲𑀼 𑀤𑁆𑀯𑀻𑀲𑀼 𑀘 𑀙𑀓𑁆𑀓𑁂𑀲𑀼 𑀯𑀺𑀲𑀼𑀁 𑀳𑁂𑀝𑁆𑀞𑀺𑀫𑁂𑀳𑀺 𑀏𑀓𑀢𑁄 𑀘 𑀲𑀚𑁆𑀛𑀸𑀬𑁂 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀧𑀜𑁆𑀘𑀓𑀸𑀦𑀁 𑀯𑀲𑁂𑀦 𑀧𑀜𑁆𑀘𑀫𑀸𑀲𑀧𑀭𑀺𑀧𑀼𑀡𑁆𑀡𑀸 𑀮𑀩𑁆𑀪𑀦𑁆𑀢𑀺, 𑀢𑀘𑀧𑀜𑁆𑀘𑀓𑁂 𑀧𑀦 𑀯𑀺𑀲𑀼𑀁 𑀢𑀺𑀧𑀜𑁆𑀘𑀸𑀳𑀫𑁂𑀯𑀸𑀢𑀺 𑀅𑀟𑁆𑀠𑀫𑀸𑀲𑁄𑀬𑁂𑀯𑁂𑀓𑁄 𑀮𑀩𑁆𑀪𑀢𑀻𑀢𑀺 𑀅𑀟𑁆𑀠𑀫𑀸𑀲𑀸𑀥𑀺𑀓𑀧𑀜𑁆𑀘𑀫𑀸𑀲𑀸 𑀮𑀩𑁆𑀪𑀦𑁆𑀢𑀺.

𑀏𑀯𑀁 𑀲𑀢𑀺 𑀬𑀣𑀸 𑀢𑀢𑁆𑀣 𑀅𑀟𑁆𑀠𑀫𑀸𑀲𑁂 𑀊𑀦𑁂𑀧𑀺 𑀫𑀸𑀲𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁂 𑀲𑀚𑁆𑀛𑀸𑀬𑁂 𑀙 𑀫𑀸𑀲𑀸 𑀧𑀭𑀺𑀘𑁆𑀙𑁂𑀤𑀓𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑀲𑁆𑀲 𑀲𑀚𑁆𑀛𑀸𑀬𑀲𑁆𑀲 𑀲𑀢𑁆𑀢𑀫𑀸𑀲𑀸𑀤𑀺𑀫𑀸𑀲𑀦𑁆𑀢𑀭𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 𑀙𑀫𑀸𑀲𑀕𑁆𑀕𑀳𑀡𑀁 𑀓𑀢𑀁, 𑀦 𑀲𑀓𑀮𑀙𑀫𑀸𑀲𑁂 𑀲𑀚𑁆𑀛𑀸𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁, 𑀏𑀯𑀫𑀺𑀥𑀸𑀧𑀺 𑀫𑀸𑀲𑀯𑀲𑁂𑀦 ¶ 𑀓𑀸𑀮𑁂 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁂 𑀊𑀦𑁂𑀧𑀺 𑀧𑀜𑁆𑀘𑀤𑀺𑀯𑀲𑁂 𑀤𑀺𑀬𑀟𑁆𑀠𑀫𑀸𑀲𑁄 𑀧𑀭𑀺𑀘𑁆𑀙𑁂𑀤𑀓𑁄 𑀳𑁄𑀢𑀻𑀢𑀺 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑀲𑁆𑀲 ¶ 𑀓𑀸𑀮𑀲𑁆𑀲 𑀤𑁆𑀯𑀺𑀫𑀸𑀲𑀸𑀤𑀺𑀫𑀸𑀲𑀦𑁆𑀢𑀭𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 ‘‘𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀤𑀺𑀬𑀟𑁆𑀠𑀫𑀸𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀘 𑀅𑀝𑁆𑀞𑀓𑀣𑀸𑀯𑀘𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀏𑀓𑀸𑀳𑀫𑁂𑀯 𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀘𑀺𑀢𑀓𑀸𑀬 𑀛𑀸𑀬𑀻𑀢𑀺 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀅𑀝𑁆𑀞𑀫𑀺𑀬𑀁 𑀘𑀺𑀢𑀓𑀸𑀬 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀥𑀸𑀢𑀼𑀧𑀽𑀚𑀁 𑀅𑀓𑀁𑀲𑀽𑀢𑀺 𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀕𑀺𑀫𑁆𑀳𑀸𑀦𑀁 𑀤𑀺𑀬𑀟𑁆𑀠𑁄 𑀘 𑀫𑀸𑀲𑁄 𑀲𑁂𑀲𑁄 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀫𑁆𑀧𑀺 𑀳𑀺 𑀘𑀺𑀢𑀓𑀸𑀬 𑀛𑀸𑀧𑀦𑀲𑀢𑁆𑀢𑀸𑀳𑀁 𑀦 𑀆𑀕𑀢𑀁, 𑀤𑁆𑀯𑁂𑀬𑁂𑀯 𑀲𑀢𑁆𑀢𑀸𑀳𑀸𑀦𑀺 𑀆𑀕𑀢𑀸𑀦𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀦 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀇𑀢𑁄 𑀅𑀜𑁆𑀜𑁂𑀦 𑀯𑀸 𑀧𑀓𑀸𑀭𑁂𑀦 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀏𑀢𑁆𑀣 𑀏𑀓𑁄 𑀤𑀺𑀯𑀲𑁄 𑀦𑀝𑁆𑀞𑁄. 𑀲𑁄 𑀧𑀸𑀝𑀺𑀧𑀤𑀤𑀺𑀯𑀲𑁄 𑀓𑁄𑀮𑀸𑀳𑀮𑀤𑀺𑀯𑀲𑁄 𑀦𑀸𑀫, 𑀢𑀲𑁆𑀫𑀸 𑀇𑀥 𑀦 𑀕𑀳𑀺𑀢𑁄’’𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 𑀧𑀸𑀝𑀺𑀧𑀤𑀤𑀺𑀯𑀲𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀦𑀧𑀺 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀲𑀢𑁆𑀢𑀸𑀳𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀲𑀢𑁆𑀢𑀸𑀳𑀸𑀦𑀁 𑀕𑀳𑀺𑀢𑀢𑁆𑀢𑀸 𑀚𑁂𑀝𑁆𑀞𑀫𑀽𑀮𑀲𑀼𑀓𑁆𑀓𑀧𑀜𑁆𑀘𑀫𑀻 𑀏𑀓𑀯𑀻𑀲𑀢𑀺𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀽𑀢𑀺 𑀏𑀢𑁆𑀣 𑀲𑀸𑀥𑀼𑀓𑀻𑀴𑀦𑀁 𑀦𑀸𑀫 𑀲𑀁𑀯𑁂𑀕𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀕𑀻𑀢𑀸𑀦𑀺 𑀕𑀸𑀬𑀺𑀢𑁆𑀯𑀸 𑀧𑀽𑀚𑀸𑀯𑀲𑁂𑀦 𑀓𑀻𑀴𑀦𑀢𑁄 𑀲𑀼𑀦𑁆𑀤𑀭𑀁 𑀓𑀻𑀴𑀦𑀦𑁆𑀢𑀺 𑀲𑀸𑀥𑀼𑀓𑀻𑀴𑀦𑀁. 𑀅𑀣 𑀯𑀸 𑀲𑀧𑀭𑀳𑀺𑀢𑀲𑀸𑀥𑀦𑀝𑁆𑀞𑁂𑀦 𑀲𑀸𑀥𑀼, 𑀢𑁂𑀲𑀁 𑀲𑀁𑀯𑁂𑀕𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀺𑀢𑁆𑀢𑁂𑀢𑁆𑀯𑀸 𑀓𑀻𑀴𑀦𑀁 𑀲𑀸𑀥𑀼𑀓𑀻𑀴𑀦𑀁, 𑀉𑀴𑀸𑀭𑀧𑀼𑀜𑁆𑀜𑀧𑀲𑀯𑀦𑀢𑁄 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀸𑀯𑀺𑀭𑁄𑀥𑀺𑀓𑀻𑀴𑀸𑀯𑀺𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑁂 𑀲𑀸𑀥𑀼𑀓𑀻𑀴𑀸𑀬 𑀏𑀓𑀤𑁂𑀲𑁂𑀦 𑀓𑀢𑀢𑁆𑀢𑀸 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸 𑀦𑀸𑀫 𑀢𑁂 𑀚𑀸𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼𑀬𑁂𑀯 𑀲𑀸𑀥𑀼𑀓𑀻𑀴𑀦𑀁 𑀅𑀓𑀁𑀲𑀼. 𑀢𑀢𑁄𑀬𑁂𑀯 𑀘 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 𑁋

‘‘𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀲𑀢𑁆𑀢𑀸𑀳𑀁 𑀲𑀦𑁆𑀣𑀸𑀕𑀸𑀭𑁂 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀭𑀺𑀢𑁆𑀯𑀸 𑀥𑀦𑀼𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ¶ 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑀺𑀁𑀲𑀼 𑀕𑀭𑀼𑀁 𑀓𑀭𑀺𑀁𑀲𑀼 𑀫𑀸𑀦𑁂𑀲𑀼𑀁 𑀧𑀽𑀚𑁂𑀲𑀼’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁩𑁫).

𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁩𑁫) 𑀯𑀼𑀢𑁆𑀢𑀁 𑁋

‘‘𑀓𑀲𑁆𑀫𑀸 ¶ 𑀧𑀦𑁂𑀢𑁂 𑀏𑀯𑀫𑀓𑀁𑀲𑀽𑀢𑀺? 𑀇𑀢𑁄 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀲𑀢𑁆𑀢𑀸𑀳𑁂𑀲𑀼 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑁄𑀓𑀸𑀲𑀁 𑀓𑀭𑁄𑀦𑁆𑀢𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀦𑁆𑀢𑀸 𑀲𑀸𑀥𑀼𑀓𑀻𑀴𑀺𑀓𑀸𑀬 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀅𑀳𑁄𑀲𑀺 ‘𑀇𑀫𑀁 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀺𑀲𑁆𑀲𑀸𑀫, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀅𑀫𑁆𑀳𑀸𑀓𑀁 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑁄𑀘𑀺𑀤𑁂𑀯 𑀆𑀕𑀦𑁆𑀢𑁆𑀯𑀸 𑀥𑀸𑀢𑀼𑀬𑁄 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀫𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀓𑀻𑀴𑀺𑀲𑁆𑀲𑀸𑀫𑀸’𑀢𑀺, 𑀢𑁂𑀦 𑀢𑁂 𑀏𑀯𑀫𑀓𑀁𑀲𑀽’’𑀢𑀺.

𑀢𑀲𑁆𑀫𑀸 𑀯𑀺𑀲𑁂𑀲𑀢𑁄 𑀲𑀸𑀥𑀼𑀓𑀻𑀴𑀺𑀓𑀸 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂 𑀧𑀦 𑀥𑀸𑀢𑀼𑀧𑀽𑀚𑀸𑀬 𑀓𑀢𑀢𑁆𑀢𑀸 ‘‘𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑀸’’𑀢𑀺 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀆𑀳 ‘‘𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀽’’𑀢𑀺. 𑀉𑀧𑀓𑀝𑁆𑀞𑀸𑀢𑀺 𑀆𑀲𑀦𑁆𑀦𑀸. 𑀯𑀲𑁆𑀲𑀁 𑀉𑀧𑀦𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸. 𑀏𑀓𑀁 𑀫𑀕𑁆𑀕𑀁 𑀕𑀢𑁄𑀢𑀺 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀢𑀼𑀁 𑀏𑀓𑁂𑀦 𑀫𑀕𑁆𑀕𑁂𑀦 𑀕𑀢𑁄. 𑀏𑀯𑀁 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀤𑀬𑁄𑀧𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀦𑁆𑀢𑀸 𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂𑀦 𑀲𑀸𑀯𑀢𑁆𑀣𑀺, 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀬𑀢𑁆𑀣 𑀲𑀸𑀯𑀢𑁆𑀣𑀺, 𑀢𑀢𑁆𑀣 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀬𑁂𑀦 𑀯𑀸 𑀤𑀺𑀲𑀸𑀪𑀸𑀕𑁂𑀦 𑀲𑀸𑀯𑀢𑁆𑀣𑀺 𑀧𑀓𑁆𑀓𑀫𑀺𑀢𑀩𑁆𑀩𑀸 𑀳𑁄𑀢𑀺, 𑀢𑁂𑀦 𑀤𑀺𑀲𑀸𑀪𑀸𑀕𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀲𑀸𑀯𑀢𑁆𑀣𑀺𑀬𑀁. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬. 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀦𑀼𑀲𑀬𑀢𑁆𑀢𑀸 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀪𑀺𑀲𑀗𑁆𑀔𑀢𑁂𑀦 𑀓𑀫𑁆𑀫𑀼𑀦𑀸 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁 𑀚𑀦𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀚𑀦𑁄, 𑀓𑀺𑀮𑁂𑀲𑁂 𑀚𑀦𑁂𑀢𑀺, 𑀅𑀚𑀦𑀺, 𑀚𑀦𑀺𑀲𑁆𑀲𑀢𑀻𑀢𑀺 𑀯𑀸 𑀚𑀦𑁄, 𑀫𑀳𑀦𑁆𑀢𑁄 𑀚𑀦𑁄𑀢𑀺 𑀫𑀳𑀸𑀚𑀦𑁄, 𑀢𑀁 𑀫𑀳𑀸𑀚𑀦𑀁, 𑀩𑀳𑀼𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸. 𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸𑀢𑀺 𑀧𑀭𑀺𑀪𑁄𑀕𑀘𑁂𑀢𑀺𑀬𑀪𑀸𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) ‘‘𑀕𑀦𑁆𑀥𑀓𑀼𑀝𑀺𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀺𑀮𑀸𑀢𑀁 𑀫𑀸𑀮𑀸𑀓𑀘𑀯𑀭𑀁 𑀫𑀺𑀮𑀸𑀢𑀫𑀸𑀮𑀸𑀓𑀘𑀯𑀭𑀁. 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 𑀧𑀞𑀫𑀞𑀺𑀢𑀝𑁆𑀞𑀸𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 ¶ 𑀬𑀣𑀸𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀞𑀺𑀢𑀓𑀸𑀮𑁂 𑀓𑀭𑀡𑀻𑀬𑀁 𑀯𑀢𑁆𑀢𑀁 𑀲𑀩𑁆𑀩𑀫𑀓𑀸𑀲𑀻𑀢𑀺 𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀭𑁄𑀦𑁆𑀢𑁄 𑀘 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀲𑀫𑁆𑀫𑀚𑁆𑀚𑀦𑀉𑀤𑀓𑀽𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀕𑀦𑁆𑀢𑁆𑀯𑀸 ‘‘𑀦𑀦𑀼 𑀪𑀕𑀯𑀸 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀦𑁆𑀳𑀸𑀦𑀓𑀸𑀮𑁄, 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁄, 𑀅𑀬𑀁 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀤𑀸𑀦𑀓𑀸𑀮𑁄, 𑀅𑀬𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑀦𑀓𑀸𑀮𑁄, 𑀅𑀬𑀁 𑀫𑀼𑀔𑀥𑁄𑀯𑀦𑀓𑀸𑀮𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀤𑁂𑀯𑀫𑀸𑀦𑁄𑀯 𑀅𑀓𑀸𑀲𑀺. 𑀢𑀫𑁂𑀦𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀢𑀼𑀫𑁆𑀳𑁂 𑀏𑀯𑀁 𑀧𑀭𑀺𑀤𑁂𑀯𑀫𑀸𑀦𑀸 𑀓𑀣𑀁 𑀅𑀜𑁆𑀜𑁂 𑀅𑀲𑁆𑀲𑀸𑀲𑀬𑀺𑀲𑁆𑀲𑀣𑀸’’𑀢𑀺 𑀲𑀁𑀯𑁂𑀚𑁂𑀲𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑁂𑀦 𑀲𑀁𑀯𑀺𑀕𑁆𑀕𑀳𑀤𑀬𑁄 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀪𑀼𑀢𑀺 𑀞𑀸𑀦𑀦𑀺𑀲𑀚𑁆𑀚𑀩𑀳𑀼𑀮𑀢𑀸𑀬 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀁 ¶ 𑀓𑀸𑀬𑀁 𑀲𑀫𑀲𑁆𑀲𑀸𑀲𑁂𑀢𑀼𑀁 𑀔𑀻𑀭𑀯𑀺𑀭𑁂𑀘𑀦𑀁 𑀧𑀺𑀯𑀺. 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀣𑁂𑀭𑁄’’𑀢𑀺𑀆𑀤𑀺𑀫𑀸𑀳.

𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀦𑁆𑀢𑀺 𑀉𑀧𑀘𑀺𑀢𑀲𑁂𑀫𑁆𑀳𑀸𑀤𑀺𑀥𑀸𑀢𑀼𑀓𑀁 𑀓𑀸𑀬𑀁. 𑀲𑀫𑀲𑁆𑀲𑀸𑀲𑁂𑀢𑀼𑀦𑁆𑀢𑀺 𑀲𑀦𑁆𑀢𑀧𑁆𑀧𑁂𑀢𑀼𑀁. 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑀤𑀺𑀯𑀲𑀢𑁄. ‘‘𑀚𑁂𑀢𑀯𑀦𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀤𑀺𑀯𑀲𑀢𑁄 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂’’𑀢𑀺 𑀯𑀤𑀦𑁆𑀢𑀺. 𑀯𑀺𑀭𑀺𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑁂𑀘𑀦𑀁, 𑀑𑀲𑀥𑀧𑀭𑀺𑀪𑀸𑀯𑀺𑀢𑀁 𑀔𑀻𑀭𑀫𑁂𑀯 𑀯𑀺𑀭𑁂𑀘𑀦𑀦𑁆𑀢𑀺 𑀔𑀻𑀭𑀯𑀺𑀭𑁂𑀘𑀦𑀁. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀪𑁂𑀲𑀚𑁆𑀚𑀧𑀸𑀦𑀁 𑀲𑀦𑁆𑀥𑀸𑀬. 𑀅𑀗𑁆𑀕𑀲𑀼𑀪𑀢𑀸𑀬 𑀲𑀼𑀪𑁄𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀢𑁆𑀢𑀸 𑀲𑀼𑀪𑁂𑀦 𑀫𑀸𑀡𑀯𑁂𑀦. 𑀧𑀳𑀺𑀢𑀁 𑀫𑀸𑀡𑀯𑀓𑀦𑁆𑀢𑀺 ‘‘𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀺𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀫𑀳𑀸𑀚𑀦𑁄 𑀘 𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀯𑀺𑀳𑀸𑀭𑀁 𑀔𑁄 𑀧𑀦 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀫𑀚𑁆𑀛𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀯𑀸 𑀓𑀸𑀢𑀼𑀁 𑀥𑀫𑁆𑀫𑀓𑀣𑀁 𑀯𑀸 𑀲𑁄𑀢𑀼𑀁, 𑀕𑁂𑀳𑀁 𑀆𑀕𑀢𑀁𑀬𑁂𑀯 𑀦𑀁 𑀤𑀺𑀲𑁆𑀯𑀸 𑀲𑀼𑀔𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀓𑀸 𑀘 𑀫𑁂 𑀓𑀗𑁆𑀔𑀸 𑀅𑀢𑁆𑀣𑀺, 𑀢𑀫𑁆𑀧𑀺 𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑁂𑀲𑀺𑀢𑀁 𑀫𑀸𑀡𑀯𑀓𑀁. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀅𑀓𑀸𑀮𑁄 𑀔𑁄’’𑀢𑀺𑀆𑀤𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀯𑁄𑀘. 𑀅𑀓𑀸𑀮𑁄 𑀔𑁄𑀢𑀺 𑀅𑀚𑁆𑀚 𑀕𑀦𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁄 𑀦 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀘𑁂 𑀆𑀳 ‘‘𑀅𑀢𑁆𑀣𑀺 𑀫𑁂 𑀅𑀚𑁆𑀚𑀸’’𑀢𑀺𑀆𑀤𑀺. 𑀪𑁂𑀲𑀚𑁆𑀚𑀫𑀢𑁆𑀢𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀪𑁂𑀲𑀚𑁆𑀚𑀁. 𑀅𑀧𑁆𑀧𑀢𑁆𑀣𑁄 𑀳𑀺 𑀅𑀬𑀁 𑀫𑀢𑁆𑀢𑀸𑀲𑀤𑁆𑀤𑁄 ‘‘𑀫𑀢𑁆𑀢𑀸 𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀔𑀻𑀭𑀯𑀺𑀭𑁂𑀘𑀦𑀁 𑀧𑀻𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀘𑁂𑀢𑀓𑀢𑁆𑀣𑁂𑀭𑁂𑀦𑀸𑀢𑀺 𑀘𑁂𑀢𑀺𑀬𑀭𑀝𑁆𑀞𑁂 𑀚𑀸𑀢𑀢𑁆𑀢𑀸 ‘‘𑀘𑁂𑀢𑀓𑁄’’𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁂𑀦. 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄𑀢𑀺 ‘‘𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀯𑀁 𑀕𑁄𑀢𑀫𑁄 𑀇𑀫𑀁 𑀮𑁄𑀓𑀁 ¶ 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑁂 𑀢𑀲𑁆𑀲 𑀅𑀘𑁆𑀘𑀬𑁂𑀦 𑀦𑀝𑁆𑀞𑀸 𑀦𑀼 𑀔𑁄, 𑀥𑀭𑀦𑁆𑀢𑀺, 𑀲𑀘𑁂 𑀥𑀭𑀦𑁆𑀢𑀺, 𑀆𑀦𑀦𑁆𑀤𑁄 𑀚𑀸𑀦𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑁂𑀲𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀥𑀫𑁆𑀫𑀸𑀦𑀁 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀢𑀫𑁂𑀲𑀸𑀦𑀁 𑀔𑁄 𑀪𑁄 𑀆𑀦𑀦𑁆𑀤 𑀥𑀫𑁆𑀫𑀸𑀦𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁪𑁮) 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄. 𑀅𑀣𑀲𑁆𑀲 𑀣𑁂𑀭𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀡𑁆𑀡𑀁 𑀔𑁄, 𑀫𑀸𑀡𑀯, 𑀔𑀦𑁆𑀥𑀸𑀦𑀁 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻’’𑀢𑀺𑀆𑀤𑀺𑀦𑀸 𑀲𑀼𑀪𑀲𑀼𑀢𑁆𑀢𑀫𑀪𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀤𑀻𑀖𑀦𑀺𑀓𑀸𑀬𑁂 𑀲𑀼𑀪𑀲𑀼𑀢𑁆𑀢𑀁 𑀦𑀸𑀫 𑀤𑀲𑀫𑀁 𑀲𑀼𑀢𑁆𑀢𑀫𑀪𑀸𑀲𑀻’’𑀢𑀺.

𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀦𑁆𑀢𑀺 𑀏𑀢𑁆𑀣 𑀔𑀡𑁆𑀟𑀦𑁆𑀢𑀺 𑀙𑀺𑀦𑁆𑀦𑀁. 𑀨𑀼𑀮𑁆𑀮𑀦𑁆𑀢𑀺 𑀪𑀺𑀦𑁆𑀦𑀁. 𑀢𑁂𑀲𑀁 𑀧𑀝𑀺𑀲𑀗𑁆𑀔𑀭𑀡𑀁 𑀧𑀼𑀦 𑀲𑀫𑁆𑀫𑀸 𑀧𑀸𑀓𑀢𑀺𑀓𑀓𑀭𑀡𑀁, 𑀅𑀪𑀺𑀦𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀚𑀕𑀳𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀦𑀕𑀭𑀁. 𑀢𑀜𑁆𑀳𑀺 𑀫𑀦𑁆𑀥𑀢𑀼𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸𑀢𑀺 𑀙𑀟𑁆𑀟𑀺𑀢𑀸 𑀘 𑀧𑀢𑀺𑀢𑀸 𑀘 𑀉𑀓𑁆𑀮𑀸𑀧𑀸 𑀘 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁂𑀳𑀺 ¶ 𑀪𑀺𑀓𑁆𑀔𑀽𑀳𑀺 𑀙𑀟𑁆𑀟𑀺𑀢𑀸 𑀯𑀺𑀲𑁆𑀲𑀝𑁆𑀞𑀸, 𑀢𑀢𑁄𑀬𑁂𑀯 𑀘 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀤𑀺𑀢𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀧𑀢𑀺𑀢𑀸, 𑀲𑀫𑁆𑀫𑀚𑁆𑀚𑀦𑀸𑀪𑀸𑀯𑁂𑀦 𑀆𑀓𑀺𑀡𑁆𑀡𑀓𑀘𑀯𑀭𑀢𑁆𑀢𑀸 𑀉𑀓𑁆𑀮𑀸𑀧𑀸 𑀘 𑀅𑀳𑁂𑀲𑀼𑀦𑁆𑀢𑀺. 𑀇𑀫𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑁂𑀡𑀺𑀬𑀢𑀺 𑀤𑀺𑀲𑁆𑀲𑀢𑀻𑀢𑀺 𑀧𑀭𑀺𑀯𑁂𑀡𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀺𑀳𑀸𑀭𑁂𑀲𑀼. 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑀞𑀫𑀁 𑀫𑀸𑀲𑀦𑁆𑀢𑀺 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑀁 𑀫𑀸𑀲𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀲𑁂𑀦𑀸𑀲𑀦𑀯𑀢𑁆𑀢𑀸𑀦𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀘 𑀲𑁂𑀦𑀸𑀲𑀦𑀧𑀝𑀺𑀩𑀤𑁆𑀥𑀸𑀦𑀁 𑀩𑀳𑀽𑀦𑀁 𑀯𑀘𑀦𑀢𑁄 ‘‘𑀪𑀕𑀯𑀢𑀸…𑀧𑁂… 𑀯𑀡𑁆𑀡𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 ‘‘𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀁 𑀓𑀭𑁄𑀫𑀸’’𑀢𑀺 𑀘𑀺𑀦𑁆𑀢𑀺𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀲𑁄 𑀘 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀳𑀺 𑀣𑁂𑀭𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀧𑀸𑀝𑀺𑀧𑀤𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁. 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸𑀢𑀺 𑀅𑀚𑀸𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼𑀦𑁄 𑀧𑀘𑁆𑀘𑀢𑁆𑀣𑀺𑀓𑁄 𑀚𑀸𑀢𑁄𑀢𑀺 ‘‘𑀅𑀚𑀸𑀢𑀲𑀢𑁆𑀢𑀽’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁄 𑀭𑀸𑀚𑀸. 𑀢𑀲𑁆𑀫𑀺𑀁 𑀓𑀺𑀭 𑀓𑀼𑀘𑁆𑀙𑀺𑀕𑀢𑁂 𑀤𑁂𑀯𑀺𑀬𑀸 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺 ‘‘𑀅𑀳𑁄 𑀯𑀢𑀸𑀳𑀁 𑀭𑀜𑁆𑀜𑁄 𑀤𑀓𑁆𑀔𑀺𑀡𑀩𑀸𑀳𑀼𑀢𑁄 𑀮𑁄𑀳𑀺𑀢𑀁 𑀧𑀺𑀯𑁂𑀬𑁆𑀬’’𑀦𑁆𑀢𑀺 ¶ . 𑀅𑀣 𑀢𑀲𑁆𑀲𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑀸 𑀓𑀺𑀲𑀪𑀸𑀯𑀁 𑀤𑀼𑀩𑁆𑀩𑀡𑁆𑀡𑀪𑀸𑀯𑀜𑁆𑀘 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀜𑀢𑁆𑀯𑀸 𑀘 𑀯𑁂𑀚𑁆𑀚𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦 𑀩𑀸𑀳𑀼𑀁 𑀨𑀸𑀮𑁂𑀢𑁆𑀯𑀸 𑀲𑀼𑀯𑀡𑁆𑀡𑀲𑀭𑀓𑁂𑀦 𑀮𑁄𑀳𑀺𑀢𑀁 𑀕𑀳𑁂𑀢𑁆𑀯𑀸 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺. 𑀦𑁂𑀫𑀺𑀢𑁆𑀢𑀓𑀸 𑀢𑀁 𑀲𑀼𑀢𑁆𑀯𑀸 ‘‘𑀏𑀲 𑀕𑀩𑁆𑀪𑁄 𑀭𑀜𑁆𑀜𑁄 𑀲𑀢𑁆𑀢𑀼 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀭𑀸𑀚𑀸 𑀳𑀜𑁆𑀜𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼, 𑀢𑀲𑁆𑀫𑀸 ‘‘𑀅𑀚𑀸𑀢𑁄𑀬𑁂𑀯 𑀭𑀜𑁆𑀜𑁄 𑀲𑀢𑁆𑀢𑀼 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑁂𑀫𑀺𑀢𑁆𑀢𑀓𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀅𑀚𑀸𑀢𑀲𑀢𑁆𑀢𑀼 𑀦𑀸𑀫 𑀚𑀸𑀢𑁄. 𑀓𑀺𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀓𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀤𑁂𑀲𑀼𑀦𑁆𑀢𑀺 𑀦𑀺𑀯𑁂𑀤𑁂𑀲𑀼𑀁, 𑀚𑀸𑀦𑀸𑀧𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀢𑁆𑀣𑀸𑀢𑀺 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀸. 𑀆𑀡𑀸𑀘𑀓𑁆𑀓𑀦𑁆𑀢𑀺 𑀆𑀡𑀸𑀬𑁂𑀯 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀆𑀡𑀸𑀘𑀓𑁆𑀓𑀁. 𑀲𑀦𑁆𑀦𑀺𑀲𑀚𑁆𑀚𑀝𑁆𑀞𑀸𑀦𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀁.

𑀭𑀸𑀚𑀪𑀯𑀦𑀯𑀺𑀪𑀽𑀢𑀺𑀦𑁆𑀢𑀺 𑀭𑀸𑀚𑀪𑀯𑀦𑀲𑀫𑁆𑀧𑀢𑁆𑀢𑀺𑀁. 𑀅𑀯𑀳𑀲𑀦𑁆𑀢𑀫𑀺𑀯𑀸𑀢𑀺 𑀅𑀯𑀳𑀸𑀲𑀁 𑀓𑀼𑀭𑀼𑀫𑀸𑀦𑀁 𑀯𑀺𑀬. 𑀲𑀺𑀭𑀺𑀬𑀸 𑀦𑀺𑀓𑁂𑀢𑀫𑀺𑀯𑀸𑀢𑀺 𑀲𑀺𑀭𑀺𑀬𑀸 𑀯𑀲𑀦𑀝𑁆𑀞𑀸𑀦𑀫𑀺𑀯. 𑀏𑀓𑀦𑀺𑀧𑀸𑀢𑀢𑀺𑀢𑁆𑀣𑀫𑀺𑀯 𑀘 𑀤𑁂𑀯𑀫𑀦𑀼𑀲𑁆𑀲𑀦𑀬𑀦𑀯𑀺𑀳𑀗𑁆𑀕𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀧𑀸𑀦𑀻𑀬𑀢𑀺𑀢𑁆𑀣𑁂 𑀲𑀦𑁆𑀦𑀺𑀧𑀢𑀦𑁆𑀢𑀸 𑀧𑀓𑁆𑀔𑀺𑀦𑁄 𑀯𑀺𑀬 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀘𑀓𑁆𑀔𑀽𑀦𑀺 𑀫𑀡𑁆𑀟𑀧𑁂𑀬𑁂𑀯 𑀦𑀺𑀧𑀢𑀦𑁆𑀢𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀬𑀦𑀲𑀗𑁆𑀔𑀸𑀢𑀯𑀺𑀳𑀗𑁆𑀕𑀸𑀦𑀁 𑀏𑀓𑀦𑀺𑀧𑀸𑀢𑀢𑀺𑀢𑁆𑀣𑀫𑀺𑀯 𑀘. 𑀮𑁄𑀓𑀭𑀸𑀫𑀡𑁂𑀬𑁆𑀬𑀓𑀫𑀺𑀯 𑀲𑀫𑁆𑀧𑀺𑀡𑁆𑀟𑀺𑀢𑀦𑁆𑀢𑀺 𑀏𑀓𑀢𑁆𑀣 𑀲𑀫𑁆𑀧𑀺𑀡𑁆𑀟𑀺𑀢𑀁 𑀭𑀸𑀲𑀺𑀓𑀢𑀁 𑀮𑁄𑀓𑁂 𑀭𑀫𑀡𑀻𑀬𑀪𑀸𑀯𑀁 𑀯𑀺𑀬. 𑀬𑀤𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀁 𑀭𑀫𑀡𑀻𑀬𑀢𑁆𑀢𑀁 𑀲𑀩𑁆𑀩𑀫𑁂𑀯 𑀆𑀦𑁂𑀢𑁆𑀯𑀸 𑀏𑀓𑀢𑁆𑀣 𑀲𑀫𑁆𑀧𑀺𑀡𑁆𑀟𑀺𑀢𑀁 𑀲𑀺𑀬𑀸, 𑀢𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑀦𑁆𑀢𑀺 𑀨𑁂𑀕𑁆𑀕𑀼𑀭𑀳𑀺𑀢𑀲𑀸𑀭𑀁 𑀯𑀺𑀬 𑀓𑀲𑀝𑀯𑀺𑀦𑀺𑀫𑀼𑀢𑁆𑀢𑀁 𑀧𑀲𑀦𑁆𑀦𑀪𑀽𑀢𑀁 𑀯𑀺𑀬 𑀘 𑀤𑀝𑁆𑀞𑀩𑁆𑀩𑁂𑀲𑀼 𑀤𑀝𑁆𑀞𑀼𑀁 𑀅𑀭𑀳𑀭𑀽𑀧𑁂𑀲𑀼 𑀲𑀸𑀭𑀪𑀽𑀢𑀁 𑀧𑀲𑀦𑁆𑀦𑀪𑀽𑀢𑀜𑁆𑀘𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀤𑀝𑁆𑀞𑀩𑁆𑀩𑁄 𑀤𑀲𑁆𑀲𑀦𑀻𑀬𑁄 ¶ 𑀲𑀸𑀭𑀪𑀽𑀢𑁄 𑀯𑀺𑀲𑀺𑀝𑁆𑀞𑀢𑀭𑁄 𑀫𑀡𑁆𑀟𑁄 𑀫𑀡𑁆𑀟𑀦𑀁 𑀅𑀮𑀗𑁆𑀓𑀸𑀭𑁄 𑀏𑀢𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑁄, 𑀫𑀡𑁆𑀟𑀧𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀫𑀡𑁆𑀟𑀁 𑀲𑀽𑀭𑀺𑀬𑀭𑀲𑁆𑀫𑀺𑀁 𑀧𑀸𑀢𑀺 𑀦𑀺𑀯𑀸𑀭𑁂𑀢𑀻𑀢𑀺 𑀫𑀡𑁆𑀟𑀧𑁄. 𑀯𑀺𑀯𑀺𑀥…𑀧𑁂… 𑀘𑀸𑀭𑀼𑀯𑀺𑀢𑀸𑀦𑀦𑁆𑀢𑀺 𑀏𑀢𑁆𑀣 𑀓𑀼𑀲𑀼𑀫𑀤𑀸𑀫𑀸𑀦𑀺 𑀘 𑀢𑀸𑀦𑀺 𑀑𑀮𑀫𑁆𑀩𑀓𑀸𑀦𑀺 𑀘𑀸𑀢𑀺 𑀓𑀼𑀲𑀼𑀫𑀤𑀸𑀫𑀑𑀮𑀫𑁆𑀩𑀓𑀸𑀦𑀺. 𑀏𑀢𑁆𑀣 𑀘 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄, 𑀑𑀮𑀫𑁆𑀩𑀓𑀓𑀼𑀲𑀼𑀫𑀤𑀸𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀯𑀺𑀯𑀺𑀥𑀸𑀦𑀺 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀺 𑀯𑀺𑀦𑀺𑀕𑁆𑀕𑀮𑀦𑁆𑀢𑀁 𑀯𑀫𑁂𑀦𑁆𑀢𑀁 𑀦𑀺𑀓𑁆𑀔𑀸𑀫𑁂𑀦𑁆𑀢𑀫𑀺𑀯 𑀘𑀸𑀭𑀼 𑀲𑁄𑀪𑀦𑀁 𑀯𑀺𑀢𑀸𑀦𑀁 𑀏𑀢𑁆𑀣𑀸𑀢𑀺 𑀯𑀺𑀯𑀺𑀥𑀓𑀼𑀲𑀼𑀫𑀤𑀸𑀫𑀑𑀮𑀫𑁆𑀩𑀓𑀯𑀺𑀦𑀺𑀕𑁆𑀕𑀮𑀦𑁆𑀢𑀘𑀸𑀭𑀼𑀯𑀺𑀢𑀸𑀦𑁄, 𑀫𑀡𑁆𑀟𑀧𑁄, 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀭𑀢𑀦𑀯𑀺𑀘𑀺𑀢𑁆𑀭𑀫𑀡𑀺𑀓𑀑𑀝𑁆𑀝𑀺𑀫𑀢𑀮𑀫𑀺𑀯𑀸𑀢𑀺 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀢𑁆𑀢𑀸𑀬𑁂𑀯 𑀦𑀸𑀦𑀸𑀭𑀢𑀦𑁂𑀳𑀺 ¶ 𑀯𑀺𑀘𑀺𑀢𑁆𑀢𑀪𑀽𑀢𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀫𑀺𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀭𑀢𑀦𑀯𑀺𑀘𑀺𑀢𑁆𑀢𑀕𑁆𑀕𑀳𑀡𑀁 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀢𑀸𑀬 𑀦𑀺𑀤𑀲𑁆𑀲𑀦𑀁, 𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀕𑁆𑀕𑀳𑀡𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀧𑀭𑀺𑀓𑀫𑁆𑀫𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀢𑀮𑀢𑁆𑀢𑀸 𑀫𑀡𑀺𑀓𑁄𑀝𑁆𑀝𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑀮𑀦𑁆𑀢𑀺 𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀁. 𑀦𑀦𑁆𑀢𑀺 𑀫𑀡𑁆𑀟𑀧𑀁. 𑀧𑀼𑀧𑁆𑀨𑀽𑀧𑀳𑀸𑀭𑁄 𑀧𑀼𑀧𑁆𑀨𑀧𑀽𑀚𑀸. 𑀉𑀢𑁆𑀢𑀭𑀸𑀪𑀺𑀫𑀼𑀔𑀦𑁆𑀢𑀺 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑀁. 𑀆𑀲𑀦𑀸𑀭𑀳𑀦𑁆𑀢𑀺 𑀦𑀺𑀲𑀻𑀤𑀦𑀸𑀭𑀳𑀁. 𑀤𑀦𑁆𑀢𑀔𑀘𑀺𑀢𑀦𑁆𑀢𑀺 𑀤𑀦𑁆𑀢𑁂𑀳𑀺 𑀭𑀘𑀺𑀢𑀁, 𑀤𑀦𑁆𑀢𑁂𑀳𑀺 𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀆𑀲𑀦𑁂. 𑀦𑀺𑀝𑁆𑀞𑀺𑀢𑀁 𑀪𑀦𑁆𑀢𑁂 𑀫𑀫 𑀓𑀺𑀘𑁆𑀘𑀦𑁆𑀢𑀺 𑀫𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀁𑀲𑀼 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀜𑁆𑀜𑁄 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀯𑀺𑀘𑀭𑀡𑀓𑀪𑀺𑀓𑁆𑀔𑀼 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀏𑀢𑁂 𑀫𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀻’’𑀢𑀺 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺. 𑀏𑀓𑀘𑁆𑀘𑁂 𑀦𑀁 𑀆𑀳𑀁𑀲𑀼𑀬𑁂𑀯 ‘‘𑀲𑁆𑀯𑁂, 𑀆𑀯𑀼𑀲𑁄, 𑀲𑀦𑁆𑀦𑀺𑀧𑀸𑀢𑁄’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀽’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀆𑀯𑀚𑁆𑀚𑁂𑀲𑀻𑀢𑀺 𑀉𑀧𑀦𑀸𑀫𑁂𑀲𑀺. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑀳𑁂𑀢𑁆𑀯𑀸, 𑀬𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀢𑁂𑀲𑀁 𑀮𑁂𑀲𑀫𑀢𑁆𑀢𑀫𑁆𑀧𑀺 𑀅𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀯𑁂𑀳𑀻𑀢𑀺 𑀪𑀯𑀢𑁄 𑀆𑀪𑀯𑀕𑁆𑀕𑀁 𑀥𑀫𑁆𑀫𑀢𑁄 𑀯𑀸 𑀆𑀕𑁄𑀢𑁆𑀭𑀪𑀼𑀁 𑀲𑀯𑀦𑀢𑁄 𑀧𑀯𑀢𑁆𑀢𑀦𑀢𑁄 𑀆𑀲𑀯𑀲𑀜𑁆𑀜𑀺𑀢𑁂𑀳𑀺 𑀓𑀺𑀮𑁂𑀲𑁂𑀳𑀺. 𑀮𑀓𑁆𑀔𑀡𑀯𑀘𑀦𑀜𑁆𑀘𑁂𑀢𑀁 𑀆𑀲𑀯𑁂𑀳𑀻𑀢𑀺, 𑀢𑀤𑁂𑀓𑀝𑁆𑀞𑀢𑀸𑀬 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀓𑀺𑀮𑁂𑀲𑁂𑀳𑀺, 𑀲𑀩𑁆𑀩𑁂𑀳𑀺𑀧𑀺 𑀧𑀸𑀧𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺𑀬𑁂𑀯. 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻𑀢𑀺 𑀘𑀺𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀫𑀸𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀻𑀢𑀺 𑀅𑀢𑁆𑀣𑁄. 𑀘𑀗𑁆𑀓𑀫𑁂𑀦𑀸𑀢𑀺 𑀘𑀗𑁆𑀓𑀫𑀦𑀓𑀺𑀭𑀺𑀬𑀸𑀬. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀽𑀢𑀁 𑀓𑀢𑀁 𑀉𑀧𑀘𑀺𑀢𑀁 𑀧𑀼𑀜𑁆𑀜𑀁 𑀏𑀢𑁂𑀦𑀸𑀢𑀺 𑀓𑀢𑀧𑀼𑀜𑁆𑀜𑁄, 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀓𑀢𑀸𑀥𑀺𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀸𑀢𑀺 𑀯𑀻𑀭𑀺𑀬𑀁 𑀅𑀦𑀼𑀬𑀼𑀜𑁆𑀚, 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀅𑀦𑀼𑀬𑁄𑀕𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀓𑀣𑀸𑀤𑁄𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀓𑀣𑀸𑀬 𑀅𑀧𑀭𑀚𑁆𑀛𑀁 𑀦𑀸𑀫 𑀦𑀢𑁆𑀣𑀺. 𑀅𑀘𑁆𑀘𑀸𑀭𑀤𑁆𑀥𑀁 𑀯𑀻𑀭𑀺𑀬𑀦𑁆𑀢𑀺 𑀅𑀢𑀺𑀯𑀺𑀬 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁. 𑀉𑀤𑁆𑀥𑀘𑁆𑀘𑀸𑀬𑀸𑀢𑀺 ¶ 𑀉𑀤𑁆𑀥𑀢𑀪𑀸𑀯𑀸𑀬. 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀫𑀻𑀢𑀺 𑀘𑀗𑁆𑀓𑀫𑀦𑀯𑀻𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀧𑀳𑀸𑀦𑀯𑀲𑁂𑀦 𑀲𑀫𑀸𑀥𑀺𑀦𑀸 𑀲𑀫𑀭𑀲𑀢𑀸𑀧𑀸𑀤𑀦𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀫𑀺.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 ¶ 𑀣𑁂𑀭𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀧𑀓𑁆𑀔𑀲𑁆𑀲 𑀧𑀜𑁆𑀘𑀫𑀺𑀬𑀁 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀸𑀧𑁂𑀢𑀼𑀓𑀸𑀫𑁄𑀢𑀺 ‘‘𑀲𑁂𑀓𑁆𑀔𑀢𑀸𑀬 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀕𑀳𑁂𑀢𑀼𑀁 𑀅𑀬𑀼𑀢𑁆𑀢𑀫𑁆𑀧𑀺 𑀩𑀳𑀼𑀲𑁆𑀲𑀼𑀢𑀢𑁆𑀢𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀣𑁂𑀭𑀸𑀦𑀁 ‘‘𑀇𑀤𑀸𑀦𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄’’𑀢𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀤𑀺𑀦𑁆𑀦𑀑𑀯𑀸𑀤𑀲𑁆𑀲 𑀲𑀨𑀮𑀢𑀸𑀤𑀻𑀧𑀦𑀢𑁆𑀣𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀓𑀢𑁆𑀯𑀸 𑀅𑀜𑁆𑀜𑀩𑁆𑀬𑀸𑀓𑀭𑀡𑀲𑁆𑀲 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑀢𑁆𑀢𑀸 𑀘 𑀣𑁂𑀭𑁄 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀸𑀧𑁂𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸. 𑀏𑀓𑁂𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁𑀬𑁂𑀯 𑀏𑀓𑁂. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁆𑀧𑀺 𑀳𑀺 𑀲𑀩𑁆𑀩𑀁 𑀫𑀚𑁆𑀛𑀺𑀫𑀪𑀸𑀡𑀓𑀸 𑀯𑀤𑀦𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀻𑀖𑀪𑀸𑀡𑀓𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀧𑀦𑁂𑀢𑁆𑀣 𑀏𑀯𑀁 𑀯𑀤𑀦𑁆𑀢𑀺 𑁋

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀭𑀳𑀸 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀅𑀕𑀫𑀸𑀲𑀺. 𑀓𑀣𑀁 𑀅𑀕𑀫𑀸𑀲𑀺? ‘𑀇𑀤𑀸𑀦𑀺𑀫𑁆𑀳𑀺 𑀲𑀦𑁆𑀦𑀺𑀧𑀸𑀢𑀫𑀚𑁆𑀛𑀁 𑀧𑀯𑀺𑀲𑀦𑀸𑀭𑀳𑁄’𑀢𑀺 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑁄 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀩𑀦𑁆𑀥𑀦𑀸 𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀚𑀸𑀢𑀺𑀫𑀡𑀺 𑀯𑀺𑀬 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂 𑀲𑀫𑀼𑀕𑁆𑀕𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀩𑀸𑀮𑀸𑀢𑀧𑀲𑀫𑁆𑀨𑀲𑁆𑀲𑀯𑀺𑀓𑀲𑀺𑀢𑀭𑁂𑀡𑀼𑀧𑀺𑀜𑁆𑀚𑀭𑀕𑀩𑁆𑀪𑀁 𑀧𑀤𑀼𑀫𑀁 𑀯𑀺𑀬 𑀘 𑀧𑀭𑀺𑀲𑀼𑀤𑁆𑀥𑁂𑀦 𑀧𑀭𑀺𑀬𑁄𑀤𑀸𑀢𑁂𑀦 𑀲𑀧𑁆𑀧𑀪𑁂𑀦 𑀲𑀲𑁆𑀲𑀺𑀭𑀺𑀓𑁂𑀦 𑀫𑀼𑀔𑀯𑀭𑁂𑀦 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀆𑀭𑁄𑀘𑀬𑀫𑀸𑀦𑁄 𑀯𑀺𑀬 𑀘 𑀅𑀕𑀫𑀸𑀲𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 ‘𑀲𑁄𑀪𑀢𑀺 𑀯𑀢 𑀪𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀆𑀦𑀦𑁆𑀤𑁄, 𑀲𑀘𑁂 𑀲𑀢𑁆𑀣𑀸 𑀥𑀭𑁂𑀬𑁆𑀬, 𑀅𑀤𑁆𑀥𑀸 𑀅𑀚𑁆𑀚 𑀆𑀦𑀦𑁆𑀤𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀤𑁂𑀬𑁆𑀬, 𑀳𑀦𑁆𑀤 𑀇𑀫𑀲𑁆𑀲𑀸𑀳𑀁 𑀇𑀤𑀸𑀦𑀺 𑀲𑀢𑁆𑀣𑀸𑀭𑀸 𑀤𑀸𑀢𑀩𑁆𑀩𑀁 𑀲𑀸𑀥𑀼𑀓𑀸𑀭𑀁 𑀤𑀤𑀸𑀫𑀻’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀥𑀼𑀓𑀸𑀭𑀫𑀤𑀸𑀲𑀻’’𑀢𑀺.

𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀻𑀢𑀺𑀧𑀺 𑀏𑀓𑁂𑀢𑀺 𑀏𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀁 𑀢𑀣𑀸 𑀢𑀣𑀸 𑀕𑀳𑁂𑀢𑁆𑀯𑀸 𑀆𑀕𑀢𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀘𑀦𑁂 𑀅𑀜𑁆𑀜𑀁 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀲𑀢𑁆𑀢𑀫𑀸𑀲𑀁 𑀓𑀢𑀸𑀬 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀓𑀤𑀸𑀘𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀆𑀕𑀢𑀢𑁆𑀢𑀸 𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂 𑀯𑀤𑀦𑁆𑀢𑀺. 𑀓𑀤𑀸𑀘𑀺 𑀆𑀓𑀸𑀲𑁂𑀦 𑀆𑀕𑀢𑀢𑁆𑀢𑀸 𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂 𑀯𑀤𑀦𑁆𑀢𑀻’’𑀢𑀺.

𑀪𑀺𑀓𑁆𑀔𑀽 ¶ 𑀆𑀫𑀦𑁆𑀢𑁂𑀲𑀻𑀢𑀺 𑀪𑀺𑀓𑁆𑀔𑀽 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀧𑀦 𑀜𑀸𑀧𑀦𑁂𑀧𑀺 𑀳𑁄𑀢𑀺. 𑀬𑀣𑀸𑀳 𑁋 ‘‘𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, (𑀤𑀻. 𑀦𑀺. 𑁨.𑁨𑁧𑁮) 𑀧𑀝𑀺𑀯𑁂𑀤𑀬𑀸𑀫𑀺 ¶ 𑀯𑁄, 𑀪𑀺𑀓𑁆𑀔𑀯𑁂’’𑀢𑀺 (𑀅. 𑀦𑀺. 𑁭.𑁭𑁨). 𑀧𑀓𑁆𑀓𑁄𑀲𑀦𑁂𑀧𑀺 𑀤𑀺𑀲𑁆𑀲𑀢𑀺. 𑀬𑀣𑀸𑀳 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀻’’𑀢𑀺 (𑀅. 𑀦𑀺. 𑁯.𑁧𑁧). 𑀆𑀯𑀼𑀲𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑀤𑀻𑀧𑀦𑀁. 𑀓𑀁 𑀥𑀼𑀭𑀁 𑀓𑀢𑁆𑀯𑀸𑀢𑀺 𑀓𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸. 𑀓𑀺𑀁 𑀆𑀦𑀦𑁆𑀤𑁄 𑀦𑀧𑁆𑀧𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀞𑀧𑀺𑀢𑀧𑀼𑀘𑁆𑀙𑀸. 𑀦𑀧𑁆𑀧𑀳𑁄𑀢𑀻𑀢𑀺 𑀦 𑀲𑀓𑁆𑀓𑁄𑀢𑀺. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀬𑀤𑀺𑀤𑀦𑁆𑀢𑀺 𑀘 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄, 𑀬𑀤𑀺𑀤𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀦𑁆𑀦𑀻𑀢𑀺 𑀲𑀫𑁆𑀫𑀢𑀁 𑀅𑀓𑀸𑀲𑀺. 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀦𑁆𑀢𑀺 𑀧𑀼𑀘𑁆𑀙𑀥𑀸𑀢𑀼𑀲𑁆𑀲 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀩𑀻𑀚𑀦𑀻𑀕𑀳𑀡𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀥𑀫𑁆𑀫𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀸𑀧𑀺 𑀳𑀺 𑀥𑀫𑁆𑀫𑀓𑀣𑀺𑀓𑀸𑀦𑀁 𑀥𑀫𑁆𑀫𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀺𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀡𑁆𑀳𑀸𑀢𑀺. 𑀦 𑀳𑀺 𑀅𑀜𑁆𑀜𑀣𑀸 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑀺𑀓𑁆𑀔𑀸𑀲𑀁𑀬𑀫𑀸𑀦𑀁 𑀩𑀼𑀤𑁆𑀥𑀸𑀦𑀁 𑀫𑀼𑀔𑀘𑀦𑁆𑀤𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀳𑁄𑀢𑀺. ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀲𑁆𑀲 𑀲𑀗𑁆𑀕𑀻𑀢𑀺𑀬𑀸 𑀧𑀼𑀭𑀺𑀫𑀓𑀸𑀮𑁂 𑀧𑀞𑀫𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀘 𑀧𑀞𑀫𑀪𑀸𑀯𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀞𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀲𑀗𑁆𑀕𑀻𑀢𑀸𑀦𑀺, 𑀯𑀺𑀲𑁂𑀲𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀣𑀼𑀦𑀥𑀫𑁆𑀫𑁂𑀢𑀺 𑀘 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁.

𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀻𑀢𑀺𑀆𑀤𑀺 ‘‘𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁂𑀦 𑀲𑀳 𑀢𑀢𑁄 𑀅𑀯𑀲𑀺𑀝𑁆𑀞𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀺𑀁 𑀧𑀦𑁂𑀢𑁆𑀣 𑀧𑀞𑀫𑀧𑀸𑀭𑀸𑀚𑀺𑀓𑀧𑀸𑀴𑀺𑀬𑀁 𑀓𑀺𑀜𑁆𑀘𑀺 𑀅𑀧𑀦𑁂𑀢𑀩𑁆𑀩𑀁 𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀁 𑀯𑀸 𑀆𑀲𑀺 𑀦𑀸𑀲𑀻𑀢𑀺? 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀪𑀸𑀲𑀺𑀢𑁂 𑀅𑀧𑀦𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀦 𑀳𑀺 𑀢𑀣𑀸𑀕𑀢𑀸 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀦𑀺𑀭𑀢𑁆𑀣𑀓𑀁 𑀯𑀤𑀦𑁆𑀢𑀺, 𑀲𑀸𑀯𑀓𑀸𑀦𑀁 𑀧𑀦 𑀤𑁂𑀯𑀢𑀸𑀦𑀁 𑀯𑀸 𑀪𑀸𑀲𑀺𑀢𑁂 𑀅𑀧𑀦𑁂𑀢𑀩𑁆𑀩𑀫𑁆𑀧𑀺 𑀳𑁄𑀢𑀺, 𑀢𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸 𑀅𑀧𑀦𑀬𑀺𑀁𑀲𑀼, 𑀧𑀓𑁆𑀔𑀺𑀧𑀺𑀢𑀩𑁆𑀩𑀁 𑀧𑀦 𑀲𑀩𑁆𑀩𑀢𑁆𑀣𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀁 𑀬𑀢𑁆𑀣 𑀧𑀓𑁆𑀔𑀺𑀧𑀺𑀢𑀼𑀁 𑀬𑀼𑀢𑁆𑀢𑀁, 𑀢𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼𑀬𑁂𑀯. 𑀓𑀺𑀁 𑀧𑀦 𑀢𑀦𑁆𑀢𑀺 𑀘𑁂? ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺 𑀯𑀸 ‘‘𑀅𑀣 𑀔𑁄’’𑀇𑀢𑀺 𑀯𑀸 ‘‘𑀏𑀯𑀁 𑀯𑀼𑀢𑁆𑀢𑁂’’𑀢𑀺 𑀯𑀸 ‘‘𑀏𑀢𑀤𑀯𑁄𑀘𑀸’’𑀢𑀺 𑀯𑀸 𑀏𑀯𑀫𑀸𑀤𑀺𑀓𑀁 𑀲𑀫𑁆𑀩𑀦𑁆𑀥𑀯𑀘𑀦𑀫𑀢𑁆𑀢𑀁. 𑀏𑀯𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀬𑀼𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀦 𑀇𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀦𑁆𑀢𑀺 𑀞𑀧𑁂𑀲𑀼𑀁 ¶ . 𑀧𑀞𑀫𑀧𑀸𑀭𑀸𑀚𑀺𑀓𑁂 𑀲𑀗𑁆𑀕𑀳𑀫𑀸𑀭𑀼𑀴𑁆𑀳𑁂 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀦𑀬𑁂𑀦𑁂𑀯 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀼. ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀘 𑀦𑁂𑀲𑀁 𑀲𑀚𑁆𑀛𑀸𑀬𑀸𑀭𑀫𑁆𑀪𑀓𑀸𑀮𑁂𑀬𑁂𑀯 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀺𑀬 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺𑀢𑁆𑀣. 𑀢𑁂 𑀏𑀢𑁂𑀦𑁂𑀯 𑀦𑀬𑁂𑀦 𑀲𑁂𑀲𑀧𑀸𑀭𑀸𑀚𑀺𑀓𑀸𑀦𑀺𑀧𑀺 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀇𑀤𑀁 𑀧𑀸𑀭𑀸𑀚𑀺𑀓𑀓𑀡𑁆𑀟’’𑀦𑁆𑀢𑀺 𑀞𑀧𑁂𑀲𑀼𑀁. 𑀏𑀯𑀁 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 ‘‘𑀢𑁂𑀭𑀲𑀓’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀯𑀻𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀲𑀢𑀸𑀦𑀺 ‘‘𑀫𑀳𑀸𑀯𑀺𑀪𑀗𑁆𑀕𑁄’’𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀫𑀳𑀸𑀯𑀺𑀪𑀗𑁆𑀕𑀸𑀯𑀲𑀸𑀦𑁂𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀢𑀢𑁄 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀅𑀝𑁆𑀞 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀧𑀸𑀭𑀸𑀚𑀺𑀓𑀓𑀡𑁆𑀟𑀁 ¶ 𑀦𑀸𑀫𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀲𑀢𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁄’’𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀉𑀪𑀢𑁄𑀯𑀺𑀪𑀗𑁆𑀕𑁄 𑀦𑀸𑀫 𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑁄’’𑀢𑀺 𑀞𑀧𑁂𑀲𑀼𑀁. 𑀉𑀪𑀢𑁄𑀯𑀺𑀪𑀗𑁆𑀕𑀸𑀯𑀲𑀸𑀦𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀅𑀲𑀻𑀢𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀔𑀦𑁆𑀥𑀓𑀁 𑀧𑀜𑁆𑀘𑀯𑀻𑀲𑀢𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀧𑀭𑀺𑀯𑀸𑀭𑀜𑁆𑀘 𑀲𑀗𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀇𑀤𑀁 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫𑀸’’𑀢𑀺 𑀞𑀧𑁂𑀲𑀼𑀁. 𑀯𑀺𑀦𑀬𑀧𑀺𑀝𑀓𑀸𑀯𑀲𑀸𑀦𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺. 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀇𑀤𑀁 𑀢𑀼𑀬𑁆𑀳𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸𑀘𑁂𑀳𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀯𑀼𑀢𑁆𑀢𑁄𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀯𑀺𑀦𑀬𑀧𑀺𑀝𑀓𑀁 𑀲𑀗𑁆𑀕𑀳𑀫𑀸𑀭𑁄𑀧𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀲𑀗𑁆𑀕𑀸𑀬𑀺𑀁𑀲𑀼. 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸’’𑀢𑀺𑀆𑀤𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀥𑀫𑁆𑀫𑀁 𑀧𑀼𑀘𑁆𑀙𑀻𑀢𑀺 𑀏𑀢𑁆𑀣 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀆𑀦𑀦𑁆𑀤𑀢𑁆𑀣𑁂𑀭𑁂 𑀤𑀦𑁆𑀢𑀔𑀘𑀺𑀢𑀁 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁂 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 ‘‘𑀓𑀢𑀭𑀁, 𑀆𑀯𑀼𑀲𑁄, 𑀧𑀺𑀝𑀓𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺? ‘‘𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁, 𑀪𑀦𑁆𑀢𑁂𑀢𑀺. 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀘𑀢𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄, 𑀢𑀸𑀲𑀼 𑀧𑀞𑀫𑀁 𑀓𑀢𑀭𑀁 𑀲𑀗𑁆𑀕𑀻𑀢𑀺𑀦𑁆𑀢𑀺? 𑀤𑀻𑀖𑀲𑀗𑁆𑀕𑀻𑀢𑀺𑀁, 𑀪𑀦𑁆𑀢𑁂𑀢𑀺. 𑀤𑀻𑀖𑀲𑀗𑁆𑀕𑀻𑀢𑀺𑀬𑀁 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺, 𑀢𑀬𑁄 𑀘 𑀯𑀕𑁆𑀕𑀸, 𑀢𑁂𑀲𑀼 𑀧𑀞𑀫𑀁 𑀓𑀢𑀭𑀁 𑀯𑀕𑁆𑀕𑀦𑁆𑀢𑀺. 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀁, 𑀪𑀦𑁆𑀢𑁂𑀢𑀺. 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁂 𑀢𑁂𑀭𑀲 𑀲𑀼𑀢𑁆𑀢𑀦𑁆𑀢𑀸, 𑀢𑁂𑀲𑀼 𑀧𑀞𑀫𑀁 𑀓𑀢𑀭𑀁 𑀲𑀼𑀢𑁆𑀢𑀦𑁆𑀢𑀺? 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀦𑀸𑀫 𑀪𑀦𑁆𑀢𑁂 𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢𑀁 𑀦𑀸𑀦𑀸𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀓𑀼𑀳𑀦𑀮𑀧𑀦𑀸𑀤𑀺𑀯𑀺𑀤𑁆𑀥𑀁𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀁, 𑀢𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀩𑁆𑀭𑀳𑁆𑀫𑀚𑀸𑀮𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺?

𑀅𑀦𑁆𑀢𑀭𑀸 ¶ 𑀘 𑀪𑀦𑁆𑀢𑁂 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀓𑀸𑀭𑀡𑀔𑀡𑀘𑀺𑀢𑁆𑀢𑀯𑁂𑀫𑀚𑁆𑀛𑀯𑀺𑀯𑀭𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸’’𑀢𑀺 (𑀅. 𑀦𑀺. 𑁬.𑁪𑁪; 𑁧𑁦.𑁭𑁫) 𑀘, ‘‘𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁨𑁮) 𑀘 𑀆𑀤𑀻𑀲𑀼 𑀓𑀸𑀭𑀡𑁂 𑀅𑀦𑁆𑀢𑀭𑀸𑀲𑀤𑁆𑀤𑁄 𑀯𑀢𑁆𑀢𑀢𑀺. ‘‘𑀅𑀤𑁆𑀤𑀲 𑀫𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀪𑀸𑀚𑀦𑀁 𑀥𑁄𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀔𑀡𑁂. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀘𑀺𑀢𑁆𑀢𑁂. ‘‘𑀅𑀦𑁆𑀢𑀭𑀸 𑀯𑁄𑀲𑀸𑀦𑀫𑀸𑀧𑀸𑀤𑀻’’𑀢𑀺𑀆𑀤𑀻𑀲𑀼 𑀯𑁂𑀫𑀚𑁆𑀛𑁂. ‘‘𑀅𑀧𑀺 𑀘𑀸𑀬𑀁 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁧) 𑀯𑀺𑀯𑀭𑁂. 𑀲𑁆𑀯𑀸𑀬𑀫𑀺𑀥 𑀯𑀺𑀯𑀭𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀴𑀦𑁆𑀤𑀸𑀬 𑀘 𑀯𑀺𑀯𑀭𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 ‘‘𑀅𑀦𑁆𑀢𑀭𑀸 𑀕𑀸𑀫𑀜𑁆𑀘 𑀦𑀤𑀺𑀜𑁆𑀘 𑀬𑀸𑀢𑀻’’𑀢𑀺 𑀏𑀯𑀁 𑀏𑀓𑀫𑁂𑀯 ¶ 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀚𑁆𑀚𑀦𑁆𑀢𑀺, 𑀲𑁄 𑀤𑀼𑀢𑀺𑀬𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺. 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀅𑀦𑁆𑀢𑀭𑀸𑀲𑀤𑁆𑀤𑀬𑁄𑀕𑁂𑀦 𑀉𑀧𑀬𑁄𑀕𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀇𑀥 𑀧𑀦 𑀬𑁄𑀚𑁂𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑁄. 𑀭𑀸𑀚𑀸𑀕𑀸𑀭𑀓𑁂𑀢𑀺 𑀢𑀢𑁆𑀣 𑀭𑀜𑁆𑀜𑁄 𑀓𑀻𑀴𑀦𑀢𑁆𑀣𑀁 𑀧𑀝𑀺𑀪𑀸𑀦𑀘𑀺𑀢𑁆𑀢𑀯𑀺𑀘𑀺𑀢𑁆𑀭𑀁 𑀅𑀕𑀸𑀭𑀁 𑀅𑀓𑀁𑀲𑀼, 𑀢𑀁 𑀭𑀸𑀚𑀸𑀕𑀸𑀭𑀓𑀦𑁆𑀢𑀺 𑀧𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀭𑀜𑁆𑀜𑁄 𑀉𑀬𑁆𑀬𑀸𑀦𑀁. 𑀢𑀲𑁆𑀲 𑀓𑀺𑀭 𑀤𑁆𑀯𑀸𑀭𑀲𑀫𑀻𑀧𑁂 𑀢𑀭𑀼𑀡𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀁 𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀅𑀯𑀺𑀤𑀽𑀭𑀪𑀯𑀢𑁆𑀢𑀸 𑀉𑀬𑁆𑀬𑀸𑀦𑀫𑁆𑀧𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑀁 ‘‘𑀯𑀭𑀼𑀡𑀸𑀦𑀕𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬.

𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀦𑁆𑀢𑀺 𑀏𑀢𑁆𑀣 𑀲𑀼𑀧𑁆𑀧𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀲𑀜𑁆𑀚𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯𑀓𑀦𑁆𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀫𑀸𑀡𑀯𑁄𑀢𑀺 𑀲𑀢𑁆𑀢𑁄𑀧𑀺 𑀘𑁄𑀭𑁄𑀧𑀺 𑀢𑀭𑀼𑀡𑁄𑀧𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑁋

‘‘𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀺, 𑀬𑁂 𑀧𑀫𑀚𑁆𑀚𑀦𑁆𑀢𑀺 𑀫𑀸𑀡𑀯𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺, 𑀳𑀻𑀦𑀓𑀸𑀬𑀽𑀧𑀕𑀸 𑀦𑀭𑀸’’𑀢𑀺. (𑀫. 𑀦𑀺. 𑁩.𑁨𑁭𑁧; 𑀅. 𑀦𑀺. 𑁩.𑁩𑁬) 𑁋

𑀆𑀤𑀻𑀲𑀼 𑀲𑀢𑁆𑀢𑁄 𑀫𑀸𑀡𑀯𑁄𑀢𑀺 𑀯𑀼𑀢𑁆𑀢𑁄. ‘‘𑀫𑀸𑀡𑀯𑁂𑀳𑀺𑀧𑀺 𑀲𑀫𑀸𑀕𑀘𑁆𑀙𑀦𑁆𑀢𑀺 𑀓𑀢𑀓𑀫𑁆𑀫𑁂𑀳𑀺𑀧𑀺 𑀅𑀓𑀢𑀓𑀫𑁆𑀫𑁂𑀳𑀺𑀧𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀘𑁄𑀭𑁄. ‘‘𑀅𑀫𑁆𑀩𑀝𑁆𑀞𑀫𑀸𑀡𑀯𑁄 𑀅𑀗𑁆𑀕𑀓𑁄 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁮-𑁨𑁬𑁧, 𑁩𑁧𑁬) 𑀢𑀭𑀼𑀡𑁄 𑀫𑀸𑀡𑀯𑁄𑀢𑀺 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀅𑀬𑀫𑁂𑀯 ¶ 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀩𑁆𑀭𑀳𑁆𑀫𑀤𑀢𑁆𑀢𑀁 𑀦𑀸𑀫 𑀢𑀭𑀼𑀡𑀧𑀼𑀭𑀺𑀲𑀁 𑀆𑀭𑀩𑁆𑀪𑀸’’𑀢𑀺. 𑀚𑀻𑀯𑀓𑀫𑁆𑀩𑀯𑀦𑁂𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑁂. 𑀅𑀣 ‘‘𑀓𑀁 𑀆𑀭𑀩𑁆𑀪𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑁂𑀦𑀲𑀤𑁆𑀥𑀺’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦 𑀏𑀢𑀁 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀏𑀯 𑀯𑀼𑀢𑁆𑀢𑀁, 𑀭𑀜𑁆𑀜𑀸𑀧𑀺 ‘‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀻’’𑀢𑀺𑀆𑀤𑀺𑀦𑀸 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦𑀸𑀢𑀺 𑀅𑀬𑀁 𑀓𑁄𑀲𑀮𑀭𑀜𑁆𑀜𑁄 𑀥𑀻𑀢𑀸𑀬 𑀧𑀼𑀢𑁆𑀢𑁄, 𑀦 𑀯𑀺𑀤𑁂𑀳𑀭𑀜𑁆𑀜𑁄, ‘‘𑀯𑁂𑀤𑁂𑀳𑀻’’𑀢𑀺 𑀧𑀦 𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀫𑁂𑀢𑀁. 𑀯𑀺𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑁂𑀤𑁄, 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑁂𑀤𑁂𑀦 𑀈𑀳𑀢𑀺 𑀖𑀝𑀢𑀺 𑀯𑀸𑀬𑀫𑀢𑀻𑀢𑀺 𑀯𑁂𑀤𑁂𑀳𑀻, 𑀯𑁂𑀤𑁂𑀳𑀺𑀬𑀸 𑀧𑀼𑀢𑁆𑀢𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑁄, 𑀢𑁂𑀦.

𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀧𑀜𑁆𑀘 𑀦𑀺𑀓𑀸𑀬𑁂 𑀧𑀼𑀘𑁆𑀙𑀻𑀢𑀺 𑀏𑀢𑁆𑀣 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀦𑀬𑁂𑀦 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀸𑀯𑀲𑀸𑀦𑁂 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 𑀲𑀚𑁆𑀛𑀸𑀬𑀫𑀓𑀁𑀲𑀼. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺. 𑀏𑀯𑀁 𑀩𑁆𑀭𑀳𑁆𑀫𑀚𑀸𑀮𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀢𑁄 𑀧𑀭𑀁 ‘‘𑀲𑀸𑀫𑀜𑁆𑀜𑀨𑀮𑀁 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀸𑀦𑀼𑀓𑁆𑀓𑀫𑁂𑀦 𑀲𑀤𑁆𑀥𑀺𑀁 𑀩𑁆𑀭𑀳𑁆𑀫𑀚𑀸𑀮𑁂𑀦 𑀢𑁂𑀭𑀲𑀲𑀼𑀢𑁆𑀢𑀦𑁆𑀢𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 ‘‘𑀅𑀬𑀁 ¶ 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀦𑀸𑀫𑀸’’𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 𑀞𑀧𑁂𑀲𑀼𑀁. 𑀢𑀤𑀦𑀦𑁆𑀢𑀭𑀁 𑀫𑀳𑀸𑀯𑀕𑁆𑀕𑀁, 𑀢𑀤𑀦𑀦𑁆𑀢𑀭𑀁 𑀧𑀸𑀣𑀺𑀓𑀯𑀕𑁆𑀕𑀦𑁆𑀢𑀺 𑀏𑀯𑀁 𑀢𑀺𑀯𑀕𑁆𑀕𑀲𑀗𑁆𑀕𑀳𑀁 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀦𑁆𑀢𑀧𑀝𑀺𑀫𑀡𑁆𑀟𑀺𑀢𑀁 𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀢𑀦𑁆𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 ‘‘𑀅𑀬𑀁 𑀤𑀻𑀖𑀦𑀺𑀓𑀸𑀬𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄, 𑀇𑀫𑀁 𑀢𑀼𑀬𑁆𑀳𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸𑀘𑁂𑀳𑀻’’𑀢𑀺. 𑀢𑀢𑁄 𑀅𑀦𑀦𑁆𑀢𑀭𑀁 𑀅𑀲𑀻𑀢𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀦𑀺𑀲𑁆𑀲𑀺𑀢𑀓𑁂 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀇𑀫𑀁 𑀢𑀼𑀫𑁆𑀳𑁂 𑀧𑀭𑀺𑀳𑀭𑀣𑀸’’𑀢𑀺. 𑀢𑀤𑀦𑀦𑁆𑀢𑀭𑀁 𑀪𑀸𑀡𑀯𑀸𑀭𑀲𑀢𑀧𑀭𑀺𑀫𑀸𑀡𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀪𑀦𑁆𑀢𑁂, 𑀇𑀫𑀁 𑀢𑀼𑀫𑁆𑀳𑀸𑀓𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸𑀘𑁂𑀣𑀸’’𑀢𑀺. 𑀢𑀤𑀦𑀦𑁆𑀢𑀭𑀁 𑀯𑀻𑀲𑀢𑀺𑀪𑀸𑀡𑀯𑀸𑀭𑀲𑀢𑀧𑀅𑀫𑀸𑀡𑀁 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀇𑀫𑀁 𑀢𑀼𑀫𑁆𑀳𑀸𑀓𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸𑀘𑁂𑀣𑀸’’𑀢𑀺.

𑀢𑀤𑀦𑀦𑁆𑀢𑀭𑀁 𑁋

‘‘𑀥𑀫𑁆𑀫𑀲𑀗𑁆𑀕𑀡𑀺𑀁 𑀯𑀺𑀪𑀗𑁆𑀕𑀜𑁆𑀘, 𑀓𑀣𑀸𑀯𑀢𑁆𑀣𑀼𑀜𑁆𑀘 𑀧𑀼𑀕𑁆𑀕𑀮𑀁;

𑀥𑀸𑀢𑀼𑀬𑀫𑀓𑀁 𑀧𑀝𑁆𑀞𑀸𑀦𑀁, 𑀅𑀪𑀺𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀏𑀯𑀁 ¶ 𑀲𑀁𑀯𑀡𑁆𑀡𑀺𑀢𑀁 𑀲𑀼𑀔𑀼𑀫𑀜𑀸𑀡𑀕𑁄𑀘𑀭𑀁 𑀢𑀦𑁆𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 ‘‘𑀇𑀤𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀜𑁆𑀘 𑀅𑀭𑀳𑀦𑁆𑀢𑀲𑀢𑀸𑀦𑀺 𑀲𑀚𑁆𑀛𑀸𑀬𑀫𑀓𑀁𑀲𑀼. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀣𑀯𑀻𑀓𑀫𑁆𑀧𑁄 𑀅𑀳𑁄𑀲𑀺. 𑀢𑀢𑁄 𑀧𑀭𑀁 𑀚𑀸𑀢𑀓𑀁 𑀫𑀳𑀸𑀦𑀺𑀤𑁆𑀤𑁂𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁄 𑀅𑀧𑀤𑀸𑀦𑀁 𑀲𑀼𑀢𑁆𑀢𑀦𑀺𑀧𑀸𑀢𑁄 𑀔𑀼𑀤𑁆𑀤𑀓𑀧𑀸𑀞𑁄 𑀥𑀫𑁆𑀫𑀧𑀤𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀯𑀺𑀫𑀸𑀦𑀯𑀢𑁆𑀣𑀼 𑀧𑁂𑀢𑀯𑀢𑁆𑀣𑀼 𑀣𑁂𑀭𑀕𑀸𑀣𑀸 𑀣𑁂𑀭𑀻𑀕𑀸𑀣𑀸𑀢𑀺 𑀇𑀫𑀁 𑀢𑀦𑁆𑀢𑀺𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 ‘‘𑀔𑀼𑀤𑁆𑀤𑀓𑀕𑀦𑁆𑀣𑁄 𑀦𑀸𑀫 𑀅𑀬’’𑀦𑁆𑀢𑀺 𑀘 𑀯𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀲𑁆𑀫𑀺𑀁𑀬𑁂𑀯 𑀲𑀗𑁆𑀕𑀳𑀁 𑀆𑀭𑁄𑀧𑀬𑀺𑀁𑀲𑀽𑀢𑀺 𑀤𑀻𑀖𑀪𑀸𑀡𑀓𑀸 𑀯𑀤𑀦𑁆𑀢𑀺. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 ‘‘𑀘𑀭𑀺𑀬𑀸𑀧𑀺𑀝𑀓𑀩𑀼𑀤𑁆𑀥𑀯𑀁𑀲𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀫𑁆𑀧𑀺 𑀢𑀁 𑀔𑀼𑀤𑁆𑀤𑀓𑀕𑀦𑁆𑀣𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀚𑀸𑀢𑀓𑀸𑀤𑀺𑀓𑁂 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦 𑀘 𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀢𑀸𑀤𑀺𑀲𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑀗𑁆𑀕𑀡𑁆𑀳𑀺𑀢𑀼𑀁 𑀬𑀼𑀢𑁆𑀢𑀁, 𑀦 𑀧𑀦 𑀤𑀻𑀖𑀦𑀺𑀓𑀸𑀬𑀸𑀤𑀺𑀧𑁆𑀧𑀓𑀸𑀭𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂, 𑀦𑀸𑀧𑀺 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀪𑀽𑀢𑁂 𑀯𑀺𑀦𑀬𑀧𑀺𑀝𑀓𑁂𑀢𑀺. 𑀤𑀻𑀖𑀪𑀸𑀡𑀓𑀸 ‘‘𑀚𑀸𑀢𑀓𑀸𑀤𑀻𑀦𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑀗𑁆𑀕𑀳𑁄’’𑀢𑀺 𑀯𑀤𑀦𑁆𑀢𑀺. 𑀘𑀭𑀺𑀬𑀸𑀧𑀺𑀝𑀓𑀩𑀼𑀤𑁆𑀥𑀯𑀁𑀲𑀸𑀦𑀜𑁆𑀘𑁂𑀢𑁆𑀣 𑀅𑀕𑁆𑀕𑀳𑀡𑀁 𑀚𑀸𑀢𑀓𑀕𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀺𑀢𑀸𑀦𑀁 𑀚𑀸𑀢𑀓𑀸𑀤𑀻𑀦𑀁 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸𑀪𑀸𑀯𑀢𑁄 𑀢𑀸𑀤𑀺𑀲𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄, 𑀦 𑀧𑀦 𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂𑀢𑀺 𑀚𑀸𑀢𑀓𑀸𑀤𑀻𑀦𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀢𑀁 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀼𑀢𑁆𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀔𑀼𑀤𑁆𑀤𑀓𑀦𑀺𑀓𑀸𑀬𑀲𑁆𑀲 𑀲𑁂𑀲𑀦𑀺𑀓𑀸𑀬𑀸𑀦𑀁 𑀯𑀺𑀬 𑀅𑀧𑀸𑀓𑀝𑀢𑁆𑀢𑀸 𑀲𑁂𑀲𑁂 𑀞𑀧𑁂𑀢𑁆𑀯𑀸 𑀔𑀼𑀤𑁆𑀤𑀓𑀦𑀺𑀓𑀸𑀬𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀔𑀼𑀤𑁆𑀤𑀓𑀦𑀺𑀓𑀸𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀓𑀸𑀬𑁂𑀲𑀼. 𑀢𑀢𑁆𑀣𑀸𑀢𑀺 𑀔𑀼𑀤𑁆𑀤𑀓𑀦𑀺𑀓𑀸𑀬𑁂.

𑀏𑀯𑀁 ¶ 𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀓𑀸𑀮𑀤𑁂𑀲𑀓𑀸𑀭𑀓𑀓𑀭𑀡𑀧𑁆𑀧𑀓𑀸𑀭𑁂𑀳𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀯𑀯𑀢𑁆𑀣𑀸𑀧𑀺𑀢𑁂𑀲𑀼 𑀥𑀫𑁆𑀫𑀯𑀺𑀦𑀬𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑀏𑀓𑀯𑀺𑀥𑀸𑀤𑀺𑀪𑁂𑀤𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀏𑀢𑁆𑀣 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀜𑀸𑀡𑀁 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀯𑀸𑀢𑀺 𑀉𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀁 𑀲𑀦𑁆𑀥𑀸𑀬𑀸𑀳. 𑀯𑀺𑀫𑀼𑀢𑁆𑀢𑀺𑀭𑀲𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑁆𑀲𑀸𑀤𑀁 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀓𑀁 𑀯𑀸 𑀅𑀕𑁆𑀕𑀨𑀮𑀦𑀺𑀧𑁆𑀨𑀸𑀤𑀦𑀢𑁄, 𑀯𑀺𑀫𑀼𑀢𑁆𑀢𑀺𑀓𑀺𑀘𑁆𑀘𑀁 𑀯𑀸 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀸𑀤𑀦𑀢𑁄.

𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀓𑀺𑀮𑁂𑀲𑀯𑀺𑀦𑀬𑀦𑁂𑀦 𑀯𑀺𑀦𑀬𑁄, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀧𑀢𑀦𑀸𑀤𑀺𑀢𑁄 𑀥𑀸𑀭𑀡𑁂𑀦 𑀥𑀫𑁆𑀫𑁄 𑀘 𑀳𑁄𑀢𑀺 ¶ , 𑀇𑀥𑀸𑀥𑀺𑀧𑁆𑀧𑁂𑀢𑁂 𑀧𑀦 𑀥𑀫𑁆𑀫𑀯𑀺𑀦𑀬𑁂 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄 𑀆𑀳 ‘‘𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑁄’’𑀢𑀺. 𑀅𑀣 𑀯𑀸 𑀬𑀤𑀺𑀧𑀺 𑀥𑀫𑁆𑀫𑁄𑀬𑁂𑀯 𑀯𑀺𑀦𑀬𑁄 𑀧𑀭𑀺𑀬𑀢𑁆𑀢𑀺𑀆𑀤𑀺𑀪𑀸𑀯𑀢𑁄, 𑀢𑀣𑀸𑀧𑀺 𑀯𑀺𑀦𑀬𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁄 𑀅𑀪𑀺𑀦𑁆𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀧𑀬𑀼𑀢𑁆𑀢𑁄 𑀥𑀫𑁆𑀫𑀲𑀤𑁆𑀤𑁄 𑀯𑀺𑀦𑀬𑀢𑀦𑁆𑀢𑀺𑀯𑀺𑀧𑀭𑀻𑀢𑀁 𑀢𑀦𑁆𑀢𑀺𑀁 𑀤𑀻𑀧𑁂𑀢𑀺 𑀬𑀣𑀸 ‘‘𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄, 𑀕𑁄𑀩𑀮𑀻𑀩𑀤𑁆𑀤’’𑀦𑁆𑀢𑀺𑀆𑀤𑀺.

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀏𑀓𑀽𑀦𑀯𑀻𑀲𑀢𑀺𑀫𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀪𑀸𑀲𑀺𑀢𑀸. 𑀢𑁂𑀦𑀸𑀳 ‘‘𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺. 𑀇𑀤𑀁 𑀓𑀺𑀭 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀉𑀤𑀸𑀦𑀁. 𑀅𑀬𑀫𑀲𑁆𑀲 𑀲𑀗𑁆𑀔𑁂𑀧𑀢𑁆𑀣𑁄 (𑀥. 𑀧. 𑀅𑀝𑁆𑀞. 𑁨.𑁧𑁫𑁪) 𑁋 𑀅𑀳𑀁 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀓𑀸𑀭𑀓𑀁 𑀢𑀡𑁆𑀳𑀸𑀯𑀟𑁆𑀠𑀓𑀺𑀁 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀜𑀸𑀡𑁂𑀦 𑀢𑀁 𑀤𑀝𑁆𑀞𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀩𑁄𑀥𑀺𑀜𑀸𑀡𑀲𑁆𑀲𑀢𑁆𑀣𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀁 𑀲𑀁𑀲𑀸𑀭𑀯𑀝𑁆𑀝𑀁 𑀅𑀦𑀺𑀩𑁆𑀩𑀺𑀲𑀁 𑀅𑀦𑀺𑀩𑁆𑀩𑀺𑀲𑀦𑁆𑀢𑁄 𑀢𑀁 𑀜𑀸𑀡𑀁 𑀅𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄𑀬𑁂𑀯 𑀲𑀦𑁆𑀥𑀸𑀯𑀺𑀲𑁆𑀲𑀁 𑀲𑀁𑀲𑀭𑀺𑀁. 𑀬𑀲𑁆𑀫𑀸 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀫𑀺𑀲𑁆𑀲𑀢𑀸𑀬 𑀚𑀸𑀢𑀺 𑀦𑀸𑀫𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀦𑁆𑀢𑀼𑀁 𑀤𑀼𑀓𑁆𑀔𑀸, 𑀦 𑀘 𑀲𑀸 𑀢𑀲𑁆𑀫𑀺𑀁 𑀅𑀤𑀺𑀝𑁆𑀞𑁂 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀕𑀯𑁂𑀲𑀦𑁆𑀢𑁄 𑀲𑀦𑁆𑀥𑀸𑀯𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄.

𑀤𑀺𑀝𑁆𑀞𑁄𑀲𑀻𑀢𑀺 𑀇𑀤𑀸𑀦𑀺 𑀫𑀬𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂𑀦 𑀤𑀺𑀝𑁆𑀞𑁄 𑀅𑀲𑀺. 𑀧𑀼𑀦 𑀕𑁂𑀳𑀦𑁆𑀢𑀺 𑀧𑀼𑀦 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀫𑀫 𑀕𑁂𑀳𑀁 𑀦 𑀓𑀸𑀳𑀲𑀺 𑀦 𑀓𑀭𑀺𑀲𑁆𑀲𑀲𑀺. 𑀢𑀯 𑀲𑀩𑁆𑀩𑀸 𑀅𑀦𑀯𑀲𑁂𑀲𑀸 𑀓𑀺𑀮𑁂𑀲𑀨𑀸𑀲𑀼𑀓𑀸 𑀫𑀬𑀸 𑀪𑀕𑁆𑀕𑀸. 𑀇𑀫𑀲𑁆𑀲 𑀢𑀬𑀸 𑀓𑀢𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀓𑀽𑀝𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀓𑀡𑁆𑀡𑀺𑀓𑀫𑀡𑁆𑀟𑀮𑀁 𑀯𑀺𑀲𑀗𑁆𑀔𑀢𑀁 𑀯𑀺𑀤𑁆𑀥𑀁𑀲𑀺𑀢𑀁. 𑀯𑀺𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀢𑀁 𑀅𑀦𑀼𑀧𑀯𑀺𑀝𑁆𑀞𑀁 𑀇𑀤𑀸𑀦𑀺 𑀫𑀫 𑀘𑀺𑀢𑁆𑀢𑀁, 𑀅𑀳𑀜𑁆𑀘 𑀢𑀡𑁆𑀳𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀅𑀚𑁆𑀛𑀕𑀸 𑀅𑀥𑀺𑀕𑀢𑁄 𑀧𑀢𑁆𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀯𑀺𑀲𑀗𑁆𑀔𑀸𑀭𑀕𑀢𑀦𑁆𑀢𑀺 𑀘𑀺𑀢𑁆𑀢𑀫𑁂𑀯 𑀢𑀡𑁆𑀳𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 ¶ 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀅𑀚𑁆𑀛𑀕𑀸 𑀅𑀥𑀺𑀕𑀢𑁄 𑀧𑀢𑁆𑀢𑁄’’𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀬𑀁 𑀫𑀦𑀲𑀸 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀁 𑀆𑀤𑀺. ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸𑀢𑀺 𑀅𑀬𑀁 𑀧𑀦 𑀯𑀸𑀘𑀸𑀬 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀁 𑀆𑀤𑀻’’𑀢𑀺 𑀯𑀤𑀦𑁆𑀢𑀺. 𑀅𑀦𑁆𑀢𑁄𑀚𑀧𑁆𑀧𑀦𑀯𑀲𑁂𑀦 𑀓𑀺𑀭 𑀪𑀕𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑁂𑀘𑀻𑀢𑀺 ¶ 𑀔𑀦𑁆𑀥𑀓𑀪𑀸𑀡𑀓𑀸. 𑀧𑀞𑀫𑀁 𑀯𑀼𑀢𑁆𑀢𑁄 𑀧𑀦 𑀥𑀫𑁆𑀫𑀧𑀤𑀪𑀸𑀡𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀔𑀦𑁆𑀥𑀓𑀪𑀸𑀡𑀓𑀸 𑀯𑀤𑀦𑁆𑀢𑀺 ‘‘𑀥𑀫𑁆𑀫𑀧𑀤𑀪𑀸𑀡𑀓𑀸𑀦𑀁 𑀕𑀸𑀣𑀸 𑀫𑀦𑀲𑀸 𑀤𑁂𑀲𑀺𑀢𑀢𑁆𑀢𑀸 𑀢𑀤𑀸 𑀫𑀳𑀢𑁄 𑀚𑀦𑀲𑁆𑀲 𑀉𑀧𑀓𑀸𑀭𑀸𑀬 𑀦 𑀳𑁄𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀕𑀸𑀣𑀸 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀢𑀤𑀸 𑀲𑀼𑀡𑀦𑁆𑀢𑀸𑀦𑀁 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀉𑀧𑀓𑀸𑀭𑀸𑀬 𑀅𑀳𑁄𑀲𑀺, 𑀢𑀲𑁆𑀫𑀸 𑀇𑀤𑀫𑁂𑀯 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺. 𑀥𑀫𑁆𑀫𑀧𑀤𑀪𑀸𑀡𑀓𑀸 𑀧𑀦 ‘‘𑀤𑁂𑀲𑀦𑀸𑀬 𑀚𑀦𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀪𑀸𑀯𑁄 𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀪𑀕𑀯𑀢𑀸 𑀫𑀦𑀲𑀸 𑀤𑁂𑀲𑀺𑀢𑀢𑁆𑀢𑀸𑀬𑁂𑀯 𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀉𑀪𑀬𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀁 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀦𑀼 𑀘 𑀬𑀤𑀺 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀫𑀦𑀲𑀸 𑀤𑁂𑀲𑀺𑀢𑀁, 𑀅𑀣 𑀓𑀲𑁆𑀫𑀸 𑀥𑀫𑁆𑀫𑀧𑀤𑀅𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁨.𑁧𑁫𑁩-𑁧𑁫𑁪) ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀉𑀤𑀸𑀦𑀯𑀲𑁂𑀦 𑀉𑀤𑀸𑀦𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀢𑀢𑁆𑀣𑀸𑀧𑀺 𑀫𑀦𑀲𑀸 𑀉𑀤𑀸𑀦𑁂𑀢𑁆𑀯𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀫𑀦𑀲𑀸𑀯 𑀤𑁂𑀲𑀺𑀢𑀦𑁆𑀢𑀺 𑀏𑀯𑀁 𑀕𑀳𑀡𑁂 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀬𑀤𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀤𑁂𑀲𑀺𑀢𑀁 𑀲𑀺𑀬𑀸, 𑀉𑀤𑀸𑀦𑀧𑀸𑀴𑀺𑀬𑀁 𑀆𑀭𑀼𑀴𑁆𑀳𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀉𑀤𑀸𑀦𑀧𑀸𑀴𑀺𑀬𑀁 𑀅𑀦𑀸𑀭𑀼𑀴𑁆𑀳𑀪𑀸𑀯𑁄𑀬𑁂𑀯 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀫𑀦𑀲𑀸 𑀤𑁂𑀲𑀺𑀢𑀪𑀸𑀯𑁂 𑀓𑀸𑀭𑀡𑀦𑁆𑀢𑀺 𑀯𑀤𑀦𑁆𑀢𑀺.

𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸. 𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺 𑀆𑀤𑀺𑀕𑀸𑀣𑀸𑀢𑁆𑀢𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑀸𑀦𑀕𑀸𑀣𑀦𑁆𑀢𑀺 𑀧𑀦 𑀚𑀸𑀢𑀺𑀬𑀸 𑀏𑀓𑀯𑀘𑀦𑀁, 𑀢𑀢𑁆𑀣𑀸𑀧𑀺 𑀧𑀞𑀫𑀕𑀸𑀣𑀁𑀬𑁂𑀯 𑀯𑀸 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀔𑀦𑁆𑀥𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀇𑀤𑀁 ‘‘𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀦 𑀏𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, ‘‘𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸’’𑀢𑀺 𑀏𑀢𑁂𑀦 𑀧𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀫𑁂𑀯 𑀳𑀺 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺. 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦. 𑀆𑀫𑀦𑁆𑀢𑀬𑀸𑀫𑀻𑀢𑀺 𑀦𑀺𑀯𑁂𑀤𑀬𑀸𑀫𑀺, 𑀩𑁄𑀥𑁂𑀫𑀻𑀢𑀺 𑀅𑀢𑁆𑀣𑁄. 𑀯𑀬𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑀼𑀔𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀫𑁆𑀧𑀺 𑀲𑀗𑁆𑀔𑀸𑀭𑀸𑀦𑀁 𑀯𑀺𑀪𑀸𑀯𑁂𑀢𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄. 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀦𑀬𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁 𑀩𑀼𑀤𑁆𑀥𑀸𑀯𑁂𑀡𑀺𑀓𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀁 𑀅𑀯𑀺𑀧𑀭𑀻𑀢𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀓𑀸𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀇𑀤𑀸𑀦𑀺 ¶ 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀺 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀅𑀣 𑀯𑀸 ‘‘𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁂𑀦 𑀲𑀗𑁆𑀔𑁂𑀧𑁂𑀦 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀦𑀺𑀭𑀯𑀲𑁂𑀲𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀫𑀸𑀤𑀧𑀤𑀜𑁆𑀳𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀲𑀸𑀲𑀦𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀅𑀦𑁆𑀢𑀭𑁂𑀢𑀺 𑀅𑀦𑁆𑀢𑀭𑀸𑀴𑁂, 𑀯𑁂𑀫𑀚𑁆𑀛𑁂𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀓𑀫𑁆𑀫𑀫𑁂𑀯 𑀓𑀫𑁆𑀫𑀦𑁆𑀢𑀁, 𑀏𑀯𑀁 𑀲𑀼𑀢𑁆𑀢𑀫𑁂𑀯 𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀗𑁆𑀕𑀻𑀢𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀸𑀤𑀺. 𑀓𑁂𑀘𑀺 𑀧𑀦 ‘‘𑀲𑀼𑀪𑀲𑀼𑀢𑁆𑀢𑀫𑁆𑀧𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀅𑀲𑀗𑁆𑀕𑀻𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. ‘‘𑀧𑀞𑀫𑀲𑀗𑁆𑀕𑀻𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀤𑁂𑀲𑀺𑀢’’𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀲𑀼𑀪𑀲𑀼𑀢𑁆𑀢𑀁 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁪𑁪) 𑀆𑀕𑀢𑀁. 𑀢𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀦 𑀳𑁄𑀢𑀺. 𑀦 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀬𑀫𑁂𑀯 𑀲𑀼𑀪𑀲𑀼𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀸𑀫𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀪𑀲𑀼𑀢𑁆𑀢𑀁 𑀲𑀗𑁆𑀕𑀻𑀢𑀺𑀫𑀸𑀭𑁄𑀧𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀣 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀲𑁆𑀲 𑀏𑀯𑀫𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀯𑀼𑀢𑁆𑀢𑀫𑁆𑀧𑀺 𑀲𑀼𑀪𑀲𑀼𑀢𑁆𑀢𑀁 𑀧𑀞𑀫𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀢𑀦𑁆𑀢𑀺𑀁 𑀞𑀧𑁂𑀢𑀼𑀓𑀸𑀫𑁂𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀳𑀺 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦𑁂𑀯 ‘𑀏𑀯𑀁 𑀫𑁂 𑀲𑀼𑀢’𑀦𑁆𑀢𑀺𑀆𑀤𑀺𑀦𑀸 𑀢𑀦𑁆𑀢𑀺 𑀞𑀧𑀺𑀢𑀸’’𑀢𑀺, 𑀏𑀯𑀁 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀅𑀣 𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀼𑀪𑀲𑀼𑀢𑁆𑀢𑀁 𑀲𑀬𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀸𑀫𑀜𑁆𑀜𑀨𑀮𑀸𑀤𑀻𑀲𑀼 𑀪𑀕𑀯𑀢𑀸 𑀤𑁂𑀲𑀺𑀢𑀦𑀬𑁂𑀦𑁂𑀯 𑀤𑁂𑀲𑁂𑀲𑀻𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀮𑀤𑁆𑀥𑀦𑀬𑁂 𑀞𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑀺 𑀅𑀤𑀳𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦. 𑀤𑁆𑀯𑁂 𑀯𑀺𑀪𑀗𑁆𑀕𑀸𑀦𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀲𑁂𑀦𑁂𑀯 𑀤𑁆𑀯𑁂 𑀯𑀺𑀪𑀗𑁆𑀕𑀸𑀦𑀺. 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸𑀦𑀻𑀢𑀺 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑁂𑀲𑀼 𑀆𑀕𑀢𑀸𑀦𑀺 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸𑀦𑀺. 𑀲𑁄𑀴𑀲𑀧𑀭𑀺𑀯𑀸𑀭𑀸𑀢𑀺 𑀲𑁄𑀴𑀲𑀳𑀺 ¶ 𑀧𑀭𑀺𑀯𑀸𑀭𑁂𑀳𑀺 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀲𑁄𑀴𑀲𑀧𑀭𑀺𑀯𑀸𑀭𑀸𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀭𑀺𑀯𑀸𑀭𑀧𑀸𑀴𑀺𑀬𑀁 ‘‘𑀬𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑁧) 𑀧𑀜𑁆𑀜𑀢𑁆𑀢𑀺𑀯𑀸𑀭𑁄, 𑀢𑀢𑁄 𑀧𑀭𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁫𑁭) 𑀓𑀢𑀸𑀧𑀢𑁆𑀢𑀺𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 ¶ 𑀪𑀚𑀦𑁆𑀢𑀻’’𑀢𑀺𑀆𑀤𑀺𑀧𑁆𑀧𑀪𑁂𑀤𑁄 (𑀧𑀭𑀺. 𑁧𑁮𑁨) 𑀯𑀺𑀧𑀢𑁆𑀢𑀺𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀧𑁆𑀧𑀪𑁂𑀤𑁄 (𑀧𑀭𑀺. 𑁧𑁮𑁩) 𑀲𑀗𑁆𑀕𑀳𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁮𑁪) 𑀲𑀫𑀼𑀝𑁆𑀞𑀸𑀦𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁮𑁫) 𑀅𑀥𑀺𑀓𑀭𑀡𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻’’𑀢𑀺𑀆𑀤𑀺𑀧𑁆𑀧𑀪𑁂𑀤𑁄 (𑀧𑀭𑀺. 𑁧𑁮𑁬) 𑀲𑀫𑀣𑀯𑀸𑀭𑁄, 𑀢𑀤𑀦𑀦𑁆𑀢𑀭𑀁 𑀲𑀫𑀼𑀘𑁆𑀘𑀬𑀯𑀸𑀭𑁄 𑀘𑀸𑀢𑀺 𑀅𑀝𑁆𑀞 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑀢𑁄 𑀧𑀭𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑁧𑁮𑁮) 𑀦𑀬𑁂𑀦 𑀧𑀼𑀦 𑀧𑀘𑁆𑀘𑀬𑀯𑀲𑁂𑀦 𑀏𑀓𑁄 𑀧𑀜𑁆𑀜𑀢𑁆𑀢𑀺𑀯𑀸𑀭𑁄, 𑀢𑀲𑁆𑀲 𑀯𑀲𑁂𑀦 𑀧𑀼𑀭𑀺𑀫𑀲𑀤𑀺𑀲𑀸 𑀏𑀯 𑀓𑀢𑀸𑀧𑀢𑁆𑀢𑀺𑀯𑀸𑀭𑀸𑀤𑀬𑁄 𑀲𑀢𑁆𑀢 𑀯𑀸𑀭𑀸𑀢𑀺 𑀏𑀯𑀁 𑀅𑀧𑀭𑁂𑀧𑀺 𑀅𑀝𑁆𑀞 𑀯𑀸𑀭𑀸 𑀯𑀼𑀢𑁆𑀢𑀸. 𑀇𑀢𑀺 𑀇𑀫𑀸𑀦𑀺 𑀅𑀝𑁆𑀞, 𑀧𑀼𑀭𑀺𑀫𑀸𑀦𑀺𑀧𑀺 𑀅𑀝𑁆𑀞𑀸𑀢𑀺 𑀫𑀳𑀸𑀯𑀺𑀪𑀗𑁆𑀕𑁂 𑀲𑁄𑀴𑀲 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀢𑀢𑁄 𑀧𑀭𑀁 𑀢𑁂𑀦𑁂𑀯 𑀦𑀬𑁂𑀦 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂𑀧𑀺 𑀲𑁄𑀴𑀲 𑀯𑀸𑀭𑀸 𑀆𑀕𑀢𑀸𑀢𑀺 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀯𑀸𑀭𑁂𑀳𑀺 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀲𑁄𑀴𑀲𑀧𑀭𑀺𑀯𑀸𑀭𑀸𑀢𑀺 𑀯𑀼𑀘𑁆𑀘𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀧𑀭𑀺𑀯𑀸𑀭𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀤𑀺𑀲𑁆𑀲𑀢𑀺, 𑀩𑀳𑀽𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑁄𑀴𑀲𑀧𑀭𑀺𑀯𑀸𑀭𑀸’’𑀢𑀺 𑀏𑀯𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀅𑀬𑀫𑁆𑀧𑀺 𑀧𑀸𑀞𑁄 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀲𑁆𑀲𑁂𑀯𑀢𑁆𑀣𑁄 𑀯𑀼𑀢𑁆𑀢𑁄.

𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄. 𑀯𑀼𑀢𑁆𑀢𑀧𑁆𑀧𑀫𑀸𑀡𑀸𑀦𑀁 𑀯𑀸 𑀲𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑁄 𑀏𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸𑀢𑀺 ¶ 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀯𑀺𑀯𑀺𑀥𑀸 𑀳𑀻’’𑀢𑀺𑀆𑀤𑀺. 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸𑀢𑀺 𑀬𑀣𑀸𑀓𑁆𑀓𑀫𑀁 𑀮𑁄𑀓𑀯𑀚𑁆𑀚𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑀴𑁆𑀳𑀻𑀓𑀫𑁆𑀫𑀧𑁆𑀧𑀬𑁄𑀚𑀦𑀸, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀚𑁆𑀛𑀸𑀘𑀸𑀭𑀦𑀺𑀲𑁂𑀥𑀦𑀢𑁄𑀢𑀺 𑀲𑀜𑁆𑀜𑀫𑀯𑁂𑀮𑀁 𑀅𑀢𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄 𑀆𑀘𑀸𑀭𑁄 𑀅𑀚𑁆𑀛𑀸𑀘𑀸𑀭𑁄, 𑀯𑀻𑀢𑀺𑀓𑁆𑀓𑀫𑁄, 𑀢𑀲𑁆𑀲 𑀦𑀺𑀲𑁂𑀥𑀦𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀯𑀺𑀯𑀺𑀥𑀦𑀬𑀢𑁆𑀢𑀸𑀤𑀺𑀳𑁂𑀢𑀼𑀦𑀸. 𑀏𑀢𑀦𑁆𑀢𑀺 ‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸’’𑀢𑀺𑀆𑀤𑀺𑀕𑀸𑀣𑀸𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀯𑀺𑀦𑀬𑀲𑁆𑀲. 𑀇𑀢𑀭𑀁 𑀧𑀦𑀸𑀢𑀺 𑀲𑀼𑀢𑁆𑀢𑀁.

𑀇𑀤𑀸𑀦𑀺 𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄𑀢𑀺𑀆𑀤𑀺𑀕𑀸𑀣𑀸𑀬 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂𑀢𑀺 𑀬𑁄 𑀢𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺 𑀲𑀼𑀡𑀸𑀢𑀺 𑀯𑀸𑀘𑁂𑀢𑀺 𑀘𑀺𑀦𑁆𑀢𑁂𑀢𑀺 𑀤𑁂𑀲𑁂𑀢𑀺 𑀘, 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀻𑀮𑀸𑀤𑀺𑀅𑀢𑁆𑀣𑁄 𑀢𑀲𑁆𑀲𑀧𑀺 𑀳𑁄𑀢𑀺, 𑀢𑁂𑀦 𑀧𑀭𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄 𑀧𑀭𑀲𑁆𑀲𑀧𑀺 𑀳𑁄𑀢𑀻𑀢𑀺 𑀢𑀤𑀼𑀪𑀬𑀁 𑀢𑀁 ¶ 𑀲𑀼𑀢𑁆𑀢𑀁 𑀲𑀽𑀘𑁂𑀢𑀺 𑀤𑀻𑀧𑁂𑀢𑀺. 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁆𑀣𑁂 𑀘𑀸𑀢𑀺 𑀏𑀯𑀫𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀲𑀤𑁆𑀤𑁄 𑀘𑀸𑀬𑀁 𑀳𑀺𑀢𑀧𑀭𑀺𑀬𑀸𑀬𑀯𑀘𑀦𑁄, 𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑁄. 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀧𑀺 𑀪𑀸𑀲𑀺𑀢𑀢𑁆𑀣𑀁 𑀲𑀽𑀘𑁂𑀢𑀺 𑀧𑀭𑀲𑁆𑀲𑀧𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀲𑀺𑀬𑀸, 𑀲𑀼𑀢𑁆𑀢𑁂𑀦 𑀘 𑀬𑁄 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀲𑁄 𑀢𑀲𑁆𑀲𑁂𑀯 𑀳𑁄𑀢𑀺, 𑀦 𑀢𑁂𑀦 𑀧𑀭𑀢𑁆𑀣𑁄 𑀲𑀽𑀘𑀺𑀢𑁄 𑀳𑁄𑀢𑀻𑀢𑀺. 𑀢𑁂𑀦 𑀲𑀽𑀘𑁂𑀢𑀩𑁆𑀩𑀲𑁆𑀲 𑀧𑀭𑀢𑁆𑀣𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀢𑁆𑀢𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀢𑁆𑀣𑀲𑁆𑀲 𑀅𑀪𑀸𑀯𑀸 𑀆𑀤𑀺𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑀺𑀢𑀧𑀭𑀺𑀬𑀸𑀬𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀢𑁆𑀢𑁂 𑀅𑀲𑀫𑁆𑀪𑀯𑀢𑁄 𑀲𑀼𑀢𑁆𑀢𑀸𑀥𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸 𑀯𑀼𑀢𑁆𑀢𑀸.

𑀅𑀣 𑀯𑀸 𑀲𑀼𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑁂 𑀅𑀢𑁆𑀢𑀢𑁆𑀣𑀸𑀤𑀬𑁄 𑀅𑀢𑁆𑀣𑀧𑁆𑀧𑀪𑁂𑀤𑀸 ‘‘𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁬𑁩) 𑀯𑀼𑀢𑁆𑀢𑀸 𑀅𑀢𑁆𑀢𑀢𑁆𑀣𑁄, 𑀧𑀭𑀢𑁆𑀣𑁄, 𑀉𑀪𑀬𑀢𑁆𑀣𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀅𑀢𑁆𑀣𑁄, 𑀕𑀼𑀴𑁆𑀳𑁄 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀅𑀢𑁆𑀣𑁄, 𑀦𑀻𑀢𑁄 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄𑀢𑀺, 𑀢𑁂 𑀅𑀢𑁆𑀣𑁂 𑀲𑀼𑀢𑁆𑀢𑀁 𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄 ¶ 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀓𑀺𑀜𑁆𑀘𑀸𑀧𑀺 𑀲𑀼𑀢𑁆𑀢𑀦𑀺𑀭𑀧𑁂𑀓𑁆𑀔𑀁 𑀅𑀢𑁆𑀢𑀢𑁆𑀣𑀸𑀤𑀬𑁄 𑀯𑀼𑀢𑁆𑀢𑀸 𑀲𑀼𑀢𑁆𑀢𑀢𑁆𑀣𑀪𑀸𑀯𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀢𑁂𑀲𑀼 𑀧𑀦 𑀏𑀓𑁄𑀧𑀺 𑀅𑀢𑁆𑀣𑀧𑁆𑀧𑀪𑁂𑀤𑁄 𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑀢𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀲𑁆𑀫𑀸 𑀢𑁂 𑀅𑀢𑁆𑀣𑁂 𑀲𑀼𑀢𑁆𑀢𑀁 𑀲𑀽𑀘𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀣-𑀲𑀤𑁆𑀤𑁄𑀬𑀁 𑀪𑀸𑀲𑀺𑀢𑀢𑁆𑀣𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺. 𑀏𑀢𑁆𑀣 𑀳𑀺 𑀧𑀼𑀭𑀺𑀫𑀓𑀸 𑀧𑀜𑁆𑀘 𑀅𑀢𑁆𑀣𑀧𑁆𑀧𑀪𑁂𑀤𑀸 𑀳𑀺𑀢𑀧𑀭𑀺𑀬𑀸𑀬𑀸, 𑀢𑀢𑁄 𑀧𑀭𑁂 𑀙 𑀪𑀸𑀲𑀺𑀢𑀢𑁆𑀣𑀪𑁂𑀤𑀸, 𑀧𑀘𑁆𑀙𑀺𑀫𑀓𑀸 𑀧𑀦 𑀉𑀪𑀬𑀲𑀪𑀸𑀯𑀸. 𑀢𑀢𑁆𑀣 𑀤𑀼𑀭𑀥𑀺𑀕𑀫𑀢𑀸𑀬 𑀯𑀺𑀪𑀸𑀯𑀦𑁂 𑀅𑀕𑀸𑀥𑀪𑀸𑀯𑁄 𑀕𑀫𑁆𑀪𑀻𑀭𑁄, 𑀦 𑀯𑀺𑀯𑀝𑁄 𑀕𑀼𑀴𑁆𑀳𑁄, 𑀫𑀽𑀮𑀼𑀤𑀓𑀸𑀤𑀬𑁄 𑀯𑀺𑀬 𑀧𑀁𑀲𑀼𑀦𑀸 𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀜𑀸𑀧𑁂𑀢𑀩𑁆𑀩𑁄 𑀦𑁂𑀬𑁆𑀬𑁄, 𑀬𑀣𑀸𑀭𑀼𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀦𑀻𑀢𑁄. 𑀅𑀦𑀯𑀚𑁆𑀚𑀦𑀺𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑀸 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀥𑀫𑁆𑀫𑀯𑀲𑁂𑀦 𑀯𑀸. 𑀧𑀭𑀫𑀢𑁆𑀣𑁄 𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀏𑀯 𑀯𑀸.

𑀅𑀣 𑀯𑀸 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀻𑀢𑀺 𑀅𑀢𑁆𑀢𑀢𑁆𑀣𑀁, 𑀅𑀧𑁆𑀧𑀺𑀘𑁆𑀙𑀸𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀧𑀭𑀢𑁆𑀣𑀁 𑀲𑀽𑀘𑁂𑀢𑀺. 𑀏𑀯𑀁 ‘‘𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 (𑀅. 𑀦𑀺. 𑁪.𑁯𑁯) 𑀲𑀼𑀢𑁆𑀢𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀘 𑀯𑀺𑀲𑁂𑀲𑁂𑀢𑁆𑀯𑀸 𑀲𑀼𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀤𑀻𑀦𑀺 𑀲𑀸𑀢𑀺𑀲𑀬𑀁 𑀧𑀓𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺 𑀢𑀧𑁆𑀧𑀥𑀸𑀦𑀪𑀸𑀯𑀢𑁄, 𑀦 𑀆𑀡𑀸𑀥𑀫𑁆𑀫𑀲𑀪𑀸𑀯𑀯𑀲𑀧𑁆𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀫𑁂𑀯 𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 (𑀧𑀸𑀘𑀺. 𑁬𑁫𑁫) 𑀘 ‘‘𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀘 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑀲𑀤𑁆𑀤𑁄 𑀉𑀧𑀘𑀭𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀲𑀼𑀢𑁆𑀢𑁂𑀲𑀼 ¶ 𑀆𑀡𑀸𑀥𑀫𑁆𑀫𑀲𑀪𑀸𑀯𑀸 𑀘 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀯𑀺𑀬 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀆𑀡𑀸𑀥𑀫𑁆𑀫𑀲𑀪𑀸𑀯𑁂, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀳𑁄𑀢𑀻𑀢𑀺 ‘‘𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸’’𑀢𑀺 𑀇𑀤𑀫𑁆𑀧𑀺 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀫𑁆𑀧𑀸𑀧𑀦𑁂 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀢𑀧𑁆𑀧𑀭𑀪𑀸𑀯𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀧𑁆𑀧𑀭𑀪𑀸𑀯𑁄 𑀘 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑀢𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺 ¶ . 𑀯𑀺𑀦𑀬𑀤𑁂𑀲𑀦𑀁 𑀯𑀺𑀬 𑀇𑀲𑁆𑀲𑀭𑀪𑀸𑀯𑀢𑁄 𑀆𑀡𑀸𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀅𑀤𑁂𑀲𑁂𑀢𑁆𑀯𑀸 𑀯𑁂𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀘𑀭𑀺𑀬𑀸𑀦𑀼𑀭𑀽𑀧𑀁 𑀯𑀼𑀢𑁆𑀢𑀢𑁆𑀢𑀸 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀺𑀯𑀲𑁂𑀦 𑀓𑀸𑀮𑀦𑁆𑀢𑀭𑁂 𑀅𑀪𑀺𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀲𑁆𑀲𑀫𑀺𑀯 𑀨𑀮’’𑀦𑁆𑀢𑀺. 𑀧𑀲𑀯𑀢𑀻𑀢𑀺 𑀨𑀮𑀢𑀺, 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀬𑀲𑀫𑀗𑁆𑀕𑀻𑀦𑀁𑀬𑁂𑀯 𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑁂𑀦𑀼 𑀯𑀺𑀬 𑀔𑀻𑀭’’𑀦𑁆𑀢𑀺 𑀆𑀳. 𑀥𑁂𑀦𑀼𑀢𑁄𑀧𑀺 𑀳𑀺 𑀉𑀧𑀸𑀬𑀯𑀦𑁆𑀢𑀸𑀦𑀁𑀬𑁂𑀯 𑀔𑀻𑀭𑀧𑀝𑀺𑀮𑀸𑀪𑁄 𑀳𑁄𑀢𑀺. 𑀅𑀦𑀼𑀧𑀸𑀬𑁂𑀦 𑀳𑀺 𑀅𑀓𑀸𑀮𑁂 𑀅𑀚𑀸𑀢𑀯𑀘𑁆𑀙𑀁 𑀥𑁂𑀦𑀼𑀁 𑀤𑁄𑀳𑀦𑁆𑀢𑁄 𑀓𑀸𑀮𑁂𑀧𑀺 𑀯𑀸 𑀯𑀺𑀲𑀸𑀡𑀁 𑀕𑀳𑁂𑀢𑁆𑀯𑀸 𑀤𑁄𑀳𑀦𑁆𑀢𑁄 𑀦𑁂𑀯 𑀔𑀻𑀭𑀁 𑀧𑀝𑀺𑀮𑀪𑀢𑀺. ‘‘𑀲𑀼𑀢𑁆𑀢𑀸𑀡𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀼𑀢𑁆𑀢𑀲𑀪𑀸𑀕𑀦𑁆𑀢𑀺 𑀲𑀼𑀢𑁆𑀢𑀲𑀤𑀺𑀲𑀁. 𑀲𑀼𑀢𑁆𑀢𑀲𑀪𑀸𑀕𑀢𑀁𑀬𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀢𑀘𑁆𑀙𑀓𑀸𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑀟𑁆𑀠𑀓𑀻𑀦𑀁 𑀓𑀸𑀴𑀲𑀼𑀢𑁆𑀢𑀁. 𑀧𑀫𑀸𑀡𑀁 𑀳𑁄𑀢𑀻𑀢𑀺 𑀢𑀤𑀦𑀼𑀲𑀸𑀭𑁂𑀦 𑀢𑀘𑁆𑀙𑀦𑀢𑁄. 𑀏𑀯𑀫𑁂𑀢𑀫𑁆𑀧𑀺 𑀯𑀺𑀜𑁆𑀜𑀽𑀦𑀦𑁆𑀢𑀺 𑀬𑀣𑀸 𑀓𑀸𑀴𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀲𑀜𑁆𑀜𑀸𑀡𑁂 𑀓𑀢𑁂 𑀕𑀳𑁂𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀯𑀺𑀯𑀸𑀤𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀼𑀢𑁆𑀢𑁂 𑀆𑀦𑀻𑀢𑀫𑀢𑁆𑀢𑁂 ‘‘𑀇𑀤𑀁 𑀕𑀳𑁂𑀢𑀩𑁆𑀩𑀁, 𑀇𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀢𑁆𑀢𑀸 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀻𑀢𑀺 𑀏𑀢𑀫𑁆𑀧𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀲𑀼𑀢𑁆𑀢𑀲𑀪𑀸𑀕𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀘𑀸’’𑀢𑀺𑀆𑀤𑀺. 𑀲𑀼𑀢𑁆𑀢𑀁 𑀯𑀺𑀬 𑀧𑀫𑀸𑀡𑀢𑁆𑀢𑀸 𑀲𑀗𑁆𑀕𑀸𑀳𑀓𑀢𑁆𑀢𑀸 𑀘 𑀲𑀼𑀢𑁆𑀢𑀫𑀺𑀯 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀅𑀢𑁆𑀢𑀢𑁆𑀣𑀸𑀤𑀺𑀯𑀺𑀥𑀸𑀦𑁂 𑀲𑀼𑀢𑁆𑀢𑀲𑁆𑀲 𑀧𑀫𑀸𑀡𑀪𑀸𑀯𑁄 𑀅𑀢𑁆𑀢𑀢𑁆𑀣𑀸𑀤𑀻𑀦𑀁𑀬𑁂𑀯 𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀬𑁄𑀚𑁂𑀢𑀩𑁆𑀩𑀁 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑀧𑀥𑀸𑀦𑀢𑁆𑀢𑀸 𑀲𑀼𑀢𑁆𑀢𑀲𑁆𑀲. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀯𑀺𑀲𑁂𑀲𑀢𑁆𑀢𑀜𑁆𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀢𑀦𑁆𑀢𑀺 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄’’𑀢𑀺𑀆𑀤𑀺𑀓𑀁 𑀅𑀢𑁆𑀣𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀲𑁆𑀲.

𑀬𑀦𑁆𑀢𑀺 𑀬𑀲𑁆𑀫𑀸. 𑀏𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑁂. 𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀓𑀫𑀦𑀓𑀺𑀭𑀺𑀬𑀸𑀬 𑀯𑀼𑀟𑁆𑀠𑀺𑀪𑀸𑀯𑀁 𑀅𑀢𑀺𑀭𑁂𑀓𑀢𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺𑀆𑀤𑀻𑀲𑀼 𑀯𑀼𑀟𑁆𑀠𑀺𑀬𑀁 𑀆𑀕𑀢𑁄’’𑀢𑀺. 𑀅𑀪𑀺𑀜𑁆𑀜𑀸𑀢𑀸𑀢𑀺 𑀅𑀟𑁆𑀠𑀘𑀦𑁆𑀤𑀸𑀤𑀺𑀦𑀸 𑀓𑁂𑀦𑀘𑀺 𑀲𑀜𑁆𑀜𑀸𑀡𑁂𑀦 𑀜𑀸𑀢𑀸 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸𑀢𑀺 𑀅𑀢𑁆𑀣𑁄. 𑀅𑀟𑁆𑀠𑀘𑀦𑁆𑀤𑀸𑀤𑀺𑀪𑀸𑀯𑁄 𑀳𑀺 𑀭𑀢𑁆𑀢𑀺𑀬𑀸 𑀉𑀧𑀮𑀓𑁆𑀔𑀡𑀯𑀲𑁂𑀦 𑀲𑀜𑁆𑀜𑀸𑀡𑀁 𑀳𑁄𑀢𑀺, 𑀬𑀲𑁆𑀫𑀸 𑀅𑀟𑁆𑀠𑁄 𑀘𑀦𑁆𑀤𑁄, 𑀢𑀲𑁆𑀫𑀸 𑀅𑀝𑁆𑀞𑀫𑀻, 𑀬𑀲𑁆𑀫𑀸 𑀊𑀦𑁄, 𑀢𑀲𑁆𑀫𑀸 𑀘𑀸𑀢𑀼𑀤𑁆𑀤𑀲𑀻, 𑀬𑀲𑁆𑀫𑀸 𑀧𑀼𑀡𑁆𑀡𑁄, 𑀢𑀲𑁆𑀫𑀸 ¶ 𑀧𑀦𑁆𑀦𑀭𑀲𑀻𑀢𑀺. 𑀅𑀪𑀺𑀮𑀓𑁆𑀔𑀺𑀢𑀸𑀢𑀺 𑀏𑀢𑁆𑀣𑀸𑀧𑀺 ¶ 𑀅𑀬𑀫𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀮𑀓𑁆𑀔𑀺𑀢𑀲𑀤𑁆𑀤𑀧𑀭𑀺𑀬𑀸𑀬𑁄 𑀅𑀪𑀺𑀜𑁆𑀜𑀸𑀢𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸𑀢𑀺𑀆𑀤𑀻𑀲𑀼 𑀮𑀓𑁆𑀔𑀡𑁂’’𑀢𑀺. 𑀏𑀢𑁆𑀣 𑀘 𑀯𑀸𑀘𑀓𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀦𑀺𑀧𑀸𑀢𑀸𑀦𑀁 𑀢𑀤𑀢𑁆𑀣𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀮𑀓𑁆𑀔𑀺𑀢𑀲𑀤𑁆𑀤𑀢𑁆𑀣𑀚𑁄𑀢𑀓𑁄 𑀅𑀪𑀺𑀲𑀤𑁆𑀤𑁄 𑀮𑀓𑁆𑀔𑀡𑁂 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁄. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀳𑀺 𑀧𑀽𑀚𑁂𑀢𑀼𑀁 𑀅𑀭𑀳𑁄 𑀭𑀸𑀚𑀸. 𑀧𑀽𑀚𑀺𑀢𑁂𑀢𑀺 𑀧𑀽𑀚𑀸𑀭𑀳𑁂.

𑀅𑀪𑀺𑀥𑀫𑁆𑀫𑁂𑀢𑀺 ‘‘𑀲𑀼𑀧𑀺𑀦𑀦𑁆𑀢𑁂𑀦 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑁂𑀧𑀺 𑀅𑀓𑀼𑀲𑀮𑀘𑁂𑀢𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂. ‘‘𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀪𑀸𑀯𑀢𑁄 𑀥𑀫𑁆𑀫𑀸𑀦𑀁𑀬𑁂𑀯 𑀘 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂’’𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑁄 𑀅𑀓𑀼𑀲𑀮’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀘 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀅𑀓𑀼𑀲𑀮𑀁, 𑀦 𑀧𑀸𑀡𑀲𑀗𑁆𑀔𑀸𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀲𑀗𑁆𑀔𑀸𑀢𑁄 𑀅𑀢𑀺𑀧𑀸𑀢𑁄, 𑀢𑀣𑀸 𑀅𑀤𑀺𑀦𑁆𑀦𑀲𑁆𑀲 𑀧𑀭𑀲𑀦𑁆𑀢𑀓𑀲𑁆𑀲 𑀆𑀤𑀸𑀦𑀲𑀗𑁆𑀔𑀸𑀢𑀸 𑀯𑀺𑀜𑁆𑀜𑀢𑁆𑀢𑀺 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄, 𑀢𑀁𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀓𑀼𑀲𑀮𑁄 𑀥𑀫𑁆𑀫𑁄𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀯𑀺𑀦𑀬𑁂𑀢𑀺 𑀏𑀢𑁆𑀣 ‘‘𑀚𑀸𑀢𑀭𑀽𑀧𑀭𑀚𑀢𑀁 𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑁄 𑀯𑀺𑀦𑀬𑁂 𑀯𑀺𑀦𑁂𑀢𑀺 𑀦𑀸𑀫. 𑀏𑀢𑁆𑀣 ‘‘𑀏𑀯𑀁 𑀧𑀝𑀺𑀕𑁆𑀕𑀡𑁆𑀳𑀢𑁄 𑀧𑀸𑀘𑀺𑀢𑁆𑀢𑀺𑀬𑀁, 𑀏𑀯𑀁 𑀤𑀼𑀓𑁆𑀓𑀝𑀦𑁆𑀢𑀺 𑀯𑀤𑀦𑁆𑀢𑁄 𑀘 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀺 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀚𑀸𑀢𑀭𑀽𑀧𑀭𑀚𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑁂𑀲𑀼 𑀅𑀜𑁆𑀜𑀢𑀭𑀁, 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀢𑁆𑀢𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀓𑁂𑀯𑀮𑀁 𑀮𑁄𑀮𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁, 𑀭𑀽𑀧𑀺𑀬𑀙𑀟𑁆𑀟𑀓𑀲𑁆𑀲 𑀲𑀫𑁆𑀫𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀯𑀺𑀦𑀬𑁂 𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀅𑀪𑀺𑀲𑀤𑁆𑀤𑁄 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀅𑀥𑀺𑀓𑁂’’𑀢𑀺.

𑀦𑀦𑀼 𑀘 ‘‘𑀅𑀪𑀺𑀓𑁆𑀓𑀫𑀦𑁆𑀢𑀻’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑁄 𑀓𑀫𑀦𑀓𑀺𑀭𑀺𑀬𑀸𑀬 𑀯𑀼𑀟𑁆𑀠𑀺𑀪𑀸𑀯𑀁 𑀅𑀢𑀺𑀭𑁂𑀓𑀢𑀁 𑀤𑀻𑀧𑁂𑀢𑀺, ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺 𑀏𑀢𑁆𑀣 𑀜𑀸𑀡𑀮𑀓𑁆𑀔𑀡𑀓𑀺𑀭𑀺𑀬𑀸𑀦𑀁 𑀲𑀼𑀧𑀸𑀓𑀝𑀢𑁆𑀢𑀸 𑀯𑀺𑀲𑁂𑀲𑀁, ‘‘𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀻𑀢𑀺 𑀇𑀤𑀁 𑀢𑀸𑀯 𑀬𑀼𑀢𑁆𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸 𑀉𑀧𑀲𑀕𑁆𑀕𑀲𑁆𑀲, ‘‘𑀅𑀪𑀺𑀭𑀸𑀚𑀸 𑀅𑀪𑀺𑀯𑀺𑀦𑀬𑁄’’𑀢𑀺 𑀧𑀦 𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀸𑀚𑀯𑀺𑀦𑀬𑁂𑀲𑀼 𑀅𑀪𑀺𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀓𑀣𑀫𑁂𑀢𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀘𑁂? 𑀇𑀥𑀸𑀧𑀺 𑀦𑀢𑁆𑀣𑀺 ¶ 𑀤𑁄𑀲𑁄 𑀧𑀽𑀚𑀦𑀧𑀭𑀺𑀘𑁆𑀙𑁂𑀤𑀦𑀓𑀺𑀭𑀺𑀬𑀸𑀤𑀻𑀧𑀦𑀢𑁄, 𑀢𑀸𑀳𑀺 𑀘 𑀓𑀺𑀭𑀺𑀬𑀸𑀳𑀺 𑀭𑀸𑀚𑀯𑀺𑀦𑀬𑀸𑀦𑀁 𑀬𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀏𑀢𑁆𑀣 𑀅𑀢𑀺𑀫𑀸𑀮𑀸𑀤𑀻𑀲𑀼 𑀅𑀢𑀺𑀲𑀤𑁆𑀤𑁄 𑀯𑀺𑀬 𑀅𑀪𑀺𑀲𑀤𑁆𑀤𑁄 𑀲𑀳 𑀲𑀸𑀥𑀦𑁂𑀦 𑀓𑀺𑀭𑀺𑀬𑀁 𑀯𑀤𑀢𑀻𑀢𑀺 𑀅𑀪𑀺𑀭𑀸𑀚𑀅𑀪𑀺𑀯𑀺𑀦𑀬𑀲𑀤𑁆𑀤𑀸 𑀲𑀺𑀤𑁆𑀥𑀸, 𑀏𑀯𑀁 𑀅𑀪𑀺𑀥𑀫𑁆𑀫𑀲𑀤𑁆𑀤𑁂 𑀅𑀪𑀺𑀲𑀤𑁆𑀤𑁄 𑀲𑀳 𑀲𑀸𑀥𑀦𑁂𑀦 𑀯𑀼𑀟𑁆𑀠𑀺𑀬𑀸𑀤𑀺𑀓𑀺𑀭𑀺𑀬𑀁 𑀤𑀻𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 ¶ 𑀘𑀸𑀢𑀺 𑀅𑀪𑀺𑀥𑀫𑁆𑀫𑁂. 𑀪𑀸𑀯𑁂𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁. 𑀨𑀭𑀺𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁. 𑀯𑀼𑀟𑁆𑀠𑀺𑀫𑀦𑁆𑀢𑁄𑀢𑀺 𑀪𑀸𑀯𑀦𑀸𑀨𑀭𑀡𑀯𑀼𑀟𑁆𑀠𑀻𑀳𑀺 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀸𑀤𑀻𑀳𑀻𑀢𑀺 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀤𑁆𑀯𑀸𑀭𑀧𑀝𑀺𑀧𑀤𑀸𑀤𑀻𑀳𑀺. 𑀮𑀓𑁆𑀔𑀡𑀻𑀬𑀢𑁆𑀢𑀸𑀢𑀺 𑀲𑀜𑁆𑀚𑀸𑀦𑀺𑀢𑀩𑁆𑀩𑀢𑁆𑀢𑀸. 𑀏𑀓𑀦𑁆𑀢𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁𑀬𑁂𑀯 𑀧𑀽𑀚𑀸𑀭𑀳𑀢𑁆𑀢𑀸 ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀮𑁄𑀓𑀼𑀢𑁆𑀢𑀭𑀸𑀬𑁂𑀯 𑀧𑀽𑀚𑀺𑀢𑀸𑀢𑀺 𑀤𑀲𑁆𑀲𑀺𑀢𑀸. 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀨𑀼𑀲𑀦𑀸𑀤𑀺𑀲𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀥𑀺𑀓𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀏𑀢𑁆𑀣 𑀓𑀸𑀫𑀸𑀯𑀘𑀭𑁂𑀳𑀺 𑀫𑀳𑀦𑁆𑀢𑀪𑀸𑀯𑀢𑁄 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸𑀧𑀺 𑀅𑀥𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀥𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸.

𑀬𑀁 𑀧𑀦𑁂𑀢𑁆𑀣 𑀅𑀯𑀺𑀲𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀯𑀺𑀦𑀬𑀸𑀤𑀻𑀲𑀼 𑀢𑀻𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀬𑀁 𑀅𑀯𑀺𑀲𑀺𑀝𑁆𑀞𑀁 𑀲𑀫𑀸𑀦𑀁, 𑀢𑀁 𑀧𑀺𑀝𑀓𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀸𑀤𑀬𑁄 𑀳𑀺 𑀢𑀬𑁄 𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀸𑀥𑀸𑀭𑀡𑀢𑁆𑀢𑀸 𑀯𑀺𑀲𑀺𑀝𑁆𑀞𑀸 𑀦𑀸𑀫, 𑀧𑀺𑀝𑀓𑀲𑀤𑁆𑀤𑁄 𑀧𑀦 𑀢𑁂𑀳𑀺 𑀢𑀻𑀳𑀺𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀅𑀯𑀺𑀲𑀺𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀧𑀸𑀴𑀺𑀲𑀫𑁆𑀧𑀤𑀸𑀦𑀯𑀲𑁂𑀦 𑀫𑀸 𑀕𑀡𑁆𑀳𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀤𑀸𑀮𑀜𑁆𑀘 𑀧𑀺𑀝𑀓𑀜𑁆𑀘 𑀓𑀼𑀤𑀸𑀮𑀧𑀺𑀝𑀓𑀁. 𑀢𑀢𑁆𑀣 𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀲𑁆𑀲𑀸 𑀤𑀸𑀮𑀦𑀢𑁄 𑀯𑀺𑀤𑀸𑀮𑀦𑀢𑁄 𑀅𑀬𑁄𑀫𑀬𑁄 𑀉𑀧𑀓𑀭𑀡𑀯𑀺𑀲𑁂𑀲𑁄 𑀓𑀼𑀤𑀸𑀮𑀁 𑀦𑀸𑀫, 𑀢𑀸𑀮𑀧𑀡𑁆𑀡𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀓𑀢𑁄 𑀪𑀸𑀚𑀦𑀯𑀺𑀲𑁂𑀲𑁄 𑀧𑀺𑀝𑀓𑀁 𑀦𑀸𑀫, 𑀢𑀁 𑀆𑀤𑀸𑀬 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 ‘‘𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

𑀤𑁂𑀲𑀦𑀸𑀲𑀸𑀲𑀦𑀓𑀣𑀸𑀪𑁂𑀤𑀦𑁆𑀢𑀺 𑀏𑀢𑁆𑀣 𑀓𑀣𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀪𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀦𑀸 𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀯𑀺𑀦𑀬𑀦𑀁 𑀲𑀸𑀲𑀦𑀁 ¶ . 𑀓𑀣𑁂𑀢𑀩𑁆𑀩𑀲𑁆𑀲 𑀲𑀁𑀯𑀭𑀸𑀲𑀁𑀯𑀭𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀓𑀣𑀦𑀁 𑀯𑀘𑀦𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀓𑀣𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀤𑁂𑀲𑀺𑀢𑀸𑀭𑀁 𑀪𑀕𑀯𑀦𑁆𑀢𑀫𑀧𑁂𑀓𑁆𑀔𑀺𑀢𑁆𑀯𑀸 𑀤𑁂𑀲𑀦𑀸, 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀲𑀸𑀲𑀦𑀁, 𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀓𑀣𑀸𑀢𑀺 𑀏𑀯𑀫𑁂𑀢𑁆𑀣 𑀤𑁂𑀲𑀦𑀸𑀤𑀻𑀦𑀁 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀤𑀬𑁄 𑀤𑁂𑀲𑁂𑀢𑀩𑁆𑀩𑀸𑀤𑀺𑀦𑀺𑀭𑀧𑁂𑀓𑁆𑀔𑀸 𑀦 𑀳𑁄𑀦𑁆𑀢𑀺, 𑀆𑀡𑀸𑀤𑀬𑁄 𑀧𑀦 𑀯𑀺𑀲𑁂𑀲𑀢𑁄 𑀤𑁂𑀲𑀓𑀸𑀤𑀺𑀅𑀥𑀻𑀦𑀸𑀢𑀺 𑀢𑀁𑀢𑀁𑀯𑀺𑀲𑁂𑀲𑀬𑁄𑀕𑀯𑀲𑁂𑀦 𑀤𑁂𑀲𑀦𑀸𑀤𑀻𑀦𑀁 𑀪𑁂𑀤𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀆𑀡𑀸𑀯𑀺𑀥𑀸𑀦𑀁 𑀯𑀺𑀲𑁂𑀲𑀢𑁄 𑀆𑀡𑀸𑀭𑀳𑀸𑀥𑀻𑀦𑀁 𑀢𑀢𑁆𑀣 𑀓𑁄𑀲𑀮𑁆𑀮𑀬𑁄𑀕𑀢𑁄. 𑀏𑀯𑀁 𑀯𑁄𑀳𑀸𑀭𑀧𑀭𑀫𑀢𑁆𑀣𑀯𑀺𑀥𑀸𑀦𑀸𑀦𑀺 𑀘 𑀯𑀺𑀥𑀸𑀬𑀓𑀸𑀥𑀻𑀦𑀸𑀦𑀻𑀢𑀺 𑀆𑀡𑀸𑀤𑀺𑀯𑀺𑀥𑀺𑀦𑁄 𑀤𑁂𑀲𑀓𑀸𑀬𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀅𑀧𑀭𑀸𑀥𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀬 𑀥𑀫𑁆𑀫𑀸𑀦𑀼𑀭𑀽𑀧𑀫𑁆𑀧𑀺 𑀲𑀸𑀲𑀦𑀁 𑀯𑀺𑀲𑁂𑀲𑀢𑁄, 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀦𑁆𑀢𑀺 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀲𑀸𑀲𑀦𑀁 𑀯𑀼𑀢𑁆𑀢𑀁. 𑀲𑀁𑀯𑀭𑀸𑀲𑀁𑀯𑀭𑀦𑀸𑀫𑀭𑀽𑀧𑀸𑀦𑀁 𑀯𑀺𑀬 𑀯𑀺𑀦𑀺𑀯𑁂𑀞𑁂𑀢𑀩𑁆𑀩𑀸𑀬 𑀤𑀺𑀝𑁆𑀞𑀺𑀬𑀸𑀧𑀺 𑀓𑀣𑀦𑀁 𑀲𑀢𑀺 𑀯𑀸𑀘𑀸𑀯𑀢𑁆𑀣𑀼𑀲𑁆𑀫𑀺𑀁 𑀦𑀸𑀲𑀢𑀻𑀢𑀺 𑀯𑀺𑀲𑁂𑀲𑀢𑁄 𑀢𑀤𑀥𑀻𑀦𑀦𑁆𑀢𑀺 𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀓𑀣𑀸 𑀯𑀼𑀢𑁆𑀢𑀸. 𑀪𑁂𑀤𑀲𑀤𑁆𑀤𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀤𑁂𑀲𑀦𑀸𑀪𑁂𑀤𑀁 𑀲𑀸𑀲𑀦𑀪𑁂𑀤𑀁 𑀓𑀣𑀸𑀪𑁂𑀤𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂’’𑀢𑀺. 𑀪𑁂𑀤𑀦𑁆𑀢𑀺 𑀘 𑀦𑀸𑀦𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀧𑀺𑀝𑀓𑁂𑀲𑀼 𑀲𑀺𑀓𑁆𑀔𑀸 𑀘 𑀧𑀳𑀸𑀦𑀸𑀦𑀺 𑀘 𑀕𑀫𑁆𑀪𑀻𑀭𑀪𑀸𑀯𑁄 ¶ 𑀘 𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀁, 𑀢𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀢𑁆𑀢𑀺𑀪𑁂𑀤𑀜𑁆𑀘 𑀯𑀺𑀪𑀸𑀯𑀬𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀭𑀺𑀬𑀢𑁆𑀢𑀺𑀪𑁂𑀤𑀦𑁆𑀢𑀺 𑀘 𑀧𑀭𑀺𑀬𑀸𑀧𑀼𑀡𑀦𑀪𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀬𑀳𑀺𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀦𑀬𑀸𑀤𑀺𑀓𑁂 𑀧𑀺𑀝𑀓𑁂. 𑀬𑀁 𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀺𑀧𑀢𑁆𑀢𑀺𑀜𑁆𑀘 𑀬𑀣𑀸 𑀧𑀸𑀧𑀼𑀡𑀸𑀢𑀺, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀬𑀁 𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀺𑀧𑀢𑁆𑀢𑀺𑀜𑁆𑀘𑀸𑀧𑀺 𑀬𑀳𑀺𑀁 𑀬𑀣𑀸 𑀧𑀸𑀧𑀼𑀡𑀸𑀢𑀺, 𑀢𑀫𑁆𑀧𑀺 𑀲𑀩𑁆𑀩𑀁 𑀯𑀺𑀪𑀸𑀯𑀬𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀬𑀣𑀸𑀢𑀺 𑀬𑁂𑀳𑀺 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀉𑀧𑀸𑀭𑀫𑁆𑀪𑀦𑀺𑀲𑁆𑀲𑀭𑀡𑀥𑀫𑁆𑀫𑀓𑁄𑀲𑀓𑀭𑀓𑁆𑀔𑀡𑀳𑁂𑀢𑀼𑀧𑀭𑀺𑀬𑀸𑀧𑀼𑀡𑀦𑀁 𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀤𑀼𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀭𑀺𑀤𑀻𑀧𑀦𑀸 𑀯𑀺𑀪𑀸𑀯𑀦𑀸 𑀘𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀅𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀏𑀓𑀫𑁂𑀯. 𑀆𑀡𑀸𑀭𑀳𑁂𑀦𑀸𑀢𑀺 𑀆𑀡𑀁 𑀞𑀧𑁂𑀢𑀼𑀁 𑀅𑀭𑀳𑀢𑀻𑀢𑀺 𑀆𑀡𑀸𑀭𑀳𑁄, 𑀪𑀕𑀯𑀸. 𑀲𑁄 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀬 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀘 𑀅𑀯𑀺𑀧𑀭𑀻𑀢𑀳𑀺𑀢𑁄𑀧𑀤𑁂𑀲𑀓𑀪𑀸𑀯𑁂𑀦 𑀧𑀫𑀸𑀡𑀯𑀘𑀦𑀢𑁆𑀢𑀸 𑀆𑀡𑀁 𑀧𑀡𑁂𑀢𑀼𑀁 𑀅𑀭𑀳𑀢𑀺, 𑀯𑁄𑀳𑀸𑀭𑀧𑀭𑀫𑀢𑁆𑀣𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑁄 𑀆𑀳 ‘‘𑀆𑀡𑀸𑀩𑀸𑀳𑀼𑀮𑁆𑀮𑀢𑁄’’𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀞𑀫𑀦𑁆𑀢𑀺 ¶ 𑀯𑀺𑀦𑀬𑀧𑀺𑀝𑀓𑀁. 𑀧𑀘𑀼𑀭𑀸𑀧𑀭𑀸𑀥𑀸 𑀲𑁂𑀬𑁆𑀬𑀲𑀓𑀢𑁆𑀣𑁂𑀭𑀸𑀤𑀬𑁄. 𑀢𑁂 𑀳𑀺 𑀤𑁄𑀲𑀩𑀸𑀳𑀼𑀮𑁆𑀮𑀢𑁄 ‘‘𑀧𑀘𑀼𑀭𑀸𑀧𑀭𑀸𑀥𑀸’’𑀢𑀺 𑀯𑀼𑀢𑁆𑀢𑀸. 𑀧𑀘𑀼𑀭𑁄 𑀩𑀳𑀼𑀓𑁄 𑀩𑀳𑀼𑀮𑁄 𑀅𑀧𑀭𑀸𑀥𑁄 𑀤𑁄𑀲𑁄 𑀯𑀻𑀢𑀺𑀓𑁆𑀓𑀫𑁄 𑀬𑁂𑀲𑀁 𑀢𑁂 𑀧𑀘𑀼𑀭𑀸𑀧𑀭𑀸𑀥𑀸. 𑀅𑀦𑁂𑀓𑀚𑁆𑀛𑀸𑀲𑀬𑀸𑀢𑀺𑀆𑀤𑀻𑀲𑀼 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄. 𑀲𑁄 𑀘 𑀅𑀢𑁆𑀣𑀢𑁄 𑀤𑀺𑀝𑁆𑀞𑀺 𑀜𑀸𑀡𑀜𑁆𑀘, 𑀧𑀪𑁂𑀤𑀢𑁄 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑀘𑀭𑀺𑀬𑀯𑀲𑁂𑀦 𑀆𑀬𑀢𑀺𑀁 𑀲𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀸 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 ‘‘𑀆𑀲𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀜𑁆𑀜𑀺𑀢’’𑀦𑁆𑀢𑀺.

𑀇𑀤𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀆𑀲𑀬𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀦𑀺𑀯𑀲𑀦𑁆𑀢𑀻𑀢𑀺 𑀆𑀲𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀲𑀬𑀸 𑀓𑀸𑀫𑀭𑀸𑀕𑀪𑀯𑀭𑀸𑀕𑀤𑀺𑀝𑁆𑀞𑀺𑀧𑀝𑀺𑀖𑀯𑀺𑀘𑀺𑀓𑀺𑀘𑁆𑀙𑀸𑀫𑀸𑀦𑀸𑀯𑀺𑀚𑁆𑀚𑀸𑀯𑀲𑁂𑀦 𑀲𑀢𑁆𑀢. 𑀫𑀽𑀲𑀺𑀓𑀯𑀺𑀲𑀁 𑀯𑀺𑀬 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸, 𑀅𑀢𑀻𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀣𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀥𑀫𑁆𑀫𑀸𑀦𑀁 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀻𑀢𑀺. 𑀘𑀭𑀺𑀬𑀸𑀢𑀺 𑀭𑀸𑀕𑀘𑀭𑀺𑀬𑀸𑀤𑀺𑀓𑀸 𑀙 𑀫𑀽𑀮𑀘𑀭𑀺𑀬𑀸, 𑀅𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀸, 𑀲𑀁𑀲𑀕𑁆𑀕𑀯𑀲𑁂𑀦 𑀧𑀦 𑀢𑁂𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀅𑀣 𑀯𑀸 𑀘𑀭𑀺𑀬𑀸𑀢𑀺 𑀘𑀭𑀺𑀢𑀁, 𑀢𑀁 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. ‘‘𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 ‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺𑀆𑀤𑀺𑀦𑀸 ¶ 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀲𑀢𑁆𑀢𑀸𑀦𑀁 𑀧𑀼𑀩𑁆𑀩𑀘𑀭𑀺𑀬𑀯𑀲𑁂𑀦 𑀅𑀪𑀺𑀭𑀼𑀘𑀻’’𑀢𑀺 𑀯𑀼𑀢𑁆𑀢𑀁. 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀧𑀡𑀻𑀢𑀪𑁂𑀤𑁂𑀦. 𑀬𑀣𑀸𑀦𑀼𑀮𑁄𑀫𑀦𑁆𑀢𑀺 𑀅𑀚𑁆𑀛𑀸𑀲𑀬𑀸𑀤𑀻𑀦𑀁 𑀅𑀦𑀼𑀭𑀽𑀧𑀁. 𑀅𑀳𑀁 𑀫𑀫𑀸𑀢𑀺 𑀲𑀜𑁆𑀜𑀺𑀦𑁄𑀢𑀺 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 𑀅𑀳𑀁 𑀫𑀫𑀸𑀢𑀺 𑀏𑀯𑀁 𑀧𑀯𑀢𑁆𑀢𑀲𑀜𑁆𑀜𑀺𑀦𑁄. 𑀬𑀣𑀸𑀥𑀫𑁆𑀫𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀅𑀢𑁆𑀢𑀸 𑀅𑀢𑁆𑀢𑀦𑀺𑀬𑀁 𑀯𑀸, 𑀓𑁂𑀯𑀮𑀁 𑀥𑀫𑁆𑀫𑀫𑀢𑁆𑀢𑀫𑁂𑀢𑀦𑁆𑀢𑀺 𑀏𑀯𑀁 𑀥𑀫𑁆𑀫𑀲𑀪𑀸𑀯𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄.

𑀲𑀁𑀯𑀭𑀸𑀲𑀁𑀯𑀭𑁄𑀢𑀺 𑀏𑀢𑁆𑀣 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀫𑀳𑀦𑁆𑀢𑁄 𑀲𑀁𑀯𑀭𑁄 𑀅𑀲𑀁𑀯𑀭𑁄. 𑀯𑀼𑀟𑁆𑀠𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀅-𑀓𑀸𑀭𑁄 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺, 𑀢𑀲𑁆𑀫𑀸 𑀔𑀼𑀤𑁆𑀤𑀓𑁄 𑀫𑀳𑀦𑁆𑀢𑁄 𑀘 𑀲𑀁𑀯𑀭𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸𑀢𑀺 𑀤𑀺𑀝𑁆𑀞𑀺𑀬𑀸 𑀯𑀺𑀫𑁄𑀘𑀦𑀁. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀯𑀺𑀪𑀸𑀕𑁄 𑀧𑀭𑀢𑁄 𑀧𑀞𑀫𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 ¶ 𑀲𑀫𑀸𑀥𑀺𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄 ‘‘𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁. 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁 𑀓𑀺𑀮𑁂𑀲𑀸𑀦𑀦𑁆𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀯𑀸 𑀬𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀯𑀻𑀢𑀺𑀓𑁆𑀓𑀫𑁄, 𑀢𑀲𑁆𑀲 𑀧𑀳𑀸𑀦𑀁. 𑀅𑀦𑀼𑀲𑀬𑀯𑀲𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀯𑀢𑁆𑀢𑀦𑁆𑀢𑀸 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀧𑀭𑀺𑀬𑀼𑀝𑁆𑀞𑀺𑀢𑀸𑀧𑀺 𑀲𑀻𑀮𑀪𑁂𑀤𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲𑀸’’𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀦𑁆𑀢𑀺 𑀑𑀓𑀸𑀲𑀤𑀸𑀦𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀘𑀺𑀢𑁆𑀢𑁂 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀉𑀝𑁆𑀞𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀧𑀳𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀲𑀬𑀧𑁆𑀧𑀳𑀸𑀦𑀦𑁆𑀢𑀺 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀦𑀓𑀸 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀸 𑀅𑀦𑀼𑀲𑀬𑀸. 𑀢𑁂 𑀧𑀦 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀣𑀸𑀫𑀕𑀢𑀸 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 𑀓𑀺𑀮𑁂𑀲𑀸, 𑀢𑁂𑀲𑀁 𑀧𑀳𑀸𑀦𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀁. 𑀢𑁂 𑀘 𑀲𑀩𑁆𑀩𑀲𑁄 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀧𑀳𑀻𑀬𑀦𑁆𑀢𑀻𑀢𑀺 𑀆𑀳 ‘‘𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬𑀸’’𑀢𑀺.

𑀢𑀤𑀗𑁆𑀕𑀧𑁆𑀧𑀳𑀸𑀦𑀦𑁆𑀢𑀺 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀕𑀢𑁂𑀦 𑀢𑁂𑀦 𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀸𑀦𑀁 ‘‘𑀢𑀤𑀗𑁆𑀕𑀧𑁆𑀧𑀳𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀢𑁂𑀦 𑀢𑁂𑀦 𑀲𑀼𑀲𑀻𑀮𑁆𑀬𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀗𑁆𑀕𑀲𑁆𑀲 𑀧𑀳𑀸𑀦𑀁 ‘‘𑀢𑀤𑀗𑁆𑀕𑀧𑁆𑀧𑀳𑀸𑀦’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀓𑁆𑀔𑀫𑁆𑀪𑀦𑀲𑀫𑀉𑀘𑁆𑀙𑁂𑀤𑀧𑁆𑀧𑀳𑀸𑀦𑀸𑀦𑀻𑀢𑀺 𑀏𑀢𑁆𑀣 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀚𑀮𑀢𑀮𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀲𑀦𑁆𑀢𑀸𑀦𑁂 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁. 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀓𑀺𑀮𑁂𑀲𑁂𑀳𑀺 𑀯𑀸 𑀤𑀽𑀲𑀺𑀢𑀁 𑀘𑀭𑀺𑀢𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁. 𑀢𑀤𑁂𑀯 𑀬𑀢𑁆𑀣 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀢𑀸𑀦𑀁 𑀲𑀫𑁆𑀫𑀸 𑀓𑀺𑀮𑁂𑀲𑁂𑀢𑀺 𑀩𑀸𑀥𑀬𑀢𑀺 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀧𑀳𑀸𑀦𑀁, 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 ¶ 𑀧𑀯𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀢𑀤𑀗𑁆𑀕𑀯𑀲𑁂𑀦 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀅𑀢𑁆𑀢𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯𑀥𑀫𑁆𑀫𑀧𑁆𑀧𑀓𑀸𑀲𑀦𑀢𑁄 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁 𑀯𑀼𑀢𑁆𑀢𑀁.

𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣𑀸𑀢𑀺 ¶ 𑀏𑀢𑁂𑀲𑀼 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀧𑀺𑀝𑀓𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑁄𑀢𑀺 𑀧𑀸𑀴𑀻𑀢𑀺 𑀏𑀢𑁆𑀣 𑀧𑀓𑀝𑁆𑀞𑀸𑀦𑀁 𑀉𑀓𑁆𑀓𑀝𑁆𑀞𑀸𑀦𑀁 𑀲𑀻𑀮𑀸𑀤𑀺𑀅𑀢𑁆𑀣𑀸𑀦𑀁 𑀩𑁄𑀥𑀦𑀢𑁄 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀲𑀺𑀢𑀢𑁆𑀢𑀸 𑀘 𑀧𑀓𑀝𑁆𑀞𑀸𑀦𑀁 𑀯𑀘𑀦𑀧𑁆𑀧𑀩𑀦𑁆𑀥𑀸𑀦𑀁 𑀆𑀴𑀻𑀢𑀺 𑀧𑀸𑀴𑀺, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. ‘‘𑀥𑀫𑁆𑀫𑁄𑀢𑀺 𑀧𑀸𑀴𑀻𑀢𑀺 𑀏𑀢𑁆𑀣 𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀯𑁄𑀳𑀸𑀭𑀲𑁆𑀲 𑀘 𑀤𑀻𑀧𑀦𑁄 𑀲𑀤𑁆𑀤𑁄𑀬𑁂𑀯 𑀧𑀸𑀴𑀺 𑀦𑀸𑀫𑀸’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀮𑀺𑀔𑀺𑀢𑁂 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀧𑀦 𑀇𑀤𑀁 𑀯𑀼𑀢𑁆𑀢𑀁 𑁋 𑀲𑀪𑀸𑀯𑀢𑁆𑀣𑀲𑁆𑀲 𑀲𑀪𑀸𑀯𑀯𑁄𑀳𑀸𑀭𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑁂𑀦 𑀪𑀕𑀯𑀢𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀧𑀡𑁆𑀟𑀢𑁆𑀢𑀺 𑀧𑀸𑀴𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀲𑀤𑁆𑀤𑁄𑀬𑁂𑀯 𑀧𑀸𑀴𑀺 𑀲𑀺𑀬𑀸, 𑀧𑀸𑀴𑀺𑀬𑀸 𑀤𑁂𑀲𑀦𑀸𑀬 𑀘 𑀦𑀸𑀦𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀘 𑀧𑀸𑀴𑀺𑀬𑀸 𑀯𑀘𑀻𑀪𑁂𑀤𑀓𑀭𑀡𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑁂𑀲𑀦𑀸𑀬 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀢𑀣𑀸 𑀳𑀺 𑀤𑁂𑀲𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀧𑀸𑀴𑀺𑀬𑀸 𑀤𑁂𑀲𑀦𑀸𑀢𑀺 𑀯𑀘𑀻𑀪𑁂𑀤𑀓𑀭𑀡𑀫𑀢𑁆𑀢𑀁 𑀯𑀺𑀦𑀸 𑀧𑀸𑀴𑀺𑀬𑀸 𑀲𑀳 𑀤𑁂𑀲𑀦𑀸𑀬 𑀅𑀦𑀜𑁆𑀜𑀣𑀸 𑀯𑀼𑀢𑁆𑀢𑀸. 𑀢𑀣𑀸 𑀘 𑀉𑀧𑀭𑀺 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁂𑀲𑀦𑀸𑀬 𑀅𑀦𑀜𑁆𑀜𑀪𑀸𑀯𑁂𑀦 𑀧𑀸𑀴𑀺𑀬𑀸 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀓𑀣𑀺𑀢𑁄 𑀳𑁄𑀢𑀺. 𑀅𑀧𑀺𑀘 𑀬𑀤𑀺 𑀧𑀸𑀴𑀺𑀬𑀸 𑀅𑀜𑁆𑀜𑀸𑀬𑁂𑀯 𑀤𑁂𑀲𑀦𑀸 𑀲𑀺𑀬𑀸, ‘‘𑀧𑀸𑀴𑀺𑀬𑀸 𑀘 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀤𑁂𑀲𑀦𑀸𑀬 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀧𑀦 𑀅𑀯𑀢𑁆𑀯𑀸 ‘‘𑀧𑀸𑀴𑀺𑀬𑀸 𑀘 𑀧𑀸𑀴𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀴𑀺𑀬𑀸 𑀤𑁂𑀲𑀦𑀸𑀬 𑀘 𑀅𑀦𑀜𑁆𑀜𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 ‘‘𑀤𑁂𑀲𑀦𑀸 𑀦𑀸𑀫 𑀧𑀜𑁆𑀜𑀢𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀤𑁂𑀲𑀦𑀸𑀬 𑀅𑀦𑀜𑁆𑀜𑀪𑀸𑀯𑀢𑁄 𑀧𑀸𑀴𑀺𑀬𑀸 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀓𑀣𑀺𑀢𑁄𑀯 𑀳𑁄𑀢𑀻𑀢𑀺.

𑀏𑀢𑁆𑀣 𑀘 ‘‘𑀲𑀤𑁆𑀤𑁄𑀬𑁂𑀯 𑀧𑀸𑀴𑀺 𑀦𑀸𑀫𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀥𑀫𑁆𑀫𑀲𑁆𑀲𑀧𑀺 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀩𑁄𑀥𑀓𑀪𑀸𑀯𑁂𑀦 𑀜𑀸𑀢𑁄 𑀉𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀯𑀯𑀢𑁆𑀣𑀸𑀧𑀺𑀢𑁄 𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀥𑀫𑁆𑀫𑁄, 𑀧𑀘𑁆𑀙𑀸 𑀧𑀭𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀢𑀤𑀢𑁆𑀣𑀧𑁆𑀧𑀓𑀸𑀲𑀓𑁄 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑁂𑀲𑀦𑀸 ‘‘𑀤𑁂𑀲𑀻𑀬𑀢𑀺 𑀲𑀫𑀼𑀝𑁆𑀞𑀸𑀧𑀻𑀬𑀢𑀺 𑀲𑀤𑁆𑀤𑁄 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸 𑀫𑀼𑀲𑀸𑀯𑀸𑀤𑀸𑀤𑀬𑁄 𑀯𑀺𑀬. 𑀢𑀢𑁆𑀣𑀸𑀧𑀺 𑀳𑀺 𑀫𑀼𑀲𑀸𑀯𑀸𑀤𑀸𑀤𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑀸𑀤𑀺𑀲𑀤𑁆𑀤𑁂𑀦 𑀯𑁄𑀳𑀭𑀻𑀬𑀢𑀺.

𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀢𑀺 𑀏𑀢𑁆𑀣 𑀧𑀸𑀴𑀺𑀅𑀢𑁆𑀣𑁄 𑀧𑀸𑀴𑀺𑀤𑁂𑀲𑀦𑀸 𑀧𑀸𑀴𑀺𑀅𑀢𑁆𑀣𑀧𑀝𑀺𑀯𑁂𑀥𑁄 𑀘𑀸𑀢𑀺 𑀇𑀫𑁂 𑀢𑀬𑁄 𑀧𑀸𑀴𑀺𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 ¶ 𑀯𑀺𑀦𑀬𑀧𑀺𑀝𑀓𑀸𑀤𑀻𑀦𑀁 𑀅𑀢𑁆𑀣𑀲𑁆𑀲 𑀤𑁂𑀲𑀦𑀸𑀬 𑀧𑀝𑀺𑀯𑁂𑀥𑀲𑁆𑀲 𑀘 𑀆𑀥𑀸𑀭𑀪𑀸𑀯𑁄 𑀬𑀼𑀢𑁆𑀢𑁄, 𑀧𑀺𑀝𑀓𑀸𑀦𑀺 𑀧𑀦 𑀧𑀸𑀴𑀺𑀬𑁄𑀬𑁂𑀯𑀸𑀢𑀺 𑀢𑁂𑀲𑀁 𑀥𑀫𑁆𑀫𑀲𑁆𑀲 𑀆𑀥𑀸𑀭𑀪𑀸𑀯𑁄 ¶ 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀘𑁂? 𑀧𑀸𑀴𑀺𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀧𑀸𑀴𑀺𑀬𑀸 𑀆𑀥𑀸𑀭𑀪𑀸𑀯𑀢𑁄. 𑀅𑀯𑀬𑀯𑀲𑁆𑀲 𑀳𑀺 𑀲𑀫𑀼𑀤𑀸𑀬𑁄 𑀆𑀥𑀸𑀭𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀏𑀢𑁆𑀣 𑀘 𑀥𑀫𑁆𑀫𑀸𑀤𑀻𑀦𑀁 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑀢𑁄 𑀢𑁂𑀳𑀺 𑀥𑀫𑁆𑀫𑀸𑀤𑀻𑀳𑀺 𑀯𑀺𑀦𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀯𑀺𑀦𑀬𑀸𑀤𑀻𑀦𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑁄 𑀕𑀫𑁆𑀪𑀻𑀭𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯, 𑀢𑀲𑁆𑀫𑀸 𑀥𑀫𑁆𑀫𑀸𑀤𑀬𑁄 𑀏𑀯 𑀤𑀼𑀓𑁆𑀔𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑀸, 𑀦 𑀯𑀺𑀦𑀬𑀸𑀤𑀬𑁄𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁 𑀲𑀫𑁆𑀫𑀼𑀔𑁂𑀦 𑀯𑀺𑀲𑀬𑀯𑀺𑀲𑀬𑀻𑀫𑀼𑀔𑁂𑀦 𑀘 𑀯𑀺𑀦𑀬𑀸𑀤𑀻𑀦𑀁𑀬𑁂𑀯 𑀕𑀫𑁆𑀪𑀻𑀭𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀥𑀫𑁆𑀫𑁄 𑀳𑀺 𑀯𑀺𑀦𑀬𑀸𑀤𑀬𑁄, 𑀢𑁂𑀲𑀁 𑀯𑀺𑀲𑀬𑁄 𑀅𑀢𑁆𑀣𑁄, 𑀥𑀫𑁆𑀫𑀢𑁆𑀣𑀯𑀺𑀲𑀬𑀸 𑀘 𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀢𑀺. 𑀢𑀢𑁆𑀣 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀁𑀯𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀓𑁆𑀔𑁂𑀦 𑀑𑀕𑀬𑁆𑀳𑀦𑁆𑀢𑀻𑀢𑀺 𑀤𑀼𑀓𑁆𑀔𑁄𑀕𑀸𑀳𑀸. 𑀏𑀓𑀤𑁂𑀲𑁂𑀦 𑀑𑀕𑀸𑀳𑀦𑁆𑀢𑁂𑀳𑀺𑀧𑀺 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀧𑀢𑀺𑀝𑁆𑀞𑀸 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘𑀸’’𑀢𑀺. 𑀏𑀓𑀫𑁂𑀓𑀲𑁆𑀫𑀺𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀺𑀝𑀓𑁂. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀺𑀝𑀓𑁂𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁.

𑀇𑀤𑀸𑀦𑀺 𑀳𑁂𑀢𑀼𑀳𑁂𑀢𑀼𑀨𑀮𑀸𑀤𑀻𑀦𑀁 𑀯𑀲𑁂𑀦𑀧𑀺 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺. 𑀳𑁂𑀢𑀽𑀢𑀺 𑀧𑀘𑁆𑀘𑀬𑁄. 𑀲𑁄 𑀳𑀺 𑀅𑀢𑁆𑀢𑀦𑁄 𑀨𑀮𑀁 𑀤𑀳𑀢𑀺 𑀯𑀺𑀤𑀳𑀢𑀻𑀢𑀺 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀳𑁂𑀢𑀼𑀧𑀭𑀺𑀬𑀸𑀬𑀢𑀸 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀦𑀦𑀼 𑀘 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀏𑀢𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀥𑀫𑁆𑀫𑁂 𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀳𑀺 ‘‘𑀥𑀫𑁆𑀫𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, ‘‘𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀜𑀸𑀡’’𑀦𑁆𑀢𑀺, 𑀢𑀲𑁆𑀫𑀸 𑀳𑁂𑀢𑀼𑀥𑀫𑁆𑀫𑀲𑀤𑁆𑀤𑀸 𑀏𑀓𑀢𑁆𑀣𑀸 𑀜𑀸𑀡𑀧𑀝𑀺𑀲𑀫𑁆𑀪𑀺𑀤𑀸𑀲𑀤𑁆𑀤𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀥𑀺𑀢𑁄 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄. 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀲𑀸𑀥𑀺𑀢𑁄 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄. 𑀳𑁂𑀢𑀼𑀦𑁄 𑀨𑀮𑀁 𑀳𑁂𑀢𑀼𑀨𑀮𑀁. 𑀢𑀜𑁆𑀘 𑀬𑀲𑁆𑀫𑀸 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 ¶ 𑀅𑀭𑀻𑀬𑀢𑀺 𑀅𑀥𑀺𑀕𑀫𑀻𑀬𑀢𑀺 𑀲𑀫𑁆𑀧𑀸𑀧𑀼𑀡𑀻𑀬𑀢𑀺, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀣𑀸𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀲𑀤𑁆𑀤𑁄 𑀳𑁂𑀢𑀼𑀁 𑀳𑁂𑀢𑀼𑀨𑀮𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀪𑀸𑀯𑀯𑀸𑀘𑀓𑁄 𑀳𑁂𑀲 𑀥𑀫𑁆𑀫𑀲𑀤𑁆𑀤𑁄, 𑀦 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀪𑀸𑀯𑀯𑀸𑀘𑀓𑁄, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀦𑁆𑀢𑀺 𑀬𑁄 𑀬𑁄 𑀅𑀯𑀺𑀚𑁆𑀚𑀸𑀤𑀺𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀼𑀭𑀽𑀧𑀁 𑀯𑀸 𑀬𑀣𑀸𑀥𑀫𑁆𑀫𑀁. 𑀤𑁂𑀲𑀦𑀸𑀧𑀺 𑀳𑀺 𑀧𑀝𑀺𑀯𑁂𑀥𑁄 𑀯𑀺𑀬 𑀅𑀯𑀺𑀧𑀭𑀻𑀢𑀯𑀺𑀲𑀬𑀯𑀺𑀪𑀸𑀯𑀦𑀢𑁄 𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀢𑀢𑁄𑀬𑁂𑀯 𑀘 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑁄 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄. 𑀏𑀢𑁆𑀣 𑀘 𑀅𑀪𑀺𑀮𑀧𑁆𑀧𑀢𑀻𑀢𑀺 𑀅𑀪𑀺𑀮𑀸𑀧𑁄𑀢𑀺 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺. 𑀏𑀢𑁂𑀦 ‘‘𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮) 𑀏𑀢𑁆𑀣 ¶ 𑀯𑀼𑀢𑁆𑀢𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀤𑁂𑀲𑀦𑀸𑀬. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁭𑁧𑁮 𑀆𑀤𑀬𑁄) 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀯𑀺𑀪. 𑀅𑀝𑁆𑀞. 𑁭𑁧𑁮) ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀸𑀭𑀫𑁆𑀫𑀡𑀢𑀸 𑀤𑀲𑁆𑀲𑀺𑀢𑀸. 𑀢𑀣𑀸 𑀳𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀬𑀁 𑀲𑀤𑁆𑀤𑁄 𑀯𑀸𑀘𑀓𑁄𑀢𑀺 𑀯𑀘𑀦𑀯𑀘𑀦𑀢𑁆𑀣𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁𑀢𑀁𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁂𑀦 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀢𑁄 𑀯𑀺𑀦𑀺𑀫𑀼𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀤𑁂𑀲𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀳𑀺 𑀤𑁂𑀲𑀦𑀸, 𑀧𑀓𑀸𑀭𑁂𑀦 𑀜𑀸𑀧𑀻𑀬𑀢𑀺 𑀏𑀢𑁂𑀦, 𑀧𑀓𑀸𑀭𑀢𑁄 𑀜𑀸𑀧𑁂𑀢𑀻𑀢𑀺 𑀯𑀸 𑀧𑀜𑁆𑀜𑀢𑁆𑀢𑀻𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁄 𑀯𑀼𑀘𑁆𑀘𑀢𑀺. 𑀏𑀯𑀁 ‘‘𑀤𑁂𑀲𑀦𑀸 𑀦𑀸𑀫 𑀲𑀤𑁆𑀤𑁄’’𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀯𑀸𑀤𑀺𑀦𑁄 𑀧𑀦 𑀏𑀯𑀁 𑀯𑀤𑀦𑁆𑀢𑀺 𑁋 𑀓𑀺𑀜𑁆𑀘𑀸𑀧𑀺 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄’’𑀢𑀺 𑀏𑀢𑁆𑀣 𑀅𑀪𑀺𑀮𑀧𑁆𑀧𑀢𑀻𑀢𑀺 𑀅𑀪𑀺𑀮𑀸𑀧𑁄𑀢𑀺 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺, 𑀦 𑀧𑀡𑁆𑀡𑀢𑁆𑀢𑀺, 𑀢𑀣𑀸𑀧𑀺 𑀲𑀤𑁆𑀤𑁂 𑀯𑀼𑀘𑁆𑀘𑀫𑀸𑀦𑁂 𑀢𑀤𑀦𑀼𑀭𑀽𑀧𑀁 𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀯𑁄𑀳𑀸𑀭𑁂𑀦 𑀤𑀻𑀧𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀚𑀸𑀦𑀦𑀢𑁄 𑀲𑀤𑁆𑀤𑁂 𑀓𑀣𑀺𑀢𑁂 𑀢𑀤𑀦𑀼𑀭𑀽𑀧𑀸 𑀧𑀡𑁆𑀡𑀢𑁆𑀢𑀺𑀧𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀓𑀣𑀺𑀢𑀸𑀬𑁂𑀯 𑀳𑁄𑀢𑀺. 𑀅𑀣 𑀯𑀸 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀢𑁆𑀣𑁄’’𑀢𑀺 𑀅𑀯𑀢𑁆𑀯𑀸 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁂𑀲𑀦𑀸 𑀦𑀸𑀫 𑀲𑀤𑁆𑀤𑁄 𑀦 𑀳𑁄𑀢𑀻𑀢𑀺 𑀤𑀻𑀧𑀺𑀢𑀫𑁂𑀯𑀸𑀢𑀺.

𑀇𑀤𑀸𑀦𑀺 𑀧𑀝𑀺𑀯𑁂𑀥𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀧𑀝𑀺𑀯𑁂𑀥𑁄𑀢𑀺 𑀅𑀪𑀺𑀲𑀫𑀬𑁄’’𑀢𑀺. 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀜𑀸𑀡𑀁 𑀧𑀝𑀺𑀯𑁂𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀧𑀝𑀺𑀯𑁂𑀥𑁄 ¶ , 𑀅𑀪𑀺𑀲𑀫𑁂𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀅𑀪𑀺𑀲𑀫𑀬𑁄. 𑀇𑀤𑀸𑀦𑀺 𑀅𑀪𑀺𑀲𑀫𑀬𑀧𑁆𑀧𑀪𑁂𑀤𑀢𑁄 𑀅𑀪𑀺𑀲𑀫𑀬𑀧𑁆𑀧𑀓𑀸𑀭𑀢𑁄 𑀆𑀭𑀫𑁆𑀫𑀡𑀢𑁄 𑀲𑀪𑀸𑀯𑀢𑁄 𑀘 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀬𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀅𑀯𑀩𑁄𑀥𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀺𑀲𑀬𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀦𑀸𑀫 𑀅𑀯𑀺𑀚𑁆𑀚𑀸𑀤𑀺𑀥𑀫𑁆𑀫𑀸𑀭𑀫𑁆𑀫𑀡𑁄 𑀲𑀗𑁆𑀔𑀸𑀭𑀸𑀤𑀺𑀅𑀢𑁆𑀣𑀸𑀭𑀫𑁆𑀫𑀡𑁄 𑀢𑀤𑀼𑀪𑀬𑀧𑀜𑁆𑀜𑀸𑀧𑀦𑀸𑀭𑀫𑁆𑀫𑀡𑁄 𑀮𑁄𑀓𑀺𑀬𑁄 𑀅𑀯𑀩𑁄𑀥𑁄. 𑀅𑀲𑀫𑁆𑀫𑁄𑀳𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀫𑀕𑁆𑀕𑀬𑀼𑀢𑁆𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀢𑁆𑀣𑀧𑀜𑁆𑀜𑀢𑁆𑀢𑀻𑀲𑀼 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁄 𑀮𑁄𑀓𑀼𑀢𑁆𑀢𑀭𑁄 𑀅𑀪𑀺𑀲𑀫𑀬𑁄. 𑀢𑀣𑀸 𑀳𑀺 ‘‘𑀅𑀬𑀁 𑀳𑁂𑀢𑀼, 𑀇𑀤𑀫𑀲𑁆𑀲 𑀨𑀮𑀁, 𑀅𑀬𑀁 𑀢𑀤𑀼𑀪𑀬𑀸𑀦𑀼𑀭𑀽𑀧𑁄 𑀯𑁄𑀳𑀸𑀭𑁄’’𑀢𑀺 𑀏𑀯𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀮𑁄𑀓𑀺𑀬𑀜𑀸𑀡𑀁 𑀯𑀺𑀲𑀬𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀮𑁄𑀓𑀼𑀢𑁆𑀢𑀭𑀜𑀸𑀡𑀁 𑀧𑀦 𑀳𑁂𑀢𑀼𑀳𑁂𑀢𑀼𑀨𑀮𑀸𑀤𑀻𑀲𑀼 𑀲𑀫𑁆𑀫𑁄𑀳𑀲𑁆𑀲 𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀽𑀢𑀺 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀲𑀗𑁆𑀔𑀸𑀭𑁂 𑀉𑀧𑁆𑀧𑀸𑀤𑁂𑀢𑀺 𑀅𑀯𑀺𑀚𑁆𑀚𑀸𑀢𑀺 𑀏𑀯𑀁 𑀓𑀸𑀭𑀺𑀬𑀸𑀦𑀼𑀭𑀽𑀧𑀁 𑀓𑀸𑀭𑀡𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀲𑀼 𑀢𑀻𑀲𑀼 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀇𑀢𑀭𑁂𑀲𑀁 𑀬𑀣𑀸𑀦𑀼𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀓𑀸𑀭𑀺𑀬𑀸𑀦𑀼𑀭𑀽𑀧𑀁 𑀓𑀸𑀭𑀡𑁂𑀲𑀼 𑀧𑀝𑀺𑀯𑁂𑀥𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀽𑀢𑀺 ¶ ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀸𑀦𑀼𑀭𑀽𑀧𑀁 𑀓𑀸𑀭𑀺𑀬𑁂𑀲𑀼 𑀅𑀯𑀩𑁄𑀥𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀽𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀡𑁆𑀡𑀢𑁆𑀢𑀻𑀲𑀼 𑀅𑀯𑀩𑁄𑀥𑁄𑀢𑀺 𑀅𑀢𑁆𑀣𑁄.

𑀬𑀣𑀸𑀯𑀼𑀢𑁆𑀢𑁂𑀳𑀺 𑀥𑀫𑁆𑀫𑀸𑀤𑀻𑀳𑀺 𑀧𑀺𑀝𑀓𑀸𑀦𑀁 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀚𑀸𑀢𑀦𑁆𑀢𑀺 𑀓𑀸𑀭𑀡𑀧𑁆𑀧𑀪𑁂𑀤𑁄 𑀓𑀸𑀭𑀡𑀫𑁂𑀯 𑀯𑀸. 𑀅𑀢𑁆𑀣𑀚𑀸𑀢𑀦𑁆𑀢𑀺 𑀓𑀸𑀭𑀺𑀬𑀧𑁆𑀧𑀪𑁂𑀤𑁄 𑀓𑀸𑀭𑀺𑀬𑀫𑁂𑀯 𑀯𑀸. 𑀬𑀸 𑀘𑀸𑀬𑀁 𑀤𑁂𑀲𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀘𑁂𑀢𑁆𑀣𑀸𑀢𑀺 𑀏𑀢𑀸𑀲𑀼 𑀢𑀁𑀢𑀁𑀧𑀺𑀝𑀓𑀕𑀢𑀸𑀲𑀼 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀲𑀼 𑀬𑁄 𑀧𑀝𑀺𑀯𑁂𑀥𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑁄𑀕𑀸𑀳𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸. 𑀢𑁂𑀲𑀁 𑀧𑀜𑁆𑀜𑀸𑀧𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀧𑀝𑀺𑀯𑁂𑀥𑀦𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀘 𑀉𑀧𑁆𑀧𑀸𑀤𑀦𑀯𑀺𑀲𑀬𑀻𑀓𑀭𑀡𑀸𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀭𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀧𑀺𑀝𑀓𑁂𑀲𑀼. 𑀯𑀼𑀢𑁆𑀢𑀢𑁆𑀣𑀸𑀢𑀺 𑀯𑀼𑀢𑁆𑀢𑁄 𑀲𑀁𑀯𑀡𑁆𑀡𑀺𑀢𑁄 𑀅𑀢𑁆𑀣𑁄 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀣𑀸.

𑀢𑀻𑀲𑀼 ¶ 𑀧𑀺𑀝𑀓𑁂𑀲𑀽𑀢𑀺 𑀏𑀢𑁆𑀣 ‘‘𑀏𑀓𑁂𑀓𑀲𑁆𑀫𑀺’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀧𑀓𑀭𑀡𑀢𑁄 𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀬𑀢𑁆𑀢𑀺𑀪𑁂𑀤𑁄𑀢𑀺 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀺𑀬𑀢𑁆𑀢𑀺. 𑀧𑀭𑀺𑀬𑀸𑀧𑀼𑀡𑀦𑀯𑀸𑀘𑀓𑁄 𑀳𑁂𑀢𑁆𑀣 𑀧𑀭𑀺𑀬𑀢𑁆𑀢𑀺𑀲𑀤𑁆𑀤𑁄, 𑀦 𑀧𑀸𑀴𑀺𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀭𑀺𑀬𑀸𑀧𑀼𑀡𑀦𑀧𑁆𑀧𑀓𑀸𑀭𑁄 𑀤𑀝𑁆𑀞𑀩𑁆𑀩𑁄 𑀜𑀸𑀢𑀩𑁆𑀩𑁄’’𑀢𑀺. 𑀢𑀢𑁄𑀬𑁂𑀯 𑀘 ‘‘𑀧𑀭𑀺𑀬𑀢𑁆𑀢𑀺𑀬𑁄 𑀧𑀭𑀺𑀬𑀸𑀧𑀼𑀡𑀦𑀧𑁆𑀧𑀓𑀸𑀭𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸 𑀧𑀸𑀴𑀺𑀬𑁄 𑀏𑀯 𑀧𑀭𑀺𑀬𑀢𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄𑀬𑁂𑀯 𑀘 ‘‘𑀧𑀭𑀺𑀬𑀢𑁆𑀢𑀺𑀬𑁄 𑀧𑀸𑀴𑀺𑀓𑁆𑀓𑀫𑀸’’𑀢𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀮𑀺𑀔𑀺𑀢𑁂 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀳𑀺 𑀅𑀮𑀕𑀤𑁆𑀤𑀽𑀧𑀫𑀸𑀧𑀭𑀺𑀬𑀸𑀧𑀼𑀡𑀦𑀬𑁄𑀕𑀢𑁄 𑀅𑀮𑀕𑀤𑁆𑀤𑀽𑀧𑀫𑀸 𑀧𑀭𑀺𑀬𑀢𑁆𑀢𑀻𑀢𑀺 𑀧𑀸𑀴𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸 𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀧𑀭𑀢𑁄 𑀦𑀺𑀤𑁆𑀤𑁂𑀲𑀯𑀘𑀦𑀫𑁆𑀧𑀺 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀢𑀢𑁆𑀣 𑀳𑀺 𑀧𑀸𑀴𑀺𑀬𑁂𑀯 𑀤𑀼𑀕𑁆𑀕𑀳𑀺𑀢𑀸 𑀧𑀭𑀺𑀬𑀸𑀧𑀼𑀝𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀅𑀮𑀕𑀤𑁆𑀤𑁄 𑀅𑀮𑀕𑀤𑁆𑀤𑀕𑁆𑀕𑀳𑀡𑀁 𑀉𑀧𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑀽𑀧𑀫𑀸. 𑀅𑀮𑀕𑀤𑁆𑀤𑀲𑁆𑀲 𑀕𑀳𑀡𑀜𑁆𑀳𑁂𑀢𑁆𑀣 𑀅𑀮𑀕𑀤𑁆𑀤𑀲𑀤𑁆𑀤𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀆𑀧𑀽𑀧𑀺𑀓𑁄’’𑀢𑀺 𑀏𑀢𑁆𑀣 𑀅𑀧𑀽𑀧𑀲𑀤𑁆𑀤𑁂𑀦 𑀅𑀧𑀽𑀧𑀔𑀸𑀤𑀦𑀁 𑀯𑀺𑀬 𑀅𑀮𑀕𑀤𑁆𑀤𑀕𑁆𑀕𑀳𑀡𑁂𑀦 𑀕𑀳𑀺𑀢𑀧𑀭𑀺𑀬𑀢𑁆𑀢𑀺 𑀉𑀧𑀫𑀻𑀬𑀢𑀺, 𑀦 𑀧𑀦 𑀅𑀮𑀕𑀤𑁆𑀤𑁂𑀦. ‘‘𑀅𑀮𑀕𑀤𑁆𑀤𑀕𑁆𑀕𑀳𑀡𑀽𑀧𑀫𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑁂𑀧𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀼𑀢𑁆𑀢𑀁 ‘‘𑀑𑀝𑁆𑀞𑀫𑀼𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀮𑀕𑀤𑁆𑀤𑁄𑀢𑀺 𑀘𑁂𑀢𑁆𑀣 𑀆𑀲𑀻𑀯𑀺𑀲𑁄 𑀯𑀼𑀘𑁆𑀘𑀢𑀺. 𑀕𑀤𑁄𑀢𑀺 𑀳𑀺 𑀯𑀺𑀲𑀲𑁆𑀲 𑀦𑀸𑀫𑀁. 𑀢𑀜𑁆𑀘 𑀢𑀲𑁆𑀲 𑀅𑀮𑀁 𑀧𑀭𑀺𑀧𑀼𑀡𑁆𑀡𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀮𑀁 𑀧𑀭𑀺𑀬𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀕𑀤𑁄 𑀅𑀲𑁆𑀲𑀸𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀤𑀓𑀸𑀭𑀸𑀕𑀫𑀜𑁆𑀘 𑀓𑀢𑁆𑀯𑀸 ‘‘𑀅𑀮𑀕𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀅𑀮𑀁 𑀚𑀻𑀯𑀺𑀢𑀳𑀭𑀡𑁂 𑀲𑀫𑀢𑁆𑀣𑁄 𑀕𑀤𑁄 𑀅𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑁄. 𑀦𑀺𑀲𑁆𑀲𑀭𑀡𑀢𑁆𑀣𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀏𑀢𑀺𑀲𑁆𑀲𑀸𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸. 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺 ¶ 𑀏𑀢𑁆𑀣 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄. 𑀅𑀜𑁆𑀜𑀁 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀲𑀢𑁄 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺.

𑀤𑀼𑀕𑁆𑀕𑀳𑀺𑀢𑀸𑀢𑀺 𑀤𑀼𑀝𑁆𑀞𑀼 𑀕𑀳𑀺𑀢𑀸. 𑀤𑀼𑀕𑁆𑀕𑀳𑀺𑀢𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸’’𑀢𑀺, 𑀉𑀧𑀸𑀭𑀫𑁆𑀪𑀸 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀤𑀺𑀳𑁂𑀢𑀼 𑀉𑀕𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀮𑀕𑀤𑁆𑀤𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁩𑁯) 𑁋

‘‘𑀬𑁄 ¶ 𑀳𑀺 𑀩𑀼𑀤𑁆𑀥𑀯𑀘𑀦𑀁 ‘𑀏𑀯𑀁 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀮𑀪𑀺𑀲𑁆𑀲𑀸𑀫𑀺, 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀯𑀸 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀧𑀭𑀺𑀬𑀢𑁆𑀢𑀺 𑀦𑀸𑀫. 𑀏𑀯𑀁 𑀧𑀭𑀺𑀬𑀸𑀧𑀼𑀡𑀦𑀢𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀅𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀯𑀭𑀢𑀭’’𑀦𑁆𑀢𑀺.

𑀦𑀦𑀼 𑀘 𑀅𑀮𑀕𑀤𑁆𑀤𑀕𑁆𑀕𑀳𑀡𑀽𑀧𑀫𑀸 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑀼𑀕𑁆𑀕𑀳𑀺𑀢𑀸𑀧𑀺 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀢𑀢𑁆𑀣𑀸𑀧𑀺 𑀅𑀮𑀕𑀤𑁆𑀤𑀕𑁆𑀕𑀳𑀡𑀲𑁆𑀲 𑀉𑀧𑀫𑀸𑀪𑀸𑀯𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁, 𑀢𑀫𑁂𑀦𑀁 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬, 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑀻𑀯𑀸𑀬 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀁 𑀯𑀸 𑀩𑀸𑀳𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀪𑁄𑀕𑁂𑀳𑀺 𑀧𑀮𑀺𑀯𑁂𑀞𑁂𑀬𑁆𑀬, 𑀅𑀣 𑀔𑁄 𑀲𑁄 𑀦𑁂𑀯 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀲𑀼𑀕𑁆𑀕𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁩𑁯).

𑀢𑀲𑁆𑀫𑀸 𑀇𑀥 𑀤𑀼𑀕𑁆𑀕𑀳𑀺𑀢𑀸 𑀏𑀯 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀬𑁂𑀦 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀤𑀁 𑀧𑀦 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀦𑀺𑀲𑁆𑀲𑀭𑀡𑀢𑁆𑀣𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 ¶ 𑀅𑀮𑀕𑀤𑁆𑀤𑀲𑁆𑀲 𑀤𑀼𑀕𑁆𑀕𑀳𑀡𑀽𑀧𑀫𑀸 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀼𑀕𑁆𑀕𑀳𑀡𑀽𑀧𑀫𑀸 𑀳𑀺 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸 𑀯𑀸 𑀳𑁄𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀯𑀸, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸 𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀧𑀭𑀺𑀬𑀢𑁆𑀢𑀺𑀤𑀼𑀕𑁆𑀕𑀳𑀡𑀁 𑀲𑀦𑁆𑀥𑀸𑀬. 𑀯𑀼𑀢𑁆𑀢𑀦𑁆𑀢𑀺 𑀅𑀮𑀕𑀤𑁆𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀁.

𑀅𑀮𑀕𑀤𑁆𑀤𑀢𑁆𑀣𑀺𑀓𑁄𑀢𑀺 𑀆𑀲𑀻𑀯𑀺𑀲𑀢𑁆𑀣𑀺𑀓𑁄. 𑀅𑀮𑀕𑀤𑁆𑀤𑀁 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀺 𑀲𑀻𑀮𑁂𑀦𑀸𑀢𑀺 𑀅𑀮𑀕𑀤𑁆𑀤𑀕𑀯𑁂𑀲𑀻. 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄𑀢𑀺 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀢𑁆𑀣𑀁 𑀘𑀭𑀫𑀸𑀦𑁄. 𑀪𑁄𑀕𑁂𑀢𑀺 𑀲𑀭𑀻𑀭𑁂. 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 ¶ 𑀯𑀸𑀢𑀺 𑀏𑀢𑁆𑀣 𑀫𑀡𑀺𑀩𑀦𑁆𑀥𑀓𑁄 𑀬𑀸𑀯 𑀅𑀕𑁆𑀕𑀦𑀔𑀸 ‘‘𑀳𑀢𑁆𑀣𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀲𑀤𑁆𑀥𑀺𑀁 𑀅𑀕𑁆𑀕𑀩𑀸𑀳𑀸𑀬 𑀅𑀯𑀲𑁂𑀲𑀸 ‘‘𑀩𑀸𑀳𑀸’’𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬𑀧𑀺 𑀬𑀸𑀯 𑀅𑀕𑁆𑀕𑀦𑀔𑀸 𑀳𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀁 𑀳𑀢𑁆𑀣𑀜𑁆𑀘 𑀩𑀸𑀳𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀭𑀻𑀭𑀁 ‘‘𑀅𑀗𑁆𑀕𑀧𑀘𑁆𑀘𑀗𑁆𑀕’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀁𑀦𑀺𑀤𑀸𑀦𑀁, 𑀢𑀁𑀓𑀸𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀭𑀺𑀫𑀧𑀤𑁂 𑀳𑀺 𑀯𑀺𑀪𑀢𑁆𑀢𑀺𑀅𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀢𑀁 𑀳𑀢𑁆𑀣𑀸𑀤𑀻𑀲𑀼 𑀟𑀁𑀲𑀦𑀁 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 𑀢𑀁𑀦𑀺𑀤𑀸𑀦𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀧𑀼𑀭𑀺𑀫𑀧𑀤𑁂 𑀧𑀘𑁆𑀘𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀘 𑀮𑁄𑀧𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀬𑀁 𑀯𑀼𑀢𑁆𑀢𑀁 𑀳𑀢𑁆𑀣𑀸𑀤𑀻𑀲𑀼 𑀟𑀁𑀲𑀦𑀁 𑀢𑀁𑀦𑀺𑀤𑀸𑀦𑀜𑁆𑀘 𑀫𑀭𑀡𑀸𑀤𑀺𑀉𑀧𑀕𑀫𑀦𑀁, 𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀏𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸𑀢𑀺 𑀏𑀓𑀘𑁆𑀘𑁂 𑀢𑀼𑀘𑁆𑀙𑀧𑀼𑀭𑀺𑀲𑀸. 𑀥𑀫𑁆𑀫𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀁. 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀲𑀚𑁆𑀛𑀸𑀬𑀦𑁆𑀢𑀺 𑀘𑁂𑀯 𑀯𑀸𑀘𑀼𑀕𑁆𑀕𑀢𑀸 𑀓𑀭𑁄𑀦𑁆𑀢𑀸 𑀥𑀸𑀭𑁂𑀦𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀦𑁆𑀢𑀺 𑀬𑀣𑀸𑀪𑀽𑀢𑀁 𑀪𑀸𑀲𑀺𑀢𑀢𑁆𑀣𑀁 𑀧𑀬𑁄𑀚𑀦𑀢𑁆𑀣𑀜𑁆𑀘. 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸 𑀓𑀣𑀺𑀢𑀸, 𑀫𑀬𑀜𑁆𑀘 𑀢𑀁 𑀧𑀽𑀭𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀪𑀸𑀲𑀺𑀢𑀢𑁆𑀣𑀁 𑀧𑀬𑁄𑀚𑀦𑀢𑁆𑀣𑀜𑁆𑀘 ‘‘𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀁, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺. 𑀅𑀦𑀼𑀧𑀧𑀭𑀺𑀓𑁆𑀔𑀢𑀦𑁆𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀦𑁆𑀢𑀸𑀦𑀁. 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀦𑀺𑀚𑁆𑀛𑀸𑀦𑀧𑀜𑁆𑀜𑀁 𑀦𑀓𑁆𑀔𑀫𑀦𑁆𑀢𑀺, 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀭𑁄𑀘𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀢𑁂𑀲𑀁 𑀧𑀜𑁆𑀜𑀸𑀬 𑀅𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀦𑁆𑀢𑀸𑀦𑀁 𑀢𑁂 𑀥𑀫𑁆𑀫𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺, ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁, 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸, 𑀫𑀕𑁆𑀕𑁄, 𑀨𑀮𑀁, 𑀯𑀝𑁆𑀝𑀁, 𑀯𑀺𑀯𑀝𑁆𑀝𑀁 𑀓𑀣𑀺𑀢’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀻’’𑀢𑀺.

𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯𑀸𑀢𑀺 𑀢𑁂 𑀧𑀭𑁂𑀲𑀁 𑀯𑀸𑀤𑁂 𑀤𑁄𑀲𑀸𑀭𑁄𑀧𑀦𑀸𑀦𑀺𑀲𑀁𑀲𑀸 𑀳𑀼𑀢𑁆𑀯𑀸 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘𑀸𑀢𑀺 𑀇𑀢𑀺 𑀏𑀯𑀁 𑀏𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸, 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀆𑀭𑁄𑀧𑀺𑀢𑀯𑀸𑀤𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀧𑀫𑁄𑀓𑁆𑀔𑀧𑁆𑀧𑀬𑁄𑀚𑀦𑀸 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀭𑁂𑀳𑀺 𑀲𑀓𑀯𑀸𑀤𑁂 𑀤𑁄𑀲𑁂 𑀆𑀭𑁄𑀧𑀺𑀢𑁂 𑀢𑀁 𑀤𑁄𑀲𑀁 𑀏𑀯𑀜𑁆𑀘 ¶ 𑀏𑀯𑀜𑁆𑀘 𑀫𑁄𑀘𑁂𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺. 𑀅𑀣 𑀯𑀸 𑀲𑁄 𑀲𑁄 𑀯𑀸𑀤𑁄 𑀇𑀢𑀺𑀯𑀸𑀤𑁄, 𑀇𑀢𑀺𑀯𑀸𑀤𑀲𑁆𑀲 𑀧𑀫𑁄𑀓𑁆𑀔𑁄 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑁄, 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑁄 𑀆𑀦𑀺𑀲𑀁𑀲𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸, 𑀢𑀁𑀢𑀁𑀯𑀸𑀤𑀧𑁆𑀧𑀫𑁄𑀘𑀦𑀸𑀦𑀺𑀲𑀁𑀲𑀸 𑀘𑀸𑀢𑀺 𑀅𑀢𑁆𑀣𑁄 ¶ . 𑀬𑀲𑁆𑀲 𑀘𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀬𑀲𑁆𑀲 𑀘 𑀲𑀻𑀮𑀸𑀤𑀺𑀧𑀽𑀭𑀡𑀲𑁆𑀲 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀢𑀜𑁆𑀘 𑀅𑀲𑁆𑀲 𑀥𑀫𑁆𑀫𑀲𑁆𑀲 𑀲𑀻𑀮𑀸𑀤𑀺𑀧𑀭𑀺𑀧𑀽𑀭𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀏𑀢𑁂 𑀤𑀼𑀕𑁆𑀕𑀳𑀺𑀢𑀕𑀸𑀳𑀺𑀦𑁄 𑀦𑀸𑀦𑀼𑀪𑁄𑀦𑁆𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺.

𑀅𑀣 𑀯𑀸 𑀬𑀲𑁆𑀲 𑀉𑀧𑀸𑀭𑀫𑁆𑀪𑀲𑁆𑀲 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀬𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑁂 𑀧𑀭𑁂𑀳𑀺 ‘‘𑀅𑀬𑀫𑀢𑁆𑀣𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 𑀤𑀼𑀕𑁆𑀕𑀳𑀺𑀢𑀢𑁆𑀢𑀸𑀬𑁂𑀯 𑀲𑁄𑀬𑁂𑀯𑀢𑁆𑀣𑁄𑀢𑀺 𑀧𑀝𑀺𑀧𑀸𑀤𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀻𑀢𑀺 𑀧𑀭𑀲𑁆𑀲 𑀯𑀸𑀤𑁂 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀢𑀼𑀁 𑀅𑀢𑁆𑀢𑀦𑁄 𑀯𑀸𑀤𑀸 𑀢𑀁 𑀫𑁄𑀘𑁂𑀢𑀼𑀜𑁆𑀘 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀢𑀁 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺𑀬𑁂𑀯𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀉𑀧𑀸𑀭𑀫𑁆𑀪𑀫𑀸𑀦𑀤𑀧𑁆𑀧𑀫𑀓𑁆𑀔𑀧𑀮𑀸𑀲𑀸𑀤𑀺𑀳𑁂𑀢𑀼𑀪𑀸𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀢𑁆𑀣 𑀳𑀺 𑀓𑀸𑀭𑀡𑁂 𑀨𑀮𑀯𑁄𑀳𑀸𑀭𑁂𑀦 ‘‘𑀢𑁂 𑀥𑀫𑁆𑀫𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀓𑀺𑀜𑁆𑀘𑀸𑀧𑀺 𑀦 𑀢𑁂 𑀥𑀫𑁆𑀫𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀓𑀸𑀮𑁂 𑀯𑀺𑀯𑀸𑀤𑀲𑀫𑀬𑁂 𑀘 𑀢𑀁𑀫𑀽𑀮𑀓𑀸𑀦𑀁 𑀉𑀧𑀸𑀭𑀫𑁆𑀪𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀅𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀢𑁂 𑀥𑀫𑁆𑀫𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀓𑀸𑀭𑀡𑁂 𑀨𑀮𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀅𑀦𑀪𑀺𑀲𑀫𑁆𑀪𑀼𑀡𑀦𑀁 𑀢𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀁 𑀧𑀭𑀸𑀫𑀲𑀢𑀺.

𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀧𑀽𑀭𑀺𑀁𑀬𑁂𑀯𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀲𑀫𑀸𑀥𑀺𑀦𑁄 𑀆𑀕𑀢𑀝𑁆𑀞𑀸𑀦𑁂 𑀲𑀫𑀸𑀥𑀺𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀁 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀸𑀫𑀺, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀉𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯 𑀲𑀸 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸 𑀦𑀸𑀫 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀧𑀭𑀺𑀬𑀢𑁆𑀢𑀺𑀲𑀼𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀅𑀮𑀕𑀤𑁆𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑀸𑀦𑀫𑁆𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀦𑁆𑀦𑁂𑀳𑀺 𑀉𑀧𑀦𑀻𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀧𑀭𑁂𑀲𑀁 𑀯𑀸𑀤𑁂 𑀲𑀳𑀥𑀫𑁆𑀫𑁂𑀦 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑀸𑀦𑀫𑁆𑀧𑀺 𑀲𑀓𑀯𑀸𑀤𑀢𑁄 𑀤𑁄𑀲𑀁 𑀳𑀭𑀦𑁆𑀢𑀸𑀦𑀫𑁆𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀳𑀺 ¶ 𑀦 𑀓𑁂𑀯𑀮𑀁 𑀲𑀼𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀻𑀦𑁂𑀯, 𑀧𑀭𑀯𑀸𑀤𑀦𑀺𑀕𑁆𑀕𑀳𑀲𑀓𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀸𑀦𑀺𑀧𑀺 𑀇𑀚𑁆𑀛𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁬𑁮).

𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄𑀢𑀺 ¶ 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁂𑀦 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄. 𑀧𑀳𑀻𑀦𑀓𑀺𑀮𑁂𑀲𑁄𑀢𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑀓𑀺𑀮𑁂𑀲𑁄. 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄𑀢𑀺 𑀧𑀝𑀺𑀯𑀺𑀤𑁆𑀥𑀅𑀭𑀳𑀢𑁆𑀢𑀨𑀮𑁄. 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀓𑀼𑀧𑁆𑀧𑀦𑁆𑀢𑀺 𑀳𑀺 𑀅𑀭𑀳𑀢𑁆𑀢𑀨𑀮𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀢𑀺𑀧𑀺 𑀳𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀘𑀢𑀼𑀦𑁆𑀦𑀜𑁆𑀘 𑀨𑀮𑀸𑀦𑀁 𑀅𑀓𑀼𑀧𑁆𑀧𑀲𑀪𑀸𑀯𑁂 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀲𑀓𑀲𑀓𑀦𑀸𑀫𑀧𑀭𑀺𑀘𑁆𑀘𑀸𑀕𑁂𑀦 𑀉𑀧𑀭𑀽𑀧𑀭𑀺 𑀦𑀸𑀫𑀦𑁆𑀢𑀭𑀧𑁆𑀧𑀢𑁆𑀢𑀺𑀢𑁄 𑀢𑁂𑀲𑀁 𑀫𑀕𑁆𑀕𑀨𑀮𑀸𑀦𑀺 ‘‘𑀅𑀓𑀼𑀧𑁆𑀧𑀸𑀦𑀻’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀅𑀭𑀳𑀸 𑀧𑀦 𑀲𑀩𑁆𑀩𑀤𑀸𑀧𑀺 𑀅𑀭𑀳𑀸𑀬𑁂𑀯 𑀦𑀸𑀫𑀸𑀢𑀺 𑀢𑀲𑁆𑀲𑁂𑀯 𑀨𑀮𑀁 ‘‘𑀅𑀓𑀼𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲𑁂𑀯 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫𑀸’’𑀢𑀺. 𑀢𑀲𑁆𑀲 𑀳𑀺 𑀅𑀧𑀭𑀺𑀜𑁆𑀜𑀸𑀢𑀁 𑀅𑀧𑁆𑀧𑀳𑀻𑀦𑀁 𑀅𑀪𑀸𑀯𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑁄 𑀢𑀦𑁆𑀢𑀺𑀥𑀸𑀭𑀓𑁄 𑀧𑀯𑁂𑀡𑀻𑀧𑀸𑀮𑀓𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀘 𑀳𑀼𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀯𑁂𑀡𑀻𑀢𑀺 𑀥𑀫𑁆𑀫𑀲𑀦𑁆𑀢𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀁𑀲𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀁𑀲𑀸𑀦𑀼𑀭𑀓𑁆𑀔𑀡𑀢𑁆𑀣𑀁. 𑀢𑀲𑁆𑀲 𑀯𑀁𑀲𑁄𑀧𑀺 𑀅𑀢𑁆𑀣𑀢𑁄 𑀧𑀯𑁂𑀡𑀻𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀘 𑀬𑀤𑀺 𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺, 𑀓𑀲𑁆𑀫𑀸 ‘‘𑀔𑀻𑀡𑀸𑀲𑀯𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀘𑁆𑀘𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀳𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀏𑀓𑀘𑁆𑀘𑁄 𑀪𑀺𑀓𑁆𑀔𑀼 𑀙𑀸𑀢𑀓𑀪𑀬𑀸𑀤𑀻𑀲𑀼 𑀕𑀦𑁆𑀣𑀥𑀭𑁂𑀲𑀼 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼 𑀲𑀬𑀁 𑀪𑀺𑀓𑁆𑀔𑀸𑀘𑀸𑀭𑁂𑀦 𑀅𑀓𑀺𑀮𑀫𑀫𑀸𑀦𑁄 𑀅𑀢𑀺𑀫𑀥𑀼𑀭𑀁 𑀩𑀼𑀤𑁆𑀥𑀯𑀘𑀦𑀁 𑀫𑀸 𑀦𑀲𑁆𑀲𑀢𑀼, 𑀢𑀦𑁆𑀢𑀺𑀁 𑀥𑀸𑀭𑁂𑀲𑁆𑀲𑀸𑀫𑀺, 𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻𑀢𑀺 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀧𑀺 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫 𑀓𑀲𑁆𑀫𑀸 𑀦 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑁄 ‘‘𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁂𑀦 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀧𑀦 𑀪𑀯𑀓𑀦𑁆𑀢𑀸𑀭𑀢𑁄 𑀅𑀦𑀺𑀢𑁆𑀢𑀺𑀡𑁆𑀡𑀢𑁆𑀢𑀸 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀧𑀭𑀺𑀬𑀢𑁆𑀢𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸 𑀯𑀸 𑀳𑁄𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸 𑀯𑀸, 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀦𑀺𑀲𑁆𑀲𑀭𑀡𑀢𑁆𑀣𑀸𑀯, 𑀔𑀻𑀡𑀸𑀲𑀯𑀸𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀻𑀡𑀸𑀲𑀯𑁄 ¶ 𑀘 𑀪𑀡𑁆𑀟𑀸𑀕𑀸𑀭𑀺𑀓𑀲𑀤𑀺𑀲𑀢𑁆𑀢𑀸 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀲𑀸𑀥𑀦𑀓𑀸𑀮𑁂 𑀢𑀤𑀼𑀧𑀺𑀬𑀁 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀭𑀜𑁆𑀜𑁄 𑀉𑀧𑀦𑀸𑀫𑁂𑀢𑁆𑀯𑀸 𑀅𑀮𑀗𑁆𑀓𑀭𑁄𑀢𑀺, 𑀏𑀯𑀁 𑀔𑀻𑀡𑀸𑀲𑀯𑁄𑀧𑀺 𑀥𑀫𑁆𑀫𑀭𑀢𑀦𑀪𑀡𑁆𑀟𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑁄𑀓𑁆𑀔𑀸𑀥𑀺𑀕𑀫𑀲𑁆𑀲 𑀪𑀩𑁆𑀩𑀭𑀽𑀧𑁂 𑀲𑀳𑁂𑀢𑀼𑀓𑁂 𑀲𑀢𑁆𑀢𑁂 𑀧𑀲𑁆𑀲𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀗𑁆𑀔𑀸𑀢𑁂𑀦 𑀮𑁄𑀓𑀼𑀢𑁆𑀢𑀭𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑁄𑀢𑀻𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 𑀢𑀺𑀲𑁆𑀲𑁄 𑀧𑀭𑀺𑀬𑀢𑁆𑀢𑀺𑀬𑁄 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑀻𑀲𑀼𑀧𑀺 𑀧𑀺𑀝𑀓𑁂𑀲𑀼 𑀬𑀣𑀸𑀭𑀳𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑁂 𑀧𑀦𑀸’’𑀢𑀺𑀆𑀤𑀺. 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀻𑀢𑀺𑀆𑀤𑀻𑀲𑀼 ¶ 𑀬𑀲𑁆𑀫𑀸 𑀲𑀻𑀮𑀁 𑀯𑀺𑀲𑀼𑀚𑁆𑀛𑀫𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀩𑀮𑁂𑀦 𑀘 𑀲𑀁𑀓𑀺𑀮𑁂𑀲𑀫𑀮𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀧𑀸𑀭𑀺𑀧𑀽𑀭𑀺𑀜𑁆𑀘 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀻𑀮𑀲𑀫𑁆𑀧𑀤𑀸 𑀲𑀺𑀚𑁆𑀛𑀫𑀸𑀦𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀪𑀸𑀯𑁂𑀦 𑀲𑀢𑀺𑀩𑀮𑀁 𑀜𑀸𑀡𑀩𑀮𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀢𑀲𑁆𑀲𑀸 𑀯𑀺𑀚𑁆𑀚𑀢𑁆𑀢𑀬𑀽𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 𑀲𑀪𑀸𑀕𑀳𑁂𑀢𑀼𑀲𑀫𑁆𑀧𑀤𑀸𑀦𑀢𑁄. 𑀲𑀢𑀺𑀩𑀮𑁂𑀦 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀯𑀺𑀚𑁆𑀚𑀸𑀲𑀺𑀤𑁆𑀥𑀺, 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀲𑀼𑀤𑀺𑀝𑁆𑀞𑀓𑀸𑀭𑀺𑀢𑀸𑀧𑀭𑀺𑀘𑀬𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀦𑀼𑀩𑀤𑁆𑀥𑀸𑀬 𑀤𑀼𑀢𑀺𑀬𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀺, 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑀩𑁆𑀪𑀸𑀯𑀢𑁄 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸𑀯𑀲𑁂𑀦 𑀅𑀚𑁆𑀛𑀸𑀲𑀬𑀲𑀼𑀤𑁆𑀥𑀺𑀬𑀸 𑀢𑀢𑀺𑀬𑀯𑀺𑀚𑁆𑀚𑀸𑀲𑀺𑀤𑁆𑀥𑀺. 𑀧𑀼𑀭𑁂𑀢𑀭𑀲𑀺𑀤𑁆𑀥𑀸𑀦𑀁 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀧𑀸𑀭𑀺𑀧𑀽𑀭𑀺𑀁 𑀯𑀺𑀦𑀸 𑀲𑀻𑀮𑀲𑁆𑀲 𑀆𑀲𑀯𑀓𑁆𑀔𑀬𑀜𑀸𑀡𑀽𑀧𑀦𑀺𑀲𑁆𑀲𑀬𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁯; 𑁩.𑁫; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪) 𑀯𑀘𑀦𑀢𑁄 𑀲𑀫𑀸𑀥𑀺𑀲𑀫𑁆𑀧𑀤𑀸 𑀙𑀴𑀪𑀺𑀜𑁆𑀜𑀢𑀸𑀬 𑀉𑀧𑀦𑀺𑀲𑁆𑀲𑀬𑁄. ‘‘𑀬𑁄𑀕𑀸 𑀯𑁂 𑀚𑀸𑀬𑀢𑀺 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨) 𑀯𑀘𑀦𑀢𑁄 𑀧𑀼𑀩𑁆𑀩𑀬𑁄𑀕𑁂𑀦 𑀕𑀭𑀼𑀯𑀸𑀲𑀤𑁂𑀲𑀪𑀸𑀲𑀸𑀓𑁄𑀲𑀮𑁆𑀮𑀉𑀕𑁆𑀕𑀳𑀡𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘 𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀪𑁂𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑁄. 𑀏𑀢𑁆𑀣 𑀘 ‘‘𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀲𑀫𑀸𑀥𑀺𑀯𑀺𑀚𑀫𑁆𑀪𑀦𑀪𑀽𑀢𑀸 𑀅𑀦𑀯𑀲𑁂𑀲𑀸 𑀙 𑀅𑀪𑀺𑀜𑁆𑀜𑀸 𑀦 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸 𑀅𑀢𑁆𑀣𑀻𑀢𑀺 𑀲𑀢𑀺𑀧𑀺 𑀯𑀺𑀚𑁆𑀚𑀸𑀦𑀁 𑀅𑀪𑀺𑀜𑁆𑀜𑁂𑀓𑀤𑁂𑀲𑀪𑀸𑀯𑁂 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀏𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀕𑀳𑀺𑀢𑀸. 𑀬𑀣𑀸 𑀳𑀺 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀢𑀸𑀲𑀁 𑀧𑀝𑀺𑀮𑀪𑀺𑀢𑀩𑁆𑀩𑀢𑁄. 𑀏𑀯𑀁 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀲𑀫𑀼𑀤𑀸𑀕𑀢𑀸 𑀘 𑀙 𑀅𑀪𑀺𑀜𑁆𑀜𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 ¶ 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀻𑀢𑀺 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀢𑀸𑀲𑀁 𑀅𑀥𑀺𑀕𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀥𑀫𑁆𑀫𑀲𑀫𑀥𑀺𑀕𑀫𑀲𑀤𑀺𑀲𑀸 𑀳𑀺 𑀇𑀫𑁂𑀲𑀁 𑀅𑀭𑀺𑀬𑀸𑀦𑀁 𑀇𑀫𑁂 𑀯𑀺𑀲𑁂𑀲𑀸𑀥𑀺𑀕𑀫𑀸𑀢𑀺.

𑀢𑀸𑀲𑀁𑀬𑁂𑀯 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄𑀢𑀺 𑀏𑀢𑁆𑀣 𑀢𑀸𑀲𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀧𑀸𑀧𑀼𑀡𑀺𑀢𑀩𑁆𑀩𑀸𑀦𑀁 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀯𑀺𑀦𑀬𑁂 𑀧𑀪𑁂𑀤𑀯𑀘𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀭𑀜𑁆𑀚𑀓𑀡𑁆𑀟𑁂 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀯 𑀯𑀺𑀪𑀢𑁆𑀢𑀸𑀢𑀺. 𑀤𑀼𑀢𑀺𑀬𑁂 𑀢𑀸𑀲𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑀁, 𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀢𑀸 𑀳𑀺 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀼𑀢𑁆𑀢𑁂 𑀯𑀺𑀪𑀢𑁆𑀢𑀸𑀬𑁂𑀯𑀸𑀢𑀺. 𑀢𑀸𑀲𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀯𑀼𑀢𑁆𑀢𑀸𑀬𑁂𑀯. 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀦 𑀅𑀜𑁆𑀜𑀢𑁆𑀣 𑀧𑀪𑁂𑀤𑀯𑀘𑀦𑀸𑀪𑀸𑀯𑀁 𑀢𑀢𑁆𑀣𑁂𑀯 𑀘 𑀲𑀫𑁆𑀫𑀸 𑀯𑀺𑀪𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀼𑀓𑀸𑀫𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀯𑀥𑀸𑀭𑀡𑀁 𑀅𑀓𑀢𑁆𑀯𑀸 ‘‘𑀢𑀢𑁆𑀣𑁂𑀯𑀸’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀯𑀥𑀸𑀭𑀡𑀁 𑀞𑀧𑁂𑀲𑀺.

𑀇𑀤𑀸𑀦𑀺 ¶ ‘‘𑀯𑀺𑀦𑀬𑁂 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 ‘𑀫𑀼𑀤𑀼𑀓𑀸𑀦𑀁 𑀅𑀢𑁆𑀣𑀭𑀡𑀸𑀤𑀻𑀦𑀁 𑀲𑀫𑁆𑀨𑀲𑁆𑀲𑁄 𑀯𑀺𑀬 𑀇𑀢𑁆𑀣𑀺𑀲𑀫𑁆𑀨𑀲𑁆𑀲𑁄𑀧𑀺 𑀯𑀝𑁆𑀝𑀢𑀻’𑀢𑀺 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑁂 𑀤𑁄𑀲𑀁 𑀅𑀤𑀺𑀲𑁆𑀯𑀸 𑀲𑀻𑀮𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑁂 𑀧𑀦 𑀤𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀔𑁄 𑀲𑀫𑁆𑀨𑀲𑁆𑀲𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺, 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺. 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑁄 𑀇𑀢𑁆𑀣𑀺𑀨𑀲𑁆𑀲𑁄, 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀦𑁆𑀢𑀺 𑀅𑀭𑀺𑀝𑁆𑀞𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀁. 𑀲𑁄 𑀳𑀺 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑀺𑀓𑁂𑀲𑀼 𑀲𑁂𑀲𑀦𑁆𑀢𑀭𑀸𑀬𑀺𑀓𑁂 𑀚𑀸𑀦𑀸𑀢𑀺, 𑀯𑀺𑀦𑀬𑁂 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁂 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀭𑀳𑁄𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀅𑀕𑀸𑀭𑀺𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽𑀧𑀺 𑀫𑀦𑀸𑀧𑀺𑀓𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀦𑁆𑀢𑀺, 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺, 𑀓𑀲𑁆𑀫𑀸 𑀇𑀢𑁆𑀣𑀻𑀦𑀁𑀬𑁂𑀯 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀦 𑀯𑀝𑁆𑀝𑀦𑁆𑀢𑀺, 𑀏𑀢𑁂𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀅𑀦𑀯𑀚𑁆𑀚𑁂𑀦 𑀧𑀘𑁆𑀘𑀬𑀧𑀭𑀺𑀪𑀼𑀜𑁆𑀚𑀦𑀭𑀲𑁂𑀦 𑀲𑀸𑀯𑀚𑁆𑀚𑀓𑀸𑀫𑀕𑀼𑀡𑀧𑀭𑀺𑀪𑁄𑀕𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀣𑀽𑀮𑀯𑀸𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀲𑀼𑀔𑀼𑀫𑀲𑀼𑀢𑁆𑀢𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀲𑀺𑀦𑁂𑀭𑀼𑀦𑁄 𑀲𑀤𑀺𑀲𑀢𑀁 𑀉𑀧𑀲𑀁𑀳𑀭𑀦𑁆𑀢𑁄 ¶ 𑀯𑀺𑀬 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀪𑀕𑀯𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀤𑁄𑀲𑁄’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 ‘‘𑀫𑁂𑀣𑀼𑀦𑀥𑀫𑁆𑀫𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀚𑀺𑀦𑀲𑁆𑀲 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀫𑀤𑀸𑀲𑀺. 𑀢𑁂𑀦𑀸𑀳 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀺.

𑀢𑀢𑁆𑀣 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀅𑀦𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂 𑀦𑀺𑀬𑀼𑀢𑁆𑀢𑀸, 𑀅𑀦𑁆𑀢𑀭𑀸𑀬𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀺, 𑀅𑀦𑁆𑀢𑀭𑀸𑀬𑀲𑁆𑀲 𑀯𑀸 𑀓𑀭𑀡𑀲𑀻𑀮𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸, 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀧𑀭𑀢𑁄 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁪𑁧𑁭) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑁋 𑀬𑁂 𑀇𑀫𑁂 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀤𑁂𑀲𑀺𑀢𑀸 𑀘𑁂𑀯 𑀧𑀜𑁆𑀜𑀢𑁆𑀢𑀸 𑀘, 𑀢𑁂 𑀥𑀫𑁆𑀫𑁂 𑀧𑀝𑀺𑀲𑁂𑀯𑀢𑁄 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀢𑁂 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀸𑀬 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀦𑀸𑀮𑀁 𑀲𑀫𑀢𑁆𑀣𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦𑀸𑀳𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀚𑀸𑀦𑀸𑀫𑀻𑀢𑀺. 𑀢𑀢𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀢𑀢𑁄 𑀅𑀦𑀯𑀚𑁆𑀚𑀲𑀜𑁆𑀜𑀻𑀪𑀸𑀯𑀳𑁂𑀢𑀼𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀺.

𑀘𑀢𑁆𑀢𑀸𑀭𑁄𑀫𑁂 ¶ , 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀦𑀸 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄, 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀧𑀭𑀳𑀺𑀢𑀸𑀬, 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀅𑀢𑁆𑀢𑀳𑀺𑀢𑀸𑀬, 𑀦𑁂𑀯 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀦𑁄 𑀧𑀭𑀳𑀺𑀢𑀸𑀬, 𑀅𑀢𑁆𑀢𑀳𑀺𑀢𑀸𑀬 𑀘𑁂𑀯 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀭𑀳𑀺𑀢𑀸𑀬 𑀘𑀸’’𑀢𑀺 (𑀅. 𑀦𑀺. 𑁪.𑁯𑁬; 𑀧𑀼. 𑀧. 𑀫𑀸𑀢𑀺𑀓𑀸, 𑀘𑀢𑀼𑀓𑁆𑀓𑀉𑀤𑁆𑀤𑁂𑀲 𑁨𑁪) 𑁋

𑀆𑀤𑀺𑀦𑀸 𑀧𑀼𑀕𑁆𑀕𑀮𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑀤𑁂𑀲𑀦𑀸 𑀯𑁄𑀳𑀸𑀭𑀯𑀲𑁂𑀦, 𑀦 𑀧𑀭𑀫𑀢𑁆𑀣𑀢𑁄’’𑀢𑀺 𑀏𑀯𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄. 𑀩𑀼𑀤𑁆𑀥𑀲𑁆𑀲 𑀳𑀺 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀤𑁂𑀲𑀦𑀸 ¶ 𑀲𑀫𑁆𑀫𑀼𑀢𑀺𑀤𑁂𑀲𑀦𑀸 𑀧𑀭𑀫𑀢𑁆𑀣𑀤𑁂𑀲𑀦𑀸 𑀘𑀸𑀢𑀺. 𑀢𑀢𑁆𑀣 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄’’𑀢𑀺 𑀏𑀯𑀭𑀽𑀧𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀏𑀯𑀭𑀽𑀧𑀸 𑀧𑀭𑀫𑀢𑁆𑀣𑀤𑁂𑀲𑀦𑀸. 𑀢𑀢𑁆𑀣 𑀪𑀕𑀯𑀸 𑀬𑁂 𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀲𑀫𑁆𑀫𑀼𑀢𑀺𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀬𑁂 𑀧𑀦 𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀧𑀭𑀫𑀢𑁆𑀣𑀤𑁂𑀲𑀦𑀁 𑀤𑁂𑀲𑁂𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀤𑁂𑀲𑀪𑀸𑀲𑀸𑀓𑀼𑀲𑀮𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀓𑁄 𑀆𑀘𑀭𑀺𑀬𑁄 𑀬𑁂 𑀤𑀫𑀺𑀴𑀪𑀸𑀲𑀸𑀬 𑀯𑀼𑀢𑁆𑀢𑁂 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀤𑀫𑀺𑀴𑀪𑀸𑀲𑀸𑀬 𑀆𑀘𑀺𑀓𑁆𑀔𑀢𑀺, 𑀬𑁂 𑀅𑀦𑁆𑀥𑀓𑀪𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀬, 𑀢𑁂𑀲𑀁 𑀢𑀸𑀬 𑀪𑀸𑀲𑀸𑀬, 𑀏𑀯𑀁 𑀢𑁂 𑀫𑀸𑀡𑀯𑀸 𑀙𑁂𑀓𑀁 𑀩𑁆𑀬𑀢𑁆𑀢𑀁 𑀆𑀘𑀭𑀺𑀬𑀫𑀸𑀕𑀫𑁆𑀫 𑀔𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑀢𑁆𑀣 𑀆𑀘𑀭𑀺𑀬𑁄 𑀯𑀺𑀬 𑀩𑀼𑀤𑁆𑀥𑁄 𑀪𑀕𑀯𑀸, 𑀢𑀬𑁄 𑀯𑁂𑀤𑀸 𑀯𑀺𑀬 𑀓𑀣𑁂𑀢𑀩𑁆𑀩𑀪𑀸𑀯𑁂 𑀞𑀺𑀢𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀤𑁂𑀲𑀪𑀸𑀲𑀸𑀬 𑀓𑁄𑀲𑀮𑁆𑀮𑀫𑀺𑀯 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑁄𑀲𑀮𑁆𑀮𑀁, 𑀦𑀸𑀦𑀸𑀤𑁂𑀲𑀪𑀸𑀲𑀸𑀫𑀸𑀡𑀯𑀓𑀸 𑀯𑀺𑀬 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸, 𑀆𑀘𑀭𑀺𑀬𑀲𑁆𑀲 𑀤𑀫𑀺𑀴𑀪𑀸𑀲𑀸𑀤𑀺𑀆𑀘𑀺𑀓𑁆𑀔𑀦𑀁 𑀯𑀺𑀬 𑀪𑀕𑀯𑀢𑁄 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦𑀧𑀺 𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀳 𑀘𑁂𑀢𑁆𑀣 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀺.

‘‘𑀲𑀗𑁆𑀓𑁂𑀢𑀯𑀘𑀦𑀁 ¶ 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀓𑀸𑀭𑀡𑀸.

‘‘𑀢𑀲𑁆𑀫𑀸 𑀯𑁄𑀳𑀸𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁫𑁭; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦);

𑀅𑀧𑀺𑀘 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 𑁋 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸𑀢𑀺. ‘‘𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀳𑀺𑀭𑀺𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ¶ ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀳𑀺𑀭𑀺𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀇𑀢𑁆𑀣𑀻 𑀳𑀺𑀭𑀺𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀓𑀫𑁆𑀫𑀲𑁆𑀲𑀓𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀯𑁂𑀴𑀼𑀯𑀦𑀸𑀤𑀬𑁄 𑀫𑀳𑀸𑀯𑀺𑀳𑀸𑀭𑀸 𑀔𑀦𑁆𑀥𑁂𑀳𑀺 𑀓𑀸𑀭𑀸𑀧𑀺𑀢𑀸, 𑀥𑀸𑀢𑀽𑀳𑀺 𑀆𑀬𑀢𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀧𑀺𑀢𑀭𑀁 𑀅𑀭𑀳𑀦𑁆𑀢𑀁, 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 𑀲𑀗𑁆𑀖𑀪𑁂𑀤𑀁 𑀓𑀭𑁄𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀫𑁂𑀢𑁆𑀢𑀸𑀬𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. ‘‘𑀔𑀦𑁆𑀥𑀸 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫𑀸’’𑀢𑀺. ‘‘𑀧𑀼𑀕𑁆𑀕𑀮𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. 𑀮𑁄𑀓𑀲𑀫𑁆𑀫𑀼𑀢𑀺𑀜𑁆𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀦 𑀯𑀺𑀚𑀳𑀦𑁆𑀢𑀺, 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀸 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 ¶ , 𑀢𑀲𑁆𑀫𑀸 𑀇𑀫𑀺𑀦𑀸 𑀘 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑁄 𑀧𑀼𑀕𑁆𑀕𑀮𑀤𑁂𑀲𑀦𑀸, 𑀦 𑀧𑀭𑀫𑀢𑁆𑀣𑀤𑁂𑀲𑀦𑀸𑀢𑀺 𑀏𑀯𑀁 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀻𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀤𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀯𑀺𑀧𑀭𑀻𑀢𑀁 𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀕𑁆𑀕𑀳𑀺𑀢𑀦𑁆𑀢𑀺 𑀳𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀤𑀼𑀕𑁆𑀕𑀳𑀺𑀢𑀕𑀸𑀳𑀁 𑀲𑀦𑁆𑀥𑀸𑀬. 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀥𑀫𑁆𑀫𑁂𑀦𑀸𑀢𑀺 𑀧𑀸𑀞𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀤𑀼𑀕𑁆𑀕𑀳𑀡𑀁 𑀤𑀼𑀕𑁆𑀕𑀳𑀺𑀢𑀁. 𑀅𑀢𑁆𑀢𑀦𑀸𑀢𑀺 𑀘 𑀲𑀸𑀫𑀺𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀡𑁂𑀦 ¶ 𑀯𑀺𑀧𑀭𑀻𑀢𑀕𑀸𑀳𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀻𑀢𑀺 𑀅𑀫𑁆𑀳𑀸𑀓𑀜𑁆𑀘 𑀅𑀩𑁆𑀪𑀸𑀘𑀺𑀓𑁆𑀔𑀦𑀁 𑀓𑀭𑁄𑀢𑀺. 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀻𑀢𑀺 𑀅𑀢𑁆𑀢𑀦𑁄 𑀓𑀼𑀲𑀮𑀫𑀽𑀮𑀸𑀦𑀺 𑀔𑀦𑀦𑁆𑀢𑁄 𑀅𑀢𑁆𑀢𑀸𑀦𑀁 𑀔𑀦𑀢𑀺 𑀦𑀸𑀫.

𑀥𑀫𑁆𑀫𑀘𑀺𑀦𑁆𑀢𑀦𑁆𑀢𑀺 𑀥𑀫𑁆𑀫𑀲𑀪𑀸𑀯𑀯𑀺𑀚𑀸𑀦𑀦𑀁. 𑀅𑀢𑀺𑀥𑀸𑀯𑀦𑁆𑀢𑁄𑀢𑀺 𑀞𑀸𑀢𑀩𑁆𑀩𑀫𑀭𑀺𑀬𑀸𑀤𑀸𑀬𑀁 𑀅𑀝𑁆𑀞𑀢𑁆𑀯𑀸 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀤𑀸𑀦𑀁 𑀳𑁄𑀢𑀺, 𑀲𑀬𑀫𑁂𑀯 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀅𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀅𑀢𑀺𑀥𑀸𑀯𑀦𑁆𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄. 𑀘𑀢𑁆𑀢𑀸𑀭𑀻𑀢𑀺 𑀩𑀼𑀤𑁆𑀥𑀯𑀺𑀲𑀬𑀇𑀤𑁆𑀥𑀺𑀯𑀺𑀲𑀬𑀓𑀫𑁆𑀫𑀯𑀺𑀧𑀸𑀓𑀮𑁄𑀓𑀯𑀺𑀲𑀬𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀩𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀯𑁂 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀛𑀸𑀬𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀛𑀸𑀦𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄…𑀧𑁂… 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄…𑀧𑁂… 𑀮𑁄𑀓𑀘𑀺𑀦𑁆𑀢𑀸 𑀪𑀺𑀓𑁆𑀔𑀯𑁂 𑀅𑀘𑀺𑀦𑁆𑀢𑁂𑀬𑁆𑀬𑀸 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸…𑀧𑁂… 𑀇𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭).

𑀢𑀢𑁆𑀣 ‘‘𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀻’’𑀢𑀺 𑀢𑁂𑀲𑀁 𑀲𑀪𑀸𑀯𑀦𑀺𑀤𑀲𑁆𑀲𑀦𑀁. ‘‘𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻’’𑀢𑀺 𑀢𑀢𑁆𑀣 𑀓𑀢𑁆𑀢𑀩𑁆𑀩𑀢𑀸𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀻𑀢𑀺 𑀘𑀺𑀦𑁆𑀢𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺, 𑀘𑀺𑀦𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀘𑀺𑀦𑁆𑀢𑁂𑀬𑁆𑀬𑀢𑁆𑀢𑀸 𑀏𑀯 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀓𑀸𑀫𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺𑀧𑀺 𑀙 𑀅𑀲𑀸𑀥𑀸𑀭𑀡𑀸𑀤𑀻𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀢𑀸𑀦𑀺 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀇𑀫𑀸𑀦𑀺 𑀧𑀦 𑀏𑀯𑀁 𑀦 ¶ 𑀳𑁄𑀦𑁆𑀢𑀻𑀢𑀺 𑀅𑀨𑀮𑀪𑀸𑀯𑀢𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀺𑀝𑀓𑀸𑀦𑀁.

𑀏𑀢𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀯𑀘𑀦𑀁. 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀻𑀢𑀺 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀫𑀳𑀸𑀯𑀕𑁆𑀕𑀧𑀸𑀣𑀺𑀓𑀯𑀕𑁆𑀕𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀯𑀕𑁆𑀕𑁂𑀳𑀺 𑀲𑀗𑁆𑀕𑀳𑁄 𑀏𑀢𑁂𑀲𑀦𑁆𑀢𑀺 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀺. 𑀘𑀢𑀼𑀢𑁆𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸𑀢𑀺 𑀕𑀸𑀣𑀸𑀬 𑀏𑀯𑀫𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀲𑁆𑀲 ¶ 𑀦𑀺𑀓𑀸𑀬𑀲𑁆𑀲 𑀲𑀼𑀢𑁆𑀢𑀕𑀡𑀦𑀸𑀢𑁄 𑀘𑀢𑀼𑀢𑁆𑀢𑀺𑀁𑀲𑁂𑀯 𑀘 𑀲𑀼𑀢𑁆𑀢𑀦𑁆𑀢𑀸 𑀯𑀕𑁆𑀕𑀲𑀗𑁆𑀕𑀳𑀯𑀲𑁂𑀦 𑀢𑀬𑁄 𑀯𑀕𑁆𑀕𑀸 𑀅𑀲𑁆𑀲 𑀲𑀗𑁆𑀕𑀳𑀲𑁆𑀲𑀸𑀢𑀺 𑀢𑀺𑀯𑀕𑁆𑀕𑁄 𑀲𑀗𑁆𑀕𑀳𑁄. 𑀏𑀲 𑀧𑀞𑀫𑁄 𑀦𑀺𑀓𑀸𑀬𑁄 𑀤𑀻𑀖𑀦𑀺𑀓𑀸𑀬𑁄𑀢𑀺 𑀅𑀦𑀼𑀮𑁄𑀫𑀺𑀓𑁄 𑀅𑀧𑀘𑁆𑀘𑀦𑀻𑀓𑁄, 𑀅𑀢𑁆𑀣𑀸𑀦𑀼𑀮𑁄𑀫𑀦𑀢𑁄 𑀅𑀦𑁆𑀯𑀢𑁆𑀣𑀦𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀢𑁆𑀣𑀸𑀦𑀼𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑀺𑀓𑁄, 𑀅𑀦𑀼𑀮𑁄𑀫𑀺𑀓𑀢𑁆𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀦𑀺𑀓𑀸𑀬𑀫𑁆𑀧𑀻𑀢𑀺 𑀏𑀓𑀲𑀫𑀽𑀳𑀫𑁆𑀧𑀺. 𑀏𑀯𑀁 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀯𑀺𑀘𑀺𑀢𑁆𑀢𑀁. 𑀬𑀣𑀬𑀺𑀤𑀦𑁆𑀢𑀺 𑀬𑀣𑀸 𑀇𑀫𑁂. 𑀧𑁄𑀡𑀺𑀓𑀸 𑀘𑀺𑀓𑁆𑀔𑀮𑁆𑀮𑀺𑀓𑀸 𑀘 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀧𑁄𑀡𑀺𑀓𑀦𑀺𑀓𑀸𑀬𑁄 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀲𑀸𑀥𑀓𑀸𑀦𑀺 𑀲𑀸𑀲𑀦𑀢𑁄 𑀘 𑀮𑁄𑀓𑀢𑁄 𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀉𑀤𑀸𑀳𑀭𑀡𑀸𑀦𑀺 𑀏𑀢𑁆𑀣 𑀦𑀺𑀓𑀸𑀬𑀲𑀤𑁆𑀤𑀲𑁆𑀲 𑀲𑀫𑀽𑀳𑀦𑀺𑀯𑀸𑀲𑀸𑀦𑀁 𑀯𑀸𑀘𑀓𑀪𑀸𑀯𑁂 𑀲𑀸𑀲𑀦𑀢𑁄 𑀘 𑀯𑁄𑀳𑀸𑀭𑀢𑁄 𑀘 𑀲𑀸𑀥𑀓𑀸𑀦𑀺 𑀧𑀫𑀸𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀞𑀫𑀫𑀼𑀤𑀸𑀳𑀭𑀡𑀁 𑀲𑀸𑀲𑀦𑀢𑁄 𑀲𑀸𑀥𑀓𑀯𑀘𑀦𑀁, 𑀤𑀼𑀢𑀺𑀬𑀁 𑀮𑁄𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀻𑀢𑀺 𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑀸𑀤𑀻𑀳𑀺 𑀧𑀜𑁆𑀘𑀤𑀲𑀳𑀺 𑀯𑀕𑁆𑀕𑁂𑀳𑀺 𑀲𑀗𑁆𑀕𑀳𑁄 𑀏𑀢𑁂𑀲𑀦𑁆𑀢𑀺 𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀺. 𑀤𑀺𑀬𑀟𑁆𑀠𑀲𑀢𑀁 𑀤𑁆𑀯𑁂 𑀘 𑀲𑀼𑀢𑁆𑀢𑀸𑀦𑀻𑀢𑀺 𑀅𑀟𑁆𑀠𑁂𑀦 𑀤𑀼𑀢𑀺𑀬𑀁 𑀤𑀺𑀬𑀟𑁆𑀠𑀁, 𑀏𑀓𑀁 𑀲𑀢𑀁 𑀤𑁆𑀯𑁂 𑀧𑀜𑁆𑀜𑀸𑀲𑀲𑀼𑀢𑁆𑀢𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀺𑀓𑀸𑀬𑁂. 𑀧𑀜𑁆𑀘𑀤𑀲𑀯𑀕𑁆𑀕𑀧𑀭𑀺𑀕𑁆𑀕𑀳𑁄𑀢𑀺 𑀧𑀜𑁆𑀘𑀤𑀲𑀳𑀺 𑀯𑀕𑁆𑀕𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑁄 𑀲𑀗𑁆𑀕𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀦𑁆𑀢𑀸𑀦𑀁 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀲𑀼𑀢𑁆𑀢𑀲𑀢𑀸𑀦𑀺 𑀘𑀸𑀢𑀺 𑀧𑀸𑀞𑁂 𑀲𑀼𑀢𑁆𑀢𑀦𑁆𑀢𑀸𑀦𑀁 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀢𑁆𑀣𑀘𑀺 𑀧𑀦 ‘‘𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘𑀸’’𑀢𑀺𑀧𑀺 𑀧𑀸𑀞𑁄. 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄𑀢𑀺 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀗𑁆𑀕𑀳𑁄.

𑀧𑀼𑀩𑁆𑀩𑁂 𑀦𑀺𑀤𑀲𑁆𑀲𑀺𑀢𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀦𑀺𑀤𑁆𑀤𑁂𑀲𑁂 𑀦𑀺𑀤𑀲𑁆𑀲𑀺𑀢𑀸. 𑀯𑀼𑀢𑁆𑀢𑀫𑁂𑀯 𑀧𑀓𑀸𑀭𑀦𑁆𑀢𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀦𑀺𑀓𑀸𑀬𑁂 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀫𑁂𑀯 𑀳𑀺 𑀇𑀫𑀺𑀦𑀸 𑀧𑀓𑀸𑀭𑀦𑁆𑀢𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀞𑀧𑁂𑀢𑁆𑀯𑀸 𑀘𑀢𑀼𑀭𑁄𑀧𑁂𑀢𑁂’’𑀢𑀺𑀆𑀤𑀺. 𑀢𑀤𑀜𑁆𑀜𑀦𑁆𑀢𑀺 𑀢𑁂𑀳𑀺 𑀘𑀢𑀽𑀳𑀺 𑀦𑀺𑀓𑀸𑀬𑁂𑀳𑀺 𑀅𑀜𑁆𑀜𑀁 𑀅𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀫𑁂𑀯 ¶ 𑁨 𑀳𑀺𑀤𑀦𑁆𑀢𑀺 𑀲𑀩𑁆𑀩𑀫𑁂𑀯 𑀇𑀤𑀁 𑀩𑀼𑀤𑁆𑀥𑀯𑀘𑀦𑀁. 𑀦𑀯𑀧𑁆𑀧𑀪𑁂𑀤𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀧𑀦𑁂𑀢𑀁 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀣𑀸 𑀳𑀺 𑀦𑀯𑀳𑀺 𑀅𑀗𑁆𑀕𑁂𑀳𑀺 𑀯𑀯𑀢𑁆𑀣𑀺𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀭𑀳𑀺𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀲𑀼𑀢𑁆𑀢𑀲𑀪𑀸𑀯𑀸𑀦𑁂𑀯 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀺 ¶ 𑀲𑀺𑀬𑀼𑀁, 𑀅𑀣 𑀲𑀼𑀢𑁆𑀢𑀲𑀪𑀸𑀯𑀸𑀦𑁂𑀯 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀺, 𑀏𑀯𑀁 𑀲𑀢𑀺 𑀲𑀼𑀢𑁆𑀢𑀦𑁆𑀢𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 𑀅𑀝𑁆𑀞𑀗𑁆𑀕𑀁 𑀲𑀸𑀲𑀦𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀅𑀧𑀺𑀘 ‘‘𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀜𑁆𑀘 𑀦𑀸𑀫 𑀲𑀕𑀸𑀣𑀓𑀁 𑀯𑀸 𑀲𑀺𑀬𑀸 𑀦𑀺𑀕𑁆𑀕𑀸𑀣𑀓𑀁 𑀯𑀸𑀢𑀺 𑀅𑀗𑁆𑀕𑀤𑁆𑀯𑀬𑁂𑀦𑁂𑀯 𑀢𑀤𑀼𑀪𑀬𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀲𑀼𑀢𑁆𑀢𑀁 𑀉𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀜𑁆𑀜𑀸𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀅𑀣𑀸𑀧𑀺 𑀓𑀣𑀜𑁆𑀘𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀯𑀸 𑀦 𑀲𑀺𑀬𑀸 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬, 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀓𑀯𑀕𑁆𑀕𑀲𑁆𑀲 𑀯𑀺𑀬, 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄.

𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑁄𑀲𑀲𑁆𑀲, 𑀦𑀢𑁆𑀣𑀺 𑀏𑀢𑁆𑀣𑀸𑀯𑀕𑀸𑀳𑀡𑀁;

𑀢𑀲𑁆𑀫𑀸 𑀅𑀲𑀗𑁆𑀓𑀭𑀁𑀬𑁂𑀯, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁.

𑀲𑀩𑁆𑀩𑀲𑁆𑀲𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑀣𑀸 𑀳𑀺 ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁, 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂, 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀭𑀺𑀬𑀢𑁆𑀢𑀺𑀯𑀺𑀲𑁂𑀲𑁂𑀲𑀼𑀧𑀺 𑀲𑀼𑀢𑁆𑀢𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭) 𑀆𑀳 𑁋 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺. 𑀢𑀢𑁆𑀣 𑀳𑀺 𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀺 𑀧𑀭𑀺𑀬𑁂𑀲𑀦𑀸 𑀅𑀢𑁆𑀣𑀯𑀺𑀘𑀸𑀭𑀡𑀸 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸. 𑀢𑀤𑁂𑀓𑀤𑁂𑀲𑁂𑀲𑀼 𑀧𑀦 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀯𑀸 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘‘𑀕𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀜𑁆𑀳𑀺 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀁. 𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄 𑀲𑀑𑀓𑀸𑀲𑀢𑁄 𑀅𑀦𑁄𑀓𑀸𑀲𑀯𑀺𑀥𑀺 𑀩𑀮𑀯𑀸𑀢𑀺 ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 ¶ 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀬𑀼𑀢𑁆𑀢𑁂𑀲𑀼 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼 ¶ 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸. 𑀏𑀢𑁆𑀣 𑀳𑀺 𑀲𑀢𑀺𑀧𑀺 𑀲𑀜𑁆𑀜𑀦𑁆𑀢𑀭𑀦𑀺𑀫𑀺𑀢𑁆𑀢𑀬𑁄𑀕𑁂 𑀅𑀦𑁄𑀓𑀸𑀲𑀲𑀜𑁆𑀜𑀸𑀦𑀁 𑀩𑀮𑀯𑀪𑀸𑀯𑁂𑀦𑁂𑀯 𑀕𑀸𑀣𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀲𑀢𑀺𑀧𑀺 𑀧𑀜𑁆𑀳𑀸𑀯𑀺𑀲𑀚𑁆𑀚𑀦𑀪𑀸𑀯𑁂 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄. 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄.

𑀦𑀦𑀼 𑀘 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸 𑀏𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸. 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺, 𑀢𑀁 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸𑀢𑀺. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀅𑀣 𑀔𑁄 𑀲𑀼𑀢𑁆𑀢𑀪𑀸𑀯𑁂𑀦𑁂𑀯. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀲𑀼𑀢𑁆𑀢𑀦𑀸𑀫𑀓𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦𑀢𑁆𑀣𑀺. 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳𑀪𑀸𑀯𑁄 𑀳𑀺 𑀦𑀸𑀫 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀲𑀳 𑀕𑀸𑀣𑀸𑀳𑀻𑀢𑀺 𑀘 𑀲𑀕𑀸𑀣𑀓𑀁. 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀦𑀦𑀼 𑀘 𑀕𑀸𑀣𑀸𑀲𑀫𑀼𑀤𑀸𑀬𑁄 𑀕𑀸𑀣𑀸𑀳𑀺 𑀅𑀜𑁆𑀜𑁄 𑀳𑁄𑀢𑀺, 𑀢𑀣𑀸 𑀘 𑀢𑀲𑁆𑀲 𑀯𑀲𑁂𑀦 𑀲𑀳 𑀕𑀸𑀣𑀸𑀳𑀻𑀢𑀺 𑀲𑀕𑀸𑀣𑀓𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺? 𑀢𑀁 𑀦. 𑀦 𑀳𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦 𑀅𑀜𑁆𑀜𑀢𑁄. 𑀅𑀜𑁆𑀜𑀸𑀬𑁂𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀣𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 ¶ 𑀲𑀼𑀢𑁆𑀢𑀸𑀤𑀻𑀦𑀺 𑀦𑀯𑀗𑁆𑀕𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀤𑁆𑀤𑁂𑀲𑁄 𑀦𑀸𑀫 𑀲𑀼𑀢𑁆𑀢𑀦𑀺𑀧𑀸𑀢𑁂 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁨) 𑁋

𑀆𑀤𑀺𑀦𑀸 ¶ 𑀆𑀕𑀢𑀲𑁆𑀲 𑀅𑀝𑁆𑀞𑀓𑀯𑀕𑁆𑀕𑀲𑁆𑀲,

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄;)

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺,

𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁩𑁮) 𑁋

𑀆𑀤𑀺𑀦𑀸 𑀆𑀕𑀢𑀲𑁆𑀲 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲,

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁩𑁫) 𑁋

𑀆𑀤𑀺𑀦𑀸 𑀆𑀕𑀢𑀲𑁆𑀲 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀘 𑀢𑀤𑀢𑁆𑀣𑀯𑀺𑀪𑀸𑀕𑀯𑀲𑁂𑀦 𑀲𑀢𑁆𑀣𑀼𑀓𑀧𑁆𑀧𑁂𑀦 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀓𑀢𑁄 𑀦𑀺𑀤𑁆𑀤𑁂𑀲𑁄 𑀫𑀳𑀸𑀦𑀺𑀤𑁆𑀤𑁂𑀲𑁄 𑀘𑀽𑀴𑀦𑀺𑀤𑁆𑀤𑁂𑀲𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀯𑀫𑀺𑀥 𑀦𑀺𑀤𑁆𑀤𑁂𑀲𑀲𑁆𑀲 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀏𑀯 𑀤𑀲𑁆𑀲𑀺𑀢𑁄. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀧𑀺 𑀦𑁂𑀢𑁆𑀢𑀺𑀧𑀓𑀭𑀡𑀝𑁆𑀞𑀓𑀣𑀸𑀬𑀁 𑀏𑀯𑀫𑁂𑀢𑀲𑁆𑀲 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄𑀯 𑀓𑀣𑀺𑀢𑁄. 𑀓𑁂𑀘𑀺 𑀧𑀦 𑀦𑀺𑀤𑁆𑀤𑁂𑀲𑀲𑁆𑀲 𑀕𑀸𑀣𑀸𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑁂𑀲𑀼 𑀤𑁆𑀯𑀻𑀲𑀼 𑀲𑀗𑁆𑀕𑀳𑀁 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑁆𑀤𑁂𑀲𑀅𑀝𑁆𑀞𑀓𑀣𑀸𑀬𑀁 𑀉𑀧𑀲𑁂𑀦𑀢𑁆𑀣𑁂𑀭𑁂𑀦 𑁋

‘‘𑀢𑀤𑁂𑀢𑀁 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁, 𑀤𑀻𑀖𑀦𑀺𑀓𑀸𑀬𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀲𑀼 𑀫𑀳𑀸𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀫𑀳𑀸𑀦𑀺𑀓𑀸𑀬𑁂 𑀧𑀭𑀺𑀬𑀸𑀧𑀦𑁆𑀦𑀁, 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 ¶ 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀢𑁆𑀣𑀼𑀲𑀸𑀲𑀦𑀗𑁆𑀕𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀕𑀸𑀣𑀸𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀫𑀳𑀸𑀦𑀺. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸).

𑀏𑀢𑁆𑀣 𑀢𑀸𑀯 𑀓𑀢𑁆𑀣𑀘𑀺 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀲𑀪𑀸𑀯𑀢𑁄 𑀦𑀺𑀤𑁆𑀤𑁂𑀲𑁂𑀓𑀤𑁂𑀲𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀬𑀼𑀚𑁆𑀚𑀢𑀼 𑀦𑀸𑀫 ¶ , 𑀕𑀸𑀣𑀗𑁆𑀕𑀲𑀗𑁆𑀕𑀳𑁄 𑀧𑀦 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀇𑀤𑀫𑁂𑀢𑁆𑀣 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬 𑀳𑀺 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑀪𑀸𑀯𑁄 𑀕𑀸𑀣𑀗𑁆𑀕𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀧𑀤𑀸𑀤𑀻𑀲𑀼 𑀳𑀺 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀕𑀸𑀣𑀸𑀲𑀫𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀦𑀺𑀤𑁆𑀤𑁂𑀲𑁂 𑀘 𑀦 𑀓𑁄𑀘𑀺 𑀓𑁂𑀯𑀮𑁄 𑀕𑀸𑀣𑀸𑀩𑀦𑁆𑀥𑀧𑁆𑀧𑀤𑁂𑀲𑁄 𑀉𑀧𑀮𑀩𑁆𑀪𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑀸𑀦𑀁𑀬𑁂𑀯 𑀳𑀺 𑀅𑀝𑁆𑀞𑀓𑀯𑀕𑁆𑀕𑀸𑀤𑀺𑀲𑀗𑁆𑀕𑀳𑀺𑀢𑀸𑀦𑀁 𑀕𑀸𑀣𑀸𑀦𑀁 𑀦𑀺𑀤𑁆𑀤𑁂𑀲𑀫𑀢𑁆𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀓𑀢𑀁. 𑀅𑀢𑁆𑀣𑀯𑀺𑀪𑀚𑀦𑀢𑁆𑀣𑀁 𑀆𑀦𑀻𑀢𑀸𑀧𑀺 𑀳𑀺 𑀢𑀸 𑀅𑀝𑁆𑀞𑀓𑀯𑀕𑁆𑀕𑀸𑀤𑀺𑀲𑀗𑁆𑀕𑀳𑀺𑀢𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀫𑀽𑀮𑀕𑀸𑀣𑀸𑀬𑁄 𑀲𑀼𑀢𑁆𑀢𑀦𑀺𑀧𑀸𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀜𑁆𑀜𑀸𑀬𑁂𑀯𑀸𑀢𑀺 𑀦 𑀦𑀺𑀤𑁆𑀤𑁂𑀲𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀆𑀕𑀢𑀪𑀸𑀯𑁂𑀧𑀺 𑀢𑀁 𑀯𑁄𑀳𑀸𑀭𑀁 𑀅𑀮𑀪𑀫𑀸𑀦𑀸 𑀚𑀸𑀢𑀓𑀸𑀤𑀺𑀕𑀸𑀣𑀸𑀧𑀭𑀺𑀬𑀸𑀧𑀦𑁆𑀦𑀸 𑀕𑀸𑀣𑀸𑀬𑁄 𑀯𑀺𑀬, 𑀢𑀲𑁆𑀫𑀸 𑀓𑀸𑀭𑀡𑀦𑁆𑀢𑀭𑀫𑁂𑀢𑁆𑀣 𑀕𑀯𑁂𑀲𑀺𑀢𑀩𑁆𑀩𑀁, 𑀬𑀼𑀢𑁆𑀢𑀢𑀭𑀁 𑀯𑀸 𑀕𑀳𑁂𑀢𑀩𑁆𑀩𑀁.

𑀦𑀸𑀮𑀓𑀲𑀼𑀢𑁆𑀢𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀦𑀸𑀮𑀓𑀲𑀼𑀢𑁆𑀢𑀁 𑀦𑀸𑀫 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀢𑀤𑀢𑁆𑀣𑀁 𑀅𑀪𑀺𑀓𑀗𑁆𑀔𑀫𑀸𑀦𑁂𑀦 𑀢𑀢𑁄 𑀧𑀪𑀼𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀆𑀕𑀢𑁂𑀦 𑀅𑀲𑀺𑀢𑀲𑁆𑀲 𑀇𑀲𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑁂𑀦 𑀦𑀸𑀮𑀓𑀢𑁆𑀣𑁂𑀭𑁂𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 ‘‘𑀅𑀜𑁆𑀜𑀸𑀢𑀫𑁂𑀢’’𑀦𑁆𑀢𑀺𑀆𑀤𑀻𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁭𑁦𑁬) 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀪𑀸𑀲𑀺𑀢𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀸𑀧𑀭𑀺𑀤𑀻𑀧𑀓𑀁 𑀲𑀼𑀢𑁆𑀢𑀁. 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀁 𑀧𑀦 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀤𑁂𑀯𑁂𑀲𑀼 ‘‘𑀓𑀸 𑀦𑀼 𑀔𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀢𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁯𑁨𑁧; 𑀫𑀳𑀸𑀦𑀺. 𑁧𑁫𑁦 ) 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁯𑁨𑁨) 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁. 𑀏𑀯𑀫𑀺𑀥𑀲𑀼𑀢𑁆𑀢𑀦𑀺𑀧𑀸𑀢𑁂 𑀆𑀕𑀢𑀸𑀦𑀁 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄, 𑀢𑀢𑁆𑀣𑁂𑀯 𑀆𑀕𑀢𑀸𑀦𑀁 𑀅𑀲𑀼𑀢𑁆𑀢𑀦𑀸𑀫𑀺𑀓𑀸𑀦𑀁 𑀲𑀼𑀤𑁆𑀥𑀺𑀓𑀕𑀸𑀣𑀸𑀦𑀁 𑀕𑀸𑀣𑀗𑁆𑀕𑀲𑀗𑁆𑀕𑀳𑀜𑁆𑀘 𑀤𑀲𑁆𑀲𑀬𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀭𑀫𑁆𑀪𑁂 𑁋

‘‘𑀕𑀸𑀣𑀸𑀲𑀢𑀲𑀫𑀸𑀓𑀺𑀡𑁆𑀡𑁄 ¶ , 𑀕𑁂𑀬𑁆𑀬𑀩𑁆𑀬𑀸𑀓𑀭𑀡𑀗𑁆𑀓𑀺𑀢𑁄;

𑀓𑀲𑁆𑀫𑀸 𑀲𑀼𑀢𑁆𑀢𑀦𑀺𑀧𑀸𑀢𑁄𑀢𑀺, 𑀲𑀗𑁆𑀔𑀫𑁂𑀲 𑀕𑀢𑁄𑀢𑀺 𑀘𑁂’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑁋

𑀲𑀓𑀮𑀲𑁆𑀲𑀧𑀺 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀓𑀲𑁆𑀫𑀸 𑀘𑁄𑀤𑀺𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀘𑁄𑀤𑀓𑁂𑀦 𑀲𑀕𑀸𑀣𑀓𑀢𑁆𑀢𑀁 𑀓𑀢𑁆𑀣𑀘𑀺 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀫𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀘𑁄𑀤𑀦𑀸𑀫𑀢𑁆𑀢𑀁 𑀓𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑀺𑀕𑁆𑀕𑀸𑀣𑀓𑀲𑁆𑀲 𑀲𑀼𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄 𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀦 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸𑀢𑀺. 𑀲𑀕𑀸𑀣𑀸𑀯𑀕𑁆𑀕𑁄 𑀕𑁂𑀬𑁆𑀬𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫 𑀧𑀝𑀺𑀲𑀫𑁆𑀪𑀺𑀤𑀸𑀤𑀻’’𑀢𑀺 ¶ 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀲𑁆𑀲 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀁 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 (𑀧𑀝𑀺. 𑀫. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) ‘‘𑀦𑀯𑀲𑀼 𑀲𑀢𑁆𑀣𑀼𑀲𑀸𑀲𑀦𑀗𑁆𑀕𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀺𑀢’’𑀦𑁆𑀢𑀺.

𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸𑀢𑀺 𑀅𑀲𑀼𑀢𑁆𑀢𑀦𑀸𑀫𑀺𑀓𑀸. ‘‘𑀲𑀼𑀤𑁆𑀥𑀺𑀓𑀕𑀸𑀣𑀸 𑀦𑀸𑀫 𑀯𑀢𑁆𑀣𑀼𑀕𑀸𑀣𑀸’’𑀢𑀺 𑀢𑀻𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀢𑁆𑀣𑀼𑀕𑀸𑀣𑀸𑀢𑀺 𑁋

‘‘𑀓𑁄𑀲𑀮𑀸𑀦𑀁 𑀧𑀼𑀭𑀸 𑀭𑀫𑁆𑀫𑀸, 𑀅𑀕𑀫𑀸 𑀤𑀓𑁆𑀔𑀺𑀡𑀸𑀧𑀣𑀁;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀸𑀦𑁄, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽’’𑀢𑀺. (𑀲𑀼. 𑀦𑀺. 𑁯𑁮𑁨) 𑁋

𑀆𑀤𑀺𑀦𑀸 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 𑀦𑀺𑀤𑀸𑀦𑀁 𑀆𑀭𑁄𑀧𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀸 𑀙𑀧𑁆𑀧𑀜𑁆𑀜𑀸𑀲 𑀘 𑀕𑀸𑀣𑀸𑀬𑁄, 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀲𑀗𑁆𑀕𑀻𑀢𑀺𑀓𑀸𑀮𑁂 𑀦𑀸𑀮𑀓𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀭𑁄𑀧𑁂𑀦𑁆𑀢𑁂𑀦 𑀯𑀼𑀢𑁆𑀢𑀸 𑁋

‘‘𑀆𑀦𑀦𑁆𑀤𑀚𑀸𑀢𑁂 𑀢𑀺𑀤𑀲𑀕𑀡𑁂 𑀧𑀢𑀻𑀢𑁂,

𑀲𑀓𑁆𑀓𑀜𑁆𑀘 𑀇𑀦𑁆𑀤𑀁 𑀲𑀼𑀘𑀺𑀯𑀲𑀦𑁂 𑀘 𑀤𑁂𑀯𑁂;

𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀅𑀢𑀺𑀭𑀺𑀯 𑀣𑁄𑀫𑀬𑀦𑁆𑀢𑁂,

𑀅𑀲𑀺𑀢𑁄 𑀇𑀲𑀺 𑀅𑀤𑁆𑀤𑀲 𑀤𑀺𑀯𑀸𑀯𑀺𑀳𑀸𑀭𑁂’’𑀢𑀺. (𑀲𑀼. 𑀦𑀺. 𑁬𑁮𑁪) 𑁋

𑀆𑀤𑀺𑀓𑀸 𑀯𑀻𑀲𑀢𑀺𑀫𑀢𑁆𑀢𑀸 𑀕𑀸𑀣𑀸𑀬𑁄 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘‘𑀦𑀸𑀮𑀓𑀲𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀕𑀸𑀣𑀸𑀬𑁄 𑀦𑀸𑀮𑀓𑀲𑀼𑀢𑁆𑀢𑀲𑀗𑁆𑀔𑁆𑀬𑀁𑀬𑁂𑀯 𑀕𑀘𑁆𑀙𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨.𑁬𑁮𑁫) 𑁋

‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀫𑁂𑀯 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀝𑁆𑀞𑁄 ¶ 𑀬𑁂𑀦 𑀬𑀤𑀸 𑀘 𑀲𑀫𑀸𑀤𑀧𑀺𑀢𑁄 𑀦𑀸𑀮𑀓𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺, 𑀢𑀁 𑀲𑀩𑁆𑀩𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 ‘𑀆𑀦𑀦𑁆𑀤𑀚𑀸𑀢𑁂’𑀢𑀺𑀆𑀤𑀺𑀓𑀸 𑀯𑀻𑀲𑀢𑀺 𑀯𑀢𑁆𑀣𑀼𑀕𑀸𑀣𑀸𑀬𑁄 𑀯𑀢𑁆𑀯𑀸 𑀅𑀪𑀸𑀲𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀦𑀸𑀮𑀓𑀲𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀫𑀸 𑀦𑀸𑀮𑀓𑀲𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀕𑀸𑀣𑀸𑀬𑁄 𑀦𑀸𑀮𑀓𑀲𑀼𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀧𑀸𑀭𑀸𑀬𑀦𑀺𑀓𑀯𑀕𑁆𑀕𑀲𑁆𑀲 𑀯𑀢𑁆𑀣𑀼𑀕𑀸𑀣𑀸𑀬𑁄 𑀇𑀥 𑀲𑀼𑀤𑁆𑀥𑀺𑀓𑀕𑀸𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀧𑀦𑀲𑁆𑀲 𑀧𑀸𑀭𑀸𑀬𑀦𑀺𑀬𑀯𑀕𑁆𑀕𑁂 𑀅𑀚𑀺𑀢𑀫𑀸𑀡𑀯𑀓𑀸𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 ¶ 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀘𑁆𑀙𑀸𑀕𑀸𑀣𑀸 𑀪𑀕𑀯𑀢𑁄 𑀯𑀺𑀲𑀚𑁆𑀚𑀦𑀕𑀸𑀣𑀸 𑀘 𑀇𑀥 𑀲𑀼𑀤𑁆𑀥𑀺𑀓𑀕𑀸𑀣𑀸𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀢𑀸𑀧𑀺 𑀳𑀺 𑀧𑀸𑀴𑀺𑀬𑀁 𑀲𑀼𑀢𑁆𑀢𑀦𑀸𑀫𑁂𑀦 𑀅𑀯𑀢𑁆𑀯𑀸 ‘‘𑀅𑀚𑀺𑀢𑀫𑀸𑀡𑀯𑀓𑀧𑀼𑀘𑁆𑀙𑀸 𑀢𑀺𑀲𑁆𑀲𑀫𑁂𑀢𑁆𑀢𑀬𑁆𑀬𑀫𑀸𑀡𑀯𑀓𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁦𑁩𑁮-𑁧𑁦𑁪𑁮) 𑀆𑀕𑀢𑀢𑁆𑀢𑀸 𑀘𑀼𑀡𑁆𑀡𑀺𑀬𑀕𑀦𑁆𑀣𑁂𑀳𑀺 𑀅𑀫𑀺𑀲𑁆𑀲𑀢𑁆𑀢𑀸 𑀘 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀦𑀸𑀫𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀇𑀤𑀸𑀦𑀺 𑀉𑀤𑀸𑀦𑀁 𑀲𑀭𑀽𑀧𑀢𑁄 𑀯𑀯𑀢𑁆𑀣𑀧𑁂𑀦𑁆𑀢𑁄 𑀆𑀳 ‘‘𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺𑀆𑀤𑀺. 𑀓𑁂𑀦𑀝𑁆𑀞𑁂𑀦 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀧𑀦𑁂𑀢𑀁 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺? 𑀉𑀤𑀸𑀦𑀦𑀝𑁆𑀞𑁂𑀦. 𑀓𑀺𑀫𑀺𑀤𑀁 𑀉𑀤𑀸𑀦𑀁 𑀦𑀸𑀫? 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀉𑀤𑀸𑀳𑀸𑀭𑁄. 𑀬𑀣𑀸 𑀳𑀺 𑀬𑀁 𑀢𑁂𑀮𑀸𑀤𑀺 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀅𑀯𑀲𑁂𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀫𑀳𑁄𑀖𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀬𑀁 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀁 𑀳𑀤𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀯𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑀯𑀺𑀲𑁂𑀲𑁄 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦𑀧𑀺 𑀅𑀬𑀫𑀸𑀓𑀸𑀭𑁄 𑀮𑀩𑁆𑀪𑀢𑁂𑀯. 𑀢𑀬𑀺𑀤𑀁 𑀓𑀢𑁆𑀣𑀘𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀓𑀢𑁆𑀣𑀘𑀺 𑀯𑀸𑀓𑁆𑀬𑀯𑀲𑁂𑀦 𑀧𑀯𑀢𑁆𑀢𑀁. 𑀢𑀣𑀸 𑀳𑀺 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂𑀥 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 ¶ ‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻 𑀦 𑀆𑀧𑁄’’’𑀢𑀺 (𑀉𑀤𑀸. 𑁭𑁧-𑁭𑁨) 𑁋

𑀆𑀤𑀻𑀲𑀼 𑀲𑁄𑀫𑀦𑀲𑁆𑀲𑀜𑀸𑀡𑀲𑀫𑀼𑀝𑁆𑀞𑀺𑀢𑀯𑀸𑀓𑁆𑀬𑀯𑀲𑁂𑀦 𑀧𑀯𑀢𑁆𑀢𑀁.

𑀦𑀦𑀼 𑀘 𑀉𑀤𑀸𑀦𑀁 𑀦𑀸𑀫 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀧𑀺𑀢𑁄 𑀥𑀫𑁆𑀫𑀲𑀁𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑁄 𑀢𑀣𑀸 𑀘𑁂𑀯 𑀲𑀩𑁆𑀩𑀢𑁆𑀣 𑀆𑀕𑀢𑀁, 𑀇𑀥 𑀓𑀲𑁆𑀫𑀸 𑀪𑀕𑀯𑀸 𑀉𑀤𑀸𑀦𑁂𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺? 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀸𑀧𑀦𑀢𑁆𑀣𑀁. 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀳𑀺 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 ‘‘𑀇𑀥 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀲𑀩𑁆𑀩𑁄 𑀲𑀪𑀸𑀯𑀥𑀫𑁆𑀫𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑁄𑀯 𑀉𑀧𑀮𑀩𑁆𑀪𑀢𑀺, 𑀦 𑀧𑀘𑁆𑀘𑀬𑀦𑀺𑀭𑀧𑁂𑀓𑁆𑀔𑁄, 𑀅𑀬𑀁 𑀧𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀓𑀣𑀫𑀧𑁆𑀧𑀘𑁆𑀘𑀬𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑁂𑀲𑀁 ¶ 𑀜𑀸𑀧𑁂𑀢𑀼𑀓𑀸𑀫𑁄 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦’’𑀦𑁆𑀢𑀺 (𑀉𑀤𑀸. 𑁭𑁧)-𑀆𑀤𑀺𑀫𑀸𑀳. 𑀦 𑀏𑀓𑀦𑁆𑀢𑀢𑁄 𑀢𑁂 𑀧𑀝𑀺𑀕𑁆𑀕𑀸𑀳𑀓𑁂 𑀓𑀢𑁆𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄’’𑀢𑀺. (𑀉𑀤𑀸. 𑁪𑁪) 𑁋

𑀏𑀯𑀫𑀸𑀤𑀺𑀓𑀁 𑀧𑀦 𑀥𑀫𑁆𑀫𑀲𑀁𑀯𑁂𑀕𑀯𑀲𑀧𑁆𑀧𑀯𑀢𑁆𑀢𑀁 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔’’𑀦𑁆𑀢𑀺. (𑀥. 𑀧. 𑁧𑁩𑁧; 𑀉𑀤𑀸. 𑁧𑁩) 𑁋

𑀇𑀤𑀫𑁆𑀧𑀺 𑀥𑀫𑁆𑀫𑀲𑀁𑀯𑁂𑀕𑀯𑀲𑀧𑁆𑀧𑀯𑀢𑁆𑀢𑀁 𑀉𑀤𑀸𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀩𑀳𑀼𑀮𑀸 𑀕𑁄𑀧𑀸𑀮𑀓𑀸 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀅𑀳𑀺𑀁 𑀤𑀡𑁆𑀟𑁂𑀳𑀺 𑀳𑀦𑀦𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑁂 𑀤𑀸𑀭𑀓𑁂 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀓𑀼𑀫𑀸𑀭𑀓𑀸 𑀇𑀫𑀁 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀟𑀁𑀲𑀦𑀪𑀬𑁂𑀦 𑀪𑀦𑁆𑀢𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀇𑀫𑁂 ‘𑀅𑀢𑁆𑀢𑀦𑁄 𑀲𑀼𑀔𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀇𑀫𑀁 𑀧𑀳𑀭𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀺, 𑀅𑀳𑁄 𑀅𑀯𑀺𑀚𑁆𑀚𑀸𑀬 𑀦𑀺𑀓𑀢𑀺𑀓𑁄𑀲𑀮𑁆𑀮’’𑀦𑁆𑀢𑀺 𑀥𑀫𑁆𑀫𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀦𑁂𑀯 𑀘 𑀥𑀫𑁆𑀫𑀲𑀁𑀯𑁂𑀕𑁂𑀦 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀏𑀯𑀫𑁂𑀢𑀁 𑀓𑀢𑁆𑀣𑀘𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀓𑀢𑁆𑀣𑀘𑀺 𑀯𑀸𑀓𑁆𑀬𑀯𑀲𑁂𑀦 𑀓𑀢𑁆𑀣𑀘𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀓𑀢𑁆𑀣𑀘𑀺 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦 ¶ 𑀧𑀯𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀻’’𑀢𑀺 𑀬𑀁 𑀉𑀤𑀸𑀦𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀉𑀤𑀸𑀦𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀪𑀸𑀲𑀺𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀧𑀺𑀢𑀜𑁆𑀘.

𑀢𑀬𑀺𑀤𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀸𑀲𑀺𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀲𑀺𑀢𑀁 𑀲𑀸𑀯𑀓𑀪𑀸𑀲𑀺𑀢𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀲𑀺𑀢𑀁 𑁋

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲’’𑀦𑁆𑀢𑀺. 𑁋

𑀆𑀤𑀺𑀦𑀸 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 (𑀲𑀼. 𑀦𑀺. 𑁩𑁫) 𑀆𑀕𑀢𑀫𑁂𑀯. 𑀲𑀸𑀯𑀓𑀪𑀸𑀲𑀺𑀢𑀸𑀦𑀺𑀧𑀺 𑁋

‘‘𑀲𑀩𑁆𑀩𑁄 𑀭𑀸𑀕𑁄 ¶ 𑀧𑀳𑀻𑀦𑁄 𑀫𑁂, 𑀲𑀩𑁆𑀩𑁄 𑀤𑁄𑀲𑁄 𑀲𑀫𑀽𑀳𑀢𑁄;

𑀲𑀩𑁆𑀩𑁄 𑀫𑁂 𑀯𑀺𑀳𑀢𑁄 𑀫𑁄𑀳𑁄, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺. 𑁋

𑀆𑀤𑀺𑀦𑀸 𑀣𑁂𑀭𑀕𑀸𑀣𑀸𑀲𑀼 (𑀣𑁂𑀭𑀕𑀸. 𑁭𑁯),

‘‘𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀁, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀪𑀼𑀬𑁆𑀳, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋

𑀣𑁂𑀭𑀺𑀕𑀸𑀣𑀸𑀲𑀼 (𑀣𑁂𑀭𑀻𑀕𑀸. 𑁧𑁫) 𑀘 𑀆𑀕𑀢𑀸𑀦𑀺. 𑀅𑀜𑁆𑀜𑀸𑀦𑀺𑀧𑀺 𑀲𑀓𑁆𑀓𑀸𑀤𑀻𑀳𑀺 𑀤𑁂𑀯𑁂𑀳𑀺 𑀪𑀸𑀲𑀺𑀢𑀸𑀦𑀺 ‘‘𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁 𑀓𑀲𑁆𑀲𑀧𑁂 𑀲𑀼𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀻𑀦𑀺 (𑀉𑀤𑀸. 𑁨𑁭), 𑀲𑁄𑀡𑀤𑀡𑁆𑀟𑀩𑁆𑀭𑀸𑀳𑁆𑀫𑀡𑀸𑀤𑀻𑀳𑀺 𑀫𑀦𑀼𑀲𑁆𑀲𑁂𑀳𑀺 𑀘 𑀪𑀸𑀲𑀺𑀢𑀸𑀦𑀺 ‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄’’𑀢𑀺𑀆𑀤𑀻𑀦𑀺 (𑀤𑀻. 𑀦𑀺. 𑁨.𑁩𑁭𑁧; 𑀫. 𑀦𑀺. 𑁧.𑁨𑁯𑁦) 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀦𑀺 𑀉𑀤𑀸𑀦𑀸𑀦𑀺 𑀲𑀦𑁆𑀢𑀺 𑀏𑀯, 𑀦 𑀢𑀸𑀦𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀬𑀸𑀦𑀺 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀫𑀁 𑀆𑀳𑀘𑁆𑀘𑀪𑀸𑀲𑀺𑀢𑀸𑀦𑀺 𑀚𑀺𑀦𑀯𑀘𑀦𑀪𑀽𑀢𑀸𑀦𑀺, 𑀢𑀸𑀦𑁂𑀯 𑀘 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 ‘‘𑀉𑀤𑀸𑀦’’𑀦𑁆𑀢𑀺 𑀲𑀗𑁆𑀕𑀻𑀢𑀁. 𑀏𑀢𑀸𑀦𑀺𑀬𑁂𑀯 𑀘 𑀲𑀦𑁆𑀥𑀸𑀬 𑀪𑀕𑀯𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀦𑀯𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀉𑀤𑁆𑀤𑀺𑀲𑀦𑁆𑀢𑁂𑀦 𑀉𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀸 𑀧𑀦 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺𑀆𑀤𑀺𑀕𑀸𑀣𑀸 𑀪𑀕𑀯𑀢𑀸 𑀩𑁄𑀥𑀺𑀬𑀸 𑀫𑀽𑀮𑁂 𑀉𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀤𑀸𑀦𑀪𑀽𑀢𑀸 𑀘, 𑀢𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀪𑀕𑀯𑀢𑀸 𑀤𑁂𑀲𑀺𑀢𑀢𑁆𑀢𑀸 ¶ 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀉𑀤𑀸𑀦𑀧𑀸𑀴𑀺𑀬𑀁 𑀲𑀗𑁆𑀕𑀳𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀥𑀫𑁆𑀫𑀧𑀤𑁂 𑀲𑀗𑁆𑀕𑀳𑀺𑀢𑀸. 𑀬𑀜𑁆𑀘 ‘‘𑀅𑀜𑁆𑀜𑀸𑀲𑀺 𑀯𑀢 𑀪𑁄 𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀉𑀤𑀸𑀦𑀯𑀘𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀯𑁂𑀤𑀦𑀲𑀫𑀢𑁆𑀣𑀦𑀺𑀕𑁆𑀖𑁄𑀲𑀯𑀺𑀧𑁆𑀨𑀸𑀭𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀤𑀧𑀺 𑀧𑀞𑀫𑀩𑁄𑀥𑀺𑀬𑀁 𑀲𑀩𑁆𑀩𑁂𑀲𑀁 𑀏𑀯 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 ‘‘𑀆𑀭𑀸𑀥𑀬𑀺𑀁𑀲𑀼 𑀯𑀢 𑀫𑀁 𑀪𑀺𑀓𑁆𑀔𑀽 𑀏𑀓𑀁 𑀲𑀫𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁 (𑀫. 𑀦𑀺. 𑁧.𑁨𑁨𑁫) 𑀯𑀺𑀬 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑁂𑀓𑀤𑁂𑀲𑀲𑁆𑀲 𑀬𑀣𑀸𑀤𑁂𑀲𑀺𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀸𑀯𑀓𑁂𑀲𑀼 𑀲𑀩𑁆𑀩𑀧𑀞𑀫𑀁 𑀣𑁂𑀭𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀲𑁆𑀲 𑀲𑀨𑀮𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀺𑀢𑀁 𑀉𑀤𑀸𑀳𑀸𑀭𑀫𑀢𑁆𑀢𑀸𑀁, 𑀦 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁 (𑀫𑀳𑀸𑀯. 𑁧-𑁩; 𑀉𑀤𑀸. 𑁧-𑁩) 𑀯𑀺𑀬 𑀧𑀯𑀢𑁆𑀢𑀺𑀬𑀸 𑀦𑀺𑀯𑀢𑁆𑀢𑀺𑀬𑀸 𑀯𑀸 𑀧𑀓𑀸𑀲𑀦𑀦𑁆𑀢𑀺 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀉𑀤𑀸𑀦𑀧𑀸𑀴𑀺𑀬𑀁 𑀲𑀗𑁆𑀕𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀤𑀸𑀦𑀧𑀸𑀴𑀺𑀬𑀜𑁆𑀘 𑀩𑁄𑀥𑀺𑀯𑀕𑁆𑀕𑀸𑀤𑀻𑀲𑀼 𑀅𑀝𑁆𑀞𑀲𑀼 𑀯𑀕𑁆𑀕𑁂𑀲𑀼 𑀤𑀲 𑀤𑀲 𑀓𑀢𑁆𑀯𑀸 𑀅𑀲𑀻𑀢𑀺𑀬𑁂𑀯 𑀲𑀼𑀢𑁆𑀢𑀦𑁆𑀢𑀸 𑀲𑀗𑁆𑀕𑀻𑀢𑀸 ¶ , 𑀢𑀢𑁄𑀬𑁂𑀯 𑀘 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀲𑀻𑀢𑀺 𑀏𑀯 𑀲𑀼𑀢𑁆𑀢𑀦𑁆𑀢𑀸, 𑀯𑀕𑁆𑀕𑀸 𑀅𑀝𑁆𑀞 𑀲𑀫𑀸𑀲𑀢𑁄;

𑀕𑀸𑀣𑀸 𑀘 𑀧𑀜𑁆𑀘𑀦𑀯𑀼𑀢𑀺, 𑀉𑀤𑀸𑀦𑀲𑁆𑀲 𑀧𑀓𑀸𑀲𑀺𑀢𑀸.

‘‘𑀅𑀟𑁆𑀠𑀽𑀦𑀦𑀯𑀫𑀢𑁆𑀢𑀸 𑀘, 𑀪𑀸𑀡𑀯𑀸𑀭𑀸 𑀧𑀫𑀸𑀡𑀢𑁄;

𑀏𑀓𑀸𑀥𑀺𑀓𑀸 𑀢𑀣𑀸𑀲𑀻𑀢𑀺, 𑀉𑀤𑀸𑀦𑀲𑁆𑀲𑀸𑀦𑀼𑀲𑀦𑁆𑀥𑀬𑁄.

‘‘𑀏𑀓𑀯𑀻𑀲𑀲𑀳𑀲𑁆𑀲𑀸𑀦𑀺, 𑀲𑀢𑀫𑁂𑀯 𑀯𑀺𑀘𑀓𑁆𑀔𑀡𑁄;

𑀧𑀤𑀸𑀦𑁂𑀢𑀸𑀦𑀼𑀤𑀸𑀦𑀲𑁆𑀲, 𑀕𑀡𑀺𑀢𑀸𑀦𑀺 𑀯𑀺𑀦𑀺𑀤𑁆𑀤𑀺𑀲𑁂. 𑁋

𑀕𑀸𑀣𑀸𑀧𑀸𑀤𑀢𑁄 𑀧𑀦 𑁋

‘‘𑀅𑀝𑁆𑀞𑀲𑀳𑀲𑁆𑀲𑀫𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑁂𑀯 𑀲𑀢𑀸𑀦𑀺 𑀘;

𑀧𑀤𑀸𑀦𑁂𑀢𑀸𑀦𑀼𑀤𑀸𑀦𑀲𑁆𑀲, 𑀢𑁂𑀯𑀻𑀲𑀢𑀺 𑀘 𑀦𑀺𑀤𑁆𑀤𑀺𑀲𑁂.

‘‘𑀅𑀓𑁆𑀔𑀭𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀲𑀝𑁆𑀞𑀺 𑀲𑀢𑁆𑀢 𑀲𑀢𑀸𑀦𑀺 𑀘;

𑀢𑀻𑀡𑀺 𑀤𑁆𑀯𑀸𑀲𑀻𑀢𑀺 𑀘 𑀢𑀣𑀸, 𑀉𑀤𑀸𑀦𑀲𑁆𑀲 𑀧𑀯𑁂𑀤𑀺𑀢𑀸’’𑀢𑀺.

𑀇𑀥 𑀧𑀦 ‘‘𑀤𑁆𑀯𑀸𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀲𑀫𑁂𑀢𑀺, 𑀢𑀲𑁆𑀫𑀸 ‘‘𑀅𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 ¶ 𑀪𑀕𑀯𑀢𑀸 𑁋 ‘‘𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁. 𑀏𑀓𑀥𑀫𑁆𑀫𑀁, 𑀪𑀺𑀓𑁆𑀔𑀯𑁂, 𑀧𑀚𑀳𑀣, 𑀅𑀳𑀁 𑀯𑁄 𑀧𑀸𑀝𑀺𑀪𑁄𑀕𑁄 𑀅𑀦𑀸𑀕𑀸𑀫𑀺𑀢𑀸𑀬. 𑀓𑀢𑀫𑀁 𑀏𑀓𑀥𑀫𑁆𑀫𑀁? 𑀮𑁄𑀪𑀁, 𑀪𑀺𑀓𑁆𑀔𑀯𑁂, 𑀏𑀓𑀥𑀫𑁆𑀫𑀁 𑀧𑀚𑀳𑀣, 𑀅𑀳𑀁 𑀯𑁄 𑀧𑀸𑀝𑀺𑀪𑁄𑀕𑁄 𑀅𑀦𑀸𑀕𑀸𑀫𑀺𑀢𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀏𑀓𑀓𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀯𑀲𑁂𑀦 𑀇𑀢𑀺𑀯𑀼𑀢𑁆𑀢𑀓𑀧𑀸𑀴𑀺𑀬𑀁 (𑀇𑀢𑀺𑀯𑀼. 𑁧) 𑀲𑀗𑁆𑀕𑀳𑀫𑀸𑀭𑁄𑀧𑀺𑀢𑀸𑀦𑀺 𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸𑀦𑀺 𑀇𑀢𑀺𑀯𑀼𑀢𑁆𑀢𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀏𑀓𑀓𑀦𑀺𑀧𑀸𑀢𑁂 𑀢𑀸𑀯 𑀲𑀢𑁆𑀢𑀯𑀻𑀲𑀢𑀺 𑀲𑀼𑀢𑁆𑀢𑀸𑀦𑀺, 𑀤𑀼𑀓𑀦𑀺𑀧𑀸𑀢𑁂 𑀤𑁆𑀯𑀸𑀯𑀻𑀲𑀢𑀺, 𑀢𑀺𑀓𑀦𑀺𑀧𑀸𑀢𑁂 ¶ 𑀧𑀜𑁆𑀜𑀸𑀲, 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀢𑁂𑀭𑀲𑀸𑀢𑀺 𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸𑀦𑁂𑀯 𑀇𑀢𑀺𑀯𑀼𑀢𑁆𑀢𑀓𑀧𑀸𑀴𑀺𑀬𑀁 𑀆𑀕𑀢𑀸𑀦𑀺. 𑀢𑀢𑁄𑀬𑁂𑀯 𑀘 𑀧𑀸𑀴𑀺𑀬𑀁 𑁋

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀓𑁄𑀥𑁄 𑀫𑀓𑁆𑀔𑁂𑀦 𑀧𑀜𑁆𑀘𑀫𑀁;

𑀫𑀸𑀦𑁄 𑀲𑀩𑁆𑀩𑀁 𑀧𑀼𑀦 𑀫𑀸𑀦𑁄,

𑀮𑁄𑀪𑁄 𑀤𑁄𑀲𑁂𑀦 𑀢𑁂𑀭𑀲.

‘‘𑀫𑁄𑀳𑁄 𑀓𑁄𑀥𑁄 𑀧𑀼𑀦 𑀫𑀓𑁆𑀔𑁄,

𑀦𑀻𑀯𑀭𑀡𑀸 𑀢𑀡𑁆𑀳𑀸𑀬 𑀧𑀜𑁆𑀘𑀫𑀁;

𑀤𑁆𑀯𑁂 𑀲𑁂𑀓𑁆𑀔𑀪𑁂𑀤𑀸 𑀲𑀸𑀫𑀕𑁆𑀕𑀻,

𑀧𑀤𑀼𑀝𑁆𑀞𑀦𑀺𑀭𑀬𑁂𑀦 𑀢𑁂𑀭𑀲.

‘‘𑀧𑀲𑀦𑁆𑀦𑀸 𑀏𑀓𑀫𑀸𑀪𑀸𑀬𑀺, 𑀧𑀼𑀕𑁆𑀕𑀮𑀁 𑀅𑀢𑀻𑀢𑁂𑀦 𑀧𑀜𑁆𑀘𑀫𑀁;

𑀏𑀯𑀜𑁆𑀘𑁂 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀢𑁆𑀢𑀯𑀻𑀲 𑀧𑀓𑀸𑀲𑀺𑀢𑀸’’𑀢𑀺. 𑁋

𑀏𑀯𑀫𑀸𑀤𑀺𑀦𑀸 𑀉𑀤𑁆𑀤𑀸𑀦𑀕𑀸𑀣𑀸𑀳𑀺 𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀸𑀦𑀺 𑀕𑀡𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀢𑁂𑀦𑁂𑀯 𑀘 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀇𑀢𑀺𑀯𑀼. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑁋

‘‘𑀲𑀼𑀢𑁆𑀢𑀢𑁄 𑀏𑀓𑀓𑀦𑀺𑀧𑀸𑀢𑁂 𑀢𑀸𑀯 𑀲𑀢𑁆𑀢𑀯𑀻𑀲𑀢𑀺 𑀲𑀼𑀢𑁆𑀢𑀸𑀦𑀺, 𑀤𑀼𑀓𑀦𑀺𑀧𑀸𑀢𑁂 𑀤𑁆𑀯𑀸𑀯𑀻𑀲𑀢𑀺, 𑀢𑀺𑀓𑀦𑀺𑀧𑀸𑀢𑁂 𑀧𑀜𑁆𑀜𑀸𑀲, 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀢𑁂𑀭𑀲𑀸𑀢𑀺 𑀤𑁆𑀯𑀸𑀤𑀲𑀸𑀥𑀺𑀓𑀲𑀢𑀲𑀼𑀢𑁆𑀢𑀲𑀗𑁆𑀕𑀳’’𑀦𑁆𑀢𑀺 𑁋

𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀤𑁆𑀯𑀸𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀬 ‘‘𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺𑀧𑀺 𑀲𑀓𑁆𑀓𑀸 ¶ 𑀯𑀢𑁆𑀢𑀼𑀁, 𑀢𑀣𑀸𑀧𑀺 𑀈𑀤𑀺𑀲𑁂 𑀞𑀸𑀦𑁂 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀬𑀸𑀣𑀸𑀯𑀢𑁄𑀯 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 ‘‘𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’ 𑀇𑀘𑁆𑀘𑁂𑀯 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀚𑀸𑀢𑀁 𑀪𑀽𑀢𑀁 𑀧𑀼𑀭𑀸𑀯𑀼𑀢𑁆𑀣𑀁 𑀪𑀕𑀯𑀢𑁄 𑀧𑀼𑀩𑁆𑀩𑀘𑀭𑀺𑀢𑀁 𑀓𑀸𑀬𑀢𑀺 𑀓𑀣𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀚𑀸𑀢𑀓𑀁.

‘‘𑀘𑀢𑁆𑀢𑀸𑀭𑁄𑀫𑁂 ¶ , 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀣 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺, 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀪𑀯𑀢𑀺. 𑀲𑀘𑁂 𑀪𑀺𑀓𑁆𑀔𑀼𑀦𑀻𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀓𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀺𑀓𑀸 𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀣 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺, 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀪𑀯𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺 (𑀅. 𑀦𑀺. 𑁪.𑁧𑁨𑁯) 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺.

𑀘𑀽𑀴𑀯𑁂𑀤𑀮𑁆𑀮𑀸𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) 𑀯𑀺𑀲𑀸𑀔𑁂𑀦 𑀦𑀸𑀫 𑀉𑀧𑀸𑀲𑀓𑁂𑀦 𑀧𑀼𑀝𑁆𑀞𑀸𑀬 𑀥𑀫𑁆𑀫𑀤𑀺𑀦𑁆𑀦𑀸𑀬 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀘𑀽𑀴𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀯𑁂𑀤𑀮𑁆𑀮𑀁 (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀧𑀦 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑁂𑀦 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀫𑁆𑀧𑀺 (𑀫. 𑀦𑀺. 𑁧.𑁮𑁯 𑀆𑀤𑀬𑁄) 𑀪𑀺𑀓𑁆𑀔𑀽𑀳𑀺 𑀧𑀼𑀝𑁆𑀞𑁂𑀦 𑀢𑁂𑀦𑁂𑀯𑀸𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀏𑀢𑀸𑀦𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀲𑀓𑁆𑀓𑀧𑀜𑁆𑀳𑀁 (𑀤𑀻. 𑀦𑀺. 𑁨.𑁩𑁪𑁪 𑀆𑀤𑀬𑁄) 𑀧𑀦 𑀲𑀓𑁆𑀓𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 𑀅𑀪𑀸𑀲𑀺, 𑀢𑀜𑁆𑀘 𑀤𑀻𑀖𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀫𑁆𑀧𑀺 (𑀫. 𑀦𑀺. 𑁩.𑁮𑁫 𑀆𑀤𑀬𑁄) 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀧𑀦 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀤𑀦𑁆𑀢𑀺 𑀜𑀸𑀡𑀁. 𑀢𑀼𑀝𑁆𑀞𑀺𑀦𑁆𑀢𑀺 𑀬𑀣𑀸𑀪𑀸𑀲𑀺𑀢𑀥𑀫𑁆𑀫𑀤𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 ‘‘𑀲𑀸𑀥𑀼 𑀅𑀬𑁆𑀬𑁂, 𑀲𑀸𑀥𑀸𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀅𑀩𑁆𑀪𑀦𑀼𑀫𑁄𑀤𑀦𑀯𑀲𑀧𑁆𑀧𑀯𑀢𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀮𑀤𑁆𑀥𑀸 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸 𑀮𑀪𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 ¶ 𑀅𑀗𑁆𑀕𑀯𑀲𑁂𑀦 𑀲𑀓𑀮𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 𑀆𑀳 ‘‘𑀓𑀣𑀁 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦𑀸𑀢𑀺 𑀥𑀫𑁆𑀫𑀭𑀸𑀲𑀺𑀯𑀲𑁂𑀦. 𑀤𑁆𑀯𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄 𑀕𑀡𑁆𑀳𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀉𑀕𑁆𑀕𑀡𑁆𑀳𑀺𑀁, 𑀤𑁆𑀯𑁂𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀥𑀺𑀕𑀡𑁆𑀳𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄𑀢𑀺 𑀤𑁆𑀯𑁂 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄 𑀉𑀕𑁆𑀕𑀡𑁆𑀳𑀺𑀁, 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀸 𑀅𑀥𑀺𑀕𑀡𑁆𑀳𑀺𑀁. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀳𑀺 𑀪𑀸𑀲𑀺𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀦𑁆𑀢𑀸𑀤𑀻𑀦𑀁 𑀯𑀲𑁂𑀦 𑀳𑀺 ‘‘𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀻𑀢𑀺 ¶ 𑀢𑀤𑀼𑀪𑀬𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀘𑀢𑀼𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺. 𑀬𑁂 𑀫𑁂 𑀥𑀫𑁆𑀫𑀸 𑀧𑀯𑀢𑁆𑀢𑀺𑀦𑁄𑀢𑀺 𑀬𑁂 𑀥𑀫𑁆𑀫𑀸 𑀫𑀫 𑀧𑀯𑀢𑁆𑀢𑀺𑀦𑁄 𑀧𑀯𑀢𑁆𑀢𑀫𑀸𑀦𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀚𑀺𑀯𑁆𑀳𑀕𑁆𑀕𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀢𑁂 𑀥𑀫𑁆𑀫𑀸 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀬𑁂 𑀇𑀫𑁂’’𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 ‘‘𑀬𑁂 𑀇𑀫𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀽𑀦𑀜𑁆𑀘 𑀧𑀯𑀢𑁆𑀢𑀺𑀦𑁄, 𑀢𑁂𑀳𑀺 𑀧𑀯𑀢𑁆𑀢𑀺𑀢𑀸, 𑀢𑁂𑀲𑁆𑀯𑀸𑀳𑀁 𑀤𑁆𑀯𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄𑀢𑀺 𑀏𑀯𑀁 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺.

𑀏𑀢𑁆𑀣 𑀘 𑀲𑀼𑀪𑀲𑀼𑀢𑁆𑀢𑀁 (𑀤𑀻. 𑀦𑀺. 𑁧.𑁪𑁪𑁪 𑀆𑀤𑀬𑁄) 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀜𑁆𑀘 (𑀫. 𑀦𑀺. 𑁩.𑁭𑁯 𑀆𑀤𑀬𑁄) 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀅𑀦𑁆𑀢𑁄𑀕𑀥𑀁 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀢𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸𑀕𑀡𑁆𑀞𑀺𑀧𑀤𑁂 𑀢𑀸𑀯 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑀬𑀁 𑀯𑀼𑀢𑁆𑀢𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀪𑀺𑀓𑁆𑀔𑀼𑀢𑁄 𑀕𑀳𑀺𑀢𑁂𑀬𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀏𑀯𑀫𑀸𑀳𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑀸 𑀧𑀦 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀪𑀸𑀲𑀺𑀢𑀢𑁆𑀢𑀸 𑀲𑀬𑀁 𑀯𑀼𑀢𑁆𑀢𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀫𑁆𑀧𑀺 ‘‘𑀩𑀼𑀤𑁆𑀥𑀢𑁄 𑀕𑀡𑁆𑀳𑀺’’𑀦𑁆𑀢𑀺 𑀏𑀢𑁆𑀣 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀯𑀢𑁆𑀢𑀼𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀪𑀕𑀯𑀢𑀸𑀬𑁂𑀯 𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑀸𑀯𑀓𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀢𑀢𑀺𑀬𑀲𑀗𑁆𑀕𑀻𑀢𑀺𑀬𑀜𑁆𑀘 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀫𑁆𑀧𑀺 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁, 𑀢𑀢𑁄𑀬𑁂𑀯 𑀘 𑀅𑀢𑁆𑀢𑀦𑀸 𑀪𑀸𑀲𑀺𑀢𑀫𑁆𑀧𑀺 𑀲𑀼𑀪𑀲𑀼𑀢𑁆𑀢𑀸𑀤𑀺 𑀲𑀗𑁆𑀕𑀻𑀢𑀺𑀁 𑀆𑀭𑁄𑀧𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦𑀸𑀢𑀺 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 ‘‘𑀢𑁆𑀯𑀁 𑀩𑀳𑀼𑀲𑁆𑀲𑀼𑀢𑁄𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑁄, 𑀓𑀺𑀢𑁆𑀢𑀓𑀸 𑀥𑀫𑁆𑀫𑀸 𑀢𑁂 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀸, 𑀢𑀬𑀸 𑀥𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁂 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 ¶ 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀏𑀯𑀁 ‘‘𑀤𑁆𑀯𑀸𑀲𑀻𑀢𑀺 𑀩𑀼𑀤𑁆𑀥𑀢𑁄 𑀕𑀡𑁆𑀳𑀺’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦. 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀺. 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀜𑁆𑀳𑀺 ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁩) 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀆𑀭𑀪𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀏𑀓𑀸𑀦𑀼𑀲𑀦𑁆𑀥𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀦𑁆𑀢𑀺 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀸𑀤𑀺. 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀜𑁆𑀳𑀺 𑀦𑀸𑀦𑀸𑀞𑀸𑀦𑁂𑀲𑀼 𑀦𑀸𑀦𑀸𑀥𑀫𑁆𑀫𑀤𑁂𑀲𑀦𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑀸𑀣𑀸𑀩𑀦𑁆𑀥𑁂𑀲𑀼 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑁋

‘‘𑀓𑀢𑀺 𑀙𑀺𑀦𑁆𑀤𑁂 𑀓𑀢𑀺 𑀚𑀳𑁂, 𑀓𑀢𑀺 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀓𑀢𑀺 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, ‘𑀑𑀖𑀢𑀺𑀡𑁆𑀡𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁫) 𑁋

𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 ¶ 𑀧𑀜𑁆𑀳𑀧𑀼𑀘𑁆𑀙𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄.

‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, ‘𑀑𑀖𑀢𑀺𑀡𑁆𑀡𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁫) 𑁋

𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀯𑀺𑀲𑀚𑁆𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀓𑀤𑀼𑀓𑀪𑀸𑀚𑀦𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀢𑀺𑀓𑁂𑀲𑀼 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀯𑀺𑀪𑀚𑀦𑀯𑀲𑁂𑀦 𑀬𑀁 𑀯𑀼𑀢𑁆𑀢𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 (𑀥. 𑀲. 𑁯𑁮𑁫-𑁯𑁮𑁭) 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀫𑀦𑁄𑀓𑀫𑁆𑀫𑀁. 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

‘‘𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸 𑀅𑀭𑀽𑀧𑀸𑀯𑀘𑀭𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 ¶ …𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼. 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑁋

𑀅𑀬𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀏𑀯𑀁 𑀲𑁂𑀲𑀢𑁆𑀢𑀺𑀓𑀸𑀦𑀫𑁆𑀧𑀺 𑀏𑀓𑁂𑀓𑀲𑁆𑀲 𑀢𑀺𑀓𑀲𑁆𑀲 𑀯𑀺𑀪𑀚𑀦𑀁 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 ‘‘𑀳𑁂𑀢𑀽 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀺𑀓𑁂𑀲𑀼 𑀤𑀼𑀓𑁂𑀲𑀼 𑀏𑀓𑁂𑀓𑀲𑁆𑀲 𑀤𑀼𑀓𑀲𑁆𑀲 𑀯𑀺𑀪𑀚𑀦𑀯𑀲𑁂𑀦 𑀬𑀁 𑀯𑀼𑀢𑁆𑀢𑀁 𑁋

‘‘𑀓𑀢𑀫𑁂 ¶ 𑀥𑀫𑁆𑀫𑀸 𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀸 𑀳𑁂𑀢𑀽’’𑀢𑀺 (𑀥. 𑀲. 𑁧𑁦𑁫𑁯) 𑁋

𑀆𑀤𑀺, 𑀢𑀢𑁆𑀣𑀸𑀧𑀺 𑀏𑀓𑁂𑀓𑀲𑁆𑀲 𑀤𑀼𑀓𑀲𑁆𑀲 𑀯𑀺𑀪𑀚𑀦𑀁 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀧𑀼𑀦 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 (𑀥. 𑀲. 𑁧𑁩𑁮𑁪-𑁧𑁩𑁮𑁬) 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘. 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑁋

𑀏𑀯𑀫𑀸𑀤𑀺𑀦𑀸 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀢𑀺𑀓𑀪𑀸𑀚𑀦𑁂𑀲𑀼 𑀏𑀓𑁂𑀓𑀲𑁆𑀲 𑀢𑀺𑀓𑀲𑁆𑀲 𑀪𑀸𑀚𑀦𑀁 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀢𑀣𑀸 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀸 𑀳𑁂𑀢𑀽’’𑀢𑀺 (𑀥. 𑀲. 𑁧𑁪𑁪𑁧) 𑁋

𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀲𑀼 𑀤𑀼𑀓𑀪𑀸𑀚𑀦𑁂𑀲𑀼 𑀏𑀓𑀫𑁂𑀓𑀁 𑀤𑀼𑀓𑀪𑀸𑀚𑀦𑀁 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀏𑀯𑀫𑁂𑀢𑁆𑀣 𑀢𑀺𑀓𑀤𑀼𑀓𑀪𑀸𑀚𑀦𑀯𑀲𑁂𑀦 𑀥𑀫𑁆𑀫𑀓𑁆𑀔𑀦𑁆𑀥𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀫𑁂𑀓𑀜𑁆𑀘 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀦𑁆𑀢𑀺 𑀏𑀢𑁆𑀣 𑀧𑀦 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧) 𑁋

𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁂 ¶ 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀏𑀓𑀫𑁂𑀓𑀁 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀁 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀏𑀢𑁆𑀣 ‘‘𑀏𑀓𑁂𑀓𑀢𑀺𑀓𑀤𑀼𑀓𑀪𑀸𑀚𑀦𑀁 𑀏𑀓𑀫𑁂𑀓𑀁 𑀘𑀺𑀢𑁆𑀢𑀯𑀸𑀭𑀪𑀸𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀏𑀓𑁂𑀓𑁄’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀳𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑁄𑀯 𑀳𑁄𑀢𑀻𑀢𑀺 ‘‘𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀯𑀢𑁆𑀣𑀽𑀢𑀺𑀆𑀤𑀻𑀲𑀼 𑀯𑀢𑁆𑀣𑀼 𑀦𑀸𑀫 𑀲𑀼𑀤𑀺𑀦𑁆𑀦𑀓𑀡𑁆𑀟𑀸𑀤𑀺 ¶ . 𑀫𑀸𑀢𑀺𑀓𑀸𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪) 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀚𑁆𑀛𑀸𑀘𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀧𑀤𑀪𑀸𑀚𑀦𑀻𑀬𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 ‘‘𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀧𑀸𑀭𑀸. 𑁪𑁫) 𑀯𑀺𑀪𑀚𑀦𑀁. 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 ‘‘𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁫𑁫) 𑀏𑀯𑀫𑀸𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀢𑁆𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸𑀝𑁆𑀝𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀓𑀘𑁆𑀙𑁂𑀤𑁄𑀢𑀺 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀯𑁂𑀫𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁪𑁬𑁮) 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀢𑀺𑀓𑀤𑀼𑀓𑁆𑀓𑀝𑀸𑀤𑀺𑀪𑁂𑀤𑁄 𑀢𑀺𑀓𑀧𑀭𑀺𑀘𑁆𑀙𑁂𑀤𑁄.

𑀇𑀤𑀸𑀦𑀺 𑀏𑀯𑀫𑁂𑀢𑀁 𑀅𑀪𑁂𑀤𑀢𑁄 𑀭𑀲𑀯𑀲𑁂𑀦 𑀏𑀓𑀯𑀺𑀥𑀦𑁆𑀢𑀺𑀆𑀤𑀺𑀦𑀸 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄…𑀧𑁂… 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀯𑀺𑀦𑀬𑀸𑀤𑀺𑀪𑁂𑀤𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑀫𑀼𑀔𑁂𑀦 𑀯𑀲𑀻𑀕𑀡𑁂𑀦 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀧𑀝𑀺𑀫𑀡𑁆𑀟𑀺𑀢𑀸𑀬 𑀲𑀗𑁆𑀕𑀻𑀢𑀺𑀬𑀸 𑀇𑀫𑀲𑁆𑀲 𑀧𑀺𑀝𑀓𑀲𑁆𑀲 𑀯𑀺𑀦𑀬𑀪𑀸𑀯𑁄 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀸𑀤𑀺𑀪𑀸𑀯𑁄 𑀘 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀇𑀫𑀫𑁂𑀯𑀺𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀗𑁆𑀕𑀻𑀢𑀁, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀓𑁂𑀯𑀮𑀜𑁆𑀘 𑀇𑀫𑀫𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀤𑁆𑀤𑀸𑀦𑀲𑀗𑁆𑀕𑀳𑁄 𑀧𑀞𑀫𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀆𑀕𑀢𑀸𑀦𑀁 𑀯𑀺𑀦𑀻𑀢𑀯𑀢𑁆𑀣𑀼𑀆𑀤𑀻𑀦𑀁 𑀲𑀗𑁆𑀔𑁂𑀧𑀢𑁄 𑀲𑀗𑁆𑀕𑀳𑀤𑀲𑁆𑀲𑀦𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀓𑀣𑀺𑀢𑀸 𑁋

‘‘𑀫𑀓𑁆𑀓𑀝𑀻 𑀯𑀚𑁆𑀚𑀺𑀧𑀼𑀢𑁆𑀢𑀸 𑀘, 𑀕𑀺𑀳𑀻 𑀦𑀕𑁆𑀕𑁄 𑀘 𑀢𑀺𑀢𑁆𑀣𑀺𑀬𑀸;

𑀤𑀸𑀭𑀺𑀓𑀼𑀧𑁆𑀧𑀮𑀯𑀡𑁆𑀡𑀸 𑀘, 𑀩𑁆𑀬𑀜𑁆𑀚𑀦𑁂𑀳𑀺𑀧𑀭𑁂 𑀤𑀼𑀯𑁂’’𑀢𑀺. (𑀧𑀸𑀭𑀸. 𑁬𑁬) 𑁋

𑀆𑀤𑀺𑀓𑀸 ¶ 𑀕𑀸𑀣𑀸𑀬𑁄. 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑁄 𑀯𑀕𑁆𑀕𑀲𑀗𑁆𑀕𑀳𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑁂𑀬𑁆𑀬𑀸𑀮𑀦𑀻𑀮𑀘𑀓𑁆𑀓𑀧𑁂𑀬𑁆𑀬𑀸𑀮𑀸𑀤𑀺𑀯𑀯𑀢𑁆𑀣𑀸𑀧𑀦𑀯𑀲𑁂𑀦 𑀧𑁂𑀬𑁆𑀬𑀸𑀮𑀲𑀗𑁆𑀕𑀳𑁄. 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀸𑀤𑀻𑀲𑀼 𑀏𑀓𑀓𑀦𑀺𑀧𑀸𑀢𑀸𑀤𑀺𑀲𑀗𑁆𑀕𑀳𑁄. 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄. 𑀫𑀚𑁆𑀛𑀺𑀫𑀦𑀺𑀓𑀸𑀬𑀸𑀤𑀻𑀲𑀼 𑀫𑀽𑀮𑀧𑀡𑁆𑀡𑀸𑀲𑀓𑀸𑀤𑀺𑀯𑀲𑁂𑀦 𑀧𑀡𑁆𑀡𑀸𑀲𑀓𑀲𑀗𑁆𑀕𑀳𑁄.

𑀅𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀓𑀫𑁆𑀧𑀻𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀻 𑀲𑀼𑀝𑁆𑀞𑀼 𑀓𑀫𑁆𑀧𑀺. 𑀲𑀫𑁆𑀧𑀓𑀫𑁆𑀧𑀻𑀢𑀺 𑀉𑀤𑁆𑀥𑀁 𑀅𑀥𑁄 𑀘 𑀕𑀘𑁆𑀙𑀦𑁆𑀢𑀻 𑀲𑀫𑁆𑀧𑀓𑀫𑁆𑀧𑀺. 𑀲𑀫𑁆𑀧𑀯𑁂𑀥𑀻𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀻 𑀲𑀼𑀝𑁆𑀞𑀼 𑀧𑀯𑁂𑀥𑀺. 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺, 𑀧𑀼𑀧𑁆𑀨𑀯𑀲𑁆𑀲𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 ¶ . 𑀬𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀧𑀜𑁆𑀘𑀳𑀺 𑀲𑀢𑁂𑀳𑀺 𑀬𑁂𑀦 𑀓𑀢𑀸 𑀲𑀗𑁆𑀕𑀻𑀢𑀸, 𑀢𑁂𑀦 𑀧𑀜𑁆𑀘𑀲𑀢𑀸𑀦𑀺 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 ‘‘𑀧𑀜𑁆𑀘𑀲𑀢𑀸’’𑀢𑀺 𑀘, 𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 ‘‘𑀣𑁂𑀭𑀺𑀓𑀸’’𑀢𑀺 𑀘 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀅𑀬𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀬𑀤𑀢𑁆𑀣𑀁 𑀲𑀸 𑀇𑀥 𑀦𑀺𑀤𑀲𑁆𑀲𑀺𑀢𑀸, 𑀢𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺 𑀯𑀓𑁆𑀔𑀫𑀸𑀦𑀁 𑀲𑀩𑁆𑀩𑀁 𑀦𑀺𑀤𑀸𑀦𑀯𑀘𑀦𑀁 𑀯𑀼𑀢𑁆𑀢𑀁. 𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀣𑀺𑀬𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁 𑀯𑀼𑀢𑁆𑀢𑀁, 𑀦𑀦𑀼 𑀘 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑀏𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺 𑀅𑀲𑀫𑁆𑀫𑁄𑀲𑀥𑀫𑁆𑀫𑀸 𑀲𑀤𑁆𑀥𑁂𑀬𑁆𑀬𑀸 𑀘, 𑀤𑁂𑀲𑀓𑀸𑀮𑀓𑀢𑁆𑀢𑀼𑀳𑁂𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀦𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀯𑀼𑀲𑁄, 𑀉𑀧𑀸𑀮𑀺, 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁.

𑀅𑀧𑀺𑀘 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀓𑀸 𑀧𑀝𑀺𑀧𑀢𑁆𑀢𑀺 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸, 𑀢𑀲𑁆𑀫𑀸 ¶ 𑀧𑀭𑁂𑀲𑀁𑀬𑁂𑀯𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀩𑁆𑀩𑀭𑀘𑀦𑀸. 𑀢𑀬𑀺𑀤𑀁 𑀲𑀢𑁆𑀣𑀼𑀭𑀘𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀳𑀺 𑀬𑀣𑀸𑀭𑀳𑀁 𑀧𑀓𑀸𑀲𑀻𑀬𑀢𑀺.

𑀅𑀧𑀺𑀘 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁, 𑀢𑀜𑁆𑀘𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀁 ‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑁄𑀢𑀺 𑀳𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀼𑀧𑀭𑀺𑀲𑀼𑀤𑁆𑀥𑀜𑀸𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀧𑀭𑀺𑀤𑀻𑀧𑀦𑁂𑀦, 𑀪𑀕𑀯𑀸𑀢𑀺 𑀘 𑀇𑀫𑀺𑀦𑀸 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀫𑀮𑀤𑀼𑀘𑁆𑀘𑀭𑀺𑀢𑀸𑀤𑀺𑀤𑁄𑀲𑀧𑁆𑀧𑀳𑀸𑀦𑀤𑀻𑀧𑀦𑁂𑀦, 𑀢𑀢𑁄 𑀏𑀯 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀅𑀬𑀫𑀢𑁆𑀣𑁄 𑀲𑀩𑁆𑀩𑀣𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑁆𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑀢𑀢𑁆𑀭𑀸𑀬𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀢𑀺 𑀢𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀅𑀬𑀁 𑀆𑀘𑀭𑀺𑀬𑀸𑀦𑀁 𑀧𑀭𑀫𑁆𑀧𑀭𑀸 𑀧𑀯𑁂𑀡𑀻 𑀧𑀝𑀺𑀧𑀸𑀝𑀺. 𑀉𑀧𑀸𑀮𑀺 𑀤𑀸𑀲𑀓𑁄𑀢𑀺𑀆𑀤𑀻𑀲𑀼 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀸𑀓𑀝𑁄𑀬𑁂𑀯, 𑀤𑀸𑀲𑀓𑀢𑁆𑀣𑁂𑀭𑀸𑀤𑀬𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 ¶ . 𑀯𑁂𑀲𑀸𑀮𑀺𑀬𑀁 𑀓𑀺𑀭 𑀏𑀓𑁄 𑀤𑀸𑀲𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀢𑀺𑀡𑁆𑀡𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑀸𑀦𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄𑀬𑁂𑀯 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀯𑀼𑀢𑁄 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀯𑀸𑀮𑀺𑀓𑀸𑀭𑀸𑀫𑁂 𑀦𑀺𑀯𑀲𑀦𑁆𑀢𑀁 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑁂𑀤𑁂𑀲𑀼 𑀲𑀩𑁆𑀩𑀸𑀦𑀺 𑀕𑀡𑁆𑀞𑀺𑀝𑁆𑀞𑀸𑀦𑀸𑀦𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄𑀧𑀺 𑀲𑀩𑁆𑀩𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀲𑀬𑀫𑁆𑀧𑀺 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀦𑀸𑀫𑀁 𑀲𑀦𑁆𑀥𑀸𑀬 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 ‘‘𑀏𑀓𑀥𑀫𑁆𑀫𑁄 𑀔𑁄, 𑀫𑀸𑀡𑀯, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀢𑀢𑀺, 𑀲𑀩𑁆𑀩𑁂𑀧𑀺, 𑀫𑀸𑀡𑀯, 𑀥𑀫𑁆𑀫𑀸 𑀏𑀓𑀥𑀫𑁆𑀫𑀲𑁆𑀫𑀺𑀁 𑀑𑀲𑀭𑀦𑁆𑀢𑀺, 𑀓𑀢𑀫𑁄 𑀦𑀼 𑀔𑁄 𑀲𑁄, 𑀫𑀸𑀡𑀯𑀓, 𑀥𑀫𑁆𑀫𑁄’’𑀢𑀺. 𑀲𑁄𑀧𑀺 𑀔𑁄 𑀫𑀸𑀡𑀯𑁄 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 ‘‘𑀓𑀺𑀫𑀺𑀤𑀁 𑀪𑁄 𑀧𑀩𑁆𑀩𑀚𑀺𑀢𑀸’’𑀢𑀺 𑀆𑀳. 𑀩𑀼𑀤𑁆𑀥𑀫𑀦𑁆𑀢𑁄𑀬𑀁 𑀫𑀸𑀡𑀯𑀸𑀢𑀺. 𑀲𑀓𑁆𑀓𑀸 𑀧𑀦𑀸𑀬𑀁 𑀪𑁄 𑀫𑀬𑁆𑀳𑀫𑁆𑀧𑀺 𑀤𑀸𑀢𑀼𑀦𑁆𑀢𑀺. 𑀲𑀓𑁆𑀓𑀸, 𑀫𑀸𑀡𑀯, 𑀅𑀫𑁆𑀳𑁂𑀳𑀺 𑀕𑀳𑀺𑀢𑀧𑀩𑁆𑀩𑀚𑁆𑀚𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀸𑀢𑀼𑀦𑁆𑀢𑀺. ‘‘𑀲𑀸𑀥𑀼 𑀔𑁄 𑀪𑁄 𑀧𑀩𑁆𑀩𑀚𑀺𑀢𑀸’’𑀢𑀺 𑀫𑀸𑀡𑀯𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀆𑀘𑀭𑀺𑀬𑀜𑁆𑀘 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀢𑀻𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 ¶ 𑀮𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀢𑀁 𑀥𑀼𑀭𑀁 𑀓𑀢𑁆𑀯𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑀲𑁆𑀲 𑀧𑀺𑀝𑀓𑀢𑁆𑀢𑀬𑀁 𑀯𑀸𑀘𑁂𑀲𑀺.

𑀲𑁄𑀡𑀓𑁄 𑀧𑀦 𑀤𑀸𑀲𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀲𑁄 𑀓𑀺𑀭 𑀓𑀸𑀲𑀻𑀲𑀼 𑀏𑀓𑀲𑁆𑀲 𑀯𑀸𑀡𑀺𑀚𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀜𑁆𑀘𑀤𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀏𑀓𑀁 𑀲𑀫𑀬𑀁 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀯𑀸𑀡𑀺𑀚𑁆𑀚𑀸𑀬 𑀕𑀺𑀭𑀺𑀩𑁆𑀩𑀚𑀁 𑀕𑀢𑁄. 𑀢𑀢𑁄 𑀧𑀜𑁆𑀘𑀧𑀜𑁆𑀜𑀸𑀲𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀸𑀲𑀓𑀢𑁆𑀣𑁂𑀭𑀁 𑀲𑀧𑀭𑀺𑀲𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀣𑁂𑀭𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 ‘‘𑀧𑀩𑁆𑀩𑀚𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀢𑁂𑀲𑀼 𑀅𑀦𑀺𑀘𑁆𑀙𑀦𑁆𑀢𑁂𑀲𑀼 𑀙𑀺𑀦𑁆𑀦𑀪𑀢𑁆𑀢𑁄 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀣𑁂𑀭𑁄 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄𑀧𑀺 𑀕𑀡𑀧𑀸𑀫𑁄𑀓𑁆𑀔𑁄 𑀳𑀼𑀢𑁆𑀯𑀸 𑀩𑀳𑀽𑀦𑀁 𑀥𑀫𑁆𑀫𑀯𑀺𑀦𑀬𑀁 𑀯𑀸𑀘𑁂𑀲𑀺.

𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀧𑀦 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀳𑁄𑀲𑀺. 𑀲𑁄 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑁂 𑀲𑀺𑀕𑁆𑀕𑀯𑁄 𑀦𑀸𑀫 𑀅𑀫𑀘𑁆𑀘𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀲𑀳𑀸𑀬𑁂𑀦 𑀘𑀡𑁆𑀟𑀯𑀚𑁆𑀚𑀺𑀦𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀧𑀭𑀺𑀯𑀸𑀭𑁄 𑀓𑀼𑀓𑁆𑀓𑀼𑀝𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑁄𑀡𑀓𑀢𑁆𑀣𑁂𑀭𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀦𑀸𑀮𑀧𑀦𑁆𑀢𑀁 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 ‘‘𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀸 𑀦𑀸𑀮𑀧𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁄 ‘‘𑀓𑀣𑀁, 𑀪𑀦𑁆𑀢𑁂, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀘 𑀪𑀺𑀓𑁆𑀔𑀽𑀳𑀺 ‘‘𑀲𑀢𑁆𑀣𑀼𑀦𑁄 𑀘𑁂𑀯 𑀲𑀗𑁆𑀖𑀲𑁆𑀲 𑀘 𑀧𑀓𑁆𑀓𑁄𑀲𑀦𑀸𑀬 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀆𑀬𑀼𑀲𑀗𑁆𑀔𑀬𑀸 ¶ 𑀘 𑀯𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀧𑀭𑀺𑀯𑀸𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀧𑀺𑀢𑀁 𑀲𑁄𑀡𑀓𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀫𑀬𑀸 𑀲𑀤𑁆𑀥𑀺𑀁 𑀦𑀸𑀮𑀧𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀣𑁂𑀭𑁂𑀦 ‘‘𑀪𑀼𑀜𑁆𑀚𑀺𑀢𑀩𑁆𑀩𑀓𑀁 𑀓𑀼𑀫𑀸𑀭 𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺𑀧𑀺 𑀢𑀁 𑀪𑁄𑀚𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀓𑁆𑀓𑀸, 𑀓𑀼𑀫𑀸𑀭, 𑀅𑀫𑁆𑀳𑀸𑀤𑀺𑀲𑁂 𑀓𑀢𑁆𑀯𑀸 𑀪𑁄𑀚𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑁄 𑀅𑀢𑁆𑀢𑀦𑁄 𑀲𑀳𑀸𑀬𑁂𑀦 𑀘𑀡𑁆𑀟𑀯𑀚𑁆𑀚𑀺𑀦𑀸 𑀢𑁂𑀳𑀺 𑀘 𑀧𑀜𑁆𑀘𑀳𑀺 𑀧𑀼𑀭𑀺𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀡𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀢𑀢𑁆𑀣 𑀲𑀺𑀕𑁆𑀕𑀯𑁄 𑀘 𑀘𑀡𑁆𑀟𑀯𑀚𑁆𑀚𑀻 𑀘 𑀤𑁆𑀯𑁂 ¶ 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀙𑀴𑀪𑀺𑀜𑁆𑀜𑀸 𑀅𑀳𑁂𑀲𑀼𑀁.

𑀢𑀺𑀲𑁆𑀲𑀲𑁆𑀲 𑀧𑀦 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀓𑀣𑀸 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀯𑀺𑀚𑀺𑀢𑀸𑀯𑀺𑀦𑁄𑀢𑀺 𑀯𑀺𑀚𑀺𑀢𑀲𑀩𑁆𑀩𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀺𑀚𑀺𑀢𑀯𑀦𑁆𑀢𑁄. 𑀧𑀭𑀫𑁆𑀧𑀭𑀸𑀬𑀸𑀢𑀺 𑀧𑀝𑀺𑀧𑀸𑀝𑀺𑀬𑀸, 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀫𑁆𑀩𑀼𑀲𑀺𑀭𑀺𑀯𑁆𑀳𑀬𑁂𑀢𑀺 𑀚𑀫𑁆𑀩𑀼𑀲𑀤𑀺𑀲𑀦𑀸𑀫𑁂, 𑀚𑀫𑁆𑀩𑀼𑀦𑀸𑀫𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀦𑁆𑀢𑁂𑀦 𑀳𑀺 𑀚𑀫𑁆𑀩𑀼𑀭𑀼𑀓𑁆𑀔𑁂𑀦 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 𑀤𑀻𑀧𑁄𑀧𑀺 ‘‘𑀚𑀫𑁆𑀩𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀘𑁆𑀙𑀺𑀚𑁆𑀚𑀫𑀸𑀦𑀁 𑀅𑀯𑀺𑀦𑀲𑁆𑀲𑀫𑀸𑀦𑀁 𑀓𑀢𑁆𑀯𑀸.

𑀯𑀺𑀦𑀬𑀯𑀁𑀲𑀦𑁆𑀢𑀺𑀆𑀤𑀻𑀳𑀺 𑀢𑀻𑀳𑀺 𑀯𑀺𑀦𑀬𑀧𑀸𑀴𑀺𑀬𑁂𑀯 𑀓𑀣𑀺𑀢𑀸 𑀧𑀭𑀺𑀬𑀸𑀬𑀯𑀘𑀦𑀢𑁆𑀢𑀸. 𑀧𑀓𑀢𑀜𑁆𑀜𑀼𑀢𑀦𑁆𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑀁, 𑀧𑀝𑀼𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀼𑀭𑀕𑁆𑀕𑀸𑀳𑁄 𑀅𑀳𑁄𑀲𑀻𑀢𑀺 𑀧𑀥𑀸𑀦𑀕𑁆𑀕𑀸𑀳𑀻 𑀅𑀳𑁄𑀲𑀺, 𑀲𑀩𑁆𑀩𑁂𑀲𑀁 𑀧𑀸𑀫𑁄𑀓𑁆𑀔𑁄 𑀳𑀼𑀢𑁆𑀯𑀸 𑀕𑀡𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽𑀦𑀁 𑀲𑀫𑀼𑀤𑀸𑀬𑁄 𑀲𑀫𑀽𑀳𑁄 𑀪𑀺𑀓𑁆𑀔𑀼𑀲𑀫𑀼𑀤𑀸𑀬𑁄, 𑀲𑀫𑀡𑀕𑀡𑁄𑀢𑀺 𑀅𑀢𑁆𑀣𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

‘‘𑀬𑀤𑀸 𑀦𑀺𑀩𑁆𑀩𑀸𑀬𑀺𑀁𑀲𑀽’’𑀢𑀺 𑀲𑀫𑁆𑀩𑀦𑁆𑀥𑁄. 𑀚𑁄𑀢𑀬𑀺𑀢𑁆𑀯𑀸 𑀘 𑀲𑀩𑁆𑀩𑀥𑀻𑀢𑀺 𑀢𑀫𑁂𑀯 𑀲𑀤𑁆𑀥𑀫𑁆𑀫𑀁 𑀲𑀩𑁆𑀩𑀢𑁆𑀣 𑀧𑀓𑀸𑀲𑀬𑀺𑀢𑁆𑀯𑀸. ‘‘𑀚𑀼𑀢𑀺𑀫𑀦𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀚𑀼𑀢𑀻𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀧𑀜𑁆𑀜𑀸𑀚𑁄𑀢𑀺𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄, 𑀢𑁂𑀚𑀯𑀦𑁆𑀢𑁄𑀢𑀺 𑀯𑀸, 𑀫𑀳𑀸𑀦𑀼𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀩𑁆𑀩𑀸𑀬𑀺𑀁𑀲𑀽𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 ¶ 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀧𑀳𑀻𑀦𑀲𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀓𑀢𑁆𑀣𑀘𑀺 𑀆𑀮𑀬𑁄 𑀢𑀡𑁆𑀳𑀸𑀢𑀺 𑀅𑀦𑀸𑀮𑀬𑀸, 𑀯𑀻𑀢𑀭𑀸𑀕𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻𑀢𑀺 𑀯𑀲𑁆𑀲𑀲𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑁆𑀲𑀸𑀢𑀺 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀕𑀯𑀸, 𑀢𑀲𑁆𑀫𑀺𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀢𑁂 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀲𑀸𑀮𑀺𑀓𑀸𑀢𑀺 𑀯𑁂𑀲𑀸𑀮𑀻𑀦𑀺𑀯𑀸𑀲𑀺𑀦𑁄. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀯𑁂𑀲𑀸𑀮𑀺𑀬𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸. 𑀓𑀧𑁆𑀧𑀢𑀺 𑀲𑀺𑀗𑁆𑀕𑀻𑀮𑁄𑀡𑀓𑀧𑁆𑀧𑁄𑀢𑀺 𑀲𑀺𑀗𑁆𑀕𑁂𑀦 𑀮𑁄𑀡𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑁆𑀯𑀸 𑀅𑀮𑁄𑀡𑀓𑀧𑀺𑀡𑁆𑀟𑀧𑀸𑀢𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀢𑀼𑀁 𑀓𑀧𑁆𑀧𑀢𑀺, 𑀦 𑀲𑀦𑁆𑀦𑀺𑀥𑀺𑀁 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄𑀢𑀺 𑀤𑁆𑀯𑀗𑁆𑀕𑀼𑀮𑀁 ¶ 𑀅𑀢𑀺𑀓𑁆𑀓𑀦𑁆𑀢𑀸𑀬 𑀙𑀸𑀬𑀸𑀬 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄𑀢𑀺 ‘‘𑀕𑀸𑀫𑀦𑁆𑀢𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄𑀢𑀺 𑀏𑀓𑀲𑀻𑀫𑀸𑀬𑀁 𑀦𑀸𑀦𑀸𑀲𑁂𑀦𑀸𑀲𑀦𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁄𑀲𑀣𑀸𑀤𑀻𑀦𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄𑀢𑀺 ‘‘𑀅𑀦𑀸𑀕𑀢𑀸𑀦𑀁 𑀆𑀕𑀢𑀓𑀸𑀮𑁂 𑀅𑀦𑀼𑀫𑀢𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀼 𑀅𑀦𑀸𑀕𑀢𑁂𑀲𑀼𑀬𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀦𑀼𑀫𑀢𑀺𑀁 𑀕𑀳𑁂𑀢𑀼𑀁 𑀓𑀧𑁆𑀧𑀢𑀺, 𑀯𑀕𑁆𑀕𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀆𑀘𑀺𑀡𑁆𑀡𑁄 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀏𑀓𑀘𑁆𑀘𑁄 𑀓𑀧𑁆𑀧𑀢𑀺 𑀥𑀫𑁆𑀫𑀺𑀓𑁄, 𑀏𑀓𑀘𑁆𑀘𑁄 𑀦 𑀓𑀧𑁆𑀧𑀢𑀺 𑀅𑀥𑀫𑁆𑀫𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄𑀢𑀺 𑀬𑀁 𑀔𑀻𑀭𑀁 𑀔𑀻𑀭𑀪𑀸𑀯𑀁 𑀯𑀺𑀚𑀳𑀺𑀢𑀁 𑀤𑀥𑀺𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀁, 𑀢𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀢𑀺 𑀚𑀮𑁄𑀕𑀺𑀁 𑀧𑀸𑀢𑀼𑀦𑁆𑀢𑀺 𑀏𑀢𑁆𑀣 𑀚𑀮𑁄𑀕𑀻𑀢𑀺 𑀢𑀭𑀼𑀡𑀲𑀼𑀭𑀸. 𑀬𑀁 𑀫𑀚𑁆𑀚𑀲𑀫𑁆𑀪𑀸𑀭𑀁 𑀏𑀓𑀢𑁄 𑀓𑀢𑀁 𑀫𑀚𑁆𑀚𑀪𑀸𑀯𑀫𑀲𑀫𑁆𑀧𑀢𑁆𑀢𑀁, 𑀢𑀁 𑀧𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀲𑀭𑀲𑀢𑁄 𑀯𑀺𑀓𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀤𑀸 𑀚𑀸𑀢𑀁 𑀭𑀽𑀧𑀫𑁂𑀯 𑀳𑁄𑀢𑀻𑀢𑀺 𑀚𑀸𑀢𑀁 𑀭𑀽𑀧𑀫𑁂𑀢𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑀁, 𑀲𑀼𑀯𑀡𑁆𑀡𑀁. 𑀥𑀯𑀮𑀲𑀪𑀸𑀯𑀢𑀸𑀬 𑀭𑀸𑀚𑀢𑀻𑀢𑀺 𑀭𑀚𑀢𑀁, 𑀭𑀽𑀧𑀺𑀬𑀁. 𑀲𑀼𑀲𑀼𑀦𑀸𑀕𑀧𑀼𑀢𑁆𑀢𑁄𑀢𑀺 𑀲𑀼𑀲𑀼𑀦𑀸𑀕𑀲𑁆𑀲 𑀧𑀼𑀢𑁆𑀢𑁄.

𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄𑀢𑀺 𑀓𑀸𑀓𑀡𑁆𑀟𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄. 𑀯𑀚𑁆𑀚𑀻𑀲𑀽𑀢𑀺 𑀚𑀦𑀧𑀤𑀯𑀘𑀦𑀢𑁆𑀢𑀸 𑀩𑀳𑀼𑀯𑀘𑀦𑀁 𑀓𑀢𑀁. 𑀏𑀓𑁄𑀧𑀺 𑀳𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑀢𑁆𑀢𑀸 𑀩𑀳𑀼𑀯𑀘𑀦𑁂𑀦 𑀯𑀼𑀘𑁆𑀘𑀢𑀺. 𑀬𑁂𑀦 𑀯𑁂𑀲𑀸𑀮𑀻, 𑀢𑀤𑀯𑀲𑀭𑀻𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀯𑁂𑀲𑀸𑀮𑀻 𑀅𑀯𑀲𑀭𑀺𑀢𑀩𑁆𑀩𑀸, 𑀬𑀲𑁆𑀫𑀺𑀁 𑀯𑀸 𑀧𑀤𑁂𑀲𑁂 𑀯𑁂𑀲𑀸𑀮𑀻, 𑀢𑀤𑀯𑀲𑀭𑀺, 𑀢𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀏𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀫𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁, 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀻𑀢𑀺 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑁂𑀦 𑀓𑀢𑀸.

𑀢𑀤𑀳𑀼𑀧𑁄𑀲𑀣𑁂𑀢𑀺 ¶ 𑀏𑀢𑁆𑀣 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀦𑀺, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀉𑀧𑀯𑀲𑀺𑀢𑀩𑁆𑀩𑀤𑀺𑀯𑀲𑁄. 𑀉𑀧𑀯𑀲𑀦𑁆𑀢𑀻𑀢𑀺 𑀘 𑀲𑀻𑀮𑁂𑀦 𑀯𑀸 𑀲𑀩𑁆𑀩𑀲𑁄 𑀆𑀳𑀸𑀭𑀲𑁆𑀲 𑀘 𑀅𑀪𑀼𑀜𑁆𑀚𑀦𑀲𑀗𑁆𑀔𑀸𑀢𑁂𑀦 𑀅𑀦𑀲𑀦𑁂𑀦 ¶ 𑀯𑀸 𑀔𑀻𑀭𑀧𑀸𑀦𑀫𑀥𑀼𑀧𑀸𑀦𑀸𑀤𑀺𑀫𑀢𑁆𑀢𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑁂𑀲 𑀤𑀺𑀯𑀲𑁄 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀪𑁂𑀤𑁂𑀦 𑀢𑀺𑀯𑀺𑀥𑁄. 𑀓𑀢𑁆𑀣𑀘𑀺 𑀧𑀦 𑀧𑀸𑀢𑀺𑀫𑁄𑀓𑁆𑀔𑁂𑀧𑀺 𑀲𑀻𑀮𑁂𑀧𑀺 𑀉𑀧𑀯𑀸𑀲𑁂𑀧𑀺 𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀉𑀧𑁄𑀲𑀣𑀲𑀤𑁆𑀤𑁄 𑀆𑀕𑀢𑁄. 𑀢𑀣𑀸 𑀳𑁂𑀲 ‘‘𑀆𑀬𑀸𑀫𑀸𑀯𑀼𑀲𑁄 𑀓𑀧𑁆𑀧𑀺𑀦, 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀆𑀕𑀢𑁄. ‘‘𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀯𑀺𑀲𑀸𑀔𑁂 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁪𑁩) 𑀲𑀻𑀮𑁂. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑁂𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁯) 𑀉𑀧𑀯𑀸𑀲𑁂. ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬; 𑀫. 𑀦𑀺. 𑁩.𑁨𑁫𑁮) 𑀧𑀜𑁆𑀜𑀢𑁆𑀢𑀺𑀬𑀜𑁆𑀘 𑀆𑀕𑀢𑁄. 𑀢𑀢𑁆𑀣 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀉𑀧𑁂𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦 𑀳𑀼𑀢𑁆𑀯𑀸 𑀯𑀲𑀺𑀢𑀩𑁆𑀩𑀢𑁄 𑀲𑀦𑁆𑀢𑀸𑀦𑁂 𑀯𑀸𑀲𑁂𑀢𑀩𑁆𑀩𑀢𑁄 𑀉𑀧𑁄𑀲𑀣𑁄 𑀲𑀻𑀮𑀁. 𑀅𑀲𑀦𑀸𑀤𑀺𑀲𑀁𑀬𑀫𑀸𑀤𑀺𑀁 𑀯𑀸 𑀉𑀧𑁂𑀘𑁆𑀘 𑀯𑀲𑀦𑁆𑀢𑀻𑀢𑀺 𑀉𑀧𑁄𑀲𑀣𑁄 𑀉𑀧𑀯𑀸𑀲𑁄. 𑀢𑀣𑀸𑀭𑀽𑀧𑁂 𑀳𑀢𑁆𑀣𑀺𑀅𑀲𑁆𑀲𑀯𑀺𑀲𑁂𑀲𑁂 𑀉𑀧𑁄𑀲𑀣𑁄𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀢𑁄 𑀉𑀧𑁄𑀲𑀣𑁄 𑀧𑀜𑁆𑀜𑀢𑁆𑀢𑀺. 𑀇𑀥 𑀧𑀦 ‘‘𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁮𑁧) 𑀯𑀺𑀬 𑀉𑀧𑁄𑀲𑀣𑀤𑀺𑀯𑀲𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀢𑀤𑀳𑀼𑀧𑁄𑀲𑀣𑁂𑀢𑀺 𑀢𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀓𑀁𑀲𑀧𑀸𑀢𑀺𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁. 𑀓𑀳𑀸𑀧𑀡𑀫𑁆𑀧𑀻𑀢𑀺𑀆𑀤𑀻𑀲𑀼 𑀓𑀳𑀸𑀧𑀡𑀲𑁆𑀲 𑀲𑀫𑀪𑀸𑀕𑁄 𑀅𑀟𑁆𑀠𑁄. 𑀧𑀸𑀤𑁄 𑀘𑀢𑀼𑀢𑁆𑀣𑀪𑀸𑀕𑁄. 𑀫𑀸𑀲𑀓𑁄𑀬𑁂𑀯 𑀫𑀸𑀲𑀓𑀭𑀽𑀧𑀁. 𑀲𑀩𑁆𑀩𑀁 𑀢𑀸𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁪𑁬 𑀆𑀤𑀬𑁄) 𑀆𑀕𑀢𑀸 𑀲𑀩𑁆𑀩𑀸𑀧𑀺 𑀧𑀸𑀴𑀺 𑀇𑀥 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀼𑀢𑁄 𑀯𑀢𑁆𑀢𑀩𑁆𑀩𑀸𑀢𑀺 𑀆𑀳 ‘‘𑀬𑀸𑀯 𑀇𑀫𑀸𑀬 𑀧𑀦 𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸’’𑀢𑀺𑀆𑀤𑀺. 𑀲𑀗𑁆𑀕𑀸𑀬𑀺𑀢𑀲𑀤𑀺𑀲𑀫𑁂𑀯 𑀲𑀗𑁆𑀕𑀸𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀩𑁆𑀩𑁂 𑀓𑀢𑀁 𑀉𑀧𑀸𑀤𑀸𑀬𑀸𑀢𑀺 𑀧𑀼𑀩𑁆𑀩𑁂 𑀓𑀢𑀁 𑀧𑀞𑀫𑀲𑀗𑁆𑀕𑀻𑀢𑀺𑀫𑀼𑀧𑀸𑀤𑀸𑀬. 𑀲𑀸 𑀧𑀦𑀸𑀬𑀁 𑀲𑀗𑁆𑀕𑀻𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀢𑁂𑀲𑀼 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀲𑀼 𑀣𑁂𑀭𑁂𑀲𑀼. 𑀯𑀺𑀲𑁆𑀲𑀼𑀢𑀸𑀢𑀺 𑀕𑀡𑀧𑀸𑀫𑁄𑀓𑁆𑀔𑀢𑀸𑀬 𑀯𑀺𑀲𑁆𑀲𑀼𑀢𑀸 𑀲𑀩𑁆𑀩𑀢𑁆𑀣 𑀧𑀸𑀓𑀝𑀸. 𑀢𑀲𑁆𑀫𑀺𑀜𑁆𑀳𑀺 𑀲𑀦𑁆𑀦𑀺𑀧𑀸𑀢𑁂 𑀅𑀝𑁆𑀞𑁂𑀯 𑀕𑀡𑀧𑀸𑀫𑁄𑀓𑁆𑀔𑀸 𑀫𑀳𑀸𑀣𑁂𑀭𑀸 𑀅𑀳𑁂𑀲𑀼𑀁, 𑀢𑁂𑀲𑀼 𑀘 𑀯𑀸𑀲𑀪𑀕𑀸𑀫𑀻 𑀲𑀼𑀫𑀦𑁄𑀢𑀺 𑀤𑁆𑀯𑁂 𑀣𑁂𑀭𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸, 𑀅𑀯𑀲𑁂𑀲𑀸 𑀙 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲. 𑀏𑀢𑁂 𑀧𑀦 𑀲𑀩𑁆𑀩𑁂𑀧𑀺 𑀅𑀝𑁆𑀞 𑀫𑀳𑀸𑀣𑁂𑀭𑀸 𑀪𑀕𑀯𑀦𑁆𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀇𑀤𑀸𑀦𑀺 𑀢𑁂 𑀣𑁂𑀭𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀓𑀸𑀫𑀻 𑀘𑀸’’𑀢𑀺𑀆𑀤𑀺. 𑀲𑀸𑀡𑀲𑀫𑁆𑀪𑀽𑀢𑁄𑀢𑀺 𑀲𑀸𑀡𑀤𑁂𑀲𑀯𑀸𑀲𑀻 𑀲𑀫𑁆𑀪𑀽𑀢𑀢𑁆𑀣𑁂𑀭𑁄 ¶ . 𑀤𑀼𑀢𑀺𑀬𑁄 𑀲𑀗𑁆𑀕𑀳𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀦𑁆𑀦𑀪𑀸𑀭𑀸𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑀪𑀸𑀭𑀸. ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁨𑁨) 𑀳𑀺 𑀯𑀼𑀢𑁆𑀢𑀁. 𑀓𑀢𑀓𑀺𑀘𑁆𑀘𑀸𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀅𑀙𑀓𑀺𑀭𑀺𑀬𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑁄𑀴𑀲𑀯𑀺𑀥𑀲𑁆𑀲𑀧𑀺 𑀓𑀺𑀘𑁆𑀘𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑀸.

𑀅𑀩𑁆𑀩𑀼𑀤𑀦𑁆𑀢𑀺 𑀉𑀧𑀤𑁆𑀤𑀯𑀁 𑀯𑀤𑀦𑁆𑀢𑀺 𑀘𑁄𑀭𑀓𑀫𑁆𑀫𑀫𑁆𑀧𑀺 𑀪𑀕𑀯𑀢𑁄 𑀯𑀘𑀦𑀁 𑀣𑁂𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀤𑀻𑀧𑀦𑀢𑁄 ¶ . 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀩𑁆𑀩𑀼𑀤𑀁 𑀕𑀡𑁆𑀟𑁄’’𑀢𑀺 𑀯𑀼𑀢𑁆𑀢𑀁. 𑀇𑀫𑀦𑁆𑀢𑀺 𑀯𑀓𑁆𑀔𑀫𑀸𑀦𑀦𑀺𑀤𑀲𑁆𑀲𑀦𑀁. 𑀲𑀦𑁆𑀤𑀺𑀲𑁆𑀲𑀫𑀸𑀦𑀸 𑀫𑀼𑀔𑀸 𑀲𑀫𑁆𑀫𑀼𑀔𑀸. 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀪𑀸𑀯𑀺𑀢𑀫𑀕𑁆𑀕𑀦𑁆𑀢𑀺 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀢𑁆𑀢𑀺𑀬𑀸 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀁. 𑀛𑀸𑀦𑀜𑁆𑀳𑀺 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀇𑀥 ‘‘𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀉𑀧𑀸𑀬𑁄 𑀳𑀺 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀢𑀁 𑀢𑀁 𑀉𑀧𑀧𑀢𑁆𑀢𑀺𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀺 𑀚𑀦𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀫𑀕𑁆𑀕𑁄𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀢𑁄 𑀘𑀸𑀬𑀁 𑀫𑀕𑁆𑀕𑁄 𑀦𑀸𑀫 𑀘𑁂𑀢𑀦𑀸𑀧𑀺 𑀳𑁄𑀢𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀢𑀤𑀼𑀪𑀬𑀫𑁆𑀧𑀺. ‘‘𑀦𑀺𑀭𑀬𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀚𑀸𑀦𑀸𑀫𑀺 𑀦𑀺𑀭𑀬𑀕𑀸𑀫𑀺𑀜𑁆𑀘 𑀫𑀕𑁆𑀕’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁩) 𑀳𑀺 𑀏𑀢𑁆𑀣 𑀘𑁂𑀢𑀦𑀸 𑀫𑀕𑁆𑀕𑁄 𑀦𑀸𑀫.

‘‘𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦𑀁,

𑀥𑀫𑁆𑀫𑀸 𑀏𑀢𑁂 𑀲𑀧𑁆𑀧𑀼𑀭𑀺𑀲𑀸𑀦𑀼𑀬𑀸𑀢𑀸;

𑀏𑀢𑀜𑁆𑀳𑀺 𑀫𑀕𑁆𑀕𑀁 𑀤𑀺𑀯𑀺𑀬𑀁 𑀯𑀤𑀦𑁆𑀢𑀺,

𑀏𑀢𑁂𑀦 𑀳𑀺 𑀕𑀘𑁆𑀙𑀢𑀺 𑀤𑁂𑀯𑀮𑁄𑀓’’𑀦𑁆𑀢𑀺. (𑀅. 𑀦𑀺. 𑁮.𑁩𑁨; 𑀓𑀣𑀸. 𑁪𑁭𑁯) 𑁋

𑀏𑀢𑁆𑀣 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀕𑁆𑀕𑁄 𑀦𑀸𑀫. ‘‘𑀅𑀬𑀁 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸’’𑀢𑀺 𑀲𑀗𑁆𑀔𑀸𑀭𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁧𑁬𑁧) 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀫𑀕𑁆𑀕𑁄 𑀦𑀸𑀫. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀛𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀕𑀳𑁂𑀢𑀩𑁆𑀩𑀸.

𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀮𑁄𑀓𑀲𑀫𑁆𑀫𑀢𑀲𑁆𑀲 𑀅𑀧𑀼𑀢𑁆𑀢𑀓𑀲𑁆𑀲 𑀫𑁄𑀕𑁆𑀕𑀮𑀺𑀦𑀸𑀫𑀩𑁆𑀭𑀸𑀳𑁆𑀫𑀡𑀲𑁆𑀲. 𑀦𑀦𑀼 𑀘 𑀓𑀣𑀫𑁂𑀢𑀁 𑀦𑀸𑀫 𑀯𑀼𑀢𑁆𑀢𑀁 ‘‘𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀲𑁆𑀲𑀢𑀻’’𑀢𑀺. 𑀓𑀺𑀁 𑀉𑀧𑀭𑀽𑀧𑀧𑀢𑁆𑀢𑀺𑀬𑀸 𑀧𑀝𑀺𑀮𑀤𑁆𑀥𑀲𑀫𑀸𑀧𑀢𑁆𑀢𑀻𑀦𑀫𑁆𑀧𑀺 𑀓𑀸𑀫𑀸𑀯𑀘𑀭𑁂 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺? 𑀳𑁄𑀢𑀺. 𑀲𑀸 𑀘 𑀓𑀢𑀸𑀥𑀺𑀓𑀸𑀭𑀸𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦 𑀳𑁄𑀢𑀺, 𑀦 𑀲𑀩𑁆𑀩𑁂𑀲𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀫𑀳𑀕𑁆𑀕𑀢𑀲𑁆𑀲 𑀕𑀭𑀼𑀓𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀭𑀺𑀢𑁆𑀢𑀓𑀫𑁆𑀫𑀁 𑀓𑀣𑀫𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻𑀢𑀺? 𑀏𑀢𑁆𑀣 𑀘 𑀢𑀸𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀇𑀤𑀁 ¶ 𑀯𑀼𑀢𑁆𑀢𑀁 ‘‘𑀦𑀺𑀓𑀦𑁆𑀢𑀺𑀩𑀮𑁂𑀦𑁂𑀯 𑀛𑀸𑀦𑀸 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀅𑀦𑀻𑀯𑀭𑀡𑀸𑀯𑀢𑁆𑀣𑀸𑀬 𑀦𑀺𑀓𑀦𑁆𑀢𑀺𑀬𑀸 𑀛𑀸𑀦𑀲𑁆𑀲 𑀧𑀭𑀺𑀳𑀸𑀦𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀏𑀯𑀫𑁂𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑀺 ‘‘𑀲𑀢𑀺𑀧𑀺 𑀫𑀳𑀕𑁆𑀕𑀢𑀓𑀫𑁆𑀫𑀼𑀦𑁄 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑀲𑀫𑀢𑁆𑀣𑀲𑁆𑀲 𑀧𑀭𑀺𑀢𑁆𑀢𑀓𑀫𑁆𑀫𑀲𑁆𑀲𑀧𑀺 𑀅𑀪𑀸𑀯𑁂 ‘𑀇𑀚𑁆𑀛𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’𑀢𑀺 (𑀤𑀻. 𑀦𑀺. 𑁩.𑁩𑁩𑁭; 𑀅. 𑀦𑀺. 𑁮.𑁩𑁫; 𑀲𑀁. 𑀦𑀺. 𑁪.𑁩𑁫𑁨) 𑀯𑀘𑀦𑀢𑁄 𑀓𑀸𑀫𑀪𑀯𑁂 𑀘𑁂𑀢𑁄𑀧𑀡𑀺𑀥𑀺 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀭𑀺𑀢𑁆𑀢𑀓𑀫𑁆𑀫𑀼𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺.

𑀲𑀸𑀥𑀼 ¶ 𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀁 𑀬𑀸𑀘𑀸𑀫𑀸𑀢𑀺 𑀅𑀢𑁆𑀣𑁄. 𑀳𑀝𑁆𑀞𑀧𑀳𑀝𑁆𑀞𑁄𑀢𑀺 𑀘𑀺𑀢𑁆𑀢𑀧𑀻𑀡𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀦𑁆𑀢𑀼𑀝𑁆𑀞𑁄. 𑀉𑀤𑀕𑁆𑀕𑀼𑀤𑀕𑁆𑀕𑁄𑀢𑀺 𑀲𑀭𑀻𑀭𑀯𑀺𑀓𑀸𑀭𑀼𑀧𑁆𑀧𑀸𑀤𑀦𑀧𑀻𑀢𑀺𑀯𑀲𑁂𑀦 𑀉𑀤𑀕𑁆𑀕𑀼𑀤𑀕𑁆𑀕𑁄. 𑀧𑀻𑀢𑀺𑀫𑀸 𑀳𑀺 𑀧𑀼𑀕𑁆𑀕𑀮𑁄 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀕𑁆𑀕𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀢𑁆𑀢𑀸 ‘‘𑀉𑀤𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸𑀢𑀺 ‘‘𑀲𑀸𑀥𑀽’’𑀢𑀺 𑀧𑀝𑀺𑀯𑀘𑀦𑀁 𑀤𑀢𑁆𑀯𑀸. 𑀢𑀻𑀭𑁂𑀢𑁆𑀯𑀸𑀢𑀺 𑀦𑀺𑀝𑁆𑀞𑀧𑁂𑀢𑁆𑀯𑀸. 𑀧𑀼𑀦 𑀧𑀘𑁆𑀘𑀸𑀕𑀫𑀺𑀁𑀲𑀽𑀢𑀺 𑀧𑀼𑀦 𑀆𑀕𑀫𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀁 𑀅𑀓𑀁𑀲𑀼, 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀦𑀯𑀓𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑀳𑀭𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀥𑀺𑀓𑀭𑀡𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀽𑀢𑀺 𑀢𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁂𑀳𑀺 𑀉𑀧𑁆𑀧𑀸𑀤𑀺𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀫𑁆𑀧𑀸𑀧𑀼𑀡𑀺𑀁𑀲𑀼 𑀦𑀸𑀕𑀫𑀺𑀁𑀲𑀼. 𑀦𑁄 𑀅𑀳𑀼𑀯𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀤𑀡𑁆𑀟𑀓𑀫𑁆𑀫𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀸𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀬𑀼𑀧𑀭𑀺𑀫𑀸𑀡𑀁, 𑀢𑀸𑀯 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀅𑀢𑁆𑀣𑁄.

𑀓𑀺𑀁 𑀧𑀦 𑀓𑀢𑁆𑀯𑀸 𑀢𑁂 𑀣𑁂𑀭𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀆𑀳 ‘‘𑀤𑀼𑀢𑀺𑀬𑀁 𑀲𑀗𑁆𑀕𑀳𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀅𑀦𑀸𑀕𑀢𑁂𑀧𑀺 𑀲𑀤𑁆𑀥𑀫𑁆𑀫𑀯𑀼𑀟𑁆𑀠𑀺𑀬𑀸 𑀳𑁂𑀢𑀼𑀁 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀸𑀦𑀺 ‘‘𑀢𑁂𑀧𑀺 𑀦𑀸𑀫 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸 𑀣𑁂𑀭𑀸 𑀅𑀦𑀺𑀘𑁆𑀘𑀢𑀸𑀬 𑀯𑀲𑀁 𑀕𑀢𑀸, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑁂’’𑀢𑀺 𑀲𑀁𑀯𑁂𑀚𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 𑀆𑀳 ‘‘𑀔𑀻𑀡𑀸𑀲𑀯𑀸’’𑀢𑀺𑀆𑀤𑀺. 𑀅𑀦𑀺𑀘𑁆𑀘𑀢𑀸𑀯𑀲𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀯𑀲𑀢𑁆𑀢𑀁, 𑀅𑀦𑀺𑀘𑁆𑀘𑀢𑀸𑀬𑀢𑁆𑀢𑀪𑀸𑀯𑀁 𑀅𑀦𑀺𑀘𑁆𑀘𑀢𑀸𑀥𑀻𑀦𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀫𑁆𑀫𑀺𑀁 𑀮𑀸𑀫𑀓𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 𑀅𑀦𑀪𑀺𑀪𑀯𑀦𑀻𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀦𑀺𑀘𑁆𑀘𑀢𑀁 𑀏𑀯𑀁 𑀜𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀘𑀺 𑀧𑀦 ‘‘𑀤𑀼𑀭𑀪𑀺𑀲𑀫𑁆𑀪𑀯’’𑀦𑁆𑀢𑀺 𑀏𑀢𑁆𑀣 ‘‘𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀬𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 𑀦𑀺𑀘𑁆𑀘𑀁 𑀅𑀫𑀢𑀁 𑀧𑀤𑀁, 𑀢𑀁 𑀧𑀢𑁆𑀢𑀼𑀁 𑀯𑀸𑀬𑀫𑁂 𑀥𑀻𑀭𑁄’’𑀢𑀺 𑀲𑀫𑁆𑀩𑀦𑁆𑀥𑀁 ¶ 𑀯𑀤𑀦𑁆𑀢𑀺. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀢𑁆𑀢𑀩𑁆𑀩𑀁 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀤𑀼𑀢𑀺𑀬𑀲𑀗𑁆𑀕𑀻𑀢𑀺 𑀲𑀁𑀯𑀡𑁆𑀡𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀇𑀫𑀺𑀲𑁆𑀲𑀸 𑀧𑀦 𑀲𑀗𑁆𑀕𑀻𑀢𑀺𑀬𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀦𑀺𑀓𑁆𑀓𑀟𑁆𑀠𑀺𑀢𑀸 𑀢𑁂 𑀤𑀲𑀲𑀳𑀲𑁆𑀲𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀤𑀼𑀩𑁆𑀩𑀮𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀯𑀺𑀲𑀼𑀁 𑀫𑀳𑀸𑀲𑀗𑁆𑀖𑀺𑀓𑀁 𑀆𑀘𑀭𑀺𑀬𑀓𑀼𑀮𑀁 ¶ 𑀦𑀸𑀫 𑀅𑀓𑀁𑀲𑀼, 𑀢𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀦𑀺 𑀤𑁆𑀯𑁂 𑀆𑀘𑀭𑀺𑀬𑀓𑀼𑀮𑀸𑀦𑀺 𑀚𑀸𑀢𑀸𑀦𑀺 𑀕𑁄𑀓𑀼𑀮𑀺𑀓𑀸 𑀘 𑀏𑀓𑀩𑁆𑀬𑁄𑀳𑀸𑀭𑀺𑀓𑀸 𑀘. 𑀕𑁄𑀓𑀼𑀮𑀺𑀓𑀦𑀺𑀓𑀸𑀬𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀦𑀺 𑀤𑁆𑀯𑁂 𑀆𑀘𑀭𑀺𑀬𑀓𑀼𑀮𑀸𑀦𑀺 𑀚𑀸𑀢𑀸𑀦𑀺 𑀧𑀡𑁆𑀡𑀢𑁆𑀢𑀺𑀯𑀸𑀤𑀸 𑀘 𑀩𑀸𑀳𑀼𑀮𑀺𑀬𑀸 𑀘. 𑀩𑀳𑀼𑀲𑁆𑀲𑀼𑀢𑀺𑀓𑀸𑀢𑀺𑀧𑀺 𑀢𑁂𑀲𑀁𑀬𑁂𑀯 𑀦𑀸𑀫𑀁, 𑀢𑁂𑀲𑀁𑀬𑁂𑀯 𑀅𑀦𑁆𑀢𑀭𑀸 𑀘𑁂𑀢𑀺𑀬𑀯𑀸𑀤𑀸 𑀦𑀸𑀫 𑀅𑀧𑀭𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀏𑀯𑀁 𑀫𑀳𑀸𑀲𑀗𑁆𑀖𑀺𑀓𑀸𑀘𑀭𑀺𑀬𑀓𑀼𑀮𑀢𑁄 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀧𑀜𑁆𑀘𑀸𑀘𑀭𑀺𑀬𑀓𑀼𑀮𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀸𑀦𑀺 𑀫𑀳𑀸𑀲𑀗𑁆𑀖𑀺𑀓𑁂𑀳𑀺 𑀲𑀤𑁆𑀥𑀺𑀁 𑀙 𑀳𑁄𑀦𑁆𑀢𑀺.

𑀢𑀲𑁆𑀫𑀺𑀁𑀬𑁂𑀯 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸 𑀫𑀳𑀺𑀲𑀸𑀲𑀓𑀸 𑀘 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘. 𑀢𑀢𑁆𑀣 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑁂 𑀘𑀢𑁆𑀢𑀸𑀭𑁄 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀼𑀢𑁆𑀢𑀭𑀺𑀓𑀸 𑀪𑀤𑁆𑀤𑀬𑀸𑀦𑀺𑀓𑀸 𑀙𑀦𑁆𑀦𑀸𑀕𑀸𑀭𑀺𑀓𑀸 𑀲𑀫𑀺𑀢𑀺𑀓𑀸𑀢𑀺. 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 𑀫𑀳𑀺𑀲𑀸𑀲𑀓𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀥𑀫𑁆𑀫𑀕𑀼𑀢𑁆𑀢𑀺𑀓𑀸𑀢𑀺 𑀤𑁆𑀯𑁂 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀲𑀩𑁆𑀩𑀢𑁆𑀣𑀺𑀯𑀸𑀤𑀓𑀼𑀮𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀧𑀺𑀓𑀸 𑀦𑀸𑀫 𑀚𑀸𑀢𑀸, 𑀓𑀲𑁆𑀲𑀧𑀺𑀓𑁂𑀲𑀼𑀧𑀺 𑀪𑀺𑀦𑁆𑀦𑁂𑀲𑀼 𑀅𑀧𑀭𑁂 𑀲𑀗𑁆𑀓𑀦𑁆𑀢𑀺𑀓𑀸 𑀦𑀸𑀫 𑀚𑀸𑀢𑀸, 𑀲𑀗𑁆𑀓𑀦𑁆𑀢𑀺𑀓𑁂𑀲𑀼 𑀪𑀺𑀦𑁆𑀦𑁂𑀲𑀼 𑀲𑀼𑀢𑁆𑀢𑀯𑀸𑀤𑀸 𑀦𑀸𑀫 𑀚𑀸𑀢𑀸𑀢𑀺 𑀣𑁂𑀭𑀯𑀸𑀤𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀇𑀫𑁂 𑀏𑀓𑀸𑀤𑀲 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸, 𑀢𑁂 𑀣𑁂𑀭𑀯𑀸𑀤𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑁂 𑀘 𑀤𑁆𑀯𑀸𑀤𑀲 𑀫𑀳𑀸𑀲𑀗𑁆𑀖𑀺𑀓𑀸𑀦𑀜𑁆𑀘 𑀙 𑀆𑀘𑀭𑀺𑀬𑀯𑀸𑀤𑀸𑀢𑀺 𑀲𑀩𑁆𑀩𑁂 𑀅𑀝𑁆𑀞𑀸𑀭𑀲 𑀆𑀘𑀭𑀺𑀬𑀯𑀸𑀤𑀸 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑁂 ¶ 𑀉𑀧𑁆𑀧𑀦𑁆𑀦𑀸. 𑀅𑀝𑁆𑀞𑀸𑀭𑀲 𑀦𑀺𑀓𑀸𑀬𑀸𑀢𑀺𑀧𑀺 𑀅𑀝𑁆𑀞𑀸𑀭𑀲𑀸𑀘𑀭𑀺𑀬𑀓𑀼𑀮𑀸𑀦𑀻𑀢𑀺𑀧𑀺 𑀏𑀢𑁂𑀲𑀁𑀬𑁂𑀯 𑀦𑀸𑀫𑀁. 𑀏𑀢𑁂𑀲𑀼 𑀧𑀦 𑀲𑀢𑁆𑀢𑀭𑀲 𑀯𑀸𑀤𑀸 𑀪𑀺𑀦𑁆𑀦𑀓𑀸, 𑀣𑁂𑀭𑀯𑀸𑀤𑁄𑀯𑁂𑀓𑁄 𑀅𑀲𑀫𑁆𑀪𑀺𑀦𑁆𑀦𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀦𑀺𑀓𑁆𑀓𑀟𑁆𑀠𑀺𑀢𑀸 𑀧𑀸𑀧𑀪𑀺𑀓𑁆𑀔𑀽, 𑀣𑁂𑀭𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑀸;

𑀅𑀜𑁆𑀜𑀁 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸𑀦, 𑀅𑀥𑀫𑁆𑀫𑀯𑀸𑀤𑀻 𑀩𑀳𑀽 𑀚𑀦𑀸.

‘‘𑀤𑀲𑀲𑀳𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀥𑀫𑁆𑀫𑀲𑀗𑁆𑀕𑀳𑀁;

𑀢𑀲𑁆𑀫𑀸𑀬𑀁 𑀥𑀫𑁆𑀫𑀲𑀗𑁆𑀕𑀻𑀢𑀺, 𑀫𑀳𑀸𑀲𑀗𑁆𑀕𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀫𑀳𑀸𑀲𑀗𑁆𑀕𑀻𑀢𑀺𑀓𑀸 𑀪𑀺𑀓𑁆𑀔𑀽, 𑀯𑀺𑀮𑁄𑀫𑀁 𑀅𑀓𑀁𑀲𑀼 𑀲𑀸𑀲𑀦𑁂;

𑀪𑀺𑀦𑁆𑀤𑀺𑀢𑁆𑀯𑀸 𑀫𑀽𑀮𑀲𑀗𑁆𑀕𑀳𑀁, 𑀅𑀜𑁆𑀜𑀁 𑀅𑀓𑀁𑀲𑀼 𑀲𑀗𑁆𑀕𑀳𑀁.

‘‘𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢𑀁, 𑀅𑀜𑁆𑀜𑀢𑁆𑀭 𑀅𑀓𑀭𑀺𑀁𑀲𑀼 𑀢𑁂;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀯𑀺𑀦𑀬𑁂 𑀦𑀺𑀓𑀸𑀬𑁂𑀲𑀼 𑀘 𑀧𑀜𑁆𑀘𑀲𑀼.

‘‘𑀧𑀭𑀺𑀬𑀸𑀬𑀤𑁂𑀲𑀺𑀢𑀜𑁆𑀘𑀸𑀧𑀺 ¶ , 𑀅𑀣𑁄 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀺𑀢𑀁;

𑀦𑀻𑀢𑀢𑁆𑀣𑀜𑁆𑀘𑁂𑀯 𑀦𑁂𑀬𑁆𑀬𑀢𑁆𑀣𑀁, 𑀅𑀚𑀸𑀦𑀺𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

‘‘𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁, 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼 𑀢𑁂;

𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀢𑁂 𑀪𑀺𑀓𑁆𑀔𑀽, 𑀩𑀳𑀼𑀁 𑀅𑀢𑁆𑀣𑀁 𑀯𑀺𑀦𑀸𑀲𑀬𑀼𑀁.

‘‘𑀙𑀟𑁆𑀟𑁂𑀢𑁆𑀯𑀸𑀦 𑀏𑀓𑀤𑁂𑀲𑀁, 𑀲𑀼𑀢𑁆𑀢𑀁 𑀯𑀺𑀦𑀬𑀕𑀫𑁆𑀪𑀺𑀭𑀁;

𑀧𑀢𑀺𑀭𑀽𑀧𑀁 𑀲𑀼𑀢𑁆𑀢𑀁 𑀯𑀺𑀦𑀬𑀁, 𑀢𑀜𑁆𑀘 𑀅𑀜𑁆𑀜𑀁 𑀓𑀭𑀺𑀁𑀲𑀼 𑀢𑁂.

‘‘𑀧𑀭𑀺𑀯𑀸𑀭𑀁 𑀅𑀢𑁆𑀣𑀼𑀤𑁆𑀥𑀸𑀭𑀁, 𑀅𑀪𑀺𑀥𑀫𑁆𑀫𑀁 𑀙𑀧𑁆𑀧𑀓𑀭𑀡𑀁;

𑀧𑀝𑀺𑀲𑀫𑁆𑀪𑀺𑀤𑀜𑁆𑀘 𑀦𑀺𑀤𑁆𑀤𑁂𑀲𑀁, 𑀏𑀓𑀤𑁂𑀲𑀜𑁆𑀘 𑀚𑀸𑀢𑀓𑀁;

𑀏𑀢𑁆𑀢𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀦, 𑀅𑀜𑁆𑀜𑀸𑀦𑀺 𑀅𑀓𑀭𑀺𑀁𑀲𑀼 𑀢𑁂.

‘‘𑀦𑀸𑀫𑀁 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘;

𑀧𑀓𑀢𑀺𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀧𑀼𑀩𑁆𑀩𑀗𑁆𑀕𑀫𑀸 𑀪𑀺𑀦𑁆𑀦𑀯𑀸𑀤𑀸, 𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀭𑀓𑀸;

𑀢𑁂𑀲𑀜𑁆𑀘 𑀅𑀦𑀼𑀓𑀸𑀭𑁂𑀦, 𑀪𑀺𑀦𑁆𑀦𑀯𑀸𑀤𑀸 𑀩𑀳𑀽 𑀅𑀳𑀼.

‘‘𑀢𑀢𑁄 𑀅𑀧𑀭𑀓𑀸𑀮𑀫𑁆𑀳𑀺, 𑀢𑀲𑁆𑀫𑀺𑀁 𑀪𑁂𑀤𑁄 𑀅𑀚𑀸𑀬𑀣;

𑀕𑁄𑀓𑀼𑀮𑀺𑀓𑀸 𑀏𑀓𑀩𑁆𑀬𑁄𑀳𑀸𑀭𑀺, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄.

‘‘𑀕𑁄𑀓𑀼𑀮𑀺𑀓𑀸𑀦𑀁 ¶ 𑀤𑁆𑀯𑁂 𑀪𑁂𑀤𑀸, 𑀅𑀧𑀭𑀓𑀸𑀮𑀫𑁆𑀳𑀺 𑀚𑀸𑀬𑀣;

𑀩𑀳𑀼𑀲𑁆𑀲𑀼𑀢𑀺𑀓𑀸 𑀘 𑀧𑀜𑁆𑀜𑀢𑁆𑀢𑀺, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄.

‘‘𑀘𑁂𑀢𑀺𑀬𑀸 𑀘 𑀧𑀼𑀦𑀯𑀸𑀤𑀻, 𑀫𑀳𑀸𑀲𑀗𑁆𑀕𑀻𑀢𑀺𑀪𑁂𑀤𑀓𑀸;

𑀧𑀜𑁆𑀘 𑀯𑀸𑀤𑀸 𑀇𑀫𑁂 𑀲𑀩𑁆𑀩𑁂, 𑀫𑀳𑀸𑀲𑀗𑁆𑀕𑀻𑀢𑀺𑀫𑀽𑀮𑀓𑀸.

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀏𑀓𑀤𑁂𑀲𑀜𑁆𑀘 𑀲𑀗𑁆𑀕𑀳𑀁;

𑀕𑀦𑁆𑀣𑀜𑁆𑀘 𑀏𑀓𑀤𑁂𑀲𑀜𑁆𑀳𑀺, 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀦𑀸𑀫𑀁 ¶ 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘;

𑀧𑀓𑀢𑀺𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀯𑀺𑀲𑀼𑀤𑁆𑀥𑀢𑁆𑀣𑁂𑀭𑀯𑀸𑀤𑀫𑁆𑀳𑀺, 𑀧𑀼𑀦 𑀪𑁂𑀤𑁄 𑀅𑀚𑀸𑀬𑀣;

𑀫𑀳𑀺𑀲𑀸𑀲𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄.

‘‘𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀸𑀤𑀫𑁆𑀳𑀺, 𑀘𑀢𑀼𑀥𑀸 𑀪𑁂𑀤𑁄 𑀅𑀚𑀸𑀬𑀣;

𑀥𑀫𑁆𑀫𑀢𑁆𑀢𑀼𑀭𑀺𑀓𑀸 𑀪𑀤𑁆𑀤𑀬𑀸𑀦𑀺𑀓𑀸, 𑀙𑀦𑁆𑀦𑀸𑀕𑀸𑀭𑀺𑀓𑀸 𑀘 𑀲𑀫𑀺𑀢𑀺.

‘‘𑀫𑀳𑀺𑀲𑀸𑀲𑀓𑀸𑀦𑀁 𑀤𑁆𑀯𑁂 𑀪𑁂𑀤𑀸, 𑀅𑀧𑀭𑀓𑀸𑀮𑀫𑁆𑀳𑀺 𑀅𑀚𑀸𑀬𑀣;

𑀲𑀩𑁆𑀩𑀢𑁆𑀣𑀺𑀯𑀸𑀤𑀸 𑀥𑀫𑁆𑀫𑀕𑀼𑀢𑁆𑀢𑀸, 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀣 𑀪𑀺𑀓𑁆𑀔𑀯𑁄.

‘‘𑀲𑀩𑁆𑀩𑀢𑁆𑀣𑀺𑀯𑀸𑀤𑀸𑀦𑀁 𑀓𑀲𑁆𑀲𑀧𑀺𑀓𑀸, 𑀲𑀗𑁆𑀓𑀦𑁆𑀢𑀺 𑀓𑀲𑁆𑀲𑀧𑀺𑀓𑁂𑀦 𑀘;

𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀲𑀼𑀢𑁆𑀢𑀯𑀸𑀤𑀻, 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀣.

‘‘𑀇𑀫𑁂 𑀏𑀓𑀸𑀤𑀲 𑀯𑀸𑀤𑀸, 𑀧𑀪𑀺𑀦𑁆𑀦𑀸 𑀣𑁂𑀭𑀯𑀸𑀤𑀢𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀏𑀓𑀤𑁂𑀲𑀜𑁆𑀘 𑀲𑀗𑁆𑀕𑀳𑀁;

𑀕𑀦𑁆𑀣𑀜𑁆𑀘 𑀏𑀓𑀤𑁂𑀲𑀜𑁆𑀳𑀺, 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀦𑀸𑀫𑀁 𑀮𑀺𑀗𑁆𑀕𑀁 𑀧𑀭𑀺𑀓𑁆𑀔𑀸𑀭𑀁, 𑀆𑀓𑀧𑁆𑀧𑀓𑀭𑀡𑀸𑀦𑀺 𑀘;

𑀧𑀓𑀢𑀺𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸, 𑀢𑀜𑁆𑀘 𑀅𑀜𑁆𑀜𑀁 𑀅𑀓𑀁𑀲𑀼 𑀢𑁂.

‘‘𑀲𑀢𑁆𑀢𑀭𑀲 𑀪𑀺𑀦𑁆𑀦𑀯𑀸𑀤𑀸, 𑀏𑀓𑀯𑀸𑀤𑁄 𑀅𑀪𑀺𑀦𑁆𑀦𑀓𑁄;

𑀲𑀩𑁆𑀩𑁂𑀯𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀪𑀺𑀦𑁆𑀦𑀯𑀸𑀤𑁂𑀦 𑀢𑁂 𑀲𑀳;

𑀦𑀺𑀕𑁆𑀭𑁄𑀥𑁄𑀯 𑀫𑀳𑀸𑀭𑀼𑀓𑁆𑀔𑁄, 𑀣𑁂𑀭𑀯𑀸𑀤𑀸𑀦𑀫𑀼𑀢𑁆𑀢𑀫𑁄.

‘‘𑀅𑀦𑀽𑀦𑀁 𑀅𑀦𑀥𑀺𑀓𑀜𑁆𑀘, 𑀓𑁂𑀯𑀮𑀁 𑀚𑀺𑀦𑀲𑀸𑀲𑀦𑀁;

𑀓𑀡𑁆𑀝𑀓𑀸 𑀯𑀺𑀬 𑀭𑀼𑀓𑁆𑀔𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑀸 𑀯𑀸𑀤𑀲𑁂𑀲𑀓𑀸.

‘‘𑀧𑀞𑀫𑁂 ¶ ¶ 𑀯𑀲𑁆𑀲𑀲𑀢𑁂 𑀦𑀢𑁆𑀣𑀺, 𑀤𑀼𑀢𑀺𑀬𑁂 𑀯𑀲𑁆𑀲𑀲𑀢𑀦𑁆𑀢𑀭𑁂;

𑀪𑀺𑀦𑁆𑀦𑀸 𑀲𑀢𑁆𑀢𑀭𑀲 𑀯𑀸𑀤𑀸, 𑀉𑀧𑁆𑀧𑀦𑁆𑀦𑀸 𑀚𑀺𑀦𑀲𑀸𑀲𑀦𑁂’’𑀢𑀺.

𑀅𑀧𑀭𑀸𑀧𑀭𑀁 𑀧𑀦 𑀳𑁂𑀫𑀯𑀢𑀸 𑀭𑀸𑀚𑀕𑀺𑀭𑀺𑀓𑀸 𑀲𑀺𑀤𑁆𑀥𑀢𑁆𑀣𑀺𑀓𑀸 𑀧𑀼𑀩𑁆𑀩𑀲𑁂𑀮𑀺𑀬𑀸 𑀅𑀧𑀭𑀲𑁂𑀮𑀺𑀬𑀸 𑀯𑀸𑀚𑀺𑀭𑀺𑀬𑀸𑀢𑀺 𑀅𑀜𑁆𑀜𑁂𑀧𑀺 𑀙 𑀆𑀘𑀭𑀺𑀬𑀯𑀸𑀤𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀭𑀺𑀫𑀓𑀸𑀦𑀁 𑀧𑀦 𑀅𑀝𑁆𑀞𑀸𑀭𑀲𑀦𑁆𑀦𑀁 𑀆𑀘𑀭𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀲𑀸𑀲𑀦𑁂 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀥𑀫𑁆𑀫𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀲𑀗𑁆𑀖𑀧𑀽𑀚𑀸𑀬 𑀲𑀢𑀲𑀳𑀲𑁆𑀲𑀁, 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀲𑀢𑀲𑀳𑀲𑁆𑀲𑀁, 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀦𑁆𑀢𑀺 𑀧𑀜𑁆𑀘 𑀲𑀢𑀲𑀳𑀲𑁆𑀲𑀸𑀦𑀺 𑀧𑀭𑀺𑀘𑁆𑀘𑀚𑀦𑁆𑀢𑁄 𑀲𑀸𑀲𑀦𑁂 𑀉𑀴𑀸𑀭𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀢𑀤𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀉𑀧𑁆𑀧𑀸𑀤𑀺𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀸𑀲𑀦𑀫𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑀸𑀦𑀁 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀳𑀲𑁆𑀲𑀫𑁂𑀓𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘 𑀬𑀲𑀢𑁆𑀣𑁂𑀭𑁄 𑀘 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀁𑀲𑀼, 𑀏𑀯𑀫𑁂𑀯 𑀲𑀗𑁆𑀕𑀸𑀬𑀦𑁆𑀢𑁄 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀅𑀓𑀸𑀲𑀺. 𑀇𑀤𑀸𑀦𑀺 𑀢𑀁 𑀢𑀢𑀺𑀬𑀲𑀗𑁆𑀕𑀻𑀢𑀺𑀁 𑀫𑀽𑀮𑀢𑁄 𑀧𑀪𑀼𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀲𑁆𑀲𑁄𑀧𑀺 𑀔𑁄 𑀫𑀳𑀸𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀻’’𑀢𑀺𑀆𑀤𑀺.

𑀢𑀢𑁆𑀣 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀻𑀢𑀺 𑀫𑁄𑀕𑁆𑀕𑀮𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀻𑀢𑀺 𑀅𑀢𑁆𑀣𑁄. 𑀕𑁂𑀳𑀲𑁆𑀲 𑀧𑀦 𑀢𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀦𑀺𑀲𑁆𑀲𑀺𑀢𑁂 𑀦𑀺𑀲𑁆𑀲𑀬𑀯𑁄𑀳𑀸𑀭𑀯𑀲𑁂𑀦 ‘‘𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁄 𑀕𑀸𑀫𑁄 𑀆𑀕𑀢𑁄’’𑀢𑀺. 𑀲𑀢𑁆𑀢𑀯𑀲𑁆𑀲𑀸𑀦𑀻𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀢𑀺𑀘𑁆𑀙𑀣𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀘𑁆𑀙𑀣, 𑀇𑀥 𑀪𑀺𑀓𑁆𑀔𑀸 𑀦 𑀮𑀩𑁆𑀪𑀢𑀺, 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑁄 𑀧𑀩𑁆𑀩𑀚𑀺𑀢𑀸’’𑀢𑀺𑀆𑀤𑀺 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀕𑁂𑀳𑁂 𑀪𑀺𑀓𑁆𑀔𑀸𑀮𑀸𑀪𑀁 𑀅𑀦𑀺𑀘𑁆𑀙𑀦𑁆𑀢𑁄 𑀆𑀳. 𑀧𑀝𑀺𑀬𑀸𑀤𑀺𑀢𑀪𑀢𑁆𑀢𑀢𑁄𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀞𑀧𑀺𑀢𑀪𑀢𑁆𑀢𑀢𑁄. 𑀢𑀤𑀼𑀧𑀺𑀬𑀦𑁆𑀢𑀺 𑀢𑀤𑀦𑀼𑀭𑀽𑀧𑀁. 𑀉𑀧𑀲𑀫𑀁 𑀤𑀺𑀲𑁆𑀯𑀸𑀢𑀺 𑀣𑁂𑀭𑀲𑁆𑀲 𑀓𑀸𑀬𑀘𑀺𑀢𑁆𑀢𑀯𑀽𑀧𑀲𑀫𑀁 𑀧𑀼𑀦𑀧𑁆𑀧𑀼𑀦𑀁 𑀤𑀺𑀲𑁆𑀯𑀸, 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀧𑀣𑀯𑀽𑀧𑀲𑀫𑀲𑀦𑁆𑀤𑀲𑁆𑀲𑀦𑁂𑀦 𑀳𑀺 𑀢𑀦𑁆𑀦𑀺𑀩𑀦𑁆𑀥𑀺𑀦𑁄 𑀘𑀺𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀧𑀯𑀢𑁆𑀢𑀺𑀉𑀧𑀲𑀫𑁄𑀧𑀺 𑀯𑀺𑀜𑁆𑀜𑀸𑀬𑀢𑀺. 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀲𑀻𑀤𑀺𑀢𑁆𑀯𑀸𑀢𑀺 ¶ 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁂𑀲𑀢𑁄 𑀅𑀥𑀺𑀓𑀢𑀭𑀁 𑀧𑀲𑀻𑀤𑀺𑀢𑁆𑀯𑀸. 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀭𑀡𑀢𑁆𑀣𑀸𑀬𑀸𑀢𑀺 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀢𑁆𑀣𑀸𑀬. 𑀅𑀥𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸.

𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄𑀢𑀺 𑀲𑁄𑀴𑀲𑀯𑀲𑁆𑀲𑁄𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄 𑀯𑁄𑀳𑀭𑀺𑀢𑀩𑁆𑀩𑁄𑀢𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑁄, 𑀲𑁄𑀬𑁂𑀯 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄. 𑀲𑁄𑀴𑀲𑀯𑀲𑁆𑀲𑁄𑀢𑀺 𑀯𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄, 𑀲𑁄𑀴𑀲𑀯𑀲𑁆𑀲𑀸𑀦𑀺 𑀯𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺 𑀅𑀲𑁆𑀲𑀸𑀢𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄, 𑀲𑁄𑀴𑀲𑀯𑀲𑁆𑀲𑁄𑀢𑀺 𑀉𑀤𑁆𑀤𑁂𑀲𑁄 𑀯𑀸 𑀅𑀲𑁆𑀲 ¶ 𑀅𑀢𑁆𑀣𑀻𑀢𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄, 𑀅𑀢𑁆𑀣𑀢𑁄 𑀧𑀦 𑀲𑁄𑀴𑀲𑀯𑀲𑁆𑀲𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀕𑀼𑀡𑀓𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑁄𑀢𑀺 𑀧𑀸𑀭𑀕𑀽. 𑀧𑀸𑀭𑀕𑀽𑀢𑀺 𑀘𑁂𑀢𑁆𑀣 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀲𑀫𑀸𑀲𑀸𑀤𑀺𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀮𑀕𑁆𑀕𑁂𑀢𑁆𑀯𑀸𑀢𑀺 𑀑𑀮𑀫𑁆𑀩𑁂𑀢𑁆𑀯𑀸. 𑀦 𑀘 𑀓𑀸𑀘𑀻𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀓𑀸𑀘𑀺 𑀓𑀣𑀸 𑀦𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀦𑀺𑀲𑀻𑀤𑀺𑀢𑀩𑁆𑀩𑀸𑀲𑀦𑀁. 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀣𑀸’’𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄𑀢𑀺 𑀓𑁄𑀧𑁂𑀦 𑀓𑀼𑀧𑀺𑀢𑁄, 𑀅𑀦𑀢𑁆𑀢𑀫𑀦𑁄 𑀤𑁄𑀫𑀦𑀲𑁆𑀲𑁂𑀦. 𑀤𑁄𑀫𑀦𑀲𑁆𑀲𑀲𑀫𑀗𑁆𑀕𑀻 𑀳𑀺 𑀧𑀼𑀕𑁆𑀕𑀮𑁄 𑀧𑀻𑀢𑀺𑀲𑀼𑀔𑁂𑀳𑀺 𑀦 𑀅𑀢𑁆𑀢𑀫𑀦𑁄 𑀦 𑀅𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀦𑀢𑁆𑀢𑀫𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀦 𑀲𑀓𑀫𑀦𑁄𑀢𑀺 𑀯𑀸 𑀅𑀦𑀢𑁆𑀢𑀫𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀅𑀝𑁆𑀞𑀺𑀢𑀘𑀺𑀢𑁆𑀢𑀢𑁆𑀢𑀸.

𑀘𑀡𑁆𑀟𑀺𑀓𑁆𑀓𑀪𑀸𑀯𑁂𑀢𑀺 𑀘𑀡𑁆𑀟𑀺𑀓𑁄 𑀯𑀼𑀘𑁆𑀘𑀢𑀺 𑀘𑀡𑁆𑀟𑁄 𑀣𑀤𑁆𑀥𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁, 𑀣𑀤𑁆𑀥𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀘𑀡𑁆𑀟𑀺𑀓𑁆𑀓𑀪𑀸𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀡𑁆𑀟𑀺𑀓𑁄𑀬𑁂𑀯 𑀘𑀡𑁆𑀟𑀺𑀓𑁆𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑁂𑀦 ‘‘𑀘𑀡𑁆𑀟𑀺𑀓𑁆𑀓𑀪𑀸𑀯𑁂’’𑀢𑀺 𑀏𑀢𑁆𑀣 𑀣𑀤𑁆𑀥𑀪𑀸𑀯𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀜𑁆𑀘𑀺 𑀫𑀦𑁆𑀢𑀦𑁆𑀢𑀺 𑀓𑀺𑀜𑁆𑀘𑀺 𑀯𑁂𑀤𑀁. 𑀅𑀜𑁆𑀜𑁂 𑀓𑁂 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀦 𑀓𑁂𑀘𑀺 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀧𑀤𑁂𑀲𑀜𑀸𑀡𑁂 𑀞𑀺𑀢𑀢𑁆𑀢𑀸 𑀣𑁂𑀭𑁄 𑀏𑀯𑀫𑀸𑀳. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀏𑀯 𑀳𑀺 ‘‘𑀧𑀼𑀘𑁆𑀙, 𑀫𑀸𑀡𑀯, 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀺. 𑀲𑀸𑀯𑀓𑀸 𑀧𑀦 𑀧𑀤𑁂𑀲𑀜𑀸𑀡𑁂 𑀞𑀺𑀢𑀢𑁆𑀢𑀸 ‘‘𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺 𑀯𑀸 𑀯𑀤𑀦𑁆𑀢𑀺.

𑀢𑀻𑀲𑀼 𑀯𑁂𑀤𑁂𑀲𑀽𑀢𑀺𑀆𑀤𑀻𑀲𑀼 𑀢𑀬𑁄 𑀯𑁂𑀤𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀦𑀺𑀖𑀡𑁆𑀟𑀽𑀢𑀺 𑀦𑀸𑀫𑀦𑀺𑀖𑀡𑁆𑀟𑀼𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀁 𑀲𑀢𑁆𑀣𑀁, 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀘 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀦𑁆𑀢𑀺 𑀅𑀢𑁆𑀣𑁄, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀲𑁆𑀲 𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀦𑀺𑀔𑀡𑁆𑀟𑁂𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼, 𑀲𑁄 𑀏𑀯 𑀇𑀥 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀖𑀡𑁆𑀟𑀽𑀢𑀺 𑀯𑀼𑀢𑁆𑀢𑁄. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀲𑀢𑁆𑀣𑀁. 𑀏𑀢𑁆𑀣 𑀘 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄𑀢𑀺 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀯𑀺𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀲𑁄 𑀧𑀦 𑀯𑀡𑁆𑀡𑀧𑀤𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀩𑀳𑀼𑀯𑀺𑀓𑀧𑁆𑀧𑁄𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀬𑀸𑀤𑀺𑀘𑀭𑀺𑀬𑀸𑀤𑀺𑀓𑀁 𑀧𑀓𑀭𑀡𑀁. 𑀯𑀘𑀦𑀢𑁆𑀣𑀢𑁄 𑀧𑀦 𑀓𑀺𑀝𑀢𑀺 𑀕𑀫𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀓𑁂𑀝𑀼𑀪𑁂𑀦 𑀘 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸, 𑀢𑀬𑁄 𑀯𑁂𑀤𑀸. 𑀢𑁂𑀲𑀼 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑁂𑀲𑀼. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄 ¶ 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑁄, 𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘. 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦𑀸𑀢𑀺 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸, 𑀢𑁂𑀲𑀼 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑁂𑀲𑀼. 𑀇𑀢𑀺𑀳𑀸𑀲𑀧𑀜𑁆𑀘𑀫𑁂𑀲𑀽𑀢𑀺 𑀅𑀣𑀩𑁆𑀩𑀦𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 ‘‘𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑀬𑁄 𑀯𑁂𑀤𑀸. 𑀢𑁂𑀲𑀼 𑀇𑀢𑀺𑀳𑀸𑀲𑀧𑀜𑁆𑀘𑀫𑁂𑀲𑀼. 𑀦𑁂𑀯 𑀅𑀢𑁆𑀢𑀦𑀸 𑀧𑀲𑁆𑀲𑀢𑀻𑀢𑀺 𑀦𑁂𑀯 𑀲𑀬𑀁 𑀧𑀲𑁆𑀲𑀢𑀺, 𑀦𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙, 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺 ‘‘𑀲𑀩𑁆𑀩𑀸𑀧𑀺 𑀧𑀼𑀘𑁆𑀙𑀸 𑀯𑁂𑀤𑁂𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀯𑀫𑀸𑀳.

𑀬𑀲𑁆𑀲 𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀧𑀜𑁆𑀳𑀤𑁆𑀯𑀬𑀁 𑀘𑀼𑀢𑀺𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀔𑀻𑀡𑀸𑀲𑀯𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑁄𑀥𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀬𑀲𑁆𑀲 𑀯𑀸 𑀧𑀦𑀸𑀢𑀺𑀆𑀤𑀺𑀓𑁂 𑀧𑀦 𑀤𑀼𑀢𑀺𑀬𑀧𑀜𑁆𑀳𑁂 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀬𑀲𑁆𑀲 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑀗𑁆𑀕𑀢𑁄 𑀧𑀭𑀪𑀸𑀕𑁂 𑀲𑀬𑀁 𑀯𑀸 𑀅𑀜𑁆𑀜𑀁 𑀯𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀫𑁂𑀲𑀁 𑀧𑀦 𑀧𑀜𑁆𑀳𑀸𑀦𑀁 𑀧𑀞𑀫𑁄 𑀧𑀜𑁆𑀳𑁄 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄, 𑀢𑀲𑁆𑀫𑀸 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁬𑁩) 𑀏𑀯𑀁 ¶ 𑀧𑀼𑀝𑁆𑀞𑁂𑀦 𑀲𑀢𑀸 𑀏𑀯𑀫𑀬𑀁 𑀧𑀜𑁆𑀳𑁄 𑀘 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀇𑀢𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀸’’𑀢𑀺 (𑀬𑀫. 𑁨.𑀘𑀺𑀢𑁆𑀢𑀬𑀫𑀓.𑁬𑁩). 𑀬𑁂𑀲𑀜𑁆𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀯𑀝𑁆𑀝𑀤𑀼𑀓𑁆𑀔𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀯𑀢𑁆𑀢𑀢𑀺, 𑀢𑁂𑀲𑀁 𑀢𑀤𑁂𑀯 𑀘𑀼𑀢𑀺𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺. 𑀉𑀧𑁆𑀧𑀸𑀤𑀧𑁆𑀧𑀢𑁆𑀢𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀪𑀗𑁆𑀕𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀪𑀗𑁆𑀕𑀁 𑀧𑀦 𑀧𑀢𑁆𑀯𑀸 𑀢𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀜𑁆𑀜𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀞𑀧𑁂𑀢𑁆𑀯𑀸 𑀧𑀦 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀔𑀻𑀡𑀸𑀲𑀯𑀁 𑀇𑀢𑀭𑁂𑀲𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀧𑁆𑀧𑀢𑁆𑀢𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀪𑀗𑁆𑀕𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀪𑀗𑁆𑀕𑀁 𑀧𑀦 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑁂𑀯, 𑀅𑀜𑁆𑀜𑀁 𑀧𑀦 𑀢𑀲𑁆𑀫𑀺𑀁 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘. 𑀤𑀼𑀢𑀺𑀬𑁄 𑀧𑀦 𑀧𑀜𑁆𑀳𑁄 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀬𑀫𑀺𑀢𑀢𑁆𑀢𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄, 𑀢𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀼𑀝𑁆𑀞𑁂𑀦 ‘‘𑀆𑀫𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀘𑀼𑀢𑀺𑀘𑀺𑀢𑁆𑀢𑀁 𑀪𑀗𑁆𑀕𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 ¶ 𑀦𑀸𑀫, 𑀢𑀢𑁄 𑀧𑀭𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸𑀬 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀪𑀗𑁆𑀕𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺 𑀘𑀸𑀢𑀺 𑀯𑀼𑀘𑁆𑀘𑀢𑀺.

𑀅𑀬𑀁 𑀧𑀦 𑀫𑀸𑀡𑀯𑁄 𑀏𑀯𑀫𑀺𑀫𑁂 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀯𑀺𑀖𑀸𑀢𑀁 𑀧𑀸𑀧𑀼𑀡𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀸𑀡𑀯𑁄 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀉𑀧𑀭𑀺𑀫𑀧𑀤𑁂 𑀯𑀸 𑀳𑁂𑀝𑁆𑀞𑀺𑀫𑀧𑀤𑀁, 𑀳𑁂𑀝𑁆𑀞𑀺𑀫𑀧𑀤𑁂 𑀯𑀸 𑀉𑀧𑀭𑀺𑀫𑀧𑀤𑀁 𑀅𑀢𑁆𑀣𑀢𑁄 𑀲𑀫𑀦𑁆𑀦𑀸𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀧𑀼𑀩𑁆𑀩𑁂𑀦𑀸𑀧𑀭𑀁 𑀬𑁄𑀚𑁂𑀢𑁆𑀯𑀸 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀢𑀸𑀯 𑀆𑀘𑀺𑀓𑁆𑀔𑀻𑀢𑀺 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂’’𑀢𑀺𑀆𑀤𑀺𑀓𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 ‘‘𑀫𑀦𑁆𑀢𑀲𑁆𑀲 𑀉𑀧𑀘𑀸𑀭𑁄 𑀅𑀬’’𑀦𑁆𑀢𑀺 𑀧𑀞𑀫𑀁 𑀆𑀘𑀺𑀓𑁆𑀔𑀺. 𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀲𑀫𑀸𑀤𑀺𑀦𑁆𑀦𑀲𑀻𑀮𑀢𑁄 𑀦𑀢𑁆𑀣𑀺 𑀧𑀭𑀺𑀳𑀸𑀦𑀻𑀢𑀺 𑀆𑀳 ‘‘𑀅𑀪𑀩𑁆𑀩𑁄 𑀤𑀸𑀦𑀺 𑀲𑀸𑀲𑀦𑀢𑁄 𑀦𑀺𑀯𑀢𑁆𑀢𑀺𑀢𑀼’’𑀦𑁆𑀢𑀺. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑀼𑀦𑁆𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀓𑀢𑀓𑀺𑀘𑁆𑀘𑀪𑀸𑀯𑀢𑁄𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀳𑀸𑀭𑀯𑀺𑀥𑀺𑀫𑁆𑀳𑀺 𑀙𑁂𑀓𑀪𑀸𑀯𑀢𑁆𑀣𑀁 ‘‘𑀉𑀧𑀚𑁆𑀛𑀸𑀬𑁄 𑀫𑀁 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀤𑀓𑀤𑀦𑁆𑀢𑀧𑁄𑀦𑀁 𑀉𑀧𑀝𑁆𑀞𑀸𑀧𑁂𑀲𑀻𑀢𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀉𑀤𑀓𑀜𑁆𑀘 𑀤𑀦𑁆𑀢𑀓𑀝𑁆𑀞𑀜𑁆𑀘 𑀧𑀝𑀺𑀬𑀸𑀤𑁂𑀢𑁆𑀯𑀸 𑀞𑀧𑁂𑀲𑀺. 𑀤𑀦𑁆𑀢𑁂 𑀧𑀼𑀦𑀦𑁆𑀢𑀺 𑀯𑀺𑀲𑁄𑀥𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀦𑁆𑀢𑀧𑁄𑀦𑀁 𑀯𑀼𑀘𑁆𑀘𑀢𑀺 𑀤𑀦𑁆𑀢𑀓𑀝𑁆𑀞𑀁. 𑀕𑀼𑀡𑀯𑀦𑁆𑀢𑀸𑀦𑀁 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀣𑁂𑀭𑁄 𑀲𑀸𑀫𑀡𑁂𑀭𑀲𑁆𑀲 𑀘 𑀔𑀦𑁆𑀢𑀺𑀯𑀻𑀭𑀺𑀬𑀉𑀧𑀝𑁆𑀞𑀸𑀦𑀸𑀤𑀺𑀕𑀼𑀡𑁂 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀁 𑀯𑀺𑀦𑀸𑀯 𑀅𑀪𑀺𑀜𑁆𑀜𑀸𑀬 𑀧𑀓𑀢𑀺𑀬𑀸 𑀯𑀻𑀫𑀁𑀲𑀫𑀸𑀦𑁄 𑀧𑀼𑀦 𑀲𑀫𑁆𑀫𑀚𑁆𑀚𑀦𑀸𑀤𑀺𑀁 𑀅𑀓𑀸𑀲𑀺. ‘‘𑀲𑀸𑀫𑀡𑁂𑀭𑀲𑁆𑀲 𑀘𑀺𑀢𑁆𑀢𑀤𑀫𑀦𑀢𑁆𑀣𑀁 𑀅𑀓𑀸𑀲𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀩𑀼𑀤𑁆𑀥𑀯𑀘𑀦𑀁 𑀧𑀝𑁆𑀞𑀧𑁂𑀲𑀻𑀢𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀁 𑀆𑀭𑀪𑀺. 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀦𑁆𑀢𑀺 𑀏𑀢𑁆𑀣 ‘‘𑀲𑀸𑀫𑀡𑁂𑀭𑀸𑀦𑀁 𑀯𑀺𑀦𑀬𑀧𑀭𑀺𑀬𑀸𑀧𑀼𑀡𑀦𑀁 𑀘𑀸𑀭𑀺𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀺𑀓𑁄𑀯 𑀲𑀫𑀸𑀦𑁄𑀢𑀺 𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀧𑀼𑀡𑁆𑀡𑀏𑀓𑀯𑀲𑁆𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀳𑀤𑀬𑁂 𑀧𑀢𑀺𑀝𑁆𑀞𑀸𑀧𑀺𑀢𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀯𑁄𑀳𑀸𑀭𑀯𑀲𑁂𑀦 𑀢𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀳𑀢𑁆𑀣𑁂 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺. 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀽𑀢𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑁂 𑀲𑀓𑀮𑀲𑀸𑀲𑀦𑀧𑀢𑀺𑀝𑁆𑀞𑀸𑀧𑀦𑁂𑀦 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀭𑁄𑀧𑀺𑀢𑀤𑀡𑁆𑀟𑀓𑀫𑁆𑀫𑀢𑁄 𑀫𑀼𑀢𑁆𑀢𑀸 𑀳𑀼𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼.

𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀭𑀜𑁆𑀜𑁄 𑀏𑀓𑀲𑀢𑀧𑀼𑀢𑁆𑀢𑀸𑀢𑀺 𑀏𑀢𑁆𑀣 𑀩𑀺𑀦𑁆𑀤𑀼𑀲𑀸𑀭𑁄 𑀦𑀸𑀫 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄. 𑀢𑀣𑀸 𑀳𑀺 𑀯𑀺𑀝𑀝𑀽𑀪𑀲𑀗𑁆𑀕𑀸𑀫𑁂 𑀓𑀧𑀺𑀮𑀯𑀢𑁆𑀣𑀼𑀢𑁄 𑀦𑀺𑀓𑁆𑀔𑀦𑁆𑀢𑀲𑀓𑁆𑀬𑀧𑀼𑀢𑁆𑀢𑁂𑀳𑀺 𑀫𑀸𑀧𑀺𑀢𑁂 𑀫𑁄𑀭𑀺𑀬𑀦𑀕𑀭𑁂 𑀔𑀢𑁆𑀢𑀺𑀬𑀓𑀼𑀮𑀲𑀫𑁆𑀪𑀯𑁄 𑀘𑀦𑁆𑀤𑀕𑀼𑀢𑁆𑀢𑀓𑀼𑀫𑀸𑀭𑁄 𑀧𑀸𑀝𑀮𑀺𑀧𑀼𑀢𑁆𑀢𑁂 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀩𑀺𑀦𑁆𑀤𑀼𑀲𑀸𑀭𑁄 ¶ 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀳𑀼𑀢𑁆𑀯𑀸 𑀏𑀓𑀲𑀢𑀧𑀼𑀢𑁆𑀢𑀓𑀸𑀦𑀁 𑀚𑀦𑀓𑁄 𑀅𑀳𑁄𑀲𑀺. 𑀏𑀓𑀲𑀢𑀦𑁆𑀢𑀺 𑀏𑀓𑀜𑁆𑀘 𑀲𑀢𑀜𑁆𑀘 𑀏𑀓𑀲𑀢𑀁, 𑀏𑀓𑁂𑀦𑀸𑀥𑀺𑀓𑀁 𑀲𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀸𑀯 𑀫𑀸𑀢𑀸 𑀅𑀲𑁆𑀲𑀸𑀢𑀺 𑀏𑀓𑀫𑀸𑀢𑀺𑀓𑀁, 𑀅𑀢𑁆𑀢𑀦𑀸 𑀲𑀳𑁄𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑀸𑀯 𑀏𑀓𑀭𑀚𑁆𑀚𑀁 𑀓𑀢𑀦𑁆𑀢𑀺 𑀆𑀳 ‘‘𑀅𑀦𑀪𑀺𑀲𑀺𑀢𑁆𑀢𑁄𑀯 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸’’𑀢𑀺. 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀦𑁆𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀸𑀥𑀺𑀧𑀘𑁆𑀘𑀯𑀲𑁂𑀦 𑀓𑀭𑀺𑀬𑀫𑀸𑀦𑀁 𑀅𑀪𑀺𑀲𑁂𑀓𑀁. 𑀧𑀼𑀜𑁆𑀜𑀧𑁆𑀧𑀪𑀸𑀯𑁂𑀦 𑀧𑀸𑀧𑀼𑀡𑀺𑀢𑀩𑁆𑀩𑀸𑀧𑀺 𑀭𑀸𑀚𑀺𑀤𑁆𑀥𑀺𑀬𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀕𑀢𑀸 𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 ¶ 𑀅𑀯𑀲𑁂𑀲𑀯𑀺𑀲𑁂𑀲𑀸 𑀯𑀺𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀪𑀽𑀢𑀸 𑀅𑀪𑀺𑀲𑁂𑀓𑀸𑀦𑀼𑀪𑀸𑀯𑁂𑀦𑁂𑀯 𑀆𑀕𑀢𑀸𑀢𑀺 𑀆𑀳 ‘‘𑀅𑀪𑀺𑀲𑁂𑀓𑀸𑀦𑀼𑀪𑀸𑀯𑁂𑀦 𑀘𑀲𑁆𑀲 𑀇𑀫𑀸 𑀭𑀸𑀚𑀺𑀤𑁆𑀥𑀺𑀬𑁄 𑀆𑀕𑀢𑀸’’𑀢𑀺.

𑀢𑀢𑁆𑀣 𑀭𑀸𑀚𑀺𑀤𑁆𑀥𑀺𑀬𑁄𑀢𑀺 𑀭𑀸𑀚𑀪𑀸𑀯𑀸𑀦𑀼𑀕𑀢𑀧𑁆𑀧𑀪𑀸𑀯𑀸. 𑀬𑀢𑁄𑀢𑀺 𑀬𑀢𑁄 𑀲𑁄𑀴𑀲𑀖𑀝𑀢𑁄. 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑁄. 𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀢𑀺 𑀢𑀲𑁆𑀲𑀸𑀯 𑀦𑀸𑀫𑀁. 𑀢𑀲𑁆𑀲𑀸 𑀓𑀺𑀭 𑀲𑀭𑀻𑀭𑁂 𑀲𑀦𑁆𑀥𑀬𑁄 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁𑀦𑀸𑀫𑀺𑀓𑀸 𑀚𑀸𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀤𑁂𑀯𑀢𑀸 𑀏𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀯𑀲𑀺𑀓𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂. 𑀅𑀕𑀤𑀸𑀫𑀮𑀓𑀦𑁆𑀢𑀺 𑀅𑀧𑁆𑀧𑀓𑁂𑀦𑁂𑀯 𑀲𑀭𑀻𑀭𑀲𑁄𑀥𑀦𑀸𑀤𑀺𑀲𑀫𑀢𑁆𑀣𑀁 𑀲𑀩𑁆𑀩𑀤𑁄𑀲𑀳𑀭𑀡𑀁 𑀑𑀲𑀥𑀸𑀫𑀮𑀓𑀁. 𑀅𑀕𑀤𑀳𑀭𑀻𑀢𑀓𑀫𑁆𑀧𑀺 𑀢𑀸𑀤𑀺𑀲𑀫𑁂𑀯 𑀳𑀭𑀻𑀢𑀓𑀁. 𑀢𑁂𑀲𑀼 𑀓𑀺𑀭 𑀤𑁆𑀯𑀻𑀲𑀼 𑀬𑀣𑀸𑀓𑀸𑀫𑀫𑁂𑀓𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀙𑀤𑁆𑀤𑀦𑁆𑀢𑀤𑀳𑀢𑁄𑀢𑀺 𑀙𑀤𑁆𑀤𑀦𑁆𑀢𑀤𑀳𑀲𑀫𑀻𑀧𑁂 𑀞𑀺𑀢𑀤𑁂𑀯𑀯𑀺𑀫𑀸𑀦𑀢𑁄 𑀓𑀧𑁆𑀧𑀭𑀼𑀓𑁆𑀔𑀢𑁄 𑀯𑀸. ‘‘𑀙𑀤𑁆𑀤𑀦𑁆𑀢𑀤𑀳𑁂 𑀢𑀸𑀤𑀺𑀲𑀸 𑀭𑀼𑀓𑁆𑀔𑀯𑀺𑀲𑁂𑀲𑀸 𑀲𑀦𑁆𑀢𑀺, 𑀢𑀢𑁄 𑀆𑀳𑀭𑀦𑁆𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀤𑀺𑀩𑁆𑀩𑀜𑁆𑀘 𑀧𑀸𑀦𑀓𑀦𑁆𑀢𑀺 𑀤𑀺𑀩𑁆𑀩𑀨𑀮𑀭𑀲𑀧𑀸𑀦𑀓𑀜𑁆𑀘. 𑀅𑀲𑀼𑀢𑁆𑀢𑀫𑀬𑀺𑀓𑀦𑁆𑀢𑀺 𑀓𑀧𑁆𑀧𑀭𑀼𑀓𑁆𑀔𑀢𑁄 𑀦𑀺𑀩𑁆𑀩𑀢𑁆𑀢𑀤𑀺𑀩𑁆𑀩𑀤𑀼𑀲𑁆𑀲𑀢𑁆𑀢𑀸 𑀲𑀼𑀢𑁆𑀢𑁂𑀳𑀺 𑀦 𑀓𑀢𑀦𑁆𑀢𑀺 𑀅𑀲𑀼𑀢𑁆𑀢𑀫𑀬𑀺𑀓𑀁. 𑀲𑀼𑀫𑀦𑀧𑀼𑀧𑁆𑀨𑀧𑀝𑀦𑁆𑀢𑀺 𑀲𑀩𑁆𑀩𑀢𑁆𑀣 𑀲𑀼𑀔𑀼𑀫𑀁 𑀳𑀼𑀢𑁆𑀯𑀸 𑀉𑀕𑁆𑀕𑀢𑀧𑀼𑀧𑁆𑀨𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀼𑀫𑀦𑀧𑀼𑀧𑁆𑀨𑀧𑀝𑀁 𑀦𑀸𑀫 𑀚𑀸𑀢𑀁. 𑀉𑀝𑁆𑀞𑀺𑀢𑀲𑁆𑀲 𑀲𑀸𑀮𑀺𑀦𑁄𑀢𑀺 𑀲𑀬𑀁𑀚𑀸𑀢𑀲𑀸𑀮𑀺𑀦𑁄. 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀜𑁆𑀘𑁂𑀢𑁆𑀣 𑀏𑀓𑀯𑀘𑀦𑀁, 𑀲𑀸𑀮𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀯 𑀯𑀸𑀳𑀲𑀳𑀲𑁆𑀲𑀸𑀦𑀻𑀢𑀺 𑀏𑀢𑁆𑀣 ‘‘𑀘𑀢𑀲𑁆𑀲𑁄 𑀫𑀼𑀝𑁆𑀞𑀺𑀬𑁄 𑀏𑀓𑁄 𑀓𑀼𑀟𑀼𑀯𑁄, 𑀘𑀢𑁆𑀢𑀸𑀭𑁄 𑀓𑀼𑀟𑀼𑀯𑀸 𑀏𑀓𑁄 𑀧𑀢𑁆𑀣𑁄, 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀏𑀓𑁄 𑀆𑀴𑁆𑀳𑀓𑁄, 𑀘𑀢𑁆𑀢𑀸𑀭𑁄 𑀆𑀴𑁆𑀳𑀓𑀸 𑀏𑀓𑀁 𑀤𑁄𑀡𑀁, 𑀘𑀢𑁆𑀢𑀸𑀭𑁄 𑀤𑁄𑀡𑀸 𑀏𑀓𑀫𑀸𑀦𑀺𑀓𑀸, 𑀘𑀢𑀲𑁆𑀲𑁄 𑀫𑀸𑀦𑀺𑀓𑀸 𑀏𑀓𑀔𑀸𑀭𑀻, 𑀯𑀻𑀲𑀢𑀺 𑀔𑀸𑀭𑀺𑀬𑁄 𑀏𑀓𑁄 𑀯𑀸𑀳𑁄, 𑀢𑀤𑁂𑀯 𑀏𑀓𑀁 𑀲𑀓𑀝’’𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀤𑀻𑀲𑀼 (𑀲𑀼. 𑀦𑀺. 𑀅𑀝𑁆𑀞. 𑁨.𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧𑁮𑁧; 𑀅. 𑀦𑀺. 𑁩.𑁧𑁦; 𑁮𑁯) 𑀯𑀼𑀢𑁆𑀢𑀁. 𑀇𑀥 𑀧𑀦 ‘‘𑀤𑁆𑀯𑁂 𑀲𑀓𑀝𑀸𑀦𑀺 𑀏𑀓𑁄 𑀯𑀸𑀳𑁄’’𑀢𑀺 𑀯𑀤𑀦𑁆𑀢𑀺. 𑀦𑀺𑀢𑁆𑀣𑀼𑀲𑀓𑀡𑁂 𑀓𑀭𑁄𑀦𑁆𑀢𑀻𑀢𑀺 𑀣𑀼𑀲𑀓𑀼𑀡𑁆𑀟𑀓𑀭𑀳𑀺𑀢𑁂 𑀓𑀭𑁄𑀦𑁆𑀢𑀺. 𑀫𑀥𑀼𑀁 𑀓𑀭𑁄𑀦𑁆𑀢𑀻𑀢𑀺 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑀝𑁆𑀞𑀸𑀦𑁂 𑀫𑀥𑀼𑀁 𑀓𑀭𑁄𑀦𑁆𑀢𑀺. 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀲𑀩𑁆𑀩𑀢𑁆𑀣 𑀩𑀮𑀺𑀓𑀫𑁆𑀫𑀓𑀸𑀭𑀓𑀸 𑀭𑀝𑁆𑀞𑀯𑀸𑀲𑀺𑀦𑁄 𑀯𑀺𑀬 𑀫𑀥𑀼𑀭𑀲𑀭𑀁 𑀯𑀺𑀓𑀽𑀚𑀦𑁆𑀢𑀸 𑀩𑀮𑀺𑀁 𑀓𑀭𑁄𑀦𑁆𑀢𑀺. ‘‘𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀲𑀤𑁆𑀤𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀸𑀬𑁂𑀯 𑀩𑀦𑁆𑀥𑀦𑀁 𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁. 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀦𑁆𑀢𑀺 𑀓𑀓𑀼𑀲𑀦𑁆𑀥𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁. 𑀅𑀥𑀺𑀕𑀢𑀭𑀽𑀧𑀤𑀲𑁆𑀲𑀦𑀦𑁆𑀢𑀺 𑀧𑀝𑀺𑀮𑀤𑁆𑀥𑀭𑀽𑀧𑀤𑀲𑁆𑀲𑀦𑀁. 𑀅𑀬𑀁 𑀓𑀺𑀭 𑀓𑀧𑁆𑀧𑀸𑀬𑀼𑀓𑀢𑁆𑀢𑀸 𑀘𑀢𑀼𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 ¶ 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀓𑁆𑀔𑀢𑁄 𑀅𑀤𑁆𑀤𑀓𑁆𑀔𑀺. 𑀓𑀸𑀴𑀁 𑀦𑀸𑀫 ¶ 𑀦𑀸𑀕𑀭𑀸𑀚𑀸𑀦𑀁 𑀆𑀦𑀬𑀺𑀢𑁆𑀯𑀸𑀢𑀺 𑀏𑀢𑁆𑀣 𑀲𑁄 𑀧𑀦 𑀦𑀸𑀕𑀭𑀸𑀚𑀸 𑀕𑀗𑁆𑀕𑀸𑀬𑀁 𑀦𑀺𑀓𑁆𑀔𑀺𑀢𑁆𑀢𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀸𑀬 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂𑀲𑀼 𑀧𑀢𑀺𑀢𑀲𑀜𑁆𑀜𑀸𑀬 𑀆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀦𑀼 𑀘 𑀅𑀲𑁄𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸 𑀳𑁂𑀝𑁆𑀞𑀸 𑀬𑁄𑀚𑀦𑀢𑁄 𑀉𑀧𑀭𑀺 𑀧𑀯𑀢𑁆𑀢𑀢𑀺, 𑀇𑀫𑀲𑁆𑀲 𑀘 𑀯𑀺𑀫𑀸𑀦𑀁 𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀫𑀸 𑀓𑀣𑀁 𑀅𑀬𑀁 𑀦𑀸𑀕𑀭𑀸𑀚𑀸 𑀭𑀜𑁆𑀜𑁄 𑀆𑀡𑀸𑀬 𑀆𑀕𑀢𑁄𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑀢𑁄 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀁, 𑀢𑀣𑀸𑀧𑀺 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂𑀦 𑀲𑀳 𑀏𑀓𑀸𑀩𑀤𑁆𑀥𑀢𑀸𑀬 𑀢𑀲𑁆𑀲 𑀆𑀡𑀁 𑀅𑀓𑀸𑀲𑀺. 𑀬𑀣𑀸 𑀳𑀺 𑀭𑀚𑁆𑀚𑀲𑀻𑀫𑀦𑁆𑀢𑀭𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀢𑁂𑀳𑀺 𑀢𑁂𑀳𑀺 𑀭𑀸𑀚𑀽𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸 𑀢𑁂𑀲𑀁 𑀢𑁂𑀲𑀁 𑀆𑀡𑀸𑀬 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀯𑀤𑀦𑁆𑀢𑀺.

𑀆𑀧𑀸𑀣𑀁 𑀓𑀭𑁄𑀳𑀻𑀢𑀺 𑀲𑀫𑁆𑀫𑀼𑀔𑀁 𑀓𑀭𑁄𑀳𑀺, 𑀕𑁄𑀘𑀭𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀦𑀺𑀫𑁆𑀫𑀺𑀢𑀁 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀻𑀤𑀺𑀲𑀁 𑀢𑀁 𑀩𑀼𑀤𑁆𑀥𑀭𑀽𑀧𑀦𑁆𑀢𑀺 𑀆𑀳 ‘‘𑀲𑀓𑀮𑀲𑀭𑀻𑀭𑀯𑀺𑀧𑁆𑀧𑀓𑀺𑀡𑁆𑀡𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀜𑁆𑀜𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀕𑁆𑀕𑀳𑀡𑀁 𑀢𑁂𑀦 𑀦𑀺𑀫𑁆𑀫𑀺𑀢𑀸𑀦𑀫𑁆𑀧𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀪𑀕𑀯𑀢𑁄 𑀧𑀼𑀜𑁆𑀜𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀸𑀤𑀻𑀳𑀺 𑀲𑀤𑀺𑀲𑀢𑁆𑀢𑀸 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑁂𑀦 𑀢𑀤𑀸 𑀦𑀺𑀫𑁆𑀫𑀺𑀢𑀁 𑀅𑀦𑁂𑀓𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀩𑀼𑀤𑁆𑀥𑀭𑀽𑀧𑀁 𑀪𑀕𑀯𑀢𑁄 𑀧𑀼𑀜𑁆𑀜𑀧𑁆𑀧𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀁 𑀢𑀫𑁆𑀩𑀦𑀔𑀢𑀼𑀗𑁆𑀕𑀦𑀸𑀲𑀸𑀤𑀺. 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀤𑀺. 𑀯𑀺𑀓𑀲𑀺𑀢…𑀧𑁂… 𑀲𑀮𑀺𑀮𑀢𑀮𑀦𑁆𑀢𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀯𑀺𑀓𑀲𑀺𑀢𑁂𑀳𑀺 𑀯𑀺𑀓𑀸𑀲𑀫𑀼𑀧𑀕𑀢𑁂𑀳𑀺 𑀓𑀁 𑀅𑀮𑀗𑁆𑀓𑀭𑁄𑀢𑀻𑀢𑀺 ‘‘𑀓𑀫𑀮’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀭𑀢𑁆𑀢𑀧𑀤𑀼𑀫𑁂𑀳𑀺 𑀦𑀻𑀮𑀼𑀧𑁆𑀧𑀮𑀸𑀤𑀺𑀪𑁂𑀤𑁂𑀳𑀺 𑀉𑀧𑁆𑀧𑀮𑁂𑀳𑀺 𑀘𑁂𑀯 𑀲𑁂𑀢𑀧𑀤𑀼𑀫𑀲𑀗𑁆𑀔𑀸𑀢𑁂𑀳𑀺 𑀧𑀼𑀡𑁆𑀟𑀭𑀻𑀓𑁂𑀳𑀺 𑀘 𑀧𑀝𑀺𑀫𑀡𑁆𑀟𑀺𑀢𑀁 𑀲𑀫𑀦𑁆𑀢𑀢𑁄 𑀲𑀚𑁆𑀚𑀺𑀢𑀁 𑀚𑀮𑀢𑀮𑀫𑀺𑀯. 𑀢𑀸𑀭𑀸𑀕𑀡…𑀧𑁂… 𑀕𑀕𑀦𑀢𑀮𑀦𑁆𑀢𑀺 𑀲𑀩𑁆𑀩𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀕𑀡𑀲𑁆𑀲 𑀭𑀲𑁆𑀫𑀺𑀚𑀸𑀮𑀯𑀺𑀲𑀤𑁂𑀳𑀺 𑀯𑀺𑀧𑁆𑀨𑀼𑀭𑀺𑀢𑀸𑀬 𑀪𑀸𑀲𑀫𑀸𑀦𑀸𑀬 𑀲𑁄𑀪𑀸𑀬 𑀓𑀦𑁆𑀢𑀺𑀬𑀸 𑀲𑀫𑀼𑀚𑁆𑀚𑀮𑀁 𑀲𑀫𑁆𑀫𑀸 𑀪𑀸𑀲𑀫𑀸𑀦𑀁 𑀕𑀕𑀦𑀢𑀮𑀫𑀺𑀯 𑀆𑀓𑀸𑀲𑀢𑀮𑀫𑀺𑀯. 𑀲𑀜𑁆𑀛𑀸𑀧𑁆𑀧𑀪𑀸…𑀧𑁂… 𑀓𑀦𑀓𑀕𑀺𑀭𑀺𑀲𑀺𑀔𑀭𑀦𑁆𑀢𑀺 𑀲𑀜𑁆𑀛𑀸𑀓𑀸𑀮𑀲𑀜𑁆𑀚𑀸𑀢𑀧𑁆𑀧𑀪𑀸𑀦𑀼𑀭𑀸𑀕𑁂𑀳𑀺 𑀇𑀦𑁆𑀤𑀘𑀸𑀧𑁂𑀳𑀺 𑀯𑀺𑀚𑁆𑀚𑀼𑀮𑀢𑀸𑀳𑀺 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑀺𑀢𑀁 𑀓𑀦𑀓𑀕𑀺𑀭𑀺𑀲𑀺𑀔𑀭𑀫𑀺𑀯 𑀲𑀼𑀯𑀡𑁆𑀡𑀧𑀩𑁆𑀩𑀢𑀓𑀽𑀝𑀫𑀺𑀯. 𑀯𑀺𑀫𑀮𑀓𑁂𑀢𑀼𑀫𑀸𑀮𑀸𑀢𑀺 𑀏𑀢𑁆𑀣 ‘‘𑀓𑁂𑀢𑀼𑀫𑀸𑀮𑀸 𑀦𑀸𑀫 𑀲𑀻𑀲𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀭𑀺 𑀫𑀼𑀤𑁆𑀥𑀦𑀺 𑀧𑀼𑀜𑁆𑀚𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀭𑀲𑁆𑀫𑀺𑀭𑀸𑀲𑀻’’𑀢𑀺 𑀯𑀤𑀦𑁆𑀢𑀺. ‘‘𑀫𑀼𑀤𑁆𑀥𑀦𑀺 𑀫𑀚𑁆𑀛𑁂 𑀧𑀜𑁆𑀜𑀸𑀬𑀫𑀸𑀦𑁄 𑀉𑀦𑁆𑀦𑀢𑀧𑁆𑀧𑀤𑁂𑀲𑁄𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀅𑀲𑁄𑀓𑁄 ¶ 𑀥𑀫𑁆𑀫𑀭𑀸𑀚𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀳𑀼𑀢𑁆𑀯𑀸 𑀬𑀣𑀸𑀞𑀺𑀢𑁄𑀯 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀲𑀸𑀤𑀲𑁄𑀫𑁆𑀫𑁂𑀳𑀺 𑀘𑀓𑁆𑀔𑀽𑀳𑀺 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀭𑀽𑀧𑀫𑁂𑀯 𑀑𑀮𑁄𑀓𑁂𑀲𑀺, 𑀢𑀲𑁆𑀫𑀸 𑀅𑀓𑁆𑀔𑀻𑀳𑀺 𑀧𑀽𑀚𑀸 𑀓𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀓𑁆𑀔𑀺𑀧𑀽𑀚𑀁 𑀦𑀸𑀫 𑀅𑀓𑀸𑀲𑀻’’𑀢𑀺. 𑀅𑀣 𑀯𑀸 𑀘𑀓𑁆𑀔𑀽𑀦𑀁 𑀢𑀸𑀤𑀺𑀲𑀲𑁆𑀲 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀧𑀦𑁂𑀦 𑀅𑀓𑁆𑀔𑀻𑀦𑀁 𑀧𑀽𑀚𑀸 𑀓𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀓𑁆𑀔𑀺𑀧𑀽𑀚𑀁 𑀦𑀸𑀫 𑀅𑀓𑀸𑀲𑀻’’𑀢𑀺.

𑀇𑀤𑁆𑀥𑀺𑀯𑀺𑀪𑀸𑀯𑀦𑀸𑀥𑀺𑀓𑀸𑀭𑀧𑁆𑀧𑀲𑀗𑁆𑀕𑁂𑀦 ¶ 𑀘𑁂𑀢𑀁 𑀯𑀢𑁆𑀣𑀼 𑀯𑀼𑀢𑁆𑀢𑀁, 𑀦𑀸𑀦𑀼𑀓𑁆𑀓𑀫𑁂𑀦. 𑀅𑀬𑀜𑁆𑀳𑁂𑀢𑁆𑀣 𑀅𑀦𑀼𑀓𑁆𑀓𑀫𑁄 𑁋 𑀅𑀲𑁄𑀓𑁄 𑀓𑀺𑀭 𑀫𑀳𑀸𑀭𑀸𑀚𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸𑀦𑀼𑀓𑁆𑀓𑀫𑁂𑀦 𑀲𑀻𑀳𑀧𑀜𑁆𑀚𑀭𑁂𑀦 𑀑𑀮𑁄𑀓𑁂𑀦𑁆𑀢𑁄 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀁 𑀦𑀸𑀕𑀭𑀚𑀦𑀦𑀬𑀦𑀸𑀦𑀺 𑀆𑀓𑀟𑁆𑀠𑀦𑁆𑀢𑀁 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑀁 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀲𑀜𑁆𑀚𑀸𑀢𑀧𑁂𑀫𑁄 𑀲𑀩𑀳𑀼𑀫𑀸𑀦𑁄 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀲𑀻𑀳𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀘𑀦𑀸𑀤𑀸𑀲𑁂 𑀤𑀺𑀲𑁆𑀲𑀫𑀸𑀦𑀁 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀸𑀬𑀁 𑀤𑀺𑀲𑁆𑀯𑀸 𑀭𑀢𑀦𑀢𑁆𑀢𑀬𑁂 𑀧𑀲𑀻𑀤𑀺𑀢𑁆𑀯𑀸 𑀲𑀧𑀭𑀺𑀲𑁄 𑀲𑀭𑀡𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀢𑀢𑁄 𑀧𑀝𑁆𑀞𑀸𑀬 𑀅𑀪𑀺𑀯𑀟𑁆𑀠𑀫𑀸𑀦𑀲𑀤𑁆𑀥𑁄 𑀧𑀼𑀩𑁆𑀩𑁂 𑀪𑁄𑀚𑀺𑀬𑀫𑀸𑀦𑀸𑀦𑀺 𑀢𑀺𑀢𑁆𑀣𑀺𑀬𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀲𑀼𑀯𑀓𑀸𑀳𑀢𑀲𑀸𑀮𑀺𑀲𑀫𑁆𑀧𑀸𑀤𑀺𑀢𑀪𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀤𑁂𑀯𑀢𑁄𑀧𑀦𑀻𑀢𑀁 𑀅𑀦𑁄𑀢𑀢𑁆𑀢𑀲𑀮𑀺𑀮𑀁 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀜𑁆𑀘 𑀉𑀧𑀦𑀸𑀫𑁂𑀢𑁆𑀯𑀸 𑀦𑀺𑀘𑁆𑀘𑀲𑀗𑁆𑀖𑀼𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀏𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀴𑀁 𑀦𑀸𑀕𑀭𑀸𑀚𑀸𑀦𑀁 𑀆𑀦𑀬𑀺𑀢𑁆𑀯𑀸 𑀢𑁂𑀦 𑀦𑀺𑀫𑁆𑀫𑀺𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀺𑀭𑀻𑀲𑁄𑀪𑀕𑁆𑀕𑀲𑀫𑁆𑀧𑀦𑁆𑀦𑀁 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀤𑀻𑀖𑀧𑀼𑀣𑀼𑀮𑀦𑀺𑀘𑁆𑀘𑀮𑀦𑀬𑀦𑀧𑁆𑀧𑀪𑀸𑀳𑀺 𑀲𑀢𑁆𑀢𑀸𑀳𑀁 𑀅𑀓𑁆𑀔𑀺𑀧𑀽𑀚𑀫𑀓𑀸𑀲𑀺.

𑀇𑀤𑀸𑀦𑀺 𑀧𑀦 𑀬𑀣𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑀲𑁆𑀲 𑀲𑀸𑀲𑀦𑀸𑀯𑀢𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀸 𑀓𑀺𑀭 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺𑀢𑁆𑀯𑀸’’𑀢𑀺𑀆𑀤𑀺. 𑀩𑀸𑀳𑀺𑀭𑀓𑀧𑀸𑀲𑀡𑁆𑀟𑀦𑁆𑀢𑀺 𑀩𑀸𑀳𑀺𑀭𑀓𑀧𑁆𑀧𑀯𑁂𑀤𑀺𑀢𑀁 𑀲𑀫𑀬𑀯𑀸𑀤𑀁. 𑀩𑀸𑀳𑀺𑀭𑀓𑀧𑁆𑀧𑀯𑁂𑀤𑀺𑀢𑀸 𑀳𑀺 𑀲𑀫𑀬𑀯𑀸𑀤𑀸 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀧𑀸𑀲𑀁 𑀤𑀺𑀝𑁆𑀞𑀺𑀧𑀸𑀲𑀜𑁆𑀘 𑀟𑁂𑀦𑁆𑀢𑀺 𑀑𑀟𑁆𑀟𑁂𑀦𑁆𑀢𑀻𑀢𑀺 ‘‘𑀧𑀸𑀲𑀡𑁆𑀟𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀺𑀕𑁆𑀕𑀡𑁆𑀳𑀻𑀢𑀺 𑀯𑀻𑀫𑀁𑀲𑀫𑀸𑀦𑁄 𑀧𑀭𑀺𑀕𑁆𑀕𑀳𑁂𑀲𑀺. 𑀩𑀺𑀦𑁆𑀤𑀼𑀲𑀸𑀭𑁄 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀻𑀢𑀺 𑀅𑀢𑁆𑀢𑀦𑁄 𑀧𑀺𑀢𑀼 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑁂𑀲𑀼 𑀲𑀫𑁆𑀪𑀢𑁆𑀢𑁄 𑀅𑀳𑁄𑀲𑀺. 𑀘𑀦𑁆𑀤𑀓𑁂𑀦 𑀦𑀸𑀫 𑀓𑀺𑀭 𑀩𑁆𑀭𑀸𑀳𑁆𑀫𑀡𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁄 𑀘𑀦𑁆𑀤𑀕𑀼𑀢𑁆𑀢𑀓𑀼𑀫𑀸𑀭𑁄 𑀢𑁂𑀦 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀫𑀓𑀸𑀲𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑁂 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑀯𑀲𑁂𑀦 𑀘𑀦𑁆𑀤𑀕𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸 𑀢𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 ¶ 𑀦𑀺𑀘𑁆𑀘𑀪𑀢𑁆𑀢𑀺𑀓𑀸 𑀅𑀳𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀪𑀸𑀯𑀫𑀦𑀼𑀧𑀕𑀢𑁂 𑀤𑀲𑁆𑀲𑁂𑀢𑀺. 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀯𑀦𑁆𑀢𑁄𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀧𑀸𑀲𑀡𑁆𑀟𑀸𑀦’’𑀦𑁆𑀢𑀺. 𑀏𑀢𑁆𑀣 𑀧𑀦 𑀤𑀺𑀝𑁆𑀞𑀺𑀧𑀸𑀲𑀸𑀤𑀻𑀦𑀁 𑀑𑀟𑁆𑀟𑀦𑀢𑁄 𑀧𑀡𑁆𑀟𑀭𑀗𑁆𑀕𑀸𑀤𑀬𑁄𑀯 ‘‘𑀧𑀸𑀲𑀡𑁆𑀟𑀸’’𑀢𑀺 𑀯𑀼𑀢𑁆𑀢𑀸. 𑀲𑀻𑀳𑀧𑀜𑁆𑀚𑀭𑁂𑀢𑀺 𑀫𑀳𑀸𑀯𑀸𑀢𑀧𑀸𑀦𑁂. 𑀉𑀧𑀲𑀫𑀧𑀭𑀺𑀩𑀸𑀳𑀺𑀭𑁂𑀦𑀸𑀢𑀺 𑀉𑀧𑀲𑀫𑀢𑁄 𑀧𑀭𑀺𑀩𑀸𑀳𑀺𑀭𑁂𑀦, 𑀉𑀧𑀲𑀫𑀭𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀣𑀸𑀢𑀺 𑀅𑀦𑁆𑀢𑁂𑀧𑀼𑀭𑀁 𑀧𑀯𑁂𑀲𑁂𑀣, 𑀆𑀦𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀫𑀸 𑀲𑀳 𑀪𑀯𑀦𑁆𑀢𑀺 𑀓𑀺𑀘𑁆𑀘𑁂𑀲𑀽𑀢𑀺 𑀅𑀫𑀘𑁆𑀘𑀸, 𑀭𑀚𑁆𑀚𑀓𑀺𑀘𑁆𑀘𑀯𑁄𑀲𑀸𑀧𑀦𑀓𑀸. 𑀤𑁂𑀯𑀸𑀢𑀺 𑀭𑀸𑀚𑀸𑀦𑀁 𑀆𑀮𑀧𑀦𑁆𑀢𑀺. 𑀭𑀸𑀚𑀸𑀦𑁄 𑀳𑀺 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑁂𑀳𑀺 𑀓𑀻𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀇𑀲𑁆𑀲𑀭𑀺𑀬𑀞𑀸𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑀳𑀡𑀁 𑀢𑀁 𑀢𑀁 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀯𑀸 𑀓𑀭𑁄𑀦𑁆𑀢𑀺 𑀯𑁄𑀳𑀭𑀦𑁆𑀢𑀺, 𑀧𑀼𑀜𑁆𑀜𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑀦𑁆𑀢𑀻𑀢𑀺 𑀯𑀸 ‘‘𑀤𑁂𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 ¶ . 𑀢𑀣𑀸 𑀳𑀺 𑀢𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀭𑀜𑁆𑀚𑁂𑀦𑁆𑀢𑀸 𑀲𑀬𑀁 𑀬𑀣𑀸𑀯𑀼𑀢𑁆𑀢𑁂𑀳𑀺 𑀯𑀺𑀲𑁂𑀲𑁂𑀳𑀺 𑀭𑀸𑀚𑀦𑁆𑀢𑀺 𑀤𑀺𑀧𑁆𑀧𑀦𑁆𑀢𑀺 𑀲𑁄𑀪𑀦𑁆𑀢𑀻𑀢𑀺 ‘‘𑀭𑀸𑀚𑀸𑀦𑁄’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀦𑀺𑀕𑀡𑁆𑀞𑀸𑀤𑀬𑁄𑀢𑀺 𑀏𑀢𑁆𑀣 𑀦𑀺𑀕𑀡𑁆𑀞𑁄 𑀦𑀸𑀫 ‘‘𑀅𑀫𑁆𑀳𑀸𑀓𑀁 𑀕𑀡𑁆𑀞𑀦𑀓𑀺𑀮𑁂𑀲𑁄 𑀲𑀁𑀲𑀸𑀭𑁂 𑀧𑀮𑀺𑀩𑀼𑀤𑁆𑀥𑀦𑀓𑀺𑀘𑁆𑀘𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀺𑀲𑀬𑁄 𑀦𑀢𑁆𑀣𑀺, 𑀓𑀺𑀮𑁂𑀲𑀕𑀡𑁆𑀞𑀺𑀭𑀳𑀺𑀢𑀸 𑀫𑀬’’𑀦𑁆𑀢𑀺 𑀏𑀯𑀁 𑀯𑀸𑀤𑀺𑀢𑀸𑀬 ‘‘𑀦𑀺𑀕𑀡𑁆𑀞𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀢𑀺𑀢𑁆𑀣𑀺𑀬𑀸.

𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀉𑀘𑁆𑀘𑀸𑀦𑀺 𑀘 𑀅𑀯𑀘𑀸𑀦𑀺 𑀘, 𑀫𑀳𑀦𑁆𑀢𑀸𑀦𑀺 𑀘𑁂𑀯 𑀔𑀼𑀤𑁆𑀤𑀓𑀸𑀦𑀺 𑀘, 𑀅𑀣 𑀯𑀸 𑀯𑀺𑀲𑀺𑀝𑁆𑀞𑀸𑀦𑀺 𑀘𑁂𑀯 𑀮𑀸𑀫𑀓𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀪𑀤𑁆𑀤𑀧𑀻𑀞𑀓𑁂𑀲𑀽𑀢𑀺 𑀯𑁂𑀢𑁆𑀢𑀫𑀬𑀧𑀻𑀞𑁂𑀲𑀼. 𑀲𑀸𑀭𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑁄. 𑀭𑀸𑀚𑀗𑁆𑀕𑀡𑁂𑀦𑀸𑀢𑀺 𑀭𑀸𑀚𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀯𑀺𑀯𑀝𑁂𑀦 𑀪𑀽𑀫𑀺𑀧𑁆𑀧𑀤𑁂𑀲𑁂𑀦. 𑀅𑀗𑁆𑀕𑀡𑀦𑁆𑀢𑀺 𑀳𑀺 𑀓𑀢𑁆𑀣𑀘𑀺 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀭𑀸𑀕𑁄 𑀅𑀗𑁆𑀕𑀡’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁯𑁨𑁪). 𑀭𑀸𑀕𑀸𑀤𑀬𑁄 𑀳𑀺 𑀅𑀗𑁆𑀕𑀦𑁆𑀢𑀺 𑀏𑀢𑁂𑀳𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀸 𑀦𑀺𑀳𑀻𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀗𑁆𑀕𑀡𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑁆𑀣𑀘𑀺 𑀫𑀮𑀁 𑀯𑀸 𑀧𑀗𑁆𑀓𑁄 𑀯𑀸 ‘‘𑀢𑀲𑁆𑀲𑁂𑀯 𑀭𑀚𑀲𑁆𑀲 𑀯𑀸 𑀅𑀗𑁆𑀕𑀡𑀲𑁆𑀲 𑀯𑀸 𑀧𑀳𑀸𑀦𑀸𑀬 𑀯𑀸𑀬𑀫𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁮𑁪). 𑀅𑀜𑁆𑀚𑀢𑀺 𑀲𑀫𑁆𑀫𑀓𑁆𑀔𑁂𑀢𑀻𑀢𑀺 𑀳𑀺 𑀅𑀗𑁆𑀕𑀡𑀁, 𑀫𑀮𑀸𑀤𑀺. 𑀓𑀢𑁆𑀣𑀘𑀺 𑀢𑀣𑀸𑀭𑀽𑀧𑁄 𑀯𑀺𑀯𑀝𑀧𑁆𑀧𑀤𑁂𑀲𑁄 ‘‘𑀘𑁂𑀢𑀺𑀬𑀗𑁆𑀕𑀡𑀁 𑀩𑁄𑀥𑀺𑀬𑀗𑁆𑀕𑀡’’𑀦𑁆𑀢𑀺𑀆𑀤𑀻𑀲𑀼. 𑀅𑀜𑁆𑀚𑀢𑀺 𑀢𑀢𑁆𑀣 𑀞𑀺𑀢𑀁 𑀅𑀢𑀺𑀲𑀼𑀦𑁆𑀤𑀭𑀢𑀸𑀬 𑀅𑀪𑀺𑀩𑁆𑀬𑀜𑁆𑀚𑁂𑀢𑀻𑀢𑀺 𑀳𑀺 𑀅𑀗𑁆𑀕𑀡𑀁, 𑀯𑀺𑀯𑀝𑁄 𑀪𑀽𑀫𑀺𑀧𑁆𑀧𑀤𑁂𑀲𑁄. 𑀇𑀥𑀸𑀧𑀺 𑀲𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀤𑀦𑁆𑀢𑀦𑁆𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑀯𑀺𑀧𑁆𑀨𑀦𑁆𑀤𑀭𑀳𑀺𑀢𑀘𑀺𑀢𑁆𑀢𑀢𑀸𑀬 𑀤𑀦𑁆𑀢𑀁, 𑀦𑀺𑀘𑁆𑀘𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀲𑀢𑀸𑀭𑀓𑁆𑀔𑀢𑀸𑀬 𑀕𑀼𑀢𑁆𑀢𑀁, 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀁 ¶ 𑀲𑀦𑁆𑀢𑀢𑀸𑀬 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁, 𑀧𑀸𑀲𑀸𑀤𑀺𑀓𑁂𑀦 𑀇𑀭𑀺𑀬𑀸𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑁆𑀧𑀦𑁆𑀦𑀇𑀭𑀺𑀬𑀸𑀧𑀣𑀁. 𑀇𑀤𑀸𑀦𑀺 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀆𑀳 ‘‘𑀓𑁄 𑀧𑀦𑀸𑀬𑀁 𑀦𑀺𑀕𑁆𑀭𑁄𑀥𑁄 𑀦𑀸𑀫𑀸’’𑀢𑀺𑀆𑀤𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀢𑀺 𑀏𑀢𑁆𑀣 𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀓𑀺𑀭 𑀏𑀓𑀲𑀢𑀧𑀼𑀢𑁆𑀢𑁂𑀲𑀼 𑀫𑁄𑀭𑀺𑀬𑀯𑀁𑀲𑀚𑀸𑀬 𑀥𑀫𑁆𑀫𑀤𑁂𑀯𑀺𑀬𑀸 𑀅𑀲𑁄𑀓𑀢𑀺𑀲𑁆𑀲𑀦𑀸𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀢𑁆𑀢𑀸𑀦𑀁 𑀫𑀚𑁆𑀛𑁂 𑀚𑁂𑀝𑁆𑀞𑁄 𑀅𑀲𑁄𑀓𑀓𑀼𑀫𑀸𑀭𑁄 𑀅𑀯𑀦𑁆𑀢𑀺𑀭𑀝𑁆𑀞𑀁 𑀪𑀼𑀜𑁆𑀚𑀢𑀺. 𑀧𑀺𑀢𑀭𑀸 𑀧𑁂𑀲𑀺𑀢𑁄 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀫𑀢𑁆𑀣𑀓𑁂 𑀯𑀺𑀝𑀝𑀽𑀪𑀪𑀬𑀸𑀕𑀢𑀸𑀦𑀁 𑀲𑀸𑀓𑀺𑀬𑀸𑀦𑀫𑀸𑀯𑀸𑀲𑀁 𑀯𑁂𑀝𑀺𑀲𑀁 𑀦𑀸𑀫 𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀯𑁂𑀝𑀺𑀲𑀁 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀭𑀁 𑀆𑀤𑀸𑀬 𑀉𑀚𑁆𑀚𑁂𑀦𑀻𑀭𑀸𑀚𑀥𑀸𑀦𑀺𑀬𑀁 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀫𑀳𑀺𑀦𑁆𑀤𑀁 𑀦𑀸𑀫 𑀓𑀼𑀫𑀸𑀭𑀁 𑀲𑀗𑁆𑀖𑀫𑀺𑀢𑁆𑀢𑀜𑁆𑀘 𑀓𑀼𑀫𑀸𑀭𑀺𑀓𑀁 𑀮𑀪𑀺𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀭𑀚𑁆𑀚𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀧𑀺𑀢𑀼𑀦𑁄 𑀕𑀺𑀮𑀸𑀦𑀪𑀸𑀯𑀁 𑀲𑀼𑀢𑁆𑀯𑀸 𑀉𑀚𑁆𑀚𑁂𑀦𑀺𑀁 𑀧𑀳𑀸𑀬 𑀲𑀻𑀖𑀁 𑀧𑀸𑀝𑀮𑀺𑀧𑀼𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀧𑀺𑀢𑀼 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀬𑀼𑀯𑀭𑀸𑀚𑀸 𑀲𑀼𑀫𑀦𑀸𑀪𑀺𑀥𑀸𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀫𑀭𑀡𑀁 𑀯𑀸 𑀳𑁄𑀢𑀼 𑀭𑀚𑁆𑀚𑀁 𑀯𑀸’’𑀢𑀺 𑀅𑀝𑁆𑀞𑀦𑀯𑀼𑀢𑀺𑀪𑀸𑀢𑀺𑀓𑀧𑀭𑀺𑀯𑀼𑀢𑁄 𑀲𑀁𑀯𑀝𑁆𑀝𑀲𑀸𑀕𑀭𑁂 𑀚𑀮𑀢𑀭𑀗𑁆𑀕𑀲𑀗𑁆𑀖𑀸𑀢𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀉𑀧𑀕𑀘𑁆𑀙𑀢𑀺. 𑀢𑀢𑁄 𑀅𑀲𑁄𑀓𑁄 𑀉𑀚𑁆𑀚𑁂𑀦𑀻𑀭𑀸𑀚𑀸 𑀲𑀗𑁆𑀕𑀸𑀫𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀼𑀫𑀤𑁆𑀤𑀦𑀁 𑀓𑀭𑁄𑀦𑁆𑀢𑁄 𑀲𑀼𑀫𑀦𑀁 𑀦𑀸𑀫 𑀭𑀸𑀚𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀖𑀸𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀓𑀺𑀭 𑀤𑀼𑀩𑁆𑀩𑀮𑀓𑀸𑀮𑁂𑀬𑁂𑀯 𑀅𑀲𑁄𑀓𑀓𑀼𑀫𑀸𑀭𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀉𑀚𑁆𑀚𑁂𑀦𑀻𑀭𑀚𑁆𑀚𑀁 ¶ 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀦𑀕𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀲𑀼𑀫𑀦𑀁 𑀦𑀸𑀫 𑀭𑀸𑀚𑀓𑀼𑀫𑀸𑀭𑀁 𑀅𑀕𑁆𑀕𑀳𑁂𑀲𑀻’’𑀢𑀺.

𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸𑀢𑀺 𑀧𑀭𑀺𑀧𑀓𑁆𑀓𑀕𑀩𑁆𑀪𑀸. 𑀏𑀓𑀁 𑀲𑀸𑀮𑀦𑁆𑀢𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀁 𑀏𑀓𑀁 𑀧𑀸𑀲𑀸𑀤𑀁. ‘‘𑀤𑁂𑀯𑀢𑀸𑀬 𑀧𑀦 𑀆𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀧𑀸𑀲𑀸𑀤𑁂 𑀫𑀳𑀸𑀚𑀦𑁂𑀦 𑀅𑀤𑀺𑀲𑁆𑀲𑀫𑀸𑀦𑀸 𑀳𑀼𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀻’’𑀢𑀺 𑀯𑀤𑀦𑁆𑀢𑀺. 𑀦𑀺𑀩𑀤𑁆𑀥𑀯𑀢𑁆𑀢𑀦𑁆𑀢𑀺 ‘‘𑀏𑀓𑀲𑁆𑀲 𑀤𑀺𑀯𑀲𑀲𑁆𑀲 𑀏𑀢𑁆𑀢𑀓’’𑀦𑁆𑀢𑀺 𑀦𑀺𑀬𑀸𑀫𑁂𑀢𑁆𑀯𑀸 𑀞𑀧𑀺𑀢𑀯𑀢𑁆𑀢𑀁. 𑀳𑁂𑀢𑀼𑀲𑀫𑁆𑀧𑀤𑀦𑁆𑀢𑀺 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀧𑀼𑀜𑁆𑀜𑀲𑀫𑁆𑀧𑀤𑀁. 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀔𑀼𑀭𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀬𑁂𑀯, 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑁆𑀢𑀺𑀫𑀸𑀬 𑀓𑁂𑀲𑀯𑀝𑁆𑀝𑀺𑀬𑀸 𑀯𑁄𑀭𑁄𑀧𑀦𑀸𑀬 𑀲𑀫𑀓𑀸𑀮𑀫𑁂𑀯 𑀘 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀭𑀻𑀭𑀁 𑀚𑀕𑁆𑀕𑀺𑀢𑁆𑀯𑀸𑀢𑀺 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀫𑀼𑀔𑀥𑁄𑀯𑀦𑀸𑀤𑀻𑀳𑀺 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸.

𑀲𑀻𑀳𑀧𑀜𑁆𑀚𑀭𑁂 𑀘𑀗𑁆𑀓𑀫𑀢𑀻𑀢𑀺 𑀲𑀻𑀳𑀧𑀜𑁆𑀚𑀭𑀲𑀫𑀻𑀧𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯𑀸𑀢𑀺 𑀢𑀲𑁆𑀫𑀺𑀁 𑀔𑀡𑁂𑀬𑁂𑀯. 𑀅𑀬𑀁 𑀚𑀦𑁄𑀢𑀺 𑀭𑀸𑀚𑀗𑁆𑀕𑀡𑁂 𑀘𑀭𑀫𑀸𑀦𑀁 𑀚𑀦𑀁 𑀤𑀺𑀲𑁆𑀯𑀸 ¶ 𑀯𑀤𑀢𑀺. 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑁄𑀢𑀺 𑀅𑀦𑀯𑀝𑁆𑀞𑀺𑀢𑀢𑁆𑀢𑀸 𑀓𑀸𑀬𑀘𑀸𑀧𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀦𑁆𑀢𑀫𑀺𑀕𑀲𑀤𑀺𑀲𑁄. 𑀅𑀢𑀺𑀯𑀺𑀬 𑀲𑁄𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀦𑁆𑀢𑀺 𑀏𑀢𑁆𑀣 𑀆𑀮𑁄𑀓𑀺𑀢𑀁 𑀦𑀸𑀫 𑀧𑀼𑀭𑀢𑁄𑀧𑁂𑀓𑁆𑀔𑀦𑀁. 𑀅𑀪𑀺𑀫𑀼𑀔𑁄𑀮𑁄𑀓𑀦𑀜𑁆𑀳𑀺 ‘‘𑀆𑀮𑁄𑀓𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀮𑁄𑀓𑀺𑀢𑀦𑁆𑀢𑀺 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁, 𑀬𑀁 𑀤𑀺𑀲𑀸𑀪𑀺𑀫𑀼𑀔𑀁 𑀑𑀮𑁄𑀓𑁂𑀢𑀺, 𑀢𑀤𑀦𑀼𑀕𑀢𑀤𑀺𑀲𑀸𑀧𑁂𑀓𑁆𑀔𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀺𑀜𑁆𑀚𑀦𑀁 𑀧𑀩𑁆𑀩𑀲𑀗𑁆𑀓𑁄𑀘𑀦𑀁. 𑀧𑀲𑀸𑀭𑀡𑀜𑁆𑀘 𑀢𑁂𑀲𑀁𑀬𑁂𑀯 𑀧𑀲𑀸𑀭𑀡𑀁. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺 𑀲𑁂𑀲𑀚𑀦𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑁄 𑀯𑀺𑀲𑀺𑀝𑁆𑀞𑀥𑀫𑁆𑀫𑁄. 𑀧𑁂𑀫𑀁 𑀲𑀡𑁆𑀞𑀳𑀻𑀢𑀺 𑀧𑁂𑀫𑀁 𑀧𑀢𑀺𑀝𑁆𑀞𑀸𑀲𑀺, 𑀉𑀧𑁆𑀧𑀚𑁆𑀚𑀻𑀢𑀺 𑀅𑀢𑁆𑀣𑁄. 𑀯𑀸𑀡𑀺𑀚𑀓𑁄 𑀅𑀳𑁄𑀲𑀻𑀢𑀺 𑀫𑀥𑀼𑀯𑀸𑀡𑀺𑀚𑀓𑁄 𑀅𑀳𑁄𑀲𑀺.

𑀅𑀢𑀻𑀢𑁂 𑀓𑀺𑀭 𑀢𑀬𑁄 𑀪𑀸𑀢𑀭𑁄 𑀫𑀥𑀼𑀯𑀸𑀡𑀺𑀚𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀓𑀦𑀺𑀝𑁆𑀞𑁄 𑀫𑀥𑀼𑀁 𑀯𑀺𑀓𑁆𑀓𑀺𑀡𑀸𑀢𑀺, 𑀇𑀢𑀭𑁂 𑀅𑀭𑀜𑁆𑀜𑀢𑁄 𑀆𑀳𑀭𑀦𑁆𑀢𑀺. 𑀢𑀤𑀸 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀡𑁆𑀟𑀼𑀓𑀭𑁄𑀕𑀸𑀢𑀼𑀭𑁄 𑀅𑀳𑁄𑀲𑀺. 𑀅𑀧𑀭𑁄 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀤𑀢𑁆𑀣𑀁 𑀫𑀥𑀼𑀪𑀺𑀓𑁆𑀔𑀸𑀬 𑀘𑀭𑀫𑀸𑀦𑁄 𑀦𑀕𑀭𑀁 𑀧𑀸𑀯𑀺𑀲𑀺. 𑀧𑀯𑀺𑀝𑁆𑀞𑀜𑁆𑀘 𑀢𑀁 𑀏𑀓𑀸 𑀓𑀼𑀫𑁆𑀪𑀤𑀸𑀲𑀻 𑀉𑀤𑀓𑀳𑀭𑀡𑀢𑁆𑀣𑀁 𑀢𑀺𑀢𑁆𑀣𑀁 𑀕𑀘𑁆𑀙𑀫𑀸𑀦𑀸 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀘 𑀧𑀼𑀘𑁆𑀙𑀺𑀢𑁆𑀯𑀸 𑀆𑀕𑀢𑀓𑀸𑀭𑀡𑀜𑁆𑀘 𑀜𑀢𑁆𑀯𑀸 ‘‘𑀏𑀢𑁆𑀣, 𑀪𑀦𑁆𑀢𑁂, 𑀫𑀥𑀼𑀯𑀸𑀡𑀺𑀚𑀓𑀸 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀘𑁆𑀙𑀣𑀸’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀫𑀥𑀼𑀆𑀧𑀡𑀁 𑀤𑀲𑁆𑀲𑁂𑀲𑀺. 𑀲𑁄 𑀘 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀓𑀦𑀺𑀝𑁆𑀞𑁄 𑀫𑀥𑀼𑀯𑀸𑀡𑀺𑀚𑁄 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄 ‘‘𑀓𑁂𑀦𑀸𑀕𑀢𑀸𑀢𑁆𑀣, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀥𑀼𑀦𑁄 𑀧𑀽𑀭𑁂𑀢𑁆𑀯𑀸 𑀤𑀤𑀫𑀸𑀦𑁄 𑀧𑀢𑁆𑀢𑀧𑀼𑀡𑁆𑀡𑀁 𑀫𑀥𑀼𑀁 𑀉𑀕𑁆𑀕𑀦𑁆𑀢𑁆𑀯𑀸 𑀫𑀼𑀔𑀢𑁄 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀫𑀸𑀦𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 ‘‘𑀇𑀫𑀺𑀦𑀸𑀳𑀁, 𑀪𑀦𑁆𑀢𑁂, 𑀧𑀼𑀜𑁆𑀜𑀓𑀫𑁆𑀫𑁂𑀦 𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀁 𑀓𑀭𑁂𑀬𑁆𑀬𑀁, 𑀆𑀡𑀸 𑀘 𑀫𑁂 𑀆𑀓𑀸𑀲𑁂 𑀧𑀣𑀯𑀺𑀬𑀜𑁆𑀘 𑀬𑁄𑀚𑀦𑀧𑁆𑀧𑀫𑀸𑀡𑁂 𑀞𑀸𑀦𑁂 𑀨𑀭𑀢𑀽’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 ‘‘𑀏𑀯𑀁 𑀳𑁄𑀢𑀼 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀪𑁂𑀲𑀚𑁆𑀚𑀫𑀓𑀸𑀲𑀺.

𑀓𑀦𑀺𑀝𑁆𑀞𑁄 ¶ 𑀧𑀦 𑀫𑀥𑀼𑀯𑀸𑀡𑀺𑀚𑁄 𑀫𑀥𑀼𑀁 𑀤𑀢𑁆𑀯𑀸 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄 𑀇𑀢𑀭𑁂 𑀅𑀭𑀜𑁆𑀜𑀢𑁄 𑀆𑀕𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳 ‘‘𑀢𑀼𑀫𑁆𑀳𑀸𑀓𑀁 𑀪𑀸𑀢𑀭𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀣, 𑀫𑀫𑀜𑁆𑀘 𑀢𑀼𑀫𑁆𑀳𑀸𑀓𑀜𑁆𑀘 𑀫𑀥𑀼𑀁 𑀕𑀳𑁂𑀢𑁆𑀯𑀸 𑀈𑀤𑀺𑀲𑀲𑁆𑀲 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺’’𑀦𑁆𑀢𑀺. 𑀢𑁂𑀲𑀼 𑀚𑁂𑀝𑁆𑀞𑁄 𑀓𑀼𑀚𑁆𑀛𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀘𑀡𑁆𑀟𑀸𑀮𑀸𑀧𑀺 𑀓𑀸𑀲𑀸𑀯𑀦𑀺𑀯𑀸𑀲𑀺𑀦𑁄 𑀳𑁄𑀦𑁆𑀢𑀺, 𑀦𑀦𑀼 𑀢𑀯 𑀳𑀢𑁆𑀣𑀢𑁄 𑀫𑀥𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀢𑁄 𑀘𑀡𑁆𑀟𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀚𑁆𑀛𑀺𑀫𑁄 𑀧𑀦 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀢𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀕𑀳𑁂𑀢𑁆𑀯𑀸 𑀧𑀭𑀲𑀫𑀼𑀤𑁆𑀤𑁂 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀆𑀳. 𑀧𑀘𑁆𑀙𑀸 𑀧𑀦 𑀢𑁂𑀧𑀺 𑀤𑁆𑀯𑁂 𑀪𑀸𑀢𑀭𑁄 𑀓𑀦𑀺𑀝𑁆𑀞𑁂𑀦 𑀯𑀼𑀘𑁆𑀘𑀫𑀸𑀦𑀁 ¶ 𑀤𑀸𑀦𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀲𑀼𑀢𑁆𑀯𑀸 𑀅𑀦𑀼𑀫𑁄𑀤𑀺𑀁𑀲𑀼𑀬𑁂𑀯. 𑀲𑀸𑀧𑀺 𑀘 𑀓𑀼𑀫𑁆𑀪𑀤𑀸𑀲𑀻 ‘‘𑀢𑀲𑁆𑀲 𑀫𑀥𑀼𑀤𑀸𑀬𑀓𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀢𑁂𑀲𑀼 𑀓𑀦𑀺𑀝𑁆𑀞𑁄 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀅𑀳𑁄𑀲𑀺, 𑀲𑀸 𑀘 𑀓𑀼𑀫𑁆𑀪𑀤𑀸𑀲𑀻 𑀅𑀢𑀺𑀯𑀺𑀬 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀦𑀸𑀫 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀧𑀭𑀲𑀫𑀼𑀤𑁆𑀤𑀯𑀸𑀤𑀻 𑀧𑀦 𑀫𑀚𑁆𑀛𑀺𑀫𑁄 𑀇𑀫𑀲𑁆𑀫𑀺𑀁𑀬𑁂𑀯 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸 𑀅𑀳𑁄𑀲𑀺. 𑀚𑁂𑀝𑁆𑀞𑁄 𑀧𑀦 𑀘𑀡𑁆𑀟𑀸𑀮𑀯𑀸𑀤𑀺𑀢𑀸𑀬 𑀘𑀡𑁆𑀟𑀸𑀮𑀕𑀸𑀫𑁂 𑀚𑀸𑀢𑁄 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀲𑀸𑀫𑀡𑁂𑀭𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀳𑀺 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀏𑀲 𑀭𑀜𑁆𑀜𑁄 𑀚𑁂𑀝𑁆𑀞𑀪𑀸𑀢𑀸 𑀯𑀸𑀡𑀺𑀚𑀓𑁄 𑀅𑀳𑁄𑀲𑀻’’𑀢𑀺.

𑀧𑀼𑀩𑁆𑀩𑁂 𑀯 𑀲𑀦𑁆𑀦𑀺𑀯𑀸𑀲𑁂𑀦𑀸𑀢𑀺 𑀏𑀢𑁆𑀣 (𑀚𑀸. 𑀅𑀝𑁆𑀞. 𑁨.𑁨.𑁧𑁭𑁪) 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀧𑀼𑀩𑁆𑀩𑁂 𑀲𑀦𑁆𑀦𑀺𑀯𑀸𑀲𑁂𑀦 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑀚𑀸𑀢𑀺𑀬𑀁. 𑀲𑀦𑁆𑀦𑀺𑀯𑀸𑀲𑁂𑀦𑀸𑀢𑀺 𑀲𑀳𑀯𑀸𑀲𑁂𑀦. 𑀲𑀳𑀲𑀤𑁆𑀤𑀢𑁆𑀣𑁄 𑀳𑀺 𑀅𑀬𑀁 𑀲𑀁𑀲𑀤𑁆𑀤𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀪𑀯𑁂 𑀳𑀺𑀢𑀘𑀭𑀡𑁂𑀦 𑀯𑀸. 𑀏𑀯𑀁 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀺𑀦𑁂𑀳𑀲𑀗𑁆𑀔𑀸𑀢𑀁 𑀧𑁂𑀫𑀁 𑀚𑀸𑀬𑀢𑁂 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑁂𑀫𑀁 𑀦𑀸𑀫𑁂𑀢𑀁 𑀤𑁆𑀯𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀚𑀸𑀬𑀢𑀺, 𑀧𑀼𑀭𑀺𑀫𑀪𑀯𑁂 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀥𑀻𑀢𑀸 𑀯𑀸 𑀧𑀼𑀢𑁆𑀢𑁄 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀢𑀺 𑀯𑀸 𑀪𑀭𑀺𑀬𑀸 𑀯𑀸 𑀲𑀳𑀸𑀬𑁄 𑀯𑀸 𑀫𑀺𑀢𑁆𑀢𑁄 𑀯𑀸 𑀳𑀼𑀢𑁆𑀯𑀸 𑀬𑁄 𑀬𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑁄, 𑀢𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀸 𑀲𑀦𑁆𑀦𑀺𑀯𑀸𑀲𑁂𑀦 𑀪𑀯𑀦𑁆𑀢𑀭𑁂𑀧𑀺 𑀅𑀦𑀼𑀩𑀦𑁆𑀥𑀦𑁆𑀢𑁄 𑀲𑁄 𑀲𑀺𑀦𑁂𑀳𑁄 𑀦 𑀯𑀺𑀚𑀳𑀢𑀺, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀳𑀺𑀢𑁂𑀦 𑀯𑀸𑀢𑀺 𑀏𑀯𑀁 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑀁 𑀧𑁂𑀫𑀁 𑀦𑀸𑀫 𑀚𑀸𑀬𑀢𑀻𑀢𑀺. 𑀓𑀺𑀁 𑀯𑀺𑀬𑀸𑀢𑀺 𑀆𑀳 ‘‘𑀉𑀧𑁆𑀧𑀮𑀁 𑀯 𑀬𑀣𑁄𑀤𑀓𑁂’’𑀢𑀺. 𑀏𑀢𑁆𑀣𑀸𑀧𑀺 𑀯𑀸-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀭𑀲𑁆𑀲𑀢𑁆𑀢𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀘𑁂𑀢𑁆𑀣 𑀯𑀸𑀲𑀤𑁆𑀤𑁄. 𑀢𑁂𑀦 𑀧𑀤𑀼𑀫𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸-𑀲𑀤𑁆𑀤𑁄 𑀉𑀧𑀫𑀸𑀬𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀉𑀧𑁆𑀧𑀮𑀜𑁆𑀘 𑀲𑁂𑀲𑀜𑁆𑀘 𑀧𑀤𑀼𑀫𑀸𑀤𑀺 𑀉𑀤𑀓𑁂 𑀚𑀸𑀬𑀫𑀸𑀦𑀁 𑀤𑁆𑀯𑁂 𑀓𑀸𑀭𑀡𑀸𑀦𑀺 𑀦𑀺𑀲𑁆𑀲𑀸𑀬 𑀚𑀸𑀬𑀢𑀺 𑀉𑀤𑀓𑀜𑁆𑀘𑁂𑀯 𑀓𑀮𑀮𑀜𑁆𑀘, 𑀢𑀣𑀸 𑀏𑀢𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑁂𑀫𑀁 𑀚𑀸𑀬𑀢𑀻𑀢𑀺.

𑀭𑀜𑁆𑀜𑁄 𑀳𑀢𑁆𑀣𑁂𑀢𑀺 𑀲𑀦𑁆𑀢𑀺𑀓𑀁 𑀉𑀧𑀕𑀢𑀲𑁆𑀲 𑀭𑀜𑁆𑀜𑁄 𑀳𑀢𑁆𑀣𑁂. 𑀭𑀜𑁆𑀜𑁄 𑀅𑀦𑀼𑀭𑀽𑀧𑀦𑁆𑀢𑀺 𑀏𑀓𑀽𑀦𑀲𑀢𑀪𑀸𑀢𑀼𑀓𑀸𑀦𑀁 𑀖𑀸𑀢𑀺𑀢𑀢𑁆𑀢𑀸 𑀘𑀡𑁆𑀟𑀧𑀓𑀢𑀺𑀢𑀸𑀬 𑀭𑀚𑁆𑀚𑁂 𑀞𑀺𑀢𑀢𑁆𑀢𑀸 𑀘 ‘‘𑀧𑀫𑀸𑀤𑀯𑀺𑀳𑀸𑀭𑀻 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀧𑀤𑁂 𑀅𑀧𑁆𑀧𑀫𑀸𑀤𑀯𑀕𑁆𑀕𑀁 𑀤𑁂𑀲𑁂𑀢𑀼𑀁 ¶ 𑀆𑀭𑀪𑀺. 𑀢𑀢𑁆𑀣 (𑀥. 𑀧. 𑀅𑀝𑁆𑀞. 𑁧.𑁨𑁩) 𑀅𑀧𑁆𑀧𑀫𑀸𑀤𑁄𑀢𑀺 𑀲𑀢𑀺𑀬𑀸 ¶ 𑀅𑀯𑀺𑀧𑁆𑀧𑀯𑀸𑀲𑁄, 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀫𑀢𑀧𑀤𑀦𑁆𑀢𑀺 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀅𑀚𑀸𑀢𑀢𑁆𑀢𑀸 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺, 𑀢𑀲𑁆𑀫𑀸 ‘‘𑀅𑀫𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀢𑀲𑁆𑀲 𑀧𑀤𑀁 𑀅𑀫𑀢𑀧𑀤𑀁, 𑀅𑀫𑀢𑀲𑁆𑀲 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀫𑀸𑀤𑁄𑀢𑀺 𑀧𑀫𑀚𑁆𑀚𑀦𑀪𑀸𑀯𑁄, 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀲𑀢𑀺𑀬𑀸 𑀯𑁄𑀲𑁆𑀲𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀫𑀘𑁆𑀘𑀼𑀦𑁄𑀢𑀺 𑀫𑀭𑀡𑀲𑁆𑀲. 𑀧𑀤𑀦𑁆𑀢𑀺 𑀉𑀧𑀸𑀬𑁄 𑀫𑀕𑁆𑀕𑁄. 𑀧𑀫𑀢𑁆𑀢𑁄 𑀳𑀺 𑀚𑀸𑀢𑀺𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀚𑀸𑀢𑁄 𑀧𑀦 𑀚𑀻𑀬𑀢𑀺 𑀘𑁂𑀯 𑀫𑀻𑀬𑀢𑀺 𑀘𑀸𑀢𑀺 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁 𑀦𑀸𑀫 𑀳𑁄𑀢𑀺, 𑀫𑀭𑀡𑀁 𑀉𑀧𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑀸𑀢𑀁 𑀢𑀸𑀢, 𑀧𑀭𑀺𑀬𑁄𑀲𑀸𑀧𑁂𑀳𑀻𑀢𑀺 𑀇𑀫𑀺𑀦𑀸 ‘‘𑀲𑀤𑀸 𑀅𑀧𑁆𑀧𑀫𑀸𑀤𑁂𑀦 𑀳𑀼𑀢𑁆𑀯𑀸 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀢𑀓𑁂𑀦𑁂𑀯 𑀫𑀬𑀸 𑀜𑀸𑀢𑀁, 𑀢𑀼𑀫𑁆𑀳𑁂 𑀥𑀫𑁆𑀫𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀣𑀸’’𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀢𑁆𑀢𑀦𑁄 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀢𑀁 𑀤𑀻𑀧𑁂𑀦𑁆𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀓𑀣𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀓𑁂𑀘𑀺 𑀧𑀦 ‘‘𑀅𑀪𑀸𑀲𑀻𑀢𑀺 𑀏𑀢𑁆𑀣 ‘𑀪𑀸𑀲𑀺𑀲𑁆𑀲𑀸𑀫𑀺 𑀯𑀺𑀢𑀓𑁆𑀓𑁂𑀫𑀻’𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘𑀲𑀩𑁆𑀩𑀁 𑀅𑀧𑁆𑀧𑀫𑀸𑀤𑀯𑀕𑁆𑀕𑀁 𑀪𑀸𑀲𑀺𑀲𑁆𑀲𑀸𑀫𑀻’𑀢𑀺 𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸 𑀅𑀪𑀸𑀲𑀻𑀢𑀺 𑀯𑀼𑀢𑁆𑀢𑀁, 𑀭𑀜𑁆𑀜𑀸 𑀧𑀦 𑀅𑀟𑁆𑀠𑀕𑀸𑀣𑀁 𑀲𑀼𑀢𑁆𑀯𑀸𑀯 ‘𑀅𑀜𑁆𑀜𑀸𑀢𑀁 𑀢𑀸𑀢, 𑀧𑀭𑀺𑀬𑁄𑀲𑀸𑀧𑁂𑀳𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘𑀉𑀧𑀭𑀺 𑀦 𑀓𑀣𑁂𑀲𑀻’’’𑀢𑀺 𑀯𑀤𑀦𑁆𑀢𑀺. ‘‘𑀢𑀁 𑀧𑀦 𑀬𑀼𑀢𑁆𑀢𑀁 𑀦 𑀳𑁄𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀥𑀼𑀯𑀪𑀢𑁆𑀢𑀸𑀦𑀻𑀢𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺. 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄𑀢𑀺 𑀆𑀳 ‘‘𑀯𑀚𑁆𑀚𑀸𑀯𑀚𑁆𑀚𑀁 𑀤𑀺𑀲𑁆𑀯𑀸 𑀘𑁄𑀤𑁂𑀢𑀸 𑀲𑀸𑀭𑁂𑀢𑀸 𑀘𑀸’’𑀢𑀺. 𑀢𑀢𑁆𑀣 𑀯𑀚𑁆𑀚𑀸𑀯𑀚𑁆𑀚𑀦𑁆𑀢𑀺 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀜𑁆𑀘 𑀯𑀚𑁆𑀚𑀁. 𑀘𑁄𑀤𑁂𑀢𑀸𑀢𑀺 ‘‘𑀇𑀤𑀁 𑀢𑀬𑀸 𑀤𑀼𑀓𑁆𑀓𑀝𑀁, 𑀇𑀤𑀁 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀘𑁄𑀤𑁂𑀢𑀸. 𑀲𑀸𑀭𑁂𑀢𑀸𑀢𑀺 𑀅𑀢𑁆𑀢𑀦𑁄 𑀯𑀚𑁆𑀚𑀁 𑀅𑀲𑁆𑀲𑀭𑀦𑁆𑀢𑀲𑁆𑀲 𑀲𑀢𑀺𑀁 𑀉𑀧𑁆𑀧𑀸𑀤𑁂𑀢𑀸, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀯𑀸 𑀲𑀸𑀭𑁂𑀢𑀸, 𑀧𑀯𑀢𑁆𑀢𑁂𑀢𑀸𑀢𑀺 𑀅𑀢𑁆𑀣𑁄.

‘‘𑀏𑀯𑀁 𑀢𑀬𑀸 𑀩𑀼𑀤𑁆𑀥𑀯𑀘𑀦𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀁, 𑀏𑀯𑀁 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀆𑀘𑀸𑀭𑀲𑁆𑀲 𑀲𑀺𑀓𑁆𑀔𑀸𑀧𑀦𑀢𑁄 𑀆𑀘𑀭𑀺𑀬𑁄 𑀦𑀸𑀫𑀸𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀺𑀓𑁆𑀔𑀺𑀢𑀩𑁆𑀩𑀓𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀸’’𑀢𑀺. 𑀢𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀓𑀥𑀫𑁆𑀫𑁄 𑀦𑀸𑀫 𑀲𑀓𑀮𑀁 𑀩𑀼𑀤𑁆𑀥𑀯𑀘𑀦𑀁 𑀲𑀻𑀮𑀸𑀤𑀬𑁄 𑀘 𑀥𑀫𑁆𑀫𑀸. ‘‘𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘𑀸’’𑀢𑀺 𑀇𑀤𑀁 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀼𑀢𑁆𑀢𑀁 ¶ . 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀬𑁄𑀚𑁂𑀢𑀩𑁆𑀩𑀸, 𑀫𑀫 𑀘𑀸𑀢𑀺 𑀇𑀫𑀺𑀦𑀸 𑀧𑀦 𑀧𑀩𑁆𑀩𑀚𑁆𑀚𑀸𑀯. 𑀢𑀤𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀢𑁆𑀢𑀸 𑀦𑀺𑀕𑁆𑀭𑁄𑀥𑀲𑁆𑀲 𑀪𑀸𑀯𑀺𑀦𑀺𑀁 𑀯𑀸 𑀉𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑀉𑀪𑀬𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀭𑀡𑀕𑀫𑀦𑀯𑀲𑁂𑀦 𑀧𑀩𑁆𑀩𑀚𑁆𑀚𑀸𑀲𑀺𑀤𑁆𑀥𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺 𑀧𑀩𑁆𑀩𑀚𑁆𑀚𑀸𑀬 𑀦𑀺𑀲𑁆𑀲𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀡𑁆𑀟𑀼𑀓𑀫𑁆𑀫𑀯𑀲𑁂𑀦𑀧𑀺 𑀦𑀺𑀲𑁆𑀲𑀬𑀪𑀸𑀯𑁄 𑀮𑀩𑁆𑀪𑀢𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀟𑁆𑀠𑀸𑀧𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀢𑁄 𑀢𑀢𑁄 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀯𑀟𑁆𑀠𑀸𑀧𑁂𑀦𑁆𑀢𑁄. 𑀧𑁄𑀣𑀼𑀚𑁆𑀚𑀦𑀺𑀓𑁂𑀦𑀸𑀢𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑀸𑀦𑀼𑀭𑀽𑀧𑁂𑀦. 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀓𑀺𑀢𑁆𑀢𑀦𑀸𑀥𑀺𑀓𑀸𑀭𑀢𑁆𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁆𑀧𑀺 𑀧𑀘𑁆𑀙𑀸 𑀯𑀢𑁆𑀢𑀩𑁆𑀩𑀫𑁆𑀧𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀆𑀳 ‘‘𑀧𑀼𑀦 𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺 ¶ . 𑀘𑁂𑀢𑀺𑀬𑀧𑀝𑀺𑀫𑀡𑁆𑀟𑀺𑀢𑀸𑀦𑀻𑀢𑀺 𑀏𑀢𑁆𑀣 𑀘𑀬𑀺𑀢𑀩𑁆𑀩𑀁 𑀧𑀽𑀚𑁂𑀢𑀩𑁆𑀩𑀦𑁆𑀢𑀺 𑀘𑁂𑀢𑀺𑀬𑀁, 𑀇𑀝𑁆𑀞𑀓𑀸𑀤𑀻𑀳𑀺 𑀘𑀺𑀢𑀢𑁆𑀢𑀸 𑀯𑀸 𑀘𑁂𑀢𑀺𑀬𑀁, 𑀘𑁂𑀢𑀺𑀬𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀯𑀺𑀪𑀽𑀲𑀺𑀢𑀸𑀦𑀻𑀢𑀺 𑀘𑁂𑀢𑀺𑀬𑀧𑀝𑀺𑀫𑀡𑁆𑀟𑀺𑀢𑀸𑀦𑀺. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦.

𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀏𑀓𑀤𑀺𑀯𑀲𑀁 𑀓𑀺𑀭𑀸’’𑀢𑀺𑀆𑀤𑀺. 𑀅𑀲𑁄𑀓𑀸𑀭𑀸𑀫𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀢𑀺 𑀏𑀢𑁆𑀣 𑀓𑀢𑁂 𑀆𑀭𑀸𑀫𑁂 𑀧𑀘𑁆𑀙𑀸 𑀓𑀸𑀭𑀸𑀧𑀓𑀲𑁆𑀲 𑀭𑀜𑁆𑀜𑁄 𑀦𑀸𑀫𑀯𑀲𑁂𑀦 𑀦𑀺𑀭𑀼𑀴𑁆𑀳𑀁 𑀦𑀸𑀫𑀧𑀡𑁆𑀡𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀲𑁄𑀓𑀸𑀭𑀸𑀫𑁂’’𑀢𑀺. 𑀓𑁂𑀘𑀺 𑀧𑀦 ‘‘𑀢𑀲𑁆𑀫𑀺𑀁 𑀤𑀺𑀯𑀲𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀖𑀭𑁂𑀬𑁂𑀯 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀻’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀢𑀺 𑀪𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀯𑀲𑁂𑀦 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀤𑀻𑀧𑀯𑀁𑀲𑁂 𑁋

‘‘𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸, 𑀦𑀺𑀲𑀻𑀤𑀸𑀧𑁂𑀢𑁆𑀯𑀸𑀦 𑀆𑀲𑀦𑁂;

𑀬𑀸𑀕𑀼𑀁 𑀦𑀸𑀦𑀸𑀯𑀺𑀥𑀁 𑀔𑀚𑁆𑀚𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀅𑀤𑀸𑀲𑀺 𑀧𑀬𑀢𑀧𑀸𑀡𑀺, 𑀬𑀸𑀯𑀤𑀢𑁆𑀣𑀁 𑀬𑀤𑀺𑀘𑁆𑀙𑀓𑀁.

‘‘𑀪𑀼𑀢𑁆𑀢𑀸𑀯𑀺𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁄;

𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀤𑀸𑀲𑀺 𑀬𑀼𑀕𑀲𑀸𑀝𑀓𑀁.

‘‘𑀧𑀸𑀤𑀅𑀩𑁆𑀪𑀜𑁆𑀚𑀦𑀁 𑀢𑁂𑀮𑀁, 𑀙𑀢𑁆𑀢𑀜𑁆𑀘𑀸𑀧𑀺 𑀉𑀧𑀸𑀳𑀦𑀁;

𑀲𑀩𑁆𑀩𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁, 𑀅𑀤𑀸𑀲𑀺 𑀨𑀸𑀡𑀺𑀢𑀁 𑀫𑀥𑀼𑀁.

‘‘𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀦𑀺𑀲𑀻𑀤𑀺, 𑀅𑀲𑁄𑀓𑀥𑀫𑁆𑀫𑁄 𑀫𑀳𑀻𑀧𑀢𑀺;

𑀦𑀺𑀲𑀚𑁆𑀚 𑀭𑀸𑀚𑀸 𑀧𑀯𑀸𑀭𑁂𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀘𑁆𑀘𑀬𑀁.

‘‘𑀬𑀸𑀯𑀢𑀸 𑀪𑀺𑀓𑁆𑀔𑀽 𑀇𑀘𑁆𑀙𑀦𑁆𑀢𑀺, 𑀢𑀸𑀯 𑀤𑁂𑀫𑀺 𑀬𑀤𑀺𑀘𑁆𑀙𑀓𑀁;

𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑁂𑀦, 𑀧𑀯𑀸𑀭𑁂𑀢𑁆𑀯𑀸𑀦 𑀧𑀘𑁆𑀘𑀬𑁂;

𑀢𑀢𑁄 𑀅𑀧𑀼𑀘𑁆𑀙𑀺 𑀕𑀫𑁆𑀪𑀻𑀭𑀁, 𑀥𑀫𑁆𑀫𑀓𑁆𑀔𑀦𑁆𑀥𑀁 𑀲𑀼𑀤𑁂𑀲𑀺𑀢’’𑀦𑁆𑀢𑀺.

𑀅𑀗𑁆𑀕𑀢𑁄, 𑀫𑀳𑀸𑀭𑀸𑀚, 𑀦𑀯 𑀅𑀗𑁆𑀕𑀸𑀦𑀻𑀢𑀺𑀆𑀤𑀺 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑀁 𑀅𑀤𑀸𑀲𑀻𑀢𑀺 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑁂𑀲𑀼 𑀓𑀢𑁆𑀢𑀩𑁆𑀩𑀲𑁆𑀲 𑀦𑀯𑀓𑀫𑁆𑀫𑀲𑁆𑀲 𑀅𑀥𑀺𑀝𑁆𑀞𑀸𑀬𑀓𑀁 𑀯𑀺𑀥𑀸𑀬𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀏𑀓𑀤𑀺𑀯𑀲𑀫𑁂𑀯 𑀲𑀩𑁆𑀩𑀦𑀕𑀭𑁂𑀳𑀺 𑀧𑀡𑁆𑀡𑀸𑀦𑀺 𑀆𑀕𑀫𑀺𑀁𑀲𑀽𑀢𑀺 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀓𑀺𑀭 𑀭𑀸𑀳𑀼𑀦𑀸 ¶ 𑀘𑀦𑁆𑀤𑀲𑁆𑀲 𑀕𑀳𑀡𑀤𑀺𑀯𑀲𑁂 𑀦𑀯𑀓𑀫𑁆𑀫𑀁 𑀆𑀭𑀪𑀺𑀢𑁆𑀯𑀸 𑀧𑀼𑀦 𑀭𑀸𑀳𑀼𑀦𑀸 𑀘𑀦𑁆𑀤𑀲𑁆𑀲 𑀕𑀳𑀡𑀤𑀺𑀯𑀲𑁂𑀬𑁂𑀯 𑀦𑀺𑀝𑁆𑀞𑀸𑀧𑁂𑀲𑀼𑀁, 𑀢𑀲𑁆𑀫𑀸 𑀏𑀓𑀤𑀺𑀯𑀲𑀫𑁂𑀯 𑀧𑀡𑁆𑀡𑀸𑀦𑀺 𑀆𑀕𑀫𑀺𑀁𑀲𑀽𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞 𑀲𑀻𑀮𑀗𑁆𑀕𑀸𑀦𑀻𑀢𑀺 𑀅𑀝𑁆𑀞 𑀉𑀧𑁄𑀲𑀣𑀗𑁆𑀕𑀲𑀻𑀮𑀸𑀦𑀺. ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸𑀬𑀸’’𑀢𑀺 𑀇𑀤𑀁 𑀅𑀲𑀫𑀸𑀤𑀺𑀦𑁆𑀦𑀼𑀧𑁄𑀲𑀣𑀗𑁆𑀕𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀫𑀭𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀦𑀕𑀭𑁂. 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀦𑁆𑀢𑀺 𑀅𑀮𑀗𑁆𑀓𑀢𑀓𑀭𑀡𑀯𑀲𑁂𑀦 𑀲𑀩𑁆𑀩𑀲𑀚𑁆𑀚𑀺𑀢𑀁.

𑀅𑀥𑀺𑀓𑀁 𑀓𑀸𑀭𑀁 𑀅𑀥𑀺𑀓𑀸𑀭𑀁, 𑀅𑀥𑀺𑀓𑀁 𑀓𑀺𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀁𑀲𑀽𑀢𑀺 𑀏𑀢𑁆𑀣 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑁆𑀬𑀲𑁆𑀲 𑀑𑀓𑀸𑀲𑀮𑁄𑀓𑀲𑁆𑀲 𑀢𑀦𑁆𑀦𑀺𑀯𑀸𑀲𑀻𑀲𑀢𑁆𑀢𑀮𑁄𑀓𑀲𑁆𑀲 𑀘 𑀯𑀺𑀯𑀝𑀪𑀸𑀯𑀓𑀭𑀡𑀧𑀸𑀝𑀺𑀳𑀸𑀭𑀺𑀬𑀁 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫. 𑀢𑀁 𑀧𑀦 𑀓𑀭𑁄𑀦𑁆𑀢𑁄 𑀇𑀤𑁆𑀥𑀺𑀫𑀸 𑀅𑀦𑁆𑀥𑀓𑀸𑀭𑀁 𑀯𑀸 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀝𑀁, 𑀅𑀦𑀸𑀧𑀸𑀣𑀁 𑀯𑀸 𑀆𑀧𑀸𑀣𑀁 𑀓𑀭𑁄𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀤𑀽𑀭𑁂 𑀞𑀺𑀢𑁄𑀧𑀺 𑀅𑀢𑁆𑀢𑀸 𑀯𑀸 𑀧𑀭𑁄 𑀯𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀧𑀸𑀓𑀝𑀁 𑀓𑀸𑀢𑀼𑀓𑀸𑀫𑁄 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀇𑀤𑀁 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑀁 𑀆𑀮𑁄𑀓𑀚𑀸𑀢𑀁 𑀳𑁄𑀢𑀽’’𑀢𑀺 𑀯𑀸 ‘‘𑀇𑀤𑀁 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀝𑀁 𑀳𑁄𑀢𑀽’’𑀢𑀺 𑀯𑀸 ‘‘𑀇𑀤𑀁 𑀅𑀦𑀸𑀧𑀸𑀣𑀁 𑀆𑀧𑀸𑀣𑀁 𑀳𑁄𑀢𑀽’’𑀢𑀺 𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀢𑀺. 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦 𑀬𑀣𑀸𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀅𑀧𑀭𑁂 𑀤𑀽𑀭𑁂 𑀞𑀺𑀢𑀸𑀧𑀺 𑀧𑀲𑁆𑀲𑀦𑁆𑀢𑀺, 𑀲𑀬𑀫𑁆𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑁄 𑀧𑀲𑁆𑀲𑀢𑀺 𑀪𑀕𑀯𑀸 𑀯𑀺𑀬 𑀤𑁂𑀯𑁄𑀭𑁄𑀳𑀡𑁂. 𑀪𑀕𑀯𑀸 𑀳𑀺 𑀤𑁂𑀯𑀮𑁄𑀓𑁂 𑀅𑀪𑀺𑀥𑀫𑁆𑀫𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀓𑀲𑁆𑀲𑀦𑀕𑀭𑀁 𑀑𑀢𑀭𑀦𑁆𑀢𑁄 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀯𑀺𑀯𑀝𑀸𑀦𑀺 𑀯𑀺𑀬 𑀳𑀼𑀢𑁆𑀯𑀸 𑀏𑀓𑀗𑁆𑀕𑀡𑀁 ¶ 𑀯𑀺𑀬 𑀳𑀼𑀢𑁆𑀯𑀸 𑀧𑀓𑀸𑀲𑀺𑀁𑀲𑀼. 𑀬𑀣𑀸 𑀘 𑀧𑀼𑀭𑀢𑁆𑀣𑀺𑀫𑁂𑀦, 𑀏𑀯𑀁 𑀧𑀘𑁆𑀙𑀺𑀫𑁂𑀦𑀧𑀺 𑀉𑀢𑁆𑀢𑀭𑁂𑀦𑀧𑀺 𑀤𑀓𑁆𑀔𑀺𑀡𑁂𑀦𑀧𑀺 𑀲𑀩𑁆𑀩𑀁 𑀯𑀺𑀯𑀝𑀫𑀤𑁆𑀤𑀲. 𑀳𑁂𑀝𑁆𑀞𑀸𑀧𑀺 𑀬𑀸𑀯 𑀅𑀯𑀻𑀘𑀺 𑀉𑀧𑀭𑀺 𑀘 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀁, 𑀢𑀸𑀯 𑀅𑀤𑁆𑀤𑀲. 𑀫𑀦𑀼𑀲𑁆𑀲𑀸𑀧𑀺 𑀤𑁂𑀯𑁂 𑀧𑀲𑁆𑀲𑀦𑁆𑀢𑀺, 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑁂. 𑀢𑀢𑁆𑀣 𑀦𑁂𑀯 𑀫𑀦𑀼𑀲𑁆𑀲𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑀺, 𑀦 𑀤𑁂𑀯𑀸 𑀅𑀥𑁄 𑀑𑀮𑁄𑀓𑁂𑀦𑁆𑀢𑀺, 𑀲𑀩𑁆𑀩𑁂 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀸𑀯 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺, 𑀢𑀁 𑀤𑀺𑀯𑀲𑀁 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀅𑀳𑁄𑀲𑀺.

𑀅𑀧𑀺𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀢𑀴𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄𑀧𑀺 𑀇𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀘𑁂𑀢𑀺𑀬𑀗𑁆𑀕𑀡𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀅𑀧𑀡𑁆𑀡𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀅𑀧𑀡𑁆𑀡𑀓𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁧𑁬) 𑀓𑀣𑁂𑀦𑁆𑀢𑁄 𑀳𑁂𑀝𑁆𑀞𑀸𑀫𑀼𑀔𑀁 𑀩𑀻𑀚𑀦𑀺𑀁 𑀅𑀓𑀸𑀲𑀺, 𑀬𑀸𑀯 𑀅𑀯𑀻𑀘𑀺𑀢𑁄 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺, 𑀢𑀢𑁄 𑀉𑀧𑀭𑀺𑀫𑀼𑀔𑀁 𑀅𑀓𑀸𑀲𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺. 𑀣𑁂𑀭𑁄 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀲𑀕𑁆𑀕𑀲𑀼𑀔𑁂𑀦 𑀘 𑀧𑀮𑁄𑀪𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻 𑀅𑀭𑀳𑀦𑁆𑀢𑁄𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂𑀧𑀺 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀅𑀳𑁄𑀲𑀺. 𑀇𑀫𑁂 𑀧𑀦 𑀪𑀺𑀓𑁆𑀔𑀽 𑀬𑀣𑀸 ¶ 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀅𑀲𑁄𑀓𑀸𑀭𑀸𑀫𑁂 𑀞𑀺𑀢𑁄 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀲𑀫𑀦𑁆𑀢𑀢𑁄 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀧𑀲𑁆𑀲𑀢𑀺, 𑀘𑀢𑀼𑀭𑀸𑀲𑀻𑀢𑀺 𑀘 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀉𑀴𑀸𑀭𑀸𑀬 𑀯𑀺𑀳𑀸𑀭𑀫𑀳𑀧𑀽𑀚𑀸𑀬 𑀯𑀺𑀭𑁄𑀘𑀫𑀸𑀦𑀸𑀦𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀁𑀲𑀼.

𑀯𑀺𑀳𑀸𑀭𑀫𑀳𑀧𑀽𑀚𑀸𑀬𑀸𑀢𑀺 𑀯𑀺𑀳𑀸𑀭𑀫𑀳𑀲𑀗𑁆𑀔𑀸𑀢𑀸𑀬 𑀧𑀽𑀚𑀸𑀬. 𑀯𑀺𑀪𑀽𑀢𑀺𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀁. 𑀏𑀯𑀭𑀽𑀧𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀦𑁆𑀢𑀺 𑀈𑀤𑀺𑀲𑀁 𑀧𑀭𑀺𑀘𑁆𑀘𑀸𑀕𑀫𑀽𑀮𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁. 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀫𑀓𑀸𑀲𑀻𑀢𑀺 𑀣𑁂𑀭𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 ‘‘𑀉𑀢𑁆𑀢𑀭𑀺𑀧𑀺 𑀘𑁂 𑀓𑀣𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀲𑁄𑀬𑁂𑀯 𑀓𑀣𑁂𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀯𑀺𑀲𑀚𑁆𑀚𑀦𑀁 𑀣𑁂𑀭𑀲𑁆𑀲 𑀪𑀸𑀭𑀫𑀓𑀸𑀲𑀺. 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀫𑀺, 𑀦 𑀳𑁄𑀫𑀻𑀢𑀺 𑀲𑀸𑀲𑀦𑀲𑁆𑀲 𑀜𑀸𑀢𑀓𑁄 𑀅𑀩𑁆𑀪𑀦𑁆𑀢𑀭𑁄 𑀳𑁄𑀫𑀺, 𑀦 𑀳𑁄𑀫𑀻𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸 𑀧𑀼𑀢𑁆𑀢𑀥𑀻𑀢𑀭𑁄 𑀦 𑀲𑀦𑁆𑀢𑀺, 𑀦 𑀢𑁂 𑀲𑀸𑀲𑀦𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀯𑀳𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀏𑀯𑀫𑀸𑀳 ‘‘𑀦 𑀔𑁄, 𑀫𑀳𑀸𑀭𑀸𑀚, 𑀏𑀢𑁆𑀢𑀸𑀯𑀢𑀸 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀻’’𑀢𑀺. 𑀓𑀣𑀜𑁆𑀘𑀭𑀳𑀺, 𑀪𑀦𑁆𑀢𑁂, 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀘𑀭𑀳𑀻𑀢𑀺 𑀦𑀺𑀧𑀸𑀢𑁄 𑀅𑀓𑁆𑀔𑀦𑁆𑀢𑀺𑀁 ¶ 𑀤𑀻𑀧𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀏𑀯𑀭𑀽𑀧𑀁 𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸𑀧𑀺 𑀲𑀸𑀲𑀦𑀲𑁆𑀲 𑀤𑀸𑀬𑀸𑀤𑁄 𑀦 𑀳𑁄𑀢𑀺, 𑀅𑀜𑁆𑀜𑀁 𑀓𑀺𑀁 𑀦𑀸𑀫 𑀓𑀢𑁆𑀯𑀸 𑀳𑁄𑀢𑀻𑀢𑀺.

𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀻𑀢𑀺 𑀬𑀤𑀸 𑀘 𑀢𑀺𑀲𑁆𑀲𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄, 𑀬𑁂𑀦 𑀘 𑀓𑀸𑀭𑀡𑁂𑀦 𑀧𑀩𑁆𑀩𑀚𑀺𑀢𑁄, 𑀢𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑀢𑁄 𑀉𑀢𑁆𑀢𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑀓𑁆𑀔𑀲𑀻𑀢𑀺 𑀲𑀓𑁆𑀔𑀺𑀲𑁆𑀲𑀲𑀺. 𑀧𑀸𑀫𑁄𑀚𑁆𑀚𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀧𑀸𑀫𑁄𑀚𑁆𑀚𑁄. 𑀧𑀼𑀢𑁆𑀢𑀸𑀦𑀁 𑀫𑀦𑀁 𑀮𑀪𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀼𑀢𑁆𑀢𑀻𑀧𑀺 𑀲𑀸𑀫𑀜𑁆𑀜𑀢𑁄 𑀧𑀼𑀢𑁆𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘 𑀧𑀼𑀢𑁆𑀢𑀸𑀢𑀺 𑀏𑀯𑀁 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀻𑀢𑀼𑀲𑀤𑁆𑀤𑁂𑀦 𑀲𑀳 𑀧𑀬𑀼𑀚𑁆𑀚𑀫𑀸𑀦𑁄 𑀳𑀺 𑀧𑀼𑀢𑁆𑀢𑀲𑀤𑁆𑀤𑁄 𑀏𑀓𑁄𑀯 𑀅𑀯𑀲𑀺𑀲𑁆𑀲𑀢𑀺, 𑀥𑀻𑀢𑀼𑀲𑀤𑁆𑀤𑁄 𑀦𑀺𑀯𑀢𑁆𑀢𑀢𑀻𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀼𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀲𑀼 𑀯𑀺𑀓𑀸𑀮𑀪𑁄𑀚𑀦𑀸𑀯𑁂𑀭𑀫𑀡𑀺𑀧𑀭𑀺𑀬𑁄𑀲𑀸𑀦𑀸𑀲𑀼 𑀙𑀲𑀼 𑀲𑀺𑀓𑁆𑀔𑀸𑀲𑀼 𑀲𑀫𑀸𑀤𑀧𑀦𑀯𑀲𑁂𑀦 𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀲𑀝𑁆𑀞𑀺𑀯𑀲𑁆𑀲𑀸𑀬𑀧𑀺 𑀳𑀺 𑀲𑀸𑀫𑀡𑁂𑀭𑀺𑀬𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁦𑁭𑁮-𑁧𑁦𑁭𑁯) 𑀙 𑀲𑀺𑀓𑁆𑀔𑀸𑀬𑁄 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀬𑁂𑀯. 𑀦 𑀳𑀺 𑀏𑀢𑀸𑀲𑀼 𑀙𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀸𑀫𑀡𑁂𑀭𑀺𑀁 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀙 𑀯𑀲𑁆𑀲𑀸𑀦𑀺 𑀅𑀪𑀺𑀲𑁂𑀓𑀲𑁆𑀲 𑀅𑀲𑁆𑀲𑀸𑀢𑀺 𑀙𑀩𑁆𑀩𑀲𑁆𑀲𑀸𑀪𑀺𑀲𑁂𑀓𑁄, 𑀅𑀪𑀺𑀲𑁂𑀓𑀢𑁄 𑀧𑀝𑁆𑀞𑀸𑀬 𑀅𑀢𑀺𑀓𑁆𑀓𑀦𑁆𑀢𑀙𑀯𑀲𑁆𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑀁 𑀣𑁂𑀭𑀯𑀸𑀤𑀦𑁆𑀢𑀺 𑀤𑁆𑀯𑁂 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸 𑀧𑀸𑀴𑀺𑀬𑁂𑀯𑁂𑀢𑁆𑀣 ‘‘𑀣𑁂𑀭𑀯𑀸𑀤𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 ¶ 𑀫𑀳𑀸𑀓𑀲𑁆𑀲𑀧𑀧𑀪𑀼𑀢𑀻𑀦𑀁 𑀫𑀳𑀸𑀣𑁂𑀭𑀸𑀦𑀁 𑀯𑀸𑀤𑀢𑁆𑀢𑀸 ‘‘𑀣𑁂𑀭𑀯𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑁄𑀦𑁆𑀢𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀏𑀢𑁆𑀣 𑀓𑁄𑀦𑁆𑀢𑀲𑀓𑀼𑀡𑀺𑀬𑁄 𑀦𑀸𑀫 𑀓𑀺𑀦𑁆𑀦𑀭𑀚𑀸𑀢𑀺𑀬𑁄. ‘‘𑀢𑀸𑀲𑀼 𑀏𑀓𑀺𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀲𑀬𑀺𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀭𑀜𑁆𑀜𑀸 𑀧𑁄𑀲𑀺𑀢𑁄 𑀓𑁄𑀦𑁆𑀢𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀫𑀳𑀸𑀯𑀁𑀲𑁂𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀧𑀼𑀭𑁂 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀸, 𑀯𑀦𑁂 𑀯𑀦𑀘𑀭𑁄 𑀘𑀭𑀁;

𑀓𑁄𑀦𑁆𑀢𑀓𑀺𑀦𑁆𑀦𑀭𑀺𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀁 𑀓𑀺𑀭 𑀓𑀧𑁆𑀧𑀬𑀺.

‘‘𑀢𑁂𑀦 𑀲𑀁𑀯𑀸𑀲𑀫𑀦𑁆𑀯𑀸𑀬, 𑀲𑀸 𑀧𑀼𑀢𑁆𑀢𑁂 𑀚𑀦𑀬𑀻 𑀤𑀼𑀯𑁂;

𑀢𑀺𑀲𑁆𑀲𑁄 𑀚𑁂𑀝𑁆𑀞𑁄 𑀓𑀦𑀺𑀝𑁆𑀞𑁄 𑀢𑀼, 𑀲𑀼𑀫𑀺𑀢𑁆𑀢𑁄 𑀦𑀸𑀫 𑀦𑀸𑀫𑀢𑁄.

‘‘𑀫𑀳𑀸𑀯𑀭𑀼𑀡𑀢𑁆𑀣𑁂𑀭𑀲𑁆𑀲 ¶ , 𑀓𑀸𑀮𑁂 𑀧𑀩𑁆𑀩𑀚𑀺 𑀲𑀦𑁆𑀢𑀺𑀓𑁂;

𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀙𑀴𑀪𑀺𑀜𑁆𑀜𑀸𑀕𑀼𑀡𑀁 𑀉𑀪𑁄’’𑀢𑀺.

𑀓𑁂𑀘𑀺 𑀧𑀦 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑁄𑀦𑁆𑀢𑀸 𑀦𑀸𑀫 𑀓𑀝𑁆𑀞𑀯𑀸𑀳𑀦𑀭𑀜𑁆𑀜𑁄 𑀯𑀁𑀲𑁂 𑀚𑀸𑀢𑀸 𑀏𑀓𑀸 𑀭𑀸𑀚𑀥𑀻𑀢𑀸. 𑀢𑀁 𑀕𑀭𑀼𑀴𑀬𑀦𑁆𑀢𑁂𑀦 𑀅𑀭𑀜𑁆𑀜𑀕𑀢𑀁 𑀏𑀓𑁄 𑀯𑀦𑀘𑀭𑀓𑁄 𑀆𑀦𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑀲𑁆𑀲 𑀉𑀪𑁄 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺. 𑀢𑀢𑁆𑀭𑀸𑀬𑀁 𑀚𑁂𑀝𑁆𑀞𑀓𑁄 𑀫𑀸𑀢𑀼𑀦𑀸𑀫𑁂𑀦 𑀓𑁄𑀦𑁆𑀢𑀧𑀼𑀢𑁆𑀢𑁄 𑀦𑀸𑀫 𑀚𑀸𑀢𑁄’’𑀢𑀺. 𑀓𑀝𑁆𑀞𑀯𑀸𑀳𑀦𑀭𑀜𑁆𑀜𑁄 𑀓𑀺𑀭 𑀦𑀕𑀭𑁂 𑀲𑀩𑁆𑀩𑁂𑀧𑀺 𑀯𑀺𑀪𑀯𑀲𑀫𑁆𑀧𑀦𑁆𑀦𑀸 𑀦𑀤𑀻𑀧𑀩𑁆𑀩𑀢𑀓𑀻𑀴𑀸𑀤𑀻𑀲𑀼 𑀕𑀭𑀼𑀴𑀲𑀓𑀼𑀡𑀲𑀤𑀺𑀲𑀁 𑀬𑀦𑁆𑀢𑀁 𑀓𑀸𑀭𑁂𑀢𑁆𑀯𑀸 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 𑀯𑀺𑀬 𑀕𑀭𑀼𑀴𑀯𑀸𑀳𑀦𑁂𑀦 𑀯𑀺𑀘𑀭𑀦𑁆𑀢𑀺.

𑀩𑁆𑀬𑀸𑀥𑀺𑀧𑀝𑀺𑀓𑀫𑁆𑀫𑀢𑁆𑀣𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀆𑀳𑀺𑀡𑁆𑀟𑀦𑁆𑀢𑁄 𑀧𑀲𑀢𑀫𑀢𑁆𑀢𑀁 𑀲𑀧𑁆𑀧𑀺𑀁 𑀅𑀮𑀪𑀺𑀢𑁆𑀯𑀸𑀢𑀺 𑀢𑀤𑀸 𑀓𑀺𑀭 𑀚𑁂𑀝𑁆𑀞𑀲𑁆𑀲 𑀓𑁄𑀦𑁆𑀢𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀓𑀼𑀘𑁆𑀙𑀺𑀯𑀸𑀢𑁄 𑀲𑀫𑀼𑀝𑁆𑀞𑀸𑀲𑀺. 𑀢𑀁 𑀩𑀸𑀴𑁆𑀳𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀻𑀴𑀺𑀢𑀁 𑀓𑀦𑀺𑀝𑁆𑀞𑁄 𑀲𑀼𑀫𑀺𑀢𑁆𑀢𑁄 𑀦𑀸𑀫 𑀣𑁂𑀭𑁄 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢𑁆𑀣, 𑀪𑀦𑁆𑀢𑁂, 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺. 𑀢𑀺𑀲𑁆𑀲𑀢𑁆𑀣𑁂𑀭𑁄, ‘‘𑀆𑀯𑀼𑀲𑁄, 𑀧𑀲𑀢𑀫𑀢𑁆𑀢𑀁 𑀲𑀧𑁆𑀧𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑀦𑀁 𑀢𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑀁 𑀧𑀘𑁆𑀙𑀸𑀪𑀢𑁆𑀢𑀁 𑀲𑀧𑁆𑀧𑀺𑀅𑀢𑁆𑀣𑀸𑀬 𑀘𑀭𑀡𑀜𑁆𑀘 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀫𑁂𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀢𑀬𑀸 𑀬𑀤𑀺 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀏𑀯𑀁 𑀯𑀺𑀘𑀭𑀺𑀢𑁆𑀯𑀸 𑀬𑀁 𑀮𑀤𑁆𑀥𑀁, 𑀢𑀁 𑀆𑀳𑀭𑀸’’𑀢𑀺 𑀆𑀳. 𑀓𑀦𑀺𑀝𑁆𑀞𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀘𑀭𑀦𑁆𑀢𑁄 𑀧𑀲𑀢𑀫𑀢𑁆𑀢𑀫𑁆𑀧𑀺 𑀲𑀧𑁆𑀧𑀺𑀁 𑀦𑀸𑀮𑀢𑁆𑀣. 𑀲𑁄 𑀧𑀦 𑀓𑀼𑀘𑁆𑀙𑀺𑀯𑀸𑀢𑁄 𑀩𑀮𑀯𑀢𑀭𑁄 𑀲𑀧𑁆𑀧𑀺𑀖𑀝𑀲𑀢𑁂𑀦𑀧𑀺 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀅𑀳𑁄𑀲𑀺. 𑀣𑁂𑀭𑁄 𑀢𑁂𑀦𑁂𑀯 𑀩𑁆𑀬𑀸𑀥𑀺𑀩𑀮𑁂𑀦 𑀓𑀸𑀮𑀫𑀓𑀸𑀲𑀺. 𑀓𑁂𑀘𑀺 𑀧𑀦 ‘‘𑀯𑀺𑀘𑁆𑀙𑀺𑀓𑀦𑀸𑀫𑀓𑁂𑀦 𑀓𑀻𑀝𑀯𑀺𑀲𑁂𑀦 𑀟𑀝𑁆𑀞𑁄 𑀣𑁂𑀭𑁄 𑀢𑀲𑁆𑀲 𑀯𑀺𑀲𑀯𑁂𑀕𑁂𑀦 𑀅𑀥𑀺𑀫𑀢𑁆𑀢𑀸𑀬 ¶ 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀢𑀁 𑀯𑀽𑀧𑀲𑀫𑁂𑀢𑀼𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀲𑀢𑀫𑀢𑁆𑀢𑀁 𑀲𑀧𑁆𑀧𑀺𑀁 𑀅𑀮𑀪𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀧𑀸𑀤𑁂 𑀓𑀻𑀝𑀯𑀺𑀲𑁂𑀦𑀸𑀲𑀺, 𑀟𑀝𑁆𑀞𑁄 𑀚𑁂𑀝𑁆𑀞𑁄 𑀲𑀯𑁂𑀤𑀦𑁄;

𑀆𑀳 𑀧𑀼𑀝𑁆𑀞𑁄 𑀓𑀦𑀺𑀝𑁆𑀞𑁂𑀦, 𑀪𑁂𑀲𑀚𑁆𑀚𑀁 𑀧𑀲𑀢𑀁 𑀖𑀢𑀁.

‘‘𑀭𑀜𑁆𑀜𑁄 𑀦𑀺𑀯𑁂𑀤𑀦𑀁 𑀣𑁂𑀭𑁄, 𑀕𑀺𑀮𑀸𑀦𑀧𑀘𑁆𑀘𑀬𑁂𑀧𑀺 𑀘;

𑀲𑀧𑁆𑀧𑀺𑀅𑀢𑁆𑀣𑀜𑁆𑀘 𑀘𑀭𑀡𑀁, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺.

‘‘𑀧𑀺𑀡𑁆𑀟𑀸𑀬 ¶ 𑀘𑁂 𑀘𑀭𑀁 𑀲𑀧𑁆𑀧𑀺𑀁, 𑀮𑀪𑀲𑁂 𑀢𑁆𑀯𑀁 𑀢𑀫𑀸𑀳𑀭;

𑀇𑀘𑁆𑀘𑀸𑀳 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑁄, 𑀲𑀼𑀫𑀺𑀢𑁆𑀢𑀁 𑀣𑁂𑀭𑀫𑀼𑀢𑁆𑀢𑀫𑀁.

‘‘𑀧𑀺𑀡𑁆𑀟𑀸𑀬 𑀘𑀭𑀢𑀸 𑀢𑁂𑀦, 𑀦 𑀮𑀤𑁆𑀥𑀁 𑀧𑀲𑀢𑀁 𑀖𑀢𑀁;

𑀲𑀧𑁆𑀧𑀺𑀓𑀼𑀫𑁆𑀪𑀲𑀢𑁂𑀦𑀸𑀧𑀺, 𑀩𑁆𑀬𑀸𑀥𑀺 𑀚𑀸𑀢𑁄 𑀅𑀲𑀸𑀥𑀺𑀬𑁄.

‘‘𑀢𑁂𑀦𑁂𑀯 𑀩𑁆𑀬𑀸𑀥𑀺𑀦𑀸 𑀣𑁂𑀭𑁄, 𑀧𑀢𑁆𑀢𑁄 𑀆𑀬𑀼𑀓𑁆𑀔𑀬𑀦𑁆𑀢𑀺𑀓𑀁;

𑀑𑀯𑀤𑀺𑀢𑁆𑀯𑀧𑁆𑀧𑀫𑀸𑀤𑁂𑀦, 𑀦𑀺𑀩𑁆𑀩𑀸𑀢𑀼𑀁 𑀫𑀸𑀦𑀲𑀁 𑀅𑀓𑀸.

‘‘𑀆𑀓𑀸𑀲𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸, 𑀢𑁂𑀚𑁄𑀥𑀸𑀢𑀼𑀯𑀲𑁂𑀦 𑀲𑁄;

𑀬𑀣𑀸𑀭𑀼𑀘𑀺 𑀅𑀥𑀺𑀝𑁆𑀞𑀸𑀬, 𑀲𑀭𑀻𑀭𑀁 𑀧𑀭𑀺𑀦𑀺𑀩𑁆𑀩𑀼𑀢𑁄.

‘‘𑀚𑀸𑀮𑀸 𑀲𑀭𑀻𑀭𑀸 𑀦𑀺𑀓𑁆𑀔𑀫𑁆𑀫, 𑀦𑀺𑀫𑀁𑀲𑀙𑀸𑀭𑀺𑀓𑀁 𑀟𑀳𑀺;

𑀣𑁂𑀭𑀲𑁆𑀲 𑀲𑀓𑀮𑀁 𑀓𑀸𑀬𑀁, 𑀅𑀝𑁆𑀞𑀺𑀓𑀸𑀦𑀺 𑀢𑀼 𑀦𑁄 𑀟𑀳𑀻’’𑀢𑀺.

𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸𑀢𑀺 ‘‘𑀅𑀫𑁆𑀳𑀸𑀤𑀺𑀲𑀸𑀦𑀫𑁆𑀧𑀺 𑀏𑀯𑀁 𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸, 𑀢𑀼𑀫𑁆𑀳𑁂 𑀮𑀪𑀫𑀸𑀦𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀫𑀚𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀏𑀯𑀁 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸. 𑀧𑀮𑁆𑀮𑀗𑁆𑀓𑁂𑀦𑀸𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑁂𑀦. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀢𑁂𑀚𑁄𑀥𑀸𑀢𑀼𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸𑀢𑀺 𑀣𑁂𑀭𑀲𑁆𑀲 𑀥𑀸𑀢𑀼𑀲𑀓𑁆𑀓𑀸𑀭𑀁 𑀓𑀢𑁆𑀯𑀸. 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀘𑀢𑀲𑁆𑀲𑁄 𑀧𑁄𑀓𑁆𑀔𑀭𑀡𑀺𑀬𑁄 ¶ 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀏𑀓𑀁 𑀫𑀥𑀼𑀦𑁄, 𑀏𑀓𑀁 𑀨𑀸𑀡𑀺𑀢𑀲𑁆𑀲, 𑀏𑀓𑀁 𑀲𑀓𑁆𑀓𑀭𑀸𑀬 𑀧𑀽𑀭𑀸𑀧𑁂𑀲𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀯𑀫𑁂𑀯 𑀓𑀸𑀭𑀸𑀧𑁂𑀲𑀻𑀢𑀺 𑀯𑀤𑀦𑁆𑀢𑀺.

𑀲𑀪𑀸𑀬𑀁 𑀲𑀢𑀲𑀳𑀲𑁆𑀲𑀦𑁆𑀢𑀺 𑀦𑀕𑀭𑀫𑀚𑁆𑀛𑁂 𑀯𑀺𑀦𑀺𑀘𑁆𑀙𑀬𑀲𑀸𑀮𑀸𑀬𑀁 𑀲𑀢𑀲𑀳𑀲𑁆𑀲𑀁. 𑀇𑀫𑀺𑀦𑀸 𑀲𑀓𑀮𑀦𑀕𑀭𑀢𑁄 𑀲𑀫𑀼𑀝𑁆𑀞𑀺𑀢𑀁 𑀆𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀭𑀜𑁆𑀜𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘 𑀭𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀦𑀓𑀁 𑀆𑀬𑀁 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀲𑀢𑀲𑀳𑀲𑁆𑀲𑀢𑁄. 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀤𑁂𑀯𑀲𑀺𑀓𑀁 𑀲𑀢𑀲𑀳𑀲𑁆𑀲𑀁 𑀯𑀺𑀲𑀚𑁆𑀚𑁂𑀲𑀻𑀢𑀺 𑀓𑀣𑀁 𑀧𑀦 𑀣𑁂𑀭𑀲𑁆𑀲 𑀲𑀢𑀲𑀳𑀲𑁆𑀲𑀁 𑀯𑀺𑀲𑀚𑁆𑀚𑁂𑀲𑀺? 𑀭𑀸𑀚𑀸 𑀓𑀺𑀭 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀝𑀓𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀦𑀻𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫 𑀦𑀻𑀢’’𑀦𑁆𑀢𑀺 𑀲𑀼𑀢𑁆𑀯𑀸𑀯 𑀧𑀭𑀺𑀯𑀢𑁆𑀢𑁂𑀢𑀺. 𑀣𑁂𑀭𑁄𑀧𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀢𑀺𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑀺. 𑀢𑀲𑁆𑀲 𑀳𑀺 𑀢𑀺𑀘𑀻𑀯𑀭𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀘 ¶ 𑀕𑀦𑁆𑀥𑀲𑀫𑀼𑀕𑁆𑀕𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀫𑀸𑀮𑀸𑀲𑀫𑀼𑀕𑁆𑀕𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀸𑀢𑁄𑀯 𑀆𑀳𑀭𑀻𑀬𑀺𑀢𑁆𑀣, 𑀢𑀣𑀸 𑀤𑀺𑀯𑀸 𑀘𑁂𑀯 𑀲𑀸𑀬𑀜𑁆𑀘. 𑀣𑁂𑀭𑁄𑀧𑀺 𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀲𑀺, 𑀲𑀫𑁆𑀧𑀢𑁆𑀢𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀤𑀸𑀲𑀺. 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀓𑀁 𑀘𑀻𑀯𑀭𑀁 𑀅𑀳𑁄𑀲𑀺. 𑀏𑀯𑀁 𑀣𑁂𑀭𑀲𑁆𑀲 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑀚𑁆𑀚𑁂𑀲𑀺. 𑀉𑀴𑀸𑀭𑁄 𑀮𑀸𑀪𑀲𑀓𑁆𑀓𑀸𑀭𑁄𑀢𑀺 𑀏𑀢𑁆𑀣 𑀮𑀩𑁆𑀪𑀢𑀺 𑀧𑀸𑀧𑀼𑀡𑀻𑀬𑀢𑀻𑀢𑀺 𑀮𑀸𑀪𑁄, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀓𑁆𑀓𑀘𑁆𑀘𑀁 𑀓𑀸𑀢𑀩𑁆𑀩𑁄 𑀤𑀸𑀢𑀩𑁆𑀩𑁄𑀢𑀺 𑀲𑀓𑁆𑀓𑀸𑀭𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸𑀬𑁂𑀯. 𑀧𑀘𑁆𑀘𑀬𑀸 𑀏𑀯 𑀳𑀺 𑀧𑀡𑀻𑀢𑀧𑀡𑀻𑀢𑀸 𑀲𑀼𑀦𑁆𑀤𑀭𑀲𑀼𑀦𑁆𑀤𑀭𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀸 ‘‘𑀲𑀓𑁆𑀓𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀧𑀭𑁂𑀳𑀺 𑀓𑀸𑀢𑀩𑁆𑀩𑀕𑀸𑀭𑀯𑀓𑀺𑀭𑀺𑀬𑀸 𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀸 𑀯𑀸 𑀲𑀓𑁆𑀓𑀸𑀭𑁄.

𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀁 (𑀫. 𑀦𑀺. 𑁨.𑁧𑁧𑁯), 𑀲𑀗𑁆𑀔𑀸𑀭𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁪𑁧) 𑀯𑀺𑀬. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀧𑁆𑀧𑀓𑀸𑀭𑁄 𑀯𑀸 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀪𑁂𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀺𑀬𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀧𑁆𑀧𑀓𑀸𑀭𑀲𑀤𑁆𑀤𑁂 𑀲𑀫𑀸𑀦𑀢𑁆𑀣𑁂 𑀇𑀘𑁆𑀙𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀲𑀓𑁆𑀓𑀸 𑀇𑀫𑁂𑀲𑀁 𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀯𑀽𑀧𑀲𑀫𑁂𑀢𑀼𑀦𑁆𑀢𑀺 𑀢𑁂𑀲𑀜𑁆𑀳𑀺 𑀫𑀚𑁆𑀛𑁂 𑀯𑀲𑀦𑁆𑀢𑁄 𑀢𑁂𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 𑀆𑀤𑁂𑀬𑁆𑀬𑀯𑀘𑀦𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀢𑀤𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀼𑀔𑀯𑀺𑀳𑀸𑀭𑀸𑀪𑀸𑀯𑀢𑁄 𑀢𑀁 𑀧𑀳𑀸𑀬 𑀇𑀘𑁆𑀙𑀺𑀢𑀩𑁆𑀩𑀲𑀼𑀔𑀯𑀺𑀳𑀸𑀭𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑀸 𑀨𑀸𑀲𑀼𑀓𑀯𑀺𑀳𑀸𑀭𑁂𑀦 𑀯𑀺𑀳𑀭𑀺𑀢𑀼𑀓𑀸𑀫𑁄’’𑀢𑀺. 𑀅𑀳𑁄𑀕𑀗𑁆𑀕𑀧𑀩𑁆𑀩𑀢𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀧𑀩𑁆𑀩𑀢𑀁. 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘, 𑀢𑀲𑁆𑀫𑀸 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸𑀬 𑀘 𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀫𑁆𑀫𑀯𑀲𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀩𑁆𑀩𑀼𑀤𑀁 𑀣𑁂𑀦𑀦𑀝𑁆𑀞𑁂𑀦, 𑀫𑀮𑀁 𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑀝𑁆𑀞𑁂𑀦, 𑀓𑀡𑁆𑀝𑀓𑀁 𑀯𑀺𑀚𑁆𑀛𑀦𑀝𑁆𑀞𑁂𑀦. 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀻𑀢𑀺 𑀅𑀕𑁆𑀕𑀺𑀳𑀼𑀢𑁆𑀢𑀓𑀸 𑀯𑀺𑀬 𑀅𑀕𑁆𑀕𑀺𑀁 𑀧𑀽𑀚𑁂𑀦𑁆𑀢𑀺 ¶ . 𑀧𑀜𑁆𑀘𑀸𑀢𑀧𑁂 𑀢𑀧𑁆𑀧𑀦𑁆𑀢𑀻𑀢𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀞𑀢𑁆𑀯𑀸 𑀲𑀽𑀭𑀺𑀬𑀸𑀢𑀧𑁂𑀦 𑀢𑀧𑁆𑀧𑀦𑁆𑀢𑀺. 𑀆𑀤𑀺𑀘𑁆𑀘𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀉𑀤𑀬𑀓𑀸𑀮𑀢𑁄 𑀧𑀪𑀼𑀢𑀺 𑀲𑀽𑀭𑀺𑀬𑀁 𑀑𑀮𑁄𑀓𑀬𑀫𑀸𑀦𑀸 𑀬𑀸𑀯𑀢𑁆𑀣𑀗𑁆𑀕𑀫𑀦𑀸 𑀲𑀽𑀭𑀺𑀬𑀸𑀪𑀺𑀫𑀼𑀔𑀸𑀯 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑁄𑀪𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀧𑀕𑁆𑀕𑀡𑁆𑀳𑀺𑀁𑀲𑀽𑀢𑀺 𑀯𑀺𑀦𑀸𑀲𑁂𑀲𑁆𑀲𑀸𑀫𑀸𑀢𑀺 𑀉𑀲𑁆𑀲𑀸𑀳𑀫𑀓𑀁𑀲𑀼. 𑀅𑀯𑀺𑀲𑀳𑀦𑁆𑀢𑁄𑀢𑀺 𑀅𑀲𑀓𑁆𑀓𑁄𑀦𑁆𑀢𑁄.

𑀲𑀢𑁆𑀢𑀤𑀺𑀯𑀲𑁂𑀦 ¶ 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀸𑀢𑀺 𑀲𑀢𑁆𑀢𑀤𑀺𑀯𑀲𑁂 𑀭𑀚𑁆𑀚𑀲𑀼𑀔𑀁 𑀢𑀸𑀯 𑀅𑀦𑀼𑀪𑀯. 𑀢𑀫𑀢𑁆𑀣𑀁 𑀲𑀜𑁆𑀜𑀸𑀧𑁂𑀲𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀫𑀢𑁆𑀣𑀁 𑀩𑁄𑀥𑁂𑀲𑀺. 𑀓𑀣𑀁 𑀲𑀜𑁆𑀜𑀸𑀧𑁂𑀲𑀻𑀢𑀺 𑀆𑀳 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑀭𑀽𑀧𑀦𑁆𑀢𑀺 𑀘𑀺𑀢𑁆𑀢𑀸𑀦𑀼𑀭𑀽𑀧𑀁, 𑀬𑀣𑀸𑀓𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀲𑁆𑀲𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀅𑀭𑁂 𑀢𑁆𑀯𑀁 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑀫𑀭𑀡𑀦𑁆𑀢𑀺 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀫𑀭𑀡𑀁. 𑀯𑀺𑀲𑁆𑀲𑀢𑁆𑀣𑁄𑀢𑀺 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑁄, 𑀫𑀭𑀡𑀲𑀗𑁆𑀓𑀸𑀭𑀳𑀺𑀢𑁄 𑀦𑀺𑀩𑁆𑀪𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀩𑀤𑁆𑀥𑀁 𑀫𑀭𑀡𑀁 𑀧𑁂𑀓𑁆𑀔𑀫𑀸𑀦𑀸𑀢𑀺 ‘‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁, 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀧𑀲𑁆𑀲𑀲𑀸𑀫𑀺 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’’𑀢𑀺 𑀏𑀯𑀁 𑀫𑀭𑀡𑀲𑁆𑀲𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀦𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑁆𑀧𑀯𑀢𑁆𑀢𑀺𑀓𑀸𑀮𑀧𑀝𑀺𑀩𑀤𑁆𑀥𑀁 𑀫𑀭𑀡𑀁 𑀧𑁂𑀓𑁆𑀔𑀫𑀸𑀦𑀸. 𑀢𑀢𑁆𑀣 𑀅𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀯𑀸𑀢𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀧𑀺 𑀯𑀤𑀦𑁆𑀢𑀺.

𑀫𑀺𑀕𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀫𑀺𑀕𑀫𑀸𑀭𑀡𑀢𑁆𑀣𑀸𑀬 ‘‘𑀅𑀭𑀜𑁆𑀜𑁂 𑀫𑀺𑀕𑀧𑀭𑀺𑀬𑁂𑀲𑀦𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀢𑀢𑁆𑀣 𑀫𑀺𑀕𑀯𑀦𑁆𑀢𑀺 𑀫𑀺𑀕𑀸𑀦𑀁 𑀯𑀸𑀦𑀦𑀢𑁄 𑀳𑁂𑀲𑀦𑀢𑁄 𑀩𑀸𑀥𑀦𑀢𑁄 ‘‘𑀫𑀺𑀕𑀯’’𑀦𑁆𑀢𑀺 𑀮𑀤𑁆𑀥𑀲𑀫𑀜𑁆𑀜𑀁 𑀫𑀺𑀕𑀯𑀁. 𑀬𑁄𑀦𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀦𑁆𑀢𑀺 𑀬𑁄𑀦𑀓𑀯𑀺𑀲𑀬𑁂 𑀚𑀸𑀢𑀁 𑀇𑀥𑀸𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑀁 𑀥𑀫𑁆𑀫𑀭𑀓𑁆𑀔𑀺𑀢𑀦𑀸𑀫𑀥𑁂𑀬𑁆𑀬𑀁 𑀫𑀳𑀸𑀣𑁂𑀭𑀁. 𑀳𑀢𑁆𑀣𑀺𑀦𑀸𑀕𑁂𑀦𑀸𑀢𑀺 𑀫𑀳𑀸𑀳𑀢𑁆𑀣𑀺𑀦𑀸. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀧𑀺 𑀳𑀺 𑀦𑀸𑀕𑀲𑀤𑁆𑀤𑁄𑀢𑀺 𑀯𑀤𑀦𑁆𑀢𑀺. 𑀅𑀳𑀺𑀦𑀸𑀕𑀸𑀤𑀺𑀢𑁄 𑀯𑀸 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀳𑀢𑁆𑀣𑀺𑀦𑀸𑀕𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀲𑀬𑀁 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁. 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀢𑀲𑁆𑀫𑀺𑀁 𑀧𑀲𑁆𑀲𑀦𑁆𑀢𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀬𑀁 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦 𑀳𑁄𑀢𑀻𑀢𑀺 𑀕𑀺𑀳𑀺𑀲𑁆𑀲𑀧𑀺 𑀇𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀲𑀸 𑀳𑀺 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫. 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸 𑀧𑀦 𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺. 𑀢𑀣𑀸 𑀘 𑀯𑀓𑁆𑀔𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁨𑁫𑁨) ‘‘𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀮𑀕𑁆𑀕𑁂𑀢𑁆𑀯𑀸𑀢𑀺 𑀆𑀓𑀸𑀲𑁂 𑀓𑀸𑀬𑀩𑀦𑁆𑀥𑀦𑀁 𑀧𑀲𑀸𑀭𑁂𑀢𑁆𑀯𑀸 𑀢𑀢𑁆𑀣 𑀘𑀻𑀯𑀭𑀁 𑀮𑀕𑁆𑀕𑁂𑀢𑁆𑀯𑀸.

𑀙𑀡𑀯𑁂𑀲𑀦𑁆𑀢𑀺 ¶ 𑀢𑀼𑀝𑁆𑀞𑀺𑀚𑀦𑀦𑀯𑁂𑀲𑀁, 𑀉𑀲𑁆𑀲𑀯𑀯𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀬𑀸𑀤𑁂𑀲𑀼𑀦𑁆𑀢𑀺 ‘‘𑀆𑀕𑀢𑀓𑀸𑀮𑁂 𑀘𑀻𑀯𑀭𑀸𑀤𑀻𑀦𑀁 ¶ 𑀧𑀭𑀺𑀬𑁂𑀲𑀦𑀁 𑀪𑀸𑀭𑀺𑀬’’𑀦𑁆𑀢𑀺 𑀧𑀞𑀫𑀫𑁂𑀯 𑀧𑀢𑁆𑀢𑀘𑀻𑀯𑀭𑀸𑀦𑀺 𑀲𑀫𑁆𑀧𑀸𑀤𑁂𑀲𑀼𑀁. 𑀧𑀥𑀸𑀦𑀖𑀭𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀅𑀦𑀼𑀭𑀽𑀧𑀁 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀁. 𑀲𑁄𑀧𑀻𑀢𑀺 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀼𑀧𑀩𑁆𑀩𑀚𑀺𑀢𑁄𑀢𑀺 𑀉𑀴𑀸𑀭𑀯𑀺𑀪𑀯𑁂𑀦 𑀔𑀢𑁆𑀢𑀺𑀬𑀚𑀦𑁂𑀦 𑀅𑀦𑀼𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀕𑀦𑁆𑀢𑁆𑀯𑀸𑀢𑀺 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸. 𑀓𑀼𑀲𑀮𑀸𑀥𑀺𑀧𑁆𑀧𑀸𑀬𑁄𑀢𑀺 𑀫𑀦𑀸𑀧𑀚𑁆𑀛𑀸𑀲𑀬𑁄. 𑀤𑁆𑀯𑁂𑀴𑁆𑀳𑀓𑀚𑀸𑀢𑁄𑀢𑀺 ‘‘𑀇𑀫𑁂 𑀪𑀺𑀓𑁆𑀔𑀽 𑀦 𑀏𑀓𑀫𑀕𑁆𑀕𑁂𑀦 𑀓𑀣𑁂𑀦𑁆𑀢𑀻’’𑀢𑀺 𑀲𑀁𑀲𑀬𑀫𑀸𑀧𑀦𑁆𑀦𑁄. 𑀏𑀓𑁂𑀓𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑀦𑁆𑀢𑀺 𑀏𑀓𑁂𑀓𑀲𑁆𑀲 𑀏𑀓𑁂𑀓𑀲𑀳𑀲𑁆𑀲𑀧𑀭𑀺𑀘𑁆𑀙𑀺𑀦𑁆𑀦𑀁 𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀜𑁆𑀘. 𑀕𑀡𑁆𑀳𑀺𑀢𑁆𑀯𑀸 𑀆𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀣𑁂𑀭𑀸 𑀪𑀺𑀓𑁆𑀔𑀽 ‘‘𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀕𑀢𑀸. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀓𑀼𑀓𑁆𑀓𑀼𑀘𑁆𑀘𑀁 𑀦 𑀓𑀸𑀢𑀩𑁆𑀩𑀁. 𑀓𑀧𑁆𑀧𑀺𑀬𑀲𑀸𑀲𑀦𑀜𑁆𑀳𑁂𑀢𑀁 𑀦 𑀕𑀺𑀳𑀺𑀓𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀁. 𑀣𑁂𑀭𑁄 𑀦𑀸𑀕𑀘𑁆𑀙𑀻𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀭𑀸𑀚𑀸 𑀧𑀓𑁆𑀓𑁄𑀲𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀥𑀫𑁆𑀫𑀓𑀫𑁆𑀫𑀢𑁆𑀣𑀸𑀬 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀦 𑀧𑁂𑀲𑀺𑀢𑁂𑀧𑀺 𑀦 𑀆𑀕𑀢𑁄 𑀓𑀺𑀭. 𑀣𑁂𑀭𑁄 𑀳𑀺 𑀲𑀩𑁆𑀩𑀢𑁆𑀣 𑀯𑀺𑀔𑁆𑀬𑀸𑀢𑀯𑀲𑁂𑀦 𑀲𑀫𑁆𑀪𑀸𑀯𑀦𑀼𑀧𑁆𑀧𑀢𑁆𑀢𑀺𑀢𑁄 𑀲𑀫𑁆𑀪𑀸𑀯𑀺𑀢𑀲𑁆𑀲 𑀘 𑀉𑀤𑁆𑀥𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀅𑀲𑀸𑀭𑀼𑀧𑁆𑀧𑀯𑀘𑀦𑀮𑁂𑀲𑁂𑀦 𑀦 𑀆𑀕𑀘𑁆𑀙𑀻𑀢𑀺. 𑀫𑀳𑀮𑁆𑀮𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀣𑁂𑀭𑁄𑀢𑀺 𑀓𑀺𑀜𑁆𑀘𑀸𑀧𑀺 𑀭𑀸𑀚𑀸 𑀣𑁂𑀭𑀁 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀦𑀸𑀫𑀁 𑀧𑀦 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀧𑀼𑀘𑁆𑀙𑀻𑀢𑀺 𑀯𑀤𑀦𑁆𑀢𑀺. 𑀯𑀬𑁆𑀳𑀦𑁆𑀢𑀺 𑀉𑀧𑀭𑀺 𑀫𑀡𑁆𑀟𑀧𑀲𑀤𑀺𑀲𑀁 𑀧𑀤𑀭𑀘𑁆𑀙𑀦𑁆𑀦𑀁, 𑀲𑀩𑁆𑀩𑀧𑀮𑀺𑀕𑀼𑀡𑁆𑀞𑀺𑀫𑀁 𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑀁 𑀲𑀓𑀝𑀯𑀺𑀲𑁂𑀲𑀁 𑀯𑀬𑁆𑀳𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀏𑀢𑁆𑀣 𑀦𑀸𑀯𑀸𑀢𑀺 𑀧𑁄𑀢𑁄. 𑀲𑁄 𑀳𑀺 𑀑𑀭𑀢𑁄 𑀧𑀸𑀭𑀁 𑀧𑀢𑀢𑀺 𑀕𑀘𑁆𑀙𑀢𑀻𑀢𑀺 𑀧𑁄𑀢𑁄, 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑀸𑀯𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀓𑀢𑁄 𑀲𑀗𑁆𑀖𑀝𑀺𑀢𑀸 𑀦𑀸𑀯𑀸 𑀦𑀸𑀯𑀸𑀲𑀗𑁆𑀖𑀸𑀝𑀁, 𑀢𑀣𑀸 𑀢𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀩𑀳𑀼𑀪𑀸𑀯𑀢𑁄 𑀆𑀳 ‘‘𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬𑀸’’𑀢𑀺. 𑀬𑀦𑁆𑀢𑀺 𑀬𑀲𑁆𑀫𑀸, 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄’’𑀢𑀺 (𑀘𑀽𑀴𑀯. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀽𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁭) 𑀯𑀘𑀦𑀢𑁄 𑀧𑀸𑀧𑀓𑀭𑀡𑀸𑀪𑀸𑀯𑀢𑁄 𑀲𑀫𑀡𑁄 𑀇𑀥 𑀦𑀸𑀕𑁄 𑀦𑀸𑀫𑀸𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀏𑀓𑁄 𑀢𑀁 𑀫𑀳𑀸𑀭𑀸𑀚 𑀲𑀫𑀡𑀦𑀸𑀕𑁄 𑀤𑀓𑁆𑀔𑀺𑀡𑀳𑀢𑁆𑀣𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀅𑀩𑁆𑀩𑀸𑀳𑀺𑀁𑀲𑀽𑀢𑀺 𑀆𑀓𑀟𑁆𑀠𑀺𑀁𑀲𑀼. ‘‘𑀭𑀜𑁆𑀜𑁄 𑀳𑀢𑁆𑀣𑀕𑁆𑀕𑀳𑀡𑀁 𑀮𑀻𑀴𑀸𑀯𑀲𑁂𑀦 𑀓𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀲𑁆𑀫𑀸𑀢𑀺𑀆𑀤𑀺𑀘𑁄𑀤𑀦𑀁 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀩𑀸𑀳𑀺𑀭𑀢𑁄𑀢𑀺 𑀉𑀬𑁆𑀬𑀸𑀦𑀲𑁆𑀲 𑀩𑀸𑀳𑀺𑀭𑀢𑁄. 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀤𑀼𑀓𑁆𑀓𑀭𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 𑀤𑀼𑀓𑁆𑀓𑀭’’𑀦𑁆𑀢𑀺. 𑀅𑀥𑀺𑀝𑁆𑀞𑀸𑀦𑁂 𑀧𑀦𑁂𑀢𑁆𑀣 𑀯𑀺𑀲𑀼𑀁 𑀤𑀼𑀓𑁆𑀓𑀭𑀢𑀸 𑀦𑀸𑀫 𑀦𑀢𑁆𑀣𑀺. 𑀲𑀻𑀫𑀁 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀦𑁆𑀢𑁄𑀲𑀻𑀫𑀁 𑀲𑀻𑀫𑀸𑀬 ¶ 𑀅𑀩𑁆𑀪𑀦𑁆𑀢𑀭𑀁 𑀅𑀓𑁆𑀓𑀫𑀺𑀢𑁆𑀯𑀸. 𑀅𑀪𑀺𑀜𑁆𑀜𑀸𑀧𑀸𑀤𑀓𑀦𑁆𑀢𑀺 𑀅𑀪𑀺𑀜𑁆𑀜𑀸𑀬 𑀧𑀢𑀺𑀝𑁆𑀞𑀸𑀪𑀽𑀢𑀁. 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸 𑀏𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀣𑀯𑀻𑀘𑀮𑀦𑀁 𑀅𑀥𑀺𑀝𑁆𑀞𑀳𑀺. 𑀭𑀣𑀲𑁆𑀲 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑁄 𑀧𑀸𑀤𑁄𑀯 𑀘𑀮𑀻𑀢𑀺 𑀏𑀢𑁆𑀣 𑀧𑀸𑀤𑁄𑀢𑀺 𑀭𑀣𑀘𑀓𑁆𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀭𑀣𑀲𑁆𑀲 𑀕𑀫𑀦𑀓𑀺𑀘𑁆𑀘𑀲𑀸𑀥𑀦𑀢𑁄 𑀧𑀸𑀤𑀲𑀤𑀺𑀲𑀢𑁆𑀢𑀸 𑀇𑀥 ‘‘𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀁. 𑀲𑀓𑁆𑀔𑀢𑀻𑀢𑀺 𑀲𑀓𑁆𑀔𑀺𑀲𑁆𑀲𑀢𑀺. 𑀏𑀢𑀫𑀢𑁆𑀣𑀦𑁆𑀢𑀺 𑀯𑀺𑀦𑀸 𑀘𑁂𑀢𑀦𑀸𑀬 𑀧𑀸𑀧𑀲𑁆𑀲 𑀅𑀲𑀫𑁆𑀪𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁. 𑀘𑁂𑀢𑀦𑀸𑀳𑀦𑁆𑀢𑀺 𑀏𑀢𑁆𑀣 ‘‘𑀘𑁂𑀢𑀦𑀁 𑀅𑀳’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀘𑁂𑀢𑀬𑀺𑀢𑁆𑀯𑀸𑀢𑀺 𑀘𑁂𑀢𑀦𑀁 𑀧𑀯𑀢𑁆𑀢𑀬𑀺𑀢𑁆𑀯𑀸. 𑀤𑀻𑀧𑀓𑀢𑀺𑀢𑁆𑀢𑀺𑀭𑁄𑀢𑀺 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀪𑀸𑀯𑀲𑁆𑀲 𑀤𑀻𑀧𑀦𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑁄 ¶ 𑀢𑀺𑀢𑁆𑀢𑀺𑀭𑁄. 𑀬𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀲𑀸𑀓𑀼𑀡𑀺𑀓𑁄 𑀢𑀲𑁆𑀲 𑀲𑀤𑁆𑀤𑁂𑀦 𑀆𑀕𑀢𑀸𑀕𑀢𑁂 𑀢𑀺𑀢𑁆𑀢𑀺𑀭𑁂 𑀕𑀡𑁆𑀳𑀸𑀢𑀺.

𑀢𑀸𑀧𑀲𑀁 𑀧𑀼𑀘𑁆𑀙𑀻𑀢𑀺 𑀅𑀢𑀻𑀢𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀕𑀸𑀫𑁂 𑀏𑀓𑁄 𑀲𑀸𑀓𑀼𑀡𑀺𑀓𑁄 𑀏𑀓𑀁 𑀤𑀻𑀧𑀓𑀢𑀺𑀢𑁆𑀢𑀺𑀭𑀁 𑀕𑀳𑁂𑀢𑁆𑀯𑀸 𑀲𑀼𑀝𑁆𑀞𑀼 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀧𑀜𑁆𑀚𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑁄 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀢𑀲𑁆𑀲 𑀲𑀤𑁆𑀤𑁂𑀦 𑀆𑀕𑀢𑀸𑀕𑀢𑁂 𑀢𑀺𑀢𑁆𑀢𑀺𑀭𑁂 𑀕𑀡𑁆𑀳𑀸𑀢𑀺. 𑀢𑀺𑀢𑁆𑀢𑀺𑀭𑁄 ‘‘𑀫𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀫𑀫 𑀜𑀸𑀢𑀓𑀸 𑀦𑀲𑁆𑀲𑀦𑁆𑀢𑀺, 𑀫𑀬𑁆𑀳𑁂𑀢𑀁 𑀧𑀸𑀧’’𑀦𑁆𑀢𑀺 𑀦𑀺𑀲𑁆𑀲𑀤𑁆𑀤𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀦𑀺𑀲𑁆𑀲𑀤𑁆𑀤𑀪𑀸𑀯𑀁 𑀜𑀢𑁆𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀢𑀁 𑀲𑀻𑀲𑁂 𑀧𑀳𑀭𑀢𑀺. 𑀢𑀺𑀢𑁆𑀢𑀺𑀭𑁄 𑀤𑀼𑀓𑁆𑀔𑀸𑀢𑀼𑀭𑀢𑀸𑀬 𑀲𑀤𑁆𑀤𑀁 𑀓𑀭𑁄𑀢𑀺. 𑀏𑀯𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀣 𑀲𑁄 𑀢𑀺𑀢𑁆𑀢𑀺𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀫𑀭𑀦𑁆𑀢𑀽𑀢𑀺 𑀫𑀬𑁆𑀳𑀁 𑀘𑁂𑀢𑀦𑀸 𑀦𑀢𑁆𑀣𑀺, 𑀧𑀝𑀺𑀘𑁆𑀘 𑀓𑀫𑁆𑀫𑀁 𑀧𑀦 𑀫𑀁 𑀨𑀼𑀲𑀢𑀺. 𑀫𑀬𑀺 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂 𑀳𑀺 𑀏𑀢𑁂 𑀦𑀸𑀕𑀘𑁆𑀙𑀦𑁆𑀢𑀺, 𑀓𑀭𑁄𑀦𑁆𑀢𑁂𑀬𑁂𑀯𑀸𑀕𑀘𑁆𑀙𑀦𑁆𑀢𑀺, 𑀆𑀕𑀢𑀸𑀕𑀢𑁂 𑀅𑀬𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀫𑀬𑁆𑀳𑀁 𑀧𑀸𑀧𑀁, 𑀦𑀢𑁆𑀣𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 ‘‘𑀓𑁄 𑀦𑀼 𑀔𑁄 𑀫𑁂 𑀇𑀫𑀁 𑀓𑀗𑁆𑀔𑀁 𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺 𑀢𑀣𑀸𑀭𑀽𑀧𑀁 𑀧𑀡𑁆𑀟𑀺𑀢𑀁 𑀉𑀧𑀥𑀸𑀭𑁂𑀦𑁆𑀢𑁄 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀩𑀳𑀼𑀓𑁂 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑀲𑁆𑀲 𑀅𑀲𑁆𑀲𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀜𑁆𑀚𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀯𑀸𑀮𑀺𑀓𑀸𑀢𑀮𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀺𑀢𑁆𑀢𑀺𑀭𑁄 𑀢𑀲𑁆𑀲 𑀦𑀺𑀤𑁆𑀤𑀫𑁄𑀓𑁆𑀓𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀫 𑀓𑀗𑁆𑀔𑀁 𑀇𑀫𑀁 𑀢𑀸𑀧𑀲𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀚𑀸𑀦𑀦𑁆𑀢𑁄 𑀫𑁂 𑀓𑀣𑁂𑀲𑁆𑀲𑀢𑀻’’𑀢𑀺 𑀧𑀜𑁆𑀚𑀭𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑁋

‘‘𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀩𑀳𑀼 𑀆𑀕𑀘𑁆𑀙𑀢𑁂 𑀚𑀦𑁄;

𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄’’𑀢𑀺. (𑀚𑀸. 𑁧.𑁪.𑁭𑁫) 𑁋

𑀢𑀸𑀧𑀲𑀁 ¶ 𑀧𑀼𑀘𑁆𑀙𑀺. 𑀢𑀲𑁆𑀲𑀢𑁆𑀣𑁄 (𑀚𑀸. 𑀅𑀝𑁆𑀞. 𑁩.𑁭𑁫) 𑁋 𑀪𑀦𑁆𑀢𑁂, 𑀲𑀘𑀸𑀳𑀁 𑀲𑀤𑁆𑀤𑀁 𑀦 𑀓𑀭𑁂𑀬𑁆𑀬𑀁, 𑀅𑀬𑀁 𑀢𑀺𑀢𑁆𑀢𑀺𑀭𑀚𑀦𑁄 𑀦 𑀆𑀕𑀘𑁆𑀙𑁂𑀬𑁆𑀬, 𑀫𑀬𑀺 𑀧𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂 ‘‘𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄’’𑀢𑀺 𑀅𑀬𑀁 𑀩𑀳𑀼𑀚𑀦𑁄 𑀆𑀕𑀘𑁆𑀙𑀢𑀺, 𑀢𑀁 𑀆𑀕𑀢𑀸𑀕𑀢𑀁 𑀮𑀼𑀤𑁆𑀤𑁄 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑁄 𑀫𑀁 𑀧𑀝𑀺𑀘𑁆𑀘 𑀫𑀁 𑀦𑀺𑀲𑁆𑀲𑀸𑀬 𑀏𑀢𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀨𑀼𑀲𑀢𑀺 𑀧𑀝𑀺𑀮𑀪𑀢𑀺 𑀯𑀺𑀦𑁆𑀤𑀢𑀺, 𑀢𑀲𑁆𑀫𑀺𑀁 𑀫𑀁 𑀧𑀝𑀺𑀘𑁆𑀘 𑀓𑀢𑁂 𑀧𑀸𑀧𑁂 ‘‘𑀫𑀫 𑀦𑀼 𑀔𑁄 𑀏𑀢𑀁 𑀧𑀸𑀧’’𑀦𑁆𑀢𑀺 𑀏𑀯𑀁 𑀫𑁂 𑀫𑀦𑁄 𑀲𑀗𑁆𑀓𑀢𑀺 𑀧𑀭𑀺𑀲𑀗𑁆𑀓𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀆𑀧𑀚𑁆𑀚𑀢𑀻𑀢𑀺.

𑀦 𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀻𑀢𑀺𑀆𑀤𑀺𑀓𑀸𑀬 𑀧𑀦 𑀢𑀸𑀧𑀲𑁂𑀦 𑀯𑀼𑀢𑁆𑀢𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀬𑀤𑀺 𑀢𑀯 𑀧𑀸𑀧𑀓𑀺𑀭𑀺𑀬𑀸𑀬 𑀫𑀦𑁄 𑀦 𑀧𑀤𑀼𑀲𑁆𑀲𑀢𑀺, 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀦 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀮𑀼𑀤𑁆𑀤𑁂𑀦 𑀢𑀁 𑀧𑀝𑀺𑀘𑁆𑀘 𑀓𑀢𑀫𑁆𑀧𑀺 ¶ 𑀧𑀸𑀧𑀓𑀫𑁆𑀫𑀁 𑀢𑀁 𑀦 𑀨𑀼𑀲𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀧𑀸𑀧𑀓𑀺𑀭𑀺𑀬𑀸𑀬 𑀳𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀦𑀺𑀭𑀸𑀮𑀬𑀲𑁆𑀲 𑀪𑀤𑁆𑀭𑀲𑁆𑀲 𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀢𑁄 𑀢𑀯 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀬 𑀅𑀪𑀸𑀯𑀸 𑀢𑀁 𑀧𑀸𑀧𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀢𑀯 𑀘𑀺𑀢𑁆𑀢𑀁 𑀦 𑀅𑀮𑁆𑀮𑀻𑀬𑀢𑀻𑀢𑀺.

𑀲𑀫𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑀤𑁆𑀥𑀺𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀺 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀢𑀸𑀦𑀜𑁆𑀘 𑀣𑁂𑀭𑀜𑁆𑀘 𑀬𑀣𑀸 𑀢𑁂 𑀪𑀺𑀓𑁆𑀔𑀽 𑀦 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀲𑀸𑀡𑀺𑀧𑀸𑀓𑀸𑀭𑁂𑀦 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀲𑀸𑀡𑀺𑀧𑀸𑀓𑀸𑀭𑀁 𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀸𑀡𑀺𑀧𑀸𑀓𑀸𑀭𑀦𑁆𑀢𑀭𑁂𑀢𑀺 𑀲𑀸𑀡𑀺𑀧𑀸𑀓𑀸𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀏𑀓𑀮𑀤𑁆𑀥𑀺𑀓𑁂𑀢𑀺 𑀲𑀫𑀸𑀦𑀮𑀤𑁆𑀥𑀺𑀓𑁂. 𑀓𑀺𑀁 𑀯𑀤𑀢𑀺 𑀲𑀻𑀮𑁂𑀦𑀸𑀢𑀺 𑀓𑀺𑀁𑀯𑀸𑀤𑀻. 𑀅𑀣 𑀯𑀸 𑀓𑁄 𑀓𑀢𑀫𑁄 𑀯𑀸𑀤𑁄 𑀓𑀺𑀁𑀯𑀸𑀤𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀺𑀁𑀯𑀸𑀤𑀻. 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀯𑀤𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀲𑀲𑁆𑀲𑀢𑀯𑀸𑀤𑀺𑀦𑁄. 𑀅𑀣 𑀯𑀸 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀲𑁆𑀲𑀢𑁄 𑀯𑀸𑀤𑁄 𑀲𑀲𑁆𑀲𑀢𑀯𑀸𑀤𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀲𑁆𑀲𑀢𑀯𑀸𑀤𑀺𑀦𑁄, 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀣 𑀲𑀲𑁆𑀲𑀢𑁄 𑀯𑀸𑀤𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀢𑁂𑀲𑀜𑁆𑀳𑀺 𑀅𑀢𑁆𑀢𑀸 𑀮𑁄𑀓𑁄 𑀘 𑀲𑀲𑁆𑀲𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀯𑀸𑀤𑁄𑀢𑀺? 𑀲𑀘𑁆𑀘𑀫𑁂𑀢𑀁. 𑀲𑀲𑁆𑀲𑀢𑀲𑀳𑀘𑀭𑀺𑀢𑀢𑀸𑀬 𑀧𑀦 𑀯𑀸𑀤𑁄𑀧𑀺 𑀲𑀲𑁆𑀲𑀢𑁄𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀲𑀲𑁆𑀲𑀢𑁄𑀢𑀺 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀯𑀸 𑀇𑀢𑀺𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀬𑁂 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸 𑀢𑀁 𑀲𑀲𑁆𑀲𑀢𑀁 𑀅𑀫𑀢𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀲𑀲𑁆𑀲𑀢𑀯𑀸𑀤𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑁆𑀤𑁂𑀲𑁂 𑀧𑀝𑀺𑀲𑀫𑁆𑀪𑀺𑀤𑀸𑀬𑀜𑁆𑀘 𑁋

‘‘𑀭𑀽𑀧𑀁 ¶ 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺.

𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀧𑀦 𑀧𑀜𑁆𑀘𑀤𑀲𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁄 𑀮𑁄𑀓𑁄𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀅𑀬𑀜𑁆𑀘 𑀅𑀢𑁆𑀣𑁄 𑀮𑀩𑁆𑀪𑀢𑀺. 𑀢𑀣𑀸 𑀏𑀓𑀁 𑀔𑀦𑁆𑀥𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑁄 𑀅𑀢𑁆𑀢𑀦𑁄 𑀉𑀧𑀪𑁄𑀕𑀪𑀽𑀢𑁄 𑀮𑁄𑀓𑁄𑀢𑀺, 𑀲𑀲𑀦𑁆𑀢𑀢𑀺𑀧𑀢𑀺𑀢𑁂 𑀯𑀸 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁄 𑀮𑁄𑀓𑁄𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀢𑀲𑁆𑀲𑀸𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑁄, 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄. 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀺𑀦𑁄. 𑀢𑁂 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸𑀢𑀺 ¶ . 𑀢𑀢𑁆𑀣 ‘‘𑀇𑀲𑁆𑀲𑀭𑁄 𑀦𑀺𑀘𑁆𑀘𑁄, 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀇𑀲𑁆𑀲𑀭𑀯𑀸𑀤𑀸. ‘‘𑀦𑀺𑀘𑁆𑀘𑁄 𑀩𑁆𑀭𑀳𑁆𑀫𑀸, 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸𑀧𑀺 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸, 𑀤𑁆𑀯𑀺𑀅𑀡𑀼𑀓𑀸𑀤𑀬𑁄 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀓𑀡𑀸𑀤𑀯𑀸𑀤𑀸𑀤𑀬𑁄. ‘‘𑀘𑀓𑁆𑀔𑀸𑀤𑀬𑁄 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘’’𑀦𑁆𑀢𑀺 𑀏𑀯𑀁𑀯𑀸𑀤𑀺𑀦𑁄𑀧𑀺 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺 𑀏𑀢𑀲𑁆𑀫𑀺𑀁 𑀯𑀸𑀤𑁂 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑁄 𑀏𑀯, 𑀢𑀬𑀺𑀤𑀁 𑀓𑀣𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺? 𑀓𑁄 𑀯𑀸 𑀏𑀯𑀫𑀸𑀳 𑁋 ‘‘𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦’’𑀦𑁆𑀢𑀺, 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑀸𑀪𑀺𑀦𑀺𑀯𑁂𑀲𑁄 𑀇𑀥 𑀫𑀺𑀘𑁆𑀙𑀸𑀤𑀲𑁆𑀲𑀦𑀁. 𑀢𑁂𑀦 𑀧𑀦 𑀏𑀓𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑁂𑀦 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀸𑀯𑀩𑁄𑀥𑁄 𑀯𑀺𑀤𑀽𑀲𑀺𑀢𑁄 𑀲𑀁𑀲𑀝𑁆𑀞𑀪𑀸𑀯𑀢𑁄, 𑀯𑀺𑀲𑀲𑀁𑀲𑀝𑁆𑀞𑁄 𑀯𑀺𑀬 𑀲𑀩𑁆𑀩𑁄 𑀲𑀧𑁆𑀧𑀺𑀫𑀡𑁆𑀟𑁄 𑀲𑀓𑀺𑀘𑁆𑀘𑀓𑀭𑀡𑀸𑀲𑀫𑀢𑁆𑀣𑀢𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀧𑀓𑁆𑀔𑁂 ¶ 𑀞𑀧𑁂𑀢𑀩𑁆𑀩𑀢𑀁 𑀦𑀸𑀭𑀳𑀢𑀻𑀢𑀺. 𑀅𑀲𑀲𑁆𑀲𑀢𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀧𑀺 𑀯𑀸 𑀘𑀓𑁆𑀔𑀼𑀆𑀤𑀬𑁄 𑀲𑀫𑀸𑀭𑁄𑀧𑀺𑀢𑀚𑀻𑀯𑀲𑀪𑀸𑀯𑀸 𑀏𑀯 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀕𑀬𑁆𑀳𑀦𑁆𑀢𑀻𑀢𑀺 𑀢𑀤𑀯𑀩𑁄𑀥𑀲𑁆𑀲 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀗𑁆𑀔𑀢𑀸𑀬 𑀘 𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀯𑀺𑀪𑀚𑁆𑀚𑀯𑀸𑀤𑁄𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁𑀧𑀓𑀸𑀭𑀸 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀳𑁄𑀢𑀺 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀲𑀫𑁆𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀼𑀭𑀺𑀫𑀲𑀲𑁆𑀲𑀢𑀯𑀸𑀤𑁂𑀧𑀺 𑀅𑀲𑀲𑁆𑀲𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀸𑀢𑀺 𑀕𑀳𑀡𑀁 𑀯𑀺𑀲𑁂𑀲𑀢𑁄 𑀫𑀺𑀘𑁆𑀙𑀸𑀤𑀲𑁆𑀲𑀦𑀁, 𑀲𑀲𑁆𑀲𑀢𑀸𑀦𑀁 𑀧𑀦 𑀲𑀲𑁆𑀲𑀢𑀸𑀢𑀺 𑀕𑀸𑀳𑁄 𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀬𑀣𑀸𑀲𑀪𑀸𑀯𑀕𑁆𑀕𑀳𑀡𑀪𑀸𑀯𑀢𑁄. 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 𑀓𑁂𑀘𑀺𑀤𑁂𑀯 𑀥𑀫𑁆𑀫𑀸 𑀲𑀲𑁆𑀲𑀢𑀸𑀢𑀺 𑀕𑀳𑁂𑀢𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀪𑀸𑀕𑀧𑁆𑀧𑀯𑀢𑁆𑀢𑀺𑀬𑀸 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀯𑀸𑀤𑀦𑁆𑀢𑀭𑀢𑀸 𑀯𑀼𑀢𑁆𑀢𑀸. 𑀦 𑀘𑁂𑀢𑁆𑀣 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀢𑁆𑀢𑀸 𑀏𑀓𑀤𑁂𑀲𑀲𑁆𑀲 𑀲𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁄 𑀦𑀺𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀸𑀤𑀺𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀯𑀲𑁂𑀦 𑀯𑀸𑀤𑀤𑁆𑀯𑀬𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀅𑀜𑁆𑀜𑁂 𑀏𑀯 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀅𑀜𑁆𑀜𑁂 𑀏𑀓𑀘𑁆𑀘𑀲𑀲𑁆𑀲𑀢𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀏𑀓𑀤𑁂𑀲𑀧𑀭𑀺𑀕𑁆𑀕𑀳𑁄 𑀘 𑀯𑀸𑀤𑀤𑁆𑀯𑀬𑀲𑁆𑀲 𑀧𑀭𑀺𑀩𑁆𑀬𑀢𑁆𑀢𑁄𑀬𑁂𑀯𑀸𑀢𑀺.

𑀅𑀦𑁆𑀢𑀸𑀦𑀦𑁆𑀢𑀺𑀓𑀸𑀢𑀺 𑀏𑀢𑁆𑀣 𑀅𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣 𑀲𑀪𑀸𑀯𑁄 𑀑𑀲𑀸𑀦𑀦𑁆𑀢𑀺 𑀅𑀦𑁆𑀢𑁄, 𑀫𑀭𑀺𑀬𑀸𑀤𑀸. 𑀢𑀧𑁆𑀧𑀝𑀺𑀲𑁂𑀥𑁂𑀦 𑀅𑀦𑀦𑁆𑀢𑁄. 𑀓𑀲𑁆𑀲 𑀧𑀦𑀸𑀬𑀁 𑀅𑀦𑁆𑀢𑀸𑀦𑀦𑁆𑀢𑁄𑀢𑀺? 𑀮𑁄𑀓𑀻𑀬𑀢𑀺 𑀲𑀁𑀲𑀸𑀭𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺, 𑀮𑁄𑀓𑀻𑀬𑀢𑀺 𑀯𑀸 𑀏𑀢𑁆𑀣 𑀢𑁂𑀳𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀲𑁆𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀤𑀺𑀲𑀪𑀸𑀯𑀲𑁆𑀲 𑀅𑀢𑁆𑀢𑀦𑁄. 𑀅𑀦𑁆𑀢𑁄 𑀘 𑀅𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑁄 𑀘 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑁄 𑀘𑀸𑀢𑀺 𑀅𑀦𑁆𑀢𑀸𑀦𑀦𑁆𑀢𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 ¶ 𑀯𑀺𑀬. 𑀅𑀦𑁆𑀢𑀸𑀦𑀦𑁆𑀢𑀲𑀳𑀘𑀭𑀺𑀢𑁄 𑀯𑀸𑀤𑁄 𑀅𑀦𑁆𑀢𑀸𑀦𑀦𑁆𑀢𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀅𑀦𑁆𑀢𑀸𑀦𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀯𑀸 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀺𑀦𑁄. ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄, 𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄, 𑀅𑀦𑁆𑀢𑀯𑀸 𑀘 𑀅𑀬𑀁 𑀮𑁄𑀓𑁄 𑀅𑀦𑀦𑁆𑀢𑁄 𑀘, 𑀦𑁂𑀯𑀸𑀬𑀁 𑀮𑁄𑀓𑁄 𑀅𑀦𑁆𑀢𑀯𑀸 𑀦 𑀧𑀦𑀸𑀦𑀦𑁆𑀢𑁄’’𑀢𑀺 𑀏𑀯𑀁 𑀅𑀦𑁆𑀢𑀁 𑀯𑀸 𑀅𑀦𑀦𑁆𑀢𑀁 𑀯𑀸 𑀅𑀦𑁆𑀢𑀸𑀦𑀦𑁆𑀢𑀁 𑀯𑀸 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀸 ¶ 𑀳𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀺𑀦𑁄 𑀅𑀦𑁆𑀢𑀯𑀸𑀤𑀻 𑀅𑀦𑀦𑁆𑀢𑀯𑀸𑀤𑀻 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀻 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑀯𑀸𑀤𑀻𑀢𑀺. 𑀢𑀣𑀸 𑀳𑀺 𑀓𑁄𑀘𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀅𑀯𑀟𑁆𑀠𑁂𑀢𑁆𑀯𑀸 𑀢𑀁 ‘‘𑀮𑁄𑀓𑁄’’𑀢𑀺 𑀕𑀳𑁂𑀢𑁆𑀯𑀸 𑀅𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀳𑁄𑀢𑀺. 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀟𑁆𑀠𑀺𑀢𑀓𑀲𑀺𑀡𑁂 𑀧𑀦 𑀅𑀦𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀉𑀤𑁆𑀥𑀫𑀥𑁄 𑀅𑀯𑀟𑁆𑀠𑁂𑀢𑁆𑀯𑀸 𑀧𑀦 𑀢𑀺𑀭𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀉𑀤𑁆𑀥𑀫𑀥𑁄 𑀅𑀦𑁆𑀢𑀲𑀜𑁆𑀜𑀻 𑀢𑀺𑀭𑀺𑀬𑀁 𑀅𑀦𑀦𑁆𑀢𑀲𑀜𑁆𑀜𑀻 𑀳𑁄𑀢𑀺. 𑀓𑁄𑀘𑀺 𑀧𑀦 𑀬𑀲𑁆𑀫𑀸 𑀮𑁄𑀓𑀲𑀜𑁆𑀜𑀺𑀢𑁄 𑀅𑀢𑁆𑀢𑀸 𑀅𑀥𑀺𑀕𑀢𑀯𑀺𑀲𑁂𑀲𑁂𑀳𑀺 𑀫𑀳𑁂𑀲𑀻𑀳𑀺 𑀓𑀤𑀸𑀘𑀺 𑀅𑀦𑀦𑁆𑀢𑁄 𑀲𑀓𑁆𑀔𑀺𑀤𑀺𑀝𑁆𑀞𑁄 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦𑁂𑀯𑀦𑁆𑀢𑀯𑀸. 𑀬𑀲𑁆𑀫𑀸 𑀧𑀦 𑀢𑁂𑀳𑀺𑀬𑁂𑀯 𑀓𑀤𑀸𑀘𑀺 𑀅𑀦𑁆𑀢𑀯𑀸 𑀲𑀓𑁆𑀔𑀺𑀤𑀺𑀝𑁆𑀞𑁄 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦 𑀧𑀦 𑀅𑀦𑀦𑁆𑀢𑁄𑀢𑀺 𑀏𑀯𑀁 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀳𑁄𑀢𑀺. 𑀓𑁂𑀘𑀺 𑀧𑀦 𑀬𑀤𑀺 𑀧𑀦𑀸𑀬𑀁 𑀅𑀢𑁆𑀢𑀸 𑀅𑀦𑁆𑀢𑀯𑀸𑀲𑀺𑀬𑀸, 𑀤𑀽𑀭𑀤𑁂𑀲𑁂 𑀉𑀧𑀧𑀚𑁆𑀚𑀫𑀸𑀦𑀸𑀦𑀼𑀲𑁆𑀲𑀭𑀡𑀸𑀤𑀺𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀦 𑀲𑀺𑀬𑀸. 𑀅𑀣 𑀅𑀦𑀦𑁆𑀢𑁄 𑀇𑀥 𑀞𑀺𑀢𑀲𑁆𑀲 𑀤𑁂𑀯𑀮𑁄𑀓𑀦𑀺𑀭𑀬𑀸𑀤𑀻𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀼𑀪𑀯𑀦𑀫𑁆𑀧𑀺 𑀲𑀺𑀬𑀸. 𑀲𑀘𑁂 𑀧𑀦 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑁄 𑀘, 𑀢𑀤𑀼𑀪𑀬𑀧𑀝𑀺𑀲𑁂𑀥𑀤𑁄𑀲𑀲𑀫𑀸𑀬𑁄𑀕𑁄, 𑀢𑀲𑁆𑀫𑀸 𑀅𑀦𑁆𑀢𑀯𑀸 𑀅𑀦𑀦𑁆𑀢𑁄𑀢𑀺 𑀘 𑀅𑀩𑁆𑀬𑀸𑀓𑀭𑀡𑀻𑀬𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀢𑀓𑁆𑀓𑀦𑀯𑀲𑁂𑀦 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑀲𑀜𑁆𑀜𑀻 𑀳𑁄𑀢𑀻𑀢𑀺 𑀯𑀡𑁆𑀡𑀬𑀦𑁆𑀢𑀺.

𑀏𑀢𑁆𑀣 𑀘 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸𑀤𑀻𑀦𑀁 𑀅𑀦𑁆𑀢𑀜𑁆𑀘 𑀅𑀦𑀦𑁆𑀢𑀜𑁆𑀘 𑀅𑀦𑁆𑀢𑀸𑀦𑀦𑁆𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁, 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀓𑀣𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀏𑀯. 𑀬𑀲𑁆𑀫𑀸 𑀅𑀦𑁆𑀢𑀸𑀦𑀦𑁆𑀢𑀧𑀅𑀲𑁂𑀥𑀯𑀸𑀤𑁄𑀧𑀺 𑀅𑀦𑁆𑀢𑀸𑀦𑀦𑁆𑀢𑀯𑀺𑀲𑀬𑁄 𑀏𑀯 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀆𑀭𑀩𑁆𑀪 ‘‘𑀧𑀯𑀢𑁆𑀢𑀯𑀸𑀤𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀼𑀢𑁆𑀢𑀁 𑀢𑀸𑀯 𑀧𑀘𑁆𑀙𑀺𑀫𑀯𑀸𑀤𑀤𑁆𑀯𑀬𑀲𑁆𑀲 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁, 𑀅𑀦𑁆𑀢𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀉𑀪𑀬𑀯𑀺𑀲𑀬𑀢𑁆𑀢𑀸 𑀏𑀢𑁂𑀲𑀁 𑀯𑀸𑀤𑀲𑁆𑀲, 𑀧𑀼𑀭𑀺𑀫𑀯𑀸𑀤𑀤𑁆𑀯𑀬𑀲𑁆𑀲 𑀧𑀦 𑀓𑀣𑀁 𑀯𑀺𑀲𑀼𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀉𑀧𑀘𑀸𑀭𑀯𑀼𑀢𑁆𑀢𑀺𑀬𑀸. 𑀲𑀫𑀼𑀤𑀺𑀢𑁂𑀲𑀼 𑀳𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑁂𑀲𑀼 𑀧𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀲𑀤𑁆𑀤𑁄 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑀸𑀬 𑀧𑀘𑁆𑀘𑁂𑀓𑀫𑁆𑀧𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀻𑀲𑀼 𑀧𑀯𑀢𑁆𑀢𑀢𑀺 𑀬𑀣𑀸 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄, 𑀬𑀣𑀸 𑀘 𑀮𑁄𑀓𑁂 𑀲𑀢𑁆𑀢𑀺𑀲𑀬𑁄𑀢𑀺.

𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸𑀢𑀺 𑀏𑀢𑁆𑀣 𑀦 𑀫𑀭𑀢𑀺 𑀦 𑀉𑀧𑀘𑁆𑀙𑀺𑀚𑁆𑀚𑀢𑀻𑀢𑀺 𑀅𑀫𑀭𑀸. 𑀓𑀸 𑀲𑀸? ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 ¶ 𑀦𑁄’’𑀢𑀺 (𑀤𑀻. 𑀦𑀺. 𑁧.𑁬𑁨) 𑀏𑀯𑀁 𑀧𑀯𑀢𑁆𑀢𑀯𑀸𑀤𑀯𑀲𑁂𑀦 𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸 𑀘. ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀺𑀥𑁄 𑀦𑀸𑀦𑀧𑁆𑀧𑀓𑀸𑀭𑁄 𑀔𑁂𑀧𑁄 𑀧𑀭𑀯𑀸𑀤𑀻𑀦𑀁 𑀔𑀺𑀧𑀦𑀁 𑀯𑀺𑀓𑁆𑀔𑁂𑀧𑁄, 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸 𑀯𑀸𑀘𑀸𑀬 𑀯𑀸 𑀯𑀺𑀓𑁆𑀔𑁂𑀧𑁄 ¶ 𑀅𑀫𑀭𑀸𑀯𑀺𑀓𑁆𑀔𑁂𑀧𑁄, 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸. 𑀅𑀣 𑀯𑀸 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸 𑀯𑀸𑀘𑀸𑀬 𑀯𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄, 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄 𑀏𑀯 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸. 𑀅𑀣 𑀯𑀸 𑀅𑀫𑀭𑀸 𑀦𑀸𑀫 𑀫𑀘𑁆𑀙𑀚𑀸𑀢𑀺, 𑀲𑀸 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀤𑀓𑁂 𑀲𑀦𑁆𑀥𑀸𑀯𑀫𑀸𑀦𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀯𑀸𑀤𑁄 𑀏𑀓𑀲𑁆𑀫𑀺𑀁 𑀲𑀪𑀸𑀯𑁂 𑀅𑀦𑀯𑀝𑁆𑀞𑀸𑀦𑀢𑁄 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺, 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀫𑀭𑀸𑀬 𑀯𑀺𑀓𑁆𑀔𑁂𑀧𑁄 𑀯𑀺𑀬𑀸𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀳𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀯𑀸 ‘‘𑀅𑀓𑀼𑀲𑀮’’𑀦𑁆𑀢𑀺 𑀯𑀸 𑀧𑀼𑀝𑁆𑀞𑁄 𑀦 𑀓𑀺𑀜𑁆𑀘𑀺 𑀩𑁆𑀬𑀸𑀓𑀭𑁄𑀢𑀺. ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀯𑀸 𑀧𑀼𑀝𑁆𑀞𑁄 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀓𑀺𑀁 𑀅𑀓𑀼𑀲𑀮’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑀣𑀸𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺. ‘‘𑀓𑀺𑀁 𑀉𑀪𑀬𑀢𑁄 𑀅𑀜𑁆𑀜𑀣𑀸’’𑀢𑀺𑀧𑀺 𑀯𑀼𑀢𑁆𑀢𑁂 ‘‘𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀢𑀺𑀯𑀺𑀥𑁂𑀦𑀧𑀺 𑀦 𑀳𑁄𑀢𑀺, 𑀓𑀺𑀁 𑀢𑁂 𑀮𑀤𑁆𑀥𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑁄𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀓𑀺𑀁 𑀦𑁄 𑀦𑁄 𑀢𑁂 𑀮𑀤𑁆𑀥𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺. 𑀏𑀯𑀁 𑀯𑀺𑀓𑁆𑀔𑁂𑀧𑀫𑁂𑀯 𑀆𑀧𑀚𑁆𑀚𑀢𑀺, 𑀏𑀓𑀫𑁂𑀓𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀦 𑀢𑀺𑀝𑁆𑀞𑀢𑀺. 𑀢𑀢𑁄 ‘‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀧𑀼𑀝𑁆𑀞𑁄𑀧𑀺 𑀏𑀯𑀫𑁂𑀯 𑀯𑀺𑀓𑁆𑀔𑀺𑀧𑀢𑀺, 𑀦 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀢𑀺𑀝𑁆𑀞𑀢𑀺. 𑀲𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸.

𑀦𑀦𑀼 𑀘𑀸𑀬𑀁 𑀲𑀩𑁆𑀩𑁄𑀧𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀓𑀼𑀲𑀮𑀸𑀤𑀬𑁄 𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀣𑀺𑀓𑀸𑀤𑀻𑀦𑀺 𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀦𑀫𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀓𑀣𑀁 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁄. 𑀦 𑀳𑀺 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀼𑀘𑁆𑀙𑀺𑀢𑀁 𑀅𑀚𑀸𑀦𑀦𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 𑀬𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀳𑁂𑀯 𑀔𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸, 𑀅𑀣 𑀔𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀢𑁄. 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄𑀬𑁂𑀯 𑀳𑀺 𑀧𑀼𑀕𑁆𑀕𑀮𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀣𑀺𑀓𑀸𑀤𑀻𑀦𑀺 𑀘 𑀬𑀸𑀣𑀸𑀯𑀢𑁄 𑀅𑀲𑀫𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀫𑀼𑀲𑀸𑀯𑀸𑀤𑀸𑀤𑀺𑀪𑀬𑁂𑀦 𑀘 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀻𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺. 𑀅𑀣 𑀯𑀸 𑀧𑀼𑀜𑁆𑀜𑀧𑀸𑀧𑀸𑀦𑀁 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀦𑀯𑀩𑁄𑀥𑁂𑀦 𑀅𑀲𑀤𑁆𑀤𑀳𑀦𑁂𑀦 𑀘 𑀢𑀩𑁆𑀩𑀺𑀲𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀁𑀬𑁂𑀯 𑀲𑀼𑀦𑁆𑀤𑀭𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀲𑀼𑀁𑀬𑁂𑀯 𑀘𑁂𑀲𑀸 𑀏𑀓𑀸 𑀤𑀺𑀝𑁆𑀞𑀺 𑀲𑀢𑁆𑀢𑀪𑀗𑁆𑀕𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄𑀬𑁂𑀯 𑀘 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸 𑀘𑀸’’𑀢𑀺.

𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸𑀢𑀺 ¶ ¶ 𑀏𑀢𑁆𑀣 𑀅𑀥𑀺𑀘𑁆𑀘 𑀬𑀤𑀺𑀘𑁆𑀙𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀤𑀲𑁆𑀲𑀦𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀅𑀢𑁆𑀢𑀮𑁄𑀓𑀲𑀜𑁆𑀜𑀺𑀢𑀸𑀦𑀜𑁆𑀳𑀺 𑀔𑀦𑁆𑀥𑀸𑀦𑀁 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀸𑀭𑀫𑁆𑀫𑀡𑀁 𑀤𑀲𑁆𑀲𑀦𑀁 𑀢𑀤𑀸𑀓𑀸𑀭𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀢𑀤𑀸𑀓𑀸𑀭𑀲𑀳𑀘𑀭𑀺𑀢𑀢𑀸𑀬 𑀘 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀺, 𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺 𑀘. 𑀢𑀁 𑀏𑀢𑁂𑀲𑀫𑀢𑁆𑀣𑀻𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸.

𑀲𑀜𑁆𑀜𑀻𑀯𑀸𑀤𑀸𑀢𑀺 𑀲𑀜𑁆𑀜𑀻 𑀯𑀸𑀤𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀲𑀜𑁆𑀜𑀻𑀯𑀸𑀤𑀸 ‘‘𑀩𑀼𑀤𑁆𑀥𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄’’𑀢𑀺 𑀬𑀣𑀸. 𑀅𑀣 𑀯𑀸 𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀲𑀜𑁆𑀜𑀻𑀲𑀳𑀘𑀭𑀡𑀦𑀬𑁂𑀦. 𑀲𑀜𑁆𑀜𑀻 𑀯𑀸𑀤𑁄 𑀬𑁂𑀲𑀁 𑀢𑁂 𑀲𑀜𑁆𑀜𑀻𑀯𑀸𑀤𑀸. ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀲𑀜𑁆𑀜𑀻𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺, 𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺, 𑀦𑁂𑀯 𑀭𑀽𑀧𑀻 𑀦𑀸𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺. 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺, 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀳𑁄𑀢𑀺, 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺. 𑀏𑀓𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺, 𑀦𑀸𑀦𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺. 𑀧𑀭𑀺𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺, 𑀅𑀧𑁆𑀧𑀫𑀸𑀡𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺. 𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺, 𑀏𑀓𑀦𑁆𑀢𑀤𑀼𑀓𑁆𑀔𑀻 𑀅𑀢𑁆𑀢𑀸 𑀳𑁄𑀢𑀺. 𑀲𑀼𑀔𑀤𑀼𑀓𑁆𑀔𑀻 𑀅𑀢𑁆𑀢𑀸 𑀳𑁄𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀲𑀜𑁆𑀜𑀻𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁭𑁬) 𑀏𑀯𑀁 𑀲𑁄𑀴𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀯𑀸𑀤𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

𑀅𑀲𑀜𑁆𑀜𑀻𑀯𑀸𑀤𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀘 𑀲𑀜𑁆𑀜𑀻𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 ‘‘𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀸𑀦𑀁 𑀯𑀲𑁂𑀦 𑀲𑀜𑁆𑀜𑀻𑀯𑀸𑀤𑀸 𑀯𑀼𑀢𑁆𑀢𑀸, ‘‘𑀅𑀲𑀜𑁆𑀜𑀻’’𑀢𑀺 𑀘 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀘 𑀕𑀡𑁆𑀳𑀦𑁆𑀢𑀸𑀦𑀁 𑀯𑀲𑁂𑀦 𑀅𑀲𑀜𑁆𑀜𑀻𑀯𑀸𑀤𑀸 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀘 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀲𑀜𑁆𑀜𑀻𑀯𑀸𑀤𑀸 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀅𑀲𑀜𑁆𑀜𑀻𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺, 𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺, 𑀦𑁂𑀯 𑀭𑀽𑀧𑀻 𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺. 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺, 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀳𑁄𑀢𑀺, 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀅𑀲𑀜𑁆𑀜𑀻𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀏𑀯𑀁 𑀅𑀝𑁆𑀞𑀯𑀺𑀥𑁂𑀦 𑀯𑀺𑀪𑀢𑁆𑀢𑀸. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸𑀧𑀺 𑀏𑀯𑀫𑁂𑀯 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁮𑁨) 𑀅𑀝𑁆𑀞𑀯𑀺𑀥𑁂𑀦 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀘𑁆𑀙𑁂𑀤𑀯𑀸𑀤𑀸𑀢𑀺 ¶ ‘‘𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁮𑁫) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 ¶ 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀉𑀘𑁆𑀙𑁂𑀤𑁄 𑀲𑀳𑀘𑀭𑀡𑀦𑀬𑁂𑀦. 𑀉𑀘𑁆𑀙𑁂𑀤𑁄 𑀯𑀸𑀤𑁄 𑀬𑁂𑀲𑀁 𑀢𑁂 𑀉𑀘𑁆𑀙𑁂𑀤𑀯𑀸𑀤𑀸, 𑀉𑀘𑁆𑀙𑁂𑀤𑀯𑀸𑀤𑁄 𑀯𑀸 𑀏𑀢𑁂𑀲𑀫𑀢𑁆𑀣𑀻𑀢𑀺 𑀉𑀘𑁆𑀙𑁂𑀤𑀯𑀸𑀤𑀸, 𑀉𑀘𑁆𑀙𑁂𑀤𑀁 𑀯𑀤𑀦𑁆𑀢𑀻𑀢𑀺 𑀯𑀸 𑀉𑀘𑁆𑀙𑁂𑀤𑀯𑀸𑀤𑀸.

𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄 𑀦𑀸𑀫 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀉𑀧𑀮𑀤𑁆𑀥𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀯𑀤𑀦𑁆𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸. 𑀢𑁂 𑀧𑀦 ‘‘𑀬𑀢𑁄 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁯𑁪) 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁂 𑀳𑀺 𑀫𑀦𑁆𑀥𑀸𑀢𑀼𑀓𑀸𑀫𑀕𑀼𑀡𑀲𑀤𑀺𑀲𑁂 𑀫𑀸𑀦𑀼𑀲𑀓𑁂 𑀓𑀸𑀫𑀕𑀼𑀡𑁂, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀭𑀸𑀚𑀲𑁆𑀲 𑀓𑀸𑀫𑀕𑀼𑀡𑀲𑀤𑀺𑀲𑁂 𑀤𑀺𑀩𑁆𑀩𑁂 𑀘 𑀓𑀸𑀫𑀕𑀼𑀡𑁂 𑀉𑀧𑀕𑀢𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀁 𑀯𑀤𑀦𑁆𑀢𑀺.

𑀯𑀺𑀪𑀚𑁆𑀚𑀯𑀸𑀤𑀻𑀢𑀺 𑀯𑁂𑀭𑀜𑁆𑀚𑀓𑀡𑁆𑀟𑁂 𑀆𑀕𑀢𑀦𑀬𑁂𑀦𑁂𑀯 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑀁 𑀯𑀺𑀪𑀚𑁆𑀚 𑀯𑀤𑀢𑀻𑀢𑀺 𑀯𑀺𑀪𑀚𑁆𑀚𑀯𑀸𑀤𑀻.

𑀢𑀢𑁆𑀣 𑀳𑀺 𑀪𑀕𑀯𑀢𑀸 ‘‘𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀭𑀸𑀕𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺𑀆𑀤𑀺𑀦𑀸 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀦𑁄 𑀯𑁂𑀦𑀬𑀺𑀓𑀸𑀤𑀺𑀪𑀸𑀯𑁄 𑀯𑀺𑀪𑀚𑁆𑀚 𑀯𑀼𑀢𑁆𑀢𑁄𑀢𑀺. 𑀅𑀧𑀺𑀘 𑀲𑁄𑀫𑀦𑀲𑁆𑀲𑀸𑀤𑀻𑀦𑀁 𑀘𑀻𑀯𑀭𑀸𑀤𑀻𑀦𑀜𑁆𑀘 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀪𑀸𑀯𑀁 𑀯𑀺𑀪𑀚𑁆𑀚 𑀯𑀤𑀢𑀻𑀢𑀺 𑀯𑀺𑀪𑀚𑁆𑀚𑀯𑀸𑀤𑀻, 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀸𑀤𑁂 𑀯𑀸 𑀯𑀺𑀪𑀚𑁆𑀚 𑀯𑀤𑀢𑀻𑀢𑀺 𑀯𑀺𑀪𑀚𑁆𑀚𑀯𑀸𑀤𑀻, ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀻𑀦𑀁 𑀞𑀧𑀦𑀻𑀬𑀸𑀦𑀁 𑀧𑀜𑁆𑀳𑀸𑀦𑀁 𑀞𑀧𑀦𑀢𑁄 𑀭𑀸𑀕𑀸𑀤𑀺𑀔𑀬𑀲𑀗𑁆𑀔𑀸𑀢𑀲𑁆𑀲 𑀲𑀲𑁆𑀲𑀢𑀲𑁆𑀲 𑀭𑀸𑀕𑀸𑀤𑀺𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀉𑀘𑁆𑀙𑁂𑀤𑀲𑁆𑀲 𑀯𑀘𑀦𑀢𑁄 𑀯𑀺𑀪𑀚𑁆𑀚𑀯𑀸𑀤𑀻, 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀽𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑁆𑀕𑀫𑁆𑀫 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀽𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁂𑀲𑀦𑀢𑁄 𑀯𑀺𑀪𑀚𑁆𑀚𑀯𑀸𑀤𑀻, 𑀪𑀕𑀯𑀸. 𑀧𑀭𑀧𑁆𑀧𑀯𑀸𑀤𑀁 𑀫𑀤𑁆𑀤𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀯𑀸𑀤𑀁, 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀤𑁆𑀥𑀫𑁆𑀫𑀦𑁆𑀢𑀭𑀥𑀸𑀦𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀯𑀸𑀤𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀸𑀕𑀫𑁂 𑀅𑀬𑀁 𑀣𑁂𑀭𑁄 𑀬𑀸𑀦𑀺 𑀘 𑀢𑀤𑀸 𑀉𑀧𑁆𑀧𑀦𑁆𑀦𑀸𑀦𑀺 𑀯𑀢𑁆𑀣𑀽𑀦𑀺, 𑀬𑀸𑀦𑀺 𑀘 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀝𑀺𑀩𑀸𑀳𑀦𑀢𑁆𑀣𑀁 ¶ 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑀯𑀲𑁂𑀦𑁂𑀯 𑀢𑀣𑀸𑀕𑀢𑁂𑀦 𑀞𑀧𑀺𑀢𑀫𑀸𑀢𑀺𑀓𑀁 𑀯𑀺𑀪𑀚𑀦𑁆𑀢𑁄 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺, 𑀧𑀭𑀯𑀸𑀤𑁂 𑀧𑀜𑁆𑀘𑀸𑀢𑀺 𑀲𑀼𑀢𑁆𑀢𑀲𑀳𑀲𑁆𑀲𑀁 𑀆𑀳𑀭𑀺𑀢𑁆𑀯𑀸 𑀢𑀤𑀸 𑀉𑀧𑁆𑀧𑀦𑁆𑀦𑀯𑀸𑀤𑀲𑁆𑀲 𑀫𑀤𑁆𑀤𑀦𑀢𑁄 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀁 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀯𑀸𑀤𑀸𑀦𑀁 𑀧𑀝𑀺𑀲𑁂𑀥𑀦𑀮𑀓𑁆𑀔𑀡𑀪𑀸𑀯𑀢𑁄 𑀆𑀬𑀢𑀺𑀁 𑀧𑀝𑀺𑀲𑁂𑀥𑀮𑀓𑁆𑀔𑀡𑀁 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀅𑀓𑀸𑀲𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀆𑀘𑀭𑀺𑀬𑀧𑀭𑀫𑁆𑀧𑀭𑀓𑀣𑀸𑀯𑀡𑁆𑀡𑀦𑀸

‘‘𑀓𑁂𑀦𑀸𑀪𑀢’’𑀦𑁆𑀢𑀺 ¶ 𑀇𑀫𑀁 𑀧𑀜𑁆𑀳𑀁 𑀯𑀺𑀲𑀚𑁆𑀚𑁂𑀦𑁆𑀢𑁂𑀦 𑀚𑀫𑁆𑀩𑀼𑀤𑀻𑀧𑁂 𑀢𑀸𑀯 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀬𑀸𑀯 𑀢𑀢𑀺𑀬𑀲𑀗𑁆𑀕𑀻𑀢𑀺, 𑀢𑀸𑀯 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀻𑀳𑀴𑀤𑀻𑀧𑁂 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑀺𑀬𑀲𑀗𑁆𑀕𑀳𑀢𑁄 𑀧𑀦 𑀉𑀤𑁆𑀥’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀫𑀁 𑀤𑀻𑀧𑀦𑁆𑀢𑀺 𑀇𑀫𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁. 𑀓𑀜𑁆𑀘𑀺 𑀓𑀸𑀮𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂. 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀪𑀤𑁆𑀤𑀦𑀸𑀫𑁄𑀢𑀺 𑀪𑀤𑁆𑀤𑀲𑀸𑀮𑀢𑁆𑀣𑁂𑀭𑁄. 𑀦𑀸𑀫𑀲𑁆𑀲 𑀏𑀓𑀤𑁂𑀲𑁂𑀦𑀧𑀺 𑀳𑀺 𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺 ‘‘𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺 𑀬𑀣𑀸. 𑀆𑀕𑀼𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀦𑀸𑀕𑀸. 𑀯𑀺𑀦𑀬𑀧𑀺𑀝𑀓𑀁 𑀯𑀸𑀘𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀩𑀧𑀡𑁆𑀡𑀺𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀦𑀺𑀓𑀸𑀬𑁂 𑀧𑀜𑁆𑀘 𑀯𑀸𑀘𑁂𑀲𑀼𑀦𑁆𑀢𑀺 𑀯𑀺𑀦𑀬𑀸𑀪𑀺𑀥𑀫𑁆𑀫𑀯𑀚𑁆𑀚𑁂 𑀤𑀻𑀖𑀦𑀺𑀓𑀸𑀬𑀸𑀤𑀺𑀓𑁂 𑀧𑀜𑁆𑀘 𑀦𑀺𑀓𑀸𑀬𑁂 𑀘 𑀯𑀸𑀘𑁂𑀲𑀼𑀁. 𑀲𑀢𑁆𑀢 𑀘𑁂𑀯 𑀧𑀓𑀭𑀡𑁂𑀢𑀺 𑀥𑀫𑁆𑀫𑀲𑀗𑁆𑀕𑀡𑀻𑀯𑀺𑀪𑀗𑁆𑀕𑀸𑀤𑀺𑀓𑁂 𑀲𑀢𑁆𑀢 𑀅𑀪𑀺𑀥𑀫𑁆𑀫𑀧𑁆𑀧𑀓𑀭𑀡𑁂 𑀘 𑀯𑀸𑀘𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀦𑀺 𑀯𑀺𑀬 𑀲𑀺𑀮𑀼𑀘𑁆𑀘𑀬𑁂 𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸, 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀝𑁆𑀞𑁂𑀦 𑀯𑀸 𑀫𑁂𑀥𑀸, 𑀧𑀜𑁆𑀜𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻. 𑀢𑀺𑀧𑁂𑀝𑀓𑁄𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀺𑀧𑁂𑀝𑀓𑁄, 𑀢𑁂𑀧𑀺𑀝𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀭𑁄𑀢𑀺 𑀅𑀢𑁆𑀣𑁄. 𑀢𑀸𑀭𑀓𑀸𑀦𑀁 𑀭𑀸𑀚𑀸𑀢𑀺 𑀢𑀸𑀭𑀓𑀭𑀸𑀚𑀸, 𑀘𑀦𑁆𑀤𑀺𑀫𑀸. 𑀅𑀢𑀺𑀭𑁄𑀘𑀣𑀸𑀢𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀧𑀼𑀧𑁆𑀨𑀦𑀸𑀫𑁄𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄. 𑀲𑀤𑁆𑀥𑀫𑁆𑀫𑀯𑀁𑀲𑀓𑁄𑀯𑀺𑀤𑁄𑀢𑀺 𑀲𑀤𑁆𑀥𑀫𑁆𑀫𑀢𑀦𑁆𑀢𑀺𑀬𑀸 𑀓𑁄𑀯𑀺𑀤𑁄. 𑀧𑀼𑀧𑁆𑀨𑀦𑀸𑀫𑁄𑀢𑀺 𑀲𑀼𑀫𑀦𑀢𑁆𑀣𑁂𑀭𑁄. 𑀚𑀫𑁆𑀩𑀼𑀤𑀻𑀧𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀼𑀫𑀦𑀢𑁆𑀣𑁂𑀭𑁄 𑀓𑀺𑀭 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀲𑀻𑀳𑀴𑀤𑀻𑀧𑀫𑁆𑀳𑀺 𑀲𑀸𑀲𑀦𑁂 𑀑𑀲𑀓𑁆𑀓𑀫𑀸𑀦𑁂 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀸𑀲𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀫𑀕𑁆𑀕𑀓𑁄𑀯𑀺𑀤𑀸𑀢𑀺 𑀲𑀕𑁆𑀕𑀫𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁂𑀲𑀼 𑀓𑁄𑀯𑀺𑀤𑀸.

𑀪𑀸𑀭𑀁 ¶ 𑀓𑀢𑁆𑀯𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀸𑀲𑀦𑀁 𑀪𑀸𑀭𑀁 𑀓𑀢𑁆𑀯𑀸, 𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀲𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀁 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀁 𑀧𑁂𑀲𑁂𑀲𑀻’’𑀢𑀺𑀆𑀤𑀺. 𑀫𑀳𑀺𑀁𑀲𑀓𑀫𑀡𑁆𑀟𑀮𑀦𑁆𑀢𑀺 𑀅𑀦𑁆𑀥𑀓𑀭𑀝𑁆𑀞𑀁 𑀯𑀤𑀦𑁆𑀢𑀺. 𑀯𑀦𑀯𑀸𑀲𑀺𑀦𑁆𑀢𑀺 𑀯𑀦𑀯𑀸𑀲𑀺𑀭𑀝𑁆𑀞𑀁. 𑀅𑀢𑁆𑀢𑀸 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀅𑀢𑁆𑀢𑀧𑀜𑁆𑀘𑀫𑀸, 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀧𑀜𑁆𑀘 𑀧𑀜𑁆𑀘𑁂𑀯 𑀪𑀺𑀓𑁆𑀔𑀽 𑀅𑀕𑀫𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀕𑀢𑀸𑀦𑀁 𑀣𑁂𑀭𑀸𑀦𑀁 𑀓𑀺𑀘𑁆𑀘𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀕𑀢𑀝𑁆𑀞𑀸𑀦𑁂 𑀓𑀺𑀘𑁆𑀘𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑁂’’𑀢𑀺𑀆𑀤𑀺𑀫𑀸𑀳. 𑀓𑀭𑀓𑀯𑀲𑁆𑀲𑀦𑁆𑀢𑀺 𑀳𑀺𑀫𑀧𑀸𑀢𑀦𑀓𑀯𑀲𑁆𑀲𑀁. 𑀳𑀭𑀸𑀧𑁂𑀢𑁆𑀯𑀸𑀢𑀺 𑀉𑀤𑀓𑁄𑀖𑁂𑀦 𑀳𑀭𑀸𑀧𑁂𑀢𑁆𑀯𑀸. 𑀅𑀭𑀯𑀸𑀴𑀤𑀳𑀧𑀺𑀝𑁆𑀞𑀺𑀬𑀦𑁆𑀢𑀺 𑀅𑀭𑀯𑀸𑀴𑀤𑀳𑀲𑁆𑀲 𑀉𑀤𑀓𑀧𑀺𑀝𑁆𑀞𑀺𑀬𑀁. 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀲𑀢𑁆𑀣𑀓𑁂𑀦 𑀙𑀺𑀦𑁆𑀦𑀁 𑀭𑀗𑁆𑀕𑁂𑀦 𑀪𑀺𑀦𑁆𑀦𑀁 𑀯𑀡𑁆𑀡𑀯𑀺𑀓𑀸𑀭𑀫𑀸𑀧𑀦𑁆𑀦𑀁 𑀧𑀝𑀁 𑀥𑀸𑀭𑁂𑀢𑀻𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄. 𑀅𑀣 𑀯𑀸 𑀲𑀢𑁆𑀣𑀓𑁂𑀦 𑀙𑀺𑀦𑁆𑀦𑀸𑀦𑀁 𑀕𑀺𑀳𑀺𑀯𑀢𑁆𑀣𑀯𑀺𑀲𑀪𑀸𑀕𑀸𑀦𑀁 𑀓𑀸𑀲𑀸𑀯𑀸𑀦𑀁 𑀥𑀸𑀭𑀡𑀢𑁄 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄. 𑀪𑀡𑁆𑀟𑀽𑀢𑀺 𑀫𑀼𑀡𑁆𑀟𑀓𑁄. 𑀓𑀸𑀲𑀸𑀯𑀯𑀲𑀦𑁄𑀢𑀺 𑀓𑀸𑀲𑀸𑀯𑀯𑀢𑁆𑀣𑀦𑀺𑀯𑀢𑁆𑀣𑁄. 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄𑀢𑀺 𑀣𑁂𑀭𑀁 ¶ 𑀧𑀝𑀺𑀘𑁆𑀘 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀁 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑀁 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀲𑀦𑁆𑀥𑀸𑀭𑁂𑀢𑀼𑀁 𑀅𑀥𑀺𑀲𑀳𑀺𑀢𑀼𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀪𑀺𑀁𑀲𑀦𑀓𑀸𑀦𑀻𑀢𑀺 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀺. 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀢𑀢𑁄 𑀪𑀼𑀲𑀸 𑀯𑀸𑀢𑀸 𑀯𑀸𑀬𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀪𑀼𑀲𑀸 𑀯𑀸𑀢𑀸𑀢𑀺 𑀭𑀼𑀓𑁆𑀔𑀪𑁂𑀤𑀦𑀧𑀩𑁆𑀩𑀢𑀓𑀽𑀝𑀦𑀺𑀧𑀸𑀢𑀦𑀲𑀫𑀢𑁆𑀣𑀸 𑀩𑀮𑀯𑀯𑀸𑀢𑀸. 𑀅𑀲𑀦𑀺𑀬𑁄 𑀨𑀮𑀦𑁆𑀢𑀻𑀢𑀺 𑀅𑀲𑀦𑀺𑀬𑁄 𑀪𑀺𑀚𑁆𑀚𑀦𑁆𑀢𑀺, 𑀧𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀳𑀭𑀡𑀯𑀼𑀝𑁆𑀞𑀺𑀬𑁄𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀆𑀯𑀼𑀥𑀯𑀼𑀝𑁆𑀞𑀺𑀬𑁄. 𑀦𑀺𑀤𑁆𑀥𑀫𑀣𑀸𑀢𑀺 𑀕𑀳𑁂𑀢𑁆𑀯𑀸 𑀅𑀧𑀦𑁂𑀣. 𑀪𑀺𑀁𑀲𑀦𑀓𑀦𑁆𑀢𑀺 𑀦𑀸𑀕𑀭𑀸𑀚𑀲𑁆𑀲 𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑀬𑁄𑀕𑀚𑀦𑀺𑀢𑀪𑀬𑀦𑀺𑀫𑀺𑀢𑁆𑀢𑀁 𑀯𑀺𑀧𑁆𑀧𑀓𑀸𑀭𑀁.

𑀫𑁂 𑀪𑀬𑀪𑁂𑀭𑀯𑀁 𑀚𑀦𑁂𑀢𑀼𑀁 𑀧𑀝𑀺𑀩𑀮𑁄 𑀦 𑀅𑀲𑁆𑀲 𑀦 𑀪𑀯𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀬𑀪𑁂𑀭𑀯𑀁 𑀦𑀸𑀫 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀁 𑀪𑀬𑀁. 𑀅𑀣 𑀯𑀸 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁, 𑀧𑀝𑀺𑀖𑀪𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑁂𑀭𑀯𑀦𑁆𑀢𑀺 𑀪𑀬𑀚𑀦𑀓𑀫𑀸𑀭𑀫𑁆𑀫𑀡𑀁. 𑀲𑀘𑁂𑀧𑀺 𑀢𑁆𑀯𑀁 𑀫𑀳𑀺𑀁 𑀲𑀩𑁆𑀩𑀦𑁆𑀢𑀺 𑀲𑀘𑁂𑀧𑀺 𑀢𑁆𑀯𑀁 𑀫𑀳𑀸𑀦𑀸𑀕 𑀲𑀩𑁆𑀩𑀁 𑀫𑀳𑀺𑀁 𑀲𑀫𑀼𑀤𑁆𑀤𑁂𑀦 𑀲𑀳 𑀲𑀲𑀫𑀼𑀤𑁆𑀤𑀁 𑀧𑀩𑁆𑀩𑀢𑁂𑀦 𑀲𑀳 𑀲𑀧𑀩𑁆𑀩𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀫𑀽𑀧𑀭𑀺 𑀫𑀬𑁆𑀳𑀁 𑀲𑀻𑀲𑁄𑀧𑀭𑀺 𑀔𑀺𑀧𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀫𑁂 𑀪𑀬𑀪𑁂𑀭𑀯𑀁 𑀚𑀦𑁂𑀢𑀼𑀁 𑀦𑁂𑀯 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦. 𑀢𑀯𑁂𑀯𑀲𑁆𑀲 𑀯𑀺𑀖𑀸𑀢𑁄 𑀉𑀭𑀕𑀸𑀥𑀺𑀧𑀸𑀢𑀺 𑀉𑀭𑀕𑀸𑀦𑀁 ¶ 𑀦𑀸𑀕𑀸𑀦𑀁 𑀅𑀥𑀺𑀧𑀢𑀺 𑀭𑀸𑀚 𑀢𑀯 𑀏𑀯 𑀯𑀺𑀖𑀸𑀢𑁄 𑀤𑀼𑀓𑁆𑀔𑀁 𑀯𑀺𑀳𑀺𑀁𑀲𑀸 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀢𑁆𑀣 𑀘 𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀢𑀸𑀬 𑀘 𑀲𑀉𑀲𑁆𑀲𑀸𑀳𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀣𑁂𑀭𑁂𑀦 𑀓𑀢𑀁 𑀦𑀸𑀕𑀸𑀦𑀼𑀲𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣𑀸𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄 𑀉𑀤𑁆𑀥𑀁 𑀬𑀣𑀸 𑀧𑀼𑀭𑁂𑀢𑀺 𑀬𑀣𑀸 𑀢𑀼𑀫𑁆𑀳𑁂 𑀇𑀢𑁄 𑀧𑀼𑀭𑁂 𑀲𑀤𑁆𑀥𑀫𑁆𑀫𑀲𑀯𑀦𑀼𑀧𑁆𑀧𑀢𑁆𑀢𑀺𑀯𑀺𑀭𑀳𑀺𑀢𑀓𑀸𑀮𑁂 𑀧𑀭𑀲𑁆𑀲 𑀓𑁄𑀥𑀁 𑀉𑀧𑁆𑀧𑀸𑀤𑀬𑀺𑀢𑁆𑀣, 𑀇𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀅𑀦𑀸𑀕𑀢𑁂 𑀓𑁄𑀥𑀜𑁆𑀘 𑀫𑀸 𑀚𑀦𑀬𑀺𑀢𑁆𑀣, 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀧𑀼𑀢𑁆𑀢𑁂 𑀲𑀺𑀦𑁂𑀳𑀘𑁆𑀙𑁂𑀤𑀦𑀁 𑀲𑀩𑁆𑀩𑀯𑀺𑀦𑀸𑀲𑀫𑀽𑀮𑀓𑀁 𑀲𑀲𑁆𑀲𑀖𑀸𑀢𑀓𑀜𑁆𑀘 𑀫𑀸 𑀓𑀭𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀓𑀸𑀫𑀸 𑀳𑀺 𑀧𑀸𑀡𑀺𑀦𑁄𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀓𑀸𑀭𑀡𑁄𑀧𑀤𑁂𑀲𑁂, 𑀬𑀲𑁆𑀫𑀸 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀓𑀸𑀫𑀸, 𑀢𑀲𑁆𑀫𑀸 𑀳𑀺𑀢𑀲𑀼𑀔𑀉𑀧𑀘𑁆𑀙𑁂𑀤𑀓𑀭𑀁 𑀲𑀲𑁆𑀲𑀖𑀸𑀢𑀜𑁆𑀘 𑀫𑀸 𑀓𑀭𑁄𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀬𑀁 𑀬𑀁 𑀅𑀦𑀼𑀲𑀺𑀝𑁆𑀞𑀁 𑀬𑀣𑀸𑀦𑀼𑀲𑀺𑀝𑁆𑀞𑀁, 𑀅𑀦𑀼𑀲𑀺𑀝𑁆𑀞𑀁 𑀅𑀦𑀢𑀺𑀓𑁆𑀓𑀫𑁆𑀫 𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁, 𑀣𑁂𑀭𑁂𑀦 𑀤𑀺𑀦𑁆𑀦𑁄𑀯𑀸𑀤𑀁 𑀅𑀦𑀢𑀺𑀓𑁆𑀓𑀫𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺 𑀧𑀞𑀫𑀫𑀕𑁆𑀕𑀨𑀮𑀸𑀥𑀺𑀕𑀫𑁄 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺. 𑀓𑀼𑀮𑀲𑀢𑀲𑀳𑀲𑁆𑀲𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀺𑀲𑀸𑀦𑀁 𑀲𑀢𑀲𑀳𑀲𑁆𑀲𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀸𑀢𑀺 𑀓𑀲𑁆𑀫𑀻𑀭𑀕𑀦𑁆𑀥𑀸𑀭𑀭𑀝𑁆𑀞𑀯𑀸𑀲𑀺𑀦𑁄. 𑀓𑀸𑀲𑀸𑀯𑀧𑀚𑁆𑀚𑁄𑀢𑀸𑀢𑀺 𑀪𑀺𑀓𑁆𑀔𑀽𑀦𑀁 𑀦𑀺𑀯𑀢𑁆𑀣𑀧𑀸𑀭𑀼𑀢𑀓𑀸𑀲𑀸𑀯𑀯𑀢𑁆𑀣𑁂𑀳𑀺 𑀑𑀪𑀸𑀲𑀺𑀢𑀸. 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑀸𑀢𑀺 ¶ 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀸𑀢𑁂𑀦 𑀘𑁂𑀯 𑀳𑀢𑁆𑀣𑀧𑀸𑀤𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀯𑀸𑀢𑁂𑀦 𑀘 𑀲𑀫𑀦𑁆𑀢𑀢𑁄 𑀩𑀻𑀚𑀺𑀬𑀫𑀸𑀦𑀸 𑀅𑀳𑁂𑀲𑀼𑀁. 𑀤𑀼𑀝𑁆𑀞𑀦𑁆𑀢𑀺 𑀓𑀼𑀧𑀺𑀢𑀁. 𑀩𑀦𑁆𑀥𑀦𑀸𑀢𑀺 𑀲𑀁𑀲𑀸𑀭𑀩𑀦𑁆𑀥𑀦𑀢𑁄.

𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂 𑀜𑀸𑀡𑀁. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀞𑀫𑀫𑀕𑁆𑀕𑀜𑀸𑀡𑀫𑁂𑀯 𑀢𑁂 𑀧𑀝𑀺𑀮𑀪𑀺𑀁𑀲𑀽’’𑀢𑀺 𑀯𑀤𑀦𑁆𑀢𑀺. 𑀘𑁄𑀤𑁂𑀢𑁆𑀯𑀸 𑀤𑁂𑀯𑀤𑀽𑀢𑁂𑀳𑀻𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁨𑁬𑁩 𑀆𑀤𑀬𑁄) 𑀤𑁂𑀯𑀤𑀽𑀢𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀯𑀲𑁂𑀦 (𑀫. 𑀦𑀺. 𑁩.𑁨𑁬𑁧 𑀆𑀤𑀬𑁄) 𑀤𑀳𑀭𑀓𑀼𑀫𑀸𑀭𑁄 𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄 𑀕𑀺𑀮𑀸𑀦𑀲𑀢𑁆𑀢𑁄 𑀓𑀫𑁆𑀫𑀓𑀸𑀭𑀡𑀸 𑀓𑀫𑁆𑀫𑀓𑀸𑀭𑀡𑀺𑀓𑀸 𑀯𑀸 𑀫𑀢𑀲𑀢𑁆𑀢𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀤𑁂𑀯𑀤𑀽𑀢𑁂𑀳𑀺 𑀘𑁄𑀤𑁂𑀢𑁆𑀯𑀸 𑀑𑀯𑀤𑀺𑀢𑁆𑀯𑀸, 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀳𑀭𑀓𑀼𑀫𑀸𑀭𑀸𑀤𑀬𑁄 ¶ 𑀳𑀺 𑀢𑀢𑁆𑀣 ‘‘𑀤𑁂𑀯𑀤𑀽𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀳𑀺 𑀤𑀳𑀭𑀓𑀼𑀫𑀸𑀭𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘‘𑀧𑀲𑁆𑀲𑀣 𑀪𑁄 𑀫𑀬𑁆𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀯𑀺𑀬 𑀳𑀢𑁆𑀣𑀧𑀸𑀤𑀸 𑀅𑀢𑁆𑀣𑀺, 𑀲𑀓𑁂 𑀧𑀦𑀫𑁆𑀳𑀺 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, ‘𑀅𑀳𑀁 𑀓𑀺𑀮𑀺𑀝𑁆𑀞𑁄, 𑀦𑀳𑀸𑀧𑁂𑀣 𑀫’𑀦𑁆𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺, 𑀚𑀸𑀢𑀺𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄, 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀚𑀸𑀢𑀺𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀸𑀢𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲𑀸 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘‘𑀧𑀲𑁆𑀲𑀣 𑀪𑁄 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀢𑀭𑀼𑀡𑁄 𑀅𑀳𑁄𑀲𑀺𑀁 𑀊𑀭𑀼𑀩𑀮𑀩𑀸𑀳𑀼𑀩𑀮𑀚𑀯𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲 𑀫𑁂 𑀢𑀸 𑀩𑀮𑀚𑀯𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁆𑀢𑀭𑀳𑀺𑀢𑀸, 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀜𑁆𑀘 𑀦 𑀓𑀭𑁄𑀦𑁆𑀢𑀺, 𑀚𑀭𑀸𑀬𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄, 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀚𑀭𑀸𑀬 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀭𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲𑀸 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀕𑀺𑀮𑀸𑀦𑀲𑀢𑁆𑀢𑁄𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘‘𑀧𑀲𑁆𑀲𑀣 𑀪𑁄 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀦𑀺𑀭𑁄𑀕𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀩𑁆𑀬𑀸𑀥𑀺𑀦𑀸 𑀅𑀪𑀺𑀳𑀢𑁄 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄, 𑀉𑀝𑁆𑀞𑀸𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺, 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀩𑁆𑀬𑀸𑀥𑀺𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄, 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀩𑁆𑀬𑀸𑀥𑀺𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀩𑁆𑀬𑀸𑀥𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀓𑀫𑁆𑀫𑀓𑀸𑀭𑀡𑀸 𑀓𑀫𑁆𑀫𑀓𑀸𑀭𑀡𑀺𑀓𑀸 𑀯𑀸 𑀘𑀢𑀼𑀢𑁆𑀣𑁄 𑀤𑁂𑀯𑀤𑀽𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀫𑁆𑀫𑀓𑀸𑀭𑀡𑀧𑀓𑁆𑀔𑁂 𑀤𑁆𑀯𑀢𑁆𑀢𑀺𑀁𑀲 𑀢𑀸𑀯 𑀓𑀫𑁆𑀫𑀓𑀸𑀭𑀡𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀺 𑀦𑀸𑀫 ‘‘𑀫𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸 𑀦 𑀭𑀼𑀓𑁆𑀔𑁂 𑀯𑀸 𑀧𑀸𑀲𑀸𑀡𑁂 ¶ 𑀯𑀸 𑀦𑀺𑀩𑁆𑀩𑀢𑁆𑀢𑀸𑀫, 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀸𑀫, 𑀇𑀢𑀺 𑀅𑀫𑁆𑀳𑀸𑀓𑀁 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁄𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀢𑀸 𑀤𑁂𑀯𑀤𑀽𑀢𑀸 𑀦𑀸𑀫 𑀚𑀸𑀢𑀸. 𑀓𑀫𑁆𑀫𑀓𑀸𑀭𑀡𑀺𑀓𑀸𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀺 𑀦𑀸𑀫 ‘‘𑀫𑀬𑀁 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸 𑀓𑀭𑁄𑀦𑁆𑀢𑀸 𑀦 𑀭𑀼𑀓𑁆𑀔𑀸𑀤𑀻𑀲𑀼 ¶ 𑀓𑀭𑁄𑀫, 𑀢𑀼𑀫𑁆𑀳𑀸𑀤𑀺𑀲𑁂𑀲𑀼 𑀲𑀢𑁆𑀢𑁂𑀲𑀼𑀬𑁂𑀯 𑀓𑀭𑁄𑀫, 𑀇𑀢𑀺 𑀅𑀫𑁆𑀳𑀸𑀓𑀁 𑀢𑀼𑀫𑁆𑀳𑁂𑀲𑀼 𑀧𑀼𑀭𑁂 𑀓𑀫𑁆𑀫𑀓𑀸𑀭𑀡𑀸𑀓𑀸𑀭𑀡𑀢𑁄𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀢𑁂𑀧𑀺 𑀤𑁂𑀯𑀤𑀽𑀢𑀸 𑀦𑀸𑀫 𑀚𑀸𑀢𑀸.

𑀫𑀢𑀓𑀲𑀢𑁆𑀢𑁄𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘‘𑀧𑀲𑁆𑀲𑀣 𑀪𑁄 𑀫𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀁 𑀧𑀢𑁆𑀢𑀁, 𑀫𑀭𑀡𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄, 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀫𑀭𑀡𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄. 𑀢𑀲𑁆𑀫𑀸 𑀤𑀳𑀭𑀓𑀼𑀫𑀸𑀭𑀸𑀤𑀬𑁄 𑀏𑀢𑁆𑀣 ‘‘𑀤𑁂𑀯𑀤𑀽𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀫𑀢𑀕𑁆𑀕𑀺𑀬𑀦𑁆𑀢𑀺 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀁 (𑀲𑀁. 𑀦𑀺. 𑁨.𑁧𑁨𑁪). 𑀥𑀫𑁆𑀫𑀸𑀫𑀢𑀁 𑀧𑀸𑀬𑁂𑀲𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀫𑀢𑀁 𑀧𑀸𑀦𑀁 𑀧𑀝𑀺𑀮𑀸𑀪𑀓𑀭𑀡𑀯𑀲𑁂𑀦 𑀧𑀸𑀬𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀫𑀥𑀺𑀓𑀸𑀦𑀻𑀢𑀺 𑀲𑀳𑀸𑀥𑀺𑀓𑀸𑀦𑀺. 𑀲𑀳𑀢𑁆𑀣𑁄 𑀳𑁂𑀢𑁆𑀣 𑀲𑀁𑀲𑀤𑁆𑀤𑁄. 𑀇𑀲𑀻𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑁂 𑀏𑀲𑀺 𑀕𑀯𑁂𑀲𑀺 𑀧𑀭𑀺𑀬𑁂𑀲𑀻𑀢𑀺 𑀇𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀘 𑀭𑀝𑁆𑀞𑀸𑀦𑀻𑀢𑀺 𑀧𑀜𑁆𑀘𑀯𑀺𑀥𑀘𑀻𑀦𑀭𑀝𑁆𑀞𑀸𑀦𑀺. 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀧𑀓𑀸𑀲𑁂𑀦𑁆𑀢𑁄 𑀬𑀓𑁆𑀔𑀲𑁂𑀦𑀁 𑀧𑀲𑀸𑀤𑀬𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑁂𑀦 𑀘 𑀲𑀫𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀢𑁂𑀲𑀁 𑀕𑀫𑀦𑀢𑁄 𑀧𑀼𑀩𑁆𑀩𑀪𑀸𑀕𑀓𑀸𑀮𑁂. 𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀻𑀢𑀺 𑀯𑁂𑀲𑁆𑀲𑀯𑀡𑀲𑀦𑁆𑀢𑀺𑀓𑀸 𑀮𑀤𑁆𑀥𑀁 𑀪𑀯𑀺𑀲𑁆𑀲𑀢𑀺. 𑀯𑁂𑀕𑀲𑀸𑀢𑀺 𑀯𑁂𑀕𑁂𑀦. 𑀲𑀫𑀦𑁆𑀢𑀢𑁄 𑀆𑀭𑀓𑁆𑀔𑀁 𑀞𑀧𑁂𑀲𑀻𑀢𑀺 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀧𑀯𑀺𑀲𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀲𑀫𑀦𑁆𑀢𑀸 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀳𑀲𑁆𑀲𑀸𑀦𑀻𑀢𑀺 𑀅𑀟𑁆𑀠𑁂𑀦 𑀘𑀢𑀼𑀢𑁆𑀣𑀸𑀦𑀺 𑀅𑀟𑁆𑀠𑀼𑀟𑁆𑀠𑀸𑀦𑀺, 𑀅𑀢𑀺𑀭𑁂𑀓𑀧𑀜𑁆𑀘𑀲𑀢𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀬𑀟𑁆𑀠𑀲𑀳𑀲𑁆𑀲𑀦𑁆𑀢𑀺 𑀅𑀟𑁆𑀠𑁂𑀦 𑀤𑀼𑀢𑀺𑀬𑀁 𑀤𑀺𑀬𑀟𑁆𑀠𑀁, 𑀅𑀢𑀺𑀭𑁂𑀓𑀧𑀜𑁆𑀘𑀲𑀢𑀁 𑀏𑀓𑀁 𑀲𑀳𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀡𑀼𑀢𑁆𑀢𑀭𑀸𑀢𑀺 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘 𑀲𑁄𑀡𑀼𑀢𑁆𑀢𑀭𑀸. 𑀦𑀺𑀤𑁆𑀥𑀫𑁂𑀢𑁆𑀯𑀸𑀦𑀸𑀢𑀺 𑀧𑀮𑀸𑀧𑁂𑀢𑁆𑀯𑀸𑀦. 𑀅𑀤𑁂𑀲𑀺𑀲𑀼𑀦𑁆𑀢𑀺 𑀅𑀤𑁂𑀲𑀬𑀼𑀁.

𑀅𑀚𑁆𑀛𑀺𑀝𑁆𑀞𑁄𑀢𑀺 𑀆𑀡𑀢𑁆𑀢𑁄. 𑀧𑀼𑀦 𑀤𑀸𑀦𑀻𑀢𑀺 𑀏𑀢𑁆𑀣 𑀤𑀸𑀦𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀼𑀦 𑀆𑀕𑀘𑁆𑀙𑁂𑀬𑁆𑀬𑀸𑀫 𑀯𑀸 𑀦 𑀯𑀸𑀢𑀺 𑀅𑀢𑁆𑀣𑁄. 𑀭𑀸𑀚𑀕𑀳𑀦𑀕𑀭𑀧𑀭𑀺𑀯𑀢𑁆𑀢𑀓𑁂𑀦𑀸𑀢𑀺 𑀭𑀸𑀚𑀕𑀳𑀦𑀕𑀭𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀩𑀳𑀺 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀫𑀕𑁆𑀕𑁂𑀦 𑀕𑀫𑀦𑁂𑀦 𑀯𑀸. 𑀇𑀤𑀸𑀦𑀺 𑀣𑁂𑀭𑀫𑀸𑀢𑀼𑀬𑀸 𑀯𑁂𑀝𑀺𑀲𑀦𑀕𑀭𑁂 𑀦𑀺𑀯𑀸𑀲𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀢𑀲𑁆𑀲 𑀦𑀕𑀭𑀲𑁆𑀲 𑀢𑀲𑁆𑀲𑀸 𑀚𑀸𑀢𑀺𑀪𑀽𑀫𑀺𑀪𑀸𑀯𑀁 𑀣𑁂𑀭𑀲𑁆𑀲 𑀘 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁄𑀓𑁄 𑀓𑀺𑀭 𑀓𑀼𑀫𑀸𑀭𑀓𑀸𑀮𑁂’’𑀢𑀺𑀆𑀤𑀺𑀫𑀸𑀳.

𑀅𑀬𑀁 ¶ ¶ 𑀧𑀦𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀧𑀼𑀩𑁆𑀩𑁂 𑀓𑀺𑀭 𑀫𑁄𑀭𑀺𑀬𑀯𑀁𑀲𑁂 𑀚𑀸𑀢𑀲𑁆𑀲 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀩𑀺𑀦𑁆𑀤𑀼𑀲𑀸𑀭𑁄 𑀦𑀸𑀫 𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀺 𑀦𑀕𑀭𑁂 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀲𑀉𑀤𑀭𑀺𑀬𑀸 𑀅𑀳𑁂𑀲𑀼𑀁, 𑀢𑁂𑀲𑀁 𑀏𑀓𑀽𑀦𑀲𑀢𑀫𑀢𑁆𑀢𑀸 𑀯𑁂𑀫𑀸𑀢𑀺𑀓𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀭𑀸𑀚𑀸 𑀧𑀦 𑀢𑁂𑀲𑀁 𑀲𑀩𑁆𑀩𑀚𑁂𑀝𑁆𑀞𑀓𑀲𑁆𑀲 𑀅𑀲𑁄𑀓𑀓𑀼𑀫𑀸𑀭𑀲𑁆𑀲 𑀉𑀧𑀭𑀚𑁆𑀚𑀝𑁆𑀞𑀸𑀦𑀜𑁆𑀘 𑀅𑀯𑀦𑁆𑀢𑀺𑀭𑀝𑁆𑀞𑀜𑁆𑀘 𑀤𑀢𑁆𑀯𑀸 𑀅𑀣𑁂𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀢𑀸𑀢, 𑀉𑀧𑀭𑀸𑀚, 𑀢𑀯 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀉𑀚𑁆𑀚𑁂𑀦𑀻𑀦𑀕𑀭𑁂 𑀯𑀲𑀸𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀲𑁄 𑀧𑀺𑀢𑀼 𑀯𑀘𑀦𑁂𑀦 𑀢𑀁 𑀉𑀚𑁆𑀚𑁂𑀦𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑁂𑀝𑀺𑀲𑀕𑀺𑀭𑀺𑀦𑀕𑀭𑁂 𑀯𑁂𑀝𑀺𑀲𑀦𑀸𑀫𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀖𑀭𑁂 𑀦𑀺𑀯𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀥𑀻𑀢𑀭𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀁 𑀯𑁂𑀝𑀺𑀲𑀕𑀺𑀭𑀺𑀁 𑀦𑀸𑀫 𑀓𑀼𑀫𑀸𑀭𑀺𑀁 𑀤𑀺𑀲𑁆𑀯𑀸 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀓𑀣𑀸𑀧𑁂𑀢𑁆𑀯𑀸 𑀢𑀁 𑀢𑁂𑀳𑀺 𑀤𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑁂𑀦 𑀲𑀁𑀯𑀸𑀲𑁂𑀦 𑀲𑀜𑁆𑀚𑀸𑀢𑀕𑀩𑁆𑀪𑀸 𑀳𑀼𑀢𑁆𑀯𑀸 𑀢𑀢𑁄 𑀉𑀚𑁆𑀚𑁂𑀦𑀺𑀁 𑀦𑀻𑀢𑀸 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀚𑀦𑀬𑀺. 𑀢𑀢𑁄 𑀯𑀲𑁆𑀲𑀤𑁆𑀯𑀬𑁂 𑀅𑀢𑀺𑀓𑁆𑀓𑀦𑁆𑀢𑁂 𑀲𑀗𑁆𑀖𑀫𑀺𑀢𑁆𑀢𑀜𑁆𑀘 𑀥𑀻𑀢𑀭𑀁 𑀉𑀧𑀮𑀪𑀺𑀢𑁆𑀯𑀸 𑀉𑀧𑀭𑀸𑀚𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀯𑀲𑀢𑀺. 𑀉𑀧𑀭𑀸𑀚𑀲𑁆𑀲 𑀧𑀦 𑀧𑀺𑀢𑀸 𑀩𑀺𑀦𑁆𑀤𑀼𑀲𑀸𑀭𑁄 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀧𑀼𑀢𑁆𑀢𑀁 𑀅𑀲𑁄𑀓𑀓𑀼𑀫𑀸𑀭𑀁 𑀲𑀭𑀺𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑀼𑀁 𑀉𑀚𑁆𑀚𑁂𑀦𑀺𑀁 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀢𑀢𑁄 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀅𑀲𑁄𑀓𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀲𑀁 𑀯𑀘𑀦𑁂𑀦 𑀲𑁄 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀢𑀼𑀭𑀺𑀢𑀕𑀫𑀦𑁂𑀦𑀸𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑁂𑀝𑀺𑀲𑀕𑀺𑀭𑀺𑀦𑀕𑀭𑀫𑁆𑀳𑀺 𑀧𑀼𑀢𑁆𑀢𑀤𑀸𑀭𑁂 𑀞𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀓𑀁 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀕𑀦𑁆𑀢𑁆𑀯𑀸 𑀕𑀢𑀲𑀫𑀦𑀦𑁆𑀢𑀭𑀫𑁂𑀯 𑀓𑀸𑀮𑀓𑀢𑀲𑁆𑀲 𑀧𑀺𑀢𑀼𑀦𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁄 𑀏𑀓𑀽𑀦𑀲𑀢𑀫𑀢𑁆𑀢𑁂 𑀯𑁂𑀫𑀸𑀢𑀺𑀓𑀪𑀸𑀢𑀭𑁄 𑀘 𑀖𑀸𑀢𑀸𑀧𑁂𑀢𑁆𑀯𑀸 𑀯𑀺𑀳𑀢𑀓𑀡𑁆𑀝𑀓𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀕𑀡𑁆𑀳𑀺. 𑀢𑀤𑀸𑀧𑀺 𑀣𑁂𑀭𑀫𑀸𑀢𑀸 𑀤𑀸𑀭𑀓𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀢𑀢𑁆𑀣𑁂𑀯 𑀯𑁂𑀝𑀺𑀲𑀕𑀺𑀭𑀺𑀦𑀕𑀭𑁂 𑀯𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸 𑀢𑀲𑁆𑀲 𑀫𑀸𑀢𑀸 𑀢𑁂𑀦 𑀲𑀫𑀬𑁂𑀦 𑀜𑀸𑀢𑀺𑀖𑀭𑁂 𑀯𑀲𑀻’’𑀢𑀺.

𑀆𑀭𑁄𑀧𑁂𑀲𑀻𑀢𑀺 𑀧𑀝𑀺𑀧𑀸𑀤𑁂𑀲𑀺. 𑀅𑀫𑁆𑀳𑀸𑀓𑀁 𑀇𑀥 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀫𑀸𑀢𑀼 𑀤𑀲𑁆𑀲𑀦𑀲𑁆𑀲 𑀓𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀅𑀦𑀼𑀪𑀯𑀢𑀼 𑀢𑀸𑀯 𑀫𑁂 𑀧𑀺𑀢𑀭𑀸 𑀧𑁂𑀲𑀺𑀢𑀁 𑀅𑀪𑀺𑀲𑁂𑀓𑀦𑁆𑀢𑀺𑀆𑀤𑀻𑀲𑀼 𑀅𑀪𑀺𑀲𑁂𑀓𑀧𑁂𑀲𑀦𑀸𑀤𑀺𑀓𑀣𑀸 𑀯𑀺𑀢𑁆𑀣𑀸𑀭𑁂𑀦 𑀉𑀢𑁆𑀢𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀙𑀡𑀢𑁆𑀣𑀦𑁆𑀢𑀺 𑀙𑀡𑀦𑀺𑀫𑀺𑀢𑁆𑀢𑀁, 𑀙𑀡𑀳𑁂𑀢𑀽𑀢𑀺 𑀅𑀢𑁆𑀣𑁄, 𑀲𑀬𑀁 𑀙𑀡𑀓𑀻𑀴𑀁 𑀅𑀓𑀸𑀢𑀼𑀓𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀸 𑀓𑀺𑀭 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀚𑁂𑀝𑁆𑀞𑀫𑀽𑀮𑀫𑀸𑀲𑀧𑀼𑀡𑁆𑀡𑀫𑀺𑀬𑀁 𑀦𑀓𑁆𑀔𑀢𑁆𑀢𑀁 𑀖𑁄𑀲𑀸𑀧𑁂𑀢𑁆𑀯𑀸 ‘‘𑀲𑀮𑀺𑀮𑀓𑀻𑀴𑀸𑀙𑀡𑀁 ¶ 𑀓𑀭𑁄𑀣𑀸’’𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀫𑀺𑀕𑀯𑀁 𑀓𑀻𑀴𑀺𑀢𑀼𑀓𑀸𑀫𑁄 𑀫𑀺𑀲𑁆𑀲𑀓𑀧𑀩𑁆𑀩𑀢𑀁 𑀅𑀕𑀫𑀸𑀲𑀺. 𑀫𑀺𑀲𑁆𑀲𑀓𑀧𑀩𑁆𑀩𑀢𑀦𑁆𑀢𑀺 𑀧𑀁𑀲𑀼𑀧𑀸𑀲𑀸𑀡𑀫𑀺𑀲𑁆𑀲𑀓𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀁 𑀧𑀩𑁆𑀩𑀢𑀁. 𑀤𑀺𑀝𑁆𑀞𑀲𑀘𑁆𑀘𑁄𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁄, 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀓𑀺𑀭 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀫𑀸𑀢𑀼𑀤𑁂𑀯𑀺𑀬𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺, 𑀲𑁄 𑀘 𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀣𑁂𑀭𑀲𑁆𑀲 𑀫𑀸𑀢𑀼𑀤𑁂𑀯𑀺𑀬𑀸 𑀪𑀕𑀺𑀦𑀻 𑀢𑀲𑁆𑀲𑀸 𑀥𑀻𑀢𑀸, 𑀢𑀲𑁆𑀲𑀸 𑀅𑀬𑀁 𑀧𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀤𑁂𑀯𑀺𑀬𑀸 ¶ 𑀪𑀕𑀺𑀦𑀻 𑀥𑀻𑀢𑀼, 𑀧𑀼𑀢𑁆𑀢𑁄 𑀪𑀡𑁆𑀟𑀼𑀓𑀦𑀸𑀫𑀓𑁄;

𑀣𑁂𑀭𑁂𑀦 𑀤𑁂𑀯𑀺𑀬𑀸 𑀥𑀫𑁆𑀫𑀁, 𑀲𑀼𑀢𑁆𑀯𑀸 𑀤𑁂𑀲𑀺𑀢𑀫𑁂𑀯 𑀢𑀼;

𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸, 𑀯𑀲𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘 𑀢𑀼𑀫𑁆𑀳𑁂 𑀩𑁆𑀬𑀸𑀓𑀢𑀸𑀢𑀺 𑀩𑁄𑀥𑀺𑀫𑀽𑀮𑁂 𑀏𑀯 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀤𑀺𑀲𑁆𑀯𑀸 𑀅𑀦𑀸𑀕𑀢𑁂 𑀢𑀲𑁆𑀲 𑀤𑀻𑀧𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ‘‘𑀅𑀦𑀸𑀕𑀢𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀲𑁆𑀲𑀢𑀻’’𑀢𑀺 𑀢𑀼𑀫𑁆𑀳𑁂 𑀩𑁆𑀬𑀸𑀓𑀢𑀸. 𑀢𑀢𑁆𑀣 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀦𑁆𑀢𑀺 𑀤𑀻𑀧𑀯𑀸𑀲𑀺𑀦𑁄 𑀯𑀼𑀢𑁆𑀢𑀸. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀁 𑀆𑀲𑀬𑀸𑀦𑀼𑀲𑀬𑀜𑀸𑀡𑀜𑁆𑀘 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀧𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀸𑀤𑀺𑀁 𑀯𑀺𑀦𑀸 𑀅𑀜𑁆𑀜𑀁 𑀦 𑀲𑀓𑁆𑀓𑀸 𑀤𑀝𑁆𑀞𑀼𑀦𑁆𑀢𑀺 ‘‘𑀯𑁄𑀮𑁄𑀓𑁂𑀦𑁆𑀢𑁄’’𑀢𑀺 𑀅𑀯𑀢𑁆𑀯𑀸 ‘‘𑀯𑁄𑀮𑁄𑀓𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀫𑀢𑁆𑀣𑀦𑁆𑀢𑀺 ‘‘𑀅𑀦𑀸𑀕𑀢𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀲𑁆𑀲𑀢𑀻’’𑀢𑀺 𑀇𑀫𑀫𑀢𑁆𑀣𑀁.

𑀯𑁂𑀝𑀺𑀲𑀕𑀺𑀭𑀺𑀫𑁆𑀳𑀺 𑀭𑀸𑀚𑀕𑀳𑁂𑀢𑀺 𑀤𑁂𑀯𑀺𑀬𑀸 𑀓𑀢𑀯𑀺𑀳𑀸𑀭𑁂. 𑀓𑀸𑀮𑁄𑀯 𑀕𑀫𑀦𑀲𑁆𑀲, 𑀕𑀘𑁆𑀙𑀸𑀫 𑀤𑀻𑀧𑀫𑀼𑀢𑁆𑀢𑀫𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀢𑁂𑀲𑀁 𑀧𑀭𑀺𑀯𑀺𑀢𑀓𑁆𑀓𑀦𑀺𑀤𑀲𑁆𑀲𑀦𑀁. 𑀧𑀴𑀺𑀦𑀸𑀢𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀅𑀫𑁆𑀩𑀭𑁂𑀢𑀺 𑀆𑀓𑀸𑀲𑁂. 𑀏𑀯𑀫𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀓𑀺𑀁 𑀢𑁂 𑀅𑀓𑀁𑀲𑀽𑀢𑀺 𑀘𑁂𑀢𑀺𑀬𑀧𑀩𑁆𑀩𑀢𑁂 𑀦𑀺𑀧𑀢𑀺𑀁𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀫𑀼𑀧𑁆𑀧𑀢𑀺𑀢𑀸 𑀣𑁂𑀭𑀸, 𑀦𑀺𑀧𑀢𑀺𑀁𑀲𑀼 𑀦𑀕𑀼𑀢𑁆𑀢𑀫𑁂’’𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀣𑁂𑀭𑀸𑀦𑀜𑁆𑀘 𑀢𑀢𑁆𑀣 𑀦𑀺𑀧𑀢𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀢𑁄 𑀧𑀼𑀭𑀲𑁂𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀧𑀼𑀭𑀢𑁄𑀢𑀺 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂. 𑀧𑀼𑀭𑀲𑁂𑀝𑁆𑀞𑀲𑁆𑀲𑀸𑀢𑀺 𑀅𑀦𑀼𑀭𑀸𑀥𑀧𑀼𑀭𑀲𑀗𑁆𑀔𑀸𑀢𑀲𑁆𑀲 𑀧𑀼𑀭𑀯𑀭𑀲𑁆𑀲. 𑀫𑁂𑀖𑀲𑀦𑁆𑀦𑀺𑀪𑁂𑀢𑀺 𑀲𑀫𑀦𑁆𑀢𑀢𑁄 𑀦𑀻𑀮𑀯𑀡𑁆𑀡𑀢𑁆𑀢𑀸 𑀦𑀻𑀮𑀫𑀳𑀸𑀫𑁂𑀖𑀲𑀤𑀺𑀲𑁂. 𑀲𑀻𑀮𑀓𑀽𑀝𑀫𑁆𑀳𑀻𑀢𑀺 𑀏𑀯𑀁𑀦𑀸𑀫𑀓𑁂 𑀧𑀩𑁆𑀩𑀢𑀓𑀽𑀝𑁂. 𑀳𑀁𑀲𑀸𑀯 𑀦𑀕𑀫𑀼𑀤𑁆𑀥𑀦𑀻𑀢𑀺 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀳𑀁𑀲𑀸 𑀯𑀺𑀬.

𑀢𑀢𑁆𑀣 ¶ 𑀧𑀦 𑀧𑀢𑀺𑀝𑁆𑀞𑀳𑀦𑁆𑀢𑁄 𑀓𑀤𑀸 𑀧𑀢𑀺𑀝𑁆𑀞𑀳𑀻𑀢𑀺 𑀆𑀳 ‘‘𑀏𑀯𑀁 𑀇𑀝𑁆𑀝𑀺𑀬𑀸𑀤𑀻𑀳𑀺 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁆𑀲𑀢𑁄 𑀢𑀁 𑀅𑀯𑀥𑀺𑀪𑀽𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀲𑁆𑀫𑀺𑀁𑀬𑁂𑀯 𑀯𑀲𑁆𑀲𑁂𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀬𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀢𑀲𑁆𑀫𑀺𑀁𑀬𑁂𑀯 𑀘 𑀤𑀺𑀯𑀲𑁂 𑀯𑀺𑀚𑀬𑀓𑀼𑀫𑀸𑀭𑁄 𑀇𑀫𑀁 𑀤𑀻𑀧𑀫𑀸𑀕𑀢𑁄𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀮𑀗𑁆𑀓𑀸𑀬𑀁 𑀯𑀺𑀚𑀬𑀲𑀦𑀸𑀫𑀓𑁄 𑀓𑀼𑀫𑀸𑀭𑁄,

𑀑𑀢𑀺𑀡𑁆𑀡𑁄 𑀣𑀺𑀭𑀫𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂;

𑀲𑀸𑀮𑀸𑀦𑀁 ¶ 𑀬𑀫𑀓𑀕𑀼𑀡𑀸𑀦𑀫𑀦𑁆𑀢𑀭𑀲𑁆𑀫𑀺𑀁,

𑀦𑀺𑀩𑁆𑀩𑀸𑀢𑀼𑀁 𑀲𑀬𑀺𑀢𑀤𑀺𑀦𑁂 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀲𑀻𑀳𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄𑀢𑀺 𑀏𑀢𑁆𑀣 𑀓𑀸𑀮𑀺𑀗𑁆𑀕𑀭𑀸𑀚𑀥𑀻𑀢𑀼 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀻𑀳𑀲𑁆𑀲 𑀚𑀸𑀢𑁄 𑀓𑀼𑀫𑀸𑀭𑁄 𑀲𑀻𑀳𑀓𑀼𑀫𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀧𑀼𑀩𑁆𑀩𑁂 𑀅𑀫𑀦𑀼𑀲𑁆𑀲𑀸𑀯𑀸𑀲𑀢𑁆𑀢𑀸 𑀆𑀳 ‘‘𑀫𑀦𑀼𑀲𑁆𑀲𑀸𑀯𑀸𑀲𑀁 𑀅𑀓𑀸𑀲𑀻’’𑀢𑀺. 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂𑀢𑀺 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂. 𑀇𑀥 𑀯𑀺𑀚𑀬𑁄 𑀓𑀸𑀮𑀫𑀓𑀸𑀲𑀻𑀢𑀺 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀯𑀺𑀚𑀬𑀭𑀸𑀚𑀓𑀼𑀫𑀸𑀭𑁄 𑀅𑀝𑁆𑀞𑀢𑀺𑀁𑀲 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀣𑀸 𑀳𑀺 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸 𑀤𑁆𑀯𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀉𑀤𑀬𑀪𑀤𑁆𑀤𑁄 𑀲𑁄𑀴𑀲 𑀯𑀲𑁆𑀲𑀸𑀦𑀺, 𑀢𑀲𑁆𑀫𑀸 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀅𑀝𑁆𑀞𑀫𑀯𑀲𑁆𑀲𑀁 𑀇𑀥 𑀯𑀺𑀚𑀬𑀲𑁆𑀲 𑀧𑀞𑀫𑀯𑀲𑁆𑀲𑀦𑁆𑀢𑀺 𑀓𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀘𑀢𑀼𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀉𑀤𑀬𑀪𑀤𑁆𑀤𑀲𑁆𑀲 𑀘𑀼𑀤𑁆𑀤𑀲 𑀯𑀲𑁆𑀲𑀸𑀦𑀻𑀢𑀺 𑀯𑀺𑀚𑀬𑀲𑁆𑀲 𑀅𑀝𑁆𑀞𑀢𑀺𑀁𑀲 𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀯𑀺𑀚𑀬𑁄 𑀮𑀗𑁆𑀓𑀫𑀸𑀕𑀫𑁆𑀫, 𑀲𑀢𑁆𑀣𑀼 𑀦𑀺𑀩𑁆𑀩𑀸𑀦𑀯𑀸𑀲𑀭𑁂;

𑀅𑀝𑁆𑀞𑀢𑀺𑀁𑀲 𑀲𑀫𑀸𑀓𑀸𑀲𑀺, 𑀭𑀚𑁆𑀚𑀁 𑀬𑀓𑁆𑀔𑀯𑀺𑀫𑀤𑁆𑀤𑀓𑁄’’𑀢𑀺.

‘‘𑀉𑀤𑀬𑀪𑀤𑁆𑀤𑀲𑁆𑀲 𑀧𑀜𑁆𑀘𑀤𑀲𑀫𑁂 𑀯𑀲𑁆𑀲𑁂 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀦𑀸𑀫 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀭𑀚𑁆𑀚𑀁 𑀧𑀸𑀧𑀼𑀡𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀬𑀪𑀤𑁆𑀤𑀲𑁆𑀲 𑀘𑀼𑀤𑁆𑀤𑀲𑀫𑀯𑀲𑁆𑀲𑀲𑀗𑁆𑀔𑀸𑀢𑀁 𑀏𑀓𑀁 𑀯𑀲𑁆𑀲𑀁 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀯𑀺𑀚𑀬𑀲𑁆𑀲 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀻𑀳𑀴𑀁 𑀅𑀭𑀸𑀚𑀺𑀓𑀁 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀯𑀲𑁆𑀲𑁂 𑀯𑀺𑀚𑀬𑀭𑀸𑀚𑀲𑁆𑀲 𑀅𑀫𑀘𑁆𑀘𑀸 𑀉𑀧𑀢𑀺𑀲𑁆𑀲𑀁 𑀦𑀸𑀫 𑀅𑀫𑀘𑁆𑀘𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀢𑀲𑁆𑀲 𑀦𑀸𑀫𑁂𑀦 𑀓𑀢𑁂 𑀉𑀧𑀢𑀺𑀲𑁆𑀲𑀕𑀸𑀫𑁂 𑀯𑀲𑀦𑁆𑀢𑀸 𑀅𑀭𑀸𑀚𑀺𑀓𑀁 𑀭𑀚𑁆𑀚𑀫𑀦𑀼𑀲𑀸𑀲𑀺𑀁𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀲𑁆𑀫𑀺𑀁 ¶ 𑀫𑀢𑁂 𑀅𑀫𑀘𑁆𑀘𑀸 𑀢𑁂, 𑀧𑁂𑀓𑁆𑀔𑀦𑁆𑀢𑀸 𑀔𑀢𑁆𑀢𑀺𑀬𑀸𑀕𑀫𑀁;

𑀉𑀧𑀢𑀺𑀲𑁆𑀲𑀕𑀸𑀫𑁂 𑀞𑀢𑁆𑀯𑀸𑀦, 𑀭𑀝𑁆𑀞𑀁 𑀲𑀫𑀦𑀼𑀲𑀸𑀲𑀺𑀲𑀼𑀁.

‘‘𑀫𑀢𑁂 𑀯𑀺𑀚𑀬𑀭𑀸𑀚𑀫𑁆𑀳𑀺, 𑀔𑀢𑁆𑀢𑀺𑀬𑀸𑀕𑀫𑀦𑀸 𑀧𑀼𑀭𑀸;

𑀏𑀓𑀁 𑀯𑀲𑁆𑀲𑀁 𑀅𑀬𑀁 𑀮𑀗𑁆𑀓𑀸-𑀤𑀻𑀧𑁄 𑀆𑀲𑀺 𑀅𑀭𑀸𑀚𑀺𑀓𑁄’’𑀢𑀺.

𑀢𑀢𑁆𑀣𑀸𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀇𑀥 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀓𑀸𑀮𑀫𑀓𑀸𑀲𑀻𑀢𑀺 𑀇𑀫𑀲𑁆𑀫𑀺𑀁 𑀲𑀻𑀳𑀴𑀤𑀻𑀧𑁂 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀭𑀚𑁆𑀚𑀫𑀦𑀼𑀲𑀸𑀲𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀣𑀸 𑀳𑀺 𑀉𑀤𑀬𑀪𑀤𑁆𑀤𑀲𑁆𑀲 𑀅𑀦𑀦𑁆𑀢𑀭𑀁 𑀅𑀦𑀼𑀭𑀼𑀤𑁆𑀥𑁄 𑀘 𑀫𑀼𑀡𑁆𑀟𑁄 𑀘 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀭𑀚𑁆𑀚𑀫𑀦𑀼𑀲𑀸𑀲𑀺𑀁𑀲𑀼, 𑀢𑀤𑀦𑀦𑁆𑀢𑀭𑀁 𑀦𑀸𑀕𑀤𑀸𑀲𑀓𑁄 𑀘𑀢𑀼𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀢𑀲𑁆𑀫𑀸 ¶ 𑀉𑀤𑀬𑀪𑀤𑁆𑀤𑀲𑁆𑀲 𑀧𑀜𑁆𑀘𑀤𑀲𑀫𑀲𑁄𑀴𑀲𑀫𑀯𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀅𑀦𑀼𑀭𑀼𑀤𑁆𑀥𑀲𑁆𑀲 𑀘 𑀫𑀼𑀡𑁆𑀟𑀲𑁆𑀲 𑀘 𑀅𑀝𑁆𑀞 𑀯𑀲𑁆𑀲𑀸𑀦𑀺, 𑀦𑀸𑀕𑀤𑀸𑀲𑀓𑀲𑁆𑀲 𑀘 𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑁂𑀲𑀼 𑀯𑀻𑀲𑀢𑀺 𑀯𑀲𑁆𑀲𑀸𑀦𑀻𑀢𑀺 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀲𑁆𑀲 𑀭𑀜𑁆𑀜𑁄 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋

‘‘𑀢𑀢𑁄 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁄, 𑀭𑀚𑁆𑀚𑀁 𑀢𑀺𑀁𑀲 𑀲𑀫𑀸 𑀅𑀓𑀸’’𑀢𑀺;

𑀢𑀢𑁆𑀣𑀸𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂𑀢𑀺 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂. 𑀢𑀣𑀸 𑀳𑀺 𑀦𑀸𑀕𑀤𑀸𑀲𑀓𑀲𑁆𑀲 𑀅𑀦𑀦𑁆𑀢𑀭𑀸 𑀲𑀼𑀲𑀼𑀦𑀸𑀕𑁄 𑀅𑀝𑁆𑀞𑀸𑀭𑀲 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀫𑀸 𑀦𑀸𑀕𑀤𑀸𑀲𑀓𑀲𑁆𑀲 𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑁂𑀲𑀼 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀘𑀢𑀽𑀳𑀺 𑀯𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀼𑀲𑀼𑀦𑀸𑀕𑀲𑁆𑀲 𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀲𑁄𑀴𑀲 𑀯𑀲𑁆𑀲𑀸𑀦𑀻𑀢𑀺 𑀇𑀥 𑀅𑀪𑀬𑀭𑀜𑁆𑀜𑁄 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀬𑁄 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀮𑀗𑁆𑀓𑀸𑀭𑀚𑁆𑀚𑀫𑀓𑀸𑀭𑀬𑀻’’𑀢𑀺;

𑀤𑀸𑀫𑀭𑀺𑀓𑁄𑀢𑀺 𑀬𑀼𑀤𑁆𑀥𑀓𑀸𑀭𑀓𑁄 𑀘𑁄𑀭𑁄. 𑀧𑀡𑁆𑀟𑀼𑀓𑀸𑀪𑀬𑁄 𑀧𑀦 𑀅𑀪𑀬𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀭𑀸𑀚𑀸𑀬𑁂𑀯, 𑀦 𑀘𑁄𑀭𑁄, 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀭𑀚𑁆𑀚𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀤𑀸𑀫𑀭𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀻𑀢𑀺 𑀏𑀓𑀤𑁂𑀲𑀲𑁆𑀲 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀪𑀬𑀲𑁆𑀲 𑀳𑀺 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀦 𑀢𑀸𑀯 𑀲𑀩𑁆𑀩𑀁 𑀭𑀚𑁆𑀚𑀫𑀕𑁆𑀕𑀳𑁂𑀲𑀻𑀢𑀺. 𑀢𑀣𑀸 𑀳𑀺 𑀯𑀻𑀲𑀢𑀺𑀫𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀅𑀪𑀬𑀲𑁆𑀲 𑀦𑀯 𑀪𑀸𑀢𑀺𑀓𑁂 ¶ 𑀅𑀢𑁆𑀢𑀦𑁄 𑀫𑀸𑀢𑀼𑀮𑁂 𑀢𑀢𑁆𑀣 𑀢𑀢𑁆𑀣 𑀬𑀼𑀤𑁆𑀥𑀁 𑀓𑀢𑁆𑀯𑀸 𑀖𑀸𑀢𑁂𑀦𑁆𑀢𑀲𑁆𑀲 𑀅𑀦𑀪𑀺𑀲𑀺𑀢𑁆𑀢𑀲𑁆𑀲𑁂𑀯 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀁𑀲𑀼, 𑀢𑀢𑁄𑀬𑁂𑀯 𑀘 𑀢𑀸𑀦𑀺 𑀭𑀸𑀚𑀲𑀼𑀜𑁆𑀜𑀸𑀦𑀺 𑀦𑀸𑀫 𑀅𑀳𑁂𑀲𑀼𑀁. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀧𑀡𑁆𑀟𑀼𑀓𑀸𑀪𑀬𑀭𑀜𑁆𑀜𑁄 𑀘, 𑀅𑀪𑀬𑀲𑁆𑀲 𑀘 𑀅𑀦𑁆𑀢𑀭𑁂;

𑀭𑀸𑀚𑀲𑀼𑀜𑁆𑀜𑀸𑀦𑀺 𑀯𑀲𑁆𑀲𑀸𑀦𑀺, 𑀅𑀳𑁂𑀲𑀼𑀁 𑀤𑀲 𑀲𑀢𑁆𑀢 𑀘𑀸’’𑀢𑀺.

𑀢𑀢𑁆𑀣𑀸𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀧𑀡𑁆𑀟𑀼𑀓𑀲𑁆𑀲𑀸𑀢𑀺 𑀧𑀡𑁆𑀟𑀼𑀓𑀸𑀪𑀬𑀲𑁆𑀲. 𑀪𑀯𑀢𑀺 𑀳𑀺 𑀏𑀓𑀤𑁂𑀲𑁂𑀦𑀧𑀺 𑀯𑁄𑀳𑀸𑀭𑁄 ‘‘𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺 𑀬𑀣𑀸. 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀽𑀢𑀺 𑀅𑀦𑀪𑀺𑀲𑀺𑀢𑁆𑀢𑀲𑁆𑀲𑁂𑀯 𑀧𑀭𑀺𑀧𑀽𑀭𑀺𑀁𑀲𑀼. 𑀏𑀢𑁆𑀣 𑀘 𑀓𑀸𑀴𑀸𑀲𑁄𑀓𑀲𑁆𑀲 𑀲𑁄𑀴𑀲𑀫𑀯𑀲𑁆𑀲𑀁 𑀞𑀧𑁂𑀢𑁆𑀯𑀸 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀳𑁂𑀝𑁆𑀞𑀸 𑀲𑀼𑀲𑀼𑀦𑀸𑀕𑀲𑁆𑀲 𑀲𑀢𑁆𑀢𑀭𑀲𑀫𑀅𑀝𑁆𑀞𑀸𑀭𑀲𑀫𑀯𑀲𑁆𑀲𑀸𑀦𑀺 𑀘 𑀤𑁆𑀯𑁂 𑀕𑀳𑁂𑀢𑁆𑀯𑀸 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀺 𑀕𑀡𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑁂𑀝𑁆𑀞𑀸 𑀏𑀓𑁂𑀦 𑀯𑀲𑁆𑀲𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀭𑀸𑀚𑀲𑀼𑀜𑁆𑀜𑀸𑀦𑀺 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀺 𑀳𑁂𑀝𑁆𑀞𑀸 𑀯𑀺𑀚𑀬𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀭𑀸𑀚𑀽𑀦𑀫𑀦𑁆𑀢𑀭𑁂 𑀅𑀭𑀸𑀚𑀺𑀓𑁂𑀦 𑀏𑀓𑁂𑀦 𑀯𑀲𑁆𑀲𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲 𑀭𑀸𑀚𑀲𑀼𑀜𑁆𑀜𑀯𑀲𑁆𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀘𑀦𑁆𑀤𑀕𑀼𑀢𑁆𑀢𑀲𑁆𑀲 ¶ 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀥 𑀧𑀡𑁆𑀟𑀼𑀓𑀸𑀪𑀬𑁄 𑀓𑀸𑀮𑀫𑀓𑀸𑀲𑀻𑀢𑀺 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀘𑀼𑀤𑁆𑀤𑀲𑀫𑁂 𑀯𑀲𑁆𑀲𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀧𑀡𑁆𑀟𑀼𑀓𑀸𑀪𑀬𑁄 𑀦𑀸𑀫 𑀭𑀸𑀚𑀸 𑀲𑀢𑁆𑀢𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀫𑀦𑀼𑀲𑀸𑀲𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀣𑀸 𑀳𑀺 𑀲𑀼𑀲𑀼𑀦𑀸𑀕𑀲𑁆𑀲 𑀧𑀼𑀢𑁆𑀢𑁄 𑀓𑀸𑀴𑀸𑀲𑁄𑀓𑁄 𑀅𑀝𑁆𑀞𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀢𑁄 𑀢𑀲𑁆𑀲 𑀧𑀼𑀢𑁆𑀢𑀸 𑀤𑀲 𑀪𑀸𑀢𑀼𑀓𑀸 𑀤𑁆𑀯𑁂𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁, 𑀢𑁂𑀲𑀁 𑀧𑀘𑁆𑀙𑀸 𑀦𑀯 𑀦𑀦𑁆𑀤𑀸 𑀤𑁆𑀯𑁂𑀯𑀻𑀲𑀢𑀺, 𑀘𑀦𑁆𑀤𑀕𑀼𑀢𑁆𑀢𑁄 𑀘𑀢𑀼𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀓𑀸𑀴𑀸𑀲𑁄𑀓𑀲𑁆𑀲 𑀅𑀝𑁆𑀞𑀯𑀻𑀲𑀢𑀺𑀯𑀲𑁆𑀲𑁂𑀲𑀼 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀳𑁂𑀝𑁆𑀞𑀸 𑀕𑀳𑀺𑀢𑀸𑀦𑀻𑀢𑀺 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀢𑁂𑀭𑀲 𑀯𑀲𑁆𑀲𑀸𑀦𑀺, 𑀤𑀲𑀪𑀸𑀢𑀼𑀓𑀸𑀦𑀁 𑀤𑁆𑀯𑁂𑀯𑀻𑀲𑀢𑀺, 𑀢𑀣𑀸 𑀦𑀯𑀦𑀦𑁆𑀤𑀸𑀦𑀁 𑀤𑁆𑀯𑁂𑀯𑀻𑀲𑀢𑀺, 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀘𑀼𑀤𑁆𑀤𑀲𑀫𑀯𑀲𑁆𑀲𑀁 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀯𑀲𑁆𑀲𑀸𑀦𑀻𑀢𑀺 𑀧𑀡𑁆𑀟𑀼𑀓𑀸𑀪𑀬𑀲𑁆𑀲 𑀲𑀢𑁆𑀢𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑀺𑀁𑀲𑀼. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀧𑀡𑁆𑀟𑀼𑀓𑀸𑀪𑀬𑀦𑀸𑀫𑀲𑁆𑀲, 𑀭𑀜𑁆𑀜𑁄 𑀯𑀲𑁆𑀲𑀸𑀦𑀺 𑀲𑀢𑁆𑀢𑀢𑀻’’𑀢𑀺;

𑀢𑀢𑁆𑀣 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀫𑀼𑀝𑀲𑀺𑀯𑀭𑀸𑀚𑀸 𑀓𑀸𑀮𑀫𑀓𑀸𑀲𑀻𑀢𑀺 𑀢𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀇𑀥 𑀫𑀼𑀝𑀲𑀺𑀯𑁄 𑀦𑀸𑀫 𑀭𑀸𑀚𑀸 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀫𑀦𑀼𑀲𑀸𑀲𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺 ¶ . 𑀢𑀣𑀸 𑀳𑀺 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀩𑀺𑀦𑁆𑀤𑀼𑀲𑀸𑀭𑁄 𑀅𑀝𑁆𑀞𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀅𑀲𑁄𑀓𑀥𑀫𑁆𑀫𑀭𑀸𑀚𑀸 𑀭𑀚𑁆𑀚𑀁 𑀧𑀸𑀧𑀼𑀡𑀺, 𑀢𑀲𑁆𑀫𑀸 𑀘𑀦𑁆𑀤𑀕𑀼𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀯𑀲𑁆𑀲𑁂𑀲𑀼 𑀢𑁂𑀭𑀲 𑀯𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀏𑀓𑀸𑀤𑀲 𑀯𑀲𑁆𑀲𑀸𑀦𑀺, 𑀩𑀺𑀦𑁆𑀤𑀼𑀲𑀸𑀭𑀲𑁆𑀲 𑀅𑀝𑁆𑀞𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀅𑀲𑁄𑀓𑀲𑁆𑀲 𑀅𑀦𑀪𑀺𑀲𑀺𑀢𑁆𑀢𑀲𑁆𑀲 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀅𑀪𑀺𑀲𑀺𑀢𑁆𑀢𑀲𑁆𑀲 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀻𑀢𑀺 𑀏𑀯𑀁 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀇𑀥 𑀫𑀼𑀝𑀲𑀺𑀯𑀲𑁆𑀲 𑀧𑀭𑀺𑀧𑀽𑀭𑀺𑀁𑀲𑀼. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀫𑀼𑀝𑀲𑀺𑀯𑁄 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺, 𑀮𑀗𑁆𑀓𑀸𑀭𑀚𑁆𑀚𑀫𑀓𑀸𑀭𑀬𑀻’’𑀢𑀺;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀭𑀚𑁆𑀚𑀁 𑀧𑀸𑀧𑀼𑀡𑀻𑀢𑀺 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀧𑀸𑀧𑀼𑀡𑀺. 𑀇𑀤𑀸𑀦𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀅𑀚𑀸𑀢𑀲𑀢𑁆𑀢𑀼𑀆𑀤𑀻𑀦𑀁 𑀯𑀲𑁆𑀲𑀕𑀡𑀦𑀸𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲𑀢𑀺 𑀯𑀲𑁆𑀲𑀸𑀦𑀺 𑀏𑀓𑀢𑁄 𑀕𑀡𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂’’𑀢𑀺𑀆𑀤𑀺. 𑀢𑀢𑁆𑀣 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀘𑀢𑀼𑀯𑀻𑀲𑀢𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁆𑀲𑀲𑀗𑁆𑀔𑀸𑀢𑀁 𑀅𑀝𑁆𑀞𑀫𑀯𑀲𑁆𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀲𑁄𑀓𑀲𑁆𑀲 𑀧𑀼𑀢𑁆𑀢𑀓𑀸 𑀤𑀲 𑀪𑀸𑀢𑀼𑀓𑀭𑀸𑀚𑀸𑀦𑁄𑀢𑀺 𑀓𑀸𑀴𑀸𑀲𑁄𑀓𑀲𑁆𑀲 𑀧𑀼𑀢𑁆𑀢𑀸 𑀪𑀤𑁆𑀤𑀲𑁂𑀦𑁄 𑀓𑁄𑀭𑀡𑁆𑀟𑀯𑀡𑁆𑀡𑁄 𑀫𑀗𑁆𑀓𑀼𑀭𑁄 𑀲𑀩𑁆𑀩𑀜𑁆𑀚𑀳𑁄 𑀚𑀸𑀮𑀺𑀓𑁄 𑀉𑀪𑀓𑁄 𑀲𑀜𑁆𑀘𑀬𑁄 𑀓𑁄𑀭𑀩𑁆𑀬𑁄 𑀦𑀦𑁆𑀤𑀺𑀯𑀟𑁆𑀠𑀦𑁄 𑀧𑀜𑁆𑀘𑀫𑀓𑁄𑀢𑀺 𑀇𑀫𑁂 𑀤𑀲 𑀪𑀸𑀢𑀼𑀓𑀭𑀸𑀚𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀕𑁆𑀕𑀲𑁂𑀦𑀦𑀦𑁆𑀤𑁄 𑀧𑀡𑁆𑀟𑀼𑀓𑀦𑀦𑁆𑀤𑁄 𑀧𑀡𑁆𑀟𑀼𑀕𑀢𑀺𑀦𑀦𑁆𑀤𑁄 𑀪𑀽𑀢𑀧𑀸𑀮𑀦𑀦𑁆𑀤𑁄 𑀭𑀝𑁆𑀞𑀧𑀸𑀮𑀦𑀦𑁆𑀤𑁄 𑀕𑁄𑀯𑀺𑀲𑀸𑀡𑀓𑀦𑀦𑁆𑀤𑁄 𑀲𑀯𑀺𑀤𑁆𑀥𑀓𑀦𑀦𑁆𑀤𑁄 𑀓𑁂𑀯𑀝𑁆𑀝𑀓𑀦𑀦𑁆𑀤𑁄 𑀥𑀦𑀦𑀦𑁆𑀤𑁄𑀢𑀺 𑀇𑀫𑁂 𑀦𑀯 𑀦𑀦𑁆𑀤𑀸𑀢𑀺 ¶ 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦 𑀭𑀸𑀚𑀯𑀁𑀲𑀸𑀦𑀼𑀲𑀸𑀭𑁂𑀦𑀸𑀢𑀺 𑀏𑀢𑁂𑀦 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀭𑀸𑀚𑀽𑀦𑀁 𑀯𑀁𑀲𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀫𑁂𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀧𑀼𑀦 𑀭𑀸𑀚𑀽𑀦𑀁 𑀯𑀲𑁂𑀦 𑀏𑀯𑀁 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁆𑀲𑀁 𑀇𑀥 𑀯𑀺𑀚𑀬𑀲𑁆𑀲 𑀧𑀞𑀫𑀁 𑀯𑀲𑁆𑀲𑀦𑁆𑀢𑀺 𑀓𑀢𑁆𑀯𑀸 𑀢𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁆𑀲𑀢𑁄 𑀉𑀤𑁆𑀥𑀁 𑀯𑀺𑀚𑀬𑀲𑁆𑀲 𑀲𑀢𑁆𑀢𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀢𑀢𑁄 𑀅𑀭𑀸𑀚𑀺𑀓𑀫𑁂𑀓𑀯𑀲𑁆𑀲𑀁, 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀲𑁆𑀲 𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀅𑀪𑀬𑀲𑁆𑀲 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺, 𑀧𑀡𑁆𑀟𑀼𑀓𑀸𑀪𑀬𑀲𑁆𑀲 𑀅𑀪𑀺𑀲𑁂𑀓𑀢𑁄 𑀧𑀼𑀩𑁆𑀩𑁂 𑀲𑀢𑁆𑀢𑀭𑀲 𑀯𑀲𑁆𑀲𑀸𑀦𑀺, 𑀅𑀪𑀺𑀲𑀺𑀢𑁆𑀢𑀲𑁆𑀲 𑀲𑀢𑁆𑀢𑀢𑀺 𑀯𑀲𑁆𑀲𑀸𑀦𑀺, 𑀫𑀼𑀝𑀲𑀺𑀯𑀲𑁆𑀲 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺, 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲 𑀧𑀞𑀫𑀁 𑀯𑀲𑁆𑀲𑀦𑁆𑀢𑀺 𑀏𑀯𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀙𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀚𑁂𑀝𑁆𑀞𑀫𑀸𑀲𑀲𑁆𑀲 ¶ 𑀧𑀼𑀡𑁆𑀡𑀫𑀺𑀬𑀁 𑀚𑁂𑀝𑁆𑀞𑀦𑀓𑁆𑀔𑀢𑁆𑀢𑀁 𑀫𑀽𑀮𑀦𑀓𑁆𑀔𑀢𑁆𑀢𑀁 𑀯𑀸 𑀳𑁄𑀢𑀻𑀢𑀺 𑀆𑀳 ‘‘𑀚𑁂𑀝𑁆𑀞𑀫𑀽𑀮𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀧𑀦 𑀦𑀓𑁆𑀔𑀢𑁆𑀢𑁂 𑀓𑀢𑁆𑀢𑀩𑁆𑀩𑀙𑀡𑀫𑁆𑀧𑀺 𑀢𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀢𑀫𑁂𑀯 𑀦𑀸𑀫𑀁 𑀮𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀺𑀕𑀯𑀦𑁆𑀢𑀺 𑀫𑀺𑀕𑀸𑀦𑀁 𑀯𑀸𑀦𑀦𑀢𑁄 𑀳𑁂𑀲𑀦𑀢𑁄 𑀩𑀸𑀥𑀦𑀢𑁄 𑀫𑀺𑀕𑀯𑀦𑁆𑀢𑀺 𑀮𑀤𑁆𑀥𑀲𑀫𑀜𑁆𑀜𑀁 𑀫𑀺𑀕𑀯𑀁. 𑀭𑁄𑀳𑀺𑀢𑀫𑀺𑀕𑀭𑀽𑀧𑀦𑁆𑀢𑀺 𑀕𑁄𑀓𑀡𑁆𑀡𑀫𑀺𑀕𑀯𑁂𑀲𑀁. 𑀚𑀺𑀬𑀦𑁆𑀢𑀺 𑀥𑀦𑀼𑀚𑀺𑀬𑀁. 𑀅𑀦𑀼𑀩𑀦𑁆𑀥𑀦𑁆𑀢𑁄𑀢𑀺 𑀧𑀤𑀲𑀸 𑀅𑀦𑀼𑀥𑀸𑀯𑀦𑁆𑀢𑁄. 𑀫𑀫𑀁𑀬𑁂𑀯 𑀭𑀸𑀚𑀸 𑀧𑀲𑁆𑀲𑀢𑀽𑀢𑀺 𑀏𑀢𑁆𑀣 ‘‘𑀅𑀫𑁆𑀳𑁂𑀲𑀼 𑀩𑀳𑀽𑀲𑀼 𑀤𑀺𑀝𑁆𑀞𑁂𑀲𑀼 𑀭𑀸𑀚𑀸 𑀅𑀢𑀺𑀯𑀺𑀬 𑀪𑀸𑀬𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀢𑁆𑀢𑀸𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀫𑀫𑀁𑀬𑁂𑀯 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀺𑀦𑁆𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘𑀺𑀦𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀲𑁆𑀫𑀺𑀁 𑀤𑀻𑀧𑁂 𑀚𑀸𑀢𑁄’’𑀢𑀺𑀆𑀤𑀺. 𑀣𑁂𑀭𑁄 𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀁 𑀚𑀸𑀦𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀓𑀣𑁂𑀢𑁆𑀯𑀸 𑀢𑀁 𑀅𑀲𑁆𑀲𑀸𑀲𑁂𑀢𑀼𑀓𑀸𑀫𑁄 ‘‘𑀲𑀫𑀡𑀸 𑀫𑀬𑀁 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀫𑀳𑀸𑀭𑀸𑀚 𑀫𑀬𑀁 𑀲𑀫𑀡𑀸 𑀦𑀸𑀫, 𑀢𑁆𑀯𑀁 𑀧𑀭𑀺𑀯𑀺𑀢𑀓𑁆𑀓𑀁 𑀫𑀸 𑀅𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀯𑁂𑀯 𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀢𑀯 𑀅𑀦𑀼𑀓𑀫𑁆𑀧𑀢𑁆𑀣𑀸𑀬 𑀏𑀯 𑀆𑀕𑀢𑀸, 𑀦 𑀯𑀺𑀫𑀼𑀔𑀪𑀸𑀯𑀢𑁆𑀣𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑁂 𑀲𑀫𑀡𑀸 𑀦𑀸𑀫𑀸’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 ‘‘𑀲𑀫𑀡𑀸 𑀫𑀬𑀁, 𑀫𑀳𑀸𑀭𑀸𑀚𑀸’’𑀢𑀺 𑀓𑀲𑁆𑀫𑀸 𑀣𑁂𑀭𑁄 𑀆𑀳𑀸𑀢𑀺 𑀘𑁂? 𑀅𑀲𑁄𑀓𑀥𑀫𑁆𑀫𑀭𑀸𑀚𑁂𑀦 𑀧𑁂𑀲𑀺𑀢𑀲𑀸𑀲𑀦𑁂𑀦𑁂𑀯 𑀧𑀼𑀩𑁆𑀩𑁂 𑀕𑀳𑀺𑀢𑀲𑀫𑀡𑀲𑀜𑁆𑀜𑀁 𑀲𑀸𑀭𑁂𑀢𑀼𑀁 𑀏𑀯𑀫𑀸𑀳𑀸𑀢𑀺. 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑁂𑀦 𑀘 𑀲𑀫𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀤𑀺𑀝𑁆𑀞𑀸 𑀳𑀼𑀢𑁆𑀯𑀸 𑀲𑀳𑀸𑀬𑀓𑀸𑀢𑀺 𑀅𑀤𑀺𑀝𑁆𑀞𑀲𑀳𑀸𑀬𑀓𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀤𑀺𑀲𑁆𑀯𑀸𑀯 𑀲𑀳𑀸𑀬𑀓𑀪𑀸𑀯𑀁 𑀉𑀧𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀸𑀢𑀧𑀩𑁆𑀩𑀢𑀧𑀸𑀤𑁂𑀢𑀺 𑀙𑀸𑀢𑀯𑀸𑀳𑀲𑁆𑀲 𑀦𑀸𑀫 𑀧𑀩𑁆𑀩𑀢𑀲𑁆𑀲 𑀧𑀸𑀤𑁂. 𑀢𑀁 𑀓𑀺𑀭 𑀧𑀩𑁆𑀩𑀢𑀁 𑀅𑀦𑀼𑀭𑀸𑀥𑀧𑀼𑀭𑀸 𑀧𑀼𑀩𑁆𑀩𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀅𑀢𑀺𑀭𑁂𑀓𑀬𑁄𑀚𑀦𑀤𑁆𑀯𑀬𑀫𑀢𑁆𑀣𑀓𑁂 𑀢𑀺𑀝𑁆𑀞𑀢𑀺. 𑀢𑀫𑁆𑀳𑀺 𑀞𑀸𑀦𑁂 𑀧𑀘𑁆𑀙𑀸 𑀲𑀤𑁆𑀥𑀸𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺, 𑀢𑀁 ‘‘𑀙𑀸𑀢𑀯𑀺𑀳𑀸𑀭’’𑀦𑁆𑀢𑀺 𑀯𑁄𑀳𑀭𑀺𑀁𑀲𑀼. ‘‘𑀭𑀣𑀬𑀝𑁆𑀞𑀺𑀧𑁆𑀧𑀫𑀸𑀡𑀸𑀢𑀺 𑀆𑀬𑀸𑀫𑀢𑁄 𑀘 𑀆𑀯𑀝𑁆𑀝𑀢𑁄 𑀘 𑀭𑀣𑀧𑀢𑁄𑀤𑁂𑀦 𑀲𑀫𑀧𑁆𑀧𑀫𑀸𑀡𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀫𑀳𑀸𑀯𑀁𑀲𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀙𑀸𑀢𑀧𑀩𑁆𑀩𑀢𑀧𑀸𑀤𑀫𑁆𑀳𑀺 ¶ , 𑀢𑀺𑀲𑁆𑀲𑁄 𑀘 𑀯𑁂𑀴𑀼𑀬𑀝𑁆𑀞𑀺𑀬𑁄;

𑀚𑀸𑀢𑀸 𑀭𑀣𑀧𑀢𑁄𑀤𑁂𑀦, 𑀲𑀫𑀸𑀦𑀸 𑀧𑀭𑀺𑀫𑀸𑀡𑀢𑁄’’𑀢𑀺.

𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀭𑀣𑀬𑀝𑁆𑀞𑀺𑀧𑁆𑀧𑀫𑀸𑀡𑀸𑀢𑀺 𑀭𑀣𑀲𑁆𑀲 𑀥𑀚𑀬𑀝𑁆𑀞𑀺𑀧𑁆𑀧𑀫𑀸𑀡𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀺𑀁𑀲𑀽𑀢𑀺 𑀢𑀲𑁆𑀲 𑀅𑀪𑀺𑀲𑁂𑀓𑀲𑀫𑀓𑀸𑀮𑀫𑁂𑀯 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀏𑀯𑀫𑀼𑀢𑁆𑀢𑀭𑀺𑀧𑀺 𑀯𑀓𑁆𑀔𑀫𑀸𑀦𑀸𑀦𑀁 ¶ 𑀅𑀘𑁆𑀙𑀭𑀺𑀬𑀸𑀦𑀁 𑀧𑀸𑀢𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀭𑀸𑀚𑀸𑀲𑀺 𑀧𑀺𑀢𑀼𑀅𑀘𑁆𑀘𑀬𑁂;

𑀢𑀲𑁆𑀲𑀸𑀪𑀺𑀲𑁂𑀓𑁂𑀦 𑀲𑀫𑀁, 𑀩𑀳𑀽𑀦𑀘𑁆𑀙𑀭𑀺𑀬𑀸𑀦𑀳𑀽’’𑀢𑀺.

𑀏𑀓𑀸 𑀮𑀢𑀸 𑀬𑀝𑁆𑀞𑀺 𑀦𑀸𑀫𑀸𑀢𑀺 𑀓𑀜𑁆𑀘𑀦𑀮𑀢𑀸𑀬 𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸 𑀏𑀓𑀸 𑀬𑀝𑁆𑀞𑀺 𑀅𑀳𑁄𑀲𑀺. 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀮𑀢𑀸𑀢𑀺 𑀢𑀁 𑀭𑀚𑀢𑀯𑀡𑁆𑀡𑀁 𑀬𑀝𑁆𑀞𑀺𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀺𑀬 𑀉𑀧𑁆𑀧𑀦𑁆𑀦𑀮𑀢𑀸. 𑀔𑀸𑀬𑀢𑀻𑀢𑀺 𑀤𑀺𑀲𑁆𑀲𑀢𑀺. 𑀓𑀺𑀜𑁆𑀚𑀓𑁆𑀔𑀸𑀦𑀻𑀢𑀺 𑀓𑁂𑀲𑀭𑀸𑀦𑀺. 𑀏𑀢𑀸𑀦𑀺 𑀘 𑀧𑀼𑀧𑁆𑀨𑀬𑀝𑁆𑀞𑀺𑀬𑀁 𑀦𑀻𑀮𑀧𑀼𑀧𑁆𑀨𑀸𑀤𑀻𑀦𑀺 𑀲𑀓𑀼𑀡𑀬𑀝𑁆𑀞𑀺𑀬𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀸 𑀫𑀺𑀕𑀧𑀓𑁆𑀔𑀺𑀦𑁄 𑀢𑀢𑁆𑀣𑁂𑀯 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀢𑀸 𑀭𑀚𑀢𑀬𑀝𑁆𑀞𑀻𑀯𑀸𑀢𑀺 𑀭𑀚𑀢𑀫𑀬𑀬𑀝𑁆𑀞𑀺 𑀯𑀺𑀬 𑀏𑀓𑀸 𑀬𑀝𑁆𑀞𑀺 𑀲𑁂𑀢𑀯𑀡𑁆𑀡𑀸𑀢𑀺 𑀅𑀢𑁆𑀣𑁄. 𑀮𑀢𑀸𑀢𑀺 𑀢𑀢𑁆𑀣𑁂𑀯 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀺𑀬 𑀤𑀺𑀲𑁆𑀲𑀫𑀸𑀦𑀮𑀢𑀸. 𑀦𑀻𑀮𑀸𑀤𑀺 𑀬𑀸𑀤𑀺𑀲𑀁 𑀧𑀼𑀧𑁆𑀨𑀦𑁆𑀢𑀺 𑀬𑀸𑀤𑀺𑀲𑀁 𑀮𑁄𑀓𑁂 𑀦𑀻𑀮𑀸𑀤𑀺𑀧𑀼𑀧𑁆𑀨𑀁 𑀅𑀢𑁆𑀣𑀺, 𑀢𑀸𑀤𑀺𑀲𑀁 𑀧𑀼𑀧𑁆𑀨𑀬𑀝𑁆𑀞𑀺𑀫𑁆𑀳𑀺 𑀔𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁂𑀓𑀯𑀺𑀳𑀺𑀢𑀁 𑀭𑀢𑀦𑀁 𑀉𑀧𑁆𑀧𑀚𑁆𑀚𑀻𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁 𑀭𑀢𑀦𑀁 𑀲𑀫𑀼𑀤𑁆𑀤𑀢𑁄 𑀲𑀬𑀫𑁂𑀯 𑀢𑀻𑀭𑀁 𑀆𑀭𑀼𑀳𑀺𑀢𑁆𑀯𑀸 𑀯𑁂𑀮𑀦𑁆𑀢𑁂 𑀊𑀫𑀺𑀯𑁂𑀕𑀸𑀪𑀺𑀚𑀸𑀢𑀫𑀭𑀺𑀬𑀸𑀤𑀯𑀝𑁆𑀝𑀺 𑀯𑀺𑀬 𑀉𑀧𑁆𑀧𑀚𑁆𑀚𑀺, 𑀉𑀝𑁆𑀞𑀳𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀩𑀧𑀡𑁆𑀡𑀺𑀬𑀁 𑀧𑀦 𑀅𑀝𑁆𑀞 𑀫𑀼𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀁𑀲𑀽𑀢𑀺 𑀏𑀢𑁆𑀣𑀸𑀧𑀺 𑀢𑀫𑁆𑀩𑀧𑀡𑁆𑀡𑀺𑀬𑀁 𑀲𑀫𑀼𑀤𑁆𑀤𑀢𑁄 𑀲𑀬𑀫𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀚𑀸𑀢𑀺𑀢𑁄 𑀅𑀝𑁆𑀞 𑀫𑀼𑀢𑁆𑀢𑀸 𑀲𑀫𑀼𑀤𑁆𑀤𑀢𑀻𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀞𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀮𑀗𑁆𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀦𑀺𑀥𑀬𑁄 𑀭𑀢𑀦𑀸𑀦𑀺 𑀘;

𑀅𑀦𑁆𑀢𑁄𑀞𑀺𑀢𑀸𑀦𑀺 𑀉𑀕𑁆𑀕𑀦𑁆𑀢𑁆𑀯𑀸, 𑀧𑀣𑀯𑀻𑀢𑀮𑀫𑀸𑀭𑀼𑀳𑀼𑀁.

‘‘𑀮𑀗𑁆𑀓𑀸𑀤𑀻𑀧𑀲𑀫𑀻𑀧𑀫𑁆𑀳𑀺, 𑀪𑀺𑀦𑁆𑀦𑀦𑀸𑀯𑀸𑀕𑀢𑀸𑀦𑀺 𑀘;

𑀢𑀢𑁆𑀭 𑀚𑀸𑀢𑀸𑀦𑀺 𑀘 𑀣𑀮𑀁, 𑀭𑀢𑀦𑀸𑀦𑀺 𑀲𑀫𑀸𑀭𑀼𑀳𑀼𑀁.

‘‘𑀳𑀬𑀕𑀚𑀸 ¶ 𑀭𑀣𑀸𑀫𑀮𑀓𑀸, 𑀯𑀮𑀬𑀗𑁆𑀕𑀼𑀮𑀺𑀯𑁂𑀞𑀓𑀸;

𑀓𑀓𑀼𑀥𑀨𑀮𑀸 𑀧𑀸𑀓𑀢𑀺𑀓𑀸, 𑀇𑀘𑁆𑀘𑁂𑀢𑀸 𑀅𑀝𑁆𑀞 𑀚𑀸𑀢𑀺𑀢𑁄.

‘‘𑀫𑀼𑀢𑁆𑀢𑀸 𑀲𑀫𑀼𑀤𑁆𑀤𑀸 𑀉𑀕𑁆𑀕𑀦𑁆𑀢𑁆𑀯𑀸, 𑀢𑀻𑀭𑁂 𑀯𑀝𑁆𑀝𑀺 𑀯𑀺𑀬 𑀞𑀺𑀢𑀸;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲, 𑀲𑀩𑁆𑀩𑀧𑀼𑀜𑁆𑀜𑀯𑀺𑀚𑀫𑁆𑀪𑀺𑀢’’𑀦𑁆𑀢𑀺.

𑀳𑀬𑀫𑀼𑀢𑁆𑀢𑀸𑀢𑀺 ¶ 𑀅𑀲𑁆𑀲𑀭𑀽𑀧𑀲𑀡𑁆𑀞𑀸𑀦𑀫𑀼𑀢𑁆𑀢𑀸. 𑀕𑀚𑀫𑀼𑀢𑁆𑀢𑀸𑀢𑀺 𑀳𑀢𑁆𑀣𑀺𑀭𑀽𑀧𑀲𑀡𑁆𑀞𑀸𑀦𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀁𑀢𑀁𑀲𑀡𑁆𑀞𑀸𑀦𑀯𑀲𑁂𑀦 𑀫𑀼𑀢𑁆𑀢𑀸𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀗𑁆𑀕𑀼𑀮𑀺𑀯𑁂𑀞𑀓𑀫𑀼𑀢𑁆𑀢𑀸𑀢𑀺 𑀅𑀗𑁆𑀕𑀼𑀮𑀻𑀬𑀓𑀲𑀡𑁆𑀞𑀸𑀦𑀸, 𑀫𑀼𑀤𑁆𑀤𑀺𑀓𑀸𑀲𑀡𑁆𑀞𑀸𑀦𑀸𑀢𑀺 𑀅𑀢𑁆𑀣𑁄. 𑀓𑀓𑀼𑀥𑀨𑀮𑀫𑀼𑀢𑁆𑀢𑀸𑀢𑀺 𑀓𑀓𑀼𑀥𑀭𑀼𑀓𑁆𑀔𑀨𑀮𑀸𑀓𑀸𑀭𑀸 𑀩𑀳𑀽 𑀅𑀲𑀸𑀫𑀼𑀤𑁆𑀤𑀺𑀓𑀸 𑀫𑀼𑀢𑁆𑀢𑀸. 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀻𑀢𑀺 𑀭𑀸𑀚𑀸𑀭𑀳𑀉𑀢𑁆𑀢𑀫𑀪𑀡𑁆𑀟𑀸𑀦𑀺. 𑀢𑀸𑀦𑀺 𑀲𑀭𑀽𑀧𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀢𑁆𑀢𑀁 𑀘𑀸𑀫𑀭’’𑀦𑁆𑀢𑀺𑀆𑀤𑀺. 𑀅𑀜𑁆𑀜𑀜𑁆𑀘 𑀩𑀳𑀼𑀯𑀺𑀥𑀁 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀦𑁆𑀢𑀺 𑀅𑀪𑀺𑀲𑁂𑀓𑀸𑀲𑀺𑀜𑁆𑀘𑀦𑀓𑀁 𑀲𑀸𑀫𑀼𑀤𑁆𑀤𑀺𑀓𑀁 𑀤𑀓𑁆𑀔𑀺𑀡𑀸𑀯𑀝𑁆𑀝𑀁 𑀲𑀗𑁆𑀔𑀁. 𑀅𑀦𑁄𑀢𑀢𑁆𑀢𑁄𑀤𑀓𑀫𑁂𑀯 ‘‘𑀕𑀗𑁆𑀕𑁄𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀟𑁆𑀠𑀫𑀸𑀦𑀦𑁆𑀢𑀺 𑀅𑀮𑀗𑁆𑀓𑀸𑀭𑀘𑀼𑀡𑁆𑀡𑀁. ‘‘𑀦𑀳𑀸𑀦𑀘𑀼𑀡𑁆𑀡’’𑀦𑁆𑀢𑀺 𑀓𑁂𑀘𑀺. 𑀯𑀝𑀁𑀲𑀓𑀦𑁆𑀢𑀺 𑀓𑀡𑁆𑀡𑀧𑀺𑀴𑀦𑁆𑀥𑀦𑀯𑀝𑀁𑀲𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀝𑀁𑀲𑀓𑀁 𑀓𑀡𑁆𑀡𑀘𑀽𑀴𑀺𑀓𑀝𑁆𑀞𑀸𑀦𑁂 𑀑𑀮𑀫𑁆𑀩𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀪𑀺𑀗𑁆𑀕𑀸𑀭𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁 𑀫𑀳𑀸𑀪𑀺𑀗𑁆𑀕𑀸𑀭𑀁. ‘‘𑀫𑀓𑀭𑀫𑀼𑀔𑀲𑀡𑁆𑀞𑀸𑀦𑀸 𑀩𑀮𑀺𑀓𑀫𑁆𑀫𑀸𑀤𑀺𑀓𑀭𑀡𑀢𑁆𑀣𑀁 𑀓𑀢𑀸 𑀪𑀸𑀚𑀦𑀯𑀺𑀓𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑁆𑀢𑀺 𑀓𑀸𑀓𑀧𑀤𑀲𑀡𑁆𑀞𑀸𑀦𑀸 𑀫𑀗𑁆𑀕𑀮𑀢𑁆𑀣𑀁 𑀓𑀢𑀸 𑀲𑀼𑀯𑀡𑁆𑀡𑀪𑀸𑀚𑀦𑀯𑀺𑀓𑀢𑀺. 𑀓𑀜𑁆𑀜𑀦𑁆𑀢𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑀺𑀁. 𑀅𑀥𑁄𑀯𑀺𑀫𑀁 𑀤𑀼𑀲𑁆𑀲𑀬𑀼𑀕𑀦𑁆𑀢𑀺 𑀓𑀺𑀮𑀺𑀝𑁆𑀞𑁂 𑀚𑀸𑀢𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑀪𑀸𑀯𑀫𑀼𑀧𑀕𑀘𑁆𑀙𑀦𑁆𑀢𑀁 𑀅𑀥𑁄𑀯𑀺𑀫𑀁 𑀤𑀼𑀲𑁆𑀲𑀬𑀼𑀕𑀁. 𑀳𑀢𑁆𑀣𑀧𑀼𑀜𑁆𑀙𑀦𑀦𑁆𑀢𑀺 𑀧𑀻𑀢𑀯𑀡𑁆𑀡𑀁 𑀫𑀳𑀕𑁆𑀖𑀁 𑀳𑀢𑁆𑀣𑀧𑀼𑀜𑁆𑀙𑀦𑀧𑀝𑀁. 𑀳𑀭𑀺𑀘𑀦𑁆𑀤𑀦𑀦𑁆𑀢𑀺 𑀳𑀭𑀺𑀯𑀡𑁆𑀡𑀘𑀦𑁆𑀤𑀦𑀁, 𑀲𑀼𑀯𑀡𑁆𑀡𑀯𑀡𑁆𑀡𑀘𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀳𑀺𑀢𑀘𑀦𑁆𑀤𑀦𑀁 𑀯𑀸, 𑀕𑁄𑀲𑀺𑀢𑀘𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀭 𑀉𑀤𑁆𑀥𑀦𑁂 𑀓𑀼𑀣𑀺𑀢𑀢𑁂𑀮𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑀁 𑀲𑀓𑀮𑀫𑁆𑀧𑀺 𑀢𑁂𑀮𑀁 𑀅𑀕𑁆𑀕𑀺𑀜𑁆𑀘 𑀦𑀺𑀩𑁆𑀩𑀸𑀧𑀦𑀲𑀫𑀢𑁆𑀣𑀁 𑀘𑀦𑁆𑀤𑀦𑀁. 𑀢𑁂𑀦𑁂𑀯 ‘‘𑀕𑁄𑀲𑀺𑀢𑀘𑀦𑁆𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀲𑀤𑁆𑀤𑁂𑀦 𑀳𑀺 𑀚𑀮𑀁 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀬 𑀲𑀺𑀢𑀁 𑀘𑀦𑁆𑀤𑀦𑀁 𑀕𑁄𑀲𑀺𑀢𑀘𑀦𑁆𑀤𑀦𑀁. 𑀦𑀸𑀕𑀪𑀯𑀦𑀲𑀫𑁆𑀪𑀯𑀁 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀁. 𑀳𑀭𑀻𑀢𑀓𑀁 𑀆𑀫𑀮𑀓𑀦𑁆𑀢𑀺 𑀅𑀕𑀤𑀳𑀭𑀻𑀢𑀓𑀁 𑀅𑀕𑀤𑀸𑀫𑀮𑀓𑀁. 𑀢𑀁 𑀔𑀺𑀧𑁆𑀧𑀫𑁂𑀯 𑀲𑀭𑀻𑀭𑀫𑀮𑀲𑁄𑀥𑀦𑀸𑀤𑀺𑀓𑀭𑀡𑀲𑀫𑀢𑁆𑀣𑀁 𑀳𑁄𑀢𑀺.

𑀉𑀡𑁆𑀳𑀻𑀲𑀦𑁆𑀢𑀺 𑀉𑀡𑁆𑀳𑀻𑀲𑀧𑀝𑁆𑀝𑀁. 𑀯𑁂𑀞𑀦𑀦𑁆𑀢𑀺 𑀲𑀻𑀲𑀯𑁂𑀞𑀦𑀁. 𑀲𑀸𑀭𑀧𑀸𑀫𑀗𑁆𑀕𑀦𑁆𑀢𑀺 𑀉𑀢𑁆𑀢𑀫𑀁 𑀭𑀢𑀦𑀧𑀸𑀫𑀗𑁆𑀕𑀲𑀼𑀢𑁆𑀢𑀁. 𑀯𑀢𑁆𑀣𑀓𑁄𑀝𑀺𑀓𑀦𑁆𑀢𑀺 𑀯𑀢𑁆𑀣𑀬𑀼𑀕𑀫𑁂𑀯. 𑀦𑀸𑀕𑀫𑀸𑀳𑀝𑀦𑁆𑀢𑀺 𑀦𑀸𑀕𑁂𑀳𑀺 𑀆𑀳𑀝𑀁. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀫𑀢𑁄𑀲𑀥𑀦𑁆𑀢𑀺 𑀏𑀯𑀁𑀦𑀸𑀫𑀺𑀓𑀸 𑀕𑀼𑀴𑀺𑀓𑀚𑀸𑀢𑀺, 𑀅𑀫𑀢𑀲𑀤𑀺𑀲𑀓𑀺𑀘𑁆𑀘𑀢𑁆𑀢𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀢𑀁 𑀓𑀺𑀭 𑀧𑀭𑀺𑀧𑀦𑁆𑀣𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀲𑀸𑀥𑁂𑀦𑁆𑀢𑁂𑀳𑀺 𑀅𑀕𑀤𑁄𑀲𑀥𑀲𑀫𑁆𑀪𑀸𑀭𑁂𑀳𑀺 𑀬𑁄𑀚𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀓𑀢𑀁 𑀕𑀼𑀴𑀺𑀓𑀁. 𑀢𑀁 𑀧𑀦 𑀭𑀸𑀚𑀽𑀦𑀁 𑀫𑀼𑀔𑀲𑁄𑀥𑀦𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀫𑀳𑀢𑀸 𑀧𑀭𑀺𑀳𑀸𑀭𑁂𑀦 𑀉𑀧𑀦𑁂𑀦𑁆𑀢𑀺. 𑀢𑁂𑀦 𑀢𑁂 𑀅𑀗𑁆𑀕𑀭𑀸𑀕𑀁 𑀦𑀸𑀫 𑀓𑀭𑁄𑀦𑁆𑀢𑀺, 𑀓𑀭𑁄𑀦𑁆𑀢𑀸 𑀘 𑀬𑀣𑀸𑀭𑀳𑀁 𑀤𑁆𑀯𑀻𑀳𑀺 𑀢𑀻𑀳𑀺 𑀅𑀕𑀤𑁄𑀲𑀥𑀭𑀗𑁆𑀕𑀢𑀺𑀮𑀓𑀸𑀳𑀺 𑀦𑀮𑀸𑀝𑀓𑀅𑀁𑀲𑀓𑀽𑀝𑀉𑀭𑀫𑀚𑁆𑀛𑀲𑀗𑁆𑀔𑀸𑀢𑀁 ¶ 𑀅𑀗𑁆𑀕𑀁 ¶ 𑀲𑀚𑁆𑀚𑁂𑀢𑁆𑀯𑀸 𑀅𑀗𑁆𑀕𑀭𑀸𑀕𑀁 𑀓𑀭𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀧𑀦 𑀕𑀼𑀴𑀺𑀓𑀸 𑀅𑀳𑀺𑀯𑀺𑀘𑁆𑀙𑀺𑀓𑀸𑀤𑀻𑀦𑀫𑁆𑀧𑀺 𑀯𑀺𑀲𑀁 𑀳𑀦𑀢𑀺, 𑀢𑁂𑀦𑀧𑀺 𑀢𑀁 𑀯𑀼𑀘𑁆𑀘𑀢𑀺 ‘‘𑀅𑀫𑀢𑁄𑀲𑀥’’𑀦𑁆𑀢𑀺.

𑀅𑀳𑀁 𑀩𑀼𑀤𑁆𑀥𑀜𑁆𑀘𑀸𑀢𑀺𑀆𑀤𑀻𑀲𑀼 𑀲𑀩𑁆𑀩𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀻𑀢𑀺 𑀩𑀼𑀤𑁆𑀥𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘, 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀧𑀭𑀺𑀬𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀘, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀅𑀭𑀺𑀬𑀲𑀸𑀯𑀓𑀲𑀗𑁆𑀖𑀜𑁆𑀘 𑀅𑀳𑀁 𑀲𑀭𑀡𑀁 𑀕𑀢𑁄 𑀧𑀭𑀸𑀬𑀡𑀦𑁆𑀢𑀺 𑀉𑀧𑀕𑀢𑁄, 𑀪𑀚𑀺𑀁 𑀲𑁂𑀯𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀳𑀺𑀁𑀲𑀢𑀺 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀓𑀢𑀸𑀳𑀺 𑀯𑀺𑀳𑀢𑀓𑀺𑀮𑁂𑀲𑁂𑀦 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀁 𑀧𑀭𑀺𑀓𑀺𑀮𑁂𑀲𑀁 𑀳𑀦𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀲𑀭𑀡𑀁, 𑀭𑀢𑀦𑀢𑁆𑀢𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀺𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑁄𑀧𑀺 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀅𑀲𑁆𑀲𑀸𑀲𑀤𑀸𑀦𑁂𑀦 𑀘 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀖𑁄𑀧𑀺 𑀅𑀧𑁆𑀧𑀓𑀸𑀦𑀫𑁆𑀧𑀺 𑀓𑀸𑀭𑀸𑀦𑀁 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑀭𑀡𑀪𑀽𑀢𑀁 𑀭𑀢𑀦𑀢𑁆𑀢𑀬𑀁 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀲𑀭𑀡𑀦𑁆𑀢𑀺 𑀕𑀢𑁄 𑀅𑀯𑀕𑀢𑁄, 𑀚𑀸𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀲𑀓𑀢𑁆𑀢𑀁 𑀤𑁂𑀲𑁂𑀲𑀺𑀦𑁆𑀢𑀺 𑀭𑀢𑀦𑀢𑁆𑀢𑀬𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄𑀢𑀺 𑀏𑀯𑀁 𑀤𑀲𑁆𑀲𑀺𑀢𑀁 𑀉𑀧𑀸𑀲𑀓𑀪𑀸𑀯𑀁 𑀫𑀬𑀺 𑀅𑀪𑀺𑀦𑀺𑀯𑀺𑀝𑁆𑀞𑀁 𑀯𑀸𑀘𑀸𑀬 𑀧𑀓𑀸𑀲𑁂𑀲𑀺𑀦𑁆𑀢𑀺 𑀅𑀢𑁆𑀣𑁄, ‘‘𑀉𑀧𑀸𑀲𑀓𑁄𑀳𑀁 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑁄’’𑀢𑀺 𑀏𑀯𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂𑀢𑀺 𑀲𑀓𑁆𑀬𑀲𑁆𑀲 𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀼𑀢𑁆𑀢𑁄 𑀲𑁄 𑀪𑀕𑀯𑀸 𑀲𑀓𑁆𑀬𑀧𑀼𑀢𑁆𑀢𑁄, 𑀢𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬, ‘‘𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀬𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀉𑀧𑁂𑀳𑀻𑀢𑀺 𑀉𑀧𑀕𑀘𑁆𑀙.

𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀪𑀺𑀲𑁂𑀓𑁂𑀦𑀸𑀢𑀺 𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀪𑀺𑀲𑁂𑀓𑀼𑀧𑀓𑀭𑀡𑁂𑀦. 𑀬𑀤𑀸 𑀳𑀺 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀥𑀫𑁆𑀫𑀸𑀲𑁄𑀓𑀭𑀜𑁆𑀜𑁄 𑀇𑀢𑁄 𑀯𑁂𑀴𑀼𑀬𑀝𑁆𑀞𑀺𑀬𑀸𑀤𑀬𑁄 𑀫𑀳𑀸𑀭𑀳𑁂 𑀧𑀡𑁆𑀡𑀸𑀓𑀸𑀭𑁂 𑀧𑁂𑀲𑁂𑀲𑀺. 𑀢𑀤𑀸 𑀲𑁄𑀧𑀺 𑀢𑁂 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀅𑀢𑀺𑀯𑀺𑀬 𑀢𑀼𑀝𑁆𑀞𑁄 ‘‘𑀇𑀫𑁂𑀳𑀺 𑀅𑀢𑀺𑀭𑁂𑀓𑀢𑀭𑀁 𑀓𑀺𑀁 𑀦𑀸𑀫 𑀫𑀳𑀕𑁆𑀖𑀁 𑀧𑀝𑀺𑀧𑀡𑁆𑀡𑀸𑀓𑀸𑀭𑀁 𑀲𑀳𑀸𑀬𑀲𑁆𑀲 𑀫𑁂 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 ¶ 𑀫𑀦𑁆𑀢𑁂𑀢𑁆𑀯𑀸 𑀮𑀗𑁆𑀓𑀸𑀤𑀻𑀧𑁂 𑀅𑀪𑀺𑀲𑁂𑀓𑀧𑀭𑀺𑀳𑀸𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀢𑁆𑀣 𑀈𑀤𑀺𑀲𑁄 𑀅𑀪𑀺𑀲𑁂𑀓𑀧𑀭𑀺𑀳𑀸𑀭𑁄 𑀅𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸 ‘‘𑀲𑀸𑀥𑀼 𑀯𑀢 𑀫𑁂 𑀲𑀳𑀸𑀬𑀲𑁆𑀲 𑀅𑀪𑀺𑀲𑁂𑀓𑀧𑀭𑀺𑀳𑀸𑀭𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑀸𑀤𑀻𑀦𑀺 𑀢𑀻𑀡𑀺 𑀲𑀗𑁆𑀔𑀸𑀦𑀺 𑀘 𑀕𑀗𑁆𑀕𑁄𑀤𑀓𑀜𑁆𑀘 𑀅𑀭𑀼𑀡𑀯𑀡𑁆𑀡𑀫𑀢𑁆𑀢𑀺𑀓𑀜𑁆𑀘 𑀅𑀝𑁆𑀞𑀝𑁆𑀞 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀜𑁆𑀜𑀸𑀬𑁄 𑀘 𑀲𑀼𑀯𑀡𑁆𑀡𑀭𑀚𑀢𑀮𑁄𑀳𑀫𑀢𑁆𑀢𑀺𑀓𑀸𑀫𑀬𑀖𑀝𑁂 𑀘 𑀅𑀝𑁆𑀞𑀳𑀺 𑀲𑁂𑀝𑁆𑀞𑀺𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀅𑀫𑀘𑁆𑀘𑀓𑀼𑀮𑀸𑀦𑀺 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀇𑀥 𑀧𑁂𑀲𑁂𑀲𑀺 ‘‘𑀇𑀫𑁂𑀳𑀺 𑀫𑁂 𑀲𑀳𑀸𑀬𑀲𑁆𑀲 𑀧𑀼𑀦 𑀅𑀪𑀺𑀲𑁂𑀓𑀁 𑀓𑀭𑁄𑀣𑀸’’𑀢𑀺, 𑀅𑀜𑁆𑀜𑀜𑁆𑀘 𑀅𑀪𑀺𑀲𑁂𑀓𑀢𑁆𑀣𑀸𑀬 ¶ 𑀩𑀳𑀼𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀪𑀺𑀲𑁂𑀓𑁂𑀦𑀸’’𑀢𑀺. 𑀏𑀓𑁄 𑀫𑀸𑀲𑁄 𑀅𑀪𑀺𑀲𑀺𑀢𑁆𑀢𑀲𑁆𑀲 𑀅𑀲𑁆𑀲𑀸𑀢𑀺 𑀏𑀓𑀫𑀸𑀲𑀸𑀪𑀺𑀲𑀺𑀢𑁆𑀢𑁄. 𑀓𑀣𑀁 𑀧𑀦 𑀢𑀲𑁆𑀲 𑀢𑀤𑀸 𑀏𑀓𑀫𑀸𑀲𑀸𑀪𑀺𑀲𑀺𑀢𑁆𑀢𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀳𑀺𑀲𑁆𑀲 𑀅𑀪𑀺𑀲𑁂𑀓𑀫𑀓𑀁𑀲𑀽’’𑀢𑀺, 𑀧𑀼𑀩𑁆𑀩𑁂 𑀓𑀢𑀸𑀪𑀺𑀲𑁂𑀓𑀲𑁆𑀲𑀧𑀺 𑀅𑀲𑁄𑀓𑀭𑀜𑁆𑀜𑀸 𑀧𑁂𑀲𑀺𑀢𑁂𑀦 𑀅𑀦𑀕𑁆𑀖𑁂𑀦 𑀧𑀭𑀺𑀳𑀸𑀭𑁂𑀦 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀧𑀼𑀦 𑀅𑀪𑀺𑀲𑁂𑀓𑀫𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀢𑁂 𑀫𑀺𑀕𑀲𑀺𑀭𑀫𑀸𑀲𑀲𑁆𑀲, 𑀆𑀤𑀺𑀘𑀦𑁆𑀤𑁄𑀤𑀬𑀁 𑀤𑀺𑀦𑁂;

𑀅𑀪𑀺𑀲𑀺𑀢𑁆𑀢𑀜𑁆𑀘 𑀮𑀗𑁆𑀓𑀺𑀦𑁆𑀤𑀁, 𑀅𑀫𑀘𑁆𑀘𑀸 𑀲𑀸𑀫𑀺𑀪𑀢𑁆𑀢𑀺𑀦𑁄.

‘‘𑀥𑀫𑁆𑀫𑀸𑀲𑁄𑀓𑀲𑁆𑀲 𑀯𑀘𑀦𑀁, 𑀲𑀼𑀢𑁆𑀯𑀸 𑀲𑀸𑀫𑀺𑀳𑀺𑀢𑁂 𑀭𑀢𑀸;

𑀧𑀼𑀦𑀸𑀧𑀺 𑀅𑀪𑀺𑀲𑁂𑀘𑀺𑀁𑀲𑀼, 𑀮𑀗𑁆𑀓𑀸𑀳𑀺𑀢𑀲𑀼𑀔𑁂 𑀭𑀢’’𑀦𑁆𑀢𑀺.

𑀤𑀻𑀧𑀯𑀁𑀲𑁂𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀯𑀺𑀲𑀸𑀔𑀫𑀸𑀲𑁂 𑀤𑁆𑀯𑀸𑀤𑀲𑀺𑀬𑀁, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸;

𑀅𑀪𑀺𑀲𑁂𑀓𑀁 𑀲𑀧𑀭𑀺𑀯𑀸𑀭𑀁, 𑀅𑀲𑁄𑀓𑀥𑀫𑁆𑀫𑁂𑀦 𑀧𑁂𑀲𑀺𑀢𑀁.

‘‘𑀤𑀼𑀢𑀺𑀬𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀣, 𑀭𑀸𑀚𑀸𑀦𑀁 𑀤𑁂𑀯𑀸𑀦𑀁𑀧𑀺𑀬𑀁;

𑀅𑀪𑀺𑀲𑀺𑀢𑁆𑀢𑁄 𑀤𑀼𑀢𑀺𑀬𑀸𑀪𑀺𑀲𑁂𑀓𑁂𑀦, 𑀯𑀺𑀲𑀸𑀔𑀫𑀸𑀲𑁂 𑀉𑀧𑁄𑀲𑀣𑁂.

‘‘𑀢𑀢𑁄 𑀫𑀸𑀲𑁂 𑀅𑀢𑀺𑀓𑁆𑀓𑀫𑁆𑀫, 𑀚𑁂𑀝𑁆𑀞𑀫𑀸𑀲𑁂 𑀉𑀧𑁄𑀲𑀣𑁂;

𑀫𑀳𑀺𑀦𑁆𑀤𑁄 𑀲𑀢𑁆𑀢𑀫𑁄 𑀳𑀼𑀢𑁆𑀯𑀸, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑁄’’𑀢𑀺.

𑀢𑀤𑀸 𑀧𑀦 𑀢𑀲𑁆𑀲 𑀭𑀜𑁆𑀜𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀅𑀪𑀺𑀲𑁂𑀓𑀲𑁆𑀲 𑀓𑀢𑀢𑁆𑀢𑀸 𑀢𑀢𑁄 𑀧𑀪𑀼𑀢𑀺 𑀬𑀸𑀯𑀚𑁆𑀚𑀢𑀦𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀫𑁂𑀯 𑀅𑀪𑀺𑀲𑁂𑀓𑀓𑀭𑀡𑀫𑀸𑀘𑀺𑀡𑁆𑀡𑀁. 𑀅𑀪𑀺𑀲𑁂𑀓𑀯𑀺𑀥𑀸𑀦𑀜𑁆𑀘𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀪𑀺𑀲𑁂𑀓𑀫𑀗𑁆𑀕𑀮𑀢𑁆𑀣𑀁 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀲𑁆𑀲 ¶ 𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑁄 𑀓𑀢𑀲𑁆𑀲 𑀉𑀤𑀼𑀫𑁆𑀩𑀭𑀲𑀸𑀔𑀫𑀡𑁆𑀟𑀧𑀲𑁆𑀲 𑀫𑀚𑁆𑀛𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀉𑀤𑀼𑀫𑁆𑀩𑀭𑀪𑀤𑁆𑀤𑀧𑀻𑀞𑀫𑁆𑀳𑀺 𑀅𑀪𑀺𑀲𑁂𑀓𑀸𑀭𑀳𑀁 𑀅𑀪𑀺𑀚𑀘𑁆𑀘𑀁 𑀔𑀢𑁆𑀢𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀫𑀗𑁆𑀕𑀮𑀸𑀪𑀭𑀡𑀪𑀽𑀲𑀺𑀢𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀔𑀢𑁆𑀢𑀺𑀬𑀓𑀜𑁆𑀜𑀸 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀲𑀸𑀫𑀼𑀤𑁆𑀤𑀺𑀓𑀁 𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯, 𑀢𑀁 𑀲𑀩𑁆𑀩𑁂𑀧𑀺 𑀔𑀢𑁆𑀢𑀺𑀬𑀕𑀡𑀸 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀡𑀢𑁆𑀣𑀁 ¶ 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀔𑀢𑁆𑀢𑀺𑀬𑀕𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺.

𑀢𑀢𑁄 𑀧𑀼𑀦 𑀧𑀼𑀭𑁄𑀳𑀺𑀢𑁄𑀧𑀺 𑀧𑀼𑀭𑁄𑀳𑀺𑀘𑁆𑀘𑀝𑁆𑀞𑀸𑀦𑀸𑀦𑀼𑀭𑀽𑀧𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁄 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀭𑀚𑀢𑀫𑀬𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯, 𑀢𑀁 𑀲𑀩𑁆𑀩𑁂𑀧𑀺 𑀩𑁆𑀭𑀸𑀳𑁆𑀫𑀡𑀕𑀡𑀸 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀡𑀢𑁆𑀣𑀁 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺.

𑀢𑀢𑁄 𑀧𑀼𑀦 𑀲𑁂𑀝𑁆𑀞𑀺𑀧𑀺 𑀲𑁂𑀝𑁆𑀞𑀺𑀝𑁆𑀞𑀸𑀦𑀸𑀦𑀼𑀭𑀽𑀧𑀪𑀽𑀲𑀦𑀪𑀽𑀲𑀺𑀢𑁄 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀭𑀢𑀦𑀫𑀬𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯 𑀢𑀁 𑀲𑀩𑁆𑀩𑁂𑀧𑀺 𑀕𑀳𑀧𑀢𑀺𑀕𑀡𑀸 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀡𑀢𑁆𑀣𑀁 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀕𑀳𑀧𑀢𑀺𑀕𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺.

𑀢𑁂 𑀧𑀦 𑀢𑀲𑁆𑀲 𑀏𑀯𑀁 𑀯𑀤𑀦𑁆𑀢𑀸 ‘‘𑀲𑀘𑁂 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀯𑀘𑀦𑀸𑀦𑀼𑀭𑀽𑀧𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀲𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀓𑀸𑀭𑁂𑀲𑁆𑀲𑀲𑀺, 𑀢𑀯 𑀫𑀼𑀤𑁆𑀥𑀸 𑀲𑀢𑁆𑀢𑀥𑀸 𑀨𑀮𑀢𑀽’’𑀢𑀺 𑀏𑀯𑀁 𑀭𑀜𑁆𑀜𑁄 𑀅𑀪𑀺𑀲𑀧𑀦𑁆𑀢𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀤𑀻𑀧𑁂 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲 ¶ 𑀫𑀼𑀤𑁆𑀥𑀦𑀺 𑀥𑀫𑁆𑀫𑀸𑀲𑁄𑀓𑁂𑀦𑁂𑀯 𑀇𑀥 𑀧𑁂𑀲𑀺𑀢𑀸 𑀔𑀢𑁆𑀢𑀺𑀬𑀓𑀜𑁆𑀜𑀸𑀬𑁂𑀯 𑀅𑀦𑁄𑀢𑀢𑁆𑀢𑁄𑀤𑀓𑀧𑀼𑀡𑁆𑀡𑁂𑀦 𑀲𑀸𑀫𑀼𑀤𑁆𑀤𑀺𑀓𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑁂𑀦 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀻𑀢𑀺 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑀁 𑀅𑀪𑀺𑀲𑁂𑀓𑀯𑀺𑀥𑀸𑀦𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀲𑀻𑀳𑀴𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀧𑀞𑀫𑀁 𑀢𑀸𑀯 𑀅𑀪𑀺𑀲𑁂𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀭𑀸𑀚𑀽𑀦𑀁 𑀲𑀼𑀯𑀡𑁆𑀡𑀫𑀬𑀸𑀤𑀻𑀦𑀺 𑀢𑀻𑀡𑀺 𑀲𑀗𑁆𑀔𑀸𑀦𑀺 𑀘 𑀕𑀗𑁆𑀕𑁄𑀤𑀓𑀜𑁆𑀘 𑀔𑀢𑁆𑀢𑀺𑀬𑀓𑀜𑁆𑀜𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑀬𑀫𑀸𑀦𑁄𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑀫𑁆𑀫𑁄𑀤𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁 ‘‘𑀓𑀘𑁆𑀘𑀺 𑀪𑀦𑁆𑀢𑁂 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀯𑁄 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀓𑀣𑀁 𑀓𑀣𑀬𑀫𑀸𑀦𑁄. 𑀙 𑀚𑀦𑁂 𑀤𑀲𑁆𑀲𑁂𑀲𑀻𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑀸𑀦𑀁 ‘‘𑀦 𑀇𑀫𑁂 𑀬𑀓𑁆𑀔𑀸, 𑀫𑀦𑀼𑀲𑁆𑀲𑀸 𑀇𑀫𑁂’’𑀢𑀺 𑀲𑀜𑁆𑀚𑀸𑀦𑀦𑀢𑁆𑀣𑀁 𑀪𑀡𑁆𑀟𑀼𑀓𑀲𑁆𑀲 ¶ 𑀉𑀧𑀸𑀲𑀓𑀲𑁆𑀲 𑀆𑀦𑀻𑀢𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀙 𑀚𑀦𑁂 𑀤𑀲𑁆𑀲𑁂𑀲𑀺. 𑀢𑁂𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀇𑀤𑁆𑀥𑀺𑀧𑁆𑀧𑀢𑁆𑀢𑀸𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀧𑀢𑁆𑀢𑀸. 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑀸𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑁂 𑀓𑀼𑀲𑀮𑀸. 𑀏𑀯𑀫𑁂𑀢𑁆𑀣 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸, 𑀤𑀺𑀩𑁆𑀩𑀲𑁄𑀢𑀁 𑀧𑀦 𑀢𑀸𑀲𑀁 𑀯𑀲𑁂𑀦 𑀆𑀕𑀢𑀫𑁂𑀯 𑀳𑁄𑀢𑀺. 𑀩𑀳𑀽𑀢𑀺 𑀏𑀯𑀭𑀽𑀧𑀸 𑀙𑀴𑀪𑀺𑀜𑁆𑀜𑀸 𑀩𑀼𑀤𑁆𑀥𑀲𑀸𑀯𑀓𑀸 𑀩𑀳𑀽 𑀕𑀡𑀦𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀓𑀸𑀲𑀸𑀯𑀧𑀚𑁆𑀚𑁄𑀢𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀻𑀢𑀺. 𑀓𑁂𑀘𑀺 𑀧𑀦 ‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀔𑀻𑀡𑀸𑀲𑀯𑀸 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑀸 𑀓𑁂𑀘𑀺 𑀔𑀻𑀡𑀸𑀲𑀯𑀸𑀢𑀺 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 ‘𑀅𑀭𑀳𑀦𑁆𑀢𑁄’𑀢𑀺 𑀇𑀫𑀺𑀦𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀦𑁆𑀢𑀺 𑀧𑀜𑁆𑀜𑀸𑀧𑀸𑀝𑀯𑀁, 𑀧𑀜𑁆𑀜𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀆𑀲𑀦𑁆𑀦𑀦𑁆𑀢𑀺 𑀆𑀲𑀦𑁆𑀦𑁂 𑀞𑀺𑀢𑀁. 𑀲𑀸𑀥𑀼 𑀫𑀳𑀸𑀭𑀸𑀚 𑀧𑀡𑁆𑀟𑀺𑀢𑁄𑀲𑀻𑀢𑀺 𑀭𑀸𑀚𑀸𑀦𑀁 𑀧𑀲𑀁𑀲𑀢𑀺. 𑀧𑀼𑀦 𑀯𑀻𑀫𑀁𑀲𑀦𑁆𑀢𑁄 ‘‘𑀅𑀢𑁆𑀣𑀺 𑀧𑀦 𑀢𑁂 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀻𑀢𑀺 ‘‘𑀅𑀬𑀁 𑀭𑀸𑀚𑀸 ‘𑀇𑀫𑁂 𑀲𑀫𑀡𑀸 𑀦𑀸𑀫 𑀈𑀤𑀺𑀲𑀸, 𑀲𑀻𑀮𑀸𑀤𑀺𑀧𑀝𑀺𑀧𑀢𑁆𑀢𑀺 𑀘 𑀢𑁂𑀲𑀁 𑀈𑀤𑀺𑀲𑀻’𑀢𑀺 𑀘 𑀦 𑀚𑀸𑀦𑀸𑀢𑀺, 𑀳𑀦𑁆𑀤 𑀦𑀁 𑀇𑀫𑀸𑀬 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀲𑀫𑀡𑀪𑀸𑀯𑀽𑀧𑀕𑀫𑀦𑀁 𑀲𑀫𑀡𑀧𑀝𑀺𑀧𑀢𑁆𑀢𑀺𑀜𑁆𑀘 𑀯𑀺𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀁 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀢𑀢𑁆𑀣 𑀳𑀺 𑁋

‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄…𑀧𑁂… 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 ¶ 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄, 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺, 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀬𑀦𑁆𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺.

‘‘𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄, 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 ¶ 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁧.𑁨𑁯𑁧-𑁨𑁯𑁨) 𑁋

𑀏𑀯𑀫𑀸𑀤𑀺𑀦𑀸 𑀲𑀸𑀲𑀦𑁂 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀧𑀝𑀺𑀮𑀤𑁆𑀥𑀲𑀤𑁆𑀥𑁂𑀳𑀺 𑀘 𑀧𑀩𑁆𑀩𑀚𑁆𑀚𑀼𑀧𑀕𑀫𑀦𑀁 𑀧𑀩𑁆𑀩𑀚𑀺𑀢𑁂𑀳𑀺 𑀘 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

𑀭𑀸𑀚𑀸 𑀲𑀼𑀢𑁆𑀢𑀦𑁆𑀢𑀁 𑀲𑀼𑀡𑀦𑁆𑀢𑁄𑀬𑁂𑀯 𑀅𑀜𑁆𑀜𑀸𑀲𑀻𑀢𑀺 ‘‘𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀼𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂 (𑀫. 𑀦𑀺. 𑁧.𑁨𑁯𑁩) 𑀆𑀕𑀢𑀢𑁆𑀢𑀸 𑀢𑀁 𑀲𑀼𑀡𑀦𑁆𑀢𑁄𑀬𑁂𑀯 𑀅𑀜𑁆𑀜𑀸𑀲𑀺. 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀸𑀢𑀺 𑀦 𑀢𑀸𑀯 𑀭𑀢𑁆𑀢𑀺𑀬𑀸 𑀉𑀧𑀝𑁆𑀞𑀺𑀢𑀢𑁆𑀢𑀸 𑀅𑀦𑀸𑀕𑀢𑀯𑀘𑀦𑀫𑀓𑀸𑀲𑀺. 𑀆𑀕𑀢𑀨𑀮𑁄𑀢𑀺 𑀅𑀦𑀸𑀕𑀸𑀫𑀺𑀨𑀮𑀁 𑀲𑀦𑁆𑀥𑀸𑀬𑀸𑀳, 𑀲𑀫𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀨𑀮𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀬𑁂𑀯 𑀘 𑀯𑀺𑀲𑁂𑀲𑀢𑁄 𑀅𑀯𑀺𑀧𑀭𑀻𑀢𑀯𑀺𑀤𑀺𑀢𑀲𑀢𑁆𑀣𑀼𑀲𑀸𑀲𑀦𑀢𑁆𑀢𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀇𑀤𑀸𑀦𑀺 𑀧𑀩𑁆𑀩𑀚𑀺𑀲𑁆𑀲𑀢𑀻𑀢𑀺 𑀕𑀺𑀳𑀺𑀮𑀺𑀗𑁆𑀕𑁂𑀦 𑀆𑀦𑀻𑀢𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀏𑀯𑀫𑀸𑀳. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄𑀢𑀺 𑀭𑀜𑁆𑀜𑁂 ¶ 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀦𑁆𑀢𑁄𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀫𑀸𑀕𑀢𑀸 𑀲𑀼𑀡𑀦𑁆𑀢𑀽𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸.

𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦𑀸𑀢𑀺 𑀪𑀽𑀫𑀢𑁆𑀣𑀭𑀡𑀸𑀓𑀸𑀭𑁂𑀦. 𑀉𑀧𑁆𑀧𑀸𑀢𑀧𑀸𑀞𑀓𑀸𑀢𑀺 𑀦𑀺𑀫𑀺𑀢𑁆𑀢𑀧𑀸𑀞𑀓𑀸, 𑀦𑁂𑀫𑀺𑀢𑁆𑀢𑀓𑀸𑀢𑀺 𑀅𑀢𑁆𑀣𑁄. 𑀕𑀳𑀺𑀢𑀸 𑀤𑀸𑀦𑀺 𑀇𑀫𑁂𑀳𑀺 𑀧𑀣𑀯𑀻𑀢𑀺 𑀆𑀲𑀦𑀸𑀦𑀁 𑀧𑀣𑀯𑀺𑀬𑀁 𑀅𑀢𑁆𑀣𑀢𑀢𑁆𑀢𑀸 𑀏𑀯𑀫𑀸𑀳𑀁𑀲𑀼. 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀢𑀺 𑀏𑀢𑁆𑀣 𑀢𑁂𑀦 𑀓𑀸𑀭𑀡𑁂𑀦 𑀲𑀸𑀲𑀦𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄 𑀅𑀯𑀲𑁆𑀲𑀁 𑀧𑀢𑀺𑀝𑁆𑀞𑀳𑀦𑁆𑀢𑀲𑁆𑀲 𑀲𑀸𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀫𑀺𑀤𑀦𑁆𑀢𑀺 𑀏𑀯𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀢𑁆𑀯𑀸, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑁂𑀢𑀯𑀢𑁆𑀣𑀼𑀁 𑀯𑀺𑀫𑀸𑀦𑀯𑀢𑁆𑀣𑀼𑀁 𑀲𑀘𑁆𑀘𑀲𑀁𑀬𑀼𑀢𑁆𑀢𑀜𑁆𑀘 𑀓𑀣𑁂𑀲𑀻𑀢𑀺 𑀤𑁂𑀲𑀦𑀸𑀯𑀺𑀥𑀺𑀓𑀼𑀲𑀮𑁄 𑀣𑁂𑀭𑁄 𑀚𑀦𑀲𑁆𑀲 𑀲𑀁𑀯𑁂𑀕𑀁 𑀚𑀦𑁂𑀢𑀼𑀁 𑀧𑀞𑀫𑀁 𑀧𑁂𑀢𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀁𑀯𑁂𑀕𑀚𑀸𑀢𑀁 𑀚𑀦𑀁 𑀅𑀲𑁆𑀲𑀸𑀲𑁂𑀢𑀼𑀁 𑀲𑀕𑁆𑀕𑀓𑀣𑀸𑀯𑀲𑁂𑀦 𑀯𑀺𑀫𑀸𑀦𑀯𑀢𑁆𑀣𑀼𑀜𑁆𑀘 𑀓𑀣𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑀸𑀦𑀁 ‘‘𑀫𑀸 𑀏𑀢𑁆𑀣 𑀅𑀲𑁆𑀲𑀸𑀤𑀁 𑀓𑀭𑁄𑀣 𑀦𑀺𑀩𑁆𑀩𑀸𑀦𑀁 𑀯𑀺𑀦𑀸 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀲𑀗𑁆𑀔𑀸𑀭𑀕𑀢𑀁 𑀥𑀼𑀯𑀁 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀭𑀫𑀲𑁆𑀲𑀸𑀲𑀓𑀁 𑀦𑀺𑀩𑁆𑀩𑀸𑀦𑀫𑀥𑀺𑀕𑀦𑁆𑀢𑀼𑀁 𑀯𑀸𑀬𑀫𑀣𑀸’’𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀅𑀦𑁆𑀢𑁂 𑀲𑀘𑁆𑀘𑀲𑀁𑀬𑀼𑀢𑁆𑀢𑀁 𑀓𑀣𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀲𑀁 𑀲𑀼𑀢𑁆𑀯𑀸𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀣𑁂𑀭𑀸𑀦𑀁 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸. 𑀭𑀜𑁆𑀜𑁄 𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸𑀢𑀺 𑀭𑀜𑁆𑀜𑁄 𑀦𑀺𑀯𑁂𑀤𑀦𑀁 𑀓𑀢𑁆𑀯𑀸, 𑀭𑀸𑀚𑀸𑀦𑀁 𑀧𑀝𑀺𑀯𑁂𑀤𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀮𑀁 𑀕𑀘𑁆𑀙𑀸𑀫𑀸𑀢𑀺 𑀧𑀼𑀭𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀢𑁆𑀢𑀸 𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀻𑀢𑀺 𑀧𑀝𑀺𑀧𑀓𑁆𑀔𑀺𑀧𑀦𑁆𑀢𑁄 𑀆𑀳. 𑀫𑁂𑀖𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀦𑁆𑀢𑀺 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁. 𑀢𑀲𑁆𑀲 𑀓𑀺𑀭 ¶ 𑀉𑀬𑁆𑀬𑀸𑀦𑀲𑁆𑀲 𑀪𑀽𑀫𑀺𑀕𑁆𑀕𑀳𑀡𑀤𑀺𑀯𑀲𑁂 𑀅𑀓𑀸𑀮𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀩𑁆𑀩𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀬𑁄 𑀧𑀽𑀭𑁂𑀦𑁆𑀢𑁄 𑀕𑀺𑀫𑁆𑀳𑀸𑀪𑀺𑀳𑀢𑀭𑀼𑀓𑁆𑀔𑀮𑀢𑀸𑀤𑀻𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄𑀯 𑀧𑀸𑀯𑀲𑁆𑀲𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀫𑀳𑀸𑀫𑁂𑀖𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀚𑀸𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀉𑀬𑁆𑀬𑀸𑀦𑀝𑁆𑀞𑀸𑀦𑀕𑁆𑀕𑀳𑀡𑁂, 𑀫𑀳𑀸𑀫𑁂𑀖𑁄 𑀅𑀓𑀸𑀮𑀚𑁄;

𑀧𑀸𑀯𑀲𑁆𑀲𑀺 𑀢𑁂𑀦 𑀉𑀬𑁆𑀬𑀸𑀦𑀁, 𑀫𑀳𑀸𑀫𑁂𑀖𑀯𑀦𑀁 𑀅𑀳𑀽’’𑀢𑀺.

𑀲𑀼𑀔𑀲𑀬𑀺𑀢𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀇𑀥 𑀲𑀼𑀔𑀁 𑀲𑀬𑀺𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀇𑀥 𑀦𑀺𑀯𑀸𑀲𑁄 𑀲𑀼𑀔’’𑀦𑁆𑀢𑀺 𑀏𑀯𑀁 𑀲𑀼𑀔𑀲𑀬𑀺𑀢𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁄 𑀣𑁂𑀭𑁂𑀦 ‘‘𑀲𑀼𑀔𑀲𑀬𑀺𑀢𑀫𑁆𑀳𑀺, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀓𑀫𑀺𑀤𑀁 𑀉𑀬𑁆𑀬𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀏𑀯𑀁 𑀲𑀢𑀺 ¶ 𑀇𑀤𑀁 𑀦𑁄 𑀉𑀬𑁆𑀬𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑁄’’𑀢𑀺 𑀧𑀼𑀘𑁆𑀙𑀺. 𑀇𑀫𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀴𑀼𑀯𑀦𑀸𑀭𑀸𑀫𑀧𑀝𑀺𑀕𑁆𑀕𑀳𑀡𑁂 𑀯𑀼𑀢𑁆𑀢𑀫𑀺𑀫𑀁 𑀲𑀼𑀢𑁆𑀢𑀁. 𑀉𑀤𑀓𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀁. 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁 𑀅𑀤𑀸𑀲𑀻𑀢𑀺 ‘‘𑀇𑀫𑀁 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀚𑁂𑀝𑁆𑀞𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀤𑀼𑀢𑀺𑀬𑀤𑀺𑀯𑀲𑁂 𑀅𑀤𑀸𑀲𑀺. 𑀫𑀳𑀸𑀯𑀺𑀳𑀸𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀧𑀸𑀢𑁂𑀦𑁂𑀯 𑀲𑀤𑁆𑀥𑀺𑀁 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀧𑀺 𑀦 𑀢𑀸𑀯 𑀢𑀢𑁆𑀣 𑀯𑀺𑀳𑀸𑀭𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀆𑀳 ‘‘𑀇𑀤𑀜𑁆𑀘 𑀧𑀞𑀫𑀁 𑀯𑀺𑀳𑀸𑀭𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀓𑀸𑀴𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯. 𑀅𑀟𑁆𑀠𑀦𑀯𑀫𑀸𑀦𑀁 𑀧𑀸𑀡𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀟𑁆𑀠𑁂𑀦 𑀦𑀯𑀫𑀸𑀦𑀁 𑀧𑀸𑀡𑀲𑀳𑀲𑁆𑀲𑀸𑀦𑀁, 𑀧𑀜𑁆𑀘𑀲𑀢𑀸𑀥𑀺𑀓𑀸𑀦𑀁 𑀅𑀝𑁆𑀞𑀲𑀳𑀲𑁆𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀚𑁄𑀢𑀺𑀧𑀸𑀢𑀼𑀪𑀸𑀯𑀝𑁆𑀞𑀸𑀦𑀦𑁆𑀢𑀺 𑀜𑀸𑀡𑀸𑀮𑁄𑀓𑀲𑁆𑀲 𑀧𑀸𑀢𑀼𑀪𑀸𑀯𑀝𑁆𑀞𑀸𑀦𑀁. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀦𑁆𑀢𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀫𑀳𑀸𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀁, 𑀭𑀸𑀚𑁄𑀯𑀸𑀤𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀳𑀘𑁆𑀘𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀼𑀫𑁆𑀳𑁂 𑀚𑀸𑀦𑀦𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀺𑀝𑁆𑀞𑁄 𑀦𑀸𑀫 𑀅𑀫𑀘𑁆𑀘𑁄𑀢𑀺 𑀭𑀜𑁆𑀜𑁄 𑀪𑀸𑀕𑀺𑀦𑁂𑀬𑁆𑀬𑁄 𑀅𑀭𑀺𑀝𑁆𑀞𑁄 𑀦𑀸𑀫 𑀅𑀫𑀘𑁆𑀘𑁄. 𑀧𑀜𑁆𑀘𑀧𑀡𑁆𑀡𑀸𑀲𑀸𑀬𑀸𑀢𑀺 𑀏𑀢𑁆𑀣 ‘‘𑀘𑀢𑀼𑀧𑀡𑁆𑀡𑀸𑀲𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀁 ‘‘𑀤𑁆𑀯𑀸𑀲𑀝𑁆𑀞𑀺 𑀅𑀭𑀳𑀦𑁆𑀢𑁄’’𑀢𑀺 𑀯𑀘𑀦𑀁 𑀲𑀫𑁂𑀢𑀺. 𑀢𑁂𑀦𑁂𑀯 𑀘 𑀲𑀻𑀳𑀴𑀪𑀸𑀲𑀸𑀬 𑀮𑀺𑀔𑀺𑀢𑁂 𑀫𑀳𑀸𑀯𑀁𑀲𑁂 ‘‘𑀘𑀢𑀼𑀧𑀡𑁆𑀡𑀸𑀲𑀸𑀬 𑀲𑀤𑁆𑀥𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀲𑀪𑀸𑀢𑀺𑀓𑀲𑀫𑀸𑀓𑀼𑀮𑀁 𑀭𑀸𑀚𑀓𑀼𑀮𑀦𑁆𑀢𑀺 𑀫𑀼𑀝𑀲𑀺𑀯𑀲𑁆𑀲 𑀧𑀼𑀢𑁆𑀢𑁂𑀳𑀺 𑀅𑀪𑀬𑁄 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀫𑀳𑀸𑀦𑀸𑀕𑁄 𑀉𑀢𑁆𑀢𑀺𑀬𑁄 𑀫𑀢𑁆𑀢𑀸𑀪𑀬𑁄 𑀲𑀽𑀭𑀢𑀺𑀲𑁆𑀲𑁄𑀢𑀺 𑀏𑀯𑀫𑀸𑀤𑀻𑀳𑀺 𑀤𑀲𑀳𑀺 𑀪𑀸𑀢𑀺𑀓𑁂𑀳𑀺 𑀲𑀫𑀸𑀓𑀺𑀡𑁆𑀡𑀁 𑀭𑀸𑀚𑀓𑀼𑀮𑀁. 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀯𑀲𑁆𑀲𑀁 𑀯𑀲𑀺𑀁𑀲𑀽𑀢𑀺 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀤𑀺𑀯𑀲𑁂 𑀭𑀜𑁆𑀜𑀸 𑀤𑀺𑀦𑁆𑀦𑀯𑀺𑀳𑀸𑀭𑁂𑀬𑁂𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀲𑁆𑀲𑀁 𑀯𑀲𑀺𑀁𑀲𑀼. 𑀧𑀯𑀸𑀭𑁂𑀢𑁆𑀯𑀸𑀢𑀺 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸. 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀦𑁆𑀢𑀺 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁. 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀳𑀺 𑀧𑀼𑀭𑀺𑀫𑀺𑀓𑀸𑀬𑀁 𑀉𑀧𑀕𑀦𑁆𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀢𑀢𑁄 𑀏𑀓𑀫𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀘𑀸𑀢𑀼𑀫𑀸𑀲𑀺𑀦𑀺𑀬𑀁 𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀭𑀺𑀬𑀕𑀡𑀧𑀭𑀺𑀯𑀼𑀢𑁄 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀪𑁄𑀚𑀦𑀸𑀯𑀲𑀸𑀦𑁂 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑁂𑀳𑀺 𑀘𑀺𑀭𑀤𑀺𑀝𑁆𑀞𑁄 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀯𑀘𑀦𑀫𑀩𑁆𑀭𑁆𑀯𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀓𑁆𑀔𑀢𑀺 ‘‘𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀯𑀻𑀭𑁄, 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀇𑀥𑀸’’𑀢𑀺. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸𑀢𑀺 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑀡𑀸𑀬𑀸𑀢𑀺 𑀅𑀢𑁆𑀣𑁄, 𑀧𑀞𑀫𑀧𑀯𑀸𑀭𑀡𑀸𑀬 𑀯𑀸 𑀧𑀯𑀸𑀭𑁂𑀢𑁆𑀯𑀸 𑀏𑀓𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀬𑀁 𑀅𑀯𑁄𑀘, 𑀅𑀜𑁆𑀜𑀣𑀸 ‘𑀧𑀼𑀡𑁆𑀡𑀫𑀸𑀬𑀁 ¶ 𑀫𑀳𑀸𑀯𑀻𑀭𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼’’𑀦𑁆𑀢𑀺, 𑀢𑀢𑁆𑀣 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑀡𑀸𑀬𑀸𑀢𑀺 𑀅𑀬𑀫𑀢𑁆𑀣𑀯𑀺𑀓𑀧𑁆𑀧𑁄 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀁 𑀧𑀯𑀸𑀭𑁂𑀦𑁆𑀢𑀺. 𑀘𑀺𑀭𑀤𑀺𑀝𑁆𑀞𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀲𑀢𑁆𑀣𑀼𑀲𑁆𑀲 𑀲𑀭𑀻𑀭𑀸𑀯𑀬𑀯𑁄 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀅𑀯𑀬𑀯𑁂 𑀲𑀫𑀼𑀤𑀸𑀬𑀯𑁄𑀳𑀸𑀭𑀯𑀲𑁂𑀦 𑀏𑀯𑀫𑀸𑀳𑀸𑀢𑀺 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺.

𑀣𑁂𑀭𑁂𑀦 𑀯𑀼𑀢𑁆𑀢𑀫𑁆𑀧𑀺 𑀕𑀫𑀦𑀓𑀸𑀭𑀡𑀁 𑀞𑀧𑁂𑀢𑁆𑀯𑀸 𑀇𑀥 𑀯𑀸𑀲𑁂 𑀧𑀬𑁄𑀚𑀦𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀕𑀫𑀦𑀁 𑀧𑀝𑀺𑀲𑁂𑀥𑁂𑀢𑀼𑀓𑀸𑀫𑁄 𑀆𑀳 ‘‘𑀅𑀳𑀁 𑀪𑀦𑁆𑀢𑁂 𑀢𑀼𑀫𑁆𑀳𑁂’’𑀢𑀺𑀆𑀤𑀺. 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀆𑀘𑀭𑀺𑀬𑀁 𑀤𑀺𑀲𑁆𑀯𑀸 𑀅𑀪𑀺𑀯𑀸𑀤𑀦𑀓𑀭𑀡𑀁 𑀅𑀪𑀺𑀯𑀸𑀤𑀦𑀁 𑀦𑀸𑀫. 𑀬𑀲𑁆𑀫𑀺𑀁 𑀯𑀸 𑀤𑀺𑀲𑀸𑀪𑀸𑀕𑁂 𑀆𑀘𑀭𑀺𑀬𑁄 𑀯𑀲𑀢𑀺 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀦𑁆𑀢𑁄, 𑀢𑀢𑁄 𑀅𑀪𑀺𑀫𑀼𑀔𑁄𑀯 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀇𑀤𑀁 𑀅𑀪𑀺𑀯𑀸𑀤𑀦𑀁 𑀦𑀸𑀫. 𑀆𑀘𑀭𑀺𑀬𑀁 𑀧𑀦 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀓𑀭𑀡𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀦𑀸𑀫. 𑀆𑀘𑀭𑀺𑀬𑀁 𑀧𑀦 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀁 𑀦𑀫𑀲𑁆𑀲𑀢𑀺, 𑀬𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀲𑁄 𑀯𑀲𑀢𑀺, 𑀢𑀤𑀪𑀺𑀫𑀼𑀔𑁄𑀧𑀺 𑀢𑀣𑁂𑀯 𑀦𑀫𑀲𑁆𑀲𑀢𑀺, 𑀕𑀘𑁆𑀙𑀦𑁆𑀢𑁄𑀧𑀺 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀢𑀺𑀬𑁂𑀯𑀸𑀢𑀺 𑀇𑀤𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦𑀸𑀫. 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀲𑁆𑀲 𑀧𑀦 𑀓𑀭𑀡𑀁 𑀲𑀸𑀫𑀻𑀘𑀺𑀓𑀭𑀡𑀁 𑀦𑀸𑀫. 𑀘𑀻𑀯𑀭𑀸𑀤𑀻𑀲𑀼 𑀳𑀺 𑀘𑀻𑀯𑀭𑀁 𑀤𑁂𑀦𑁆𑀢𑁄 𑀦 𑀬𑀁 𑀯𑀸 𑀢𑀁 𑀯𑀸 𑀤𑁂𑀢𑀺, 𑀫𑀳𑀕𑁆𑀖𑀁 𑀲𑀢𑀫𑀽𑀮𑀕𑁆𑀖𑀫𑁆𑀧𑀺 𑀧𑀜𑁆𑀘𑀲𑀢𑀫𑀽𑀮𑀕𑁆𑀖𑀫𑁆𑀧𑀺 𑀲𑀢𑀲𑀳𑀲𑁆𑀲𑀫𑀽𑀮𑀕𑁆𑀖𑀫𑁆𑀧𑀺 𑀤𑁂𑀢𑀺𑀬𑁂𑀯. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀲𑀸𑀫𑀻𑀘𑀺𑀓𑀭𑀡𑀁 𑀦𑀸𑀫. 𑀲𑀭𑀻𑀭𑀥𑀸𑀢𑀼𑀬𑁄𑀢𑀺 𑀲𑀭𑀻𑀭𑀸𑀯𑀬𑀯𑀸. 𑀅𑀜𑁆𑀜𑀸𑀢𑀦𑁆𑀢𑀺 𑀅𑀜𑁆𑀜𑀸𑀢𑀁, 𑀯𑀺𑀤𑀺𑀢𑀁 𑀫𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀮𑀘𑁆𑀙𑀸𑀫𑀸𑀢𑀺 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫. 𑀲𑀼𑀫𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀳𑀻𑀢𑀺 𑀧𑀞𑀫𑀫𑁂𑀯 𑀲𑀸𑀫𑀡𑁂𑀭𑀲𑁆𑀲 𑀓𑀣𑀺𑀢𑀢𑁆𑀢𑀸 𑀯𑀸 ‘‘𑀚𑀸𑀦𑀸𑀢𑀺 𑀏𑀲 𑀅𑀫𑁆𑀳𑀸𑀓𑀫𑀥𑀺𑀧𑁆𑀧𑀸𑀬’’𑀦𑁆𑀢𑀺 𑀜𑀢𑁆𑀯𑀸 𑀯𑀸 𑀏𑀯𑀫𑀸𑀳𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁 𑀫𑀳𑀸𑀭𑀸𑀚𑀸𑀢𑀺 𑀫𑀳𑀸𑀭𑀸𑀚 𑀢𑁆𑀯𑀁 𑀥𑀸𑀢𑀽𑀦𑀁 𑀧𑀝𑀺𑀮𑀸𑀪𑁂 𑀫𑀸 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀳𑀺, 𑀫𑀸 𑀢𑁆𑀯𑀁 𑀢𑀢𑁆𑀣 𑀯𑀸𑀯𑀝𑁄 𑀪𑀯, 𑀅𑀜𑁆𑀜𑀁 𑀢𑀬𑀸 𑀓𑀢𑁆𑀢𑀩𑁆𑀩𑀁 𑀓𑀭𑁄𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀤𑁂𑀯 𑀭𑀜𑁆𑀜𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀻𑀣𑀺𑀬𑁄 𑀲𑁄𑀥𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀢𑀸𑀴𑀸𑀯𑀘𑀭𑁂 𑀉𑀧𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀓𑀁𑀲𑀢𑀸𑀴𑀸𑀤𑀺𑀢𑀸𑀴𑀁 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀢𑀸𑀴𑀸𑀯𑀘𑀭𑀁 𑀯𑀼𑀘𑁆𑀘𑀢𑀺 𑀆𑀢𑀢𑀯𑀺𑀢𑀢𑀸𑀤𑀺 ¶ 𑀲𑀩𑁆𑀩𑀁 𑀢𑀽𑀭𑀺𑀬𑀪𑀡𑁆𑀟𑀁. 𑀢𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀁 𑀲𑀦𑁆𑀦𑀺𑀧𑀸𑀢𑁂𑀣𑀸𑀢𑀺 𑀏𑀢𑁆𑀣 𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀦𑁆𑀢𑀺 𑀲𑀩𑁆𑀩𑀁 𑀢𑀽𑀭𑀺𑀬𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀲𑀳𑀘𑀭𑀡𑀦𑀬𑁂𑀦 𑀲𑀩𑁆𑀩𑀢𑀽𑀭𑀺𑀬𑀪𑀡𑁆𑀟𑀸𑀦𑀁 𑀯𑀸𑀤𑀓𑀸𑀧𑀺 ¶ 𑀕𑀳𑁂𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀘𑁆𑀙𑀲𑀻𑀢𑀺 𑀮𑀪𑀺𑀲𑁆𑀲𑀲𑀺. 𑀣𑁂𑀭𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀽𑀢𑀺 𑀭𑀸𑀚𑀦𑀺𑀯𑁂𑀲𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀅𑀕𑀫𑀁𑀲𑀼.

𑀢𑀸𑀯𑀤𑁂𑀯𑀸𑀢𑀺 𑀢𑀁 𑀔𑀡𑀁𑀬𑁂𑀯. 𑀧𑀸𑀝𑀮𑀺𑀧𑀼𑀢𑁆𑀢𑀤𑁆𑀯𑀸𑀭𑁂𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀤𑁆𑀯𑀸𑀭𑁂. 𑀓𑀺𑀁 𑀪𑀦𑁆𑀢𑁂 𑀲𑀼𑀫𑀦 𑀆𑀳𑀺𑀡𑁆𑀟𑀲𑀻𑀢𑀺 𑀲𑀼𑀫𑀦 𑀢𑁆𑀯𑀁 𑀲𑀫𑀡𑀥𑀫𑁆𑀫𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀯𑀺𑀘𑀭𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀧𑀘𑁆𑀙𑀸 𑀢𑀢𑁆𑀣 𑀯𑀺𑀳𑀸𑀭𑀢𑁆𑀣𑀸𑀬 𑀆𑀓𑀗𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬𑀸𑀢𑀺 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀸𑀪𑀢𑁆𑀢𑀫𑁂𑀯 𑀳𑀺 𑀙𑀸𑀬𑀸 𑀯𑀟𑁆𑀠𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀤𑀺𑀲𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀙𑀢𑁆𑀢𑀁 𑀅𑀧𑀦𑀫𑀢𑀽𑀢𑀺 𑀇𑀤𑀁 𑀲𑁂𑀢𑀘𑁆𑀙𑀢𑁆𑀢𑀁 𑀲𑀬𑀫𑁂𑀯 𑀫𑁂 𑀲𑀻𑀲𑁄𑀧𑀭𑀺𑀢𑁄 𑀥𑀸𑀢𑀼𑀘𑀗𑁆𑀓𑁄𑀝𑀓𑀸𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀦𑀫𑀢𑀽𑀢𑀺 𑀅𑀢𑁆𑀣𑁄. 𑀫𑀬𑁆𑀳𑀁 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀢𑀽𑀢𑀺 𑀇𑀤𑀁 𑀥𑀸𑀢𑀼𑀘𑀗𑁆𑀓𑁄𑀝𑀓𑀁 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀥𑀸𑀢𑀼𑀬𑀸 𑀲𑀳 𑀆𑀕𑀦𑁆𑀢𑁆𑀯𑀸 𑀲𑀺𑀭𑀲𑁆𑀫𑀺𑀁 𑀫𑁂 𑀧𑀢𑀺𑀝𑁆𑀞𑀸𑀢𑀽𑀢𑀺 𑀅𑀢𑁆𑀣𑁄. 𑀧𑁄𑀓𑁆𑀔𑀭𑀯𑀲𑁆𑀲𑀁 𑀦𑀸𑀫 𑀧𑁄𑀓𑁆𑀔𑀭𑀧𑀢𑁆𑀢𑀧𑁆𑀧𑀫𑀸𑀡𑀁 𑀯𑀮𑀸𑀳𑀓𑀫𑀚𑁆𑀛𑁂 𑀉𑀝𑁆𑀞𑀳𑀺𑀢𑁆𑀯𑀸 𑀓𑀫𑁂𑀦 𑀨𑀭𑀺𑀢𑁆𑀯𑀸 𑀢𑁂𑀫𑁂𑀢𑀼𑀓𑀸𑀫𑁂𑀬𑁂𑀯 𑀢𑁂𑀫𑀬𑀫𑀸𑀦𑀁 𑀫𑀳𑀦𑁆𑀢𑀁 𑀳𑀼𑀢𑁆𑀯𑀸 𑀯𑀲𑁆𑀲𑀢𑀺. 𑀫𑀳𑀸𑀯𑀻𑀭𑁄𑀢𑀺 𑀫𑀳𑀸𑀧𑀭𑀓𑁆𑀓𑀫𑁄. 𑀫𑀳𑀸𑀯𑀻𑀭𑀸𑀯𑀬𑀯𑀢𑁆𑀢𑀸 𑀘𑁂𑀢𑁆𑀣 𑀲𑀢𑁆𑀣𑀼𑀯𑁄𑀳𑀸𑀭𑁂𑀦 𑀥𑀸𑀢𑀼𑀬𑁄 𑀏𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀥𑀸𑀢𑀼𑀲𑀭𑀻𑀭𑁂𑀦𑀸𑀕𑀫𑀦𑀜𑁆𑀳𑀺 𑀲𑀦𑁆𑀥𑀸𑀬 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄𑀯 𑀳𑀼𑀢𑁆𑀯𑀸 𑀅𑀧𑀲𑀓𑁆𑀓𑀦𑁆𑀢𑁄𑀢𑀺 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀬𑁂𑀯 𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀑𑀲𑀓𑁆𑀓𑀦𑁆𑀢𑁄, 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀏𑀲 𑀧𑀘𑁆𑀙𑀺𑀫𑀤𑀺𑀲𑀁 𑀦 𑀑𑀮𑁄𑀓𑁂𑀢𑀺, 𑀢𑀣𑀸𑀧𑀺 𑀧𑀘𑁆𑀙𑀺𑀫𑀤𑀺𑀲𑀁 𑀲𑀦𑁆𑀥𑀸𑀬 𑀕𑀘𑁆𑀙𑀢𑀻𑀢𑀺 ‘‘𑀧𑀘𑁆𑀙𑀺𑀫𑀤𑀺𑀲𑀸𑀪𑀺𑀫𑀼𑀔𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀬𑁂𑀯 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀚𑀼𑀓𑁂𑀦𑁂𑀯 𑀦𑀕𑀭𑀁 𑀧𑀸𑀯𑀺𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑁂𑀚𑀯𑀢𑁆𑀣𑀼 𑀦𑀸𑀫𑀸𑀢𑀺 𑀫𑀳𑁂𑀚𑀦𑀸𑀫𑀓𑁂𑀦 𑀬𑀓𑁆𑀔𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀏𑀓𑀁 𑀤𑁂𑀯𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ¶ . 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀧𑀭𑀺𑀪𑀼𑀢𑁆𑀢𑀽𑀧𑀓𑀭𑀡𑀸𑀦𑀺 𑀦𑀺𑀤𑀳𑀺𑀢𑁆𑀯𑀸 𑀓𑀢𑀁 𑀘𑁂𑀢𑀺𑀬𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀺𑀯𑀺𑀥𑀜𑁆𑀳𑀺 𑀘𑁂𑀢𑀺𑀬𑀁 𑀯𑀤𑀦𑁆𑀢𑀺 𑀧𑀭𑀺𑀪𑁄𑀕𑀘𑁂𑀢𑀺𑀬𑀁 𑀥𑀸𑀢𑀼𑀘𑁂𑀢𑀺𑀬𑀁 𑀥𑀫𑁆𑀫𑀘𑁂𑀢𑀺𑀬𑀦𑁆𑀢𑀺. 𑀢𑀢𑁆𑀣 𑀧𑀭𑀺𑀪𑁄𑀕𑀘𑁂𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀥𑀸𑀢𑀼𑀘𑁂𑀢𑀺𑀬𑀁 𑀧𑀦 𑀥𑀸𑀢𑀼𑀬𑁄 𑀦𑀺𑀤𑀳𑀺𑀢𑁆𑀯𑀸 𑀓𑀢𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀮𑀺𑀔𑀺𑀢𑀧𑁄𑀢𑁆𑀣𑀓𑀁 𑀦𑀺𑀤𑀳𑀺𑀢𑁆𑀯𑀸 𑀓𑀢𑀁 𑀧𑀦 𑀥𑀫𑁆𑀫𑀘𑁂𑀢𑀺𑀬𑀁 𑀦𑀸𑀫. 𑀲𑀸𑀭𑀻𑀭𑀺𑀓𑀁 𑀧𑀭𑀺𑀪𑁄𑀕𑀺𑀓𑀁 𑀉𑀤𑁆𑀤𑀺𑀲𑁆𑀲𑀓𑀦𑁆𑀢𑀺 𑀏𑀯𑀫𑁆𑀧𑀺 𑀢𑀺𑀧𑁆𑀧𑀪𑁂𑀤𑀁 𑀘𑁂𑀢𑀺𑀬𑀁 𑀯𑀤𑀦𑁆𑀢𑀺. 𑀅𑀬𑀁 𑀧𑀦 𑀧𑀪𑁂𑀤𑁄 𑀧𑀝𑀺𑀫𑀸𑀭𑀽𑀧𑀲𑁆𑀲𑀧𑀺 𑀉𑀤𑁆𑀤𑀺𑀲𑁆𑀲𑀓𑀘𑁂𑀢𑀺𑀬𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀼𑀝𑁆𑀞𑀼𑀢𑀭𑀁 𑀬𑀼𑀚𑁆𑀚𑀢𑀺.

𑀓𑀣𑀁 𑀧𑀦 𑀇𑀤𑀁 𑀞𑀸𑀦𑀁 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑁂𑀢𑀺𑀬𑀝𑁆𑀞𑀸𑀦𑀁 𑀅𑀳𑁄𑀲𑀻𑀢𑀺 𑀆𑀳 ‘‘𑀅𑀢𑀻𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀧𑀚𑁆𑀚𑀭𑀓𑁂𑀦𑀸𑀢𑀺 𑀏𑀢𑁆𑀣 𑀧𑀚𑁆𑀚𑀭𑀓𑁄 𑀦𑀸𑀫 𑀭𑁄𑀕𑁄 𑀯𑀼𑀘𑁆𑀘𑀢𑀺. 𑀲𑁄 𑀘 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 ¶ 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀸 𑀓𑀺𑀭 𑀧𑀼𑀡𑁆𑀡𑀓𑀸𑀴𑁄 𑀦𑀸𑀫 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀲𑀭𑀻𑀭𑁂 𑀧𑀚𑁆𑀚𑀭𑀓𑀁 𑀦𑀸𑀫 𑀭𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀭𑀓𑁆𑀔𑀲𑁂𑀳𑀺 𑀚𑀦𑀲𑁆𑀲𑁂𑀢𑁆𑀣, 𑀭𑁄𑀕𑁄 𑀧𑀚𑁆𑀚𑀭𑀓𑁄 𑀅𑀳𑀽’’𑀢𑀺;

𑀤𑀻𑀧𑀯𑀁𑀲𑁂𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀭𑀓𑁆𑀔𑀲𑀸 𑀘 𑀩𑀳𑀽 𑀢𑀢𑁆𑀣, 𑀧𑀚𑁆𑀚𑀭𑀸 𑀘 𑀲𑀫𑀼𑀝𑁆𑀞𑀺𑀢𑀸;

𑀧𑀚𑁆𑀚𑀭𑁂𑀦 𑀩𑀳𑀽 𑀲𑀢𑁆𑀢𑀸, 𑀦𑀲𑁆𑀲𑀦𑁆𑀢𑀺 𑀤𑀻𑀧𑀫𑀼𑀢𑁆𑀢𑀫𑁂’’𑀢𑀺.

𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀏𑀢𑁆𑀣 𑀅𑀦𑀬𑁄𑀢𑀺 𑀅𑀯𑀟𑁆𑀠𑀺. 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀲𑀼𑀔𑀁 𑀩𑁆𑀬𑀲𑀢𑀺 𑀯𑀺𑀓𑁆𑀔𑀺𑀧𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀦𑁆𑀢𑀺 𑀤𑀼𑀓𑁆𑀔𑀁 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀫𑀸𑀧𑀚𑁆𑀚𑀦𑁆𑀢𑁂 𑀤𑀺𑀲𑁆𑀯𑀸’’𑀢𑀺 𑀯𑀘𑀦𑀢𑁄 𑀧𑀞𑀫𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸 𑀧𑀘𑁆𑀙𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂 𑀲𑀢𑁆𑀢𑁂 𑀅𑀦𑀬𑀩𑁆𑀬𑀲𑀦𑀫𑀸𑀧𑀚𑁆𑀚𑀦𑁆𑀢𑁂 𑀤𑀺𑀲𑁆𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀆𑀲𑀬𑀸𑀦𑀼𑀲𑀬𑀸𑀤𑀺𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀢𑁂 𑀲𑀢𑁆𑀢𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀸 𑀤𑀺𑀲𑁆𑀲𑀦𑁆𑀢𑀺. 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀢𑀺 𑀯𑀺𑀲𑀫𑀯𑀲𑁆𑀲𑀸𑀤𑀺𑀯𑀲𑁂𑀦 𑀤𑀼𑀝𑁆𑀞𑀸 𑀅𑀲𑁄𑀪𑀦𑀸 𑀯𑀼𑀝𑁆𑀞𑀺𑀬𑁂𑀯 𑀤𑀼𑀩𑁆𑀩𑀼𑀝𑁆𑀞𑀺𑀓𑀸, 𑀲𑀲𑁆𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀓𑀸𑀬𑀲𑀼𑀔𑀼𑀧𑁆𑀧𑀢𑁆𑀢𑀺𑀲𑀧𑁆𑀧𑀸𑀬𑀸 𑀲𑀢𑁆𑀢𑀼𑀧𑀓𑀸𑀭𑀸 𑀲𑀫𑁆𑀫𑀸 𑀯𑀼𑀝𑁆𑀞𑀺 𑀢𑀢𑁆𑀣 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄𑀬𑁂𑀯 𑀘 ‘‘𑀤𑀼𑀩𑁆𑀪𑀺𑀓𑁆𑀔𑀁 𑀤𑀼𑀲𑁆𑀲𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀸𑀬 𑀅𑀪𑀸𑀯𑁄 ¶ , 𑀤𑀼𑀮𑁆𑀮𑀪𑀪𑀸𑀯𑁄 𑀯𑀸 𑀤𑀼𑀩𑁆𑀪𑀺𑀓𑁆𑀔𑀁, 𑀲𑀼𑀮𑀪𑀸 𑀢𑀢𑁆𑀣 𑀪𑀺𑀓𑁆𑀔𑀸 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀲𑁆𑀲𑀸𑀦𑀁 𑀅𑀪𑀸𑀯𑁄, 𑀅𑀲𑀫𑁆𑀧𑀦𑁆𑀦𑀢𑀸 𑀯𑀸 𑀤𑀼𑀲𑁆𑀲𑀲𑁆𑀲𑀁. 𑀤𑁂𑀯𑁄𑀢𑀺 𑀫𑁂𑀖𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀥𑀸𑀭𑀫𑀦𑀼𑀧𑀯𑁂𑀘𑁆𑀙𑀻𑀢𑀺 𑀉𑀤𑀓𑀥𑀸𑀭𑀁 𑀲𑀫𑁆𑀫𑀸 𑀯𑀺𑀫𑀼𑀜𑁆𑀘𑀺, 𑀲𑀫𑁆𑀫𑀸 𑀅𑀦𑀼𑀧𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀳𑀸𑀯𑀺𑀯𑀸𑀤𑁄 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀚𑀬𑀦𑁆𑀢𑀫𑀳𑀸𑀭𑀸𑀚𑁂𑀦 𑀘 𑀢𑀲𑁆𑀲 𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀼𑀓𑁂𑀦 𑀲𑀫𑀺𑀤𑁆𑀥𑀓𑀼𑀫𑀸𑀭𑀦𑀸𑀫𑀓𑁂𑀦 𑀉𑀧𑀭𑀸𑀚𑁂𑀦 𑀘 𑀲𑀤𑁆𑀥𑀺𑀁 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀳𑀸𑀬𑀼𑀤𑁆𑀥𑀁 𑀉𑀧𑀝𑁆𑀞𑀺𑀢𑀁. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀡𑁆𑀟𑀤𑀻𑀧𑁂 𑀫𑀳𑀸𑀯𑀺𑀯𑀸𑀤𑁄 𑀳𑁄𑀢𑀻’’𑀢𑀺. 𑀳𑁄𑀢𑀻𑀢𑀺 𑀓𑀺𑀭𑀺𑀬𑀸 𑀓𑀸𑀮𑀫𑀧𑁂𑀓𑁆𑀔𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀧𑀬𑁄𑀕𑁄, 𑀯𑀺𑀯𑀸𑀤𑀲𑁆𑀲 𑀧𑀦 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀯𑀺𑀜𑁆𑀜𑀸𑀬𑀢𑀺. 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀳𑁂𑀢𑁆𑀣 𑀅𑀢𑀻𑀢𑀓𑀸𑀮𑀸𑀯𑀕𑀫𑁄 𑀬𑀣𑀸 ‘‘𑀪𑀸𑀲𑀢𑁂 𑀯𑀟𑁆𑀠𑀢𑁂 𑀢𑀤𑀸’’𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀢𑁆𑀢𑀫𑀸𑀦𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀓𑀮𑀳𑀯𑀺𑀕𑁆𑀕𑀳𑀚𑀸𑀢𑀸𑀢𑀺 𑀏𑀢𑁆𑀣 𑀓𑀮𑀳𑁄 𑀦𑀸𑀫 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀢𑀢𑁆𑀣 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀓𑀸𑀬𑁂𑀦 𑀓𑀸𑀢𑀩𑁆𑀩𑁄 𑀓𑀮𑀳𑁄 𑀓𑀸𑀬𑀓𑀮𑀳𑁄. 𑀫𑀫𑁆𑀫𑀖𑀝𑁆𑀝𑀦𑀸𑀤𑀺𑀯𑀲𑁂𑀦 𑀯𑀸𑀘𑀸𑀬 𑀓𑀸𑀢𑀩𑁆𑀩𑁄 𑀓𑀮𑀳𑁄 𑀯𑀸𑀘𑀸𑀓𑀮𑀳𑁄 ¶ . 𑀯𑀺𑀧𑀘𑁆𑀘𑀦𑀻𑀓𑀕𑀳𑀡𑀁 𑀯𑀺𑀕𑁆𑀕𑀳𑁄. 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀦𑁆𑀦𑁄 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀕𑀸𑀳𑁄. 𑀅𑀣 𑀯𑀸 𑀓𑀮𑀳𑁄 𑀦𑀸𑀫 𑀯𑀸𑀘𑀸𑀓𑀮𑀳𑁄. 𑀅𑀜𑁆𑀜𑀫𑀜𑁆𑀜𑀁 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀯𑀺𑀭𑀽𑀧𑀁 𑀯𑀺𑀭𑀼𑀤𑁆𑀥𑀁 𑀯𑀸 𑀕𑀳𑀡𑀁 𑀯𑀺𑀕𑁆𑀕𑀳𑁄 𑀓𑀸𑀬𑀓𑀮𑀳𑁄. 𑀬𑀣𑀸𑀯𑀼𑀢𑁆𑀢𑁄 𑀓𑀮𑀳𑁄 𑀘 𑀯𑀺𑀕𑁆𑀕𑀳𑁄 𑀘 𑀚𑀸𑀢𑁄 𑀲𑀜𑁆𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀓𑀮𑀳𑀯𑀺𑀕𑁆𑀕𑀳𑀚𑀸𑀢𑀸, 𑀲𑀜𑁆𑀚𑀸𑀢𑀓𑀮𑀳𑀯𑀺𑀕𑁆𑀕𑀳𑀸𑀢𑀺 𑀅𑀢𑁆𑀣𑁄.

𑀢𑀸𑀦𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀦𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀲𑀸𑀲𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑁂𑀦 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀢𑀺 𑀢𑀸𑀦𑀺 𑀘𑁂𑀢𑀺𑀬𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀺. 𑀢𑀻𑀡𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁧; 𑀯𑀺𑀪. 𑀅𑀝𑁆𑀞. 𑁮𑁦𑁯) 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺, 𑀢𑀸𑀦𑀺 𑀧𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀲 𑀳𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀼𑀲𑀺𑀦𑀸𑀭𑀸𑀬𑀁. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺. 𑀲𑀸𑀲𑀦𑀲𑁆𑀲 𑀓𑀺𑀭 𑀑𑀲𑀓𑁆𑀓𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ¶ 𑀫𑀳𑀸𑀘𑁂𑀢𑀺𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀫𑀳𑀸𑀘𑁂𑀢𑀺𑀬𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁, 𑀢𑀢𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼 𑀦 𑀅𑀦𑁆𑀢𑀭𑀸 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀭𑀸𑀲𑀺𑀪𑀽𑀢𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀸 𑀳𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺, 𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀚𑁆𑀚 𑀲𑀸𑀲𑀦𑀁 𑀑𑀲𑀓𑁆𑀓𑀢𑀺, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀤𑀸𑀦𑀺 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑀢𑁄 𑀫𑀳𑀦𑁆𑀢𑀢𑀭𑀁 𑀓𑀸𑀭𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀞𑀧𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑀸𑀢𑀽𑀲𑀼 𑀢𑁂𑀚𑁄𑀥𑀸𑀢𑀼 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺, 𑀲𑀸𑀲𑀧𑀫𑀢𑁆𑀢𑀺𑀬𑀸𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸𑀯 𑀪𑀯𑀺𑀲𑁆𑀲𑀢𑀺, 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀧𑀭𑀺𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀽𑀲𑀼 𑀅𑀦𑁆𑀢𑀭𑀳𑀺𑀢𑀸𑀲𑀼 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺.

𑀤𑀺𑀯𑀸 𑀩𑁄𑀥𑀺𑀭𑀼𑀓𑁆𑀔𑀝𑁆𑀞𑀸𑀦𑁂 𑀳𑀢𑁆𑀣𑀺𑀲𑀸𑀮𑀸𑀬𑀁 𑀢𑀺𑀝𑁆𑀞𑀢𑀻𑀢𑀺 𑀤𑀺𑀯𑀸 𑀯𑀢𑁆𑀣𑀼𑀯𑀺𑀘𑀺𑀦𑀦𑀸𑀬 𑀑𑀓𑀸𑀲𑀁 𑀓𑀼𑀭𑀼𑀫𑀸𑀦𑁄 𑀢𑀢𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀓𑀼𑀫𑁆𑀪𑁂 𑀞𑀧𑁂𑀢𑁆𑀯𑀸 𑀲𑀥𑀸𑀢𑀼𑀓𑁄𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀁𑀲𑁂 𑁋

‘‘𑀭𑀢𑁆𑀢𑀺𑀁 𑀦𑀸𑀕𑁄𑀦𑀼𑀧𑀭𑀺𑀬𑀸𑀢𑀺, 𑀢𑀁 𑀞𑀸𑀦𑀁 𑀲𑁄 𑀲𑀥𑀸𑀢𑀼𑀓𑀁;

𑀩𑁄𑀥𑀺𑀝𑁆𑀞𑀸𑀦𑀫𑁆𑀳𑀺 𑀲𑀸𑀮𑀸𑀬𑀁, 𑀤𑀺𑀯𑀸 𑀞𑀸𑀢𑀺 𑀲𑀥𑀸𑀢𑀼𑀓𑁄’’𑀢𑀺.

𑀣𑀽𑀧𑀧𑀢𑀺𑀝𑁆𑀞𑀸𑀦𑀪𑀽𑀫𑀺𑀁 𑀧𑀭𑀺𑀬𑀸𑀬𑀢𑀻𑀢𑀺 𑀫𑀢𑁆𑀣𑀓𑀢𑁄 𑀥𑀸𑀢𑀼𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀥𑀸𑀢𑀼𑀓𑀁 𑀣𑀽𑀧𑀧𑀢𑀺𑀝𑁆𑀞𑀸𑀦𑀪𑀽𑀫𑀺𑀁 𑀭𑀢𑁆𑀢𑀺𑀪𑀸𑀕𑁂 ¶ 𑀧𑀭𑀺𑀬𑀸𑀬𑀢𑀺, 𑀲𑀫𑀦𑁆𑀢𑀢𑁄 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀚𑀗𑁆𑀖𑀧𑁆𑀧𑀫𑀸𑀡𑀦𑁆𑀢𑀺 𑀧𑀼𑀧𑁆𑀨𑀝𑁆𑀞𑀸𑀦𑀧𑁆𑀧𑀫𑀸𑀡𑀁. 𑀣𑀽𑀧𑀓𑀼𑀘𑁆𑀙𑀺𑀢𑁄 𑀳𑁂𑀝𑁆𑀞𑀸𑀪𑀸𑀕𑀜𑁆𑀳𑀺 𑀣𑀽𑀧𑀲𑁆𑀲 𑀚𑀗𑁆𑀖𑀸𑀢𑀺 𑀯𑀤𑀦𑁆𑀢𑀺. 𑀥𑀸𑀢𑀼𑀑𑀭𑁄𑀧𑀦𑀢𑁆𑀣𑀸𑀬𑀸𑀢𑀺 𑀳𑀢𑁆𑀣𑀺𑀓𑀼𑀫𑁆𑀪𑀢𑁄 𑀥𑀸𑀢𑀼𑀓𑀭𑀡𑁆𑀟𑀓𑀲𑁆𑀲 𑀑𑀭𑁄𑀧𑀦𑀢𑁆𑀣𑀸𑀬. 𑀲𑀓𑀮𑀦𑀕𑀭𑀜𑁆𑀘 𑀚𑀦𑀧𑀤𑁄 𑀘𑀸𑀢𑀺 𑀦𑀕𑀭𑀯𑀸𑀲𑀺𑀦𑁄 𑀚𑀦𑀧𑀤𑀯𑀸𑀲𑀺𑀦𑁄 𑀘 𑀅𑀪𑁂𑀤𑀢𑁄 𑀦𑀕𑀭𑀚𑀦𑀧𑀤𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸 ‘‘𑀲𑀩𑁆𑀩𑁄 𑀕𑀸𑀫𑁄 𑀆𑀕𑀢𑁄, 𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀳𑀸𑀚𑀦𑀓𑀸𑀬𑁂𑀢𑀺 𑀫𑀳𑀸𑀚𑀦𑀲𑀫𑀽𑀳𑁂. 𑀲𑀫𑀽𑀳𑀧𑀭𑀺𑀬𑀸𑀬𑁄 𑀳𑁂𑀢𑁆𑀣 𑀓𑀸𑀬𑀲𑀤𑁆𑀤𑁄. 𑀏𑀓𑁂𑀓𑀥𑀸𑀢𑀼𑀧𑁆𑀧𑀤𑁂𑀲𑀢𑁄 𑀢𑁂𑀚𑁄𑀤𑀓𑀦𑀺𑀓𑁆𑀔𑀫𑀦𑀸𑀤𑀺𑀯𑀲𑁂𑀦 𑀬𑀫𑀓𑀬𑀫𑀓𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 ¶ . 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀭𑀲𑁆𑀫𑀺𑀬𑁄 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄. 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀉𑀤𑀓𑀥𑀸𑀭𑀸 𑀘𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺 𑀪𑀕𑀯𑀢𑀺 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀫𑀳𑁄𑀲𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀅𑀘𑀺𑀦𑁆𑀢𑀺𑀬𑀸’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀩𑀼𑀤𑁆𑀥𑀥𑀫𑁆𑀫𑀸𑀢𑀺 𑀏𑀢𑁆𑀣 𑀩𑀼𑀤𑁆𑀥𑀕𑀼𑀡𑀸.

𑀥𑀭𑀫𑀸𑀦𑀓𑀸𑀮𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀫𑀸𑀲𑀻𑀢𑀺 𑀪𑀕𑀯𑀸 𑀓𑀺𑀭 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀦𑀯𑀫𑁂 𑀫𑀸𑀲𑁂 𑀨𑀼𑀲𑁆𑀲𑀧𑀼𑀡𑁆𑀡𑀫𑀤𑀺𑀯𑀲𑁂 𑀬𑀓𑁆𑀔𑀸𑀥𑀺𑀯𑀸𑀲𑀁 𑀮𑀗𑁆𑀓𑀸𑀤𑀻𑀧𑀫𑀼𑀧𑀕𑀦𑁆𑀢𑁆𑀯𑀸 𑀮𑀗𑁆𑀓𑀸𑀫𑀚𑁆𑀛𑁂 𑀢𑀺𑀬𑁄𑀚𑀦𑀸𑀬𑀢𑁂 𑀬𑁄𑀚𑀦𑀯𑀺𑀢𑁆𑀣𑀢𑁂 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂 𑀫𑀳𑀸𑀬𑀓𑁆𑀔𑀲𑀫𑀸𑀕𑀫𑁂 𑀉𑀧𑀭𑀺𑀆𑀓𑀸𑀲𑁂 𑀞𑀢𑁆𑀯𑀸 𑀓𑀧𑁆𑀧𑀼𑀝𑁆𑀞𑀸𑀦𑀲𑀫𑀬𑁂 𑀲𑀫𑀼𑀝𑁆𑀞𑀺𑀢𑀯𑀼𑀝𑁆𑀞𑀺𑀯𑀸𑀢𑀦𑀺𑀩𑁆𑀩𑀺𑀲𑁂𑀲𑀯𑀲𑁆𑀲𑀯𑀸𑀬𑀼𑀦𑀸 𑀘 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀦𑁆𑀥𑀓𑀸𑀭𑀲𑀤𑀺𑀲𑀖𑁄𑀭𑀦𑁆𑀥𑀓𑀸𑀭𑀦𑀺𑀓𑀸𑀬𑁂𑀦 𑀘 𑀲𑀻𑀢𑀦𑀭𑀓𑀦𑀺𑀩𑁆𑀩𑀺𑀲𑁂𑀲𑀩𑀳𑀮𑀲𑀻𑀢𑁂𑀦 𑀘 𑀲𑀁𑀯𑀝𑁆𑀝𑀓𑀸𑀮𑀲𑀜𑁆𑀚𑀸𑀢𑀯𑀸𑀢𑀲𑀗𑁆𑀔𑀼𑀪𑀺𑀢𑁂𑀳𑀺 𑀫𑁂𑀖𑀦𑀪𑀕𑀚𑁆𑀚𑀺𑀢𑀲𑀤𑀺𑀲𑁂𑀦 𑀕𑀕𑀦𑀫𑁂𑀤𑀦𑀻𑀦𑀺𑀦𑁆𑀦𑀸𑀤𑁂𑀦 𑀘 𑀬𑀓𑁆𑀔𑀸𑀦𑀁 𑀪𑀬𑀁 𑀲𑀦𑁆𑀢𑀸𑀲𑀁 𑀚𑀦𑁂𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑀸𑀪𑀬𑁄 ‘‘𑀤𑁂𑀣 𑀫𑁂 𑀲𑀫𑀕𑁆𑀕𑀸 𑀦𑀺𑀲𑀻𑀤𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀤𑁂𑀫 𑀢𑁂 𑀲𑀓𑀮𑀤𑀻𑀧𑀁, 𑀤𑁂𑀳𑀺 𑀦𑁄, 𑀫𑀸𑀭𑀺𑀲, 𑀅𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀢𑀁 𑀉𑀧𑀤𑁆𑀤𑀯𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀬𑀓𑁆𑀔𑀤𑀢𑁆𑀢𑀪𑀽𑀫𑀺𑀬𑀸 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀲𑀫𑀦𑁆𑀢𑀢𑁄 𑀚𑀮𑀫𑀸𑀦𑀁 𑀘𑀫𑁆𑀫𑀔𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀓𑀧𑁆𑀧𑀼𑀝𑁆𑀞𑀸𑀦𑀕𑁆𑀕𑀺𑀲𑀤𑀺𑀲𑀤𑀳𑀦𑀸𑀪𑀺𑀪𑀽𑀢𑀸𑀦𑀁 𑀚𑀮𑀥𑀺𑀲𑀮𑀺𑀮𑀪𑀻𑀢𑀸𑀦𑀁 𑀲𑀫𑀦𑁆𑀢𑀸 𑀯𑁂𑀮𑀦𑁆𑀢𑁂 𑀪𑀫𑀦𑁆𑀢𑀸𑀦𑀁 𑀬𑀓𑁆𑀔𑀸𑀦𑀁 𑀕𑀺𑀭𑀺𑀤𑀻𑀧𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀲𑀼 𑀢𑀁 𑀬𑀣𑀸𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀫𑁆𑀫𑀔𑀡𑁆𑀟𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀢𑀤𑀸 𑀲𑀫𑀸𑀕𑀢𑁂 𑀅𑀦𑁂𑀓𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀦𑁂𑀓𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀓𑀢𑁆𑀯𑀸 𑀲𑀼𑀫𑀦𑀓𑀽𑀝𑀯𑀸𑀲𑀺𑀦𑀸 𑀫𑀳𑀸𑀲𑀼𑀫𑀦𑀤𑁂𑀯𑀭𑀸𑀚𑁂𑀦 𑀲𑀫𑀥𑀺𑀕𑀢𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦 𑀬𑀸𑀘𑀺𑀢𑀧𑀽𑀚𑀦𑀻𑀬𑁄 𑀲𑀻𑀲𑀁 𑀧𑀭𑀸𑀫𑀲𑀺𑀢𑁆𑀯𑀸 𑀫𑀼𑀝𑁆𑀞𑀺𑀫𑀢𑁆𑀢𑀸 𑀦𑀻𑀮𑀸𑀫𑀮𑀓𑁂𑀲𑀥𑀸𑀢𑀼𑀬𑁄 𑀢𑀲𑁆𑀲 𑀤𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀫𑀕𑀫𑀸𑀲𑀺.

𑀤𑀼𑀢𑀺𑀬𑀁 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀜𑁆𑀘𑀫𑁂 𑀲𑀁𑀯𑀘𑁆𑀙𑀭𑁂 𑀘𑀽𑀴𑁄𑀤𑀭𑀫𑀳𑁄𑀤𑀭𑀸𑀦𑀁 𑀚𑀮𑀣𑀮𑀦𑀺𑀯𑀸𑀲𑀻𑀦𑀁 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀁 𑀦𑀸𑀕𑀭𑀸𑀚𑀽𑀦𑀁 𑀫𑀡𑀺𑀧𑀮𑁆𑀮𑀗𑁆𑀓𑀁 𑀦𑀺𑀲𑁆𑀲𑀸𑀬 𑀉𑀧𑀝𑁆𑀞𑀺𑀢𑀫𑀳𑀸𑀲𑀗𑁆𑀕𑀸𑀫𑁂 𑀦𑀸𑀕𑀸𑀦𑀁 𑀫𑀳𑀸𑀯𑀺𑀦𑀸𑀲𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀫𑀸𑀲𑀓𑀸𑀴𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀲𑀫𑀺𑀤𑁆𑀥𑀲𑀼𑀫𑀦𑁂𑀦 𑀦𑀸𑀫 𑀭𑀼𑀓𑁆𑀔𑀤𑁂𑀯𑀧𑀼𑀢𑁆𑀢𑁂𑀦 𑀙𑀢𑁆𑀢𑀁 𑀓𑀢𑁆𑀯𑀸 𑀥𑀸𑀭𑀺𑀢𑀭𑀸𑀚𑀸𑀬𑀢𑀦𑁄 𑀦𑀸𑀕𑀤𑀻𑀧𑀁 𑀲𑀫𑀸𑀕𑀦𑁆𑀢𑁆𑀯𑀸 𑀲𑀗𑁆𑀕𑀸𑀫𑀫𑀚𑁆𑀛𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀖𑁄𑀭𑀦𑁆𑀥𑀓𑀸𑀭𑁂𑀦 ¶ 𑀦𑀸𑀕𑁂 𑀲𑀦𑁆𑀢𑀸𑀲𑁂𑀢𑁆𑀯𑀸 𑀅𑀲𑁆𑀲𑀸𑀲𑁂𑀦𑁆𑀢𑁄 𑀆𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀦𑀁 𑀉𑀧𑀕𑀢𑀦𑀸𑀕𑀸𑀦𑀁 𑀲𑀸𑀫𑀕𑁆𑀕𑀺𑀓𑀭𑀡𑀻𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑁂𑀳𑀺 𑀤𑁆𑀯𑀻𑀳𑀺 𑀦𑀸𑀕𑀭𑀸𑀚𑀽𑀳𑀺 ¶ 𑀧𑀽𑀚𑀺𑀢𑁂 𑀧𑀣𑀯𑀻𑀢𑀮𑀕𑀢𑁂 𑀫𑀡𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀦𑀸𑀕𑁂𑀳𑀺 𑀤𑀺𑀩𑁆𑀩𑀦𑁆𑀦𑀧𑀸𑀦𑁂𑀳𑀺 𑀲𑀦𑁆𑀢𑀧𑁆𑀧𑀺𑀢𑁄 𑀚𑀮𑀣𑀮𑀦𑀺𑀯𑀸𑀲𑀺𑀦𑁄 𑀅𑀲𑀻𑀢𑀺𑀓𑁄𑀝𑀺𑀦𑀸𑀕𑁂 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀳𑀺 𑀦𑀫𑀲𑁆𑀲𑀺𑀢𑀼𑀁 𑀧𑀮𑁆𑀮𑀗𑁆𑀓𑀜𑁆𑀘 𑀭𑀸𑀚𑀸𑀬𑀢𑀦𑀧𑀸𑀤𑀧𑀜𑁆𑀘 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀫𑀕𑀫𑀸𑀲𑀺.

𑀢𑀢𑀺𑀬𑀫𑁆𑀧𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀅𑀝𑁆𑀞𑀫𑁂 𑀲𑀁𑀯𑀘𑁆𑀙𑀭𑁂 𑀫𑀳𑁄𑀤𑀭𑀫𑀸𑀢𑀼𑀮𑁂𑀦 𑀫𑀡𑀺𑀅𑀓𑁆𑀔𑀺𑀓𑀦𑀸𑀕𑀭𑀸𑀚𑁂𑀦𑀸𑀪𑀺𑀬𑀸𑀘𑀺𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀼𑀢𑁄 𑀓𑀮𑁆𑀬𑀸𑀡𑀻𑀧𑀤𑁂𑀲𑁂 𑀫𑀡𑀺𑀅𑀓𑁆𑀔𑀺𑀓𑀲𑁆𑀲 𑀪𑀯𑀦𑀫𑀼𑀧𑀕𑀦𑁆𑀢𑁆𑀯𑀸 𑀢𑀢𑁆𑀣 𑀫𑀸𑀧𑀺𑀢𑀭𑀼𑀘𑀺𑀭𑀭𑀢𑀦𑀫𑀡𑁆𑀟𑀧𑁂 𑀫𑀦𑁄𑀳𑀭𑀯𑀭𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀦𑀸𑀕𑀭𑀸𑀚𑁂𑀦 𑀤𑀺𑀩𑁆𑀩𑀦𑁆𑀦𑀧𑀸𑀦𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀦𑀸𑀕𑀫𑀸𑀡𑀯𑀺𑀓𑀕𑀡𑀧𑀭𑀺𑀯𑀼𑀢𑁂𑀦 𑀤𑀺𑀩𑁆𑀩𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀺𑀢𑁄 𑀢𑀢𑁆𑀣 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀬𑀸𑀲𑀦𑀸 𑀲𑀼𑀫𑀦𑀓𑀽𑀝𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀼𑀪𑀺𑀬𑀗𑁆𑀕𑀡𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀓𑀮𑁆𑀬𑀸𑀡𑀻𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑁂 𑀘 𑀣𑀽𑀧𑀸𑀭𑀸𑀫𑀝𑁆𑀞𑀸𑀦𑁂 𑀘 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑁂 𑀘 𑀲𑀲𑀸𑀯𑀓𑁄 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀺𑀮𑀸𑀘𑁂𑀢𑀺𑀬𑀝𑁆𑀞𑀸𑀦𑁂𑀬𑁂𑀯 𑀞𑀢𑁆𑀯𑀸 𑀤𑁂𑀯𑀦𑀸𑀕𑁂 𑀲𑀫𑀦𑀼𑀲𑀸𑀲𑀺𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀫𑀕𑀫𑀸𑀲𑀺. 𑀏𑀯𑀁 𑀪𑀕𑀯𑀸 𑀥𑀭𑀫𑀸𑀦𑀓𑀸𑀮𑁂𑀧𑀺 𑀇𑀫𑀁 𑀤𑀻𑀧𑀁 𑀢𑀺𑀓𑁆𑀔𑀢𑁆𑀢𑀼𑀁 𑀆𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀢𑀤𑁂𑀯 𑀢𑀺𑀓𑁆𑀔𑀢𑁆𑀢𑀼𑀫𑀸𑀕𑀫𑀦𑀁 𑀲𑀗𑁆𑀔𑁂𑀧𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀧𑀞𑀫𑀁 𑀬𑀓𑁆𑀔𑀤𑀫𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀭𑀓𑁆𑀔𑀁 𑀓𑀭𑁄𑀦𑁆𑀢𑁄𑀢𑀺 𑀬𑀓𑁆𑀔𑀸𑀦𑀁 𑀧𑀼𑀦 𑀅𑀧𑀯𑀺𑀲𑀦𑀢𑁆𑀣𑀸𑀬 𑀭𑀓𑁆𑀔𑀁 𑀓𑀭𑁄𑀦𑁆𑀢𑁄. 𑀆𑀯𑀺𑀚𑁆𑀚𑀻𑀢𑀺 𑀲𑀫𑀦𑁆𑀢𑀢𑁄 𑀯𑀺𑀘𑀭𑀺. 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀦𑁆𑀢𑀺 𑀘𑀽𑀴𑁄𑀤𑀭𑀫𑀳𑁄𑀤𑀭𑀸𑀦𑀁. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀲𑀫𑀺𑀤𑁆𑀥𑀲𑀼𑀫𑀦𑁂𑀦 𑀦𑀸𑀫 𑀤𑁂𑀯𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀆𑀕𑀢𑁄, 𑀢𑀣𑀸𑀧𑀺 𑀧𑀘𑁆𑀙𑀸𑀲𑀫𑀡𑁂𑀦 𑀏𑀓𑁂𑀦𑀧𑀺 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀅𑀦𑀸𑀕𑀢𑀢𑁆𑀢𑀸 ‘‘𑀏𑀓𑀓𑁄𑀯 𑀆𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀦𑀼𑀭𑀽𑀧𑀲𑁆𑀲 𑀧𑀭𑀺𑀧𑀦𑁆𑀣𑀲𑁆𑀲 𑀯𑀺𑀳𑀢𑀢𑁆𑀢𑀸 ‘‘𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀭𑀜𑁆𑀜𑁄 𑀪𑀸𑀢𑀸𑀢𑀺 𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸. 𑀅𑀪𑀬𑁄𑀢𑀺 𑀫𑀢𑁆𑀢𑀸𑀪𑀬𑁄.

𑀅𑀦𑀼𑀴𑀸 𑀤𑁂𑀯𑀻𑀢𑀺 𑀭𑀜𑁆𑀜𑁄 𑀚𑁂𑀝𑁆𑀞𑀪𑀸𑀢𑀼𑀚𑀸𑀬𑀸 𑀅𑀦𑀼𑀴𑀸 𑀤𑁂𑀯𑀻. 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀻𑀢𑀺 𑀬𑀤𑀸 𑀳𑀺 𑀲𑁄 𑀓𑀓𑀼𑀲𑀦𑁆𑀥𑁄 𑀦𑀸𑀫 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀦𑀼𑀲𑁆𑀲𑁂 𑀧𑀚𑁆𑀚𑀭𑀓𑀸𑀪𑀺𑀪𑀽𑀢𑁂 𑀅𑀦𑀬𑀩𑁆𑀬𑀲𑀦𑀫𑀸𑀧𑀚𑁆𑀚𑀦𑁆𑀢𑁂 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀳𑀤𑀬𑁄 𑀇𑀫𑀁 𑀤𑀻𑀧𑀫𑀸𑀕𑀢𑁄, 𑀢𑀤𑀸 ¶ 𑀢𑀁 𑀭𑁄𑀕𑀪𑀬𑀁 𑀯𑀽𑀧𑀲𑀫𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑀸𑀭𑀳𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀫𑀫 𑀲𑀺𑀭𑀻𑀲𑀫𑀳𑀸𑀩𑁄𑀥𑀺𑀢𑁄 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀫𑀸𑀤𑀸𑀬 𑀭𑀼𑀘𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀇𑀥𑀸𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺 ¶ . 𑀲𑀸 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀔𑁂𑀫𑀯𑀢𑀻𑀭𑀸𑀚𑀥𑀸𑀦𑀺𑀬𑀸 𑀔𑁂𑀫𑀭𑀸𑀚𑀸𑀦𑀫𑀸𑀤𑀸𑀬 𑀫𑀳𑀸𑀩𑁄𑀥𑀺𑀫𑀼𑀧𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀸𑀬 𑀫𑀦𑁄𑀲𑀺𑀮𑀸𑀮𑁂𑀔𑀁 𑀔𑁂𑀫𑀭𑀸𑀚𑁂𑀦 𑀤𑀸𑀧𑁂𑀢𑁆𑀯𑀸 𑀢𑀁 𑀲𑀬𑀁 𑀙𑀺𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀞𑀺𑀢𑀁 𑀩𑁄𑀥𑀺𑀲𑀸𑀔𑀫𑀸𑀤𑀸𑀬 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀻𑀳𑀺 𑀘𑁂𑀯 𑀤𑁂𑀯𑀢𑀸𑀳𑀺 𑀘 𑀧𑀭𑀺𑀯𑀸𑀭𑀺𑀢𑀸 𑀇𑀤𑁆𑀥𑀺𑀬𑀸 𑀇𑀥𑀸𑀦𑁂𑀢𑁆𑀯𑀸 𑀢𑀣𑀸𑀕𑀢𑁂𑀦 𑀧𑀲𑀸𑀭𑀺𑀢𑁂 𑀤𑀓𑁆𑀔𑀺𑀡𑀳𑀢𑁆𑀣𑁂 𑀲𑀲𑀼𑀯𑀡𑁆𑀡𑀓𑀝𑀸𑀳𑀁 𑀫𑀳𑀸𑀩𑁄𑀥𑀺𑀁 𑀞𑀧𑁂𑀲𑀺. 𑀢𑀁 𑀢𑀣𑀸𑀕𑀢𑁄 𑀅𑀪𑀬𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀤𑀢𑁆𑀯𑀸 𑀢𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑀳𑀸𑀢𑀺𑀢𑁆𑀣𑀯𑀦’’𑀦𑁆𑀢𑀺 𑀧𑀜𑁆𑀜𑀸𑀢𑁂 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀓𑁄𑀡𑀸𑀕𑀫𑀦𑁄 𑀘 𑀪𑀕𑀯𑀸 𑀤𑀼𑀩𑁆𑀩𑀼𑀝𑁆𑀞𑀺𑀧𑀻𑀴𑀺𑀢𑁂 𑀤𑀻𑀧𑀯𑀸𑀲𑀺𑀦𑁄 𑀤𑀺𑀲𑁆𑀯𑀸 𑀇𑀫𑀁 𑀤𑀻𑀧𑀫𑀸𑀕𑀢𑁄 𑀢𑀁 𑀪𑀬𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀩𑁆𑀩𑀩𑁄𑀥𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 ‘‘𑀫𑀫 𑀉𑀤𑀼𑀫𑁆𑀩𑀭𑀫𑀳𑀸𑀩𑁄𑀥𑀺𑀢𑁄 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀫𑀸𑀤𑀸𑀬 𑀓𑀭𑀓𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀻 𑀇𑀥𑀸𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀲𑁄𑀪𑀭𑀸𑀚𑀥𑀸𑀦𑀺𑀬𑀸 𑀲𑁄𑀪𑀭𑀸𑀚𑀸𑀦𑀫𑀸𑀤𑀸𑀬 𑀫𑀳𑀸𑀩𑁄𑀥𑀺𑀫𑀼𑀧𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀸𑀬 𑀫𑀦𑁄𑀲𑀺𑀮𑀸𑀮𑁂𑀔𑀁 𑀲𑁄𑀪𑀭𑀸𑀚𑁂𑀦 𑀤𑀸𑀧𑁂𑀢𑁆𑀯𑀸 𑀢𑀁 𑀲𑀬𑀁 𑀙𑀺𑀚𑁆𑀚𑀺𑀢𑁆𑀯𑀸 𑀳𑁂𑀫𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀁 𑀩𑁄𑀥𑀺𑀲𑀸𑀔𑀫𑀸𑀤𑀸𑀬 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀼𑀭𑀕𑀡𑀧𑀭𑀺𑀯𑀼𑀢𑀸 𑀇𑀤𑁆𑀥𑀺𑀬𑀸 𑀇𑀥𑀸𑀳𑀭𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀧𑀲𑀸𑀭𑀺𑀢𑀤𑀓𑁆𑀔𑀺𑀡𑀧𑀸𑀡𑀺𑀢𑀮𑁂 𑀲𑀳𑁂𑀫𑀓𑀝𑀸𑀳𑀁 𑀫𑀳𑀸𑀩𑁄𑀥𑀺𑀁 𑀞𑀧𑁂𑀲𑀺. 𑀢𑀁 𑀢𑀣𑀸𑀕𑀢𑁄 𑀲𑀫𑀺𑀤𑁆𑀥𑀲𑁆𑀲 𑀭𑀜𑁆𑀜𑁄 𑀤𑀢𑁆𑀯𑀸 𑀢𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑀳𑀸𑀦𑀸𑀕𑀯𑀦’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑁂 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂 𑀫𑀳𑀸𑀩𑁄𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀓𑀲𑁆𑀲𑀧𑁄𑀧𑀺 𑀘 𑀪𑀕𑀯𑀸 𑀉𑀧𑀝𑁆𑀞𑀺𑀢𑀭𑀸𑀚𑀽𑀧𑀭𑀸𑀚𑀬𑀼𑀤𑁆𑀥𑁂𑀦 𑀧𑀸𑀡𑀺𑀦𑁄 𑀯𑀺𑀦𑀸𑀲𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬 𑀘𑁄𑀤𑀺𑀢𑁄 𑀇𑀫𑀁 𑀤𑀻𑀧𑀫𑀸𑀕𑀦𑁆𑀢𑁆𑀯𑀸 𑀢𑀁 𑀓𑀮𑀳𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑀁 𑀧𑀸𑀧𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀫𑀫 𑀦𑀺𑀕𑁆𑀭𑁄𑀥𑀫𑀳𑀸𑀩𑁄𑀥𑀺𑀢𑁄 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀫𑀸𑀤𑀸𑀬 𑀲𑀼𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑀻 𑀇𑀥𑀸𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑀸 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀯𑀺𑀤𑀺𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀩𑀸𑀭𑀸𑀡𑀲𑀻𑀭𑀸𑀚𑀥𑀸𑀦𑀺𑀬𑀸 ¶ 𑀩𑁆𑀭𑀳𑁆𑀫𑀤𑀢𑁆𑀢𑀭𑀸𑀚𑀸𑀦𑀫𑀸𑀤𑀸𑀬 𑀫𑀳𑀸𑀩𑁄𑀥𑀺𑀫𑀼𑀧𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀸𑀬 𑀫𑀦𑁄𑀲𑀺𑀮𑀸𑀮𑁂𑀔𑀁 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀤𑀸𑀧𑁂𑀢𑁆𑀯𑀸 𑀢𑀁 𑀲𑀬𑀁 𑀙𑀺𑀚𑁆𑀚𑀺𑀢𑁆𑀯𑀸 𑀓𑀦𑀓𑀓𑀝𑀸𑀳𑁂 𑀞𑀺𑀢𑀁 𑀩𑁄𑀥𑀺𑀲𑀸𑀔𑀫𑀸𑀤𑀸𑀬 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀦𑀻𑀧𑀭𑀺𑀯𑀸𑀭𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑀸 𑀇𑀤𑁆𑀥𑀺𑀬𑀸 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀫𑀼𑀦𑀺𑀦𑁆𑀤𑁂𑀦 𑀧𑀲𑀸𑀭𑀺𑀢𑁂 𑀤𑀓𑁆𑀔𑀺𑀡𑀓𑀭𑀢𑀮𑁂 𑀲𑀲𑀼𑀯𑀡𑁆𑀡𑀓𑀝𑀸𑀳𑀁 𑀫𑀳𑀸𑀩𑁄𑀥𑀺𑀁 𑀞𑀧𑁂𑀲𑀺. 𑀢𑀁 𑀪𑀕𑀯𑀸 𑀚𑀬𑀦𑁆𑀢𑀭𑀜𑁆𑀜𑁄 𑀤𑀢𑁆𑀯𑀸 𑀢𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀫𑀳𑀸𑀲𑀸𑀮𑀯𑀦’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑁂 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂 𑀫𑀳𑀸𑀩𑁄𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀩𑁄𑀥𑀺𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳 ‘‘𑀇𑀫𑀲𑁆𑀫𑀺𑀜𑁆𑀘 𑀫𑀳𑀸𑀭𑀸𑀚 𑀤𑀻𑀧𑁂 𑀧𑀼𑀭𑀺𑀫𑀓𑀸𑀦𑀁 𑀢𑀺𑀡𑁆𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀩𑁄𑀥𑀺 𑀧𑀢𑀺𑀝𑁆𑀞𑀸𑀲𑀻’’𑀢𑀺.

𑀲𑀭𑀲𑀭𑀁𑀲𑀺𑀚𑀸𑀮𑀯𑀺𑀲𑁆𑀲𑀚𑁆𑀚𑀦𑀓𑁂𑀦𑀸𑀢𑀺 ¶ 𑀲𑀺𑀦𑀺𑀤𑁆𑀥𑀢𑀸𑀬 𑀭𑀲𑀯𑀦𑁆𑀢𑀁 𑀑𑀚𑀯𑀦𑁆𑀢𑀁 𑀅𑀪𑀺𑀦𑀯𑀭𑀁𑀲𑀺𑀚𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦. 𑀅𑀣 𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀭𑀡𑀢𑁄 𑀲𑀭𑀲𑀁 𑀲𑀚𑀻𑀯𑀁 𑀚𑀻𑀯𑀫𑀸𑀦𑀁 𑀯𑀺𑀬 𑀭𑀁𑀲𑀺𑀚𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦. 𑀅𑀣 𑀯𑀸 𑀲𑀭𑀲𑀓𑀸𑀮𑁂 𑀥𑀭𑀫𑀸𑀦𑀓𑀸𑀮𑁂 𑀩𑀼𑀤𑁆𑀥𑁂𑀦 𑀯𑀺𑀬 𑀭𑀁𑀲𑀺𑀚𑀸𑀮𑀁 𑀫𑀼𑀜𑁆𑀘𑀦𑁆𑀢𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺. 𑀏𑀓𑀤𑀺𑀯𑀲𑁂𑀦𑁂𑀯 𑀅𑀕𑀫𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀻𑀢𑀺 𑀅𑀢𑁆𑀢𑀦𑁄 𑀧𑀭𑀺𑀘𑀸𑀭𑀺𑀓𑁂𑀳𑀺 𑀧𑀜𑁆𑀘𑀳𑀺 𑀓𑀜𑁆𑀜𑀸𑀲𑀢𑁂𑀳𑀺. 𑀉𑀧𑀲𑁆𑀲𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀓𑀸𑀭𑀸𑀧𑁂𑀢𑁆𑀯𑀸. 𑀅𑀧𑁆𑀧𑁂𑀲𑀻𑀢𑀺 𑀮𑁂𑀔𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀯𑀜𑁆𑀘 𑀅𑀯𑁄𑀘𑀸𑀢𑀺 𑀭𑀸𑀚𑀲𑀦𑁆𑀤𑁂𑀲𑀁 𑀅𑀧𑁆𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀫𑀼𑀔𑀲𑀸𑀲𑀦𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀏𑀯𑀁 𑀅𑀯𑁄𑀘. 𑀉𑀤𑀺𑀓𑁆𑀔𑀢𑀻𑀢𑀺 𑀅𑀧𑁂𑀓𑁆𑀔𑀢𑀺 𑀧𑀢𑁆𑀣𑁂𑀢𑀺.

𑀙𑀺𑀦𑁆𑀦𑀳𑀢𑁆𑀣𑀁 𑀯𑀺𑀬𑀸𑀢𑀺 𑀙𑀺𑀦𑁆𑀦𑀳𑀢𑁆𑀣𑀯𑀦𑁆𑀢𑀁 𑀯𑀺𑀬. 𑀙𑀺𑀦𑁆𑀦𑀸 𑀳𑀢𑁆𑀣𑀸 𑀏𑀢𑀲𑁆𑀲𑀸𑀢𑀺 𑀙𑀺𑀦𑁆𑀦𑀳𑀢𑁆𑀣𑁄𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀧𑀩𑁆𑀩𑀚𑁆𑀚𑀸𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀧𑀩𑁆𑀩𑀚𑁆𑀚𑀸𑀪𑀺𑀫𑀼𑀔𑀸, 𑀧𑀩𑁆𑀩𑀚𑁆𑀚𑀸𑀬 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑀸 ‘‘𑀓𑀤𑀸 𑀦𑀼 𑀔𑁄 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀁 𑀧𑀝𑀺𑀫𑀸𑀦𑁂𑀢𑀻𑀢𑀺 𑀫𑀁 𑀉𑀤𑀺𑀓𑁆𑀔𑀢𑀺. 𑀲𑀢𑁆𑀣𑁂𑀦 𑀖𑀸𑀢𑀁 𑀦 𑀅𑀭𑀳𑀢𑀻𑀢𑀺 𑀅𑀲𑀢𑁆𑀣𑀖𑀸𑀢𑀸𑀭𑀳𑀁. 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀦𑁆𑀢𑀺 𑀳𑀺𑀫𑀧𑀼𑀡𑁆𑀡𑀯𑀮𑀸𑀳𑀓𑀕𑀩𑁆𑀪𑀁. 𑀧𑀸𑀝𑀺𑀳𑀸𑀭𑀺𑀬𑀯𑀲𑁂𑀦 𑀚𑀸𑀢𑀁 𑀳𑀺𑀫𑀫𑁂𑀯 ‘‘𑀯𑀮𑀸𑀳𑀓𑀕𑀩𑁆𑀪’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀤𑁄𑀡𑀫𑀢𑁆𑀢𑀸𑀢𑀺 𑀫𑀕𑀥𑀦𑀸𑀴𑀺𑀬𑀸 𑀲𑁄𑀴𑀲𑀦𑀸𑀴𑀺𑀧𑁆𑀧𑀫𑀸𑀡𑀸.

𑀫𑀕𑁆𑀕𑀦𑁆𑀢𑀺 𑀲𑀢𑁆𑀢𑀬𑁄𑀚𑀦𑀺𑀓𑀁 𑀫𑀕𑁆𑀕𑀁. 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸𑀢𑀺 𑀲𑁄𑀥𑀸𑀧𑁂𑀢𑁆𑀯𑀸, 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺 𑀳𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀩𑀳𑀮𑀯𑀺𑀧𑀼𑀮𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀸𑀭𑀯𑀡𑁆𑀡𑀦𑁆𑀢𑀺 𑀭𑀜𑁆𑀜𑁄 𑀧𑀓𑀢𑀺𑀲𑀼𑀯𑀡𑁆𑀡𑀓𑀸𑀭𑀯𑀡𑁆𑀡𑀁. 𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀦𑁆𑀢𑀺 𑀦𑀯𑀳𑀢𑁆𑀣𑀧𑁆𑀧𑀫𑀸𑀡𑁄 𑀧𑀭𑀺𑀓𑁆𑀔𑁂𑀧𑁄 𑀅𑀲𑁆𑀲𑀸𑀢𑀺 𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀁, 𑀧𑀭𑀺𑀓𑁆𑀔𑁂𑀧𑀢𑁄 ¶ 𑀦𑀯𑀳𑀢𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀜𑁆𑀘𑀳𑀢𑁆𑀣𑀼𑀩𑁆𑀩𑁂𑀥’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀳𑀢𑁆𑀣𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀯𑀺𑀢𑁆𑀣𑀸𑀭𑀁. 𑀲𑀫𑀼𑀲𑁆𑀲𑀺𑀢𑀥𑀚𑀧𑀝𑀸𑀓𑀦𑁆𑀢𑀺 𑀉𑀲𑁆𑀲𑀸𑀧𑀺𑀢𑀦𑀻𑀮𑀧𑀻𑀢𑀸𑀤𑀺𑀯𑀺𑀯𑀺𑀥𑀥𑀚𑀧𑀝𑀸𑀓𑀁. 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀭𑀘𑀺𑀢𑀦𑀸𑀦𑀸𑀭𑀢𑀦𑁂𑀳𑀺 𑀲𑀼𑀯𑀺𑀘𑀺𑀢𑁆𑀢𑀁. 𑀅𑀦𑁂𑀓𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀧𑀲𑀦𑁆𑀦𑀚𑀦𑀧𑀽𑀚𑀺𑀢𑁂𑀳𑀺 𑀳𑀢𑁆𑀣𑀽𑀧𑀕𑀸𑀤𑀻𑀳𑀺 𑀦𑀸𑀦𑀸𑀮𑀗𑁆𑀓𑀸𑀭𑁂𑀳𑀺 𑀲𑀚𑁆𑀚𑀺𑀢𑀁. 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀦𑁆𑀢𑀺 𑀉𑀧𑀳𑀸𑀭𑀯𑀲𑁂𑀦 𑀉𑀧𑀦𑀻𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑁂𑀳𑀺 𑀚𑀮𑀣𑀮𑀧𑀼𑀧𑁆𑀨𑁂𑀳𑀺 𑀆𑀓𑀺𑀡𑁆𑀡𑀁. 𑀅𑀦𑁂𑀓𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑀦𑁆𑀢𑀺 𑀆𑀢𑀪𑀯𑀺𑀢𑀢𑀸𑀤𑀺𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀗𑁆𑀖𑁄𑀲𑀺𑀢𑀁. 𑀅𑀯𑀲𑁂𑀲𑀁 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀻𑀢𑀺 𑀏𑀢𑁆𑀣 ‘‘𑀳𑀦𑁆𑀤, 𑀫𑀳𑀸𑀭𑀸𑀚, 𑀢𑀬𑀸 𑀕𑀳𑁂𑀢𑀩𑁆𑀩𑀸 𑀅𑀬𑀁 𑀲𑀸𑀔𑀸, 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑁄 𑀅𑀬𑀁 𑀔𑀦𑁆𑀥𑁄, 𑀦 𑀫𑀬𑀁 𑀢𑀬𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀸 𑀯𑀺𑀬 𑀅𑀯𑀲𑁂𑀲𑀸 𑀲𑀸𑀔𑀸 𑀲𑀢𑁆𑀣𑀼 𑀢𑁂𑀚𑀲𑀸 𑀅𑀤𑀲𑁆𑀲𑀦𑀫𑀕𑀫𑀁𑀲𑀽𑀢𑀺 𑀯𑀤𑀦𑁆𑀢𑀺. 𑀕𑀯𑀓𑁆𑀔𑀚𑀸𑀮𑀲𑀤𑀺𑀲𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀚𑀸𑀮𑀓𑀯𑀸𑀝𑀲𑀤𑀺𑀲𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀘𑁂𑀮𑀼𑀓𑁆𑀔𑁂𑀧𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺𑀁𑀲𑀽𑀢𑀺 𑀢𑁂𑀲𑀁 𑀢𑁂𑀲𑀁 𑀚𑀦𑀸𑀦𑀁 𑀲𑀻𑀲𑁄𑀧𑀭𑀺 𑀪𑀫𑀦𑁆𑀢𑀸𑀦𑀁 𑀉𑀢𑁆𑀢𑀭𑀸𑀲𑀗𑁆𑀕𑀘𑁂𑀮𑀸𑀦𑀁 𑀉𑀓𑁆𑀔𑁂𑀧𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀺𑀁𑀲𑀽𑀢𑀺 ¶ 𑀅𑀢𑁆𑀣𑁄. 𑀫𑀽𑀮𑀲𑀢𑁂𑀦𑀸𑀢𑀺 𑀤𑀲𑀲𑀼 𑀮𑁂𑀔𑀸𑀲𑀼 𑀏𑀓𑁂𑀓𑀸𑀬 𑀤𑀲 𑀤𑀲 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀫𑀽𑀮𑀲𑀢𑁂𑀦. 𑀤𑀲 𑀫𑀳𑀸𑀫𑀽𑀮𑀸𑀢𑀺 𑀧𑀞𑀫𑀮𑁂𑀔𑀸𑀬 𑀦𑀺𑀓𑁆𑀔𑀦𑁆𑀢𑀤𑀲𑀫𑀳𑀸𑀫𑀽𑀮𑀸𑀦𑀺.

𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀨𑀮𑀺𑀁𑀲𑀽𑀢𑀺 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀣𑀦𑀺𑀁𑀲𑀼. 𑀤𑁂𑀯𑀤𑀼𑀦𑁆𑀤𑀼𑀪𑀻𑀢𑀺 𑀘 𑀦 𑀏𑀢𑁆𑀣 𑀓𑀸𑀘𑀺 𑀪𑁂𑀭𑀻 𑀅𑀥𑀺𑀧𑁆𑀧𑁂𑀢𑀸, 𑀅𑀣 𑀔𑁄 𑀉𑀧𑁆𑀧𑀸𑀢𑀪𑀸𑀯𑁂𑀦 𑀆𑀓𑀸𑀲𑀕𑀢𑁄 𑀦𑀺𑀕𑁆𑀖𑁄𑀲𑀲𑀤𑁆𑀤𑁄. 𑀤𑁂𑀯𑁄𑀢𑀺 𑀳𑀺 𑀫𑁂𑀖𑁄. 𑀢𑀲𑁆𑀲 𑀳𑀺 𑀅𑀘𑁆𑀙𑀪𑀸𑀯𑁂𑀦 𑀆𑀓𑀸𑀲𑀯𑀡𑁆𑀡𑀲𑁆𑀲 𑀤𑁂𑀯𑀲𑁆𑀲𑀸𑀪𑀸𑀯𑁂𑀦 𑀲𑀼𑀓𑁆𑀔𑀕𑀚𑁆𑀚𑀺𑀢𑀲𑀜𑁆𑀜𑀺𑀢𑁂 𑀲𑀤𑁆𑀤𑁂 𑀦𑀺𑀘𑁆𑀙𑀭𑀦𑁆𑀢𑁂 𑀤𑁂𑀯𑀤𑀼𑀦𑁆𑀤𑀼𑀪𑀻𑀢𑀺 𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀨𑀮𑀺𑀁𑀲𑀽𑀢𑀺 𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀩𑁆𑀩𑀢𑀸𑀦𑀁 𑀦𑀘𑁆𑀘𑁂𑀳𑀻𑀢𑀺 𑀧𑀣𑀯𑀻𑀓𑀫𑁆𑀧𑁂𑀦 𑀇𑀢𑁄 𑀘𑀺𑀢𑁄 𑀘 𑀪𑀫𑀦𑁆𑀢𑀸𑀦𑀁 𑀧𑀩𑁆𑀩𑀢𑀸𑀦𑀁 𑀦𑀘𑁆𑀘𑁂𑀳𑀺. 𑀬𑀓𑁆𑀔𑀸𑀦𑀁 𑀳𑀺𑀗𑁆𑀓𑀸𑀭𑁂𑀳𑀻𑀢𑀺 𑀯𑀺𑀫𑁆𑀳𑀬𑀚𑀸𑀢𑀸𑀦𑀁 𑀬𑀓𑁆𑀔𑀸𑀦𑀁 𑀯𑀺𑀫𑁆𑀳𑀬𑀧𑁆𑀧𑀓𑀸𑀲𑀦𑀯𑀲𑁂𑀦 𑀧𑀯𑀢𑁆𑀢𑁂𑀳𑀺 𑀳𑀺𑀗𑁆𑀓𑀸𑀭𑀲𑀤𑁆𑀤𑁂𑀳𑀺. 𑀬𑀓𑁆𑀔𑀸 𑀳𑀺 𑀯𑀺𑀫𑁆𑀳𑀬𑀚𑀸𑀢𑀸 ‘‘𑀳𑀺𑀁 𑀳𑀺’’𑀦𑁆𑀢𑀺 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀺. 𑀣𑀼𑀢𑀺𑀚𑀧𑁆𑀧𑁂𑀳𑀻𑀢𑀺 𑀧𑀲𑀁𑀲𑀸𑀯𑀘𑀦𑁂𑀳𑀺. 𑀩𑁆𑀭𑀳𑁆𑀫𑀸𑀦𑀁 𑀅𑀧𑁆𑀨𑁄𑀝𑀦𑁂𑀳𑀻𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀩𑀸𑀳𑀸𑀬𑀁 𑀧𑀳𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀧𑁆𑀨𑁄𑀝𑀦𑁂𑀳𑀺. 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑀺 𑀩𑁆𑀭𑀳𑁆𑀫𑀸𑀦𑁄 𑀯𑀸𑀫𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀩𑀸𑀳𑀸𑀬𑀁 𑀧𑀳𑀸𑀭𑀁 𑀤𑁂𑀦𑁆𑀢𑀺. 𑀏𑀓𑀓𑁄𑀮𑀸𑀳𑀮𑀦𑁆𑀢𑀺 𑀏𑀓𑀢𑁄 𑀧𑀯𑀢𑁆𑀢𑀓𑁄𑀮𑀸𑀳𑀮𑀁 ¶ . 𑀏𑀓𑀦𑀺𑀦𑁆𑀦𑀸𑀤𑀦𑁆𑀢𑀺 𑀏𑀓𑀢𑁄 𑀧𑀯𑀢𑁆𑀢𑀦𑀺𑀕𑁆𑀖𑁄𑀲𑀁. 𑀨𑀮𑀢𑁄 𑀦𑀺𑀓𑁆𑀔𑀦𑁆𑀢𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀉𑀚𑀼𑀓𑀁 𑀉𑀕𑁆𑀕𑀦𑁆𑀢𑁆𑀯𑀸 𑀑𑀦𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀼𑀔𑀯𑀝𑁆𑀝𑀺𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀻𑀢𑀺 𑀆𑀳 ‘‘𑀲𑀓𑀮𑀘𑀓𑁆𑀓𑀯𑀸𑀴𑀁 𑀭𑀢𑀦𑀕𑁄𑀧𑀸𑀦𑀲𑀻𑀯𑀺𑀦𑀤𑁆𑀥𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸’’𑀢𑀺. 𑀢𑀗𑁆𑀔𑀡𑀢𑁄 𑀘 𑀧𑀦 𑀧𑀪𑀼𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀫𑀳𑀸𑀩𑁄𑀥𑀺𑀲𑁆𑀲 𑀙𑀩𑁆𑀩𑀡𑁆𑀡𑀭𑀲𑁆𑀫𑀻𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀓𑀸𑀮𑀢𑁄 𑀧𑀪𑀼𑀢𑀺. 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀲𑀼𑀯𑀡𑁆𑀡𑀓𑀝𑀸𑀳𑁂𑀦𑁂𑀯 𑀲𑀤𑁆𑀥𑀺𑀁 𑀉𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑁄𑀤𑀓𑀧𑀼𑀡𑁆𑀡𑀁 𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀞𑀫𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑁄𑀬𑁂𑀯 𑀳𑀺 𑀩𑁄𑀥𑀺 𑀧𑀘𑁆𑀙𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀅𑀘𑁆𑀙𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁄 𑀳𑀼𑀢𑁆𑀯𑀸 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀞𑀫𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀺, 𑀢𑀢𑁄 𑀳𑀺𑀫𑀕𑀩𑁆𑀪𑀲𑀢𑁆𑀢𑀸𑀳𑀁 𑀅𑀪𑀺𑀲𑁂𑀓𑀲𑀢𑁆𑀢𑀸𑀳𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁄𑀬𑁂𑀯 𑀘 𑀫𑀳𑀸𑀯𑀁𑀲𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀏𑀯𑀁 𑀲𑀢𑁂𑀦 𑀫𑀽𑀮𑀸𑀦𑀁, 𑀢𑀢𑁆𑀣𑁂𑀲𑀸 𑀕𑀦𑁆𑀥𑀓𑀤𑁆𑀤𑀫𑁂;

𑀧𑀢𑀺𑀝𑁆𑀞𑀸𑀲𑀺 𑀫𑀳𑀸𑀩𑁄𑀥𑀺, 𑀧𑀲𑀸𑀤𑁂𑀦𑁆𑀢𑀻 𑀫𑀳𑀸𑀚𑀦𑀁.

‘‘𑀢𑀲𑁆𑀲𑀸 𑀔𑀦𑁆𑀥𑁄 𑀤𑀲𑀳𑀢𑁆𑀣𑁄, 𑀧𑀜𑁆𑀘 𑀲𑀸𑀔𑀸 𑀫𑀦𑁄𑀭𑀫𑀸;

𑀘𑀢𑀼𑀳𑀢𑁆𑀣𑀸 𑀘𑀢𑀼𑀳𑀢𑁆𑀣𑀸, 𑀤𑀲𑀟𑁆𑀠𑀨𑀮𑀫𑀡𑁆𑀟𑀺𑀢𑀸.

‘‘𑀲𑀳𑀲𑁆𑀲𑀦𑁆𑀢𑀼 𑀧𑀲𑀸𑀔𑀸𑀦𑀁, 𑀲𑀸𑀔𑀸𑀦𑀁 𑀢𑀸𑀲𑀫𑀸𑀲𑀺 𑀘;

𑀏𑀯𑀁 𑀆𑀲𑀺 𑀫𑀳𑀸𑀩𑁄𑀥𑀺, 𑀫𑀦𑁄𑀳𑀭𑀲𑀺𑀭𑀺𑀦𑁆𑀥𑀭𑀸.

‘‘𑀓𑀝𑀸𑀳𑀫𑁆𑀳𑀺 ¶ 𑀫𑀳𑀸𑀩𑁄𑀥𑀺, 𑀧𑀢𑀺𑀝𑁆𑀞𑀺𑀢𑀓𑁆𑀔𑀡𑁂 𑀫𑀳𑀻;

𑀅𑀓𑀫𑁆𑀧𑀺 𑀧𑀸𑀝𑀺𑀳𑀻𑀭𑀸𑀦𑀺, 𑀅𑀳𑁂𑀲𑀼𑀁 𑀯𑀺𑀯𑀺𑀥𑀸𑀦𑀺 𑀘.

‘‘𑀲𑀬𑀁 𑀦𑀸𑀤𑁂𑀳𑀺 𑀢𑀽𑀭𑀺𑀬𑀸𑀦𑀁, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀸𑀥𑀼𑀓𑀸𑀭𑀦𑀺𑀦𑁆𑀦𑀸𑀤𑁂𑀳𑀺, 𑀤𑁂𑀯𑀩𑁆𑀭𑀳𑁆𑀫𑀕𑀡𑀲𑁆𑀲 𑀘.

‘‘𑀫𑁂𑀖𑀸𑀦𑀁 𑀫𑀺𑀕𑀧𑀓𑁆𑀔𑀻𑀦𑀁, 𑀬𑀓𑁆𑀔𑀸𑀤𑀻𑀦𑀁 𑀭𑀯𑁂𑀳𑀺 𑀘;

𑀭𑀯𑁂𑀳𑀺 𑀘 𑀫𑀳𑀻𑀓𑀫𑁆𑀧𑁂, 𑀏𑀓𑀓𑁄𑀮𑀸𑀳𑀮𑀁 𑀅𑀳𑀼.

‘‘𑀩𑁄𑀥𑀺𑀬𑀸 𑀨𑀮𑀧𑀢𑁆𑀢𑁂𑀳𑀺, 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀲𑀼𑀪𑀸;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀁, 𑀲𑀓𑀮𑀁 𑀲𑁄𑀪𑀬𑀺𑀁𑀲𑀼 𑀘.

‘‘𑀲𑀓𑀝𑀸𑀳𑀸 𑀫𑀳𑀸𑀩𑁄𑀥𑀺, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀢𑀢𑁄 𑀦𑀪𑀁;

𑀅𑀝𑁆𑀞𑀸𑀲𑀺 𑀳𑀺𑀫𑀕𑀩𑁆𑀪𑀫𑁆𑀳𑀺, 𑀲𑀢𑁆𑀢𑀸𑀳𑀸𑀦𑀺 𑀅𑀤𑀲𑁆𑀲𑀦𑀸’’𑀢𑀺.

𑀢𑀲𑁆𑀫𑀸 ¶ 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑁄𑀬𑁂𑀯 𑀩𑁄𑀥𑀺 𑀓𑀝𑀸𑀳𑁂𑀦𑁂𑀯 𑀲𑀤𑁆𑀥𑀺 𑀉𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀳𑁂𑀝𑁆𑀞𑀸 𑀧𑀦 𑀪𑀕𑀯𑀢𑁄 𑀅𑀥𑀺𑀝𑁆𑀞𑀸𑀦𑀓𑁆𑀓𑀫𑀁 𑀤𑀲𑁆𑀲𑁂𑀦𑁆𑀢𑁂𑀦 𑀬𑀁 𑀯𑀼𑀢𑁆𑀢𑀁 𑁋

‘‘𑀪𑀕𑀯𑀸 𑀓𑀺𑀭 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀮𑀗𑁆𑀓𑀸𑀤𑀻𑀧𑁂 𑀫𑀳𑀸𑀩𑁄𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬 𑀅𑀲𑁄𑀓𑀫𑀳𑀸𑀭𑀸𑀚𑀸 𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑀢𑁆𑀣𑀁 𑀕𑀫𑀺𑀲𑁆𑀲𑀢𑀺, 𑀢𑀤𑀸 𑀫𑀳𑀸𑀩𑁄𑀥𑀺𑀲𑁆𑀲 𑀤𑀓𑁆𑀔𑀺𑀡𑀲𑀸𑀔𑀸 𑀲𑀬𑀫𑁂𑀯 𑀙𑀺𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀸𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀇𑀤𑀫𑁂𑀓𑀫𑀥𑀺𑀝𑁆𑀞𑀸𑀦𑀁.

‘‘𑀢𑀢𑁆𑀣 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀘 ‘𑀫𑀳𑀸𑀩𑁄𑀥𑀺 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀽’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀇𑀤𑀁 𑀤𑀼𑀢𑀺𑀬𑀫𑀥𑀺𑀝𑁆𑀞𑀸𑀦𑀁.

‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀢𑁄 𑀑𑀭𑀼𑀬𑁆𑀳 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀧𑀢𑁆𑀢𑁂𑀳𑀺 𑀘 𑀨𑀮𑁂𑀳𑀺 𑀘 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀇𑀤𑀁 𑀢𑀢𑀺𑀬𑀫𑀥𑀺𑀝𑁆𑀞𑀸𑀦’’𑀦𑁆𑀢𑀺.

𑀢𑀁 ¶ 𑀇𑀫𑀺𑀦𑀸 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀧𑀞𑀫𑀁 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀢𑁄 𑀑𑀭𑀼𑀬𑁆𑀳 𑀙𑀩𑁆𑀩𑀡𑁆𑀡𑀭𑀁𑀲𑀺𑀯𑀺𑀲𑁆𑀲𑀚𑁆𑀚𑀦𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀦𑀜𑁆𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦 𑀲𑀫𑁂𑀢𑀺. 𑀫𑀳𑀸𑀯𑀁𑀲𑁂 𑀧𑀦 𑀅𑀥𑀺𑀝𑁆𑀞𑀸𑀦𑁂𑀧𑀺 𑀧𑀞𑀫𑀁 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀳𑀦𑀁 𑀧𑀘𑁆𑀙𑀸𑀬𑁂𑀯 𑀙𑀩𑁆𑀩𑀡𑁆𑀡𑀭𑀁𑀲𑀺𑀯𑀺𑀲𑁆𑀲𑀚𑁆𑀚𑀦𑀁 𑀳𑀺𑀫𑀯𑀮𑀸𑀳𑀓𑀕𑀩𑁆𑀪𑀧𑀯𑀺𑀲𑀦𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁂𑀦 𑀚𑀺𑀦𑁂𑀦 𑀳𑀺;

𑀓𑀢𑀁 𑀫𑀳𑀸𑀅𑀥𑀺𑀝𑁆𑀞𑀸𑀦𑀁, 𑀧𑀜𑁆𑀘𑀓𑀁 𑀧𑀜𑁆𑀘𑀘𑀓𑁆𑀔𑀼𑀦𑀸.

‘‘𑀕𑀬𑁆𑀳𑀫𑀸𑀦𑀸 𑀫𑀳𑀸𑀩𑁄𑀥𑀺-𑀲𑀸𑀔𑀸𑀲𑁄𑀓𑁂𑀦 𑀤𑀓𑁆𑀔𑀺𑀡𑀸;

𑀙𑀺𑀚𑁆𑀚𑀺𑀢𑁆𑀯𑀸𑀦 𑀲𑀬𑀁𑀬𑁂𑀯, 𑀧𑀢𑀺𑀝𑁆𑀞𑀸𑀢𑀼 𑀓𑀝𑀸𑀳𑀓𑁂.

‘‘𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀸 𑀲𑀸𑀔𑀸, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀼𑀪𑀸;

𑀭𑀸𑀚𑀬𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀨𑀮𑀧𑀢𑁆𑀢𑁂𑀳𑀺 𑀫𑀼𑀜𑁆𑀘𑀢𑀼.

‘‘𑀲𑀲𑀼𑀯𑀡𑁆𑀡𑀓𑀝𑀸𑀳𑀸 𑀲𑀸, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀫𑀦𑁄𑀭𑀫𑀸;

𑀅𑀤𑀺𑀲𑁆𑀲𑀫𑀸𑀦𑀸 𑀲𑀢𑁆𑀢𑀸𑀳𑀁, 𑀳𑀺𑀫𑀕𑀩𑁆𑀪𑀫𑁆𑀳𑀺 𑀢𑀺𑀝𑁆𑀞𑀢𑀽’’𑀢𑀺.

𑀩𑁄𑀥𑀺𑀯𑀁𑀲𑁂𑀧𑀺 ¶ 𑀘 𑀅𑀬𑀫𑁂𑀯 𑀅𑀥𑀺𑀝𑁆𑀞𑀸𑀦𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀓𑁆𑀓𑀫𑁄 𑀬𑀣𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀳𑀺𑀫𑀜𑁆𑀘 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑁂𑀯 𑀧𑀯𑀺𑀲𑀺𑀁𑀲𑀽𑀢𑀺 𑀫𑀳𑀸𑀩𑁄𑀥𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁 𑀳𑀺𑀫𑀜𑁆𑀘 𑀩𑁄𑀥𑀺𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀘 𑀆𑀯𑀢𑁆𑀢𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀩𑁄𑀥𑀺𑀫𑁂𑀯 𑀧𑀯𑀺𑀲𑀺𑀁𑀲𑀼, 𑀩𑁄𑀥𑀺𑀧𑀯𑀺𑀝𑁆𑀞𑀸 𑀯𑀺𑀬 𑀳𑀼𑀢𑁆𑀯𑀸 𑀅𑀦𑁆𑀢𑀭𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀧𑀦 ‘‘𑀳𑀺𑀫𑀜𑁆𑀘 𑀭𑀁𑀲𑀺𑀬𑁄 𑀘𑀸’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀲𑀢𑀲𑁄𑀥𑀺𑀢𑀲𑀫𑁆𑀫𑀢𑁂 𑀧𑁄𑀭𑀸𑀡𑀧𑁄𑀢𑁆𑀣𑀓𑁂 𑀲𑁂𑀲𑁂𑀲𑀼 𑀘 𑀲𑀩𑁆𑀩𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀫𑀳𑀸𑀯𑀁𑀲𑁂𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀅𑀢𑀻𑀢𑁂 𑀢𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀲𑀩𑁆𑀩𑁂 𑀳𑀺𑀫𑀯𑀮𑀸𑀳𑀓𑀸;

𑀧𑀯𑀺𑀲𑀺𑀁𑀲𑀼 𑀫𑀳𑀸𑀩𑁄𑀥𑀺𑀁, 𑀲𑀩𑁆𑀩𑀸 𑀢𑀸 𑀭𑀁𑀲𑀺𑀬𑁄𑀧𑀺 𑀘𑀸’’𑀢𑀺.

𑀓𑁂𑀦𑀘𑀺 𑀧𑀦 ‘‘𑀧𑀜𑁆𑀘 𑀭𑀁𑀲𑀺𑀬𑁄’’𑀢𑀺 𑀧𑀸𑀞𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀤𑀺𑀲𑀸𑀳𑀺 𑀧𑀜𑁆𑀘 𑀭𑀲𑁆𑀫𑀺𑀬𑁄 𑀆𑀯𑀢𑁆𑀢𑀺𑀢𑁆𑀯𑀸𑀢𑀺 ¶ 𑀧𑀜𑁆𑀘𑀳𑀺 𑀨𑀮𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀜𑁆𑀘, 𑀢𑀸 𑀧𑀦 𑀙𑀩𑁆𑀩𑀡𑁆𑀡𑀸𑀯𑀸’’𑀢𑀺, 𑀢𑀁 𑀢𑀲𑁆𑀲 𑀲𑀫𑁆𑀫𑁄𑀳𑀯𑀺𑀚𑀫𑁆𑀪𑀺𑀢𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀧𑀼𑀡𑁆𑀡𑀔𑀦𑁆𑀥𑀲𑀸𑀔𑀸𑀧𑀲𑀸𑀔𑀧𑀜𑁆𑀘𑀨𑀮𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀧𑀭𑀺𑀧𑀼𑀡𑁆𑀡𑀔𑀦𑁆𑀥𑀲𑀸𑀔𑀸𑀧𑀲𑀸𑀔𑀸𑀳𑀺 𑀘𑁂𑀯 𑀧𑀜𑁆𑀘𑀳𑀺 𑀘 𑀨𑀮𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄, 𑀲𑀫𑀦𑁆𑀢𑀢𑁄 𑀯𑀺𑀪𑀽𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸𑀢𑀺 𑀅𑀦𑁄𑀢𑀢𑁆𑀢𑁄𑀤𑀓𑁂𑀦 𑀅𑀪𑀺𑀲𑁂𑀓𑀁 𑀤𑀢𑁆𑀯𑀸. 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀻𑀢𑀺 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀯𑀲𑀺.

𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀯𑀸𑀭𑀡𑀸𑀤𑀺𑀯𑀲𑁂𑀢𑀺 𑀅𑀲𑁆𑀲𑀬𑀼𑀚𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀼𑀡𑁆𑀡𑀫𑀺𑀬𑀁. 𑀘𑀸𑀢𑀼𑀤𑁆𑀤𑀲𑀻𑀉𑀧𑁄𑀲𑀣𑀢𑁆𑀢𑀸 𑀤𑁆𑀯𑀺𑀲𑀢𑁆𑀢𑀸𑀳𑁂 𑀚𑀸𑀢𑁂 𑀉𑀧𑁄𑀲𑀣𑁄 𑀲𑀫𑁆𑀧𑀢𑁆𑀢𑁄𑀢𑀺 𑀆𑀳 ‘‘𑀓𑀸𑀴𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀤𑀺𑀯𑀲𑁂’’𑀢𑀺, 𑀅𑀲𑁆𑀲𑀬𑀼𑀚𑀫𑀸𑀲𑀓𑀸𑀴𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀻𑀉𑀧𑁄𑀲𑀣𑁂𑀢𑀺 𑀅𑀢𑁆𑀣𑁄. 𑀧𑀸𑀘𑀻𑀦𑀫𑀳𑀸𑀲𑀸𑀮𑀫𑀽𑀮𑁂 𑀞𑀧𑁂𑀲𑀻𑀢𑀺 𑀦𑀕𑀭𑀲𑁆𑀲 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂 𑀚𑀸𑀢𑀲𑁆𑀲 𑀫𑀳𑀸𑀲𑀸𑀮𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀞𑀧𑁂𑀲𑀺. 𑀲𑀢𑁆𑀢𑀭𑀲𑀫𑁂 𑀤𑀺𑀯𑀲𑁂𑀢𑀺 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀓𑀢𑁆𑀢𑀺𑀓𑀙𑀡𑀧𑀽𑀚𑀁 𑀅𑀤𑁆𑀤𑀲𑀸𑀢𑀺 𑀓𑀢𑁆𑀢𑀺𑀓𑀙𑀡𑀯𑀲𑁂𑀦 𑀩𑁄𑀥𑀺𑀲𑁆𑀲 𑀓𑀭𑀺𑀬𑀫𑀸𑀦𑀁 𑀧𑀽𑀚𑀁 𑀲𑀼𑀫𑀦𑀲𑀸𑀫𑀡𑁂𑀭𑁄 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 𑀆𑀕𑀢𑁄 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀯 𑀘 𑀣𑁂𑀭𑁄 𑀩𑁄𑀥𑀺𑀆𑀳𑀭𑀡𑀢𑁆𑀣𑀁 𑀧𑁂𑀲𑁂𑀲𑀺.

𑀅𑀝𑁆𑀞𑀸𑀭𑀲 𑀤𑁂𑀯𑀢𑀸𑀓𑀼𑀮𑀸𑀦𑀻𑀢𑀺 𑀫𑀳𑀸𑀩𑁄𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀦𑀸𑀕𑀬𑀓𑁆𑀔𑀸𑀤𑀺𑀤𑁂𑀯𑀢𑀸𑀓𑀼𑀮𑀸𑀦𑀺 𑀤𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑀘𑁆𑀘𑀓𑀼𑀮𑀸𑀦𑀺 𑀩𑁄𑀥𑀺𑀲𑁆𑀲 𑀓𑀢𑁆𑀢𑀩𑁆𑀩𑀯𑀺𑀘𑀸𑀭𑀡𑀢𑁆𑀣𑀸𑀬 ¶ 𑀅𑀤𑀸𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀺 𑀮𑁄𑀓𑀲𑀫𑁆𑀫𑀢𑀢𑁆𑀢𑀸 𑀉𑀤𑀓𑀸𑀲𑀺𑀜𑁆𑀘𑀦𑀢𑁆𑀣𑀸𑀬 𑀅𑀤𑀸𑀲𑀺, 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑀸𑀦𑀺 𑀩𑁄𑀥𑀺𑀲𑁆𑀲 𑀓𑀢𑁆𑀢𑀩𑁆𑀩𑀧𑀽𑀚𑁄𑀧𑀓𑀭𑀡𑀕𑁄𑀧𑀦𑀢𑁆𑀣𑀸𑀬 𑀅𑀤𑀸𑀲𑀺. ‘‘𑀕𑁄𑀧𑀓𑀸 𑀭𑀸𑀚𑀓𑀫𑁆𑀫𑀺𑀦𑁄 𑀢𑀣𑀸 𑀢𑀭𑀘𑁆𑀙𑀸’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀕𑁄𑀧𑀓𑀓𑀼𑀮𑀸𑀦𑀺 𑀩𑁄𑀥𑀺𑀲𑀺𑀜𑁆𑀘𑀦𑀢𑁆𑀣𑀁 𑀔𑀻𑀭𑀥𑁂𑀦𑀼𑀧𑀸𑀮𑀦𑀢𑁆𑀣𑀸𑀬 𑀢𑀭𑀘𑁆𑀙𑀓𑀼𑀮𑀸𑀦𑀺 𑀓𑀸𑀮𑀺𑀗𑁆𑀕𑀓𑀼𑀮𑀸𑀦𑀺 𑀯𑀺𑀲𑁆𑀲𑀸𑀲𑀺𑀓𑀸𑀦𑀺 𑀧𑀥𑀸𑀦𑀫𑀦𑀼𑀲𑁆𑀲𑀓𑀼𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀮𑀺𑀗𑁆𑀕𑀓𑀼𑀮𑀸𑀦𑀻𑀢𑀺 𑀏𑀢𑁆𑀣 ‘‘𑀉𑀤𑀓𑀸𑀤𑀺𑀕𑀸𑀳𑀓𑀸 𑀓𑀸𑀮𑀺𑀗𑁆𑀕𑀸’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀓𑀮𑀺𑀗𑁆𑀕𑁂𑀲𑀼 𑀚𑀦𑀧𑀤𑁂 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀁 𑀓𑀸𑀮𑀺𑀗𑁆𑀕𑀓𑀼𑀮’’𑀦𑁆𑀢𑀺 𑀓𑁂𑀘𑀺. 𑀇𑀫𑀺𑀦𑀸 𑀧𑀭𑀺𑀯𑀸𑀭𑁂𑀦𑀸𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀛𑀸𑀝𑀯𑀺𑀁 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀭𑀸𑀚𑀸 𑀲𑀬𑀫𑁆𑀧𑀺 𑀫𑀳𑀸𑀩𑁄𑀥𑀺𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑁄 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀣𑀮𑀧𑀣𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀜𑁆𑀛𑀸𑀝𑀯𑀺𑀁 𑀦𑀸𑀫 𑀅𑀝𑀯𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀢𑀸𑀫𑀮𑀺𑀢𑁆𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑀸𑀫𑀮𑀺𑀢𑁆𑀢𑀺𑀁 𑀦𑀸𑀫 𑀢𑀺𑀢𑁆𑀣𑀁 𑀲𑀫𑁆𑀧𑀢𑁆𑀢𑁄. 𑀇𑀤𑀫𑀲𑁆𑀲 𑀢𑀢𑀺𑀬𑀦𑁆𑀢𑀺 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀺𑀝𑁆𑀞𑀺𑀢𑀫𑀳𑀸𑀩𑁄𑀥𑀺𑀲𑁆𑀲 𑀭𑀚𑁆𑀚𑀲𑀫𑁆𑀧𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁄 𑀧𑀼𑀩𑁆𑀩𑁂 𑀧𑀦𑁂𑀲 𑀏𑀓𑀯𑀸𑀭𑀁 𑀲𑀤𑁆𑀥𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑁂𑀦 𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀲𑀺𑀬𑁂𑀯, 𑀢𑀲𑁆𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀘𑀢𑀼𑀢𑁆𑀣𑀫𑀺𑀤𑀁 𑀭𑀚𑁆𑀚𑀲𑀫𑁆𑀧𑀤𑀸𑀦𑀁. 𑀫𑀳𑀸𑀩𑁄𑀥𑀺𑀁 𑀧𑀦 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀤𑀺𑀯𑀲𑁂 𑀭𑀚𑁆𑀚𑁂𑀦 𑀧𑀽𑀚𑁂𑀲𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀚𑁆𑀚𑀢𑁄 𑀉𑀧𑁆𑀧𑀦𑁆𑀦𑀁 𑀆𑀬𑀁 𑀕𑀳𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀧𑀽𑀚𑀁 𑀓𑀸𑀭𑁂𑀲𑀺.

𑀫𑀸𑀕𑀲𑀺𑀭𑀫𑀸𑀲𑀲𑁆𑀲𑀸𑀢𑀺 ¶ 𑀫𑀺𑀕𑀲𑀺𑀭𑀫𑀸𑀲𑀲𑁆𑀲. 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑁂. 𑀢𑀜𑁆𑀳𑀺 𑀓𑀡𑁆𑀳𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀧𑀯𑀢𑁆𑀢𑀫𑀸𑀦𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀦 𑀧𑀼𑀡𑁆𑀡𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀸 𑀧𑀼𑀡𑁆𑀡𑀫𑀻, 𑀢𑀸𑀯 𑀏𑀓𑁄 𑀫𑀸𑀲𑁄𑀢𑀺 𑀯𑁄𑀳𑀸𑀭𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀢𑁂𑀦 𑀯𑁄𑀳𑀸𑀭𑁂𑀦 ‘‘𑀤𑀼𑀢𑀺𑀬𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀢𑁆𑀣 𑀳𑀺 𑀓𑀡𑁆𑀳𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑀁 ‘‘𑀧𑀞𑀫𑀧𑀸𑀝𑀺𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀫𑀳𑀸𑀲𑀸𑀮𑀫𑀽𑀮𑁂 𑀤𑀺𑀦𑁆𑀦𑁂𑀳𑀺 𑀲𑁄𑀴𑀲𑀳𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀤𑀦𑁆𑀢𑀺. 𑀕𑀘𑁆𑀙𑀢𑀺 𑀯𑀢𑀭𑁂𑀢𑀺 𑀏𑀢𑁆𑀣 𑀅𑀭𑁂𑀢𑀺 𑀔𑁂𑀤𑁂. 𑀢𑁂𑀦𑁂𑀯𑀸𑀳 ‘‘𑀓𑀦𑁆𑀤𑀺𑀢𑁆𑀯𑀸’’𑀢𑀺, 𑀩𑁄𑀥𑀺𑀬𑀸 𑀅𑀤𑀲𑁆𑀲𑀦𑀁 𑀅𑀲𑀳𑀫𑀸𑀦𑁄 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀭𑀲𑀭𑀁𑀲𑀺𑀚𑀸𑀮𑀦𑁆𑀢𑀺 𑀏𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀩𑁄𑀥𑀺𑀲𑀫𑀸𑀭𑀼𑀴𑁆𑀳𑀸𑀢𑀺 𑀫𑀳𑀸𑀩𑁄𑀥𑀺𑀦𑀸 𑀲𑀫𑀸𑀭𑀼𑀴𑁆𑀳𑀸. 𑀧𑀲𑁆𑀲𑀢𑁄 𑀧𑀲𑁆𑀲𑀢𑁄𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄 ¶ . 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀧𑀓𑁆𑀔𑀦𑁆𑀢𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀤𑀓𑀢𑀮𑀁 𑀧𑀓𑁆𑀔𑀦𑁆𑀤𑀺. 𑀲𑀫𑀦𑁆𑀢𑀸 𑀬𑁄𑀚𑀦𑀦𑁆𑀢𑀺 𑀲𑀫𑀦𑁆𑀢𑀢𑁄 𑀏𑀓𑁂𑀓𑁂𑀦 𑀧𑀲𑁆𑀲𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀯𑀻𑀘𑀺𑀬𑁄 𑀯𑀽𑀧𑀲𑀦𑁆𑀢𑀸𑀢𑀺 𑀯𑀻𑀘𑀺𑀬𑁄 𑀦 𑀉𑀝𑁆𑀞𑀳𑀺𑀁𑀲𑀼, 𑀦𑀸𑀳𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀚𑁆𑀚𑀺𑀁𑀲𑀽𑀢𑀺 𑀯𑀺𑀭𑀯𑀺𑀁𑀲𑀼, 𑀦𑀸𑀤𑀁 𑀧𑀯𑀢𑁆𑀢𑀬𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀸𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀩𑁆𑀩𑀢𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀸 𑀤𑁂𑀯𑀢𑀸 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀼𑀧𑀡𑁆𑀡𑀭𑀽𑀧𑁂𑀦𑀸𑀢𑀺 𑀲𑀼𑀧𑀡𑁆𑀡𑀲𑀤𑀺𑀲𑁂𑀦 𑀭𑀽𑀧𑁂𑀦. 𑀦𑀸𑀕𑀓𑀼𑀮𑀸𑀦𑀺 𑀲𑀦𑁆𑀢𑀸𑀲𑁂𑀲𑀻𑀢𑀺 𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑀢𑁆𑀣𑀁 𑀆𑀕𑀢𑀸𑀦𑀺 𑀦𑀸𑀕𑀓𑀼𑀮𑀸𑀦𑀺 𑀲𑀦𑁆𑀢𑀸𑀲𑁂𑀲𑀺, 𑀢𑁂𑀲𑀁 𑀪𑀬𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀮𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀸 𑀳𑀺 𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀦𑀸𑀕𑀸 𑀫𑀳𑀸𑀩𑁄𑀥𑀺𑀁 𑀕𑀳𑁂𑀢𑀼𑀁 𑀯𑀸𑀢𑀯𑀲𑁆𑀲𑀦𑁆𑀥𑀓𑀸𑀭𑀸𑀤𑀻𑀳𑀺 𑀫𑀳𑀦𑁆𑀢𑀁 𑀯𑀺𑀓𑀼𑀩𑁆𑀩𑀦𑀁 𑀅𑀓𑀁𑀲𑀼. 𑀢𑀢𑁄 𑀲𑀗𑁆𑀖𑀫𑀺𑀢𑁆𑀢𑀢𑁆𑀣𑁂𑀭𑀻 𑀕𑀭𑀼𑀴𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀢𑁂𑀦 𑀕𑀭𑀼𑀴𑀭𑀽𑀧𑁂𑀦 𑀆𑀓𑀸𑀲𑀁 𑀧𑀽𑀭𑀬𑀫𑀸𑀦𑀸 𑀲𑀺𑀔𑀸𑀫𑀭𑀻𑀘𑀺𑀚𑀸𑀮𑁂𑀦 𑀕𑀕𑀦𑀁 𑀏𑀓𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀧𑀓𑁆𑀔𑀧𑁆𑀧𑀳𑀸𑀭𑀯𑀸𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀆𑀮𑁄𑀴𑁂𑀢𑁆𑀯𑀸 𑀲𑀁𑀯𑀝𑁆𑀝𑀚𑀮𑀥𑀺𑀦𑀸𑀤𑀲𑀤𑀺𑀲𑁂𑀦 𑀭𑀯𑁂𑀦 𑀦𑀸𑀕𑀸𑀦𑀁 𑀳𑀤𑀬𑀸𑀦𑀺 𑀪𑀺𑀦𑁆𑀤𑀦𑁆𑀢𑀻 𑀯𑀺𑀬 𑀢𑀸𑀲𑁂𑀢𑁆𑀯𑀸 𑀦𑀸𑀕𑁂 𑀧𑀮𑀸𑀧𑁂𑀲𑀺. 𑀢𑁂 𑀘 𑀉𑀢𑁆𑀭𑀲𑁆𑀢𑀭𑀽𑀧𑀸 𑀦𑀸𑀕𑀸 𑀆𑀕𑀦𑁆𑀢𑁆𑀯𑀸𑀢𑀺 𑀢𑁂 𑀘 𑀯𑀼𑀢𑁆𑀢𑀦𑀬𑁂𑀦 𑀉𑀢𑁆𑀢𑀸𑀲𑀺𑀢𑀸 𑀦𑀸𑀕𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸. 𑀢𑀁 𑀯𑀺𑀪𑀽𑀢𑀺𑀦𑁆𑀢𑀺 𑀢𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀲𑀗𑁆𑀔𑀸𑀢𑀁 𑀯𑀺𑀪𑀽𑀢𑀺𑀁, 𑀢𑀁 𑀅𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀣𑁂𑀭𑀻 𑀬𑀸𑀘𑀺𑀢𑁆𑀯𑀸𑀢𑀺 ‘‘𑀅𑀬𑁆𑀬𑁂, 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀫𑀼𑀘𑀮𑀺𑀦𑁆𑀤𑀦𑀸𑀕𑀭𑀸𑀚𑀲𑁆𑀲 𑀪𑁄𑀕𑀸𑀯𑀮𑀺𑀁 𑀅𑀢𑁆𑀢𑀦𑁄 𑀕𑀦𑁆𑀥𑀓𑀼𑀝𑀺𑀁 𑀓𑀢𑁆𑀯𑀸 𑀲𑀢𑁆𑀢𑀸𑀳𑀁 𑀢𑀲𑁆𑀲 𑀲𑀗𑁆𑀕𑀳𑀁 𑀅𑀓𑀸𑀲𑀺. 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀦𑁂𑀭𑀜𑁆𑀚𑀭𑀸𑀦𑀤𑀻𑀢𑀻𑀭𑁂 𑀅𑀢𑁆𑀢𑀦𑁄 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑀁 𑀫𑀳𑀸𑀓𑀸𑀴𑀦𑀸𑀕𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀉𑀭𑀼𑀯𑁂𑀮𑀦𑀸𑀕𑁂𑀦 𑀫𑀸𑀧𑀺𑀢𑀁 𑀯𑀺𑀲𑀥𑀽𑀫𑀤𑀳𑀦𑀁 𑀅𑀕𑀡𑁂𑀢𑁆𑀯𑀸 𑀢𑀲𑁆𑀲 𑀲𑀭𑀡𑀲𑀻𑀮𑀸𑀪𑀭𑀡𑀫𑀤𑀸𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀧𑁂𑀲𑁂𑀢𑁆𑀯𑀸 𑀦𑀦𑁆𑀤𑁄𑀧𑀦𑀦𑁆𑀤𑀦𑀸𑀕𑀭𑀸𑀚𑀸𑀦𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑀁 𑀅𑀓𑀸𑀲𑀺. 𑀏𑀯𑀁 𑀲𑁄 𑀮𑁄𑀓𑀦𑀸𑀬𑀓𑁄 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑀓𑁄, 𑀢𑁆𑀯𑀫𑁆𑀧𑀺 𑀦𑁄 𑀤𑁄𑀲𑀫𑀲𑁆𑀲𑀭𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀫𑀳𑀸𑀩𑁄𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀸𑀕𑀮𑁄𑀓𑀲𑁆𑀲 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀏𑀯𑀁 𑀬𑀸𑀘𑀺𑀢𑁆𑀯𑀸. 𑀫𑀳𑀸𑀩𑁄𑀥𑀺𑀯𑀺𑀬𑁄𑀕𑀤𑀼𑀓𑁆𑀔𑀺𑀢𑁄𑀢𑀺 𑀫𑀳𑀸𑀩𑁄𑀥𑀺𑀯𑀺𑀬𑁄𑀕𑁂𑀦 ¶ 𑀤𑀼𑀓𑁆𑀔𑀺𑀢𑁄 𑀲𑀜𑁆𑀚𑀸𑀢𑀫𑀸𑀦𑀲𑀺𑀓𑀤𑀼𑀓𑁆𑀔𑁄. 𑀓𑀦𑁆𑀤𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁 𑀭𑁄𑀤𑀺𑀢𑁆𑀯𑀸𑀢𑀺, 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦 𑀯𑀸 𑀧𑀼𑀦𑀧𑁆𑀧𑀼𑀦𑀁 𑀭𑁄𑀤𑀺𑀢𑁆𑀯𑀸, 𑀯𑀺𑀮𑀸𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀉𑀢𑁆𑀢𑀭𑀤𑁆𑀯𑀸𑀭𑀢𑁄𑀢𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀉𑀢𑁆𑀢𑀭𑀤𑁆𑀯𑀸𑀭𑀢𑁄. 𑀫𑀕𑁆𑀕𑀁 𑀲𑁄𑀥𑀸𑀧𑁂𑀢𑁆𑀯𑀸𑀢𑀺 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀁 𑀉𑀤𑁆𑀥𑀭𑀸𑀧𑀦𑀯𑀲𑁂𑀦 𑀫𑀕𑁆𑀕𑀁 𑀲𑁄𑀥𑀸𑀧𑁂𑀢𑁆𑀯𑀸. 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸𑀢𑀺 ¶ 𑀯𑀸𑀮𑀼𑀓𑀸𑀤𑀻𑀦𑀁 𑀑𑀓𑀺𑀭𑀸𑀧𑀦𑀸𑀤𑀺𑀯𑀲𑁂𑀦 𑀲𑀚𑁆𑀚𑁂𑀢𑁆𑀯𑀸. 𑀲𑀫𑀼𑀤𑁆𑀤𑀲𑀸𑀮𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀲𑀫𑀼𑀤𑁆𑀤𑀸𑀲𑀦𑁆𑀦𑀲𑀸𑀮𑀸𑀬 𑀯𑀢𑁆𑀣𑀼𑀪𑀽𑀢𑁂 𑀧𑀤𑁂𑀲𑁂. 𑀢𑀲𑁆𑀫𑀺𑀁 𑀓𑀺𑀭 𑀧𑀤𑁂𑀲𑁂 𑀞𑀺𑀢𑁂𑀳𑀺 𑀲𑀫𑀼𑀤𑁆𑀤𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀧𑀓𑀸𑀲𑁂𑀢𑀼𑀁 𑀢𑀢𑁆𑀣 𑀏𑀓𑀸 𑀲𑀸𑀮𑀸 𑀓𑀢𑀸. 𑀲𑀸 𑀦𑀸𑀫𑁂𑀦 ‘‘𑀲𑀫𑀼𑀤𑁆𑀤𑀸𑀲𑀦𑁆𑀦𑀲𑀸𑀮𑀸’’𑀢𑀺 𑀧𑀸𑀓𑀝𑀸 𑀚𑀸𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀫𑀼𑀤𑁆𑀤𑀸𑀲𑀦𑁆𑀦𑀲𑀸𑀮𑀸𑀬, 𑀞𑀸𑀦𑁂 𑀞𑀢𑁆𑀯𑀸 𑀫𑀳𑀡𑁆𑀡𑀯𑁂;

𑀆𑀕𑀘𑁆𑀙𑀦𑁆𑀢𑀁 𑀫𑀳𑀸𑀩𑁄𑀥𑀺𑀁, 𑀫𑀳𑀸𑀣𑁂𑀭𑀺𑀤𑁆𑀥𑀺𑀬𑀸𑀤𑁆𑀤𑀲.

‘‘𑀢𑀲𑁆𑀫𑀺𑀁 𑀞𑀸𑀦𑁂 𑀓𑀢𑀸 𑀲𑀸𑀮𑀸, 𑀧𑀓𑀸𑀲𑁂𑀢𑀼𑀁 𑀢𑀫𑀩𑁆𑀪𑀼𑀢𑀁;

‘𑀲𑀫𑀼𑀤𑁆𑀤𑀸𑀲𑀦𑁆𑀦𑀲𑀸𑀮𑀸’𑀢𑀺, 𑀦𑀸𑀫𑁂𑀦𑀸𑀲𑀺𑀥 𑀧𑀸𑀓𑀝𑀸’’𑀢𑀺.

𑀢𑀸𑀬 𑀯𑀺𑀪𑀽𑀢𑀺𑀬𑀸𑀢𑀺 𑀢𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀣𑁂𑀭𑀲𑁆𑀲𑀸𑀢𑀺 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲. 𑀫𑀕𑁆𑀕𑀲𑁆𑀲 𑀓𑀺𑀭 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀧𑀼𑀧𑁆𑀨𑁂𑀳𑀺 𑀓𑀽𑀝𑀸𑀕𑀸𑀭𑀲𑀤𑀺𑀲𑀲𑀡𑁆𑀞𑀸𑀦𑀸𑀦𑀺 𑀧𑀼𑀧𑁆𑀨𑀘𑁂𑀢𑀺𑀬𑀸𑀦𑀺 𑀓𑀸𑀭𑀸𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀦𑁆𑀢𑀭𑁂 𑀧𑀼𑀧𑁆𑀨𑀅𑀕𑁆𑀖𑀺𑀬𑀸𑀦𑀺 𑀞𑀧𑁂𑀦𑁆𑀢𑁄’’𑀢𑀺. 𑀆𑀕𑀢𑁄 𑀯𑀢𑀭𑁂𑀢𑀺 𑀏𑀢𑁆𑀣 𑀅𑀭𑁂𑀢𑀺 𑀧𑀲𑀁𑀲𑀸𑀬𑀁, 𑀲𑀸𑀥𑀼 𑀯𑀢𑀸𑀢𑀺 𑀅𑀢𑁆𑀣𑁄. 𑀲𑁄𑀴𑀲𑀳𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀻𑀢𑀺 𑀅𑀝𑁆𑀞𑀳𑀺 𑀅𑀫𑀘𑁆𑀘𑀓𑀼𑀮𑁂𑀳𑀺 𑀅𑀝𑁆𑀞𑀳𑀺 𑀘 𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀳𑀻𑀢𑀺 𑀏𑀯𑀁 𑀲𑁄𑀴𑀲𑀳𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀺. 𑀲𑀫𑀼𑀤𑁆𑀤𑀢𑀻𑀭𑁂 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸𑀢𑀺 𑀲𑀫𑀼𑀤𑁆𑀤𑀯𑁂𑀮𑀸𑀢𑀮𑁂 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁂 𑀭𑀫𑀡𑀻𑀬𑁂 𑀫𑀡𑁆𑀟𑀧𑁂 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸. 𑀏𑀯𑀁 𑀧𑀦 𑀓𑀢𑁆𑀯𑀸 𑀲𑀓𑀮𑀢𑀫𑁆𑀩𑀧𑀡𑁆𑀡𑀺𑀭𑀚𑁆𑀚𑁂𑀦 𑀫𑀳𑀸𑀩𑁄𑀥𑀺𑀁 𑀧𑀽𑀚𑁂𑀢𑁆𑀯𑀸 𑀲𑁄𑀴𑀲𑀦𑁆𑀦𑀁 𑀓𑀼𑀮𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀬𑀁 𑀤𑁄𑀯𑀸𑀭𑀺𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑀬𑁄 𑀤𑀺𑀯𑀲𑁂 𑀅𑀦𑁂𑀓𑀧𑁆𑀧𑀓𑀸𑀭𑀁 𑀧𑀽𑀚𑀁 𑀓𑀸𑀭𑀸𑀧𑁂𑀲𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀡𑀺 𑀤𑀺𑀯𑀲𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀭𑀚𑁆𑀚𑀁 𑀯𑀺𑀘𑀸𑀭𑁂𑀲𑀻𑀢𑀺 𑀭𑀚𑁆𑀚𑀁 𑀯𑀺𑀘𑀸𑀭𑁂𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑁄𑀴𑀲𑀳𑀺 𑀯𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑁂𑀳𑀺 𑀭𑀚𑁆𑀚𑀁 𑀯𑀺𑀘𑀸𑀭𑀸𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂𑀢𑀺 𑀫𑀺𑀕𑀲𑀺𑀭𑀫𑀸𑀲𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀤𑀲𑀫𑀺𑀬𑀁. 𑀅𑀦𑀼𑀧𑀼𑀩𑁆𑀩𑁂𑀦 𑀅𑀦𑀼𑀭𑀸𑀥𑀧𑀼𑀭𑀁 𑀲𑀫𑁆𑀧𑀢𑁆𑀢𑁄𑀢𑀺 𑀤𑀲𑀫𑀺𑀬𑀁 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀭𑀣𑁂 𑀫𑀳𑀸𑀩𑁄𑀥𑀺𑀁 𑀞𑀧𑁂𑀢𑁆𑀯𑀸 𑀉𑀴𑀸𑀭𑀧𑀽𑀚𑀁 𑀓𑀼𑀭𑀼𑀫𑀸𑀦𑁄 𑀧𑀸𑀘𑀻𑀦𑀧𑀲𑁆𑀲𑀯𑀺𑀳𑀸𑀭𑀲𑁆𑀲 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀫𑀸𑀦𑁂𑀢𑁆𑀯𑀸 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀧𑀸𑀢𑀭𑀸𑀲𑀁 𑀧𑀯𑀢𑁆𑀢𑁂𑀢𑁆𑀯𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁 𑀦𑀸𑀕𑀤𑀻𑀧𑁂 𑀤𑀲𑀩𑀮𑁂𑀦 𑀓𑀢𑀁 𑀦𑀸𑀕𑀤𑀫𑀦𑀁 𑀲𑀼𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀦𑀺𑀲𑀚𑁆𑀚𑀸𑀤𑀺𑀦𑀸 𑀧𑀭𑀺𑀪𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀣𑀽𑀧𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀡𑀁 𑀓𑀸𑀭𑁂𑀢𑁆𑀯𑀸 𑀢𑀢𑁄 𑀆𑀳𑀭𑀺𑀢𑁆𑀯𑀸 𑀢𑀯𑀓𑁆𑀓𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀕𑀸𑀫𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀽𑀚𑀁 𑀓𑀢𑁆𑀯𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀭𑀸𑀥𑀧𑀼𑀭𑀁 ¶ 𑀲𑀫𑁆𑀧𑀢𑁆𑀢𑁄. 𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁂𑀢𑀺 𑀫𑀺𑀕𑀲𑀺𑀭𑀫𑀸𑀲𑀲𑁆𑀲𑁂𑀯 𑀲𑀼𑀓𑁆𑀓𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑁂. 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬𑀸𑀢𑀺 𑀙𑀸𑀬𑀸𑀬 𑀯𑀟𑁆𑀠𑀫𑀸𑀦𑀲𑀫𑀬𑁂, 𑀲𑀸𑀬𑀦𑁆𑀳𑀲𑀫𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀁. 𑀢𑀺𑀮𑀓𑀪𑀽𑀢𑁂𑀢𑀺 𑀅𑀮𑀗𑁆𑀓𑀸𑀭𑀪𑀽𑀢𑁂. 𑀭𑀸𑀚𑀯𑀢𑁆𑀣𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑀝𑁆𑀞𑀸𑀦𑁂𑀢𑀺 𑀭𑀸𑀚𑀼𑀬𑁆𑀬𑀸𑀦𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑀝𑁆𑀞𑀸𑀦𑁂. ‘‘𑀲𑀓𑀮𑀭𑀚𑁆𑀚𑀁 𑀫𑀳𑀸𑀩𑁄𑀥𑀺𑀲𑁆𑀲 𑀤𑀺𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀉𑀧𑀘𑀸𑀭𑀢𑁆𑀣𑀁 𑀭𑀸𑀚𑀸 𑀤𑁄𑀯𑀸𑀭𑀺𑀓𑀯𑁂𑀲𑀁 𑀕𑀡𑁆𑀳𑀻’’𑀢𑀺 𑀯𑀤𑀦𑁆𑀢𑀺.

𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀦𑁆𑀢𑀺 𑀉𑀤𑀬𑀩𑁆𑀩𑀬𑀸𑀤𑀺𑀅𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀁. 𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀆𑀭𑀪𑀺𑀢𑁆𑀯𑀸. 𑀅𑀢𑁆𑀣𑀗𑁆𑀕𑀫𑀺𑀢𑁂𑀢𑀺 𑀅𑀢𑁆𑀣𑀗𑁆𑀕𑀢𑁂. ‘‘𑀲𑀳 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 ‘‘𑀲𑀳 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑀸’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀁. 𑀲𑀢𑀺 𑀳𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀻𑀢𑀺 𑀘 𑀇𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁, 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀅𑀳𑁂𑀲𑀼𑀁𑀬𑁂𑀯. 𑀢𑀣𑀸 𑀳𑀺 𑀲𑀳 𑀩𑁄𑀥𑀺𑀧𑀢𑀺𑀝𑁆𑀞𑀸𑀦𑁂𑀦 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺, 𑀢𑀸𑀦𑀺 𑀫𑀽𑀮𑀸𑀦𑀺 𑀓𑀝𑀸𑀳𑀫𑀼𑀔𑀯𑀝𑁆𑀝𑀺𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀢𑀁 𑀓𑀝𑀸𑀳𑀁 𑀯𑀺𑀦𑀦𑁆𑀥𑀦𑁆𑀢𑀸 𑀧𑀣𑀯𑀻𑀢𑀮𑀫𑁄𑀢𑀭𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀤𑀺𑀩𑁆𑀩𑀓𑀼𑀲𑀼𑀫𑀸𑀦𑀺 𑀯𑀲𑁆𑀲𑀺𑀁𑀲𑀼, 𑀆𑀓𑀸𑀲𑁂 𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀚𑁆𑀚𑀺𑀁𑀲𑀼, 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀯𑀼𑀝𑁆𑀞𑀺𑀥𑀸𑀭𑀫𑀓𑀸𑀲𑀺, 𑀆𑀓𑀸𑀲𑀧𑀤𑁂𑀲𑀸 𑀯𑀺𑀭𑀯𑀺𑀁𑀲𑀼, 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀫𑀤𑀁𑀲𑀼, 𑀲𑀫𑀸𑀕𑀢𑀸 𑀲𑀓𑀮𑀤𑀻𑀧𑀯𑀸𑀲𑀺𑀦𑁄 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼, 𑀕𑀳𑀺𑀢𑀫𑀓𑀭𑀦𑁆𑀤𑀸 𑀫𑀦𑁆𑀤𑀫𑀸𑀭𑀼𑀢𑀸 𑀯𑀸𑀬𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀖𑀦𑀲𑀻𑀢𑀮𑀳𑀺𑀫𑀯𑀮𑀸𑀳𑀓𑀸 𑀫𑀳𑀸𑀩𑁄𑀥𑀺𑀁 𑀙𑀸𑀤𑀬𑀺𑀁𑀲𑀼. 𑀏𑀯𑀁 𑀩𑁄𑀥𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀳𑀺𑀫𑀕𑀩𑁆𑀪𑁂 𑀲𑀦𑁆𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀮𑁄𑀓𑀲𑁆𑀲 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺. 𑀳𑀺𑀫𑀕𑀩𑁆𑀪𑁂 𑀲𑀦𑁆𑀦𑀺𑀲𑀻𑀤𑀻𑀢𑀺 𑀳𑀺𑀫𑀕𑀩𑁆𑀪𑀲𑁆𑀲 𑀅𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀯𑀺𑀧𑁆𑀨𑀼𑀭𑀦𑁆𑀢𑀸𑀢𑀺 𑀯𑀺𑀧𑁆𑀨𑀼𑀭𑀦𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀭𑀦𑁆𑀢𑀸. 𑀦𑀺𑀘𑁆𑀙𑀭𑀺𑀁𑀲𑀽𑀢𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀤𑀲𑁆𑀲𑀺𑀁𑀲𑀽𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀲𑀩𑁆𑀩𑁂 𑀤𑀻𑀧𑀯𑀸𑀲𑀺𑀦𑁄𑀢𑀺 𑀲𑀩𑁆𑀩𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀺𑀦𑁄. 𑀉𑀢𑁆𑀢𑀭𑀲𑀸𑀔𑀢𑁄 𑀏𑀓𑀁 𑀨𑀮𑀦𑁆𑀢𑀺 𑀉𑀢𑁆𑀢𑀭𑀲𑀸𑀔𑀸𑀬 𑀞𑀺𑀢𑀁 𑀏𑀓𑀁 𑀨𑀮𑀁. ‘‘𑀧𑀸𑀘𑀻𑀦𑀲𑀸𑀔𑀸𑀬 𑀏𑀓𑀁 𑀨𑀮’’𑀦𑁆𑀢𑀺𑀧𑀺 𑀓𑁂𑀘𑀺. 𑀫𑀳𑀸𑀆𑀲𑀦𑀝𑁆𑀞𑀸𑀦𑁂𑀢𑀺 𑀧𑀼𑀩𑁆𑀩𑀧𑀲𑁆𑀲𑁂 𑀫𑀳𑀸𑀲𑀺𑀮𑀸𑀲𑀦𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂. 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀺𑀳𑀸𑀭𑁂𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀲𑀗𑁆𑀔𑀸𑀢𑁂 𑀓𑀲𑁆𑀲𑀧𑀕𑀺𑀭𑀺𑀯𑀺𑀳𑀸𑀭𑁂. ‘‘𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀺𑀳𑀸𑀭𑁂’’𑀢𑀺 𑀳𑀺 𑀧𑀼𑀩𑁆𑀩𑀲𑀗𑁆𑀓𑁂𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀦 𑀲𑁄 𑀯𑀺𑀳𑀸𑀭𑁄 ‘‘𑀓𑀲𑁆𑀲𑀧𑀕𑀺𑀭𑀻’’𑀢𑀺 𑀧𑀜𑁆𑀜𑀸𑀢𑁄. ‘‘𑀇𑀲𑁆𑀲𑀭𑀲𑀫𑀡𑀸𑀭𑀸𑀫𑁂’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀢𑀯𑀓𑁆𑀓𑀩𑁆𑀭𑀸𑀳𑁆𑀫𑀡𑀕𑀸𑀫𑁂 ¶ , 𑀣𑀽𑀧𑀸𑀭𑀸𑀫𑁂 𑀢𑀣𑁂𑀯 𑀘;

𑀇𑀲𑁆𑀲𑀭𑀲𑀫𑀡𑀸𑀭𑀸𑀫𑁂, 𑀧𑀞𑀫𑁂 𑀘𑁂𑀢𑀺𑀬𑀗𑁆𑀕𑀡𑁂’’𑀢𑀺.

𑀬𑁄𑀚𑀦𑀺𑀬𑀆𑀭𑀸𑀫𑁂𑀲𑀽𑀢𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀲𑀫𑀦𑁆𑀢𑀸 𑀬𑁄𑀚𑀦𑀲𑁆𑀲 𑀅𑀦𑁆𑀢𑁄 𑀓𑀢𑀆𑀭𑀸𑀫𑁂𑀲𑀼. 𑀲𑀫𑀦𑁆𑀢𑀸 𑀧𑀢𑀺𑀝𑁆𑀞𑀺𑀢𑁂 ¶ 𑀫𑀳𑀸𑀩𑁄𑀥𑀺𑀫𑁆𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀲𑀫𑀦𑁆𑀢𑀸 𑀏𑀯𑀁 𑀧𑀼𑀢𑁆𑀢𑀦𑀢𑁆𑀢𑀼𑀧𑀭𑀫𑁆𑀧𑀭𑀸𑀬 𑀫𑀳𑀸𑀩𑁄𑀥𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀮𑁄𑀳𑀧𑀸𑀲𑀸𑀤𑀝𑁆𑀞𑀸𑀦𑀁 𑀧𑀽𑀚𑁂𑀲𑀻𑀢𑀺 𑀮𑁄𑀳𑀧𑀸𑀲𑀸𑀤𑀲𑁆𑀲 𑀓𑀢𑁆𑀢𑀩𑁆𑀩𑀝𑁆𑀞𑀸𑀦𑀁 𑀧𑀽𑀚𑁂𑀲𑀺. ‘‘𑀓𑀺𑀜𑁆𑀘𑀸𑀧𑀺 𑀮𑁄𑀳𑀧𑀸𑀲𑀸𑀤𑀁 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄𑀬𑁂𑀯 𑀫𑀳𑀸𑀭𑀸𑀚𑀸 𑀓𑀸𑀭𑁂𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀪𑀸𑀯𑀢𑁄 ‘𑀅𑀦𑀸𑀕𑀢𑁂’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑁂𑀦𑁂𑀯 𑀓𑀸𑀭𑀺𑀢𑁄 𑀮𑁄𑀳𑀧𑀸𑀲𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀫𑀽𑀮𑀸𑀦𑀺 𑀧𑀦𑀲𑁆𑀲 𑀦 𑀢𑀸𑀯 𑀑𑀢𑀭𑀦𑁆𑀢𑀻𑀢𑀺 𑀇𑀫𑀺𑀦𑀸, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀲𑀢𑁆𑀣𑀼𑀲𑀸𑀲𑀦𑀁 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑀫𑁂𑀯 𑀅𑀳𑁄𑀲𑀺, 𑀦 𑀢𑀸𑀯 𑀲𑀼𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀅𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀧𑀦 𑀦 𑀢𑀸𑀯 𑀑𑀢𑀺𑀡𑁆𑀡𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀑𑀢𑀭𑀦𑁆𑀢𑀻𑀢𑀺 𑀳𑀺 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀢𑁂𑀦𑁂𑀯𑀸𑀳 ‘‘𑀓𑀤𑀸 𑀧𑀦 𑀪𑀦𑁆𑀢𑁂 𑀫𑀽𑀮𑀸𑀦𑀺 𑀑𑀢𑀺𑀡𑁆𑀡𑀸𑀦𑀺 𑀦𑀸𑀫 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀬𑁄 𑀅𑀫𑀘𑁆𑀘𑁄 𑀘𑀢𑀼𑀧𑀡𑁆𑀡𑀸𑀲𑀸𑀬 𑀚𑁂𑀝𑁆𑀞𑀓𑀓𑀦𑀺𑀝𑁆𑀞𑀪𑀸𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀧𑀩𑁆𑀩𑀚𑀺𑀢𑁄, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀳𑀸𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀽’’𑀢𑀺. 𑀫𑁂𑀖𑀯𑀡𑁆𑀡𑀸𑀪𑀬𑀲𑁆𑀲 𑀅𑀫𑀘𑁆𑀘𑀲𑁆𑀲 𑀧𑀭𑀺𑀯𑁂𑀡𑀝𑁆𑀞𑀸𑀦𑁂𑀢𑀺 𑀫𑁂𑀖𑀯𑀡𑁆𑀡𑀸𑀪𑀬𑀲𑁆𑀲 𑀭𑀜𑁆𑀜𑁄 𑀅𑀫𑀘𑁆𑀘𑁂𑀦 𑀓𑀢𑁆𑀢𑀩𑁆𑀩𑀲𑁆𑀲 𑀧𑀭𑀺𑀯𑁂𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑁂 𑀞𑀸𑀦𑁂. 𑀫𑀡𑁆𑀟𑀧𑀧𑁆𑀧𑀓𑀸𑀭𑀦𑁆𑀢𑀺 𑀫𑀡𑁆𑀟𑀧𑀲𑀤𑀺𑀲𑀁. 𑀲𑀤𑀺𑀲𑀢𑁆𑀣𑀫𑁆𑀧𑀺 𑀳𑀺 𑀧𑀓𑀸𑀭𑀲𑀤𑁆𑀤𑀁 𑀯𑀡𑁆𑀡𑀬𑀦𑁆𑀢𑀺. 𑀲𑀸𑀲𑀦𑀲𑁆𑀲 𑀫𑀽𑀮𑀸𑀦𑀺 𑀑𑀢𑀭𑀦𑁆𑀢𑀸𑀦𑀺 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀲𑀸𑀲𑀦𑀲𑁆𑀲 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀸𑀦𑀸𑀓𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺.

𑀫𑁂𑀖𑀯𑀺𑀭𑀳𑀺𑀢𑀲𑁆𑀲 𑀦𑀺𑀫𑁆𑀫𑀮𑀲𑁆𑀲𑁂𑀯 𑀆𑀓𑀸𑀲𑀲𑁆𑀲 𑀯𑀺𑀭𑀯𑀺𑀢𑀢𑁆𑀢𑀸 ‘‘𑀆𑀓𑀸𑀲𑀁 𑀫𑀳𑀸𑀯𑀺𑀭𑀯𑀁 𑀭𑀯𑀻’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀓𑀕𑀡𑀻𑀳𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀡𑀸𑀘𑀭𑀺𑀬𑁂𑀳𑀺. 𑀧𑀘𑁆𑀘𑁂𑀓𑀁 𑀕𑀡𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀘𑁆𑀘𑁂𑀓𑀕𑀡𑀺𑀦𑁄. 𑀬𑀣𑀸 𑀯𑁂𑀚𑁆𑀚𑁄 𑀕𑀺𑀮𑀸𑀦𑁂𑀲𑀼 𑀓𑀭𑀼𑀡𑀸𑀬 𑀢𑀺𑀓𑀺𑀘𑁆𑀙𑀦𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀕𑀢𑀘𑁆𑀙𑀦𑁆𑀤𑀤𑁄𑀲𑁄 𑀚𑀺𑀕𑀼𑀘𑁆𑀙𑀦𑀻𑀬𑁂𑀲𑀼 𑀯𑀡𑁂𑀲𑀼 𑀕𑀼𑀬𑁆𑀳𑀝𑁆𑀞𑀸𑀦𑁂𑀲𑀼 𑀘 𑀪𑁂𑀲𑀚𑁆𑀚𑀮𑁂𑀧𑀦𑀸𑀤𑀺𑀦𑀸 𑀢𑀺𑀓𑀺𑀘𑁆𑀙𑀦𑀫𑁂𑀯 𑀓𑀭𑁄𑀢𑀺, 𑀏𑀯𑀁 𑀪𑀕𑀯𑀸𑀧𑀺 𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀻𑀴𑀺𑀢𑁂𑀲𑀼 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸𑀬 𑀢𑁂 𑀲𑀢𑁆𑀢𑁂 𑀓𑀺𑀮𑁂𑀲𑀩𑁆𑀬𑀸𑀥𑀺𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑀼𑀓𑀸𑀫𑁄 𑀅𑀯𑀢𑁆𑀢𑀩𑁆𑀩𑀸𑀭𑀳𑀸𑀦𑀺 𑀕𑀼𑀬𑁆𑀳𑀝𑁆𑀞𑀸𑀦𑀦𑀺𑀲𑁆𑀲𑀺𑀢𑀸𑀦𑀺𑀧𑀺 𑀅𑀲𑀧𑁆𑀧𑀸𑀬𑀸𑀦𑀺 𑀯𑀤𑀦𑁆𑀢𑁄 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀩𑁆𑀬𑀸𑀥𑀺𑀁 ¶ 𑀢𑀺𑀓𑀺𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼 𑀓𑀭𑀼𑀡𑀸𑀕𑀼𑀡𑀧𑀭𑀺𑀤𑀻𑀧𑀓’’𑀦𑁆𑀢𑀺. 𑀅𑀦𑀼𑀲𑀺𑀝𑁆𑀞𑀺𑀓𑀭𑀸𑀦𑀦𑁆𑀢𑀺 𑀅𑀦𑀼𑀲𑀸𑀲𑀦𑀻𑀓𑀭𑀸𑀦𑀁, 𑀬𑁂 𑀪𑀕𑀯𑀢𑁄 𑀅𑀦𑀼𑀲𑀸𑀲𑀦𑀺𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀯𑀺𑀧𑁆𑀨𑀦𑁆𑀤𑀺𑀢𑀯𑀺𑀦𑀬𑀦𑀦𑁆𑀢𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀅𑀚𑁆𑀛𑀸𑀘𑀸𑀭𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀓𑀺𑀮𑁂𑀲𑀯𑀺𑀧𑁆𑀨𑀦𑁆𑀤𑀺𑀢𑀲𑁆𑀲 𑀯𑀺𑀦𑀬𑀦𑀓𑀭𑀁.

𑀭𑀸𑀚𑀺𑀦𑁄𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀭𑀸𑀚𑀸𑀦𑀫𑀦𑀼𑀲𑀸𑀲𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀦𑁆𑀢𑀺 𑀜𑀸𑀡𑀸𑀮𑁄𑀓𑀁. 𑀦𑀺𑀩𑁆𑀩𑀸𑀬𑀺𑀁𑀲𑀼 𑀫𑀳𑁂𑀲𑀬𑁄𑀢𑀺 𑀏𑀢𑁆𑀣 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀲𑀫𑁆𑀧𑀢𑁆𑀢𑁄, 𑀢𑀢𑁆𑀣 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀯𑀺𑀦𑀬𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀤𑁆𑀯𑀸𑀲𑀝𑁆𑀞𑀺𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀯𑀤𑀦𑁆𑀢𑀺.

𑀢𑁂𑀲𑀁 ¶ 𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀢𑁂𑀲𑀁 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀢𑀺𑀲𑁆𑀲𑀤𑀢𑁆𑀢𑀸𑀤𑀬𑁄 𑀧𑀦 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸, 𑀢𑀲𑁆𑀫𑀸 𑀢𑀺𑀲𑁆𑀲𑀤𑀢𑁆𑀢𑀓𑀸𑀴𑀲𑀼𑀫𑀦𑀤𑀻𑀖𑀲𑀼𑀫𑀦𑀸𑀤𑀬𑁄 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀉𑀪𑀬𑀣𑀸 𑀯𑀼𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 𑁋

‘‘𑀢𑀢𑁄 𑀫𑀳𑀺𑀦𑁆𑀤𑁄 𑀇𑀝𑁆𑀝𑀺𑀬𑁄, 𑀉𑀢𑁆𑀢𑀺𑀬𑁄 𑀲𑀫𑁆𑀩𑀮𑁄 𑀢𑀣𑀸;

𑀪𑀤𑁆𑀤𑀦𑀸𑀫𑁄 𑀘 𑀧𑀡𑁆𑀟𑀺𑀢𑁄.

‘‘𑀏𑀢𑁂 𑀦𑀸𑀕𑀸 𑀫𑀳𑀸𑀧𑀜𑁆𑀜𑀸, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸;

𑀯𑀺𑀦𑀬𑀁 𑀢𑁂 𑀯𑀸𑀘𑀬𑀺𑀁𑀲𑀼, 𑀧𑀺𑀝𑀓𑀁 𑀢𑀫𑁆𑀩𑀧𑀡𑁆𑀡𑀺𑀬𑀸.

‘‘𑀦𑀺𑀓𑀸𑀬𑁂 𑀧𑀜𑁆𑀘 𑀯𑀸𑀘𑁂𑀲𑀼𑀁, 𑀲𑀢𑁆𑀢 𑀘𑁂𑀯 𑀧𑀓𑀭𑀡𑁂;

𑀢𑀢𑁄 𑀅𑀭𑀺𑀝𑁆𑀞𑁄 𑀫𑁂𑀥𑀸𑀯𑀻, 𑀢𑀺𑀲𑁆𑀲𑀤𑀢𑁆𑀢𑁄 𑀘 𑀧𑀡𑁆𑀟𑀺𑀢𑁄.

‘‘𑀯𑀺𑀲𑀸𑀭𑀤𑁄 𑀓𑀸𑀴𑀲𑀼𑀫𑀦𑁄, 𑀣𑁂𑀭𑁄 𑀘 𑀤𑀻𑀖𑀦𑀸𑀫𑀓𑁄’’𑀢𑀺. 𑁋

𑀏𑀯𑀫𑀸𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸.

𑀆𑀘𑀭𑀺𑀬𑀧𑀭𑀫𑁆𑀧𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀬𑀸𑀦𑀺𑀲𑀁𑀲𑀓𑀣𑀸𑀯𑀡𑁆𑀡𑀦𑀸

𑀏𑀢𑁆𑀢𑀸𑀯𑀢𑀸 ¶ 𑀘 ‘‘𑀓𑁂𑀦𑀸𑀪𑀢’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀢𑁆𑀣 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀆𑀳 ‘‘𑀓𑀢𑁆𑀣 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀮𑀫𑀺𑀯𑀸𑀢𑀺 𑀲𑀻𑀳𑀢𑁂𑀮𑀫𑀺𑀯. 𑀅𑀥𑀺𑀫𑀢𑁆𑀢𑀲𑀢𑀺𑀕𑀢𑀺𑀥𑀻𑀢𑀺𑀫𑀦𑁆𑀢𑁂𑀲𑀽𑀢𑀺 𑀏𑀢𑁆𑀣 𑀲𑀢𑀻𑀢𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀥𑀸𑀭𑀡𑀓𑀲𑀢𑀺. 𑀕𑀢𑀻𑀢𑀺 𑀉𑀕𑁆𑀕𑀡𑁆𑀳𑀦𑀓𑀕𑀢𑀺. 𑀥𑀻𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀕𑀡𑁆𑀳𑀦𑀓𑀜𑀸𑀡𑀁. 𑀕𑀢𑀻𑀢𑀺 𑀯𑀸 𑀧𑀜𑁆𑀜𑀸𑀕𑀢𑀺. 𑀥𑀻𑀢𑀻𑀢𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀁 𑀲𑀚𑁆𑀛𑀸𑀬𑀦𑀯𑀻𑀭𑀺𑀬𑀁 𑀥𑀸𑀭𑀡𑀯𑀻𑀭𑀺𑀬𑀜𑁆𑀘. 𑀮𑀚𑁆𑀚𑀻𑀲𑀽𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀓𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁂𑀲𑀼. 𑀓𑀼𑀓𑁆𑀓𑀼𑀘𑁆𑀘𑀓𑁂𑀲𑀽𑀢𑀺 𑀅𑀡𑀼𑀫𑀢𑁆𑀢𑁂𑀲𑀼𑀧𑀺 𑀯𑀚𑁆𑀚𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀢𑀸𑀬 ¶ 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀼𑀓𑁆𑀓𑀼𑀘𑁆𑀘𑀓𑀸𑀭𑀻𑀲𑀼. 𑀲𑀺𑀓𑁆𑀔𑀸𑀓𑀸𑀫𑁂𑀲𑀽𑀢𑀺 𑀅𑀥𑀺𑀲𑀻𑀮𑀅𑀅𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀯𑀲𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀸𑀫𑀬𑀫𑀸𑀦𑁂𑀲𑀼 𑀲𑀫𑁆𑀧𑀺𑀬𑀸𑀬𑀺𑀢𑁆𑀯𑀸 𑀲𑀺𑀓𑁆𑀔𑀦𑁆𑀢𑁂𑀲𑀼.

𑀅𑀓𑀢𑁆𑀢𑀩𑁆𑀩𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑁂𑀲𑀼 𑀧𑀢𑀺𑀝𑁆𑀞𑀸𑀧𑀦𑀢𑁄 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑀺𑀬𑁄𑀢𑀺 𑀯𑀼𑀢𑁆𑀢𑀁. 𑀆𑀘𑀸𑀭𑀕𑁄𑀘𑀭𑀓𑀼𑀲𑀮𑀢𑀸𑀢𑀺 𑀯𑁂𑀴𑀼𑀤𑀸𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀦𑀜𑁆𑀘 𑀅𑀓𑀭𑀡𑁂𑀦 𑀲𑀩𑁆𑀩𑀲𑁄 𑀅𑀦𑀸𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 ‘‘𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺 (𑀯𑀺𑀪. 𑁫𑁧𑁧) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀲𑀺𑀬𑀸𑀤𑀺𑀅𑀕𑁄𑀘𑀭𑀁 𑀯𑀚𑁆𑀚𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀸𑀤𑀺𑀅𑀢𑁆𑀣𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀫𑀡𑀸𑀘𑀸𑀭𑁂𑀲𑀼 𑀘𑁂𑀯 𑀲𑀫𑀡𑀕𑁄𑀘𑀭𑁂𑀲𑀼 𑀘 𑀓𑀼𑀲𑀮𑀢𑀸. 𑀅𑀧𑀺𑀘 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀲𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀲𑀓𑁆𑀓𑀘𑁆𑀘𑀓𑀸𑀭𑀻 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀘𑀸𑀭𑁄.

𑀕𑁄𑀘𑀭𑁄 𑀧𑀦 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄 𑀆𑀭𑀓𑁆𑀔𑀕𑁄𑀘𑀭𑁄 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀤𑀲𑀓𑀣𑀸𑀯𑀢𑁆𑀣𑀼𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲𑀼𑀢𑀁 𑀲𑀼𑀡𑀸𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀓𑀗𑁆𑀔𑀁 𑀯𑀺𑀢𑀭𑀢𑀺 ¶ , 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀬𑀲𑁆𑀲 𑀯𑀸 𑀧𑀦 𑀅𑀦𑀼𑀲𑀺𑀓𑁆𑀔𑀫𑀸𑀦𑁄 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦, 𑀲𑀼𑀢𑁂𑀦, 𑀘𑀸𑀕𑁂𑀦, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺, 𑀅𑀬𑀁 𑀉𑀧𑀦𑀺𑀲𑁆𑀲𑀬𑀕𑁄𑀘𑀭𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀻𑀣𑀺𑀧𑀝𑀺𑀧𑀦𑁆𑀦𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀸𑀯𑀻 𑀲𑀁𑀯𑀼𑀢𑁄 𑀕𑀘𑁆𑀙𑀢𑀺, 𑀦 𑀳𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀲𑁆𑀲𑀁, 𑀦 𑀭𑀣𑀁, 𑀦 𑀧𑀢𑁆𑀢𑀺𑀁, 𑀦 𑀇𑀢𑁆𑀣𑀺𑀁, 𑀦 𑀧𑀼𑀭𑀺𑀲𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄, 𑀦 𑀅𑀥𑁄 𑀑𑀮𑁄𑀓𑁂𑀦𑁆𑀢𑁄, 𑀦 𑀤𑀺𑀲𑀸𑀯𑀺𑀤𑀺𑀲𑀫𑁆𑀧𑀺 𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺, 𑀅𑀬𑀁 𑀆𑀭𑀓𑁆𑀔𑀕𑁄𑀘𑀭𑁄. 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄 𑀧𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀬𑀢𑁆𑀣 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀅𑀬𑀁 𑀉𑀧𑀦𑀺𑀩𑀦𑁆𑀥𑀕𑁄𑀘𑀭𑁄. 𑀇𑀢𑀺 𑀇𑀫𑀺𑀦𑀸 𑀘 𑀆𑀘𑀸𑀭𑁂𑀦 𑀇𑀫𑀺𑀦𑀸 𑀘 𑀕𑁄𑀘𑀭𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀘𑀸𑀭𑀕𑁄𑀘𑀭𑀓𑀼𑀲𑀮𑀢𑀸. 𑀏𑀯𑀁 𑀅𑀦𑀸𑀘𑀸𑀭𑀁 𑀅𑀕𑁄𑀘𑀭𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀆𑀘𑀸𑀭𑀕𑁄𑀘𑀭𑁂𑀲𑀼 𑀓𑀼𑀲𑀮𑀪𑀸𑀯𑁄 𑀯𑀺𑀦𑀬𑀥𑀭𑀸𑀬𑀢𑁆𑀢𑁄𑀢𑀺 𑀅𑀬𑀫𑀸𑀦𑀺𑀲𑀁𑀲𑁄 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀺𑀦𑀬𑀧𑀭𑀺𑀬𑀸𑀧𑀼𑀡𑀦𑀁 𑀦𑀺𑀲𑁆𑀲𑀸𑀬. 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 ¶ 𑀲𑀼𑀭𑀓𑁆𑀔𑀺𑀢𑁄𑀢𑀺 𑀓𑀣𑀫𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄? 𑀆𑀧𑀢𑁆𑀢𑀺𑀜𑁆𑀳𑀺 𑀆𑀧𑀚𑁆𑀚𑀦𑁆𑀢𑁄 𑀙𑀳𑀸𑀓𑀸𑀭𑁂𑀳𑀺 𑀆𑀧𑀚𑁆𑀚𑀢𑀺 𑀅𑀮𑀚𑁆𑀚𑀺𑀢𑀸, 𑀅𑀜𑁆𑀜𑀸𑀡𑀢𑀸, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀲𑀢𑀺𑀲𑀫𑁆𑀫𑁄𑀲𑀸𑀢𑀺. 𑀯𑀺𑀦𑀬𑀥𑀭𑁄 𑀧𑀦 𑀇𑀫𑁂𑀳𑀺 𑀙𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺.

𑀓𑀣𑀁 𑀅𑀮𑀚𑁆𑀚𑀺𑀢𑀸𑀬 𑀦𑀸𑀧𑀚𑁆𑀚𑀢𑀺? 𑀲𑁄 𑀳𑀺 ‘‘𑀧𑀲𑁆𑀲𑀣 𑀪𑁄, 𑀅𑀬𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀚𑀸𑀦𑀦𑁆𑀢𑁄𑀬𑁂𑀯 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀻’’𑀢𑀺 𑀇𑀫𑀁 𑀧𑀭𑀽𑀧𑀯𑀸𑀤𑀁 𑀭𑀓𑁆𑀔𑀦𑁆𑀢𑁄𑀧𑀺 𑀅𑀓𑀧𑁆𑀧𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀮𑀚𑁆𑀚𑀺𑀢𑀸𑀬 𑀦𑀸𑀧𑀚𑁆𑀚𑀢𑀺. 𑀲𑀳𑀲𑀸 𑀆𑀧𑀦𑁆𑀦𑀫𑁆𑀧𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀢𑀺, 𑀢𑀢𑁄 𑁋

‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀜𑁆𑀘 𑀦 𑀕𑀘𑁆𑀙𑀢𑀺, 𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀮𑀚𑁆𑀚𑀺𑀧𑀼𑀕𑁆𑀕𑀮𑁄’’𑀢𑀺. (𑀧𑀭𑀺. 𑁩𑁫𑁯) 𑁋

𑀇𑀫𑀲𑁆𑀫𑀺𑀁 𑀮𑀚𑁆𑀚𑀺𑀪𑀸𑀯𑁂 𑀧𑀢𑀺𑀝𑁆𑀞𑀺𑀢𑁄𑀯 𑀳𑁄𑀢𑀺.

𑀓𑀣𑀁 ¶ 𑀅𑀜𑁆𑀜𑀸𑀡𑀢𑀸𑀬 𑀦𑀸𑀧𑀚𑁆𑀚𑀢𑀺? 𑀲𑁄 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁𑀬𑁂𑀯 𑀓𑀭𑁄𑀢𑀺, 𑀅𑀓𑀧𑁆𑀧𑀺𑀬𑀁 𑀦 𑀓𑀭𑁄𑀢𑀺. 𑀏𑀯𑀁 𑀅𑀜𑁆𑀜𑀸𑀡𑀢𑀸𑀬 𑀦𑀸𑀧𑀚𑁆𑀚𑀢𑀺.

𑀓𑀣𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀦𑀸𑀧𑀚𑁆𑀚𑀢𑀺? 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀢𑀺𑀓𑀁 𑀧𑀤𑀪𑀸𑀚𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀘𑁂 𑀳𑁄𑀢𑀺, 𑀓𑀭𑁄𑀢𑀺, 𑀅𑀓𑀧𑁆𑀧𑀺𑀬𑀁 𑀘𑁂, 𑀦 𑀓𑀭𑁄𑀢𑀺. 𑀉𑀧𑁆𑀧𑀦𑁆𑀦𑀁 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 ‘‘𑀯𑀝𑁆𑀝𑀢𑀻’’𑀢𑀺 𑀫𑀤𑁆𑀤𑀺𑀢𑁆𑀯𑀸 𑀦 𑀯𑀻𑀢𑀺𑀓𑁆𑀓𑀫𑀢𑀺. 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸𑀬 𑀦𑀸𑀧𑀚𑁆𑀚𑀢𑀺.

𑀓𑀣𑀁 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀤𑀻𑀳𑀺 𑀦𑀸𑀧𑀚𑁆𑀚𑀢𑀺? 𑀲𑁄 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻 𑀦 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻 𑀦 𑀳𑁄𑀢𑀺, 𑀲𑀼𑀧𑀢𑀺𑀝𑁆𑀞𑀺𑀢𑀸 𑀘𑀲𑁆𑀲 𑀲𑀢𑀺 𑀳𑁄𑀢𑀺, 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀩𑁆𑀩𑀁 𑀯𑀺𑀓𑀧𑁆𑀧𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀙𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀅𑀔𑀡𑁆𑀟𑀲𑀻𑀮𑁄 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑁄. 𑀏𑀯𑀫𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄.

𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀦𑁆𑀢𑀺 ¶ 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀪𑀺𑀪𑀽𑀢𑀸𑀦𑀁. 𑀓𑀣𑀁 𑀧𑀦 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺? 𑀢𑀺𑀭𑁄𑀭𑀝𑁆𑀞𑁂𑀲𑀼 𑀢𑀺𑀭𑁄𑀚𑀦𑀧𑀤𑁂𑀲𑀼 𑀘 𑀉𑀧𑁆𑀧𑀦𑁆𑀦𑀓𑀼𑀓𑁆𑀓𑀼𑀘𑁆𑀘𑀸 𑀪𑀺𑀓𑁆𑀔𑀽 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀯𑀺𑀳𑀸𑀭𑁂 𑀯𑀺𑀦𑀬𑀥𑀭𑁄 𑀯𑀲𑀢𑀻’’𑀢𑀺 𑀤𑀽𑀭𑀢𑁄𑀧𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀦𑁆𑀢𑀺. 𑀲𑁄 𑀢𑁂𑀳𑀺 𑀓𑀢𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀕𑀭𑀼𑀓𑀮𑀳𑀼𑀓𑀸𑀤𑀺𑀪𑁂𑀤𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑀸𑀧𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺.

𑀯𑀺𑀲𑀸𑀭𑀤𑁄 𑀲𑀗𑁆𑀖𑀫𑀚𑁆𑀛𑁂 𑀯𑁄𑀳𑀭𑀢𑀻𑀢𑀺 𑀯𑀺𑀕𑀢𑁄 𑀲𑀸𑀭𑀤𑁄 𑀪𑀬𑀁 𑀏𑀢𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄, 𑀅𑀪𑀻𑀢𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀦𑀬𑀥𑀭𑀲𑁆𑀲 𑀳𑀺 𑀲𑀗𑁆𑀖𑀫𑀚𑁆𑀛𑁂 𑀓𑀣𑁂𑀦𑁆𑀢𑀲𑁆𑀲 𑀪𑀬𑀁 𑀲𑀸𑀭𑀚𑁆𑀚𑀁 𑀑𑀓𑁆𑀓𑀫𑀢𑀺, 𑀯𑀺𑀦𑀬𑀥𑀭𑀲𑁆𑀲 𑀢𑀁 𑀦 𑀳𑁄𑀢𑀺. 𑀓𑀲𑁆𑀫𑀸? ‘‘𑀏𑀯𑀁 𑀓𑀣𑁂𑀦𑁆𑀢𑀲𑁆𑀲 𑀤𑁄𑀲𑁄 𑀳𑁄𑀢𑀺, 𑀏𑀯𑀁 𑀦 𑀤𑁄𑀲𑁄’’𑀢𑀺 𑀜𑀢𑁆𑀯𑀸 𑀓𑀣𑀦𑀢𑁄.

𑀧𑀘𑁆𑀘𑀢𑁆𑀣𑀺𑀓𑁂 ¶ 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸 𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀘 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀘. 𑀢𑀢𑁆𑀣 𑀫𑁂𑀢𑁆𑀢𑀺𑀬𑀪𑀼𑀫𑁆𑀫𑀚𑀓𑀸 𑀘 𑀪𑀺𑀓𑁆𑀔𑀽 𑀯𑀟𑁆𑀠𑁄 𑀘 𑀮𑀺𑀘𑁆𑀙𑀯𑀻 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀘𑁄𑀤𑁂𑀲𑀼𑀁, 𑀇𑀫𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫. 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸. 𑀯𑀺𑀧𑀭𑀻𑀢𑀤𑀲𑁆𑀲𑀦𑀸 𑀧𑀦 𑀅𑀭𑀺𑀝𑁆𑀞𑀪𑀺𑀓𑁆𑀔𑀼𑀓𑀡𑁆𑀝𑀓𑀲𑀸𑀫𑀡𑁂𑀭𑀯𑁂𑀲𑀸𑀮𑀺𑀓𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀫𑀳𑀸𑀲𑀗𑁆𑀖𑀺𑀓𑀸𑀤𑀬𑁄 𑀘 𑀅𑀩𑀼𑀤𑁆𑀥𑀲𑀸𑀲𑀦𑀁 ‘‘𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀯𑀢𑁆𑀯𑀸 𑀓𑀢𑀧𑀕𑁆𑀕𑀳𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫. 𑀢𑁂 𑀲𑀩𑁆𑀩𑁂𑀧𑀺 𑀲𑀳𑀥𑀫𑁆𑀫𑁂𑀦 𑀲𑀳𑀓𑀸𑀭𑀡𑁂𑀦 𑀯𑀘𑀦𑁂𑀦 𑀬𑀣𑀸 𑀢𑀁 𑀅𑀲𑀤𑁆𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀸𑀢𑀺.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀅𑀥𑀺𑀕𑀫𑀯𑀲𑁂𑀦. 𑀢𑀢𑁆𑀣 𑀢𑀺𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀻𑀢𑀺 𑀅𑀬𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀘, 𑀅𑀬𑀁 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄 𑀦𑀸𑀫. 𑀢𑀢𑁆𑀣 𑀓𑁂𑀘𑀺 𑀣𑁂𑀭𑀸 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 ‘‘𑀲𑀸𑀲𑀦𑀲𑁆𑀲 𑀧𑀭𑀺𑀬𑀢𑁆𑀢𑀺 𑀫𑀽𑀮’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀣𑁂𑀭𑀸 ‘‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 (𑀤𑀻. 𑀦𑀺. 𑁨.𑁨𑁧𑁪) ‘‘𑀲𑀸𑀲𑀦𑀲𑁆𑀲 𑀧𑀝𑀺𑀧𑀢𑁆𑀢𑀺 𑀫𑀽𑀮’’𑀦𑁆𑀢𑀺 𑀯𑀢𑁆𑀯𑀸 ‘‘𑀬𑀸𑀯 𑀧𑀜𑁆𑀘 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀸𑀯 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀻’’𑀢𑀺 𑀆𑀳𑀁𑀲𑀼. 𑀇𑀢𑀭𑁂 𑀧𑀦 𑀣𑁂𑀭𑀸 ‘‘𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀆𑀳𑀁𑀲𑀼. 𑀲𑀘𑁂𑀧𑀺 𑀧𑀜𑁆𑀘 𑀪𑀺𑀓𑁆𑀔𑀽 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀭𑀓𑁆𑀔𑀡𑀓𑀸 𑀳𑁄𑀦𑁆𑀢𑀺, 𑀢𑁂 𑀲𑀤𑁆𑀥𑁂 𑀓𑀼𑀮𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀺𑀫𑁂 𑀚𑀦𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 ¶ 𑀤𑀲𑀯𑀕𑁆𑀕𑀕𑀡𑀁 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑀺𑀫𑀚𑀦𑀧𑀤𑁂𑀧𑀺 𑀉𑀧𑀲𑀫𑁆𑀧𑀤𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀖𑀁 𑀧𑀽𑀭𑁂𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀢𑁆𑀯𑀸 𑀲𑀸𑀲𑀦𑀁 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀕𑀫𑀬𑀺𑀲𑁆𑀲𑀦𑁆𑀢𑀺. 𑀏𑀯𑀫𑀬𑀁 𑀯𑀺𑀦𑀬𑀥𑀭𑁄 𑀢𑀺𑀯𑀺𑀥𑀲𑁆𑀲𑀧𑀺 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺. 𑀏𑀯𑀫𑀬𑀁 𑀯𑀺𑀦𑀬𑀥𑀭𑁄 𑀇𑀫𑁂 𑀧𑀜𑁆𑀘𑀸𑀦𑀺𑀲𑀁𑀲𑁂 𑀧𑀝𑀺𑀮𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 (𑀧𑀭𑀺. 𑀅𑀝𑁆𑀞. 𑁩𑁬𑁬) 𑀯𑀺𑀦𑀬𑁄𑀢𑀺 𑀯𑀺𑀦𑀬𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁, 𑀯𑀺𑀦𑀬𑁄𑀢𑀺 𑀯𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀲𑀓𑀮𑀸𑀧𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀧𑀼𑀡𑀦𑀁 ¶ 𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀲𑀁𑀯𑀭𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀲𑁆𑀲 𑀲𑀻𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑁄. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀤𑀼𑀩𑁆𑀩𑀮𑀸 𑀢𑀭𑀼𑀡𑀧𑀻𑀢𑀺. 𑀧𑀻𑀢𑀻𑀢𑀺 𑀩𑀮𑀯𑀧𑀻𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀲𑀼𑀔𑀁. 𑀢𑀜𑁆𑀳𑀺 𑀤𑀼𑀯𑀺𑀥𑀫𑁆𑀧𑀺 𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄. 𑀦𑀺𑀩𑁆𑀩𑀺𑀤𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀅𑀣 𑀯𑀸 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀢𑀭𑀼𑀡𑀯𑀺𑀧𑀲𑁆𑀲𑀦𑀸, 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀳𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀺𑀤𑀸𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀩𑀮𑀯𑀯𑀺𑀧𑀲𑁆𑀲𑀦𑀸. 𑀯𑀺𑀭𑀸𑀕𑁄𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬, 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀅𑀯𑀲𑁆𑀲𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀢𑁄, 𑀦 𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀅𑀦𑀼𑀧𑁆𑀧𑀦𑁆𑀦𑁂 𑀅𑀦𑁆𑀢𑀭𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀳𑁄𑀢𑀺.

𑀏𑀢𑀤𑀢𑁆𑀣𑀸 𑀓𑀣𑀸𑀢𑀺 𑀅𑀬𑀁 𑀯𑀺𑀦𑀬𑀓𑀣𑀸 𑀦𑀸𑀫 𑀏𑀢𑀤𑀢𑁆𑀣𑀸𑀬, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣𑀧𑀺. 𑀫𑀦𑁆𑀢𑀦𑀸𑀧𑀺 𑀯𑀺𑀦𑀬𑀫𑀦𑁆𑀢𑀦𑀸𑀏𑀯, ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫, 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀦𑀬𑀧𑀝𑀺𑀩𑀤𑁆𑀥𑀲𑀁𑀲𑀦𑁆𑀤𑀦𑀸. 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸𑀢𑀺 𑀉𑀧𑀦𑀺𑀲𑀻𑀤𑀢𑀺 𑀏𑀢𑁆𑀣 𑀨𑀮𑀁 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀉𑀧𑀦𑀺𑀲𑀸 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁 𑀧𑀘𑁆𑀘𑀬𑁄𑀢𑀺. ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺𑀓𑀸 𑀓𑀸𑀭𑀡𑀧𑀭𑀫𑁆𑀧𑀭𑀸 𑀏𑀢𑀤𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀭𑀫𑁆𑀧𑀭𑀧𑀘𑁆𑀘𑀬𑀓𑀣𑀸𑀬 𑀲𑁄𑀢𑀸𑀯𑀥𑀸𑀦𑀁 𑀇𑀫𑀁 𑀓𑀣𑀁 𑀲𑀼𑀢𑁆𑀯𑀸 𑀬𑀁 𑀉𑀧𑁆𑀧𑀚𑁆𑀚𑀢𑀺 𑀜𑀸𑀡𑀁, 𑀢𑀫𑁆𑀧𑀺 𑀏𑀢𑀤𑀢𑁆𑀣𑀁. 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀲𑀩𑁆𑀩𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀢𑀸𑀤𑀺𑀲𑁄𑀯 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑀢𑁄 𑀧𑀭𑀺𑀡𑀸𑀫𑁂𑀢𑀩𑁆𑀩𑁄, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀅𑀬𑀁 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄, 𑀲𑁄𑀧𑀺 𑀏𑀢𑀤𑀢𑁆𑀣𑀸𑀬 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀅𑀬𑀁 ¶ 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑁄 𑀫𑀕𑁆𑀕𑁄, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀏𑀢𑀤𑀢𑁆𑀣𑀫𑁂𑀯𑀸𑀢𑀺. 𑀏𑀯𑀜𑁆𑀘 𑀲𑀢𑀺 𑀇𑀫𑀺𑀦𑀸 𑀫𑀳𑀼𑀲𑁆𑀲𑀸𑀳𑀢𑁄 𑀲𑀸𑀥𑀺𑀢𑀩𑁆𑀩𑀁 ¶ 𑀦𑀺𑀬𑀢𑀧𑁆𑀧𑀬𑁄𑀚𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀳𑁂𑀝𑁆𑀞𑀸 ‘‘𑀯𑀺𑀭𑀸𑀕𑁄…𑀧𑁂… 𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀦 𑀮𑀩𑁆𑀪𑀫𑀸𑀦𑀸𑀦𑀺𑀲𑀁𑀲𑀨𑀮𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀬𑁄𑀕𑁄𑀢𑀺 𑀉𑀕𑁆𑀕𑀳𑀡𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀅𑀪𑀺𑀬𑁄𑀕𑁄.

𑀯𑀺𑀦𑀬𑀸𑀦𑀺𑀲𑀁𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀩𑀸𑀳𑀺𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 ¶ ¶ 𑀢𑀁 𑀓𑀢𑀫𑀁, 𑀢𑀁 𑀓𑀣𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀦𑁆𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀦𑀺𑀬𑀫𑁄𑀢𑀺 𑀅𑀦𑀺𑀬𑀫𑁄, 𑀦𑀺𑀤𑁆𑀤𑀺𑀲𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀦𑀺𑀤𑁆𑀤𑁂𑀲𑁄, 𑀯𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀯𑀘𑀦𑀁, 𑀦𑀺𑀤𑁆𑀤𑁂𑀲𑁄𑀬𑁂𑀯 𑀯𑀘𑀦𑀁 𑀦𑀺𑀤𑁆𑀤𑁂𑀲𑀯𑀘𑀦𑀁, 𑀅𑀦𑀺𑀬𑀫𑀲𑁆𑀲 𑀦𑀺𑀤𑁆𑀤𑁂𑀲𑀯𑀘𑀦𑀁 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁, 𑀧𑀞𑀫𑀁 𑀅𑀦𑀺𑀬𑀫𑀺𑀢𑀲𑁆𑀲 𑀲𑀫𑀬𑀲𑁆𑀲 𑀦𑀺𑀤𑁆𑀤𑁂𑀲𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂𑀦𑀸𑀢𑀺 𑀅𑀯𑀢𑁆𑀯𑀸 𑀢𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀺𑀬𑀫𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀯𑀘𑀦𑀁 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀬𑀁𑀢𑀁𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀆𑀳 ‘‘𑀢𑀲𑁆𑀲 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂𑀦𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 ‘‘𑀢𑁂𑀦𑀸’’𑀢𑀺 𑀏𑀢𑀲𑁆𑀲. 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂𑀦𑀧𑀻𑀢𑀺 ‘‘𑀬𑁂𑀦𑀸’’𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁂𑀦𑀧𑀺. 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸𑀢𑀺 𑀧𑀭𑀪𑀸𑀕𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀧𑀭𑀺𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦. 𑀧𑀭𑀺𑀯𑀺𑀢𑀓𑁆𑀓𑁂 𑀳𑀺 𑀲𑀺𑀤𑁆𑀥𑁂 𑀬𑁂𑀦 𑀲𑀫𑀬𑁂𑀦 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀇𑀤𑀁 𑀅𑀢𑁆𑀣𑀢𑁄 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀧𑀭𑀪𑀸𑀕𑁂 𑀳𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀤𑁆𑀥𑁄’’𑀢𑀺𑀆𑀤𑀺. ‘‘𑀢𑁂𑀦𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀢𑀤𑀢𑁆𑀣𑀫𑁂𑀯 ‘‘𑀬𑁂𑀦𑀸’’𑀢𑀺 𑀅𑀢𑁆𑀣𑀢𑁄 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀬𑁂𑀦𑀸’’𑀢𑀺 𑀅𑀬𑀁 ‘‘𑀢𑁂𑀦𑀸’’𑀢𑀺 𑀏𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄 𑀦𑀸𑀫 𑀚𑀸𑀢𑁄. 𑀧𑀝𑀺𑀦𑀺𑀤𑁆𑀤𑁂𑀲𑁄𑀢𑀺 𑀘 𑀯𑀺𑀢𑁆𑀣𑀸𑀭𑀦𑀺𑀤𑁆𑀤𑁂𑀲𑁄𑀢𑀺 𑀅𑀢𑁆𑀣𑁄.

𑀅𑀧𑀭𑀪𑀸𑀕𑁂 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄𑀢𑀺 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄, 𑀏𑀢𑀲𑁆𑀲 𑀲𑀼𑀕𑀢 𑀓𑀸𑀮𑁄, 𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬, 𑀉𑀤𑁆𑀤𑀺𑀲𑁂𑀬𑁆𑀬 𑀧𑀸𑀢𑀺𑀫𑁄𑀓𑁆𑀔𑀁. 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀲𑁆𑀲 𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀺𑀢𑀓𑁆𑀓𑁄𑀢𑀺 ‘‘𑀓𑀢𑀫𑁂𑀲𑀸𑀦𑀁 𑀔𑁄 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀓𑀢𑀫𑁂𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀧𑀭𑀺𑀯𑀺𑀢𑀓𑁆𑀓𑁄. 𑀬𑀁𑀢𑀁𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑁄𑀢𑀺 𑀆𑀳 ‘‘𑀢𑀲𑁆𑀫𑀸 𑀬𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀦𑁆𑀦𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦. 𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀢𑁆𑀢𑀩𑁆𑀩𑁄𑀢𑀺 𑀏𑀢𑀲𑁆𑀲 ‘‘𑀬𑀤𑀺𑀤’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀢𑁆𑀢𑀩𑁆𑀩𑁄’’𑀢𑀺 𑀬𑀤𑀺𑀤𑀁 𑀬𑀁 𑀇𑀤𑀁 𑀯𑀺𑀥𑀸𑀦𑀁, 𑀅𑀬𑀁 𑀲𑀩𑁆𑀩𑀲𑁆𑀫𑀺𑀁 𑀯𑀺𑀦𑀬𑁂 𑀬𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 ¶ 𑀯𑀸 ‘‘𑀧𑀝𑀺𑀦𑀺𑀤𑁆𑀤𑁂𑀲𑁄 𑀓𑀢𑁆𑀢𑀩𑁆𑀩𑁄’’𑀢𑀺 𑀬𑀤𑀺𑀤𑀁 𑀬𑀸 𑀅𑀬𑀁 𑀬𑀼𑀢𑁆𑀢𑀺, 𑀅𑀬𑀁 𑀲𑀩𑁆𑀩𑀲𑁆𑀫𑀺𑀁 𑀯𑀺𑀦𑀬𑁂 𑀬𑀼𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀺𑀤𑀁 ¶ 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀦𑁆𑀢𑀺 𑀢𑀲𑁆𑀲𑀸 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀬𑀸 𑀧𑀭𑀺𑀤𑀻𑀧𑀦𑁂 𑀇𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁, 𑀉𑀧𑀸𑀬𑀫𑀢𑁆𑀢𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀔𑀁 𑀤𑁆𑀯𑀸𑀭𑀁 𑀉𑀧𑀸𑀬𑁄𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀧𑀝𑀺𑀦𑀺𑀤𑁆𑀤𑁂𑀲𑀫𑀸𑀳 ‘‘𑀬𑁂𑀦 𑀲𑀼𑀤𑀺𑀦𑁆𑀦𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑀸𑀢𑀺 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀢𑁆𑀢𑀸 𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄𑀧𑀺 𑀢𑀸𑀤𑀺𑀲𑁄𑀬𑁂𑀯𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀝𑀺𑀲𑁂𑀯𑀻’’𑀢𑀺. 𑀧𑀼𑀩𑁆𑀩𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸𑀢𑀺 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦. 𑀧𑀘𑁆𑀙𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸𑀢𑀺 𑀭𑀜𑁆𑀜𑀸 𑀅𑀤𑀺𑀦𑁆𑀦𑀁 𑀤𑀸𑀭𑀽𑀦𑀁 𑀆𑀤𑀺𑀬𑀦𑀲𑀗𑁆𑀔𑀸𑀢𑀧𑀘𑁆𑀙𑀸𑀉𑀧𑁆𑀧𑀦𑁆𑀦𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦. 𑀲𑀫𑀬𑀲𑀤𑁆𑀤𑁄𑀢𑀺 𑀏𑀢𑀲𑁆𑀲 ‘‘𑀤𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀲𑀫𑀯𑀸𑀬𑁂𑀢𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁, 𑀓𑀸𑀭𑀡𑀲𑀫𑀯𑀸𑀬𑁂𑀢𑀺 𑀅𑀢𑁆𑀣𑁄. 𑀔𑀡𑁂𑀢𑀺 𑀑𑀓𑀸𑀲𑁂. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀲𑀫𑀯𑀸𑀬𑁄 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀧𑀬𑀼𑀢𑁆𑀢𑀓𑀸𑀮𑁄. 𑀲𑀫𑀬𑁄 𑀦𑀸𑀫 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀅𑀢𑁆𑀣𑀢𑁄 𑀢𑀤𑀦𑀼𑀭𑀽𑀧𑀁 𑀲𑀭𑀻𑀭𑀩𑀮𑀜𑁆𑀘𑁂𑀯 𑀢𑀧𑁆𑀧𑀘𑁆𑀘𑀬𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀘. 𑀉𑀧𑀸𑀤𑀸𑀦𑀁 𑀦𑀸𑀫 𑀜𑀸𑀡𑁂𑀦 𑀢𑁂𑀲𑀁 𑀕𑀳𑀡𑀁 𑀲𑀮𑁆𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀧𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀅𑀫𑁆𑀳𑀸𑀓𑀁 𑀲𑁆𑀯𑁂 𑀕𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀓𑀸𑀬𑁂 𑀩𑀮𑀫𑀢𑁆𑀢𑀸 𑀘𑁂𑀯 𑀨𑀭𑀺𑀲𑁆𑀲𑀢𑀺, 𑀕𑀫𑀦𑀧𑀘𑁆𑀘𑀬𑀸 𑀘 𑀅𑀜𑁆𑀜𑁄 𑀅𑀨𑀸𑀲𑀼𑀯𑀺𑀳𑀸𑀭𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀣𑁂𑀢𑀁 𑀓𑀸𑀮𑀜𑁆𑀘 𑀕𑀫𑀦𑀓𑀸𑀭𑀡𑀲𑀫𑀯𑀸𑀬𑀲𑀗𑁆𑀔𑀸𑀢𑀁 𑀲𑀫𑀬𑀜𑁆𑀘 𑀉𑀧𑀥𑀸𑀭𑁂𑀢𑁆𑀯𑀸 𑀅𑀧𑀺 𑀏𑀯 𑀦𑀸𑀫 𑀲𑁆𑀯𑁂 𑀆𑀕𑀘𑁆𑀙𑁂𑀬𑁆𑀬𑀸𑀫𑀸𑀢𑀺.

𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸, 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 𑀔𑀡𑁄𑀢𑀺 𑀘 𑀲𑀫𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀧𑀯𑀼𑀤𑁆𑀥𑀁 𑀯𑀦𑀁 𑀧𑀯𑀦𑀁, 𑀢𑀲𑁆𑀫𑀺𑀁 𑀧𑀯𑀦𑀲𑁆𑀫𑀺𑀁, 𑀯𑀦𑀲𑀡𑁆𑀟𑁂𑀢𑀺 𑀅𑀢𑁆𑀣𑁄. 𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀲𑀫𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼. 𑀪𑀤𑁆𑀤𑀸𑀮𑀻𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀤𑁆𑀤𑀸𑀮𑀺 𑀢𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀢𑁂 𑀦 𑀧𑀝𑀺𑀯𑀺𑀤𑁆𑀥𑀁 𑀦 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺. 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀪𑀕𑀯𑀸 𑀔𑁄’’𑀢𑀺𑀆𑀤𑀺.

𑀉𑀕𑁆𑀕𑀸𑀳𑀫𑀸𑀦𑁄 ¶ 𑀢𑀺𑀆𑀤𑀻𑀲𑀼 𑀫𑀸𑀦𑁄𑀢𑀺 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀓𑀢𑀺𑀦𑀸𑀫𑀁, 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀧𑀦 𑀉𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 ‘‘𑀉𑀕𑁆𑀕𑀸𑀳𑀫𑀸𑀦𑁄’’𑀢𑀺 𑀦𑀁 𑀲𑀜𑁆𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀕𑁆𑀕𑀸𑀳𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺 ¶ . 𑀲𑀫𑀡𑀫𑀼𑀡𑁆𑀟𑀺𑀓𑀸𑀬 𑀧𑀼𑀢𑁆𑀢𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄. 𑀲𑀫𑀬𑀁 𑀤𑀺𑀝𑁆𑀞𑀺𑀁 𑀧𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄, 𑀢𑀲𑁆𑀫𑀺𑀁 𑀲𑀫𑀬𑀧𑁆𑀧𑀯𑀸𑀤𑀓𑁂, 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀧𑀪𑀼𑀢𑀬𑁄 𑀩𑁆𑀭𑀸𑀳𑁆𑀫𑀡𑀸 𑀦𑀺𑀕𑀡𑁆𑀞𑀸𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀧𑀭𑀺𑀩𑁆𑀩𑀸𑀚𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀤𑀺𑀝𑁆𑀞𑀺𑀁 𑀧𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀸𑀫𑁄 ‘‘𑀲𑀫𑀬𑀧𑁆𑀧𑀯𑀸𑀤𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀼𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀢𑀺𑀦𑁆𑀤𑀼𑀓𑀸𑀘𑀻𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 𑀏𑀓𑀲𑀸𑀮𑀓𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀁 𑀏𑀓𑀸 𑀲𑀸𑀮𑀸 𑀓𑀢𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀫𑀳𑀸𑀧𑀼𑀜𑁆𑀜𑀁 𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀸𑀮𑀸 𑀓𑀢𑀸, 𑀢𑀲𑁆𑀫𑀸 𑀢𑀫𑁂𑀯 𑀏𑀓𑀁 𑀲𑀸𑀮𑀫𑀼𑀧𑀸𑀤𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 ‘‘𑀏𑀓𑀲𑀸𑀮𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀮𑁆𑀮𑀺𑀓𑀸𑀬 𑀧𑀦 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀪𑀽𑀢𑁄 𑀲𑁄 𑀧𑀼𑀧𑁆𑀨𑀨𑀮𑀲𑀜𑁆𑀙𑀦𑁆𑀦𑁄 𑀆𑀭𑀸𑀫𑁄𑀢𑀺 𑀓𑀢𑁆𑀯𑀸 ‘‘𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀢𑀲𑁆𑀫𑀺𑀁 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂. 𑀧𑀝𑀺𑀯𑀲𑀢𑀻𑀢𑀺 𑀢𑀲𑁆𑀫𑀺𑀁 𑀯𑀸𑀲𑀨𑀸𑀲𑀼𑀢𑀸𑀬 𑀯𑀲𑀢𑀺.

𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂. 𑀅𑀢𑁆𑀣𑁄𑀢𑀺 𑀯𑀼𑀟𑁆𑀠𑀺. 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀧𑀸𑀧𑀼𑀡𑀺𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀉𑀪𑀬𑀢𑁆𑀣𑀲𑀗𑁆𑀔𑀸𑀢𑀳𑀺𑀢𑀧𑀝𑀺𑀮𑀸𑀪𑀸. 𑀲𑀫𑁆𑀧𑀭𑀸𑀬𑀺𑀓𑁄𑀧𑀺 𑀳𑀺 𑀅𑀢𑁆𑀣𑁄 𑀓𑀸𑀭𑀡𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀧𑀝𑀺𑀮𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀫𑀢𑁆𑀣𑀤𑁆𑀯𑀬𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀅𑀢𑁆𑀣𑀸𑀪𑀺𑀲𑀫𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀺𑀬𑀸 𑀧𑀜𑁆𑀜𑀸𑀬 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀥𑀻𑀭𑁄. 𑀅𑀣 𑀯𑀸 𑀥𑀻 𑀧𑀜𑁆𑀜𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀥𑀻𑀭𑁄.

𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀲𑀫𑁆𑀫𑀸 𑀧𑀳𑀸𑀦𑁂𑀦. 𑀲𑀫𑁆𑀫𑀸𑀢𑀺 𑀇𑀫𑀺𑀦𑀸 𑀫𑀸𑀦𑀲𑁆𑀲 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀻𑀴𑀦𑀁 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁, 𑀧𑀻𑀴𑀦𑀫𑁂𑀯 𑀅𑀢𑁆𑀣𑁄 𑀧𑀻𑀴𑀦𑀝𑁆𑀞𑁄, 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀫𑁂𑀘𑁆𑀘 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄 𑀲𑀗𑁆𑀔𑀢𑀝𑁆𑀞𑁄. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁. 𑀯𑀺𑀧𑀭𑀺𑀡𑀸𑀫𑁄 𑀚𑀭𑀸𑀬 𑀫𑀭𑀡𑁂𑀦 ¶ 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄𑀯 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄, 𑀧𑀻𑀴𑀦𑀸𑀤𑀻𑀦𑀺. 𑀢𑀸𑀦𑀺 𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 ‘‘𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀸𑀦𑀺, 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑀬𑀲𑁆𑀲 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺.

𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬𑀲𑀤𑁆𑀤𑁄 𑀏𑀯𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀲𑀉𑀧𑀲𑀕𑁆𑀕𑁄 𑀅𑀪𑀺𑀲𑀫𑀬𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀳𑀓𑀸𑀭𑀻𑀓𑀸𑀭𑀡𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 ¶ 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀸𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑁂𑀦 𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀢𑀁𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀜𑀸𑀡𑁂𑀦 𑀅𑀪𑀺𑀫𑀼𑀔𑀁 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 𑀘 𑀅𑀢𑁆𑀣𑀫𑀢𑁆𑀢𑀁 𑀧𑀝𑀺𑀘𑁆𑀘 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂. 𑀲𑀤𑁆𑀤𑀯𑀺𑀲𑁂𑀲𑁂 𑀳𑀺 𑀅𑀧𑁂𑀓𑁆𑀔𑀺𑀬𑀫𑀸𑀦𑁂 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑀢𑁆𑀣𑀸𑀪𑀺𑀥𑀸𑀦𑀁 𑀦 𑀲𑀫𑁆𑀪𑀯𑀢𑀺. 𑀦 𑀳𑀺 𑀬𑁄 𑀓𑀸𑀮𑀢𑁆𑀣𑁄 𑀲𑀫𑀬𑀲𑀤𑁆𑀤𑁄, 𑀲𑁄𑀬𑁂𑀯 𑀲𑀫𑀽𑀳𑀸𑀤𑀺𑀅𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀲𑀫𑀬𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀫𑀼𑀧𑀸𑀤𑀸𑀬 𑀅𑀦𑁂𑀓𑀢𑁆𑀣𑀢𑀸 ¶ 𑀲𑀫𑀬𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄𑀢𑀺 𑀅𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀇𑀥 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄 𑀤𑁂𑀲𑀤𑁂𑀲𑀓𑀸𑀤𑀻𑀦𑀁 𑀯𑀺𑀬 𑀦𑀺𑀤𑀸𑀦𑀪𑀸𑀯𑁂𑀦 𑀓𑀸𑀮𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀘.

𑀉𑀧𑀬𑁄𑀕𑀯𑀘𑀦𑁂𑀦 𑀪𑀼𑀫𑁆𑀫𑀯𑀘𑀦𑁂𑀦 𑀘 𑀦𑀺𑀤𑁆𑀤𑁂𑀲𑀫𑀓𑀢𑁆𑀯𑀸 𑀇𑀥 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁂 𑀧𑀬𑁄𑀚𑀦𑀁 𑀦𑀺𑀤𑁆𑀥𑀸𑀭𑁂𑀢𑀼𑀓𑀸𑀫𑁄 𑀧𑀭𑀫𑁆𑀫𑀼𑀔𑁂𑀦 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ‘‘𑀏𑀢𑁆𑀣𑀸𑀳𑀸’’𑀢𑀺𑀆𑀤𑀺. 𑀏𑀢𑁆𑀣 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀢𑀡𑁆𑀟𑀯𑀸𑀤𑀻 𑀆𑀳𑀸𑀢𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀘𑁄𑀤𑀦𑀸𑀬 𑀓𑀢𑁆𑀢𑀼𑀓𑀸𑀫𑀢𑀁 𑀤𑀻𑀧𑁂𑀢𑀺, 𑀦𑀦𑀽𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄. 𑀓𑀲𑁆𑀫𑀸 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀸𑀧𑀺 ‘‘𑀬𑀣𑀸’’𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼. 𑀢𑀣𑀸𑀢𑀺 𑀉𑀧𑀬𑁄𑀕𑀪𑀼𑀫𑁆𑀫𑀯𑀘𑀦𑁂𑀳𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂. 𑀅𑀜𑁆𑀜𑀣𑀸𑀢𑀺 𑀓𑀭𑀡𑀯𑀘𑀦𑁂𑀦. 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁, 𑀢𑀸𑀯 𑀅𑀘𑁆𑀘𑀦𑁆𑀢𑀫𑁂𑀯, 𑀦𑀺𑀭𑀦𑁆𑀢𑀭𑀫𑁂𑀯𑀸𑀢𑀺 ¶ 𑀅𑀢𑁆𑀣𑁄. 𑀓𑀭𑀼𑀡𑀸𑀯𑀺𑀳𑀸𑀭𑁂𑀦𑀸𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀣𑀸 𑀳𑀺 𑀓𑀭𑀼𑀡𑀸𑀦𑀺𑀤𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀇𑀥 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 ‘‘𑀓𑀭𑀼𑀡𑀸𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀓𑀭𑀼𑀡𑀸𑀲𑀫𑀆𑀧𑀢𑁆𑀢𑀺𑀯𑀺𑀳𑀸𑀭𑁄. 𑀦 𑀳𑀺 𑀤𑁂𑀲𑀦𑀸𑀓𑀸𑀮𑁂 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑀬𑀲𑁆𑀲 𑀤𑁂𑀲𑀦𑀸𑀜𑀸𑀡𑀲𑁆𑀲 𑀲𑀢𑁆𑀢𑀯𑀺𑀲𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀲𑀳𑀼𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸, 𑀢𑀲𑁆𑀫𑀸 𑀓𑀭𑀼𑀡𑀸𑀯𑀲𑁂𑀦 𑀧𑀯𑀢𑁆𑀢𑁄 𑀧𑀭𑀳𑀺𑀢𑀧𑀅𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀯𑀺𑀳𑀸𑀭𑁄 𑀇𑀥 𑀓𑀭𑀼𑀡𑀸𑀯𑀺𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀤𑀻𑀧𑀦𑀢𑁆𑀣𑀁 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀅𑀚𑁆𑀛𑁂𑀢𑀻’’𑀢𑀺.

𑀅𑀥𑀺𑀓𑀭𑀡𑀢𑁆𑀣𑁄𑀢𑀺 𑀆𑀥𑀸𑀭𑀢𑁆𑀣𑁄. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀲𑁄𑀬𑁂𑀯𑀢𑁆𑀣𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄. 𑀓𑀣𑀁 𑀧𑀦 𑀅𑀪𑀺𑀥𑀫𑁆𑀫𑁂 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀤𑁆𑀯𑀬𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀅𑀥𑀺𑀓𑀭𑀡𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀮𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀓𑀸𑀮𑀢𑁆𑀣𑁄, 𑀲𑀫𑀽𑀳𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀲𑀫𑀽𑀳𑀢𑁆𑀣𑁄. 𑀅𑀣 𑀯𑀸 𑀓𑀸𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀓𑀸𑀮𑀢𑁆𑀣𑁄, 𑀲𑀫𑀽𑀳𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀲𑀫𑀽𑀳𑀢𑁆𑀣𑁄. 𑀓𑁄 𑀲𑁄? 𑀲𑀫𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄 𑀢𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀁 𑀆𑀥𑀸𑀭𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀧𑀼𑀜𑁆𑀚𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄.

𑀦𑀦𑀼 ¶ 𑀘𑀸𑀬𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀓𑀸𑀮𑁄 𑀲𑀫𑀽𑀳𑁄 𑀘 𑀯𑁄𑀳𑀸𑀭𑀫𑀢𑁆𑀢𑀓𑁄, 𑀲𑁄 𑀓𑀣𑀁 𑀆𑀥𑀸𑀭𑁄 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀬𑀣𑀸 𑀳𑀺 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀢𑁆𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄 𑀲𑀸𑀬𑀦𑁆𑀳𑁂 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁄 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀫𑁆𑀳𑀺 𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀫𑀺𑀥𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀪𑀺𑀥𑀫𑁆𑀫𑁂 𑀆𑀥𑀸𑀭𑀢𑁆𑀣𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑀫𑁆𑀪𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀔𑀡𑁄 𑀦𑀸𑀫 𑀅𑀝𑁆𑀞𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑁄 𑀦𑀯𑀫𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑁄 𑀔𑀡𑁄, 𑀬𑀸𑀦𑀺 𑀯𑀸 𑀧𑀦𑁂𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀧𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀏𑀢𑁆𑀣 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺, 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀢𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀑𑀓𑀸𑀲𑀝𑁆𑀞𑁂𑀦 𑀔𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀸𑀦𑀺 𑀳𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀪𑀽𑀢𑀸𑀦𑀺. 𑀲𑀫𑀯𑀸𑀬𑁄 𑀦𑀸𑀫 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 ¶ (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧; 𑀲𑀁. 𑀦𑀺. 𑁪.𑁬𑁦) 𑀏𑀯𑀫𑀸𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀗𑁆𑀔𑀸𑀢𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀲𑀡𑁆𑀞𑀺𑀢𑀸 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀲𑀸𑀫𑀕𑁆𑀕𑀻. 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀸𑀥𑀸𑀭𑀡𑀨𑀮𑀁. 𑀳𑁂𑀢𑀽𑀢𑀺 𑀚𑀦𑀓𑀳𑁂𑀢𑀼. 𑀬𑀣𑀸𑀯𑀼𑀢𑁆𑀢𑀔𑀡𑀲𑀗𑁆𑀔𑀆𑀢𑀲𑁆𑀲 𑀲𑀫𑀯𑀸𑀬𑀲𑀗𑁆𑀔𑀸𑀢𑀲𑁆𑀲 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀲𑀢𑁆𑀢𑀸𑀬 𑀢𑁂𑀲𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀪𑀸𑀯𑁄 𑀲𑀢𑁆𑀢𑀸 𑀮𑀓𑁆𑀔𑀻𑀬𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀅𑀜𑁆𑀜𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀸𑀪𑀸𑀯𑁂 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀺𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀔𑀡𑁂 𑀧𑀘𑁆𑀘𑀬𑀲𑀫𑀯𑀸𑀬𑁂 𑀳𑁂𑀢𑀼𑀫𑁆𑀳𑀺 𑀘 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀘𑁆𑀘𑀬𑀲𑀫𑀯𑀸𑀬𑁂 𑀳𑁂𑀢𑀼𑀫𑁆𑀳𑀺 𑀘 𑀲𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 ¶ . 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀥𑀺𑀓𑀭𑀡𑀢𑁆𑀣𑀲𑁆𑀲 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑁆𑀲 𑀘 𑀤𑀻𑀧𑀦𑀢𑁆𑀣𑀁.

𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂. 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑁄 ‘‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀓𑀣𑀁 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑁄 𑀳𑀺 𑀲𑁄’’𑀢𑀺𑀆𑀤𑀺. 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀢𑀁𑀢𑀁𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁄𑀯 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼 𑀘𑁂𑀯 𑀓𑀭𑀡𑀜𑁆𑀘. 𑀢𑀣𑀸 𑀳𑀺 𑀬𑀤𑀸 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀧𑀞𑀫𑀫𑁂𑀯 𑀢𑁂𑀲𑀁 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀫𑀸𑀦𑁄 𑀯𑀺𑀳𑀭𑀢𑀺, 𑀢𑀤𑀸 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀲𑀢𑀻𑀢𑀺 𑀲𑀺𑀤𑁆𑀥𑁄 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑁆𑀲 𑀳𑁂𑀢𑀼𑀪𑀸𑀯𑁄 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀦𑁆𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀸𑀬 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀧𑀦 𑀢𑁂𑀦𑁂𑀯 𑀧𑀼𑀩𑁆𑀩𑀲𑀺𑀤𑁆𑀥𑁂𑀦 𑀯𑀻𑀢𑀺𑀓𑁆𑀓𑀫𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀓𑀢𑀫𑀢𑁆𑀢𑀸 𑀓𑀭𑀡𑀪𑀸𑀯𑁄𑀧𑀺 𑀯𑀻𑀢𑀺𑀓𑁆𑀓𑀫𑀲𑁆𑀲𑁂𑀯 𑀲𑀺𑀤𑁆𑀥𑁄 ‘‘𑀅𑀲𑀺𑀦𑀸 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀻𑀢𑀺𑀓𑁆𑀓𑀫𑀁 𑀧𑀦 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀢𑀦𑁆𑀦𑀺𑀲𑁆𑀲𑀬𑀓𑀸𑀮𑀫𑁆𑀧𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀓𑀸𑀮𑀲𑁆𑀲𑀧𑀺 𑀇𑀥 𑀳𑁂𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀘 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑀦𑀺𑀲𑁆𑀲𑀬𑀲𑁆𑀲 𑀓𑀸𑀮𑀲𑁆𑀲𑀧𑀺 𑀓𑀭𑀡𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀸𑀮𑀲𑁆𑀲𑀧𑀺 𑀳𑁂𑀢𑀼𑀪𑀸𑀯𑁄 𑀓𑀭𑀡𑀪𑀸𑀯𑁄 𑀘 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀯𑀻𑀢𑀺𑀓𑁆𑀓𑀫𑁄𑀬𑁂𑀯 𑀳𑁂𑀢𑀼𑀪𑀽𑀢𑁄 𑀓𑀭𑀡𑀪𑀽𑀢𑁄 𑀘. 𑀲𑁄 𑀳𑀺 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂 𑀓𑀭𑀡𑀫𑁆𑀧𑀺 𑀳𑁄𑀢𑀻𑀢𑀺.

𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀧𑀜𑁆𑀜𑀸𑀧𑀬𑀦𑁆𑀢𑁄𑀢𑀺 𑀯𑀻𑀢𑀺𑀓𑁆𑀓𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀁 𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀓𑀭𑀡𑀪𑀽𑀢𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀯𑀢𑁆𑀣𑀼𑀁 𑀯𑀻𑀢𑀺𑀓𑁆𑀓𑀫𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻𑀢𑀺 𑀅𑀢𑁆𑀣𑁄. ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 ¶ 𑀅𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀯𑀘𑀦𑀢𑁄 ‘‘𑀢𑁂𑀦 𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂𑀧𑀺 𑀧𑀞𑀫𑀁 ‘‘𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀯𑀘𑀦𑀁 𑀇𑀥 𑀳𑁂𑀢𑀼𑀅𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀕𑀯𑀸 𑀳𑀺 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀦𑁆𑀢𑁄 𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑀁 𑀧𑀭𑀺𑀯𑀺𑀢𑀓𑁆𑀓𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀺𑀳𑀸𑀲𑀻𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑀺𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀆𑀘𑀭𑀺𑀬𑀲𑁆𑀲 𑀇𑀥 𑀓𑀫𑀯𑀘𑀦𑀺𑀘𑁆𑀙𑀸 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑀁 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀫𑁆𑀧𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸) ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀬𑀫𑁂𑀯 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀦 𑀳𑀺 𑀢𑀢𑁆𑀣 𑀧𑀞𑀫𑀁 ‘‘𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀯𑀘𑀦𑀁 𑀇𑀥 ‘‘𑀢𑁂𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀏𑀢𑁆𑀣 𑀳𑁂𑀢𑀼𑀅𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀲𑀫𑀬𑁂𑀦 𑀯𑀺𑀳𑀸𑀲𑀺, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀳𑁂𑀢𑀼𑀪𑀽𑀢𑁂𑀦 𑀲𑀫𑀬𑁂𑀦 𑀯𑀺𑀳𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑀲𑁆𑀲 𑀓𑀭𑀡𑀢𑁆𑀣𑀲𑁆𑀲 𑀯𑀸 𑀤𑀻𑀧𑀦𑀢𑁆𑀣𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂. 𑀳𑁄𑀢𑀺 𑀘𑁂𑀢𑁆𑀣𑀸𑀢𑀺 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀗𑁆𑀕𑀳𑀯𑀲𑁂𑀦 𑀅𑀬𑀁 𑀕𑀸𑀣𑀸 𑀳𑁄𑀢𑀺. 𑀅𑀜𑁆𑀜𑀢𑁆𑀭𑀸𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼.

𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁄. 𑀢𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀢𑁄 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀧𑀭𑀢𑁄 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀝𑁆𑀞𑀸𑀦𑁂 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀭𑀜𑁆𑀚𑀸𑀬𑀦𑁆𑀢𑀺 𑀏𑀢𑁆𑀣 ‘‘𑀩𑀮𑀺𑀓𑀭𑀕𑁆𑀕𑀳𑀡𑁂𑀦 𑀚𑀦𑀲𑁆𑀲 𑀧𑀻𑀴𑀸𑀪𑀸𑀯𑀢𑁄 𑀦𑀺𑀤𑁆𑀤𑁄𑀲𑀢𑁆𑀢𑀸 𑀯𑀺𑀕𑀢𑁄 𑀭𑀚𑁄 𑀅𑀲𑁆𑀲𑀸𑀢𑀺 𑀯𑁂𑀭𑀜𑁆𑀚𑀸, 𑀲𑁂𑀭𑀺𑀯𑀸𑀡𑀺𑀚𑀚𑀸𑀢𑀓𑁂 𑀤𑁂𑀯𑀤𑀢𑁆𑀢𑀲𑁆𑀲 𑀯𑁂𑀭𑀼𑀧𑁆𑀧𑀦𑁆𑀦𑀧𑀤𑁂𑀲𑁂 𑀓𑀢𑀢𑁆𑀢𑀸 𑀯𑁂𑀭𑀁 𑀏𑀢𑁆𑀣 𑀚𑀸𑀢𑀦𑁆𑀢𑀺 𑀯𑁂𑀭𑀜𑁆𑀚𑀸, 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑁂 𑀦𑀝𑀲𑀫𑀚𑁆𑀚𑀸𑀤𑀻𑀳𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀘 𑀯𑀺𑀯𑀺𑀥𑁂𑀳𑀺 𑀉𑀧𑀓𑀭𑀡𑁂𑀳𑀺 𑀭𑀜𑁆𑀚𑀦𑀢𑁄 𑀯𑀺𑀯𑀺𑀥𑁂𑀳𑀺 𑀭𑀜𑁆𑀚𑀬𑀢𑀻𑀢𑀺 𑀯𑁂𑀭𑀜𑁆𑀚𑀸, 𑀧𑀝𑀺𑀧𑀓𑁆𑀔𑁂 𑀅𑀪𑀺𑀪𑀯𑀺𑀢𑁆𑀯𑀸 𑀓𑀢𑀪𑀸𑀯𑀢𑁄 𑀯𑁂𑀭𑀁 𑀅𑀪𑀺𑀪𑀯𑀺𑀢𑁆𑀯𑀸 𑀚𑀸𑀢𑀸𑀢𑀺 𑀯𑁂𑀭𑀜𑁆𑀚𑀸, 𑀯𑁂𑀭𑀜𑁆𑀚𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀅𑀲𑁆𑀲𑀫𑀝𑁆𑀞𑀸𑀦𑁂 𑀓𑀢𑀢𑁆𑀢𑀸 𑀯𑁂𑀭𑀜𑁆𑀚𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀓𑁂𑀘𑀺 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀇𑀫𑀺𑀦𑀸, 𑀦𑀸𑀫𑀫𑀢𑁆𑀢𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁂𑀭𑀜𑁆𑀚𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀦𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 ‘‘𑀕𑀗𑁆𑀕𑀸𑀬𑀁 𑀕𑀸𑀯𑁄 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀼𑀮’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀯𑀺𑀲𑁂𑀲𑁂𑀦𑀸𑀢𑀺 ¶ ¶ ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺. 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑀧𑀭𑀸𑀫𑀲𑀦𑁂𑀦 𑀯𑀺𑀦𑀸. 𑀅𑀣 𑀯𑀸 𑀅𑀯𑀺𑀲𑁂𑀲𑁂𑀦𑀸𑀢𑀺 𑀦 𑀯𑀺𑀲𑁂𑀲𑁂𑀦, 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄.

𑀇𑀭𑀺𑀬𑀸𑀧𑀣…𑀧𑁂… 𑀯𑀺𑀳𑀸𑀭𑁂𑀲𑀽𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀳𑀸𑀭𑁂𑀲𑀼. 𑀢𑀢𑁆𑀣 𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀧𑁆𑀧𑀬𑁄𑀕𑁄 𑀓𑀸𑀬𑀺𑀓𑀓𑀺𑀭𑀺𑀬𑀸. 𑀢𑀲𑁆𑀲𑀸 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀇𑀭𑀺𑀬𑀸𑀬 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀦𑀺𑀲𑀚𑁆𑀚𑀸𑀤𑀺. 𑀦 𑀳𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀳𑀺 𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀓𑀜𑁆𑀘𑀺 𑀓𑀸𑀬𑀺𑀓𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀞𑀸𑀦𑀲𑀫𑀗𑁆𑀕𑀻 𑀯𑀸 𑀳𑀺 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀯𑀸𑀢𑀺. 𑀯𑀺𑀳𑀭𑀡𑀁, 𑀯𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀳𑀸𑀭𑁄, 𑀇𑀭𑀺𑀬𑀸𑀧𑀣𑁄𑀯 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄, 𑀲𑁄 𑀘 𑀅𑀢𑁆𑀣𑀢𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀆𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑁄𑀯. 𑀤𑀺𑀯𑀺 𑀪𑀯𑁄 𑀤𑀺𑀩𑁆𑀩𑁄, 𑀢𑀢𑁆𑀣 𑀩𑀳𑀼𑀮𑀧𑁆𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑀪𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑁄 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀸 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸 𑀯𑀸 𑀤𑀺𑀩𑁆𑀩𑁄, 𑀤𑀺𑀩𑁆𑀩𑁄 𑀘 𑀲𑁄 𑀯𑀺𑀳𑀸𑀭𑁄 𑀘𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀤𑀺𑀩𑁆𑀩𑀪𑀸𑀯𑀸𑀯𑀳𑁄 𑀯𑀸 𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺. 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀳𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀦𑁂𑀢𑁆𑀢𑀺𑀬𑀁 𑀧𑀦 ‘‘𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑀺𑀬 𑀢𑀸𑀲𑀁 𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀤𑀺𑀩𑁆𑀩𑀪𑀸𑀯𑀸𑀯𑀳𑀲𑀸𑀫𑀜𑁆𑀜𑀢𑁄 𑀢𑀸𑀧𑀺 ‘‘𑀤𑀺𑀩𑁆𑀩𑀯𑀺𑀳𑀸𑀭𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀩𑁆𑀭𑀳𑁆𑀫𑀸𑀦𑀁 𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀩𑁆𑀭𑀳𑁆𑀫𑀸𑀦𑁄 𑀯𑀸 𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀳𑀺𑀢𑀽𑀧𑀲𑀁𑀳𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀅𑀢𑁆𑀣𑁄, 𑀫𑁂𑀢𑁆𑀢𑀸𑀛𑀸𑀦𑀸𑀤𑀺𑀓𑀸 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑀸 𑀉𑀢𑁆𑀢𑀫𑀸 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀅𑀭𑀺𑀬𑀸𑀦𑀁 𑀯𑀸 𑀯𑀺𑀳𑀸𑀭𑀸 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀯𑀺𑀲𑁂𑀲𑀢𑁄 𑀧𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀘 𑀪𑀕𑀯𑀢𑁄 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑀸.

𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 ¶ 𑀬𑀣𑀸𑀯𑀼𑀢𑁆𑀢𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀪𑀕𑀯𑀸 𑀳𑀺 𑀮𑁄𑀪𑀤𑁄𑀲𑀫𑁄𑀳𑀼𑀲𑁆𑀲𑀦𑁆𑀦𑀓𑀸𑀮𑁂 𑀮𑁄𑀓𑁂 𑀢𑀲𑁆𑀲 𑀲𑀓𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀦𑀬𑀦𑀢𑁆𑀣𑀁 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀅𑀬𑀯𑀺𑀳𑀸𑀭𑁂 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀣𑀸 𑀳𑀺 𑀬𑀤𑀸 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀓𑀺𑀭 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀮𑁄𑀪𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 ¶ 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀸 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀇𑀲𑁆𑀲𑀭𑀺𑀬𑀢𑁆𑀣𑀁 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀧𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀤𑁄𑀲𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀤𑁄𑀲𑁂𑀦 𑀤𑁄𑀲𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀯𑀤𑀦𑁆𑀢𑀺, 𑀢𑀤𑀸 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀫𑁄𑀳𑁂𑀦 𑀫𑁄𑀳𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺 𑀉𑀧𑀳𑀭𑀢𑀺 𑀉𑀧𑀦𑁂𑀢𑀺 𑀚𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀧𑀦 𑀦 𑀓𑀤𑀸𑀘𑀺 𑀦 𑀯𑀺𑀳𑀭𑀢𑀺 𑀢𑀁 𑀯𑀺𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀸𑀪𑀸𑀯𑀢𑁄, 𑀢𑀢𑁄𑀬𑁂𑀯 𑀘 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄𑀢𑀺 𑀆𑀳 ‘‘𑀇𑀥 𑀧𑀦𑀸’’𑀢𑀺𑀆𑀤𑀺. 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀦𑁆𑀢𑀺 𑀇𑀢𑀭𑀯𑀺𑀳𑀸𑀭𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀯𑀺𑀲𑁂𑀲𑀯𑀘𑀦𑀲𑁆𑀲 𑀅𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀘 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀢𑁆𑀣𑀚𑁄𑀢𑀦𑁄, 𑀳𑀭𑀢𑀻𑀢𑀺 𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄, 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀲𑁆𑀲 𑀓𑁂𑀦 𑀯𑀺𑀘𑁆𑀙𑀺𑀦𑁆𑀤𑀦𑀁, 𑀓𑀣𑀁 𑀓𑀲𑁆𑀲 𑀧𑀯𑀢𑁆𑀢𑀦𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀲𑁄𑀢𑀺 𑀪𑀕𑀯𑀸. 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑀧𑀺 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀲𑁆𑀲 𑀦𑀸𑀫 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀧𑀢𑀦𑁆𑀢𑀦𑁆𑀢𑀺 𑀅𑀧𑀢𑀦𑁆𑀢𑀁. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑀺𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀘 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀻𑀢𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺 𑀉𑀧𑀦𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂𑀢𑀺 ¶ 𑀏𑀢𑁆𑀣 𑀯𑀡𑁆𑀡𑀬𑀦𑁆𑀢𑀺 𑁋 𑀦𑀴𑁂𑀭𑀽𑀢𑀺 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀬𑀓𑁆𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀢𑁂𑀦 𑀅𑀥𑀺𑀯𑀢𑁆𑀣𑁄 𑀧𑀼𑀘𑀺𑀫𑀦𑁆𑀤𑁄 ‘‘𑀦𑀴𑁂𑀭𑀼𑀲𑁆𑀲 𑀧𑀼𑀘𑀺𑀫𑀦𑁆𑀤𑁄 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀦𑀴𑁂 𑀭𑀼𑀳𑀢𑁆𑀢𑀸 𑀚𑀸𑀢𑀢𑁆𑀢𑀸 𑀦𑀴𑁂𑀭𑀼. 𑀲𑀼𑀲𑀺𑀭𑀫𑁂𑀢𑁆𑀣 𑀦𑀴𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀭𑀼𑀓𑁆𑀔𑀲𑀼𑀲𑀺𑀭𑁂 𑀚𑀸𑀢𑀢𑁆𑀢𑀸 𑀦𑀴𑁂𑀭𑀼 𑀘 𑀲𑁄 𑀧𑀼𑀘𑀺𑀫𑀦𑁆𑀤𑁄 𑀘𑀸𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀴𑀯𑀦𑁂 𑀭𑀼𑀳𑀢𑁆𑀢𑀸 𑀚𑀸𑀢𑀢𑁆𑀢𑀸 𑀯𑀸 𑀦𑀴𑁂𑀭𑀼. 𑀦𑀴𑀯𑀦𑁂 𑀓𑀺𑀭 𑀲𑁄 𑀧𑀼𑀘𑀺𑀫𑀦𑁆𑀤𑀭𑀼𑀓𑁆𑀔𑁄 𑀚𑀸𑀢𑁄. 𑀉𑀭𑀼𑀦𑀴𑁄 𑀧𑀼𑀘𑀺𑀫𑀦𑁆𑀤𑁄 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑁄. 𑀉𑀭𑀼𑀲𑀤𑁆𑀤𑁄 𑀘𑁂𑀢𑁆𑀣 𑀫𑀳𑀦𑁆𑀢𑀧𑀭𑀺𑀬𑀸𑀬𑁄, 𑀦𑀴𑀲𑀤𑁆𑀤𑁄 𑀲𑀼𑀲𑀺𑀭𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀫𑀳𑀦𑁆𑀢𑁂𑀦 𑀲𑀼𑀲𑀺𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀘𑀺𑀫𑀦𑁆𑀤𑁄 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀆𑀘𑀭𑀺𑀬𑁄 𑀧𑀦 𑀓𑀺𑀫𑁂𑀢𑁆𑀣 𑀩𑀳𑀼𑀪𑀸𑀲𑀺𑀢𑁂𑀦𑀸𑀢𑀺 𑀏𑀓𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀴𑁂𑀭𑀼 𑀦𑀸𑀫 𑀬𑀓𑁆𑀔𑁄’’𑀢𑀺𑀆𑀤𑀺𑀫𑀸𑀳.

𑀫𑀽𑀮-𑀲𑀤𑁆𑀤𑁄 𑀏𑀢𑁆𑀣 𑀲𑀫𑀻𑀧𑀯𑀘𑀦𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀫𑀽𑀮𑀫𑀽𑀮𑀸𑀤𑀻𑀲𑀼 𑀯𑀢𑁆𑀢𑀫𑀸𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀽𑀮𑀦𑁆𑀢𑀺 𑀲𑀫𑀻𑀧’’𑀦𑁆𑀢𑀺𑀆𑀤𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀸𑀔𑀸𑀤𑀺𑀫𑀢𑁄 𑀲𑀗𑁆𑀖𑀸𑀢𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂 𑀅𑀯𑀬𑀯𑀯𑀺𑀲𑁂𑀲𑁂 ¶ 𑀧𑀯𑀢𑁆𑀢𑀫𑀸𑀦𑁄 𑀫𑀽𑀮𑀲𑀤𑁆𑀤𑁄 𑀬𑀲𑁆𑀫𑀸 𑀢𑀁𑀲𑀤𑀺𑀲𑁂𑀲𑀼 𑀢𑀦𑁆𑀦𑀺𑀲𑁆𑀲𑀬𑁂 𑀧𑀤𑁂𑀲𑁂 𑀘 𑀭𑀼𑀴𑁆𑀳𑀻𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀽𑀮𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀏𑀓𑁂𑀦 𑀫𑀽𑀮𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀆𑀳 ‘‘𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀻’’𑀢𑀺 𑀬𑀣𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁, 𑀭𑀽𑀧𑀭𑀽𑀧’’𑀦𑁆𑀢𑀺 𑀘. 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀻𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑁂. 𑀮𑁄𑀪𑁄 𑀳𑀺 𑀮𑁄𑀪𑀲𑀳𑀕𑀢𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑁂𑀯 𑀳𑁂𑀢𑀼𑀢𑁆𑀢𑀸 𑀅𑀲𑀸𑀥𑀸𑀭𑀡𑁄, 𑀢𑀲𑁆𑀫𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑁂𑀯 𑀆𑀯𑁂𑀡𑀺𑀓𑁂 𑀦𑁂𑀲𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁂 𑀧𑀘𑁆𑀘𑀬𑀥𑀫𑁆𑀫𑀯𑀺𑀲𑁂𑀲𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀣𑀸 𑀅𑀮𑁄𑀪𑀸𑀤𑀬𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑀸𑀥𑀸𑀭𑀡𑀸, 𑀮𑁄𑀪𑀸𑀤𑀬𑁄 𑀧𑀦 𑀢𑀣𑀸 𑀦 𑀳𑁄𑀦𑁆𑀢𑀺 𑀅𑀓𑀼𑀲𑀮𑀲𑁆𑀲𑁂𑀯 𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑀁. 𑀅𑀣 𑀯𑀸 𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀮𑁄𑀪𑀸𑀤𑀻𑀦𑀫𑁆𑀧𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀫𑀽𑀮𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀲𑀼𑀧𑀺 𑀳𑀺 𑀅𑀮𑁄𑀪𑀸𑀤𑀺𑀓𑀼𑀲𑀮𑀫𑀽𑀮𑀁 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀅𑀲𑀸𑀥𑀸𑀭𑀡𑀓𑀸𑀭𑀡𑀁, 𑀢𑀣𑀸 𑀅𑀮𑁄𑀪𑀸𑀤𑀺𑀅𑀩𑁆𑀬𑀸𑀓𑀢𑀫𑀽𑀮𑀫𑁆𑀧𑀺 𑀇𑀢𑀭𑀤𑁆𑀯𑀬𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸𑀢𑀺. 𑀦𑀺𑀯𑀸𑀢𑁂𑀢𑀺 𑀯𑀸𑀢𑀭𑀳𑀺𑀢𑁂 𑀧𑀤𑁂𑀲𑁂, 𑀯𑀸𑀢𑀲𑁆𑀲 𑀅𑀪𑀸𑀯𑁂 𑀯𑀸. 𑀧𑀢𑀦𑁆𑀢𑀻𑀢𑀺 𑀦𑀺𑀧𑀢𑀦𑁆𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀭𑀫𑀡𑀻𑀬𑁄𑀢𑀺 𑀫𑀦𑀼𑀜𑁆𑀜𑁄. 𑀧𑀸𑀲𑀸𑀤𑀺𑀓𑁄𑀢𑀺 𑀧𑀲𑀸𑀤𑀸𑀯𑀳𑁄, 𑀧𑀲𑀸𑀤𑀚𑀦𑀓𑁄𑀢𑀺 𑀅𑀢𑁆𑀣𑁄. 𑀆𑀥𑀺𑀧𑀘𑁆𑀘𑀁 𑀓𑀼𑀭𑀼𑀫𑀸𑀦𑁄 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 ¶ ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣. 𑀲𑀺𑀬𑀸𑀢𑀺 𑀓𑀲𑁆𑀲𑀘𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸, 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦 𑀓𑀤𑀸𑀘𑀺 𑀘𑁄𑀤𑁂𑀬𑁆𑀬 𑀯𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀢𑀸𑀯 𑀪𑀕𑀯𑀸𑀢𑀺𑀆𑀤𑀻𑀲𑀼 𑀘𑁄𑀤𑀓𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀧𑀸𑀝𑀮𑀺𑀧𑀼𑀢𑁆𑀢𑁂 𑀧𑀸𑀲𑀸𑀤𑁂 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀥𑀺𑀓𑀭𑀡𑀸𑀥𑀺𑀓𑀭𑀡𑀁 𑀬𑀤𑀺 𑀪𑀯𑁂𑀬𑁆𑀬, 𑀢𑀤𑀸 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺 𑀅𑀥𑀺𑀓𑀭𑀡𑀤𑁆𑀯𑀬𑀦𑀺𑀤𑁆𑀤𑁂𑀲𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀇𑀫𑁂𑀲𑀁 𑀧𑀦 𑀪𑀺𑀦𑁆𑀦𑀤𑁂𑀲𑀢𑁆𑀢𑀸 𑀦 𑀬𑀼𑀢𑁆𑀢𑁄 𑀉𑀪𑀬𑀦𑀺𑀤𑁆𑀤𑁂𑀲𑁄𑀢𑀺. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀬𑀤𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂 𑀯𑀺𑀳𑀭𑀢𑀺. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦𑀸𑀦𑀸𑀞𑀸𑀦𑀪𑀽𑀢𑀢𑁆𑀢𑀸 𑀯𑁂𑀭𑀜𑁆𑀚𑀸𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀸𑀦𑀁 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀘𑁄𑀤𑀓𑁄 𑀢𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀯𑁂𑀭𑀜𑁆𑀚𑀸𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀸𑀦𑀁 𑀪𑀽𑀫𑀺𑀪𑀸𑀕𑀯𑀲𑁂𑀦 𑀪𑀺𑀦𑁆𑀦𑀢𑁆𑀢𑀸𑀬𑁂𑀯 𑀳𑀺 𑀦 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀢𑁂𑀦𑁂𑀯 𑀲𑀫𑀬𑁂𑀦 𑀯𑀺𑀳𑀭𑀺𑀢𑀼𑀁, ‘‘𑀉𑀪𑀬𑀢𑁆𑀣 𑀢𑁂𑀦𑁂𑀯 𑀲𑀫𑀬𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀦𑀸𑀦𑀸𑀲𑀫𑀬𑁂 𑀯𑀺𑀳𑀸𑀭𑁄 𑀅𑀯𑀸𑀭𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀭𑁄 𑀲𑀩𑁆𑀩𑀫𑁂𑀢𑀁 𑀅𑀯𑀺𑀧𑀭𑀻𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑁂𑀦 𑀢𑀬𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂’’𑀢𑀺 𑀏𑀢𑀁 𑀯𑀘𑀦𑀁. 𑀏𑀯𑀦𑁆𑀢𑀺 ‘‘𑀬𑀤𑀺 𑀢𑀸𑀯 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀁 𑀢𑀁 𑀪𑀯𑀢𑀸 𑀘𑁄𑀤𑀺𑀢𑀁, 𑀢𑀁 𑀅𑀢𑁆𑀣𑀢𑁄 𑀏𑀯𑀁 𑀦 𑀔𑁄 𑀧𑀦 𑀤𑀝𑁆𑀞𑀩𑁆𑀩𑀁, 𑀦 𑀉𑀪𑀬𑀢𑁆𑀣 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 ¶ 𑀅𑀯𑀺𑀧𑀭𑀻𑀢𑀫𑀢𑁆𑀣𑀁 𑀢𑀲𑁆𑀲 𑀘 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀪𑀸𑀯𑀁 𑀢𑁂𑀦 𑀘 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀦𑀦𑀼 𑀅𑀯𑁄𑀘𑀼𑀫𑁆𑀳 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀕𑁄𑀬𑀽𑀣𑀸𑀦𑀻𑀢𑀺 𑀕𑁄𑀫𑀡𑁆𑀟𑀮𑀸𑀦𑀺. 𑀏𑀯𑀫𑁆𑀧𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀯𑁂𑀭𑀜𑁆𑀚𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀻𑀧𑀸𑀥𑀺𑀓𑀭𑀡𑀢𑁆𑀣𑀯𑀲𑁂𑀦 𑀉𑀪𑀬𑀣𑀸 𑀦𑀺𑀤𑀸𑀦𑀓𑀺𑀢𑁆𑀢𑀦𑁂 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘‘𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄.

𑀅𑀯𑀲𑁆𑀲𑀜𑁆𑀘𑁂𑀢𑁆𑀣 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀓𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀓𑀺𑀢𑁆𑀢𑀦𑀁 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀅𑀦𑁂𑀓𑀧𑁆𑀧𑀬𑁄𑀚𑀦𑀁, 𑀏𑀯𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀫𑁆𑀧𑀺 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀯𑀺𑀯𑀺𑀥𑀧𑁆𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑁂𑀭𑀜𑁆𑀚𑀸𑀓𑀺𑀢𑁆𑀢𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀦𑁆𑀢𑀺 𑀢𑁂𑀲𑀁 𑀢𑀢𑁆𑀣 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀉𑀧𑀲𑀗𑁆𑀓𑀫𑀦𑀧𑀬𑀺𑀭𑀼𑀧𑀸𑀲𑀦𑀸𑀤𑀻𑀦𑀁 𑀑𑀓𑀸𑀲𑀤𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀲𑀭𑀡𑁂𑀲𑀼 ¶ 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀦𑁂𑀦 𑀬𑀣𑀽𑀧𑀦𑀺𑀲𑁆𑀲𑀬𑀁 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀸𑀯𑀳𑀦𑁂𑀦 𑀘 𑀕𑀳𑀝𑁆𑀞𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁. 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀦𑁆𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑀦𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁂𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁.

𑀧𑀘𑁆𑀘𑀬𑀕𑁆𑀕𑀳𑀡𑁂𑀦𑁂𑀯 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀺𑀤𑁆𑀥𑀺𑀢𑁄 𑀆𑀳 ‘‘𑀢𑀣𑀸 𑀧𑀼𑀭𑀺𑀫𑁂𑀦…𑀧𑁂… 𑀯𑀺𑀯𑀚𑁆𑀚𑀦𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦𑀸𑀢𑀺 𑀯𑁂𑀭𑀜𑁆𑀚𑀸𑀯𑀘𑀦𑁂𑀦. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀢𑀲𑁆𑀲 𑀓𑀺𑀮𑀫𑀣𑁄 𑀓𑀺𑀮𑀦𑁆𑀢𑀪𑀸𑀯𑁄 𑀅𑀢𑁆𑀢𑀓𑀺𑀮𑀫𑀣𑁄, 𑀅𑀢𑁆𑀢𑀧𑀻𑀴𑀸 𑀅𑀢𑁆𑀢𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀅𑀦𑀼𑀬𑁄𑀕𑁄 𑀓𑀭𑀡𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄, 𑀉𑀧𑀯𑀸𑀲𑀓𑀡𑁆𑀝𑀓𑀸𑀧𑀲𑁆𑀲𑀬𑀲𑁂𑀬𑁆𑀬𑀸𑀤𑀺𑀦𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀯𑀺𑀯𑀚𑁆𑀚𑀦𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁. 𑀅𑀦𑁆𑀢𑁄𑀕𑀸𑀫𑁂 𑀯𑀲𑀦𑁆𑀢𑀸𑀦𑀁 𑀅𑀦𑀺𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀯𑀺𑀲𑀪𑀸𑀕𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀤𑀲𑁆𑀲𑀦𑀸𑀤𑀺𑀲𑀫𑁆𑀪𑀯𑀢𑁄 𑀩𑀳𑀺𑀕𑀸𑀫𑁂 𑀧𑀢𑀺𑀭𑀽𑀧𑀝𑁆𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀢𑀤𑀪𑀸𑀯𑀢𑁄 𑀆𑀳 ‘‘𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀧𑀘𑁆𑀙𑀺𑀫𑁂𑀦𑀸𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀯𑀘𑀦𑁂𑀦. 𑀓𑀺𑀮𑁂𑀲𑀓𑀸𑀫𑀲𑁆𑀲 𑀯𑀢𑁆𑀣𑀼𑀪𑀽𑀢𑀢𑁆𑀢𑀸 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀢𑁆𑀣𑀼𑀓𑀸𑀫𑁄, 𑀢𑀲𑁆𑀲 𑀧𑀳𑀸𑀦𑀁 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀁. 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀼𑀧𑀸𑀬𑀤𑀲𑁆𑀲𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀲𑀁𑀬𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀬𑁄𑀕𑁄 𑀅𑀦𑀼𑀬𑁄𑀕𑁄 𑀅𑀦𑀼𑀪𑀯𑁄, 𑀢𑀲𑁆𑀲 𑀧𑀭𑀺𑀯𑀚𑁆𑀚𑀦𑁂 𑀉𑀧𑀸𑀬𑀤𑀲𑁆𑀲𑀦𑀁.

𑀲𑀬𑀫𑁂𑀯 𑀕𑁄𑀘𑀭𑀕𑀸𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀲𑁆𑀲𑀯𑀦𑀸𑀦𑀼𑀭𑀽𑀧𑀪𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀤𑀲𑁆𑀲𑀦𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀓𑀸𑀮𑁄 𑀲𑀫𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀅𑀪𑀺𑀬𑁄𑀕𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕’’𑀦𑁆𑀢𑀺. 𑀥𑀫𑁆𑀫𑀤𑁂𑀲𑀦𑀸𑀬 𑀲𑀉𑀲𑁆𑀲𑀸𑀳𑀪𑀸𑀯𑁄 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑁄. 𑀩𑀳𑀺𑀕𑀸𑀫𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀯𑀲𑀦𑁆𑀢𑀲𑁆𑀲 𑀆𑀓𑀺𑀡𑁆𑀡𑀯𑀺𑀳𑀸𑀭𑀸𑀪𑀸𑀯𑀢𑁄 𑀓𑀸𑀬𑀯𑀺𑀯𑁂𑀓𑀸𑀤𑀻𑀲𑀼 𑀅𑀥𑀺𑀫𑀼𑀢𑁆𑀢𑀺 𑀢𑀧𑁆𑀧𑁄𑀡𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺’’𑀦𑁆𑀢𑀺.

𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀻𑀦𑀁 ¶ 𑀳𑁂𑀢𑀼𑀪𑀽𑀢𑀸 𑀏𑀯 𑀓𑀭𑀼𑀡𑀸𑀧𑀜𑁆𑀜𑀸 𑀥𑀫𑁆𑀫𑀤𑁂𑀲𑀦𑀸𑀬 𑀉𑀧𑀕𑀫𑀦𑀲𑁆𑀲 𑀢𑀢𑁄 𑀅𑀧𑀕𑀫𑀦𑀲𑁆𑀲 𑀓𑀸𑀭𑀡𑀪𑀽𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦’’𑀦𑁆𑀢𑀺𑀆𑀤𑀺. 𑀓𑀭𑀼𑀡𑀸𑀧𑀜𑁆𑀜𑀸𑀬𑁂𑀯 𑀳𑀺 𑀅𑀦𑀦𑁆𑀢𑀭𑀤𑀼𑀓𑀲𑁆𑀲 𑀳𑁂𑀢𑀽 𑀳𑁄𑀦𑁆𑀢𑀺. 𑀏𑀢𑁂𑀦 𑀘 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁 𑀦 𑀮𑀸𑀪𑀸𑀤𑀺𑀦𑀺𑀫𑀺𑀢𑁆𑀢𑀁 ¶ , 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁 𑀦 𑀯𑀺𑀭𑁄𑀥𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀕𑀫𑀦𑀸𑀧𑀕𑀫𑀦𑀸𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁 𑀯𑀺𑀪𑀸𑀯𑀺𑀪𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀫𑀼𑀢𑁆𑀢𑀢𑀦𑁆𑀢𑀺 𑀢𑀦𑁆𑀦𑀺𑀦𑁆𑀦𑀪𑀸𑀯𑀁. 𑀦𑀺𑀭𑀼𑀧𑀮𑁂𑀧𑀦𑀦𑁆𑀢𑀺 𑀅𑀦𑀼𑀧𑀮𑁂𑀧𑀦𑀁 𑀅𑀦𑀮𑁆𑀮𑀻𑀬𑀦𑀁.

𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀺𑀓𑀲𑀼𑀔𑀁 𑀦𑀸𑀫 𑀅𑀦𑀯𑀚𑁆𑀚𑀲𑀼𑀔𑀁. 𑀢𑀜𑁆𑀳𑀺 𑀥𑀫𑁆𑀫𑀺𑀓𑀁 𑀮𑀸𑀪𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀥𑀫𑁆𑀫𑀺𑀓𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀪𑀺𑀬𑁄𑀕𑀦𑀺𑀫𑀺𑀢𑁆𑀢𑀁 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀦𑁆𑀢𑀺 𑀧𑀘𑁆𑀘𑀬𑀧𑀝𑀺𑀕𑁆𑀕𑀳𑀡𑀥𑀫𑁆𑀫𑀤𑁂𑀲𑀦𑀸𑀤𑀺𑀯𑀲𑁂𑀦 𑀉𑀧𑀓𑀸𑀭𑀩𑀳𑀼𑀮𑀢𑀁. 𑀤𑁂𑀯𑀢𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁 𑀚𑀦𑀯𑀺𑀯𑀺𑀢𑁆𑀢𑀢𑀸𑀬. 𑀧𑀘𑀼𑀭𑀚𑀦𑀯𑀺𑀯𑀺𑀢𑁆𑀢𑀜𑁆𑀳𑀺 𑀞𑀸𑀦𑀁 𑀤𑁂𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀦𑁆𑀢𑀺 𑀆𑀫𑀺𑀲𑁄𑀧𑀪𑁄𑀕𑁂𑀦 𑀲𑀁𑀯𑀟𑁆𑀠𑀺𑀢𑀪𑀸𑀯𑀁.

𑀏𑀓𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀣 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑀏𑀓𑁄𑀢𑀺 𑀤𑀼𑀢𑀺𑀬𑀸𑀤𑀺𑀧𑀝𑀺𑀓𑁆𑀔𑁂𑀧𑀢𑁆𑀣𑁄 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀼𑀕𑁆𑀕𑀮𑁄𑀢𑀺 𑀲𑀫𑁆𑀫𑀼𑀢𑀺𑀓𑀣𑀸, 𑀦 𑀧𑀭𑀫𑀢𑁆𑀣𑀓𑀣𑀸. 𑀩𑀼𑀤𑁆𑀥𑀲𑁆𑀲 𑀳𑀺 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸 𑀧𑀭𑀫𑀢𑁆𑀣𑀤𑁂𑀲𑀦𑀸 𑀘𑀸𑀢𑀺. 𑀅𑀬𑀫𑀢𑁆𑀣𑁄 𑀧𑀦 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑁄𑀯𑀸𑀢𑀺 𑀇𑀥 𑀦 𑀯𑀼𑀘𑁆𑀘𑀢𑀺. 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀓𑁂𑀦𑀝𑁆𑀞𑁂𑀦 𑀏𑀓𑀧𑀼𑀕𑁆𑀕𑀮𑁄? 𑀅𑀲𑀤𑀺𑀲𑀝𑁆𑀞𑁂𑀦 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦 𑀅𑀲𑀫𑀲𑀫𑀝𑁆𑀞𑁂𑀦. 𑀲𑁄 𑀳𑀺 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀝𑀺𑀧𑀸𑀝𑀺𑀬𑀸 𑀆𑀯𑀚𑁆𑀚𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀕𑀼𑀡𑁂𑀳𑀺 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀲𑁂𑀲𑀫𑀳𑀸𑀚𑀦𑁂𑀦 𑀅𑀲𑀤𑀺𑀲𑁄𑀢𑀺 𑀅𑀲𑀤𑀺𑀲𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄. 𑀬𑁂 𑀘𑀲𑁆𑀲 𑀢𑁂 𑀕𑀼𑀡𑀸, 𑀢𑁂𑀧𑀺 𑀅𑀜𑁆𑀜𑀲𑀢𑁆𑀢𑀸𑀦𑀁 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀸𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄. 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀬𑀫𑁂𑀯 𑀏𑀓𑁄 𑀭𑀽𑀧𑀓𑀸𑀬𑀕𑀼𑀡𑁂𑀳𑀺 𑀘𑁂𑀯 𑀦𑀸𑀫𑀓𑀸𑀬𑀕𑀼𑀡𑁂𑀳𑀺 𑀘 𑀲𑀫𑁄𑀢𑀺 𑀅𑀲𑀫𑀲𑀫𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂.

𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀧𑀦 𑀉𑀪𑀬𑀫𑁆𑀧𑀺 𑀯𑀺𑀧𑁆𑀧𑀓𑀢𑀯𑀘𑀦𑀫𑁂𑀯. 𑀉𑀧𑁆𑀧𑀚𑁆𑀚𑀦𑁆𑀢𑁄 𑀩𑀳𑀼𑀚𑀦𑀳𑀺𑀢𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀭𑀽𑀧𑀜𑁆𑀘𑁂𑀢𑁆𑀣 𑀮𑀓𑁆𑀔𑀡𑀁 𑀦 𑀲𑀓𑁆𑀓𑀸 𑀏𑀢𑀁 𑀅𑀜𑁆𑀜𑁂𑀦 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀝𑀺𑀩𑀸𑀳𑀺𑀢𑀼𑀁. 𑀅𑀧𑀺𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂 𑀧𑀭𑀺𑀬𑁂𑀲𑀦𑁆𑀢𑁄 𑀤𑀲 𑀧𑀸𑀭𑀫𑀺𑀬𑁄 𑀤𑀺𑀲𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀫𑀬𑀸 𑀧𑀽𑀭𑁂𑀢𑀩𑁆𑀩𑀸’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀤𑀸𑀦𑀧𑀸𑀭𑀫𑀺𑀁 ¶ 𑀧𑀽𑀭𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀲𑀻𑀮𑀧𑀸𑀭𑀫𑀺𑀁…𑀧𑁂… 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀦𑁆𑀢𑀺 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺, 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 ¶ 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀜𑀸𑀢𑀢𑁆𑀣𑀘𑀭𑀺𑀬𑀁 𑀮𑁄𑀓𑀢𑁆𑀣𑀘𑀭𑀺𑀬𑀁 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀁 𑀧𑀽𑀭𑀬𑀫𑀸𑀦𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀁 𑀧𑀳𑀸𑀬 𑀢𑀼𑀲𑀺𑀢𑀧𑀼𑀭𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀡𑁆𑀡𑀸𑀲 𑀯𑀲𑁆𑀲𑀓𑁄𑀝𑀺𑀬𑁄 𑀢𑀺𑀝𑁆𑀞𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀤𑁂𑀯𑀢𑀸𑀳𑀺 𑀬𑀸𑀘𑀺𑀢𑁄 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀫𑀸𑀬𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺, 𑀅𑀦𑀽𑀦𑀸𑀥𑀺𑀓𑁂 𑀤𑀲 𑀫𑀸𑀲𑁂 𑀕𑀩𑁆𑀪𑀯𑀸𑀲𑀁 𑀯𑀲𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀚𑀸𑀢𑀤𑀺𑀯𑀲𑁂 𑀙𑀦𑁆𑀦𑀲𑀳𑀸𑀬𑁄 𑀓𑀡𑁆𑀟𑀓𑀁 𑀅𑀲𑁆𑀲𑀯𑀭𑀫𑀸𑀭𑀼𑀬𑁆𑀳 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀦𑁆𑀢𑁄 𑀅𑀦𑁄𑀫𑀦𑀤𑀺𑀢𑀻𑀭𑁂 𑀧𑀩𑁆𑀩𑀚𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀓𑀭𑁄𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀧𑀭𑀺𑀧𑀸𑀓𑀕𑀢𑁂 𑀜𑀸𑀡𑁂 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀤𑁆𑀯𑀸𑀤𑀲𑀗𑁆𑀕𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂𑀧𑀺 𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺 𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀸𑀯𑀓𑀸𑀦𑀁 𑀯𑀺𑀬 𑀦 𑀧𑀝𑀺𑀧𑀸𑀝𑀺𑀬𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑁂𑀯 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑀮𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺 𑀕𑀼𑀡𑀭𑀸𑀲𑀺 𑀆𑀕𑀢𑁄𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄.

𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀩𑀳𑀼𑀚𑀦𑀲𑀼𑀔𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀲𑀼𑀔𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 ¶ 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀭𑀲𑀢𑁆𑀢𑀮𑁄𑀓𑀲𑁆𑀲𑀸𑀢𑀺? 𑀬𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀫𑀢𑀧𑀸𑀦𑀁 𑀧𑀺𑀯𑀺, 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀲𑁆𑀲. 𑀪𑀕𑀯𑀢𑀸 𑀳𑀺 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀸 𑀇𑀲𑀺𑀧𑀢𑀦𑀁 𑀆𑀕𑀫𑁆𑀫 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑁂 (𑀲𑀁. 𑀦𑀺. 𑁩.𑁫; 𑀫𑀳𑀸𑀯. 𑁧𑁩) 𑀤𑁂𑀲𑀺𑀢𑁂 𑀆𑀬𑀲𑁆𑀫𑀢𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑀸 𑀩𑁆𑀭𑀳𑁆𑀫𑀸𑀦𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼, 𑀏𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄. 𑀧𑀜𑁆𑀘𑀫𑀤𑀺𑀯𑀲𑁂 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 ¶ 𑀉𑀧𑁆𑀧𑀦𑁆𑀦𑁄. 𑀢𑀢𑁄 𑀬𑀲𑀤𑀸𑀭𑀓𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀡𑁆𑀡𑀸𑀲 𑀧𑀼𑀭𑀺𑀲𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀢𑁄 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑁂 𑀢𑀬𑁄 𑀫𑀕𑁆𑀕𑁂 𑀘 𑀨𑀮𑀸𑀦𑀺 𑀘 𑀲𑀫𑁆𑀧𑀸𑀧𑁂𑀲𑀺, 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄. 𑀕𑀬𑀸𑀲𑀻𑀲𑁂 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀧𑀭𑀺𑀬𑁄𑀲𑀸𑀦𑁂 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀚𑀝𑀺𑀮𑀲𑀳𑀲𑁆𑀲𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀢𑁄 𑀮𑀝𑁆𑀞𑀺𑀯𑀦𑁂 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸 𑀏𑀓𑀸𑀤𑀲 𑀦𑀳𑀼𑀢𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀏𑀓𑀁 𑀦𑀳𑀼𑀢𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀢𑀺𑀭𑁄𑀓𑀼𑀝𑁆𑀝𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 (𑀔𑀼. 𑀧𑀸. 𑁭. 𑁧 𑀆𑀤𑀬𑁄) 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑁂𑀳𑀺 𑀅𑀫𑀢𑀧𑀸𑀦𑀁 𑀧𑀻𑀢𑀁. 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸, 𑀥𑀦𑀧𑀸𑀮𑀲𑀫𑀸𑀕𑀫𑁂 𑀤𑀲𑀳𑀺 𑀧𑀸𑀡𑀲𑀳𑀲𑁆𑀲𑁂𑀳𑀺, 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑁂𑀳𑀺, 𑀚𑀫𑁆𑀩𑀼𑀓𑀆𑀚𑀻𑀯𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸𑀯, 𑀆𑀦𑀦𑁆𑀤𑀲𑁂𑀝𑁆𑀞𑀺𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸𑀯 𑀧𑀸𑀡𑀲𑀳𑀲𑁆𑀲𑁂𑀳𑀺 𑀅𑀫𑀢𑀧𑀸𑀦𑀁 𑀧𑀻𑀢𑀁. 𑀧𑀸𑀲𑀸𑀡𑀓𑀘𑁂𑀢𑀺𑀬𑁂 𑀧𑀸𑀭𑀸𑀬𑀦𑀲𑀼𑀢𑁆𑀢𑀓𑀣𑀸𑀤𑀺𑀯𑀲𑁂 (𑀲𑀼. 𑀦𑀺. 𑁯𑁮𑁨 𑀆𑀤𑀬𑁄) 𑀘𑀼𑀤𑁆𑀤𑀲 𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀺𑀯𑀲𑁂 𑀯𑀻𑀲𑀢𑀺 𑀧𑀸𑀡𑀓𑁄𑀝𑀺𑀬𑁄, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀅𑀲𑀻𑀢𑀺 𑀧𑀸𑀡𑀓𑁄𑀝𑀺𑀬𑁄, 𑀤𑁂𑀯𑁄𑀭𑁄𑀳𑀡𑁂 𑀢𑀺𑀁𑀲 𑀧𑀸𑀡𑀓𑁄𑀝𑀺𑀬𑁄, 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀦𑁆𑀢𑁂 (𑀤𑀻. 𑀦𑀺. 𑁨.𑁩𑁪𑁪 𑀆𑀤𑀬𑁄) 𑀅𑀲𑀻𑀢𑀺 𑀤𑁂𑀯𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑁂 (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀫𑀗𑁆𑀕𑀮𑀲𑀼𑀢𑁆𑀢𑁂 (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑀫𑀗𑁆𑀕𑀮𑀲𑀼𑀢𑁆𑀢) 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑁂 (𑀫. 𑀦𑀺. 𑁩.𑁪𑁧𑁬 𑀆𑀤𑀬𑁄) 𑀲𑀫𑀘𑀺𑀢𑁆𑀢𑀧𑀝𑀺𑀧𑀤𑀸𑀬𑀸𑀢𑀺 (𑀅. 𑀦𑀺. 𑁨.𑁩𑁩) 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀪𑀺𑀲𑀫𑀬𑀧𑁆𑀧𑀢𑁆𑀢𑀲𑀢𑁆𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄𑀢𑀺. 𑀬𑀸𑀯𑀚𑁆𑀚𑀤𑀺𑀯𑀲𑀸 𑀇𑀢𑁄 ¶ 𑀧𑀭𑀫𑁆𑀧𑀺 𑀅𑀦𑀸𑀕𑀢𑁂 𑀇𑀫𑀁 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁂 𑀧𑀢𑀺𑀝𑁆𑀞𑀳𑀦𑁆𑀢𑀸𑀦𑀁 𑀯𑀲𑁂𑀦𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁𑀬𑁂𑀯, 𑀅𑀯𑀲𑁂𑀲𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬𑁂𑀯 𑀉𑀧𑁆𑀧𑀦𑁆𑀦𑁄. 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀧𑀦 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀩𑁆𑀩𑁂 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀢𑁂𑀲𑀫𑁆𑀧𑀺 𑀅𑀢𑁆𑀣𑀢𑁆𑀣𑀸𑀬 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬𑁂𑀯 𑀉𑀧𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀇𑀤𑀸𑀦𑀺 𑀢𑀸𑀬 𑀧𑀼𑀘𑁆𑀙𑀸𑀬 𑀧𑀼𑀝𑁆𑀞𑀁 𑀏𑀓𑀧𑀼𑀕𑁆𑀕𑀮𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀆𑀳. 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀦𑁆𑀢𑀺 𑀮𑁄𑀓𑀢𑁆𑀣𑀦𑀺𑀧𑁆𑀨𑀸𑀤𑀦𑀁, 𑀩𑀼𑀤𑁆𑀥𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀮𑀼𑀫𑁆𑀩𑀺𑀦𑀻𑀯𑀦𑁂 𑀤𑀼𑀢𑀺𑀬𑀁 𑀩𑁄𑀥𑀺𑀫𑀡𑁆𑀟𑁂𑀢𑀺 𑀮𑀼𑀫𑁆𑀩𑀺𑀦𑀻𑀯𑀦𑁂 𑀭𑀽𑀧𑀓𑀸𑀬𑁂𑀦 𑀚𑀸𑀢𑁄, 𑀩𑁄𑀥𑀺𑀫𑀡𑁆𑀟𑁂 𑀥𑀫𑁆𑀫𑀓𑀸𑀬𑁂𑀦. 𑀏𑀯𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀭𑀜𑁆𑀚𑀸𑀓𑀺𑀢𑁆𑀢𑀦𑀢𑁄 𑀭𑀽𑀧𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀁 𑀤𑀲𑁆𑀲𑁂𑀢𑀺, 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑀓𑀺𑀢𑁆𑀢𑀦𑀢𑁄 𑀥𑀫𑁆𑀫𑀓𑀸𑀬𑀲𑁆𑀲. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀭𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁, 𑀤𑀼𑀢𑀺𑀬𑁂𑀦 𑀅𑀢𑁆𑀢𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁. 𑀧𑀼𑀭𑀺𑀫𑁂𑀦 𑀯𑀸 𑀓𑀭𑀼𑀡𑀸𑀓𑀺𑀘𑁆𑀘𑀁, 𑀇𑀢𑀭𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀁 ¶ , 𑀧𑀼𑀭𑀺𑀫𑁂𑀦 𑀘𑀲𑁆𑀲 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀲𑀫𑀦𑁆𑀦𑀸𑀕𑀫𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀫𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀘𑁆𑀙𑀺𑀫𑀓𑁄𑀢𑀺 𑀕𑀼𑀡𑁂𑀦 𑀧𑀘𑁆𑀙𑀺𑀫𑀓𑁄. 𑀆𑀦𑀦𑁆𑀤𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀗𑁆𑀔𑁆𑀬𑀸𑀬𑀧𑀻𑀢𑀺 𑀕𑀡𑀦𑀢𑁄𑀧𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀲𑀗𑁆𑀖𑀸𑀢𑁂𑀦 𑀲𑀫𑀡𑀕𑀡𑁂𑀦𑀸’’𑀢𑀺. 𑀏𑀢𑁆𑀣 𑀧𑀦 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬, 𑀫. 𑀦𑀺. 𑁧.𑁪𑁯𑁨; 𑁩.𑁫𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸, ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪; 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀜𑁆𑀘 𑀲𑀻𑀮𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑁂𑀦 𑀲𑀗𑁆𑀖𑀢𑁄 𑀲𑀗𑁆𑀖𑀝𑀺𑀢𑁄 𑀲𑀫𑁂𑀢𑁄𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀲𑀗𑁆𑀖𑀸𑀢𑁄, 𑀲𑀫𑀡𑀕𑀡𑁄. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 ¶ 𑀆𑀤𑀺𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀻𑀮𑀸𑀦𑀁 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀸, 𑀧𑀕𑁂𑀯 𑀲𑀓𑀤𑀸𑀕𑀸𑀫𑀺𑀆𑀤𑀬𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀸𑀬𑁂𑀯. ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪), 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪) 𑀯𑀘𑀦𑀢𑁄 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁄 𑀮𑀩𑁆𑀪𑀢𑀺𑀬𑁂𑀯, 𑀇𑀥 𑀧𑀦 𑀅𑀭𑀺𑀬𑀲𑀗𑁆𑀖𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄 ‘‘𑀬𑁄 𑀢𑀢𑁆𑀣 𑀧𑀘𑁆𑀙𑀺𑀫𑀓𑁄, 𑀲𑁄 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀘𑀦𑀢𑁄. 𑀏𑀢𑁂𑀦𑀸𑀢𑀺 ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺 𑀏𑀢𑁂𑀦 𑀯𑀘𑀦𑁂𑀦. 𑀅𑀲𑁆𑀲𑀸𑀢𑀺 𑀧𑀜𑁆𑀘𑀫𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑀢𑀲𑁆𑀲. 𑀦𑀺𑀭𑀩𑁆𑀩𑀼𑀤𑁄𑀢𑀺𑀆𑀤𑀻𑀦𑀁 𑀯𑀘𑀦𑀢𑁆𑀣𑁄 𑀧𑀭𑀢𑁄 𑀏𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀲𑁆𑀲𑁄𑀲𑀻𑀢𑀺 𑀏𑀢𑁆𑀣 𑀲𑀯𑀦𑀫𑀼𑀧𑀮𑀩𑁆𑀪𑁄𑀢𑀺 𑀆𑀳 ‘‘𑀅𑀲𑁆𑀲𑁄𑀲𑀻𑀢𑀺 𑀲𑀼𑀡𑀺 𑀉𑀧𑀮𑀪𑀻’’𑀢𑀺, 𑀅𑀜𑁆𑀜𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀘𑀸𑀬𑀫𑀼𑀧𑀮𑀩𑁆𑀪𑁄 𑀲𑀯𑀦𑀯𑀲𑁂𑀦𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀸𑀲𑀻’’𑀢𑀺. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀤𑁆𑀤𑀧𑁆𑀧𑀬𑁄𑀕𑀲𑁆𑀲 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄’’𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂𑀢𑀺 𑀧𑀦 𑀇𑀫𑀺𑀦𑀸 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑁂𑀧𑀺 𑀲𑀩𑁆𑀩𑀲𑁆𑀫𑀺𑀁 𑀯𑀸𑀓𑁆𑀬𑁂 𑀇𑀝𑁆𑀞𑀢𑁄𑀯𑀥𑀸𑀭𑀡𑀢𑁆𑀣𑀁 𑀔𑁄𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀫𑁂𑀯 𑀇𑀝𑁆𑀞𑀢𑁄𑀯𑀥𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦𑀸’’𑀢𑀺𑀆𑀤𑀺. 𑀅𑀣 𑀧𑀤𑀧𑀽𑀭𑀡𑀢𑁆𑀣𑁂𑀦 𑀔𑁄𑀲𑀤𑁆𑀤𑁂𑀦 𑀓𑀺𑀁𑀧𑀬𑁄𑀚𑀦𑀦𑁆𑀢𑀺 ¶ 𑀆𑀳 ‘‘𑀧𑀤𑀧𑀽𑀭𑀡𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯𑀸’’𑀢𑀺. ‘‘𑀅𑀲𑁆𑀲𑁄𑀲𑀻’’𑀢𑀺 𑀳𑀺 𑀧𑀤𑀁 𑀔𑁄𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂, 𑀢𑀲𑁆𑀫𑀸 𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯 𑀧𑀬𑁄𑀚𑀦𑀁. 𑀫𑀢𑁆𑀢-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀁 𑀤𑀲𑁆𑀲𑁂𑀢𑀺, 𑀏𑀯-𑀲𑀤𑁆𑀤𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀁.

𑀯𑁂𑀭𑀜𑁆𑀚𑁄𑀢𑀺 𑀏𑀢𑁆𑀣 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁂𑀭𑀜𑁆𑀚𑀸𑀬𑀁 𑀚𑀸𑀢𑁄’’𑀢𑀺𑀆𑀤𑀺. 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀯𑁂𑀤𑁄 𑀯𑀼𑀘𑁆𑀘𑀢𑀺, 𑀲𑁄 𑀧𑀦 𑀫𑀦𑁆𑀢𑀩𑁆𑀭𑀳𑁆𑀫𑀓𑀧𑁆𑀧𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀫𑀦𑁆𑀢𑀸 𑀧𑀥𑀸𑀦𑀫𑀽𑀮𑀪𑀸𑀯𑀢𑁄𑀬𑁂𑀯 𑀅𑀝𑁆𑀞𑀓𑀸𑀤𑀻𑀳𑀺 𑀧𑀯𑀼𑀢𑁆𑀢𑀸, 𑀇𑀢𑀭𑁂 𑀧𑀦 𑀢𑀦𑁆𑀦𑀺𑀲𑁆𑀲𑀬𑁂𑀦 𑀚𑀸𑀢𑀸, 𑀢𑁂𑀦 ¶ 𑀧𑀥𑀸𑀦𑀲𑁆𑀲𑁂𑀯 𑀕𑀳𑀡𑀁. 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀇𑀭𑀼𑀯𑁂𑀤𑀸𑀤𑀺𑀓𑁂 𑀫𑀦𑁆𑀢𑀲𑀢𑁆𑀣𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀭𑀼𑀯𑁂𑀤𑀸𑀤𑀬𑁄 𑀳𑀺 𑀕𑀼𑀢𑁆𑀢𑀪𑀸𑀲𑀺𑀢𑀩𑁆𑀩𑀢𑀸𑀬 ‘‘𑀫𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀤𑀫𑁂𑀯 𑀳𑀻𑀢𑀺 𑀅𑀯𑀥𑀸𑀭𑀡𑁂𑀦 𑀩𑁆𑀭𑀳𑁆𑀫𑀢𑁄 𑀚𑀸𑀢𑁄𑀢𑀺𑀆𑀤𑀺𑀓𑀁 𑀦𑀺𑀭𑀼𑀢𑁆𑀢𑀺𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀧𑀺 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀯𑀺𑀥𑀸 𑀳𑀺 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀸 𑀯𑀺𑀲𑀼𑀤𑁆𑀥𑀺𑀩𑁆𑀭𑀸𑀳𑁆𑀫𑀡𑀸 𑀘𑀸𑀢𑀺. 𑀇𑀤𑀸𑀦𑀺 𑀢𑀢𑁆𑀣 𑀯𑀺𑀲𑀼𑀤𑁆𑀥𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀭𑀺𑀬𑀸 𑀧𑀦𑀸’’𑀢𑀺𑀆𑀤𑀺.

𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀅𑀯𑀻𑀢𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀡𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀡𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀤𑀸𑀳𑀭𑀡𑁂𑀦 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀧𑀦 ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀪𑀺𑀦𑁆𑀦𑀕𑀸𑀣𑀸𑀲𑀦𑁆𑀦𑀺𑀲𑁆𑀲𑀺𑀢𑀧𑀤𑀤𑁆𑀯𑀬𑀁 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀇𑀤𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 ‘𑀲𑀫𑀺𑀢𑀢𑁆𑀢𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀇𑀤𑀁 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀕𑀸𑀣𑀸𑀩𑀦𑁆𑀥𑁂 𑀯𑀼𑀢𑁆𑀢𑀯𑀘𑀦’’𑀦𑁆𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀇𑀥 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. 𑀚𑀸𑀢𑀺𑀲𑀫𑀼𑀤𑀸𑀕𑀢𑀦𑁆𑀢𑀺 𑀚𑀸𑀢𑀺𑀬𑀸 𑀆𑀕𑀢𑀁, 𑀚𑀸𑀢𑀺𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀸𑀧𑀯𑀘𑀦𑀫𑀢𑁆𑀢𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑀸 𑀳𑁂𑀢𑁂 𑀪𑁄𑀢𑀺 𑀯𑀸 𑀆𑀯𑀼𑀲𑁄𑀢𑀺 𑀯𑀸 𑀤𑁂𑀯𑀸𑀦𑀫𑁆𑀧𑀺𑀬𑀸𑀢𑀺 𑀯𑀸. 𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀻𑀢𑀺 𑀬𑁄 𑀆𑀫𑀦𑁆𑀢𑀦𑀸𑀤𑀻𑀲𑀼 ‘‘𑀪𑁄 𑀪𑁄’’𑀢𑀺 𑀯𑀤𑀦𑁆𑀢𑁄 𑀯𑀺𑀘𑀭𑀢𑀺, 𑀲𑁄 𑀪𑁄𑀯𑀸𑀤𑀻 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀓𑀺𑀜𑁆𑀘𑀦𑁄𑀢𑀺 𑀭𑀸𑀕𑀸𑀤𑀻𑀳𑀺 𑀓𑀺𑀜𑁆𑀘𑀦𑁂𑀳𑀺 𑀲𑀓𑀺𑀜𑁆𑀘𑀦𑁄. 𑀭𑀸𑀕𑀸𑀤𑀬𑁄 𑀳𑀺 𑀲𑀢𑁆𑀢𑁂 𑀓𑀺𑀜𑁆𑀘𑁂𑀦𑁆𑀢𑀺 𑀫𑀤𑁆𑀤𑀦𑁆𑀢𑀺 𑀧𑀮𑀺𑀩𑀼𑀦𑁆𑀥𑀦𑁆𑀢𑀻𑀢𑀺 ‘‘𑀓𑀺𑀜𑁆𑀘𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀓𑀺𑀭 𑀕𑁄𑀡𑁂𑀳𑀺 𑀔𑀮𑀁 𑀫𑀤𑁆𑀤𑀸𑀧𑁂𑀦𑁆𑀢𑀸 ‘‘𑀓𑀺𑀜𑁆𑀘𑁂𑀳𑀺 𑀓𑀧𑀺𑀮, 𑀓𑀺𑀜𑁆𑀘𑁂𑀳𑀺 𑀓𑀸𑀴𑀓𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀫𑀤𑁆𑀤𑀦𑀝𑁆𑀞𑁄 𑀓𑀺𑀜𑁆𑀘𑀦𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀢𑁆𑀢𑀯𑀲𑁂𑀦𑀸𑀢𑀺 ¶ 𑀏𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀲𑀤𑁆𑀤𑁂𑀦 𑀘𑁂𑀢𑁆𑀣 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀕𑁄𑀢𑀫𑁄𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 ¶ 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀩𑀼𑀤𑁆𑀥𑀺𑀅𑀪𑀺𑀥𑀸𑀦𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀬 𑀅𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀲𑀫𑀡𑁄𑀢𑀺 𑀇𑀫𑀺𑀦𑀸 𑀲𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀫𑀺𑀢𑀧𑀸𑀧𑀢𑀸𑀓𑀺𑀢𑁆𑀢𑀦𑀢𑁄, 𑀕𑁄𑀢𑀫𑁄𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑀢𑀸𑀤𑀻𑀧𑀦𑀢𑁄. 𑀲𑀓𑁆𑀬𑀲𑁆𑀲 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀲𑀓𑁆𑀬𑀧𑀼𑀢𑁆𑀢𑁄. 𑀇𑀫𑀺𑀦𑀸 𑀘 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀯𑀺𑀪𑀸𑀯𑀦𑀢𑁄 𑀯𑀼𑀢𑁆𑀢𑀁 ‘‘𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀅𑀤𑀻𑀧𑀦’’𑀦𑁆𑀢𑀺. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀭𑀺𑀳𑀸𑀦𑀺𑀬𑀸 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀝𑁄. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀚𑀸𑀢𑀺𑀬𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀦 𑀓𑀺𑀜𑁆𑀘𑀺 𑀧𑀸𑀭𑀺𑀚𑀼𑀜𑁆𑀜𑀁, 𑀅𑀣 𑀔𑁄 𑀯𑀟𑁆𑀠𑀺𑀬𑁂𑀯. 𑀅𑀪𑀺𑀦𑀺𑀓𑁆𑀔𑀫𑀦𑁂 𑀘 𑀢𑀢𑁄 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀢𑁂𑀦 ‘‘𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄. 𑀢𑀢𑁄 𑀧𑀭𑀦𑁆𑀢𑀺 ‘‘𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀺.

𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀇𑀢𑁆𑀣𑀁 𑀇𑀫𑀁 𑀧𑀓𑀸𑀭𑀁 𑀪𑀽𑀢𑁄 𑀆𑀧𑀦𑁆𑀦𑁄𑀢𑀺 𑀇𑀢𑁆𑀢𑀫𑁆𑀪𑀽𑀢𑁄, 𑀢𑀲𑁆𑀲 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀲𑁄𑀬𑁂𑀯 𑀅𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄. 𑀅𑀣 𑀯𑀸 𑀇𑀢𑁆𑀣𑀁 𑀏𑀯𑀁 𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀏𑀯𑀁 𑀓𑀣𑀦𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄, 𑀢𑀲𑁆𑀫𑀺𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑁆𑀧𑀓𑀸𑀭𑀲𑁆𑀲 𑀤𑀻𑀧𑀦𑀢𑁄. 𑀢𑁂𑀦 𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂𑀧𑀺 𑀲𑀫𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀤𑀻𑀧𑀦𑀢𑁄 ‘‘𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀺 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀢𑁄𑀢𑀺 𑀅𑀪𑀺𑀲𑀤𑁆𑀤𑀬𑁄𑀕𑀢𑁄 ¶ 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺. ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀳𑀺 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺 𑀫𑀸𑀢𑀭𑀺 𑀯𑀺𑀲𑀬𑁂 𑀫𑀸𑀢𑀼𑀬𑀸 𑀯𑀸 𑀲𑀸𑀥𑀽’’𑀢𑀺 𑀏𑀯𑀁 𑀅𑀥𑀺𑀓𑀭𑀡𑀢𑁆𑀣𑁂 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀲𑁆𑀲 𑀯𑀸 𑀲𑀸𑀫𑀺𑀯𑀘𑀦𑀲𑁆𑀲 𑀯𑀸 𑀧𑀲𑀗𑁆𑀕𑁂 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁂𑀦 𑀅𑀪𑀺𑀲𑀤𑁆𑀤𑁂𑀦 𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀬𑀣𑀸 𑀘𑁂𑀢𑁆𑀣 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀼 𑀯𑀺𑀲𑀬𑁂 𑀫𑀸𑀢𑀼𑀲𑀫𑁆𑀩𑀦𑁆𑀥𑀻 𑀯𑀸 𑀲𑀸𑀥𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 ¶ , 𑀏𑀯𑀫𑀺𑀥𑀸𑀧𑀺 ‘‘𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀫𑁆𑀩𑀦𑁆𑀥𑀻 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑀤𑀢𑁆𑀢𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑀁, 𑀢𑀣𑀸 𑀢𑀢𑁆𑀣 ‘‘𑀫𑀸𑀢𑀭’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀇𑀥 ‘‘𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺 𑀯𑀘𑀦𑀁, 𑀢𑀢𑁆𑀣 𑀲𑀸𑀥𑀼𑀲𑀤𑁆𑀤𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀉𑀕𑁆𑀕𑀢𑀲𑀤𑁆𑀤𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀮𑁆𑀬𑀸𑀡𑁄𑀢𑀺 𑀪𑀤𑁆𑀤𑀓𑁄. 𑀓𑀮𑁆𑀬𑀸𑀡𑀪𑀸𑀯𑁄 𑀘𑀲𑁆𑀲 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬𑀸𑀢𑀺 𑀆𑀳 ‘‘𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄’’𑀢𑀺, 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀁𑀯𑀺𑀲𑀬𑀢𑀸𑀬 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀁𑀯𑀺𑀲𑀬𑀢𑀸 𑀳𑁂𑀢𑁆𑀣 𑀲𑀫𑀦𑁆𑀦𑀸𑀕𑀫𑁄 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬 𑀢𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀝𑁆𑀞𑀕𑀼𑀡𑀯𑀺𑀲𑀬𑀢𑀸𑀬 𑀏𑀯 𑀳𑀺 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑁂𑀝𑁆𑀞𑀢𑀸 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀕𑀼𑀡𑀸𑀦𑀁 𑀲𑀁𑀓𑀺𑀢𑁆𑀢𑀦𑀢𑁄 𑀲𑀤𑁆𑀤𑀦𑀻𑀬𑀢𑁄 𑀘 𑀓𑀺𑀢𑁆𑀢𑀺𑀲𑀤𑁆𑀤𑁄 𑀯𑀡𑁆𑀡𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺 𑀏𑀯𑀸’’𑀢𑀺. 𑀯𑀡𑁆𑀡𑁄𑀬𑁂𑀯 𑀳𑀺 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀺𑀧𑀭𑀺𑀬𑀸𑀬𑁄 𑀳𑀺 𑀲𑀤𑁆𑀤𑀲𑀤𑁆𑀤𑁄 𑀬𑀣𑀸 ‘‘𑀉𑀴𑀸𑀭𑀲𑀤𑁆𑀤𑀸 𑀇𑀲𑀬𑁄, 𑀕𑀼𑀡𑀯𑀦𑁆𑀢𑁄 𑀢𑀧𑀲𑁆𑀲𑀺𑀦𑁄’’𑀢𑀺. 𑀅𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀣𑀼𑀢𑀺𑀖𑁄𑀲𑁄, 𑀅𑀪𑀺𑀢𑁆𑀣𑀯𑀼𑀤𑀸𑀳𑀸𑀭𑁄.

‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀧𑀦 𑀏𑀢𑀲𑁆𑀲 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀢𑀲𑁆𑀲𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀢𑁄, 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀦𑁆𑀢𑀺 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀆𑀳 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺. 𑀇𑀢𑁄 𑀧𑀭𑀁 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀢𑁆𑀣 𑀬𑀢𑁆𑀣 𑀧𑀸𑀴𑀺𑀧𑀸𑀞𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀢𑀢𑁆𑀣 𑀢𑀢𑁆𑀣 ‘‘𑀧𑀸𑀴𑀺𑀬𑀁 𑀧𑀦𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀇𑀤𑀸𑀦𑀺 𑀢𑀢𑁆𑀣 𑀧𑀤𑀬𑁄𑀚𑀦𑀸𑀧𑀼𑀩𑁆𑀩𑀓𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀲𑀼 𑀧𑀦 ¶ 𑀅𑀬𑀁 𑀢𑀸𑀯 𑀬𑁄𑀚𑀦𑀸’’𑀢𑀺𑀆𑀤𑀺. 𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸𑀢𑀺 𑀮𑀤𑁆𑀥𑀦𑀸𑀫𑁄, 𑀲𑁄 𑀪𑀕𑀯𑀸. 𑀪𑀕𑀯𑀸𑀢𑀺 𑀳𑀺 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁮𑁪). 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀫𑁂𑀯. 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺𑀧𑀺𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀻𑀬𑀦𑁆𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀲𑀁𑀓𑀺𑀢𑁆𑀢𑀓𑁂𑀦𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. 𑀏𑀯𑀜𑁆𑀳𑀺 𑀲𑀢𑀺 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀬𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸 𑀩𑀼𑀤𑁆𑀥𑀕𑀼𑀡𑀸, 𑀢𑁂 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀳𑀺 𑀇𑀥 𑀇𑀢𑀺-𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀸𑀭𑀡𑀢𑁆𑀣𑁄 ¶ , 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀢𑁂𑀲𑀁 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀸𑀦𑀺 𑀘 𑀕𑀼𑀡𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀸𑀦𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀁 𑀧𑀘𑁆𑀘𑀓𑁆𑀔𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀲𑀁𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳.

‘‘𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁, 𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀧𑀭𑀺𑀤𑀻𑀧𑀬𑀦𑁆𑀢𑀻’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫-𑁧𑁨𑁮) 𑀲𑀩𑁆𑀩𑀸𑀓𑀸𑀭𑀢𑁄 𑀲𑀁𑀯𑀡𑁆𑀡𑀺𑀢𑀫𑁆𑀧𑀺 𑀅𑀢𑁆𑀣𑀁 𑀇𑀥𑀸𑀧𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀢𑀢𑁆𑀣 𑀧𑀬𑁄𑀚𑀦𑀫𑀸𑀳 ‘‘𑀇𑀤𑀸𑀦𑀺 𑀯𑀺𑀦𑀬𑀥𑀭𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀦𑁆𑀢𑀺 𑀘𑀺𑀢𑁆𑀢𑀲𑀦𑁆𑀢𑁄𑀲𑀦𑀢𑁆𑀣𑀁, 𑀘𑀺𑀢𑁆𑀢𑀧𑁆𑀧𑀲𑀸𑀤𑀚𑀦𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀆𑀭𑀓𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀆𑀭𑀓𑀢𑁆𑀢𑀸𑀢𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀧𑀽𑀚𑀸𑀯𑀺𑀲𑁂𑀲𑀸𑀦𑀜𑁆𑀘.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀆𑀭𑀓𑀸 𑀳𑀺 𑀲𑁄’’𑀢𑀺𑀆𑀤𑀺. 𑀤𑀽𑀭𑀢𑀸 𑀦𑀸𑀫 𑀆𑀲𑀦𑁆𑀦𑀢𑀸 𑀯𑀺𑀬 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀻𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀤𑀽𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑁄’’𑀢𑀺 𑀆𑀳, 𑀲𑀼𑀝𑁆𑀞𑀼 𑀯𑀺𑀤𑀽𑀭𑀪𑀸𑀯𑁂𑀦𑁂𑀯 𑀯𑀺𑀤𑀽𑀭𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑀲𑁆𑀲 𑀓𑀺𑀮𑁂𑀲𑁂𑀳𑀺 𑀤𑀽𑀭𑁂 ¶ 𑀞𑀺𑀢𑀪𑀸𑀯𑁄, 𑀦 𑀧𑀤𑁂𑀲𑀯𑀲𑁂𑀦, 𑀅𑀣 𑀔𑁄 𑀢𑁂𑀲𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸’’𑀢𑀺. 𑀦𑀦𑀼 𑀅𑀜𑁆𑀜𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁 𑀢𑁂 𑀧𑀳𑀻𑀦𑀸 𑀏𑀯𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀯𑀸𑀲𑀦𑀸𑀦’’𑀦𑁆𑀢𑀺. 𑀦 𑀳𑀺 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀜𑁆𑀜𑁂 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑁂 𑀧𑀳𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀏𑀢𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀅𑀭𑀳𑀢𑁆𑀢𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀓𑀸 𑀧𑀦𑀸𑀬𑀁 𑀯𑀸𑀲𑀦𑀸 𑀦𑀸𑀫? 𑀧𑀳𑀻𑀦𑀓𑀺𑀮𑁂𑀲𑀲𑁆𑀲𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀧𑀬𑁄𑀕𑀲𑀤𑀺𑀲𑀧𑀬𑁄𑀕𑀳𑁂𑀢𑀼𑀪𑀽𑀢𑁄 𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑁄 𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑁄 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀯𑀲𑀮𑀲𑀫𑀼𑀤𑀸𑀘𑀸𑀭𑀦𑀺𑀫𑀺𑀢𑁆𑀢𑀁 𑀯𑀺𑀬. 𑀓𑀣𑀁 𑀧𑀦 ‘‘𑀆𑀭𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀮𑁂𑀲𑁂𑀳𑀻’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀲𑀸𑀫𑀜𑁆𑀜𑀘𑁄𑀤𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁄 ‘‘𑀆𑀭𑀓𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁧.𑁪𑁩𑁪) 𑀲𑀼𑀢𑁆𑀢𑀧𑀤𑀸𑀦𑁂𑀢𑁆𑀣 𑀉𑀤𑀸𑀳𑀭𑀺𑀢𑀩𑁆𑀩𑀸𑀦𑀺. 𑀆𑀭𑀓𑀸𑀢𑀺 𑀘𑁂𑀢𑁆𑀣 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀓-𑀓𑀸𑀭𑀲𑁆𑀲 𑀘 𑀳𑀓𑀸𑀭𑀁 𑀲𑀸𑀦𑀼𑀲𑀸𑀭𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀇𑀤𑀫𑁂𑀢𑁆𑀣 𑀯𑀼𑀘𑁆𑀘𑀢𑀺 𑁋

‘‘𑀲𑁄 𑀢𑀢𑁄 𑀆𑀭𑀓𑀸 𑀦𑀸𑀫, 𑀬𑀲𑁆𑀲 𑀬𑁂𑀦𑀸𑀲𑀫𑀗𑁆𑀕𑀺𑀢𑀸;

𑀅𑀲𑀫𑀗𑁆𑀕𑀻 𑀘 𑀤𑁄𑀲𑁂𑀳𑀺, 𑀦𑀸𑀣𑁄 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫);

𑀅𑀦𑀢𑁆𑀣𑀘𑀭𑀡𑁂𑀦 ¶ 𑀓𑀺𑀮𑁂𑀲𑀸 𑀏𑀯 𑀅𑀭𑀬𑁄𑀢𑀺 𑀓𑀺𑀮𑁂𑀲𑀸𑀭𑀬𑁄. 𑀅𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀺𑀳𑀸𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀇𑀤𑀁 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀬𑀲𑁆𑀫𑀸 𑀭𑀸𑀕𑀸𑀤𑀺𑀲𑀗𑁆𑀔𑀸𑀢𑀸, 𑀲𑀩𑁆𑀩𑁂𑀧𑀺 𑀅𑀭𑀬𑁄 𑀳𑀢𑀸;

𑀧𑀜𑁆𑀜𑀸𑀲𑀢𑁆𑀣𑁂𑀦 𑀦𑀸𑀣𑁂𑀦, 𑀢𑀲𑁆𑀫𑀸𑀧𑀺 𑀅𑀭𑀳𑀁 𑀫𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁬);

𑀬𑀜𑁆𑀘𑁂𑀢𑀁 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀣𑀘𑀓𑁆𑀓𑀲𑁆𑀲 𑀦𑀸𑀪𑀺 𑀯𑀺𑀬 𑀫𑀽𑀮𑀸𑀯𑀬𑀯𑀪𑀽𑀢𑀁 𑀅𑀦𑁆𑀢𑁄 𑀩𑀳𑀺 𑀘 𑀲𑀫𑀯𑀝𑁆𑀞𑀺𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀤𑁆𑀯𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀻’’𑀢𑀺. 𑀦𑀸𑀪𑀺𑀬𑀸 𑀦𑁂𑀫𑀺𑀬𑀸 𑀘 𑀲𑀫𑁆𑀩𑀤𑁆𑀥𑀅𑀭𑀲𑀤𑀺𑀲𑀸 𑀧𑀘𑁆𑀘𑀬𑀨𑀮𑀪𑀽𑀢𑁂𑀳𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀚𑀭𑀸𑀫𑀭𑀡𑁂𑀳𑀺 𑀲𑀫𑁆𑀩𑀤𑁆𑀥𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀭’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀭𑀺𑀬𑀦𑁆𑀢𑀪𑀸𑀯𑁂𑀦 𑀧𑀸𑀓𑀝𑀁 𑀚𑀭𑀸𑀫𑀭𑀡𑀦𑁆𑀢𑀺 𑀢𑀁 𑀦𑁂𑀫𑀺𑀝𑁆𑀞𑀸𑀦𑀺𑀬𑀁 𑀓𑀢𑁆𑀯𑀸 𑀆𑀳 ¶ ‘‘𑀚𑀭𑀸𑀫𑀭𑀡𑀦𑁂𑀫𑀻’’𑀢𑀺. 𑀬𑀣𑀸 𑀭𑀣𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀬𑀸 𑀧𑀥𑀸𑀦𑀓𑀸𑀭𑀡𑀁 𑀅𑀓𑁆𑀔𑁄, 𑀏𑀯𑀁 𑀲𑀁𑀲𑀸𑀭𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀬𑀸 𑀆𑀲𑀯𑀲𑀫𑀼𑀤𑀬𑁄𑀢𑀺 𑀆𑀳 ‘‘𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸’’𑀢𑀺. 𑀆𑀲𑀯𑀸 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀆𑀲𑀯𑀲𑀫𑀼𑀤𑀬𑁄. 𑀬𑀣𑀸𑀳 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩). 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀧𑁆𑀧𑀪𑁂𑀤𑁄 𑀓𑀸𑀫𑀪𑀯𑀸𑀤𑀺𑀓𑁄 𑀢𑀺𑀪𑀯𑁄 𑀏𑀯 𑀭𑀣𑁄, 𑀢𑀲𑁆𑀫𑀺𑀁 𑀢𑀺𑀪𑀯𑀭𑀣𑁂. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀲𑀫𑀁, 𑀲𑀩𑁆𑀩𑀲𑁄 𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑁄𑀚𑀺𑀢𑀦𑁆𑀢𑀺 𑀲𑀫𑀸𑀬𑁄𑀚𑀺𑀢𑀁. 𑀆𑀤𑀺𑀭𑀳𑀺𑀢𑀁 𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁.

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯) 𑁋

𑀏𑀯𑀁 𑀯𑀼𑀢𑁆𑀢𑀲𑀁𑀲𑀸𑀭𑁄𑀯 𑀲𑀁𑀲𑀸𑀭𑀘𑀓𑁆𑀓𑀁. 𑀅𑀦𑁂𑀦𑀸𑀢𑀺 𑀪𑀕𑀯𑀢𑀸. 𑀩𑁄𑀥𑀺𑀫𑀡𑁆𑀟𑁂𑀢𑀺 𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀫𑀡𑁆𑀟𑀪𑀸𑀯𑀧𑁆𑀧𑀢𑁆𑀢𑁂 𑀞𑀸𑀦𑁂 𑀓𑀸𑀮𑁂 𑀯𑀸. 𑀩𑁄𑀥𑀻𑀢𑀺 𑀧𑀜𑁆𑀜𑀸, 𑀲𑀸 𑀏𑀢𑁆𑀣 𑀫𑀡𑁆𑀟𑀸 𑀧𑀲𑀦𑁆𑀦𑀸 𑀚𑀸𑀢𑀸𑀢𑀺 𑀩𑁄𑀥𑀺𑀫𑀡𑁆𑀟𑁄. 𑀯𑀻𑀭𑀺𑀬𑀧𑀸𑀤𑁂𑀳𑀻𑀢𑀺 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀓𑁆𑀔𑀺𑀬𑁂𑀲𑀼 𑀲𑀦𑁆𑀦𑀺𑀭𑀼𑀫𑁆𑀪𑀦𑀲𑀦𑁆𑀦𑀺𑀓𑁆𑀔𑀺𑀧𑀦𑀓𑀺𑀘𑁆𑀘𑀢𑀸𑀬 𑀤𑁆𑀯𑀺𑀥𑀸 𑀧𑀯𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀳𑀺 𑀧𑀸𑀤𑁂𑀳𑀺. 𑀲𑀻𑀮𑀧𑀣𑀯𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀲𑀻𑀮𑀫𑁂𑀯 𑀧𑀣𑀯𑀻, 𑀢𑀲𑁆𑀲𑀁. 𑀧𑀢𑀺𑀝𑁆𑀞𑀸𑀬𑀸𑀢𑀺 𑀲𑀫𑁆𑀧𑀸𑀤𑀦𑀯𑀲𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀲𑀤𑁆𑀥𑀸𑀳𑀢𑁆𑀣𑁂𑀦𑀸𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀤𑀸𑀦𑀲𑀸𑀥𑀦𑀢𑁄 𑀲𑀤𑁆𑀥𑀸𑀯 𑀳𑀢𑁆𑀣𑁄, 𑀢𑁂𑀦. 𑀓𑀫𑁆𑀫𑀓𑁆𑀔𑀬𑀓𑀭𑀦𑁆𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀔𑀬𑀓𑀭𑀡𑀢𑁄 𑀓𑀫𑁆𑀫𑀓𑁆𑀔𑀬𑀓𑀭𑀁. 𑀜𑀸𑀡𑀨𑀭𑀲𑀼𑀦𑁆𑀢𑀺 𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀁 𑀫𑀕𑁆𑀕𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸.

𑀏𑀯𑀁 ¶ ‘‘𑀅𑀭𑀸𑀦𑀁 𑀳𑀢𑀢𑁆𑀢𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀅𑀭𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑀁 𑀘𑀓𑁆𑀓𑀁 𑀯𑀺𑀬 𑀘𑀓𑁆𑀓𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀓𑁆𑀓𑀫𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀦𑁆𑀢𑀺 𑀅𑀦𑀼 𑀅𑀦𑀼 𑀅𑀫𑀢𑀕𑁆𑀕𑀁 𑀅𑀯𑀺𑀜𑁆𑀜𑀸𑀢𑀧𑀼𑀩𑁆𑀩𑀓𑁄𑀝𑀺𑀓𑀁 𑀲𑀁𑀲𑀸𑀭𑀫𑀡𑁆𑀟𑀮𑀁. 𑀲𑁂𑀲𑀸 𑀤𑀲 𑀥𑀫𑁆𑀫𑀸𑀢𑀺 𑀲𑀗𑁆𑀔𑀸𑀭𑀸𑀤𑀬𑁄 𑀚𑀸𑀢𑀺𑀧𑀭𑀺𑀬𑁄𑀲𑀸𑀦𑀸 𑀤𑀲 𑀥𑀫𑁆𑀫𑀸. 𑀓𑀣𑀁 𑀢𑁂𑀲𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀭𑀪𑀸𑀯𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀢𑁆𑀢𑀸 𑀘𑀸’’𑀢𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀫𑀽𑀮𑀁 𑀧𑀥𑀸𑀦𑀓𑀸𑀭𑀡𑀁 𑀬𑁂𑀲𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀢𑁂 𑀅𑀯𑀺𑀚𑁆𑀚𑀸𑀫𑀽𑀮𑀓𑀸, 𑀢𑁂𑀲𑀁 𑀪𑀸𑀯𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀁. 𑀚𑀭𑀸𑀫𑀭𑀡𑀁 𑀧𑀭𑀺𑀬𑀦𑁆𑀢𑀁 ¶ 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀏𑀢𑁂𑀲𑀦𑁆𑀢𑀺 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀸, 𑀲𑀗𑁆𑀔𑀸𑀭𑀸𑀤𑀬𑁄 𑀤𑀲 𑀥𑀫𑁆𑀫𑀸. 𑀢𑁂𑀲𑀁 𑀪𑀸𑀯𑁄 𑀚𑀭𑀸𑀫𑀭𑀡𑀧𑀭𑀺𑀬𑀦𑁆𑀢𑀢𑁆𑀢𑀁. 𑀲𑀗𑁆𑀔𑀸𑀭𑀸𑀤𑀺𑀚𑀸𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀤𑀲𑀥𑀫𑁆𑀫𑀸𑀦𑀁 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘𑀸𑀢𑀺 𑀅𑀢𑁆𑀣𑁄, 𑀦𑀸𑀪𑀺𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀫𑀽𑀮𑀢𑁄 𑀦𑁂𑀫𑀺𑀪𑀽𑀢𑁂𑀦 𑀚𑀭𑀸𑀫𑀭𑀡𑁂𑀦 𑀅𑀦𑁆𑀢𑀢𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀫𑁆𑀩𑀦𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀓𑁆𑀔𑀸𑀤𑀻𑀲𑀽𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑁂𑀲𑀼. 𑀅𑀜𑁆𑀜𑀸𑀡𑀦𑁆𑀢𑀺 𑀜𑀸𑀡𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀫𑁄𑀳𑁄 𑀅𑀜𑁆𑀜𑀸𑀡𑀁, 𑀦 𑀧𑀦 𑀜𑀸𑀡𑀢𑁄 𑀅𑀜𑁆𑀜𑀁, 𑀦𑀧𑀺 𑀜𑀸𑀡𑀲𑁆𑀲 𑀅𑀪𑀸𑀯𑀫𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀬𑀣𑀸𑀲𑀪𑀸𑀯𑀧𑁆𑀧𑀝𑀺𑀯𑁂𑀥𑀸𑀧𑁆𑀧𑀤𑀸𑀦𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦𑁂𑀯. 𑀏𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀲𑀘𑁆𑀘𑀤𑁆𑀯𑀬𑀁 𑀲𑁂𑀲𑀝𑁆𑀞𑀸𑀦𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦𑀧𑀺 𑀅𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀲𑀘𑁆𑀘𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀤𑁂𑀢𑀺, 𑀢𑀣𑀸 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀦𑁆𑀢𑀺.

𑀤𑀼𑀓𑁆𑀔𑀦𑁆𑀢𑀺 𑀘𑁂𑀢𑁆𑀣 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀓𑀸𑀫𑀪𑀯𑀸𑀤𑀺𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸 𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀜𑁆𑀘 𑀅𑀯𑀺𑀚𑁆𑀚𑀁 𑀢𑀺𑀥𑀸 𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂 𑀢𑀻𑀲𑀼 𑀪𑀯𑁂𑀲𑀼 𑀲𑀗𑁆𑀔𑀸𑀭𑀸𑀤𑀺𑀓𑁂 𑀧𑀝𑀺𑀧𑀸𑀝𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸𑀢𑀺 𑀓𑀸𑀫𑀪𑀯𑁂 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸. 𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸 𑀅𑀭𑀽𑀧𑀪𑀯𑁂 𑀅𑀯𑀺𑀚𑁆𑀚𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀓𑀸𑀫𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀼𑀜𑁆𑀜𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸𑀦𑀁, 𑀓𑀸𑀫𑀪𑀯𑁂 𑀯𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀬𑁂 𑀧𑀼𑀜𑁆𑀜𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸, 𑀢𑁂𑀲𑀁 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀢𑀺 𑀘𑁂𑀢𑁆𑀣 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀢𑀸𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀲𑀼 𑀲𑀳𑀚𑀸𑀢𑀲𑁆𑀲 𑀲𑀳𑀚𑀸𑀢𑀸𑀤𑀺𑀯𑀲𑁂𑀦, 𑀅𑀲𑀳𑀚𑀸𑀢𑀲𑁆𑀲 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀤𑀺𑀯𑀲𑁂𑀦, 𑀅𑀦𑀸𑀦𑀦𑁆𑀢𑀭𑀲𑁆𑀲 𑀧𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀪𑀯𑁂 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀦𑀁. 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀯𑀲𑁂𑀦𑁂𑀯. 𑀇𑀫𑀲𑁆𑀫𑀺𑀜𑁆𑀘 𑀧𑀦𑀢𑁆𑀣𑁂 𑀏𑀢𑁆𑀣 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 ¶ 𑀅𑀢𑀺𑀧𑁆𑀧𑀧𑀜𑁆𑀘𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀦𑀬𑀺𑀥 𑀯𑀺𑀢𑁆𑀣𑀸𑀭𑀬𑀺𑀲𑁆𑀲𑀸𑀫. 𑀇𑀢𑀭𑁂𑀲𑀽𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼.

𑀢𑀺𑀡𑁆𑀡𑀁 ¶ 𑀆𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑀸𑀬𑀢𑀦𑀸𑀦𑀁 𑀖𑀸𑀦𑀸𑀤𑀺𑀢𑁆𑀢𑀬𑀲𑁆𑀲 𑀢𑀢𑁆𑀣 𑀅𑀲𑀫𑁆𑀪𑀯𑀢𑁄. 𑀏𑀓𑀲𑁆𑀲𑀸𑀢𑀺 𑀫𑀦𑀸𑀬𑀢𑀦𑀲𑁆𑀲 𑀇𑀢𑀭𑁂𑀲𑀁 𑀢𑀢𑁆𑀣 𑀅𑀲𑀫𑁆𑀪𑀯𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀢𑀺𑀡𑁆𑀡𑀁 𑀨𑀲𑁆𑀲𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀩𑁆𑀩𑀺𑀥𑀲𑁆𑀲 𑀨𑀲𑁆𑀲𑀲𑁆𑀲𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁄𑀢𑀲𑀫𑁆𑀨𑀲𑁆𑀲𑀖𑀸𑀦𑀲𑀫𑁆𑀨𑀲𑁆𑀲𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀓𑀸𑀬𑀲𑀫𑁆𑀨𑀲𑁆𑀲𑀫𑀦𑁄𑀲𑀫𑁆𑀨𑀲𑁆𑀲𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑀲𑁆𑀲 𑀨𑀲𑁆𑀲𑀲𑁆𑀲. 𑀙𑀦𑁆𑀦𑀁 𑀯𑁂𑀤𑀦𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀢𑀣𑀸 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺 𑀇𑀫𑀸𑀲𑀁 𑀙𑀦𑁆𑀦𑀁 𑀯𑁂𑀤𑀦𑀸𑀦𑀁. 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀦𑁆𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀢𑀡𑁆𑀳𑀸𑀓𑀸𑀬𑀸𑀦𑀁. 𑀢𑀢𑁆𑀣 𑀢𑀢𑁆𑀣 𑀲𑀸 𑀲𑀸 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀢𑁆𑀣 𑀢𑀢𑁆𑀣 𑀓𑀸𑀫𑀪𑀯𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀢𑀡𑁆𑀳𑀸.

𑀲𑀸 𑀢𑀡𑁆𑀳𑀸𑀤𑀺𑀫𑀽𑀮𑀺𑀓𑀸 𑀓𑀣𑀸 𑀅𑀢𑀺𑀲𑀁𑀔𑀺𑀢𑁆𑀢𑀸𑀢𑀺 𑀢𑀁 𑀉𑀧𑀸𑀤𑀸𑀦𑀪𑀯𑁂 𑀘 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀓𑀸𑀫𑀢𑀡𑁆𑀳𑀸𑀧𑀯𑀢𑁆𑀢𑀺𑀫𑀸𑀳, 𑀢𑀣𑀸 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻𑀢𑀺𑀆𑀤𑀻𑀳𑀺. 𑀲𑀸 𑀧𑀦 𑀢𑀡𑁆𑀳𑀸 𑀬𑀲𑁆𑀫𑀸 𑀪𑀼𑀲𑀫𑀸𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀓𑀸𑀫𑀼𑀧𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸’’𑀢𑀺. 𑀢𑀣𑁂𑀯𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯. 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂 𑀲𑀫𑁆𑀧𑀢𑁆𑀢𑀺𑀁. ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸’’𑀢𑀺 𑀯𑀘𑀦𑀢𑁄 𑀪𑀯𑀭𑀸𑀕𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑀫𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑁂𑀢𑁆𑀢𑀁 𑀪𑀸𑀯𑁂𑀢𑀻𑀢𑀺 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀢𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀛𑀸𑀦𑀁 𑀯𑀸, 𑀢𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀁 𑀪𑀸𑀯𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀺 𑀬𑁄𑀚𑀦𑀸𑀲𑀼 𑀏𑀲𑁂𑀯 𑀦𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀇𑀥𑁂𑀓𑀘𑁆𑀘𑁄 ‘‘𑀦𑀢𑁆𑀣𑀺 𑀧𑀭𑀮𑁄𑀓𑁄’’𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀲𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑀺𑀪𑀯𑁂 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀲𑁄 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀧𑀭𑁄 ‘‘𑀭𑀽𑀧𑀻 𑀫𑀦𑁄𑀫𑀬𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸 ¶ 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑁄𑀧𑀺 ‘‘𑀅𑀭𑀽𑀧𑀪𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀅𑀭𑀽𑀧𑀽𑀧𑀧𑀢𑁆𑀢𑀺𑀬𑀸 ¶ 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀳𑀺𑀬𑁂𑀯 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀧𑀺 𑀬𑁄𑀚𑀦𑀸 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀲𑁂𑀦𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁄 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀅𑀲𑀼𑀤𑁆𑀥𑀺𑀫𑀕𑁆𑀕𑀁 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀧𑀭𑀸𑀫𑀲𑀦𑁆𑀢𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀬𑁆𑀯𑀸𑀬𑀁 𑀲𑀁𑀲𑀸𑀭𑀘𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀸𑀫𑀪𑀯𑁂 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄, 𑀢𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀲𑀗𑁆𑀔𑀸𑀭𑀸 𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀸, 𑀏𑀯𑀁 𑀅𑀯𑀺𑀚𑁆𑀚𑀸𑀧𑀺 𑀓𑀸𑀫𑀸𑀲𑀯𑀸𑀤𑀺𑀦𑀸 𑀲𑀳𑁂𑀢𑀼𑀓𑀸 𑀏𑀯𑀸𑀢𑀺 𑀆𑀳 ‘‘𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀢𑀺 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀸𑀦𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑁂. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀪𑀼𑀫𑁆𑀫𑀁. 𑀧𑀜𑁆𑀜𑀸𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀧𑀓𑀸𑀭𑀢𑁄 𑀚𑀸𑀦𑀦𑀸. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀨𑀮𑀥𑀫𑁆𑀫𑀸 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀺𑀢𑀺, 𑀓𑀸𑀭𑀡𑀁, 𑀥𑀫𑁆𑀫𑀸𑀦𑀁 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀘𑀬𑀜𑀸𑀡𑀦𑁆𑀢𑀺 𑀅𑀢𑁆𑀣𑁄, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀯𑀩𑁄𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸𑀬𑁂𑀯 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀅𑀤𑀺𑀝𑁆𑀞𑁂𑀲𑀼 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀲𑀓𑁆𑀓𑀸 𑀤𑀝𑁆𑀞𑀼𑀦𑁆𑀢𑀺 ‘‘𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀪𑁄𑀧𑁂𑀢𑁂 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀇𑀤𑀁 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑀢𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀬𑀲𑁆𑀫𑀸 𑀅𑀤𑁆𑀥𑀢𑁆𑀢𑀬𑁂 𑀓𑀗𑁆𑀔𑀸𑀫𑀮𑀯𑀺𑀢𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀏𑀢𑁂𑀦 𑀦𑀬𑁂𑀦 ‘‘𑀅𑀯𑀺𑀚𑁆𑀚𑀸 𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 ‘‘𑀲𑀗𑁆𑀔𑀸𑀭𑀸 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.

𑀲𑀁𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀳𑁂𑀢𑀼 𑀯𑀺𑀧𑀸𑀓𑁄 𑀘. 𑀅𑀣 𑀯𑀸 𑀳𑁂𑀢𑀼𑀯𑀺𑀧𑀸𑀓𑁄𑀢𑀺 𑀲𑀁𑀔𑀺𑀧𑁆𑀧𑀢𑀻𑀢𑀺 𑀲𑀗𑁆𑀔𑁂𑀧𑁄, 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀲𑀗𑁆𑀔𑁂𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀏𑀓𑀯𑀘𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀢𑁂 𑀧𑀦 𑀲𑀗𑁆𑀔𑁂𑀧𑀸 𑀅𑀢𑀻𑀢𑁂 𑀳𑁂𑀢𑀼, 𑀏𑀢𑀭𑀳𑀺 𑀯𑀺𑀧𑀸𑀓𑁄, 𑀏𑀢𑀭𑀳𑀺 𑀳𑁂𑀢𑀼, 𑀆𑀬𑀢𑀺𑀁 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀓𑀸𑀮𑀯𑀺𑀪𑀸𑀕𑁂𑀦 𑀘𑀢𑁆𑀢𑀸𑀭𑁄 𑀚𑀸𑀢𑀸, 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑀗𑁆𑀔𑁂𑀧𑁄 𑀘𑁂𑀢𑁆𑀣 𑀅𑀢𑀻𑀢𑁄 𑀅𑀤𑁆𑀥𑀸’’𑀢𑀺𑀆𑀤𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀓𑀺𑀮𑁂𑀲𑀪𑀸𑀯𑀲𑀸𑀫𑀜𑁆𑀜𑀢𑁄 𑀢𑀡𑁆𑀳𑀼𑀧𑀸𑀤𑀸𑀦𑀸 𑀕𑀳𑀺𑀢𑀸, 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀓𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑀢𑁄 𑀪𑀯𑁄 𑀕𑀳𑀺𑀢𑁄, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀢𑁂𑀳𑀺 𑀯𑀺𑀦𑀸 𑀲𑀓𑀺𑀘𑁆𑀘𑀸𑀓𑀭𑀡𑀢𑁄 𑀘 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀅𑀣 𑀯𑀸 𑀅𑀯𑀺𑀤𑁆𑀯𑀸 𑀧𑀭𑀺𑀢𑀲𑁆𑀲𑀢𑀺, 𑀧𑀭𑀺𑀢𑀲𑀺𑀢𑁄 ¶ 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀲𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀢𑀲𑁆𑀫𑀸 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄, 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭).

𑀢𑀢𑁆𑀣 (𑀯𑀺𑀪. 𑀅𑀝𑁆𑀞. 𑁨𑁪𑁨; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁪𑁭) 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑁂 𑀓𑀫𑁆𑀫𑀪𑀯𑁂, 𑀅𑀢𑀻𑀢𑀚𑀸𑀢𑀺𑀬𑀁 𑀓𑀫𑁆𑀫𑀪𑀯𑁂 𑀓𑀭𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀫𑁄𑀳𑁄 𑀅𑀯𑀺𑀚𑁆𑀚𑀸𑀢𑀺 𑀬𑁄 𑀢𑀤𑀸 𑀤𑀼𑀓𑁆𑀔𑀸𑀤𑀻𑀲𑀼 𑀫𑁄𑀳𑁄 𑀬𑁂𑀦 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸. 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸𑀢𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀢𑁄 𑀬𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄, 𑀬𑀣𑀸 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀲𑀫𑁆𑀧𑀺 𑀲𑀁𑀯𑀘𑁆𑀙𑀭𑀫𑁆𑀧𑀺 𑀤𑀸𑀦𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀦 𑀳𑀢𑁆𑀣𑁂 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑀬𑀢𑁄 𑀘𑁂𑀢𑀦𑀸 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸𑀯𑀚𑁆𑀚𑀦𑁂𑀲𑀼 𑀯𑀸 𑀙𑀲𑀼 𑀚𑀯𑀦𑁂𑀲𑀼 𑀘𑁂𑀢𑀦𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸 𑀦𑀸𑀫, 𑀲𑀢𑁆𑀢𑀫𑀸 𑀪𑀯𑁄. 𑀬𑀸 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄, 𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀲𑀗𑁆𑀔𑀸𑀭𑀸 𑀦𑀸𑀫. 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀢𑀺 𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀲𑁆𑀲 𑀨𑀮𑁂 𑀉𑀧𑀧𑀢𑁆𑀢𑀺𑀪𑀯𑁂 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸, 𑀲𑀸 𑀢𑀡𑁆𑀳𑀸 𑀦𑀸𑀫. 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀦𑁆𑀢𑀺 𑀬𑀁 𑀓𑀫𑁆𑀫𑀪𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 ‘‘𑀇𑀤𑀁 𑀓𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀸𑀫𑁂 𑀲𑁂𑀯𑀺𑀲𑁆𑀲𑀸𑀫𑀺 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀉𑀧𑀕𑀫𑀦𑀁 𑀕𑀳𑀡𑀁 𑀧𑀭𑀸𑀫𑀲𑀦𑀁, 𑀇𑀤𑀁 𑀉𑀧𑀸𑀤𑀸𑀦𑀁 𑀦𑀸𑀫. 𑀘𑁂𑀢𑀦𑀸 𑀪𑀯𑁄𑀢𑀺 ‘‘𑀢𑀁 𑀓𑀫𑁆𑀫𑀁 𑀓𑀭𑁄𑀢𑁄 𑀬𑀸 𑀧𑀼𑀭𑀺𑀫𑀸 𑀘𑁂𑀢𑀦𑀸𑀬𑁄’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀬𑀸 𑀘𑁂𑀢𑀦𑀸 𑀪𑀯𑁄𑀢𑀺 𑀯𑀼𑀢𑁆𑀢𑀸, 𑀲𑀸 𑀘𑁂𑀢𑀦𑀸 𑀪𑀯𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 ¶ 𑀲𑀩𑁆𑀩𑁂𑀧𑁂𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀥𑀫𑁆𑀫𑁂 𑀤𑁆𑀯𑀻𑀳𑀺 𑀯𑀝𑁆𑀝𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 ‘‘𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀅𑀢𑀻𑀢𑁂 𑀓𑀫𑁆𑀫𑀯𑀝𑁆𑀝’’𑀦𑁆𑀢𑀺. 𑀏𑀢𑁆𑀣 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀸 𑀪𑀯𑁄 𑀘 𑀓𑀫𑁆𑀫𑀁, 𑀅𑀯𑀺𑀚𑁆𑀚𑀸𑀤𑀬𑁄 𑀧𑀦 𑀓𑀫𑁆𑀫𑀲𑀳𑀸𑀬𑀢𑀸𑀬 𑀓𑀫𑁆𑀫𑀲𑀭𑀺𑀓𑁆𑀔𑀓𑀸 𑀢𑀤𑀼𑀧𑀓𑀸𑀭𑀓𑀸 𑀘𑀸𑀢𑀺 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀯𑀺𑀚𑁆𑀚𑀸𑀤𑀬𑁄 𑀳𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀢𑀸𑀬 𑀓𑀫𑁆𑀫𑀲𑀭𑀺𑀓𑁆𑀔𑀓𑀸 𑀲𑀳𑀚𑀸𑀢𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘 𑀓𑀫𑁆𑀫𑀲𑁆𑀲 𑀘 𑀉𑀧𑀓𑀸𑀭𑀓𑀸. 𑀓𑀫𑁆𑀫𑀫𑁂𑀯 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀁 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀓𑀫𑁆𑀫𑀯𑀝𑁆𑀝𑀁. 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀡𑀸𑀤𑀬𑁄 𑀯𑁂𑀤𑀦𑀸𑀧𑀭𑀺𑀬𑀦𑁆𑀢𑀸 𑀧𑀜𑁆𑀘 𑀏𑀢𑀭𑀳𑀺 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀓𑀺𑀮𑁂𑀲𑀓𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑀢𑁄 𑀢𑀡𑁆𑀳𑀼𑀧𑀸𑀤𑀸𑀦𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸, 𑀪𑀯𑀕𑁆𑀕𑀳𑀡𑁂𑀦 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀪𑀯𑁂 𑀕𑀳𑀺𑀢𑁂 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 ¶ , 𑀢𑀡𑁆𑀳𑀼𑀧𑀸𑀤𑀸𑀦𑀕𑁆𑀕𑀳𑀡𑁂𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀬𑀸𑀬 𑀯𑀸 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸𑀯 𑀳𑁄𑀢𑀻𑀢𑀺 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋

‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄, 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸’’𑀢𑀺 (𑀧𑀝𑀺. 𑀫. 𑁧.𑁪𑁭).

𑀢𑀢𑁆𑀣 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀦𑁆𑀢𑀺 𑀧𑀭𑀺𑀧𑀓𑁆𑀓𑀸𑀬𑀢𑀦𑀲𑁆𑀲 𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀫𑁆𑀫𑁄𑀳𑁄 𑀤𑀲𑁆𑀲𑀺𑀢𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀦𑀁 𑀚𑀸𑀢𑀺𑀚𑀭𑀸𑀪𑀗𑁆𑀕𑀸𑀯𑀢𑁆𑀣𑀸 𑀚𑀸𑀢𑀺𑀚𑀭𑀸𑀫𑀭𑀡𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀅𑀯𑀢𑁆𑀣𑀸𑀦𑀁 𑀕𑀳𑀡𑁂𑀦 𑀅𑀯𑀢𑁆𑀣𑀸𑀯𑀦𑁆𑀢𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀆𑀳 ‘‘𑀚𑀸𑀢𑀺𑀚𑀭𑀸𑀫𑀭𑀡𑀸𑀧𑀤𑁂𑀲𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸’’𑀢𑀺. 𑀅𑀧𑀤𑁂𑀲𑁂𑀦𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀓𑀣𑀦𑁂𑀦. 𑀇𑀫𑁂𑀢𑀺 𑀯𑀺𑀜𑁆𑀜𑀸𑀡𑀸𑀤𑀬𑁄. 𑀆𑀬𑀢𑀺𑀁 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑁂𑀢𑀼𑀢𑁄 𑀪𑀸𑀯𑀻𑀦𑀁 𑀅𑀦𑀸𑀕𑀢𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀢𑁂𑀢𑀺 𑀅𑀯𑀺𑀚𑁆𑀚𑀸𑀤𑀬𑁄. 𑀆𑀓𑀸𑀭𑀢𑁄𑀢𑀺 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀕𑀳𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸 ¶ . 𑀢𑀢𑁄 𑀆𑀓𑀸𑀭𑀢𑁄. 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀅𑀢𑀻𑀢𑁂 𑀳𑁂𑀢𑀼𑀧𑀜𑁆𑀘𑀓𑀸𑀤𑀺𑀪𑁂𑀤𑀢𑁄 𑀯𑀻𑀲𑀢𑀺𑀯𑀺𑀥𑀸 𑀳𑁄𑀦𑁆𑀢𑀺.

𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑁂𑀢𑁆𑀣 𑀅𑀦𑁆𑀢𑀭𑀸 𑀏𑀓𑁄 𑀲𑀦𑁆𑀥𑀻𑀢𑀺 𑀳𑁂𑀢𑀼𑀢𑁄 𑀨𑀮𑀲𑁆𑀲 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀳𑁂𑀢𑀼𑀨𑀮𑀲𑁆𑀲 𑀲𑀫𑁆𑀩𑀦𑁆𑀥𑀪𑀽𑀢𑁄 𑀏𑀓𑁄 𑀲𑀦𑁆𑀥𑀺, 𑀢𑀣𑀸 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑀸. 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑀸 𑀧𑀦 𑀨𑀮𑀢𑁄 𑀳𑁂𑀢𑀼𑀦𑁄 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀨𑀮𑀳𑁂𑀢𑀼𑀲𑀫𑁆𑀩𑀦𑁆𑀥𑀪𑀽𑀢𑁄 𑀏𑀓𑁄 𑀲𑀦𑁆𑀥𑀺. 𑀨𑀮𑀪𑀽𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀜𑁆𑀜𑀲𑁆𑀲 𑀳𑁂𑀢𑀼𑀲𑀪𑀸𑀯𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀢𑁂𑀦𑀸𑀳 ‘‘𑀘𑀢𑀼𑀲𑀗𑁆𑀔𑁂𑀧’’𑀦𑁆𑀢𑀺𑀆𑀤𑀺. 𑀲𑀩𑁆𑀩𑀸𑀓𑀸𑀭𑀢𑁄𑀢𑀺 𑀇𑀥 𑀯𑀼𑀢𑁆𑀢𑁂𑀳𑀺 𑀘 𑀅𑀯𑀼𑀢𑁆𑀢𑁂𑀳𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀤𑀻𑀲𑀼 𑀘 𑀆𑀕𑀢𑁂𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺. 𑀚𑀸𑀦𑀸𑀢𑀻𑀢𑀺 𑀅𑀯𑀩𑀼𑀚𑁆𑀛𑀢𑀺. 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀁. 𑀢𑀦𑁆𑀢𑀺 𑀢𑀁 𑀚𑀸𑀦𑀦𑀁. 𑀜𑀸𑀢𑀝𑁆𑀞𑁂𑀦𑀸𑀢𑀺 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀦𑀝𑁆𑀞𑁂𑀦. 𑀧𑀚𑀸𑀦𑀦𑀝𑁆𑀞𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦.

𑀇𑀤𑀸𑀦𑀺 ¶ 𑀬𑀤𑀢𑁆𑀣𑀫𑀺𑀤𑀁 𑀪𑀯𑀘𑀓𑁆𑀓𑀁 𑀇𑀥𑀸𑀦𑀻𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂 𑀥𑀫𑁆𑀫𑁂𑀢𑀺 𑀢𑁂 𑀅𑀯𑀺𑀚𑁆𑀚𑀸𑀤𑀺𑀓𑁂 𑀥𑀫𑁆𑀫𑁂. 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸𑀢𑀺 𑀫𑀳𑀸𑀯𑀚𑀺𑀭𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀚𑀸𑀦𑀺𑀢𑁆𑀯𑀸. 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄. 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄. 𑀅𑀭𑁂 𑀳𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀬𑀤𑀸 𑀪𑀕𑀯𑀸 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺, 𑀢𑀤𑀸 𑀅𑀭𑁂 𑀳𑀦𑀢𑀺 𑀦𑀸𑀫. 𑀢𑀢𑁄 𑀧𑀭𑀁 𑀧𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀓𑁆𑀔𑀡𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀳𑀦𑀺 𑀯𑀺𑀳𑀦𑀺 𑀯𑀺𑀤𑁆𑀥𑀁𑀲𑁂𑀲𑀻’’𑀢𑀺. 𑀏𑀯𑀫𑁆𑀧𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳𑀦𑁆𑀢𑀺 𑀏𑀯𑀁 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 𑀬𑀣𑀸𑀯𑀼𑀢𑁆𑀢𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳𑀁. 𑀏𑀢𑁆𑀣𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀭𑀸 𑀲𑀁𑀲𑀸𑀭𑀘𑀓𑁆𑀓𑀲𑁆𑀲, 𑀳𑀢𑀸 𑀜𑀸𑀡𑀸𑀲𑀺𑀦𑀸 𑀬𑀢𑁄;

𑀮𑁄𑀓𑀦𑀸𑀣𑁂𑀦 𑀢𑁂𑀦𑁂𑀲, 𑀅𑀭𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁮);

𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸𑀢𑀺 𑀉𑀢𑁆𑀢𑀫𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀢𑁄. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀘𑁂𑀢𑀦𑁂 𑀘𑀓𑁆𑀓𑀭𑀢𑀦𑁂 𑀉𑀧𑁆𑀧𑀦𑁆𑀦𑁂 𑀢𑀢𑁆𑀣𑁂𑀯 𑀮𑁄𑀓𑁄 𑀧𑀽𑀚𑀁 𑀓𑀭𑁄𑀢𑀺, 𑀅𑀜𑁆𑀜𑀢𑁆𑀣 𑀧𑀽𑀚𑀸𑀯𑀺𑀲𑁂𑀲𑀸 𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀦𑁆𑀦𑁂 ¶ 𑀢𑀣𑀸𑀕𑀢𑁂’’𑀢𑀺𑀆𑀤𑀺𑀫𑀸𑀳. ‘‘𑀏𑀓𑁂𑀓𑀁 𑀥𑀫𑁆𑀫𑀓𑁆𑀔𑀦𑁆𑀥𑀁 𑀏𑀓𑁂𑀓𑀯𑀺𑀳𑀸𑀭𑁂𑀦 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀢𑁆𑀣𑀸𑀭𑀁𑀬𑁂𑀯 𑀉𑀤𑁆𑀤𑀺𑀲𑁆𑀲 𑀓𑀢𑀢𑁆𑀢𑀸 ‘‘𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑁂𑀲𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑁂𑀲𑀁 𑀅𑀫𑀳𑁂𑀲𑀓𑁆𑀔𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀓𑀭𑀺𑀬𑀫𑀸𑀦𑀸𑀦𑀁 𑀦𑀸𑀢𑀺𑀉𑀴𑀸𑀭𑀸𑀦𑀁 𑀧𑀽𑀚𑀸𑀯𑀺𑀲𑁂𑀲𑀸𑀦𑀁 𑀅𑀭𑀳𑀪𑀸𑀯𑁂 𑀓𑀸 𑀦𑀸𑀫 𑀓𑀣𑀸. 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸𑀧𑀺 𑀅𑀭𑀳𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀧𑀽𑀚𑀸𑀯𑀺𑀲𑁂𑀲𑀲𑁆𑀲 𑀘 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸𑀧𑀺 𑀅𑀭𑀳𑀁. 𑀇𑀫𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀇𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀽𑀚𑀸𑀯𑀺𑀲𑁂𑀲𑀁 𑀲𑀳 𑀧𑀘𑁆𑀘𑀬𑁂𑀳𑀺,

𑀬𑀲𑁆𑀫𑀸 𑀅𑀬𑀁 𑀅𑀭𑀳𑀢𑀺 𑀮𑁄𑀓𑀦𑀸𑀣𑁄;

𑀅𑀢𑁆𑀣𑀸𑀦𑀼𑀭𑀽𑀧𑀁 𑀅𑀭𑀳𑀦𑁆𑀢𑀺 𑀮𑁄𑀓𑁂,

𑀢𑀲𑁆𑀫𑀸 𑀚𑀺𑀦𑁄 𑀅𑀭𑀳𑀢𑀺 𑀦𑀸𑀫𑀫𑁂𑀢’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁯);

𑀅𑀲𑀺𑀮𑁄𑀓𑀪𑀬𑁂𑀦𑀸𑀢𑀺 𑀅𑀓𑀺𑀢𑁆𑀢𑀺𑀪𑀬𑁂𑀦, 𑀅𑀬𑀲𑀪𑀬𑁂𑀦 𑀕𑀭𑀳𑀸𑀪𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀳𑁄 𑀧𑀸𑀧𑀁 𑀓𑀭𑁄𑀦𑁆𑀢𑀻𑀢𑀺 ‘‘𑀫𑀸 𑀦𑀁 𑀓𑁄𑀘𑀺 𑀚𑀜𑁆𑀜𑀸’’𑀢𑀺 𑀭𑀳𑀲𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺. 𑀏𑀯𑀫𑁂𑀲 𑀦 𑀓𑀤𑀸𑀘𑀺 𑀓𑀭𑁄𑀢𑀻𑀢𑀺 𑀏𑀲 𑀪𑀕𑀯𑀸 𑀧𑀸𑀧𑀳𑁂𑀢𑀽𑀦𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀓𑀤𑀸𑀘𑀺𑀧𑀺 𑀏𑀯𑀁 𑀦 𑀓𑀭𑁄𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀬𑀲𑁆𑀫𑀸 ¶ 𑀦𑀢𑁆𑀣𑀺 𑀭𑀳𑁄 𑀦𑀸𑀫, 𑀧𑀸𑀧𑀓𑀫𑁆𑀫𑁂𑀲𑀼 𑀢𑀸𑀤𑀺𑀦𑁄;

𑀭𑀳𑀸𑀪𑀸𑀯𑁂𑀦 𑀢𑁂𑀦𑁂𑀲, 𑀅𑀭𑀳𑀁 𑀇𑀢𑀺 𑀯𑀺𑀲𑁆𑀲𑀼𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁦);

𑀇𑀤𑀸𑀦𑀺 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀩𑁆𑀩𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁄𑀢𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀻𑀢𑀺 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄𑀢𑀺 𑀏𑀢𑁆𑀣𑀸𑀧𑀺 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀝𑁆𑀞𑀩𑁆𑀩𑁄.

𑀅𑀭𑀳𑀦𑁆𑀢𑀺 𑀏𑀢𑁆𑀣 𑀅𑀬𑀫𑀧𑀭𑁄𑀧𑀺 𑀦𑀬𑁄 𑀤𑀝𑁆𑀞𑀩𑁆𑀩𑁄 𑁋 𑀆𑀭𑀓𑀸𑀢𑀺 𑀅𑀭𑀳𑀁, 𑀲𑀼𑀯𑀺𑀤𑀽𑀭𑀪𑀸𑀯𑀢𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀼𑀢𑁄 𑀧𑀦 𑀲𑀼𑀯𑀺𑀤𑀽𑀭𑀪𑀸𑀯𑀢𑁄𑀢𑀺? 𑀬𑁂 𑀅𑀪𑀸𑀯𑀺𑀢𑀓𑀸𑀬𑀸 𑀅𑀪𑀸𑀯𑀺𑀢𑀲𑀻𑀮𑀸 𑀅𑀪𑀸𑀯𑀺𑀢𑀘𑀺𑀢𑁆𑀢𑀸 𑀅𑀪𑀸𑀯𑀺𑀢𑀧𑀜𑁆𑀜𑀸, 𑀢𑀢𑁄 𑀏𑀯 𑀅𑀧𑁆𑀧𑀳𑀻𑀦𑀭𑀸𑀕𑀤𑁄𑀲𑀫𑁄𑀳𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀤𑀲𑁆𑀲𑀸𑀯𑀺𑀦𑁄 𑀅𑀧𑁆𑀧𑀝𑀺𑀧𑀦𑁆𑀦𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸 𑀘, 𑀢𑀢𑁄 𑀲𑀼𑀯𑀺𑀤𑀽𑀭𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑁂 ¶ 𑀘𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀅𑀲𑁆𑀲 𑀧𑀸𑀤𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄, 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀫𑀁 𑀧𑀲𑁆𑀲𑀢𑀻’’𑀢𑀺 (𑀇𑀢𑀺𑀯𑀼. 𑁯𑁨).

𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸 𑀳𑀺 𑀲𑀘𑁂𑀧𑀺 𑀲𑀸𑀬𑀁𑀧𑀸𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸𑀯𑀘𑀭𑀸𑀯 𑀲𑀺𑀬𑀼𑀁, 𑀦 𑀢𑁂 𑀢𑀸𑀯𑀢𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀸, 𑀢𑀣𑀸 𑀲𑀢𑁆𑀣𑀸𑀧𑀺 𑀦𑁂𑀲𑀁. 𑀇𑀢𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀭𑀓𑀸 𑀤𑀽𑀭𑁂𑀢𑀺 𑀅𑀭𑀳𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀫𑁆𑀫𑀸 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂 𑀦𑀺𑀳𑀻𑀦𑀸𑀲𑀬𑀸 𑀦𑀭𑀸;

𑀆𑀭𑀓𑀸 𑀢𑁂𑀳𑀺 𑀪𑀕𑀯𑀸, 𑀤𑀽𑀭𑁂 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺.

𑀢𑀣𑀸 𑀆𑀭𑀓𑀸𑀢𑀺 𑀅𑀭𑀳𑀁, 𑀆𑀲𑀦𑁆𑀦𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀧𑀦 𑀆𑀲𑀦𑁆𑀦𑀪𑀸𑀯𑀢𑁄𑀢𑀺? 𑀬𑁂 𑀪𑀸𑀯𑀺𑀢𑀓𑀸𑀬𑀸 𑀪𑀸𑀯𑀺𑀢𑀲𑀻𑀮𑀸 𑀪𑀸𑀯𑀺𑀢𑀘𑀺𑀢𑁆𑀢𑀸 𑀪𑀸𑀯𑀺𑀢𑀧𑀜𑁆𑀜𑀸, 𑀢𑀢𑁄 𑀏𑀯 𑀧𑀳𑀻𑀦𑀭𑀸𑀕𑀤𑁄𑀲𑀫𑁄𑀳𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 ¶ 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑀲𑁆𑀲𑀸𑀯𑀺𑀦𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀢𑀢𑁄 𑀆𑀲𑀦𑁆𑀦𑀪𑀸𑀯𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑁄𑀚𑀦𑀲𑀢𑁂 𑀘𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬, 𑀲𑁄 𑀘 𑀳𑁄𑀢𑀺 𑀅𑀦𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀦 𑀢𑀺𑀩𑁆𑀩𑀲𑀸𑀭𑀸𑀕𑁄 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀔𑁄 𑀲𑁄 𑀲𑀦𑁆𑀢𑀺𑀓𑁂𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀇𑀢𑀺𑀯𑀼. 𑁯𑁨).

𑀢𑀣𑀸𑀭𑀽𑀧𑀸 𑀳𑀺 𑀧𑀼𑀕𑁆𑀕𑀮𑀸 𑀲𑀢𑁆𑀣𑀼 𑀬𑁄𑀚𑀦𑀲𑀢𑀦𑁆𑀢𑀭𑀺𑀓𑀸𑀧𑀺 𑀳𑁄𑀦𑁆𑀢𑀺, 𑀦 𑀢𑀸𑀯𑀢𑀸 𑀢𑁂 ‘‘𑀲𑀢𑁆𑀣𑀼 𑀤𑀽𑀭𑀘𑀸𑀭𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀸, 𑀢𑀣𑀸 𑀲𑀢𑁆𑀣𑀸𑀧𑀺 𑀦𑁂𑀲𑀁. 𑀇𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀆𑀭𑀓𑀸 𑀆𑀲𑀦𑁆𑀦𑁂𑀢𑀺 𑀅𑀭𑀳𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀬𑁂 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀲𑀼𑀧𑁆𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸;

𑀆𑀭𑀓𑀸 𑀢𑁂𑀳𑀺 𑀆𑀲𑀦𑁆𑀦𑁂, 𑀢𑁂𑀦𑀸𑀧𑀺 𑀅𑀭𑀳𑀁 𑀚𑀺𑀦𑁄’’𑀢𑀺.

𑀬𑁂 ¶ 𑀇𑀫𑁂 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀦𑀢𑁆𑀣𑀁 𑀆𑀯𑀳𑀦𑁆𑀢𑀺, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀏𑀓𑀁𑀲𑁂𑀦𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀘, 𑀢𑁂 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀜𑁆𑀘 𑀧𑀭𑀺𑀧𑀽𑀭𑁂𑀢𑀼𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀲𑀸𑀥𑀽𑀳𑀺 𑀤𑀽𑀭𑀢𑁄 𑀭𑀳𑀺𑀢𑀩𑁆𑀩𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸 𑀧𑀳𑀸𑀢𑀩𑁆𑀩𑀸𑀢𑀺 𑀭𑀳𑀸 𑀦𑀸𑀫, 𑀢𑁂 𑀘 𑀬𑀲𑁆𑀫𑀸 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀧𑀳𑀻𑀦𑀸 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀸. 𑀬𑀣𑀸𑀳 𑁋

‘‘𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁄 𑀧𑀳𑀻𑀦𑁄 𑀤𑁄𑀲𑁄 𑀫𑁄𑀳𑁄, 𑀲𑀩𑁆𑀩𑁂𑀧𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺 (𑀧𑀸𑀭𑀸. 𑁯).

𑀢𑀲𑁆𑀫𑀸 𑀲𑀩𑁆𑀩𑀲𑁄 𑀦 𑀲𑀦𑁆𑀢𑀺 𑀏𑀢𑀲𑁆𑀲 𑀭𑀳𑀸𑀢𑀺 𑀅𑀭𑀳𑁄𑀢𑀺 𑀯𑀢𑁆𑀢𑀩𑁆𑀩𑁂 𑀑𑀓𑀸𑀭𑀲𑁆𑀲 𑀲𑀸𑀦𑀼𑀲𑀸𑀭𑀁 𑀅𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀸𑀧𑀥𑀫𑁆𑀫𑀸 ¶ 𑀭𑀳𑀸 𑀦𑀸𑀫, 𑀲𑀸𑀥𑀽𑀳𑀺 𑀭𑀳𑀺𑀢𑀩𑁆𑀩𑀢𑁄;

𑀢𑁂𑀲𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸, 𑀪𑀕𑀯𑀸 𑀅𑀭𑀳𑀁 𑀫𑀢𑁄’’𑀢𑀺.

𑀬𑁂 𑀢𑁂 𑀲𑀩𑁆𑀩𑀲𑁄 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀸 𑀧𑀳𑀻𑀦𑀓𑀺𑀮𑁂𑀲𑀸 𑀪𑀸𑀯𑀺𑀢𑀫𑀕𑁆𑀕𑀸 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸, 𑀬𑁂 𑀘 𑀲𑁂𑀔𑀸 𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀸 𑀯𑀺𑀳𑀭𑀦𑁆𑀢𑀺, 𑀬𑁂 𑀘 𑀧𑀭𑀺𑀲𑀼𑀤𑁆𑀥𑀧𑁆𑀧𑀬𑁄𑀕𑀸 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑀸 𑀲𑀤𑁆𑀥𑀸𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸 𑀧𑀼𑀕𑁆𑀕𑀮𑀸, 𑀢𑁂𑀳𑀺 𑀦 𑀭𑀳𑀺𑀢𑀩𑁆𑀩𑁄 𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑁄, 𑀢𑁂 𑀘 𑀪𑀕𑀯𑀢𑀸𑀢𑀺 𑀅𑀭𑀳𑀁. 𑀢𑀣𑀸 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀢𑁆𑀣𑀸𑀭𑀸 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀲𑀢𑁆𑀣𑀼 𑀥𑀫𑁆𑀫𑀲𑀭𑀻𑀭𑁂𑀦 𑀅𑀯𑀺𑀭𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀬𑀣𑀸𑀳 𑀆𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄 𑁋

‘‘𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯,

𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁,

𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁.

‘‘𑀲𑀤𑁆𑀥𑀸 ¶ 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘,

𑀦𑀸𑀧𑁂𑀦𑁆𑀢𑀺𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄,

𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀻’’𑀢𑀺. (𑀲𑀼. 𑀦𑀺. 𑁧𑁧𑁪𑁮-𑁧𑁧𑁪𑁯);

𑀢𑁂𑀦𑁂𑀯 𑀘 𑀢𑁂 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀦𑁆𑀢𑀺. 𑀬𑀣𑀸𑀳 𑁋

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁮; 𑀅. 𑀦𑀺. 𑁧.𑁨𑁭𑁬).

𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀭𑀺 𑀦𑀺𑀘𑁆𑀘𑀮𑀲𑀤𑁆𑀥𑀸 𑀏𑀯 𑀳𑁄𑀦𑁆𑀢𑀺. 𑀇𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁂𑀳𑀺 𑀧𑀼𑀭𑀺𑀲𑀯𑀺𑀲𑁂𑀲𑁂𑀳𑀺 𑀅𑀯𑀺𑀭𑀳𑀺𑀢𑀩𑁆𑀩𑀢𑁄 𑀢𑁂𑀲𑀜𑁆𑀘 𑀅𑀯𑀺𑀭𑀳𑀦𑀢𑁄 𑀦 𑀲𑀦𑁆𑀢𑀺 𑀏𑀢𑀲𑁆𑀲 𑀭𑀳𑀸 𑀧𑀭𑀺𑀘𑁆𑀘𑀚𑀦𑀓𑀸, 𑀦𑀢𑁆𑀣𑀺 𑀯𑀸 𑀏𑀢𑀲𑁆𑀲 𑀭𑀳𑀸 𑀲𑀸𑀥𑀽𑀳𑀺 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀢𑀸𑀢𑀺 𑀅𑀭𑀳𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀬𑁂 𑀲𑀘𑁆𑀙𑀺𑀓𑀢𑀲𑀤𑁆𑀥𑀫𑁆𑀫𑀸, 𑀅𑀭𑀺𑀬𑀸 𑀲𑀼𑀤𑁆𑀥𑀕𑁄𑀘𑀭𑀸;

𑀦 𑀢𑁂𑀳𑀺 𑀭𑀳𑀺𑀢𑁄 𑀳𑁄𑀢𑀺, 𑀦𑀸𑀣𑁄 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺.

𑀭𑀳𑁄𑀢𑀺 ¶ 𑀘 𑀕𑀫𑀦𑀁 𑀯𑀼𑀘𑁆𑀘𑀢𑀺, 𑀪𑀕𑀯𑀢𑁄 𑀘 𑀦𑀸𑀦𑀸𑀕𑀢𑀻𑀲𑀼 𑀧𑀭𑀺𑀩𑁆𑀪𑀫𑀦𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑁂 𑀕𑀫𑀦𑀁 𑀦𑀢𑁆𑀣𑀺 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀩𑁆𑀩𑀲𑁄 𑀲𑀲𑀫𑁆𑀪𑀸𑀭𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀬𑀣𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀏𑀯𑀁 𑀦𑀢𑁆𑀣𑀺 𑀏𑀢𑀲𑁆𑀲 𑀭𑀳𑁄 𑀕𑀫𑀦𑀁 𑀕𑀢𑀻𑀲𑀼 𑀧𑀘𑁆𑀘𑀸𑀚𑀸𑀢𑀻𑀢𑀺𑀧𑀺 𑀅𑀭𑀳𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀭𑀳𑁄 𑀯𑀸 𑀕𑀫𑀦𑀁 𑀬𑀲𑁆𑀲, 𑀲𑀁𑀲𑀸𑀭𑁂 𑀦𑀢𑁆𑀣𑀺 𑀲𑀩𑁆𑀩𑀲𑁄;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀅𑀭𑀳𑀁 𑀲𑀼𑀕𑀢𑁄 𑀫𑀢𑁄’’𑀢𑀺.

𑀧𑀸𑀲𑀁𑀲𑀢𑁆𑀢𑀸 𑀯𑀸 𑀪𑀕𑀯𑀸 𑀅𑀭𑀳𑀁. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀧𑀲𑀁𑀲𑀸𑀬𑀁 𑀅𑀭𑀳𑀲𑀤𑁆𑀤𑀁 𑀯𑀡𑁆𑀡𑁂𑀦𑁆𑀢𑀺. 𑀧𑀸𑀲𑀁𑀲𑀪𑀸𑀯𑁄 𑀘 𑀪𑀕𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁄 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄. 𑀢𑀣𑀸 𑀳𑁂𑀲 𑀅𑀦𑀼𑀢𑁆𑀢𑀭𑁂𑀦 𑀲𑀻𑀮𑁂𑀦 𑀅𑀦𑀼𑀢𑁆𑀢𑀭𑁂𑀦 𑀲𑀫𑀸𑀥𑀺𑀦𑀸 𑀅𑀦𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀅𑀦𑀼𑀢𑁆𑀢𑀭𑀸𑀬 ¶ 𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀕𑀼𑀡𑁂 𑀯𑀺𑀪𑀚𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 𑀤𑁂𑀯𑁂𑀳𑀺 𑀩𑁆𑀭𑀳𑁆𑀫𑁂𑀳𑀺 𑀪𑀕𑀯𑀢𑀸 𑀯𑀸 𑀧𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁄. 𑀇𑀢𑀺 𑀧𑀸𑀲𑀁𑀲𑀢𑁆𑀢𑀸𑀧𑀺 𑀪𑀕𑀯𑀸 𑀅𑀭𑀳𑀁. 𑀢𑁂𑀦𑁂𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀕𑀼𑀡𑁂𑀳𑀺 𑀲𑀤𑀺𑀲𑁄 𑀦𑀢𑁆𑀣𑀺, 𑀬𑀲𑁆𑀫𑀸 𑀮𑁄𑀓𑁂 𑀲𑀤𑁂𑀯𑀓𑁂;

𑀢𑀲𑁆𑀫𑀸 𑀧𑀸𑀲𑀁𑀲𑀺𑀬𑀢𑁆𑀢𑀸𑀧𑀺, 𑀅𑀭𑀳𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑁄’’𑀢𑀺.

𑀲𑀩𑁆𑀩𑀲𑀗𑁆𑀕𑀳𑀯𑀲𑁂𑀦 𑀧𑀦 𑁋

𑀆𑀭𑀓𑀸 𑀫𑀦𑁆𑀤𑀩𑀼𑀤𑁆𑀥𑀻𑀦𑀁, 𑀆𑀭𑀓𑀸 𑀘 𑀯𑀺𑀚𑀸𑀦𑀢𑀁;

𑀭𑀳𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸, 𑀯𑀺𑀤𑀽𑀦𑀫𑀭𑀳𑁂𑀬𑁆𑀬𑀢𑁄;

𑀪𑀯𑁂𑀲𑀼 𑀘 𑀭𑀳𑀸𑀪𑀸𑀯𑀸, 𑀧𑀸𑀲𑀁𑀲𑀸 𑀅𑀭𑀳𑀁 𑀚𑀺𑀦𑁄𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑁆𑀲 𑀲𑀩𑁆𑀩𑀲𑁄 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀼𑀤𑁆𑀥𑁄𑀢𑀺 𑀳𑀺 𑀏𑀢𑁆𑀣 𑀲𑀁-𑀲𑀤𑁆𑀤𑁄 𑀲𑀬𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀯𑀲𑁂𑀲𑀸𑀦𑀁 𑀦𑁂𑀬𑁆𑀬𑀥𑀫𑁆𑀫𑀸𑀦𑀁. 𑀓𑀣𑀁 𑀧𑀦𑁂𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺? 𑀏𑀓𑀤𑁂𑀲𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀯 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀣𑀯𑀺𑀲𑁂𑀲𑀦𑀧𑁂𑀓𑁆𑀔𑀸 𑀓𑀢𑁆𑀢𑀭𑀺 𑀏𑀯 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄. ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀇𑀥 𑀲𑀤𑁆𑀤𑀢𑁄 𑀮𑀩𑁆𑀪𑀢𑀺, ‘‘𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀦 𑀳𑀺 𑀩𑀼𑀚𑁆𑀛𑀦𑀓𑀺𑀭𑀺𑀬𑀸 𑀅𑀯𑀺𑀲𑀬𑀸 𑀬𑀼𑀚𑁆𑀚𑀢𑀺.

𑀇𑀤𑀸𑀦𑀺 𑀢𑀲𑁆𑀲𑀸 𑀯𑀺𑀲𑀬𑀁 ‘‘𑀲𑀩𑁆𑀩𑀥𑀫𑁆𑀫𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑁂𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀮𑀓𑁆𑀔𑀡𑀭𑀲𑀸𑀤𑀺𑀢𑁄 𑀘 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑁂. 𑀅𑀪𑀺𑀜𑁆𑀜𑁂𑀬𑁆𑀬𑀢𑁄 𑀩𑀼𑀤𑁆𑀥𑁄𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀩𑀼𑀚𑁆𑀛𑀺, 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀤𑀻𑀳𑀺 𑀅𑀥𑀺𑀕𑀫𑀓𑁆𑀔𑀡𑁂 𑀫𑀕𑁆𑀕𑀧𑀜𑁆𑀜𑀸𑀬 𑀅𑀧𑀭𑀪𑀸𑀕𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀳𑀺 𑀅𑀜𑁆𑀜𑀸𑀲𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄 ¶ . 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀚𑀸𑀦𑀺𑀢𑀩𑁆𑀩𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀫𑀸𑀳. 𑀧𑀳𑀸𑀢𑀩𑁆𑀩𑁂𑀢𑀺 𑀲𑀫𑀼𑀤𑀬𑀧𑀓𑁆𑀔𑀺𑀬𑁂. 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀧𑀦𑁂𑀢𑁆𑀣 𑀲𑁄𑀧𑀸𑀤𑀺𑀲𑁂𑀲𑀸𑀤𑀺𑀓𑀁 𑀧𑀭𑀺𑀬𑀸𑀬𑀲𑀺𑀤𑁆𑀥𑀁 𑀪𑁂𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁄, 𑀉𑀤𑁆𑀤𑁂𑀲𑁄 𑀯𑀸 𑀅𑀬𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀫𑁆𑀧𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀘𑀓𑁆𑀔𑀼 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀉𑀤𑁆𑀤𑁂𑀲𑁄 𑀘 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀣𑀧𑀭𑀺𑀘𑁆𑀙𑁂𑀤𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀓𑀭𑀻𑀬𑀢𑀺. 𑀉𑀤𑁆𑀤𑁂𑀲𑁂𑀦 𑀳𑀺 𑀉𑀤𑁆𑀤𑀺𑀲𑀺𑀬𑀫𑀸𑀦𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸, 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’𑀢𑀺. 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀢𑀺 𑀯𑀸 𑀨𑀮𑀯𑀺𑀫𑀼𑀢𑁆𑀢𑀻𑀦𑀫𑁆𑀧𑀺 𑀕𑀳𑀡𑀁, 𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯𑀸𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀜𑁆𑀘 𑀪𑀸𑀯𑁂𑀢𑀩𑁆𑀩𑁂𑀢𑀺 𑀏𑀢𑁆𑀣 𑀛𑀸𑀦𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀘𑀸𑀳𑀸𑀢𑀺 𑀲𑁂𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 𑀏𑀯𑀫𑀸𑀳.

𑀓𑀺𑀁 𑀧𑀦 𑀪𑀕𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀸𑀥𑁂𑀢𑀻𑀢𑀺? 𑀲𑀸𑀥𑁂𑀢𑀺 𑀫𑀳𑀸𑀓𑀭𑀼𑀡𑀸𑀬 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀢𑁄. 𑀢𑀢𑁆𑀣 ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀻’’𑀢𑀺𑀆𑀤𑀻𑀦𑀺 (𑀫. 𑀦𑀺. 𑁨.𑁩𑁪𑁧; 𑀫𑀳𑀸𑀯. 𑁧𑁧) 𑀲𑀼𑀢𑁆𑀢𑀧𑀤𑀸𑀦𑀺, 𑀇𑀤𑀫𑁂𑀯 𑀘 ‘‘𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀲𑀼𑀢𑁆𑀢𑀧𑀤𑀁 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀢𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀲𑀘𑁆𑀘𑀫𑀸𑀳, 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀁. ¶ 𑀘-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀫𑀺𑀦𑀸𑀯 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀥𑀫𑁆𑀫𑁂 𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀬𑀲𑁆𑀫𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀫𑀬𑀸 𑀩𑀼𑀤𑁆𑀥𑀸𑀦𑀺, 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀓𑀺𑀜𑁆𑀘𑀺 𑀜𑁂𑀬𑁆𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀩𑀼𑀤𑁆𑀥𑁄𑀲𑁆𑀫𑀺, 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀮𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀪𑀸𑀯𑁂𑀢𑀩𑁆𑀩𑀁 𑀫𑀕𑁆𑀕𑀲𑀘𑁆𑀘𑀁. 𑀧𑀳𑀸𑀢𑀩𑁆𑀩𑀁 𑀲𑀫𑀼𑀤𑀬𑀲𑀘𑁆𑀘𑀁. 𑀳𑁂𑀢𑀼𑀯𑀘𑀦𑁂𑀦 𑀧𑀦 𑀨𑀮𑀲𑀺𑀤𑁆𑀥𑀺𑀢𑁄 𑀢𑁂𑀲𑀁 𑀨𑀮𑀸𑀦𑀺 𑀦𑀺𑀭𑁄𑀥𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀧𑀭𑀺𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀇𑀤𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀫𑁂𑀯𑀸𑀢𑀺 𑀘𑀢𑀼𑀲𑀘𑁆𑀘𑀪𑀸𑀯𑀦𑀁 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀨𑀮𑀜𑁆𑀘 𑀯𑀺𑀫𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘𑀩𑀼𑀚𑁆𑀛𑀺𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀲𑁆𑀫𑀻’𑀢𑀺 𑀬𑀼𑀢𑁆𑀢𑀳𑁂𑀢𑀼𑀦𑀸 𑀩𑀼𑀤𑁆𑀥𑀪𑀸𑀯𑀁 𑀲𑀸𑀥𑁂𑀢𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁯𑁯).

𑀢𑀢𑁆𑀣 ¶ 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀯𑀺𑀚𑁆𑀚𑀸 𑀯𑀼𑀢𑁆𑀢𑀸 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀯𑀺𑀫𑀼𑀢𑁆𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀫𑀕𑁆𑀕𑀯𑀺𑀚𑁆𑀚𑀸𑀧𑀺 𑀪𑀸𑀯𑁂𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑀸, 𑀲𑀩𑁆𑀩𑁂𑀧𑀺 𑀧𑀦 𑀲𑀪𑀸𑀯𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺 𑀯𑀺𑀚𑁆𑀚𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀨𑀮𑁂𑀦 𑀯𑀺𑀦𑀸 𑀳𑁂𑀢𑀼𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄 𑀳𑁂𑀢𑀼𑀯𑀘𑀦𑁂𑀦 𑀨𑀮𑀲𑀺𑀤𑁆𑀥𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀭𑁄𑀥𑀲𑁆𑀲 𑀳𑀺 𑀲𑀫𑁆𑀧𑀸𑀧𑀦𑁂𑀦 𑀫𑀕𑁆𑀕𑀲𑁆𑀲 𑀳𑁂𑀢𑀼𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀡𑁆𑀳𑀸𑀬 𑀲𑀫𑀼𑀤𑀬𑀪𑀸𑀯𑁄𑀢𑀺.

𑀏𑀯𑀁 𑀲𑀘𑁆𑀘𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑁂𑀳𑀺 𑀘𑁂𑀯 𑀔𑀦𑁆𑀥𑀸𑀤𑀻𑀳𑀺 𑀘 𑀲𑀘𑁆𑀘𑀯𑀲𑁂𑀦𑁂𑀯 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀽𑀮𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀲𑀦𑁆𑀢𑁂𑀲𑀼𑀧𑀺 𑀅𑀯𑀺𑀚𑁆𑀚𑀸𑀤𑀻𑀲𑀼 𑀅𑀜𑁆𑀜𑁂𑀲𑀼 𑀓𑀸𑀭𑀡𑁂𑀲𑀼 𑀢𑁂𑀲𑀫𑁆𑀧𑀺 𑀫𑀽𑀮𑀪𑀽𑀢𑀓𑀸𑀭𑀡𑀪𑀸𑀯𑁂𑀦. 𑀢𑀡𑁆𑀳𑀸 𑀳𑀺 𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑀸𑀯𑀳𑁂𑀢𑀼𑀢𑁄 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀘 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀬 𑀧𑀥𑀸𑀦𑀓𑀸𑀭𑀡𑀁. 𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀉𑀧𑁆𑀧𑀸𑀤𑀺𑀓𑀸. 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸 𑀢𑀡𑁆𑀳𑀸. 𑀉𑀪𑀺𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 𑀢𑀁𑀲𑀫𑀼𑀤𑀬𑀲𑁆𑀲 𑀘. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀭𑁄𑀥𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀸. 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦𑀸𑀢𑀺 ‘‘𑀘𑀓𑁆𑀔𑀼𑀁 𑀘𑀓𑁆𑀔𑀼𑀲𑀫𑀼𑀤𑀬𑁄 𑀘𑀓𑁆𑀔𑀼𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀦𑀺𑀤𑁆𑀥𑀸𑀭𑀡𑁂𑀦. 𑀢𑀡𑁆𑀳𑀸𑀬𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀲𑀩𑁆𑀪𑀸𑀯𑀢𑁄 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁄𑀕𑀥𑀢𑁆𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄 𑀘 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 𑀢𑀡𑁆𑀳𑀸𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀢𑁆𑀢𑀫𑀸𑀦𑀪𑀯𑁂 𑀢𑀡𑁆𑀳𑀸 𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀸𑀯𑀢𑁄 𑀘 𑀤𑀼𑀓𑁆𑀔𑀲𑀘𑁆𑀘𑀁. 𑀬𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 ¶ 𑀲𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀕𑀳𑁂𑀢𑀩𑁆𑀩𑀸.

𑀓𑀲𑀺𑀡𑀸𑀦𑀻𑀢𑀺 𑀓𑀲𑀺𑀡𑀸𑀭𑀫𑁆𑀫𑀡𑀺𑀓𑀚𑁆𑀛𑀸𑀦𑀸𑀦𑀺. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀢𑀺 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑀸𑀦𑀺 𑀘. 𑀦𑀯 𑀪𑀯𑀸𑀢𑀺 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀅𑀭𑀽𑀧𑀪𑀯𑁄 𑀲𑀜𑁆𑀜𑀻𑀪𑀯𑁄 𑀅𑀲𑀜𑁆𑀜𑀻𑀪𑀯𑁄 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯𑁄 𑀏𑀓𑀯𑁄𑀓𑀸𑀭𑀪𑀯𑁄 𑀘𑀢𑀼𑀯𑁄𑀓𑀸𑀭𑀪𑀯𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺 𑀦𑀯 𑀪𑀯𑀸. 𑀢𑀢𑁆𑀣 𑀪𑀯𑀢𑀻𑀢𑀺 𑀪𑀯𑁄, 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀬𑀼𑀢𑁆𑀢𑁄 𑀪𑀯𑁄, 𑀓𑀸𑀫𑀲𑀗𑁆𑀔𑀸𑀢𑁄 𑀯𑀸 𑀪𑀯𑁄 𑀓𑀸𑀫𑀪𑀯𑁄, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑁄. 𑀓𑀸𑀫𑁂 𑀧𑀳𑀸𑀬 𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑁂𑀦 𑀭𑀽𑀧𑁂𑀦 𑀬𑀼𑀢𑁆𑀢𑁄 𑀪𑀯𑁄, 𑀭𑀽𑀧𑀲𑀗𑁆𑀔𑀸𑀢𑁄 𑀯𑀸 𑀪𑀯𑁄 𑀭𑀽𑀧𑀪𑀯𑁄, 𑀲𑁄𑀴𑀲 ¶ 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑁄. 𑀓𑀸𑀫𑀜𑁆𑀘 𑀭𑀽𑀧𑀜𑁆𑀘 𑀧𑀳𑀸𑀬 𑀅𑀭𑀽𑀧𑀭𑀸𑀕𑀲𑀗𑁆𑀔𑀸𑀢𑁂𑀦 𑀅𑀭𑀽𑀧𑁂𑀦 𑀬𑀼𑀢𑁆𑀢𑁄 𑀪𑀯𑁄, 𑀅𑀭𑀽𑀧𑀲𑀗𑁆𑀔𑀸𑀢𑁄 𑀯𑀸 𑀪𑀯𑁄 𑀅𑀭𑀽𑀧𑀪𑀯𑁄, 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀪𑀽𑀫𑀺𑀬𑁄. 𑀲𑀜𑁆𑀜𑀸𑀯𑀢𑀁 𑀪𑀯𑁄 𑀲𑀜𑁆𑀜𑀻𑀪𑀯𑁄, 𑀲𑀜𑁆𑀜𑀸 𑀯𑀸 𑀏𑀢𑁆𑀣 𑀪𑀯𑁂 𑀅𑀢𑁆𑀣𑀻𑀢𑀺 𑀲𑀜𑁆𑀜𑀻𑀪𑀯𑁄, 𑀲𑁄 𑀓𑀸𑀫𑀪𑀯𑁄 𑀘 𑀅𑀲𑀜𑁆𑀜𑀻𑀪𑀯𑀫𑀼𑀢𑁆𑀢𑁄 𑀭𑀽𑀧𑀪𑀯𑁄 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯𑀫𑀼𑀢𑁆𑀢𑁄 𑀅𑀭𑀽𑀧𑀪𑀯𑁄 𑀘 𑀳𑁄𑀢𑀺. 𑀦 𑀲𑀜𑁆𑀜𑀻𑀪𑀯𑁄 𑀅𑀲𑀜𑁆𑀜𑀻𑀪𑀯𑁄, 𑀲𑁄 𑀭𑀽𑀧𑀪𑀯𑁂𑀓𑀤𑁂𑀲𑁄. 𑀑𑀴𑀸𑀭𑀺𑀓𑀢𑁆𑀢𑀸𑀪𑀸𑀯𑀢𑁄 𑀦𑁂𑀯𑀲𑀜𑁆𑀜𑀸, 𑀲𑀼𑀔𑀼𑀫𑀢𑁆𑀢𑀲𑁆𑀲 𑀲𑀩𑁆𑀪𑀸𑀯𑀢𑁄 𑀦𑀸𑀲𑀜𑁆𑀜𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸, 𑀢𑀸𑀬 𑀬𑀼𑀢𑁆𑀢𑁄 𑀪𑀯𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄. 𑀅𑀣 𑀯𑀸 𑀑𑀴𑀸𑀭𑀺𑀓𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀸 𑀲𑀼𑀔𑀼𑀫𑀸𑀬 𑀘 𑀪𑀸𑀯𑀸 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸 𑀅𑀲𑁆𑀫𑀺𑀁 𑀪𑀯𑁂𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁄, 𑀲𑁄 𑀅𑀭𑀽𑀧𑀪𑀯𑁂𑀓𑀤𑁂𑀲𑁄. 𑀏𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀏𑀓𑁂𑀦 𑀯𑀸 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁄, 𑀲𑁄 𑀅𑀲𑀜𑁆𑀜𑀻𑀪𑀯𑁄. 𑀘𑀢𑀽𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀘𑀢𑀽𑀳𑀺 𑀯𑀸 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀲𑁄 𑀅𑀭𑀽𑀧𑀪𑀯𑁄 𑀏𑀯. 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀺𑀡𑁆𑀡𑁄 𑀪𑀯𑁄, 𑀧𑀜𑁆𑀘𑀳𑀺 𑀯𑀸 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀲𑁄 𑀓𑀸𑀫𑀪𑀯𑁄 𑀘 𑀭𑀽𑀧𑀪𑀯𑁂𑀓𑀤𑁂𑀲𑁄 𑀘 𑀳𑁄𑀢𑀺. 𑀯𑁄𑀓𑀸𑀭𑁄𑀢𑀺 𑀯𑀸 𑀔𑀦𑁆𑀥𑀸𑀦𑀫𑁂𑀢𑀫𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀏𑀓𑁄 𑀯𑁄𑀓𑀸𑀭𑁄 𑀅𑀲𑁆𑀲 𑀪𑀯𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁄𑀢𑀺 𑀏𑀯𑀫𑀸𑀤𑀺𑀦𑀸𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀸𑀭𑀫𑁆𑀫𑀡𑀯𑀺𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀯𑀺𑀧𑀸𑀓𑀚𑁆𑀛𑀸𑀦𑀸𑀦𑀁 𑀯𑀸 𑀏𑀢𑀁 𑀕𑀳𑀡𑀁. 𑀏𑀢𑁆𑀣 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀢𑀡𑁆𑀳𑀸𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀧𑀦 𑀬𑀢𑁆𑀣 𑀢𑁂 𑀓𑀺𑀭𑀺𑀬𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀸 𑀢𑀡𑁆𑀳𑀸. 𑀅𑀦𑀼𑀮𑁄𑀫𑀢𑁄𑀢𑀺 𑀏𑀢𑁆𑀣 ‘‘𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀅𑀯𑀺𑀚𑁆𑀚𑀸 𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀅𑀦𑀼𑀩𑀼𑀤𑁆𑀥𑁄𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 𑀩𑀼𑀤𑁆𑀥𑁄. 𑀢𑁂𑀦𑀸𑀢𑀺 𑀬𑀲𑁆𑀫𑀸 𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑀢𑁄 𑀘 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑁂 𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀓𑀺𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸’’𑀢𑀺, 𑀲𑀩𑁆𑀩𑀲𑁆𑀲𑀧𑀺 𑀜𑁂𑀬𑁆𑀬𑀲𑁆𑀲 𑀲𑀩𑁆𑀩𑀸𑀓𑀸𑀭𑀢𑁄 𑀅𑀯𑀺𑀧𑀭𑀻𑀢𑀁 𑀲𑀬𑀫𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸𑀢𑀺 ¶ 𑀅𑀢𑁆𑀣𑁄. 𑀇𑀫𑀺𑀦𑀸𑀲𑁆𑀲 𑀧𑀭𑁄𑀧𑀤𑁂𑀲𑀭𑀳𑀺𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 ¶ 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀥𑀺𑀕𑀫𑁄 𑀤𑀲𑁆𑀲𑀺𑀢𑁄.

𑀦𑀦𑀼 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀜𑁆𑀜𑀁 𑀅𑀦𑀸𑀯𑀭𑀡𑀜𑀸𑀡𑀁, 𑀅𑀜𑁆𑀜𑀣𑀸 ‘‘𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀩𑀼𑀤𑁆𑀥𑀜𑀸𑀡𑀸𑀦𑀻’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀪𑁂𑀤𑀯𑀲𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀤𑁆𑀯𑀺𑀥𑀸 𑀯𑀼𑀢𑁆𑀢𑀢𑁆𑀢𑀸. 𑀏𑀓𑀫𑁂𑀯 𑀳𑀺 𑀢𑀁 𑀜𑀸𑀡𑀁 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀯𑀺𑀲𑀬𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣 𑀘 𑀆𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁧𑁯) ‘‘𑀲𑀩𑁆𑀩𑀁 𑀲𑀗𑁆𑀔𑀢𑀫𑀲𑀗𑁆𑀔𑀢𑀁 𑀅𑀦𑀯𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣 𑀆𑀯𑀭𑀡𑀁 𑀦𑀢𑁆𑀣𑀻𑀢𑀺 𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺𑀆𑀤𑀺. 𑀢𑀲𑁆𑀫𑀸 𑀦𑀢𑁆𑀣𑀺 𑀦𑁂𑀲𑀁 𑀅𑀢𑁆𑀣𑀢𑁄 𑀪𑁂𑀤𑁄, 𑀏𑀓𑀦𑁆𑀢𑁂𑀦 𑀘𑁂𑀢𑀁 𑀏𑀯𑀫𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀸𑀦𑀁 𑀲𑀸𑀥𑀸𑀭𑀡𑀢𑀸 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀅𑀡𑀼𑀫𑀢𑁆𑀢𑀫𑁆𑀧𑀺 𑀆𑀯𑀭𑀡𑀁 𑀅𑀢𑁆𑀣𑀺, 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂 𑀬𑀢𑁆𑀣 𑀢𑀁 𑀦 𑀧𑀯𑀢𑁆𑀢𑀢𑀺, 𑀢𑀢𑁆𑀣𑀸𑀯𑀭𑀡𑀲𑀩𑁆𑀪𑀸𑀯𑀢𑁄 𑀅𑀦𑀸𑀯𑀭𑀡𑀪𑀸𑀯𑁄𑀬𑁂𑀯 𑀦 𑀲𑀺𑀬𑀸. 𑀅𑀣 𑀯𑀸 𑀧𑀦 𑀳𑁄𑀢𑀼 𑀅𑀜𑁆𑀜𑀫𑁂𑀯 𑀅𑀦𑀸𑀯𑀭𑀡𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄, 𑀇𑀥 𑀧𑀦 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀲 𑀘𑀸𑀥𑀺𑀕𑀫𑀦𑁂𑀦 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀯𑀺𑀤𑀽 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀘 𑀯𑀼𑀘𑁆𑀘𑀢𑀺 𑀦 𑀲𑀓𑀺𑀁𑀬𑁂𑀯 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁨) ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺. 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀜𑀸𑀡𑀲𑀫𑀥𑀺𑀕𑀫𑁂𑀦 𑀳𑀺 𑀪𑀕𑀯𑀢𑁄 𑀲𑀦𑁆𑀢𑀸𑀦𑁂 𑀅𑀦𑀯𑀲𑁂𑀲𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀢𑀸 𑀅𑀳𑁄𑀲𑀻𑀢𑀺.

𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑀺𑀤𑀁 𑀜𑀸𑀡𑀁 𑀧𑀯𑀢𑁆𑀢𑀫𑀸𑀦𑀁 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀓𑀫𑁂𑀦𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀅𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀜𑁆𑀘 𑀏𑀓𑀚𑁆𑀛𑀁 𑀉𑀧𑀝𑁆𑀞𑀸𑀦𑁂 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀧𑀝𑀺𑀯𑀺𑀪𑀸𑀕𑁂𑀦𑀸𑀯𑀩𑁄𑀥𑁄 𑀦 𑀲𑀺𑀬𑀸, 𑀢𑀣𑀸 𑀲𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 ¶ 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀢𑁆𑀢𑀸𑀓𑀸𑀭𑁂𑀦 𑀯𑀺𑀬 𑀲𑀩𑁆𑀩𑀥𑀫𑁆𑀫𑀸 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑁂𑀧𑀺 ‘‘𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀞𑀺𑀢𑀮𑀓𑁆𑀔𑀡𑀯𑀺𑀲𑀬𑀁 𑀯𑀺𑀓𑀧𑁆𑀧𑀭𑀳𑀺𑀢𑀁 𑀲𑀩𑁆𑀩𑀓𑀸𑀮𑀁 𑀩𑀼𑀤𑁆𑀥𑀸𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 𑀲𑀩𑁆𑀩𑀯𑀺𑀤𑀽𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 ‘𑀘𑀭𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀢𑀺𑀝𑁆𑀞𑀦𑁆𑀢𑁄𑀧𑀺 𑀲𑀫𑀸𑀳𑀺𑀢𑁄’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀼𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀤𑁄𑀲𑀸 𑀦𑀸𑀢𑀺𑀯𑀢𑁆𑀢𑀺, 𑀞𑀺𑀢𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑀸𑀬 𑀘 𑀅𑀢𑀻𑀢𑀸𑀦𑀸𑀕𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀁 𑀢𑀤𑀪𑀸𑀯𑀢𑁄 𑀏𑀓𑀤𑁂𑀲𑀯𑀺𑀲𑀬𑀫𑁂𑀯 𑀪𑀕𑀯𑀢𑁄 𑀜𑀸𑀡𑀁 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀺𑀁𑀬𑁂𑀯 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺.

𑀅𑀣 ¶ 𑀓𑀫𑁂𑀦 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺. 𑀏𑀯𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀜𑁂𑀬𑁆𑀬𑁂 𑀓𑀫𑁂𑀦 𑀕𑀬𑁆𑀳𑀫𑀸𑀦𑁂 𑀢𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺 𑀅𑀧𑀭𑀺𑀬𑀦𑁆𑀢𑀪𑀸𑀯𑀢𑁄 𑀜𑁂𑀬𑁆𑀬𑀲𑁆𑀲. 𑀬𑁂 𑀧𑀦 ‘‘𑀅𑀢𑁆𑀣𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑁂𑀦 𑀲𑀩𑁆𑀩𑀜𑁆𑀜𑀽 𑀪𑀕𑀯𑀸, 𑀢𑀜𑁆𑀘 𑀜𑀸𑀡𑀁 𑀦 𑀅𑀦𑀼𑀫𑀸𑀦𑀜𑀸𑀡𑀁 𑀲𑀁𑀲𑀬𑀸𑀪𑀸𑀯𑀢𑁄. 𑀲𑀁𑀲𑀬𑀸𑀦𑀼𑀩𑀤𑁆𑀥𑀜𑁆𑀳𑀺 𑀮𑁄𑀓𑁂 𑀅𑀦𑀼𑀫𑀸𑀦𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀦 𑀬𑀼𑀢𑁆𑀢𑀁. 𑀲𑀩𑁆𑀩𑀲𑁆𑀲 𑀳𑀺 𑀅𑀧𑁆𑀧𑀘𑁆𑀘𑀓𑁆𑀔𑀪𑀸𑀯𑁂 𑀅𑀢𑁆𑀣𑀸𑀯𑀺𑀲𑀁𑀯𑀸𑀤𑀦𑁂𑀦 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀬𑀜𑁆𑀳𑀺 𑀢𑀁 𑀲𑁂𑀲𑀁, 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀦𑁆𑀢𑀺.

𑀅𑀣 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁 𑀢𑀲𑁆𑀲 𑀲𑁂𑀲𑀪𑀸𑀯𑁄 𑀏𑀯 𑀦 𑀲𑀺𑀬𑀸𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀅𑀯𑀺𑀲𑀬𑀯𑀺𑀘𑀸𑀭𑀡𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀩𑀼𑀤𑁆𑀥𑀯𑀺𑀲𑀬𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑁄 𑀘𑀺𑀦𑁆𑀢𑁂𑀬𑁆𑀬, 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀲𑀓𑀮𑀁 𑀏𑀓𑀤𑁂𑀲𑁄 𑀯𑀸, 𑀢𑀢𑁆𑀣 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺 𑀦𑀺𑀘𑁆𑀘𑀲𑀫𑀸𑀥𑀸𑀦𑀜𑁆𑀘 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀘 𑀲𑀓𑀮𑀲𑁆𑀲 𑀅𑀯𑀺𑀲𑀬𑀪𑀸𑀯𑁂 𑀢𑀲𑁆𑀲 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸 𑀦 𑀲𑀺𑀬𑀸, 𑀏𑀓𑀦𑁆𑀢𑁂𑀦𑁂𑀯𑀲𑁆𑀲𑀸 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑁆𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀝𑀺𑀩𑀤𑁆𑀥𑀸’’𑀢𑀺 (𑀫𑀳𑀸𑀦𑀺. 𑁬𑁯; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄. 𑀅𑀢𑀻𑀢𑀸𑀦𑀸𑀕𑀢𑀯𑀺𑀲𑀬𑀫𑁆𑀧𑀺 𑀪𑀕𑀯𑀢𑁄 𑀜𑀸𑀡𑀁 𑀅𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀕𑀳𑀡𑀯𑀺𑀭𑀳𑀺𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀫𑁂𑀯.

𑀦𑀦𑀼 ¶ 𑀘 𑀏𑀢𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀬𑀤𑀸 𑀲𑀓𑀮𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁, 𑀢𑀤𑀸 𑀲𑀓𑀺𑀁𑀬𑁂𑀯 𑀲𑀓𑀮𑀯𑀺𑀲𑀬𑀢𑀸𑀬 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀤𑁄𑀲𑀸 𑀦𑀸𑀢𑀺𑀯𑀢𑁆𑀢𑀺𑀬𑁂𑀯𑀸𑀢𑀺? 𑀦, 𑀢𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀯𑀺𑀲𑁄𑀥𑀺𑀢𑁄 𑀳𑀺 𑀲𑁄 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺. 𑀅𑀜𑁆𑀜𑀣𑀸 𑀧𑀘𑀼𑀭𑀚𑀦𑀜𑀸𑀡𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀜𑀸𑀡𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀢𑀸 𑀦 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀮𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀢𑀁 𑀏𑀓𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀬 𑀲𑀼𑀯𑀯𑀢𑁆𑀣𑀸𑀧𑀺𑀢𑁂𑀬𑁂𑀯 𑀢𑁂 𑀥𑀫𑁆𑀫𑁂 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀁, ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁫) 𑀏𑀯𑀫𑁂𑀓𑀚𑁆𑀛𑀁 𑀯𑀺𑀲𑀼𑀁 𑀲𑀓𑀺𑀁 𑀓𑀫𑁂𑀦 𑀯𑀸 𑀇𑀘𑁆𑀙𑀸𑀦𑀼𑀭𑀽𑀧𑀁 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀯𑀺𑀚𑁆𑀚𑀸𑀳𑀻𑀢𑀺 𑀏𑀢𑁆𑀣 𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀯𑀺𑀚𑁆𑀚𑀸, 𑀬𑀸𑀣𑀸𑀯𑀢𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀯𑀸 ¶ 𑀧𑀝𑀺𑀧𑀓𑁆𑀔𑀲𑁆𑀲 𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀢𑀫𑁄𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀧𑀤𑀸𑀮𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀅𑀢𑁆𑀢𑀦𑁄 𑀯𑀺𑀲𑀬𑀲𑁆𑀲 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀧𑀺 𑀯𑀺𑀚𑁆𑀚𑀸. 𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀯𑀸, 𑀅𑀯𑀺𑀓𑀮𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂. 𑀫𑀦𑁄𑀫𑀬𑀺𑀤𑁆𑀥𑀺𑀬𑀸𑀢𑀺 𑀏𑀢𑁆𑀣 ‘‘𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁩𑁬) 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸 𑀇𑀤𑁆𑀥𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀲𑁆𑀲𑁂𑀯 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀸 𑀫𑀦𑁄𑀫𑀬𑀺𑀤𑁆𑀥𑀺 𑀦𑀸𑀫. 𑀙 𑀅𑀪𑀺𑀜𑁆𑀜𑀸𑀢𑀺 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀇𑀤𑁆𑀥𑀺𑀯𑀺𑀥𑀸𑀤𑀺𑀓𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄. 𑀢𑀺𑀲𑁆𑀲𑀦𑁆𑀦𑀁 𑀅𑀝𑁆𑀞𑀦𑁆𑀦𑀜𑁆𑀘 𑀯𑀺𑀚𑁆𑀚𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀕𑀳𑀡𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀦𑀸𑀫 𑀲𑀤𑁆𑀥𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀩𑀸𑀳𑀼𑀲𑀘𑁆𑀘𑀁 𑀯𑀻𑀭𑀺𑀬𑀁 𑀲𑀢𑀺 𑀧𑀜𑁆𑀜𑀸 𑀘. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀥 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸, 𑀑𑀢𑁆𑀢𑀧𑁆𑀧𑀻, 𑀩𑀳𑀼𑀲𑁆𑀲𑀼𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁩𑁦). 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀻𑀮𑀸𑀤𑀬𑁄𑀬𑁂𑀯 𑀧𑀦𑁆𑀦𑀭𑀲 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑁂𑀬𑁂𑀯 𑀳𑀻’’𑀢𑀺𑀆𑀤𑀺. 𑀢𑁂𑀦 𑀢𑁂𑀲𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀢𑁄 𑀦𑀺𑀩𑁆𑀩𑀸𑀦𑀼𑀧𑀕𑀫𑀦𑁂 𑀏𑀓𑀁𑀲𑀢𑁄 𑀲𑀸𑀥𑀦𑀪𑀸𑀯𑀫𑀸𑀳. 𑀇𑀤𑀸𑀦𑀺 𑀢𑀤𑀢𑁆𑀣𑀲𑀸𑀥𑀦𑀸𑀬 𑀆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸𑀢𑀺𑀆𑀤𑀺 ¶ 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀦𑀼 𑀘𑀸𑀬𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸 𑀲𑀸𑀯𑀓𑁂𑀲𑀼𑀧𑀺 𑀮𑀩𑁆𑀪𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀮𑀩𑁆𑀪𑀢𑀺, 𑀦 𑀧𑀦 𑀢𑀣𑀸, 𑀬𑀣𑀸 𑀪𑀕𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀲𑀯𑀓𑁆𑀔𑀬𑀯𑀺𑀚𑁆𑀚𑀸𑀬 𑀲𑀩𑁆𑀩𑀜𑁆𑀜𑀼𑀪𑀸𑀯𑀲𑀺𑀤𑁆𑀥𑀺𑀢𑁄 𑀆𑀳 ‘‘𑀯𑀺𑀚𑁆𑀚𑀸𑀲𑀫𑁆𑀧𑀤𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸’’𑀢𑀺. 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀅𑀦𑁆𑀢𑁄𑀕𑀥𑀪𑀸𑀯𑁂𑀦 𑀘𑀭𑀡𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀬𑀣𑀸𑀭𑀳𑀁 𑀢𑀲𑁆𑀲 𑀘 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀅𑀲𑀸𑀥𑀸𑀭𑀡𑀲𑀪𑀸𑀯𑀲𑁆𑀲 𑀪𑀕𑀯𑀢𑀺 𑀉𑀧𑀮𑀩𑁆𑀪𑀦𑀢𑁄 𑀆𑀳 ‘‘𑀘𑀭𑀡𑀲𑀫𑁆𑀧𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸’’𑀢𑀺. 𑀬𑀣𑀸 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀢𑁆𑀣𑁂 𑀦𑀺𑀬𑁄𑀚𑀦𑀁 𑀧𑀜𑁆𑀜𑀸𑀬 𑀯𑀺𑀦𑀸 𑀦 𑀳𑁄𑀢𑀺, 𑀏𑀯𑀁 𑀦𑁂𑀲𑀁 𑀅𑀢𑁆𑀣𑀸𑀦𑀢𑁆𑀣𑀚𑀸𑀦𑀦𑀁 𑀲𑀢𑁆𑀣𑀼 𑀓𑀭𑀼𑀡𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀉𑀪𑀬𑀫𑁆𑀧𑀺 𑀉𑀪𑀬𑀢𑁆𑀣 𑀲𑀓𑀺𑀘𑁆𑀘𑀓𑀫𑁂𑀯 𑀲𑀺𑀬𑀸. 𑀬𑀢𑁆𑀣 𑀧𑀦 𑀬𑀲𑁆𑀲𑀸 𑀧𑀥𑀸𑀦𑀪𑀸𑀯𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀲𑀩𑁆𑀩𑀜𑁆𑀜𑀼𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀢𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀅𑀜𑁆𑀜𑁄𑀧𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀦𑀺𑀬𑁄𑀚𑁂𑀢𑀺, 𑀢𑀣𑀸 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯𑀸𑀬𑀁 𑀆𑀯𑁂𑀡𑀺𑀓𑀸 𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀧𑀦𑀸𑀬𑀁 𑀲𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀲𑀸𑀯𑀓𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀦𑁆𑀢𑀧𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀦𑁆𑀢𑀧𑀉𑀪𑀬𑀦𑁆𑀢𑀧𑀸 𑀕𑀳𑀺𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣 ¶ 𑀘 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀲𑀢𑁆𑀣𑀼 𑀧𑀜𑁆𑀜𑀸𑀫𑀳𑀢𑁆𑀢𑀁 𑀧𑀓𑀸𑀲𑀺𑀢𑀁 𑀳𑁄𑀢𑀺, 𑀘𑀭𑀡𑀲𑀫𑁆𑀧𑀤𑀸𑀬 𑀓𑀭𑀼𑀡𑀸𑀫𑀳𑀢𑁆𑀢𑀁. 𑀢𑁂𑀲𑀼 𑀧𑀜𑁆𑀜𑀸𑀬 𑀪𑀕𑀯𑀢𑁄 𑀥𑀫𑁆𑀫𑀭𑀚𑁆𑀚𑀧𑁆𑀧𑀢𑁆𑀢𑀺, 𑀓𑀭𑀼𑀡𑀸𑀬 𑀥𑀫𑁆𑀫𑀲𑀁𑀯𑀺𑀪𑀸𑀕𑁄. 𑀧𑀜𑁆𑀜𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀺𑀤𑀸, 𑀓𑀭𑀼𑀡𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀲𑀳𑀦𑀁. 𑀧𑀜𑁆𑀜𑀸𑀬 𑀧𑀭𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀁, 𑀓𑀭𑀼𑀡𑀸𑀬 𑀧𑀭𑀤𑀼𑀓𑁆𑀔𑀧𑀢𑀺𑀓𑀸𑀭𑀸𑀭𑀫𑁆𑀪𑁄. 𑀧𑀜𑁆𑀜𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀪𑀸𑀯𑁄, 𑀓𑀭𑀼𑀡𑀸𑀬 𑀢𑀤𑀥𑀺𑀕𑀫𑁄. 𑀧𑀜𑁆𑀜𑀸𑀬 𑀲𑀬𑀁 𑀢𑀭𑀡𑀁, 𑀓𑀭𑀼𑀡𑀸𑀬 𑀧𑀭𑁂𑀲𑀁 𑀢𑀸𑀭𑀡𑀁. 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺, 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀺𑀘𑁆𑀘𑀲𑀺𑀤𑁆𑀥𑀺. 𑀓𑀭𑀼𑀡𑀸𑀬 𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀲𑀁𑀲𑀸𑀭𑀸𑀪𑀺𑀫𑀼𑀔𑀪𑀸𑀯𑁄, 𑀧𑀜𑁆𑀜𑀸𑀬 𑀢𑀢𑁆𑀣 𑀅𑀦𑀪𑀺𑀭𑀢𑀺, 𑀢𑀣𑀸 𑀓𑀭𑀼𑀡𑀸𑀬 𑀧𑀭𑁂𑀲𑀁 𑀅𑀪𑀺𑀁𑀲𑀸𑀧𑀦𑀁, 𑀧𑀜𑁆𑀜𑀸𑀬 𑀲𑀬𑀁 𑀧𑀭𑁂𑀳𑀺 𑀅𑀪𑀸𑀬𑀦𑀁. 𑀓𑀭𑀼𑀡𑀸𑀬 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺, 𑀧𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁄 𑀧𑀭𑀁 𑀭𑀓𑁆𑀔𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀅𑀧𑀭𑀦𑁆𑀢𑀧𑁄, 𑀧𑀜𑁆𑀜𑀸𑀬 𑀅𑀦𑀢𑁆𑀢𑀦𑁆𑀢𑀧𑁄, 𑀢𑁂𑀦 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 ¶ 𑀧𑀼𑀕𑁆𑀕𑀮𑁂𑀲𑀼 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀮𑁄𑀓𑀦𑀸𑀣𑀢𑀸, 𑀧𑀜𑁆𑀜𑀸𑀬 𑀅𑀢𑁆𑀢𑀦𑀸𑀣𑀢𑀸. 𑀓𑀭𑀼𑀡𑀸𑀬 𑀘𑀲𑁆𑀲 𑀦𑀺𑀦𑁆𑀦𑀢𑀸𑀪𑀸𑀯𑁄, 𑀧𑀜𑁆𑀜𑀸𑀬 𑀉𑀦𑁆𑀦𑀫𑀸𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼 𑀚𑀦𑀺𑀢𑀸𑀦𑀼𑀕𑁆𑀕𑀳𑁄, 𑀧𑀜𑁆𑀜𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀢𑁆𑀣 𑀯𑀺𑀭𑀢𑁆𑀢𑀘𑀺𑀢𑁆𑀢𑁄, 𑀧𑀜𑁆𑀜𑀸𑀬 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄, 𑀓𑀭𑀼𑀡𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀲𑀢𑁆𑀢𑀸𑀦𑀼𑀕𑁆𑀕𑀳𑀸𑀬 𑀧𑀯𑀢𑁆𑀢𑁄. 𑀬𑀣𑀸 𑀳𑀺 𑀓𑀭𑀼𑀡𑀸 𑀪𑀕𑀯𑀢𑁄 𑀲𑀺𑀦𑁂𑀳𑀲𑁄𑀓𑀯𑀺𑀭𑀳𑀺𑀢𑀸, 𑀏𑀯𑀁 𑀧𑀜𑁆𑀜𑀸 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀯𑀺𑀦𑀺𑀫𑀼𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑁄𑀥𑀺𑀢𑀸 𑀧𑀭𑀫𑀯𑀺𑀲𑀼𑀤𑁆𑀥𑀸 𑀕𑀼𑀡𑀯𑀺𑀲𑁂𑀲𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀳𑀺 𑀧𑀓𑀸𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀲𑀼𑀕𑀢𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀪𑀦𑀕𑀫𑀦𑀢𑁆𑀢𑀸’’𑀢𑀺𑀆𑀤𑀺. ‘‘𑀕𑀢𑁂 𑀞𑀺𑀢𑁂’’𑀢𑀺𑀆𑀤𑀻𑀲𑀼 𑀕𑀫𑀦𑀫𑁆𑀧𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀫𑀦𑀫𑁆𑀧𑀺 𑀳𑀺 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑁄𑀪𑀦𑀦𑁆𑀢𑀺 𑀲𑀼𑀪𑀁, 𑀲𑀼𑀪𑀪𑀸𑀯𑁄 𑀯𑀺𑀲𑀼𑀤𑁆𑀥𑀢𑀸𑀬, 𑀯𑀺𑀲𑀼𑀤𑁆𑀥𑀢𑀸 𑀤𑁄𑀲𑀯𑀺𑀕𑀫𑁂𑀦𑀸𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀫𑀦𑀯𑀚𑁆𑀚’’𑀦𑁆𑀢𑀺. 𑀕𑀫𑀦𑀜𑁆𑀘 𑀦𑀸𑀫 𑀩𑀳𑀼𑀯𑀺𑀥𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁 𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑁄’’𑀢𑀺 𑀆𑀳. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀕𑀢𑀺 𑀅𑀥𑀺𑀕𑀫𑁄𑀢𑀺 𑀘 𑀓𑀢𑁆𑀯𑀸 𑀕𑀢𑀁 𑀕𑀫𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀕𑀫𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀳𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑁂𑀫𑀁 𑀤𑀺𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀲𑀚𑁆𑀚𑀫𑀸𑀦𑁄𑀢𑀺 𑀧𑀭𑀺𑀧𑀦𑁆𑀣𑀸𑀪𑀸𑀯𑁂𑀦 𑀲𑀼𑀕𑀢𑀺𑀕𑀫𑀦𑁂𑀧𑀺 𑀅𑀲𑀚𑁆𑀚𑀦𑁆𑀢𑁄 𑀲𑀗𑁆𑀕𑀁 𑀅𑀓𑀭𑁄𑀦𑁆𑀢𑁄, 𑀧𑀕𑁂𑀯 𑀇𑀢𑀭𑀢𑁆𑀣. 𑀅𑀣 𑀯𑀸 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀯𑀲𑁂𑀦𑁂𑀯 𑀘𑀢𑀼𑀦𑁆𑀦𑀫𑁆𑀧𑀺 𑀫𑀕𑁆𑀕𑀸𑀦𑀁 𑀧𑀝𑀺𑀮𑀤𑁆𑀥𑀪𑀸𑀯𑀢𑁄 𑀅𑀲𑀚𑁆𑀚𑀫𑀸𑀦𑁄 𑀅𑀩𑀚𑁆𑀛𑀦𑁆𑀢𑁄 𑀕𑀢𑁄. 𑀬𑀁 𑀕𑀫𑀦𑀁 𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀕𑀫𑀦𑀢𑁆𑀣𑀁 𑀆𑀯𑀳𑀢𑀺, 𑀲𑀩𑁆𑀩𑀜𑁆𑀘 𑀅𑀦𑀼𑀢𑁆𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀆𑀯𑀳𑀢𑀺, 𑀢𑀤𑁂𑀯 𑀲𑁄𑀪𑀦𑀁 𑀦𑀸𑀫, 𑀢𑁂𑀦 𑀘 𑀪𑀕𑀯𑀸 𑀕𑀢𑁄𑀢𑀺 𑀆𑀳 ‘‘𑀇𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀕𑀢𑁄’’𑀢𑀺 𑀲𑁄𑀪𑀦𑀢𑁆𑀣𑁄 𑀲𑀼𑀲𑀤𑁆𑀤𑁄𑀢𑀺 𑀓𑀢𑁆𑀯𑀸.

𑀅𑀲𑀼𑀦𑁆𑀤𑀭𑀸𑀦𑀁 𑀤𑀼𑀓𑁆𑀔𑀸𑀦𑀁 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀅𑀘𑁆𑀘𑀦𑁆𑀢𑀲𑀼𑀔𑀢𑁆𑀢𑀸 𑀏𑀓𑀦𑁆𑀢𑀢𑁄 𑀲𑀼𑀦𑁆𑀤𑀭𑀁 𑀦𑀸𑀫 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀜𑁆𑀘𑁂𑀲 𑀞𑀸𑀦𑀁 𑀕𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀺𑀩𑁆𑀩𑀸𑀦𑀁 ¶ 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀫. 𑀦𑀺. 𑁨.𑁨𑁧𑁫; 𑀥. 𑀧. 𑁨𑁦𑁩-𑁨𑁦𑁪). 𑀲𑀫𑁆𑀫𑀸𑀢𑀺 𑀲𑀼𑀝𑁆𑀞𑀼. 𑀲𑀼𑀝𑁆𑀞𑀼 𑀕𑀫𑀦𑀜𑁆𑀘 𑀦𑀸𑀫 𑀧𑀝𑀺𑀧𑀓𑁆𑀔𑁂𑀦 𑀅𑀦𑀪𑀺𑀪𑀽𑀢𑀲𑁆𑀲 𑀕𑀫𑀦𑀦𑁆𑀢𑀺 𑀆𑀳 ‘‘𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄’’𑀢𑀺, 𑀧𑀳𑀻𑀦𑀸𑀦𑀁 𑀧𑀼𑀦 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀆𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺. 𑀏𑀢𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀧𑀘𑁆𑀘𑀸𑀕𑀫𑀦𑀁, 𑀇𑀤𑀜𑁆𑀘 𑀲𑀺𑀔𑀸𑀧𑁆𑀧𑀢𑁆𑀢𑀁 𑀲𑀫𑁆𑀫𑀸𑀕𑀫𑀦𑀁, 𑀬𑀸𑀬 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 ¶ 𑀲𑀺𑀤𑁆𑀥𑀁, 𑀲𑀸𑀧𑀺 𑀲𑀫𑁆𑀫𑀸𑀕𑀫𑀦𑀫𑁂𑀯𑀸𑀢𑀺 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀼𑀕𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸 𑀯𑀸 𑀆𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀲𑀫𑁆𑀧𑀸𑀧𑀦𑁂 𑀅𑀯𑀺𑀧𑀭𑀻𑀢𑀧𑀝𑀺𑀧𑀢𑁆𑀢𑀺𑀬𑀸. 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑀸𑀢𑀺 𑀏𑀢𑁂𑀦 𑀫𑀳𑀸𑀩𑁄𑀥𑀺𑀬𑀸 𑀧𑀝𑀺𑀧𑀤𑀸 𑀅𑀯𑀺𑀪𑀸𑀕𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀩𑁆𑀩𑀤𑀸 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀦𑁆𑀢𑀺 𑀇𑀫𑁂 𑀅𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀕𑀢𑁄𑀢𑀺 𑀏𑀢𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀇𑀫𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀕𑀢𑁄𑀢𑀺 𑀏𑀢𑁂𑀦 𑀅𑀭𑀺𑀬𑀫𑀕𑁆𑀕𑀕𑀢𑀺𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀭𑀸𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀲𑁆𑀲𑁂𑀯 𑀪𑀸𑀲𑀦𑁂. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀲𑀸𑀥𑁂𑀢𑀩𑁆𑀩𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣𑀁. 𑀅𑀢𑁆𑀣𑀫𑀼𑀔𑁂𑀦 𑀳𑀺 𑀯𑀸𑀘𑀸𑀬 𑀅𑀪𑀽𑀢𑀢𑀸 𑀪𑀽𑀢𑀢𑀸 𑀯𑀸. 𑀅𑀢𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦 𑀲𑀫𑁆𑀧𑀭𑀸𑀬𑀺𑀓𑁂𑀦 𑀯𑀸 𑀅𑀦𑀢𑁆𑀣𑁂𑀦 𑀲𑀁𑀳𑀺𑀢𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀅𑀦𑀢𑁆𑀣𑀸𑀯𑀳𑀁. 𑀦 𑀅𑀢𑁆𑀣𑁄𑀢𑀺 𑀅𑀦𑀢𑁆𑀣𑁄, 𑀅𑀢𑁆𑀣𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀪𑀸𑀯𑁄 𑀘, 𑀢𑁂𑀦 𑀲𑀁𑀳𑀺𑀢𑀁, 𑀧𑀺𑀲𑀼𑀡𑀯𑀸𑀘𑀁 𑀲𑀫𑁆𑀨𑀧𑁆𑀧𑀮𑀸𑀧𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀧𑀞𑀫𑀸 𑀯𑀸𑀘𑀸 𑀲𑀻𑀮𑀯𑀦𑁆𑀢𑀁 ‘‘𑀤𑀼𑀲𑁆𑀲𑀻𑀮𑁄’’𑀢𑀺, 𑀅𑀘𑀡𑁆𑀟𑀸𑀮𑀸𑀤𑀺𑀁 ‘‘𑀘𑀡𑁆𑀟𑀸𑀮𑁄’’𑀢𑀺𑀆𑀤𑀺𑀦𑀸 𑀪𑀸𑀲𑀫𑀸𑀦𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀤𑀼𑀢𑀺𑀬𑀸 𑀤𑀼𑀲𑁆𑀲𑀻𑀮𑀁 ‘‘𑀤𑀼𑀲𑁆𑀲𑀻𑀮𑁄’’𑀢𑀺, 𑀘𑀡𑁆𑀟𑀸𑀮𑀸𑀤𑀺𑀫𑁂𑀯 ‘‘𑀘𑀡𑁆𑀟𑀸𑀮𑁄’’𑀢𑀺𑀆𑀤𑀺𑀦𑀸 𑀅𑀯𑀺𑀦𑀬𑁂𑀦 𑀪𑀸𑀲𑀫𑀸𑀦𑀲𑁆𑀲. 𑀢𑀢𑀺𑀬𑀸 𑀦𑁂𑀭𑀬𑀺𑀓𑀸𑀤𑀺𑀓𑀲𑁆𑀲 𑀦𑁂𑀭𑀬𑀺𑀓𑀸𑀤𑀺𑀪𑀸𑀯𑀯𑀺𑀪𑀸𑀯𑀦𑀻𑀓𑀣𑀸 𑀬𑀣𑀸 ‘‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄’’𑀢𑀺𑀆𑀤𑀺𑀓𑀸. 𑀘𑀢𑀼𑀢𑁆𑀣𑀻 ‘‘𑀯𑁂𑀤𑀯𑀺𑀳𑀺𑀢𑁂𑀦 𑀬𑀜𑁆𑀜𑀯𑀺𑀥𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀢𑀁 𑀲𑀼𑀕𑀢𑀺𑀁 𑀆𑀯𑀳𑀢𑀻’’𑀢𑀺 𑀮𑁄𑀓𑀲𑁆𑀲 𑀩𑁆𑀬𑀸𑀫𑁄𑀳𑀦𑀓𑀣𑀸. 𑀧𑀜𑁆𑀘𑀫𑀻 𑀪𑀽𑀢𑁂𑀦 𑀧𑁂𑀲𑀼𑀜𑁆𑀜𑀼𑀧𑀲𑀁𑀳𑀸𑀭𑀸 𑀓𑀣𑀸. 𑀙𑀝𑁆𑀞𑀸 𑀬𑀼𑀢𑁆𑀢𑀧𑀢𑁆𑀢𑀝𑁆𑀞𑀸𑀦𑁂 𑀧𑀯𑀢𑁆𑀢𑀺𑀢𑀸 𑀤𑀸𑀦𑀲𑀻𑀮𑀸𑀤𑀺𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀫𑀸 𑀕𑀤𑀢𑁆𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀪𑀽𑀢𑀸𑀤𑀺𑀁 𑀯𑀚𑁆𑀚𑁂𑀢𑁆𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀧𑀺𑀬𑀁 𑀫𑀦𑀸𑀧𑀁 𑀢𑀢𑁄 𑀏𑀯 𑀲𑀫𑁆𑀫𑀸 𑀲𑀼𑀝𑁆𑀞𑀼 𑀕𑀤𑀦𑀢𑁄 𑀲𑀼𑀕𑀢𑁄. 𑀆𑀧𑀸𑀣𑀕𑀫𑀦𑀫𑀢𑁆𑀢𑁂𑀦 𑀓𑀲𑁆𑀲𑀘𑀺 𑀅𑀧𑁆𑀧𑀺𑀬𑀫𑁆𑀧𑀺 𑀳𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀺𑀬𑀁 𑀫𑀦𑀸𑀧𑀫𑁂𑀯 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀏𑀢𑁆𑀣 𑀧𑀦 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀕𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁 𑀪𑀤𑁆𑀤𑀓𑀁. 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀁 ¶ 𑀯𑀺𑀮𑀸𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 ¶ 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀳𑀺𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑀯𑀚𑁆𑀚𑀢𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀢𑀸𑀬 𑀘 𑀲𑁄𑀪𑀦𑀫𑁂𑀯. 𑀅𑀣 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀬𑀁 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀜𑀸𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀫𑁆𑀫𑀸 𑀧𑀘𑁆𑀘𑀓𑁆𑀔𑀢𑁄 𑀕𑀢𑁄 𑀅𑀩𑁆𑀪𑀜𑁆𑀜𑀸𑀲𑀻𑀢𑀺 𑀲𑀼𑀕𑀢𑁄.

𑀇𑀤𑀸𑀦𑀺 𑀮𑁄𑀓𑀯𑀺𑀤𑀽𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀣𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀬𑁄 𑀬𑁄 𑀮𑁄𑀓𑁄 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀧𑀓𑀸𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀪𑀸𑀯𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀯𑀢𑁄𑀢𑀺 𑀤𑀼𑀓𑁆𑀔𑀲𑀪𑀸𑀯𑀢𑁄. 𑀲𑀩𑁆𑀩𑁄 𑀳𑀺 𑀮𑁄𑀓𑁄 𑀤𑀼𑀓𑁆𑀔𑀲𑀪𑀸𑀯𑁄. 𑀬𑀣𑀸𑀳 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺. 𑀲𑀫𑀼𑀤𑀬𑀢𑁄𑀢𑀺 𑀬𑀢𑁄 𑀲𑀫𑀼𑀤𑁂𑀢𑀺, 𑀢𑀢𑁄 𑀢𑀡𑁆𑀳𑀸𑀤𑀺𑀢𑁄. 𑀦𑀺𑀭𑁄𑀥𑀢𑁄𑀢𑀺 𑀬𑀢𑁆𑀣 𑀲𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀯𑀺𑀲𑀗𑁆𑀔𑀸𑀭𑀢𑁄. 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 𑀬𑁂𑀦 𑀯𑀺𑀥𑀺𑀦𑀸 𑀲𑁄 𑀦𑀺𑀭𑁄𑀥𑁄 𑀧𑀢𑁆𑀢𑀩𑁆𑀩𑁄, 𑀢𑀢𑁄 𑀅𑀭𑀺𑀬𑀫𑀕𑁆𑀕𑀢𑁄 𑀇𑀢𑁄 𑀅𑀜𑁆𑀜𑀲𑁆𑀲 𑀧𑀓𑀸𑀭𑀲𑁆𑀲 𑀅𑀪𑀸𑀯𑀸. 𑀇𑀢𑀺 ‘‘𑀲𑀩𑁆𑀩𑀣𑀸 𑀮𑁄𑀓𑀁 𑀅𑀯𑁂𑀤𑀻’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀲𑀸𑀥𑀓𑀁 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀣 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀇𑀤𑀜𑁆𑀘 𑀲𑀼𑀢𑁆𑀢𑀁 ‘‘𑀬𑀢𑁆𑀣 𑀔𑁄, 𑀪𑀦𑁆𑀢𑁂, 𑀦 𑀚𑀸𑀬𑀢𑀺…𑀧𑁂… 𑀦 𑀉𑀧𑀧𑀚𑁆𑀚𑀢𑀺, 𑀲𑀓𑁆𑀓𑀸 𑀦𑀼 𑀔𑁄 𑀲𑁄, 𑀪𑀦𑁆𑀢𑁂, 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑁄 𑀜𑀸𑀢𑀼𑀁 𑀯𑀸 𑀤𑀝𑁆𑀞𑀼𑀁 𑀯𑀸 𑀧𑀸𑀧𑀼𑀡𑀺𑀢𑀼𑀁 𑀯𑀸’’𑀢𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫) 𑀑𑀓𑀸𑀲𑀮𑁄𑀓𑀲𑁆𑀲 𑀕𑀢𑀺𑀁 𑀲𑀦𑁆𑀥𑀸𑀬 𑀭𑁄𑀳𑀺𑀢𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀦 𑀚𑀸𑀬𑀢𑀻𑀢𑀺𑀆𑀤𑀺𑀦𑀸 𑀉𑀚𑀼𑀓𑀁 𑀚𑀸𑀢𑀺𑀆𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀧𑀤𑀤𑁆𑀯𑀬𑁂𑀦 𑀅𑀧𑀭𑀸𑀧𑀭𑀁 𑀘𑀯𑀦𑀼𑀧𑀧𑀢𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀓𑁂𑀘𑀺 𑀧𑀦 ‘‘𑀦 ¶ 𑀚𑀸𑀬𑀢𑀻𑀢𑀺𑀆𑀤𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀑𑀧𑀧𑀸𑀢𑀺𑀓𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀢𑀦𑁆𑀢𑀺 𑀚𑀸𑀢𑀺𑀆𑀤𑀺𑀭𑀳𑀺𑀢𑀁. 𑀕𑀫𑀦𑁂𑀦𑀸𑀢𑀺 𑀧𑀤𑀲𑀸 𑀕𑀫𑀦𑁂𑀦. 𑀮𑁄𑀓𑀲𑁆𑀲𑀦𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀁. 𑀜𑀸𑀢𑁂𑀬𑁆𑀬𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀁. 𑀤𑀝𑁆𑀞𑁂𑀬𑁆𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀧𑀢𑁆𑀢𑀩𑁆𑀩𑀁. ‘‘𑀜𑀸𑀢𑀸𑀬𑀁 𑀤𑀺𑀝𑁆𑀞𑀸𑀬𑀁 𑀧𑀢𑁆𑀢𑀸𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀢𑀢𑁆𑀣 𑀕𑀫𑀦𑁂𑀦 𑀮𑁄𑀓𑀲𑁆𑀲𑀦𑁆𑀢𑀁 𑀜𑀸𑀢𑀸 𑀅𑀬𑀁 𑀤𑀺𑀝𑁆𑀞𑀸 𑀅𑀬𑀁 𑀧𑀢𑁆𑀢𑀸 𑀅𑀬𑀦𑁆𑀢𑀺 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁄.

𑀓𑀸𑀫𑀁 𑀧𑀤𑀲𑀸 𑀕𑀫𑀦𑁂𑀦 𑀕𑀦𑁆𑀢𑁆𑀯𑀸 𑀮𑁄𑀓𑀲𑁆𑀲𑀦𑁆𑀢𑀁 𑀜𑀸𑀢𑀼𑀁 𑀤𑀝𑁆𑀞𑀼𑀁 𑀧𑀢𑁆𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀅𑀧𑀺 𑀘 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑁂 ¶ 𑀢𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂𑀢𑀺 𑀩𑁆𑀬𑀸𑀫𑀧𑁆𑀧𑀫𑀸𑀡𑁂 𑀅𑀢𑁆𑀢𑀪𑀸𑀯𑁂. 𑀇𑀫𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀲𑀲𑀜𑁆𑀜𑀺𑀫𑁆𑀳𑀻𑀢𑀺 𑀲𑀜𑁆𑀜𑀸𑀬 𑀲𑀳𑀺𑀢𑁂. 𑀇𑀫𑀺𑀦𑀸 𑀲𑀜𑁆𑀜𑀸𑀲𑀻𑀲𑁂𑀦 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑁂 𑀤𑀲𑁆𑀲𑁂𑀢𑀺 𑀲𑀜𑁆𑀜𑀸𑀲𑀳𑀺𑀢𑀢𑁆𑀢𑀸 𑀏𑀯. 𑀲𑀫𑀦𑀓𑁂𑀢𑀺 𑀲𑀯𑀺𑀜𑁆𑀜𑀸𑀡𑀓𑁂𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺, 𑀅𑀯𑀺𑀜𑁆𑀜𑀸𑀡𑀓𑁂 𑀧𑀦 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀫𑀼𑀤𑀸𑀬𑀫𑀢𑁆𑀢𑁂 𑀧𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀢𑀲𑁆𑀲 𑀮𑁄𑀓𑀲𑁆𑀲 𑀦𑀺𑀭𑀼𑀚𑁆𑀛𑀦𑀁 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀳𑀺 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀧𑀜𑁆𑀜𑀸𑀧𑀦𑀢𑁄 𑀲𑀭𑀻𑀭𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀸𑀧𑁂𑀢𑀺. 𑀅𑀤𑁂𑀲𑀫𑁆𑀧𑀺 𑀳𑀺 𑀢𑀁 𑀬𑁂𑀲𑀁 𑀦𑀺𑀭𑁄𑀥𑁄, 𑀢𑁂𑀲𑀁 𑀯𑀲𑁂𑀦 𑀤𑁂𑀲𑀢𑁄𑀧𑀺 𑀉𑀧𑀘𑀸𑀭𑀯𑀲𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁧; 𑀫. 𑀦𑀺. 𑁧.𑁧𑁩𑁪; 𑀯𑀺𑀪. 𑁨𑁦𑁪).

𑀕𑀫𑀦𑁂𑀦𑀸𑀢𑀺 𑀧𑀸𑀓𑀢𑀺𑀓𑀕𑀫𑀦𑁂𑀦. 𑀮𑁄𑀓𑀲𑁆𑀲𑀦𑁆𑀢𑁄𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑀓𑀺𑀭𑀺𑀬𑀸𑀬 𑀳𑁂𑀢𑀼𑀪𑀽𑀢𑀁 𑀦𑀺𑀩𑁆𑀩𑀸𑀦𑀁. 𑀓𑀼𑀤𑀸𑀘𑀦𑀦𑁆𑀢𑀺 𑀓𑀤𑀸𑀘𑀺𑀧𑀺. 𑀅𑀧𑁆𑀧𑀢𑁆𑀯𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀅𑀦𑀥𑀺𑀕𑀦𑁆𑀢𑁆𑀯𑀸. 𑀧𑀫𑁄𑀘𑀦𑀦𑁆𑀢𑀺 𑀧𑀫𑀼𑀢𑁆𑀢𑀺 𑀦𑀺𑀲𑁆𑀲𑀭𑀡𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀮𑁄𑀓𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀢𑁆𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸. 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀮𑁄𑀓𑀯𑀺𑀤𑀽𑀢𑀺 𑀲𑀪𑀸𑀯𑀸𑀤𑀺𑀢𑁄 𑀲𑀩𑁆𑀩𑀁 𑀮𑁄𑀓𑀁 𑀯𑀺𑀚𑀸𑀦𑀦𑁆𑀢𑁄. 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄. 𑀮𑁄𑀓𑀦𑁆𑀢𑀕𑀽𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀮𑁄𑀓𑀁 𑀯𑀺𑀤𑀺𑀢𑁆𑀯𑀸 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀮𑁄𑀓𑀦𑁆𑀢𑀕𑀽. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄. 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀯𑀸 𑀅𑀪𑀺𑀲𑀫𑀺𑀢𑀢𑁆𑀢𑀸 𑀲𑀫𑀺𑀢𑀸𑀯𑀻. 𑀦𑀸𑀲𑀻𑀲𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺, 𑀬𑀣𑀸 𑀇𑀫𑀁 𑀮𑁄𑀓𑀁, 𑀏𑀯𑀁 𑀧𑀭𑀜𑁆𑀘 𑀮𑁄𑀓𑀁 𑀦𑀸𑀲𑀻𑀲𑀢𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸.

𑀏𑀯𑀁 ¶ 𑀬𑀤𑀺𑀧𑀺 𑀮𑁄𑀓𑀯𑀺𑀤𑀼𑀢𑀸 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑀺𑀢𑀸 𑀲𑀪𑀸𑀯𑀸𑀤𑀺𑀢𑁄 𑀤𑀲𑁆𑀲𑀺𑀢𑀢𑁆𑀢𑀸, 𑀮𑁄𑀓𑁄 𑀧𑀦 𑀏𑀓𑀤𑁂𑀲𑁂𑀦𑁂𑀯 𑀯𑀼𑀢𑁆𑀢𑁄𑀢𑀺 𑀢𑀁 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘 𑀢𑀬𑁄 𑀮𑁄𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑀮𑁄𑀓𑁄. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑁄, 𑀮𑁄𑀓𑀻𑀬𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀑𑀓𑀸𑀲𑀮𑁄𑀓𑁄 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀚𑀗𑁆𑀕𑀫𑀸 𑀣𑀸𑀯𑀭𑀸 𑀘 𑀢𑁂𑀲𑀜𑁆𑀘 𑀑𑀓𑀸𑀲𑀪𑀽𑀢𑁄𑀢𑀺 𑀓𑀢𑁆𑀯𑀸. 𑀢𑀤𑀸𑀥𑀸𑀭𑀢𑀸𑀬 𑀳𑁂𑀲 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀉𑀪𑀬𑁂𑀧𑀺 𑀔𑀦𑁆𑀥𑀸 𑀲𑀗𑁆𑀔𑀸𑀭𑀮𑁄𑀓𑁄 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀻𑀬𑀦𑁆𑀢𑀺 𑀮𑀼𑀚𑁆𑀚𑀦𑁆𑀢𑀺 𑀧𑀮𑀼𑀚𑁆𑀚𑀦𑁆𑀢𑀺 𑀘𑀸𑀢𑀺. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀢𑁆𑀣𑁄 𑀳𑁂𑀢𑁆𑀣 𑀆𑀳𑀸𑀭𑀲𑀤𑁆𑀤𑁄 ‘‘𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁨𑁩𑁨) 𑀯𑀺𑀬. 𑀏𑀯𑀜𑁆𑀳𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀲𑀸 𑀧𑀦𑀸𑀬𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ¶ 𑀲𑀗𑁆𑀔𑀸𑀭𑀥𑀫𑁆𑀫𑁄, 𑀦 𑀲𑀢𑁆𑀢𑀥𑀫𑁆𑀫𑁄𑀢𑀺 𑀆𑀳 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀬𑀤𑀺 𑀏𑀯𑀁 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀓𑀢𑁆𑀣𑀘𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀢𑁆𑀣𑀘𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀘. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂 𑀬𑀣𑀸𑀭𑀼𑀘𑀺 𑀓𑀢𑁆𑀣𑀘𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀓𑀢𑁆𑀣𑀘𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑁂 𑀯𑀸 𑀧𑀦 𑀯𑁂𑀦𑁂𑀬𑁆𑀬𑀸 𑀲𑀸𑀲𑀦𑀓𑁆𑀓𑀫𑀁 𑀅𑀦𑁄𑀢𑀺𑀡𑁆𑀡𑀸, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑀺. 𑀬𑁂 𑀘 𑀑𑀢𑀺𑀡𑁆𑀡𑀸, 𑀢𑁂𑀲𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀺𑀲𑀬𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸, 𑀇𑀢𑀭𑀸 𑀧𑀭𑀫𑀢𑁆𑀣𑀲𑀘𑁆𑀘𑀯𑀺𑀲𑀬𑀸. 𑀧𑀼𑀭𑀺𑀫𑀸 𑀓𑀭𑀼𑀡𑀸𑀦𑀼𑀓𑀽𑀮𑀸, 𑀇𑀢𑀭𑀸 𑀧𑀜𑁆𑀜𑀸𑀦𑀼𑀓𑀽𑀮𑀸. 𑀲𑀤𑁆𑀥𑀸𑀦𑀼𑀲𑀸𑀭𑀻𑀕𑁄𑀢𑁆𑀢𑀸𑀦𑀁 𑀯𑀸 𑀧𑀼𑀭𑀺𑀫𑀸. 𑀢𑁂 𑀳𑀺 𑀧𑀼𑀕𑁆𑀕𑀮𑀧𑁆𑀧𑀫𑀸𑀡𑀺𑀓𑀸, 𑀧𑀘𑁆𑀙𑀺𑀫𑀸 𑀥𑀫𑁆𑀫𑀸𑀦𑀼𑀲𑀸𑀭𑀻𑀕𑁄𑀢𑁆𑀢𑀸𑀦𑀁. 𑀲𑀤𑁆𑀥𑀸𑀘𑀭𑀺𑀢𑀢𑀸𑀬 𑀯𑀸 𑀮𑁄𑀓𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸, 𑀧𑀜𑁆𑀜𑀸𑀘𑀭𑀺𑀢𑀢𑀸𑀬 𑀥𑀫𑁆𑀫𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸. 𑀧𑀼𑀭𑀺𑀫𑀸 𑀘 𑀦𑁂𑀬𑁆𑀬𑀢𑁆𑀣𑀸, 𑀧𑀘𑁆𑀙𑀺𑀫𑀸 𑀦𑀻𑀢𑀢𑁆𑀣𑀸. 𑀇𑀢𑀺 𑀪𑀕𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀼𑀯𑀺𑀥𑀁 𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 ¶ 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 ‘‘𑀅𑀢𑁆𑀢𑀸 𑀮𑁄𑀓𑁄’’𑀢𑀺 𑀧𑀭𑀺𑀓𑀧𑁆𑀧𑀦𑀸 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀯𑀺𑀲𑀬𑀸, 𑀦 𑀲𑀗𑁆𑀔𑀸𑀭𑀯𑀺𑀲𑀬𑀸𑀢𑀺 𑀆𑀳 ‘‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 𑀧𑀭𑀺𑀩𑁆𑀪𑀫𑀦𑁆𑀢𑀺. 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸𑀢𑀺 𑀢𑁂𑀲𑀁 𑀧𑀭𑀺𑀩𑁆𑀪𑀫𑀦𑁂𑀦𑁂𑀯 𑀢𑀸 𑀢𑀸 𑀤𑀺𑀲𑀸 𑀧𑀪𑀲𑁆𑀲𑀭𑀸 𑀳𑀼𑀢𑁆𑀯𑀸 𑀯𑀺𑀭𑁄𑀘𑀦𑁆𑀢𑀺. 𑀅𑀣 𑀯𑀸 𑀤𑀺𑀲𑀸𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀢𑀲𑁆𑀫𑀸 𑀲𑀬𑀁 𑀯𑀺𑀭𑁄𑀘𑀫𑀸𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀬𑀢𑁆𑀢𑀓𑀸 𑀤𑀺𑀲𑀸 𑀪𑀦𑁆𑀢𑀺 𑀲𑁄𑀪𑁂𑀦𑁆𑀢𑀺 𑀑𑀪𑀸𑀲𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀲𑀳𑀲𑁆𑀲𑀧𑁆𑀧𑀓𑀸𑀭𑁄 𑀑𑀓𑀸𑀲𑀮𑁄𑀓𑁄, 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀬𑁄𑀢𑀺 𑀅𑀢𑁆𑀣𑁄. ‘‘𑀢𑀸𑀯𑀲𑀳𑀲𑁆𑀲𑀯𑀸’’𑀢𑀺 𑀯𑀸 𑀧𑀸𑀞𑁄, 𑀢𑀸𑀯 𑀢𑀢𑁆𑀢𑀓𑀁 𑀲𑀳𑀲𑁆𑀲𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀢𑀸𑀯𑀲𑀳𑀲𑁆𑀲𑀯𑀸. 𑀏𑀢𑁆𑀣𑀸𑀢𑀺 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀲𑀗𑁆𑀔𑀸𑀢𑁂 𑀮𑁄𑀓𑁂.

𑀢𑀫𑁆𑀧𑀻𑀢𑀺 𑀢𑀺𑀯𑀺𑀥𑀫𑁆𑀧𑀺 𑀮𑁄𑀓𑀁. 𑀲𑀩𑁆𑀩𑀣𑀸 𑀅𑀯𑁂𑀤𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀧𑀝𑀺𑀯𑀺𑀚𑁆𑀛𑀺. 𑀓𑀣𑀁 𑀧𑀝𑀺𑀯𑀺𑀚𑁆𑀛𑀻𑀢𑀺 𑀆𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺. 𑀢𑀣𑀸 𑀳𑀺𑀲𑁆𑀲𑀸𑀢𑀺 𑀇𑀫𑀲𑁆𑀲 ‘‘𑀲𑀩𑁆𑀩𑀣𑀸 𑀯𑀺𑀤𑀺𑀢𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀅𑀦𑁂𑀦 𑀪𑀕𑀯𑀢𑀸. 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀬𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀢𑀸𑀬 𑀲𑀩𑁆𑀩𑁄 𑀲𑀗𑁆𑀔𑀸𑀭𑀮𑁄𑀓𑁄 𑀏𑀓𑀯𑀺𑀥𑁄 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀤𑁆𑀯𑁂 𑀮𑁄𑀓𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀕𑁆𑀕𑀳𑀡𑁂𑀦 ¶ 𑀘𑁂𑀢𑁆𑀣 𑀦𑀺𑀩𑁆𑀩𑀸𑀦𑀲𑁆𑀲 𑀅𑀕𑁆𑀕𑀳𑀡𑀁 𑀢𑀲𑁆𑀲 𑀅𑀮𑁄𑀓𑀲𑀪𑀸𑀯𑀢𑁆𑀢𑀸. 𑀦𑀦𑀼 𑀘 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀮𑁄𑀓𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸𑀦𑀁 𑀇𑀥 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀣 𑀯𑀸 𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸.

𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀲𑀼𑀔𑀤𑀼𑀓𑁆𑀔𑀉𑀧𑁂𑀓𑁆𑀔𑀸𑀯𑀲𑁂𑀦. 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀨𑀲𑁆𑀲𑀸𑀳𑀸𑀭𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑀺 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀢𑀢𑁆𑀣 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀨𑀲𑁆𑀲𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀉𑀧𑀸𑀤𑀸𑀦𑀸𑀦𑀁 ¶ 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀻𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀫𑀦𑀸𑀬𑀢𑀦𑀧𑀭𑀺𑀬𑀦𑁆𑀢𑀸𑀦𑀺. 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀳𑁂𑀝𑁆𑀞𑀺𑀫𑀸 𑀘 𑀢𑀬𑁄 𑀆𑀭𑀼𑀧𑁆𑀧𑀸𑀢𑀺 𑀇𑀫𑀸 𑀲𑀢𑁆𑀢 ‘‘𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀦𑀸𑀦𑀢𑁆𑀢𑀁 𑀓𑀸𑀬𑁄 𑀏𑀢𑁂𑀲𑀁, 𑀦𑀸𑀦𑀢𑁆𑀢𑁄 𑀯𑀸 𑀓𑀸𑀬𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀸, 𑀦𑀸𑀦𑀢𑁆𑀢𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁨𑁭; 𑀅. 𑀦𑀺. 𑀅𑀝𑁆𑀞. 𑁩.𑁭.𑁪𑁪-𑁪𑁫) 𑀙𑀓𑀸𑀫𑀸𑀯𑀘𑀭𑀸 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀭𑀺𑀫𑀸𑀡𑁂𑀲𑀼 𑀳𑀺 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀤𑁆𑀯𑁂𑀧𑀺 𑀏𑀓𑀲𑀤𑀺𑀲𑀸 𑀦𑀢𑁆𑀣𑀺. 𑀬𑁂𑀧𑀺 𑀓𑀢𑁆𑀣𑀘𑀺 𑀬𑀫𑀓𑀪𑀸𑀢𑀭𑁄 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸 𑀏𑀓𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀓𑀣𑀺𑀢𑀳𑀲𑀺𑀢𑀕𑀫𑀦𑀞𑀸𑀦𑀸𑀤𑀻𑀳𑀺 𑀯𑀺𑀲𑁂𑀲𑁄 𑀳𑁄𑀢𑀺𑀬𑁂𑀯, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀘 𑀦𑁂𑀲𑀁 𑀢𑀺𑀳𑁂𑀢𑀼𑀓𑀸𑀧𑀺 𑀤𑀼𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀙𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘 𑀓𑁂𑀲𑀜𑁆𑀘𑀺 𑀓𑀸𑀬𑁄 𑀦𑀻𑀮𑁄 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀻𑀢𑀸𑀤𑀺𑀯𑀡𑁆𑀡𑁄, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀘 𑀦𑁂𑀲𑀁 𑀤𑀼𑀳𑁂𑀢𑀼𑀓𑀸𑀧𑀺 𑀢𑀺𑀳𑁂𑀢𑀼𑀓𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀧𑀺 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀏𑀓𑀘𑁆𑀘𑁂 𑀯𑀺𑀦𑀺𑀧𑀸𑀢𑀺𑀓𑀸 𑀧𑀦 𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀓𑀸 𑀉𑀢𑁆𑀢𑀭𑀫𑀸𑀢𑀸 𑀬𑀓𑁆𑀔𑀺𑀦𑀻, 𑀧𑀺𑀬𑀗𑁆𑀓𑀭𑀫𑀸𑀢𑀸, 𑀥𑀫𑁆𑀫𑀕𑀼𑀢𑁆𑀢𑀸𑀢𑀺 𑀏𑀯𑀫𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀏𑀢𑁂𑀲𑀜𑁆𑀳𑀺 𑀑𑀤𑀸𑀢𑀓𑀆𑀴𑀫𑀗𑁆𑀕𑀼𑀭𑀘𑁆𑀙𑀯𑀺𑀲𑀸𑀫𑀯𑀡𑁆𑀡𑀸𑀤𑀺𑀯𑀲𑁂𑀦 𑀘𑁂𑀯 𑀓𑀺𑀲𑀣𑀽𑀮𑀭𑀲𑁆𑀲𑀤𑀻𑀖𑀸𑀤𑀺𑀯𑀲𑁂𑀦 𑀘 𑀓𑀸𑀬𑁄 𑀦𑀸𑀦𑀸 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀧𑀺, 𑀢𑁂 𑀧𑀦 𑀤𑁂𑀯𑀸 𑀯𑀺𑀬 𑀦 𑀫𑀳𑁂𑀲𑀓𑁆𑀔𑀸 ¶ , 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀧𑁆𑀧𑁂𑀲𑀓𑁆𑀔𑀸 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀸 𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀳𑀭𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀸𑀴𑀧𑀓𑁆𑀔𑁂 𑀤𑀼𑀓𑁆𑀔𑀺𑀢𑀸 𑀚𑀼𑀡𑁆𑀳𑀧𑀓𑁆𑀔𑁂 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀸𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀯𑀼𑀢𑁆𑀢𑀸 𑀲𑀢𑀺𑀧𑀺 𑀤𑁂𑀯𑀪𑀸𑀯𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀬𑁂 𑀧𑀦𑁂𑀢𑁆𑀣 𑀢𑀺𑀳𑁂𑀢𑀼𑀓𑀸, 𑀢𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀧𑀺 𑀳𑁄𑀢𑀺. 𑀧𑀺𑀬𑀗𑁆𑀓𑀭𑀫𑀸𑀢𑀸 𑀳𑀺 𑀬𑀓𑁆𑀔𑀺𑀦𑀻 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀲𑀚𑁆𑀛𑀸𑀬𑀢𑁄 𑀲𑀼𑀢𑁆𑀯𑀸 𑁋

‘‘𑀫𑀸 ¶ 𑀲𑀤𑁆𑀤𑀁 𑀓𑀭𑀺 𑀧𑀺𑀬𑀗𑁆𑀓𑀭, 𑀪𑀺𑀓𑁆𑀔𑀼 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺;

𑀅𑀧𑀺𑀘 𑀥𑀫𑁆𑀫𑀧𑀤𑀁 𑀯𑀺𑀚𑀸𑀦𑀺𑀬, 𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸.

‘‘𑀧𑀸𑀡𑁂𑀲𑀼 𑀘 𑀲𑀁𑀬𑀫𑀸𑀫𑀲𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀡𑀸𑀫𑀲𑁂;

𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬𑀫𑀢𑁆𑀢𑀦𑁄, 𑀅𑀧𑀺 𑀫𑀼𑀘𑁆𑀘𑁂𑀫 𑀧𑀺𑀲𑀸𑀘𑀬𑁄𑀦𑀺𑀬𑀸’’𑀢𑀺. (𑀲𑀁. 𑀦𑀺. 𑁧.𑁨𑁪𑁦) 𑁋

𑀏𑀯𑀁 𑀧𑀼𑀢𑁆𑀢𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀉𑀢𑁆𑀢𑀭𑀫𑀸𑀢𑀸 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀯 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸. 𑀏𑀯𑀫𑀺𑀫𑁂𑀧𑀺 𑀓𑀸𑀬𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀦𑀸𑀦𑀢𑁆𑀢𑀸 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺.

𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀲𑀗𑁆𑀔𑀸𑀢𑀸 𑀧𑀦 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀪𑀺𑀦𑁆𑀦𑁂𑀦 𑀧𑀞𑀫𑀚𑁆𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀘𑁂𑀯 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸 𑀘 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀲𑀼 𑀳𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁 𑀓𑀸𑀬𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂𑀳𑀺 𑀧𑀫𑀸𑀡𑀢𑁄 𑀯𑀺𑀧𑀼𑀮𑀢𑀭𑁄 𑀳𑁄𑀢𑀺, 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀓𑀸𑀬𑁄 𑀧𑀦 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀳𑀺𑀧𑀺 𑀧𑀫𑀸𑀡𑀢𑁄 𑀯𑀺𑀧𑀼𑀮𑀢𑀭𑁄 𑀳𑁄𑀢𑀺. 𑀓𑀸𑀫𑀜𑁆𑀘 𑀦𑁂𑀲𑀁 𑀧𑀪𑀸𑀯𑀲𑁂𑀦𑀧𑀺 𑀓𑀸𑀬𑁄 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑁂𑀳𑀺 𑀉𑀴𑀸𑀭𑀢𑀭𑁄 𑀳𑁄𑀢𑀺, 𑀢𑀁 𑀧𑀦 𑀇𑀥 𑀅𑀧𑁆𑀧𑀫𑀸𑀡𑀁. 𑀢𑀣𑀸 𑀳𑀺 𑀧𑀭𑀺𑀢𑁆𑀢𑀸𑀪𑀸𑀤𑀻𑀦𑀁 𑀧𑀭𑀺𑀢𑁆𑀢𑀲𑀼𑀪𑀸𑀤𑀻𑀦𑀜𑁆𑀘 𑀓𑀸𑀬𑁂 𑀲𑀢𑀺𑀧𑀺 𑀧𑀪𑀸𑀯𑁂𑀫𑀢𑁆𑀢𑁂 𑀏𑀓𑀢𑁆𑀢𑀯𑀲𑁂𑀦𑁂𑀯 𑀯𑀯𑀢𑁆𑀣𑀧𑀻𑀬𑀢𑀻𑀢𑀺 ‘‘𑀏𑀓𑀢𑁆𑀢𑀓𑀸𑀬𑀸’’𑀢𑁆𑀯𑁂𑀯 𑀢𑁂 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀫𑀺𑀫𑁂 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀓𑀸𑀬𑀲𑁆𑀲 𑀦𑀸𑀦𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀧𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀏𑀓𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄. 𑀬𑀣𑀸 𑀘 𑀢𑁂, 𑀏𑀯𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸. 𑀦𑀺𑀭𑀬𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀕𑀸𑀯𑀼𑀢𑀁, 𑀓𑁂𑀲𑀜𑁆𑀘𑀺 𑀅𑀟𑁆𑀠𑀬𑁄𑀚𑀦𑀁, 𑀓𑁂𑀲𑀜𑁆𑀘𑀺 𑀬𑁄𑀚𑀦𑀁 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀦 𑀬𑁄𑀚𑀦𑀲𑀢𑀺𑀓𑁄 𑀚𑀸𑀢𑁄. 𑀢𑀺𑀭𑀘𑁆𑀙𑀸𑀦𑁂𑀲𑀼𑀧𑀺 𑀓𑁂𑀘𑀺 𑀔𑀼𑀤𑁆𑀤𑀓𑀸, 𑀓𑁂𑀘𑀺 𑀫𑀳𑀦𑁆𑀢𑀸, 𑀧𑁂𑀢𑁆𑀢𑀺𑀯𑀺𑀲𑀬𑁂𑀧𑀺 𑀓𑁂𑀘𑀺 𑀲𑀝𑁆𑀞𑀺𑀳𑀢𑁆𑀣𑀸, 𑀓𑁂𑀘𑀺 𑀅𑀲𑀻𑀢𑀺𑀳𑀢𑁆𑀣𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀲𑀼𑀯𑀡𑁆𑀡𑀸, 𑀓𑁂𑀘𑀺 𑀤𑀼𑀩𑁆𑀩𑀡𑁆𑀡𑀸, 𑀢𑀣𑀸 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸. 𑀅𑀧𑀺 𑀘𑁂𑀢𑁆𑀣 𑀤𑀻𑀖𑀧𑀺𑀝𑁆𑀞𑀺𑀓𑀧𑁂𑀢𑀸 𑀦𑀸𑀫 ¶ 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀧𑀺 𑀳𑁄𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀸𑀯 𑀳𑁄𑀢𑀺. 𑀇𑀢𑀺 𑀆𑀧𑀸𑀬𑀺𑀓𑀸𑀧𑀺 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄’’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺.

𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸 ¶ 𑀧𑀦 𑀧𑀭𑀺𑀢𑁆𑀢𑀸𑀪𑀸 𑀅𑀧𑁆𑀧𑀫𑀸𑀡𑀸𑀪𑀸 𑀆𑀪𑀲𑁆𑀲𑀭𑀸 ‘‘𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀁 𑀓𑀸𑀬𑁄 𑀏𑀓𑀧𑁆𑀧𑀫𑀸𑀡𑁄𑀯 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺.

𑀧𑀭𑀺𑀢𑁆𑀢𑀲𑀼𑀪𑀸 𑀅𑀧𑁆𑀧𑀫𑀸𑀡𑀲𑀼𑀪𑀸 𑀲𑀼𑀪𑀓𑀺𑀡𑁆𑀳𑀸 𑀧𑀦 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄. 𑀢𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀓𑀸𑀬𑀲𑁆𑀲 𑀘𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀏𑀓𑀢𑁆𑀢𑀸. ‘‘𑀯𑁂𑀳𑀧𑁆𑀨𑀮𑀸𑀧𑀺 𑀇𑀫𑀁𑀬𑁂𑀯 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀪𑀚𑀦𑁆𑀢𑀺 𑀓𑀸𑀬𑀲𑁆𑀲 𑀘𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀏𑀓𑀭𑀽𑀧𑀢𑁆𑀢𑀸. 𑀲𑀼𑀤𑁆𑀥𑀸𑀯𑀸𑀲𑀸 𑀧𑀦 𑀅𑀧𑀼𑀦𑀭𑀸𑀯𑀢𑁆𑀢𑀦𑀢𑁄 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸, 𑀦 𑀲𑀩𑁆𑀩𑀓𑀸𑀮𑀺𑀓𑀸. 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁂 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀲𑁆𑀲 𑀪𑀕𑀯𑀢𑁄 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁, 𑀦 𑀲𑀢𑁆𑀢𑀸𑀯𑀸𑀲𑀁 𑀪𑀚𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀦 𑀔𑁄 𑀧𑀦 𑀲𑁄 𑀲𑀸𑀭𑀺𑀧𑀼𑀢𑁆𑀢 𑀆𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀫𑀬𑀸 𑀅𑀦𑀸𑀯𑀼𑀝𑁆𑀞𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁬𑁦) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 ‘‘𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀁 𑀪𑀚𑀦𑁆𑀢𑀻’’𑀢𑀺 𑀯𑀤𑀢𑀺, 𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀬𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀁. 𑀢𑀲𑁆𑀫𑀸 𑀅𑀲𑀜𑁆𑀜𑀲𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀢𑁆𑀢𑀲𑀼𑀪𑀸𑀤𑀻𑀲𑀼 𑀅𑀓𑀦𑀺𑀝𑁆𑀞𑀧𑀭𑀺𑀬𑁄𑀲𑀸𑀦𑀸𑀲𑀼 𑀦𑀯𑀲𑀼 𑀪𑀽𑀫𑀻𑀲𑀼 𑀲𑀢𑁆𑀢𑀸 ‘‘𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺 𑀕𑀳𑁂𑀢𑀩𑁆𑀩𑀸.

𑀅𑀲𑀜𑁆𑀜𑀲𑀢𑁆𑀢𑀸 𑀧𑀦 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀏𑀢𑁆𑀣 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀸 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀥𑀻 𑀘𑀺𑀢𑁆𑀢𑀁, 𑀥𑀻 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲 𑀦𑀸𑀫 𑀅𑀪𑀸𑀯𑁄𑀬𑁂𑀯 𑀲𑀸𑀥𑀼. 𑀘𑀺𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀯𑀥𑀩𑀦𑁆𑀥𑀸𑀤𑀺𑀧𑀘𑁆𑀘𑀬𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑁂 𑀅𑀲𑀢𑀺 𑀦𑀢𑁆𑀣𑁂𑀢’’𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀭𑀽𑀧𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁄 𑀬𑀲𑁆𑀲 𑀇𑀭𑀺𑀬𑀸𑀧𑀣𑁄 𑀫𑀦𑀼𑀲𑁆𑀲𑀮𑁄𑀓𑁂 𑀧𑀡𑀺𑀳𑀺𑀢𑁄 𑀅𑀳𑁄𑀲𑀺, 𑀲𑁄 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀦𑀺𑀧𑀦𑁆𑀦𑁄 𑀯𑀸 𑀳𑁄𑀢𑀺. 𑀏𑀯𑀁 𑀘𑀺𑀢𑁆𑀢𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀢𑁂𑀲𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀡𑀸𑀪𑀸𑀯𑀢𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀢𑁂 𑀦 𑀪𑀚𑀦𑁆𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 ¶ 𑀧𑀦 𑀬𑀣𑁂𑀯 𑀲𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀲𑀼𑀔𑀼𑀫𑀢𑁆𑀢𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺. 𑀢𑀜𑁆𑀳𑀺 𑀲𑀜𑁆𑀜𑀸𑀬 𑀯𑀺𑀬 𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀢𑁆𑀢𑀸 𑀧𑀭𑀺𑀩𑁆𑀬𑀢𑁆𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀸𑀪𑀸𑀯𑀢𑁄 𑀦𑁂𑀯 𑀯𑀺𑀜𑁆𑀜𑀸𑀡𑀁 ¶ , 𑀦 𑀘 𑀲𑀩𑁆𑀩𑀲𑁄 𑀅𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀦𑁂𑀯𑀯𑀺𑀜𑁆𑀜𑀸𑀡𑀸 𑀦𑀸𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀧𑀭𑀺𑀧𑁆𑀨𑀼𑀝𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀦𑁆𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀯𑀺𑀦𑀺𑀧𑀸𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀓𑀸 𑀅𑀧𑀸𑀬𑀲𑀢𑁆𑀢𑀸 𑀘 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸 𑀅𑀲𑀜𑁆𑀜𑀲𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀓𑀸 𑀘 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀯𑀚𑁆𑀚𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀢𑁆𑀢𑀬𑁂𑀦 𑀲𑀤𑁆𑀥𑀺𑀁 ‘‘𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀮𑁄𑀓𑀲𑁆𑀲 𑀥𑀫𑁆𑀫𑀢𑁆𑀢𑀸 𑀮𑁄𑀓𑀥𑀫𑁆𑀫𑀸. 𑀇𑀫𑁂 𑀳𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀦𑁄 𑀥𑀫𑁆𑀫𑀸, 𑀢𑀲𑁆𑀫𑀸 𑀏𑀢𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀲𑀢𑁆𑀢𑁄 𑀦𑀢𑁆𑀣𑀺. 𑀢𑁂 𑀳𑀺 𑀅𑀧𑀭𑀸𑀧𑀭𑀁 𑀓𑀤𑀸𑀘𑀺 𑀮𑁄𑀓𑀁 𑀅𑀦𑀼𑀧𑀢𑀦𑁆𑀢𑀺, 𑀓𑀤𑀸𑀘𑀺 𑀢𑁂 𑀮𑁄𑀓𑁄 𑀘 𑀅𑀦𑀼𑀧𑀢𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑀥𑀫𑁆𑀫𑀸 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀮𑁄𑀓𑁄 𑀘 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁮.𑁬). 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀦𑀁 𑀮𑀤𑁆𑀥𑀺, 𑀢𑀸𑀦𑀺 𑀏𑀯 𑀯𑀸 𑀮𑀤𑁆𑀥𑀩𑁆𑀩𑀢𑁄 𑀮𑀸𑀪𑁄. 𑀢𑀤𑀪𑀸𑀯𑁄 𑀅𑀮𑀸𑀪𑁄. 𑀮𑀸𑀪𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀩𑁆𑀩𑀺𑀲𑀬𑁄 𑀅𑀦𑀼𑀭𑁄𑀥𑁄 𑀕𑀳𑀺𑀢𑁄, 𑀅𑀮𑀸𑀪𑀕𑁆𑀕𑀳𑀡𑁂𑀦 𑀯𑀺𑀭𑁄𑀥𑁄. 𑀏𑀯𑀁 𑀬𑀲𑀸𑀤𑀻𑀲𑀼𑀧𑀺 𑀢𑀩𑁆𑀩𑀺𑀲𑀬𑀅𑀦𑀼𑀭𑁄𑀥𑀯𑀺𑀭𑁄𑀥𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀮𑀸𑀪𑁂 𑀧𑀦 𑀆𑀕𑀢𑁂 𑀅𑀮𑀸𑀪𑁄 𑀆𑀕𑀢𑁄𑀬𑁂𑀯 𑀳𑁄𑀢𑀻𑀢𑀺 𑀮𑀸𑀪𑁄 𑀘 𑀅𑀮𑀸𑀪𑁄 𑀘 𑀯𑀼𑀢𑁆𑀢𑁄. 𑀬𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀘 𑀮𑁄𑀳𑀺𑀢𑁂 𑀲𑀢𑀺 𑀢𑀤𑀼𑀧𑀖𑀸𑀢𑀯𑀲𑁂𑀦 𑀧𑀼𑀩𑁆𑀩𑁄 𑀯𑀺𑀬 𑀮𑀸𑀪𑀸𑀤𑀻𑀲𑀼 𑀅𑀦𑀼𑀭𑁄𑀥𑁂 𑀲𑀢𑀺 𑀅𑀮𑀸𑀪𑀸𑀤𑀻𑀲𑀼 𑀯𑀺𑀭𑁄𑀥𑁄 𑀮𑀤𑁆𑀥𑀸𑀯𑀲𑀭𑁄 𑀏𑀯 𑀳𑁄𑀢𑀺.

𑀦𑀯 𑀲𑀢𑁆𑀢𑀸𑀯𑀸𑀲𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀏𑀯 𑀅𑀲𑀜𑁆𑀜𑀲𑀢𑁆𑀢𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂𑀳𑀺 𑀲𑀤𑁆𑀥𑀺𑀁 ‘‘𑀦𑀯 𑀲𑀢𑁆𑀢𑀸𑀯𑀸𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀢𑁆𑀢𑀸 𑀆𑀯𑀲𑀦𑁆𑀢𑀺 𑀏𑀢𑁂𑀲𑀽𑀢𑀺 𑀲𑀢𑁆𑀢𑀸𑀯𑀸𑀲𑀸, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀆𑀤𑀺𑀪𑁂𑀤𑀸 𑀲𑀢𑁆𑀢𑀦𑀺𑀓𑀸𑀬𑀸. 𑀢𑁂 𑀳𑀺 𑀲𑀢𑁆𑀢𑀦𑀺𑀓𑀸𑀬𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀸𑀦𑀁 𑀢𑀸𑀬 𑀏𑀯 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 ¶ 𑀆𑀥𑀸𑀭𑁄 𑀯𑀺𑀬 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺 𑀲𑀫𑀼𑀤𑀸𑀬𑀸𑀥𑀸𑀭𑀢𑀸𑀬 𑀅𑀯𑀬𑀯𑀲𑁆𑀲 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀲𑀼𑀤𑁆𑀥𑀸𑀯𑀸𑀲𑀸𑀦𑀫𑁆𑀧𑀺 𑀲𑀢𑁆𑀢𑀸𑀯𑀸𑀲𑀕𑁆𑀕𑀳𑀡𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀤𑀲𑀸𑀬𑀢𑀦𑀸𑀦𑀻𑀢𑀺 𑀅𑀭𑀽𑀧𑀲𑀪𑀸𑀯𑀁 𑀫𑀦𑀸𑀬𑀢𑀦𑀁 𑀭𑀽𑀧𑀸𑀭𑀽𑀧𑀸𑀤𑀺𑀫𑀺𑀲𑁆𑀲𑀓𑀁 𑀥𑀫𑁆𑀫𑀸𑀬𑀢𑀦𑀜𑁆𑀘 𑀞𑀧𑁂𑀢𑁆𑀯𑀸 𑀓𑁂𑀯𑀮𑀁 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀯𑀲𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀬𑁄 𑀧𑀜𑁆𑀘, 𑀭𑀽𑀧𑀸𑀬𑀢𑀦𑀸𑀤𑀬𑁄 𑀧𑀜𑁆𑀘𑀸𑀢𑀺 𑀤𑀲𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀢𑀸𑀦𑀺𑀬𑁂𑀯 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀘𑀓𑁆𑀔𑀸𑀤𑀬𑁄 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺? 𑀆𑀬𑀢𑀦𑀢𑁄 (𑀯𑀺𑀪. 𑀅𑀝𑁆𑀞. 𑁧𑁫𑁪) 𑀆𑀬𑀸𑀦𑀁 𑀯𑀸 𑀢𑀦𑀦𑀢𑁄 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀸𑀦𑀺. 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀢𑁂 𑀘 𑀧𑀦 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀇𑀤𑀜𑁆𑀘 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀺𑀯𑀺𑀬 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀬𑀸𑀯 𑀦 𑀦𑀺𑀯𑀢𑁆𑀢𑀢𑀺, 𑀢𑀸𑀯 𑀦𑀬𑀦𑁆𑀢𑀺 𑀧𑀯𑀢𑁆𑀢𑀬𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺 𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀸𑀦𑀺. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁩𑁮) 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁫𑁮; 𑀅. 𑀦𑀺. 𑁩.𑁧𑁦𑁨; 𑁫.𑁨𑁩) 𑀓𑀸𑀭𑀡𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀓𑁆𑀔𑀼𑀆𑀤𑀻𑀲𑀼 𑀘 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀺𑀯𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑀓𑁆𑀔𑀸𑀤𑀬𑁄 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀘𑀓𑁆𑀔𑀸𑀤𑀻𑀲𑀼 𑀘 𑀢𑁂 𑀆𑀓𑀺𑀡𑁆𑀡𑀸 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀢𑁆𑀢𑀸 𑀘𑀸𑀢𑀺 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀆𑀓𑀭𑁄. 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀲𑀫𑁄𑀲𑀭𑀡𑀢𑁄 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. 𑀢𑀦𑁆𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀸𑀯𑁂𑀦 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄. 𑀘𑀓𑁆𑀔𑀸𑀤𑀻𑀦𑀁 𑀅𑀪𑀸𑀯𑁂 𑀅𑀪𑀸𑀯𑀢𑁄 𑀘𑀓𑁆𑀔𑀸𑀤𑀬𑁄𑀯 𑀦𑁂𑀲𑀁 𑀓𑀸𑀭𑀡𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁. 𑀏𑀯𑀁 𑀲𑁂𑀲𑀸𑀦𑀺𑀧𑀺.

𑀇𑀫𑀸𑀦𑁂𑀯 ¶ 𑀧𑀦 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀙𑀯𑀺𑀜𑁆𑀜𑀸𑀡𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲 𑀯𑀺𑀤𑀳𑀦𑀸𑀤𑀺𑀢𑁄 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀳𑀺 𑀘𑀓𑁆𑀔𑀸𑀤𑀻𑀲𑀼 𑀏𑀓𑁂𑀓𑁄 𑀥𑀫𑁆𑀫𑁄 𑀬𑀣𑀸𑀲𑀫𑁆𑀪𑀯𑀁 𑀯𑀺𑀤𑀳𑀢𑀺, 𑀥𑀻𑀬𑀢𑁂, 𑀯𑀺𑀥𑀸𑀦𑀁, 𑀯𑀺𑀥𑀻𑀬𑀢𑁂 𑀏𑀢𑀸𑀬, 𑀏𑀢𑁆𑀣 𑀯𑀸 𑀥𑀻𑀬𑀢𑀻𑀢𑀺 𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀺𑀬𑀸 𑀳𑀺 𑀥𑀸𑀢𑀼𑀬𑁄 𑀓𑀸𑀭𑀡𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀯 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀥𑀸𑀢𑀼𑀬𑁄 𑀯𑀺𑀬 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀁, 𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀯𑀺𑀤𑀳𑀦𑁆𑀢𑀺, 𑀪𑀸𑀭𑀳𑀸𑀭𑁂𑀳𑀺 𑀘 𑀪𑀸𑀭𑁄 𑀯𑀺𑀬 𑀲𑀢𑁆𑀢𑁂𑀳𑀺 𑀥𑀻𑀬𑀦𑁆𑀢𑀺 𑀥𑀸𑀭𑀻𑀬𑀦𑁆𑀢𑀺, 𑀤𑀼𑀓𑁆𑀔𑀯𑀺𑀥𑀸𑀦𑀫𑀢𑁆𑀢𑀫𑁂𑀯 𑀘𑁂𑀢𑀸 𑀅𑀯𑀲𑀯𑀢𑁆𑀢𑀦𑀢𑁄. 𑀏𑀢𑀸𑀳𑀺 𑀘 𑀓𑀸𑀭𑀡𑀪𑀽𑀢𑀸𑀳𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀢𑁆𑀢𑁂𑀳𑀺 𑀅𑀦𑀼𑀯𑀺𑀥𑀻𑀬𑀢𑀺, 𑀢𑀣𑀸𑀯𑀺𑀳𑀺𑀢𑀜𑁆𑀘 𑀢𑀁 𑀏𑀢𑀸𑀲𑁆𑀯𑁂𑀯 𑀥𑀻𑀬𑀢𑀺 𑀞𑀧𑀻𑀬𑀢𑀺, 𑀢𑀲𑁆𑀫𑀸 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺 𑀘 𑀬𑀣𑀸 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀦𑀸𑀫 𑀲𑀪𑀸𑀯𑀢𑁄 𑀦𑀢𑁆𑀣𑀺, 𑀦 𑀏𑀯𑀫𑁂𑀢𑀸, 𑀏𑀢𑀸 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀬𑀣𑀸 𑀘 𑀮𑁄𑀓𑁂 𑀯𑀺𑀘𑀺𑀢𑁆𑀢𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀤𑀬𑁄 𑀲𑁂𑀮𑀸𑀯𑀬𑀯𑀸 ‘‘𑀥𑀸𑀢𑀼𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀢𑀸𑀧𑀺 𑀥𑀸𑀢𑀼𑀬𑁄 𑀯𑀺𑀬 𑀥𑀸𑀢𑀼𑀬𑁄. 𑀯𑀺𑀘𑀺𑀢𑁆𑀢𑀸 𑀳𑁂𑀢𑀸 𑀜𑀸𑀡𑀜𑁂𑀬𑁆𑀬𑀸𑀯𑀬𑀯𑀸𑀢𑀺. 𑀬𑀣𑀸 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀪𑀽𑀢𑁂𑀲𑀼 𑀭𑀲𑀲𑁄𑀡𑀺𑀢𑀸𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 ¶ 𑀥𑀸𑀢𑀼𑀲𑀫𑀜𑁆𑀜𑀸, 𑀏𑀯𑀫𑁂𑀢𑁂𑀲𑀼𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀯𑀬𑀯𑁂𑀲𑀼 𑀥𑀸𑀢𑀼𑀲𑀫𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁂𑀢𑁂 𑀘𑀓𑁆𑀔𑀸𑀤𑀬𑁄𑀢𑀺. 𑀅𑀧𑀺 𑀘 𑀥𑀸𑀢𑀽𑀢𑀺 𑀦𑀺𑀚𑁆𑀚𑀻𑀯𑀫𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀣𑀸 𑀳𑀺 𑀪𑀕𑀯𑀸 ‘‘𑀙𑀥𑀸𑀢𑀼𑀭𑁄 𑀅𑀬𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁪𑁩) 𑀚𑀻𑀯𑀲𑀜𑁆𑀜𑀸𑀲𑀫𑀽𑀳𑀦𑀦𑀢𑁆𑀣𑀁 𑀥𑀸𑀢𑀼𑀤𑁂𑀲𑀦𑀫𑀓𑀸𑀲𑀺. 𑀢𑀲𑁆𑀫𑀸 𑀦𑀺𑀚𑁆𑀚𑀻𑀯𑀝𑁆𑀞𑁂𑀦𑀧𑀺 𑀥𑀸𑀢𑀼𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀏𑀢𑁆𑀣 𑀘 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀯𑀘𑀦𑁂𑀦 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸, 𑀢𑀸𑀬 𑀘 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀘𑀦𑀢𑁄 𑀤𑀼𑀓𑁆𑀔𑀸𑀦𑀢𑁆𑀢𑀢𑀸 𑀘 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀻𑀡𑀺𑀧𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀢𑁂 𑀘 𑀅𑀢𑁆𑀣𑀢𑁄 𑀨𑀲𑁆𑀲𑀸𑀤𑀬𑁄. 𑀭𑀽𑀧𑀦𑁆𑀢𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀸𑀦𑀺, 𑀢𑀸𑀦𑀺 𑀘 𑀅𑀢𑁆𑀣𑀢𑁄 𑀧𑀣𑀯𑀻𑀆𑀤𑀬𑁄𑀢𑀺 𑀅𑀯𑀺𑀲𑁂𑀲𑁂𑀦𑁂𑀯 𑀲𑀮𑀓𑁆𑀔𑀡𑀢𑁄 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸. 𑀢𑀕𑁆𑀕𑀳𑀡𑁂𑀦𑁂𑀯 𑀬𑁂 𑀢𑁂 𑀲𑀯𑀺𑀲𑁂𑀲𑀸 𑀓𑀼𑀲𑀮𑀸𑀤𑀬𑁄 𑀳𑁂𑀢𑀼𑀆𑀤𑀬𑁄 𑀘, 𑀢𑁂𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀇𑀢𑀺 𑀅𑀬𑀁 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄’’𑀢𑀺.

𑀏𑀯𑀁 ¶ 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀲𑀩𑁆𑀩𑀣𑀸 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀢𑁆𑀢𑀮𑁄𑀓𑀲𑁆𑀲𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀬𑀁 𑀚𑀸𑀦𑀸𑀢𑀻𑀢𑀺 𑀆𑀕𑀫𑁆𑀫 𑀘𑀺𑀢𑁆𑀢𑀁 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄 𑀫𑀺𑀕𑀸𑀲𑀬𑁄 𑀯𑀺𑀬. 𑀬𑀣𑀸 𑀫𑀺𑀕𑁄 𑀕𑁄𑀘𑀭𑀸𑀬 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀦𑀕𑀳𑀦𑁂 𑀲𑀬𑀢𑀻𑀢𑀺 𑀲𑁄 𑀢𑀲𑁆𑀲 𑀆𑀲𑀬𑁄, 𑀏𑀯𑀁 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑀁 𑀆𑀕𑀫𑁆𑀫 𑀬𑀢𑁆𑀣 𑀲𑁂𑀢𑀺, 𑀲𑁄 𑀢𑀲𑁆𑀲 𑀆𑀲𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀤𑁆𑀤𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀢𑁆𑀢𑀸 𑀇𑀫𑀸 𑀏𑀯 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄 𑀲𑀦𑁆𑀦𑀺𑀲𑁆𑀲𑀺𑀢𑀸. 𑀬𑀣𑀸𑀳 ‘‘𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁆𑀯𑀸𑀬𑀁 𑀓𑀘𑁆𑀘𑀸𑀦 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀜𑁆𑀘𑁂𑀯 𑀦𑀢𑁆𑀣𑀺𑀢𑀜𑁆𑀘𑀸’’𑀢𑀺 (𑀲𑀁. 𑀦𑀺. 𑁨.𑁧𑁫). 𑀅𑀢𑁆𑀣𑀺𑀢𑀸𑀢𑀺 𑀳𑀺 𑀲𑀲𑁆𑀲𑀢𑀕𑁆𑀕𑀸𑀳𑁄 𑀅𑀥𑀺𑀧𑁆𑀧𑁂𑀢𑁄, 𑀦𑀢𑁆𑀣𑀺𑀢𑀸𑀢𑀺 𑀉𑀘𑁆𑀙𑁂𑀤𑀕𑁆𑀕𑀸𑀳𑁄. 𑀅𑀬𑀁 𑀢𑀸𑀯 𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀆𑀲𑀬𑁄, 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀦 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀤𑀼𑀯𑀺𑀥𑁄 𑀆𑀲𑀬𑁄. 𑀢𑀢𑁆𑀣 ‘‘𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀬𑀣𑀸𑀪𑀽𑀢𑀜𑀸𑀡𑀁 𑀧𑀦 𑀫𑀕𑁆𑀕𑀜𑀸𑀡’’𑀦𑁆𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁮𑁧𑁫) 𑀯𑀼𑀢𑁆𑀢𑀁 ¶ . 𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄 𑀘 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀢𑁂𑀲𑀜𑁆𑀘 𑀜𑀸𑀡𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺, 𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁧𑁧𑁩).

𑀅𑀦𑀼𑀲𑀬𑀁 𑀚𑀸𑀦𑀸𑀢𑀻𑀢𑀺 𑀅𑀦𑀼 𑀅𑀦𑀼 𑀲𑀬𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑁂 𑀧𑀦 𑀢𑁂? 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸, 𑀅𑀢𑀻𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀥𑀫𑁆𑀫𑀸𑀦𑀁 𑀓𑀸𑀮𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄 ¶ 𑀅𑀢𑁆𑀣𑀺, 𑀢𑀁 𑀲𑀢𑁆𑀢𑀯𑀺𑀥𑀁 𑀅𑀦𑀼𑀲𑀬𑀁 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀦𑁆𑀢𑀸𑀦𑁂 𑀧𑀭𑁄𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀚𑀸𑀦𑀸𑀢𑀺.

𑀘𑀭𑀺𑀢𑀁 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀘𑀭𑀺𑀢𑀦𑁆𑀢𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀁. 𑀢𑀜𑁆𑀳𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁧𑁪 𑀆𑀤𑀬𑁄) 𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀅𑀣 𑀯𑀸 𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸 𑀧𑀦 𑀭𑀸𑀕𑀤𑁄𑀲𑀫𑁄𑀳𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀯𑀲𑁂𑀦 𑀙 𑀫𑀽𑀮𑀘𑀭𑀺𑀬𑀸, 𑀢𑀸𑀲𑀁 𑀅𑀧𑀭𑀺𑀬𑀦𑁆𑀢𑁄 𑀅𑀦𑁆𑀢𑀭𑀪𑁂𑀤𑁄, 𑀲𑀁𑀲𑀕𑁆𑀕𑀪𑁂𑀤𑁄 𑀧𑀦 𑀢𑁂𑀲𑀝𑁆𑀞𑀺𑀯𑀺𑀥𑁄. 𑀢𑀁 𑀘𑀭𑀺𑀢𑀁 𑀲𑀪𑀸𑀯𑀢𑁄 𑀲𑀁𑀓𑀺𑀮𑁂𑀲𑀢𑁄 𑀯𑁄𑀤𑀸𑀦𑀢𑁄 𑀲𑀫𑀼𑀝𑁆𑀞𑀸𑀦𑀢𑁄 𑀨𑀮𑀢𑁄 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀏𑀯𑀫𑀸𑀤𑀺𑀦𑀸 𑀧𑀓𑀸𑀭𑁂𑀦 𑀚𑀸𑀦𑀸𑀢𑀺.

𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀅𑀥𑀺𑀫𑀼𑀢𑁆𑀢𑀻𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼. 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀻𑀢𑀺. 𑀬𑀸𑀬 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀬𑁂𑀯 𑀲𑁂𑀯𑀦𑁆𑀢𑀺, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀘 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂 𑀏𑀯. 𑀲𑀘𑁂 𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀦 𑀲𑀻𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀲𑀻𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀧𑀺 𑀦 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽, 𑀇𑀢𑀭𑁂 𑀅𑀲𑀸𑀭𑀼𑀧𑁆𑀧𑀸, 𑀢𑁂𑀧𑀺 𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀓𑀺𑀭 𑀦𑀸𑀕𑀤𑀻𑀧𑁂 𑀘𑁂𑀢𑀺𑀬𑀯𑀦𑁆𑀤𑀦𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑀺 𑀦𑀺𑀫𑀦𑁆𑀢𑀺𑀢𑁄 𑀣𑁂𑀭𑁂𑀦 𑀘 𑀲𑀤𑁆𑀥𑀺𑀁 𑀏𑀓𑁄 𑀅𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀥𑀼𑀭𑀯𑀺𑀳𑀸𑀭𑁂𑀧𑀺 𑀏𑀓𑁄 𑀅𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀲𑀼 𑀕𑀸𑀫𑀁 𑀑𑀲𑀭𑀦𑁆𑀢𑁂𑀲𑀼 𑀢𑁂 𑀉𑀪𑁄 𑀚𑀦𑀸 𑀓𑀺𑀜𑁆𑀘𑀸𑀧𑀺 𑀆𑀕𑀦𑁆𑀢𑀼𑀓𑁂𑀦 𑀦𑁂𑀯𑀸𑀲𑀺𑀓𑁄, 𑀦𑁂𑀯𑀸𑀲𑀺𑀓𑁂𑀦 𑀯𑀸 𑀆𑀕𑀦𑁆𑀢𑀼𑀓𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀏𑀓𑀢𑁄 ¶ 𑀳𑀼𑀢𑁆𑀯𑀸 𑀳𑀲𑀺𑀢𑁆𑀯𑀸 𑀳𑀲𑀺𑀢𑁆𑀯𑀸 𑀓𑀣𑀬𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀤𑀺𑀲𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀚𑀸𑀦𑀺𑀢𑁆𑀯𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑀁 (𑀲𑀁. 𑀦𑀺. 𑁨.𑁮𑁫 𑀆𑀤𑀬𑁄) 𑀓𑀣𑀺𑀢’’𑀦𑁆𑀢𑀺 𑀆𑀳. 𑀏𑀯𑀫𑀬𑀁 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑁄𑀧𑀲𑁂𑀯𑀦𑀸𑀤𑀺𑀦𑀺𑀬𑀸𑀫𑀺𑀓𑀸 𑀅𑀚𑁆𑀛𑀸𑀲𑀬𑀥𑀸𑀢𑀼 𑀅𑀚𑁆𑀛𑀸𑀲𑀬𑀪𑀸𑀯𑁄 𑀅𑀥𑀺𑀫𑀼𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺. ‘‘𑀇𑀫𑀲𑁆𑀲 𑀅𑀥𑀺𑀫𑀼𑀢𑁆𑀢𑀺 𑀳𑀻𑀦𑀸, 𑀇𑀫𑀲𑁆𑀲 𑀧𑀡𑀻𑀢𑀸. 𑀢𑀢𑁆𑀣𑀸𑀧𑀺 𑀇𑀫𑀲𑁆𑀲 𑀫𑀼𑀤𑀼, 𑀇𑀫𑀲𑁆𑀲 𑀫𑀼𑀤𑀼𑀢𑀭𑀸, 𑀇𑀫𑀲𑁆𑀲 𑀫𑀼𑀤𑀼𑀢𑀫𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀥𑀺𑀫𑀼𑀢𑁆𑀢𑀺𑀬𑀸 𑀧𑀦 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀸𑀤𑀺𑀓𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀸𑀤𑀺𑀦𑀸 𑀯𑁂𑀤𑀺𑀢𑀩𑁆𑀩𑁄.

𑀅𑀧𑁆𑀧𑀭𑀚𑀓𑁆𑀔𑁂𑀢𑀺 ¶ 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀧𑁆𑀧𑀁 𑀯𑀸 𑀭𑀸𑀕𑀸𑀤𑀺𑀭𑀚𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀦𑀼𑀲𑁆𑀲𑀤𑀭𑀸𑀕𑀸𑀤𑀺𑀭𑀚𑀸 𑀲𑀢𑁆𑀢𑀸. 𑀢𑁂 𑀅𑀧𑁆𑀧𑀭𑀚𑀓𑁆𑀔𑁂. 𑀫𑀳𑀸𑀭𑀚𑀓𑁆𑀔𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀉𑀲𑁆𑀲𑀤𑀭𑀸𑀕𑀸𑀤𑀺𑀭𑀚𑀸 𑀫𑀳𑀸𑀭𑀚𑀓𑁆𑀔𑀸. 𑀚𑀸𑀦𑀸𑀢𑀻𑀢𑀺 ‘‘𑀇𑀫𑀲𑁆𑀲 𑀭𑀸𑀕𑀭𑀚𑁄 𑀅𑀧𑁆𑀧𑁄, 𑀇𑀫𑀲𑁆𑀲 𑀤𑁄𑀲𑀭𑀚𑁄 𑀅𑀧𑁆𑀧𑁄’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀭𑀚𑀓𑁆𑀔𑀸𑀤𑀺𑀓𑁂 𑀚𑀸𑀦𑀸𑀢𑀺.

𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀢𑀺 𑀢𑀺𑀔𑀺𑀡𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀢𑀺 𑀫𑀼𑀤𑀼𑀓𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀉𑀪𑀬𑀢𑁆𑀣𑀸𑀧𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀲𑁆𑀯𑀸𑀓𑀸𑀭𑁂𑀢𑀺 𑀲𑀼𑀦𑁆𑀤𑀭𑀸𑀓𑀸𑀭𑁂, 𑀓𑀮𑁆𑀬𑀸𑀡𑀧𑀓𑀢𑀺𑀓𑁂 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑁂𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀯𑀸 𑀆𑀲𑀬𑀸𑀤𑀬𑁄 𑀆𑀓𑀸𑀭𑀸 𑀓𑁄𑀝𑁆𑀞𑀸𑀲𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀯𑀺𑀧𑀭𑀻𑀢𑀸 𑀤𑁆𑀯𑀸𑀓𑀸𑀭𑀸. 𑀲𑀼𑀯𑀺𑀜𑁆𑀜𑀸𑀧𑀬𑁂𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀼𑀓𑀭𑁂 𑀲𑀤𑁆𑀥𑁂 𑀧𑀜𑁆𑀜𑀯𑀦𑁆𑀢𑁂 𑀘, 𑀬𑁂 𑀯𑀸 𑀓𑀣𑀺𑀢𑀁 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀯𑀺𑀧𑀭𑀻𑀢𑀸 𑀤𑀼𑀯𑀺𑀜𑁆𑀜𑀸𑀧𑀬𑀸. 𑀪𑀩𑁆𑀩𑁂 𑀅𑀪𑀩𑁆𑀩𑁂𑀢𑀺 𑀏𑀢𑁆𑀣 𑀬𑁂 𑀅𑀭𑀺𑀬𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀓𑀫𑁆𑀫𑀸𑀯𑀭𑀡𑀓𑀺𑀮𑁂𑀲𑀸𑀯𑀭𑀡𑀯𑀺𑀧𑀸𑀓𑀸𑀯𑀭𑀡𑀭𑀳𑀺𑀢𑀸, 𑀢𑁂 𑀪𑀩𑁆𑀩𑀸. 𑀯𑀺𑀧𑀭𑀻𑀢𑀸 𑀅𑀪𑀩𑁆𑀩𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀪𑀕𑀯𑀸 𑀅𑀧𑀭𑀺𑀫𑀸𑀡𑁂 𑀲𑀢𑁆𑀢𑁂 𑀆𑀲𑀬𑀸𑀤𑀺𑀢𑁄 𑀅𑀦𑀯𑀲𑁂𑀲𑁂𑀢𑁆𑀯𑀸 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄.

𑀦𑀦𑀼 𑀘 𑀲𑀢𑁆𑀢𑁂𑀲𑀼 𑀧𑀫𑀸𑀡𑀸𑀤𑀺𑀧𑀺 𑀚𑀸𑀦𑀺𑀢𑀩𑁆𑀩𑁄 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀢𑀲𑁆𑀲 𑀧𑀦 𑀚𑀸𑀦𑀦𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬𑀸𑀢𑀺 𑀇𑀥 𑀦 𑀕𑀳𑀺𑀢𑀁, 𑀪𑀕𑀯𑀢𑁄 𑀧𑀦 𑀢𑀫𑁆𑀧𑀺 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀫𑁂𑀯, 𑀧𑀬𑁄𑀚𑀦𑀸𑀪𑀸𑀯𑀸 𑀤𑁂𑀲𑀦𑀁 𑀦𑀸𑀭𑀼𑀴𑁆𑀳𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁧𑁨𑁧).

𑀏𑀯𑀁 ¶ 𑀲𑀢𑁆𑀢𑀮𑁄𑀓𑀲𑁆𑀲𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀑𑀓𑀸𑀲𑀮𑁄𑀓𑀲𑁆𑀲𑀧𑀺 𑀢𑀣𑁂𑀯 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀘 𑀲𑀢𑁆𑀢𑀮𑁄𑀓𑁄’’𑀢𑀺𑀆𑀤𑀺 ¶ . 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀓𑀯𑀸𑀴𑀦𑁆𑀢𑀺 𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀦𑁂𑀫𑀺𑀫𑀡𑁆𑀟𑀮𑀲𑀤𑀺𑀲𑁂𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀘𑀓𑁆𑀓𑀯𑀸𑀴’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀟𑁆𑀠𑀼𑀟𑁆𑀠𑀸𑀦𑀻𑀢𑀺 𑀉𑀧𑀟𑁆𑀠𑀘𑀢𑀼𑀢𑁆𑀣𑀸𑀦𑀺, 𑀢𑀻𑀡𑀺 𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀦𑀳𑀼𑀢𑀸𑀦𑀻𑀢𑀺 𑀤𑀲𑀲𑀳𑀲𑁆𑀲𑀸𑀦𑀺. 𑀲𑀗𑁆𑀔𑀸𑀢𑀸𑀢𑀺 𑀓𑀣𑀺𑀢𑀸. 𑀬𑀲𑁆𑀫𑀸 𑀧𑀣𑀯𑀻 𑀦𑀸𑀫𑀸𑀬𑀁 𑀢𑀺𑀭𑀺𑀬𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀸, 𑀢𑀲𑁆𑀫𑀸 ‘‘𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸’’𑀢𑀺 𑀩𑀳𑀮𑀢𑁄𑀬𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀦𑀦𑀼 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀳𑀺 𑀢𑀁𑀢𑀁𑀘𑀓𑁆𑀓𑀯𑀸𑀴𑀧𑀣𑀯𑀻 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺? 𑀦 𑀢𑀤𑀜𑁆𑀜𑀘𑀓𑁆𑀓𑀯𑀸𑀴𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀪𑀸𑀯𑀢𑁄. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀜𑁆𑀳𑀺 𑀧𑀢𑁆𑀢𑀸𑀦𑀁 𑀅𑀦𑁆𑀢𑀭𑀸𑀴𑀲𑀤𑀺𑀲𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀮𑁄𑀓𑀥𑀸𑀢𑀽𑀦𑀁 𑀅𑀦𑁆𑀢𑀭𑁂𑀬𑁂𑀯 𑀧𑀣𑀯𑀻 𑀦𑀢𑁆𑀣𑀺 𑀮𑁄𑀓𑀦𑁆𑀢𑀭𑀦𑀺𑀭𑀬𑀪𑀸𑀯𑀢𑁄, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸𑀦𑀁 𑀧𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀦𑁆𑀢𑀭𑁂𑀳𑀺 𑀲𑀫𑁆𑀩𑀤𑁆𑀥𑀝𑁆𑀞𑀸𑀦𑁂 𑀧𑀣𑀯𑀻 𑀏𑀓𑀸𑀩𑀤𑁆𑀥𑀸𑀯, 𑀯𑀺𑀯𑀝𑁆𑀝𑀓𑀸𑀮𑁂 𑀲𑀡𑁆𑀞𑀳𑀫𑀸𑀦𑀸𑀧𑀺 𑀧𑀣𑀯𑀻 𑀬𑀣𑀸𑀲𑀡𑁆𑀞𑀺𑀢𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀸𑀯 𑀲𑀡𑁆𑀞𑀳𑀢𑀺.

𑀲𑀡𑁆𑀞𑀺𑀢𑀻𑀢𑀺 𑀳𑁂𑀝𑁆𑀞𑀸 𑀉𑀧𑀭𑀺𑀢𑁄 𑀘𑀸𑀢𑀺 𑀲𑀩𑁆𑀩𑀲𑁄 𑀞𑀺𑀢𑀺. 𑀏𑀯𑀁 𑀲𑀡𑁆𑀞𑀺𑀢𑁂𑀢𑀺 𑀏𑀯𑀁 𑀅𑀯𑀝𑁆𑀞𑀺𑀢𑁂. 𑀏𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑁂. 𑀅𑀚𑁆𑀛𑁄𑀕𑀸𑀴𑁆𑀳𑁄𑀢𑀺 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁄. 𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯𑀸𑀢𑀺 𑀢𑀢𑁆𑀢𑀓𑀫𑁂𑀯 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺𑀬𑁂𑀯 𑀉𑀕𑁆𑀕𑀢𑁄. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀉𑀩𑁆𑀩𑁂𑀥𑁄𑀯, 𑀅𑀣 𑀔𑁄 𑀆𑀬𑀸𑀫𑀯𑀺𑀢𑁆𑀣𑀸𑀭𑀸𑀧𑀺𑀲𑁆𑀲 𑀢𑀢𑁆𑀢𑀓𑀸𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀺𑀦𑁂𑀭𑀼, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀸 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑁂𑀦, 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑀸’’𑀢𑀺 (𑀅. 𑀦𑀺. 𑁭.𑁬𑁬).

𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁄𑀢𑀺 𑀧𑀩𑁆𑀩𑀢𑁂𑀲𑀼 𑀉𑀢𑁆𑀢𑀫𑁄, 𑀧𑀩𑁆𑀩𑀢𑁄𑀬𑁂𑀯 𑀯𑀸 𑀉𑀢𑁆𑀢𑀫𑁄 𑀧𑀩𑁆𑀩𑀢𑀼𑀢𑁆𑀢𑀫𑁄, 𑀲𑀺𑀦𑁂𑀭𑀼𑀲𑀗𑁆𑀔𑀸𑀢𑁄 𑀧𑀩𑁆𑀩𑀢𑀼𑀢𑁆𑀢𑀫𑁄 𑀲𑀺𑀦𑁂𑀭𑀼𑀧𑀩𑁆𑀩𑀢𑀼𑀢𑁆𑀢𑀫𑁄, 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀘 𑀧𑀸𑀘𑀻𑀦𑀧𑀲𑁆𑀲𑀁 𑀭𑀚𑀢𑀫𑀬𑀁, 𑀢𑀲𑁆𑀫𑀸 𑀢𑀲𑁆𑀲 𑀧𑀪𑀸𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺𑀬𑀸 𑀧𑀸𑀘𑀻𑀦𑀤𑀺𑀲𑀸𑀬 𑀲𑀫𑀼𑀤𑁆𑀤𑁄𑀤𑀓𑀁 𑀔𑀻𑀭𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀤𑀓𑁆𑀔𑀺𑀡𑀧𑀲𑁆𑀲𑀁 𑀧𑀦 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁, 𑀢𑀲𑁆𑀫𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀲𑀫𑀼𑀤𑁆𑀤𑁄𑀤𑀓𑀁 𑀬𑁂𑀪𑀼𑀬𑁆𑀬𑁂𑀦 𑀦𑀻𑀮𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀆𑀓𑀸𑀲𑀁. 𑀧𑀘𑁆𑀙𑀺𑀫𑀧𑀲𑁆𑀲𑀁 𑀨𑀮𑀺𑀓𑀫𑀬𑀁. 𑀉𑀢𑁆𑀢𑀭𑀧𑀲𑁆𑀲𑀁 𑀲𑀼𑀯𑀡𑁆𑀡𑀫𑀬𑀁. 𑀘𑀢𑁆𑀢𑀸𑀭𑁄 𑀲𑀫𑀼𑀤𑁆𑀤𑀸𑀧𑀺 𑀲𑀺𑀦𑁂𑀭𑀼𑀭𑀲𑁆𑀫𑀻𑀳𑀺 𑀏𑀯 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀢𑀣𑀸 𑀳𑀺 𑀧𑀼𑀩𑁆𑀩𑀤𑀓𑁆𑀔𑀺𑀡𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀭𑀚𑀢𑀫𑀡𑀺𑀭𑀲𑁆𑀫𑀺𑀬𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀫𑀡𑀺𑀨𑀮𑀺𑀓𑀭𑀲𑁆𑀫𑀺𑀬𑁄, 𑀧𑀘𑁆𑀙𑀺𑀫𑀼𑀢𑁆𑀢𑀭𑀧𑀲𑁆𑀲𑁂𑀳𑀺 ¶ 𑀦𑀺𑀓𑁆𑀔𑀦𑁆𑀢𑀸 𑀨𑀮𑀺𑀓𑀲𑀼𑀯𑀡𑁆𑀡𑀭𑀲𑁆𑀫𑀺𑀬𑁄, 𑀉𑀢𑁆𑀢𑀭𑀧𑀸𑀘𑀻𑀦𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀲𑀼𑀯𑀡𑁆𑀡𑀭𑀚𑀢𑀭𑀲𑁆𑀫𑀺𑀬𑁄 𑀏𑀓𑀢𑁄 𑀳𑀼𑀢𑁆𑀯𑀸 ¶ 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀅𑀦𑁆𑀢𑀭𑁂𑀲𑀼 𑀘𑀢𑁆𑀢𑀸𑀭𑁄 𑀫𑀳𑀸𑀲𑀫𑀼𑀤𑁆𑀤𑀸 𑀳𑁄𑀦𑁆𑀢𑀺.

𑀢𑀢𑁄𑀢𑀺 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄. 𑀉𑀧𑀟𑁆𑀠𑀼𑀧𑀟𑁆𑀠𑁂𑀦𑀸𑀢𑀺 𑀉𑀧𑀟𑁆𑀠𑁂𑀦 𑀉𑀧𑀟𑁆𑀠𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀢𑀢𑁆𑀢𑀓𑀫𑁂𑀯 𑀉𑀧𑀭𑀺 𑀉𑀕𑁆𑀕𑀢𑁄 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁄, 𑀏𑀓𑀯𑀻𑀲𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄 𑀢𑀢𑁆𑀢𑀓𑀫𑁂𑀯 𑀘 𑀉𑀧𑀭𑀺 𑀉𑀕𑁆𑀕𑀢𑁄 𑀈𑀲𑀥𑀭𑁄 𑀧𑀩𑁆𑀩𑀢𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀉𑀧𑀟𑁆𑀠𑀼𑀧𑀟𑁆𑀠𑀧𑁆𑀧𑀫𑀸𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁄 𑀬𑀸𑀯 𑀘𑀓𑁆𑀓𑀯𑀸𑀴𑀧𑀸𑀤𑀫𑀽𑀮𑀸 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄, 𑀏𑀯𑀁 𑀬𑀸𑀯 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑀸𑀢𑀺 𑀳𑁂𑀝𑁆𑀞𑀸 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑁄𑀧𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁄 𑀧𑀣𑀯𑀺𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀏𑀯𑀁 𑀈𑀲𑀥𑀭𑀸𑀤𑀬𑁄𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄’’𑀢𑀺 (𑀘𑀽𑀴𑀯. 𑁧𑁮𑁪; 𑀉𑀤𑀸. 𑁪𑁫). 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀻𑀦𑀁 𑀅𑀦𑁆𑀢𑀭𑁂 𑀲𑀻𑀤𑀦𑁆𑀢𑀭𑀲𑀫𑀼𑀤𑁆𑀤𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀺𑀭 𑀉𑀤𑀓𑀁 𑀲𑀼𑀔𑀼𑀫𑀁 𑀫𑁄𑀭𑀧𑀢𑁆𑀢𑀫𑀢𑁆𑀢𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀲𑀻𑀤𑀢𑁂𑀯, 𑀢𑀲𑁆𑀫𑀸 𑀢𑁂 𑀲𑀻𑀤𑀲𑀫𑀼𑀤𑁆𑀤𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀬𑀣𑀸𑀓𑁆𑀓𑀫𑀁 𑀲𑀺𑀦𑁂𑀭𑀼𑀆𑀤𑀻𑀦𑀁 𑀅𑀘𑁆𑀘𑀼𑀕𑁆𑀕𑀫𑀲𑀫𑀸𑀦𑀧𑀅𑀫𑀸𑀡𑀸𑀢𑀺 𑀯𑀤𑀦𑁆𑀢𑀺. 𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸𑀢𑀺 𑀅𑀚𑁆𑀛𑁄𑀕𑀸𑀴𑁆𑀳𑀸 𑀘 𑀉𑀕𑁆𑀕𑀢𑀸 𑀘. 𑀩𑁆𑀭𑀳𑀸𑀢𑀺 𑀫𑀳𑀦𑁆𑀢𑀸.

𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄𑀢𑀺 𑀧𑀭𑀺𑀓𑁆𑀔𑀺𑀧𑀦𑀯𑀲𑁂𑀦 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄 𑀞𑀺𑀢𑀸. 𑀲𑀺𑀦𑁂𑀭𑀼𑀁 𑀢𑀸𑀯 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀬𑀼𑀕𑀦𑁆𑀥𑀭𑁄, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀈𑀲𑀥𑀭𑁄. 𑀏𑀯𑀁 𑀢𑀁 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸 ‘‘𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄’’𑀢𑀺 𑀯𑀼𑀢𑁆𑀢𑀸. 𑀓𑀢𑁆𑀣𑀘𑀺 𑀧𑀦 ‘‘𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀓𑀡𑁆𑀡𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀢𑀺𑀝𑁆𑀞𑀺𑀢𑁄, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀦𑀢𑀓𑁄 𑀦𑀸𑀫 𑀧𑀩𑁆𑀩𑀢𑁄’’𑀢𑀺 𑀏𑀯𑀁 𑀅𑀜𑁆𑀜𑁄𑀬𑁂𑀯 𑀅𑀦𑀼𑀓𑁆𑀓𑀫𑁄 𑀆𑀕𑀢𑁄. 𑀢𑀣𑀸 𑀳𑀺 𑀦𑀺𑀫𑀺𑀚𑀸𑀢𑀓𑁂 𑁋

‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀺𑀁, 𑀤𑀺𑀩𑁆𑀩𑀬𑀸𑀦𑀫𑀥𑀺𑀝𑁆𑀞𑀺𑀢𑁄;

𑀬𑀸𑀬𑀫𑀸𑀦𑁄 𑀫𑀳𑀸𑀭𑀸𑀚𑀸, 𑀅𑀤𑁆𑀤𑀸 𑀲𑀻𑀤𑀦𑁆𑀢𑀭𑁂 𑀦𑀕𑁂;

𑀤𑀺𑀲𑁆𑀯𑀸𑀦𑀸𑀫𑀦𑁆𑀢𑀬𑀻 𑀲𑀽𑀢𑀁, 𑀇𑀫𑁂 𑀓𑁂 𑀦𑀸𑀫 𑀧𑀩𑁆𑀩𑀢𑀸’’𑀢𑀺. (𑀚𑀸. 𑁨.𑁨𑁨.𑁫𑁬𑁬)

𑀏𑀯𑀁 ¶ 𑀦𑀺𑀫𑀺𑀫𑀳𑀸𑀭𑀸𑀚𑁂𑀦 𑀧𑀼𑀝𑁆𑀞𑁂𑀦 𑀫𑀸𑀢𑀮𑀺𑀤𑁂𑀯𑀧𑀼𑀢𑁆𑀢𑁂𑀦 𑁋

‘‘𑀲𑀼𑀤𑀲𑁆𑀲𑀦𑁄 𑀓𑀭𑀯𑀻𑀓𑁄, 𑀈𑀲𑀥𑀭𑁄 𑀬𑀼𑀕𑀦𑁆𑀥𑀭𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀻 𑀩𑁆𑀭𑀳𑀸.

‘‘𑀏𑀢𑁂 ¶ 𑀲𑀻𑀤𑀦𑁆𑀢𑀭𑁂 𑀦𑀕𑀸, 𑀅𑀦𑀼𑀧𑀼𑀩𑁆𑀩𑀲𑀫𑀼𑀕𑁆𑀕𑀢𑀸;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸, 𑀬𑀸𑀦𑀺 𑀢𑁆𑀯𑀁 𑀭𑀸𑀚 𑀧𑀲𑁆𑀲𑀲𑀻’’𑀢𑀺. (𑀚𑀸. 𑁨.𑁨𑁨.𑁫𑁬𑁮-𑁫𑁬𑁯)

𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀅𑀬𑀁, 𑀫𑀳𑀸𑀭𑀸𑀚, 𑀏𑀢𑁂𑀲𑀁 𑀲𑀩𑁆𑀩𑀩𑀸𑀳𑀺𑀭𑁄 𑀲𑀼𑀤𑀲𑁆𑀲𑀦𑁄 𑀧𑀩𑁆𑀩𑀢𑁄 𑀦𑀸𑀫, 𑀢𑀤𑀦𑀦𑁆𑀢𑀭𑁂 𑀓𑀭𑀯𑀻𑀓𑁄 𑀦𑀸𑀫, 𑀲𑁄 𑀲𑀼𑀤𑀲𑁆𑀲𑀦𑀢𑁄 𑀉𑀘𑁆𑀘𑀢𑀭𑁄. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄𑀧𑀺 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀓𑀭𑀯𑀻𑀓𑀲𑁆𑀲 𑀅𑀦𑀦𑁆𑀢𑀭𑁂 𑀈𑀲𑀥𑀭𑁄 𑀦𑀸𑀫, 𑀲𑁄 𑀓𑀭𑀯𑀻𑀓𑀢𑁄 𑀉𑀘𑁆𑀘𑀢𑀭𑁄. 𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑁄 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀈𑀲𑀥𑀭𑀲𑁆𑀲 𑀅𑀦𑀦𑁆𑀢𑀭𑁂 𑀬𑀼𑀕𑀦𑁆𑀥𑀭𑁄 𑀦𑀸𑀫, 𑀲𑁄 𑀈𑀲𑀥𑀭𑀢𑁄 𑀉𑀘𑁆𑀘𑀢𑀭𑁄. 𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑁄 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀬𑀼𑀕𑀦𑁆𑀥𑀭𑀲𑁆𑀲 𑀅𑀦𑀦𑁆𑀢𑀭𑁂 𑀦𑁂𑀫𑀺𑀦𑁆𑀥𑀭𑁄 𑀦𑀸𑀫, 𑀲𑁄 𑀬𑀼𑀕𑀦𑁆𑀥𑀭𑀢𑁄 𑀉𑀘𑁆𑀘𑀢𑀭𑁄. 𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑁄 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀦𑁂𑀫𑀺𑀦𑁆𑀥𑀭𑀲𑁆𑀲 𑀅𑀦𑀦𑁆𑀢𑀭𑁂 𑀯𑀺𑀦𑀢𑀓𑁄 𑀦𑀸𑀫, 𑀲𑁄 𑀦𑁂𑀫𑀺𑀦𑁆𑀥𑀭𑀢𑁄 𑀉𑀘𑁆𑀘𑀢𑀭𑁄. 𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑁄 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀯𑀺𑀦𑀢𑀓𑀲𑁆𑀲 𑀅𑀦𑀦𑁆𑀢𑀭𑁂 𑀅𑀲𑁆𑀲𑀓𑀡𑁆𑀡𑁄 𑀦𑀸𑀫, 𑀲𑁄 𑀯𑀺𑀦𑀢𑀓𑀢𑁄 𑀉𑀘𑁆𑀘𑀢𑀭𑁄. 𑀢𑁂𑀲𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑁄 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄. 𑀏𑀢𑁂 𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁂 𑀲𑀢𑁆𑀢 𑀧𑀩𑁆𑀩𑀢𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀼𑀕𑁆𑀕𑀢𑀸 𑀲𑁄𑀧𑀸𑀦𑀲𑀤𑀺𑀲𑀸 𑀳𑀼𑀢𑁆𑀯𑀸 𑀞𑀺𑀢𑀸’’𑀢𑀺 (𑀚𑀸. 𑀅𑀝𑁆𑀞. 𑁬.𑁨𑁨.𑁫𑁬𑁯).

𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄𑀢𑀺 𑀳𑀺𑀫𑀯𑀸 𑀧𑀩𑁆𑀩𑀢𑁄 𑀧𑀜𑁆𑀘 𑀬𑁄𑀚𑀦𑀲𑀢𑀸𑀦𑀺 𑀉𑀘𑁆𑀘𑁄, 𑀉𑀩𑁆𑀩𑁂𑀥𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑀺𑀫𑀯𑀸𑀢𑀺 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑀬𑀼𑀢𑁆𑀢𑀢𑀸𑀬 𑀳𑀺𑀫𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀺𑀫𑀯𑀸, 𑀕𑀺𑀫𑁆𑀳𑀓𑀸𑀮𑁂 𑀳𑀺𑀫𑀁 𑀯𑀫𑀢𑀻𑀢𑀺 𑀳𑀺𑀫𑀯𑀸. 𑀧𑀩𑁆𑀩𑀢𑁄𑀢𑀺 𑀲𑁂𑀮𑁄. 𑀲𑁂𑀮𑁄 𑀳𑀺 𑀲𑀦𑁆𑀥𑀺𑀲𑀗𑁆𑀔𑀸𑀢𑁂𑀳𑀺 𑀧𑀩𑁆𑀩𑁂𑀳𑀺 𑀲𑀳𑀺𑀢𑀢𑁆𑀢𑀸 ‘‘𑀧𑀩𑁆𑀩𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀧𑀲𑀯𑀦𑀸𑀤𑀺𑀯𑀲𑁂𑀦 𑀚𑀮𑀲𑁆𑀲 𑀲𑀸𑀭𑀪𑀽𑀢𑀸𑀦𑀁 𑀪𑁂𑀲𑀚𑁆𑀚𑀸𑀤𑀻𑀦𑀁 𑀯𑀢𑁆𑀣𑀽𑀦𑀜𑁆𑀘 𑀕𑀺𑀭𑀡𑀢𑁄 ‘‘𑀕𑀺𑀭𑀻’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄𑀢𑀺 𑀬𑁄𑀚𑀦𑀸𑀦𑀁 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑀢𑁄 ¶ 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺 𑀅𑀢𑁆𑀣𑁄, 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀢𑀻𑀡𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀲𑀼𑀤𑀲𑁆𑀲𑀦𑀓𑀽𑀝𑀘𑀺𑀢𑁆𑀭𑀓𑀽𑀝𑀸𑀤𑀻𑀳𑀺 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀲𑀳𑀲𑁆𑀲𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄, 𑀲𑁄𑀪𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘𑁂𑀢𑁆𑀣 𑀅𑀯𑀼𑀢𑁆𑀢𑁄𑀧𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 (𑀫. 𑀦𑀺. 𑀅𑀝𑁆𑀞. 𑁨.𑁩𑁧; 𑀅. 𑀦𑀺. 𑀅𑀝𑁆𑀞. 𑁩.𑁮.𑁧𑁯; 𑀲𑀼. 𑀦𑀺. 𑀅𑀝𑁆𑀞. 𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸) 𑁋 𑀅𑀬𑀁 ¶ 𑀳𑀺𑀫𑀯𑀸 𑀦𑀸𑀫 𑀧𑀩𑁆𑀩𑀢𑁄 𑀲𑀫𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀧𑀜𑁆𑀘𑀲𑀢𑀦𑀤𑀻𑀯𑀺𑀘𑀺𑀢𑁆𑀢𑁄, 𑀬𑀢𑁆𑀣 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀦 𑀘𑁂𑀯 𑀕𑀫𑁆𑀪𑀻𑀭𑀢𑀸𑀬 𑀘 𑀧𑀡𑁆𑀡𑀸𑀲 𑀧𑀡𑁆𑀡𑀸𑀲 𑀬𑁄𑀚𑀦𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸 𑀅𑀦𑁄𑀢𑀢𑁆𑀢𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄 𑀫𑀦𑁆𑀤𑀸𑀓𑀺𑀦𑀻𑀤𑀳𑁄 𑀲𑀻𑀳𑀧𑁆𑀧𑀧𑀸𑀢𑀤𑀳𑁄𑀢𑀺 𑀲𑀢𑁆𑀢 𑀫𑀳𑀸𑀲𑀭𑀸 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀲𑀼 𑀅𑀦𑁄𑀢𑀢𑁆𑀢𑁄 𑀲𑀼𑀤𑀲𑁆𑀲𑀦𑀓𑀽𑀝𑀁 𑀘𑀺𑀢𑁆𑀭𑀓𑀽𑀝𑀁 𑀓𑀸𑀴𑀓𑀽𑀝𑀁 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀓𑁂𑀮𑀸𑀲𑀓𑀽𑀝𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀲𑀼𑀤𑀲𑁆𑀲𑀦𑀓𑀽𑀝𑀁 𑀲𑁄𑀯𑀡𑁆𑀡𑀫𑀬𑀁 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀅𑀦𑁆𑀢𑁄𑀯𑀗𑁆𑀓𑀁 𑀓𑀸𑀓𑀫𑀼𑀔𑀲𑀡𑁆𑀞𑀸𑀦𑀁 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁. 𑀘𑀺𑀢𑁆𑀭𑀓𑀽𑀝𑀁 𑀲𑀩𑁆𑀩𑀭𑀢𑀦𑀫𑀬𑀁. 𑀓𑀸𑀴𑀓𑀽𑀝𑀁 𑀅𑀜𑁆𑀚𑀦𑀫𑀬𑀁. 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀲𑀸𑀦𑀼𑀫𑀬𑀁 𑀅𑀩𑁆𑀪𑀦𑁆𑀢𑀭𑁂 𑀫𑀼𑀕𑁆𑀕𑀯𑀡𑁆𑀡𑀁 𑀓𑀸𑀴𑀸𑀦𑀼𑀲𑀸𑀭𑀺𑀬𑀸𑀤𑀺𑀫𑀽𑀮𑀕𑀦𑁆𑀥𑁄 𑀘𑀦𑁆𑀤𑀦𑀸𑀤𑀺𑀲𑀸𑀭𑀕𑀦𑁆𑀥𑁄 𑀲𑀭𑀮𑀸𑀤𑀺𑀨𑁂𑀕𑁆𑀕𑀼𑀕𑀦𑁆𑀥𑁄 𑀮𑀯𑀗𑁆𑀕𑀸𑀤𑀺𑀢𑀘𑀕𑀦𑁆𑀥𑁄 𑀓𑀧𑀺𑀝𑁆𑀞𑀸𑀤𑀺𑀧𑀧𑀝𑀺𑀓𑀕𑀦𑁆𑀥𑁄 𑀲𑀚𑁆𑀚𑀸𑀤𑀺𑀭𑀲𑀕𑀦𑁆𑀥𑁄 𑀢𑀫𑀸𑀮𑀸𑀤𑀺𑀧𑀢𑁆𑀢𑀕𑀦𑁆𑀥𑁄 𑀦𑀸𑀕𑀓𑀼𑀗𑁆𑀓𑀼𑀫𑀸𑀤𑀺𑀧𑀼𑀧𑁆𑀨𑀕𑀦𑁆𑀥𑁄 𑀚𑀸𑀢𑀺𑀨𑀮𑀸𑀤𑀺𑀨𑀮𑀕𑀦𑁆𑀥𑁄 𑀲𑀩𑁆𑀩𑀣𑀸 𑀕𑀦𑁆𑀥𑀪𑀸𑀯𑀢𑁄 𑀕𑀦𑁆𑀥𑀕𑀦𑁆𑀥𑁄𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀕𑀦𑁆𑀥𑁂𑀳𑀺 𑀉𑀲𑁆𑀲𑀦𑁆𑀦𑀁 𑀦𑀸𑀦𑀧𑁆𑀧𑀓𑀸𑀭𑀑𑀲𑀥𑀲𑀜𑁆𑀙𑀦𑁆𑀦𑀁 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀆𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀚𑀮𑀦𑁆𑀢𑀁 𑀢𑀺𑀝𑁆𑀞𑀢𑀺.

𑀢𑀢𑁆𑀣𑁂𑀯 𑀦𑀦𑁆𑀤𑀫𑀽𑀮𑀓𑀁 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁫) 𑀦𑀸𑀫 𑀧𑀩𑁆𑀪𑀸𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑁄𑀓𑀸𑀲𑁄. 𑀢𑀺𑀲𑁆𑀲𑁄 𑀕𑀼𑀳𑀸𑀬𑁄 𑀲𑀼𑀯𑀡𑁆𑀡𑀕𑀼𑀳𑀸 𑀫𑀡𑀺𑀕𑀼𑀳𑀸 𑀭𑀚𑀢𑀕𑀼𑀳𑀸𑀢𑀺. 𑀢𑀢𑁆𑀣 𑀫𑀡𑀺𑀕𑀼𑀳𑀸𑀤𑁆𑀯𑀸𑀭𑁂 𑀫𑀜𑁆𑀚𑀽𑀲𑀓𑁄 𑀦𑀸𑀫 𑀭𑀼𑀓𑁆𑀔𑁄 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦, 𑀲𑁄 𑀬𑀢𑁆𑀢𑀓𑀸𑀦𑀺 𑀉𑀤𑀓𑁂 𑀯𑀸 𑀣𑀮𑁂 𑀯𑀸 𑀧𑀼𑀧𑁆𑀨𑀸𑀦𑀺, 𑀲𑀩𑁆𑀩𑀸𑀦𑀺 𑀧𑀼𑀧𑁆𑀨𑀢𑀺 𑀯𑀺𑀲𑁂𑀲𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀕𑀫𑀦𑀤𑀺𑀯𑀲𑁂, 𑀢𑀲𑁆𑀲𑀽𑀧𑀭𑀺𑀢𑁄 𑀲𑀩𑁆𑀩𑀭𑀢𑀦𑀫𑀸𑀴𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀲𑀫𑀓𑀭𑀡𑀯𑀸𑀢𑁄 𑀲𑀩𑁆𑀩𑀭𑀢𑀦𑀫𑀬𑀁 𑀯𑀸𑀮𑀺𑀓𑀁 𑀲𑀫𑀁 𑀓𑀭𑁄𑀢𑀺, 𑀲𑀺𑀜𑁆𑀘𑀦𑀓𑀯𑀸𑀢𑁄 𑀅𑀦𑁄𑀢𑀢𑁆𑀢𑀤𑀳𑀢𑁄 𑀆𑀦𑁂𑀢𑁆𑀯𑀸 𑀉𑀤𑀓𑀁 𑀲𑀺𑀜𑁆𑀘𑀢𑀺, 𑀲𑀼𑀕𑀦𑁆𑀥𑀓𑀭𑀡𑀯𑀸𑀢𑁄 𑀲𑀩𑁆𑀩𑁂𑀲𑀁 𑀕𑀦𑁆𑀥𑀭𑀼𑀓𑁆𑀔𑀸𑀦𑀁 𑀕𑀦𑁆𑀥𑁂 𑀆𑀦𑁂𑀢𑀺, 𑀑𑀘𑀺𑀦𑀓𑀯𑀸𑀢𑁄 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀲𑀦𑁆𑀣𑀭𑀡𑀓𑀯𑀸𑀢𑁄 𑀲𑀩𑁆𑀩𑀢𑁆𑀣 𑀲𑀦𑁆𑀣𑀭𑀢𑀺, 𑀲𑀤𑀸 𑀧𑀜𑁆𑀜𑀢𑁆𑀢𑀸𑀦𑁂𑀯 𑀘𑁂𑀢𑁆𑀣 𑀆𑀲𑀦𑀸𑀦𑀺 𑀳𑁄𑀦𑁆𑀢𑀺. 𑀬𑁂𑀲𑀼 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑀼𑀧𑁆𑀧𑀸𑀤𑀤𑀺𑀯𑀲𑁂 𑀉𑀧𑁄𑀲𑀣𑀤𑀺𑀯𑀲𑁂 𑀘 𑀲𑀩𑁆𑀩𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀅𑀬𑀁 𑀢𑀢𑁆𑀣 𑀧𑀓𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀢𑀺. 𑀢𑀢𑁄 𑀲𑀘𑁂 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀜𑁆𑀜𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑁂𑀧𑀺 𑀢𑀗𑁆𑀔𑀡𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀦𑁆𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑀺. 𑀢𑀢𑁄 𑀲𑀗𑁆𑀖𑀢𑁆𑀣𑁂𑀭𑁄 𑀅𑀥𑀼𑀦𑀸𑀕𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀩𑁆𑀩𑁂𑀲𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 ‘‘𑀓𑀣𑀫𑀥𑀺𑀕𑀢’’𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀢𑀤𑀸 𑀲𑁄 𑀅𑀢𑁆𑀢𑀦𑁄 𑀉𑀤𑀸𑀦𑀩𑁆𑀬𑀸𑀓𑀭𑀡𑀕𑀸𑀣𑀁 𑀪𑀸𑀲𑀢𑀺. 𑀏𑀯𑀫𑀺𑀤𑀁 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀯𑀸𑀲𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀮𑀸𑀲𑀓𑀽𑀝𑀁 𑀧𑀦 𑀭𑀚𑀢𑀫𑀬𑀁. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀘𑀺𑀢𑁆𑀭𑀓𑀽𑀝𑀸𑀤𑀻𑀦𑀺 𑀲𑀼𑀤𑀲𑁆𑀲𑀦𑁂𑀦 𑀲𑀫𑀸𑀦𑀼𑀩𑁆𑀩𑁂𑀥𑀲𑀡𑁆𑀞𑀸𑀦𑀸𑀦𑀺 ¶ 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀧𑀦 𑀧𑀼𑀣𑀼𑀮𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺, 𑀆𑀬𑀸𑀫𑀢𑁄 𑀧𑀦 𑀉𑀩𑁆𑀩𑁂𑀥𑀢𑁄 𑀯𑀺𑀬 𑀤𑁆𑀯𑀺𑀬𑁄𑀚𑀦𑀲𑀢𑀸𑀦𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀪𑀸𑀯𑁂𑀦 𑀘 𑀞𑀲𑁆𑀲𑀦𑁆𑀢𑀺, 𑀦𑀤𑀺𑀬𑁄 𑀘 𑀢𑁂𑀲𑀼 𑀲𑀦𑁆𑀤𑀦𑁆𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑀓𑀁 𑀅𑀦𑁄𑀢𑀢𑁆𑀢𑀫𑁂𑀯 𑀧𑀯𑀺𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀢𑁆𑀣 𑀑𑀪𑀸𑀲𑀁 𑀓𑀭𑁄𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀓𑀭𑁄𑀦𑁆𑀢𑀺, 𑀢𑁂𑀦𑁂𑀯𑀲𑁆𑀲 ‘‘𑀅𑀦𑁄𑀢𑀢𑁆𑀢’’𑀦𑁆𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺. 𑀢𑀢𑁆𑀣 𑀭𑀢𑀦𑀫𑀬𑀫𑀦𑀼𑀜𑁆𑀜𑀲𑁄𑀧𑀸𑀦𑀲𑀺𑀮𑀸𑀢𑀮𑀸𑀦𑀺 𑀦𑀺𑀫𑁆𑀫𑀘𑁆𑀙𑀓𑀘𑁆𑀙𑀧𑀸𑀦𑀺 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑀽𑀤𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀢𑀤𑀼𑀧𑀪𑁄𑀕𑀻𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀼𑀦𑀸𑀯 𑀲𑀼𑀧𑁆𑀧𑀝𑀺𑀬𑀢𑁆𑀢𑀸𑀦𑀺 𑀲𑀼𑀲𑀡𑁆𑀞𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀘 𑀇𑀤𑁆𑀥𑀺𑀫𑀦𑁆𑀢𑁄 𑀘 𑀇𑀲𑀬𑁄 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀬𑀓𑁆𑀔𑀸𑀤𑀬𑁄 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑀺.

𑀢𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀻𑀳𑀫𑀼𑀔𑀁 𑀳𑀢𑁆𑀣𑀺𑀫𑀼𑀔𑀁 𑀅𑀲𑁆𑀲𑀫𑀼𑀔𑀁 𑀉𑀲𑀪𑀫𑀼𑀔𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀘𑀢𑀲𑁆𑀲𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀲𑀻𑀳𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀦𑀤𑀻𑀢𑀻𑀭𑁂 𑀲𑀻𑀳𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀫𑀼𑀔𑀸𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀸. 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀅𑀦𑁄𑀢𑀢𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀦𑀤𑀺𑀬𑁄 𑀅𑀦𑀼𑀧𑀕𑀫𑁆𑀫 𑀧𑀸𑀘𑀻𑀦𑀳𑀺𑀫𑀯𑀦𑁆𑀢𑁂𑀦𑁂𑀯 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺. 𑀧𑀘𑁆𑀙𑀺𑀫𑀤𑀺𑀲𑀢𑁄 𑀘 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀦𑀤𑀺𑀬𑁄𑀧𑀺 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀳𑀺𑀫𑀯𑀦𑁆𑀢𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂𑀦𑁂𑀯 𑀘 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀤𑀓𑁆𑀔𑀺𑀡𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀦 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦𑁂𑀯 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑁆𑀔𑁂𑀧𑁂𑀦 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀺𑀬𑀕𑁆𑀕𑀴𑁂 𑀦𑀸𑀫 𑀧𑀸𑀲𑀸𑀡𑁂 ¶ 𑀧𑀢𑀺𑀢𑀸, 𑀧𑀸𑀲𑀸𑀡𑁄 𑀉𑀤𑀓𑀥𑀸𑀭𑀸𑀯𑁂𑀕𑁂𑀦 𑀪𑀺𑀦𑁆𑀦𑁄. 𑀢𑀢𑁆𑀣 𑀧𑀜𑁆𑀜𑀸𑀲𑀬𑁄𑀚𑀦𑀧𑁆𑀧𑀫𑀸𑀡𑀸 𑀢𑀺𑀬𑀕𑁆𑀕𑀴𑀸 𑀦𑀸𑀫 𑀫𑀳𑀸𑀧𑁄𑀓𑁆𑀔𑀭𑀡𑀻 𑀚𑀸𑀢𑀸, 𑀫𑀳𑀸𑀧𑁄𑀓𑁆𑀔𑀭𑀡𑀺𑀬𑀸 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀸, 𑀢𑀢𑁄 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀯𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀜𑁆𑀘𑀗𑁆𑀕𑀼𑀮𑀺𑀲𑀤𑀺𑀲𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑁄𑀢𑀢𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 ‘‘𑀆𑀯𑀝𑁆𑀝𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺, 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀓𑀡𑁆𑀳𑀕𑀗𑁆𑀕𑀸’’𑀢𑀺, 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀆𑀓𑀸𑀲𑀕𑀗𑁆𑀕𑀸’’𑀢𑀺, 𑀢𑀺𑀬𑀕𑁆𑀕𑀴𑀧𑀸𑀲𑀸𑀡𑁂 𑀧𑀜𑁆𑀜𑀸𑀲𑀬𑁄𑀚𑀦𑁄𑀓𑀸𑀲𑁂 𑀞𑀺𑀢𑀸 ‘‘𑀢𑀺𑀬𑀕𑁆𑀕𑀴𑀧𑁄𑀓𑁆𑀔𑀭𑀡𑀻’’𑀢𑀺, 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀩𑀳𑀮𑀕𑀗𑁆𑀕𑀸’’𑀢𑀺, 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀉𑀫𑀗𑁆𑀕𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀝𑁆𑀞𑀸𑀦𑁂 𑀧𑀦 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻𑀢𑀺 𑀧𑀜𑁆𑀘𑀥𑀸 𑀲𑀗𑁆𑀔𑁆𑀬𑀁 𑀕𑀢𑀸. 𑀏𑀯𑀫𑁂𑀢𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀳𑀺𑀫𑀯𑀦𑁆𑀢𑀢𑁄 𑀧𑀪𑀯𑀦𑁆𑀢𑀺.

𑀙𑀤𑁆𑀤𑀦𑁆𑀢𑀤𑀳𑀲𑁆𑀲 ¶ 𑀧𑀦 (𑀚𑀸. 𑀅𑀝𑁆𑀞. 𑁫.𑁧𑁬.𑀙𑀤𑁆𑀤𑀦𑁆𑀢𑀚𑀸𑀢𑀓𑀯𑀡𑁆𑀡𑀦𑀸) 𑀫𑀚𑁆𑀛𑁂 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀞𑀸𑀦𑁂 𑀲𑁂𑀯𑀸𑀮𑁄 𑀯𑀸 𑀧𑀡𑀓𑀁 𑀯𑀸 𑀦𑀢𑁆𑀣𑀺, 𑀫𑀡𑀺𑀓𑁆𑀔𑀦𑁆𑀥𑀯𑀡𑁆𑀡𑀁 𑀉𑀤𑀓𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀤𑀦𑀦𑁆𑀢𑀭𑀁 𑀬𑁄𑀚𑀦𑀯𑀺𑀢𑁆𑀣𑀢𑀁 𑀲𑀼𑀤𑁆𑀥𑀓𑀮𑁆𑀮𑀳𑀸𑀭𑀯𑀦𑀁 𑀢𑀁 𑀉𑀤𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁, 𑀢𑀤𑀦𑀦𑁆𑀢𑀭𑀁 𑀬𑁄𑀚𑀦𑀯𑀺𑀢𑁆𑀣𑀢𑀫𑁂𑀯 𑀲𑀼𑀤𑁆𑀥𑀦𑀻𑀮𑀼𑀧𑁆𑀧𑀮𑀯𑀦𑀁 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁, 𑀬𑁄𑀚𑀦𑀬𑁄𑀚𑀦𑀯𑀺𑀢𑁆𑀣𑀢𑀸𑀦𑁂𑀯 𑀭𑀢𑁆𑀢𑀼𑀧𑁆𑀧𑀮𑀲𑁂𑀢𑀼𑀧𑁆𑀧𑀮𑀭𑀢𑁆𑀢𑀧𑀤𑀼𑀫𑀲𑁂𑀢𑀧𑀤𑀼𑀫𑀓𑀼𑀫𑀼𑀤𑀯𑀦𑀸𑀦𑀺 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸𑀦𑀺, 𑀇𑀫𑁂𑀲𑀁 𑀧𑀦 𑀲𑀢𑁆𑀢𑀦𑁆𑀦𑀁 𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀲𑀩𑁆𑀩𑁂𑀲𑀫𑁆𑀧𑀺 𑀓𑀮𑁆𑀮𑀳𑀸𑀭𑀸𑀤𑀻𑀦𑀁 𑀯𑀲𑁂𑀦 𑀯𑁄𑀫𑀺𑀲𑁆𑀲𑀓𑀯𑀦𑀁 𑀬𑁄𑀚𑀦𑀯𑀺𑀢𑁆𑀣𑀢𑀫𑁂𑀯 𑀢𑀸𑀦𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁, 𑀢𑀤𑀦𑀦𑁆𑀢𑀭𑀁 𑀦𑀸𑀕𑀸𑀦𑀁 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀬𑁄𑀚𑀦𑀯𑀺𑀢𑁆𑀣𑀢𑀫𑁂𑀯 𑀭𑀢𑁆𑀢𑀲𑀸𑀮𑀺𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀉𑀤𑀓𑀧𑀭𑀺𑀬𑀦𑁆𑀢𑁂 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀲𑀼𑀭𑀪𑀺𑀲𑀼𑀔𑀼𑀫𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀁 𑀔𑀼𑀤𑁆𑀤𑀓𑀕𑀘𑁆𑀙𑀯𑀦𑀦𑁆𑀢𑀺 𑀇𑀫𑀸𑀦𑀺 𑀤𑀲 𑀯𑀦𑀸𑀦𑀺 𑀬𑁄𑀚𑀦𑀬𑁄𑀚𑀦𑀯𑀺𑀢𑁆𑀣𑀢𑀸𑀦𑁂𑀯. 𑀢𑀢𑁄 𑀔𑀼𑀤𑁆𑀤𑀓𑀭𑀸𑀚𑀫𑀸𑀲𑀫𑀳𑀸𑀭𑀸𑀚𑀫𑀸𑀲𑀫𑀼𑀕𑁆𑀕𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀢𑀺𑀧𑀼𑀲𑀏𑀴𑀸𑀮𑀼𑀓𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀯𑀮𑁆𑀮𑀺𑀯𑀦𑀸𑀦𑀺, 𑀢𑀢𑁄 𑀧𑀽𑀕𑀭𑀼𑀓𑁆𑀔𑀧𑁆𑀧𑀫𑀸𑀡𑀁 𑀉𑀘𑁆𑀙𑀼𑀯𑀦𑀁, 𑀢𑀢𑁄 𑀳𑀢𑁆𑀣𑀺𑀤𑀦𑁆𑀢𑀧𑁆𑀧𑀫𑀸𑀡𑀨𑀮𑀁 𑀓𑀤𑀮𑀺𑀯𑀦𑀁, 𑀢𑀢𑁄 𑀲𑀸𑀮𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀘𑀸𑀝𑀺𑀧𑁆𑀧𑀫𑀸𑀡𑀨𑀮𑀁 𑀧𑀦𑀲𑀯𑀦𑀁, 𑀢𑀢𑁄 𑀫𑀥𑀼𑀭𑀨𑀮𑀁 𑀅𑀫𑁆𑀩𑀯𑀦𑀁, 𑀢𑀢𑁄 𑀘𑀺𑀜𑁆𑀘𑀯𑀦𑀁, 𑀢𑀢𑁄 𑀓𑀧𑀺𑀝𑁆𑀞𑀯𑀦𑀁, 𑀢𑀢𑁄 𑀯𑁄𑀫𑀺𑀲𑁆𑀲𑀓𑁄 𑀫𑀳𑀸𑀯𑀦𑀲𑀡𑁆𑀟𑁄, 𑀢𑀢𑁄 𑀯𑁂𑀡𑀼𑀯𑀦𑀁, 𑀯𑁂𑀡𑀼𑀯𑀦𑀁 𑀧𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢 ¶ 𑀧𑀩𑁆𑀩𑀢𑀸 𑀞𑀺𑀢𑀸, 𑀢𑁂𑀲𑀁 𑀩𑀸𑀳𑀺𑀭𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀞𑀫𑁄 𑀘𑀽𑀴𑀓𑀸𑀴𑀧𑀩𑁆𑀩𑀢𑁄 𑀦𑀸𑀫, 𑀤𑀼𑀢𑀺𑀬𑁄 𑀫𑀳𑀸𑀓𑀸𑀴𑀧𑀩𑁆𑀩𑀢𑁄 𑀦𑀸𑀫, 𑀢𑀢𑁄 𑀉𑀤𑀓𑀧𑀲𑁆𑀲𑀧𑀩𑁆𑀩𑀢𑁄 𑀦𑀸𑀫, 𑀢𑀢𑁄 𑀘𑀦𑁆𑀤𑀧𑀲𑁆𑀲𑀧𑀩𑁆𑀩𑀢𑁄 𑀦𑀸𑀫, 𑀢𑀢𑁄 𑀲𑀽𑀭𑀺𑀬𑀧𑀲𑁆𑀲𑀧𑀩𑁆𑀩𑀢𑁄 𑀦𑀸𑀫, 𑀢𑀢𑁄 𑀫𑀡𑀺𑀧𑀲𑁆𑀲𑀧𑀩𑁆𑀩𑀢𑁄 𑀦𑀸𑀫, 𑀲𑀢𑁆𑀢𑀫𑁄 𑀲𑀼𑀯𑀡𑁆𑀡𑀧𑀲𑁆𑀲𑀧𑀩𑁆𑀩𑀢𑁄 𑀦𑀸𑀫. 𑀲𑁄 𑀉𑀩𑁆𑀩𑁂𑀥𑀢𑁄 𑀲𑀢𑁆𑀢𑀬𑁄𑀚𑀦𑀺𑀓𑁄 𑀙𑀤𑁆𑀤𑀦𑁆𑀢𑀤𑀳𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺 𑀯𑀺𑀬 𑀞𑀺𑀢𑁄. 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀺𑀫𑀧𑀲𑁆𑀲𑀁 𑀲𑀼𑀯𑀡𑁆𑀡𑀯𑀡𑁆𑀡𑀁, 𑀢𑀢𑁄 𑀦𑀺𑀓𑁆𑀔𑀦𑁆𑀢𑁂𑀦 𑀑𑀪𑀸𑀲𑁂𑀦 𑀙𑀤𑁆𑀤𑀦𑁆𑀢𑀤𑀳𑁄 𑀲𑀫𑀼𑀕𑁆𑀕𑀢𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀳𑁄𑀢𑀺. 𑀩𑀸𑀳𑀺𑀭𑀺𑀫𑀧𑀩𑁆𑀩𑀢𑁂𑀲𑀼 𑀧𑀦 𑀏𑀓𑁄 𑀉𑀩𑁆𑀩𑁂𑀥𑀢𑁄 𑀙 𑀬𑁄𑀚𑀦𑀸𑀦𑀺, 𑀏𑀓𑁄 𑀧𑀜𑁆𑀘, 𑀏𑀓𑁄 𑀘𑀢𑁆𑀢𑀸𑀭𑀺, 𑀏𑀓𑁄 𑀢𑀻𑀡𑀺, 𑀏𑀓𑁄 𑀤𑁆𑀯𑁂, 𑀏𑀓𑁄 𑀬𑁄𑀚𑀦𑀁.

𑀏𑀯𑀁 𑀲𑀢𑁆𑀢𑀧𑀩𑁆𑀩𑀢𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀢𑀲𑁆𑀲 𑀤𑀳𑀲𑁆𑀲 𑀧𑀼𑀩𑁆𑀩𑀼𑀢𑁆𑀢𑀭𑀓𑀡𑁆𑀡𑁂 𑀉𑀤𑀓𑀯𑀸𑀢𑀧𑁆𑀧𑀳𑀭𑀡𑁄𑀓𑀸𑀲𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄, 𑀢𑀲𑁆𑀲 𑀔𑀦𑁆𑀥𑁄 𑀧𑀭𑀺𑀓𑁆𑀔𑁂𑀧𑀢𑁄 𑀧𑀜𑁆𑀘𑀬𑁄𑀚𑀦𑀺𑀓𑁄, 𑀉𑀩𑁆𑀩𑁂𑀥𑀢𑁄 𑀲𑀢𑁆𑀢𑀬𑁄𑀚𑀦𑀺𑀓𑁄. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀲𑁆𑀲𑁄 𑀲𑀸𑀔𑀸𑀬𑁄 𑀙𑀙𑀬𑁄𑀚𑀦𑀺𑀓𑀸, 𑀉𑀤𑁆𑀥𑀁 𑀉𑀕𑁆𑀕𑀢𑀲𑀸𑀔𑀸𑀧𑀺 𑀙𑀬𑁄𑀚𑀦𑀺𑀓𑀸𑀯. 𑀇𑀢𑀺 𑀲𑁄 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀉𑀩𑁆𑀩𑁂𑀥𑁂𑀦 𑀢𑁂𑀭𑀲𑀬𑁄𑀚𑀦𑀺𑀓𑁄 𑀲𑀸𑀔𑀸𑀦𑀁 𑀑𑀭𑀺𑀫𑀦𑁆𑀢𑀢𑁄 𑀬𑀸𑀯 𑀧𑀸𑀭𑀺𑀫𑀦𑁆𑀢𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀅𑀝𑁆𑀞𑀳𑀺 𑀧𑀸𑀭𑁄𑀳𑀲𑀳𑀲𑁆𑀲𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀫𑀼𑀡𑁆𑀟𑀫𑀡𑀺𑀧𑀩𑁆𑀩𑀢𑁄 𑀯𑀺𑀬 𑀯𑀺𑀮𑀸𑀲𑀫𑀸𑀦𑁄 𑀢𑀺𑀝𑁆𑀞𑀢𑀺. 𑀙𑀤𑁆𑀤𑀦𑁆𑀢𑀤𑀳𑀲𑁆𑀲 𑀧𑀦 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀲𑀼𑀯𑀡𑁆𑀡𑀧𑀩𑁆𑀩𑀢𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀓𑀜𑁆𑀘𑀦𑀕𑀼𑀳𑀸. 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀯𑀲𑁆𑀲𑀸𑀭𑀢𑁆𑀢𑁂 𑀅𑀝𑁆𑀞𑀲𑀳𑀲𑁆𑀲𑀦𑀸𑀕𑀧𑀭𑀺𑀯𑀼𑀢𑁄 𑀓𑀜𑁆𑀘𑀦𑀕𑀼𑀳𑀸𑀬𑀁 𑀯𑀲𑀢𑀺, 𑀕𑀺𑀫𑁆𑀳𑀓𑀸𑀮𑁂 𑀉𑀤𑀓𑀯𑀸𑀢𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑁄 𑀫𑀳𑀸𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀸𑀭𑁄𑀳𑀦𑁆𑀢𑀭𑁂 𑀢𑀺𑀝𑁆𑀞𑀢𑀺.

𑀫𑀦𑁆𑀤𑀸𑀓𑀺𑀦𑀺𑀬𑀸 ¶ 𑀧𑀦 𑀫𑀚𑁆𑀛𑁂 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀲𑁂𑀯𑀸𑀮𑁄 𑀯𑀸 𑀧𑀡𑀓𑀁 𑀯𑀸 𑀦𑀢𑁆𑀣𑀺, 𑀨𑀮𑀺𑀓𑀯𑀡𑁆𑀡𑀁 𑀉𑀤𑀓𑀫𑁂𑀯 𑀳𑁄𑀢𑀺, 𑀢𑀢𑁄 𑀧𑀭𑀁 𑀧𑀦 𑀦𑀸𑀕𑀸𑀦𑀁 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀢𑀁 𑀲𑁂𑀢𑀧𑀤𑀼𑀫𑀯𑀦𑀁 𑀢𑀁 𑀉𑀤𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀢𑁆𑀣 𑀫𑀼𑀴𑀸𑀮𑀁 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀁 𑀳𑁄𑀢𑀺, 𑀪𑀺𑀲𑀁 𑀫𑀳𑀸𑀪𑁂𑀭𑀺𑀧𑁄𑀓𑁆𑀔𑀭𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀢𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀧𑀩𑁆𑀩𑀦𑁆𑀢𑀭𑁂 𑀆𑀴𑁆𑀳𑀓𑀧𑁆𑀧𑀫𑀸𑀡𑀁 𑀔𑀻𑀭𑀁 𑀳𑁄𑀢𑀺. 𑀧𑀤𑀼𑀫𑀸𑀦𑀁 𑀧𑀼𑀧𑁆𑀨𑀲𑀫𑀬𑁂 𑀯𑀸𑀢𑁄 𑀭𑁂𑀡𑀼𑀯𑀝𑁆𑀝𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀤𑀼𑀫𑀺𑀦𑀻𑀧𑀢𑁆𑀢𑁂𑀲𑀼 𑀞𑀧𑁂𑀢𑀺, 𑀢𑀢𑁆𑀣 𑀉𑀤𑀓𑀨𑀼𑀲𑀺𑀢𑀸𑀦𑀺 𑀧𑀢𑀦𑁆𑀢𑀺, 𑀢𑀢𑁄 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀅𑀬𑁄𑀖𑀝𑀺𑀓𑀸 𑀯𑀺𑀬 𑀧𑁄𑀓𑁆𑀔𑀭𑀫𑀥𑀼 𑀢𑀺𑀝𑁆𑀞𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀸𑀯𑀫𑀳𑀦𑁆𑀢𑀫𑁂𑀯 𑀭𑀢𑁆𑀢𑀧𑀤𑀼𑀫𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀭𑀢𑁆𑀢𑀓𑀼𑀫𑀼𑀤𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀲𑁂𑀢𑀓𑀼𑀫𑀼𑀤𑀯𑀦𑀁 ¶ , 𑀢𑀤𑀦𑀦𑁆𑀢𑀭𑀁 𑀦𑀻𑀮𑀼𑀧𑁆𑀧𑀮𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀭𑀢𑁆𑀢𑀼𑀧𑁆𑀧𑀮𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀲𑀼𑀕𑀦𑁆𑀥𑀲𑀸𑀮𑀺𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀏𑀴𑀸𑀮𑀼𑀓𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀻𑀦𑀺 𑀫𑀥𑀼𑀭𑀭𑀲𑀸𑀦𑀺 𑀯𑀮𑁆𑀮𑀺𑀨𑀮𑀸𑀦𑀺, 𑀢𑀤𑀦𑀦𑁆𑀢𑀭𑀁 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀢𑀫𑁂𑀯 𑀉𑀘𑁆𑀙𑀼𑀯𑀦𑀁, 𑀢𑀢𑁆𑀣 𑀧𑀽𑀕𑀭𑀼𑀓𑁆𑀔𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀁 𑀉𑀘𑁆𑀙𑀼. 𑀢𑀤𑀦𑀦𑁆𑀢𑀭𑀁 𑀓𑀤𑀮𑀺𑀯𑀦𑀁, 𑀬𑀢𑁄 𑀤𑀼𑀯𑁂 𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀢𑀤𑀦𑀦𑁆𑀢𑀭𑀁 𑀘𑀸𑀝𑀺𑀧𑁆𑀧𑀫𑀸𑀡𑀨𑀮𑀁 𑀧𑀦𑀲𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀅𑀫𑁆𑀩𑀯𑀦𑀁, 𑀚𑀫𑁆𑀩𑀼𑀯𑀦𑀁, 𑀓𑀧𑀺𑀝𑁆𑀞𑀯𑀦𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀢𑀲𑁆𑀫𑀺𑀁 𑀤𑀳𑁂 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀨𑀮𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀳𑀺𑀫𑀯𑀢𑀺 𑀯𑀺𑀚𑁆𑀚𑀫𑀸𑀦𑀓𑀲𑀢𑁆𑀢𑀫𑀳𑀸𑀲𑀭𑀧𑁆𑀧𑀪𑀼𑀢𑀻𑀦𑀁 𑀧𑀫𑀸𑀡𑀲𑀡𑁆𑀞𑀸𑀦𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁂𑀯 𑀯𑀺𑀲𑁂𑀲𑀁 𑀪𑀕𑀯𑀸 𑀲𑀩𑁆𑀩𑀣𑀸 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥𑀧𑀭𑀺𑀓𑁆𑀔𑁂𑀧𑀸𑀢𑀺 𑀧𑀦𑁆𑀦𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑀧𑀭𑀺𑀓𑁆𑀔𑁂𑀧𑀸, 𑀔𑀦𑁆𑀥𑀲𑁆𑀲 𑀧𑀭𑀺𑀡𑀸𑀳𑁄 𑀧𑀦𑁆𑀦𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀕𑀯𑁆𑀳𑀬𑀸𑀢𑀺 𑀦𑀕𑀲𑀤𑁆𑀤𑁂𑀦 𑀅𑀯𑁆𑀳𑀸𑀢𑀩𑁆𑀩𑀸, 𑀭𑀼𑀓𑁆𑀔𑀸𑀪𑀺𑀥𑀸𑀦𑀸𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑁄 𑀳𑀺 𑀦 𑀕𑀘𑁆𑀙𑀢𑀻𑀢𑀺 𑀦𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀕𑀯𑁆𑀳𑀬𑀸 𑀚𑀫𑁆𑀩𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥𑀲𑀸𑀔𑀸𑀬𑀸𑀫𑀸𑀢𑀺 𑀉𑀩𑁆𑀩𑁂𑀥𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑀸𑀬𑀸𑀫𑀸 𑀉𑀩𑁆𑀩𑁂𑀥𑀢𑁄 𑀲𑀫𑀦𑁆𑀢𑀢𑁄 𑀘 𑀧𑀜𑁆𑀜𑀸𑀲𑀬𑁄𑀚𑀦𑀲𑀸𑀔𑀸𑀬𑀸𑀫𑀸 𑀘. 𑀢𑀢𑁄 𑀏𑀯 𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸. 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀳𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀔𑀸𑀯𑀺𑀝𑀧𑀸, 𑀢𑀸𑀯 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺, 𑀢𑀢𑁄 𑀧𑀭𑀫𑁆𑀧𑀺 𑀉𑀚𑀼𑀓𑀁 𑀉𑀕𑁆𑀕𑀢𑀲𑀸𑀔𑀸 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺, 𑀲𑀫𑀦𑁆𑀢𑀢𑁄 𑀘 𑀏𑀓𑁂𑀓𑀸 𑀲𑀸𑀔𑀸 𑀧𑀡𑁆𑀡𑀸𑀲 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀯𑀟𑁆𑀠𑀺𑀢𑀸𑀦𑀺. 𑀢𑀸𑀲𑀼 𑀧𑀦 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺, 𑀢𑀸𑀲𑀁 𑀦𑀤𑀻𑀦𑀁 𑀉𑀪𑀬𑀢𑀻𑀭𑁂 𑀚𑀫𑁆𑀩𑀼𑀧𑀓𑁆𑀓𑀸𑀦𑀁 𑀧𑀢𑀺𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀗𑁆𑀓𑀼𑀭𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂 𑀦𑀤𑀻𑀚𑀮𑁂𑀦 𑀯𑀼𑀬𑁆𑀳𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺, 𑀢𑀢𑁄𑀬𑁂𑀯 𑀚𑀫𑁆𑀩𑀼𑀦𑀤𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀚𑀫𑁆𑀩𑀼𑀦𑀤’’𑀦𑁆𑀢𑀺 𑀢𑀁 𑀲𑀼𑀯𑀡𑁆𑀡𑀁 𑀯𑀼𑀘𑁆𑀘𑀢𑀺.

𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀬𑀲𑁆𑀲𑀸 𑀫𑀳𑀦𑁆𑀢𑀢𑀸 𑀓𑀧𑁆𑀧𑀝𑁆𑀞𑀸𑀬𑀺𑀓𑀸𑀤𑀺𑀧𑁆𑀧𑀓𑀸𑀭𑁂𑀦 𑀧𑀪𑀸𑀯𑁂𑀦. 𑀬𑀜𑁆𑀘𑁂𑀢𑀁 𑀚𑀫𑁆𑀩𑀼𑀬𑀸 𑀧𑀫𑀸𑀡𑀁, 𑀏𑀢𑀤𑁂𑀯 𑀅𑀲𑀼𑀭𑀸𑀦𑀁 𑀘𑀺𑀢𑁆𑀢𑀧𑀸𑀝𑀮𑀺𑀬𑀸, 𑀕𑀭𑀼𑀴𑀸𑀦𑀁 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀲𑁆𑀲, 𑀅𑀧𑀭𑀕𑁄𑀬𑀸𑀦𑁂 𑀓𑀤𑀫𑁆𑀩𑀲𑁆𑀲, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀓𑀧𑁆𑀧𑀭𑀼𑀓𑁆𑀔𑀲𑁆𑀲, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀲𑀺𑀭𑀻𑀲𑀲𑁆𑀲, 𑀢𑀸𑀯𑀢𑀺𑀁𑀲𑁂𑀲𑀼 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲𑀸𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀧𑀸𑀝𑀮𑀻 ¶ 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭; 𑀅. 𑀦𑀺. 𑀅𑀝𑁆𑀞. 𑁧.𑁧.𑁩𑁨𑁨);

𑀏𑀢𑁆𑀣 ¶ 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫𑀦𑁆𑀢𑀺 𑀏𑀢𑁆𑀣 𑀲𑀺𑀭𑀻𑀲𑁂𑀦𑀸𑀢𑀺 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁. 𑀲𑀢𑁆𑀢𑀫𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀲𑀺𑀭𑀻𑀲𑁄 𑀪𑀯𑀢𑀺 𑀲𑀢𑁆𑀢𑀫𑁄𑀢𑀺 𑀅𑀢𑁆𑀣𑁄.

𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄. 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄 𑀧𑀢𑀺𑀝𑁆𑀞𑀺𑀢𑁄, 𑀅𑀬𑀁 𑀏𑀓𑀸 𑀮𑁄𑀓𑀥𑀸𑀢𑀼 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄. ‘‘𑀢𑀁 𑀲𑀩𑁆𑀩𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄 𑀞𑀺𑀢𑁄’’𑀢𑀺 𑀏𑀯𑀫𑁆𑀧𑁂𑀢𑁆𑀣 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺, 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄𑀧𑀺 𑀮𑁄𑀓𑀥𑀸𑀢𑀼𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀮𑁄𑀓𑀥𑀸𑀢𑀼𑀬𑀁. 𑀘𑀦𑁆𑀤𑀫𑀡𑁆𑀟𑀮𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀦𑁆𑀢𑀺 𑀉𑀚𑀼𑀓𑀁 𑀆𑀬𑀸𑀫𑀢𑁄 𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁, 𑀧𑀭𑀺𑀫𑀡𑁆𑀟𑀮𑀢𑁄 𑀧𑀦 𑀢𑀻𑀳𑀺 𑀬𑁄𑀚𑀦𑁂𑀳𑀺 𑀊𑀦𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑀁. 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀘𑀦𑁆𑀤𑀫𑀡𑁆𑀟𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀚𑀼𑀓𑀁 𑀧𑀜𑁆𑀜𑀸𑀲𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀧𑀭𑀺𑀫𑀡𑁆𑀟𑀮𑀢𑁄 𑀧𑀦 𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑀁.

𑀢𑁂𑀲𑀼 𑀧𑀦 𑀘𑀦𑁆𑀤𑀫𑀡𑁆𑀟𑀮𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁨𑁧) 𑀳𑁂𑀝𑁆𑀞𑀸, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀧𑀭𑀺, 𑀅𑀦𑁆𑀢𑀭𑀸 𑀦𑁂𑀲𑀁 𑀬𑁄𑀚𑀦𑀁 𑀳𑁄𑀢𑀺. 𑀘𑀦𑁆𑀤𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀽𑀭𑀺𑀬𑀲𑁆𑀲 𑀉𑀧𑀭𑀺𑀫𑀦𑁆𑀢𑀁 𑀬𑁄𑀚𑀦𑀲𑀢𑀁 𑀳𑁄𑀢𑀺, 𑀘𑀦𑁆𑀤𑀯𑀺𑀫𑀸𑀦𑀁 𑀅𑀦𑁆𑀢𑁄 𑀫𑀡𑀺𑀫𑀬𑀁, 𑀩𑀳𑀺 𑀭𑀚𑀢𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀻𑀢𑀮𑀫𑁂𑀯 𑀳𑁄𑀢𑀺. 𑀲𑀽𑀭𑀺𑀬𑀯𑀺𑀫𑀸𑀦𑀁 𑀅𑀦𑁆𑀢𑁄 𑀓𑀦𑀓𑀫𑀬𑀁, 𑀩𑀸𑀳𑀺𑀭𑀁 𑀨𑀮𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀅𑀦𑁆𑀢𑁄 𑀘 𑀩𑀳𑀺 𑀘 𑀉𑀡𑁆𑀳𑀫𑁂𑀯. 𑀘𑀦𑁆𑀤𑁄 𑀉𑀚𑀼𑀓𑀁 𑀲𑀡𑀺𑀓𑀁 𑀕𑀘𑁆𑀙𑀢𑀺. 𑀲𑁄 𑀳𑀺 𑀅𑀫𑀸𑀯𑀸𑀲𑀺𑀬𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀣𑁄𑀓𑀁 𑀣𑁄𑀓𑀁 𑀑𑀳𑀻𑀬𑀦𑁆𑀢𑁄 𑀧𑀼𑀡𑁆𑀡𑀫𑀸𑀲𑀺𑀬𑀁 𑀉𑀧𑀟𑁆𑀠𑀫𑀕𑁆𑀕𑀢𑁄 𑀑𑀳𑀻𑀬𑀢𑀺, 𑀢𑀺𑀭𑀺𑀬𑀁 𑀧𑀦 𑀲𑀻𑀖𑀁 𑀕𑀘𑁆𑀙𑀢𑀺. 𑀢𑀣𑀸 𑀳𑁂𑀲 𑀏𑀓𑀲𑁆𑀫𑀺𑀁 𑀫𑀸𑀲𑁂 𑀓𑀤𑀸𑀘𑀺 𑀤𑀓𑁆𑀔𑀺𑀡𑀢𑁄, 𑀓𑀤𑀸𑀘𑀺 𑀉𑀢𑁆𑀢𑀭𑀢𑁄 𑀤𑀺𑀲𑁆𑀲𑀢𑀺, 𑀘𑀦𑁆𑀤𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀦𑀓𑁆𑀔𑀢𑁆𑀢𑀢𑀸𑀭𑀓𑀸 𑀕𑀘𑁆𑀙𑀦𑁆𑀢𑀺, 𑀘𑀦𑁆𑀤𑁄 𑀥𑁂𑀦𑀼 𑀯𑀺𑀬 𑀯𑀘𑁆𑀙𑀁 𑀢𑀁 𑀢𑀁 𑀦𑀓𑁆𑀔𑀢𑁆𑀢𑀁 𑀉𑀧𑀲𑀗𑁆𑀓𑀫𑀢𑀺, 𑀦𑀓𑁆𑀔𑀢𑁆𑀢𑀸𑀦𑀺 𑀧𑀦 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦𑀁 𑀦 𑀯𑀺𑀚𑀳𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀻𑀣𑀺𑀬𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀽𑀭𑀺𑀬𑀲𑁆𑀲 𑀧𑀦 𑀉𑀚𑀼𑀓𑀁 𑀕𑀫𑀦𑀁 𑀲𑀻𑀖𑀁, 𑀢𑀺𑀭𑀺𑀬𑀁 𑀕𑀫𑀦𑀁 𑀤𑀦𑁆𑀥𑀁. 𑀢𑀺𑀭𑀺𑀬𑀁 𑀕𑀫𑀦𑀁 𑀦𑀸𑀫 𑀤𑀓𑁆𑀔𑀺𑀡𑀤𑀺𑀲𑀢𑁄 𑀉𑀢𑁆𑀢𑀭𑀤𑀺𑀲𑀸𑀬, 𑀉𑀢𑁆𑀢𑀭𑀤𑀺𑀲𑀢𑁄 𑀤𑀓𑁆𑀔𑀺𑀡𑀤𑀺𑀲𑀸𑀬 𑀕𑀫𑀦𑀁, 𑀢𑀁 𑀤𑀦𑁆𑀥𑀁 𑀙𑀳𑀺 𑀙𑀳𑀺 𑀫𑀸𑀲𑁂𑀳𑀺 𑀇𑀚𑁆𑀛𑀦𑀢𑁄.

𑀲𑀽𑀭𑀺𑀬𑁄 ¶ 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑁂 𑀘𑀦𑁆𑀤𑁂𑀦 𑀲𑀳𑁂𑀯 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀸𑀝𑀺𑀧𑀤𑀤𑀺𑀯𑀲𑁂 𑀬𑁄𑀚𑀦𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀕𑀘𑁆𑀙𑀢𑀺 𑀅𑀢𑁆𑀢𑀦𑁄 ¶ 𑀲𑀻𑀖𑀕𑀸𑀫𑀺𑀢𑀸𑀬 𑀢𑀲𑁆𑀲 𑀘 𑀤𑀦𑁆𑀥𑀕𑀸𑀫𑀺𑀢𑀸𑀬, 𑀅𑀣 𑀘𑀦𑁆𑀤𑁄 𑀮𑁂𑀔𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀢𑀢𑁄 𑀧𑀭𑀫𑁆𑀧𑀺 𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀸𑀬 𑀬𑁄𑀚𑀦𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀕𑀘𑁆𑀙𑀢𑀺. 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀸𑀯 𑀲𑀼𑀓𑁆𑀓𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑀸 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀑𑀳𑀸𑀬 𑀕𑀘𑁆𑀙𑀢𑀺, 𑀅𑀣 𑀘𑀦𑁆𑀤𑁄 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀉𑀧𑁄𑀲𑀣𑀤𑀺𑀯𑀲𑁂 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀦𑀜𑁆𑀘𑁂𑀢𑁆𑀣 𑀉𑀧𑀭𑀺𑀪𑀸𑀕𑀢𑁄 𑀧𑀢𑀺𑀢𑀲𑀽𑀭𑀺𑀬𑀸𑀮𑁄𑀓𑀢𑀸𑀬 𑀳𑁂𑀝𑁆𑀞𑀢𑁄 𑀧𑀯𑀢𑁆𑀢𑀸𑀬 𑀲𑀽𑀭𑀺𑀬𑀲𑁆𑀲 𑀤𑀽𑀭𑀪𑀸𑀯𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀫𑀸𑀦𑀸𑀬 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀯𑀲𑁂𑀦 𑀅𑀦𑀼𑀓𑁆𑀓𑀫𑁂𑀦 𑀘𑀡𑁆𑀟𑀫𑀡𑁆𑀟𑀮𑀧𑁆𑀧𑀤𑁂𑀲𑀲𑁆𑀲 𑀯𑀟𑁆𑀠𑀫𑀸𑀦𑀲𑁆𑀲 𑀯𑀺𑀬 𑀤𑀺𑀲𑁆𑀲𑀫𑀸𑀦𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀺𑀬 𑀉𑀧𑁄𑀲𑀣𑀤𑀺𑀯𑀲𑁂 𑀧𑀼𑀡𑁆𑀡𑀫𑀸𑀬𑀁 𑀧𑀭𑀺𑀧𑀼𑀡𑁆𑀡𑀫𑀡𑁆𑀟𑀮𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀅𑀣 𑀲𑀽𑀭𑀺𑀬𑁄 𑀧𑀸𑀝𑀺𑀧𑀤𑀤𑀺𑀯𑀲𑁂 𑀬𑁄𑀚𑀦𑀸𑀦𑀁 𑀲𑀢𑀲𑀳𑀲𑁆𑀲𑀁 𑀥𑀸𑀯𑀺𑀢𑁆𑀯𑀸 𑀧𑀼𑀦 𑀘𑀦𑁆𑀤𑀫𑀡𑁆𑀟𑀮𑀁 𑀕𑀡𑁆𑀳𑀸𑀢𑀺 𑀘𑀦𑁆𑀤𑀲𑁆𑀲 𑀤𑀦𑁆𑀥𑀕𑀢𑀺𑀢𑀸𑀬 𑀅𑀢𑁆𑀢𑀦𑁄 𑀘 𑀲𑀻𑀖𑀕𑀢𑀺𑀢𑀸𑀬, 𑀢𑀣𑀸 𑀤𑀼𑀢𑀺𑀬𑀸𑀬 𑀲𑀢𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀬𑀸𑀯 𑀉𑀧𑁄𑀲𑀣𑀤𑀺𑀯𑀲𑀸 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀥𑀸𑀯𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀣 𑀘𑀦𑁆𑀤𑁄 𑀅𑀦𑀼𑀓𑁆𑀓𑀫𑁂𑀦 𑀳𑀸𑀬𑀺𑀢𑁆𑀯𑀸 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀲𑀩𑁆𑀩𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀳𑀸𑀬𑀫𑀸𑀦𑀢𑀸 𑀘𑁂𑀢𑁆𑀣 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀫𑀸𑀦𑀢𑀸𑀬 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀦 𑀙𑀸𑀬𑀸𑀬 𑀳𑀸𑀬𑀫𑀸𑀦𑀢𑀸𑀬 𑀫𑀡𑁆𑀟𑀮𑀁 𑀯𑀟𑁆𑀠𑀫𑀸𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀇𑀥 𑀘 𑀙𑀸𑀬𑀸𑀬 𑀯𑀟𑁆𑀠𑀫𑀸𑀦𑀢𑀸𑀬 𑀫𑀡𑁆𑀟𑀮𑀁 𑀳𑀸𑀬𑀫𑀸𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀦𑀼𑀓𑁆𑀓𑀫𑁂𑀦 𑀳𑀸𑀬𑀺𑀢𑁆𑀯𑀸 𑀯𑀺𑀬 𑀉𑀧𑁄𑀲𑀣𑀤𑀺𑀯𑀲𑁂 𑀲𑀩𑁆𑀩𑀲𑁄 𑀦 𑀧𑀜𑁆𑀜𑀸𑀬𑀢𑀺. 𑀘𑀦𑁆𑀤𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀲𑀽𑀭𑀺𑀬𑁄 𑀉𑀧𑀭𑀺 𑀳𑁄𑀢𑀺, 𑀫𑀳𑀢𑀺𑀬𑀸 𑀧𑀸𑀢𑀺𑀬𑀸 𑀔𑀼𑀤𑁆𑀤𑀓𑀪𑀸𑀚𑀦𑀁 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁 𑀧𑀺𑀥𑀻𑀬𑀢𑀺, 𑀫𑀚𑁆𑀛𑀦𑁆𑀳𑀺𑀓𑁂 𑀕𑁂𑀳𑀘𑁆𑀙𑀸𑀬𑀸 𑀯𑀺𑀬 𑀘𑀦𑁆𑀤𑀲𑁆𑀲 𑀙𑀸𑀬𑀸 𑀦 𑀧𑀜𑁆𑀜𑀸𑀬𑀢𑀺. 𑀲𑁄 𑀙𑀸𑀬𑀸𑀬 𑀅𑀧𑀜𑁆𑀜𑀸𑀬𑀫𑀸𑀦𑀸𑀬 𑀤𑀽𑀭𑁂 𑀞𑀺𑀢𑀸𑀦𑀁 𑀤𑀺𑀯𑀸 𑀧𑀤𑀻𑀧𑁄 𑀯𑀺𑀬 𑀲𑀬𑀫𑁆𑀧𑀺 𑀦 𑀧𑀜𑁆𑀜𑀸𑀬𑀢𑀺.

𑀇𑀫𑁂𑀲𑀁 𑀧𑀦 𑀅𑀚𑀯𑀻𑀣𑀺 𑀦𑀸𑀕𑀯𑀻𑀣𑀺 𑀕𑁄𑀯𑀻𑀣𑀻𑀢𑀺 𑀢𑀺𑀲𑁆𑀲𑁄 𑀕𑀫𑀦𑀯𑀻𑀣𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀚𑀸𑀦𑀁 𑀉𑀤𑀓𑀁 𑀧𑀝𑀺𑀓𑀽𑀮𑀁 𑀳𑁄𑀢𑀺, 𑀳𑀢𑁆𑀣𑀺𑀦𑀸𑀕𑀸𑀦𑀁 𑀫𑀦𑀸𑀧𑀁, 𑀕𑀼𑀦𑁆𑀦𑀁 𑀲𑀻𑀢𑀼𑀡𑁆𑀳𑀲𑀫𑀢𑀸𑀬 𑀨𑀸𑀲𑀼 𑀳𑁄𑀢𑀺. 𑀢𑀣𑀸 𑀘 𑀬𑀸𑀬 𑀯𑀻𑀣𑀺𑀬𑀸 𑀲𑀽𑀭𑀺𑀬𑁂 𑀕𑀘𑁆𑀙𑀦𑁆𑀢𑁂 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑀸 𑀲𑀽𑀭𑀺𑀬𑀸𑀪𑀺𑀢𑀸𑀧𑀲𑀦𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀯𑀺𑀫𑀸𑀦𑀢𑁄 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀓𑀻𑀴𑀸𑀧𑀲𑀼𑀢𑀸 𑀳𑀼𑀢𑁆𑀯𑀸 𑀦 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀓𑀺𑀭 𑀲𑀽𑀭𑀺𑀬𑀯𑀺𑀫𑀸𑀦𑀁 𑀧𑀓𑀢𑀺𑀫𑀕𑁆𑀕𑀢𑁄 𑀅𑀥𑁄 𑀑𑀢𑀭𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀲 𑀑𑀭𑀼𑀬𑁆𑀳 𑀘𑀭𑀡𑁂𑀦𑁂𑀯 𑀘𑀦𑁆𑀤𑀯𑀺𑀫𑀸𑀦𑀫𑁆𑀧𑀺 𑀅𑀥𑁄 𑀑𑀭𑀼𑀬𑁆𑀳 𑀘𑀭𑀢𑀺 𑀢𑀕𑁆𑀕𑀢𑀺𑀓𑀢𑁆𑀢𑀸, 𑀢𑀲𑁆𑀫𑀸 ¶ 𑀲𑀸 𑀯𑀻𑀣𑀺 𑀉𑀤𑀓𑀸𑀪𑀸𑀯𑁂𑀦 𑀅𑀚𑀸𑀦𑀼𑀭𑀽𑀧𑀢𑀸𑀬 ‘‘𑀅𑀚𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀸 𑀕𑀢𑀸. 𑀬𑀸𑀬 𑀧𑀦 𑀯𑀻𑀣𑀺𑀬𑀸 𑀲𑀽𑀭𑀺𑀬𑁂 𑀕𑀘𑁆𑀙𑀦𑁆𑀢𑁂 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑀸 𑀲𑀽𑀭𑀺𑀬𑀸𑀪𑀺𑀢𑀸𑀧𑀸𑀪𑀸𑀯𑀢𑁄 𑀅𑀪𑀺𑀡𑁆𑀳𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀻𑀴𑀸𑀧𑀲𑀼𑀢𑀸 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀓𑀺𑀭 𑀲𑀽𑀭𑀺𑀬𑀯𑀺𑀫𑀸𑀦𑀁 𑀧𑀓𑀢𑀺𑀫𑀕𑁆𑀕𑀢𑁄 𑀉𑀤𑁆𑀥𑀁 𑀆𑀭𑀼𑀳𑀺𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀲 𑀉𑀤𑁆𑀥𑀁 𑀆𑀭𑀼𑀬𑁆𑀳 𑀘𑀭𑀡𑁂𑀦𑁂𑀯 𑀘𑀦𑁆𑀤𑀯𑀺𑀫𑀸𑀦𑀫𑁆𑀧𑀺 𑀉𑀤𑁆𑀥𑀁 𑀆𑀭𑀼𑀬𑁆𑀳 𑀘𑀭𑀢𑀺 𑀢𑀕𑁆𑀕𑀢𑀺𑀓𑀢𑁆𑀢𑀸, 𑀢𑀕𑁆𑀕𑀢𑀺𑀓𑀢𑀸 𑀘 𑀲𑀫𑀸𑀦𑀕𑀢𑀺 𑀦𑀸𑀫 ¶ 𑀯𑀸𑀢𑀫𑀡𑁆𑀟𑀮𑁂𑀦 𑀯𑀺𑀫𑀸𑀦𑀲𑁆𑀲 𑀨𑁂𑀮𑁆𑀮𑀺𑀢𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸 𑀲𑀸 𑀯𑀻𑀣𑀺 𑀉𑀤𑀓𑀩𑀳𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀭𑀽𑀧𑀢𑀸𑀬 ‘‘𑀦𑀸𑀕𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀸 𑀕𑀢𑀸. 𑀬𑀤𑀸 𑀲𑀽𑀭𑀺𑀬𑁄 𑀉𑀤𑁆𑀥𑀁 𑀅𑀦𑀸𑀭𑁄𑀳𑀦𑁆𑀢𑁄 𑀅𑀥𑁄 𑀘 𑀅𑀦𑁄𑀢𑀭𑀦𑁆𑀢𑁄 𑀧𑀓𑀢𑀺𑀫𑀕𑁆𑀕𑁂𑀦𑁂𑀯 𑀕𑀘𑁆𑀙𑀢𑀺, 𑀢𑀤𑀸 𑀯𑀲𑁆𑀲𑀯𑀮𑀸𑀳𑀓𑀸 𑀬𑀣𑀸𑀓𑀸𑀮𑀁 𑀬𑀣𑀸𑀭𑀼𑀘𑀺𑀜𑁆𑀘 𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀔𑁂𑀦 𑀯𑀺𑀘𑀭𑀦𑁆𑀢𑀺, 𑀢𑁂𑀦 𑀓𑀸𑀮𑁂𑀦 𑀓𑀸𑀮𑀁 𑀯𑀲𑁆𑀲𑀦𑀢𑁄 𑀮𑁄𑀓𑁂 𑀉𑀢𑀼𑀲𑀫𑀢𑀸 𑀳𑁄𑀢𑀺, 𑀢𑀸𑀬 𑀉𑀢𑀼𑀲𑀫𑀢𑀸𑀬 𑀳𑁂𑀢𑀼𑀪𑀽𑀢𑀸𑀬 𑀲𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀕𑀢𑀺 𑀕𑀯𑀸𑀦𑀼𑀭𑀽𑀧𑀢𑀸𑀬 ‘‘𑀕𑁄𑀯𑀻𑀣𑀻’’𑀢𑀺 𑀲𑀫𑀜𑁆𑀜𑀸 𑀕𑀢𑀸. 𑀢𑀲𑁆𑀫𑀸 𑀬𑀁 𑀓𑀸𑀮𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀅𑀚𑀯𑀻𑀣𑀺𑀁 𑀆𑀭𑀼𑀳𑀦𑁆𑀢𑀺, 𑀢𑀤𑀸 𑀤𑁂𑀯𑁄 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀯𑀲𑁆𑀲𑀢𑀺. 𑀬𑀤𑀸 𑀦𑀸𑀕𑀯𑀻𑀣𑀺𑀁 𑀆𑀭𑁄𑀳𑀦𑁆𑀢𑀺, 𑀢𑀤𑀸 𑀪𑀺𑀦𑁆𑀦𑀁 𑀯𑀺𑀬 𑀦𑀪𑀁 𑀧𑀕𑁆𑀖𑀭𑀢𑀺. 𑀬𑀤𑀸 𑀕𑁄𑀯𑀻𑀣𑀺𑀁 𑀆𑀭𑁄𑀳𑀦𑁆𑀢𑀺, 𑀢𑀤𑀸 𑀉𑀢𑀼𑀲𑀫𑀢𑀸 𑀲𑀫𑁆𑀧𑀚𑁆𑀚𑀢𑀺.

𑀬𑀤𑀸 𑀧𑀦 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀉𑀧𑀭𑀸𑀚𑀲𑁂𑀦𑀸𑀧𑀢𑀺𑀧𑁆𑀧𑀪𑀼𑀢𑀬𑁄 𑀲𑀩𑁆𑀩𑁂 𑀤𑁂𑀯𑀸 𑀩𑁆𑀭𑀳𑁆𑀫𑀸𑀦𑁄 𑀘 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑁂𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀳𑀺 𑀩𑀳𑁆𑀯𑀸𑀩𑀸𑀥𑀢𑀸𑀤𑀺𑀅𑀦𑀺𑀝𑁆𑀞𑀨𑀮𑀽𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀥𑀫𑁆𑀫𑀺𑀓𑀢𑀸𑀲𑀜𑁆𑀜𑀺𑀢𑀲𑁆𑀲 𑀲𑀸𑀥𑀸𑀭𑀡𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀩𑀮𑁂𑀦 𑀯𑀺𑀲𑀫𑀁 𑀯𑀸𑀬𑀦𑁆𑀢𑁂𑀦 𑀯𑀸𑀬𑀼𑀦𑀸 𑀨𑁂𑀮𑁆𑀮𑀺𑀬𑀫𑀸𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀯𑀺𑀲𑀫𑀁 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀬𑀣𑀸𑀫𑀕𑁆𑀕𑁂𑀦 𑀦 𑀧𑀯𑀢𑁆𑀢𑀦𑁆𑀢𑀺. 𑀯𑀸𑀢𑁄 𑀬𑀣𑀸𑀫𑀕𑁆𑀕𑁂𑀦 𑀦 𑀯𑀸𑀬𑀢𑀺, 𑀅𑀬𑀣𑀸𑀫𑀕𑁆𑀕𑁂𑀦 𑀯𑀸𑀬𑀢𑀺, 𑀅𑀬𑀣𑀸𑀫𑀕𑁆𑀕𑁂𑀦 𑀯𑀸𑀬𑀦𑁆𑀢𑁄 𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑀸𑀦𑀺 𑀔𑁄𑀪𑁂𑀢𑀺, 𑀯𑀺𑀫𑀸𑀦𑁂𑀲𑀼 𑀔𑁄𑀪𑀺𑀢𑁂𑀲𑀼 𑀤𑁂𑀯𑀢𑀸𑀦𑀁 𑀓𑀻𑀴𑀦𑀢𑁆𑀣𑀸𑀬 𑀘𑀺𑀢𑁆𑀢𑀸𑀦𑀺 𑀦 𑀦𑀫𑀦𑁆𑀢𑀺, 𑀘𑀺𑀢𑁆𑀢𑁂𑀲𑀼 𑀅𑀦𑀫𑀦𑁆𑀢𑁂𑀲𑀼 𑀲𑀻𑀢𑀼𑀡𑁆𑀳𑀪𑁂𑀤𑁄 𑀉𑀢𑀼 𑀬𑀣𑀸𑀓𑀸𑀮𑁂𑀦 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀲𑀫𑁆𑀧𑀚𑁆𑀚𑀦𑁆𑀢𑁂 𑀦 𑀲𑀫𑁆𑀫𑀸 𑀤𑁂𑀯𑁄 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀦 𑀯𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀯𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀦 𑀯𑀲𑁆𑀲𑀢𑀺. 𑀯𑀲𑁆𑀲𑀦𑁆𑀢𑁄𑀧𑀺 𑀯𑀧𑁆𑀧𑀓𑀸𑀮𑁂 𑀅𑀗𑁆𑀓𑀼𑀭𑀓𑀸𑀮𑁂 𑀦𑀸𑀴𑀓𑀸𑀮𑁂 𑀧𑀼𑀧𑁆𑀨𑀓𑀸𑀮𑁂 𑀔𑀻𑀭𑀕𑁆𑀕𑀳𑀡𑀸𑀤𑀺𑀓𑀸𑀮𑁂𑀲𑀼 𑀬𑀣𑀸 𑀬𑀣𑀸 ¶ 𑀲𑀲𑁆𑀲𑀸𑀦𑀁 𑀉𑀧𑀓𑀸𑀭𑁄 𑀦 𑀳𑁄𑀢𑀺, 𑀢𑀣𑀸 𑀢𑀣𑀸 𑀯𑀲𑁆𑀲𑀢𑀺 𑀘 𑀯𑀺𑀕𑀘𑁆𑀙𑀢𑀺 𑀘. 𑀢𑁂𑀦 𑀲𑀲𑁆𑀲𑀸𑀦𑀺 𑀯𑀺𑀲𑀫𑀧𑀸𑀓𑀸𑀦𑀺 𑀳𑁄𑀦𑁆𑀢𑀺 𑀯𑀺𑀕𑀢𑀕𑀦𑁆𑀥𑀭𑀲𑀸𑀤𑀺𑀲𑀫𑁆𑀧𑀤𑀸𑀦𑀺, 𑀏𑀓𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑁂𑀲𑀼𑀧𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀅𑀢𑀺𑀓𑀺𑀮𑀺𑀦𑁆𑀦𑀁, 𑀏𑀓𑀲𑁆𑀫𑀺𑀁 𑀲𑀫𑀧𑀸𑀓𑀁. 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀓𑀼𑀘𑁆𑀙𑀺𑀬𑀫𑁆𑀧𑀺 𑀲𑀩𑁆𑀩𑀲𑁄 𑀅𑀧𑀭𑀺𑀡𑀢𑀁, 𑀏𑀓𑀤𑁂𑀲𑁂𑀦 𑀧𑀭𑀺𑀡𑀢𑀁, 𑀲𑀼𑀧𑀭𑀺𑀡𑀢𑀦𑁆𑀢𑀺 𑀏𑀯𑀁 𑀢𑀻𑀳𑀺𑀬𑁂𑀯 𑀧𑀓𑀸𑀭𑁂𑀳𑀺 𑀧𑀘𑁆𑀘𑀢𑀺, 𑀧𑀓𑁆𑀓𑀸𑀲𑀬𑀁 𑀦 𑀲𑀫𑁆𑀫𑀸 𑀉𑀧𑀕𑀘𑁆𑀙𑀢𑀺. 𑀢𑁂𑀦 𑀲𑀢𑁆𑀢𑀸 𑀩𑀳𑁆𑀯𑀸𑀩𑀸𑀥𑀸 𑀘𑁂𑀯 𑀳𑁄𑀦𑁆𑀢𑀺 𑀅𑀧𑁆𑀧𑀸𑀬𑀼𑀓𑀸 𑀘.

𑀥𑀫𑁆𑀫𑀺𑀓𑀸𑀦𑀁 𑀧𑀦 𑀭𑀸𑀚𑀽𑀦𑀁 𑀓𑀸𑀮𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀫𑀁 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀬𑀣𑀸𑀫𑀕𑁆𑀕𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀉𑀢𑀼𑀲𑀫𑀢𑀸 𑀘 𑀲𑀫𑁆𑀧𑀚𑁆𑀚𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀙 𑀫𑀸𑀲𑁂 𑀲𑀺𑀦𑁂𑀭𑀼𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀙 𑀫𑀸𑀲𑁂 𑀅𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀢𑀣𑀸 𑀳𑀺 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀙 𑀫𑀸𑀲𑁂 𑀢𑀢𑁄 𑀕𑀫𑀦𑀯𑀻𑀣𑀺𑀢𑁄 𑀩𑀳𑀺 𑀅𑀢𑁆𑀢𑀦𑁄 𑀢𑀺𑀭𑀺𑀬𑀁 𑀕𑀫𑀦𑁂𑀦 𑀘𑀓𑁆𑀓𑀯𑀸𑀴𑀸𑀪𑀺𑀫𑀼𑀔𑀸 𑀦𑀺𑀓𑁆𑀔𑀫𑀦𑁆𑀢𑀺 ¶ . 𑀏𑀯𑀁 𑀙 𑀫𑀸𑀲𑁂 𑀔𑀡𑁂 𑀔𑀡𑁂 𑀲𑀺𑀦𑁂𑀭𑀼𑀢𑁄 𑀅𑀧𑀲𑀓𑁆𑀓𑀦𑀯𑀲𑁂𑀦 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀲𑀫𑀻𑀧𑀁 𑀧𑀢𑁆𑀢𑀸. 𑀢𑀢𑁄𑀧𑀺 𑀙 𑀫𑀸𑀲𑁂 𑀔𑀡𑁂 𑀔𑀡𑁂 𑀅𑀧𑀲𑀓𑁆𑀓𑀦𑀯𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀺𑀦𑁂𑀭𑀼𑀲𑀫𑀻𑀧𑀁 𑀧𑀸𑀧𑀼𑀡𑀦𑁆𑀢𑀸 𑀅𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀢𑁂 𑀳𑀺 𑀆𑀲𑀸𑀴𑁆𑀳𑀻𑀫𑀸𑀲𑁂 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀘𑀭𑀦𑁆𑀢𑀺, 𑀢𑀢𑁄 𑀤𑁆𑀯𑁂 𑀫𑀸𑀲𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀘𑀭𑀦𑁆𑀢𑀺. 𑀧𑀞𑀫𑀓𑀢𑁆𑀢𑀺𑀓𑀫𑀸𑀲𑁂 𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑀺, 𑀢𑀢𑁄 𑀘𑀓𑁆𑀓𑀯𑀸𑀴𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀢𑀬𑁄 𑀫𑀸𑀲𑁂 𑀘𑀓𑁆𑀓𑀯𑀸𑀴𑀲𑀫𑀻𑀧𑁂𑀦 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀺𑀢𑁆𑀭𑀫𑀸𑀲𑁂 𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑁂 𑀤𑁆𑀯𑁂 𑀫𑀸𑀲𑁂 𑀲𑀺𑀦𑁂𑀭𑀼𑀅𑀪𑀺𑀫𑀼𑀔𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀦 𑀆𑀲𑀸𑀴𑁆𑀳𑁂 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀘𑀭𑀦𑁆𑀢𑀺. 𑀏𑀢𑁆𑀣 𑀘 𑀲𑀺𑀦𑁂𑀭𑀼𑀲𑁆𑀲 𑀘𑀓𑁆𑀓𑀯𑀸𑀴𑀲𑁆𑀲 𑀘 𑀬𑀁 𑀞𑀸𑀦𑀁 𑀯𑁂𑀫𑀚𑁆𑀛𑀁, 𑀢𑀲𑁆𑀲 𑀲𑀺𑀦𑁂𑀭𑀼𑀲𑁆𑀲 𑀘 𑀬𑀁 𑀞𑀸𑀦𑀁 𑀯𑁂𑀫𑀚𑁆𑀛𑀁, 𑀢𑁂𑀦 𑀕𑀘𑁆𑀙𑀦𑁆𑀢𑀸 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀘𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀲𑀺𑀦𑁂𑀭𑀼𑀲𑁆𑀲 𑀅𑀕𑁆𑀕𑀸𑀮𑀺𑀦𑁆𑀤𑀁 𑀅𑀮𑁆𑀮𑀻𑀦𑀸, 𑀘𑀓𑁆𑀓𑀯𑀸𑀴𑀲𑀫𑀻𑀧𑁂𑀦 𑀘𑀭𑀡𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀸 𑀧𑀦 𑀲𑀺𑀦𑁂𑀭𑀼𑀲𑁆𑀲 𑀘𑀓𑁆𑀓𑀯𑀸𑀴𑀲𑁆𑀲 𑀉𑀚𑀼𑀓𑀁 𑀯𑁂𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀯𑁂𑀫𑀚𑁆𑀛𑁂𑀦 𑀯𑀺𑀘𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀯𑀺𑀘𑀭𑀦𑁆𑀢𑀸 𑀘 𑀏𑀓𑀧𑁆𑀧𑀳𑀸𑀭𑁂𑀦 𑀢𑀻𑀲𑀼𑀧𑀺 𑀤𑀻𑀧𑁂𑀲𑀼 𑀆𑀮𑁄𑀓𑀁 𑀓𑀭𑁄𑀦𑁆𑀢𑀺. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀺. 𑀓𑀣𑀁? 𑀇𑀫𑀲𑁆𑀫𑀺𑀜𑁆𑀳𑀺 𑀤𑀻𑀧𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁄 𑀧𑀼𑀩𑁆𑀩𑀯𑀺𑀤𑁂𑀳𑁂 𑀫𑀚𑁆𑀛𑀦𑁆𑀳𑀺𑀓𑁄 𑀳𑁄𑀢𑀺, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀅𑀧𑀭𑀕𑁄𑀬𑀸𑀦𑁂 𑀫𑀚𑁆𑀛𑀺𑀫𑀬𑀸𑀫𑁄, 𑀧𑀼𑀩𑁆𑀩𑀯𑀺𑀤𑁂𑀳𑀫𑁆𑀳𑀺 𑀉𑀕𑁆𑀕𑀫𑀦𑀓𑀸𑀮𑁄 𑀉𑀢𑁆𑀢𑀭𑀓𑀼𑀭𑀽𑀲𑀼 𑀫𑀚𑁆𑀛𑀦𑁆𑀳𑀺𑀓𑁄, 𑀅𑀧𑀭𑀕𑁄𑀬𑀸𑀦𑁂 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀇𑀥 𑀫𑀚𑁆𑀛𑀺𑀫𑀬𑀸𑀫𑁄, 𑀉𑀢𑁆𑀢𑀭𑀓𑀼𑀭𑀽𑀲𑀼 ¶ 𑀉𑀕𑁆𑀕𑀫𑀦𑀓𑀸𑀮𑁄 𑀅𑀧𑀭𑀕𑁄𑀬𑀸𑀦𑁂 𑀫𑀚𑁆𑀛𑀦𑁆𑀳𑀺𑀓𑁄, 𑀇𑀥 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀫𑀚𑁆𑀛𑀺𑀫𑀬𑀸𑀫𑁄, 𑀅𑀧𑀭𑀕𑁄𑀬𑀸𑀦𑀤𑀻𑀧𑁂 𑀉𑀕𑁆𑀕𑀫𑀦𑀓𑀸𑀮𑁄 𑀇𑀥 𑀫𑀚𑁆𑀛𑀦𑁆𑀳𑀺𑀓𑁄, 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑁂 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀫𑀚𑁆𑀛𑀺𑀫𑀬𑀸𑀫𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀤𑀻𑀧𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀧𑀭𑀕𑁄𑀬𑀸𑀦𑀯𑀸𑀲𑀻𑀦𑀁 𑀉𑀕𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀲𑁂𑀲𑀤𑀻𑀧𑁂𑀲𑀼𑀧𑀺. 𑀇𑀢𑀺 𑀇𑀫𑀺𑀦𑀸𑀯 𑀧𑀓𑀸𑀭𑁂𑀦 𑀢𑀻𑀲𑀼 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑁄 𑀅𑀜𑁆𑀜𑀣𑀸 𑀧𑀦 𑀤𑁆𑀯𑀻𑀲𑀼 𑀏𑀯 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀤𑀻𑀧𑁂 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀢𑁆𑀣𑀗𑁆𑀕𑀫𑀺𑀢𑁂 𑀢𑀢𑁆𑀣 𑀦 𑀧𑀜𑁆𑀜𑀸𑀬𑀢𑀺, 𑀆𑀮𑁄𑀓𑀁 𑀦 𑀤𑀲𑁆𑀲𑁂𑀢𑀺, 𑀤𑁆𑀯𑀻𑀲𑀼 𑀏𑀯 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦 𑀉𑀪𑀬𑀁. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀤𑀻𑀧𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀻𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑁂 𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀞𑀸𑀦𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺, 𑀢𑀣𑀸 𑀅𑀧𑀭𑀕𑁄𑀬𑀸𑀦𑁂 𑀉𑀕𑁆𑀕𑀫𑀦𑀯𑀲𑁂𑀦 𑀢𑀢𑁆𑀣𑀸𑀧𑀺 𑀉𑀧𑀟𑁆𑀠𑀲𑁆𑀲𑁂𑀯 𑀧𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁 𑀧𑀦 𑀅𑀢𑁆𑀣𑀗𑁆𑀕𑀫𑀺𑀢𑁂 𑀦 ¶ 𑀧𑀜𑁆𑀜𑀸𑀬𑀢𑀻𑀢𑀺 𑀤𑁆𑀯𑀻𑀲𑀼 𑀤𑀻𑀧𑁂𑀲𑀼 𑀲𑀩𑁆𑀩𑀢𑁆𑀣 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺 𑀅𑀧𑀭𑀕𑁄𑀬𑀸𑀦𑁂𑀧𑀺 𑀉𑀕𑁆𑀕𑀢𑁂 𑀲𑀽𑀭𑀺𑀬𑁂 𑀲𑀩𑁆𑀩𑀢𑁆𑀣 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄.

𑀧𑀸𑀢𑀼𑀪𑀯𑀦𑁆𑀢𑀸 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀓𑀢𑁄𑀯 𑀮𑁄𑀓𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂𑀲𑀼 𑀲𑀽𑀭𑀺𑀬𑁄 𑀧𑀞𑀫𑀢𑀭𑀁 𑀧𑀜𑁆𑀜𑀸𑀬𑀢𑀺. 𑀧𑀞𑀫𑀓𑀧𑁆𑀧𑀺𑀓𑀸𑀦𑀜𑁆𑀳𑀺 𑀲𑀢𑁆𑀢𑀸𑀦𑀁 𑀲𑀬𑀁𑀧𑀪𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀢𑁂 𑀪𑀻𑀢𑀢𑀲𑀺𑀢𑀸 ‘‘𑀪𑀤𑁆𑀤𑀓𑀁 𑀯𑀢𑀲𑁆𑀲, 𑀲𑀘𑁂 𑀅𑀜𑁆𑀜𑁄 𑀆𑀮𑁄𑀓𑁄 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀢𑁄 𑀫𑀳𑀸𑀚𑀦𑀲𑁆𑀲 𑀲𑀽𑀭𑀪𑀸𑀯𑀁 𑀚𑀦𑀬𑀫𑀸𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀝𑁆𑀞𑀳𑀺, 𑀢𑁂𑀦𑁂𑀯𑀲𑁆𑀲 ‘‘𑀲𑀽𑀭𑀺𑀬𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀫𑀺𑀢𑁂 𑀧𑀼𑀦 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀢𑁂 𑀪𑀻𑀢𑀢𑀲𑀺𑀢𑀸 ‘‘𑀪𑀤𑁆𑀤𑀓𑀁 𑀯𑀢𑀲𑁆𑀲, 𑀲𑀘𑁂 𑀅𑀜𑁆𑀜𑁄 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁 𑀉𑀝𑁆𑀞𑀳𑀺, 𑀢𑁂𑀦𑁂𑀯𑀲𑁆𑀲 ‘‘𑀘𑀦𑁆𑀤𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀏𑀯𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺 ¶ , 𑀢𑀢𑁄 𑀧𑀪𑀼𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀘 𑀫𑀸𑀲𑀟𑁆𑀠𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸 𑀚𑀸𑀬𑀦𑁆𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀦 𑀧𑀸𑀢𑀼𑀪𑀽𑀢𑀤𑀺𑀯𑀲𑁂𑀬𑁂𑀯 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸 𑀘𑀢𑁆𑀢𑀸𑀭𑁄 𑀘 𑀤𑀻𑀧𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂 𑀘 𑀔𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀘𑁂𑀢𑁆𑀣 ‘‘𑀏𑀓𑀁 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀇𑀫𑀲𑁆𑀲 𑀘𑀓𑁆𑀓𑀯𑀸𑀴𑀲𑁆𑀲 𑀲𑀺𑀦𑁂𑀭𑀼𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀧𑀭𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀧𑁆𑀧𑀫𑀸𑀡𑀜𑁆𑀘 𑀧𑀳𑀸𑀬 𑀇𑀫𑀺𑀲𑁆𑀲𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑁋

𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀸𑀦𑀁, 𑀅𑀦𑁆𑀢𑀭𑀁 𑀧𑀭𑀺𑀫𑀸𑀡𑀢𑁄;

𑀧𑀜𑁆𑀘 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀽𑀦𑀲𑀝𑁆𑀞𑀺 𑀘.

𑀲𑀢𑀸𑀦𑀺 𑀲𑀢𑁆𑀢 𑀜𑁂𑀬𑁆𑀬𑀸𑀦𑀺, 𑀧𑀜𑁆𑀘𑀯𑀻𑀲𑀼𑀢𑁆𑀢𑀭𑀸𑀦𑀺 𑀘;

𑀫𑀚𑁆𑀛𑀯𑀻𑀣𑀺𑀕𑀢𑁄 𑀦𑀸𑀫, 𑀢𑀢𑁆𑀣 𑀯𑁂𑀫𑀚𑁆𑀛𑀕𑁄 𑀭𑀯𑀺.

𑀫𑀚𑁆𑀛𑀢𑁄 𑀬𑀸𑀯 𑀫𑁂𑀭𑀼𑀫𑁆𑀳𑀸, 𑀘𑀓𑁆𑀓𑀯𑀸𑀴𑀸𑀦𑀫𑀦𑁆𑀢𑀭𑁂;

𑀯𑁂𑀫𑀚𑁆𑀛𑀕𑁄 𑀬𑀤𑀸 𑀳𑁄𑀢𑀺, 𑀉𑀪𑀬𑀦𑁆𑀢𑀕𑀢𑁄 𑀢𑀤𑀸.

𑀫𑀚𑁆𑀛𑀢𑁄 ¶ 𑀬𑀸𑀯 𑀫𑁂𑀭𑀼𑀫𑁆𑀳𑀸, 𑀘𑀓𑁆𑀓𑀯𑀸𑀴𑀸 𑀘 𑀧𑀩𑁆𑀩𑀢𑀸;

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀽𑀦𑀲𑀻𑀢𑀺 𑀘.

𑀅𑀝𑁆𑀞𑀲𑀢𑀁 𑀤𑀼𑀯𑁂 𑀲𑀝𑁆𑀞𑀺, 𑀬𑁄𑀚𑀦𑀸𑀦𑀺 𑀤𑁆𑀯𑀺𑀕𑀸𑀯𑀼𑀢𑀁;

𑀉𑀪𑀢𑁄 𑀅𑀦𑁆𑀢𑀢𑁄 𑀫𑁂𑀭𑀼-𑀘𑀓𑁆𑀓𑀯𑀸𑀴𑀸𑀦𑀫𑀦𑁆𑀢𑀭𑁂.

𑀏𑀓𑀁 𑀲𑀢𑀲𑀳𑀲𑁆𑀲𑀜𑁆𑀘, 𑀲𑀳𑀲𑁆𑀲𑀸𑀦𑀽𑀦𑀢𑀸𑀮𑀻𑀲𑀁;

𑀦𑀯𑀲𑀢𑀸𑀦𑁂𑀓𑀢𑀺𑀁𑀲, 𑀬𑁄𑀚𑀦𑀸𑀦𑀺 𑀘 𑀕𑀸𑀯𑀼𑀢𑀁.

𑀧𑀫𑀸𑀡𑀢𑁄 𑀲𑀫𑀦𑁆𑀢𑀸 𑀘, 𑀫𑀡𑁆𑀟𑀮𑀁 𑀫𑀚𑁆𑀛𑀯𑀻𑀣𑀺𑀬𑀸;

𑀲𑀢𑀲𑀳𑀲𑁆𑀲𑀸𑀦𑀽𑀦𑀯𑀻𑀲, 𑀲𑀳𑀲𑁆𑀲𑀸𑀦𑁂𑀓𑀢𑀺𑀁𑀲 𑀘.

𑀲𑀢𑀫𑁂𑀓𑀜𑁆𑀘 𑀯𑀺𑀜𑁆𑀜𑁂𑀬𑁆𑀬𑀁, 𑀧𑀜𑁆𑀘𑀲𑀢𑁆𑀢𑀢𑀺 𑀉𑀢𑁆𑀢𑀭𑀁;

𑀤𑀓𑁆𑀔𑀺𑀡𑀁 𑀉𑀢𑁆𑀢𑀭𑀜𑁆𑀘𑀸𑀧𑀺, 𑀕𑀘𑁆𑀙𑀦𑁆𑀢𑁄 𑀧𑀦 𑀪𑀸𑀡𑀼𑀫𑀸.

𑀫𑀚𑁆𑀛𑀯𑀻𑀣𑀺𑀧𑁆𑀧𑀫𑀸𑀡𑁂𑀦 ¶ , 𑀫𑀡𑁆𑀟𑀮𑁂𑀦𑁂𑀯 𑀕𑀘𑁆𑀙𑀢𑀺;

𑀕𑀘𑁆𑀙𑀦𑁆𑀢𑁄 𑀘 𑀧𑀦𑁂𑀯𑀁 𑀲𑁄, 𑀑𑀭𑀼𑀬𑁆𑀳𑁄𑀭𑀼𑀬𑁆𑀳 𑀳𑁂𑀝𑁆𑀞𑀢𑁄.

𑀆𑀭𑀼𑀬𑁆𑀳𑀸𑀭𑀼𑀬𑁆𑀳 𑀉𑀤𑁆𑀥𑀜𑁆𑀘, 𑀬𑀢𑁄 𑀕𑀘𑁆𑀙𑀢𑀺 𑀲𑀩𑁆𑀩𑀤𑀸;

𑀢𑀢𑁄 𑀕𑀢𑀺𑀯𑀲𑁂𑀦𑀲𑁆𑀲, 𑀤𑀽𑀭𑀫𑀤𑁆𑀥𑀸𑀦𑀫𑀸𑀲𑀺 𑀢𑀁.

𑀢𑀺𑀁𑀲 𑀲𑀢𑀲𑀳𑀲𑁆𑀲𑀸𑀦𑀺, 𑀬𑁄𑀚𑀦𑀸𑀦𑀺 𑀧𑀫𑀸𑀡𑀢𑁄;

𑀢𑀲𑁆𑀫𑀸 𑀲𑁄 𑀧𑀭𑀺𑀢𑁄 𑀬𑀸𑀢𑀺, 𑀢𑀢𑁆𑀢𑀓𑀁𑀯 𑀤𑀺𑀦𑁂 𑀤𑀺𑀦𑁂.

𑀲𑀳𑀲𑁆𑀲𑀫𑁂𑀓𑀁 𑀧𑀜𑁆𑀘𑀲𑀢𑀁, 𑀘𑀢𑀼𑀧𑀜𑁆𑀜𑀸𑀲𑀬𑁄𑀚𑀦𑀁;

𑀢𑀺𑀕𑀸𑀯𑀼𑀢𑀁 𑀢𑁂𑀭𑀲𑀽𑀲𑀪𑀁, 𑀢𑁂𑀢𑁆𑀢𑀺𑀁𑀲 𑀭𑀢𑀦𑀸𑀦𑀺 𑀘.

𑀅𑀝𑁆𑀞𑀗𑁆𑀕𑀼𑀮𑀸𑀦𑀺 𑀘 𑀢𑀺𑀭𑀺𑀬𑀁, 𑀕𑀘𑁆𑀙𑀢𑁂𑀓𑀤𑀺𑀦𑁂 𑀭𑀯𑀺;

𑀙𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺, 𑀙 𑀲𑀢𑀸𑀦𑀺 𑀢𑀺𑀕𑀸𑀯𑀼𑀢𑀁.

𑀬𑁄𑀚𑀦𑀸𑀦𑀁 ¶ 𑀢𑀺𑀢𑀸𑀮𑀻𑀲𑀁, 𑀫𑀸𑀲𑁂𑀦𑁂𑀓𑁂𑀦 𑀕𑀘𑁆𑀙𑀢𑀺;

𑀢𑁂𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀺, 𑀤𑁆𑀯𑀺𑀲𑀢𑀁 𑀲𑀢𑁆𑀢𑀲𑀻𑀢𑀺 𑀘.

𑀕𑀸𑀯𑀼𑀢𑀸𑀦𑀺 𑀤𑀼𑀯𑁂 𑀘𑀸𑀧𑀺, 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀕𑀘𑁆𑀙𑀢𑀺;

𑀇𑀫𑀸𑀬 𑀕𑀢𑀺𑀬𑀸 𑀅𑀦𑁆𑀢-𑀯𑀻𑀣𑀺𑀢𑁄 𑀯𑀻𑀣𑀺𑀅𑀦𑁆𑀢𑀺𑀫𑀁.

𑀕𑀘𑁆𑀙𑀢𑀺 𑀙𑀳𑀺 𑀫𑀸𑀲𑁂𑀳𑀺, 𑀢𑀺𑀫𑀸𑀲𑁂𑀳𑀺 𑀘 𑀫𑀚𑁆𑀛𑀺𑀫𑀁;

𑀲𑀺𑀦𑁂𑀭𑀼𑀲𑀦𑁆𑀢𑀺𑀓𑁂 𑀅𑀦𑁆𑀢-𑀯𑀻𑀣𑀺𑀢𑁄 𑀧𑀦 𑀪𑀸𑀡𑀼𑀫𑀸;

𑀆𑀕𑀘𑁆𑀙𑀦𑁆𑀢𑁄 𑀤𑁆𑀯𑀺𑀫𑀸𑀲𑁂𑀳𑀺, 𑀅𑀲𑁆𑀲 𑀤𑀻𑀧𑀲𑁆𑀲 𑀫𑀚𑁆𑀛𑀕𑁄.

𑀢𑀲𑁆𑀫𑀸 𑀲𑀻𑀳𑀴𑀤𑀻𑀧𑀲𑁆𑀲, 𑀫𑀚𑁆𑀛𑀢𑁄 𑀫𑁂𑀭𑀼𑀅𑀦𑁆𑀢𑀭𑀁;

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀤𑁆𑀯𑀺𑀲𑀢𑁂𑀦𑀸𑀥𑀺𑀓𑀸𑀦𑀺 𑀢𑀼.

𑀢𑁂𑀢𑁆𑀢𑀺𑀁𑀲𑀜𑁆𑀘 𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑀸𑀭𑀲 𑀢𑀺𑀕𑀸𑀯𑀼𑀢𑀁;

𑀘𑀓𑁆𑀓𑀯𑀸𑀴𑀦𑁆𑀢𑀭𑀜𑁆𑀘𑀲𑁆𑀲, 𑀤𑀻𑀧𑀲𑁆𑀲𑁂𑀯 𑀘 𑀫𑀚𑁆𑀛𑀢𑁄.

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀙𑀯𑀻𑀲𑀢𑀺;

𑀙 𑀉𑀢𑁆𑀢𑀭𑀸𑀦𑀺 𑀧𑀜𑁆𑀘𑁂𑀯, 𑀲𑀢𑀸𑀦𑁂𑀓𑀜𑁆𑀘 𑀕𑀸𑀯𑀼𑀢𑀦𑁆𑀢𑀺.

𑀏𑀯𑀫𑁂𑀢𑁆𑀣 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀦𑁆𑀢𑀺 𑀏𑀢𑁆𑀣 𑀢𑁂𑀢𑁆𑀢𑀺𑀁𑀲 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀁𑀲𑀳𑀘𑀭𑀺𑀢𑀝𑁆𑀞𑀸𑀦𑀁 𑀢𑁂𑀢𑁆𑀢𑀺𑀁𑀲𑀁, 𑀢𑀤𑁂𑀯 𑀢𑀸𑀯𑀢𑀺𑀁𑀲𑀁 ¶ , 𑀢𑀁 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀸, 𑀤𑁂𑀯𑀸, 𑀢𑁂𑀲𑀁 𑀪𑀯𑀦𑀁 𑀢𑀸𑀯𑀢𑀺𑀁𑀲𑀪𑀯𑀦𑀁. 𑀢𑀣𑀸 𑀳𑀺 𑀫𑀖𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀫𑀘𑀮𑀕𑀸𑀫𑀓𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑁆𑀧𑀦𑁆𑀦𑁂 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑁂 𑀉𑀧𑀸𑀤𑀸𑀬 𑀅𑀲𑁆𑀲 𑀤𑁂𑀯𑀮𑁄𑀓𑀲𑁆𑀲 𑀅𑀬𑀁 𑀧𑀡𑁆𑀡𑀢𑁆𑀢𑀺 𑀚𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀅𑀣 𑀯𑀸 𑀬𑀲𑁆𑀫𑀸 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀙 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀅𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦’’𑀦𑁆𑀢𑀺. 𑀢𑀲𑁆𑀫𑀸 𑀦𑀸𑀫𑀧𑀡𑁆𑀡𑀢𑁆𑀢𑀺𑀬𑁂𑀯𑁂𑀲𑀸 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀳𑀲𑁆𑀲𑀬𑁄𑀚𑀦𑀦𑁆𑀢𑀺 𑀇𑀤𑀁 𑀧𑀦 𑀲𑀓𑁆𑀓𑀧𑀼𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀸 𑀅𑀢𑁆𑀣𑀺 𑀧𑀩𑁆𑀩𑀢𑀝𑁆𑀞𑀓𑀸, 𑀅𑀢𑁆𑀣𑀺 𑀆𑀓𑀸𑀲𑀝𑁆𑀞𑀓𑀸, 𑀢𑁂𑀲𑀁 𑀧𑀭𑀫𑁆𑀧𑀭𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀧𑀢𑁆𑀢𑀸, 𑀢𑀣𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀬𑀸𑀫𑀸𑀤𑀻𑀦𑀜𑁆𑀘. 𑀏𑀓𑀤𑁂𑀯𑀮𑁄𑀓𑁂𑀧𑀺 𑀳𑀺 𑀤𑁂𑀯𑀸𑀦𑀁 𑀧𑀭𑀫𑁆𑀧𑀭𑀸 ¶ 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀅𑀧𑁆𑀧𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀇𑀤𑀁 𑀧𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀲𑀺𑀦𑁂𑀭𑀼𑀲𑁆𑀲 𑀉𑀧𑀭𑀺𑀫𑀢𑀮𑁂 𑀤𑀲𑀲𑀳𑀲𑁆𑀲𑀬𑁄𑀚𑀦𑀺𑀓𑁂 𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀧𑀸𑀘𑀻𑀦𑀧𑀘𑁆𑀙𑀺𑀫𑀤𑁆𑀯𑀸𑀭𑀸𑀦𑀁 𑀅𑀦𑁆𑀢𑀭𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀺, 𑀢𑀣𑀸 𑀤𑀓𑁆𑀔𑀺𑀡𑀼𑀢𑁆𑀢𑀭𑀤𑁆𑀯𑀸𑀭𑀸𑀦𑀁. 𑀢𑀁 𑀔𑁄 𑀧𑀦 𑀦𑀕𑀭𑀁 𑀤𑁆𑀯𑀸𑀭𑀲𑀳𑀲𑁆𑀲𑀬𑀼𑀢𑁆𑀢𑀁 𑀅𑀳𑁄𑀲𑀺 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀧𑀝𑀺𑀫𑀡𑁆𑀟𑀺𑀢𑀁.

𑀢𑀲𑁆𑀲 𑀫𑀚𑁆𑀛𑁂 (𑀥. 𑀧. 𑀅𑀝𑁆𑀞. 𑁧.𑁨𑁯 𑀫𑀖𑀯𑀢𑁆𑀣𑀼) 𑀢𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁂𑀳𑀺, 𑀥𑀚𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀲𑀢𑁆𑀢𑀭𑀢𑀦𑀫𑀬𑁄 𑀲𑀢𑁆𑀢𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀲𑀓𑁆𑀓𑀲𑁆𑀲 𑀯𑁂𑀚𑀬𑀦𑁆𑀢𑁄 𑀦𑀸𑀫 𑀧𑀸𑀲𑀸𑀤𑁄. 𑀢𑀢𑁆𑀣 𑀲𑀼𑀯𑀡𑁆𑀡𑀬𑀝𑁆𑀞𑀻𑀲𑀼 𑀫𑀡𑀺𑀥𑀚𑀸 𑀅𑀳𑁂𑀲𑀼𑀁, 𑀫𑀡𑀺𑀬𑀝𑁆𑀞𑀻𑀲𑀼 𑀲𑀼𑀯𑀡𑁆𑀡𑀥𑀚𑀸, 𑀧𑀯𑀸𑀴𑀬𑀝𑁆𑀞𑀻𑀲𑀼 𑀫𑀼𑀢𑁆𑀢𑀥𑀚𑀸, 𑀫𑀼𑀢𑁆𑀢𑀬𑀝𑁆𑀞𑀻𑀲𑀼 𑀧𑀯𑀸𑀴𑀥𑀚𑀸, 𑀲𑀢𑁆𑀢𑀭𑀢𑀦𑀫𑀬𑀸𑀲𑀼 𑀬𑀝𑁆𑀞𑀻𑀲𑀼 𑀲𑀢𑁆𑀢𑀭𑀢𑀦𑀫𑀬𑀸 𑀥𑀚𑀸.

𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀸𑀬𑀸𑀫𑁄 𑀯𑁂𑀚𑀬𑀦𑁆𑀢𑀭𑀣𑁄 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁯 𑀆𑀤𑀬𑁄). 𑀢𑀲𑁆𑀲 𑀳𑀺 𑀧𑀘𑁆𑀙𑀺𑀫𑀦𑁆𑀢𑁄 𑀧𑀡𑁆𑀡𑀸𑀲𑀬𑁄𑀚𑀦𑁄, 𑀫𑀚𑁆𑀛𑁂 𑀭𑀣𑀧𑀜𑁆𑀚𑀭𑁄 𑀧𑀡𑁆𑀡𑀸𑀲𑀬𑁄𑀚𑀦𑁄, 𑀭𑀣𑀲𑀦𑁆𑀥𑀺𑀢𑁄 𑀬𑀸𑀯 𑀭𑀣𑀲𑀻𑀲𑀸 𑀧𑀡𑁆𑀡𑀸𑀲𑁂𑀯 𑀬𑁄𑀚𑀦𑀸𑀦𑀺. 𑀢𑀤𑁂𑀯 𑀧𑀫𑀸𑀡𑀁 𑀤𑀺𑀕𑀼𑀡𑀁 𑀓𑀢𑁆𑀯𑀸 ‘‘𑀢𑀺𑀬𑁄𑀚𑀦𑀲𑀢𑀸𑀬𑀸𑀫𑁄’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀬𑁄𑀚𑀦𑀺𑀓𑀧𑀮𑁆𑀮𑀗𑁆𑀓𑁄 𑀅𑀢𑁆𑀣𑀢𑁄 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀢𑀺𑀬𑁄𑀚𑀦𑀺𑀓𑀁 𑀲𑁂𑀢𑀘𑁆𑀙𑀢𑁆𑀢𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀬𑀼𑀕𑁂 𑀲𑀳𑀲𑁆𑀲𑀆𑀚𑀜𑁆𑀜𑀬𑀼𑀢𑁆𑀢𑀁. 𑀲𑁂𑀲𑀸𑀮𑀗𑁆𑀓𑀸𑀭𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺. 𑀥𑀚𑁄 𑀧𑀦𑀲𑁆𑀲 𑀅𑀟𑁆𑀠𑀢𑀺𑀬𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀉𑀕𑁆𑀕𑀢𑁄, 𑀬𑀲𑁆𑀲 𑀯𑀸𑀢𑀸𑀳𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲𑁂𑀯 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺.

𑀲𑀓𑁆𑀓𑀲𑁆𑀲 𑀧𑀦 𑀏𑀭𑀸𑀯𑀡𑁄 𑀦𑀸𑀫 𑀳𑀢𑁆𑀣𑀻 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄, 𑀲𑁄𑀧𑀺 𑀤𑁂𑀯𑀧𑀼𑀢𑁆𑀢𑁄𑀬𑁂𑀯. 𑀦 𑀳𑀺 𑀤𑁂𑀯𑀮𑁄𑀓𑀲𑁆𑀫𑀺𑀁 𑀢𑀺𑀭𑀘𑁆𑀙𑀸𑀦𑀕𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 ¶ 𑀉𑀬𑁆𑀬𑀸𑀦𑀓𑀻𑀴𑀸𑀬 𑀦𑀺𑀓𑁆𑀔𑀫𑀦𑀓𑀸𑀮𑁂 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀏𑀭𑀸𑀯𑀡𑁄 𑀦𑀸𑀫 𑀳𑀢𑁆𑀣𑀻 𑀳𑁄𑀢𑀺. 𑀲𑁄 𑀢𑁂𑀢𑁆𑀢𑀺𑀁𑀲𑀓𑀼𑀫𑁆𑀪𑁂 𑀫𑀸𑀧𑁂𑀢𑀺 𑀆𑀯𑀝𑁆𑀝𑁂𑀦 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑁂, 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀲𑀓𑁆𑀓𑀲𑁆𑀲 𑀅𑀢𑁆𑀣𑀸𑀬 𑀲𑀼𑀤𑀲𑁆𑀲𑀦𑀁 𑀦𑀸𑀫 𑀢𑀺𑀁𑀲𑀬𑁄𑀚𑀦𑀺𑀓𑀁 𑀓𑀼𑀫𑁆𑀪𑀁 𑀫𑀸𑀧𑁂𑀢𑀺. 𑀢𑀲𑁆𑀲 𑀉𑀧𑀭𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀭𑀢𑀦𑀫𑀡𑁆𑀟𑀧𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀲𑀢𑁆𑀢𑀭𑀢𑀦𑀫𑀬𑀸 𑀬𑁄𑀚𑀦𑀼𑀩𑁆𑀩𑁂𑀥𑀸 𑀥𑀚𑀸 𑀉𑀝𑁆𑀞𑀳𑀦𑁆𑀢𑀺. 𑀧𑀭𑀺𑀬𑀦𑁆𑀢𑁂 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸 𑀑𑀮𑀫𑁆𑀩𑀦𑁆𑀢𑀺, 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀤𑁆𑀤𑀲𑀤𑀺𑀲𑁄 𑀤𑀺𑀩𑁆𑀩𑀕𑀻𑀢𑀲𑀤𑁆𑀤𑁄 𑀯𑀺𑀬 𑀭𑀯𑁄 𑀦𑀺𑀘𑁆𑀙𑀭𑀢𑀺. 𑀫𑀡𑁆𑀟𑀧𑀫𑀚𑁆𑀛𑁂 𑀲𑀓𑁆𑀓𑀲𑁆𑀲 𑀬𑁄𑀚𑀦𑀺𑀓𑁄 𑀫𑀡𑀺𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑀓𑁆𑀓𑁄 𑀦𑀺𑀲𑀻𑀤𑀢𑀺. 𑀢𑁂𑀢𑁆𑀢𑀺𑀁𑀲𑀸𑀬 𑀓𑀼𑀫𑁆𑀪𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀓𑀼𑀫𑁆𑀪𑁂 𑀲𑀢𑁆𑀢 𑀲𑀢𑁆𑀢 𑀤𑀦𑁆𑀢𑁂 𑀫𑀸𑀧𑁂𑀢𑀺, 𑀢𑁂𑀲𑀼 𑀏𑀓𑁂𑀓𑁄 𑀧𑀡𑁆𑀡𑀸𑀲𑀬𑁄𑀚𑀦𑀸𑀬𑀸𑀫𑁄. 𑀏𑀓𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀤𑀦𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀧𑁄𑀓𑁆𑀔𑀭𑀡𑀺𑀬𑁄 𑀳𑁄𑀦𑁆𑀢𑀺, 𑀏𑀓𑁂𑀓𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀲𑀢𑁆𑀢 𑀲𑀢𑁆𑀢 𑀧𑀤𑀼𑀫𑀺𑀦𑀻𑀕𑀘𑁆𑀙𑀸, 𑀏𑀓𑁂𑀓𑀲𑁆𑀫𑀺𑀁 𑀕𑀘𑁆𑀙𑁂 𑀲𑀢𑁆𑀢 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁂𑀓𑀲𑁆𑀲 𑀧𑀼𑀧𑁆𑀨𑀲𑁆𑀲 𑀲𑀢𑁆𑀢 𑀲𑀢𑁆𑀢 𑀧𑀢𑁆𑀢𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀢𑁆𑀢𑁂 𑀲𑀢𑁆𑀢 𑀲𑀢𑁆𑀢 𑀤𑁂𑀯𑀥𑀻𑀢𑀭𑁄 𑀦𑀘𑁆𑀘𑀦𑁆𑀢𑀺. 𑀏𑀯𑀁 𑀲𑀫𑀦𑁆𑀢𑀸 𑀧𑀡𑁆𑀡𑀸𑀲𑀬𑁄𑀚𑀦𑀝𑁆𑀞𑀸𑀦𑁂 𑀳𑀢𑁆𑀣𑀺𑀤𑀦𑁆𑀢𑁂𑀲𑀼𑀬𑁂𑀯 𑀦𑀘𑁆𑀘𑀦𑀝𑀲𑀫𑀚𑁆𑀚𑁄 𑀳𑁄𑀢𑀺.

𑀦𑀦𑁆𑀤𑀸 ¶ 𑀦𑀸𑀫 𑀧𑀦 𑀧𑁄𑀓𑁆𑀔𑀭𑀡𑀻 𑀧𑀜𑁆𑀜𑀸𑀲𑀬𑁄𑀚𑀦𑀸. ‘‘𑀧𑀜𑁆𑀘𑀲𑀢𑀬𑁄𑀚𑀦𑀺𑀓𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀘𑀺𑀢𑁆𑀢𑀮𑀢𑀸𑀯𑀦𑀁 𑀧𑀦 𑀲𑀝𑁆𑀞𑀺𑀬𑁄𑀚𑀦𑀺𑀓𑀁. ‘‘𑀧𑀜𑁆𑀘𑀬𑁄𑀚𑀦𑀲𑀢𑀺𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁, 𑀢𑀣𑀸 𑀦𑀦𑁆𑀤𑀦𑀯𑀦𑀁 𑀨𑀸𑀭𑀼𑀲𑀓𑀯𑀦𑀜𑁆𑀘. 𑀲𑀓𑁆𑀓𑁄 𑀧𑀦𑁂𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀲𑀼𑀯𑀡𑁆𑀡𑀫𑀳𑀸𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑁄 𑀦𑀦𑁆𑀤𑀦𑀯𑀦𑀸𑀤𑀻𑀲𑀼 𑀯𑀺𑀘𑀭𑀢𑀺.

𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀦 𑀓𑁄𑀯𑀺𑀴𑀸𑀭𑁄 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑁄 𑀧𑀜𑁆𑀘𑀤𑀲𑀬𑁄𑀚𑀦𑀧𑀭𑀺𑀡𑀸𑀳𑀓𑁆𑀔𑀦𑁆𑀥𑁄 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄. 𑀢𑀲𑁆𑀲 𑀫𑀽𑀮𑁂 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀸 𑀧𑀜𑁆𑀜𑀸𑀲𑀬𑁄𑀚𑀦𑀯𑀺𑀢𑁆𑀣𑀸𑀭𑀸 𑀧𑀜𑁆𑀘𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀸 𑀚𑀬𑀲𑀼𑀫𑀦𑀧𑀼𑀧𑁆𑀨𑀓𑀯𑀡𑁆𑀡𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸, 𑀬𑀲𑁆𑀲𑀸 𑀫𑀼𑀤𑀼𑀢𑀸𑀬 𑀲𑀓𑁆𑀓𑀲𑁆𑀲 𑀦𑀺𑀲𑀻𑀤𑀢𑁄 𑀉𑀧𑀟𑁆𑀠𑀓𑀸𑀬𑁄 𑀅𑀦𑀼𑀧𑀯𑀺𑀲𑀢𑀺, 𑀉𑀝𑁆𑀞𑀺𑀢𑀓𑀸𑀮𑁂 𑀊𑀦𑀁 𑀧𑀭𑀺𑀧𑀽𑀭𑀢𑀺.

𑀲𑀼𑀥𑀫𑁆𑀫𑀸 ¶ 𑀦𑀸𑀫 𑀤𑁂𑀯𑀲𑀪𑀸 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀢𑀺𑀬𑁄𑀚𑀦𑀲𑀢𑀺𑀓𑀸, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀺𑀓𑀸, 𑀉𑀩𑁆𑀩𑁂𑀥𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸, 𑀢𑀲𑁆𑀲𑀸 𑀨𑀮𑀺𑀓𑀫𑀬𑀸 𑀪𑀽𑀫𑀺, 𑀣𑀫𑁆𑀪𑀢𑀼𑀮𑀸𑀲𑀗𑁆𑀖𑀸𑀝𑀸𑀤𑀻𑀲𑀼 𑀯𑀸𑀴𑀭𑀽𑀧𑀸𑀤𑀺𑀲𑀗𑁆𑀖𑀝𑁆𑀝𑀦𑀓𑀆𑀡𑀺𑀬𑁄 𑀫𑀡𑀺𑀫𑀬𑀸, 𑀲𑀼𑀯𑀡𑁆𑀡𑀫𑀬𑀸 𑀣𑀫𑁆𑀪𑀸, 𑀭𑀚𑀢𑀫𑀬𑀸 𑀣𑀫𑁆𑀪𑀖𑀝𑀓𑀸 𑀘 𑀲𑀗𑁆𑀖𑀸𑀝𑀜𑁆𑀘, 𑀧𑀯𑀸𑀴𑀫𑀬𑀸𑀦𑀺 𑀯𑀸𑀴𑀭𑀽𑀧𑀸𑀦𑀺, 𑀲𑀢𑁆𑀢𑀭𑀢𑀦𑀫𑀬𑀸 𑀕𑁄𑀧𑀸𑀦𑀲𑀺𑀬𑁄 𑀘 𑀧𑀓𑁆𑀔𑀧𑀸𑀲𑀸 𑀘 𑀫𑀼𑀔𑀯𑀝𑁆𑀝𑀺 𑀘, 𑀇𑀦𑁆𑀤𑀦𑀻𑀮𑀇𑀝𑁆𑀞𑀓𑀸𑀳𑀺 𑀙𑀤𑀦𑀁, 𑀲𑁄𑀯𑀡𑁆𑀡𑀫𑀬𑀁 𑀙𑀤𑀦𑀯𑀺𑀥𑀁, 𑀭𑀚𑀢𑀫𑀬𑀸 𑀣𑀼𑀧𑀺𑀓𑀸.

𑀆𑀲𑀸𑀯𑀢𑀻 𑀦𑀸𑀫 𑀏𑀓𑀸 𑀮𑀢𑀸 𑀅𑀢𑁆𑀣𑀺, ‘‘𑀲𑀸 𑀧𑀼𑀧𑁆𑀨𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀸 𑀯𑀲𑁆𑀲𑀲𑀳𑀲𑁆𑀲𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀧𑀼𑀧𑁆𑀨𑀫𑀸𑀦𑁂 𑀏𑀓𑀁 𑀯𑀲𑁆𑀲𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀸𑀤𑀺𑀪𑀸𑀯𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀡𑁆𑀟𑀼𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 ‘𑀧𑀡𑁆𑀟𑀼𑀧𑀮𑀸𑀲𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀦 𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀧𑀦𑁆𑀦𑀧𑀮𑀸𑀲𑁄 𑀪𑀯𑀺𑀲𑁆𑀲𑀢𑀻’’’𑀢𑀺𑀆𑀤𑀺 (𑀅. 𑀦𑀺. 𑁭.𑁬𑁯).

𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀲𑁆𑀲 𑀧𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲 𑀲𑀫𑀦𑁆𑀢𑀸 𑀧𑀜𑁆𑀘 𑀬𑁄𑀚𑀦𑀲𑀢𑀸𑀦𑀺 𑀆𑀪𑀸 𑀨𑀭𑀢𑀺, 𑀅𑀦𑀼𑀯𑀸𑀢𑀁 𑀬𑁄𑀚𑀦𑀲𑀢𑀁 𑀕𑀦𑁆𑀥𑁄 𑀕𑀘𑁆𑀙𑀢𑀺. 𑀧𑀼𑀧𑁆𑀨𑀺𑀢𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀆𑀭𑁄𑀳𑀡𑀓𑀺𑀘𑁆𑀘𑀁 𑀯𑀸 𑀅𑀗𑁆𑀓𑀼𑀲𑀁 𑀕𑀳𑁂𑀢𑁆𑀯𑀸 𑀦𑀸𑀫𑀦𑀓𑀺𑀘𑁆𑀘𑀁 𑀯𑀸 𑀧𑀼𑀧𑁆𑀨𑀸𑀳𑀭𑀡𑀢𑁆𑀣𑀁 𑀘𑀗𑁆𑀓𑁄𑀝𑀓𑀓𑀺𑀘𑁆𑀘𑀁 𑀯𑀸 𑀦𑀢𑁆𑀣𑀺. 𑀓𑀦𑁆𑀢𑀦𑀓𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 ¶ 𑀧𑀼𑀧𑁆𑀨𑀸𑀦𑀺 𑀯𑀡𑁆𑀝𑀢𑁄 𑀓𑀦𑁆𑀢𑀢𑀺, 𑀲𑀫𑁆𑀧𑀝𑀺𑀘𑁆𑀙𑀦𑀓𑀯𑀸𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀧𑀯𑁂𑀲𑀦𑀓𑀯𑀸𑀢𑁄 𑀲𑀼𑀥𑀫𑁆𑀫𑀤𑁂𑀯𑀲𑀪𑀁 𑀧𑀯𑁂𑀲𑁂𑀢𑀺, 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀧𑀼𑀭𑀸𑀡𑀧𑀼𑀧𑁆𑀨𑀸𑀦𑀺 𑀦𑀻𑀳𑀭𑀢𑀺, 𑀲𑀦𑁆𑀣𑀭𑀡𑀓𑀯𑀸𑀢𑁄 𑀧𑀢𑁆𑀢𑀓𑀡𑁆𑀡𑀺𑀓𑀓𑁂𑀲𑀭𑀸𑀦𑀺 𑀭𑀘𑁂𑀦𑁆𑀢𑁄 𑀲𑀦𑁆𑀣𑀭𑀢𑀺, 𑀫𑀚𑁆𑀛𑀝𑁆𑀞𑀸𑀦𑁂 𑀥𑀫𑁆𑀫𑀸𑀲𑀦𑀁 𑀳𑁄𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑁄 𑀭𑀢𑀦𑀧𑀮𑁆𑀮𑀗𑁆𑀓𑁄, 𑀢𑀲𑁆𑀲 𑀉𑀧𑀭𑀺 𑀥𑀸𑀭𑀺𑀬𑀫𑀸𑀦𑀁 𑀢𑀺𑀬𑁄𑀚𑀦𑀺𑀓𑀁 𑀲𑁂𑀢𑀘𑁆𑀙𑀢𑁆𑀢𑀁, 𑀢𑀤𑀦𑀦𑁆𑀢𑀭𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀆𑀲𑀦𑀁 𑀅𑀢𑁆𑀣𑀭𑀻𑀬𑀢𑀺, 𑀢𑀢𑁄 𑀩𑀸𑀢𑁆𑀢𑀺𑀁𑀲𑀸𑀬 𑀤𑁂𑀯𑀧𑀼𑀢𑁆𑀢𑀸𑀦𑀁, 𑀢𑀢𑁄 𑀅𑀜𑁆𑀜𑁂𑀲𑀁 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀦𑀁. 𑀅𑀜𑁆𑀜𑁂𑀲𑀁 𑀤𑁂𑀯𑀢𑀸𑀦𑀁 𑀧𑀦 𑀧𑀼𑀧𑁆𑀨𑀓𑀡𑁆𑀡𑀺𑀓𑀸𑀯 𑀆𑀲𑀦𑀁 𑀳𑁄𑀢𑀺. 𑀤𑁂𑀯𑀸 𑀤𑁂𑀯𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑀢𑁄 𑀧𑀼𑀧𑁆𑀨𑁂𑀳𑀺 𑀭𑁂𑀡𑀼𑀯𑀝𑁆𑀝𑀺 𑀉𑀕𑁆𑀕𑀦𑁆𑀢𑁆𑀯𑀸 𑀉𑀧𑀭𑀺 𑀓𑀡𑁆𑀡𑀺𑀓𑀁 𑀆𑀳𑀘𑁆𑀘 𑀦𑀺𑀧𑀢𑀫𑀸𑀦𑀸 𑀤𑁂𑀯𑀢𑀸𑀦𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 ¶ 𑀅𑀢𑁆𑀢𑀪𑀸𑀯𑀁 𑀮𑀸𑀔𑀸𑀧𑀭𑀺𑀓𑀫𑁆𑀫𑀲𑀚𑁆𑀚𑀺𑀢𑀁 𑀯𑀺𑀬 𑀓𑀭𑁄𑀢𑀺, 𑀢𑁂𑀲𑀁 𑀲𑀸 𑀓𑀻𑀴𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺. 𑀇𑀢𑀺 𑀇𑀫𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀪𑀕𑀯𑀸 𑀲𑀩𑁆𑀩𑀣𑀸 𑀅𑀯𑁂𑀤𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀅𑀲𑀼𑀭𑀪𑀯𑀦𑀦𑁆𑀢𑀺 𑀏𑀢𑁆𑀣 𑀤𑁂𑀯𑀸 𑀯𑀺𑀬 𑀦 𑀲𑀼𑀭𑀦𑁆𑀢𑀺 𑀦 𑀈𑀲𑀭𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀻𑀢𑀺 𑀅𑀲𑀼𑀭𑀸. 𑀲𑀼𑀭𑀸 𑀦𑀸𑀫 𑀤𑁂𑀯𑀸, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀢𑀺 𑀯𑀸 𑀅𑀲𑀼𑀭𑀸. 𑀲𑀓𑁆𑀓𑁄 𑀓𑀺𑀭 𑀫𑀘𑀮𑀕𑀸𑀫𑀓𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢 𑀯𑀢𑁆𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀢𑁆𑀣 𑀓𑀸𑀮𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬. 𑀢𑀢𑁄 𑀧𑀼𑀩𑁆𑀩𑀤𑁂𑀯𑀸 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸, 𑀲𑀓𑁆𑀓𑀸𑀭𑀁 𑀦𑁂𑀲𑀁 𑀓𑀭𑁄𑀫𑀸’’𑀢𑀺 𑀯𑀢𑁆𑀯𑀸 𑀤𑀺𑀩𑁆𑀩𑀧𑀤𑀼𑀫𑀸𑀦𑀺 𑀉𑀧𑀦𑀸𑀫𑁂𑀲𑀼𑀁, 𑀉𑀧𑀟𑁆𑀠𑀭𑀚𑁆𑀚𑁂𑀦 𑀘 𑀦𑀺𑀫𑀦𑁆𑀢𑁂𑀲𑀼𑀁. 𑀲𑀓𑁆𑀓𑁄 𑀉𑀧𑀟𑁆𑀠𑀭𑀚𑁆𑀚𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀺, 𑀅𑀣 𑀦𑁂𑀯𑀸𑀲𑀺𑀓𑀸 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀫𑀸’’𑀢𑀺 𑀕𑀦𑁆𑀥𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀲𑀓𑀧𑀭𑀺𑀲𑀸𑀬 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀫𑀸𑀭𑀺𑀲𑀸 𑀫𑀸 𑀕𑀦𑁆𑀥𑀧𑀸𑀦𑀁 𑀧𑀺𑀯𑀺𑀢𑁆𑀣, 𑀧𑀺𑀯𑀫𑀸𑀦𑀸𑀓𑀸𑀭𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀦𑁂𑀯𑀸𑀲𑀺𑀓𑀤𑁂𑀯𑀢𑀸 𑀲𑀼𑀯𑀡𑁆𑀡𑀲𑀭𑀓𑁂𑀳𑀺 𑀉𑀧𑀦𑀻𑀢𑀁 𑀕𑀦𑁆𑀥𑀧𑀸𑀦𑀁 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀲𑀼𑀯𑀡𑁆𑀡𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀲𑀬𑀺𑀁𑀲𑀼. 𑀲𑀓𑁆𑀓𑁄 ‘‘𑀕𑀡𑁆𑀳𑀣 𑀥𑀼𑀢𑁆𑀢𑁂, 𑀳𑀭𑀣 𑀥𑀼𑀢𑁆𑀢𑁂’’𑀢𑀺 𑀢𑁂 𑀧𑀸𑀤𑁂𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀸𑀤𑁂 𑀔𑀺𑀧𑀸𑀧𑁂𑀲𑀺. 𑀲𑀓𑁆𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀢𑀤𑀦𑀼𑀯𑀢𑁆𑀢𑀓𑀸𑀧𑀺 𑀲𑀩𑁆𑀩𑁂 𑀢𑀢𑁆𑀣𑁂𑀯 𑀧𑀢𑀺𑀁𑀲𑀼. 𑀅𑀣 𑀦𑁂𑀲𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀅𑀲𑀼𑀭𑀪𑀯𑀦𑀁 𑀦𑀺𑀩𑁆𑀩𑀢𑁆𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀝𑀺𑀘𑁆𑀙𑀦𑁆𑀦𑀪𑀽𑀢𑀸𑀬 𑀘𑀺𑀢𑁆𑀭𑀧𑀸𑀝𑀮𑀺𑀬𑀸 𑀉𑀧𑀲𑁄𑀪𑀺𑀢𑀁. 𑀲𑀓𑁆𑀓𑁄 𑀢𑁂𑀲𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑀸𑀕𑀫𑀦𑀢𑁆𑀣𑀸𑀬 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀦𑁆𑀢𑀭𑀸 𑀤𑁆𑀯𑀺𑀦𑁆𑀦𑀁 𑀅𑀬𑀼𑀚𑁆𑀛𑀧𑀼𑀭𑀸𑀦𑀁, 𑀧𑀜𑁆𑀘𑀯𑀺𑀥𑀸 𑀞𑀧𑀺𑀢𑀸 𑀅𑀪𑀺𑀭𑀓𑁆𑀔𑀸;

𑀉𑀭𑀕𑀓𑀭𑁄𑀝𑀺𑀧𑀬𑀲𑁆𑀲 𑀘 𑀳𑀸𑀭𑀻, 𑀫𑀤𑀦𑀬𑀼𑀢𑀸 𑀘𑀢𑀼𑀭𑁄 𑀘 𑀫𑀳𑀢𑁆𑀣𑀸’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁭; 𑀚𑀸. 𑀅𑀝𑁆𑀞. 𑁧.𑁧.𑁩𑁧);

𑀢𑀢𑁆𑀣 ¶ 𑀤𑁆𑀯𑀺𑀦𑁆𑀦𑀁 𑀅𑀬𑀼𑀚𑁆𑀛𑀧𑀼𑀭𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑁂𑀯𑀸𑀲𑀼𑀭𑀦𑀕𑀭𑀸𑀦𑀁 𑀅𑀦𑁆𑀢𑀭𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀓𑀺𑀭 𑀦𑀕𑀭𑀸𑀦𑀺 𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺. 𑀬𑀤𑀸 𑀳𑀺 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀤𑁂𑀯𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀳𑀺𑀢𑁂 𑀅𑀲𑀼𑀭𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 ¶ 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀤𑀸 𑀤𑁂𑀯𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀅𑀲𑀼𑀭𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀅𑀲𑀼𑀭𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀳𑀺𑀢𑁂 𑀲𑀓𑁆𑀓𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀦𑁆𑀢𑀭𑀸 𑀏𑀢𑁂𑀲𑀼 𑀉𑀭𑀕𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀓𑁆𑀓𑁂𑀦 𑀆𑀭𑀓𑁆𑀔𑀸 𑀞𑀧𑀺𑀢𑀸. 𑀢𑀢𑁆𑀣 𑀉𑀭𑀕𑀲𑀤𑁆𑀤𑁂𑀦 𑀦𑀸𑀕𑀸 𑀕𑀳𑀺𑀢𑀸. 𑀢𑁂 𑀉𑀤𑀓𑁂 𑀫𑀳𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀦𑁂𑀭𑀼𑀲𑁆𑀲 𑀧𑀞𑀫𑀸𑀮𑀺𑀦𑁆𑀤𑁂 𑀏𑀢𑁂𑀲𑀁 𑀆𑀭𑀓𑁆𑀔𑀸. 𑀲𑀺𑀦𑁂𑀭𑀼𑀲𑁆𑀲 𑀓𑀺𑀭 𑀲𑀫𑀦𑁆𑀢𑀢𑁄 𑀩𑀳𑀮𑀢𑁄 𑀧𑀼𑀣𑀼𑀮𑀢𑁄 𑀘 𑀧𑀜𑁆𑀘𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑀸𑀦𑀺 𑀘𑀢𑁆𑀢𑀸𑀭𑀺 𑀧𑀭𑀺𑀪𑀡𑁆𑀟𑀸𑀦𑀺 𑀢𑀸𑀯𑀢𑀺𑀁𑀲𑀪𑀯𑀦𑀲𑁆𑀲 𑀆𑀭𑀓𑁆𑀔𑀸𑀬 𑀦𑀸𑀕𑁂𑀳𑀺 𑀕𑀭𑀼𑀴𑁂𑀳𑀺 𑀓𑀼𑀫𑁆𑀪𑀡𑁆𑀟𑁂𑀳𑀺 𑀬𑀓𑁆𑀔𑁂𑀳𑀺 𑀘 𑀅𑀥𑀺𑀝𑁆𑀞𑀺𑀢𑀸𑀦𑀺. 𑀢𑁂𑀳𑀺 𑀓𑀺𑀭 𑀲𑀺𑀦𑁂𑀭𑀼𑀲𑁆𑀲 𑀉𑀧𑀟𑁆𑀠𑀁 𑀧𑀭𑀺𑀬𑀸𑀤𑀺𑀦𑁆𑀦𑀁, 𑀏𑀢𑀸𑀦𑀺𑀬𑁂𑀯 𑀘 𑀲𑀺𑀦𑁂𑀭𑀼𑀲𑁆𑀲 𑀆𑀮𑀺𑀦𑁆𑀤𑀸𑀦𑀺 𑀫𑁂𑀔𑀮𑀸𑀦𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀓𑀭𑁄𑀝𑀺𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸 𑀕𑀳𑀺𑀢𑀸. 𑀢𑁂𑀲𑀁 𑀓𑀺𑀭 𑀓𑀭𑁄𑀝𑀺 𑀦𑀸𑀫 𑀧𑀸𑀦𑀪𑁄𑀚𑀦𑀁, 𑀢𑁂𑀦 𑀦𑀸𑀫𑀁 𑀮𑀪𑀺𑀁𑀲𑀼, 𑀤𑀼𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀧𑀬𑀲𑁆𑀲𑀳𑀸𑀭𑀻𑀲𑀤𑁆𑀤𑁂𑀦 𑀓𑀼𑀫𑁆𑀪𑀡𑁆𑀟𑀸 𑀕𑀳𑀺𑀢𑀸. 𑀤𑀸𑀦𑀯𑀭𑀓𑁆𑀔𑀲𑀸 𑀓𑀺𑀭 𑀢𑁂, 𑀢𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀫𑀤𑀦𑀬𑀼𑀢𑀲𑀤𑁆𑀤𑁂𑀦 𑀬𑀓𑁆𑀔𑀸 𑀕𑀳𑀺𑀢𑀸. 𑀯𑀺𑀲𑀫𑀘𑀸𑀭𑀺𑀦𑁄 𑀓𑀺𑀭 𑀢𑁂 𑀬𑀼𑀤𑁆𑀥𑀲𑁄𑀡𑁆𑀟𑀸, 𑀘𑀢𑀼𑀢𑁆𑀣𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀘𑀢𑀼𑀭𑁄 𑀘 𑀫𑀳𑀢𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀼𑀢𑁆𑀢𑀸. 𑀢𑁂 𑀳𑀺 𑀲𑀺𑀦𑁂𑀭𑀼𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀲𑁆𑀲𑁂 𑀬𑀼𑀕𑀦𑁆𑀥𑀭𑀸𑀤𑀻𑀲𑀼 𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂 𑀫𑀳𑀸𑀤𑀻𑀧𑁂 𑀘 𑀲𑀸𑀲𑀺𑀢𑀩𑁆𑀩𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀯𑀲𑁂𑀦 ‘‘𑀫𑀳𑀢𑁆𑀣𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀜𑁆𑀘𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸.

𑀢𑁂 𑀧𑀦 𑀅𑀲𑀼𑀭𑀸 𑀆𑀬𑀼𑀯𑀡𑁆𑀡𑀬𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀳𑀺 𑀢𑀸𑀯𑀢𑀺𑀁𑀲𑀲𑀤𑀺𑀲𑀸𑀯. 𑀢𑀲𑁆𑀫𑀸 𑀅𑀦𑁆𑀢𑀭𑀸 𑀅𑀢𑁆𑀢𑀸𑀦𑀁 𑀅𑀚𑀸𑀦𑀺𑀢𑁆𑀯𑀸 𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀺𑀢𑀸𑀬 ‘‘𑀦𑀬𑀺𑀤𑀁 𑀤𑁂𑀯𑀦𑀕𑀭𑀁, 𑀢𑀢𑁆𑀣 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀼𑀧𑁆𑀨𑀢𑀺, 𑀇𑀥 𑀧𑀦 𑀘𑀺𑀢𑁆𑀢𑀧𑀸𑀝𑀮𑀻, 𑀚𑀭𑀲𑀓𑁆𑀓𑁂𑀦 𑀫𑀬𑀁 𑀲𑀼𑀭𑀁 𑀧𑀸𑀬𑁂𑀢𑁆𑀯𑀸 𑀯𑀜𑁆𑀘𑀺𑀢𑀸, 𑀤𑁂𑀯𑀦𑀕𑀭𑀜𑁆𑀘 𑀦𑁄 𑀕𑀳𑀺𑀢𑀁, 𑀕𑀘𑁆𑀙𑀸𑀫 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀆𑀭𑀼𑀬𑁆𑀳 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀨𑀮𑀓𑀸𑀦𑀺 𑀕𑀳𑁂𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸 𑀳𑀼𑀢𑁆𑀯𑀸 𑀅𑀲𑀼𑀭𑀪𑁂𑀭𑀺𑀬𑁄 𑀯𑀸𑀤𑁂𑀦𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸 𑀯𑀫𑁆𑀫𑀺𑀓𑀁 𑀯𑀺𑀬 𑀲𑀺𑀦𑁂𑀭𑀼𑀁 𑀅𑀪𑀺𑀭𑀼𑀳𑀺𑀢𑀼𑀁 𑀆𑀭𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀞𑀫𑀁 𑀦𑀸𑀕𑁂𑀳𑀺 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀬𑀼𑀤𑁆𑀥𑁂 𑀦 𑀓𑀲𑁆𑀲𑀘𑀺 𑀙𑀯𑀺 𑀯𑀸 𑀘𑀫𑁆𑀫𑀁 𑀯𑀸 𑀙𑀺𑀚𑁆𑀚𑀢𑀺, 𑀦 𑀮𑁄𑀳𑀺𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀓𑀼𑀫𑀸𑀭𑀓𑀸𑀦𑀁 𑀤𑀸𑀭𑀼𑀫𑁂𑀡𑁆𑀟𑀓𑀬𑀼𑀤𑁆𑀥𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀢𑀸𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀓𑁄𑀝𑀺𑀲𑀢𑀸𑀧𑀺 𑀓𑁄𑀝𑀺𑀲𑀳𑀲𑁆𑀲𑀸𑀧𑀺 𑀦𑀸𑀕𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀅𑀲𑀼𑀭𑀧𑀼𑀭𑀁𑀬𑁂𑀯 𑀧𑀯𑁂𑀲𑁂𑀢𑁆𑀯𑀸 ¶ 𑀦𑀺𑀯𑀢𑁆𑀢𑀦𑁆𑀢𑀺. 𑀲𑀘𑁂 𑀧𑀦 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀦𑀸𑀕𑀸 𑀑𑀲𑀓𑁆𑀓𑀺𑀢𑁆𑀯𑀸 𑀤𑀼𑀢𑀺𑀬𑁂 𑀆𑀮𑀺𑀦𑁆𑀤𑁂 𑀲𑀼𑀧𑀡𑁆𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀺. 𑀏𑀲 𑀦𑀬𑁄 𑀲𑀼𑀧𑀡𑁆𑀡𑀸𑀤𑀻𑀲𑀼𑀧𑀺. 𑀬𑀤𑀸 𑀧𑀦 𑀢𑀸𑀦𑀺 𑀧𑀜𑁆𑀘𑀧𑀺 𑀞𑀸𑀦𑀸𑀦𑀺 𑀅𑀲𑀼𑀭𑀸 𑀫𑀤𑁆𑀤𑀦𑁆𑀢𑀺, 𑀢𑀤𑀸 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀑𑀲𑀓𑁆𑀓𑀦𑁆𑀢𑀺 ¶ . 𑀅𑀣 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑀺. 𑀲𑀓𑁆𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀯𑁂𑀚𑀬𑀦𑁆𑀢𑀭𑀣𑀁 𑀆𑀭𑀼𑀬𑁆𑀳 𑀲𑀬𑀁 𑀯𑀸 𑀦𑀺𑀓𑁆𑀔𑀫𑀢𑀺, 𑀏𑀓𑀁 𑀯𑀸 𑀧𑀼𑀢𑁆𑀢𑀁 𑀧𑁂𑀲𑁂𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀏𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑀼𑀭𑁂 𑀬𑀼𑀤𑁆𑀥𑁂𑀦 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀢𑁆𑀢𑀦𑀸 𑀲𑀤𑀺𑀲𑀸 𑀧𑀝𑀺𑀫𑀸 𑀫𑀸𑀧𑁂𑀢𑁆𑀯𑀸 𑀞𑀧𑁂𑀢𑀺, 𑀢𑀲𑁆𑀫𑀸 𑀅𑀲𑀼𑀭𑀸 𑀦𑀸𑀕𑀸𑀤𑀬𑁄 𑀚𑀺𑀦𑀺𑀢𑁆𑀯𑀸 𑀆𑀕𑀢𑀸𑀧𑀺 𑀇𑀦𑁆𑀤𑀧𑀝𑀺𑀫𑀸 𑀤𑀺𑀲𑁆𑀯𑀸 ‘‘𑀲𑀓𑁆𑀓𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀧𑀮𑀸𑀬𑀦𑁆𑀢𑀺. 𑀇𑀢𑀺 𑀲𑀼𑀭𑀸𑀦𑀁 𑀧𑀝𑀺𑀧𑀓𑁆𑀔𑀸𑀢𑀺 𑀅𑀲𑀼𑀭𑀸, 𑀯𑁂𑀧𑀘𑀺𑀢𑁆𑀢𑀺𑀧𑀳𑀸𑀭𑀸𑀤𑀸𑀤𑀬𑁄, 𑀢𑁂𑀲𑀁 𑀪𑀯𑀦𑀁 𑀅𑀲𑀼𑀭𑀪𑀯𑀦𑀁. 𑀢𑀁 𑀧𑀦 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀤𑀲𑀲𑀳𑀲𑁆𑀲𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀅𑀲𑀼𑀭𑀪𑀯𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀚𑀫𑁆𑀩𑀼𑀤𑀻𑀧𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀢𑀣𑀸-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀚𑀫𑁆𑀩𑀼𑀤𑀻𑀧𑁄 𑀘 𑀢𑀣𑀸 𑀤𑀲𑀲𑀳𑀲𑁆𑀲𑀬𑁄𑀚𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀆𑀬𑀸𑀫𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀬𑁄𑀚𑀦𑀲𑀢𑀁 𑀳𑁄𑀢𑀺, 𑀮𑁄𑀳𑀧𑀣𑀯𑀻 𑀮𑁄𑀳𑀙𑀤𑀦𑀁 𑀏𑀓𑁂𑀓𑀸 𑀘 𑀪𑀺𑀢𑁆𑀢𑀺 𑀦𑀯𑀦𑀯𑀬𑁄𑀚𑀦𑀺𑀓𑀸 𑀳𑁄𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀢𑁄 𑀬𑁄𑀚𑀦𑀲𑀢𑀁 𑀕𑀘𑁆𑀙𑀢𑀺. 𑀲𑁂𑀲𑀤𑀺𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀚𑀸𑀮𑀧𑀭𑀺𑀬𑀦𑁆𑀢𑀯𑀲𑁂𑀦 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀸𑀭𑀲𑀬𑁄𑀚𑀦𑀸𑀥𑀺𑀓𑀸𑀦𑀺 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀧𑀭𑀺𑀓𑁆𑀔𑁂𑀧𑁂𑀦 𑀦𑀯 𑀬𑁄𑀚𑀦𑀲𑀢𑀸𑀦𑀺 𑀘𑀢𑀼𑀧𑀡𑁆𑀡𑀸𑀲𑀜𑁆𑀘 𑀬𑁄𑀚𑀦𑀸𑀦𑀺. 𑀲𑀫𑀦𑁆𑀢𑀸 𑀧𑀦 𑀉𑀲𑁆𑀲𑀤𑁂𑀳𑀺 𑀲𑀤𑁆𑀥𑀺𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀦𑀭𑀓𑁄 ‘‘𑀅𑀯𑀻𑀘𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄𑀢𑀺? 𑀯𑀻𑀘𑀺 𑀦𑀸𑀫 𑀅𑀦𑁆𑀢𑀭𑀁 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀘 𑀅𑀕𑁆𑀕𑀺𑀚𑀸𑀮𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀯𑀸 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑁆𑀢𑀭𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 ‘‘𑀅𑀯𑀻𑀘𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀢𑀲𑁆𑀲 𑀳𑀺 𑀧𑀼𑀭𑀢𑁆𑀣𑀺𑀫𑀪𑀺𑀢𑁆𑀢𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀁𑀲𑀺𑀩𑁆𑀩𑀫𑀸𑀦𑀬𑁄𑀚𑀦𑀲𑀢𑀁 𑀕𑀦𑁆𑀢𑁆𑀯𑀸 𑀪𑀺𑀢𑁆𑀢𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀢𑁄 𑀬𑁄𑀚𑀦𑀲𑀢𑀁 𑀕𑀘𑁆𑀙𑀢𑀺. 𑀲𑁂𑀲𑀤𑀺𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀚𑀸𑀮𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀺. 𑀅𑀩𑁆𑀪𑀦𑁆𑀢𑀭𑁂 𑀧𑀦𑀲𑁆𑀲 𑀬𑁄𑀚𑀦𑀲𑀢𑀺𑀓𑁂 𑀞𑀸𑀦𑁂 𑀦𑀸𑀴𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑀺𑀢𑀢𑀺𑀧𑀼𑀧𑀺𑀝𑁆𑀞𑀁 𑀯𑀺𑀬 𑀲𑀢𑁆𑀢𑀸 𑀦𑀺𑀭𑀦𑁆𑀢𑀭𑀸, ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀢𑁆𑀢𑁄 𑀅𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 ¶ 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀕𑀘𑁆𑀙𑀦𑁆𑀢𑀸𑀦𑀁 𑀞𑀺𑀢𑀸𑀦𑀁 𑀦𑀺𑀲𑀺𑀦𑁆𑀦𑀸𑀦𑀁 𑀦𑀺𑀧𑀦𑁆𑀦𑀸𑀦𑀜𑁆𑀘 𑀧𑀘𑁆𑀘𑀫𑀸𑀦𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀕𑀘𑁆𑀙𑀦𑁆𑀢𑀸 𑀞𑀺𑀢𑁂 𑀯𑀸 𑀦𑀺𑀲𑀺𑀦𑁆𑀦𑁂 𑀯𑀸 𑀦𑀺𑀧𑀦𑁆𑀦𑁂 𑀯𑀸 𑀦 𑀩𑀸𑀥𑁂𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀦 𑀙 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀁 𑀤𑀼𑀓𑁆𑀔𑀲𑀳𑀕𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸 𑀚𑀺𑀯𑁆𑀳𑀸𑀕𑁆𑀕𑁂 𑀙 𑀫𑀥𑀼𑀩𑀺𑀦𑁆𑀤𑀽𑀦𑀺 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀢𑀫𑁆𑀩𑀮𑁄𑀳𑀩𑀺𑀦𑁆𑀤𑀼𑀫𑁆𑀳𑀺 𑀞𑀧𑀺𑀢𑁂 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀢𑀤𑁂𑀯 𑀧𑀜𑁆𑀜𑀸𑀬𑀢𑀺, 𑀇𑀢𑀭𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀦𑀺𑀭𑀦𑁆𑀢𑀭𑀁, 𑀇𑀢𑀭𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀻𑀢𑀺 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀬𑀜𑁆𑀘 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀚𑀫𑁆𑀩𑀼𑀤𑀻𑀧𑀲𑁆𑀲 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀯𑀤𑀦𑁆𑀢𑀺.

𑀚𑀫𑁆𑀩𑀼𑀤𑀻𑀧𑁄 ¶ 𑀧𑀦 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄. 𑀢𑀢𑁆𑀣 𑀘 𑀘𑀢𑀼𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀢𑀤𑀼𑀧𑀪𑁄𑀕𑀻𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀓𑁆𑀔𑀬𑀸 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 ‘‘𑀲𑀫𑀼𑀤𑁆𑀤𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀫𑀦𑀼𑀲𑁆𑀲𑀸 𑀯𑀲𑀦𑁆𑀢𑀺, 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀳𑀺𑀫𑀯𑀸 𑀧𑀢𑀺𑀝𑁆𑀞𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑀕𑁄𑀬𑀸𑀦𑀁 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀦𑁆𑀢𑀺𑀆𑀤𑀻𑀲𑀼 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀫𑀸𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀚𑀫𑁆𑀩𑀼𑀤𑀻𑀧𑁄 𑀲𑀓𑀝𑀲𑀡𑁆𑀞𑀸𑀦𑁄, 𑀙𑀦𑁆𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺 𑀙𑀧𑀡𑁆𑀡𑀸𑀲𑀭𑀢𑀦𑀸𑀕𑀸𑀭𑁂𑀳𑀺 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄. 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀆𑀤𑀺𑀢𑁄 𑀢𑁂𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁. 𑀢𑀸𑀦𑀺 𑀧𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀁, 𑀢𑀢𑁄 𑀧𑀭𑀁 𑀅𑀲𑀻𑀢𑀺 𑀲𑀳𑀲𑁆𑀲𑀸𑀦𑀺 𑀘 𑀦𑀯 𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀤𑁄𑀡𑀫𑀼𑀔𑀦𑁆𑀢𑀺 𑀘 𑀫𑀳𑀸𑀦𑀕𑀭𑀲𑁆𑀲 𑀆𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀥𑀸𑀦𑀖𑀭𑀁 𑀯𑀼𑀘𑁆𑀘𑀢𑀺. 𑀅𑀧𑀭𑀕𑁄𑀬𑀸𑀦𑁄 𑀆𑀤𑀸𑀲𑀲𑀡𑁆𑀞𑀸𑀦𑁄, 𑀧𑀼𑀩𑁆𑀩𑀯𑀺𑀤𑁂𑀳𑁄 𑀅𑀟𑁆𑀠𑀘𑀦𑁆𑀤𑀲𑀡𑁆𑀞𑀸𑀦𑁄, 𑀉𑀢𑁆𑀢𑀭𑀓𑀼𑀭𑀼 𑀧𑀻𑀞𑀲𑀡𑁆𑀞𑀸𑀦𑁄. ‘‘𑀢𑀁𑀢𑀁𑀦𑀺𑀯𑀸𑀲𑀻𑀦𑀁 𑀢𑀁𑀢𑀁𑀧𑀭𑀺𑀯𑀸𑀭𑀤𑀻𑀧𑀯𑀸𑀲𑀻𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀁 𑀫𑀼𑀔𑀫𑁆𑀧𑀺 𑀢𑀁𑀢𑀁𑀲𑀡𑁆𑀞𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀧𑀺 𑀘𑁂𑀢𑁆𑀣 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑁄 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀭 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀖𑀦𑀦𑀺𑀘𑀺𑀢𑀧𑀢𑁆𑀢𑀲𑀜𑁆𑀙𑀦𑁆𑀦𑀲𑀸𑀔𑀸𑀧𑀲𑀸𑀔𑀸 𑀓𑀽𑀝𑀸𑀕𑀸𑀭𑀼𑀧𑀫𑀸 𑀫𑀦𑁄𑀭𑀫𑀸 𑀭𑀼𑀓𑁆𑀔𑀸 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑁂𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺. 𑀬𑀢𑁆𑀣 𑀲𑀼𑀔𑀁 𑀦𑀺𑀯𑀲𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀢𑀢𑁆𑀣 𑀭𑀼𑀓𑁆𑀔𑀸 𑀲𑀼𑀚𑀸𑀢𑀸 𑀲𑀩𑁆𑀩𑀤𑀸𑀧𑀺 𑀧𑀼𑀧𑁆𑀨𑀺𑀢𑀕𑁆𑀕𑀸 𑀢𑀺𑀝𑁆𑀞𑀦𑁆𑀢𑀺. 𑀚𑀮𑀸𑀲𑀬𑀸𑀧𑀺 𑀯𑀺𑀓𑀲𑀺𑀢𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑁄𑀕𑀦𑁆𑀥𑀺𑀓𑀸𑀤𑀺𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀧𑀭𑀫𑀲𑀼𑀕𑀦𑁆𑀥𑀸 𑀲𑀫𑀦𑁆𑀢𑀢𑁄 𑀧𑀯𑀸𑀬𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺.

𑀲𑀭𑀻𑀭𑀫𑁆𑀧𑀺 ¶ 𑀢𑁂𑀲𑀁 𑀅𑀢𑀺𑀤𑀻𑀖𑀢𑀸𑀤𑀺𑀤𑁄𑀲𑀭𑀳𑀺𑀢𑀁 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀁 𑀚𑀭𑀸𑀬 𑀅𑀦𑀪𑀺𑀪𑀽𑀢𑀢𑁆𑀢𑀸 𑀯𑀮𑀺𑀢𑀧𑀮𑀺𑀢𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀁 𑀬𑀸𑀯𑀢𑀸𑀬𑀼𑀓𑀁 𑀅𑀧𑀭𑀺𑀓𑁆𑀔𑀻𑀡𑀚𑀯𑀩𑀮𑀧𑀭𑀓𑁆𑀓𑀫𑀲𑁄𑀪𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀦𑀼𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀢𑀸𑀬 𑀦 𑀘 𑀢𑁂𑀲𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀯𑀲𑁂𑀦 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀯𑀲𑁂𑀦 𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀢𑀢𑁄 𑀏𑀯 𑀦 𑀤𑀸𑀲𑀤𑀸𑀲𑀻𑀓𑀫𑁆𑀫𑀓𑀭𑀸𑀤𑀺𑀧𑀭𑀺𑀕𑁆𑀕𑀳𑁄 𑀅𑀢𑁆𑀣𑀺. 𑀦 𑀘 𑀢𑀢𑁆𑀣 𑀲𑀻𑀢𑀼𑀡𑁆𑀳𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀯𑀸𑀴𑀸𑀤𑀺𑀧𑀭𑀺𑀲𑁆𑀲𑀬𑁄 𑀅𑀢𑁆𑀣𑀺. 𑀬𑀣𑀸 𑀦𑀸𑀫𑁂𑀢𑁆𑀣 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀲𑀫𑀲𑀻𑀢𑀼𑀡𑁆𑀳𑁄 𑀉𑀢𑀼 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀓𑀸𑀮𑀁 𑀢𑀢𑁆𑀣 𑀲𑀫𑀲𑀻𑀢𑀼𑀡𑁆𑀳𑁄𑀯 𑀉𑀢𑀼 𑀳𑁄𑀢𑀺, 𑀦 𑀘 𑀦𑁂𑀲𑀁 𑀓𑁄𑀘𑀺 𑀉𑀧𑀖𑀸𑀢𑁄 𑀯𑀺𑀳𑁂𑀲𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺.

𑀅𑀓𑀝𑁆𑀞𑀧𑀸𑀓𑀺𑀫𑀫𑁂𑀯 𑀲𑀸𑀮𑀺𑀁 𑀅𑀓𑀡𑀁 𑀅𑀣𑀼𑀲𑀁 𑀲𑀼𑀤𑁆𑀥𑀁 𑀲𑀼𑀕𑀦𑁆𑀥𑀁 𑀢𑀡𑁆𑀟𑀼𑀮𑀨𑀮𑀁 𑀦𑀺𑀤𑁆𑀥𑀽𑀫𑀗𑁆𑀕𑀸𑀭𑁂𑀦 𑀅𑀕𑁆𑀕𑀺𑀦𑀸 𑀧𑀘𑀺𑀢𑁆𑀯𑀸 ¶ 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑀢𑁆𑀣 𑀓𑀺𑀭 𑀚𑁄𑀢𑀺𑀓𑀧𑀸𑀲𑀸𑀡𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀣 𑀢𑁂 𑀢𑀬𑁄 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀉𑀓𑁆𑀔𑀮𑀺𑀁 𑀆𑀭𑁄𑀧𑁂𑀦𑁆𑀢𑀺, 𑀧𑀸𑀲𑀸𑀡𑁂𑀳𑀺 𑀢𑁂𑀚𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑀸𑀘𑁂𑀢𑀺, 𑀅𑀜𑁆𑀜𑁄 𑀲𑀽𑀧𑁄 𑀯𑀸 𑀩𑁆𑀬𑀜𑁆𑀚𑀦𑁄 𑀯𑀸 𑀦 𑀳𑁄𑀢𑀺, 𑀪𑀼𑀜𑁆𑀚𑀦𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀼𑀓𑀽𑀮𑁄𑀬𑁂𑀯𑀲𑁆𑀲 𑀭𑀲𑁄 𑀳𑁄𑀢𑀺. 𑀢𑀁 𑀧𑀦 𑀪𑀼𑀜𑁆𑀚𑀦𑁆𑀢𑀸𑀦𑀁 𑀦𑁂𑀲𑀁 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀓𑀸𑀲𑁄 𑀅𑀧𑀫𑀸𑀭𑁄 𑀚𑀭𑁄𑀢𑀺 𑀏𑀯𑀫𑀸𑀤𑀺𑀓𑁄 𑀦 𑀓𑁄𑀘𑀺 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁 𑀤𑁂𑀦𑁆𑀢𑀺𑀬𑁂𑀯, 𑀫𑀘𑁆𑀙𑀭𑀺𑀬𑀘𑀺𑀢𑁆𑀢𑀁 𑀦𑀸𑀫 𑀦𑁂𑀯 𑀳𑁄𑀢𑀺, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄𑀧𑀺 𑀫𑀳𑀺𑀤𑁆𑀥𑀺𑀓𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀦𑁆𑀢𑀺. 𑀦 𑀘 𑀢𑁂 𑀔𑀼𑀚𑁆𑀚𑀸 𑀯𑀸 𑀯𑀸𑀫𑀦𑀸 𑀯𑀸 𑀓𑀸𑀡𑀸 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑀸 𑀯𑀸 𑀧𑀓𑁆𑀔𑀳𑀢𑀸 𑀯𑀸 𑀯𑀺𑀓𑀮𑀗𑁆𑀕𑀸 𑀯𑀸 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸 𑀯𑀸 𑀳𑁄𑀦𑁆𑀢𑀺.

𑀇𑀢𑁆𑀣𑀺𑀬𑁄𑀧𑀺 𑀢𑀢𑁆𑀣 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀸𑀘𑁆𑀘𑁄𑀤𑀸𑀢𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀭𑀽𑀧𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀤𑀻𑀖𑀗𑁆𑀕𑀼𑀮𑀻 𑀢𑀫𑁆𑀩𑀦𑀔𑀸 𑀅𑀮𑀫𑁆𑀩𑀣𑀦𑀸 𑀢𑀦𑀼𑀫𑀚𑁆𑀛𑀸 𑀧𑀼𑀡𑁆𑀡𑀘𑀦𑁆𑀤𑀫𑀼𑀔𑀻 𑀯𑀺𑀲𑀸𑀮𑀓𑁆𑀔𑀻 𑀫𑀼𑀤𑀼𑀕𑀢𑁆𑀢𑀸 𑀲𑀳𑀺𑀪𑁄𑀭𑀽 𑀑𑀤𑀸𑀢𑀤𑀦𑁆𑀢𑀸 𑀕𑀫𑁆𑀪𑀻𑀭𑀦𑀸𑀪𑀻 𑀢𑀦𑀼𑀚𑀗𑁆𑀖𑀸 𑀤𑀻𑀖𑀦𑀻𑀮𑀯𑁂𑀮𑁆𑀮𑀺𑀢𑀓𑁂𑀲𑀻 𑀧𑀼𑀣𑀼𑀮𑀲𑀼𑀲𑁆𑀲𑁄𑀡𑀻 𑀦𑀸𑀢𑀺𑀮𑁄𑀫𑀸 𑀦𑀸𑀮𑁄𑀫𑀸 𑀲𑀼𑀪𑀕𑀸 𑀉𑀢𑀼𑀲𑀼𑀔𑀲𑀫𑁆𑀨𑀲𑁆𑀲𑀸 𑀲𑀡𑁆𑀳𑀸 𑀲𑀔𑀺𑀮𑀲𑀫𑁆𑀪𑀸𑀲𑀸 𑀦𑀸𑀦𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀯𑀺𑀘𑀭𑀦𑁆𑀢𑀺, 𑀲𑀩𑁆𑀩𑀤𑀸𑀧𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺.

𑀧𑀼𑀭𑀺𑀲𑀸𑀧𑀺 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬, 𑀦 𑀧𑀼𑀢𑁆𑀢𑀸 𑀫𑀸𑀢𑀸𑀤𑀻𑀲𑀼 𑀭𑀚𑁆𑀚𑀦𑁆𑀢𑀺, 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸. 𑀲𑀢𑁆𑀢𑀸𑀳𑀺𑀓𑀫𑁂𑀯 𑀘 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸 𑀓𑀸𑀫𑀭𑀢𑀺𑀬𑀸 𑀯𑀺𑀳𑀭𑀦𑁆𑀢𑀺 ¶ , 𑀢𑀢𑁄 𑀯𑀻𑀢𑀭𑀸𑀕𑀸 𑀯𑀺𑀬 𑀬𑀣𑀸𑀲𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀦 𑀢𑀢𑁆𑀣 𑀇𑀥 𑀯𑀺𑀬 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀕𑀩𑁆𑀪𑀧𑀭𑀺𑀳𑀭𑀡𑀫𑀽𑀮𑀓𑀁 𑀯𑀸 𑀤𑀼𑀓𑁆𑀔𑀁 𑀯𑀺𑀚𑀸𑀬𑀦𑀫𑀽𑀮𑀓𑀁 𑀯𑀸 𑀤𑀼𑀓𑁆𑀔𑀁 𑀳𑁄𑀢𑀺, 𑀭𑀢𑁆𑀢𑀓𑀜𑁆𑀘𑀼𑀓𑀢𑁄 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀤𑀸𑀭𑀓𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀫𑀓𑁆𑀔𑀺𑀢𑀸 𑀏𑀯 𑀲𑁂𑀫𑁆𑀳𑀸𑀤𑀺𑀦𑀸 𑀲𑀼𑀔𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸. 𑀫𑀸𑀢𑀸 𑀧𑀦 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀯𑀺𑀚𑀸𑀬𑀺𑀢𑁆𑀯𑀸 𑀢𑁂𑀲𑀁 𑀯𑀺𑀘𑀭𑀡𑀓𑀧𑁆𑀧𑀤𑁂𑀲𑁂 𑀞𑀧𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀸 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀺. 𑀢𑁂𑀲𑀁 𑀢𑀢𑁆𑀣 𑀲𑀬𑀺𑀢𑀸𑀦𑀁 𑀬𑁂 𑀧𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀸 𑀯𑀸 𑀇𑀢𑁆𑀣𑀺𑀬𑁄 𑀯𑀸, 𑀢𑁂 𑀅𑀢𑁆𑀢𑀦𑁄 𑀅𑀗𑁆𑀕𑀼𑀮𑀺𑀬𑁄 𑀉𑀧𑀦𑀸𑀫𑁂𑀦𑁆𑀢𑀺, 𑀢𑁂𑀲𑀁 𑀓𑀫𑁆𑀫𑀩𑀮𑁂𑀦 𑀢𑀢𑁄 𑀔𑀻𑀭𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 𑀤𑀸𑀭𑀓𑀸 𑀬𑀸𑀧𑁂𑀦𑁆𑀢𑀺. 𑀏𑀯𑀁 𑀧𑀦 𑀯𑀟𑁆𑀠𑀦𑁆𑀢𑀸 𑀓𑀢𑀺𑀧𑀬𑀤𑀺𑀯𑀲𑁂𑀬𑁂𑀯 𑀮𑀤𑁆𑀥𑀩𑀮𑀸 𑀳𑀼𑀢𑁆𑀯𑀸 𑀤𑀸𑀭𑀺𑀓𑀸 𑀇𑀢𑁆𑀣𑀺𑀬𑁄 𑀉𑀧𑀕𑀘𑁆𑀙𑀦𑁆𑀢𑀺, 𑀤𑀸𑀭𑀓𑀸 𑀧𑀼𑀭𑀺𑀲𑁂.

𑀓𑀧𑁆𑀧𑀭𑀼𑀓𑁆𑀔𑀢𑁄 𑀏𑀯 𑀘 𑀢𑁂𑀲𑀁 𑀢𑀢𑁆𑀣 𑀯𑀢𑁆𑀣𑀸𑀪𑀭𑀡𑀸𑀦𑀺 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸𑀦𑀺 𑀳𑀺 𑀯𑀢𑁆𑀣𑀸𑀦𑀺 𑀲𑀼𑀔𑀼𑀫𑀸𑀦𑀺 𑀫𑀼𑀤𑀼𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀓𑀧𑁆𑀧𑀭𑀼𑀓𑁆𑀔𑁂𑀲𑀼 𑀑𑀮𑀫𑁆𑀩𑀦𑁆𑀢𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀯𑀺𑀥𑀯𑀡𑁆𑀡𑀭𑀢𑀦𑀯𑀺𑀦𑀤𑁆𑀥𑀸𑀦𑀺 𑀅𑀦𑁂𑀓𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀪𑀺𑀢𑁆𑀢𑀺𑀓𑀫𑁆𑀫𑀯𑀺𑀘𑀺𑀢𑁆𑀢𑀸𑀦𑀺 𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀓𑀝𑀽𑀧𑀕𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀆𑀪𑀭𑀡𑀸𑀦𑀺 𑀘 𑀓𑀧𑁆𑀧𑀭𑀼𑀓𑁆𑀔𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀣𑀸 𑀯𑀻𑀡𑀸𑀫𑀼𑀤𑀺𑀗𑁆𑀕𑀧𑀡𑀯𑀲𑀫𑁆𑀫𑀢𑀸𑀴𑀲𑀗𑁆𑀔𑀯𑀁𑀲𑀯𑁂𑀢𑀸𑀴𑀧𑀭𑀺𑀯𑀸𑀭𑀸𑀤𑀻𑀦𑀺 𑀯𑀮𑁆𑀮𑀓𑀻𑀧𑀪𑀉𑀢𑀺𑀓𑀸𑀦𑀺 ¶ 𑀢𑀽𑀭𑀺𑀬𑀪𑀡𑁆𑀟𑀸𑀦𑀺𑀧𑀺 𑀢𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀢𑁆𑀣 𑀘 𑀩𑀳𑀽 𑀨𑀮𑀭𑀼𑀓𑁆𑀔𑀸 𑀓𑀼𑀫𑁆𑀪𑀫𑀢𑁆𑀢𑀸𑀦𑀺 𑀨𑀮𑀸𑀦𑀺 𑀨𑀮𑀦𑁆𑀢𑀺, 𑀫𑀥𑀼𑀭𑀭𑀲𑀸𑀦𑀺 𑀬𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀲𑀢𑁆𑀢𑀸𑀳𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀦 𑀩𑀸𑀥𑀻𑀬𑀦𑁆𑀢𑀺.

𑀦𑀚𑁆𑀚𑁄𑀧𑀺 𑀢𑀢𑁆𑀣 𑀲𑀼𑀯𑀺𑀲𑀼𑀤𑁆𑀥𑀚𑀮𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸 𑀅𑀓𑀤𑁆𑀤𑀫𑀸 𑀯𑀸𑀮𑀼𑀓𑀢𑀮𑀸 𑀦𑀸𑀢𑀺𑀲𑀻𑀢𑀸 𑀦𑀸𑀢𑀺𑀉𑀡𑁆𑀳𑀸 𑀲𑀼𑀭𑀪𑀺𑀕𑀦𑁆𑀥𑀻𑀳𑀺 𑀚𑀮𑀚𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺𑀬𑁄 𑀲𑀦𑁆𑀤𑀦𑁆𑀢𑀺, 𑀦 𑀢𑀢𑁆𑀣 𑀓𑀡𑁆𑀝𑀓𑀺𑀦𑀸 𑀓𑀓𑁆𑀔𑀴𑀕𑀘𑁆𑀙𑀮𑀢𑀸 𑀳𑁄𑀦𑁆𑀢𑀺, 𑀅𑀓𑀡𑁆𑀝𑀓𑀸 𑀧𑀼𑀧𑁆𑀨𑀨𑀮𑀲𑀘𑁆𑀙𑀦𑁆𑀦𑀸 𑀏𑀯 𑀳𑁄𑀦𑁆𑀢𑀺, 𑀘𑀦𑁆𑀤𑀦𑀦𑀸𑀕𑀭𑀼𑀓𑁆𑀔𑀸 𑀲𑀬𑀫𑁂𑀯 𑀭𑀲𑀁 𑀧𑀕𑁆𑀖𑀭𑀦𑁆𑀢𑀺. 𑀦𑀳𑀸𑀬𑀺𑀢𑀼𑀓𑀸𑀫𑀸 𑀘 𑀦𑀤𑀻𑀢𑀺𑀢𑁆𑀣𑁂 𑀏𑀓𑀚𑁆𑀛𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑀸 𑀉𑀢𑁆𑀢𑀺𑀡𑁆𑀡𑀸 𑀉𑀧𑀭𑀺𑀝𑁆𑀞𑀺𑀫𑀁 𑀉𑀧𑀭𑀺𑀝𑁆𑀞𑀺𑀫𑀁 𑀯𑀢𑁆𑀣𑀸𑀪𑀭𑀡𑀁 𑀕𑀡𑁆𑀳𑀦𑁆𑀢𑀺, 𑀦 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀇𑀤𑀁 𑀫𑀫, 𑀇𑀤𑀁 𑀧𑀭𑀲𑁆𑀲𑀸’’𑀢𑀺. 𑀢𑀢𑁄 𑀏𑀯 𑀦 𑀢𑁂𑀲𑀁 𑀓𑁄𑀘𑀺 𑀯𑀺𑀕𑁆𑀕𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸, 𑀲𑀢𑁆𑀢𑀸𑀳𑀺𑀓𑀸 𑀏𑀯 𑀘 𑀦𑁂𑀲𑀁 𑀓𑀸𑀫𑀭𑀢𑀺𑀓𑀻𑀴𑀸 𑀳𑁄𑀢𑀺, 𑀢𑀢𑁄 𑀯𑀻𑀢𑀭𑀸𑀕𑀸 𑀯𑀺𑀬 𑀯𑀺𑀘𑀭𑀦𑁆𑀢𑀺. 𑀬𑀢𑁆𑀣 𑀘 𑀭𑀼𑀓𑁆𑀔𑁂 𑀲𑀬𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯 𑀲𑀬𑀦𑀁 𑀉𑀧𑀮𑀩𑁆𑀪𑀢𑀺.

𑀫𑀢𑁂 ¶ 𑀘 𑀲𑀢𑁆𑀢𑁂 𑀦 𑀭𑁄𑀤𑀦𑁆𑀢𑀺 𑀦 𑀲𑁄𑀘𑀦𑁆𑀢𑀺, 𑀢𑀜𑁆𑀘 𑀫𑀡𑁆𑀟𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀢𑀸𑀯𑀤𑁂𑀯 𑀘 𑀢𑀣𑀸𑀭𑀽𑀧𑀸 𑀲𑀓𑀼𑀡𑀸 𑀉𑀧𑀕𑀦𑁆𑀢𑁆𑀯𑀸 𑀫𑀢𑀁 𑀤𑀻𑀧𑀦𑁆𑀢𑀭𑀁 𑀦𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀲𑀸𑀦𑀁 𑀯𑀸 𑀅𑀲𑀼𑀘𑀺𑀝𑁆𑀞𑀸𑀦𑀁 𑀯𑀸 𑀢𑀢𑁆𑀣 𑀦𑀢𑁆𑀣𑀺, 𑀦 𑀘 𑀢𑀢𑁄 𑀫𑀢𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑀦𑁆𑀢𑀺. ‘‘𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀘 𑀦𑁂𑀲𑀁 𑀲𑀩𑁆𑀩𑀓𑀸𑀮𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀲𑀩𑁆𑀩𑀫𑁂𑀢𑀁 𑀦𑁂𑀲𑀁 𑀧𑀜𑁆𑀘𑀲𑀻𑀮𑀁 𑀯𑀺𑀬 𑀥𑀫𑁆𑀫𑀢𑀸𑀲𑀺𑀤𑁆𑀥𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀤𑀦𑁆𑀢𑀭𑁂𑀲𑀽𑀢𑀺 𑀢𑁂𑀲𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂𑀲𑀼. 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸𑀢𑀺 𑀮𑁄𑀓𑀸𑀦𑀁 𑀮𑁄𑀓𑀥𑀸𑀢𑀽𑀦𑀁 𑀅𑀦𑁆𑀢𑀭𑁄 𑀯𑀺𑀯𑀭𑁄 𑀮𑁄𑀓𑀦𑁆𑀢𑀭𑁄, 𑀢𑀢𑁆𑀣 𑀪𑀯𑀸 𑀮𑁄𑀓𑀦𑁆𑀢𑀭𑀺𑀓𑀸, 𑀦𑀺𑀭𑀬𑀸. 𑀢𑀺𑀡𑁆𑀡𑀜𑁆𑀳𑀺 𑀲𑀓𑀝𑀘𑀓𑁆𑀓𑀸𑀦𑀁 𑀧𑀢𑁆𑀢𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀪𑀸𑀯𑁂𑀦 𑀞𑀧𑀺𑀢𑀸𑀦𑀁 𑀅𑀦𑁆𑀢𑀭𑀲𑀤𑀺𑀲𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂𑀲𑀼 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄. 𑀲𑁄 𑀧𑀦 𑀧𑀭𑀺𑀫𑀸𑀡𑀢𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁄 𑀳𑁄𑀢𑀺 𑀦𑀺𑀘𑁆𑀘𑀯𑀺𑀯𑀝𑁄 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀓𑁂𑀦𑀘𑀺 𑀦 𑀧𑀺𑀳𑀺𑀢𑁄. 𑀬𑀣𑀸 𑀳𑀺 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀧𑀺𑀥𑀸𑀬𑀺𑀓𑀸 𑀧𑀣𑀯𑀻 𑀦𑀢𑁆𑀣𑀻𑀢𑀺 𑀅𑀲𑀁𑀯𑀼𑀢𑀸 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸, 𑀏𑀯𑀁 𑀉𑀧𑀭𑀺𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀯𑀺𑀬 𑀤𑁂𑀯𑀯𑀺𑀫𑀸𑀦𑀸𑀦𑀁 𑀅𑀪𑀸𑀯𑀢𑁄 𑀅𑀲𑀁𑀯𑀼𑀢𑀸 𑀅𑀧𑀺𑀳𑀺𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀲𑀫𑀢𑁆𑀣𑁂𑀦 𑀘 𑀅𑀦𑁆𑀥𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣 𑀓𑀺𑀭 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺 𑀆𑀮𑁄𑀓𑀲𑁆𑀲 𑀅𑀪𑀸𑀯𑀢𑁄. 𑀢𑀻𑀲𑀼 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦 𑀆𑀮𑁄𑀓𑀓𑀭𑀡𑀲𑀫𑀢𑁆𑀣𑀸𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀢𑀢𑁆𑀣 𑀆𑀮𑁄𑀓𑀁 𑀦 𑀤𑀲𑁆𑀲𑁂𑀦𑁆𑀢𑀺. 𑀢𑁂 𑀳𑀺 𑀬𑀼𑀕𑀦𑁆𑀥𑀭𑀲𑀫𑀧𑁆𑀧𑀫𑀸𑀡𑁂 𑀆𑀓𑀸𑀲𑀧𑁆𑀧𑀤𑁂𑀲𑁂 𑀯𑀺𑀘𑀭𑀡𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀯𑀺𑀘𑀭𑀦𑁆𑀢𑀺, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 ¶ 𑀅𑀢𑀺𑀓𑁆𑀓𑀫𑁆𑀫 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸, 𑀢𑀲𑁆𑀫𑀸 𑀢𑁂 𑀢𑀢𑁆𑀣 𑀆𑀮𑁄𑀓𑀁 𑀦 𑀤𑀲𑁆𑀲𑁂𑀦𑁆𑀢𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀸𑀤𑀻𑀲𑀼 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀅𑀜𑁆𑀜𑁂𑀧𑀺 𑀓𑀺𑀭 𑀪𑁄 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀢𑀁 𑀤𑀺𑀯𑀲𑀁 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀦 𑀑𑀪𑀸𑀲𑁄 𑀏𑀓𑀁 𑀬𑀸𑀕𑀼𑀧𑀸𑀦𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺, 𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀫𑀢𑁆𑀢𑀫𑁂𑀯 𑀯𑀺𑀚𑁆𑀚𑁄𑀪𑀸𑀲𑁄 𑀯𑀺𑀬 𑀦𑀺𑀘𑁆𑀙𑀭𑀺𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀪𑀡𑀦𑁆𑀢𑀸𑀦𑀁𑀬𑁂𑀯 𑀅𑀦𑁆𑀢𑀭𑀥𑀸𑀬𑀢𑀺.

𑀓𑀺𑀁 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺? 𑀪𑀸𑀭𑀺𑀬𑀁 𑀤𑀸𑀭𑀼𑀡𑀁 𑀕𑀭𑀼𑀓𑀁 𑀫𑀸𑀢𑀸𑀧𑀺𑀢𑀽𑀦𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀉𑀧𑀭𑀺 𑀅𑀧𑀭𑀸𑀥𑀁 𑀅𑀜𑁆𑀜𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀡𑀯𑀥𑀸𑀤𑀺𑀁 𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀪𑀬𑀘𑁄𑀭𑀦𑀸𑀕𑀘𑁄𑀭𑀸𑀤𑀬𑁄 𑀯𑀺𑀬. 𑀢𑁂𑀲𑀁 𑀅𑀢𑁆𑀢𑀪𑀸𑀯𑁄 𑀢𑀺𑀕𑀸𑀯𑀼𑀢𑀺𑀓𑁄 𑀳𑁄𑀢𑀺, 𑀯𑀕𑁆𑀕𑀼𑀮𑀻𑀦𑀁 ¶ 𑀯𑀺𑀬 𑀤𑀻𑀖𑀦𑀔𑀸 𑀳𑁄𑀦𑁆𑀢𑀺. 𑀢𑁂 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀦𑀔𑁂𑀳𑀺 𑀘𑀓𑁆𑀓𑀯𑀸𑀴𑀧𑀸𑀤𑁂 𑀮𑀕𑁆𑀕𑀦𑁆𑀢𑀺, 𑀬𑀤𑀸 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀕𑀢𑀸 𑀳𑁄𑀦𑁆𑀢𑀺, 𑀅𑀣 ‘‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀔𑀸𑀤𑀦𑀢𑁆𑀣𑀁 𑀕𑀡𑁆𑀳𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑁂 𑀉𑀤𑀓𑁂 𑀧𑀢𑀦𑁆𑀢𑀺, 𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺, 𑀧𑀢𑀺𑀢𑀫𑀢𑁆𑀢𑀸𑀯 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀧𑀺𑀝𑁆𑀞𑀧𑀺𑀡𑁆𑀟𑀁 𑀯𑀺𑀬 𑀯𑀺𑀮𑀻𑀬𑀦𑁆𑀢𑀺 𑀅𑀢𑀺𑀲𑀻𑀢𑀮𑀪𑀸𑀯𑀢𑁄 𑀆𑀢𑀧𑀲𑀦𑁆𑀢𑀸𑀧𑀸𑀪𑀸𑀯𑁂𑀦. 𑀅𑀢𑀺𑀲𑀻𑀢𑀮𑀪𑀸𑀯𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸. 𑀦 𑀳𑀺 𑀢𑀁 𑀓𑀧𑁆𑀧𑀲𑀡𑁆𑀞𑀳𑀦𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀣𑀸 𑀳𑀺 𑀲𑀢𑀺 𑀧𑀣𑀯𑀻𑀧𑀺 𑀯𑀺𑀮𑀻𑀬𑁂𑀬𑁆𑀬, 𑀢𑁂𑀲𑀁 𑀯𑀸 𑀧𑀸𑀧𑀓𑀫𑁆𑀫𑀩𑀮𑁂𑀦 𑀧𑁂𑀢𑀸𑀦𑀁 𑀧𑀓𑀢𑀺𑀉𑀤𑀓𑀲𑁆𑀲 𑀧𑀼𑀩𑁆𑀩𑀔𑁂𑀴𑀪𑀸𑀯𑀸𑀧𑀢𑁆𑀢𑀺 𑀯𑀺𑀬 𑀢𑀲𑁆𑀲 𑀉𑀤𑀓𑀲𑁆𑀲 𑀢𑀤𑀸 𑀔𑀸𑀭𑀪𑀸𑀯𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀧𑀺𑀝𑁆𑀞𑀧𑀺𑀡𑁆𑀟𑀁 𑀯𑀺𑀬 𑀯𑀺𑀮𑀻𑀬𑀦𑁆𑀢𑀻’’𑀢𑀺.

𑀅𑀦𑀦𑁆𑀢𑀸𑀦𑀻𑀢𑀺 𑀅𑀧𑀭𑀺𑀫𑀸𑀡𑀸𑀦𑀺, ‘‘𑀏𑀢𑁆𑀢𑀓𑀸𑀦𑀻’’𑀢𑀺 𑀅𑀜𑁆𑀜𑁂𑀳𑀺 𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺. 𑀢𑀸𑀦𑀺 𑀘 𑀪𑀕𑀯𑀸 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀺 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄, 𑀅𑀦𑀦𑁆𑀢𑁄 𑀲𑀢𑁆𑀢𑀦𑀺𑀓𑀸𑀬𑁄, 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀻’’𑀢𑀺. 𑀢𑀺𑀯𑀺𑀥𑀫𑁆𑀧𑀺 𑀳𑀺 𑀅𑀦𑀦𑁆𑀢𑀁 𑀩𑀼𑀤𑁆𑀥𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀲𑀬𑀫𑁆𑀧𑀺 𑀅𑀦𑀦𑁆𑀢𑀢𑁆𑀢𑀸. 𑀬𑀸𑀯𑀢𑀓𑀜𑁆𑀳𑀺 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀫𑁂𑀯 𑀜𑁂𑀬𑁆𑀬𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀯𑁂𑀤𑀻’’𑀢𑀺𑀆𑀤𑀺. 𑀅𑀦𑀦𑁆𑀢𑀢𑀸 𑀘𑀲𑁆𑀲 𑀅𑀦𑀦𑁆𑀢𑀜𑁂𑀬𑁆𑀬𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑁆𑀢𑀸. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀏𑀯𑀫𑀲𑁆𑀲 𑀑𑀓𑀸𑀲𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄’’𑀢𑀺.

𑀅𑀧𑀺 ¶ 𑀘𑁂𑀢𑁆𑀣 𑀯𑀺𑀯𑀝𑁆𑀝𑀸𑀤𑀻𑀦𑀫𑁆𑀧𑀺 𑀯𑀺𑀤𑀺𑀢𑀢𑀸 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀫𑀸 𑀯𑀺𑀯𑀝𑁆𑀝𑀸𑀤𑀬𑁄𑀧𑀺 𑀆𑀤𑀺𑀢𑁄 𑀧𑀪𑀼𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀓𑀧𑁆𑀧𑀲𑁆𑀲 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀢𑀢𑁆𑀣 𑀲𑀁𑀯𑀝𑁆𑀝𑀦𑀁 𑀯𑀺𑀦𑀲𑁆𑀲𑀦𑀁 𑀲𑀁𑀯𑀝𑁆𑀝𑁄, 𑀯𑀺𑀦𑀲𑁆𑀲𑀫𑀸𑀦𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀮𑁄𑀬𑁂𑀯, 𑀢𑀤𑀸 𑀧𑀯𑀢𑁆𑀢𑀫𑀸𑀦𑀲𑀗𑁆𑀔𑀸𑀭𑀯𑀲𑁂𑀦𑀲𑁆𑀲 𑀯𑀺𑀦𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑀝𑁆𑀝𑀢𑁄 𑀉𑀤𑁆𑀥𑀁 𑀢𑀣𑀸𑀞𑀸𑀬𑀻𑀓𑀸𑀮𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻. 𑀯𑀺𑀯𑀝𑁆𑀝𑀦𑀁 𑀦𑀺𑀩𑁆𑀩𑀢𑁆𑀢𑀦𑀁 𑀯𑀟𑁆𑀠𑀦𑀁 𑀯𑀸 𑀯𑀺𑀯𑀝𑁆𑀝𑁄, 𑀯𑀟𑁆𑀠𑀫𑀸𑀦𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄. 𑀲𑁄𑀧𑀺 𑀅𑀢𑁆𑀣𑀢𑁄 𑀓𑀸𑀮𑁄𑀬𑁂𑀯, 𑀢𑀤𑀸 𑀧𑀯𑀢𑁆𑀢𑀫𑀸𑀦𑀲𑀗𑁆𑀔𑀸𑀭𑀯𑀲𑁂𑀦𑀲𑁆𑀲 𑀯𑀟𑁆𑀠𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀯𑀝𑁆𑀝𑀢𑁄 𑀉𑀤𑁆𑀥𑀁 ¶ 𑀢𑀣𑀸𑀞𑀸𑀬𑀻𑀓𑀸𑀮𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻. 𑀢𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑀢𑁂𑀚𑁄𑀲𑀁𑀯𑀝𑁆𑀝𑁄 𑀆𑀧𑁄𑀲𑀁𑀯𑀝𑁆𑀝𑁄 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑀆𑀪𑀲𑁆𑀲𑀭𑀸 𑀲𑀼𑀪𑀓𑀺𑀡𑁆𑀳𑀸 𑀯𑁂𑀳𑀧𑁆𑀨𑀮𑀸𑀢𑀺. 𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀢𑀤𑀸 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀢𑀤𑀸 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀢𑀤𑀸 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀺.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑀻𑀲𑀼𑀧𑀺 𑀲𑀁𑀯𑀝𑁆𑀝𑀓𑀸𑀮𑁂𑀲𑀼 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥𑀁 𑀳𑁄𑀢𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑀜𑁆𑀘. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺, 𑀬𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀸𑀤𑀻𑀲𑀼 𑀓𑀫𑁆𑀧𑀢𑀺. 𑀬𑀢𑁆𑀢𑀓𑁂 𑀳𑀺 𑀞𑀸𑀦𑁂 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀜𑀸𑀡𑀸𑀤𑀺𑀜𑀸𑀡𑀸𑀦𑀼𑀪𑀸𑀯𑁄 𑀧𑀼𑀜𑁆𑀜𑀨𑀮𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀭𑀲𑁂𑀦𑁂𑀯 𑀧𑀝𑀺𑀯𑀺𑀚𑀫𑁆𑀪𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀓𑁆𑀔𑁂𑀢𑁆𑀢𑀁 𑀦𑀸𑀫𑀸𑀢𑀺 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀡𑀸𑀓𑁆𑀔𑁂𑀢𑁆𑀢𑀁 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀬𑀢𑁆𑀣 𑀭𑀢𑀦𑀲𑀼𑀢𑁆𑀢𑀁 (𑀔𑀼. 𑀧𑀸. 𑁬.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁨𑁪 𑀆𑀤𑀬𑁄) 𑀔𑀦𑁆𑀥𑀧𑀭𑀺𑀢𑁆𑀢𑀁 (𑀅. 𑀦𑀺. 𑁪.𑁬𑁭; 𑀚𑀸. 𑁧.𑁨.𑁧𑁦𑁫-𑁧𑁦𑁬; 𑀘𑀽𑀴𑀯. 𑁨𑁫𑁧 𑀆𑀤𑀬𑁄) 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 (𑀲𑀁. 𑀦𑀺. 𑁧.𑁨𑁪𑁯) 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 (𑀚𑀸. 𑁧.𑁨.𑁧𑁭-𑁧𑁮) 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀺. 𑀇𑀤𑁆𑀥𑀺𑀫𑀸 𑀳𑀺 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀆𑀡𑀸𑀓𑁆𑀔𑁂𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀜𑁆𑀜𑀁 𑀘𑀓𑁆𑀓𑀯𑀸𑀴𑀁 𑀕𑀢𑁄𑀧𑀺 𑀓𑀢𑀧𑀭𑀺𑀢𑁆𑀢𑁄 𑀏𑀯 𑀳𑁄𑀢𑀺. 𑀏𑀓𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑁂 𑀓𑀢𑁂 𑀆𑀡𑀸𑀓𑁆𑀔𑁂𑀢𑁆𑀢𑁂 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀅𑀪𑀺𑀲𑀫𑁆𑀪𑀼𑀡𑀸𑀢𑁂𑀯 𑀧𑀭𑀺𑀢𑁆𑀢𑀸𑀦𑀼𑀪𑀸𑀯𑁄 𑀢𑀢𑁆𑀣 𑀤𑁂𑀯𑀢𑀸𑀳𑀺 𑀧𑀭𑀺𑀢𑁆𑀢𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀢𑀁 𑀆𑀡𑀸𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀧𑀦 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁. 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑁂𑀲𑀼 𑀳𑀺 𑀘𑀓𑁆𑀓𑀯𑀸𑀴𑁂𑀲𑀼 𑀬𑀁 𑀬𑀁 𑀢𑀣𑀸𑀕𑀢𑁄 𑀆𑀓𑀗𑁆𑀔𑀢𑀺, 𑀢𑀁 𑀢𑀁 𑀚𑀸𑀦𑀸𑀢𑀺 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀜𑀸𑀡𑀲𑁆𑀲. 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀼 𑀏𑀓𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀧𑀦 𑀯𑀺𑀦𑀲𑁆𑀲𑀦𑁆𑀢𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀯𑀺𑀦𑀝𑁆𑀞𑀫𑁂𑀯 𑀳𑁄𑀢𑀺. 𑀯𑀺𑀦𑀲𑁆𑀲𑀦𑁆𑀢𑀫𑁆𑀧𑀺 𑀏𑀓𑀢𑁄𑀯 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄𑀯 𑀲𑀡𑁆𑀞𑀳𑀢𑀺, 𑀢𑀲𑁆𑀲𑁂𑀯𑀁 𑀯𑀺𑀦𑀸𑀲𑁄 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀺𑀁 ¶ 𑀲𑀫𑀬𑁂 𑀓𑀧𑁆𑀧𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀏𑀓𑀁 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀢𑀺 ¶ , 𑀫𑀦𑀼𑀲𑁆𑀲𑀸 𑀢𑀼𑀝𑁆𑀞𑀸 𑀲𑀩𑁆𑀩𑀩𑀻𑀚𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀧𑀦𑁆𑀢𑀺, 𑀲𑀲𑁆𑀲𑁂𑀲𑀼 𑀧𑀦 𑀕𑁄𑀔𑀸𑀬𑀺𑀢𑀫𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀕𑀤𑁆𑀭𑀪𑀭𑀯𑀁 𑀭𑀯𑀦𑁆𑀢𑁄 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀯𑀲𑁆𑀲𑀢𑀺, 𑀢𑀤𑀸 𑀧𑀘𑁆𑀙𑀺𑀦𑁆𑀦𑀧𑀘𑁆𑀙𑀺𑀦𑁆𑀦𑀫𑁂𑀯 𑀳𑁄𑀢𑀺 𑀯𑀲𑁆𑀲𑀁. 𑀇𑀤𑀁 𑀲𑀦𑁆𑀥𑀸𑀬 𑀳𑀺 𑀪𑀕𑀯𑀢𑀸 ‘‘𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄 𑀬𑀁 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁭.𑁬𑁬) 𑀯𑀼𑀢𑁆𑀢𑀁. 𑀯𑀲𑁆𑀲𑀽𑀧𑀚𑀻𑀯𑀺𑀦𑁄𑀧𑀺 𑀲𑀢𑁆𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑀸𑀤𑀺𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀼𑀧𑁆𑀨𑀨𑀮𑀽𑀧𑀚𑀻𑀯𑀺𑀦𑀺𑀬𑁄 𑀘 𑀤𑁂𑀯𑀢𑀸. 𑀏𑀯𑀁 𑀤𑀻𑀖𑁂 𑀅𑀤𑁆𑀥𑀸𑀦𑁂 𑀯𑀻𑀢𑀺𑀯𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀫𑀘𑁆𑀙𑀓𑀘𑁆𑀙𑀧𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺. 𑀢𑀢𑁆𑀣 𑀦𑁂𑀭𑀬𑀺𑀓𑀸 𑀲𑀢𑁆𑀢𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁂 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀏𑀓𑁂.

𑀛𑀸𑀦𑀁 𑀧𑀦 𑀯𑀺𑀦𑀸 𑀦𑀢𑁆𑀣𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀢𑁂𑀲𑀜𑁆𑀘 𑀓𑁂𑀘𑀺 𑀤𑀼𑀩𑁆𑀪𑀺𑀓𑁆𑀔𑀧𑀻𑀴𑀺𑀢𑀸, 𑀓𑁂𑀘𑀺 𑀅𑀪𑀩𑁆𑀩𑀸 𑀛𑀸𑀦𑀸𑀥𑀺𑀕𑀫𑀸𑀬, 𑀢𑁂 𑀓𑀣𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺? 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦. 𑀢𑀤𑀸 𑀳𑀺 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑁆𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀫𑀸𑀭𑀺𑀲𑀸 𑀫𑀸𑀭𑀺𑀲𑀸 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀉𑀲𑁆𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀟𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀢𑁂 𑀧𑀦 𑀤𑁂𑀯𑀸 𑀮𑁄𑀓𑀁 𑀩𑁆𑀬𑀽𑀳𑁂𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀻𑀢𑀺 ‘‘𑀮𑁄𑀓𑀩𑁆𑀬𑀽𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀓𑀺𑀭 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀲𑀁𑀯𑁂𑀕𑀚𑀸𑀢𑀸 𑀲𑀫𑁆𑀪𑀫𑀧𑁆𑀧𑀢𑁆𑀢𑀸𑀯 𑀳𑀼𑀢𑁆𑀯𑀸 𑀢𑁂𑀲𑀁 𑀆𑀲𑀦𑁆𑀦𑁂 𑀞𑀸𑀦𑁂 𑀲𑀦𑁆𑀦𑀺𑀧𑀢𑀦𑁆𑀢𑀺.

𑀓𑀣𑀁 𑀧𑀦𑁂𑀢𑁂 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀚𑀸𑀦𑀦𑁆𑀢𑀻𑀢𑀺? ‘‘𑀥𑀫𑁆𑀫𑀢𑀸𑀬 𑀲𑀜𑁆𑀘𑁄𑀤𑀺𑀢𑀸’’𑀢𑀺 𑀆𑀘𑀭𑀺𑀬𑀸. ‘‘𑀢𑀸𑀤𑀺𑀲𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑁂𑀦𑀸’’𑀢𑀺 𑀏𑀓𑁂. ‘‘𑀩𑁆𑀭𑀳𑁆𑀫𑀤𑁂𑀯𑀢𑀸𑀳𑀺 𑀉𑀬𑁆𑀬𑁄𑀚𑀺𑀢𑀸’’𑀢𑀺 𑀅𑀧𑀭𑁂. 𑀢𑁂𑀲𑀁 𑀧𑀦 𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀘 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀲𑀁𑀯𑁂𑀕𑀚𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀤𑀼𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀤𑀺𑀩𑁆𑀩𑀲𑀼𑀥𑀸𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁄 𑀯𑀸𑀬𑁄𑀓𑀲𑀺𑀡𑁂 ¶ 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀤𑁂𑀯𑀸𑀦𑀁 𑀓𑀺𑀭 𑀲𑀼𑀔𑀲𑀫𑁆𑀨𑀲𑁆𑀲𑀯𑀸𑀢𑀕𑁆𑀕𑀳𑀡𑀧𑀅𑀘𑀬𑁂𑀦 𑀯𑀸𑀬𑁄𑀓𑀲𑀺𑀡𑁂 𑀛𑀸𑀦𑀸𑀦𑀺 𑀲𑀼𑀔𑁂𑀦𑁂𑀯 𑀇𑀚𑁆𑀛𑀦𑁆𑀢𑀺. 𑀢𑀤𑀜𑁆𑀜𑁂 𑀧𑀦 𑀆𑀧𑀸𑀬𑀺𑀓𑀸 𑀲𑀢𑁆𑀢𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑁂𑀦 ¶ 𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀭𑀳𑀺𑀢𑁄 𑀳𑀺 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀦𑀸𑀫 𑀲𑀢𑁆𑀢𑁄 𑀦𑀢𑁆𑀣𑀺. 𑀢𑁂𑀧𑀺 𑀢𑀢𑁆𑀣 𑀢𑀣𑁂𑀯 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺. 𑀏𑀯𑀁 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁.

𑀓𑁂𑀘𑀺 𑀧𑀦 ‘‘𑀅𑀧𑀸𑀬𑀲𑀢𑁆𑀢𑀸 𑀲𑀁𑀯𑀝𑁆𑀝𑀫𑀸𑀦𑀮𑁄𑀓𑀥𑀸𑀢𑀽𑀳𑀺 𑀅𑀜𑁆𑀜𑁂𑀲𑀼 𑀮𑁄𑀓𑀥𑀸𑀢𑀽𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀳𑀺 𑀲𑀩𑁆𑀩𑁂 𑀅𑀧𑀸𑀬𑀲𑀢𑁆𑀢𑀸 𑀢𑀤𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀅𑀧𑀸𑀬𑁂𑀲𑀼 𑀤𑀻𑀖𑀸𑀬𑀼𑀓𑀸𑀦𑀁 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀦 𑀯𑀺𑀦𑀲𑁆𑀲𑀫𑀸𑀦𑁂𑀧𑀺 𑀓𑀧𑁆𑀧𑁂 𑀦𑀺𑀭𑀬𑀢𑁄 𑀦 𑀫𑀼𑀘𑁆𑀘𑀢𑀺𑀬𑁂𑀯, 𑀢𑀲𑁆𑀫𑀸 𑀲𑁄 𑀢𑀢𑁆𑀣 𑀅𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀸𑀬 𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑁂𑀯 𑀲𑀕𑁆𑀕𑁄 𑀅𑀢𑁆𑀣𑀺, 𑀦 𑀫𑀕𑁆𑀕𑁄, 𑀢𑀲𑁆𑀫𑀸 𑀲𑁄 𑀲𑀁𑀯𑀝𑁆𑀝𑀫𑀸𑀦𑀘𑀓𑁆𑀓𑀯𑀸𑀴𑀢𑁄 𑀅𑀜𑁆𑀜𑀢𑁆𑀣 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀘𑁆𑀘𑀢𑀺. 𑀓𑀺𑀁 𑀧𑀦 𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑀁 𑀦 𑀛𑀸𑀬𑀢𑀻𑀢𑀺? 𑀛𑀸𑀬𑀢𑀺. 𑀢𑀲𑁆𑀫𑀺𑀁 𑀛𑀸𑀬𑀫𑀸𑀦𑁂𑀧𑀺 𑀏𑀲 𑀆𑀓𑀸𑀲𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀧𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑀺.

𑀯𑀲𑁆𑀲𑀽𑀧𑀘𑁆𑀙𑁂𑀤𑀢𑁄 𑀧𑀦 𑀉𑀤𑁆𑀥𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀧𑀸𑀢𑀼𑀪𑀽𑀢𑁂 𑀧𑀦 𑀢𑀲𑁆𑀫𑀺𑀁 𑀦𑁂𑀯 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄, 𑀦 𑀤𑀺𑀯𑀸𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺. 𑀏𑀓𑁄 𑀲𑀽𑀭𑀺𑀬𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺, 𑀅𑀯𑀺𑀘𑁆𑀙𑀺𑀦𑁆𑀦𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀯 𑀮𑁄𑀓𑁄 𑀳𑁄𑀢𑀺. 𑀬𑀣𑀸 𑀘 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀲𑀽𑀭𑀺𑀬𑀯𑀺𑀫𑀸𑀦𑁂 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀦𑀢𑁆𑀣𑀺. 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀬𑀣𑀸 𑀅𑀜𑁆𑀜𑁂 𑀓𑀸𑀫𑀸𑀯𑀘𑀭𑀤𑁂𑀯𑀸, 𑀏𑀯𑀁 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄𑀧𑀺 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀦 𑀧𑀪𑀲𑁆𑀲𑀭𑀢𑀭𑀜𑁆𑀘𑁂𑀯 𑀢𑁂𑀚𑀯𑀦𑁆𑀢𑀢𑀭𑀜𑁆𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑀁 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀅𑀜𑁆𑀜𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀧𑀭𑁂. 𑀢𑀢𑁆𑀣 𑀧𑀓𑀢𑀺𑀲𑀽𑀭𑀺𑀬𑁂 𑀯𑀢𑁆𑀢𑀫𑀸𑀦𑁂 𑀆𑀓𑀸𑀲𑁂 𑀯𑀮𑀸𑀳𑀓𑀸𑀧𑀺 𑀥𑀽𑀫𑀲𑀺𑀔𑀸𑀧𑀺 𑀯𑀢𑁆𑀢𑀦𑁆𑀢𑀺, 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀯𑀢𑁆𑀢𑀫𑀸𑀦𑁂 𑀯𑀺𑀕𑀢𑀥𑀽𑀫𑀯𑀮𑀸𑀳𑀓𑀁 𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀦𑀺𑀫𑁆𑀫𑀮𑀁 𑀦𑀪𑀁 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀲𑁂𑀲𑀓𑀼𑀦𑁆𑀦𑀤𑀺𑀆𑀤𑀻𑀲𑀼 𑀉𑀤𑀓𑀁 𑀲𑀼𑀲𑁆𑀲𑀢𑀺.

𑀢𑀢𑁄𑀧𑀺 ¶ 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀫𑀳𑀸𑀦𑀤𑀺𑀬𑁄𑀧𑀺 𑀲𑀼𑀲𑁆𑀲𑀦𑁆𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀳𑀺𑀫𑀯𑀢𑀺 𑀫𑀳𑀸𑀦𑀤𑀻𑀦𑀁 𑀧𑀪𑀯𑀸 𑀲𑀻𑀳𑀧𑁆𑀧𑀧𑀸𑀢𑀤𑀳𑁄 𑀫𑀦𑁆𑀤𑀸𑀓𑀺𑀦𑀻𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀅𑀦𑁄𑀢𑀢𑁆𑀢𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀸𑀲𑀭𑀸 𑀲𑀼𑀲𑁆𑀲𑀦𑁆𑀢𑀺.

𑀢𑀢𑁄𑀧𑀺 ¶ 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀧𑀜𑁆𑀘𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀙𑀝𑁆𑀞𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀥𑀽𑀫𑀁 𑀳𑁄𑀢𑀺 𑀧𑀭𑀺𑀬𑀸𑀤𑀺𑀦𑁆𑀦𑀲𑀺𑀦𑁂𑀳𑀁 𑀥𑀽𑀫𑁂𑀦. 𑀬𑀸𑀬 𑀳𑀺 𑀆𑀧𑁄𑀥𑀸𑀢𑀼𑀬𑀸 𑀢𑀢𑁆𑀣 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼 𑀆𑀩𑀦𑁆𑀥𑀢𑁆𑀢𑀸 𑀲𑀫𑁆𑀧𑀺𑀡𑁆𑀟𑀺𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸 𑀙𑀝𑁆𑀞𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁂𑀦 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀬𑀣𑀸 𑀘𑀺𑀤𑀁, 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺𑀧𑀺.

𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀢𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀚𑀸𑀮𑀁 𑀳𑁄𑀢𑀺 𑀲𑀤𑁆𑀥𑀺𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀳𑀺, 𑀬𑁄𑀚𑀦𑀲𑀢𑀺𑀓𑀸𑀤𑀺𑀪𑁂𑀤𑀸𑀦𑀺 𑀲𑀺𑀦𑁂𑀭𑀼𑀓𑀽𑀝𑀸𑀦𑀺 𑀧𑀮𑀼𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑀸 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀓𑀦𑀓𑀯𑀺𑀫𑀸𑀦𑀭𑀢𑀦𑀯𑀺𑀫𑀸𑀦𑀫𑀡𑀺𑀯𑀺𑀫𑀸𑀦𑀸𑀦𑀺 𑀛𑀸𑀧𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀡𑁆𑀳𑀸𑀢𑀺. 𑀏𑀢𑁂𑀦𑁂𑀯𑀽𑀧𑀸𑀬𑁂𑀦 𑀬𑀸𑀯 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀁 𑀕𑀡𑁆𑀳𑀸𑀢𑀺, 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀛𑀸𑀧𑁂𑀢𑁆𑀯𑀸 𑀆𑀪𑀲𑁆𑀲𑀭𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀲𑀸 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀦𑀺𑀩𑁆𑀩𑀸𑀬𑀢𑀺. 𑀲𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸 𑀧𑀦 𑀲𑀧𑁆𑀧𑀺𑀢𑁂𑀮𑀚𑁆𑀛𑀸𑀧𑀦𑀕𑁆𑀕𑀺𑀲𑀺𑀔𑀸 𑀯𑀺𑀬 𑀙𑀸𑀭𑀺𑀓𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀺. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄.

𑀏𑀯𑀁 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀏𑀓𑀗𑁆𑀕𑀡𑀁 𑀳𑀼𑀢𑁆𑀯𑀸 𑀞𑀺𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀮𑁄𑀓𑀲𑁆𑀲 𑀲𑀡𑁆𑀞𑀸𑀦𑀢𑁆𑀣𑀸𑀬 𑀤𑁂𑀯𑁄 𑀯𑀲𑁆𑀲𑀺𑀢𑀼𑀁 𑀆𑀭𑀪𑀢𑀺, 𑀆𑀤𑀺𑀢𑁄𑀯 𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑁄 𑀯𑀺𑀬 𑀳𑁄𑀢𑀺. 𑀢𑀢𑁄 𑀓𑀡𑀫𑀢𑁆𑀢𑀸 𑀢𑀡𑁆𑀟𑀼𑀮𑀫𑀢𑁆𑀢𑀸 𑀫𑀼𑀕𑁆𑀕𑀫𑀸𑀲𑀩𑀤𑀭𑀆𑀫𑀮𑀓𑀏𑀴𑀸𑀮𑀼𑀓𑀓𑀼𑀫𑁆𑀪𑀡𑁆𑀟𑀅𑀮𑀸𑀩𑀼𑀫𑀢𑁆𑀢𑀸 𑀉𑀤𑀓𑀥𑀸𑀭𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 ¶ 𑀉𑀲𑀪𑀤𑁆𑀯𑁂𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦…𑀧𑁂… 𑀬𑁄𑀚𑀦𑀲𑀢𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑀸 𑀳𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀕𑀩𑁆𑀪𑀦𑁆𑀢𑀭𑀁 𑀬𑀸𑀯 𑀅𑀯𑀺𑀦𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀧𑀽𑀭𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀘 𑀢𑀺𑀭𑀺𑀬𑀜𑁆𑀘 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀖𑀦𑀁 𑀓𑀭𑁄𑀢𑀺 𑀧𑀭𑀺𑀯𑀝𑀼𑀫𑀁 𑀧𑀤𑀼𑀫𑀺𑀦𑀻𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼𑀲𑀤𑀺𑀲𑀁.

𑀓𑀣𑀁 𑀢𑀸𑀯𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁 𑀖𑀦𑀁 𑀓𑀭𑁄𑀢𑀻𑀢𑀺 𑀘𑁂? 𑀯𑀺𑀯𑀭𑀲𑀫𑁆𑀧𑀤𑀸𑀦𑀢𑁄 𑀯𑀸𑀢𑀲𑁆𑀲𑀸𑀢𑀺. 𑀢𑀜𑁆𑀳𑀺𑀲𑁆𑀲 𑀢𑀳𑀺𑀁 𑀢𑀳𑀺𑀁 𑀯𑀺𑀯𑀭𑀁 𑀤𑁂𑀢𑀺. 𑀢𑀁 𑀏𑀯𑀁 𑀯𑀸𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀬𑀫𑀸𑀦𑀁 𑀖𑀦𑀁 𑀓𑀭𑀺𑀬𑀫𑀸𑀦𑀁 𑀧𑀭𑀺𑀓𑁆𑀔𑀬𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀑𑀢𑀺𑀡𑁆𑀡𑁂 𑀑𑀢𑀺𑀡𑁆𑀡𑁂 𑀉𑀤𑀓𑁂 𑀩𑁆𑀭𑀳𑁆𑀫𑀮𑁄𑀓𑀝𑁆𑀞𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁄, 𑀉𑀧𑀭𑀺𑀘𑀢𑀼𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀝𑁆𑀞𑀸𑀦𑁂 𑀘 𑀤𑁂𑀯𑀮𑁄𑀓𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀪𑀯𑀦𑀸𑀦𑀺 𑀧𑀦 𑀧𑀣𑀯𑀻𑀲𑀫𑁆𑀩𑀦𑁆𑀥𑀢𑀸𑀬 𑀦 𑀢𑀸𑀯 𑀧𑀸𑀢𑀼𑀪𑀯𑀦𑁆𑀢𑀺. 𑀧𑀼𑀭𑀺𑀫𑀧𑀣𑀯𑀺𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑁂 𑀧𑀦 𑀩𑀮𑀯𑀯𑀸𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀢𑀁 𑀧𑀺𑀳𑀺𑀢𑀤𑁆𑀯𑀸𑀭𑁂 𑀥𑀫𑁆𑀫𑀓𑀭𑀡𑁂 𑀞𑀺𑀢𑀉𑀤𑀓𑀫𑀺𑀯 𑀦𑀺𑀭𑀼𑀲𑁆𑀲𑀸𑀲𑀁 𑀓𑀢𑁆𑀯𑀸 𑀭𑀼𑀫𑁆𑀪𑀦𑁆𑀢𑀺 ¶ . 𑀫𑀥𑀼𑀭𑁄𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀫𑀸𑀦𑀁 𑀉𑀧𑀭𑀺 𑀭𑀲𑀧𑀣𑀯𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀉𑀤𑀓𑀧𑀺𑀝𑁆𑀞𑁂 𑀉𑀧𑁆𑀧𑀮𑀺𑀦𑀻𑀧𑀢𑁆𑀢𑀁 𑀯𑀺𑀬 𑀧𑀣𑀯𑀻 𑀲𑀡𑁆𑀞𑀸𑀢𑀺. 𑀲𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀘𑁂𑀯 𑀳𑁄𑀢𑀺 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸 𑀘 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀉𑀧𑀭𑀺 𑀧𑀝𑀮𑀁 𑀯𑀺𑀬. 𑀏𑀢𑁆𑀣 𑀧𑀦 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁 𑀯𑀺𑀦𑀲𑁆𑀲𑀫𑀸𑀦𑁂 𑀮𑁄𑀓𑁂 𑀧𑀘𑁆𑀙𑀸 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀫𑀸𑀦𑁂 𑀧𑀞𑀫𑀁 𑀲𑀡𑁆𑀞𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀤𑀸 𑀘 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀧𑀞𑀫𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀑𑀧𑀧𑀸𑀢𑀺𑀓𑀸 𑀳𑀼𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸, 𑀢𑁂 𑀢𑀁 𑀭𑀲𑀧𑀣𑀯𑀺𑀁 𑀲𑀸𑀬𑀺𑀢𑁆𑀯𑀸 𑀢𑀡𑁆𑀳𑀸𑀪𑀺𑀪𑀽𑀢𑀸 𑀆𑀮𑀼𑀧𑁆𑀧𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀺. 𑀅𑀣 𑀢𑁂𑀲𑀁 𑀲𑀬𑀁𑀧𑀪𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺. 𑀢𑁂 𑀅𑀦𑁆𑀥𑀓𑀸𑀭𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀜𑀸𑀲𑀬𑁄𑀚𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 ‘‘𑀆𑀮𑁄𑀓𑀁 𑀧𑀝𑀺𑀮𑀪𑀺𑀫𑁆𑀳𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀻𑀢𑀸𑀦𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑁄 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀲𑀽𑀭𑀺𑀬𑁄 𑀳𑁄𑀢𑀽’’𑀢𑀺 𑀲𑀽𑀭𑀺𑀬𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺.

𑀅𑀣 𑀲𑀽𑀭𑀺𑀬𑁂 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 ‘‘𑀬𑀫𑁆𑀧𑀺 𑀆𑀮𑁄𑀓𑀁 𑀮𑀪𑀺𑀫𑁆𑀳, 𑀲𑁄𑀧𑀺 𑀦𑁄 𑀦𑀝𑁆𑀞𑁄’’𑀢𑀺 𑀧𑀼𑀦 𑀪𑀻𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀅𑀜𑁆𑀜𑀁 𑀆𑀮𑁄𑀓𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀬 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄 ¶ 𑀫𑀢𑁆𑀢𑀸𑀬 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀺𑀬 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀘𑀦𑁆𑀤𑁄 𑀳𑁄𑀢𑀽’’𑀢𑀺 𑀘𑀦𑁆𑀤𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺.

𑀏𑀯𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀢𑁄 𑀧𑀪𑀼𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀘 𑀫𑀸𑀲𑀟𑁆𑀠𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀸𑀢𑀼𑀪𑀽𑀢𑀤𑀺𑀯𑀲𑁂𑀬𑁂𑀯 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸 𑀤𑀻𑀧𑀲𑀫𑀼𑀤𑁆𑀤𑀸 𑀘 𑀧𑀸𑀢𑀼𑀪𑀯𑀦𑁆𑀢𑀺. 𑀢𑁂 𑀘 𑀔𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀣𑀁? 𑀬𑀣𑀸 𑀦𑀸𑀫 𑀓𑀗𑁆𑀕𑀼𑀪𑀢𑁆𑀢𑁂 𑀧𑀘𑁆𑀘𑀫𑀸𑀦𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀼𑀩𑁆𑀩𑀼𑀴𑀓𑀸 𑀉𑀝𑁆𑀞𑀳𑀦𑁆𑀢𑀺, 𑀏𑀓𑁂 𑀧𑀤𑁂𑀲𑀸 𑀣𑀽𑀧𑀣𑀽𑀧𑀸 𑀳𑁄𑀦𑁆𑀢𑀺, 𑀏𑀓𑁂 𑀦𑀺𑀦𑁆𑀦𑀦𑀺𑀦𑁆𑀦𑀸, 𑀏𑀓𑁂 𑀲𑀫𑀲𑀫𑀸, 𑀏𑀯𑀫𑁂𑀯 𑀣𑀽𑀧𑀣𑀽𑀧𑀝𑁆𑀞𑀸𑀦𑁂 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀦𑀺𑀦𑁆𑀦𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀫𑀼𑀤𑁆𑀤𑀸, 𑀲𑀫𑀲𑀫𑀝𑁆𑀞𑀸𑀦𑁂 𑀤𑀻𑀧𑀸𑀢𑀺.

𑀅𑀣 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀫𑁆𑀫𑁂𑀦 𑀏𑀓𑀘𑁆𑀘𑁂 𑀯𑀡𑁆𑀡𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀯𑀡𑁆𑀡𑀯𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁂 𑀅𑀢𑀺𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀅𑀢𑀺𑀫𑀸𑀦𑀧𑀘𑁆𑀘𑀬𑀸 𑀲𑀸𑀧𑀺 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀢𑀺, 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀪𑀯𑀢𑀺. 𑀅𑀣 𑀦𑁂𑀲𑀁 𑀢𑁂𑀦𑁂𑀯 𑀦𑀬𑁂𑀦 𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀣 𑀧𑀤𑀸𑀮𑀢𑀸 𑀧𑀸𑀢𑀼𑀪𑀯𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀲𑀸𑀧𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 ¶ 𑀧𑀸𑀢𑀼𑀪𑀯𑀢𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀨𑀮𑁄. 𑀢𑀢𑁄 𑀦𑁂𑀲𑀁 𑀪𑀸𑀚𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀲𑀸𑀮𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀞𑀧𑁂𑀦𑁆𑀢𑀺, 𑀲𑀬𑀫𑁂𑀯 𑀚𑀸𑀮𑀲𑀺𑀔𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑀘𑀢𑀺. 𑀲𑁄 𑀳𑁄𑀢𑀺 𑀑𑀤𑀦𑁄 𑀲𑀼𑀫𑀦𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄, 𑀦 𑀢𑀲𑁆𑀲 𑀲𑀽𑀧𑁂𑀦 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀯𑀸 𑀓𑀭𑀡𑀻𑀬𑀁 𑀅𑀢𑁆𑀣𑀺, 𑀬𑀁 𑀬𑀁 𑀭𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁𑀢𑀁𑀭𑀲𑁄𑀯 𑀳𑁄𑀢𑀺. 𑀢𑁂𑀲𑀁 𑀢𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀬𑀢𑀁 𑀢𑀢𑁄 𑀧𑀪𑀼𑀢𑀺 𑀫𑀼𑀢𑁆𑀢𑀓𑀭𑀻𑀲𑀁 𑀲𑀜𑁆𑀚𑀸𑀬𑀢𑀺. 𑀢𑀣𑀸 𑀳𑀺 𑀭𑀲𑀧𑀣𑀯𑀻 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀤𑀸𑀮𑀢𑀸𑀢𑀺 𑀇𑀫𑁂 𑀢𑀸𑀯 𑀧𑀭𑀺𑀪𑀼𑀢𑁆𑀢𑀸 𑀲𑀼𑀥𑀸𑀳𑀸𑀭𑁄 𑀯𑀺𑀬 𑀔𑀼𑀤𑀁 𑀯𑀺𑀦𑁄𑀤𑁂𑀢𑁆𑀯𑀸 𑀭𑀲𑀳𑀭𑀡𑀻𑀳𑀺 𑀭𑀲𑀫𑁂𑀯 𑀧𑀭𑀺𑀩𑁆𑀬𑀽𑀳𑁂𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺 𑀯𑀢𑁆𑀣𑀼𑀦𑁄 𑀲𑀼𑀔𑀼𑀫𑀪𑀸𑀯𑁂𑀦, 𑀦 𑀦𑀺𑀲𑁆𑀲𑀦𑁆𑀤𑀸, 𑀲𑀼𑀔𑀼𑀫𑀪𑀸𑀯𑁂𑀦𑁂𑀯 𑀕𑀳𑀡𑀺𑀦𑁆𑀥𑀦𑀫𑁂𑀯 𑀘 𑀳𑁄𑀢𑀺. 𑀑𑀤𑀦𑁄 𑀧𑀦 𑀧𑀭𑀺𑀪𑀼𑀢𑁆𑀢𑁄 𑀭𑀲𑀁 𑀯𑀟𑁆𑀠𑁂𑀦𑁆𑀢𑁄𑀧𑀺 𑀯𑀢𑁆𑀣𑀼𑀦𑁄 𑀑𑀴𑀸𑀭𑀺𑀓𑀪𑀸𑀯𑁂𑀦𑁂𑀯 𑀦𑀺𑀲𑁆𑀲𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀲𑁆𑀲𑀸𑀯𑀁 𑀓𑀭𑀻𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑀺.

𑀅𑀣 𑀢𑁂𑀲𑀁 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀡𑀫𑀼𑀔𑀸𑀦𑀺 𑀧𑀪𑀺𑀚𑁆𑀚𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀪𑀸𑀯𑁄 𑀧𑀸𑀢𑀼𑀪𑀯𑀢𑀺. 𑀧𑀼𑀭𑀺𑀫𑀢𑁆𑀢𑀪𑀸𑀯𑁂𑀲𑀼 𑀳𑀺 𑀧𑀯𑀢𑁆𑀢𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀼𑀪𑀸𑀯𑁂𑀦 𑀬𑀸𑀯 𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀓𑀸𑀫𑀭𑀸𑀕𑁄 𑀯𑀺𑀓𑁆𑀔𑀫𑁆𑀪𑀦𑀯𑁂𑀕𑁂𑀦 𑀲𑀫𑀺𑀢𑁄 ¶ , 𑀦 𑀢𑀸𑀯 𑀩𑀳𑀮𑀓𑀸𑀫𑀭𑀸𑀕𑀽𑀧𑀦𑀺𑀲𑁆𑀲𑀬𑀸𑀦𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀤𑀸 𑀧𑀦𑀲𑁆𑀲 𑀯𑀺𑀘𑁆𑀙𑀺𑀦𑁆𑀦𑀢𑀸𑀬 𑀩𑀳𑀮𑀓𑀸𑀫𑀭𑀸𑀕𑁄 𑀮𑀤𑁆𑀥𑀸𑀯𑀲𑀭𑁄 𑀅𑀳𑁄𑀲𑀺, 𑀢𑀤𑀸 𑀢𑀤𑀼𑀧𑀦𑀺𑀲𑁆𑀲𑀬𑀸𑀦𑀺 𑀢𑀸𑀦𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂𑀲𑀼 𑀲𑀜𑁆𑀚𑀸𑀬𑀺𑀁𑀲𑀼, 𑀢𑀤𑀸 𑀇𑀢𑁆𑀣𑀻 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁄 𑀘 𑀇𑀢𑁆𑀣𑀺𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑀧𑀘𑁆𑀘𑀬𑀸 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺. 𑀢𑁂 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀬𑀫𑀸𑀦𑀸 𑀯𑀺𑀳𑁂𑀞𑀺𑀬𑀫𑀸𑀦𑀸 𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀅𑀕𑀸𑀭𑀸𑀦𑀺 𑀓𑀭𑁄𑀦𑁆𑀢𑀺. 𑀢𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀜𑁆𑀜𑀢𑀭𑀲𑁆𑀲 𑀅𑀮𑀲𑀚𑀸𑀢𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀓𑀡𑁄𑀧𑀺 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀺, 𑀮𑀸𑀬𑀺𑀢𑀝𑁆𑀞𑀸𑀦𑀫𑁆𑀧𑀺 𑀦 𑀧𑀝𑀺𑀯𑀺𑀭𑀼𑀳𑀢𑀺.

𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀦𑁆𑀢𑀺 ‘‘𑀧𑀸𑀧𑀓𑀸 𑀯𑀢 𑀪𑁄 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀫𑀬𑀜𑁆𑀳𑀺 𑀧𑀼𑀩𑁆𑀩𑁂 𑀫𑀦𑁄𑀫𑀬𑀸 𑀅𑀳𑀼𑀫𑁆𑀳𑀸’’𑀢𑀺, 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁨𑁮) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁄 𑀫𑀭𑀺𑀬𑀸𑀤𑀁 𑀞𑀧𑁂𑀦𑁆𑀢𑀺, 𑀅𑀣𑀜𑁆𑀜𑀢𑀭𑁄 𑀲𑀢𑁆𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀪𑀸𑀲𑁂𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑁂𑀳𑀺 𑀧𑀳𑀭𑀦𑁆𑀢𑀺. 𑀢𑁂 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑁂 𑀓𑀮𑀳𑀫𑀼𑀲𑀸𑀯𑀸𑀤𑀤𑀡𑁆𑀟𑀸𑀤𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀘 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑀺 ‘‘𑀬𑀦𑁆𑀦𑀽𑀦 𑀫𑀬𑀁 𑀏𑀓𑀁 𑀲𑀢𑁆𑀢𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫, 𑀬𑁄 𑀦𑁄 𑀲𑀫𑁆𑀫𑀸 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬𑁂𑀬𑁆𑀬, 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑁂𑀬𑁆𑀬, 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀫𑀬𑀁 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀫𑀦𑀼𑀧𑁆𑀧𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁂𑀲𑀼 𑀧𑀦 𑀲𑀢𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀢𑀸𑀯 𑀓𑀧𑁆𑀧𑁂 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀢𑁂𑀦 𑀲𑀫𑀬𑁂𑀦 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀪𑀺𑀭𑀽𑀧𑀢𑀭𑁄 𑀘 ¶ 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀝𑀺𑀩𑀮𑁄 𑀦𑀺𑀕𑁆𑀕𑀳𑀧𑀕𑁆𑀕𑀳𑀁 𑀓𑀸𑀢𑀼𑀁. 𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀁𑀲𑀼. 𑀲𑁄 𑀢𑁂𑀦 𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑁄𑀢𑀺 𑀫𑀳𑀸𑀲𑀫𑁆𑀫𑀢𑁄, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑀢𑁆𑀢𑀺𑀬𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑁂𑀲𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸𑀢𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀬𑀜𑁆𑀳𑀺 𑀮𑁄𑀓𑁂 𑀅𑀘𑁆𑀙𑀭𑀺𑀬𑀝𑁆𑀞𑀸𑀦𑀁, 𑀩𑁄𑀥𑀺𑀲𑀢𑁆𑀢𑁄𑀯 𑀢𑀢𑁆𑀣 𑀆𑀤𑀺𑀧𑀼𑀭𑀺𑀲𑁄𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀔𑀢𑁆𑀢𑀺𑀬𑀫𑀡𑁆𑀟𑀮𑁂 𑀲𑀡𑁆𑀞𑀺𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀸𑀤𑀬𑁄𑀧𑀺 𑀯𑀡𑁆𑀡𑀸 𑀲𑀡𑁆𑀞𑀳𑀺𑀁𑀲𑀼.

𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀚𑀸𑀮𑁄𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀧𑁆𑀧𑀯𑀺𑀦𑀸𑀲𑀓𑀚𑀸𑀮𑁄𑀧𑀘𑁆𑀙𑁂𑀤𑀢𑁄 𑀬𑀸𑀯 ¶ 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀧𑀽𑀭𑀓𑁄 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀢𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀢𑁄 𑀬𑀸𑀯 𑀧𑀼𑀦 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄, 𑀇𑀤𑀁 𑀘𑀢𑀼𑀢𑁆𑀣𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳𑀁. ‘‘𑀯𑀻𑀲𑀢𑀺𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀕𑀳’’𑀦𑁆𑀢𑀺 𑀓𑁂𑀘𑀺. 𑀲𑁂𑀲𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀸𑀮𑀢𑁄 𑀢𑁂𑀦 𑀲𑀫𑀧𑁆𑀧𑀫𑀸𑀡𑀸𑀦𑁂𑀯. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀏𑀯𑀁 𑀢𑀸𑀯 𑀅𑀕𑁆𑀕𑀺𑀦𑀸 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀧𑁆𑀧𑁄 𑀉𑀤𑀓𑁂𑀦 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥 𑀓𑀧𑁆𑀧𑀯𑀺𑀦𑀸𑀲𑀓𑁄 𑀔𑀸𑀭𑀼𑀤𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺. 𑀲𑁄 𑀆𑀤𑀺𑀢𑁄 𑀲𑀼𑀔𑀼𑀫𑀁 𑀲𑀼𑀔𑀼𑀫𑀁 𑀯𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀥𑀸𑀭𑀸𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀁 𑀧𑀽𑀭𑁂𑀦𑁆𑀢𑁄 𑀯𑀲𑁆𑀲𑀢𑀺. 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀯𑀺𑀮𑀻𑀬𑀦𑁆𑀢𑀺, 𑀉𑀤𑀓𑀁 𑀲𑀫𑀦𑁆𑀢𑀢𑁄 𑀯𑀸𑀢𑁂𑀳𑀺 𑀥𑀸𑀭𑀻𑀬𑀢𑀺. 𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀧𑀪𑀼𑀢𑀺 𑀬𑀸𑀯 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀁 𑀉𑀤𑀓𑀁 𑀕𑀡𑁆𑀳𑀸𑀢𑀺. 𑀢𑁂𑀦 𑀳𑀺 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀯𑀺𑀮𑀻𑀬𑀦𑁆𑀢𑁂𑀯, 𑀢𑀲𑁆𑀫𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑁂𑀦 𑀲𑀤𑁆𑀥𑀺𑀁 𑀏𑀓𑀽𑀤𑀓𑀫𑁂𑀯 𑀢𑀁 𑀳𑁄𑀢𑀻𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 ‘‘𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀁 𑀢𑀁 𑀲𑀦𑁆𑀥𑀸𑀭𑀓𑀯𑀸𑀬𑀼𑀓𑁆𑀔𑀦𑁆𑀥𑀜𑁆𑀘 𑀅𑀦𑀯𑀲𑁂𑀲𑀢𑁄 𑀯𑀺𑀦𑀸𑀲𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀲𑀬𑀫𑁂𑀯 𑀏𑀓𑁄 𑀖𑀦𑀪𑀽𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁. 𑀉𑀧𑀭𑀺 𑀧𑀦 𑀙𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀢𑀁 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀯𑀽𑀧𑀲𑀫𑁆𑀫𑀢𑀺, 𑀉𑀤𑀓𑀸𑀦𑀼𑀕𑀢𑀁 𑀧𑀦 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳𑀲𑀸 𑀯𑀽𑀧𑀲𑀫𑁆𑀫𑀢𑀺, 𑀅𑀦𑁆𑀢𑀭𑀥𑀸𑀦𑀁 𑀕𑀘𑁆𑀙𑀢𑀺. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀓𑁂𑀯𑀮𑀁 𑀧𑀦𑀺𑀥 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀲𑀼𑀪𑀓𑀺𑀡𑁆𑀳𑀢𑁄 𑀘𑀯𑀺𑀢𑁆𑀯𑀸 𑀆𑀪𑀲𑁆𑀲𑀭𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀔𑀸𑀭𑀼𑀤𑀓𑁄𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 ¶ . 𑀉𑀤𑀓𑀼𑀧𑀘𑁆𑀙𑁂𑀤𑀢𑁄 𑀬𑀸𑀯 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁. 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀢𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀢𑁄 ¶ 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀆𑀫𑁂𑀖𑁄, 𑀇𑀤𑀁 𑀘𑀢𑀼𑀢𑁆𑀣𑀫𑀲𑀗𑁆𑀔𑁆𑀬𑁂𑀬𑁆𑀬𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀳𑁄𑀢𑀺. 𑀏𑀯𑀁 𑀉𑀤𑀓𑁂𑀦 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀺𑀁 𑀲𑀫𑀬𑁂 𑀓𑀧𑁆𑀧𑁄 𑀯𑀸𑀢𑁂𑀦 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥 𑀓𑀧𑁆𑀧𑀯𑀺𑀦𑀸𑀲𑀦𑀢𑁆𑀣𑀁 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀲𑁄 𑀧𑀞𑀫𑀁 𑀣𑀽𑀮𑀭𑀚𑀁 𑀉𑀝𑁆𑀞𑀸𑀧𑁂𑀢𑀺, 𑀢𑀢𑁄 𑀲𑀡𑁆𑀳𑀭𑀚𑀁 𑀲𑀼𑀔𑀼𑀫𑀯𑀸𑀮𑀺𑀓𑀁 𑀣𑀽𑀮𑀯𑀸𑀮𑀺𑀓𑀁 𑀲𑀓𑁆𑀔𑀭𑀧𑀸𑀲𑀸𑀡𑀸𑀤𑀬𑁄𑀢𑀺 𑀬𑀸𑀯𑀓𑀽𑀝𑀸𑀕𑀸𑀭𑀫𑀢𑁆𑀢𑁂 𑀧𑀸𑀲𑀸𑀡𑁂 𑀯𑀺𑀲𑀫𑀝𑁆𑀞𑀸𑀦𑁂 𑀞𑀺𑀢𑀫𑀳𑀸𑀭𑀼𑀓𑁆𑀔𑁂 𑀘 𑀉𑀝𑁆𑀞𑀸𑀧𑁂𑀢𑀺. 𑀢𑁂 𑀧𑀣𑀯𑀺𑀢𑁄 𑀦𑀪𑀫𑀼𑀕𑁆𑀕𑀢𑀸 𑀦 𑀧𑀼𑀦 𑀧𑀢𑀦𑁆𑀢𑀺, 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀅𑀣𑀸𑀦𑀼𑀓𑁆𑀓𑀫𑁂𑀦 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁 𑀫𑀽𑀮𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺. 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀸𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑀸 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀘𑀢𑀼𑀬𑁄𑀚𑀦𑀧𑀜𑁆𑀘𑀬𑁄𑀚𑀦𑀙𑀬𑁄𑀚𑀦𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀧𑀪𑀺𑀚𑁆𑀚𑀺𑀢𑁆𑀯𑀸 𑀯𑀸𑀢𑀯𑁂𑀕𑀼𑀓𑁆𑀔𑀺𑀢𑁆𑀢𑀸 𑀆𑀓𑀸𑀲𑁂𑀬𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀲𑀺𑀦𑁂𑀭𑀼𑀧𑀩𑁆𑀩𑀢𑀫𑁆𑀧𑀺 𑀯𑀸𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀳𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀏𑀢𑁂𑀦𑁂𑀯𑀽𑀧𑀸𑀬𑁂𑀦 𑀪𑀽𑀫𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀯𑀺𑀦𑀸𑀲𑁂𑀦𑁆𑀢𑁄 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀸𑀴𑀸 𑀘𑀓𑁆𑀓𑀯𑀸𑀴𑁂𑀳𑀺, 𑀳𑀺𑀫𑀯𑀦𑁆𑀢𑀸 𑀳𑀺𑀫𑀯𑀦𑁆𑀢𑁂𑀳𑀺, 𑀲𑀺𑀦𑁂𑀭𑀽 𑀲𑀺𑀦𑁂𑀭𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀧𑀣𑀯𑀺𑀢𑁄 𑀬𑀸𑀯 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀯𑀸𑀢𑁄 𑀕𑀡𑁆𑀳𑀸𑀢𑀺, 𑀦𑀯𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀏𑀯𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑁂𑀦 𑀢𑀁𑀲𑀦𑁆𑀥𑀸𑀭𑀓𑀯𑀸𑀢𑁂𑀦 𑀘 𑀲𑀤𑁆𑀥𑀺𑀁 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑀺𑀦𑀲𑁆𑀲𑀢𑀺 𑀅𑀯𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀸𑀪𑀸𑀯𑀢𑁄. 𑀳𑁂𑀝𑁆𑀞𑀸𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀇𑀥 𑀧𑀦 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀯𑁂𑀳𑀧𑁆𑀨𑀮𑀢𑁄 𑀘𑀯𑀺𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀯𑀸𑀢𑀼𑀧𑀘𑁆𑀙𑁂𑀤𑁄, 𑀇𑀤𑀫𑁂𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁. 𑀯𑀸𑀢𑀼𑀧𑀘𑁆𑀙𑁂𑀤𑀢𑁄 𑀬𑀸𑀯 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀤𑀼𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀁 𑀯𑀸𑀢𑁂𑀦 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀅𑀣 ¶ 𑀓𑀺𑀁𑀓𑀸𑀭𑀡𑀸 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺. 𑀬𑀤𑀺𑀧𑀺 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀳𑁂𑀢𑀼𑀓𑁄 𑀲𑀭𑀲𑀦𑀺𑀭𑁄𑀥𑁄 𑀯𑀺𑀦𑀸𑀲𑀓𑀸𑀪𑀸𑀯𑀢𑁄, 𑀲𑀦𑁆𑀢𑀸𑀦𑀦𑀺𑀭𑁄𑀥𑁄 𑀧𑀦 𑀳𑁂𑀢𑀼𑀯𑀺𑀭𑀳𑀺𑀢𑁄 𑀦𑀢𑁆𑀣𑀺. 𑀬𑀣𑀸 𑀢𑀁 𑀲𑀢𑁆𑀢𑀦𑀺𑀓𑀸𑀬𑁂𑀲𑀽𑀢𑀺 𑀪𑀸𑀚𑀦𑀮𑁄𑀓𑀲𑁆𑀲𑀧𑀺 𑀲𑀳𑁂𑀢𑀼𑀓𑁂𑀦 𑀯𑀺𑀦𑀸𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀺𑀫𑁂𑀯𑀁 𑀮𑁄𑀓𑀯𑀺𑀦𑀸𑀲𑁂 𑀓𑀸𑀭𑀡𑀦𑁆𑀢𑀺? 𑀅𑀓𑀼𑀲𑀮𑀫𑀽𑀮𑀁 ¶ 𑀓𑀸𑀭𑀡𑀁. 𑀬𑀣𑀸 𑀳𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀩𑀮𑁂𑀦 𑀧𑀞𑀫𑀁 𑀮𑁄𑀓𑁄 𑀯𑀺𑀯𑀝𑁆𑀝𑀢𑀺, 𑀏𑀯𑀁 𑀢𑁂𑀲𑀁 𑀧𑀸𑀧𑀓𑀫𑁆𑀫𑀩𑀮𑁂𑀦 𑀲𑀁𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀓𑀼𑀲𑀮𑀫𑀽𑀮𑁂𑀲𑀼 𑀉𑀲𑁆𑀲𑀦𑁆𑀦𑁂𑀲𑀼 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺. 𑀬𑀣𑀸 𑀳𑀺 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀅𑀥𑀺𑀓𑀪𑀸𑀯𑁂𑀦 𑀬𑀣𑀸𑀓𑁆𑀓𑀫𑀁 𑀭𑁄𑀕𑀦𑁆𑀢𑀭𑀓𑀧𑁆𑀧𑁄 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁄 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭𑀓𑀧𑁆𑀧𑁄𑀢𑀺 𑀇𑀫𑁂 𑀢𑀺𑀯𑀺𑀥𑀸 𑀅𑀦𑁆𑀢𑀭𑀓𑀧𑁆𑀧𑀸 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 𑀚𑀸𑀬𑀦𑁆𑀢𑀺. 𑀏𑀯𑀫𑁂𑀢𑁂 𑀬𑀣𑀸𑀯𑀼𑀢𑁆𑀢𑀸 𑀢𑀬𑁄 𑀲𑀁𑀯𑀝𑁆𑀝𑀸 𑀭𑀸𑀕𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑁂𑀦𑁂𑀯 𑀳𑁄𑀦𑁆𑀢𑀺.

𑀢𑀢𑁆𑀣 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺, 𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀺. 𑀤𑁄𑀲𑁂 𑀳𑀺 𑀉𑀲𑁆𑀲𑀦𑁆𑀦𑀢𑀭𑁂 𑀅𑀥𑀺𑀓𑀢𑀭𑁂𑀦 𑀤𑁄𑀲𑁂𑀦 𑀯𑀺𑀬 𑀢𑀺𑀓𑁆𑀔𑀢𑀭𑁂𑀦 𑀔𑀸𑀭𑀼𑀤𑀓𑁂𑀦 𑀯𑀺𑀦𑀸𑀲𑁄 𑀬𑀼𑀢𑁆𑀢𑁄𑀢𑀺. 𑀓𑁂𑀘𑀺 𑀧𑀦 ‘‘𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸, 𑀭𑀸𑀕𑁂 𑀉𑀤𑀓𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀓𑀺𑀭 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀧𑀸𑀓𑀝𑀲𑀢𑁆𑀢𑀼𑀲𑀤𑀺𑀲𑀲𑁆𑀲 𑀤𑁄𑀲𑀲𑁆𑀲 𑀅𑀕𑁆𑀕𑀺𑀲𑀤𑀺𑀲𑀢𑀸, 𑀅𑀧𑀸𑀓𑀝𑀲𑀢𑁆𑀢𑀼𑀲𑀤𑀺𑀲𑀲𑁆𑀲 𑀭𑀸𑀕𑀲𑁆𑀲 𑀔𑀸𑀭𑀼𑀤𑀓𑀲𑀤𑀺𑀲𑀢𑀸 𑀘 𑀬𑀼𑀢𑁆𑀢𑀸𑀢𑀺. 𑀫𑁄𑀳𑁂 𑀧𑀦 𑀉𑀲𑁆𑀲𑀦𑁆𑀦𑀢𑀭𑁂 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺. 𑀏𑀯𑀁 𑀯𑀺𑀦𑀲𑁆𑀲𑀦𑁆𑀢𑁄𑀧𑀺 𑀘 𑀦𑀺𑀭𑀦𑁆𑀢𑀭𑀫𑁂𑀯 𑀲𑀢𑁆𑀢 𑀯𑀸𑀭𑁂 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦, 𑀧𑀼𑀦 𑀲𑀢𑁆𑀢 𑀯𑀸𑀭𑁂 𑀅𑀕𑁆𑀕𑀺𑀦𑀸, 𑀅𑀝𑁆𑀞𑀫𑁂 𑀉𑀤𑀓𑁂𑀦𑀸𑀢𑀺 𑀏𑀯𑀁 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀯𑀸𑀭𑁂 𑀯𑀺𑀦𑀲𑁆𑀲𑀦𑁆𑀢𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀉𑀤𑀓𑁂𑀦 𑀯𑀺𑀦𑀲𑁆𑀲𑀺𑀢𑁆𑀯𑀸 𑀧𑀼𑀦 𑀲𑀢𑁆𑀢 𑀯𑀸𑀭𑁂 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀲𑀝𑁆𑀞𑀺 𑀓𑀧𑁆𑀧𑀸 𑀅𑀢𑀻𑀢𑀸 𑀳𑁄𑀦𑁆𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀉𑀤𑀓𑁂𑀦 𑀦𑀲𑁆𑀲𑀦𑀯𑀸𑀭𑀁 𑀲𑀫𑁆𑀧𑀢𑁆𑀢𑀫𑁆𑀧𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑁄 𑀯𑀸𑀢𑁄 𑀧𑀭𑀺𑀧𑀼𑀡𑁆𑀡𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀬𑀼𑀓𑁂 𑀲𑀼𑀪𑀓𑀺𑀡𑁆𑀳𑁂 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀮𑁄𑀓𑀁 𑀯𑀺𑀦𑀸𑀲𑁂𑀢𑀺. 𑀏𑀢𑁆𑀣 𑀧𑀦 𑀭𑀸𑀕𑁄 𑀲𑀢𑁆𑀢𑀸𑀦𑀁 𑀩𑀳𑀼𑀮𑀁 𑀧𑀯𑀢𑁆𑀢𑀢𑀻𑀢𑀺 𑀅𑀕𑁆𑀕𑀺𑀯𑀲𑁂𑀦 𑀩𑀳𑀼𑀲𑁄 𑀮𑁄𑀓𑀯𑀺𑀦𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀏𑀯𑀁 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀯𑀺𑀦𑀲𑁆𑀲𑀺𑀢𑁆𑀯𑀸 𑀲𑀡𑁆𑀞𑀳𑀦𑁆𑀢𑀁 𑀲𑀡𑁆𑀞𑀳𑀺𑀢𑁆𑀯𑀸 𑀞𑀺𑀢𑀜𑁆𑀘 𑀑𑀓𑀸𑀲𑀮𑁄𑀓𑀁 𑀪𑀕𑀯𑀸 𑀬𑀸𑀣𑀸𑀯𑀢𑁄 𑀅𑀯𑁂𑀤𑀻𑀢𑀺 𑀏𑀯𑀫𑁆𑀧𑀺𑀲𑁆𑀲 𑀲𑀩𑁆𑀩𑀣𑀸 𑀑𑀓𑀸𑀲𑀮𑁄𑀓𑁄 𑀯𑀺𑀤𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀁 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽’’𑀢𑀺, 𑀇𑀤𑀸𑀦𑀺 𑀢𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀲𑀩𑁆𑀩𑀣𑀸 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽’’𑀢𑀺. 𑀢𑀢𑁆𑀣 ¶ 𑀲𑀩𑁆𑀩𑀣𑀸𑀢𑀺 𑀮𑀓𑁆𑀔𑀡𑀸𑀤𑀺𑀧𑁆𑀧𑀪𑁂𑀤𑀢𑁄 𑀲𑀗𑁆𑀔𑀸𑀭𑀮𑁄𑀓𑀲𑁆𑀲, 𑀆𑀲𑀬𑀸𑀤𑀺𑀧𑁆𑀧𑀪𑁂𑀤𑀢𑁄 𑀲𑀢𑁆𑀢𑀮𑁄𑀓𑀲𑁆𑀲, 𑀧𑀭𑀺𑀫𑀸𑀡𑀲𑀡𑁆𑀞𑀸𑀦𑀸𑀤𑀺𑀧𑁆𑀧𑀪𑁂𑀤𑀢𑁄 𑀑𑀓𑀸𑀲𑀮𑁄𑀓𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀺𑀤𑀺𑀢𑀮𑁄𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀦𑀼𑀢𑁆𑀢𑀭𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀧𑀦 𑀕𑀼𑀡𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀢𑀦𑁄𑀢𑀺 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀲𑀸𑀫𑀺𑀯𑀘𑀦𑀫𑁂𑀢𑀁, 𑀅𑀢𑁆𑀢𑀢𑁄𑀢𑀺 𑀅𑀢𑁆𑀣𑁄. 𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀯𑀺𑀲𑀺𑀝𑁆𑀞𑀢𑀭𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀭𑀕𑁆𑀕𑀳𑀡𑀜𑁆𑀘𑁂𑀢𑁆𑀣 ‘‘𑀅𑀦𑀼𑀢𑁆𑀢𑀭𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑀢𑀸𑀬 𑀓𑀢𑀁, 𑀦 𑀯𑀺𑀲𑀺𑀝𑁆𑀞𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀸𑀬. 𑀲𑀤𑁂𑀯𑀓𑁂 𑀳𑀺 𑀮𑁄𑀓𑁂 𑀲𑀤𑀺𑀲𑀓𑀧𑁆𑀧𑁄𑀧𑀺 𑀦𑀸𑀫 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀦𑀢𑁆𑀣𑀺, 𑀓𑀼𑀢𑁄 𑀲𑀤𑀺𑀲𑁄, 𑀯𑀺𑀲𑀺𑀝𑁆𑀞𑁂 𑀧𑀦 𑀓𑀸 𑀓𑀣𑀸. 𑀓𑀲𑁆𑀲𑀘𑀻𑀢𑀺 𑀓𑀲𑁆𑀲𑀘𑀺𑀧𑀺. 𑀅𑀪𑀺𑀪𑀯𑀢𑀻𑀢𑀺 𑀲𑀻𑀮𑀲𑀫𑁆𑀧𑀤𑀸𑀬 ¶ 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀳𑀺𑀭𑁄𑀢𑁆𑀢𑀧𑁆𑀧𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀧𑀜𑁆𑀜𑀸𑀦𑀜𑁆𑀘 𑀉𑀓𑁆𑀓𑀁𑀲𑀧𑁆𑀧𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀦 𑀅𑀜𑁆𑀜𑀲𑀸𑀥𑀸𑀭𑀡𑁄 𑀲𑀯𑀸𑀲𑀦𑀧𑀝𑀺𑀧𑀓𑁆𑀔𑀲𑁆𑀲 𑀧𑀳𑀻𑀦𑀢𑁆𑀢𑀸 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀻𑀮𑀕𑀼𑀡𑁄, 𑀢𑁂𑀦 𑀪𑀕𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀜𑁆𑀜𑀤𑀢𑁆𑀣𑀼 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀢𑀺, 𑀦 𑀲𑀬𑀁 𑀓𑁂𑀦𑀘𑀺 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀫𑀸𑀥𑀺𑀕𑀼𑀡𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀲𑀻𑀮𑀸𑀤𑀬𑁄 𑀘𑁂𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀯𑁂𑀤𑀺𑀢𑀩𑁆𑀩𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀦 𑀮𑁄𑀓𑀺𑀬𑀁 𑀓𑀸𑀫𑀸𑀯𑀘𑀭𑀫𑁂𑀯.

𑀬𑀤𑀺 𑀏𑀯𑀁 𑀓𑀣𑀁 𑀢𑁂𑀦 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀪𑀺𑀪𑀯𑀢𑀻𑀢𑀺? 𑀢𑀲𑁆𑀲𑀧𑀺 𑀆𑀦𑀼𑀪𑀸𑀯𑀢𑁄 𑀅𑀲𑀤𑀺𑀲𑀢𑁆𑀢𑀸. 𑀢𑀫𑁆𑀧𑀺 𑀳𑀺 𑀯𑀺𑀲𑀬𑀢𑁄 𑀧𑀯𑀢𑁆𑀢𑀺𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀉𑀢𑁆𑀢𑀭𑀺𑀢𑀭𑀫𑁂𑀯. 𑀢𑀜𑁆𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀢𑁆𑀣𑀼 𑀯𑀺𑀫𑀼𑀢𑁆𑀢𑀺𑀕𑀼𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀜𑁆𑀘 𑀅𑀢𑀓𑁆𑀓𑀸𑀯𑀘𑀭𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀼𑀝𑁆𑀞𑀼 𑀧𑀸𑀓𑀝𑀁 𑀯𑀺𑀪𑀽𑀢𑀢𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑀫𑁆𑀫𑀤𑁂𑀯 𑀘 𑀯𑀲𑀻𑀪𑀸𑀯𑀲𑁆𑀲 𑀧𑀸𑀧𑀓𑀢𑁆𑀢𑀸 𑀪𑀯𑀗𑁆𑀕𑀧𑀭𑀺𑀯𑀸𑀲𑀲𑁆𑀲 𑀘 𑀅𑀢𑀺𑀧𑀭𑀺𑀢𑁆𑀢𑀓𑀢𑁆𑀢𑀸 𑀮𑀳𑀼 𑀮𑀳𑀼 𑀧𑀯𑀢𑁆𑀢𑀢𑀻𑀢𑀺.

𑀏𑀯𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑀺𑀲𑀲𑁆𑀲𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀕𑀼𑀡𑁂𑀦𑀧𑀺 𑀅𑀲𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑀫𑁄𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑁂𑀦 𑀲𑀫𑁄 𑀲𑀤𑀺𑀲𑁄𑀢𑀺 𑀅𑀲𑀫𑁄. 𑀢𑀣𑀸 𑀅𑀲𑀫𑁂𑀳𑀺 𑀲𑀫𑁄 𑀅𑀲𑀫𑀲𑀫𑁄. 𑀅𑀲𑀫𑀸 𑀯𑀸 𑀲𑀫𑀸 𑀏𑀢𑀲𑁆𑀲𑀸𑀢𑀺 𑀅𑀲𑀫𑀲𑀫𑁄. 𑀲𑀻𑀮𑀸𑀤𑀺𑀕𑀼𑀡𑁂𑀦 𑀦𑀢𑁆𑀣𑀺 𑀏𑀢𑀲𑁆𑀲 ¶ 𑀧𑀝𑀺𑀫𑀸𑀢𑀺 𑀅𑀧𑁆𑀧𑀝𑀺𑀫𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀉𑀧𑀫𑀸𑀫𑀢𑁆𑀢𑀁 𑀧𑀝𑀺𑀫𑀸, 𑀲𑀤𑀺𑀲𑀽𑀧𑀫𑀸 𑀧𑀝𑀺𑀪𑀸𑀕𑁄, 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀞𑀺𑀢𑁄 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦 𑀔𑁄 𑀧𑀦𑀸𑀳𑀁 𑀪𑀺𑀓𑁆𑀔𑀯𑁂 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺𑀆𑀤𑀻𑀲𑀼 𑀫𑀫 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀁 𑀮𑁄𑀓𑀁 𑀧𑀲𑁆𑀲𑀦𑁆𑀢𑁄𑀧𑀺 𑀢𑀢𑁆𑀣 𑀲𑀤𑁂𑀯𑀓𑁂…𑀧𑁂… 𑀧𑀚𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀁 𑀲𑀫𑁆𑀧𑀦𑁆𑀦𑀢𑀭𑀲𑀻𑀮𑀁 𑀓𑀜𑁆𑀘𑀺𑀧𑀺 𑀧𑀼𑀕𑁆𑀕𑀮𑀁 𑀦 𑀔𑁄 𑀧𑀦 𑀧𑀲𑁆𑀲𑀸𑀫𑀺 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀻𑀢𑀺 𑀏𑀢𑁆𑀣 𑁋

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 ¶ 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑁋

𑀇𑀤𑀁 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄 𑀯𑀲𑀯𑀢𑁆𑀢𑀻, 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩; 𑀤𑀻. 𑀦𑀺. 𑁩.𑁧𑁮𑁮) 𑁋

𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀆𑀤𑀺𑀓𑀸 𑀕𑀸𑀣𑀸𑀬𑁄𑀢𑀺 𑁋

‘‘𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄. (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧);

‘‘𑀤𑀦𑁆𑀢𑁄 𑀤𑀫𑀬𑀢𑀁 𑀲𑁂𑀝𑁆𑀞𑁄, 𑀲𑀦𑁆𑀢𑁄 𑀲𑀫𑀬𑀢𑀁 𑀇𑀲𑀺;

𑀫𑀼𑀢𑁆𑀢𑁄 𑀫𑁄𑀘𑀬𑀢𑀁 𑀅𑀕𑁆𑀕𑁄, 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄. (𑀇𑀢𑀺𑀯𑀼. 𑁧𑁧𑁨)

‘‘𑀦𑀬𑀺𑀫𑀲𑁆𑀫𑀺𑀁 ¶ 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦,

𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀲𑀤𑀺𑀲𑁄 𑀘 𑀯𑀺𑀚𑁆𑀚𑀢𑀺;

𑀆𑀳𑀼𑀦𑁂𑀬𑁆𑀬𑀸𑀦𑀁 𑀧𑀭𑀫𑀸𑀳𑀼𑀢𑀺𑀁 𑀕𑀢𑁄,

𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑁂𑀲𑀺𑀦’’𑀦𑁆𑀢𑀺. (𑀯𑀺. 𑀯. 𑁧𑁦𑁪𑁭; 𑀓𑀣𑀸. 𑁭𑁯𑁯) 𑁋

𑀏𑀯𑀫𑀸𑀤𑀺𑀓𑀸 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀻𑀢𑀺𑀆𑀤𑀻𑀲𑀼 𑀤𑀫𑀺𑀢𑀩𑁆𑀩𑀸𑀢𑀺 𑀤𑀫𑁆𑀫𑀸, 𑀤𑀫𑀺𑀢𑀼𑀁 𑀅𑀭𑀳𑀭𑀽𑀧𑀸. 𑀧𑀼𑀭𑀺𑀲𑀸 𑀘 𑀢𑁂 𑀤𑀫𑁆𑀫𑀸 𑀘𑀸𑀢𑀺 𑀧𑀼𑀭𑀺𑀲𑀤𑀫𑁆𑀫𑀸. 𑀯𑀺𑀲𑁂𑀲𑀦𑀲𑁆𑀲 𑀘𑁂𑀢𑁆𑀣 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀤𑀫𑁆𑀫𑀧𑀼𑀭𑀺𑀲𑀸𑀢𑀺 𑀅𑀢𑁆𑀣𑁄. ‘‘𑀲𑀢𑀺𑀧𑀺 𑀫𑀸𑀢𑀼𑀕𑀸𑀫𑀲𑁆𑀲𑀧𑀺 𑀤𑀫𑁆𑀫𑀪𑀸𑀯𑁂 𑀧𑀼𑀭𑀺𑀲𑀕𑁆𑀕𑀳𑀡𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀲𑀸𑀭𑁂𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀫𑁂𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑀫𑁂𑀢𑀻𑀢𑀺 𑀲𑀫𑁂𑀢𑀺, 𑀓𑀸𑀬𑀲𑀫𑀸𑀤𑀻𑀳𑀺 𑀬𑁄𑀚𑁂𑀢𑀻𑀢𑀺 ¶ 𑀅𑀢𑁆𑀣𑁄. 𑀢𑀁 𑀧𑀦 𑀓𑀸𑀬𑀲𑀫𑀸𑀤𑀻𑀳𑀺 𑀬𑁄𑀚𑀦𑀁 𑀬𑀣𑀸𑀭𑀳𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀅𑀤𑀦𑁆𑀢𑀸𑀢𑀺 𑀇𑀤𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑀫𑀢𑀁 𑀅𑀦𑀼𑀧𑀕𑀢𑀸 𑀧𑀼𑀭𑀺𑀲𑀤𑀫𑁆𑀫𑀸𑀢𑀺 𑀯𑀼𑀢𑁆𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑁂 𑀧𑀦 𑀯𑀺𑀧𑁆𑀧𑀓𑀢𑀤𑀫𑁆𑀫𑀪𑀸𑀯𑀸 𑀲𑀩𑁆𑀩𑀣𑀸 𑀤𑀫𑁂𑀢𑀩𑁆𑀩𑀢𑀁 𑀦𑀸𑀢𑀺𑀯𑀢𑁆𑀢𑀸, 𑀢𑁂𑀧𑀺 𑀧𑀼𑀭𑀺𑀲𑀤𑀫𑁆𑀫𑀸 𑀏𑀯, 𑀬𑀢𑁄 𑀢𑁂 𑀲𑀢𑁆𑀣𑀸 𑀤𑀫𑁂𑀢𑀺. 𑀪𑀕𑀯𑀸 𑀳𑀺 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀞𑀫𑀚𑁆𑀛𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀤𑀼𑀢𑀺𑀬𑀚𑁆𑀛𑀸𑀦𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀆𑀘𑀺𑀓𑁆𑀔𑀦𑁆𑀢𑁄 𑀏𑀓𑀤𑁂𑀲𑁂𑀦 𑀤𑀦𑁆𑀢𑁂𑀧𑀺 𑀲𑀫𑁂𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁯) ‘‘𑀅𑀧𑀺 𑀘 𑀲𑁄 𑀪𑀕𑀯𑀸 𑀯𑀺𑀲𑀼𑀤𑁆𑀥𑀲𑀻𑀮𑀸𑀤𑀻𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀘 𑀉𑀢𑁆𑀢𑀭𑀺𑀫𑀕𑁆𑀕𑀧𑁆𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀤𑀦𑁆𑀢𑁂𑀧𑀺 𑀤𑀫𑁂𑀢𑀺𑀬𑁂𑀯𑀸’’𑀢𑀺. 𑀅𑀣 𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀤𑀦𑁆𑀢𑀸 𑀏𑀓𑀤𑁂𑀲𑁂𑀦 𑀤𑀦𑁆𑀢𑀸 𑀘 𑀇𑀥 𑀅𑀤𑀦𑁆𑀢𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀫𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 𑀤𑀫𑀦𑀸𑀭𑀳𑀸.

𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀢𑀺𑀆𑀤𑀻𑀲𑀼 𑀉𑀤𑁆𑀥𑀁 𑀅𑀦𑀼𑀕𑁆𑀕𑀦𑁆𑀢𑁆𑀯𑀸 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸 𑀕𑀢𑀸 𑀯𑀟𑁆𑀠𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸, 𑀤𑁂𑀯𑀫𑀦𑀼𑀲𑁆𑀲𑀸𑀤𑀬𑁄 𑀯𑀺𑀬 𑀉𑀤𑁆𑀥𑀁 𑀤𑀻𑀖𑀁 𑀅𑀳𑀼𑀢𑁆𑀯𑀸 𑀢𑀺𑀭𑀺𑀬𑀁 𑀤𑀻𑀖𑀸𑀢𑀺 𑀅𑀢𑁆𑀣𑁄. 𑀢𑀺𑀭𑀘𑁆𑀙𑀸𑀦𑀸𑀬𑁂𑀯 𑀧𑀼𑀭𑀺𑀲𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸. 𑀫𑀦𑀲𑁆𑀲 ¶ 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀸 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀸. 𑀓𑁂 𑀧𑀦 𑀢𑁂? 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧).

𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀫𑀳𑀸𑀲𑀸𑀯𑀓𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀳𑀺 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀽𑀢𑀺 𑀏𑀓𑁂. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀮𑁄𑀪𑀸𑀤𑀻𑀳𑀺 𑀘 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀦𑁆𑀦𑀸, 𑀢𑁂 𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀲𑀢𑁆𑀢𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 𑀫𑀳𑀸𑀲𑀫𑁆𑀫𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀧𑀭𑀫𑁆𑀧𑀭𑀸𑀬 ¶ 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀢𑀲𑁆𑀲 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 𑀫𑀦𑀼𑀲𑁆𑀲𑀸 𑀫𑀸𑀦𑀼𑀲𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀏𑀯 𑀳𑀺 𑀢𑁂 𑀫𑀸𑀡𑀯𑀸 ‘‘𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀘 𑀢𑁂 𑀧𑀼𑀭𑀺𑀲𑀸 𑀘𑀸𑀢𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀸.

𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀢𑀺 𑀏𑀢𑁆𑀣 𑀦 𑀫𑀦𑀼𑀲𑁆𑀲𑀸𑀢𑀺 𑀅𑀫𑀦𑀼𑀲𑁆𑀲𑀸. 𑀢𑀁𑀲𑀤𑀺𑀲𑀢𑀸 𑀏𑀢𑁆𑀣 𑀚𑁄𑀢𑀻𑀬𑀢𑀺. 𑀢𑁂𑀦 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺 𑀬𑀓𑁆𑀔𑀸𑀤𑀬𑁄 𑀅𑀫𑀦𑀼𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀦 𑀬𑁂 𑀓𑁂𑀘𑀺 𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂, 𑀢𑀣𑀸 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁. 𑀬𑀓𑁆𑀔𑀸𑀤𑀬𑁄 𑀏𑀯 𑀘 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀧𑀮𑀸𑀮𑁄 𑀳𑀺𑀫𑀯𑀦𑁆𑀢𑀯𑀸𑀲𑀻, 𑀘𑀽𑀴𑁄𑀤𑀭𑀫𑀳𑁄𑀤𑀭𑀸 𑀦𑀸𑀕𑀤𑀻𑀧𑀯𑀸𑀲𑀺𑀦𑁄, 𑀅𑀕𑁆𑀕𑀺𑀲𑀺𑀔𑀥𑀽𑀫𑀲𑀺𑀔𑀸 𑀲𑀻𑀳𑀴𑀤𑀻𑀧𑀯𑀸𑀲𑀺𑀦𑁄 𑀦𑀺𑀩𑁆𑀩𑀺𑀲𑀸 𑀓𑀢𑀸 𑀤𑁄𑀲𑀯𑀺𑀲𑀲𑁆𑀲 𑀯𑀺𑀦𑁄𑀤𑀦𑁂𑀦. 𑀢𑁂𑀦𑀸𑀳 ‘‘𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀺𑀢𑀸’’𑀢𑀺. 𑀓𑀽𑀝𑀤𑀦𑁆𑀢𑀸𑀤𑀬𑁄𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀖𑁄𑀭𑀫𑀼𑀔𑀉𑀧𑀸𑀮𑀺𑀕𑀳𑀧𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀓𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀚𑀓𑀮𑀸𑀧𑀬𑀓𑁆𑀔𑀩𑀓𑀩𑁆𑀭𑀳𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀲𑀁 𑀧𑀦 𑀤𑀫𑀦𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀅𑀢𑀺𑀧𑁆𑀧𑀧𑀜𑁆𑀘𑀪𑀸𑀯𑀢𑁄 𑀇𑀥 𑀦 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀓𑁂𑀲𑀻𑀲𑀼𑀢𑁆𑀢𑀁 ‘‘𑀯𑀺𑀦𑀻𑀢𑀸 𑀯𑀺𑀘𑀺𑀢𑁆𑀭𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁 𑀬𑀣𑀸𑀭𑀳𑀁 𑀲𑀡𑁆𑀳𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀯𑀺𑀦𑀬𑀦𑀲𑁆𑀲 𑀤𑀻𑀧𑀦𑀢𑁄.

𑀅𑀢𑁆𑀣𑀧𑀤𑀦𑁆𑀢𑀺 𑀅𑀢𑁆𑀣𑀸𑀪𑀺𑀩𑁆𑀬𑀜𑁆𑀚𑀦𑀓𑀁 𑀧𑀤𑀁, 𑀯𑀸𑀓𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀸𑀓𑁆𑀬𑁂𑀦 𑀳𑀺 𑀅𑀢𑁆𑀣𑀸𑀪𑀺𑀩𑁆𑀬𑀢𑁆𑀢𑀺, 𑀦 𑀦𑀸𑀫𑀸𑀤𑀺𑀧𑀤𑀫𑀢𑁆𑀢𑁂𑀦, 𑀏𑀓𑀧𑀤𑀪𑀸𑀯𑁂𑀦 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀢𑁆𑀣𑀼 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀅𑀝𑁆𑀞 𑀤𑀺𑀲𑀸𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀸𑀧𑀺 𑀅𑀲𑀁𑀓𑀺𑀡𑁆𑀡𑀪𑀸𑀯𑁂𑀦 𑀤𑀺𑀲𑁆𑀲𑀦𑁆𑀢𑀺 𑀅𑀧𑀤𑀺𑀲𑁆𑀲𑀦𑁆𑀢𑀺, 𑀤𑀺𑀲𑀸 𑀯𑀺𑀬𑀸𑀢𑀺 𑀯𑀸 𑀤𑀺𑀲𑀸. 𑀅𑀲𑀚𑁆𑀚𑀫𑀸𑀦𑀸𑀢𑀺 𑀦 𑀲𑀚𑁆𑀚𑀫𑀸𑀦𑀸 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀦𑀺𑀲𑁆𑀲𑀗𑁆𑀕𑀘𑀸𑀭𑀸. 𑀥𑀸𑀯𑀦𑁆𑀢𑀻𑀢𑀺 𑀚𑀯𑀦𑀯𑀼𑀢𑁆𑀢𑀺𑀬𑁄𑀕𑀢𑁄 𑀥𑀸𑀯𑀦𑁆𑀢𑀺. 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀻𑀢𑀺 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀧𑀭𑀺𑀯𑀢𑁆𑀢𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀲𑀢𑁆𑀣𑀸𑀭𑀸 𑀧𑀦 𑀤𑀫𑀺𑀢𑀸 𑀧𑀼𑀭𑀺𑀲𑀤𑀫𑁆𑀫𑀸 𑀏𑀓𑀺𑀭𑀺𑀬𑀸𑀧𑀣𑁂𑀦𑁂𑀯 𑀅𑀝𑁆𑀞 𑀤𑀺𑀲𑀸 𑀥𑀸𑀯𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀓𑀧𑀮𑁆𑀮𑀗𑁆𑀓𑁂𑀦𑁂𑀯 𑀦𑀺𑀲𑀺𑀦𑁆𑀦𑀸’’𑀢𑀺. 𑀅𑀝𑁆𑀞 𑀤𑀺𑀲𑀸𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀮𑁄𑀓𑀺𑀬𑁂𑀳𑀺 𑀅𑀕𑀢𑀧𑀼𑀩𑁆𑀩𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑀺𑀲𑀁 𑀅𑀫𑀢𑀤𑀺𑀲𑀜𑁆𑀘 𑀧𑀓𑁆𑀔𑀦𑁆𑀤𑀦𑀢𑁄.

𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀻𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁄, 𑀇𑀥𑀮𑁄𑀓𑀢𑁆𑀣𑁄. 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀫𑀸 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀦𑀺𑀩𑁆𑀩𑀸𑀦𑀁. 𑀢𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺. 𑀬𑀣𑀸𑀭𑀳𑀦𑁆𑀢𑀺 𑀬𑀣𑀸𑀦𑀼𑀭𑀽𑀧𑀁, 𑀢𑁂𑀲𑀼 𑀢𑁂𑀲𑀼 𑀅𑀢𑁆𑀣𑁂𑀲𑀼 𑀬𑁄 𑀬𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀅𑀭𑀳𑀢𑀺, 𑀢𑀤𑀦𑀼𑀭𑀽𑀧𑀁. 𑀅𑀦𑀼𑀲𑀸𑀲𑀢𑀻𑀢𑀺 𑀯𑀺𑀦𑁂𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 ¶ 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑁂𑀦 𑀯𑀡𑀺𑀚𑁆𑀚𑀸𑀬 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑁄 𑀚𑀦𑀲𑀫𑀽𑀳𑁄. 𑀳𑀺𑀢𑀼𑀧𑀤𑁂𑀲𑀸𑀤𑀺𑀯𑀲𑁂𑀦 𑀧𑀭𑀺𑀧𑀸𑀮𑁂𑀢𑀩𑁆𑀩𑁄 𑀲𑀸𑀲𑀺𑀢𑀩𑁆𑀩𑁄 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀢𑁆𑀣𑀸 𑀲𑀢𑁆𑀣𑀯𑀸𑀳𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑁄 𑀯𑀺𑀬 𑀪𑀕𑀯𑀸𑀢𑀺 𑀆𑀳 ‘‘𑀲𑀢𑁆𑀣𑀸 𑀯𑀺𑀬𑀸𑀢𑀺 𑀲𑀢𑁆𑀣𑀸, 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄’’𑀢𑀺.

𑀇𑀤𑀸𑀦𑀺 ¶ 𑀢𑀫𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀸𑀴𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀲𑀢𑁆𑀣𑀯𑀸𑀳𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀣𑁂𑀢𑀺 𑀲𑀢𑁆𑀣𑀺𑀓𑁂 𑀚𑀦𑁂. 𑀓𑀁 𑀉𑀤𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑁄 𑀅𑀭𑀜𑁆𑀜𑀧𑁆𑀧𑀤𑁂𑀲𑁄. 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀇𑀢𑀭𑁄𑀧𑀺 𑀅𑀭𑀜𑁆𑀜𑀧𑁆𑀧𑀤𑁂𑀲𑁄 𑀢𑀣𑀸 𑀯𑀼𑀘𑁆𑀘𑀢𑀺. 𑀘𑁄𑀭𑀓𑀦𑁆𑀢𑀸𑀭𑀦𑁆𑀢𑀺 𑀘𑁄𑀭𑁂𑀳𑀺 𑀅𑀥𑀺𑀝𑁆𑀞𑀺𑀢𑀓𑀦𑁆𑀢𑀸𑀭𑀁, 𑀢𑀣𑀸 𑀯𑀸𑀴𑀓𑀦𑁆𑀢𑀸𑀭𑀁. 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀦𑁆𑀢𑀺 𑀤𑀼𑀮𑁆𑀮𑀪𑀪𑀺𑀓𑁆𑀔𑀁 𑀓𑀦𑁆𑀢𑀸𑀭𑀁. 𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀉𑀢𑁆𑀢𑀸𑀭𑁂𑀢𑀻𑀢𑀺𑀆𑀤𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀉𑀢𑁆𑀢𑀸𑀭𑁂𑀢𑀻𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀉𑀧𑀦𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀦𑀺𑀢𑁆𑀢𑀸𑀭𑁂𑀢𑀻𑀢𑀺 𑀅𑀔𑁂𑀫𑀦𑁆𑀢𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀸𑀫𑁂𑀦𑁆𑀢𑁄 𑀢𑀸𑀭𑁂𑀢𑀺. 𑀧𑀢𑀸𑀭𑁂𑀢𑀻𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀭𑁂𑀢𑀺, 𑀳𑀢𑁆𑀣𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀭𑁂𑀢𑀺 𑀯𑀺𑀬 𑀢𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁆𑀧𑁂𑀢𑀁 𑀢𑀸𑀭𑀡𑀼𑀢𑁆𑀢𑀸𑀭𑀡𑀸𑀤𑀺 𑀔𑁂𑀫𑀝𑁆𑀞𑀸𑀦𑁂 𑀞𑀧𑀦𑀫𑁂𑀯𑀸𑀢𑀺 𑀆𑀳 ‘‘𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀻’’𑀢𑀺. 𑀲𑀢𑁆𑀢𑁂𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂. 𑀫𑀳𑀸𑀕𑀳𑀦𑀢𑀸𑀬 𑀫𑀳𑀸𑀦𑀢𑁆𑀣𑀢𑀸𑀬 𑀤𑀼𑀦𑁆𑀦𑀺𑀢𑁆𑀣𑀭𑀢𑀸𑀬 𑀘 𑀚𑀸𑀢𑀺𑀬𑁂𑀯 𑀓𑀦𑁆𑀢𑀸𑀭𑁄 𑀚𑀸𑀢𑀺𑀓𑀦𑁆𑀢𑀸𑀭𑁄, 𑀢𑀁 𑀚𑀸𑀢𑀺𑀓𑀦𑁆𑀢𑀸𑀭𑀁.

𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑀲𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀤𑁂𑀯𑀫𑀦𑀼𑀲𑁆𑀲𑀸 𑀏𑀯 𑀳𑀺 𑀉𑀓𑁆𑀓𑀝𑁆𑀞𑀲𑀢𑁆𑀢𑀸, 𑀦 𑀢𑀺𑀭𑀘𑁆𑀙𑀸𑀦𑀸𑀤𑀬𑁄. 𑀏𑀢𑀦𑁆𑀢𑀺 ‘‘𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀏𑀢𑀁 𑀯𑀘𑀦𑀁. 𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀲𑁆𑀲 𑀬𑁄𑀕𑁆𑀬𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦. 𑀪𑀕𑀯𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀸𑀫𑀺𑀯𑀘𑀦𑀁 𑀬𑀣𑀸 ‘‘𑀉𑀧𑀚𑁆𑀛𑀸𑀬𑀢𑁄 𑀅𑀚𑁆𑀛𑁂𑀢𑀻’’𑀢𑀺. 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀆𑀤𑀺𑀓𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀲𑁆𑀲 𑀩𑀮𑀯𑀓𑀸𑀭𑀡𑀁. 𑀕𑀕𑁆𑀕𑀭𑀸𑀬𑀸𑀢𑀺 𑀕𑀕𑁆𑀕𑀭𑀸𑀬 𑀦𑀸𑀫 𑀭𑀜𑁆𑀜𑁄 𑀤𑁂𑀯𑀺𑀬𑀸, 𑀢𑀸𑀬 𑀯𑀸 𑀓𑀸𑀭𑀺𑀢𑀢𑁆𑀢𑀸 ‘‘𑀕𑀕𑁆𑀕𑀭𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀬. 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀥𑀫𑁆𑀫𑀲𑀜𑁆𑀜𑀸𑀬 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺, 𑀕𑀡𑁆𑀳𑀦𑁆𑀢𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀧𑀚𑁆𑀚𑀺. 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀝𑁆𑀞𑀸𑀲𑀻𑀢𑀺 𑀢𑀲𑁆𑀲 𑀲𑀻𑀲𑁂 𑀤𑀡𑁆𑀟𑀲𑁆𑀲 𑀞𑀧𑀺𑀢𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀢𑀢𑁆𑀣 𑀤𑀡𑁆𑀟𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀡𑁆𑀟𑀽𑀓𑁄𑀧𑀺 𑀤𑀡𑁆𑀟𑁂 𑀞𑀧𑀺𑀢𑁂𑀧𑀺 𑀉𑀧𑁆𑀧𑀻𑀴𑀺𑀢𑁂𑀧𑀺 𑀥𑀫𑁆𑀫𑀕𑀢𑁂𑀦 𑀧𑀲𑀸𑀤𑁂𑀦 𑀯𑀺𑀲𑁆𑀲𑀭𑀫𑀓𑀭𑁄𑀦𑁆𑀢𑁄𑀯 𑀓𑀸𑀮𑀫𑀓𑀸𑀲𑀺. 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀅𑀬𑀁 𑀥𑀫𑁆𑀫𑀢𑀸, 𑀬𑀸 ‘‘𑀓𑀼𑀢𑁄𑀳𑀁 𑀇𑀥 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀫𑀓𑀸𑀲𑀺’’𑀦𑁆𑀢𑀺 𑀆𑀯𑀚𑁆𑀚𑀦𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀪𑀯𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀆𑀳 ‘‘𑀅𑀭𑁂 𑀅𑀳𑀫𑁆𑀧𑀺 𑀦𑀸𑀫 𑀇𑀥 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀻𑀢𑀺 𑀓𑀢𑀜𑁆𑀜𑀼𑀢𑀸𑀲𑀁𑀯𑀟𑁆𑀠𑀺𑀢𑁂𑀦 𑀧𑁂𑀫𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀯𑀦𑁆𑀤𑀺.

𑀚𑀸𑀦𑀦𑁆𑀢𑁄𑀯 ¶ ¶ 𑀧𑀼𑀘𑁆𑀙𑀻𑀢𑀺 𑀫𑀳𑀸𑀚𑀦𑀲𑁆𑀲 𑀓𑀫𑁆𑀫𑀨𑀮𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀓𑀸𑀫𑁄 𑀪𑀕𑀯𑀸 ‘‘𑀓𑁄 𑀫𑁂 𑀯𑀦𑁆𑀤𑀢𑀻’’𑀢𑀺 𑀕𑀸𑀣𑀸𑀬 𑀧𑀼𑀘𑁆𑀙𑀺. 𑀢𑀢𑁆𑀣 (𑀯𑀺. 𑀯. 𑀅𑀝𑁆𑀞. 𑁮𑁫𑁭) 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄, 𑀓𑀢𑀫𑁄𑀢𑀺 𑀅𑀢𑁆𑀣𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀬𑀲𑁂𑀦 𑀘 𑀧𑀭𑀺𑀯𑀸𑀭𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀸𑀫𑀦𑀻𑀬𑁂𑀦 𑀲𑀼𑀦𑁆𑀤𑀭𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀲𑀩𑁆𑀩𑀸 𑀤𑀲𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄, 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁄 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀫𑀡𑁆𑀟𑀽𑀓𑁄𑀳𑀁 𑀧𑀼𑀭𑁂 𑀆𑀲𑀺’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀼𑀭𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. 𑀉𑀤𑀓𑁂𑀢𑀺 𑀇𑀤𑀁 𑀢𑀤𑀸 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀁. 𑀉𑀤𑀓𑁂 𑀫𑀡𑁆𑀟𑀽𑀓𑁄𑀢𑀺 𑀢𑁂𑀦 𑀉𑀤𑁆𑀥𑀼𑀫𑀸𑀬𑀺𑀓𑀸𑀤𑀺𑀓𑀲𑁆𑀲 𑀣𑀮𑁂 𑀫𑀡𑁆𑀟𑀽𑀓𑀲𑁆𑀲 𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑀼𑀦𑁆𑀦𑀁 𑀖𑀸𑀲𑁂𑀲𑀦𑀝𑁆𑀞𑀸𑀦𑀁. 𑀇𑀥 𑀧𑀦 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄, 𑀯𑀸𑀭𑀺 𑀉𑀤𑀓𑀁 𑀕𑁄𑀘𑀭𑁄 𑀏𑀢𑀲𑁆𑀲𑀸𑀢𑀺 𑀯𑀸𑀭𑀺𑀕𑁄𑀘𑀭𑁄. 𑀉𑀤𑀓𑀘𑀸𑀭𑀻𑀧𑀺 𑀳𑀺 𑀓𑁄𑀘𑀺 𑀓𑀘𑁆𑀙𑀧𑀸𑀤𑀺 𑀅𑀯𑀸𑀭𑀺𑀕𑁄𑀘𑀭𑁄𑀧𑀺 𑀳𑁄𑀢𑀻𑀢𑀺 ‘‘𑀯𑀸𑀭𑀺𑀕𑁄𑀘𑀭𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀤𑁂𑀲𑁂𑀦𑁆𑀢𑀲𑁆𑀲 𑀢𑀯 𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀲𑀭𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀲𑀼𑀡𑀦𑁆𑀢𑀲𑁆𑀲. 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀯𑀥𑀻 𑀯𑀘𑁆𑀙𑀧𑀸𑀮𑀓𑁄𑀢𑀺 𑀯𑀘𑁆𑀙𑁂 𑀭𑀓𑁆𑀔𑀦𑁆𑀢𑁄 𑀕𑁄𑀧𑀸𑀮𑀓𑀤𑀸𑀭𑀓𑁄 𑀫𑀫 𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸 𑀤𑀡𑁆𑀟𑀫𑁄𑀮𑀼𑀩𑁆𑀪 𑀢𑀺𑀝𑁆𑀞𑀦𑁆𑀢𑁄 𑀫𑀫 𑀲𑀻𑀲𑁂 𑀤𑀡𑁆𑀟𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀫𑀁 𑀫𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑀲𑀺𑀢𑀁 𑀓𑀢𑁆𑀯𑀸𑀢𑀺 ‘‘𑀢𑀣𑀸 𑀧𑀭𑀺𑀢𑁆𑀢𑀢𑀭𑁂𑀦𑀧𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀏𑀯𑀁 𑀅𑀢𑀺𑀯𑀺𑀬 𑀉𑀴𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀻’’𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀸𑀲𑀼𑀭𑀢𑀭𑀥𑀯𑀴𑀯𑀺𑀧𑁆𑀨𑀼𑀭𑀦𑁆𑀢𑀤𑀲𑀦𑀔𑀓𑀺𑀭𑀡𑀸𑀯𑀴𑀻𑀳𑀺 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀁 𑀧𑀤𑁂𑀲𑀁 𑀑𑀪𑀸𑀲𑁂𑀦𑁆𑀢𑁄 𑀲𑀺𑀢𑀁 𑀓𑀢𑁆𑀯𑀸. 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀲𑁂𑀦 𑀳𑀺 𑀲𑁄 𑁋

‘‘𑀫𑀼𑀳𑀼𑀢𑁆𑀢𑀁 𑀘𑀺𑀢𑁆𑀢𑀧𑀲𑀸𑀤𑀲𑁆𑀲, 𑀇𑀤𑁆𑀥𑀺𑀁 𑀧𑀲𑁆𑀲 𑀬𑀲𑀜𑁆𑀘 𑀫𑁂;

𑀆𑀦𑀼𑀪𑀸𑀯𑀜𑁆𑀘 𑀫𑁂 𑀧𑀲𑁆𑀲, 𑀯𑀡𑁆𑀡𑀁 𑀧𑀲𑁆𑀲 𑀚𑀼𑀢𑀺𑀜𑁆𑀘 𑀫𑁂.

‘‘𑀬𑁂 ¶ 𑀘 𑀢𑁂 𑀤𑀻𑀖𑀫𑀤𑁆𑀥𑀸𑀦𑀁, 𑀥𑀫𑁆𑀫𑀁 𑀅𑀲𑁆𑀲𑁄𑀲𑀼𑀁 𑀕𑁄𑀢𑀫;

𑀧𑀢𑁆𑀢𑀸 𑀢𑁂 𑀅𑀘𑀮𑀝𑁆𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’𑀢𑀺. (𑀯𑀺. 𑀯. 𑁮𑁫𑁯-𑁮𑁬𑁦) 𑁋

𑀇𑀫𑀸 ¶ 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀬𑀁 𑀧𑀦 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀯𑀘𑀦𑀁, 𑀢𑀣𑀸 𑀓𑀺𑀜𑁆𑀘𑀻𑀢𑀺. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀻𑀢𑀺 𑀜𑁂𑀬𑁆𑀬𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀓𑀢𑀁 𑀳𑁄𑀢𑀺. 𑀧𑀦𑀸𑀢𑀺 𑀯𑀸 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄 𑀦𑀺𑀧𑀸𑀢𑁄. 𑀢𑁂𑀦 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀢𑁆𑀣𑀼 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁄 𑀯𑀼𑀢𑁆𑀢𑁄. 𑀩𑀼𑀤𑁆𑀥𑁄𑀢𑀺 𑀧𑀦 𑀇𑀫𑀺𑀦𑀸 𑀢𑀤𑀜𑁆𑀜𑀲𑁆𑀲𑀧𑀺 𑀜𑁂𑀬𑁆𑀬𑀲𑁆𑀲 𑀅𑀯𑀩𑁄𑀥𑁄. 𑀧𑀼𑀭𑀺𑀫𑁂𑀦 𑀯𑀸 𑀲𑀢𑁆𑀣𑀼 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁄, 𑀧𑀘𑁆𑀙𑀺𑀫𑁂𑀦 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑁄. 𑀧𑀻-𑀢𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀲𑁂𑀲𑁄 𑀚𑁄𑀢𑀻𑀬𑀢𑀺. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀯𑀲𑁂𑀦𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑁄𑀓𑁆𑀔𑁄, 𑀅𑀕𑁆𑀕𑀫𑀕𑁆𑀕𑁄, 𑀢𑀲𑁆𑀲 𑀅𑀦𑁆𑀢𑁄, 𑀅𑀕𑁆𑀕𑀨𑀮𑀁, 𑀢𑀲𑁆𑀫𑀺𑀁 𑀮𑀤𑁆𑀥𑁂 𑀮𑀤𑁆𑀥𑀩𑁆𑀩𑀢𑁄 𑀢𑀢𑁆𑀣 𑀪𑀯𑀁 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁, 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀜𑀸𑀡𑀁.

𑀏𑀯𑀁 𑀧𑀯𑀢𑁆𑀢𑁄𑀢𑀺 𑀏𑀢𑁆𑀣 𑁋

‘‘𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀦𑀺. 𑁧𑁯𑁨) 𑁋

𑀅𑀬𑀁 ¶ 𑀦𑀺𑀤𑁆𑀤𑁂𑀲𑀧𑀸𑀴𑀺𑀦𑀬𑁄. 𑀬𑀲𑁆𑀫𑀸 𑀘𑁂𑀢𑁆𑀣 𑀢𑀲𑁆𑀲𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 (𑀧𑀝𑀺. 𑀫. 𑁧.𑁧𑁬𑁨) 𑀪𑁂𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀏𑀓𑁂𑀦𑀧𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁄 𑀯𑀸’’𑀢𑀺 𑀅𑀦𑀺𑀬𑀫𑀢𑁆𑀣𑁄 𑀯𑀸𑀲𑀤𑁆𑀤𑁄 𑀯𑀼𑀢𑁆𑀢𑁄.

𑀢𑀢𑁆𑀣 (𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁨; 𑀫𑀳𑀸𑀦𑀺. 𑀅𑀝𑁆𑀞. 𑁧𑁯𑁨) 𑀬𑀣𑀸 𑀮𑁄𑀓𑁂 𑀅𑀯𑀕𑀦𑁆𑀢𑀸 ‘‘𑀅𑀯𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦. 𑀬𑀣𑀸 𑀧𑀡𑁆𑀡𑀲𑁄𑀲𑀸 𑀯𑀸𑀢𑀸 ‘‘𑀧𑀡𑁆𑀡𑀲𑀼𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦. 𑀳𑁂𑀢𑀼𑀅𑀢𑁆𑀣𑁄 𑀘𑁂𑀢𑁆𑀣 𑀅𑀦𑁆𑀢𑁄𑀦𑀻𑀢𑁄 ¶ . 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑀼𑀚𑁆𑀛𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀥𑀫𑁆𑀫𑀩𑁄𑀥𑀦𑀲𑀫𑀢𑁆𑀣𑀸𑀬 𑀩𑀼𑀤𑁆𑀥𑀺𑀬𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄𑀢𑀺 𑀅𑀜𑁆𑀜𑁂𑀦 𑀅𑀩𑁄𑀥𑀺𑀢𑁄 𑀲𑀬𑀫𑁂𑀯 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄𑀢𑀺 𑀦𑀸𑀦𑀸𑀕𑀼𑀡𑀯𑀺𑀲𑀯𑀦𑀢𑁄 𑀧𑀤𑀼𑀫𑀫𑀺𑀯 𑀯𑀺𑀓𑀲𑀦𑀝𑁆𑀞𑁂𑀦 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄𑀢𑀺 𑀏𑀯𑀫𑀸𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀘𑀺𑀢𑁆𑀢𑀲𑀗𑁆𑀓𑁄𑀘𑀓𑀭𑀥𑀫𑁆𑀫𑀧𑁆𑀧𑀳𑀸𑀦𑁂𑀦 𑀦𑀺𑀤𑁆𑀤𑀸𑀓𑁆𑀔𑀬𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀬 𑀲𑀩𑁆𑀩𑀓𑀺𑀮𑁂𑀲𑀦𑀺𑀤𑁆𑀤𑀸𑀓𑁆𑀔𑀬𑀯𑀺𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀗𑁆𑀔𑀸 𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀲𑀗𑁆𑀔𑀸𑀢𑁂𑀦𑀸𑀢𑀺 𑀯𑀘𑀦𑀲𑁆𑀲 𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀮𑁂𑀧𑀤𑀺𑀝𑁆𑀞𑀺𑀮𑁂𑀧𑀸𑀪𑀸𑀯𑁂𑀦 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦. 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀏𑀓𑀦𑁆𑀢𑀯𑀻𑀢𑀭𑀸𑀕𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀸𑀯𑀲𑁂𑀲𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀓𑀺𑀮𑁂𑀲𑁄. 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄𑀢𑀺 𑀕𑀫𑀦𑀢𑁆𑀣𑀸𑀦𑀁 𑀩𑀼𑀤𑁆𑀥𑀺𑀅𑀢𑁆𑀣𑀢𑀸 𑀯𑀺𑀬 𑀩𑀼𑀤𑁆𑀥𑀺𑀅𑀢𑁆𑀣𑀸𑀦𑀫𑁆𑀧𑀺 𑀕𑀫𑀦𑀢𑁆𑀣𑀢𑀸 𑀮𑀩𑁆𑀪𑀢𑀻𑀢𑀺 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄𑀢𑀺 𑀦 𑀧𑀭𑁂𑀳𑀺 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄, 𑀅𑀣 𑀔𑁄 𑀲𑀬𑀫𑁂𑀯 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀺 𑀩𑀼𑀤𑁆𑀥𑀁 𑀩𑁄𑀥𑁄𑀢𑀺 𑀅𑀦𑀢𑁆𑀣𑀦𑁆𑀢𑀭𑀁. 𑀢𑀢𑁆𑀣 𑀬𑀣𑀸 𑀭𑀢𑁆𑀢𑀕𑀼𑀡𑀬𑁄𑀕𑀢𑁄 𑀭𑀢𑁆𑀢𑁄 𑀧𑀝𑁄, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀬𑁄𑀕𑀢𑁄 𑀩𑀼𑀤𑁆𑀥𑁄𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀦𑁆𑀢𑀺𑀆𑀤𑀺 𑀅𑀢𑁆𑀣𑀸𑀦𑀼𑀕𑀢𑀸𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀩𑁄𑀥𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀪𑀕𑀯𑀸 𑀩𑀼𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 ¶ 𑀪𑀕𑀯𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀸𑀢𑀺 𑀇𑀤𑀁 𑀧𑀦𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑁂𑀳𑀺 𑀉𑀢𑁆𑀢𑀫𑀲𑁆𑀲 𑀕𑀭𑀼𑀦𑁄 𑀕𑀸𑀭𑀯𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀯𑀘𑀦𑀫𑁂𑀢𑀁 𑀪𑀕𑀯𑀸𑀢𑀺. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑁄 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀘 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺.

𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄, 𑀢𑀲𑁆𑀫𑀸 𑀬𑁄 ‘‘𑀪𑀕𑀯𑀸’’𑀢𑀺 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄. 𑀕𑀭𑀼𑀓𑀭𑀡𑀁 𑀯𑀸 𑀲𑀸𑀢𑀺𑀲𑀬𑀁 𑀅𑀭𑀳𑀢𑀻𑀢𑀺 𑀕𑀸𑀭𑀯𑀬𑀼𑀢𑁆𑀢𑁄, 𑀕𑀸𑀭𑀯𑀸𑀭𑀳𑁄𑀢𑀺 𑀅𑀢𑁆𑀣𑁄. ‘‘𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸𑀧𑀓𑀸 𑀕𑀭𑀽 𑀳𑁄𑀦𑁆𑀢𑀺, 𑀦 𑀘 𑀕𑀸𑀭𑀯𑀬𑀼𑀢𑁆𑀢𑀸, 𑀅𑀬𑀁 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 ‘𑀕𑀭𑀽’𑀢𑀺 𑀯𑀢𑁆𑀯𑀸 ‘𑀕𑀸𑀭𑀯𑀬𑀼𑀢𑁆𑀢𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺.

𑀕𑀼𑀡𑀯𑀺𑀲𑁂𑀲𑀳𑁂𑀢𑀼𑀓𑀁 ¶ ‘‘𑀪𑀕𑀯𑀸’’𑀢𑀺 𑀇𑀤𑀁 𑀪𑀕𑀯𑀢𑁄 𑀦𑀸𑀫𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑀼𑀓𑀸𑀫𑁄 𑀦𑀸𑀫𑀁𑀬𑁂𑀯 𑀢𑀸𑀯 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀦𑀸𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀯𑀢𑁆𑀣𑀺𑀓𑀦𑁆𑀢𑀺 𑀅𑀯𑀢𑁆𑀣𑀸𑀬 𑀯𑀺𑀤𑀺𑀢𑀁 𑀢𑀁 𑀢𑀁 𑀅𑀯𑀢𑁆𑀣𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀁 𑀯𑁄𑀳𑀭𑀺𑀢𑀁. 𑀢𑀣𑀸 𑀮𑀺𑀗𑁆𑀕𑀺𑀓𑀁 𑀢𑁂𑀦 𑀢𑁂𑀦 𑀮𑀺𑀗𑁆𑀕𑁂𑀦 𑀯𑁄𑀳𑀭𑀺𑀢𑀁. 𑀦𑁂𑀫𑀺𑀢𑁆𑀢𑀺𑀓𑀦𑁆𑀢𑀺 𑀦𑀺𑀫𑀺𑀢𑁆𑀢𑀢𑁄 𑀆𑀕𑀢𑀁. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀬𑀤𑀺𑀘𑁆𑀙𑀸𑀬 𑀧𑀯𑀢𑁆𑀢𑀁, 𑀬𑀤𑀺𑀘𑁆𑀙𑀸𑀬 𑀆𑀕𑀢𑀁 𑀬𑀤𑀺𑀘𑁆𑀙𑀓𑀁. 𑀇𑀤𑀸𑀦𑀺 𑀆𑀯𑀢𑁆𑀣𑀺𑀓𑀸𑀤𑀻𑀦𑀺 𑀦𑀸𑀫𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣 𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀺𑀩𑀤𑁆𑀤𑁄’’𑀢𑀺𑀆𑀤𑀺. 𑀢𑀢𑁆𑀣 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀩𑀸𑀮𑁄 𑀬𑀼𑀯𑀸 𑀯𑀼𑀟𑁆𑀠𑁄𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀤𑀼𑀢𑀺𑀬𑁂𑀦 𑀫𑀼𑀡𑁆𑀟𑀻 𑀚𑀝𑀻𑀢𑀺 𑀏𑀯𑀫𑀸𑀤𑀺𑀁, 𑀢𑀢𑀺𑀬𑁂𑀦 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀛𑀸𑀬𑀻𑀢𑀺 𑀏𑀯𑀫𑀸𑀤𑀺𑀁, 𑀘𑀢𑀼𑀢𑁆𑀣𑁂𑀦 𑀅𑀖𑀧𑀤𑀻𑀧𑀦𑀁 𑀧𑀸𑀯𑀘𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑁂𑀫𑀺𑀢𑁆𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀦 𑀫𑀳𑀸𑀫𑀸𑀬𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀇𑀤𑀁 𑀦𑀸𑀫𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀓𑁆𑀔𑀡𑁂𑀬𑁂𑀯 𑀚𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 ¶ 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀅𑀲𑀸𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸’’𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀨𑀚𑁆𑀚𑀫𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀩𑀼𑀤𑁆𑀥𑀕𑀼𑀡𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀦𑀺𑀧𑁆𑀨𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓’’𑀦𑁆𑀢𑀺. 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀸 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀸 𑀧𑀜𑁆𑀜𑀢𑁆𑀢𑀺. 𑀬𑀁𑀕𑀼𑀡𑀦𑀺𑀫𑀺𑀢𑁆𑀢𑀸 𑀳𑀺 𑀲𑀸, 𑀢𑁂 𑀲𑀢𑁆𑀣𑀼 𑀧𑀘𑁆𑀘𑀓𑁆𑀔𑀪𑀽𑀢𑀸, 𑀢𑀁𑀕𑀼𑀡𑀸 𑀯𑀺𑀬 𑀲𑀸𑀧𑀺 𑀲𑀘𑁆𑀙𑀺𑀓𑀢𑀸 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀭𑁂𑀲𑀁 𑀯𑁄𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀤𑀦𑁆𑀢𑀻𑀢𑀺 𑀫𑀳𑀸𑀣𑁂𑀭𑀲𑁆𑀲 𑀕𑀭𑀼𑀪𑀸𑀯𑀢𑁄 𑀩𑀳𑀼𑀯𑀘𑀦𑁂𑀦𑀸𑀳, 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀸 𑀓𑀢𑀫𑀦𑀼𑀯𑀸𑀤𑀁 𑀲𑀦𑁆𑀥𑀸𑀬. 𑀇𑀲𑁆𑀲𑀭𑀺𑀬𑀸𑀤𑀺𑀪𑁂𑀤𑁄 𑀪𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀕𑀻. 𑀫𑀕𑁆𑀕𑀨𑀮𑀸𑀤𑀺𑀅𑀭𑀺𑀬𑀥𑀫𑁆𑀫𑀭𑀢𑀦𑀁 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀤𑀺𑀕𑀼𑀡𑀬𑀼𑀢𑁆𑀢𑀸𑀦𑀺 𑀪𑀚𑀺 𑀲𑁂𑀯𑀺 𑀲𑀻𑀮𑁂𑀦𑀸𑀢𑀺 𑀪𑀚𑀻, 𑀪𑀚𑀦𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀪𑀸𑀕𑀻𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀅𑀢𑁆𑀣𑀥𑀫𑁆𑀫𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀘 𑀅𑀥𑀺𑀲𑀻𑀮𑀸𑀤𑀻𑀦𑀜𑁆𑀘 𑀪𑀸𑀕𑀻𑀢𑀺 𑀅𑀢𑁆𑀣𑁄. 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀯𑀺𑀪𑀢𑁆𑀢𑀯𑀸. 𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀁 𑀪𑀕𑁆𑀕𑀁 𑀅𑀓𑀸𑀲𑀻𑀢𑀺 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀕𑀭𑀼𑀧𑀺 𑀮𑁄𑀓𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀭𑀽’’𑀢𑀺. 𑀬𑀲𑁆𑀫𑀸 𑀕𑀭𑀼, 𑀢𑀲𑁆𑀫𑀸𑀧𑀺 𑀪𑀕𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀇𑀢𑀺-𑀲𑀤𑁆𑀤𑁄. 𑀲𑁄 𑀘 𑀬𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀢𑁆𑀣𑀺 𑀪𑀕𑀻𑀢𑀺𑀆𑀤𑀻𑀲𑀼, 𑀢𑀢𑁆𑀣 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀕𑁆𑀬𑀯𑀸. 𑀩𑀳𑀽𑀳𑀺 𑀜𑀸𑀬𑁂𑀳𑀻𑀢𑀺 𑀓𑀸𑀬𑀪𑀸𑀯𑀦𑀸𑀤𑀺𑀓𑁂𑀳𑀺 𑀅𑀦𑁂𑀓𑁂𑀳𑀺 𑀪𑀸𑀯𑀦𑀸𑀓𑁆𑀓𑀫𑁂𑀳𑀺. 𑀲𑀼𑀪𑀸𑀯𑀺𑀢𑀢𑁆𑀢𑀦𑁄𑀢𑀺 𑀲𑀫𑁆𑀫𑀤𑁂𑀯 𑀪𑀸𑀯𑀺𑀢𑀲𑀪𑀸𑀯𑀲𑁆𑀲. 𑀧𑀘𑁆𑀘𑀢𑁆𑀢𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀢𑁂𑀦 𑀲𑀼𑀪𑀸𑀯𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀼𑀪𑀸𑀯𑀺𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀼𑀪𑀸𑀯𑀺𑀢𑀢𑁆𑀢𑀦𑁄 𑀲𑀼𑀪𑀸𑀯𑀺𑀢𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀪𑀯𑀸𑀦𑀁 𑀅𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀪𑀯𑀦𑁆𑀢𑀕𑁄.

𑀦𑀺𑀤𑁆𑀤𑁂𑀲𑁂 ¶ 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀏𑀢𑁆𑀣𑀸𑀬𑀁 𑀦𑀺𑀤𑁆𑀤𑁂𑀲𑀦𑀬𑁄 𑁋

‘‘𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁. 𑀅𑀧𑀺𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀢𑀡𑁆𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 ¶ 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸. 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸. 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸’’𑀢𑀺 (𑀫𑀳𑀸𑀦𑀺. 𑁮𑁪).

𑀏𑀢𑁆𑀣 𑀘 ‘‘𑀕𑀸𑀭𑀯𑀸𑀥𑀺𑀯𑀘𑀦’’𑀦𑁆𑀢𑀺𑀆𑀤𑀻𑀦𑀺 𑀬𑀤𑀺𑀧𑀺 𑀕𑀸𑀣𑀸𑀬𑀁 𑀆𑀕𑀢𑀧𑀤𑀸𑀦𑀼𑀓𑁆𑀓𑀫𑁂𑀦 𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀬𑀣𑀸𑀭𑀳𑀁 𑀧𑀦 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀦𑀺𑀤𑁆𑀤𑁂𑀲𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀕𑀭𑀽𑀦𑀁 𑀕𑀭𑀼𑀪𑀸𑀯𑀯𑀸𑀘𑀓𑀁 𑀯𑀘𑀦𑀁. 𑀪𑀚𑀻𑀢𑀺 𑀪𑀸𑀕𑀲𑁄 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦’’𑀦𑁆𑀢𑀺. 𑀫𑀕𑁆𑀕𑀨𑀮𑀸𑀤𑀺 𑀅𑀭𑀺𑀬𑀥𑀫𑁆𑀫𑁄𑀬𑁂𑀯 𑀥𑀫𑁆𑀫𑀭𑀢𑀦𑀁. 𑀧𑀼𑀦 𑀪𑀚𑀻𑀢𑀺 𑀇𑀫𑀲𑁆𑀲 𑀲𑁂𑀯𑀻𑀢𑀺 𑀅𑀢𑁆𑀣𑁄. 𑀪𑀸𑀕𑀻𑀢𑀺 𑀪𑀸𑀕𑀸𑀪𑀺𑀥𑁂𑀬𑁆𑀬𑀯𑀸. 𑀧𑀼𑀦 𑀪𑀸𑀕𑀻𑀢𑀺 𑀏𑀢𑁆𑀣 𑀪𑀚𑀦𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀭𑀲𑀲𑁆𑀲𑀸𑀢𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀭𑀲𑀲𑁆𑀲. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀳𑀺 𑀞𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀲𑀼𑀡𑀦𑁆𑀢𑀲𑁆𑀲 𑀘 𑀢𑀤𑀢𑁆𑀣𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀅𑀢𑁆𑀣𑀭𑀲𑁄. 𑀥𑀫𑁆𑀫𑀁 𑀆𑀭𑀩𑁆𑀪 𑀥𑀫𑁆𑀫𑀭𑀲𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤’’𑀦𑁆𑀢𑀺 (𑀅. 𑀦𑀺. 𑁬.𑁧𑁦). 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲𑀸𑀢𑀺 𑀯𑀺𑀫𑀼𑀢𑁆𑀢𑀺𑀪𑀽𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀯𑀸 𑀭𑀲𑀲𑁆𑀲. 𑀲𑀜𑁆𑀜𑀸𑀪𑀸𑀯𑀦𑀸𑀦𑀦𑁆𑀢𑀺 ¶ 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 ¶ . 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀸𑀢𑀺𑀲𑀤𑁆𑀤𑀲𑀺𑀤𑁆𑀥𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀬𑀤𑀺𑀧𑀺 ‘‘𑀪𑀸𑀕𑁆𑀬𑀯𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 ‘‘𑀪𑀕𑀻 𑀪𑀚𑀻’’𑀢𑀺 (𑀫𑀳𑀸𑀦𑀺. 𑁮𑁪) 𑀦𑀺𑀤𑁆𑀤𑁂𑀲𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑁄 𑀏𑀯, 𑀢𑀣𑀸𑀧𑀺 𑀧𑀤𑀲𑀺𑀤𑁆𑀥𑀺𑀅𑀢𑁆𑀣𑀯𑀺𑀪𑀸𑀕𑀅𑀢𑁆𑀣𑀬𑁄𑀚𑀦𑀸𑀤𑀺𑀲𑀳𑀺𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄 𑀢𑀢𑁄 𑀅𑀜𑁆𑀜𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄’’𑀢𑀺. 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄𑀢𑀺 𑀏𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀯𑀡𑁆𑀡𑀯𑀺𑀓𑀸𑀭𑁄 𑀯𑀡𑁆𑀡𑀮𑁄𑀧𑁄 𑀥𑀸𑀢𑀼𑀅𑀢𑁆𑀣𑁂𑀦 𑀦𑀺𑀬𑁄𑀚𑀦𑀜𑁆𑀘𑀸𑀢𑀺 𑀇𑀫𑀁 𑀢𑀺𑀯𑀺𑀥𑀁 𑀮𑀓𑁆𑀔𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀤𑁆𑀤𑀦𑀬𑁂𑀦𑀸𑀢𑀺 𑀲𑀤𑁆𑀤𑀮𑀓𑁆𑀔𑀡𑀦𑀬𑁂𑀦. 𑀧𑀺𑀲𑁄𑀤𑀭𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀆𑀓𑀢𑀺𑀕𑀡𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸’’𑀢𑀺. 𑀧𑀓𑁆𑀔𑀺𑀧𑀦𑀫𑁂𑀯 𑀮𑀓𑁆𑀔𑀡𑀁. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀓𑀭𑀡𑀜𑁆𑀳𑀺 𑀧𑀓𑁆𑀔𑀺𑀧𑀦𑀁. 𑀧𑀸𑀭𑀧𑁆𑀧𑀢𑁆𑀢𑀦𑁆𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀧𑀸𑀭𑀫𑀻𑀪𑀸𑀯𑀧𑁆𑀧𑀢𑁆𑀢𑀁. 𑀪𑀸𑀕𑁆𑀬𑀦𑁆𑀢𑀺 𑀓𑀼𑀲𑀮𑀁. 𑀢𑀢𑁆𑀣 𑀫𑀕𑁆𑀕𑀓𑀼𑀲𑀮𑀁 𑀮𑁄𑀓𑀼𑀢𑁆𑀢𑀭𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁, 𑀇𑀢𑀭𑀁 𑀮𑁄𑀓𑀺𑀬𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁, 𑀇𑀢𑀭𑀫𑁆𑀧𑀺 𑀯𑀸 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑀁 𑀧𑀭𑀺𑀬𑀸𑀬𑀢𑁄 𑀮𑁄𑀓𑀼𑀢𑁆𑀢𑀭𑀲𑀼𑀔𑀦𑀺𑀩𑁆𑀩𑀢𑁆𑀢𑀓𑀁 𑀲𑀺𑀬𑀸.

𑀇𑀤𑀸𑀦𑀺 𑀪𑀕𑀯𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀮𑁄𑀪𑀸𑀤𑀬𑁄 𑀏𑀓𑀓𑀯𑀲𑁂𑀦 𑀕𑀳𑀺𑀢𑀸, 𑀢𑀣𑀸 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑁄 𑀯𑀺𑀧𑀮𑁆𑀮𑀸𑀲𑀪𑀸𑀯𑀲𑀸𑀫𑀜𑁆𑀜𑁂𑀦, 𑀅𑀳𑀺𑀭𑀺𑀓𑀸𑀤𑀬𑁄 𑀤𑀼𑀓𑀯𑀲𑁂𑀦. 𑀢𑀢𑁆𑀣 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 𑀓𑁄𑀥𑁄, 𑀲𑁄 𑀦𑀯𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄. ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁩-𑁪) 𑀧𑀼𑀦𑀧𑁆𑀧𑀼𑀦𑀁 𑀓𑀼𑀚𑁆𑀛𑀦𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀬𑁄𑀦𑀦𑁆𑀥𑀦𑁄 𑀉𑀧𑀦𑀸𑀳𑁄. 𑀉𑀪𑀬𑀫𑁆𑀧𑀺 𑀧𑀝𑀺𑀖𑁄𑀬𑁂𑀯, 𑀲𑁄 𑀧𑀯𑀢𑁆𑀢𑀺𑀦𑀸𑀦𑀢𑁆𑀢𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁄. 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀓𑁄𑀥𑁄 𑀓𑁄𑀥𑁄𑀬𑁂𑀯, 𑀢𑀤𑀼𑀢𑁆𑀢𑀭𑀺 𑀉𑀧𑀦𑀸𑀳𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄, 𑀅𑀧𑀭𑀓𑀸𑀮𑁂 𑀉𑀧𑀦𑀸𑀳𑁄’’𑀢𑀺 (𑀯𑀺𑀪. 𑁮𑁯𑁧). 𑀅𑀕𑀸𑀭𑀺𑀬𑀲𑁆𑀲 (𑀫. 𑀦𑀺. 𑀅𑀝𑁆𑀞. 𑁧.𑁭𑁧) 𑀅𑀦𑀕𑀸𑀭𑀺𑀬𑀲𑁆𑀲 𑀯𑀸 𑀲𑀼𑀓𑀢𑀓𑀭𑀡𑀯𑀺𑀦𑀸𑀲𑀦𑁄 𑀫𑀓𑁆𑀔𑁄. 𑀅𑀕𑀸𑀭𑀺𑀬𑁄𑀧𑀺 𑀳𑀺 𑀓𑁂𑀦𑀘𑀺 𑀅𑀦𑀼𑀓𑀫𑁆𑀧𑀓𑁂𑀦 𑀤𑀮𑀺𑀤𑁆𑀤𑁄 𑀲𑀫𑀸𑀦𑁄 𑀉𑀘𑁆𑀘𑁂 𑀞𑀸𑀦𑁂 𑀞𑀧𑀺𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 ‘‘𑀓𑀺𑀁 𑀢𑀬𑀸 𑀫𑀬𑁆𑀳𑀁 𑀓𑀢’’𑀦𑁆𑀢𑀺 𑀢𑀲𑁆𑀲 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺. 𑀅𑀦𑀕𑀸𑀭𑀺𑀬𑁄𑀧𑀺 𑀲𑀸𑀫𑀡𑁂𑀭𑀓𑀸𑀮𑀢𑁄 𑀧𑀪𑀼𑀢𑀺 𑀆𑀘𑀭𑀺𑀬𑁂𑀦 𑀯𑀸 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀦𑀬𑀧𑁆𑀧𑀓𑀭𑀡𑀓𑁄𑀲𑀮𑁆𑀮𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀺𑀢𑁄 𑀅𑀧𑀭𑁂𑀦 ¶ 𑀲𑀫𑀬𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀘𑀺𑀢𑁆𑀢𑀻𑀓𑀢𑁄 𑀘𑀭𑀫𑀸𑀦𑁄 ‘‘𑀅𑀬𑀁 𑀅𑀫𑁆𑀳𑁂𑀳𑀺 𑀤𑀳𑀭𑀓𑀸𑀮𑁂 𑀏𑀯𑀁 𑀅𑀦𑀼𑀕𑁆𑀕𑀳𑀺𑀢𑁄 𑀲𑀁𑀯𑀟𑁆𑀠𑀺𑀢𑁄 𑀘, 𑀅𑀣 𑀘 𑀧𑀦𑀺𑀤𑀸𑀦𑀺 𑀦𑀺𑀲𑁆𑀲𑀺𑀦𑁂𑀳𑁄 𑀚𑀸𑀢𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀓𑀺𑀁 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀢𑁂𑀲𑀁 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀲𑁂𑀲𑁄 𑀧𑀼𑀩𑁆𑀩𑀓𑀸𑀭𑀺𑀢𑀸𑀮𑀓𑁆𑀔𑀡𑀲𑁆𑀲 𑀕𑀼𑀡𑀲𑁆𑀲 𑀯𑀺𑀦𑀸𑀲𑀦𑁄 𑀉𑀤𑀓𑀧𑀼𑀜𑁆𑀙𑀦𑀺𑀬𑀸 𑀯𑀺𑀬 𑀲𑀭𑀻𑀭𑀸𑀦𑀼𑀕𑀢𑀁 𑀉𑀤𑀓𑀁 𑀦𑀺𑀧𑀼𑀜𑁆𑀙𑀦𑁆𑀢𑁄 𑀫𑀓𑁆𑀔𑁄. 𑀢𑀣𑀸 𑀳𑀺 𑀲𑁄 𑀧𑀭𑁂𑀲𑀁 𑀕𑀼𑀡𑀸𑀦𑀁 𑀫𑀓𑁆𑀔𑀦𑀝𑁆𑀞𑁂𑀦 ‘‘𑀫𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀴𑀸𑀲𑀢𑀻𑀢𑀺 𑀧𑀴𑀸𑀲𑁄, 𑀧𑀭𑀲𑁆𑀲 𑀕𑀼𑀡𑁂 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀩𑀳𑀼𑀲𑁆𑀲𑀼𑀢𑁂𑀧𑀺 ¶ 𑀧𑀼𑀕𑁆𑀕𑀮𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 ‘‘𑀈𑀤𑀺𑀲𑀲𑁆𑀲 𑀘 𑀩𑀳𑀼𑀲𑁆𑀲𑀼𑀢𑀲𑁆𑀲 𑀅𑀦𑀺𑀬𑀢𑀸 𑀕𑀢𑀺, 𑀢𑀯 𑀯𑀸 𑀫𑀫 𑀯𑀸 𑀓𑁄 𑀯𑀺𑀲𑁂𑀲𑁄’’𑀢𑀺, 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁂 𑀧𑀼𑀕𑁆𑀕𑀮𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 ‘‘𑀢𑁆𑀯𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀢𑁄, 𑀢𑁆𑀯𑀫𑁆𑀧𑀺 𑀲𑀻𑀮𑀫𑀢𑁆𑀢𑁂 𑀞𑀺𑀢𑁄, 𑀅𑀳𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀬𑀼𑀕𑀕𑁆𑀕𑀸𑀳𑁄. 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀳𑀺 𑀧𑀴𑀸𑀲𑁄.

𑀧𑀭𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀔𑀻𑀬𑀫𑀸𑀦𑀸 𑀉𑀲𑀽𑀬𑀫𑀸𑀦𑀸 𑀇𑀲𑁆𑀲𑀸. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀕𑀽𑀳𑀦𑀁 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀫𑀸𑀦𑀁 𑀫𑀘𑁆𑀙𑀭𑀺𑀬𑀁. 𑀯𑀜𑁆𑀘𑀦𑀺𑀓𑀘𑀭𑀺𑀬𑀪𑀽𑀢𑀸 𑀫𑀸𑀬𑀸, 𑀲𑀸 𑀲𑀓𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸. 𑀢𑀣𑀸 𑀳𑀺 𑀲𑀸 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀢𑁄 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸 𑀯𑀺𑀬𑀸𑀢𑀺 ‘‘𑀫𑀸𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑀁 𑀓𑁂𑀭𑀸𑀝𑀺𑀓𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀸𑀞𑁂𑀬𑁆𑀬𑀁. 𑀅𑀲𑀦𑁆𑀢𑀕𑀼𑀡𑀤𑀻𑀧𑀦𑀜𑁆𑀳𑀺 ‘‘𑀓𑁂𑀭𑀸𑀝𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀭𑀸𑀝𑀺𑀓𑁄 𑀳𑀺 𑀧𑀼𑀕𑁆𑀕𑀮𑁄 𑀆𑀬𑀦𑀫𑀘𑁆𑀙𑁄 𑀯𑀺𑀬 𑀳𑁄𑀢𑀺. 𑀆𑀬𑀦𑀫𑀘𑁆𑀙𑁄 𑀦𑀸𑀫 𑀲𑀧𑁆𑀧𑀫𑀼𑀔𑀫𑀘𑁆𑀙𑀯𑀸𑀮𑀸 𑀏𑀓𑀸 𑀫𑀘𑁆𑀙𑀚𑀸𑀢𑀺. 𑀲𑁄 𑀓𑀺𑀭 𑀫𑀘𑁆𑀙𑀸𑀦𑀁 𑀦𑀗𑁆𑀕𑀼𑀝𑁆𑀞𑀁 𑀤𑀲𑁆𑀲𑁂𑀢𑀺, 𑀲𑀧𑁆𑀧𑀸𑀦𑀁 𑀲𑀻𑀲𑀁 ‘‘𑀢𑀼𑀫𑁆𑀳𑀸𑀓𑀁 𑀲𑀤𑀺𑀲𑁄 𑀅𑀳’’𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁, 𑀏𑀯𑀫𑁂𑀯 𑀓𑁂𑀭𑀸𑀝𑀺𑀓𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀲𑀼𑀢𑁆𑀢𑀦𑁆𑀢𑀺𑀓𑀁 𑀯𑀸 𑀆𑀪𑀺𑀥𑀫𑁆𑀫𑀺𑀓𑀁 𑀯𑀸 𑀉𑀧𑀲𑀗𑁆𑀓𑀫𑀢𑀺, 𑀢𑀁 𑀢𑀁 𑀏𑀯𑀁 𑀯𑀤𑀢𑀺 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀻, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀓𑀸, 𑀦𑀸𑀳𑀁 𑀢𑀼𑀫𑁆𑀳𑁂 𑀫𑀼𑀜𑁆𑀘𑀸𑀫𑀻’’𑀢𑀺. 𑀏𑀯𑀫𑁂𑀢𑁂 ‘‘𑀲𑀕𑀸𑀭𑀯𑁄 𑀅𑀬𑀁 𑀅𑀫𑁆𑀳𑁂𑀲𑀼 𑀲𑀧𑁆𑀧𑀢𑀺𑀲𑁆𑀲𑁄’’𑀢𑀺 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀲𑁆𑀲𑁂𑀯𑀁 𑀓𑁂𑀭𑀸𑀝𑀺𑀓𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀸𑀞𑁂𑀬𑁆𑀬𑀁.

𑀲𑀩𑁆𑀩𑀲𑁄 𑀫𑀤𑁆𑀤𑀯𑀸𑀪𑀸𑀯𑁂𑀦 𑀯𑀸𑀢𑀪𑀭𑀺𑀢𑀪𑀲𑁆𑀢𑀲𑀤𑀺𑀲𑀲𑁆𑀲 𑀣𑀤𑁆𑀥𑀪𑀸𑀯𑀲𑁆𑀲 𑀅𑀦𑁄𑀦𑀫𑀺𑀢𑀤𑀡𑁆𑀟𑀲𑀤𑀺𑀲𑀢𑀸𑀬 𑀧𑀕𑁆𑀕𑀳𑀺𑀢𑀲𑀺𑀭𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀓𑀸𑀬𑀲𑁆𑀲 𑀘 𑀓𑀸𑀭𑀓𑁄 ¶ 𑀣𑀫𑁆𑀪𑁄. 𑀢𑀤𑀼𑀢𑁆𑀢𑀭𑀺𑀓𑀭𑀡𑁄 𑀲𑀸𑀭𑀫𑁆𑀪𑁄. 𑀲𑁄 𑀤𑀼𑀯𑀺𑀥𑁂𑀦 𑀮𑀩𑁆𑀪𑀢𑀺 𑀅𑀓𑀼𑀲𑀮𑀯𑀲𑁂𑀦 𑀘𑁂𑀯 𑀓𑀼𑀲𑀮𑀯𑀲𑁂𑀦 𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀲𑁆𑀲 𑀧𑀭𑁂𑀦 𑀓𑀢𑀁 𑀅𑀮𑀗𑁆𑀓𑀸𑀭𑀸𑀤𑀺𑀁 𑀤𑀺𑀲𑁆𑀯𑀸 𑀢𑀤𑁆𑀤𑀺𑀕𑀼𑀡𑀢𑀤𑁆𑀤𑀺𑀕𑀼𑀡𑀓𑀭𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄, 𑀅𑀦𑀕𑀸𑀭𑀺𑀬𑀲𑁆𑀲 𑀘 𑀬𑀢𑁆𑀢𑀓𑀁 𑀬𑀢𑁆𑀢𑀓𑀁 𑀧𑀭𑁄 𑀧𑀭𑀺𑀬𑀸𑀧𑀼𑀡𑀸𑀢𑀺 𑀯𑀸 𑀓𑀣𑁂𑀢𑀺 𑀯𑀸, 𑀫𑀸𑀦𑀯𑀲𑁂𑀦 𑀢𑀤𑁆𑀤𑀺𑀕𑀼𑀡𑀢𑀤𑁆𑀤𑀺𑀕𑀼𑀡𑀓𑀭𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀓𑀼𑀲𑀮𑁄. 𑀢𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀁 𑀓𑀭𑁄𑀢𑀺. 𑀅𑀕𑀸𑀭𑀺𑀬𑁄 𑀲𑀫𑀸𑀦𑁄 𑀏𑀓𑁂𑀦𑁂𑀓𑀲𑁆𑀫𑀺𑀁 𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀲𑀚𑁆𑀚𑀺𑀢𑁂 𑀅𑀧𑀭𑁄 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀲𑀚𑁆𑀚𑁂𑀢𑀺, 𑀅𑀧𑀭𑁄 𑀘𑀢𑁆𑀢𑀸𑀭𑁄, 𑀅𑀧𑀭𑁄 𑀅𑀝𑁆𑀞, 𑀅𑀧𑀭𑁄 𑀲𑁄𑀴𑀲. 𑀅𑀦𑀕𑀸𑀭𑀺𑀬𑁄 𑀲𑀫𑀸𑀦𑁄 𑀏𑀓𑁂𑀦𑁂𑀓𑀲𑁆𑀫𑀺𑀁 𑀦𑀺𑀓𑀸𑀬𑁂 𑀕𑀳𑀺𑀢𑁂 ‘‘𑀦𑀸𑀳𑀁 𑀏𑀢𑀲𑁆𑀲 𑀳𑁂𑀝𑁆𑀞𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀭𑁄 𑀤𑁆𑀯𑁂 𑀕𑀡𑁆𑀳𑀸𑀢𑀺, 𑀅𑀧𑀭𑁄 𑀢𑀬𑁄, 𑀅𑀧𑀭𑁄 𑀘𑀢𑁆𑀢𑀸𑀭𑁄, 𑀅𑀧𑀭𑁄 𑀧𑀜𑁆𑀘. 𑀲𑀸𑀭𑀫𑁆𑀪𑀯𑀲𑁂𑀦 𑀳𑀺 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀓𑀼𑀲𑀮𑀧𑀓𑁆𑀔𑁄 𑀳𑁂𑀲 𑀦𑀺𑀭𑀬𑀕𑀸𑀫𑀺𑀫𑀕𑁆𑀕𑁄. 𑀅𑀕𑀸𑀭𑀺𑀬𑀲𑁆𑀲 𑀧𑀦 𑀧𑀭𑀁 𑀏𑀓𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀤𑀸𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄, 𑀅𑀦𑀕𑀸𑀭𑀺𑀬𑀲𑁆𑀲 𑀘 𑀧𑀭𑁂𑀦 𑀏𑀓𑀦𑀺𑀓𑀸𑀬𑁂 𑀕𑀳𑀺𑀢𑁂 𑀫𑀸𑀦𑀁 𑀅𑀦𑀺𑀲𑁆𑀲𑀸𑀬 𑀓𑁂𑀯𑀮𑀁 𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀆𑀮𑀲𑀺𑀬𑀁 𑀅𑀪𑀺𑀪𑀼𑀬𑁆𑀬 𑀤𑁆𑀯𑁂 𑀦𑀺𑀓𑀸𑀬𑁂 𑀕𑀳𑁂𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀼𑀲𑀮𑁄. 𑀓𑀼𑀲𑀮𑀧𑀓𑁆𑀔𑀯𑀲𑁂𑀦 𑀳𑀺 𑀏𑀓𑀲𑁆𑀫𑀺𑀁 𑀏𑀓𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑁂 𑀤𑁆𑀯𑁂, 𑀤𑁆𑀯𑁂 𑀤𑁂𑀦𑁆𑀢𑁂 𑀘𑀢𑁆𑀢𑀸𑀭𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀸𑀧𑀺 ¶ 𑀧𑀭𑁂𑀦 𑀏𑀓𑀲𑁆𑀫𑀺𑀁 𑀦𑀺𑀓𑀸𑀬𑁂 𑀕𑀳𑀺𑀢𑁂 ‘‘𑀤𑁆𑀯𑁂 𑀦𑀺𑀓𑀸𑀬𑁂 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀫𑁂 𑀨𑀸𑀲𑀼 𑀳𑁄𑀢𑀻’’𑀢𑀺 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀢𑁆𑀯𑀸 𑀢𑀤𑀼𑀢𑁆𑀢𑀭𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀥 𑀧𑀦 𑀅𑀓𑀼𑀲𑀮𑀧𑀓𑁆𑀔𑀺𑀬𑁄 𑀢𑀤𑀼𑀢𑁆𑀢𑀭𑀺𑀓𑀭𑀡𑁄 ‘‘𑀲𑀸𑀭𑀫𑁆𑀪𑁄’’𑀢𑀺 𑀯𑀼𑀢𑁆𑀢𑁄.

𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀉𑀦𑁆𑀦𑀢𑀺𑀯𑀲𑁂𑀦 𑀧𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀸𑀦𑁄. 𑀅𑀩𑁆𑀪𑀼𑀦𑁆𑀦𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀢𑀺𑀫𑀸𑀦𑁄. 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀅𑀢𑁆𑀢𑀸𑀦𑀁 𑀲𑀤𑀺𑀲𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀢𑀢𑁄 𑀅𑀥𑀺𑀓𑀢𑁄 𑀤𑀳𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀓𑁄 𑀅𑀢𑀺𑀫𑀸𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀚𑀸𑀢𑀺𑀆𑀤𑀺𑀁 𑀧𑀝𑀺𑀘𑁆𑀘 𑀫𑀚𑁆𑀚𑀦𑀸𑀓𑀸𑀭𑁄 𑀫𑀤𑁄, 𑀲𑁄𑀧𑀺 𑀅𑀢𑁆𑀣𑀢𑁄 𑀫𑀸𑀦𑁄 𑀏𑀯. 𑀲𑁄 𑀧𑀦 𑀚𑀸𑀢𑀺𑀫𑀤𑁄 𑀕𑁄𑀢𑁆𑀢𑀫𑀤𑁄 𑀆𑀭𑁄𑀕𑁆𑀬𑀫𑀤𑁄 𑀬𑁄𑀩𑁆𑀩𑀦𑀫𑀤𑁄 𑀚𑀻𑀯𑀺𑀢𑀫𑀤𑁄 𑀮𑀸𑀪𑀫𑀤𑁄 𑀲𑀓𑁆𑀓𑀸𑀭𑀫𑀤𑁄 𑀕𑀭𑀼𑀓𑀸𑀭𑀫𑀤𑁄 𑀧𑀼𑀭𑁂𑀓𑁆𑀔𑀸𑀭𑀫𑀤𑁄 𑀧𑀭𑀺𑀯𑀸𑀭𑀫𑀤𑁄 𑀪𑁄𑀕𑀫𑀤𑁄 𑀯𑀡𑁆𑀡𑀫𑀤𑁄 𑀲𑀼𑀢𑀫𑀤𑁄 𑀧𑀝𑀺𑀪𑀸𑀦𑀫𑀤𑁄 𑀭𑀢𑁆𑀢𑀜𑁆𑀜𑀼𑀫𑀤𑁄 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑁄 𑀅𑀦𑀯𑀜𑁆𑀜𑀢𑁆𑀢𑀺𑀫𑀤𑁄 𑀇𑀭𑀺𑀬𑀸𑀧𑀣𑀫𑀤𑁄 𑀇𑀤𑁆𑀥𑀺𑀫𑀤𑁄 𑀬𑀲𑀫𑀤𑁄 𑀲𑀻𑀮𑀫𑀤𑁄 𑀛𑀸𑀦𑀫𑀤𑁄 𑀲𑀺𑀧𑁆𑀧𑀫𑀤𑁄 𑀆𑀭𑁄𑀳𑀫𑀤𑁄 𑀧𑀭𑀺𑀡𑀸𑀳𑀫𑀤𑁄 𑀲𑀡𑁆𑀞𑀸𑀦𑀫𑀤𑁄 𑀧𑀸𑀭𑀺𑀧𑀽𑀭𑀺𑀫𑀤𑁄𑀢𑀺 𑀅𑀦𑁂𑀓𑀯𑀺𑀥𑁄.

𑀢𑀢𑁆𑀣 ¶ (𑀯𑀺𑀪. 𑀅𑀝𑁆𑀞. 𑁮𑁪𑁩-𑁮𑁪𑁪) 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀫𑀸𑀦𑁄 𑀚𑀸𑀢𑀺𑀫𑀤𑁄, 𑀲𑁄 𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀳𑀺 𑀔𑀢𑁆𑀢𑀺𑀬𑁄 ‘‘𑀫𑀸𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺, 𑀅𑀯𑀲𑁂𑀲𑀸 𑀅𑀦𑁆𑀢𑀭𑀸 𑀉𑀝𑁆𑀞𑀸𑀬 𑀔𑀢𑁆𑀢𑀺𑀬𑀸 𑀚𑀸𑀢𑀸, 𑀅𑀳𑀁 𑀧𑀦 𑀯𑀁𑀲𑀸𑀕𑀢𑀔𑀢𑁆𑀢𑀺𑀬𑁄’’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑁄𑀢𑁆𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀫𑀸𑀦𑁄 𑀕𑁄𑀢𑁆𑀢𑀫𑀤𑁄, 𑀲𑁄𑀧𑀺 𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀔𑀢𑁆𑀢𑀺𑀬𑁄𑀧𑀺 𑀳𑀺 ‘‘𑀅𑀳𑀁 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑁄, 𑀅𑀳𑀁 𑀆𑀤𑀺𑀘𑁆𑀘𑀕𑁄𑀢𑁆𑀢𑁄’’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 ‘‘𑀅𑀳𑀁 𑀓𑀲𑁆𑀲𑀧𑀕𑁄𑀢𑁆𑀢𑁄, 𑀅𑀳𑀁 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄’’𑀢𑀺 𑀫𑀸𑀦𑀁 𑀓𑀭𑁄𑀢𑀺. 𑀯𑁂𑀲𑁆𑀲𑁄𑀧𑀺 𑀲𑀼𑀤𑁆𑀤𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀮𑀕𑁄𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀢𑀺. 𑀆𑀭𑁄𑀕𑁆𑀬𑀫𑀤𑀸𑀤𑀻𑀲𑀼𑀧𑀺 ‘‘𑀅𑀳𑀁 𑀅𑀭𑁄𑀕𑁄, 𑀲𑁂𑀲𑀸 𑀭𑁄𑀕𑀩𑀳𑀼𑀮𑀸, 𑀓𑀡𑁆𑀟𑀼𑀯𑀦𑀫𑀢𑁆𑀢𑀫𑁆𑀧𑀺 𑀫𑀬𑁆𑀳𑀁 𑀩𑁆𑀬𑀸𑀥𑀺 𑀦𑀸𑀫 𑀦𑀢𑁆𑀣𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀆𑀭𑁄𑀕𑁆𑀬𑀫𑀤𑁄 𑀦𑀸𑀫. ‘‘𑀅𑀳𑀁 𑀢𑀭𑀼𑀡𑁄, 𑀅𑀯𑀲𑁂𑀲𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁄 𑀧𑀧𑀸𑀢𑁂 𑀞𑀺𑀢𑀭𑀼𑀓𑁆𑀔𑀲𑀤𑀺𑀲𑁄, 𑀅𑀳𑀁 𑀧𑀦 𑀧𑀞𑀫𑀯𑀬𑁂 𑀞𑀺𑀢𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀬𑁄𑀩𑁆𑀩𑀦𑀫𑀤𑁄. ‘‘𑀅𑀳𑀁 𑀘𑀺𑀭𑀁 𑀚𑀻𑀯𑀺𑀁, 𑀘𑀺𑀭𑀁 𑀚𑀻𑀯𑀸𑀫𑀺, 𑀘𑀺𑀭𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀁, 𑀲𑀼𑀔𑀁 𑀚𑀻𑀯𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀚𑀻𑀯𑀺𑀢𑀫𑀤𑁄 𑀦𑀸𑀫. ‘‘𑀅𑀳𑀁 𑀮𑀸𑀪𑀻, 𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀮𑀸𑀪𑀸, 𑀫𑀬𑁆𑀳𑀁 𑀧𑀦 𑀮𑀸𑀪𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀮𑀸𑀪𑀫𑀤𑁄 𑀦𑀸𑀫.

‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀮𑀪𑀦𑁆𑀢𑀺, 𑀅𑀳𑀁 𑀧𑀦 𑀲𑀼𑀓𑀢𑀁 𑀧𑀡𑀻𑀢𑀁 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀁 𑀮𑀪𑀸𑀫𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀓𑁆𑀓𑀸𑀭𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀪𑀺𑀓𑁆𑀔𑀽𑀦𑀁 𑀧𑀸𑀤𑀧𑀺𑀝𑁆𑀞𑀺𑀬𑀁 𑀅𑀓𑁆𑀓𑀫𑀺𑀢𑁆𑀯𑀸 ¶ 𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 ‘𑀅𑀬𑀁 𑀲𑀫𑀡𑁄’𑀢𑀺𑀧𑀺 𑀦 𑀯𑀦𑁆𑀤𑀦𑁆𑀢𑀺, 𑀫𑀁 𑀧𑀦 𑀤𑀺𑀲𑁆𑀯𑀸 𑀯𑀦𑁆𑀤𑀦𑁆𑀢𑀺, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀁 𑀓𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀤𑀼𑀭𑀸𑀲𑀤𑀁 𑀓𑀢𑁆𑀯𑀸 𑀫𑀜𑁆𑀜𑀦𑁆𑀢𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀕𑀭𑀼𑀓𑀸𑀭𑀫𑀤𑁄 𑀦𑀸𑀫. ‘‘𑀉𑀧𑁆𑀧𑀦𑁆𑀦𑁄 𑀧𑀜𑁆𑀳𑁄 𑀫𑀬𑁆𑀳𑀫𑁂𑀯 𑀫𑀼𑀔𑁂𑀦 𑀙𑀺𑀚𑁆𑀚𑀢𑀺, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸𑀧𑀺 𑀆𑀕𑀘𑁆𑀙𑀦𑁆𑀢𑀸𑀧𑀺 𑀫𑀫𑁂𑀯 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀼𑀭𑁂𑀓𑁆𑀔𑀸𑀭𑀫𑀤𑁄 𑀦𑀸𑀫. 𑀅𑀕𑀸𑀭𑀺𑀬𑀲𑁆𑀲 𑀢𑀸𑀯 𑀫𑀳𑀸𑀧𑀭𑀺𑀯𑀸𑀭𑀲𑁆𑀲 ‘‘𑀧𑀼𑀭𑀺𑀲𑀲𑀢𑀫𑁆𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀫𑁆𑀧𑀺 𑀫𑀁 𑀧𑀭𑀺𑀯𑀸𑀭𑁂𑀢𑀻’’𑀢𑀺, 𑀅𑀦𑀕𑀸𑀭𑀺𑀬𑀲𑁆𑀲 ‘‘𑀲𑀫𑀡𑀲𑀢𑀫𑁆𑀧𑀺 𑀲𑀫𑀡𑀲𑀳𑀲𑁆𑀲𑀫𑁆𑀧𑀺 𑀫𑀁 𑀧𑀭𑀺𑀯𑀸𑀭𑁂𑀢𑀺, 𑀲𑁂𑀲𑀸 𑀅𑀧𑁆𑀧𑀧𑀭𑀺𑀯𑀸𑀭𑀸, 𑀅𑀳𑀁 𑀫𑀳𑀸𑀧𑀭𑀺𑀯𑀸𑀭𑁄 𑀘𑁂𑀯 𑀲𑀼𑀘𑀺𑀧𑀭𑀺𑀯𑀸𑀭𑁄 𑀘𑀸’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀭𑀺𑀯𑀸𑀭𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 ¶ 𑀧𑀭𑀺𑀪𑁄𑀕𑀫𑀢𑁆𑀢𑀓𑀫𑁆𑀧𑀺 𑀦 𑀮𑀪𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀦𑀺𑀥𑀸𑀦𑀕𑀢𑀲𑁆𑀲𑁂𑀯 𑀥𑀦𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀪𑁄𑀕𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸 𑀤𑀼𑀭𑀽𑀧𑀸, 𑀅𑀳𑀁 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄’’𑀢𑀺𑀧𑀺 ‘‘𑀅𑀯𑀲𑁂𑀲𑀲𑀢𑁆𑀢𑀸 𑀦𑀺𑀕𑁆𑀕𑀼𑀡𑀸 𑀧𑀢𑁆𑀣𑀝𑀅𑀓𑀺𑀢𑁆𑀢𑀺𑀦𑁄, 𑀫𑀬𑁆𑀳𑀁 𑀧𑀦 𑀓𑀺𑀢𑁆𑀢𑀺𑀲𑀤𑁆𑀤𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀸𑀓𑀝𑁄 ‘𑀇𑀢𑀺𑀧𑀺 𑀣𑁂𑀭𑁄 𑀩𑀳𑀼𑀲𑁆𑀲𑀼𑀢𑁄, 𑀇𑀢𑀺𑀧𑀺 𑀲𑀻𑀮𑀯𑀸, 𑀇𑀢𑀺𑀧𑀺 𑀥𑀼𑀢𑀕𑀼𑀡𑀬𑀼𑀢𑁆𑀢𑁄’’’𑀢𑀺, 𑀏𑀯𑀁 𑀲𑀭𑀻𑀭𑀯𑀡𑁆𑀡𑀁 𑀕𑀼𑀡𑀯𑀡𑁆𑀡𑀜𑁆𑀘 𑀧𑀝𑀺𑀘𑁆𑀘 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀯𑀡𑁆𑀡𑀫𑀤𑁄 𑀦𑀸𑀫.

‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀳𑀁 𑀧𑀦 𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀼𑀢𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀪𑀸𑀦𑀸, 𑀫𑀬𑁆𑀳𑀁 𑀧𑀦 𑀧𑀝𑀺𑀪𑀸𑀦𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀝𑀺𑀪𑀸𑀦𑀫𑀤𑁄 𑀦𑀸𑀫. ‘‘𑀅𑀳𑀁 𑀭𑀢𑁆𑀢𑀜𑁆𑀜𑀽 𑀅𑀲𑀼𑀓𑀁 𑀩𑀼𑀤𑁆𑀥𑀯𑀁𑀲𑀁 𑀭𑀸𑀚𑀯𑀁𑀲𑀁 𑀚𑀦𑀧𑀤𑀯𑀁𑀲𑀁 𑀕𑀸𑀫𑀯𑀁𑀲𑀁 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀬𑁄𑀕𑀁 𑀚𑀸𑀦𑀸𑀫𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀭𑀢𑁆𑀢𑀜𑁆𑀜𑀼𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸 𑀧𑀺𑀡𑁆𑀟𑀧𑀸𑀢𑀺𑀓𑀸 𑀚𑀸𑀢𑀸, 𑀅𑀳𑀁 𑀧𑀦 𑀚𑀸𑀢𑀺𑀧𑀺𑀡𑁆𑀟𑀧𑀸𑀢𑀺𑀓𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀉𑀜𑁆𑀜𑀸𑀢𑀸 𑀅𑀯𑀜𑁆𑀜𑀸𑀢𑀸, 𑀅𑀳𑀁 𑀧𑀦 𑀅𑀦𑀯𑀜𑁆𑀜𑀸𑀢𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀅𑀦𑀯𑀜𑁆𑀜𑀢𑁆𑀢𑀺𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀇𑀭𑀺𑀬𑀸𑀧𑀣𑁄 𑀅𑀧𑀸𑀲𑀸𑀤𑀺𑀓𑁄, 𑀫𑀬𑁆𑀳𑀁 𑀧𑀦 𑀧𑀸𑀲𑀸𑀤𑀺𑀓𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀇𑀭𑀺𑀬𑀸𑀧𑀣𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑀲𑀤𑀺𑀲𑀸, 𑀅𑀳𑀁 𑀧𑀦 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀯𑀸 ‘‘𑀅𑀳𑀁 𑀬𑀁 𑀬𑀁 𑀓𑀫𑁆𑀫𑀁 𑀓𑀭𑁄𑀫𑀺, 𑀢𑀁 𑀢𑀁 𑀇𑀚𑁆𑀛𑀢𑀻’’𑀢𑀺 𑀯𑀸 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀇𑀤𑁆𑀥𑀺𑀫𑀤𑁄 𑀦𑀸𑀫.

𑀬𑀲𑀫𑀤𑁄 𑀧𑀦 𑀅𑀕𑀸𑀭𑀺𑀓𑁂𑀦𑀧𑀺 𑀅𑀦𑀕𑀸𑀭𑀺𑀓𑁂𑀦𑀧𑀺 𑀤𑀻𑀧𑁂𑀢𑀩𑁆𑀩𑁄. 𑀅𑀕𑀸𑀭𑀺𑀓𑁄𑀧𑀺 𑀳𑀺 𑀏𑀓𑀘𑁆𑀘𑁄 𑀅𑀝𑁆𑀞𑀸𑀭𑀲𑀲𑀼 𑀲𑁂𑀡𑀻𑀲𑀼 𑀏𑀓𑀺𑀲𑁆𑀲𑀸 𑀚𑁂𑀝𑁆𑀞𑀓𑁄 𑀳𑁄𑀢𑀺, 𑀢𑀲𑁆𑀲 ‘‘𑀅𑀯𑀲𑁂𑀲𑁂 𑀧𑀼𑀭𑀺𑀲𑁂 𑀅𑀳𑀁 𑀧𑀝𑁆𑀞𑀧𑁂𑀫𑀺, 𑀅𑀳𑀁 𑀯𑀺𑀘𑀸𑀭𑁂𑀫𑀻’’𑀢𑀺, 𑀅𑀦𑀕𑀸𑀭𑀺𑀓𑁄𑀧𑀺 𑀏𑀓𑀘𑁆𑀘𑁄 𑀓𑀢𑁆𑀣𑀘𑀺 𑀚𑁂𑀝𑁆𑀞𑀓𑁄 𑀳𑁄𑀢𑀺, 𑀢𑀲𑁆𑀲 ‘‘𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀫𑀬𑁆𑀳𑀁 𑀑𑀯𑀸𑀤𑁂 𑀯𑀢𑁆𑀢𑀦𑁆𑀢𑀺, 𑀅𑀳𑀁 𑀚𑁂𑀝𑁆𑀞𑀓𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀬𑀲𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 ¶ 𑀲𑀢𑁆𑀢𑀸 𑀤𑀼𑀲𑁆𑀲𑀻𑀮𑀸, 𑀅𑀳𑀁 𑀧𑀦 𑀲𑀻𑀮𑀯𑀸’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀻𑀮𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀓𑀼𑀓𑁆𑀓𑀼𑀝𑀲𑁆𑀲 𑀉𑀤𑀓𑀧𑀸𑀦𑀫𑀢𑁆𑀢𑁂𑀧𑀺 𑀓𑀸𑀮𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀢𑁆𑀣𑀺, 𑀅𑀳𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀦𑀁 𑀮𑀸𑀪𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀛𑀸𑀦𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀦𑀺𑀲𑁆𑀲𑀺𑀧𑁆𑀧𑀸, 𑀅𑀳𑀁 𑀲𑀺𑀧𑁆𑀧𑀯𑀸’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 ¶ 𑀲𑀺𑀧𑁆𑀧𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀭𑀲𑁆𑀲𑀸, 𑀅𑀳𑀁 𑀤𑀻𑀖𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀆𑀭𑁄𑀳𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸 𑀲𑀢𑁆𑀢𑀸 𑀭𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺 𑀤𑀻𑀖𑀸 𑀯𑀸, 𑀅𑀳𑀁 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀭𑀺𑀡𑀸𑀳𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀁 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁, 𑀫𑀬𑁆𑀳𑀁 𑀧𑀦 𑀫𑀦𑀸𑀧𑀁 𑀧𑀸𑀲𑀸𑀤𑀺𑀓’’𑀦𑁆𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀲𑀡𑁆𑀞𑀸𑀦𑀫𑀤𑁄 𑀦𑀸𑀫. ‘‘𑀅𑀯𑀲𑁂𑀲𑀸𑀦𑀁 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂 𑀩𑀳𑀽 𑀤𑁄𑀲𑀸, 𑀫𑀬𑁆𑀳𑀁 𑀧𑀦 𑀲𑀭𑀻𑀭𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀦𑀢𑁆𑀣𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀧𑀸𑀭𑀺𑀧𑀽𑀭𑀺𑀫𑀤𑁄 𑀦𑀸𑀫. 𑀏𑀯𑀫𑀬𑀁 𑀲𑀩𑁆𑀩𑁄𑀧𑀺 𑀚𑀸𑀢𑀺𑀆𑀤𑀺𑀁 𑀦𑀺𑀲𑁆𑀲𑀸𑀬 𑀫𑀚𑁆𑀚𑀦𑀸𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑁄 𑀫𑀸𑀦𑁄 𑀇𑀥 ‘‘𑀫𑀤𑁄’’𑀢𑀺 𑀯𑀼𑀢𑁆𑀢𑁄. 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀧𑀫𑀸𑀤𑁄, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀢𑀺𑀬𑀸 𑀅𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑀁, 𑀲𑀢𑀺𑀯𑀺𑀭𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀡𑁆𑀳𑀸𑀯𑀺𑀚𑁆𑀚𑀸 𑀧𑀸𑀓𑀝𑀸𑀬𑁂𑀯.

𑀮𑁄𑀪𑀸𑀤𑀬𑁄 𑀘 𑀧𑀼𑀦 𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮𑀦𑁆𑀢𑀺 𑀢𑀺𑀓𑀯𑀲𑁂𑀦 𑀕𑀳𑀺𑀢𑀸. 𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼𑀧𑀺 𑀢𑀺𑀯𑀺𑀥-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀬𑁄 𑀢𑀺𑀯𑀺𑀥𑀲𑀁𑀓𑀺𑀮𑁂𑀲𑀸. 𑀭𑀸𑀕𑀫𑀮𑀸𑀤𑀬𑁄 𑀫𑀮𑀻𑀦𑀪𑀸𑀯𑀓𑀭𑀢𑁆𑀢𑀸 𑀢𑀺𑀯𑀺𑀥𑀫𑀮𑀸𑀦𑀺. 𑀭𑀸𑀕𑀸𑀤𑀬𑁄 𑀳𑀺 𑀘𑀺𑀢𑁆𑀢𑀁 𑀫𑀮𑀻𑀦𑀁 𑀓𑀭𑁄𑀦𑁆𑀢𑀺, 𑀫𑀮𑀁 𑀕𑀸𑀳𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀮𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀭𑀸𑀕𑁄 𑀯𑀺𑀲𑀫𑀁, 𑀤𑁄𑀲𑁄 𑀯𑀺𑀲𑀫𑀁, 𑀫𑁄𑀳𑁄 𑀯𑀺𑀲𑀫’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀏𑀯𑀁 𑀯𑀼𑀢𑁆𑀢𑀸 𑀭𑀸𑀕𑀸𑀤𑀬𑁄 ‘‘𑀓𑀸𑀬𑀯𑀺𑀲𑀫𑀁 𑀯𑀘𑀻𑀯𑀺𑀲𑀫𑀁 𑀫𑀦𑁄𑀯𑀺𑀲𑀫’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀏𑀯𑀫𑀸𑀕𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀢𑀺𑀯𑀺𑀥𑀯𑀺𑀲𑀫𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀭𑀸𑀕𑀸𑀤𑀻𑀲𑀼 𑀘𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼 𑀘 𑀲𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑀺, 𑀧𑀓𑁆𑀔𑀮𑀺𑀢𑀸 𑀘 𑀲𑀸𑀲𑀦𑀢𑁄𑀧𑀺 𑀲𑀼𑀕𑀢𑀺𑀢𑁄𑀧𑀺 𑀧𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀓𑁆𑀔𑀮𑀦𑀧𑀸𑀢𑀳𑁂𑀢𑀼𑀪𑀸𑀯𑀢𑁄 ‘‘𑀯𑀺𑀲𑀫𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀓𑀸𑀫𑀲𑀜𑁆𑀜𑀸 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀯𑀺𑀳𑀺𑀁𑀲𑀸𑀲𑀜𑁆𑀜𑀸’’𑀢𑀺 (𑀯𑀺𑀪. 𑁯𑁧𑁧) 𑀏𑀯𑀫𑀸𑀕𑀢𑀸 𑀓𑀸𑀫𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀜𑁆𑀜𑀸 𑀢𑀺𑀯𑀺𑀥𑀲𑀜𑁆𑀜𑀸. 𑀢𑀣𑀸 ‘‘𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄’’𑀢𑀺 𑀏𑀯𑀫𑀸𑀕𑀢𑀸 𑀢𑀺𑀯𑀺𑀥𑀯𑀺𑀢𑀓𑁆𑀓𑀸. 𑀢𑀡𑁆𑀳𑀸𑀧𑀧𑀜𑁆𑀘𑁄 𑀤𑀺𑀝𑁆𑀞𑀺𑀧𑀧𑀜𑁆𑀘𑁄 𑀫𑀸𑀦𑀧𑀧𑀜𑁆𑀘𑁄𑀢𑀺 𑀇𑀫𑁂 𑀢𑀺𑀯𑀺𑀥𑀧𑀧𑀜𑁆𑀘𑀸. 𑀯𑀝𑁆𑀝𑀲𑁆𑀫𑀺𑀁 𑀲𑀢𑁆𑀢𑁂 𑀧𑀧𑀜𑁆𑀘𑁂𑀦𑁆𑀢𑀻𑀢𑀺 𑀢𑀡𑁆𑀳𑀸𑀤𑀬𑁄 ‘‘𑀧𑀧𑀜𑁆𑀘𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀸𑀢𑀺𑀆𑀤𑀻𑀲𑀼 𑀘𑀢𑀼𑀩𑁆𑀩𑀺𑀥-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀢𑁄 𑀏𑀲𑀦𑁆𑀢𑀻𑀢𑀺 𑀯𑀺𑀧𑀭𑀺𑀬𑁂𑀲𑀸. ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑁂𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑁂𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑁂𑀲𑁄 ¶ , 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑁂𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑁂𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑁂𑀲𑁄, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑁂𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑁂𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑁂𑀲𑁄 ¶ , 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑁂𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑁂𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑁂𑀲𑁄’’𑀢𑀺 𑀏𑀯𑀫𑀸𑀕𑀢𑀸 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀘𑀢𑀼𑀦𑁆𑀦𑀁 𑀅𑀦𑀺𑀘𑁆𑀘𑀸𑀤𑀺𑀯𑀢𑁆𑀣𑀽𑀦𑀁 𑀯𑀲𑁂𑀦 ‘‘𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀸’’𑀢𑀺 𑀯𑀼𑀢𑁆𑀢𑀸. 𑀏𑀢𑁆𑀣 𑀧𑀦 𑀘𑀺𑀢𑁆𑀢𑀓𑀺𑀘𑁆𑀘𑀲𑁆𑀲 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀸𑀬 𑀅𑀓𑀼𑀲𑀮𑀲𑀜𑁆𑀜𑀸𑀬 𑀲𑀓𑀓𑀺𑀘𑁆𑀘𑀲𑁆𑀲 𑀩𑀮𑀯𑀓𑀸𑀮𑁂 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀺𑀝𑁆𑀞𑀺𑀯𑀺𑀭𑀳𑀺𑀢𑀲𑁆𑀲𑁂𑀯 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀓𑀓𑀺𑀘𑁆𑀘𑀲𑁆𑀲 𑀩𑀮𑀯𑀓𑀸𑀮𑁂 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄. 𑀢𑀲𑁆𑀫𑀸 𑀲𑀩𑁆𑀩𑀤𑀼𑀩𑁆𑀩𑀮𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀢𑀢𑁄 𑀩𑀮𑀯𑀢𑀭𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀲𑀩𑁆𑀩𑀩𑀮𑀯𑀢𑀭𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄. 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀲𑀜𑁆𑀜𑀸 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀕𑀳𑀡𑀢𑁄. 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀘𑀺𑀢𑁆𑀢𑀁 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀲𑁆𑀲𑀧𑀺 𑀲𑀫𑁆𑀧𑀸𑀤𑀦𑀢𑁄. 𑀓𑀫𑁆𑀫𑀸𑀭𑀲𑁆𑀲 𑀫𑀳𑀸𑀲𑀡𑁆𑀟𑀸𑀲𑁂𑀦 𑀅𑀬𑁄𑀕𑀳𑀡𑀁 𑀯𑀺𑀬 𑀤𑀺𑀝𑁆𑀞𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀲𑀦𑀢𑁄. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸, 𑀅𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸𑀢𑀺 𑀇𑀫𑁂 𑀅𑀝𑁆𑀞 𑀯𑀺𑀧𑀮𑁆𑀮𑀸𑀲𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀓𑀸 𑀳𑁄𑀦𑁆𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺. 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁯) 𑀏𑀯𑀫𑀸𑀕𑀢𑀸 𑀓𑀸𑀫𑀢𑀡𑁆𑀳𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀲𑀯𑀦𑁆𑀢𑀺 𑀘𑀓𑁆𑀔𑀼𑀆𑀤𑀺𑀢𑁄 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼𑀆𑀤𑀺𑀢𑁄 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀧𑀦 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀆𑀲𑀯𑀲𑀤𑁆𑀤𑁄𑀢𑀺. 𑀅𑀣 𑀯𑀸 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼𑀁, 𑀑𑀓𑀸𑀲𑀢𑁄 𑀬𑀸𑀯 𑀪𑀯𑀕𑁆𑀕𑀁 𑀲𑀯𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸, 𑀏𑀢𑁂 𑀥𑀫𑁆𑀫𑁂 𑀏𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀥𑀺𑀅𑀢𑁆𑀣𑁄 𑀳𑀺 𑀆-𑀓𑀸𑀭𑁄. 𑀅𑀯𑀥𑀺 𑀘 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀫𑀭𑀺𑀬𑀸𑀤𑀁 𑀓𑀺𑀭𑀺𑀬𑀁 𑀩𑀳𑀺𑀓𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀧𑀸𑀝𑀮𑀺𑀧𑀼𑀢𑁆𑀢𑀁 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺, 𑀅𑀪𑀺𑀯𑀺𑀥𑀺 𑀧𑀦 𑀓𑀺𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀪𑀯𑀕𑁆𑀕𑀁 𑀪𑀕𑀯𑀢𑁄 ¶ 𑀬𑀲𑁄 𑀧𑀯𑀢𑁆𑀢𑀢𑀻’’𑀢𑀺, 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀘𑀸𑀬𑀁 𑀆-𑀓𑀸𑀭𑁄 𑀇𑀥 𑀕𑀳𑀺𑀢𑁄, 𑀢𑀲𑁆𑀫𑀸 𑀢𑁂 𑀥𑀫𑁆𑀫𑁂 𑀢𑀜𑁆𑀘 𑀑𑀓𑀸𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀯𑀦𑁆𑀢𑀻𑀢𑀺 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀺𑀭𑀸𑀤𑀬𑁄 𑀆𑀲𑀯𑀸 𑀯𑀺𑀬𑀸𑀢𑀺𑀧𑀺 𑀆𑀲𑀯𑀸. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀸 𑀫𑀤𑀺𑀭𑀸𑀤𑀬𑁄 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀘 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀆𑀲𑀯𑀸, 𑀏𑀢𑁂𑀬𑁂𑀯 𑀪𑀯𑀺𑀢𑀼𑀫𑀭𑀳𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁬𑁧). 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂 𑀑𑀓𑀸𑀲𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀸𑀦𑀸𑀤𑀻𑀲𑀼 𑀘 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦 ¶ 𑀅𑀪𑀺𑀩𑁆𑀬𑀸𑀧𑀦𑀁 𑀫𑀤𑀦𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀏𑀢𑁂𑀲𑀼𑀬𑁂𑀯 𑀆𑀲𑀯𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺 𑀧𑀲𑀯𑀦𑁆𑀢𑀻𑀢𑀺𑀧𑀺 𑀆𑀲𑀯𑀸. 𑀦 𑀳𑀺 𑀢𑀁 𑀓𑀺𑀜𑁆𑀘𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀬𑀁 𑀆𑀲𑀯𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬.

‘‘𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄’’𑀢𑀺 (𑀲𑀁. 𑀦𑀺. 𑁫.𑁧𑁭𑁫; 𑀫𑀳𑀸𑀦𑀺. 𑁨𑁯, 𑁧𑁪𑁭) 𑀏𑀯𑀫𑀸𑀕𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀘𑀢𑁆𑀢𑀸𑀭𑁄 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. ‘‘𑀓𑀸𑀫𑁄𑀖𑁄 𑀪𑀯𑁄𑀖𑁄 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄’’𑀢𑀺 (𑀲𑀁. 𑀦𑀺. 𑁫.𑁧𑁭𑁨; 𑀫𑀳𑀸𑀦𑀺. 𑁧𑁪; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁧) 𑀏𑀯𑀫𑀸𑀕𑀢𑀸 𑀘𑀢𑁆𑀢𑀸𑀭𑁄 𑀓𑀸𑀫𑀢𑀡𑁆𑀳𑀸𑀤𑀬𑁄 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸. 𑀢𑁂𑀬𑁂𑀯 ‘‘𑀓𑀸𑀫𑀬𑁄𑀕𑁄 𑀪𑀯𑀬𑁄𑀕𑁄 𑀤𑀺𑀝𑁆𑀞𑀺𑀬𑁄𑀕𑁄 𑀅𑀯𑀺𑀚𑁆𑀚𑀸𑀬𑁄𑀕𑁄’’𑀢𑀺 (𑀲𑀁. 𑀦𑀺. 𑁫.𑁧𑁭𑁩; 𑀅. 𑀦𑀺. 𑁪.𑁧𑁦) 𑀏𑀯𑀫𑀸𑀕𑀢𑀸 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀅𑀭𑀺𑀬𑀸 𑀏𑀢𑀸𑀬 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀕𑀢𑀺, 𑀲𑀸 𑀙𑀦𑁆𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸. ‘‘𑀘𑀻𑀯𑀭𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢, 𑀲𑁂𑀦𑀸𑀲𑀦, 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁪.𑁯) 𑀏𑀯𑀫𑀸𑀕𑀢𑀸 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸. 𑀢𑀢𑁆𑀣 𑀇𑀢𑀺𑀪𑀯𑀸𑀪𑀯𑀳𑁂𑀢𑀽𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄, 𑀬𑀣𑀸 𑀘𑀻𑀯𑀭𑀸𑀤𑀺𑀳𑁂𑀢𑀼, 𑀏𑀯𑀁 𑀪𑀯𑀸𑀪𑀯𑀳𑁂𑀢𑀼𑀧𑀻𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑁄𑀢𑀺 𑀘𑁂𑀢𑁆𑀣 𑀧𑀡𑀻𑀢𑀧𑀡𑀻𑀢𑀢𑀭𑀸𑀦𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺.

𑀧𑀜𑁆𑀘 𑀘𑁂𑀢𑁄𑀔𑀺𑀮𑀸𑀢𑀺𑀆𑀤𑀻𑀲𑀼 ¶ ‘‘𑀩𑀼𑀤𑁆𑀥𑁂 𑀓𑀗𑁆𑀔𑀢𑀺, 𑀥𑀫𑁆𑀫𑁂, 𑀲𑀗𑁆𑀖𑁂, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄’’𑀢𑀺 (𑀫. 𑀦𑀺. 𑁧.𑁧𑁮𑁫; 𑀤𑀻. 𑀦𑀺. 𑁩.𑁩𑁧𑁯) 𑀏𑀯𑀫𑀸𑀕𑀢𑀸𑀦𑀺 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸𑀦𑀺, 𑀘𑁂𑀢𑁄 𑀔𑀺𑀮𑀬𑀢𑀺 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀺 𑀏𑀢𑁂𑀳𑀻𑀢𑀺 𑀘𑁂𑀢𑁄𑀔𑀺𑀮𑀸𑀦𑀺. 𑀯𑀺𑀦𑀺𑀩𑀦𑁆𑀥𑀸𑀤𑀻𑀲𑀼𑀧𑀺 𑀧𑀜𑁆𑀘-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. ‘‘𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀫. 𑀦𑀺. 𑁧.𑁧𑁮𑁬; 𑀤𑀻. 𑀦𑀺. 𑁩.𑁩𑁨𑁦) 𑀆𑀕𑀢𑀸 𑀧𑀜𑁆𑀘 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀡𑁆𑀳𑀦𑁆𑀢𑀻𑀢𑀺 𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀸. 𑀏𑀢𑁂 𑀳𑀺 𑀢𑀡𑁆𑀳𑀸𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀅𑀯𑀲𑀭𑀸𑀧𑁆𑀧𑀤𑀸𑀦𑀯𑀲𑁂𑀦 𑀘𑀺𑀢𑁆𑀢𑀁 𑀩𑀦𑁆𑀥𑀁 𑀯𑀺𑀬 𑀲𑀫𑁄𑀭𑁄𑀥𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀘𑁂𑀢𑁄 𑀯𑀺𑀭𑀽𑀧𑀁 𑀦𑀺𑀩𑀦𑁆𑀥𑀻𑀬𑀢𑀺 𑀲𑀁𑀬𑀫𑀻𑀬𑀢𑀺 𑀏𑀢𑁂𑀳𑀻𑀢𑀺 𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀸. 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀺 𑀧𑀜𑁆𑀘 𑀓𑀼𑀲𑀮𑀥𑀫𑁆𑀫𑁂 𑀦𑀻𑀯𑀸𑀭𑁂𑀦𑁆𑀢𑀺 𑀆𑀯𑀭𑀦𑁆𑀢𑀻𑀢𑀺 𑀦𑀻𑀯𑀭𑀡𑀸𑀦𑀺. 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀬𑁄 𑀧𑀜𑁆𑀘𑀸𑀪𑀺𑀦𑀦𑁆𑀤𑀦𑀸.

𑀙 ¶ 𑀯𑀺𑀯𑀸𑀤𑀫𑀽𑀮𑀸𑀢𑀺𑀆𑀤𑀻𑀲𑀼 𑀓𑁄𑀥𑁄 𑀫𑀓𑁆𑀔𑁄 𑀇𑀲𑁆𑀲𑀸 𑀲𑀸𑀞𑁂𑀬𑁆𑀬𑀁 𑀧𑀸𑀧𑀺𑀘𑁆𑀙𑀢𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄𑀢𑀺 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀬𑀲𑁆𑀫𑀸 𑀓𑀼𑀤𑁆𑀥𑁄 𑀯𑀸 𑀓𑁄𑀥𑀯𑀲𑁂𑀦…𑀧𑁂… 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀯𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀲𑀺𑀢𑀸𑀬 𑀓𑀮𑀳𑀁 𑀯𑀺𑀕𑁆𑀕𑀳𑀁 𑀯𑀺𑀯𑀸𑀤𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑁄𑀥𑀸𑀤𑀬𑁄 ‘‘𑀙 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀽𑀧𑀢𑀡𑁆𑀳𑀸𑀲𑀤𑁆𑀤𑀢𑀡𑁆𑀳𑀸𑀤𑀬𑁄 𑀙 𑀢𑀡𑁆𑀳𑀸𑀓𑀸𑀬𑀸. 𑀓𑀸𑀫𑀭𑀸𑀕𑀧𑀝𑀺𑀖𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀪𑀯𑀭𑀸𑀕𑀫𑀸𑀦𑀸𑀯𑀺𑀚𑁆𑀚𑀸 𑀲𑀢𑁆𑀢𑀸𑀦𑀼𑀲𑀬𑀸. 𑀣𑀸𑀫𑀕𑀢𑀝𑁆𑀞𑁂𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀘 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀘𑀸𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀫𑀺𑀘𑁆𑀙𑀸𑀆𑀚𑀻𑀯𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀢𑀺𑀫𑀺𑀘𑁆𑀙𑀸𑀲𑀫𑀸𑀥𑀻 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸.

‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁦𑁩; 𑁩.𑁩𑁫𑁯) 𑀏𑀯𑀫𑀸𑀕𑀢𑀸 𑀧𑀭𑀺𑀬𑁂𑀲𑀦𑀸𑀤𑀬𑁄 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸. 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁦𑁩) 𑀢𑀡𑁆𑀳𑀁 𑀧𑀝𑀺𑀘𑁆𑀘𑀸𑀢𑀺 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬. 𑀧𑀭𑀺𑀬𑁂𑀲𑀦𑀸𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸. 𑀲𑀸 ¶ 𑀳𑀺 𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀺. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄. 𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀺. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀇𑀥 𑀯𑀺𑀢𑀓𑁆𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀜𑁆𑀘 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀢𑀺 ‘‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀢𑁆𑀣𑀸𑀬, 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀙𑀦𑁆𑀤𑀭𑀸𑀕𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀩𑁆𑀩𑀮𑀭𑀸𑀕𑁄 𑀘 𑀩𑀮𑀯𑀭𑀸𑀕𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀙𑀦𑁆𑀤𑁄𑀢𑀺 𑀳𑀺 𑀇𑀥 𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦𑀁. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑀲𑁆𑀲 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀭𑀓𑁆𑀔𑁄𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀼𑀲𑀕𑁄𑀧𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀡𑀁. 𑀅𑀥𑀺𑀓𑀭𑁄𑀢𑀻𑀢𑀺 𑀅𑀥𑀺𑀓𑀭𑀡𑀁, 𑀓𑀸𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀆𑀭𑀓𑁆𑀔𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀏𑀓𑀢𑁄𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀯𑀺𑀭𑁄𑀥𑁄 𑀯𑀺𑀕𑁆𑀕𑀳𑁄. 𑀧𑀘𑁆𑀙𑀺𑀫𑁄 𑀧𑀘𑁆𑀙𑀺𑀫𑁄 𑀯𑀺𑀯𑀸𑀤𑁄. 𑀢𑀼𑀯𑀁 𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀘𑀦𑀁, 𑀢𑁆𑀯𑀁 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄.

𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀫𑀼𑀲𑀸𑀯𑀸𑀤𑀧𑀺𑀲𑀼𑀡𑀯𑀸𑀘𑀸𑀨𑀭𑀼𑀲𑀯𑀸𑀘𑀸𑀲𑀫𑁆𑀨𑀧𑁆𑀧𑀮𑀸𑀧𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀻 ¶ 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀧𑀜𑁆𑀘 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀭𑀽𑀧𑀢𑀡𑁆𑀳𑀸𑀤𑀺𑀙𑀢𑀡𑁆𑀳𑀸𑀬𑁂𑀯 𑀧𑀘𑁆𑀘𑁂𑀓𑀁 𑀓𑀸𑀫𑀢𑀡𑁆𑀳𑀸𑀪𑀯𑀢𑀡𑁆𑀳𑀸𑀯𑀺𑀪𑀯𑀢𑀡𑁆𑀳𑀸𑀯𑀲𑁂𑀦 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀭𑀽𑀧𑀸𑀭𑀫𑁆𑀫𑀡𑀸 𑀢𑀡𑁆𑀳𑀸, 𑀭𑀽𑀧𑁂 𑀯𑀸 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸, 𑀲𑀸 𑀓𑀸𑀫𑀭𑀸𑀕𑀪𑀸𑀯𑁂𑀦 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀓𑀸𑀫𑀢𑀡𑁆𑀳𑀸, 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢’’𑀦𑁆𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀪𑀯𑀢𑀡𑁆𑀳𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 ‘‘𑀭𑀽𑀧𑀁 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀧𑁂𑀘𑁆𑀘 𑀦 𑀪𑀯𑀢𑀻’’𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 ¶ 𑀏𑀯𑀁 𑀢𑀺𑀯𑀺𑀥𑀸 𑀳𑁄𑀢𑀺. 𑀬𑀣𑀸 𑀘 𑀭𑀽𑀧𑀢𑀡𑁆𑀳𑀸, 𑀏𑀯𑀁 𑀲𑀤𑁆𑀤𑀢𑀡𑁆𑀳𑀸𑀤𑀬𑁄𑀧𑀻𑀢𑀺 𑀏𑀢𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲, 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀅𑀝𑁆𑀞𑀼𑀢𑁆𑀢𑀭𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀪𑁂𑀤-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 ‘‘𑀮𑁄𑀪𑀧𑁆𑀧𑀪𑁂𑀤𑁄 𑀤𑁄𑀲𑀧𑁆𑀧𑀪𑁂𑀤𑁄 𑀬𑀸𑀯 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧𑀪𑁂𑀤𑁄’’𑀢𑀺. 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀲𑀢𑁆𑀢𑀸𑀦𑀁 𑀤𑀭𑀣𑀧𑀭𑀺𑀴𑀸𑀳𑀓𑀭𑀸𑀦𑀺 𑀓𑀺𑀮𑁂𑀲𑀸𑀦𑀁 𑀅𑀦𑁂𑀓𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺. 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑀢𑁄 𑀳𑀺 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀪𑀸𑀕𑀢𑁄 𑀘 𑀅𑀦𑀦𑁆𑀢𑀧𑁆𑀧𑀪𑁂𑀤𑀸 𑀓𑀺𑀮𑁂𑀲𑀸.

𑀲𑀗𑁆𑀔𑁂𑀧𑀢𑁄 𑀯𑀸𑀢𑀺𑀆𑀤𑀻𑀲𑀼 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀫𑀸𑀭𑀡𑀝𑁆𑀞𑁂𑀦 𑀯𑀺𑀩𑀸𑀥𑀦𑀝𑁆𑀞𑁂𑀦 𑀓𑀺𑀮𑁂𑀲𑀸𑀯 𑀫𑀸𑀭𑁄𑀢𑀺 𑀓𑀺𑀮𑁂𑀲𑀫𑀸𑀭𑁄. 𑀯𑀥𑀓𑀝𑁆𑀞𑁂𑀦 𑀔𑀦𑁆𑀥𑀸𑀯 𑀫𑀸𑀭𑁄𑀢𑀺 𑀔𑀦𑁆𑀥𑀫𑀸𑀭𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀯𑀥𑀓𑀁 𑀭𑀽𑀧𑀁, 𑀯𑀥𑀓𑀁 𑀭𑀽𑀧𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀚𑀸𑀢𑀺𑀚𑀭𑀸𑀤𑀺𑀫𑀳𑀸𑀩𑁆𑀬𑀲𑀦𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀪𑀺𑀲𑀗𑁆𑀔𑀸𑀭𑁄𑀯 𑀫𑀸𑀭𑁄 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄. 𑀲𑀁𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀕𑀼𑀡𑀫𑀸𑀭𑀡𑀝𑁆𑀞𑁂𑀦 𑀤𑁂𑀯𑀧𑀼𑀢𑁆𑀢𑁄𑀯 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄. 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑁆𑀲 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀜𑁆𑀘 𑀚𑀸𑀦𑀺𑀓𑀭𑀡𑁂𑀦 𑀫𑀳𑀸𑀩𑀸𑀥𑀭𑀽𑀧𑀢𑁆𑀢𑀸 𑀫𑀘𑁆𑀘𑀼 𑀏𑀯 𑀫𑀸𑀭𑁄𑀢𑀺 𑀫𑀘𑁆𑀘𑀼𑀫𑀸𑀭𑁄. 𑀢𑀢𑁆𑀣 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀓𑀺𑀮𑁂𑀲𑀫𑀸𑀭𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀁, 𑀲𑀳𑀸𑀬𑀯𑁂𑀓𑀮𑁆𑀮𑀓𑀭𑀡𑀯𑀲𑁂𑀦 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀁, 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀫𑀸𑀭𑀜𑁆𑀘 𑀅𑀪𑀜𑁆𑀚𑀺, 𑀪𑀕𑁆𑀕𑁂 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀲𑁆𑀲𑀬𑀸𑀦𑀦𑁆𑀢𑀺 𑀉𑀧𑀤𑁆𑀤𑀯𑀸𑀦𑀁.

𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀥𑀭𑀲𑁆𑀲𑀸𑀢𑀺 𑀅𑀦𑁂𑀓 𑀲𑀢 𑀧𑀼𑀜𑁆𑀜 𑀦𑀺𑀩𑁆𑀩𑀢𑁆𑀢𑀫𑀳𑀸 𑀧𑀼𑀭𑀺𑀲𑀮𑀓𑁆𑀔𑀡𑀥𑀭𑀲𑁆𑀲. 𑀏𑀢𑁆𑀣 𑀳𑀺 ‘‘𑀓𑁂𑀯𑀮𑀁 𑀲𑀢𑀫𑀢𑁆𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀓𑁂𑀓𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀦 𑀭𑁄𑀘𑀬𑀺𑀁𑀲𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ¶ ‘‘𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸’’𑀢𑀺, 𑀅𑀦𑀦𑁆𑀢𑀸𑀲𑀼 𑀧𑀦 𑀮𑁄𑀓𑀥𑀸𑀢𑀽𑀲𑀼 𑀬𑀢𑁆𑀢𑀓𑀸 𑀲𑀢𑁆𑀢𑀸, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀘𑁆𑀘𑁂𑀓𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀢𑀸𑀦𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀬𑀢𑁆𑀢𑀓𑀸𑀦𑀺, 𑀢𑀢𑁄 𑀏𑀓𑁂𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀫𑀳𑀸𑀲𑀢𑁆𑀢𑁂𑀦 𑀲𑀢𑀕𑀼𑀡𑀁 𑀓𑀢𑀁 𑀲𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀭𑁄𑀘𑀬𑀺𑀁𑀲𑀼. 𑀢𑀲𑁆𑀫𑀸 𑀇𑀥 𑀲𑀢-𑀲𑀤𑁆𑀤𑁄 𑀩𑀳𑀼𑀪𑀸𑀯𑀧𑀭𑀺𑀬𑀸𑀬𑁄, 𑀦 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑀯𑀘𑀦𑁄𑀢𑀺 𑀤𑀝𑁆𑀞𑀩𑁆𑀩𑁄 ‘‘𑀲𑀢𑀕𑁆𑀖𑀁 𑀲𑀢𑀁 𑀤𑁂𑀯𑀫𑀦𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 ¶ 𑀯𑀺𑀬. 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺 𑀇𑀢𑀭𑀸𑀲𑀁 𑀨𑀮𑀲𑀫𑁆𑀧𑀤𑀸𑀦𑀁 𑀫𑀽𑀮𑀪𑀸𑀯𑀢𑁄 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀘. 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀇𑀤𑀁 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀳𑀸𑀦𑀲𑀫𑁆𑀧𑀤𑀸𑀧𑀼𑀩𑁆𑀩𑀓𑀢𑁆𑀢𑀸 𑀜𑀸𑀡𑀲𑀫𑁆𑀧𑀤𑀸𑀤𑀻𑀦𑀁 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀺𑀬𑀲𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄𑀢𑀺 𑀏𑀢𑁆𑀣 𑀪𑀸𑀕𑁆𑀬𑀯𑀦𑁆𑀢𑀢𑀸𑀬 𑀮𑁄𑀓𑀺𑀬𑀸𑀦𑀁 𑀩𑀳𑀼𑀫𑀢𑀪𑀸𑀯𑁄, 𑀪𑀕𑁆𑀕𑀤𑁄𑀲𑀢𑀸𑀬 𑀲𑀭𑀺𑀓𑁆𑀔𑀓𑀸𑀦𑀁 𑀩𑀳𑀼𑀫𑀢𑀪𑀸𑀯𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀜𑁆𑀜𑀯𑀦𑁆𑀢𑀁 𑀕𑀳𑀝𑁆𑀞𑀸 𑀔𑀢𑁆𑀢𑀺𑀬𑀸𑀤𑀬𑁄 𑀅𑀪𑀺𑀕𑀘𑁆𑀙𑀦𑁆𑀢𑀺, 𑀧𑀳𑀻𑀦𑀤𑁄𑀲𑀁 𑀤𑁄𑀲𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀧𑀩𑁆𑀩𑀚𑀺𑀢𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀅𑀪𑀺𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀪𑀺𑀕𑀫𑀦𑀻𑀬𑀢𑀸’’𑀢𑀺. 𑀅𑀪𑀺𑀕𑀢𑀸𑀦𑀜𑁆𑀘 𑀢𑁂𑀲𑀁 𑀓𑀸𑀬𑀘𑀺𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑁂 𑀧𑀝𑀺𑀩𑀮𑀪𑀸𑀯𑁄 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀲𑀩𑁆𑀪𑀸𑀯𑀢𑁄 𑀭𑀽𑀧𑀓𑀸𑀬𑀁 𑀢𑀲𑁆𑀲 𑀧𑀲𑀸𑀤𑀘𑀓𑁆𑀔𑀼𑀦𑀸, 𑀥𑀫𑁆𑀫𑀓𑀸𑀬𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀤𑀼𑀓𑁆𑀔𑀤𑁆𑀯𑀬𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀕𑁆𑀬𑀯𑀦𑁆𑀢𑀢𑀸𑀬 𑀉𑀧𑀕𑀢𑀸𑀦𑀁 𑀆𑀫𑀺𑀲𑀤𑀸𑀦𑀁 𑀤𑁂𑀢𑀺, 𑀪𑀕𑁆𑀕𑀤𑁄𑀲𑀢𑀸𑀬 𑀥𑀫𑁆𑀫𑀤𑀸𑀦𑀁 𑀤𑁂𑀢𑀻𑀢𑀺 𑀆𑀳 ‘‘𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀉𑀧𑀓𑀸𑀭𑀺𑀢𑀸’’𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀘 𑀲𑀁𑀬𑁄𑀚𑀦𑀲𑀫𑀢𑁆𑀣𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 ‘‘𑀧𑀼𑀩𑁆𑀩𑁂 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑁂𑀳𑀺 𑀫𑀬𑀸 𑀅𑀬𑀁 𑀮𑁄𑀓𑀕𑁆𑀕𑀪𑀸𑀯𑁄 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑀦𑁂𑀦 𑀅𑀪𑀺𑀕𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀳𑀺 𑀲𑀁𑀬𑁄𑀚𑀦𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺.

𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁 𑀦𑀸𑀫 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑀲𑀻𑀪𑀸𑀯𑀸𑀧𑀸𑀤𑀦𑀁𑀬𑁂𑀯, 𑀧𑀝𑀺𑀓𑀽𑀮𑀸𑀤𑀻𑀲𑀼 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀺𑀢𑀸𑀤𑀺𑀯𑀺𑀳𑀸𑀭𑀲𑀺𑀤𑁆𑀥𑀺, 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀆𑀤𑀺𑀓𑁄 𑀇𑀤𑁆𑀥𑀺𑀯𑀺𑀥𑁄𑀧𑀺 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀫𑁂𑀯 𑀘𑀺𑀢𑁆𑀢𑀪𑀸𑀯𑀦𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀇𑀚𑁆𑀛𑀦𑀢𑁄. 𑀅𑀡𑀺𑀫𑀸𑀮𑀖𑀺𑀫𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀺𑀫𑀸 𑀧𑀢𑁆𑀢𑀺 𑀧𑀸𑀓𑀫𑁆𑀫𑀁 𑀈𑀲𑀺𑀢𑀸 𑀯𑀲𑀺𑀢𑀸 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸𑀢𑀺 𑀇𑀫𑁂 𑀙𑀧𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀓𑀸𑀬𑀲𑁆𑀲 𑀅𑀡𑀼𑀪𑀸𑀯𑀓𑀭𑀡𑀁 𑀅𑀡𑀺𑀫𑀸. 𑀆𑀓𑀸𑀲𑁂 𑀧𑀤𑀲𑀸 𑀕𑀫𑀦𑀸𑀤𑀻𑀦𑀁 𑀅𑀭𑀳𑀪𑀸𑀯𑁂𑀦 𑀮𑀳𑀼𑀪𑀸𑀯𑁄 𑀮𑀖𑀺𑀫𑀸. 𑀫𑀳𑀢𑁆𑀢𑀁 𑀫𑀳𑀺𑀫𑀸 𑀓𑀸𑀬𑀲𑁆𑀲 𑀫𑀳𑀦𑁆𑀢𑀢𑀸𑀧𑀸𑀤𑀦𑀁. 𑀇𑀝𑁆𑀞𑀤𑁂𑀲𑀲𑁆𑀲 𑀧𑀸𑀧𑀼𑀡𑀦𑀁 𑀧𑀢𑁆𑀢𑀺. 𑀅𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀇𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑀁 𑀧𑀸𑀓𑀫𑁆𑀫𑀁. 𑀲𑀬𑀁𑀯𑀲𑀺𑀢𑀸 𑀇𑀲𑁆𑀲𑀭𑀪𑀸𑀯𑁄 𑀈𑀲𑀺𑀢𑀸. 𑀇𑀤𑁆𑀥𑀺𑀯𑀺𑀥𑁂 𑀯𑀲𑀻𑀪𑀸𑀯𑁄 𑀯𑀲𑀺𑀢𑀸. 𑀆𑀓𑀸𑀲𑁂𑀦 𑀯𑀸 𑀕𑀘𑁆𑀙𑀢𑁄 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀭𑁄𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀯𑁄𑀲𑀸𑀦𑀧𑁆𑀧𑀢𑁆𑀢𑀺 ¶ 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸 ¶ . ‘‘𑀓𑀼𑀫𑀸𑀭𑀓𑀭𑀽𑀧𑀸𑀤𑀺𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀫𑀺𑀤𑀁 𑀅𑀝𑁆𑀞𑀯𑀺𑀥𑀁 𑀮𑁄𑀓𑀺𑀬𑀲𑀫𑁆𑀫𑀢𑀁 𑀇𑀲𑁆𑀲𑀭𑀺𑀬𑀁. 𑀢𑀁 𑀧𑀦 𑀪𑀕𑀯𑀢𑁄 𑀇𑀤𑁆𑀥𑀺𑀯𑀺𑀥𑀦𑁆𑀢𑁄𑀕𑀥𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀜𑁆𑀘𑀸𑀢𑀺 𑀆𑀳 ‘‘𑀲𑀩𑁆𑀩𑀓𑀸𑀭𑀧𑀭𑀺𑀧𑀽𑀭𑀁 𑀅𑀢𑁆𑀣𑀻’’𑀢𑀺. 𑀢𑀣𑀸 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀬𑀲𑀸𑀤𑀻𑀲𑀼𑀧𑀺 𑀅𑀢𑁆𑀣𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄.

𑀓𑁂𑀲𑀜𑁆𑀘𑀺 𑀬𑀲𑁄 𑀧𑀤𑁂𑀲𑀯𑀼𑀢𑁆𑀢𑀺 𑀅𑀬𑀣𑀸𑀪𑀽𑀢𑀕𑀼𑀡𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀅𑀧𑀭𑀺𑀲𑀼𑀤𑁆𑀥𑁄 𑀘 𑀳𑁄𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥 𑀅𑀥𑀺𑀕𑀢𑀲𑀢𑁆𑀣𑀼𑀕𑀼𑀡𑀸𑀦𑀁 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀸𑀦𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀬𑀲𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀆𑀳 ‘‘𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑁄’’𑀢𑀺. 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁄𑀢𑀺 𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀅𑀥𑀺𑀕𑀢𑁄. 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄𑀢𑀺 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑀢𑁆𑀢𑀸 𑀏𑀯 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑁄. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀢𑀺 𑀅𑀦𑀯𑀲𑁂𑀲𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑀸. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻𑀢𑀺 𑀲𑀩𑁆𑀩𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑁄𑀪𑀸. 𑀬𑀁 𑀬𑀁 𑀏𑀢𑁂𑀦 𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀦𑁆𑀢𑀺 ‘‘𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀬𑀁 𑀬𑀁 𑀏𑀢𑁂𑀦 𑀮𑁄𑀓𑀦𑀸𑀣𑁂𑀦 𑀫𑀦𑁄𑀯𑀘𑀻𑀧𑀡𑀺𑀥𑀸𑀦𑀯𑀲𑁂𑀦 𑀇𑀘𑁆𑀙𑀺𑀢𑀁 𑀓𑀸𑀬𑀧𑀡𑀺𑀥𑀸𑀦𑀯𑀲𑁂𑀦 𑀧𑀢𑁆𑀣𑀺𑀢𑀁. 𑀢𑀣𑁂𑀯𑀸𑀢𑀺 𑀧𑀡𑀺𑀥𑀸𑀦𑀸𑀦𑀼𑀭𑀽𑀧𑀫𑁂𑀯. 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀧𑀬𑀢𑁆𑀢𑁄𑀢𑀺 𑀯𑀻𑀭𑀺𑀬𑀧𑀸𑀭𑀫𑀺𑀪𑀸𑀯𑀧𑁆𑀧𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑀗𑁆𑀔𑀸𑀢𑁄 𑀉𑀲𑁆𑀲𑀸𑀳𑁄.

𑀓𑀼𑀲𑀮𑀸𑀤𑀻𑀳𑀺 𑀪𑁂𑀤𑁂𑀳𑀻𑀢𑀺 𑀲𑀩𑁆𑀩𑀢𑁆𑀢𑀺𑀓𑀤𑀼𑀓𑀧𑀤𑀲𑀗𑁆𑀕𑀳𑀺𑀢𑁂𑀳𑀺 𑀓𑀼𑀲𑀮𑀸𑀤𑀺𑀧𑁆𑀧𑀪𑁂𑀤𑁂𑀳𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀆𑀕𑀢𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄𑀯 𑀲𑀗𑁆𑀕𑀳𑀺𑀢𑀸, 𑀅𑀣 𑀔𑁄 𑀲𑀗𑁆𑀕𑀳𑀸𑀤𑀬𑁄 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀬𑁄 𑀞𑀧𑀦𑀸𑀤𑀬𑁄 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀦𑁆𑀢𑀺𑀆𑀤𑀻𑀲𑀼 𑀧𑀻𑀴𑀦𑀝𑁆𑀞𑁄 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀲𑁆𑀲 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀗𑁆𑀔𑀢𑀝𑁆𑀞𑁄 𑀲𑀫𑁂𑀘𑁆𑀘 𑀲𑀗𑁆𑀕𑀫𑁆𑀫 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄. 𑀲𑀦𑁆𑀢𑀸𑀧𑀝𑁆𑀞𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀻𑀳𑀺 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁. 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀦𑀁. 𑀦𑀺𑀤𑀸𑀦𑀝𑁆𑀞𑁄 ‘‘𑀇𑀤𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀦𑀺𑀤𑀲𑁆𑀲𑁂𑀦𑁆𑀢𑀲𑁆𑀲 𑀯𑀺𑀬 𑀲𑀫𑀼𑀝𑁆𑀞𑀸𑀧𑀦𑀁. 𑀲𑀁𑀬𑁄𑀕𑀝𑁆𑀞𑁄 𑀲𑀁𑀲𑀸𑀭𑀤𑀼𑀓𑁆𑀔𑁂𑀦 𑀲𑀁𑀬𑁄𑀚𑀦𑀁. 𑀧𑀮𑀺𑀩𑁄𑀥𑀝𑁆𑀞𑁄 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀦𑀺𑀯𑀸𑀭𑀡𑀁. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄 𑀲𑀩𑁆𑀩𑀽𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀪𑀸𑀯𑀢𑁆𑀢𑀸 𑀢𑀢𑁄 ¶ 𑀯𑀺𑀦𑀺𑀲𑁆𑀲𑀝𑀢𑀸, 𑀢𑀁𑀦𑀺𑀲𑁆𑀲𑀭𑀡𑀦𑀺𑀫𑀺𑀢𑁆𑀢𑀢𑀸 𑀯𑀸. 𑀯𑀺𑀯𑁂𑀓𑀝𑁆𑀞𑁄 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀲𑀁𑀬𑀼𑀢𑁆𑀢𑀢𑀸. 𑀅𑀲𑀗𑁆𑀔𑀢𑀝𑁆𑀞𑁄 𑀓𑁂𑀦𑀘𑀺𑀧𑀺 𑀧𑀘𑁆𑀘𑀬𑁂𑀦 𑀅𑀦𑀪𑀺𑀲𑀗𑁆𑀔𑀢𑀢𑀸. 𑀅𑀫𑀢𑀝𑁆𑀞𑁄 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀫𑀭𑀡𑀸𑀪𑀸𑀯𑁄, 𑀲𑀢𑁆𑀢𑀸𑀦𑀁 𑀫𑀭𑀡𑀸𑀪𑀸𑀯𑀳𑁂𑀢𑀼𑀢𑀸 𑀯𑀸. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀓𑁆𑀓𑀫𑀦𑀝𑁆𑀞𑁄. 𑀳𑁂𑀢𑀼𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀪𑀸𑀯𑁄. 𑀤𑀲𑁆𑀲𑀦𑀝𑁆𑀞𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀁. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀥𑀺𑀧𑀘𑁆𑀘𑀓𑀭𑀡𑀁, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄 𑀯𑀸 𑀯𑀺𑀲𑁂𑀲𑀢𑁄 𑀫𑀕𑁆𑀕𑀸𑀥𑀺𑀧𑀢𑀺𑀯𑀘𑀦𑀢𑁄 ¶ . 𑀲𑀢𑀺𑀧𑀺 𑀳𑀺 𑀛𑀸𑀦𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂 ‘‘𑀛𑀸𑀦𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀺𑀁 𑀅𑀯𑀢𑁆𑀯𑀸 ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀢𑁆𑀣𑀺 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂 𑀯𑀺𑀲𑁂𑀲𑁄’’𑀢𑀺. 𑀏𑀢𑁂𑀬𑁂𑀯 𑀘 𑀧𑀻𑀴𑀦𑀸𑀤𑀬𑁄 𑀲𑁄𑀴𑀲𑀸𑀓𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀢𑀺𑀆𑀤𑀻𑀲𑀼 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀺𑀩𑁆𑀩𑀯𑀺𑀳𑀸𑀭𑁄. 𑀫𑁂𑀢𑁆𑀢𑀸𑀤𑀺𑀚𑁆𑀛𑀸𑀦𑀸𑀦𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀅𑀭𑀺𑀬𑀯𑀺𑀳𑀸𑀭𑁄. 𑀓𑀸𑀫𑁂𑀳𑀺 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀸𑀯𑀲𑁂𑀦 𑀏𑀓𑀻𑀪𑀸𑀯𑁄 𑀓𑀸𑀬𑀯𑀺𑀯𑁂𑀓𑁄. 𑀧𑀞𑀫𑀚𑁆𑀛𑀸𑀦𑀸𑀤𑀺𑀦𑀸 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑀢𑀸 𑀘𑀺𑀢𑁆𑀢𑀯𑀺𑀯𑁂𑀓𑁄. 𑀉𑀧𑀥𑀺𑀯𑀺𑀯𑁂𑀓𑁄 𑀦𑀺𑀩𑁆𑀩𑀸𑀦𑀁. 𑀉𑀧𑀥𑀻𑀢𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀉𑀧𑀥𑀻 𑀓𑀸𑀫𑀼𑀧𑀥𑀺 𑀔𑀦𑁆𑀥𑀼𑀧𑀥𑀺 𑀓𑀺𑀮𑁂𑀲𑀼𑀧𑀥𑀺 𑀅𑀪𑀺𑀲𑀗𑁆𑀔𑀸𑀭𑀼𑀧𑀥𑀻𑀢𑀺. 𑀓𑀸𑀫𑀸𑀧𑀺 𑀳𑀺 ‘‘𑀬𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀲𑀼𑀔𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀦𑀬𑁂𑀦 ‘‘𑀉𑀧𑀥𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂𑀳𑀺 𑀧𑀦 𑀘𑀢𑀽𑀳𑀺 𑀉𑀧𑀥𑀻𑀳𑀺 𑀯𑀺𑀯𑀺𑀢𑁆𑀢𑀢𑀸𑀬 𑀦𑀺𑀩𑁆𑀩𑀸𑀦𑀁 ‘‘𑀉𑀧𑀥𑀺𑀯𑀺𑀯𑁂𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀜𑁆𑀜𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄. 𑀲𑁄 𑀳𑀺 𑀲𑀼𑀜𑁆𑀜𑀢𑀸𑀬 𑀥𑀸𑀢𑀼𑀬𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀼𑀜𑁆𑀜𑀢𑁄, 𑀓𑀺𑀮𑁂𑀲𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑁄𑀓𑁆𑀔𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀅𑀧𑁆𑀧𑀡𑀺𑀳𑀺𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄. 𑀅𑀣 𑀯𑀸 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀧𑀝𑀺𑀮𑀤𑁆𑀥𑁄 𑀅𑀭𑀺𑀬𑀫𑀕𑁆𑀕𑁄 𑀆𑀕𑀫𑀦𑀯𑀲𑁂𑀦 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 ¶ 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀧𑀝𑀺𑀮𑀤𑁆𑀥𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀧𑀝𑀺𑀮𑀤𑁆𑀥𑁄 ‘‘𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀧𑀝𑀺. 𑀫. 𑁧.𑁨𑁨𑁩).

𑀅𑀜𑁆𑀜𑁂𑀢𑀺 𑀮𑁄𑀓𑀺𑀬𑀅𑀪𑀺𑀜𑁆𑀜𑀸𑀤𑀺𑀓𑁂.

𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 ¶ 𑀪𑀯𑁂𑀲𑀼 𑀧𑀭𑀺𑀩𑁆𑀪𑀫𑀦𑀁, 𑀢𑀜𑁆𑀘 𑀢𑀡𑁆𑀳𑀸𑀧𑀥𑀸𑀦𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦’’𑀦𑁆𑀢𑀺. 𑀯𑀦𑁆𑀢𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀫𑀼𑀔𑁂𑀦 𑀉𑀕𑁆𑀕𑀺𑀭𑀺𑀢𑀁 𑀧𑀼𑀦 𑀅𑀧𑀘𑁆𑀘𑀸𑀕𑀫𑀦𑀯𑀲𑁂𑀦 𑀙𑀟𑁆𑀟𑀺𑀢𑀁. 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀮𑁄𑀓𑁂’’𑀢𑀺𑀆𑀤𑀺. 𑀬𑀣𑀸 𑀮𑁄𑀓𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑁂𑀓𑀧𑀤𑀢𑁄 𑀏𑀓𑁂𑀓𑀫𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 ‘‘𑀫𑁂𑀔𑀮𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀻𑀢𑀺 𑀅𑀢𑁆𑀣𑁄. 𑀫𑁂𑀳𑀦𑀲𑁆𑀲𑀸𑀢𑀺 𑀕𑀼𑀬𑁆𑀳𑀧𑁆𑀧𑀤𑁂𑀲𑀲𑁆𑀲. 𑀔𑀲𑁆𑀲𑀸𑀢𑀺 𑀑𑀓𑀸𑀲𑀲𑁆𑀲.

𑀅𑀧𑀭𑁄 𑀦𑀬𑁄 (𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑁋 𑀪𑀸𑀕𑀯𑀸𑀢𑀺 𑀪𑀕𑀯𑀸. 𑀪𑀢𑀯𑀸𑀢𑀺 𑀪𑀕𑀯𑀸. 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸. 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄.

𑀢𑀢𑁆𑀣 𑀓𑀣𑀁 𑀪𑀸𑀕𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀕𑀼𑀡𑀓𑁄𑀝𑁆𑀞𑀸𑀲𑀸, 𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀢𑀣𑀸𑀕𑀢𑀲𑁆𑀲 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁, 𑀲𑀤𑁆𑀥𑀸 𑀯𑀻𑀭𑀺𑀬𑀁, 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺, 𑀢𑀬𑁄 𑀲𑀫𑁆𑀫𑀸𑀯𑀺𑀢𑀓𑁆𑀓𑀸, 𑀢𑀺𑀲𑁆𑀲𑁄 𑀅𑀦𑀯𑀚𑁆𑀚𑀲𑀜𑁆𑀜𑀸, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺, 𑀧𑀜𑁆𑀘 ¶ 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀲𑀜𑁆𑀜𑀸, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑀸, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑀸, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀻𑀬𑀸 𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸, 𑀲𑀢𑁆𑀢𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸, 𑀅𑀝𑁆𑀞𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸, 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑁄, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸, 𑀅𑀝𑁆𑀞𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑀸, 𑀦𑀯 𑀲𑀜𑁆𑀜𑀸, 𑀦𑀯 𑀦𑀸𑀦𑀢𑁆𑀢𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀭𑀡𑀸 ¶ 𑀥𑀫𑁆𑀫𑀸, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑀲 𑀅𑀲𑁂𑀓𑁆𑀔𑀥𑀫𑁆𑀫𑀸, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸, 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀲𑁄𑀴𑀲 𑀅𑀧𑀭𑀦𑁆𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺, 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑀸, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺, 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑁂𑀤𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸 𑀕𑀼𑀡𑀪𑀸𑀕𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀕𑀯𑀸𑀢𑀺 𑀯𑀢𑁆𑀢𑀩𑁆𑀩𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀢𑀸𑀯 𑀪𑀸𑀕𑀯𑀸𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀲𑀻𑀮𑀸𑀤𑀬𑁄 𑀲𑀩𑁆𑀩𑁂, 𑀕𑀼𑀡𑀪𑀸𑀕𑀸 𑀅𑀲𑁂𑀲𑀢𑁄;

𑀯𑀺𑀚𑁆𑀚𑀦𑁆𑀢𑀺 𑀲𑀼𑀕𑀢𑁂 𑀢𑀲𑁆𑀫𑀸, 𑀪𑀕𑀯𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀣𑀁 𑀪𑀢𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀓𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 ¶ 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀭𑀺𑀧𑀽𑀭𑁂𑀢𑀩𑁆𑀩𑀸 𑀤𑀸𑀦𑀧𑀸𑀭𑀫𑀻 𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀅𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄 𑀦𑀬𑀦𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸, 𑀧𑀼𑀩𑁆𑀩𑀬𑁄𑀕𑁄, 𑀧𑀼𑀩𑁆𑀩𑀘𑀭𑀺𑀬𑀸, 𑀥𑀫𑁆𑀫𑀓𑁆𑀔𑀸𑀦𑀁, 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀢𑀺 𑀏𑀯𑀫𑀸𑀤𑀬𑁄 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀜𑀸𑀡𑀲𑀫𑁆𑀪𑀸𑀭𑀸 𑀩𑀼𑀤𑁆𑀥𑀓𑀭𑀸 𑀥𑀫𑁆𑀫𑀸, 𑀢𑁂 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀬𑀣𑀸 𑀳𑀸𑀦𑀪𑀸𑀕𑀺𑀬𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀦𑁆𑀢𑀺, 𑀅𑀣 𑀔𑁄 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀅𑀦𑀯𑀲𑁂𑀲𑀢𑁄 𑀪𑀢𑀸 𑀲𑀫𑁆𑀪𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀢𑀯𑀸𑀢𑀺 𑀪𑀕𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀢-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸. 𑀅𑀣 𑀯𑀸 𑀪𑀢𑀯𑀸𑀢𑀺 𑀢𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦 𑀪𑀭𑀺 𑀲𑀫𑁆𑀪𑀭𑀺, 𑀧𑀭𑀺𑀧𑀽𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀪𑀢𑀯𑀸𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀲𑀫𑁆𑀩𑁄𑀥𑀺𑀬𑀸 𑀲𑀩𑁆𑀩𑁂, 𑀤𑀸𑀦𑀧𑀸𑀭𑀫𑀺𑀆𑀤𑀺𑀓𑁂;

𑀲𑀫𑁆𑀪𑀸𑀭𑁂 𑀪𑀢𑀯𑀸 𑀦𑀸𑀣𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄.

𑀓𑀣𑀁 ¶ 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀬𑁂 𑀢𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀪𑀸𑀕𑀸, 𑀢𑁂 𑀅𑀦𑀯𑀲𑁂𑀲𑀢𑁄 𑀮𑁄𑀓𑀳𑀺𑀢𑀢𑁆𑀣𑀁 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀦𑀺 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀻𑀢𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀔𑀦𑁆𑀥𑀸𑀤𑀻𑀲𑀼 𑀘 𑀬𑁂 𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀸 𑀘𑀢𑀼𑀩𑁆𑀩𑀺𑀥𑀸 𑀅𑀪𑀺𑀲𑀫𑀬𑀪𑀸𑀕𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 ‘‘𑀘𑀓𑁆𑀔𑀼 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑁄𑀢𑀁 𑀧𑀭𑀺𑀜𑁆𑀜𑁂𑀬𑁆𑀬𑀁…𑀧𑁂… 𑀚𑀭𑀸𑀫𑀭𑀡𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨𑁧) 𑀅𑀦𑁂𑀓𑁂 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀳𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀪𑁂𑀤𑀸 𑀪𑀸𑀯𑁂𑀢𑀩𑁆𑀩𑀪𑀸𑀕𑀸 𑀘 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂 𑀯𑀦𑀺 𑀪𑀚𑀺 𑀬𑀣𑀸𑀭𑀳𑀁 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀦𑀁 𑀯𑀲𑁂𑀦 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀬𑁂 𑀇𑀫𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀸 ¶ 𑀕𑀼𑀡𑀓𑁄𑀝𑁆𑀞𑀸𑀲𑀸 𑀕𑀼𑀡𑀪𑀸𑀕𑀸, 𑀓𑀺𑀦𑁆𑀢𑀺 𑀦𑀼 𑀔𑁄 𑀢𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀧𑀢𑀺𑀝𑁆𑀞𑀧𑁂𑀬𑁆𑀬𑀦𑁆𑀢𑀺 𑀫𑀳𑀸𑀓𑀭𑀼𑀡𑀸𑀬 𑀯𑀦𑀺 𑀅𑀪𑀺𑀧𑀢𑁆𑀣𑀬𑀺, 𑀲𑀸 𑀘𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀸𑀯𑀳𑀸 𑀅𑀳𑁄𑀲𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀜𑁂𑀬𑁆𑀬𑀲𑀫𑀸𑀧𑀢𑁆𑀢𑀺-𑀕𑀼𑀡𑀪𑀸𑀕𑁂 𑀢𑀣𑀸𑀕𑀢𑁄;

𑀪𑀚𑀺 𑀧𑀢𑁆𑀣𑀬𑀺 𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀪𑀕𑀯𑀸 𑀢𑀢𑁄.

𑀓𑀣𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀲𑀫𑀸𑀲𑀢𑁄 𑀢𑀸𑀯 𑀓𑀢𑀧𑀼𑀜𑁆𑀜𑁂𑀳𑀺 𑀧𑀬𑁄𑀕𑀲𑀫𑁆𑀧𑀦𑁆𑀦𑁂𑀳𑀺 𑀬𑀣𑀸𑀯𑀺𑀪𑀯𑀁 𑀪𑀚𑀻𑀬𑀦𑁆𑀢𑀻𑀢𑀺 𑀪𑀕𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀮𑁄𑀓𑀺𑀬𑁂 𑀢𑀸𑀯 𑀢𑀣𑀸𑀕𑀢𑁄 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀬𑀢𑁆𑀣 𑀧𑀢𑀺𑀝𑁆𑀞𑀸𑀬 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀲𑀫𑀦𑁆𑀦𑀸𑀦𑁂𑀦𑁆𑀢𑁄 𑀩𑀼𑀤𑁆𑀥𑀥𑀫𑁆𑀫𑁂 𑀧𑀭𑀺𑀧𑀸𑀘𑁂𑀲𑀺. 𑀩𑀼𑀤𑁆𑀥𑀪𑀽𑀢𑁄 𑀧𑀦 𑀢𑁂 𑀦𑀺𑀭𑀯𑀚𑁆𑀚𑀲𑀼𑀔𑀽𑀧𑀲𑀁𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀮𑁄𑀓𑀼𑀢𑁆𑀢𑀭𑁂𑀧𑀺 𑀯𑀦𑀺 𑀪𑀚𑀺 𑀲𑁂𑀯𑀺. 𑀯𑀺𑀢𑁆𑀢𑀸𑀭𑀢𑁄 𑀧𑀦 𑀧𑀤𑁂𑀲𑀭𑀚𑁆𑀚𑀇𑀲𑁆𑀲𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀤𑁂𑀯𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀲𑁂𑀦 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 𑀘 𑀅𑀦𑁂𑀓𑀯𑀺𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀪𑀕𑁂 𑀯𑀦𑀺 𑀪𑀚𑀺 𑀲𑁂𑀯𑀺. 𑀏𑀯𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀮𑁄𑀓𑁂, 𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀧𑀼𑀣𑀼;

𑀲𑀩𑁆𑀩𑀸 𑀢𑀸 𑀪𑀚𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄.

𑀓𑀣𑀁 ¶ 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸? 𑀪𑀢𑁆𑀢𑀸 𑀤𑀴𑁆𑀳𑀪𑀢𑁆𑀢𑀺𑀓𑀸 𑀅𑀲𑁆𑀲 𑀩𑀳𑀽 𑀅𑀢𑁆𑀣𑀻𑀢𑀺 𑀪𑀢𑁆𑀢𑀯𑀸. 𑀢𑀣𑀸𑀕𑀢𑁄 𑀳𑀺 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀻𑀪𑀸𑀯𑀢𑁄 𑀲𑀩𑁆𑀩𑀲𑀢𑁆𑀢𑀸𑀉𑀢𑁆𑀢𑀫𑁄, 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦 𑀩𑁆𑀬𑀸𑀫𑀧𑁆𑀧𑀪𑀸𑀤𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁂𑀦 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀺𑀦𑀸 𑀲𑀼𑀯𑀺𑀧𑀼𑀮𑁂𑀦 𑀲𑀼𑀯𑀺𑀲𑀼𑀤𑁆𑀥𑁂𑀦 𑀘 𑀣𑀼𑀢𑀺𑀖𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀆𑀤𑀻𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀦𑀺𑀭𑀢𑀺𑀲𑀬𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀻𑀪𑀸𑀯𑀢𑁄 𑀘 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄𑀢𑀺 ¶ 𑀏𑀯𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀩𑁆𑀩𑀣𑀸𑀧𑀺 𑀧𑀲𑀸𑀤𑀸𑀯𑀳𑀪𑀸𑀯𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀲𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀆𑀤𑀭𑀩𑀳𑀼𑀫𑀸𑀦𑀕𑀸𑀭𑀯𑀸𑀬𑀢𑀦𑀢𑀸𑀬 𑀧𑀭𑀫𑀧𑁂𑀫𑀲𑀫𑁆𑀪𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂 𑀘𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀸 𑀢𑁂𑀲𑀁 𑀲𑀫𑁆𑀪𑀢𑁆𑀢𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸𑀢𑀺. 𑀢𑀣𑀸 𑀳𑀺 𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀅𑀘𑁆𑀘𑀸𑀕𑁂𑀧𑀺 𑀢𑀢𑁆𑀣 𑀧𑀲𑀸𑀤𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺 𑀢𑀲𑁆𑀲 𑀯𑀸 𑀆𑀡𑀁 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫) 𑀘.

𑀏𑀯𑀁 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑀲𑁆𑀲 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀢-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸.

𑀕𑀼𑀡𑀸𑀢𑀺𑀲𑀬𑀬𑀼𑀢𑁆𑀢𑀲𑁆𑀲, 𑀬𑀲𑁆𑀫𑀸 𑀮𑁄𑀓𑀳𑀺𑀢𑁂𑀲𑀺𑀦𑁄;

𑀲𑀫𑁆𑀪𑀢𑁆𑀢𑀸 𑀩𑀳𑀯𑁄 𑀲𑀢𑁆𑀣𑀼, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀺.

𑀓𑀣𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑀪𑀽𑀢𑁄𑀧𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀪𑀕𑀲𑀗𑁆𑀔𑀸𑀢𑀁 𑀲𑀺𑀭𑀺𑀁 𑀇𑀲𑁆𑀲𑀭𑀺𑀬𑀁 𑀬𑀲𑀜𑁆𑀘 𑀯𑀫𑀺 𑀉𑀕𑁆𑀕𑀺𑀭𑀺, 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 ¶ 𑀙𑀟𑁆𑀟𑀬𑀺. 𑀢𑀣𑀸 𑀳𑀺𑀲𑁆𑀲 𑀲𑁄𑀫𑀦𑀲𑁆𑀲𑀓𑀼𑀫𑀸𑀭𑀓𑀸𑀮𑁂(𑀚𑀸. 𑁧.𑁧𑁫.𑁨𑁧𑁧 𑀆𑀤𑀬𑁄) 𑀳𑀢𑁆𑀣𑀺𑀧𑀸𑀮𑀓𑀼𑀫𑀸𑀭𑀓𑀸𑀮𑁂 (𑀚𑀸. 𑁧.𑁧𑁫.𑁩𑁩𑁭 𑀆𑀤𑀬𑁄) 𑀅𑀬𑁄𑀖𑀭𑀧𑀡𑁆𑀟𑀺𑀢𑀓𑀸𑀮𑁂(𑀚𑀸. 𑁧.𑁧𑁫.𑁩𑁬𑁩 𑀆𑀤𑀬𑁄) 𑀫𑀽𑀕𑀧𑀓𑁆𑀔𑀧𑀡𑁆𑀟𑀺𑀢𑀓𑀸𑀮𑁂 (𑀚𑀸. 𑁨.𑁨𑁨.𑁧 𑀆𑀤𑀬𑁄) 𑀘𑀽𑀴𑀲𑀼𑀢𑀲𑁄𑀫𑀓𑀸𑀮𑁂𑀢𑀺 (𑀚𑀸. 𑁨.𑁧𑁭.𑁧𑁯𑁫 𑀆𑀤𑀬𑁄) 𑀏𑀯𑀫𑀸𑀤𑀻𑀲𑀼 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻𑀧𑀽𑀭𑀡𑀯𑀲𑁂𑀦 𑀤𑁂𑀯𑀭𑀚𑁆𑀚𑀲𑀤𑀺𑀲𑀸𑀬 𑀭𑀚𑁆𑀚𑀲𑀺𑀭𑀺𑀬𑀸 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀪𑀸𑀯𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀘𑀭𑀺𑀫𑀢𑁆𑀢𑀪𑀸𑀯𑁂𑀧𑀺 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑀲𑀅𑀲𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀁 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀜𑁆𑀘 𑀢𑀺𑀡𑀸𑀬𑀧𑀺 ¶ 𑀅𑀫𑀜𑁆𑀜𑀫𑀸𑀦𑁄 𑀦𑀺𑀭𑀧𑁂𑀓𑁆𑀔𑁄 𑀧𑀳𑀸𑀬 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀇𑀫𑁂 𑀲𑀺𑀭𑀺𑀆𑀤𑀺𑀓𑁂 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀸 𑀲𑁄𑀪𑀸 𑀓𑀧𑁆𑀧𑀝𑁆𑀞𑀸𑀬𑀺𑀪𑀸𑀯𑀢𑁄, 𑀢𑁂𑀧𑀺 𑀪𑀕𑀯𑀸 𑀯𑀫𑀺 𑀢𑀁𑀦𑀺𑀯𑀸𑀲𑀺𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀦𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀻𑀢𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀬𑀲𑁆𑀫𑀸, 𑀬𑀲𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀧𑀳𑀸𑀲𑀺 𑀮𑁄𑀓𑀘𑀺𑀢𑁆𑀢𑀜𑁆𑀘, 𑀲𑀼𑀕𑀢𑁄 𑀪𑀕𑀯𑀸 𑀢𑀢𑁄.

𑀓𑀣𑀁 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀪𑀸𑀕𑀸 𑀦𑀸𑀫 𑀲𑀪𑀸𑀕𑀥𑀫𑁆𑀫𑀓𑁄𑀝𑁆𑀞𑀸𑀲𑀸, 𑀢𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀭𑀽𑀧𑀯𑁂𑀤𑀦𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀯𑀺𑀥𑀸, 𑀢𑁂 𑀘 𑀪𑀕𑀯𑀸 𑀲𑀩𑁆𑀩𑀁 𑀧𑀧𑀜𑁆𑀘𑀁 𑀲𑀩𑁆𑀩𑀁 𑀬𑁄𑀕𑀁 𑀲𑀩𑁆𑀩𑀁 𑀕𑀦𑁆𑀣𑀁 𑀲𑀩𑁆𑀩𑀁 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀫𑀢𑀥𑀸𑀢𑀼𑀁 𑀲𑀫𑀥𑀺𑀕𑀘𑁆𑀙𑀦𑁆𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺 𑀦 𑀧𑀘𑁆𑀘𑀸𑀕𑀫𑀺. 𑀢𑀣𑀸 𑀳𑁂𑀲 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀣𑀯𑀺𑀁 𑀆𑀧𑀁 𑀢𑁂𑀚𑀁 𑀯𑀸𑀬𑀁, 𑀘𑀓𑁆𑀔𑀼𑀁 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀁 𑀓𑀸𑀬𑀁 𑀫𑀦𑀁, 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁, 𑀭𑀽𑀧𑀢𑀡𑁆𑀳𑀁…𑀧𑁂… 𑀥𑀫𑁆𑀫𑀢𑀡𑁆𑀳𑀁, 𑀭𑀽𑀧𑀯𑀺𑀢𑀓𑁆𑀓𑀁…𑀧𑁂… 𑀥𑀫𑁆𑀫𑀯𑀺𑀢𑀓𑁆𑀓𑀁, 𑀭𑀽𑀧𑀯𑀺𑀘𑀸𑀭𑀁…𑀧𑁂… 𑀥𑀫𑁆𑀫𑀯𑀺𑀘𑀸𑀭𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦𑀧𑀺 𑀲𑀩𑁆𑀩𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀅𑀦𑀯𑀲𑁂𑀲𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁂𑀦 𑀙𑀟𑁆𑀟𑀬𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀢𑀁, 𑀆𑀦𑀦𑁆𑀤, 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀢𑀣𑀸𑀕𑀢𑁄 𑀧𑀼𑀦 𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁩). 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀕𑁂 𑀯𑀫𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀳𑀻𑀦𑀧𑀡𑀻𑀢𑁂 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑀼𑀔𑁂𑀦 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺 𑀧𑀚𑀳𑀺, 𑀧𑀭𑁂𑀲𑀜𑁆𑀘 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂 ¶ , 𑀧𑀳𑀸𑀢𑀩𑁆𑀩𑀸 𑀧𑀕𑁂𑀯 𑀅𑀥𑀫𑁆𑀫𑀸 (𑀫. 𑀦𑀺. 𑁨𑁪𑁦). 𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁪𑁦). 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺 ¶ 𑀥𑀫𑁆𑀫𑀪𑁂𑀤𑀸 𑀫𑀳𑁂𑀲𑀺𑀦𑀸;

𑀓𑀡𑁆𑀳𑀸 𑀲𑀼𑀓𑁆𑀓𑀸 𑀬𑀢𑁄 𑀯𑀦𑁆𑀢𑀸, 𑀢𑀢𑁄𑀧𑀺 𑀪𑀕𑀯𑀸 𑀫𑀢𑁄.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄’’𑀢𑀺.

𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀗𑁆𑀔𑁂𑀧𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀸 𑀩𑀼𑀤𑁆𑀥𑀕𑀼𑀡𑀸, 𑀢𑀸𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀳𑀸𑀦𑀲𑀫𑁆𑀧𑀤𑀸𑀜𑀸𑀡𑀲𑀫𑁆𑀧𑀤𑀸𑀪𑁂𑀤𑀢𑁄 𑀤𑀼𑀯𑀺𑀥𑀸 𑀆𑀦𑀼𑀪𑀸𑀯𑀲𑀫𑁆𑀧𑀤𑀸𑀤𑀻𑀦𑀁 𑀢𑀤𑀯𑀺𑀦𑀸𑀪𑀸𑀯𑁂𑀦 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀬𑁄𑀕𑀸𑀲𑀬𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀢𑀢𑁆𑀣 𑀧𑀬𑁄𑀕𑀢𑁄 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀽𑀧𑀤𑁂𑀲𑁄, 𑀆𑀲𑀬𑀢𑁄 𑀧𑀝𑀺𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑁂𑀲𑀺𑀢𑀸 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀸𑀤𑀺𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺. 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸𑀧𑀺 𑀅𑀢𑁆𑀣𑀘𑀭𑀺𑀬𑀸 𑀧𑀭𑀳𑀺𑀢𑀧𑀅𑀧𑀢𑁆𑀢𑀺 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀯𑀺𑀪𑀸𑀯𑀦𑀯𑀲𑁂𑀦 𑀧𑀸𑀴𑀺𑀬𑀁 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀅𑀭𑀳𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀳𑀸𑀦𑀲𑀫𑁆𑀧𑀤𑀸𑀯𑀲𑁂𑀦 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑀯𑀺𑀤𑀽𑀢𑀺 𑀘 𑀇𑀫𑁂𑀳𑀺 𑀧𑀤𑁂𑀳𑀺 𑀜𑀸𑀡𑀲𑀫𑁆𑀧𑀤𑀸𑀯𑀲𑁂𑀦. 𑀦𑀦𑀼 𑀘 ‘‘𑀮𑁄𑀓𑀯𑀺𑀤𑀽’’𑀢𑀺 𑀇𑀫𑀺𑀦𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸 𑀯𑀺𑀪𑀸𑀯𑀻𑀬𑀢𑀻𑀢𑀺? 𑀲𑀘𑁆𑀘𑀁 𑀯𑀺𑀪𑀸𑀯𑀻𑀬𑀢𑀺, 𑀅𑀢𑁆𑀣𑀺 𑀧𑀦 𑀯𑀺𑀲𑁂𑀲𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀪𑀸𑀯𑁄 𑀯𑀺𑀪𑀸𑀯𑀺𑀢𑁄, ‘‘𑀮𑁄𑀓𑀯𑀺𑀤𑀽’’𑀢𑀺 𑀧𑀦 𑀇𑀫𑀺𑀦𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀻𑀦𑀫𑁆𑀧𑀺 𑀆𑀦𑀼𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀲𑀩𑁆𑀩𑀸𑀧𑀺 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸. 𑀲𑀼𑀕𑀢𑁄𑀢𑀺 𑀧𑀦 𑀇𑀫𑀺𑀦𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸. 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀪𑀕𑀯𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀯𑀺𑀪𑀸𑀯𑀺𑀢𑀸. 𑀩𑀼𑀤𑁆𑀥𑁄𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀢𑁆𑀯𑀸 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑀸𑀧𑀺 𑀩𑀼𑀚𑁆𑀛𑀺, 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀩𑁄𑀥𑁂𑀲𑀻’’𑀢𑀺𑀆𑀤𑀺 ¶ . 𑀪𑀕𑀯𑀸𑀢𑀺 𑀘 𑀇𑀫𑀺𑀦𑀸𑀧𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀲𑀩𑁆𑀩𑀸 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀯𑀺𑀪𑀸𑀯𑀺𑀢𑀸.

𑀅𑀧𑀭𑁄 ¶ 𑀦𑀬𑁄 𑁋 𑀳𑁂𑀢𑀼𑀨𑀮𑀲𑀢𑁆𑀢𑀼𑀧𑀓𑀸𑀭𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸 𑀩𑀼𑀤𑁆𑀥𑀕𑀼𑀡𑀸. 𑀢𑀢𑁆𑀣 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀮𑁄𑀓𑀯𑀺𑀤𑀽𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀨𑀮𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸. 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀫𑁂𑀳𑀺 𑀲𑀢𑁆𑀢𑀼𑀧𑀓𑀸𑀭𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀧𑀓𑀸𑀲𑀺𑀢𑀸. 𑀩𑀼𑀤𑁆𑀥𑁄𑀢𑀺 𑀇𑀫𑀺𑀦𑀸 𑀨𑀮𑀯𑀲𑁂𑀦 𑀲𑀢𑁆𑀢𑀼𑀧𑀓𑀸𑀭𑀯𑀲𑁂𑀦 𑀘 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸. 𑀲𑀼𑀕𑀢𑁄 𑀪𑀕𑀯𑀸𑀢𑀺 𑀧𑀦 𑀇𑀫𑁂𑀳𑀺 𑀧𑀤𑁂𑀳𑀺 𑀳𑁂𑀢𑀼𑀨𑀮𑀲𑀢𑁆𑀢𑀼𑀧𑀓𑀸𑀭𑀯𑀲𑁂𑀦 𑀩𑀼𑀤𑁆𑀥𑀕𑀼𑀡𑀸 𑀯𑀺𑀪𑀸𑀯𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺𑀆𑀤𑀻𑀲𑀼 𑀲𑁄 𑀪𑀕𑀯𑀸𑀢𑀺 𑀬𑁄 ‘‘𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀢𑀕𑀼𑀡𑁄, 𑀲𑁄 𑀪𑀕𑀯𑀸. 𑀇𑀫𑀁 𑀮𑁄𑀓𑀦𑁆𑀢𑀺 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀤𑁂𑀯𑀓𑀦𑁆𑀢𑀺 𑀘 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀳𑀺 𑀲𑁄 𑀚𑀸𑀢𑁄 𑀢𑀁𑀦𑀺𑀯𑀸𑀲𑀻 𑀘. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀢𑁆𑀣𑀺𑀓𑀸…𑀧𑁂… 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀲𑀫𑀺𑀢𑀸𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺. 𑀲𑀤𑁂𑀯𑀓𑀸𑀤𑀺𑀯𑀘𑀦𑁂𑀦 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀘 𑀕𑀳𑀺𑀢𑀢𑁆𑀢𑀸 𑀆𑀳 ‘‘𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡’’𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀭𑀸𑀚𑀸𑀦𑁄. 𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀢𑀻𑀳𑀺 𑀧𑀤𑁂𑀳𑀻𑀢𑀺 𑀲𑀤𑁂𑀯𑀓𑀲𑀫𑀸𑀭𑀓𑀲𑀩𑀭𑁆𑀳𑁆𑀫𑀓𑀯𑀘𑀦𑁂𑀳𑀺. 𑀤𑁆𑀯𑀻𑀳𑀻𑀢𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺.

𑀅𑀭𑀽𑀧𑀻 ¶ 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸𑀢𑀺 𑀇𑀫𑀁 𑀦𑀺𑀩𑁆𑀩𑀘𑀦𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑁂𑀯𑀸𑀳 𑀪𑀕𑀯𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁩.𑁧𑁧𑁭). 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄 𑀆𑀳 ‘‘𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄’’𑀢𑀺 ¶ . 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀆𑀳 ‘‘𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄’’𑀢𑀺. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀧𑀭𑀺𑀲𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦. 𑀇𑀢𑀭𑀸 𑀧𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯𑀸𑀢𑀺.

𑀓𑀣𑀁 𑀧𑀦𑁂𑀢𑁆𑀣 𑀘𑀢𑀼𑀧𑀭𑀺𑀲𑀯𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁄 𑀕𑀳𑀺𑀢𑁄? ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀡𑀧𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸 𑀘 𑀕𑀳𑀺𑀢𑀸 𑀳𑁄𑀦𑁆𑀢𑀺, ‘‘𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀔𑀢𑁆𑀢𑀺𑀬𑀧𑀭𑀺𑀲𑀸 𑀕𑀳𑀧𑀢𑀺𑀧𑀭𑀺𑀲𑀸 𑀘 𑀕𑀳𑀺𑀢𑀸, ‘‘𑀧𑀚’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀇𑀫𑀸𑀬𑁂𑀯 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀯𑀼𑀢𑁆𑀢𑀸, 𑀘𑀢𑀼𑀧𑀭𑀺𑀲𑀲𑀗𑁆𑀔𑀸𑀢𑀁 𑀧𑀚𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀓𑀣𑀁 𑀧𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄 𑀕𑀳𑀺𑀢𑁄? 𑀏𑀢𑁆𑀣𑀸𑀧𑀺 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀕𑀳𑀺𑀢𑀸, ‘‘𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀫𑀼𑀢𑀺𑀤𑁂𑀯𑀲𑀗𑁆𑀔𑀸𑀢𑀸 𑀔𑀢𑁆𑀢𑀺𑀬𑀸, 𑀕𑀳𑀧𑀢𑀺𑀲𑀼𑀤𑁆𑀤𑀲𑀗𑁆𑀔𑀸𑀢𑀸 𑀅𑀯𑀲𑁂𑀲𑀫𑀦𑀼𑀲𑁆𑀲𑀸 𑀘 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀇𑀢𑁄 𑀧𑀦 𑀅𑀜𑁆𑀜𑁂𑀲𑀁 𑀫𑀦𑀼𑀲𑁆𑀲𑀲𑀢𑁆𑀢𑀸𑀦𑀁 𑀅𑀪𑀸𑀯𑀢𑁄 ‘‘𑀧𑀚’’𑀦𑁆𑀢𑀺 𑀇𑀫𑀺𑀦𑀸 𑀘𑀢𑀽𑀳𑀺 𑀧𑀓𑀸𑀭𑁂𑀳𑀺 𑀞𑀺𑀢𑀸 𑀏𑀢𑁂𑀬𑁂𑀯 𑀫𑀦𑀼𑀲𑁆𑀲𑀲𑀢𑁆𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀚𑀸𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀸𑀤𑀺𑀯𑀲𑁂𑀦 𑀞𑀺𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁𑀬𑁂𑀯 𑀕𑀳𑀺𑀢𑀢𑁆𑀢𑀸 𑀇𑀤𑀸𑀦𑀺 ‘‘𑀧𑀚’’𑀦𑁆𑀢𑀺 𑀇𑀫𑀺𑀦𑀸 𑀅𑀯𑀲𑁂𑀲𑀲𑀢𑁆𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 ‘‘𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸’’𑀢𑀺. 𑀢𑀢𑁆𑀣 𑀦𑀸𑀕𑀕𑀭𑀼𑀴𑀸𑀤𑀺𑀯𑀲𑁂𑀦 𑀅𑀯𑀲𑁂𑀲𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀸𑀧𑀺 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀘𑀢𑀼𑀧𑀭𑀺𑀲𑀲𑀳𑀺𑀢𑁄 𑀅𑀯𑀲𑁂𑀲𑀲𑀼𑀤𑁆𑀥𑀦𑀸𑀕𑀲𑀼𑀧𑀡𑁆𑀡𑀦𑁂𑀭𑀬𑀺𑀓𑀸𑀤𑀺𑀲𑀢𑁆𑀢𑀮𑁄𑀓𑁄, 𑀘𑀢𑀼𑀥𑀸 𑀞𑀺𑀢𑀫𑀦𑀼𑀲𑁆𑀲𑀲𑀳𑀺𑀢𑁄 𑀯𑀸 𑀅𑀯𑀲𑁂𑀲𑀦𑀸𑀕𑀲𑀼𑀧𑀡𑁆𑀡𑀦𑁂𑀭𑀬𑀺𑀓𑀸𑀤𑀺𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦. 𑀧𑀜𑁆𑀘𑀲𑀼 𑀳𑀺 𑀕𑀢𑀻𑀲𑀼 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀯 𑀲𑁂𑀝𑁆𑀞𑀸, 𑀢𑀢𑁆𑀣𑀸𑀧𑀺 𑀅𑀭𑀽𑀧𑀺𑀦𑁄 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀺𑀮𑁂𑀲𑀤𑀼𑀓𑁆𑀔𑀢𑀸𑀬 𑀲𑀦𑁆𑀢𑀧𑀡𑀻𑀢𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀬 𑀅𑀢𑀺𑀯𑀺𑀬 𑀤𑀻𑀖𑀸𑀬𑀼𑀓𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀅𑀢𑀺𑀯𑀺𑀬 𑀉𑀓𑁆𑀓𑀝𑁆𑀞𑀸. 𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄𑀢𑀺 𑀤𑀲𑀲𑀳𑀲𑁆𑀲𑀺𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀲𑁂𑀦 𑀯𑀤𑀢𑀺. ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁 𑀦𑀯𑀮𑁄𑀓𑀼𑀢𑁆𑀢𑀭𑀁. 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁄𑀢𑀺 𑀅𑀢𑁆𑀣𑀸𑀦𑀜𑁆𑀘𑁂𑀯 𑀧𑀤𑀸𑀦𑀜𑁆𑀘 𑀅𑀦𑀼𑀲𑀦𑁆𑀥𑀸𑀦𑀼𑀓𑁆𑀓𑀫𑁄. 𑀧𑁄𑀭𑀸𑀡𑀸 𑀧𑀦𑁂𑀢𑁆𑀣 𑀏𑀯𑀁 𑀯𑀡𑁆𑀡𑀬𑀦𑁆𑀢𑀺 𑁋 𑀲𑀤𑁂𑀯𑀓𑀦𑁆𑀢𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀁 𑀮𑁄𑀓𑀁. 𑀲𑀫𑀸𑀭𑀓𑀦𑁆𑀢𑀺 𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀁 𑀮𑁄𑀓𑀁. 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀁 𑀮𑁄𑀓𑀁. 𑀏𑀯𑀁 𑀲𑀩𑁆𑀩𑁂𑀧𑀺 𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 ¶ 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁄 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀆𑀳. 𑀏𑀯𑀁 𑀧𑀜𑁆𑀘𑀳𑀺𑀧𑀺 𑀧𑀤𑁂𑀳𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺.

𑀅𑀪𑀺𑀜𑁆𑀜𑀸𑀢𑀺 𑀬𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸’’𑀢𑀺. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀦𑀼𑀫𑀸𑀦𑀉𑀧𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀆𑀤𑀺𑀧𑀝𑀺𑀓𑁆𑀔𑁂𑀧𑁄 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀢𑁂𑀦 𑀯𑀻𑀣𑀺𑀫𑀺𑀲𑁆𑀲𑀸𑀧𑀺 𑀓𑀤𑀸𑀘𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀳𑀺𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑀕𑁆𑀕𑀳𑀡𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀁 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀯𑀸, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀦𑁂𑀬𑁆𑀬𑀲𑁆𑀲 𑀯𑀸 𑀯𑀲𑁂𑀦 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄. 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀻𑀢𑀺 𑀆𑀤𑀺𑀫𑁆𑀳𑀺𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀫𑀚𑁆𑀛𑁂𑀧𑀺 𑀧𑀭𑀺𑀬𑁄𑀲𑀸𑀦𑁂𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀳𑀺 ¶ 𑀓𑀮𑁆𑀬𑀸𑀡𑀢𑀸 𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀪𑀸𑀯𑁂𑀦.

𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀲𑀼𑀦𑁆𑀤𑀭𑀢𑁆𑀢𑀸. 𑀥𑀫𑁆𑀫𑀲𑁆𑀲𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲. 𑀓𑀺𑀜𑁆𑀘𑀸𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀓𑁄𑀘𑀺 𑀦𑀢𑁆𑀣𑀺, 𑀬𑁂𑀲𑀼 𑀧𑀦 𑀅𑀯𑀬𑀯𑁂𑀲𑀼 𑀲𑀫𑀼𑀤𑀸𑀬𑀭𑀽𑀧𑁂𑀦 𑀅𑀧𑁂𑀓𑁆𑀔𑀺𑀢𑁂𑀲𑀼 𑀕𑀸𑀣𑀸𑀢𑀺 𑀲𑀫𑀜𑁆𑀜𑀸, 𑀢𑀁 𑀢𑀢𑁄 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀲𑀁𑀲𑀸𑀫𑀺𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀸𑀦𑀼𑀲𑀦𑁆𑀥𑀺𑀓𑀦𑁆𑀢𑀺 𑀇𑀤𑀁 𑀦𑀸𑀢𑀺𑀩𑀳𑀼𑀯𑀺𑀪𑀸𑀕𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀢𑀭𑀲𑁆𑀲 𑀧𑀦 𑀢𑁂𑀦𑁂𑀯 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀸𑀕𑀸 𑀮𑀩𑁆𑀪𑀦𑁆𑀢𑀻𑀢𑀺. 𑀦𑀺𑀤𑀸𑀦𑁂𑀦𑀸𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀞𑀧𑀺𑀢𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀤𑀺𑀅𑀧𑀤𑀺𑀲𑀦𑀮𑀓𑁆𑀔𑀡𑁂𑀦 𑀦𑀺𑀤𑀸𑀦𑀕𑀦𑁆𑀣𑁂𑀦. 𑀦𑀺𑀕𑀫𑁂𑀦𑀸𑀢𑀺 ‘‘𑀇𑀤𑀫𑀯𑁄𑀘𑀸’’𑀢𑀺𑀆𑀤𑀺𑀓𑁂𑀦 ‘‘𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 𑀯𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑀦𑀺𑀕𑀫𑀦𑁂𑀦. 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀞𑀧𑀺𑀢𑀸𑀦𑀺𑀧𑀺 𑀳𑀺 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁄 𑀢𑀤𑀦𑁆𑀢𑁄𑀕𑀥𑀸𑀦𑁂𑀯. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀤𑀺, 𑀇𑀤𑀫𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀫𑀚𑁆𑀛’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦) 𑀯𑀼𑀢𑁆𑀢𑀁.

𑀏𑀯𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀯𑀲𑁂𑀦 𑀥𑀫𑁆𑀫𑀲𑁆𑀲 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀓𑀮𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀲𑀦𑀥𑀫𑁆𑀫𑁄𑀢𑀺 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 ¶ 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦) 𑁋

𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀧𑀓𑀸𑀲𑀓𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀲𑀻𑀮𑀫𑀽𑀮𑀓𑀢𑁆𑀢𑀸 𑀲𑀸𑀲𑀦𑀲𑁆𑀲 ‘‘𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄’’𑀢𑀺 𑀯𑀼𑀢𑁆𑀢𑀁. 𑀲𑀫𑀣𑀸𑀤𑀻𑀦𑀁 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀫𑀚𑁆𑀛𑀪𑀸𑀯𑀢𑁄 𑀆𑀳 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄’’𑀢𑀺. 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺. 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦𑀸𑀫 𑀧𑀜𑁆𑀜𑀸𑀬 𑀳𑁄𑀢𑀺, 𑀢𑀲𑁆𑀲𑀸 𑀘 𑀲𑀻𑀮𑀁 𑀲𑀫𑀸𑀥𑀺 𑀘 𑀫𑀽𑀮𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀻𑀳𑀺 ¶ 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄’’𑀢𑀺. 𑀧𑀜𑁆𑀜𑀸 𑀧𑀦 𑀅𑀦𑀼𑀩𑁄𑀥𑀧𑀅𑀯𑁂𑀥𑀯𑀲𑁂𑀦 𑀤𑀼𑀯𑀺𑀥𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀕𑀡𑁆𑀳𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄’’𑀢𑀺 𑀆𑀳. 𑀢𑀲𑁆𑀲𑀸 𑀦𑀺𑀧𑁆𑀨𑀢𑁆𑀢𑀺𑀨𑀮𑀓𑀺𑀘𑁆𑀘𑀁 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸, 𑀢𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺. 𑀨𑀮𑀕𑁆𑀕𑀳𑀡𑁂𑀦 𑀯𑀸 𑀲𑀉𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀫𑀸𑀳, 𑀇𑀢𑀭𑁂𑀦 𑀇𑀢𑀭𑀁 𑀢𑀤𑀼𑀪𑀬𑀜𑁆𑀘 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀑𑀲𑀸𑀦𑀦𑁆𑀢𑀺 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄’’𑀢𑀺.

𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄𑀢𑀺 𑀩𑀼𑀤𑁆𑀥𑀲𑁆𑀲 𑀲𑀼𑀩𑁄𑀥𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸, 𑀢𑀸𑀬 𑀆𑀤𑀺𑀓𑀮𑁆𑀬𑀸𑀡𑁄 𑀢𑀧𑁆𑀧𑀪𑀯𑀢𑁆𑀢𑀸. 𑀲𑀩𑁆𑀩𑀲𑁄 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑁄𑀤𑀸𑀦𑀧𑀸𑀭𑀺𑀧𑀽𑀭𑀻 𑀘 𑀥𑀫𑁆𑀫𑀲𑀼𑀥𑀫𑁆𑀫𑀢𑀸, 𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄 𑀢𑀁𑀲𑀭𑀻𑀭𑀢𑁆𑀢𑀸. 𑀲𑀢𑁆𑀣𑀸𑀭𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺, 𑀢𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 𑀢𑀸𑀬 𑀲𑀸𑀲𑀦𑀲𑁆𑀲 𑀮𑁄𑀓𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄. 𑀢𑀦𑁆𑀢𑀺 𑀲𑀸𑀲𑀦𑀥𑀫𑁆𑀫𑀁. 𑀢𑀣𑀢𑁆𑀢𑀸𑀬𑀸𑀢𑀺 𑀬𑀣𑀢𑁆𑀢𑀸𑀬 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀣𑀢𑁆𑀢𑀸𑀬 𑀢𑀣𑀪𑀸𑀯𑀸𑀬. 𑀲𑁄 𑀧𑀦 𑀅𑀪𑀺𑀲𑀫𑁆𑀩𑁄𑀥𑀺 𑀧𑀘𑁆𑀘𑁂𑀓𑀩𑁄𑀥𑀺 𑀲𑀸𑀯𑀓𑀩𑁄𑀥𑀻𑀢𑀺 𑀢𑀺𑀯𑀺𑀥𑁄 𑀇𑀢𑁄 𑀅𑀜𑁆𑀜𑀣𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁆𑀣 𑀲𑀩𑁆𑀩𑀕𑀼𑀡𑁂𑀳𑀺 𑀅𑀕𑁆𑀕𑀪𑀸𑀯𑀢𑁄 𑀇𑀢𑀭𑀩𑁄𑀥𑀺𑀤𑁆𑀯𑀬𑀫𑀽𑀮𑀢𑀸𑀬 𑀘 𑀧𑀞𑀫𑀸𑀬 𑀩𑁄𑀥𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑀢𑀸, 𑀕𑀼𑀡𑁂𑀳𑀺 𑀯𑁂𑀫𑀚𑁆𑀛𑀪𑀸𑀯𑀢𑁄 𑀤𑀼𑀢𑀺𑀬𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑀢𑀸, 𑀢𑀤𑀼𑀪𑀬𑀢𑀸𑀬 𑀯𑀸 𑀯𑁄𑀲𑀸𑀦𑀢𑀸𑀬 𑀘 𑀲𑀸𑀲𑀦𑀥𑀫𑁆𑀫𑀲𑁆𑀲 𑀢𑀢𑀺𑀬𑀸𑀬 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀸 𑀯𑀼𑀢𑁆𑀢𑀸.

𑀏𑀲𑁄𑀢𑀺 𑀲𑀸𑀲𑀦𑀥𑀫𑁆𑀫𑁄. 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀢𑁄𑀢𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀦𑀻𑀯𑀭𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀩𑁆𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀣𑀸 𑀬𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀻𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻, 𑀢𑀣𑀸 𑀢𑀣𑀸 𑀲𑁄 𑀢𑀢𑁆𑀣 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀮𑀪𑀢𑀺 𑀥𑀫𑁆𑀫𑀯𑁂𑀤’’𑀦𑁆𑀢𑀺.

‘‘𑀬𑀲𑁆𑀫𑀺𑀁 ¶ , 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀧𑀜𑁆𑀘𑀲𑁆𑀲 𑀦𑀻𑀯𑀭𑀡𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑁋

𑀘 𑀆𑀤𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄𑀢𑀺 𑀲𑀫𑀣𑀲𑀼𑀔𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀼𑀔𑀲𑁆𑀲 𑀘 𑀲𑀫𑁆𑀧𑀸𑀧𑀦𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 ¶ 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀆𑀤𑀺, 𑀢𑀣𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁.

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺 𑀘. (𑀥. 𑀧. 𑁩𑁭𑁪-𑁩𑁭𑁩);

𑀢𑀣𑀸 𑀧𑀝𑀺𑀧𑀦𑁆𑀦𑁄𑀢𑀺 𑀬𑀣𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀁 𑀆𑀯𑀳𑀢𑀺, 𑀬𑀣𑀸 𑀯𑀸 𑀲𑀢𑁆𑀣𑀸𑀭𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀲𑀸𑀲𑀦𑀥𑀫𑁆𑀫𑁄. 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀲𑁆𑀲 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑁂𑀧𑀲𑁆𑀲 𑀆𑀯𑀳𑀦𑀢𑁄. 𑀦𑀸𑀣𑀧𑁆𑀧𑀪𑀯𑀢𑁆𑀢𑀸𑀢𑀺 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄, 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁, 𑀦𑀸𑀣𑁄𑀯 𑀧𑀪𑀯𑁄 𑀏𑀢𑀲𑁆𑀲𑀸𑀢𑀺 𑀦𑀸𑀣𑀧𑁆𑀧𑀪𑀯𑁄, 𑀢𑀲𑁆𑀲 𑀪𑀸𑀯𑁄 𑀦𑀸𑀣𑀧𑁆𑀧𑀪𑀯𑀢𑁆𑀢𑀁, 𑀢𑀲𑁆𑀫𑀸 𑀲𑀸𑀲𑀦𑀥𑀫𑁆𑀫𑀲𑁆𑀲 𑀦𑀸𑀣𑀳𑁂𑀢𑀼𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀼𑀤𑁆𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑀢𑀸 𑀅𑀢𑁆𑀣𑀲𑀼𑀤𑁆𑀥𑀺, 𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄. 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄𑀢𑀺 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀓𑀺𑀘𑁆𑀘𑀲𑁆𑀲 𑀲𑀼𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀲𑀸𑀲𑀦𑀥𑀫𑁆𑀫𑀲𑁆𑀲. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀅𑀯𑀺𑀲𑁂𑀲𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀓𑀮𑁄 𑀘 𑀢𑀦𑁆𑀢𑀺𑀥𑀫𑁆𑀫𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀢𑀫𑁂𑀲𑀸𑀦𑀁 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀫𑀳𑁄𑀲𑀻’’𑀢𑀺𑀆𑀤𑀺 (𑀧𑀸𑀭𑀸. 𑁧𑁮). 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 (𑀧𑀸𑀭𑀸. 𑁧𑁪). 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀬𑀣𑀸𑀭𑀳𑀁. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀜𑁆𑀳𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀢𑀣𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀢𑀭𑀁 𑀧𑀦 𑀢𑀦𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀜𑁆𑀘. 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀧𑀦𑁆𑀦𑀢𑁆𑀣𑀢𑀸𑀬. 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁄 𑀳𑀺 𑀇𑀥 𑀲𑀳𑀲𑀤𑁆𑀤𑁄. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀲 𑀳𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀡𑁆𑀡𑀦𑀸𑀦𑀺𑀲𑁆𑀲𑀺𑀢𑀸 𑀤𑁂𑀲𑀦𑀸 𑀳𑁄𑀢𑀺, 𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀪𑀕𑀯𑀸 𑀧𑀦 𑀢𑀣𑀸𑀭𑀽𑀧𑀁 𑀤𑁂𑀲𑀦𑀁 ¶ 𑀧𑀳𑀸𑀬 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀦𑀺𑀲𑁆𑀲𑀺𑀢𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 ‘‘𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺 ¶ . 𑀬𑀲𑁆𑀲 𑀧𑀦 𑀤𑁂𑀲𑀦𑀸 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀪𑁂𑀤𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀦𑁂𑀯 𑀤𑁆𑀯𑀺𑀧𑁆𑀧𑀓𑀸𑀭𑁂𑀦𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀢𑀸𑀬 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬, 𑀯𑀺𑀯𑀝𑀓𑀭𑀡𑀢𑀸𑀬 𑀑𑀝𑁆𑀞𑁂 𑀅𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀢𑁄 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀓𑀺𑀭𑀸𑀢𑀪𑀸𑀲𑀸 𑀯𑀺𑀬, 𑀲𑀩𑁆𑀩𑀢𑁆𑀣𑁂𑀯 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀬𑀯𑀦𑀪𑀸𑀲𑀸 𑀯𑀺𑀬, 𑀲𑀩𑁆𑀩𑀢𑁆𑀣𑁂𑀯 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀦𑀺𑀕𑁆𑀕𑀳𑀻𑀢𑀩𑁆𑀬𑀜𑁆𑀚𑀦𑀸 𑀯𑀸 𑀧𑀸𑀤𑀲𑀺𑀓𑀸𑀤𑀺 𑀫𑀺𑀮𑀓𑁆𑀔𑀼𑀪𑀸𑀲𑀸 𑀯𑀺𑀬, 𑀢𑀲𑁆𑀲 𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀅𑀩𑁆𑀬𑀜𑁆𑀚𑀦𑀸 𑀦𑀸𑀫 𑀤𑁂𑀲𑀦𑀸 𑀳𑁄𑀢𑀺. 𑀲𑀩𑁆𑀩𑀸𑀧𑀺 𑀳𑀺 𑀏𑀲𑀸 𑀩𑁆𑀬𑀜𑁆𑀚𑀦𑁂𑀓𑀤𑁂𑀲𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀧𑀦 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁧; 𑀧𑀭𑀺. 𑀅𑀝𑁆𑀞. 𑁪𑁮𑁫) 𑁋

𑀏𑀯𑀁 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 ‘‘𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀏𑀢𑁆𑀣 𑀦𑁂𑀢𑁆𑀢𑀺𑀦𑀬𑁂𑀦𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀸𑀲𑀦𑀁…𑀧𑁂… 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺𑀧𑀺 𑀦𑁂𑀢𑁆𑀢𑀺𑀬𑀁 ‘‘𑀩𑁆𑀬𑀜𑁆𑀚𑀦𑀫𑀼𑀔𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀅𑀓𑁆𑀔𑀭𑀁 𑀧𑀤’’𑀦𑁆𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀇𑀥 𑀧𑀦 𑀧𑀸𑀴𑀺𑀬𑀁 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀅𑀢𑁆𑀣𑀧𑀤𑀸𑀦𑀺𑀬𑁂𑀯 𑀧𑀞𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀓𑀸𑀲𑀦𑀁 𑀤𑀻𑀧𑀦𑀁 𑀲𑀗𑁆𑀓𑀸𑀲𑀦𑀁. 𑀓𑀸𑀲𑀦𑀦𑁆𑀢𑀺 𑀘 𑀓𑀸𑀲𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑀺𑀪𑀸𑀯𑀻𑀬𑀢𑀻𑀢𑀺 𑀅𑀢𑁆𑀣𑁄. ‘‘𑀫𑀜𑁆𑀜𑀫𑀸𑀦𑁄 𑀔𑁄 𑀪𑀺𑀓𑁆𑀔𑀼 𑀩𑀤𑁆𑀥𑁄 𑀫𑀸𑀭𑀲𑁆𑀲 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀗𑁆𑀔𑁂𑀧𑁂𑀦 𑀤𑀻𑀧𑀦𑀁 𑀲𑀗𑁆𑀓𑀸𑀲𑀦𑀁 𑀦𑀸𑀫. 𑀢𑀢𑁆𑀢𑀓𑁂𑀦 𑀳𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀯𑀺𑀤𑁆𑀥𑀁. 𑀢𑁂𑀦𑀸𑀳 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸’’𑀢𑀺𑀆𑀤𑀺. 𑀧𑀞𑀫𑀁 𑀓𑀸𑀲𑀦𑀁 𑀧𑀓𑀸𑀲𑀦𑀁. ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀘𑁆𑀙𑀸 𑀓𑀣𑀺𑀢𑀩𑁆𑀩𑀫𑀢𑁆𑀣𑀁 𑀧𑀞𑀫𑀁 𑀯𑀘𑀦𑁂𑀦 𑀤𑀻𑀧𑀦𑀁 𑀧𑀓𑀸𑀲𑀦𑀁 𑀦𑀸𑀫. 𑀆𑀤𑀺𑀓𑀫𑁆𑀫𑀲𑁆𑀫𑀺𑀜𑁆𑀳𑀺 𑀅𑀬𑀁 𑀧-𑀲𑀤𑁆𑀤𑁄 ‘‘𑀧𑀜𑁆𑀜𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀜𑁆𑀘𑁂𑀢𑀁 𑀧𑀤𑀤𑁆𑀯𑀬𑀁 𑀉𑀤𑁆𑀤𑁂𑀲𑀪𑀸𑀯𑀢𑁄. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀳𑀺 𑀲𑀗𑁆𑀔𑁂𑀧𑀢𑁄 𑀧𑀞𑀫𑀜𑁆𑀘 𑀯𑀼𑀢𑁆𑀢𑀫𑀢𑁆𑀣𑀁 𑀧𑀝𑀺𑀧𑀚𑁆𑀚𑀢𑀺. 𑀲𑀁𑀔𑀺𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁 𑀲𑀓𑀺𑀁 𑀯𑀼𑀢𑁆𑀢𑀲𑁆𑀲 𑀧𑀼𑀦 𑀯𑀘𑀦𑀜𑁆𑀘 𑀯𑀺𑀯𑀭𑀡𑀯𑀺𑀪𑀚𑀦𑀸𑀦𑀺, 𑀬𑀣𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀲𑀓𑀺𑀁𑀬𑁂𑀯 𑀘 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀓𑀢𑀫𑁂 ¶ 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀯𑀭𑀡𑀯𑀲𑁂𑀦 ¶ 𑀯𑀺𑀪𑀚𑀦𑀯𑀲𑁂𑀦 𑀘 𑀧𑀼𑀦 𑀯𑀘𑀦𑀁. 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀫𑁂𑀢𑀁 𑀧𑀤𑀤𑁆𑀯𑀬𑀁 𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀯𑀺𑀯𑀝𑀲𑁆𑀲 𑀯𑀺𑀢𑁆𑀣𑀸𑀭𑀢𑀭𑀸𑀪𑀺𑀥𑀸𑀦𑀁 𑀯𑀺𑀪𑀢𑁆𑀢𑀲𑁆𑀲 𑀘 𑀧𑀓𑀸𑀭𑁂𑀳𑀺 𑀜𑀸𑀧𑀦𑀁 𑀯𑀺𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀸𑀧𑀦𑀸𑀦𑀺, 𑀬𑀣𑀸 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀝𑀯𑀺𑀪𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀸𑀦𑀻𑀓𑀺𑀭𑀺𑀬𑀸 𑀧𑀜𑁆𑀜𑀸𑀧𑀦𑀸 𑀘. 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀧𑁂𑀓𑁆𑀔𑀫𑁂𑀢𑀁 𑀧𑀤𑀤𑁆𑀯𑀬𑀁 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑀢𑁄.

𑀅𑀣 𑀯𑀸 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀞𑀫𑀁 𑀤𑀻𑀧𑀺𑀢𑀫𑀢𑁆𑀣𑀁 𑀧𑀼𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀻𑀧𑀦𑁂𑀦 ‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀆𑀤𑀺𑀢𑁆𑀢𑀁? 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀁𑀔𑀺𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑀸𑀪𑀺𑀥𑀸𑀦𑁂𑀦 𑀲𑀓𑀺𑀁 𑀯𑀼𑀢𑁆𑀢𑀲𑁆𑀲 𑀧𑀼𑀦𑀧𑀺 𑀅𑀪𑀺𑀥𑀸𑀦𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑁂𑀲𑀦𑀁 𑀯𑀺𑀯𑀭𑀡𑀁 𑀦𑀸𑀫. ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀯𑀭𑀺𑀢𑁂 𑀓𑀼𑀲𑀮𑁂 𑀥𑀫𑁆𑀫𑁂 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺 𑀯𑀺𑀪𑀸𑀕𑀓𑀭𑀡𑀁 𑀯𑀺𑀪𑀚𑀦𑀁 𑀦𑀸𑀫. 𑀯𑀺𑀯𑀝𑀲𑁆𑀲 𑀯𑀺𑀢𑁆𑀣𑀸𑀭𑀸𑀪𑀺𑀥𑀸𑀦𑁂𑀦 𑀯𑀺𑀪𑀢𑁆𑀢𑀲𑁆𑀲 𑀘 𑀉𑀧𑀫𑀸𑀪𑀺𑀥𑀸𑀦𑁂𑀦 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀻𑀢𑀺 𑀯𑀺𑀯𑀭𑀡𑁂𑀦 𑀯𑀺𑀯𑀭𑀺𑀢𑀢𑁆𑀣𑀲𑁆𑀲 ‘‘𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸’’𑀢𑀺 𑀅𑀢𑀺𑀯𑀺𑀯𑀭𑀺𑀢𑁆𑀯𑀸 𑀓𑀣𑀦𑀁, 𑀯𑀺𑀪𑀚𑀦𑁂𑀦 𑀯𑀺𑀪𑀢𑁆𑀢𑀲𑁆𑀲 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀸𑀯𑀻 𑀦𑀺𑀘𑁆𑀘𑀫𑁆𑀫𑀸, 𑀏𑀯𑀫𑁂𑀯 𑀔𑁆𑀯𑀸𑀬𑀁 𑀪𑀺𑀓𑁆𑀔𑀯𑁂 𑀨𑀲𑁆𑀲𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀉𑀧𑀫𑀸𑀓𑀣𑀦𑀜𑁆𑀘 𑀉𑀢𑁆𑀢𑀸𑀦𑀻𑀓𑀭𑀡𑀁 𑀦𑀸𑀫. 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑁂𑀦 𑀯𑀺𑀘𑀺𑀢𑁆𑀢𑁂𑀦 𑀅𑀦𑁂𑀓𑀯𑀺𑀥𑁂𑀦 𑀲𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑀦𑀁 𑀅𑀢𑀺𑀔𑀺𑀡𑀩𑀼𑀤𑁆𑀥𑀻𑀦𑀁 𑀅𑀦𑁂𑀓𑀯𑀺𑀥𑁂𑀦 𑀜𑀸𑀡𑀢𑀺𑀔𑀺𑀡𑀓𑀭𑀡𑀜𑁆𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀲𑁄𑀢𑀽𑀦𑀁 𑀘𑀺𑀢𑁆𑀢𑀢𑁄𑀲𑀦𑁂𑀦 𑀘𑀺𑀢𑁆𑀢𑀦𑀺𑀲𑀸𑀦𑁂𑀦 𑀘 𑀧𑀜𑁆𑀜𑀸𑀧𑀦𑀁 𑀧𑀜𑁆𑀜𑀢𑁆𑀢𑀻𑀢𑀺 𑀓𑀢𑁆𑀯𑀸. 𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀲𑁆𑀲 𑀲𑀗𑁆𑀓𑀸𑀲𑀦𑀸𑀤𑀺𑀅𑀢𑁆𑀣𑀧𑀤𑀭𑀽𑀧𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀙𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀸𑀤𑀬𑁄 𑀳𑀺 𑀅𑀢𑁆𑀣𑀸𑀓𑀸𑀭𑀢𑁆𑀢𑀸 ‘‘𑀅𑀢𑁆𑀣𑀧𑀤𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀣𑁄𑀬𑁂𑀯 𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀲𑀗𑁆𑀓𑀸𑀲𑀻𑀬𑀢𑀺 𑀧𑀓𑀸𑀲𑀻𑀬𑀢𑀺 𑀯𑀺𑀯𑀭𑀻𑀬𑀢𑀺 𑀯𑀺𑀪𑀚𑀻𑀬𑀢𑀺 𑀉𑀢𑁆𑀢𑀸𑀦𑀻 𑀓𑀭𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀺.

𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀲-𑀓𑀸𑀭 𑀤𑀼-𑀓𑀸𑀭 𑀲𑁄-𑀓𑀸𑀭𑀸𑀤𑀺 𑀯𑀺𑀬 𑀉𑀘𑁆𑀘𑀸𑀭𑀡𑀯𑁂𑀮𑀸𑀬 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂 𑀯𑀡𑁆𑀡𑁄 𑀅𑀓𑁆𑀔𑀭𑀁 𑀧𑀭𑀺𑀬𑀸𑀬𑀯𑀲𑁂𑀦 𑀅𑀓𑁆𑀔𑀭𑀡𑀢𑁄 ¶ 𑀅𑀯𑁂𑀯𑀘𑀦𑀢𑁄. 𑀦 𑀳𑀺 𑀯𑀡𑁆𑀡𑀲𑁆𑀲 𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀺. 𑀬𑀣𑀸 𑀳𑀺 𑀧𑀤𑀁 𑀲𑀯𑁂𑀯𑀘𑀦𑀢𑀸𑀬 𑀅𑀢𑁆𑀣𑀯𑀲𑁂𑀦 𑀧𑀭𑀺𑀬𑀸𑀬𑀁 𑀘𑀭𑀦𑁆𑀢𑀁 𑀲𑀜𑁆𑀘𑀭𑀦𑁆𑀢𑀁 𑀯𑀺𑀬 𑀳𑁄𑀢𑀺, 𑀦 𑀏𑀯𑀁 𑀯𑀡𑁆𑀡𑁄 𑀅𑀯𑁂𑀯𑀘𑀦𑀢𑁆𑀢𑀸. 𑀏𑀓𑀓𑁆𑀔𑀭𑀁 𑀯𑀸 𑀧𑀤𑀁 𑀅𑀓𑁆𑀔𑀭𑀁 ‘‘𑀫𑀸 𑀏𑀯𑀁 𑀓𑀺𑀭 𑀢’’𑀦𑁆𑀢𑀺𑀆𑀤𑀻𑀲𑀼 𑀫𑀸-𑀓𑀸𑀭𑀸𑀤𑀬𑁄 ¶ 𑀯𑀺𑀬. 𑀓𑁂𑀘𑀺 𑀧𑀦 ‘‘𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀭𑀺𑀲𑀼𑀤𑁆𑀥𑀧𑀬𑁄𑀕𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀓𑀭𑀡𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀯𑀸𑀘𑀸𑀳𑀺 𑀅𑀓𑁆𑀔𑀭𑀡𑀢𑁄 𑀅𑀯𑁂𑀯𑀘𑀦𑀢𑁄 𑀅𑀓𑀣𑀺𑀢𑀢𑁆𑀢𑀸 𑀅𑀓𑁆𑀔𑀭𑀦𑁆𑀢𑀺 𑀲𑀜𑁆𑀜𑀺𑀢𑀸. 𑀢𑀁 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑀲𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀸𑀦𑀁 𑀯𑀲𑁂𑀦 𑀪𑀕𑀯𑀢𑀸 𑀭𑀢𑀦𑀖𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀫𑀲𑀺𑀢𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀯𑀲𑁂𑀦 𑀘 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀪𑀢𑁆𑀢𑀺𑀬𑀦𑁆𑀢𑀁 𑀅𑀢𑁆𑀣𑀲𑁆𑀲 𑀜𑀸𑀧𑀦𑀢𑁄 𑀧𑀤𑀁. 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀳𑀺 𑀧𑀤𑀁. 𑀢𑀁 𑀦𑀸𑀫𑀧𑀤𑀁 𑀆𑀔𑁆𑀬𑀸𑀢𑀧𑀤𑀁 𑀉𑀧𑀲𑀕𑁆𑀕𑀧𑀤𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀨𑀲𑁆𑀲𑁄 𑀯𑁂𑀤𑀦𑀸 𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀤𑀩𑁆𑀩𑀧𑀥𑀸𑀦𑀁 𑀦𑀸𑀫𑀧𑀤𑀁. 𑀦𑀸𑀫𑀧𑀤𑁂𑀳𑀺 𑀤𑀩𑁆𑀩𑀫𑀸𑀯𑀺𑀪𑀽𑀢𑀭𑀽𑀧𑀁, 𑀓𑀺𑀭𑀺𑀬𑀸 𑀅𑀦𑀸𑀯𑀺𑀪𑀽𑀢𑀭𑀽𑀧𑀸. 𑀨𑀼𑀲𑀢𑀺 𑀯𑁂𑀤𑀬𑀢𑀺 𑀯𑀺𑀚𑀸𑀦𑀸𑀢𑀻𑀢𑀺 𑀏𑀯𑀫𑀸𑀤𑀺𑀓𑀁 𑀓𑀺𑀭𑀺𑀬𑀸𑀧𑀥𑀸𑀦𑀁 𑀆𑀔𑁆𑀬𑀸𑀢𑀧𑀤𑀁. 𑀆𑀔𑁆𑀬𑀸𑀢𑀧𑀤𑁂𑀳𑀺 𑀓𑀺𑀭𑀺𑀬𑀸 𑀆𑀯𑀺𑀪𑀽𑀢𑀭𑀽𑀧𑀸, 𑀤𑀩𑁆𑀩𑀫𑀦𑀸𑀯𑀺𑀪𑀽𑀢𑀭𑀽𑀧𑀁. 𑀬𑀣𑀸 ‘‘𑀘𑀺𑀭𑀧𑁆𑀧𑀯𑀸𑀲𑀺’’𑀦𑁆𑀢𑀺 𑀏𑀢𑁆𑀣 𑀧-𑀲𑀤𑁆𑀤𑁄 𑀯𑀲𑀦𑀓𑀺𑀭𑀺𑀬𑀸𑀬 𑀯𑀺𑀬𑁄𑀕𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀺, 𑀏𑀯𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀤𑀻𑀧𑀦𑀢𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀯𑀩𑁄𑀥𑀦𑀺𑀫𑀺𑀢𑁆𑀢𑀁. 𑀧-𑀇𑀢𑀺 𑀏𑀯𑀫𑀸𑀤𑀺𑀓𑀁 𑀉𑀧𑀲𑀕𑁆𑀕𑀧𑀤𑀁. 𑀓𑀺𑀭𑀺𑀬𑀸𑀬 𑀤𑀩𑁆𑀩𑀲𑁆𑀲 𑀘 𑀲𑀭𑀽𑀧𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀳𑁂𑀢𑀼𑀪𑀽𑀢𑀁 𑀏𑀯𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀦𑀺𑀧𑀸𑀢𑀧𑀤𑀁. ‘‘𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀳𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀤𑀻𑀧𑀦𑀢𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀚𑁄𑀢𑀓𑁄 𑀏𑀯𑀁𑀲𑀤𑁆𑀤𑁄, ‘‘𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀤𑀩𑁆𑀩𑀯𑀺𑀲𑁂𑀲𑀲𑁆𑀲. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀧𑀤𑀸𑀪𑀺𑀳𑀺𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀓𑀣𑀺𑀢𑀫𑀢𑁆𑀣𑀁 ‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬, 𑀘𑀺𑀢𑁆𑀢, 𑀯𑀻𑀫𑀁𑀲𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀯𑀸𑀓𑁆𑀬𑀫𑁂𑀯 𑀩𑁆𑀬𑀜𑁆𑀚𑀦𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀧𑀤𑀲𑀫𑀼𑀤𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀆𑀔𑁆𑀬𑀸𑀢𑀁 𑀲𑀦𑀺𑀧𑀸𑀢𑀁 𑀲𑀓𑀸𑀭𑀓𑀁 𑀲𑀯𑀺𑀲𑁂𑀲𑀦𑀁 𑀯𑀸𑀓𑁆𑀬𑀦𑁆𑀢𑀺 𑀳𑀺 𑀯𑀤𑀦𑁆𑀢𑀺. 𑀦𑀦𑀼 𑀘 𑀧𑀤𑁂𑀦𑀧𑀺 𑀅𑀢𑁆𑀣𑁄 𑀩𑁆𑀬𑀜𑁆𑀚𑀻𑀬𑀢𑀻𑀢𑀺 𑀧𑀤𑀫𑁆𑀧𑀺 𑀩𑁆𑀬𑀜𑁆𑀚𑀦𑀦𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀢𑀁 𑀦. 𑀧𑀤𑀫𑀢𑁆𑀢𑀲𑀯𑀦𑁂𑀧𑀺 𑀳𑀺 𑀅𑀥𑀺𑀓𑀸𑀭𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑁂𑀳𑀺 𑀧𑀤𑀦𑁆𑀢𑀭𑁂𑀳𑀺 𑀅𑀦𑀼𑀲𑀦𑁆𑀥𑀸𑀦𑀁 𑀓𑀢𑁆𑀯𑀸𑀯 𑀅𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀸𑀓𑁆𑀬𑀫𑁂𑀯 𑀅𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺.

𑀧𑀓𑀸𑀭𑀢𑁄 𑀯𑀸𑀓𑁆𑀬𑀯𑀺𑀪𑀸𑀕𑁄 𑀆𑀓𑀸𑀭𑁄. ‘‘𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑁄? 𑀬𑁄 𑀙𑀦𑁆𑀤𑁄 𑀙𑀦𑁆𑀤𑀺𑀓𑀢𑀸 𑀓𑀢𑁆𑀢𑀼𑀓𑀫𑁆𑀬𑀢𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀓𑀣𑀺𑀢𑀲𑁆𑀲𑁂𑀯 𑀯𑀸𑀓𑁆𑀬𑀲𑁆𑀲 ¶ 𑀅𑀦𑁂𑀓𑀯𑀺𑀥𑁂𑀦 𑀯𑀺𑀪𑀸𑀕𑀓𑀭𑀡𑀁 𑀆𑀓𑀸𑀭𑁄 𑀦𑀸𑀫. 𑀆𑀓𑀸𑀭𑀸𑀪𑀺𑀳𑀺𑀢𑀁 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺. ‘‘𑀨𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀆𑀓𑀸𑀭𑁂𑀦 𑀓𑀣𑀺𑀢𑀁 ‘‘𑀨𑀼𑀲𑀢𑀻𑀢𑀺 𑀨𑀲𑁆𑀲𑁄, 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀯𑀘𑀦𑀁 𑀦𑀺𑀭𑀼𑀢𑁆𑀢𑀺 𑀦𑀸𑀫. ‘‘𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀸 𑀫𑀕𑁆𑀕𑀻𑀬𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄’’𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀘𑀦𑀯𑀺𑀢𑁆𑀣𑀸𑀭𑁄 𑀦𑀺𑀭𑀯𑀲𑁂𑀲𑀤𑁂𑀲𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑁄. 𑀅𑀣 𑀯𑀸 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸𑀢𑀺 𑀦𑀺𑀩𑁆𑀩𑀘𑀦𑀮𑀤𑁆𑀥𑀧𑀤𑁂𑀲𑀼 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀸𑀲𑀼 𑀲𑀼𑀔𑀬𑀢𑀻𑀢𑀺 𑀲𑀼𑀔𑀸, 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸, 𑀦𑁂𑀯 𑀤𑀼𑀓𑁆𑀔𑀬𑀢𑀺 𑀦 𑀲𑀼𑀔𑀬𑀢𑀻𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀅𑀢𑁆𑀣𑀯𑀺𑀢𑁆𑀣𑀸𑀭𑁄 𑀦𑀺𑀭𑀯𑀲𑁂𑀲𑁂𑀦 𑀓𑀣𑀺𑀢𑀢𑁆𑀢𑀸 𑀦𑀺𑀤𑁆𑀤𑁂𑀲𑁄 𑀦𑀸𑀫. 𑀏𑀢𑁂𑀲𑀁 𑀅𑀓𑁆𑀔𑀭𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀧𑀤𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀢𑀸𑀬 𑀲𑀩𑁆𑀬𑀜𑁆𑀚𑀦𑀁.

𑀏𑀯𑀁 ¶ 𑀧𑀦𑀲𑁆𑀲 𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑁄 𑀩𑁆𑀬𑀜𑁆𑀚𑀦𑀧𑀤𑀲𑀫𑁆𑀧𑀢𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀺. 𑀢𑀣𑀸 𑀳𑀺 𑀧𑀤𑀸𑀯𑀬𑀯𑀕𑁆𑀕𑀳𑀡𑀫𑀼𑀔𑁂𑀦 𑀧𑀤𑀕𑁆𑀕𑀳𑀡𑀁, 𑀕𑀳𑀺𑀢𑁂𑀦 𑀘 𑀧𑀤𑁂𑀦 𑀧𑀤𑀢𑁆𑀣𑀸𑀯𑀩𑁄𑀥𑁄 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑀲𑁆𑀲 𑀳𑁄𑀢𑀻𑀢𑀺 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀅𑀓𑁆𑀔𑀭𑁂𑀳𑀺 𑀲𑀁𑀔𑀺𑀢𑁆𑀢𑁂𑀦 𑀤𑀻𑀧𑀺𑀬𑀫𑀸𑀦𑁄 𑀅𑀢𑁆𑀣𑁄 𑀧𑀤𑀧𑀭𑀺𑀬𑁄𑀲𑀸𑀦𑁂 𑀯𑀸𑀓𑁆𑀬𑀲𑁆𑀲 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀧𑀤𑁂𑀦 𑀧𑀞𑀫𑀁 𑀧𑀓𑀸𑀲𑀺𑀢𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺. 𑀯𑀸𑀓𑁆𑀬𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑁄 𑀅𑀢𑁆𑀣𑁄 𑀯𑀺𑀯𑀭𑀺𑀢𑁄 𑀯𑀺𑀯𑀝𑁄 𑀓𑀢𑁄 𑀳𑁄𑀢𑀻𑀢𑀺 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺. 𑀬𑀲𑁆𑀫𑀸 𑀘 𑀧𑀓𑀸𑀭𑁂𑀳𑀺 𑀯𑀸𑀓𑁆𑀬𑀪𑁂𑀤𑁂 𑀓𑀢𑁂 𑀢𑀤𑀢𑁆𑀣𑁄 𑀯𑀺𑀪𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺. 𑀢𑀣𑀸 𑀯𑀸𑀓𑁆𑀬𑀸𑀯𑀬𑀯𑀸𑀦𑀁 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑁂 𑀓𑀢𑁂 𑀲𑁄 𑀅𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺. 𑀓𑀢𑀦𑀺𑀩𑁆𑀩𑀘𑀦𑁂𑀳𑀺 𑀧𑀦 𑀯𑀸𑀓𑁆𑀬𑀸𑀯𑀬𑀯𑁂𑀳𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀤𑁂𑀲𑀺𑀢𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀩𑀼𑀤𑁆𑀥𑀺𑀦𑀺𑀲𑀸𑀦𑀜𑁆𑀘 𑀓𑀢𑀁 𑀳𑁄𑀢𑀻𑀢𑀺 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀺. 𑀅𑀧𑀺𑀘 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀉𑀕𑁆𑀖𑀝𑁂𑀢𑁆𑀯𑀸 𑀧𑀤𑁂𑀳𑀺 𑀯𑀺𑀦𑁂𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀁, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀧𑀜𑁆𑀘𑁂𑀢𑁆𑀯𑀸 𑀆𑀓𑀸𑀭𑁂𑀳𑀺 𑀯𑀺𑀦𑁂𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑀺𑀭𑀼𑀢𑁆𑀢𑀻𑀳𑀺 𑀦𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀳𑀺 𑀯𑀺𑀦𑁂𑀢𑀺 𑀦𑁂𑀬𑁆𑀬𑀁. 𑀏𑀯𑀜𑁆𑀘𑀸𑀬𑀁 𑀥𑀫𑁆𑀫𑁄 𑀉𑀕𑁆𑀖𑀝𑀺𑀬𑀫𑀸𑀦𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀁 𑀯𑀺𑀦𑁂𑀢𑀺, 𑀯𑀺𑀧𑀜𑁆𑀘𑀺𑀬𑀫𑀸𑀦𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑀻𑀬𑀫𑀸𑀦𑁄 𑀦𑁂𑀬𑁆𑀬𑀁. 𑀢𑀢𑁆𑀣 𑀉𑀕𑁆𑀖𑀝𑀦𑀸 𑀆𑀤𑀺, 𑀯𑀺𑀧𑀜𑁆𑀘𑀦𑀸 𑀫𑀚𑁆𑀛𑁂, 𑀦𑀬𑀦𑀁 𑀅𑀦𑁆𑀢𑁂. 𑀏𑀯𑀁 𑀢𑀻𑀲𑀼 𑀓𑀸𑀮𑁂𑀲𑀼 𑀢𑀺𑀥𑀸 𑀤𑁂𑀲𑀺𑀢𑁄 𑀤𑁄𑀲𑀢𑁆𑀢𑀬𑀯𑀺𑀥𑀫𑀦𑁄 𑀕𑀼𑀡𑀢𑁆𑀢𑀬𑀸𑀯𑀳𑁄 𑀢𑀺𑀯𑀺𑀥𑀯𑀺𑀦𑁂𑀬𑁆𑀬𑀯𑀺𑀦𑀬𑀦𑁄𑀢𑀺 𑀏𑀯𑀫𑁆𑀧𑀺 𑀢𑀺𑀯𑀺𑀥𑀓𑀮𑁆𑀬𑀸𑀡𑁄𑀬𑀁 ¶ 𑀥𑀫𑁆𑀫𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀲𑀸𑀢𑁆𑀣𑁄 𑀲𑀩𑁆𑀬𑀜𑁆𑀚𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀧𑀓𑀭𑀡𑁂 (𑀦𑁂𑀢𑁆𑀢𑀺. 𑁯) 𑁋

‘‘𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀪𑀕𑀯𑀸 𑀅𑀓𑁆𑀔𑀭𑁂𑀳𑀺 𑀘 𑀧𑀤𑁂𑀳𑀺 𑀘 𑀉𑀕𑁆𑀖𑀝𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀘 𑀆𑀓𑀸𑀭𑁂𑀳𑀺 𑀘 𑀯𑀺𑀧𑀜𑁆𑀘𑁂𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀘 𑀦𑀺𑀤𑁆𑀤𑁂𑀲𑁂𑀳𑀺 𑀘 𑀯𑀺𑀢𑁆𑀣𑀸𑀭𑁂𑀢𑀺. 𑀢𑀢𑁆𑀣 𑀉𑀕𑁆𑀖𑀝𑀦𑀸 𑀆𑀤𑀺, 𑀯𑀺𑀧𑀜𑁆𑀘𑀦𑀸 𑀫𑀚𑁆𑀛𑁂, 𑀯𑀺𑀢𑁆𑀣𑀸𑀭𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀲𑁄𑀬𑀁 𑀥𑀫𑁆𑀫𑀯𑀺𑀦𑀬𑁄 𑀉𑀕𑁆𑀖𑀝𑀺𑀬𑀦𑁆𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 𑀆𑀤𑀺𑀓𑀮𑁆𑀬𑀸𑀡𑁄𑀢𑀺. 𑀯𑀺𑀧𑀜𑁆𑀘𑀺𑀬𑀦𑁆𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 𑀫𑀚𑁆𑀛𑁂𑀓𑀮𑁆𑀬𑀸𑀡𑁄𑀢𑀺. 𑀯𑀺𑀢𑁆𑀣𑀸𑀭𑀺𑀬𑀦𑁆𑀢𑁄 𑀦𑁂𑀬𑁆𑀬𑀁 𑀧𑀼𑀕𑁆𑀕𑀮𑀁 𑀯𑀺𑀦𑁂𑀢𑀺, 𑀢𑁂𑀦 𑀦𑀁 𑀆𑀳𑀼 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄𑀢𑀻’’𑀢𑀺.

𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀅𑀢𑁆𑀣𑁄. 𑀥𑀫𑁆𑀫𑁄 𑀢𑀦𑁆𑀢𑀺. 𑀧𑀝𑀺𑀯𑁂𑀥𑁄 𑀢𑀦𑁆𑀢𑀺𑀬𑀸 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀤𑁂𑀲𑀦𑀸 𑀦𑀸𑀫 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀢𑁂 𑀧𑀦𑁂𑀢𑁂 𑀅𑀢𑁆𑀣𑀸𑀤𑀬𑁄 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 ¶ 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀅𑀣 𑀯𑀸 𑀅𑀢𑁆𑀣𑁄 𑀦𑀸𑀫 𑀳𑁂𑀢𑀼𑀨𑀮𑀁. 𑀥𑀫𑁆𑀫𑁄 𑀳𑁂𑀢𑀼. 𑀤𑁂𑀲𑀦𑀸 𑀧𑀜𑁆𑀜𑀢𑁆𑀢𑀺, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀁. 𑀧𑀝𑀺𑀯𑁂𑀥𑁄 𑀅𑀪𑀺𑀲𑀫𑀬𑁄, 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄. 𑀢𑁂𑀲𑀁 𑀢𑁂𑀲𑀁 𑀯𑀸 𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀢𑁂𑀧𑀺 𑀘𑁂𑀢𑁂 𑀅𑀢𑁆𑀣𑀸𑀤𑀬𑁄 𑀬𑀲𑁆𑀫𑀸 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀧𑁆𑀧𑀜𑁆𑀜𑁂𑀳𑀺 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀲𑀼 𑀧𑀝𑀺𑀯𑁂𑀥𑀲𑁆𑀲𑀧𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀕𑀼𑀡𑀤𑀻𑀧𑀦𑀢𑁄. 𑀢𑀸𑀲𑀁 𑀥𑀫𑁆𑀫𑀤𑁂𑀲𑀦𑀸𑀦𑀁 𑀩𑁆𑀬𑀜𑁆𑀚𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀢𑀸𑀲𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀢𑁄. 𑀅𑀢𑁆𑀣𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀇𑀫𑀺𑀲𑁆𑀲𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀬 𑀅𑀢𑁆𑀣𑀯𑀺𑀲𑀬𑀢𑁆𑀢𑀸 𑀆𑀳 ‘‘𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 ¶ 𑀅𑀲𑀢𑀺 𑀢𑀤𑀪𑀸𑀯𑀢𑁄. 𑀥𑀫𑁆𑀫𑁄𑀢𑀺 𑀢𑀦𑁆𑀢𑀺. 𑀦𑀺𑀭𑀼𑀢𑁆𑀢𑀻𑀢𑀺 𑀢𑀦𑁆𑀢𑀺𑀧𑀤𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀘𑀦𑀁. 𑀢𑀢𑁆𑀣 𑀧𑀪𑁂𑀤𑀕𑀢𑀸𑀦𑀺 𑀜𑀸𑀡𑀸𑀦𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀆𑀳 ‘‘𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀅𑀲𑀢𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄.

𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀭𑀺𑀓𑁆𑀔𑀓𑀚𑀦𑀸𑀦𑀁 𑀓𑀺𑀁𑀓𑀼𑀲𑀮𑀕𑀯𑁂𑀲𑀻𑀦𑀁 𑀧𑀲𑀸𑀤𑀸𑀯𑀳𑀁, 𑀢𑀲𑁆𑀫𑀸 𑀲𑀸𑀢𑁆𑀣𑀁. 𑀅𑀢𑁆𑀣𑀲𑀫𑁆𑀧𑀦𑁆𑀦𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀧𑀯𑀢𑁆𑀢𑀺𑀬𑀸. 𑀲𑀸𑀢𑁆𑀣𑀓𑀢𑀸 𑀧𑀦𑀲𑁆𑀲 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑀸𑀬, 𑀲𑀸 𑀧𑀭𑀫𑀕𑀫𑁆𑀪𑀻𑀭𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄’’𑀢𑀺𑀆𑀤𑀺. 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑀲𑁆𑀫𑀸 𑀮𑁄𑀓𑀺𑀬𑀚𑀦𑀲𑁆𑀲 𑀧𑀲𑀸𑀤𑀸𑀯𑀳𑀁, 𑀢𑀲𑁆𑀫𑀸 𑀲𑀩𑁆𑀬𑀜𑁆𑀚𑀦𑀁. 𑀮𑁄𑀓𑀺𑀬𑀚𑀦𑁄 𑀳𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀢𑀼𑀲𑁆𑀲𑀢𑀺. 𑀇𑀥𑀸𑀧𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁. 𑀲𑀩𑁆𑀬𑀜𑁆𑀚𑀦𑀢𑀸 𑀧𑀦𑀲𑁆𑀲 𑀲𑀤𑁆𑀥𑁂𑀬𑁆𑀬𑀢𑀸𑀬, 𑀲𑀸 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀲𑀸𑀢𑁆𑀣𑀦𑁆𑀢𑀺 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀢𑀁 𑀆𑀳, 𑀢𑀢𑁄 𑀧𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀁 𑀲𑀤𑁆𑀥𑁂𑀬𑁆𑀬𑀢𑁄 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀤𑁆𑀥𑀸𑀧𑀤𑀝𑁆𑀞𑀸𑀦𑀢𑀸𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀢𑀁, 𑀢𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀅𑀕𑀸𑀥𑀸𑀧𑀸𑀭𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀅𑀜𑁆𑀜𑀣𑀸 𑀢𑀤𑀪𑀸𑀯𑀢𑁄. 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀼𑀩𑁄𑀥𑀲𑀤𑁆𑀤𑀓𑀢𑀸𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀧𑀭𑀫𑀕𑀫𑁆𑀪𑀻𑀭𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀯𑀺𑀦𑁂𑀬𑁆𑀬𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀸𑀧𑀸𑀤𑀦𑀢𑁄. 𑀲𑀩𑁆𑀩𑁄𑀧𑁂𑀲 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀤𑁆𑀯𑀬𑀲𑁆𑀲 𑀧𑀧𑀜𑁆𑀘𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀘𑁂𑀯 𑀢𑀢𑁆𑀣 𑀢𑀢𑁆𑀣 𑀲𑀁𑀯𑀡𑁆𑀡𑀺𑀢𑀁. 𑀢𑀣𑀸 𑀳𑁂𑀢𑁆𑀣 𑀯𑀺𑀓𑀧𑁆𑀧𑀲𑁆𑀲 𑀲𑀫𑀼𑀘𑁆𑀘𑀬𑀲𑁆𑀲 𑀯𑀸 𑀅𑀕𑁆𑀕𑀳𑀡𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀯𑁄𑀤𑀸𑀦𑀢𑁆𑀣𑀲𑁆𑀲 𑀅𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀓𑁂𑀯𑀮𑀲𑀤𑁆𑀤𑁄 𑀲𑀓𑀮𑀸𑀥𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦𑀸’’𑀢𑀺 ¶ , 𑀲𑀩𑁆𑀩𑀪𑀸𑀕𑁂𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀧𑀦𑁂𑀢𑀩𑁆𑀩𑀲𑁆𑀲𑀸𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀲𑁆𑀲.

𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬-𑀲𑀤𑁆𑀤𑁄 𑀤𑀸𑀦𑁂 𑀯𑁂𑀬𑁆𑀬𑀸𑀯𑀘𑁆𑀘𑁂 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀻𑀮𑁂 𑀅𑀧𑁆𑀧𑀫𑀜𑁆𑀜𑀸𑀲𑀼 𑀫𑁂𑀣𑀼𑀦𑀯𑀺𑀭𑀢𑀺𑀬𑀁 𑀲𑀤𑀸𑀭𑀲𑀦𑁆𑀢𑁄𑀲𑁂 𑀯𑀻𑀭𑀺𑀬𑁂 𑀉𑀧𑁄𑀲𑀣𑀗𑁆𑀕𑁂𑀲𑀼 𑀅𑀭𑀺𑀬𑀫𑀕𑁆𑀕𑁂 𑀲𑀸𑀲𑀦𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺.

‘‘𑀓𑀺𑀁 ¶ 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀻 𑀚𑀼𑀢𑀻 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀢𑁂 𑀦𑀸𑀕𑀫𑀳𑀸𑀯𑀺𑀫𑀸𑀦𑀁.

‘‘𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂,

𑀲𑀤𑁆𑀥𑀸 𑀉𑀪𑁄 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳𑀸;

𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺,

𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

‘‘𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀻 𑀚𑀼𑀢𑀻 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀫𑁂 𑀥𑀻𑀭 𑀫𑀳𑀸𑀯𑀺𑀫𑀸𑀦’’𑀦𑁆𑀢𑀺. 𑁋

𑀇𑀫𑀲𑁆𑀫𑀺𑀜𑁆𑀳𑀺 𑀧𑀼𑀡𑁆𑀡𑀓𑀚𑀸𑀢𑀓𑁂 (𑀚𑀸. 𑁨.𑁨𑁨.𑁧𑁫𑁯𑁨-𑁧𑁫𑁯𑁩, 𑁧𑁫𑁯𑁫) 𑀤𑀸𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀓𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀓𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

‘‘𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺. 𑁋

𑀇𑀫𑀲𑁆𑀫𑀺𑀁 ¶ 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀫𑁆𑀳𑀺 (𑀧𑁂. 𑀯. 𑁨𑁭𑁫, 𑁨𑁭𑁭) 𑀯𑁂𑀬𑁆𑀬𑀸𑀯𑀘𑁆𑀘𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀔𑁄 𑀢𑀁 𑀪𑀺𑀓𑁆𑀔𑀯𑁂 𑀢𑀺𑀢𑁆𑀢𑀺𑀭𑀺𑀬𑀁 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀳𑁄𑀲𑀻’’𑀢𑀺 (𑀘𑀽𑀴𑀯. 𑁩𑁧𑁧) 𑀇𑀫𑀲𑁆𑀫𑀺𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑁂 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀻𑀮𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀁 𑀔𑁄 𑀧𑀦 𑀫𑁂 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀬𑀸𑀯𑀤𑁂𑀯 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁨𑁯) 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸. ‘‘𑀧𑀭𑁂 𑀅𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀲𑁆𑀫𑀺𑀁 𑀲𑀮𑁆𑀮𑁂𑀔𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁮𑁩) 𑀫𑁂𑀣𑀼𑀦𑀯𑀺𑀭𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸.

‘‘𑀫𑀬𑀜𑁆𑀘 ¶ 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫,

𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺. 𑁋

𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑁂 (𑀚𑀸. 𑁧.𑁧𑁦.𑁯𑁭) 𑀲𑀤𑀸𑀭𑀲𑀦𑁆𑀢𑁄𑀲𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀸, 𑀢𑀧𑀲𑁆𑀲𑀻 𑀲𑀼𑀤𑀁 𑀳𑁄𑀫𑀻’’𑀢𑀺 𑀮𑁄𑀫𑀳𑀁𑀲𑀦𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁫𑁫) 𑀯𑀻𑀭𑀺𑀬𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑁋

𑀏𑀯𑀁 (𑀚𑀸. 𑁨.𑁨𑁨.𑁪𑁨𑁯) 𑀦𑀺𑀫𑀺𑀚𑀸𑀢𑀓𑁂 𑀅𑀢𑁆𑀢𑀤𑀫𑀦𑀯𑀲𑁂𑀦 𑀓𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀉𑀧𑁄𑀲𑀣𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀇𑀤𑀁 𑀔𑁄 𑀧𑀦 𑀫𑁂, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬…𑀧𑁂… 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 (𑀤𑀻. 𑀦𑀺. 𑁨.𑁩𑁨𑁯) 𑀅𑀭𑀺𑀬𑀫𑀕𑁆𑀕𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁧𑁭𑁪) 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀲𑀸𑀲𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀇𑀤𑀫𑁂𑀯 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺𑀆𑀤𑀺. 𑀲𑁂𑀝𑁆𑀞𑁂𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑁂𑀝𑁆𑀞𑁂𑀳𑀺. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀁 𑀯𑀸 𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁.

𑀲𑀦𑀺𑀤𑀸𑀦𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀦𑀺𑀤𑀸𑀦𑁂𑀦 𑀲𑀦𑀺𑀤𑀸𑀦𑀁. 𑀲𑀉𑀧𑁆𑀧𑀢𑁆𑀢𑀺𑀓𑀦𑁆𑀢𑀺 𑀲𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀁. 𑀯𑁂𑀦𑁂𑀬𑁆𑀬𑀸𑀦𑀁 ¶ 𑀅𑀦𑀼𑀭𑀽𑀧𑀢𑁄𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀘𑀭𑀺𑀬𑀸𑀤𑀺𑀅𑀦𑀼𑀭𑀽𑀧𑀢𑁄. 𑀅𑀢𑁆𑀣𑀲𑁆𑀲𑀸𑀢𑀺 𑀤𑁂𑀲𑀺𑀬𑀫𑀸𑀦𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲. 𑀳𑁂𑀢𑀼𑀤𑀸𑀳𑀭𑀡𑀬𑀼𑀢𑁆𑀢𑀢𑁄𑀢𑀺 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺 𑀘 𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀳𑁂𑀢𑀼𑀧𑀫𑀕𑁆𑀕𑀳𑀡𑁂𑀦 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀬𑀼𑀢𑁆𑀢𑀢𑁄. 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦𑀸𑀢𑀺 ‘‘𑀢𑁂 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦. 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸, 𑀧𑀝𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁂𑀦 𑀅𑀥𑀺𑀕𑀫𑀯𑁂𑀬𑁆𑀬𑀢𑁆𑀢𑀺𑀬𑀲𑀩𑁆𑀪𑀸𑀯𑀢𑁄 𑀲𑀸𑀢𑁆𑀣𑀁 𑀓𑀧𑀺𑀮𑀫𑀢𑀸𑀤𑀺 𑀯𑀺𑀬 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀁 𑀅𑀳𑀼𑀢𑁆𑀯𑀸 ¶ 𑀅𑀢𑁆𑀣𑀲𑀫𑁆𑀧𑀦𑁆𑀦𑀦𑁆𑀢𑀺 𑀓𑀢𑁆𑀯𑀸. 𑀧𑀭𑀺𑀬𑀢𑁆𑀢𑀺𑀬𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀭𑀺𑀘𑀬𑁂𑀦. 𑀆𑀕𑀫𑀩𑁆𑀬𑀢𑁆𑀢𑀺𑀢𑁄𑀢𑀺 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑁂𑀲𑀼 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑀲𑁆𑀲 𑀯𑀺𑀬 𑀲𑀫𑁆𑀫𑁄𑀳𑀁 𑀅𑀚𑀦𑁂𑀢𑁆𑀯𑀸 𑀩𑀸𑀳𑀼𑀲𑀘𑁆𑀘𑀯𑁂𑀬𑁆𑀬𑀢𑁆𑀢𑀺𑀬𑀲𑀩𑁆𑀪𑀸𑀯𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀆𑀕𑀫𑀩𑁆𑀬𑀢𑁆𑀢𑀻𑀢𑀺. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄𑀢𑀺 𑀲𑀻𑀮𑀸𑀤𑀻𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀳𑀺 𑀅𑀯𑀺𑀭𑀳𑀺𑀢𑀢𑁆𑀢𑀸. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀯𑀲𑁂𑀲𑁂𑀦 𑀲𑀫𑀦𑁆𑀢𑀢𑁄 𑀧𑀼𑀡𑁆𑀡𑀁 𑀧𑀽𑀭𑀺𑀢𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄𑀢𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑀢𑁄. 𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀸𑀬. 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄𑀢𑀺 𑀓𑀣𑀜𑁆𑀘𑀺𑀧𑀺 𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀦𑀺𑀲𑁆𑀲𑀬𑀢𑁄 𑀧𑀭𑀺𑀲𑀼𑀤𑁆𑀥𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 ‘‘𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀦𑀺𑀲𑁆𑀲𑀸𑀬 𑀮𑀸𑀪𑀁 𑀯𑀸 𑀲𑀓𑁆𑀓𑀸𑀭𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀲𑁂𑀢𑀺, 𑀢𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀳𑁄𑀢𑀺. 𑀪𑀕𑀯𑀸 𑀧𑀦 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄 𑀳𑀺𑀢𑀨𑀭𑀡𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀼𑀤𑀼𑀳𑀤𑀬𑁄 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀤𑁂𑀲𑀦𑀸 𑀧𑀭𑀺𑀲𑀼𑀤𑁆𑀥𑀸𑀢𑀺.

𑀲𑀸𑀥𑀽𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁯𑁫) 𑀆𑀬𑀸𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂. ‘‘𑀢𑁂𑀦 𑀳𑀺 𑀩𑁆𑀭𑀸𑀳𑁆𑀫𑀡 𑀲𑀸𑀥𑀼𑀓𑀁 𑀲𑀼𑀡𑁄𑀳𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁫.𑁧𑁯𑁨) 𑀤𑀴𑁆𑀳𑀻𑀓𑀫𑁆𑀫𑁂 𑀆𑀡𑀢𑁆𑀢𑀺𑀬𑀜𑁆𑀘 𑀤𑀺𑀲𑁆𑀲𑀢𑀺.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀺 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁨.𑁧𑁮.𑁧𑁦𑁧) 𑀲𑀼𑀦𑁆𑀤𑀭𑁂. 𑀇𑀥𑀸𑀧𑀺 𑀲𑀼𑀦𑁆𑀤𑀭𑁂𑀬𑁂𑀯 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦𑀸’’𑀢𑀺. 𑀢𑀢𑁆𑀣 𑀲𑀼𑀦𑁆𑀤𑀭𑀦𑁆𑀢𑀺 𑀪𑀤𑁆𑀤𑀓𑀁. 𑀪𑀤𑁆𑀤𑀓𑀢𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳’’𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀸𑀯𑀳𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀲𑀜𑁆𑀜𑀺𑀢𑀳𑀺𑀢𑀸𑀯𑀳𑀁. 𑀲𑀼𑀔𑀸𑀯𑀳𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀯𑀺𑀥𑀲𑀼𑀔𑀸𑀯𑀳𑀁. 𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁 ¶ . 𑀬𑀸𑀤𑀺𑀲𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀳𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀓𑀸𑀮𑁂𑀧𑀺 𑀅𑀘𑁆𑀘𑀦𑁆𑀢𑀸𑀬 𑀧𑀲𑀸𑀤𑀦𑀻𑀬𑁄 𑀢𑁂𑀲𑀁 𑀬𑀣𑀸𑀪𑀽𑀢𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀭𑀽𑀧𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀪𑀼𑀘𑁆𑀘…𑀧𑁂… 𑀅𑀭𑀳𑀢𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑁆𑀧𑀫𑀸𑀡𑀸𑀦𑀁 𑀮𑀽𑀔𑀧𑁆𑀧𑀫𑀸𑀡𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 ¶ 𑀧𑀲𑀸𑀤𑀸𑀯𑀳𑀢𑀁 𑀤𑀲𑁆𑀲𑁂𑀢𑀺, 𑀢𑀁𑀤𑀲𑁆𑀲𑀦𑁂𑀦 𑀘 𑀇𑀢𑀭𑁂𑀲𑀫𑁆𑀧𑀺 𑀭𑀽𑀧𑀧𑁆𑀧𑀫𑀸𑀡𑀖𑁄𑀲𑀧𑁆𑀧𑀫𑀸𑀡𑀸𑀦𑀁 𑀧𑀲𑀸𑀤𑀸𑀯𑀳𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄𑀢𑀺 𑀆𑀳 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀯𑀫𑀚𑁆𑀛𑀸𑀲𑀬𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀲𑀺𑀬𑀲𑀓𑀼𑀡𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁.

𑁨. 𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸 𑀇𑀥 𑀉𑀧𑀲𑀗𑁆𑀓𑀫𑀦𑀓𑀺𑀭𑀺𑀬𑀸𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑀫𑁂𑀯𑁂𑀢𑀁 𑀓𑀭𑀡𑀯𑀘𑀦𑀁 𑀬𑀼𑀢𑁆𑀢𑀁, 𑀦 𑀓𑀭𑀡𑀢𑁆𑀣𑀁 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸’’𑀢𑀺. 𑀅𑀯𑀺𑀪𑀸𑀕𑀢𑁄 𑀳𑀺 𑀲𑀢𑀢𑀧𑁆𑀧𑀯𑀢𑁆𑀢𑀦𑀺𑀭𑀢𑀺𑀲𑀬𑀲𑀸𑀤𑀼𑀯𑀺𑀧𑀼𑀮𑀸𑀫𑀢𑀭𑀲𑀲𑀤𑁆𑀥𑀫𑁆𑀫𑀨𑀮𑀢𑀸𑀬𑀲𑁆𑀲 𑀲𑀸𑀤𑀼𑀨𑀮𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁂𑀦 𑀪𑀕𑀯𑀸 𑀉𑀧𑀫𑀺𑀢𑁄. 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀳𑀺 𑀫𑀳𑀸𑀭𑀼𑀓𑁆𑀔𑀲𑁆𑀲 𑀲𑀸𑀤𑀼𑀨𑀮𑀢𑀸 𑀕𑀳𑀺𑀢𑀸𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀲𑀫𑁆𑀧𑀢𑁆𑀢𑀓𑀸𑀫𑀢𑀸𑀬 𑀳𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁𑀢𑀁𑀧𑀤𑁂𑀲𑀸𑀢𑀺𑀓𑁆𑀓𑀫𑀦𑁂𑀦 𑀉𑀧𑀲𑀗𑁆𑀓𑀫𑀺 𑀉𑀧𑀲𑀗𑁆𑀓𑀫𑀦𑁆𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦’’𑀦𑁆𑀢𑀺. 𑀢𑀢𑁄𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀢𑁄 𑀉𑀧𑀲𑀗𑁆𑀓𑀫𑀻𑀢𑀺 𑀯𑀼𑀢𑁆𑀢𑁄, 𑀢𑀢𑁄 𑀉𑀧𑀕𑀢𑀝𑁆𑀞𑀸𑀦𑀢𑁄. 𑀆𑀲𑀦𑁆𑀦𑀢𑀭𑀁 𑀞𑀸𑀦𑀦𑁆𑀢𑀺 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑀁.

𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺. 𑀧𑀼𑀩𑁆𑀩𑀪𑀸𑀲𑀺𑀢𑀸𑀬 𑀢𑀤𑀦𑀼𑀓𑀭𑀡𑁂𑀦 𑀏𑀯𑀁 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁 𑀏𑀓𑀭𑀽𑀧𑀢𑀁. 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 ¶ 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁, 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀬𑀸𑀧𑀦𑀻𑀬𑀦𑁆𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁. 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁. 𑀢𑀤𑀦𑀼𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁. 𑀲𑀼𑀔𑀯𑀺𑀳𑀸𑀭𑀲𑀫𑁆𑀪𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀘𑁆𑀘𑀺𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀩𑀮𑀧𑁆𑀧𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀓𑀁, 𑀢𑀤𑁂𑀯 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀆𑀳 ‘‘𑀲𑀫𑁆𑀫𑁄𑀤𑀚𑀦𑀦𑀢𑁄’’𑀢𑀺. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺 𑀆𑀳. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄. ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄𑀢𑀺 𑀆𑀧𑀸𑀣𑀫𑀥𑀼𑀭𑀢𑀫𑀸𑀳. 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳. 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺.

𑀅𑀢𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀧𑀝𑀺𑀓𑁆𑀔𑁂𑀧𑁂𑀦 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀁 𑀦𑀸𑀫 𑀕𑀳𑀺𑀢𑀁, 𑀢𑀁 𑀧𑀦 𑀅𑀯𑀓𑀁𑀲𑀢𑁄 𑀉𑀪𑀺𑀦𑁆𑀦𑀁 𑀧𑀲𑀸𑀭𑀺𑀢𑀳𑀢𑁆𑀣𑀸𑀲𑀗𑁆𑀖𑀝𑁆𑀝𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀲𑀸𑀭𑁂𑀢𑁆𑀯𑀸. 𑀫𑁂𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀬𑀸 𑀲𑀼𑀢’’𑀦𑁆𑀢𑀺. 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂𑀢𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁂, 𑀦 𑀩𑀸𑀳𑀺𑀢𑀧𑀸𑀧𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀆𑀧𑀸𑀤𑀺𑀢𑁂𑀢𑀺 𑀔𑀡𑁆𑀟𑀺𑀢𑀤𑀦𑁆𑀢𑀧𑀮𑀺𑀢𑀓𑁂𑀲𑀸𑀤𑀺𑀪𑀸𑀯𑀁 𑀲𑀫𑁆𑀧𑀸𑀧𑀺𑀢𑁂. 𑀯𑀼𑀟𑁆𑀠𑀺𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑁂𑀢𑀺 𑀯𑀼𑀟𑁆𑀠𑀺𑀧𑀭𑀺𑀘𑁆𑀙𑁂𑀤𑀁 𑀲𑀫𑁆𑀧𑀢𑁆𑀢𑁂, 𑀯𑀼𑀟𑁆𑀠𑀺𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬𑀸𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀫𑀳𑀮𑁆𑀮𑀓𑀪𑀸𑀯𑁂𑀦. 𑀫𑀳𑀢𑁆𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀮𑁆𑀮𑀓𑁄, 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑁄, 𑀦 𑀯𑀺𑀪𑀯𑀸𑀤𑀺𑀦𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀅𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀓𑀸𑀮𑀁. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀭𑀚𑁆𑀚𑀧𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁂’’𑀢𑀺 𑀯𑀢𑁆𑀯𑀸 𑀓𑀣𑀁 𑀯𑀬𑁄𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁂’’𑀢𑀺. 𑀧𑀘𑁆𑀙𑀺𑀫𑁄 𑀢𑀢𑀺𑀬𑀪𑀸𑀕𑁄𑀢𑀺 𑀲𑀢𑁆𑀢𑀲𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑁄 𑀓𑁄𑀝𑁆𑀞𑀸𑀲𑁄.

𑀤𑀼𑀢𑀺𑀬𑁂 ¶ 𑀅𑀢𑁆𑀣𑀯𑀺𑀓𑀧𑁆𑀧𑁂 𑀚𑀺𑀡𑁆𑀡𑁂𑀢𑀺 𑀦𑀸𑀬𑀁 𑀚𑀺𑀡𑁆𑀡𑀢𑀸 𑀯𑀬𑁄𑀫𑀢𑁆𑀢𑁂𑀦, 𑀅𑀣 𑀔𑁄 𑀓𑀼𑀮𑀧𑀭𑀺𑀯𑀝𑁆𑀝𑁂𑀦 𑀧𑀼𑀭𑀸𑀡𑀢𑀸𑀬𑀸𑀢𑀺 𑀆𑀳 ‘‘𑀚𑀺𑀡𑁆𑀡𑁂𑀢𑀺 𑀧𑁄𑀭𑀸𑀡𑁂’’𑀢𑀺𑀆𑀤𑀺. 𑀢𑁂𑀦 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀼𑀮𑀯𑀲𑁂𑀦 𑀉𑀤𑀺𑀢𑁄𑀤𑀺𑀢𑀪𑀸𑀯𑀫𑀸𑀳. ‘‘𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀚𑀸𑀢𑀺𑀯𑀼𑀟𑁆𑀠𑀺𑀬𑀸 𑀯𑀓𑁆𑀔𑀫𑀸𑀦𑀢𑁆𑀢𑀸 𑀕𑀼𑀡𑀯𑀼𑀟𑁆𑀠𑀺𑀬𑀸 𑀢𑀢𑁄 𑀲𑀸𑀢𑀺𑀲𑀬𑀢𑁆𑀢𑀸 𑀘 ‘‘𑀯𑀼𑀟𑁆𑀠𑁂𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀟𑁆𑀠𑀺𑀬𑀼𑀢𑁆𑀢𑁂’’𑀢𑀺 𑀆𑀳. 𑀢𑀣𑀸 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬𑀧𑀺 𑀢𑁂𑀦𑁂𑀯 𑀯𑀓𑁆𑀔𑀫𑀸𑀦𑀢𑁆𑀢𑀸 𑀫𑀳𑀮𑁆𑀮𑀓𑁂𑀢𑀺 𑀧𑀤𑁂𑀦 𑀯𑀺𑀪𑀯𑀫𑀳𑀢𑁆𑀢𑀢𑀸 𑀬𑁄𑀚𑀺𑀢𑀸. 𑀫𑀕𑁆𑀕𑀧𑀝𑀺𑀧𑀦𑁆𑀦𑁂𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀺𑀥𑀺𑀁 𑀉𑀧𑀕𑀢𑁂 𑀢𑀁 𑀅𑀯𑁄𑀓𑁆𑀓𑀫𑁆𑀫 𑀘𑀭𑀡𑀢𑁄. 𑀅𑀦𑁆𑀢𑀺𑀫𑀯𑀬𑀦𑁆𑀢𑀺 𑀧𑀘𑁆𑀙𑀺𑀫𑀯𑀬𑀁.

𑀧𑀘𑁆𑀘𑀼𑀝𑁆𑀞𑀸𑀦𑀁 𑀦𑀸𑀫 𑀆𑀲𑀦𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀦𑀸𑀲𑀦𑀸 𑀯𑀼𑀝𑁆𑀞𑀳𑀢𑀻’’𑀢𑀺, 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀦 𑀯𑀼𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀚𑀺𑀡𑁆𑀡𑁂…𑀧𑁂… 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀉𑀧𑀬𑁄𑀕𑀯𑀘𑀦𑀁 𑀆𑀲𑀦𑀸 𑀯𑀼𑀝𑁆𑀞𑀸𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀚𑀺𑀡𑁆𑀡𑁂…𑀧𑁂… 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀤𑀺𑀲𑁆𑀯𑀸𑀢𑀺 𑀅𑀚𑁆𑀛𑀸𑀳𑀸𑀭𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀁 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀫𑀸 𑀦 𑀧𑀘𑁆𑀘𑀼𑀝𑁆𑀞𑁂𑀢𑀻𑀢𑀺 ¶ 𑀉𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀼𑀕𑁆𑀕𑀫𑀦𑀫𑁆𑀧𑀺 𑀳𑀺 𑀧𑀘𑁆𑀘𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀘𑀭𑀺𑀬𑀁 𑀧𑀦 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀓𑀭𑀡𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺. 𑀦𑀸𑀲𑀦𑀸 𑀯𑀼𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀘𑁆𑀘𑀼𑀕𑁆𑀕𑀫𑀦𑀸𑀪𑀸𑀯𑀲𑁆𑀲 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂𑀢𑀺 𑀧𑀓𑀢𑀺𑀯𑀺𑀪𑀸𑀯𑀦𑀲𑀗𑁆𑀔𑀸𑀢𑁂 𑀅𑀢𑁆𑀣𑁂, 𑀦 𑀅𑀪𑀺𑀯𑀸𑀤𑁂𑀢𑀺 𑀯𑀸𑀢𑀺 𑀦 𑀅𑀪𑀺𑀯𑀸𑀤𑁂𑀢𑀩𑁆𑀩𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀁 𑀅𑀜𑁆𑀜𑀸𑀡𑀦𑁆𑀢𑀺 ‘‘𑀅𑀬𑀁 𑀫𑀫 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀸𑀢𑀼𑀁 𑀅𑀭𑀳𑀭𑀽𑀧𑁄 𑀦 𑀳𑁄𑀢𑀻’’𑀢𑀺 𑀅𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀜𑁆𑀜𑀸𑀡𑀁. 𑀑𑀮𑁄𑀓𑁂𑀦𑁆𑀢𑁄𑀢𑀺 ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀭𑁂𑀬𑁆𑀬𑀁, 𑀕𑀭𑀼𑀁 𑀓𑀭𑁂𑀬𑁆𑀬’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀅. 𑀦𑀺. 𑁪.𑁨𑁧) 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄. 𑀦𑀺𑀧𑀘𑁆𑀘𑀓𑀸𑀭𑀸𑀭𑀳𑀦𑁆𑀢𑀺 𑀧𑀡𑀺𑀧𑀸𑀢𑀸𑀭𑀳𑀁. 𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄, 𑀚𑀸𑀢𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀢𑁆𑀢𑀭𑁂𑀦 𑀫𑀼𑀔𑁄𑀢𑀺 𑀉𑀢𑁆𑀢𑀭𑀸𑀪𑀺𑀫𑀼𑀔𑁄, 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀓𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀲𑀺𑀦𑁆𑀢𑀺 𑀇𑀤𑀁 ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀢𑀺𑀚𑀸𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺, 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂 ¶ 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀜𑁆𑀘 𑀯𑀸𑀘𑀁 𑀪𑀸𑀲𑀢𑀻’’𑀢𑀺 𑀏𑀯𑀁 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁨.𑁩𑁧) 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀽𑀧𑀭𑀺𑀝𑁆𑀞𑀺𑀢𑀲𑁆𑀲 𑀯𑀺𑀬 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀢𑁄 𑀧𑀕𑁂𑀯 𑀤𑀺𑀲𑀸𑀯𑀺𑀮𑁄𑀓𑀦𑀲𑁆𑀲 𑀓𑀢𑀢𑁆𑀢𑀸. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀳𑁂𑀝𑁆𑀞𑀸 𑀉𑀧𑀭𑀻𑀢𑀺 𑀤𑀲𑀧𑀺 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀑𑀮𑁄𑀓𑁂𑀲𑀺𑀦𑁆𑀢𑀺 𑀫𑀫 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑁂 𑀚𑀸𑀢𑁂 𑀧𑀜𑁆𑀜𑀸𑀬𑀫𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀑𑀮𑁄𑀓𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀫𑀳𑀸𑀧𑀼𑀭𑀺𑀲𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑁆𑀧𑀤𑁂𑀲𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀧𑀼𑀭𑀺𑀲𑁄. 𑀅𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀲𑀩𑁆𑀩𑀧𑀥𑀸𑀦𑁄. 𑀚𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀯𑀼𑀟𑁆𑀠𑀢𑀫𑁄, 𑀕𑀼𑀡𑁂𑀳𑀺 𑀫𑀳𑀮𑁆𑀮𑀓𑀢𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀧𑀲𑀢𑁆𑀣𑀢𑀫𑁄. 𑀅𑀢𑁆𑀣𑀢𑁄 𑀧𑀦 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀉𑀢𑁆𑀢𑀭𑀺𑀢𑀭𑁄𑀢𑀺 𑀅𑀥𑀺𑀓𑀢𑀭𑁄. 𑀧𑀢𑀺𑀫𑀸𑀦𑁂𑀲𑀻𑀢𑀺 𑀧𑀽𑀚𑁂𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀭𑀳𑁄 𑀧𑀼𑀕𑁆𑀕𑀮𑁄𑀢𑀺 𑀫𑀬𑁆𑀳𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀸𑀬 𑀅𑀭𑀳𑁄 𑀅𑀦𑀼𑀘𑁆𑀙𑀯𑀺𑀓𑁄 𑀧𑀼𑀕𑁆𑀕𑀮𑁄. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀧𑀦𑁂𑀢𑁆𑀣 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀕𑀢𑀸𑀢𑀺 𑀢𑀣𑀸𑀕𑀢𑀢𑁄, 𑀢𑀣𑀸𑀕𑀢𑀲𑁆𑀲 ¶ 𑀲𑀦𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀭𑀽𑀧𑀦𑁆𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀪𑀸𑀯𑀁. 𑀧𑀭𑀺𑀧𑀸𑀓𑀲𑀺𑀣𑀺𑀮𑀩𑀦𑁆𑀥𑀦𑀦𑁆𑀢𑀺 𑀧𑀭𑀺𑀧𑀸𑀓𑁂𑀦 𑀲𑀺𑀣𑀺𑀮𑀩𑀦𑁆𑀥𑀦𑀁.

𑁩. 𑀢𑀁 𑀯𑀘𑀦𑀦𑁆𑀢𑀺 ‘‘𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀯𑀘𑀦𑀁. ‘‘𑀦𑀸𑀳𑀁 𑀅𑀭𑀲𑀭𑀽𑀧𑁄, 𑀫𑀸𑀤𑀺𑀲𑀸 𑀯𑀸 𑀅𑀭𑀲𑀭𑀽𑀧𑀸’’𑀢𑀺 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀣𑀤𑁆𑀥𑁄 𑀪𑀯𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀚𑀦𑀦𑀢𑁆𑀣’’𑀦𑁆𑀢𑀺. 𑀅𑀬𑀜𑁆𑀳𑀺 𑀧𑀭𑀺𑀬𑀸𑀬𑀲𑀤𑁆𑀤𑁄 𑀤𑁂𑀲𑀦𑀸𑀯𑀸𑀭𑀓𑀸𑀭𑀡𑁂𑀲𑀼 𑀯𑀢𑁆𑀢𑀢𑀻𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬𑁂𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀅𑀯𑀕𑀫𑁂𑀢𑀺 𑀩𑁄𑀥𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀧𑀭𑀺𑀬𑀸𑀬𑀢𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀧𑀭𑀺𑀬𑀸𑀬𑁄 ¶ , 𑀯𑀸𑀭𑁄. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀺, 𑀢𑀲𑁆𑀲 𑀯𑀸 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀦𑁆𑀢𑀺 𑀏𑀯𑀁 𑀧𑀭𑀺𑀬𑀸𑀬𑀲𑀤𑁆𑀤𑀲𑁆𑀲 𑀤𑁂𑀲𑀦𑀸𑀯𑀸𑀭𑀓𑀸𑀭𑀡𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬. 𑀓𑀢𑀫𑁄 𑀧𑀦 𑀲𑁄𑀢𑀺 𑀧𑀭𑀺𑀬𑀸𑀬𑀸𑀧𑁂𑀓𑁆𑀔𑁄 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄, 𑀓𑀢𑀫𑁄 𑀲𑁄 𑀧𑀭𑀺𑀬𑀸𑀬𑁄𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀯𑀲𑁂𑀦. 𑀉𑀧𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀯𑀲𑁂𑀦. 𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀫𑁆𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀅𑀲𑁂𑀝𑁆𑀞𑀲𑀫𑁆𑀫𑀢𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀦𑀦𑁆𑀤𑀦𑁆𑀢𑀸𑀦𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦 𑀧𑀫𑁄𑀤𑀫𑀸𑀦𑀸𑀦𑀁. 𑀭𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀩𑀮𑀯𑀭𑀸𑀕𑀯𑀲𑁂𑀦 𑀭𑀚𑁆𑀚𑀦𑁆𑀢𑀸𑀦𑀁. 𑀭𑀽𑀧𑀸𑀤𑀺𑀧𑀭𑀺𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀢𑀡𑁆𑀳𑀸𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀭𑀽𑀧𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀤𑀬𑀢𑀧𑁆𑀧𑀦𑀢𑁄 𑀅𑀫𑁆𑀩𑀭𑀲𑀸𑀤𑀬𑁄 𑀯𑀺𑀬 ‘‘𑀭𑀽𑀧𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀯𑀺𑀜𑁆𑀙𑀦𑁆𑀢𑀻𑀢𑀺 𑀆𑀓𑀟𑁆𑀠𑀦𑁆𑀢𑀺. 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀲𑀸𑀫𑀕𑁆𑀕𑀺𑀬𑀦𑁆𑀢𑀺 𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀤𑀺𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀁. 𑀅𑀦𑀼𑀓𑁆𑀔𑀺𑀧𑀦𑁆𑀢𑁄𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀯𑀲𑁂𑀦 𑀓𑀣𑀺𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑀧𑁆𑀧𑀸𑀬𑀪𑀸𑀯𑀢𑁄 𑀅𑀢𑁆𑀢𑀸𑀦𑀁 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀅𑀦𑀼𑀓𑁆𑀓𑀁𑀲𑁂𑀦𑁆𑀢𑁄.

𑀏𑀢𑀲𑁆𑀫𑀺𑀁 𑀧𑀦𑀢𑁆𑀣𑁂 𑀓𑀭𑀡𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 ‘‘𑀚𑀳𑀺𑀢𑀸’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀢𑀣𑀸𑀕𑀢𑁂𑀦 𑀚𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀽𑀮𑀦𑁆𑀢𑀺 𑀪𑀯𑀫𑀽𑀮𑀁. ‘‘𑀢𑀸𑀮𑀯𑀢𑁆𑀣𑀼𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀑𑀝𑁆𑀞𑀫𑀼𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀫𑀚𑁆𑀛𑁂𑀧𑀤𑀮𑁄𑀧𑀁 𑀓𑀢𑁆𑀯𑀸 𑀅𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺. 𑀢𑀢𑁆𑀣 𑀢𑀸𑀮𑀲𑁆𑀲 𑀯𑀢𑁆𑀣𑀼 𑀢𑀸𑀮𑀯𑀢𑁆𑀣𑀼. 𑀬𑀣𑀸 𑀆𑀭𑀸𑀫𑀲𑁆𑀲 𑀯𑀢𑁆𑀣𑀼𑀪𑀽𑀢𑀧𑀼𑀩𑁆𑀩𑁄 𑀧𑀤𑁂𑀲𑁄 𑀆𑀭𑀸𑀫𑀲𑁆𑀲 𑀅𑀪𑀸𑀯𑁂 ‘‘𑀆𑀭𑀸𑀫𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀸𑀮𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁂 𑀢𑀸𑀮𑁂 𑀧𑀤𑁂𑀲𑀫𑀢𑁆𑀢𑁂 𑀞𑀺𑀢𑁂 𑀢𑀸𑀮𑀲𑁆𑀲 𑀯𑀢𑁆𑀣𑀼𑀪𑀽𑀢𑀧𑀼𑀩𑁆𑀩𑀢𑁆𑀢𑀸 ‘‘𑀢𑀸𑀮𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀦𑁂𑀲𑀦𑁆𑀢𑀺 𑀭𑀽𑀧𑀭𑀲𑀸𑀤𑀻𑀦𑀁. 𑀓𑀣𑀁 𑀧𑀦 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀯𑀢𑁆𑀣𑀼 𑀓𑀢𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀭𑀽𑀧𑀸𑀤𑀺𑀧𑀭𑀺𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀢𑀡𑁆𑀳𑀸𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀲𑀗𑁆𑀔𑀸𑀢𑀭𑀽𑀧𑀭𑀲𑀸𑀤𑀻𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀪𑀸𑀯𑁂𑀦 𑀯𑀢𑁆𑀣𑀼𑀫𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀢𑁂’’𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂𑀢𑀺 𑀧𑀼𑀭𑁂, 𑀲𑀭𑀸𑀕𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀅𑀢𑁆𑀢𑀦𑁄 𑀯𑀢𑁆𑀣𑀼𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀭𑀲𑀸𑀤𑀬𑁄 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄.

𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀢𑁆𑀢𑀸𑀢𑀺 ¶ ¶ 𑀅𑀯𑀺𑀭𑀼𑀴𑁆𑀳𑀺𑀲𑀪𑀸𑀯𑀢𑀸𑀬. 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀢𑀸𑀮𑁄 𑀧𑀢𑁆𑀢𑀨𑀮𑀸𑀤𑀻𑀦𑀁 𑀅𑀯𑀢𑁆𑀣𑀼𑀪𑀽𑀢𑁄 𑀢𑀸𑀮𑀸𑀯𑀢𑁆𑀣𑀽𑀢𑀺 𑀆𑀳 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸’’𑀢𑀺. 𑀏𑀢𑁂𑀦 ‘‘𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀅𑀬𑀁 𑀯𑀺𑀕𑁆𑀕𑀳𑁄 𑀤𑀲𑁆𑀲𑀺𑀢𑁄. 𑀏𑀢𑁆𑀣 𑀧𑀦 𑀅𑀯𑀢𑁆𑀣𑀼𑀪𑀽𑀢𑁄 𑀢𑀸𑀮𑁄 𑀯𑀺𑀬 𑀓𑀢𑀸𑀢𑀺 𑀅𑀯𑀢𑁆𑀣𑀼𑀢𑀸𑀮𑀸𑀓𑀢𑀸𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑁂𑀲𑀦𑀲𑁆𑀲 𑀧𑀤𑀲𑁆𑀲 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 ‘‘𑀢𑀸𑀮𑀸𑀯𑀢𑁆𑀣𑀼𑀓𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀧𑀦𑀢𑁆𑀣𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀭𑀽𑀧𑀭𑀲𑀸𑀤𑀺𑀯𑀘𑀦𑁂𑀦 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸 𑀕𑀳𑀺𑀢𑀸, 𑀢𑁂 𑀉𑀧𑁆𑀧𑀦𑁆𑀦𑀸𑀧𑀺 𑀫𑀢𑁆𑀣𑀓𑀲𑀤𑀺𑀲𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀫𑀕𑁆𑀕𑀲𑀢𑁆𑀣𑁂𑀦 𑀙𑀺𑀦𑁆𑀦𑀢𑁆𑀢𑀸 𑀆𑀬𑀢𑀺𑀁 𑀢𑀸𑀮𑀧𑀢𑁆𑀢𑀲𑀤𑀺𑀲𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀸 𑀚𑀸𑀢𑀸, 𑀢𑀲𑁆𑀫𑀸 𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀭𑀽𑀧𑀭𑀲𑀸𑀤𑀬𑁄𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 ‘‘𑀅𑀪𑀺𑀦𑀦𑁆𑀤𑀦𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀼𑀲𑀮𑀲𑁄𑀫𑀦𑀲𑁆𑀲𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀦𑀪𑀸𑀯𑀁𑀓𑀢𑀸𑀢𑀺 𑀏𑀢𑁆𑀣 𑀅𑀦𑀼-𑀲𑀤𑁆𑀤𑁄 𑀧𑀘𑁆𑀙𑀸-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀬𑀣𑀸 𑀦𑁂𑀲𑀁 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀻’’𑀢𑀺𑀆𑀤𑀺. 𑀅𑀦𑀼𑀅𑀪𑀸𑀯𑀁 𑀕𑀢𑀸𑀢𑀺 𑀧𑀘𑁆𑀙𑀸 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀯𑀲𑁂𑀦 𑀅𑀪𑀸𑀯𑀁 𑀕𑀢𑀸 𑀯𑀺𑀦𑀸𑀲𑀫𑀼𑀧𑀕𑀢𑀸, 𑀧𑀳𑀻𑀦𑀸𑀢𑀺 𑀅𑀢𑁆𑀣𑁄. ‘‘𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀽’’𑀢𑀺 (𑀫𑀳𑀸𑀯. 𑁭, 𑁮) 𑀏𑀢𑁆𑀣 𑀅𑀦𑀘𑁆𑀙𑀭𑀺𑀬𑀲𑀤𑁆𑀤𑀁 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀅𑀦𑀼𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸’’𑀢𑀺. 𑀢𑀢𑁆𑀣 𑀅𑀦𑀼𑀅𑀘𑁆𑀙𑀭𑀺𑀬𑀸𑀢𑀺 𑀲𑀯𑀦𑀓𑀸𑀮𑁂 𑀉𑀧𑀭𑀽𑀧𑀭𑀺 𑀯𑀺𑀫𑁆𑀳𑀬𑀓𑀭𑀸𑀢𑀺 𑀅𑀢𑁆𑀣𑁄.

𑀬𑀜𑁆𑀘 𑀔𑁄 𑀢𑁆𑀯𑀁 𑀯𑀤𑁂𑀲𑀺, 𑀲𑁄 𑀧𑀭𑀺𑀬𑀸𑀬𑁄 𑀦 𑀳𑁄𑀢𑀻𑀢𑀺 𑀬𑀁 𑀯𑀦𑁆𑀤𑀦𑀸𑀤𑀺𑀲𑀸𑀫𑀕𑁆𑀕𑀺𑀭𑀲𑀸𑀪𑀸𑀯𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀅𑀭𑀲𑀭𑀽𑀧𑀢𑀸𑀬 𑀯𑀤𑁂𑀲𑀺, 𑀢𑀁 𑀓𑀸𑀭𑀡𑀁 𑀦 𑀳𑁄𑀢𑀺, 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀩𑁆𑀭𑀸𑀳𑁆𑀫𑀡𑁄 𑀬𑀁 𑀯𑀦𑁆𑀤𑀦𑀸𑀤𑀺𑀲𑀸𑀫𑀕𑁆𑀕𑀺𑀭𑀲𑀸𑀪𑀸𑀯𑀲𑀗𑁆𑀔𑀸𑀢𑀁 𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀆𑀳, 𑀲𑁄 𑀧𑀭𑀺𑀬𑀸𑀬𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑁂 𑀯𑀦𑁆𑀤𑀦𑀸𑀤𑀻𑀦𑀺 𑀪𑀕𑀯𑀸 𑀓𑀭𑁄𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀇𑀫𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳𑀸’’𑀢𑀺𑀆𑀤𑀺.

𑁪. 𑀲𑀩𑁆𑀩𑀧𑀭𑀺𑀬𑀸𑀬𑁂𑀲𑀽𑀢𑀺 𑀲𑀩𑁆𑀩𑀯𑀸𑀭𑁂𑀲𑀼. 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀢𑀦𑁆𑀢𑀺 𑀬𑀁 𑀲𑀦𑁆𑀥𑀸𑀬 𑀩𑁆𑀭𑀸𑀳𑁆𑀫𑀡𑁄 ‘‘𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄’’𑀢𑀺𑀆𑀤𑀺𑀫𑀸𑀳, 𑀪𑀕𑀯𑀸 𑀘 𑀬𑀁 𑀲𑀦𑁆𑀥𑀸𑀬 𑀦𑀺𑀩𑁆𑀪𑁄𑀕𑀢𑀸𑀤𑀺𑀁 𑀅𑀢𑁆𑀢𑀦𑀺 𑀅𑀦𑀼𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀢𑀁 ¶ . 𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀧𑀭𑀺𑀪𑁄𑀕𑁄. 𑀅𑀧𑀭𑀁 𑀧𑀭𑀺𑀬𑀸𑀬𑀦𑁆𑀢𑀺 𑀅𑀜𑁆𑀜𑀁 𑀓𑀸𑀭𑀡𑀁.

𑁫. 𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀦𑁆𑀢𑀺 𑀓𑀼𑀮𑀸𑀘𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀁, 𑀓𑀼𑀮𑀘𑀸𑀭𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀭𑀺𑀬𑀦𑁆𑀢𑀺 𑀅𑀓𑀭𑀡𑀪𑀸𑀯𑀁. 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 𑀓𑀸𑀬𑀢𑁄 𑀧𑀯𑀢𑁆𑀢𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀫𑀺𑀘𑁆𑀙𑀸𑀘𑀸𑀭𑀘𑁂𑀢𑀦𑀸 ¶ 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 (𑀇𑀢𑀺𑀯𑀼. 𑀅𑀝𑁆𑀞. 𑁭𑁪) 𑀧𑀸𑀡𑁄𑀢𑀺 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘𑁂𑀢𑁆𑀣 𑀭𑀽𑀧𑀸𑀭𑀽𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀺. 𑀲𑀢𑁆𑀢𑁄𑀢𑀺 𑀘 𑀔𑀦𑁆𑀥𑀲𑀦𑁆𑀢𑀸𑀦𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀻𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀫𑀜𑁆𑀜𑀢𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸. 𑀬𑀸𑀬 𑀳𑀺 𑀘𑁂𑀢𑀦𑀸𑀬 𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼𑀓𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀸 𑀢𑀸𑀤𑀺𑀲𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀮𑀤𑁆𑀥𑀼𑀧𑀓𑁆𑀓𑀫𑀸𑀦𑀺 𑀳𑀺 𑀪𑀽𑀢𑀸𑀦𑀺 𑀇𑀢𑀭𑀪𑀽𑀢𑀸𑀦𑀺 𑀯𑀺𑀬 𑀦 𑀯𑀺𑀲𑀤𑀸𑀦𑀻𑀢𑀺 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀓𑀸𑀭𑀡𑀸𑀦𑀺 𑀦 𑀳𑁄𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑁄 𑀳𑀦𑁆𑀢𑀸, 𑀓𑁄 𑀯𑀸 𑀳𑀜𑁆𑀜𑀢𑀺, 𑀬𑀤𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀲𑁄 𑀅𑀭𑀽𑀧𑀢𑀸𑀬 𑀦 𑀙𑁂𑀤𑀦𑀪𑁂𑀤𑀦𑀸𑀤𑀺𑀯𑀲𑁂𑀦 𑀯𑀺𑀓𑁄𑀧𑀦𑀲𑀫𑀢𑁆𑀣𑁄, 𑀦𑀧𑀺 𑀯𑀺𑀓𑁄𑀧𑀦𑀻𑀬𑁄. 𑀅𑀣 𑀭𑀽𑀧𑀲𑀦𑁆𑀢𑀸𑀦𑁄, 𑀲𑁄 𑀅𑀘𑁂𑀢𑀦𑀢𑀸𑀬 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄𑀢𑀺 𑀦 𑀢𑀢𑁆𑀣 𑀙𑁂𑀤𑀦𑀸𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀮𑀩𑁆𑀪𑀢𑀺 𑀬𑀣𑀸 𑀫𑀢𑀲𑀭𑀻𑀭𑁂. 𑀧𑀬𑁄𑀕𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺 𑀅𑀢𑀻𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀪𑀯𑁂𑀬𑁆𑀬 𑀅𑀦𑀸𑀕𑀢𑁂𑀲𑀼 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸, 𑀢𑀢𑁆𑀣 𑀦 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀫𑁆𑀪𑀯𑀢𑀺 𑀢𑁂𑀲𑀁 𑀅𑀪𑀸𑀯𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀢𑁆𑀢𑀸 𑀲𑀭𑀲𑁂𑀦𑁂𑀯 ¶ 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑀸𑀬 𑀯𑀺𑀦𑀸𑀲𑀸𑀪𑀺𑀫𑀼𑀔𑁂𑀲𑀼 𑀦𑀺𑀧𑁆𑀧𑀬𑁄𑀚𑀦𑁄 𑀧𑀬𑁄𑀕𑁄 𑀲𑀺𑀬𑀸, 𑀯𑀺𑀦𑀸𑀲𑀲𑁆𑀲 𑀘 𑀓𑀸𑀭𑀡𑀭𑀳𑀺𑀢𑀢𑁆𑀢𑀸 𑀦 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺𑀧𑁆𑀧𑀬𑁄𑀕𑀳𑁂𑀢𑀼𑀓𑀁 𑀫𑀭𑀡𑀁, 𑀦𑀺𑀭𑀻𑀳𑀓𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀲𑁆𑀲 𑀲𑁄 𑀧𑀬𑁄𑀕𑁄, 𑀔𑀡𑀺𑀓𑀢𑁆𑀢𑀸 𑀯𑀥𑀸𑀥𑀺𑀧𑁆𑀧𑀸𑀬𑀲𑀫𑀓𑀸𑀮𑀪𑀺𑀚𑁆𑀚𑀦𑀢𑁄 𑀓𑀲𑁆𑀲 𑀓𑀺𑀭𑀺𑀬𑀸, 𑀧𑀭𑀺𑀬𑁄𑀲𑀸𑀦𑀓𑀸𑀮𑀸𑀦𑀯𑀝𑁆𑀞𑀸𑀦𑀢𑁄 𑀓𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀩𑀤𑁆𑀥𑁄𑀢𑀺?

𑀯𑀼𑀘𑁆𑀘𑀢𑁂 𑁋 𑀬𑀣𑀸𑀯𑀼𑀢𑁆𑀢𑀯𑀥𑀓𑀘𑁂𑀢𑀦𑀸𑀲𑀳𑀺𑀢𑁄 𑀲𑀗𑁆𑀔𑀸𑀭𑀸𑀦𑀁 𑀧𑀼𑀜𑁆𑀚𑁄 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑀦𑁆𑀢𑀸. 𑀢𑁂𑀦 𑀧𑀯𑀢𑁆𑀢𑀺𑀢𑀯𑀥𑀧𑁆𑀧𑀬𑁄𑀕𑀦𑀺𑀫𑀺𑀢𑁆𑀢𑀁 𑀅𑀧𑀕𑀢𑀼𑀲𑁆𑀫𑀸𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀫𑀢𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀬𑀣𑀸𑀯𑀼𑀢𑁆𑀢𑀯𑀥𑀧𑁆𑀧𑀬𑁄𑀕𑀓𑀭𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀳𑀜𑁆𑀜𑀢𑀺, 𑀓𑁂𑀯𑀮𑁄 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄. 𑀯𑀥𑀧𑁆𑀧𑀬𑁄𑀕𑀸𑀯𑀺𑀲𑀬𑀪𑀸𑀯𑁂𑀧𑀺 𑀢𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑀦𑁆𑀢𑀸𑀦𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀲𑀦𑁆𑀢𑀸𑀦𑁂 𑀧𑀭𑁂𑀦 𑀧𑀬𑁄𑀚𑀺𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀯𑀺𑀦𑀺𑀩𑀦𑁆𑀥𑀓𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀳𑀢𑁂 𑀯𑀺𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀲𑀫𑁆𑀪𑀯𑁄, 𑀦𑀧𑀺 𑀅𑀳𑁂𑀢𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀦 𑀘 𑀧𑀬𑁄𑀕𑁄 𑀦𑀺𑀧𑁆𑀧𑀬𑁄𑀚𑀦𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀢𑀧𑀬𑁄𑀕𑀯𑀲𑁂𑀦 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀓𑀮𑀸𑀧𑀲𑁆𑀲 ¶ 𑀢𑀣𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀔𑀡𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀫𑀭𑀡𑀲𑁆𑀲 𑀇𑀥 𑀫𑀭𑀡𑀪𑀸𑀯𑁂𑀦 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀦𑁆𑀢𑀢𑀺𑀫𑀭𑀡𑀲𑁆𑀲 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀳𑁂𑀢𑀼𑀓𑀪𑀸𑀯𑀢𑁄 𑀦 𑀅𑀳𑁂𑀢𑀼𑀓𑀁 𑀫𑀭𑀡𑀁, 𑀦 𑀘 𑀓𑀢𑁆𑀢𑀼𑀭𑀳𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀧𑀬𑁄𑀕𑁄 𑀦𑀺𑀭𑀻𑀳𑀓𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼 𑀲𑀦𑁆𑀦𑀺𑀳𑀺𑀢𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀸𑀤𑀦𑀺𑀬𑀢𑁂𑀲𑀼 𑀓𑀸𑀭𑀡𑁂𑀲𑀼 𑀓𑀢𑁆𑀢𑀼𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀬𑀣𑀸 ‘‘𑀧𑀤𑀻𑀧𑁄 𑀧𑀓𑀸𑀲𑁂𑀢𑀺, 𑀦𑀺𑀲𑀸𑀓𑀭𑁄𑀯 𑀘𑀦𑁆𑀤𑀺𑀫𑀸’’𑀢𑀺. 𑀦 𑀘 𑀓𑁂𑀯𑀮𑀲𑁆𑀲 𑀯𑀥𑀸𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀓𑀮𑀸𑀧𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀇𑀘𑁆𑀙𑀺𑀢𑀩𑁆𑀩𑁄 𑀲𑀦𑁆𑀢𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀲𑁆𑀲𑁂𑀯 𑀧𑀝𑀺𑀚𑀸𑀦𑀦𑀢𑁄. 𑀲𑀦𑁆𑀢𑀸𑀦𑀯𑀲𑁂𑀦 𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀧𑀤𑀻𑀧𑀸𑀤𑀻𑀦𑀁 𑀅𑀢𑁆𑀣𑀓𑀺𑀭𑀺𑀬𑀸 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀯 𑀧𑀸𑀡𑀸𑀢𑀺𑀧𑀸𑀢𑁂𑀦 𑀓𑀫𑁆𑀫𑀩𑀤𑁆𑀥𑁄. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀲𑁄 (𑀫. 𑀦𑀺. 𑀅𑀝𑁆𑀞. 𑁧.𑁮𑁯; 𑀥. 𑀲. 𑀅𑀝𑁆𑀞. 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸) 𑀘 𑀧𑀸𑀡𑀸𑀢𑀺𑀧𑀸𑀢𑁄 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬, 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀤𑀻𑀲𑀼 ¶ 𑀅𑀧𑁆𑀧𑀕𑀼𑀡𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺𑀧𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀬𑀯𑀸𑀘𑀸𑀳𑀺 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁, 𑀧𑀭𑀲𑀦𑁆𑀢𑀓𑀁, 𑀢𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀧𑀭𑀲𑁆𑀲𑀳𑀭𑀡𑀁 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀭𑀧𑀭𑀺𑀕𑁆𑀕𑀳𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀫𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀣𑁂𑀬𑁆𑀬𑀘𑁂𑀢𑀦𑀸. 𑀢𑀁 𑀳𑀻𑀦𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬. 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀢𑀁𑀢𑀁𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁.

𑀫𑀺𑀘𑁆𑀙𑀸 𑀘𑀭𑀡𑀁 𑀫𑀺𑀘𑁆𑀙𑀸𑀘𑀸𑀭𑁄, 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄. 𑀲𑁄 𑀧𑀦 𑀮𑀓𑁆𑀔𑀡𑀢𑁄 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸. 𑀲𑁄 𑀧𑀦𑁂𑀲 𑀫𑀺𑀘𑁆𑀙𑀸𑀘𑀸𑀭𑁄 𑀲𑀻𑀮𑀸𑀤𑀺𑀕𑀼𑀡𑀯𑀺𑀭𑀳𑀺𑀢𑁂 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁, 𑀲𑁂𑀯𑀦𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀏𑀯.

𑀯𑀘𑀻𑀤𑁆𑀯𑀸𑀭𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 𑀯𑀸𑀘𑀢𑁄 𑀧𑀯𑀢𑁆𑀢𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ¶ 𑀆𑀳 ‘‘𑀫𑀼𑀲𑀸𑀯𑀸𑀤𑀧𑀺𑀲𑀼𑀡𑀯𑀸𑀘𑀸𑀨𑀭𑀼𑀲𑀯𑀸𑀘𑀸𑀲𑀫𑁆𑀨𑀧𑁆𑀧𑀮𑀸𑀧𑀘𑁂𑀢𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. 𑀫𑀼𑀲𑀸 𑀯𑀤𑀻𑀬𑀢𑀺 𑀯𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀫𑀼𑀲𑀸𑀯𑀸𑀤𑁄, 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀦𑀢𑁆𑀣𑀻𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻 𑀫𑀜𑁆𑀜𑁂 𑀲𑀦𑁆𑀤𑀢𑀻’’𑀢𑀺 𑀧𑀽𑀭𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀅𑀢𑀣𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀭𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 ¶ 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀬𑀲𑁆𑀫𑀸 𑀧𑀦 𑀬𑀣𑀸 𑀓𑀸𑀬𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀘𑀸𑀳𑀺 𑀧𑀭𑀁 𑀯𑀺𑀲𑀁𑀯𑀸𑀤𑁂𑀢𑀺, 𑀢𑀣𑀸 ‘‘𑀇𑀤𑀫𑀲𑁆𑀲 𑀪𑀡𑀸𑀳𑀻’’𑀢𑀺 𑀆𑀡𑀸𑀧𑁂𑀦𑁆𑀢𑁄𑀧𑀺, 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀧𑀺, ‘‘𑀅𑀬𑀁 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀓𑀼𑀝𑁆𑀝𑀸𑀤𑀻𑀲𑀼 𑀮𑀺𑀔𑀺𑀢𑁆𑀯𑀸 𑀞𑀧𑁂𑀦𑁆𑀢𑁄𑀧𑀺, 𑀢𑀲𑁆𑀫𑀸 𑀏𑀢𑁆𑀣 𑀆𑀡𑀢𑁆𑀢𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀧𑀺 𑀧𑀬𑁄𑀕𑀸 𑀬𑀼𑀚𑁆𑀚𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑀸, 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑁂 𑀪𑀺𑀦𑁆𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀧𑀺𑀬𑀲𑀼𑀜𑁆𑀜𑀓𑀭𑀡𑀢𑁄 𑀧𑀺𑀲𑀼𑀡𑀸. 𑀬𑀸𑀬 𑀳𑀺 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁, 𑀧𑀭𑀲𑁆𑀲 𑀘 𑀧𑀺𑀬𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀯𑀸𑀘𑀸. 𑀮𑀓𑁆𑀔𑀡𑀢𑁄 𑀧𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸 𑀧𑀺𑀲𑀼𑀡𑀁 𑀯𑀤𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄, ‘‘𑀇𑀢𑀺 𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀸 ‘‘𑀇𑀢𑀺 𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀧𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀧𑀭𑁂 𑀧𑀦 𑀅𑀪𑀺𑀦𑁆𑀦𑁂 𑀓𑀫𑁆𑀫𑀧𑀣𑀪𑁂𑀤𑁄 𑀦𑀢𑁆𑀣𑀺, 𑀪𑀺𑀦𑁆𑀦𑁂 𑀏𑀯 𑀳𑁄𑀢𑀺.

𑀨𑀭𑀼𑀲𑀬𑀢𑀻𑀢𑀺 𑀨𑀭𑀼𑀲𑀸, 𑀯𑀸𑀘𑀸. 𑀬𑀸𑀬 𑀳𑀺 𑀯𑀸𑀘𑀸𑀬 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀲𑀺𑀦𑁂𑀳𑀸𑀪𑀸𑀯𑁂𑀦 𑀮𑀽𑀔𑀁 𑀓𑀭𑁄𑀢𑀺, 𑀲𑀸 𑀨𑀭𑀼𑀲𑀯𑀸𑀘𑀸. 𑀅𑀣 𑀯𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸 𑀤𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀲𑀪𑀸𑀯𑁂𑀦𑀧𑀺 𑀓𑀓𑁆𑀓𑀲𑀸 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀲𑀼𑀔𑀸𑀢𑀺 𑀨𑀭𑀼𑀲𑀯𑀸𑀘𑀸. 𑀏𑀢𑁆𑀣 𑀧𑀦 𑀧𑀭𑁂𑀲𑀁 𑀫𑀫𑁆𑀫𑀘𑁆𑀙𑁂𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑀦𑀺𑀝𑁆𑀞𑀼𑀭𑀢𑀸𑀬 𑀲𑀪𑀸𑀯𑁂𑀦 𑀓𑀸𑀭𑀡𑀯𑁄𑀳𑀸𑀭𑁂𑀦 𑀘 𑀯𑀸𑀘𑀸𑀬 𑀨𑀭𑀼𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺 ¶ 𑀤𑀝𑁆𑀞𑀩𑁆𑀩𑀸. 𑀢𑀁 𑀨𑀭𑀼𑀲𑀁 𑀯𑀤𑀢𑀺 𑀏𑀢𑀸𑀬𑀸𑀢𑀺 𑀨𑀭𑀼𑀲𑀯𑀸𑀘𑀸, 𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀸 𑀘𑁂𑀢𑀦𑀸. 𑀢𑀲𑁆𑀲𑀸 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀸𑀭𑀓𑁄 𑀫𑀸𑀢𑀼 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺, 𑀢𑀁 𑀫𑀸𑀢𑀸 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀘𑀡𑁆𑀟𑀸 𑀢𑀁 𑀫𑀳𑀺𑀁𑀲𑀻 𑀅𑀦𑀼𑀩𑀦𑁆𑀥𑀢𑀽’’𑀢𑀺 𑀅𑀓𑁆𑀓𑁄𑀲𑀺. 𑀅𑀣𑀲𑁆𑀲 𑀢𑀣𑁂𑀯 𑀅𑀭𑀜𑁆𑀜𑁂 𑀫𑀳𑀺𑀁𑀲𑀻 𑀉𑀝𑁆𑀞𑀸𑀲𑀺. 𑀤𑀸𑀭𑀓𑁄 ‘‘𑀬𑀁 𑀫𑀫 𑀫𑀸𑀢𑀸 𑀫𑀼𑀔𑁂𑀦 𑀓𑀣𑁂𑀲𑀺, 𑀢𑀁 𑀫𑀸 𑀳𑁄𑀢𑀼. 𑀬𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀲𑀺, 𑀢𑀁 𑀳𑁄𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺. 𑀫𑀳𑀺𑀁𑀲𑀻 𑀢𑀢𑁆𑀣𑁂𑀯 𑀩𑀤𑁆𑀥𑀸 𑀯𑀺𑀬 𑀅𑀝𑁆𑀞𑀸𑀲𑀺 ¶ . 𑀏𑀯𑀁 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺, 𑀦𑀺𑀤𑁆𑀥𑀫𑀣 𑀦𑁂’’𑀢𑀺. 𑀅𑀣 𑀘 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺, 𑀬𑀣𑀸 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀯𑀸𑀘𑀸 𑀳𑁄𑀢𑀺, 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦 𑀏𑀲𑀸 𑀨𑀭𑀼𑀲𑀯𑀸𑀘𑀸𑀯. 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑁋 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄, 𑀓𑀼𑀧𑀺𑀢𑀘𑀺𑀢𑁆𑀢𑀁, 𑀅𑀓𑁆𑀓𑁄𑀲𑀦𑀸𑀢𑀺.

𑀲𑀁 𑀲𑀼𑀔𑀁 𑀳𑀺𑀢𑀜𑁆𑀘 𑀨𑀮𑀢𑀺 𑀯𑀺𑀲𑀭𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀲𑀫𑁆𑀨𑀁, 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀼𑀧𑀓𑀸𑀭𑀓𑀁 𑀬𑀁 𑀓𑀺𑀜𑁆𑀘𑀺, 𑀲𑀫𑁆𑀨𑀁 𑀧𑀮𑀧𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀉𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀦𑀺𑀭𑀢𑁆𑀣𑀓𑀓𑀣𑀸𑀧𑀼𑀭𑁂𑀓𑁆𑀔𑀸𑀭𑀢𑀸, 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀜𑁆𑀘. 𑀧𑀭𑁂 𑀧𑀦 𑀢𑀁 𑀓𑀣𑀁 𑀅𑀕𑀡𑁆𑀳𑀦𑁆𑀢𑁂 𑀓𑀫𑁆𑀫𑀧𑀣𑀪𑁂𑀤𑁄 𑀦𑀢𑁆𑀣𑀺, 𑀧𑀭𑁂𑀦 𑀧𑀦 𑀲𑀫𑁆𑀨𑀧𑁆𑀧𑀮𑀸𑀧𑁂 𑀕𑀳𑀺𑀢𑁂𑀬𑁂𑀯 𑀳𑁄𑀢𑀺.

𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄𑀢𑀺 𑀏𑀢𑁆𑀣 𑀧𑀭𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀫𑀼𑀔𑀁 𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀮𑁄𑀪𑁄. 𑀲𑀸 𑀧𑀦 ‘‘𑀅𑀳𑁄 𑀯𑀢 𑀇𑀤𑀁 𑀫𑀫𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀧𑀭𑀪𑀡𑁆𑀟𑀁, 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘. 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢 𑀇𑀤𑀁 𑀫𑀫𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀦 𑀧𑀭𑀺𑀡𑀸𑀫𑁂𑀢𑀺.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀸𑀧𑀸𑀤𑁄, 𑀧𑀝𑀺𑀖𑁄. 𑀲𑁄 𑀧𑀭𑀯𑀺𑀦𑀸𑀲𑀸𑀬 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄 ¶ . 𑀲𑁄 𑀨𑀭𑀼𑀲𑀯𑀸𑀘𑀸 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 𑀫𑀳𑀸𑀲𑀸𑀯𑀚𑁆𑀚𑁄 𑀘. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀧𑀭𑀲𑀢𑁆𑀢𑁄, 𑀢𑀲𑁆𑀲 𑀘 𑀯𑀺𑀦𑀸𑀲𑀦𑀘𑀺𑀦𑁆𑀢𑀸. 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 ‘‘𑀅𑀳𑁄 𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀯𑀺𑀦𑀸𑀲𑀦𑀁 𑀦 𑀘𑀺𑀦𑁆𑀢𑁂𑀢𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦 ¶ 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀅𑀧𑀺𑀘 𑀅𑀦𑀺𑀬𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀦𑀺𑀬𑀢𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀯𑀢𑁆𑀣𑀼𑀦𑁄 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸, 𑀬𑀣𑀸 𑀘 𑀢𑀁 𑀕𑀡𑁆𑀳𑀸𑀢𑀺, 𑀢𑀣𑀸𑀪𑀸𑀯𑁂𑀦 𑀢𑀲𑁆𑀲𑀼𑀧𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀦𑀢𑁆𑀣𑀺𑀓𑀸𑀳𑁂𑀢𑀼𑀓𑀅𑀅𑀭𑀺𑀬𑀤𑀺𑀝𑁆𑀞𑀻𑀳𑀺 𑀏𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺.

‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀧𑀺 𑀧𑀸𑀭𑀺𑀲𑁂𑀲𑀜𑀸𑀬𑀢𑁄 𑀯𑀼𑀢𑁆𑀢𑀸𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂’’𑀢𑀺𑀆𑀤𑀺. 𑀢𑁂 𑀬𑀣𑀸𑀯𑀼𑀢𑁆𑀢𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑁂 𑀅𑀓𑀼𑀲𑀮𑀥𑀫𑁆𑀫𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀯𑀺𑀳𑀺𑀢𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸.

𑁬. 𑀅𑀬𑀁 𑀮𑁄𑀓𑀢𑀦𑁆𑀢𑀻𑀢𑀺 𑀅𑀬𑀁 𑀯𑀼𑀟𑁆𑀠𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀸𑀮𑀓𑁆𑀔𑀡𑀸 𑀮𑁄𑀓𑀧𑁆𑀧𑀯𑁂𑀡𑀻. 𑀅𑀦𑀸𑀕𑀸𑀫𑀺𑀩𑁆𑀭𑀳𑁆𑀫𑀸𑀦𑀁 𑀅𑀮𑀗𑁆𑀓𑀸𑀭𑀸𑀤𑀻𑀲𑀼 𑀅𑀦𑀸𑀕𑀸𑀫𑀺𑀪𑀺𑀓𑁆𑀔𑀽𑀦𑀜𑁆𑀘 𑀘𑀻𑀯𑀭𑀸𑀤𑀻𑀲𑀼 𑀦𑀺𑀓𑀦𑁆𑀢𑀺𑀯𑀲𑁂𑀦 𑀭𑀸𑀕𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀯 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑀸’’𑀢𑀺. 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀢𑁆𑀣𑀼𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀭𑀸𑀕𑁄 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀝𑁆𑀞𑀸𑀲𑀯𑀘𑀦𑁄 𑀳𑁂𑀢𑁆𑀣 𑀕𑀼𑀡𑀲𑀤𑁆𑀤𑁄 ‘‘𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁪) 𑀯𑀺𑀬. 𑀤𑁆𑀯𑀻𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀽𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀤𑁆𑀯𑀻𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼. 𑀫𑁄𑀳𑀲𑁆𑀲 𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀢𑁆𑀢𑀸 𑀆𑀳 ‘‘𑀲𑀩𑁆𑀩𑀸𑀓𑀼𑀲𑀮𑀲𑀫𑁆𑀪𑀯𑀲𑁆𑀲𑀸’’𑀢𑀺. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁.

𑁭. 𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂𑀢𑀺 ‘‘𑀅𑀳𑀫𑀪𑀺𑀚𑀸𑀢𑁄 𑀭𑀽𑀧𑀯𑀸 𑀧𑀜𑁆𑀜𑀯𑀸, 𑀓𑀣𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀅𑀪𑀺𑀯𑀸𑀤𑀦𑀸𑀤𑀺𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀚𑀺𑀕𑀼𑀘𑁆𑀙𑀢𑀺 𑀯𑀺𑀬 𑀚𑀺𑀕𑀼𑀘𑁆𑀙𑀢𑀻𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀫𑀺. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦𑀸𑀢𑀺 𑀅𑀜𑁆𑀜𑀸𑀡𑀲𑀫𑁆𑀪𑀽𑀢𑀝𑁆𑀞𑁂𑀦. 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀚𑀺𑀕𑀼𑀘𑁆𑀙𑀫𑀸𑀦𑁄 𑀢𑁂𑀲𑀁 𑀲𑀫𑀗𑁆𑀕𑀻𑀪𑀸𑀯𑀫𑁆𑀧𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀻’’𑀢𑀺. 𑀲𑀫𑀸𑀧𑀢𑁆𑀢𑀻𑀢𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀲𑀫𑀸𑀧𑀚𑁆𑀚𑀦𑀸 𑀲𑀫𑀗𑁆𑀕𑀺𑀪𑀸𑀯𑁄𑀢𑀺. 𑀫𑀡𑁆𑀟𑀦𑀓𑀚𑀸𑀢𑀺𑀬𑁄𑀢𑀺 𑀫𑀡𑁆𑀟𑀦𑀲𑀪𑀸𑀯𑁄, 𑀫𑀡𑁆𑀟𑀦𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀚𑁂𑀕𑀼𑀘𑁆𑀙𑀺𑀢𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑀲𑀻𑀮𑀢𑀁.

𑁮. 𑀮𑁄𑀓𑀚𑁂𑀝𑁆𑀞𑀓𑀓𑀫𑁆𑀫𑀦𑁆𑀢𑀺 ¶ 𑀮𑁄𑀓𑁂 𑀚𑁂𑀝𑁆𑀞𑀓𑀸𑀦𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑀁, 𑀮𑁄𑀓𑁂 𑀯𑀸 𑀲𑁂𑀝𑁆𑀞𑀲𑀫𑁆𑀫𑀢𑀁 𑀓𑀫𑁆𑀫𑀁. 𑀢𑀢𑁆𑀭𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼. 𑀧𑀤𑀸𑀪𑀺𑀳𑀺𑀢𑁄 ¶ 𑀅𑀢𑁆𑀣𑁄 𑀧𑀤𑀢𑁆𑀣𑁄, 𑀩𑁆𑀬𑀜𑁆𑀚𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑀁 𑀯𑀸 𑀅𑀭𑀳𑀢𑀻𑀢𑀺 𑀏𑀢𑁆𑀣 𑀯𑀺𑀦𑀬𑀦𑀁 𑀯𑀺𑀦𑀬𑁄, 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀕𑁆𑀕𑀳𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀦𑀼 𑀘 𑀧𑀞𑀫𑀁 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀲𑀓𑀢𑁆𑀣𑁂 𑀅𑀭𑀳𑀢𑁆𑀣𑁂 𑀘 𑀪𑀤𑁆𑀥𑀺𑀢𑀧𑀘𑁆𑀘𑀬𑁄 𑀲𑀤𑁆𑀤𑀮𑀓𑁆𑀔𑀡𑀢𑁄 𑀤𑀺𑀲𑁆𑀲𑀢𑀺, 𑀦 𑀧𑀦 ‘‘𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂, 𑀢𑀲𑁆𑀫𑀸 𑀓𑀣𑀫𑁂𑀢𑁆𑀣 𑀢𑀤𑁆𑀥𑀺𑀢𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀻’’𑀢𑀺. 𑀯𑀺𑀘𑀺𑀢𑁆𑀭𑀢𑀸 𑀘𑁂𑀢𑁆𑀣 𑀮𑁄𑀓𑀧𑁆𑀧𑀫𑀸𑀡𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀅𑀢𑁆𑀣𑁂 𑀢𑀤𑁆𑀥𑀺𑀢𑀧𑁆𑀧𑀬𑁄𑀕𑁄 𑀮𑁄𑀓𑀲𑁆𑀲, 𑀢𑀢𑁆𑀣 𑀢𑀢𑁆𑀣 𑀢𑀤𑁆𑀥𑀺𑀢𑀯𑀼𑀢𑁆𑀢𑀺 𑀮𑁄𑀓𑀢𑁄 𑀲𑀺𑀤𑁆𑀥𑀸𑀢𑀺 𑀯𑀺𑀘𑀺𑀢𑁆𑀭𑀸 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀢𑀲𑁆𑀫𑀸 𑀬𑀣𑀸 ‘‘𑀫𑀸 𑀲𑀤𑁆𑀤𑀫𑀓𑀸𑀲𑀻’’𑀢𑀺 𑀯𑀤𑀦𑁆𑀢𑁄 ‘‘𑀫𑀸𑀲𑀤𑁆𑀤𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀦𑀬𑀺𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯. 𑀓𑀧𑀡𑀧𑀼𑀭𑀺𑀲𑁄𑀢𑀺 𑀕𑀼𑀡𑀯𑀺𑀭𑀳𑀺𑀢𑀢𑀸𑀬 𑀤𑀻𑀦𑀫𑀦𑀼𑀲𑁆𑀲𑁄. 𑀩𑁆𑀬𑀜𑁆𑀚𑀦𑀸𑀦𑀺 𑀅𑀯𑀺𑀘𑀸𑀭𑁂𑀢𑁆𑀯𑀸𑀢𑀺 𑀢𑀺𑀲𑁆𑀲𑀤𑀢𑁆𑀢𑀸𑀤𑀺𑀲𑀤𑁆𑀤𑁂𑀲𑀼 𑀯𑀺𑀬 ‘‘𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀬𑀁 𑀦𑀸𑀫 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀩𑁆𑀬𑀜𑁆𑀚𑀦𑀁 𑀯𑀺𑀘𑀸𑀭𑀁 𑀅𑀓𑀢𑁆𑀯𑀸, 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦. 𑀤𑁂𑀯𑀮𑁄𑀓𑀕𑀩𑁆𑀪𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀯𑀢𑁆𑀯𑀸 𑀞𑀧𑁂𑀢𑁆𑀯𑀸 𑀪𑀼𑀫𑁆𑀫𑀤𑁂𑀯𑁂 𑀲𑁂𑀲𑁂𑀲𑀼 𑀤𑁂𑀯𑁂𑀲𑀼 𑀕𑀩𑁆𑀪𑀕𑁆𑀕𑀳𑀡𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀲𑀦𑁆𑀥𑀺𑀬𑁂𑀯𑁂𑀢𑁆𑀣 𑀕𑀩𑁆𑀪𑀲𑀫𑁆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀲𑁆𑀲. 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀫𑀸𑀢𑀺𑀢𑁄 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄, 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑀲𑁆𑀲 𑀤𑀸𑀲𑀺𑀬𑀸 𑀧𑀼𑀢𑁆𑀢𑁄𑀢𑀺 𑀤𑀸𑀲𑀺𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀓𑁆𑀓𑁄𑀲𑀦𑀁 𑀯𑀺𑀬 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑁄𑀧𑀺 𑀏𑀯𑀫𑀸𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀩𑁆𑀪𑀢𑁄𑀢𑀺 𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀪𑀩𑁆𑀩𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄𑀢𑀺 𑀇𑀫𑀲𑁆𑀲 𑀯𑀺𑀕𑁆𑀕𑀳𑀲𑁆𑀲 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁂𑀯𑀮𑁄𑀓𑀕𑀩𑁆𑀪𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀆𑀬𑀢𑀺𑀁 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻𑀢𑀻’’𑀢𑀺. 𑀇𑀢𑀺-𑀲𑀤𑁆𑀤𑀸 ¶ 𑀏 𑀳𑁂𑀢𑀼𑀅𑀢𑁆𑀣𑁄, 𑀬𑀲𑁆𑀫𑀸 𑀆𑀬𑀢𑀺𑀫𑁆𑀧𑀺 𑀳𑀻𑀦𑀕𑀩𑁆𑀪𑀧𑀝𑀺𑀮𑀸𑀪𑀪𑀸𑀕𑀻, 𑀢𑀲𑁆𑀫𑀸 𑀳𑀻𑀦𑁄 𑀯𑀸 𑀕𑀩𑁆𑀪𑁄 𑀅𑀲𑁆𑀲𑀸𑀢𑀺 𑀅𑀧𑀕𑀩𑁆𑀪𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀦 𑀢𑀲𑁆𑀲𑁂𑀯 𑀯𑀺𑀕𑁆𑀕𑀳𑀲𑁆𑀲 𑀓𑁄𑀥𑀯𑀲𑁂𑀦…𑀧𑁂… 𑀤𑀲𑁆𑀲𑁂𑀦𑁆𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀻𑀦𑁄 𑀯𑀸𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑀯𑀸𑀲𑁄 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀕𑀩𑁆𑀪-𑀲𑀤𑁆𑀤𑁄 𑀅𑀢𑁆𑀣𑀺 𑀫𑀸𑀢𑀼𑀓𑀼𑀘𑁆𑀙𑀺𑀧𑀭𑀺𑀬𑀸𑀬𑁄 ‘‘𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁩𑁬𑁩) 𑀯𑀺𑀬 ¶ . 𑀅𑀢𑁆𑀣𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀧𑀭𑀺𑀬𑀸𑀬𑁄 ‘‘𑀅𑀦𑁆𑀢𑀫𑀲𑁄 𑀕𑀩𑁆𑀪𑀧𑀸𑀢𑀦𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁨𑁯) 𑀯𑀺𑀬. 𑀢𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀧𑀭𑀺𑀬𑀸𑀬𑀁 𑀕𑀳𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀕𑀢𑁂 𑀕𑀩𑁆𑀪𑀲𑁂𑀬𑁆𑀬𑀸’’𑀢𑀺. 𑀕𑀩𑁆𑀪𑁂 𑀲𑁂𑀬𑁆𑀬𑀸 𑀕𑀩𑁆𑀪𑀲𑁂𑀬𑁆𑀬𑀸. 𑀅𑀦𑀼𑀢𑁆𑀢𑀭𑁂𑀦 𑀫𑀕𑁆𑀕𑁂𑀦𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦. 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀯𑀺𑀳𑀢𑀢𑁆𑀢𑀸 𑀆𑀳 ‘‘𑀯𑀺𑀳𑀢𑀓𑀸𑀭𑀡𑀢𑁆𑀢𑀸’’𑀢𑀺. 𑀇𑀢𑀭𑀸 𑀢𑀺𑀲𑁆𑀲𑁄𑀧𑀻𑀢𑀺 𑀅𑀡𑁆𑀟𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸. 𑀏𑀢𑁆𑀣 𑀘 𑀬𑀤𑀺𑀧𑀺 ‘‘𑀅𑀧𑀕𑀩𑁆𑀪𑁄’’𑀢𑀺 𑀇𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 𑀕𑀩𑁆𑀪𑀲𑁂𑀬𑁆𑀬𑀸 𑀏𑀯 𑀯𑀢𑁆𑀢𑀩𑁆𑀩𑀸, 𑀧𑀲𑀗𑁆𑀕𑀢𑁄 𑀧𑀦 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀫𑁆𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀧𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀲𑀢𑁆𑀢𑀧𑀭𑀺𑀬𑀸𑀬𑀲𑁆𑀲 𑀕𑀩𑁆𑀪𑀲𑀤𑁆𑀤𑀲𑁆𑀲 𑀯𑀲𑁂𑀦 𑀯𑀺𑀕𑁆𑀕𑀳𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦 𑀯𑀺𑀓𑀧𑁆𑀧𑁂 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀉𑀪𑀬𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀦𑀼 𑀘 ‘‘𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀳𑀻𑀦𑀸’’𑀢𑀺 (𑀧𑀸𑀭𑀸. 𑁧𑁦) 𑀯𑀼𑀢𑁆𑀢𑀢𑁆𑀢𑀸 𑀕𑀩𑁆𑀪𑀲𑁆𑀲 𑀲𑁂𑀬𑁆𑀬𑀸 𑀏𑀯 𑀧𑀳𑀻𑀦𑀸, 𑀦 𑀧𑀦 𑀕𑀩𑁆𑀪𑁄𑀢𑀺 𑀆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀬𑀣𑀸 𑀘𑀸’’𑀢𑀺𑀆𑀤𑀺. 𑀅𑀣 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 𑀧𑀼𑀦𑀩𑁆𑀪𑀯𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀦𑁆𑀢𑀺 𑀆𑀳 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀦𑀸𑀫𑀸’’𑀢𑀺𑀆𑀤𑀺. 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺.

𑁧𑁧. 𑀥𑀫𑁆𑀫𑀥𑀸𑀢𑀼𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑁂 𑀅𑀦𑀯𑀲𑁂𑀲𑁂 𑀥𑀸𑀭𑁂𑀢𑀺 𑀬𑀸𑀣𑀸𑀯𑀢𑁄 𑀉𑀧𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀸𑀢𑀼, 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀲𑀪𑀸𑀯𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀘𑁆𑀙𑀺𑀓𑀢𑁆𑀯𑀸, 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀧𑀝𑀺𑀮𑀸𑀪𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀭𑀼𑀘𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁄, 𑀢𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀨𑀭𑀡𑀁. 𑀢𑀸𑀤𑀺𑀕𑀼𑀡𑀮𑀓𑁆𑀔𑀡𑀫𑁂𑀯 𑀧𑀼𑀦 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑁆𑀯𑀸 ¶ 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀣𑀯𑀻𑀲𑀫𑀘𑀺𑀢𑁆𑀢𑀢’’𑀦𑁆𑀢𑀺. 𑀬𑀣𑀸 𑀧𑀣𑀯𑀻 𑀲𑀼𑀘𑀺𑀅𑀲𑀼𑀘𑀺𑀦𑀺𑀓𑁆𑀔𑁂𑀧𑀙𑁂𑀤𑀦𑀪𑁂𑀤𑀦𑀸𑀤𑀻𑀲𑀼 𑀦 𑀯𑀺𑀓𑀫𑁆𑀧𑀢𑀺, 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀦 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀮𑀸𑀪𑀸𑀮𑀸𑀪𑀸𑀤𑀻𑀲𑀼 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑁆𑀧𑀳𑀸𑀦𑀢𑁄 𑀅𑀯𑀺𑀓𑀫𑁆𑀧𑀺𑀢𑀘𑀺𑀢𑁆𑀢𑀢𑀸𑀬 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀼𑀧𑁆𑀧𑀥𑀫𑁆𑀫𑀢𑀦𑁆𑀢𑀺 𑀏𑀢𑁆𑀣 ‘‘𑀅𑀓𑀼𑀧𑁆𑀧𑀥𑀫𑁆𑀫𑁄 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀧𑀭𑁂𑀲𑀼 𑀧𑀦 𑀅𑀓𑁆𑀓𑁄𑀲𑀦𑁆𑀢𑁂𑀲𑀼𑀧𑀺 𑀅𑀢𑁆𑀢𑀦𑁄 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀸𑀮𑀓𑁆𑀔𑀡𑀁 𑀅𑀓𑀼𑀚𑁆𑀛𑀦𑀲𑀪𑀸𑀯𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀚𑀭𑀸𑀬 𑀅𑀦𑀼𑀲𑀝𑀦𑁆𑀢𑀺 𑀚𑀭𑀸𑀬 𑀧𑀮𑀺𑀯𑁂𑀞𑀺𑀢𑀁. 𑀯𑀝𑁆𑀝𑀔𑀸𑀡𑀼𑀪𑀽𑀢𑀦𑁆𑀢𑀺 𑀅𑀦𑁂𑀓𑁂𑀲𑀁 𑀅𑀦𑀬𑀩𑁆𑀬𑀲𑀦𑀸𑀦𑀁 𑀦𑀺𑀧𑀸𑀢𑀮𑀓𑁆𑀔𑀡𑀢𑁆𑀣𑀫𑁆𑀪𑀪𑀽𑀢𑀢𑀸𑀬 𑀲𑀁𑀲𑀸𑀭𑀔𑀸𑀡𑀼𑀪𑀽𑀢𑀁. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀟𑁆𑀠𑀢𑀸𑀬 𑀆𑀲𑀦𑁆𑀦𑀯𑀼𑀢𑁆𑀢𑀺𑀫𑀭𑀡𑀦𑁆𑀢𑀺 𑀲𑀫𑁆𑀪𑀸𑀯𑀦𑀯𑀲𑁂𑀦 ‘‘𑀅𑀚𑁆𑀚 𑀫𑀭𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀳𑀦𑁆𑀢𑁂𑀦 𑀔𑁄 𑀧𑀦 𑀉𑀲𑁆𑀲𑀸𑀳𑁂𑀦𑀸𑀢𑀺 ‘‘𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀏𑀯𑀁 𑀲𑀜𑁆𑀚𑀸𑀢𑀫𑀳𑀼𑀲𑁆𑀲𑀸𑀳𑁂𑀦. 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀦𑁆𑀢𑀺 ¶ 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀧𑀼𑀭𑁂𑀚𑀸𑀢𑀪𑀸𑀯𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀲𑀫𑁄𑀢𑀺 𑀅𑀧𑁆𑀧𑀝𑀺𑀲𑀫𑁄, 𑀧𑀼𑀭𑁂𑀚𑀸𑀢𑀪𑀸𑀯𑁄.

‘‘𑀅𑀧𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀻’’𑀢𑀺 𑀯𑀤𑀦𑁆𑀢𑁄 𑀧𑀺-𑀲𑀤𑁆𑀤𑁄𑀧𑀺 𑀯𑀺𑀲𑀼𑀁 𑀅𑀢𑁆𑀣𑀺 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀪𑀸𑀯𑀦𑀢𑁆𑀣𑁂𑀢𑀺 ‘‘𑀅𑀧𑀺 𑀦𑀸𑀫𑁂𑀯𑀁 𑀲𑀺𑀬𑀸’’𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑀲𑁆𑀫𑀺𑀁 𑀚𑁄𑀢𑀓𑀢𑀸𑀬 𑀧𑀺𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬𑀸𑀢𑀺 𑀯𑀘𑀦𑀲𑁆𑀲 𑀫𑀥𑀼𑀭𑀪𑀸𑀯𑀢𑁆𑀣𑀁, 𑀫𑀼𑀤𑀼𑀪𑀸𑀯𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀻𑀢𑀺 𑀏𑀯𑀁 𑀏𑀓𑀫𑁂𑀯 𑀕𑀡𑀦𑀁 𑀅𑀯𑀢𑁆𑀯𑀸 𑀅𑀧𑀭𑀸𑀬 𑀕𑀡𑀦𑀸𑀬 𑀲𑀤𑁆𑀥𑀺𑀁 𑀯𑀘𑀦𑀁 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺 𑀬𑀣𑀸 ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀧𑀸𑀤𑀸𑀤𑀻𑀳𑀺 𑀅𑀢𑁆𑀢𑀦𑀸 𑀦𑁂𑀲𑀁 𑀓𑀺𑀜𑁆𑀘𑀺 𑀉𑀧𑀖𑀸𑀢𑀁 𑀅𑀓𑀭𑁄𑀦𑁆𑀢𑀺𑀬𑀸 𑀩𑀳𑀺𑀯𑀸𑀢𑀸𑀤𑀺𑀧𑀭𑀺𑀲𑁆𑀲𑀬𑀧𑀭𑀺𑀳𑀸𑀭𑀢𑁆𑀣𑀁 𑀲𑀫𑁆𑀫𑀤𑁂𑀯 𑀉𑀧𑀭𑀺 𑀲𑀬𑀺𑀢𑀸𑀦𑀺. 𑀉𑀧𑀭𑀺𑀅𑀢𑁆𑀣𑁄 𑀳𑁂𑀢𑁆𑀣 𑀅𑀥𑀺-𑀲𑀤𑁆𑀤𑁄. 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸𑀢𑀺 𑀢𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀢𑁆𑀣𑀁 𑀅𑀢𑁆𑀢𑀦𑁄 𑀓𑀸𑀬𑀼𑀲𑁆𑀫𑀸𑀯𑀲𑁂𑀦 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀉𑀲𑁆𑀫𑀻𑀓𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀲𑀫𑁆𑀫𑀤𑁂𑀯 𑀲𑀩𑁆𑀩𑀲𑁄 𑀓𑀼𑀓𑁆𑀓𑀼𑀝𑀯𑀸𑀲𑀦𑀸𑀬 𑀯𑀸𑀲𑀺𑀢𑀸𑀦𑀺. 𑀢𑁂𑀦𑀸𑀳 ‘‘𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻’’𑀢𑀺.

𑀏𑀢𑁆𑀣 𑀘 𑀲𑀫𑁆𑀫𑀸 𑀧𑀭𑀺𑀲𑁂𑀤𑀦𑀁 𑀓𑀼𑀓𑁆𑀓𑀼𑀝𑀕𑀦𑁆𑀥𑀧𑀭𑀺𑀪𑀸𑀯𑀦𑀜𑁆𑀘 𑀲𑀫𑁆𑀫𑀸 𑀅𑀥𑀺𑀲𑀬𑀦𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀦𑀼𑀪𑀸𑀯𑀦𑀺𑀧𑁆𑀨𑀸𑀤𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀸 𑀅𑀥𑀺𑀲𑀬𑀦𑁂𑀦𑁂𑀯 𑀳𑀺 𑀇𑀢𑀭𑀤𑁆𑀯𑀬𑀁 𑀇𑀚𑁆𑀛𑀢𑀺 ¶ . 𑀦 𑀳𑀺 𑀲𑀫𑁆𑀫𑀸 𑀅𑀥𑀺𑀲𑀬𑀦𑀢𑁄 𑀯𑀺𑀲𑀼𑀁 𑀲𑀫𑁆𑀫𑀸 𑀧𑀭𑀺𑀲𑁂𑀤𑀦𑀲𑁆𑀲 𑀲𑀫𑁆𑀫𑀸 𑀧𑀭𑀺𑀪𑀸𑀯𑀦𑀲𑁆𑀲 𑀘 𑀓𑀭𑀡𑀁 𑀅𑀢𑁆𑀣𑀺, 𑀢𑁂𑀦 𑀧𑀦 𑀲𑀤𑁆𑀥𑀺𑀁𑀬𑁂𑀯 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁 ‘‘𑀏𑀯𑀁 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀺𑀬𑀫𑀸𑀦𑀸𑀦𑀻’’𑀢𑀺. 𑀦𑀔𑀲𑀺𑀔𑀸𑀢𑀺 𑀦𑀔𑀕𑁆𑀕𑀸𑀦𑀺. 𑀫𑀼𑀔𑀢𑀼𑀡𑁆𑀟𑀓𑀦𑁆𑀢𑀺 𑀫𑀼𑀔𑀕𑁆𑀕𑀁. 𑀓𑀧𑀸𑀮𑀲𑁆𑀲 𑀢𑀦𑀼𑀓𑀢𑁆𑀢𑀸𑀢𑀺 𑀏𑀢𑁆𑀣 𑀬𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸 𑀆𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀫𑀸𑀦𑀲𑁆𑀲 𑀓𑀸𑀭𑀡𑀁, 𑀢𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸𑀬 𑀦𑀔𑀲𑀺𑀔𑀸𑀫𑀼𑀔𑀢𑀼𑀡𑁆𑀟𑀓𑀸𑀦𑀁 𑀔𑀭𑀢𑀸𑀬 𑀘 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸𑀢𑀺 𑀏𑀢𑁆𑀣 𑀳𑀢𑁆𑀣𑀸𑀢𑀺 𑀧𑀓𑁆𑀔𑀸. 𑀦 𑀳𑀺 𑀓𑀼𑀓𑁆𑀓𑀼𑀝𑀸𑀦𑀁 𑀧𑀓𑁆𑀔𑀢𑁄 𑀅𑀜𑁆𑀜𑁄 𑀳𑀢𑁆𑀣𑁄 𑀦𑀸𑀫 𑀅𑀢𑁆𑀣𑀺. 𑀏𑀢𑁆𑀣𑀸𑀢𑀺 𑀆𑀮𑁄𑀓𑀝𑁆𑀞𑀸𑀦𑁂. 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸𑀢𑀺 𑀧𑀓𑁆𑀔𑁂 𑀘𑀸𑀮𑁂𑀦𑁆𑀢𑀸. 𑀦𑀺𑀓𑁆𑀔𑀫𑀦𑁆𑀢𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀦𑀺𑀓𑁆𑀔𑀫𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄.

𑀲𑁄 𑀚𑁂𑀝𑁆𑀞𑁄 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑁄𑀢𑀺 𑀬𑁄 𑀧𑀞𑀫𑀢𑀭𑀁 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀦𑁆𑀢𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑁄, 𑀲𑁄𑀬𑁂𑀯 𑀚𑁂𑀝𑁆𑀞𑁄𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀲𑀁𑀲𑀦𑁆𑀤𑁂𑀦𑁆𑀢𑁄. 𑀢𑀺𑀪𑀽𑀫𑀓𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀅𑀧𑁆𑀧𑀳𑀻𑀦𑀸𑀬 𑀅𑀯𑀺𑀚𑁆𑀚𑀸𑀬 𑀯𑁂𑀞𑀺𑀢𑀢𑁆𑀢𑀸𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀽’’𑀢𑀺. 𑀅𑀡𑁆𑀟𑀓𑁄𑀲𑀦𑁆𑀢𑀺 𑀩𑀻𑀚𑀓𑀧𑀸𑀮𑀁. 𑀮𑁄𑀓𑀲𑀦𑁆𑀦𑀺𑀯𑀸𑀲𑁂𑀢𑀺 𑀮𑁄𑀓𑁄 𑀏𑀯 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀏𑀢𑁆𑀣 ¶ 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑁄, 𑀲𑀁-𑀲𑀤𑁆𑀤𑁄 𑀲𑀸𑀫𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑁂𑀦𑀸𑀓𑀸𑀭𑁂𑀦 𑀲𑀬𑀫𑁂𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺’’𑀦𑁆𑀢𑀺, 𑀲𑀫𑁆𑀫𑀸 𑀲𑀬𑀫𑁂𑀯 𑀘 𑀩𑀼𑀚𑁆𑀛𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀢𑀺 𑀯𑀸 𑀧𑀲𑀢𑁆𑀣𑀯𑀘𑀦𑁄, 𑀲𑀁-𑀲𑀤𑁆𑀤𑁄 𑀲𑀼𑀦𑁆𑀤𑀭𑀯𑀘𑀦𑁄𑀢𑀺 𑀆𑀳 ‘‘𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺’’𑀦𑁆𑀢𑀺. 𑀩𑁄𑀥𑀺𑀲𑀤𑁆𑀤𑀲𑁆𑀲 𑀅𑀦𑁂𑀓𑀢𑁆𑀣𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 ‘‘𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀩𑀼𑀚𑁆𑀛𑀺 𑀏𑀢𑁆𑀣𑀸𑀢𑀺 𑀭𑀼𑀓𑁆𑀔𑁄 𑀩𑁄𑀥𑀺. 𑀲𑀬𑀁 𑀩𑀼𑀚𑁆𑀛𑀢𑀺, 𑀩𑀼𑀚𑁆𑀛𑀦𑁆𑀢𑀺 𑀯𑀸 𑀢𑁂𑀦 𑀅𑀭𑀺𑀬𑀸𑀢𑀺 𑀫𑀕𑁆𑀕𑁄 𑀩𑁄𑀥𑀺. 𑀲𑀩𑁆𑀩𑀥𑀫𑁆𑀫𑁂 𑀲𑀩𑁆𑀩𑀸𑀓𑀸𑀭𑀢𑁄 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀩𑁄𑀥𑀺. 𑀩𑀼𑀚𑁆𑀛𑀻𑀬𑀢𑀺 𑀲𑀘𑁆𑀙𑀺𑀓𑀭𑀻𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀩𑁄𑀥𑀺. 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀦𑁆𑀢𑀺 𑀤𑀼𑀢𑀺𑀬𑀫𑀼𑀤𑀸𑀳𑀭𑀡𑀁 𑀯𑀺𑀦𑀸𑀧𑀺 𑀭𑀼𑀓𑁆𑀔𑀲𑀤𑁆𑀤𑁂𑀦 𑀩𑁄𑀥𑀺𑀲𑀤𑁆𑀤𑀲𑁆𑀲 𑀭𑀼𑀓𑁆𑀔𑁂 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀭𑀪𑀽𑀭𑀺𑀫𑁂𑀥𑀲𑁄𑀢𑀺 𑀫𑀳𑀸𑀧𑀣𑀯𑀻 𑀯𑀺𑀬 𑀧𑀢𑁆𑀣𑀝𑀯𑀭𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸𑀢𑀺 𑀲𑀩𑁆𑀩𑀕𑀼𑀡𑀸𑀦𑀁 𑀅𑀤𑀸𑀬𑀓𑀢𑁆𑀢𑀸. 𑀲𑀩𑁆𑀩𑀕𑀼𑀡𑁂 𑀦 𑀤𑀤𑀸𑀢𑀻𑀢𑀺 𑀳𑀺 ¶ 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑁄, 𑀅𑀬𑀼𑀢𑁆𑀢𑀲𑀫𑀸𑀲𑁄𑀬𑀁 𑀕𑀫𑀓𑀢𑁆𑀢𑀸 𑀬𑀣𑀸 ‘‘𑀅𑀲𑀽𑀭𑀺𑀬𑀁𑀧𑀲𑁆𑀲𑀸𑀦𑀺 𑀫𑀼𑀔𑀸𑀦𑀻’’𑀢𑀺.

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀉𑀧𑀦𑀺𑀲𑁆𑀲𑀬𑀯𑀢𑁄 𑀲𑀳𑁂𑀯 𑀅𑀭𑀳𑀢𑁆𑀢𑀨𑀮𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀺. 𑀦𑀦𑀼 𑀘𑁂𑀢𑁆𑀣 𑀢𑀻𑀲𑀼 𑀯𑀺𑀚𑁆𑀚𑀸𑀲𑀼 𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀣𑀫𑁂𑀢𑀁 𑀬𑀼𑀚𑁆𑀚𑀢𑀺 ‘‘𑀫𑀕𑁆𑀕𑁄 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀻’’𑀢𑀺? 𑀦𑀸𑀬𑀁 𑀤𑁄𑀲𑁄. 𑀲𑀢𑀺𑀧𑀺 𑀆𑀲𑀯𑀓𑁆𑀔𑀬𑀜𑀸𑀡𑀲𑁆𑀲 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂 𑀅𑀝𑁆𑀞𑀗𑁆𑀕𑀺𑀓𑁂 𑀫𑀕𑁆𑀕𑁂 𑀲𑀢𑀺 𑀫𑀕𑁆𑀕𑀜𑀸𑀡𑁂𑀦 𑀲𑀤𑁆𑀥𑀺𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀻𑀢𑀺 ‘‘𑀫𑀕𑁆𑀕𑁄 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀤𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀙 𑀅𑀪𑀺𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀦𑁆𑀢𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀧𑀝𑀺𑀮𑀪𑀺𑀢𑀩𑁆𑀩𑀁 𑀲𑀩𑁆𑀩𑀫𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀚𑀸𑀦𑀺𑀁. 𑀚𑀸𑀦𑀦𑀜𑁆𑀘 𑀦 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀝𑀺𑀯𑀺𑀚𑁆𑀛𑀺’’𑀦𑁆𑀢𑀺, 𑀧𑀘𑁆𑀘𑀓𑁆𑀔𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄𑀧𑀺 𑀦 𑀤𑀽𑀭𑁂 𑀞𑀺𑀢𑀲𑁆𑀲 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁄 𑀯𑀺𑀬𑀸𑀢𑀺 𑀆𑀳 ‘‘𑀧𑀢𑁆𑀢𑁄𑀫𑁆𑀳𑀻’’𑀢𑀺, 𑀧𑀸𑀧𑀼𑀡𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀧𑀼𑀡𑀦𑀜𑁆𑀘 𑀦 𑀲𑀬𑀁 𑀕𑀦𑁆𑀢𑁆𑀯𑀸𑀢𑀺 𑀆𑀳 ‘‘𑀅𑀥𑀺𑀕𑀢𑁄𑀫𑁆𑀳𑀻’’𑀢𑀺, 𑀲𑀓𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀝𑀺𑀮𑀪𑀺𑀦𑁆𑀢𑀺 𑀅𑀢𑁆𑀣𑁄.

𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀦𑁆𑀢𑀺 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑁂𑀦 𑀲𑀫𑁆𑀫𑀤𑁂𑀯 𑀧𑀝𑀺𑀧𑀸𑀤𑀦𑀁. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦. 𑀬𑀣𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀁, 𑀏𑀯𑀁 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀪𑀕𑀯𑀢𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸…𑀧𑁂… 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀓𑀭𑀡’’𑀦𑁆𑀢𑀺. ‘‘𑀲𑀦𑁆𑀢𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀡𑁆𑀟𑀲𑀤𑀺𑀲𑀢𑀸 𑀲𑀦𑁆𑀢𑀸𑀦𑀲𑁆𑀲 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑀤𑀺𑀲𑀢𑀸 𑀩𑀼𑀤𑁆𑀥𑀕𑀼𑀡𑀸𑀦𑀁, 𑀩𑀼𑀤𑁆𑀥𑀕𑀼𑀡𑀸𑀢𑀺 𑀘 𑀅𑀢𑁆𑀣𑀢𑁄 𑀩𑀼𑀤𑁆𑀥𑁄𑀬𑁂𑀯 ‘‘𑀢𑀣𑀸𑀕𑀢𑀲𑁆𑀲 𑀔𑁄 ¶ 𑀏𑀢𑀁, 𑀯𑀸𑀲𑁂𑀝𑁆𑀞, 𑀅𑀥𑀺𑀯𑀘𑀦𑀁 𑀥𑀫𑁆𑀫𑀓𑀸𑀬𑁄 𑀇𑀢𑀺𑀧𑀻’’𑀢𑀺 𑀯𑀘𑀦𑀢𑁄. 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀧𑀝𑀺𑀘𑁆𑀙𑀸𑀤𑀦𑀲𑀸𑀫𑀜𑁆𑀜𑁂𑀦 𑀘 𑀅𑀯𑀺𑀚𑁆𑀚𑀸𑀬 𑀅𑀡𑁆𑀟𑀓𑁄𑀲𑀲𑀤𑀺𑀲𑀢𑀸. 𑀫𑀼𑀤𑀼𑀪𑀽𑀢𑀲𑁆𑀲𑀧𑀺 𑀔𑀭𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀣𑀤𑁆𑀥𑀔𑀭𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄𑀢𑀺 𑀏𑀢𑁆𑀣 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀼𑀔𑀸𑀦𑀼𑀧𑁆𑀧𑀯𑁂𑀲𑁄 𑀢𑀺𑀓𑁆𑀔𑀢𑀸, 𑀅𑀦𑀼𑀧𑀯𑀺𑀲𑀺𑀢𑁆𑀯𑀸𑀧𑀺 𑀲𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀦𑀢𑀺𑀓𑁆𑀓𑀫𑀦𑀢𑁄 𑀅𑀓𑀼𑀡𑁆𑀞𑀢𑀸 𑀔𑀭𑀪𑀸𑀯𑁄. 𑀢𑀺𑀓𑁆𑀔𑁄𑀧𑀺 𑀳𑀺 𑀏𑀓𑀘𑁆𑀘𑁄 𑀲𑀭𑁄 𑀮𑀓𑁆𑀔𑀁 𑀧𑀢𑁆𑀯𑀸 𑀓𑀼𑀡𑁆𑀞𑁄 𑀳𑁄𑀢𑀺, 𑀦 𑀢𑀣𑀸 𑀇𑀤𑀁. 𑀲𑀢𑀺𑀧𑀺 𑀔𑀭𑀪𑀸𑀯𑁂 𑀲𑀼𑀔𑀼𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦 ¶ 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑁄𑀪𑀭𑀳𑀺𑀢𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀧𑀲𑀦𑁆𑀦𑀪𑀸𑀯𑁄, 𑀲𑀢𑀺𑀧𑀺 𑀘 𑀧𑀲𑀦𑁆𑀦𑀪𑀸𑀯𑁂 𑀅𑀦𑁆𑀢𑀭𑀸 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀓𑀺𑀮𑁂𑀲𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀽𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀺𑀫𑁂𑀳𑀺 𑀧𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀧𑁆𑀧𑀢𑁆𑀢𑀺, 𑀢𑀤𑀸 𑀘 𑀲𑀸 𑀫𑀕𑁆𑀕𑀜𑀸𑀡𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄’’𑀢𑀺. 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀅𑀦𑀦𑁆𑀢𑀭𑀁 𑀲𑀺𑀔𑀸𑀧𑁆𑀧𑀢𑁆𑀢𑀅𑀦𑀼𑀮𑁄𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀫𑀕𑁆𑀕𑀯𑀺𑀚𑀸𑀬𑀦𑀢𑁆𑀣𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦𑀸𑀢𑀺 𑀧𑀞𑀫𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀥𑀺𑀕𑀢𑁂𑀦. 𑀅𑀪𑀺𑀜𑁆𑀜𑀸𑀧𑀓𑁆𑀔𑁂𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀓𑁆𑀔𑁂. 𑀮𑁄𑀓𑀼𑀢𑁆𑀢𑀭𑀸𑀪𑀺𑀜𑁆𑀜𑀸 𑀳𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑀺𑀢𑀸. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀙𑀅𑀪𑀺𑀜𑁆𑀜𑀸𑀧𑀓𑁆𑀔𑁂’’𑀢𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀧𑀸𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄𑀢𑀺 𑀯𑀼𑀤𑁆𑀥𑀢𑀫𑀢𑁆𑀢𑀸 𑀚𑁂𑀝𑁆𑀞𑁄, 𑀲𑀩𑁆𑀩𑀕𑀼𑀡𑁂𑀳𑀺 𑀉𑀢𑁆𑀢𑀫𑀢𑁆𑀢𑀸 𑀧𑀲𑀢𑁆𑀣𑀢𑀫𑁄𑀢𑀺 𑀲𑁂𑀝𑁆𑀞𑁄.

𑀇𑀤𑀸𑀦𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀩𑁆𑀭𑀸𑀳𑁆𑀫𑀡 𑀯𑀻𑀭𑀺𑀬’’𑀦𑁆𑀢𑀺𑀆𑀤𑀺𑀓𑀸𑀬 𑀤𑁂𑀲𑀦𑀸𑀬 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀪𑀕𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑀪𑀸𑀕𑀺𑀬𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀢𑁄 𑀧𑀝𑁆𑀞𑀸𑀬. 𑀘𑀺𑀢𑁆𑀢𑀫𑁂𑀯𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀺𑀢𑁆𑀢𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀦𑁆𑀦𑀁, 𑀦 𑀢𑀸𑀯 𑀪𑀕𑀯𑀢𑀺 𑀧𑀲𑀸𑀤𑁄𑀢𑀺 𑀅𑀢𑁆𑀣𑁄. 𑀫𑀼𑀝𑁆𑀞𑀲𑁆𑀲𑀢𑀺𑀦𑀸𑀢𑀺 𑀯𑀺𑀦𑀝𑁆𑀞𑀲𑁆𑀲𑀢𑀺𑀦𑀸, 𑀲𑀢𑀺𑀯𑀺𑀭𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀸𑀭𑀤𑁆𑀥𑀓𑀸𑀬𑁂𑀦𑀸𑀢𑀺 𑀲𑀤𑀭𑀣𑀓𑀸𑀬𑁂𑀦. 𑀩𑁄𑀥𑀺𑀫𑀡𑁆𑀟𑁂𑀢𑀺 𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀫𑀡𑁆𑀟𑀪𑀸𑀯𑀧𑁆𑀧𑀢𑁆𑀢𑁂 𑀞𑀸𑀦𑁂. 𑀩𑁄𑀥𑀻𑀢𑀺 𑀳𑀺 𑀧𑀜𑁆𑀜𑀸 𑀯𑀼𑀘𑁆𑀘𑀢𑀺, 𑀲𑀸 𑀏𑀢𑁆𑀣 𑀫𑀡𑁆𑀟𑀸 𑀧𑀲𑀦𑁆𑀦𑀸 𑀚𑀸𑀢𑀸𑀢𑀺 𑀲𑁄 𑀧𑀤𑁂𑀲𑁄 ‘‘𑀩𑁄𑀥𑀺𑀫𑀡𑁆𑀟𑁄’’𑀢𑀺 𑀧𑀜𑁆𑀜𑀸𑀢𑁄. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼, 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀏𑀯𑀁 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁. 𑀢𑀢𑁆𑀣 𑀢𑀘𑁄𑀢𑀺 𑀏𑀓𑀁 𑀅𑀗𑁆𑀕𑀁 𑀦𑁆𑀳𑀸𑀭𑀼 𑀏𑀓𑀁 𑀅𑀗𑁆𑀕𑀁 𑀅𑀝𑁆𑀞𑀺 𑀏𑀓𑀁 𑀅𑀗𑁆𑀕𑀁 𑀫𑀁𑀲𑀮𑁄𑀳𑀺𑀢𑀁 𑀏𑀓𑀁 𑀅𑀗𑁆𑀕𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀘𑁄 𑀏𑀓𑀁 𑀅𑀗𑁆𑀕𑀦𑁆𑀢𑀺 𑀘 𑀢𑀘𑁂 𑀦𑀺𑀭𑀧𑁂𑀓𑁆𑀔𑀪𑀸𑀯𑁄 𑀏𑀓𑀁 𑀅𑀗𑁆𑀕𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀥𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀳𑀺 𑀢𑀘𑁂 𑀧𑀮𑀼𑀚𑁆𑀚𑀫𑀸𑀦𑁂𑀧𑀺 𑀢𑀁𑀦𑀺𑀫𑀺𑀢𑁆𑀢𑀁 𑀅𑀯𑁄𑀲𑀸𑀦𑀸𑀧𑀚𑁆𑀚𑀦𑀁 𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀏𑀓𑀁 𑀓𑀸𑀭𑀡𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 ¶ 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀕𑁆𑀕𑀳𑀺𑀢𑀦𑁆𑀢𑀺 𑀆𑀭𑀫𑁆𑀪𑀁 𑀲𑀺𑀣𑀺𑀮𑀁 ¶ 𑀅𑀓𑀢𑁆𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑀲𑀗𑁆𑀔𑀸𑀢𑀼𑀲𑁆𑀲𑀸𑀳𑀦𑀪𑀸𑀯𑁂𑀦 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀅𑀲𑀮𑁆𑀮𑀻𑀦𑀦𑁆𑀢𑀺 𑀅𑀲𑀗𑁆𑀓𑀼𑀘𑀺𑀢𑀁 𑀓𑁄𑀲𑀚𑁆𑀚𑀯𑀲𑁂𑀦 𑀲𑀗𑁆𑀓𑁄𑀘𑀁 𑀅𑀦𑀸𑀧𑀦𑁆𑀦𑀁. 𑀉𑀧𑀝𑁆𑀞𑀺𑀢𑀸𑀢𑀺 𑀑𑀕𑀸𑀳𑀦𑀲𑀗𑁆𑀔𑀸𑀢𑁂𑀦 𑀅𑀧𑀺𑀮𑀸𑀧𑀪𑀸𑀯𑁂𑀦 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦𑀸’’𑀢𑀺. 𑀲𑀫𑁆𑀫𑁄𑀲𑀲𑁆𑀲 𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀦 𑀲𑀫𑁆𑀫𑀼𑀝𑁆𑀞𑀸𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀓𑀺𑀜𑁆𑀘𑀸𑀧𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑁂𑀯 𑀘𑀺𑀢𑁆𑀢𑀫𑁂𑀯 𑀧𑀲𑁆𑀲𑀤𑁆𑀥𑀁, 𑀓𑀸𑀬𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑁂𑀯 𑀘 𑀓𑀸𑀬𑁄 𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 𑀓𑀸𑀬𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀬𑀸 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑀸’’𑀢𑀺. 𑀓𑀸𑀬𑀧𑀲𑁆𑀲𑀤𑁆𑀥𑀺𑀬𑀸 𑀉𑀪𑀬𑁂𑀲𑀫𑁆𑀧𑀺 𑀓𑀸𑀬𑀸𑀦𑀁 𑀧𑀲𑁆𑀲𑀫𑁆𑀪𑀦𑀸𑀯𑀳𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀻’’𑀢𑀺. 𑀲𑁄 𑀘 𑀔𑁄𑀢𑀺 𑀲𑁄 𑀘 𑀔𑁄 𑀓𑀸𑀬𑁄. 𑀯𑀺𑀕𑀢𑀤𑀭𑀣𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑁄. 𑀦𑀸𑀫𑀓𑀸𑀬𑁂 𑀳𑀺 𑀯𑀺𑀕𑀢𑀤𑀭𑀣𑁂 𑀭𑀽𑀧𑀓𑀸𑀬𑁄𑀧𑀺 𑀯𑀽𑀧𑀲𑀦𑁆𑀢𑀤𑀭𑀣𑀧𑀭𑀺𑀴𑀸𑀳𑁄 𑀳𑁄𑀢𑀺. 𑀲𑀫𑁆𑀫𑀸 𑀆𑀳𑀺𑀢𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀥𑀸𑀯𑀦𑀲𑀗𑁆𑀔𑀸𑀢𑀁 𑀯𑀺𑀓𑁆𑀔𑁂𑀧𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀸𑀧𑀸𑀤𑀦𑁂𑀦 𑀲𑀫𑁆𑀫𑀤𑁂𑀯 𑀆𑀳𑀺𑀢𑀁 𑀞𑀧𑀺𑀢𑀁. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼 𑀞𑀧𑀺𑀢’’𑀦𑁆𑀢𑀺𑀆𑀤𑀺. 𑀘𑀺𑀢𑁆𑀢𑀲𑁆𑀲 𑀅𑀦𑁂𑀓𑀕𑁆𑀕𑀪𑀸𑀯𑁄 𑀯𑀺𑀓𑁆𑀔𑁂𑀧𑀯𑀲𑁂𑀦 𑀘𑀜𑁆𑀘𑀮𑀢𑀸, 𑀲𑀸 𑀲𑀢𑀺 𑀏𑀓𑀕𑁆𑀕𑀢𑀸𑀬 𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀻𑀭𑀺𑀬𑀲𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀻𑀦𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦.

𑀦𑀦𑀼 𑀘 𑀲𑀤𑁆𑀥𑀸𑀧𑀜𑁆𑀜𑀸𑀦𑀫𑁆𑀧𑀺 𑀓𑀺𑀘𑁆𑀘𑀲𑀺𑀤𑁆𑀥𑀺 𑀛𑀸𑀦𑀲𑁆𑀲 𑀧𑀼𑀩𑁆𑀩𑀧𑀝𑀺𑀧𑀤𑀸𑀬 𑀇𑀘𑁆𑀙𑀺𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸 𑀧𑀦 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑁂𑀦 𑀅𑀯𑀼𑀢𑁆𑀢𑀲𑀺𑀤𑁆𑀥𑀸𑀢𑀺 𑀦 𑀕𑀳𑀺𑀢𑀸. 𑀅𑀲𑀢𑀺 𑀳𑀺 𑀲𑀤𑁆𑀥𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑁂 𑀘 𑀦𑁂𑀲𑀁 𑀅𑀲𑀢𑀺 𑀜𑀸𑀬𑀸𑀭𑀫𑁆𑀪𑀸𑀤𑀺𑀪𑀸𑀯𑁄 𑀦 𑀲𑀺𑀬𑀸, 𑀢𑀣𑀸 𑀅𑀲𑀮𑁆𑀮𑀻𑀦𑀸𑀲𑀫𑁆𑀫𑁄𑀲𑀢𑀸𑀤𑀬𑁄 𑀯𑀻𑀭𑀺𑀬𑀸𑀤𑀻𑀦𑀦𑁆𑀢𑀺 𑀅𑀲𑀮𑁆𑀮𑀻𑀦𑀢𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀛𑀸𑀦𑀪𑀸𑀯𑀦𑀸𑀬𑀁 𑀯𑀸 𑀲𑀫𑀸𑀥𑀺𑀓𑀺𑀘𑁆𑀘𑀁 𑀅𑀥𑀺𑀓𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀸𑀥𑀺𑀧𑀭𑀺𑀬𑁄𑀲𑀸𑀦𑀸𑀯 𑀛𑀸𑀦𑀲𑁆𑀲 𑀧𑀼𑀩𑁆𑀩𑀧𑀝𑀺𑀧𑀤𑀸 𑀓𑀣𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀞𑀫𑀚𑁆𑀛𑀸𑀦𑀓𑀣𑀸

𑀇𑀤𑀸𑀦𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀧𑀸𑀴𑀺𑀬𑀸 𑀛𑀸𑀦𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁦𑁮) 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀁 𑀅𑀝𑁆𑀞𑀓𑀣𑀸𑀦𑀬𑁂𑀦𑁂𑀯 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀯𑀘𑀦𑁂 𑀓𑀸𑀭𑀡𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀓𑀢𑀫𑁂 𑀓𑀸𑀫𑀸’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀤𑀼𑀩𑁆𑀩𑀮𑁄 𑀮𑁄𑀪𑁄 𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄, 𑀢𑀢𑁄 𑀩𑀮𑀯𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀩𑀳𑀮𑀭𑀸𑀕𑁄 𑀙𑀦𑁆𑀤𑀭𑀸𑀕𑁄. 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀲𑀗𑁆𑀓𑀧𑁆𑀧𑁂𑀢𑀺 𑀏𑀢𑁂𑀦𑀸𑀢𑀺 𑀲𑀗𑁆𑀓𑀧𑁆𑀧𑁄, 𑀢𑀣𑀸𑀧𑀯𑀢𑁆𑀢𑁄 𑀮𑁄𑀪𑁄. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀲𑀗𑁆𑀓𑀧𑁆𑀧𑀦𑀸 𑀦𑀸𑀫 𑀅𑀯𑀬𑀯𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀉𑀧𑀭𑀽𑀧𑀭𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀲𑁆𑀲 𑀓𑀧𑁆𑀧𑀦𑀸. 𑀅𑀦𑀼𑀩𑁆𑀬𑀜𑁆𑀚𑀦𑀲𑀗𑁆𑀓𑀧𑁆𑀧𑀦𑀸 𑀧𑀦 ‘‘𑀳𑀢𑁆𑀣𑀸 𑀲𑁄𑀪𑀦𑀸, 𑀧𑀸𑀤𑀸 𑀲𑁄𑀪𑀦𑀸’’𑀢𑀺 𑀏𑀯𑀁 𑀅𑀦𑀼𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀓𑀧𑁆𑀧𑀦𑀸𑀢𑀺. 𑀓𑀺𑀮𑁂𑀲𑀸𑀦𑀜𑁆𑀳𑀺 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 𑀧𑀭𑀺𑀩𑁆𑀬𑀜𑁆𑀚𑀦𑀢𑁄 𑀧𑀭𑀺𑀩𑁆𑀬𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀁 𑀳𑀢𑁆𑀣𑀧𑀸𑀤𑀸𑀤𑀺𑀅𑀯𑀬𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀩𑀮𑀯𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀲𑀗𑁆𑀓𑀧𑁆𑀧𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀲𑀗𑁆𑀓𑀧𑁆𑀧𑀭𑀸𑀕𑁄. 𑀲𑁆𑀯𑀸𑀬𑀁 𑀧𑀪𑁂𑀤𑁄 𑀏𑀓𑀲𑁆𑀲𑁂𑀯 𑀮𑁄𑀪𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀅𑀯𑀢𑁆𑀣𑀸𑀪𑁂𑀤𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀯𑀘𑁆𑀙𑁄 𑀤𑀫𑁆𑀫𑁄 𑀩𑀮𑀻𑀩𑀤𑁆𑀤𑁄’’𑀢𑀺. 𑀓𑀸𑀫𑀸𑀢𑀺 𑀓𑀺𑀮𑁂𑀲𑀓𑀸𑀫𑀸, 𑀓𑀸𑀫𑁂𑀦𑁆𑀢𑀻𑀢𑀺 𑀓𑀸𑀫𑀸, 𑀓𑀸𑀫𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀇𑀫𑀲𑁆𑀲 𑀢𑀁 𑀓𑀢𑀫𑀁, 𑀢𑀁 𑀓𑀣𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀯𑀺𑀯𑀺𑀘𑁆𑀘𑀺𑀢𑁆𑀯𑀸𑀢𑀺 𑀯𑀺𑀲𑀼𑀁 𑀳𑀼𑀢𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸’’𑀢𑀺, 𑀧𑀚𑀳𑀦𑀯𑀲𑁂𑀦 𑀅𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀏𑀢𑁆𑀣 𑀯𑀺𑀯𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀯𑀺𑀯𑁂𑀘𑀦𑀁 𑀛𑀸𑀦𑀓𑁆𑀔𑀡𑁂 𑀓𑀸𑀫𑀸𑀦𑀁 𑀅𑀪𑀸𑀯𑀫𑀢𑁆𑀢𑀁 𑀯𑀼𑀢𑁆𑀢𑀁. 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀧𑀦 𑀇𑀫𑀺𑀦𑀸 𑀏𑀓𑀁𑀲𑀢𑁄 𑀓𑀸𑀫𑀸𑀦𑀁 𑀯𑀺𑀯𑁂𑀘𑁂𑀢𑀩𑁆𑀩𑀢𑀸𑀤𑀻𑀧𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀢𑀸 𑀛𑀸𑀦𑀲𑁆𑀲 𑀓𑀸𑀫𑀯𑀺𑀯𑁂𑀓𑀧𑁆𑀧𑀳𑀸𑀦𑀲𑁆𑀲 𑀘 𑀛𑀸𑀦𑀸𑀥𑀺𑀕𑀫𑀽𑀧𑀸𑀬𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀬𑀣𑀸 𑀧𑀤𑀻𑀧𑀸𑀪𑀸𑀯𑁂𑀦 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀸𑀭𑀸𑀪𑀺𑀪𑀯𑁄, 𑀏𑀯𑀁 𑀛𑀸𑀦𑀸𑀪𑀸𑀯𑁂𑀦 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀁 𑀓𑀸𑀫𑀸𑀪𑀺𑀪𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀢𑀦𑁆𑀢𑀺 𑀧𑀼𑀩𑁆𑀩𑀧𑀤𑁂𑀬𑁂𑀯 𑀅𑀯𑀥𑀸𑀭𑀡𑀯𑀘𑀦𑀁, 𑀦 𑀔𑁄 𑀧𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀓𑀸𑀫𑁂𑀳𑀺 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀲𑁆𑀲 𑀅𑀓𑀢𑀢𑁆𑀢𑀸. 𑀢𑀦𑁆𑀦𑀺𑀲𑁆𑀲𑀭𑀡𑀢𑁄𑀢𑀺 𑀦𑀺𑀲𑁆𑀲𑀭𑀦𑁆𑀢𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀦𑀺𑀲𑁆𑀲𑀭𑀡𑀁. 𑀓𑁂 𑀦𑀺𑀕𑁆𑀕𑀘𑁆𑀙𑀦𑁆𑀢𑀺? 𑀓𑀸𑀫𑀸. 𑀢𑁂𑀲𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁 𑀧𑀳𑀸𑀦𑀁 𑀢𑀦𑁆𑀦𑀺𑀲𑁆𑀲𑀭𑀡𑀁, 𑀢𑀢𑁄 𑀓𑀸𑀫𑀦𑀺𑀲𑁆𑀲𑀭𑀡𑀢𑁄𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀲𑀫𑀸𑀦𑁂 𑀯𑀺𑀓𑁆𑀔𑀫𑁆𑀪𑀦𑁂 𑀓𑀸𑀫𑀸𑀦𑀫𑁂𑀯𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀦 𑀩𑁆𑀬𑀸𑀧𑀸𑀤𑀸𑀤𑀻𑀦𑀦𑁆𑀢𑀺 𑀘𑁄𑀤𑀦𑀁 𑀬𑀼𑀢𑁆𑀢𑀺𑀢𑁄 𑀆𑀕𑀫𑀢𑁄 𑀘 𑀲𑀸𑀥𑁂𑀢𑀼𑀁 ‘‘𑀓𑀸𑀫𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 𑀲𑀓𑀮𑀲𑁆𑀲𑀧𑀺 𑀓𑀸𑀫𑀪𑀯𑀲𑁆𑀲 𑀲𑀫𑀢𑀺𑀓𑁆𑀓𑀫𑀧𑀝𑀺𑀧𑀤𑀸𑀪𑀸𑀯𑀢𑁄. 𑀢𑁂𑀦 𑀇𑀫𑀲𑁆𑀲 𑀛𑀸𑀦𑀲𑁆𑀲 𑀓𑀸𑀫𑀧𑀭𑀺𑀜𑁆𑀜𑀸𑀪𑀸𑀯𑀫𑀸𑀳 ¶ . 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄𑀢𑀺 ‘‘𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧) 𑀯𑀼𑀢𑁆𑀢𑀯𑀺𑀪𑀸𑀕𑀲𑁆𑀲 𑀓𑀺𑀮𑁂𑀲𑀓𑀸𑀫𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀪𑀸𑀯𑀢𑁄. 𑀢𑁂𑀦 𑀬𑀣𑀸 𑀫𑁂𑀢𑁆𑀢𑀸 𑀩𑁆𑀬𑀸𑀧𑀸𑀤𑀲𑁆𑀲, 𑀓𑀭𑀼𑀡𑀸 𑀯𑀺𑀳𑀺𑀁𑀲𑀸𑀬, 𑀏𑀯𑀫𑀺𑀤𑀁 𑀛𑀸𑀦𑀁 𑀓𑀸𑀫𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀧𑀸𑀓𑁂𑀦 𑀘𑁂𑀢𑁆𑀣 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑁄 ¶ 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑀢𑁆𑀢𑀦𑁄 𑀧𑀯𑀢𑁆𑀢𑀺𑀬𑀸 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀘 𑀓𑀸𑀫𑀭𑀸𑀕𑀢𑁄 𑀓𑀸𑀫𑀥𑀸𑀢𑀼𑀢𑁄 𑀘 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀢𑁆𑀢𑀸 𑀇𑀤𑀁 𑀛𑀸𑀦𑀁 𑀯𑀺𑀲𑁂𑀲𑀢𑁄 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀸𑀕𑀢𑁄 𑀏𑀯𑀸𑀢𑀺 𑀆𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁.

𑀓𑀸𑀫𑀜𑁆𑀘𑁂𑀢𑁆𑀣 𑀢𑀫𑀢𑁆𑀣𑀁 𑀤𑀻𑀧𑁂𑀢𑀼𑀁 𑀧𑀼𑀭𑀺𑀫𑀧𑀤𑁂𑀬𑁂𑀯 𑀅𑀯𑀥𑀸𑀭𑀡𑀁 𑀕𑀳𑀺𑀢𑀁, 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀢𑀁 𑀕𑀳𑁂𑀢𑀩𑁆𑀩𑀫𑁂𑀯 𑀢𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀢𑁆𑀢𑀭𑀧𑀤𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑀢𑁄. 𑀏𑀲 𑀤𑀝𑁆𑀞𑀩𑁆𑀩𑁄𑀢𑀺 𑀏𑀲 𑀦𑀺𑀬𑀫𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀥𑀸𑀭𑀡𑀯𑀘𑀦𑁂𑀦𑀸𑀢𑀺 𑀲𑀩𑁆𑀩𑀯𑀺𑀯𑁂𑀓𑀲𑀸𑀥𑀸𑀭𑀡𑀯𑀘𑀦𑁂𑀦. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄. 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸 𑀓𑀸𑀬𑀯𑀺𑀯𑁂𑀓𑀸𑀤𑀬𑁄. 𑀢𑀬𑁄 𑀏𑀯 𑀇𑀥 𑀤𑀝𑁆𑀞𑀩𑁆𑀩𑀸𑀢𑀺 𑀢𑀬𑁄 𑀏𑀯 𑀇𑀥 𑀛𑀸𑀦𑀓𑀣𑀸𑀬𑀁 𑀤𑀝𑁆𑀞𑀩𑁆𑀩𑀸 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄. 𑀦𑀺𑀤𑁆𑀤𑁂𑀲𑁂𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧). 𑀢𑀢𑁆𑀣 𑀳𑀺 ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑀸 𑀓𑀺𑀮𑁂𑀲𑀓𑀸𑀫𑀸 𑀘𑀸’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀢𑁆𑀣 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸 𑀫𑀦𑀸𑀧𑀺𑀬𑀸 𑀭𑀽𑀧𑀸…𑀧𑁂… 𑀫𑀦𑀸𑀧𑀺𑀬𑀸 𑀨𑁄𑀝𑁆𑀞𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀓𑀸𑀫𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀢𑁂 𑀧𑀦 𑀓𑀸𑀫𑀻𑀬𑀦𑁆𑀢𑀻𑀢𑀺 𑀓𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣𑁂𑀯𑀸𑀢𑀺 𑀦𑀺𑀤𑁆𑀤𑁂𑀲𑁂𑀬𑁂𑀯. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂. 𑀏𑀯𑀜𑁆𑀳𑀺 𑀲𑀢𑀻𑀢𑀺 𑀏𑀯𑀁 𑀉𑀪𑀬𑁂𑀲𑀫𑁆𑀧𑀺 𑀓𑀸𑀫𑀸𑀦𑀁 𑀲𑀗𑁆𑀕𑀳𑁂 𑀲𑀢𑀺. 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀬𑀼𑀚𑁆𑀚𑀫𑀸𑀦𑀢𑁆𑀣𑀦𑁆𑀢𑀭𑀲𑀫𑀼𑀘𑁆𑀘𑀬𑀢𑁆𑀣𑁄 𑀧𑀺-𑀲𑀤𑁆𑀤𑁄, 𑀦 𑀓𑀺𑀮𑁂𑀲𑀓𑀸𑀫𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀲𑁆𑀫𑀸? 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀲𑁆𑀲 𑀤𑀼𑀢𑀺𑀬𑀧𑀤𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑀯𑀺𑀯𑁂𑀓𑁂𑀦. 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀯𑁂𑀓𑀤𑀻𑀧𑀦𑀢𑁄 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀧𑀼𑀭𑀺𑀫𑁂𑀦𑀸𑀢𑀺 𑀓𑀸𑀬𑀯𑀺𑀯𑁂𑀓𑁂𑀦. 𑀏𑀢𑁆𑀣𑀸𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂. 𑀇𑀢𑁄 𑀯𑀸 𑀦𑀺𑀤𑁆𑀥𑀸𑀭𑀺𑀢𑁂 𑀯𑀺𑀯𑁂𑀓𑀤𑁆𑀯𑀬𑁂, 𑀅𑀓𑀼𑀲𑀮𑀲𑀤𑁆𑀤𑁂𑀦 𑀬𑀤𑀺 𑀓𑀺𑀮𑁂𑀲𑀓𑀸𑀫𑀸, 𑀲𑀩𑁆𑀩𑀸𑀓𑀼𑀲𑀮𑀸𑀧𑀺 𑀯𑀸 ¶ 𑀕𑀳𑀺𑀢𑀸, 𑀲𑀩𑁆𑀩𑀣𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄’’𑀢𑀺. 𑀤𑀼𑀢𑀺𑀬𑁂𑀦𑀸𑀢𑀺 𑀘 𑀘𑀺𑀢𑁆𑀢𑀯𑀺𑀯𑁂𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀦𑁄 𑀧𑀳𑀸𑀦𑀁 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁. 𑀮𑁄𑀮𑀪𑀸𑀯𑁄 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀭𑀽𑀧𑀸𑀤𑀻𑀲𑀼 𑀢𑀡𑁆𑀳𑀼𑀧𑁆𑀧𑀸𑀤𑁄, 𑀢𑀲𑁆𑀲 𑀳𑁂𑀢𑀽 𑀯𑀢𑁆𑀣𑀼𑀓𑀸𑀫𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸. 𑀩𑀸𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀸𑀮𑀪𑀸𑀯𑁄 𑀦𑀸𑀫 𑀅𑀯𑀺𑀚𑁆𑀚𑀸, 𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀺 𑀯𑀸, 𑀢𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀲𑀩𑁆𑀩𑁂𑀧𑀺 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀳𑁂𑀢𑀽. 𑀓𑀸𑀫𑀕𑀼𑀡𑀸𑀥𑀺𑀕𑀫𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀲𑀼𑀤𑁆𑀥𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀢𑀩𑁆𑀩𑀺𑀯𑁂𑀓𑁂𑀦 𑀧𑀬𑁄𑀕𑀲𑀼𑀤𑁆𑀥𑀺 𑀯𑀺𑀪𑀸𑀯𑀺𑀢𑀸. 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁄𑀥𑀦𑁂𑀦 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑀁𑀯𑀟𑁆𑀠𑀦𑁂𑀦 𑀘 𑀅𑀚𑁆𑀛𑀸𑀲𑀬𑀯𑀺𑀲𑁄𑀥𑀦𑀁 𑀆𑀲𑀬𑀧𑁄𑀲𑀦𑀁. 𑀆𑀲𑀬𑀧𑁄𑀲𑀦𑀦𑁆𑀢𑀺 𑀘 𑀛𑀸𑀦𑀪𑀸𑀯𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀧𑀼𑀩𑁆𑀩𑀬𑁄𑀕𑀸𑀤𑀺𑀯𑀲𑁂𑀦 𑀲𑀺𑀤𑁆𑀥𑀸 𑀅𑀚𑁆𑀛𑀸𑀲𑀬𑀲𑀫𑁆𑀧𑀤𑀸 ¶ , 𑀲𑀸 𑀧𑀦 𑀢𑀡𑁆𑀳𑀼𑀧𑀢𑀸𑀧𑀯𑀺𑀕𑀫𑁂𑀦 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦𑀸’’𑀢𑀺. 𑀓𑀸𑀫𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁.

𑀅𑀦𑁂𑀓𑀪𑁂𑀤𑁄𑀢𑀺 𑀓𑀸𑀫𑀸𑀲𑀯𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀤𑀺𑀯𑀲𑁂𑀦 𑀭𑀽𑀧𑀢𑀡𑁆𑀳𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀧𑁆𑀧𑀪𑁂𑀤𑁄. 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯𑀸𑀢𑀺 𑀓𑀸𑀫𑀲𑀪𑀸𑀯𑁄𑀬𑁂𑀯 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀦𑀧𑀺 𑀓𑀼𑀲𑀮𑀘𑁆𑀙𑀦𑁆𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀻𑀢𑀺 ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀓𑀼𑀲𑀮𑁂𑀲𑀼 𑀅𑀦𑁆𑀢𑁄𑀕𑀥𑁄𑀧𑀺. 𑀛𑀸𑀦𑀧𑀝𑀺𑀧𑀓𑁆𑀔𑀢𑁄𑀢𑀺 𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀢𑀁𑀳𑁂𑀢𑀼 𑀢𑀁𑀦𑀺𑀫𑀺𑀢𑁆𑀢𑀁 𑀯𑀺𑀲𑀼𑀁 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑀼𑀁 𑀲𑀭𑀽𑀧𑁂𑀦 𑀕𑀳𑀺𑀢𑁄. 𑀬𑀤𑀺 𑀓𑀺𑀮𑁂𑀲𑀓𑀸𑀫𑁄𑀯 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀢𑀁 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀦𑁂𑀓𑀪𑁂𑀤𑀢𑁄’’𑀢𑀺𑀆𑀤𑀺. 𑀅𑀜𑁆𑀜𑁂𑀲𑀫𑁆𑀧𑀻𑀢𑀺 𑀤𑀺𑀝𑁆𑀞𑀺𑀫𑀸𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀻𑀦𑀁 𑀢𑀁𑀲𑀳𑀺𑀢𑀨𑀲𑁆𑀲𑀸𑀤𑀻𑀦𑀜𑁆𑀘. 𑀉𑀧𑀭𑀺𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄𑀢𑀺 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀉𑀧𑀭𑀺𑀛𑀸𑀦𑀗𑁆𑀕𑀸𑀦𑀺, 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀢𑀧𑁆𑀧𑀘𑁆𑀘𑀦𑀻𑀓𑀦𑀻𑀯𑀭𑀡𑀯𑀘𑀦𑀁. ‘‘𑀉𑀧𑀭𑀺𑀛𑀸𑀦𑀗𑁆𑀕𑀸𑀦𑀁 𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀛𑀸𑀦𑀗𑁆𑀕𑀸𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀻𑀢𑀺 𑀛𑀸𑀦𑀗𑁆𑀕𑀸𑀦𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺. 𑀯𑀺𑀤𑁆𑀥𑀁𑀲𑀓𑀸𑀦𑀻𑀢𑀺 𑀯𑀺𑀖𑀸𑀢𑀓𑀸𑀦𑀺. 𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 ¶ 𑀧𑀝𑀺𑀧𑀓𑁆𑀔𑁄𑀢𑀺 𑀭𑀸𑀕𑀧𑀡𑀺𑀥𑀺𑀬𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀦𑀸𑀦𑀸𑀭𑀫𑁆𑀫𑀡𑁂𑀳𑀺 𑀧𑀮𑁄𑀪𑀺𑀢𑀲𑁆𑀲 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀢𑁄 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀲𑀫𑀸𑀥𑀺 𑀧𑀝𑀺𑀧𑀓𑁆𑀔𑁄. 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲𑀸𑀢𑀺 𑀧𑀸𑀫𑁄𑀚𑁆𑀚𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑁂𑀫𑀢𑁆𑀢𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀻𑀢𑀺 𑀧𑀝𑀺𑀧𑀓𑁆𑀔𑀸. 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲𑀸𑀢𑀺 𑀬𑁄𑀦𑀺𑀲𑁄 𑀲𑀗𑁆𑀓𑀧𑁆𑀧𑀦𑀯𑀲𑁂𑀦 𑀲𑀯𑀺𑀧𑁆𑀨𑀸𑀭𑀧𑁆𑀧𑀯𑀢𑁆𑀢𑀺𑀢𑁄 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀸𑀢𑀺 𑀲𑀼𑀔𑀁 𑀯𑀽𑀧𑀲𑀦𑁆𑀢𑀲𑀻𑀢𑀮𑀲𑀪𑀸𑀯𑀢𑁆𑀢𑀸 𑀅𑀯𑀽𑀧𑀲𑀫𑀸𑀦𑀼𑀢𑀸𑀧𑀲𑀪𑀸𑀯𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑀁. 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸𑀢𑀺 𑀯𑀺𑀘𑀸𑀭𑁄 𑀆𑀭𑀫𑁆𑀫𑀡𑁂 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀜𑁆𑀜𑀸𑀧𑀢𑀺𑀭𑀽𑀧𑀲𑀪𑀸𑀯𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄. 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁂𑀦 𑀤𑁂𑀲𑀺𑀢𑀸 𑀧𑀺𑀝𑀓𑀸𑀦𑀁 𑀲𑀁𑀯𑀡𑁆𑀡𑀦𑀸 𑀧𑁂𑀝𑀓𑀁, 𑀢𑀲𑁆𑀫𑀺𑀁 𑀧𑁂𑀝𑀓𑁂.

𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲𑀸𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀯𑀺𑀲𑁂𑀲𑀯𑀺𑀲𑀬𑀲𑁆𑀲. 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀦𑁆𑀢𑀺 𑀩𑁆𑀬𑀸𑀧𑀸𑀤𑀯𑀺𑀯𑁂𑀓𑀯𑀘𑀦𑁂𑀦 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀯𑀺𑀲𑀬𑀲𑁆𑀲 𑀤𑁄𑀲𑀲𑁆𑀲, 𑀫𑁄𑀳𑀸𑀥𑀺𑀓𑁂𑀳𑀺 𑀣𑀺𑀦𑀫𑀺𑀤𑁆𑀥𑀸𑀤𑀻𑀳𑀺 𑀯𑀺𑀯𑁂𑀓𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀤𑀼𑀓𑁆𑀔𑀸𑀤𑀺𑀧𑀼𑀩𑁆𑀩𑀦𑁆𑀢𑀸𑀤𑀺𑀪𑁂𑀤𑀯𑀺𑀲𑀬𑀲𑁆𑀲 𑀫𑁄𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀢𑀤𑁂𑀓𑀝𑁆𑀞𑀣𑀺𑀦𑀫𑀺𑀤𑁆𑀥𑀸𑀤𑀺𑀯𑀺𑀓𑁆𑀔𑀫𑁆𑀪𑀓𑀜𑁆𑀘𑁂𑀢𑀁 𑀲𑀩𑁆𑀩𑀸𑀓𑀼𑀲𑀮𑀧𑀝𑀺𑀧𑀓𑁆𑀔𑀲𑀪𑀸𑀯𑀢𑁆𑀢𑀸 𑀲𑀩𑁆𑀩𑀓𑀼𑀲𑀮𑀸𑀦𑀁, 𑀢𑁂𑀦 𑀲𑀪𑀸𑀯𑁂𑀦 𑀲𑀩𑁆𑀩𑀸𑀓𑀼𑀲𑀮𑀧𑁆𑀧𑀳𑀸𑀬𑀓𑀁 ¶ 𑀳𑁄𑀦𑁆𑀢𑀫𑁆𑀧𑀺 𑀓𑀸𑀫𑀭𑀸𑀕𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀲𑀪𑀸𑀯𑀫𑁂𑀯 𑀳𑁄𑀢𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀦𑀻𑀯𑀭𑀡𑀸𑀓𑀼𑀲𑀮𑀫𑀽𑀮𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳.

𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑀸𑀘𑀺 𑀯𑀲𑀯𑀢𑁆𑀢𑀺𑀢𑀸𑀢𑀺 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀦𑀦𑁆𑀢𑀺 𑀳𑀺 𑀯𑀺𑀢𑀓𑁆𑀓𑀦𑀓𑀺𑀭𑀺𑀬𑀸, 𑀲𑀸 𑀘 𑀯𑀺𑀢𑀓𑁆𑀓𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀸𑀬 𑀳𑁄𑀢𑀺. 𑀢𑀬𑀺𑀤𑀁 𑀯𑀺𑀢𑀓𑁆𑀓𑀦𑀁 ‘‘𑀈𑀤𑀺𑀲𑀫𑀺𑀤’’𑀦𑁆𑀢𑀺 𑀆𑀭𑀫𑁆𑀫𑀡𑀧𑀭𑀺𑀓𑀧𑁆𑀧𑀦𑀦𑁆𑀢𑀺 𑀆𑀳 ‘‘𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑀩𑀮𑁂𑀦 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀭𑀼𑀴𑁆𑀳𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀓𑁄𑀘𑀺 𑀭𑀸𑀚𑀯𑀮𑁆𑀮𑀪𑀁 𑀜𑀸𑀢𑀺𑀁 𑀯𑀸 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀆𑀭𑁄𑀳𑀢𑀺 𑀅𑀦𑀼𑀧𑀯𑀺𑀲𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺? 𑀯𑀺𑀢𑀓𑁆𑀓𑀩𑀮𑁂𑀦𑁂𑀯. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀘𑀬𑁂𑀦 𑀢𑁂𑀦 𑀯𑀺𑀦𑀸𑀧𑀺 𑀦𑀺𑀭𑀸𑀲𑀗𑁆𑀓𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀭𑀺𑀘𑀬𑁂𑀦 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀧𑀭𑀺𑀘𑀬𑁂𑀦𑀸𑀢𑀺 ¶ 𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀯𑀺𑀢𑀓𑁆𑀓𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀧𑀭𑀺𑀘𑀬𑁂𑀦. 𑀯𑀺𑀢𑀓𑁆𑀓𑀲𑁆𑀲 𑀳𑀺 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀭𑀼𑀳𑀦𑀁 𑀘𑀺𑀭𑀧𑀭𑀺𑀘𑀺𑀢𑀁, 𑀢𑁂𑀦 𑀢𑀁 𑀓𑀤𑀸𑀘𑀺 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀢𑀢𑁆𑀣 𑀧𑀯𑀢𑁆𑀢𑀢𑁂𑀯. 𑀬𑀣𑀸 𑀢𑀁 𑀜𑀸𑀡𑀲𑀳𑀺𑀢𑀁 𑀳𑀼𑀢𑁆𑀯𑀸 𑀲𑀫𑁆𑀫𑀲𑀦𑀯𑀲𑁂𑀦 𑀘𑀺𑀭𑀧𑀭𑀺𑀘𑀺𑀢𑀁 𑀓𑀤𑀸𑀘𑀺 𑀜𑀸𑀡𑀭𑀳𑀺𑀢𑀫𑁆𑀧𑀺 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀬𑀣𑀸 𑀯𑀸 𑀓𑀺𑀮𑁂𑀲𑀲𑀳𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀲𑀩𑁆𑀩𑀲𑁄 𑀓𑀺𑀮𑁂𑀲𑀭𑀳𑀺𑀢𑀫𑁆𑀧𑀺 𑀧𑀭𑀺𑀘𑀬𑁂𑀦 𑀓𑀺𑀮𑁂𑀲𑀯𑀸𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄𑀢𑀺 𑀆𑀤𑀺𑀢𑁄, 𑀅𑀪𑀺𑀫𑀼𑀔𑀁 𑀯𑀸 𑀳𑀦𑀦𑀁 𑀆𑀳𑀦𑀦𑀁. 𑀧𑀭𑀺𑀢𑁄, 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀯𑀸 𑀆𑀳𑀦𑀦𑀁 𑀧𑀭𑀺𑀬𑀸𑀳𑀦𑀦𑀁. ‘‘𑀭𑀽𑀧𑀁 𑀭𑀽𑀧𑀁, 𑀧𑀣𑀯𑀻 𑀧𑀣𑀯𑀻’’𑀢𑀺 𑀆𑀓𑁄𑀝𑁂𑀦𑁆𑀢𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺 𑀆𑀳𑀦𑀦𑀁 𑀧𑀭𑀺𑀬𑀸𑀳𑀦𑀦𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀺𑀜𑁆𑀳𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀢𑀁 𑀢𑀲𑁆𑀲 𑀕𑀳𑀡𑀬𑁄𑀕𑁆𑀬𑀁 𑀓𑀭𑁄𑀦𑁆𑀢𑁄 𑀯𑀺𑀢𑀓𑁆𑀓𑁄 𑀆𑀓𑁄𑀝𑁂𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀬𑀤𑀺 𑀏𑀯𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 ‘‘𑀆𑀓𑁄𑀝𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄. 𑀬𑀣𑀸, 𑀫𑀳𑀸𑀭𑀸𑀚, 𑀪𑁂𑀭𑀻 𑀆𑀓𑁄𑀝𑀺𑀢𑀸 𑀅𑀣 𑀧𑀘𑁆𑀙𑀸 𑀅𑀦𑀼𑀭𑀯𑀢𑀺 𑀅𑀦𑀼𑀲𑀤𑁆𑀤𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀣𑀸 𑀆𑀓𑁄𑀝𑀦𑀸, 𑀏𑀯𑀁 𑀯𑀺𑀢𑀓𑁆𑀓𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀧𑀘𑁆𑀙𑀸 𑀅𑀦𑀼𑀭𑀯𑀦𑀸 𑀅𑀦𑀼𑀲𑀤𑁆𑀤𑀦𑀸, 𑀏𑀯𑀁 𑀯𑀺𑀘𑀸𑀭𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀓𑁄𑀝𑀦𑀮𑀓𑁆𑀔𑀡𑀢𑀸 𑀯𑀺𑀢𑀓𑁆𑀓𑀲𑁆𑀲 𑀓𑀲𑁆𑀫𑀸 𑀯𑀼𑀢𑁆𑀢𑀸? 𑀦𑀸𑀬𑀁 𑀯𑀺𑀭𑁄𑀥𑁄. 𑀣𑁂𑀭𑁂𑀦 𑀳𑀺 𑀓𑀺𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀺 𑀢𑀣𑀸 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀘. 𑀩𑁄𑀥𑀦𑁂𑀬𑁆𑀬𑀚𑀦𑀸𑀦𑀼𑀭𑁄𑀥𑁂𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀏𑀓𑀻𑀪𑀸𑀯𑁄𑀧𑀺 𑀲𑀪𑀸𑀯𑀥𑀫𑁆𑀫𑁄 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀯𑀺𑀬 𑀲𑀫𑀸𑀭𑁄𑀧𑀺𑀢𑀭𑀽𑀧𑁂𑀳𑀺 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 ¶ 𑀧𑀓𑀸𑀲𑀻𑀬𑀢𑀺. 𑀏𑀯𑀜𑁆𑀳𑀺 𑀲𑁄 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑁄 𑀳𑁄𑀢𑀺. 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀏𑀢𑁆𑀣 𑀆𑀦𑀬𑀦𑀁 𑀘𑀺𑀢𑁆𑀢𑁂 𑀆𑀭𑀫𑁆𑀫𑀡𑀲𑁆𑀲 𑀉𑀧𑀦𑀬𑀦𑀁, 𑀆𑀓𑀟𑁆𑀠𑀦𑀁 𑀯𑀸.

𑀅𑀦𑀼𑀲𑀜𑁆𑀘𑀭𑀡𑀁 𑀅𑀦𑀼𑀧𑀭𑀺𑀩𑁆𑀪𑀫𑀦𑀁. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀲𑀦𑁆𑀢𑀸𑀦𑀫𑁆𑀳𑀺 𑀮𑀩𑁆𑀪𑀫𑀸𑀦𑁄 𑀏𑀯 𑀲𑀦𑁆𑀢𑀸𑀦𑁂 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀫𑀚𑁆𑀚𑀦𑀦𑁆𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀦𑀼𑀫𑀲𑀦𑀁, 𑀧𑀭𑀺𑀫𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀯𑀺𑀘𑀸𑀭𑁄 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑁂. 𑀲𑀳𑀚𑀸𑀢𑀸𑀦𑀁 𑀅𑀦𑀼𑀬𑁄𑀚𑀦𑀁 𑀆𑀭𑀫𑁆𑀫𑀡𑁂 𑀅𑀦𑀼𑀯𑀺𑀘𑀭𑀡𑀲𑀗𑁆𑀔𑀸𑀢𑀅𑀦𑀼𑀫𑀚𑁆𑀚𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀧𑁆𑀧𑀩𑀦𑁆𑀥𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀲𑁄 ‘‘𑀅𑀦𑀼𑀧𑁆𑀧𑀩𑀦𑁆𑀥𑀦𑀢𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦𑁂𑀯 𑀘 ‘‘𑀖𑀡𑁆𑀝𑀸𑀦𑀼𑀭𑀯𑁄 𑀯𑀺𑀬, 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑁄. 𑀓𑀢𑁆𑀣𑀘𑀻𑀢𑀺 𑀧𑀞𑀫𑀚𑁆𑀛𑀸𑀦𑁂 ¶ 𑀧𑀭𑀺𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘. 𑀑𑀴𑀸𑀭𑀺𑀓𑀝𑁆𑀞𑁂𑀦𑀸𑀢𑀺 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑀝𑁆𑀞𑁂𑀦. 𑀬𑀣𑀸 𑀖𑀡𑁆𑀝𑀸𑀪𑀺𑀖𑀸𑀢𑀲𑀤𑁆𑀤𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑁄𑀢𑀺, 𑀏𑀯𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀺𑀭𑁄𑀧𑀦𑀝𑁆𑀞𑁂𑀦 𑀯𑀺𑀢𑀓𑁆𑀓𑁄 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀖𑀡𑁆𑀝𑀸𑀪𑀺𑀖𑀸𑀢𑀲𑀤𑁆𑀤𑁄 𑀯𑀺𑀬𑀸’’𑀢𑀺𑀆𑀤𑀺. 𑀯𑀺𑀧𑁆𑀨𑀸𑀭𑀯𑀸𑀢𑀺 𑀏𑀢𑁆𑀣 𑀯𑀺𑀧𑁆𑀨𑀸𑀭𑁄 𑀦𑀸𑀫 𑀯𑀺𑀢𑀓𑁆𑀓𑀲𑁆𑀲 𑀣𑀺𑀦𑀫𑀺𑀤𑁆𑀥𑀧𑀝𑀺𑀧𑀓𑁆𑀔𑁄 𑀆𑀭𑀫𑁆𑀫𑀡𑁂 𑀅𑀦𑁄𑀮𑀻𑀦𑀢𑀸 𑀅𑀲𑀗𑁆𑀓𑁄𑀘𑁄, 𑀲𑁄 𑀧𑀦 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀘𑀮𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬𑀸𑀢𑀺 𑀏𑀢𑁆𑀣 𑀧𑀭𑀺𑀲𑁆𑀲𑀬𑀸𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀧𑀭𑀺𑀩𑁆𑀪𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀓𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀆𑀓𑀸𑀲𑁂 𑀕𑀘𑁆𑀙𑀢𑁄 𑀫𑀳𑀸𑀲𑀓𑀼𑀡𑀲𑁆𑀲 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀯𑀸𑀢𑀕𑁆𑀕𑀳𑀡𑀢𑁆𑀣𑀁 𑀧𑀓𑁆𑀔𑁂 𑀨𑀦𑁆𑀤𑀸𑀧𑀬𑀫𑀸𑀦𑀲𑁆𑀲 𑀕𑀫𑀦𑀁 𑀯𑀺𑀬 𑀅𑀦𑀼𑀫𑀚𑁆𑀚𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄’’𑀢𑀺 𑁋

𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑀦𑁂𑀦 𑀧𑀯𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀢𑀣𑀸 𑀳𑀺 𑀉𑀧𑀘𑀸𑀭𑁂 𑀯𑀸 𑀅𑀧𑁆𑀧𑀦𑀸𑀬𑀁 𑀯𑀸 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀺𑀬𑀁 𑀯𑀺𑀢𑀓𑁆𑀓𑁄 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀧𑀞𑀫𑀸𑀪𑀺𑀦𑀺𑀧𑀸𑀢𑁂 𑀧𑀸𑀓𑀝𑁄 𑀳𑁄𑀢𑀺. 𑀬𑀣𑀸 𑀳𑀺 𑀅𑀧𑀼𑀩𑁆𑀩𑀸𑀭𑀫𑁆𑀫𑀡𑁂 𑀧𑀞𑀫𑀸𑀪𑀺𑀦𑀺𑀧𑀸𑀢𑀪𑀽𑀢𑁄 𑀯𑀺𑀢𑀓𑁆𑀓𑁄 𑀯𑀺𑀧𑁆𑀨𑀸𑀭𑀯𑀸 𑀳𑁄𑀢𑀺, 𑀦 𑀢𑀣𑀸 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀬𑀁, 𑀦𑀸𑀢𑀺𑀯𑀺𑀧𑁆𑀨𑀸𑀭𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺 𑀲𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑀢𑁄. 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀯𑀺𑀢𑀓𑁆𑀓𑀲𑁆𑀲 𑀯𑀺𑀲𑁂𑀲𑁄 𑀅𑀪𑀺𑀦𑀺𑀭𑁄𑀧𑀦𑀸𑀓𑀸𑀭𑁄 𑀑𑀴𑀸𑀭𑀺𑀓𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑁂 𑀧𑀸𑀓𑀝𑁄 𑀳𑁄𑀢𑀺, 𑀢𑀤𑀪𑀸𑀯𑀢𑁄 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀘𑀸𑀭𑀲𑁆𑀲 𑀯𑀺𑀲𑁂𑀲𑁄 𑀅𑀦𑀼𑀫𑀚𑁆𑀚𑀦𑀸𑀓𑀸𑀭𑁄 𑀧𑀸𑀓𑀝𑁄 𑀳𑁄𑀢𑀺.

𑀅𑀬𑀁 ¶ 𑀧𑀦𑁂𑀢𑁆𑀣 𑀅𑀧𑀭𑁄 𑀦𑀬𑁄 𑁋 𑀫𑀮𑀕𑁆𑀕𑀳𑀺𑀢𑀁 𑀓𑀁𑀲𑀪𑀸𑀚𑀦𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀘𑀼𑀡𑁆𑀡𑀢𑁂𑀮𑀏𑀴𑀓𑀮𑁄𑀫𑀸𑀤𑀺𑀓𑀢𑀘𑀼𑀫𑁆𑀩𑀝𑀓𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀤𑀴𑁆𑀳𑀁 𑀕𑀳𑀡𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀤𑀡𑁆𑀟𑀧𑁆𑀧𑀳𑀸𑀭𑁂𑀦 𑀘𑀓𑁆𑀓𑀁 𑀪𑀫𑀬𑀺𑀢𑁆𑀯𑀸 𑀪𑀸𑀚𑀦𑀁 𑀓𑀭𑁄𑀦𑁆𑀢𑀲𑁆𑀲 𑀧𑀺𑀡𑁆𑀟𑀲𑁆𑀲 𑀉𑀧𑁆𑀧𑀻𑀴𑀦𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀢𑀲𑁆𑀲𑁂𑀯 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀓𑀁𑀲𑀪𑀸𑀚𑀦𑀸𑀤𑀻𑀲𑀼 𑀓𑀺𑀜𑁆𑀘𑀺 𑀫𑀡𑁆𑀟𑀮𑀁 𑀯𑀝𑁆𑀝𑀮𑁂𑀔𑀁 𑀓𑀭𑁄𑀦𑁆𑀢𑀲𑁆𑀲 𑀫𑀚𑁆𑀛𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑁄 𑀯𑀺𑀬 ¶ 𑀅𑀪𑀺𑀦𑀺𑀭𑁄𑀧𑀦𑁄 𑀯𑀺𑀢𑀓𑁆𑀓𑁄, 𑀩𑀳𑀺 𑀧𑀭𑀺𑀩𑁆𑀪𑀫𑀦𑀓𑀡𑁆𑀝𑀓𑁄 𑀯𑀺𑀬 𑀅𑀦𑀼𑀫𑀚𑁆𑀚𑀦𑁄 𑀯𑀺𑀘𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀧𑀼𑀧𑁆𑀨𑀨𑀮𑀲𑀸𑀔𑀸𑀤𑀺𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀭𑀼𑀓𑁆𑀔𑁄 ‘‘𑀲𑀧𑀼𑀧𑁆𑀨𑁄 𑀲𑀨𑀮𑁄’’𑀢𑀺 𑀯𑁄𑀳𑀭𑀻𑀬𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀼𑀓𑁆𑀔𑁄 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀪𑀗𑁆𑀕𑁂 𑀧𑀦𑀸𑀢𑀺𑀆𑀤𑀻𑀲𑀼 𑀛𑀸𑀦𑀪𑀸𑀯𑀦𑀸𑀬 𑀧𑀼𑀕𑁆𑀕𑀮𑀯𑀲𑁂𑀦 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 ‘‘𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀛𑀸𑀦𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺. 𑀬𑀤𑀺𑀧𑀺 𑀯𑀺𑀪𑀗𑁆𑀕𑁂 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸, 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀯𑀺𑀪𑀗𑁆𑀕𑁂𑀧𑀺 𑀬𑀣𑀸 𑀇𑀥 ‘‘𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑁄, 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄, 𑀧𑀭𑀫𑀢𑁆𑀣𑀢𑁄 𑀧𑀼𑀕𑁆𑀕𑀮𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀛𑀸𑀦𑀲𑀫𑀗𑁆𑀕𑀺𑀦𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀗𑁆𑀕𑀺𑀢𑀸𑀤𑀲𑁆𑀲𑀦𑁂𑀦 𑀛𑀸𑀦𑀲𑁆𑀲𑁂𑀯 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄’’𑀢𑀺.

𑀯𑀺𑀯𑁂𑀓𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀫𑀸 𑀯𑀺𑀯𑁂𑀓𑀸’’𑀢𑀺. 𑀳𑁂𑀢𑀼𑀅𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀢𑀲𑁆𑀫𑀸 𑀯𑀺𑀯𑁂𑀓𑀸 𑀳𑁂𑀢𑀼𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀯𑁂𑀓𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀁 𑀓𑀫𑁆𑀫𑀲𑀸𑀥𑀦𑀢𑀁 𑀯𑀸 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂’’𑀢𑀺. ‘‘𑀯𑀺𑀯𑀺𑀢𑁆𑀢𑁄’’𑀢𑀺 𑀳𑀺 𑀇𑀫𑀺𑀦𑀸 𑀦𑀻𑀯𑀭𑀡𑁂𑀳𑀺 𑀯𑀺𑀦𑀸𑀪𑀽𑀢𑁄 𑀢𑁂𑀳𑀺 𑀯𑀺𑀯𑁂𑀘𑀺𑀢𑁄𑀢𑀺 𑀘 𑀲𑀸𑀥𑀦𑀤𑁆𑀯𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀫𑁂𑀯𑀸𑀢𑀺. 𑀧𑀺𑀦𑀬𑀢𑀻𑀢𑀺 𑀢𑀧𑁆𑀧𑁂𑀢𑀺 𑀯𑀟𑁆𑀠𑁂𑀢𑀺 𑀯𑀸. 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸𑀢𑀺 𑀧𑀭𑀺𑀢𑀼𑀲𑁆𑀲𑀦𑀮𑀓𑁆𑀔𑀡𑀸. 𑀧𑀻𑀦𑀦𑀭𑀲𑀸𑀢𑀺 𑀧𑀭𑀺𑀩𑁆𑀭𑀽𑀳𑀦𑀭𑀲𑀸. 𑀨𑀭𑀡𑀭𑀲𑀸𑀢𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀭𑀲𑀸. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁. 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀮𑀤𑁆𑀥𑀲𑁆𑀲𑀸𑀤𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁆𑀯𑀸𑀬𑀁 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀧𑀭𑀺𑀬𑀸𑀬𑀮𑀤𑁆𑀥𑁄 𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀦𑀺𑀯𑀢𑁆𑀢𑀦𑀢𑁆𑀣𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀪𑀸𑀯𑀲𑀸𑀥𑀦𑀫𑁂𑀯 𑀮𑀩𑁆𑀪𑀢𑀻𑀢𑀺 ‘‘𑀲𑀼𑀔𑀦𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀢𑀮𑀓𑁆𑀔𑀡𑀦𑁆𑀢𑀺 𑀇𑀝𑁆𑀞𑀲𑀪𑀸𑀯𑀢𑁆𑀢𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀯𑀸 𑀅𑀢𑁆𑀢𑀦𑀺 𑀲𑀸𑀤𑀬𑀢𑀻𑀢𑀺 𑀲𑀸𑀢𑀁 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀲𑀸𑀢𑀁 𑀫𑀥𑀼𑀭𑀦𑁆𑀢𑀺 𑀯𑀤𑀦𑁆𑀢𑀺, 𑀲𑀸𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀸𑀢𑀮𑀓𑁆𑀔𑀡𑀁. 𑀉𑀧𑀩𑁆𑀭𑀽𑀳𑀦𑀭𑀲𑀦𑁆𑀢𑀺𑀆𑀤𑀻𑀲𑀼 𑀉𑀧𑀩𑁆𑀭𑀽𑀳𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀁𑀯𑀤𑁆𑀥𑀦𑀁, 𑀤𑀼𑀓𑁆𑀔𑀁 𑀯𑀺𑀬 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀺𑀬 𑀅𑀦𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀅𑀦𑀼 𑀅𑀦𑀼 𑀕𑀡𑁆𑀳𑀦𑀁 𑀉𑀧𑀓𑀸𑀭𑀺𑀢𑀸 𑀯𑀸 𑀅𑀦𑀼𑀕𑁆𑀕𑀳𑁄. 𑀓𑀢𑁆𑀣𑀘𑀻𑀢𑀺 ¶ 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑁂. 𑀧𑀝𑀺𑀮𑀸𑀪𑀢𑀼𑀝𑁆𑀞𑀻𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀢𑀼𑀝𑁆𑀞𑀺. 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀦𑁆𑀢𑀺 ¶ 𑀧𑀝𑀺𑀮𑀤𑁆𑀥𑀲𑁆𑀲 𑀆𑀭𑀫𑁆𑀫𑀡𑀭𑀲𑀲𑁆𑀲 𑀅𑀦𑀼𑀪𑀯𑀦𑀁. 𑀏𑀢𑁂𑀦 𑀧𑀻𑀢𑀺𑀲𑀼𑀔𑀸𑀦𑀺 𑀲𑀪𑀸𑀯𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀬𑀢𑁆𑀣 𑀧𑀻𑀢𑀺, 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀯𑀺𑀢𑀓𑁆𑀓𑀲𑁆𑀲 𑀯𑀺𑀬 𑀯𑀺𑀘𑀸𑀭𑁂𑀦 𑀧𑀻𑀢𑀺𑀬𑀸 𑀲𑀼𑀔𑁂𑀦 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀫𑀸𑀳. 𑀬𑀢𑁆𑀣 𑀲𑀼𑀔𑀁, 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀻𑀢𑀺 𑀯𑀺𑀘𑀸𑀭𑀲𑁆𑀲 𑀯𑀺𑀬 𑀯𑀺𑀢𑀓𑁆𑀓𑁂𑀦, 𑀲𑀼𑀔𑀲𑁆𑀲 𑀧𑀻𑀢𑀺𑀬𑀸 𑀅𑀦𑀘𑁆𑀘𑀦𑁆𑀢𑀲𑀁𑀬𑁄𑀕𑀁. 𑀢𑁂𑀦 𑀅𑀘𑁆𑀘𑀦𑁆𑀢𑀸𑀦𑀘𑁆𑀘𑀦𑁆𑀢𑀲𑀁𑀬𑁄𑀕𑀺𑀢𑀸𑀬 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑀓𑀁 𑀉𑀤𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑀁, 𑀦𑀺𑀭𑀼𑀤𑀓𑀫𑀭𑀼𑀝𑁆𑀞𑀸𑀦𑀁. 𑀯𑀦𑀫𑁂𑀯 𑀯𑀦𑀦𑁆𑀢𑀁. 𑀯𑀦𑀘𑁆𑀙𑀸𑀬𑀧𑁆𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀦𑁆𑀢𑀺 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀫𑀳𑀸𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀖𑀫𑁆𑀫𑀧𑀭𑁂𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄 𑀧𑀝𑀺𑀧𑀣𑁂 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀓𑀢𑁆𑀣 𑀧𑀸𑀦𑀻𑀬𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑁂𑀬𑁆𑀬, 𑀲𑁄 ‘‘𑀅𑀝𑀯𑀺𑀁 𑀉𑀢𑁆𑀢𑀭𑀺𑀢𑁆𑀯𑀸𑀯 𑀚𑀸𑀢𑀲𑁆𑀲𑀭𑀯𑀦𑀲𑀡𑁆𑀟𑁄 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀤𑁂𑀬𑁆𑀬, 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀯 𑀳𑀝𑁆𑀞𑀧𑀳𑀝𑁆𑀞𑁄 𑀪𑀯𑁂𑀬𑁆𑀬, 𑀢𑀢𑁄 𑀕𑀘𑁆𑀙𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑀸𑀦𑀺 𑀉𑀧𑁆𑀧𑀮𑀤𑀮𑀦𑀸𑀴𑀧𑀢𑁆𑀢𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀳𑀝𑁆𑀞𑀧𑀳𑀝𑁆𑀞𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀮𑁆𑀮𑀯𑀢𑁆𑀣𑁂 𑀅𑀮𑁆𑀮𑀓𑁂𑀲𑁂 𑀧𑀼𑀭𑀺𑀲𑁂 𑀧𑀲𑁆𑀲𑁂𑀬𑁆𑀬, 𑀯𑀦𑀓𑀼𑀓𑁆𑀓𑀼𑀝𑀯𑀦𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬, 𑀚𑀸𑀢𑀲𑁆𑀲𑀭𑀧𑀭𑀺𑀬𑀦𑁆𑀢𑁂 𑀚𑀸𑀢𑀫𑀡𑀺𑀚𑀸𑀮𑀲𑀤𑀺𑀲𑀁 𑀦𑀻𑀮𑀯𑀦𑀲𑀡𑁆𑀟𑀁 𑀧𑀲𑁆𑀲𑁂𑀬𑁆𑀬, 𑀲𑀭𑁂 𑀚𑀸𑀢𑀸𑀦𑀺 𑀉𑀧𑁆𑀧𑀮𑀧𑀤𑀼𑀫𑀓𑀼𑀫𑀼𑀤𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀉𑀤𑀓𑀫𑁆𑀧𑀺 𑀧𑀲𑁆𑀲𑁂𑀬𑁆𑀬, 𑀲𑁄 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀳𑀝𑁆𑀞𑀧𑀳𑀝𑁆𑀞𑁄 𑀳𑀼𑀢𑁆𑀯𑀸 𑀚𑀸𑀢𑀲𑁆𑀲𑀭𑀁 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀲𑁆𑀲𑀤𑁆𑀥𑀤𑀭𑀣𑁄 𑀪𑀺𑀲𑀫𑀼𑀴𑀸𑀮𑀧𑁄𑀓𑁆𑀔𑀭𑀸𑀤𑀻𑀦𑀺 𑀔𑀸𑀤𑀺𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀫𑀦𑁆𑀤𑀸𑀮𑀯𑀫𑀽𑀮𑀸𑀦𑀺 𑀔𑀦𑁆𑀥𑁂 𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀤𑀓𑀲𑀸𑀝𑀓𑀁 𑀆𑀢𑀧𑁂 𑀓𑀢𑁆𑀯𑀸 𑀲𑀻𑀢𑀘𑁆𑀙𑀸𑀬𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀦𑀺𑀧𑀦𑁆𑀦𑁄𑀯 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀤𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀚𑀸𑀢𑀲𑁆𑀲𑀭𑀯𑀦𑀲𑀡𑁆𑀟𑀲𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀤𑀓𑀤𑀲𑁆𑀲𑀦𑀸 𑀳𑀝𑁆𑀞𑀧𑀳𑀝𑁆𑀞𑀓𑀸𑀮𑁄 𑀯𑀺𑀬 𑀧𑀼𑀩𑁆𑀩𑀪𑀸𑀕𑀸𑀭𑀫𑁆𑀫𑀡𑁂 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀸 𑀧𑀻𑀢𑀺, 𑀦𑁆𑀳𑀸𑀬𑀺𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑀻𑀢𑀘𑁆𑀙𑀸𑀬𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀧𑀳𑀭𑀦𑁆𑀢𑁂 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀤𑀦𑁆𑀢𑁄 𑀦𑀺𑀧𑀦𑁆𑀦𑀓𑀸𑀮𑁄 𑀯𑀺𑀬 𑀩𑀮𑀧𑁆𑀧𑀢𑁆𑀢𑀁 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀸𑀓𑀸𑀭𑀲𑀡𑁆𑀞𑀺𑀢𑀁 𑀲𑀼𑀔𑀁.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀧𑀝𑀺𑀮𑀸𑀪𑀲𑀫𑀬𑁂 𑀧𑀝𑀺𑀮𑀤𑁆𑀥𑀲𑁆𑀲 𑀭𑀲𑀸𑀦𑀼𑀪𑀯𑀦𑀲𑀫𑀬𑁂 𑀯𑀦𑀘𑁆𑀙𑀸𑀬𑀸𑀤𑀻𑀦𑀁 𑀲𑀯𑀦𑀤𑀲𑁆𑀲𑀦𑀲𑀫𑀬𑁂 𑀧𑀭𑀺𑀪𑁄𑀕𑀲𑀫𑀬𑁂 𑀘. 𑀧𑀸𑀓𑀝𑀪𑀸𑀯𑀢𑁄𑀢𑀺 𑀬𑀣𑀸𑀓𑁆𑀓𑀫𑀁 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀪𑀽𑀢𑀪𑀸𑀯𑀢𑁄. 𑀯𑀺𑀯𑁂𑀓𑀚𑀁 ¶ 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀯𑁂𑀓𑀚𑀦𑁆𑀢𑀺 𑀛𑀸𑀦𑀁 𑀯𑀼𑀢𑁆𑀢𑀁. 𑀧𑀻𑀢𑀺𑀲𑀼𑀔𑀲𑀤𑁆𑀤𑀢𑁄 𑀘 𑀅𑀢𑁆𑀣𑀺𑀅𑀢𑁆𑀣𑀯𑀺𑀲𑁂𑀲𑀯𑀢𑁄 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂𑀢𑀺 𑀏𑀢𑁆𑀣 𑀅𑀓𑀸𑀭𑁄 𑀤𑀝𑁆𑀞𑀩𑁆𑀩𑁄 𑀬𑀣𑀸 𑀅𑀭𑀺𑀲𑀲𑁄𑀢𑀺. 𑀤𑀼𑀢𑀺𑀬𑁂 𑀧𑀻𑀢𑀺𑀲𑀼𑀔𑀫𑁂𑀯 𑀯𑀺𑀯𑁂𑀓𑀚𑀁, 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀦𑁆𑀢𑀺 𑀘 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 ¶ 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑀲𑁆𑀲 𑀘 𑀅𑀮𑁄𑀧𑁄 𑀓𑀢𑁄, 𑀮𑁄𑀧𑁂 𑀯𑀸 𑀲𑀢𑀺 ‘‘𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀧𑀸𑀞𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀧𑀞𑀫𑀦𑁆𑀢𑀺 𑀇𑀫𑀺𑀦𑀸 𑀤𑁂𑀲𑀦𑀸𑀓𑁆𑀓𑀫𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. ‘‘𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣𑀸𑀧𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀫𑀢𑁆𑀢𑀁 𑀯𑀸 𑀧𑀞𑀫𑀦𑁆𑀢𑀺 𑀇𑀤𑀁 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀧𑀞𑀫𑀦𑁆𑀢𑀺 𑀇𑀤𑀁 𑀧𑀦 𑀦 𑀏𑀓𑀦𑁆𑀢𑀮𑀓𑁆𑀔𑀡𑀁. 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀆𑀤𑀺𑀁 𑀧𑀸𑀧𑁂𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀓𑁆𑀓𑁄𑀢𑀺. 𑀏𑀯𑀁 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀬𑀝𑁆𑀞𑁂𑀦 𑀧𑀦 𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀧𑀞𑀫𑀁. 𑀢𑁂𑀦𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁭𑁫) ‘‘𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁, 𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀧𑀞𑀫’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀛𑀸𑀧𑁂𑀢𑀻𑀢𑀺 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀤𑀳𑀢𑀺, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀕𑁄𑀘𑀭𑀦𑁆𑀢𑀺 𑀓𑀲𑀺𑀡𑀸𑀤𑀺𑀆𑀮𑀫𑁆𑀩𑀦𑀁. 𑀢𑀦𑁆𑀢𑀺 𑀢𑀁 𑀕𑁄𑀘𑀭𑀁. 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀧𑀲𑁆𑀲𑀢𑀺. 𑀲𑀳 𑀉𑀧𑀘𑀸𑀭𑁂𑀦𑀸𑀢𑀺 𑀲𑀤𑁆𑀥𑀺𑀁 𑀉𑀧𑀘𑀸𑀭𑀚𑁆𑀛𑀸𑀦𑁂𑀦. 𑀓𑀲𑀺𑀡𑀸𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀦𑁄 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀲𑁆𑀲 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀉𑀧𑀦𑀺𑀚𑁆𑀛𑀸𑀬𑀦𑀢𑁄. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀬𑀦𑀢𑁄𑀢𑀺 𑀬𑀣𑀸𑀲𑀫𑁆𑀪𑀯𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀢𑀣𑀮𑀓𑁆𑀔𑀡𑀲𑁆𑀲 𑀘 𑀉𑀧𑀦𑀺𑀚𑁆𑀛𑀸𑀬𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺. 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀫𑀕𑁆𑀕𑁄 𑀅𑀲𑀫𑁆𑀫𑁄𑀳𑀢𑁄 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀚𑁆𑀛𑀸𑀬𑀦𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺. 𑀢𑀣𑀮𑀓𑁆𑀔𑀡𑀦𑁆𑀢𑀺 𑀅𑀯𑀺𑀦𑀸𑀲𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀜𑁆𑀜𑀣𑀸𑀪𑀸𑀯𑀢𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀢𑀣𑀮𑀓𑁆𑀔𑀡𑀁, 𑀫𑀕𑁆𑀕𑀲𑁆𑀲𑀧𑀺 𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀢𑀣𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀯𑀺𑀲𑀤𑀺𑀲𑁄𑀤𑀸𑀳𑀭𑀡𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀲𑀥𑀦𑁄’’𑀢𑀺𑀆𑀤𑀺. 𑀅𑀜𑁆𑀜𑁄 𑀅𑀧𑀤𑁂𑀲𑀸𑀭𑀳𑁄 𑀳𑁄𑀢𑀻𑀢𑀺 𑀥𑀦𑀢𑁄 𑀧𑀭𑀺𑀚𑀦𑀢𑁄 𑀘 𑀅𑀜𑁆𑀜𑁄 𑀥𑀦𑀯𑀸 𑀧𑀭𑀺𑀚𑀦𑀯𑀸 𑀘 𑀧𑀼𑀭𑀺𑀲𑁄 𑀲𑀳 𑀥𑀦𑁂𑀦 𑀯𑀢𑁆𑀢𑀢𑀺 𑀧𑀭𑀺𑀚𑀦𑁂𑀦 𑀘𑀸𑀢𑀺 𑀲𑀥𑀦𑁄 𑀲𑀧𑀭𑀺𑀚𑀦𑁄𑀢𑀺 𑀅𑀧𑀤𑁂𑀲𑀁 𑀅𑀭𑀳𑀢𑀻𑀢𑀺 𑀅𑀧𑀤𑁂𑀲𑀸𑀭𑀳𑁄 𑀳𑁄𑀢𑀺 ¶ , 𑀅𑀧𑀤𑀺𑀲𑀺𑀢𑀩𑁆𑀩𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀦𑀗𑁆𑀕𑁂𑀲𑀼 𑀏𑀯 𑀲𑁂𑀦𑀸𑀲𑀫𑁆𑀫𑀼𑀢𑀻𑀢𑀺 𑀭𑀣𑀸𑀤𑀺𑀲𑁂𑀦𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀸𑀬 𑀲𑁂𑀦𑀸𑀬 𑀅𑀪𑀸𑀯𑁂𑀧𑀺 𑀭𑀣𑁂𑀳𑀺 𑀧𑀢𑁆𑀢𑀻𑀳𑀺 𑀘 𑀲𑀳 𑀯𑀢𑁆𑀢𑀦𑀢𑁄 𑀲𑀭𑀣𑀸 𑀲𑀧𑀢𑁆𑀢𑀺 𑀲𑁂𑀦𑀸𑀢𑀺 𑀭𑀣𑀸𑀤𑀺𑀲𑁂𑀦𑀗𑁆𑀕𑁂𑀲𑀼𑀬𑁂𑀯 𑀲𑁂𑀦𑀸𑀯𑁄𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀛𑀸𑀦𑀧𑀸𑀞𑁂 𑀅𑀕𑁆𑀕𑀳𑀺𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀕𑀳𑀺𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀯𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺. 𑀏𑀯𑀁 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸𑀬𑁂𑀯. 𑀲𑀘𑀺𑀢𑁆𑀢𑁂𑀓𑀕𑁆𑀕𑀢𑀦𑁆𑀢𑀺 𑀇𑀥 𑀅𑀯𑀼𑀢𑁆𑀢𑁂𑀧𑀻𑀢𑀺 ‘‘𑀲𑀘𑀺𑀢𑁆𑀢𑁂𑀓𑀕𑁆𑀕𑀢’’𑀦𑁆𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀇𑀫𑀲𑁆𑀫𑀺𑀁 𑀛𑀸𑀦𑀧𑀸𑀞𑁂 𑀅𑀯𑀼𑀢𑁆𑀢𑁂𑀧𑀻𑀢𑀺 𑀅𑀢𑁆𑀣𑁄, 𑀲𑀸𑀫𑀜𑁆𑀜𑀢𑁄 𑀧𑀦 𑀛𑀸𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯. 𑀢𑁂𑀦𑁂𑀯𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺 ¶ . 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀯𑀺𑀢𑀓𑁆𑀓𑀸𑀤𑀻𑀳𑀺 𑀲𑀳 𑀯𑀢𑁆𑀢𑀩𑁆𑀩𑀁, 𑀢𑀁 𑀥𑀫𑁆𑀫𑀁 𑀤𑀻𑀧𑁂𑀢𑀼𑀁 𑀢𑀲𑁆𑀲 𑀧𑀓𑀸𑀲𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑁄 𑀓𑀢𑁄, 𑀲𑁄 𑀏𑀯 𑀅𑀥𑀺𑀧𑁆𑀧𑀸𑀬𑁄 𑀢𑁂𑀦 𑀪𑀕𑀯𑀢𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁯) ‘‘𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 𑀲𑀸 𑀛𑀸𑀦𑀧𑀸𑀞𑁂 𑀅𑀕𑁆𑀕𑀳𑀺𑀢𑀸𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀦𑁆𑀢𑀺.

𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀏𑀢𑁆𑀣 𑀉𑀧-𑀲𑀁𑀲𑀤𑁆𑀤𑀸 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀭𑀢𑁆𑀣𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀏𑀢𑁆𑀣 𑀧𑀢𑁆𑀯𑀸 𑀲𑀸𑀥𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀇𑀭𑀺𑀬𑀦𑁆𑀢𑀺 𑀓𑀺𑀭𑀺𑀬𑀁. 𑀯𑀼𑀢𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑁂𑀳𑀺 𑀭𑀓𑁆𑀔𑀡𑀁 𑀧𑀸𑀮𑀦𑀁. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀢𑁆𑀢𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸

𑀯𑀽𑀧𑀲𑀫𑀸𑀢𑀺 𑀯𑀽𑀧𑀲𑀫𑀳𑁂𑀢𑀼. 𑀯𑀽𑀧𑀲𑀫𑁄𑀢𑀺 𑀘𑁂𑀢𑁆𑀣 𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀢𑀺𑀓𑁆𑀓𑀫𑁄 𑀅𑀢𑁆𑀣𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀲𑀫𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺. 𑀓𑀢𑀫𑁂𑀲𑀁 𑀧𑀦𑁂𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀓𑀺𑀁 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀉𑀤𑀸𑀳𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀦𑀢𑁆𑀣𑀺 𑀢𑁂𑀲𑀁 𑀯𑀽𑀧𑀲𑀫𑁄. 𑀦 𑀳𑀺 𑀓𑀤𑀸𑀘𑀺 𑀧𑀞𑀫𑀚𑁆𑀛𑀸𑀦𑀁 ¶ 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑀁 𑀅𑀢𑁆𑀣𑀺. 𑀅𑀣 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀁, 𑀏𑀯𑀫𑁆𑀧𑀺 𑀦𑀢𑁆𑀣𑁂𑀯 𑀯𑀽𑀧𑀲𑀫𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑁂𑀲𑀁 𑀢𑀢𑁆𑀣 𑀅𑀪𑀸𑀯𑀢𑁄𑀢𑀺 𑀇𑀫𑀁 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀤𑀺𑀝𑁆𑀞𑀸𑀤𑀻𑀦𑀯𑀲𑁆𑀲 𑀢𑀁𑀢𑀁𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀯𑀽𑀧𑀲𑀫𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀯𑀺𑀢𑀓𑁆𑀓𑀸𑀤𑀬𑁄 𑀏𑀯 𑀘 𑀛𑀸𑀦𑀗𑁆𑀕𑀪𑀽𑀢𑀸 𑀢𑀣𑀸 𑀓𑀭𑀻𑀬𑀦𑁆𑀢𑀺, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄, 𑀢𑀲𑁆𑀫𑀸 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑀸𑀥𑀺𑀯𑀘𑀦𑀁 𑀛𑀸𑀦𑁂 𑀆𑀕𑀢𑀁. 𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 ‘‘𑀏𑀢𑁂𑀦 𑀏𑀢𑀁 𑀑𑀴𑀸𑀭𑀺𑀓’’𑀦𑁆𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑀁 𑀲𑀼𑀢𑁆𑀢𑁂 𑀆𑀕𑀢𑀁, 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀯𑀺𑀢𑀓𑁆𑀓𑀸𑀤𑀻𑀦𑀁 𑀢𑀁𑀲𑀳𑀕𑀢𑀸𑀦𑀜𑁆𑀘 𑀯𑀽𑀧𑀲𑀫𑀸𑀤𑀺𑀓𑁂 𑀯𑀢𑁆𑀢𑀩𑁆𑀩𑁂 𑀯𑀺𑀢𑀓𑁆𑀓𑀸𑀤𑀻𑀦𑀁𑀬𑁂𑀯 𑀯𑀽𑀧𑀲𑀫𑁄 𑀯𑀼𑀘𑁆𑀘𑀫𑀸𑀦𑁄 𑀅𑀥𑀺𑀓𑀯𑀘𑀦𑀁 𑀅𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀓𑀢𑁆𑀯𑀸 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀞𑀫𑀚𑁆𑀛𑀸𑀦𑀲𑁆𑀲 𑀑𑀴𑀸𑀭𑀺𑀓𑀢𑀸, 𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀲𑀫𑀥𑀺𑀕𑀫𑁄, 𑀦 𑀲𑀪𑀸𑀯𑀢𑁄 𑀅𑀦𑁄𑀴𑀸𑀭𑀺𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺 𑀅𑀬𑀫𑀢𑁆𑀣𑁄 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀢𑁂𑀦 𑀤𑀻𑀧𑀺𑀢𑁄 ¶ , 𑀢𑀲𑁆𑀫𑀸 ‘‘𑀓𑀺𑀁 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦’’𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀯. ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀦𑀺 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀗𑁆𑀕𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑀸𑀦𑀻𑀢𑀺 𑀢𑁂𑀲𑀁 𑀏𑀓𑀤𑁂𑀲𑀪𑀽𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀁 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀦𑀬𑁂𑀦 𑀢𑀁 𑀤𑀻𑀧𑀓𑀁 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑁂𑀧𑀺 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀤𑀺𑀓𑁂 𑀧𑀳𑁂𑀬𑁆𑀬𑀗𑁆𑀕𑀦𑀺𑀤𑁆𑀤𑁂𑀲𑀢𑀸𑀲𑀸𑀫𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀲𑀫𑀽𑀳𑀢𑁄 𑀕𑀳𑀺𑀢𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀲𑁆𑀲 𑀢𑀤𑁂𑀓𑀤𑁂𑀲𑀢𑀸 𑀳𑁄𑀢𑀻𑀢𑀺. 𑀅𑀣 𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀢𑀁𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑁂𑀦 𑀧𑀻𑀢𑀺𑀯𑀺𑀭𑀸𑀕𑀸𑀤𑀺𑀯𑀘𑀦𑀸𑀦𑀁 𑀧𑀻𑀢𑀺𑀆𑀤𑀺𑀲𑀫𑀢𑀺𑀓𑁆𑀓𑀫𑀸 𑀢𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀁𑀤𑀻𑀧𑀓𑀢𑀸 𑀯𑀼𑀢𑁆𑀢𑀸. 𑀏𑀯𑀜𑁆𑀳𑀺 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀁 𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦 𑀧𑀻𑀢𑀺𑀯𑀺𑀭𑀸𑀕𑀸𑀤𑀺𑀯𑀘𑀦𑀸𑀦𑀁 𑀲𑀯𑀺𑀲𑀬𑁂 𑀲𑀫𑀸𑀦𑀩𑁆𑀬𑀸𑀧𑀸𑀭𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀸𑀤𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑀺𑀪𑀗𑁆𑀕𑁂 ¶ 𑀧𑀦𑀸’’𑀢𑀺𑀆𑀤𑀺. 𑀧𑀦-𑀲𑀤𑁆𑀤𑁄𑀧𑀺 𑀅𑀧𑀺𑀲𑀤𑁆𑀤𑀢𑁆𑀣𑁄, 𑀯𑀺𑀪𑀗𑁆𑀕𑁂𑀧𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬𑀸𑀢𑀺 𑀦𑀻𑀮𑀬𑁄𑀕𑀢𑁄 𑀯𑀢𑁆𑀣𑀁 𑀦𑀻𑀮𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂𑀢𑀺 ‘‘𑀘𑁂𑀢𑁄 𑀲𑀫𑁆𑀧𑀲𑀸𑀤𑀬𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂. 𑀘𑁂𑀢𑀲𑁄𑀢𑀺 𑀘 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 ‘‘𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀧𑀓𑁆𑀔𑁂. 𑀘𑁂𑀢𑀲𑁄𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. ‘‘𑀬𑀸𑀯 𑀦 𑀧𑀭𑁂 𑀏𑀓𑀕𑀢𑁂 𑀓𑀭𑁄𑀫𑀻’’𑀢𑀺𑀆𑀤𑀻𑀲𑀼 𑀲𑁂𑀝𑁆𑀞𑀯𑀘𑀦𑁄𑀧𑀺 𑀏𑀓𑀲𑀤𑁆𑀤𑁄 𑀮𑁄𑀓𑁂 𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀲𑁂𑀝𑁆𑀞𑁄𑀧𑀺 𑀳𑀺 𑀮𑁄𑀓𑁂 𑀏𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀏𑀓𑀸𑀓𑀻𑀳𑀺 𑀔𑀼𑀤𑁆𑀤𑀓𑁂𑀳𑀺 𑀚𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀅𑀲𑀳𑀸𑀬𑀢𑁆𑀣𑁄𑀧𑀺 𑀏𑀓𑀲𑀤𑁆𑀤𑁄 𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀏𑀓𑁄 𑀅𑀲𑀳𑀸𑀬𑁄 𑀳𑀼𑀢𑁆𑀯𑀸’’𑀢𑀺. 𑀲𑀤𑁆𑀥𑀸𑀤𑀬𑁄𑀧𑀺 𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀢𑁄 𑀘 𑀅𑀲𑀸𑀥𑀸𑀭𑀡𑀢𑁄 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯, 𑀲𑀫𑀸𑀥𑀺 𑀧𑀦 𑀛𑀸𑀦𑀓𑁆𑀔𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀓𑀭𑀡𑁂𑀦 𑀲𑀸𑀢𑀺𑀲𑀬𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳.

‘‘𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀯𑀺𑀲𑁂𑀲𑀦𑀤𑁆𑀯𑀬𑀁 𑀛𑀸𑀦𑀲𑁆𑀲 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀕𑀳𑀺𑀢𑀁. 𑀲𑁆𑀯𑀸𑀬𑀫𑀢𑀺𑀲𑀬𑁄 𑀬𑀣𑀸 𑀇𑀫𑀲𑁆𑀫𑀺𑀁 𑀛𑀸𑀦𑁂 𑀮𑀩𑁆𑀪𑀢𑀺, 𑀦 𑀢𑀣𑀸 𑀧𑀞𑀫𑀚𑁆𑀛𑀸𑀦𑁂𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀦𑀼 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑁂 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀯𑀲𑁂𑀦 𑀅𑀦𑀼𑀫𑀚𑁆𑀚𑀦𑀅𑀦𑀼𑀬𑀼𑀚𑁆𑀚𑀦𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀸 𑀥𑀫𑁆𑀫𑀸 𑀲𑀢𑀺𑀧𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀧𑀕𑀫𑁂 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 ¶ 𑀓𑀺𑀜𑁆𑀘𑀺 𑀔𑁄𑀪𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀢𑁂𑀳𑀺 𑀘 𑀢𑁂 𑀦 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦…𑀧𑁂… 𑀦 𑀲𑀼𑀧𑁆𑀧𑀲𑀦𑁆𑀦’’𑀦𑁆𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀺𑀓𑀸 𑀊𑀫𑀺𑀬𑁄 𑀯𑀻𑀘𑀺𑀬𑁄, 𑀫𑀳𑀢𑀺𑀬𑁄 𑀢𑀭𑀗𑁆𑀕𑀸. 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄𑀢𑀺 𑀲𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑁂 𑀯𑀻𑀭𑀺𑀬𑀲𑀫𑀢𑀸𑀬 𑀘 𑀢𑁂𑀦𑁂𑀯 𑀔𑁄𑀢𑁂𑀦 𑀲𑀫𑁆𑀧𑀲𑀸𑀤𑀸𑀪𑀸𑀯𑁂𑀦 𑀘 𑀩𑀳𑀮𑁂 𑀯𑀺𑀬 𑀚𑀮𑁂 𑀫𑀘𑁆𑀙𑁄 𑀲𑀫𑀸𑀥𑀺𑀧𑀺 𑀦 𑀲𑀼𑀝𑁆𑀞𑀼 𑀧𑀸𑀓𑀝𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦𑀸𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀔𑁄𑀪𑁄 𑀏𑀯 𑀧𑀮𑀺𑀩𑁄𑀥𑁄. 𑀏𑀯𑀁 𑀯𑀼𑀢𑁆𑀢𑁂𑀦𑀸𑀢𑀺 𑀬𑀲𑁆𑀲𑀸 𑀲𑀤𑁆𑀥𑀸𑀬 𑀯𑀲𑁂𑀦 𑀲𑀫𑁆𑀧𑀲𑀸𑀤𑀦𑀁, 𑀬𑀲𑁆𑀲𑀸 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀯𑀲𑁂𑀦 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀘 𑀛𑀸𑀦𑀁 𑀯𑀼𑀢𑁆𑀢𑀁, 𑀢𑀸𑀲𑀁 𑀏𑀯 ‘‘𑀲𑀤𑁆𑀤𑀳𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁭𑁪) 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀯𑀺𑀪𑀸𑀯𑀦𑀯𑀲𑁂𑀦 𑀯𑀼𑀢𑁆𑀢𑁂𑀦 𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑁂𑀦. 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸𑀢𑀺 ‘‘𑀲𑀫𑁆𑀧𑀲𑀸𑀤𑀦𑀬𑁄𑀕𑀢𑁄, 𑀲𑀫𑁆𑀧𑀲𑀸𑀤𑀦𑀢𑁄 ¶ 𑀯𑀸 𑀲𑀫𑁆𑀧𑀲𑀸𑀤𑀦𑀁. 𑀏𑀓𑁄𑀤𑀺𑀁 𑀪𑀸𑀯𑁂𑀢𑀻𑀢𑀺 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀛𑀸𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸. 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀓𑀣𑀁 𑀧𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀦𑀦𑀼 𑀛𑀸𑀦𑀯𑀺𑀪𑀗𑁆𑀕𑁂 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁭𑁪) 𑀲𑀤𑁆𑀥𑀸𑀬𑁂𑀯 𑀯𑀼𑀢𑁆𑀢𑀸, ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀘 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀺𑀲𑁆𑀲𑁂𑀯 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀫𑁆𑀧𑀲𑀸𑀤𑀦𑀁 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀛𑀸𑀦𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬 𑀯𑀺𑀪𑀗𑁆𑀕𑀧𑀸𑀞𑁂𑀦 𑀲𑀤𑁆𑀥𑀺𑀁 𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀯𑀺𑀪𑀗𑁆𑀕𑁂𑀧𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀦𑀺𑀤𑁆𑀤𑁂𑀲𑀲𑁆𑀲 𑀓𑀢𑀢𑁆𑀢𑀸. 𑀢𑀣𑀸 𑀳𑀺 𑀬𑁂𑀦 𑀲𑀫𑁆𑀧𑀲𑀸𑀤𑀦𑁂𑀦 𑀬𑁄𑀕𑀸 𑀛𑀸𑀦𑀁 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 ‘‘𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁂 𑀲𑀫𑁆𑀧𑀲𑀸𑀤𑀦𑀁 𑀛𑀸𑀦𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀢𑀁𑀬𑁄𑀕𑀸 𑀛𑀸𑀦𑁂 𑀢𑀁𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. ‘‘𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀘 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑁄𑀤𑀺𑀫𑁆𑀳𑀺 𑀤𑀲𑁆𑀲𑀺𑀢𑁂 𑀏𑀓𑁄𑀤𑀺𑀪𑀸𑀯𑀁 𑀛𑀸𑀦𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀛𑀸𑀦𑀲𑁆𑀲 𑀏𑀓𑁄𑀤𑀺𑀯𑀟𑁆𑀠𑀦𑀢𑀸 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀁 𑀅𑀓𑀢𑁆𑀯𑀸 𑀥𑀫𑁆𑀫𑀫𑀢𑁆𑀢𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀯𑀺𑀭𑁄𑀥𑁄 𑀬𑀼𑀢𑁆𑀢𑁄.

𑀬𑀁 𑀧𑀦 𑀯𑀼𑀢𑁆𑀢𑀁 𑀝𑀻𑀓𑀸𑀓𑀸𑀭𑁂𑀳𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀸𑀤𑀻𑀳𑀺 ‘‘𑀬𑀤𑀺 𑀏𑀓𑁄𑀤𑀻𑀢𑀺 𑀲𑀫𑀸𑀥𑀺𑀲𑁆𑀲 𑀕𑀳𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀸 ‘𑀏𑀓𑁄𑀤𑀺𑀪𑀸𑀯’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀸𑀥𑀺𑀲𑁆𑀲 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀢𑀲𑁆𑀫𑀸 𑀏𑀓𑁄𑀤𑀺𑀪𑀸𑀯𑀲𑀤𑁆𑀤𑁄 𑀏𑀯 𑀲𑀫𑀸𑀥𑀺𑀫𑁆𑀳𑀺 𑀧𑀯𑀢𑁆𑀢𑁄 𑀲𑀫𑁆𑀧𑀲𑀸𑀤𑀦𑀲𑀤𑁆𑀤𑁄 𑀯𑀺𑀬 𑀛𑀸𑀦𑁂 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢’’𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀲𑁄 𑀅𑀝𑁆𑀞𑀓𑀣𑀸𑀦𑀺𑀭𑀧𑁂𑀓𑁆𑀔𑁄 𑀯𑀺𑀲𑀼𑀁𑀬𑁂𑀯𑁂𑀓𑁄 𑀅𑀢𑁆𑀣𑀯𑀺𑀓𑀧𑁆𑀧𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀦𑀚𑁆𑀛𑀸𑀭𑀼𑀴𑁆𑀳𑀢𑁆𑀢𑀸 𑀏𑀓𑀁 𑀉𑀤𑁂𑀢𑀻𑀢𑀺 𑀏𑀓𑁄𑀤𑀻𑀢𑀺 𑀢𑀣𑀸𑀯𑀺𑀥𑀲𑀫𑀸𑀥𑀺𑀬𑀼𑀢𑁆𑀢𑀁 𑀛𑀸𑀦𑀘𑀺𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀏𑀓𑁄𑀤𑀺𑀲𑁆𑀲 𑀪𑀸𑀯𑁄 𑀏𑀓𑁄𑀤𑀺𑀪𑀸𑀯𑁄𑀢𑀺 𑀲𑀫𑀸𑀥𑀺𑀲𑁆𑀲 𑀕𑀳𑀡𑀁 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀬𑁄 𑀧𑀦𑀸𑀬𑀁 𑀢𑁂𑀲𑀫𑀪𑀺𑀦𑀺𑀯𑁂𑀲𑁄 ‘‘𑀏𑀓𑁄𑀤𑀻𑀢𑀺 𑀲𑀫𑀸𑀥𑀺𑀲𑁆𑀲 𑀕𑀳𑀡𑁂 𑀲𑀢𑀺 ‘𑀏𑀓𑁄𑀤𑀺𑀪𑀸𑀯’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀸𑀥𑀺𑀲𑁆𑀲 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁆𑀢𑀩𑁆𑀩𑁄 𑀲𑀺𑀬𑀸’’𑀢𑀺 ¶ , 𑀲𑁄 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀅𑀬𑀼𑀢𑁆𑀢𑁄. 𑀅𑀜𑁆𑀜𑀢𑁆𑀣𑀧𑀺 𑀳𑀺 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀲𑁆𑀲𑁂𑀯 𑀩𑀸𑀳𑀼𑀮𑁆𑀮𑁂𑀦 𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑁂𑀲𑁄 𑀤𑀺𑀲𑁆𑀲𑀢𑀺.

𑀲𑀦𑁆𑀢𑀸𑀢𑀺 ¶ 𑀲𑀫𑀁 𑀦𑀺𑀭𑁄𑀥𑀁 𑀕𑀢𑀸. 𑀲𑀫𑀺𑀢𑀸𑀢𑀺 𑀪𑀸𑀯𑀦𑀸𑀬 𑀲𑀫𑀁 𑀕𑀫𑀺𑀢𑀸 𑀦𑀺𑀭𑁄𑀥𑀺𑀢𑀸. 𑀯𑀽𑀧𑀲𑀦𑁆𑀢𑀸𑀢𑀺 𑀢𑀢𑁄 𑀏𑀯 𑀲𑀼𑀝𑁆𑀞𑀼 𑀉𑀧𑀲𑀦𑁆𑀢𑀸. 𑀅𑀢𑁆𑀣𑀗𑁆𑀕𑀢𑀸𑀢𑀺 𑀅𑀢𑁆𑀣𑀁 𑀯𑀺𑀦𑀸𑀲𑀁 𑀕𑀢𑀸. 𑀅𑀩𑁆𑀪𑀢𑁆𑀣𑀗𑁆𑀕𑀢𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑁆𑀧𑀺𑀢𑀸𑀢𑀺 𑀕𑀫𑀺𑀢𑀸 𑀯𑀺𑀦𑀸𑀲𑀁 𑀕𑀢𑀸. 𑀲𑁄𑀲𑀺𑀢𑀸𑀢𑀺 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀅𑀪𑀸𑀯𑁂𑀦 𑀲𑁄𑀲𑀁 𑀲𑀼𑀓𑁆𑀔𑀪𑀸𑀯𑀁 𑀕𑀢𑀸. 𑀩𑁆𑀬𑀦𑁆𑀢𑀻𑀓𑀢𑀸𑀢𑀺 𑀯𑀺𑀕𑀢𑀦𑁆𑀢𑀸 𑀓𑀢𑀸.

𑀅𑀬𑀫𑀢𑁆𑀣𑁄𑀢𑀺 𑀪𑀸𑀯𑀦𑀸𑀬 𑀧𑀳𑀻𑀦𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀪𑀸𑀯𑀲𑀗𑁆𑀔𑀸𑀢𑁄 𑀅𑀢𑁆𑀣𑁄. 𑀘𑁄𑀤𑀓𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 ‘‘𑀏𑀯𑀫𑁂𑀢𑀁 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄’’𑀢𑀺 𑀯𑀢𑁆𑀯𑀸 ‘‘𑀦 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸’’𑀢𑀺 𑀏𑀢𑀁 𑀯𑀘𑀦𑀁. 𑀢𑀤𑀢𑁆𑀣𑀤𑀻𑀧𑀓𑀦𑁆𑀢𑀺 𑀢𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑀫𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑀁. 𑀦 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀲𑁆𑀲𑀸𑀢𑀺 𑀉𑀧𑀘𑀸𑀭𑀓𑁆𑀔𑀡𑁂 𑀯𑀺𑀬 𑀦𑀻𑀯𑀭𑀡𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀲𑀗𑁆𑀔𑁄𑀪𑀲𑁆𑀲 𑀯𑀽𑀧𑀲𑀫𑀸 𑀦 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ‘‘𑀧𑀼𑀭𑀺𑀫𑀁 𑀯𑀢𑁆𑀯𑀸𑀧𑀺 𑀯𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀽𑀧𑀸𑀬𑀤𑀻𑀧𑀓𑁂𑀦 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀢𑀸𑀬 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀢𑀸𑀬 𑀘 𑀳𑁂𑀢𑀼𑀤𑀻𑀧𑀓𑁂𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀸𑀯𑀳𑁂𑀢𑀼𑀤𑀻𑀧𑀓𑁂𑀦 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁄 𑀤𑀻𑀧𑀺𑀢𑁄𑀢𑀺, 𑀓𑀺𑀁 𑀧𑀼𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀯𑀘𑀦𑁂𑀦 𑀓𑀢𑁂𑀦𑀸𑀢𑀺? 𑀦, 𑀅𑀤𑀻𑀧𑀺𑀢𑀢𑁆𑀢𑀸. 𑀦 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀳𑀺 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀏𑀢𑁂𑀲𑀁 𑀯𑀽𑀧𑀲𑀫𑀦𑀁. 𑀑𑀴𑀸𑀭𑀺𑀓𑀗𑁆𑀕𑀫𑀼𑀔𑁂𑀦 𑀳𑀺 𑀢𑀁𑀢𑀁𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀸𑀤𑀻𑀳𑀺 𑀧𑀓𑀸𑀲𑀺𑀢𑀁. 𑀬𑀢𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀭𑀢𑁆𑀢𑀪𑀸𑀯𑀤𑀻𑀧𑀓𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑀁, 𑀬𑁂 𑀘 𑀲𑀗𑁆𑀔𑀸𑀭𑁂𑀲𑀼 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀫𑀕𑁆𑀕𑁂𑀲𑀼 𑀧𑀳𑀻𑀦𑀢𑀡𑁆𑀳𑁂𑀲𑀼 𑀘 𑀨𑀮𑁂𑀲𑀼 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀯𑀺𑀓𑁆𑀔𑀫𑁆𑀪𑀺𑀢𑀯𑀺𑀢𑀓𑁆𑀓𑀯𑀺𑀘𑀸𑀭𑀢𑀡𑁆𑀳𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑁆𑀧𑀬𑁄𑀕𑁄 𑀧𑀼𑀭𑀺𑀫𑁂𑀦 𑀦 𑀦𑀺𑀯𑀸𑀭𑀺𑀢𑁄 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀆𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀅𑀢𑀺𑀓𑁆𑀓𑀫𑁄 𑀘 𑀢𑁂𑀲𑀁 𑀯𑀽𑀧𑀲𑀫𑁄𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀚𑁆𑀛𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄’’𑀢𑀺. 𑀧𑀞𑀫𑀫𑁆𑀧𑀻𑀢𑀺 𑀧𑀞𑀫𑀚𑁆𑀛𑀸𑀦𑀫𑁆𑀧𑀺.

𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣𑀸𑀧𑀺 ‘‘𑀤𑀼𑀢𑀺𑀬𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀤𑀼𑀢𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀗𑁆𑀕𑀧𑀸𑀞𑁂𑀦 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀬𑀁 𑀧𑀦 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁮𑁦) ‘‘𑀛𑀸𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑁄 ¶ 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 ¶ 𑀲𑀧𑀭𑀺𑀓𑁆𑀔𑀸𑀭𑀁 𑀛𑀸𑀦𑀁 𑀤𑀲𑁆𑀲𑁂𑀢𑀼𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀭𑀣𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀁 𑀯𑀺𑀬 𑀳𑀺 𑀲𑀫𑁆𑀧𑀲𑀸𑀤𑁄 𑀛𑀸𑀦𑀲𑁆𑀲 𑀧𑀭𑀺𑀓𑁆𑀔𑀸𑀭𑁄, 𑀦 𑀛𑀸𑀦𑀗𑁆𑀕𑀦𑁆𑀢𑀺 𑀆𑀳 ‘‘𑀧𑀭𑀺𑀬𑀸𑀬𑁄𑀬𑁂𑀯 𑀘𑁂𑀲𑁄’’𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀉𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀢𑀺𑀯𑀗𑁆𑀕𑀺𑀓𑀫𑁂𑀯𑁂𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀲𑀸𑀤𑀦𑀁 𑀧𑀦 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸

𑀯𑀺𑀭𑀚𑁆𑀚𑀦𑀁 𑀯𑀺𑀭𑀸𑀕𑁄. 𑀢𑀁 𑀧𑀦 𑀯𑀺𑀭𑀚𑁆𑀚𑀦𑀁 𑀦𑀺𑀩𑁆𑀩𑀺𑀦𑁆𑀤𑀦𑀫𑀼𑀔𑁂𑀦 𑀳𑀻𑀴𑀦𑀁 𑀯𑀸 𑀢𑀧𑁆𑀧𑀝𑀺𑀩𑀤𑁆𑀥𑀭𑀸𑀕𑀧𑁆𑀧𑀳𑀸𑀦𑀁 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲𑀸 𑀧𑀻𑀢𑀺𑀬𑀸 𑀚𑀺𑀕𑀼𑀘𑁆𑀙𑀦𑀁 𑀯𑀸 𑀲𑀫𑀢𑀺𑀓𑁆𑀓𑀫𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸𑀢𑀺 𑀧𑀻𑀢𑀺𑀬𑀸 𑀯𑀺𑀭𑀸𑀕𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀦𑁆𑀢𑀭𑀸, 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀺𑀡𑁆𑀟𑀦𑀁 𑀲𑀫𑀼𑀘𑁆𑀘𑀬𑁄. 𑀫𑀕𑁆𑀕𑁄𑀢𑀺 𑀉𑀧𑀸𑀬𑁄. 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀳𑀺 𑀧𑀝𑀺𑀮𑀸𑀪𑀁 𑀯𑀺𑀦𑀸 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀅𑀥𑀺𑀕𑀫𑁄 𑀦 𑀳𑁄𑀢𑀻𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑁄 𑀢𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑁄. 𑀢𑀤𑀥𑀺𑀕𑀫𑀸𑀬𑀸𑀢𑀺 𑀢𑀢𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬.

𑀉𑀧𑀧𑀢𑁆𑀢𑀺𑀢𑁄𑀢𑀺 𑀲𑀫𑀯𑀸𑀳𑀺𑀢𑀪𑀸𑀯𑁂𑀦 𑀧𑀢𑀺𑀭𑀽𑀧𑀢𑁄 𑀛𑀸𑀦𑀼𑀧𑁂𑀓𑁆𑀔𑀸𑀧𑀺 𑀲𑀫𑀯𑀸𑀳𑀺𑀢𑀫𑁂𑀯 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀫𑀁 𑀧𑀲𑁆𑀲𑀢𑀻’’𑀢𑀺. 𑀯𑀺𑀲𑀤𑀸𑀬𑀸𑀢𑀺 𑀲𑀁𑀓𑀺𑀮𑁂𑀲𑀯𑀺𑀕𑀫𑁂𑀦 𑀧𑀭𑀺𑀩𑁆𑀬𑀢𑁆𑀢𑀸𑀬. 𑀯𑀺𑀧𑀼𑀮𑀸𑀬𑀸𑀢𑀺 𑀲𑀸𑀢𑀺𑀲𑀬𑀁 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀫𑀳𑀢𑀺𑀬𑀸. 𑀣𑀸𑀫𑀕𑀢𑀸𑀬𑀸𑀢𑀺 𑀧𑀻𑀢𑀺𑀯𑀺𑀕𑀫𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀬. 𑀦𑀦𑀼 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀯 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀓𑀣𑀫𑀬𑀁 𑀢𑀢𑀺𑀬𑀚𑁆𑀛𑀸𑀦𑀲𑀫𑀗𑁆𑀕𑀻 𑀉𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀉𑀧𑁂𑀓𑁆𑀔𑀓𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀘𑁂? 𑀦 𑀓𑁂𑀯𑀮𑀁 𑀯𑁂𑀤𑀦𑀼𑀧𑁂𑀓𑁆𑀔𑀸𑀯 𑀉𑀧𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺, 𑀅𑀣 𑀔𑁄 𑀅𑀜𑁆𑀜𑀸𑀧𑀺 𑀉𑀧𑁂𑀓𑁆𑀔𑀸 𑀯𑀺𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁂𑀓𑁆𑀔𑀸 𑀧𑀦 𑀤𑀲𑀯𑀺𑀥𑀸 𑀳𑁄𑀢𑀻’’𑀢𑀺𑀆𑀤𑀺. 𑀢𑀢𑁆𑀣 (𑀥. 𑀲. 𑀅𑀝𑁆𑀞. 𑁧𑁬𑁩; 𑀯𑀺𑀲𑀼𑀤𑁆𑀥𑀺. 𑁧.𑁮𑁪) ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀅. 𑀦𑀺. 𑁬.𑁧) 𑀏𑀯𑀫𑀸𑀕𑀢𑀸 𑀔𑀻𑀡𑀸𑀲𑀯𑀲𑁆𑀲 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 ¶ 𑀧𑀦 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁮) 𑀏𑀯𑀫𑀸𑀕𑀢𑀸 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 ¶ ‘‘𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁭; 𑀲𑀁. 𑀦𑀺. 𑁫.𑁧𑁮𑁨, 𑁧𑁯𑁦-𑁧𑁯𑁧) 𑀏𑀯𑀫𑀸𑀕𑀢𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 𑀧𑀦 ‘‘𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁩.𑁧𑁦𑁩) 𑀏𑀯𑀫𑀸𑀕𑀢𑀸 𑀅𑀦𑀘𑁆𑀘𑀸𑀭𑀤𑁆𑀥𑀦𑀸𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀯𑀻𑀭𑀺𑀬𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 𑁋

‘‘𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

‘‘𑀓𑀢𑀫𑀸 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀧𑀞𑀫𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀻𑀯𑀭𑀡𑁂 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀤𑀼𑀢𑀺𑀬𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀢𑀢𑀺𑀬𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀻𑀢𑀺𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬 𑀲𑀼𑀔𑀤𑀼𑀓𑁆𑀔𑁂 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀭𑀽𑀧𑀲𑀜𑁆𑀜𑀁 𑀧𑀝𑀺𑀖𑀲𑀜𑁆𑀜𑀁 𑀦𑀸𑀦𑀢𑁆𑀢𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀇𑀫𑀸 𑀅𑀝𑁆𑀞 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀫𑀣𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

‘‘𑀓𑀢𑀫𑀸 ¶ 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 ¶ 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀧𑀅𑀮𑀸𑀪𑀢𑁆𑀣𑀸𑀬…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀁 𑀩𑁆𑀬𑀸𑀥𑀺𑀁 𑀫𑀭𑀡𑀁 𑀲𑁄𑀓𑀁 𑀧𑀭𑀺𑀤𑁂𑀯𑀁 𑀉𑀧𑀸𑀬𑀸𑀲𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀆𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀁, 𑀇𑀫𑀸 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁫𑁭) 𑁋

𑀏𑀯𑀫𑀸𑀕𑀢𑀸 𑀦𑀻𑀯𑀭𑀡𑀸𑀤𑀺𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀦𑀸𑀫.

𑀢𑀢𑁆𑀣 𑀦𑀻𑀯𑀭𑀡𑁂 𑀧𑀝𑀺𑀲𑀗𑁆𑀔𑀸𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀧𑀝𑀺𑀲𑀗𑁆𑀔𑀸𑀬, 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀺𑀝𑁆𑀞𑀦𑀸𑀢𑀺 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀸𑀪𑀺𑀫𑀼𑀔𑀻𑀪𑀽𑀢𑀢𑁆𑀢𑀸 𑀢𑁂𑀲𑀁 𑀧𑀳𑀸𑀦𑁂𑀧𑀺 𑀅𑀩𑁆𑀬𑀸𑀧𑀸𑀭𑀪𑀸𑀯𑀽𑀧𑀕𑀫𑀦𑁂𑀦 𑀫𑀚𑁆𑀛𑀢𑁆𑀢𑀢𑀸𑀬 𑀲𑀦𑁆𑀢𑀺𑀝𑁆𑀞𑀦𑀸. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀽𑀢𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑁂 𑀩𑁆𑀬𑀸𑀧𑀸𑀭𑀸𑀓𑀭𑀡𑁂𑀦 𑀦𑀻𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀉𑀧𑁂𑀓𑁆𑀔𑀦𑀸𑀲𑀽𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀲𑀼 𑀉𑀧𑁆𑀧𑀸𑀤𑀸𑀤𑀻𑀲𑀼 𑀘. 𑀢𑀢𑁆𑀣 𑀉𑀧𑁆𑀧𑀸𑀤𑀦𑁆𑀢𑀺 𑀧𑀼𑀭𑀺𑀫𑀓𑀫𑁆𑀫𑀧𑀘𑁆𑀘𑀬𑀸 𑀔𑀦𑁆𑀥𑀸𑀦𑀁 𑀇𑀥 𑀉𑀧𑁆𑀧𑀢𑁆𑀢𑀺𑀫𑀸𑀳. 𑀧𑀯𑀢𑁆𑀢𑀦𑁆𑀢𑀺 𑀢𑀣𑀸𑀉𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀺𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀢𑁂𑀪𑀽𑀫𑀓𑀁 𑀲𑀗𑁆𑀔𑀸𑀭𑀕𑀢𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀆𑀬𑀽𑀳𑀦𑀦𑁆𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀁. 𑀕𑀢𑀺𑀦𑁆𑀢𑀺 𑀬𑀸𑀬 𑀕𑀢𑀺𑀬𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀁. 𑀉𑀧𑀧𑀢𑁆𑀢𑀺𑀦𑁆𑀢𑀺 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁. 𑀚𑀸𑀢𑀺𑀦𑁆𑀢𑀺 𑀚𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀁 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺𑀁. 𑀚𑀭𑀸𑀫𑀭𑀡𑀸𑀤𑀬𑁄 𑀧𑀸𑀓𑀝𑀸 𑀏𑀯.

𑀏𑀢𑁆𑀣 ¶ 𑀘 𑀉𑀧𑁆𑀧𑀸𑀤𑀸𑀤𑀬𑁄 𑀧𑀜𑁆𑀘𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀯𑀺𑀲𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀲𑁂𑀲𑀸 𑀢𑁂𑀲𑀁 𑀯𑁂𑀯𑀘𑀦𑀯𑀲𑁂𑀦. 𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀻𑀢𑀺 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀉𑀧𑁆𑀧𑀸𑀤𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀘 𑀯𑁂𑀯𑀘𑀦𑀁. 𑀕𑀢𑀺 𑀉𑀧𑀧𑀢𑁆𑀢𑀺 𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀯𑀢𑁆𑀢𑀲𑁆𑀲, 𑀚𑀭𑀸𑀤𑀬𑁄 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀦𑀼 𑀘𑁂𑀢𑁆𑀣 𑀘𑀢𑀽𑀲𑀼 𑀫𑀕𑁆𑀕𑀯𑀸𑀭𑁂𑀲𑀼 ‘‘𑀉𑀧𑁆𑀧𑀸𑀤’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀫𑀽𑀮𑀧𑀤𑀸𑀦𑀺, ‘‘𑀕𑀢𑀻’’𑀢𑀺𑀆𑀤𑀻𑀦𑀺 𑀤𑀲 𑀯𑁂𑀯𑀘𑀦𑀧𑀤𑀸𑀦𑀻𑀢𑀺 𑀧𑀦𑁆𑀦𑀭𑀲 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀙𑀲𑀼 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀯𑀸𑀭𑁂𑀲𑀼 𑀧𑀜𑁆𑀘 𑀫𑀽𑀮𑀧𑀤𑀸𑀦𑁂𑀯 𑀯𑀼𑀢𑁆𑀢𑀸𑀦𑀺, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀢𑀺𑀓𑁆𑀔𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑀫𑀢𑁆𑀣𑀲𑁆𑀲 𑀫𑀕𑁆𑀕𑀲𑁆𑀲 𑀲𑀩𑁆𑀪𑀸𑀯𑀢𑁄 𑀢𑀲𑁆𑀲𑀸 𑀢𑀺𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑁂𑀯𑀘𑀦𑀧𑀤𑁂𑀳𑀺 𑀲𑀳 𑀤𑀴𑁆𑀳𑀁 𑀓𑀢𑁆𑀯𑀸 𑀫𑀽𑀮𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀨𑀮𑀲𑁆𑀲 ¶ 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑁂𑀦 𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀫𑀕𑁆𑀕𑀸𑀬𑀢𑁆𑀢𑀢𑁆𑀢𑀸 𑀘 𑀫𑀦𑁆𑀤𑀪𑀽𑀢𑀸𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀫𑀽𑀮𑀧𑀤𑀸𑀦𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀫𑀕𑁆𑀕𑀯𑀸𑀭𑁂𑀲𑀼 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑁄 𑀯𑀼𑀢𑁆𑀢𑁄. ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀨𑀮𑀯𑀸𑀭𑁂𑀲𑀼 𑀧𑀦 𑀅𑀧𑁆𑀧𑀡𑀺𑀳𑀺𑀢𑀨𑀮𑀲𑀫𑀸𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸𑀢𑀺 𑀇𑀢𑀭𑀸𑀲𑀁 𑀤𑁆𑀯𑀺𑀦𑁆𑀦𑀁 𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀼𑀝𑁆𑀞𑀸𑀦𑀯𑀲𑁂𑀦 𑀳𑀺 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄, 𑀢𑀣𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀅𑀦𑀺𑀫𑀺𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀼𑀝𑁆𑀞𑀸𑀦𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑁄, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀼𑀝𑁆𑀞𑀸𑀦𑀯𑀲𑀏𑀦 𑀲𑀼𑀜𑁆𑀜𑀢𑀫𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑀯𑀲𑁂𑀦 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀘𑀢𑀲𑁆𑀲𑁄, 𑀢𑀣𑀸 𑀅𑀧𑁆𑀧𑀡𑀺𑀳𑀺𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘𑀢𑀲𑁆𑀲𑁄, 𑀲𑀼𑀜𑁆𑀜𑀢𑀯𑀺𑀳𑀸𑀭𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀯𑀲𑁂𑀦 𑀤𑁆𑀯𑁂𑀢𑀺 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀯𑀼𑀢𑁆𑀢𑀸, 𑀲𑀫𑀣𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀧𑀦 𑀅𑀧𑁆𑀧𑀦𑀸𑀯𑀻𑀣𑀺𑀬𑀸 𑀆𑀲𑀦𑁆𑀦𑀧𑀼𑀩𑁆𑀩𑀪𑀸𑀕𑁂 𑀩𑀮𑀧𑁆𑀧𑀢𑁆𑀢𑀁 𑀪𑀸𑀯𑀦𑀸𑀫𑀬𑀜𑀸𑀡𑀁.

𑀬𑀸 𑀧𑀦 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺 (𑀥. 𑀲. 𑁧𑁫𑁦) 𑀏𑀯𑀫𑀸𑀕𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀲𑀜𑁆𑀜𑀺𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀯𑁂𑀤𑀦𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 ‘‘𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁, 𑀢𑀁 𑀧𑀚𑀳𑀢𑀺, 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀫. 𑀦𑀺. 𑁩.𑁭𑁧; 𑀅. 𑀦𑀺. 𑁭.𑁫𑁫) 𑀏𑀯𑀫𑀸𑀕𑀢𑀸 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀦𑀸𑀫.

𑀢𑀢𑁆𑀣 ¶ 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀧𑀚𑀳𑀢𑀺. 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻𑀢𑀺 𑀤𑀺𑀝𑁆𑀞𑀲𑁄𑀯𑀢𑁆𑀢𑀺𑀓𑀢𑁆𑀢𑀬𑀲𑁆𑀲 𑀲𑀧𑁆𑀧𑀲𑁆𑀲 𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀯𑀺𑀬 𑀤𑀺𑀝𑁆𑀞𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀲𑀗𑁆𑀔𑀸𑀭𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀬𑀸 𑀧𑀦 𑀙𑀦𑁆𑀤𑀸𑀤𑀻𑀲𑀼 𑀬𑁂𑀯𑀸𑀧𑀦𑀓𑁂𑀲𑀼 𑀆𑀕𑀢𑀸 𑀲𑀳𑀚𑀸𑀢𑀸𑀦𑀁 𑀲𑀫𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 ‘‘𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁦; 𑀥. 𑀲. 𑁧𑁬𑁩) 𑀏𑀯𑀫𑀸𑀕𑀢𑀸 𑀅𑀕𑁆𑀕𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀧𑀓𑁆𑀔𑀧𑀸𑀢𑀚𑀦𑀦𑀻 𑀉𑀧𑁂𑀓𑁆𑀔𑀸, 𑀅𑀬𑀁 𑀛𑀸𑀦𑀼𑀧𑁂𑀓𑁆𑀔𑀸 𑀦𑀸𑀫.

𑀬𑀸 ¶ 𑀧𑀦 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁩𑁨; 𑀥. 𑀲. 𑁧𑁬𑁫) 𑀏𑀯𑀫𑀸𑀕𑀢𑀸 𑀲𑀩𑁆𑀩𑀧𑀘𑁆𑀘𑀦𑀻𑀓𑀧𑀭𑀺𑀲𑀼𑀤𑁆𑀥𑀸 𑀧𑀘𑁆𑀘𑀦𑀻𑀓𑀯𑀽𑀧𑀲𑀫𑀦𑁂𑀧𑀺 𑀅𑀩𑁆𑀬𑀸𑀧𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸 𑀦𑀸𑀫.

𑀢𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀘 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀘 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘 𑀛𑀸𑀦𑀼𑀧𑁂𑀓𑁆𑀔𑀸 𑀘 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯 𑀳𑁄𑀢𑀺. 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀪𑁂𑀤𑁂𑀦 𑀧𑀦𑀲𑁆𑀲𑀸 𑀅𑀬𑀁 𑀪𑁂𑀤𑁄 𑀏𑀓𑀲𑁆𑀲𑀧𑀺 𑀲𑀢𑁄 𑀲𑀢𑁆𑀢𑀲𑁆𑀲 𑀓𑀼𑀫𑀸𑀭𑀬𑀼𑀯𑀣𑁂𑀭𑀲𑁂𑀦𑀸𑀧𑀢𑀺𑀭𑀸𑀚𑀸𑀤𑀺𑀯𑀲𑁂𑀦 𑀪𑁂𑀤𑁄 𑀯𑀺𑀬. 𑀢𑀲𑁆𑀫𑀸 𑀢𑀸𑀲𑀼 𑀬𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸, 𑀦 𑀢𑀢𑁆𑀣 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸𑀤𑀬𑁄. 𑀬𑀢𑁆𑀣 𑀯𑀸 𑀧𑀦 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸, 𑀦 𑀢𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘𑁂𑀢𑀸𑀲𑀁 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑁄, 𑀏𑀯𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀦𑀫𑁆𑀧𑀺. 𑀧𑀜𑁆𑀜𑀸 𑀏𑀯 𑀳𑀺 𑀲𑀸 𑀓𑀺𑀘𑁆𑀘𑀯𑀲𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀲𑀸𑀬𑀁 𑀕𑁂𑀳𑀁 𑀧𑀯𑀺𑀝𑁆𑀞𑀁 𑀲𑀧𑁆𑀧𑀁 𑀅𑀚𑀧𑀤𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀫𑀸𑀦𑀲𑁆𑀲 𑀢𑀁 𑀣𑀼𑀲𑀓𑁄𑀝𑁆𑀞𑀓𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀲𑀧𑁆𑀧𑁄 𑀦𑀼 𑀔𑁄, 𑀦𑁄’’𑀢𑀺 𑀅𑀯𑀮𑁄𑀓𑁂𑀦𑁆𑀢𑀲𑁆𑀲 𑀲𑁄𑀯𑀢𑁆𑀢𑀺𑀓𑀢𑁆𑀢𑀬𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑁂𑀫𑀢𑀺𑀓𑀲𑁆𑀲 ‘‘𑀲𑀧𑁆𑀧𑁄, 𑀦 𑀲𑀧𑁆𑀧𑁄’’𑀢𑀺 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀢𑀸 𑀳𑁄𑀢𑀺, 𑀏𑀯𑀫𑁂𑀯 𑀬𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀮𑀓𑁆𑀔𑀡𑀢𑁆𑀢𑀬𑁂 𑀤𑀺𑀝𑁆𑀞𑁂 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀪𑀸𑀯𑀸𑀤𑀺𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸. 𑀬𑀣𑀸 𑀧𑀦 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀕𑀸𑀴𑁆𑀳𑀁 𑀲𑀧𑁆𑀧𑀁 𑀕𑀳𑁂𑀢𑁆𑀯𑀸 ‘‘𑀓𑀺𑀦𑁆𑀢𑀸𑀳𑀁 𑀇𑀫𑀁 𑀲𑀧𑁆𑀧𑀁 𑀅𑀯𑀺𑀳𑁂𑀞𑁂𑀦𑁆𑀢𑁄 𑀅𑀢𑁆𑀢𑀸𑀦𑀜𑁆𑀘 𑀇𑀫𑀺𑀦𑀸 𑀅𑀟𑀁𑀲𑀸𑀧𑁂𑀦𑁆𑀢𑁄 𑀫𑀼𑀜𑁆𑀘𑁂𑀬𑁆𑀬’’𑀦𑁆𑀢𑀺 𑀫𑀼𑀜𑁆𑀘𑀦𑀸𑀓𑀸𑀭𑀫𑁂𑀯 𑀧𑀭𑀺𑀬𑁂𑀲𑀢𑁄 𑀕𑀳𑀡𑁂 𑀫𑀚𑁆𑀛𑀢𑁆𑀢𑀢𑀸 𑀳𑁄𑀢𑀺, 𑀏𑀯𑀫𑁂𑀯 𑀬𑀸 𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀆𑀤𑀺𑀢𑁆𑀢𑁂 𑀯𑀺𑀬 𑀢𑀬𑁄 𑀪𑀯𑁂 𑀧𑀲𑁆𑀲𑀢𑁄 𑀲𑀗𑁆𑀔𑀸𑀭𑀕𑁆𑀕𑀳𑀡𑁂 ¶ 𑀫𑀚𑁆𑀛𑀢𑁆𑀢𑀢𑀸, 𑀅𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸. 𑀇𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀲𑀺𑀤𑁆𑀥𑀸𑀬 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀧𑀺 𑀲𑀺𑀤𑁆𑀥𑀸𑀯 𑀳𑁄𑀢𑀺. 𑀇𑀫𑀺𑀦𑀸 𑀧𑀦𑁂𑀲𑀸 𑀯𑀺𑀘𑀺𑀦𑀦𑀕𑀳𑀡𑁂𑀲𑀼 𑀫𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂𑀦 𑀓𑀺𑀘𑁆𑀘𑁂𑀦 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸. 𑀯𑀻𑀭𑀺𑀬𑀼𑀧𑁂𑀓𑁆𑀔𑀸 𑀧𑀦 𑀯𑁂𑀤𑀦𑀼𑀧𑁂𑀓𑁆𑀔𑀸 𑀘 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀯𑀲𑁂𑀲𑀸𑀳𑀺 𑀘 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸 𑀏𑀯𑀸𑀢𑀺.

𑀇𑀫𑀸𑀲𑀁 𑀧𑀦 𑀤𑀲𑀦𑁆𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀦𑀁 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁄 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀫𑀬𑀁 𑀤𑀲𑀯𑀺𑀥𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑁄𑀢𑀺 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀓𑀸𑀫𑀸𑀯𑀘𑀭𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀭𑀽𑀧𑀸𑀯𑀘𑀭𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀽𑀫𑀺𑀢𑁄. ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀔𑀻𑀡𑀸𑀲𑀯𑀲𑁆𑀲𑁂𑀯, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀢𑀺𑀡𑁆𑀡𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀧𑀼𑀕𑁆𑀕𑀮𑀢𑁄. ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀢𑁄. ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀙𑀴𑀸𑀭𑀫𑁆𑀫𑀡𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀥𑀫𑁆𑀫𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀢𑁄. 𑀔𑀦𑁆𑀥𑀲𑀗𑁆𑀕𑀳𑀏𑀓𑀓𑁆𑀔𑀡𑀓𑀼𑀲𑀮𑀢𑁆𑀢𑀺𑀓𑀲𑀗𑁆𑀔𑁂𑀧𑀯𑀲𑁂𑀦𑀸𑀢𑀺 ‘‘𑀯𑁂𑀤𑀦𑀼𑀧𑁂𑀓𑁆𑀔𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸, 𑀇𑀢𑀭𑀸 𑀦𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀔𑀦𑁆𑀥𑀲𑀗𑁆𑀕𑀳𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀩𑁄𑀚𑁆𑀛𑀗𑁆𑀕𑀛𑀸𑀦𑀧𑀸𑀭𑀺𑀲𑀼𑀤𑁆𑀥𑀺𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 ¶ 𑀘 𑀅𑀢𑁆𑀣𑀢𑁄 𑀏𑀓𑀸, 𑀢𑀲𑁆𑀫𑀸 𑀏𑀓𑀓𑁆𑀔𑀡𑁂 𑀢𑀸𑀲𑀼 𑀏𑀓𑀸𑀬 𑀲𑀢𑀺 𑀦 𑀇𑀢𑀭𑀸, 𑀢𑀣𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀯𑁂𑀤𑀦𑀸𑀯𑀻𑀭𑀺𑀬𑀼𑀧𑁂𑀓𑁆𑀔𑀸𑀦𑀁 𑀏𑀓𑀓𑁆𑀔𑀡𑁂 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀏𑀯𑀁 𑀏𑀓𑀓𑁆𑀔𑀡𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀅𑀩𑁆𑀬𑀸𑀓𑀢𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸, 𑀢𑀣𑀸 𑀲𑁂𑀲𑀸, 𑀯𑁂𑀤𑀦𑀼𑀧𑁂𑀓𑁆𑀔𑀸 𑀧𑀦 𑀲𑀺𑀬𑀸 𑀅𑀓𑀼𑀲𑀮𑀸𑀧𑀻𑀢𑀺 𑀏𑀯𑀁 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦. 𑀤𑀲𑀧𑁂𑀢𑀸 𑀲𑀗𑁆𑀔𑁂𑀧𑀢𑁄 𑀘𑀢𑁆𑀢𑀸𑀭𑁄𑀯 𑀥𑀫𑁆𑀫𑀸 𑀯𑀻𑀭𑀺𑀬𑀯𑁂𑀤𑀦𑀸𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀜𑀸𑀡𑀯𑀲𑁂𑀦𑀸𑀢𑀺 𑀏𑀯𑀁 𑀲𑀗𑁆𑀔𑁂𑀧𑀯𑀲𑁂𑀦.

𑀇𑀤𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀬 𑀛𑀸𑀦𑀼𑀧𑁂𑀓𑁆𑀔𑀸𑀬 𑀮𑀓𑁆𑀔𑀡𑀸𑀤𑀺𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀸𑀪𑁄𑀕𑀭𑀲𑀸𑀢𑀺 𑀧𑀡𑀻𑀢𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀯𑀦𑀢𑀺𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀬𑀸𑀧𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀺 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀁 𑀢𑀲𑁆𑀫𑀺𑀁 𑀲𑀼𑀔𑁂 𑀅𑀩𑁆𑀬𑀸𑀯𑀝𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀅𑀩𑁆𑀬𑀸𑀧𑀸𑀭𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀔𑁄𑀪𑀁 𑀉𑀧𑁆𑀧𑀺𑀮𑀯𑀜𑁆𑀘 𑀆𑀯𑀳𑀦𑁆𑀢𑁂𑀳𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑁆𑀢𑀸 𑀅𑀧𑀭𑀺𑀩𑁆𑀬𑀢𑁆𑀢𑀁 𑀢𑀢𑁆𑀣 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀓𑀺𑀘𑁆𑀘𑀁, 𑀢𑀤𑀪𑀸𑀯𑀢𑁄 𑀇𑀥 𑀧𑀭𑀺𑀩𑁆𑀬𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀧𑀭𑀺𑀩𑁆𑀬𑀢𑁆𑀢𑀁 𑀳𑀻’’𑀢𑀺𑀆𑀤𑀺.

𑀇𑀤𑀸𑀦𑀺 ¶ 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 ‘‘𑀯𑀼𑀘𑁆𑀘𑀢𑀻’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀲𑀭𑀢𑀻𑀢𑀺 𑀇𑀫𑀺𑀦𑀸 ‘‘𑀲𑀢𑁄’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀫𑀤𑁂𑀯 𑀧𑀚𑀸𑀦𑀸𑀢𑀺. 𑀧𑀼𑀕𑁆𑀕𑀮𑁂𑀦𑀸𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦. 𑀲𑀭𑀡𑀁 𑀘𑀺𑀦𑁆𑀢𑀦𑀁 𑀉𑀧𑀝𑁆𑀞𑀸𑀦𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀭𑀡𑀮𑀓𑁆𑀔𑀡𑀸. 𑀲𑀫𑁆𑀫𑀼𑀲𑁆𑀲𑀦𑀧𑀝𑀺𑀧𑀓𑁆𑀔𑁄 𑀅𑀲𑀫𑁆𑀫𑀼𑀲𑁆𑀲𑀦𑀁 𑀓𑀺𑀘𑁆𑀘𑀁 𑀏𑀢𑀺𑀲𑁆𑀲𑀸𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀭𑀲𑀸. 𑀓𑀺𑀮𑁂𑀲𑁂𑀳𑀺 𑀆𑀭𑀓𑁆𑀔𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀢𑀢𑁄 𑀯𑀸 𑀆𑀭𑀓𑁆𑀔𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀲𑀫𑁆𑀫𑀼𑀬𑁆𑀳𑀦𑀁 𑀲𑀫𑁆𑀫𑀤𑁂𑀯 𑀧𑀚𑀸𑀦𑀦𑀁, 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑁄 𑀯𑀸 𑀅𑀲𑀫𑁆𑀫𑁄𑀳𑁄 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀅𑀲𑀫𑁆𑀫𑁄𑀳𑀮𑀓𑁆𑀔𑀡𑀁. 𑀢𑀻𑀭𑀡𑀁 𑀓𑀺𑀘𑁆𑀘𑀲𑁆𑀲 𑀧𑀸𑀭𑀕𑀫𑀦𑀁. 𑀧𑀯𑀺𑀘𑀬𑁄 𑀯𑀻𑀫𑀁𑀲𑀸. 𑀓𑀸𑀫𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀁 𑀉𑀧𑀸𑀤𑀸𑀬 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺𑀧𑀺 𑀲𑀼𑀔𑀼𑀫𑀸𑀦𑁂𑀯, 𑀇𑀫𑀁 𑀧𑀦 𑀉𑀧𑀭𑀺𑀫𑀚𑁆𑀛𑀸𑀦𑀁 𑀉𑀧𑀸𑀤𑀸𑀬 ‘‘𑀑𑀴𑀸𑀭𑀺𑀓𑀢𑁆𑀢𑀸 𑀧𑀦 𑀢𑁂𑀲𑀁 𑀛𑀸𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀘 𑀑𑀴𑀸𑀭𑀺𑀓𑀢𑀸 𑀯𑀺𑀢𑀓𑁆𑀓𑀸𑀤𑀺𑀣𑀽𑀮𑀗𑁆𑀕𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 ‘‘𑀩𑀳𑀼𑀘𑁂𑀢𑀲𑀺𑀓𑀢𑀸𑀬𑀸’’𑀢𑀺 𑀘 𑀯𑀤𑀦𑁆𑀢𑀺. 𑀪𑀽𑀫𑀺𑀬𑀁 𑀯𑀺𑀬 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲 𑀪𑀽𑀫𑀺𑀬𑀁 𑀕𑀢𑀺 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀢𑀺 𑀲𑀼𑀔𑀸 𑀳𑁄𑀢𑀻𑀢𑀺 𑀢𑁂𑀲𑀼 𑀛𑀸𑀦𑁂𑀲𑀼 𑀕𑀢𑀺 𑀲𑀼𑀔𑀸 𑀳𑁄𑀢𑀺. 𑀅𑀩𑁆𑀬𑀢𑁆𑀢𑀁 𑀢𑀢𑁆𑀣 𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀦𑁆𑀢𑀺 ‘‘𑀇𑀤𑀁 𑀦𑀸𑀫 𑀤𑀼𑀓𑁆𑀓𑀭𑀁 𑀓𑀭𑀻𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀦 𑀲𑀼𑀔𑀼𑀫𑀢𑁆𑀢𑀸𑀢𑀺 𑀅𑀬𑀫𑀢𑁆𑀣𑁄 𑀓𑀸𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀧𑀺 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀅𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁂𑀲𑀼 𑀧𑀻𑀢𑀺𑀲𑀼𑀔𑁂𑀲𑀼 𑀧𑀻𑀢𑀺𑀲𑀗𑁆𑀔𑀸𑀢𑀲𑁆𑀲 𑀑𑀴𑀸𑀭𑀺𑀓𑀗𑁆𑀕𑀲𑁆𑀲 𑀧𑀳𑀸𑀦𑁂𑀦 𑀲𑀼𑀔𑀼𑀫𑀢𑀸𑀬 𑀇𑀥 𑀲𑀸𑀢𑀺𑀲𑀬𑁄 𑀲𑀢𑀺𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀲𑀲𑁆𑀲𑀸’’𑀢𑀺𑀆𑀤𑀺. 𑀥𑁂𑀦𑀼𑀁 𑀧𑀺𑀯𑀢𑀻𑀢𑀺 𑀥𑁂𑀦𑀼𑀧𑀕𑁄, 𑀥𑁂𑀦𑀼𑀬𑀸 𑀔𑀻𑀭𑀁 𑀧𑀺𑀯𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦𑀤𑁂𑀯 𑀧𑀻𑀢𑀺𑀁 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀳𑀸𑀦𑀪𑀸𑀕𑀺𑀬𑀁 𑀛𑀸𑀦𑀁 𑀲𑀺𑀬𑀸 ¶ , 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀲𑀫𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀺𑀬𑀸’’𑀢𑀺. 𑀇𑀤𑀜𑁆𑀘 𑀅𑀢𑀺𑀫𑀥𑀼𑀭𑀁 𑀲𑀼𑀔𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑁂 𑀲𑀼𑀔𑀁 𑀲𑀦𑁆𑀥𑀸𑀬𑀸𑀳, 𑀅𑀢𑀺𑀫𑀥𑀼𑀭𑀢𑀸 𑀘𑀲𑁆𑀲 𑀧𑀳𑀸𑀲𑁄𑀤𑀕𑁆𑀬𑀲𑀪𑀸𑀯𑀸𑀬 𑀧𑀻𑀢𑀺𑀬𑀸 𑀅𑀪𑀸𑀯𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀦𑁆𑀢𑀺 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 𑀧𑀤𑀤𑁆𑀯𑀬𑀁.

𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀦𑁆𑀢𑀺 𑀏𑀢𑁆𑀣 𑀓𑀣𑀫𑀸𑀪𑁄𑀕𑁂𑀦 𑀯𑀺𑀦𑀸 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺’’𑀦𑁆𑀢𑀺 𑀆𑀳𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀲𑀼𑀔𑀁 𑀯𑁂𑀤𑀬𑀸𑀫𑀻’’𑀢𑀺 𑀏𑀯𑀫𑀸𑀪𑁄𑀕𑁂 𑀅𑀲𑀢𑀺𑀧𑀺 𑀦𑀸𑀫𑀓𑀸𑀬𑁂𑀦 𑀘𑁂𑀢𑀲𑀺𑀓𑀲𑀼𑀔𑀁, 𑀓𑀸𑀬𑀺𑀓𑀲𑀼𑀔𑀳𑁂𑀢𑀼𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀦 ¶ 𑀓𑀸𑀬𑀺𑀓𑀲𑀼𑀔𑀜𑁆𑀘 𑀛𑀸𑀦𑀲𑀫𑀗𑁆𑀕𑀻 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀲𑁆𑀲𑀸𑀢𑀺 𑀛𑀸𑀦𑀲𑀫𑀗𑁆𑀕𑀺𑀦𑁄. 𑀬𑀁 𑀯𑀸 𑀢𑀦𑁆𑀢𑀺 𑀬𑀁 𑀯𑀸 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁. 𑀢𑀁𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀢𑀢𑁄 𑀲𑀫𑀼𑀝𑁆𑀞𑀺𑀢𑁂𑀦 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀅𑀲𑁆𑀲 𑀛𑀸𑀦𑀲𑀫𑀗𑁆𑀕𑀺𑀦𑁄 𑀭𑀽𑀧𑀓𑀸𑀬𑁄 𑀬𑀲𑁆𑀫𑀸 𑀨𑀼𑀝𑁄, 𑀢𑀲𑁆𑀫𑀸 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀲𑁆𑀲𑀸𑀢𑀺 𑀭𑀽𑀧𑀓𑀸𑀬𑀲𑁆𑀲. 𑀨𑀼𑀝𑀢𑁆𑀢𑀸𑀢𑀺 𑀩𑁆𑀬𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀉𑀤𑀓𑁂𑀦 𑀨𑀼𑀝𑁆𑀞𑀲𑀭𑀻𑀭𑀲𑁆𑀲 𑀢𑀸𑀤𑀺𑀲𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀝𑁆𑀞𑁂 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀏𑀢𑁂𑀳𑀺 𑀛𑀸𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀳𑀺 𑀭𑀽𑀧𑁂𑀳𑀺 𑀨𑀼𑀝𑁆𑀞𑀲𑀭𑀻𑀭𑀲𑁆𑀲. 𑀛𑀸𑀦𑀸 𑀯𑀼𑀝𑁆𑀞𑀺𑀢𑁄𑀧𑀻𑀢𑀺 𑀛𑀸𑀦𑀫𑁆𑀳𑀸 𑀯𑀼𑀝𑁆𑀞𑀺𑀢𑁄𑀧𑀺. 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀺 𑀅𑀯𑀲𑁂𑀲𑀢𑀺𑀲𑀫𑀼𑀝𑁆𑀞𑀺𑀢𑀭𑀽𑀧𑀲𑀗𑁆𑀖𑀝𑁆𑀝𑀦𑁂𑀦 𑀉𑀧𑁆𑀧𑀦𑁆𑀦𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀓𑀸𑀬𑀺𑀓𑀁 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬. 𑀏𑀢𑀫𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀘𑁂𑀢𑀲𑀺𑀓𑀓𑀸𑀬𑀺𑀓𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀁.

𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀁𑀛𑀸𑀦𑀳𑁂𑀢𑀽’’𑀢𑀺. 𑀆𑀘𑀺𑀓𑁆𑀔𑀦𑁆𑀢𑀻𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀓𑀺𑀢𑁆𑀢𑀦𑀢𑁆𑀣𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀲𑀁𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀓𑀺𑀦𑁆𑀢𑀻𑀢𑀺 𑀧𑀲𑀁𑀲𑀦𑀸𑀓𑀸𑀭𑀧𑀼𑀘𑁆𑀙𑀸. 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀢𑀺 𑀲𑀼𑀔𑀲𑁆𑀲 𑀧𑀭𑀫𑀁 𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑁂. 𑀲𑀼𑀔𑀸𑀪𑀺𑀲𑀗𑁆𑀕𑁂𑀦𑀸𑀢𑀺 𑀲𑀼𑀔𑀲𑁆𑀫𑀺𑀁 𑀆𑀮𑀬𑁂𑀦. 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀲𑀫𑁆𑀧𑀚𑀜𑁆𑀜𑀫𑁆𑀧𑀺 𑀕𑀳𑀺𑀢𑀁 𑀳𑁄𑀢𑀻𑀢𑀺 𑀇𑀥 𑀧𑀸𑀴𑀺𑀬𑀁 𑀲𑀢𑀺𑀬𑀸 𑀏𑀯 𑀕𑀳𑀺𑀢𑀢𑁆𑀢𑀸 𑀏𑀯𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀲𑀢𑀺𑀫𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀲𑀫𑁆𑀧𑀚𑀸𑀦𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀯𑀸. 𑀅𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑁆𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀁. 𑀛𑀸𑀦𑀓𑁆𑀔𑀡𑁂 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘𑁂𑀢𑀲𑀺𑀓𑀲𑀼𑀔𑀫𑁂𑀯 𑀮𑀩𑁆𑀪𑀢𑀻𑀢𑀺 ‘‘𑀲𑀼𑀔𑀁 𑀦𑀸𑀫𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀦𑁆𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑁄 𑀢𑀢𑀺𑀬𑀦𑁆𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸

‘‘𑀧𑀼𑀩𑁆𑀩𑁂𑀯𑀸’’𑀢𑀺 ¶ 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀤𑀸 𑀧𑀦 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀻’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀆𑀳 ‘‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀉𑀧𑀘𑀸𑀭𑀓𑁆𑀔𑀡𑁂’’𑀢𑀺. 𑀏𑀯𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀳𑀸𑀦𑀓𑁆𑀓𑀫𑁂𑀦 𑀅𑀯𑀼𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀧𑀳𑀸𑀦𑀓𑁆𑀓𑀫𑁄 𑀦𑀸𑀫 𑀧𑀳𑀸𑀬𑀓𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀝𑀺𑀧𑀸𑀝𑀺. 𑀢𑁂𑀦 𑀧𑀦 𑀯𑀼𑀘𑁆𑀘𑀫𑀸𑀦𑁂 ‘‘𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀓𑀲𑁆𑀫𑀸 𑀇𑀢𑁄 𑀅𑀜𑁆𑀜𑀣𑀸 𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺 ¶ . 𑀉𑀤𑁆𑀤𑁂𑀲𑀓𑁆𑀓𑀫𑁂𑀦𑀸𑀢𑀺 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀉𑀤𑁆𑀤𑁂𑀲𑀓𑁆𑀓𑀫𑁂𑀦.

𑀅𑀣 𑀓𑀲𑁆𑀫𑀸 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀦𑁆𑀦𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀓𑀢𑁆𑀣 𑀘 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑁄𑀥𑀝𑁆𑀞𑀸𑀦𑀁 𑀦𑀺𑀭𑁄𑀥𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀢𑁂𑀦 𑀓𑀢𑁆𑀣𑀸𑀢𑀺 𑀧𑀼𑀘𑁆𑀙𑀸𑀬 𑀏𑀢𑁆𑀣𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀛𑀸𑀦𑀸𑀦𑀼𑀪𑀸𑀯𑀦𑀺𑀫𑀺𑀢𑁆𑀢𑀜𑁆𑀳𑀺 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀲𑀼𑀝𑁆𑀞𑀼 𑀧𑀳𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑁂𑀦 𑀯𑀽𑀧𑀲𑀫𑁄. 𑀦𑀺𑀭𑁄𑀥𑁄 𑀧𑀳𑀸𑀦𑀫𑀢𑁆𑀢𑀁. 𑀦𑀸𑀦𑀸𑀯𑀚𑁆𑀚𑀦𑁂𑀢𑀺 𑀬𑁂𑀦 𑀆𑀯𑀚𑁆𑀚𑀦𑁂𑀦 𑀅𑀧𑁆𑀧𑀦𑀸𑀯𑀻𑀣𑀺, 𑀢𑀢𑁄 𑀪𑀺𑀦𑁆𑀦𑀸𑀯𑀚𑁆𑀚𑀦𑁂 𑀅𑀦𑁂𑀓𑀸𑀯𑀚𑁆𑀚𑀦𑁂 𑀯𑀸. 𑀅𑀧𑁆𑀧𑀦𑀸𑀯𑀻𑀣𑀺𑀬𑀜𑁆𑀳𑀺 𑀉𑀧𑀘𑀸𑀭𑁄 𑀏𑀓𑀸𑀯𑀚𑁆𑀚𑀦𑁄, 𑀇𑀢𑀭𑁄 𑀅𑀦𑁂𑀓𑀸𑀯𑀚𑁆𑀚𑀦𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀦𑀢𑁄. 𑀯𑀺𑀲𑀫𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑁄 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁄. 𑀧𑀻𑀢𑀺𑀨𑀭𑀡𑁂𑀦𑀸𑀢𑀺 𑀧𑀻𑀢𑀺𑀬𑀸 𑀨𑀭𑀡𑀭𑀲𑀢𑁆𑀢𑀸 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀯𑀸 𑀧𑀡𑀻𑀢𑀭𑀽𑀧𑀸𑀦𑀁 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺. 𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀲𑀭𑀻𑀭𑀲𑁆𑀲 𑀲𑀼𑀔𑁄𑀓𑁆𑀓𑀦𑁆𑀢𑀓𑀸𑀬𑀢𑁆𑀢𑀸 𑀓𑀼𑀢𑁄 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑀸𑀤𑀺𑀦𑀸𑀢𑀺 𑀆𑀳 ‘‘𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸’’𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑁄 ‘‘𑀧𑀳𑀻𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀧𑀳𑀻𑀦𑀲𑁆𑀲𑀧𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀢𑀺 𑀇𑀤𑀜𑁆𑀘 ‘‘𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁. ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲 𑀫𑀬𑁆𑀳𑀁 𑀅𑀢𑀺𑀘𑀺𑀭𑀁 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀓𑀸𑀬𑁄𑀧𑀺 𑀓𑀺𑀮𑀫𑀺, 𑀘𑀺𑀢𑁆𑀢𑀫𑁆𑀧𑀺 𑀊𑀳𑀜𑁆𑀜𑀻’’𑀢𑀺 𑀯𑀘𑀦𑀢𑁄 𑀓𑀸𑀬𑀘𑀺𑀢𑁆𑀢𑀔𑁂𑀤𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂𑀢𑀺 𑀏𑀢𑁆𑀣 ‘‘𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀅𑀲𑁆𑀲 𑀧𑀳𑀻𑀦𑀲𑁆𑀲𑀧𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁆𑀧𑀢𑁆𑀢𑀺 𑀪𑀯𑁂𑀬𑁆𑀬.

𑀏𑀢𑁆𑀣 𑀘 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑁂𑀦 𑀛𑀸𑀦𑀮𑀸𑀪𑀻𑀦𑀫𑁆𑀧𑀺 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑁂𑀦 𑀘 𑀅𑀦𑀻𑀯𑀭𑀡𑀲𑀪𑀸𑀯𑁄 𑀮𑁄𑀪𑁄 𑀯𑀺𑀬 𑀤𑁄𑀲𑁄𑀧𑀺 𑀅𑀢𑁆𑀣𑀻𑀢𑀺 ¶ 𑀤𑀻𑀧𑁂𑀢𑀺. 𑀦 𑀳𑀺 𑀤𑁄𑀲𑁂𑀦 𑀯𑀺𑀦𑀸 𑀤𑁄𑀫𑀦𑀲𑁆𑀲𑀁 𑀧𑀯𑀢𑁆𑀢𑀢𑀺, 𑀦 𑀘𑁂𑀢𑁆𑀣 𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀢𑀢𑁆𑀣 𑀧𑀭𑀺𑀳𑀻𑀦𑀚𑁆𑀛𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀤𑁄𑀫𑀦𑀲𑁆𑀲𑀁 𑀤𑀲𑁆𑀲𑀺𑀢𑀁, 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀅𑀲𑀫𑁆𑀪𑀯𑀢𑁄 𑀛𑀸𑀦𑀮𑀸𑀪𑀻𑀦𑀁 𑀲𑀩𑁆𑀩𑀲𑁄 𑀤𑁄𑀫𑀦𑀲𑁆𑀲𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀘 𑀦 𑀲𑀓𑁆𑀓𑀸 ¶ 𑀯𑀢𑁆𑀢𑀼𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀧𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀦 𑀳𑁂𑀯 𑀔𑁄 𑀲𑁄 𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀅𑀳𑁄𑀲𑀻’’𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀅𑀦𑀻𑀯𑀭𑀡𑀲𑀪𑀸𑀯𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀲𑀺𑀬𑀸, 𑀭𑀽𑀧𑀸𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦 𑀘 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀦𑁆𑀢𑀺𑀆𑀤𑀻𑀲𑀼 𑀩𑁆𑀬𑀸𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀸𑀦𑀺 𑀅𑀦𑀼𑀤𑁆𑀥𑀝𑀸𑀦𑀺, 𑀦 𑀘𑁂𑀢𑁆𑀣 𑀅𑀦𑀻𑀯𑀭𑀡𑀢𑀸𑀧𑀭𑀺𑀬𑀸𑀬𑁄 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀫𑁆𑀧𑀺 𑀅𑀦𑀻𑀯𑀭𑀡𑀸𑀦𑀁𑀬𑁂𑀯 𑀦𑀻𑀯𑀭𑀡𑀲𑀤𑀺𑀲𑀢𑀸𑀬 𑀦𑀻𑀯𑀭𑀡𑀧𑀭𑀺𑀬𑀸𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀧𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺, 𑀢𑀫𑁆𑀧𑀺 𑀅𑀓𑀸𑀭𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀘 𑀤𑁄𑀫𑀦𑀲𑁆𑀲𑁂𑀦 𑀛𑀸𑀦𑀢𑁄 𑀧𑀭𑀺𑀳𑀸𑀬𑀦𑀢𑁄. 𑀮𑀳𑀼𑀓𑁂𑀦 𑀧𑀦 𑀧𑀘𑁆𑀘𑀬𑁂𑀦 𑀧𑀭𑀺𑀳𑀻𑀦𑀁 𑀢𑀸𑀤𑀺𑀲𑀸 𑀦𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀇𑀤𑀁 𑀧𑀦 𑀧𑀭𑀺𑀓𑀧𑁆𑀧𑀦𑀯𑀘𑀦𑀁 𑀉𑀧𑀘𑀸𑀭𑀓𑁆𑀔𑀡𑁂 𑀤𑁄𑀫𑀦𑀲𑁆𑀲𑀲𑁆𑀲 𑀅𑀧𑁆𑀧𑀳𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬’’𑀦𑁆𑀢𑀺. 𑀬𑀤𑀺 𑀧𑀦 𑀢𑀤𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀞𑀫𑀚𑁆𑀛𑀸𑀦𑀫𑁆𑀧𑀺𑀲𑁆𑀲 𑀧𑀭𑀺𑀳𑀻𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀳𑀻𑀦𑀫𑁆𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀻𑀢𑀺 𑀯𑀺𑀬 𑀦 𑀤𑀽𑀭𑁂𑀢𑀺 𑀓𑀢𑁆𑀯𑀸 ‘‘𑀆𑀲𑀦𑁆𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀯𑀚𑁆𑀚𑀦𑀽𑀧𑀘𑀸𑀭𑁂 𑀧𑀳𑀻𑀦𑀫𑁆𑀧𑀺 𑀧𑀳𑀸𑀦𑀗𑁆𑀕𑀁 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀸𑀤𑀺𑀲𑀸𑀬 𑀆𑀲𑁂𑀯𑀦𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀬𑀣𑀸 𑀫𑀕𑁆𑀕𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀲𑀤𑀺𑀲𑀸𑀦𑀼𑀧𑀲𑁆𑀲𑀦𑀸𑀯 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀧𑁆𑀧𑀦𑀸𑀯𑀸𑀭𑀢𑁄 𑀧𑀼𑀩𑁆𑀩𑁂 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀸𑀳𑀭𑀻𑀢𑀺 𑀲𑀫𑀸𑀦𑁂𑀲𑀺, 𑀲𑀗𑁆𑀕𑀳𑁂𑀢𑁆𑀯𑀸 𑀅𑀪𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀼𑀔𑀼𑀫𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀅𑀯𑀺𑀪𑀽𑀢𑀢𑀸𑀬 𑀲𑀼𑀔𑀼𑀫𑀸, 𑀢𑀢𑁄 𑀏𑀯 𑀅𑀦𑀼𑀫𑀺𑀦𑀺𑀢𑀩𑁆𑀩𑀲𑀪𑀸𑀯𑀢𑁆𑀢𑀸 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀸. 𑀤𑀼𑀝𑁆𑀞𑀲𑁆𑀲𑀸𑀢𑀺 𑀤𑀼𑀝𑁆𑀞𑀧𑀬𑁄𑀕𑀲𑁆𑀲, 𑀤𑀼𑀤𑁆𑀤𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀓𑁆𑀓𑀸 𑀳𑁄𑀢𑀺 𑀏𑀲𑀸 𑀕𑀸𑀳𑀬𑀺𑀢𑀼𑀦𑁆𑀢𑀺 𑀅𑀜𑁆𑀜𑀸𑀧𑁄𑀳𑀦𑀦𑀬𑁂𑀦 𑀲𑀓𑁆𑀓𑀸 𑀕𑀸𑀳𑀬𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀇𑀤𑀫𑁂𑀯 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀤𑀬𑁄 𑀳𑀺 𑀢𑀲𑁆𑀲𑀸 𑀧𑀘𑁆𑀘𑀬𑀸’’𑀢𑀺. 𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀤𑀬𑁄𑀢𑀺 𑀘 𑀲𑁄𑀧𑀘𑀸𑀭𑀸 𑀧𑀞𑀫𑀚𑁆𑀛𑀸𑀦𑀸𑀤𑀬𑁄𑀯𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸. 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺 (𑀫. 𑀦𑀺. 𑁩.𑁧𑁪𑁭; 𑀲𑀁. 𑀦𑀺. 𑁫.𑁧𑁦𑁨𑁧) 𑀯𑀼𑀢𑁆𑀢𑀢𑁆𑀢𑀸. 𑀏𑀢𑀸𑀢𑀺 𑀲𑀼𑀔𑀸𑀤𑀬𑁄 𑀯𑁂𑀤𑀦𑀸. 𑀲𑀼𑀔𑀁 ¶ 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀲𑀦𑀕𑀦𑁆𑀥𑀸𑀮𑁂𑀧𑀦𑀧𑀼𑀧𑁆𑀨𑀸𑀪𑀭𑀡𑀲𑀫𑀸𑀮𑁂𑀧𑀦𑀸𑀤𑀺𑀦𑀺𑀩𑁆𑀩𑀢𑁆𑀢𑀁 𑀓𑀸𑀬𑀺𑀓𑀲𑀼𑀔𑀁 ¶ 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄. ‘‘𑀲𑀼𑀔𑀸𑀬 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔 𑀯𑁂𑀤𑀦𑀸𑀬, 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀯𑀘𑀦𑀢𑁄 𑀆𑀳 ‘‘𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲 𑀧𑀘𑁆𑀘𑀬𑁄’’𑀢𑀺. ‘‘𑀤𑀼𑀓𑁆𑀔𑀸𑀬 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀢𑁄 𑀯𑀼𑀢𑁆𑀢𑀁 ‘‘𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲 𑀧𑀘𑁆𑀘𑀬𑁄’’𑀢𑀺. 𑀲𑀼𑀔𑀸𑀤𑀺𑀖𑀸𑀢𑁂𑀦𑀸𑀢𑀺 𑀲𑀼𑀔𑀸𑀤𑀻𑀦𑀁 𑀧𑀳𑀸𑀦𑁂𑀦.

𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀏𑀢𑁆𑀣 𑀦 𑀤𑀼𑀓𑁆𑀔𑀦𑁆𑀢𑀺 𑀅𑀤𑀼𑀓𑁆𑀔𑀁, 𑀤𑀼𑀓𑁆𑀔𑀯𑀺𑀤𑀽𑀭𑀁. 𑀬𑀲𑁆𑀫𑀸 𑀢𑀢𑁆𑀣 𑀤𑀼𑀓𑁆𑀔𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀸𑀪𑀸𑀯𑁂𑀦𑀸’’𑀢𑀺. 𑀅𑀲𑀼𑀔𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦𑀸𑀢𑀺 𑀤𑀼𑀓𑁆𑀔𑀲𑀼𑀔𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦. 𑀧𑀝𑀺𑀧𑀓𑁆𑀔𑀪𑀽𑀢𑀦𑁆𑀢𑀺 𑀇𑀤𑀁 𑀇𑀥 𑀢𑀢𑀺𑀬𑀯𑁂𑀤𑀦𑀸𑀬 𑀤𑀼𑀓𑁆𑀔𑀸𑀤𑀻𑀦𑀁 𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀺𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀲𑁆𑀲 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀲𑁆𑀲, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀁 𑀯𑀸 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀅𑀦𑀼𑀪𑀯𑀦𑀮𑀓𑁆𑀔𑀡𑀸. 𑀢𑀢𑁄 𑀏𑀯 𑀫𑀚𑁆𑀛𑀢𑁆𑀢𑀭𑀲𑀸. 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀦 𑀯𑀺𑀪𑀽𑀢𑀸𑀓𑀸𑀭𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀫𑀺𑀕𑀕𑀢𑀫𑀕𑁆𑀕𑁄 𑀯𑀺𑀬 𑀢𑁂𑀳𑀺 𑀅𑀦𑀼𑀫𑀸𑀢𑀩𑁆𑀩𑀸𑀯𑀺𑀪𑀽𑀢𑀸𑀓𑀸𑀭𑁄𑀧𑀝𑁆𑀞𑀸𑀦𑀸. 𑀲𑀼𑀔𑀦𑀺𑀭𑁄𑀥𑁄 𑀦𑀸𑀫 𑀇𑀥 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁄, 𑀲𑁄 𑀧𑀤𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀲𑀼𑀔𑀦𑀺𑀭𑁄𑀥𑀧𑀤𑀝𑁆𑀞𑀸𑀦𑀸. 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑁂𑀢𑀁 𑀲𑀫𑀸𑀲𑀧𑀤𑀦𑁆𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺’’𑀦𑁆𑀢𑀺. 𑀲𑀩𑁆𑀩𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑀭𑀺𑀲𑀼𑀤𑁆𑀥𑀸𑀬 𑀧𑀘𑁆𑀘𑀦𑀻𑀓𑀲𑀫𑀦𑁂𑀧𑀺 𑀅𑀩𑁆𑀬𑀸𑀯𑀝𑀸𑀬 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀢𑀺 𑀲𑀫𑁆𑀧𑀳𑀁𑀲𑀦𑀧𑀜𑁆𑀜𑀸 𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑀸 𑀲𑀼𑀯𑀺𑀲𑀤𑀸 𑀘 𑀳𑁄𑀢𑀻𑀢𑀺 𑀆𑀳 ‘‘𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀲𑀸 𑀉𑀧𑁂𑀓𑁆𑀔𑀸𑀬 𑀓𑀢𑀸 𑀦 𑀅𑀜𑁆𑀜𑁂𑀦𑀸’’𑀢𑀺. 𑀬𑀤𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀇𑀥 ‘‘𑀉𑀧𑁂𑀓𑁆𑀔𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀓𑀣𑀁 𑀲𑀢𑀺𑀬𑁂𑀯 𑀧𑀸𑀭𑀺𑀲𑀼𑀤𑁆𑀥𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀲𑀢𑀺𑀲𑀻𑀲𑁂𑀦𑀸𑀢𑀺 𑀲𑀢𑀺𑀁 𑀉𑀢𑁆𑀢𑀫𑀗𑁆𑀕𑀁 𑀓𑀢𑁆𑀯𑀸, 𑀧𑀥𑀸𑀦𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑀧𑀺 𑀓𑀲𑁆𑀫𑀸 𑀇𑀥𑁂𑀯 𑀲𑀢𑀺 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸 𑀢𑀻𑀲𑀼 𑀛𑀸𑀦𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀧𑀘𑁆𑀘𑀦𑀻𑀓𑀸𑀪𑀺𑀪𑀯𑀦𑀢𑁄 𑀲𑀳𑀸𑀬𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀘 𑀅𑀧𑀸𑀭𑀺𑀲𑀼𑀤𑁆𑀥𑀺, 𑀢𑀣𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀤𑀪𑀸𑀯𑀢𑁄 𑀇𑀥 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀫𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸𑀢𑀺 𑀲𑀽𑀭𑀺𑀬𑀧𑁆𑀧𑀪𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑀢𑁆𑀢𑀸. 𑀅𑀢𑀺𑀓𑁆𑀔𑀢𑀸𑀬 𑀘𑀦𑁆𑀤𑀮𑁂𑀔𑀸 ¶ 𑀯𑀺𑀬 𑀭𑀢𑁆𑀢𑀺𑀧𑀺 𑀲𑁄𑀫𑁆𑀫𑀲𑀪𑀸𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀫𑁂𑀯 𑀘 𑀘𑀦𑁆𑀤𑀮𑁂𑀔𑀸 𑀲𑀫𑀼𑀚𑁆𑀚𑀮𑀢𑀻𑀢𑀺 𑀲𑀸 𑀢𑀲𑁆𑀲𑀸 𑀲𑀗𑁆𑀕𑀬𑁆𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀫𑁆𑀫𑀪𑀸𑀯𑁂𑀦 𑀘 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸 𑀲𑀪𑀸𑀕𑀸𑀬 𑀭𑀢𑁆𑀢𑀺𑀬𑀸’’𑀢𑀺 𑀆𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸

𑁧𑁨. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 ¶ 𑀧𑀯𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀅𑀭𑀽𑀧𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀗𑁆𑀕𑀳𑀫𑁂𑀯𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺. 𑀬𑀼𑀢𑁆𑀢𑀁 𑀢𑀸𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀪𑀯𑁄𑀓𑁆𑀓𑀫𑀦𑀢𑁆𑀣𑀢𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑀸𑀧𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀢𑁂𑀲𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺 𑀯𑀘𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑀸 𑀧𑀦 𑀦𑀺𑀭𑁄𑀥𑀧𑀸𑀤𑀓𑀢𑀸 𑀘 𑀘𑀢𑀼𑀢𑁆𑀣𑀲𑁆𑀲𑁂𑀯 𑀛𑀸𑀦𑀲𑁆𑀲 𑀆𑀯𑁂𑀡𑀺𑀓𑀸, 𑀲𑀸 𑀓𑀣𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸𑀢𑀺? 𑀧𑀭𑀫𑁆𑀧𑀭𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀤𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀫𑁆𑀧𑀺 𑀳𑀺 𑀧𑀤𑀝𑁆𑀞𑀸𑀦𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀬𑀣𑀸 ‘‘𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀬𑁄𑀚𑀦𑀦𑀺𑀤𑁆𑀤𑁂𑀲𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀻𑀢𑀺 𑀇𑀢𑁆𑀢𑀲𑀫𑀸𑀥𑀢𑁆𑀣𑀸𑀦𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀻𑀲𑁂𑀦 𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀻𑀢𑀺 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀸𑀦𑀺. 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀢𑁄 𑀆𑀳 ‘‘𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸’’𑀢𑀺. 𑀓𑀲𑁆𑀫𑀸 𑀧𑀦 𑀲𑀢𑁆𑀢𑀸𑀳𑀫𑁂𑀯 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺? 𑀢𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀓𑀭𑀡𑀢𑁄, 𑀢𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀉𑀧𑀸𑀤𑀺𑀦𑁆𑀦𑀓𑀧𑁆𑀧𑀯𑀢𑁆𑀢𑀲𑁆𑀲 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀸𑀳𑀸𑀭𑀲𑁆𑀲 𑀲𑀢𑁆𑀢𑀸𑀳𑀫𑁂𑀯 𑀬𑀸𑀧𑀦𑀢𑁄.

𑀓𑀸 (𑀯𑀺𑀲𑀼𑀤𑁆𑀥𑀺. 𑁨.𑁮𑁬𑁭-𑁮𑁬𑁮) 𑀧𑀦𑀸𑀬𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫, 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 𑀓𑀸 𑀧𑀦𑀸𑀬𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫𑀸𑀢𑀺 𑀬𑀸 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺 ¶ , 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀘 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁄 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀅𑀦𑀸𑀕𑀸𑀫𑀺𑀦𑁄 𑀔𑀻𑀡𑀸𑀲𑀯𑀸 𑀘 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑀢𑁆𑀣 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂. 𑀓𑀲𑁆𑀫𑀸? 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀲𑀓𑁆𑀓𑀸 𑀢𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀓𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀤𑀺𑀝𑁆𑀞𑀥𑀫𑁆𑀫𑁂 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑀬𑀢𑁄 𑀏𑀯𑀫𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺. 𑀬𑁄 𑀳𑀺 𑀲𑀫𑀣𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄𑀧𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀢𑀺, 𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀉𑀪𑀬𑀯𑀲𑁂𑀦𑁂𑀯 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑁂𑀢𑀺, 𑀲𑁄 𑀢𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀅𑀬𑀁 ¶ 𑀧𑀦 𑀯𑀺𑀢𑁆𑀣𑀸𑀭𑁄 𑁋 𑀇𑀥 𑀪𑀺𑀓𑁆𑀔𑀼 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺. 𑀯𑀺𑀧𑀲𑁆𑀲𑀦𑀸 𑀘 𑀧𑀦𑁂𑀲𑀸 𑀢𑀺𑀯𑀺𑀥𑀸 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀡𑁆𑀳𑀦𑀓𑀯𑀺𑀧𑀲𑁆𑀲𑀦𑀸 𑀫𑀦𑁆𑀤𑀸 𑀯𑀸 𑀢𑀺𑀓𑁆𑀔𑀸 𑀯𑀸 𑀫𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺𑀬𑁂𑀯. 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀢𑀺𑀓𑁆𑀔𑀸𑀯 𑀯𑀝𑁆𑀝𑀢𑀺 𑀫𑀕𑁆𑀕𑀪𑀸𑀯𑀦𑀸𑀲𑀤𑀺𑀲𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸 𑀧𑀦 𑀦𑀸𑀢𑀺𑀫𑀦𑁆𑀤𑀦𑀸𑀢𑀺𑀢𑀺𑀓𑁆𑀔𑀸 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀏𑀲 𑀦𑀸𑀢𑀺𑀫𑀦𑁆𑀤𑀸𑀬 𑀦𑀸𑀢𑀺𑀢𑀺𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑁂 𑀲𑀗𑁆𑀔𑀸𑀭𑁂 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀤𑀼𑀢𑀺𑀬𑀚𑁆𑀛𑀸𑀦𑀁…𑀧𑁂… 𑀢𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀅𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁 𑀲𑀗𑁆𑀖𑀧𑀢𑀺𑀫𑀸𑀦𑀦𑀁 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀦𑁆𑀢𑀺.

𑀢𑀢𑁆𑀣 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀦𑁆𑀢𑀺 𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀦 𑀳𑁄𑀢𑀺, 𑀦𑀸𑀦𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀫𑀜𑁆𑀘𑀧𑀻𑀞𑀁 𑀯𑀸 𑀦𑀺𑀯𑀸𑀲𑀕𑁂𑀳𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀢𑀁 𑀬𑀣𑀸 𑀦 𑀯𑀺𑀓𑀼𑀧𑁆𑀧𑀢𑀺, 𑀅𑀕𑁆𑀕𑀺𑀉𑀤𑀓𑀯𑀸𑀢𑀘𑁄𑀭𑀉𑀦𑁆𑀤𑀽𑀭𑀸𑀤𑀻𑀦𑀁 𑀯𑀲𑁂𑀦 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀁 ¶ ‘‘𑀇𑀤𑀜𑁆𑀘𑀺𑀤𑀜𑁆𑀘 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀫𑀸 𑀅𑀕𑁆𑀕𑀺𑀦𑀸 𑀛𑀸𑀬𑀢𑀼, 𑀫𑀸 𑀉𑀤𑀓𑁂𑀦 𑀯𑀼𑀬𑁆𑀳𑀢𑀼, 𑀫𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀼, 𑀫𑀸 𑀘𑁄𑀭𑁂𑀳𑀺 𑀳𑀭𑀻𑀬𑀢𑀼, 𑀫𑀸 𑀉𑀦𑁆𑀤𑀽𑀭𑀸𑀤𑀻𑀳𑀺 𑀔𑀚𑁆𑀚𑀢𑀽’’𑀢𑀺. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂 𑀢𑀁 𑀲𑀢𑁆𑀢𑀸𑀳𑀁 𑀢𑀲𑁆𑀲 𑀦 𑀓𑁄𑀘𑀺 𑀧𑀭𑀺𑀲𑁆𑀲𑀬𑁄 𑀳𑁄𑀢𑀺, 𑀅𑀦𑀥𑀺𑀝𑁆𑀞𑀳𑀢𑁄 𑀧𑀦 𑀅𑀕𑁆𑀕𑀺𑀆𑀤𑀻𑀳𑀺 𑀦𑀲𑁆𑀲𑀢𑀺, 𑀇𑀤𑀁 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁 𑀦𑀸𑀫. 𑀬𑀁 𑀧𑀦 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀁 𑀯𑀸, 𑀢𑀢𑁆𑀣 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀫𑀸𑀧𑀢𑁆𑀢𑀺𑀬𑁂𑀯 𑀦𑀁 𑀭𑀓𑁆𑀔𑀢𑀺.

𑀲𑀗𑁆𑀖𑀧𑀢𑀺𑀫𑀸𑀦𑀦𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀢𑀺𑀫𑀸𑀦𑀦𑀁 𑀉𑀤𑀺𑀓𑁆𑀔𑀦𑀁, 𑀬𑀸𑀯 𑀲𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀢𑀸𑀯 𑀲𑀗𑁆𑀖𑀓𑀫𑁆𑀫𑀲𑁆𑀲 𑀅𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀢𑀺𑀫𑀸𑀦𑀦𑀁 𑀏𑀢𑀲𑁆𑀲 𑀦 𑀧𑀼𑀩𑁆𑀩𑀓𑀺𑀘𑁆𑀘𑀁, 𑀧𑀢𑀺𑀫𑀸𑀦𑀦𑀸𑀯𑀚𑁆𑀚𑀦𑀁 𑀧𑀦 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀢𑀲𑁆𑀫𑀸 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁 ‘‘𑀲𑀘𑁂 𑀫𑀬𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀲𑀗𑁆𑀖𑁄 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀸𑀯 𑀫𑀁 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺, 𑀢𑀸𑀯𑀤𑁂𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀓𑀢𑁆𑀯𑀸 𑀲𑀫𑀸𑀧𑀦𑁆𑀦𑁄 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀼𑀝𑁆𑀞𑀳𑀢𑀺𑀬𑁂𑀯. 𑀬𑁄 𑀧𑀦 𑀏𑀯𑀁 𑀦 𑀓𑀭𑁄𑀢𑀺, 𑀲𑀗𑁆𑀖𑁄 𑀘𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑀺 ‘‘𑀢𑀁 𑀧𑀓𑁆𑀓𑁄𑀲𑀸𑀳𑀻’’𑀢𑀺, 𑀅𑀣𑀲𑁆𑀲 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀗𑁆𑀖𑁄 𑀢𑀁 𑀆𑀯𑀼𑀲𑁄 𑀧𑀢𑀺𑀫𑀸𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀯𑀁 𑀕𑀭𑀼𑀓𑀸 𑀳𑀺 𑀲𑀗𑁆𑀖𑀲𑁆𑀲 𑀆𑀡𑀸 𑀦𑀸𑀫, 𑀢𑀲𑁆𑀫𑀸 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀬𑀣𑀸 𑀧𑀞𑀫𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁.

𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀦𑁆𑀢𑀺 ¶ 𑀇𑀥𑀸𑀧𑀺 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀸𑀯𑀚𑁆𑀚𑀦𑀫𑁂𑀯 𑀇𑀫𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀏𑀯𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀚𑀻𑀯𑀺𑀢𑀤𑁆𑀥𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑁄. 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂𑀲𑀼 𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁, ‘‘𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀸 𑀲𑀢𑁆𑀢𑀸𑀳𑀁 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺 𑀦 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀦𑀺𑀭𑀼𑀚𑁆𑀛𑀦𑀓𑁂 𑀆𑀬𑀼𑀲𑀗𑁆𑀔𑀸𑀭𑁂 𑀅𑀦𑀸𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀦𑁆𑀢𑁄𑀦𑀺𑀭𑁄𑀥𑁂 𑀫𑀭𑀡𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑁆𑀢𑀭𑀸𑀯 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀏𑀢𑀁 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀅𑀯𑀲𑁂𑀲𑀜𑁆𑀳𑀺 𑀅𑀦𑀸𑀯𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀇𑀤𑀁 𑀧𑀦 𑀆𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀲𑁄 𑀏𑀯𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀇𑀤𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀣𑁂𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺, 𑀦𑀺𑀭𑁄𑀥𑀁 𑀨𑀼𑀲𑀢𑀺 ¶ . 𑀓𑀲𑁆𑀫𑀸 𑀧𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀘𑀺𑀢𑁆𑀢𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺? 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸. 𑀇𑀤𑀜𑁆𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀬𑀼𑀕𑀦𑀤𑁆𑀥𑁂 𑀓𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀆𑀭𑁄𑀳𑀦𑀁 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑁄, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀦𑀺𑀭𑁄𑀥𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀘𑀺𑀢𑁆𑀢𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺.

𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁂𑀦 𑀩𑁄𑀥𑀺𑀫𑀡𑁆𑀟𑀼𑀧𑀲𑀗𑁆𑀓𑀫𑀦𑀢𑁄 𑀧𑀼𑀩𑁆𑀩𑁂𑀧𑀺 𑀘𑀭𑀺𑀫𑀪𑀯𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀧𑀼𑀩𑁆𑀩𑀁, 𑀢𑀤𑀸 𑀧𑀦 𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀫𑀢𑁆𑀢𑀫𑁂𑀯 𑀅𑀳𑁄𑀲𑀺, 𑀦 𑀯𑀺𑀧𑀲𑁆𑀲𑀦𑀸𑀤𑀺𑀧𑀸𑀤𑀓𑀁. 𑀢𑀲𑁆𑀫𑀸 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢’’𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁂 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀁. 𑀅𑀪𑀺𑀜𑁆𑀜𑀸𑀧𑀸𑀤𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀞𑀫𑀸𑀭𑀫𑁆𑀪𑁂 𑀏𑀯 𑀧𑀸𑀤𑀓𑀚𑁆𑀛𑀸𑀦𑁂𑀦 𑀧𑀬𑁄𑀚𑀦𑀁 𑀅𑀳𑁄𑀲𑀺, 𑀦 𑀢𑀢𑁄 𑀧𑀭𑀁 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀨𑀮𑀲𑀫𑀸𑀧𑀢𑁆𑀢𑀺𑀅𑀪𑀺𑀜𑁆𑀜𑀸𑀯𑀴𑀜𑁆𑀚𑀦𑀸𑀤𑀺𑀅𑀢𑁆𑀣𑀁. 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀩𑁆𑀩𑀁 𑀜𑀸𑀡𑀲𑀫𑀸𑀥𑀺𑀓𑀺𑀘𑁆𑀘𑀁 𑀆𑀓𑀗𑁆𑀔𑀸𑀫𑀢𑁆𑀢𑀧𑀝𑀺𑀩𑀤𑁆𑀥𑀫𑁂𑀯𑀸𑀢𑀺. 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀁. 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀧𑀸𑀤𑀓𑀢𑁆𑀢𑀸 𑀏𑀯 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁 𑀢𑀁𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀪𑀺𑀲𑀫𑁆𑀩𑁄𑀥𑀺, 𑀢𑀤𑀥𑀺𑀕𑀫𑀲𑀫𑀓𑀸𑀮𑀫𑁂𑀯 𑀘 𑀪𑀕𑀯𑀢𑁄 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀳𑀢𑁆𑀣𑀕𑀢𑀸 𑀅𑀳𑁂𑀲𑀼𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀬𑁄 𑀘 𑀫𑀕𑁆𑀕𑀸𑀥𑀺𑀕𑀫𑁄𑀢𑀺.

‘‘𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀲𑁄 𑀅𑀳’’𑀦𑁆𑀢𑀺. 𑀏𑀯𑀁 𑀲𑀫𑀸𑀳𑀺𑀢𑁂𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀛𑀸𑀦𑀢𑁆𑀢𑀬𑀸𑀥𑀺𑀕𑀫𑀧𑀝𑀺𑀧𑀸𑀝𑀺𑀲𑀺𑀤𑁆𑀥𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀸𑀦𑀲𑁆𑀲 ¶ 𑀦𑀺𑀤𑀲𑁆𑀲𑀦𑀢𑁆𑀣𑁄𑀢𑀺 𑀆𑀳 ‘‘𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀢𑀲𑁆𑀲 𑀘 𑀅𑀥𑀺𑀕𑀫𑀫𑀕𑁆𑀕𑀲𑁆𑀲 𑀦𑀺𑀤𑀲𑁆𑀲𑀦𑀁, 𑀬𑁂𑀦 𑀲𑀫𑀸𑀥𑀸𑀦𑀸𑀦𑀼𑀓𑁆𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀮𑀤𑁆𑀥𑁄, 𑀢𑀤𑀼𑀪𑀬𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀫𑀺𑀦𑀸…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀢𑁆𑀣 𑀇𑀫𑀺𑀦𑀸 𑀓𑀫𑁂𑀦𑀸𑀢𑀺 𑀇𑀫𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀸𑀤𑀺𑀦𑀸 𑀓𑀫𑁂𑀦. 𑀬𑀤𑀺𑀧𑀺 ‘‘𑀏𑀯’’𑀦𑁆𑀢𑀺 𑀇𑀤𑀁 𑀆𑀕𑀫𑀦𑀲𑀫𑀸𑀥𑀺𑀦𑀸 𑀲𑀤𑁆𑀥𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀸𑀦𑀁 𑀤𑀻𑀧𑁂𑀢𑀺, 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀫𑀸𑀥𑀺 𑀏𑀯 𑀧𑀦 𑀇𑀤𑁆𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀥𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂’’𑀢𑀺. 𑀲𑀩𑁆𑀩𑀧𑀘𑁆𑀘𑀦𑀻𑀓𑀥𑀫𑁆𑀫𑀼𑀧𑀓𑁆𑀓𑀺𑀮𑁂𑀲𑀧𑀭𑀺𑀲𑀼𑀤𑁆𑀥𑀸𑀬 𑀧𑀘𑁆𑀘𑀦𑀻𑀓𑀲𑀫𑀦𑁂𑀧𑀺 𑀅𑀩𑁆𑀬𑀸𑀯𑀝𑀸𑀬 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬 ¶ 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀲𑀼𑀧𑀭𑀺𑀲𑀼𑀤𑁆𑀥𑀸 𑀲𑀼𑀯𑀺𑀲𑀤𑀸 𑀘 𑀳𑁄𑀦𑁆𑀢𑀺, 𑀲𑀢𑀺𑀲𑀻𑀲𑁂𑀦 𑀧𑀦 𑀢𑀢𑁆𑀣 𑀤𑁂𑀲𑀦𑀸 𑀓𑀢𑀸𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂’’𑀢𑀺, 𑀉𑀧𑁂𑀓𑁆𑀔𑀸𑀬 𑀚𑀦𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀫𑁆𑀪𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀼𑀤𑁆𑀥𑀺𑀬𑀸 𑀏𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀧𑀭𑀺𑀬𑁄𑀤𑀸𑀢𑀢𑀸 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀧𑀪𑀲𑁆𑀲𑀭𑀢𑀸 𑀯𑀺𑀬𑀸𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀖𑀸𑀢𑁂𑀦𑀸𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀁 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀜𑁆𑀘 𑀬𑀣𑀸𑀓𑁆𑀓𑀫𑀁 𑀭𑀸𑀕𑀤𑁄𑀲𑀧𑀘𑁆𑀘𑀬𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦. ‘‘𑀲𑀼𑀔𑀁 𑀲𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀲𑁄𑀫𑀦𑀲𑁆𑀲𑀁 𑀭𑀸𑀕𑀲𑁆𑀲, 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀘𑁆𑀘𑀬𑁄, 𑀤𑁄𑀫𑀦𑀲𑁆𑀲𑀁 𑀤𑁄𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀭𑀸𑀕𑀸𑀤𑀬𑁄 𑀘𑁂𑀢𑀲𑁄 𑀫𑀮𑀸𑀲𑀼𑀘𑀺𑀪𑀸𑀯𑁂𑀦 ‘‘𑀅𑀗𑁆𑀕𑀡𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀉𑀧𑀕𑀦𑁆𑀢𑁆𑀯𑀸 𑀓𑀺𑀮𑁂𑀲𑀦𑀝𑁆𑀞𑁂𑀦 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀆𑀳 ‘‘𑀅𑀦𑀗𑁆𑀕𑀡𑀢𑁆𑀢𑀸 𑀏𑀯 𑀘 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂’’𑀢𑀺. 𑀢𑁂𑀦𑀸𑀳 ‘‘𑀅𑀗𑁆𑀕𑀡𑁂𑀦 𑀳𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀻’’𑀢𑀺, 𑀯𑀺𑀩𑀸𑀥𑀻𑀬𑀢𑀺 𑀉𑀧𑀢𑀸𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀪𑀸𑀯𑀺𑀢𑀢𑁆𑀢𑀸𑀢𑀺 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑁂𑀦 𑀲𑀼𑀝𑁆𑀞𑀼 𑀪𑀸𑀯𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁂’’𑀢𑀺, 𑀆𑀯𑀚𑁆𑀚𑀦𑀸𑀤𑀺𑀦𑀸 𑀧𑀜𑁆𑀘𑀥𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀸 𑀧𑀭𑀺𑀤𑀫𑀦𑁂𑀦 𑀯𑀲𑀁 𑀯𑀢𑁆𑀢𑀺𑀢𑀼𑀁 𑀉𑀧𑀕𑀢𑁂𑀢𑀺 𑀅𑀢𑁆𑀣𑁄. 𑀯𑀲𑁂 𑀯𑀢𑁆𑀢𑀫𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀲𑁂 𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀧𑀕𑀼𑀡𑀪𑀸𑀯𑀸𑀧𑀢𑁆𑀢𑀺𑀬𑀸 𑀲𑀼𑀧𑀭𑀺𑀫𑀤𑁆𑀤𑀺𑀢𑀁 𑀯𑀺𑀬 𑀘𑀫𑁆𑀫𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬 𑀘 𑀮𑀸𑀔𑀸 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀓𑁆𑀔𑀫𑁂𑀢𑀺 𑀯𑀺𑀓𑀼𑀩𑁆𑀩𑀦𑀸𑀤𑀺𑀇𑀤𑁆𑀥𑀺𑀓𑀫𑁆𑀫𑀓𑁆𑀔𑀫𑁂. 𑀢𑀤𑀼𑀪𑀬𑀦𑁆𑀢𑀺 𑀫𑀼𑀤𑀼𑀢𑀸𑀓𑀫𑁆𑀫𑀦𑀺𑀬𑀤𑁆𑀯𑀬𑀁.

𑀦𑀸𑀳𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧) 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄. 𑀅𑀳𑀦𑁆𑀢𑀺 𑀲𑀢𑁆𑀣𑀸 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀅𑀜𑁆𑀜𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀘𑀺𑀢𑁆𑀢𑀢𑁄 𑀅𑀜𑁆𑀜𑀁. 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀏𑀓𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀁. 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄𑀧𑀺 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀯𑀲𑀻𑀪𑀸𑀯𑀸𑀧𑀸𑀤𑀦𑁂𑀦 𑀪𑀸𑀯𑀺𑀢𑀁 𑀢𑀣𑀸 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑁂𑀦 𑀩𑀳𑀼𑀮𑀻𑀓𑀢𑀁 𑀏𑀯𑀁 𑀲𑀯𑀺𑀲𑁂𑀲𑀫𑀼𑀤𑀼𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀫𑀼𑀤𑀼 ¶ 𑀓𑀫𑁆𑀫𑀓𑁆𑀔𑀫𑀢𑀸𑀬 𑀓𑀫𑁆𑀫𑀦𑀺𑀬𑀜𑁆𑀘 𑀳𑁄𑀢𑀺 𑀬𑀣𑀸 𑀇𑀤𑀁 𑀘𑀺𑀢𑁆𑀢𑀦𑁆𑀢𑀺. 𑀇𑀤𑀁 𑀘𑀺𑀢𑁆𑀢𑀦𑁆𑀢𑀺 𑀘 𑀅𑀢𑁆𑀢𑀦𑁄 𑀢𑁂𑀲𑀜𑁆𑀘 𑀧𑀘𑁆𑀘𑀓𑁆𑀔𑀢𑀸𑀬 𑀏𑀯𑀫𑀸𑀳.

𑀬𑀣𑀸 𑀬𑀣𑀸𑀯𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀢𑀸𑀤𑀬𑁄 𑀦 𑀯𑀺𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀢𑀢𑁆𑀣 𑀅𑀯𑀝𑁆𑀞𑀺𑀢𑀁 𑀇𑀥 ‘‘𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 ¶ 𑀞𑀺𑀢𑀢𑁆𑀢𑀸 𑀞𑀺𑀢𑁂, 𑀞𑀺𑀢𑀢𑁆𑀢𑀸𑀬𑁂𑀯 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺. 𑀬𑀣𑀸 𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀧𑀺 𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸𑀳𑀺 𑀮𑀓𑁆𑀔𑀻𑀬𑀢𑀻𑀢𑀺 ‘‘𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀓𑀸𑀭𑀡𑁂𑀦 𑀨𑀮𑀁 𑀦𑀺𑀤𑁆𑀥𑀸𑀭𑀻𑀬𑀢𑀺, 𑀏𑀯𑀁 𑀨𑀮𑁂𑀦𑀧𑀺 𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑀻𑀬𑀢𑀻𑀢𑀺 𑀦𑀺𑀘𑁆𑀘𑀮𑀪𑀸𑀯𑁂𑀦 𑀅𑀯𑀝𑁆𑀞𑀸𑀦𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑀸 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀫𑀦𑀺𑀬𑀢𑀸𑀬 𑀘 𑀲𑀫𑁆𑀪𑀯𑀢𑀁 𑀲𑀤𑁆𑀥𑀸𑀤𑀺𑀩𑀮𑀸𑀦𑀁 𑀆𑀦𑀼𑀪𑀸𑀯𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺.

𑀇𑀤𑀸𑀦𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀏𑀯𑀁 𑀲𑀼𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁 𑀘𑀺𑀢𑁆𑀢𑀁 𑀏𑀓𑀁𑀲𑁂𑀦 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀲𑀤𑁆𑀥𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀩𑀮𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀅𑀲𑁆𑀲𑀤𑁆𑀥𑀺𑀬𑁂𑀦𑀸𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀳𑁂𑀢𑀼𑀦𑀸. 𑀦 𑀇𑀜𑁆𑀚𑀢𑀻𑀢𑀺 𑀦 𑀘𑀮𑀢𑀺 𑀦 𑀓𑀫𑁆𑀧𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀉𑀧𑀭𑀺𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀢𑀺. 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀯𑀲𑀻𑀪𑀸𑀯𑀸𑀧𑀸𑀤𑀦𑀧𑀭𑀺𑀤𑀫𑀦𑀲𑀸𑀥𑀦𑁂𑀦 𑀯𑀻𑀭𑀺𑀬𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑁂 𑀅𑀲𑀫𑁆𑀫𑁄𑀲𑀸𑀤𑀺𑀓𑀸𑀬 𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸𑀬 𑀲𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀲𑀫𑀸𑀥𑀺𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀢𑁆𑀣𑁂𑀯 𑀅𑀯𑀺𑀓𑁆𑀔𑁂𑀧𑀲𑀸𑀥𑀦𑁂𑀦 𑀲𑀫𑀸𑀥𑀸𑀦𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀲𑁆𑀲𑀸 𑀏𑀯 𑀪𑀸𑀯𑀦𑀸𑀬 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀥𑀫𑁆𑀫𑀸𑀦𑀁 𑀧𑀚𑀸𑀦𑀦𑀮𑀓𑁆𑀔𑀡𑀸𑀬 𑀧𑀜𑁆𑀜𑀸𑀬 𑀉𑀧𑀢𑁆𑀣𑀫𑁆𑀪𑀺𑀢𑀁. 𑀑𑀪𑀸𑀲𑀕𑀢𑀦𑁆𑀢𑀺 𑀜𑀸𑀡𑁄𑀪𑀸𑀲𑀲𑀳𑀕𑀢𑀁. 𑀑𑀪𑀸𑀲𑀪𑀽𑀢𑁂𑀦 𑀳𑀺 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀸𑀦𑀲𑀁𑀯𑀤𑁆𑀥𑀺𑀢𑁂𑀦 𑀜𑀸𑀡𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀬𑀸𑀣𑀸𑀯𑀢𑁄 𑀧𑀲𑁆𑀲𑀦𑁆𑀢𑁄 𑀢𑀢𑁄 𑀉𑀢𑁆𑀭𑀸𑀲𑀦𑁆𑀢𑁄 𑀑𑀢𑁆𑀢𑀧𑁆𑀧𑀦𑁆𑀢𑁄 𑀢𑀁 𑀅𑀪𑀺𑀪𑀯𑀢𑀺, 𑀦 𑀢𑁂𑀦 𑀅𑀪𑀺𑀪𑀼𑀬𑁆𑀬𑀢𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀦𑁆𑀥𑀓𑀸𑀭𑁂𑀦 𑀦 𑀇𑀜𑁆𑀚𑀢𑀻’’𑀢𑀺. 𑀏𑀢𑁂𑀦 𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀳𑀺𑀭𑁄𑀢𑁆𑀢𑀧𑁆𑀧𑀩𑀮𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀢𑀸 𑀧𑀭𑀺𑀲𑀼𑀤𑁆𑀥𑀢𑀸 𑀧𑀭𑀺𑀬𑁄𑀤𑀸𑀢𑀢𑀸 𑀅𑀦𑀗𑁆𑀕𑀡𑀢𑀸 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑀢𑀸 𑀫𑀼𑀤𑀼𑀪𑀸𑀯𑁄 𑀓𑀫𑁆𑀫𑀦𑀺𑀬𑀢𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑀸 𑀞𑀺𑀢𑀢𑀸𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀅𑀣 𑀯𑀸 𑀲𑀫𑀸𑀳𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀇𑀫𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 ‘‘𑀲𑀫𑀸𑀳𑀺𑀢𑁂’’𑀢𑀺 𑀇𑀫𑀁 𑀅𑀗𑁆𑀕𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀺𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑁄 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ¶ 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀺𑀅𑀢𑁆𑀣𑀁 ¶ 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀢𑀤𑀪𑀺𑀫𑀼𑀔𑀓𑀭𑀡𑀬𑁄𑀕𑁆𑀕𑀁. 𑀢𑁂𑀦𑀸𑀳 ‘‘𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑀓𑀸𑀫𑀁 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀏𑀯 𑀧𑀞𑀫𑀚𑁆𑀛𑀸𑀦𑀲𑀫𑀥𑀺𑀕𑀫𑁄, 𑀯𑀺𑀢𑀓𑁆𑀓𑀸𑀤𑀺𑀯𑀽𑀧𑀲𑀫𑀸 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁄, 𑀢𑀣𑀸𑀧𑀺 𑀦 𑀢𑀣𑀸 𑀢𑁂 𑀢𑁂𑀳𑀺 𑀤𑀽𑀭𑀻𑀪𑀽𑀢𑀸, 𑀅𑀧𑁂𑀢𑀸 𑀯𑀸 𑀬𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄, 𑀢𑀲𑁆𑀫𑀸 𑀘𑁂𑀢𑀲𑁄 𑀫𑀮𑀻𑀦𑀪𑀸𑀯𑀲𑀗𑁆𑀔𑁄𑀪𑀉𑀧𑁆𑀧𑀺𑀮𑀸𑀪𑀸𑀯𑀓𑀭𑁂𑀳𑀺 𑀦𑀻𑀯𑀭𑀡𑀸𑀤𑀻𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀺𑀬𑀸 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀺𑀧𑀭𑀺𑀬𑁄𑀤𑀸𑀢𑀢𑀸 𑀘 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦𑀻𑀯𑀭𑀡…𑀧𑁂… 𑀧𑀭𑀺𑀬𑁄𑀤𑀸𑀢𑁂’’𑀢𑀺. 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦𑀦𑁆𑀢𑀺 𑀏𑀢𑁆𑀣 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀧𑀸𑀞𑀁 𑀕𑀳𑁂𑀢𑁆𑀯𑀸 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦’’𑀦𑁆𑀢𑀺 𑀅𑀬𑀁 𑀧𑀸𑀞𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑁂𑀦 𑁋

‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀦𑁆𑀢𑀺 𑀛𑀸𑀦𑀧𑀝𑀺𑀮𑀸𑀪𑀳𑁂𑀢𑀼𑀓𑀸𑀦𑀁 𑀛𑀸𑀦𑀧𑀝𑀺𑀮𑀸𑀪𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 ‘𑀅𑀳𑁄 𑀯𑀢 𑀫𑀫𑁂𑀯 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀁 𑀫𑀸𑀦𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀻𑀦𑀁. 𑀅𑀪𑀺𑀚𑁆𑀛𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦𑀧𑀺 𑀢𑁂𑀲𑀁𑀬𑁂𑀯 𑀲𑀗𑁆𑀕𑀳𑁄. 𑀅𑀪𑀺𑀚𑁆𑀛𑀸 𑀘𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑁂𑀦 𑀅𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀫𑀸𑀦𑀸𑀤𑀬𑁄 𑀘 𑀢𑀤𑁂𑀓𑀝𑁆𑀞𑀸 𑀤𑀝𑁆𑀞𑀩𑁆𑀩𑀸 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸. 𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀧𑀦 𑀦𑀻𑀯𑀭𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀓𑀣𑀁 𑀧𑀦 𑀧𑀞𑀫𑀚𑁆𑀛𑀸𑀦𑁂𑀦 𑀅𑀯𑀺𑀓𑁆𑀔𑀫𑁆𑀪𑀦𑁂𑀬𑁆𑀬𑀸 𑀇𑀥 𑀯𑀺𑀕𑀘𑁆𑀙𑀦𑁆𑀢𑀻𑀢𑀺? ‘𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀸’𑀢𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀧𑀭𑀸𑀫𑀝𑁆𑀞𑀪𑀸𑀯𑀤𑀲𑁆𑀲𑀦𑀢𑁄. 𑀬𑁂 𑀧𑀦𑁂𑀢𑁆𑀣 ‘𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀺𑀚𑁆𑀛𑀸𑀤𑀻𑀦’𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑁄𑀧𑀅𑀧𑁆𑀧𑀘𑁆𑀘𑀬𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀬𑁄 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’𑀦𑁆𑀢𑀺 𑀧𑀸𑀞𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦’𑀦𑁆𑀢𑀺 𑀧𑀸𑀞𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀢𑀣𑀸 𑀧𑀸𑀞𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸 𑀘 𑀦𑀻𑀯𑀭𑀡𑀸 𑀘𑁂𑀯 𑀢𑀤𑁂𑀓𑀝𑁆𑀞𑀸 𑀘, 𑀢𑁂𑀲𑀁 ¶ 𑀤𑀽𑀭𑀻𑀪𑀸𑀯𑀁 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁𑀬𑁂𑀯 𑀅𑀪𑀸𑀯𑀯𑀺𑀕𑀫𑀘𑁄𑀤𑀦𑀸𑀬 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸. 𑀦𑀦𑀼 𑀘 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀢𑁆𑀣𑀲𑀼𑀢𑁆𑀢𑁂𑀲𑀼 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺 𑀑𑀴𑀸𑀭𑀺𑀓𑀸𑀦𑀁𑀬𑁂𑀯 𑀧𑀸𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺. 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀅𑀥𑀺𑀕𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀼𑀔𑀼𑀫𑀸𑀬𑁂𑀯 𑀢𑁂 𑀕𑀳𑀺𑀢𑀸, 𑀅𑀗𑁆𑀕𑀡𑀼𑀧𑀓𑁆𑀓𑀺𑀮𑁂𑀲𑀢𑀸𑀲𑀸𑀫𑀜𑁆𑀜𑁂𑀦 𑀧𑀦𑁂𑀢𑁆𑀣 𑀲𑀼𑀢𑁆𑀢𑀸𑀦𑀁 𑀅𑀧𑀤𑀺𑀲𑀦𑀁. 𑀢𑀣𑀸 𑀳𑀺 ‘𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀼𑀢𑁆𑀢𑀯𑀲𑁂𑀦𑀸’’𑀢𑀺.

𑀅𑀯𑀲𑁆𑀲𑀜𑁆𑀘𑁂𑀢𑀫𑁂𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀅𑀥𑀺𑀕𑀢𑀚𑁆𑀛𑀸𑀦𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀇𑀘𑁆𑀙𑀸𑀯𑀘𑀭𑀸𑀦𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀢𑀺 ¶ . 𑀢𑁂𑀦𑁂𑀯 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀧𑀸𑀞𑀁 𑀕𑀳𑁂𑀢𑁆𑀯𑀸 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦’’𑀦𑁆𑀢𑀺 𑀅𑀬𑀁 𑀧𑀸𑀞𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀧𑀺 𑀘 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦’’𑀦𑁆𑀢𑀺 𑀇𑀫𑀲𑁆𑀲𑁂𑀯 𑀧𑀸𑀞𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀬𑀫𑁂𑀯 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄, 𑀅𑀢𑁆𑀣𑁄𑀧𑀺 𑀘𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 ‘‘𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀧𑀯𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀅𑀬𑀫𑁆𑀧𑀺 𑀧𑀸𑀞𑁄 𑀅𑀬𑀼𑀢𑁆𑀢𑁄𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀢𑁄𑀬𑁂𑀯 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀬𑀁 𑀧𑀸𑀞𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀤𑀲𑁆𑀲𑀺𑀢𑁄𑀢𑀺.

𑀇𑀤𑁆𑀥𑀺𑀧𑀸𑀤𑀓𑀪𑀸𑀯𑀽𑀧𑀕𑀫𑀦𑁂𑀦𑀸𑀢𑀺 𑀇𑀤𑁆𑀥𑀺𑀬𑀸 𑀧𑀸𑀤𑀓𑀪𑀸𑀯𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀲𑁆𑀲 𑀉𑀧𑀕𑀫𑀦𑁂𑀦. 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀇𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀯𑀲𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀪𑀸𑀯𑀦𑀸𑀬 𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀧𑀡𑀻𑀢𑀪𑀸𑀯𑀽𑀧𑀕𑀫𑀦𑁂𑀦𑀸𑀢𑀺 𑀢𑀢𑁄 𑀏𑀯 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀉𑀢𑁆𑀢𑀫𑀝𑁆𑀞𑁂𑀦 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀘 𑀧𑀡𑀻𑀢𑀪𑀸𑀯𑀲𑁆𑀲 𑀉𑀧𑀕𑀫𑀦𑁂𑀦. 𑀉𑀪𑀬𑀜𑁆𑀘𑁂𑀢𑀁 𑀪𑀸𑀯𑀦𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀯𑀘𑀦𑀁, 𑀧𑀭𑀺𑀧𑀼𑀡𑁆𑀡𑀸𑀬 𑀪𑀸𑀯𑀦𑀸𑀬 𑀧𑀡𑀻𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀞𑀺𑀢𑁂𑀢𑀺. 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂𑀢𑀺 𑀇𑀤𑀁 𑀞𑀺𑀢𑀺𑀬𑀸 𑀯𑀺𑀲𑁂𑀲𑀦𑀁. 𑀢𑁂𑀦𑀸𑀳 ‘‘𑀬𑀣𑀸 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑁂’’𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 𑀉𑀪𑀬𑀫𑁂𑀓𑀁 𑀅𑀗𑁆𑀕𑀁, ‘‘𑀲𑀫𑀸𑀳𑀺𑀢𑁂’’𑀢𑀺 𑀧𑀦 𑀇𑀤𑀫𑁆𑀧𑀺 𑀏𑀓𑀫𑀗𑁆𑀕𑀁. 𑀢𑁂𑀦𑁂𑀯𑀲𑁆𑀲 𑀧𑀞𑀫𑀯𑀺𑀓𑀧𑁆𑀧𑀢𑁄 𑀯𑀺𑀲𑁂𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀲𑁆𑀲 𑀯𑀸 𑀅𑀦𑀼𑀲𑁆𑀲𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀢𑀁𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀢𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀺 𑀬𑀁 𑀜𑀸𑀡𑀁 ¶ 𑀢𑀤𑀢𑁆𑀣𑀸𑀬𑀸𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀢𑀸𑀯 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀲𑀢𑀺𑀜𑀸𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀼𑀩𑁆𑀩𑁂’’𑀢𑀺 𑀇𑀤𑀁 𑀧𑀤𑀁 ‘‘𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀅𑀢𑀻𑀢𑀪𑀯𑀯𑀺𑀲𑀬𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀢𑀻𑀢𑀚𑀸𑀢𑀻𑀲𑀽’’𑀢𑀺. 𑀦𑀺𑀯𑀸𑀲𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄, 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀘 𑀦𑀺𑀯𑀲𑀺𑀢𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸’’𑀢𑀺. 𑀦𑀺𑀯𑀼𑀢𑁆𑀣𑀢𑀸 𑀘𑁂𑀢𑁆𑀣 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑀸, 𑀢𑀣𑀸𑀪𑀽𑀢𑀸 𑀘 𑀢𑁂 𑀅𑀦𑀼 𑀅𑀦𑀼 𑀪𑀽𑀢𑀸 𑀚𑀸𑀢𑀸 𑀧𑀯𑀢𑁆𑀢𑀸, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀯𑀼𑀢𑁆𑀣𑀸𑀢𑀺 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸’’𑀢𑀺. 𑀏𑀯𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀯𑀲𑁂𑀦 𑀦𑀺𑀯𑀸𑀲𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀲𑁂𑀲𑁂𑀦 𑀯𑀢𑁆𑀢𑀼𑀁 ‘‘𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀦𑀺𑀯𑀼𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀕𑁄𑀘𑀭𑀦𑀺𑀯𑀸𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁄𑀘𑀭𑀪𑀽𑀢𑀸𑀧𑀺 𑀳𑀺 𑀕𑁄𑀘𑀭𑀸𑀲𑁂𑀯𑀦𑀸𑀬 𑀆𑀲𑁂𑀯𑀺𑀢𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀦𑀼𑀪𑀽𑀢𑀸 𑀦𑀺𑀯𑀼𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂 𑀧𑀦 𑀤𑀼𑀯𑀺𑀥𑀸 𑀲𑀧𑀭𑀯𑀺𑀜𑁆𑀜𑀸𑀡𑀕𑁄𑀘𑀭𑀢𑀸𑀬𑀸𑀢𑀺 𑀉𑀪𑀬𑁂𑀧𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸’’𑀢𑀺 𑀯𑀢𑁆𑀯𑀸 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺 𑀯𑀘𑀦𑀁 𑀬𑁂 𑀢𑁂 𑀕𑁄𑀘𑀭𑀦𑀺𑀯𑀸𑀲𑁂𑀦 ¶ 𑀦𑀺𑀯𑀼𑀢𑁆𑀣𑀥𑀫𑁆𑀫𑀸, 𑀦 𑀢𑁂 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀫𑀢𑁆𑀢𑀸, 𑀅𑀣 𑀔𑁄 𑀬𑀣𑀸 𑀧𑀼𑀩𑁆𑀩𑁂 𑀦𑀸𑀫𑀕𑁄𑀢𑁆𑀢𑀯𑀡𑁆𑀡𑀮𑀺𑀗𑁆𑀕𑀸𑀳𑀸𑀭𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀸, 𑀢𑀣𑁂𑀯𑁂𑀢𑀁 𑀜𑀸𑀡𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀡𑁆𑀳𑀸𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀦𑀺𑀯𑀼𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄𑀯 𑀯𑀺𑀜𑁆𑀜𑀸𑀡𑁂𑀦, 𑀅𑀣 𑀔𑁄 𑀧𑀭𑁂𑀲𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸𑀧𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀧𑀭𑁂𑀲𑀫𑁆𑀧𑀺 𑀯𑀸 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺. 𑀢𑀲𑁆𑀲 𑀘 𑀕𑀳𑀡𑁂 𑀧𑀬𑁄𑀚𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀩𑁆𑀩𑀁.

𑀢𑁂 𑀘 𑀔𑁄 𑀬𑀲𑁆𑀫𑀸 𑀅𑀢𑀻𑀢𑀸𑀲𑀼 𑀏𑀯 𑀚𑀸𑀢𑀻𑀲𑀼 𑀅𑀜𑁆𑀜𑁂𑀳𑀺 𑀯𑀺𑀜𑁆𑀜𑀸𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀢𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑀸𑀧𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀢𑁂 𑀯𑀺𑀜𑁆𑀜𑀸𑀢𑀸, 𑀢𑁂𑀲𑀁 𑀢𑀤𑀸 𑀯𑀢𑁆𑀢𑀫𑀸𑀦𑀲𑀦𑁆𑀢𑀸𑀦𑀸𑀦𑀼𑀲𑀸𑀭𑁂𑀦 𑀢𑁂𑀲𑀫𑁆𑀧𑀺 𑀅𑀢𑀻𑀢𑁂 𑀧𑀯𑀢𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀯𑀺𑀲𑀬𑀪𑀽𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀽’’𑀢𑀺 𑀯𑀼𑀢𑁆𑀢𑀁. 𑀙𑀺𑀦𑁆𑀦𑀯𑀝𑀼𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀁 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀁. ‘‘𑀆𑀤𑀺𑀲𑀤𑁆𑀤𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀼𑀲𑁆𑀲𑀭𑀡𑀸𑀦𑀺 𑀕𑀬𑁆𑀳𑀦𑁆𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀙𑀺𑀦𑁆𑀦𑀯𑀝𑀼𑀫𑀓𑀸 𑀧𑀦 𑀲𑀩𑁆𑀩𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀸 𑀙𑀺𑀦𑁆𑀦𑀲𑀁𑀲𑀸𑀭𑀫𑀕𑁆𑀕𑀢𑁆𑀢𑀸, 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀁 𑀦𑀸𑀫 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀲𑁆𑀲𑀭𑀡𑀁. 𑀲𑀸 𑀧𑀦 𑀧𑀝𑀺𑀧𑀢𑁆𑀢𑀺 𑀲𑀗𑁆𑀔𑁂𑀧𑀢𑁄 ¶ 𑀙𑀴𑀸𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑀸𑀢𑀺 𑀢𑀸𑀦𑀺 𑀇𑀥 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀦𑀺. 𑀢𑀲𑁆𑀫𑀸 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀜𑁆𑀜𑀸𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀦𑁂𑀢𑁆𑀣 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦 𑀅𑀯𑀺𑀜𑁆𑀜𑀸𑀢𑀸𑀦𑀁 𑀅𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀫𑁆𑀧𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸 𑀅𑀕𑀦𑁆𑀢𑁆𑀯𑀸 𑀲𑀻𑀳𑁄𑀓𑁆𑀓𑀦𑁆𑀢𑀺𑀓𑀯𑀲𑁂𑀦 𑀅𑀦𑀼𑀲𑁆𑀲𑀭𑀡𑀁 𑀕𑀳𑀺𑀢𑀁, 𑀇𑀫𑁂 𑀧𑀦 𑀬𑀣𑀸𑀯𑀼𑀢𑁆𑀢𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀬𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀦 𑀳𑀺 𑀅𑀢𑀻𑀢𑁂 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀏𑀯𑀁 𑀯𑀺𑀧𑀲𑁆𑀲𑀺𑀁𑀲𑀼, 𑀏𑀯𑀁 𑀫𑀕𑁆𑀕𑀁 𑀪𑀸𑀯𑁂𑀲𑀼𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀸𑀓𑀁𑀲𑀼, 𑀏𑀯𑀁 𑀯𑁂𑀦𑁂𑀬𑁆𑀬𑁂 𑀯𑀺𑀦𑁂𑀲𑀼𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀣𑀸 𑀅𑀜𑁆𑀜𑁂𑀲𑀁 𑀜𑀸𑀡𑀲𑁆𑀲 𑀕𑀢𑀺 𑀅𑀢𑁆𑀣𑀻𑀢𑀺. 𑀬𑁂 𑀧𑀦 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀅𑀢𑁆𑀢𑀦𑁄𑀯 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀸, 𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺 𑀔𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀸𑀯𑀓𑀸 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑁂𑀯. 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀪𑀺𑀦𑀻𑀳𑀭𑀺𑀦𑁆𑀢𑀺 𑀘𑀺𑀢𑁆𑀢𑀁 𑀛𑀸𑀦𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑀺𑀦𑁆𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑁄𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀩𑁆𑀪𑀸𑀭𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 ‘‘𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀢𑁆𑀢𑀸 ‘‘𑀲𑁄’’𑀢𑀺 𑀏𑀢𑁆𑀣 𑀅𑀳𑀁𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄 𑀢𑀤𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀲𑁄 𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀓𑀯𑀺𑀥𑀦𑁆𑀢𑀺 𑀦𑀸𑀦𑀸𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀁. 𑀧𑀓𑀸𑀭𑁂𑀳𑀻𑀢𑀺 𑀦𑀸𑀫𑀕𑁄𑀢𑁆𑀢𑀸𑀤𑀺𑀆𑀓𑀸𑀭𑁂𑀳𑀺 𑀲𑀤𑁆𑀥𑀺𑀁. 𑀲𑀳𑀬𑁄𑀕𑁂 ¶ 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀧𑀯𑀢𑁆𑀢𑀺𑀢𑀦𑁆𑀢𑀺 𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀁. 𑀢𑁂𑀦𑀸𑀳 ‘‘𑀲𑀁𑀯𑀡𑁆𑀡𑀺𑀢’’𑀦𑁆𑀢𑀺, 𑀯𑀺𑀢𑁆𑀣𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀯𑀸𑀲𑀦𑁆𑀢𑀺 𑀅𑀦𑁆𑀢𑁄𑀕𑀥𑀪𑁂𑀤𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀦𑁆𑀢𑀺 𑀢𑁂 𑀪𑁂𑀤𑁂 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀢𑀢𑁆𑀣 𑀦𑀺𑀯𑀼𑀢𑁆𑀣𑀲𑀦𑁆𑀢𑀸𑀦’’𑀦𑁆𑀢𑀺 𑀆𑀳. 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸𑀢𑀺 𑀜𑀸𑀡𑀕𑀢𑀺𑀬𑀸 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸. 𑀅𑀦𑀼𑀤𑁂𑀯𑀸𑀢𑀺 𑀅𑀦𑀼 𑀏𑀯, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄. ‘‘𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑀲𑀫𑀦𑀦𑁆𑀢𑀭𑀪𑀸𑀯𑀲𑀭𑀡𑀁 𑀅𑀦𑀼𑀲𑀤𑁆𑀤𑁄 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑁂 𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯 𑀲𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺. 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀧𑀝𑀺𑀧𑀸𑀝𑀺𑀬𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀲𑀩𑁆𑀩𑀧𑀘𑁆𑀙𑀺𑀫𑀸 𑀦𑀺𑀲𑀚𑁆𑀚𑀸 𑀆𑀯𑀚𑁆𑀚𑀺𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀪𑀽𑀢𑀁 𑀧𑀼𑀩𑁆𑀩𑀓𑀭𑀡𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬.

𑀆𑀭𑀤𑁆𑀥𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑁂𑀢𑀺 ¶ 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑁂. 𑀏𑀓𑀫𑁆𑀧𑀺 𑀚𑀸𑀢𑀺𑀦𑁆𑀢𑀺 𑀏𑀓𑀫𑁆𑀧𑀺 𑀪𑀯𑀁. 𑀲𑁄 𑀳𑀺 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀦𑁆𑀢𑁄𑀕𑀥𑀥𑀫𑁆𑀫𑀧𑁆𑀧𑀪𑁂𑀤𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑁄 𑀇𑀥 ‘‘𑀚𑀸𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄 𑀚𑀸𑀬𑀢𑀻𑀢𑀺 𑀚𑀸𑀢𑀻𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀏𑀓𑀫𑁆𑀧𑀺…𑀧𑁂… 𑀔𑀦𑁆𑀥𑀲𑀦𑁆𑀢𑀸𑀦’’𑀦𑁆𑀢𑀺. 𑀧𑀭𑀺𑀳𑀸𑀬𑀫𑀸𑀦𑁄𑀢𑀺 𑀔𑀻𑀬𑀫𑀸𑀦𑁄 𑀯𑀺𑀦𑀲𑁆𑀲𑀫𑀸𑀦𑁄. 𑀓𑀧𑁆𑀧𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀮𑁄, 𑀢𑀤𑀸 𑀧𑀯𑀢𑁆𑀢𑀫𑀸𑀦𑀲𑀗𑁆𑀔𑀸𑀭𑀯𑀲𑁂𑀦𑀲𑁆𑀲 𑀧𑀭𑀺𑀳𑀸𑀦𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀟𑁆𑀠𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 ‘‘𑀓𑀸𑀮𑀁 𑀔𑁂𑀧𑁂𑀢𑀺, 𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸’’𑀢𑀺 (𑀚𑀸. 𑁧.𑁨.𑁧𑁯𑁦) 𑀆𑀤𑀻𑀲𑀼 𑀓𑀸𑀮𑀲𑁆𑀲𑀧𑀺 𑀔𑀬𑁄 𑀯𑀼𑀘𑁆𑀘𑀢𑀺, 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀲𑀁𑀯𑀝𑁆𑀝𑀦𑀁 𑀯𑀺𑀦𑀲𑁆𑀲𑀦𑀁 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀢𑁄 𑀉𑀤𑁆𑀥𑀁 𑀢𑀣𑀸𑀞𑀸𑀬𑀻 𑀲𑀁𑀯𑀝𑁆𑀝𑀝𑁆𑀞𑀸𑀬𑀻. 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀢𑀁𑀧𑀼𑀩𑁆𑀩𑀓𑀢𑁆𑀢𑀸. 𑀯𑀺𑀯𑀝𑁆𑀝𑀦𑀁 𑀦𑀺𑀩𑁆𑀩𑀢𑁆𑀢𑀦𑀁, 𑀯𑀟𑁆𑀠𑀦𑀁 𑀯𑀸 𑀯𑀺𑀯𑀝𑁆𑀝𑁄.

𑀢𑁂𑀚𑁂𑀦 𑀲𑀁𑀯𑀝𑁆𑀝𑁄 𑀢𑁂𑀚𑁄𑀲𑀁𑀯𑀝𑁆𑀝𑁄. 𑀲𑀁𑀯𑀝𑁆𑀝𑀲𑀻𑀫𑀸𑀢𑀺 𑀲𑀁𑀯𑀝𑁆𑀝𑀦𑀫𑀭𑀺𑀬𑀸𑀤𑀸. 𑀲𑀁𑀯𑀝𑁆𑀝𑀢𑀻𑀢𑀺 𑀯𑀺𑀦𑀲𑁆𑀲𑀢𑀺. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁, 𑀢𑀻𑀲𑀼𑀧𑀺 𑀲𑀁𑀯𑀝𑁆𑀝𑀓𑀸𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀦𑁆𑀢𑀺 𑀇𑀥 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀢𑀓𑁂 𑀞𑀸𑀦𑁂 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀜𑀸𑀡𑀸𑀤𑀺𑀜𑀸𑀡𑀸𑀦𑀼𑀪𑀸𑀯𑁄 𑀧𑀼𑀜𑁆𑀜𑀨𑀮𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀭𑀲𑁂𑀦𑁂𑀯 𑀧𑀭𑀺𑀚𑀫𑁆𑀪𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀓𑁆𑀔𑁂𑀢𑁆𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢’’𑀦𑁆𑀢𑀺. 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀆𑀡𑀸𑀓𑁆𑀔𑁂𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀜𑁆𑀜𑀁 𑀘𑀓𑁆𑀓𑀯𑀸𑀴𑀁 𑀕𑀢𑁄𑀧𑀺 𑀓𑀢𑀧𑀭𑀺𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀞𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀢𑁆𑀢𑁂 𑀓𑀢𑁂 𑀆𑀡𑀸𑀓𑁆𑀔𑁂𑀢𑁆𑀢𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑁆𑀯𑁂𑀯 𑀧𑀭𑀺𑀢𑁆𑀢𑀸𑀦𑀼𑀪𑀸𑀯𑁄 𑀢𑀢𑁆𑀣 𑀤𑁂𑀯𑀢𑀸𑀳𑀺 𑀧𑀭𑀺𑀢𑁆𑀢𑀸𑀦𑀁 ¶ 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀻’’𑀢𑀺. 𑀬𑀁 𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀭𑁂𑀦 𑀅𑀪𑀺𑀯𑀺𑀜𑁆𑀜𑀸𑀧𑀦𑀁 𑀅𑀢𑁆𑀢𑀦𑁄 𑀭𑀽𑀧𑀤𑀲𑁆𑀲𑀦𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑁂 𑀯𑀺𑀲𑀬𑀓𑁆𑀔𑁂𑀢𑁆𑀢𑁂. 𑀬𑀁 𑀬𑀁 𑀆𑀓𑀗𑁆𑀔𑀢𑀺, 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀆𑀓𑀗𑁆𑀔𑀫𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀜𑀸𑀡𑀲𑁆𑀲 𑀬𑀁 𑀬𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 ¶ 𑀇𑀘𑁆𑀙𑀢𑀺, 𑀢𑀁 𑀢𑀁 𑀅𑀦𑀼𑀲𑁆𑀲𑀭𑀢𑀺. 𑀏𑀓𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀢𑀺𑀭𑀺𑀬𑀢𑁄 𑀲𑀁𑀯𑀝𑁆𑀝𑀫𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀲𑀡𑁆𑀞𑀳𑀦𑁆𑀢𑀦𑁆𑀢𑀺 𑀯𑀺𑀯𑀝𑁆𑀝𑀫𑀸𑀦𑀁 𑀚𑀸𑀬𑀫𑀸𑀦𑀁. 𑀢𑀲𑁆𑀲 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑁆𑀢𑀺 𑀅𑀫𑁆𑀳𑁂𑀳𑀺𑀧𑀺 𑀳𑁂𑀝𑁆𑀞𑀸 ‘‘𑀮𑁄𑀓𑀯𑀺𑀤𑀽’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀧𑀲𑀗𑁆𑀕𑀢𑁄 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀦 𑀯𑀼𑀘𑁆𑀘𑀢𑀺.

𑀏𑀯𑀁 𑀧𑀲𑀗𑁆𑀕𑁂𑀦 𑀲𑀁𑀯𑀝𑁆𑀝𑀸𑀤𑀺𑀓𑁂 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀥𑀺𑀕𑀢𑀁 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀧𑀦𑁂𑀢𑁂 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸 𑀯𑀼𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀲𑀫𑀼𑀤𑀸𑀬𑀢𑁄 𑀅𑀦𑁂𑀓𑁂𑀲𑀁 𑀲𑀁𑀯𑀝𑁆𑀝𑀓𑀧𑁆𑀧𑀸𑀤𑀻𑀦𑀁 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀢𑁆𑀢𑀸. 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀘 𑀅𑀦𑀺𑀬𑀫𑀢𑁆𑀣𑁂𑀦 𑀇𑀢𑀭𑀸𑀲𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄𑀢𑀺. 𑀅𑀣 𑀯𑀸 𑀅𑀫𑀼𑀫𑁆𑀳𑀺 𑀲𑀁𑀯𑀝𑁆𑀝𑀓𑀧𑁆𑀧𑁂𑀢𑀺 𑀇𑀤𑀁 𑀲𑀁𑀯𑀝𑁆𑀝𑀓𑀧𑁆𑀧𑀲𑁆𑀲 𑀆𑀤𑀺𑀢𑁄 𑀧𑀸𑀴𑀺𑀬𑀁 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀳𑀺 𑀇𑀫𑀲𑁆𑀲 𑀓𑀢𑀺𑀧𑀬𑀓𑀸𑀮𑀁 𑀪𑀯𑀸𑀤𑀻𑀲𑀼 𑀲𑀁𑀲𑀭𑀡𑀁 𑀉𑀧𑀮𑀩𑁆𑀪𑀢𑀻𑀢𑀺. 𑀲𑀁𑀯𑀝𑁆𑀝𑀓𑀧𑁆𑀧𑁂 𑀯𑀸 𑀯𑀢𑁆𑀢𑀫𑀸𑀦𑁂 𑀬𑁂𑀲𑀼 𑀪𑀯𑀸𑀤𑀻𑀲𑀼 𑀇𑀫𑀲𑁆𑀲 𑀉𑀧𑀧𑀢𑁆𑀢𑀺 𑀅𑀳𑁄𑀲𑀺, 𑀢𑀁𑀤𑀲𑁆𑀲𑀦𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀪𑀯𑁂 𑀯𑀸𑀢𑀺𑀆𑀤𑀻𑀲𑀼 𑀓𑀸𑀫𑀸𑀤𑀺𑀪𑀯𑁂 𑀯𑀸 𑀅𑀡𑁆𑀟𑀚𑀸𑀤𑀺𑀬𑁄𑀦𑀺𑀬𑀸 𑀯𑀸 𑀤𑁂𑀯𑀸𑀤𑀺𑀕𑀢𑀺𑀬𑀸 𑀯𑀸 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀆𑀤𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸 𑀯𑀸 𑀲𑀢𑁆𑀢𑀸𑀯𑀸𑀲𑁂 𑀯𑀸 𑀔𑀢𑁆𑀢𑀺𑀬𑀸𑀤𑀺𑀲𑀢𑁆𑀢𑀦𑀺𑀓𑀸𑀬𑁂 𑀯𑀸. 𑀬𑀲𑁆𑀫𑀸 𑀇𑀤𑀁 𑀪𑀕𑀯𑀢𑁄 𑀯𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀆𑀕𑀢𑀁, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀦𑀸𑀫𑀸𑀤𑀺𑀯𑀲𑁂𑀦 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁𑀦𑀸𑀫𑁄𑀢𑀺 𑀯𑁂𑀲𑁆𑀲𑀦𑁆𑀢𑀭𑁄 𑀯𑀸 𑀚𑁄𑀢𑀺𑀧𑀸𑀮𑁄 𑀯𑀸’’𑀢𑀺𑀆𑀤𑀺. 𑀲𑀸𑀮𑀺𑀫𑀁𑀲𑁄𑀤𑀦𑀸𑀳𑀸𑀭𑁄 𑀯𑀸𑀢𑀺 𑀕𑀺𑀳𑀺𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀯𑀸𑀢𑀺 𑀢𑀸𑀧𑀲𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄𑀢𑀺 𑀲𑀬𑀫𑁆𑀧𑀢𑀺𑀢𑀨𑀮𑀸𑀳𑀸𑀭𑁄. 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀸𑀤𑀺𑀧𑁆𑀧𑀪𑁂𑀤𑀸𑀦𑀦𑁆𑀢𑀺 𑀏𑀢𑁆𑀣 𑀲𑀸𑀫𑀺𑀲𑀸 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀸𑀤𑀬𑁄, 𑀦𑀺𑀭𑀸𑀫𑀺𑀲𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀸𑀤𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀯𑁂𑀓𑀚𑀲𑀫𑀸𑀥𑀺𑀚𑀲𑀼𑀔𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀳𑁂𑀝𑁆𑀞𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀫𑀼𑀢𑁆𑀭𑀸𑀲𑀺𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄𑀬𑀁, 𑀩𑁆𑀬𑀸𑀧𑀦𑀺𑀘𑁆𑀙𑀸𑀮𑁄𑀧𑁄 𑀯𑀸, 𑀅𑀫𑀼𑀢𑁆𑀭 𑀅𑀫𑀼𑀢𑁆𑀭 𑀆𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀲𑁆𑀲 𑀬𑀸𑀯𑀤𑀺𑀘𑁆𑀙𑀓𑀁 𑀅𑀦𑀼𑀲𑁆𑀲𑀭𑀡𑀦𑁆𑀢𑀺 𑀏𑀢𑁆𑀣 𑀆𑀭𑁄𑀳𑀦𑁆𑀢𑀲𑁆𑀲𑀸𑀢𑀺 𑀧𑀝𑀺𑀮𑁄𑀫𑀢𑁄 𑀜𑀸𑀡𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀆𑀭𑁄𑀳𑀦𑁆𑀢𑀲𑁆𑀲. 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 ¶ 𑀬𑀸𑀯𑀤𑀺𑀘𑁆𑀙𑀓𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲. 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀦𑀁, 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀽𑀧𑀧𑀢𑁆𑀢𑀺𑀬𑀸𑀢𑀺 ¶ 𑀇𑀥 𑀘𑀭𑀺𑀫𑀪𑀯𑁂 𑀉𑀧𑀧𑀢𑁆𑀢𑀺𑀬𑀸. 𑀅𑀦𑀦𑁆𑀢𑀭𑀦𑁆𑀢𑀺 𑀅𑀢𑀻𑀢𑀸𑀦𑀦𑁆𑀢𑀭𑀫𑀸𑀳. 𑀅𑀫𑀼𑀢𑁆𑀭𑀸𑀢𑀺 𑀅𑀫𑀼𑀓𑀲𑁆𑀫𑀺𑀁 𑀪𑀯𑁂𑀢𑀺 𑀅𑀢𑁆𑀣𑁄. 𑀉𑀤𑀧𑀸𑀤𑀺𑀦𑁆𑀢𑀺 𑀉𑀧𑁆𑀧𑀚𑁆𑀚𑀺𑀁. 𑀢𑀸𑀳𑀺 𑀤𑁂𑀯𑀢𑀸𑀳𑀻𑀢𑀺 𑀢𑀼𑀲𑀺𑀢𑀤𑁂𑀯𑀢𑀸𑀳𑀺. 𑀏𑀓𑀕𑁄𑀢𑁆𑀢𑁄𑀢𑀺 𑀢𑀼𑀲𑀺𑀢𑀕𑁄𑀢𑁆𑀢𑁂𑀦 𑀏𑀓𑀕𑁄𑀢𑁆𑀢𑁄. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀸𑀯𑀢𑁆𑀣𑀸𑀬𑀁 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀚𑀦𑀓𑀁 𑀦𑀸𑀫 𑀅𑀓𑀼𑀲𑀮𑁂𑀦 𑀓𑀫𑁆𑀫𑀼𑀦𑀸 𑀅𑀦𑀼𑀧𑀤𑁆𑀤𑀼𑀢𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀼𑀓𑁆𑀔𑀁 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀫𑀢𑁆𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀼𑀜𑁆𑀜𑀸𑀦𑀫𑁆𑀧𑀺 𑀧𑀦 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀤𑀻𑀲𑀼 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄 𑀳𑁄𑀢𑀺𑀬𑁂𑀯𑀸𑀢𑀺 ‘‘𑀓𑀤𑀸𑀘𑀺 𑀤𑀼𑀓𑁆𑀔𑀤𑀼𑀓𑁆𑀔𑀲𑁆𑀲𑀧𑀺 𑀲𑀫𑁆𑀪𑀯𑁄 𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀧𑀜𑁆𑀜𑀸𑀲…𑀧𑁂… 𑀧𑀭𑀺𑀬𑀦𑁆𑀢𑁄𑀢𑀺 𑀇𑀤𑀁 𑀫𑀦𑀼𑀲𑁆𑀲𑀯𑀲𑁆𑀲𑀕𑀡𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁂𑀯𑀸𑀦𑀁 𑀯𑀲𑁆𑀲𑀕𑀡𑀦𑀸𑀬 𑀧𑀦 𑀘𑀢𑀼𑀲𑀳𑀲𑁆𑀲𑀫𑁂𑀯.

𑀇𑀢𑀻𑀢𑀺 𑀯𑀼𑀢𑁆𑀢𑀢𑁆𑀣𑀦𑀺𑀤𑀲𑁆𑀲𑀦𑀫𑁂𑀢𑀁, 𑀢𑀜𑁆𑀘 𑀔𑁄 𑀬𑀣𑀸𑀭𑀳𑀢𑁄, 𑀦 𑀬𑀣𑀸𑀦𑀼𑀧𑀼𑀩𑁆𑀩𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀫𑀕𑁄𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀉𑀤𑁆𑀤𑀺𑀲𑀻𑀬𑀢𑀻𑀢𑀺 𑀤𑀺𑀲𑁆𑀯𑀸𑀯 𑀅𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 ‘‘𑀅𑀬𑀁 𑀓𑁄 𑀦𑀸𑀫𑁄’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀢𑀺𑀲𑁆𑀲𑁄 𑀕𑁄𑀢𑀫𑁄’’𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀉𑀤𑁆𑀤𑀺𑀲𑀻𑀬𑀢𑀺. 𑀯𑀡𑁆𑀡𑀸𑀤𑀻𑀳𑀻𑀢𑀺 𑀯𑀡𑁆𑀡𑀸𑀳𑀸𑀭𑀯𑁂𑀤𑀬𑀺𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑁂𑀳𑀺. 𑀲𑀸𑀫𑁄𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 𑀏𑀯𑀫𑀸𑀤𑀺𑀏𑀯𑀁𑀧𑀓𑀸𑀭𑀦𑀸𑀦𑀢𑁆𑀢𑀢𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀦𑀸𑀫𑀕𑁄𑀢𑁆𑀢𑀁 𑀉𑀤𑁆𑀤𑁂𑀲𑁄𑀢𑀺 𑀉𑀤𑁆𑀤𑀺𑀲𑀻𑀬𑀢𑀺 𑀲𑀢𑁆𑀢𑁄 𑀏𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑁄 𑀦𑀸𑀫𑀕𑁄𑀢𑁆𑀢𑀁. 𑀇𑀢𑀭𑁂 𑀆𑀓𑀸𑀭𑀸𑀢𑀺 𑀆𑀓𑀭𑀻𑀬𑀢𑀺 𑀤𑀺𑀲𑁆𑀯𑀸𑀯 𑀲𑀢𑁆𑀢𑁄 𑀯𑀺𑀜𑁆𑀜𑀸𑀬𑀢𑀺 𑀏𑀢𑁂𑀳𑀻𑀢𑀺 𑀇𑀢𑀭𑁂 𑀯𑀡𑁆𑀡𑀸𑀤𑀬𑁄 𑀆𑀓𑀸𑀭𑀸. ‘‘𑀦𑁄 𑀘 𑀔𑁄 𑀅𑀯𑀺𑀲𑁂𑀲𑁂𑀦𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀢𑁆𑀣𑀺𑀬𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀺𑀢𑁆𑀣𑀺𑀬𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀢𑁂 𑀧𑀦 𑀓𑀫𑁆𑀫𑀯𑀸𑀤𑀺𑀦𑁄 𑀓𑀺𑀭𑀺𑀬𑀯𑀸𑀤𑀺𑀦𑁄 𑀢𑀸𑀧𑀲𑀸𑀤𑀬𑁄. 𑀬𑀲𑁆𑀫𑀸 𑀢𑀺𑀢𑁆𑀣𑀺𑀬𑀸𑀦𑀁 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀏𑀯 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀆𑀕𑀢𑀁, 𑀢𑀲𑁆𑀫𑀸 ‘‘𑀦 𑀢𑀢𑁄 𑀧𑀭’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀬𑁄𑀕𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄𑀬𑁂𑀯 𑀘 𑀩𑀮𑀯𑀧𑀜𑁆𑀜𑀢𑁆𑀢𑀸 𑀞𑀧𑁂𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂 𑀇𑀢𑀭𑁂 𑀧𑀓𑀢𑀺𑀲𑀸𑀯𑀓𑀸 𑀓𑀧𑁆𑀧𑀲𑀢𑀫𑁆𑀧𑀺 𑀓𑀧𑁆𑀧𑀲𑀳𑀲𑁆𑀲𑀫𑁆𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑁂𑀯𑀸𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁨) ‘‘𑀧𑀓𑀢𑀺𑀲𑀸𑀯𑀓𑀸 𑀓𑀧𑁆𑀧𑀲𑀢𑀫𑁆𑀧𑀺 𑀓𑀧𑁆𑀧𑀲𑀳𑀲𑁆𑀲𑀫𑁆𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑁂𑀯 𑀩𑀮𑀯𑀧𑀜𑁆𑀜𑀢𑁆𑀢𑀸’’𑀢𑀺. 𑀏𑀢𑁆𑀢𑀓𑁄 𑀳𑀺 𑀢𑁂𑀲𑀁 𑀅𑀪𑀺𑀦𑀻𑀳𑀸𑀭𑁄𑀢𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀢𑀤𑀥𑀺𑀓𑀁 𑀏𑀓𑀁 𑀤𑁆𑀯𑁂 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀓𑀸𑀮𑀯𑀲𑁂𑀦 𑀏𑀯𑀁𑀧𑀭𑀺𑀫𑀸𑀡𑁄 𑀬𑀣𑀸𑀓𑁆𑀓𑀫𑀁 𑀢𑁂𑀲𑀁 𑀫𑀳𑀸𑀲𑀸𑀯𑀓𑀅𑀕𑁆𑀕𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀼𑀜𑁆𑀜𑀜𑀸𑀡𑀸𑀪𑀺𑀦𑀻𑀳𑀸𑀭𑁄, 𑀲𑀸𑀯𑀓𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀺𑀢𑀸 𑀲𑀺𑀤𑁆𑀥𑀸. 𑀬𑀤𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀓𑀸𑀮𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑁂𑀲𑀁 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀯𑀺𑀪𑀯𑁄, 𑀏𑀯𑀁 𑀲𑀦𑁆𑀢𑁂 𑀩𑀼𑀤𑁆𑀥𑀸𑀦𑀫𑁆𑀧𑀺𑀲𑁆𑀲 𑀧𑀭𑀺𑀘𑁆𑀙𑁂𑀤𑀢𑀸 𑀆𑀧𑀦𑁆𑀦𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻’’𑀢𑀺. ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀩𑀼𑀤𑁆𑀥𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀫𑁆𑀧𑀺 𑀲𑀯𑀺𑀲𑀬𑁂 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀢𑀢𑁆𑀣 𑀬𑀁 𑀬𑀁 𑀜𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀚𑀸𑀦𑀦𑁆𑀢𑀺 ¶ 𑀏𑀯. 𑀅𑀣 𑀯𑀸 𑀲𑀢𑀺𑀧𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁂 𑀓𑀸𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀸𑀤𑀺𑀦𑀸 𑀲𑀸𑀢𑀺𑀲𑀬𑀢𑁆𑀢𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀢𑀁𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻’’𑀢𑀺. 𑀅𑀢𑀻𑀢𑁂 ‘‘𑀏𑀢𑁆𑀢𑀓𑀸𑀦𑀁 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 𑀏𑀯𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀯𑀺𑀬. 𑀢𑁂𑀦𑀸𑀳 ‘‘𑀬𑀸𑀯 𑀇𑀘𑁆𑀙𑀦𑁆𑀢𑀺 𑀢𑀸𑀯 𑀲𑀭𑀦𑁆𑀢𑀻’’𑀢𑀺.

𑀏𑀯𑀁 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀓𑀸𑀮𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀯𑀲𑁂𑀦𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀢𑁆𑀣𑀺𑀬𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀔𑀦𑁆𑀥𑀧𑀝𑀺𑀧𑀸𑀝𑀺𑀫𑁂𑀯 𑀲𑀭𑀦𑁆𑀢𑀻𑀢𑀺 𑀏𑀢𑁆𑀣 𑀔𑀦𑁆𑀥𑀧𑀝𑀺𑀧𑀸𑀝𑀺 𑀔𑀦𑁆𑀥𑀸𑀦𑀁 𑀅𑀦𑀼𑀓𑁆𑀓𑀫𑁄, 𑀲𑀸 𑀘 𑀔𑁄 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀝𑀺𑀧𑀸𑀝𑀺𑀯𑀲𑁂𑀦. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀇𑀭𑀺𑀬𑀸𑀧𑀣𑀧𑀝𑀺𑀧𑀸𑀝𑀺 𑀔𑀦𑁆𑀥𑀧𑀝𑀺𑀧𑀸𑀝𑀻’’𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺 𑀅𑀦𑀸𑀫𑀲𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀏𑀯 𑀕𑀳𑀡𑀯𑀲𑁂𑀦. 𑀬𑀣𑀸 𑀧𑀦 𑀅𑀦𑁆𑀥𑀸 𑀬𑀝𑁆𑀞𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀢𑁂 𑀔𑀦𑁆𑀥𑀧𑀝𑀺𑀧𑀸𑀝𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀦𑁆𑀢𑀻𑀢𑀺 𑀆𑀳 ‘‘𑀢𑁂𑀲𑀜𑁆𑀳𑀺 𑀅𑀦𑁆𑀥𑀸𑀦𑀁 𑀯𑀺𑀬 𑀇𑀘𑁆𑀙𑀺𑀢𑀧𑁆𑀧𑀤𑁂𑀲𑁄𑀓𑁆𑀓𑀫𑀦𑀁 𑀦𑀢𑁆𑀣𑀻’’𑀢𑀺. 𑀲𑀸𑀯𑀓𑀸𑀢𑀺 𑀧𑀓𑀢𑀺𑀲𑀸𑀯𑀓𑀸𑀧𑀺 𑀫𑀳𑀸𑀲𑀸𑀯𑀓𑀸𑀧𑀺 𑀅𑀕𑁆𑀕𑀲𑀸𑀯𑀓𑀸𑀧𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀸. 𑀧𑀓𑀢𑀺𑀲𑀸𑀯𑀓𑀸𑀧𑀺 𑀳𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀧𑀺 𑀅𑀦𑀼𑀲𑁆𑀲𑀭𑀦𑁆𑀢𑀺 ¶ , 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀗𑁆𑀓𑀫𑀦𑁆𑀢𑀺 𑀩𑀮𑀯𑀧𑀜𑁆𑀜𑀢𑁆𑀢𑀸, 𑀢𑀣𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸. 𑀤𑁆𑀯𑀺𑀦𑁆𑀦𑀁 𑀧𑀦 𑀅𑀕𑁆𑀕𑀲𑀸𑀯𑀓𑀸𑀦𑀁 𑀔𑀦𑁆𑀥𑀧𑀝𑀺𑀧𑀸𑀝𑀺𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀏𑀓𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀧𑀲𑁆𑀲𑀦𑁆𑀢𑀺, 𑀧𑀼𑀦 𑀅𑀧𑀭𑀲𑁆𑀲 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀏𑀯𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺 𑀲𑀗𑁆𑀓𑀫𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀬𑀣𑀸 𑀦𑀸𑀫 𑀲𑀭𑀤𑀲𑀫𑀬𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀘𑀢𑀼𑀭𑀢𑀦𑀺𑀓𑁂 𑀕𑁂𑀳𑁂 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀭𑀽𑀧𑀕𑀢𑀁 𑀲𑀼𑀧𑀸𑀓𑀝𑀫𑁂𑀯 𑀳𑁄𑀢𑀻𑀢𑀺 𑀮𑁄𑀓𑀲𑀺𑀤𑁆𑀥𑀫𑁂𑀢𑀁. 𑀲𑀺𑀬𑀸 𑀧𑀦 𑀢𑀲𑁆𑀲 𑀲𑀼𑀔𑀼𑀫𑀢𑀭𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀕𑀢𑀲𑁆𑀲 𑀅𑀕𑁄𑀘𑀭𑀢𑀸, 𑀦 𑀢𑁆𑀯𑁂𑀯 𑀩𑀼𑀤𑁆𑀥𑀸𑀦𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀕𑁄𑀘𑀭𑀢𑀸, 𑀅𑀣 𑀔𑁄 𑀢𑀁 𑀜𑀸𑀡𑀸𑀮𑁄𑀓𑁂𑀦 𑀑𑀪𑀸𑀲𑀺𑀢𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀼𑀧𑀸𑀓𑀝𑀁 𑀲𑀼𑀯𑀺𑀪𑀽𑀢𑀫𑁂𑀯 𑀳𑁄𑀢𑀺, 𑀢𑀣𑀸 𑀜𑁂𑀬𑁆𑀬𑀸𑀯𑀭𑀡𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸 𑀧𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦𑀸𑀢𑀺 𑀲𑀻𑀳𑀕𑀢𑀺𑀧𑀢𑀦𑀯𑀲𑁂𑀦. 𑀬𑀁 𑀬𑀁 𑀞𑀸𑀦𑀁 𑀆𑀓𑀗𑁆𑀔𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀬𑀲𑁆𑀫𑀺𑀁 𑀪𑀯𑁂 𑀬𑀁 𑀬𑀁 𑀞𑀸𑀦𑀁 𑀚𑀸𑀦𑀺𑀢𑀼𑀁 𑀇𑀘𑁆𑀙𑀦𑁆𑀢𑀺. 𑀢𑀁 𑀲𑀩𑁆𑀩𑀁 𑀲𑀭𑀦𑁆𑀢𑀺𑀬𑁂𑀯𑀸𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀢𑀁 𑀲𑀩𑁆𑀩𑀁 𑀲𑀭𑀦𑁆𑀢𑀺𑀬𑁂𑀯, 𑀦 𑀦 𑀲𑀭𑀦𑁆𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀦𑁂𑀯 𑀔𑀦𑁆𑀥𑀧𑀝𑀺𑀧𑀸𑀝𑀺𑀓𑀺𑀘𑁆𑀘𑀁, 𑀦 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀗𑁆𑀓𑀫𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑁂𑀲𑀜𑁆𑀳𑀺 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀬𑀁 𑀬𑀁 𑀞𑀸𑀦𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀧𑀸𑀓𑀝𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸 𑀧𑁂𑀬𑁆𑀬𑀸𑀮𑀧𑀸𑀴𑀺𑀁 𑀧𑀞𑀦𑁆𑀢𑀸 ‘‘𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀧𑀭𑀺𑀬𑁄𑀲𑀸𑀦𑀫𑁂𑀯 𑀕𑀡𑁆𑀳𑀦𑁆𑀢𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀺, 𑀦 𑀅𑀦𑀼𑀧𑀤𑀁, 𑀏𑀯𑀁 𑀅𑀦𑁂𑀓𑀸𑀧𑀺 ¶ 𑀓𑀧𑁆𑀧𑀓𑁄𑀝𑀺𑀬𑁄 𑀧𑁂𑀬𑁆𑀬𑀸𑀮𑀧𑀸𑀴𑀺𑀁 𑀯𑀺𑀬 𑀲𑀗𑁆𑀔𑀺𑀧𑀺𑀢𑁆𑀯𑀸 𑀬𑀁 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀜𑀸𑀡𑁂𑀦 𑀑𑀓𑁆𑀓𑀫𑀦𑁆𑀢𑀸 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀢𑁂𑀲𑀁 𑀜𑀸𑀡𑀁 𑀬𑀣𑀸 𑀦𑀸𑀫 𑀓𑀢𑀯𑀸𑀮𑀯𑁂𑀥𑀺𑀧𑀭𑀺𑀘𑀬𑀲𑁆𑀲 𑀲𑀭𑀪𑀗𑁆𑀕𑀲𑀤𑀺𑀲𑀲𑁆𑀲 𑀥𑀦𑀼𑀕𑁆𑀕𑀳𑀲𑁆𑀲 𑀔𑀺𑀢𑁆𑀢𑁄 𑀲𑀭𑁄 𑀅𑀦𑁆𑀢𑀭𑀦𑁆𑀢𑀭𑀸 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄 𑀮𑀓𑁆𑀔𑁂𑀬𑁂𑀯 𑀧𑀢𑀢𑀺 𑀦 𑀲𑀚𑁆𑀚𑀢𑀺 𑀦 𑀯𑀺𑀭𑀚𑁆𑀛𑀢𑀺, 𑀏𑀯𑀁 𑀅𑀦𑁆𑀢𑀭𑀦𑁆𑀢𑀭𑀸𑀲𑀼 𑀚𑀸𑀢𑀻𑀲𑀼 𑀦 𑀲𑀚𑁆𑀚𑀢𑀺 𑀦 𑀯𑀺𑀭𑀚𑁆𑀛𑀢𑀺, 𑀅𑀲𑀚𑁆𑀚𑀫𑀸𑀦𑀁 𑀅𑀯𑀺𑀭𑀚𑁆𑀛𑀫𑀸𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁𑀬𑁂𑀯 𑀕𑀡𑁆𑀳𑀸𑀢𑀺.

𑀅𑀢𑀻𑀢𑀪𑀯𑁂 𑀔𑀦𑁆𑀥𑀸 𑀢𑀧𑁆𑀧𑀝𑀺𑀩𑀤𑁆𑀥𑀦𑀸𑀫𑀕𑁄𑀢𑁆𑀢𑀸𑀦𑀺 𑀘 𑀲𑀩𑁆𑀩𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑁆𑀯𑁂𑀯 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀓𑀺𑀁 𑀯𑀺𑀤𑀺𑀢𑀁 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲’’𑀦𑁆𑀢𑀺. 𑀫𑁄𑀳𑁄 𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 𑀢𑀫𑁄 𑀯𑀺𑀬 𑀢𑀫𑁄𑀢𑀺 𑀆𑀳 ‘‘𑀲𑁆𑀯𑁂𑀯 𑀫𑁄𑀳𑁄’’𑀢𑀺𑀆𑀤𑀺. 𑀑𑀪𑀸𑀲𑀓𑀭𑀡𑀝𑁆𑀞𑁂𑀦𑀸𑀢𑀺 𑀓𑀸𑀢𑀩𑁆𑀩𑀢𑁄 𑀓𑀭𑀡𑀁, 𑀑𑀪𑀸𑀲𑁄𑀯 𑀓𑀭𑀡𑀁 𑀑𑀪𑀸𑀲𑀓𑀭𑀡𑀁, 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀑𑀪𑀸𑀲𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀦𑀁 𑀩𑁄𑀥𑀦𑀢𑁄 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸𑀢𑀺 𑀏𑀢𑁂𑀦 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺 𑀅𑀬𑀫𑁆𑀧𑀺 ¶ 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸, 𑀧𑀝𑀺𑀧𑀓𑁆𑀔𑀢𑀸 𑀘𑀲𑁆𑀲𑀸 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀚𑁆𑀚𑀸𑀬 𑀘 𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂𑀢𑀺 𑀇𑀫𑀺𑀦𑀸 𑀢𑀫𑁄 𑀯𑀺𑀳𑀢𑁄 𑀯𑀺𑀦𑀝𑁆𑀞𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀝𑁆𑀞𑁂𑀦 𑀯𑀻𑀭𑀺𑀬𑀁 𑀆𑀢𑀸𑀧𑁄𑀢𑀺 𑀆𑀳 ‘‘𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄’’𑀢𑀺, 𑀯𑀻𑀭𑀺𑀬𑀯𑀢𑁄𑀢𑀺 𑀅𑀢𑁆𑀣𑁄. 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀁 𑀧𑀢𑀺𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲. 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄𑀢𑀺 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀫𑀸𑀤𑀺𑀲𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀥𑀸𑀦𑀸𑀦𑀼𑀬𑁄𑀕𑀲𑁆𑀲𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀢𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸

𑁧𑁩. 𑀘𑀼𑀢𑀺𑀬𑀸𑀢𑀺 𑀘𑀯𑀦𑁂. 𑀉𑀧𑀧𑀸𑀢𑁂𑀢𑀺 𑀉𑀧𑀧𑀚𑁆𑀚𑀦𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁, 𑀘𑀼𑀢𑀺𑀓𑁆𑀔𑀡𑀲𑀸𑀫𑀦𑁆𑀢𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑀲𑀸𑀫𑀦𑁆𑀢𑀸 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀬𑁂 𑀧𑀦 𑀆𑀲𑀦𑁆𑀦𑀘𑀼𑀢𑀺𑀓𑀸’’𑀢𑀺𑀆𑀤𑀺. 𑀬𑁂𑀦 𑀜𑀸𑀡𑁂𑀦𑀸𑀢𑀺 𑀬𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦𑁂𑀯 𑀳𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘 𑀉𑀧𑀧𑀢𑁆𑀢𑀺 𑀘 𑀜𑀸𑀬𑀢𑀺. 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 ‘‘𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀓𑀲𑀺𑀡𑀸𑀭𑀫𑁆𑀫𑀡𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 𑀢𑁂𑀚𑁄𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀁 𑀆𑀮𑁄𑀓𑀓𑀲𑀺𑀡𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀓𑀲𑀺𑀡𑁂𑀲𑀼 ¶ 𑀅𑀜𑁆𑀜𑀢𑀭𑀁 𑀆𑀲𑀦𑁆𑀦𑀁 𑀓𑀸𑀢𑀩𑁆𑀩𑀁, 𑀉𑀧𑀘𑀸𑀭𑀚𑁆𑀛𑀸𑀦𑀕𑁄𑀘𑀭𑀁 𑀓𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀞𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬.

𑀲𑁄 𑀅𑀳𑀦𑁆𑀢𑀺 𑀲𑁄 𑀓𑀢𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀅𑀳𑀁. 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸𑀢𑀺 𑀤𑀺𑀯𑀺 𑀪𑀯𑀦𑁆𑀢𑀺 𑀤𑀺𑀩𑁆𑀩𑀁, 𑀤𑁂𑀯𑀸𑀦𑀁 𑀧𑀲𑀸𑀤𑀘𑀓𑁆𑀔𑀼, 𑀢𑁂𑀦 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀤𑀺𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸𑀢𑀺 𑀘 𑀳𑀻𑀦𑀽𑀧𑀫𑀸𑀤𑀲𑁆𑀲𑀦𑀁 𑀤𑁂𑀯𑀢𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀢𑁄𑀧𑀺 𑀇𑀫𑀲𑁆𑀲 ¶ 𑀫𑀳𑀸𑀦𑀼𑀪𑀸𑀯𑀢𑁆𑀢𑀸. 𑀇𑀤𑀸𑀦𑀺 𑀢𑀁 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑁂𑀯𑀢𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀩𑀳𑀼𑀮𑀢𑀸𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀘𑀭𑀺𑀢𑀢𑁆𑀢𑀸 𑀲𑀼𑀘𑀭𑀺𑀢𑁂𑀦 𑀤𑁂𑀯𑀽𑀧𑀧𑀢𑁆𑀢𑀺𑀚𑀦𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁. 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀸𑀢𑀭𑁄𑀕𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀧𑀮𑀺𑀩𑀼𑀤𑁆𑀥𑀦𑁆𑀢𑀺 𑀅𑀦𑀼𑀧𑀤𑁆𑀤𑀼𑀢𑀁. 𑀧𑀺𑀢𑁆𑀢𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀓𑀫𑁆𑀫𑀲𑁆𑀲 𑀘 𑀉𑀴𑀸𑀭𑀢𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀓𑁆𑀓𑀺𑀮𑁂𑀲𑀤𑁄𑀲𑀭𑀳𑀺𑀢𑀜𑁆𑀳𑀺 𑀓𑀫𑁆𑀫𑀁 𑀢𑀺𑀡𑀸𑀤𑀺𑀤𑁄𑀲𑀭𑀳𑀺𑀢𑀁 𑀯𑀺𑀬 𑀲𑀲𑁆𑀲𑀁 𑀉𑀴𑀸𑀭𑀨𑀮𑀁 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀳𑁄𑀢𑀺. 𑀓𑀸𑀭𑀡𑀽𑀧𑀘𑀸𑀭𑁂𑀦 𑀘𑀲𑁆𑀲 𑀨𑀮𑀁 𑀢𑀣𑀸 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓’’𑀦𑁆𑀢𑀺. 𑀤𑀽𑀭𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀼𑀔𑀼𑀫𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀲𑀸𑀤𑀘𑀓𑁆𑀔𑀽𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀲𑀸𑀤𑀮𑀓𑁆𑀔𑀡𑀁 𑀘𑀓𑁆𑀔𑀼. 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀻𑀭𑀺𑀬𑀸𑀭𑀫𑁆𑀪𑀯𑀲𑁂𑀦𑁂𑀯 𑀇𑀚𑁆𑀛𑀦𑀢𑁄 𑀲𑀩𑁆𑀩𑀸𑀧𑀺 𑀓𑀼𑀲𑀮𑀪𑀸𑀯𑀦𑀸 𑀯𑀻𑀭𑀺𑀬𑀪𑀸𑀯𑀦𑀸, 𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀸 𑀯𑀸 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸 𑀯𑀺𑀲𑁂𑀲𑀢𑁄 𑀯𑀻𑀭𑀺𑀬𑀪𑀸𑀯𑀦𑀸, 𑀢𑀲𑁆𑀲𑀸 𑀆𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁. 𑀜𑀸𑀡𑀫𑀬𑀁 𑀘𑀓𑁆𑀔𑀼 𑀜𑀸𑀡𑀘𑀓𑁆𑀔𑀼. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀲𑀼𑀔𑀼𑀫𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀢𑀸𑀬 𑀘 𑀢𑀁𑀲𑀤𑀺𑀲𑀫𑁂𑀯.

𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸. 𑀇𑀫𑀺𑀦𑀸 𑀓𑀸𑀭𑀡𑀯𑀲𑁂𑀦𑀲𑁆𑀲 𑀤𑀺𑀩𑁆𑀩𑀪𑀸𑀯𑀫𑀸𑀳. 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀫𑁂𑀦 𑀉𑀓𑁆𑀓𑀁𑀲𑀕𑀢𑀁 𑀧𑀸𑀤𑀓𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀤𑀺𑀩𑁆𑀩𑀯𑀺𑀳𑀸𑀭𑀁 𑀲𑀦𑁆𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀤𑀺𑀩𑁆𑀩𑀯𑀺𑀳𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀯𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀪𑀽𑀢𑀁 𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀦𑁆𑀢𑀺 𑀓𑀲𑀺𑀡𑀸𑀮𑁄𑀓𑀸𑀦𑀼𑀕𑁆𑀕𑀳𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀲𑀬𑀁 𑀜𑀸𑀡𑀸𑀮𑁄𑀓𑀨𑀭𑀡𑀪𑀸𑀯𑁂𑀦 𑀘 𑀫𑀳𑀸𑀚𑀼𑀢𑀺𑀓𑀪𑀸𑀯𑀢𑁄𑀧𑀺 𑀤𑀺𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀚𑀼𑀢𑀺𑀓𑀫𑁆𑀧𑀺 𑀳𑀺 𑀤𑀺𑀩𑁆𑀩𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀤𑀺𑀩𑁆𑀩𑀫𑀺𑀤𑀁 𑀩𑁆𑀬𑀫𑁆𑀳’’𑀦𑁆𑀢𑀺𑀆𑀤𑀻𑀲𑀼. 𑀫𑀳𑀸𑀕𑀢𑀺𑀓𑀢𑁆𑀢𑀸𑀢𑀺 𑀫𑀳𑀦𑀻𑀬𑀕𑀫𑀦𑀢𑁆𑀢𑀸, 𑀯𑀺𑀫𑁆𑀳𑀬𑀦𑀻𑀬𑀧𑁆𑀧𑀯𑀢𑁆𑀢𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁆𑀳𑀬𑀦𑀻𑀬𑀸 𑀳𑀺𑀲𑁆𑀲 𑀧𑀯𑀢𑁆𑀢𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑀢𑁄. 𑀢𑀁 𑀲𑀩𑁆𑀩𑀦𑁆𑀢𑀺 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀢𑁆𑀣𑀧𑀜𑁆𑀘𑀓𑀫𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀚𑀼𑀢𑀺𑀕𑀢𑀺𑀅𑀢𑁆𑀣𑁂𑀲𑀼𑀧𑀺 𑀲𑀤𑁆𑀤𑀯𑀺𑀤𑀽 𑀤𑀺𑀯𑀼𑀲𑀤𑁆𑀤𑀁 𑀇𑀘𑁆𑀙𑀦𑁆𑀢𑀻𑀢𑀺 𑀫𑀳𑀸𑀚𑀼𑀢𑀺𑀓𑀢𑁆𑀢𑀸 𑀫𑀳𑀸𑀕𑀢𑀺𑀓𑀢𑁆𑀢𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩’𑀦𑁆𑀢𑀺 𑀇𑀤𑀁 𑀤𑀺𑀩𑁆𑀩𑀢𑀺 𑀚𑁄𑀢𑀬𑀢𑀻𑀢𑀺 𑀤𑀺𑀩𑁆𑀩𑀁, 𑀤𑀺𑀩𑁆𑀩𑀢𑀺 ¶ 𑀕𑀘𑁆𑀙𑀢𑀺 𑀅𑀲𑀚𑁆𑀚𑀫𑀸𑀦𑀁 𑀧𑀯𑀢𑁆𑀢𑀢𑀻𑀢𑀺 𑀤𑀺𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀧𑀦 𑁋

‘‘𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀸𑀬 ¶ 𑀬𑁄𑀕𑀺𑀦𑁄 𑀧𑀭𑀺𑀓𑀫𑁆𑀫𑀓𑀭𑀡𑀁 𑀢𑀧𑁆𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀲𑁆𑀲 𑀅𑀢𑁆𑀣𑀢𑁄 𑀢𑀲𑁆𑀲 𑀯𑀺𑀚𑀬𑀺𑀘𑁆𑀙𑀸 𑀦𑀸𑀫 𑀳𑁄𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 𑀘 𑀇𑀤𑁆𑀥𑀺𑀫𑀸 𑀤𑁂𑀯𑀢𑀸𑀦𑀁 𑀯𑀘𑀦𑀕𑀳𑀡𑀓𑁆𑀔𑀫𑀦𑀥𑀫𑁆𑀫𑀤𑀸𑀦𑀯𑀲𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀬𑁄 𑀯𑀺𑀬 𑀤𑀸𑀦𑀕𑁆𑀕𑀳𑀡𑀮𑀓𑁆𑀔𑀡𑁂 𑀯𑁄𑀳𑀸𑀭𑁂 𑀘 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀏𑀯𑀁 𑀯𑀺𑀳𑀸𑀭𑀯𑀺𑀚𑀬𑀺𑀘𑁆𑀙𑀸𑀯𑁄𑀳𑀸𑀭𑀚𑀼𑀢𑀺𑀕𑀢𑀺𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀇𑀫𑀲𑁆𑀲 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀪𑀸𑀯𑀲𑀺𑀤𑁆𑀥𑀺𑀢𑁄 𑀲𑀤𑁆𑀤𑀯𑀺𑀤𑀽 𑀘 𑀢𑁂𑀲𑀼 𑀏𑀯 𑀅𑀢𑁆𑀣𑁂𑀲𑀼 𑀤𑀺𑀯𑀼𑀲𑀤𑁆𑀤𑀁 𑀇𑀘𑁆𑀙𑀦𑁆𑀢𑀻𑀢𑀺 ‘𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑁋

𑀆𑀳.

𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀭𑀽𑀧𑀤𑀲𑁆𑀲𑀦𑀪𑀸𑀯𑁂𑀦. 𑀘𑀓𑁆𑀔𑀼𑀦𑀸 𑀳𑀺 𑀲𑀢𑁆𑀢𑀸 𑀭𑀽𑀧𑀁 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀫𑀁𑀲𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀢𑀣𑀸 𑀇𑀤𑀁. 𑀇𑀤𑀁 𑀧𑀦 𑀲𑀬𑀫𑁂𑀯 𑀢𑀢𑁄 𑀲𑀸𑀢𑀺𑀲𑀬𑀁 𑀘𑀓𑁆𑀔𑀼𑀓𑀺𑀘𑁆𑀘𑀓𑀸𑀭𑀻𑀢𑀺 𑀆𑀳 ‘‘𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀽’’𑀢𑀺. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻𑀢𑀺 𑀧𑀭𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀢𑁄 ‘‘𑀏𑀢𑁆𑀣𑁂 𑀯𑀸𑀬𑀁 𑀲𑀢𑁆𑀢𑁄 𑀉𑀘𑁆𑀙𑀺𑀦𑁆𑀦𑁄, 𑀏𑀯𑀫𑀺𑀢𑀭𑁂𑀧𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻𑀢𑀺 𑀛𑀸𑀦𑀮𑀸𑀪𑀻 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑁄 𑀯𑀺𑀬 𑀕𑀡𑁆𑀳𑀸𑀢𑀺. 𑀬𑀣𑀸 𑀳𑀺 𑀲𑁄 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀅𑀪𑀺𑀜𑁆𑀜𑀸𑀮𑀸𑀪𑀻 𑀳𑀼𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀇𑀥𑀽𑀧𑀧𑀢𑁆𑀢𑀺𑀫𑁂𑀯 𑀤𑀺𑀲𑁆𑀯𑀸 𑀢𑀢𑁄 𑀧𑀭𑀁 𑀅𑀲𑀜𑁆𑀜𑀪𑀯𑁂 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 ‘‘𑀅𑀳𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀳𑀼𑀢𑁆𑀯𑀸 𑀲𑀢𑁆𑀢𑀢𑀸𑀬 𑀧𑀭𑀺𑀡𑀢𑁄, 𑀲𑁂𑀲𑀸𑀧𑀺 𑀲𑀢𑁆𑀢𑀸 𑀢𑀸𑀤𑀺𑀲𑀸𑀬𑁂𑀯𑀸’’𑀢𑀺 𑀅𑀪𑀺𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀏𑀯𑀫𑀬𑀫𑁆𑀧𑀺 𑀉𑀧𑀧𑀸𑀢𑀫𑀢𑁆𑀢𑀫𑁂𑀯 𑀤𑀺𑀲𑁆𑀯𑀸 𑀘𑀼𑀢𑀺𑀁 𑀅𑀧𑀲𑁆𑀲𑀦𑁆𑀢𑁄 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺.

𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀸𑀤𑀲𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁄 𑀯𑀸’’𑀢𑀺𑀆𑀤𑀺. 𑀬𑀣𑀸𑀳𑀸𑀢𑀺 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑁂 𑀆𑀕𑀢𑀧𑀸𑀴𑀺𑀁 𑀦𑀺𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀅𑀦𑀼𑀭𑀼𑀤𑁆𑀥𑁄 𑀦𑀦𑁆𑀤𑀺𑀬𑁄 𑀓𑀺𑀫𑀺𑀮𑁄𑀢𑀺 𑀇𑀫𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀅𑀦𑀼𑀭𑀼𑀤𑁆𑀥𑀸 𑀢𑀼𑀫𑁆𑀳𑁂 𑀓𑀺𑀁 𑀇𑀫𑁂𑀳𑀺 𑀦 𑀆𑀮𑀼𑀴𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀇𑀫𑁂𑀳𑀺 𑀉𑀧𑀸𑀤𑀸𑀬 𑀏𑀓𑀸𑀤𑀲𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀆𑀮𑀼𑀴𑀺𑀢𑀧𑀼𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑁋

‘‘𑀅𑀳𑀫𑁆𑀧𑀺 ¶ ¶ 𑀲𑀼𑀤𑀁 𑀅𑀦𑀼𑀭𑀼𑀤𑁆𑀥𑀸 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀲𑀢𑁆𑀢𑁄𑀯 𑀲𑀫𑀸𑀦𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄 𑀔𑁄 𑀧𑀦 𑀫𑁂 𑀑𑀪𑀸𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀯𑀺𑀘𑀺𑀓𑀺𑀘𑁆𑀙𑀸 𑀔𑁄 𑀫𑁂 𑀉𑀤𑀧𑀸𑀤𑀺, 𑀯𑀺𑀘𑀺𑀓𑀺𑀘𑁆𑀙𑀸𑀥𑀺𑀓𑀭𑀡𑀜𑁆𑀘 𑀫𑁂 𑀲𑀫𑀸𑀥𑀺 𑀘𑀯𑀺, 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺.

‘‘𑀲𑁄 𑀔𑁄 𑀅𑀳𑀁 𑀅𑀦𑀼𑀭𑀼𑀤𑁆𑀥𑀸 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄 𑀔𑁄 𑀧𑀦 𑀫𑁂 𑀑𑀪𑀸𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀅𑀫𑀦𑀲𑀺𑀓𑀸𑀭𑁄 𑀔𑁄 𑀫𑁂 𑀉𑀤𑀧𑀸𑀤𑀺, 𑀅𑀫𑀦𑀲𑀺𑀓𑀸𑀭𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺 𑀘𑀯𑀺, 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀫𑁂 𑀧𑀼𑀦 𑀦 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀅𑀫𑀦𑀲𑀺𑀓𑀸𑀭𑁄’’’𑀢𑀺 𑁋

𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁧) 𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑁄 𑀔𑁄 𑀅𑀳𑀁 𑀅𑀦𑀼𑀭𑀼𑀤𑁆𑀥𑀸 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 (𑀫. 𑀦𑀺. 𑀅𑀝𑁆𑀞. 𑁩.𑁨𑁪𑁧) 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀲𑁆𑀲 ‘‘𑀇𑀤𑀁 𑀦𑀼 𑀔𑁄 𑀓𑀺’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀦 𑀫𑁂 𑀭𑀽𑀧𑀸𑀦𑀺 𑀉𑀧𑀝𑁆𑀞𑀳𑀺𑀁𑀲𑀼, 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀤𑀸𑀦𑀺 𑀓𑀺𑀜𑁆𑀘𑀺 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀢𑀼𑀡𑁆𑀳𑀻 𑀪𑀯𑀢𑀺, 𑀢𑀁 𑀢𑀼𑀡𑁆𑀳𑀻𑀪𑀸𑀯𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀫𑀦𑀲𑀺𑀓𑀸𑀭𑁄’’𑀢𑀺. 𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀓𑀺𑀜𑁆𑀘𑀺 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀣𑀺𑀦𑀫𑀺𑀤𑁆𑀥𑀁. 𑀢𑀣𑀸𑀪𑀽𑀢𑀲𑁆𑀲 𑀳𑀺 𑀲𑀯𑀺𑀧𑁆𑀨𑀸𑀭𑀺𑀓𑀫𑀦𑀲𑀺𑀓𑀸𑀭𑀲𑁆𑀲 𑀅𑀪𑀸𑀯𑀢𑁄 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀬𑀣𑀸𑀭𑀤𑁆𑀥𑀫𑀦𑀲𑀺𑀓𑀸𑀭𑀯𑀲𑁂𑀦 ¶ 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀸𑀦𑀯𑀭𑀓𑁆𑀔𑀲𑀅𑀚𑀕𑀭𑀸𑀤𑀬𑁄 𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀙𑀫𑁆𑀪𑀺𑀢𑀢𑁆𑀢𑀁. 𑀉𑀧𑁆𑀧𑀺𑀮𑀦𑁆𑀢𑀺 ‘‘𑀫𑀬𑀸 𑀤𑀺𑀝𑁆𑀞𑀪𑀬𑀁 𑀧𑀓𑀢𑀺𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀑𑀮𑁄𑀓𑀺𑀬𑀫𑀸𑀦𑀁 𑀦 𑀧𑀲𑁆𑀲𑀢𑀺, 𑀅𑀤𑀺𑀝𑁆𑀞𑁂 𑀧𑀭𑀺𑀓𑀧𑁆𑀧𑀺𑀢𑀲𑀤𑀺𑀲𑁂 𑀓𑀺𑀁𑀦𑀸𑀫 𑀪𑀬’’𑀦𑁆𑀢𑀺 𑀪𑀬𑀲𑁆𑀲 𑀯𑀺𑀦𑁄𑀤𑀦𑀯𑀲𑁂𑀦 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑁄𑀲𑀮𑁆𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀓𑀸𑀬𑀸𑀮𑀲𑀺𑀬𑀁. ‘‘𑀫𑀬𑀸 𑀣𑀺𑀦𑀫𑀺𑀤𑁆𑀥𑀁 𑀙𑀫𑁆𑀪𑀺𑀢𑀢𑁆𑀢𑀸𑀦𑀁 𑀯𑀽𑀧𑀲𑀫𑀦𑀢𑁆𑀣𑀁 𑀕𑀸𑀴𑁆𑀳𑀁 𑀯𑀻𑀭𑀺𑀬𑀁 ¶ 𑀧𑀕𑁆𑀕𑀳𑀺𑀢𑀁, 𑀢𑁂𑀦 𑀫𑁂 𑀉𑀧𑁆𑀧𑀺𑀮𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀲𑀫𑀸𑀥𑀺𑀤𑀽𑀲𑀺𑀢𑀸 𑀕𑁂𑀳𑀲𑁆𑀲𑀺𑀢𑀸 𑀩𑀮𑀯𑀧𑀻𑀢𑀺 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁 𑀓𑀸𑀬𑀤𑀭𑀣𑁄 𑀓𑀸𑀬𑀸𑀮𑀲𑀺𑀬𑀁 𑀉𑀤𑀧𑀸𑀤𑀺.

𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀦𑁆𑀢𑀺 ‘‘𑀫𑀫 𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀢𑁄 𑀤𑀼𑀝𑁆𑀞𑀼𑀮𑁆𑀮𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀦 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄 𑀉𑀧𑁆𑀧𑀦𑁆𑀦𑀁 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁. 𑀅𑀢𑀺𑀮𑀻𑀦𑀯𑀻𑀭𑀺𑀬𑀦𑁆𑀢𑀺 ‘‘𑀫𑀫 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄 𑀏𑀯𑀁 𑀚𑀸𑀢’’𑀦𑁆𑀢𑀺 𑀧𑀼𑀦 𑀯𑀻𑀭𑀺𑀬𑀁 𑀲𑀺𑀣𑀺𑀮𑀬𑀢𑁄 𑀉𑀧𑁆𑀧𑀦𑁆𑀦𑀁 𑀅𑀢𑀺𑀮𑀻𑀦𑀯𑀻𑀭𑀺𑀬𑀁. 𑀅𑀪𑀺𑀚𑀧𑁆𑀧𑀸𑀢𑀺 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀯𑀲𑀗𑁆𑀖𑀁 𑀧𑀲𑁆𑀲𑀢𑁄 𑀉𑀧𑁆𑀧𑀦𑁆𑀦𑀸 𑀢𑀡𑁆𑀳𑀸. ‘‘𑀏𑀯𑀁 𑀫𑁂 𑀳𑁄𑀢𑀽’’𑀢𑀺 𑀳𑀺 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦 𑀚𑀧𑁆𑀧𑀢𑀻𑀢𑀺 𑀅𑀪𑀺𑀚𑀧𑁆𑀧𑀸, 𑀢𑀡𑁆𑀳𑀸. 𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 ‘‘𑀫𑀬𑁆𑀳𑀁 𑀏𑀓𑀚𑀸𑀢𑀺𑀓𑀁 𑀭𑀽𑀧𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀪𑀺𑀚𑀧𑁆𑀧𑀸 𑀉𑀧𑁆𑀧𑀦𑁆𑀦𑀸, 𑀦𑀸𑀦𑀸𑀯𑀺𑀥𑀁 𑀭𑀽𑀧𑀁 𑀫𑀦𑀲𑀺𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑁂𑀦 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀸𑀪𑀺𑀫𑀼𑀔𑀁 𑀯𑀟𑁆𑀠𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀦𑁆𑀦𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀲𑀜𑁆𑀜𑀸𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀸. 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀦𑁆𑀢𑀺 ‘‘𑀫𑀬𑁆𑀳𑀁 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀤𑀧𑀸𑀤𑀺, 𑀇𑀝𑁆𑀞𑀁 𑀯𑀸 𑀅𑀦𑀺𑀝𑁆𑀞𑀁 𑀯𑀸 𑀏𑀓𑀚𑀸𑀢𑀺𑀓𑀫𑁂𑀯 𑀭𑀽𑀧𑀁 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀣𑀸 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀦𑁆𑀦𑀁 𑀭𑀽𑀧𑀸𑀦𑀁 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁, 𑀅𑀢𑀺𑀯𑀺𑀬 𑀉𑀢𑁆𑀢𑀭𑀺 𑀓𑀢𑁆𑀯𑀸 𑀦𑀺𑀚𑁆𑀛𑀸𑀦𑀁 𑀧𑁂𑀓𑁆𑀔𑀦𑀁 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁. 𑀑𑀪𑀸𑀲𑀦𑁆𑀢𑀺 𑀧𑀭𑀺𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁 𑀑𑀪𑀸𑀲𑀁. 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀻𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑀫𑀦𑀲𑀺𑀓𑀸𑀭𑀧𑁆𑀧𑀲𑀼𑀢𑀢𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀸𑀫𑀺. 𑀭𑀽𑀧𑀸𑀦𑀺 𑀳𑀺 𑀔𑁄 𑀧𑀲𑁆𑀲𑀸𑀫𑀻𑀢𑀺 𑀢𑁂𑀦 𑀧𑀭𑀺𑀓𑀫𑁆𑀫𑁄𑀪𑀸𑀲𑁂𑀦 𑀨𑀭𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀯𑀺𑀲𑀬𑀪𑀽𑀢𑀸𑀦𑀺 𑀭𑀽𑀧𑀕𑀢𑀸𑀦𑀺 𑀧𑀲𑁆𑀲𑀸𑀫𑀺.

𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁆𑀯𑀸𑀳𑀁 ¶ 𑀑𑀪𑀸𑀲𑀜𑁆𑀳𑀺 𑀔𑁄 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺, 𑀭𑀽𑀧𑀸𑀦𑀺 𑀔𑁄 𑀧𑀲𑁆𑀲𑀸𑀫𑀺, 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀅𑀦𑀼𑀭𑀼𑀤𑁆𑀥𑀸 𑀏𑀢𑀤𑀳𑁄𑀲𑀺 ‘𑀬𑀲𑁆𑀫𑀺𑀜𑁆𑀳𑀺 𑀔𑁄 𑀅𑀳𑀁 𑀲𑀫𑀬𑁂 𑀭𑀽𑀧𑀦𑀺𑀫𑀺𑀢𑁆𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀑𑀪𑀸𑀲𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀺. 𑀑𑀪𑀸𑀲𑀜𑁆𑀳𑀺 𑀔𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀜𑁆𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺. 𑀬𑀲𑁆𑀫𑀺𑀁 𑀧𑀦𑀸𑀳𑀁 𑀲𑀫𑀬𑁂 𑀑𑀪𑀸𑀲𑀦𑀺𑀫𑀺𑀢𑁆𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀭𑀽𑀧𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀺. 𑀭𑀽𑀧𑀸𑀦𑀺 𑀳𑀺 𑀔𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀸𑀫𑀺, 𑀦 𑀘 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀁 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯’’𑀦𑁆𑀢𑀺 (𑀫. 𑀦𑀺. 𑁩.𑁨𑁪𑁩) 𑁋

𑀏𑀯𑀫𑀸𑀤𑀺𑀧𑀸𑀴𑀺𑀁 ¶ 𑀲𑀗𑁆𑀕𑀡𑁆𑀳𑀸𑀢𑀺.

𑀫𑀦𑀼𑀲𑁆𑀲𑀸𑀦𑀁 𑀇𑀤𑀦𑁆𑀢𑀺 𑀫𑀸𑀦𑀼𑀲𑀓𑀁, 𑀫𑀦𑀼𑀲𑁆𑀲𑀸𑀦𑀁 𑀕𑁄𑀘𑀭𑀪𑀽𑀢𑀁 𑀭𑀽𑀧𑀸𑀭𑀫𑁆𑀫𑀡𑀁. 𑀢𑀤𑀜𑁆𑀜𑀲𑁆𑀲 𑀧𑀦 𑀤𑀺𑀩𑁆𑀩𑀢𑀺𑀭𑁄𑀓𑀼𑀝𑁆𑀝𑀲𑀼𑀔𑀼𑀫𑀸𑀤𑀺𑀪𑁂𑀤𑀲𑁆𑀲 𑀭𑀽𑀧𑀲𑁆𑀲 𑀤𑀲𑁆𑀲𑀦𑀢𑁄 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀁. 𑀏𑀯𑀭𑀽𑀧𑀁 𑀢𑀜𑁆𑀘 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑁂𑀦𑀸’’𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀽𑀧𑀘𑀸𑀭𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀉𑀧𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁, 𑀧𑀓𑀢𑀺𑀬𑀸 𑀘𑀓𑁆𑀔𑀼𑀤𑁆𑀯𑀸𑀭𑁂𑀦 𑀕𑀳𑁂𑀢𑀩𑁆𑀩𑀁 𑀯𑀺𑀲𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀯𑀺𑀲𑀬𑀫𑀼𑀔𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑀬𑀺𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑀼𑀲𑀓𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀫𑀁𑀲𑀘𑀓𑁆𑀔𑀸𑀢𑀺𑀓𑁆𑀓𑀫𑁄 𑀢𑀲𑁆𑀲 𑀓𑀺𑀘𑁆𑀘𑀸𑀢𑀺𑀓𑁆𑀓𑀫𑁂𑀦𑁂𑀯 𑀤𑀝𑁆𑀞𑀩𑁆𑀩𑁄. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦𑀧𑀺 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸 𑀔𑀡𑀲𑁆𑀲 𑀅𑀢𑀺𑀇𑀢𑁆𑀢𑀭𑀢𑀸𑀬 𑀅𑀢𑀺𑀲𑀼𑀔𑀼𑀫𑀢𑀸𑀬 𑀓𑁂𑀲𑀜𑁆𑀘𑀺 𑀭𑀽𑀧𑀲𑁆𑀲, 𑀅𑀧𑀺𑀘 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀢𑀜𑁆𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀪𑀽𑀢𑀁, 𑀦 𑀘 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑁂𑀳𑀺 𑀯𑀺𑀦𑀸 𑀫𑀳𑀕𑁆𑀕𑀢𑀲𑁆𑀲 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀪𑀺𑀚𑁆𑀚𑀫𑀸𑀦𑀁 𑀯𑀸, 𑀢𑀲𑁆𑀫𑀸 𑀘𑀼𑀢𑀽𑀧𑀧𑀸𑀢𑀓𑁆𑀔𑀡𑁂 𑀭𑀽𑀧𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀝𑁆𑀞𑀼𑀁 𑀦 𑀲𑀓𑁆𑀓𑀸𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁.

𑀬𑀤𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑀫𑁂𑀯, 𑀅𑀣 𑀓𑀲𑁆𑀫𑀸 ‘‘𑀲𑀢𑁆𑀢𑁂 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀭𑀽𑀧𑀤𑀲𑁆𑀲𑀦𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀕𑀳𑀡𑀲𑁆𑀲 𑀯𑀸 𑀓𑀸𑀭𑀡𑀪𑀸𑀯𑀢𑁄 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑁂 𑀘𑀯𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀭𑀽𑀧𑁂𑀢𑀺 𑀦 𑀘𑀼𑀢𑀽𑀧𑀧𑀸𑀢𑀓𑁆𑀔𑀡𑀲𑀫𑀗𑁆𑀕𑀺𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑁄𑀳𑀽𑀧𑀦𑀺𑀲𑁆𑀲𑀬𑀁 𑀦𑀸𑀫 𑀓𑀫𑁆𑀫𑀁 𑀦𑀺𑀳𑀻𑀦𑀁 𑀦𑀺𑀳𑀻𑀦𑀨𑀮𑀁 𑀳𑁄𑀢𑀻𑀢𑀺 𑀆𑀳 ‘‘𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸’’𑀢𑀺. 𑀫𑁄𑀳𑀽𑀧𑀦𑀺𑀲𑁆𑀲𑀬𑀢𑀸 𑀘 𑀓𑀼𑀲𑀮𑀓𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 ¶ 𑀫𑁄𑀳𑀧𑁆𑀧𑀯𑀢𑁆𑀢𑀺𑀩𑀳𑀼𑀮𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀬 𑀧𑀦 𑀫𑁄𑀳𑀧𑁆𑀧𑀯𑀢𑁆𑀢𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀁 𑀓𑀼𑀲𑀮𑀓𑀫𑁆𑀫𑀁 𑀦𑀺𑀳𑀻𑀦𑀫𑁂𑀯 𑀚𑀸𑀢𑀺𑀆𑀤𑀺𑀁 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀦𑀺𑀳𑀻𑀦𑀚𑀸𑀢𑀺𑀆𑀤𑀬𑁄 𑀫𑁄𑀳𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀸𑀦𑀻𑀢𑀺 𑀆𑀳 ‘‘𑀳𑀻𑀦𑀸𑀦𑀁 𑀚𑀸𑀢𑀺𑀓𑀼𑀮𑀪𑁄𑀕𑀸𑀤𑀻𑀦’’𑀦𑁆𑀢𑀺𑀆𑀤𑀺. 𑀳𑀻𑀴𑀺𑀢𑁂𑀢𑀺 𑀕𑀭𑀳𑀺𑀢𑁂. 𑀑𑀳𑀻𑀴𑀺𑀢𑁂𑀢𑀺 𑀯𑀺𑀲𑁂𑀲𑀢𑁄 𑀕𑀭𑀳𑀺𑀢𑁂. 𑀉𑀜𑁆𑀜𑀸𑀢𑁂𑀢𑀺 𑀮𑀸𑀫𑀓𑀪𑀸𑀯𑁂𑀦 𑀜𑀸𑀢𑁂. 𑀅𑀯𑀜𑁆𑀜𑀸𑀢𑁂𑀢𑀺 𑀯𑀺𑀲𑁂𑀲𑀢𑁄 𑀮𑀸𑀫𑀓𑀪𑀸𑀯𑁂𑀦 𑀯𑀺𑀤𑀺𑀢𑁂. 𑀅𑀫𑁄𑀳𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀫𑁄𑀳𑁄 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀘 𑀧𑀯𑀢𑁆𑀢𑁄 𑀓𑀣𑀺𑀢𑁄, 𑀢𑁂𑀦 𑀘 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀤𑀲𑁆𑀲𑁂𑀢𑀺. 𑀢𑀩𑁆𑀩𑀺𑀧𑀭𑀻𑀢𑁂𑀢𑀺 𑀢𑀲𑁆𑀲 𑀳𑀻𑀴𑀺𑀢𑀸𑀤𑀺𑀪𑀸𑀯𑀲𑁆𑀲 𑀯𑀺𑀧𑀭𑀻𑀢𑁂, 𑀅𑀳𑀻𑀴𑀺𑀢𑁂 𑀅𑀦𑁄𑀳𑀻𑀴𑀺𑀢𑁂 𑀅𑀦𑀼𑀜𑁆𑀜𑀸𑀢𑁂 𑀅𑀦𑀯𑀜𑁆𑀜𑀸𑀢𑁂 𑀘𑀺𑀢𑁆𑀢𑀻𑀓𑀢𑁂𑀢𑀺 𑀅𑀢𑁆𑀣𑁄.

𑀲𑀼𑀯𑀡𑁆𑀡𑁂𑀢𑀺 𑀲𑀼𑀦𑁆𑀤𑀭𑀯𑀡𑁆𑀡𑁂. 𑀤𑀼𑀩𑁆𑀩𑀡𑁆𑀡𑁂𑀢𑀺 𑀅𑀲𑀼𑀦𑁆𑀤𑀭𑀯𑀡𑁆𑀡𑁂. 𑀲𑀸 𑀧𑀦𑀸𑀬𑀁 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸 𑀬𑀣𑀸𑀓𑁆𑀓𑀫𑀁 𑀓𑀫𑁆𑀫𑀲𑁆𑀲 𑀅𑀤𑁄𑀲𑀤𑁄𑀲𑀽𑀧𑀦𑀺𑀲𑁆𑀲𑀬𑀢𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀤𑁄𑀲𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺. 𑀅𑀤𑁄𑀲𑀽𑀧𑀦𑀺𑀲𑁆𑀲𑀬𑀢𑀸 𑀘 𑀓𑀫𑁆𑀫𑀲𑁆𑀲 𑀫𑁂𑀢𑁆𑀢𑀸𑀤𑀻𑀳𑀺 𑀧𑀭𑀺𑀪𑀸𑀯𑀺𑀢𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺 ¶ 𑀇𑀤𑀁 𑀲𑀡𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀡𑁆𑀞𑀸𑀦𑀯𑀘𑀦𑁄𑀧𑀺 𑀳𑀺 𑀯𑀡𑁆𑀡𑀲𑀤𑁆𑀤𑁄 𑀳𑁄𑀢𑀺 ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀯𑀺𑀬. 𑀧𑀞𑀫𑀁 𑀯𑀼𑀢𑁆𑀢𑁄 𑀧𑀦 𑀅𑀢𑁆𑀣𑁄 𑀯𑀡𑁆𑀡𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀲𑀼𑀦𑁆𑀤𑀭𑀁 𑀕𑀢𑀺𑀁 𑀕𑀢𑀸 𑀲𑀼𑀕𑀢𑀸𑀢𑀺 𑀆𑀳 ‘‘𑀲𑀼𑀕𑀢𑀺𑀕𑀢𑁂’’𑀢𑀺, 𑀲𑀼𑀕𑀢𑀺𑀁 𑀉𑀧𑀧𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀅𑀮𑁄𑀪𑀚𑁆𑀛𑀸𑀲𑀬𑀸 𑀲𑀢𑁆𑀢𑀸 𑀯𑀤𑀜𑁆𑀜𑀽 𑀯𑀺𑀕𑀢𑀫𑀘𑁆𑀙𑁂𑀭𑀸 𑀅𑀮𑁄𑀪𑀽𑀧𑀦𑀺𑀲𑁆𑀲𑀬𑁂𑀦 𑀓𑀫𑁆𑀫𑀼𑀦𑀸 𑀲𑀼𑀕𑀢𑀸 𑀲𑀫𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂’’𑀢𑀺. 𑀤𑀼𑀓𑁆𑀔𑀁 𑀕𑀢𑀺𑀁 𑀕𑀢𑀸 𑀤𑀼𑀕𑁆𑀕𑀢𑀸𑀢𑀺 𑀆𑀳 ‘‘𑀤𑀼𑀕𑁆𑀕𑀢𑀺𑀕𑀢𑁂’’𑀢𑀺. 𑀮𑁄𑀪𑀚𑁆𑀛𑀸𑀲𑀬𑀸 𑀲𑀢𑁆𑀢𑀸 𑀮𑀼𑀤𑁆𑀥𑀸 𑀫𑀘𑁆𑀙𑀭𑀺𑀦𑁄 𑀮𑁄𑀪𑀽𑀧𑀦𑀺𑀲𑁆𑀲𑀬𑁂𑀦 𑀓𑀫𑁆𑀫𑀼𑀦𑀸 𑀤𑀼𑀕𑁆𑀕𑀢𑀸 𑀤𑀼𑀭𑀽𑀧𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀮𑁄𑀪𑀦𑀺𑀲𑁆𑀲𑀦𑁆𑀤𑀬𑀼𑀢𑁆𑀢𑀢𑁆𑀢𑀸 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑁂’’𑀢𑀺. 𑀉𑀧𑀘𑀺𑀢𑀦𑁆𑀢𑀺 𑀨𑀮𑀸𑀯𑀳𑀪𑀸𑀯𑁂𑀦 𑀓𑀢𑀁. 𑀬𑀣𑀸 𑀓𑀢𑀜𑁆𑀳𑀺 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀁. 𑀘𑀯𑀫𑀸𑀦𑁂𑀢𑀺𑀆𑀤𑀻𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀲𑀬𑀫𑀼𑀔𑁂𑀦 𑀯𑀺𑀲𑀬𑀺𑀩𑁆𑀬𑀸𑀧𑀸𑀭𑀫𑀸𑀳. 𑀧𑀼𑀭𑀺𑀫𑁂𑀳𑀻𑀢𑀺 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀤𑀻𑀳𑀻𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 ‘‘𑀤𑀺𑀩𑁆𑀩𑁂𑀦…𑀧𑁂… 𑀧𑀲𑁆𑀲𑀸𑀫𑀻’’𑀢𑀺 𑀇𑀫𑁂𑀳𑀺 ‘‘𑀘𑀯𑀫𑀸𑀦𑁂’’𑀢𑀺𑀆𑀤𑀻𑀳𑀺 𑀘 𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 ¶ 𑀧𑀦 𑀧𑀤𑁂𑀦𑀸𑀢𑀺 ‘‘𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀸𑀓𑁆𑀬𑁂𑀦. 𑀧𑀚𑁆𑀚𑀢𑀺 𑀜𑀸𑀬𑀢𑀺 𑀅𑀢𑁆𑀣𑁄 𑀇𑀫𑀺𑀦𑀸𑀢𑀺 𑀳𑀺 𑀧𑀤𑀁 𑀯𑀸𑀓𑁆𑀬𑀁.

𑀫𑀳𑀦𑁆𑀢𑀁 𑀤𑀼𑀓𑁆𑀔𑀫𑀦𑀼𑀪𑀯𑀫𑀸𑀦𑁂𑀢𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸 𑀢𑁂𑀲𑀁 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦𑁂𑀯 𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀢𑀺 𑀦𑁂𑀭𑀬𑀺𑀓𑀲𑀢𑁆𑀢𑁂 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀞𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻. 𑀏𑀯𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀢𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀜𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀓𑀺𑀁 𑀦𑀼 𑀔𑁄𑀢𑀺𑀆𑀤𑀺 𑀫𑀦𑀲𑀺𑀓𑀸𑀭𑀯𑀺𑀥𑀺𑀤𑀲𑁆𑀲𑀦𑀁. 𑀏𑀯𑀁 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀬𑁂𑀲𑀁 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀭𑀺𑀓𑀫𑁆𑀫𑀉𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀦𑀸𑀫𑀓𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀭𑀽𑀧𑀸𑀯𑀘𑀭𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁, 𑀢𑀢𑁆𑀣 𑀬𑀁 𑀢𑁂𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀢𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀯𑀺𑀦𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀘𑁂𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀫𑀳𑀕𑁆𑀕𑀢𑀪𑀸𑀯𑁄 𑀏𑀯 𑀦 𑀲𑀺𑀬𑀸. 𑀤𑁂𑀯𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑁂𑀭𑀬𑀺𑀓𑀤𑁂𑀯𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀆𑀓𑀗𑁆𑀔𑀫𑀸𑀦𑁄 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 𑀅𑀜𑁆𑀜𑀕𑀢𑀺𑀓𑁂𑀲𑀼𑀧𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺𑀬𑁂𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀧𑀸𑀬𑀕𑁆𑀕𑀳𑀡𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀤𑀻𑀧𑁂𑀢𑀻’’𑀢𑀺𑀆𑀤𑀺, ‘‘𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀘. 𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀁 𑀆𑀭𑀫𑁆𑀫𑀡𑀫𑁂𑀢𑀲𑁆𑀲𑀸𑀢𑀺 𑀢𑀁𑀓𑀫𑁆𑀫𑀸𑀭𑀫𑁆𑀫𑀡𑀁. 𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀺𑀢𑁆𑀢𑀮𑀢𑀸𑀯𑀦𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀬𑀣𑀸 ¶ 𑀘𑀺𑀫𑀲𑁆𑀲𑀸𑀢𑀺 𑀬𑀣𑀸 𑀘 𑀇𑀫𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀺, 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀻𑀢𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀸𑀪𑀸𑀯𑀜𑁆𑀘 𑀦𑀺𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀸𑀦𑁂𑀯 𑀳𑀺 𑀇𑀫𑀸𑀦𑀻’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀻 𑀦𑀺𑀭𑀬𑀸𑀤𑀺𑀅𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑁂𑀭𑀬𑀺𑀓𑀸𑀤𑀺𑀓𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀢𑁂𑀳𑀺 𑀧𑀼𑀩𑁆𑀩𑁂 𑀆𑀬𑀽𑀳𑀺𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀸𑀤𑀺𑀓𑀁 𑀓𑀫𑁆𑀫𑀁 𑀢𑀸𑀤𑀺𑀲𑁂𑀦 𑀲𑀫𑀸𑀤𑀸𑀦𑁂𑀦 𑀢𑀚𑁆𑀚𑁂𑀦 𑀘 𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀓𑁆𑀔𑀢𑁂 𑀘𑀺𑀢𑁆𑀢𑁂 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺, 𑀏𑀯𑀁 𑀬𑀲𑁆𑀲 𑀬𑀲𑁆𑀲 𑀲𑀢𑁆𑀢𑀲𑁆𑀲 𑀲𑀫𑀦𑀦𑁆𑀢𑀭𑀁 𑀅𑀦𑀸𑀕𑀢𑀁 𑀅𑀢𑁆𑀢𑀪𑀸𑀯𑀁 𑀜𑀸𑀢𑀼𑀓𑀸𑀫𑁄, 𑀢𑀁 𑀢𑀁 𑀑𑀤𑀺𑀲𑁆𑀲 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀅𑀢𑀻𑀢𑁂 𑀏𑀢𑀭𑀳𑀺 𑀯𑀸 𑀆𑀬𑀽𑀳𑀺𑀢𑀁 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 ¶ 𑀤𑀺𑀲𑁆𑀯𑀸 𑀢𑁂𑀦 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀅𑀦𑀸𑀕𑀢𑀁 𑀅𑀢𑁆𑀢𑀪𑀸𑀯𑀁 𑀜𑀸𑀢𑀼𑀓𑀸𑀫𑁄 𑀢𑀸𑀤𑀺𑀲𑁂𑀦 𑀲𑀫𑀸𑀤𑀸𑀦𑁂𑀦 𑀢𑀚𑁆𑀚𑁂𑀦 𑀘 𑀫𑀦𑀲𑀺𑀓𑀸𑀭𑁂𑀦 𑀧𑀭𑀺𑀓𑁆𑀔𑀢𑁂 𑀘𑀺𑀢𑁆𑀢𑁂 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. 𑀏𑀲 𑀦𑀬𑁄 𑀢𑀢𑁄 𑀧𑀭𑁂𑀲𑀼𑀧𑀺 𑀅𑀢𑁆𑀢𑀪𑀸𑀯𑁂𑀲𑀼. 𑀏𑀢𑀁 𑀅𑀦𑀸𑀕𑀢𑀁𑀲𑀜𑀸𑀡𑀁 𑀦𑀸𑀫. 𑀬𑀲𑁆𑀫𑀸 𑀏𑀢𑀁 𑀤𑁆𑀯𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀲𑀢𑀺 𑀏𑀯 𑀲𑀺𑀚𑁆𑀛𑀢𑀺, 𑀦𑀸𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀻’’𑀢𑀺.

𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑁂𑀦 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀧𑀽𑀢𑀺𑀓𑀢𑁆𑀢𑀸 𑀤𑀼𑀝𑁆𑀞𑀼 𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀏𑀯𑀁 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀘𑁄𑀧𑀦𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀓𑀢𑀼𑀧𑀘𑀺𑀢𑀁, 𑀅𑀲𑀢𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑁂 𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀲𑁆𑀲 𑀅𑀯𑀺𑀕𑀘𑁆𑀙𑀦𑀢𑁄 𑀲𑁄 𑀢𑁂𑀦 𑀲𑀳𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀗𑁆𑀕𑀻𑀪𑀽𑀢𑀸’’𑀢𑀺. 𑀅𑀦𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬 𑀧𑀼𑀢𑁆𑀢𑀸𑀦𑀁, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑀺𑀬 𑀘 𑀦𑀺𑀲𑁆𑀲𑀺𑀢𑀓𑀸𑀦𑀁 𑀅𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀕𑀭𑀳𑀓𑀸 𑀉𑀧𑀯𑀸𑀤𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀕𑀼𑀡𑀧𑀭𑀺𑀥𑀁𑀲𑀦𑁂𑀦𑀸𑀢𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀕𑀼𑀡𑀸𑀦𑀁 𑀯𑀺𑀤𑁆𑀥𑀁𑀲𑀦𑁂𑀦, 𑀯𑀺𑀦𑀸𑀲𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸𑀧𑀺 𑀉𑀧𑀯𑀸𑀤𑁄 𑀕𑀼𑀡𑀧𑀭𑀺𑀥𑀁𑀲𑀦𑀫𑁂𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀕𑀼𑀡𑀸𑀢𑀺 𑀧𑀦𑁂𑀢𑁆𑀣 𑀛𑀸𑀦𑀸𑀤𑀺𑀯𑀺𑀲𑁂𑀲𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀻𑀮𑀧𑀭𑀺𑀥𑀁𑀲𑀦𑀁 𑀯𑀺𑀲𑀼𑀁 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀫𑀡𑀥𑀫𑁆𑀫𑁄’’𑀢𑀺𑀆𑀤𑀺. 𑀲𑀫𑀡𑀥𑀫𑁆𑀫𑁄𑀢𑀺 𑀘 𑀲𑀻𑀮𑀲𑀁𑀬𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀚𑀸𑀦𑀁 𑀯𑀸𑀢𑀺 𑀬𑀁 𑀉𑀧𑀯𑀤𑀢𑀺, 𑀢𑀲𑁆𑀲 𑀅𑀭𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄 𑀯𑀸. 𑀅𑀚𑀸𑀦𑀁 𑀯𑀸𑀢𑀺 𑀅𑀚𑀸𑀦𑀦𑁆𑀢𑁄 𑀯𑀸. 𑀚𑀸𑀦𑀦𑀸𑀚𑀸𑀦𑀦𑀜𑁆𑀘𑁂𑀢𑁆𑀣 𑀅𑀧𑁆𑀧𑀫𑀸𑀡𑀁, 𑀅𑀭𑀺𑀬𑀪𑀸𑀯𑁄 𑀏𑀯 𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀉𑀪𑀬𑀣𑀸𑀧𑀺 𑀅𑀭𑀺𑀬𑀽𑀧𑀯𑀸𑀤𑁄𑀯 𑀳𑁄𑀢𑀻’’𑀢𑀺. ‘‘𑀅𑀭𑀺𑀬𑁄𑀢𑀺 𑀧𑀦 𑀅𑀚𑀸𑀦𑀢𑁄 𑀅𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲𑁂𑀯 𑀢𑀢𑁆𑀣 𑀅𑀭𑀺𑀬𑀕𑀼𑀡𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑀲𑁆𑀲 𑀕𑀼𑀡𑀧𑀭𑀺𑀥𑀁𑀲𑀦𑀁 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀭𑀺𑀬𑀽𑀧𑀯𑀸𑀤𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀪𑀸𑀭𑀺𑀬𑀁 𑀓𑀫𑁆𑀫𑀦𑁆𑀢𑀺 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀢𑁆𑀢𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀲𑀢𑁂𑀓𑀺𑀘𑁆𑀙𑀁 𑀧𑀦 𑀳𑁄𑀢𑀺 𑀔𑀫𑀸𑀧𑀦𑁂𑀦, 𑀦 𑀆𑀦𑀦𑁆𑀢𑀭𑀺𑀬𑀁 𑀯𑀺𑀬 𑀅𑀢𑁂𑀓𑀺𑀘𑁆𑀙𑀁.

𑀢𑀲𑁆𑀲 ¶ 𑀘 𑀆𑀯𑀺𑀪𑀸𑀯𑀢𑁆𑀣𑀦𑁆𑀢𑀺 𑀪𑀸𑀭𑀺𑀬𑀸𑀤𑀺𑀲𑀪𑀸𑀯𑀲𑁆𑀲 𑀧𑀓𑀸𑀲𑀦𑀢𑁆𑀣𑀁. 𑀢𑀁 𑀚𑀺𑀕𑀼𑀘𑁆𑀙𑀻𑀢𑀺 𑀢𑀁 𑀣𑁂𑀭𑀁, 𑀢𑀁 𑀯𑀸 𑀓𑀺𑀭𑀺𑀬𑀁 𑀚𑀺𑀕𑀼𑀘𑁆𑀙𑀺. 𑀅𑀢𑀺𑀘𑁆𑀙𑀸𑀢𑁄𑀢𑀺 𑀅𑀢𑀺𑀯𑀺𑀬 𑀔𑀼𑀤𑀸𑀪𑀺𑀪𑀽𑀢𑁄. 𑀫𑀳𑀮𑁆𑀮𑀓𑁄𑀢𑀺 𑀲𑀫𑀡𑀸𑀦𑀁 𑀲𑀸𑀭𑀼𑀧𑁆𑀧𑀫𑀲𑀸𑀭𑀼𑀧𑁆𑀧𑀁, 𑀮𑁄𑀓𑀲𑀫𑀼𑀤𑀸𑀘𑀸𑀭𑀫𑀢𑁆𑀢𑀁 𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀕𑀭𑀳𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁. 𑀅𑀫𑁆𑀳𑀸𑀓𑀁 𑀮𑀚𑁆𑀚𑀺𑀢𑀩𑁆𑀩𑀓𑀁 𑀅𑀓𑀸𑀲𑀻𑀢𑀺 ‘‘𑀲𑀫𑀡𑁂𑀦 𑀦𑀸𑀫 𑀏𑀯𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀫𑀬𑀁 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀸𑀦𑀦𑁆𑀢𑁄 𑀏𑀯 𑀣𑁂𑀭𑁄 ‘‘𑀅𑀢𑁆𑀣𑀺 𑀢𑁂 𑀆𑀯𑀼𑀲𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸’’𑀢𑀺 𑀧𑀼𑀘𑁆𑀙𑀺. 𑀇𑀢𑀭𑁄𑀧𑀺 𑀲𑀘𑁆𑀘𑀸𑀪𑀺𑀲𑀫𑀬𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀺 𑀆𑀳 ‘‘𑀲𑁄𑀢𑀸𑀧𑀦𑁆𑀦𑁄 𑀅𑀳’’𑀦𑁆𑀢𑀺. 𑀣𑁂𑀭𑁄 𑀢𑀁 𑀓𑀭𑀼𑀡𑀸𑀬𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀆𑀯𑀺 𑀅𑀓𑀸𑀲𑀺. 𑀢𑁂𑀦𑀲𑁆𑀲 𑀢𑀁 𑀧𑀸𑀓𑀢𑀺𑀓𑀁 𑀅𑀳𑁄𑀲𑀻𑀢𑀺 𑀢𑁂𑀦 𑀅𑀲𑁆𑀲 𑀢𑀁 𑀓𑀫𑁆𑀫𑀁 𑀫𑀕𑁆𑀕𑀸𑀯𑀭𑀡𑀁 𑀦𑀸𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂𑀯 𑀧𑀦 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀅𑀧𑀸𑀬𑀕𑀸𑀫𑀻𑀦𑀁 𑀲𑀼𑀧𑁆𑀧𑀳𑀻𑀦𑀪𑀸𑀯𑀢𑁄 𑀲𑀕𑁆𑀕𑀸𑀯𑀭𑀡𑀫𑀲𑁆𑀲 𑀓𑀸𑀢𑀼𑀫𑀲𑀫𑀢𑁆𑀣𑀫𑁂𑀯 𑀢𑀁 𑀓𑀫𑁆𑀫𑀁. 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀻𑀢𑀺 𑀏𑀢𑁆𑀣 ‘‘𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀤𑁄𑀲𑁂𑀦𑀧𑀺 𑀦𑀓𑁆𑀔𑀫𑀦𑁆𑀢𑀺, 𑀲𑁂𑀲𑀅𑀭𑀺𑀬𑀸 𑀯𑀸 𑀢𑀲𑁆𑀲 𑀅𑀢𑁆𑀣𑀓𑀸𑀫𑀸 𑀳𑀼𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀡𑀢𑁆𑀣𑀸𑀬 𑀦 𑀔𑀫𑀸𑀧𑁂𑀬𑁆𑀬𑀼𑀦𑁆𑀢𑀺 𑀆𑀳 ‘‘𑀲𑀘𑁂 𑀲𑁄 𑀦𑀓𑁆𑀔𑀫𑀢𑀻’’𑀢𑀺. 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀞𑀺𑀢𑀓𑁂𑀦𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧) 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑁋

‘‘𑀲𑀘𑁂 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀯𑀸 𑀧𑁂𑀲𑁂𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦𑀸𑀧𑀺 𑀕𑀦𑁆𑀢𑀼𑀁, 𑀦 𑀧𑁂𑀲𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀦𑀯𑀓𑀢𑀭𑀸 𑀳𑁄𑀦𑁆𑀢𑀺, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀘𑁂 𑀯𑀼𑀟𑁆𑀠𑀢𑀭𑀸, 𑀯𑀼𑀟𑁆𑀠𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 ‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀔𑀫𑀢𑀼 𑀫𑁂 𑀲𑁄 𑀆𑀬𑀲𑁆𑀫𑀸’𑀢𑀺 𑀯𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑀁. 𑀲𑀫𑁆𑀫𑀼𑀔𑀸 𑀅𑀔𑀫𑀦𑁆𑀢𑁂𑀧𑀺 𑀏𑀢𑀤𑁂𑀯 𑀓𑀸𑀢𑀩𑁆𑀩’’𑀦𑁆𑀢𑀺.

𑀇𑀤𑀁 𑀧𑀦 𑀧𑀭𑀫𑁆𑀧𑀺 𑀢𑀢𑁆𑀣 (𑀯𑀺𑀲𑀼𑀤𑁆𑀥𑀺. 𑁨.𑁪𑁧𑁧) 𑀯𑀼𑀢𑁆𑀢𑀁 𑁋

‘‘𑀲𑀘𑁂 𑀏𑀓𑀘𑀸𑀭𑀺𑀓𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁂𑀯𑀲𑁆𑀲 𑀯𑀲𑀦𑀝𑁆𑀞𑀸𑀦𑀁, 𑀦 𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀏𑀓𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘𑀅𑀳𑀁, 𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀆𑀬𑀲𑁆𑀫𑀦𑁆𑀢𑀁 𑀇𑀤𑀜𑁆𑀘𑀺𑀤𑀜𑁆𑀘 𑀅𑀯𑀘𑀁, 𑀢𑀁 𑀫𑁂 𑀅𑀦𑀼𑀲𑁆𑀲𑀭𑀢𑁄 𑀅𑀦𑀼𑀲𑁆𑀲𑀭𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀳𑁄𑀢𑀺, 𑀓𑀺𑀁 𑀓𑀭𑁄𑀫𑀻’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁄 𑀯𑀓𑁆𑀔𑀢𑀺 ‘𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀣𑁂𑀭𑁄 𑀢𑀼𑀫𑁆𑀳𑀸𑀓𑀁 𑀔𑀫𑀢𑀺, 𑀘𑀺𑀢𑁆𑀢𑀁 𑀯𑀽𑀧𑀲𑀫𑁂𑀣𑀸’𑀢𑀺. 𑀢𑁂𑀦𑀧𑀺 𑀅𑀭𑀺𑀬𑀲𑁆𑀲 𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘𑀔𑀫𑀢𑀽’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑀫𑀜𑁆𑀘𑀝𑁆𑀞𑀸𑀦𑀦𑁆𑀢𑀺 ¶ ¶ 𑀧𑀽𑀚𑀸𑀓𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀓𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀢𑀁 𑀓𑀫𑁆𑀫𑀁 𑀲𑀕𑁆𑀕𑀸𑀯𑀭𑀡𑀁 𑀫𑀕𑁆𑀕𑀸𑀯𑀭𑀡𑀜𑁆𑀘 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀘𑀭𑀺𑀬𑀸𑀧𑀺𑀝𑀓𑁂 𑀫𑀸𑀢𑀗𑁆𑀕𑀘𑀭𑀺𑀢𑀲𑀁𑀯𑀡𑁆𑀡𑀦𑀸𑀬𑀁 (𑀘𑀭𑀺𑀬𑀸. 𑀅𑀝𑁆𑀞. 𑁨.𑁬𑁪) 𑁋

‘‘𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀲𑀫𑀺𑀤𑁆𑀥𑀸𑀳𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀳𑀺 𑀲𑀼𑀲𑀗𑁆𑀔𑀢𑀲𑀦𑁆𑀢𑀸𑀦𑁂 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑁂 𑀫𑀳𑀸𑀲𑀢𑁆𑀢𑁂 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀅𑀪𑀺𑀲𑀧𑀲𑀗𑁆𑀔𑀸𑀢𑀁 𑀨𑀭𑀼𑀲𑀯𑀘𑀦𑀁 𑀲𑀁𑀬𑀼𑀢𑁆𑀢𑀁 𑀫𑀳𑀸𑀲𑀢𑁆𑀢𑀲𑁆𑀲 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀢𑁄 𑀢𑀲𑁆𑀲 𑀘 𑀅𑀚𑁆𑀛𑀸𑀲𑀬𑀨𑀭𑀼𑀲𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑀼𑀢𑁆𑀯𑀸 𑀲𑀘𑁂 𑀲𑁄 𑀫𑀳𑀸𑀲𑀢𑁆𑀢𑀁 𑀦 𑀔𑀫𑀸𑀧𑁂𑀢𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀚𑀸𑀢𑀁. 𑀔𑀫𑀸𑀧𑀺𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀲𑁆𑀲 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀺 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀘 𑀥𑀫𑁆𑀫𑀢𑀸’’𑀢𑀺 𑁋

𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀏𑀯𑀁 𑀔𑀫𑀸𑀧𑀺𑀢𑁂 𑀢𑀁 𑀓𑀫𑁆𑀫𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀲𑁆𑀲 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑁂𑀦 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀦𑁆𑀦𑀦𑁆𑀢𑀺 𑀦𑁂𑀯 𑀲𑀕𑁆𑀕𑀸𑀯𑀭𑀡𑀁 𑀦 𑀫𑁄𑀓𑁆𑀔𑀸𑀯𑀭𑀡𑀜𑁆𑀘 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀯𑀺𑀧𑀭𑀻𑀢𑀁 𑀤𑀲𑁆𑀲𑀦𑀫𑁂𑀢𑁂𑀲𑀦𑁆𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀸. 𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀤𑀸𑀦𑀸𑀦𑀺, 𑀓𑀫𑁆𑀫𑀸𑀦𑀺 𑀲𑀫𑀸𑀤𑀸𑀦𑀸𑀦𑀺 𑀬𑁂𑀲𑀁 𑀢𑁂 𑀓𑀫𑁆𑀫𑀲𑀫𑀸𑀤𑀸𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀫𑁆𑀫𑀲𑀫𑀸𑀤𑀸𑀦𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀳𑁂𑀢𑀼𑀅𑀢𑁆𑀣𑀁 𑀯𑀸 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀭𑁂 𑀓𑀫𑁆𑀫𑁂𑀲𑀼 𑀲𑀫𑀸𑀤𑀸𑀧𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑀬𑀺𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑁂 𑀘…𑀧𑁂… 𑀲𑀫𑀸𑀤𑀧𑁂𑀦𑁆𑀢𑀺, 𑀢𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀕𑁆𑀕𑀫𑀕𑁆𑀕𑀝𑁆𑀞𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀣 𑀯𑀸 𑀅𑀕𑁆𑀕𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀲𑀻𑀮𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀫𑀕𑁆𑀕𑀝𑁆𑀞𑀲𑁆𑀲 𑀳𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀏𑀓𑀁𑀲𑀺𑀓𑀸 𑀅𑀜𑁆𑀜𑀸𑀭𑀸𑀥𑀦𑀸, 𑀇𑀢𑀭𑁂𑀲𑀁 𑀅𑀦𑁂𑀓𑀁𑀲𑀺𑀓𑀸. 𑀅𑀜𑁆𑀜𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀏𑀢𑁆𑀣 𑀲𑀫𑁆𑀧𑀚𑁆𑀚𑀦𑀁 𑀲𑀫𑁆𑀧𑀤𑀸, 𑀦𑀺𑀧𑁆𑀨𑀢𑁆𑀢𑀺, 𑀏𑀯𑀁 𑀅𑀯𑀺𑀭𑀚𑁆𑀛𑀦𑀓𑀦𑀺𑀧𑁆𑀨𑀢𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄, 𑀬𑀣𑀸 𑀢𑀁 𑀅𑀯𑀲𑁆𑀲𑀫𑁆𑀪𑀸𑀯𑀻, 𑀏𑀯𑀫𑀺𑀤𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀬𑀣𑀸 𑀳𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑀁, 𑀏𑀯𑀫𑁂𑀢𑀁 𑀇𑀫𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀘𑀼𑀢𑀺𑀅𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀮𑀲𑁆𑀫𑀺𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑁂 𑀦 𑀇𑀫𑀸𑀬 𑀉𑀧𑀫𑀸𑀬 𑀕𑀸𑀴𑁆𑀳𑀢𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀉𑀧𑀫𑀸 𑀅𑀢𑁆𑀣𑀺. 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸𑀢𑀺𑀆𑀤𑀻𑀲𑀼 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁯) 𑀅𑀭𑀺𑀬𑀽𑀧𑀯𑀸𑀤𑀁 𑀲𑀦𑁆𑀥𑀸𑀬 ‘‘𑀧𑀼𑀦 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀦 𑀯𑀓𑁆𑀔𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫, ‘‘𑀧𑀼𑀦 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ¶ 𑀘𑀺𑀢𑁆𑀢𑀁 𑀧𑀚𑀳𑀢𑀺 𑀦𑀸𑀫, ‘‘𑀧𑀼𑀦 𑀏𑀯𑀭𑀽𑀧𑀺𑀁 𑀤𑀺𑀝𑁆𑀞𑀺𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀚𑀳𑀦𑁆𑀢𑁄 𑀤𑀺𑀝𑁆𑀞𑀺𑀁 𑀧𑀚𑀳𑀢𑀺 𑀦𑀸𑀫. 𑀢𑀣𑀸 𑀅𑀓𑀭𑁄𑀦𑁆𑀢𑁄 𑀦𑁂𑀯 𑀧𑀚𑀳𑀢𑀺 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂𑀢𑀺 𑀬𑀣𑀸 𑀦𑀺𑀭𑀬𑀧𑀸𑀮𑁂𑀳𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀬𑁂 𑀞𑀧𑀺𑀢𑁄, 𑀏𑀯𑀁 𑀦𑀺𑀭𑀬𑁂 𑀞𑀧𑀺𑀢𑁄𑀬𑁂𑀯, 𑀦𑀸𑀲𑁆𑀲 𑀦𑀺𑀭𑀬𑀽𑀧𑀧𑀢𑁆𑀢𑀺𑀬𑀸 𑀓𑁄𑀘𑀺 𑀯𑀺𑀩𑀦𑁆𑀥𑁄. 𑀢𑀢𑁆𑀭𑀸𑀬𑀁 𑀬𑀼𑀢𑁆𑀢𑀺 𑁋 𑀦𑀺𑀭𑀬𑀽𑀧𑀕𑁄 𑀅𑀭𑀺𑀬𑀽𑀧𑀯𑀸𑀤𑀻 𑀢𑀤𑀸𑀤𑀸𑀬𑀓𑀲𑁆𑀲 𑀅𑀯𑀺𑀚𑀳𑀦𑀢𑁄 𑀲𑁂𑀬𑁆𑀬𑀣𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺. 𑀏𑀢𑁆𑀣 𑀘 ‘‘𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀯𑀘𑀦𑁂𑀦 𑀢𑀤𑀸𑀤𑀸𑀬𑀓𑀲𑁆𑀲 𑀅𑀧𑁆𑀧𑀳𑀸𑀦𑁂𑀦𑁂𑀯 𑀅𑀭𑀺𑀬𑀽𑀧𑀯𑀸𑀤𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀢𑁆𑀣𑀸𑀯𑀳𑁄𑀯, 𑀧𑀳𑀸𑀦𑁂𑀦 𑀧𑀦 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀔𑀫𑀸𑀧𑀦𑁂𑀦 𑀦 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀢𑁆𑀣𑀸𑀯𑀳𑁄 𑀬𑀣𑀸 𑀢𑀁 𑀯𑀼𑀝𑁆𑀞𑀺𑀢𑀸 𑀤𑁂𑀲𑀺𑀢𑀸 𑀘 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀺, 𑀬𑀢𑁄 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑁄𑀧𑀺 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀸𑀦𑀻’’𑀢𑀺.

‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺 (𑀤𑀻. 𑀦𑀺. 𑁧. 𑁧𑁪𑁭), 𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧’’𑀦𑁆𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀇𑀥 𑀓𑀸𑀬-𑀲𑀤𑁆𑀤𑁄 𑀔𑀦𑁆𑀥𑀧𑀜𑁆𑀘𑀓𑀯𑀺𑀲𑀬𑁄𑀢𑀺 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑀸’’𑀢𑀺. 𑀅𑀯𑀻𑀢𑀭𑀸𑀕𑀲𑁆𑀲 𑀫𑀭𑀡𑀢𑁄 𑀧𑀭𑀁 𑀦𑀸𑀫 𑀪𑀯𑀦𑁆𑀢𑀭𑀽𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂’’𑀢𑀺. 𑀬𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀉𑀧𑀘𑁆𑀙𑁂𑀤𑁂𑀦𑁂𑀯 𑀓𑀸𑀬𑁄 𑀪𑀺𑀚𑁆𑀚𑀢𑀻𑀢𑀺 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀸’’𑀢𑀺. 𑀏𑀢𑀺 𑀇𑀫𑀲𑁆𑀫𑀸 𑀲𑀼𑀔𑀦𑁆𑀢𑀺 𑀅𑀬𑁄, 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸’’𑀢𑀺. 𑀆𑀬𑀦𑁆𑀢𑀺 𑀏𑀢𑀲𑁆𑀫𑀸 𑀲𑀼𑀔𑀸𑀦𑀻𑀢𑀺 𑀆𑀬𑁄, 𑀧𑀼𑀜𑁆𑀜𑀓𑀫𑁆𑀫𑀸𑀤𑀻𑀦𑀁 𑀲𑀼𑀔𑀲𑀸𑀥𑀦𑀁. 𑀢𑁂𑀦𑀸𑀳 ‘‘𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀅𑀪𑀸𑀯𑀸’’𑀢𑀺. 𑀯𑀺𑀯𑀲𑀸𑀢𑀺 𑀓𑀫𑁆𑀫𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀺𑀕𑀢𑁄 𑀯𑀲𑁄 𑀏𑀢𑁂𑀲𑀦𑁆𑀢𑀺 𑀯𑀺𑀯𑀲𑀸, 𑀅𑀯𑀲𑀯𑀢𑁆𑀢𑀺𑀦𑁄𑀢𑀺 ¶ 𑀅𑀢𑁆𑀣𑁄. 𑀇𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀬𑁄, 𑀅𑀲𑁆𑀲𑀸𑀤𑁄𑀢𑀺 𑀆𑀳 ‘‘𑀅𑀲𑁆𑀲𑀸𑀤𑀲𑀜𑁆𑀜𑀺𑀢𑁄 𑀅𑀬𑁄’’𑀢𑀺.

𑀦𑀸𑀕𑀭𑀸𑀚𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀲𑀼𑀭𑀲𑀤𑀺𑀲𑀦𑁆𑀢𑀺 𑀧𑁂𑀢𑀸𑀲𑀼𑀭𑀲𑀤𑀺𑀲𑀁. 𑀲𑁄 𑀳𑀻𑀢𑀺 𑀲𑁄 𑀅𑀲𑀼𑀭𑀓𑀸𑀬𑁄. 𑀲𑀩𑁆𑀩𑀲𑀫𑀼𑀲𑁆𑀲𑀬𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀲𑀫𑁆𑀧𑀢𑁆𑀢𑀺𑀲𑀫𑀼𑀲𑁆𑀲𑀬𑁂𑀳𑀺, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀭𑀸𑀲𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀲𑀼𑀝𑁆𑀞𑀼 𑀘𑀭𑀺𑀢𑀁, 𑀲𑁄𑀪𑀦𑀁 𑀯𑀸 𑀘𑀭𑀺𑀢𑀁 𑀅𑀦𑀯𑀚𑁆𑀚𑀢𑁆𑀢𑀸𑀢𑀺 𑀲𑀼𑀘𑀭𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀧𑀭𑀺𑀬𑀸𑀬𑁂𑀦. ‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 (𑀇𑀢𑀺𑀯𑀼. 𑁮𑁩) 𑀯𑀘𑀦𑀢𑁄 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀼𑀕𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀲𑀼𑀕𑀢𑀺𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀕𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸

𑁧𑁪. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 ¶ 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀺𑀧𑀲𑁆𑀲𑀦𑀸 𑀘 𑀢𑀺𑀯𑀺𑀥𑀸 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀪𑁂𑀤𑁂𑀦. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀢𑁆𑀢𑀸 𑀲𑀬𑀫𑁆𑀪𑀽𑀜𑀸𑀡𑀪𑀽𑀢𑀸, 𑀇𑀢𑀭𑁂𑀲𑀁 𑀲𑀼𑀢𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀢𑁆𑀢𑀸 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀸. 𑀲𑀸 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀅𑀭𑀽𑀧𑀫𑀼𑀔𑀯𑀲𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀁 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀅𑀦𑁂𑀓𑀥𑀸𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀦𑀸𑀦𑀸𑀦𑀬𑀢𑁄 𑀯𑀺𑀪𑀸𑀯𑀺𑀢𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀪𑁂𑀤𑀕𑀫𑀦𑀢𑁄 𑀦𑀸𑀦𑀸𑀦𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀩𑁆𑀩𑀪𑀸𑀕𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀢𑀭𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑁄𑀢𑀺. 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀫𑀳𑀸𑀯𑀚𑀺𑀭𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀪𑁂𑀤𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀤𑁂𑀯𑀲𑀺𑀓𑀁 𑀲𑀢𑁆𑀣𑀼 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀲𑁆𑀯𑀸𑀬𑀁 𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀧𑀭𑀫𑀢𑁆𑀣𑀫𑀜𑁆𑀚𑀼𑀲𑀸𑀬𑀁 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀡𑁆𑀡𑀦𑀸𑀬𑀁 𑀉𑀤𑁆𑀤𑁂𑀲𑀢𑁄 𑀤𑀲𑁆𑀲𑀺𑀢𑁄, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑁄.

𑀆𑀲𑀯𑀸𑀦𑀁 𑀔𑁂𑀧𑀦𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀆𑀲𑀯𑀓𑁆𑀔𑀬𑁄 𑀅𑀭𑀺𑀬𑀫𑀕𑁆𑀕𑁄, 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀕𑁆𑀕𑀳𑀡𑀁. 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭 𑀘𑁂𑀢𑀁 𑀜𑀸𑀡’’𑀦𑁆𑀢𑀺 𑀯𑀢𑁆𑀯𑀸 𑀔𑀬𑁂𑀢𑀺 𑀘 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸’’𑀢𑀺 𑀆𑀳. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀢𑀤𑀸 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀏𑀢𑁆𑀢𑀓𑀁 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄𑀢𑀺 𑀘 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺. 𑀦𑀺𑀩𑁆𑀩𑀢𑁆𑀢𑀺𑀓𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀁. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫. 𑀢𑀤𑀼𑀪𑀬𑀯𑀢𑁄 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀺 𑀢𑀤𑀼𑀪𑀬𑀲𑁆𑀲 𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀯𑀸𑀢𑀺 𑀯𑀸 𑀧𑀸𑀧𑀼𑀡𑀦𑀳𑁂𑀢𑀼. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀢𑁂 𑀯𑀸 𑀦 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀧𑁆𑀧𑀯𑀢𑁆𑀢𑀺, 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲. 𑀲𑀫𑁆𑀧𑀸𑀧𑀓𑀦𑁆𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀸𑀧𑀓𑀁.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 ¶ 𑀆𑀲𑀯𑀲𑀗𑁆𑀔𑀸𑀢𑀓𑀺𑀮𑁂𑀲𑀯𑀲𑁂𑀦. 𑀬𑀲𑁆𑀫𑀸 𑀆𑀲𑀯𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀲𑁂𑀲𑀲𑀘𑁆𑀘𑀸𑀦𑀜𑁆𑀘 𑀢𑀁𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀬𑀢𑁄’’𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀲𑀘𑁆𑀘𑀸𑀦𑀻𑀢𑀺 𑀬𑁄𑀚𑀦𑀸. 𑀆𑀲𑀯𑀸𑀦𑀁𑀬𑁂𑀯 𑀘𑁂𑀢𑁆𑀣 𑀕𑀳𑀡𑀁 ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀆𑀭𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 𑀆𑀲𑀯𑀯𑀺𑀫𑀼𑀢𑁆𑀢𑀺𑀲𑀻𑀲𑁂𑀦𑁂𑀯 𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀇𑀥 𑀓𑀣𑀺𑀢𑁄𑀢𑀺 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲 𑀢𑀤𑀸 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀸 ‘‘𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀅𑀪𑀺𑀲𑀫𑀬𑀓𑀸𑀮𑁂 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁 𑀉𑀧𑀸𑀤𑀸𑀬 ‘‘𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀲𑁄 𑀘 𑀓𑀸𑀫𑀁 𑀫𑀕𑁆𑀕𑀓𑁆𑀔𑀡𑀢𑁄 𑀧𑀭𑀁 𑀬𑀸𑀯𑀚𑁆𑀚𑀢𑀦𑀸 𑀅𑀢𑀻𑀢𑀓𑀸𑀮𑀺𑀓𑁄 𑀏𑀯, 𑀲𑀩𑁆𑀩𑀧𑀞𑀫𑀁 𑀧𑀦𑀲𑁆𑀲 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀁 𑀨𑀮𑀓𑁆𑀔𑀡𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ¶ 𑀆𑀳 ‘‘𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀻’’𑀢𑀺. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀯𑀸 𑀳𑁂𑀢𑀼𑀦𑀺𑀤𑁆𑀤𑁂𑀲𑁄𑀬𑀁. 𑀚𑀸𑀦𑀦𑀳𑁂𑀢𑀼 𑀤𑀲𑁆𑀲𑀦𑀳𑁂𑀢𑀼 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀪𑀯𑀸𑀲𑀯𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀪𑀯𑀭𑀸𑀕𑀲𑁆𑀲 𑀯𑀺𑀬 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀲𑀫𑀯𑀭𑁄𑀥𑁄𑀢𑀺 𑀤𑀺𑀝𑁆𑀞𑀸𑀲𑀯𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀫𑀸 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺 𑀚𑀸𑀦𑀸𑀢𑀺, 𑀬𑀲𑁆𑀫𑀸 𑀘 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺𑀆𑀤𑀺𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀔𑀻𑀡𑀸 𑀚𑀸𑀢𑀻𑀢𑀺 𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺’’𑀦𑁆𑀢𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲. 𑀪𑀽𑀫𑀺𑀦𑁆𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀓𑀢𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀸 𑀓𑀢𑀸, 𑀢𑀁 𑀧𑀓𑀸𑀲𑁂𑀢𑁆𑀯𑀸 𑀧𑀭𑀺𑀳𑀸𑀭𑀁 𑀯𑀢𑁆𑀢𑀼𑀓𑀸𑀫𑁄 𑀆𑀳 ‘‘𑀦 𑀢𑀸𑀯𑀲𑁆𑀲𑀸’’𑀢𑀺𑀆𑀤𑀺. 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸𑀢𑀺 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀔𑀻𑀡𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸’’𑀢𑀺. 𑀦 𑀅𑀦𑀸𑀕𑀢𑀸 𑀅𑀲𑁆𑀲 𑀚𑀸𑀢𑀺 𑀔𑀻𑀡𑀸𑀢𑀺 𑀬𑁄𑀚𑀦𑀸. 𑀦 𑀅𑀦𑀸𑀕𑀢𑀸𑀢𑀺 𑀘 𑀅𑀦𑀸𑀕𑀢𑀢𑁆𑀢𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑁂𑀲𑁂𑀦 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄’’𑀢𑀺. 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀳𑀺 𑀧𑀬𑁄𑀕𑁄 𑀲𑀫𑁆𑀪𑀯𑀢𑀺, 𑀦𑀸𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀕𑀢𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀘 𑀔𑁂𑀧𑀦𑁂 𑀯𑀸𑀬𑀸𑀫𑁄𑀧𑀺 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀬𑀸 𑀧𑀦 𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. ‘‘𑀬𑀸 𑀧𑀦𑀸’’𑀢𑀺 𑀳𑀺 𑀆𑀤𑀺𑀦𑀸 𑀫𑀕𑁆𑀕𑀪𑀸𑀯𑀦𑀸𑀬 𑀅𑀦𑀸𑀕𑀢𑀚𑀸𑀢𑀺𑀬𑀸 𑀏𑀯 𑀳𑁂𑀢𑀼𑀯𑀺𑀦𑀸𑀲𑀦𑀤𑁆𑀯𑀸𑀭𑁂𑀦 𑀔𑀻𑀡𑀪𑀸𑀯𑁄 𑀧𑀓𑀸𑀲𑀻𑀬𑀢𑀺. 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀽𑀢𑀺 𑀪𑀯𑀢𑁆𑀢𑀬𑀕𑁆𑀕𑀳𑀡𑀁 𑀯𑀼𑀢𑁆𑀢𑀦𑀬𑁂𑀦 𑀅𑀦𑀯𑀲𑁂𑀲𑀢𑁄 𑀚𑀸𑀢𑀺𑀬𑀸 𑀔𑀻𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀚𑀸𑀢𑀺𑀁. 𑀲𑁄𑀢𑀺 𑀪𑀕𑀯𑀸.

𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀇𑀥 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀦𑀺𑀝𑁆𑀞𑀺𑀢’’𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑁂 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀼𑀕𑀼𑀡𑀸 𑀧𑀯𑀢𑁆𑀢𑀺, 𑀇𑀢𑀭𑀲𑀘𑁆𑀘𑁂𑀲𑀼 𑀘 𑀦𑁂𑀲𑀁 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺 ¶ 𑀧𑀸𑀓𑀝𑀸 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦𑀸’’𑀢𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀫𑁂 𑀧𑀓𑀸𑀭𑀸 𑀇𑀢𑁆𑀣𑀁, 𑀢𑀩𑁆𑀪𑀸𑀯𑁄 𑀇𑀢𑁆𑀣𑀢𑁆𑀢𑀁, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀧𑀦 𑀧𑀓𑀸𑀭𑀸 𑀅𑀭𑀺𑀬𑀫𑀕𑁆𑀕𑀩𑁆𑀬𑀸𑀧𑀸𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀏𑀯𑀁𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬𑀸’’𑀢𑀺. 𑀢𑁂 𑀳𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺 ¶ , 𑀧𑀭𑀺𑀜𑁆𑀜𑀸𑀤𑀻𑀲𑀼 𑀘 𑀧𑀳𑀸𑀦𑀫𑁂𑀯 𑀧𑀥𑀸𑀦𑀁, 𑀢𑀤𑀢𑁆𑀣𑀢𑁆𑀢𑀸𑀬 𑀇𑀢𑀭𑁂𑀲𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸’’𑀢𑀺. 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 𑀏𑀢𑁆𑀣𑀸𑀬𑀫𑀧𑀭𑁄 𑀦𑀬𑁄 𑁋 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀢𑁂𑀦𑀸𑀬𑀫𑀢𑁆𑀣𑁄 𑁋 𑀇𑀢𑁆𑀣𑀢𑁆𑀢𑀸𑀬 𑀇𑀢𑁆𑀣𑀫𑁆𑀪𑀸𑀯𑀢𑁄 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀅𑀦𑀸𑀕𑀢𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀬𑁆𑀳𑀁 𑀦𑀢𑁆𑀣𑀺, 𑀇𑀫𑁂 𑀧𑀦 𑀘𑀭𑀺𑀫𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀅𑀧𑁆𑀧𑀢𑀺𑀝𑁆𑀞𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬. 𑀅𑀧𑀭𑀺𑀜𑁆𑀜𑀸𑀢𑀫𑀽𑀮𑀓𑀸 𑀳𑀺 𑀧𑀢𑀺𑀝𑁆𑀞𑀸. 𑀬𑀣𑀸𑀳 ‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀴𑁆𑀳’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬; 𑀫𑀳𑀸𑀦𑀺. 𑁭). 𑀢𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺.

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀦 𑀧𑀞𑀫𑀤𑀼𑀢𑀺𑀬𑀜𑀸𑀡𑀤𑁆𑀯𑀬𑀸𑀥𑀺𑀕𑀫𑀁 𑀯𑀺𑀬 𑀓𑁂𑀯𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄. 𑀲𑀭𑀽𑀧𑀢𑁄 𑀳𑀺 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀫𑁂𑀯𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀞𑀫𑀯𑀺𑀚𑁆𑀚𑀸𑀬 𑀚𑀸𑀢𑁄𑀬𑁂𑀯 𑀧𑀼𑀭𑁂𑀚𑀸𑀢𑀲𑁆𑀲 𑀲𑀳𑀚𑀸𑀢𑀲𑁆𑀲 𑀯𑀸 𑀅𑀪𑀸𑀯𑀢𑁄 𑀲𑀩𑁆𑀩𑁂𑀲𑀁 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄, 𑀓𑀺𑀫𑀗𑁆𑀕𑀁 𑀧𑀦 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺 𑀅𑀢𑀻𑀢𑀸𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀢𑀩𑁆𑀪𑀸𑀯𑀻𑀪𑀸𑀯𑀢𑁄 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀁𑀲𑀜𑀸𑀡𑀁 𑀧𑀓𑀸𑀲𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺 𑀅𑀢𑀻𑀢𑀓𑁆𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀔𑀸𑀢𑁂 𑀅𑀢𑀻𑀢𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀘 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯 𑀇𑀚𑁆𑀛𑀦𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀭𑀺𑀪𑀡𑁆𑀟𑀜𑀸𑀡𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀺𑀬𑁂𑀯 𑀘 𑀞𑀺𑀢𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑀺𑀤𑁆𑀥𑀺𑀢𑁄 𑀯𑀼𑀢𑁆𑀢𑀁 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡’’𑀦𑁆𑀢𑀺. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀲𑀧𑀭𑀺𑀪𑀡𑁆𑀟𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁄 𑀘 𑀅𑀦𑀸𑀕𑀢𑀁𑀲𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀁, 𑀢𑀢𑁆𑀣 𑀜𑀸𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁. 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑁂𑀦𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀤𑀲𑀩𑀮𑀜𑀸𑀡𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸𑀤𑀻𑀦𑀫𑁆𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀇𑀚𑁆𑀛𑀦𑀢𑁄 ¶ ¶ 𑀯𑀼𑀢𑁆𑀢𑀁 ‘‘𑀆𑀲𑀯𑀓𑁆𑀔𑀬𑁂𑀦 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡’’𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸’’𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸

𑁧𑁫. 𑀧𑀻𑀢𑀺𑀯𑀺𑀧𑁆𑀨𑀸𑀭𑀧𑀭𑀺𑀧𑀼𑀡𑁆𑀡𑀕𑀢𑁆𑀢𑀘𑀺𑀢𑁆𑀢𑁄𑀢𑀺 𑀧𑀻𑀢𑀺𑀨𑀭𑀡𑁂𑀦 𑀧𑀭𑀺𑀧𑀼𑀡𑁆𑀡𑀓𑀸𑀬𑀘𑀺𑀢𑁆𑀢𑁄. 𑀅𑀜𑁆𑀜𑀸𑀡𑀦𑁆𑀢𑀺 𑀅𑀜𑁆𑀜𑀸𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀥𑀻𑀲𑀤𑁆𑀤𑀲𑁆𑀲 𑀬𑁄𑀕𑀢𑁄 𑀳𑀺 𑀲𑀸𑀫𑀺𑀅𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀏𑀢𑁆𑀣 𑀅𑀢𑀺𑀓𑁆𑀓𑀦𑁆𑀢𑀸, 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄 𑀫𑀦𑁄𑀭𑀫𑁄, 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦 𑀧𑀭𑀺𑀘𑁆𑀙𑁂𑀤𑁂𑀦. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂.

𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸𑀢𑀺 𑀯𑀘𑀦𑀤𑁆𑀯𑀬𑀲𑁆𑀲 ‘‘𑀲𑀸𑀥𑀼 𑀲𑀸𑀥𑀼 𑀪𑁄 𑀕𑁄𑀢𑀫𑀸’’𑀢𑀺 𑀆𑀫𑁂𑀟𑀺𑀢𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀯𑀺𑀲𑀬𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀆𑀳 ‘‘𑀪𑀬𑁂 𑀓𑁄𑀥𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀘𑁄𑀭𑁄 𑀘𑁄𑀭𑁄, 𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀪𑀬𑁂 𑀆𑀫𑁂𑀟𑀺𑀢𑀁. ‘‘𑀯𑀺𑀚𑁆𑀛 𑀯𑀺𑀚𑁆𑀛, 𑀧𑀳𑀭 𑀧𑀳𑀭𑀸’’𑀢𑀺𑀆𑀤𑀻𑀲𑀼 𑀓𑁄𑀥𑁂. ‘‘𑀲𑀸𑀥𑀼 𑀲𑀸𑀥𑀽’’𑀢𑀺𑀆𑀤𑀻𑀲𑀼 𑀧𑀲𑀁𑀲𑀸𑀬𑀁. ‘‘𑀕𑀘𑁆𑀙 𑀕𑀘𑁆𑀙, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀻’’𑀢𑀺𑀆𑀤𑀻𑀲𑀼 𑀢𑀼𑀭𑀺𑀢𑁂. ‘‘𑀆𑀕𑀘𑁆𑀙 𑀆𑀕𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀓𑁄𑀢𑀽𑀳𑀮𑁂. ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁪𑁪) 𑀅𑀘𑁆𑀙𑀭𑁂. ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁦; 𑀅. 𑀦𑀺. 𑁯.𑁧𑁧) 𑀳𑀸𑀲𑁂. ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀻𑀲𑀼 𑀲𑁄𑀓𑁂. ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦; 𑀘𑀽𑀴𑀯. 𑁩𑁩𑁨) 𑀧𑀲𑀸𑀤𑁂. 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄 ¶ . 𑀢𑁂𑀦 𑀕𑀭𑀳𑀅𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀧𑁄 𑀧𑀸𑀧𑁄’’𑀢𑀺𑀆𑀤𑀻𑀲𑀼 𑀕𑀭𑀳𑀸𑀬𑀁. ‘‘𑀅𑀪𑀺𑀭𑀽𑀧𑀓 𑀅𑀪𑀺𑀭𑀽𑀧𑀓𑀸’’𑀢𑀺𑀆𑀤𑀻𑀲𑀼 𑀅𑀲𑀫𑁆𑀫𑀸𑀦𑁂 𑀤𑀝𑁆𑀞𑀩𑁆𑀩𑀁.

𑀦𑀬𑀺𑀤𑀁 ¶ 𑀆𑀫𑁂𑀟𑀺𑀢𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀣𑀤𑁆𑀯𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀧𑀦 𑀪𑀕𑀯𑀢𑁄 𑀯𑀘𑀦𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸’’𑀢𑀺. 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁 𑀯𑀸 𑀏𑀢𑀁, 𑀢𑀲𑁆𑀫𑀸 𑀅𑀢𑁆𑀣𑀯𑀲𑁂𑀦 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁄𑀲𑀦𑀸𑀲𑀦𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀢𑁄. 𑀕𑀼𑀡𑀸𑀥𑀺𑀕𑀫𑀦𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀲𑀫𑁆𑀧𑀸𑀧𑀦𑀢𑁄. 𑀬𑁂 𑀕𑀼𑀡𑁂 𑀤𑁂𑀲𑀦𑀸 𑀅𑀥𑀺𑀕𑀫𑁂𑀢𑀺, 𑀢𑁂𑀲𑀼 𑀧𑀥𑀸𑀦𑀪𑀽𑀢𑀸 𑀕𑀼𑀡𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀢𑁂 𑀧𑀥𑀸𑀦𑀪𑀽𑀢𑁂 𑀕𑀼𑀡𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀸𑀧𑀫𑀼𑀔𑀸 𑀳𑀺 𑀮𑁄𑀓𑀺𑀬𑀸 𑀕𑀼𑀡𑀸, 𑀧𑀜𑁆𑀜𑀸𑀧𑀫𑀼𑀔𑀸 𑀮𑁄𑀓𑀼𑀢𑁆𑀢𑀭𑀸. 𑀲𑀸𑀢𑁆𑀣𑀢𑁄𑀢𑀺𑀆𑀤𑀻𑀲𑀼 𑀲𑀻𑀮𑀸𑀤𑀺𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀢𑁄, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀢𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑀧𑁆𑀧𑀬𑁄𑀕𑀢𑀸𑀬 𑀉𑀢𑁆𑀢𑀸𑀦𑀧𑀤𑀢𑁄, 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑀸𑀬 𑀕𑀫𑁆𑀪𑀻𑀭𑀢𑁆𑀣𑀢𑁄. 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀥𑀼𑀭𑀲𑀤𑁆𑀤𑀧𑁆𑀧𑀬𑁄𑀕𑀢𑀸𑀬 𑀓𑀡𑁆𑀡𑀲𑀼𑀔𑀢𑁄, 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀧𑁂𑀫𑀦𑀻𑀬𑀢𑁆𑀣𑀢𑀸𑀬 𑀳𑀤𑀬𑀗𑁆𑀕𑀫𑀢𑁄. 𑀫𑀸𑀦𑀸𑀢𑀺𑀫𑀸𑀦𑀯𑀺𑀥𑀫𑀦𑁂𑀦 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀣𑀫𑁆𑀪𑀲𑀸𑀭𑀫𑁆𑀪𑀦𑀺𑀫𑁆𑀫𑀤𑁆𑀤𑀦𑁂𑀦 𑀅𑀧𑀭𑀯𑀫𑁆𑀪𑀦𑀢𑁄. 𑀳𑀺𑀢𑀸𑀥𑀺𑀧𑁆𑀧𑀸𑀬𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑁂𑀲𑀁 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀽𑀧𑀲𑀫𑀦𑁂𑀦 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀧𑀜𑁆𑀜𑀸𑀯𑀤𑀸𑀢𑀢𑁄. 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀢𑀸𑀬 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀲𑀼𑀯𑀺𑀲𑀼𑀤𑁆𑀥𑀢𑁆𑀣𑀢𑀸𑀬 𑀯𑀺𑀫𑀤𑁆𑀤𑀓𑁆𑀔𑀫𑀢𑁄. 𑀆𑀧𑀸𑀣𑀭𑀫𑀡𑀻𑀬𑀢𑀸𑀬 𑀏𑀯 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑀸𑀬 𑀳𑀺𑀢𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺𑀢𑀸𑀬 𑀘 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀦𑀢𑁄, 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄, 𑀫𑀺𑀘𑁆𑀙𑀸𑀯𑀸𑀤𑀯𑀺𑀥𑀫𑀦𑀢𑁄, 𑀲𑀫𑁆𑀫𑀸𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁄, 𑀅𑀓𑀼𑀲𑀮𑀫𑀽𑀮𑀲𑀫𑀼𑀤𑁆𑀥𑀭𑀡𑀢𑁄, 𑀓𑀼𑀲𑀮𑀫𑀽𑀮𑀲𑀁𑀭𑁄𑀧𑀦𑀢𑁄, 𑀅𑀧𑀸𑀬𑀤𑁆𑀯𑀸𑀭𑀧𑀺𑀥𑀸𑀦𑀢𑁄, 𑀲𑀕𑁆𑀕𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀢𑁄, 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄, 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀢𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑁄𑀫𑀼𑀔𑀞𑀧𑀺𑀢𑀦𑁆𑀢𑀺 𑀓𑁂𑀦𑀘𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑀁. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀳𑁂𑀝𑁆𑀞𑀸𑀫𑀼𑀔𑀁 𑀚𑀸𑀢𑀁. 𑀉𑀕𑁆𑀖𑀸𑀝𑁂𑀬𑁆𑀬𑀸𑀢𑀺 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀳𑀢𑁆𑀣𑁂 ¶ 𑀕𑀳𑁂𑀢𑁆𑀯𑀸𑀢𑀺 ‘‘𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀦𑀺𑀲𑁆𑀲𑀦𑁆𑀤𑁂𑀳𑀁 𑀏𑀲 𑀫𑀕𑁆𑀕𑁄, 𑀏𑀯𑀁 𑀕𑀘𑁆𑀙𑀸’’𑀢𑀺 𑀤𑀲𑁆𑀲𑁂𑀬𑁆𑀬. 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻. 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀥𑁂𑀬𑁆𑀬𑀲𑁆𑀲 𑀅𑀦𑀸𑀥𑀸𑀭𑀪𑀽𑀢𑀁 𑀪𑀸𑀚𑀦𑀁 𑀆𑀥𑀸𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀢𑀸𑀬 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀥𑁄𑀫𑀼𑀔𑀞𑀧𑀺𑀢𑀢𑀸𑀬 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀏𑀯𑀁 𑀧𑀤𑀤𑁆𑀯𑀬𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀣𑀸𑀲𑀗𑁆𑀔𑁆𑀬𑀁. 𑀓𑀸𑀫𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄𑀧𑀺 𑀧𑀝𑀺𑀘𑁆𑀙𑀸𑀤𑀓𑀸 𑀦𑀻𑀯𑀭𑀡𑀪𑀸𑀯𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀲𑀯𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑀺𑀓𑀸 𑀲𑀢𑁆𑀢𑁂 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑁂𑀦𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺. 𑀲𑀩𑁆𑀩𑁄 𑀅𑀧𑀸𑀬𑀕𑀸𑀫𑀺𑀫𑀕𑁆𑀕𑁄 𑀓𑀼𑀫𑁆𑀫𑀕𑁆𑀕𑁄 𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄𑀢𑀺 𑀓𑀢𑁆𑀯𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 ¶ 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀢𑁂𑀦𑁂𑀯 𑀳𑀺 𑀢𑀤𑀼𑀪𑀬𑀧𑀝𑀺𑀧𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀆𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀦 𑀢𑀣𑀸, 𑀉𑀚𑁆𑀚𑀮𑁄 𑀬𑀣𑀸 𑀢𑁂𑀮𑀲𑀦𑁆𑀦𑀺𑀲𑁆𑀲𑀬𑁄𑀢𑀺 𑀢𑁂𑀮𑀧𑀚𑁆𑀚𑁄𑀢𑀕𑁆𑀕𑀳𑀡𑀁. 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀏𑀢𑁂𑀳𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀦𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀸𑀤𑀺𑀉𑀧𑀫𑁄𑀧𑀫𑀺𑀢𑀩𑁆𑀩𑀧𑁆𑀧𑀓𑀸𑀭𑁂𑀳𑀺, 𑀏𑀢𑁂𑀳𑀺 𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀭𑀲𑀭𑀽𑀧𑀢𑀸𑀤𑀻𑀦𑀁 𑀅𑀢𑁆𑀢𑀦𑀺 𑀅𑀜𑁆𑀜𑀣𑀸 𑀧𑀝𑀺𑀧𑀸𑀤𑀦𑀧𑀭𑀺𑀬𑀸𑀬𑁂𑀳𑀺 𑀅𑀢𑁆𑀢𑀦𑁄 𑀤𑀺𑀩𑁆𑀩𑀯𑀺𑀳𑀸𑀭𑀯𑀺𑀪𑀸𑀯𑀦𑀧𑀭𑀺𑀬𑀸𑀬𑁂𑀳𑀺 𑀯𑀺𑀚𑁆𑀚𑀢𑁆𑀢𑀬𑀯𑀺𑀪𑀸𑀯𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀯𑀺𑀪𑀸𑀯𑀦𑀧𑀭𑀺𑀬𑀸𑀬𑁂𑀳𑀺 𑀘. 𑀢𑁂𑀦𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄’’𑀢𑀺.

𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸

𑀧𑀲𑀦𑁆𑀦𑀸𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀁 𑀲𑀓𑁆𑀓𑀸𑀭𑀁. 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺. 𑀏𑀢𑁆𑀣 𑀳𑀺 𑀦𑀸𑀬𑀁 𑀕𑀫𑀺𑀲𑀤𑁆𑀤𑁄 𑀦𑀻𑀲𑀤𑁆𑀤𑀸𑀤𑀬𑁄 𑀯𑀺𑀬 𑀤𑁆𑀯𑀺𑀓𑀫𑁆𑀫𑀓𑁄, 𑀢𑀲𑁆𑀫𑀸 𑀬𑀣𑀸 𑀅𑀚𑀁 𑀕𑀸𑀫𑀁 𑀦𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀢𑁂𑀦𑀸𑀳 ‘‘𑀧𑀭𑀸𑀬𑀡’’𑀦𑁆𑀢𑀺. 𑀧𑀭𑀸𑀬𑀡𑀪𑀸𑀯𑁄 ¶ 𑀘 𑀅𑀦𑀢𑁆𑀣𑀦𑀺𑀲𑁂𑀥𑀦𑁂𑀦 𑀅𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸’’𑀢𑀺. 𑀅𑀖𑀲𑁆𑀲𑀸𑀢𑀺 𑀤𑀼𑀓𑁆𑀔𑀢𑁄𑀢𑀺 𑀯𑀤𑀦𑁆𑀢𑀺, 𑀧𑀸𑀧𑀢𑁄𑀢𑀺 𑀧𑀦 𑀅𑀢𑁆𑀣𑁄 𑀬𑀼𑀢𑁆𑀢𑁄, 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀭𑀡𑀦𑁆𑀢𑀺 𑀕𑀫𑀦𑀜𑁆𑀘𑁂𑀢𑁆𑀣 𑀢𑀤𑀥𑀺𑀧𑁆𑀧𑀸𑀬𑁂𑀦 𑀪𑀚𑀦𑀁 𑀢𑀣𑀸 𑀚𑀸𑀦𑀦𑀁 𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀘𑁆𑀙𑀸𑀫𑀻𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁. 𑀪𑀚𑀦𑀁 𑀯𑀸 𑀲𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀗𑁆𑀓𑀫𑀦𑀁, 𑀲𑁂𑀯𑀦𑀸 𑀲𑀦𑁆𑀢𑀺𑀓𑀸𑀯𑀘𑀭𑀢𑀸, 𑀧𑀬𑀺𑀭𑀼𑀧𑀸𑀲𑀦𑀁 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀜𑁆𑀜𑀲𑀭𑀡𑀢𑀁𑀬𑁂𑀯 𑀤𑀻𑀧𑁂𑀢𑀺. 𑀕𑀘𑁆𑀙𑀸𑀫𑀻𑀢𑀺 𑀧𑀤𑀲𑁆𑀲 𑀓𑀣𑀁 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀬𑁂𑀲𑀁 𑀳𑀻’’𑀢𑀺𑀆𑀤𑀺.

𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀨𑀮𑀝𑁆𑀞𑀸 𑀏𑀯 𑀤𑀲𑁆𑀲𑀺𑀢𑀸, 𑀦 𑀫𑀕𑁆𑀕𑀝𑁆𑀞𑀸𑀢𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀸’’𑀢𑀺 𑀆𑀳. 𑀦𑀦𑀼 𑀘 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀼𑀘𑁆𑀘𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀫𑀕𑁆𑀕𑀝𑁆𑀞𑀸 𑀏𑀯 𑀢𑀣𑀸 𑀯𑀢𑁆𑀢𑀩𑁆𑀩𑀸, 𑀦 𑀇𑀢𑀭𑁂 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀏𑀯 ‘‘𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀸. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑁂𑀦 𑀳𑀺 𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀲𑀫𑁆𑀪𑀯𑁄. 𑀅𑀓𑁆𑀔𑀸𑀬𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 ¶ 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀲𑀼𑀢𑁆𑀢𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, ‘‘𑀯𑀺𑀢𑁆𑀣𑀸𑀭𑁄’’𑀢𑀺 𑀯𑀸 𑀇𑀫𑀺𑀦𑀸. 𑀏𑀢𑁆𑀣 𑀘 𑀅𑀭𑀺𑀬𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺, 𑀢𑀣𑀸𑀧𑀺 𑀅𑀭𑀺𑀬𑀨𑀮𑀸𑀦𑀁 ‘‘𑀬𑀲𑁆𑀫𑀸 𑀢𑀸𑀬 𑀲𑀤𑁆𑀥𑀸𑀬 𑀅𑀯𑀽𑀧𑀲𑀦𑁆𑀢𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀢𑀸𑀬 𑀦𑀺𑀬𑁆𑀬𑀸𑀦𑀸𑀦𑀼𑀕𑀼𑀡𑀢𑀸𑀬 𑀦𑀺𑀬𑁆𑀬𑀸𑀦𑀧𑀭𑀺𑀬𑁄𑀲𑀸𑀦𑀢𑀸𑀬 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀦 𑀦𑀺𑀬𑁆𑀬𑀸𑀦𑀥𑀫𑁆𑀫𑀲𑀫𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺 𑀏𑀯, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀸𑀭𑀼𑀴𑁆𑀳𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄𑀢𑀺 𑀏𑀯𑀫𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀧𑀳𑀻𑀬𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀦𑁆𑀢𑀺 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 ¶ 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀲𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀓𑁂𑀦𑀘𑀺 𑀅𑀯𑀺𑀭𑀼𑀤𑁆𑀥𑀁, 𑀇𑀝𑁆𑀞𑀁 𑀧𑀡𑀻𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀧𑀕𑀼𑀡𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀯𑀸 𑀧𑀕𑀼𑀡𑀁. 𑀬𑀣𑀸𑀳 ‘‘𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺 (𑀫. 𑀦𑀺. 𑁧.𑁨𑁮𑁩; 𑀫𑀳𑀸𑀯. 𑁯). 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦𑀸𑀢𑀺 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨) 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀻𑀮𑀸𑀦𑀜𑁆𑀘 𑀲𑀁𑀳𑀢𑀪𑀸𑀯𑁂𑀦, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀁𑀳𑀢𑁄𑀢𑀺 𑀖𑀝𑀺𑀢𑁄, 𑀲𑀫𑁂𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀸 𑀏𑀯. 𑀅𑀝𑁆𑀞 𑀘 𑀧𑀼𑀕𑁆𑀕𑀮𑀸 𑀥𑀫𑁆𑀫𑀤𑀲𑀸 𑀢𑁂𑀢𑀺 𑀧𑀼𑀭𑀺𑀲𑀬𑀼𑀕𑀴𑀯𑀲𑁂𑀦 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀝𑁆𑀞𑁂𑀯 𑀅𑀭𑀺𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀸𑀯𑀺𑀢𑀸𑀬 𑀥𑀫𑁆𑀫𑀤𑀲𑀸. 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀭𑀡𑀦𑁆𑀢𑀺 𑀕𑀫𑀦𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀕𑀫𑀦𑁂𑀦 𑀘 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀅𑀢𑁆𑀢𑀦𑁄 𑀳𑀤𑀬𑀗𑁆𑀕𑀢𑀁 𑀯𑀸𑀘𑀸𑀬 𑀧𑀯𑁂𑀤𑁂𑀲𑀺.

𑀧𑀲𑀦𑁆𑀦𑀸𑀓𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀓𑀣𑀸

𑀲𑀭𑀡𑀕𑀫𑀦𑀲𑁆𑀲 ¶ 𑀯𑀺𑀲𑀬𑀧𑁆𑀧𑀪𑁂𑀤𑀨𑀮𑀲𑀁𑀓𑀺𑀮𑁂𑀲𑀪𑁂𑀤𑀸𑀦𑀁 𑀯𑀺𑀬 𑀓𑀢𑁆𑀢𑀼 𑀘 𑀯𑀺𑀪𑀸𑀯𑀦𑀸 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺 ‘‘𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 𑀢𑁂𑀦 𑀯𑀺𑀦𑀸 𑀲𑀭𑀡𑀕𑀫𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀲𑀭𑀡𑀦𑁆𑀢𑀺 𑀧𑀤𑀢𑁆𑀣𑀢𑁄 𑀢𑀸𑀯 𑀳𑀺𑀁𑀲𑀢𑀻𑀢𑀺 𑀲𑀭𑀡𑀁. 𑀳𑀺𑀁𑀲𑀢𑁆𑀣𑀲𑁆𑀲 𑀳𑀺 𑀲𑀭𑀲𑀤𑁆𑀤𑀲𑁆𑀲 𑀯𑀲𑁂𑀦𑁂𑀢𑀁 𑀧𑀤𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀯𑀝𑁆𑀝𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁 𑀳𑀦𑀢𑀺, 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀭𑀢𑀦𑀢𑁆𑀢𑀬𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁 ¶ . 𑀅𑀣 𑀯𑀸 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁪) 𑀅𑀢𑁆𑀣𑁂 𑀦𑀺𑀬𑁄𑀚𑀦𑁂𑀦 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦 ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀦 𑀧𑀸𑀧𑀓𑁄 𑀯𑀺𑀧𑀸𑀓𑁄, 𑀧𑀸𑀧𑀓𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀅𑀦𑀢𑁆𑀣𑀢𑁄 𑀦𑀺𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺, 𑀳𑀺𑀢𑀸𑀳𑀺𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀓𑀁 𑀩𑁆𑀬𑀲𑀦𑀁 𑀅𑀧𑀯𑀢𑁆𑀢𑀺𑀓𑀭𑀡𑁂𑀦 𑀯𑀺𑀦𑀸𑀲𑁂𑀢𑀺 𑀩𑀼𑀤𑁆𑀥𑁄. 𑀪𑀯𑀓𑀦𑁆𑀢𑀸𑀭𑀉𑀢𑁆𑀢𑀭𑀡𑁂𑀦 𑀫𑀕𑁆𑀕𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺, 𑀇𑀢𑀭𑁄 𑀅𑀲𑁆𑀲𑀸𑀲𑀤𑀸𑀦𑁂𑀦. 𑀅𑀧𑁆𑀧𑀓𑀸𑀦𑀫𑁆𑀧𑀺 𑀤𑀸𑀦𑀯𑀲𑁂𑀦 𑀧𑀽𑀚𑀸𑀯𑀲𑁂𑀦 𑀘 𑀉𑀧𑀦𑀻𑀢𑀸𑀦𑀁 𑀲𑀓𑁆𑀓𑀸𑀭𑀸𑀦𑀁 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀢𑁄, 𑀢𑀲𑁆𑀫𑀸 𑀇𑀫𑀺𑀦𑀸𑀧𑀺 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀭𑀢𑀦𑀢𑁆𑀢𑀬𑀧𑀲𑀆𑀤𑀢𑀕𑁆𑀕𑀭𑀼𑀓𑀢𑀸𑀳𑀺 𑀯𑀺𑀥𑀼𑀢𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀫𑁄𑀳𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀢𑀸𑀬 𑀯𑀺𑀳𑀢𑀓𑀺𑀮𑁂𑀲𑁄 𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀧𑀭𑀸𑀬𑀡𑀁 𑀕𑀢𑀺 𑀢𑀸𑀡𑀁 𑀮𑁂𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀢𑁄 𑀲𑀭𑀡𑀦𑁆𑀢𑀺 𑀕𑀘𑁆𑀙𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 ‘‘𑀏𑀢𑀸𑀦𑀺 𑀫𑁂 𑀢𑀻𑀡𑀺 𑀭𑀢𑀦𑀸𑀦𑀺 𑀲𑀭𑀡𑀁, 𑀏𑀢𑀸𑀦𑀺 𑀧𑀭𑀸𑀬𑀡’’𑀦𑁆𑀢𑀺 𑀏𑀯𑀁 𑀉𑀧𑁂𑀢𑀺 𑀪𑀚𑀢𑀺 𑀲𑁂𑀯𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀏𑀯𑀁 𑀯𑀸 𑀚𑀸𑀦𑀸𑀢𑀺, 𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀸𑀯 𑀲𑀭𑀡𑀁, 𑀲𑀭𑀡𑀕𑀫𑀦𑀁, 𑀬𑁄 𑀘 𑀲𑀭𑀡𑀁 𑀕𑀘𑁆𑀙𑀢𑀺, 𑀇𑀤𑀁 𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁂 𑀧𑀦 𑀤𑀼𑀯𑀺𑀥𑀁 𑀲𑀭𑀡𑀕𑀫𑀦𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀜𑁆𑀘. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀫𑀕𑁆𑀕𑀓𑁆𑀔𑀡𑁂 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀦𑁂𑀦 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀺. 𑀅𑀢𑁆𑀣𑀢𑁄 𑀘𑀢𑀼𑀲𑀘𑁆𑀘𑀸𑀥𑀺𑀕𑀫𑁄 𑀏𑀯 𑀳𑀺 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀁. 𑀢𑀢𑁆𑀣 𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦, 𑀫𑀕𑁆𑀕𑀥𑀫𑁆𑀫𑁄 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄𑀬𑁂𑀯 𑀲𑀭𑀡𑀕𑀫𑀦𑀢𑁆𑀣𑀁 𑀲𑀸𑀥𑁂𑀢𑀺, 𑀩𑀼𑀤𑁆𑀥𑀕𑀼𑀡𑀸 𑀧𑀦 𑀲𑀸𑀯𑀓𑀕𑁄𑀘𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦, 𑀢𑀣𑀸 𑀅𑀭𑀺𑀬𑀲𑀗𑁆𑀖𑀕𑀼𑀡𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀻’’𑀢𑀺 ¶ . 𑀇𑀚𑁆𑀛𑀦𑁆𑀢𑀜𑁆𑀘 𑀲𑀳𑁂𑀯 𑀇𑀚𑁆𑀛𑀢𑀺, 𑀦 𑀮𑁄𑀓𑀺𑀬𑀁 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀦 𑀲𑀭𑀡𑀕𑀫𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀧𑀦 𑀅𑀥𑀺𑀕𑀢𑀫𑁂𑀯 𑀳𑁄𑀢𑀺 𑀏𑀓𑀘𑁆𑀘𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀻𑀦𑀁 ¶ 𑀮𑁄𑀓𑀺𑀬𑀯𑀺𑀚𑁆𑀚𑀸𑀤𑀬𑁄 𑀯𑀺𑀬𑀸’’𑀢𑀺, 𑀢𑁂𑀲𑀁 𑀮𑁄𑀓𑀺𑀬𑀫𑁂𑀯 𑀲𑀭𑀡𑀕𑀫𑀦𑀁 𑀲𑀺𑀬𑀸, 𑀦 𑀮𑁄𑀓𑀼𑀢𑁆𑀢𑀭𑀁. 𑀢𑀜𑁆𑀘 𑀅𑀬𑀼𑀢𑁆𑀢𑀁 𑀤𑀼𑀯𑀺𑀥𑀲𑁆𑀲𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀮𑁄𑀓𑀺𑀬𑀁 𑀧𑀦 𑀲𑀭𑀡𑀕𑀫𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀭𑀫𑁆𑀫𑀡𑀢𑁄 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀇𑀚𑁆𑀛𑀢𑀺. 𑀢𑀁 𑀅𑀢𑁆𑀣𑀢𑁄 𑀩𑀼𑀤𑁆𑀥𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀤𑀲𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 ‘‘𑀲𑀤𑁆𑀥𑀸𑀧𑀝𑀺𑀮𑀸𑀪𑁄’’𑀢𑀺 𑀇𑀫𑀺𑀦𑀸 𑀫𑀸𑀢𑀸𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀤𑀸𑀭𑀓𑀸𑀤𑀻𑀦𑀁 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑀭𑀡𑀕𑀫𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀇𑀫𑀺𑀦𑀸 𑀧𑀦 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀭𑀡𑀕𑀫𑀦𑀁 𑀤𑀲𑁆𑀲𑀺𑀢𑀁 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀮𑁄𑀓𑀺𑀬𑀸𑀯𑀩𑁄𑀥𑀯𑀲𑁂𑀦𑁂𑀯 𑀲𑀫𑁆𑀫𑀸 𑀜𑀸𑀬𑁂𑀦 𑀤𑀲𑁆𑀲𑀦𑀢𑁄.

𑀢𑀬𑀺𑀤𑀁 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀘𑀢𑀼𑀥𑀸 𑀧𑀯𑀢𑁆𑀢𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑁂𑀦 𑀢𑀧𑁆𑀧𑀭𑀸𑀬𑀡𑀢𑀸𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦 𑀧𑀡𑀺𑀧𑀸𑀢𑁂𑀦𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀅𑀢𑁆𑀢𑀸𑀦𑀁 𑀩𑀼𑀤𑁆𑀥𑀲𑁆𑀲 𑀦𑀺𑀬𑁆𑀬𑀸𑀢𑁂𑀫𑀺, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀁 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀁. 𑀢𑀧𑁆𑀧𑀭𑀸𑀬𑀡𑀢𑀸 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑀧𑀭𑀸𑀬𑀡𑁄 𑀥𑀫𑁆𑀫𑀧𑀭𑀸𑀬𑀡𑁄 𑀲𑀗𑁆𑀖𑀧𑀭𑀸𑀬𑀡𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀢𑀧𑁆𑀧𑀭𑀸𑀬𑀡𑀪𑀸𑀯𑁄. 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 ‘𑀅𑀳𑀁 𑀩𑀼𑀤𑁆𑀥𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀥𑀫𑁆𑀫𑀲𑁆𑀲, 𑀲𑀗𑁆𑀖𑀲𑁆𑀲𑀸’𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑁄. 𑀧𑀡𑀺𑀧𑀸𑀢𑁄 𑀦𑀸𑀫 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 ‘𑀅𑀳𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯 𑀢𑀺𑀡𑁆𑀡𑀁 𑀯𑀢𑁆𑀣𑀽𑀦𑀁 𑀓𑀭𑁄𑀫𑀻’𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀏𑀯𑀁 𑀩𑀼𑀤𑁆𑀥𑀸𑀤𑀻𑀲𑀼 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄. 𑀇𑀫𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺 𑀲𑀭𑀡𑀕𑀫𑀦𑀁.

𑀅𑀧𑀺𑀘 ‘‘𑀪𑀕𑀯𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀥𑀫𑁆𑀫𑀲𑁆𑀲 𑀲𑀗𑁆𑀖𑀲𑁆𑀲 𑀅𑀢𑁆𑀢𑀸𑀦𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀧𑀭𑀺𑀘𑁆𑀘𑀢𑁆𑀢𑁄𑀬𑁂𑀯 𑀫𑁂 𑀅𑀢𑁆𑀢𑀸, 𑀧𑀭𑀺𑀘𑁆𑀘𑀢𑁆𑀢𑀁𑀬𑁂𑀯 𑀫𑁂 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀮𑁂𑀡𑀁 𑀢𑀸𑀡’’𑀦𑁆𑀢𑀺 𑀏𑀯𑀫𑁆𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀢𑁆𑀣𑀸𑀭𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑀸𑀫𑀺, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑀸𑀫𑀺, 𑀲𑀼𑀕𑀢𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑀸𑀫𑀺, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑀸𑀫𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘 𑀯𑀢𑀸𑀳𑀁 𑀧𑀲𑁆𑀲𑀸𑀫𑀺, 𑀪𑀕𑀯𑀦𑁆𑀢𑀫𑁂𑀯 𑀧𑀲𑁆𑀲𑀸𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀏𑀯𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀭𑀡𑀕𑀫𑀦𑀁 𑀯𑀺𑀬 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀲𑁄 ¶ ¶ 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁. (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁪);

‘‘𑀢𑁂 𑀫𑀬𑀁 𑀯𑀺𑀘𑀭𑀺𑀲𑁆𑀲𑀸𑀫, 𑀕𑀸𑀫𑀸 𑀕𑀸𑀫𑀁 𑀦𑀕𑀸 𑀦𑀕𑀁…𑀧𑁂… 𑀲𑀼𑀥𑀫𑁆𑀫𑀢’’𑀦𑁆𑀢𑀺. (𑀲𑀼. 𑀦𑀺. 𑁧𑁮𑁨) 𑁋

𑀏𑀯𑀫𑁆𑀧𑀺 𑀆𑀴𑀯𑀓𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸𑀤𑀻𑀦𑀁 𑀲𑀭𑀡𑀕𑀫𑀦𑀁 𑀯𑀺𑀬 𑀢𑀧𑁆𑀧𑀭𑀸𑀬𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀦𑀼 𑀘𑁂𑀢𑁂 𑀆𑀴𑀯𑀓𑀸𑀤𑀬𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑀲𑀭𑀡𑀕𑀫𑀦𑀸, 𑀓𑀣𑀁 𑀢𑁂𑀲𑀁 𑀢𑀧𑁆𑀧𑀭𑀸𑀬𑀡𑀢𑀸𑀲𑀭𑀡𑀕𑀫𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀫𑀕𑁆𑀕𑁂𑀦𑀸𑀕𑀢𑀲𑀭𑀡𑀕𑀫𑀦𑁂𑀳𑀺𑀧𑀺 ‘‘𑀲𑁄𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺 𑀕𑀸𑀫𑀸 𑀕𑀸𑀫’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁪) 𑀢𑁂𑀳𑀺 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁. 𑀅𑀣 𑀔𑁄 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺, 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 ‘‘𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄, 𑀩𑁆𑀭𑀳𑁆𑀫𑀸𑀬𑀼 𑀅𑀳𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀫. 𑀦𑀺. 𑁨.𑁩𑁯𑁪) 𑀏𑀯𑀫𑁆𑀧𑀺 𑀧𑀡𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄.

𑀲𑁄 𑀧𑀦𑁂𑀲 𑀜𑀸𑀢𑀺𑀪𑀬𑀸𑀘𑀭𑀺𑀬𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀳𑁂𑀢𑀼𑀓𑁂𑀦 𑀧𑀡𑀺𑀧𑀸𑀢𑁂𑀦 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀦 𑀇𑀢𑀭𑁂𑀳𑀺 𑀜𑀸𑀢𑀺𑀪𑀬𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀢𑀻𑀳𑀺 𑀧𑀡𑀺𑀧𑀸𑀢𑁂𑀳𑀺. 𑀲𑁂𑀝𑁆𑀞𑀯𑀲𑁂𑀦𑁂𑀯 𑀳𑀺 𑀲𑀭𑀡𑀁 𑀕𑀬𑁆𑀳𑀢𑀺, 𑀲𑁂𑀝𑁆𑀞𑀯𑀲𑁂𑀦 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀬𑁄 𑀲𑀸𑀓𑀺𑀬𑁄 𑀯𑀸 𑀓𑁄𑀮𑀺𑀬𑁄 𑀯𑀸 ‘‘𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀜𑀸𑀢𑀓𑁄’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄 𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀭𑀸𑀚𑀧𑀽𑀚𑀺𑀢𑁄 𑀫𑀳𑀸𑀦𑀼𑀪𑀸𑀯𑁄 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁. 𑀬𑁄𑀧𑀺 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀉𑀕𑁆𑀕𑀳𑀺𑀢𑀁 𑀲𑀭𑀫𑀸𑀦𑁄 𑀩𑀼𑀤𑁆𑀥𑀓𑀸𑀮𑁂 𑀯𑀸 𑁋

‘‘𑀏𑀓𑁂𑀦 𑀪𑁄𑀕𑀁 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁩.𑁨𑁬𑁫) 𑁋

𑀏𑀯𑀭𑀽𑀧𑀺𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀅𑀦𑀼𑀲𑀸𑀲𑀦𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂’’𑀢𑀺 𑀯𑀦𑁆𑀤𑀢𑀺, 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑀭𑀡𑀁, 𑀲𑀫𑁆𑀧𑀭𑀸𑀬𑀺𑀓𑀁 𑀧𑀦 𑀦𑀺𑀬𑁆𑀬𑀸𑀦𑀺𑀓𑀁 𑀯𑀸 𑀅𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑀫𑁂𑀯 𑀓𑀭𑁄𑀢𑀺. 𑀬𑁄 𑀧𑀦 ‘‘𑀅𑀬𑀁 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀯𑀦𑁆𑀤𑀢𑀺, 𑀢𑁂𑀦𑁂𑀯 𑀕𑀳𑀺𑀢𑀁 𑀳𑁄𑀢𑀺 𑀲𑀭𑀡𑀁.

𑀏𑀯𑀁 ¶ ¶ 𑀕𑀳𑀺𑀢𑀲𑀭𑀡𑀲𑁆𑀲 𑀘 𑀉𑀧𑀸𑀲𑀓𑀲𑁆𑀲 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀩𑁆𑀩𑀚𑀺𑀢𑀫𑁆𑀧𑀺 𑀜𑀸𑀢𑀺𑀁 ‘‘𑀜𑀸𑀢𑀓𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄𑀧𑀺 𑀲𑀭𑀡𑀕𑀫𑀦𑀁 𑀦 𑀪𑀺𑀚𑁆𑀚𑀢𑀺, 𑀧𑀕𑁂𑀯 𑀅𑀧𑀩𑁆𑀩𑀚𑀺𑀢𑀁. 𑀢𑀣𑀸 𑀭𑀸𑀚𑀸𑀦𑀁 𑀪𑀬𑀯𑀲𑁂𑀦 𑀯𑀦𑁆𑀤𑀢𑁄. 𑀲𑁄 𑀳𑀺 𑀭𑀝𑁆𑀞𑀧𑀽𑀚𑀺𑀢𑀢𑁆𑀢𑀸 𑀅𑀯𑀦𑁆𑀤𑀺𑀬𑀫𑀸𑀦𑁄 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸𑀢𑀺. 𑀢𑀣𑀸 𑀬𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀓𑀁 𑀢𑀺𑀢𑁆𑀣𑀺𑀬𑀫𑁆𑀧𑀺 ‘‘𑀆𑀘𑀭𑀺𑀬𑁄 𑀫𑁂 𑀅𑀬’’𑀦𑁆𑀢𑀺 𑀯𑀦𑁆𑀤𑀢𑁄𑀧𑀺 𑀦 𑀪𑀺𑀚𑁆𑀚𑀢𑀺. 𑀏𑀯𑀁 𑀲𑀭𑀡𑀕𑀫𑀦𑀲𑁆𑀲 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀭𑀡𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀨𑀮𑀓𑀣𑀸

𑀏𑀢𑁆𑀣 𑀘 𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮𑀁 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀓𑀮𑀲𑁆𑀲 𑀧𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀆𑀦𑀺𑀲𑀁𑀲𑀨𑀮𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀜𑁆𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

‘‘𑀏𑀢𑀁 𑀔𑁄 𑀲𑀭𑀡𑀁 𑀔𑁂𑀫𑀁, 𑀏𑀢𑀁 𑀲𑀭𑀡𑀫𑀼𑀢𑁆𑀢𑀫𑀁;

𑀏𑀢𑀁 𑀲𑀭𑀡𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁧𑁯𑁦-𑁧𑁯𑁨);

𑀅𑀧𑀺𑀘 𑀦𑀺𑀘𑁆𑀘𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦 𑀧𑁂𑀢𑀲𑁆𑀲 𑀆𑀦𑀺𑀲𑀁𑀲𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀺𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀅𑀭𑀳𑀦𑁆𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁮; 𑀅. 𑀦𑀺. 𑁧.𑁨𑁭𑁬).

𑀮𑁄𑀓𑀺𑀬𑀲𑁆𑀲 ¶ ¶ 𑀧𑀦 𑀲𑀭𑀡𑀕𑀫𑀦𑀲𑁆𑀲 𑀪𑀯𑀲𑀫𑁆𑀧𑀤𑀸𑀧𑀺 𑀪𑁄𑀕𑀲𑀫𑁆𑀧𑀤𑀸𑀧𑀺 𑀨𑀮𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂,

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁,

𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.(𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 ‘𑀲𑀸𑀥𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀩𑀼𑀤𑁆𑀥𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀩𑀼𑀤𑁆𑀥𑀲𑀭𑀡𑀕𑀫𑀦𑀳𑁂𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀦𑁆𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀲𑀼𑀔𑁂𑀦 𑀬𑀲𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺 𑀭𑀲𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀻’’’𑀢𑀺 (𑀲𑀁. 𑀦𑀺. 𑁪.𑁩𑁪𑁧).

𑀏𑀲 𑀦𑀬𑁄 𑀥𑀫𑁆𑀫𑁂 𑀲𑀗𑁆𑀖𑁂 𑀘.

𑀅𑀧𑀺𑀘 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀧𑀺 𑀲𑀭𑀡𑀕𑀫𑀦𑀲𑁆𑀲 𑀨𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑁂𑀮𑀸𑀫𑀲𑀼𑀢𑁆𑀢𑁂 (𑀅. 𑀦𑀺. 𑁯.𑁨𑁦) ‘‘𑀓𑀭𑀻𑀲𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀦𑀁 𑀲𑀼𑀯𑀡𑁆𑀡𑀧𑀸𑀢𑀺𑀭𑀽𑀧𑀺𑀬𑀧𑀸𑀢𑀺𑀓𑀁𑀲𑀧𑀸𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀭𑀽𑀧𑀺𑀬𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀧𑀽𑀭𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀅𑀲𑁆𑀲𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀣𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑁂𑀦𑀼𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀅𑀧𑀭𑀺𑀫𑀸𑀡𑀲𑁆𑀲 𑀘 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀪𑁂𑀤𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀯𑁂𑀮𑀸𑀫𑀫𑀳𑀸𑀤𑀸𑀦𑀢𑁄 𑀏𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀲𑀢𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀤𑀺𑀦𑁆𑀦𑀤𑀸𑀦𑀢𑁄 𑀏𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀢𑀢𑁄 ¶ 𑀏𑀓𑀲𑁆𑀲 𑀅𑀦𑀸𑀕𑀸𑀫𑀺𑀦𑁄, 𑀢𑀢𑁄 𑀏𑀓𑀲𑁆𑀲 𑀅𑀭𑀳𑀢𑁄, 𑀢𑀢𑁄 𑀏𑀓𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 ¶ 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀓𑀭𑀡𑀁, 𑀢𑀢𑁄 𑀲𑀭𑀡𑀕𑀫𑀦𑀁 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀧𑀓𑀸𑀲𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀁, 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀘𑁂𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 (𑀅. 𑀦𑀺. 𑁯.𑁨𑁦) 𑁋

𑀆𑀤𑀺. 𑀏𑀯𑀁 𑀲𑀭𑀡𑀕𑀫𑀦𑀨𑀮𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀭𑀡𑀕𑀫𑀦𑀨𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀲𑀁𑀓𑀺𑀮𑁂𑀲𑀪𑁂𑀤𑀓𑀣𑀸

𑀢𑀢𑁆𑀣 𑀘 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀤𑀻𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀦 𑀫𑀳𑀸𑀚𑀼𑀢𑀺𑀓𑀁, 𑀦 𑀉𑀚𑁆𑀚𑀮𑀁 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀬𑁄𑀤𑀸𑀢𑀁 𑀳𑁄𑀢𑀺, 𑀦 𑀫𑀳𑀸𑀯𑀺𑀧𑁆𑀨𑀸𑀭𑀁 𑀅𑀦𑀼𑀴𑀸𑀭𑀁. 𑀏𑀢𑁆𑀣 𑀘 𑀅𑀜𑁆𑀜𑀸𑀡𑀁 𑀦𑀸𑀫 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀕𑀼𑀡𑀸𑀦𑀁 𑀅𑀚𑀸𑀦𑀦𑀁 𑀢𑀢𑁆𑀣 𑀲𑀫𑁆𑀫𑁄𑀳𑁄. ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄. 𑀫𑀺𑀘𑁆𑀙𑀸𑀜𑀸𑀡𑀁 𑀦𑀸𑀫 𑀢𑀲𑁆𑀲 𑀕𑀼𑀡𑀸𑀦𑀁 𑀅𑀕𑀼𑀡𑀪𑀸𑀯𑀧𑀭𑀺𑀓𑀧𑁆𑀧𑀦𑁂𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀦 𑀲𑀭𑀡𑀕𑀫𑀦𑀲𑁆𑀲 𑀦𑀢𑁆𑀣𑀺 𑀲𑀁𑀓𑀺𑀮𑁂𑀲𑁄. 𑀮𑁄𑀓𑀺𑀬𑀲𑁆𑀲 𑀘 𑀲𑀭𑀡𑀕𑀫𑀦𑀲𑁆𑀲 𑀤𑀼𑀯𑀺𑀥𑁄 𑀪𑁂𑀤𑁄 𑀲𑀸𑀯𑀚𑁆𑀚𑁄 𑀅𑀦𑀯𑀚𑁆𑀚𑁄 𑀘. 𑀢𑀢𑁆𑀣 𑀲𑀸𑀯𑀚𑁆𑀚𑁄 𑀅𑀜𑁆𑀜𑀲𑀢𑁆𑀣𑀸𑀭𑀸𑀤𑀻𑀲𑀼 𑀅𑀢𑁆𑀢𑀦𑀺𑀬𑁆𑀬𑀸𑀢𑀦𑀸𑀤𑀻𑀳𑀺 𑀳𑁄𑀢𑀺, 𑀲𑁄 𑀅𑀦𑀺𑀝𑁆𑀞𑀨𑀮𑁄. 𑀅𑀦𑀯𑀚𑁆𑀚𑁄 𑀧𑀦 𑀓𑀸𑀮𑀓𑀺𑀭𑀺𑀬𑀸𑀬 𑀳𑁄𑀢𑀺. 𑀮𑁄𑀓𑀺𑀬𑀜𑁆𑀳𑀺 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀁 𑀯𑀺𑀬 𑀅𑀕𑁆𑀕𑀳𑀺𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀓𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀪𑁂𑀤𑁂𑀦 𑀪𑁂𑀤𑁄, 𑀲𑁄 𑀅𑀯𑀺𑀧𑀸𑀓𑀢𑁆𑀢𑀸 𑀅𑀨𑀮𑁄. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀦 𑀦𑁂𑀯𑀢𑁆𑀣𑀺 𑀪𑁂𑀤𑁄. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀢𑀻𑀢𑀺. 𑀏𑀯𑀁 𑀲𑀭𑀡𑀕𑀫𑀦𑀲𑁆𑀲 𑀲𑀁𑀓𑀺𑀮𑁂𑀲𑁄 𑀘 𑀪𑁂𑀤𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁄𑀤𑀸𑀦𑀁 𑀦 𑀕𑀳𑀺𑀢𑀁, 𑀦𑀦𑀼 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀧𑀺 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀲𑀁𑀓𑀺𑀮𑁂𑀲𑀕𑁆𑀕𑀳𑀡𑁂𑀦 𑀅𑀢𑁆𑀣𑀢𑁄 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁. 𑀬𑀸𑀦𑀺 𑀳𑀺 𑀢𑁂𑀲𑀁 𑀲𑀁𑀓𑀺𑀮𑁂𑀲𑀓𑀸𑀭𑀡𑀸𑀦𑀺 𑀅𑀜𑁆𑀜𑀸𑀡𑀸𑀤𑀻𑀦𑀺 ¶ , 𑀢𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀳𑀸𑀦𑁂𑀦 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 ‘‘𑀲𑀭𑀡𑀁 𑀲𑀭𑀡𑀕𑀫𑀦’’𑀦𑁆𑀢𑀺𑀆𑀤𑀻𑀦𑀁 𑀧𑀧𑀜𑁆𑀘𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀲 𑀧𑀦 𑀬𑀣𑀸𑀯𑀼𑀢𑁆𑀢𑀧𑀧𑀜𑁆𑀘𑀲𑁆𑀲 𑀇𑀥 𑀅𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀧𑀦 𑀇𑀥 𑀯𑀼𑀘𑁆𑀘𑀫𑀸𑀦𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑀭𑀡𑀯𑀡𑁆𑀡𑀦𑀢𑁄𑀢𑀺 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀭𑀡𑀯𑀡𑁆𑀡𑀦𑀢𑁄.

𑀲𑀭𑀡𑀕𑀫𑀦𑀲𑀁𑀓𑀺𑀮𑁂𑀲𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸

𑀏𑀯𑀁 ¶ 𑀥𑀸𑀭𑁂𑀢𑀽𑀢𑀺 𑀏𑀯𑀁 𑀚𑀸𑀦𑀸𑀢𑀽𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀓𑁄 𑀉𑀧𑀸𑀲𑀓𑁄𑀢𑀺 𑀲𑀭𑀽𑀧𑀧𑀼𑀘𑁆𑀙𑀸, 𑀢𑀲𑁆𑀫𑀸 𑀓𑀺𑀁𑀮𑀓𑁆𑀔𑀡𑁄 𑀉𑀧𑀸𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀳𑁂𑀢𑀼𑀧𑀼𑀘𑁆𑀙𑀸. 𑀢𑁂𑀦 𑀓𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀉𑀧𑀸𑀲𑀓𑀲𑀤𑁆𑀤𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑀤𑁆𑀤𑀲𑁆𑀲 𑀳𑀺 𑀅𑀪𑀺𑀥𑁂𑀬𑁆𑀬𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀢𑀤𑀢𑁆𑀣𑀲𑁆𑀲 𑀢𑀩𑁆𑀪𑀸𑀯𑀓𑀸𑀭𑀡𑀁. 𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺 𑀓𑀻𑀤𑀺𑀲𑀁 𑀅𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀻𑀮𑀁, 𑀓𑀺𑀢𑁆𑀢𑀓𑁂𑀦 𑀲𑀻𑀮𑁂𑀦𑀸𑀬𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀆𑀚𑀻𑀯𑁄𑀢𑀺 𑀓𑁄 𑀅𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄. 𑀲𑁄 𑀧𑀦 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀧𑀭𑀺𑀯𑀚𑁆𑀚𑀦𑁂𑀦 𑀳𑁄𑀢𑀻𑀢𑀺 𑀲𑁄𑀧𑀺 𑀯𑀺𑀪𑀚𑀻𑀬𑀢𑀺. 𑀓𑀸 𑀯𑀺𑀧𑀢𑁆𑀢𑀻𑀢𑀺 𑀓𑀲𑁆𑀲 𑀲𑀻𑀮𑀲𑁆𑀲 𑀆𑀚𑀻𑀯𑀲𑁆𑀲 𑀯𑀸 𑀯𑀺𑀧𑀢𑁆𑀢𑀺. 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺 𑀯𑀸 𑀧𑀝𑀺𑀲𑁂𑀥𑁄 𑀯𑀸. 𑀲𑀫𑁆𑀧𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀓𑀣𑀁 𑀯𑁂𑀤𑀺𑀢𑀩𑁆𑀩𑀁? 𑀯𑀼𑀘𑁆𑀘𑀢𑁂 𑁋 𑀓𑁄 𑀉𑀧𑀸𑀲𑀓𑁄𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀢𑀺𑀲𑀭𑀡𑀁 𑀕𑀢𑁄 𑀕𑀳𑀝𑁆𑀞𑁄. 𑀲𑀭𑀡𑀕𑀫𑀦𑀫𑁂𑀯 𑀳𑁂𑀢𑁆𑀣 𑀓𑀸𑀭𑀡𑀁, 𑀦 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀭𑀢𑀦𑀢𑁆𑀢𑀬𑀉𑀧𑀸𑀲𑀦𑀢𑁄. 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀆𑀤𑀭𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀺𑀬𑁄𑀕𑁂𑀦 𑀧𑀬𑀺𑀭𑀼𑀧𑀸𑀲𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀩𑀼𑀤𑁆𑀥𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄. 𑀥𑀫𑁆𑀫𑀁, 𑀲𑀗𑁆𑀖𑀁 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄.

𑀓𑀺𑀫𑀲𑁆𑀲 ¶ 𑀲𑀻𑀮𑀦𑁆𑀢𑀺 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄. 𑀯𑁂𑀭𑀫𑀡𑀺𑀬𑁄𑀢𑀺 𑀘𑁂𑀢𑁆𑀣 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀤𑀼𑀲𑁆𑀲𑀻𑀮𑁆𑀬𑀁, 𑀢𑀲𑁆𑀲 𑀫𑀦𑀦𑀢𑁄 𑀳𑀦𑀦𑀢𑁄 𑀯𑀺𑀦𑀸𑀲𑀦𑀢𑁄 𑀯𑁂𑀭𑀫𑀡𑀺𑀬𑁄 𑀧𑀜𑁆𑀘 𑀯𑀺𑀭𑀢𑀺𑀬𑁄 𑀯𑀺𑀭𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀲𑀻𑀮𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀫𑀼𑀲𑀸𑀯𑀸𑀤𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁩𑁩).

𑀓𑁄 𑀆𑀚𑀻𑀯𑁄𑀢𑀺 𑀧𑀜𑁆𑀘 𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸. 𑀓𑀢𑀫𑀸 𑀧𑀜𑁆𑀘? 𑀲𑀢𑁆𑀣𑀯𑀡𑀺𑀚𑁆𑀚𑀸 𑀲𑀢𑁆𑀢𑀯𑀡𑀺𑀚𑁆𑀚𑀸 ¶ 𑀫𑀁𑀲𑀯𑀡𑀺𑀚𑁆𑀚𑀸 𑀫𑀚𑁆𑀚𑀯𑀡𑀺𑀚𑁆𑀚𑀸 𑀯𑀺𑀲𑀯𑀡𑀺𑀚𑁆𑀚𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸’’𑀢𑀺 (𑀅. 𑀦𑀺. 𑁫.𑁧𑁭𑁭).

𑀏𑀢𑁆𑀣 𑀘 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀯𑀼𑀥𑀪𑀡𑁆𑀟𑀁 𑀓𑀢𑁆𑀯𑀸 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀬𑀣𑀸𑀓𑀢𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀲𑀢𑁆𑀢𑀯𑀡𑀺𑀚𑁆𑀚𑀸𑀢𑀺 𑀫𑀦𑀼𑀲𑁆𑀲𑀯𑀺𑀓𑁆𑀓𑀬𑁄. 𑀫𑀁𑀲𑀯𑀡𑀺𑀚𑁆𑀚𑀸𑀢𑀺 𑀲𑀽𑀦𑀓𑀸𑀭𑀸𑀤𑀬𑁄 𑀯𑀺𑀬 𑀫𑀺𑀕𑀲𑀽𑀓𑀭𑀸𑀤𑀺𑀓𑁂 𑀧𑁄𑀲𑁂𑀢𑁆𑀯𑀸 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀬𑁄. 𑀫𑀚𑁆𑀚𑀯𑀡𑀺𑀚𑁆𑀚𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀯𑀺𑀲𑀯𑀡𑀺𑀚𑁆𑀚𑀸𑀢𑀺 𑀯𑀺𑀲𑀁 𑀬𑁄𑀚𑁂𑀢𑁆𑀯𑀸 𑀲𑀗𑁆𑀕𑀳𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀢𑀢𑁆𑀣 𑀲𑀢𑁆𑀣𑀯𑀡𑀺𑀚𑁆𑀚𑀸 𑀧𑀭𑁄𑀧𑀭𑁄𑀥𑀦𑀺𑀫𑀺𑀢𑁆𑀢𑀢𑀸𑀬 𑀅𑀓𑀭𑀡𑀻𑀬𑀸 𑀯𑀼𑀢𑁆𑀢𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄, 𑀫𑀁𑀲𑀯𑀺𑀲𑀯𑀡𑀺𑀚𑁆𑀚𑀸 𑀯𑀥𑀳𑁂𑀢𑀼𑀢𑁄, 𑀫𑀚𑁆𑀚𑀯𑀡𑀺𑀚𑁆𑀚𑀸 𑀧𑀫𑀸𑀤𑀝𑁆𑀞𑀸𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸 𑀯𑀺𑀧𑀢𑁆𑀢𑀻𑀢𑀺 𑀬𑀸 𑀢𑀲𑁆𑀲𑁂𑀯 𑀲𑀻𑀮𑀲𑁆𑀲 𑀘 𑀆𑀚𑀻𑀯𑀲𑁆𑀲 𑀘 𑀯𑀺𑀧𑀢𑁆𑀢𑀺 𑀪𑁂𑀤𑁄 𑀓𑁄𑀧𑁄 𑀧𑀓𑁄𑀧𑁄 𑀘, 𑀅𑀬𑀫𑀲𑁆𑀲 𑀯𑀺𑀧𑀢𑁆𑀢𑀺. 𑀅𑀧𑀺𑀘 𑀬𑀸𑀬 𑀏𑀲 𑀘𑀡𑁆𑀟𑀸𑀮𑁄 𑀘𑁂𑀯 𑀳𑁄𑀢𑀺 𑀫𑀮𑀜𑁆𑀘 𑀧𑀝𑀺𑀓𑀼𑀝𑁆𑀞𑁄 𑀘, 𑀲𑀸𑀧𑀺𑀲𑁆𑀲 𑀯𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘 𑀅𑀢𑁆𑀣𑀢𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀝𑀺𑀓𑀼𑀝𑁆𑀞𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺, 𑀦𑁄 𑀓𑀫𑁆𑀫𑀁 ¶ , 𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀺, 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁭𑁫).

𑀏𑀢𑁆𑀣 𑀘 𑀉𑀧𑀸𑀲𑀓𑀧𑀝𑀺𑀓𑀼𑀝𑁆𑀞𑁄𑀢𑀺 𑀉𑀧𑀸𑀲𑀓𑀦𑀺𑀳𑀻𑀦𑁄. 𑀩𑀼𑀤𑁆𑀥𑀸𑀤𑀻𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼 𑀘 𑀲𑀤𑁆𑀥𑀸𑀯𑀺𑀧𑀭𑀺𑀬𑀸𑀬𑁄 𑀅𑀲𑁆𑀲𑀤𑁆𑀥𑀺𑀬𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄, 𑀬𑀣𑀸𑀯𑀼𑀢𑁆𑀢𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀤𑁆𑀥𑁄. 𑀬𑀣𑀸𑀯𑀼𑀢𑁆𑀢𑀲𑀻𑀮𑀯𑀺𑀧𑀢𑁆𑀢𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀲𑁆𑀲𑀻𑀮𑁄. ‘‘𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀸 𑀇𑀤𑀁 𑀦𑀸𑀫 𑀫𑀗𑁆𑀕𑀮𑀁 𑀳𑁄𑀢𑀻’’𑀢𑀺 𑀏𑀯𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀪𑁂𑀤𑀁 𑀫𑀗𑁆𑀕𑀮𑀫𑁂𑀯 𑀧𑀢𑁆𑀢𑀺𑀬𑀸𑀬𑀢𑀺. 𑀦𑁄 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀁 𑀦𑁄 𑀧𑀢𑁆𑀢𑀺𑀬𑀸𑀬𑀢𑀺. 𑀇𑀢𑁄𑀩𑀳𑀺𑀤𑁆𑀥𑀸𑀢𑀺 𑀇𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀓𑀲𑀫𑀬𑁂. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀤𑀓𑁆𑀔𑀺𑀡𑀸𑀭𑀳𑀲𑀜𑁆𑀜𑀻 𑀕𑀯𑁂𑀲𑀢𑀺. 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀤𑀸𑀦𑀫𑀸𑀦𑀦𑀸𑀤𑀺𑀓𑀁 𑀓𑀼𑀲𑀮𑀓𑀺𑀭𑀺𑀬𑀁 𑀧𑀞𑀫𑀢𑀭𑀁 𑀓𑀭𑁄𑀢𑀺. 𑀏𑀢𑁆𑀣 𑀘 𑀤𑀓𑁆𑀔𑀺𑀡𑁂𑀬𑁆𑀬𑀧𑀅𑀬𑁂𑀲𑀦𑀧𑀼𑀩𑁆𑀩𑀓𑀸𑀭𑁂 𑀏𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸 ¶ 𑀲𑀫𑁆𑀧𑀢𑁆𑀢𑀻𑀢𑀺 𑀲𑀸𑀯 𑀢𑀲𑁆𑀲 𑀲𑀻𑀮𑀲𑀫𑁆𑀧𑀤𑀸 𑀘 𑀆𑀚𑀻𑀯𑀲𑀫𑁆𑀧𑀤𑀸 𑀘 𑀲𑀫𑁆𑀧𑀢𑁆𑀢𑀺, 𑀬𑁂 𑀘𑀲𑁆𑀲 𑀭𑀢𑀦𑀪𑀸𑀯𑀸𑀤𑀺𑀓𑀭𑀸 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸. 𑀬𑀣𑀸𑀳 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄 𑀘. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀦 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀧𑀘𑁆𑀘𑁂𑀢𑀺, 𑀦𑁄 𑀫𑀗𑁆𑀕𑀮𑀁, 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀺, 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻’’𑀢𑀺.

𑀏𑀢𑁆𑀣 𑀘 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀉𑀧𑀸𑀲𑀓𑁄𑀯 𑀭𑀢𑀦𑀁 𑀉𑀧𑀸𑀲𑀓𑀭𑀢𑀦𑀁, 𑀕𑀼𑀡𑀲𑁄𑀪𑀸𑀓𑀺𑀢𑁆𑀢𑀺𑀲𑀤𑁆𑀤𑀲𑀼𑀕𑀦𑁆𑀥𑀢𑀸𑀳𑀺 𑀉𑀧𑀸𑀲𑀓𑁄𑀯 𑀧𑀤𑀼𑀫𑀁 𑀉𑀧𑀸𑀲𑀓𑀧𑀤𑀼𑀫𑀁, 𑀢𑀣𑀸 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀯𑀺𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑁂𑀬𑁆𑀬𑀁. 𑀏𑀯𑀫𑀺𑀤𑀁 ‘‘𑀓𑁄 𑀉𑀧𑀸𑀲𑀓𑁄’’𑀢𑀺𑀆𑀤𑀺𑀓𑀁 𑀧𑀓𑀺𑀡𑁆𑀡𑀓𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀲 𑀧𑀦 𑀧𑀓𑀺𑀡𑁆𑀡𑀓𑀲𑁆𑀲 𑀇𑀥 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀁 𑀅𑀢𑀺𑀪𑀸𑀭𑀺𑀬𑀓𑀭𑀡𑀢𑁄’’𑀢𑀺𑀆𑀤𑀺.

𑀆𑀤𑀺𑀫𑁆𑀳𑀻𑀢𑀺 ¶ 𑀆𑀤𑀺𑀅𑀢𑁆𑀣𑁂. 𑀓𑁄𑀝𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁. 𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀓𑁄𑀝𑁆𑀞𑀸𑀲𑁂𑀦, ‘‘𑀇𑀫𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀧𑀦𑀲𑀨𑀮𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀯𑀲𑀦𑀝𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀆𑀧𑀸𑀡𑀓𑁄𑀝𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀚𑀻𑀯𑀺𑀢𑁂𑀦𑀧𑀳𑀁 𑀯𑀢𑁆𑀣𑀼𑀢𑁆𑀢𑀬𑀁 𑀧𑀝𑀺𑀧𑀽𑀚𑁂𑀦𑁆𑀢𑁄 𑀲𑀭𑀡𑀕𑀫𑀦𑀜𑁆𑀘 𑀭𑀓𑁆𑀔𑀸𑀫𑀻𑀢𑀺 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀳𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀳𑀺 𑀬𑀸𑀯 𑀫𑁂 𑀧𑀸𑀡𑀸 𑀥𑀭𑀦𑁆𑀢𑀺, 𑀢𑀸𑀯 𑀲𑀭𑀡𑀁 𑀉𑀧𑁂𑀢𑀁, 𑀉𑀧𑁂𑀦𑁆𑀢𑁄 𑀦 𑀯𑀸𑀘𑀸𑀫𑀢𑁆𑀢𑁂𑀦 𑀦 𑀏𑀓𑀯𑀸𑀭𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀸𑀡𑀸𑀦𑀁 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀬𑀸𑀯𑀚𑀻𑀯𑀁 𑀉𑀧𑁂𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀸𑀤𑀺𑀬𑀢𑀼, 𑀢𑀁 𑀧𑀦 𑀲𑀸𑀤𑀺𑀬𑀦𑀁 𑀫𑀦𑀲𑀸 𑀲𑀫𑁆𑀧𑀝𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀢𑀽’’𑀢𑀺. 𑀓𑀸𑀬𑀗𑁆𑀕𑀦𑁆𑀢𑀺 𑀓𑀸𑀬𑀫𑁂𑀯 𑀅𑀗𑁆𑀕𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀸𑀬𑀲𑁆𑀲 𑀯𑀸 𑀅𑀗𑁆𑀕𑀁 𑀲𑀻𑀲𑀸𑀤𑀺 𑀓𑀸𑀬𑀗𑁆𑀕𑀁, 𑀲𑀻𑀲𑀸𑀤𑀺 𑀲𑀭𑀻𑀭𑀸𑀯𑀬𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀸𑀘𑀗𑁆𑀕𑀦𑁆𑀢𑀺 ‘‘𑀳𑁄𑀢𑀼 𑀲𑀸𑀥𑀽’’𑀢𑀺 𑀏𑀯𑀫𑀸𑀤𑀺𑀯𑀸𑀘𑀸𑀬 𑀅𑀗𑁆𑀕𑀁 𑀅𑀯𑀬𑀯𑀁. 𑀯𑀸𑀘𑀗𑁆𑀕𑀲𑁆𑀲 𑀘𑁄𑀧𑀦𑀁 𑀯𑀸𑀘𑀸𑀬 𑀧𑀯𑀢𑁆𑀢𑀦𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀬𑁂𑀯. 𑀔𑀦𑁆𑀢𑀺𑀁 𑀘𑀸𑀭𑁂𑀢𑁆𑀯𑀸𑀢𑀺 𑀔𑀦𑁆𑀢𑀺𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀔𑀦𑁆𑀢𑀺𑀁 𑀥𑀸𑀭𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀉𑀧𑁆𑀧𑀦𑁆𑀦𑀁 𑀭𑀼𑀘𑀺𑀁 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀥𑀸𑀭𑁂𑀢𑁆𑀯𑀸 𑀯𑀘𑀻𑀪𑁂𑀤𑁂𑀦 𑀅𑀧𑀓𑀸𑀲𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀣𑀁 ¶ 𑀧𑀦 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀅𑀜𑁆𑀜𑀸𑀲𑀺. 𑀦 𑀳𑀺 𑀢𑁂𑀦 𑀲𑀓𑁆𑀓𑀸 𑀪𑀕𑀯𑀢𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀯𑀺𑀜𑁆𑀜𑀸𑀢𑀼𑀁, 𑀢𑀲𑁆𑀫𑀸 ‘‘𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀓𑀺𑀜𑁆𑀘𑀸𑀧𑀺 𑀢𑁂𑀦 𑀦 𑀲𑀓𑁆𑀓𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀯𑀺𑀜𑁆𑀜𑀸𑀢𑀼𑀁, 𑀢𑀣𑀸𑀧𑀺 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑀓𑀼𑀲𑀮𑀢𑀸𑀬 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀅𑀦𑀼𑀫𑀸𑀦𑀢𑁄 𑀅𑀜𑁆𑀜𑀸𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀫𑁂 𑀲𑀫𑀡𑁄 𑀕𑁄𑀢𑀫𑁄’’𑀢𑀺𑀆𑀤𑀺. 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑀓𑀼𑀲𑀮𑀢𑀸𑀬𑀸𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀚𑀸𑀦𑀦𑁂 𑀙𑁂𑀓𑀢𑀸𑀬, 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂 𑀓𑀼𑀲𑀮𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀦𑁆𑀢𑀺 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀤𑀲𑀦𑁆𑀦𑀁 𑀦𑀔𑀸𑀦𑀁 𑀲𑀫𑁄𑀥𑀸𑀦𑁂𑀦 𑀏𑀓𑀻𑀪𑀸𑀯𑁂𑀦 𑀲𑀫𑀼𑀚𑁆𑀚𑀮𑀦𑁆𑀢𑀁. 𑀅𑀜𑁆𑀚𑀮𑀺𑀦𑁆𑀢𑀺 𑀳𑀢𑁆𑀣𑀧𑀼𑀝𑀁. 𑀧𑀝𑀺𑀫𑀼𑀔𑁄𑀬𑁂𑀯𑀸𑀢𑀺 𑀅𑀪𑀺𑀫𑀼𑀔𑁄𑀬𑁂𑀯, 𑀦 𑀪𑀕𑀯𑀢𑁄 𑀧𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀦𑁆𑀤𑀺𑀢𑁆𑀯𑀸𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸

𑁧𑁬. 𑀲𑀼𑀲𑀲𑁆𑀲𑀓𑀸𑀮𑁂𑀧𑀻𑀢𑀺 ¶ 𑀲𑀫𑁆𑀧𑀦𑁆𑀦𑀲𑀲𑁆𑀲𑀓𑀸𑀮𑁂𑀧𑀺. 𑀅𑀢𑀺𑀲𑀫𑀕𑁆𑀖𑁂𑀧𑀻𑀢𑀺 𑀅𑀢𑀺𑀲𑀬𑁂𑀦 𑀅𑀧𑁆𑀧𑀕𑁆𑀖𑁂𑀧𑀺, 𑀬𑀤𑀸 𑀓𑀺𑀜𑁆𑀘𑀺𑀤𑁂𑀯 𑀤𑀢𑁆𑀯𑀸 𑀩𑀳𑀼𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀁 𑀕𑀡𑁆𑀳𑀦𑁆𑀢𑀺, 𑀢𑀸𑀤𑀺𑀲𑁂 𑀓𑀸𑀮𑁂𑀧𑀻𑀢𑀺 𑀅𑀢𑁆𑀣𑁄. 𑀲𑀸𑀮𑀺𑀆𑀤𑀺 𑀥𑀜𑁆𑀜𑀁 𑀧𑀼𑀩𑁆𑀩𑀡𑁆𑀡𑀁, 𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀧𑀭𑀡𑁆𑀡𑀁. 𑀤𑁆𑀯𑀺𑀥𑀸 𑀧𑀯𑀢𑁆𑀢𑀁 𑀈𑀳𑀺𑀢𑀁 𑀏𑀢𑁆𑀣𑀸𑀢𑀺 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀫𑀚𑁆𑀛𑀧𑀤𑀮𑁄𑀧𑀻𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀬𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑀺𑀥𑀸 𑀧𑀯𑀢𑁆𑀢𑀈𑀳𑀺𑀢𑀺𑀓𑀸’’𑀢𑀺. 𑀈𑀳𑀦𑀁 𑀈𑀳𑀺𑀢𑀦𑁆𑀢𑀺 𑀈𑀳𑀺𑀢𑀲𑀤𑁆𑀤𑁄𑀬𑀁 𑀪𑀸𑀯𑀲𑀸𑀥𑀦𑁄𑀢𑀺 𑀆𑀳 ‘‘𑀈𑀳𑀺𑀢𑀁 𑀦𑀸𑀫 𑀇𑀭𑀺𑀬𑀸’’𑀢𑀺. 𑀢𑀢𑁆𑀣 𑀇𑀭𑀺𑀬𑀸𑀢𑀺 𑀓𑀺𑀭𑀺𑀬𑀸. 𑀓𑀲𑁆𑀲 𑀧𑀦𑁂𑀲𑀸 𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀇𑀭𑀺𑀬𑀸’’𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀸 𑀘𑀺𑀢𑁆𑀢𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀘𑀺𑀢𑁆𑀢𑀈𑀳𑀸’’𑀢𑀺. 𑀓𑀣𑀁 𑀧𑀦𑁂𑀢𑁆𑀣 𑀈𑀳𑀺𑀢𑀲𑁆𑀲 𑀤𑁆𑀯𑀺𑀥𑀸 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀮𑀘𑁆𑀙𑀸𑀫 𑀦𑀼 𑀔𑁄’’𑀢𑀺𑀆𑀤𑀺. 𑀢𑀢𑁆𑀣 𑀮𑀘𑁆𑀙𑀸𑀫 𑀦𑀼 𑀔𑁄𑀢𑀺 𑀇𑀤𑀁 𑀤𑀼𑀕𑁆𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀚𑀻𑀯𑀺𑀢𑀼𑀁 𑀯𑀸 𑀲𑀓𑁆𑀔𑀺𑀲𑁆𑀲𑀸𑀫 𑀦𑀼 𑀔𑁄, 𑀦𑁄𑀢𑀺 𑀇𑀤𑀁 𑀧𑀦 𑀇𑀲𑁆𑀲𑀭𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀫𑀸𑀦𑀸𑀢𑀺 𑀬𑀸𑀘𑀫𑀸𑀦𑀸. ‘‘𑀤𑀼𑀳𑀺𑀢𑀺𑀓𑀸’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺-𑀲𑀤𑁆𑀤𑀲𑁆𑀲 𑀳𑀺 𑀤𑀼-𑀲𑀤𑁆𑀤𑀸𑀤𑁂𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄 𑀳𑁄𑀢𑀺. 𑀤𑀼𑀓𑁆𑀔𑀁 𑀯𑀸 𑀈𑀳𑀺𑀢𑀁 𑀏𑀢𑁆𑀣 𑀦 𑀲𑀓𑁆𑀓𑀸 𑀓𑁄𑀘𑀺 𑀧𑀬𑁄𑀕𑁄 𑀲𑀼𑀔𑁂𑀦 𑀓𑀸𑀢𑀼𑀦𑁆𑀢𑀺 𑀤𑀼𑀳𑀺𑀢𑀺𑀓𑀸, 𑀤𑀼𑀓𑁆𑀓𑀭𑀚𑀻𑀯𑀺𑀢𑀧𑁆𑀧𑀬𑁄𑀕𑀸𑀢𑀺 𑀅𑀢𑁆𑀣𑁄.

𑀤𑀼-𑀲𑀤𑁆𑀤𑁂 𑀯𑀸 𑀉𑀓𑀸𑀭𑀲𑁆𑀲 𑀯𑀓𑀸𑀭𑀁 𑀓𑀢𑁆𑀯𑀸 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀩𑁆𑀬𑀸𑀥𑀺 𑀭𑁄𑀕𑁄𑀢𑀺 𑀏𑀢𑀸𑀦𑀺 ‘‘𑀆𑀢𑀼𑀭𑀢𑀸’’𑀢𑀺 𑀇𑀫𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀢𑁂𑀦 𑀲𑁂𑀢𑀝𑁆𑀝𑀺𑀓𑀸 𑀦𑀸𑀫 𑀏𑀓𑀸 𑀭𑁄𑀕𑀚𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀧𑀦 𑀭𑁄𑀕𑁄 𑀧𑀸𑀡𑀓𑀤𑁄𑀲𑁂𑀦 𑀲𑀫𑁆𑀪𑀯𑀢𑀺. 𑀏𑀓𑁄 𑀓𑀺𑀭 𑀧𑀸𑀡𑀓𑁄 ¶ 𑀦𑀸𑀴𑀫𑀚𑁆𑀛𑀕𑀢𑀁 𑀕𑀡𑁆𑀞𑀺𑀁 𑀯𑀺𑀚𑁆𑀛𑀢𑀺, 𑀬𑁂𑀦 𑀯𑀺𑀤𑁆𑀥𑀢𑁆𑀢𑀸 𑀦𑀺𑀓𑁆𑀔𑀦𑁆𑀢𑀫𑁆𑀧𑀺 𑀲𑀸𑀮𑀺𑀲𑀻𑀲𑀁 𑀔𑀻𑀭𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀙𑀺𑀦𑁆𑀦𑀔𑀻𑀭’’𑀦𑁆𑀢𑀺𑀆𑀤𑀺.

𑀯𑀼𑀢𑁆𑀢𑀲𑀲𑁆𑀲𑀦𑁆𑀢𑀺 𑀯𑀧𑀺𑀢𑀲𑀲𑁆𑀲𑀁. 𑀢𑀢𑁆𑀣𑀸𑀢𑀺 𑀯𑁂𑀭𑀜𑁆𑀚𑀸𑀬𑀁. 𑀲𑀮𑀸𑀓𑀸𑀫𑀢𑁆𑀢𑀁 𑀯𑀼𑀢𑁆𑀢𑀁 𑀏𑀢𑁆𑀣𑀸𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸, 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀲𑀮𑀸𑀓𑀸 𑀏𑀯 𑀲𑀫𑁆𑀧𑀚𑁆𑀚𑀢𑀻’’𑀢𑀺. 𑀬𑀁 𑀢𑀢𑁆𑀣 𑀯𑀼𑀢𑁆𑀢𑀁 𑀯𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀸𑀫𑀢𑁆𑀢𑀫𑁂𑀯 𑀅𑀳𑁄𑀲𑀺, 𑀨𑀮𑀁 𑀦 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀘 𑀇𑀫𑀺𑀦𑀸 ‘‘𑀲𑀮𑀸𑀓𑀸𑀯𑀼𑀢𑁆𑀢𑀸’’𑀢𑀺 𑀏𑀢𑁆𑀣𑀸𑀬𑀁 𑀯𑀼𑀢𑁆𑀢𑀲𑀤𑁆𑀤𑁄 𑀦𑀺𑀧𑁆𑀨𑀢𑁆𑀢𑀺𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀮𑀸𑀓𑀸𑀬𑀸𑀢𑀺 𑀯𑁂𑀴𑀼𑀯𑀺𑀮𑀻𑀯𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀲𑀮𑀸𑀓𑀸𑀬. 𑀥𑀜𑁆𑀜𑀯𑀺𑀓𑁆𑀓𑀬𑀓𑀸𑀦𑀁 𑀲𑀦𑁆𑀢𑀺𑀓𑀦𑁆𑀢𑀺 𑀥𑀜𑁆𑀜𑀁 𑀯𑀺𑀓𑁆𑀓𑀺𑀡𑀦𑁆𑀢𑀻𑀢𑀺 𑀥𑀜𑁆𑀜𑀯𑀺𑀓𑁆𑀓𑀬𑀓𑀸, 𑀢𑁂𑀲𑀁 𑀲𑀫𑀻𑀧𑀦𑁆𑀢𑀺 𑀅𑀢𑁆𑀣𑁄. 𑀓𑀬𑀓𑁂𑀲𑀽𑀢𑀺 𑀥𑀜𑁆𑀜𑀕𑀡𑁆𑀳𑀦𑀓𑁂𑀲𑀼. 𑀓𑀺𑀡𑀺𑀢𑁆𑀯𑀸𑀢𑀺 𑀕𑀳𑁂𑀢𑁆𑀯𑀸. 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂𑀢𑀺 𑀓𑁄𑀝𑁆𑀞𑀸𑀕𑀸𑀭𑀲𑁆𑀲 𑀲𑀫𑀻𑀧𑀝𑁆𑀞𑀸𑀦𑁂, 𑀥𑀜𑁆𑀜𑀫𑀺𑀦𑀦𑀝𑁆𑀞𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀯𑀡𑁆𑀡𑀚𑁆𑀛𑀓𑁆𑀔𑀦𑁆𑀢𑀺 𑀓𑀳𑀸𑀧𑀡𑀧𑀭𑀺𑀓𑁆𑀔𑀓𑀁. 𑀦𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀦𑁆𑀢𑀺 𑀧𑀕𑁆𑀕𑀬𑁆𑀳𑀢𑀻𑀢𑀺 𑀧𑀕𑁆𑀕𑀳𑁄, 𑀧𑀢𑁆𑀢𑁄. 𑀢𑁂𑀦 𑀧𑀕𑁆𑀕𑀳𑁂𑀦 𑀧𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀬𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀕𑁆𑀕𑀳𑁂𑀦 𑀬𑁄 𑀉𑀜𑁆𑀙𑁄’’𑀢𑀺𑀆𑀤𑀺. 𑀦𑀲𑀼𑀓𑀭𑀸𑀢𑀺 𑀲𑀼𑀓𑀭𑀪𑀸𑀯𑁄 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀦𑀲𑀼𑀓𑀭𑀸. 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸𑀢𑀺 𑀧𑀺𑀡𑁆𑀟𑀸𑀬 𑀘𑀭𑀡𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁂𑀧𑀺 𑀳𑀺 𑀢𑁆𑀯𑀸𑀲𑀤𑁆𑀤𑀫𑁂𑀓𑁂 𑀇𑀘𑁆𑀙𑀦𑁆𑀢𑀺.

𑀉𑀢𑁆𑀢𑀭𑀸𑀧𑀣𑀢𑁄 𑀆𑀕𑀢𑀸, 𑀉𑀢𑁆𑀢𑀭𑀸𑀧𑀣𑁄 𑀯𑀸 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀉𑀢𑁆𑀢𑀭𑀸𑀧𑀣𑀓𑀸𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀉𑀢𑁆𑀢𑀭𑀸𑀳𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀉𑀢𑁆𑀢𑀭𑀸𑀧𑀣𑀯𑀸𑀲𑀺𑀓𑀸’’𑀢𑀺𑀆𑀤𑀺. ‘‘𑀉𑀢𑁆𑀢𑀭𑀸𑀧𑀣𑀓𑀸’’𑀇𑀘𑁆𑀘𑁂𑀯 𑀯𑀸 𑀧𑀸𑀴𑀺𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀉𑀢𑁆𑀢𑀭𑀁 𑀯𑀺𑀲𑀺𑀝𑁆𑀞𑀁 𑀪𑀡𑁆𑀟𑀁 𑀆𑀳𑀭𑀦𑁆𑀢𑀻𑀢𑀺 𑀉𑀢𑁆𑀢𑀭𑀸𑀳𑀓𑀸, 𑀉𑀢𑁆𑀢𑀭𑀁 𑀯𑀸 𑀅𑀥𑀺𑀓𑀁 𑀅𑀕𑁆𑀖𑀁 𑀦𑁂𑀦𑁆𑀢𑀻𑀢𑀺 𑀉𑀢𑁆𑀢𑀭𑀸𑀳𑀓𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺. 𑀅𑀲𑁆𑀲𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑁂𑀢𑀺 𑀅𑀲𑁆𑀲𑀸𑀦𑀁 𑀆𑀓𑀭𑀝𑁆𑀞𑀸𑀦𑁂. 𑀯𑁂𑀭𑀜𑁆𑀚𑀦𑁆𑀢𑀺 𑀯𑁂𑀭𑀜𑁆𑀚𑀸𑀬𑀁. 𑀪𑀼𑀫𑁆𑀫𑀢𑁆𑀣𑁂 𑀳𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀫𑀦𑁆𑀤𑀺𑀭𑀦𑁆𑀢𑀺 𑀅𑀲𑁆𑀲𑀲𑀸𑀮𑀁. 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀬𑁄𑀢𑀺 𑀧𑀜𑁆𑀜𑀸𑀬𑀺𑀁𑀲𑀽𑀢𑀺 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀓𑀢𑀢𑁆𑀢𑀸 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀬𑁄𑀢𑀺 𑀧𑀸𑀓𑀝𑀸 𑀅𑀳𑁂𑀲𑀼𑀁. 𑀏𑀯𑀁 𑀓𑀢𑀸𑀦𑀜𑁆𑀘 𑀅𑀲𑁆𑀲𑀲𑀸𑀮𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀲𑁆𑀲𑀸𑀦𑀁 𑀯𑀲𑀦𑁄𑀓𑀸𑀲𑁄 𑀏𑀓𑁂𑀓𑀸 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀤𑁆𑀥𑀸𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀻𑀖𑀓𑀸𑀮𑀁 𑀧𑀯𑀢𑁆𑀢𑁂𑀢𑀼𑀁 𑀔𑀫𑀸 𑀦 𑀳𑁄𑀦𑁆𑀢𑀺, 𑀦 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀸 𑀤𑀺𑀲𑀸 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀦 𑀳𑀺 𑀢𑁂’’𑀢𑀺𑀆𑀤𑀺. 𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀢𑀻𑀭𑀚𑀸𑀢𑀸 𑀤𑀓𑁆𑀔𑀺𑀡𑀸𑀧𑀣𑀫𑀦𑀼𑀲𑁆𑀲𑀸. ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀩𑀼𑀤𑁆𑀥𑀁 𑀫𑀫𑀸𑀬𑀦𑁆𑀢𑀻𑀢𑀺 𑀩𑀼𑀤𑁆𑀥𑀫𑀸𑀫𑀓𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀧𑀝𑀺𑀬𑀸𑀤𑁂𑀢𑀼𑀦𑁆𑀢𑀺 𑀲𑀫𑁆𑀧𑀸𑀤𑁂𑀢𑀼𑀁. 𑀦𑀺𑀘𑁆𑀘𑀪𑀢𑁆𑀢𑀲𑀗𑁆𑀔𑁂𑀧𑁂𑀦𑀸𑀢𑀺 𑀦𑀺𑀘𑁆𑀘𑀪𑀢𑁆𑀢𑀸𑀓𑀸𑀭𑁂𑀦. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀇𑀤𑀁 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 ¶ 𑀅𑀢𑁆𑀣𑁄’’𑀢𑀺. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸 𑀇𑀤𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀬𑀣𑀸 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑀣𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬’’𑀦𑁆𑀢𑀺𑀆𑀤𑀺. 𑀏𑀯𑀦𑁆𑀢𑀺 𑀏𑀯𑀁 𑀧𑀘𑁆𑀙𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂. 𑀦𑀦𑀼 𑀘 𑀯𑀺𑀳𑀸𑀭𑁂 𑀦𑀺𑀲𑀻𑀤𑀦𑁆𑀢𑀸𑀧𑀺 𑀅𑀦𑁆𑀢𑀭𑀯𑀸𑀲𑀓𑀁 𑀦𑀺𑀯𑀸𑀲𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀦𑀺𑀯𑀸𑀲𑁂𑀢𑁆𑀯𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑀸’’𑀢𑀺𑀆𑀤𑀺. 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀜𑁆𑀘 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀦𑀺𑀯𑀢𑁆𑀣𑀫𑁆𑀧𑀺 𑀧𑀼𑀦 𑀕𑀸𑀫𑀧𑁆𑀧𑀯𑁂𑀲𑀦𑀲𑀫𑀬𑁂 𑀘𑀸𑀮𑁂𑀢𑁆𑀯𑀸 ¶ 𑀇𑀢𑁄 𑀘𑀺𑀢𑁄 𑀘 𑀲𑀡𑁆𑀞𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀦𑀺𑀯𑀸𑀲𑀦𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀢𑁂 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑀸 𑀅𑀳𑁂𑀲𑀼’’𑀦𑁆𑀢𑀺. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀜𑁆𑀘 𑀘𑀻𑀯𑀭𑀜𑁆𑀘 𑀕𑀳𑁂𑀢𑁆𑀯𑀸. 𑀕𑀳𑀡𑀜𑁆𑀘𑁂𑀢𑁆𑀣 𑀦 𑀓𑁂𑀯𑀮𑀁 𑀳𑀢𑁆𑀣𑁂𑀦𑁂𑀯, 𑀅𑀣 𑀔𑁄 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀥𑀸𑀭𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑀬𑁄𑀚𑀦𑀁 𑀓𑀭𑁄𑀢𑀺 ‘‘𑀧𑀢𑁆𑀢𑀁 𑀳𑀢𑁆𑀣𑁂𑀳𑀻’’𑀢𑀺𑀆𑀤𑀺𑀦𑀸.

𑀕𑀢𑀕𑀢𑀝𑁆𑀞𑀸𑀦𑁂𑀢𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀝𑁆𑀞𑀸𑀦𑁂. 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀧𑀦 𑀢𑁂 𑀪𑀺𑀓𑁆𑀔𑀽 𑀲𑀬𑀫𑁂𑀯 𑀏𑀯𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀓𑀺𑀫𑁂𑀯𑀁 𑀮𑀤𑁆𑀥𑀁 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀧𑀘𑀸𑀧𑁂𑀢𑁆𑀯𑀸 𑀲𑀬𑀁 𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀣𑁂𑀭𑀸𑀦𑀁 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻’’𑀢𑀺𑀆𑀤𑀺. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀸𑀯𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀓𑀸𑀢𑀼𑀁 𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀧𑀼𑀦 𑀅𑀓𑀧𑁆𑀧𑀺𑀬𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀘 𑀯𑀝𑁆𑀝𑀢𑀻’’𑀢𑀺. 𑀪𑀸𑀚𑀦𑀸𑀤𑀺𑀧𑀭𑀺𑀳𑀭𑀡𑀯𑀲𑁂𑀦 𑀩𑀳𑀼𑀪𑀡𑁆𑀟𑀺𑀓𑀢𑀸𑀬 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸’’𑀢𑀺. 𑀲𑀓𑀁 𑀲𑀓𑀁 𑀧𑀝𑀺𑀯𑀻𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸𑀢𑀺 𑀲𑀫𑀡𑀥𑀫𑁆𑀫𑀢𑁄 𑀅𑀜𑁆𑀜𑀢𑁆𑀣 𑀦𑀺𑀭𑀼𑀲𑁆𑀲𑀸𑀳𑀸. 𑀢𑀤𑀼𑀧𑀺𑀬𑀦𑁆𑀢𑀺 𑀢𑀤𑀦𑀼𑀭𑀽𑀧𑀁. 𑀧𑀺𑀲𑀢𑀻𑀢𑀺 𑀘𑀼𑀡𑁆𑀡𑁂𑀢𑀺. 𑀧𑀼𑀜𑁆𑀜𑀜𑀸𑀡𑀯𑀺𑀲𑁂𑀲𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀲𑁆𑀲 𑀫𑀦𑀸𑀧𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀜𑁆𑀜𑀯𑀢𑀸’’𑀢𑀺𑀆𑀤𑀺. 𑀦𑀦𑁆𑀢𑀺 𑀦𑀁 𑀧𑀢𑁆𑀣𑀧𑀼𑀮𑀓𑀁. ‘‘𑀦 𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀘𑀦𑀢𑁄 𑀢𑀢𑁄 𑀧𑀼𑀩𑁆𑀩𑁂 𑀪𑀕𑀯𑀢𑁄 𑀧𑀺𑀡𑁆𑀟𑀸𑀬 𑀘𑀭𑀡𑀫𑁆𑀧𑀺 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. ‘‘𑀮𑀤𑁆𑀥𑁄’’𑀢𑀺 𑀯𑀸 𑀧𑀸𑀞𑁄, 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀦𑁂𑀯 𑀮𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀓𑀤𑀸 𑀧𑀦 𑀣𑁂𑀭𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑁄𑀢𑀺? 𑀯𑀼𑀘𑁆𑀘𑀢𑁂 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁯-𑁨𑁨𑁩) 𑁋 𑀏𑀓𑀤𑀸 𑀓𑀺𑀭 𑀪𑀕𑀯𑀸 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀢𑁄. 𑀣𑁂𑀭𑁄 𑀫𑀕𑁆𑀕𑀸 𑀉𑀓𑁆𑀓𑀫𑁆𑀫 ‘‘𑀪𑀕𑀯𑀸 𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀪𑀕𑀯𑀸 ‘‘𑀏𑀳𑀺 𑀪𑀺𑀓𑁆𑀔𑀼, 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀲𑁄 ‘‘𑀳𑀦𑁆𑀤 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀇𑀫𑀺𑀦𑀸 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀙𑀫𑀸𑀬𑀁 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀅𑀣 𑀪𑀕𑀯𑀸 ‘‘𑀆𑀳𑀭 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀇𑀢𑀭𑁂𑀦 𑀫𑀕𑁆𑀕𑁂𑀦 ¶ 𑀕𑀘𑁆𑀙𑀢𑁄 𑀘𑁄𑀭𑀸 𑀧𑀢𑁆𑀢𑀘𑀻𑀯𑀭𑀜𑁆𑀘𑁂𑀯 𑀳𑀭𑀺𑀁𑀲𑀼, 𑀲𑀻𑀲𑀜𑁆𑀘 𑀪𑀺𑀦𑁆𑀤𑀺𑀁𑀲𑀼. 𑀲𑁄 ‘‘𑀪𑀕𑀯𑀸 𑀤𑀸𑀦𑀺 𑀫𑁂 𑀧𑀝𑀺𑀲𑀭𑀡𑀁, 𑀦 𑀅𑀜𑁆𑀜𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀮𑁄𑀳𑀺𑀢𑁂𑀦 𑀕𑀴𑀦𑁆𑀢𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺. ‘‘𑀓𑀺𑀫𑀺𑀤𑀁 𑀪𑀺𑀓𑁆𑀔𑀽’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 ¶ 𑀦𑀁 𑀪𑀕𑀯𑀸 ‘‘𑀫𑀸 𑀘𑀺𑀦𑁆𑀢𑀬𑀺 𑀪𑀺𑀓𑁆𑀔𑀼, 𑀏𑀢𑀁 𑀓𑀸𑀭𑀡𑀁𑀬𑁂𑀯 𑀢𑁂 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀲𑀺.

𑀏𑀓𑀤𑀸 𑀧𑀦 𑀪𑀕𑀯𑀸 𑀫𑁂𑀖𑀺𑀬𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀘𑀻𑀦𑀯𑀁𑀲𑀫𑀺𑀕𑀤𑀸𑀬𑁂 𑀚𑀦𑁆𑀢𑀼𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀸𑀧𑀺 𑀫𑁂𑀖𑀺𑀬𑁄 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀧𑀸𑀲𑀸𑀤𑀺𑀓𑀁 𑀅𑀫𑁆𑀩𑀯𑀦𑀁 𑀤𑀺𑀲𑁆𑀯𑀸 ‘‘𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀏𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀦𑁆𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀫𑁆𑀧𑀺 𑀪𑀕𑀯𑀸 ‘‘𑀇𑀤𑀫𑁂𑀯 𑀢𑁂 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑀬𑀺𑀢𑁆𑀯𑀸 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀫𑀬𑁆𑀳𑀁 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀬𑁂𑀯 𑀧𑀢𑁆𑀣𑀬𑀫𑀸𑀦𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀲𑀺𑀁, 𑀦𑀦𑀼 𑀫𑀸𑀤𑀺𑀲𑁄 𑀫𑀳𑀸𑀧𑀜𑁆𑀜𑁄 𑀉𑀧𑀝𑁆𑀞𑀸𑀓𑁄 𑀦𑀸𑀫 𑀯𑀝𑁆𑀝𑀢𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀪𑀕𑀯𑀸 ‘‘𑀅𑀮𑀁, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀢𑁆𑀯𑀁 𑀯𑀺𑀳𑀭𑀲𑀺, 𑀅𑀲𑀼𑀜𑁆𑀜𑀸𑀬𑁂𑀯 𑀲𑀸 𑀤𑀺𑀲𑀸, 𑀢𑀯 𑀑𑀯𑀸𑀤𑁄 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀲𑀤𑀺𑀲𑁄, 𑀦 𑀫𑁂 𑀢𑀬𑀸 𑀉𑀧𑀝𑁆𑀞𑀸𑀓𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀲𑀩𑁆𑀩𑁂 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀢𑀺, 𑀢𑁆𑀯𑀫𑁆𑀧𑀺 𑀬𑀸𑀘𑀸𑀳𑀻’’𑀢𑀺. 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀝𑁆𑀞𑀸𑀦𑀁 𑀦𑀸𑀫 𑀆𑀯𑀼𑀲𑁄 𑀓𑀻𑀤𑀺𑀲𑀁 𑀳𑁄𑀢𑀺, 𑀓𑀺𑀁 𑀫𑀁 𑀲𑀢𑁆𑀣𑀸 𑀦 𑀧𑀲𑁆𑀲𑀢𑀺, 𑀲𑀘𑁂 𑀭𑁄𑀘𑁂𑀲𑁆𑀲𑀢𑀺, ‘‘𑀆𑀦𑀦𑁆𑀤𑁄 𑀫𑀁 𑀉𑀧𑀝𑁆𑀞𑀸𑀢𑀽’’𑀢𑀺 𑀯𑀓𑁆𑀔𑀢𑀻𑀢𑀺. 𑀅𑀣 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀅𑀜𑁆𑀜𑁂𑀦 𑀉𑀲𑁆𑀲𑀸𑀳𑁂𑀢𑀩𑁆𑀩𑁄, 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀪𑀺𑀓𑁆𑀔𑀽 ‘‘𑀉𑀝𑁆𑀞𑁂𑀳𑀺 𑀆𑀯𑀼𑀲𑁄 𑀆𑀦𑀦𑁆𑀤, 𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀲𑀩𑀮𑀁 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀘 𑀘𑀢𑀲𑁆𑀲𑁄 𑀘 𑀆𑀬𑀸𑀘𑀦𑀸𑀢𑀺 𑀅𑀝𑁆𑀞 𑀯𑀭𑁂 𑀬𑀸𑀘𑀺.

𑀘𑀢𑁆𑀢𑀸𑀭𑁄 ¶ 𑀧𑀝𑀺𑀓𑁆𑀔𑁂𑀧𑀸 𑀦𑀸𑀫 ‘‘𑀲𑀘𑁂 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺 ¶ , 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀦𑀺𑀫𑀦𑁆𑀢𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀤𑀻𑀦𑀯𑀁 𑀅𑀤𑁆𑀤𑀲𑀸’’𑀢𑀺 𑀯𑀼𑀢𑁆𑀢𑁂 𑀆𑀳 ‘‘𑀲𑀘𑀸𑀳𑀁, 𑀪𑀦𑁆𑀢𑁂, 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀮𑀪𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀆𑀦𑀦𑁆𑀤𑁄 𑀤𑀲𑀩𑀮𑁂𑀦 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀢𑀺, 𑀏𑀓𑀦𑀺𑀫𑀦𑁆𑀢𑀦𑀁 𑀕𑀘𑁆𑀙𑀢𑀺, 𑀏𑀢𑀁 𑀮𑀸𑀪𑀁 𑀮𑀪𑀦𑁆𑀢𑁄 𑀢𑀣𑀸𑀕𑀢𑀁 𑀉𑀧𑀝𑁆𑀞𑀸𑀢𑀺, 𑀓𑁄 𑀏𑀯𑀁 𑀉𑀧𑀝𑁆𑀞𑀳𑀢𑁄 𑀪𑀸𑀭𑁄’’’𑀢𑀺. 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀬𑀸𑀘𑀺.

𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀦𑀸𑀫 ‘‘𑀲𑀘𑁂, 𑀪𑀦𑁆𑀢𑁂 𑀪𑀕𑀯𑀸, 𑀫𑀬𑀸 𑀕𑀳𑀺𑀢𑀁 𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑀸𑀳𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑀧𑀭𑀺𑀲𑀁 𑀆𑀕𑀢𑀓𑁆𑀔𑀡𑁂 𑀏𑀯 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 𑀮𑀘𑁆𑀙𑀸𑀫𑀺, 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀘𑁆𑀙𑀸𑀫𑀺, 𑀢𑀣𑀸 𑀬𑀁 𑀪𑀕𑀯𑀸 𑀫𑀬𑁆𑀳𑀁 𑀧𑀭𑀫𑁆𑀫𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀁 𑀧𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀆𑀳 ‘‘𑀇𑀥, 𑀪𑀦𑁆𑀢𑁂, 𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑁄 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀫𑀁 𑀏𑀯𑀁 𑀯𑀤𑀦𑁆𑀢𑀺 ‘𑀲𑁆𑀯𑁂𑀯, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀺𑀓𑁆𑀔𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’𑀢𑀺. 𑀲𑀘𑁂 𑀪𑀕𑀯𑀸 𑀢𑀢𑁆𑀣 𑀦 𑀕𑀫𑀺𑀲𑁆𑀲𑀢𑀺, 𑀇𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀧𑀭𑀺𑀲𑀁 𑀤𑀲𑁆𑀲𑁂𑀢𑀼𑀁 𑀓𑀗𑁆𑀔𑀜𑁆𑀘 𑀯𑀺𑀦𑁄𑀤𑁂𑀢𑀼𑀁 𑀑𑀓𑀸𑀲𑀁 𑀦 𑀮𑀘𑁆𑀙𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀓𑀺𑀁 𑀆𑀦𑀦𑁆𑀤𑁄 𑀤𑀲𑀩𑀮𑀁 𑀉𑀧𑀝𑁆𑀞𑀸𑀢𑀺, 𑀏𑀢𑁆𑀢𑀓𑀫𑁆𑀧𑀺𑀲𑁆𑀲 𑀅𑀦𑀼𑀕𑁆𑀕𑀳𑀁 𑀪𑀕𑀯𑀸 𑀦 𑀓𑀭𑁄𑀢𑀻’𑀢𑀺. 𑀪𑀕𑀯𑀢𑁄 𑀘 𑀧𑀭𑀫𑁆𑀫𑀼𑀔𑀸 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 ‘𑀅𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑀸𑀣𑀸 𑀇𑀤𑀁 𑀲𑀼𑀢𑁆𑀢𑀁 𑀇𑀤𑀁 𑀚𑀸𑀢𑀓𑀁 𑀓𑀢𑁆𑀣 𑀤𑁂𑀲𑀺𑀢’𑀦𑁆𑀢𑀺. 𑀲𑀘𑀸𑀳𑀁 𑀢𑀁 𑀦 𑀲𑀫𑁆𑀧𑀸𑀬𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀏𑀢𑁆𑀢𑀓𑀫𑁆𑀧𑀺, 𑀆𑀯𑀼𑀲𑁄, 𑀦 𑀚𑀸𑀦𑀸𑀲𑀺, 𑀓𑀲𑁆𑀫𑀸 𑀢𑁆𑀯𑀁 𑀙𑀸𑀬𑀸 𑀯𑀺𑀬 𑀪𑀕𑀯𑀦𑁆𑀢𑀁 𑀦 𑀯𑀺𑀚𑀳𑀦𑁆𑀢𑁄 𑀤𑀻𑀖𑀭𑀢𑁆𑀢𑀁 𑀘𑀺𑀭𑀁 𑀯𑀺𑀘𑀭𑀻’𑀢𑀺. 𑀢𑁂𑀦𑀸𑀳𑀁 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀧𑀼𑀦 𑀓𑀣𑀦𑀁 𑀇𑀘𑁆𑀙𑀸𑀫𑀻’’𑀢𑀺. 𑀇𑀫𑀸 𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀬𑀸𑀘𑀺. 𑀪𑀕𑀯𑀸𑀧𑀺𑀲𑁆𑀲 𑀅𑀤𑀸𑀲𑀺. 𑀏𑀯𑀁 𑀇𑀫𑁂 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺.

𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀲𑁆𑀲 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀁 𑀧𑀸𑀧𑀼𑀡𑀺, 𑀧𑀸𑀧𑀼𑀡𑀺𑀢𑁆𑀯𑀸 𑀘 𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺. 𑀣𑁂𑀭𑁄 𑀳𑀺 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀕𑀯𑀦𑁆𑀢𑀁 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦 𑀧𑀸𑀤𑀧𑀭𑀺𑀓𑀫𑁆𑀫𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑁂𑀦 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀺𑀘𑁆𑀘𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀲𑀢𑁆𑀣𑀼 𑀇𑀤𑀁 ¶ 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀢𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀫𑀳𑀢𑀺𑀁 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀺𑀁 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀦𑀯 𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀺. 𑀏𑀯𑀜𑁆𑀳𑀺𑀲𑁆𑀲 𑀅𑀳𑁄𑀲𑀺 ‘‘𑀲𑀘𑁂 𑀫𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑁂𑀬𑁆𑀬, 𑀪𑀕𑀯𑀢𑀺 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀦𑀸𑀳𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀭𑀢𑁆𑀢𑀺𑀁 𑀤𑀡𑁆𑀟𑀤𑀻𑀧𑀺𑀓𑀁 𑀳𑀢𑁆𑀣𑁂𑀦 𑀦 𑀫𑀼𑀜𑁆𑀘𑀢𑀺, 𑀏𑀯𑀫𑁂𑀢𑀲𑁆𑀲 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀝𑁆𑀞𑀸𑀦𑀲𑁆𑀲 ¶ 𑀅𑀮𑀤𑁆𑀥𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑁄 𑀘 𑀔𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀸’’𑀢𑀺. 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦𑀺𑀬𑀢𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀺. 𑀅𑀦𑀺𑀬𑀢𑀼𑀧𑀝𑁆𑀞𑀸𑀓𑀸 𑀧𑀦 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀁 𑀩𑀳𑀽 𑀅𑀳𑁂𑀲𑀼𑀁, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀤𑀸𑀘𑀺 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁄’’𑀢𑀺𑀆𑀤𑀺. 𑀜𑀸𑀢𑀺 𑀘 𑀲𑁄 𑀧𑀲𑀢𑁆𑀣𑀢𑀫𑀕𑀼𑀡𑀬𑁄𑀕𑀢𑁄 𑀲𑁂𑀝𑁆𑀞𑁄 𑀘𑀸𑀢𑀺 𑀜𑀸𑀢𑀺𑀲𑁂𑀝𑁆𑀞𑁄. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀬𑀫𑁂𑀯 𑀧𑀢𑀺𑀭𑀽𑀧𑁄𑀢𑀺 𑀆𑀧𑀤𑀸𑀲𑀼 𑀆𑀫𑀺𑀲𑀲𑁆𑀲 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀤𑀸𑀦𑀁 𑀦𑀸𑀫 𑀜𑀸𑀢𑀓𑁂𑀦𑁂𑀯 𑀓𑀸𑀢𑀼𑀁 𑀬𑀼𑀢𑁆𑀢𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀭𑀸𑀯𑀝𑁆𑀝𑀦𑀸𑀬𑀸𑀢𑀺 𑀫𑀸𑀭𑁂𑀦 𑀓𑀢𑀘𑀺𑀢𑁆𑀢𑀸𑀯𑀝𑁆𑀝𑀦𑀸𑀬, 𑀫𑀸𑀭𑀸𑀦𑀼𑀪𑀸𑀯𑁂𑀦 𑀲𑀜𑁆𑀚𑀸𑀢𑀘𑀺𑀢𑁆𑀢𑀲𑀫𑁆𑀫𑁄𑀳𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀆𑀯𑀝𑁆𑀝𑁂𑀢𑁆𑀯𑀸 𑀫𑁄𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀺𑀝𑁆𑀞𑀦𑁆𑀢𑀼…𑀧𑁂… 𑀢𑀫𑁆𑀧𑀺 𑀫𑀸𑀭𑁄 𑀆𑀯𑀝𑁆𑀝𑁂𑀬𑁆𑀬𑀸𑀢𑀺 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀢𑀼𑀧𑀘𑀺𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀢𑀤𑀸 𑀮𑀤𑁆𑀥𑁄𑀓𑀸𑀲𑀯𑀲𑁂𑀦 𑀉𑀧𑀝𑁆𑀞𑀺𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂 𑁋

‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁮-𑁮𑁯);

𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀧𑀭𑀺𑀬𑁄𑀦𑀤𑁆𑀥𑀘𑀺𑀢𑁆𑀢𑁄, 𑀅𑀪𑀺𑀪𑀽𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀆𑀯𑀝𑁆𑀝𑀺𑀢𑀧𑀭𑀺𑀬𑁄𑀲𑀸𑀦𑁂 𑀆𑀕𑀫𑀺𑀁𑀲𑀽𑀢𑀺 𑀫𑀸𑀭𑁂𑀦 𑀆𑀯𑀝𑁆𑀝𑁂𑀢𑁆𑀯𑀸 𑀕𑀢𑁂 𑀧𑀘𑁆𑀙𑀸 𑀆𑀕𑀫𑀺𑀁𑀲𑀼. 𑀅𑀯𑀺𑀲𑀳𑀢𑀸𑀬𑀸𑀢𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬. 𑀅𑀪𑀺𑀳𑀝𑀪𑀺𑀓𑁆𑀔𑀸𑀬𑀸𑀢𑀺 𑀧𑀘𑀺𑀢𑁆𑀯𑀸 𑀅𑀪𑀺𑀳𑀭𑀺𑀬𑀫𑀸𑀦𑀪𑀺𑀓𑁆𑀔𑀸𑀬. 𑀦𑀺𑀩𑀤𑁆𑀥𑀤𑀸𑀦𑀲𑁆𑀲𑀸𑀢𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀪𑀕𑀯𑀢𑁄 𑀤𑀲𑁆𑀲𑀸𑀫𑀸’’𑀢𑀺 𑀦𑀺𑀘𑁆𑀘𑀪𑀢𑁆𑀢𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀤𑀸𑀦𑀲𑁆𑀲. 𑀅𑀧𑁆𑀧𑀺𑀢𑀯𑀢𑁆𑀣𑀲𑁆𑀲𑀸𑀢𑀺 ‘‘𑀇𑀤𑀁 𑀩𑀼𑀤𑁆𑀥𑀲𑁆𑀲 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣’’𑀦𑁆𑀢𑀺 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀤𑀺𑀦𑁆𑀦𑀯𑀢𑁆𑀣𑀼𑀦𑁄. 𑀦 𑀯𑀺𑀲𑀳𑀢𑀻𑀢𑀺 𑀦 𑀲𑀓𑁆𑀓𑁄𑀢𑀺. 𑀅𑀪𑀺𑀳𑀝𑀪𑀺𑀓𑁆𑀔𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀅𑀪𑀺𑀳𑀝𑀪𑀺𑀓𑁆𑀔𑀸𑀦𑀻𑀳𑀸𑀭𑁂𑀦 ¶ . 𑀩𑁆𑀬𑀸𑀫𑀧𑁆𑀧𑀪𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀩𑁆𑀬𑀸𑀫𑀫𑀢𑁆𑀢𑀸𑀬 𑀧𑀪𑀸𑀬. 𑀏𑀢𑁆𑀣 𑀘 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀘 𑀦𑀺𑀧𑁆𑀧𑀪𑀸𑀓𑀭𑀡𑀁 𑀅𑀦𑁆𑀢𑀭𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑁂𑀯𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀳𑀻’’𑀢𑀺𑀆𑀤𑀺. 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀬 𑀏𑀓𑀸𑀩𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑁆𑀧𑀤𑁂𑀲𑀁 𑀧𑀢𑁆𑀯𑀸’’𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀸𑀫 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀆𑀯𑀭𑀡𑀁.

𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀦𑁆𑀢𑀺 𑀓𑀺𑀁 𑀲𑀬𑀫𑁂𑀯 𑀉𑀧𑁆𑀧𑀦𑁆𑀦𑀁 𑀉𑀤𑀼𑀓𑁆𑀔𑀮𑀲𑀤𑁆𑀤𑀁 𑀅𑀲𑁆𑀲𑁄𑀲𑀻𑀢𑀺 ¶ 𑀘𑁂𑀢𑀺 𑀆𑀳 ‘‘𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀓𑁄𑀝𑁆𑀝𑁂𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀅𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀧𑀬𑁄𑀚𑀦𑀲𑀸𑀥𑀓𑀁. 𑀅𑀦𑀢𑁆𑀣𑀲𑀜𑁆𑀳𑀺𑀢𑁂𑀢𑀺 𑀅𑀦𑀢𑁆𑀣𑀦𑀺𑀲𑁆𑀲𑀺𑀢𑁂 𑀯𑀘𑀦𑁂. 𑀖𑀸𑀢𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀁. 𑀬𑀲𑁆𑀫𑀺𑀜𑁆𑀘 𑀬𑁂𑀦 𑀖𑀸𑀢𑁄 𑀦𑀺𑀧𑁆𑀨𑀸𑀤𑀻𑀬𑀢𑀺, 𑀢𑀲𑁆𑀲𑁂𑀯 𑀢𑁂𑀦 𑀖𑀸𑀢𑁄 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀕𑁆𑀕𑁂𑀦𑁂𑀯 𑀢𑀸𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀖𑀸𑀢𑁄 𑀲𑀫𑀼𑀘𑁆𑀙𑁂𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀘𑀦𑀲𑁆𑀲 𑀘 𑀲𑀫𑀼𑀕𑁆𑀖𑀸𑀢𑁄 𑀢𑀫𑁆𑀫𑀽𑀮𑀓𑀺𑀮𑁂𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀓𑀭𑁄𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀢𑀸𑀬 𑀲𑀫𑀭𑀺𑀬𑀸𑀤𑀁 𑀲𑀧𑀭𑀺𑀘𑁆𑀙𑁂𑀤𑀁 𑀨𑀮𑀁 𑀦𑀺𑀧𑁆𑀨𑀢𑁆𑀢𑁂𑀢𑀻𑀢𑀺 𑀆𑀓𑀸𑀭𑁄 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀻’’𑀢𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀼𑀢𑁆𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁. 𑀢𑀸𑀬 𑀧𑀼𑀘𑁆𑀙𑀸𑀬 𑀯𑀻𑀢𑀺𑀓𑁆𑀓𑀫𑀁 𑀧𑀸𑀓𑀝𑀁 𑀓𑀢𑁆𑀯𑀸𑀢𑀺 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀢𑀯𑀻𑀢𑀺𑀓𑁆𑀓𑀫𑀁 𑀧𑀓𑀸𑀲𑁂𑀢𑁆𑀯𑀸, 𑀯𑀻𑀢𑀺𑀓𑁆𑀓𑀫𑀧𑁆𑀧𑀓𑀸𑀲𑀦𑀜𑁆𑀘 𑀓𑀺𑀫𑀢𑁆𑀣𑀫𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀦𑀼𑀚𑀸𑀦𑀦𑀢𑁆𑀣𑀁.

𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀦 𑀓𑀺𑀜𑁆𑀘𑀺 𑀏𑀢𑁆𑀣 𑀅𑀧𑀼𑀩𑁆𑀩𑀁 𑀯𑀢𑁆𑀢𑀩𑁆𑀩𑀫𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯 𑀳𑀻’’𑀢𑀺𑀆𑀤𑀺. 𑀲𑀸𑀥𑀼 𑀲𑀸𑀥𑀽𑀢𑀺 𑀇𑀤𑀁 𑀧𑀲𑀁𑀲𑀸𑀬𑀁 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀫𑁆𑀧𑀳𑀁𑀲𑁂𑀦𑁆𑀢𑁄’’𑀢𑀺. 𑀤𑁆𑀯𑀻𑀲𑀼 𑀆𑀓𑀸𑀭𑁂𑀲𑀽𑀢𑀺 𑀥𑀫𑁆𑀫𑀤𑁂𑀲𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀓𑀸𑀭𑀡𑁂𑀲𑀼. 𑀏𑀓𑀁 𑀕𑀳𑁂𑀢𑁆𑀯𑀸𑀢𑀺 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀓𑀸𑀭𑀡𑀁 𑀕𑀳𑁂𑀢𑁆𑀯𑀸. 𑀏𑀯𑀁𑀤𑀼𑀩𑁆𑀪𑀺𑀓𑁆𑀔𑁂𑀢𑀺 𑀏𑀯𑀁 𑀤𑀼𑀓𑁆𑀔𑁂𑀦 𑀮𑀪𑀺𑀢𑀩𑁆𑀩𑀸 𑀪𑀺𑀓𑁆𑀔𑀸 𑀏𑀢𑁆𑀣𑀸𑀢𑀺 𑀏𑀯𑀁𑀤𑀼𑀩𑁆𑀪𑀺𑀓𑁆𑀔𑁂 𑀓𑀸𑀮𑁂, 𑀤𑁂𑀲𑁂 𑀯𑀸. 𑀤𑀼𑀮𑁆𑀮𑀪𑀧𑀺𑀡𑁆𑀟𑁂𑀢𑀺 𑀏𑀢𑀲𑁆𑀲𑁂𑀯 𑀅𑀢𑁆𑀣𑀤𑀻𑀧𑀦𑀁. 𑀪𑀸𑀚𑀦𑀸𑀤𑀺𑀧𑀭𑀺𑀳𑀭𑀡𑀯𑀲𑁂𑀦 𑀩𑀳𑀼𑀪𑀡𑁆𑀟𑀺𑀓𑀢𑀸𑀬 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀇𑀫𑀸𑀬 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺. 𑀏𑀢𑁆𑀢𑀓𑀫𑁂𑀯 𑀅𑀮𑀁 𑀬𑀸𑀧𑁂𑀢𑀼𑀦𑁆𑀢𑀺 𑀉𑀢𑁆𑀢𑀭𑀺 𑀧𑀢𑁆𑀣𑀦𑀸𑀪𑀸𑀯𑀢𑁄 𑀧𑀦 ‘‘𑀇𑀫𑀺𑀦𑀸 𑀘 𑀲𑀮𑁆𑀮𑁂𑀔𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀩𑁆𑀪𑀺𑀓𑁆𑀔𑀁 𑀯𑀺𑀚𑀺𑀢𑀦𑁆𑀢𑀺 𑀏𑀢𑁆𑀣 𑀳𑀺 𑀪𑀺𑀓𑁆𑀔𑀸𑀦𑀁 𑀅𑀪𑀸𑀯𑁄 𑀤𑀼𑀩𑁆𑀪𑀺𑀓𑁆𑀔𑀁 ‘‘𑀦𑀺𑀫𑁆𑀫𑀓𑁆𑀔𑀺𑀓’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀪𑀺𑀓𑁆𑀔𑀸𑀪𑀸𑀯𑁄𑀬𑁂𑀯 𑀳𑀺 𑀢𑀁𑀦𑀺𑀫𑀺𑀢𑁆𑀢𑀘𑀺𑀢𑁆𑀢𑀯𑀺𑀖𑀸𑀢𑀸𑀦𑀁 𑀅𑀪𑀸𑀯𑀢𑁄 𑀪𑀺𑀓𑁆𑀔𑀽𑀳𑀺 ¶ 𑀯𑀺𑀚𑀺𑀢𑁄 𑀯𑀲𑁂 𑀯𑀢𑁆𑀢𑀺𑀢𑁄. 𑀮𑁄𑀪𑁄 𑀯𑀺𑀚𑀺𑀢𑁄𑀢𑀺 𑀆𑀫𑀺𑀲𑀳𑁂𑀢𑀼 𑀭𑀢𑁆𑀢𑀺𑀘𑁆𑀙𑁂𑀤𑀯𑀲𑁆𑀲𑀘𑁆𑀙𑁂𑀤𑀲𑀫𑀼𑀝𑁆𑀞𑀸𑀧𑀓𑁄 𑀮𑁄𑀮𑀼𑀧𑁆𑀧𑀸𑀤𑁄𑀧𑀺 𑀢𑁂𑀲𑀁 𑀦𑀸𑀳𑁄𑀲𑀻𑀢𑀺 𑀆𑀫𑀺𑀲𑀮𑁄𑀮𑀢𑀸𑀲𑀗𑁆𑀔𑀸𑀢𑁄 𑀮𑁄𑀪𑁄 𑀯𑀺𑀚𑀺𑀢𑁄. 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄𑀢𑀺 ‘‘𑀆𑀫𑀺𑀲𑀳𑁂𑀢𑀼 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑁆𑀧𑀓𑀸𑀲𑀦𑀯𑀲𑁂𑀦 𑀕𑀼𑀡𑀯𑀡𑀺𑀚𑁆𑀚𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀇𑀘𑁆𑀙𑀸𑀘𑀸𑀭𑀲𑁆𑀲 𑀅𑀪𑀸𑀯𑀢𑁄 𑀬𑀣𑀸𑀯𑀼𑀢𑁆𑀢𑁄 𑀇𑀘𑁆𑀙𑀸𑀘𑀸𑀭𑁄 𑀯𑀺𑀚𑀺𑀢𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀲𑁆𑀲𑀧𑀺 𑀅𑀦𑀼𑀧𑁆𑀧𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀘𑀺𑀦𑁆𑀢𑀸 𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀦𑀧𑁆𑀧𑀼𑀦𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀦 𑀘𑀺𑀢𑁆𑀢𑀧𑀻𑀴𑀸𑀧𑀺 𑀦𑀸𑀳𑁄𑀲𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀖𑀸𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁.

𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀯𑀲𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑀯𑀲𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄 𑀲𑀢𑁆𑀢𑀸𑀳𑀓𑀺𑀘𑁆𑀘𑀯𑀲𑁂𑀦𑀧𑀺 𑀓𑀢𑁆𑀣𑀘𑀺 𑀅𑀕𑀢𑀢𑁆𑀢𑀸. 𑀲𑀢𑁆𑀢𑀸𑀳𑀓𑀺𑀘𑁆𑀘𑀯𑀲𑁂𑀦 𑀯𑀺𑀧𑁆𑀧𑀯𑀸𑀲𑀜𑁆𑀳𑀺 𑀲𑀦𑁆𑀥𑀸𑀬 𑀭𑀢𑁆𑀢𑀺𑀘𑁆𑀙𑁂𑀤𑁄𑀢𑀺 ¶ 𑀅𑀝𑁆𑀞𑀓𑀣𑀸𑀯𑁄𑀳𑀸𑀭𑁄, 𑀢𑀢𑁄𑀬𑁂𑀯 𑀘 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯) ‘‘𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀯𑀢𑁆𑀯𑀸 ‘‘𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀅𑀦𑀺𑀫𑀦𑁆𑀢𑀺𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑀫𑁂𑀯 𑀯𑀺𑀪𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦𑀸𑀫 𑀲𑀢𑁆𑀢𑀸𑀳𑀓𑀭𑀡𑀻𑀬𑀯𑀲𑁂𑀦 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀭𑀢𑁆𑀢𑀺𑀘𑁆𑀙𑁂𑀤𑀮𑀓𑁆𑀔𑀡𑀜𑁆𑀘 𑀓𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀧𑀘𑁆𑀘𑀬𑀯𑁂𑀓𑀮𑁆𑀮𑀲𑀗𑁆𑀔𑀸𑀢𑁂 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑁂 𑀲𑀢𑀺 𑀭𑀢𑁆𑀢𑀺𑀘𑁆𑀙𑁂𑀤𑀲𑁆𑀲𑀧𑀺 𑀯𑀼𑀢𑁆𑀢𑀢𑁆𑀢𑀸 𑀬𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 𑀯𑀲𑁆𑀲𑀘𑁆𑀙𑁂𑀤𑀸𑀥𑀺𑀓𑀸𑀭𑁂 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀫𑁄 𑀘𑁄𑀭𑁂𑀳𑀺 𑀯𑀼𑀝𑁆𑀞𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀕𑀸𑀫𑁄 𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁧) 𑁋

𑀏𑀢𑁆𑀣 ‘‘𑀲𑀘𑁂 𑀕𑀸𑀫𑁄 𑀅𑀯𑀺𑀤𑀽𑀭𑀕𑀢𑁄 𑀳𑁄𑀢𑀺, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀤𑀽𑀭𑀕𑀢𑁄, 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺, 𑀢𑀢𑁆𑀣𑁂𑀯 𑀲𑀪𑀸𑀕𑀝𑁆𑀞𑀸𑀦𑁂 𑀯𑀲𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁧) 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑀧𑀺 𑀲𑀁𑀲𑀦𑁆𑀤𑀦𑀢𑁄. 𑀢𑀣𑀸 𑀳𑀺 𑀕𑀸𑀫𑁂 𑀯𑀼𑀝𑁆𑀞𑀺𑀢𑁂 ¶ 𑀪𑀺𑀓𑁆𑀔𑀸𑀬 𑀅𑀪𑀸𑀯𑀢𑁄 𑀯𑀲𑁆𑀲𑀘𑁆𑀙𑁂𑀤𑁂𑀧𑀺 𑀅𑀦𑀸𑀧𑀢𑁆𑀢𑀺𑀁 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀕𑀸𑀫𑁄 𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁧) 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀸𑀬 𑀅𑀪𑀸𑀯𑁄 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑀁. 𑀢𑀢𑁆𑀣 ‘‘𑀲𑀘𑁂 𑀤𑀽𑀭𑀕𑀢𑁄, 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁧) 𑀇𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑁂 𑀲𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀸𑀥𑁂𑀢𑀺.

𑀬𑀁 𑀧𑀦 𑀯𑀼𑀢𑁆𑀢𑀁 𑀓𑁂𑀦𑀘𑀺 𑁋

‘‘𑀭𑀢𑁆𑀢𑀺𑀘𑁆𑀙𑁂𑀤𑁄𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀢𑁄𑀢𑀺 𑀯𑀼𑀢𑁆𑀢𑀁 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀬𑀁, 𑀢𑀲𑁆𑀫𑀸 𑀯𑀲𑁆𑀲𑀘𑁆𑀙𑁂𑀤𑀲𑁆𑀲 𑀓𑀸𑀭𑀡𑁂 𑀲𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀯𑀺𑀦𑀬𑀥𑀭𑀸 𑀧𑀦 𑀦 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁄 𑀯𑀻𑀫𑀁𑀲𑀺𑀢𑀩𑁆𑀩𑁄’’𑀢𑀺.

𑀢𑀁 𑀧𑀦 𑀲𑀬𑀁 𑀲𑀫𑁆𑀫𑀽𑀴𑁆𑀳𑀲𑁆𑀲 𑀧𑀭𑁂𑀲𑀁 𑀫𑁄𑀳𑀼𑀧𑁆𑀧𑀸𑀤𑀦𑀫𑀢𑁆𑀢𑀁. 𑀦 𑀳𑀺 𑀯𑀺𑀦𑀬𑀥𑀭𑀸𑀦𑀁 𑀅𑀦𑀺𑀘𑁆𑀙𑀸𑀬 𑀓𑀸𑀭𑀡𑀁 𑀤𑀺𑀲𑁆𑀲𑀢𑀺 ¶ 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀦𑀢𑁄 𑀬𑀼𑀢𑁆𑀢𑀺𑀅𑀪𑀸𑀯𑀢𑁄 𑀘. 𑀬𑀜𑁆𑀳𑀺 𑀓𑀸𑀭𑀡𑀁 𑀯𑀲𑁆𑀲𑀘𑁆𑀙𑁂𑀤𑁂𑀧𑀺 𑀅𑀦𑀸𑀧𑀢𑁆𑀢𑀺𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀺𑀁 𑀲𑀢𑀺 𑀯𑀺𑀦𑀸 𑀯𑀲𑁆𑀲𑀘𑁆𑀙𑁂𑀤𑀁 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀸 𑀦𑀸𑀫 𑀬𑀼𑀢𑁆𑀢𑀺. ‘‘𑀧𑀘𑁆𑀙𑀺𑀫𑀺𑀓𑀸𑀬 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀸’’𑀢𑀺 𑀇𑀤𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀭𑀽𑀧𑀧𑀭𑀺𑀯𑀺𑀢𑀓𑁆𑀓𑀦𑀧𑀅𑀤𑀻𑀧𑀦𑀁, 𑀦 𑀧𑀦 𑀯𑀺𑀲𑁂𑀲𑀢𑁆𑀣𑀧𑀭𑀺𑀤𑀻𑀧𑀦𑀁. 𑀢𑀣𑀸 𑀳𑀺 𑀤𑀼𑀩𑁆𑀪𑀺𑀓𑁆𑀔𑀢𑀸𑀬 𑀯𑀲𑁆𑀲𑀘𑁆𑀙𑁂𑀤𑀓𑀭𑀡𑀲𑀩𑁆𑀪𑀸𑀯𑀢𑁄 𑀧𑀼𑀭𑀺𑀫𑀺𑀓𑀸𑀬 𑀢𑀸𑀯 𑀯𑀲𑁆𑀲𑀘𑁆𑀙𑁂𑀤𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀘𑁆𑀙𑀺𑀫𑀺𑀓𑀸𑀬𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑀢𑀸𑀬 𑀕𑀫𑀦𑁂𑀧𑀺 𑀦𑀢𑁆𑀣𑀺 𑀤𑁄𑀲𑁄 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀲𑁆𑀲 𑀅𑀲𑀫𑁆𑀧𑀢𑁆𑀢𑀪𑀸𑀯𑀢𑁄.

𑀦 𑀓𑀺𑀲𑁆𑀫𑀺𑀜𑁆𑀘𑀺 𑀫𑀜𑁆𑀜𑀦𑁆𑀢𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀕𑀼𑀡𑁂 𑀲𑀫𑁆𑀪𑀸𑀯𑀦𑀯𑀲𑁂𑀦 𑀦 𑀫𑀜𑁆𑀜𑀦𑁆𑀢𑀺. 𑀧𑀓𑀸𑀲𑁂𑀢𑁆𑀯𑀸𑀢𑀺 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀸𑀤𑀺𑀕𑀼𑀡𑀯𑀲𑁂𑀦 𑀧𑀓𑀸𑀲𑁂𑀢𑁆𑀯𑀸. ‘‘𑀧𑀘𑁆𑀙𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀫𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀼𑀘𑁆𑀙𑀺𑀧𑀝𑀺𑀚𑀕𑁆𑀕𑀦𑁂 𑀲𑀢𑀺 𑀢𑀣𑀸𑀧𑀯𑀢𑁆𑀢𑀇𑀘𑁆𑀙𑀸𑀘𑀸𑀭𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀢𑁄 𑀆𑀚𑀻𑀯𑀲𑀼𑀤𑁆𑀥𑀺𑀬𑀸 𑀘 𑀅𑀪𑀸𑀯𑀢𑁄 𑀧𑀼𑀦 𑀯𑀸𑀬𑀫𑀺𑀢𑁆𑀯𑀸 𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀫𑀸’’𑀢𑀺.

𑀓𑀺𑀁 𑀇𑀤𑀦𑁆𑀢𑀺 𑀕𑀭𑀳𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀲𑀫𑁆𑀧𑀸𑀤𑀺𑀢𑀁 𑀫𑀁𑀲𑁂𑀦 𑀉𑀧𑀲𑀺𑀢𑁆𑀢𑀁 𑀑𑀤𑀦𑀁 𑀲𑀸𑀮𑀺𑀫𑀁𑀲𑁄𑀤𑀦𑀁. 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻𑀢𑀺 𑀅𑀯𑀜𑁆𑀜𑀸𑀢𑀓𑀭𑀡𑀯𑀲𑁂𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀺𑀲𑁆𑀲𑀢𑀺, 𑀮𑀸𑀫𑀓𑀁 𑀦𑀺𑀳𑀻𑀦𑀁 𑀓𑀢𑁆𑀯𑀸 𑀫𑀜𑁆𑀜𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀢𑁂𑀦𑀸𑀳 ‘‘𑀑𑀜𑁆𑀜𑀸𑀢𑀁 𑀅𑀯𑀜𑁆𑀜𑀸𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀦𑀺𑀳𑀻𑀦𑀁 𑀓𑀢𑁆𑀯𑀸 𑀜𑀸𑀢𑀁 𑀑𑀜𑁆𑀜𑀸𑀢𑀁. 𑀅𑀯𑀜𑁆𑀜𑀸𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀚𑀦𑀧𑀤𑁄. 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀯𑁂𑀭𑀜𑁆𑀚𑀸𑀬𑀁 𑀧𑀽𑀭𑀺𑀢𑀸𑀬 𑀲𑀼𑀤𑀼𑀓𑁆𑀓𑀭𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬𑀸𑀢𑀺 𑀢𑀼𑀫𑁆𑀳𑀸𑀓𑀁 𑀇𑀫𑀁 𑀅𑀧𑁆𑀧𑀺𑀘𑁆𑀙𑀧𑀝𑀺𑀧𑀤𑀁 𑀦𑀺𑀲𑁆𑀲𑀸𑀬. 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀗𑁆𑀔𑀸𑀢𑀸𑀢𑀺 𑀙𑀩𑁆𑀩𑀕𑁆𑀕𑀺𑀬𑀸𑀤𑀬𑁄 𑀯𑀼𑀢𑁆𑀢𑀸. 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀢𑀼𑀫𑁆𑀳𑀸𑀓𑀁 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀫𑀸𑀦𑀦𑁆𑀢𑀺 𑀅𑀢𑀺𑀫𑀸𑀦𑀁. 𑀅𑀢𑀺𑀫𑀸𑀦𑁄𑀬𑁂𑀯 𑀳𑁂𑀢𑁆𑀣 𑀦𑀺𑀳𑀻𑀦𑀢𑀸𑀬 ‘‘𑀑𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀦 𑀧𑀦 𑀳𑀻𑀴𑁂𑀢𑁆𑀯𑀸 𑀫𑀜𑁆𑀜𑀦𑀁. 𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀺𑀚𑀺𑀢𑀁 𑀲𑀸𑀮𑀺𑀫𑀁𑀲𑁄𑀤𑀦𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀸𑀴𑀺𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀮𑀤𑁆𑀥𑀁, 𑀢𑁂𑀦𑁂𑀯 𑀢𑀼𑀲𑁆𑀲𑀺𑀢𑁆𑀯𑀸 𑀲𑀸𑀮𑀺𑀫𑀁𑀲𑁄𑀤𑀦𑀧𑀢𑁆𑀣𑀦𑀸𑀬 𑀙𑀺𑀦𑁆𑀦𑀢𑁆𑀢𑀸 𑀘 𑀢𑀼𑀫𑁆𑀳𑁂𑀳𑀺 𑀯𑀺𑀚𑀺𑀢𑀁 𑀅𑀪𑀺𑀪𑀽𑀢𑀁 𑀲𑀸𑀮𑀺𑀫𑀁𑀲𑁄𑀤𑀦𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀢𑀢𑁆𑀣 𑀧𑀢𑁆𑀣𑀦𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻𑀢𑀺.

𑀤𑀼𑀩𑁆𑀪𑀺𑀓𑁆𑀔𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀻𑀳𑀦𑀸𑀤𑀓𑀣𑀸

𑁧𑁭. 𑀆𑀬𑀲𑁆𑀫𑀸𑀢𑀺 𑀯𑀸 𑀤𑁂𑀯𑀸𑀦𑀁𑀧𑀺𑀬𑀸𑀢𑀺 𑀯𑀸 𑀪𑀤𑁆𑀭𑀪𑀯𑀦𑁆𑀢𑀺 𑀯𑀸 𑀧𑀺𑀬𑀲𑀫𑀼𑀤𑀸𑀘𑀸𑀭𑁄 𑀏𑀲𑁄𑀢𑀺 𑀆𑀳 ‘‘𑀆𑀬𑀲𑁆𑀫𑀸𑀢𑀺 ¶ 𑀧𑀺𑀬𑀯𑀘𑀦𑀫𑁂𑀢’’𑀦𑁆𑀢𑀺. 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀳𑀺 𑀧𑀭𑀁 𑀧𑀺𑀬𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀸 ‘‘𑀪𑀯’’𑀦𑁆𑀢𑀺 𑀯𑀸 ‘‘𑀤𑁂𑀯𑀸𑀦𑀁𑀧𑀺𑀬𑀸’’𑀢𑀺 𑀯𑀸 ‘‘𑀆𑀬𑀲𑁆𑀫𑀸’’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀼𑀔𑀸 𑀲𑀫𑁆𑀩𑁄𑀥𑀦𑀯𑀲𑁂𑀦 𑀆𑀯𑀼𑀲𑁄𑀢𑀺, 𑀢𑀺𑀭𑁄𑀓𑁆𑀔𑀁 𑀆𑀬𑀲𑁆𑀫𑀸𑀢𑀺 𑀅𑀬𑀫𑁆𑀧𑀺 𑀲𑀫𑀼𑀤𑀸𑀘𑀸𑀭𑁄. 𑀢𑀬𑀺𑀤𑀁 𑀧𑀺𑀬𑀯𑀘𑀦𑀁 𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀲𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺. 𑀕𑀼𑀡𑀫𑀳𑀢𑁆𑀢𑀢𑀸𑀬 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀦 𑀘𑀽𑀴𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀅𑀢𑁆𑀣𑀺𑀢𑀸𑀬𑀸𑀢𑀺 𑀆𑀳 ‘‘𑀫𑀳𑀸 𑀘 𑀲𑁄 𑀕𑀼𑀡𑀫𑀳𑀦𑁆𑀢𑀢𑀸𑀬𑀸’’𑀢𑀺. 𑀧𑀧𑁆𑀧𑀝𑀓𑁄𑀚𑀦𑁆𑀢𑀺 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀁 𑀆𑀳𑀘𑁆𑀘 𑀞𑀺𑀢𑁂 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑁂 𑀲𑀫𑀼𑀝𑁆𑀞𑀺𑀢𑀁 𑀉𑀤𑀓𑁄𑀖𑁂𑀦 𑀅𑀚𑁆𑀛𑁄𑀢𑁆𑀣𑀝𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀲𑀜𑁆𑀚𑀸𑀢𑀓𑀤𑁆𑀤𑀫𑀧𑀝𑀮𑀲𑀤𑀺𑀲𑀁 𑀅𑀢𑀺𑀫𑀥𑀼𑀭𑀧𑀣𑀯𑀻𑀫𑀡𑁆𑀟𑀁. 𑀦 𑀫𑁂 𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧𑀦𑁆𑀢𑀺 𑀢𑀁 𑀅𑀦𑀸𑀧𑀼𑀘𑁆𑀙𑀸 𑀓𑀭𑀡𑀁 𑀦 𑀫𑁂 𑀅𑀦𑀼𑀘𑁆𑀙𑀯𑀺𑀓𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀧𑀼𑀘𑁆𑀙𑀸 𑀓𑀭𑁄𑀦𑁆𑀢𑁂𑀦 𑀘 𑀬𑀣𑀸 𑀪𑀕𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀓𑀺𑀜𑁆𑀘𑀺 𑀅𑀦𑀸𑀧𑀼𑀘𑁆𑀙𑀸 𑀓𑀭𑁄𑀢𑀺, 𑀏𑀯𑀫𑀳𑀫𑁆𑀧𑀻𑀢𑀺 𑀪𑀕𑀯𑀢𑀸 𑀲𑀫𑀸𑀦𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑀸𑀦𑁂𑀦 𑀓𑀢𑀁 𑀯𑀺𑀬 𑀪𑀯𑀺𑀲𑁆𑀲𑀢𑀻𑀢𑀺 ¶ 𑀆𑀳 ‘‘𑀬𑀼𑀕𑀕𑁆𑀕𑀸𑀳𑁄 𑀯𑀺𑀬 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑀢𑁄 𑀪𑀯𑁂𑀬𑁆𑀬𑀸’’𑀢𑀺. 𑀧𑀭𑁂𑀦 𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀸𑀦𑀁 𑀬𑀼𑀕𑀁 𑀬𑀼𑀕𑀴𑀁 𑀲𑀫𑀸𑀦𑀁 𑀓𑀢𑁆𑀯𑀸 𑀕𑀸𑀳𑁄, 𑀢𑀲𑁆𑀲 𑀫𑀫 𑀯𑀸 𑀓𑁄 𑀯𑀺𑀲𑁂𑀲𑁄𑀢𑀺 𑀕𑀳𑀡𑀁 𑀬𑀼𑀕𑀕𑁆𑀕𑀸𑀳𑁄.

𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁. 𑀲𑀸 𑀧𑀦𑁂𑀢𑁆𑀣 𑀭𑀲𑀲𑀫𑁆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀢𑀺𑀯𑀺𑀥𑀜𑁆𑀳𑀺 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀲𑀫𑀗𑁆𑀕𑀻𑀫𑀥𑀼𑀭𑀯𑀲𑁂𑀦. 𑀢𑀢𑁆𑀣 𑁋

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂’’𑀢𑀺. (𑀚𑀸. 𑁧.𑁧𑁪.𑁧) 𑁋

𑀇𑀤𑀁 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀧𑀭𑀺𑀧𑀼𑀡𑁆𑀡𑀫𑁆𑀧𑀺 𑀳𑀺 𑀲𑀫𑀦𑁆𑀢𑀢𑁄 𑀧𑀦𑁆𑀦𑀁 𑀧𑀢𑁆𑀢𑀦𑁆𑀢𑀺 𑀲𑀫𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀇𑀤𑀁 𑀲𑀫𑀗𑁆𑀕𑀻𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀲𑀫𑀗𑁆𑀕𑀻𑀧𑀺 𑀳𑀺 𑀲𑀫𑁆𑀫𑀤𑁂𑀯 𑀧𑀦𑁆𑀦𑁄 𑀕𑀢𑁄 𑀉𑀧𑀕𑀢𑁄𑀢𑀺 𑀲𑀫𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀢𑁆𑀭𑀲𑁆𑀲 𑀭𑀼𑀓𑁆𑀔𑁄 𑀲𑀫𑁆𑀧𑀦𑁆𑀦𑀨𑀮𑁄 𑀘 𑀉𑀧𑀧𑀦𑁆𑀦𑀨𑀮𑁄 𑀘𑀸’’𑀢𑀺 (𑀫. 𑀦𑀺. 𑁨.𑁪𑁮) 𑀇𑀤𑀁 𑀫𑀥𑀼𑀭𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀢𑀢𑁆𑀣 𑀫𑀥𑀼𑀭𑀲𑀫𑁆𑀧𑀦𑁆𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀧𑀦𑁆𑀦𑀨𑀮𑁄𑀢𑀺 𑀩𑀳𑀼𑀨𑀮𑁄. 𑀅𑀲𑁆𑀲𑀸𑀢𑀺 𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀲𑁆𑀲. 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀉𑀧𑀫𑀸𑀬 𑀦𑀺𑀤𑀲𑁆𑀲𑀦𑀢𑁆𑀣𑀁. 𑀅𑀦𑀻𑀴𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀦𑀺𑀤𑁆𑀤𑁄𑀲𑀢𑀸 𑀘𑁂𑀢𑁆𑀣 𑀫𑀓𑁆𑀔𑀺𑀓𑀸𑀤𑀺𑀭𑀳𑀺𑀢𑀢𑀸𑀬𑀸𑀢𑀺 𑀆𑀳 ‘‘𑀦𑀺𑀫𑁆𑀫𑀓𑁆𑀔𑀺𑀓’’𑀦𑁆𑀢𑀺𑀆𑀤𑀺. 𑀦𑀢𑁆𑀣𑀺 𑀏𑀢𑁆𑀣 𑀫𑀓𑁆𑀔𑀺𑀓𑀸𑀢𑀺 𑀦𑀺𑀫𑁆𑀫𑀓𑁆𑀔𑀺𑀓𑀁. 𑀫𑀓𑁆𑀔𑀺𑀓𑀸𑀲𑀤𑁆𑀤𑁂𑀦 𑀘𑁂𑀢𑁆𑀣 𑀫𑀓𑁆𑀔𑀺𑀓𑀡𑁆𑀟𑀓𑀫𑁆𑀧𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 ‘‘𑀦𑀺𑀫𑁆𑀫𑀓𑁆𑀔𑀺𑀓𑀦𑁆𑀢𑀺 𑀇𑀫𑀲𑁆𑀲𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀦𑀺𑀫𑁆𑀫𑀓𑁆𑀔𑀺𑀓𑀡𑁆𑀟𑀓𑀦𑁆𑀢𑀺 𑀯𑀼𑀢𑁆𑀢𑀁, 𑀫𑀓𑁆𑀔𑀺𑀓𑀸𑀳𑀺 𑀢𑀸𑀲𑀁 𑀅𑀡𑁆𑀟𑀓𑁂𑀳𑀺 ¶ 𑀘 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 ‘‘𑀫𑀓𑁆𑀔𑀺𑀓𑀸𑀦𑀁 𑀅𑀡𑁆𑀟𑀸𑀦𑀺 𑀫𑀓𑁆𑀔𑀺𑀓𑀡𑁆𑀟𑀸𑀦𑀺, 𑀦𑀢𑁆𑀣𑀺 𑀏𑀢𑁆𑀣 𑀫𑀓𑁆𑀔𑀺𑀓𑀡𑁆𑀟𑀸𑀦𑀻𑀢𑀺 𑀦𑀺𑀫𑁆𑀫𑀓𑁆𑀔𑀺𑀓𑀡𑁆𑀟𑀦𑁆𑀢𑀺. 𑀇𑀫𑀺𑀦𑀸 𑀫𑀓𑁆𑀔𑀺𑀓𑀸𑀦𑀁 𑀅𑀡𑁆𑀟𑁂𑀳𑀺 𑀭𑀳𑀺𑀢𑀢𑀸 𑀯𑀼𑀢𑁆𑀢𑀸, ‘𑀦𑀺𑀫𑁆𑀫𑀓𑁆𑀔𑀺𑀓’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀫𑀓𑁆𑀔𑀺𑀓𑀸𑀦𑀁𑀬𑁂𑀯 𑀅𑀪𑀸𑀯𑁄 𑀯𑀼𑀢𑁆𑀢𑁄’’𑀢𑀺. 𑀏𑀢𑀁 𑀓𑀺𑀭 𑀫𑀥𑀽𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀫𑀥𑀼. 𑀲𑀩𑁆𑀩𑀫𑀥𑀽𑀳𑀻𑀢𑀺 𑀫𑀳𑀸𑀫𑀓𑁆𑀔𑀺𑀓𑀪𑀫𑀭𑀫𑀓𑁆𑀔𑀺𑀓𑀸𑀤𑀺𑀓𑀢𑁂𑀳𑀺. 𑀅𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀁. 𑀲𑁂𑀝𑁆𑀞𑀦𑁆𑀢𑀺 𑀧𑀲𑀢𑁆𑀣𑀢𑀫𑀁. 𑀲𑀼𑀭𑀲𑀦𑁆𑀢𑀺 𑀲𑁄𑀪𑀦𑀭𑀲𑀁. 𑀑𑀚𑀯𑀦𑁆𑀢𑀦𑁆𑀢𑀺 𑀅𑀘𑁆𑀘𑀦𑁆𑀢𑀫𑁄𑀚𑀲𑀫𑁆𑀧𑀦𑁆𑀦𑀁.

𑀆𑀬𑀸𑀘𑀦𑀯𑀘𑀦𑀫𑁂𑀢𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀸𑀤𑀺𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀏𑀓𑀁 𑀳𑀢𑁆𑀣𑀦𑁆𑀢𑀺 𑀏𑀓𑀁 𑀧𑀸𑀡𑀺𑀢𑀮𑀁. ‘‘𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀧𑀣𑀯𑀻𑀲𑀤𑀺𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀦𑀼 𑀔𑁄 𑀧𑀣𑀯𑀻, 𑀉𑀤𑀸𑀳𑀼 𑀦 𑀅𑀬𑀦𑁆𑀢𑀺 𑀇𑀫𑀺𑀦𑀸 ¶ 𑀦𑀺𑀫𑁆𑀫𑀺𑀢𑀧𑀣𑀯𑀺𑀬𑀸 𑀧𑀓𑀢𑀺𑀧𑀣𑀯𑀺𑀬𑀸 𑀘 𑀲𑀦𑁆𑀤𑀺𑀲𑁆𑀲𑀫𑀸𑀦𑀢𑁆𑀢𑀸 ‘‘𑀏𑀲𑀸 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀧𑀣𑀯𑀻, 𑀉𑀤𑀸𑀳𑀼 𑀅𑀜𑁆𑀜𑀸’’𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀓𑀼𑀓𑁆𑀓𑀼𑀘𑁆𑀘𑀁 𑀤𑀲𑁆𑀲𑁂𑀢𑀺. 𑀦𑀺𑀩𑀤𑁆𑀥𑀯𑀺𑀧𑀼𑀮𑀸𑀕𑀫𑁄 𑀕𑀸𑀫𑁄 𑀦𑀺𑀕𑀫𑁄, 𑀧𑀯𑀢𑁆𑀢𑀺𑀢𑀫𑀳𑀸𑀆𑀬𑁄 𑀫𑀳𑀸𑀕𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀯𑀸 𑀏𑀲 𑀯𑀺𑀧𑀮𑁆𑀮𑀸𑀲𑁄𑀢𑀺 𑀧𑀼𑀩𑁆𑀩𑀧𑀓𑁆𑀔𑀁 𑀦𑀺𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀯𑀺𑀧𑀮𑁆𑀮𑀸𑀲𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀇𑀤𑁆𑀥𑀺𑀫𑀢𑁄 𑀇𑀤𑁆𑀥𑀺𑀯𑀺𑀲𑀬𑁄’’𑀢𑀺. 𑀇𑀤𑁆𑀥𑀺𑀩𑀮𑁂𑀦𑁂𑀯 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑁄 𑀯𑀺𑀧𑀮𑁆𑀮𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀅𑀜𑁆𑀜𑀣𑀸 𑀯𑀺𑀧𑀮𑁆𑀮𑀸𑀲𑀧𑁆𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀧𑀦𑀸’’𑀢𑀺𑀆𑀤𑀺. 𑀕𑀭𑀳𑀦𑁆𑀢𑀸𑀢𑀺 𑀲𑀫𑁆𑀫𑀼𑀔𑀸 𑀕𑀭𑀳𑀦𑁆𑀢𑀸. 𑀉𑀧𑀯𑀤𑀦𑁆𑀢𑀸𑀢𑀺 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑁆𑀢𑀸.

𑀦𑀦𑀼 𑀘 𑀉𑀢𑁆𑀢𑀭𑀓𑀼𑀭𑀼𑀁 𑀧𑀺𑀡𑁆𑀟𑀸𑀬 𑀕𑀫𑀦𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀓𑀸𑀭𑀡𑀁 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀺𑀫𑁂𑀢𑁆𑀣 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀬𑀤𑀺𑀧𑀺 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀥𑀺𑀓𑀢𑀢𑁆𑀢𑀸 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀧𑀺𑀡𑁆𑀟𑀸𑀬 𑀉𑀢𑁆𑀢𑀭𑀓𑀼𑀭𑀼𑀕𑀫𑀦𑀫𑁆𑀧𑀺 𑀪𑀕𑀯𑀢𑀸 𑀧𑀝𑀺𑀲𑀺𑀤𑁆𑀥𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀤𑁂𑀯 𑀓𑀸𑀭𑀡𑀁 𑀇𑀥𑀸𑀧𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼𑀦𑁆𑀢𑀺 𑀇𑀤𑀁 𑀇𑀥 𑀅𑀯𑀼𑀢𑁆𑀢𑀫𑁆𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑁄𑀧𑀺 𑀘𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺. ‘‘𑀏𑀯𑀁 𑀧𑀦 𑀯𑀺𑀧𑀮𑁆𑀮𑀸𑀲𑀁 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀙𑀸 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀯𑀺𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀢𑁂 𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀧𑁆𑀧𑀝𑀓𑁄𑀚𑀁 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺, 𑀢𑀁 𑀅𑀧𑀦𑁂𑀢𑁆𑀯𑀸 𑀢𑁂 𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀽𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀓𑁂𑀦 𑀧𑀤𑀯𑀻𑀢𑀺𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀧𑀤𑀲𑁆𑀲 𑀯𑀻𑀢𑀺𑀳𑀭𑀡𑀁 𑀦𑀺𑀓𑁆𑀔𑀺𑀧𑀦𑀁 𑀧𑀤𑀯𑀻𑀢𑀺𑀳𑀸𑀭𑁄, 𑀧𑀤𑀦𑀺𑀓𑁆𑀔𑁂𑀧𑁄, 𑀢𑀲𑁆𑀫𑀸 𑀏𑀓𑁂𑀦 𑀧𑀤𑀦𑀺𑀓𑁆𑀔𑁂𑀧𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑁂𑀦 𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀜𑁆𑀘 𑀲𑀫𑀕𑀫𑀦𑁂𑀦 ¶ 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀦𑁆𑀢𑀭𑁂 𑀫𑀼𑀝𑁆𑀞𑀺𑀭𑀢𑀦𑀫𑀢𑁆𑀢𑀁, 𑀢𑀲𑁆𑀫𑀸. 𑀫𑀸𑀢𑀺𑀓𑀸𑀫𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀫𑀸𑀢𑀺𑀓𑀸𑀫𑀢𑁆𑀢𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄.

𑀦𑀺𑀝𑁆𑀞𑀺𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀲𑀻𑀳𑀦𑀸𑀤𑀓𑀣𑀸.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸

𑁧𑁮. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀢𑀺 ¶ 𑀧𑀼𑀩𑁆𑀩𑁂 𑀅𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑁂𑀭𑁄 𑀳𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀜𑀧𑁂𑀢𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀜𑁆𑀘 𑀲𑀦𑁆𑀥𑀸𑀬 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄, 𑀏𑀢𑀲𑁆𑀲 𑀲𑀼𑀕𑀢 𑀓𑀸𑀮𑁄, 𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬, 𑀉𑀤𑁆𑀤𑀺𑀲𑁂𑀬𑁆𑀬 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 (𑀧𑀸𑀭𑀸. 𑁨𑁧) 𑀆𑀳. 𑀪𑀕𑀯𑀢𑀸𑀧𑀺 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀧𑀼𑀩𑁆𑀩𑁂 𑀅𑀧𑁆𑀧𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀳𑁂𑀲𑀼𑀁, 𑀩𑀳𑀼𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀺𑀁𑀲𑀼. 𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀏𑀢𑀭𑀳𑀺 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀻𑀢𑀺. 𑀏𑀯𑀫𑁂𑀢𑀁, 𑀪𑀤𑁆𑀤𑀸𑀮𑀺, 𑀳𑁄𑀢𑀺, 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀼 𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀻𑀢𑀺. 𑀦 𑀢𑀸𑀯, 𑀪𑀤𑁆𑀤𑀸𑀮𑀺, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀬𑀸𑀯 𑀦 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑁋

𑀇𑀫𑀲𑁆𑀫𑀺𑀁 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁪𑁫) 𑀯𑀺𑀬 𑀏𑀓𑀘𑁆𑀘𑁂𑀲𑀼 𑀧𑀜𑁆𑀜𑀢𑁆𑀢𑁂𑀲𑀼𑀧𑀺 𑀢𑀢𑁄 𑀧𑀭𑀁 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀺 𑀲𑀦𑁆𑀥𑀸𑀬 ‘‘𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀥𑁂𑀯 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀫𑀫𑁆𑀧𑀺 𑀧𑀘𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺, 𑀦 𑀘 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁 ‘‘𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄’’𑀢𑀺 𑀯𑀘𑀦𑀜𑁆𑀘 𑀧𑀼𑀩𑁆𑀩𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀩𑁆𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀘 𑀣𑁂𑀭𑀲𑁆𑀲 𑀆𑀬𑀸𑀘𑀦𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀫𑀽𑀮𑀢𑁄 𑀧𑀪𑀼𑀢𑀺 𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳. 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑁄 𑀚𑀦𑀯𑀺𑀯𑀺𑀢𑁆𑀢𑀁 𑀞𑀸𑀦𑀁 𑀉𑀧𑀕𑀢𑀲𑁆𑀲. 𑀢𑁂𑀦 𑀕𑀡𑀲𑀗𑁆𑀕𑀡𑀺𑀓𑀸𑀪𑀸𑀯𑁂𑀦 𑀣𑁂𑀭𑀲𑁆𑀲 𑀓𑀸𑀬𑀯𑀺𑀯𑁂𑀓𑀫𑀸𑀳. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀘𑀸𑀭𑀢𑁄 𑀘𑀺𑀢𑁆𑀢𑀲𑁆𑀲 𑀦𑀺𑀯𑀢𑁆𑀢𑀺𑀬𑀸 𑀧𑀝𑀺 𑀲𑀫𑁆𑀫𑀤𑁂𑀯 𑀦𑀺𑀮𑀻𑀦𑀲𑁆𑀲 𑀢𑀢𑁆𑀣 𑀅𑀯𑀺𑀲𑀝𑀘𑀺𑀢𑁆𑀢𑀲𑁆𑀲. 𑀢𑁂𑀦 𑀘𑀺𑀢𑁆𑀢𑀲𑀗𑁆𑀕𑀡𑀺𑀓𑀸𑀪𑀸𑀯𑁂𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀺𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑀫𑀸𑀳. 𑀘𑀺𑀭𑀦𑁆𑀢𑀺 𑀓𑀸𑀮𑀸𑀧𑁂𑀓𑁆𑀔𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀘𑀺𑀭𑀸𑀢𑀺 𑀘𑀺𑀭𑀓𑀸𑀮𑀬𑀼𑀢𑁆𑀢𑀸 𑀞𑀺𑀢𑀺 𑀅𑀪𑁂𑀤𑁂𑀦 𑀯𑀼𑀢𑁆𑀢𑀸.

𑀏𑀢𑀁 ¶ ¶ 𑀦 𑀲𑀓𑁆𑀓𑁄𑀢𑀻𑀢𑀺 𑀏𑀢𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀣𑁂𑀭𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸’’𑀢𑀺𑀆𑀤𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀦 𑀲𑀓𑁆𑀓𑁄𑀢𑀻’’𑀢𑀺 𑀇𑀤𑀁 𑀬𑀲𑁆𑀫𑀸 𑀚𑀸𑀦𑀫𑀸𑀦𑁄𑀧𑀺 𑀲𑀫𑁆𑀫𑀤𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀲𑁄𑀴𑀲𑀯𑀺𑀥𑀸𑀬 𑀧𑀜𑁆𑀜𑀸𑀬 𑀫𑀢𑁆𑀣𑀓𑀁 𑀧𑀢𑁆𑀢𑀲𑁆𑀲𑀸𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀅𑀦𑀼𑀧𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 (𑀫. 𑀦𑀺. 𑁩.𑁯𑁩) 𑁋

‘‘𑀫𑀳𑀸𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀼𑀣𑀼𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄, 𑀳𑀸𑀲𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄, 𑀚𑀯𑀦𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 𑁋

𑀏𑀯𑀫𑀸𑀕𑀢𑀸 𑀫𑀳𑀸𑀧𑀜𑁆𑀜𑀸𑀤𑀺𑀓𑀸 𑀙, 𑀢𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀆𑀕𑀢𑀸 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀜𑁆𑀜𑀸, 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀢𑀺 𑀇𑀫𑀸𑀲𑀁 𑀲𑁄𑀴𑀲𑀧𑁆𑀧𑀪𑁂𑀤𑀸𑀦𑀁 𑀧𑀜𑁆𑀜𑀸𑀦𑀁 𑀲𑀸𑀯𑀓𑀯𑀺𑀲𑀬𑁂 𑀉𑀓𑁆𑀓𑀝𑁆𑀞𑀓𑁄𑀝𑀺𑀧𑁆𑀧𑀢𑁆𑀢𑀲𑁆𑀲.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁𑀬𑁂𑀯 𑀩𑀼𑀤𑁆𑀥𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀁 𑀓𑀣𑁂𑀲𑀺, 𑀦 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬𑀁 𑀯𑀺𑀬 𑀧𑀜𑁆𑀘𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁, 𑀢𑀢𑁄 𑀯𑀸 𑀧𑀦 𑀪𑀺𑀬𑁆𑀬𑁄𑀢𑀺? 𑀬𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀝𑀺𑀯𑁂𑀥𑀲𑀸𑀲𑀦𑀁 𑀏𑀓𑀁𑀲𑀢𑁄 𑀦𑀺𑀘𑁆𑀙𑀬𑁂𑀦 𑀅𑀚𑁆𑀚𑀸𑀧𑀺 𑀥𑀭𑀢𑀺, 𑀦 𑀅𑀦𑁆𑀢𑀭𑀳𑀺𑀢𑀁, 𑀢𑁂 𑀏𑀯 𑀓𑀺𑀢𑁆𑀢𑁂𑀦𑁆𑀢𑁄 𑀯𑀺𑀧𑀲𑁆𑀲𑀻𑀆𑀤𑀻𑀦𑀁𑀬𑁂𑀯 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑀁 𑀇𑀥 𑀓𑀣𑁂𑀲𑀺. 𑀢𑁂𑀲𑀁𑀬𑁂𑀯 𑀳𑀺 𑀲𑀸𑀯𑀓𑀸 𑀢𑀤𑀸 𑀘𑁂𑀯 𑀏𑀢𑀭𑀳𑀺 𑀘 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑀁 𑀞𑀺𑀢𑀸, 𑀦 𑀅𑀜𑁆𑀜𑁂𑀲𑀁 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸. 𑀲𑀺𑀤𑁆𑀥𑀢𑁆𑀣𑀢𑀺𑀲𑁆𑀲𑀨𑀼𑀲𑁆𑀲𑀸𑀦𑀁 𑀓𑀺𑀭 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑀸 𑀉𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀉𑀧𑀓𑀸𑀤𑀬𑁄 𑀯𑀺𑀬 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀦 𑀢𑀢𑁆𑀣 𑀢𑀢𑁆𑀣 𑀲𑀸𑀯𑀓𑀸 𑀬𑀸𑀯𑀢𑀸𑀬𑀼𑀓𑀁 𑀅𑀝𑁆𑀞𑀁𑀲𑀽𑀢𑀺 𑀯𑀤𑀦𑁆𑀢𑀺. 𑀅𑀧𑀼𑀩𑁆𑀩𑀸𑀘𑀭𑀺𑀫𑀦𑀺𑀬𑀫𑁄 𑀧𑀦 𑀅𑀧𑀭𑀸𑀧𑀭𑀁 𑀲𑀁𑀲𑀭𑀡𑀓𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀇𑀘𑁆𑀙𑀺𑀢𑁄𑀢𑀺 𑀦 𑀢𑁂𑀦𑁂𑀢𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁯. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀏𑀯𑀫𑀸𑀤𑀺𑀯𑀺𑀪𑀸𑀕𑁂𑀦 𑀇𑀥 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀘𑀺𑀭𑀝𑁆𑀞𑀺𑀢𑀺𑀓𑀢𑀸𑀬 𑀘𑀺𑀭𑀝𑁆𑀞𑀺𑀢𑀺𑀓𑀢𑀸𑀬 𑀘 𑀓𑀸𑀭𑀡𑀧𑀼𑀘𑁆𑀙𑀸𑀧𑀭𑀢𑁆𑀢𑀸 𑀘𑁄𑀤𑀦𑀸𑀬𑀸𑀢𑀺 𑀆𑀳 ‘‘𑀳𑁂𑀢𑀼 𑀧𑀘𑁆𑀘𑀬𑁄𑀢𑀺 𑀉𑀪𑀬𑀫𑁂𑀢𑀁 𑀓𑀸𑀭𑀡𑀸𑀥𑀺𑀯𑀘𑀦’’𑀦𑁆𑀢𑀺. 𑀳𑀺𑀦𑁄𑀢𑀺 𑀢𑁂𑀦 ¶ 𑀨𑀮𑀦𑁆𑀢𑀺 𑀳𑁂𑀢𑀽𑀢𑀺 𑀓𑀭𑀡𑀲𑀸𑀥𑀦𑁄𑀬𑀁 𑀳𑁂𑀢𑀼𑀲𑀤𑁆𑀤𑁄𑀢𑀺 𑀆𑀳 ‘‘𑀢𑁂𑀦 𑀢𑀲𑁆𑀲 𑀨𑀮’’𑀦𑁆𑀢𑀺𑀆𑀤𑀺. 𑀓𑀢𑁆𑀢𑀼𑀲𑀸𑀥𑀦𑁄𑀧𑀺 𑀳𑁂𑀢𑀼𑀲𑀤𑁆𑀤𑁄 𑀦𑁄 𑀦 𑀬𑀼𑀚𑁆𑀚𑀢𑀺 𑀳𑀺𑀦𑁄𑀢𑀺 𑀨𑀮𑀲𑁆𑀲 𑀳𑁂𑀢𑀼𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 𑀳𑁂𑀢𑀽𑀢𑀺. 𑀢𑀁 𑀧𑀝𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀨𑀮𑀁 𑀏𑀢𑀺 𑀧𑀯𑀢𑁆𑀢𑀢𑀺 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀺𑀮𑀸𑀲𑀼𑀦𑁄 ¶ 𑀅𑀳𑁂𑀲𑀼𑀦𑁆𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀅𑀳𑁂𑀲𑀼𑀁, 𑀦𑀺𑀭𑀼𑀲𑁆𑀲𑀸𑀳𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀦𑀺𑀭𑀼𑀲𑁆𑀲𑀸𑀳𑀢𑀸 𑀦 𑀆𑀮𑀲𑀺𑀬𑀯𑀲𑁂𑀦𑀸𑀢𑀺 𑀆𑀳 ‘‘𑀦 𑀆𑀮𑀲𑀺𑀬𑀓𑀺𑀮𑀸𑀲𑀼𑀦𑁄’’𑀢𑀺, 𑀆𑀮𑀲𑀺𑀬𑀯𑀲𑁂𑀦 𑀓𑀺𑀮𑀸𑀲𑀼𑀦𑁄 𑀦𑀸𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀆𑀮𑀲𑀺𑀬𑀁 𑀯𑀸𑀢𑀺 𑀇𑀫𑀺𑀦𑀸 𑀣𑀺𑀦𑀫𑀺𑀤𑁆𑀥𑀯𑀲𑀧𑁆𑀧𑀯𑀢𑁆𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀪𑀸𑀯𑀫𑀸𑀳. 𑀑𑀲𑀦𑁆𑀦𑀯𑀻𑀭𑀺𑀬𑀢𑀸 𑀯𑀸𑀢𑀺 𑀇𑀫𑀺𑀦𑀸 𑀧𑀦 ‘‘𑀆𑀮𑀲𑀺𑀬𑀸𑀪𑀸𑀯𑁂𑀧𑀺 𑀅𑀦𑁆𑀢𑀫𑀲𑁄 𑀅𑀦𑁆𑀦𑀪𑀸𑀭𑀦𑁂𑀲𑀸𑀤𑀸𑀦𑀫𑁆𑀧𑀺 𑀲𑀓𑁆𑀓𑀘𑁆𑀘𑀁𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀘𑀦𑀢𑁄 𑀬𑀲𑁆𑀲 𑀓𑀲𑁆𑀲𑀘𑀺𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀦𑀺𑀭𑀼𑀲𑁆𑀲𑀸𑀳𑀢𑀸 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺 𑀲𑀩𑁆𑀩𑁂𑀲𑀁 𑀲𑀫𑀓𑁂𑀦𑁂𑀯 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀧𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸 𑀳𑀻’’𑀢𑀺𑀆𑀤𑀺. 𑀑𑀲𑀦𑁆𑀦𑀯𑀻𑀭𑀺𑀬𑀸𑀢𑀺 𑀑𑀳𑀻𑀦𑀯𑀻𑀭𑀺𑀬𑀸, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀦𑁆𑀦𑀯𑀻𑀭𑀺𑀬𑀸𑀢𑀺 𑀅𑀥𑀺𑀓𑀯𑀻𑀭𑀺𑀬𑀸, 𑀫𑀳𑀼𑀲𑁆𑀲𑀸𑀳𑀸𑀢𑀺 𑀅𑀢𑁆𑀣𑁄. 𑀯𑁂𑀕𑁂𑀦𑀸𑀢𑀺 𑀚𑀯𑁂𑀦. 𑀥𑀫𑁆𑀫𑁂 𑀕𑀭𑀼 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀕𑀭𑀼𑀦𑁄. 𑀥𑀫𑁆𑀫𑁂 𑀕𑀸𑀭𑀯𑀫𑁂𑀢𑁂𑀲𑀦𑁆𑀢𑀺 𑀥𑀫𑁆𑀫𑀕𑀸𑀭𑀯𑀸. 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀅𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀲𑀺𑀔𑀺𑀲𑁆𑀲 𑀲𑀢𑁆𑀢𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑁂𑀲𑁆𑀲𑀪𑀼𑀲𑁆𑀲 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀢𑁂𑀲𑀁 𑀓𑀺𑀭 𑀓𑀸𑀮𑁂 𑀤𑀻𑀖𑀸𑀬𑀼𑀓𑀸 𑀲𑀢𑁆𑀢𑀸’’𑀢𑀺. 𑀅𑀪𑀺𑀲𑀫𑁂𑀦𑁆𑀢𑀻𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑀦𑀺𑀤𑁆𑀤𑁄𑀲𑀢𑀸𑀬𑀸𑀢𑀺 𑀯𑀻𑀢𑀺𑀓𑁆𑀓𑀫𑀤𑁄𑀲𑀲𑁆𑀲 𑀅𑀪𑀸𑀯𑀢𑁄. ‘‘𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀯𑀲𑁂𑀦 𑀅𑀧𑀜𑁆𑀜𑀧𑁂𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁮, 𑁧𑁯𑁪) 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀸𑀦𑀁𑀬𑁂𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀆𑀡𑀸𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦𑀸𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀑𑀲𑀸𑀦𑀤𑀺𑀯𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀓𑀺𑀁 𑀲𑀓𑀺’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀧𑁂𑀓𑁆𑀔𑀫𑀺𑀤𑀁 𑀲𑀸𑀫𑀺𑀯𑀘𑀦𑀁. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀩𑁆𑀩𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀉𑀧𑁄𑀲𑀣𑀁 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑀫𑀁 𑀢𑀁 𑀞𑀸𑀦𑀦𑁆𑀢𑀺 𑀆𑀳 ‘‘𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸’’𑀢𑀺𑀆𑀤𑀺. 𑀇𑀲𑀺𑀧𑀢𑀦𑀁 ¶ 𑀢𑁂𑀦 𑀲𑀫𑀬𑁂𑀦 𑀔𑁂𑀫𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀳𑁄𑀢𑀺, 𑀫𑀺𑀕𑀸𑀦𑀁 𑀧𑀦 𑀅𑀪𑀬𑀯𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀔𑁂𑀫𑁂 𑀫𑀺𑀕𑀤𑀸𑀬𑁂’’𑀢𑀺.

𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀻𑀢𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁂𑀳𑀺 𑀅𑀲𑀁𑀲𑀝𑁆𑀞𑀸𑀦𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀪𑀺𑀓𑁆𑀔𑀽𑀦𑀁 𑀲𑀳𑀲𑁆𑀲𑀸𑀦𑀺 𑀯𑀲𑀦𑁆𑀢𑀺. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑁂 𑀲𑀩𑁆𑀩𑁂𑀧𑀺 𑀤𑁆𑀯𑀸𑀤𑀲𑀲𑀳𑀲𑁆𑀲𑀪𑀺𑀓𑁆𑀔𑀼𑀕𑀡𑁆𑀳𑀦𑀓𑀸 𑀫𑀳𑀸𑀯𑀺𑀳𑀸𑀭𑀸 𑀅𑀪𑀬𑀕𑀺𑀭𑀺𑀘𑁂𑀢𑀺𑀬𑀧𑀩𑁆𑀩𑀢𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀲𑀤𑀺𑀲𑀸 𑀘 𑀅𑀳𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑁄𑀲𑀣𑀸𑀭𑁄𑀘𑀺𑀓𑀸𑀢𑀺 𑀉𑀧𑁄𑀲𑀣𑀸𑀭𑁄𑀘𑀦𑀓𑀸. 𑀢𑀸 𑀓𑀺𑀭 𑀤𑁂𑀯𑀢𑀸 𑀏𑀓𑀫𑁆𑀳𑀺 𑀯𑀲𑁆𑀲𑁂 𑀦𑀺𑀓𑁆𑀔𑀦𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 ‘‘𑀦𑀺𑀓𑁆𑀔𑀦𑁆𑀢𑀁 𑀔𑁄, 𑀫𑀸𑀭𑀺𑀲𑀸, 𑀏𑀓𑀁 𑀯𑀲𑁆𑀲𑀁, 𑀧𑀜𑁆𑀘 𑀤𑀸𑀦𑀺 𑀯𑀲𑁆𑀲𑀸𑀦𑀺 𑀲𑁂𑀲𑀸𑀦𑀺, 𑀧𑀜𑁆𑀘𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’’𑀢𑀺. 𑀢𑀣𑀸 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 ‘‘𑀦𑀺𑀓𑁆𑀔𑀦𑁆𑀢𑀸𑀦𑀺 𑀔𑁄, 𑀫𑀸𑀭𑀺𑀲𑀸, 𑀤𑁆𑀯𑁂 𑀯𑀲𑁆𑀲𑀸𑀦𑀺 ¶ , 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀲𑁂𑀲𑀸𑀦𑀺, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’’𑀢𑀺 𑀆𑀭𑁄𑀘𑁂𑀦𑁆𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀢𑀻𑀲𑀼 𑀘𑀢𑀽𑀲𑀼 𑀧𑀜𑁆𑀘𑀲𑀼 𑀯𑀲𑁆𑀲𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀆𑀭𑁄𑀘𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀭𑀺𑀲𑀸 𑀏𑀓𑀁 𑀯𑀲𑁆𑀲𑀁 𑀅𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺. 𑀲𑀸𑀦𑀼𑀪𑀸𑀯𑀸𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀸𑀦𑀼𑀪𑀸𑀯𑀸. 𑀢𑁂 𑀓𑀺𑀭 𑀪𑀺𑀓𑁆𑀔𑀽𑀢𑀺 𑀬𑁂 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀸𑀘𑀻𑀦𑀲𑀫𑀼𑀤𑁆𑀤𑀦𑁆𑀢𑁂𑀢𑀺 𑀧𑀸𑀘𑀻𑀦𑀲𑀫𑀼𑀤𑁆𑀤𑀲𑁆𑀲 𑀲𑀫𑀻𑀧𑀤𑁂𑀲𑁂. 𑀕𑀫𑀺𑀬𑀯𑀢𑁆𑀢𑀦𑁆𑀢𑀺 𑀕𑀫𑀺𑀓𑁂𑀳𑀺 𑀓𑀸𑀢𑀩𑁆𑀩𑀁 𑀲𑁂𑀦𑀸𑀲𑀦𑀧𑀝𑀺𑀚𑀕𑁆𑀕𑀦𑀸𑀤𑀺𑀯𑀢𑁆𑀢𑀁. 𑀉𑀧𑁄𑀲𑀣𑀕𑁆𑀕𑀦𑁆𑀢𑀺 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑀁. 𑀕𑀢𑀸𑀯 𑀳𑁄𑀦𑁆𑀢𑀻𑀢𑀺 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀕𑀢𑀸 𑀏𑀯 𑀳𑁄𑀦𑁆𑀢𑀺. 𑀢𑁂𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀘 𑀕𑀢𑀸 𑀲𑀩𑁆𑀩𑁂𑀧𑀺.

𑀔𑀦𑁆𑀢𑀻 𑀧𑀭𑀫𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁦; 𑀥. 𑀧. 𑀅𑀝𑁆𑀞. 𑁨.𑁧𑁮𑁫) 𑀧𑀭𑀽𑀧𑀯𑀸𑀤𑀁 𑀧𑀭𑀸𑀧𑀓𑀸𑀭𑀁 𑀲𑀻𑀢𑀼𑀡𑁆𑀳𑀸𑀤𑀺𑀪𑁂𑀤𑀜𑁆𑀘 𑀕𑀼𑀡𑁄𑀧𑀭𑁄𑀥𑀁 𑀔𑀫𑀢𑀺 𑀲𑀳𑀢𑀺 𑀅𑀥𑀺𑀯𑀸𑀲𑁂𑀢𑀻𑀢𑀺 𑀔𑀦𑁆𑀢𑀺. 𑀲𑀸 𑀧𑀦 𑀲𑀻𑀮𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀲𑀯𑀺𑀲𑁂𑀲𑀁 𑀢𑀧𑀢𑀺 𑀲𑀦𑁆𑀢𑀧𑀢𑀺 𑀯𑀺𑀥𑀫𑀢𑀻𑀢𑀺 𑀧𑀭𑀫𑀁 𑀉𑀢𑁆𑀢𑀫𑀁 𑀢𑀧𑁄. 𑀢𑀺𑀢𑀺𑀓𑁆𑀔𑀦𑀁 𑀔𑀫𑀦𑀁 𑀢𑀺𑀢𑀺𑀓𑁆𑀔𑀸. 𑀔𑀦𑁆𑀢𑀺𑀬𑀸𑀬𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀔𑀫𑀸𑀬𑀁 𑀢𑀺𑀢𑀺𑀓𑁆𑀔𑀸𑀲𑀤𑁆𑀤𑀁 𑀯𑀡𑁆𑀡𑁂𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀢𑀺𑀢𑀺𑀓𑁆𑀔𑀸𑀲𑀗𑁆𑀔𑀸𑀢𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀦𑀸𑀫 𑀉𑀢𑁆𑀢𑀫𑀁 𑀢𑀧𑁄’’𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸𑀢𑀺 𑀪𑀯𑁂𑀦 𑀪𑀯𑀦𑁆𑀢𑀭𑀁 𑀯𑀺𑀦𑀸𑀢𑀺 𑀪𑀯𑀦𑀺𑀓𑀦𑁆𑀢𑀺𑀪𑀸𑀯𑁂𑀦 𑀲𑀁𑀲𑀺𑀩𑁆𑀩𑀢𑀺, 𑀲𑀢𑀡𑁆𑀳𑀲𑁆𑀲𑁂𑀯 𑀯𑀸 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀪𑀸𑀯𑀢𑁄 𑀨𑀮𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀯𑀺𑀦𑀸𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 ¶ 𑀯𑀸𑀦𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀢𑀢𑁆𑀣 𑀢𑀲𑁆𑀲𑀸 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄. 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀦𑁆𑀢𑀧𑀡𑀻𑀢𑀦𑀺𑀧𑀼𑀡𑀲𑀺𑀯𑀔𑁂𑀫𑀸𑀤𑀺𑀦𑀸 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀫𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸.

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻𑀢𑀺 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀭𑀳𑀺𑀢𑀢𑁆𑀢𑀸 𑀧𑀭𑀁 𑀉𑀧𑀖𑀸𑀢𑁂𑀢𑀺 𑀩𑀸𑀥𑀢𑀺 𑀯𑀺𑀳𑀺𑀁𑀲𑀢𑀺, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀺 𑀧𑀩𑁆𑀩𑀸𑀚𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀧𑀩𑁆𑀩𑀸𑀚𑀦𑀢𑁄. 𑀘𑀢𑀼𑀢𑁆𑀣𑀧𑀸𑀤𑁄 𑀧𑀦 𑀢𑀢𑀺𑀬𑀧𑀸𑀤𑀲𑁆𑀲𑁂𑀯 𑀯𑁂𑀯𑀘𑀦𑀁 𑀅𑀦𑀢𑁆𑀣𑀦𑁆𑀢𑀭𑀢𑁆𑀢𑀸. ‘‘𑀦 𑀳𑀺 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀢𑀲𑁆𑀲 𑀳𑀺 ‘‘𑀦 𑀲𑀫𑀡𑁄 𑀳𑁄𑀢𑀻’’𑀢𑀺 𑀯𑁂𑀯𑀘𑀦𑀁. ‘‘𑀧𑀭𑀽𑀧𑀖𑀸𑀢𑀻’’𑀢𑀺 𑀏𑀢𑀲𑁆𑀲 ‘‘𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄’’𑀢𑀺 𑀯𑁂𑀯𑀘𑀦𑀁. 𑀅𑀣 𑀯𑀸 𑀧𑀭𑀽𑀧𑀖𑀸𑀢𑀻𑀢𑀺 𑀲𑀻𑀮𑀽𑀧𑀖𑀸𑀢𑀻. 𑀲𑀻𑀮𑀜𑁆𑀳𑀺 𑀉𑀢𑁆𑀢𑀫𑀝𑁆𑀞𑁂𑀦 ‘‘𑀧𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀧𑀭𑀲𑀤𑁆𑀤𑀲𑁆𑀲 𑀲𑁂𑀝𑁆𑀞𑀯𑀸𑀘𑀓𑀢𑁆𑀢𑀸 ‘‘𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑁄 𑀘 𑀲𑀫𑀡𑁄 𑀧𑀭𑀁 𑀬𑀁 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀺𑀳𑁂𑀞𑀬𑀦𑁆𑀢𑁄 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺 𑀅𑀢𑁆𑀢𑀦𑁄 𑀲𑀻𑀮𑀯𑀺𑀦𑀸𑀲𑀓𑁄, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀅𑀪𑀸𑀯𑀸 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀧𑀭𑀁 𑀅𑀦𑁆𑀢𑀫𑀲𑁄 𑀟𑀁𑀲𑀫𑀓𑀲𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑁄 𑀦 𑀳𑀺 𑀧𑀩𑁆𑀩𑀚𑀺𑀢𑁄. 𑀓𑀺𑀁 𑀓𑀸𑀭𑀡𑀸? 𑀧𑀸𑀧𑀫𑀮𑀲𑁆𑀲 𑀅𑀧𑀩𑁆𑀩𑀸𑀚𑀺𑀢𑀢𑁆𑀢𑀸 𑀅𑀦𑀻𑀳𑀝𑀢𑁆𑀢𑀸. ‘‘𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁩𑁮𑁮) 𑀇𑀤𑀜𑁆𑀳𑀺 𑀧𑀩𑁆𑀩𑀚𑀺𑀢𑀮𑀓𑁆𑀔𑀡𑀁 ¶ . 𑀬𑁄𑀧𑀺 𑀦𑀳𑁂𑀯 𑀔𑁄 𑀉𑀧𑀖𑀸𑀢𑁂𑀢𑀺 𑀦 𑀫𑀸𑀭𑁂𑀢𑀺, 𑀅𑀧𑀺𑀘 𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺, 𑀲𑁄𑀧𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄 𑀲𑀫𑀡𑁄 𑀦 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀯𑀺𑀳𑁂𑀲𑀸𑀬 𑀅𑀲𑀫𑀺𑀢𑀢𑁆𑀢𑀸. 𑀲𑀫𑀺𑀢𑀢𑁆𑀢𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀤𑀜𑁆𑀳𑀺 𑀲𑀫𑀡𑀮𑀓𑁆𑀔𑀡𑀁. ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫) 𑀳𑀺 𑀯𑀼𑀢𑁆𑀢𑀁.

𑀅𑀧𑀺𑀘 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑁄 𑀧𑀸𑀢𑀺𑀫𑁄𑀓𑁆𑀔𑀓𑀣𑀸𑀬 𑀘 𑀲𑀻𑀮𑀧𑁆𑀧𑀥𑀸𑀦𑀢𑁆𑀢𑀸 𑀲𑀻𑀮𑀲𑁆𑀲 𑀘 𑀯𑀺𑀲𑁂𑀲𑀢𑁄 𑀤𑁄𑀲𑁄 𑀧𑀝𑀺𑀧𑀓𑁆𑀔𑁄𑀢𑀺 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀆𑀤𑀺𑀢𑁄 ‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄’’𑀢𑀺 𑀆𑀳. 𑀢𑁂𑀦 𑀅𑀦𑀺𑀝𑁆𑀞𑀲𑁆𑀲 𑀧𑀝𑀺𑀳𑀦𑀦𑀽𑀧𑀸𑀬𑁄 𑀯𑀼𑀢𑁆𑀢𑁄, 𑀢𑀺𑀢𑀺𑀓𑁆𑀔𑀸𑀕𑁆𑀕𑀳𑀡𑁂𑀦 𑀧𑀦 𑀇𑀝𑁆𑀞𑀲𑁆𑀲, 𑀢𑀤𑀼𑀪𑀬𑁂𑀦𑀧𑀺 𑀉𑀧𑁆𑀧𑀦𑁆𑀦𑀁 𑀅𑀭𑀢𑀺𑀁 𑀉𑀧𑁆𑀧𑀦𑁆𑀦𑀁 𑀭𑀢𑀺𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀡𑁆𑀳𑀸𑀯𑀸𑀦𑀲𑁆𑀲 𑀯𑀽𑀧𑀲𑀫𑀦𑀢𑁄 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸. 𑀢𑀢𑁆𑀣 𑀔𑀦𑁆𑀢𑀺𑀕𑁆𑀕𑀳𑀡𑁂𑀦 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀢𑀺𑀢𑀺𑀓𑁆𑀔𑀸𑀕𑁆𑀕𑀳𑀡𑁂𑀦 𑀆𑀲𑀬𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁄. 𑀢𑀣𑀸 𑀔𑀦𑁆𑀢𑀺𑀕𑁆𑀕𑀳𑀡𑁂𑀦 𑀧𑀭𑀸𑀧𑀭𑀸𑀥𑀲𑀳𑀢𑀸, 𑀢𑀺𑀢𑀺𑀓𑁆𑀔𑀸𑀕𑁆𑀕𑀳𑀡𑁂𑀦 𑀧𑀭𑁂𑀲𑀼 𑀅𑀦𑀧𑀭𑀚𑁆𑀛𑀦𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀓𑀸𑀭𑀡𑀫𑀼𑀔𑁂𑀦 𑀅𑀦𑁆𑀯𑀬𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑀢𑁄 ¶ 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑀣𑀸 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁 𑀧𑀭𑀁 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑀦𑀜𑁆𑀘 ‘‘𑀧𑀭𑀽𑀧𑀖𑀸𑀢𑁄 𑀧𑀭𑀁 𑀯𑀺𑀳𑁂𑀞𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑁂𑀲𑀁 𑀲𑀸𑀧𑀢𑁂𑀬𑁆𑀬𑀸𑀯𑀳𑀭𑀡𑀁 𑀧𑀭𑀸𑀫𑀲𑀦𑀁 𑀯𑀺𑀲𑀁𑀯𑀸𑀤𑀦𑀁 𑀅𑀜𑁆𑀜𑀫𑀜𑁆𑀜𑀪𑁂𑀤𑀦𑀁 𑀨𑀭𑀼𑀲𑀯𑀘𑀦𑁂𑀦 𑀫𑀫𑁆𑀫𑀖𑀝𑁆𑀝𑀦𑀁 𑀦𑀺𑀭𑀢𑁆𑀣𑀓𑀯𑀺𑀧𑁆𑀧𑀮𑀸𑀧𑁄 𑀧𑀭𑀲𑀦𑁆𑀢𑀓𑀸𑀪𑀺𑀚𑁆𑀛𑀸𑀦𑀁 𑀉𑀘𑁆𑀙𑁂𑀤𑀘𑀺𑀦𑁆𑀢𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀜𑁆𑀘 𑀉𑀧𑀖𑀸𑀢𑁄 𑀧𑀭𑀯𑀺𑀳𑁂𑀞𑀦𑀜𑁆𑀘 𑀳𑁄𑀢𑀻𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀓𑀼𑀲𑀮𑀲𑁆𑀲 𑀓𑀫𑁆𑀫𑀧𑀣𑀲𑁆𑀲 𑀓𑀫𑁆𑀫𑀲𑁆𑀲 𑀘 𑀓𑀭𑀡𑁂𑀦 𑀧𑀩𑁆𑀩𑀚𑀺𑀢𑁄 𑀲𑀫𑀡𑁄 𑀘 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀤𑀼𑀢𑀺𑀬𑀕𑀸𑀣𑀸𑀬 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀲𑁆𑀲 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀕𑀳𑀺𑀢𑀲𑁆𑀲 𑀲𑀸𑀯𑀚𑁆𑀚𑀥𑀫𑁆𑀫𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀭𑀡𑀜𑁆𑀳𑀺 𑀦𑀸𑀫 𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀦𑁆𑀢𑀺 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀓𑀭𑀡𑀁 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀲𑁆𑀲. ‘‘𑀓𑀼𑀲𑀮𑀲𑁆𑀲𑀸’’𑀢𑀺 𑀳𑀺 𑀇𑀤𑀁 ‘‘𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂 𑀢𑁂𑀲𑀜𑁆𑀘 𑀲𑀫𑁆𑀪𑀸𑀭𑀪𑀽𑀢𑁂 𑀢𑁂𑀪𑀽𑀫𑀺𑀓𑀓𑀼𑀲𑀮𑁂 𑀥𑀫𑁆𑀫𑁂 𑀩𑁄𑀥𑁂𑀢𑀺. 𑀉𑀧𑀲𑀫𑁆𑀧𑀤𑀸𑀢𑀺 𑀉𑀧𑀲𑀫𑁆𑀧𑀸𑀤𑀦𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀲𑁆𑀲 𑀓𑀼𑀲𑀮𑀲𑁆𑀲 𑀲𑀫𑀥𑀺𑀕𑀫𑁄 𑀧𑀝𑀺𑀮𑀸𑀪𑁄. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀚𑁄𑀢𑀦𑀁 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀁 𑀲𑀩𑁆𑀩𑀲𑁄 𑀧𑀭𑀺𑀲𑁄𑀥𑀦𑀁. 𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀘𑀺𑀢𑁆𑀢𑀁 𑀲𑀩𑁆𑀩𑀲𑁄 𑀧𑀭𑀺𑀬𑁄𑀤𑀧𑀻𑀬𑀢𑀺 𑀦𑀸𑀫, 𑀅𑀕𑁆𑀕𑀨𑀮𑀓𑁆𑀔𑀡𑁂 𑀧𑀦 𑀧𑀭𑀺𑀬𑁄𑀤𑀧𑀺𑀢𑀁 𑀳𑁄𑀢𑀺 𑀧𑀼𑀦 𑀧𑀭𑀺𑀬𑁄𑀤𑀧𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀭𑀺𑀦𑀺𑀝𑁆𑀞𑀺𑀢𑀧𑀭𑀺𑀬𑁄𑀤𑀧𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀻’’𑀢𑀺. 𑀇𑀢𑀺 𑀲𑀻𑀮𑀲𑀁𑀯𑀭𑁂𑀦 𑀲𑀩𑁆𑀩𑀧𑀸𑀧𑀁 𑀧𑀳𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 ¶ 𑀓𑀼𑀲𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀺.

𑀢𑀢𑀺𑀬𑀕𑀸𑀣𑀸𑀬 𑀅𑀦𑀼𑀧𑀯𑀸𑀤𑁄𑀢𑀺 𑀯𑀸𑀘𑀸𑀬 𑀓𑀲𑁆𑀲𑀘𑀺 𑀅𑀦𑀼𑀧𑀯𑀤𑀦𑀁. 𑀅𑀦𑀼𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀫𑀦𑀲𑀸 𑀘 𑀓𑀲𑁆𑀲𑀘𑀺 𑀉𑀧𑀖𑀸𑀢𑀸𑀓𑀭𑀡𑀁 𑀫𑀦𑀲𑀸𑀧𑀺 𑀧𑀭𑁂𑀲𑀁 𑀅𑀦𑀢𑁆𑀣𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀉𑀧𑀖𑀸𑀢𑀓𑀭𑀡𑀲𑁆𑀲 𑀯𑀚𑁆𑀚𑁂𑀢𑀩𑁆𑀩𑀢𑁆𑀢𑀸. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀬𑀁 𑀢𑀁 𑀧𑀅𑀢𑀺𑀫𑁄𑀓𑁆𑀔𑀁 𑀅𑀢𑀺𑀧𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀲𑀻𑀮𑀁, 𑀧𑀸𑀢𑀺 𑀯𑀸 𑀲𑀼𑀕𑀢𑀺𑀪𑀬𑁂𑀳𑀺 𑀫𑁄𑀓𑁆𑀔𑁂𑀢𑀺 𑀤𑀼𑀕𑁆𑀕𑀢𑀺𑀪𑀬𑁂𑀳𑀺, 𑀬𑁄 𑀯𑀸 𑀦𑀁 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂 𑀘. 𑀲𑀁𑀯𑀭𑁄𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑁄 𑀲𑀁𑀯𑀭𑁄. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀚𑀦𑀲𑀗𑁆𑀖𑀝𑁆𑀝𑀯𑀺𑀭𑀳𑀺𑀢𑀁 𑀦𑀺𑀚𑁆𑀚𑀦𑀲𑀫𑁆𑀩𑀸𑀥𑀁 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀜𑁆𑀘. 𑀏𑀢𑁆𑀣 𑀤𑁆𑀯𑀻𑀳𑀺𑀬𑁂𑀯 ¶ 𑀧𑀘𑁆𑀘𑀬𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 𑀧𑀘𑁆𑀘𑀬𑀲𑀦𑁆𑀢𑁄𑀲𑀲𑀸𑀫𑀜𑁆𑀜𑁂𑀦 𑀇𑀢𑀭𑀤𑁆𑀯𑀬𑀲𑁆𑀲𑀧𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀚𑁄𑀢𑀺𑀢𑀪𑀸𑀯𑀢𑁄. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀁, 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀅𑀥𑀺𑀘𑀺𑀢𑁆𑀢𑁂 𑀆𑀬𑁄𑀕𑁄 𑀘, 𑀅𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀏𑀢𑀁 𑀧𑀭𑀲𑁆𑀲 𑀅𑀦𑀼𑀧𑀯𑀤𑀦𑀁 𑀅𑀦𑀼𑀧𑀖𑀸𑀢𑀦𑀁 𑀧𑀸𑀢𑀺𑀫𑁄𑀓𑁆𑀔𑁂 𑀲𑀁𑀯𑀭𑁄 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀫𑀢𑁆𑀢𑀜𑁆𑀜𑀼𑀢𑀸 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁂𑀯𑀦𑀁 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀘 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀺.

𑀇𑀫𑀸 𑀧𑀦 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸’’𑀢𑀺𑀆𑀤𑀺. 𑀬𑀸𑀯 𑀲𑀸𑀲𑀦𑀧𑀭𑀺𑀬𑀦𑁆𑀢𑀸𑀢𑀺 𑀥𑀭𑀫𑀸𑀦𑀓𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑀸𑀲𑀦𑀧𑀭𑀺𑀬𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀸𑀯 𑀩𑀼𑀤𑁆𑀥𑀸 𑀥𑀭𑀦𑁆𑀢𑀺, 𑀢𑀸𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀜𑁆𑀳𑀺 𑀩𑀼𑀤𑁆𑀥𑀸𑀬𑁂𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀲𑀸𑀯𑀓𑀸. 𑀧𑀞𑀫𑀩𑁄𑀥𑀺𑀬𑀁𑀬𑁂𑀯 𑀉𑀤𑁆𑀤𑁂𑀲𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀞𑀫𑀩𑁄𑀥𑀺 𑀘𑁂𑀢𑁆𑀣 𑀯𑀻𑀲𑀢𑀺𑀯𑀲𑁆𑀲𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀜𑁆𑀘 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀫𑁂𑀯 ‘‘𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀓𑀣𑀺𑀢𑀢𑁆𑀢𑀸 ‘‘𑀧𑀞𑀫𑀩𑁄𑀥𑀺 𑀦𑀸𑀫 𑀯𑀻𑀲𑀢𑀺𑀯𑀲𑁆𑀲𑀸𑀦𑀻’’𑀢𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀬 𑀯𑀲𑁆𑀲𑁂𑀲𑀼 𑀆𑀤𑀺𑀢𑁄 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀧𑀞𑀫𑀩𑁄𑀥𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 𑀫𑀚𑁆𑀛𑁂 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀫𑀚𑁆𑀛𑀺𑀫𑀩𑁄𑀥𑀺, 𑀅𑀦𑁆𑀢𑁂 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀧𑀘𑁆𑀙𑀺𑀫𑀩𑁄𑀥𑀻𑀢𑀺 𑀢𑀺𑀡𑁆𑀡𑀁 𑀩𑁄𑀥𑀻𑀦𑀁 𑀲𑀫𑀧𑁆𑀧𑀫𑀸𑀡𑀢𑀸 𑀲𑀺𑀬𑀸𑀢𑀺 𑀢𑀫𑁆𑀧𑀺 𑀬𑀼𑀢𑁆𑀢𑀁. 𑀧𑀦𑁆𑀦𑀭𑀲𑀢𑁆𑀢𑀺𑀓𑁂𑀦 𑀳𑀺 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀧𑀽𑀭𑁂𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀦𑁆𑀦𑀭𑀲𑀯𑀲𑁆𑀲𑀧𑁆𑀧𑀫𑀸𑀡𑀸𑀬 𑀧𑀞𑀫𑀩𑁄𑀥𑀺𑀬𑀸 𑀯𑀻𑀲𑀢𑀺𑀯𑀲𑁆𑀲𑁂𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁆𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁.

𑀦𑀦𑀼 ¶ 𑀘 𑀓𑀸𑀦𑀺𑀘𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸𑀧𑀺 𑀦 𑀢𑀸𑀯 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀜𑁆𑀜𑀸𑀢𑀁 𑀧𑀘𑁆𑀙𑀸 𑀣𑁂𑀭𑀲𑁆𑀲 𑀆𑀬𑀸𑀘𑀦𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀢𑀲𑁆𑀫𑀸 𑀓𑀣𑀫𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑀢𑁄 𑀧𑀦 𑀧𑀪𑀼𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀉𑀤𑁆𑀤𑀺𑀲𑀻𑀬𑀢𑀻’’𑀢𑀺, 𑀬𑀤𑀺𑀧𑀺 𑀓𑀸𑀦𑀺𑀘𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸𑀯 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀦 𑀅𑀦𑀼𑀜𑁆𑀜𑀸𑀢𑀁, 𑀢𑀣𑀸𑀧𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀦𑀢𑁆𑀣𑀺, 𑀓𑀺𑀦𑁆𑀢𑀼 𑀧𑀜𑁆𑀜𑀢𑁆𑀢𑁂𑀬𑁂𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑀢𑁄 𑀧𑀦 𑀧𑀪𑀼𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀬𑀸 ¶ 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁂 𑀓𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀯𑁄𑀳𑀸𑀭𑁂 𑀫𑀳𑀸𑀯𑀺𑀳𑀸𑀭𑁂. 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀫𑀸𑀢𑀼𑀝𑁆𑀞𑀸𑀦𑀺𑀬𑀢𑁆𑀢𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀬 𑀯𑀺𑀲𑀸𑀔𑀸𑀫𑀳𑀸𑀉𑀧𑀸𑀲𑀺𑀓𑀸𑀬 𑀓𑀸𑀭𑀺𑀢𑁂 𑀧𑀸𑀲𑀸𑀤𑁂. 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦.

𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑀸𑀦𑀁 𑀲𑀼𑀪𑀤𑁆𑀤𑀲𑀤𑀺𑀲𑀸𑀦𑀁 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀯𑀲𑁂𑀦𑁂𑀯 𑀯𑀺𑀯𑀺𑀥𑀸 𑀓𑀼𑀮𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀘𑁆𑀘𑀦𑀻𑀘𑀉𑀴𑀸𑀭𑀼𑀴𑀸𑀭𑀪𑁄𑀕𑀸𑀤𑀺𑀓𑀼𑀮𑀯𑀲𑁂𑀦 𑀯𑀸𑀢𑀺 𑀉𑀘𑁆𑀘𑀦𑀻𑀘𑀓𑀼𑀮𑀯𑀲𑁂𑀦 𑀉𑀴𑀸𑀭𑀼𑀴𑀸𑀭𑀪𑁄𑀕𑀸𑀤𑀺𑀓𑀼𑀮𑀯𑀲𑁂𑀦 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑀲𑁂𑀦 𑀯𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀯𑀲𑁂𑀦 𑀯𑀸 𑀉𑀘𑁆𑀘𑀓𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀲𑁂𑀲𑀸𑀦𑀁 𑀯𑀲𑁂𑀦 𑀦𑀻𑀘𑀓𑀼𑀮𑀢𑀸. 𑀉𑀴𑀸𑀭𑀼𑀴𑀸𑀭𑀪𑁄𑀕𑀸𑀤𑀺𑀓𑀼𑀮𑀯𑀲𑁂𑀦 𑀯𑀸𑀢𑀺 𑀉𑀴𑀸𑀭𑀢𑀭𑀢𑀫𑀉𑀧𑀪𑁄𑀕𑀯𑀦𑁆𑀢𑀸𑀤𑀺𑀓𑀼𑀮𑀯𑀲𑁂𑀦. 𑀉𑀴𑀸𑀭𑀸𑀢𑀺𑀲𑀬𑀚𑁄𑀢𑀦𑀢𑁆𑀣𑀜𑁆𑀳𑀺 𑀧𑀼𑀦 𑀉𑀴𑀸𑀭𑀕𑁆𑀕𑀳𑀡𑀁 ‘‘𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀆𑀤𑀺-𑀲𑀤𑁆𑀤𑁂𑀦 𑀉𑀴𑀸𑀭𑀸𑀦𑀼𑀴𑀸𑀭𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀩𑁆𑀭𑀳𑁆𑀫𑀘𑀭𑀺𑀬𑀁 𑀭𑀓𑁆𑀔𑀦𑁆𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀭𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀭𑀺𑀳𑀭𑀦𑁆𑀢𑀻’’𑀢𑀺. 𑀅𑀧𑀜𑁆𑀜𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀬𑀤𑀺 𑀲𑀫𑀸𑀦𑀚𑀸𑀢𑀺𑀆𑀤𑀺𑀓𑀸 𑀲𑀺𑀬𑀼𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀮𑀸𑀦𑀼𑀕𑀢𑀕𑀦𑁆𑀣𑀁 𑀯𑀺𑀬 𑀦 𑀦𑀸𑀲𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀧𑀦 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀧𑀜𑁆𑀜𑀢𑁆𑀢𑀁, 𑀇𑀫𑁂 𑀘 𑀪𑀺𑀓𑁆𑀔𑀽 𑀦 𑀲𑀫𑀸𑀦𑀚𑀸𑀢𑀺𑀆𑀤𑀺𑀓𑀸, 𑀢𑀲𑁆𑀫𑀸 𑀯𑀺𑀦𑀸𑀲𑁂𑀲𑀼𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀏𑀓𑀦𑀸𑀫𑀸…𑀧𑁂… 𑀢𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀳𑁂𑀞𑁂𑀦𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀘𑀺𑀭𑀝𑁆𑀞𑀺𑀢𑀺𑀓𑀯𑀸𑀭𑁂𑀧𑀺 ‘‘𑀦𑀸𑀦𑀸𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀢𑀺𑀧𑀺 𑀢𑁂𑀲𑀁 𑀦𑀸𑀦𑀸𑀚𑀘𑁆𑀘𑀸𑀤𑀺𑀪𑀸𑀯𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀏𑀯 𑀲𑀸𑀲𑀦𑀲𑁆𑀲 𑀘𑀺𑀭𑀧𑁆𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑁂𑀯 𑀲𑀸𑀲𑀦𑀲𑁆𑀲 𑀘𑀺𑀭𑀧𑁆𑀧𑀯𑀢𑁆𑀢𑀺. 𑀬𑀲𑁆𑀫𑀸 𑀩𑀼𑀤𑁆𑀥𑀸 𑀅𑀢𑁆𑀢𑀦𑁄 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀫𑁆𑀧𑀺 𑀯𑀺𑀦𑁂𑀢𑀩𑁆𑀩𑀲𑀢𑁆𑀢𑀲𑀫𑁆𑀪𑀯𑁂 𑀲𑀢𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀲𑀢𑀺 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀲𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀲𑀗𑁆𑀔𑀸𑀢𑀁 𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀘𑀺𑀢𑁆𑀢𑀁 𑀢𑀲𑁆𑀲𑀸𑀬𑁂𑀯 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀧𑀯𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀕𑁆𑀕𑀲𑀗𑁆𑀕𑀳𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀻𑀳𑀻𑀢𑀺 ¶ 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀫𑀳𑀸𑀯𑀕𑁆𑀕𑀸𑀤𑀺𑀯𑀕𑁆𑀕𑀲𑀗𑁆𑀕𑀳𑀯𑀲𑁂𑀦 𑀫𑀽𑀮𑀧𑀡𑁆𑀡𑀸𑀲𑀫𑀅𑀛𑀫𑀧𑀡𑁆𑀡𑀸𑀲𑀸𑀤𑀺𑀧𑀡𑁆𑀡𑀸𑀲𑀲𑀗𑁆𑀕𑀳𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀲𑀁𑀬𑀼𑀢𑁆𑀢𑀸𑀤𑀺𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣𑀸𑀢𑀺 𑀏𑀢𑁆𑀣 𑀏𑀯𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀯𑀺𑀥𑀺𑀯𑀲𑁂𑀦 𑀧𑀝𑀺𑀲𑁂𑀥𑀦𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑀸𑀓𑀸𑀭𑀧𑀭𑀸𑀫𑀲𑀦𑀁, 𑀲𑀸 𑀘 𑀲𑀫𑁆𑀫𑀸𑀯𑀺𑀢𑀓𑁆𑀓𑀸𑀦𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀜𑁆𑀘 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺 𑀅𑀢𑁆𑀣𑀆𑀦𑀺𑀲𑀁𑀲𑀲𑁆𑀲 𑀆𑀤𑀻𑀦𑀯𑀲𑁆𑀲 𑀘 𑀯𑀺𑀪𑀸𑀯𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀣𑀸’’𑀢𑀺𑀆𑀤𑀺. 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑀁 𑀯𑀼𑀘𑁆𑀘𑀢𑀺 𑀮𑁄𑀪𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀅𑀮𑁄𑀪𑁄, 𑀦𑀻𑀯𑀭𑀡𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀁, 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀩𑁆𑀩𑁄 𑀓𑀼𑀲𑀮𑁄 𑀥𑀫𑁆𑀫𑁄, 𑀲𑀩𑁆𑀩𑀲𑀗𑁆𑀔𑀢𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁, 𑀉𑀧𑀦𑀺𑀲𑁆𑀲𑀬𑀢𑁄 𑀲𑀫𑁆𑀧𑀬𑁄𑀕𑀢𑁄 𑀆𑀭𑀫𑁆𑀫𑀡𑀓𑀭𑀡𑀢𑁄 𑀘 𑀦𑁂𑀓𑁆𑀔𑀫𑁆𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑁄 𑀅𑀲𑀼𑀪𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄 𑀳𑁄𑀢𑀺, 𑀅𑀲𑀼𑀪𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁄, 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀩𑁆𑀬𑀸𑀧𑀸𑀤𑁄, 𑀓𑀜𑁆𑀘𑀺𑀧𑀺 𑀦 𑀩𑁆𑀬𑀸𑀧𑀸𑀤𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀅𑀩𑁆𑀬𑀸𑀧𑀸𑀤𑁄, 𑀫𑁂𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁂𑀦 𑀅𑀩𑁆𑀬𑀸𑀧𑀸𑀤𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. 𑀲𑁄 𑀫𑁂𑀢𑁆𑀢𑀸𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄 𑀳𑁄𑀢𑀺, 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀲𑁂𑀦 𑀅𑀥𑀺𑀕𑀢𑁂 𑀧𑀞𑀫𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁄, 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄. 𑀯𑀺𑀳𑀺𑀁𑀲𑀸𑀬 𑀧𑀝𑀺𑀧𑀓𑁆𑀔𑀸, 𑀦 𑀯𑀺𑀳𑀺𑀁𑀲𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑁂𑀢𑀺 𑀅𑀯𑀺𑀳𑀺𑀁𑀲𑀸, 𑀓𑀭𑀼𑀡𑀸. 𑀢𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀲𑁄 𑀓𑀭𑀼𑀡𑀸𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄, 𑀓𑀭𑀼𑀡𑀸𑀪𑀸𑀯𑀦𑀸𑀯𑀲𑁂𑀦 𑀅𑀥𑀺𑀕𑀢𑁂 𑀧𑀞𑀫𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁄, 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄.

𑀦𑀦𑀼 𑀘 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑀳𑀢𑁄 𑀦𑁂𑀲𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀇𑀫𑁂𑀲𑀁 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀦𑀁 𑀦 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺. 𑀬𑀤𑀸 𑀳𑀺 𑀅𑀮𑁄𑀪𑁄 𑀧𑀥𑀸𑀦𑁄 𑀳𑁄𑀢𑀺 𑀦𑀺𑀬𑀫𑀺𑀢𑀧𑀭𑀺𑀡𑀢𑀲𑀫𑀼𑀤𑀸𑀘𑀸𑀭𑀸𑀤𑀺𑀯𑀲𑁂𑀦, 𑀢𑀤𑀸 𑀇𑀢𑀭𑁂 𑀤𑁆𑀯𑁂 𑀢𑀤𑀦𑁆𑀯𑀸𑀬𑀺𑀓𑀸 𑀪𑀯𑀦𑁆𑀢𑀺. 𑀢𑀣𑀸 𑀳𑀺 𑀬𑀤𑀸 𑀅𑀮𑁄𑀪𑀧𑁆𑀧𑀥𑀸𑀦𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀤𑀸 𑀮𑀤𑁆𑀥𑀸𑀯𑀲𑀭𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀧𑀢𑀺𑀝𑁆𑀞𑀳𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀅𑀤𑁄𑀲𑀮𑀓𑁆𑀔𑀡𑀲𑁆𑀲 𑀅𑀩𑁆𑀬𑀸𑀧𑀸𑀤𑀲𑁆𑀲 𑀯𑀲𑁂𑀦 𑀬𑁄 𑀢𑀲𑁆𑀲𑁂𑀯 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀪𑀸𑀯𑁄 𑀲𑀫𑁆𑀪𑀯𑁂𑀬𑁆𑀬, 𑀲𑀢𑀺 𑀘 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀪𑀸𑀯𑁂 𑀓𑀲𑁆𑀲𑀘𑀺𑀧𑀺 𑀅𑀯𑀺𑀳𑁂𑀞𑀦𑀚𑀸𑀢𑀺𑀓𑀢𑀸𑀬 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀪𑀸𑀯𑁄 𑀘 𑀲𑀫𑁆𑀪𑀯𑁂𑀬𑁆𑀬. 𑀢𑁂 𑀇𑀢𑀭𑁂 ¶ 𑀤𑁆𑀯𑁂 𑀢𑀲𑁆𑀲𑁂𑀯 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀲𑁆𑀲 𑀅𑀦𑀼𑀕𑀸𑀫𑀺𑀦𑁄 𑀲𑀭𑀽𑀧𑀢𑁄 𑀅𑀤𑀺𑀲𑁆𑀲𑀦𑀢𑁄 𑀢𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀻𑀢𑀺 𑀅𑀦𑀼𑀫𑀸𑀦𑁂𑀬𑁆𑀬𑀸 𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀬𑀤𑀸 𑀫𑁂𑀢𑁆𑀢𑀸𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀤𑀸 𑀇𑀢𑀭𑁂 𑀤𑁆𑀯𑁂 𑀢𑀤𑀦𑁆𑀯𑀸𑀬𑀺𑀓𑀸 ¶ 𑀪𑀯𑀦𑁆𑀢𑀺. 𑀬𑀤𑀸 𑀓𑀭𑀼𑀡𑀸𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀤𑀸 𑀇𑀢𑀭𑁂 𑀤𑁆𑀯𑁂 𑀢𑀤𑀦𑁆𑀯𑀸𑀬𑀺𑀓𑀸 𑀪𑀯𑀦𑁆𑀢𑀺.

𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. 𑀏𑀢𑁆𑀣 𑀳𑀺 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑁂𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄, 𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀲𑀫𑁆𑀧𑀬𑁄𑀕𑀯𑀲𑁂𑀦 𑀓𑀸𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑁂𑀲𑀼 𑀤𑁆𑀯𑁂 𑀲𑀢𑁆𑀢𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀸𑀫𑀯𑀺𑀢𑀓𑁆𑀓𑁄 𑀳𑀺 𑀧𑀺𑀬𑁂 𑀫𑀦𑀸𑀧𑁂 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀅𑀧𑁆𑀧𑀺𑀬𑁂 𑀅𑀫𑀦𑀸𑀧𑁂 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀦𑀸𑀲𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀗𑁆𑀔𑀸𑀭𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀗𑁆𑀔𑀸𑀭𑁄 𑀳𑀺 𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺, ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’’𑀦𑁆𑀢𑀺 𑀘𑀺𑀦𑁆𑀢𑀦𑀓𑀸𑀮𑁂 𑀧𑀦 𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀓𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑁄 𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑁄 𑀦𑀸𑀫 𑀦𑀢𑁆𑀣𑀻’’𑀢𑀺, 𑀦𑀦𑀼 𑀬𑁂 𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑀸𑀢𑀺 𑀇𑀘𑁆𑀙𑀺𑀢𑀸 𑀲𑀢𑁆𑀢𑀲𑀜𑁆𑀜𑀺𑀢𑀸, 𑀢𑁂𑀧𑀺 𑀅𑀢𑁆𑀣𑀢𑁄 𑀲𑀗𑁆𑀔𑀸𑀭𑀸 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀲𑀯𑀺𑀜𑁆𑀜𑀸𑀡𑀓𑀢𑀸𑀬 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲 𑀯𑀺𑀲𑀬𑀸 𑀇𑀘𑁆𑀙𑀺𑀢𑀸 𑀲𑀢𑁆𑀢𑀲𑀜𑁆𑀜𑀺𑀢𑀸. 𑀬𑁂 𑀧𑀦 𑀦 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀸𑀬𑁄𑀕𑀢𑁄, 𑀢𑁂 𑀲𑀦𑁆𑀥𑀸𑀬 ‘‘𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀗𑁆𑀔𑀸𑀭𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀏𑀢𑁆𑀣 𑀆𑀲𑀯𑁂𑀳𑀻𑀢𑀺 𑀓𑀢𑁆𑀣𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀘𑀺𑀢𑁆𑀢𑀸𑀦𑀻𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁, 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀓𑀫𑁆𑀫𑀲𑀸𑀥𑀦𑀁, 𑀢𑀲𑁆𑀫𑀸 𑀆𑀲𑀯𑁂𑀳𑀺 𑀓𑀢𑁆𑀢𑀼𑀪𑀽𑀢𑁂𑀳𑀺 𑀅𑀦𑀼𑀧𑀸𑀤𑀸𑀬 𑀆𑀭𑀫𑁆𑀫𑀡𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀢𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀢𑁂𑀲𑀜𑁆𑀳𑀺 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀬𑁂𑀳𑀺 𑀆𑀲𑀯𑁂𑀳𑀻𑀢𑀺 𑀏𑀢𑁆𑀣𑀸𑀧𑀺 𑀓𑀢𑁆𑀢𑀼𑀅𑀢𑁆𑀣𑁂 𑀏𑀯 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀓𑀫𑁆𑀫𑀲𑀸𑀥𑀦𑀁. 𑀦 𑀢𑁂 ¶ 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀢𑁂 𑀆𑀲𑀯𑀸 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀯𑀲𑁂𑀦 𑀦 𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀼 𑀯𑀺𑀫𑁄𑀘𑁂𑀲𑀼𑀁. 𑀏𑀢𑁆𑀣 𑀳𑀺 𑀘𑀺𑀢𑁆𑀢𑀸𑀦𑀻𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀓𑀢𑁆𑀢𑀼𑀲𑀸𑀥𑀦𑀁. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀫𑀸𑀦𑀸𑀢𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀫𑀸𑀦𑀸 𑀆𑀲𑀯𑀸. 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀸𑀦𑀺 𑀯𑀺𑀫𑁄𑀘𑁂𑀲𑀼𑀁. 𑀯𑀺𑀓𑀲𑀺𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀦𑁆𑀢𑀺 𑀲𑀸𑀢𑀺𑀲𑀬𑀜𑀸𑀡𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀲𑀫𑁆𑀨𑀼𑀮𑁆𑀮𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀦𑁆𑀢𑀺 ‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 𑀯𑀦𑀲𑀡𑁆𑀟𑁂’’𑀢𑀺 𑀯𑀼𑀢𑁆𑀢𑀯𑀘𑀦𑀸𑀧𑁂𑀓𑁆𑀔𑀁. 𑀢𑁂𑀦𑀸𑀳 ‘‘𑀬𑀁 𑀯𑀼𑀢𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 𑀯𑀦𑀲𑀡𑁆𑀟𑁂𑀢𑀺, 𑀢𑀢𑁆𑀭𑀸’’𑀢𑀺. 𑀓𑀢𑀦𑁆𑀢𑀺 𑀪𑀸𑀯𑀲𑀸𑀥𑀦𑀯𑀸𑀘𑀺 𑀇𑀤𑀁 𑀧𑀤𑀦𑁆𑀢𑀺 𑀆𑀳 ‘‘𑀪𑀺𑀁𑀲𑀦𑀓𑀢𑀲𑁆𑀫𑀺𑀁 ¶ 𑀳𑁄𑀢𑀺, 𑀪𑀺𑀁𑀲𑀦𑀓𑀓𑀺𑀭𑀺𑀬𑀸𑀬𑀸’’𑀢𑀺. 𑀪𑀺𑀁𑀲𑀦𑀲𑁆𑀲 𑀓𑀭𑀡𑀁 𑀓𑀺𑀭𑀺𑀬𑀸 𑀪𑀺𑀁𑀲𑀦𑀓𑀢𑀁, 𑀢𑀲𑁆𑀫𑀺𑀁 𑀪𑀺𑀁𑀲𑀦𑀓𑀢𑀲𑁆𑀫𑀺𑀁.

𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀪𑀺𑀁𑀲𑀬𑀢𑀻𑀢𑀺 𑀪𑀺𑀁𑀲𑀦𑁄, 𑀪𑀺𑀁𑀲𑀦𑁄 𑀏𑀯 𑀪𑀺𑀁𑀲𑀦𑀓𑁄, 𑀢𑀲𑁆𑀲 𑀪𑀸𑀯𑁄 𑀪𑀺𑀁𑀲𑀦𑀓𑀢𑁆𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀪𑀺𑀁𑀲𑀦𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀁𑀲𑀦𑀓𑀢𑀲𑁆𑀫𑀺𑀦𑁆𑀢𑀺 𑀪𑀺𑀁𑀲𑀦𑀓𑀪𑀸𑀯𑁂𑀢𑀺 𑀅𑀢𑁆𑀣𑁄’’𑀢𑀺𑀆𑀤𑀺. 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑀁 𑀮𑁄𑀫𑀯𑀦𑁆𑀢𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀦 𑀮𑁄𑀫𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀩𑀳𑀼𑀢𑀭𑀸𑀦𑀁 𑀯𑀸’’𑀢𑀺𑀆𑀤𑀺.

𑀧𑀼𑀭𑀺𑀲𑀬𑀼𑀕𑀯𑀲𑁂𑀦𑀸𑀢𑀺 𑀧𑀼𑀭𑀺𑀲𑀓𑀸𑀮𑀯𑀲𑁂𑀦, 𑀧𑀼𑀭𑀺𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀲𑀼𑀪𑀤𑁆𑀤𑀲𑀤𑀺𑀲𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑀁 𑀲𑀓𑀮𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀲𑀢𑀲𑀳𑀲𑁆𑀲𑀁…𑀧𑁂… 𑀅𑀝𑁆𑀞𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀻𑀢𑀺 𑀏𑀢𑁆𑀣 𑀧𑀼𑀭𑀺𑀲𑀸𑀦𑀁 𑀬𑀼𑀕𑀧𑁆𑀧𑀯𑀢𑁆𑀢𑀺𑀓𑀸𑀮𑁄 𑀧𑀼𑀭𑀺𑀲𑀬𑀼𑀕𑀁. 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀧𑀼𑀭𑀺𑀲𑁄𑀯 𑀧𑀼𑀭𑀺𑀲𑀬𑀼𑀕𑀁. 𑀥𑀭𑀫𑀸𑀦𑁂 𑀪𑀕𑀯𑀢𑀺 𑀏𑀓𑀁 𑀧𑀼𑀭𑀺𑀲𑀬𑀼𑀕𑀁, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀦𑁆𑀢𑀺 𑀓𑀢𑁆𑀯𑀸 ‘‘𑀤𑁆𑀯𑁂𑀬𑁂𑀯 𑀧𑀼𑀭𑀺𑀲𑀬𑀼𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀏𑀓𑀫𑁂𑀯 𑀧𑀼𑀭𑀺𑀲𑀬𑀼𑀕𑀁 𑀅𑀲𑀻𑀢𑀺𑀬𑁂𑀯 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀝𑁆𑀞𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁦. 𑀲𑀸𑀯𑀓𑀬𑀼𑀕𑀸𑀦𑀻𑀢𑀺 𑀲𑀸𑀯𑀓𑀸 𑀏𑀯 𑀲𑀸𑀯𑀓𑀬𑀼𑀕𑀸𑀦𑀺. 𑀅𑀲𑀫𑁆𑀪𑀼𑀡𑀦𑁆𑀢𑁂𑀦𑀸𑀢𑀺 𑀅𑀧𑀸𑀧𑀼𑀡𑀦𑁆𑀢𑁂𑀦. 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀬𑀦𑀢𑁆𑀣𑀁 𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲.

𑁨𑁧. 𑀓𑁄 ¶ 𑀅𑀦𑀼𑀲𑀦𑁆𑀥𑀻𑀢𑀺 𑀧𑀼𑀩𑁆𑀩𑀸𑀧𑀭𑀓𑀣𑀸𑀦𑀁 𑀓𑀺𑀁 𑀅𑀦𑀼𑀲𑀦𑁆𑀥𑀸𑀦𑀁, 𑀓𑁄 𑀲𑀫𑁆𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀧𑁂𑀓𑁆𑀔𑀦𑁆𑀢𑀺 𑀬𑀸𑀘𑀻𑀬𑀢𑀻𑀢𑀺 𑀬𑀸𑀘𑀦𑀸, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑁂𑀯 𑀬𑀸𑀘𑀦𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸, 𑀢𑀁 𑀅𑀧𑁂𑀓𑁆𑀔𑀢𑀻𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀁, 𑀬𑀸𑀘𑀺𑀬𑀫𑀸𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀅𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀘𑀦𑀯𑀺𑀲𑀺𑀝𑁆𑀞𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑁂𑀯 𑀳𑀺 ‘‘𑀢𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀧𑀭𑀸𑀫𑀝𑁆𑀞𑀸, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑀢𑁆𑀣 𑀢𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺. 𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀬𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀧𑀦𑀁 𑀯𑀼𑀢𑁆𑀢𑀁, 𑀬𑀸𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀢𑀲𑁆𑀲𑀁 𑀬𑀸𑀘𑀺𑀬𑀫𑀸𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀮𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁.

𑀆𑀲𑀯𑀝𑁆𑀞𑀸𑀦𑀻𑀬𑀸𑀢𑀺 𑀏𑀢𑁆𑀣 𑀅𑀥𑀺𑀓𑀭𑀡𑁂 𑀅𑀦𑀻𑀬𑀲𑀤𑁆𑀤𑁄𑀢𑀺 𑀆𑀳 ‘‘𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀲𑀽’’𑀢𑀺𑀆𑀤𑀺 ¶ . 𑀓𑁂 𑀧𑀦 𑀢𑁂 𑀆𑀲𑀯𑀸, 𑀓𑁂 𑀘 𑀥𑀫𑁆𑀫𑀸 𑀢𑀤𑀥𑀺𑀓𑀭𑀡𑀪𑀽𑀢𑀸𑀢𑀺 𑀆𑀳 ‘‘𑀬𑁂𑀲𑀼 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀧𑀭𑀽𑀧𑀯𑀸𑀤𑀸𑀤𑀬𑁄, 𑀲𑀫𑁆𑀧𑀭𑀸𑀬𑀺𑀓𑀸 𑀆𑀧𑀸𑀬𑀺𑀓𑀸 𑀅𑀧𑀸𑀬𑀤𑀼𑀓𑁆𑀔𑀯𑀺𑀲𑁂𑀲𑀸. 𑀢𑁂 𑀆𑀲𑀯𑀦𑁆𑀢𑀺 𑀢𑁂𑀦 𑀢𑁂𑀦 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀦𑁂𑀲𑀦𑁆𑀢𑀺 𑀧𑀭𑀽𑀧𑀯𑀸𑀤𑀸𑀤𑀺𑀆𑀲𑀯𑀸𑀦𑀁. 𑀢𑁂𑀢𑀺 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸. 𑀅𑀲𑀢𑀺 𑀆𑀲𑀯𑀝𑁆𑀞𑀸𑀦𑀻𑀬𑁂 𑀥𑀫𑁆𑀫𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀁 𑀓𑁄 𑀤𑁄𑀲𑁄, 𑀬𑁂𑀦𑁂𑀯𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀤𑀺 𑀳𑀺 𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺𑀆𑀤𑀺, 𑀯𑀻𑀢𑀺𑀓𑁆𑀓𑀫𑀤𑁄𑀲𑀁 𑀅𑀤𑀺𑀲𑁆𑀯𑀸 𑀬𑀤𑀺 𑀧𑀜𑁆𑀜𑀧𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑀁 𑀧𑀭𑀽𑀧𑀯𑀸𑀤𑁄, 𑀧𑀭𑁂𑀳𑀺 𑀯𑀘𑀦𑁂𑀲𑀼 𑀤𑁄𑀲𑀸𑀭𑁄𑀧𑀦𑀁 𑀧𑀭𑀽𑀧𑀸𑀭𑀫𑁆𑀪𑁄, 𑀲𑀫𑁆𑀫𑀼𑀔𑀸 𑀕𑀭𑀳𑀦𑀁 𑀕𑀭𑀳𑀤𑁄𑀲𑁄.

𑀓𑀣𑀜𑁆𑀳𑀺 𑀦𑀸𑀫 𑀧𑀮𑀺𑀯𑁂𑀞𑁂𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀣𑀁-𑀲𑀤𑁆𑀤𑀬𑁄𑀕𑁂 𑀅𑀦𑀸𑀕𑀢𑀧𑁆𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀯𑀸𑀬𑀺𑀓𑁄𑀢𑀺 𑀅𑀦𑀼𑀯𑀢𑁆𑀢𑀓𑁄. 𑀪𑁄𑀕𑀓𑁆𑀔𑀦𑁆𑀥𑀦𑁆𑀢𑀺 𑀪𑁄𑀕𑀭𑀸𑀲𑀺𑀁. ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻, 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀝𑁆𑀝𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄, 𑀜𑀸𑀢𑀻𑀬𑁂𑀯 𑀧𑀭𑀺𑀯𑀝𑁆𑀝𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑁄. 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑁂 𑀧𑀭𑀫𑀢𑀸𑀬 𑀉𑀢𑁆𑀢𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸, 𑀖𑀸𑀲𑀘𑁆𑀙𑀸𑀤𑀦𑀧𑀭𑀺𑀬𑁂𑀲𑀦𑁂 𑀲𑀮𑁆𑀮𑁂𑀔𑀯𑀲𑁂𑀦 𑀧𑀭𑀫𑀢𑀸𑀬 𑀉𑀓𑁆𑀓𑀝𑁆𑀞𑀪𑀸𑀯𑁂 𑀲𑀡𑁆𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀖𑀸𑀲𑀘𑁆𑀙𑀸𑀤𑀦𑀫𑁂𑀯 𑀯𑀸 𑀧𑀭𑀫𑀁 𑀧𑀭𑀫𑀸 𑀓𑁄𑀝𑀺 𑀏𑀢𑁂𑀲𑀁 𑀦 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀅𑀲𑀸𑀫𑀺𑀲𑀚𑀸𑀢𑀁 𑀧𑀭𑀺𑀬𑁂𑀲𑀦𑁆𑀢𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺 𑀘𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀸, 𑀢𑁂𑀲𑀁 𑀪𑀸𑀯𑁄 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸, 𑀢𑀲𑁆𑀲𑀁 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑀸. 𑀢𑁂𑀲𑀼 𑀦𑀸𑀫 𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀺𑀲𑀺𑀝𑁆𑀞𑁂𑀲𑀼 ¶ 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁄 𑀦𑀸𑀫. 𑀮𑁄𑀓𑀸𑀫𑀺𑀲𑀪𑀽𑀢𑀦𑁆𑀢𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀁 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁆𑀢𑀸 𑀮𑁄𑀓𑀸𑀫𑀺𑀲𑀪𑀽𑀢𑀁. 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦𑁂𑀯𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺𑀆𑀤𑀺𑀦𑀸 𑀧𑀩𑁆𑀩𑀚𑁆𑀚𑀸𑀫𑀼𑀔𑁂𑀦𑁂𑀯. 𑀏𑀢𑀦𑁆𑀢𑀺 𑀫𑁂𑀣𑀼𑀦𑀸𑀤𑀻𑀦𑀁 𑀅𑀓𑀭𑀡𑀁. 𑀣𑀸𑀫𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀸𑀧𑀦𑀓𑀺𑀭𑀺𑀬𑀸𑀬 𑀲𑀸𑀫𑀢𑁆𑀣𑀺𑀬𑀁. 𑀩𑀮𑀦𑁆𑀢𑀺 𑀬𑀸𑀣𑀸𑀯𑀢𑁄 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀝𑀺𑀯𑁂𑀥𑀲𑀫𑀢𑁆𑀣𑀁 𑀜𑀸𑀡𑀩𑀮𑀁. 𑀓𑀼𑀧𑁆𑀧𑁂𑀬𑁆𑀬𑀸𑀢𑀺 𑀓𑀼𑀧𑁆𑀧𑀁 𑀪𑀯𑁂𑀬𑁆𑀬. 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁 𑀦 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺, 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑁄𑀢𑀺 𑀢𑀺𑀓𑀺𑀘𑁆𑀙𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑀲𑁆𑀲 𑀅𑀧𑀭𑀺𑀚𑀸𑀦𑀦𑀢𑁄 𑀅𑀓𑀼𑀲𑀮𑁄 𑀅𑀙𑁂𑀓𑁄. 𑀅𑀯𑀼𑀤𑁆𑀥𑀺 𑀅𑀦𑀬𑁄, 𑀩𑁆𑀬𑀲𑀦𑀁 𑀤𑀼𑀓𑁆𑀔𑀁. 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑀦𑀢𑁄 𑀧𑀞𑀫𑀫𑁂𑀯. 𑀲𑀜𑁆𑀙𑀯𑀺𑀁 𑀓𑀢𑁆𑀯𑀸𑀢𑀺 𑀲𑁄𑀪𑀦𑀘𑁆𑀙𑀯𑀺𑀁 𑀓𑀢𑁆𑀯𑀸. 𑀩𑀸𑀮𑀯𑁂𑀚𑁆𑀚𑁄𑀢𑀺 𑀅𑀧𑀡𑁆𑀟𑀺𑀢𑀯𑁂𑀚𑁆𑀚𑁄. 𑀮𑁄𑀳𑀺𑀢𑀓𑁆𑀔𑀬𑀜𑁆𑀘 𑀫𑀁 𑀧𑀸𑀧𑁂𑀢𑀻𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸. 𑀭𑁄𑀕𑀁 𑀯𑀽𑀧𑀲𑀫𑁂𑀢𑁆𑀯𑀸𑀢𑀺 𑀨𑀸𑀲𑀼𑀁 𑀓𑀢𑁆𑀯𑀸. 𑀲𑀓𑁂 𑀆𑀘𑀭𑀺𑀬𑀓𑁂𑀢𑀺 𑀆𑀘𑀭𑀺𑀬𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀆𑀘𑀭𑀺𑀬𑀓𑀁, 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀪𑀸𑀯𑁂, 𑀆𑀘𑀭𑀺𑀬𑀓𑀫𑁆𑀫𑁂 𑀯𑀸. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀤𑀺𑀢𑀸𑀦𑀼𑀪𑀸𑀯𑁄𑀢𑀺 𑀧𑀸𑀓𑀝𑀸𑀦𑀼𑀪𑀸𑀯𑁄.

𑀯𑀺𑀧𑀼𑀮𑀪𑀸𑀯𑁂𑀦𑀸𑀢𑀺 ¶ 𑀧𑀩𑁆𑀩𑀚𑀺𑀢𑀸𑀦𑀁 𑀩𑀳𑀼𑀪𑀸𑀯𑁂𑀦. 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑀲𑁆𑀫𑀸 𑀲𑁂𑀦𑀸𑀲𑀦𑀸𑀦𑀺 𑀧𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀺𑀳𑁂𑀢𑀼𑀓𑀸 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁂𑀦 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀮𑀸𑀪𑀕𑁆𑀕𑀫𑀳𑀢𑁆𑀢𑀦𑁆𑀢𑀺 𑀘𑀻𑀯𑀭𑀸𑀤𑀺𑀮𑀪𑀺𑀢𑀩𑁆𑀩𑀧𑀘𑁆𑀘𑀬𑁄 𑀮𑀸𑀪𑁄, 𑀢𑀲𑁆𑀲 𑀅𑀕𑁆𑀕𑀁 𑀫𑀳𑀢𑁆𑀢𑀁 𑀧𑀡𑀻𑀢𑀢𑀸 𑀩𑀳𑀼𑀪𑀸𑀯𑁄 𑀯𑀸. 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀸𑀯𑁄 𑀩𑀸𑀳𑀼𑀲𑀘𑁆𑀘𑀁. 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀸𑀢𑀺 𑀅𑀦𑀼𑀧𑀸𑀬𑁂𑀦 𑀅𑀪𑀺𑀦𑀺𑀯𑀺𑀲𑀫𑀸𑀦𑀸, 𑀯𑀺𑀧𑀭𑀻𑀢𑀢𑁄 𑀚𑀸𑀦𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀲𑀪𑀸𑀯𑁂𑀦 𑀲𑀪𑀸𑀯𑀁 𑀲𑀁𑀲𑀦𑁆𑀤𑀺𑀢𑁆𑀯𑀸, 𑀅𑀦𑀼𑀜𑁆𑀜𑀸𑀢𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀲𑀼 𑀲𑀼𑀔𑀲𑀫𑁆𑀨𑀲𑁆𑀲𑀲𑀸𑀫𑀜𑁆𑀜𑀢𑁄 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑀭𑀲𑁂𑀧𑀺 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀨𑀲𑁆𑀲𑀭𑀲𑁂𑀦 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸, 𑀲𑀫𑀸𑀦𑀪𑀸𑀯𑀁 𑀉𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 ¶ 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀻𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁮) 𑀲𑀢𑁆𑀣𑀼𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀢𑁆𑀯𑀸 𑀤𑀻𑀧𑁂𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 ‘‘𑀦𑀺𑀭𑀩𑁆𑀩𑀼𑀤𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀧𑀸𑀭𑀸. 𑁨𑁧) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑀗𑁆𑀖𑀲𑀜𑁆𑀜𑀺𑀢𑁂 𑀅𑀢𑁆𑀣𑁂. 𑀓𑀣𑀁 𑀧𑀦 𑀤𑀼𑀲𑁆𑀲𑀻𑀮𑀸𑀦𑀁 𑀘𑁄𑀭𑀪𑀸𑀯𑁄𑀢𑀺 𑀆𑀳 ‘‘𑀢𑁂 𑀳𑀺 𑀅𑀲𑁆𑀲𑀫𑀡𑀸𑀯 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀓𑀸𑀴𑀓𑀥𑀫𑁆𑀫𑀬𑁄𑀕𑀸𑀢𑀺 𑀤𑀼𑀲𑁆𑀲𑀻𑀮𑀢𑀸𑀲𑀗𑁆𑀔𑀸𑀢𑀧𑀸𑀧𑀥𑀫𑁆𑀫𑀬𑁄𑀕𑀢𑁄. 𑀧𑀪𑀲𑁆𑀲𑀭𑁄𑀢𑀺 𑀧𑀪𑀲𑁆𑀲𑀭𑀲𑀻𑀮𑁄. 𑀲𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀲𑀸𑀭𑀪𑀽𑀢𑀢𑁆𑀢𑀸 𑀲𑀻𑀮𑀸𑀤𑀬𑁄 𑀕𑀼𑀡𑀸 ‘‘𑀲𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀲𑀩𑁆𑀩𑀧𑀭𑀺𑀢𑁆𑀢𑀕𑀼𑀡𑁄𑀢𑀺 𑀲𑀩𑁆𑀩𑁂𑀳𑀺 𑀦𑀺𑀳𑀻𑀦𑀕𑀼𑀡𑁄, 𑀅𑀧𑁆𑀧𑀕𑀼𑀡𑁄 𑀯𑀸. 𑀲𑁄 𑀲𑁄𑀢𑀸𑀧𑀦𑁆𑀦𑁄𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄𑀢𑀁 𑀆𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄. 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀢𑁄 𑀲𑀯𑀦𑀢𑁄 𑀧𑁂𑀮𑁆𑀮𑀦𑀢𑁄 𑀲𑁄𑀢𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀲𑁄𑀢𑁄𑀢𑀺 𑀘 𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀇𑀫𑀺𑀦𑀸 𑀫𑀕𑁆𑀕𑀲𑀫𑀗𑁆𑀕𑀻 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀉𑀤𑀸𑀳𑀭𑀡𑁂𑀦 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀧𑀼𑀕𑁆𑀕𑀮𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀥 𑀧𑀦𑀸’’𑀢𑀺𑀆𑀤𑀺. 𑀇𑀥 𑀆𑀧𑀦𑁆𑀦𑀲𑀤𑁆𑀤𑁄 ‘‘𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁮𑁮) 𑀯𑀺𑀬 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀢𑀺 𑀆𑀳 ‘‘𑀫𑀕𑁆𑀕𑁂𑀦 𑀨𑀮𑀲𑁆𑀲 𑀦𑀸𑀫𑀁 𑀤𑀺𑀦𑁆𑀦’’𑀦𑁆𑀢𑀺. 𑀫𑀕𑁆𑀕𑁂𑀦 𑀳𑀺 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀸 𑀲𑀢𑁆𑀢𑀗𑁆𑀕𑀺𑀓𑀲𑁆𑀲 𑀯𑀸 𑀨𑀮𑀲𑁆𑀲 𑀲𑁄𑀢𑁄𑀢𑀺 𑀦𑀸𑀫𑀁 𑀤𑀺𑀦𑁆𑀦𑀁, 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑁂 𑀧𑀦 𑀲𑀭𑀲𑀢𑁄𑀯 𑀦𑀸𑀫𑀮𑀸𑀪𑁄 𑀲𑀺𑀬𑀸. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀫𑀕𑁆𑀕𑀲𑁄𑀢𑀁 𑀆𑀧𑀚𑁆𑀚𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀆𑀧𑀦𑁆𑀦𑁄.

𑀯𑀺𑀭𑀽𑀧𑀁 ¶ 𑀲𑀤𑀼𑀓𑁆𑀔𑀁 𑀲𑀉𑀧𑀸𑀬𑀸𑀲𑀁 𑀦𑀺𑀧𑀸𑀢𑁂𑀢𑀻𑀢𑀺 𑀯𑀺𑀦𑀺𑀧𑀸𑀢𑁄, 𑀅𑀧𑀸𑀬𑀤𑀼𑀓𑁆𑀔𑁂 𑀔𑀺𑀧𑀦𑀓𑁄. 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀢𑁂𑀦𑀸𑀳 ‘‘𑀦 𑀅𑀢𑁆𑀢𑀸𑀦𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄’’𑀢𑀺. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀅𑀧𑀸𑀬𑁂𑀲𑀼 𑀔𑀺𑀧𑀦𑀓𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀺𑀓𑁄 𑀅𑀓𑀼𑀲𑀮𑀥𑀫𑁆𑀫𑁄. 𑀬𑀲𑁆𑀲 𑀧𑀦 𑀲𑁄 𑀅𑀓𑀼𑀲𑀮𑀥𑀫𑁆𑀫𑁄 𑀦𑀢𑁆𑀣𑀺 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸, 𑀲𑁄 𑀬𑀲𑁆𑀫𑀸 𑀅𑀧𑀸𑀬𑁂𑀲𑀼 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀅𑀢𑁆𑀢𑀸𑀦𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀓𑀲𑁆𑀫𑀸𑀢𑀺 𑀅𑀯𑀺𑀦𑀺𑀧𑀸𑀢𑀦𑀥𑀫𑁆𑀫𑀢𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀅𑀧𑀸𑀬𑀁 𑀕𑀫𑁂𑀦𑁆𑀢𑀻𑀢𑀺 𑀅𑀧𑀸𑀬𑀕𑀫𑀦𑀻𑀬𑀸. 𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄𑀢𑀺 𑀉𑀧𑁆𑀧𑀚𑁆𑀚𑀦𑀲𑀪𑀸𑀯𑁄. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀫𑀕𑁆𑀕𑁂𑀦𑀸𑀢𑀺 𑀲𑀫𑁆𑀫𑀸 ¶ 𑀪𑀯𑀦𑀺𑀬𑀸𑀫𑀓𑁂𑀦 𑀧𑀝𑀺𑀮𑀤𑁆𑀥𑀫𑀕𑁆𑀕𑁂𑀦. 𑀦𑀺𑀬𑀢𑁄𑀢𑀺 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀢𑁆𑀢𑀫𑀪𑀯𑀢𑁄 𑀉𑀧𑀭𑀺 𑀅𑀦𑀼𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀻𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀸 𑀲𑀫𑁆𑀩𑁄𑀥𑀺. 𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀳𑀺 𑀲𑀫𑁆𑀩𑁄𑀥𑀺, 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀘 𑀇𑀥 𑀧𑀞𑀫𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑁄 𑀏𑀯 𑀅𑀥𑀺𑀕𑀦𑁆𑀢𑀩𑁆𑀩𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺. 𑀢𑁂𑀦𑀸𑀳 ‘‘𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀅𑀯𑀲𑁆𑀲𑀁 𑀲𑀫𑁆𑀧𑀸𑀧𑀓𑁄’’𑀢𑀺. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀁 𑀅𑀯𑀲𑁆𑀲𑀁 𑀲𑀫𑁆𑀧𑀸𑀧𑀼𑀡𑀸𑀢𑀻𑀢𑀺 𑀲𑀫𑁆𑀧𑀸𑀧𑀓𑁄, 𑀲𑁄𑀢𑀸𑀧𑀦𑁆𑀦𑁄.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸

𑁨𑁨. 𑀅𑀦𑀼𑀥𑀫𑁆𑀫𑀢𑀸𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀼𑀕𑀢𑁄 𑀥𑀫𑁆𑀫𑁄. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀧𑀤𑀲𑁆𑀲 𑀯𑀺𑀯𑀭𑀡𑀁 ‘‘𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺. 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀕𑀫𑁆𑀬𑀫𑀸𑀦𑀢𑀸𑀬 𑀦 𑀯𑀼𑀢𑁆𑀢𑁄, 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼. 𑀢𑀢𑁆𑀣 𑀚𑀦𑀧𑀤𑀘𑀸𑀭𑀺𑀓𑀦𑁆𑀢𑀺 𑀚𑀦𑀧𑀤𑁂𑀲𑀼 𑀘𑀭𑀡𑀁, 𑀘𑀭𑀡𑀁 𑀯𑀸 𑀘𑀸𑀭𑁄, 𑀲𑁄 𑀏𑀯 𑀘𑀸𑀭𑀺𑀓𑀸, 𑀚𑀦𑀧𑀤𑁂𑀲𑀼 𑀘𑀸𑀭𑀺𑀓𑀸 𑀚𑀦𑀧𑀤𑀘𑀸𑀭𑀺𑀓𑀸. 𑀢𑀁 𑀧𑀓𑁆𑀓𑀫𑀦𑁆𑀢𑀺, 𑀚𑀦𑀧𑀤𑀕𑀫𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀫𑀦𑁆𑀢𑀺𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦𑁄 𑀦 𑀧𑀓𑁆𑀓𑀫𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀻’’𑀢𑀺 𑀏𑀢𑁆𑀣 𑀞𑀢𑁆𑀯𑀸 𑀪𑀕𑀯𑀢𑁄 𑀘𑀸𑀭𑀺𑀓𑀸𑀧𑀓𑁆𑀓𑀫𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀘𑀸’’𑀢𑀺𑀆𑀤𑀺. 𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁪; 𑀫. 𑀦𑀺. 𑀅𑀝𑁆𑀞. 𑁧.𑁨𑁫𑁪) 𑀤𑀼𑀯𑀺𑀥𑀸 𑀢𑀼𑀭𑀺𑀢𑀘𑀸𑀭𑀺𑀓𑀸 𑀘𑁂𑀯 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀤𑀽𑀭𑁂𑀧𑀺 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀩𑁄𑀥𑀦𑀢𑁆𑀣𑀸𑀬 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫, 𑀲𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀪𑀕𑀯𑀸 𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦 𑀢𑀺𑀕𑀸𑀯𑀼𑀢𑀫𑀕𑀫𑀸𑀲𑀺, 𑀆𑀴𑀯𑀓𑀲𑁆𑀲𑀢𑁆𑀣𑀸𑀬 𑀢𑀺𑀁𑀲𑀬𑁄𑀚𑀦𑀁, 𑀢𑀣𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲, 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁, 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁, 𑀥𑀦𑀺𑀬𑀲𑁆𑀲𑀢𑁆𑀣𑀸𑀬 𑀲𑀢𑁆𑀢𑀬𑁄𑀚𑀦𑀲𑀢𑀸𑀦𑀺 𑀅𑀕𑀫𑀸𑀲𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀢𑀺𑀕𑀸𑀯𑀼𑀢𑀸𑀥𑀺𑀓𑀁 𑀯𑀻𑀲𑀬𑁄𑀚𑀦𑀲𑀢𑀁 𑀅𑀕𑀫𑀸𑀲𑀺, 𑀅𑀬𑀁 𑀢𑀼𑀭𑀺𑀢𑀘𑀸𑀭𑀺𑀓𑀸. 𑀬𑀁 𑀧𑀦 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀬𑀸 𑀤𑁂𑀯𑀲𑀺𑀓𑀁 𑀬𑁄𑀚𑀦𑀅𑀟𑁆𑀠𑀬𑁄𑀚𑀦𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 ¶ 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀕𑀫𑀦𑀁, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀇𑀫𑀁 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀕𑀯𑀸 𑀫𑀳𑀸𑀫𑀡𑁆𑀟𑀮𑀁 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀡𑁆𑀟𑀮𑀸𑀦𑀁 ¶ 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀭𑀢𑀺. 𑀢𑀢𑁆𑀣 ‘‘𑀚𑀦𑀧𑀤𑀘𑀸𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑀼𑀭𑀺𑀢𑀘𑀸𑀭𑀺𑀓𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀫𑁂𑀯 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀫𑀡𑁆𑀟𑀮𑀁 𑀫𑀚𑁆𑀛𑀺𑀫𑀫𑀡𑁆𑀟𑀮’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀔𑀼𑀤𑁆𑀤𑀓𑀫𑀡𑁆𑀟𑀮𑀁, 𑀇𑀢𑀭𑁂𑀲𑀁 𑀯𑀸 𑀫𑀡𑁆𑀟𑀮𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀅𑀦𑁆𑀢𑀺𑀫𑀫𑀡𑁆𑀟𑀮𑀁, 𑀅𑀩𑁆𑀪𑀦𑁆𑀢𑀭𑀺𑀫𑀫𑀡𑁆𑀟𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀲𑀁 𑀧𑀦 𑀫𑀡𑁆𑀟𑀮𑀸𑀦𑀁 𑀓𑀺𑀁 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀢𑀢𑁆𑀣 𑀫𑀳𑀸𑀫𑀡𑁆𑀟𑀮𑀁 𑀦𑀯𑀬𑁄𑀚𑀦𑀲𑀢𑀺𑀓’’𑀦𑁆𑀢𑀺𑀆𑀤𑀺. 𑀦𑀯𑀬𑁄𑀚𑀦𑀲𑀢𑀺𑀓𑀫𑁆𑀧𑀺 𑀞𑀸𑀦𑀁 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀢𑀢𑁄 𑀧𑀭𑀁 𑀦𑀸𑀥𑀺𑀧𑁆𑀧𑁂𑀢𑀁 𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀅𑀕𑀫𑀦𑀢𑁄. 𑀬𑀲𑁆𑀫𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀫𑀦𑁆𑀢𑀢𑁄 𑀬𑁄𑀚𑀦𑀲𑀢𑀁 𑀏𑀓𑀓𑁄𑀮𑀸𑀳𑀮𑀁 𑀳𑁄𑀢𑀺, 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀆𑀕𑀢𑀸 𑀦𑀺𑀫𑀦𑁆𑀢𑁂𑀢𑀼𑀁 𑀮𑀪𑀦𑁆𑀢𑀺, 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀫𑀳𑀸𑀫𑀡𑁆𑀟𑀮𑀁 𑀑𑀲𑀭𑀢𑀺, 𑀢𑀢𑁆𑀣 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀢𑁂𑀲𑀼 𑀢𑁂𑀲𑀼 𑀕𑀸𑀫𑀦𑀺𑀕𑀫𑁂𑀲𑀼 𑀏𑀓𑀸𑀳𑀁 𑀤𑁆𑀯𑀻𑀳𑀁 𑀯𑀲𑀦𑁆𑀢𑀸 𑀫𑀳𑀸𑀚𑀦𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺, 𑀥𑀫𑁆𑀫𑀤𑀸𑀦𑁂𑀦 𑀘 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁 𑀯𑀟𑁆𑀠𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀫𑀳𑀸𑀚𑀦𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀸’’𑀢𑀺𑀆𑀤𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀢𑀭𑀼𑀡𑀸 𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑀦𑁂 𑀜𑀸𑀡𑀁 𑀓𑀗𑁆𑀔𑀸𑀯𑀺𑀢𑀭𑀡𑁂 𑀜𑀸𑀡𑀁 𑀲𑀫𑁆𑀫𑀲𑀦𑁂 𑀜𑀸𑀡𑀁 𑀫𑀕𑁆𑀕𑀸𑀫𑀕𑁆𑀕𑁂 𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀲𑀫𑀣𑀲𑁆𑀲 𑀢𑀭𑀼𑀡𑀪𑀸𑀯𑁄 𑀧𑀦 𑀉𑀧𑀘𑀸𑀭𑀲𑀫𑀸𑀥𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀘𑁂 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀦𑁆𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑁂𑀦𑀧𑀺 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑁂𑀦 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑀸 𑀘𑀸𑀢𑀼𑀫𑀸𑀲𑀁 𑀯𑀲𑀺𑀢𑁆𑀯𑀸𑀯 𑀦𑀺𑀓𑁆𑀔𑀫𑀦𑁆𑀢𑀺.

𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸𑀢𑀺 𑀅𑀦𑀼𑀫𑀢𑀺𑀤𑀸𑀦𑀯𑀲𑁂𑀦 𑀤𑀢𑁆𑀯𑀸. 𑀫𑀸𑀕𑀲𑀺𑀭𑀲𑁆𑀲 𑀧𑀞𑀫𑀤𑀺𑀯𑀲𑁂𑀢𑀺 𑀫𑀸𑀕𑀲𑀺𑀭𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑁂. 𑀇𑀤𑀜𑁆𑀘𑁂𑀢𑀭𑀳𑀺 𑀧𑀯𑀢𑁆𑀢𑀯𑁄𑀳𑀸𑀭𑀯𑀲𑁂𑀦 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀅𑀧𑀭𑀧𑀓𑁆𑀔𑀧𑀸𑀝𑀺𑀧𑀤𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁. 𑀢𑁂𑀳𑀺 𑀯𑀺𑀦𑁂𑀢𑀩𑁆𑀩𑀢𑁆𑀢𑀸 ‘‘𑀢𑁂𑀲𑀁 𑀯𑀺𑀦𑁂𑀬𑁆𑀬𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑁂𑀬𑁆𑀬𑀲𑀢𑁆𑀢𑀸𑀢𑀺 𑀘 𑀘𑀸𑀭𑀺𑀓𑀸𑀬 𑀯𑀺𑀦𑁂𑀢𑀩𑁆𑀩𑀲𑀢𑁆𑀢𑀸. 𑀫𑀸𑀕𑀲𑀺𑀭𑀫𑀸𑀲𑀫𑁆𑀧𑀺 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀨𑀼𑀲𑁆𑀲𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑁂𑀢𑀺 𑀇𑀤𑀫𑁆𑀧𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀢𑀼𑀫𑀸𑀲𑀯𑀼𑀢𑁆𑀣𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀯𑀺𑀦𑁂𑀬𑁆𑀬𑀲𑀢𑁆𑀢𑀸 𑀅𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑀸 𑀅𑀧𑀭𑀫𑁆𑀧𑀺 𑀏𑀓𑀫𑀸𑀲𑀁 𑀯𑀸 𑀤𑁆𑀯𑀺𑀢𑀺𑀘𑀢𑀼𑀫𑀸𑀲𑀁 𑀯𑀸 𑀢𑀢𑁆𑀣𑁂𑀯𑀯𑀲𑀺𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀸 ¶ 𑀲𑀢𑁆𑀢𑀳𑀺 𑀯𑀸 𑀙𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺. 𑀯𑁂𑀦𑁂𑀬𑁆𑀬𑀯𑀲𑁂𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀘𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 ¶ 𑀳𑀺 𑀇𑀫𑁂𑀲𑀼 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀘𑀭𑀦𑁆𑀢𑀺, 𑀅𑀣 𑀔𑁄 𑀬𑁂 𑀤𑀼𑀕𑁆𑀕𑀢𑀩𑀸𑀮𑀚𑀺𑀡𑁆𑀡𑀩𑁆𑀬𑀸𑀥𑀺𑀓𑀸, 𑀢𑁂 ‘‘𑀓𑀤𑀸 𑀢𑀣𑀸𑀕𑀢𑀁 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀫𑀬𑀺 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁂 𑀫𑀳𑀸𑀚𑀦𑁄 𑀢𑀣𑀸𑀕𑀢𑀤𑀲𑁆𑀲𑀦𑀁 𑀮𑀪𑀺𑀲𑁆𑀲𑀢𑀺, 𑀢𑀢𑁆𑀣 𑀓𑁂𑀘𑀺 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀧𑀳𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀁 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀏𑀯𑀁 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺.

𑀅𑀧𑀺𑀘 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀚𑀗𑁆𑀖𑀯𑀺𑀳𑀸𑀭𑀯𑀲𑁂𑀦 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬, 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀧𑀸𑀓𑀕𑀢𑀺𑀦𑁆𑀤𑁆𑀭𑀺𑀬𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀩𑁄𑀥𑀦𑀢𑁆𑀣𑀸𑀬𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀥𑀫𑁆𑀫𑀁, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀫𑀳𑀢𑀸 𑀥𑀫𑁆𑀫𑀯𑀲𑁆𑀲𑁂𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀢𑀧𑁆𑀧𑁂𑀲𑁆𑀲𑀸𑀫𑀸𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀫𑀼𑀲𑀸𑀯𑀸𑀤𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀤𑀼𑀢𑀺𑀬𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸. 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀸𑀢𑀺.

𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀻𑀢𑀺 𑀇𑀫𑀺𑀦𑀸 𑀬𑀣𑀸 𑀫𑀸𑀮𑀸𑀓𑀸𑀭𑁄 𑀩𑀳𑀼𑀁 𑀧𑀼𑀧𑁆𑀨𑀕𑀘𑁆𑀙𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀘𑀺𑀭𑀫𑁆𑀧𑀺 𑀞𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀼𑀧𑁆𑀨𑀲𑀼𑀜𑁆𑀜𑀁 𑀕𑀘𑁆𑀙𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀢𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑁄 𑀯𑀺𑀘𑀭𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀸𑀧𑀺 𑀬𑀢𑁆𑀣 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀯𑀺𑀦𑁂𑀬𑁆𑀬𑀲𑀢𑁆𑀢𑀸 𑀩𑀳𑀽 𑀳𑁄𑀦𑁆𑀢𑀺, 𑀢𑀢𑁆𑀣 𑀘𑀺𑀭𑀫𑁆𑀧𑀺 𑀯𑀲𑀦𑁆𑀢𑀸 𑀢𑁂 𑀯𑀺𑀦𑁂𑀢𑁆𑀯𑀸 𑀯𑀺𑀦𑁂𑀬𑁆𑀬𑀲𑀼𑀜𑁆𑀜𑀕𑀸𑀫𑀸𑀤𑀻𑀲𑀼 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀢𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀩𑀳𑀼𑀯𑀺𑀦𑁂𑀬𑁆𑀬𑀓𑁂𑀲𑀼 𑀕𑀸𑀫𑀸𑀤𑀻𑀲𑀼 𑀯𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄𑀬𑁂𑀯 𑀘 𑀅𑀢𑀺𑀔𑀼𑀤𑁆𑀤𑀓𑁂𑀧𑀺 𑀅𑀦𑁆𑀢𑀺𑀫𑀫𑀡𑁆𑀟𑀮𑁂 𑀉𑀧𑀦𑀺𑀲𑁆𑀲𑀬𑀯𑀦𑁆𑀢𑀸𑀦𑀁 𑀩𑀳𑀼𑀪𑀸𑀯𑀢𑁄 𑀢𑀸𑀯 𑀩𑀳𑀼𑀫𑁆𑀧𑀺 𑀓𑀸𑀮𑀁 𑀲𑀢𑁆𑀢𑀫𑀸𑀲𑀧𑀭𑀺𑀬𑀦𑁆𑀢𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺.

𑀲𑀦𑁆𑀢𑀲𑀪𑀸𑀯𑀢𑁆𑀢𑀸 ¶ 𑀓𑀺𑀮𑁂𑀲𑀲𑀫𑀡𑀳𑁂𑀢𑀼𑀢𑀸𑀬 𑀯𑀸 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀁, 𑀲𑀼𑀔𑀓𑀸𑀭𑀡𑀢𑀸𑀬 𑀘 𑀲𑀼𑀔𑀦𑁆𑀢𑀺 𑀆𑀳 ‘‘𑀲𑀦𑁆𑀢𑀁 𑀲𑀼𑀔𑀁 𑀦𑀺𑀩𑁆𑀩𑀸𑀦𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀢𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀽𑀢𑀸𑀬 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀇𑀤𑀜𑁆𑀘 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀦𑀼𑀲𑁆𑀲𑀸 𑀧𑀦 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀩𑁄𑀥𑀦𑁂𑀬𑁆𑀬𑀸 ¶ 𑀳𑁄𑀦𑁆𑀢𑀺. 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑀫𑀯𑀮𑁄𑀓𑀦𑀦𑁆𑀢𑀺 𑀧𑀞𑀫𑀁 𑀫𑀳𑀸𑀓𑀭𑀼𑀡𑀸𑀬 𑀨𑀭𑀺𑀢𑁆𑀯𑀸 𑀧𑀘𑁆𑀙𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀦𑀁 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀲𑀫𑁄𑀮𑁄𑀓𑀦𑀁. 𑀩𑀼𑀤𑁆𑀥𑀸 𑀓𑀺𑀭 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀬𑁂 𑀲𑀢𑁆𑀢𑀸 𑀪𑀩𑁆𑀩𑀸 𑀧𑀭𑀺𑀧𑀸𑀓𑀜𑀸𑀡𑀸 𑀅𑀚𑁆𑀚𑀬𑁂𑀯 𑀫𑀬𑀸 𑀯𑀺𑀦𑁂𑀢𑀩𑁆𑀩𑀸, 𑀢𑁂 𑀫𑀬𑁆𑀳𑀁 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀲𑀫𑀦𑁆𑀦𑀸𑀳𑀭𑀦𑁆𑀢𑀺. 𑀢𑁂𑀲𑀁 𑀲𑀳 𑀲𑀫𑀦𑁆𑀦𑀸𑀳𑀸𑀭𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀢𑀤𑀸 𑀯𑀺𑀦𑀬𑀽𑀧𑀕𑀸 𑀯𑁂𑀦𑁂𑀬𑁆𑀬𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀏𑀯𑀁 𑀆𑀧𑀸𑀣𑀫𑀸𑀕𑀢𑀸𑀦𑀁 𑀧𑀦 𑀦𑁂𑀲𑀁 𑀉𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑀘𑀭𑀺𑀬𑀁 𑀧𑀼𑀩𑁆𑀩𑀳𑁂𑀢𑀼𑀁 𑀲𑀫𑁆𑀧𑀢𑀺𑀯𑀢𑁆𑀢𑀫𑀸𑀦𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑀺. 𑀯𑁂𑀦𑁂𑀬𑁆𑀬𑀲𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀜𑁆𑀳𑀺 𑀲𑀫𑀦𑁆𑀦𑀸𑀳𑀸𑀭𑁂 𑀓𑀢𑁂 𑀧𑀞𑀫𑀁 𑀦𑁂𑀲𑀁 𑀯𑁂𑀦𑁂𑀬𑁆𑀬𑀪𑀸𑀯𑁂𑀦𑁂𑀯 𑀉𑀧𑀝𑁆𑀞𑀸𑀦𑀁 𑀳𑁄𑀢𑀺. 𑀅𑀣 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀓𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺𑀁 𑀯𑀻𑀫𑀁𑀲𑀫𑀸𑀦𑀸 𑀧𑀼𑀩𑁆𑀩𑀼𑀧𑀦𑀺𑀲𑁆𑀲𑀬𑀸𑀦𑀺 𑀑𑀮𑁄𑀓𑁂𑀦𑁆𑀢𑀺.

𑀑𑀢𑀺𑀡𑁆𑀡𑁂𑀢𑀺 𑀆𑀭𑁄𑀘𑀺𑀢𑁂, 𑀧𑀭𑀺𑀲𑀫𑀚𑁆𑀛𑀁 𑀯𑀸 𑀑𑀢𑀺𑀡𑁆𑀡𑁂. 𑀤𑁆𑀯𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀏𑀓𑁂𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑁆𑀯𑁂 𑀯𑀸𑀭𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀉𑀧𑀓𑀝𑁆𑀞𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁂 𑀘 𑀧𑀯𑀸𑀭𑀡𑀸𑀓𑀸𑀮𑁂 𑀘. 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀪𑀺𑀓𑁆𑀔𑀽 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺. 𑀪𑀕𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 ‘‘𑀓𑀲𑁆𑀫𑀸, 𑀪𑀺𑀓𑁆𑀔𑀯𑁂, 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀺𑀘𑀭𑀣𑀸’’𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀢𑁂 ‘‘𑀪𑀕𑀯𑀸 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀁 𑀆𑀕𑀢𑀫𑁆𑀳, 𑀓𑀫𑁆𑀫𑀝𑁆𑀞𑀸𑀦𑀁 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀘𑀭𑀺𑀬𑀯𑀲𑁂𑀦 𑀭𑀸𑀕𑀘𑀭𑀺𑀢𑀲𑁆𑀲 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁, 𑀫𑁄𑀳𑀘𑀭𑀺𑀢𑀲𑁆𑀲 ‘‘𑀉𑀤𑁆𑀤𑁂𑀲𑁄 𑀧𑀭𑀺𑀧𑀼𑀘𑁆𑀙𑀸 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸 𑀇𑀤𑀁 𑀢𑀼𑀬𑁆𑀳𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀆𑀘𑀺𑀓𑁆𑀔𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀫𑁄𑀳𑀘𑀭𑀺𑀢𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀧𑀦 𑀪𑀸𑀚𑀦𑀪𑀽𑀢𑀁 𑀓𑀸𑀢𑀼𑀁 𑀲𑀫𑁆𑀫𑁄𑀳𑀯𑀺𑀕𑀫𑀸𑀬 ¶ 𑀧𑀞𑀫𑀁 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀲𑀸𑀓𑀘𑁆𑀙𑀸𑀲𑀼 𑀦𑀺𑀬𑁄𑀚𑁂𑀢𑀺. 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀯𑀺𑀲𑁂𑀲𑀢𑁄 𑀧𑀼𑀭𑀺𑀫𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄 𑀲𑀧𑁆𑀧𑀸𑀬𑀸, 𑀢𑀸𑀲𑀁 𑀧𑀦 𑀅𑀦𑀼𑀬𑀼𑀜𑁆𑀚𑀦𑁂 𑀅𑀬𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂𑀦 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀜𑀸𑀡𑀘𑀭𑀺𑀢𑀲𑁆𑀲 𑀧𑀦 𑀫𑀭𑀡𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀸 𑀯𑀺𑀲𑁂𑀲𑀢𑁄 𑀲𑀧𑁆𑀧𑀸𑀬𑀸, 𑀢𑁂𑀲𑀁 𑀉𑀧𑀓𑀸𑀭𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁂 𑀕𑀫𑁆𑀪𑀻𑀭𑁂 𑀲𑀼𑀢𑁆𑀢𑀦𑁆𑀢𑁂 𑀓𑀣𑁂𑀢𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀘𑁂 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀏𑀯 𑀯𑀲𑀦𑁆𑀢𑀺. 𑀦𑁄 𑀘𑁂 𑀳𑁄𑀢𑀺, 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀧𑀺 𑀢𑀢𑁆𑀣 𑀯𑀲𑀦𑁆𑀢𑀸 𑀢𑁂𑀫𑀸𑀲𑀺𑀓𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀳𑁄𑀦𑁆𑀢𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀅𑀭𑀳𑀦𑁆𑀢𑁄𑀧𑀺. 𑀢𑀢𑁄 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀕𑀯𑀸 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 ¶ 𑀕𑀳𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄…𑀧𑁂… 𑀅𑀳𑀁 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢’’𑀦𑁆𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀦𑁆𑀢𑀺, 𑀉𑀧𑀭𑀺 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀬𑀸𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀘 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀁…𑀧𑁂… 𑀉𑀧𑀭𑀺 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀜𑁆𑀘𑀸’’𑀢𑀺.

𑀆𑀬𑀸𑀫𑀸𑀢𑀺 𑀏𑀢𑁆𑀣 𑀆-𑀲𑀤𑁆𑀤𑁄 ‘‘𑀆𑀕𑀘𑁆𑀙𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀆𑀬𑀸𑀫𑀸𑀢𑀺 𑀆𑀕𑀘𑁆𑀙 𑀬𑀸𑀫𑀸’’𑀢𑀺, 𑀏𑀳𑀺 𑀕𑀘𑁆𑀙𑀸𑀫𑀸𑀢𑀺 𑀅𑀢𑁆𑀣𑁄. 𑀆𑀦𑀦𑁆𑀤𑀸𑀢𑀺 𑀪𑀕𑀯𑀸 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸 𑀣𑁂𑀭𑀁 𑀆𑀮𑀧𑀢𑀺, 𑀦 𑀧𑀦 𑀢𑀤𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀸𑀯𑀢𑁄. 𑀧𑀜𑁆𑀘𑀲𑀢𑀧𑀭𑀺𑀫𑀸𑀡𑁄 𑀳𑀺 𑀢𑀤𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀣𑁂𑀭𑁄 𑀧𑀦 ‘‘𑀕𑀡𑁆𑀳𑀣𑀸𑀯𑀼𑀲𑁄 𑀧𑀢𑁆𑀢𑀘𑀻𑀯𑀭𑀸𑀦𑀺, 𑀪𑀕𑀯𑀸 𑀅𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑁄’’𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀺. ‘‘𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀻’’𑀢𑀺 𑀇𑀥 𑀪𑀕𑀯𑀢𑁄𑀢𑀺 𑀲𑀸𑀫𑀺𑀯𑀘𑀦𑀁 𑀆𑀫𑀦𑁆𑀢𑀦𑀯𑀘𑀦𑀫𑁂𑀯 𑀲𑀫𑁆𑀩𑀦𑁆𑀥𑀻𑀅𑀦𑁆𑀢𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀕𑀯𑀢𑁄 𑀯𑀘𑀦𑀁 𑀧𑀝𑀺𑀅𑀲𑁆𑀲𑁄𑀲𑀻’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀢𑁄𑀢𑀺 𑀧𑀦 𑀇𑀤𑀁 𑀧𑀢𑀺𑀲𑁆𑀲𑀯𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀧𑀤𑀸𑀦𑀯𑀘𑀦𑀁 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑁄𑀢𑀻’’𑀢𑀺. 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀏𑀢𑁆𑀣 𑀧𑀝𑀺-𑀲𑀤𑁆𑀤𑁄 𑀅𑀪𑀺𑀫𑀼𑀔𑀯𑀘𑀦𑁄𑀢𑀺 𑀆𑀳 ‘‘𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀲𑀼𑀡𑀻’’𑀢𑀺. 𑀪𑀕𑀯𑀢𑁄 𑀫𑀼𑀔𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀲𑀼𑀡𑀺, 𑀦 𑀉𑀤𑀸𑀲𑀺𑀦𑁄 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀲𑁆𑀲 ¶ 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀆𑀕𑀦𑁆𑀢𑀼𑀓𑀯𑀲𑁂𑀦 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀦𑀕𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀳𑀺 𑀭𑀲𑁆𑀫𑀻𑀳𑀻𑀢𑀺 𑀏𑀢𑁆𑀣 𑀭𑀲-𑀲𑀤𑁆𑀤𑁄 𑀉𑀤𑀓𑀧𑀭𑀺𑀬𑀸𑀬𑁄, 𑀧𑀺𑀜𑁆𑀚𑀭-𑀲𑀤𑁆𑀤𑁄 𑀳𑁂𑀫𑀯𑀡𑁆𑀡𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀲𑀼𑀯𑀡𑁆𑀡𑀚𑀮𑀥𑀸𑀭𑀸 𑀯𑀺𑀬 𑀲𑀼𑀯𑀡𑁆𑀡𑀯𑀡𑁆𑀡𑀸𑀳𑀺 𑀭𑀲𑁆𑀫𑀻𑀳𑀻𑀢𑀺 𑀅𑀢𑁆𑀣𑁄. 𑀲𑀫𑀼𑀚𑁆𑀚𑁄𑀢𑀬𑀫𑀸𑀦𑁄𑀢𑀺 𑀑𑀪𑀸𑀲𑀬𑀫𑀸𑀦𑁄. 𑀅𑀲𑁆𑀲𑀸𑀢𑀺 𑀯𑁂𑀭𑀜𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀪𑀕𑀯𑀦𑁆𑀢𑀁 𑀉𑀧𑀦𑀺𑀲𑀻𑀤𑀺𑀢𑀼𑀓𑀸𑀫𑁄𑀢𑀺 𑀪𑀕𑀯𑀦𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑁄, 𑀪𑀕𑀯𑀢𑁄 𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑀼𑀓𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑁆𑀭𑀸𑀳𑁆𑀫𑀡 𑀢𑀬𑀸 𑀦𑀺𑀫𑀦𑁆𑀢𑀺𑀢𑀸 𑀯𑀲𑁆𑀲𑀁𑀯𑀼𑀢𑁆𑀣𑀸 𑀅𑀫𑁆𑀳𑀸𑀢𑀺 𑀧𑀸𑀴𑀺𑀬𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀸𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀤𑀸𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀦𑁄 𑀅𑀲𑀦𑁆𑀢𑁄𑀢𑀺 𑀦𑁂𑀯 𑀅𑀯𑀺𑀚𑁆𑀚𑀫𑀸𑀦𑁄, 𑀓𑀺𑀦𑁆𑀢𑀼 𑀯𑀺𑀚𑁆𑀚𑀫𑀸𑀦𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀯𑀺𑀦𑀸 𑀯𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀲𑀸𑀫𑀜𑁆𑀜𑀯𑀘𑀦𑀢𑁄 𑀏𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀦𑁄 𑀦𑀢𑁆𑀣𑀻𑀢𑀺 𑀦𑁄 𑀅𑀫𑁆𑀳𑀸𑀓𑀁 𑀦𑀢𑁆𑀣𑀺. 𑀦𑁄𑀢𑀺 𑀯𑀸 𑀏𑀢𑀲𑁆𑀲 𑀯𑀺𑀯𑀭𑀡𑀁 𑀦𑀢𑁆𑀣𑀻𑀢𑀺. 𑀓𑁂𑀲𑀁 𑀅𑀤𑀸𑀢𑀼𑀓𑀸𑀫𑀢𑀸 𑀯𑀺𑀬𑀸𑀢𑀺 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀦𑁆𑀢𑀺 𑀏𑀢𑁆𑀣 𑀯𑀺𑀢𑁆𑀢𑀻𑀢𑀺 𑀢𑀼𑀝𑁆𑀞𑀺, 𑀯𑀺𑀢𑁆𑀢𑀺𑀬𑀸 𑀉𑀧𑀓𑀭𑀡𑀁 𑀯𑀺𑀢𑁆𑀢𑀽𑀧𑀓𑀭𑀡𑀁, 𑀢𑀼𑀝𑁆𑀞𑀺𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀽𑀢𑀁 𑀥𑀦𑀥𑀜𑁆𑀜𑀚𑀸𑀢𑀭𑀽𑀧𑀭𑀚𑀢𑀦𑀸𑀦𑀸𑀯𑀺𑀥𑀸𑀮𑀗𑁆𑀓𑀸𑀭𑀲𑀼𑀯𑀡𑁆𑀡𑀪𑀸𑀚𑀦𑀸𑀤𑀺𑀪𑁂𑀤𑀁 𑀯𑀺𑀢𑁆𑀢𑀽𑀧𑀓𑀭𑀡𑀫𑁂𑀢𑁂𑀲𑀦𑁆𑀢𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸, 𑀢𑁂𑀲𑀁 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀁 𑀫𑀘𑁆𑀙𑀭𑀻𑀦𑀁 𑀬𑀣𑀸 𑀅𑀤𑀸𑀢𑀼𑀓𑀸𑀫𑀢𑀸, 𑀏𑀯𑀁 𑀦𑁄 𑀅𑀤𑀸𑀢𑀼𑀓𑀸𑀫𑀢𑀸𑀧𑀺 ¶ 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀢𑀁 𑀓𑀸𑀭𑀡𑀁, 𑀢𑀁 𑀓𑀺𑀘𑁆𑀘𑀁 𑀯𑀸. 𑀏𑀢𑁆𑀣𑀸𑀢𑀺 𑀖𑀭𑀸𑀯𑀸𑀲𑁂. 𑀤𑀼𑀢𑀺𑀬𑁂 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀢𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀸𑀫𑀲𑀦𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸. 𑀤𑀼𑀢𑀺𑀬𑁂 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀬𑀦𑁆𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄.

𑀅𑀮𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀘𑀺𑀦𑁆𑀢𑀸𑀬𑀸𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀩𑁆𑀭𑀸𑀳𑁆𑀫𑀡 𑀦𑁂𑀢𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑁂𑀦 𑀓𑀢𑀁, 𑀅𑀣 𑀔𑁄 𑀫𑀸𑀭𑀸𑀯𑀝𑁆𑀝𑀦𑁂𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑀁 𑀲𑀜𑁆𑀜𑀸𑀧𑁂𑀢𑁆𑀯𑀸. 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬𑀸𑀢𑀺 𑀬𑀸𑀤𑀺𑀲𑀻 𑀢𑀤𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺, 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀤𑀸 𑀢𑀸𑀤𑀺𑀲𑀲𑁆𑀲 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀓𑁂𑀯𑀮𑀁 𑀅𑀩𑁆𑀪𑀦𑁆𑀢𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀏𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑁂 𑀓𑀼𑀲𑀮𑁂 ¶ 𑀥𑀫𑁆𑀫𑁂. 𑀢𑀢𑁆𑀣𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀬𑀣𑀸𑀲𑀫𑀸𑀤𑀧𑀺𑀢𑁂. 𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀁. 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀉𑀧𑀭𑀽𑀧𑀭𑀺 𑀦𑀺𑀯𑁂𑀲𑁂𑀢𑁆𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀲𑁆𑀲 𑀉𑀲𑁆𑀲𑀸𑀳𑀚𑀦𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸’’𑀢𑀺. 𑀏𑀯𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀉𑀲𑁆𑀲𑀸𑀳𑀢𑁄 𑀏𑀯𑀭𑀽𑀧𑀕𑀼𑀡𑀲𑀫𑀗𑁆𑀕𑀺𑀢𑀸 𑀘 𑀦𑀺𑀬𑀫𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀲𑀫𑁆𑀧𑀸𑀤𑀦𑀦𑁆𑀢𑀺 𑀏𑀯𑀁 𑀲𑀉𑀲𑁆𑀲𑀸𑀳𑀢𑀸𑀬 𑀅𑀜𑁆𑀜𑁂𑀳𑀺 𑀘 𑀢𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀳𑀝𑁆𑀞𑀢𑀼𑀝𑁆𑀞𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸.

𑀬𑀤𑀺 𑀪𑀕𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺, 𑀅𑀣 𑀓𑀲𑁆𑀫𑀸 𑀲𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀺? 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀢𑀣𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀤𑀺𑀧𑀺 𑀢𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑁄 𑀦𑀢𑁆𑀣𑀺, 𑀆𑀬𑀢𑀺𑀁 𑀧𑀦 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀸 𑀘 𑀲𑀩𑁆𑀩𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀥𑀫𑁆𑀫𑀓𑀣𑀸 𑀅𑀳𑁄𑀲𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀪𑀕𑀯𑀢𑁄 𑀦𑀺𑀭𑀢𑁆𑀣𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀺. 𑀢𑁂𑀫𑀸𑀲𑀺𑀓𑁄𑀧𑀺 𑀤𑁂𑀬𑁆𑀬𑀥𑀫𑁆𑀫𑁄𑀢𑀺 𑀢𑁂𑀫𑀸𑀲𑀁 𑀤𑀸𑀢𑀩𑁆𑀩𑁄𑀧𑀺 𑀤𑁂𑀬𑁆𑀬𑀥𑀫𑁆𑀫𑁄. 𑀬𑀁 𑀤𑀺𑀯𑀲𑀦𑁆𑀢𑀺 𑀬𑀲𑁆𑀫𑀺𑀁 𑀤𑀺𑀯𑀲𑁂.

𑁨𑁩. 𑀩𑀼𑀤𑁆𑀥𑀧𑀭𑀺𑀡𑀸𑀬𑀓𑀦𑁆𑀢𑀺 𑀩𑀼𑀤𑁆𑀥𑁄 𑀧𑀭𑀺𑀡𑀸𑀬𑀓𑁄 𑀏𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀧𑀭𑀺𑀡𑀸𑀬𑀓𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀢𑀁 𑀩𑀼𑀤𑁆𑀥𑀧𑀭𑀺𑀡𑀸𑀬𑀓𑀁, 𑀩𑀼𑀤𑁆𑀥𑀚𑁂𑀝𑁆𑀞𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸𑀢𑀺 𑀬𑀸𑀯 𑀅𑀢𑁆𑀣𑁄, 𑀢𑀸𑀯 𑀪𑁄𑀚𑀦𑁂𑀦 𑀢𑀤𑀸 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀸𑀢𑀼𑀁 𑀉𑀧𑀦𑀻𑀢𑀪𑀺𑀓𑁆𑀔𑀸𑀬 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀳𑀢𑁆𑀣𑀲𑀜𑁆𑀜𑀸𑀬 𑀫𑀼𑀔𑀯𑀺𑀓𑀸𑀭𑁂𑀦 𑀯𑀘𑀻𑀪𑁂𑀤𑁂𑀦 𑀯𑀸 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀏𑀢𑁆𑀣 𑀑𑀦𑀻𑀢𑁄 𑀧𑀢𑁆𑀢𑀢𑁄 𑀧𑀸𑀡𑀺 𑀏𑀢𑀲𑁆𑀲𑀸𑀢𑀺 𑀑𑀦𑀻𑀢𑀧𑀢𑁆𑀢𑀧𑀸𑀡𑀻𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀯𑀺𑀲𑀬𑁄𑀬𑀁 𑀲𑀤𑁆𑀤𑁄 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀢𑀺 𑀆𑀳 ‘‘𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺’’𑀦𑁆𑀢𑀺𑀆𑀤𑀺. ‘‘𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀑𑀦𑀺𑀢𑁆𑀢𑀁 𑀦𑀸𑀦𑀸𑀪𑀽𑀢𑀁 𑀯𑀺𑀦𑀸𑀪𑀽𑀢𑀁 𑀆𑀫𑀺𑀲𑀸𑀧𑀦𑀬𑀦𑁂𑀦 𑀯𑀸 𑀲𑀼𑀘𑀺𑀓𑀢𑀁 𑀧𑀢𑁆𑀢𑀁 𑀧𑀸𑀡𑀺𑀢𑁄 𑀅𑀲𑁆𑀲𑀸𑀢𑀺 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺 ¶ , 𑀢𑀁 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺𑀁, 𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀼𑀡𑁆𑀡𑀧𑀝𑁆𑀝𑀧𑀝𑁂 𑀘𑀸𑀢𑀺 𑀧𑀢𑁆𑀢𑀼𑀡𑁆𑀡𑀧𑀝𑁂 𑀘 𑀧𑀝𑁆𑀝𑀧𑀝𑁂 𑀘. 𑀢𑀢𑁆𑀣 𑀧𑀢𑁆𑀢𑀼𑀡𑁆𑀡𑀧𑀤𑁂𑀲𑁂 𑀪𑀯𑀸 𑀧𑀢𑁆𑀢𑀼𑀡𑁆𑀡𑀸, 𑀓𑁄𑀲𑀺𑀬𑀯𑀺𑀲𑁂𑀲𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀝𑁆𑀝𑀸𑀦𑀺 𑀧𑀦 𑀘𑀻𑀦𑀧𑀝𑀸𑀦𑀺. 𑀆𑀬𑁄𑀕𑀸𑀤𑀻𑀲𑀼 𑀆𑀬𑁄𑀕𑁄𑀢𑀺 𑀧𑀝𑀺𑀆𑀬𑁄𑀕𑁄, 𑀅𑀁𑀲𑀩𑀤𑁆𑀥𑀓𑀁 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀲𑀼. 𑀪𑁂𑀲𑀚𑁆𑀚𑀢𑁂𑀮𑀸𑀦𑀦𑁆𑀢𑀺 𑀪𑁂𑀲𑀚𑁆𑀚𑀲𑀫𑁆𑀧𑀸𑀓𑁂𑀦 𑀲𑀸𑀥𑀺𑀢𑀢𑁂𑀮𑀸𑀦𑀁. 𑀢𑀼𑀫𑁆𑀩𑀸𑀦𑀻𑀢𑀺 ¶ 𑀘𑀫𑁆𑀫𑀫𑀬𑀢𑁂𑀮𑀪𑀸𑀚𑀦𑀸𑀦𑀺. 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳𑀲𑁆𑀲𑀕𑁆𑀖𑀦𑀓𑀁 𑀢𑁂𑀮𑀫𑀤𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀫𑀳𑀸𑀬𑀸𑀕𑀁 𑀬𑀚𑀺𑀢𑁆𑀯𑀸𑀢𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸. 𑀲𑀧𑀼𑀢𑁆𑀢𑀤𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁. 𑀢𑁂𑀫𑀸𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀢𑁂𑀫𑀸𑀲𑀁 𑀲𑁄𑀢𑀩𑁆𑀩𑀥𑀫𑁆𑀫𑀁 𑀅𑀚𑁆𑀚𑁂𑀯 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀲𑁆𑀲 𑀢𑀁 𑀅𑀚𑁆𑀛𑀸𑀲𑀬𑀁 𑀧𑀽𑀭𑁂𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀁 𑀓𑀼𑀭𑀼𑀫𑀸𑀦𑁄’’𑀢𑀺. 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀢𑀺 𑀅𑀦𑀼𑀕𑀦𑁆𑀢𑁆𑀯𑀸.

𑀩𑀼𑀤𑁆𑀥𑀸𑀦𑀁 𑀅𑀦𑀪𑀺𑀭𑀢𑀺𑀧𑀭𑀺𑀢𑀲𑁆𑀲𑀺𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀬𑀣𑀸𑀚𑁆𑀛𑀸𑀲𑀬𑀁 𑀬𑀣𑀸𑀭𑀼𑀘𑀺𑀢𑀁 𑀯𑀸𑀲𑀁 𑀯𑀲𑀺𑀢𑁆𑀯𑀸’’𑀢𑀺. 𑀅𑀪𑀺𑀭𑀦𑁆𑀢𑀁 𑀅𑀪𑀺𑀭𑀢𑀻𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀅𑀪𑀺𑀭𑀦𑁆𑀢𑀲𑀤𑁆𑀤𑁄 𑀘𑀸𑀬𑀁 𑀅𑀪𑀺𑀭𑀼𑀘𑀺𑀧𑀭𑀺𑀬𑀸𑀬𑁄, 𑀦 𑀅𑀲𑁆𑀲𑀸𑀤𑀧𑀭𑀺𑀬𑀸𑀬𑁄. 𑀅𑀲𑁆𑀲𑀸𑀤𑀯𑀲𑁂𑀦 𑀘 𑀓𑀢𑁆𑀣𑀘𑀺 𑀯𑀲𑀦𑁆𑀢𑀲𑁆𑀲 𑀅𑀲𑁆𑀲𑀸𑀤𑀯𑀢𑁆𑀣𑀼𑀯𑀺𑀕𑀫𑀦𑁂𑀦 𑀲𑀺𑀬𑀸 𑀢𑀲𑁆𑀲 𑀢𑀢𑁆𑀣 𑀅𑀦𑀪𑀺𑀭𑀢𑀺, 𑀢𑀬𑀺𑀤𑀁 𑀔𑀻𑀡𑀸𑀲𑀯𑀸𑀦𑀁 𑀦𑀢𑁆𑀣𑀺, 𑀧𑀕𑁂𑀯 𑀩𑀼𑀤𑁆𑀥𑀸𑀦𑀁, 𑀢𑀲𑁆𑀫𑀸 𑀅𑀪𑀺𑀭𑀢𑀺𑀯𑀲𑁂𑀦 𑀓𑀢𑁆𑀣𑀘𑀺 𑀯𑀲𑀺𑀢𑁆𑀯𑀸 𑀢𑀤𑀪𑀸𑀯𑀢𑁄 𑀅𑀜𑁆𑀜𑀢𑁆𑀣 𑀕𑀫𑀦𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺, 𑀯𑀺𑀦𑁂𑀬𑁆𑀬𑀯𑀺𑀦𑀬𑀦𑀢𑁆𑀣𑀁 𑀧𑀦 𑀓𑀢𑁆𑀣𑀘𑀺 𑀯𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 𑀯𑀺𑀦𑁂𑀬𑁆𑀬𑀯𑀺𑀦𑀬𑀢𑁆𑀣𑀫𑁂𑀯 𑀢𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀬𑀣𑀸𑀭𑀼𑀘𑀺. 𑀲𑁄𑀭𑁂𑀬𑁆𑀬𑀸𑀤𑀻𑀦𑀺 𑀅𑀦𑀼𑀧𑀕𑀫𑁆𑀫𑀸𑀢𑀺 𑀫𑀳𑀸𑀫𑀡𑁆𑀟𑀮𑀘𑀸𑀭𑀺𑀓𑀸𑀬 𑀯𑀻𑀣𑀺𑀪𑀽𑀢𑀸𑀦𑀺 𑀲𑁄𑀭𑁂𑀬𑁆𑀬𑀦𑀕𑀭𑀸𑀤𑀻𑀦𑀺 𑀅𑀦𑀼𑀧𑀕𑀦𑁆𑀢𑁆𑀯𑀸. 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑀦𑁆𑀢𑀺 𑀕𑀸𑀫𑀲𑁆𑀲𑀧𑀺 𑀅𑀥𑀺𑀯𑀘𑀦𑀁 𑀢𑀺𑀢𑁆𑀣𑀲𑁆𑀲𑀧𑀺. 𑀕𑀗𑁆𑀕𑀁 𑀦𑀤𑀺𑀦𑁆𑀢𑀺 𑀕𑀗𑁆𑀕𑀁 𑀦𑀸𑀫 𑀦𑀤𑀺𑀁. 𑀢𑀤𑀯𑀲𑀭𑀻𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂𑀦 𑀅𑀯𑀲𑀭𑀺 𑀢𑀤𑀯𑀲𑀭𑀻’’𑀢𑀺.

𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀧𑀲𑀸𑀤𑀁 𑀚𑀦𑁂𑀢𑀻𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸, 𑀢𑀲𑁆𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬. 𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁, 𑀇𑀤𑀦𑁆𑀢𑀺 𑀯𑀓𑁆𑀔𑀫𑀸𑀦𑀓𑀸𑀭𑀡𑀯𑀘𑀦𑀸𑀧𑁂𑀓𑁆𑀔𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀁 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬𑀸’’𑀢𑀺, 𑀢𑀢𑁆𑀭 𑀬𑀸 𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑀺 𑀲𑀁𑀯𑀡𑁆𑀡𑀦𑀸 𑀯𑀼𑀢𑁆𑀢𑀸 ¶ , 𑀢𑀲𑁆𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀁𑀯𑀡𑁆𑀡𑀦𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀪𑀸𑀯𑁂 𑀲𑀩𑁆𑀩𑀲𑁄 𑀧𑀲𑀸𑀤𑀚𑀦𑀓𑀢𑁆𑀢𑁂 𑀇𑀤𑀁 𑀳𑁄𑀢𑀺. 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄’’𑀢𑀺𑀆𑀤𑀺.

𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄𑀢𑀺 ¶ ‘‘𑀉𑀧𑀸𑀮𑀺 𑀤𑀸𑀲𑀓𑁄’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩). 𑀯𑀼𑀢𑁆𑀢𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄. 𑀦𑀺𑀤𑀸𑀦𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄𑀢𑀺 𑀦𑀺𑀤𑀸𑀦𑀧𑁆𑀧𑀪𑁂𑀤𑀤𑀻𑀧𑀦𑀢𑁄 𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄 𑀘. 𑀢𑀢𑁆𑀣 𑀩𑀸𑀳𑀺𑀭𑀦𑀺𑀤𑀸𑀦𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀲𑀺𑀓𑁆𑀔𑀸𑀧𑀤𑀦𑀺𑀤𑀸𑀦𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑀸𑀦𑀧𑁆𑀧𑀪𑁂𑀤𑀤𑀻𑀧𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀣𑁂𑀭𑀯𑀸𑀤𑀧𑁆𑀧𑀓𑀸𑀲𑀦𑀁 𑀧𑀦 𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀁. 𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄𑀢𑀺 ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁮𑁪) 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀸𑀦𑀁 𑀧𑀭𑁂𑀲𑀁 𑀮𑀤𑁆𑀥𑀺𑀦𑀺𑀭𑀸𑀓𑀭𑀡𑀢𑁄, 𑀢𑀢𑁄𑀬𑁂𑀯 𑀘 𑀅𑀢𑁆𑀢𑀦𑁄 𑀲𑀫𑀬𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄.

𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀢𑁄𑀢𑀺 𑀧𑀸𑀞𑀲𑁄𑀥𑀦𑁂𑀦 𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑀸 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀤𑀦𑀺𑀧𑁆𑀨𑀢𑁆𑀢𑀺𑀤𑀲𑁆𑀲𑀦𑀁 𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀁. 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄𑀢𑀺 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀧𑀤𑀪𑀸𑀚𑀦𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀦𑀬𑀪𑁂𑀤𑀤𑀲𑁆𑀲𑀦𑀢𑁄. 𑀲𑀫𑁆𑀧𑀲𑁆𑀲𑀢𑀦𑁆𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀸𑀦𑀁, 𑀉𑀧𑀧𑀭𑀺𑀓𑁆𑀔𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀸𑀲𑀸𑀤𑀺𑀓𑀦𑁆𑀢𑀺 𑀅𑀧𑁆𑀧𑀲𑀸𑀤𑀸𑀯𑀳𑀁. 𑀏𑀢𑁆𑀣𑀸𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬. 𑀲𑀫𑁆𑀧𑀲𑁆𑀲𑀢𑀁 𑀯𑀺𑀜𑁆𑀜𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯 𑀧𑀯𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀲𑁆𑀲 𑀓𑁂𑀦 𑀤𑁂𑀲𑀺𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀢𑀺 𑀆𑀳 ‘‘𑀯𑀺𑀦𑀬𑀲𑁆𑀲𑀸’’𑀢𑀺𑀆𑀤𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.