📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀲𑀸𑀭𑀢𑁆𑀣𑀤𑀻𑀧𑀦𑀻-𑀝𑀻𑀓𑀸 (𑀤𑀼𑀢𑀺𑀬𑁄 𑀪𑀸𑀕𑁄)

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁪. 𑀅𑀦𑀼𑀧𑀤𑀯𑀡𑁆𑀡𑀦𑀦𑁆𑀢𑀺 ¶ ¶ 𑀧𑀤𑀁 𑀧𑀤𑀁 𑀧𑀝𑀺𑀯𑀡𑁆𑀡𑀦𑀁, 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀡𑁆𑀡𑀦𑀁 𑀯𑀸. 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀺𑀦𑀸 𑀓𑀺𑀘𑁆𑀘𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀲𑁆𑀲 𑀯𑀺𑀓𑁆𑀓𑀺𑀡𑀦𑀁 𑀪𑀡𑁆𑀟𑀧𑁆𑀧𑀬𑁄𑀚𑀦𑀁, 𑀤𑀸𑀢𑀼𑀁 ¶ 𑀲𑀗𑁆𑀓𑁂𑀢𑀺𑀢𑁂 𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀕𑀳𑀡𑀁 𑀉𑀤𑁆𑀥𑀸𑀭𑁄, ‘‘𑀅𑀲𑀼𑀓𑀲𑁆𑀫𑀺𑀁 𑀤𑀺𑀯𑀲𑁂 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀢𑀼𑀧𑁆𑀧𑀸𑀤𑀦𑀁 𑀲𑀸𑀭𑀡𑀁. 𑀘𑀢𑀼𑀩𑁆𑀩𑀺𑀥𑀸𑀬𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀸𑀦𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀬, 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀯𑀲𑁂𑀦 𑀯𑀸. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀳𑁂𑀢𑀼𑀅𑀢𑁆𑀣𑁄 𑀅𑀬𑀁 𑀤𑀺𑀲𑁆𑀯𑀸𑀦-𑀲𑀤𑁆𑀤𑁄 𑀅𑀲𑀫𑀸𑀦𑀓𑀢𑁆𑀢𑀼𑀓𑁄 𑀬𑀣𑀸 ‘‘𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀳𑁄𑀢𑀺, 𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺. 𑀤𑀲𑁆𑀲𑀦𑀓𑀸𑀭𑀡𑀸 𑀳𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀦𑀁 𑀅𑀳𑁄𑀲𑀺. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲𑀧𑀺 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑀺𑀬 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀲𑁆𑀲 𑀣𑁂𑀭𑀲𑁆𑀲𑀧𑀺 𑀓𑀢𑀧𑀸𑀧𑀓𑀫𑁆𑀫𑀫𑀽𑀮𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀅𑀥𑀺𑀕𑀫𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺.

𑀓𑀺𑀁 𑀧𑀦 𑀬𑁂𑀲𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂𑀧𑀺 𑀢𑁂𑀲𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺? 𑀆𑀫 𑀳𑁄𑀢𑀺, 𑀦 𑀧𑀦 𑀩𑀼𑀤𑁆𑀥𑁂 𑀧𑀝𑀺𑀘𑁆𑀘. 𑀩𑀼𑀤𑁆𑀥𑀸 𑀳𑀺 𑀧𑀭𑁂𑀲𑀁 ¶ 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑀚𑀸𑀢𑀸 𑀢𑀢𑁆𑀣 𑀦𑀺𑀭𑀦𑁆𑀢𑀭𑀁 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀝𑀺𑀘𑁆𑀘 𑀢𑁂𑀲𑀁 𑀅𑀦𑁆𑀢𑀭𑀸𑀬𑁄 𑀦 𑀳𑁄𑀢𑀺, 𑀅𑀣 𑀔𑁄 𑀓𑀺𑀭𑀺𑀬𑀸𑀧𑀭𑀺𑀳𑀸𑀦𑀺𑀬𑀸 𑀯𑀸 𑀧𑀸𑀧𑀫𑀺𑀢𑁆𑀢𑀢𑀸𑀬 𑀯𑀸 𑀳𑁄𑀢𑀺, 𑀓𑀺𑀭𑀺𑀬𑀸𑀧𑀭𑀺𑀳𑀸𑀦𑀺 𑀘 𑀤𑁂𑀲𑀓𑀲𑁆𑀲 𑀢𑀲𑁆𑀲𑁂𑀯 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀢𑀚𑁆𑀚𑀧𑀬𑁄𑀕𑀸𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸, 𑀤𑁂𑀲𑀓𑀯𑀲𑁂𑀦 𑀧𑀦𑁂𑀢𑁆𑀣 𑀧𑀭𑀺𑀳𑀸𑀦𑀺 𑀲𑀸𑀯𑀓𑀸𑀦𑀁 𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀦 𑀩𑀼𑀤𑁆𑀥𑀸𑀦𑀁 𑀯𑀲𑁂𑀦. 𑀢𑀣𑀸 𑀳𑀺 𑀲𑀘𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀥𑀦𑀜𑁆𑀚𑀸𑀦𑀺𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀲𑀬𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀺𑀲𑁆𑀲, 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀦𑁆𑀦𑁄 𑀅𑀪𑀯𑀺𑀲𑁆𑀲. 𑀏𑀯𑀁 𑀢𑀸𑀯 𑀤𑁂𑀲𑀓𑀲𑁆𑀲 𑀯𑀲𑁂𑀦 𑀓𑀺𑀭𑀺𑀬𑀸𑀧𑀭𑀺𑀳𑀸𑀦𑀺𑀬𑀸 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀲𑀘𑁂 𑀧𑁂𑀲𑁆𑀲𑁄 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑁂𑀬𑁆𑀬, 𑀬𑀸𑀯 𑀢𑀲𑁆𑀲 𑀪𑀕𑀯𑀸 𑀅𑀢𑁆𑀢𑀦𑁆𑀢𑀧𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦 𑀲𑀁𑀬𑀼𑀢𑁆𑀢𑁄 𑀅𑀪𑀯𑀺𑀲𑁆𑀲. 𑀏𑀯𑀁 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀓𑀺𑀭𑀺𑀬𑀸𑀧𑀭𑀺𑀳𑀸𑀦𑀺𑀬𑀸 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺 𑀦𑀸𑀫. 𑀇𑀫𑀲𑁆𑀲 𑀳𑀺 𑀉𑀧𑀸𑀲𑀓𑀲𑁆𑀲 𑀓𑀺𑀭𑀺𑀬𑀸𑀧𑀭𑀺𑀳𑀸𑀦𑀺 𑀚𑀸𑀢𑀸 𑀅𑀧𑀭𑀺𑀦𑀺𑀝𑁆𑀞𑀺𑀢𑀸𑀬 𑀤𑁂𑀲𑀦𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀢𑁆𑀢𑀸. 𑀲𑀘𑁂 𑀅𑀚𑀸𑀢𑀲𑀢𑁆𑀢𑀼 𑀤𑁂𑀯𑀤𑀢𑁆𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀦𑀸𑀓𑀭𑀺𑀲𑁆𑀲, 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀓𑀣𑀺𑀢𑀤𑀺𑀯𑀲𑁂 𑀲𑁄𑀢𑀸𑀧𑀦𑁆𑀦𑁄 𑀅𑀪𑀯𑀺𑀲𑁆𑀲, 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀖𑀸𑀢𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀦 𑀦𑀸𑀳𑁄𑀲𑀺. 𑀏𑀯𑀁 𑀧𑀸𑀧𑀫𑀺𑀢𑁆𑀢𑀢𑀸𑀬 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀲𑀼𑀤𑀺𑀦𑁆𑀦𑀲𑁆𑀲𑀧𑀺 𑀧𑀸𑀧𑀫𑀺𑀢𑁆𑀢𑀯𑀲𑁂𑀦 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀢𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑁄 𑀦𑀸𑀪𑀯𑀺𑀲𑁆𑀲, 𑀦 𑀢𑀁𑀫𑀽𑀮𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀅𑀥𑀺𑀕𑀫𑀦𑁆𑀢𑀭𑀸𑀬𑁄 𑀅𑀪𑀯𑀺𑀲𑁆𑀲.

𑀬𑀦𑁆𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑀫𑁂𑀢’’𑀦𑁆𑀢𑀺. ‘‘𑀥𑀫𑁆𑀫𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺 𑀓𑀺𑀭𑀺𑀬𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄 𑀏𑀯 𑀳𑀺 𑀅𑀢𑁆𑀣𑁄 ‘‘𑀬𑀦𑁆𑀦𑀽𑀦𑀸’’𑀢𑀺 𑀦𑀺𑀧𑀸𑀢𑀧𑀤𑁂𑀦 𑀚𑁄𑀢𑀻𑀬𑀢𑀺. 𑀅𑀳𑀁 𑀬𑀦𑁆𑀦𑀽𑀦 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀬𑀦𑁆𑀦𑀽𑀦𑀸𑀢𑀺 𑀘 𑀬𑀤𑀺 𑀧𑀦𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀦𑀸𑀢𑀺 𑀇𑀤𑀫𑁆𑀧𑀺 𑀳𑀺 𑀢𑁂𑀦 𑀲𑀫𑀸𑀦𑀢𑁆𑀣𑀫𑁂𑀯. 𑀬𑀁 𑀥𑀫𑁆𑀫𑀁 𑀲𑀼𑀡𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀴𑀸𑀭𑀼𑀴𑀸𑀭𑀚𑀦𑀸𑀢𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀺𑀉𑀴𑀸𑀭𑀼𑀴𑀸𑀭𑀚𑀦𑀸𑀓𑀺𑀡𑁆𑀡𑀸 ¶ . 𑀲𑀘𑁂 𑀅𑀬𑀫𑁆𑀧𑀺 𑀧𑀞𑀫𑀁 𑀆𑀕𑀘𑁆𑀙𑁂𑀬𑁆𑀬, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀅𑀭𑀳𑀭𑀽𑀧𑁄𑀢𑀺 𑀆𑀳 ‘‘𑀧𑀘𑁆𑀙𑀸 𑀆𑀕𑀢𑁂𑀦𑀸’’𑀢𑀺. 𑀲𑀺𑀓𑁆𑀔𑀢𑁆𑀢𑀬𑀽𑀧𑀲𑀁𑀳𑀺𑀢𑀦𑁆𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀲𑀺𑀓𑁆𑀔𑀢𑁆𑀢𑀬𑀬𑀼𑀢𑁆𑀢𑀁. 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀧𑀺 𑀲𑀼𑀢𑁆𑀯𑀸-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀲𑀯𑀦𑀓𑀸𑀭𑀡𑀸 𑀏𑀢𑀤𑀳𑁄𑀲𑀻𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲…𑀧𑁂… 𑀏𑀢𑀤𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀁 𑀧𑀦𑀲𑁆𑀲 𑀬𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀦𑁆𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀁.

𑀲𑀗𑁆𑀔𑁂𑀧𑀓𑀣𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 𑀲𑀫𑀸𑀲𑀢𑁄 𑀅𑀢𑁆𑀣𑀯𑀡𑁆𑀡𑀦𑀸. 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦. 𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄𑀢𑀺 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸’’𑀢𑀺 (𑀫. 𑀦𑀺. 𑁧.𑁨𑁩𑁪; 𑁨.𑁪𑁨; 𑀧𑀸𑀘𑀺. 𑁪𑁧𑁭; 𑀫𑀳𑀸𑀦𑀺. 𑁩; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁪𑁭) 𑀘 𑀆𑀤𑀺𑀦𑀸 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀅𑀯𑀩𑀼𑀚𑁆𑀛𑀸𑀫𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀉𑀧𑀧𑀭𑀺𑀓𑁆𑀔𑀢𑁄 𑀯𑀻𑀫𑀁𑀲𑀦𑁆𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀳𑁄𑀢𑀺 𑀏𑀯𑀁 𑀉𑀧𑀝𑁆𑀞𑀸𑀢𑀺. 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑁂𑀝𑁆𑀞𑀘𑀭𑀺𑀬𑀁. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 𑀅𑀔𑀡𑁆𑀟𑀺𑀢𑀁 𑀓𑀢𑁆𑀯𑀸, 𑀅𑀔𑀡𑁆𑀟𑀅𑀘𑁆𑀙𑀺𑀤𑁆𑀤𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀯𑀸. 𑀅𑀔𑀡𑁆𑀟𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁. 𑀘𑀭𑀺𑀫𑀓𑀘𑀺𑀢𑁆𑀢𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀁. 𑀓𑀺𑀜𑁆𑀘𑀺𑀧𑀺 𑀏𑀓𑀤𑁂𑀲𑀁 𑀅𑀲𑁂𑀲𑁂𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀧𑀭𑀺𑀧𑀽𑀭𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀁 𑀓𑀢𑁆𑀯𑀸𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀫𑀮𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀢𑀢𑁄 𑀏𑀯 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀁. 𑀢𑁂𑀦𑀸𑀳 ‘‘𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲’’𑀦𑁆𑀢𑀺. 𑀧𑀭𑀺𑀬𑁄𑀤𑀸𑀢𑀝𑁆𑀞𑁂𑀦 𑀦𑀺𑀫𑁆𑀫𑀮𑀪𑀸𑀯𑁂𑀦 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀁 𑀥𑁄𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀦𑁆𑀢𑀺 𑀆𑀳 ‘‘𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕’’𑀦𑁆𑀢𑀺. ‘‘𑀅𑀚𑁆𑀛𑀸𑀯𑀲𑀢𑀸’’𑀢𑀺 𑀧𑀤𑀧𑁆𑀧𑀬𑁄𑀕𑁂𑀦 𑀅𑀕𑀸𑀭𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀭𑀫𑀚𑁆𑀛𑁂’’𑀢𑀺. 𑀤𑀸𑀞𑀺𑀓𑀸𑀧𑀺 𑀫𑀲𑁆𑀲𑀼𑀕𑁆𑀕𑀳𑀡𑁂𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀫𑀲𑁆𑀲𑀼’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀉𑀢𑁆𑀢𑀭𑀸𑀥𑀭𑀫𑀲𑁆𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀻𑀢𑀺 𑀓𑀸𑀲𑀸𑀬𑀸𑀦𑀻𑀢𑀺 𑀆𑀳 ‘‘𑀓𑀲𑀸𑀬𑀭𑀲𑀧𑀻𑀢𑀢𑀸𑀬𑀸’’𑀢𑀺. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀲𑁆𑀲 𑀳𑀺𑀢𑀦𑁆𑀢𑀺 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀯𑀟𑁆𑀠𑀺𑀆𑀯𑀳𑀁 𑀅𑀕𑀸𑀭𑀲𑁆𑀲 𑀳𑀺𑀢𑀁.

𑁨𑁫. 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀢𑀺𑀆𑀤𑀻𑀲𑀼 ‘‘𑀅𑀬𑀁 𑀅𑀚𑁆𑀛𑀢𑁆𑀢𑀺𑀓𑁄’’𑀢𑀺 𑀚𑀸𑀦𑀦𑁆𑀢𑀺, 𑀜𑀸𑀬𑀦𑁆𑀢𑀺 𑀯𑀸𑀢𑀺 𑀜𑀸𑀢𑀻, 𑀮𑁄𑀳𑀺𑀢𑁂𑀦 𑀲𑀫𑁆𑀩𑀦𑁆𑀥𑀸𑀢𑀺 𑀲𑀸𑀮𑁄𑀳𑀺𑀢𑀸. 𑀧𑀺𑀢𑀼𑀧𑀓𑁆𑀔𑀺𑀓𑀸 𑀜𑀸𑀢𑀻, 𑀫𑀸𑀢𑀼𑀧𑀓𑁆𑀔𑀺𑀓𑀸 𑀲𑀸𑀮𑁄𑀳𑀺𑀢𑀸. 𑀫𑀸𑀢𑀼𑀧𑀓𑁆𑀔𑀺𑀓𑀸 𑀧𑀺𑀢𑀼𑀧𑀓𑁆𑀔𑀺𑀓𑀸 𑀯𑀸 𑀜𑀸𑀢𑀻 ¶ , 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸 𑀲𑀸𑀮𑁄𑀳𑀺𑀢𑀸. 𑀫𑀺𑀢𑁆𑀢𑀸𑀬𑀦𑁆𑀢𑀻𑀢𑀺 𑀫𑀺𑀢𑁆𑀢𑀸, ¶ 𑀫𑀺𑀦𑀦𑁆𑀢𑀺 𑀯𑀸 𑀲𑀩𑁆𑀩𑀕𑀼𑀬𑁆𑀳𑁂𑀲𑀼 𑀅𑀦𑁆𑀢𑁄 𑀧𑀓𑁆𑀔𑀺𑀧𑀦𑁆𑀢𑀻𑀢𑀺 𑀫𑀺𑀢𑁆𑀢𑀸. 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀲𑀳𑀪𑀸𑀯𑀝𑁆𑀞𑁂𑀦 𑀅𑀫𑀸 𑀳𑁄𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. 𑀫𑀫𑀸𑀬𑀢𑀻𑀢𑀺 𑀫𑀸𑀢𑀸, 𑀧𑀺𑀬𑀸𑀬𑀢𑀻𑀢𑀺 𑀧𑀺𑀢𑀸. 𑀲𑀭𑀻𑀭𑀓𑀺𑀘𑁆𑀘𑀮𑁂𑀲𑁂𑀦𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀲𑀭𑀻𑀭𑀓𑀺𑀘𑁆𑀘𑀮𑁂𑀲𑁂𑀦. 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀢𑀻𑀢𑀺 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀘 𑀘𑀺𑀢𑁆𑀢𑀜𑁆𑀜𑀣𑀢𑁆𑀢𑀁 𑀫𑀸 𑀳𑁄𑀢𑀽’’𑀢𑀺 𑀦 𑀧𑀩𑁆𑀩𑀸𑀚𑁂𑀢𑀺. 𑀢𑀢𑁄𑀬𑁂𑀯 𑀘 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀢𑀣𑀸 𑀯𑀭𑁄 𑀤𑀺𑀦𑁆𑀦𑁄.

𑁨𑁬. 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸𑀢𑀺 𑀪𑀡𑁆𑀟𑀧𑁆𑀧𑀬𑁄𑀚𑀦𑀸𑀤𑀻𑀲𑀼 𑀥𑀼𑀭𑀦𑀺𑀓𑁆𑀔𑁂𑀧𑁂𑀦. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀧𑀺𑀬𑀸𑀬𑀺𑀢𑀩𑁆𑀩𑁄𑀢𑀺 𑀧𑀺𑀬𑁄𑀢𑀺 𑀆𑀳 ‘‘𑀧𑀻𑀢𑀺𑀚𑀦𑀦𑀓𑁄’’𑀢𑀺. 𑀫𑀦𑀲𑁆𑀲 𑀅𑀧𑁆𑀧𑀸𑀬𑀦𑀢𑁄 𑀫𑀦𑀸𑀧𑁄𑀢𑀺 𑀆𑀳 ‘‘𑀫𑀦𑀯𑀟𑁆𑀠𑀦𑀓𑁄’’𑀢𑀺. 𑀲𑀼𑀔𑁂𑀥𑀺𑀢𑁄 𑀢𑀭𑀼𑀡𑀤𑀸𑀭𑀓𑀓𑀸𑀮𑁂, 𑀢𑀢𑁄 𑀧𑀭𑀜𑁆𑀘 𑀲𑀧𑁆𑀧𑀺𑀔𑀻𑀭𑀸𑀤𑀺𑀲𑀸𑀤𑀼𑀭𑀲𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀺𑀆𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀔𑀧𑀭𑀺𑀳𑀢𑁄. 𑀅𑀣 𑀯𑀸 𑀤𑀴𑁆𑀳𑀪𑀢𑁆𑀢𑀺𑀓𑀥𑀸𑀢𑀺𑀚𑀦𑀸𑀤𑀺𑀧𑀭𑀺𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀭𑀺𑀘𑁆𑀙𑁂𑀤𑀲𑀫𑁆𑀧𑀢𑁆𑀢𑀺𑀬𑀸 𑀘 𑀉𑀴𑀸𑀭𑀧𑀡𑀻𑀢𑀲𑀼𑀔𑀧𑀘𑁆𑀘𑀬𑀽𑀧𑀳𑀸𑀭𑁂𑀳𑀺 𑀘 𑀲𑀼𑀔𑁂𑀥𑀺𑀢𑁄, 𑀅𑀓𑀺𑀘𑁆𑀙𑁂𑀦𑁂𑀯 𑀤𑀼𑀓𑁆𑀔𑀧𑀘𑁆𑀘𑀬𑀯𑀺𑀦𑁄𑀤𑀦𑁂𑀦 𑀲𑀼𑀔𑀧𑀭𑀺𑀳𑀢𑁄. 𑀅𑀚𑁆𑀛𑀢𑁆𑀢𑀺𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀔𑁂𑀥𑀺𑀢𑁄, 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀔𑀧𑀭𑀺𑀳𑀢𑁄.

𑀓𑀺𑀜𑁆𑀘𑀻𑀢𑀺 𑀏𑀢𑀲𑁆𑀲 𑀯𑀺𑀯𑀭𑀡𑀁 ‘‘𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀮𑀪𑀸𑀕’’𑀦𑁆𑀢𑀺. 𑀬𑀤𑀸 𑀚𑀸𑀦𑀸𑀢𑀺-𑀲𑀤𑁆𑀤𑁄 𑀩𑁄𑀥𑀦𑀢𑁆𑀣𑁄 𑀦 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀧𑀬𑁄𑀕𑁂 ‘‘𑀲𑀧𑁆𑀧𑀺𑀦𑁄 𑀚𑀸𑀦𑀸𑀢𑀺, 𑀫𑀥𑀼𑀦𑁄 𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀲𑀤𑁆𑀤𑀢𑁆𑀣𑀯𑀺𑀤𑀽 𑀇𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀓𑀺𑀜𑁆𑀘𑀺 𑀤𑀼𑀓𑁆𑀔𑁂𑀦 𑀦𑀸𑀦𑀼𑀪𑁄𑀲𑀻’’𑀢𑀺. 𑀢𑁂𑀦𑀸𑀳 ‘‘𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀦𑀼𑀪𑀯𑀦𑀢𑁆𑀣𑁂 𑀘 𑀚𑀸𑀦𑀦𑀸’’𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀺 𑀤𑀼𑀓𑁆𑀔𑁂𑀦 𑀦𑀸𑀦𑀼𑀪𑁄𑀲𑀻𑀢𑀺 𑀓𑁂𑀦𑀘𑀺 𑀤𑀼𑀓𑁆𑀔𑁂𑀦 𑀓𑀭𑀡𑀪𑀽𑀢𑁂𑀦 𑀯𑀺𑀲𑀬𑀁 𑀦𑀸𑀦𑀼𑀪𑁄𑀲𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀓𑀺𑀜𑁆𑀘𑀻’’𑀢𑀺 𑀏𑀢𑁆𑀣𑀸𑀧𑀺 𑀳𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀲𑁆𑀲 𑀮𑁄𑀧𑁄 𑀓𑀢𑁄. 𑀢𑁂𑀦𑁂𑀯 𑀘 𑀯𑀓𑁆𑀔𑀢𑀺 ‘‘𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀼𑀭𑀺𑀫𑀧𑀤𑀲𑁆𑀲 𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑁄𑀧𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀬𑀤𑀸 𑀧𑀦 𑀚𑀸𑀦𑀸𑀢𑀺-𑀲𑀤𑁆𑀤𑁄 𑀲𑀭𑀡𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀲𑀭𑀡𑀢𑁆𑀣𑀸𑀦𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀧𑀬𑁄𑀕𑁂 ‘‘𑀫𑀸𑀢𑀼 𑀲𑀭𑀢𑀺, 𑀧𑀺𑀢𑀼 𑀲𑀭𑀢𑀺, 𑀪𑀸𑀢𑀼 𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀅𑀣 𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀦𑀲𑁆𑀲𑀭𑀲𑀻𑀢𑀺 𑀅𑀢𑁆𑀣𑁄’’𑀢𑀺, 𑀓𑀲𑁆𑀲𑀘𑀺 𑀤𑀼𑀓𑁆𑀔𑀲𑁆𑀲 𑀅𑀦𑀦𑀼𑀪𑀽𑀢𑀢𑁆𑀢𑀸 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀤𑀼𑀓𑁆𑀔𑀁 𑀧𑀭𑀺𑀬𑁂𑀲𑀫𑀸𑀦𑁄𑀧𑀺 𑀅𑀪𑀸𑀯𑀢𑁄𑀬𑁂𑀯 𑀦𑀲𑁆𑀲𑀭𑀲𑀻𑀢𑀺 𑀅𑀢𑁆𑀣𑁄 ¶ . 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀻𑀢𑀺 𑀅𑀦𑀼𑀪𑀯𑀦𑀲𑀭𑀡𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑁂 𑀤𑀼𑀢𑀺𑀬𑀢𑀢𑀺𑀬𑀯𑀺𑀓𑀧𑁆𑀧𑀤𑁆𑀯𑀬𑁂. 𑀧𑀼𑀭𑀺𑀫𑀧𑀤𑀲𑁆𑀲𑀸𑀢𑀺 ‘‘𑀓𑀺𑀜𑁆𑀘𑀻’’𑀢𑀺 𑀧𑀤𑀲𑁆𑀲. 𑀉𑀢𑁆𑀢𑀭𑀧𑀤𑁂𑀦𑀸𑀢𑀺 ‘‘𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀧𑀤𑁂𑀦. 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑁄𑀧𑁄𑀢𑀺 𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀦𑀲𑁆𑀲 𑀲𑀸𑀫𑀺𑀯𑀘𑀦𑀲𑁆𑀲 𑀮𑁄𑀧𑁄. ‘‘𑀓𑀲𑁆𑀲𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀼𑀭𑀺𑀫𑀧𑀤𑁂 𑀲𑀸𑀫𑀺𑀯𑀘𑀦𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀦𑀺𑀘𑁆𑀙𑀓𑀸𑀢𑀺 𑀅𑀦𑀺𑀘𑁆𑀙𑀦𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀢𑀺 𑀦𑀦𑀼 𑀫𑀬𑀁 𑀲𑀼𑀤𑀺𑀦𑁆𑀦 𑀲𑀸𑀫𑀸𑀤𑀻𑀲𑀼 𑀓𑁂𑀦𑀘𑀺𑀧𑀺 𑀉𑀧𑀸𑀬𑁂𑀦 𑀅𑀧𑁆𑀧𑀝𑀺𑀲𑀸𑀥𑀦𑁂𑀦 𑀅𑀧𑁆𑀧𑀝𑀺𑀓𑀸𑀭𑁂𑀦 𑀫𑀭𑀡𑁂𑀦𑀧𑀺 𑀢𑀬𑀸 𑀅𑀓𑀸𑀫𑀓𑀸𑀧𑀺 ¶ 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀏𑀯𑀁 𑀲𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀓𑀺𑀁 𑀧𑀦𑀸𑀢𑀺 𑀏𑀢𑁆𑀣 𑀓𑀺𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁂𑀦 𑀧𑀦 𑀓𑀸𑀭𑀡𑁂𑀦𑀸’’𑀢𑀺.

𑁨𑁮. 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀻𑀢𑀺 𑀏𑀢𑁆𑀣 𑀕𑀦𑁆𑀥𑀩𑁆𑀩𑀸 𑀦𑀸𑀫 𑀕𑀸𑀬𑀦𑀓𑀸, 𑀦𑀝𑀸 𑀦𑀸𑀫 𑀭𑀗𑁆𑀕𑀦𑀝𑀸, 𑀦𑀸𑀝𑀓𑀸 𑀮𑀗𑁆𑀖𑀦𑀓𑀸𑀤𑀬𑁄. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀏𑀢𑁆𑀣 𑀧𑀭𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀲𑀓𑀁 𑀯𑀺𑀲𑀬𑁂𑀲𑀼 𑀘𑀸𑀭𑁂𑀳𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀳𑀻’’𑀢𑀺𑀆𑀤𑀺. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀯𑀸 𑀲𑀼𑀔𑀽𑀧𑀓𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀘𑀸𑀭𑁂𑀳𑀺 𑀅𑀢𑁆𑀢𑀦𑁄 𑀧𑀭𑀺𑀘𑀭𑀡𑀁 𑀓𑀸𑀭𑁂𑀳𑀺. 𑀢𑀣𑀸𑀪𑀽𑀢𑁄 𑀘 𑀬𑀲𑁆𑀫𑀸 𑀮𑀴𑀦𑁆𑀢𑁄 𑀓𑀻𑀴𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀮𑀴𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑀢𑁄 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀪𑁄𑀕𑀸 𑀦𑀸𑀫𑀸𑀢𑀺 𑀆𑀳 ‘‘𑀪𑁄𑀕𑁂 𑀪𑀼𑀜𑁆𑀚𑀦𑁆𑀢𑁄’’𑀢𑀺. 𑀤𑀸𑀦𑀧𑁆𑀧𑀤𑀸𑀦𑀸𑀦𑀻𑀢𑀺 𑀏𑀢𑁆𑀣 𑀦𑀺𑀘𑁆𑀘𑀤𑀸𑀦𑀁 𑀤𑀸𑀦𑀁 𑀦𑀸𑀫, 𑀉𑀧𑁄𑀲𑀣𑀤𑀺𑀯𑀲𑀸𑀤𑀻𑀲𑀼 𑀤𑀸𑀢𑀩𑁆𑀩𑀁 𑀅𑀢𑀺𑀭𑁂𑀓𑀤𑀸𑀦𑀁 𑀧𑀤𑀸𑀦𑀁 𑀦𑀸𑀫. 𑀧𑀯𑁂𑀡𑀻𑀭𑀓𑁆𑀔𑀡𑀯𑀲𑁂𑀦 𑀯𑀸 𑀤𑀻𑀬𑀫𑀸𑀦𑀁 𑀤𑀸𑀦𑀁 𑀦𑀸𑀫, 𑀅𑀢𑁆𑀢𑀦𑀸𑀯 𑀧𑀝𑁆𑀞𑀧𑁂𑀢𑁆𑀯𑀸 𑀤𑀻𑀬𑀫𑀸𑀦𑀁 𑀧𑀤𑀸𑀦𑀁 𑀦𑀸𑀫. 𑀧𑀘𑀼𑀭𑀚𑀦𑀲𑀸𑀥𑀸𑀭𑀡𑀁 𑀯𑀸 𑀦𑀸𑀢𑀺𑀉𑀴𑀸𑀭𑀁 𑀤𑀸𑀦𑀁 𑀦𑀸𑀫, 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀅𑀢𑀺𑀉𑀴𑀸𑀭𑀁 𑀧𑀤𑀸𑀦𑀁 𑀦𑀸𑀫. 𑀆𑀤𑀺-𑀲𑀤𑁆𑀤𑁂𑀦 𑀲𑀻𑀮𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀏𑀢𑀲𑁆𑀲 𑀯𑀘𑀦𑀧𑁆𑀧𑀝𑀺𑀯𑀘𑀦𑀲𑀗𑁆𑀔𑀸𑀢𑁄 𑀆𑀮𑀸𑀧𑀲𑀮𑁆𑀮𑀸𑀧𑁄𑀢𑀺 𑀦𑀺𑀭𑀸𑀮𑀸𑀧𑀲𑀮𑁆𑀮𑀸𑀧𑁄.

𑁩𑁦. 𑀩𑀮𑀁 𑀕𑀸𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀩𑀮𑀕𑁆𑀕𑀳𑀡𑀁 𑀦𑀸𑀫 𑀓𑀸𑀬𑀩𑀮𑀲𑁆𑀲 𑀉𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀓𑀸𑀬𑀩𑀮𑀁 𑀚𑀦𑁂𑀢𑁆𑀯𑀸’’𑀢𑀺. 𑀅𑀲𑁆𑀲𑀼𑀫𑀼𑀔𑀦𑁆𑀢𑀺 𑀅𑀲𑁆𑀲𑀽𑀦𑀺 𑀫𑀼𑀔𑁂 𑀏𑀢𑀲𑁆𑀲𑀸𑀢𑀺 𑀅𑀲𑁆𑀲𑀼𑀫𑀼𑀔𑁄, 𑀢𑀁 𑀅𑀲𑁆𑀲𑀼𑀫𑀼𑀔𑀁, 𑀅𑀲𑁆𑀲𑀼𑀓𑀺𑀮𑀺𑀦𑁆𑀦𑀫𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀕𑀸𑀫𑁄𑀬𑁂𑀯 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀲𑁆𑀲. 𑀅𑀢𑀺𑀭𑁂𑀓𑀮𑀸𑀪𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺 ‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺 (𑀫𑀳𑀸𑀯. 𑁧𑁨𑁮) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀸𑀳𑀸𑀭𑀮𑀸𑀪𑀢𑁄 𑀅𑀥𑀺𑀓𑀮𑀸𑀪𑁄 𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀢𑀺𑀭𑁂𑀓𑀮𑀸𑀪𑁄, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀘𑀼𑀤𑁆𑀤𑀲 ¶ 𑀪𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺. 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀕𑀫𑀺𑀓𑀪𑀢𑁆𑀢𑀁 𑀕𑀺𑀮𑀸𑀦𑀪𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁 𑀯𑀸𑀭𑀪𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁. 𑀓𑀢𑀺𑀧𑀬𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀤𑀺𑀯𑀲𑀁 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀓𑁆𑀔𑀺𑀓𑀁. 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀁. 𑀧𑀸𑀝𑀺𑀧𑀤𑀤𑀺𑀯𑀲𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀸𑀝𑀺𑀧𑀤𑀺𑀓𑀁. 𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀁. 𑀥𑀼𑀭𑀕𑁂𑀳𑁂𑀬𑁂𑀯 𑀞𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁. 𑀕𑀸𑀫𑀯𑀸𑀲𑀻𑀆𑀤𑀻𑀳𑀺 𑀯𑀸𑀭𑁂𑀦 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀯𑀸𑀭𑀪𑀢𑁆𑀢𑀁.

𑀅𑀣 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀕𑀳𑀡𑁂 𑀳𑀺 𑀲𑀢𑀺 𑀧𑀝𑀺𑀓𑁆𑀔𑁂𑀧𑁄 𑀬𑀼𑀚𑁆𑀚𑁂𑀬𑁆𑀬, 𑀦 𑀘 𑀧𑀞𑀫𑀩𑁄𑀥𑀺𑀬𑀁 𑀕𑀳𑀧𑀢𑀺𑀘𑀻𑀯𑀭𑀲𑁆𑀲 𑀧𑀝𑀺𑀕𑁆𑀕𑀳𑀡𑀁 𑀅𑀦𑀼𑀜𑁆𑀜𑀸𑀢𑀁 𑀧𑀭𑀢𑁄 𑀚𑀻𑀯𑀓𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 𑀚𑀻𑀯𑀓𑀯𑀢𑁆𑀣𑀼𑀲𑁆𑀫𑀺𑀁 (𑀫𑀳𑀸𑀯. 𑀅𑀝𑁆𑀞. 𑁩𑁩𑁭) ‘‘𑀪𑀕𑀯𑀢𑁄 𑀳𑀺 𑀩𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀺𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀇𑀤𑀁 𑀯𑀢𑁆𑀣𑀁, 𑀏𑀢𑁆𑀣𑀦𑁆𑀢𑀭𑁂 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦 𑀓𑁄𑀘𑀺 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀺, 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸𑀯 𑀅𑀳𑁂𑀲𑀼’’𑀦𑁆𑀢𑀺. 𑀲𑀼𑀤𑀺𑀦𑁆𑀦𑁄 𑀘 𑀧𑀞𑀫𑀩𑁄𑀥𑀺𑀬𑀁𑀬𑁂𑀯 𑀧𑀩𑁆𑀩𑀚𑀺𑀢𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀼𑀤𑀺𑀦𑁆𑀦𑁄 𑀳𑀺 𑀪𑀕𑀯𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑁄, 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄, 𑀲𑀬𑀁 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸’’𑀢𑀺. 𑀢𑀲𑁆𑀫𑀸 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑀦𑀼𑀜𑁆𑀜𑀸𑀢𑁂𑀧𑀺 𑀕𑀳𑀧𑀢𑀺𑀘𑀻𑀯𑀭𑁂 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦 𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺.

𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀓𑀼𑀲𑀮𑀪𑀡𑁆𑀟𑀲𑁆𑀲 𑀪𑀼𑀲𑀁 𑀯𑀺𑀮𑀼𑀫𑁆𑀧𑀦𑀝𑁆𑀞𑁂𑀦 𑀮𑁄𑀮𑀼𑀧𑁆𑀧𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀮𑁄𑀮𑀼𑀧𑁆𑀧𑁂𑀦 𑀘𑀭𑀡𑀁 𑀮𑁄𑀮𑀼𑀧𑁆𑀧𑀘𑀸𑀭𑁄, 𑀢𑀡𑁆𑀳𑀸𑀯𑀲𑁂𑀦 𑀖𑀭𑀧𑀝𑀺𑀧𑀸𑀝𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀡𑀁, 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀖𑀭𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀸𑀬 𑀧𑀯𑀺𑀲𑀢𑀻’’𑀢𑀺. 𑀏𑀢𑁆𑀣 𑀘 𑀆𑀭𑀜𑁆𑀜𑀺𑀓𑀗𑁆𑀕𑀸𑀤𑀺𑀧𑀥𑀸𑀦𑀗𑁆𑀕𑀯𑀲𑁂𑀦 𑀲𑁂𑀲𑀥𑀼𑀢𑀗𑁆𑀕𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀚𑁆𑀚𑀻𑀦𑀦𑁆𑀢𑀺 𑀭𑀸𑀚𑀸𑀦𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀺𑀯𑀘𑀦𑀁 𑀓𑀢𑀁, 𑀯𑀚𑁆𑀚𑀻𑀭𑀸𑀚𑀽𑀦𑀦𑁆𑀢𑀺 𑀅𑀢𑁆𑀣𑁄. 𑀚𑀦𑀧𑀤-𑀲𑀤𑁆𑀤𑀲𑁆𑀲 𑀢𑀁𑀦𑀺𑀯𑀸𑀲𑀻𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 ‘‘𑀯𑀚𑁆𑀚𑀻𑀲𑀽’’𑀢𑀺 𑀚𑀦𑀧𑀤𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦𑀁, 𑀯𑀚𑁆𑀚𑀺𑀦𑀸𑀫𑀓𑁂 𑀚𑀦𑀧𑀤𑁂𑀢𑀺 𑀅𑀢𑁆𑀣𑁄.

𑀉𑀧𑀪𑁄𑀕𑀧𑀭𑀺𑀪𑁄𑀕𑀽𑀧𑀓𑀭𑀡𑀫𑀳𑀦𑁆𑀢𑀢𑀸𑀬𑀸𑀢𑀺 ¶ 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸𑀦𑀁 𑀉𑀧𑀪𑁄𑀕𑀸𑀦𑀜𑁆𑀘𑁂𑀯 𑀳𑀢𑁆𑀣𑀺𑀅𑀲𑁆𑀲𑀭𑀣𑀇𑀢𑁆𑀣𑀺𑀬𑀸𑀤𑀺𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀜𑁆𑀘 𑀫𑀳𑀦𑁆𑀢𑀢𑀸𑀬. 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑁂𑀯 𑀳𑀺 𑀇𑀥 𑀧𑀭𑀺𑀪𑁄𑀕𑀽𑀧𑀓𑀭𑀡𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀬𑁂 𑀳𑀺 𑀢𑁂𑀲𑀁 𑀉𑀧𑀪𑁄𑀕𑀸, 𑀬𑀸𑀦𑀺 𑀘 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀺, 𑀢𑀸𑀦𑀺 𑀫𑀳𑀦𑁆𑀢𑀸𑀦𑀻’’𑀢𑀺. ‘‘𑀉𑀧𑀪𑁄𑀕𑀸 𑀳𑀢𑁆𑀣𑀺𑀅𑀲𑁆𑀲𑀭𑀣𑀇𑀢𑁆𑀣𑀻𑀆𑀤𑀬𑁄, 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀺 𑀢𑁂𑀲𑀫𑁂𑀯 𑀲𑀼𑀯𑀡𑁆𑀡𑀸𑀤𑀺𑀉𑀧𑀓𑀭𑀡𑀸𑀦𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀸𑀭𑀓𑀸𑀦𑀻𑀢𑀺 𑀲𑀸𑀭𑀪𑀽𑀢𑀸𑀦𑀺. 𑀦𑀺𑀥𑁂𑀢𑁆𑀯𑀸𑀢𑀺 𑀦𑀺𑀤𑀳𑀺𑀢𑁆𑀯𑀸, 𑀦𑀺𑀥𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀺𑀯𑀲𑀧𑀭𑀺𑀩𑁆𑀩𑀬𑀲𑀗𑁆𑀔𑀸𑀢𑀪𑁄𑀕𑀫𑀳𑀦𑁆𑀢𑀢𑀸𑀬𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑀗𑁆𑀔𑀸𑀢𑀪𑁄𑀕𑀸𑀦𑀁 𑀫𑀳𑀦𑁆𑀢𑀢𑀸𑀬. 𑀚𑀸𑀢𑀭𑀽𑀧𑀭𑀚𑀢𑀲𑁆𑀲𑁂𑀯 𑀧𑀳𑀽𑀢𑀢𑀸𑀬𑀸𑀢𑀺 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦 𑀘𑁂𑀯 𑀲𑀼𑀯𑀡𑁆𑀡𑀫𑀸𑀲𑀓𑀭𑀚𑀢𑀫𑀸𑀲𑀓𑀸𑀤𑀺𑀯𑀲𑁂𑀦 𑀘 𑀚𑀸𑀢𑀭𑀽𑀧𑀭𑀚𑀢𑀲𑁆𑀲𑁂𑀯 𑀧𑀳𑀽𑀢𑀢𑀸𑀬. 𑀯𑀺𑀢𑁆𑀢𑀻𑀢𑀺 𑀢𑀼𑀝𑁆𑀞𑀺, 𑀯𑀺𑀢𑁆𑀢𑀺𑀬𑀸 𑀉𑀧𑀓𑀭𑀡𑀁 𑀯𑀺𑀢𑁆𑀢𑀽𑀧𑀓𑀭𑀡𑀁, 𑀧𑀳𑀽𑀢𑀁 𑀦𑀸𑀦𑀸𑀯𑀺𑀥𑀸𑀮𑀗𑁆𑀓𑀸𑀭𑀪𑀽𑀢𑀁 𑀯𑀺𑀢𑁆𑀢𑀽𑀧𑀓𑀭𑀡𑀫𑁂𑀢𑁂𑀲𑀦𑁆𑀢𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸. 𑀢𑁂𑀦𑀸𑀳 ‘‘𑀅𑀮𑀗𑁆𑀓𑀸𑀭𑀪𑀽𑀢𑀲𑁆𑀲𑀸’’𑀢𑀺𑀆𑀤𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀯𑀡𑀺𑀚𑁆𑀚𑀸𑀯𑀲𑁂𑀦 𑀯𑀟𑁆𑀠𑀺𑀓𑀢𑀸𑀤𑀺𑀯𑀲𑁂𑀦. 𑀥𑀦𑀥𑀜𑁆𑀜𑀲𑁆𑀲 𑀧𑀳𑀽𑀢𑀢𑀸𑀬𑀸𑀢𑀺 𑀲𑀢𑁆𑀢𑀭𑀢𑀦𑀲𑀗𑁆𑀔𑀸𑀢𑀲𑁆𑀲 𑀥𑀦𑀲𑁆𑀲 𑀲𑀩𑁆𑀩𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀲𑀗𑁆𑀕𑀳𑀺𑀢𑀲𑁆𑀲 𑀥𑀜𑁆𑀜𑀲𑁆𑀲 𑀘 𑀧𑀳𑀽𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀯𑀚𑀺𑀭𑀧𑀯𑀸𑀴𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑀸𑀮𑀺𑀯𑀻𑀳𑀺𑀆𑀤𑀺 𑀧𑀼𑀩𑁆𑀩𑀡𑁆𑀡𑀁 𑀧𑀼𑀭𑀓𑁆𑀔𑀢𑀁 𑀲𑀲𑁆𑀲𑀨𑀮𑀦𑁆𑀢𑀺 𑀓𑀢𑁆𑀯𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀼𑀕𑁆𑀕𑀫𑀸𑀲𑀸𑀤𑀺 ¶ 𑀅𑀧𑀭𑀡𑁆𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀸𑀢𑀺 𑀲𑁂𑀲𑀥𑀼𑀢𑀗𑁆𑀕𑀧𑀭𑀺𑀯𑀸𑀭𑀺𑀢𑁂𑀦 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀥𑀼𑀢𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀧𑀤𑀸𑀦𑀘𑀸𑀭𑀁 𑀘𑀭𑀺𑀢𑀼𑀓𑀸𑀫𑁄’’𑀢𑀺.

𑁩𑁧. 𑀅𑀦𑁆𑀢𑁄𑀚𑀸𑀢𑀢𑀸𑀬 𑀯𑀸 𑀜𑀸𑀢𑀺𑀲𑀤𑀺𑀲𑀻 𑀤𑀸𑀲𑀻𑀢𑀺 𑀜𑀸𑀢𑀺𑀤𑀸𑀲𑀻. 𑀧𑀽𑀢𑀺𑀪𑀸𑀯𑁂𑀦𑁂𑀯 𑀮𑀓𑁆𑀔𑀺𑀢𑀩𑁆𑀩𑀤𑁄𑀲𑁄 𑀯𑀸 𑀆𑀪𑀺𑀤𑁄𑀲𑀺𑀓𑁄, 𑀅𑀪𑀺𑀤𑁄𑀲𑀁 𑀯𑀸 𑀧𑀘𑁆𑀘𑀽𑀲𑀓𑀸𑀮𑀁 𑀕𑀢𑁄 𑀧𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀆𑀪𑀺𑀤𑁄𑀲𑀺𑀓𑁄. 𑀢𑁂𑀦𑀸𑀳 ‘‘𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀯𑀸’’𑀢𑀺𑀆𑀤𑀺. 𑀧𑀽𑀢𑀺𑀪𑀽𑀢𑀪𑀸𑀯𑁂𑀦 𑀧𑀭𑀺𑀪𑁄𑀕𑀁 𑀦𑀸𑀭𑀳𑀢𑀻𑀢𑀺 𑀅𑀧𑀭𑀺𑀪𑁄𑀕𑀸𑀭𑀳𑁄. 𑀙𑀟𑁆𑀟𑀦𑀻𑀬𑀲𑀪𑀸𑀯𑁂 𑀦𑀺𑀘𑁆𑀙𑀺𑀢𑁂𑀧𑀺 𑀧𑀼𑀘𑁆𑀙𑀸𑀓𑀸𑀮𑁂 𑀲𑀦𑁆𑀤𑁂𑀳𑀯𑁄𑀳𑀸𑀭𑀯𑀲𑁂𑀦𑁂𑀯 𑀧𑀼𑀘𑁆𑀙𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀘𑁂’’𑀢𑀺. 𑀅𑀭𑀺𑀬𑀯𑁄𑀳𑀸𑀭𑁂𑀦𑀸𑀢𑀺 𑀅𑀭𑀺𑀬𑀲𑀫𑀼𑀤𑀸𑀘𑀸𑀭𑁂𑀦. 𑀅𑀭𑀺𑀬𑀸 𑀳𑀺 𑀫𑀸𑀢𑀼𑀕𑀸𑀫𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀸𑀮𑀬𑀁.

‘‘𑀆𑀓𑀺𑀭𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀺𑀜𑁆𑀜𑀢𑁆𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀲𑀘𑁂 𑀢𑀁 𑀙𑀟𑁆𑀟𑀦𑀻𑀬𑀥𑀫𑁆𑀫’’𑀦𑁆𑀢𑀺 𑀧𑀭𑀺𑀬𑀸𑀬𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀬𑀼𑀢𑁆𑀢𑀯𑀸𑀘𑀸 𑀯𑀸’’𑀢𑀺 𑀯𑀼𑀢𑁆𑀢𑀁, 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸 𑀧𑀬𑀼𑀢𑁆𑀢𑀯𑀸𑀘𑀸. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀭𑀧𑁂𑀓𑁆𑀔𑀪𑀸𑀯𑀢𑁄 𑀯𑀼𑀢𑁆𑀢𑀁 ¶ , 𑀇𑀥 𑀧𑀦 𑀯𑀺𑀲𑁂𑀲𑀢𑁄 𑀅𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸𑀯 𑀯𑀢𑁆𑀣𑀼𑀦𑁄. 𑀅𑀕𑁆𑀕𑀅𑀭𑀺𑀬𑀯𑀁𑀲𑀺𑀓𑁄𑀢𑀺 𑀅𑀭𑀺𑀬𑀯𑀁𑀲𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸𑀦𑀁 𑀅𑀕𑁆𑀕𑁄 𑀉𑀢𑁆𑀢𑀫𑁄. 𑀦𑀺𑀫𑀻𑀬𑀢𑀺 𑀲𑀜𑁆𑀜𑀸𑀬𑀢𑀻𑀢𑀺 𑀦𑀺𑀫𑀺𑀢𑁆𑀢𑀁, 𑀬𑀣𑀸𑀲𑀮𑁆𑀮𑀓𑁆𑀔𑀺𑀢𑁄 𑀆𑀓𑀸𑀭𑁄𑀢𑀺 𑀆𑀳 ‘‘𑀕𑀺𑀳𑀺𑀓𑀸𑀮𑁂 𑀲𑀮𑁆𑀮𑀓𑁆𑀔𑀺𑀢𑀧𑀼𑀩𑁆𑀩𑀁 𑀆𑀓𑀸𑀭’’𑀦𑁆𑀢𑀺. 𑀳𑀢𑁆𑀣𑀧𑀺𑀝𑁆𑀞𑀺𑀆𑀤𑀻𑀦𑀺 𑀑𑀮𑁄𑀓𑀬𑀫𑀸𑀦𑀸 ‘‘𑀲𑀸𑀫𑀺𑀧𑀼𑀢𑁆𑀢𑀲𑁆𑀲 𑀫𑁂 𑀲𑀼𑀤𑀺𑀦𑁆𑀦𑀲𑁆𑀲 𑀯𑀺𑀬 𑀲𑀼𑀯𑀡𑁆𑀡𑀓𑀘𑁆𑀙𑀧𑀧𑀺𑀝𑁆𑀞𑀺𑀲𑀤𑀺𑀲𑀸 𑀇𑀫𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑁄, 𑀳𑀭𑀺𑀢𑀸𑀮𑀯𑀝𑁆𑀝𑀺𑀬𑁄 𑀯𑀺𑀬 𑀲𑀼𑀯𑀝𑁆𑀝𑀺𑀢𑀸 𑀅𑀗𑁆𑀕𑀼𑀮𑀺𑀬𑁄, 𑀫𑀥𑀼𑀭𑁄 𑀲𑀭𑁄’’𑀢𑀺 𑀕𑀺𑀳𑀺𑀓𑀸𑀮𑁂 𑀲𑀮𑁆𑀮𑀓𑁆𑀔𑀺𑀢𑀧𑀼𑀩𑁆𑀩𑀁 𑀆𑀓𑀸𑀭𑀁 𑀅𑀕𑁆𑀕𑀳𑁂𑀲𑀺 𑀲𑀜𑁆𑀚𑀸𑀦𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀓𑀲𑁆𑀫𑀸 𑀧𑀦 𑀲𑀸 𑀜𑀸𑀢𑀺𑀤𑀸𑀲𑀻 𑀤𑀺𑀲𑁆𑀯𑀸𑀯 𑀦 𑀲𑀜𑁆𑀚𑀸𑀦𑀻𑀢𑀺 𑀆𑀳 ‘‘𑀲𑀼𑀤𑀺𑀦𑁆𑀦𑁄 𑀳𑀻’’𑀢𑀺𑀆𑀤𑀺. 𑀧𑀩𑁆𑀩𑀚𑁆𑀚𑀼𑀧𑀕𑀢𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁂𑀦, 𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀕𑁂𑀳𑀲𑀸𑀫𑀺𑀦𑀺𑀬𑀸 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑀁 𑀅𑀦𑁆𑀢𑁄𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸. 𑀬𑀕𑁆𑀖𑁂𑀢𑀺 𑀇𑀫𑀲𑁆𑀲 𑀆𑀭𑁄𑀘𑀬𑀸𑀫𑀻𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀆𑀭𑁄𑀘𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. ‘‘𑀬𑀕𑁆𑀖𑁂 𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀲𑀼𑀝𑁆𑀞𑀼 𑀚𑀸𑀦𑁂𑀬𑁆𑀬𑀸𑀲𑀻’’𑀢𑀺𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀆𑀮𑀧𑀦𑁂𑀢𑀺 𑀤𑀸𑀲𑀺𑀚𑀦𑀲𑁆𑀲 𑀆𑀮𑀧𑀦𑁂. 𑀢𑁂𑀦𑀸𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺.

𑁩𑁨. 𑀖𑀭𑁂𑀲𑀼 𑀲𑀸𑀮𑀸 𑀳𑁄𑀦𑁆𑀢𑀻𑀢𑀺 𑀖𑀭𑁂𑀲𑀼 𑀏𑀓𑀫𑀦𑁆𑀢𑁂 𑀪𑁄𑀚𑀦𑀲𑀸𑀮𑀸 𑀳𑁄𑀦𑁆𑀢𑀺 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀸 𑀲𑀼𑀲𑀁𑀯𑀺𑀳𑀺𑀢𑀤𑁆𑀯𑀸𑀭𑀩𑀦𑁆𑀥𑀸 𑀲𑀼𑀲𑀫𑁆𑀫𑀝𑁆𑀞𑀯𑀸𑀮𑀺𑀓𑀗𑁆𑀕𑀡𑀸. 𑀉𑀤𑀓𑀓𑀜𑁆𑀚𑀺𑀬𑀦𑁆𑀢𑀺 𑀉𑀤𑀓𑀜𑁆𑀘 𑀓𑀜𑁆𑀚𑀺𑀬𑀜𑁆𑀘. 𑀓𑀲𑁆𑀫𑀸 𑀧𑀦 𑀈𑀤𑀺𑀲𑀸𑀬𑀫𑁂𑀯 𑀲𑀸𑀮𑀸𑀬 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀦 𑀳𑀺 𑀧𑀩𑁆𑀩𑀚𑀺𑀢𑀸’’𑀢𑀺𑀆𑀤𑀺. 𑀅𑀲𑀸𑀭𑀼𑀧𑁆𑀧𑁂 𑀞𑀸𑀦𑁂𑀢𑀺 𑀪𑀺𑀓𑁆𑀔𑀽𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑁂 𑀧𑀤𑁂𑀲𑁂. 𑀅𑀢𑁆𑀣𑀺 𑀦𑀼 𑀔𑁄𑀢𑀺 𑀦𑀼-𑀲𑀤𑁆𑀤𑁄 𑀧𑀼𑀘𑁆𑀙𑀦𑀢𑁆𑀣𑁂, 𑀔𑁄-𑀲𑀤𑁆𑀤𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀯𑀼𑀢𑁆𑀢𑁄. 𑀦𑀼𑀔𑁄𑀢𑀺 𑀯𑀸 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀧𑀼𑀘𑁆𑀙𑀦𑀢𑁆𑀣𑁄. 𑀢𑁂𑀦 𑀦𑀸𑀫-𑀲𑀤𑁆𑀤𑀲𑁆𑀲 𑀧𑀼𑀘𑁆𑀙𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀬𑁂𑀲𑀁 𑀦𑁄 𑀢𑁆𑀯𑀦𑁆𑀢𑀺 𑀬𑁂𑀲𑀁 𑀦𑁄 𑀧𑀼𑀢𑁆𑀢𑁄 𑀢𑁆𑀯𑀁. 𑀈𑀤𑀺𑀲𑁂 𑀞𑀸𑀦𑁂𑀢𑀺 𑀓𑀺𑀜𑁆𑀘𑀸𑀧𑀺 ¶ 𑀢𑀁 𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀦𑀼𑀭𑀽𑀧𑀁 𑀦 𑀳𑁄𑀢𑀺, 𑀢𑀣𑀸𑀧𑀺 𑀫𑀸𑀤𑀺𑀲𑀸𑀦𑀁 𑀫𑀳𑀸𑀪𑁄𑀕𑀓𑀼𑀮𑀸𑀦𑀁 𑀧𑀼𑀢𑁆𑀢𑀲𑁆𑀲 𑀧𑀭𑀓𑀼𑀮𑁂 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑁄𑀚𑀦𑀁 𑀦𑀸𑀫 𑀅𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳. 𑀢𑁂𑀦𑁂𑀯𑀸𑀳 ‘‘𑀦𑀦𑀼 𑀦𑀸𑀫, 𑀢𑀸𑀢 𑀲𑀼𑀤𑀺𑀦𑁆𑀦, 𑀲𑀓𑀁 𑀕𑁂𑀳𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀅𑀜𑁆𑀜𑁂𑀦𑀧𑀺 𑀧𑀓𑀸𑀭𑁂𑀦 𑀦𑀸𑀫𑀲𑀤𑁆𑀤𑀲𑁆𑀲 𑀧𑀼𑀘𑁆𑀙𑀦𑀢𑁆𑀣𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀣𑀸 𑀅𑀢𑁆𑀣𑀺 𑀦𑀼 𑀔𑁄 𑀢𑀸𑀢𑀸’’𑀢𑀺𑀆𑀤𑀺. 𑀢𑀣𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀇𑀤𑀸𑀦𑀺 𑀦𑀸𑀫𑀲𑀤𑁆𑀤𑀲𑁆𑀲 𑀫𑀜𑁆𑀜𑀦𑀢𑁆𑀣𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀣𑀸 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺𑀆𑀤𑀺.

𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬𑀸𑀢𑀺 𑀫𑀸𑀦𑀲𑀺𑀓𑁂𑀦 𑀤𑀼𑀓𑁆𑀔𑁂𑀦 𑀅𑀪𑀺𑀧𑀻𑀴𑀺𑀢𑀢𑁆𑀢𑀸. 𑀏𑀢𑀫𑀢𑁆𑀣𑀦𑁆𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀥𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁. 𑀅𑀦𑁄𑀓𑀧𑁆𑀧𑀦𑀸𑀫𑀭𑀺𑀲𑀦𑀢𑁆𑀣𑀯𑀲𑁂𑀦𑀸𑀢𑀺 ¶ 𑀏𑀢𑁆𑀣 𑀅𑀦𑁄𑀓𑀧𑁆𑀧𑀦𑀁 𑀅𑀲𑀤𑁆𑀤𑀳𑀦𑀁. 𑀅𑀫𑀭𑀺𑀲𑀦𑀁 𑀅𑀲𑀳𑀦𑀁. 𑀅𑀦𑀸𑀕𑀢𑀯𑀘𑀦𑀁 𑀅𑀦𑀸𑀕𑀢𑀲𑀤𑁆𑀤𑀧𑁆𑀧𑀬𑁄𑀕𑁄, 𑀅𑀢𑁆𑀣𑁄 𑀧𑀦 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀯. 𑀢𑁂𑀦𑀸𑀳 ‘‘𑀧𑀘𑁆𑀘𑀓𑁆𑀔𑀫𑁆𑀧𑀻’’𑀢𑀺. 𑀦 𑀫𑀭𑀺𑀲𑀬𑀸𑀫𑀻𑀢𑀺 𑀦 𑀯𑀺𑀲𑀳𑀸𑀫𑀺. 𑀢𑀁 𑀦 𑀲𑀼𑀦𑁆𑀤𑀭𑀦𑁆𑀢𑀺 ‘‘𑀢𑀤𑀸𑀬’’𑀦𑁆𑀢𑀺 𑀧𑀸𑀞𑀁 𑀲𑀦𑁆𑀥𑀸𑀬𑀸𑀳. 𑀅𑀮𑀁, 𑀕𑀳𑀧𑀢𑀺, 𑀓𑀢𑀁 𑀫𑁂 𑀅𑀚𑁆𑀚 𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀣𑁂𑀭𑁄 𑀉𑀓𑁆𑀓𑀝𑁆𑀞𑀏𑀓𑀸𑀲𑀦𑀺𑀓𑀢𑀸𑀬 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀏𑀯𑀫𑀸𑀳. 𑀉𑀓𑁆𑀓𑀝𑁆𑀞𑀏𑀓𑀸𑀲𑀦𑀺𑀓𑀢𑀸𑀬𑀸𑀢𑀺 𑀘 𑀇𑀤𑀁 𑀪𑀽𑀢𑀓𑀣𑀦𑀯𑀲𑁂𑀦 𑀯𑀼𑀢𑁆𑀢𑀁 𑀣𑁂𑀭𑀲𑁆𑀲 𑀢𑀣𑀸𑀪𑀸𑀯𑀤𑀻𑀧𑀦𑀢𑁆𑀣𑀁. 𑀫𑀼𑀤𑀼𑀓𑀲𑁆𑀲𑀧𑀺 𑀳𑀺 𑀏𑀓𑀸𑀲𑀦𑀺𑀓𑀲𑁆𑀲 𑀬𑀸𑀬 𑀦𑀺𑀲𑀚𑁆𑀚𑀸𑀬 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀪𑁄𑀚𑀦𑀁 𑀪𑀼𑀢𑁆𑀢𑀁, 𑀯𑀢𑁆𑀢𑀲𑀻𑀲𑁂𑀦𑀧𑀺 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀧𑀼𑀦 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 ‘‘𑀆𑀲𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬 𑀪𑁄𑀚𑀦𑀁 𑀯𑀸’’𑀢𑀺. 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑁄𑀧𑀺 𑀲𑀫𑀸𑀦𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑀺𑀤𑀁, 𑀣𑁂𑀭𑁄 𑀲𑀧𑀤𑀸𑀦𑀘𑀸𑀭𑀺𑀓𑁂𑀲𑀼𑀧𑀺 𑀉𑀓𑁆𑀓𑀝𑁆𑀞𑁄𑀬𑁂𑀯. 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑁄𑀧𑀺 𑀳𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀳𑀝𑀪𑀺𑀓𑁆𑀔𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸𑀯 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀢𑁆𑀢𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀓𑀭𑁄𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑀢𑁆𑀢𑀸𑀧𑀺 𑀲𑁆𑀯𑀸𑀢𑀦𑀸𑀬 𑀪𑀺𑀓𑁆𑀔𑀁 𑀦𑀸𑀥𑀺𑀯𑀸𑀲𑁂𑀢𑀺. 𑀅𑀣 𑀓𑀲𑁆𑀫𑀸 ‘‘𑀅𑀥𑀺𑀯𑀸𑀲𑁂𑀲𑀻’’𑀢𑀺 𑀆𑀳 ‘‘𑀲𑀘𑁂 𑀏𑀓𑀪𑀢𑁆𑀢𑀫𑁆𑀧𑀺 𑀦 𑀕𑀳𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀧𑀡𑁆𑀟𑀺𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀅𑀦𑀼𑀕𑁆𑀕𑀳𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀥𑀼𑀢𑀗𑁆𑀕𑀯𑀺𑀲𑀼𑀤𑁆𑀥𑀺𑀓𑀸 𑀦 𑀪𑀯𑀦𑁆𑀢𑀺.

𑁩𑁩. 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁄𑀢𑀺 𑀘𑀢𑀼𑀳𑀢𑁆𑀣𑁄 𑀧𑀼𑀭𑀺𑀲𑁄 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁄. ‘‘𑀙𑀳𑀢𑁆𑀣𑁄’’𑀢𑀺𑀧𑀺 𑀓𑁂𑀘𑀺. 𑀢𑀺𑀭𑁄 𑀓𑀭𑁄𑀦𑁆𑀢𑀺 𑀏𑀢𑀸𑀬𑀸𑀢𑀺 𑀢𑀺𑀭𑁄𑀓𑀭𑀡𑀻𑀢𑀺 𑀲𑀸𑀡𑀺𑀧𑀸𑀓𑀸𑀭𑀯𑀘𑀦𑁄 𑀅𑀬𑀁 𑀢𑀺𑀭𑁄𑀓𑀭𑀡𑀻-𑀲𑀤𑁆𑀤𑁄𑀢𑀺 𑀆𑀳 ‘‘𑀢𑀺𑀭𑁄𑀓𑀭𑀡𑀺𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫’’𑀦𑁆𑀢𑀺. ‘‘𑀢𑀺𑀭𑁄𑀓𑀭𑀡𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀺𑀭𑁄𑀓𑀭𑀡𑀺𑀬’’𑀦𑁆𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀁 𑀯𑀼𑀢𑁆𑀢𑀁. 𑀢𑀺𑀭𑁄𑀓𑀭𑀡𑀻𑀬-𑀲𑀤𑁆𑀤𑁄 𑀯𑀸 𑀅𑀬𑀁 𑀲𑀸𑀡𑀺𑀧𑀸𑀓𑀸𑀭𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀁 𑀲𑀫𑀦𑁆𑀢𑀢𑁄 𑀔𑀺𑀧𑀺𑀢𑁆𑀯𑀸, 𑀧𑀭𑀺𑀢𑁄 𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀫𑀦𑁆𑀢𑀢𑁄 𑀓𑀢𑁆𑀯𑀸’’𑀢𑀺. 𑀯𑀺𑀪𑀢𑁆𑀢𑀺𑀧𑀢𑀺𑀭𑀽𑀧𑀓𑁄𑀧𑀺 𑀦𑀺𑀧𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀢𑁂𑀦𑀸𑀢𑀺 𑀅𑀬𑀫𑁆𑀧𑀺 𑀯𑀸’’𑀢𑀺𑀆𑀤𑀺.

𑁩𑁪. ‘‘𑀅𑀣 ¶ 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘𑀓𑀸𑀮𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’𑀦𑁆𑀢𑀺’’ 𑀏𑀯𑀁 𑀓𑀸𑀮𑀸𑀭𑁄𑀘𑀦𑀲𑁆𑀲 𑀧𑀸𑀴𑀺𑀬𑀁 𑀅𑀦𑀸𑀭𑀼𑀴𑁆𑀳𑀢𑁆𑀢𑀸 𑀆𑀳 𑁋 ‘‘𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀓𑀸𑀮𑀸𑀭𑁄𑀘𑀦𑀁 ¶ 𑀦 𑀯𑀼𑀢𑁆𑀢’’𑀦𑁆𑀢𑀺. 𑀆𑀭𑁄𑀘𑀺𑀢𑁂𑀬𑁂𑀯 𑀓𑀸𑀮𑁂𑀢𑀺 ‘‘𑀓𑀸𑀮𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺 𑀓𑀸𑀮𑁂 𑀆𑀭𑁄𑀘𑀺𑀢𑁂𑀬𑁂𑀯. 𑀤𑁆𑀯𑁂 𑀧𑀼𑀜𑁆𑀚𑁂𑀢𑀺 𑀓𑀳𑀸𑀧𑀡𑀧𑀼𑀜𑁆𑀚𑀜𑁆𑀘 𑀲𑀼𑀯𑀡𑁆𑀡𑀧𑀼𑀜𑁆𑀚𑀜𑁆𑀘.

𑀧𑁂𑀢𑁆𑀢𑀺𑀓𑀦𑁆𑀢𑀺 𑀧𑀺𑀢𑀺𑀢𑁄 𑀆𑀕𑀢𑀁 𑀧𑁂𑀢𑁆𑀢𑀺𑀓𑀁. 𑀦𑀺𑀳𑀺𑀢𑀦𑁆𑀢𑀺 𑀪𑀽𑀫𑀺𑀕𑀢𑀁. 𑀧𑀬𑀼𑀢𑁆𑀢𑀦𑁆𑀢𑀺 𑀯𑀟𑁆𑀠𑀺𑀯𑀲𑁂𑀦 𑀧𑀬𑁄𑀚𑀺𑀢𑀁. 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀧𑀺𑀢𑀸𑀫𑀳𑀁 𑀥𑀦𑀁 𑀮𑀤𑁆𑀥𑀸, 𑀲𑀼𑀔𑀁 𑀚𑀻𑀯𑀢𑀺 𑀲𑀜𑁆𑀚𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀺𑀢𑀸𑀫𑀳𑀢𑁄 𑀆𑀕𑀢𑀁, 𑀧𑀺𑀢𑀸𑀫𑀳𑀲𑁆𑀲 𑀯𑀸 𑀇𑀤𑀁 𑀧𑁂𑀢𑀸𑀫𑀳𑀁. 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀦𑁆𑀢𑀺 𑀲𑀫𑀡𑀯𑁂𑀲𑀁. 𑀦 𑀭𑀸𑀚𑀪𑀻𑀢𑁄𑀢𑀺 𑀅𑀧𑀭𑀸𑀥𑀓𑀸𑀭𑀡𑀸 𑀦 𑀭𑀸𑀚𑀓𑀼𑀮𑀸 𑀪𑀻𑀢𑁄. 𑀬𑁂𑀲𑀁 𑀲𑀦𑁆𑀢𑀓𑀁 𑀥𑀦𑀁 𑀕𑀳𑀺𑀢𑀁, 𑀢𑁂 𑀇𑀡𑀸𑀬𑀺𑀓𑀸. 𑀧𑀮𑀺𑀩𑀼𑀤𑁆𑀥𑁄 𑀧𑀻𑀴𑀺𑀢𑁄.

𑀯𑀺𑀪𑀢𑁆𑀢𑀺𑀧𑀢𑀺𑀭𑀽𑀧𑀓𑁄𑀢𑀺 ‘‘𑀢𑁂𑀦𑀸’’𑀢𑀺 𑀧𑀤𑀁 𑀲𑀦𑁆𑀥𑀸𑀬𑀸𑀳. 𑀢𑀁𑀦𑀺𑀤𑀸𑀦𑀦𑁆𑀢𑀺 𑀢𑀁 𑀥𑀦𑀁 𑀦𑀺𑀤𑀸𑀦𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀢𑀁𑀦𑀺𑀤𑀸𑀦𑀁. 𑀅𑀲𑁆𑀲𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲, 𑀧𑀤𑀲𑁆𑀲 𑀯𑀸. 𑀪𑀬𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀉𑀢𑁆𑀭𑀲𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀪𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀜𑀸𑀡𑀪𑀬𑀁, 𑀦𑀸𑀧𑀺 ‘‘𑀪𑀸𑀬𑀢𑀺 𑀏𑀢𑀲𑁆𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀆𑀭𑀫𑁆𑀫𑀡𑀪𑀬𑀦𑁆𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀢𑀺 𑀅𑀢𑁆𑀣𑁄’’𑀢𑀺. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑁂𑀦 𑀲𑀓𑀮𑀲𑀭𑀻𑀭𑀲𑁆𑀲 𑀙𑀫𑁆𑀪𑀺𑀢𑀪𑀸𑀯𑁄. 𑀯𑀺𑀲𑁂𑀲𑀢𑁄 𑀧𑀦 𑀳𑀤𑀬𑀫𑀁𑀲𑀘𑀮𑀦𑀦𑁆𑀢𑀺 𑀆𑀳 ‘‘𑀓𑀸𑀬𑀓𑀫𑁆𑀧𑁄 𑀳𑀤𑀬𑀫𑀁𑀲𑀘𑀮𑀦’’𑀦𑁆𑀢𑀺. 𑀮𑁄𑀫𑀳𑀁𑀲𑁄𑀢𑀺 𑀢𑁂𑀦 𑀪𑀬𑁂𑀦 𑀢𑁂𑀦 𑀙𑀫𑁆𑀪𑀺𑀢𑀢𑁆𑀢𑁂𑀦 𑀲𑀓𑀮𑀲𑀭𑀻𑀭𑀮𑁄𑀫𑀸𑀦𑀁 𑀳𑀝𑁆𑀞𑀪𑀸𑀯𑁄, 𑀲𑁄 𑀧𑀦 𑀦𑁂𑀲𑀁 𑀪𑀺𑀢𑁆𑀢𑀺𑀬𑀁 𑀦𑀸𑀕𑀤𑀦𑁆𑀢𑀸𑀦𑀁 𑀯𑀺𑀬 𑀉𑀤𑁆𑀥𑀁𑀫𑀼𑀔𑀢𑀸𑀢𑀺 𑀆𑀳 ‘‘𑀮𑁄𑀫𑀸𑀦𑀁 𑀳𑀁𑀲𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄’’𑀢𑀺.

𑁩𑁫. 𑀅𑀢𑁆𑀢𑀦𑀸𑀢𑀺 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁, 𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀯𑀘𑁆𑀙𑀭𑀸𑀦𑀦𑁆𑀢𑀺 𑀅𑀦𑀘𑁆𑀘𑀦𑁆𑀢𑀺𑀬𑁄 𑀲𑀦𑁆𑀥𑀸𑀬𑀸𑀳. 𑀤𑁂𑀯𑀦𑀸𑀝𑀓𑀸𑀦𑀦𑁆𑀢𑀺 𑀦𑀘𑁆𑀘𑀦𑁆𑀢𑀺𑀬𑁄, 𑀧𑀭𑀺𑀬𑀸𑀬𑀯𑀘𑀦𑀁 𑀯𑀸 𑀏𑀢𑀁 𑀤𑁂𑀯𑀓𑀜𑁆𑀜𑀸𑀦𑀁. 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀳𑀼𑀢𑁆𑀯𑀸𑀢𑀺 𑀅𑀬𑀁 𑀮𑁄𑀓𑁄 𑀦𑀸𑀫 𑀅𑀢𑁆𑀢𑀸𑀦𑀁𑀯 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 𑀲𑀸𑀧𑀺 ‘‘𑀇𑀤𑀸𑀦𑀺 𑀅𑀳𑀁 𑀅𑀦𑀸𑀣𑀸 𑀚𑀸𑀢𑀸’’𑀢𑀺 𑀅𑀢𑁆𑀢𑀸𑀦𑀁𑀯 𑀘𑀺𑀦𑁆𑀢𑀬𑀫𑀸𑀦𑀸 ‘‘𑀅𑀬𑀁 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀺, 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀩𑀳𑀺 𑀦 𑀦𑀺𑀓𑁆𑀔𑀦𑁆𑀢𑀸 𑀏𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀤𑀸𑀭𑀓𑁄𑀧𑀺 𑀦 𑀮𑀤𑁆𑀥𑁄, 𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀚𑀻𑀯𑁂𑀬𑁆𑀬𑀸𑀫𑀺, 𑀇𑀢𑁄 𑀘𑀸𑀫𑁆𑀳𑀺 𑀧𑀭𑀺𑀳𑀻𑀦𑀸 𑀅𑀜𑁆𑀜𑀢𑁄 𑀘𑀸𑀢𑀺 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀳𑀼𑀢𑁆𑀯𑀸. 𑀓𑀼𑀮𑀭𑀼𑀓𑁆𑀔𑀧𑀢𑀺𑀝𑁆𑀞𑀸𑀧𑀦𑁂 𑀩𑀻𑀚𑀲𑀤𑀺𑀲𑀢𑁆𑀢𑀸 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄 𑀧𑀼𑀢𑁆𑀢𑁄 𑀇𑀥 𑀩𑀻𑀚𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀓𑀼𑀮𑀯𑀁𑀲𑀩𑀻𑀚𑀓𑀁 ¶ 𑀏𑀓𑀁 𑀧𑀼𑀢𑁆𑀢’’𑀦𑁆𑀢𑀺. 𑀲𑀁 𑀦𑀸𑀫 𑀥𑀦𑀁, 𑀢𑀲𑁆𑀲 𑀧𑀢𑀻𑀢𑀺 𑀲𑀁𑀧𑀢𑀺, 𑀥𑀦𑀯𑀸 ¶ 𑀯𑀺𑀪𑀯𑀲𑀫𑁆𑀧𑀦𑁆𑀦𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀸𑀯𑀳𑀢𑁆𑀢𑀸 𑀢𑀲𑁆𑀲 𑀳𑀺𑀢𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀁, 𑀢𑀤𑁂𑀯 𑀥𑀦𑀁 𑀯𑀺𑀪𑀯𑁄𑀢𑀺 𑀆𑀳 𑁋 ‘‘𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀏𑀯𑀁 𑀫𑀳𑀦𑁆𑀢𑀁 𑀅𑀫𑁆𑀳𑀸𑀓𑀁 𑀯𑀺𑀪𑀯’’𑀦𑁆𑀢𑀺.

𑁩𑁬. 𑀇𑀢𑁆𑀣𑀻𑀦𑀁 𑀓𑀼𑀫𑀸𑀭𑀻𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑀢𑁄 𑀑𑀭𑀁 𑀅𑀲𑀢𑀺 𑀯𑀺𑀩𑀦𑁆𑀥𑁂 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁂 𑀢𑀢𑀺𑀬𑁂 𑀆𑀯𑀢𑁆𑀢𑁂 𑀓𑀢𑀺𑀧𑀬𑀸 𑀮𑁄𑀳𑀺𑀢𑀧𑀻𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀅𑀕𑁆𑀕𑀳𑀺𑀢𑀧𑀼𑀩𑁆𑀩𑀸 𑀏𑀯 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺, 𑀢𑀢𑁆𑀣 𑀉𑀢𑀼𑀲𑀫𑀜𑁆𑀜𑀸 𑀧𑀼𑀧𑁆𑀨𑀲𑀫𑀜𑁆𑀜𑀸 𑀘𑀸𑀢𑀺 𑀆𑀳 𑁋 ‘‘𑀧𑀼𑀧𑁆𑀨𑀦𑁆𑀢𑀺 𑀉𑀢𑀼𑀓𑀸𑀮𑁂 𑀉𑀧𑁆𑀧𑀦𑁆𑀦𑀮𑁄𑀳𑀺𑀢𑀲𑁆𑀲 𑀦𑀸𑀫’’𑀦𑁆𑀢𑀺. 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂𑀢𑀺 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀲𑀡𑁆𑀞𑀳𑀺𑀢𑁆𑀯𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸. 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀕𑁆𑀕𑀳𑀺𑀢𑀧𑀼𑀩𑁆𑀩𑀸 𑀏𑀯 𑀪𑀺𑀚𑁆𑀚𑀦𑁆𑀢𑀺. 𑀅𑀬𑀜𑁆𑀳𑀺 𑀢𑀸𑀲𑀁 𑀲𑀪𑀸𑀯𑁄. 𑀤𑁄𑀲𑁂𑀦𑀸𑀢𑀺 𑀮𑁄𑀳𑀺𑀢𑀫𑀮𑁂𑀦. 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀻𑀢𑀺 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀢𑁆𑀢𑀸 𑀅𑀦𑀸𑀫𑀬𑀢𑁆𑀢𑀸 𑀘 𑀦𑀳𑀸𑀦𑀢𑁄 𑀧𑀭𑀁 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀼𑀤𑁆𑀥𑁂 𑀕𑀩𑁆𑀪𑀸𑀲𑀬𑁂. 𑀲𑀼𑀤𑁆𑀥𑁂 𑀧𑀦 𑀯𑀢𑁆𑀣𑀼𑀫𑁆𑀳𑀺 𑀫𑀸𑀢𑀸𑀧𑀺𑀢𑀽𑀲𑀼 𑀏𑀓𑀯𑀸𑀭𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀬𑀸𑀯 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀔𑁂𑀢𑁆𑀢𑀫𑁂𑀯 𑀳𑁄𑀢𑀺 𑀕𑀩𑁆𑀪𑀲𑀡𑁆𑀞𑀳𑀦𑀲𑁆𑀲 𑀧𑀭𑀺𑀢𑁆𑀢𑀲𑁆𑀲 𑀮𑁄𑀳𑀺𑀢𑀮𑁂𑀧𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀅𑀟𑁆𑀠𑀫𑀸𑀲𑀫𑀢𑁆𑀢𑀫𑁆𑀧𑀺 𑀔𑁂𑀢𑁆𑀢𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀩𑀸𑀳𑀸𑀬𑀦𑁆𑀢𑀺 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀬𑀸 𑀩𑀸𑀳𑀸, 𑀢𑀢𑁆𑀭 𑀦𑀁 𑀕𑀳𑁂𑀢𑁆𑀯𑀸’’𑀢𑀺. 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀺𑀬𑁂𑀯 𑀬𑀣𑀸 ‘‘𑀲𑀼𑀤𑀺𑀦𑁆𑀦𑀲𑁆𑀲 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸’’𑀢𑀺.

𑀧𑀼𑀩𑁆𑀩𑁂𑀧𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀩𑁆𑀪𑀸𑀯𑀢𑁄 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀧𑀸𑀭𑀸𑀚𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀧𑀺𑀢𑁂’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 𑁋 ‘‘𑀪𑀕𑀯𑀢𑁄 𑀓𑀺𑀭 𑀧𑀞𑀫𑀩𑁄𑀥𑀺𑀬’’𑀦𑁆𑀢𑀺𑀆𑀤𑀺. 𑀏𑀯𑀭𑀽𑀧𑀦𑁆𑀢𑀺 𑀧𑀸𑀭𑀸𑀚𑀺𑀓𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀫𑁆𑀧𑀺 𑀅𑀚𑁆𑀛𑀸𑀘𑀸𑀭𑀁 𑀦𑀸𑀓𑀁𑀲𑀼𑀬𑁂𑀯. 𑀢𑁂𑀦𑁂𑀯𑀸𑀳 𑁋 ‘‘𑀅𑀯𑀲𑁂𑀲𑁂 𑀧𑀜𑁆𑀘 𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀏𑀯 𑀧𑀜𑁆𑀜𑀧𑁂𑀲𑀻’’𑀢𑀺. 𑀇𑀤𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀮𑀳𑀼𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀲𑀩𑁆𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑀯𑀲𑁂𑀲𑀢𑁄 𑀧𑀜𑁆𑀜𑀢𑁆𑀢𑀢𑁆𑀢𑀸𑀯. 𑀧𑀞𑀫𑀩𑁄𑀥𑀺𑀬𑀁 𑀧𑀜𑁆𑀘𑀦𑁆𑀦𑀁 𑀮𑀳𑀼𑀓𑀸𑀧𑀢𑁆𑀢𑀻𑀦𑀁 𑀲𑀩𑁆𑀪𑀸𑀯𑀯𑀘𑀦𑁂𑀦𑁂𑀯 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸 𑀯𑀺𑀲𑁂𑀲𑀢𑁄 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀘 𑀳𑁂𑀢𑀼𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑁂𑀘𑀺 ¶ 𑀧𑀦 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑀲𑁂𑀲𑀧𑀜𑁆𑀘𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀏𑀯 𑀧𑀜𑁆𑀜𑀧𑁂𑀲𑀻𑀢𑀺 𑀇𑀤𑀁 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀯𑁂𑀭𑀜𑁆𑀚𑀸𑀬𑀁 𑀯𑀼𑀢𑁆𑀣𑀯𑀲𑁆𑀲𑁂𑀦 𑀪𑀕𑀯𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀢𑁄. 𑀢𑁂𑀦𑁂𑀯 𑀯𑁂𑀭𑀜𑁆𑀚𑀓𑀡𑁆𑀟𑁂 ‘‘𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄’’𑀢𑀺 𑀘 ‘‘𑀲𑀸𑀫𑀫𑁆𑀧𑀺 𑀧𑀘𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺, 𑀦 𑀘 𑀯𑀝𑁆𑀝𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀆𑀭𑀸𑀥𑀬𑀺𑀁𑀲𑀽𑀢𑀺 𑀘𑀺𑀢𑁆𑀢𑀁 𑀕𑀡𑁆𑀳𑀺𑀁𑀲𑀼, 𑀅𑀚𑁆𑀛𑀸𑀲𑀬𑀁 ¶ 𑀧𑀽𑀭𑀬𑀺𑀁𑀲𑀼, 𑀳𑀤𑀬𑀕𑀸𑀳𑀺𑀦𑀺𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀲𑀫𑀬𑁂, 𑀧𑀞𑀫𑀩𑁄𑀥𑀺𑀬𑀦𑁆𑀢𑀺 𑀅𑀢𑁆𑀣𑁄.

𑀬𑀁 𑀆𑀤𑀻𑀦𑀯𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄. 𑀆𑀤𑀻𑀦𑀯𑀁 𑀤𑀲𑁆𑀲𑁂𑀲𑁆𑀲𑀢𑀻𑀢𑀺 ‘‘𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀲𑁆𑀲𑀢𑀺. 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻𑀢𑀺 𑀇𑀫𑀲𑁆𑀲 ‘‘𑀧𑀯𑀢𑁆𑀢𑁂𑀲𑀻’’𑀢𑀺 𑀅𑀬𑀫𑀢𑁆𑀣𑁄 𑀓𑀣𑀁 𑀮𑀤𑁆𑀥𑁄𑀢𑀺 𑀆𑀳 ‘‘𑀧𑀯𑀢𑁆𑀢𑀦𑀸𑀧𑀺 𑀳𑀻’’𑀢𑀺𑀆𑀤𑀺. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀘𑁄𑀧𑀦𑀢𑁄𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀘𑀮𑀦𑀢𑁄. 𑀓𑀲𑁆𑀫𑀸 𑀧𑀦𑁂𑀲 𑀫𑁂𑀣𑀼𑀦𑀥𑀫𑁆𑀫𑁂𑀦 𑀅𑀦𑀢𑁆𑀣𑀺𑀓𑁄𑀧𑀺 𑀲𑀫𑀸𑀦𑁄 𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻𑀢𑀺 𑀆𑀳 𑁋 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀯𑀺𑀜𑁆𑀜𑀸𑀧𑀦𑀜𑁆𑀘𑁂𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀯𑀺𑀜𑁆𑀜𑀸𑀧𑀦𑀦𑁆𑀢𑀺 𑀫𑀼𑀢𑁆𑀢𑀺𑀧𑀸𑀧𑀦𑀯𑀲𑁂𑀦 𑀢𑀻𑀲𑀼 𑀯𑀸𑀭𑁂𑀲𑀼 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀦𑀁.

𑀲𑀩𑁆𑀩𑁂𑀲𑀫𑁆𑀧𑀺 𑀧𑀤𑀸𑀦𑀁 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀯𑀺𑀦𑀸𑀧𑀺 𑀏𑀯𑀓𑀸𑀭𑀁 𑀅𑀯𑀥𑀸𑀭𑀡𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑁂𑀦𑁂𑀯 𑀅𑀚𑁆𑀛𑀸𑀘𑀸𑀭𑁂𑀦𑀸’’𑀢𑀺. 𑀅𑀝𑁆𑀞 𑀳𑀺 𑀕𑀩𑁆𑀪𑀓𑀸𑀭𑀡𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀫𑁂𑀣𑀼𑀦𑀘𑁄𑀴𑀕𑁆𑀕𑀳𑀡𑀁, 𑀢𑀦𑀼𑀲𑀁𑀲𑀕𑁆𑀕𑁄 𑀘 𑀦𑀸𑀪𑀺𑀆𑀫𑀲𑀦𑀁;

𑀧𑀸𑀦𑀁 𑀤𑀲𑁆𑀲𑀦𑀲𑀯𑀦𑀁, 𑀖𑀸𑀬𑀦𑀫𑀺𑀢𑀺 𑀕𑀩𑁆𑀪𑀳𑁂𑀢𑀯𑁄 𑀅𑀝𑁆𑀞𑀸’’𑀢𑀺.

𑀇𑀤𑀸𑀦𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀓𑀺𑀁 𑀧𑀦 𑀅𑀜𑁆𑀜𑀣𑀸𑀧𑀺 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀻’’𑀢𑀺𑀆𑀤𑀺. 𑀦𑀦𑀼 𑀘 𑀦𑀸𑀪𑀺𑀧𑀭𑀸𑀫𑀲𑀦𑀫𑁆𑀧𑀺 𑀓𑀸𑀬𑀲𑀁𑀲𑀕𑁆𑀕𑁄𑀬𑁂𑀯, 𑀓𑀲𑁆𑀫𑀸 𑀦𑀁 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺? 𑀉𑀪𑀬𑁂𑀲𑀁 𑀙𑀦𑁆𑀤𑀭𑀸𑀕𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑁄 𑀯𑀼𑀢𑁆𑀢𑁄, 𑀇𑀢𑁆𑀣𑀺𑀬𑀸 𑀙𑀦𑁆𑀤𑀭𑀸𑀕𑀯𑀲𑁂𑀦 𑀦𑀸𑀪𑀺𑀧𑀭𑀸𑀫𑀲𑀦𑀁, 𑀯𑀢𑁆𑀣𑀼𑀯𑀲𑁂𑀦 𑀯𑀸 𑀢𑀁 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺, 𑀓𑀣𑀜𑁆𑀘 𑀢𑀢𑁆𑀣 𑀲𑀼𑀓𑁆𑀓𑀲𑁄𑀡𑀺𑀢𑀲𑁆𑀲 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀇𑀢𑁆𑀣𑀺𑀬𑁄 𑀳𑀻’’𑀢𑀺𑀆𑀤𑀺 ¶ . 𑀙𑀦𑁆𑀤𑀭𑀸𑀕𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀇𑀢𑁆𑀣𑀺𑀬𑀸 𑀲𑀼𑀓𑁆𑀓𑀓𑁄𑀝𑁆𑀞𑀸𑀲𑁄 𑀘𑀮𑀺𑀢𑁄 𑀳𑁄𑀢𑀺, 𑀲𑁄𑀧𑀺 𑀕𑀩𑁆𑀪𑀲𑀡𑁆𑀞𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑁆𑀣𑀺𑀲𑀦𑁆𑀢𑀸𑀦𑁂𑀧𑀺 𑀳𑀺 𑀭𑀲𑀸𑀤𑀺𑀲𑀢𑁆𑀢𑀥𑀸𑀢𑀼𑀬𑁄 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀢𑁂𑀦𑀸𑀳 𑁋 ‘‘𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀁 𑀲𑀸𑀤𑀺𑀬𑀦𑁆𑀢𑀺𑀬𑁄𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻’’𑀢𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀦𑀸 𑀲𑀢𑁆𑀢𑀧𑁆𑀧𑀓𑀸𑀭𑁂𑀦 𑀕𑀩𑁆𑀪𑀕𑁆𑀕𑀳𑀡𑁂 𑀧𑀺𑀢𑀼 𑀲𑀼𑀓𑁆𑀓𑀓𑁄𑀝𑁆𑀞𑀸𑀲𑀁 𑀯𑀺𑀦𑀸 𑀙𑀦𑁆𑀤𑀭𑀸𑀕𑀯𑀲𑁂𑀦 𑀫𑀸𑀢𑀼 𑀯𑀺𑀓𑀸𑀭𑀧𑁆𑀧𑀢𑁆𑀢𑀁 𑀮𑁄𑀳𑀺𑀢𑀫𑁂𑀯 𑀕𑀩𑁆𑀪𑀲𑀡𑁆𑀞𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀫𑀸𑀢𑀸 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀲𑀘𑁂 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄 𑀳𑀼𑀢𑁆𑀯𑀸 𑀢𑀸𑀤𑀺𑀲𑀁 𑀧𑀺𑀢𑀭𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀧𑀺𑀢𑀼𑀖𑀸𑀢𑀓𑁄𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀢𑀁 ¶ 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀻𑀢𑀺 𑀧𑀼𑀭𑀸𑀡𑀘𑀻𑀯𑀭𑀁 𑀥𑁄𑀯𑀦𑁆𑀢𑀻 𑀢𑀢𑁆𑀣 𑀬𑀁 𑀅𑀲𑀼𑀘𑀺𑀁 𑀅𑀤𑁆𑀤𑀲, 𑀢𑀁 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀧𑀺𑀯𑀺. ‘‘𑀯𑀝𑁆𑀝𑀢𑀺 𑀢𑀼𑀫𑁆𑀳𑀸𑀓𑀁 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀧𑀼𑀝𑁆𑀞𑁄 ‘‘𑀓𑀧𑁆𑀧𑀢𑀼 𑀯𑀸 𑀫𑀸 𑀯𑀸 𑀓𑀧𑁆𑀧𑀢𑀼, 𑀫𑀬𑀁 𑀢𑁂𑀦 𑀅𑀦𑀢𑁆𑀣𑀺𑀓𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀢𑁆𑀣𑀺𑀓𑀸 𑀫𑀬𑀁 𑀏𑀢𑁂𑀦𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀦𑀸𑀪𑀺𑀧𑀭𑀸𑀫𑀲𑀦𑁂 𑀫𑁂𑀣𑀼𑀦𑀭𑀸𑀕𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀦𑀸𑀪𑀺𑀧𑀭𑀸𑀫𑀲𑀦𑀓𑀸𑀮𑁂 𑀨𑀲𑁆𑀲𑀲𑀸𑀤𑀺𑀬𑀦𑀯𑀲𑁂𑀦 𑀅𑀲𑁆𑀲𑀸𑀤𑀫𑀢𑁆𑀢𑀁 𑀢𑀲𑁆𑀲𑀸 𑀅𑀳𑁄𑀲𑀻𑀢𑀺 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀕𑀩𑁆𑀪𑀲𑀡𑁆𑀞𑀳𑀦𑀁 𑀦 𑀲𑀺𑀬𑀸. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀫𑀡𑁆𑀟𑀩𑁆𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺, 𑀘𑀡𑁆𑀟𑀧𑀚𑁆𑀚𑁄𑀢𑀫𑀸𑀢𑀼 𑀦𑀸𑀪𑀺𑀬𑀁 𑀯𑀺𑀘𑁆𑀙𑀺𑀓𑀸 𑀨𑀭𑀺𑀢𑁆𑀯𑀸 𑀕𑀢𑀸, 𑀢𑁂𑀦 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀻𑀢𑀺 𑀆𑀳 ‘‘𑀏𑀢𑁂𑀦𑁂𑀯 𑀦𑀬𑁂𑀦𑀸’’𑀢𑀺𑀆𑀤𑀺. 𑀧𑀼𑀭𑀺𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀯𑀸𑀢𑀧𑀸𑀦𑀸𑀤𑀺𑀦𑀸 𑀤𑀺𑀲𑁆𑀯𑀸 𑀯𑀸 𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀸 𑀧𑀼𑀭𑀺𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀭𑀸𑀚𑁄𑀭𑁄𑀥𑀸 𑀯𑀺𑀬𑀸𑀢𑀺 𑀲𑀻𑀳𑀴𑀤𑀻𑀧𑁂 𑀓𑀺𑀭 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀢𑀣𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀅𑀬𑀦𑁆𑀢𑀺 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀅𑀚𑁆𑀛𑀸𑀘𑀸𑀭𑀁 𑀲𑀦𑁆𑀥𑀸𑀬. 𑀲𑀼𑀓𑁆𑀓𑀁 𑀲𑀦𑁆𑀥𑀸𑀬 ‘‘𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀻𑀢𑀺 𑀮𑁄𑀳𑀺𑀢𑀁 𑀲𑀦𑁆𑀥𑀸𑀬. 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀲𑀤𑁆𑀥𑀫𑁆𑀫𑀯𑀲𑁂𑀦 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀕𑀢𑀸 𑀲𑀗𑁆𑀕𑀢𑀸 𑀳𑁄𑀦𑁆𑀢𑀺. 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀻𑀢𑀺 𑀇𑀤𑀁 𑀉𑀢𑀼𑀲𑀫𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀮𑁄𑀓𑀲𑀫𑀜𑁆𑀜𑀸𑀓𑀭𑀚𑀲𑁆𑀲 𑀮𑀕𑁆𑀕𑀦𑀤𑀺𑀯𑀲𑀫𑀢𑁆𑀢𑀁. 𑀕𑀦𑁆𑀥𑀩𑁆𑀩𑁄𑀢𑀺 𑀢𑀢𑁆𑀭𑀽𑀧𑀕𑀲𑀢𑁆𑀢𑁄, 𑀕𑀦𑁆𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢-𑀓𑀸𑀭𑀲𑁆𑀲 𑀥-𑀓𑀸𑀭𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀕𑀦𑁆𑀥𑀦𑀢𑁄 𑀉𑀧𑁆𑀧𑀚𑁆𑀚𑀦𑀕𑀢𑀺𑀬𑀸 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑁂𑀦 𑀲𑀽𑀘𑀦𑀢𑁄 ¶ 𑀤𑀻𑀧𑀦𑀢𑁄 𑀕𑀦𑁆𑀥𑁄𑀢𑀺 𑀮𑀤𑁆𑀥𑀦𑀸𑀫𑁂𑀦 𑀪𑀯𑀕𑀸𑀫𑀺𑀓𑀫𑁆𑀫𑀼𑀦𑀸 𑀅𑀩𑁆𑀩𑀢𑀺 𑀧𑀯𑀢𑁆𑀢𑀢𑀻𑀢𑀺 𑀕𑀦𑁆𑀥𑀩𑁆𑀩𑁄, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑁄. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀉𑀧𑀕𑀢𑁄 𑀳𑁄𑀢𑀺. 𑀏𑀢𑁆𑀣 𑀘 𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀦𑀺𑀧𑀸𑀢𑀁 𑀑𑀮𑁄𑀓𑀬𑀫𑀸𑀦𑁄 𑀲𑀫𑀻𑀧𑁂 𑀞𑀺𑀢𑁄 𑀦𑀸𑀫 𑀳𑁄𑀢𑀺, 𑀓𑀫𑁆𑀫𑀬𑀦𑁆𑀢𑀬𑀦𑁆𑀢𑀺𑀢𑁄 𑀧𑀦 𑀏𑀓𑁄 𑀲𑀢𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀩𑁆𑀩𑀢𑁆𑀢𑀦𑀓𑁄 𑀧𑀼𑀭𑀺𑀫𑀚𑀸𑀢𑀺𑀬𑀁 𑀞𑀺𑀢𑁄𑀬𑁂𑀯 𑀕𑀢𑀺𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀧𑀢𑁆𑀢𑀸𑀪𑀺𑀫𑀼𑀔𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀦𑁆𑀦𑀺𑀧𑀸𑀢𑀸𑀢𑀺 𑀲𑀫𑁄𑀥𑀸𑀦𑁂𑀦 𑀲𑀫𑀸𑀕𑀫𑁂𑀦. 𑀕𑀩𑁆𑀪𑀲𑁆𑀲𑀸𑀢𑀺 𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀲𑁆𑀲. 𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑁄𑀧𑀺 𑀳𑀺 𑀕𑀩𑁆𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀬𑀣𑀸 𑀔𑁄 𑀧𑀦𑀸𑀦𑀦𑁆𑀤, 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁦𑁫). 𑀓𑀢𑁆𑀣𑀘𑀺 𑀧𑀦 𑀕𑀩𑁆𑀪𑁄𑀢𑀺 𑀫𑀸𑀢𑀼𑀓𑀼𑀘𑁆𑀙𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁧𑁫.𑁩𑁬𑁩); 𑁋

𑀏𑀢𑁆𑀣 ¶ 𑀘 𑀕𑀩𑁆𑀪𑀢𑀺 𑀅𑀢𑁆𑀢𑀪𑀸𑀯𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀕𑀩𑁆𑀪𑁄, 𑀓𑀮𑀮𑀸𑀤𑀺𑀅𑀯𑀢𑁆𑀣𑁄 𑀥𑀫𑁆𑀫𑀧𑁆𑀧𑀩𑀦𑁆𑀥𑁄, 𑀢𑀁𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀦 𑀲𑀢𑁆𑀢𑀲𑀦𑁆𑀢𑀸𑀦𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑀁𑀦𑀺𑀲𑁆𑀲𑀬𑀪𑀸𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀕𑀩𑁆𑀪𑁄 𑀯𑀺𑀬𑀸𑀢𑀺 𑀯𑀸. 𑀬𑀣𑀸 𑀳𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀲𑀢𑁆𑀢𑀸𑀦𑀁 𑀑𑀯𑀭𑀓𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑀢𑁆𑀢𑀸𑀦𑀁 𑀬𑀸𑀯 𑀅𑀪𑀺𑀚𑀸𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺.

𑀆𑀭𑀓𑁆𑀔𑀤𑁂𑀯𑀢𑀸𑀢𑀺 𑀢𑀲𑁆𑀲 𑀆𑀭𑀓𑁆𑀔𑀢𑁆𑀣𑀸𑀬 𑀞𑀺𑀢𑀸 𑀤𑁂𑀯𑀢𑀸. 𑀅𑀲𑁆𑀲 𑀢𑀁 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀼𑀦𑁆𑀢𑀺 𑀢𑀣𑀸 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀦𑀺𑀘𑁆𑀙𑀸𑀭𑁂𑀲𑀼𑀁. 𑀓𑀺𑀜𑁆𑀘𑀸𑀧𑀺 𑀇𑀥 𑀧𑀸𑀴𑀺𑀬𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀯𑀺𑀲𑀼𑀁 𑀦 𑀆𑀕𑀢𑀸, 𑀢𑀣𑀸𑀧𑀺 𑀲𑀤𑁆𑀤𑀲𑁆𑀲 𑀅𑀦𑀼𑀲𑁆𑀲𑀸𑀯𑀦𑁂 𑀅𑀬𑀫𑀦𑀼𑀓𑁆𑀓𑀫𑁄𑀢𑀺 𑀤𑀲𑁆𑀲𑁂𑀢𑀼𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀢𑀸𑀬𑁄 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀢𑁂𑀦𑁂𑀢𑁆𑀣 𑀆𑀓𑀸𑀲𑀝𑁆𑀞𑀓𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑀝𑁆𑀞𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺𑀳𑀸𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀏𑀯𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀏𑀯’’𑀦𑁆𑀢𑀺. 𑀔𑀡𑁂𑀦 𑀫𑀼𑀳𑀼𑀢𑁆𑀢𑁂𑀦𑀸𑀢𑀺 𑀧𑀤𑀤𑁆𑀯𑀬𑀁 𑀯𑁂𑀯𑀘𑀦𑀪𑀸𑀯𑀢𑁄 𑀲𑀫𑀸𑀦𑀢𑁆𑀣𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀓𑁄𑀮𑀸𑀳𑀮𑀫𑀳𑁄𑀲𑀻𑀢𑀺 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁂𑀲𑀼 ¶ 𑀏𑀓𑀓𑁄𑀮𑀸𑀳𑀮𑀫𑀳𑁄𑀲𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑁄 𑀲𑀤𑁆𑀤𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀩𑁆𑀪𑀼𑀕𑁆𑀕𑀘𑁆𑀙𑀺, 𑀢𑀣𑀸𑀧𑀺 𑀦 𑀲𑁄 𑀫𑀦𑀼𑀲𑁆𑀲𑀸𑀦𑀁 𑀯𑀺𑀲𑀬𑁄 𑀢𑁂𑀲𑀁 𑀭𑀽𑀧𑀁 𑀯𑀺𑀬, 𑀢𑁂𑀦𑁂𑀯 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀘𑁆𑀘𑀺 𑀦𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀅𑀦𑀪𑀺𑀭𑀢𑁄’’𑀢𑀺.

𑁩𑁭. ‘‘𑀏𑀯𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀧𑀩𑁆𑀩𑀚𑁆𑀚𑀸 𑀲𑀨𑀮𑀸 𑀅𑀳𑁄𑀲𑀺, 𑀧𑀺𑀢𑀸 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀯𑀺𑀳𑀸𑀲𑀻’’𑀢𑀺 𑀯𑀘𑀦𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀭𑀳𑀢𑁆𑀢𑀸𑀥𑀺𑀕𑀫𑁄 𑀦𑀸𑀳𑁄𑀲𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑁂𑀘𑀺 𑀧𑀦 ‘‘𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀬 𑀘𑁄𑀤𑀺𑀬𑀫𑀸𑀦𑀲𑁆𑀲 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀼𑀤𑀺𑀦𑁆𑀦𑁄 𑀢𑀁 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺, 𑀢𑁂𑀦𑁂𑀯 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀦 𑀲𑀫𑁂𑀢𑀺. 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸 𑀘 𑀅𑀧𑁆𑀧𑀫𑀸𑀡𑀁 𑀢𑀸𑀤𑀺𑀲𑀲𑁆𑀲𑀧𑀺 𑀅𑀦𑁆𑀢𑀭𑀸𑀓𑀢𑀧𑀸𑀧𑀓𑀫𑁆𑀫𑀲𑁆𑀲 𑀯𑀲𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑀺𑀬 𑀅𑀥𑀺𑀕𑀫𑀦𑁆𑀢𑀭𑀸𑀬𑀤𑀲𑁆𑀲𑀦𑀢𑁄. 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀮𑀓𑁆𑀔𑀡𑀁 𑀓𑀼𑀓𑁆𑀓𑀼𑀘𑁆𑀘𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀚𑁆𑀛𑀸𑀘𑀸𑀭𑀳𑁂𑀢𑀼𑀓𑁄 𑀧𑀘𑁆𑀙𑀸𑀦𑀼𑀢𑀸𑀧𑁄’’𑀢𑀺. 𑀓𑀢𑀁 𑀅𑀚𑁆𑀛𑀸𑀘𑀸𑀭𑀁 𑀧𑀝𑀺𑀘𑁆𑀘 𑀅𑀦𑀼𑀲𑁄𑀘𑀦𑀯𑀲𑁂𑀦 𑀯𑀺𑀭𑀽𑀧𑀁 𑀲𑀭𑀡𑀁 𑀘𑀺𑀦𑁆𑀢𑀦𑀁 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀆𑀳 ‘‘𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺. 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀺𑀭𑀺𑀬𑀸𑀢𑀺 𑀓𑀼𑀓𑀢𑀁, 𑀓𑀼𑀓𑀢𑀫𑁂𑀯 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀆𑀳 ‘‘𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸𑀪𑀸𑀯𑀢𑁄 𑀓𑀼𑀓𑁆𑀓𑀼𑀘𑁆𑀘’’𑀦𑁆𑀢𑀺. 𑀧𑀭𑀺𑀬𑀸𑀤𑀺𑀦𑁆𑀦𑀫𑀁𑀲𑀮𑁄𑀳𑀺𑀢𑀢𑁆𑀢𑀸𑀢𑀺 𑀧𑀭𑀺𑀓𑁆𑀔𑀻𑀡𑀫𑀁𑀲𑀮𑁄𑀳𑀺𑀢𑀢𑁆𑀢𑀸. 𑀅𑀯𑀺𑀧𑁆𑀨𑀸𑀭𑀺𑀓𑁄𑀢𑀺 𑀉𑀤𑁆𑀤𑁂𑀲𑀸𑀤𑀻𑀲𑀼 𑀩𑁆𑀬𑀸𑀧𑀸𑀭𑀭𑀳𑀺𑀢𑁄, 𑀅𑀩𑁆𑀬𑀸𑀯𑀝𑁄𑀢𑀺 𑀅𑀢𑁆𑀣𑁄. 𑀯𑀳𑀘𑁆𑀙𑀺𑀦𑁆𑀦𑁄𑀢𑀺 ¶ 𑀙𑀺𑀦𑁆𑀦𑀯𑀳𑁄, 𑀪𑀸𑀭𑀯𑀳𑀦𑁂𑀦 𑀙𑀺𑀦𑁆𑀦𑀓𑁆𑀔𑀦𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑀁 𑀘𑀺𑀦𑁆𑀢𑀬𑀻𑀢𑀺 ‘‘𑀬𑀤𑀺 𑀅𑀳𑀁 𑀢𑀁 𑀧𑀸𑀧𑀁 𑀦 𑀓𑀭𑀺𑀲𑁆𑀲𑀁, 𑀇𑀫𑁂 𑀪𑀺𑀓𑁆𑀔𑀽 𑀯𑀺𑀬 𑀧𑀭𑀺𑀧𑀼𑀡𑁆𑀡𑀲𑀻𑀮𑁄 𑀅𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀘𑀺𑀦𑁆𑀢𑀬𑀺.

𑁩𑁮. 𑀏𑀯𑀁𑀪𑀽𑀢𑀦𑁆𑀢𑀺 𑀓𑀺𑀲𑀮𑀽𑀔𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁. 𑀕𑀡𑀲𑀗𑁆𑀕𑀡𑀺𑀓𑀸𑀧𑀧𑀜𑁆𑀘𑁂𑀦𑀸𑀢𑀺 𑀕𑀡𑁂 𑀚𑀦𑀲𑀫𑀸𑀕𑀫𑁂 𑀲𑀦𑁆𑀦𑀺𑀧𑀢𑀦𑀁 𑀕𑀡𑀲𑀗𑁆𑀕𑀡𑀺𑀓𑀸, 𑀕𑀡𑀲𑀗𑁆𑀕𑀡𑀺𑀓𑀸𑀬𑁂𑀯 𑀧𑀧𑀜𑁆𑀘𑁄 𑀕𑀡𑀲𑀗𑁆𑀕𑀡𑀺𑀓𑀸𑀧𑀧𑀜𑁆𑀘𑁄, 𑀢𑁂𑀦. 𑀬𑀲𑁆𑀲𑀸𑀢𑀺 𑀬𑁂 𑀅𑀲𑁆𑀲. 𑀓𑀣𑀸𑀨𑀸𑀲𑀼𑀓𑀸𑀢𑀺 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑁂𑀦𑁂𑀯 𑀓𑀣𑀸𑀓𑀭𑀡𑁂 𑀨𑀸𑀲𑀼𑀓𑀸, 𑀲𑀼𑀔𑁂𑀦 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸, 𑀲𑀼𑀔𑀲𑀫𑁆𑀪𑀸𑀲𑀸𑀢𑀺 𑀅𑀢𑁆𑀣𑁄. 𑀧𑀲𑀸𑀤𑀲𑁆𑀲 𑀧𑀫𑀸𑀡𑀢𑁄 𑀊𑀦𑀸𑀥𑀺𑀓𑀢𑁆𑀢𑀁 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀲𑀸𑀤𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀲𑁆𑀲 𑀲𑀫𑁆𑀧𑀼𑀡𑁆𑀡𑀢𑁆𑀢𑀸’’𑀢𑀺. 𑀤𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀢𑀭𑀳𑀺-𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 𑀆𑀳 ‘‘𑀤𑀸𑀦𑀻𑀢𑀺 𑀦𑀺𑀧𑀸𑀢𑁄’’𑀢𑀺. 𑀦𑁄-𑀲𑀤𑁆𑀤𑁄𑀧𑀺 𑀦𑀼-𑀲𑀤𑁆𑀤𑁄 𑀯𑀺𑀬 𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀘𑁆𑀘𑀺 ¶ 𑀦𑀼 𑀢𑁆𑀯’’𑀦𑁆𑀢𑀺. 𑀢𑀫𑁂𑀯 𑀅𑀦𑀪𑀺𑀭𑀢𑀺𑀦𑁆𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑀁 𑀢𑀫𑁂𑀯 𑀕𑀺𑀳𑀺𑀪𑀸𑀯𑀧𑀢𑁆𑀣𑀦𑀸𑀓𑀸𑀭𑀁 𑀅𑀦𑀪𑀺𑀭𑀢𑀺𑀁. ‘‘𑀢𑀫𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀓𑀼𑀲𑀮𑀸𑀦’’𑀦𑁆𑀢𑀺𑀆𑀤𑀺. 𑀅𑀥𑀺𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀬𑁄. 𑀅𑀢𑁆𑀣𑀻𑀢𑀺 𑀯𑀺𑀲𑀬𑀪𑀸𑀯𑁂𑀦 𑀘𑀺𑀢𑁆𑀢𑁂 𑀧𑀭𑀺𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀸𑀧𑀲𑁆𑀲 𑀯𑀢𑁆𑀢𑀫𑀸𑀦𑀢𑀁 𑀲𑀦𑁆𑀥𑀸𑀬, 𑀅𑀢𑁆𑀣𑀺 𑀯𑀺𑀲𑀬𑀪𑀸𑀯𑁂𑀦 𑀘𑀺𑀢𑁆𑀢𑁂 𑀧𑀭𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀦𑀺𑀘𑁆𑀘𑀓𑀸𑀮𑀁 𑀅𑀪𑀺𑀫𑀼𑀔𑀁 𑀯𑀺𑀬 𑀫𑁂 𑀢𑀺𑀝𑁆𑀞𑀢𑀻’’𑀢𑀺.

𑀬𑀁 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀓𑀭𑀡𑀢𑁆𑀣𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦 𑀧𑀸𑀧𑁂𑀦𑀸’’𑀢𑀺. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬-𑀲𑀤𑁆𑀤𑁄 𑀓𑀸𑀭𑀡𑀯𑀘𑀦𑁄𑀢𑀺 𑀆𑀳 ‘‘𑀅𑀦𑁂𑀓𑀓𑀸𑀭𑀡𑁂𑀦𑀸’’𑀢𑀺. 𑀯𑀺𑀭𑀸𑀕𑀢𑁆𑀣𑀸𑀬𑀸𑀢𑀺 𑀪𑀯𑀪𑁄𑀕𑁂𑀲𑀼 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦𑁄 𑀭𑀸𑀕𑁂𑀦 𑀭𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀪𑀯𑀪𑁄𑀕𑁂𑀲𑀼𑀬𑁂𑀯 𑀭𑀸𑀕𑁂𑀦 𑀅𑀭𑀜𑁆𑀚𑀦𑀢𑁆𑀣𑀸𑀬. 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑀺𑀓𑀫𑀢𑁆𑀢𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑀺𑀤𑀺𑀲𑁆𑀲𑀢𑀺. 𑀇𑀤𑀁 𑀧𑀦𑁂𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀦𑁆𑀢𑀺 ‘‘𑀯𑀺𑀲𑀁𑀬𑁄𑀕𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 ‘‘𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀤𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦 𑀯𑀼𑀢𑁆𑀢𑀧𑀭𑀺𑀬𑀸𑀬𑀯𑀘𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑁂𑀳𑀺 𑀦 𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀅𑀕𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑁂 𑀅𑀕𑁆𑀕𑀳𑀡𑀢𑁆𑀣𑀸𑀬, 𑀪𑀯𑀪𑁄𑀕𑁂 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀕𑁆𑀕𑀳𑀡𑀢𑁆𑀣𑀸𑀬. 𑀦 𑀲𑀗𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀸𑀦𑀫𑁂𑀯𑀸𑀢𑀺 𑀲𑀗𑁆𑀔𑀸𑀭𑁂𑀳𑀺 𑀦𑀺𑀓𑁆𑀔𑀦𑁆𑀢𑀁 𑀯𑀺𑀯𑀺𑀢𑁆𑀢𑀁, 𑀢𑀢𑁄𑀬𑁂𑀯 𑀮𑁄𑀓𑀢𑁄 𑀉𑀢𑁆𑀢𑀺𑀡𑁆𑀡𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀸𑀦𑀁. 𑀫𑀤𑀦𑀺𑀫𑁆𑀫𑀤𑀦𑀸𑀬𑀸𑀢𑀺 𑀯𑀸𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀆𑀤𑀺𑀅𑀢𑁆𑀣𑁂𑀦 𑀇𑀢𑀺-𑀲𑀤𑁆𑀤𑁂𑀦 𑀯𑀸 ‘‘𑀧𑀺𑀧𑀸𑀲𑀯𑀺𑀦𑀬𑀸𑀬𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀻𑀬𑀫𑀸𑀦𑀸 𑀭𑀸𑀕𑀫𑀸𑀦𑀫𑀤𑀸𑀤𑀬𑁄 𑀢𑀁 𑀧𑀢𑁆𑀯𑀸 𑀧𑀳𑀻𑀬𑀦𑁆𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀁 𑀆𑀕𑀫𑁆𑀫𑀸𑀢𑀺 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘 ¶ 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀳𑁂𑀢𑀼. 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀸𑀤𑀬𑁄𑀢𑀺 𑀏𑀢𑁆𑀣 𑀚𑀸𑀢𑀺𑀆𑀤𑀺𑀁 𑀦𑀺𑀲𑁆𑀲𑀸𑀬 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀦𑀓𑀫𑀸𑀦𑁄𑀬𑁂𑀯 𑀫𑀤𑀚𑀦𑀦𑀝𑁆𑀞𑁂𑀦 𑀫𑀤𑁄𑀢𑀺 𑀫𑀸𑀦𑀫𑀤𑁄. 𑀧𑀼𑀭𑀺𑀲𑀫𑀤𑁄 𑀯𑀼𑀘𑁆𑀘𑀢𑀺 𑀧𑀼𑀭𑀺𑀲𑀫𑀸𑀦𑁄, ‘‘𑀅𑀳𑀁 𑀧𑀼𑀭𑀺𑀲𑁄’’𑀢𑀺 𑀉𑀧𑁆𑀧𑀚𑁆𑀚𑀦𑀓𑀫𑀸𑀦𑁄. ‘‘𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀲𑀫𑀢𑁆𑀣𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀫𑀸𑀦𑁄, 𑀭𑀸𑀕𑁄 𑀏𑀯 𑀯𑀸 𑀧𑀼𑀭𑀺𑀲𑀫𑀤𑁄’’𑀢𑀺 𑀓𑁂𑀘𑀺. 𑀆𑀤𑀺-𑀲𑀤𑁆𑀤𑁂𑀦 𑀩𑀮𑀫𑀤𑀬𑁄𑀩𑁆𑀩𑀦𑀫𑀤𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 ¶ . 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 ‘‘𑀧𑀼𑀭𑀺𑀲𑀫𑀤𑁄 𑀦𑀸𑀫 𑀲𑀫𑁆𑀪𑀯𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀥 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀦 𑀳𑀺 ‘‘𑀪𑀕𑀯𑀢𑀸 𑀲𑀫𑁆𑀪𑀯𑀲𑁆𑀲 𑀯𑀺𑀦𑀸𑀲𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀫𑁆𑀫𑀤𑀸𑀢𑀺 𑀯𑀺𑀕𑀢𑀫𑀤𑀪𑀸𑀯𑀸. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀫𑀤𑀸’’𑀢𑀺 𑀯𑀼𑀢𑁆𑀢𑀁. 𑀫𑀤𑀸 𑀦𑀺𑀫𑁆𑀫𑀤𑀻𑀬𑀦𑁆𑀢𑀺 𑀏𑀢𑁆𑀣 𑀅𑀫𑀤𑀪𑀸𑀯𑀁 𑀯𑀺𑀦𑀸𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀫𑀤𑀦𑀺𑀫𑁆𑀫𑀤𑀦𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺.

𑀓𑀸𑀫𑀧𑀺𑀧𑀸𑀲𑀸𑀢𑀺 𑀓𑀸𑀫𑀸𑀦𑀁 𑀧𑀸𑀢𑀼𑀓𑀫𑁆𑀬𑀢𑀸, 𑀓𑀸𑀫𑀢𑀡𑁆𑀳𑀸𑀢𑀺 𑀅𑀢𑁆𑀣𑁄. 𑀆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀻𑀬𑀦𑁆𑀢𑀻𑀢𑀺 𑀆𑀮𑀬𑀸, 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀆𑀳 ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸𑀮𑀬𑀸’’𑀢𑀺. 𑀧𑀜𑁆𑀘𑀲𑀼 𑀳𑀺 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦𑁂𑀯 𑀧𑀜𑁆𑀘 𑀓𑀸𑀫𑀕𑀼𑀡𑀸𑀧𑀺 𑀧𑀳𑀻𑀦𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀦𑁂𑀯 ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑁂𑀲𑀼 𑀙𑀦𑁆𑀤𑀭𑀸𑀕𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁩𑁨𑁩) 𑀯𑀼𑀢𑁆𑀢𑀁. 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀯𑀸 𑀆𑀮𑀬𑀸 𑀧𑀜𑁆𑀘𑀓𑀸𑀫𑀕𑀼𑀡𑀸𑀮𑀬𑀸. 𑀆𑀮𑀻𑀬𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀦𑀯𑀲𑁂𑀦 𑀲𑁂𑀯𑀦𑁆𑀢𑀻𑀢𑀺 𑀆𑀮𑀬𑀸𑀢𑀺 𑀳𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀁 𑀅𑀥𑀺𑀯𑀘𑀦𑀁. 𑀢𑁂𑀪𑀽𑀫𑀓𑀯𑀝𑁆𑀝𑀦𑁆𑀢𑀺 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀸 𑀯𑀝𑁆𑀝𑀦𑀝𑁆𑀞𑁂𑀦 𑀯𑀝𑁆𑀝𑀁. 𑀯𑀺𑀭𑀚𑁆𑀚𑀢𑀻𑀢𑀺 𑀧𑀮𑀼𑀚𑁆𑀚𑀢𑀺. ‘‘𑀯𑀺𑀭𑀚𑁆𑀚𑀢𑀻𑀢𑀺 𑀓𑀸𑀫𑀯𑀺𑀦𑀸𑀲𑁄 𑀯𑀼𑀢𑁆𑀢𑁄, 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀯𑀺𑀦𑀸𑀲𑁄’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀲𑀸𑀫𑀜𑁆𑀜𑀘𑁄𑀤𑀦𑀸𑀬𑀧𑀺 ‘‘𑀢𑀡𑁆𑀳𑀸𑀓𑁆𑀔𑀬𑁄’’𑀢𑀺 𑀅𑀥𑀺𑀓𑀢𑀢𑁆𑀢𑀸 𑀢𑀡𑁆𑀳𑀸𑀬 𑀏𑀯 𑀯𑀺𑀭𑀚𑁆𑀚𑀦𑀁 𑀦𑀺𑀭𑀼𑀚𑁆𑀛𑀦𑀜𑁆𑀘 𑀯𑀼𑀢𑁆𑀢𑀁.

𑀘𑀢𑀲𑁆𑀲𑁄 𑀬𑁄𑀦𑀺𑀬𑁄𑀢𑀺 𑀏𑀢𑁆𑀣 𑀬𑁄𑀦𑀻𑀢𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑀲𑁆𑀲𑀧𑀺 𑀓𑀸𑀭𑀡𑀲𑁆𑀲𑀧𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲𑀧𑀺 𑀦𑀸𑀫𑀁. ‘‘𑀘𑀢𑀲𑁆𑀲𑁄 𑀦𑀸𑀕𑀬𑁄𑀦𑀺𑀬𑁄 (𑀲𑀁. 𑀦𑀺. 𑁩.𑁩𑁪𑁨-𑁩𑁪𑁩) 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄’’𑀢𑀺 𑀏𑀢𑁆𑀣 𑀳𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫. ‘‘𑀬𑁄𑀦𑀺 𑀳𑁂𑀲𑀸 𑀪𑀽𑀫𑀺𑀚 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁨𑁬) 𑀏𑀢𑁆𑀣 𑀓𑀸𑀭𑀡𑀁. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯’’𑀦𑁆𑀢𑀺 (𑀫. 𑀦𑀺. 𑁨.𑁪𑁫𑁭; 𑀥. 𑀧. 𑁩𑁯𑁬) 𑀏𑀢𑁆𑀣 𑀧𑀲𑁆𑀲𑀸𑀯𑀫𑀕𑁆𑀕𑁄. 𑀇𑀥 𑀧𑀦 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 ‘‘𑀬𑁄𑀦𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀯𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀅𑀫𑀺𑀲𑁆𑀲𑀺𑀢𑀸𑀧𑀺 𑀲𑀫𑀸𑀦𑀚𑀸𑀢𑀺𑀢𑀸𑀬 𑀫𑀺𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀅𑀡𑁆𑀟𑀸𑀤𑀺𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁄 𑀔𑀦𑁆𑀥𑀸𑀦𑀁 𑀪𑀸𑀕𑀲𑁄 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀲𑀸 𑀘 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀬𑁄𑀦𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀅𑀡𑁆𑀟𑀚𑀸 𑀬𑁄𑀦𑀺 𑀚𑀮𑀸𑀩𑀼𑀚𑀸 𑀬𑁄𑀦𑀺 𑀲𑀁𑀲𑁂𑀤𑀚𑀸 𑀬𑁄𑀦𑀺 𑀑𑀧𑀧𑀸𑀢𑀺𑀓𑀸 𑀬𑁄𑀦𑀻’’𑀢𑀺 (𑀫. 𑀦𑀺. 𑁧.𑁧𑁫𑁨).

𑀢𑀢𑁆𑀣 ¶ ¶ 𑀅𑀡𑁆𑀟𑁂 𑀚𑀸𑀢𑀸 𑀅𑀡𑁆𑀟𑀚𑀸. 𑀚𑀮𑀸𑀩𑀼𑀫𑁆𑀳𑀺 𑀚𑀸𑀢𑀸 𑀚𑀮𑀸𑀩𑀼𑀚𑀸. 𑀲𑀁𑀲𑁂𑀤𑁂 𑀚𑀸𑀢𑀸 𑀲𑀁𑀲𑁂𑀤𑀚𑀸. 𑀯𑀺𑀦𑀸 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀸𑀢𑀺 𑀑𑀧𑀧𑀸𑀢𑀺𑀓𑀸. 𑀏𑀢𑁆𑀣 𑀘 𑀧𑁂𑀢𑀮𑁄𑀓𑁂 𑀢𑀺𑀭𑀘𑁆𑀙𑀸𑀦𑁂 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀡𑁆𑀟𑀚𑀸𑀤𑀬𑁄 𑀘𑀢𑀲𑁆𑀲𑁄𑀧𑀺 𑀬𑁄𑀦𑀺𑀬𑁄 𑀲𑀫𑁆𑀪𑀯𑀦𑁆𑀢𑀺, 𑀫𑀦𑀼𑀲𑁆𑀲𑁂𑀲𑀼 𑀧𑀦𑁂𑀢𑁆𑀣 𑀓𑁂𑀘𑀺𑀤𑁂𑀯 𑀑𑀧𑀧𑀸𑀢𑀺𑀓𑀸 𑀳𑁄𑀦𑁆𑀢𑀺 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀸𑀤𑀬𑁄 𑀯𑀺𑀬. 𑀅𑀡𑁆𑀟𑀚𑀸𑀧𑀺 𑀓𑁄𑀦𑁆𑀢𑀧𑀼𑀢𑁆𑀢𑀸 𑀤𑁆𑀯𑁂𑀪𑀸𑀢𑀺𑀬𑀣𑁂𑀭𑀸 𑀯𑀺𑀬, 𑀲𑀁𑀲𑁂𑀤𑀚𑀸𑀧𑀺 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀧𑁄𑀓𑁆𑀔𑀭𑀲𑀸𑀢𑀺𑀩𑁆𑀭𑀸𑀳𑁆𑀫𑀡𑀧𑀤𑀼𑀫𑀯𑀢𑀻𑀤𑁂𑀯𑀻𑀆𑀤𑀬𑁄 𑀯𑀺𑀬 𑀓𑁂𑀘𑀺𑀤𑁂𑀯 𑀳𑁄𑀦𑁆𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀫𑀦𑀼𑀲𑁆𑀲𑀸 𑀚𑀮𑀸𑀩𑀼𑀚𑀸𑀯. 𑀧𑁂𑀢𑁂𑀲𑀼𑀧𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀸𑀦𑀁 𑀦𑀺𑀘𑁆𑀘𑀤𑀼𑀓𑁆𑀔𑀸𑀢𑀼𑀭𑀢𑀸𑀬 𑀓𑀸𑀫𑀲𑁂𑀯𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀕𑀩𑁆𑀪𑀲𑁂𑀬𑁆𑀬𑀓𑀸 𑀦 𑀳𑁄𑀦𑁆𑀢𑀺. 𑀚𑀸𑀮𑀸𑀯𑀦𑁆𑀢𑀢𑀸𑀬 𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀲𑀡𑁆𑀞𑀸𑀢𑀺, 𑀢𑀲𑁆𑀫𑀸 𑀢𑁂 𑀑𑀧𑀧𑀸𑀢𑀺𑀓𑀸𑀬𑁂𑀯 𑀲𑀁𑀲𑁂𑀤𑀚𑀢𑀸𑀬𑀧𑀺 𑀅𑀲𑀫𑁆𑀪𑀯𑀢𑁄, 𑀅𑀯𑀲𑁂𑀲𑀧𑁂𑀢𑀸 𑀧𑀦 𑀘𑀢𑀼𑀬𑁄𑀦𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀢𑁂, 𑀏𑀯𑀁 𑀬𑀓𑁆𑀔𑀸𑀧𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀧𑀓𑁆𑀔𑀺𑀚𑀸𑀢𑀺𑀤𑀻𑀖𑀚𑀸𑀢𑀺𑀆𑀤𑀬𑁄𑀧𑀺 𑀲𑀩𑁆𑀩𑁂 𑀘𑀢𑀼𑀬𑁄𑀦𑀺𑀓𑀸𑀬𑁂𑀯. 𑀲𑀩𑁆𑀩𑁂 𑀦𑁂𑀭𑀬𑀺𑀓𑀸 𑀘 𑀘𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀤𑁂𑀯𑀸 𑀘 𑀑𑀧𑀧𑀸𑀢𑀺𑀓𑀸𑀬𑁂𑀯, 𑀪𑀼𑀫𑁆𑀫𑀤𑁂𑀯𑀸 𑀧𑀦 𑀘𑀢𑀼𑀬𑁄𑀦𑀺𑀓𑀸𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀲𑀁𑀲𑁂𑀤𑀚𑀸 𑀫𑀦𑁆𑀤𑀸 𑀤𑀳𑀭𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀑𑀧𑀧𑀸𑀢𑀺𑀓𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀳𑀼𑀢𑁆𑀯𑀸.

𑀧𑀜𑁆𑀘 𑀕𑀢𑀺𑀬𑁄𑀢𑀺 𑀏𑀢𑁆𑀣 𑀲𑀼𑀓𑀢𑀤𑀼𑀓𑁆𑀓𑀝𑀓𑀫𑁆𑀫𑀯𑀲𑁂𑀦 𑀕𑀦𑁆𑀢𑀩𑁆𑀩𑀸 𑀉𑀧𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀕𑀢𑀺𑀬𑁄. 𑀬𑀣𑀸 𑀳𑀺 𑀓𑀫𑁆𑀫𑀪𑀯𑁄 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀓𑀸𑀭𑀓𑁂 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀺𑀤𑁆𑀥𑁄, 𑀢𑀁𑀲𑀫𑀗𑁆𑀕𑀺𑀦𑀸 𑀲𑀦𑁆𑀢𑀸𑀦𑀮𑀓𑁆𑀔𑀡𑁂𑀦 𑀲𑀢𑁆𑀢𑁂𑀦 𑀓𑀢𑁄𑀢𑀺 𑀯𑁄𑀳𑀭𑀻𑀬𑀢𑀺, 𑀏𑀯𑀁 𑀉𑀧𑀧𑀢𑁆𑀢𑀺𑀪𑀯𑀮𑀓𑁆𑀔𑀡𑀕𑀢𑀺𑀬𑁄 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀕𑀫𑀓𑁂 𑀢𑀁𑀢𑀁𑀓𑀫𑁆𑀫𑀯𑀲𑁂𑀦 𑀬𑁂𑀲𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑁂𑀳𑀺 𑀕𑀦𑁆𑀢𑀩𑁆𑀩𑀸𑀢𑀺 𑀯𑁄𑀳𑀭𑀻𑀬𑀦𑁆𑀢𑀺. 𑀅𑀧𑀺𑀘 𑀕𑀢𑀺𑀕𑀢𑀺 𑀦𑀺𑀩𑁆𑀩𑀢𑁆𑀢𑀺𑀕𑀢𑀺 𑀅𑀚𑁆𑀛𑀸𑀲𑀬𑀕𑀢𑀺 𑀯𑀺𑀪𑀯𑀕𑀢𑀺 𑀦𑀺𑀧𑁆𑀨𑀢𑁆𑀢𑀺𑀕𑀢𑀻𑀢𑀺 𑀩𑀳𑀼𑀯𑀺𑀥𑀸 𑀕𑀢𑀺 𑀦𑀸𑀫. 𑀢𑀢𑁆𑀣 ‘‘𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’’𑀢𑀺 (𑀅. 𑀦𑀺. 𑁪.𑁧𑁮𑁪) 𑀘 ‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸’’𑀢𑀺 (𑀥. 𑀧. 𑁪𑁨𑁦; 𑀲𑀼. 𑀦𑀺. 𑁬𑁪𑁯) 𑀘 𑀅𑀬𑀁 𑀕𑀢𑀺𑀕𑀢𑀺 𑀦𑀸𑀫. ‘‘𑀇𑀫𑁂𑀲𑀁 𑀔𑁄 𑀧𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸’’𑀢𑀺 (𑀫. 𑀦𑀺. 𑁧.𑁫𑁦𑁮) 𑀅𑀬𑀁 𑀦𑀺𑀩𑁆𑀩𑀢𑁆𑀢𑀺𑀕𑀢𑀺 𑀦𑀸𑀫. ‘‘𑀏𑀯𑀫𑁆𑀧𑀺 𑀔𑁄 𑀢𑁂 𑀅𑀳𑀁 𑀩𑁆𑀭𑀳𑁆𑀫𑁂 𑀕𑀢𑀺𑀜𑁆𑀘 𑀧𑀚𑀸𑀦𑀸𑀫𑀺 𑀘𑀼𑀢𑀺𑀜𑁆𑀘 𑀧𑀚𑀸𑀦𑀸𑀫𑀻’’𑀢𑀺 (𑀫. 𑀦𑀺. 𑁧.𑁫𑁦𑁩) 𑀅𑀬𑀁 𑀅𑀚𑁆𑀛𑀸𑀲𑀬𑀕𑀢𑀺 𑀦𑀸𑀫. ‘‘𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 ¶ 𑀕𑀢𑀻’’𑀢𑀺 (𑀧𑀭𑀺. 𑁩𑁩𑁯) 𑀅𑀬𑀁 𑀯𑀺𑀪𑀯𑀕𑀢𑀺 𑀦𑀸𑀫. ‘‘𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀲𑀫𑁆𑀪𑀯𑀦𑁆𑀢𑀺 𑀅𑀦𑀜𑁆𑀜𑀸’’𑀢𑀺 (𑀤𑀻. 𑀦𑀺. 𑁧.𑁨𑁫𑁮; 𑁨.𑁩𑁪; 𑁩.𑁨𑁦𑁦) 𑀅𑀬𑀁 𑀦𑀺𑀧𑁆𑀨𑀢𑁆𑀢𑀺𑀕𑀢𑀺 𑀦𑀸𑀫. 𑀢𑀸𑀲𑀼 𑀇𑀥 𑀕𑀢𑀺𑀕𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀧𑀦 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀫𑀦𑀉𑀲𑁆𑀲𑀤𑁂𑀯𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄. 𑀓𑀢𑀫𑀸 𑀧𑀜𑁆𑀘? 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀫𑀦𑀼𑀲𑁆𑀲𑀸 𑀤𑁂𑀯𑀸’’𑀢𑀺 (𑀫. 𑀦𑀺. 𑁧.𑁧𑁫𑁩).

𑀢𑀢𑁆𑀣 ¶ 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀩𑁆𑀭𑀽𑀳𑁂𑀦𑁆𑀢𑁄𑀬𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑁄, 𑀲𑀼𑀔𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀬𑁄𑀢𑀺 𑀦𑀺𑀭𑀬𑁄, 𑀢𑀢𑁄 𑀏𑀯 𑀭𑀫𑀺𑀢𑀩𑁆𑀩𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀁 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀭𑀢𑀺𑀅𑀢𑁆𑀣𑁂𑀦 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀘 𑀦𑀺𑀭𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸, 𑀤𑁂𑀯𑀫𑀦𑀼𑀲𑁆𑀲𑀸𑀤𑀬𑁄 𑀯𑀺𑀬 𑀉𑀤𑁆𑀥𑀁 𑀤𑀻𑀖𑀸 𑀅𑀳𑀼𑀢𑁆𑀯𑀸 𑀢𑀺𑀭𑀺𑀬𑀁 𑀤𑀻𑀖𑀸𑀢𑀺 𑀅𑀢𑁆𑀣𑁄. 𑀧𑀓𑀝𑁆𑀞𑀢𑁄 𑀲𑀼𑀔𑀢𑁄 𑀅𑀬𑀦𑀁 𑀅𑀧𑀕𑀫𑁄 𑀧𑁂𑀘𑁆𑀘𑀪𑀸𑀯𑁄, 𑀢𑀁 𑀧𑁂𑀘𑁆𑀘𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀺𑀲𑀬𑁄𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀧𑁂𑀢𑀬𑁄𑀦𑀺. 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸, 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀢𑀸𑀬 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀢𑀸𑀬 𑀫𑀦𑀼𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀧𑀦𑀢𑁆𑀣𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧). 𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀘 𑀪𑀕𑀯𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀫𑀳𑀸𑀲𑀸𑀯𑀓𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀳𑀺 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀼.

𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀮𑁄𑀪𑀸𑀤𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀦𑁆𑀦𑀸. 𑀢𑁂 𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 ¶ 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀢𑀸𑀯𑀲𑁂𑀦 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 𑀫𑀳𑀸𑀲𑀫𑁆𑀫𑀢𑁄𑀢𑀺 𑀯𑀼𑀘𑁆𑀘𑀢𑀺 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄, 𑀧𑀘𑁆𑀘𑀓𑁆𑀔𑀢𑁄 𑀧𑀭𑀫𑁆𑀧𑀭𑀸𑀬 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀲𑀢𑁆𑀢𑀸 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 ‘‘𑀫𑀦𑀼𑀲𑁆𑀲𑀸, 𑀫𑀸𑀦𑀼𑀲𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀏𑀯 𑀳𑀺 𑀢𑁂 ‘‘𑀫𑀸𑀦𑀯𑀸 𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺.

𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀸𑀦𑀼𑀪𑀸𑀯𑀲𑀗𑁆𑀔𑀸𑀢𑁂𑀳𑀺 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺 𑀘 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺 𑀚𑁄𑀢𑀦𑁆𑀢𑀻𑀢𑀺 𑀤𑁂𑀯𑀸. 𑀢𑀢𑁆𑀣 𑀓𑀸𑀫𑀤𑁂𑀯𑀸 𑀓𑀸𑀫𑀕𑀼𑀡𑁂𑀳𑀺 𑀘𑁂𑀯 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺 𑀘, 𑀇𑀢𑀭𑁂 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑁂𑀯 𑀤𑀺𑀩𑁆𑀩𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀭𑀡𑀦𑁆𑀢𑀺 𑀯𑀸 𑀕𑀫𑀺𑀬𑀦𑁆𑀢𑀺 𑀅𑀪𑀺𑀢𑁆𑀣𑀯𑀻𑀬𑀦𑁆𑀢𑀻𑀢𑀺 𑀯𑀸 𑀤𑁂𑀯𑀸. 𑀏𑀢𑁆𑀣 𑀘 𑀦𑀺𑀭𑀬𑀕𑀢𑀺𑀤𑁂𑀯𑀕𑀢𑀺𑀫𑀦𑀼𑀲𑁆𑀲𑀕𑀢𑀻𑀳𑀺 𑀲𑀤𑁆𑀥𑀺𑀁 𑀑𑀓𑀸𑀲𑁂𑀦 𑀔𑀦𑁆𑀥𑀸 𑀯𑀼𑀢𑁆𑀢𑀸. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀕𑁆𑀕𑀳𑀡𑁂𑀦 𑀔𑀦𑁆𑀥𑀸𑀦𑀁 𑀏𑀯 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁 𑀢𑁂𑀲𑀁 𑀢𑀸𑀤𑀺𑀲𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀑𑀓𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀬𑀢𑁆𑀣 𑀬𑀢𑁆𑀣 𑀯𑀸 𑀢𑁂 𑀅𑀭𑀜𑁆𑀜𑀲𑀫𑀼𑀤𑁆𑀤𑀧𑀩𑁆𑀩𑀢𑀧𑀸𑀤𑀸𑀤𑀺𑀓𑁂 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀞𑀸𑀦𑀲𑁆𑀲 ¶ 𑀯𑀲𑁂𑀦 𑀑𑀓𑀸𑀲𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀦𑀯 𑀲𑀢𑁆𑀢𑀸𑀯𑀸𑀲𑀸 𑀘 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀦𑀬𑀸 𑀏𑀯. 𑀅𑀧𑀭𑀸𑀧𑀭𑀪𑀸𑀯𑀸𑀬𑀸𑀢𑀺 𑀅𑀧𑀭𑀸𑀧𑀭𑀁 𑀬𑁄𑀦𑀺𑀆𑀤𑀺𑀢𑁄 𑀬𑁄𑀦𑀺𑀆𑀤𑀺𑀪𑀸𑀯𑀸𑀬. 𑀆𑀩𑀦𑁆𑀥𑀦𑀁 𑀕𑀡𑁆𑀞𑀺𑀓𑀭𑀡𑀁, 𑀲𑀁𑀲𑀺𑀩𑁆𑀩𑀦𑀁 𑀢𑀼𑀦𑁆𑀦𑀓𑀭𑀡𑀁. 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀢𑀢𑁆𑀣 𑀢𑀲𑁆𑀲𑀸 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄, 𑀦𑀺𑀓𑁆𑀔𑀫𑀦𑀜𑁆𑀘𑀲𑁆𑀲 𑀢𑀡𑁆𑀳𑀸𑀬 𑀯𑀺𑀲𑀁𑀬𑁄𑀕𑁄 𑀏𑀯𑀸𑀢𑀺 𑀆𑀳 ‘‘𑀯𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺.

𑀓𑀸𑀫𑀸𑀦𑀁 𑀧𑀳𑀸𑀦𑀦𑁆𑀢𑀺 𑀏𑀢𑁆𑀣 𑀓𑀸𑀫𑀕𑁆𑀕𑀳𑀡𑁂𑀦 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄, 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄𑀢𑀺 𑀤𑀼𑀯𑀺𑀥𑀲𑁆𑀲𑀧𑀺 𑀓𑀸𑀫𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀆𑀳 ‘‘𑀯𑀢𑁆𑀣𑀼𑀓𑀸𑀫𑀸𑀦𑀁 𑀓𑀺𑀮𑁂𑀲𑀓𑀸𑀫𑀸𑀦𑀜𑁆𑀘 𑀧𑀳𑀸𑀦’’𑀦𑁆𑀢𑀺. 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀜𑁆𑀘𑁂𑀢𑁆𑀣 𑀢𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀲𑀜𑁆𑀜𑀸𑀦𑀦𑁆𑀢𑀺 𑀓𑀸𑀫𑁂𑀲𑀼, 𑀓𑀸𑀫𑀲𑀳𑀕𑀢𑀸𑀦𑀁 𑀯𑀸 𑀲𑀜𑁆𑀜𑀸𑀦𑀁. 𑀧𑀭𑀺𑀜𑁆𑀜𑀸𑀢𑀺 𑀢𑀺𑀯𑀺𑀥𑀸𑀧𑀺 𑀧𑀭𑀺𑀜𑁆𑀜𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀜𑀸𑀢𑀢𑀻𑀭𑀡𑀧𑀳𑀸𑀦𑀯𑀲𑁂𑀦 𑀢𑀺𑀯𑀺𑀥𑀸 𑀧𑀭𑀺𑀜𑁆𑀜𑀸’’𑀢𑀺. 𑀢𑀢𑁆𑀣 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸? 𑀲𑀩𑁆𑀩𑀁 𑀢𑁂𑀪𑀽𑀫𑀓𑀁 𑀦𑀸𑀫𑀭𑀽𑀧𑀁 ‘‘𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀪𑀺𑀬𑁆𑀬𑁄, 𑀇𑀤𑀁 𑀦𑀸𑀫𑀁, 𑀏𑀢𑁆𑀢𑀓𑀁 𑀦𑀸𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀁 𑀭𑀽𑀧𑀁 𑀨𑀲𑁆𑀲𑀸𑀤𑀺𑀪𑁂𑀤𑀁 𑀦𑀸𑀫𑀜𑁆𑀘 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀓𑀫𑁆𑀫𑀸𑀯𑀺𑀚𑁆𑀚𑀸𑀤𑀺𑀓𑀜𑁆𑀘𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸.

𑀓𑀢𑀫𑀸 ¶ 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺, 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸 𑀦𑀸𑀫. 𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑁄 𑀯𑀸 𑀜𑀸𑀢𑀧𑀭𑀺𑀜𑁆𑀜𑀸, 𑀫𑀕𑁆𑀕𑀸𑀫𑀕𑁆𑀕𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀆𑀤𑀬𑁄, 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀅𑀦𑀼𑀮𑁄𑀫𑀧𑀭𑀺𑀬𑁄𑀲𑀸𑀦𑀸 𑀯𑀸 𑀧𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀇𑀥 𑀧𑀦 𑀓𑀸𑀫𑀲𑀜𑁆𑀜𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑀯𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀸𑀦𑀁 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀦𑀫𑁆𑀧𑀺 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑀢𑁄 𑀫𑀕𑁆𑀕𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 𑀢𑀺𑀯𑀺𑀥𑀸𑀧𑀺 𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯 ‘‘𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑀓𑀭𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀯 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑀓𑀸𑀫𑁂𑀲𑀼, 𑀓𑀸𑀫𑁂 𑀯𑀸 𑀧𑀸𑀢𑀼𑀫𑀺𑀘𑁆𑀙𑀸 𑀓𑀸𑀫𑀧𑀺𑀧𑀸𑀲𑀸𑀢𑀺 𑀆𑀳 𑁋 ‘‘𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸𑀦𑀁, 𑀓𑀸𑀫𑁂 𑀯𑀸 𑀧𑀸𑀢𑀼𑀫𑀺𑀘𑁆𑀙𑀸𑀦’’𑀦𑁆𑀢𑀺. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀓𑀸𑀫𑀸𑀦𑀁 𑀧𑀳𑀸𑀦𑀁 𑀅𑀓𑁆𑀔𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀭𑀸𑀕𑀸𑀬, 𑀯𑀺𑀲𑀁𑀬𑁄𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀁𑀬𑁄𑀕𑀸𑀬, 𑀅𑀦𑀼𑀧𑀸𑀤𑀸𑀦𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀉𑀧𑀸𑀤𑀸𑀦𑀸𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼. 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑁄𑀢𑀻𑀢𑀺 𑀏𑀯𑀁 𑀢𑀁 𑀧𑀸𑀧𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀢𑀺. 𑀓𑀻𑀤𑀺𑀲𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀈𑀤𑀺𑀲𑁂𑀧𑀺 𑀦𑀸𑀫𑀸’’𑀢𑀺𑀆𑀤𑀺.

𑁩𑁯. 𑀦𑁂𑀯 ¶ 𑀧𑀺𑀬𑀓𑀫𑁆𑀬𑀢𑀸𑀬𑀸𑀢𑀺 𑀅𑀢𑁆𑀢𑀦𑀺 𑀲𑀢𑁆𑀣𑀼 𑀦𑁂𑀯 𑀧𑀺𑀬𑀪𑀸𑀯𑀓𑀸𑀫𑀢𑀸𑀬. 𑀦 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸𑀬𑀸𑀢𑀺 𑀦 𑀲𑀢𑁆𑀣𑀼 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑁂𑀤𑀦𑀸𑀥𑀺𑀧𑁆𑀧𑀸𑀬𑀧𑀼𑀭𑁂𑀓𑁆𑀔𑀸𑀭𑀢𑀸𑀬. 𑀦 𑀓𑀮𑀺𑀲𑀸𑀲𑀦𑀸𑀭𑁄𑀧𑀦𑀢𑁆𑀣𑀸𑀬𑀸𑀢𑀺 𑀦 𑀤𑁄𑀲𑀸𑀭𑁄𑀧𑀦𑀢𑁆𑀣𑀸𑀬. 𑀓𑀮𑀻𑀢𑀺 𑀓𑁄𑀥𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀲 𑀲𑀸𑀲𑀦𑀁 𑀓𑀮𑀺𑀲𑀸𑀲𑀦𑀁, 𑀓𑁄𑀥𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀕𑀭𑀳𑀤𑁄𑀲𑁄. 𑀯𑁂𑀮𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀯𑁂𑀮𑀁. 𑀫𑀭𑀺𑀬𑀸𑀤𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀺𑀓𑁆𑀔𑀸𑀧𑀤𑀜𑁆𑀳𑀺 𑀅𑀦𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 ‘‘𑀯𑁂𑀮𑀸, 𑀫𑀭𑀺𑀬𑀸𑀤𑀸’’𑀢𑀺 𑀘 𑀯𑀼𑀘𑁆𑀘𑀢𑀺.

𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑁄𑀢𑀺 𑀫𑁂𑀣𑀼𑀦𑀯𑀲𑁂𑀦 𑀧𑀯𑀢𑁆𑀢𑀅𑀚𑁆𑀛𑀸𑀘𑀸𑀭𑀲𑀗𑁆𑀔𑀸𑀢𑁄 𑀯𑀻𑀢𑀺𑀓𑁆𑀓𑀫𑁄. 𑀧𑀓𑀭𑀡𑁂𑀢𑀺 𑀏𑀢𑁆𑀣 𑀧-𑀲𑀤𑁆𑀤𑁄 𑀆𑀭𑀫𑁆𑀪𑀯𑀘𑀦𑁄𑀢𑀺 𑀆𑀳 ‘‘𑀓𑀢𑁆𑀢𑀼𑀁 𑀆𑀭𑀪𑀢𑀻’’𑀢𑀺. 𑀓𑀢𑁆𑀣𑀘𑀺 𑀉𑀧𑀲𑀕𑁆𑀕𑁄 𑀥𑀸𑀢𑀼𑀅𑀢𑁆𑀣𑀫𑁂𑀯 𑀯𑀤𑀢𑀺, 𑀦 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄𑀢𑀺 𑀆𑀳 ‘‘𑀓𑀭𑁄𑀢𑀺𑀬𑁂𑀯 𑀯𑀸’’𑀢𑀺. 𑀚𑀸𑀢𑀺𑀬𑀸𑀢𑀺 ¶ 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀬𑀸. 𑀕𑁄𑀢𑁆𑀢𑁂𑀦𑀸𑀢𑀺 𑀕𑁄𑀢𑀫𑀓𑀲𑁆𑀲𑀧𑀸𑀤𑀺𑀕𑁄𑀢𑁆𑀢𑁂𑀦. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀻𑀲𑀼𑀬𑁂𑀯 𑀲𑀓𑁆𑀓𑀓𑀼𑀮𑀲𑁄𑀢𑁆𑀣𑀺𑀬𑀓𑀼𑀮𑀸𑀤𑀺𑀯𑀺𑀲𑀺𑀝𑁆𑀞𑀓𑀼𑀮𑀸𑀦𑀁 𑀧𑀼𑀢𑁆𑀢𑀪𑀸𑀯𑁂𑀦. 𑀬𑀲𑀲𑁆𑀲𑀻𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀧𑁂𑀲𑀮𑀦𑁆𑀢𑀺 𑀧𑀺𑀬𑀲𑀻𑀮𑀁. 𑀅𑀯𑀺𑀓𑀫𑁆𑀧𑀫𑀸𑀦𑁂𑀦𑀸𑀢𑀺 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀓𑀫𑁆𑀧𑀫𑀸𑀦𑁂𑀦. 𑀬𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀁 𑀩𑀼𑀤𑁆𑀥𑀸 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀤𑀦𑁆𑀢𑀺 𑀅𑀭𑀺𑀝𑁆𑀞𑀮𑀸𑀴𑀼𑀤𑀸𑀬𑀻𑀆𑀤𑀺𑀓𑁂 𑀯𑀺𑀬. 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀅𑀲𑀢𑀺 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀤𑀦𑁆𑀢𑀺𑀬𑁂𑀯 𑀥𑀦𑀺𑀬𑀉𑀧𑀲𑁂𑀦𑀢𑁆𑀣𑁂𑀭𑀸𑀤𑀺𑀓𑁂 𑀯𑀺𑀬. 𑀲𑀼𑀤𑀺𑀦𑁆𑀦𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀬𑁂𑀯, 𑀢𑁂𑀦 𑀦𑀁 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀆𑀳.

𑀲𑀫𑀡𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀦𑀁. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀕𑁆𑀕𑀳𑀡𑁂𑀦 𑀧𑀝𑀺𑀯𑁂𑀥𑀲𑀸𑀲𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀸𑀲𑀦𑀸𑀦𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀙𑀯𑀺𑀦𑁆𑀢𑀺 𑀢𑁂𑀲𑀁 𑀧𑀪𑀲𑁆𑀲𑀭𑀓𑀭𑀡𑀁 𑀙𑀯𑀺𑀁. 𑀓𑀺𑀁 𑀢𑀦𑁆𑀢𑀺 𑀆𑀳 ‘‘𑀙𑀸𑀬’’𑀦𑁆𑀢𑀺, 𑀢𑁂𑀲𑀁 𑀧𑀓𑀸𑀲𑀓𑀁 𑀑𑀪𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑀦𑁆𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀪𑀸𑀯’’𑀦𑁆𑀢𑀺. 𑀙𑀯𑀺𑀫𑀦𑀼𑀕𑀢𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀧𑀢𑀺𑀭𑀽𑀧𑀦𑁆𑀢𑀺𑀆𑀤𑀻𑀲𑀼𑀧𑀺 ‘‘𑀢𑁂𑀲’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀫𑀡𑀸𑀦𑀁 𑀓𑀫𑁆𑀫𑀁 𑀲𑀸𑀫𑀡𑀓𑀁, 𑀦 𑀲𑀸𑀫𑀡𑀓𑀁 𑀅𑀲𑁆𑀲𑀸𑀫𑀡𑀓𑀁. 𑀓𑀣𑀁-𑀲𑀤𑁆𑀤𑀬𑁄𑀕𑁂𑀦 ‘‘𑀦 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. ‘‘𑀦𑀸𑀫-𑀲𑀤𑁆𑀤𑀬𑁄𑀕𑁂𑀦𑀸’’𑀢𑀺 𑀘 𑀯𑀤𑀦𑁆𑀢𑀺.

𑀤𑀬𑀸𑀮𑀼𑀓𑁂𑀦𑀸𑀢𑀺 𑀅𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑁂𑀦. 𑀧𑀭𑀺𑀪𑀸𑀲𑀦𑁆𑀢𑁄𑀢𑀺 𑀕𑀭𑀳𑀦𑁆𑀢𑁄. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀆𑀲𑀻𑀯𑀺𑀲-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀲𑀼 𑀲𑀻𑀖’’𑀦𑁆𑀢𑀺𑀆𑀤𑀺. 𑀏𑀢𑀲𑁆𑀲𑀸𑀢𑀺 𑀆𑀲𑀻𑀯𑀺𑀲𑀲𑁆𑀲. 𑀆𑀕𑀘𑁆𑀙𑀢𑀻𑀢𑀺 𑀬𑁄 𑀢𑁂𑀦 𑀤𑀝𑁆𑀞𑁄, 𑀢𑀁 𑀧𑀢𑀺𑀆𑀕𑀘𑁆𑀙𑀢𑀺. 𑀆𑀲𑀺𑀢𑁆𑀢𑀯𑀺𑀲𑁄𑀢𑀺𑀧𑀺 𑀆𑀲𑀻𑀯𑀺𑀲𑁄, 𑀲𑀓𑀮𑀓𑀸𑀬𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀯𑀺𑀬 𑀞𑀧𑀺𑀢𑀯𑀺𑀲𑁄 𑀧𑀭𑀲𑁆𑀲 𑀘 𑀲𑀭𑀻𑀭𑁂 𑀆𑀲𑀺𑀜𑁆𑀘𑀦𑀯𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀲𑀺𑀢𑀯𑀺𑀲𑁄𑀢𑀺𑀧𑀺 𑀆𑀲𑀻𑀯𑀺𑀲𑁄. 𑀬𑀁 𑀬𑀜𑁆𑀳𑀺 𑀏𑀢𑁂𑀦 𑀅𑀲𑀺𑀢𑀁 𑀳𑁄𑀢𑀺 𑀧𑀭𑀺𑀪𑀼𑀢𑁆𑀢𑀁, 𑀢𑀁 𑀯𑀺𑀲𑀫𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀺𑀢𑀁 𑀯𑀺𑀲𑀁 𑀏𑀢𑀲𑁆𑀲𑀸𑀢𑀺 𑀅𑀲𑀺𑀢𑀯𑀺𑀲𑁄𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀲𑀻𑀯𑀺𑀲𑁄’’𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ¶ 𑀯𑀼𑀢𑁆𑀢𑀁. 𑀅𑀲𑀺𑀲𑀤𑀺𑀲𑀯𑀺𑀲𑁄𑀢𑀺𑀧𑀺 𑀆𑀲𑀻𑀯𑀺𑀲𑁄, 𑀅𑀲𑀺 𑀯𑀺𑀬 𑀢𑀺𑀔𑀺𑀡𑀁 𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀦𑀲𑀫𑀢𑁆𑀣𑀁 𑀯𑀺𑀲𑀁 𑀏𑀢𑀲𑁆𑀲𑀸𑀢𑀺 𑀆𑀲𑀻𑀯𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀲𑀻𑀢𑀺 𑀯𑀸 𑀤𑀸𑀞𑀸 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀯𑀺𑀲𑁄𑀢𑀺 𑀆𑀲𑀻𑀯𑀺𑀲𑁄. 𑀲𑁂𑀲𑀲𑀧𑁆𑀧𑁂𑀳𑀺 𑀓𑀡𑁆𑀳𑀲𑀧𑁆𑀧𑀲𑁆𑀲 𑀫𑀳𑀸𑀯𑀺𑀲𑀢𑁆𑀢𑀸 𑀆𑀲𑀻𑀯𑀺𑀲𑀲𑁆𑀲𑀸𑀦𑀦𑁆𑀢𑀭𑀁 𑀓𑀡𑁆𑀳𑀲𑀧𑁆𑀧𑁄 𑀯𑀼𑀢𑁆𑀢𑁄. 𑀲𑀧𑁆𑀧𑀫𑀼𑀔𑀫𑁆𑀧𑀺 ¶ 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀪𑀬𑀸𑀯𑀳𑀢𑁆𑀢𑀸 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀅𑀓𑀼𑀲𑀮𑀓𑀫𑁆𑀫𑀢𑁄 𑀦𑀺𑀯𑀸𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀲𑀻𑀮𑀪𑁂𑀤𑀢𑁄𑀧𑀺 𑀲𑀼𑀤𑁆𑀥𑀲𑀻𑀮𑁂 𑀞𑀺𑀢𑀲𑁆𑀲 𑀫𑀭𑀡𑀫𑁂𑀯 𑀯𑀭𑀢𑀭𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀲𑀻𑀯𑀺𑀲𑀲𑁆𑀲 𑀓𑀡𑁆𑀳𑀲𑀧𑁆𑀧𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁 𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀩𑁆𑀩𑀚𑀺𑀢𑁂𑀦 𑀳𑀺 𑀓𑀢𑀧𑀸𑀧𑀓𑀫𑁆𑀫𑀁 𑀪𑀕𑀯𑀢𑁄 𑀆𑀡𑀸𑀢𑀺𑀓𑁆𑀓𑀫𑀦𑀢𑁄 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀸𑀲𑀼𑀦𑁆𑀢𑀺 𑀆𑀯𑀸𑀝𑁄𑀧𑀺 𑀯𑀼𑀘𑁆𑀘𑀢𑀺 𑀭𑀸𑀲𑀺𑀧𑀺.

‘‘𑀓𑀺𑀦𑁆𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀡𑀲𑀺 𑀲𑀸𑀭𑀣𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀲𑀻’’𑀢𑀺. (𑀚𑀸. 𑁨.𑁨𑁨.𑁩) 𑁋

𑀏𑀢𑁆𑀣 𑀳𑀺 𑀆𑀯𑀸𑀝𑁄 𑀓𑀸𑀲𑀼 𑀦𑀸𑀫.

‘‘𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀡𑀦𑁆𑀢𑀺, 𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸’’𑀢𑀺 (𑀚𑀸. 𑁨.𑁨𑁨.𑁪𑁬𑁨) 𑁋

𑀏𑀢𑁆𑀣 𑀭𑀸𑀲𑀺. 𑀇𑀥 𑀧𑀦 𑀉𑀪𑀬𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀗𑁆𑀕𑀸𑀭𑀧𑀼𑀡𑁆𑀡𑀓𑀽𑀧𑁂 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀯𑀸’’𑀢𑀺. 𑀓𑀲𑁆𑀲𑀢𑀺 𑀔𑀡𑀻𑀬𑀢𑀻𑀢𑀺 𑀓𑀸𑀲𑀼, 𑀆𑀯𑀸𑀝𑁄. 𑀓𑀲𑀻𑀬𑀢𑀺 𑀘𑀻𑀬𑀢𑀻𑀢𑀺 𑀓𑀸𑀲𑀼, 𑀭𑀸𑀲𑀺. 𑀧𑀤𑀺𑀢𑁆𑀢𑀸𑀬𑀸𑀢𑀺 𑀤𑀺𑀧𑁆𑀧𑀫𑀸𑀦𑀸𑀬. 𑀲𑀁-𑀲𑀤𑁆𑀤𑁄 𑀏𑀢𑁆𑀣 𑀲𑀫𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀸𑀬𑀸’’𑀢𑀺.

𑀇𑀤𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀧𑀓𑁆𑀔𑀺𑀧𑀦𑀁 𑀦𑀺𑀤𑀸𑀦𑀁 𑀓𑀸𑀭𑀡𑀫𑀲𑁆𑀲 𑀦𑀺𑀭𑀬𑀼𑀧𑀧𑀚𑁆𑀚𑀦𑀲𑁆𑀲𑀸𑀢𑀺 𑀇𑀢𑁄𑀦𑀺𑀤𑀸𑀦𑀁, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁. 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄-𑀆𑀤𑁂𑀲𑁄 𑀓𑀢𑁄, 𑀢𑀲𑁆𑀲 𑀘 𑀲𑀫𑀸𑀲𑁂𑀧𑀺 𑀅𑀮𑁄𑀧𑁄. 𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀢𑁆𑀯𑀁-𑀲𑀤𑁆𑀤𑁄 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀫𑀸𑀦𑁄 𑀅𑀢𑁆𑀣𑀻𑀢𑀺 𑀆𑀳 ‘‘𑀢𑁆𑀯𑀦𑁆𑀢𑀺 𑀢𑀁𑀲𑀤𑁆𑀤𑀲𑁆𑀲 𑀯𑁂𑀯𑀘𑀦’’𑀦𑁆𑀢𑀺. ‘‘𑀬𑀁 𑀢𑀦𑁆𑀢𑀺 𑀧𑀦 𑀧𑀸𑀞𑁄 𑀬𑀼𑀢𑁆𑀢𑀭𑀽𑀧𑁄’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀬𑀁 𑀢𑀦𑁆𑀢𑀺 𑀦𑀸𑀬𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁄, 𑀬𑀣𑀸 𑀮𑁄𑀓𑁂 𑀬𑀁 𑀯𑀸 𑀢𑀁 𑀯𑀸𑀢𑀺 𑀅𑀯𑀜𑁆𑀜𑀸𑀢𑀯𑀘𑀦𑀁, 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀬𑀁 𑀯𑀸 𑀢𑀁 𑀯𑀸 𑀳𑀻𑀴𑀺𑀢𑀁 𑀅𑀯𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀻𑀘𑀚𑀦𑀸𑀦𑀦𑁆𑀢𑀺 𑀦𑀺𑀳𑀻𑀦𑀕𑀼𑀡𑀸𑀦𑀁 𑀲𑀢𑁆𑀢𑀸𑀦𑀁. 𑀕𑀸𑀫𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀕𑀸𑀫-𑀲𑀤𑁆𑀤𑁂𑀦 𑀕𑀸𑀫𑀯𑀸𑀲𑀺𑀦𑁄 𑀯𑀼𑀢𑁆𑀢𑀸 𑀅𑀪𑁂𑀤𑀽𑀧𑀘𑀸𑀭𑁂𑀦𑀸𑀢𑀺 𑀆𑀳 ‘‘𑀕𑀸𑀫𑀯𑀸𑀲𑀺𑀓𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀓𑀺𑀮𑁂𑀲𑀧𑀕𑁆𑀖𑀭𑀡𑀓𑀁 𑀥𑀫𑁆𑀫𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀲𑁆𑀲𑀦𑁆𑀤𑀦𑀓𑀥𑀫𑁆𑀫𑀁 ¶ . 𑀫𑁂𑀣𑀼𑀦𑀥𑀫𑁆𑀫𑁄 𑀳𑀺 𑀭𑀸𑀕𑀁 𑀧𑀕𑁆𑀖𑀭𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀑𑀴𑀸𑀭𑀺𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀲𑀼𑀔𑀼𑀫’’𑀦𑁆𑀢𑀺. 𑀅𑀦𑀺𑀧𑀼𑀡𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀤𑀓𑁂 𑀪𑀯𑀁 𑀑𑀤𑀓𑀁. 𑀓𑀺𑀁 𑀢𑀁? 𑀉𑀤𑀓𑀓𑀺𑀘𑁆𑀘𑀦𑁆𑀢𑀺 𑀆𑀳 𑁋 ‘‘𑀉𑀤𑀓𑀓𑀺𑀘𑁆𑀘𑀁 𑀅𑀦𑁆𑀢𑀺𑀓𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸’’𑀢𑀺. 𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀦𑀸𑀕𑀢𑀯𑀘𑀦𑀁 𑀦𑀸𑀫-𑀲𑀤𑁆𑀤𑀬𑁄𑀕𑁂𑀦 𑀓𑀢𑀦𑁆𑀢𑀺 𑀆𑀳 𑁋 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻𑀢𑀺…𑀧𑁂… 𑀦𑀸𑀫-𑀲𑀤𑁆𑀤𑁂𑀦 ¶ 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀮𑁄𑀓𑁂 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀆𑀤𑀺𑀓𑀢𑁆𑀢𑀸 𑀓𑁄𑀘𑀺 𑀧𑀞𑀫𑀓𑀧𑁆𑀧𑀺𑀓𑁄, 𑀦 𑀧𑀦𑀸𑀬𑀦𑁆𑀢𑀺 𑀆𑀳 𑁋 ‘‘𑀲𑀸𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀻’’𑀢𑀺. 𑀩𑀳𑀽𑀦𑀦𑁆𑀢𑀺 𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀁, 𑀦 𑀧𑀦 𑀅𑀓𑀼𑀲𑀮𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀩𑀳𑀽𑀦𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺.

𑀬𑀁 𑀅𑀲𑀁𑀯𑀭𑀁 𑀧𑀝𑀺𑀘𑁆𑀘 𑀤𑀼𑀩𑁆𑀪𑀭𑀢𑀸𑀤𑀼𑀧𑁆𑀧𑁄𑀲𑀢𑀸𑀤𑀺 𑀳𑁄𑀢𑀺, 𑀲𑁄 𑀅𑀲𑀁𑀯𑀭𑁄 𑀤𑀼𑀩𑁆𑀪𑀭𑀢𑀸𑀤𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀓𑀸𑀭𑀡𑁂 𑀨𑀮𑀽𑀧𑀘𑀸𑀭𑁂𑀦𑀸𑀢𑀺 𑀆𑀳 𑁋 ‘‘𑀤𑀼𑀩𑁆𑀪𑀭𑀢𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀲𑀁𑀯𑀭𑀲𑁆𑀲𑀸’’𑀢𑀺. 𑀯𑀢𑁆𑀣𑀼𑀪𑀽𑀢𑀲𑁆𑀲𑀸𑀢𑀺 𑀓𑀸𑀭𑀡𑀪𑀽𑀢𑀲𑁆𑀲. 𑀯𑀲𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀳𑀺 𑀓𑀸𑀭𑀡𑀁 𑀯𑀢𑁆𑀣𑀼. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁 𑀲𑀭𑀻𑀭𑀜𑁆𑀘, 𑀘𑀺𑀢𑁆𑀢𑀫𑁂𑀯 𑀯𑀸. 𑀤𑀼𑀩𑁆𑀪𑀭𑀢𑀜𑁆𑀘𑁂𑀯 𑀤𑀼𑀧𑁆𑀧𑁄𑀲𑀢𑀜𑁆𑀘 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀢𑀦𑀸 𑀧𑀘𑁆𑀘𑀬𑀤𑀸𑀬𑀓𑁂𑀳𑀺 𑀘 𑀤𑀼𑀓𑁆𑀔𑁂𑀦 𑀪𑀭𑀺𑀢𑀩𑁆𑀩𑀢𑀁 𑀧𑁄𑀲𑁂𑀢𑀩𑁆𑀩𑀢𑀜𑁆𑀘 𑀆𑀧𑀚𑁆𑀚𑀢𑀺. 𑀅𑀲𑀁𑀯𑀭𑁂 𑀞𑀺𑀢𑁄 𑀳𑀺 𑀏𑀓𑀘𑁆𑀘𑁄 𑀅𑀢𑁆𑀢𑀦𑁄𑀧𑀺 𑀤𑀼𑀩𑁆𑀪𑀭𑁄 𑀳𑁄𑀢𑀺 𑀤𑀼𑀧𑁆𑀧𑁄𑀲𑁄, 𑀏𑀓𑀘𑁆𑀘𑁄 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺. 𑀓𑀣𑀁? 𑀬𑁄 𑀳𑀺 𑀅𑀫𑁆𑀩𑀺𑀮𑀸𑀤𑀻𑀦𑀺 𑀮𑀤𑁆𑀥𑀸 𑀅𑀦𑀫𑁆𑀩𑀺𑀮𑀸𑀤𑀻𑀦𑀺 𑀧𑀭𑀺𑀬𑁂𑀲𑀢𑀺, 𑀅𑀜𑁆𑀜𑀲𑁆𑀲 𑀖𑀭𑁂 𑀮𑀤𑁆𑀥𑀁 𑀅𑀜𑁆𑀜𑀲𑁆𑀲 𑀖𑀭𑁂 𑀙𑀟𑁆𑀟𑁂𑀦𑁆𑀢𑁄 𑀲𑀩𑁆𑀩𑀁 𑀕𑀸𑀫𑀁 𑀘𑀭𑀺𑀢𑁆𑀯𑀸 𑀭𑀺𑀢𑁆𑀢𑀧𑀢𑁆𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀅𑀬𑀁 𑀅𑀢𑁆𑀢𑀦𑁄 𑀤𑀼𑀩𑁆𑀪𑀭𑁄. 𑀬𑁄 𑀧𑀦 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑁂𑀧𑀺 𑀤𑀼𑀫𑁆𑀫𑀼𑀔𑀪𑀸𑀯𑀁 𑀅𑀦𑀢𑁆𑀢𑀫𑀦𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀢𑁂𑀲𑀁 𑀯𑀸 𑀲𑀫𑁆𑀫𑀼𑀔𑀸𑀯 𑀢𑀁 𑀧𑀺𑀡𑁆𑀟𑀧𑀸𑀢𑀁 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦’’𑀦𑁆𑀢𑀺 𑀅𑀧𑀲𑀸𑀤𑁂𑀦𑁆𑀢𑁄 𑀲𑀸𑀫𑀡𑁂𑀭𑀕𑀳𑀝𑁆𑀞𑀸𑀤𑀻𑀦𑀁 𑀤𑁂𑀢𑀺, 𑀅𑀬𑀁 𑀉𑀧𑀝𑁆𑀞𑀸𑀓𑀸𑀦𑀁 𑀤𑀼𑀩𑁆𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀤𑀽𑀭𑀢𑁄𑀯 𑀧𑀭𑀺𑀯𑀚𑁆𑀚𑁂𑀦𑁆𑀢𑀺 ‘‘𑀤𑀼𑀩𑁆𑀪𑀭𑁄 𑀪𑀺𑀓𑁆𑀔𑀼 𑀦 𑀲𑀓𑁆𑀓𑀸 𑀧𑁄𑀲𑁂𑀢𑀼’’𑀦𑁆𑀢𑀺.

𑀫𑀳𑀺𑀘𑁆𑀙𑀢𑀦𑁆𑀢𑀺 𑀏𑀢𑁆𑀣 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺 𑀇𑀘𑁆𑀙𑀢𑀺, 𑀫𑀳𑀢𑀻 𑀯𑀸 𑀧𑀦𑀲𑁆𑀲 𑀇𑀘𑁆𑀙𑀸𑀢𑀺 𑀫𑀳𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀫𑀳𑀺𑀘𑁆𑀙𑀢𑀸, 𑀲𑀦𑁆𑀢𑀕𑀼𑀡𑀯𑀺𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑀘. 𑀫𑀳𑀺𑀘𑁆𑀙𑁄 𑀳𑀺 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀲𑀻𑀮𑀥𑀼𑀢𑀥𑀫𑁆𑀫𑀸𑀤𑀺𑀕𑀼𑀡𑁂 𑀯𑀺𑀪𑀸𑀯𑁂𑀢𑀺, 𑀢𑀸𑀤𑀺𑀲𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 ‘‘𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀏𑀢𑀁 𑀫𑀳𑀺𑀘𑁆𑀙𑀢𑀸𑀮𑀓𑁆𑀔𑀡’’𑀦𑁆𑀢𑀺. 𑀲𑀸 𑀧𑀦𑁂𑀲𑀸 𑀫𑀳𑀺𑀘𑁆𑀙𑀢𑀸 ‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 ‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺’’ 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸𑀬𑁂𑀯, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀦𑁆𑀢𑀧𑁆𑀧𑀺𑀬𑁄 𑀳𑁄𑀢𑀺, 𑀯𑀺𑀚𑀸𑀢𑀫𑀸𑀢𑀸𑀧𑀺𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 ¶ 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀦 𑀧𑀘𑁆𑀘𑀬𑀁 𑀤𑁂𑀦𑁆𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀺𑀬𑀸’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁨𑁫𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁬𑁩; 𑀯𑀺𑀪. 𑀅𑀝𑁆𑀞. 𑁮𑁫𑁦; 𑀉𑀤𑀸. 𑀅𑀝𑁆𑀞. 𑁩𑁧; 𑀫𑀳𑀸𑀦𑀺. 𑀅𑀝𑁆𑀞. 𑁮𑁫);

𑀲𑀢𑁆𑀢𑁂𑀳𑀺 ¶ 𑀓𑀺𑀮𑁂𑀲𑁂𑀳𑀺 𑀘 𑀲𑀗𑁆𑀕𑀡𑀦𑀁 𑀲𑀫𑁄𑀥𑀸𑀦𑀁 𑀲𑀗𑁆𑀕𑀡𑀺𑀓𑀸𑀢𑀺 𑀆𑀳 𑁋 ‘‘𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘𑀸’’𑀢𑀺. 𑀓𑁄𑀲𑀚𑁆𑀚𑀸𑀦𑀼𑀕𑀢𑁄 𑀘 𑀳𑁄𑀢𑀻𑀢𑀺 𑀓𑀼𑀲𑀻𑀢𑀪𑀸𑀯𑁂𑀦 𑀅𑀦𑀼𑀕𑀢𑁄 𑀳𑁄𑀢𑀺, 𑀓𑀼𑀲𑀻𑀢𑀲𑁆𑀲 𑀪𑀸𑀯𑁄 𑀓𑁄𑀲𑀚𑁆𑀚𑀁. 𑀅𑀝𑁆𑀞𑀓𑀼𑀲𑀻𑀢𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀏𑀢𑁆𑀣 𑀓𑀼𑀘𑁆𑀙𑀺𑀢𑀁 𑀲𑀻𑀤𑀢𑀻𑀢𑀺 𑀓𑀼𑀲𑀻𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 ‘‘𑀓𑀼𑀲𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀓𑀼𑀲𑀻𑀢𑀪𑀸𑀯𑁄 𑀇𑀥 𑀓𑀼𑀲𑀻𑀢-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀯𑀺𑀦𑀸𑀧𑀺 𑀳𑀺 𑀪𑀸𑀯𑀚𑁄𑀢𑀦𑀲𑀤𑁆𑀤𑀁 𑀪𑀸𑀯𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀧𑀝𑀲𑁆𑀲 𑀲𑀼𑀓𑁆𑀓’’𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀻𑀢𑀪𑀸𑀯𑀯𑀢𑁆𑀣𑀽𑀦𑀻𑀢𑀺 𑀅𑀢𑁆𑀣𑁄, 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑁋

‘‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀫𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻𑀢𑀺 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀇𑀤𑀁 𑀧𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼. 𑀅𑀳𑀁 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺𑀁, 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀦𑁆𑀢𑁄, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀫𑀕𑁆𑀕𑁄 𑀔𑁄 𑀫𑁂 𑀕𑀦𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀫𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀅𑀳𑀁 𑀔𑁄 𑀫𑀕𑁆𑀕𑀁 𑀅𑀕𑀫𑀸𑀲𑀺𑀁, 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀦𑁆𑀢𑁄, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦𑀸𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀢𑀲𑁆𑀲 𑀫𑁂 𑀓𑀸𑀬𑁄 𑀓𑀺𑀮𑀦𑁆𑀢𑁄 𑀅𑀓𑀫𑁆𑀫𑀜𑁆𑀜𑁄, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀢𑀲𑁆𑀲 𑀫𑁂 𑀓𑀸𑀬𑁄 𑀕𑀭𑀼𑀓𑁄 𑀅𑀓𑀫𑁆𑀫𑀜𑁆𑀜𑁄 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀉𑀧𑁆𑀧𑀦𑁆𑀦𑁄 𑀔𑁄 𑀫𑁂 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄, 𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼𑀁, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸, 𑀢𑀲𑁆𑀲 𑀫𑁂 𑀓𑀸𑀬𑁄 𑀤𑀼𑀩𑁆𑀩𑀮𑁄 𑀅𑀓𑀫𑁆𑀫𑀜𑁆𑀜𑁄, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻𑀢𑀺 𑀲𑁄 𑀦𑀺𑀧𑀚𑁆𑀚𑀢𑀺, 𑀦 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀇𑀤𑀁 𑀅𑀝𑁆𑀞𑀫𑀁 𑀓𑀼𑀲𑀻𑀢𑀯𑀢𑁆𑀣𑀼’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁩𑁪; 𑀅. 𑀦𑀺. 𑁮.𑁮𑁦) 𑁋

𑀏𑀯𑀫𑀸𑀕𑀢𑀸𑀦𑀺 ¶ ¶ ‘‘𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀑𑀲𑀻𑀤𑀦𑀸𑀦𑀺 𑀉𑀧𑀭𑀽𑀧𑀭𑀺 𑀓𑁄𑀲𑀚𑁆𑀚𑀓𑀸𑀭𑀡𑀢𑁆𑀢𑀸 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺 𑀦𑀸𑀫, 𑀢𑁂𑀲𑀁 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀪𑀭𑁄 𑀳𑁄𑀢𑀺 𑀲𑀼𑀧𑁄𑀲𑁄𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂𑀳𑀺 𑀘 𑀲𑀼𑀔𑁂𑀦 𑀪𑀭𑀺𑀢𑀩𑁆𑀩𑁄 𑀧𑁄𑀲𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀁𑀯𑀭𑁂 𑀞𑀺𑀢𑁄 𑀳𑀺 𑀏𑀓𑀘𑁆𑀘𑁄 𑀅𑀢𑁆𑀢𑀦𑁄𑀧𑀺 𑀲𑀼𑀪𑀭𑁄 𑀳𑁄𑀢𑀺 𑀲𑀼𑀧𑁄𑀲𑁄, 𑀏𑀓𑀘𑁆𑀘𑁄 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺. 𑀓𑀣𑀁? 𑀬𑁄 𑀳𑀺 𑀬𑀁 𑀓𑀺𑀜𑁆𑀘𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀮𑀤𑁆𑀥𑀸 𑀢𑀼𑀝𑁆𑀞𑀘𑀺𑀢𑁆𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀅𑀢𑁆𑀢𑀦𑁄 𑀲𑀼𑀪𑀭𑁄. 𑀬𑁄 𑀧𑀦 𑀧𑀭𑁂𑀲𑀫𑁆𑀧𑀺 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀤𑀸𑀦𑀁 𑀅𑀳𑀻𑀴𑁂𑀢𑁆𑀯𑀸 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑁄 𑀳𑀼𑀢𑁆𑀯𑀸 𑀏𑀢𑁂𑀲𑀁 𑀲𑀫𑁆𑀫𑀼𑀔𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀢𑀺, 𑀅𑀬𑀁 𑀉𑀧𑀝𑁆𑀞𑀸𑀓𑀸𑀦𑀁 𑀲𑀼𑀪𑀭𑁄. 𑀏𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑀸 𑀳𑁄𑀦𑁆𑀢𑀺, ‘‘𑀅𑀫𑁆𑀳𑀸𑀓𑀁 𑀪𑀤𑀦𑁆𑀢𑁄 𑀲𑀼𑀪𑀭𑁄, 𑀣𑁄𑀓𑀣𑁄𑀓𑁂𑀦𑀧𑀺 𑀢𑀼𑀲𑁆𑀲𑀢𑀺, 𑀫𑀬𑀫𑁂𑀯 𑀦𑀁 𑀧𑁄𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀧𑁄𑀲𑁂𑀦𑁆𑀢𑀺. 𑀅𑀧𑁆𑀧𑀺𑀘𑁆𑀙𑀢𑀦𑁆𑀢𑀺 𑀇𑀘𑁆𑀙𑀸𑀯𑀺𑀭𑀳𑀺𑀢𑀢𑁆𑀢𑀁. 𑀏𑀢𑁆𑀣 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀅𑀧𑁆𑀧-𑀲𑀤𑁆𑀤𑁄 𑀳𑁂𑀢𑁆𑀣 𑀅𑀪𑀸𑀯𑀢𑁆𑀣𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘‘𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁫) 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀦𑀺𑀢𑁆𑀢𑀡𑁆𑀳𑀪𑀸𑀯’’𑀦𑁆𑀢𑀺.

𑀢𑀺𑀧𑁆𑀧𑀪𑁂𑀤𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀬𑀣𑀸𑀮𑀸𑀪𑀸𑀤𑀺𑀲𑀦𑁆𑀢𑁄𑀲𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁, 𑀘𑀢𑀽𑀲𑀼 𑀧𑀦 𑀧𑀘𑁆𑀘𑀬𑁂𑀲𑀼 𑀢𑀬𑁄 𑀢𑀬𑁄 𑀲𑀦𑁆𑀢𑁄𑀲𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺 𑀲𑀦𑁆𑀢𑁄𑀲𑁄. 𑀓𑀣𑀁? 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺 𑀲𑀦𑁆𑀢𑁄𑀲𑁄. 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼. 𑀢𑀲𑁆𑀲𑀸𑀬𑀁 𑀧𑀪𑁂𑀤𑀲𑀁𑀯𑀡𑁆𑀡𑀦𑀸 (𑀫. 𑀦𑀺. 𑀅𑀝𑁆𑀞. 𑁧.𑁨𑁫𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁪𑁪; 𑀅. 𑀦𑀺. 𑀅𑀝𑁆𑀞. 𑁧.𑁧.𑁬𑁫) 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀬𑁂𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀜𑁆𑀳𑀺 𑀕𑀭𑀼𑀘𑀻𑀯𑀭𑀸𑀦𑀺 𑀦 𑀨𑀸𑀲𑀼𑀪𑀸𑀯𑀸𑀯𑀳𑀸𑀦𑀺 𑀲𑀭𑀻𑀭𑀔𑁂𑀤𑀸𑀯𑀳𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦 𑀅𑀦𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀢𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺. 𑀅𑀧𑀭𑁄 ¶ 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀧𑀦 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁, 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁, 𑀇𑀤𑀁 𑀅𑀧𑁆𑀧𑀮𑀸𑀪𑀸𑀦𑀁 𑀳𑁄𑀢𑀽’’𑀢𑀺 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀸𑀡𑀘𑀻𑀯𑀭𑀁 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀫𑀳𑀕𑁆𑀖𑀜𑁆𑀳𑀺 𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 ¶ 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸𑀧𑀺 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀕𑀳𑀡𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀬𑁂𑀦𑀲𑁆𑀲 𑀧𑀭𑀺𑀪𑀼𑀢𑁆𑀢𑁂𑀦 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀮𑀪𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸, 𑀲𑁄 𑀢𑁂𑀦 𑀦𑁂𑀯 𑀲𑁄𑀫𑀦𑀲𑁆𑀲𑀁, 𑀦 𑀧𑀝𑀺𑀖𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀭𑀓𑁂𑀦𑀧𑀺 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑁄𑀧𑀺 ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀧𑀼𑀦 𑀧𑀝𑀺𑀩𑀼𑀚𑁆𑀛𑀢𑁄 𑀧𑀸𑀧𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 ¶ 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑁆𑀧𑀺𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀬𑀁 𑀮𑀪𑀢𑀺, 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀤𑁂𑀯 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 ¶ 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 ‘‘𑀕𑀡𑁆𑀳, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀣 ‘‘𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦𑁂𑀯 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀏𑀯𑀁 𑀬𑀣𑀸𑀮𑀸𑀪𑀸𑀤𑀺𑀯𑀲𑁂𑀦 𑀢𑀺𑀧𑁆𑀧𑀪𑁂𑀤𑁄 𑀲𑀦𑁆𑀢𑁄𑀲𑁄 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀯𑀺𑀢𑀓𑁆𑀓𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸𑀦𑀁 𑀯𑀲𑁂𑀦 𑀅𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀁. 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀅𑀯𑀺𑀳𑀺𑀁 𑀲𑀸𑀯𑀺𑀢𑀓𑁆𑀓𑀸𑀦𑀁 𑀯𑀲𑁂𑀦 𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀁. 𑀲𑀩𑁆𑀩𑀓𑀺𑀮𑁂𑀲𑀸𑀧𑀘𑀬𑀪𑀽𑀢𑀸𑀬 𑀯𑀺𑀯𑀝𑁆𑀝𑀸𑀬𑀸𑀢𑀺 𑀭𑀸𑀕𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀧𑀘𑀬𑀳𑁂𑀢𑀼𑀪𑀽𑀢𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸. 𑀅𑀝𑁆𑀞𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀅𑀝𑁆𑀞𑀦𑁆𑀦𑀁 𑀯𑀻𑀭𑀺𑀬𑀸𑀭𑀫𑁆𑀪𑀓𑀸𑀭𑀡𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸. 𑀬𑀣𑀸 𑀢𑀣𑀸 𑀧𑀞𑀫𑀁 𑀧𑀯𑀢𑁆𑀢𑀅𑀩𑁆𑀪𑀼𑀲𑁆𑀲𑀳𑀦𑀜𑁆𑀳𑀺 𑀉𑀧𑀭𑀺 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺. 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀳𑀺𑀢𑀸𑀦𑀺 𑀳𑀺 𑀅𑀩𑁆𑀪𑀼𑀲𑁆𑀲𑀳𑀦𑀸𑀦𑀺 𑀢𑀫𑁆𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀅𑀝𑁆𑀞 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑁋

‘‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑁂𑀦 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀅𑀳𑀁 𑀔𑁄 𑀓𑀫𑁆𑀫𑀁 𑀅𑀓𑀸𑀲𑀺𑀁, 𑀓𑀫𑁆𑀫𑀁 𑀔𑁄 𑀧𑀦𑀸𑀳𑀁 𑀓𑀭𑁄𑀦𑁆𑀢𑁄 ¶ 𑀦𑀸𑀲𑀓𑁆𑀔𑀺𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀫𑀕𑁆𑀕𑁄 𑀔𑁄 𑀫𑁂 𑀕𑀦𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀫𑀕𑁆𑀕𑀁 𑀔𑁄 𑀧𑀦 𑀫𑁂 𑀕𑀘𑁆𑀙𑀦𑁆𑀢𑁂𑀦 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀅𑀳𑀁 𑀔𑁄 𑀫𑀕𑁆𑀕𑀁 𑀅𑀕𑀫𑀸𑀲𑀺𑀁, 𑀫𑀕𑁆𑀕𑀁 𑀔𑁄 𑀧𑀦𑀸𑀳𑀁 𑀕𑀘𑁆𑀙𑀦𑁆𑀢𑁄 𑀦𑀸𑀲𑀓𑁆𑀔𑀺𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦𑀸𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀢𑀲𑁆𑀲 𑀫𑁂 𑀓𑀸𑀬𑁄 𑀮𑀳𑀼𑀓𑁄 𑀓𑀫𑁆𑀫𑀜𑁆𑀜𑁄, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀅𑀮𑀢𑁆𑀣𑀁 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀢𑀲𑁆𑀲 𑀫𑁂 𑀓𑀸𑀬𑁄 𑀩𑀮𑀯𑀸 𑀓𑀫𑁆𑀫𑀜𑁆𑀜𑁄, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀉𑀧𑁆𑀧𑀦𑁆𑀦𑁄 𑀔𑁄 𑀫𑁂 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀫𑁂 𑀆𑀩𑀸𑀥𑁄 𑀧𑀯𑀟𑁆𑀠𑁂𑀬𑁆𑀬, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺…𑀧𑁂… 𑀅𑀳𑀁 𑀔𑁄 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸, 𑀞𑀸𑀦𑀁 ¶ 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀫𑁂 𑀆𑀩𑀸𑀥𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑁂𑀬𑁆𑀬, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺 (𑀤𑀻. 𑀦𑀺. 𑁩.𑁩𑁩𑁫; 𑀅. 𑀦𑀺. 𑁮.𑁮𑁦) 𑁋

𑀏𑀯𑀁 𑀧𑀯𑀢𑁆𑀢𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀳𑀺𑀢𑀸𑀦𑀺 𑀅𑀩𑁆𑀪𑀼𑀲𑁆𑀲𑀳𑀦𑀸𑀦𑀺 𑀢𑀫𑁆𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀅𑀝𑁆𑀞 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀺 𑀦𑀸𑀫.

𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀦𑁆𑀢𑀺 𑀏𑀢𑁆𑀣 𑀢-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑁄 𑀘 𑀅𑀢𑀻𑀢𑀸𑀧𑁂𑀓𑁆𑀔𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀬𑀁 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’’𑀢𑀺𑀆𑀤𑀺. 𑀲𑀩𑁆𑀩𑀦𑀸𑀫𑀸𑀦𑀺 𑀳𑀺 𑀯𑀓𑁆𑀔𑀫𑀸𑀦𑀯𑀘𑀦𑀸𑀦𑀺𑀧𑀺 𑀳𑁄𑀦𑁆𑀢𑀺 𑀧𑀓𑁆𑀓𑀦𑁆𑀢𑀯𑀘𑀦𑀸𑀦𑀺𑀧𑀺. 𑀲𑀁𑀯𑀭𑀧𑁆𑀧𑀳𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀧𑀜𑁆𑀘𑀲𑀁𑀯𑀭𑁂𑀳𑀺 𑀘𑁂𑀯 𑀧𑀜𑁆𑀘𑀧𑀳𑀸𑀦𑁂𑀳𑀺 𑀘 𑀧𑀝𑀺𑀲𑀁𑀬𑀼𑀢𑁆𑀢𑀁. 𑀧𑀜𑁆𑀘𑀯𑀺𑀥𑁄 𑀳𑀺 𑀲𑀁𑀯𑀭𑁄 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺. 𑀧𑀳𑀸𑀦𑀫𑁆𑀧𑀺 𑀧𑀜𑁆𑀘𑀯𑀺𑀥𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀏𑀯𑀫𑀸𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀲𑀻𑀮𑀲𑀁𑀯𑀭𑁄 𑀦𑀸𑀫, 𑀲𑁄 𑀘 𑀅𑀢𑁆𑀣𑀢𑁄 ¶ 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀏𑀯𑀫𑀸𑀕𑀢𑀸 𑀇𑀦𑁆𑀤𑁆𑀭𑀺𑀬𑀸𑀭𑀓𑁆𑀔𑀸 𑀲𑀢𑀺𑀲𑀁𑀯𑀭𑁄, 𑀲𑀸 𑀘 𑀅𑀢𑁆𑀣𑀢𑁄 𑀢𑀣𑀸𑀧𑀯𑀢𑁆𑀢𑀸 𑀲𑀢𑀺 𑀏𑀯. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 (𑀲𑀼. 𑀦𑀺. 𑁧𑁦𑁪𑁧; 𑀦𑁂𑀢𑁆𑀢𑀺. 𑁧𑁧) 𑀏𑀯𑀫𑀸𑀕𑀢𑁄 𑀜𑀸𑀡𑀲𑀁𑀯𑀭𑁄. 𑀏𑀢𑁆𑀣 𑀳𑀺 ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 𑀯𑀢𑁆𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀘𑀦𑀢𑁄 𑀲𑁄𑀢𑀲𑀗𑁆𑀔𑀸𑀢𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀓𑀜𑀸𑀡𑀁 𑀧𑀺𑀤𑀳𑀦𑀝𑁆𑀞𑁂𑀦 𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑀁. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺𑀏𑀯𑀫𑀸𑀕𑀢𑀸 (𑀫. 𑀦𑀺. 𑁧.𑁨𑁪; 𑀫. 𑀦𑀺. 𑁩.𑁧𑁫𑁯; 𑀅. 𑀦𑀺. 𑁪.𑁧𑁧𑁪) 𑀅𑀥𑀺𑀯𑀸𑀲𑀦𑀸 𑀔𑀦𑁆𑀢𑀺𑀲𑀁𑀯𑀭𑁄, 𑀲𑀸 𑀘 𑀅𑀢𑁆𑀣𑀢𑁄 𑀢𑀣𑀸𑀧𑀯𑀢𑁆𑀢𑀸 𑀔𑀦𑁆𑀥𑀸 𑀅𑀤𑁄𑀲𑁄 𑀯𑀸. 𑀧𑀜𑁆𑀜𑀸𑀢𑀺 𑀏𑀓𑁂, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁬) 𑀏𑀯𑀫𑀸𑀕𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀦𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀭𑀺𑀬𑀫𑁂𑀯 𑀯𑀻𑀭𑀺𑀬𑀲𑀁𑀯𑀭𑁄. 𑀲𑀩𑁆𑀩𑁄 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀦𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀧𑀫𑀸𑀤𑀲𑁆𑀲 𑀅𑀪𑀺𑀚𑁆𑀛𑀸𑀤𑀻𑀦𑀁 𑀯𑀸 𑀅𑀓𑁆𑀔𑀦𑁆𑀢𑀺 𑀅𑀜𑁆𑀜𑀸𑀡𑀓𑁄𑀲𑀚𑁆𑀚𑀸𑀦𑀜𑁆𑀘 𑀲𑀁𑀯𑀭𑀡𑀢𑁄 𑀧𑀺𑀤𑀳𑀦𑀢𑁄 𑀙𑀸𑀤𑀦𑀢𑁄 ‘‘𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀭𑀢𑀻𑀢𑀺 𑀲𑀁𑀯𑀭𑁄, 𑀧𑀺𑀤𑀳𑀢𑀺 𑀦𑀺𑀯𑀸𑀭𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 ¶ 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀢𑀣𑀸 𑀢𑀣𑀸 𑀅𑀦𑀼𑀧𑁆𑀧𑀸𑀤𑀦𑀫𑁂𑀯 𑀳𑀺 𑀇𑀥 𑀲𑀁𑀯𑀭𑀡𑀁 𑀦𑀸𑀫. 𑀏𑀯𑀁 𑀢𑀸𑀯 𑀧𑀜𑁆𑀘𑀯𑀺𑀥𑁄 𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀦 𑀢𑁂𑀦 𑀕𑀼𑀡𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀕𑀼𑀡𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂 𑀉𑀧𑁆𑀧𑀦𑁆𑀦𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀕𑀼𑀡𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀉𑀤𑀓𑀧𑀺𑀝𑁆𑀞𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀏𑀢𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 ¶ 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀬𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀯𑀽𑀧𑀲𑀦𑁆𑀢𑀢𑀸 𑀓𑀺𑀮𑁂𑀲𑀸𑀦𑀁, 𑀏𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀢𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑀺𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑀲𑀁𑀯𑀭𑁂𑀳𑀺 𑀘𑁂𑀯 𑀧𑀳𑀸𑀦𑁂𑀳𑀺 𑀘 𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸 ‘‘𑀲𑀁𑀯𑀭𑀧𑁆𑀧𑀳𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀲𑀼𑀢𑁆𑀢𑀦𑁆𑀢𑀯𑀺𑀦𑀺𑀩𑀤𑁆𑀥𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀦𑀺𑀩𑀤𑁆𑀥𑀁, 𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀸 𑀳𑀺 𑀲𑀗𑁆𑀕𑀳𑀁 𑀦 𑀆𑀭𑁄𑀳𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢’’𑀦𑁆𑀢𑀺. 𑀅𑀣 𑀯𑀸 𑀅𑀲𑀼𑀢𑁆𑀢𑀦𑁆𑀢𑀯𑀺𑀦𑀺𑀩𑀤𑁆𑀥𑀦𑁆𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀸𑀴𑀺𑀁 𑀅𑀦𑀸𑀭𑀼𑀴𑁆𑀳𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀯𑀺𑀦𑀬𑀧𑀸𑀴𑀺𑀁 𑀅𑀦𑀸𑀭𑀼𑀴𑁆𑀳𑀪𑀸𑀯𑀁 𑀲𑀦𑁆𑀥𑀸𑀬. 𑀑𑀓𑁆𑀓𑀦𑁆𑀢𑀺𑀓𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀜𑀸𑀡𑁂𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑀭𑀸 𑀓𑀣𑀺𑀬𑀫𑀸𑀦𑀸 𑀥𑀫𑁆𑀫𑀤𑁂𑀲𑀦𑀸, 𑀧𑀝𑀺𑀓𑁆𑀔𑀺𑀧𑀦𑀸𑀥𑀺𑀧𑁆𑀧𑀸𑀬𑀸 𑀪𑀤𑁆𑀤𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑀸. 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀧𑁂𑀘𑁆𑀘 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣 𑀪𑀯𑀁 𑀲𑀫𑁆𑀧𑀭𑀸𑀬𑀺𑀓𑀁. 𑀯𑀝𑁆𑀝𑀪𑀬𑁂𑀦 𑀢𑀚𑁆𑀚𑁂𑀦𑁆𑀢𑁄𑀢𑀺 ‘‘𑀏𑀯𑀁 𑀤𑀼𑀲𑁆𑀲𑀻𑀮𑀸 𑀦𑀺𑀭𑀬𑀸𑀤𑀻𑀲𑀼 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀢𑀚𑁆𑀚𑁂𑀦𑁆𑀢𑁄. 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀢𑀻𑀢𑀺 ‘‘𑀢𑁂𑀦 𑀔𑀡𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀓𑀣𑀁 𑀪𑀕𑀯𑀸 𑀢𑀸𑀯𑀫𑀳𑀦𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑀸𑀯𑀢𑀸 𑀳𑀺 𑀮𑁄𑀓𑀺𑀬𑀫𑀳𑀸𑀚𑀦𑀸 𑀏𑀓𑀁 𑀧𑀤𑀁 𑀓𑀣𑁂𑀦𑁆𑀢𑀺, 𑀢𑀸𑀯 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀝𑁆𑀞 𑀧𑀤𑀸𑀦𑀺 𑀓𑀣𑁂𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁂 𑀧𑀦 𑀏𑀓𑀁 ¶ 𑀧𑀤𑀁 𑀓𑀣𑁂𑀦𑁆𑀢𑁂𑀬𑁂𑀯 𑀪𑀕𑀯𑀸 𑀲𑁄𑀴𑀲 𑀧𑀤𑀸𑀦𑀺 𑀓𑀣𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀮𑁄𑀓𑀺𑀬𑀚𑀦𑀲𑁆𑀲 𑀏𑀓𑀧𑀤𑀼𑀘𑁆𑀘𑀸𑀭𑀡𑀓𑁆𑀔𑀡𑁂 𑀪𑀕𑀯𑀸 𑀅𑀝𑁆𑀞𑀯𑀻𑀲𑀲𑀢𑀁 𑀧𑀤𑀸𑀦𑀺 𑀓𑀣𑁂𑀢𑀺. 𑀓𑀲𑁆𑀫𑀸? 𑀪𑀕𑀯𑀢𑁄 𑀳𑀺 𑀚𑀺𑀯𑁆𑀳𑀸 𑀫𑀼𑀤𑀼, 𑀤𑀦𑁆𑀢𑀸𑀯𑀭𑀡𑀁 𑀲𑀼𑀨𑀼𑀲𑀺𑀢𑀁, 𑀯𑀘𑀦𑀁 𑀅𑀕𑀴𑀺𑀢𑀁, 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄, 𑀢𑀲𑁆𑀫𑀸 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀧𑀼𑀘𑁆𑀙𑀢𑀺, 𑀅𑀜𑁆𑀜𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁, 𑀅𑀜𑁆𑀜𑁄 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁, 𑀅𑀜𑁆𑀜𑁄 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁, ‘‘𑀇𑀫𑀺𑀦𑀸 𑀧𑀼𑀝𑁆𑀞𑁂 𑀅𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀏𑀓𑁄 𑀏𑀓𑀁 𑀦 𑀑𑀮𑁄𑀓𑁂𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ‘‘𑀅𑀬𑀁 𑀧𑀞𑀫𑀁 𑀧𑀼𑀘𑁆𑀙𑀺, 𑀅𑀬𑀁 𑀤𑀼𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀦𑀯𑀸𑀭𑁄 𑀢𑀸𑀤𑀺𑀲𑀲𑁆𑀲 𑀧𑀜𑁆𑀜𑀯𑀢𑁄 𑀧𑀜𑁆𑀜𑀸𑀬𑀢𑀺 𑀲𑀼𑀔𑀼𑀫𑀲𑁆𑀲 𑀅𑀦𑁆𑀢𑀭𑀲𑁆𑀲 𑀮𑀩𑁆𑀪𑀦𑀢𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀤𑁂𑀲𑀦𑀸𑀯𑀸𑀭𑁄 𑀅𑀜𑁆𑀜𑁂𑀲𑀁 𑀦 𑀧𑀜𑁆𑀜𑀸𑀬𑀢𑁂𑀯 ¶ 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑁂 𑀔𑀡𑁂 𑀅𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀤𑀴𑁆𑀳𑀥𑀫𑁆𑀫𑁂𑀦 𑀥𑀦𑀼𑀕𑁆𑀕𑀳𑁂𑀦 𑀔𑀺𑀢𑁆𑀢𑀲𑀭𑀲𑁆𑀲 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀢𑀸𑀮𑀘𑁆𑀙𑀸𑀬𑀁 𑀅𑀢𑀺𑀓𑁆𑀓𑀫𑀦𑀢𑁄 𑀧𑀼𑀭𑁂𑀢𑀭𑀁𑀬𑁂𑀯 𑀪𑀕𑀯𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁, 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁, 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁, 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀺. 𑀢𑀺𑀝𑁆𑀞𑀦𑁆𑀢𑀼 𑀯𑀸 𑀏𑀢𑁂 𑀘𑀢𑁆𑀢𑀸𑀭𑁄, 𑀲𑀘𑁂 𑀳𑀺 𑀅𑀜𑁆𑀜𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼, 𑀅𑀜𑁆𑀜𑁂 𑀇𑀤𑁆𑀥𑀺𑀧𑀸𑀤𑁂𑀲𑀼, 𑀅𑀜𑁆𑀜𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀲𑀼, 𑀅𑀜𑁆𑀜𑁂 𑀧𑀜𑁆𑀘𑀩𑀮𑁂𑀲𑀼, 𑀅𑀜𑁆𑀜𑁂 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂𑀲𑀼, 𑀅𑀜𑁆𑀜𑁂 𑀅𑀝𑁆𑀞𑀫𑀕𑁆𑀕𑀗𑁆𑀕𑁂𑀲𑀼 𑀧𑀜𑁆𑀳𑁂 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑀫𑁆𑀧𑀺 𑀪𑀕𑀯𑀸 𑀓𑀣𑁂𑀬𑁆𑀬. 𑀢𑀺𑀝𑁆𑀞𑀦𑁆𑀢𑀼 𑀯𑀸 𑀏𑀢𑁂 𑀅𑀝𑁆𑀞, 𑀲𑀘𑁂 𑀅𑀜𑁆𑀜𑁂 𑀲𑀢𑁆𑀢𑀢𑀺𑀁𑀲 𑀚𑀦𑀸 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀧𑀜𑁆𑀳𑁂 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑀫𑁆𑀧𑀺 𑀪𑀕𑀯𑀸 𑀢𑀸𑀯𑀤𑁂𑀯 𑀓𑀣𑁂𑀬𑁆𑀬.

𑀫𑀽𑀮𑀁 𑀦𑀺𑀲𑁆𑀲𑀬𑁄 𑀧𑀢𑀺𑀝𑁆𑀞𑀸𑀢𑀺 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀞𑀫𑀲𑁆𑀲 𑀧𑀞𑀫𑀲𑁆𑀲 𑀯𑁂𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀑𑀓𑀸𑀲𑀪𑀸𑀯𑁄. 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀜𑁆𑀳𑀺 𑀅𑀯𑀲𑁂𑀲𑀓𑀼𑀲𑀮𑀥𑀫𑁆𑀫𑀸𑀦𑀁 𑀫𑁂𑀣𑀼𑀦𑀯𑀺𑀭𑀢𑀺𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀸 𑀧𑀢𑀺𑀝𑁆𑀞𑀸 𑀲𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀯𑀸. 𑀢𑁂𑀦𑁂𑀯𑀸𑀳 ‘‘𑀫𑁂𑀣𑀼𑀦𑀲𑀁𑀯𑀭𑁄 𑀳𑀻’’𑀢𑀺𑀆𑀤𑀺. 𑀯𑀼𑀢𑁆𑀢𑀢𑁆𑀣𑀯𑀲𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀅𑀥𑀺𑀕𑀫𑀽𑀧𑀸𑀬𑀯𑀲𑁂𑀦. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀦𑀺𑀤𑁆𑀤𑀺𑀝𑁆𑀞𑀯𑀺𑀭𑀢𑀺𑀘𑁂𑀢𑀦𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 𑁋 ‘‘𑀅𑀬𑀜𑁆𑀘 𑀅𑀢𑁆𑀣𑁄 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀳𑀺 𑀯𑀺𑀭𑀢𑀺𑀆𑀤𑀬𑁄 𑀥𑀫𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀭𑀺𑀬𑀸𑀬𑀢𑁄 𑀘 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀢𑁆𑀣 ¶ 𑀓𑀢𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀯𑁂𑀭𑀫𑀡𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀸.

‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀬𑀸 𑀢𑀲𑁆𑀫𑀺𑀁 ¶ 𑀲𑀫𑀬𑁂 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀢𑁆𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤𑀁? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄…𑀧𑁂… 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 (𑀯𑀺𑀪. 𑁭𑁦𑁬).

𑀏𑀢𑁆𑀣 𑀳𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀯𑀺𑀭𑀢𑀺𑀬𑁂𑀯 𑀲𑀺𑀓𑁆𑀔𑀸𑀧𑀤𑀁, 𑀘𑁂𑀢𑀦𑀸𑀧𑀺 𑀲𑀺𑀓𑁆𑀔𑀸𑀧𑀤𑀫𑁂𑀯, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀏𑀢𑁂𑀬𑁂𑀯 𑀤𑁆𑀯𑁂 𑀥𑀫𑁆𑀫𑀸 𑀲𑀺𑀓𑁆𑀔𑀸𑀧𑀤𑀁, 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀧𑀭𑁄𑀧𑀡𑁆𑀡𑀸𑀲 𑀥𑀫𑁆𑀫𑀸𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀓𑁄𑀝𑁆𑀞𑀸𑀲𑀢𑁄 𑀲𑀺𑀓𑁆𑀔𑀸𑀧𑀤𑀫𑁂𑀯, 𑀢𑀲𑁆𑀫𑀸 𑀢𑀢𑀺𑀬𑀦𑀬𑁄 𑀤𑀲𑁆𑀲𑀺𑀢𑁄. 𑀤𑀼𑀯𑀺𑀥𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀁 𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀦𑁆𑀢𑀺. 𑀢𑀢𑁆𑀣 𑀯𑀺𑀭𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀁. 𑀲𑀸 𑀳𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸, 𑀦𑁄 𑀘𑁂𑀢𑀦𑀸. 𑀯𑀺𑀭𑀫𑀦𑁆𑀢𑁄 𑀘 𑀢𑀸𑀬 𑀏𑀯 𑀢𑀢𑁄 𑀢𑀢𑁄 𑀯𑀺𑀭𑀫𑀢𑀺, 𑀦 𑀘𑁂𑀢𑀦𑀸𑀬, 𑀘𑁂𑀢𑀦𑀫𑁆𑀧𑀺 𑀧𑀦 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀣𑀸 𑀲𑁂𑀲𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂. 𑀢𑀲𑁆𑀫𑀸 𑀘𑁂𑀢𑀦𑀸 𑀘𑁂𑀯 𑀅𑀯𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀧𑀭𑀺𑀬𑀸𑀬𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀦 𑀓𑁂𑀯𑀮𑀁 𑀇𑀥 𑀯𑀺𑀭𑀢𑀺𑀆𑀤𑀬𑁄 𑀥𑀫𑁆𑀫𑀸𑀯 𑀲𑀺𑀓𑁆𑀔𑀸𑀧𑀤𑀁, 𑀅𑀣 𑀔𑁄 𑀢𑀤𑀢𑁆𑀣𑀚𑁄𑀢𑀺𑀓𑀸 𑀧𑀜𑁆𑀜𑀢𑁆𑀢𑀺𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. ‘‘𑀬𑁄 𑀢𑀢𑁆𑀣 𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄𑀢𑀺 𑀇𑀤𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀸𑀫𑀓𑀸𑀬𑁄𑀢𑀺 𑀦𑀸𑀫𑀲𑀫𑀽𑀳𑁄 𑀦𑀸𑀫𑀧𑀡𑁆𑀡𑀢𑁆𑀢𑀺𑀬𑁂𑀯. 𑀧𑀤𑀦𑀺𑀭𑀼𑀢𑁆𑀢𑀺𑀩𑁆𑀬𑀜𑁆𑀚𑀦𑀸𑀦𑀺 𑀦𑀸𑀫𑀯𑁂𑀯𑀘𑀦𑀸𑀦𑁂𑀯 ‘‘𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀦𑀺𑀭𑀼𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀯𑀺𑀬. 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁄𑀢𑀺 𑀯𑀺𑀭𑀢𑀺𑀆𑀤𑀬𑁄𑀯 𑀯𑀼𑀢𑁆𑀢𑀸, 𑀢𑀤𑀢𑁆𑀣𑀚𑁄𑀢𑀓𑀁 𑀯𑀘𑀦𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀇𑀤𑀫𑁆𑀧𑀺 𑀏𑀢𑁆𑀣 𑀮𑀩𑁆𑀪𑀢𑁂𑀯.

𑀅𑀢𑁆𑀣𑀯𑀲𑁂𑀢𑀺 𑀯𑀼𑀤𑁆𑀥𑀺𑀯𑀺𑀲𑁂𑀲𑁂 𑀆𑀦𑀺𑀲𑀁𑀲𑀯𑀺𑀲𑁂𑀲𑁂. 𑀢𑁂𑀲𑀁 𑀧𑀦 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀆𑀳 ‘‘𑀤𑀲 𑀓𑀸𑀭𑀡𑀯𑀲𑁂’’𑀢𑀺, 𑀤𑀲 𑀓𑀸𑀭𑀡𑀯𑀺𑀲𑁂𑀲𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀳𑀺𑀢𑀯𑀺𑀲𑁂𑀲𑁂’’𑀢𑀺. 𑀅𑀢𑁆𑀣𑁄𑀬𑁂𑀯 𑀯𑀸 𑀅𑀢𑁆𑀣𑀯𑀲𑁄, 𑀤𑀲 𑀅𑀢𑁆𑀣𑁂 𑀤𑀲 𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀣𑁄 ¶ 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 ¶ 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀳𑁂𑀢𑀽𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀝𑁆𑀞𑀼 𑀤𑁂𑀯𑀸𑀢𑀺 𑀇𑀤𑀁 𑀭𑀸𑀚𑀦𑁆𑀢𑁂𑀧𑀼𑀭𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁪𑁯𑁪 𑀆𑀤𑀬𑁄) 𑀯𑀼𑀢𑁆𑀢𑀁. ‘‘𑀬𑁂 𑀫𑀫 𑀲𑁄𑀢𑀩𑁆𑀩𑀁 𑀲𑀤𑁆𑀤𑀳𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀬𑁄 𑀘 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀦𑁆𑀢𑀺 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁩𑁪 𑀆𑀤𑀬𑁄) 𑀯𑀺𑀬 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸. 𑀲𑀼𑀔𑀯𑀺𑀳𑀸𑀭𑀸𑀪𑀸𑀯𑁂 𑀲𑀳𑀚𑀻𑀯𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀲𑀳𑀚𑀻𑀯𑀺𑀢𑀸𑀧𑀺 𑀲𑀼𑀔𑀯𑀺𑀳𑀸𑀭𑁄𑀯 𑀯𑀼𑀢𑁆𑀢𑁄. 𑀲𑀼𑀔𑀯𑀺𑀳𑀸𑀭𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀦𑀁 𑀨𑀸𑀲𑀼𑀢𑀸.

𑀫𑀗𑁆𑀓𑀼𑀢𑀦𑁆𑀢𑀺 𑀦𑀺𑀢𑁆𑀢𑁂𑀚𑀪𑀸𑀯𑀁. 𑀥𑀫𑁆𑀫𑁂𑀦𑀸𑀢𑀺𑀆𑀤𑀻𑀲𑀼 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀧𑀺𑀬𑀲𑀻𑀮𑀸𑀦𑀦𑁆𑀢𑀺 𑀲𑀺𑀓𑁆𑀔𑀸𑀓𑀸𑀫𑀸𑀦𑀁. 𑀢𑁂𑀲𑀜𑁆𑀳𑀺 𑀲𑀻𑀮𑀁 𑀧𑀺𑀬𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸’’𑀢𑀺. 𑀲𑀦𑁆𑀤𑀺𑀝𑁆𑀞𑀫𑀸𑀦𑀸𑀢𑀺 𑀲𑀁𑀲𑀬𑀁 𑀆𑀧𑀚𑁆𑀚𑀫𑀸𑀦𑀸. 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀻𑀢𑀺 𑀧𑀻𑀴𑀺𑀢𑀸 𑀳𑁄𑀦𑁆𑀢𑀺. 𑀲𑀗𑁆𑀖𑀓𑀫𑁆𑀫𑀸𑀦𑀻𑀢𑀺 𑀲𑀢𑀺𑀧𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀲𑀗𑁆𑀖𑀓𑀫𑁆𑀫𑀪𑀸𑀯𑁂 𑀕𑁄𑀩𑀮𑀺𑀩𑀤𑁆𑀤𑀜𑀸𑀬𑁂𑀦 𑀉𑀧𑁄𑀲𑀣𑀁 𑀧𑀯𑀸𑀭𑀡𑀜𑁆𑀘 𑀞𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀤𑀺𑀲𑁂𑀲𑀲𑀗𑁆𑀖𑀓𑀫𑁆𑀫𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀕𑁆𑀕𑀸𑀦𑀁 𑀪𑀸𑀯𑁄 𑀲𑀸𑀫𑀕𑁆𑀕𑀻.

‘‘𑀦 𑀯𑁄 𑀅𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁨) 𑀏𑀢𑁆𑀣 𑀯𑀺𑀯𑀸𑀤𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀆𑀲𑀯𑀸𑀢𑀺 𑀆𑀕𑀢𑀸.

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬) 𑁋

𑀏𑀢𑁆𑀣 𑀢𑁂𑀪𑀽𑀫𑀓𑀁 𑀓𑀫𑁆𑀫𑀁 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀥 𑀧𑀦 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀪𑀽𑀢𑀸 𑀘 𑀦𑀸𑀦𑀧𑁆𑀧𑀓𑀸𑀭𑀸 𑀉𑀧𑀤𑁆𑀤𑀯𑀸 𑀆𑀲𑀯𑀸𑀢𑀺 𑀆𑀳 𑁋 ‘‘𑀅𑀲𑀁𑀯𑀭𑁂 𑀞𑀺𑀢𑁂𑀦 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺. 𑀬𑀤𑀺 𑀳𑀺 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀦 𑀧𑀜𑁆𑀜𑀧𑁂𑀬𑁆𑀬, 𑀢𑀢𑁄 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀧𑀭𑀽𑀧𑀯𑀸𑀤𑀸𑀤𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀬𑁂 𑀘 𑀢𑀁𑀦𑀺𑀫𑀺𑀢𑁆𑀢𑀫𑁂𑀯 𑀦𑀺𑀭𑀬𑀸𑀤𑀻𑀲𑀼 ¶ 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀦𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄 ¶ , 𑀢𑀢𑁆𑀣 𑀪𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸’’𑀢𑀺. 𑀲𑀫𑁆𑀫𑀼𑀔𑀸 𑀕𑀭𑀳𑀡𑀁 𑀅𑀓𑀺𑀢𑁆𑀢𑀺, 𑀧𑀭𑀫𑁆𑀫𑀼𑀔𑀸 𑀕𑀭𑀳𑀡𑀁 𑀅𑀬𑀲𑁄. 𑀅𑀣 𑀯𑀸 𑀲𑀫𑁆𑀫𑀼𑀔𑀸 𑀧𑀭𑀫𑁆𑀫𑀼𑀔𑀸 𑀘 𑀕𑀭𑀳𑀡𑀁 𑀅𑀓𑀺𑀢𑁆𑀢𑀺, 𑀧𑀭𑀺𑀯𑀸𑀭𑀳𑀸𑀦𑀺 𑀅𑀬𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀕𑀫𑀦𑀫𑀕𑁆𑀕𑀣𑀓𑀦𑀸𑀬𑀸𑀢𑀺 𑀆𑀕𑀫𑀦𑀤𑁆𑀯𑀸𑀭𑀧𑀺𑀤𑀳𑀦𑀢𑁆𑀣𑀸𑀬. 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀧𑁂𑀘𑁆𑀘 𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄𑀢𑀺 𑀆𑀳 ‘‘𑀲𑀫𑁆𑀧𑀭𑀸𑀬𑁂 𑀦𑀭𑀓𑀸𑀤𑀻𑀲𑀽’’𑀢𑀺. 𑀫𑁂𑀣𑀼𑀦𑀸𑀤𑀻𑀦𑀺 𑀭𑀚𑁆𑀚𑀦𑀝𑁆𑀞𑀸𑀦𑀸𑀦𑀺, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀦𑀝𑁆𑀞𑀸𑀦𑀸𑀦𑀺.

𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀦𑀸𑀫 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀦𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀆𑀯𑀸𑀲𑀺𑀓𑀕𑀫𑀺𑀓𑀅𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀆𑀭𑀜𑁆𑀜𑀺𑀓𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀆𑀘𑀭𑀺𑀬𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀯𑀢𑁆𑀢𑀸𑀦𑀺. 𑀢𑀢𑁄 𑀅𑀜𑁆𑀜𑀸𑀦𑀺 𑀧𑀦 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂𑀬𑁂𑀯 𑀘𑀭𑀺𑀢𑀩𑁆𑀩𑀸𑀦𑀺 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺, 𑀦 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀘𑀭𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀘𑀼𑀤𑁆𑀤𑀲𑀔𑀦𑁆𑀥𑀓𑀯𑀢𑁆𑀢𑁂𑀲𑀼 𑀅𑀕𑀡𑀺𑀢𑀸𑀦𑀺, 𑀢𑀸𑀦𑀺 𑀧𑀦 ‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 (𑀘𑀽𑀴𑀯. 𑁭𑁫 𑀆𑀤𑀬𑁄) 𑀆𑀭𑀪𑀺𑀢𑁆𑀯𑀸 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁭𑁬) 𑀯𑀼𑀢𑁆𑀢𑀸𑀯𑀲𑀸𑀦𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀫𑀸𑀦𑀢𑁆𑀢𑀸𑀭𑀳𑁂𑀦, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁮𑁨) 𑀯𑀼𑀢𑁆𑀢𑀯𑀢𑁆𑀢𑀸𑀦𑀺 𑀧𑀓𑀢𑀢𑁆𑀢𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑀺𑀢𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺 𑀯𑀢𑁆𑀢𑀸𑀦𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀼𑀢𑁆𑀢𑀁 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁭𑁫) 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑀸𑀤𑀺𑀬𑀦𑀁 𑀏𑀓𑀁, ‘‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄’’𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁫𑁧) 𑀤𑀲𑀸𑀢𑀺 𑀏𑀯𑀫𑁂𑀢𑀸𑀦𑀺 𑀤𑁆𑀯𑀸𑀲𑀻𑀢𑀺 𑀯𑀢𑁆𑀢𑀸𑀦𑀺. 𑀏𑀢𑁂𑀲𑁆𑀯𑁂𑀯 𑀧𑀦 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀯𑀢𑁆𑀢𑀸𑀆𑀦𑀺, 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺 𑀏𑀯, 𑀅𑀜𑁆𑀜𑀢𑁆𑀣 𑀧𑀦 𑀅𑀝𑁆𑀞𑀓𑀣𑀸𑀧𑀤𑁂𑀲𑁂 𑀅𑀧𑁆𑀧𑀓𑀁 ¶ 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 ‘‘𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀲𑀁𑀯𑀭𑀯𑀺𑀦𑀬𑁄𑀢𑀺 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄𑀧𑀺 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀲𑀁𑀯𑀭𑁄, 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀳𑀸𑀦𑀯𑀺𑀦𑀬𑁄𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁 ¶ , 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 𑀧𑀳𑀸𑀦𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀣𑀯𑀺𑀦𑀬𑁄𑀢𑀺 𑀲𑀢𑁆𑀢 𑀅𑀥𑀺𑀓𑀭𑀡𑀲𑀫𑀣𑀸. 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀫𑁂𑀯. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀯𑀺𑀚𑁆𑀚𑀫𑀸𑀦𑀸𑀬 𑀏𑀯 𑀲𑀺𑀓𑁆𑀔𑀸𑀧𑀤𑀲𑀫𑁆𑀪𑀯𑀢𑁄 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑁋

‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀬𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀢𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀬𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀬𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀢𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀢𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀬𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀢𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀬𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀢𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀬𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀢𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬.

‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬.

‘‘𑀬𑀁 ¶ 𑀲𑀗𑁆𑀖𑀨𑀸𑀲𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬.

‘‘𑀬𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬…𑀧𑁂… 𑀬𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬…𑀧𑁂… 𑀬𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬…𑀧𑁂… 𑀬𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬…𑀧𑁂… 𑀬𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬…𑀧𑁂… 𑀬𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬…𑀧𑁂… 𑀬𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸…𑀧𑁂… 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 ¶ , 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀗𑁆𑀖𑀨𑀸𑀲𑀼𑀢𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 (𑀧𑀭𑀺. 𑁩𑁩𑁪).

‘‘𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀁, 𑀤𑁆𑀯𑁂 𑀘 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺;

𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀺, 𑀅𑀢𑁆𑀣𑀯𑀲𑁂 𑀧𑀓𑀭𑀡𑁂’’𑀢𑀺 (𑀧𑀭𑀺. 𑁩𑁩𑁪) 𑁋

𑀬𑀁 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬 𑀆𑀲𑀦𑁆𑀦𑀸𑀲𑀦𑁆𑀦𑀧𑀤𑀸𑀦𑀁 𑀉𑀧𑀭𑀽𑀧𑀭𑀺𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀺𑀢𑀢𑁆𑀢𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀲𑀤𑀺𑀲𑀢𑁆𑀢𑀸 ‘‘𑀲𑀗𑁆𑀔𑀮𑀺𑀓𑀦𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀮𑀺𑀓𑀦𑀬𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀤𑀲𑀲𑀼 𑀧𑀤𑁂𑀲𑀼 𑀏𑀓𑀫𑁂𑀓𑀁 𑀧𑀤𑀁 𑀢𑀤𑀯𑀲𑁂𑀲𑁂𑀳𑀺 𑀦𑀯𑀦𑀯𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬 ‘‘𑀏𑀓𑁂𑀓𑀧𑀤𑀫𑀽𑀮𑀺𑀓𑀁 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀅𑀢𑁆𑀣𑀲𑀢𑀦𑁆𑀢𑀺𑀆𑀤𑀻𑀲𑀼 ¶ 𑀲𑀗𑁆𑀔𑀮𑀺𑀓𑀦𑀬𑁂 𑀢𑀸𑀯 𑀧𑀼𑀭𑀺𑀫𑀧𑀼𑀭𑀺𑀫𑀧𑀤𑀸𑀦𑀁 𑀯𑀲𑁂𑀦 𑀥𑀫𑁆𑀫𑀲𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸𑀦𑀁 𑀯𑀲𑁂𑀦 𑀅𑀢𑁆𑀣𑀲𑀢𑀁 𑀤𑀝𑁆𑀞𑀩𑁆𑀩𑀁. 𑀓𑀣𑀁? 𑀓𑀺𑀜𑁆𑀘𑀸𑀧𑀺 𑀧𑀭𑀺𑀯𑀸𑀭𑁂 ‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀽’’𑀢𑀺𑀆𑀤𑀺𑀦𑀸 𑀲𑀗𑁆𑀔𑀮𑀺𑀓𑀦𑀬𑁂 𑀔𑀡𑁆𑀟𑀘𑀓𑁆𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑁂𑀦𑁂𑀯 𑀦𑀬𑁂𑀦 𑀩𑀤𑁆𑀥𑀘𑀓𑁆𑀓𑀲𑁆𑀲𑀧𑀺 𑀦𑀬𑁄 𑀤𑀺𑀦𑁆𑀦𑁄, 𑀢𑀲𑁆𑀫𑀸 ‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀽’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀗𑁆𑀖𑀲𑀼𑀝𑁆𑀞𑀽’’𑀢𑀺 𑀬𑁄𑀚𑁂𑀢𑁆𑀯𑀸 𑀩𑀤𑁆𑀥𑀘𑀓𑁆𑀓𑀁 𑀓𑀸𑀢𑀩𑁆𑀩𑀁. 𑀏𑀯𑀁 ‘‘𑀬𑀁 𑀲𑀗𑁆𑀖𑀨𑀸𑀲𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸𑀧𑀺 ‘‘𑀬𑀁 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬, 𑀢𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀽’’𑀢𑀺 𑀬𑁄𑀚𑁂𑀢𑁆𑀯𑀸 𑀩𑀤𑁆𑀥𑀘𑀓𑁆𑀓𑀁 𑀓𑀸𑀢𑀩𑁆𑀩𑀁. 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀬𑁄𑀚𑀺𑀢𑁂𑀲𑀼 𑀲𑀗𑁆𑀔𑀮𑀺𑀓𑀦𑀬𑁂𑀦 𑀤𑀲 𑀩𑀤𑁆𑀥𑀘𑀓𑁆𑀓𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀓𑁆𑀓𑁂 𑀧𑀼𑀭𑀺𑀫𑀧𑀼𑀭𑀺𑀫𑀧𑀤𑀸𑀦𑀁 𑀯𑀲𑁂𑀦 𑀤𑀲 𑀤𑀲 𑀥𑀫𑁆𑀫𑀸, 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀁 𑀯𑀲𑁂𑀦 𑀤𑀲 𑀤𑀲 𑀅𑀢𑁆𑀣𑀸𑀢𑀺 𑀲𑀗𑁆𑀔𑀮𑀺𑀓𑀦𑀬𑁂 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀲𑀫𑁆𑀧𑀚𑁆𑀚𑀢𑀺. 𑀏𑀓𑀫𑀽𑀮𑀓𑀦𑀬𑁂 𑀧𑀦 ‘‘𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼, 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀏𑀓𑀫𑁂𑀯 𑀧𑀤𑀁 𑀲𑁂𑀲𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀬𑁄𑀚𑀺𑀢𑀦𑁆𑀢𑀺 𑀧𑀼𑀭𑀺𑀫𑀧𑀤𑀲𑁆𑀲 ¶ 𑀏𑀓𑀢𑁆𑀢𑀸 𑀏𑀓𑀫𑁂𑀯 𑀥𑀫𑁆𑀫𑀧𑀤𑀁 𑀦𑀯𑁂𑀯 𑀅𑀢𑁆𑀣𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀫𑀽𑀮𑀓𑀦𑀬𑁂 𑀤𑀲𑀲𑀼 𑀧𑀤𑁂𑀲𑀼 𑀏𑀓𑀫𑁂𑀓𑀁 𑀫𑀽𑀮𑀁 𑀓𑀢𑁆𑀯𑀸 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀸𑀬 𑀓𑀢𑀸𑀬 𑀥𑀫𑁆𑀫𑀧𑀤𑀸𑀦𑀁 𑀯𑀲𑁂𑀦 𑀥𑀫𑁆𑀫𑀧𑀤𑀸𑀦𑀺 𑀤𑀲, 𑀅𑀢𑁆𑀣𑀧𑀤𑀸𑀦𑀺 𑀦𑀯𑀼𑀢𑀻𑀢𑀺 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀓𑀫𑀽𑀮𑀓𑀦𑀬𑁂 𑀲𑀗𑁆𑀔𑀮𑀺𑀓𑀦𑀬𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 𑀬𑀁 𑀢𑀢𑁆𑀣 𑀤𑀲𑀥𑀫𑁆𑀫𑀧𑀤𑀸𑀦𑀁 𑀦𑀯𑀼𑀢𑀺𑀅𑀢𑁆𑀣𑀧𑀤𑀸𑀦𑀜𑁆𑀘 𑀯𑀲𑁂𑀦 𑀧𑀤𑀲𑀢𑀁 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀥𑀫𑁆𑀫𑀲𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀤𑀢𑁆𑀣𑀚𑁄𑀢𑀦𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀺 𑀲𑀗𑁆𑀖𑀲𑀼𑀝𑁆𑀞𑀼𑀪𑀸𑀯𑀸𑀤𑀻𑀦𑀺 𑀅𑀢𑁆𑀣𑀧𑀤𑀸𑀦𑀺 𑀅𑀢𑁆𑀣𑀲𑀢𑀦𑁆𑀢𑀺 𑀏𑀯𑀁 𑀕𑀳𑀺𑀢𑁂 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀲𑀫𑁆𑀧𑀚𑁆𑀚𑀢𑀺. 𑀏𑀯𑀁 𑀢𑀸𑀯 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑁂 𑀘 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀣𑀚𑁄𑀢𑀺𑀓𑀸𑀦𑀁 𑀦𑀺𑀭𑀼𑀢𑁆𑀢𑀻𑀦𑀁 𑀯𑀲𑁂𑀦 𑀦𑀺𑀭𑀼𑀢𑁆𑀢𑀺𑀲𑀢𑀁, 𑀥𑀫𑁆𑀫𑀪𑀽𑀢𑀸𑀦𑀁 𑀦𑀺𑀭𑀼𑀢𑁆𑀢𑀻𑀦𑀁 𑀯𑀲𑁂𑀦 𑀦𑀺𑀭𑀼𑀢𑁆𑀢𑀺𑀲𑀢𑀦𑁆𑀢𑀺 𑀤𑁆𑀯𑁂 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀻𑀢𑀺 𑀅𑀢𑁆𑀣𑀲𑀢𑁂 𑀜𑀸𑀡𑀲𑀢𑀁, 𑀥𑀫𑁆𑀫𑀲𑀢𑁂 𑀜𑀸𑀡𑀲𑀢𑀁, 𑀤𑁆𑀯𑀻𑀲𑀼 𑀦𑀺𑀭𑀼𑀢𑁆𑀢𑀺𑀲𑀢𑁂𑀲𑀼 𑀤𑁆𑀯𑁂 𑀜𑀸𑀡𑀲𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀺.

𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀪𑀺𑀦𑁆𑀦𑀓𑁆𑀓𑀫𑁂𑀦 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑀘𑀸’’𑀢𑀺. 𑀓𑀣𑀁 𑀧𑀦𑁂𑀢𑁆𑀣 ‘‘𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀭𑀺𑀬𑀸𑀧𑀼𑀡𑁂𑀬𑁆𑀬𑀸𑀣𑀸𑀢𑀺𑀆𑀤𑀺 𑀅𑀢𑁆𑀣𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀸𑀦𑀬𑀦𑀢𑁆𑀣𑁄 𑀳𑀺 𑀏𑀢𑁆𑀣 𑀘-𑀲𑀤𑁆𑀤𑁄’’𑀢𑀺. 𑀯𑀼𑀢𑁆𑀢𑀢𑁆𑀣𑀢𑁄 𑀅𑀢𑀺𑀭𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀆𑀦𑀬𑀦𑀁 𑀅𑀢𑀺𑀭𑁂𑀓𑀸𑀦𑀬𑀦𑀁, 𑀲𑁄 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀅𑀢𑀺𑀭𑁂𑀓𑀸𑀦𑀬𑀦𑀢𑁆𑀣𑁄, 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑀁𑀯𑀸𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀤𑀴𑁆𑀳𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀓𑁆𑀓𑀝𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦. 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀢𑀺 𑀉𑀢𑁆𑀢𑀸𑀦𑀁 𑀯𑀼𑀘𑁆𑀘𑀢𑀺 𑀧𑀸𑀓𑀝𑀁, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀦𑀼𑀢𑁆𑀢𑀸𑀦𑀁 𑀅𑀧𑀸𑀓𑀝𑀁 𑀅𑀧𑁆𑀧𑀘𑀼𑀭𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀘, 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀁 𑀯𑀡𑁆𑀡𑀦𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀉𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀸𑀦𑀕𑁆𑀕𑀳𑀡𑀁. 𑀧𑀘𑀼𑀭𑀧𑀝𑀺𑀲𑁂𑀯𑀦𑁄 𑀳𑁄𑀢𑀻𑀢𑀺 𑀩𑀳𑀼𑀮𑀧𑀝𑀺𑀲𑁂𑀯𑀦𑁄 𑀳𑁄𑀢𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀦𑀺𑀭𑀦𑁆𑀢𑀭𑀁 𑀧𑀝𑀺𑀲𑁂𑀯𑀢𑀻𑀢𑀺 𑀅𑀢𑁆𑀣𑁄. 𑀧𑀘𑀼𑀭𑀢𑁆𑀣𑁂 𑀳𑀺 𑀯𑀢𑁆𑀢𑀫𑀸𑀦𑀯𑀘𑀦𑀦𑁆𑀢𑀺 𑀲𑀩𑁆𑀩𑀤𑀸 𑀧𑀝𑀺𑀲𑁂𑀯𑀦𑀸𑀪𑀸𑀯𑁂𑀧𑀺 ‘‘𑀇𑀳 ¶ 𑀫𑀮𑁆𑀮𑀸 𑀬𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀁 𑀉𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀆𑀳𑀺𑀡𑁆𑀟𑀦𑁆𑀢𑀸𑀢𑀺 𑀯𑀺𑀘𑀭𑀦𑁆𑀢𑀸. 𑀅𑀜𑁆𑀜𑁂𑀲𑀼𑀧𑀻𑀢𑀺 𑀅𑀜𑁆𑀜𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼.

𑁪𑁧. 𑀲𑀳𑁄𑀟𑁆𑀠𑀕𑁆𑀕𑀳𑀺𑀢𑁄𑀢𑀺 𑀲𑀳 𑀪𑀡𑁆𑀟𑁂𑀦 𑀕𑀳𑀺𑀢𑁄. 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑁂𑀦 𑀮𑁂𑀲𑀑𑀟𑁆𑀟𑀦𑁂𑀦 𑀯𑀸 𑀧𑀭𑀺𑀧𑀼𑀡𑁆𑀡𑀢𑁆𑀣𑀫𑁆𑀧𑀺 𑀧𑀞𑀫𑀧𑀜𑁆𑀜𑀢𑁆𑀢𑀺𑀁 𑀅𑀜𑁆𑀜𑀣𑀸 𑀓𑀭𑁄𑀦𑁆𑀢𑁄 ‘‘𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 𑀆𑀳. 𑀤𑀲𑁆𑀲𑀦𑀦𑁆𑀢𑀺 𑀲𑀸𑀦𑀼𑀭𑀸𑀕𑀤𑀲𑁆𑀲𑀦𑀁. 𑀕𑀳𑀡𑀦𑁆𑀢𑀺 𑀅𑀦𑀼𑀭𑀸𑀕𑀯𑀲𑁂𑀦𑁂𑀯 𑀳𑀢𑁆𑀣𑁂𑀦 𑀕𑀳𑀡𑀁. 𑀆𑀫𑀲𑀦𑀁 𑀅𑀢𑁆𑀢𑀦𑁄 𑀲𑀭𑀻𑀭𑁂𑀦 𑀢𑀲𑁆𑀲𑀸 𑀲𑀭𑀻𑀭𑀲𑁆𑀲 𑀉𑀧𑀭𑀺 𑀆𑀫𑀲𑀦𑀫𑀢𑁆𑀢𑀁, 𑀨𑀼𑀲𑀦𑀁 𑀢𑀢𑁄 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀲𑀁𑀨𑀼𑀲𑀦𑀁, 𑀖𑀝𑁆𑀝𑀦𑀁 𑀢𑀢𑁄𑀧𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀲𑀭𑀻𑀭𑁂𑀦 𑀲𑀭𑀻𑀭𑀲𑁆𑀲 𑀖𑀝𑁆𑀝𑀦𑀁. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀤𑀲𑁆𑀲𑀦𑀸𑀤𑀺 𑀲𑀩𑁆𑀩𑀫𑁆𑀧𑀺.

𑁪𑁨. 𑀤𑀴𑁆𑀳𑀢𑀭𑀁 𑀲𑀺𑀓𑁆𑀔𑀸𑀧𑀤𑀫𑀓𑀸𑀲𑀻𑀢𑀺 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀤𑀴𑁆𑀳𑀻𑀓𑀭𑀡𑀁 𑀲𑀺𑀣𑀺𑀮𑀓𑀭𑀡𑀜𑁆𑀘 𑀧𑀲𑀗𑁆𑀕𑀢𑁄 𑀆𑀧𑀦𑁆𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀤𑀼𑀯𑀺𑀥𑀜𑁆𑀳𑀺 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀲 𑀲𑀘𑀺𑀢𑁆𑀢𑀓𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁. 𑀬𑀲𑁆𑀲 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀧𑀓𑁆𑀔𑀲𑀳𑀺𑀢𑀲𑁆𑀲 𑀅𑀘𑀺𑀢𑁆𑀢𑀓𑀲𑁆𑀲 𑀘 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 ¶ 𑀳𑁄𑀢𑀺, 𑀢𑀫𑁆𑀧𑀺 𑀲𑀼𑀭𑀸𑀧𑀸𑀦𑀸𑀤𑀺 𑀮𑁄𑀓𑀯𑀚𑁆𑀚𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀅𑀘𑀺𑀢𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀏𑀓𑀁𑀲𑀢𑁄 𑀲𑀘𑀺𑀢𑁆𑀢𑀓𑀲𑁆𑀲 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀘 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦. 𑀬𑀤𑀺 𑀳𑀺 ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦𑀧𑀺 𑀬𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯, 𑀢𑀫𑁆𑀧𑀺 𑀮𑁄𑀓𑀯𑀚𑁆𑀚𑀦𑁆𑀢𑀺 𑀯𑀤𑁂𑀬𑁆𑀬, 𑀲𑀩𑁆𑀩𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀫𑁆𑀧𑀺 𑀮𑁄𑀓𑀯𑀚𑁆𑀚𑀢𑀸 𑀆𑀧𑀚𑁆𑀚𑁂𑀬𑁆𑀬 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑀫𑁆𑀧𑀺 ‘‘𑀦 𑀯𑀝𑁆𑀝𑀢𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁂 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲𑁂𑀯 𑀲𑀫𑁆𑀪𑀯𑀢𑁄. 𑀦 𑀳𑀺 𑀪𑀕𑀯𑀢𑁄 𑀆𑀡𑀁 𑀚𑀸𑀦𑀺𑀢𑁆𑀯𑀸 𑀫𑀤𑁆𑀤𑀦𑁆𑀢𑀲𑁆𑀲 𑀓𑀼𑀲𑀮𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀦𑀸𑀤𑀭𑀺𑀬𑀯𑀲𑁂𑀦 𑀧𑀝𑀺𑀖𑀘𑀺𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄.

𑀅𑀧𑀺𑀘𑁂𑀢𑁆𑀣 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸’’𑀢𑀺 𑀯𑀘𑀦𑀢𑁄 𑀅𑀘𑀺𑀢𑁆𑀢𑀓𑀲𑁆𑀲 𑀯𑀢𑁆𑀣𑀼𑀅𑀚𑀸𑀦𑀦𑀯𑀲𑁂𑀦 𑀅𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀅𑀘𑀺𑀢𑁆𑀢𑀓𑀲𑁆𑀲 𑀅𑀘𑀺𑀢𑁆𑀢𑀓𑀧𑀓𑁆𑀔𑁂𑀧𑀺 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀲𑀺𑀬𑀸, ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀇𑀤𑀁 𑀯𑀺𑀲𑁂𑀲𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀲𑀼𑀭𑀸𑀢𑀺 𑀅𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁆𑀢𑀲𑁆𑀲 𑀕𑀦𑁆𑀥𑀯𑀡𑁆𑀡𑀓𑀸𑀤𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀢𑀸𑀦𑀺 𑀮𑀺𑀫𑁆𑀧𑀦𑁆𑀢𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 ¶ 𑀯𑀺𑀦𑀸𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀏𑀓𑀦𑁆𑀢𑀸𑀓𑀼𑀲𑀮𑀁 𑀲𑀘𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀁 𑀞𑀧𑁂𑀢𑁆𑀯𑀸 𑀲𑀼𑀭𑀸𑀧𑀸𑀦𑀸𑀤𑀺𑀅𑀘𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀸𑀦𑀁 𑀮𑁄𑀓𑀯𑀚𑁆𑀚𑀢𑀸 𑀦 𑀲𑀺𑀬𑀸𑀢𑀺 𑀢𑁂𑀲𑀫𑁆𑀧𑀺 𑀲𑀗𑁆𑀕𑀡𑁆𑀳𑀢𑁆𑀣𑀁 ‘‘𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀘𑀽𑀴𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁 ‘‘𑀏𑀢𑀁 𑀲𑀢𑁆𑀢𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀦𑀺𑀧𑀦𑁆𑀦𑀁 𑀅𑀜𑁆𑀜𑀁 𑀫𑀸𑀭𑁂𑀦𑁆𑀢𑀲𑁆𑀲 𑀧𑀸𑀡𑀲𑀸𑀫𑀜𑁆𑀜𑀲𑁆𑀲 𑀅𑀢𑁆𑀣𑀺𑀢𑀸𑀬 𑀬𑀣𑀸 𑀧𑀸𑀡𑀸𑀢𑀺𑀧𑀸𑀢𑁄 𑀳𑁄𑀢𑀺, 𑀏𑀯𑀁 𑀏𑀢𑀁 𑀫𑀚𑁆𑀚𑀁 𑀧𑀺𑀯𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀁 𑀫𑀚𑁆𑀚𑀁 𑀧𑀺𑀯𑀦𑁆𑀢𑀲𑁆𑀲 𑀫𑀚𑁆𑀚𑀲𑀸𑀫𑀜𑁆𑀜𑀲𑁆𑀲 𑀅𑀢𑁆𑀣𑀺𑀢𑀸𑀬 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺. 𑀬𑀣𑀸 𑀧𑀦 𑀓𑀝𑁆𑀞𑀲𑀜𑁆𑀜𑀸𑀬 𑀲𑀧𑁆𑀧𑀁 𑀖𑀸𑀢𑁂𑀦𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀦 𑀳𑁄𑀢𑀺, 𑀏𑀯𑀁 𑀦𑀸𑀴𑀺𑀓𑁂𑀭𑀧𑀸𑀦𑀲𑀜𑁆𑀜𑀸𑀬 𑀫𑀚𑁆𑀚𑀁 𑀧𑀺𑀯𑀦𑁆𑀢𑀲𑁆𑀲 𑀅𑀓𑀼𑀲𑀮𑀁 𑀦 𑀳𑁄𑀢𑀻’’𑀢𑀺.

𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀲𑀸𑀫𑀡𑁂𑀭𑀲𑁆𑀲 𑀲𑀼𑀭𑀸𑀢𑀺 𑀅𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑁄 𑀦𑀢𑁆𑀣𑀺, 𑀅𑀓𑀼𑀲𑀮𑀁 𑀧𑀦 𑀳𑁄𑀢𑀻’’𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. ‘‘𑀪𑀺𑀓𑁆𑀔𑀼𑀦𑁄 𑀅𑀚𑀸𑀦𑀺𑀢𑁆𑀯𑀸𑀧𑀺 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀧𑀺𑀯𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀸𑀫𑀡𑁂𑀭𑁄 𑀚𑀸𑀦𑀺𑀢𑁆𑀯𑀸 ¶ 𑀧𑀺𑀯𑀦𑁆𑀢𑁄 𑀲𑀻𑀮𑀪𑁂𑀤𑀁 𑀆𑀧𑀚𑁆𑀚𑀢𑀺, 𑀦 𑀅𑀚𑀸𑀦𑀺𑀢𑁆𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, ‘‘𑀅𑀓𑀼𑀲𑀮𑀁 𑀧𑀦 𑀳𑁄𑀢𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺. 𑀅𑀧𑀭𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀅𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁆𑀢𑀲𑁆𑀲𑀧𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀼𑀔𑀁 𑀲𑀼𑀭𑀸 𑀦 𑀧𑀯𑀺𑀲𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀧𑀸𑀢𑀩𑁆𑀩𑀢𑁄’’𑀢𑀺, 𑀢𑀫𑁆𑀧𑀺 𑀦 𑀲𑀼𑀦𑁆𑀤𑀭𑀁. 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀲𑀻𑀮𑀁 𑀯𑀺𑀬 𑀳𑀺 𑀇𑀤𑀫𑁆𑀧𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑁂 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁫𑁨) 𑀯𑀼𑀢𑁆𑀢𑀁 𑁋

‘‘𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀲𑀼𑀭𑀁 𑀧𑀺𑀯𑀢𑀺. 𑀲𑀘𑁂𑀧𑀺𑀲𑁆𑀲 𑀲𑀼𑀭𑀜𑁆𑀘 𑀔𑀻𑀭𑀜𑁆𑀘 𑀫𑀺𑀲𑁆𑀲𑁂𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀔𑀻𑀭𑀫𑁂𑀯 𑀧𑀯𑀺𑀲𑀢𑀺, 𑀦 𑀲𑀼𑀭𑀸. 𑀬𑀣𑀸 𑀓𑀺𑀁? 𑀬𑀣𑀸 𑀓𑁄𑀜𑁆𑀘𑀲𑀓𑀼𑀡𑀸𑀦𑀁 𑀔𑀻𑀭𑀫𑀺𑀲𑁆𑀲𑀓𑁂 𑀉𑀤𑀓𑁂 𑀔𑀻𑀭𑀫𑁂𑀯 𑀧𑀯𑀺𑀲𑀢𑀺, 𑀦 𑀉𑀤𑀓𑀁. 𑀇𑀤𑀁 𑀬𑁄𑀦𑀺𑀲𑀺𑀤𑁆𑀥𑀦𑁆𑀢𑀺 𑀘𑁂? 𑀇𑀤𑀫𑁆𑀧𑀺 𑀥𑀫𑁆𑀫𑀢𑀸𑀲𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀬𑀤𑀺 𑀏𑀯𑀁 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁩𑁨𑁯) ‘‘𑀯𑀢𑁆𑀣𑀼𑀅𑀚𑀸𑀦𑀦𑀢𑀸𑀬 𑀘𑁂𑀢𑁆𑀣 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬 𑀮𑁄𑀓𑀯𑀚𑁆𑀚𑀢𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀸𑀬𑀁 𑀤𑁄𑀲𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬 𑀮𑁄𑀓𑀯𑀚𑁆𑀚𑀢𑀸𑀢𑀺. 𑀇𑀫𑀺𑀦𑀸𑀬𑁂𑀯 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀜𑁆𑀜𑁂𑀲𑀼𑀧𑀺 𑀮𑁄𑀓𑀯𑀚𑁆𑀚𑁂𑀲𑀼 𑀅𑀘𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀢𑀸𑀬𑁂𑀯 𑀯𑀼𑀢𑁆𑀢𑀸, 𑀦 𑀧𑀦 𑀲𑀘𑀺𑀢𑁆𑀢𑀓𑀢𑀸. 𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁧𑁨𑁨𑁭) 𑀯𑀼𑀢𑁆𑀢𑀁 𑁋

‘‘𑀕𑀺𑀭𑀕𑁆𑀕𑀲𑀫𑀚𑁆𑀚𑀁 ¶ 𑀘𑀺𑀢𑁆𑀢𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀁 𑀲𑀗𑁆𑀖𑀸𑀡𑀺 𑀇𑀢𑁆𑀣𑀸𑀮𑀗𑁆𑀓𑀸𑀭𑁄 𑀕𑀦𑁆𑀥𑀓𑀯𑀡𑁆𑀡𑀓𑁄 𑀯𑀸𑀲𑀺𑀢𑀓𑀧𑀺𑀜𑁆𑀜𑀸𑀓𑁄 𑀪𑀺𑀓𑁆𑀔𑀼𑀦𑀻𑀆𑀤𑀻𑀳𑀺 𑀉𑀫𑁆𑀫𑀤𑁆𑀤𑀦𑀧𑀭𑀺𑀫𑀤𑁆𑀤𑀦𑀸𑀢𑀺 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀘𑀺𑀢𑁆𑀢𑀓𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀻’’𑀢𑀺,

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀅𑀘𑀺𑀢𑁆𑀢𑀓𑀸𑀦𑀺, 𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀅𑀓𑀼𑀲𑀮𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀮𑁄𑀓𑀯𑀚𑁆𑀚𑀸𑀦𑀺 𑀘𑁂𑀯 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘𑀸𑀢𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀆𑀕𑀢𑀸𑀦𑀺 𑀲𑀼𑀭𑀸𑀧𑀸𑀦𑀉𑀬𑁆𑀬𑀼𑀢𑁆𑀢𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑀻𑀡𑀺, 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀆𑀕𑀢𑀸𑀦𑀺 𑀕𑀺𑀭𑀕𑁆𑀕𑀲𑀫𑀚𑁆𑀚𑀸𑀤𑀻𑀦𑀺 𑀤𑀲𑀸𑀢𑀺 𑀇𑀫𑁂𑀲𑀁 𑀢𑁂𑀭𑀲𑀦𑁆𑀦𑀁 𑀅𑀘𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀸𑀦𑀁 𑀮𑁄𑀓𑀯𑀚𑁆𑀚𑀢𑀸𑀤𑀲𑁆𑀲𑀦𑀢𑁆𑀣𑀁 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀇𑀤𑀁 𑀯𑀺𑀲𑁂𑀲𑀦𑀁 𑀓𑀢𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀬𑀲𑁆𑀫𑀸 ¶ 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀲𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀯𑀼𑀢𑁆𑀢𑀁.

𑀭𑀼𑀦𑁆𑀥𑀦𑁆𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑀁 𑀭𑀼𑀦𑁆𑀥𑀦𑁆𑀢𑀻. 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑀮𑁂𑀲𑀲𑁆𑀲 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻. 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸𑀢𑀺 𑀉𑀧𑀭𑀽𑀧𑀭𑀺 𑀯𑀻𑀢𑀺𑀓𑁆𑀓𑀫𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸. 𑀅𑀣 𑀯𑀸 𑀭𑀼𑀦𑁆𑀥𑀦𑁆𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀮𑁂𑀲𑀁 𑀭𑀼𑀦𑁆𑀥𑀦𑁆𑀢𑀻. 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀮𑁂𑀲𑀲𑁆𑀲 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻. 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸𑀢𑀺 𑀅𑀦𑀸𑀧𑀢𑁆𑀢𑀺𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸, 𑀆𑀧𑀢𑁆𑀢𑀺𑀫𑁂𑀯 𑀓𑀼𑀭𑀼𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀦𑀼 𑀘 𑀮𑁄𑀓𑀯𑀚𑁆𑀚𑁂 𑀓𑀸𑀘𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀮𑁄𑀓𑀯𑀚𑁆𑀚𑁂 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸…𑀧𑁂… 𑀕𑀸𑀴𑁆𑀳𑀢𑀭𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺𑀆𑀤𑀺. ‘‘𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 ‘‘𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀇𑀫𑀺𑀲𑁆𑀲𑀸 ‘‘𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸𑀢𑀺 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄𑀢𑀺𑀆𑀤𑀺𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀳𑀺 ‘‘𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 (𑀫𑀳𑀸𑀯. 𑁧𑁨𑁯) 𑀯𑀘𑀦𑀢𑁄 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀫𑀼𑀲𑀸 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀅𑀬𑀁 𑀧𑀦 𑀅𑀥𑀺𑀫𑀸𑀦𑁂𑀦 𑀅𑀥𑀺𑀕𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀉𑀮𑁆𑀮𑀧𑀢𑀺, 𑀦 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄, 𑀢𑀲𑁆𑀫𑀸 ‘‘𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸’’𑀢𑀺 𑀅𑀬𑀁 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 𑀅𑀦𑀸𑀧𑀢𑁆𑀢𑀺𑀓𑀭𑀸 𑀚𑀸𑀢𑀸. 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸𑀢𑀺 𑀲𑀼𑀧𑀺𑀦𑀦𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀘𑁂𑀢𑀦𑀸𑀬 𑀯𑀻𑀢𑀺𑀓𑁆𑀓𑀫𑀺𑀘𑁆𑀙𑀸𑀬 𑀘 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀼𑀧𑀺𑀦𑀦𑁆𑀢𑁂 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸 𑀲𑀁𑀯𑀺𑀚𑁆𑀚𑀢𑀺, 𑀓𑀤𑀸𑀘𑀺 𑀉𑀧𑀓𑁆𑀓𑀫𑀦𑀫𑁆𑀧𑀺 𑀳𑁄𑀢𑀺, 𑀢𑀣𑀸𑀧𑀺 𑀣𑀺𑀦𑀫𑀺𑀤𑁆𑀥𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀢𑀁 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀘𑀺𑀢𑁆𑀢𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀉𑀧𑀓𑁆𑀓𑀫𑀓𑀺𑀭𑀺𑀬𑀸𑀲𑀁𑀯𑀢𑁆𑀢𑀦𑀺𑀓𑀸𑀧𑀺 𑀘𑁂𑀢𑀦𑀸 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀢𑁂𑀦𑁂𑀯 ¶ ‘‘𑀅𑀢𑁆𑀣𑁂𑀲𑀸 𑀪𑀺𑀓𑁆𑀔𑀯𑁂 𑀘𑁂𑀢𑀦𑀸, 𑀲𑀸 𑀘 𑀔𑁄 𑀅𑀩𑁆𑀩𑁄𑀳𑀸𑀭𑀺𑀓𑀸’’𑀢𑀺 (𑀧𑀸𑀭𑀸. 𑁨𑁩𑁫) 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀅𑀬𑀁 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀓𑀭𑀸 𑀚𑀸𑀢𑀸.

𑀅𑀓𑀢𑁂 𑀯𑀻𑀢𑀺𑀓𑁆𑀓𑀫𑁂𑀢𑀺 ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀪𑀼𑀜𑁆𑀚𑀺𑀁𑀲𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀻𑀢𑀺𑀓𑁆𑀓𑀫𑁂 𑀅𑀓𑀢𑁂. 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀻𑀢𑀺 𑀧𑀞𑀫𑀁 𑀲𑀸𑀫𑀜𑁆𑀜𑀢𑁄 𑀩𑀤𑁆𑀥𑀲𑀺𑀓𑁆𑀔𑀸𑀧𑀤𑀁 𑀫𑁄𑀘𑁂𑀢𑁆𑀯𑀸 ¶ 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀅𑀦𑀸𑀧𑀢𑁆𑀢𑀺𑀓𑀭𑀡𑀯𑀲𑁂𑀦 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀻. 𑀤𑁆𑀯𑀸𑀭𑀁 𑀤𑀤𑀫𑀸𑀦𑀸𑀢𑀺 𑀅𑀦𑀸𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀁 𑀤𑀤𑀫𑀸𑀦𑀸. 𑀢𑁂𑀦𑁂𑀯𑀸𑀳 ‘‘𑀅𑀧𑀭𑀸𑀧𑀭𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑀸’’𑀢𑀺. 𑀦𑀦𑀼 𑀘 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂 ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀆𑀧𑀢𑁆𑀢𑀺𑀫𑁂𑀯 𑀓𑀭𑁄𑀦𑁆𑀢𑀻 𑀉𑀧𑁆𑀧𑀦𑁆𑀦𑀸, 𑀅𑀣 𑀓𑀲𑁆𑀫𑀸 ‘‘𑀅𑀦𑀸𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺𑀆𑀤𑀺. 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀢𑀗𑁆𑀔𑀡𑀺𑀓𑀸𑀬 𑀲𑀜𑁆𑀘𑀭𑀺𑀢𑁆𑀢𑀁 𑀆𑀧𑀦𑁆𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀓𑀢𑁂 𑀯𑀻𑀢𑀺𑀓𑁆𑀓𑀫𑁂’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀢𑁆𑀢𑀺𑀕𑀢𑀺𑀓𑀸𑀯 𑀳𑁄𑀢𑀻𑀢𑀺 𑀫𑀽𑀮𑀧𑀜𑁆𑀜𑀢𑁆𑀢𑀺𑀬𑀁𑀬𑁂𑀯 𑀅𑀦𑁆𑀢𑁄𑀕𑀥𑀸 𑀳𑁄𑀢𑀺.

𑀫𑀓𑁆𑀓𑀝𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀪𑀸𑀡𑀯𑀸𑀭𑁄

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁩. 𑀯𑁂𑀲𑀸𑀮𑀻 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀯𑁂𑀲𑀸𑀮𑀺𑀓𑀸𑀢𑀺 𑀆𑀳 ‘‘𑀯𑁂𑀲𑀸𑀮𑀺𑀯𑀸𑀲𑀺𑀦𑁄’’𑀢𑀺. 𑀯𑀚𑁆𑀚𑀻𑀲𑀼 𑀚𑀦𑀧𑀤𑁂 𑀯𑀲𑀦𑁆𑀢𑀸 𑀯𑀚𑁆𑀚𑀺𑀦𑁄, 𑀯𑀚𑁆𑀚𑀻𑀦𑀁 𑀧𑀼𑀢𑁆𑀢𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀢𑀺 𑀆𑀳 ‘‘𑀯𑀚𑁆𑀚𑀺𑀭𑀝𑁆𑀞𑁂 𑀯𑁂𑀲𑀸𑀮𑀺𑀬𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸’’𑀢𑀺. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀦𑁆𑀢𑀺 𑀜𑀸𑀢𑀻𑀦𑀁 𑀯𑀺𑀦𑀸𑀲𑁄. 𑀲𑁄 𑀧𑀦 𑀜𑀸𑀢𑀻𑀦𑀁 𑀯𑀺𑀦𑀸𑀲𑁄 𑀭𑀸𑀚𑀤𑀡𑁆𑀟𑀸𑀤𑀺𑀓𑀸𑀭𑀡𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀭𑀸𑀚𑀤𑀡𑁆𑀟𑀩𑁆𑀬𑀸𑀥𑀺𑀫𑀭𑀡𑀯𑀺𑀧𑁆𑀧𑀯𑀸𑀲𑀦𑀺𑀫𑀺𑀢𑁆𑀢𑁂𑀦𑀸’’𑀢𑀺. 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀯𑀺𑀦𑀸𑀲𑁄 𑀪𑁄𑀕𑀩𑁆𑀬𑀲𑀦𑀁. 𑀢𑀜𑁆𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀤𑀸𑀲𑀺𑀤𑀸𑀲𑀸𑀤𑀻𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀽𑀦𑀁 𑀭𑀸𑀚𑀤𑀡𑁆𑀟𑀸𑀤𑀺𑀦𑀸 𑀯𑀺𑀦𑀸𑀲𑁄𑀢𑀺 𑀆𑀳 ‘‘𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀻’’𑀢𑀺. 𑀦 𑀩𑀼𑀤𑁆𑀥𑀁 𑀕𑀭𑀳𑀸𑀫𑀸𑀢𑀺 ‘‘𑀅𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀁 𑀦 𑀕𑀭𑀳𑀸𑀫. 𑀦 𑀥𑀫𑁆𑀫𑀕𑀭𑀳𑀺𑀦𑁄𑀢𑀺 ‘‘𑀅𑀦𑀺𑀬𑁆𑀬𑀸𑀦𑀺𑀓𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀁 𑀦 𑀕𑀭𑀳𑀸𑀫. 𑀦 𑀲𑀗𑁆𑀖𑀕𑀭𑀳𑀺𑀦𑁄𑀢𑀺 ‘‘𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀁 𑀦 𑀕𑀭𑀳𑀸𑀫. 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀽𑀢𑀺 𑀤𑀲 𑀓𑀲𑀺𑀡𑀸 𑀤𑀲 𑀅𑀲𑀼𑀪𑀸 𑀤𑀲𑀸𑀦𑀼𑀲𑁆𑀲𑀢𑀺𑀬𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀇𑀫𑁂𑀲𑀼 𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸 𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑀤𑁆𑀯𑀬𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀪𑀢𑁆𑀢𑀸 𑀓𑀼𑀲𑀮𑀸 ¶ 𑀥𑀫𑁆𑀫𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀇𑀤𑀁 𑀳𑁄𑀢𑀻’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑀸 𑀉𑀧𑀘𑀸𑀭𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀧𑀞𑀫𑀚𑁆𑀛𑀸𑀦𑀸𑀤𑀬𑁄 𑀫𑀳𑀕𑁆𑀕𑀢𑀓𑀼𑀲𑀮𑀸 𑀥𑀫𑁆𑀫𑀸 ¶ . 𑀢𑁂𑀯 𑀥𑀫𑁆𑀫𑁂𑀢𑀺 𑀢𑁂 𑀏𑀯 𑀓𑀼𑀲𑀮𑁂 𑀥𑀫𑁆𑀫𑁂. 𑀫𑀚𑁆𑀛𑀺𑀫𑀬𑀸𑀫𑁄 𑀪𑀺𑀓𑁆𑀔𑀽𑀦𑀁 𑀦𑀺𑀤𑁆𑀤𑀸𑀓𑀺𑀮𑀫𑀣𑀯𑀺𑀦𑁄𑀤𑀦𑁄𑀓𑀸𑀲𑀢𑁆𑀢𑀸 𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀧𑀞𑀫𑀬𑀸𑀫𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑀜𑁆𑀘𑀸’’𑀢𑀺. 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀉𑀧𑀓𑀸𑀭𑀓𑀢𑁆𑀢𑁂𑀦 𑀢𑀲𑁆𑀲 𑀧𑀓𑁆𑀔𑁂 𑀪𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸𑀢𑀺 𑀆𑀳 ‘‘𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑀓𑀸𑀭𑀓𑀸𑀦’’𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. ‘‘𑀕𑀺𑀳𑀺𑀧𑀮𑀺𑀩𑁄𑀥𑀁 𑀆𑀯𑀸𑀲𑀧𑀮𑀺𑀩𑁄𑀥𑀜𑁆𑀘 𑀧𑀳𑀸𑀬𑀸’’𑀢𑀺 𑀇𑀫𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀧𑀮𑀺𑀩𑁄𑀥𑀸𑀦𑀁 𑀉𑀧𑀘𑁆𑀙𑁂𑀤𑀲𑁆𑀲 𑀲𑀼𑀤𑀼𑀓𑁆𑀓𑀭𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀬𑀼𑀢𑁆𑀢𑀧𑀬𑀼𑀢𑁆𑀢𑀸𑀢𑀺 𑀲𑀫𑁆𑀫𑀤𑁂𑀯 𑀬𑀼𑀢𑁆𑀢𑀸.

𑀆𑀲𑀬𑀦𑁆𑀢𑀺 𑀅𑀚𑁆𑀛𑀸𑀲𑀬𑀁. 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀧𑀝𑀺𑀲𑁂𑀯𑀺𑀢𑀫𑁂𑀣𑀼𑀦𑀸𑀦𑀁 𑀢𑁂𑀲𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 𑀪𑀕𑀯𑀸 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀏𑀯𑀁 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀲𑀫𑀽𑀳𑀦𑀢𑀺 𑀦𑀸𑀫𑀸𑀢𑀺 𑀆𑀳 𑁋 ‘‘𑀬𑀤𑀺 𑀳𑀺 𑀪𑀕𑀯𑀸…𑀧𑁂… 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺. ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀧𑀝𑀺𑀲𑁂𑀯𑀺𑀢𑀫𑁂𑀣𑀼𑀦𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 𑀦 𑀲𑀫𑀽𑀳𑀦𑀢𑀺 𑀦𑀸𑀫. 𑀦 𑀳𑀺 𑀲𑁄 𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀧𑀝𑀺𑀲𑁂𑀯𑀢𑀺. ‘‘𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀲𑀸𑀫𑀡𑁂𑀭𑀪𑀽𑀫𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀳 ‘‘𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀦 𑀞𑀺𑀢𑁄’’𑀢𑀺𑀆𑀤𑀺. 𑀉𑀢𑁆𑀢𑀫𑀢𑁆𑀣𑀦𑁆𑀢𑀺 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸.

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁪𑁫. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀲𑀸𑀲𑀦𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀢𑀣𑀸 𑀳𑀺 ‘‘𑀧𑀜𑁆𑀘𑀳𑀼𑀧𑀸𑀮𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁪𑁪𑁨) 𑀏𑀯𑀫𑀸𑀤𑀺𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, ‘‘𑀅𑀦𑀸𑀧𑀢𑁆𑀢𑀺 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄 𑀧𑀭𑀺𑀧𑀼𑀘𑁆𑀙𑀸𑀢𑀺 𑀕𑀡𑁆𑀳𑀸𑀢𑀻’’𑀢𑀺 𑀏𑀯𑀫𑀸𑀤𑀺𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀆𑀘𑀭𑀺𑀬𑀯𑀸𑀤𑀁 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁭𑁮) ‘‘𑀆𑀬𑀲𑁆𑀫𑀸 ¶ 𑀉𑀧𑀸𑀮𑀺 𑀏𑀯𑀫𑀸𑀳 𑀅𑀦𑀸𑀧𑀢𑁆𑀢𑀺 𑀆𑀯𑀼𑀲𑁄 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀢𑁄 𑀏𑀯 𑀅𑀢𑁆𑀢𑀦𑁄𑀫𑀢𑀺𑀁 𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁. 𑀢𑀸𑀬 𑀳𑀺 𑀅𑀢𑁆𑀢𑀦𑁄𑀫𑀢𑀺𑀬𑀸 𑀣𑁂𑀭𑁄 𑀏𑀢𑀤𑀕𑁆𑀕𑀝𑁆𑀞𑀸𑀦𑀁 𑀮𑀪𑀺.

𑀯𑀼𑀢𑁆𑀢𑀦𑁆𑀢𑀺 ¶ 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀧𑀚𑁆𑀚𑀢𑁂 𑀅𑀦𑁂𑀦 𑀅𑀢𑁆𑀣𑁄𑀢𑀺 𑀧𑀤𑀁, 𑀪𑀕𑀯𑀢𑀸 𑀓𑀡𑁆𑀞𑀸𑀤𑀺𑀯𑀡𑁆𑀡𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀆𑀳𑀘𑁆𑀘 𑀯𑀺𑀲𑁂𑀲𑁂𑀢𑁆𑀯𑀸 𑀪𑀸𑀲𑀺𑀢𑀁 𑀧𑀤𑀁 𑀆𑀳𑀘𑁆𑀘𑀧𑀤𑀁, 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁. 𑀢𑁂𑀦𑀸𑀳 ‘‘𑀆𑀳𑀘𑁆𑀘𑀧𑀤𑀦𑁆𑀢𑀺 𑀲𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. ‘‘𑀇𑀤𑀁 𑀓𑀧𑁆𑀧𑀢𑀺, 𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀏𑀯𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀜𑁆𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀇𑀥 ‘‘𑀭𑀲𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀭𑀲𑁄𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫’’𑀦𑁆𑀢𑀺. 𑀥𑀫𑁆𑀫𑀲𑀗𑁆𑀕𑀸𑀳𑀓𑀧𑁆𑀧𑀪𑀼𑀢𑀺𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄 𑀆𑀦𑀻𑀢𑀸 𑀅𑀝𑁆𑀞𑀓𑀣𑀸𑀢𑀦𑁆𑀢𑀺 𑀇𑀥 ‘‘𑀆𑀘𑀭𑀺𑀬𑀯𑀁𑀲𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀆𑀘𑀭𑀺𑀬𑀯𑀁𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄’’𑀢𑀺.

𑀇𑀥 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀥𑀺𑀓𑀢𑀢𑁆𑀢𑀸 𑀢𑀤𑀦𑀼𑀘𑁆𑀙𑀯𑀺𑀓𑀫𑁂𑀯 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀻’’𑀢𑀺. 𑀫𑀳𑀸𑀧𑀤𑁂𑀲𑀸𑀢𑀺 𑀫𑀳𑀸𑀑𑀓𑀸𑀲𑀸, 𑀫𑀳𑀦𑁆𑀢𑀸𑀦𑀺 𑀯𑀺𑀦𑀬𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀝𑁆𑀞𑀸𑀦𑀸𑀦𑀺 𑀬𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀢𑁄 𑀯𑀺𑀦𑀬𑁄 𑀯𑀺𑀦𑀺𑀘𑁆𑀙𑀬𑀢𑀺 𑀅𑀲𑀦𑁆𑀤𑁂𑀳𑀢𑁄. 𑀫𑀳𑀦𑁆𑀢𑀸𑀦𑀺 𑀯𑀸 𑀓𑀸𑀭𑀡𑀸𑀦𑀺 𑀫𑀳𑀸𑀧𑀤𑁂𑀲𑀸, 𑀫𑀳𑀦𑁆𑀢𑀸𑀦𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑁆𑀣𑀢𑁄 𑀧𑀦 ‘𑀬𑀁, 𑀪𑀺𑀓𑁆𑀔𑀯𑁂’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀲𑀸𑀥𑀺𑀧𑁆𑀧𑀸𑀬𑀸 𑀧𑀸𑀴𑀺𑀬𑁂𑀯 𑀫𑀳𑀸𑀧𑀤𑁂𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑁂 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑀸’’𑀢𑀺𑀆𑀤𑀺. 𑀇𑀫𑁂 𑀘 𑀫𑀳𑀸𑀧𑀤𑁂𑀲𑀸 𑀔𑀦𑁆𑀥𑀓𑁂 𑀆𑀕𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀇𑀥 𑀦 𑀯𑀼𑀘𑁆𑀘𑀢𑀺. 𑀬𑀤𑀺𑀧𑀺 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀸 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀯 𑀅𑀝𑁆𑀞𑀓𑀣𑀸, 𑀲𑀸 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀧𑀞𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦𑁂𑀯 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀢𑁆𑀢𑀸 ‘‘𑀆𑀘𑀭𑀺𑀬𑀯𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺 𑀲𑀁𑀯𑀡𑁆𑀡𑁂𑀦𑁆𑀢𑀺 𑀧𑀸𑀴𑀺𑀁 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀆𑀘𑀭𑀺𑀬𑀯𑀸𑀤𑁄 𑀦𑀸𑀫…𑀧𑁂… 𑀅𑀝𑁆𑀞𑀓𑀣𑀸𑀢𑀦𑁆𑀢𑀻’’𑀢𑀺. 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁄𑀬𑁂𑀯 𑀘 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀽𑀢𑁄 𑀓𑀣𑀸𑀫𑀕𑁆𑀕𑁄 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀪𑀢𑁄, 𑀧𑀘𑁆𑀙𑀸 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑁄 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁. 𑀓𑀺𑀜𑁆𑀘𑀸𑀧𑀺 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑀸𑀤𑀻𑀳𑀺 𑀲𑀁𑀲𑀦𑁆𑀤𑀺𑀢𑁆𑀯𑀸𑀯 𑀧𑀭𑀺𑀓𑀧𑁆𑀧𑀻𑀬𑀢𑀺, 𑀢𑀣𑀸𑀧𑀺 𑀲𑀸 𑀦 𑀲𑀼𑀢𑁆𑀢𑀸𑀤𑀻𑀲𑀼 𑀯𑀺𑀲𑁂𑀲𑀢𑁄 ¶ 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺. 𑀅𑀦𑀼𑀩𑀼𑀤𑁆𑀥𑀺𑀬𑀸𑀢𑀺 𑀲𑀼𑀢𑁆𑀢𑀸𑀤𑀻𑀦𑀺𑀬𑁂𑀯 𑀅𑀦𑀼𑀕𑀢𑀩𑀼𑀤𑁆𑀥𑀺𑀬𑀸. 𑀦𑀬𑀕𑁆𑀕𑀸𑀳𑁂𑀦𑀸𑀢𑀺 𑀲𑀼𑀢𑁆𑀢𑀸𑀤𑀺𑀢𑁄 𑀮𑀩𑁆𑀪𑀫𑀸𑀦𑀦𑀬𑀕𑁆𑀕𑀳𑀡𑁂𑀦.

𑀅𑀢𑁆𑀢𑀦𑁄𑀫𑀢𑀺𑀁 𑀲𑀸𑀫𑀜𑁆𑀜𑀢𑁄 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀁 𑀧𑀦 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀅𑀢𑁆𑀣𑁂𑀦𑀸𑀢𑀺 𑀅𑀢𑁆𑀢𑀦𑀸 𑀲𑀮𑁆𑀮𑀓𑁆𑀔𑀺𑀢𑁂𑀦 𑀅𑀢𑁆𑀣𑁂𑀦. 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸𑀢𑀺 𑀆𑀘𑀭𑀺𑀬𑀯𑀸𑀤𑁂 𑀜𑀸𑀡𑁂𑀦 𑀅𑀦𑀼𑀧𑁆𑀧𑀯𑁂𑀲𑁂𑀢𑀩𑁆𑀩𑀸. 𑀲𑀩𑁆𑀩𑀤𑀼𑀩𑁆𑀩𑀮𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀬𑀁 ¶ 𑀧𑀝𑀺𑀪𑀸𑀦𑀪𑀸𑀯𑀢𑁄. 𑀧𑀫𑀸𑀤𑀧𑀸𑀞𑀯𑀲𑁂𑀦 𑀆𑀘𑀭𑀺𑀬𑀯𑀸𑀤𑀲𑁆𑀲 𑀓𑀤𑀸𑀘𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀦 𑀅𑀲𑀁𑀲𑀦𑁆𑀤𑀦𑀸𑀧𑀺 𑀲𑀺𑀬𑀸, 𑀲𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀆𑀘𑀭𑀺𑀬𑀯𑀸𑀤𑁄𑀧𑀺…𑀧𑁂… 𑀲𑀫𑁂𑀦𑁆𑀢𑁄 𑀏𑀯 𑀕𑀳𑁂𑀢𑀩𑁆𑀩𑁄’’𑀢𑀺. 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀲𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀢𑀺, 𑀏𑀯𑀁 𑀫𑀳𑀸𑀧𑀤𑁂𑀲𑀢𑁄 𑀅𑀢𑁆𑀣𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢𑁆𑀢𑀸𑀦𑀼𑀮𑁄𑀫𑀲𑁆𑀲 𑀲𑀼𑀢𑁆𑀢𑁂𑀓𑀤𑁂𑀲𑀢𑁆𑀢𑁂𑀧𑀺 𑀲𑀼𑀢𑁆𑀢𑁂 𑀯𑀺𑀬 ‘‘𑀇𑀤𑀁 𑀓𑀧𑁆𑀧𑀢𑀺, 𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀘𑁆𑀘𑀪𑀸𑀲𑀺𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀳𑀺 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭’’𑀦𑁆𑀢𑀺. 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀅𑀧𑁆𑀧𑀝𑀺𑀩𑀸𑀳𑀺𑀬𑀁. 𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀦𑁆𑀢𑀺 𑀧𑀫𑀸𑀡𑀢𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀁. 𑀩𑀼𑀤𑁆𑀥𑀸𑀦𑀁 𑀞𑀺𑀢𑀓𑀸𑀮𑀲𑀤𑀺𑀲𑀦𑁆𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑁂𑀳𑁂𑀯 𑀓𑀣𑀺𑀢𑀢𑁆𑀢𑀸 𑀥𑀭𑀫𑀸𑀦𑀩𑀼𑀤𑁆𑀥𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀢𑁂 𑀳𑀺 𑀧𑀝𑀺𑀩𑀸𑀳𑀺𑀢𑁂 𑀩𑀼𑀤𑁆𑀥𑁄𑀯 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺. 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀻𑀢𑀺 𑀲𑀓𑀯𑀸𑀤𑀻 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺. 𑀧𑀭𑀯𑀸𑀤𑀻 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀅𑀜𑁆𑀜𑀦𑀺𑀓𑀸𑀬𑀯𑀸𑀤𑀻 𑀅𑀢𑁆𑀢𑀦𑁄 𑀦𑀺𑀓𑀸𑀬𑁂 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺. 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸𑀢𑀺 ‘‘𑀓𑀺𑀁 𑀇𑀫𑀺𑀦𑀸’’𑀢𑀺 𑀔𑁂𑀧𑀁 𑀯𑀸 ‘‘𑀓𑀺𑀫𑁂𑀲 𑀩𑀸𑀮𑁄 𑀯𑀤𑀢𑀻’’𑀢𑀺 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸. 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑀁 𑀅𑀜𑁆𑀜𑀦𑀺𑀓𑀸𑀬𑁂 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑁄 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑁂𑀬𑁂𑀯 𑀞𑀸𑀢𑀩𑁆𑀩𑀁. 𑀏𑀯𑀁 𑀲𑁂𑀲𑀯𑀸𑀭𑁂𑀲𑀼𑀧𑀺 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀬𑀦𑁆𑀢𑀺 𑀲𑀓𑀯𑀸𑀤𑀻. 𑀧𑀭𑁄𑀢𑀺 𑀅𑀜𑁆𑀜𑀦𑀺𑀓𑀸𑀬𑀯𑀸𑀤𑀻. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀦𑀦𑀼 𑀘 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀲𑀼𑀢𑁆𑀢𑀁 𑀑𑀢𑀸𑀭𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭’’𑀦𑁆𑀢𑀺 𑀳𑀺 𑀇𑀤𑀁 ¶ 𑀲𑀓𑀫𑀢𑁂𑀬𑁂𑀯 𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀲𑀓𑀫𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀲𑀼𑀢𑁆𑀢𑀸𑀤𑀺𑀁 𑀲𑀦𑁆𑀥𑀸𑀬 ‘‘𑀅𑀢𑁆𑀢𑀦𑁄𑀫𑀢𑀺 𑀲𑀩𑁆𑀩𑀤𑀼𑀩𑁆𑀩𑀮𑀸, 𑀅𑀢𑁆𑀢𑀦𑁄𑀫𑀢𑀺𑀢𑁄 𑀆𑀘𑀭𑀺𑀬𑀯𑀸𑀤𑁄 𑀩𑀮𑀯𑀢𑀭𑁄, 𑀆𑀘𑀭𑀺𑀬𑀯𑀸𑀤𑀢𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀩𑀮𑀯𑀢𑀭𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀭𑀯𑀸𑀤𑀺𑀦𑀸 𑀆𑀦𑀻𑀢𑀁 𑀅𑀜𑁆𑀜𑀦𑀺𑀓𑀸𑀬𑁂 𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀲𑀼𑀢𑁆𑀢𑀁 𑀑𑀢𑀸𑀭𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀭𑀯𑀸𑀤𑀺𑀦𑀸 𑀆𑀦𑀻𑀢𑀁 𑀲𑀼𑀢𑁆𑀢𑀸𑀤𑀺𑀁 𑀅𑀢𑁆𑀢𑀦𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀲𑀼 𑀑𑀢𑀸𑀭𑁂𑀢𑁆𑀯𑀸 𑀲𑀫𑁂𑀦𑁆𑀢𑀁𑀬𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀦𑀬𑁄 𑀇𑀥 𑀯𑀼𑀘𑁆𑀘𑀢𑀻𑀢𑀺 𑀦 𑀓𑁄𑀘𑀺 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄.

𑀩𑀸𑀳𑀺𑀭𑀓𑀲𑀼𑀢𑁆𑀢𑀦𑁆𑀢𑀺 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀅𑀦𑀸𑀭𑀼𑀴𑁆𑀳𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀸𑀤𑀻𑀦𑀺 𑀫𑀳𑀸𑀲𑀗𑁆𑀖𑀺𑀓𑀦𑀺𑀓𑀸𑀬𑀯𑀸𑀲𑀻𑀦𑀁 𑀲𑀼𑀢𑁆𑀢𑀸𑀦𑀺. 𑀯𑁂𑀤𑀮𑁆𑀮𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑀼𑀴𑁆𑀳𑀉𑀫𑁆𑀫𑀕𑁆𑀕𑀸𑀤𑀺𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀦𑀺𑀓𑀸𑀬𑀢𑁄 𑀆𑀦𑀻𑀢𑀲𑀼𑀢𑁆𑀢𑀢𑁄𑀧𑀺 𑀲𑀓𑀦𑀺𑀓𑀸𑀬𑁂 𑀅𑀢𑁆𑀢𑀦𑁄𑀫𑀢𑀺𑀬𑁂𑀯 𑀩𑀮𑀯𑀢𑀭𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑀯𑀸𑀤𑀻𑀧𑀺 𑀲𑀼𑀢𑁆𑀢𑀫𑁂𑀯𑀸𑀢𑀺𑀏𑀯𑀫𑀸𑀤𑀺𑀦𑀸 ¶ 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀯𑀲𑁂𑀦 𑀯𑀸𑀭𑁄 𑀦 𑀯𑀼𑀢𑁆𑀢𑁄, 𑀲𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑁂𑀬𑁂𑀯 𑀑𑀢𑀸𑀭𑀡𑀁 𑀪𑀺𑀦𑁆𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺.

𑀇𑀤𑀸𑀦𑀺 𑀲𑀓𑀯𑀸𑀤𑀻𑀧𑀭𑀯𑀸𑀤𑀻𑀦𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀺𑀯𑀸𑀤𑁂 𑀉𑀧𑁆𑀧𑀦𑁆𑀦𑁂 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀣 𑀧𑀦𑀸𑀬𑀁 𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑁄𑀬𑁂𑀯 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀧𑀭𑀯𑀸𑀤𑀻 𑀓𑀸𑀭𑀡𑀁 𑀦 𑀮𑀪𑀢𑀺. 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀻𑀢𑀺 𑀧𑀭𑀯𑀸𑀤𑀻 𑀅𑀢𑁆𑀢𑀦𑁄 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀁 𑀯𑀺𑀦𑀺𑀘𑁆𑀙𑀬𑀜𑁆𑀘 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀦𑀺𑀓𑀸𑀬𑁂 𑀲𑀼𑀢𑁆𑀢𑀸𑀤𑀻𑀦𑀺 𑀅𑀮𑀪𑀦𑁆𑀢𑁂𑀦 𑀲𑀓𑀯𑀸𑀤𑀺𑀦𑀸 𑀧𑀭𑀯𑀸𑀤𑀻𑀯𑀘𑀦𑁂𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀯𑀤𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀻𑀢𑀺 𑀲𑀓𑀯𑀸𑀤𑀻𑀧𑀭𑀯𑀸𑀤𑀻𑀦𑀁 𑀉𑀪𑀺𑀦𑁆𑀦𑀫𑁆𑀧𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀤𑀺𑀲𑁆𑀲𑀢𑀺. 𑀬𑀤𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀓𑀲𑁆𑀫𑀸 ‘‘𑀅𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩’’𑀦𑁆𑀢𑀺 𑀆𑀳 ‘‘𑀯𑀺𑀦𑀬𑀜𑁆𑀳𑀺 𑀧𑀢𑁆𑀯𑀸’’𑀢𑀺𑀆𑀤𑀺. ‘‘𑀯𑀺𑀦𑀬𑀁 𑀧𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀘𑀸𑀭𑀡𑀫𑀸𑀕𑀫𑁆𑀫𑀸’’𑀢𑀺. 𑀭𑀼𑀦𑁆𑀥𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 ¶ 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀸𑀯𑁂 𑀲𑀢𑀺 𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑀡𑀁 𑀭𑀼𑀦𑁆𑀥𑀺𑀢𑀩𑁆𑀩𑀁, 𑀅𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑀡𑀁 𑀕𑀸𑀴𑁆𑀳𑀁 𑀓𑀸𑀢𑀩𑁆𑀩𑀁. 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀓𑀧𑁆𑀧𑀺𑀬𑀕𑀳𑀡𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀕𑀭𑀼𑀓𑀪𑀸𑀯𑀲𑀗𑁆𑀔𑀸𑀢𑁂 𑀅𑀓𑀧𑁆𑀧𑀺𑀬𑀪𑀸𑀯𑁂𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀻𑀢𑀺 𑀩𑀳𑀽𑀳𑀺 𑀲𑀼𑀢𑁆𑀢𑁂𑀳𑀺 𑀘𑁂𑀯 𑀢𑀢𑁄 𑀆𑀦𑀻𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀘. 𑀅𑀢𑁆𑀢𑀦𑁄 𑀕𑀳𑀡𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑀡𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄𑀢𑀺 𑀲𑀓𑀯𑀸𑀤𑀻𑀧𑀭𑀯𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀓𑁂𑀘𑀺 𑀧𑀦 ‘‘𑀲𑀓𑀯𑀸𑀤𑀻𑀲𑀼𑀬𑁂𑀯 𑀬𑁄 𑀓𑁄𑀘𑀺 𑀇𑀥𑀸𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 ‘‘𑀅𑀣 𑀧𑀦𑀸𑀬𑀁 𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀻’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀢𑁆𑀣 𑀉𑀪𑁄𑀧𑀺 𑀲𑀓𑀯𑀸𑀤𑀺𑀦𑁄𑀬𑁂𑀯 𑀲𑀺𑀬𑀼𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲𑁂𑀯 𑀦𑀺𑀕𑀫𑀦𑀯𑀲𑁂𑀦 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑀺𑀭𑁂𑀓𑀓𑀸𑀭𑀡𑀁 𑀮𑀪𑀢𑀻𑀢𑀺 𑀏𑀢𑁆𑀣 𑀲𑀼𑀢𑁆𑀢𑀸𑀤𑀻𑀲𑀼 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀅𑀢𑀺𑀭𑁂𑀓𑀓𑀸𑀭𑀡𑀁 𑀦𑀸𑀫, 𑀬𑁄 𑀯𑀸 𑀲𑀼𑀢𑁆𑀢𑀸𑀤𑀻𑀲𑀼 𑀘𑀢𑀽𑀲𑀼 𑀩𑀳𑀼𑀢𑀭𑀁 𑀓𑀸𑀭𑀡𑀁 𑀮𑀪𑀢𑀺, 𑀲𑁄 𑀅𑀢𑀺𑀭𑁂𑀓𑀓𑀸𑀭𑀡𑀁 𑀮𑀪𑀢𑀺 𑀦𑀸𑀫.

𑀲𑀼𑀝𑁆𑀞𑀼 𑀧𑀯𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀯𑀢𑁆𑀢𑀺, 𑀲𑀼𑀝𑁆𑀞𑀼 𑀧𑀯𑀢𑁆𑀢𑀢𑀺 𑀲𑀻𑀮𑁂𑀦𑀸𑀢𑀺 𑀯𑀸 𑀲𑀼𑀧𑁆𑀧𑀯𑀢𑁆𑀢𑀺. 𑀢𑁂𑀦𑀸𑀳 ‘‘𑀲𑀼𑀧𑁆𑀧𑀯𑀢𑁆𑀢𑀻𑀢𑀺 𑀲𑀼𑀝𑁆𑀞𑀼 𑀧𑀯𑀢𑁆𑀢’’𑀦𑁆𑀢𑀺. 𑀯𑀸𑀘𑀸𑀬 𑀉𑀕𑁆𑀕𑀢𑀁 𑀯𑀸𑀘𑀼𑀕𑁆𑀕𑀢𑀁, 𑀯𑀘𑀲𑀸 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀢𑀢𑁄𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀧𑀸𑀴𑀺𑀢𑁄’’𑀢𑀺. 𑀏𑀢𑁆𑀣 𑀘 ‘‘𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ¶ 𑀧𑀸𑀴𑀺𑀢𑁄𑀢𑀺 𑀢𑀤𑀢𑁆𑀣𑀤𑀻𑀧𑀺𑀓𑀸 𑀅𑀜𑁆𑀜𑀸𑀬𑁂𑀯 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀧𑀭𑀺𑀧𑀼𑀘𑁆𑀙𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘𑀸’’𑀢𑀺. 𑀧𑀸𑀴𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀧𑀓𑀸𑀲𑀦𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀳𑀺 𑀧𑀭𑀺𑀧𑀼𑀘𑁆𑀙𑀸 𑀅𑀝𑁆𑀞𑀓𑀣𑀸 𑀘 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀅𑀝𑁆𑀞𑀓𑀣𑀸𑀬 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀧𑀭𑀺𑀧𑀼𑀘𑁆𑀙𑀸𑀢𑀺 𑀣𑁂𑀭𑀯𑀸𑀤𑁄 𑀯𑀼𑀢𑁆𑀢𑁄. 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀓𑀮𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀲𑀗𑁆𑀖𑀭𑀸𑀚𑀻𑀢𑀺. 𑀓𑀼𑀓𑁆𑀓𑀼𑀘𑁆𑀘𑀓𑁄𑀢𑀺 𑀅𑀡𑀼𑀫𑀢𑁆𑀢𑁂𑀲𑀼𑀧𑀺 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀦𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀢𑀦𑁆𑀢𑀺𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸𑀢𑀺 𑀧𑀸𑀴𑀺𑀁 𑀅𑀜𑁆𑀜𑀣𑀸 𑀅𑀓𑀢𑁆𑀯𑀸. 𑀅𑀯𑁄𑀓𑁆𑀓𑀫𑀦𑁆𑀢𑁄𑀢𑀺 𑀅𑀦𑀢𑀺𑀓𑁆𑀓𑀫𑀦𑁆𑀢𑁄.

𑀯𑀺𑀢𑁆𑀣𑀼𑀦𑀢𑀻𑀢𑀺 𑀅𑀢𑁆𑀣𑀁 𑀅𑀤𑀺𑀲𑁆𑀯𑀸 𑀦𑀺𑀢𑁆𑀣𑀼𑀦𑀢𑀺. 𑀯𑀺𑀧𑁆𑀨𑀦𑁆𑀤𑀢𑀻𑀢𑀺 𑀓𑀫𑁆𑀧𑀢𑀺. 𑀲𑀦𑁆𑀢𑀺𑀝𑁆𑀞𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀬𑀁 ¶ 𑀬𑀁 𑀧𑀭𑁂𑀦 𑀯𑀼𑀘𑁆𑀘𑀢𑀺, 𑀢𑀁 𑀢𑀁 𑀅𑀦𑀼𑀚𑀸𑀦𑀸𑀢𑀻’’𑀢𑀺. 𑀧𑀭𑀯𑀸𑀤𑀁 𑀕𑀡𑁆𑀳𑀸𑀢𑀻𑀢𑀺 ‘‘𑀉𑀘𑁆𑀙𑀼𑀫𑁆𑀳𑀺 𑀓𑀲𑀝𑀁 𑀬𑀸𑀯𑀚𑀻𑀯𑀺𑀓𑀁, 𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 𑀘 𑀉𑀘𑁆𑀙𑀼 𑀦𑀸𑀫 𑀯𑀺𑀲𑀼𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀘𑁆𑀙𑀼𑀧𑀺 𑀯𑀺𑀓𑀸𑀮𑁂 𑀯𑀝𑁆𑀝𑀢𑀻’’𑀢𑀺 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑁂 𑀢𑀫𑁆𑀧𑀺 𑀕𑀡𑁆𑀳𑀸𑀢𑀺. 𑀏𑀓𑁂𑀓𑀮𑁄𑀫𑀦𑁆𑀢𑀺 𑀧𑀮𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀫𑁆𑀳𑀻𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁.

𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀢𑀺 𑀆𑀘𑀭𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑀧𑀭𑀫𑁆𑀧𑀭𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀬𑀣𑀸 𑀆𑀘𑀭𑀺𑀬𑁄 𑀘 𑀆𑀘𑀭𑀺𑀬𑀸𑀘𑀭𑀺𑀬𑁄 𑀘 𑀧𑀸𑀴𑀺𑀜𑁆𑀘 𑀧𑀭𑀺𑀧𑀼𑀘𑁆𑀙𑀜𑁆𑀘 𑀯𑀤𑀦𑁆𑀢𑀺, 𑀢𑀣𑀸 𑀜𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀢𑁄𑀢𑀺 ‘‘𑀇𑀤𑀁 𑀧𑀼𑀩𑁆𑀩𑀯𑀘𑀦𑀁, 𑀇𑀤𑀁 𑀧𑀭𑀯𑀘𑀦𑀁, 𑀅𑀬𑀫𑀦𑀼𑀲𑀦𑁆𑀥𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀢𑁄. 𑀆𑀘𑀭𑀺𑀬𑀧𑀭𑀫𑁆𑀧𑀭𑀦𑁆𑀢𑀺 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁 𑀣𑁂𑀭𑀯𑀸𑀤𑀗𑁆𑀕𑀦𑁆𑀢𑀺, 𑀣𑁂𑀭𑀧𑀝𑀺𑀧𑀸𑀝𑀺𑀦𑁆𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀢𑀬𑁄 𑀧𑀭𑀺𑀯𑀝𑁆𑀝𑀸𑀢𑀺 𑀤𑁆𑀯𑁂 𑀢𑀺𑀲𑁆𑀲𑁄 𑀧𑀭𑀫𑁆𑀧𑀭𑀸.

𑀇𑀫𑁂𑀳𑀺 𑀘 𑀧𑀦 𑀢𑀻𑀳𑀺 𑀮𑀓𑁆𑀔𑀡𑁂𑀳𑀻𑀢𑀺 ‘‘𑀲𑀼𑀢𑁆𑀢𑀫𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺. 𑀏𑀢𑁆𑀣 𑀘 𑀧𑀞𑀫𑁂𑀦 𑀮𑀓𑁆𑀔𑀡𑁂𑀦 𑀯𑀺𑀦𑀬𑀲𑁆𑀲 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑀪𑀸𑀯𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁂𑀦 𑀉𑀕𑁆𑀕𑀳𑀺𑀢𑁂𑀦 𑀅𑀘𑀮𑀢𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸 𑀯𑀼𑀢𑁆𑀢𑀸, 𑀢𑀢𑀺𑀬𑁂𑀦 𑀬𑀁 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀦𑀢𑁆𑀣𑀺, 𑀢𑀫𑁆𑀧𑀺 𑀆𑀘𑀭𑀺𑀬𑀯𑀘𑀦𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸. 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀘𑁄𑀤𑀦𑀸𑀲𑀗𑁆𑀔𑀸𑀢𑁂 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂 𑀑𑀢𑀺𑀡𑁆𑀡𑁂, 𑀑𑀲𑀝𑁂𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀳. 𑀓𑁂𑀘𑀺 𑀧𑀦 ‘‘𑀘𑁄𑀤𑀓𑁂𑀦 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀏𑀯𑀁 𑀬𑁄𑀚𑁂𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀺𑀦𑀬𑀥𑀭𑁂𑀦 𑀘 𑀯𑀢𑁆𑀢𑀩𑁆𑀩𑁂’’𑀢𑀺 𑀏𑀯𑀫𑁆𑀧𑀺 𑀬𑁄𑀚𑁂𑀦𑁆𑀢𑀺. ‘‘𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀅𑀬𑀫𑁂𑀯 𑀧𑀦 𑀬𑁄𑀚𑀦𑀸 𑀲𑀼𑀦𑁆𑀤𑀭𑀢𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁. ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸…𑀧𑁂… 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 ¶ 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭) 𑀳𑀺 𑀇𑀤𑀁 𑀦𑀺𑀲𑁆𑀲𑀕𑁆𑀕𑀺𑀬𑁂 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀻𑀦𑀁 𑀫𑀸𑀢𑀺𑀓𑀸𑀬 𑀅𑀦𑀸𑀕𑀢𑀢𑁆𑀢𑀸 ‘‘𑀧𑀜𑁆𑀘𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑀭𑀁 𑀯𑀸 𑀆𑀧𑀢𑁆𑀢𑀺𑀦𑁆𑀢𑀺 ‘‘𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀻 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀓𑀸𑀮𑁂 𑀯𑁂𑀫𑀢𑀺𑀓𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 ¶ 𑀏𑀯𑀫𑀸𑀤𑀺𑀦𑀸 (𑀧𑀸𑀘𑀺. 𑁨𑁫𑁦) 𑀆𑀕𑀢𑀁 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀽𑀢𑀺 𑀯𑀺𑀦𑀻𑀢𑀯𑀢𑁆𑀣𑀼𑀁 𑀅𑀦𑁆𑀢𑁄𑀓𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂.

𑀲𑀼𑀔𑀼𑀫𑀸𑀢𑀺 𑀅𑀢𑁆𑀢𑀦𑁄𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄 𑀘𑀺𑀢𑁆𑀢𑀲𑁆𑀲 𑀲𑀻𑀖𑀧𑀭𑀺𑀯𑀢𑁆𑀢𑀺𑀢𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀮𑀳𑀼𑀓𑀸’’𑀢𑀺. 𑀘𑀺𑀢𑁆𑀢𑀁 𑀮𑀳𑀼 𑀲𑀻𑀖𑀧𑀭𑀺𑀯𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀘𑀺𑀢𑁆𑀢𑀮𑀳𑀼𑀓𑀸. 𑀢𑁂𑀢𑀺 𑀢𑁂 𑀯𑀻𑀢𑀺𑀓𑁆𑀓𑀫𑁂. 𑀢𑀁𑀯𑀢𑁆𑀣𑀼𑀓𑀦𑁆𑀢𑀺 𑀢𑁂 𑀅𑀤𑀺𑀦𑁆𑀦𑀸𑀤𑀸𑀦𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀯𑀻𑀢𑀺𑀓𑁆𑀓𑀫𑀸 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀁 𑀓𑀸𑀭𑀡𑀫𑁂𑀢𑀲𑁆𑀲𑀸𑀢𑀺 𑀢𑀁𑀯𑀢𑁆𑀣𑀼𑀓𑀁. 𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸𑀢𑀺 𑀬𑀁𑀯𑀢𑁆𑀣𑀼𑀓𑀁 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀅𑀯𑀲𑁂𑀲𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸. 𑀧𑀸𑀓𑀝𑀪𑀸𑀯𑀢𑁄 𑀲𑀼𑀔𑀯𑀴𑀜𑁆𑀚𑀦𑀢𑀸𑀬 𑀘 ‘‘𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀢𑀸𑀯 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀓𑀢𑀧𑀭𑀺𑀘𑀬𑁂𑀦 𑀢𑀤𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀓𑀫𑁆𑀫𑀝𑁆𑀞𑀸𑀦𑀁 𑀖𑀝𑀬𑀢𑀻𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀔𑀡𑁆𑀟𑀁 𑀅𑀤𑀲𑁆𑀲𑁂𑀢𑁆𑀯𑀸 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀆𑀮𑀫𑁆𑀩𑀦𑀪𑀸𑀯𑁂𑀦 𑀘𑀺𑀭𑀓𑀸𑀮𑀁 𑀖𑀝𑀬𑀢𑀺. 𑀲𑀗𑁆𑀔𑀸𑀭𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀘𑁂, 𑀢𑀲𑁆𑀲 𑀲𑀗𑁆𑀔𑀸𑀭𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀲𑀘𑁂 𑀓𑀢𑀧𑀸𑀭𑀸𑀚𑀺𑀓𑀯𑀻𑀢𑀺𑀓𑁆𑀓𑀫𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀲𑀢𑀺𑀧𑀺 𑀅𑀲𑀭𑀺𑀢𑀼𑀓𑀸𑀫𑀢𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀉𑀧𑀝𑁆𑀞𑀳𑀢𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀦 𑀯𑀺𑀦𑁆𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀦 𑀖𑀝𑀬𑀢𑀻’’𑀢𑀺𑀆𑀤𑀺. 𑀅𑀢𑁆𑀢𑀦𑀸 𑀚𑀸𑀦𑀸𑀢𑀻𑀢𑀺 𑀲𑀬𑀫𑁂𑀯 𑀚𑀸𑀦𑀸𑀢𑀺. 𑀧𑀘𑁆𑀘𑀢𑁆𑀢𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁, 𑀅𑀢𑁆𑀢𑀸 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀸 𑀘 𑀤𑁂𑀯𑀢𑀸 𑀚𑀸𑀦𑀦𑁆𑀢𑀻𑀢𑀺 𑀆𑀭𑀓𑁆𑀔𑀤𑁂𑀯𑀢𑀸𑀳𑀺 𑀅𑀜𑁆𑀜𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄 𑀤𑁂𑀯𑀢𑀸 𑀘 𑀚𑀸𑀦𑀦𑁆𑀢𑀺.

𑀦𑀺𑀝𑁆𑀞𑀺𑀢𑀸 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑀯𑀺𑀦𑀬𑀥𑀭𑀲𑁆𑀲 𑀘 𑀮𑀓𑁆𑀔𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸.

𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀦-𑀲𑀤𑁆𑀤𑀁 𑀅𑀧𑀦𑁂𑀢𑁆𑀯𑀸 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀤𑀻𑀧𑀓𑀁 𑀬𑁄-𑀲𑀤𑁆𑀤𑀫𑁂𑀯 𑀆𑀳, 𑀢𑀲𑁆𑀫𑀸. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀬𑁄-𑀲𑀤𑁆𑀤𑁂. 𑀧𑀦-𑀲𑀤𑁆𑀤𑀲𑁆𑀲 𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸 𑀬𑁄-𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑁄 𑀓𑁄𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀬𑁄 𑀓𑁄𑀘𑀺 𑀦𑀸𑀫𑀸𑀢𑀺 𑀬𑁄 𑀯𑀸 𑀲𑁄 𑀯𑀸 𑀬𑁄 𑀓𑁄𑀘𑀻𑀢𑀺 𑀯𑀼𑀢𑁆𑀢𑁄. 𑀯𑀸𑀲𑀥𑀼𑀭𑀬𑀼𑀢𑁆𑀢𑁄 𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀥𑀼𑀭𑀬𑀼𑀢𑁆𑀢𑁄 𑀯𑀸. 𑀲𑀻𑀮𑁂𑀲𑀽𑀢𑀺 𑀧𑀓𑀢𑀻𑀲𑀼.

𑀪𑀺𑀓𑁆𑀔𑀢𑀻𑀢𑀺 ¶ ¶ 𑀬𑀸𑀘𑀢𑀺. 𑀮𑀪𑀦𑁆𑀢𑁄 𑀯𑀸 𑀅𑀮𑀪𑀦𑁆𑀢𑁄 𑀯𑀸𑀢𑀺 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀢𑀺 𑀪𑀺𑀓𑁆𑀔𑀁 𑀏𑀲𑀢𑀺 𑀕𑀯𑁂𑀲𑀢𑀺, 𑀲𑁄 𑀢𑀁 𑀮𑀪𑀢𑀼 𑀯𑀸 𑀫𑀸 𑀯𑀸, 𑀢𑀣𑀸𑀧𑀺 𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀽𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀺𑀬𑀸𑀬 𑀬𑀸𑀘𑀦𑀸𑀬𑀸𑀢𑀺 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀅𑀭𑀺𑀬𑀬𑀸𑀘𑀦𑀸𑀬, 𑀦 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀯𑀺𑀬 ‘‘𑀤𑁂𑀳𑀺 𑀤𑁂𑀳𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀬𑀸𑀘𑀦𑀸𑀬. 𑀪𑀺𑀓𑁆𑀔𑀸𑀘𑀭𑀺𑀬𑀦𑁆𑀢𑀺 𑀉𑀜𑁆𑀙𑀸𑀘𑀭𑀺𑀬𑀁. 𑀅𑀚𑁆𑀛𑀼𑀧𑀕𑀢𑀢𑁆𑀢𑀸𑀢𑀺 𑀅𑀦𑀼𑀝𑁆𑀞𑀺𑀢𑀢𑁆𑀢𑀸. 𑀓𑀸𑀚𑀪𑀢𑁆𑀢𑀦𑁆𑀢𑀺 𑀓𑀸𑀚𑁂𑀳𑀺 𑀆𑀦𑀻𑀢𑀁 𑀪𑀢𑁆𑀢𑀁. 𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀪𑁂𑀤𑁂𑀦𑀸𑀢𑀺 𑀅𑀕𑁆𑀖𑀸𑀤𑀻𑀦𑀁 𑀧𑀼𑀭𑀺𑀫𑀧𑀓𑀢𑀺𑀯𑀺𑀚𑀳𑁂𑀦. 𑀧𑀼𑀭𑀺𑀫𑀧𑀓𑀢𑀺𑀯𑀺𑀚𑀳𑀦𑀜𑁆𑀳𑁂𑀢𑁆𑀣 𑀪𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀥𑁄𑀯𑀺𑀢𑁆𑀯𑀸 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑀪𑀸𑀯𑀁 𑀫𑀮𑀁, 𑀢𑀣𑀸 𑀅𑀧𑀦𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀲𑀪𑀸𑀯𑀸 𑀚𑀮𑁆𑀮𑀺𑀓𑀸. 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀦𑀺𑀩𑁆𑀩𑀘𑀦𑀁 𑀪𑀺𑀦𑁆𑀦𑀧𑀝𑀥𑀭𑁂 𑀪𑀺𑀓𑁆𑀔𑀼-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸 𑀓𑀢𑀁.

𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀼𑀩𑁆𑀩𑁂 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀤𑀸𑀦𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁. 𑀬𑁄 𑀳𑀺 𑀘𑀻𑀯𑀭𑀸𑀤𑀺𑀓𑁂 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑁂 𑀧𑀢𑁆𑀢𑀘𑀻𑀯𑀭𑀫𑁂𑀯 𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀅𑀭𑀺𑀬𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸 ‘‘𑀇𑀤𑀁 𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀅𑀦𑀸𑀕𑀢𑁂 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, 𑀢𑀲𑁆𑀲 𑀢𑀁 𑀲𑀢𑀺 𑀅𑀥𑀺𑀓𑀸𑀭𑀲𑀫𑁆𑀧𑀢𑁆𑀢𑀺𑀬𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀇𑀤𑁆𑀥𑀺𑀫𑀬𑀧𑀭𑀺𑀓𑁆𑀔𑀸𑀭𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀭𑀳𑁆𑀫𑀖𑁄𑀲𑀦𑁆𑀢𑀺 𑀉𑀢𑁆𑀢𑀫𑀖𑁄𑀲𑀁, 𑀩𑁆𑀭𑀳𑁆𑀫𑀼𑀦𑁄 𑀖𑁄𑀲𑀲𑀤𑀺𑀲𑀁 𑀯𑀸 𑀖𑁄𑀲𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘. 𑀤𑀼𑀓𑁆𑀔𑀲𑁆𑀲 𑀲𑀫𑁆𑀫𑀸 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀪𑀡𑁆𑀟𑀽𑀢𑀺 𑀫𑀼𑀡𑁆𑀟𑁄. 𑀯𑀸𑀲𑀻𑀢𑀺 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺. 𑀩𑀦𑁆𑀥𑀦𑀦𑁆𑀢𑀺 𑀓𑀸𑀬𑀩𑀦𑁆𑀥𑀦𑀁. 𑀬𑀼𑀢𑁆𑀢𑁄 𑀪𑀸𑀯𑀦𑀸𑀦𑀼𑀬𑁄𑀕𑁄 𑀅𑀲𑁆𑀲𑀸𑀢𑀺 𑀬𑀼𑀢𑁆𑀢𑀬𑁄𑀕𑁄, 𑀢𑀲𑁆𑀲 𑀬𑀼𑀢𑁆𑀢𑀬𑁄𑀕𑀲𑁆𑀲, 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀢𑀸𑀯𑀺𑀪𑀸𑀯𑀦𑀢𑁆𑀣𑀁 ‘‘𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀩𑀼𑀤𑁆𑀥𑁄𑀯 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀘 𑀅𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀘𑀭𑀺𑀬𑀓𑁄. 𑀧𑀞𑀫𑀩𑁄𑀥𑀺𑀬𑀫𑁆𑀧𑀺 𑀧𑀞𑀫𑀓𑀸𑀮𑁂𑀬𑁂𑀯 𑀲𑁂𑀲𑀉𑀧𑀲𑀫𑁆𑀧𑀤𑀸𑀦𑀁 𑀅𑀪𑀸𑀯𑁄𑀢𑀺 𑀆𑀳 ‘‘𑀧𑀞𑀫𑀩𑁄𑀥𑀺𑀬𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀧𑀜𑁆𑀘 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸 𑀧𑀜𑁆𑀘. 𑀢𑀻𑀡𑀺 𑀲𑀢𑀦𑁆𑀢𑀺 𑀢𑀻𑀡𑀺 𑀲𑀢𑀸𑀦𑀺, 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀏𑀓𑁄 𑀘 𑀣𑁂𑀭𑁄𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀯𑀼𑀢𑁆𑀢𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀯𑀺𑀦𑀬𑀧𑀸𑀴𑀺𑀬𑀁.

𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 ¶ 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀬𑁂𑀯 𑀪𑀕𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑁄 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀏𑀓𑀓𑁄𑀯 𑀕𑀦𑁆𑀢𑁆𑀯𑀸 𑀩𑀳𑀼𑀧𑀼𑀢𑁆𑀢𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺, 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀅𑀢𑁆𑀢𑀦𑁄 𑀲𑀸𑀯𑀓𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀞𑀺𑀢𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀫𑀳𑀢𑁆𑀢𑀢𑀁 ¶ 𑀅𑀢𑁆𑀢𑀦𑁄 𑀘 𑀫𑀳𑀸𑀦𑀼𑀪𑀸𑀯𑀢𑀁 𑀤𑀻𑀧𑁂𑀢𑀼𑀁 𑀬𑀲𑁆𑀲 𑀅𑀜𑁆𑀜𑀲𑁆𑀲 𑀅𑀚𑀸𑀦𑀁𑀬𑁂𑀯 ‘‘𑀚𑀸𑀦𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀲𑁆𑀲 𑀩𑀸𑀳𑀺𑀭𑀓𑀲𑁆𑀲 𑀲𑀢𑁆𑀣𑀼𑀦𑁄 𑀏𑀯𑀁 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀯𑀡𑁆𑀝𑀘𑁆𑀙𑀺𑀦𑁆𑀦𑀢𑀸𑀮𑀧𑀓𑁆𑀓𑀁 𑀯𑀺𑀬 𑀕𑀻𑀯𑀢𑁄 𑀫𑀼𑀤𑁆𑀥𑀸𑀧𑀺 𑀯𑀺𑀧𑀢𑁂𑀬𑁆𑀬, 𑀲𑀢𑁆𑀢𑀥𑀸 𑀯𑀸 𑀨𑀮𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀔𑁄, 𑀓𑀲𑁆𑀲𑀧, 𑀏𑀯𑀁 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀕𑀢𑀁 𑀲𑀸𑀯𑀓𑀁 𑀅𑀚𑀸𑀦𑀁𑀬𑁂𑀯 𑀯𑀤𑁂𑀬𑁆𑀬 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁𑀬𑁂𑀯 𑀯𑀤𑁂𑀬𑁆𑀬 ‘𑀧𑀲𑁆𑀲𑀸𑀫𑀻’𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬, 𑀲𑀢𑁆𑀢𑀥𑀸 𑀯𑀸 𑀨𑀮𑁂𑀬𑁆𑀬, 𑀅𑀳𑀁 𑀔𑁄, 𑀓𑀲𑁆𑀲𑀧, 𑀚𑀸𑀦𑀁𑀬𑁂𑀯 𑀯𑀤𑀸𑀫𑀺 ‘𑀚𑀸𑀦𑀸𑀫𑀻’𑀢𑀺, 𑀧𑀲𑁆𑀲𑀁𑀬𑁂𑀯 𑀯𑀤𑀸𑀫𑀺 ‘𑀧𑀲𑁆𑀲𑀸𑀫𑀻’’’ (𑀲𑀁. 𑀦𑀺. 𑁨.𑁧𑁫𑁪) 𑀢𑀺 𑀯𑀢𑁆𑀯𑀸 𑀚𑀸𑀢𑀺𑀫𑀤𑀫𑀸𑀦𑀫𑀤𑀭𑀽𑀧𑀫𑀤𑀧𑁆𑀧𑀳𑀸𑀦𑀢𑁆𑀣𑀁 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀑𑀯𑀤𑀦𑁆𑀢𑁄 ‘‘𑀢𑀲𑁆𑀫𑀸𑀢𑀺𑀳 𑀢𑁂 𑀓𑀲𑁆𑀲𑀧𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁪) 𑀢𑀲𑁆𑀫𑀸𑀢𑀺𑀳𑀸𑀢𑀺 𑀢𑀲𑁆𑀫𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀲𑁆𑀫𑀸 𑀅𑀳𑀁 𑀚𑀸𑀦𑀦𑁆𑀢𑁄𑀯 ‘‘𑀚𑀸𑀦𑀸𑀫𑀻’’𑀢𑀺 𑀧𑀲𑁆𑀲𑀦𑁆𑀢𑁄 𑀏𑀯 𑀘 ‘‘𑀧𑀲𑁆𑀲𑀸𑀫𑀻’’𑀢𑀺 𑀯𑀤𑀸𑀫𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀺-𑀓𑀸𑀭 𑀳-𑀓𑀸𑀭𑀸 𑀦𑀺𑀧𑀸𑀢𑀸. 𑀇𑀳𑀸𑀢𑀺 𑀯𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄. 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀺𑀩𑁆𑀩𑀦𑁆𑀢𑀺 𑀩𑀳𑀮𑀁 𑀫𑀳𑀦𑁆𑀢𑀁. 𑀳𑀺𑀭𑁄𑀢𑁆𑀢𑀧𑁆𑀧𑀜𑁆𑀘𑀸𑀢𑀺 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀉𑀧𑀲𑀗𑁆𑀓𑀫𑀦𑀢𑁄 𑀧𑀞𑀫𑀢𑀭𑀫𑁂𑀯 𑀉𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀲𑀢𑀺 𑀢𑁂𑀲𑀁 𑀧𑀼𑀭𑀢𑁄 𑀅𑀲𑁆𑀲 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀢𑀸 𑀲𑀡𑁆𑀞𑀸𑀢𑀺. 𑀬𑁄 𑀘 𑀣𑁂𑀭𑀸𑀤𑀻𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀢𑀺, 𑀣𑁂𑀭𑀸𑀤𑀬𑁄𑀧𑀺 𑀢𑀁 𑀲𑀳𑀺𑀭𑀺𑀓𑀸 𑀲𑀑𑀢𑁆𑀢𑀧𑁆𑀧𑀸 𑀘 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀆𑀦𑀺𑀲𑀁𑀲𑁄. 𑀓𑀼𑀲𑀮𑀽𑀧𑀲𑀁𑀳𑀺𑀢𑀦𑁆𑀢𑀺 𑀓𑀼𑀲𑀮𑀦𑀺𑀲𑁆𑀲𑀺𑀢𑀁, 𑀅𑀦𑀯𑀚𑁆𑀚𑀥𑀫𑁆𑀫𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀁 𑀢𑁂𑀦 𑀥𑀫𑁆𑀫𑁂𑀦 𑀅𑀝𑁆𑀞𑀺𑀓𑀁 𑀓𑀢𑁆𑀯𑀸, 𑀢𑀁 𑀯𑀸 𑀥𑀫𑁆𑀫𑀁 ‘‘𑀏𑀲 𑀫𑀬𑁆𑀳𑀁 𑀥𑀫𑁆𑀫𑁄’’𑀢𑀺 𑀅𑀝𑁆𑀞𑀺𑀁 𑀓𑀢𑁆𑀯𑀸. 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑁄𑀓𑀫𑁆𑀧𑀺 𑀩𑀳𑀺 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑁄 ¶ 𑀲𑀩𑁆𑀩𑁂𑀦 𑀲𑀫𑀦𑁆𑀦𑀸𑀳𑀸𑀭𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀑𑀳𑀺𑀢𑀲𑁄𑀢𑁄𑀢𑀺 𑀞𑀧𑀺𑀢𑀲𑁄𑀢𑁄, 𑀥𑀫𑁆𑀫𑁂 𑀦𑀺𑀳𑀺𑀢𑀲𑁄𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀢𑁂 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀜𑀸𑀡𑀲𑁄𑀢𑀜𑁆𑀘 𑀧𑀲𑀸𑀤𑀲𑁄𑀢𑀜𑁆𑀘 𑀑𑀤𑀳𑀺𑀢𑁆𑀯𑀸 ‘‘𑀫𑀬𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀓𑁆𑀓𑀘𑁆𑀘𑀫𑁂𑀯 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀜𑁆𑀳𑀺 𑀢𑁂 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀻𑀢𑀺 𑀅𑀲𑀼𑀪𑁂𑀲𑀼 𑀘𑁂𑀯 𑀆𑀦𑀸𑀧𑀸𑀦𑁂 𑀘 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀓𑀸𑀬𑀕𑀢𑀸𑀲𑀢𑀺. 𑀬𑁄 𑀘 𑀧𑀦𑀸𑀬𑀁 𑀢𑀺𑀯𑀺𑀥𑁄 𑀑𑀯𑀸𑀤𑁄, 𑀣𑁂𑀭𑀲𑁆𑀲 𑀅𑀬𑀫𑁂𑀯 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀅𑀳𑁄𑀲𑀺.

𑀓𑀲𑀺𑀡𑀸𑀭𑀫𑁆𑀫𑀡𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀭𑀽𑀧𑀲𑀜𑁆𑀜𑀸. 𑀲𑀜𑁆𑀜𑀸𑀲𑀻𑀲𑁂𑀦 𑀳𑁂𑀢𑁆𑀣 𑀛𑀸𑀦𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀘 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀪𑀸𑀕𑀸𑀭𑀫𑁆𑀫𑀡𑀢𑁆𑀢𑀸 ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁. 𑀲𑁄𑀧𑀸𑀓𑀲𑀸𑀫𑀡𑁂𑀭𑁄 𑀪𑀕𑀯𑀢𑀸 𑀧𑀼𑀝𑁆𑀞𑁄 ‘‘𑀏𑀢𑁂 𑀤𑁆𑀯𑁂 𑀭𑀽𑀧𑀸𑀯𑀘𑀭𑀪𑀸𑀯𑁂𑀦 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 𑀆𑀳. 𑀆𑀭𑀤𑁆𑀥𑀘𑀺𑀢𑁆𑀢𑁄𑀢𑀺 𑀆𑀭𑀸𑀥𑀺𑀢𑀘𑀺𑀢𑁆𑀢𑁄. 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀸𑀤𑀺𑀉𑀧𑀲𑀫𑁆𑀧𑀤𑀸 𑀉𑀧𑀭𑀺 𑀯𑀺𑀢𑁆𑀣𑀸𑀭𑀢𑁄 𑀲𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀤𑀬𑁄𑀢𑀺 ¶ 𑀏𑀢𑁆𑀣 𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀯𑀺𑀳𑀢𑀢𑁆𑀢𑀸 𑀚𑀦𑁂𑀢𑀺, 𑀢𑀸𑀳𑀺 𑀯𑀸 𑀚𑀦𑀺𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑁄, 𑀓𑀮𑁆𑀬𑀸𑀡𑁄 𑀘 𑀲𑁄 𑀧𑀼𑀣𑀼𑀚𑁆𑀚𑀦𑁄 𑀘𑀸𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄, 𑀲𑁄 𑀆𑀤𑀺 𑀬𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀢𑁂 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀤𑀬𑁄. 𑀓𑀮𑁆𑀬𑀸𑀡𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀤𑁆𑀯𑀺𑀥𑀸 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁫𑁧);

𑀪𑀤𑁆𑀭𑀸𑀬 𑀧𑀜𑁆𑀜𑀸𑀬 𑀪𑀤𑁆𑀭𑀸𑀬 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀫𑀸𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀺𑀬𑀨𑀮𑀯𑀺𑀫𑀼𑀢𑁆𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀬𑀣𑀸𑀲𑀫𑁆𑀪𑀯𑁂𑀦 𑀘𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺 𑀲𑀻𑀮𑀸𑀤𑀬𑁄 𑀢𑀬𑁄 𑀏𑀯 𑀲𑀫𑁆𑀪𑀯𑀦𑁆𑀢𑀺, 𑀅𑀭𑀺𑀬𑀸𑀦𑀁 𑀧𑀦 𑀲𑀩𑁆𑀩𑁂𑀧𑀺 𑀲𑀻𑀮𑀸𑀤𑀬𑁄. 𑀲𑀸𑀭𑁄 𑀪𑀺𑀓𑁆𑀔𑀽𑀢𑀺𑀧𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀤𑀬𑁄𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑁂𑀳𑀺𑀬𑁂𑀯 𑀲𑀻𑀮𑀲𑀸𑀭𑀸𑀤𑀻𑀳𑀻’’𑀢𑀺𑀆𑀤𑀺. 𑀅𑀣 𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀔𑀻𑀡𑀸𑀲𑀯𑁄𑀯 𑀲𑀸𑀭𑁄 ¶ 𑀪𑀺𑀓𑁆𑀔𑀼 𑀦𑀸𑀫𑀸𑀢𑀺 𑀆𑀳 ‘‘𑀯𑀺𑀕𑀢𑀓𑀺𑀮𑁂𑀲𑀨𑁂𑀕𑁆𑀕𑀼𑀪𑀸𑀯𑀢𑁄 𑀯𑀸’’𑀢𑀺𑀆𑀤𑀺.

𑀬𑁄𑀧𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀲𑀻𑀮𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 ‘‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀕𑀫𑀺𑀲𑁆𑀲𑀸𑀫𑀻’’𑀢𑀺, 𑀲𑁄𑀧𑀺 𑀯𑀼𑀘𑁆𑀘𑀢𑀺 𑀲𑀺𑀓𑁆𑀔𑀢𑀻𑀢𑀺 𑀲𑁂𑀔𑁄𑀢𑀺 𑀆𑀳 ‘‘𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀲𑀢𑁆𑀢 𑀅𑀭𑀺𑀬𑀸𑀢𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸, 𑀳𑁂𑀝𑁆𑀞𑀺𑀫𑀸 𑀘 𑀢𑀬𑁄 𑀨𑀮𑀝𑁆𑀞𑀸𑀢𑀺 𑀇𑀫𑁂 𑀲𑀢𑁆𑀢 𑀅𑀭𑀺𑀬𑀸. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀸𑀤𑀺𑀓𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄𑀢𑀺 𑀯𑀸 𑀲𑁂𑀔𑁄. 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀬𑀫𑀸𑀦𑁄 𑀲𑀺𑀓𑁆𑀔𑀸𑀲𑀼 𑀚𑀸𑀬𑀢𑀺, 𑀦 𑀬𑁄𑀦𑀺𑀬𑀁. 𑀲𑀺𑀓𑁆𑀔𑀦𑀲𑀻𑀮𑁄𑀢𑀺 𑀯𑀸 𑀲𑁂𑀔𑁄, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀯𑀸 𑀓𑀣𑀸𑀬 𑀲𑁂𑀔𑀲𑁆𑀲 𑀅𑀬𑀦𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀫𑀕𑁆𑀕𑀨𑀮𑀢𑁆𑀢𑀬𑀥𑀫𑁆𑀫𑀸 𑀲𑁂𑀔𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸. 𑀅𑀲𑁂𑀔𑁄𑀢𑀺 𑀘 𑀬𑀢𑁆𑀣 𑀲𑁂𑀔𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑀢𑁆𑀣𑀸𑀬𑀁 𑀧𑀝𑀺𑀲𑁂𑀥𑁄𑀢𑀺 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑁂𑀲𑀼 𑀅𑀲𑁂𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀳𑀺 𑀲𑀺𑀓𑁆𑀔𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸, 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀫𑀦𑀢𑁄 ¶ 𑀏𑀢𑀸 𑀲𑀺𑀓𑁆𑀔𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀅𑀝𑁆𑀞𑀲𑀼𑀧𑀺 𑀫𑀕𑁆𑀕𑀨𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀲𑀫𑀗𑁆𑀕𑀺𑀦𑁄 𑀯𑀺𑀬 𑀅𑀭𑀳𑀢𑁆𑀢𑀨𑀮𑀲𑀫𑀗𑁆𑀕𑀻𑀧𑀺 𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀅𑀭𑀳𑀢𑁄 𑀇𑀢𑀭𑁂𑀲𑀁 𑀯𑀺𑀬 𑀲𑁂𑀔𑀢𑁆𑀢𑁂 𑀲𑀢𑀺 𑀲𑁂𑀔𑀲𑁆𑀲 𑀅𑀬𑀦𑁆𑀢𑀺, 𑀲𑀺𑀓𑁆𑀔𑀸 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀘 𑀲𑁂𑀔𑁄𑀢𑀺 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀲𑁂𑀔𑁄’’𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀔𑀪𑀸𑀯𑀧𑀝𑀺𑀲𑁂𑀥𑁄 𑀓𑀢𑁄. 𑀅𑀭𑀳𑀢𑁆𑀢𑀨𑀮𑁂𑀳𑀺 𑀧𑀯𑀢𑁆𑀢𑀫𑀸𑀦𑀸 𑀲𑀺𑀓𑁆𑀔𑀸 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸 𑀦 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀓𑁂𑀯𑀮𑀁 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀦 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀦𑀸𑀧𑀺 𑀢𑀁𑀲𑀫𑀗𑁆𑀕𑀻 𑀲𑁂𑀔𑀯𑀘𑀦𑀁, 𑀦 𑀘 𑀲𑀺𑀓𑁆𑀔𑀦𑀲𑀻𑀮𑁄, 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦 𑀲𑀺𑀓𑁆𑀔𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀲𑁂𑀔𑀯𑀘𑀦𑀁 𑀲𑀺𑀓𑁆𑀔𑀦𑀲𑀻𑀮𑀸, 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺 ‘‘𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀔𑀸’’𑀢𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸, ‘‘𑀦 𑀲𑀺𑀓𑁆𑀔𑀢𑀻𑀢𑀺 𑀅𑀲𑁂𑀔𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑁄 𑀤𑀲𑁆𑀲𑀺𑀢𑁄, 𑀦 𑀲𑀺𑀓𑁆𑀔𑀸𑀬 𑀭𑀳𑀺𑀢𑁄𑀢𑀺 𑀆𑀳 𑁋 ‘‘𑀲𑁂𑀓𑁆𑀔𑀥𑀫𑁆𑀫𑁂 𑀅𑀢𑀺𑀓𑁆𑀓𑀫𑁆𑀫 ¶ …𑀧𑁂… 𑀔𑀻𑀡𑀸𑀲𑀯𑁄 𑀅𑀲𑁂𑀔𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀲𑀺𑀓𑁆𑀔𑁄 𑀯𑀸 𑀅𑀲𑁂𑀔𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑁂𑀔𑀥𑀫𑁆𑀫𑁂𑀲𑀼 𑀏𑀯 𑀞𑀺𑀢𑀲𑁆𑀲 𑀓𑀲𑁆𑀲𑀘𑀺 𑀅𑀭𑀺𑀬𑀲𑁆𑀲 𑀅𑀲𑁂𑀔𑀪𑀸𑀯𑀸𑀧𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀥𑀫𑁆𑀫𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀲𑁂𑀔𑀸𑀢𑀺 𑀓𑀢𑁆𑀯𑀸 𑀢𑀁𑀲𑀫𑀗𑁆𑀕𑀺𑀦𑁄 𑀅𑀕𑁆𑀕𑀫𑀕𑁆𑀕𑀝𑁆𑀞𑀲𑁆𑀲 𑀅𑀲𑁂𑀔𑀪𑀸𑀯𑁄 𑀆𑀧𑀦𑁆𑀦𑁄𑀢𑀺? 𑀦, 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀢𑁄. 𑀅𑀭𑀳𑀢𑁆𑀢𑀫𑀕𑁆𑀕𑀢𑁄 𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀓𑀭𑀡𑀁 𑀯𑀺𑀧𑀸𑀓𑀪𑀸𑀯𑀜𑁆𑀘, 𑀢𑀲𑁆𑀫𑀸 𑀢𑁂 𑀏𑀯 𑀲𑁂𑀔𑀸 𑀅𑀕𑁆𑀕𑀨𑀮𑀥𑀫𑁆𑀫𑀪𑀸𑀯𑀁 𑀆𑀧𑀦𑁆𑀦𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀼𑀲𑀮𑀲𑀼𑀔𑀢𑁄 𑀘 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀢𑀁𑀲𑀫𑀗𑁆𑀕𑀻 𑀅𑀲𑁂𑀔𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦. 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀅𑀥𑀺𑀓𑀸𑀭𑀢𑁆𑀢𑀸 ‘‘𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑁂’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀦𑁆𑀦𑀁 𑀯𑀕𑁆𑀕𑁄 𑀲𑀫𑀽𑀳𑁄𑀢𑀺 𑀧𑀜𑁆𑀘𑀯𑀕𑁆𑀕𑁄, 𑀧𑀜𑁆𑀘𑀧𑀭𑀺𑀫𑀸𑀡𑀬𑀼𑀢𑁆𑀢𑁄 𑀯𑀸 𑀯𑀕𑁆𑀕𑁄 𑀧𑀜𑁆𑀘𑀯𑀕𑁆𑀕𑁄, 𑀢𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀁. 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽𑀢𑀺 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽. 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀓𑀫𑁆𑀫𑀸𑀭𑀳𑀸 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀅𑀦𑀼𑀓𑁆𑀔𑀺𑀢𑁆𑀢𑀸 𑀘. 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀧𑀜𑁆𑀘𑁂𑀯 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀏𑀢𑁆𑀢𑀓𑁂𑀳𑀺𑀧𑀺 𑀓𑀫𑁆𑀫𑀲𑀺𑀤𑁆𑀥𑀺𑀢𑁄, 𑀇𑀢𑀭𑁂 𑀙𑀦𑁆𑀤𑀸𑀭𑀳𑀸. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀜𑀢𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀘𑁆𑀘𑀢𑀺, 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑀺𑀦𑁆𑀦𑀸 𑀜𑀢𑁆𑀢𑀺 𑀢𑀸𑀲𑀁 𑀘𑀢𑀼𑀢𑁆𑀣𑀸𑀢𑀺 𑀓𑀢𑁆𑀯𑀸 ‘‘𑀜𑀢𑁆𑀢𑀺𑀘𑀢𑀼𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀧𑁆𑀧𑀯𑀢𑁆𑀢𑀺𑀓𑁆𑀓𑀫𑁂𑀦 𑀧𑀦 ‘‘𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀉𑀲𑁆𑀲𑀸𑀯𑀦𑀲𑀻𑀫𑀸𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀏𑀢𑁆𑀣 𑀯𑀢𑁆𑀣𑀽𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀧𑀼𑀕𑁆𑀕𑀮𑁄, 𑀲𑁄 𑀞𑀧𑁂𑀢𑁆𑀯𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 ¶ 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀁 𑀧𑀡𑁆𑀟𑀓𑀸𑀤𑀬𑁄 𑀘 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀯𑁂𑀤𑀺𑀢𑀩𑁆𑀩𑁄. 𑀊𑀦𑀯𑀻𑀲𑀢𑀺𑀯𑀲𑁆𑀲𑀸𑀤𑀬𑁄 𑀳𑀺 𑀢𑁂𑀭𑀲 𑀧𑀼𑀕𑁆𑀕𑀮𑀸 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼, 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀲𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺.

𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀜𑀢𑁆𑀢𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀜𑁆𑀘𑀸𑀢𑀺 𑀇𑀫𑁂 𑀢𑀸𑀯 𑀧𑀜𑁆𑀘 𑀜𑀢𑁆𑀢𑀺𑀤𑁄𑀲𑀸. 𑀢𑀢𑁆𑀣 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀅𑀓𑀺𑀢𑁆𑀢𑀦𑀁 𑀯𑀢𑁆𑀣𑀼𑀅𑀧𑀭𑀸𑀫𑀲𑀦𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺 𑀏𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀲𑀗𑁆𑀖𑁄’’𑀢𑀺 𑀅𑀪𑀡𑀦𑀁 𑀲𑀗𑁆𑀖𑀅𑀧𑀭𑀸𑀫𑀲𑀦𑀁 𑀦𑀸𑀫. ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀅𑀓𑀺𑀢𑁆𑀢𑀦𑀁 𑀧𑀼𑀕𑁆𑀕𑀮𑀅𑀧𑀭𑀸𑀫𑀲𑀦𑀁 ¶ 𑀦𑀸𑀫. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀬𑀸 𑀅𑀦𑀼𑀘𑁆𑀘𑀸𑀭𑀡𑀁 𑀜𑀢𑁆𑀢𑀺𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀔𑀫𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀜𑀢𑁆𑀢𑀺𑀓𑀺𑀢𑁆𑀢𑀦𑀁 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀁 𑀦𑀸𑀫. 𑀇𑀢𑀺 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀜𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀁 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫.

𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀸𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀅𑀓𑀸𑀮𑁂 𑀲𑀸𑀯𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑀸. 𑀢𑀢𑁆𑀣 𑀯𑀢𑁆𑀣𑀸𑀤𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀢𑀻𑀲𑀼 𑀧𑀦 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀢𑁂𑀲𑀁 𑀅𑀧𑀭𑀸𑀫𑀲𑀦𑀁 𑀅𑀧𑀭𑀸𑀫𑀲𑀦𑀫𑁂𑀯, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀓𑀫𑁆𑀫𑀯𑀸𑀘𑀁 𑀅𑀯𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀓𑀺𑀢𑁆𑀢𑀦𑀫𑁂𑀯. 𑀅𑀣 𑀯𑀸 𑀧𑀦 𑀓𑀫𑁆𑀫𑀯𑀸𑀘𑀩𑁆𑀪𑀦𑁆𑀢𑀭𑁂 𑀅𑀓𑁆𑀔𑀭𑀲𑁆𑀲 𑀯𑀸 𑀧𑀤𑀲𑁆𑀲 𑀯𑀸 𑀅𑀦𑀼𑀘𑁆𑀘𑀸𑀭𑀡𑀁 𑀯𑀸 𑀤𑀼𑀭𑀼𑀘𑁆𑀘𑀸𑀭𑀡𑀁 𑀯𑀸 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀦𑀸𑀫. 𑀲𑀸𑀯𑀦𑀸𑀬 𑀅𑀦𑁄𑀓𑀸𑀲𑁂 𑀧𑀞𑀫𑀁 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀁 𑀅𑀓𑀸𑀮𑁂 𑀲𑀸𑀯𑀦𑀁 𑀦𑀸𑀫. 𑀇𑀢𑀺 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀲𑀫𑁆𑀧𑀦𑁆𑀦𑀁 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫.

𑀯𑀺𑀧𑀢𑁆𑀢𑀺𑀲𑀻𑀫𑀸𑀮𑀓𑁆𑀔𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀸𑀬 𑀧𑀦 𑀲𑀻𑀫𑀸𑀬 𑀓𑀢𑀁 𑀲𑀻𑀫𑀸𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀅𑀦𑀸𑀕𑀫𑀦𑀁, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀅𑀦𑀸𑀳𑀭𑀡𑀁, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀧𑀝𑀺𑀓𑁆𑀓𑁄𑀲𑀦𑀦𑁆𑀢𑀺 𑀇𑀫𑁂 𑀧𑀦 𑀢𑀬𑁄 𑀧𑀭𑀺𑀲𑀤𑁄𑀲𑀸, 𑀢𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀧𑀭𑀺𑀲𑀸𑀬 𑀓𑀢𑀁 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫.

𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀸𑀘𑀸𑀲𑀗𑁆𑀔𑀸𑀢𑀁 𑀪𑀕𑀯𑀢𑁄 𑀯𑀘𑀦𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀓𑀭𑀡𑀲𑁆𑀲 𑀓𑀸𑀭𑀡𑀢𑁆𑀢𑀸 𑀞𑀸𑀦𑀁, 𑀬𑀣𑀸 𑀘 𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀪𑀕𑀯𑀢𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸 𑀓𑀢𑀢𑁆𑀢𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀬𑀣𑀸𑀯𑀼𑀢𑁆𑀢𑀁 𑀅𑀦𑀽𑀦𑀁 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀘 𑀅𑀯𑀼𑀢𑁆𑀢𑀁 𑀞𑀸𑀦𑀸𑀭𑀳𑀁. 𑀬𑀣𑀸 𑀓𑀢𑁆𑀢𑀩𑁆𑀩𑀦𑁆𑀢𑀺 𑀳𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀢𑀣𑀸 𑀅𑀓𑀢𑁂 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀦 𑀢𑀁 𑀞𑀸𑀦𑀸𑀭𑀳𑀁. 𑀢𑁂𑀦𑀸𑀳 ‘‘𑀓𑀸𑀭𑀡𑀸𑀭𑀳𑁂𑀦 𑀲𑀢𑁆𑀣𑀼𑀲𑀸𑀲𑀦𑀸𑀭𑀳𑁂𑀦𑀸’’𑀢𑀺. 𑀇𑀫𑀺𑀦𑀸 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀢𑁆𑀢𑀺 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦𑀸’’𑀢𑀺 ¶ 𑀇𑀫𑀺𑀦𑀸 𑀧𑀦 𑀧𑀭𑀺𑀲𑀲𑀫𑁆𑀧𑀢𑁆𑀢𑀺 𑀓𑀣𑀺𑀢𑀸𑀯. ‘‘𑀅𑀓𑀼𑀧𑁆𑀧𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀸𑀭𑀺𑀲𑁂𑀲𑀢𑁄 𑀯𑀢𑁆𑀣𑀼𑀲𑀻𑀫𑀸𑀲𑀫𑁆𑀧𑀢𑁆𑀢𑀺𑀬𑁄 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀓𑀼𑀧𑁆𑀧𑀮𑀓𑁆𑀔𑀡𑀁 𑀏𑀓𑀢𑁆𑀣 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀓𑀼𑀧𑁆𑀧𑁂𑀦𑀸𑀢𑀺 𑀇𑀫𑀲𑁆𑀲 ‘‘𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀸𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀓𑁄𑀧𑁂𑀢𑀩𑁆𑀩𑀢𑀁 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀁 𑀉𑀧𑀕𑀢𑁂𑀦𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀞𑀸𑀦𑀸𑀭𑀳𑁂𑀦𑀸𑀢𑀺𑀏𑀢𑁆𑀣 ‘𑀦 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’𑀢𑀺𑀆𑀤𑀺 (𑀫𑀳𑀸𑀯. 𑁧𑁧𑁯) 𑀲𑀢𑁆𑀣𑀼𑀲𑀸𑀲𑀦𑀁 𑀞𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺.

‘‘𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 ¶ 𑀓𑀫𑁆𑀫𑁂𑀦𑀸’’𑀢𑀺 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀧𑀲𑀗𑁆𑀕𑀢𑁄 𑀆𑀳𑀭𑀺𑀢𑁆𑀯𑀸 𑀬𑀁 𑀓𑀫𑁆𑀫𑀮𑀓𑁆𑀔𑀡𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀧𑀜𑁆𑀘𑀺𑀢𑀁, 𑀢𑀁 𑀬𑀣𑀸𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀤𑀲𑁆𑀲𑁂𑀢𑀼𑀓𑀸𑀫𑁄 𑀇𑀥 𑀢𑀲𑁆𑀲 𑀅𑀯𑀘𑀦𑁂 𑀢𑀢𑁆𑀣 𑀯𑀘𑀦𑁂 𑀘 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸𑀢𑀺 𑀇𑀫𑀸𑀳𑀺 𑀉𑀧𑀲𑀫𑁆𑀧𑀤𑀸𑀳𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀮𑁄𑀓𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂 𑀅𑀪𑀩𑁆𑀩𑀢𑁆𑀢𑀸 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸𑀢𑀺 𑀇𑀫𑀸𑀲𑀜𑁆𑀘 𑀢𑀺𑀲𑁆𑀲𑀦𑁆𑀦𑀁 𑀉𑀧𑀲𑀫𑁆𑀧𑀤𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀁𑀬𑁂𑀯, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀧𑀭𑀺𑀲𑀼𑀤𑁆𑀥𑀸𑀦𑀁, 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀧𑀜𑁆𑀳𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀫𑀳𑀸𑀓𑀲𑁆𑀲𑀧𑀲𑁄𑀧𑀸𑀓𑀸𑀦𑀁, 𑀦 𑀘 𑀢𑁂 𑀪𑀩𑁆𑀩𑀸 𑀧𑀸𑀭𑀸𑀚𑀺𑀓𑀸𑀤𑀺𑀮𑁄𑀓𑀯𑀚𑁆𑀚𑀁 𑀆𑀧𑀚𑁆𑀚𑀺𑀢𑀼𑀁, 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀸𑀤𑀬𑁄 𑀘 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀸, 𑀅𑀬𑀜𑁆𑀘 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀏𑀢𑁆𑀣 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀯 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀧𑀦 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀜𑁆𑀜𑁂𑀧𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀸𑀤𑀬𑁄 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀧𑀺 𑀳𑀺 𑀲𑀳𑀲𑁂𑀬𑁆𑀬𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺𑀬𑁂𑀯. 𑀬𑀤𑀺 𑀏𑀯𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼𑀧𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽’’𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸𑀭𑀳𑀢𑁆𑀢𑀸 𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀘. 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀤𑀬𑁄 𑀳𑀺 𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸𑀭𑀳𑀸 𑀅𑀲𑀩𑁆𑀩𑀓𑀸𑀮𑀺𑀓𑀸 𑀘. 𑀢𑀣𑀸 𑀳𑀺 𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄𑀬𑁂𑀯 𑀣𑀸𑀯𑀭𑀸, 𑀲𑁂𑀲𑀸 𑀩𑀼𑀤𑁆𑀥𑁂 𑀥𑀭𑀫𑀸𑀦𑁂𑀬𑁂𑀯 𑀅𑀳𑁂𑀲𑀼𑀁. 𑀢𑁂𑀦𑁂𑀯 𑀘 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂𑀧𑀺 (𑀧𑀸𑀘𑀺. 𑁬𑁫𑁮) ‘‘𑀢𑀢𑁆𑀭 𑀬𑀸𑀬𑀁 𑀪𑀺𑀓𑁆𑀔𑀼𑀦𑀻 𑀲𑀫𑀕𑁆𑀕𑁂𑀦 𑀉𑀪𑀢𑁄𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸𑀬 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸𑀬 𑀘 𑀉𑀧𑀲𑀫𑁆𑀧𑀦𑁆𑀦𑀁 𑀅𑀦𑁆𑀢𑁄𑀓𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀯𑀼𑀢𑁆𑀢𑀸, 𑀦 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀸 𑀢𑀲𑁆𑀲𑀸 𑀉𑀧𑀲𑀫𑁆𑀧𑀤𑀸𑀬 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀪𑀸𑀯𑀢𑁄 ¶ 𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸. 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀳𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀏𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸𑀭𑀳𑀁 ¶ 𑀲𑀩𑁆𑀩𑀓𑀸𑀮𑀺𑀓𑀸𑀬 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀫𑁂𑀯 𑀕𑀳𑁂𑀢𑁆𑀯𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀘 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀦𑁆𑀦𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸. 𑀢𑀣𑀸 𑀳𑀺 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸’’𑀢𑀺 (𑀧𑀭𑀺. 𑁩𑁨𑁨) 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀦𑁆𑀦𑀸𑀤𑀬𑁄𑀧𑀺 𑀅𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀢𑀺𑀬𑀸 𑀅𑀘𑀺𑀢𑁆𑀢𑀓𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀲𑀳𑀲𑁂𑀬𑁆𑀬𑀸𑀤𑀺𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀸𑀭𑁄. 𑀬𑀁 𑀧𑀦𑁂𑀢𑁆𑀣 𑀇𑀢𑁄 𑀅𑀜𑁆𑀜𑀣𑀸 𑀓𑁂𑀦𑀘𑀺 𑀧𑀧𑀜𑁆𑀘𑀺𑀢𑀁, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑀦𑀺𑀭𑀼𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀺𑀩𑁆𑀩𑀘𑀦𑀯𑀲𑁂𑀦. 𑀅𑀪𑀺𑀮𑀸𑀧𑀯𑀲𑁂𑀦𑀸𑀢𑀺 𑀯𑁄𑀳𑀸𑀭𑀯𑀲𑁂𑀦. 𑀅𑀦𑀼𑀧𑁆𑀧𑀦𑁆𑀦𑀸𑀬 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀬 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸𑀬. 𑀕𑀼𑀡𑀯𑀲𑁂𑀦𑀸𑀢𑀺 𑀲𑀻𑀮𑀸𑀤𑀺𑀢𑀁𑀢𑀁𑀕𑀼𑀡𑀬𑁄𑀕𑀢𑁄. 𑀏𑀢𑁆𑀣 𑀘 𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀽𑀢𑀺 𑀦𑀺𑀩𑁆𑀩𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀲𑀸𑀚𑀻𑀯𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀆𑀲𑁂𑀯𑀺𑀢𑀩𑁆𑀩𑀸. 𑀉𑀢𑁆𑀢𑀫𑀦𑁆𑀢𑀺 𑀯𑀺𑀲𑀺𑀝𑁆𑀞𑀁. 𑀅𑀥𑀺𑀲𑀻𑀮𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀲𑀻𑀮𑀸𑀤𑀻𑀳𑀺𑀧𑀺 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀑𑀫𑀓𑀢𑀭𑀧𑁆𑀧𑀫𑀸𑀡𑀁 𑀙𑀢𑁆𑀢𑀁 𑀯𑀸 𑀥𑀚𑀁 𑀯𑀸 𑀉𑀧𑀸𑀤𑀸𑀬 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀁 ‘‘𑀅𑀢𑀺𑀙𑀢𑁆𑀢𑀁 𑀅𑀢𑀺𑀥𑀚𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀳𑀸𑀧𑀺 ‘‘𑀅𑀦𑀼𑀓𑁆𑀓𑀝𑁆𑀞𑀲𑀻𑀮𑀁 𑀉𑀧𑀸𑀤𑀸𑀬 𑀅𑀥𑀺𑀲𑀻𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀅𑀦𑀼𑀓𑁆𑀓𑀝𑁆𑀞𑀁 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀉𑀧𑀸𑀤𑀸𑀬 𑀅𑀥𑀺𑀘𑀺𑀢𑁆𑀢𑁂𑀦 𑀅𑀥𑀺𑀧𑀜𑁆𑀜𑀸𑀬 𑀘 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀲𑀻𑀮𑀸𑀤𑀺𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 ‘‘𑀓𑀢𑀫𑀁 𑀧𑀦𑁂𑀢𑁆𑀣 𑀲𑀻𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀗𑁆𑀕𑀲𑀻𑀮𑀁 𑀤𑀲𑀗𑁆𑀕𑀲𑀻𑀮𑁂𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 𑀯𑀺𑀲𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀲𑀻𑀮’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀁 𑀯𑀺𑀦𑀬𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁. 𑀢𑀜𑁆𑀳𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀭𑀡𑀁 𑀲𑀁𑀯𑀭𑁄 ¶ , 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁄 𑀏𑀯 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁.

𑀅𑀧𑀭𑁄 ¶ 𑀦𑀬𑁄 (𑀉𑀤𑀸. 𑀅𑀝𑁆𑀞. 𑁩𑁧; 𑀇𑀢𑀺𑀯𑀼. 𑀅𑀝𑁆𑀞. 𑁯𑁭) 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀺𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸. 𑀢𑀁 𑀧𑀸𑀢𑀺𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁧𑁦𑁦), ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘.

𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀺. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁪) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. ‘‘𑀓𑀡𑁆𑀞𑁂𑀓𑀸𑀴𑁄’’𑀢𑀺𑀆𑀤𑀻𑀦𑀁 𑀯𑀺𑀬𑀲𑁆𑀲 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀺, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁫-𑁫𑁭), 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀅. 𑀦𑀺. 𑁪.𑁯; 𑀇𑀢𑀺𑀯𑀼. 𑁧𑁫, 𑁧𑁦𑁫) 𑀘 𑀆𑀤𑀺. 𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀺, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁦; 𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 ¶ 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 𑀧𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 ¶ 𑀧𑀢𑀺𑀫𑁄𑀓𑁆𑀔𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁂𑀢𑀻𑀢𑀺 𑀅𑀢𑁆𑀣𑁄, 𑀧𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀫𑁄𑀓𑁆𑀔𑁄 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀢𑀺𑀫𑁄𑀓𑁆𑀔𑁄. 𑀲𑀻𑀮𑀲𑀁𑀯𑀭𑁄 𑀳𑀺 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀘 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄, 𑀧𑀢𑀺𑀫𑁄𑀓𑁆𑀔𑁄𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀺𑀯𑀢𑁆𑀢𑀢𑀺 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀢𑀺𑀫𑁄𑀓𑁆𑀔𑀁, 𑀧𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀯𑀭𑀢𑀺 𑀧𑀺𑀤𑀳𑀢𑀺 𑀏𑀢𑁂𑀦𑀸𑀢𑀺 𑀲𑀁𑀯𑀭𑁄, 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁄 𑀏𑀯 𑀲𑀻𑀮𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀅𑀢𑁆𑀣𑀢𑁄 𑀧𑀦 𑀢𑀢𑁄 𑀢𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀯𑀺𑀭𑀢𑀺𑀬𑁄 𑀘𑁂𑀯 𑀘𑁂𑀢𑀦𑀸 𑀘.

𑀅𑀥𑀺𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀦𑀯𑀲𑁂𑀲𑀢𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑀪𑀸𑀯𑀢𑁄 𑀘 𑀫𑀕𑁆𑀕𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀢𑁄 𑀘 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀅𑀥𑀺𑀓𑀁 𑀯𑀺𑀲𑀺𑀝𑁆𑀞𑀁 𑀲𑀻𑀮𑀁 𑀅𑀥𑀺𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀚𑁆𑀚𑁄𑀢𑀸𑀦𑀦𑁆𑀢𑀺 𑀆𑀮𑁄𑀓𑀸𑀦𑀁. 𑀦𑀦𑀼 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀥𑀫𑁆𑀫𑀢𑀸𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀢𑀺 𑀓𑀲𑁆𑀫𑀸 ‘‘𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸’’𑀢𑀺 ¶ 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀦 𑀳𑀺 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀫𑁆𑀧𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀦 𑀧𑀦 𑀢𑁂𑀲𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀇𑀤𑀁 𑀦𑀸𑀫 𑀳𑁄𑀢𑀻’’𑀢𑀺 𑀧𑀜𑁆𑀜𑀧𑀦𑀁 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀏𑀲 𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁 𑀩𑀮𑀦𑁆𑀢𑀺 𑀆𑀳 𑁋 ‘‘𑀩𑀼𑀤𑁆𑀥𑀸𑀬𑁂𑀯 𑀧𑀦𑀸’’𑀢𑀺𑀆𑀤𑀺. 𑀮𑁄𑀓𑀺𑀬𑀲𑀻𑀮𑀲𑁆𑀲 𑀅𑀥𑀺𑀲𑀻𑀮𑀪𑀸𑀯𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀕𑀳𑀝𑁆𑀞𑁂𑀲𑀼 𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀤𑀸𑀭𑀯𑀻𑀢𑀺𑀓𑁆𑀓𑀫𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑁂 𑀲𑀧𑀼𑀢𑁆𑀢𑀤𑀸𑀭𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀺.

𑀲𑀫𑀸𑀤𑀸𑀧𑀦𑀁 ¶ 𑀲𑀫𑀸𑀤𑀸𑀦𑀜𑁆𑀘𑀸𑀢𑀺 𑀅𑀜𑁆𑀜𑁂𑀲𑀁 𑀲𑀫𑀸𑀤𑀸𑀧𑀦𑀁 𑀲𑀬𑀁 𑀲𑀫𑀸𑀤𑀸𑀦𑀜𑁆𑀘. 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀢𑀺 𑀓𑀺𑀜𑁆𑀘𑀸𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀳𑁄𑀢𑀺𑀬𑁂𑀯, 𑀦 𑀧𑀦 𑀢𑁂 𑀢𑀢𑁆𑀣 𑀅𑀜𑁆𑀜𑁂 𑀲𑀫𑀸𑀤𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀦 𑀢𑁂𑀲𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀧𑀺 𑀅𑀥𑀺𑀧𑀜𑁆𑀜𑀢𑀸𑀲𑀸𑀥𑀦𑁂 ‘‘𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸’’𑀢𑀺 𑀯𑀘𑀦𑀁 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀺𑀬𑀘𑀺𑀢𑁆𑀢𑀲𑁆𑀲 𑀅𑀥𑀺𑀘𑀺𑀢𑁆𑀢𑀢𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀆𑀳. 𑀢𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀦𑁆𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀮𑁄𑀓𑀺𑀬𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻𑀢𑀺 𑀘 𑀇𑀫𑀺𑀦𑀸 𑀮𑁄𑀓𑀺𑀬𑀅𑀥𑀺𑀘𑀺𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻𑀢𑀺 𑀆𑀧𑀦𑁆𑀦𑀁. 𑀅𑀥𑀺𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 𑀘 ‘‘𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 ‘‘𑀲𑀸 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑁄𑀓𑀺𑀬𑀧𑀜𑁆𑀜𑀸𑀯𑀲𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀪𑀸𑀯𑁄 𑀢𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀤𑀜𑁆𑀘 𑀲𑀩𑁆𑀩𑀁 ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀅𑀬𑀜𑁆𑀳𑀺 𑀧𑀸𑀴𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀦 𑀇𑀢𑀭𑀸𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀮𑁄𑀓𑀺𑀬𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀫𑀸𑀧𑀦𑁆𑀦𑀲𑁆𑀲 𑀢𑀣𑀸𑀭𑀽𑀧𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀢𑁄 𑀅𑀥𑀺𑀘𑀺𑀢𑁆𑀢𑀢𑁄 ¶ 𑀅𑀥𑀺𑀧𑀜𑁆𑀜𑀢𑁄 𑀘 𑀧𑀭𑀺𑀳𑀸𑀦𑀺 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑁆𑀯𑀬𑀁 𑀲𑀫𑀸𑀧𑀦𑁆𑀦𑁂𑀦 𑀦 𑀲𑀓𑁆𑀓𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀦𑁆𑀢𑀺 𑀧𑀸𑀴𑀺𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀯𑀼𑀢𑁆𑀢𑀸. 𑀅𑀥𑀺𑀲𑀻𑀮𑀲𑀺𑀓𑁆𑀔𑀜𑁆𑀳𑀺 𑀬𑀸𑀯 𑀯𑀻𑀢𑀺𑀓𑁆𑀓𑀫𑀁 𑀦 𑀓𑀭𑁄𑀢𑀺, 𑀢𑀸𑀯 𑀲𑀫𑀸𑀧𑀦𑁆𑀦𑁄𑀯 𑀳𑁄𑀢𑀺. 𑀦 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀻𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀮𑁄𑀓𑀺𑀬𑀅𑀥𑀺𑀘𑀺𑀢𑁆𑀢𑀢𑁄 𑀅𑀥𑀺𑀧𑀜𑁆𑀜𑀢𑁄 𑀘 𑀧𑀭𑀺𑀳𑀸𑀬𑀺𑀢𑁆𑀯𑀸𑀧𑀺 𑀪𑀺𑀓𑁆𑀔𑀼𑀦𑁄 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀁 𑀓𑀤𑀸𑀘𑀺 𑀪𑀯𑁂𑀬𑁆𑀬𑀸𑀢𑀺 𑀢𑀁 𑀤𑁆𑀯𑀬𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸 𑀢𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀁 𑀦𑀸𑀫 𑀦 𑀓𑀤𑀸𑀘𑀺 𑀲𑀫𑁆𑀪𑀯𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀸𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀦𑀁𑀬𑁂𑀯 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀺 𑀤𑀺𑀦𑁆𑀦𑀁 𑀅𑀢𑁆𑀣𑀺 𑀬𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑁋

‘‘𑀢𑀢𑁆𑀣 𑀓𑀢𑀫𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀁? ‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸 ¶ 𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺 𑀬𑀸 𑀏𑀯𑀭𑀽𑀧𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀁. 𑀞𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡’’𑀦𑁆𑀢𑀺 (𑀯𑀺𑀪. 𑁭𑁯𑁩) 𑁋

𑀇𑀫𑀁 𑀯𑀺𑀪𑀗𑁆𑀕𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀢𑁆𑀣 (𑀯𑀺𑀪. 𑀅𑀝𑁆𑀞. 𑁭𑁯𑁩) 𑀅𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀤𑀺𑀦𑁆𑀦𑀧𑀘𑁆𑀘𑀬𑀸 𑀨𑀮𑀁 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀦𑁆𑀦𑀦𑁆𑀢𑀺 𑀘 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀁 𑀯𑀼𑀢𑁆𑀢𑀁. 𑀬𑀺𑀝𑁆𑀞𑀦𑁆𑀢𑀺 𑀫𑀳𑀸𑀬𑀸𑀕𑁄, 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀳𑀼𑀢𑀦𑁆𑀢𑀺 𑀧𑀳𑁄𑀦𑀓𑀲𑀓𑁆𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸𑀢𑀺 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀆𑀤𑀻𑀦𑀁 𑀨𑀮𑀲𑀫𑁆𑀪𑀯𑁄 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀜𑀸𑀡𑀁 ‘‘𑀇𑀤𑀁 𑀓𑀫𑁆𑀫𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’’𑀦𑁆𑀢𑀺 𑀚𑀸𑀦𑀸𑀢𑀺, 𑀇𑀤𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀇𑀤𑀁 𑀦 𑀲𑀓𑀓𑀫𑁆𑀫𑀁 𑀦𑀸𑀫, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀤𑀲𑀯𑀺𑀥𑀫𑁆𑀧𑀺 𑀲𑀼𑀘𑀭𑀺𑀢𑀁 𑀲𑀓𑀓𑀫𑁆𑀫𑀁 𑀦𑀸𑀫. 𑀅𑀢𑁆𑀢𑀦𑁄 𑀯𑀸𑀧𑀺 𑀳𑁄𑀢𑀼 𑀧𑀭𑀲𑁆𑀲 𑀯𑀸, 𑀲𑀩𑁆𑀩𑀫𑁆𑀧𑀺 𑀅𑀓𑀼𑀲𑀮𑀁 𑀦 𑀲𑀓𑀓𑀫𑁆𑀫𑀁 ¶ 𑀦𑀸𑀫. 𑀓𑀲𑁆𑀫𑀸? 𑀅𑀢𑁆𑀣𑀪𑀜𑁆𑀚𑀦𑀢𑁄 𑀅𑀦𑀢𑁆𑀣𑀚𑀦𑀦𑀢𑁄 𑀘. 𑀅𑀢𑁆𑀢𑀦𑁄 𑀯𑀸 𑀳𑁄𑀢𑀼 𑀧𑀭𑀲𑁆𑀲 𑀯𑀸, 𑀲𑀩𑁆𑀩𑀫𑁆𑀧𑀺 𑀓𑀼𑀲𑀮𑀁 𑀲𑀓𑀓𑀫𑁆𑀫𑀁 𑀦𑀸𑀫. 𑀓𑀲𑁆𑀫𑀸? 𑀅𑀦𑀢𑁆𑀣𑀪𑀜𑁆𑀚𑀦𑀢𑁄 𑀅𑀢𑁆𑀣𑀚𑀦𑀦𑀢𑁄 𑀘. 𑀏𑀯𑀁 𑀚𑀸𑀦𑀦𑀲𑀫𑀢𑁆𑀣𑁂 𑀇𑀫𑀲𑁆𑀫𑀺𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑁂 𑀞𑀢𑁆𑀯𑀸 𑀩𑀳𑀼𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀼𑀔𑁂𑀦 𑀲𑀼𑀔𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀞𑀧𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀘 𑀅𑀦𑀼𑀮𑁄𑀫𑀦𑀢𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸 𑀧𑀜𑁆𑀜𑀸 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀢𑀺𑀮𑀓𑁆𑀔𑀡𑀸𑀓𑀸𑀭𑀧𑀭𑀺𑀘𑁆𑀙𑁂𑀤𑀓𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀳𑀼𑀢𑁆𑀯𑀸 𑀅𑀪𑀸𑀯𑀸𑀤𑀺𑀆𑀓𑀸𑀭𑀧𑀅𑀘𑁆𑀙𑀺𑀦𑁆𑀤𑀦𑀓𑀁. 𑀅𑀥𑀺𑀧𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀫𑀕𑁆𑀕𑀧𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀥𑀺𑀧𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀅𑀦𑀼𑀪𑁄𑀢𑀺 𑀤𑁆𑀯𑀬𑀫𑁂𑀢𑀁, 𑀅𑀦𑀼𑀩𑀦𑁆𑀥𑀢𑀺 𑀓𑀸𑀭𑀓’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬);

𑀏𑀯𑀁 ¶ 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀘 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀁𑀯𑁂𑀕𑀯𑀢𑁆𑀣𑀼𑀢𑀸𑀬 𑀯𑀺𑀫𑀼𑀢𑁆𑀢𑀺𑀆𑀓𑀗𑁆𑀔𑀸𑀬 𑀧𑀘𑁆𑀘𑀬𑀪𑀽𑀢𑀸 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀮𑁄𑀓𑀺𑀬𑀧𑀜𑁆𑀜𑀸𑀬 𑀅𑀥𑀺𑀧𑀜𑁆𑀜𑀸𑀪𑀸𑀯𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁.

𑀲𑀳 𑀆𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀸𑀚𑀻𑀯𑁄𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀲𑀩𑁆𑀩𑀫𑁆𑀧𑀺…𑀧𑁂… 𑀢𑀲𑁆𑀫𑀸 𑀲𑀸𑀚𑀻𑀯𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 ‘‘𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁 𑀪𑀕𑀯𑀢𑁄 𑀯𑀘𑀦𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀸𑀧𑀤𑀁. 𑀲𑀪𑀸𑀕𑀯𑀼𑀢𑁆𑀢𑀺𑀦𑁄𑀢𑀺 𑀲𑀫𑀸𑀦𑀯𑀼𑀢𑁆𑀢𑀺𑀓𑀸, 𑀲𑀤𑀺𑀲𑀧𑁆𑀧𑀯𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀻𑀢𑀺 𑀏𑀢𑁆𑀣 𑀆𑀥𑁂𑀬𑁆𑀬𑀸𑀧𑁂𑀓𑁆𑀔𑀢𑁆𑀢𑀸 𑀅𑀥𑀺𑀓𑀭𑀡𑀲𑁆𑀲 𑀓𑀺𑀫𑀸𑀥𑁂𑀬𑁆𑀬𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀢𑀲𑁆𑀫𑀺’’𑀦𑁆𑀢𑀺 𑀅𑀥𑀺𑀓𑀭𑀡𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀆𑀳 𑁋 ‘‘𑀢𑀁 𑀲𑀺𑀓𑁆𑀔𑀸𑀧𑀤𑀁 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸’’𑀢𑀺, 𑀢𑀁 𑀲𑀸𑀚𑀻𑀯𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀸𑀧𑀤𑀁 ‘‘𑀬𑀣𑀸𑀲𑀺𑀓𑁆𑀔𑀸𑀧𑀤𑀁 𑀦𑀼 𑀔𑁄 𑀲𑀺𑀓𑁆𑀔𑀸𑀫𑀺, 𑀦 𑀲𑀺𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀯𑀲𑁂𑀦 𑀲𑀺𑀓𑁆𑀔𑀸𑀧𑀤𑀯𑀺𑀲𑀬𑀢𑁆𑀢𑀸 𑀢𑀤𑀸𑀥𑁂𑀬𑁆𑀬𑀪𑀽𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀭𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑀁 𑀓𑀭𑁄𑀦𑁆𑀢𑁂𑀦 ‘‘𑀬𑀁 𑀲𑀺𑀓𑁆𑀔𑀁 𑀲𑀸𑀚𑀻𑀯𑀜𑁆𑀘 𑀲𑀫𑀸𑀧𑀦𑁆𑀦𑁄, 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀲𑀺𑀓𑁆𑀔𑀢𑀺, 𑀢𑁂𑀦 ¶ 𑀯𑀼𑀘𑁆𑀘𑀢𑀺 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀫𑀯𑀢𑁆𑀯𑀸 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀓𑁂𑀯𑀮𑀜𑁆𑀘𑀸𑀬𑀫𑁂𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑀢𑀲𑁆𑀲𑀸 𑀘 𑀲𑀺𑀓𑁆𑀔𑀸𑀬𑀸𑀢𑀺 𑀢𑀲𑁆𑀲𑀸 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸𑀬 𑀲𑀺𑀓𑁆𑀔𑀸𑀬. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺

𑀲𑀻𑀮𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀯𑀸𑀭𑀺𑀢𑁆𑀢𑀲𑀻𑀮𑀯𑀲𑁂𑀦 𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀘𑁂𑀢𑀦𑀁 𑀘𑀸𑀭𑀺𑀢𑁆𑀢𑀲𑀻𑀮𑀯𑀲𑁂𑀦 𑀯𑀺𑀭𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀁 𑀘𑁂𑀢𑀦𑀜𑁆𑀘 𑀅𑀢𑁆𑀢𑀦𑀺 𑀧𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀺𑀓𑁆𑀔𑀢𑀻𑀢𑀺 ‘‘𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀪𑀕𑀯𑀢𑁄 𑀯𑀘𑀦𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀸𑀧𑀤𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀮𑀲𑀁𑀯𑀭𑀧𑀽𑀭𑀡𑀁 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑀦𑀜𑁆𑀘𑀸𑀢𑀺 𑀇𑀤𑀫𑁂𑀯 𑀘 𑀤𑁆𑀯𑀬𑀁 𑀇𑀥 𑀲𑀺𑀓𑁆𑀔𑀦𑀁 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑁄. 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑀢𑁄 𑀳𑀺 𑀬𑀸𑀯 𑀫𑀕𑁆𑀕𑀸 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺. 𑀅𑀧𑀺𑀘𑁂𑀢𑁆𑀣 ‘‘𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀢𑀺𑀘𑁂𑀢𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑀻𑀮𑀲𑀁𑀯𑀭𑀲𑁆𑀲 𑀯𑀺𑀲𑁂𑀲𑀢𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀓𑀸𑀮𑁄𑀯 𑀕𑀳𑀺𑀢𑁄, ‘‘𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀺𑀓𑁆𑀔𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀅𑀧𑁆𑀧𑀯𑀢𑁆𑀢𑀦𑀓𑀸𑀮𑁄𑀧𑀺. 𑀲𑀺𑀓𑁆𑀔𑀜𑁆𑀳𑀺 𑀧𑀭𑀺𑀧𑀽𑀭𑀡𑀯𑀲𑁂𑀦 𑀅𑀢𑁆𑀢𑀦𑀺 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀦𑀺𑀤𑁆𑀤𑀸𑀤𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 ‘‘𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀲𑀺𑀓𑁆𑀔𑀸𑀲𑀸𑀚𑀻𑀯𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸

‘‘𑀅𑀧𑁆𑀧𑀘𑁆𑀘𑀓𑁆𑀔𑀸𑀬 ¶ 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀬𑀸’’𑀢𑀺 𑀉𑀪𑀬𑀣𑀸𑀧𑀺 𑀧𑀸𑀞𑁄 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑁄. 𑀤𑀼𑀩𑁆𑀩𑀮𑁆𑀬𑁂 𑀆𑀯𑀺𑀓𑀢𑁂𑀧𑀻𑀢𑀺 ‘‘𑀬𑀁𑀦𑀽𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀤𑀼𑀩𑁆𑀩𑀮𑀪𑀸𑀯𑁂 𑀧𑀓𑀸𑀲𑀺𑀢𑁂𑀧𑀺. 𑀲𑀺𑀓𑁆𑀔𑀸𑀬 𑀧𑀦 𑀧𑀘𑁆𑀘𑀓𑁆𑀔𑀸𑀢𑀸𑀬𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀢𑀸𑀬. 𑀬𑀲𑁆𑀫𑀸 𑀤𑀺𑀭𑀢𑁆𑀢𑀯𑀘𑀦𑁂 𑀕𑀳𑀺𑀢𑁂 𑀢𑁂𑀦 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀁𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂, 𑀢𑀲𑁆𑀫𑀸 𑀤𑀺𑀭𑀢𑁆𑀢𑀯𑀘𑀦𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯 𑀧𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬𑀸’’𑀢𑀺. 𑀫𑀼𑀔𑀸𑀭𑀼𑀴𑁆𑀳𑀢𑀸𑀬𑀸𑀢𑀺 𑀬𑀲𑁆𑀫𑀸 𑀏𑀯𑀭𑀽𑀧𑀁 𑀯𑀘𑀦𑀁 𑀮𑁄𑀓𑀲𑁆𑀲 𑀫𑀼𑀔𑀫𑀸𑀭𑀼𑀴𑁆𑀳𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄.

𑀩𑁆𑀬𑀜𑁆𑀚𑀦𑀁 ¶ 𑀲𑀫𑁆𑀧𑀸𑀤𑁂𑀢𑀻𑀢𑀺 𑀢𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑀸𑀪𑀸𑀯𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀅𑀜𑁆𑀜𑀧𑀤𑁂𑀦 𑀤𑀻𑀧𑁂𑀦𑁆𑀢𑁄 𑀩𑁆𑀬𑀜𑁆𑀚𑀦𑀁 𑀲𑀫𑁆𑀧𑀸𑀤𑁂𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑁂𑀦 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀯𑀸𑀭𑀓𑀧𑀤𑀯𑀺𑀭𑀳𑀺𑀢𑀜𑁆𑀳𑀻’’𑀢𑀺𑀆𑀤𑀺. 𑀅𑀢𑁆𑀣𑀤𑀻𑀧𑀓𑀁 𑀧𑀤𑀁 𑀅𑀢𑁆𑀣𑀧𑀤𑀁.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀘𑀦𑀲𑁆𑀲. ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀪𑀬𑀫𑁆𑀧𑀺 𑀳𑁄𑀢𑀻𑀢𑀺 𑀆𑀳 𑁋 ‘‘𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀢𑁆𑀣𑁄 𑀳𑁄𑀢𑀻’’𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀘𑀦𑀲𑁆𑀲 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀧𑀤𑀢𑁆𑀣𑁄 𑀦 𑀳𑁄𑀢𑀺, 𑀢𑀣𑀸𑀧𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑁂 𑀤𑀼𑀩𑁆𑀩𑀮𑁆𑀬𑀸𑀯𑀺𑀪𑀸𑀯𑀲𑁆𑀲𑀧𑀺 𑀕𑀫𑁆𑀬𑀫𑀸𑀦𑀢𑁆𑀢𑀸 ‘‘𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀢𑁆𑀣𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀁 𑀲𑀦𑁆𑀥𑀸𑀬𑀸𑀢𑀺 𑀦𑀁 𑀅𑀢𑁆𑀣𑀪𑀽𑀢𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀲𑀦𑁆𑀥𑀸𑀬.

𑀯𑀺𑀲𑁂𑀲𑀸𑀯𑀺𑀲𑁂𑀲𑀦𑁆𑀢𑀺 𑀏𑀢𑁆𑀣 𑀬𑁂𑀦 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁, 𑀢𑀢𑁆𑀣 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀸𑀦𑀁 𑀅𑀢𑁆𑀣𑀺 𑀯𑀺𑀲𑁂𑀲𑁄. 𑀬𑁂𑀦 𑀧𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘𑁂𑀯 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀢𑀢𑁆𑀣 𑀦𑁂𑀯𑀢𑁆𑀣𑀺 𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀞𑀓𑀺𑀘𑁆𑀙𑀚𑀻𑀯𑀦𑁂𑀢𑀺 𑀥𑀸𑀢𑀽𑀲𑀼 𑀧𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀺𑀘𑁆𑀙𑀚𑀻𑀯𑀺𑀓𑀧𑁆𑀧𑀢𑁆𑀢𑁄’’𑀢𑀺. 𑀉𑀓𑁆𑀓𑀡𑁆𑀞𑀦𑀁 𑀉𑀓𑁆𑀓𑀡𑁆𑀞𑀸, 𑀓𑀺𑀘𑁆𑀙𑀚𑀻𑀯𑀺𑀓𑀸, 𑀢𑀁 𑀇𑀢𑁄 𑀧𑀢𑁆𑀢𑁄𑀢𑀺 𑀉𑀓𑁆𑀓𑀡𑁆𑀞𑀺𑀢𑁄. 𑀇𑀢𑁄𑀢𑀺 𑀇𑀢𑁄 𑀞𑀸𑀦𑀢𑁄, 𑀇𑀢𑁄 𑀯𑀺𑀳𑀸𑀭𑀢𑁄 𑀯𑀸. 𑀏𑀢𑁆𑀣𑀸𑀢𑀺 𑀕𑀦𑁆𑀢𑀼𑀫𑀺𑀘𑁆𑀙𑀺𑀢𑀁 𑀧𑀤𑁂𑀲𑀁 𑀯𑀤𑀢𑀺. 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀁𑀫𑀼𑀔𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀻𑀢𑀺 𑀆𑀳 ‘‘𑀉𑀤𑁆𑀥𑀁 𑀓𑀡𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀫𑀸𑀦𑁄’’𑀢𑀺.

𑀅𑀝𑁆𑀝𑀻𑀬𑀫𑀸𑀦𑁄𑀢𑀺 𑀏𑀢𑁆𑀣 𑀅𑀝𑁆𑀝𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 𑀅𑀝𑁆𑀝𑀻𑀬𑀢𑀻𑀢𑀺 𑀅𑀝𑁆𑀝𑀻𑀬𑀲𑀤𑁆𑀤𑀲𑁆𑀲 𑀅𑀦𑁆𑀢𑁄𑀕𑀥𑀉𑀧𑀫𑀸𑀦𑀪𑀽𑀢𑀓𑀫𑁆𑀫𑀢𑁆𑀢𑀸 ¶ 𑀉𑀧𑀫𑁂𑀬𑁆𑀬𑀪𑀽𑀢𑁂𑀦 𑀅𑀢𑁆𑀢𑀦𑀸𑀯 𑀲𑀓𑀫𑁆𑀫𑀓𑀢𑁆𑀢𑀁, 𑀦 𑀪𑀺𑀓𑁆𑀔𑀼𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀪𑀸𑀯𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑁂𑀦𑀸’’𑀢𑀺. 𑀦 𑀳𑀺 𑀲𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀫𑀺𑀯 𑀆𑀘𑀭𑀢𑀺, 𑀓𑀺𑀜𑁆𑀘𑀭𑀳𑀺 𑀅𑀢𑁆𑀢𑀸𑀦𑀁 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂𑀦 𑀓𑀭𑀡𑀪𑀽𑀢𑁂𑀦 𑀅𑀢𑁆𑀢𑀸𑀦𑀁 𑀅𑀝𑁆𑀝𑀻𑀬𑀫𑀸𑀦𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦’’𑀦𑁆𑀢𑀺. 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑁂𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀓𑀭𑀡𑀢𑁆𑀣𑁂𑀬𑁂𑀯 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀬𑀣𑀸𑀮𑀓𑁆𑀔𑀡𑀁 𑀓𑀭𑀡𑀯𑀘𑀦𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀓𑀢𑁆𑀢𑀼𑀅𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀢𑁂𑀦 𑀯𑀸 𑀪𑀺𑀓𑁆𑀔𑀼𑀪𑀸𑀯𑁂𑀦𑀸’’𑀢𑀺𑀆𑀤𑀺, 𑀢𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀪𑀺𑀓𑁆𑀔𑀼𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀅𑀝𑁆𑀝𑀁 𑀓𑀭𑁄𑀢𑀻𑀢𑀺 𑀅𑀝𑁆𑀝𑀻𑀬𑀢𑀻𑀢𑀺 ¶ 𑀅𑀝𑁆𑀝𑀻𑀬-𑀲𑀤𑁆𑀤𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀢𑁄 𑀓𑀫𑁆𑀫𑀦𑀺 𑀫𑀸𑀦-𑀲𑀤𑁆𑀤𑁂 𑀓𑀢𑁂 ‘‘𑀅𑀝𑁆𑀝𑀻𑀬𑀫𑀸𑀦𑁄’’𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 𑁋 ‘‘𑀅𑀝𑁆𑀝𑁄 𑀓𑀭𑀺𑀬𑀫𑀸𑀦𑁄 𑀧𑀻𑀴𑀺𑀬𑀫𑀸𑀦𑁄’’𑀢𑀺. 𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀇𑀫𑀺𑀦𑀸 𑀧𑀦 𑀲𑀫𑁆𑀩𑀦𑁆𑀥𑁂 𑀓𑀭𑀺𑀬𑀫𑀸𑀦𑁂 𑀪𑀺𑀓𑁆𑀔𑀼𑀪𑀸𑀯𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀏𑀯 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀅𑀲𑀼𑀘𑀺𑀁 𑀯𑀺𑀬 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄’’𑀢𑀺, 𑀢𑀁 𑀪𑀺𑀓𑁆𑀔𑀼𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀘𑀸𑀳𑀦𑁆𑀢𑀺 𑀲𑀘𑁂 𑀅𑀳𑀁.

𑀧𑀘𑁆𑀘𑀓𑁆𑀔𑀸𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀧𑀘𑁆𑀘𑀓𑁆𑀔𑁂𑀬𑁆𑀬𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀸𑀦𑀸𑀓𑀸𑀭𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀸𑀦𑀺. 𑀪𑀸𑀯𑀯𑀺𑀓𑀧𑁆𑀧𑀸𑀓𑀸𑀭𑁂𑀦𑀸𑀢𑀺 ‘‘𑀅𑀲𑁆𑀲𑀁 𑀅𑀲𑁆𑀲’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀬𑀁 𑀬𑀁 𑀪𑀯𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀢𑀲𑁆𑀲 𑀪𑀸𑀯𑀲𑁆𑀲 𑀯𑀺𑀓𑀧𑁆𑀧𑀸𑀓𑀸𑀭𑁂𑀦, 𑀪𑀺𑀓𑁆𑀔𑀼𑀪𑀸𑀯𑀢𑁄 𑀅𑀜𑁆𑀜𑀪𑀸𑀯𑀯𑀺𑀓𑀧𑁆𑀧𑀸𑀓𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁦. 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀅𑀢𑁆𑀢𑀦𑁄 𑀢𑀢𑁆𑀣 𑀢𑀢𑁆𑀣 𑀉𑀲𑁆𑀲𑀳𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀯𑀺𑀲𑀳𑀸𑀫𑀻𑀢𑀺 𑀏𑀓𑀪𑀢𑁆𑀢𑀸𑀤𑀻𑀦𑀁 𑀅𑀲𑀬𑁆𑀳𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀭𑀫𑀸𑀫𑀻𑀢𑀺 ‘‘𑀧𑀩𑁆𑀩𑀚𑁆𑀚𑀸𑀫𑀽𑀮𑀓𑀁 𑀦𑀢𑁆𑀣𑀺 𑀫𑁂 𑀲𑀼𑀔’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀪𑀺𑀭𑀫𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀸𑀭𑁂 𑀞𑀢𑁆𑀯𑀸 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 ‘‘𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀘𑀺𑀢𑁆𑀢𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. ‘‘𑀩𑀼𑀤𑁆𑀥𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀔𑁂𑀢𑁆𑀢𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀮𑁄𑀓𑁂 𑀲𑀲𑁆𑀲𑀸𑀦𑀁 𑀭𑀼𑀳𑀦𑀝𑁆𑀞𑀸𑀦𑀁 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀭𑀼𑀳𑀦𑀝𑁆𑀞𑀸𑀦𑀢𑁆𑀢𑀸 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀘𑁆𑀘𑀓𑁆𑀔𑀸𑀫𑀺 𑀥𑀸𑀭𑁂𑀳𑀻’’𑀢𑀺 𑀏𑀢𑁂𑀦 𑀓𑀸𑀮𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. ‘‘𑀯𑀤𑀢𑀻’’𑀢𑀺 𑀇𑀫𑀺𑀦𑀸 𑀧𑀬𑁄𑀕𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀓𑀺𑀦𑁆𑀦𑀼 𑀫𑁂 𑀩𑀼𑀤𑁆𑀥𑁂𑀦, 𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦, 𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀻𑀳𑀺 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦𑀧𑀺 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀚𑀸𑀦𑀦𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. ‘‘𑀉𑀫𑁆𑀫𑀢𑁆𑀢𑀓𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀻’’𑀢𑀺𑀆𑀤𑀻𑀳𑀺 𑀧𑀼𑀕𑁆𑀕𑀮𑀦𑀺𑀬𑀫𑀁 𑀤𑀲𑁆𑀲𑁂𑀢𑀺. ‘‘𑀅𑀭𑀺𑀬𑀓𑁂𑀦 𑀫𑀺𑀮𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀘 𑀦𑀧𑁆𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺𑀆𑀤𑀻𑀳𑀺 𑀧𑀼𑀕𑁆𑀕𑀮𑀸𑀤𑀺𑀦𑀺𑀬𑀫𑁂 𑀲𑀢𑀺𑀧𑀺 𑀯𑀺𑀚𑀸𑀦𑀦𑀦𑀺𑀬𑀫𑀸𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺 ¶ . ‘‘𑀤𑀯𑀸𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺𑀆𑀤𑀻𑀳𑀺 𑀔𑁂𑀢𑁆𑀢𑀸𑀤𑀺𑀦𑀺𑀬𑀫𑁂 𑀲𑀢𑀺𑀧𑀺 𑀘𑀺𑀢𑁆𑀢𑀦𑀺𑀬𑀫𑀸𑀪𑀸𑀯𑁂𑀦 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀦𑀺𑀬𑀫𑁂𑀧𑀺 𑀲𑀢𑀺 𑀧𑀬𑁄𑀕𑀦𑀺𑀬𑀫𑀸𑀪𑀸𑀯𑁂𑀦 𑀦 𑀭𑀼𑀳𑀢𑀻𑀢𑀺 ¶ 𑀤𑀲𑁆𑀲𑁂𑀢𑀺. ‘‘𑀅𑀯𑀺𑀜𑁆𑀜𑀼𑀲𑁆𑀲 𑀲𑀸𑀯𑁂𑀢𑀺, 𑀯𑀺𑀜𑁆𑀜𑀼𑀲𑁆𑀲 𑀦 𑀲𑀸𑀯𑁂𑀢𑀻’’𑀢𑀺 𑀏𑀢𑁂𑀳𑀺 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀦𑀺𑀬𑀫𑁂𑀧𑀺 𑀲𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀲𑀸𑀯𑁂𑀢𑀺, 𑀢𑀲𑁆𑀲𑁂𑀯 𑀲𑀯𑀦𑁂𑀦 𑀭𑀼𑀳𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀩𑁆𑀩𑀲𑁄 𑀯𑀸 𑀧𑀦 𑀦 𑀲𑀸𑀯𑁂𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺 𑀇𑀤𑀁 𑀧𑀦 𑀘𑀺𑀢𑁆𑀢𑀸𑀤𑀺𑀦𑀺𑀬𑀫𑁂𑀦𑁂𑀯 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀦𑀺𑀬𑀫𑀯𑀲𑁂𑀦 𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀦𑀁 𑀜𑀢𑁆𑀯𑀸 𑀢𑀤𑀪𑀸𑀯𑁂𑀦 𑀅𑀧𑁆𑀧𑀘𑁆𑀘𑀓𑁆𑀔𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁? 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦𑁂𑀯 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀤𑀯𑀸 𑀯𑀸 𑀭𑀯𑀸 𑀯𑀸 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀣𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀘𑀢𑀼𑀤𑁆𑀤𑀲𑀦𑁆𑀦𑀁, ‘‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀺, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄, 𑀢𑀺𑀢𑁆𑀣𑀺𑀬𑁄, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄, 𑀅𑀲𑁆𑀲𑀫𑀡𑁄, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀕𑀺𑀳𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑁂𑀯𑀘𑀦𑀲𑁆𑀲 𑀯𑀲𑁂𑀦 𑀢𑁂𑀲𑀼 𑀘 𑀬𑀁𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀬𑀁𑀓𑀺𑀜𑁆𑀘𑀺 𑀯𑀤𑀢𑁄𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀲𑁆𑀲. 𑀏𑀯𑀁 𑀔𑁂𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀢𑁆𑀣 𑀬𑀤𑁂𑀢𑀁 ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘 ‘‘𑀫𑀁 𑀥𑀸𑀭𑁂𑀳𑀻’’𑀢𑀺 𑀘 𑀯𑀼𑀢𑁆𑀢𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁, 𑀬𑀸𑀦𑀺 𑀘 ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀓𑀺𑀦𑁆𑀦𑀼 𑀫𑁂 𑀩𑀼𑀤𑁆𑀥𑁂𑀦, 𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦, 𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀔𑁆𑀬𑀸𑀢𑀯𑀲𑁂𑀦 𑀓𑀸𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 ‘‘𑀅𑀮𑀁 𑀫𑁂’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑁂𑀲𑀁𑀬𑁂𑀯 𑀘 𑀲𑀯𑁂𑀯𑀘𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 ‘‘𑀧𑀘𑁆𑀘𑀓𑁆𑀔𑀸𑀲𑀺’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑀻’’𑀢𑀺 𑀯𑀸 ‘‘𑀥𑀸𑀭𑁂𑀲𑁆𑀲𑀲𑀻’’𑀢𑀺 𑀯𑀸 ‘‘𑀬𑀦𑀽𑀦𑀸𑀳𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀺 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀘𑁂𑀯 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦 𑀘 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀬𑁄𑀕𑁄 ¶ ¶ 𑀧𑀦 𑀤𑀼𑀯𑀺𑀥𑁄 𑀓𑀸𑀬𑀺𑀓𑁄 𑀯𑀸𑀘𑀲𑀺𑀓𑁄. 𑀢𑀢𑁆𑀣 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀅𑀓𑁆𑀔𑀭𑀮𑀺𑀔𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀁 𑀯𑀸 𑀓𑀸𑀬𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀏𑀯𑀁 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀼𑀕𑁆𑀕𑀮𑁄 𑀧𑀦 𑀤𑀼𑀯𑀺𑀥𑁄 𑀬𑁄 𑀘 𑀧𑀘𑁆𑀘𑀓𑁆𑀔𑀸𑀢𑀺, 𑀬𑀲𑁆𑀲 𑀘 𑀧𑀘𑁆𑀘𑀓𑁆𑀔𑀸𑀢𑀺. 𑀢𑀢𑁆𑀣 𑀬𑁄 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄 𑀦 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀦 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄, 𑀲𑀫𑁆𑀫𑀼𑀔𑀻𑀪𑀽𑀢𑁄 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺. 𑀦 𑀳𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑀦𑀁 𑀭𑀼𑀳𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀬𑀲𑁆𑀲 𑀬𑁂𑀲𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 ‘‘𑀇𑀫𑀲𑁆𑀲 𑀇𑀫𑁂𑀲𑀁 𑀯𑀸 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺, 𑀲𑀘𑁂 𑀢𑁂 𑀬𑀣𑀸 𑀧𑀓𑀢𑀺𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀬𑁂 𑀚𑀸𑀦𑀦𑁆𑀢𑀺, 𑀏𑀯𑀁 𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀢𑀲𑁆𑀲 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀢𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀚𑀸𑀦𑀦𑁆𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀦 𑀲𑀘𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀯𑀘𑀦𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀯𑀺𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀇𑀢𑀺 𑀇𑀫𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀘𑀺𑀢𑁆𑀢𑀸𑀤𑀻𑀦𑀁 𑀯𑀲𑁂𑀦𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁧. ‘‘𑀯𑀤𑀢𑀻’’𑀢𑀺 𑀯𑀘𑀻𑀪𑁂𑀤𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦𑀸𑀢𑀺 𑀆𑀳 ‘‘𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦𑀸’’𑀢𑀺. 𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀓𑀢𑁆𑀯𑀸𑀢𑀺 𑀧𑀤𑀯𑀺𑀧𑀭𑀸𑀯𑀼𑀢𑁆𑀢𑀺𑀁 𑀓𑀢𑁆𑀯𑀸. 𑀇𑀤𑀜𑁆𑀘 𑀧𑀤𑀧𑁆𑀧𑀬𑁄𑀕𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀮𑁄𑀓𑁂 ‘‘𑀆𑀳𑀭 𑀧𑀢𑁆𑀢𑀁, 𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀅𑀦𑀺𑀬𑀫𑀺𑀢𑁂𑀦 𑀧𑀤𑀧𑁆𑀧𑀬𑁄𑀕𑁂𑀦 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀁 𑀤𑀺𑀝𑁆𑀞𑀁, 𑀏𑀯𑀫𑀺𑀥𑀸𑀧𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀧𑀘𑁆𑀘𑀓𑁆𑀔𑀸𑀫𑀺 𑀩𑀼𑀤𑁆𑀥’’𑀦𑁆𑀢𑀺 𑀅𑀦𑀺𑀬𑀫𑀺𑀢𑁂𑀦 𑀧𑀤𑀧𑁆𑀧𑀬𑁄𑀕𑁂𑀦 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑀧𑁆𑀧𑀥𑀸𑀦𑁄 𑀅𑀬𑀁 ¶ 𑀦𑀺𑀤𑁆𑀤𑁂𑀲𑁄, 𑀦 𑀲𑀤𑁆𑀤𑀧𑁆𑀧𑀥𑀸𑀦𑁄𑀢𑀺 𑀆𑀳 ‘‘𑀫𑀺𑀮𑀓𑁆𑀔𑀪𑀸𑀲𑀸𑀲𑀼 𑀯𑀸 𑀅𑀜𑁆𑀜𑀢𑀭𑀪𑀸𑀲𑀸𑀬 𑀢𑀫𑀢𑁆𑀣𑀁 𑀯𑀤𑁂𑀬𑁆𑀬𑀸’’𑀢𑀺. 𑀫𑀸𑀕𑀥𑀪𑀸𑀲𑀢𑁄 𑀅𑀯𑀲𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀅𑀦𑁆𑀥𑀤𑀫𑀺𑀴𑀸𑀤𑀺𑀪𑀸𑀲𑀸 𑀫𑀺𑀮𑀓𑁆𑀔𑀪𑀸𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑁂𑀢𑁆𑀢𑀧𑀤𑁂𑀲𑀼 𑀏𑀓𑀁 𑀯𑀢𑁆𑀢𑀼𑀓𑀸𑀫𑁄 𑀲𑀘𑁂𑀧𑀺 𑀅𑀜𑁆𑀜𑀁 𑀯𑀤𑁂𑀬𑁆𑀬, 𑀔𑁂𑀢𑁆𑀢𑀧𑀤𑀦𑁆𑀢𑁄𑀕𑀥𑀢𑁆𑀢𑀸 𑀧𑀘𑁆𑀘𑀓𑁆𑀔𑀸𑀢𑀸𑀯 ¶ 𑀳𑁄𑀢𑀺 𑀲𑀺𑀓𑁆𑀔𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀯𑀢𑁆𑀢𑀼𑀓𑀸𑀫𑁄’’𑀢𑀺𑀆𑀤𑀺. 𑀬𑀤𑀺𑀧𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀘𑀺𑀢𑁆𑀢𑁂𑀦 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀯𑀢𑁆𑀢𑀼𑀓𑀸𑀫𑁄 𑀧𑀼𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀢𑀫𑁂𑀯 𑀯𑀤𑁂𑀬𑁆𑀬, 𑀢𑀣𑀸𑀧𑀺 𑀲𑀸𑀲𑀦𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂 𑀲𑀢𑀺 𑀔𑁂𑀢𑁆𑀢𑀧𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀲𑀫𑁆𑀪𑀯𑀢𑁄 𑀳𑁄𑀢𑁆𑀯𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀦𑁆𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀭𑀼𑀳𑀦𑀝𑁆𑀞𑀸𑀦𑀪𑀽𑀢𑀁 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀁.

‘‘𑀧𑀘𑁆𑀘𑀓𑁆𑀔𑀸𑀫𑀺 𑀥𑀸𑀭𑁂𑀳𑀻’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑀲𑁆𑀲 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑁂𑀳𑀺 𑀦𑁂𑀯𑀢𑁆𑀣𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀺𑀦𑁆𑀢𑀺 𑀯𑀸’’𑀢𑀺𑀆𑀤𑀺. 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀯𑀤𑀢𑀻𑀢𑀺 𑀇𑀫𑀺𑀦𑀸 𑀧𑀬𑁄𑀕𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀦𑁄 𑀯𑀘𑀻𑀪𑁂𑀤𑀧𑁆𑀧𑀬𑁄𑀕𑁂𑀦𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀤𑀽𑀢𑀲𑀸𑀲𑀦𑀸𑀤𑀺𑀧𑁆𑀧𑀬𑁄𑀕𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀽𑀢𑀁 𑀯𑀸 𑀧𑀳𑀺𑀡𑀸𑀢𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀫𑀫 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀓𑀣𑁂𑀳𑀻’’𑀢𑀺 𑀫𑀼𑀔𑀲𑀸𑀲𑀦𑀯𑀲𑁂𑀦 ‘‘𑀤𑀽𑀢𑀁 𑀯𑀸 𑀧𑀳𑀺𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀧𑀳𑀺𑀡𑀦𑀯𑀲𑁂𑀦 ‘‘𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀭𑀼𑀓𑁆𑀔𑀸𑀤𑀻𑀲𑀼 𑀅𑀓𑁆𑀔𑀭𑀸𑀦𑀺 𑀮𑀺𑀔𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 ‘‘𑀅𑀓𑁆𑀔𑀭𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑀻𑀢𑀺 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀓𑁄 𑀳𑀺 𑀳𑀢𑁆𑀣𑀯𑀺𑀓𑀸𑀭𑁄 𑀳𑀢𑁆𑀣𑀫𑀼𑀤𑁆𑀤𑀸. 𑀳𑀢𑁆𑀣-𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀦 𑀲𑀩𑁆𑀩𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁧𑁮) 𑀯𑀺𑀬. 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀓𑁂𑀦 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀸𑀤𑀺𑀦𑀸 𑀳𑀢𑁆𑀣𑀯𑀺𑀓𑀸𑀭𑁂𑀦 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀧𑀘𑁆𑀘𑀓𑁆𑀔𑀸𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁. 𑀇𑀤𑀸𑀦𑀺 𑀯𑀺𑀚𑀸𑀦𑀦𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀬𑀤𑀺 𑀅𑀬𑀫𑁂𑀯 𑀚𑀸𑀦𑀸𑀢𑀽’’𑀢𑀺𑀆𑀤𑀺. 𑀅𑀬𑀜𑁆𑀘 𑀯𑀺𑀪𑀸𑀕𑁄 ‘‘𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀏𑀓𑀯𑀺𑀲𑀬𑀢𑁆𑀢𑀸 ¶ 𑀬𑀲𑁆𑀲 𑀯𑀤𑀢𑀺, 𑀢𑀲𑁆𑀲𑁂𑀯 𑀯𑀺𑀚𑀸𑀦𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀜𑁆𑀜𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀮𑀤𑁆𑀥𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀬𑀲𑁆𑀲 𑀯𑀤𑀢𑀺, 𑀢𑀢𑁄 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀲𑁄𑀬𑁂𑀯 𑀚𑀸𑀦𑀸𑀢𑀻𑀢𑀺 𑀅𑀯𑀥𑀸𑀭𑀡𑁂𑀦 𑀢𑀲𑁆𑀫𑀺𑀁 𑀅𑀯𑀺𑀚𑀸𑀦𑀦𑁆𑀢𑁂𑀬𑁂𑀯 𑀅𑀜𑁆𑀜𑀲𑁆𑀲 𑀚𑀸𑀦𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀣 𑀲𑁄 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑁄 𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺. 𑀢𑀲𑁆𑀫𑀸 ‘‘𑀅𑀬𑀫𑁂𑀯 𑀚𑀸𑀦𑀸𑀢𑀽’’𑀢𑀺 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑀺𑀢𑁂 𑀬𑀤𑀺𑀧𑀺 𑀲𑁄𑀧𑀺 𑀚𑀸𑀦𑀸𑀢𑀺 𑀅𑀜𑁆𑀜𑁄𑀧𑀺, 𑀦𑀺𑀬𑀫𑀺𑀢𑀲𑁆𑀲 𑀧𑀦 𑀦𑀺𑀬𑀫𑀺𑀢𑀯𑀲𑁂𑀦 𑀯𑀺𑀚𑀸𑀦𑀦𑀲𑀫𑁆𑀪𑀯𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 ‘‘𑀅𑀜𑁆𑀜𑁄 𑀫𑀸 𑀚𑀸𑀦𑀸𑀢𑀽’’𑀢𑀺 𑀅𑀦𑀺𑀬𑀫𑀺𑀢𑀢𑁆𑀢𑀸. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀬𑀫𑁂𑀢𑁆𑀯𑀸𑀢𑀺 𑀇𑀤𑀁 ‘‘𑀤𑁆𑀯𑁂 𑀯𑀸 𑀚𑀸𑀦𑀦𑁆𑀢𑀼 𑀏𑀓𑁄 𑀯𑀸, 𑀇𑀫𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀫𑀻’’𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀏𑀓𑀲𑁆𑀫𑀺𑀁 ¶ 𑀚𑀸𑀦𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀚𑀸𑀦𑀦𑁆𑀢𑁂𑀲𑀼𑀧𑀻’’𑀢𑀺. 𑀢𑀲𑁆𑀫𑀸 ‘‘𑀤𑁆𑀯𑁂𑀬𑁂𑀯 𑀚𑀸𑀦𑀦𑁆𑀢𑀼, 𑀏𑀓𑁄 𑀫𑀸 𑀚𑀸𑀦𑀸𑀢𑀽’’𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑀺𑀢𑁂 𑀤𑁆𑀯𑀻𑀲𑀼𑀬𑁂𑀯 𑀚𑀸𑀦𑀦𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀏𑀓𑀲𑁆𑀫𑀺𑀁 𑀚𑀸𑀦𑀦𑁆𑀢𑁂𑀢𑀺 𑀯𑀤𑀦𑁆𑀢𑀺.

𑀲𑀪𑀸𑀕𑁂𑀢𑀺 𑀯𑀺𑀲𑁆𑀲𑀸𑀲𑀺𑀓𑁂. 𑀧𑀭𑀺𑀲𑀗𑁆𑀓𑀫𑀸𑀦𑁄𑀢𑀺 ‘‘𑀲𑀘𑁂 𑀢𑁂 𑀚𑀸𑀦𑁂𑀬𑁆𑀬𑀼𑀁, 𑀫𑀁 𑀢𑁂 𑀯𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀆𑀲𑀗𑁆𑀓𑀫𑀸𑀦𑁄. 𑀲𑀫𑀬𑀜𑁆𑀜𑀽𑀢𑀺 𑀲𑀸𑀲𑀦𑀸𑀘𑀸𑀭𑀓𑀼𑀲𑀮𑁄, 𑀇𑀥 𑀧𑀦 𑀢𑀤𑀥𑀺𑀧𑁆𑀧𑀸𑀬𑀚𑀸𑀦𑀦𑀫𑀢𑁆𑀢𑁂𑀦𑀧𑀺 𑀲𑀫𑀬𑀜𑁆𑀜𑀽 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯 𑀆𑀳 𑁋 ‘‘𑀉𑀓𑁆𑀓𑀡𑁆𑀞𑀺𑀢𑁄 𑀅𑀬𑀁…𑀧𑁂… 𑀲𑀸𑀲𑀦𑀢𑁄 𑀘𑀼𑀢𑁄𑀢𑀺 𑀚𑀸𑀦𑀸𑀢𑀻’’𑀢𑀺. 𑀢𑀲𑁆𑀫𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀜𑀢𑁆𑀯𑀸𑀧𑀺 𑀲𑀘𑁂 ‘‘𑀅𑀬𑀁 𑀪𑀺𑀓𑁆𑀔𑀼𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑁄, 𑀕𑀺𑀳𑀻 𑀯𑀸 𑀳𑁄𑀢𑀼𑀓𑀸𑀫𑁄’’𑀢𑀺 𑀦 𑀚𑀸𑀦𑀸𑀢𑀺, 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀘𑁂 𑀧𑀦 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 ‘‘𑀉𑀓𑁆𑀓𑀡𑁆𑀞𑀺𑀢𑁄 𑀕𑀺𑀳𑀻 𑀳𑁄𑀢𑀼𑀓𑀸𑀫𑁄’’𑀢𑀺 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀜𑁆𑀜𑀲𑁆𑀫𑀺𑀁 𑀔𑀡𑁂 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀤𑁆𑀤𑀕𑁆𑀕𑀳𑀡𑀁, 𑀅𑀜𑁆𑀜𑀲𑁆𑀫𑀺𑀁𑀬𑁂𑀯 𑀘 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺 𑀆𑀳 𑁋 ‘‘𑀢𑀗𑁆𑀔𑀡𑀜𑁆𑀜𑁂𑀯 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑀼𑀚𑁆𑀚𑀸𑀦’’𑀦𑁆𑀢𑀺. 𑀦 𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀤𑁆𑀤𑀲𑀯𑀦𑀁 𑀢𑀤𑀢𑁆𑀣𑀯𑀺𑀚𑀸𑀦𑀦𑀜𑁆𑀘 𑀲𑀫𑁆𑀪𑀯𑀢𑀺. 𑀢𑀣𑀸 𑀳𑀺 ‘‘𑀖𑀝𑁄’’𑀢𑀺 𑀯𑀸 ‘‘𑀧𑀝𑁄’’𑀢𑀺 𑀯𑀸 𑀓𑁂𑀦𑀘𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀖-𑀲𑀤𑁆𑀤𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀕𑀳𑁂𑀢𑁆𑀯𑀸 𑀏𑀓𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀤𑀦𑀦𑁆𑀢𑀭𑀁 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺 𑀢𑀫𑁂𑀯 𑀅𑀢𑀻𑀢𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀢𑁂𑀦 𑀯𑀼𑀢𑁆𑀢𑀯𑀘𑀦𑁂 𑀬𑀢𑁆𑀢𑀓𑀸𑀦𑀺 𑀅𑀓𑁆𑀔𑀭𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀏𑀓𑀫𑁂𑀓𑀁 𑀅𑀓𑁆𑀔𑀭𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀜𑁆𑀘 𑀕𑀳𑁂𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀅𑀯𑀲𑀸𑀦𑁂 ¶ 𑀢𑀸𑀦𑀺 𑀅𑀓𑁆𑀔𑀭𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀓𑁆𑀔𑀭𑀲𑀫𑀽𑀳𑀁 𑀕𑀳𑁂𑀢𑁆𑀯𑀸 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀤𑀦𑀦𑁆𑀢𑀭𑀁 ‘‘𑀅𑀬𑀫𑀓𑁆𑀔𑀭𑀲𑀫𑀽𑀳𑁄 𑀏𑀢𑀲𑁆𑀲 𑀦𑀸𑀫’’𑀦𑁆𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀯𑀲𑁂𑀦 𑀅𑀧𑀭𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 ‘‘𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀧𑀓𑀢𑀺𑀬𑀸 𑀢𑀤𑀢𑁆𑀣𑀯𑀺𑀚𑀸𑀦𑀦𑀁 𑀲𑀫𑁆𑀪𑀯𑀢𑀺.

𑀆𑀯𑀚𑁆𑀚𑀦𑀲𑀫𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀅𑀢𑁆𑀣𑀸𑀪𑁄𑀕𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀫𑁂𑀯 𑀆𑀯𑀚𑁆𑀚𑀦𑀲𑀫𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 𑁋 ‘‘𑀬𑀣𑀸 𑀧𑀓𑀢𑀺𑀬𑀸…𑀧𑁂… 𑀚𑀸𑀦𑀦𑁆𑀢𑀻’’𑀢𑀺. 𑀢𑁂𑀦𑁂𑀯 𑀯𑀘𑀻𑀪𑁂𑀤𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀢𑀁 𑀓𑀗𑁆𑀔𑀦𑁆𑀢𑀲𑁆𑀲 𑀘𑀺𑀭𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑀁 𑀅𑀜𑁆𑀜𑁂𑀦𑀧𑀺 𑀓𑁂𑀦𑀘𑀺 𑀉𑀧𑀸𑀬𑀦𑁆𑀢𑀭𑁂𑀦 𑀲𑀫𑁆𑀪𑀯𑀢𑀺, 𑀦 𑀓𑁂𑀯𑀮𑀁 𑀯𑀘𑀻𑀪𑁂𑀤𑀫𑀢𑁆𑀢𑁂𑀦𑀸𑀢𑀺 𑀆𑀳 𑁋 ‘‘𑀅𑀣 𑀅𑀧𑀭𑀪𑀸𑀕𑁂…𑀧𑁂… 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺. ‘‘𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀪𑁂𑀤𑁄 𑀓𑀸𑀮𑀪𑁂𑀤𑁄 𑀘 𑀳𑁄𑀢𑀻𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. ‘‘𑀥𑀸𑀭𑁂𑀳𑀻’’𑀢𑀺 𑀳𑀺 𑀇𑀫𑀲𑁆𑀲 𑀬𑁄 𑀅𑀢𑁆𑀣𑁄 𑀓𑀸𑀮𑁄 𑀘, 𑀦 𑀲𑁄 ‘‘𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀲𑁆𑀲. ‘‘𑀕𑀺𑀳𑀻 ¶ 𑀳𑁄𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀢𑁆𑀣𑀪𑁂𑀤𑁄𑀬𑁂𑀯, 𑀦 𑀓𑀸𑀮𑀪𑁂𑀤𑁄 ‘‘𑀳𑁄𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀕𑀺𑀳𑀻 𑀚𑀸𑀢𑁄𑀫𑁆𑀳𑀺, 𑀕𑀺𑀳𑀻𑀫𑁆𑀳𑀻’’𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑀲𑁆𑀲 𑀘𑁂𑀯 𑀓𑀸𑀮𑀲𑁆𑀲 𑀘 𑀪𑀺𑀦𑁆𑀦𑀢𑁆𑀢𑀸 𑀅𑀧𑁆𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. ‘‘𑀅𑀚𑁆𑀚 𑀧𑀝𑁆𑀞𑀸𑀬𑀸’’𑀢𑀺 𑀇𑀤𑀁 𑀢𑀣𑀸 𑀯𑀼𑀢𑁆𑀢𑁂𑀧𑀺 𑀤𑁄𑀲𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀥𑀸𑀭𑁂𑀳𑀻’’𑀢𑀺 𑀅𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑁂𑀳𑀺𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀦𑀸𑀳𑀻’’𑀢𑀺𑀆𑀤𑀺. 𑀥𑀸𑀭𑁂𑀳𑀺 𑀚𑀸𑀦𑀸𑀳𑀺 𑀲𑀜𑁆𑀚𑀸𑀦𑀸𑀳𑀺 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀳𑀺 𑀏𑀢𑀸𑀦𑀺 𑀧𑀤𑀸𑀦𑀺 𑀅𑀢𑁆𑀣𑀢𑁄 𑀓𑀸𑀮𑀢𑁄 𑀘 𑀅𑀪𑀺𑀦𑁆𑀦𑀸𑀦𑀺.

𑁫𑁨. 𑀧𑀼𑀭𑀺𑀫𑀸𑀦𑁂𑀯 𑀘𑀼𑀤𑁆𑀤𑀲𑀸𑀢𑀺 𑀩𑀼𑀤𑁆𑀥𑀸𑀤𑀺𑀲𑀩𑁆𑀭𑀳𑁆𑀫𑀘𑀸𑀭𑀻𑀧𑀭𑀺𑀬𑀦𑁆𑀢𑀸𑀦𑀺. 𑀳𑁄𑀢𑀼 𑀪𑀯𑀢𑀽𑀢𑀺 𑀇𑀤𑀫𑁆𑀧𑀺 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀳𑁄𑀢𑀼, 𑀧𑀭𑀺𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑁫𑁩. 𑀯𑀡𑁆𑀡𑀧𑀝𑁆𑀞𑀸𑀦𑀦𑁆𑀢𑀺 𑀫𑀳𑀸𑀲𑀗𑁆𑀖𑀺𑀓𑀸𑀦𑀁 𑀩𑀼𑀤𑁆𑀥𑀕𑀼𑀡𑀧𑀭𑀺𑀤𑀻𑀧𑀓𑀁 𑀏𑀓𑀁 𑀲𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀧𑀸𑀮𑀺𑀕𑀸𑀣𑀸𑀲𑀽𑀢𑀺 (𑀫. 𑀦𑀺. 𑁨.𑁭𑁬) 𑁋

‘‘𑀥𑀻𑀭𑀲𑁆𑀲 ¶ 𑀯𑀺𑀕𑀢𑀫𑁄𑀳𑀲𑁆𑀲,

𑀧𑀪𑀺𑀦𑁆𑀦𑀔𑀻𑀮𑀲𑁆𑀲 𑀯𑀺𑀚𑀺𑀢𑀯𑀺𑀚𑀬𑀲𑁆𑀲;

𑀅𑀦𑀻𑀖𑀲𑁆𑀲 𑀲𑀼𑀲𑀫𑀘𑀺𑀢𑁆𑀢𑀲𑁆𑀲;

𑀯𑀼𑀤𑁆𑀥𑀲𑀻𑀮𑀲𑁆𑀲 𑀲𑀸𑀥𑀼𑀧𑀜𑁆𑀜𑀲𑁆𑀲;

𑀯𑁂𑀲𑀫𑀦𑁆𑀢𑀭𑀲𑁆𑀲 𑀯𑀺𑀫𑀮𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀅𑀓𑀣𑀁𑀓𑀣𑀺𑀲𑁆𑀲 𑀢𑀼𑀲𑀺𑀢𑀲𑁆𑀲;

𑀯𑀦𑁆𑀢𑀮𑁄𑀓𑀸𑀫𑀺𑀲𑀲𑁆𑀲 𑀫𑀼𑀤𑀺𑀢𑀲𑁆𑀲;

𑀓𑀢𑀲𑀫𑀡𑀲𑁆𑀲 𑀫𑀦𑀼𑀚𑀲𑁆𑀲;

𑀅𑀦𑁆𑀢𑀺𑀫𑀲𑀸𑀭𑀻𑀭𑀲𑁆𑀲 𑀦𑀭𑀲𑁆𑀲;

𑀅𑀦𑁄𑀧𑀫𑀲𑁆𑀲 𑀯𑀺𑀭𑀚𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀅𑀲𑀁𑀲𑀬𑀲𑁆𑀲 𑀓𑀼𑀲𑀮𑀲𑁆𑀲;

𑀯𑁂𑀦𑀬𑀺𑀓𑀲𑁆𑀲 𑀲𑀸𑀭𑀣𑀺𑀯𑀭𑀲𑁆𑀲;

𑀅𑀦𑀼𑀢𑁆𑀢𑀭𑀲𑁆𑀲 ¶ 𑀭𑀼𑀘𑀺𑀭𑀥𑀫𑁆𑀫𑀲𑁆𑀲;

𑀦𑀺𑀓𑁆𑀓𑀗𑁆𑀔𑀲𑁆𑀲 𑀧𑀪𑀸𑀲𑀓𑀲𑁆𑀲;

𑀫𑀸𑀦𑀘𑁆𑀙𑀺𑀤𑀲𑁆𑀲 𑀯𑀻𑀭𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀦𑀺𑀲𑀪𑀲𑁆𑀲 𑀅𑀧𑁆𑀧𑀫𑁂𑀬𑁆𑀬𑀲𑁆𑀲;

𑀕𑀫𑁆𑀪𑀻𑀭𑀲𑁆𑀲 𑀫𑁄𑀦𑀧𑁆𑀧𑀢𑁆𑀢𑀲𑁆𑀲;

𑀔𑁂𑀫𑀗𑁆𑀓𑀭𑀲𑁆𑀲 𑀯𑁂𑀤𑀲𑁆𑀲;

𑀥𑀫𑁆𑀫𑀝𑁆𑀞𑀲𑁆𑀲 𑀲𑀁𑀯𑀼𑀢𑀢𑁆𑀢𑀲𑁆𑀲;

𑀲𑀗𑁆𑀕𑀸𑀢𑀺𑀕𑀲𑁆𑀲 𑀫𑀼𑀢𑁆𑀢𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀦𑀸𑀕𑀲𑁆𑀲 𑀧𑀦𑁆𑀢𑀲𑁂𑀦𑀲𑁆𑀲;

𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀫𑀼𑀢𑁆𑀢𑀲𑁆𑀲;

𑀧𑀝𑀺𑀫𑀦𑁆𑀢𑀓𑀲𑁆𑀲 𑀥𑁄𑀦𑀲𑁆𑀲;

𑀧𑀦𑁆𑀦𑀤𑁆𑀥𑀚𑀲𑁆𑀲 𑀯𑀻𑀢𑀭𑀸𑀕𑀲𑁆𑀲;

𑀤𑀦𑁆𑀢𑀲𑁆𑀲 𑀦𑀺𑀧𑁆𑀧𑀧𑀜𑁆𑀘𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀇𑀲𑀺𑀲𑀢𑁆𑀢𑀫𑀲𑁆𑀲 ¶ 𑀅𑀓𑀼𑀳𑀲𑁆𑀲;

𑀢𑁂𑀯𑀺𑀚𑁆𑀚𑀲𑁆𑀲 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑀲𑁆𑀲;

𑀦𑁆𑀳𑀸𑀢𑀓𑀲𑁆𑀲 𑀧𑀤𑀓𑀲𑁆𑀲;

𑀧𑀲𑁆𑀲𑀤𑁆𑀥𑀲𑁆𑀲 𑀯𑀺𑀤𑀺𑀢𑀯𑁂𑀤𑀲𑁆𑀲;

𑀧𑀼𑀭𑀺𑀦𑁆𑀤𑀤𑀲𑁆𑀲 𑀲𑀓𑁆𑀓𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀅𑀭𑀺𑀬𑀲𑁆𑀲 𑀪𑀸𑀯𑀺𑀢𑀢𑁆𑀢𑀲𑁆𑀲;

𑀧𑀢𑁆𑀢𑀺𑀧𑁆𑀧𑀢𑁆𑀢𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲;

𑀲𑀢𑀺𑀫𑀢𑁄 𑀯𑀺𑀧𑀲𑁆𑀲𑀺𑀲𑁆𑀲;

𑀅𑀦𑀪𑀺𑀦𑀢𑀲𑁆𑀲 𑀦𑁄 𑀅𑀧𑀦𑀢𑀲𑁆𑀲;

𑀅𑀦𑁂𑀚𑀲𑁆𑀲 ¶ 𑀯𑀲𑀺𑀧𑁆𑀧𑀢𑁆𑀢𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀲𑀫𑀼𑀕𑁆𑀕𑀢𑀲𑁆𑀲 𑀛𑀸𑀬𑀺𑀲𑁆𑀲;

𑀅𑀦𑀦𑀼𑀕𑀢𑀦𑁆𑀢𑀭𑀲𑁆𑀲 𑀲𑀼𑀤𑁆𑀥𑀲𑁆𑀲;

𑀅𑀲𑀺𑀢𑀲𑁆𑀲 𑀳𑀺𑀢𑀲𑁆𑀲;

𑀧𑀯𑀺𑀯𑀺𑀢𑁆𑀢𑀲𑁆𑀲 𑀅𑀕𑁆𑀕𑀧𑁆𑀧𑀢𑁆𑀢𑀲𑁆𑀲;

𑀢𑀺𑀡𑁆𑀡𑀲𑁆𑀲 𑀢𑀸𑀭𑀬𑀦𑁆𑀢𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀲𑀦𑁆𑀢𑀲𑁆𑀲 𑀪𑀽𑀭𑀺𑀧𑀜𑁆𑀜𑀲𑁆𑀲;

𑀫𑀳𑀸𑀧𑀜𑁆𑀜𑀲𑁆𑀲 𑀯𑀻𑀢𑀮𑁄𑀪𑀲𑁆𑀲;

𑀢𑀣𑀸𑀕𑀢𑀲𑁆𑀲 𑀲𑀼𑀕𑀢𑀲𑁆𑀲;

𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲 𑀅𑀲𑀫𑀲𑁆𑀲;

𑀯𑀺𑀲𑀸𑀭𑀤𑀲𑁆𑀲 𑀦𑀺𑀧𑀼𑀡𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀺.

‘‘𑀢𑀡𑁆𑀳𑀘𑁆𑀙𑀺𑀤𑀲𑁆𑀲 ¶ 𑀩𑀼𑀤𑁆𑀥𑀲𑁆𑀲;

𑀯𑀻𑀢𑀥𑀽𑀫𑀲𑁆𑀲 𑀅𑀦𑀼𑀧𑀮𑀺𑀢𑁆𑀢𑀲𑁆𑀲;

𑀆𑀳𑀼𑀦𑁂𑀬𑁆𑀬𑀲𑁆𑀲 𑀬𑀓𑁆𑀔𑀲𑁆𑀲;

𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲 𑀅𑀢𑀼𑀮𑀲𑁆𑀲;

𑀫𑀳𑀢𑁄 𑀬𑀲𑀕𑁆𑀕𑀧𑁆𑀧𑀢𑁆𑀢𑀲𑁆𑀲;

𑀪𑀕𑀯𑀢𑁄 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺. 𑁋

𑀏𑀯𑀁 𑀉𑀧𑀸𑀮𑀺𑀕𑀳𑀧𑀢𑀺𑀦𑀸 𑀯𑀼𑀢𑁆𑀢𑀸𑀲𑀼 𑀉𑀧𑀸𑀮𑀺𑀲𑀼𑀢𑁆𑀢𑁂 𑀆𑀕𑀢𑀕𑀸𑀣𑀸𑀲𑀼.

𑀬𑀣𑀸𑀭𑀼𑀢𑀫𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯, 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀦𑀦𑁆𑀢𑀩𑀼𑀤𑁆𑀥𑀺𑀁 𑀅𑀦𑁄𑀫𑀩𑀼𑀤𑁆𑀥𑀺𑀁 𑀩𑁄𑀥𑀺𑀧𑀜𑁆𑀜𑀸𑀡’’𑀦𑁆𑀢𑀺 𑀇𑀫𑀸𑀦𑀺 𑀯𑀡𑁆𑀡𑀧𑀝𑁆𑀞𑀸𑀦𑁂 𑀆𑀕𑀢𑀦𑀸𑀫𑀸𑀦𑀺, ‘‘𑀥𑀻𑀭’’𑀦𑁆𑀢𑀺𑀆𑀤𑀻𑀦𑀺 𑀧𑀦 𑀉𑀧𑀸𑀮𑀺𑀕𑀸𑀣𑀸𑀲𑀼 𑀆𑀕𑀢𑀦𑀸𑀫𑀸𑀦𑀺. 𑀢𑀢𑁆𑀣 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀁 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀡𑀁 𑀏𑀢𑀲𑁆𑀲𑀸𑀢𑀺 𑀩𑁄𑀥𑀺𑀧𑀜𑁆𑀜𑀸𑀡𑁄, 𑀪𑀕𑀯𑀸. 𑀥𑀺𑀬𑀸 𑀧𑀜𑁆𑀜𑀸𑀬 𑀭𑀸𑀢𑀺 𑀕𑀡𑁆𑀳𑀸𑀢𑀺 ¶ , 𑀲𑁂𑀯𑀢𑀻𑀢𑀺 𑀯𑀸 𑀥𑀻𑀭𑁄. 𑀲𑀫𑀼𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑁂𑀢𑁄𑀔𑀻𑀮𑀢𑁆𑀢𑀸 𑀧𑀪𑀺𑀦𑁆𑀦𑀔𑀻𑀮𑁄. 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑁂 𑀯𑀺𑀚𑀺𑀦𑀺𑀁𑀲𑀼 𑀯𑀺𑀚𑀬𑀦𑁆𑀢𑀺 𑀯𑀺𑀚𑀺𑀦𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀯𑀺𑀚𑀬𑀸. 𑀓𑁂 𑀢𑁂? 𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀸. 𑀢𑁂 𑀯𑀺𑀚𑀺𑀢𑀸 𑀯𑀺𑀚𑀬𑀸 𑀏𑀢𑁂𑀦𑀸𑀢𑀺 𑀯𑀺𑀚𑀺𑀢𑀯𑀺𑀚𑀬𑁄, 𑀪𑀕𑀯𑀸. 𑀓𑀺𑀮𑁂𑀲𑀫𑀸𑀭𑀫𑀘𑁆𑀘𑀼𑀫𑀸𑀭𑀯𑀺𑀚𑀬𑁂𑀦𑁂𑀯 𑀧𑀦𑁂𑀢𑁆𑀣 𑀅𑀪𑀺𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀸𑀭𑀸𑀧𑀺 𑀯𑀺𑀚𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁆𑀯𑀸𑀓𑁆𑀔𑀸𑀢𑀦𑁆𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁭) 𑀲𑀸𑀢𑁆𑀣𑀲𑀩𑁆𑀬𑀜𑁆𑀚𑀦𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀧𑀭𑀺𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀓𑀸𑀲𑀦𑀢𑁄 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑀢𑁄 𑀯𑀸 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑁄. 𑀬𑀣𑀸 𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀥𑀫𑁆𑀫𑀲𑁆𑀲 𑀅𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑀁 𑀆𑀧𑀚𑁆𑀚𑀢𑀺 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀺𑀓𑀢𑁆𑀢𑀸𑀪𑀸𑀯𑀢𑁄, ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 𑀘 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸𑀪𑀸𑀯𑀢𑁄, 𑀢𑁂𑀦 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀸𑀬𑁂𑀯 𑀳𑁄𑀦𑁆𑀢𑀺, 𑀦 𑀢𑀣𑀸 𑀪𑀕𑀯𑀢𑁄 𑀥𑀫𑁆𑀫𑀲𑁆𑀲 𑀅𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑀁 𑀆𑀧𑀚𑁆𑀚𑀢𑀺 ‘‘𑀇𑀫𑁂 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀢𑀣𑀸𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄𑀢𑀺. 𑀏𑀯𑀁 𑀢𑀸𑀯 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄.

𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀧𑀦 𑀦𑀺𑀩𑁆𑀩𑀸𑀦𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀤𑀸𑀦𑀼𑀭𑀽𑀧𑀲𑁆𑀲 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀅𑀓𑁆𑀔𑀸𑀢𑀢𑁆𑀢𑀸 𑀲𑁆𑀯𑀸𑀓𑁆𑀔𑀸𑀢𑁄. 𑀬𑀣𑀸𑀳 𑁋

‘‘𑀲𑀼𑀧𑀜𑁆𑀜𑀢𑁆𑀢𑀸 ¶ 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁬).

𑀅𑀭𑀺𑀬𑀫𑀕𑁆𑀕𑁄 𑀘𑁂𑀢𑁆𑀣 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸𑀧𑀝𑀺𑀧𑀤𑀸𑀪𑀽𑀢𑁄𑀯 ‘‘𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸’’𑀢𑀺 𑀅𑀓𑁆𑀔𑀸𑀢𑀢𑁆𑀢𑀸 𑀲𑁆𑀯𑀸𑀓𑁆𑀔𑀸𑀢𑁄. 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀸𑀦𑁂𑀯 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑀸𑀦𑀻’’𑀢𑀺 𑀅𑀓𑁆𑀔𑀸𑀢𑀢𑁆𑀢𑀸 𑀲𑁆𑀯𑀸𑀓𑁆𑀔𑀸𑀢𑀸𑀦𑀺. 𑀦𑀺𑀩𑁆𑀩𑀸𑀦𑀁 𑀲𑀲𑁆𑀲𑀢𑀸𑀫𑀢𑀢𑀸𑀡𑀮𑁂𑀡𑀸𑀤𑀺𑀲𑀪𑀸𑀯𑀫𑁂𑀯 𑀲𑀲𑁆𑀲𑀢𑀸𑀤𑀺𑀲𑀪𑀸𑀯𑀯𑀲𑁂𑀦 𑀅𑀓𑁆𑀔𑀸𑀢𑀢𑁆𑀢𑀸 𑀲𑁆𑀯𑀸𑀓𑁆𑀔𑀸𑀢𑀦𑁆𑀢𑀺 𑀏𑀯𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀧𑀺 𑀲𑁆𑀯𑀸𑀓𑁆𑀔𑀸𑀢𑁄.

𑀅𑀭𑀺𑀬𑀫𑀕𑁆𑀕𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑀁 𑀓𑀭𑁄𑀦𑁆𑀢𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀦 𑀲𑀸𑀫𑀁 𑀤𑀝𑁆𑀞𑀩𑁆𑀩𑁄 ‘‘𑀅𑀭𑀺𑀬𑀫𑀕𑁆𑀕𑁂𑀦 𑀫𑀫 𑀭𑀸𑀕𑀸𑀤𑀬𑁄 𑀧𑀳𑀻𑀦𑀸’’𑀢𑀺 𑀲𑀬𑀁 𑀅𑀢𑁆𑀢𑀦𑀸 𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺 𑀏𑀯 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀅𑀧𑀺𑀘 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀬𑁂𑀦 𑀬𑁂𑀦 𑀅𑀥𑀺𑀕𑀢𑁄 𑀳𑁄𑀢𑀺, 𑀢𑁂𑀦 𑀢𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀧𑀭𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀢𑀁 𑀳𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀜𑀸𑀡𑁂𑀦 𑀲𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀅𑀣 𑀯𑀸 𑀧𑀲𑀢𑁆𑀣𑀸 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺𑀬𑀸 𑀚𑀬𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀢𑀣𑀸 𑀳𑁂𑀢𑁆𑀣 𑀅𑀭𑀺𑀬𑀫𑀕𑁆𑀕𑁄 𑀲𑀫𑁆𑀧𑀬𑀼𑀢𑁆𑀢𑀸𑀬, 𑀅𑀭𑀺𑀬𑀨𑀮𑀁 𑀓𑀸𑀭𑀡𑀪𑀽𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀯𑀺𑀲𑀬𑀺𑀪𑀽𑀢𑀸𑀬 𑀲𑀦𑁆𑀤𑀺𑀝𑁆𑀞𑀺𑀬𑀸 𑀓𑀺𑀮𑁂𑀲𑁂 𑀚𑀬𑀢𑀺, 𑀢𑀲𑁆𑀫𑀸 𑀬𑀣𑀸 𑀭𑀣𑁂𑀦 𑀚𑀬𑀢𑀻𑀢𑀺 𑀭𑀣𑀺𑀓𑁄, 𑀏𑀯𑀁 𑀦𑀯𑀯𑀺𑀥𑁄𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀬𑀸 𑀚𑀬𑀢𑀻𑀢𑀺 ¶ 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀅𑀣 𑀯𑀸 𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀁 𑀯𑀼𑀘𑁆𑀘𑀢𑀺, 𑀤𑀺𑀝𑁆𑀞𑀫𑁂𑀯 𑀲𑀦𑁆𑀤𑀺𑀝𑁆𑀞𑀁, 𑀲𑀦𑁆𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀁 𑀅𑀭𑀳𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀳𑀺 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀘 𑀤𑀺𑀲𑁆𑀲𑀫𑀸𑀦𑁄𑀬𑁂𑀯 𑀯𑀝𑁆𑀝𑀪𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀬𑀣𑀸 𑀯𑀢𑁆𑀣𑀫𑀭𑀳𑀢𑀻𑀢𑀺 𑀯𑀢𑁆𑀣𑀺𑀓𑁄, 𑀏𑀯𑀁 𑀲𑀦𑁆𑀤𑀺𑀝𑁆𑀞𑀁 𑀅𑀭𑀳𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄.

𑀅𑀢𑁆𑀢𑀦𑁄 𑀨𑀮𑀤𑀸𑀦𑀁 𑀲𑀦𑁆𑀥𑀸𑀬 𑀦𑀸𑀲𑁆𑀲 𑀆𑀕𑀫𑁂𑀢𑀩𑁆𑀩𑁄 𑀓𑀸𑀮𑁄 𑀅𑀢𑁆𑀣𑀻𑀢𑀺 𑀅𑀓𑀸𑀮𑁄. 𑀬𑀣𑀸 𑀳𑀺 𑀮𑁄𑀓𑀺𑀬𑀓𑀼𑀲𑀮𑀲𑁆𑀲 𑀉𑀧𑀧𑀚𑁆𑀚𑀅𑀧𑀭𑀸𑀧𑀭𑀺𑀬𑀸𑀬𑁂𑀢𑀺𑀆𑀤𑀺𑀦𑀸 𑀨𑀮𑀤𑀸𑀦𑀁 𑀧𑀢𑀺 𑀆𑀕𑀫𑁂𑀢𑀩𑁆𑀩𑁄 𑀓𑀸𑀮𑁄 𑀅𑀢𑁆𑀣𑀺, 𑀦 𑀏𑀯𑀫𑁂𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀓𑀸𑀮𑁄𑀬𑁂𑀯 𑀅𑀓𑀸𑀮𑀺𑀓𑁄, 𑀦 𑀧𑀜𑁆𑀘𑀸𑀳𑀲𑀢𑁆𑀢𑀸𑀳𑀸𑀤𑀺𑀪𑁂𑀤𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀨𑀮𑀁 𑀤𑁂𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀤𑁄𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀢𑀦𑁄 𑀨𑀮𑀧𑁆𑀧𑀤𑀸𑀦𑁂 𑀯𑀺𑀧𑁆𑀧𑀓𑀝𑁆𑀞𑁄 𑀤𑀽𑀭𑁄 𑀓𑀸𑀮𑁄 𑀧𑀢𑁆𑀢𑁄 𑀉𑀧𑀦𑀻𑀢𑁄 𑀅𑀲𑁆𑀲𑀸𑀢𑀺 𑀓𑀸𑀮𑀺𑀓𑁄, 𑀓𑀸𑀮𑀦𑁆𑀢𑀭𑀨𑀮𑀤𑀸𑀬𑀻. 𑀓𑁄 𑀲𑁄? 𑀮𑁄𑀓𑀺𑀬𑁄 𑀓𑀼𑀲𑀮𑀥𑀫𑁆𑀫𑁄. 𑀅𑀬𑀁 𑀧𑀦 𑀲𑀫𑀦𑀦𑁆𑀢𑀭𑀨𑀮𑀤𑀸𑀬𑀓𑀢𑁆𑀢𑀸 𑀦 𑀓𑀸𑀮𑀺𑀓𑁄𑀢𑀺 𑀅𑀓𑀸𑀮𑀺𑀓𑁄. 𑀫𑀕𑁆𑀕𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀅𑀓𑀸𑀮𑀺𑀓𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀁.

‘‘𑀏𑀳𑀺 𑀧𑀲𑁆𑀲 𑀇𑀫𑀁 𑀥𑀫𑁆𑀫’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄. 𑀓𑀲𑁆𑀫𑀸 𑀧𑀦𑁂𑀲 𑀢𑀁 𑀯𑀺𑀥𑀺𑀁 𑀅𑀭𑀳𑀢𑀻𑀢𑀺? 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀘. 𑀭𑀺𑀢𑁆𑀢𑀫𑀼𑀝𑁆𑀞𑀺𑀬𑀜𑁆𑀳𑀺 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀅𑀢𑁆𑀣𑀻𑀢𑀺 𑀯𑀢𑁆𑀯𑀸𑀧𑀺 ‘‘𑀏𑀳𑀺 𑀧𑀲𑁆𑀲 𑀇𑀫’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀘 𑀕𑀽𑀣𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀫𑀦𑀼𑀜𑁆𑀜𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁 ‘‘𑀏𑀳𑀺 𑀧𑀲𑁆𑀲 𑀇𑀫’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀧𑀺𑀘 𑀔𑁄 𑀦𑀁 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸. 𑀅𑀬𑀁 𑀧𑀦 𑀦𑀯𑀯𑀺𑀥𑁄𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀪𑀸𑀯𑀢𑁄 𑀘 𑀯𑀺𑀚𑁆𑀚𑀫𑀸𑀦𑁄 𑀯𑀺𑀕𑀢𑀯𑀮𑀸𑀳𑀓𑁂 𑀘 𑀆𑀓𑀸𑀲𑁂 𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀚𑀸𑀢𑀺𑀫𑀡𑀺 𑀯𑀺𑀬 𑀘 𑀧𑀭𑀺𑀲𑀼𑀤𑁆𑀥𑁄, 𑀢𑀲𑁆𑀫𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀘 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄.

𑀉𑀧𑀦𑁂𑀢𑀩𑁆𑀩𑁄𑀢𑀺 𑀑𑀧𑀦𑁂𑀬𑁆𑀬𑀺𑀓𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀉𑀧𑀦𑀬𑀦𑀁 𑀉𑀧𑀦𑀬𑁄, 𑀆𑀤𑀺𑀢𑁆𑀢𑀁 𑀘𑁂𑀮𑀁 𑀯𑀸 𑀲𑀻𑀲𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀪𑀸𑀯𑀦𑀸𑀯𑀲𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀬𑀦𑀁 𑀉𑀧𑁆𑀧𑀸𑀤𑀦𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄. 𑀇𑀤𑀁 𑀲𑀗𑁆𑀔𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀬𑀼𑀚𑁆𑀚𑀢𑀺, 𑀅𑀲𑀗𑁆𑀔𑀢𑁄 𑀧𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀦𑀬𑀦𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄, 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦 𑀅𑀮𑁆𑀮𑀻𑀬𑀦𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄 ¶ . 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀉𑀧𑀦𑁂𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑁄 𑀉𑀧𑀦𑁂𑀬𑁆𑀬𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑀢𑀁 𑀉𑀧𑀦𑁂𑀢𑀩𑁆𑀩𑁄𑀢𑀺 𑀨𑀮𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀉𑀧𑀦𑁂𑀬𑁆𑀬𑁄, 𑀉𑀧𑀦𑁂𑀬𑁆𑀬𑁄 𑀏𑀯 𑀑𑀧𑀦𑁂𑀬𑁆𑀬𑀺𑀓𑁄.

𑀲𑀩𑁆𑀩𑁂𑀳𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀥𑀺𑀕𑀢𑀁 𑀨𑀮𑀁, 𑀲𑀘𑁆𑀙𑀺𑀓𑀢𑁄 𑀦𑀺𑀭𑁄𑀥𑁄’’𑀢𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀦 𑀳𑀺 𑀉𑀧𑀚𑁆𑀛𑀸𑀬𑁂𑀦 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀦 𑀲𑁄 𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀨𑀸𑀲𑀼 𑀯𑀺𑀳𑀭𑀢𑀺, 𑀦 𑀢𑁂𑀦 𑀲𑀘𑁆𑀙𑀺𑀓𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀏𑀲 𑀧𑀭𑀲𑁆𑀲 𑀲𑀻𑀲𑁂 𑀆𑀪𑀭𑀡𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄, 𑀅𑀢𑁆𑀢𑀦𑁄 𑀧𑀦 𑀘𑀺𑀢𑁆𑀢𑁂𑀬𑁂𑀯 𑀤𑀝𑁆𑀞𑀩𑁆𑀩𑁄, 𑀅𑀦𑀼𑀪𑀯𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀗𑁆𑀔𑀢𑀦𑁆𑀢𑀺 ¶ 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀧𑀘𑁆𑀘𑀬𑀲𑀫𑁄𑀥𑀸𑀦𑀮𑀓𑁆𑀔𑀡𑁂𑀦 𑀲𑀗𑁆𑀕𑀫𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀭𑀽𑀧𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀓𑀢𑀁 𑀅𑀦𑀺𑀩𑁆𑀩𑀢𑁆𑀢𑀺𑀢𑀦𑁆𑀢𑀺 𑀅𑀲𑀗𑁆𑀔𑀢𑀁. 𑀦𑀢𑁆𑀣𑀺 𑀏𑀢𑁆𑀣 𑀫𑀢𑀦𑁆𑀢𑀺 𑀅𑀫𑀢𑀁, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀦𑀢𑁆𑀣𑀺 𑀧𑀼𑀕𑁆𑀕𑀮𑀲𑁆𑀲 𑀫𑀢𑀁 𑀫𑀭𑀡𑀦𑁆𑀢𑀺 𑀅𑀫𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀲𑁆𑀯𑀸𑀓𑁆𑀔𑀸𑀢𑀁 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀥𑀫𑁆𑀫-𑀲𑀤𑁆𑀤𑀧𑁆𑀧𑀬𑁄𑀕𑁄 𑀤𑀲𑁆𑀲𑀺𑀢𑁄, 𑀢𑀣𑀸𑀧𑀺 𑀥𑀫𑁆𑀫-𑀲𑀤𑁆𑀤𑁂𑀦 𑀅𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁂 𑀯𑁂𑀯𑀘𑀦𑁂 𑀦 𑀧𑀘𑁆𑀘𑀓𑁆𑀔𑀸𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 ‘‘𑀲𑁆𑀯𑀸𑀓𑁆𑀔𑀸𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑁆𑀯𑀸𑀓𑁆𑀔𑀸𑀢𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀥𑀫𑁆𑀫-𑀲𑀤𑁆𑀤𑀧𑁆𑀧𑀬𑁄𑀕𑁄 𑀲𑁆𑀯𑀸𑀓𑁆𑀔𑀸𑀢𑀸-𑀤𑀺𑀲𑀤𑁆𑀤𑀸𑀦𑀁 𑀥𑀫𑁆𑀫-𑀯𑀺𑀲𑁂𑀲𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀥𑀫𑁆𑀫𑀓𑁆𑀔𑀦𑁆𑀥𑀲𑁆𑀲𑀧𑀺 𑀦𑀸𑀫𑀦𑁆𑀢𑀺 𑀏𑀢𑁆𑀣 ‘‘𑀧𑀞𑀫𑀥𑀫𑁆𑀫𑀓𑁆𑀔𑀦𑁆𑀥𑀁 𑀤𑀼𑀢𑀺𑀬𑀥𑀫𑁆𑀫𑀓𑁆𑀔𑀦𑁆𑀥𑀁 𑀧𑀼𑀘𑁆𑀙𑀸𑀥𑀫𑁆𑀫𑀓𑁆𑀔𑀦𑁆𑀥𑀁 𑀯𑀺𑀲𑁆𑀲𑀚𑁆𑀚𑀦𑀸𑀥𑀫𑁆𑀫𑀓𑁆𑀔𑀦𑁆𑀥’’𑀦𑁆𑀢𑀺𑀆𑀤𑀺𑀦𑀸 𑀥𑀫𑁆𑀫𑀓𑁆𑀔𑀦𑁆𑀥𑀦𑀸𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀼𑀧𑁆𑀧𑀝𑀺𑀧𑀦𑁆𑀦𑀦𑁆𑀢𑀺 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀁. 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑀫𑁆𑀫 𑀧𑀝𑀺𑀧𑀦𑁆𑀦𑀢𑁆𑀢𑀸 𑀓𑀸𑀬𑀯𑀘𑀻𑀫𑀦𑁄𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀤𑁄𑀲𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀘 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀁. 𑀜𑀸𑀬𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀤𑀻𑀳𑀺 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀲𑀘𑁆𑀙𑀺𑀓𑀭𑀻𑀬𑀢𑀻𑀢𑀺 𑀓𑀢𑁆𑀯𑀸, 𑀢𑀤𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑀁. 𑀬𑀣𑀸 𑀧𑀝𑀺𑀧𑀦𑁆𑀦𑀸 𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀧𑀭𑁂𑀳𑀺 𑀓𑀭𑀺𑀬𑀫𑀸𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀭𑀳𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀁.

𑀬𑀼𑀕𑀴𑀯𑀲𑁂𑀦 𑀧𑀞𑀫𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀇𑀤𑀫𑁂𑀓𑀁 𑀬𑀼𑀕𑀴𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀏𑀢𑁆𑀣 𑀧𑀦 ‘‘𑀘𑀢𑀼𑀧𑀼𑀭𑀺𑀲𑀬𑀼𑀕𑀁 𑀲𑀗𑁆𑀖’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀘𑀢𑁆𑀢𑀸𑀭𑀻’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀏𑀢𑁆𑀣𑀸𑀢𑀺 𑀘𑀢𑀼𑀧𑀼𑀭𑀺𑀲𑀬𑀼𑀕𑁄𑀢𑀺 𑀳𑀺 𑀲𑀗𑁆𑀖𑁄 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀦𑁆𑀢𑀺 ¶ 𑀧𑀼𑀭𑀺𑀲𑀧𑀼𑀕𑁆𑀕𑀮𑀯𑀲𑁂𑀦 𑀏𑀓𑁄 𑀧𑀞𑀫𑀫𑀕𑁆𑀕𑀝𑁆𑀞𑁄, 𑀏𑀓𑁄 𑀨𑀮𑀝𑁆𑀞𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑁂𑀯 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀢𑁆𑀣𑀸𑀢𑀺 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑁄, 𑀲𑀗𑁆𑀖𑁄. 𑀏𑀢𑁆𑀣 𑀘 𑀧𑀼𑀭𑀺𑀲𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀏𑀓𑀢𑁆𑀣𑀸𑀦𑁂𑀢𑀸𑀦𑀺 𑀧𑀤𑀸𑀦𑀺, 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁.

𑀆𑀳𑀼𑀦𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁫𑁬) 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀼𑀦𑀁, 𑀤𑀽𑀭𑀢𑁄𑀧𑀺 𑀆𑀦𑁂𑀢𑁆𑀯𑀸 𑀲𑀻𑀮𑀯𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀸𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀆𑀳𑀼𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄 𑀢𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑀢𑁄𑀢𑀺 𑀆𑀳𑀼𑀦𑁂𑀬𑁆𑀬𑁄, 𑀲𑀗𑁆𑀖𑁄. 𑀅𑀣 𑀯𑀸 𑀤𑀽𑀭𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀏𑀢𑁆𑀣 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 ¶ 𑀆𑀳𑀯𑀦𑀻𑀬𑁄, 𑀲𑀓𑁆𑀓𑀸𑀤𑀻𑀦𑀫𑁆𑀧𑀺 𑀯𑀸 𑀆𑀳𑀯𑀦𑀁 𑀅𑀭𑀳𑀢𑀻𑀢𑀺 𑀆𑀳𑀯𑀦𑀻𑀬𑁄. 𑀬𑁄 𑀘𑀸𑀬𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀳𑀯𑀦𑀻𑀬𑁄 𑀅𑀕𑁆𑀕𑀺, 𑀬𑀢𑁆𑀣 𑀳𑀼𑀢𑀁 𑀫𑀳𑀧𑁆𑀨𑀮𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀲𑀘𑁂 𑀳𑀼𑀢𑀲𑁆𑀲 𑀫𑀳𑀧𑁆𑀨𑀮𑀢𑀸𑀬 𑀆𑀳𑀯𑀦𑀻𑀬𑁄, 𑀲𑀗𑁆𑀖𑁄𑀯 𑀆𑀳𑀯𑀦𑀻𑀬𑁄. 𑀲𑀗𑁆𑀖𑁂 𑀳𑀼𑀢𑀜𑁆𑀳𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀦𑁆𑀢𑀼, 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂 𑀯𑀦𑁂;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢’’𑀦𑁆𑀢𑀺. (𑀥. 𑀧. 𑁧𑁦𑁭);

𑀢𑀤𑁂𑀢𑀁 𑀦𑀺𑀓𑀸𑀬𑀦𑁆𑀢𑀭𑁂 ‘‘𑀆𑀳𑀯𑀦𑀻𑀬𑁄’’𑀢𑀺 𑀧𑀤𑀁 𑀇𑀥 ‘‘𑀆𑀳𑀼𑀦𑁂𑀬𑁆𑀬𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀢𑁄 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺𑀫𑀢𑁆𑀢𑀫𑁂𑀯 𑀦𑀸𑀦𑀁.

𑀧𑀸𑀳𑀼𑀦𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀸𑀳𑀼𑀦𑀁 𑀯𑀼𑀘𑁆𑀘𑀢𑀺 𑀤𑀺𑀲𑀸𑀯𑀺𑀤𑀺𑀲𑀢𑁄 𑀆𑀕𑀢𑀸𑀦𑀁 𑀧𑀺𑀬𑀫𑀦𑀸𑀧𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀲𑀓𑁆𑀓𑀸𑀭𑁂𑀦 𑀧𑀝𑀺𑀬𑀢𑁆𑀢𑀁 𑀆𑀕𑀦𑁆𑀢𑀼𑀓𑀤𑀸𑀦𑀁. 𑀢𑀫𑁆𑀧𑀺 𑀞𑀧𑁂𑀢𑁆𑀯𑀸 𑀢𑁂 𑀢𑀣𑀸𑀭𑀽𑀧𑁂 𑀧𑀺𑀬𑀫𑀺𑀢𑁆𑀢𑀸𑀤𑀺𑀓𑁂 𑀧𑀸𑀳𑀼𑀦𑀓𑁂 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀲𑀗𑁆𑀖𑁄𑀯 𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄. 𑀲𑀗𑁆𑀖𑀲𑀤𑀺𑀲𑁄 𑀳𑀺 𑀧𑀸𑀳𑀼𑀦𑀓𑁄 𑀦𑀢𑁆𑀣𑀺. 𑀢𑀣𑀸 𑀳𑁂𑀲 𑀏𑀓𑀩𑀼𑀤𑁆𑀥𑀦𑁆𑀢𑀭𑁂 𑀯𑀻𑀢𑀺𑀯𑀢𑁆𑀢𑁂𑀬𑁂𑀯 𑀤𑀺𑀲𑁆𑀲𑀢𑀺, 𑀅𑀩𑁆𑀩𑁄𑀓𑀺𑀡𑁆𑀡𑀜𑁆𑀘 𑀧𑀺𑀬𑀫𑀦𑀸𑀧𑀢𑁆𑀢𑀓𑀭𑁂𑀳𑀺 𑀲𑀻𑀮𑀸𑀤𑀺𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀯𑀁 𑀧𑀸𑀳𑀼𑀦𑀫𑀲𑁆𑀲 𑀤𑀸𑀢𑀼𑀁 𑀬𑀼𑀢𑁆𑀢𑀁, 𑀧𑀸𑀳𑀼𑀦𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄.

𑀤𑀓𑁆𑀔𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀁. 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀺, 𑀤𑀓𑁆𑀔𑀺𑀡𑀸𑀬 𑀯𑀸 𑀳𑀺𑀢𑁄 𑀬𑀲𑁆𑀫𑀸 𑀦𑀁 𑀫𑀳𑀧𑁆𑀨𑀮𑀓𑀭𑀢𑀸𑀬 𑀯𑀺𑀲𑁄𑀥𑁂𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄. 𑀉𑀪𑁄 𑀳𑀢𑁆𑀣𑁂 𑀲𑀺𑀭𑀲𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀮𑁄𑀓𑁂𑀦 𑀓𑀭𑀺𑀬𑀫𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀅𑀭𑀳𑀢𑀻𑀢𑀺 𑀅𑀜𑁆𑀚𑀮𑀺𑀓𑀭𑀡𑀻𑀬𑁄. 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀦𑁆𑀢𑀺 𑀲𑀩𑁆𑀩𑀮𑁄𑀓𑀲𑁆𑀲 𑀅𑀲𑀤𑀺𑀲𑀁 𑀧𑀼𑀜𑁆𑀜𑀯𑀺𑀭𑀼𑀳𑀦𑀝𑁆𑀞𑀸𑀦𑀁 ¶ . 𑀬𑀣𑀸 𑀳𑀺 𑀭𑀜𑁆𑀜𑁄 𑀯𑀸 𑀅𑀫𑀘𑁆𑀘𑀲𑁆𑀲 𑀯𑀸 𑀲𑀸𑀮𑀻𑀦𑀁 𑀯𑀸 𑀬𑀯𑀸𑀦𑀁 𑀯𑀸 𑀯𑀺𑀭𑀼𑀳𑀦𑀝𑁆𑀞𑀸𑀦𑀁 𑀭𑀜𑁆𑀜𑁄 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀬𑀯𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀗𑁆𑀖𑁄 𑀲𑀩𑁆𑀩𑀮𑁄𑀓𑀲𑁆𑀲 𑀧𑀼𑀜𑁆𑀜𑀸𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀳𑀺 𑀮𑁄𑀓𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀳𑀺𑀢𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀯𑀺𑀭𑀼𑀳𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀏𑀢𑁆𑀣𑀸𑀧𑀺 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀁 𑀲𑀗𑁆𑀖’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖-𑀲𑀤𑁆𑀤𑀧𑁆𑀧𑀬𑁄𑀕𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑀸-𑀤𑀺𑀲𑀤𑁆𑀤𑀸𑀦𑀁 𑀲𑀗𑁆𑀖𑀯𑀺𑀲𑁂𑀲𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀓𑀢𑁄, 𑀢𑀲𑁆𑀫𑀸 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀺𑀓𑁆𑀔𑀸𑀯𑁂𑀯𑀘𑀦𑁂𑀲𑀼 ¶ 𑀧𑀦 𑀲𑀺𑀓𑁆𑀔𑀸-𑀲𑀤𑁆𑀤𑀁 𑀯𑀺𑀦𑀸 𑀓𑁂𑀯𑀮𑀁 𑀪𑀺𑀓𑁆𑀔𑀼-𑀲𑀤𑁆𑀤𑁄 𑀪𑀺𑀓𑁆𑀔𑀼𑀦𑀻-𑀲𑀤𑁆𑀤𑁄 𑀘 𑀲𑀺𑀓𑁆𑀔𑀸𑀬 𑀅𑀥𑀺𑀯𑀘𑀦𑀁 𑀦 𑀳𑁄𑀢𑀻𑀢𑀺 ‘‘𑀪𑀺𑀓𑁆𑀔𑀼𑀲𑀺𑀓𑁆𑀔𑀁 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺, 𑀅𑀥𑀺𑀲𑀻𑀮𑀸𑀤𑀬𑁄 𑀧𑀦 𑀲𑀺𑀓𑁆𑀔𑀸 𑀏𑀯𑀸𑀢𑀺 ‘‘𑀅𑀥𑀺𑀲𑀻𑀮𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀲𑀻𑀲𑀁 𑀏𑀢𑀺. 𑀧𑀞𑀫𑀁 𑀧𑀸𑀭𑀸𑀚𑀺𑀓𑀦𑁆𑀢𑀺𑀆𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑀸𑀦𑀁𑀬𑁂𑀯 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀆𑀧𑀢𑁆𑀢𑀻𑀦𑀁.

𑀉𑀧𑀚𑁆𑀛𑀸𑀬𑀯𑁂𑀯𑀘𑀦𑁂𑀲𑀼 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸 𑀬𑁄 𑀧𑀩𑁆𑀩𑀸𑀚𑁂𑀲𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺 𑀘, 𑀢𑀁 𑀲𑀦𑁆𑀥𑀸𑀬 ‘‘𑀬𑁄 𑀫𑀁 𑀧𑀩𑁆𑀩𑀸𑀚𑁂𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀫𑀽𑀮𑁂𑀦𑀸𑀢𑀺 𑀬𑀲𑁆𑀲 𑀧𑀥𑀸𑀦𑀪𑀸𑀯𑁂𑀦 𑀓𑀸𑀭𑀡𑀪𑀸𑀯𑁂𑀦 𑀯𑀸. 𑀬𑀲𑁆𑀲 𑀫𑀽𑀮𑀁 𑀧𑀥𑀸𑀦𑀪𑀸𑀯𑁄 𑀓𑀸𑀭𑀡𑀪𑀸𑀯𑁄 𑀯𑀸 𑀏𑀢𑀺𑀲𑁆𑀲𑀸𑀢𑀺 𑀬𑀲𑁆𑀲𑀫𑀽𑀮𑀺𑀓𑀸, 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘. 𑀫𑀽𑀮-𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀪𑀸𑀯𑁂𑀧𑀺 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀕𑀫𑀓𑀢𑁆𑀢𑀸 𑀢𑀤𑁆𑀥𑀺𑀢𑀯𑀼𑀢𑁆𑀢𑀺 𑀤𑀝𑁆𑀞𑀩𑁆𑀩𑀸.

𑀆𑀘𑀭𑀺𑀬𑀯𑁂𑀯𑀘𑀦𑁂𑀲𑀼 𑀧𑀦 𑀬𑁄 𑀉𑀧𑀚𑁆𑀛𑀁 𑀅𑀤𑀢𑁆𑀯𑀸 𑀆𑀘𑀭𑀺𑀬𑁄𑀯 𑀳𑀼𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺, 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺 𑀘, 𑀢𑀁 𑀲𑀦𑁆𑀥𑀸𑀬 ‘‘𑀬𑁄 𑀫𑀁 𑀧𑀩𑁆𑀩𑀸𑀚𑁂𑀲𑀺, 𑀬𑁄 𑀫𑀁 𑀅𑀦𑀼𑀲𑀸𑀯𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑀘𑀦𑁂𑀳𑀺 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀘 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀘 𑀤𑀲𑁆𑀲𑀺𑀢𑁄. 𑀬𑀸𑀳𑀁 𑀦𑀺𑀲𑁆𑀲𑀸𑀬 𑀯𑀲𑀸𑀫𑀻𑀢𑀺 𑀦𑀺𑀲𑁆𑀲𑀬𑀸𑀘𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀬𑀸𑀳𑀁 𑀉𑀤𑁆𑀤𑀺𑀲𑀸𑀧𑁂𑀫𑀻𑀢𑀺𑀆𑀤𑀺𑀦𑀸 𑀧𑀦 𑀥𑀫𑁆𑀫𑀸𑀘𑀭𑀺𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀉𑀤𑁆𑀤𑀺𑀲𑀸𑀧𑁂𑀫𑀻𑀢𑀺 𑀧𑀸𑀞𑀁 𑀉𑀤𑁆𑀤𑀺𑀲𑀸𑀧𑁂𑀫𑀺. 𑀧𑀭𑀺𑀧𑀼𑀘𑁆𑀙𑀸𑀫𑀻𑀢𑀺 𑀉𑀕𑁆𑀕𑀳𑀺𑀢𑀧𑀸𑀞𑀲𑁆𑀲 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀸𑀫𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑁂𑀯𑀘𑀦𑀸𑀤𑀻𑀲𑀼 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀫𑀽𑀮𑁂𑀢𑀺 𑀏𑀢𑁆𑀣 𑀧𑀦 𑀢𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀓𑀮𑁆𑀮𑀓𑁄𑀢𑀺 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀧𑀭𑁂𑀢𑀸𑀦𑀁 𑀔𑀻𑀡𑀲𑀼𑀔𑀸𑀦𑀁 𑀦𑀳𑀸𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀭𑀳𑀺𑀢𑀸𑀦𑀁 𑀓𑀧𑀡𑀫𑀦𑀼𑀲𑁆𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀫𑁄𑀴𑀺𑀩𑀤𑁆𑀥𑁄𑀢𑀺 𑀲𑀺𑀔𑀸𑀩𑀤𑁆𑀥𑁄 𑀑𑀫𑀼𑀓𑁆𑀓𑀫𑀓𑀼𑀝𑁄 𑀯𑀸. 𑀓𑀺𑀜𑁆𑀘𑀸𑀧𑀺 𑀤𑁆𑀯𑁂𑀯𑀸𑀘𑀺𑀓𑁄 𑀉𑀧𑀸𑀲𑀓𑁄 𑀧𑀞𑀫𑀩𑁄𑀥𑀺𑀬𑀁𑀬𑁂𑀯 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀢𑀤𑀸 𑀮𑀩𑁆𑀪𑀫𑀸𑀦𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂𑀯𑀸𑀘𑀺𑀓𑁄 𑀉𑀧𑀸𑀲𑀓𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑁂𑀯𑀸𑀘𑀺𑀓𑁄’’𑀢𑀺 𑀇𑀤𑀫𑁂𑀯 ¶ 𑀧𑀦𑁂𑀢𑁆𑀣 𑀯𑁂𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 ‘‘𑀤𑁆𑀯𑁂𑀯𑀸𑀘𑀺𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀢𑁆𑀢𑀓𑁂𑀧𑀺 𑀯𑀼𑀢𑁆𑀢𑁂 𑀲𑀻𑀲𑀁 𑀏𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀓𑀼𑀫𑀸𑀭𑀓𑁄𑀢𑀺 ¶ 𑀓𑀼𑀫𑀸𑀭𑀸𑀯𑀢𑁆𑀣𑁄 𑀅𑀢𑀺𑀯𑀺𑀬 𑀤𑀳𑀭𑀲𑀸𑀫𑀡𑁂𑀭𑁄. 𑀘𑁂𑀮𑁆𑀮𑀓𑁄𑀢𑀺 𑀢𑀢𑁄 𑀫𑀳𑀦𑁆𑀢𑀢𑀭𑁄 𑀔𑀼𑀤𑁆𑀤𑀓𑀲𑀸𑀫𑀡𑁂𑀭𑁄. 𑀘𑁂𑀝𑀓𑁄𑀢𑀺 𑀫𑀚𑁆𑀛𑀺𑀫𑁄. 𑀫𑁄𑀴𑀺𑀕𑀮𑁆𑀮𑁄𑀢𑀺 𑀫𑀳𑀸𑀲𑀸𑀫𑀡𑁂𑀭𑁄. 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀧𑀦 𑀅𑀯𑀺𑀲𑁂𑀲𑀢𑁄 𑀲𑀸𑀫𑀡𑁂𑀭𑀸𑀥𑀺𑀯𑀘𑀦𑀁. 𑀦𑀺𑀕𑀡𑁆𑀞𑀼𑀧𑀝𑁆𑀞𑀸𑀓𑁄𑀢𑀺𑀆𑀤𑀻𑀦𑀺𑀧𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀯𑁂𑀯𑀘𑀦𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄 𑀲𑀻𑀮𑀯𑀺𑀭𑀳𑀺𑀢𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀮𑀸𑀫𑀓𑀲𑀪𑀸𑀯𑁄. 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀢𑀸𑀬 𑀅𑀲𑀼𑀘𑀺 𑀳𑀼𑀢𑁆𑀯𑀸 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀤𑀼𑀲𑁆𑀲𑀻𑀮𑁄 𑀳𑀺 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀅𑀲𑀼𑀓𑁂𑀦 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀲𑀁 𑀆𑀲𑀗𑁆𑀓𑀦𑀻𑀬𑁄 𑀳𑁄𑀢𑀺. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀫𑁂 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄𑀢𑀺 𑀮𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀓𑀫𑁆𑀫𑀦𑁆𑀢𑁄. 𑀅𑀲𑁆𑀲𑀫𑀡𑁄𑀢𑀺 𑀦 𑀲𑀫𑀡𑁄. 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀅𑀩𑁆𑀭𑀳𑁆𑀫𑀘𑀸𑀭𑀻, 𑀉𑀧𑁄𑀲𑀣𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺, 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑁄, 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀘 𑀓𑀲𑀫𑁆𑀩𑀼𑀚𑀸𑀢𑁄. 𑀓𑁄𑀡𑁆𑀞𑁄𑀢𑀺 𑀤𑀼𑀲𑁆𑀲𑀻𑀮𑀸𑀥𑀺𑀯𑀘𑀦𑀫𑁂𑀢𑀁.

‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀺 𑀯𑀸’’𑀢𑀺𑀆𑀤𑀺𑀦𑀸 𑀬𑀁-𑀲𑀤𑁆𑀤𑀧𑀭𑀸𑀫𑀝𑁆𑀞𑀸𑀦𑀁 𑀩𑀼𑀤𑁆𑀥𑀸𑀤𑀺𑀯𑁂𑀯𑀘𑀦𑀸𑀦𑀁𑀬𑁂𑀯 𑀢𑀁-𑀲𑀤𑁆𑀤𑁂𑀦 𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀢𑁂𑀳𑀺 𑀆𑀓𑀸𑀭𑁂𑀳𑀺…𑀧𑁂… 𑀩𑀼𑀤𑁆𑀥𑀸𑀤𑀻𑀦𑀁 𑀯𑁂𑀯𑀘𑀦𑁂𑀳𑀻’’𑀢𑀺. 𑀓𑀣𑀁 𑀧𑀦 𑀢𑀸𑀦𑀺 𑀆𑀓𑀸𑀭𑀸𑀤𑀺𑀲𑀤𑁆𑀤𑁂𑀳𑀺 𑀯𑁄𑀳𑀭𑀻𑀬𑀦𑁆𑀢𑀻𑀢𑀺 𑀆𑀳 ‘‘𑀯𑁂𑀯𑀘𑀦𑀸𑀦𑀺 𑀳𑀻’’𑀢𑀺𑀆𑀤𑀺. 𑀲𑀡𑁆𑀞𑀸𑀦𑀯𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀲𑀡𑁆𑀞𑀸𑀦𑀤𑀻𑀧𑀦𑀁 𑀢𑀸𑀯 𑀳𑁄𑀢𑀼, 𑀲𑀡𑁆𑀞𑀸𑀦𑀭𑀳𑀺𑀢𑀸𑀦𑀁 𑀧𑀦 𑀥𑀫𑁆𑀫𑀲𑀺𑀓𑁆𑀔𑀸𑀤𑀻𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑀡𑁆𑀞𑀸𑀦𑀢𑁆𑀢𑀸 𑀏𑀯 𑀯𑀸’’𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀭𑀽𑀧𑀸𑀦𑀺 𑀳𑀺 𑀯𑁂𑀯𑀘𑀦𑀸𑀦𑀺 ‘‘𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑀡𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀔𑁄𑀢𑀺 𑀏𑀢𑁆𑀣 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀏𑀯𑀫𑁂𑀯𑀸’’𑀢𑀺.

𑁫𑁪. 𑀫𑀼𑀘𑁆𑀙𑀸𑀧𑀭𑁂𑀢𑁄𑀢𑀺 ¶ 𑀫𑀼𑀘𑁆𑀙𑀸𑀬 𑀅𑀪𑀺𑀪𑀽𑀢𑁄. 𑀯𑀘𑀦𑀢𑁆𑀣𑀯𑀺𑀚𑀸𑀦𑀦𑀲𑀫𑀢𑁆𑀣𑀁 𑀢𑀺𑀭𑀘𑁆𑀙𑀸𑀦𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀕𑀫𑀸𑀡𑀯𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀩𑁆𑀩𑀸𑀧𑀺 𑀤𑁂𑀯𑀢𑀸 ¶ 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀯 𑀳𑁄𑀦𑁆𑀢𑀺 𑀤𑁆𑀯𑀺𑀳𑁂𑀢𑀼𑀓𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑁄. 𑀅𑀢𑀺𑀔𑀺𑀧𑁆𑀧𑀁 𑀚𑀸𑀦𑀦𑁆𑀢𑀻𑀢𑀺 𑀤𑁂𑀯𑀢𑀸𑀦𑀁 𑀪𑀯𑀗𑁆𑀕𑀧𑀭𑀺𑀯𑀸𑀲𑀲𑁆𑀲 𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀅𑀤𑀦𑁆𑀥𑀪𑀸𑀯𑀢𑁄 𑀯𑀼𑀢𑁆𑀢𑀁.

𑀲𑀪𑀸𑀕𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲. 𑀯𑀺𑀲𑀪𑀸𑀕𑀲𑁆𑀲𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲. 𑀅𑀦𑀭𑀺𑀬𑀓𑁄𑀢𑀺 𑀫𑀸𑀕𑀥𑀯𑁄𑀳𑀸𑀭𑀢𑁄 𑀅𑀜𑁆𑀜𑁄. 𑀤𑀯𑀸𑀢𑀺 𑀲𑀳𑀲𑀸. 𑀭𑀯𑀸𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸. 𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑁄 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺 𑀪𑀡𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀓𑁆𑀔𑀭𑀲𑀫𑀬𑀸𑀦𑀪𑀺𑀜𑁆𑀜𑀢𑀸𑀬 𑀯𑀸 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀯𑀸 𑀓𑀣𑁂𑀢𑀩𑁆𑀩𑀁 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀓𑀣𑁂𑀦𑁆𑀢𑁄 𑀭𑀯𑀸 𑀪𑀡𑀢𑀺 𑀦𑀸𑀫. 𑀉𑀪𑀬𑀣𑀸𑀧𑀺 𑀅𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑀲𑁆𑀲 𑀅𑀜𑁆𑀜𑀪𑀡𑀦𑀁 𑀲𑀫𑀸𑀦𑀦𑁆𑀢𑀺 𑀆𑀳 ‘‘𑀧𑀼𑀭𑀺𑀫𑁂𑀦 𑀓𑁄 𑀯𑀺𑀲𑁂𑀲𑁄’’𑀢𑀺.

𑀯𑀸𑀘𑁂𑀢𑀻𑀢𑀺 𑀧𑀸𑀴𑀺𑀁 𑀓𑀣𑁂𑀦𑁆𑀢𑁄 𑀅𑀜𑁆𑀜𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀯𑀸 𑀯𑀸𑀘𑁂𑀢𑀺. 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀧𑀸𑀴𑀺𑀁 𑀧𑀭𑀺𑀧𑀼𑀘𑁆𑀙𑀢𑀺. 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀧𑀸𑀴𑀺𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀲𑀚𑁆𑀛𑀸𑀬𑀁 𑀓𑀭𑁄𑀢𑀻𑀢𑀺 𑀉𑀕𑁆𑀕𑀳𑀺𑀢𑀧𑀸𑀴𑀺𑀁 𑀲𑀚𑁆𑀛𑀸𑀬𑀢𑀺. 𑀯𑀡𑁆𑀡𑁂𑀢𑀻𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀧𑀸𑀴𑀺𑀁 𑀯𑀡𑁆𑀡𑁂𑀢𑀺. 𑀫𑀳𑀮𑁆𑀮𑀓𑀲𑁆𑀲 𑀓𑀺𑀜𑁆𑀘𑀺 𑀅𑀚𑀸𑀦𑀦𑀢𑁄 𑀅𑀯𑀺𑀤𑀺𑀢𑀺𑀦𑁆𑀤𑁆𑀭𑀺𑀬𑀢𑀸𑀬 𑀯𑀸 ‘‘𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀫𑀢𑁆𑀢𑀺𑀓𑀸𑀬 𑀓𑀢𑀭𑀽𑀧𑀲𑀤𑀺𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀕𑀭𑀼𑀫𑁂𑀥𑀲𑁆𑀲𑀸𑀢𑀺 𑀆𑀭𑀫𑁆𑀫𑀡𑁂𑀲𑀼 𑀮𑀳𑀼𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀤𑀦𑁆𑀥𑀕𑀢𑀺𑀓𑀢𑀸𑀬 𑀕𑀭𑀼𑀧𑀜𑁆𑀜𑀲𑁆𑀲, 𑀫𑀦𑁆𑀤𑀧𑀜𑁆𑀜𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀲𑁄 𑀯𑀸𑀢𑀺 𑀇𑀫𑀺𑀦𑀸 ‘‘𑀇𑀤𑀁 𑀧𑀤𑀁 𑀲𑀸𑀯𑁂𑀲𑁆𑀲𑀸𑀫𑀺 ‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’’’𑀢𑀺 𑀏𑀯𑀁 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀢𑀺 𑀏𑀯𑀭𑀽𑀧𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀣𑀸𑀯𑀺𑀥𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀸𑀯𑀦𑀁 𑀦𑀸𑀫 𑀦𑁂𑀯 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼…𑀧𑁂… 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀦 𑀲𑀸𑀯𑁂𑀢𑀻’’𑀢𑀺.

𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁫𑁫. 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲𑀸𑀢𑀺 ¶ 𑀯𑀺𑀯𑀭𑀺𑀢𑀩𑁆𑀩𑀲𑁆𑀲 𑀧𑀓𑀸𑀲𑁂𑀢𑀩𑁆𑀩𑀲𑁆𑀲. 𑀓𑀺𑀮𑁂𑀲𑁂𑀳𑀻𑀢𑀺 𑀅𑀳𑀺𑀭𑀺𑀓𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀼𑀝𑁆𑀞𑀼𑀮𑁆𑀮-𑀧𑀤𑀢𑁄 𑀧𑀝𑁆𑀞𑀸𑀬. 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀲𑁆𑀲. 𑀤𑀲𑁆𑀲𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀲𑁆𑀲𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑁆𑀲.

𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀤𑁆𑀯𑀬𑁂𑀦 𑀤𑁆𑀯𑀬𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄’’𑀢𑀺. 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀫𑀺𑀣𑀼𑀦𑀸𑀦𑀁 𑀇𑀤𑀁 𑀫𑁂𑀣𑀼𑀦𑀁, 𑀫𑁂𑀣𑀼𑀦𑀫𑁂𑀯 𑀥𑀫𑁆𑀫𑁄 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 ¶ 𑀆𑀳 ‘‘𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀭𑀢𑁆𑀢𑀸𑀦𑀦𑁆𑀢𑀺 𑀫𑁂𑀣𑀼𑀦𑀭𑀸𑀕𑁂𑀦 𑀭𑀢𑁆𑀢𑀸𑀦𑀁. 𑀲𑀸𑀭𑀢𑁆𑀢𑀸𑀦𑀦𑁆𑀢𑀺 𑀢𑁂𑀦𑁂𑀯 𑀭𑀸𑀕𑁂𑀦 𑀅𑀢𑀺𑀯𑀺𑀬 𑀭𑀢𑁆𑀢𑀸𑀦𑀁. 𑀅𑀯𑀲𑁆𑀲𑀼𑀢𑀸𑀦𑀦𑁆𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀫𑁂𑀣𑀼𑀦𑀭𑀸𑀕𑁂𑀦 𑀢𑀺𑀦𑁆𑀢𑀸𑀦𑀁. 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀦𑁆𑀢𑀺 𑀫𑁂𑀣𑀼𑀦𑀭𑀸𑀕𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀘𑀺𑀢𑁆𑀢𑀸𑀦𑀁. 𑀲𑀤𑀺𑀲𑀸𑀦𑀦𑁆𑀢𑀺 𑀭𑀢𑁆𑀢𑀢𑀸𑀤𑀻𑀳𑀺 𑀲𑀤𑀺𑀲𑀸𑀦𑀁.

𑀬𑀲𑁆𑀫𑀸 ‘‘𑀧𑀝𑀺𑀲𑁂𑀯𑀢𑀺 𑀦𑀸𑀫𑀸’’𑀢𑀺 𑀧𑀤𑀁 𑀫𑀸𑀢𑀺𑀓𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀧𑀝𑀺𑀲𑁂𑀯𑀢𑀺 𑀦𑀸𑀫𑀸𑀢𑀺 𑀓𑀲𑁆𑀫𑀸 𑀉𑀤𑁆𑀥𑀝’’𑀦𑁆𑀢𑀺 𑀬𑁄 𑀫𑀜𑁆𑀜𑀢𑀺, 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀏𑀢𑁆𑀣…𑀧𑁂… 𑀫𑀸𑀢𑀺𑀓𑀸𑀧𑀤’’𑀦𑁆𑀢𑀺 𑀆𑀳. 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 ‘‘𑀫𑀕𑁆𑀕𑁂𑀦 𑀕𑀘𑁆𑀙𑀢𑀻’’𑀢𑀺𑀆𑀤𑀺 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 ‘‘𑀫𑀕𑁆𑀕𑁂𑀦 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀫𑀕𑁆𑀕𑁂 𑀯𑀸 𑀕𑀘𑁆𑀙𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀏𑀯𑀁 ‘‘𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂𑀦 𑀧𑀯𑁂𑀲𑁂𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀧𑀯𑁂𑀲𑁂𑀢𑀺, 𑀦𑀺𑀫𑀺𑀢𑁆𑀢𑁂 𑀯𑀸 𑀧𑀯𑁂𑀲𑁂𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀧𑀼𑀭𑀺𑀲𑀧𑀬𑁄𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀧𑀯𑁂𑀲𑀦𑀁 𑀦𑀸𑀫 𑀦 𑀩𑀳𑀺 𑀙𑀼𑀧𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑁂 𑀅𑀮𑁆𑀮𑁄𑀓𑀸𑀲𑁂’’𑀢𑀺. 𑀅𑀩𑁆𑀪𑀦𑁆𑀢𑀭𑀜𑁆𑀳𑀺 𑀧𑀯𑁂𑀲𑁂𑀦𑁆𑀢𑁄 ‘‘𑀧𑀯𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀩𑀳𑀺 𑀙𑀼𑀧𑀦𑁆𑀢𑁄. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀘 𑀧𑀓𑀢𑀺𑀬𑀸 𑀲𑀩𑁆𑀩𑀲𑁄 𑀧𑀺𑀳𑀺𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑁄𑀓𑀸𑀲𑁄 𑀯𑀼𑀘𑁆𑀘𑀢𑀻𑀢𑀺.

𑀇𑀤𑀸𑀦𑀺 𑀲𑀩𑁆𑀩𑀣𑀸 𑀮𑁂𑀲𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂 𑀘 𑀮𑀩𑁆𑀪𑀫𑀸𑀦𑀁 𑀧𑀯𑁂𑀲𑀓𑀸𑀮𑁂 𑀅𑀜𑁆𑀜𑀫𑀜𑁆𑀜𑀁 𑀨𑀲𑁆𑀲𑀸𑀭𑀳𑀁 𑀧𑀤𑁂𑀲𑀯𑀺𑀲𑁂𑀲𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀯𑀸𑀢𑁂𑀦 𑀳𑀺 𑀅𑀲𑀫𑁆𑀨𑀼𑀝𑁆𑀞𑁂 𑀅𑀮𑁆𑀮𑁄𑀓𑀸𑀲𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑁂𑀦𑀧𑀺 𑀧𑀤𑁂𑀲𑁂𑀦 𑀙𑀼𑀧𑀺𑀢𑁆𑀯𑀸 𑀧𑀯𑁂𑀲𑁂𑀦𑁆𑀢𑁄 ‘‘𑀧𑀯𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀫𑀚𑁆𑀛𑀦𑁆𑀢𑀺 𑀬𑀣𑀸 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺 𑀅𑀲𑀫𑁆𑀨𑀼𑀲𑀦𑁆𑀢𑁄 𑀧𑀯𑁂𑀲𑁂𑀢𑀺, 𑀏𑀯𑀁 𑀓𑀢𑀯𑀺𑀯𑀭𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀁 𑀯𑀼𑀘𑁆𑀘𑀢𑀺 ¶ , 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂 𑀧𑀦 𑀫𑀚𑁆𑀛𑀦𑁆𑀢𑀺 𑀅𑀕𑁆𑀕𑀓𑁄𑀝𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀉𑀧𑀭𑀻𑀢𑀺 𑀅𑀕𑁆𑀕𑀓𑁄𑀝𑀺𑀢𑁄 𑀉𑀧𑀭𑀺𑀪𑀸𑀕𑀧𑁆𑀧𑀤𑁂𑀲𑁄. 𑀇𑀤𑀜𑁆𑀘 𑀫𑀚𑁆𑀛𑁂𑀦 𑀲𑀫𑀺𑀜𑁆𑀚𑀺𑀢𑁆𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲 𑀫𑀚𑁆𑀛𑀺𑀫𑀧𑀩𑁆𑀩𑀲𑀫𑀺𑀜𑁆𑀚𑀺𑀢𑀗𑁆𑀕𑀼𑀮𑀺𑀁 𑀓𑀢𑁆𑀣𑀘𑀺 𑀧𑀯𑁂𑀲𑁂𑀦𑁆𑀢𑀲𑁆𑀲 𑀅𑀗𑁆𑀕𑀼𑀮𑀺𑀬𑀸 𑀫𑀚𑁆𑀛𑀺𑀫𑀧𑀩𑁆𑀩𑀧𑀺𑀝𑁆𑀞𑀺𑀲𑀤𑀺𑀲𑀁 𑀅𑀗𑁆𑀕𑀚𑀸𑀢𑀲𑁆𑀲 𑀉𑀧𑀭𑀺𑀪𑀸𑀕𑀯𑁂𑀫𑀚𑁆𑀛𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀧𑀯𑁂𑀲𑁂𑀦𑁆𑀢𑁄𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀪𑀸𑀕𑁂𑀦 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄. 𑀫𑀚𑁆𑀛𑁂𑀦 𑀧𑀯𑁂𑀲𑁂𑀦𑁆𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑀢𑀮𑀁 𑀙𑀼𑀧𑀺𑀢𑁆𑀯𑀸 𑀫𑀚𑁆𑀛𑁂𑀦 𑀧𑀯𑁂𑀲𑁂𑀦𑁆𑀢𑁄. 𑀓𑀢𑁆𑀣𑀘𑀺 𑀅𑀘𑁆𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀳𑀺 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀁, 𑀤𑀼𑀓𑁆𑀓𑀝𑀁 𑀧𑀦 𑀳𑁄𑀢𑀺 𑀙𑀺𑀦𑁆𑀦𑀲𑀻𑀲𑀯𑀢𑁆𑀣𑀼𑀲𑁆𑀫𑀺𑀁 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀯𑀺𑀬. 𑀫𑀚𑁆𑀛𑁂𑀦𑁂𑀯 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄𑀢𑀺 𑀅𑀕𑁆𑀕𑀓𑁄𑀝𑀺𑀬𑀸 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀦𑁆𑀢𑁄. 𑀫𑀚𑁆𑀛𑀺𑀫𑀧𑀩𑁆𑀩𑀧𑀺𑀝𑁆𑀞𑀺𑀬𑀸 𑀲𑀫𑀺𑀜𑁆𑀚𑀺𑀢𑀗𑁆𑀕𑀼𑀮𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀲𑀫𑀺𑀜𑁆𑀚𑀺𑀢𑀗𑁆𑀕𑀼𑀮𑀺𑀁 𑀫𑀚𑁆𑀛𑀺𑀫𑀧𑀩𑁆𑀩𑀧𑀺𑀝𑁆𑀞𑀺𑀬𑀸 𑀧𑀯𑁂𑀲𑁂𑀦𑁆𑀢𑁄 𑀯𑀺𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀗𑁆𑀓𑁄𑀘𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀫𑀚𑁆𑀛𑁂𑀦 𑀪𑀺𑀦𑁆𑀤𑀺𑀢𑁆𑀯𑀸. 𑀉𑀧𑀭𑀺𑀪𑀸𑀕𑁂𑀦𑀸𑀢𑀺 𑀲𑀗𑁆𑀓𑁄𑀘𑀺𑀢𑀲𑁆𑀲 𑀉𑀧𑀭𑀺𑀪𑀸𑀕𑀓𑁄𑀝𑀺𑀬𑀸. 𑀇𑀤𑀸𑀦𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀉𑀧𑀭𑀻𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀲𑁆𑀲 𑀯𑀲𑁂𑀦 𑀯𑀺𑀲𑀼𑀁 𑀘𑀢𑁆𑀢𑀸𑀭𑀺 ¶ 𑀧𑀲𑁆𑀲𑀸𑀦𑀺 𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂 𑀤𑀲𑀥𑀸 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀳𑁂𑀝𑁆𑀞𑀸 𑀧𑀦 𑀯𑀺𑀲𑀼𑀁 𑀢𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀻’’𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀮𑀩𑁆𑀪𑀫𑀸𑀦𑀸𑀦𑀺 𑀏𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀙 𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀼𑀮𑀸𑀤𑀡𑁆𑀟𑀲𑀤𑀺𑀲𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀉𑀚𑀼𑀓𑀁 𑀧𑀯𑁂𑀲𑁂𑀦𑁆𑀢𑀲𑁆𑀲.

𑀦𑀺𑀫𑀺𑀢𑁆𑀢𑁂 𑀚𑀸𑀢𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑁂 𑀚𑀸𑀢𑀁. 𑀘𑀫𑁆𑀫𑀔𑀻𑀮𑀦𑁆𑀢𑀺 𑀦𑀺𑀫𑀺𑀢𑁆𑀢𑁂 𑀉𑀝𑁆𑀞𑀺𑀢𑀁 𑀘𑀫𑁆𑀫𑀫𑁂𑀯. ‘‘𑀉𑀡𑁆𑀡𑀺𑀕𑀡𑁆𑀟𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀺𑀫𑀺𑀢𑁆𑀢𑁂 𑀚𑀸𑀢𑀫𑁆𑀧𑀺 𑀘𑀫𑁆𑀫𑀔𑀻𑀮𑀸𑀤𑀺 𑀦𑀺𑀫𑀺𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺. ‘‘𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤’’𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀺𑀦𑁆𑀦𑀪𑀸𑀯𑀲𑁆𑀲 𑀦𑀢𑁆𑀣𑀺𑀢𑀸𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯𑀸𑀳 𑁋 ‘‘𑀫𑀢𑀘𑀫𑁆𑀫𑀁 𑀯𑀸 𑀲𑀼𑀓𑁆𑀔𑀧𑀻𑀴𑀓𑀁 𑀯𑀸’’𑀢𑀺. 𑀲𑀢𑀺 𑀳𑀺 𑀉𑀧𑀸𑀤𑀺𑀦𑁆𑀦𑀪𑀸𑀯𑁂 𑀉𑀧𑀳𑀢𑁂𑀧𑀺 𑀓𑀸𑀬𑀧𑁆𑀧𑀲𑀸𑀤𑁂 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯 𑀲𑀺𑀬𑀸, 𑀫𑀢𑀘𑀫𑁆𑀫𑀁 𑀧𑀦 𑀲𑀼𑀓𑁆𑀔𑀧𑀻𑀴𑀓𑀜𑁆𑀘 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀉𑀧𑀸𑀤𑀺𑀦𑁆𑀦𑀓𑁂𑀬𑁂𑀯 𑀘 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀦 𑀘 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀦 𑀦𑀝𑁆𑀞𑁂𑀧𑀺 𑀉𑀧𑀸𑀤𑀺𑀦𑁆𑀦𑀪𑀸𑀯𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯. 𑀫𑀢𑁂 𑀅𑀓𑁆𑀔𑀸𑀬𑀺𑀢𑁂 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀘𑀦𑀢𑁄 𑀫𑁂𑀣𑀼𑀦𑀲𑁆𑀲𑀸𑀤𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀢𑀺 𑀳𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀲𑀺𑀬𑀸, 𑀩𑀻𑀚𑀸𑀦𑀺𑀧𑀺 𑀦𑀺𑀫𑀺𑀢𑁆𑀢𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. ‘‘𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀧𑀯𑁂𑀲𑁂𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 ¶ 𑀇𑀫𑀺𑀲𑁆𑀲𑀸 𑀫𑁂𑀣𑀼𑀦𑀓𑀣𑀸𑀬 𑀅𑀲𑀩𑁆𑀪𑀺𑀭𑀽𑀧𑀢𑁆𑀢𑀸 ‘‘𑀈𑀤𑀺𑀲𑀁 𑀞𑀸𑀦𑀁 𑀓𑀣𑁂𑀦𑁆𑀢𑁂𑀳𑀺 𑀲𑀼𑀡𑀦𑁆𑀢𑁂𑀳𑀺 𑀘 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑁄 ‘‘𑀅𑀬𑀜𑁆𑀘 𑀫𑁂𑀣𑀼𑀦𑀓𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀫𑁂𑀣𑀼𑀦𑀓𑀣𑀸𑀬 𑀭𑀸𑀕𑀯𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀳𑀸𑀲𑀯𑀺𑀲𑀬𑀢𑁆𑀢𑀸 𑀘 𑀢𑀤𑀼𑀪𑀬𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀦𑀺𑀬𑁄𑀚𑁂𑀢𑀺. 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂𑀦 𑀳𑀺 𑀭𑀸𑀕𑁄 𑀦𑀺𑀯𑀢𑁆𑀢𑀢𑀺, 𑀲𑀫𑀡𑀲𑀜𑁆𑀜𑀸𑀤𑀻𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀲𑀼 𑀳𑀸𑀲𑁄 𑀦𑀺𑀯𑀢𑁆𑀢𑀢𑀺. 𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬𑀸𑀢𑀺 𑀲𑀢𑁆𑀢𑀸𑀦𑀁 𑀅𑀧𑀸𑀬𑀤𑀼𑀓𑁆𑀔𑀸𑀤𑀻𑀳𑀺 𑀅𑀦𑀼𑀭𑀓𑁆𑀔𑀡𑀢𑁆𑀣𑀁. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸𑀢𑀺 𑀲𑀢𑁆𑀢𑀮𑁄𑀓𑀯𑀺𑀲𑀬𑀸𑀬 𑀅𑀦𑀼𑀓𑀫𑁆𑀧𑀸𑀬.

𑀫𑀼𑀔𑀁 𑀅𑀧𑀺𑀥𑀸𑀬𑀸𑀢𑀺 𑀫𑀼𑀔𑀁 𑀅𑀧𑀺𑀤𑀳𑀺𑀢𑁆𑀯𑀸, 𑀬𑁂𑀦 𑀓𑁂𑀦𑀘𑀺 𑀧𑀫𑀸𑀤𑁂𑀦 𑀓𑀤𑀸𑀘𑀺 𑀫𑀦𑁆𑀤𑀳𑀸𑀲𑁄 𑀪𑀯𑁂𑀬𑁆𑀬, 𑀢𑀤𑀸 𑀕𑀭𑀼𑀢𑁆𑀢𑀁 𑀓𑀼𑀧𑁆𑀧𑁂𑀬𑁆𑀬, 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀓𑀸𑀮𑁂 𑀕𑀭𑀼𑀪𑀸𑀯𑀲𑁆𑀲 𑀅𑀯𑀺𑀓𑁄𑀧𑀦𑀢𑁆𑀣𑀁 𑀩𑀻𑀚𑀓𑁂𑀦 𑀫𑀼𑀔𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀫𑀼𑀔𑀁 𑀅𑀧𑀺𑀥𑀸𑀬𑀸𑀢𑀺 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀩𑀻𑀚𑀓𑁂𑀦 𑀫𑀼𑀔𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀳𑀲𑀫𑀸𑀦𑁂𑀦 𑀦 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀤𑀦𑁆𑀢𑀯𑀺𑀤𑀁𑀲𑀓𑀦𑁆𑀢𑀺 𑀤𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀕𑀩𑁆𑀪𑀺𑀢𑁂𑀦𑀸𑀢𑀺 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀦, 𑀉𑀲𑁆𑀲𑀸𑀳𑀚𑀸𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 ‘‘𑀈𑀤𑀺𑀲𑀁 𑀦𑀸𑀫 𑀅𑀲𑀩𑁆𑀪𑀺𑀁 𑀓𑀣𑁂𑀫𑀻’’𑀢𑀺 𑀲𑀗𑁆𑀓𑁄𑀘𑀁 ¶ 𑀆𑀧𑀚𑁆𑀚𑁂𑀬𑁆𑀬, 𑀅𑀢𑁆𑀣𑀯𑀺𑀪𑀸𑀯𑀦𑀁 𑀦 𑀲𑀺𑀬𑀸, 𑀢𑀲𑁆𑀫𑀸 ‘‘𑀢𑀸𑀤𑀺𑀲𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀧𑀺 𑀢𑀸𑀯 𑀈𑀤𑀺𑀲𑀁 𑀓𑀣𑀺𑀢𑀁, 𑀓𑀺𑀫𑀗𑁆𑀕𑀁 𑀧𑀦𑀸𑀳𑀁 𑀓𑀣𑁂𑀫𑀻’’𑀢𑀺 𑀏𑀯𑀁 𑀉𑀲𑁆𑀲𑀸𑀳𑀚𑀸𑀢𑁂𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀣𑀼𑀧𑀝𑀺𑀪𑀸𑀕𑁂𑀦𑀸𑀢𑀺 𑀲𑀢𑁆𑀣𑀼𑀓𑀧𑁆𑀧𑁂𑀦, 𑀲𑀢𑁆𑀣𑀼𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀫𑀽𑀮𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑀢𑀺𑀭𑀘𑁆𑀙𑀸𑀦𑁂𑀲𑀼 𑀕𑀢𑀸𑀬𑀸𑀢𑀺 𑀢𑀺𑀭𑀘𑁆𑀙𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬. 𑀬𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀦𑀸𑀫 𑀅𑀢𑀺𑀔𑀼𑀤𑁆𑀤𑀓𑀸𑀧𑀺 𑀳𑁄𑀦𑁆𑀢𑀺, 𑀬𑁂𑀲𑀁 𑀫𑀕𑁆𑀕𑁂𑀲𑀼 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀫𑀸 𑀦 𑀲𑀩𑁆𑀩𑀸𑀯 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀢𑀺 𑀧𑀯𑁂𑀲𑀦𑀧𑁆𑀧𑀳𑁄𑀦𑀓𑀯𑀲𑁂𑀦 𑀮𑀩𑁆𑀪𑀫𑀸𑀦𑀓𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸 𑀏𑀯 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀅𑀧𑀤𑀸𑀦𑀁 𑀅𑀳𑀺𑀫𑀘𑁆𑀙𑀸𑀢𑀺𑀆𑀤𑀺𑀕𑀸𑀣𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀧𑁄𑀭𑀸𑀡𑁂𑀳𑀺 𑀞𑀧𑀺𑀢𑀸. 𑀢𑀢𑁆𑀣 𑀅𑀳𑀻𑀢𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁂𑀦 𑀲𑀩𑁆𑀩𑀸𑀧𑀺 ¶ 𑀲𑀧𑁆𑀧𑀚𑀸𑀢𑀺 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 𑁋 ‘‘𑀅𑀳𑀺𑀕𑁆𑀕𑀳𑀡𑁂𑀦…𑀧𑁂… 𑀤𑀻𑀖𑀚𑀸𑀢𑀺 𑀲𑀗𑁆𑀕𑀳𑀺𑀢𑀸’’𑀢𑀺. 𑀢𑀢𑁆𑀣 𑀕𑁄𑀦𑀲𑀸𑀢𑀺 𑀲𑀧𑁆𑀧𑀯𑀺𑀲𑁂𑀲𑀸, 𑀬𑁂𑀲𑀁 𑀧𑀺𑀝𑁆𑀞𑀻𑀲𑀼 𑀫𑀳𑀦𑁆𑀢𑀸𑀦𑀺 𑀫𑀡𑁆𑀟𑀮𑀸𑀦𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀫𑀘𑁆𑀙𑀕𑁆𑀕𑀳𑀡𑀁 𑀑𑀤𑀓𑀚𑀸𑀢𑀺𑀬𑀸 𑀉𑀧𑀮𑀓𑁆𑀔𑀡𑀧𑀤𑀦𑁆𑀢𑀺 𑀆𑀳 𑁋 ‘‘𑀫𑀘𑁆𑀙𑀕𑁆𑀕𑀳𑀡𑁂𑀦…𑀧𑁂… 𑀑𑀤𑀓𑀚𑀸𑀢𑀺 𑀲𑀗𑁆𑀕𑀳𑀺𑀢𑀸’’𑀢𑀺. 𑀢𑁂𑀦𑁂𑀯 𑀫𑀡𑁆𑀟𑀽𑀓𑀓𑀘𑁆𑀙𑀧𑀸𑀦𑀁 𑀲𑀧𑀸𑀤𑀓𑀢𑁆𑀢𑁂𑀧𑀺 𑀑𑀤𑀓𑀚𑀸𑀢𑀺𑀓𑀢𑁆𑀢𑀸 𑀲𑀗𑁆𑀕𑀳𑁄 𑀓𑀢𑁄.

𑀫𑀼𑀔𑀲𑀡𑁆𑀞𑀸𑀦𑀦𑁆𑀢𑀺 𑀑𑀝𑁆𑀞𑀘𑀫𑁆𑀫𑀲𑀡𑁆𑀞𑀸𑀦𑀁. 𑀯𑀡𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀻𑀢𑀺 𑀯𑀡𑀲𑀗𑁆𑀕𑀳𑀁 𑀕𑀘𑁆𑀙𑀢𑀺 𑀦𑀯𑀲𑀼 𑀯𑀡𑀫𑀼𑀔𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀡𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 ‘‘𑀅𑀫𑀕𑁆𑀕𑁂𑀦 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀤𑁆𑀯𑀻𑀲𑀼 𑀲𑀫𑁆𑀪𑀺𑀦𑁆𑀦𑀯𑀡𑁂𑀲𑀼 𑀏𑀓𑁂𑀦 𑀯𑀡𑁂𑀦 𑀧𑀯𑁂𑀲𑁂𑀢𑁆𑀯𑀸 𑀤𑀼𑀢𑀺𑀬𑁂𑀦 𑀦𑀻𑀳𑀭𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀯𑀓𑁆𑀔𑀢𑀺 𑀘 ‘‘𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀡𑀲𑀗𑁆𑀔𑁂𑀧𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁬𑁬). 𑀓𑀼𑀓𑁆𑀓𑀼𑀝𑀺𑀕𑁆𑀕𑀳𑀡𑀫𑁆𑀧𑀺 𑀲𑀩𑁆𑀩𑀸𑀬 𑀧𑀓𑁆𑀔𑀺𑀚𑀸𑀢𑀺𑀬𑀸 𑀉𑀧𑀮𑀓𑁆𑀔𑀡𑀧𑀤𑀦𑁆𑀢𑀺 𑀆𑀳 𑁋 ‘‘𑀓𑀼𑀓𑁆𑀓𑀼𑀝𑀺𑀕𑁆𑀕𑀳𑀡𑁂𑀦…𑀧𑁂… 𑀧𑀓𑁆𑀔𑀺𑀚𑀸𑀢𑀺 𑀲𑀗𑁆𑀕𑀳𑀺𑀢𑀸’’𑀢𑀺. 𑀫𑀚𑁆𑀚𑀸𑀭𑀺𑀕𑁆𑀕𑀳𑀡𑀫𑁆𑀧𑀺 𑀘𑀢𑀼𑀧𑁆𑀧𑀤𑀚𑀸𑀢𑀺𑀬𑀸 𑀉𑀧𑀮𑀓𑁆𑀔𑀡𑀧𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀫𑀚𑁆𑀚𑀸𑀭𑀺𑀕𑁆𑀕𑀳𑀡𑁂𑀦…𑀧𑁂… 𑀘𑀢𑀼𑀧𑁆𑀧𑀤𑀚𑀸𑀢𑀺 𑀲𑀗𑁆𑀕𑀳𑀺𑀢𑀸’’𑀢𑀺. 𑀭𑀼𑀓𑁆𑀔𑀲𑀼𑀦𑀔𑀸 𑀦𑀸𑀫 𑀓𑀮𑀦𑁆𑀤𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀗𑁆𑀕𑀼𑀲𑀸𑀢𑀺 𑀦𑀗𑁆𑀕𑀼𑀮𑀸.

𑀧𑀭𑀸𑀚𑀺𑀢-𑀲𑀤𑁆𑀤𑁄 𑀉𑀧𑀲𑀕𑁆𑀕𑀲𑁆𑀲 𑀯𑀼𑀤𑁆𑀥𑀺𑀁 𑀓𑀢𑁆𑀯𑀸 𑀢-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀧𑀸𑀭𑀸𑀚𑀺𑀓𑁄𑀢𑀺 𑀧𑀭𑀸𑀚𑀺𑀢𑁄’’𑀢𑀺. ‘‘𑀓𑀢𑁆𑀣𑀘𑀺 𑀆𑀧𑀢𑁆𑀢𑀻𑀢𑀺 ‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’𑀢𑀺𑀆𑀤𑀻𑀲𑀼 ¶ (𑀧𑀸𑀭𑀸. 𑁩𑁮𑁪, 𑁩𑁯𑁧), 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀇𑀤𑀁 𑀧𑀦 𑀤𑀺𑀲𑁆𑀯𑀸 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀧𑀭𑀸𑀚𑀬𑀢𑀻𑀢𑀺 𑀧𑀸𑀭𑀸𑀚𑀺𑀓𑀁, 𑀧𑀸𑀭𑀸𑀚𑀺𑀓𑀸𑀢𑀺 𑀘 𑀓𑀢𑁆𑀢𑀼𑀲𑀸𑀥𑀦𑁂𑀦 𑀧𑀸𑀭𑀸𑀚𑀺𑀓-𑀲𑀤𑁆𑀤𑁂𑀦 𑀲𑀺𑀓𑁆𑀔𑀸𑀧𑀤𑀁 𑀆𑀧𑀢𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀢𑀁 𑀅𑀢𑀺𑀓𑁆𑀓𑀫𑀢𑀻’’𑀢𑀺𑀆𑀤𑀺. 𑀧𑀼𑀕𑁆𑀕𑀮𑁄 𑀧𑀦 𑀓𑀫𑁆𑀫𑀲𑀸𑀥𑀦𑁂𑀦 𑀧𑀸𑀭𑀸𑀚𑀺𑀓-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄’’𑀢𑀺𑀆𑀤𑀺.

𑀏𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀢𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀧𑀭𑀸𑀚𑀺𑀢𑁄 𑀳𑁄𑀢𑀺 𑀧𑀭𑀸𑀚𑀬𑀫𑀸𑀧𑀦𑁆𑀦𑁄’’𑀢𑀺 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬. 𑀘𑀼𑀢𑁄 𑀧𑀭𑀤𑁆𑀥𑁄𑀢𑀺𑀆𑀤𑀺𑀦𑀸 𑀳𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀧𑀼𑀕𑁆𑀕𑀮𑁄 𑀘𑀼𑀢𑁄 𑀳𑁄𑀢𑀺 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀁 𑀆𑀧𑀦𑁆𑀦𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀦 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀧𑀭𑀺𑀯𑀸𑀭𑁂𑀧𑀺 𑀕𑀸𑀣𑀸 𑀧𑀼𑀕𑁆𑀕𑀮𑀯𑀼𑀢𑁆𑀢𑀺𑀧𑀸𑀭𑀸𑀚𑀺𑀓𑀲𑀤𑁆𑀤𑀦𑀺𑀩𑁆𑀩𑀘𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸 ¶ 𑀆𑀧𑀢𑁆𑀢𑀺𑀯𑀼𑀢𑁆𑀢𑀻𑀦𑀁 𑀧𑀸𑀭𑀸𑀚𑀺𑀓𑀸-𑀤𑀺𑀲𑀤𑁆𑀤𑀸𑀦𑀁 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀧𑁆𑀧𑀲𑀗𑁆𑀕𑁂 𑀯𑀼𑀢𑁆𑀢𑀢𑁆𑀢𑀸. 𑀅𑀬𑀜𑁆𑀳𑀺 𑀧𑀭𑀺𑀯𑀸𑀭𑀕𑀸𑀣𑀸𑀬 𑀅𑀢𑁆𑀣𑁄 (𑀧𑀭𑀺. 𑀅𑀝𑁆𑀞. 𑁩𑁩𑁯) 𑁋 𑀬𑀤𑀺𑀤𑀁 𑀧𑀼𑀕𑁆𑀕𑀮𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀧𑀸𑀭𑀸𑀚𑀺𑀓𑁂𑀲𑀼 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀁 𑀦𑀸𑀫 𑀯𑀼𑀢𑁆𑀢𑀁, 𑀢𑀁 𑀆𑀧𑀚𑁆𑀚𑀦𑁆𑀢𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄 𑀲𑀤𑁆𑀥𑀫𑀸 𑀘𑀼𑀢𑁄 𑀧𑀭𑀤𑁆𑀥𑁄 𑀪𑀝𑁆𑀞𑁄 𑀦𑀺𑀭𑀗𑁆𑀓𑀢𑁄 𑀘 𑀳𑁄𑀢𑀺, 𑀅𑀦𑀻𑀳𑀝𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀼𑀦 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀪𑁂𑀤𑁄 𑀲𑀁𑀯𑀸𑀲𑁄 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀏𑀢𑀁 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀳𑁄𑀢𑀺 𑀏𑀢𑁂𑀦, 𑀢𑀲𑁆𑀫𑀸 𑀏𑀢𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀧𑀭𑀺𑀪𑀝𑁆𑀞𑁄𑀢𑀺 𑀲𑀸𑀲𑀦𑀢𑁄 𑀪𑀝𑁆𑀞𑁄, 𑀧𑀭𑀺𑀳𑀻𑀦𑁄𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑁄𑀢𑀺 𑀅𑀦𑁆𑀢𑀭𑀸 𑀔𑀡𑁆𑀟𑀺𑀢𑁄.

𑀲𑀤𑁆𑀥𑀺𑀁 𑀬𑁄𑀚𑀦𑀸𑀬𑀸𑀢𑀺 𑀧𑀤𑀬𑁄𑀚𑀦𑀸𑀬 𑀲𑀤𑁆𑀥𑀺𑀁. 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀓𑀫𑁆𑀫𑀦𑁆𑀢𑀺 𑀅𑀧𑀮𑁄𑀓𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀁. 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀳𑀻𑀢𑀺 𑀏𑀓𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑁂𑀳𑀺. 𑀧𑀓𑀢𑀢𑁆𑀢𑀸 𑀦𑀸𑀫 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀅𑀦𑀼𑀓𑁆𑀔𑀺𑀢𑁆𑀢𑀸 𑀘. 𑀧𑀜𑁆𑀘𑀯𑀺𑀥𑁄𑀧𑀻𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄𑀧𑀺. 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑀸𑀦𑀁 𑀯𑀺𑀬 𑀑𑀥𑀺𑀲𑀅𑀦𑀼𑀜𑁆𑀜𑀸𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄’’𑀢𑀺. 𑀲𑀫𑀦𑁆𑀢𑀺 𑀲𑀤𑁆𑀥𑀺𑀁, 𑀏𑀓𑀧𑁆𑀧𑀳𑀸𑀭𑁂𑀦 𑀯𑀸. 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄𑀢𑀺 𑀅𑀦𑀢𑀺𑀓𑁆𑀓𑀫𑀦𑀯𑀲𑁂𑀦 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀦𑀸 𑀘 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄. 𑀲𑀸𑀫𑀜𑁆𑀜𑀲𑀺𑀓𑁆𑀔𑀸𑀧𑀤𑁂𑀲𑀼 ‘‘𑀇𑀤𑀁 𑀢𑀬𑀸 𑀦 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀅𑀩𑀳𑀺𑀓𑀸𑀢𑀩𑁆𑀩𑀢𑁄 ‘‘𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀢𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁬. 𑀦 𑀓𑁂𑀯𑀮𑀁 𑀇𑀢𑁆𑀣𑀺𑀬𑀸 𑀏𑀯 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀢𑀺 𑀇𑀫𑀺𑀦𑀸 𑀓𑁂𑀯𑀮𑀁 𑀇𑀢𑁆𑀣𑀺𑀬𑀸 𑀏𑀯 𑀦𑀺𑀫𑀺𑀢𑁆𑀢𑀁 ¶ 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀦 𑀳𑁄𑀢𑀺, 𑀅𑀣 𑀔𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀡𑁆𑀟𑀓𑀧𑀼𑀭𑀺𑀲𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀏𑀯𑀸𑀢𑀺 𑀇𑀫𑀺𑀦𑀸 𑀧𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀏𑀯 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀦 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀤𑀻𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀣𑀼𑀫𑁂𑀯 𑀦 𑀳𑁄𑀢𑀻𑀢𑀺 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀧𑀲𑀗𑁆𑀕𑁂𑀦 𑀆𑀕𑀢𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀁 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀦 𑀳𑀺 𑀇𑀢𑁄 𑀧𑀼𑀩𑁆𑀩𑁂 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀕𑁆𑀕𑀳𑀡𑀁 𑀓𑀢𑀁 𑀅𑀢𑁆𑀣𑀺, 𑀬𑁂𑀦 𑀢𑀧𑁆𑀧𑀲𑀗𑁆𑀕𑁄 𑀲𑀺𑀬𑀸. 𑀇𑀤𑀸𑀦𑁂𑀯 𑀳𑀺 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀦𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀕𑁆𑀕𑀳𑀡𑀁 𑀓𑀢𑀁, 𑀦 𑀘 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀕𑁆𑀕𑀳𑀡𑁂𑀦 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸𑀦𑀁 ¶ 𑀧𑀲𑀗𑁆𑀕𑁄 𑀬𑀼𑀢𑁆𑀢𑁄. 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀲𑀢𑁆𑀢𑀸𑀦𑀁 𑀦𑀺𑀤𑁆𑀤𑁂𑀲𑁂𑀦 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸𑀦𑀁 𑀧𑀲𑀗𑁆𑀕𑀲𑁆𑀲 𑀦𑀺𑀯𑀢𑁆𑀢𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀸𑀤𑀻𑀲𑀼 𑀯𑀸 𑀓𑀜𑁆𑀘𑀺 𑀅𑀦𑀸𑀫𑀲𑀺𑀢𑁆𑀯𑀸 𑀅𑀯𑀺𑀲𑁂𑀲𑁂𑀦 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀤𑀪𑀸𑀚𑀦𑁂 𑀘 ‘‘𑀧𑀝𑀺𑀲𑁂𑀯𑀢𑀺 𑀦𑀸𑀫𑀸’’𑀢𑀺 𑀫𑀸𑀢𑀺𑀓𑀁 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑁂𑀦 𑀅𑀗𑁆𑀕𑀚𑀸𑀢𑀁 𑀅𑀦𑁆𑀢𑀫𑀲𑁄 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑀺, 𑀏𑀲𑁄 𑀧𑀝𑀺𑀲𑁂𑀯𑀢𑀺 𑀦𑀸𑀫𑀸’’𑀢𑀺 𑀧𑀝𑀺𑀲𑁂𑀯𑀦𑀸𑀓𑀸𑀭𑁄𑀯 𑀤𑀲𑁆𑀲𑀺𑀢𑁄, 𑀦 𑀧𑀦 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀦𑀺𑀫𑀺𑀢𑁆𑀢𑀦𑀺𑀲𑁆𑀲𑀬𑀸 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀸 𑀇𑀢𑁆𑀣𑀺𑀧𑀼𑀭𑀺𑀲𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 ‘‘𑀇𑀢𑁆𑀣𑀺𑀬𑀸 𑀏𑀯 𑀦𑀼 𑀔𑁄 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻’’𑀢𑀺 𑀏𑀯𑀫𑀸𑀤𑀺 𑀲𑀦𑁆𑀤𑁂𑀳𑁄 𑀲𑀺𑀬𑀸, 𑀦𑀺𑀫𑀺𑀢𑁆𑀢𑀯𑁄𑀳𑀸𑀭𑁄 𑀘 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀭𑀽𑀧𑀓𑁂𑀲𑀼 𑀘 𑀮𑀩𑁆𑀪𑀢𑀺𑀬𑁂𑀯. 𑀢𑁂𑀦𑁂𑀯 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 (𑀧𑀸𑀭𑀸. 𑁭𑁧) ‘‘𑀮𑁂𑀧𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀺, 𑀤𑀸𑀭𑀼𑀥𑀻𑀢𑀮𑀺𑀓𑀸𑀬 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀲𑀸𑀫𑀜𑁆𑀜𑀢𑁄 ‘‘𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀳𑁄𑀢𑀺, 𑀦 𑀳𑁄𑀢𑀻’’𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸. 𑀢𑁂𑀦𑁂𑀯 ‘‘𑀮𑁂𑀧𑀘𑀺𑀢𑁆𑀢𑀸𑀤𑀺𑀯𑀢𑁆𑀣𑀽𑀲𑀼 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀲𑀢𑁆𑀢𑀦𑀺𑀬𑀫𑀦𑀢𑁆𑀣𑀜𑁆𑀘 𑀚𑀸𑀢𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀸𑀤𑀺𑀢𑁄 𑀢𑀺𑀥𑀸 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀲𑀢𑁆𑀢𑁂 𑀪𑀕𑀯𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 ‘‘𑀯𑀢𑁆𑀣𑀼𑀫𑁂𑀯 𑀦 𑀳𑁄𑀢𑀻’’𑀢𑀺 𑀦𑀺𑀫𑀺𑀢𑁆𑀢𑀲𑀸𑀫𑀜𑁆𑀜𑀢𑁄 𑀧𑀲𑀗𑁆𑀕𑀸𑀕𑀢𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸𑀦𑀁 𑀦𑀺𑀫𑀺𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀬𑁄 𑀫𑀕𑁆𑀕𑁂𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀻𑀲𑀼 𑀫𑀕𑁆𑀕𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 𑀇𑀫𑀺𑀦𑀸 ‘‘𑀤𑁆𑀯𑁂 𑀫𑀕𑁆𑀕𑁂’’𑀢𑀺 𑀏𑀢𑁆𑀣𑀸𑀧𑀺 𑀤𑁆𑀯𑀻𑀲𑀼 𑀫𑀕𑁆𑀕𑁂𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑀺𑀤𑀺𑀲𑁆𑀲𑀢𑀺.

𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁫𑁭. 𑀅𑀲𑁆𑀲𑀸𑀢𑀺 ¶ 𑀆𑀔𑁆𑀬𑀸𑀢𑀺𑀓𑀧𑀤𑀦𑁆𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑁄𑀢𑀻’’𑀢𑀺 𑀆𑀳. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀅𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀁 𑀧𑀭𑀸𑀫𑀲𑀺𑀢𑁆𑀯𑀸 𑀳𑁄𑀢𑀻𑀢𑀺 ¶ 𑀯𑀘𑀦𑀲𑁂𑀲𑁄 𑀤𑀲𑁆𑀲𑀺𑀢𑁄’’𑀢𑀺𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑁄 𑀤𑀲𑁆𑀲𑀺𑀢𑁄, 𑀦 𑀲𑁄 𑀲𑀼𑀦𑁆𑀤𑀭𑀢𑀭𑁄. 𑀬𑀤𑀺 𑀳𑀺 𑀯𑀘𑀦𑀲𑁂𑀲𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸, ‘‘𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑁂𑀦𑁂𑀯 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀳𑁄𑀢𑀻𑀢𑀺 𑀯𑀘𑀦𑀲𑁂𑀲𑁄 𑀓𑀢𑁄.

𑁫𑁮. 𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 𑀲𑀸𑀤𑀺𑀬𑀦𑀁 𑀦𑀸𑀫 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀧𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲𑀸’’𑀢𑀺. ‘‘𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀓𑁆𑀔𑀁 𑀤𑀼𑀲𑁆𑀲𑀻𑀮𑀪𑀸𑀯𑀁 𑀅𑀢𑁆𑀣𑀬𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀯𑁂𑀭𑀺𑀧𑀼𑀕𑁆𑀕𑀮𑀲𑁆𑀲 𑀧𑀦 𑀧𑀝𑀺𑀧𑀓𑁆𑀔𑀪𑀽𑀢𑀁 𑀓𑀜𑁆𑀘𑀺 𑀅𑀫𑀺𑀢𑁆𑀢𑀁 𑀅𑀢𑁆𑀣𑀬𑀦𑁆𑀢𑀺 𑀕𑀯𑁂𑀲𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀘𑀢𑁆𑀣𑀺𑀓𑀸 𑀳𑀺 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀦𑀸𑀲𑁂𑀢𑀼𑀓𑀸𑀫𑀸 𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀓𑀜𑁆𑀘𑀺 𑀅𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀲𑀳𑀸𑀬𑀪𑀸𑀯𑀫𑀼𑀧𑀕𑀘𑁆𑀙𑀦𑁆𑀢𑀁 𑀇𑀘𑁆𑀙𑀦𑁆𑀢𑀺. 𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸𑀤𑀻𑀦𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀢𑀤𑀦𑀼𑀭𑀽𑀧𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀽 𑀏𑀯 𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺 𑀆𑀳. ‘‘𑀪𑀺𑀓𑁆𑀔𑀼𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺 𑀏𑀯𑀁 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀪𑀺𑀓𑁆𑀔𑀼𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸 𑀭𑀸𑀚𑀸𑀤𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸𑀤𑀬𑁄 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀅𑀜𑁆𑀜𑀢𑁆𑀣 𑀧𑀦 𑀪𑀺𑀓𑁆𑀔𑀼𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑁂𑀯 ‘‘𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺 𑀬𑀣𑀸. 𑀇𑀲𑁆𑀲𑀸𑀧𑀓𑀢𑀸𑀢𑀺 𑀧𑀭𑁂𑀲𑀁 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀅𑀲𑀳𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀅𑀪𑀺𑀪𑀽𑀢𑀸. 𑀦𑀺𑀧𑁆𑀧𑀭𑀺𑀧𑁆𑀨𑀦𑁆𑀤𑀦𑁆𑀢𑀺 𑀧𑀭𑀺𑀧𑁆𑀨𑀦𑁆𑀤𑀯𑀺𑀭𑀳𑀺𑀢𑀁, 𑀬𑀣𑀸 𑀘𑀮𑀺𑀢𑀼𑀁 𑀧𑀭𑀺𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀬𑁄𑀚𑁂𑀦𑁆𑀢𑀻𑀢𑀺 𑀯𑀘𑁆𑀘𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀦𑁆𑀢𑀺.

𑀢𑀲𑁆𑀫𑀺𑀁 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀧𑀯𑁂𑀲𑀦𑀓𑁆𑀔𑀡𑁂, 𑀅𑀕𑁆𑀕𑀢𑁄 𑀬𑀸𑀯 𑀫𑀽𑀮𑀸 𑀧𑀯𑁂𑀲𑀦𑀓𑀸𑀮𑁄 ‘‘𑀧𑀯𑁂𑀲𑀦𑀓𑁆𑀔𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀤𑀺𑀬𑀦𑀁 𑀦𑀸𑀫 𑀲𑁂𑀯𑀦𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺. 𑀧𑀯𑀺𑀝𑁆𑀞𑀓𑀸𑀮𑁂𑀢𑀺 𑀅𑀗𑁆𑀕𑀚𑀸𑀢𑀲𑁆𑀲 𑀬𑀢𑁆𑀢𑀓𑀁 𑀞𑀸𑀦𑀁 𑀧𑀯𑁂𑀲𑀦𑀸𑀭𑀳𑀁, 𑀢𑀢𑁆𑀢𑀓𑀁 𑀅𑀦𑀯𑀲𑁂𑀲𑀢𑁄 𑀧𑀯𑀺𑀝𑁆𑀞𑀓𑀸𑀮𑁂. 𑀏𑀯𑀁 𑀧𑀯𑀺𑀝𑁆𑀞𑀲𑁆𑀲 𑀉𑀤𑁆𑀥𑀭𑀡𑀸𑀭𑀫𑁆𑀪𑀢𑁄 𑀅𑀦𑁆𑀢𑀭𑀸 𑀞𑀺𑀢𑀓𑀸𑀮𑁄 𑀞𑀺𑀢𑀁 𑀦𑀸𑀫. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀢𑁆𑀯𑀸 𑀲𑀩𑁆𑀩𑀣𑀸 𑀯𑀸𑀬𑀫𑀢𑁄 𑀑𑀭𑀫𑀺𑀢𑁆𑀯𑀸 𑀞𑀺𑀢𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀭𑀡𑀁 𑀦𑀸𑀫 𑀬𑀸𑀯 𑀅𑀕𑁆𑀕𑀸 𑀦𑀻𑀳𑀭𑀡𑀓𑀸𑀮𑁄𑀢𑀺 𑀆𑀳 𑁋 ‘‘𑀦𑀻𑀳𑀭𑀡𑀓𑀸𑀮𑁂 𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺. 𑀅𑀗𑁆𑀕𑀸𑀭𑀓𑀸𑀲𑀼𑀦𑁆𑀢𑀺 𑀅𑀗𑁆𑀕𑀸𑀭𑀭𑀸𑀲𑀺𑀁. 𑀏𑀯𑀭𑀽𑀧𑁂 𑀓𑀸𑀮𑁂 𑀅𑀲𑀸𑀤𑀺𑀬𑀦𑀁 𑀦𑀸𑀫 𑀦 𑀲𑀩𑁆𑀩𑁂𑀲𑀁 𑀯𑀺𑀲𑀬𑁄𑀢𑀺 𑀆𑀳 ‘‘𑀇𑀫𑀜𑁆𑀳𑀺 𑀏𑀯𑀭𑀽𑀧𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓’’𑀦𑁆𑀢𑀺𑀆𑀤𑀺 ¶ . 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀻𑀢𑀺 𑀭𑀸𑀕𑀤𑁄𑀲𑀫𑁄𑀳𑀚𑀸𑀢𑀺𑀚𑀭𑀸𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀲𑀗𑁆𑀔𑀸𑀢𑁂𑀳𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺. 𑀭𑀸𑀕𑀸𑀤𑀬𑁄 𑀳𑀺 𑀅𑀦𑀼𑀟𑀳𑀦𑀝𑁆𑀞𑁂𑀦 ‘‘𑀅𑀕𑁆𑀕𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀬𑀲𑁆𑀲 𑀲𑀦𑁆𑀢𑀺 ¶ , 𑀢𑀁 𑀦𑀺𑀟𑀳𑀦𑁆𑀢𑀺, 𑀫𑀳𑀸𑀧𑀭𑀺𑀴𑀸𑀳𑀸 𑀘 𑀳𑁄𑀦𑁆𑀢𑀺 𑀤𑀼𑀦𑁆𑀦𑀺𑀩𑁆𑀩𑀸𑀧𑀬𑀸 𑀘. 𑀪𑀕𑀯𑀢𑀸 𑀘 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄 𑀇𑀘𑁆𑀙𑀺𑀢𑁄𑀬𑁂𑀯𑀸𑀢𑀺 𑀆𑀳 𑁋 ‘‘𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘𑀲𑁆𑀲 𑀫𑀦𑁄𑀭𑀣𑀯𑀺𑀖𑀸𑀢𑀁 𑀓𑀭𑁄𑀦𑁆𑀢𑁄’’𑀢𑀺. 𑀅𑀲𑁆𑀲𑀸𑀢𑀺 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀗𑁆𑀕𑀺𑀲𑁆𑀲.

𑀧𑀞𑀫𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸

𑁫𑁯-𑁬𑁦. 𑀅𑀓𑁆𑀔𑀸𑀬𑀺𑀢𑀦𑀺𑀫𑀺𑀢𑁆𑀢𑀸 𑀅𑀓𑁆𑀔𑀸𑀬𑀺𑀢-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀢𑀺 𑀆𑀳 ‘‘𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀅𑀓𑁆𑀔𑀸𑀬𑀺𑀢𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀅𑀓𑁆𑀔𑀸𑀬𑀺𑀢𑀁 𑀦𑀺𑀫𑀺𑀢𑁆𑀢𑀁 𑀬𑀲𑁆𑀲𑀸 𑀲𑀸 𑀅𑀓𑁆𑀔𑀸𑀬𑀺𑀢𑀦𑀺𑀫𑀺𑀢𑁆𑀢𑀸. ‘‘𑀚𑀸𑀕𑀭𑀦𑁆𑀢𑀺’’𑀦𑁆𑀢𑀺𑀆𑀤𑀺 𑀯𑀺𑀲𑁂𑀲𑀦𑀭𑀳𑀺𑀢𑀢𑁆𑀢𑀸 ‘‘𑀲𑀼𑀤𑁆𑀥𑀺𑀓𑀘𑀢𑀼𑀓𑁆𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀲𑀫𑀸𑀦𑀸𑀘𑀭𑀺𑀬𑀓𑀸 𑀣𑁂𑀭𑀸𑀢𑀺 𑀏𑀓𑀸𑀘𑀭𑀺𑀬𑀲𑁆𑀲 𑀧𑀸𑀞𑀓𑀦𑁆𑀢𑁂𑀯𑀸𑀲𑀺𑀓𑀸. 𑀫𑀳𑀸𑀪𑀬𑁂𑀢𑀺 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂. 𑀕𑀗𑁆𑀕𑀸𑀬 𑀅𑀧𑀭𑀪𑀸𑀕𑁄 𑀅𑀧𑀭𑀕𑀗𑁆𑀕𑀁. 𑀯𑀢 𑀭𑁂𑀢𑀺 𑀕𑀭𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀯𑀺𑀲𑁆𑀲𑀚𑁆𑀚𑀦𑁆𑀢𑁂𑀦 𑀓𑀺𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦𑀺𑀘𑁆𑀘𑀓𑀸𑀮𑀁 𑀲𑁄𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀏𑀯𑀁 𑀯𑀺𑀦𑀬𑀕𑀭𑀼𑀓𑀸𑀦𑀦𑁆𑀢𑀺 𑀇𑀫𑀺𑀦𑀸 𑀉𑀧𑀭𑀺 𑀢𑁂𑀳𑀺 𑀯𑀼𑀘𑁆𑀘𑀫𑀸𑀦𑀯𑀺𑀦𑀺𑀘𑁆𑀙𑀬𑀲𑁆𑀲 𑀕𑀭𑀼𑀓𑀭𑀡𑀻𑀬𑀢𑀸𑀬 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀲𑀩𑁆𑀩𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀅𑀦𑀯𑀲𑁂𑀲𑀢𑁄 𑀕𑀳𑁂𑀢𑁆𑀯𑀸. 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀯𑀻𑀢𑀺𑀓𑁆𑀓𑀫𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀅𑀧𑀜𑁆𑀜𑀢𑁆𑀢𑀪𑀸𑀯𑀢𑁄 𑀬𑀼𑀢𑁆𑀢𑀺𑀅𑀪𑀸𑀯𑀢𑁄 𑀘 ‘‘𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀧𑀦𑁂𑀢𑁆𑀣 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀪𑀸𑀯𑀲𑁆𑀲 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀢𑁆𑀢𑀸 𑀢𑀢𑁆𑀣 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀧𑁂𑀲𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁, 𑀦 𑀘 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀢𑀸 𑀅𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀁 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀸𑀤𑀻𑀲𑀼𑀧𑀺 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀪𑀸𑀯𑀲𑁆𑀲 𑀲𑀫𑀸𑀦𑀢𑁆𑀢𑀸. 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀢𑁄 𑀳𑀺 𑀓𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀁 𑀊𑀦𑀁 𑀯𑀸 𑀬𑀤𑀺 𑀔𑀸𑀬𑀺𑀢𑀁 𑀲𑀺𑀬𑀸, 𑀢𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀅𑀓𑁆𑀔𑀸𑀬𑀺𑀢𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀫𑀺𑀯 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀸𑀤𑀻𑀦𑀺𑀧𑀺 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀸𑀦𑁂𑀯. 𑀅𑀧𑀺𑀘 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀁 𑀬𑀤𑀺 𑀲𑀪𑀸𑀯𑀢𑁄 ¶ 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀲𑀺𑀬𑀸, 𑀦 𑀢𑀢𑁆𑀣 𑀪𑀕𑀯𑀸 𑀤𑀼𑀩𑁆𑀩𑀺𑀦𑀺𑀘𑁆𑀙𑀬𑀦𑁆𑀢𑀺 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀧𑁂𑀢𑀺.

𑀇𑀤𑀸𑀦𑀺 𑀣𑁂𑀭𑁂𑀦 𑀓𑀢𑀯𑀺𑀦𑀺𑀘𑁆𑀙𑀬𑀫𑁂𑀯 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀫𑀺𑀢𑁆𑀢𑁂 𑀅𑀧𑁆𑀧𑀫𑀢𑁆𑀢𑀺𑀓𑀸𑀧𑀺 𑀫𑀁𑀲𑀭𑀸𑀚𑀺 𑀲𑀘𑁂 𑀅𑀯𑀲𑀺𑀝𑁆𑀞𑀸 𑀳𑁄𑀢𑀺, 𑀢𑀁 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀫𑁂𑀯 𑀳𑁄𑀢𑀺, 𑀢𑀢𑁄 𑀧𑀭𑀁 𑀧𑀦 𑀲𑀩𑁆𑀩𑀲𑁄 𑀔𑀸𑀬𑀺𑀢𑁂 𑀦𑀺𑀫𑀺𑀢𑁆𑀢𑁂 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁄 𑀧𑀭𑀁 𑀣𑀼𑀮𑁆𑀮𑀘𑁆𑀘𑀬𑀁 𑀦𑀢𑁆𑀣𑀻’’𑀢𑀺. 𑀅𑀣 𑀯𑀸 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀦𑀸𑀫 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀸𑀦𑀁 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀬𑀸𑀯 𑀢𑀢𑀺𑀬𑀓𑁄𑀝𑁆𑀞𑀸𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑀸 ¶ 𑀔𑀸𑀤𑀺𑀢𑀁, 𑀢𑀢𑁄 𑀧𑀭𑀁 𑀧𑀦 𑀢𑀢𑀺𑀬𑀓𑁄𑀝𑁆𑀞𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀬𑀸𑀯 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑀸 𑀔𑀸𑀤𑀺𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀢𑀲𑀭𑀻𑀭𑀲𑁆𑀫𑀺𑀁𑀬𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ‘‘𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄. ‘‘𑀬𑀤𑀺𑀧𑀺 𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀔𑀸𑀬𑀺𑀢𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀓𑀺𑀫𑁂𑀢𑁆𑀣 𑀯𑀻𑀫𑀁𑀲𑀺𑀢𑀩𑁆𑀩𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑀲𑁆𑀲𑁂𑀯 𑀅𑀥𑀺𑀓𑀢𑀢𑁆𑀢𑀸 𑀫𑀢𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀯𑀺𑀲𑀼𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑁋

‘‘𑀚𑀻𑀯𑀫𑀸𑀦𑀓𑀲𑀭𑀻𑀭𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀫𑀕𑁆𑀕𑁂 𑀲𑀘𑁂𑀧𑀺 𑀢𑀘𑀸𑀤𑀻𑀦𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀙𑀺𑀦𑁆𑀦𑁂 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀅𑀦𑁆𑀢𑀫𑀲𑁄 𑀅𑀗𑁆𑀕𑀚𑀸𑀢𑁂 𑀉𑀝𑁆𑀞𑀺𑀓𑀁 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀧𑀻𑀴𑀓𑀁 𑀯𑀸 𑀘𑀫𑁆𑀫𑀔𑀻𑀮𑀁 𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲𑀧𑀺 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀁, 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀲𑀼𑀓𑁆𑀔𑀧𑀻𑀴𑀓𑀁 𑀯𑀸 𑀫𑀢𑀘𑀫𑁆𑀫𑀁 𑀯𑀸 𑀮𑁄𑀫𑀁 𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀫𑀕𑁆𑀕𑁄 𑀉𑀧𑁆𑀧𑀸𑀝𑀺𑀢𑁄, 𑀢𑀢𑁆𑀣 𑀉𑀧𑀓𑁆𑀓𑀫𑀢𑁄 𑀯𑀡𑀲𑀗𑁆𑀔𑁂𑀧𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑁋

𑀚𑀻𑀯𑀫𑀸𑀦𑀓𑀲𑀭𑀻𑀭𑀲𑁆𑀫𑀺𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀤𑀲𑁆𑀲𑀺𑀢𑁄.

𑀲𑀩𑁆𑀩𑀲𑁄 𑀔𑀸𑀬𑀺𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀧𑁆𑀧𑀤𑁂𑀲𑁂 𑀩𑀳𑀺𑀝𑁆𑀞𑀺𑀢𑀁 𑀙𑀯𑀺𑀘𑀫𑁆𑀫𑀁 𑀲𑀩𑁆𑀩𑀲𑁄 𑀙𑀺𑀦𑁆𑀤𑀺𑀢𑁆𑀯𑀸 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀔𑀸𑀬𑀺𑀢𑀲𑀤𑀺𑀲𑀁 𑀓𑀢𑀁. 𑀢𑁂𑀦𑁂𑀯𑀸𑀳 ‘‘𑀙𑀯𑀺𑀘𑀫𑁆𑀫𑀁 𑀦𑀢𑁆𑀣𑀻’’𑀢𑀺. 𑀦𑀺𑀫𑀺𑀢𑁆𑀢𑀫𑀁𑀲𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑁂 𑀙𑀯𑀺𑀘𑀫𑁆𑀫𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀧𑀯𑁂𑀲𑀦𑀁 𑀚𑀸𑀬𑀢𑀻’’𑀢𑀺. 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀦 ¶ 𑀅𑀦𑀯𑀲𑁂𑀲𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀞𑀺𑀢𑀁 𑀙𑀯𑀺𑀘𑀫𑁆𑀫𑀫𑀁𑀲𑀸𑀤𑀺𑀁 𑀅𑀦𑀯𑀲𑁂𑀲𑁂𑀢𑁆𑀯𑀸. 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀢𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀢𑀲𑀭𑀻𑀭𑁂 𑀧𑀦𑀸’’𑀢𑀺𑀆𑀤𑀺.

𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀢𑀺𑀆𑀤𑀺𑀦𑀸 𑀧𑀦 𑀅𑀓𑁆𑀔𑀺𑀆𑀤𑀬𑁄𑀧𑀺 𑀯𑀡𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀡𑁂𑀦 𑀏𑀓𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀓𑁆𑀔𑀺𑀆𑀤𑀻𑀲𑀼𑀧𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀘 𑀯𑀡𑀲𑀗𑁆𑀕𑀳𑁄 ‘‘𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄’’𑀢𑀺 (𑀫𑀺. 𑀧. 𑁨.𑁬.𑁧) 𑀏𑀯𑀫𑀸𑀤𑀺𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼 𑀤𑀼𑀓𑁆𑀓𑀝𑀁 𑀧𑀦 𑀅𑀝𑁆𑀞𑀓𑀣𑀸𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀸𑀦𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑁂 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀏𑀯𑀁 𑀅𑀓𑁆𑀔𑀺𑀆𑀤𑀻𑀦𑀫𑁆𑀧𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀯𑀢𑁆𑀣𑀼𑀪𑀸𑀯𑁂 𑀦𑀺𑀦𑁆𑀦𑀸𑀦𑀸𑀓𑀭𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀯𑀡𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 ‘‘𑀅𑀫𑀕𑁆𑀕𑁂𑀦 ¶ 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁬𑁬) 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀦 𑀧𑀦 ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀅𑀢𑁆𑀣𑀺. 𑀬𑀤𑀺 𑀘 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀡𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀧𑀢𑀗𑁆𑀕𑀫𑀼𑀔𑀫𑀡𑁆𑀟𑀽𑀓𑀲𑁆𑀲 𑀫𑀼𑀔𑀲𑀡𑁆𑀞𑀸𑀦𑁂 𑀯𑀡𑀲𑀗𑁆𑀔𑁂𑀧𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀯𑀢𑁆𑀢𑀩𑁆𑀩𑀁, 𑀯𑀼𑀢𑁆𑀢𑀜𑁆𑀘, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀏𑀯𑁂𑀢𑁆𑀣 𑀧𑀫𑀸𑀡𑀁. 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀼𑀦𑁄 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄, 𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.). 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀯𑀢𑁆𑀣𑀺𑀓𑁄𑀲𑁂𑀲𑀽𑀢𑀺 𑀯𑀢𑁆𑀣𑀺𑀧𑀼𑀝𑁂𑀲𑀼 𑀧𑀼𑀭𑀺𑀲𑀸𑀦𑀁 𑀅𑀗𑁆𑀕𑀚𑀸𑀢𑀓𑁄𑀲𑁂𑀲𑀼. 𑀫𑀢𑀲𑀭𑀻𑀭𑀁 𑀬𑀸𑀯 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑁂𑀦 𑀓𑀼𑀣𑀺𑀢𑀁 𑀦 𑀳𑁄𑀢𑀺, 𑀢𑀸𑀯 𑀅𑀮𑁆𑀮𑀲𑀭𑀻𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀬𑀤𑀸 𑀧𑀦 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀻’’𑀢𑀺𑀆𑀤𑀺. 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀜𑁆𑀘 𑀯𑀺𑀚𑀳𑀢𑀻𑀢𑀺 𑀏𑀢𑁆𑀣 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑀁 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀪𑀸𑀯𑀜𑁆𑀘 𑀯𑀺𑀚𑀳𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀫𑁂𑀣𑀼𑀦𑀭𑀸𑀕𑁂𑀦 𑀯𑀢𑁆𑀣𑀺𑀓𑁄𑀲𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀢𑁆𑀣𑀺𑀓𑁄𑀲𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄’’𑀢𑀺. 𑀇𑀢𑁆𑀣𑀺𑀬𑀸 𑀅𑀧𑁆𑀧𑀯𑁂𑀲𑁂𑀦𑁆𑀢𑁄𑀢𑀺 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄. 𑀅𑀧𑁆𑀧𑀯𑁂𑀲𑁂𑀦𑁆𑀢𑁄𑀢𑀺 𑀘 𑀧𑀯𑁂𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀯𑁂𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲 𑀧𑀦 𑀫𑁂𑀣𑀼𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀇𑀤𑀁 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 ¶ (𑀫𑀳𑀸𑀯. 𑁨𑁫𑁨) 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀓𑁂𑀲𑀜𑁆𑀘𑀺 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑀲𑁆𑀲 𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀓𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀲𑁂𑀲𑀅𑀝𑁆𑀞𑀓𑀣𑀸𑀲𑀼 ‘‘𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦𑀸’’𑀢𑀺 𑀯𑀘𑀦𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀗𑁆𑀕𑀚𑀸𑀢𑁂𑀦𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀫𑀳𑀸𑀅𑀝𑁆𑀞𑀓𑀣𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀢𑀸𑀯 𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑀣𑀸 𑀳𑀺 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀧𑀓𑀢𑀺𑀫𑀼𑀔𑁂𑀦 𑀙𑀼𑀧𑀦𑁆𑀢𑀲𑁆𑀲 𑀯𑀺𑀲𑀸𑀡𑀸𑀤𑀺𑀕𑁆𑀕𑀳𑀡𑁂 𑀯𑀺𑀬 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀏𑀯𑀁 𑀫𑀳𑀸𑀅𑀝𑁆𑀞𑀓𑀣𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀓𑁂𑀲𑀜𑁆𑀘𑀺 𑀅𑀜𑁆𑀜𑀣𑀸 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀘𑀺 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦𑁂𑀯. ‘‘𑀦𑀺𑀫𑀺𑀢𑁆𑀢𑀫𑀼𑀔𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀧𑀲𑁆𑀲𑀸𑀯𑀫𑀕𑁆𑀕𑀁 𑀫𑁂𑀣𑀼𑀦𑀭𑀸𑀕𑁂𑀦 𑀧𑀓𑀢𑀺𑀫𑀼𑀔𑁂𑀦 𑀙𑀼𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀦𑀺𑀫𑀺𑀢𑁆𑀢𑀫𑀼𑀔𑁂𑀦 𑀯𑀸 𑀧𑀓𑀢𑀺𑀫𑀼𑀔𑁂𑀦 𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀙𑀼𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑀏𑀓𑀽𑀦𑀲𑀢𑁆𑀢𑀢𑀺𑀤𑁆𑀯𑀺𑀲𑀢𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁬𑁧-𑁨. 𑀧𑀝𑀺𑀧𑀦𑁆𑀦𑀓𑀲𑁆𑀲𑀸𑀢𑀺 ¶ 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲. 𑀉𑀧𑀸𑀤𑀺𑀦𑁆𑀦𑀓𑀦𑁆𑀢𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀸𑀤𑀺𑀦𑁆𑀦𑀓𑁂𑀦 𑀨𑀼𑀲𑀢𑀻𑀢𑀺 𑀉𑀧𑀸𑀤𑀺𑀦𑁆𑀦𑀓𑁂𑀦 𑀨𑀼𑀲𑀻𑀬𑀢𑀺 𑀖𑀝𑁆𑀝𑀻𑀬𑀢𑀻𑀢𑀺 𑀏𑀯𑀁 𑀓𑀫𑁆𑀫𑀦𑀺 𑀬-𑀓𑀸𑀭𑀮𑁄𑀧𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀏𑀯𑀁 𑀓𑀭𑁄𑀦𑁆𑀢𑁄 𑀓𑀺𑀜𑁆𑀘𑀺 𑀉𑀧𑀸𑀤𑀺𑀦𑁆𑀦𑀓𑀁 𑀉𑀧𑀸𑀤𑀺𑀦𑁆𑀦𑀓𑁂𑀦 𑀦 𑀨𑀼𑀲𑀢𑀺 𑀦 𑀖𑀝𑁆𑀝𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀮𑁂𑀲𑀁 𑀑𑀟𑁆𑀟𑁂𑀲𑁆𑀲𑀦𑁆𑀢𑀻𑀢𑀺 𑀮𑁂𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺, 𑀧𑀭𑀺𑀓𑀧𑁆𑀧𑁂𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀣𑀢𑀸𑀤𑀺𑀪𑁂𑀤𑁂𑀳𑀺 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀦𑁆𑀣𑀢𑀸𑀤𑀺𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸, 𑀲𑀦𑁆𑀣𑀢𑀸𑀤𑀻𑀳𑀺 𑀘𑀢𑀽𑀳𑀺 𑀬𑁄𑀚𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀦𑁆𑀣𑀢𑀸𑀬𑀸𑀢𑀺 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑀯𑁄𑀳𑀸𑀭𑁄 ‘‘𑀧𑀝𑁄 𑀤𑀟𑁆𑀠𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀣𑀸 𑀳𑀺 𑀧𑀝𑀲𑁆𑀲 𑀏𑀓𑀤𑁂𑀲𑁂𑀧𑀺 𑀤𑀟𑁆𑀠𑁂 ‘‘𑀧𑀝𑁄 𑀤𑀟𑁆𑀠𑁄’’𑀢𑀺 𑀯𑁄𑀳𑀭𑀦𑁆𑀢𑀺 ¶ , 𑀏𑀯𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀸𑀤𑀻𑀲𑀼 𑀓𑀺𑀲𑁆𑀫𑀺𑀜𑁆𑀘𑀺 𑀫𑀕𑁆𑀕𑁂 𑀲𑀦𑁆𑀣𑀢𑁂 𑀇𑀢𑁆𑀣𑀻 ‘‘𑀲𑀦𑁆𑀣𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀣𑀢𑀸 𑀦𑀸𑀫𑀸’’𑀢𑀺𑀆𑀤𑀺. 𑀯𑀢𑁆𑀣𑀸𑀤𑀻𑀦𑀺 𑀅𑀦𑁆𑀢𑁄 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀩𑀳𑀺 𑀞𑀧𑁂𑀢𑁆𑀯𑀸 𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 ‘‘𑀧𑀮𑀺𑀯𑁂𑀞𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑀯𑁄𑀳𑀸𑀭𑀯𑀲𑁂𑀦𑁂𑀯 𑀪𑀺𑀓𑁆𑀔𑀼𑀧𑀺 ‘‘𑀲𑀦𑁆𑀣𑀢𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀦𑁆𑀣𑀢𑁄 𑀦𑀸𑀫𑀸’’𑀢𑀺𑀆𑀤𑀺. 𑀬𑀢𑁆𑀢𑀓𑁂 𑀧𑀯𑀺𑀝𑁆𑀞𑁂𑀢𑀺 𑀢𑀺𑀮𑀨𑀮𑀫𑀢𑁆𑀢𑁂 𑀧𑀯𑀺𑀝𑁆𑀞𑁂. 𑀅𑀓𑁆𑀔𑀺𑀆𑀤𑀺𑀫𑁆𑀳𑀺 𑀲𑀦𑁆𑀣𑀢𑁂𑀧𑀺 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸𑀢𑀺 𑀆𑀳 ‘‘𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻’’𑀢𑀺.

𑀔𑀸𑀡𑀼𑀁 𑀖𑀝𑁆𑀝𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑁆𑀢𑁄 𑀔𑀸𑀡𑀼𑀁 𑀧𑀯𑁂𑀲𑁂𑀢𑁆𑀯𑀸 𑀲𑀫𑀢𑀮𑀁 𑀅𑀢𑀺𑀭𑀺𑀢𑁆𑀢𑀁 𑀯𑀸 𑀔𑀸𑀡𑀼𑀁 𑀖𑀝𑁆𑀝𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀧𑀯𑁂𑀲𑀸𑀪𑀸𑀯𑀢𑁄. 𑀲𑀘𑁂 𑀧𑀦 𑀈𑀲𑀓𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀔𑀸𑀡𑀼𑀓𑀫𑁂𑀯 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀢𑀲𑁆𑀲 𑀢𑀮𑀦𑁆𑀢𑀺 𑀯𑁂𑀴𑀼𑀦𑀴𑀸𑀤𑀺𑀓𑀲𑁆𑀲 𑀅𑀦𑁆𑀢𑁄𑀢𑀮𑀁. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀻𑀯𑀣𑀺𑀓𑀁 𑀕𑀦𑁆𑀢𑁆𑀯𑀸 𑀙𑀺𑀦𑁆𑀦𑀲𑀻𑀲𑀁 𑀧𑀲𑁆𑀲𑀺𑀢𑁆𑀯𑀸 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀢𑁄 ‘‘𑀆𑀓𑀸𑀲𑀕𑀢𑀫𑁂𑀯 𑀓𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀢𑀺, 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑁭𑁩) 𑀯𑀼𑀢𑁆𑀢𑀁. 𑀩𑀳𑀺𑀤𑁆𑀥𑀸 𑀔𑀸𑀡𑀼𑀓𑁂𑀢𑀺 𑀅𑀦𑁆𑀢𑁄𑀧𑀯𑁂𑀲𑀺𑀢𑀯𑁂𑀡𑀼𑀧𑀩𑁆𑀩𑀸𑀤𑀺𑀓𑀲𑁆𑀲 𑀩𑀳𑀺 𑀦𑀺𑀓𑁆𑀔𑀦𑁆𑀢𑀔𑀸𑀡𑀼𑀓𑁂. 𑀫𑁂𑀣𑀼𑀦𑀭𑀸𑀕𑁂𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀆𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀦 𑀲𑀓𑁆𑀓𑀸 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀼𑀦𑁆𑀢𑀺 ‘‘𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀅𑀝𑁆𑀞𑀺𑀓𑁂𑀲𑀼 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑀲𑀦𑁆𑀣𑀢𑀘𑀢𑀼𑀓𑁆𑀓𑀪𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀘𑀢𑀼𑀓𑁆𑀓𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁬𑁫. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 ¶ 𑀧𑀓𑀭𑀡𑀢𑁄 𑀯𑀺𑀲𑁂𑀲𑀯𑀺𑀦𑀺𑀘𑁆𑀙𑀬𑁄𑀢𑀺 𑀆𑀳 ‘‘𑀥𑀼𑀢𑁆𑀢𑀸𑀢𑀺 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀔𑀺𑀟𑁆𑀟𑀸𑀧𑀲𑀼𑀢𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀲𑀸𑀫𑀜𑁆𑀜𑀢𑁄𑀧𑀺 𑀅𑀢𑁆𑀣𑀲𑀫𑁆𑀪𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀥𑀼𑀢𑁆𑀢𑀲𑀼𑀭𑀸𑀥𑀼𑀢𑁆𑀢𑀸𑀤𑀬𑁄 𑀯𑀸’’𑀢𑀺 𑀆𑀳. 𑀳𑀤𑀬𑀦𑁆𑀢𑀺 𑀳𑀤𑀬𑀫𑀁𑀲𑀁.

𑀲𑀩𑁆𑀩𑀸𑀓𑀸𑀭𑁂𑀦 𑀘𑀢𑀼𑀓𑁆𑀓𑀪𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁬𑁬. 𑀧𑀝𑀺𑀜𑁆𑀜𑀸𑀓𑀭𑀡𑀁 ¶ 𑀦𑀢𑁆𑀣𑀻𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀸𑀪𑀸𑀯𑀢𑁄. 𑀦 𑀳𑀺 𑀤𑀽𑀲𑀓𑁄 ‘‘𑀓𑁂𑀦 𑀘𑀺𑀢𑁆𑀢𑁂𑀦 𑀯𑀻𑀢𑀺𑀓𑁆𑀓𑀫𑀁 𑀅𑀓𑀸𑀲𑀺, 𑀚𑀸𑀦𑀺𑀢𑁆𑀯𑀸 𑀅𑀓𑀸𑀲𑀺, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀬 𑀅𑀭𑀳𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂 𑀏𑀯. 𑀲𑀩𑁆𑀩𑀗𑁆𑀕𑀕𑀢𑀦𑁆𑀢𑀺 𑀞𑀧𑁂𑀢𑁆𑀯𑀸 𑀓𑁂𑀲𑀮𑁄𑀫𑀤𑀦𑁆𑀢𑀦𑀔𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘𑁂𑀯 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀉𑀤𑀓𑀫𑀺𑀯 𑀢𑁂𑀮𑀩𑀺𑀦𑁆𑀤𑀼 𑀅𑀯𑀲𑁂𑀲𑀲𑀩𑁆𑀩𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁. 𑀲𑀭𑀻𑀭𑀓𑀫𑁆𑀧𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀔𑀻𑀦𑀁 𑀧𑀻𑀢𑀯𑀡𑁆𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀢𑁆𑀢𑀓𑁄𑀲𑀓𑁂 𑀞𑀺𑀢𑀦𑁆𑀢𑀺 𑀳𑀤𑀬𑀧𑀧𑁆𑀨𑀸𑀲𑀸𑀦𑀁 𑀅𑀦𑁆𑀢𑀭𑁂 𑀬𑀓𑀦𑀫𑀁𑀲𑀁 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀺𑀢𑁂 𑀫𑀳𑀸𑀓𑁄𑀲𑀸𑀢𑀓𑀻𑀓𑁄𑀲𑀲𑀤𑀺𑀲𑁂 𑀧𑀺𑀢𑁆𑀢𑀓𑁄𑀲𑁂 𑀞𑀺𑀢𑀁. 𑀓𑀼𑀧𑀺𑀢𑁂𑀢𑀺 𑀧𑀺𑀢𑁆𑀢𑀓𑁄𑀲𑀢𑁄 𑀘𑀮𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂.

𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀺𑀲𑁆𑀲𑀝𑁆𑀞𑀧𑀓𑀢𑀺𑀘𑀺𑀢𑁆𑀢𑁄. 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄𑀢𑀺 𑀬𑀓𑁆𑀔𑀸 𑀓𑀺𑀭 𑀬𑀲𑁆𑀲 𑀘𑀺𑀢𑁆𑀢𑀁 𑀔𑀺𑀧𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑁂𑀢𑀫𑀼𑀔𑀁 𑀦𑀻𑀮𑁄𑀤𑀭𑀁 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑀁 𑀫𑀳𑀸𑀲𑀻𑀲𑀁 𑀧𑀚𑁆𑀚𑀮𑀺𑀢𑀦𑁂𑀢𑁆𑀢𑀁 𑀪𑁂𑀭𑀯𑀁 𑀯𑀸 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺, 𑀪𑁂𑀭𑀯𑀁 𑀯𑀸 𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺, 𑀓𑀣𑁂𑀦𑁆𑀢𑀲𑁆𑀲𑁂𑀯 𑀯𑀸 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀤𑀬𑀫𑀁𑀲𑀁 𑀫𑀤𑁆𑀤𑀦𑁆𑀢𑀺, 𑀢𑁂𑀦 𑀲𑁄 𑀲𑀢𑁆𑀢𑁄 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺 𑀔𑀺𑀢𑁆𑀢𑀘𑀺𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀪𑁂𑀭𑀯𑀸𑀦𑀺 𑀯𑀸 𑀆𑀭𑀫𑁆𑀫𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀪𑁂𑀭𑀯𑀸𑀦𑀻𑀢𑀺 𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀲𑀢𑁆𑀢𑀸𑀦𑀁 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑀸𑀦𑀺. 𑀦𑀺𑀘𑁆𑀘𑀫𑁂𑀯 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀻𑀢𑀺 𑀬𑀲𑁆𑀲 𑀧𑀺𑀢𑁆𑀢𑀓𑁄𑀲𑀢𑁄 𑀧𑀺𑀢𑁆𑀢𑀁 𑀘𑀮𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀧𑀺𑀢𑁆𑀢𑀁 𑀘𑀮𑀺𑀢𑁆𑀯𑀸 𑀧𑀺𑀢𑁆𑀢𑀓𑁄𑀲𑁂𑀬𑁂𑀯 𑀞𑀺𑀢𑀁 𑀳𑁄𑀢𑀺 𑀩𑀳𑀺 𑀅𑀦𑀺𑀓𑁆𑀔𑀦𑁆𑀢𑀁, 𑀲𑁄 𑀅𑀦𑁆𑀢𑀭𑀦𑁆𑀢𑀭𑀸 𑀲𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀦 𑀦𑀺𑀘𑁆𑀘𑀫𑁂𑀯 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀜𑀢𑁆𑀯𑀸𑀢𑀺 𑀲𑀜𑁆𑀜𑀸𑀧𑀝𑀺𑀮𑀸𑀪𑁂𑀦 𑀚𑀸𑀦𑀺𑀢𑁆𑀯𑀸. 𑀅𑀥𑀺𑀫𑀢𑁆𑀢𑀸𑀬𑀸𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀸𑀬.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀧𑀓𑀺𑀡𑁆𑀡𑀓𑀦𑁆𑀢𑀺 ¶ 𑀯𑁄𑀫𑀺𑀲𑁆𑀲𑀓𑀦𑀬𑀁. 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀓𑀺𑀭𑀺𑀬𑀸𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀅𑀓𑀺𑀭𑀺𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑁂𑀤𑀦𑀸𑀬𑀸𑀢𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁, 𑀯𑁂𑀤𑀦𑀸𑀬 𑀲𑀳 𑀓𑀼𑀲𑀮𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦𑀸𑀢𑀺 ¶ 𑀲𑀩𑁆𑀩𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀗𑁆𑀕𑀸𑀳𑀓𑀯𑀲𑁂𑀦. 𑀙 𑀲𑀺𑀓𑁆𑀔𑀸𑀧𑀤𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀓𑀸𑀬𑁄 𑀯𑀸𑀘𑀸 𑀓𑀸𑀬𑀯𑀸𑀘𑀸 𑀓𑀸𑀬𑀘𑀺𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺. 𑀆𑀧𑀢𑁆𑀢𑀺𑀬𑁂𑀯 𑀳𑀺 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀯𑀼𑀢𑁆𑀢𑀸. 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀳𑀺 𑀆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺, 𑀦 𑀲𑀺𑀓𑁆𑀔𑀸𑀧𑀤𑀲𑁆𑀲, 𑀇𑀫𑁂𑀲𑀼 𑀧𑀦 𑀙𑀲𑀼 𑀲𑀫𑀼𑀝𑁆𑀞𑀸𑀦𑁂𑀲𑀼 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺. 𑀢𑁂𑀲𑀼 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀙𑀳𑀺 𑀯𑀸 𑀲𑀫𑀼𑀝𑁆𑀞𑀸𑀦𑁂𑀳𑀺 𑀆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀧𑀜𑁆𑀘𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀏𑀓𑀲𑀫𑀼𑀝𑁆𑀞𑀸𑀦𑀸 𑀘𑀢𑀼𑀢𑁆𑀣𑁂𑀦 𑀘 𑀧𑀜𑁆𑀘𑀫𑁂𑀦 𑀘 𑀙𑀝𑁆𑀞𑁂𑀦 𑀘 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀦. 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸 𑀧𑀞𑀫𑀘𑀢𑀼𑀢𑁆𑀣𑁂𑀳𑀺 𑀘 𑀤𑀼𑀢𑀺𑀬𑀧𑀜𑁆𑀘𑀫𑁂𑀳𑀺 𑀘 𑀢𑀢𑀺𑀬𑀙𑀝𑁆𑀞𑁂𑀳𑀺 𑀘 𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀢𑀺𑀲𑀫𑀼𑀝𑁆𑀞𑀸𑀦𑀸 𑀧𑀞𑀫𑁂𑀳𑀺 𑀘 𑀢𑀻𑀳𑀺, 𑀧𑀘𑁆𑀙𑀺𑀫𑁂𑀳𑀺 𑀘 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀙𑀲𑀫𑀼𑀝𑁆𑀞𑀸𑀦𑀸 𑀙𑀳𑀺𑀧𑀺 𑀲𑀫𑀼𑀝𑁆𑀞𑀸𑀢𑀺.

𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 𑀅𑀢𑁆𑀣𑀺 𑀙𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀜𑁆𑀘𑁂𑀢𑀁 𑀆𑀧𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺, 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀧𑀦 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀤𑁂𑀲𑀦𑀸 𑀆𑀭𑀼𑀴𑁆𑀳𑀸’’𑀢𑀺. 𑀓𑀸𑀬𑀸𑀤𑀻𑀳𑀺 𑀙𑀳𑀺 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀙 𑀯𑀸 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀙𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄 𑀓𑀸𑀬𑀯𑀸𑀘𑀸 𑀓𑀸𑀬𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀯𑀸𑀘𑀸 𑀓𑀸𑀬𑀯𑀸𑀘𑀸 𑀯𑀸𑀘𑀸𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀯𑀸 𑀘𑀢𑁆𑀢𑀸𑀭𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀺 𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄 𑀯𑀸𑀘𑀸 𑀓𑀸𑀬𑀯𑀸𑀘𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺, 𑀓𑀸𑀬𑀘𑀺𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀯𑀸 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁 𑀏𑀓𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀭𑀲 𑀳𑀺 𑀲𑀫𑀼𑀝𑁆𑀞𑀸𑀦𑀲𑀻𑀲𑀸𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀁 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺.

𑀢𑀢𑁆𑀣 ¶ ¶ ‘‘𑀅𑀢𑁆𑀣𑀺 𑀙𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀺 𑀘𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀬𑀜𑁆𑀳𑀺 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀧𑀦 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀁. ‘‘𑀅𑀢𑁆𑀣𑀺 𑀢𑀺𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀬𑀜𑁆𑀳𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀧𑀦 𑀅𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀁. ‘‘𑀅𑀢𑁆𑀣𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀅𑀯𑀲𑁂𑀲𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁 𑀏𑀓𑀲𑀫𑀼𑀝𑁆𑀞𑀸𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀬𑀁 𑀢𑀢𑀺𑀬𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀧𑀞𑀫𑀘𑀢𑀼𑀢𑁆𑀣𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀙𑀝𑁆𑀞𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁, 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑁂𑀲𑀼 𑀧𑀦 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀧𑀤𑀲𑁄𑀥𑀫𑁆𑀫𑀣𑁂𑀬𑁆𑀬𑀲𑀢𑁆𑀣𑀥𑀫𑁆𑀫𑀤𑁂𑀲𑀦𑀸𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑁂𑀲𑀼 𑀬𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀤𑀼𑀢𑀺𑀬𑀧𑀜𑁆𑀘𑀫𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀧𑀜𑁆𑀘𑀫𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑁂𑀭𑀲𑀥𑀸 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀺𑀭𑀺𑀬𑀸𑀯𑀲𑁂𑀦 𑀧𑀜𑁆𑀘𑀥𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀸𑀧𑀺 𑀓𑀺𑀜𑁆𑀘𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀻𑀢𑀺 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀆𑀧𑀢𑁆𑀢𑀺𑀁 𑀯𑀤𑀢𑀺. 𑀢𑀲𑁆𑀫𑀸 𑀬𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀯𑀺𑀬 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺, 𑀅𑀬𑀁 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀓𑀸𑀬𑀯𑀸𑀘𑀸𑀬 𑀓𑀢𑁆𑀢𑀩𑁆𑀩𑀁 𑀅𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺 𑀧𑀞𑀫𑀓𑀣𑀺𑀦𑀸𑀧𑀢𑁆𑀢𑀺 𑀯𑀺𑀬, 𑀅𑀬𑀁 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 𑀯𑀺𑀬, 𑀅𑀬𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀲𑀺𑀬𑀸 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 𑀯𑀺𑀬, 𑀅𑀬𑀁 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀺𑀬, 𑀅𑀬𑀁 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫.

𑀇𑀤𑀸𑀦𑀺 ¶ 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀜𑁆𑀜𑀸𑀯𑀲𑁂𑀦 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀸𑀧𑀺 𑀅𑀢𑁆𑀣𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀯𑀺𑀫𑁄𑀓𑁆𑀔𑁄 𑀅𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀢𑁄 𑀳𑀺 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀅𑀪𑀸𑀯𑁂𑀦 𑀫𑀼𑀘𑁆𑀘𑀢𑀺, 𑀇𑀤𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀗𑁆𑀕𑀁 𑀮𑀪𑀢𑀺𑀬𑁂𑀯𑀸𑀢𑀺 𑀓𑀸𑀬𑀘𑀺𑀢𑁆𑀢𑀸𑀤𑀺𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑁂𑀳𑁂𑀯 𑀲𑀫𑀼𑀝𑁆𑀞𑀳𑀦𑀢𑁄 ¶ . ‘‘𑀮𑀪𑀢𑀺𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀦𑁄 𑀦 𑀮𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀬𑀁 𑀘𑀺𑀢𑁆𑀢𑀗𑁆𑀕𑀁 𑀮𑀪𑀢𑀺, 𑀦 𑀮𑀪𑀢𑀺 𑀘, 𑀢𑀁 ‘‘𑀇𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁 𑀇𑀢𑀭-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀧𑀝𑀺𑀬𑁄𑀕𑀯𑀺𑀲𑀬𑀢𑁆𑀢𑀸.

𑀧𑀼𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀥𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀦 𑀅𑀢𑁆𑀣𑀺 𑀲𑀘𑀺𑀢𑁆𑀢𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀲𑀳𑁂𑀯 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀻𑀢𑀺 𑀬𑀁 𑀲𑀘𑀺𑀢𑁆𑀢𑀓𑁂𑀦𑁂𑀯 𑀲𑀫𑀼𑀝𑁆𑀞𑀸𑀦𑁂𑀦 𑀆𑀧𑀚𑁆𑀚𑀢𑀺, 𑀦𑁄 𑀅𑀘𑀺𑀢𑁆𑀢𑀓𑁂𑀦. 𑀯𑀺𑀦𑀸𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀲𑀳𑀸𑀧𑀺 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀜𑁆𑀳𑀺 𑀓𑀤𑀸𑀘𑀺 𑀅𑀘𑀺𑀢𑁆𑀢𑀓𑁂𑀦, 𑀓𑀤𑀸𑀘𑀺 𑀲𑀘𑀺𑀢𑁆𑀢𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺, 𑀢𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀲𑀜𑁆𑀜𑀸𑀤𑀼𑀓𑀁 𑀅𑀦𑀸𑀧𑀢𑁆𑀢𑀺𑀫𑀼𑀔𑁂𑀦, 𑀲𑀘𑀺𑀢𑁆𑀢𑀓𑀤𑀼𑀓𑀁 𑀆𑀧𑀢𑁆𑀢𑀺𑀫𑀼𑀔𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑁄𑀓𑀯𑀚𑁆𑀚𑀤𑀼𑀓𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀢𑁆𑀢𑀸 𑀢𑀁 𑀅𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀫𑁆𑀫𑀯𑀲𑁂𑀦 𑀤𑀼𑀯𑀺𑀥𑀸𑀦𑀺, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀯𑁂𑀤𑀦𑀸𑀯𑀲𑁂𑀦 𑀘 𑀢𑀺𑀯𑀺𑀥𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀫𑁆𑀫𑀓𑀼𑀲𑀮𑀯𑁂𑀤𑀦𑀸𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑁂𑀦 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀯𑀲𑁂𑀦 𑀤𑀼𑀓𑀁 𑀯𑀼𑀢𑁆𑀢𑀁, 𑀢𑀺𑀓𑀫𑁂𑀯 𑀧𑀦 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀩𑁆𑀩𑀫𑁂𑀯 𑀳𑀺 𑀲𑀺𑀓𑁆𑀔𑀸𑀧𑀤𑀁 𑀓𑀸𑀬𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀯𑀘𑀻𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀘 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀯 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀢𑀤𑀼𑀪𑀬𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀯𑀘𑀻𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀉𑀪𑀬𑀢𑁆𑀣 𑀆𑀧𑀚𑁆𑀚𑀺𑀢𑀩𑁆𑀩𑀸 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫’’𑀦𑁆𑀢𑀺. 𑀢𑀢𑁄𑀬𑁂𑀯 𑀘 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀦𑁆𑀢𑀺 𑀢𑀤𑀼𑀪𑀬𑀯𑀲𑁂𑀦 𑀤𑀲𑁆𑀲𑀺𑀢𑀁.

𑀅𑀢𑁆𑀣𑀺 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀓𑀼𑀲𑀮𑀦𑁆𑀢𑀺𑀆𑀤𑀺𑀦𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀻 𑀯𑀸 𑀆𑀧𑀚𑁆𑀚𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀻 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀗𑁆𑀕𑀻 𑀯𑀸𑀢𑀺 ¶ 𑀤𑀲𑁆𑀲𑁂𑀢𑀺, 𑀦 𑀧𑀦 𑀓𑀼𑀲𑀮𑀸𑀧𑀺 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺. 𑀦 𑀳𑀺 𑀓𑀼𑀲𑀮𑀸 𑀆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 (𑀧𑀭𑀺. 𑁩𑁦𑁩) 𑀯𑀘𑀦𑀢𑁄. 𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑀯𑁄𑀝𑁆𑀞𑀩𑁆𑀩𑀦𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀤𑁆𑀯𑀺𑀦𑁆𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀼𑀲𑀮𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀻𑀢𑀺 𑀬𑀁 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀕𑀳𑀺𑀢𑀁 𑀆𑀧𑀢𑁆𑀢𑀺𑀁 𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀢𑀁 𑀓𑀼𑀲𑀮𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄 𑀓𑀼𑀲𑀮𑀪𑀸𑀯𑁄 𑀧𑀭𑀺𑀬𑀸𑀬𑀢𑁄𑀯, 𑀦 𑀧𑀭𑀫𑀢𑁆𑀣𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀲𑀮𑀘𑀺𑀢𑁆𑀢𑁂𑀦 𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀲𑀯𑀺𑀜𑁆𑀜𑀢𑁆𑀢𑀺𑀓𑀁 𑀅𑀯𑀺𑀜𑁆𑀜𑀢𑁆𑀢𑀺𑀓𑀁 ¶ 𑀯𑀸 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸𑀓𑀸𑀭𑀧𑁆𑀧𑀯𑀢𑁆𑀢𑀁 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀢𑀭𑁂𑀳𑀺 𑀇𑀢𑀭𑀦𑁆𑀢𑀺 𑀇𑀢𑀭𑁂𑀳𑀺 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀳𑀺 𑀬𑀁 𑀆𑀧𑀚𑁆𑀚𑀢𑀺, 𑀢𑀁 𑀇𑀢𑀭𑀁, 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀻 𑀯𑀸 𑀆𑀧𑀚𑁆𑀚𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑀗𑁆𑀕𑀻 𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀓𑀺𑀜𑁆𑀘𑀺 𑀅𑀓𑀼𑀲𑀮𑀘𑀺𑀢𑁆𑀢𑀫𑁂𑀯 𑀓𑀺𑀜𑁆𑀘𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀤𑁆𑀯𑀺𑀘𑀺𑀢𑁆𑀢𑀁, 𑀓𑀺𑀜𑁆𑀘𑀺 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀺𑀘𑀺𑀢𑁆𑀢𑀦𑁆𑀢𑀺 𑀅𑀬𑀫𑁂𑀯 𑀧𑀪𑁂𑀤𑁄 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀯𑁂𑀤𑀦𑀁 𑀤𑁆𑀯𑀺𑀯𑁂𑀤𑀦𑀁 𑀏𑀓𑀯𑁂𑀤𑀦𑀦𑁆𑀢𑀺 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑀯𑁂𑀤𑀦𑀸𑀯𑀲𑁂𑀦𑁂𑀯 𑀮𑀩𑁆𑀪𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀳𑀲𑁂𑀬𑁆𑀬𑀯𑀲𑁂𑀦 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀆𑀧𑀢𑁆𑀢𑀺𑀪𑀸𑀯𑀢𑁄 ‘‘𑀅𑀢𑁆𑀣𑀺 𑀅𑀯𑁂𑀤𑀦’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀫𑁂𑀢𑀁, 𑀓𑀤𑀸𑀘𑀺 𑀓𑀭𑀳𑀘𑀺 𑀬𑀤𑀺𑀘𑁆𑀙𑀓𑀁 𑀲𑀫𑁆𑀪𑀯𑀢𑀻𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀬𑁂𑀪𑀼𑀬𑁆𑀬𑀯𑀲𑁂𑀦 𑀮𑀩𑁆𑀪𑀫𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀇𑀫𑀲𑁆𑀫𑀺𑀁 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀺𑀓𑁆𑀔𑀸𑀧𑀤𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀁 𑀧𑀓𑀺𑀡𑁆𑀡𑀓𑀁 𑀯𑀺𑀤𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀤𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 ‘‘𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀧𑀭𑀽𑀧𑀓𑁆𑀓𑀫𑁂 𑀲𑀢𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄. ‘‘𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀤𑀫𑁆𑀧𑀺 𑀩𑀸𑀳𑀼𑀮𑁆𑀮𑀯𑀲𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀁 𑀧𑀦𑁂𑀢𑁆𑀣 𑀅𑀗𑁆𑀕𑀫𑀢𑁆𑀢𑀁 𑀳𑁄𑀢𑀻𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀘𑀺𑀢𑁆𑀢𑀫𑁂𑀢𑁆𑀣 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀫𑁂𑀯 𑀳𑁄𑀢𑀺. 𑀦 𑀢𑀲𑁆𑀲 𑀯𑀲𑁂𑀦 𑀓𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀯𑀲𑁂𑀦 ¶ 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑁆𑀢𑀸 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀫𑀦𑁄𑀓𑀫𑁆𑀫𑀪𑀸𑀯𑁄 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀪𑀸𑀯𑀢𑁄 ‘‘𑀲𑀩𑁆𑀩𑀜𑁆𑀘𑁂𑀢𑀁 𑀆𑀧𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀣𑀸𑀯𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺 𑀧𑀜𑁆𑀜𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀇𑀤𑀁 𑀓𑀺𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀢𑀺. 𑀯𑀺𑀦𑀻𑀢𑀸𑀦𑀺 𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀯𑀢𑁆𑀣𑀽𑀦𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀢𑀸𑀦𑀺 𑀳𑀺 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓𑀁. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀪𑀕𑀯𑀢𑀸𑀬𑁂𑀯 𑀯𑀺𑀦𑀺𑀘𑁆𑀙𑀺𑀢𑀸𑀦𑀺 ¶ . 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀢𑀸𑀦’’𑀦𑁆𑀢𑀺. 𑀉𑀤𑁆𑀤𑀸𑀦𑀕𑀸𑀣𑀸𑀢𑀺 𑀉𑀤𑁆𑀤𑁂𑀲𑀕𑀸𑀣𑀸, 𑀲𑀗𑁆𑀕𑀳𑀕𑀸𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀢𑁆𑀣𑀼𑀕𑀸𑀣𑀸𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑀸 𑀦𑀺𑀤𑀸𑀦𑀯𑀢𑁆𑀣𑀼𑀤𑀻𑀧𑀺𑀓𑀸 𑀯𑀺𑀦𑀻𑀢𑀯𑀢𑁆𑀣𑀼𑀧𑀸𑀴𑀺𑀬𑁂𑀯 𑀢𑁂𑀲𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀕𑀦𑁆𑀣𑀦𑀢𑁄 ‘‘𑀯𑀢𑁆𑀣𑀼𑀕𑀸𑀣𑀸’’𑀢𑀺 𑀯𑀼𑀢𑁆𑀢𑀸, 𑀦 𑀙𑀦𑁆𑀤𑁄𑀯𑀺𑀘𑀺𑀢𑀺𑀮𑀓𑁆𑀔𑀡𑁂𑀦. 𑀕𑀸𑀣𑀸𑀦𑀁 𑀯𑀢𑁆𑀣𑀼 𑀯𑀢𑁆𑀣𑀼𑀕𑀸𑀣𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀲𑀼. 𑀤𑀼𑀢𑀺𑀬𑀸𑀤𑀻𑀦𑀦𑁆𑀢𑀺 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀦𑀁. 𑀤𑀼𑀢𑀺𑀬𑀸𑀤𑀻𑀦𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀺𑀧𑁆𑀧𑀺𑀓𑀸𑀦𑀦𑁆𑀢𑀺 𑀘𑀺𑀢𑁆𑀢𑀓𑀸𑀭𑀸𑀤𑀺𑀲𑀺𑀧𑁆𑀧𑀺𑀓𑀸𑀦𑀁. 𑀬𑀁 𑀧𑀲𑁆𑀲𑀺𑀢𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀘𑀺𑀢𑁆𑀢𑀓𑀸𑀭𑀸𑀤𑀬𑁄 𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀸 𑀓𑀭𑁄𑀦𑁆𑀢𑀺, 𑀢𑀁 ‘‘𑀧𑀝𑀺𑀘𑁆𑀙𑀦𑁆𑀦𑀓𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁬𑁭. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀯𑀢𑁆𑀣𑀽𑀦𑀻𑀢𑀺 𑀫𑀓𑁆𑀓𑀝𑀺𑀯𑀢𑁆𑀣𑀼𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀜𑁆𑀘. 𑀢𑀸𑀦𑀺 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀆𑀕𑀢𑀸𑀦𑁂𑀯, 𑀢𑀣𑀸𑀧𑀺 𑀪𑀕𑀯𑀢𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀢𑀯𑀢𑁆𑀣𑀼𑀪𑀸𑀯𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀆𑀕𑀢𑀸𑀦𑀺 𑀭𑀚𑀓𑀸𑀤𑀺𑀯𑀢𑁆𑀣𑀽𑀦𑀺 𑀯𑀺𑀬 𑀧𑀼𑀦 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀺. 𑀬𑀤𑀺 𑀏𑀯𑀁 ‘‘𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀻’’𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑁂𑀬𑁆𑀬, 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀜𑁆𑀳𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀲𑀼𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀘𑁄𑀤𑁂𑀢𑁆𑀯𑀸 ‘‘𑀦𑀦𑀼, 𑀆𑀯𑀼𑀲𑁄, 𑀢𑀣𑁂𑀯 𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻’’𑀢𑀺 𑀇𑀤𑀜𑁆𑀘 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀪𑀕𑀯𑀢𑁄 𑀆𑀭𑁄𑀘𑀺𑀢𑁂 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺 𑀪𑀕𑀯𑀢𑀸 ¶ 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀫𑁆𑀳𑀺 𑀧𑀦 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀬𑀸𑀘𑀺𑀁𑀲𑀼, 𑀢𑁂 𑀲𑀦𑁆𑀥𑀸𑀬 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺𑀆𑀤𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀬𑁂 𑀧𑀦 𑀅𑀯𑀺𑀩𑁆𑀪𑀫𑀺𑀢𑁆𑀯𑀸 𑀲𑀮𑀺𑀗𑁆𑀕𑁂 𑀞𑀺𑀢𑀸𑀬𑁂𑀯 𑀉𑀧𑁆𑀧𑀦𑁆𑀦𑀓𑀼𑀓𑁆𑀓𑀼𑀘𑁆𑀘𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀢𑁂 𑀲𑀦𑁆𑀥𑀸𑀬 ‘‘𑀆𑀧𑀢𑁆𑀢𑀺𑀁 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀇𑀥 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀇𑀫𑀁 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑀸𑀯 ‘‘𑀅𑀜𑁆𑀜𑀫𑁂𑀯 𑀫𑀓𑁆𑀓𑀝𑀺𑀯𑀢𑁆𑀣𑀼 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼 𑀘 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀆𑀕𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀼𑀲𑁂 𑀕𑀦𑁆𑀣𑁂𑀢𑁆𑀯𑀸𑀢𑀺 𑀓𑀼𑀲𑀢𑀺𑀡𑀸𑀦𑀺 𑀕𑀦𑁆𑀣𑁂𑀢𑁆𑀯𑀸. 𑀓𑁂𑀲𑁂𑀳𑀻𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺. 𑀢𑀁 𑀭𑀸𑀕𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀁. 𑀜𑀢𑁆𑀯𑀸𑀢𑀺 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸. 𑀬𑀤𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀓𑀢𑀁, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀺𑀓𑁆𑀔𑀸𑀧𑀤𑀲𑁆𑀲 ¶ 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀅𑀯𑀢𑁆𑀯𑀸 𑀇𑀥 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀺𑀜𑁆𑀘𑀸𑀧𑀺 𑀢𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀓𑀢𑀁, 𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀓𑀢𑀼𑀧𑀓𑁆𑀓𑀫𑀢𑁆𑀢𑀸 ‘‘𑀧𑀸𑀭𑀸𑀚𑀺𑀓𑀁 𑀦𑀼 𑀔𑁄 𑀅𑀳𑀁 𑀆𑀧𑀦𑁆𑀦𑁄’’𑀢𑀺 𑀧𑀸𑀭𑀸𑀚𑀺𑀓𑀯𑀺𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀻𑀢𑀺 𑀇𑀥 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺.

𑁬𑁮. 𑀅𑀢𑀺𑀤𑀲𑁆𑀲𑀦𑀻𑀬𑀸𑀢𑀺 𑀤𑀺𑀯𑀲𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀡𑀢𑁄 𑀅𑀢𑀺𑀯𑀺𑀬 𑀤𑀲𑁆𑀲𑀦𑀬𑁄𑀕𑁆𑀕𑀸. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀏𑀢𑁆𑀣 𑀧𑁄𑀓𑁆𑀔𑀭𑀢𑀸 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀪𑀸𑀯𑁄, 𑀯𑀡𑁆𑀡𑀲𑁆𑀲 𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀸 𑀧𑀦 𑀧𑁄𑀓𑁆𑀔𑀭𑀦𑁆𑀢𑀺 𑀲𑀭𑀻𑀭𑀁 𑀯𑀤𑀦𑁆𑀢𑀺, 𑀯𑀡𑁆𑀡𑀁 𑀯𑀡𑁆𑀡𑀫𑁂𑀯. 𑀢𑁂𑀲𑀁 𑀫𑀢𑁂𑀦 𑀯𑀡𑁆𑀡𑀜𑁆𑀘 𑀧𑁄𑀓𑁆𑀔𑀭𑀜𑁆𑀘 𑀯𑀡𑁆𑀡𑀧𑁄𑀓𑁆𑀔𑀭𑀸𑀦𑀺, 𑀢𑁂𑀲𑀁 𑀪𑀸𑀯𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀲𑁆𑀫𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑁂𑀦 𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀧𑁄𑀓𑁆𑀔𑀭𑀁 𑀯𑀡𑁆𑀡𑀧𑁄𑀓𑁆𑀔𑀭𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁄 𑀧𑀼𑀩𑁆𑀩𑀧𑀤𑀲𑁆𑀲 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀪𑀸𑀯𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬, 𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀥𑀁𑀲𑁂𑀲𑀻𑀢𑀺 𑀅𑀪𑀺𑀪𑀯𑀻𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀅𑀲𑀸𑀤𑀺𑀬𑀦𑁆𑀢𑀻 𑀦𑀺𑀲𑀻𑀤𑀻𑀢𑀺 𑀆𑀳 𑁋 ‘‘𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦…𑀧𑁂… 𑀔𑀸𑀡𑀼𑀓𑀸 𑀯𑀺𑀬𑀸’’𑀢𑀺.

𑀦 ¶ 𑀮𑀺𑀫𑁆𑀧𑀢𑀻𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀉𑀤𑀓𑀩𑀺𑀦𑁆𑀤𑀼 𑀦 𑀲𑀡𑁆𑀞𑀸𑀢𑀺, 𑀬𑀣𑀸 𑀘 𑀲𑀽𑀘𑀺𑀫𑀼𑀔𑁂 𑀲𑀸𑀲𑀧𑁄 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀬𑁄 𑀅𑀩𑁆𑀪𑀦𑁆𑀢𑀭𑁂 𑀤𑀼𑀯𑀺𑀥𑁂𑀦𑀧𑀺 𑀓𑀸𑀫𑁂𑀦 𑀦 𑀮𑀺𑀫𑁆𑀧𑀢𑀺, 𑀢𑀲𑁆𑀫𑀺𑀁 𑀓𑀸𑀫𑁄 𑀦 𑀲𑀡𑁆𑀞𑀸𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺.

𑁬𑁯. 𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀅𑀦𑁆𑀢𑀭𑀳𑀺𑀢𑀁, 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀨𑀮𑀲𑁆𑀲 𑀯𑀺𑀦𑀸𑀲𑀼𑀧𑁆𑀧𑀸𑀤𑀤𑀲𑁆𑀲𑀦𑁂𑀦 𑀓𑀸𑀭𑀡𑀲𑁆𑀲𑀧𑀺 𑀯𑀺𑀦𑀸𑀲𑀼𑀧𑁆𑀧𑀸𑀤𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂 𑀳𑀺 𑀦𑀝𑁆𑀞𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀧𑀸𑀢𑀼𑀪𑀯𑀢𑀺. 𑀢𑀣𑀸 𑀳𑀺 ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄. 𑀬𑀲𑁆𑀲 𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’’𑀢𑀺 𑀬𑀫𑀓𑀧𑀓𑀭𑀡𑁂 (𑀬𑀫. 𑁩. 𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀯𑀼𑀢𑁆𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀤𑁆𑀯𑀬𑀲𑁆𑀲 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀳𑀧𑀯𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀸𑀢𑀼𑀪𑀯𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀲𑀼 𑀲𑀳𑀚𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀓𑀫𑁂𑀦 𑀦𑀺𑀭𑀼𑀤𑁆𑀥𑁂𑀲𑀼 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁂𑀲𑀼 𑀓𑀫𑁆𑀫𑀚𑀭𑀽𑀧𑁂𑀲𑀼 𑀲𑁂𑀲𑀭𑀽𑀧𑁂𑀲𑀼 𑀘 𑀓𑀜𑁆𑀘𑀺 𑀓𑀸𑀮𑀁 𑀧𑀯𑀢𑁆𑀢𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀲𑀼 𑀇𑀢𑁆𑀣𑀺𑀲𑀡𑁆𑀞𑀸𑀦𑀸𑀓𑀸𑀭𑁂𑀦 ¶ 𑀘 𑀘𑀢𑀼𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀸𑀬 𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀅𑀦𑁆𑀢𑀭𑀳𑀺𑀢𑀁, 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀧𑀺 𑀅𑀬𑀫𑁂𑀯 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀢𑁆𑀢𑀫𑀁, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀳𑀻𑀦𑀦𑁆𑀢𑀺 𑀇𑀫𑀺𑀦𑀸 𑀘 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀢𑁆𑀢𑀫𑀪𑀸𑀯𑁄, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀳𑀻𑀦𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀇𑀦𑁆𑀤𑁆𑀭𑀺𑀬𑀲𑁆𑀲 𑀳𑀻𑀦𑀼𑀓𑁆𑀓𑀝𑁆𑀞𑀪𑀸𑀯𑀁 𑀯𑀺𑀦𑀸 𑀢𑀦𑁆𑀦𑀺𑀲𑁆𑀲𑀬𑀲𑁆𑀲 𑀮𑀺𑀗𑁆𑀕𑀲𑁆𑀲 𑀳𑀻𑀦𑀼𑀓𑁆𑀓𑀝𑁆𑀞𑀢𑀸 𑀲𑀫𑁆𑀪𑀯𑀢𑀺. 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀻𑀢𑀺𑀆𑀤𑀺𑀦𑀸𑀧𑀺 𑀇𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀯𑀺𑀦𑀸𑀲𑀼𑀧𑁆𑀧𑀸𑀤𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀦𑀝𑁆𑀞𑁂 𑀉𑀧𑁆𑀧𑀦𑁆𑀦𑁂 𑀘 𑀢𑀦𑁆𑀦𑀺𑀲𑁆𑀲𑀬𑀲𑁆𑀲 𑀮𑀺𑀗𑁆𑀕𑀲𑁆𑀲𑀧𑀺 𑀅𑀦𑁆𑀢𑀭𑀥𑀸𑀦𑀁 𑀧𑀢𑀺𑀝𑁆𑀞𑀸𑀦𑀜𑁆𑀘 𑀲𑀫𑁆𑀪𑀯𑀢𑀺. 𑀓𑀣𑀁 𑀧𑀦𑁂𑀢𑁆𑀣 𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀉𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀓𑀁 𑀅𑀦𑀼𑀧𑀳𑀢𑀲𑀸𑀫𑀢𑁆𑀣𑀺𑀬𑀁 𑀩𑀮𑀯𑀓𑀼𑀲𑀮𑀓𑀫𑁆𑀫𑀁 𑀬𑀸𑀯𑀢𑀸𑀬𑀼𑀓𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀫𑁂𑀯 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀭𑀸 𑀧𑀦 𑀓𑁂𑀦𑀘𑀺 𑀮𑀤𑁆𑀥𑀧𑀘𑁆𑀘𑀬𑁂𑀦 𑀧𑀸𑀭𑀤𑀸𑀭𑀺𑀓𑀢𑁆𑀢𑀸𑀤𑀺𑀦𑀸 𑀩𑀮𑀯𑀅𑀓𑀼𑀲𑀮𑀓𑀫𑁆𑀫𑁂𑀦 𑀉𑀧𑀳𑀢𑀲𑀸𑀫𑀢𑁆𑀣𑀺𑀬𑀁 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀁 𑀓𑀼𑀲𑀮𑀓𑀫𑁆𑀫𑀁 𑀤𑀼𑀩𑁆𑀩𑀮𑀻𑀪𑀽𑀢𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 ¶ 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑀺. 𑀬𑀤𑀸 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀦𑀓𑀸𑀮𑁂𑀬𑁂𑀯 𑀓𑁂𑀦𑀘𑀺 𑀮𑀤𑁆𑀥𑀧𑀘𑁆𑀘𑀬𑁂𑀦 𑀧𑀸𑀭𑀤𑀸𑀭𑀺𑀓𑀢𑁆𑀢𑀸𑀤𑀺𑀦𑀸 𑀩𑀮𑀯𑀅𑀓𑀼𑀲𑀮𑀓𑀫𑁆𑀫𑁂𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀲𑀸𑀫𑀢𑁆𑀣𑀺𑀬𑀁 𑀉𑀧𑀳𑀢𑀁 𑀳𑁄𑀢𑀺, 𑀢𑀤𑀸 𑀤𑀼𑀩𑁆𑀩𑀮𑀻𑀪𑀽𑀢𑀁 𑀓𑀼𑀲𑀮𑀓𑀫𑁆𑀫𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀸𑀤𑁂𑀢𑀺. 𑀢𑀲𑁆𑀫𑀸 ‘‘𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀩𑁆𑀩𑀮𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀧𑀸𑀭𑀤𑀸𑀭𑀺𑀓𑀢𑁆𑀢𑀸𑀤𑀺𑀩𑀮𑀯𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀯𑀺𑀩𑀦𑁆𑀥𑀓𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂 𑀲𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀼𑀩𑁆𑀩𑀮𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀭𑀤𑀸𑀭𑀺𑀓𑀢𑁆𑀢𑀸𑀤𑀺𑀦𑀸 𑀩𑀮𑀯𑀅𑀓𑀼𑀲𑀮𑀓𑀫𑁆𑀫𑁂𑀦 𑀩𑀸𑀳𑀺𑀢𑀢𑁆𑀢𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀁 𑀧𑀝𑀺𑀲𑀦𑁆𑀥𑀺𑀬𑀁 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀓𑀁 𑀤𑀼𑀩𑁆𑀩𑀮𑀓𑀼𑀲𑀮𑀓𑀫𑁆𑀫𑀁 𑀬𑀤𑀸 𑀧𑀯𑀢𑁆𑀢𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀫𑀺𑀘𑁆𑀙𑀸𑀘𑀸𑀭𑀧𑀝𑀺𑀯𑀺𑀭𑀢𑀺𑀯𑀲𑁂𑀦 𑀧𑀼𑀭𑀺𑀲𑀢𑁆𑀢𑀧𑀢𑁆𑀣𑀦𑀸𑀯𑀲𑁂𑀦 𑀯𑀸 𑀓𑀢𑀼𑀧𑀘𑀺𑀢𑀩𑀮𑀯𑀓𑀼𑀲𑀮𑀓𑀫𑁆𑀫𑁂𑀦 𑀆𑀳𑀺𑀢𑀲𑀸𑀫𑀢𑁆𑀣𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑁂 𑀲𑀫𑀢𑁆𑀣𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀤𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀯𑀺𑀩𑀦𑁆𑀥𑀓𑀲𑁆𑀲 𑀩𑀮𑀯𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂 𑀲𑀢𑀺 𑀢𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀅𑀦𑁆𑀢𑀭𑀳𑀺𑀢𑀦𑁆𑀢𑀺 ‘‘𑀇𑀢𑁆𑀣𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀦𑁆𑀢𑀁 𑀤𑀼𑀩𑁆𑀩𑀮𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑀮𑀯𑀢𑀸 𑀓𑀼𑀲𑀮𑀓𑀫𑁆𑀫𑁂𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁆𑀧𑀸𑀤𑀺𑀢𑀢𑁆𑀢𑀸 ‘‘𑀧𑀼𑀭𑀺𑀲𑀮𑀺𑀗𑁆𑀕𑀁 𑀩𑀮𑀯𑀓𑀼𑀲𑀮𑁂𑀦 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀇𑀢𑁆𑀣𑀺𑀪𑀽𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑁂𑀧𑀺 𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀪𑀬𑀫𑁆𑀧𑀺 𑀅𑀓𑀼𑀲𑀮𑁂𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀓𑀼𑀲𑀮𑁂𑀦 𑀧𑀝𑀺𑀮𑀩𑁆𑀪𑀢𑀻𑀢𑀺 𑀇𑀤𑀁 𑀲𑀼𑀕𑀢𑀺𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀤𑀼𑀕𑁆𑀕𑀢𑀺𑀬𑀁 𑀧𑀦 𑀉𑀪𑀺𑀦𑁆𑀦𑀁 𑀉𑀧𑁆𑀧𑀢𑁆𑀢𑀺 𑀯𑀺𑀦𑀸𑀲𑁄 𑀘 𑀅𑀓𑀼𑀲𑀮𑀓𑀫𑁆𑀫𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀪𑀺𑀦𑁆𑀦𑀫𑁆𑀧𑀺 ¶ 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀲𑀳𑀲𑁂𑀬𑁆𑀬𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀺. 𑀤𑀼𑀓𑁆𑀔𑀻𑀢𑀺 𑀘𑁂𑀢𑁄𑀤𑀼𑀓𑁆𑀔𑀲𑀫𑀗𑁆𑀕𑀺𑀢𑀸𑀬 𑀤𑀼𑀓𑁆𑀔𑀻. 𑀤𑀼𑀫𑁆𑀫𑀦𑁄𑀢𑀺 𑀤𑁄𑀲𑁂𑀦 𑀤𑀼𑀝𑁆𑀞𑀫𑀦𑁄, 𑀯𑀺𑀭𑀽𑀧𑀫𑀦𑁄 𑀯𑀸 𑀤𑁄𑀫𑀦𑀲𑁆𑀲𑀸𑀪𑀺𑀪𑀽𑀢𑀢𑀸𑀬. ‘‘𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑁄𑀢𑀼 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑀸𑀯𑀝𑁄𑀢𑀺 𑀅𑀯𑀸𑀭𑀺𑀢𑁄. 𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁄 𑀢𑀺𑀯𑀺𑀥𑁄𑀧𑀺 𑀲𑀤𑁆𑀥𑀫𑁆𑀫𑁄. 𑀲𑀕𑁆𑀕𑁄 𑀘 𑀫𑀕𑁆𑀕𑁄 𑀘 𑀲𑀕𑁆𑀕𑀫𑀕𑁆𑀕𑁄, 𑀲𑀕𑁆𑀕𑀲𑁆𑀲 ¶ 𑀯𑀸 𑀫𑀕𑁆𑀕𑁄 𑀲𑀕𑁆𑀕𑀫𑀕𑁆𑀕𑁄, 𑀲𑀕𑁆𑀕𑀽𑀧𑀧𑀢𑁆𑀢𑀺𑀲𑀸𑀥𑀺𑀓𑀸 𑀧𑀝𑀺𑀧𑀢𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀅𑀤𑁆𑀥𑀸𑀦𑀕𑀫𑀦𑁂 𑀆𑀧𑀢𑁆𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀁𑀯𑀺𑀤𑀳𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸’’𑀢𑀺 𑀆𑀳. ‘‘𑀫𑀬𑀁 𑀅𑀲𑀼𑀓𑀁 𑀦𑀸𑀫 𑀞𑀸𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀏𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀅𑀲𑀁𑀯𑀺𑀤𑀳𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺.

𑀩𑀳𑀺𑀕𑀸𑀫𑁂𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀸𑀫𑀢𑁄 𑀩𑀳𑀺. 𑀕𑀸𑀫𑀦𑁆𑀢𑀭𑀦𑀤𑀻𑀧𑀸𑀭𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻𑀢𑀺 ‘‘𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀧𑀓𑁆𑀓𑀦𑁆𑀢𑀸 𑀯𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁬𑁯𑁩) 𑀯𑀼𑀢𑁆𑀢𑀅𑀦𑀸𑀧𑀢𑁆𑀢𑀺𑀮𑀓𑁆𑀔𑀡𑁂𑀳𑀺 𑀲𑀁𑀲𑀦𑁆𑀤𑀦𑀢𑁄 𑀯𑀼𑀢𑁆𑀢𑀁. 𑀆𑀭𑀸𑀥𑀺𑀓𑀸𑀢𑀺 𑀘𑀺𑀢𑁆𑀢𑀸𑀭𑀸𑀥𑀦𑁂 𑀲𑀫𑀢𑁆𑀣𑀸. 𑀢𑀸 𑀓𑁄𑀧𑁂𑀢𑁆𑀯𑀸𑀢𑀺 𑀢𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀮𑀚𑁆𑀚𑀺𑀦𑀺𑀬𑁄…𑀧𑁂… 𑀮𑀩𑁆𑀪𑀢𑀻𑀢𑀺 ‘‘𑀲𑀗𑁆𑀕𑀳𑁂 𑀅𑀲𑀢𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀯𑀺𑀩𑁆𑀪𑀫𑁂𑀬𑁆𑀬𑀸𑀧𑀻’’𑀢𑀺 𑀲𑀗𑁆𑀕𑀳𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀮𑀚𑁆𑀚𑀺𑀦𑀺𑀬𑁄…𑀧𑁂… 𑀮𑀩𑁆𑀪𑀢𑀻𑀢𑀺 𑀅𑀮𑀚𑁆𑀚𑀺𑀪𑀸𑀯𑀢𑁄 𑀅𑀲𑀦𑁆𑀢𑀧𑀓𑁆𑀔𑀁 𑀪𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀢𑀺𑀓𑀸…𑀧𑁂… 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀧𑀦 𑀇𑀫𑀺𑀲𑁆𑀲𑀸 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀼𑀪𑀸𑀯𑁂𑀧𑀻𑀢𑀺 𑀪𑀺𑀓𑁆𑀔𑀼𑀓𑀸𑀮𑁂𑀧𑀺. 𑀧𑀭𑀺𑀲𑀸𑀯𑀘𑀭𑁄𑀢𑀺 𑀉𑀧𑀚𑁆𑀛𑀸𑀬𑁄 𑀘 𑀆𑀘𑀭𑀺𑀬𑁄 𑀘 𑀳𑀼𑀢𑁆𑀯𑀸 𑀧𑀭𑀺𑀲𑀼𑀧𑀝𑁆𑀞𑀸𑀓𑁄. 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀳𑀺 𑀅𑀜𑁆𑀜𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀳𑀺𑀧𑀻𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀉𑀧𑀚𑁆𑀛𑀸 𑀕𑀳𑁂𑀢𑀩𑁆𑀩𑀸𑀢𑀺 𑀉𑀧𑀲𑀫𑁆𑀧𑀤𑀢𑁆𑀣𑀁 𑀉𑀧𑀚𑁆𑀛𑀸 𑀕𑀳𑁂𑀢𑀩𑁆𑀩𑀸, 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀯𑀺𑀓𑀧𑁆𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀦 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀦𑀺𑀥𑀺 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀥𑀺 𑀪𑀺𑀓𑁆𑀔𑀼𑀦𑀻𑀳𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁨𑁧) 𑀯𑀘𑀦𑀢𑁄 𑀧𑀼𑀦 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀫𑁂 𑀤𑀺𑀯𑀲𑁂𑀢𑀺 𑀇𑀤𑀁 𑀢𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀯 𑀧𑀼𑀦𑀧𑀺 𑀲𑀢𑁆𑀢𑀸𑀳𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀺𑀓𑁆𑀔𑀼𑀦𑀺𑀬𑀸 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀫𑁂𑀧𑀺 𑀤𑀺𑀯𑀲𑁂 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ¶ 𑀯𑀤𑀦𑁆𑀢𑀺. 𑀢𑀁 𑀧𑀓𑀢𑀢𑁆𑀢𑁄 𑀭𑀓𑁆𑀔𑀢𑀻𑀢𑀺 𑀅𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑁄 𑀢𑀁 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀢𑁄 𑀭𑀓𑁆𑀔𑀢𑀺, 𑀅𑀯𑀺𑀪𑀢𑁆𑀢𑀢𑀸𑀬 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀫𑀁 𑀕𑀳𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀁 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 ¶ 𑀆𑀧𑀢𑁆𑀢𑀻𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀢𑁄 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺.

‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀲𑁆𑀲 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀁. 𑀦 𑀳𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀲𑁆𑀲 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 ‘‘𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀪𑀸𑀯𑁄 𑀯𑀺𑀦𑀲𑁆𑀲𑀢𑀺. 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄 𑀘 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄 𑀬𑀸𑀯 𑀦 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 𑀅𑀢𑁆𑀣𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄, 𑀦 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀣𑀸 𑀳𑀺 𑀲𑁄 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀲𑀳𑀲𑁂𑀬𑁆𑀬𑀸𑀤𑀺𑀆𑀧𑀢𑁆𑀢𑀺𑀁 𑀦 𑀚𑀦𑁂𑀢𑀺, 𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀚𑀦𑁂𑀢𑀺. 𑀢𑁂𑀦𑁂𑀯 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀅𑀲𑀢𑀺 𑀳𑀺 𑀪𑀺𑀓𑁆𑀔𑀼𑀪𑀸𑀯𑁂 𑀤𑀼𑀓𑁆𑀓𑀝𑀁 𑀪𑀯𑁂𑀬𑁆𑀬, 𑀲𑀢𑀺 𑀘 𑀪𑀺𑀓𑁆𑀔𑀼𑀪𑀸𑀯𑁂 𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀁 𑀦𑀸𑀫 𑀅𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑁂𑀦 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑀁 𑀇𑀥 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀧𑀦 𑀧𑀓𑀢𑀢𑁆𑀢𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑀁. 𑀢𑁂𑀦𑁂𑀯 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑀁 𑀯𑀺𑀲𑀼𑀁 𑀦 𑀕𑀡𑁆𑀳𑀦𑁆𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑁂 𑀯𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀲𑁆𑀲 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀲𑀩𑁆𑀩𑀲𑁄 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁂𑀦 𑀅𑀢𑁆𑀢𑀦𑁄 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑁋

‘‘𑀅𑀘𑁆𑀙𑁂𑀤𑀕𑀸𑀳𑀦𑀺𑀭𑀧𑁂𑀓𑁆𑀔𑀦𑀺𑀲𑀕𑁆𑀕𑀢𑁄 𑀘,

𑀲𑀺𑀓𑁆𑀔𑀸𑀧𑁆𑀧𑀳𑀸𑀦𑀫𑀭𑀡𑁂𑀳𑀺 𑀘 𑀮𑀺𑀗𑁆𑀕𑀪𑁂𑀤𑀸;

𑀤𑀸𑀦𑁂𑀦 𑀢𑀲𑁆𑀲 𑀘 𑀧𑀭𑀲𑁆𑀲 𑀅𑀪𑀺𑀓𑁆𑀔𑀼𑀓𑀲𑁆𑀲,

𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀡𑀫𑁂𑀢𑀺 𑀯𑀺𑀦𑀸𑀲𑀫𑁂𑀯’’𑀦𑁆𑀢𑀺. 𑁋

𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁂𑀦𑀧𑀺 𑁋

‘‘𑀲𑀺𑀓𑁆𑀔𑀸𑀫𑀭𑀡𑀮𑀺𑀗𑁆𑀕𑁂𑀳𑀺, 𑀅𑀦𑀧𑁂𑀓𑁆𑀔𑀯𑀺𑀲𑀕𑁆𑀕𑀢𑁄;

𑀅𑀘𑁆𑀙𑁂𑀤𑀸𑀦𑀼𑀧𑀲𑀫𑁆𑀧𑀦𑁆𑀦-𑀤𑀸𑀦𑀸 𑀕𑀸𑀳𑁄𑀧𑀲𑀫𑁆𑀫𑀢𑀻’’𑀢𑀺. 𑁋

𑀯𑀼𑀢𑁆𑀢𑀁 ¶ ¶ . 𑀬𑀤𑀺 𑀘 𑀧𑀓𑀢𑀢𑁆𑀢𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑁂𑀦𑀧𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑁂𑀬𑁆𑀬, 𑀢𑁂𑀧𑀺 𑀆𑀘𑀭𑀺𑀬𑀸 𑀯𑀺𑀲𑀼𑀁 𑀢𑀫𑁆𑀧𑀺 𑀯𑀤𑁂𑀬𑁆𑀬𑀼𑀁, 𑀦 𑀯𑀼𑀢𑁆𑀢𑀜𑁆𑀘, 𑀢𑀢𑁄 𑀯𑀺𑀜𑁆𑀜𑀸𑀬𑀢𑀺 ‘‘𑀧𑀓𑀢𑀢𑁆𑀢𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑀁 𑀇𑀥 𑀳𑀻𑀦𑀸𑀬𑀸𑀯𑀢𑁆𑀢𑀦𑀦𑁆𑀢𑀺 𑀦𑀸𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀅𑀪𑀸𑀯𑀢𑁄 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑁂𑀦𑀧𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺.

𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦𑀸𑀢𑀺 𑀅𑀜𑁆𑀜𑀲𑁆𑀲 𑀅𑀤𑀢𑁆𑀯𑀸𑀯 𑀅𑀦𑀢𑁆𑀣𑀺𑀓𑀢𑀸𑀬 ‘‘𑀦𑀢𑁆𑀣𑀺 𑀇𑀫𑀺𑀦𑀸 𑀓𑀫𑁆𑀫𑀁, 𑀦 𑀇𑀤𑀸𑀦𑀺 𑀦𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀣𑀽𑀲𑀼 𑀯𑀸 ‘‘𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀳𑀡𑁂 𑀯𑀸 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦. 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀸𑀳𑁂𑀦𑀸𑀢𑀺 𑀘𑁄𑀭𑀸𑀤𑀻𑀳𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦.

𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀯𑀺𑀳𑀸𑀭𑁂. 𑀉𑀧𑀭𑁄𑀧𑀓𑀸𑀢𑀺 𑀢𑁂𑀦 𑀭𑁄𑀧𑀺𑀢𑀸 𑀭𑀼𑀓𑁆𑀔𑀕𑀘𑁆𑀙𑀸. 𑀢𑁂𑀭𑀲𑀲𑀼 𑀲𑀫𑁆𑀫𑀼𑀢𑀻𑀲𑀽𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀪𑀡𑁆𑀟𑀸𑀕𑀸𑀭𑀺𑀓𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀘𑀻𑀯𑀭𑀪𑀸𑀚𑀓𑀬𑀸𑀕𑀼𑀪𑀸𑀚𑀓𑀨𑀮𑀪𑀸𑀚𑀓𑀔𑀚𑁆𑀚𑀪𑀸𑀚𑀓𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑀆𑀭𑀸𑀫𑀺𑀓𑀧𑁂𑀲𑀓𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀺𑀲𑀗𑁆𑀔𑀸𑀢𑀸𑀲𑀼 𑀢𑁂𑀭𑀲𑀲𑀼 𑀲𑀫𑁆𑀫𑀼𑀢𑀻𑀲𑀼. 𑀓𑀸𑀫𑀁 𑀧𑀼𑀭𑀺𑀫𑀺𑀓𑀸𑀬 𑀧𑀘𑁆𑀙𑀺𑀫𑀺𑀓𑀸𑀬 𑀘 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺𑀬𑁂𑀯, 𑀧𑀼𑀭𑀺𑀫𑀺𑀓𑀸𑀬 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂 𑀧𑀘𑁆𑀙𑀺𑀫𑀺𑀓𑀸𑀬 𑀅𑀜𑁆𑀜𑀢𑁆𑀣 𑀉𑀧𑀕𑀦𑁆𑀢𑀼𑀁 𑀲𑀓𑁆𑀓𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀲𑁂𑀦𑀸𑀲𑀦𑀕𑁆𑀕𑀸𑀳𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀯𑀺𑀲𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂 𑀦 𑀲𑀓𑁆𑀓𑀸 𑀅𑀜𑁆𑀜𑀢𑁆𑀣 𑀉𑀧𑀕𑀦𑁆𑀢𑀼𑀦𑁆𑀢𑀺 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀲𑁂𑀦𑀸𑀲𑀦𑁂 𑀕𑀳𑀺𑀢𑁂’’𑀢𑀺𑀆𑀤𑀺𑀫𑀸𑀳.

𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀘𑁆𑀙𑀦𑁆𑀦𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀫𑀸𑀦𑀢𑁆𑀢𑀘𑀸𑀭𑀲𑁆𑀲𑁂𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀧𑀼𑀦 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀼𑀓𑀸𑀮𑁂 𑀘𑀺𑀡𑁆𑀡𑀫𑀸𑀦𑀢𑁆𑀢𑀸𑀪𑀸𑀯𑀢𑁄. 𑀪𑀺𑀓𑁆𑀔𑀼𑀦𑀻𑀳𑀺 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀼𑀓𑀸𑀮𑁂 𑀘𑀺𑀡𑁆𑀡𑀫𑀸𑀦𑀢𑁆𑀢𑀢𑀸𑀬 𑀪𑀺𑀓𑁆𑀔𑀼𑀦𑀻𑀓𑀸𑀮𑁂𑀧𑀺 𑀘𑀺𑀡𑁆𑀡𑀫𑀸𑀦𑀢𑁆𑀢𑀸 𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀘𑁂 𑀅𑀓𑀼𑀲𑀮𑀯𑀺𑀧𑀸𑀓𑁂…𑀧𑁂… 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑀲𑁆𑀲 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀸𑀥𑀺𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀪𑀺𑀓𑁆𑀔𑀼𑀓𑀸𑀮𑁂 𑀧𑀝𑀺𑀘𑁆𑀙𑀦𑁆𑀦𑀸𑀬 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑀸 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀲𑀫𑀸𑀤𑀺𑀡𑁆𑀡𑀧𑀭𑀺𑀯𑀸𑀲𑀲𑁆𑀲 𑀯𑀸 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑀻𑀓𑀸𑀮𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑁂 𑀧𑀭𑀺𑀓𑁆𑀔𑀻𑀡𑁂 𑀧𑀼𑀦 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑀺𑀢𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺.

𑀲𑀜𑁆𑀘𑀭𑀺𑀢𑁆𑀢𑀸𑀧𑀢𑁆𑀢𑀻𑀢𑀺 ¶ 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀲𑀤𑀸𑀦𑀁 𑀦𑀢𑁆𑀣𑀻𑀢𑀺 𑀪𑀺𑀓𑁆𑀔𑀼𑀓𑀸𑀮𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀢𑁄. 𑀪𑀺𑀓𑁆𑀔𑀼𑀦𑀻𑀓𑀸𑀮𑁂 𑀧𑀦 𑀆𑀭𑁄𑀘𑀺𑀢𑀸𑀧𑀺 𑀲𑀸𑀥𑀸𑀭𑀡𑀸𑀧𑀢𑁆𑀢𑀺 𑀲𑀘𑁂 𑀪𑀺𑀓𑁆𑀔𑀼𑀓𑀸𑀮𑁂 𑀅𑀦𑀸𑀭𑁄𑀘𑀺𑀢𑀸, 𑀧𑀝𑀺𑀘𑁆𑀙𑀦𑁆𑀦𑀸𑀯 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀽𑀳𑀺 𑀫𑀸𑀦𑀢𑁆𑀢𑁂 𑀅𑀤𑀺𑀦𑁆𑀦𑁂𑀢𑀺 𑀅𑀘𑀺𑀡𑁆𑀡𑀫𑀸𑀦𑀢𑁆𑀢𑀸𑀬 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 ¶ 𑀲𑀢𑀺. 𑀪𑀺𑀓𑁆𑀔𑀼𑀦𑀻𑀪𑀸𑀯𑁂 𑀞𑀺𑀢𑀸𑀬𑀧𑀺 𑀢𑀸 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑀬𑀸 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀪𑀸𑀯𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸. ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀲𑁆𑀲 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀲𑀦𑁆𑀢𑀸𑀦𑀲𑁆𑀲 𑀏𑀓𑀢𑁆𑀢𑀸 𑀦 𑀧𑀼𑀦 𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀢𑀺, 𑀢𑀣𑀸 𑀯𑀺𑀩𑁆𑀪𑀦𑁆𑀢𑀸𑀧𑀺 𑀪𑀺𑀓𑁆𑀔𑀼𑀦𑀻 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑀢𑀺 𑀧𑀼𑀦 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀻’’𑀢𑀺 𑀯𑀤𑀦𑁆𑀢𑀺.

𑁭𑁧. ‘‘𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀲𑀽𑀢𑀺 𑀅𑀥𑀺𑀓𑀸𑀭𑀢𑁆𑀢𑀸 𑀉𑀧𑀸𑀤𑀺𑀦𑁆𑀦𑀓𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁, 𑀢𑀁 𑀤𑀼𑀯𑀼𑀢𑁆𑀢𑀁. 𑀦 𑀳𑀺 𑀉𑀧𑀸𑀤𑀺𑀦𑁆𑀦𑀓𑁂𑀲𑀼 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀉𑀧𑀸𑀤𑀺𑀦𑁆𑀦𑀓𑁂𑀲𑀼 𑀦𑀺𑀫𑀺𑀢𑁆𑀢𑁂 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀩𑀳𑀺 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁨) 𑀯𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀧𑀼𑀩𑁆𑀩𑁂 𑀯𑀺𑀘𑀸𑀭𑀺𑀢𑀫𑁂𑀯. 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀫𑁄𑀘𑀦𑀭𑀸𑀕𑀲𑁆𑀲 𑀅𑀪𑀸𑀯𑀢𑁄. 𑀢𑀣𑁂𑀯𑀸𑀢𑀺 𑀫𑀼𑀘𑁆𑀘𑀢𑀼 𑀯𑀸 𑀫𑀸 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑁆𑀲𑀢𑀺.

𑀅𑀯𑀺𑀲𑀬𑁄𑀢𑀺 𑀅𑀲𑀸𑀤𑀺𑀬𑀦𑀁 𑀦𑀸𑀫 𑀏𑀯𑀭𑀽𑀧𑁂 𑀞𑀸𑀦𑁂 𑀤𑀼𑀓𑁆𑀓𑀭𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀅𑀳𑀁 𑀯𑀸𑀬𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀸 𑀯𑀸𑀬𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀁 𑀕𑀳𑁂𑀢𑁆𑀯𑀸. 𑀉𑀪𑀬𑀯𑀸𑀬𑀸𑀫𑁂𑀦𑁂𑀯 𑀆𑀧𑀢𑁆𑀢𑀻𑀢𑀺 𑀲𑀜𑁆𑀜𑀸𑀬 ‘‘𑀢𑁆𑀯𑀁 𑀫𑀸 𑀯𑀸𑀬𑀫𑀻’’𑀢𑀺 𑀯𑀼𑀢𑁆𑀢𑀁.

𑁭𑁩. 𑀯𑀝𑁆𑀝𑀓𑀢𑁂𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀯𑀝𑁂’’𑀢𑀺 𑀆𑀳. ‘‘𑀧𑀸𑀭𑀸𑀚𑀺𑀓𑀪𑀬𑁂𑀦 𑀆𑀓𑀸𑀲𑀕𑀢𑀫𑁂𑀯 𑀓𑀢𑁆𑀯𑀸 𑀧𑀯𑁂𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀲𑀳𑀲𑀸 𑀢𑀸𑀮𑀼𑀓𑀁 𑀯𑀸 𑀧𑀲𑁆𑀲𑀁 𑀯𑀸 𑀅𑀗𑁆𑀕𑀚𑀸𑀢𑀁 𑀨𑀼𑀲𑀢𑀺 𑀘𑁂, 𑀤𑀼𑀓𑁆𑀓𑀝𑀫𑁂𑀯 𑀫𑁂𑀣𑀼𑀦𑀭𑀸𑀕𑀲𑁆𑀲 𑀅𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀲𑀼𑀨𑀼𑀲𑀺𑀢𑀸𑀢𑀺 𑀲𑀼𑀝𑁆𑀞𑀼 𑀧𑀺𑀳𑀺𑀢𑀸. 𑀅𑀦𑁆𑀢𑁄𑀫𑀼𑀔𑁂 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀤𑀦𑁆𑀢𑀸𑀦𑀁 𑀲𑀼𑀧𑀺𑀳𑀺𑀢𑀪𑀸𑀯𑀢𑁄 𑀅𑀦𑁆𑀢𑁄𑀫𑀼𑀔𑁂 𑀧𑀯𑁂𑀲𑁂𑀢𑀼𑀁 𑀑𑀓𑀸𑀲𑁄 𑀦𑀢𑁆𑀣𑀺. 𑀉𑀧𑁆𑀧𑀸𑀝𑀺𑀢𑁂 𑀧𑀦 𑀑𑀝𑁆𑀞𑀫𑀁𑀲𑁂 𑀤𑀦𑁆𑀢𑁂𑀲𑀼𑀬𑁂𑀯 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀧𑀢𑀗𑁆𑀕𑀫𑀼𑀔𑀫𑀡𑁆𑀟𑀽𑀓𑀲𑁆𑀲 𑀫𑀼𑀔𑀲𑀡𑁆𑀞𑀸𑀦𑁂 ¶ 𑀯𑀺𑀬 𑀯𑀡𑀲𑀗𑁆𑀔𑁂𑀧𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁. ‘‘𑀫𑁂𑀣𑀼𑀦𑀭𑀸𑀕𑁂𑀦 𑀇𑀢𑁆𑀣𑀺𑀬𑀸 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀇𑀫𑀺𑀦𑀸 𑀯𑀸 𑀮𑀓𑁆𑀔𑀡𑁂𑀦 𑀲𑀫𑀸𑀦𑀢𑁆𑀢𑀸 𑀇𑀥 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀩𑀳𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑀚𑀺𑀯𑁆𑀳𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀫𑀼𑀘𑁆𑀘𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁨) 𑀯𑀘𑀦𑀢𑁄. 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀼𑀧𑁆𑀧𑀺𑀧𑀸𑀲𑀺𑀓𑀸𑀤𑀺𑀧𑁂𑀢𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀮𑁆𑀮𑀻𑀬𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸𑀢𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀦𑀁 𑀮𑁄𑀫𑀓𑀽𑀧𑁂𑀳𑀺 𑀲𑀫𑀼𑀝𑁆𑀞𑀺𑀢𑀅𑀕𑁆𑀕𑀺𑀚𑀸𑀮𑀸𑀳𑀺 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑀲𑀭𑀻𑀭𑀢𑀸𑀬 𑀔𑀼𑀧𑁆𑀧𑀺𑀧𑀸𑀲𑀺𑀓𑀸𑀤𑀻𑀦𑀁 𑀅𑀢𑀺𑀯𑀺𑀬 𑀧𑀝𑀺𑀓𑀽𑀮𑀯𑀺𑀭𑀽𑀧𑀩𑀻𑀪𑀘𑁆𑀙𑀅𑀝𑁆𑀞𑀺𑀘𑀫𑁆𑀫𑀸𑀯𑀲𑀺𑀝𑁆𑀞𑀦𑀺𑀘𑁆𑀘𑀸𑀢𑀼𑀭𑀲𑀭𑀻𑀭𑀢𑀸𑀬 ¶ 𑀆𑀫𑀲𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸. 𑀤𑁂𑀯𑀢𑀸 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀻𑀢𑀺 𑀏𑀢𑁆𑀣 𑀬𑀸𑀲𑀦𑁆𑀢𑀺 𑀲𑀸𑀫𑀺𑀯𑀘𑀦𑀁 𑀬𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁 ‘‘𑀬𑀸 𑀤𑁂𑀯𑀢𑀸 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀻’’𑀢𑀺. 𑀤𑀲𑁆𑀲𑀦𑀸𑀤𑀻𑀲𑀼 𑀤𑀲𑁆𑀲𑀦𑀁 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀢𑀸𑀲𑀁 𑀤𑀲𑁆𑀲𑀦𑀁, 𑀕𑀳𑀡𑀫𑁆𑀧𑀺 𑀪𑀺𑀓𑁆𑀔𑀼𑀦𑀸𑀯 𑀢𑀸𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀕𑀳𑀡𑀁. 𑀆𑀫𑀲𑀦𑀸𑀤𑀻𑀦𑀺 𑀧𑀦 𑀢𑀸𑀲𑀁 𑀓𑀺𑀘𑁆𑀘𑀸𑀦𑀺. 𑀢𑀢𑁆𑀣 𑀆𑀫𑀲𑀦𑀁 𑀦𑀸𑀫 𑀅𑀢𑁆𑀢𑀦𑁄 𑀲𑀭𑀻𑀭𑁂𑀦 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑀲𑁆𑀲 𑀉𑀧𑀭𑀺 𑀆𑀫𑀲𑀦𑀫𑀢𑁆𑀢𑀁, 𑀨𑀼𑀲𑀦𑀁 𑀢𑀢𑁄 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀲𑀫𑁆𑀨𑀼𑀲𑀦𑀁, 𑀖𑀝𑁆𑀝𑀦𑀁 𑀢𑀢𑁄𑀧𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀲𑀭𑀻𑀭𑁂𑀦 𑀲𑀭𑀻𑀭𑀲𑁆𑀲 𑀖𑀝𑁆𑀝𑀦𑀁. 𑀯𑀺𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 𑀬𑀣𑀸 𑀲𑁄 𑀓𑀢𑀫𑁆𑀧𑀺 𑀉𑀧𑀓𑁆𑀓𑀫𑀦𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀓𑀢𑁆𑀯𑀸. 𑀬𑀤𑀺𑀧𑀺 𑀆𑀫𑀲𑀦𑀸𑀤𑀺 𑀢𑀲𑁆𑀲𑀸 𑀓𑀺𑀘𑁆𑀘𑀁, 𑀢𑀣𑀸𑀧𑀺 𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀁 𑀅𑀯𑀢𑁆𑀯𑀸 ‘‘𑀢𑀁 𑀧𑀼𑀕𑁆𑀕𑀮𑀁 𑀯𑀺𑀲𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀅𑀓𑀢𑀯𑀺𑀲𑀜𑁆𑀜𑁄 𑀚𑀸𑀦𑀺𑀢𑁆𑀯𑀸 𑀲𑀸𑀤𑀺𑀬𑀢𑀺 𑀘𑁂, 𑀧𑀸𑀭𑀸𑀚𑀺𑀓𑀫𑁂𑀯. 𑀪𑀺𑀓𑁆𑀔𑀼𑀦𑁄 𑀧𑀦 𑀤𑀲𑁆𑀲𑀦𑀕𑀳𑀡𑁂𑀲𑀼 𑀲𑀢𑀺 𑀅𑀲𑀸𑀤𑀺𑀬𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀕𑀳𑀡𑁂𑀲𑀼 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀅𑀦𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸. 𑀬𑀤𑀺 𑀧𑀦 𑀧𑀞𑀫𑀁 𑀤𑀲𑁆𑀲𑀦𑀕𑀳𑀡𑁂𑀲𑀼 𑀲𑀢𑀺 𑀧𑀘𑁆𑀙𑀸 𑀢𑀁 𑀧𑀼𑀕𑁆𑀕𑀮𑀁 𑀯𑀺𑀲𑀜𑁆𑀜𑀁 𑀓𑀢𑁆𑀯𑀸 𑀆𑀫𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀻 𑀅𑀢𑁆𑀢𑀦𑁄 𑀫𑀦𑁄𑀭𑀣𑀁 𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀁.

𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑁄𑀢𑀺 𑀅𑀦𑀝𑁆𑀞𑁂𑀧𑀺 𑀓𑀸𑀬𑀧𑁆𑀧𑀲𑀸𑀤𑁂 𑀓𑀸𑀬𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀢𑀸𑀧𑀸𑀤𑀦𑀯𑀲𑁂𑀦 𑀯𑀸𑀢𑀧𑀺𑀢𑁆𑀢𑀸𑀤𑀻𑀳𑀺 𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑁄. 𑀲𑁂𑀯𑀦𑀘𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀻𑀢𑀺 𑀬𑀣𑀸 𑀲𑀦𑁆𑀣𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀉𑀧𑀸𑀤𑀺𑀦𑁆𑀦𑀨𑀲𑁆𑀲𑀁 𑀅𑀯𑀺𑀦𑁆𑀤𑀦𑁆𑀢𑀲𑁆𑀲𑀧𑀺 𑀲𑁂𑀯𑀦𑀘𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀧𑀺𑀢𑁆𑀢𑀯𑀸𑀢𑀸𑀤𑀺𑀦𑀸 𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑀢𑁆𑀢𑀸 𑀅𑀯𑁂𑀤𑀺𑀬𑀦𑁆𑀢𑀲𑁆𑀲𑀧𑀺 𑀲𑁂𑀯𑀦𑀘𑀺𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺.

𑀦𑀦𑀼 ¶ 𑀘 𑀙𑀼𑀧𑀺𑀢𑀫𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀲𑁆𑀲𑀸𑀫𑀻𑀢𑀺 𑀙𑀼𑀧𑀺𑀢𑀫𑀢𑁆𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑁂𑀣𑀼𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 ‘‘𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀁 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀫𑀦𑀲𑀺𑀓𑀢𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀬𑁄 𑀫𑁂𑀣𑀼𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀻𑀲𑀦𑁆𑀢𑀺 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀸𑀤𑀦𑀁. 𑀢𑀜𑁆𑀳𑀺 𑀧𑀬𑁄𑀕𑀸𑀦𑀁 𑀫𑀢𑁆𑀣𑀓𑀲𑀤𑀺𑀲𑀢𑁆𑀢𑀸 ‘‘𑀲𑀻𑀲’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀢𑁄 𑀧𑀭𑀁 𑀧𑀬𑁄𑀕𑀸𑀪𑀸𑀯𑀢𑁄. 𑀤𑀼𑀓𑁆𑀓𑀝𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑀼𑀓𑁆𑀓𑀝𑀁 𑀚𑀦𑁂𑀦𑁆𑀢𑀺. 𑀤𑀼𑀓𑁆𑀓𑀝𑀜𑁆𑀳𑀺 𑀚𑀦𑁂𑀦𑁆𑀢𑀸 𑀳𑀢𑁆𑀣𑀕𑁆𑀕𑀸𑀳𑀸𑀤𑀬𑁄 𑀧𑀬𑁄𑀕𑀸 ‘‘𑀤𑀼𑀓𑁆𑀓𑀝𑁂 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸 𑀅𑀜𑁆𑀜𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀚𑀦𑀓𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄.

𑁭𑁪. 𑀚𑀸𑀢𑀺𑀧𑀼𑀧𑁆𑀨𑀕𑀼𑀫𑁆𑀩𑀸𑀦𑀦𑁆𑀢𑀺 𑀚𑀸𑀢𑀺𑀲𑀼𑀫𑀦𑀕𑀼𑀫𑁆𑀩𑀸𑀦𑀁. 𑀉𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀩𑀸𑀳𑀼𑀮𑁆𑀮𑀢𑀸𑀬. 𑀉𑀧𑀘𑀸𑀭𑁂𑀢𑀺 𑀆𑀲𑀦𑁆𑀦𑀧𑁆𑀧𑀤𑁂𑀲𑁂. 𑀢𑁂𑀦 𑀯𑀸𑀢𑀼𑀧𑀢𑁆𑀣𑀫𑁆𑀪𑁂𑀦𑀸𑀢𑀺 ‘‘𑀅𑀗𑁆𑀕𑀫𑀗𑁆𑀕𑀸𑀦𑀺 𑀯𑀸𑀢𑀼𑀧𑀢𑁆𑀣𑀤𑁆𑀥𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀸𑀢𑀼𑀧𑀢𑁆𑀣𑀫𑁆𑀪𑁂𑀦. 𑀇𑀫𑀺𑀦𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀏𑀓𑀭𑀲𑀦𑁆𑀢𑀺 𑀆𑀯𑀚𑁆𑀚𑀦𑀸𑀤𑀺𑀯𑀻𑀣𑀺𑀘𑀺𑀢𑁆𑀢𑁂𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑀁.

𑁭𑁬. 𑀲𑀗𑁆𑀕𑀸𑀫𑀲𑀻𑀲𑀬𑁄𑀥𑁄 ¶ 𑀪𑀺𑀓𑁆𑀔𑀽𑀢𑀺 𑀬𑀲𑁆𑀫𑀸 𑀓𑀺𑀮𑁂𑀲𑀸𑀭𑀻𑀳𑀺 𑀅𑀦𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀢𑁂 𑀧𑀭𑀸𑀚𑁂𑀲𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀫𑀫𑀼𑀔𑁂 𑀬𑁄𑀥𑀲𑀤𑀺𑀲𑁄 𑀪𑀺𑀓𑁆𑀔𑀼.

𑁭𑁭. 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀫𑁂𑀣𑀼𑀦𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂. 𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀫𑁂𑀯𑀸𑀢𑀺 𑀲𑀁𑀯𑀭𑀡𑀯𑀺𑀯𑀭𑀡𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀬𑁄𑀕𑁆𑀕𑀤𑁆𑀯𑀸𑀭𑀫𑁂𑀯. 𑀭𑀼𑀓𑁆𑀔𑀲𑀽𑀘𑀺𑀓𑀡𑁆𑀝𑀓𑀤𑁆𑀯𑀸𑀭𑀦𑁆𑀢𑀺 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀓𑀡𑁆𑀝𑀓𑀤𑁆𑀯𑀸𑀭𑀜𑁆𑀘. ‘‘𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀓𑀡𑁆𑀝𑀓𑀤𑁆𑀯𑀸𑀭’’𑀫𑀺𑀘𑁆𑀘𑁂𑀯 𑀯𑀸 𑀧𑀸𑀞𑁄. 𑀬𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀼𑀓𑁆𑀔𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀣 𑀯𑀺𑀚𑁆𑀛𑀺𑀢𑁆𑀯𑀸 𑀫𑀚𑁆𑀛𑁂 𑀤𑁆𑀯𑁂 𑀢𑀺𑀲𑁆𑀲𑁄 𑀭𑀼𑀓𑁆𑀔𑀲𑀽𑀘𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁. 𑀬𑀁 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀓𑀸𑀮𑁂 𑀅𑀧𑀦𑁂𑀢𑁆𑀯𑀸 𑀣𑀓𑀦𑀬𑁄𑀕𑁆𑀕𑀁, 𑀏𑀓𑀸𑀬 𑀩𑀳𑀽𑀳𑀺 𑀯𑀸 𑀓𑀡𑁆𑀝𑀓𑀲𑀸𑀔𑀸𑀳𑀺 𑀓𑀢𑀁, 𑀢𑀁 𑀓𑀡𑁆𑀝𑀓𑀤𑁆𑀯𑀸𑀭𑀁. 𑀘𑀓𑁆𑀓𑀮𑀓𑀬𑀼𑀢𑁆𑀢𑀤𑁆𑀯𑀸𑀭𑀦𑁆𑀢𑀺 𑀳𑁂𑀝𑁆𑀞𑀸 𑀏𑀢𑀁 𑀘𑀓𑁆𑀓𑀁 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀫𑀳𑀸𑀤𑁆𑀯𑀸𑀭𑀁, 𑀬𑀁 𑀦 𑀲𑀓𑁆𑀓𑀸 𑀏𑀓𑁂𑀦 𑀲𑀁𑀯𑀭𑀺𑀢𑀼𑀁 𑀯𑀺𑀯𑀭𑀺𑀢𑀼𑀜𑁆𑀘. 𑀕𑁄𑀧𑁆𑀨𑁂𑀢𑁆𑀯𑀸𑀢𑀺 𑀭𑀚𑁆𑀚𑀽𑀳𑀺 𑀕𑀦𑁆𑀣𑁂𑀢𑁆𑀯𑀸. 𑀏𑀓𑀁 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀫𑁂𑀯𑀸𑀢𑀺 𑀏𑀢𑁆𑀣 𑀓𑀺𑀮𑀜𑁆𑀚𑀲𑀸𑀡𑀺𑀤𑁆𑀯𑀸𑀭𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑀬𑀢𑁆𑀣 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀢𑁆𑀣 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀩𑀳𑀽𑀦𑀁 𑀯𑀴𑀜𑁆𑀚𑀦𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀽𑀦𑀁 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑁂𑀧𑀺 𑀏𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀅𑀣 𑀪𑀺𑀓𑁆𑀔𑀽…𑀧𑁂… 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀳𑀺𑀢𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀦𑀺𑀲𑀺𑀦𑁆𑀦𑁄 ¶ 𑀯𑀸 𑀧𑀦 𑀳𑁄𑀢𑀼 𑀦𑀺𑀧𑀦𑁆𑀦𑁄 𑀯𑀸, 𑀬𑁂𑀦 𑀓𑁂𑀦𑀘𑀺 𑀇𑀭𑀺𑀬𑀸𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑁄 𑀳𑁄𑀢𑀺, 𑀆𑀪𑁄𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀯𑀘𑀦𑀢𑁄 𑀲𑀘𑁂 𑀦𑀺𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀆𑀪𑁄𑀕𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀤𑀺 𑀳𑀺 ‘‘𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀦𑀺𑀧𑀦𑁆𑀦𑁂 𑀆𑀪𑁄𑀕𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀞𑀺𑀢𑁂𑀧𑀺 𑀘𑀗𑁆𑀓𑀫𑀦𑁆𑀢𑁂𑀧𑀺 𑀆𑀪𑁄𑀕𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀦 𑀳𑀺 𑀦𑀺𑀲𑀺𑀦𑁆𑀦𑀯𑀘𑀦𑀁 𑀦𑀺𑀧𑀦𑁆𑀦𑀁𑀬𑁂𑀯 𑀦𑀺𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻’’𑀢𑀺 𑀇𑀤𑀁 𑀢𑀢𑁆𑀣 𑀢𑁂𑀲𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀲𑀦𑁆𑀤𑀲𑁆𑀲𑀦𑀢𑁆𑀣𑀁, 𑀦 𑀲𑁂𑀲𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀅𑀲𑀦𑁆𑀢𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀆𑀪𑁄𑀕𑀸𑀭𑀳𑁄 𑀦 𑀳𑁄𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀅𑀲𑀦𑁆𑀢𑀧𑀓𑁆𑀔𑁂 𑀞𑀺𑀢𑀢𑁆𑀢𑀸𑀬𑁂𑀯 𑀳𑀺 𑀭𑀳𑁄 𑀦𑀺𑀲𑀚𑁆𑀚𑀸𑀬 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀭𑀲𑀁𑀯𑀭𑀡𑀁 𑀦𑀸𑀫 𑀪𑀺𑀓𑁆𑀔𑀼𑀦𑀻𑀆𑀤𑀻𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺 𑀆𑀳 𑁋 ‘‘𑀪𑀺𑀓𑁆𑀔𑀼𑀦𑀺𑀁 𑀯𑀸 𑀫𑀸𑀢𑀼𑀕𑀸𑀫𑀁 𑀯𑀸 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. ‘‘𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀇𑀢𑁆𑀣𑀺𑀧𑀡𑁆𑀟𑀓𑀜𑁆𑀘 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀸𑀢𑀼𑀕𑀸𑀫𑀲𑁆𑀲 𑀅𑀦𑁆𑀢𑁄𑀕𑀩𑁆𑀪𑁂 𑀞𑀺𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸𑀧𑀺 𑀤𑁆𑀯𑀸𑀭𑁂 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦𑀺𑀲𑁆𑀲𑁂𑀡𑀺𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀉𑀧𑀭𑀺𑀢𑀮𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀤𑁆𑀯𑁂𑀧𑀺 𑀤𑁆𑀯𑀸𑀭𑀸𑀦𑀺 𑀚𑀕𑁆𑀕𑀺𑀢𑀩𑁆𑀩𑀸𑀦𑀻𑀢𑀺 𑀏𑀢𑁆𑀣 𑀲𑀘𑁂 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀓𑀯𑀸𑀝𑀁 𑀯𑀸 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀁𑀯𑀭𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀇𑀢𑀭𑀁 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀸𑀘𑀸𑀭𑀸 ¶ 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀤𑁆𑀯𑀸𑀭𑀧𑀸𑀮𑀲𑁆𑀲𑀸𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀳𑀸𑀤𑁆𑀯𑀸𑀭𑁂 𑀦𑀺𑀲𑁆𑀲𑁂𑀡𑀺𑀫𑀽𑀮𑁂 𑀯𑀸 𑀞𑀢𑁆𑀯𑀸 𑀤𑁆𑀯𑀸𑀭𑀭𑀓𑁆𑀔𑀡𑀓𑀲𑁆𑀲. 𑀧𑀘𑁆𑀙𑀺𑀫𑀸𑀦𑀁 𑀪𑀸𑀭𑁄𑀢𑀺 𑀏𑀓𑀸𑀦𑀼𑀩𑀦𑁆𑀥𑀯𑀲𑁂𑀦 𑀆𑀕𑀘𑁆𑀙𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑀁𑀯𑀼𑀢𑀤𑁆𑀯𑀸𑀭𑁂 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑀳𑀺 𑀯𑀸𑀢𑀺 𑀕𑀩𑁆𑀪𑀢𑁄 𑀩𑀳𑀺. 𑀦𑀺𑀧𑀚𑁆𑀚𑀦𑀓𑀸𑀮𑁂𑀧𑀺…𑀧𑁂… 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀏𑀢𑁆𑀣 ‘‘𑀤𑁆𑀯𑀸𑀭𑀚𑀕𑁆𑀕𑀦𑀓𑀲𑁆𑀲 𑀢𑀤𑀥𑀻𑀦𑀢𑁆𑀢𑀸 𑀢𑀤𑀸 𑀢𑀲𑁆𑀲 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀧𑀺 𑀆𑀪𑁄𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂𑀢𑀺 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂. ‘‘𑀧𑀭𑀺𑀓𑁆𑀔𑁂𑀧𑀲𑁆𑀲 𑀉𑀘𑁆𑀘𑀢𑁄 𑀧𑀫𑀸𑀡𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀧𑀭𑀺𑀓𑁆𑀔𑁂𑀧𑁄 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀦𑀻𑀘𑀢𑀭𑁄 𑀳𑁄𑀢𑀺, 𑀯𑀝𑁆𑀝𑀢𑀺. 𑀫𑀳𑀸𑀧𑀭𑀺𑀯𑁂𑀡𑀁 𑀳𑁄𑀢𑀻𑀢𑀺 𑀫𑀳𑀦𑁆𑀢𑀁 ¶ 𑀅𑀗𑁆𑀕𑀡𑀁 𑀳𑁄𑀢𑀺. 𑀫𑀳𑀸𑀩𑁄𑀥𑀺𑀬𑀗𑁆𑀕𑀡𑀮𑁄𑀳𑀧𑀸𑀲𑀸𑀤𑀬𑀗𑁆𑀕𑀡𑀲𑀤𑀺𑀲𑀦𑁆𑀢𑀺 𑀩𑀳𑀼𑀲𑀜𑁆𑀘𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀫𑀳𑀸𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁. 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀉𑀝𑁆𑀞𑀳𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀧𑀦𑁆𑀦𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑁂𑀯 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀦𑀺𑀤𑁆𑀤𑀸𑀯𑀲𑁂𑀦𑁂𑀯 𑀅𑀦𑀸𑀧𑀢𑁆𑀢𑀺. 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀲𑀼𑀧𑀢𑀺, 𑀆𑀧𑀢𑁆𑀢𑀻𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 𑀅𑀦𑀼𑀝𑁆𑀞𑀳𑀺𑀢𑁆𑀯𑀸𑀯 𑀲𑀬𑀺𑀢𑀲𑀦𑁆𑀢𑀸𑀦𑁂𑀦 𑀲𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀧𑀼𑀭𑀸𑀭𑀼𑀡𑁂 𑀧𑀩𑀼𑀚𑁆𑀛𑀺𑀢𑁆𑀯𑀸𑀧𑀺 𑀅𑀚𑀸𑀦𑀺𑀢𑁆𑀯𑀸 𑀲𑀬𑀺𑀢𑀲𑀦𑁆𑀢𑀸𑀦𑁂𑀦 𑀲𑀬𑀦𑁆𑀢𑀲𑁆𑀲𑀧𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀆𑀧𑀢𑁆𑀢𑀺𑀬𑁂𑀯. 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀯𑀼𑀝𑁆𑀞𑀸𑀢𑀻𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀉𑀝𑁆𑀞𑀳𑀢𑀺. 𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀦𑀺𑀧𑀦𑁆𑀦𑀢𑁆𑀢𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀤𑀺𑀯𑀸𑀧𑀝𑀺𑀲𑀮𑁆𑀮𑀸𑀦𑀫𑀽𑀮𑀺𑀓𑀸 𑀆𑀧𑀢𑁆𑀢𑀺. ‘‘𑀏𑀯𑀁 𑀦𑀺𑀧𑀚𑁆𑀚𑀦𑁆𑀢𑁄 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀧𑀚𑁆𑀚𑀦𑁆𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀼𑀭𑁂𑀢𑀭𑀁 𑀉𑀝𑁆𑀞𑀳𑀦𑁆𑀢𑁄𑀧𑀺 𑀅𑀦𑀼𑀝𑁆𑀞𑀳𑀦𑁆𑀢𑁄𑀧𑀺 𑀦𑀺𑀧𑀚𑁆𑀚𑀦𑀓𑀸𑀮𑁂𑀬𑁂𑀯 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀤𑀺𑀯𑀸𑀧𑀝𑀺𑀲𑀮𑁆𑀮𑀸𑀦𑀫𑀽𑀮𑀺𑀓𑀁 𑀧𑀦 𑀤𑀼𑀓𑁆𑀓𑀝𑀁 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀆𑀧𑀚𑁆𑀚𑀢𑀺.

𑀬𑀁 𑀧𑀦𑁂𑀢𑁆𑀣 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 ‘‘𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀲𑀘𑁂 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀤𑁆𑀯𑀸𑀭𑁂 𑀯𑀺𑀯𑀝𑁂𑀧𑀺 𑀦𑀺𑀧𑀚𑁆𑀚𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺 𑀅𑀔𑁂𑀢𑁆𑀢𑁂 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀢𑁆𑀢𑀸. 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀯𑀺𑀯𑀝𑁂𑀧𑀺 𑀤𑁆𑀯𑀸𑀭𑁂 ‘‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸𑀧𑀺 𑀦𑀺𑀧𑀦𑁆𑀦𑀲𑁆𑀲 𑀅𑀔𑁂𑀢𑁆𑀢𑁂 𑀧𑀺𑀳𑀺𑀢𑀢𑁆𑀢𑀸 𑀦𑀺𑀧𑀚𑁆𑀚𑀦𑀓𑀸𑀮𑁂 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀁, 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀦𑀺𑀧𑀚𑁆𑀚𑀦𑀫𑀽𑀮𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺. 𑀭𑀢𑁆𑀢𑀺𑀁 𑀧𑀺𑀳𑀺𑀢𑁂𑀧𑀺 𑀅𑀧𑀺𑀳𑀺𑀢𑁂𑀧𑀺 𑀤𑁆𑀯𑀸𑀭𑁂 𑀦𑀺𑀧𑀦𑁆𑀦𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀓𑁆𑀔𑀡𑁂𑀬𑁂𑀯 𑀅𑀧𑀺𑀳𑀺𑀢𑀤𑁆𑀯𑀸𑀭𑁂 𑀧𑀺𑀳𑀺𑀢𑁂 𑀧𑀺𑀳𑀺𑀢𑀤𑁆𑀯𑀸𑀭𑁂 𑀘 𑀧𑀼𑀦 𑀯𑀺𑀯𑀭𑀺𑀢𑁆𑀯𑀸 𑀧𑀺𑀳𑀺𑀢𑁂 𑀔𑁂𑀢𑁆𑀢𑁂 𑀧𑀺𑀳𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀻’’𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀳𑀺 𑀅𑀭𑀼𑀡𑀼𑀕𑁆𑀕𑀫𑀦𑁂 𑀆𑀧𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀔𑁂𑀢𑁆𑀢𑁂 𑀯𑀸 𑀧𑀺𑀳𑀺𑀢𑀁 𑀳𑁄𑀢𑀼 𑀅𑀔𑁂𑀢𑁆𑀢𑁂 𑀯𑀸, 𑀲𑀁𑀯𑀭𑀡𑀫𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀦𑀺𑀤𑁆𑀤𑀸𑀯𑀲𑁂𑀦 𑀦𑀺𑀧𑀚𑁆𑀚𑀢𑀻𑀢𑀺 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑀸𑀬 𑀏𑀓𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀢𑀺, 𑀏𑀯𑀁 𑀧𑀦 𑀦𑀺𑀧𑀦𑁆𑀦𑁄 𑀦𑀺𑀧𑀦𑁆𑀦𑁄 ¶ 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀅𑀧𑀲𑁆𑀲𑀸𑀬 𑀲𑀼𑀧𑀦𑁆𑀢𑀲𑁆𑀲𑀸𑀢𑀺 𑀓𑀝𑀺𑀬𑀸 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀲𑁆𑀲 𑀘 𑀅𑀦𑁆𑀢𑀭𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀤𑁂𑀲𑀁 𑀪𑀽𑀫𑀺𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀣𑀫𑁆𑀪𑀸𑀤𑀺𑀁 𑀅𑀧𑀲𑁆𑀲𑀸𑀬 𑀲𑀼𑀧𑀦𑁆𑀢𑀲𑁆𑀲. 𑀲𑀳𑀲𑀸𑀯 𑀯𑀼𑀝𑁆𑀞𑀸𑀢𑀻𑀢𑀺 𑀧𑀓𑁆𑀔𑀮𑀺𑀢𑁆𑀯𑀸 𑀧𑀢𑀺𑀢𑁄 𑀯𑀺𑀬 𑀲𑀳𑀲𑀸 𑀯𑀼𑀝𑁆𑀞𑀸𑀢𑀺. 𑀢𑀢𑁆𑀣𑁂𑀯 𑀲𑀬𑀢𑀺 𑀦 𑀯𑀼𑀝𑁆𑀞𑀸𑀢𑀻𑀢𑀺 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑀸𑀬 ¶ 𑀲𑀼𑀧𑀦𑁆𑀢𑁄 𑀦 𑀯𑀼𑀝𑁆𑀞𑀸𑀢𑀺, 𑀦 𑀫𑀼𑀘𑁆𑀙𑀸𑀧𑀭𑁂𑀢𑁄. 𑀢𑁂𑀦𑁂𑀯 ‘‘𑀅𑀯𑀺𑀲𑀬𑀢𑁆𑀢𑀸 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻’’𑀢𑀺 𑀦 𑀯𑀼𑀢𑁆𑀢𑀁.

𑀏𑀓𑀪𑀗𑁆𑀕𑁂𑀦𑀸𑀢𑀺 𑀏𑀓𑀲𑁆𑀲 𑀧𑀲𑁆𑀲𑀲𑁆𑀲 𑀪𑀜𑁆𑀚𑀦𑁂𑀦, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀸𑀤𑁂 𑀪𑀽𑀫𑀺𑀢𑁄 𑀅𑀫𑁄𑀘𑁂𑀢𑁆𑀯𑀸𑀯 𑀏𑀓𑀁 𑀧𑀲𑁆𑀲𑀁 𑀪𑀜𑁆𑀚𑀺𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀦𑀺𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀼𑀘𑁆𑀙𑀺𑀢𑁆𑀯𑀸 𑀧𑀢𑀺𑀢𑀢𑁆𑀢𑀸 𑀣𑁂𑀭𑁂𑀦 ‘‘𑀅𑀯𑀺𑀲𑀬𑀢𑁆𑀢𑀸 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀸 𑀧𑀦 𑀬𑀣𑀸 𑀬𑀓𑁆𑀔𑀕𑀳𑀺𑀢𑀓𑁄 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄 𑀘 𑀧𑀭𑀯𑀲𑁄 𑀳𑁄𑀢𑀺, 𑀏𑀯𑀁 𑀅𑀧𑀭𑀯𑀲𑀢𑁆𑀢𑀸 𑀫𑀼𑀘𑁆𑀙𑀺𑀢𑁆𑀯𑀸 𑀧𑀢𑀺𑀢𑁄 𑀓𑀜𑁆𑀘𑀺 𑀓𑀸𑀮𑀁 𑀚𑀸𑀦𑀺𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺. 𑀬𑁄 𑀘 𑀬𑀓𑁆𑀔𑀕𑀳𑀺𑀢𑀓𑁄, 𑀬𑁄 𑀘 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄𑀢𑀺 𑀇𑀫𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀘𑁆𑀙𑀺𑀫𑀢𑁆𑀢𑀸 𑀲𑁄𑀬𑁂𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀢𑁆𑀣 𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺, 𑀲𑁄𑀯 𑀧𑀫𑀸𑀡𑀢𑁄 𑀤𑀝𑁆𑀞𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨). 𑀬𑀓𑁆𑀔𑀕𑀳𑀺𑀢𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀯𑀺𑀲𑀜𑁆𑀜𑀻𑀪𑀽𑀢𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀪𑀗𑁆𑀕𑁂𑀦 𑀦𑀺𑀧𑀦𑁆𑀦𑁄 𑀧𑀦 𑀅𑀢𑁆𑀣𑀢𑁄 𑀅𑀦𑀺𑀧𑀦𑁆𑀦𑀢𑁆𑀢𑀸 𑀫𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂𑀦 𑀲𑁄 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁄𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀯𑀸 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲 𑀓𑁂𑀦𑀘𑀺 𑀯𑀺𑀯𑀝𑁂𑀧𑀺 𑀤𑁆𑀯𑀸𑀭𑁂 𑀅𑀦𑀸𑀧𑀢𑁆𑀢𑀺 𑀦𑀺𑀧𑀚𑁆𑀚𑀦𑀓𑀸𑀮𑁂 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀢𑁆𑀢𑀸. 𑀲𑀘𑁂 𑀤𑀺𑀯𑀸 𑀲𑀁𑀯𑀭𑀺𑀢𑁆𑀯𑀸 𑀤𑁆𑀯𑀸𑀭𑀲𑀫𑀻𑀧𑁂 𑀦𑀺𑀧𑀦𑁆𑀦𑁄 𑀧𑀘𑁆𑀙𑀸 𑀲𑀬𑀫𑁂𑀯 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀘𑀺𑀢𑁆𑀢𑀓𑀸 𑀘𑀸𑀬𑀁 𑀆𑀧𑀢𑁆𑀢𑀺 𑀓𑀺𑀭𑀺𑀬𑀸 𑀘 𑀅𑀓𑀺𑀭𑀺𑀬𑀸 𑀘.

𑁭𑁮. ‘‘𑀅𑀧𑀤𑁂 𑀧𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀫𑁂𑀯𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬𑀸’’𑀢𑀺 𑀆𑀳. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀬𑀤𑀺𑀤𑀦𑁆𑀢𑀺 𑀬𑁄 𑀅𑀬𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀦𑁆𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁

𑀅𑀤𑀼𑀢𑀺𑀬𑁂𑀦 ¶ ¶ 𑀚𑀺𑀦𑁂𑀦 𑀬𑀁 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀧𑀓𑀸𑀲𑀺𑀢𑀁, 𑀢𑀲𑁆𑀲 𑀇𑀤𑀸𑀦𑀺 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀧𑀢𑁆𑀢𑁄, 𑀢𑀲𑁆𑀫𑀸 𑀬𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀜𑁆𑀘 𑀧𑀼𑀩𑁆𑀩𑁂 𑀧𑀓𑀸𑀲𑀺𑀢𑀁, 𑀢𑀁 𑀲𑀩𑁆𑀩𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀲𑁆𑀲 𑀤𑀼𑀢𑀺𑀬𑀲𑁆𑀲 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁮𑁪. 𑀭𑀸𑀚𑀕𑀳𑁂𑀢𑀺 𑀏𑀢𑁆𑀣 𑀤𑀼𑀕𑁆𑀕𑀚𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀧𑀤𑀸𑀤𑀺𑀬𑁄𑀕𑀢𑁄 𑀧𑀥𑀸𑀦𑀪𑀸𑀯𑁂𑀦 𑀭𑀸𑀚𑀽𑀳𑀺 𑀕𑀳𑀺𑀢𑀁 𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀭𑀸𑀚𑀕𑀳𑀦𑁆𑀢𑀺 𑀆𑀳 ‘‘𑀫𑀦𑁆𑀥𑀸𑀢𑀼…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀫𑀳𑀸𑀲𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀭𑁂𑀡𑀼𑀦𑀸 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀕𑁆𑀕𑀳𑀡𑀁. 𑀫𑀳𑀸𑀕𑁄𑀯𑀺𑀦𑁆𑀤𑀧𑀅𑀕𑁆𑀕𑀳𑀺𑀢𑀢𑀸𑀓𑀺𑀢𑁆𑀢𑀦𑀜𑁆𑀳𑀺 𑀢𑀤𑀸 𑀭𑁂𑀡𑀼𑀦𑀸 𑀫𑀕𑀥𑀭𑀸𑀚𑁂𑀦 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀽𑀧𑀮𑀓𑁆𑀔𑀡𑀁. 𑀢𑀲𑁆𑀲 𑀳𑀺 𑀲𑁄 𑀧𑀼𑀭𑁄𑀳𑀺𑀢𑁄. ‘‘𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀧𑀼𑀭𑀸𑀢𑀦𑁄 𑀏𑀓𑁄 𑀫𑀕𑀥𑀭𑀸𑀚𑀸’’𑀢𑀺 𑀓𑁂𑀘𑀺. 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀭𑀸𑀚𑀥𑀸𑀦𑀻𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀕𑀬𑁆𑀳𑀢𑀻𑀢𑀺 𑀕𑀳𑁄, 𑀭𑀸𑀚𑀽𑀦𑀁 𑀕𑀳𑁄𑀢𑀺 𑀭𑀸𑀚𑀕𑀳𑀁, 𑀦𑀕𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂𑀢𑀺 ‘‘𑀦𑀕𑀭𑀫𑀸𑀧𑀦𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑀲𑀩𑁆𑀩𑀕𑀳𑀢𑁆𑀢𑀸 𑀭𑀸𑀚𑀕𑀳𑀁, 𑀕𑀺𑀚𑁆𑀛𑀓𑀽𑀝𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀩𑁆𑀩𑀢𑀭𑀸𑀚𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑀤𑀺𑀲𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀪𑀯𑀦𑀢𑀸𑀬 𑀭𑀸𑀚𑀫𑀸𑀦𑀁 𑀕𑁂𑀳𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀼𑀯𑀺𑀳𑀺𑀢𑀸𑀭𑀓𑁆𑀔𑀢𑀸𑀬 𑀅𑀦𑀢𑁆𑀣𑀸𑀯𑀳𑀪𑀸𑀯𑁂𑀦 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁. 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀳𑀺 𑀭𑀸𑀚𑀢𑁂, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀯𑀸 𑀭𑀸𑀚𑀕𑀳’’𑀦𑁆𑀢𑀺 𑀏𑀤𑀺𑀲𑁂 𑀧𑀓𑀸𑀭𑁂. 𑀲𑁄 𑀧𑀤𑁂𑀲𑁄 𑀞𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀉𑀴𑀸𑀭𑀲𑀢𑁆𑀢𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀩𑀼𑀤𑁆𑀥𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀬𑀓𑁆𑀔𑀸𑀦𑀁. 𑀯𑀲𑀦𑀯𑀦𑀦𑁆𑀢𑀺 𑀆𑀧𑀸𑀦𑀪𑀽𑀫𑀺𑀪𑀽𑀢𑀁 𑀉𑀧𑀯𑀦𑀁. 𑀕𑀺𑀚𑁆𑀛𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀕𑀺𑀚𑁆𑀛𑀁, 𑀓𑀽𑀝𑀁. 𑀢𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄. 𑀕𑀺𑀚𑁆𑀛𑁄 𑀯𑀺𑀬𑀸𑀢𑀺 𑀯𑀸 𑀕𑀺𑀚𑁆𑀛𑀁, 𑀓𑀽𑀝𑀁. 𑀢𑀁 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀧𑀩𑁆𑀩𑀢𑁄. 𑀕𑀺𑀚𑁆𑀛𑀲𑀤𑀺𑀲𑀓𑀽𑀝𑁄𑀢𑀺 𑀕𑀺𑀚𑁆𑀛𑀓𑀽𑀝𑁄𑀢𑀺 ¶ 𑀯𑀸 𑀫𑀚𑁆𑀛𑁂𑀧𑀤𑀮𑁄𑀧𑀻𑀲𑀫𑀸𑀲𑁄 𑀬𑀣𑀸 ‘‘𑀲𑀸𑀓𑀧𑀢𑁆𑀣𑀯𑁄’’𑀢𑀺, 𑀢𑀲𑁆𑀫𑀺𑀁 𑀕𑀺𑀚𑁆𑀛𑀓𑀽𑀝𑁂. 𑀢𑁂𑀦𑀸𑀳 ‘‘𑀕𑀺𑀚𑁆𑀛𑀸’’𑀢𑀺𑀆𑀤𑀺.

𑀢𑀢𑁄 ¶ 𑀧𑀭𑀁 𑀲𑀗𑁆𑀖𑁄𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑀭𑀺 𑀲𑀗𑁆𑀖𑁄 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸. 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀻𑀢𑀺 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀆𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀕𑀩𑁆𑀪𑁂 𑀬𑀫𑀓𑀫𑀳𑀸𑀤𑁆𑀯𑀸𑀭𑀁 𑀯𑀺𑀯𑀭𑀦𑁆𑀢𑀸 𑀯𑀺𑀬 𑀢𑀁 𑀧𑀩𑁆𑀩𑀢𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀺.

𑀓𑀤𑀸 𑀧𑀦𑁂𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼? 𑀅𑀢𑀻𑀢𑁂 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑀸 𑀓𑀼𑀮𑀥𑀻𑀢𑀸 𑀔𑁂𑀢𑁆𑀢𑀁 𑀭𑀓𑁆𑀔𑀢𑀺, 𑀢𑀲𑁆𑀲𑀸 𑀔𑁂𑀢𑁆𑀢𑀓𑀼𑀝𑀺𑀬𑀸 𑀯𑀻𑀳𑀬𑁄 𑀪𑀚𑁆𑀚𑀦𑁆𑀢𑀺𑀬𑀸 𑀢𑀢𑁆𑀣 𑀫𑀳𑀸𑀓𑀭𑀜𑁆𑀚𑀧𑀼𑀧𑁆𑀨𑀧𑁆𑀧𑀫𑀸𑀡𑀸 𑀫𑀳𑀦𑁆𑀢𑀫𑀳𑀦𑁆𑀢𑀸 𑀫𑀦𑁄𑀳𑀭𑀸 𑀧𑀜𑁆𑀘𑀲𑀢𑀫𑀢𑁆𑀢𑀸 𑀮𑀸𑀚𑀸 𑀚𑀸𑀬𑀺𑀁𑀲𑀼. 𑀲𑀸 𑀢𑁂 𑀕𑀳𑁂𑀢𑁆𑀯𑀸 𑀫𑀳𑀢𑀺 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀲𑁆𑀲𑀸 𑀅𑀦𑀼𑀕𑁆𑀕𑀳𑀢𑁆𑀣𑀁 𑀅𑀯𑀺𑀤𑀽𑀭𑁂 𑀔𑁂𑀢𑁆𑀢𑀧𑀸𑀴𑀺𑀬𑀸 𑀕𑀘𑁆𑀙𑀢𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀲𑀼𑀧𑀼𑀧𑁆𑀨𑀺𑀢𑀁 𑀫𑀳𑀦𑁆𑀢𑀁 𑀏𑀓𑀁 𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀮𑀸𑀚𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀳𑀺 𑀮𑀸𑀚𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀁 𑀧𑀤𑀼𑀫𑀧𑀼𑀧𑁆𑀨𑀁 𑀤𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀧𑀼𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁂 𑀧𑀜𑁆𑀘𑀲𑀢𑀧𑀼𑀢𑁆𑀢𑁂 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀜𑁆𑀘 𑀧𑀼𑀢𑁆𑀢𑀲𑀢𑀸𑀦𑀺 𑀧𑀢𑁆𑀣𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀲𑀫𑁆𑀪𑀢𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀸 𑀢𑀲𑁆𑀲𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀫𑀥𑀼𑀭𑀫𑀁𑀲𑀁 𑀤𑀢𑁆𑀯𑀸 ‘‘𑀏𑀢𑀺𑀲𑁆𑀲𑀸 𑀧𑀼𑀢𑁆𑀢𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀬𑀺𑀁𑀲𑀼. 𑀅𑀢𑀻𑀢𑀸𑀲𑀼 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀢𑀲𑁆𑀲𑀸 𑀧𑀼𑀢𑁆𑀢𑀪𑀸𑀯𑁂𑀦 𑀆𑀕𑀢𑀢𑁆𑀢𑀸 𑀢𑀣𑀸 𑀢𑁂𑀲𑀁 𑀅𑀳𑁄𑀲𑀺. 𑀲𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀘𑀼𑀢𑀸 𑀚𑀸𑀢𑀲𑁆𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀫𑁂𑀓𑁄 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀢𑀲𑁆𑀲𑀸 𑀧𑀤𑀲𑀸 𑀯𑀺𑀘𑀭𑀦𑁆𑀢𑀺𑀬𑀸 𑀧𑀤𑀼𑀤𑁆𑀥𑀸𑀭𑁂 𑀧𑀤𑀼𑀤𑁆𑀥𑀸𑀭𑁂 𑀪𑀽𑀫𑀺𑀢𑁄 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀏𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀆𑀦𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺, 𑀢𑀲𑁆𑀲𑀸 𑀕𑀩𑁆𑀪𑁄 𑀲𑀡𑁆𑀞𑀸𑀢𑀺. 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀺, 𑀲𑁂𑀲𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀁 𑀕𑀩𑁆𑀪𑀫𑀮𑀁 𑀦𑀺𑀲𑁆𑀲𑀸𑀬 𑀲𑀁𑀲𑁂𑀤𑀚𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸. ‘‘𑀑𑀧𑀧𑀸𑀢𑀺𑀓𑀪𑀸𑀯𑁂𑀦𑀸’’𑀢𑀺 𑀓𑁂𑀘𑀺. 𑀢𑁂 𑀯𑀬𑀧𑁆𑀧𑀢𑁆𑀢𑀸 𑀉𑀬𑁆𑀬𑀸𑀦𑁂 𑀧𑀤𑀼𑀫𑀲𑁆𑀲𑀭𑁂 𑀓𑀻𑀴𑀦𑁆𑀢𑀸 𑀏𑀓𑁂𑀓𑀲𑁆𑀫𑀺𑀁 𑀧𑀤𑀼𑀫𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀅𑀬𑀁 𑀢𑁂𑀲𑀁 𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁄𑀲𑀺 𑁋

‘‘𑀲𑀭𑁄𑀭𑀼𑀳𑀁 ¶ 𑀧𑀤𑀼𑀫𑀧𑀮𑀸𑀲𑀫𑀢𑁆𑀭𑀚𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀪𑀫𑀭𑀕𑀡𑀸𑀦𑀼𑀘𑀺𑀡𑁆𑀡𑀁;

𑀅𑀦𑀺𑀘𑁆𑀘𑀢𑀸𑀬𑀁 𑀯𑀬𑀢𑀁 𑀯𑀺𑀤𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑁋

𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼. 𑀢𑀤𑀸 𑀘𑀲𑁆𑀲 𑀧𑀩𑁆𑀩𑀢𑀲𑁆𑀲 ‘‘𑀇𑀲𑀺𑀕𑀺𑀮𑀻’’𑀢𑀺 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺. 𑀇𑀫𑁂 𑀇𑀲𑀬𑁄𑀢𑀺 𑀇𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀻. 𑀲𑀫𑀸 𑀜𑀸𑀬𑀢𑀺 𑀏𑀢𑀸𑀬𑀸𑀢𑀺 𑀲𑀫𑀜𑁆𑀜𑀸, 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄.

𑀢𑀺𑀡𑀘𑁆𑀙𑀤𑀦𑀸 𑀓𑀼𑀝𑀺𑀬𑁄 𑀫𑀚𑁆𑀛𑁂𑀧𑀤𑀮𑁄𑀧𑀻𑀲𑀫𑀸𑀲𑀁 𑀓𑀢𑁆𑀯𑀸, 𑀏𑀓𑀤𑁂𑀲𑁂 𑀯𑀸 𑀲𑀫𑀼𑀤𑀸𑀬𑀯𑁄𑀳𑀸𑀭𑀯𑀲𑁂𑀦 ‘‘𑀢𑀺𑀡𑀓𑀼𑀝𑀺𑀬𑁄’’𑀢𑀺 𑀯𑀼𑀢𑁆𑀢𑀸. ‘‘𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀽’’𑀢𑀺 𑀯𑀘𑀦𑀢𑁄 𑀯𑀲𑁆𑀲𑀽𑀧𑀕𑀫𑀦𑀸𑀭𑀳𑀸 𑀲𑀤𑁆𑀯𑀸𑀭𑀩𑀦𑁆𑀥𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀢𑀺𑀡𑀘𑁆𑀙𑀤𑀦𑀸 𑀲𑀤𑁆𑀯𑀸𑀭𑀩𑀦𑁆𑀥𑀸 𑀓𑀼𑀝𑀺𑀬𑁄’’𑀢𑀺. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦𑀸𑀢𑀺 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦. 𑀦𑀸𑀮𑀓𑀧𑀝𑀺𑀧𑀤𑀦𑁆𑀢𑀺 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁭𑁨𑁧) 𑀲𑀢𑁆𑀣𑀸𑀭𑀸 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀤𑁂𑀲𑀺𑀢𑀁 𑀧𑀼𑀣𑀼𑀚𑁆𑀚𑀦𑀓𑀸𑀮𑀢𑁄 𑀧𑀪𑀼𑀢𑀺 𑀓𑀺𑀮𑁂𑀲𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁. 𑀢𑀁 𑀧𑀦 𑀧𑀝𑀺𑀧𑀤𑀁 𑀲𑀼𑀢𑁆𑀯𑀸 𑀦𑀸𑀮𑀓𑀢𑁆𑀣𑁂𑀭𑁄 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀅𑀳𑁄𑀲𑀺 𑀤𑀲𑁆𑀲𑀦𑁂 𑀲𑀯𑀦𑁂 𑀧𑀼𑀘𑁆𑀙𑀸𑀬𑀸𑀢𑀺. 𑀲𑁄 𑀳𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀯𑀦𑀁 𑀧𑀯𑀺𑀝𑁆𑀞𑁄. 𑀧𑀼𑀦 ‘‘𑀅𑀳𑁄 𑀯𑀢𑀸𑀳𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑁂 𑀅𑀧𑁆𑀧𑀺𑀘𑁆𑀙𑀢𑀸. 𑀢𑀣𑀸 ‘‘𑀅𑀳𑁄 𑀯𑀢𑀸𑀳𑀁 𑀧𑀼𑀦 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺, 𑀅𑀬𑀫𑀲𑁆𑀲 𑀲𑀯𑀦𑁂 𑀅𑀧𑁆𑀧𑀺𑀘𑁆𑀙𑀢𑀸. 𑀢𑀣𑀸 ‘‘𑀅𑀳𑁄 𑀯𑀢𑀸𑀳𑀁 𑀧𑀼𑀦 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺, 𑀅𑀬𑀫𑀲𑁆𑀲 𑀧𑀼𑀘𑁆𑀙𑀸𑀬 𑀅𑀧𑁆𑀧𑀺𑀘𑁆𑀙𑀢𑀸.

𑀲𑁄 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀲𑀫𑀸𑀦𑁄 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀯𑀦𑀲𑀡𑁆𑀟𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀦 𑀯𑀲𑀺, 𑀏𑀓𑀭𑀼𑀓𑁆𑀔𑀫𑀽𑀮𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀦 𑀦𑀺𑀲𑀻𑀤𑀺, 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀧𑀺𑀡𑁆𑀟𑀸𑀬 𑀦 𑀧𑀸𑀯𑀺𑀲𑀺. 𑀇𑀢𑀺 𑀯𑀦𑀢𑁄 𑀯𑀦𑀁, 𑀭𑀼𑀓𑁆𑀔𑀢𑁄 𑀭𑀼𑀓𑁆𑀔𑀁, 𑀕𑀸𑀫𑀢𑁄 𑀕𑀸𑀫𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀦𑀼𑀭𑀽𑀧𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀏𑀓𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑁄𑀬𑁂𑀯 𑀦𑀁 𑀧𑀽𑀭𑁂𑀢𑀺. 𑀇𑀫𑀜𑁆𑀳𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀉𑀓𑁆𑀓𑀝𑁆𑀞𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀪𑀺𑀓𑁆𑀔𑀼 𑀲𑀢𑁆𑀢𑁂𑀯 𑀫𑀸𑀲𑀸𑀦𑀺 𑀚𑀻𑀯𑀢𑀺, 𑀫𑀚𑁆𑀛𑀺𑀫𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑁄𑀴𑀲 𑀯𑀲𑁆𑀲𑀸𑀦𑀺. 𑀅𑀬𑀁 𑀧𑀦 𑀣𑁂𑀭𑁄 𑀉𑀓𑁆𑀓𑀝𑁆𑀞𑀁 𑀓𑀢𑁆𑀯𑀸 𑀧𑀽𑀭𑁂𑀲𑀺, 𑀢𑀲𑁆𑀫𑀸 𑀲𑀢𑁆𑀢 𑀫𑀸𑀲𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀧𑀭𑀺𑀓𑁆𑀔𑀬𑀁 𑀜𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀤𑀲𑀩𑀮𑀸𑀪𑀺𑀫𑀼𑀔𑁄 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀳𑀺𑀗𑁆𑀕𑀼𑀮𑀓𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀯𑀭𑀽𑀧𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀧𑀺 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀙𑀦𑁆𑀦𑁂 𑀲𑀤𑁆𑀯𑀸𑀭𑀩𑀦𑁆𑀥𑁂𑀬𑁂𑀯 𑀞𑀸𑀦𑁂 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀧𑁆𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬𑀧𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀧𑀻’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 ¶ 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀲𑁆𑀲𑀽𑀧𑀕𑀫𑀦𑀁 𑀲𑀦𑁆𑀥𑀸𑀬𑁂𑀯 𑀧𑀝𑀺𑀓𑁆𑀔𑁂𑀧𑁄, 𑀦 𑀆𑀮𑀬𑀓𑀭𑀡𑀯𑀲𑁂𑀦 𑀉𑀧𑀕𑀫𑀦𑀁 𑀲𑀦𑁆𑀥𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀧𑀸𑀴𑀺𑀬𑀁 𑀧𑀦 𑀅𑀯𑀺𑀲𑁂𑀲𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀧𑀻’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦𑁂𑀯 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀅𑀲𑁂𑀦𑀸𑀲𑀦𑀺𑀓𑀲𑁆𑀲 𑀦𑀸𑀯𑀸𑀤𑀺𑀁 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀆𑀮𑀬𑁄 𑀦 𑀯𑀝𑁆𑀝𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀦𑀸𑀯𑀸𑀲𑀢𑁆𑀣𑀯𑀚𑁂𑀲𑀼𑀬𑁂𑀯 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀯𑀸𑀬𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁩) 𑀲𑀢𑀺 𑀅𑀲𑀢𑀺 𑀯𑀸 𑀲𑁂𑀦𑀸𑀲𑀦𑁂 𑀯𑀲𑁆𑀲𑀽𑀧𑀕𑀫𑀦𑀲𑁆𑀲 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀬𑀁 𑀧𑀝𑀺𑀓𑁆𑀔𑁂𑀧𑁄 𑀢𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 𑀅𑀲𑀢𑀺 𑀲𑁂𑀦𑀸𑀲𑀦𑁂 𑀆𑀮𑀬𑀯𑀲𑁂𑀦𑀧𑀺 𑀦𑀸𑀯𑀸𑀤𑀻𑀲𑀼 𑀉𑀧𑀕𑀫𑀦𑀁 𑀯𑀼𑀢𑁆𑀢𑀁. 𑀅𑀦𑀼𑀥𑀫𑁆𑀫𑀢𑀸𑀢𑀺 𑀯𑀢𑁆𑀢𑀁. 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀘𑁆𑀘𑀓𑀼𑀝𑀺𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀢𑀺𑀓𑀯𑀢𑁆𑀢𑀸𑀦𑀺 𑀘 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀅𑀥𑀺𑀝𑁆𑀞𑀸𑀬𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀦𑀸𑀫 𑀢𑀺𑀯𑀺𑀥𑀫𑁆𑀧𑀺 𑀲𑀤𑁆𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀣 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀧𑀥𑀸𑀦𑀖𑀭𑁂 𑀯𑀲𑀦𑁆𑀢𑀸𑀦𑀁 𑀲𑀗𑁆𑀖𑀝𑁆𑀝𑀦𑀁 𑀅𑀓𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀺𑀲𑀣 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀥𑀫𑁆𑀫𑀲𑁆𑀲𑀯𑀦𑀁 𑀲𑀫𑀺𑀤𑁆𑀥𑀁 𑀓𑀭𑁄𑀣, 𑀧𑀩𑁆𑀩𑀸𑀚𑁂𑀦𑁆𑀢𑀸 𑀲𑁄𑀥𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀣, 𑀲𑁄𑀥𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀣, 𑀲𑁄𑀥𑁂𑀢𑁆𑀯𑀸 𑀦𑀺𑀲𑁆𑀲𑀬𑀁 𑀤𑁂𑀣. 𑀏𑀓𑁄𑀧𑀺 𑀳𑀺 𑀓𑀼𑀮𑀧𑀼𑀢𑁆𑀢𑁄 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀲𑀓𑀮𑀁 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀬𑀢𑁆𑀢𑀓𑀸𑀦𑀺 𑀲𑀓𑁆𑀓𑁄𑀣, 𑀢𑀢𑁆𑀢𑀓𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀣, 𑀅𑀦𑁆𑀢𑁄𑀯𑀲𑁆𑀲𑀁 𑀦𑀸𑀫𑁂𑀢𑀁 𑀲𑀓𑀮𑀤𑀺𑀯𑀲𑀁 𑀭𑀢𑁆𑀢𑀺𑀬𑀸 𑀘 𑀧𑀞𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀯𑀻𑀭𑀺𑀬𑀁 𑀆𑀭𑀪𑀺𑀢𑀩𑁆𑀩𑀁 ¶ . 𑀧𑁄𑀭𑀸𑀡𑀓𑀫𑀳𑀆𑀣𑁂𑀭𑀸𑀧𑀺 𑀲𑀩𑁆𑀩𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂 𑀏𑀓𑀘𑀭𑀺𑀬𑀯𑀢𑁆𑀢𑀁 𑀧𑀽𑀭𑀬𑀺𑀁𑀲𑀼. 𑀪𑀲𑁆𑀲𑁂 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀤𑀲𑀯𑀢𑁆𑀣𑀼𑀓𑀓𑀣𑀁 𑀤𑀲𑀅𑀲𑀼𑀪𑀤𑀲𑀸𑀦𑀼𑀲𑁆𑀲𑀢𑀺𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀓𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀆𑀕𑀦𑁆𑀢𑀼𑀓𑀸𑀦𑀁 𑀯𑀢𑁆𑀢𑀁 𑀓𑀸𑀢𑀼𑀁, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀕𑁆𑀕𑀸𑀳𑀺𑀓𑀧𑀺𑀲𑀼𑀡𑀨𑀭𑀼𑀲𑀯𑀘𑀦𑀸𑀦𑀺 𑀫𑀸 𑀯𑀤𑀣, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀻𑀮𑀸𑀦𑀺 𑀆𑀯𑀚𑁆𑀚𑁂𑀦𑁆𑀢𑀸 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸 𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀣, 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀯𑀦𑁆𑀤𑀦𑁆𑀢𑁂𑀦 𑀕𑀦𑁆𑀥𑀫𑀸𑀮𑀁 𑀯𑀸 𑀧𑀽𑀚𑁂𑀦𑁆𑀢𑁂𑀦 𑀧𑀢𑁆𑀢𑀁 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀦 𑀦 𑀓𑀣𑁂𑀢𑀩𑁆𑀩𑀁, 𑀅𑀦𑁆𑀢𑁄𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀬𑀲𑀁𑀬𑀼𑀢𑁆𑀢𑀓𑀣𑀸 𑀯𑀸 𑀯𑀺𑀲𑀪𑀸𑀕𑀓𑀣𑀸 𑀯𑀸 𑀦 𑀓𑀣𑁂𑀢𑀩𑁆𑀩𑀸, 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀧𑀽𑀭𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀓𑀢𑀺𑀓𑀯𑀢𑁆𑀢𑀸𑀦𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀅𑀥𑀺𑀝𑁆𑀞𑀳𑀺𑀢𑁆𑀯𑀸.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁯) 𑀯𑀼𑀝𑁆𑀞𑀯𑀲𑁆𑀲𑀸𑀦𑀁 𑀧𑀯𑀸𑀭𑀡𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀯𑀸𑀭𑀺𑀢𑀸𑀧𑀺 ‘‘𑀯𑀼𑀝𑁆𑀞𑀯𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪) 𑀯𑀘𑀦𑀢𑁄 𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀢𑁂𑀫𑀸𑀲𑀦𑁆𑀢𑁄𑀕𑀥𑀢𑁆𑀢𑀸 𑀢𑀁 𑀤𑀺𑀯𑀲𑀁 𑀬𑀸𑀯 𑀦 𑀧𑀯𑀸𑀭𑁂𑀦𑁆𑀢𑀺 ¶ , 𑀢𑀸𑀯 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀏𑀓𑀤𑁂𑀲𑁂𑀦 𑀅𑀯𑀼𑀝𑁆𑀞𑀫𑁆𑀧𑀺 𑀢𑀁 𑀤𑀺𑀯𑀲𑀁 𑀯𑀼𑀝𑁆𑀞𑀪𑀸𑀕𑀸𑀧𑁂𑀓𑁆𑀔𑀸𑀬 𑀯𑀼𑀝𑁆𑀞𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁 𑀓𑀢𑀸𑀓𑀢𑀪𑀸𑀕𑀸𑀧𑁂𑀓𑁆𑀔𑀸𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀓𑀢𑀸𑀓𑀢𑀯𑁄𑀳𑀸𑀭𑁄 𑀯𑀺𑀬. 𑀯𑀺𑀧𑁆𑀧𑀓𑀢𑀜𑁆𑀳𑀺 𑀬𑀁 𑀓𑀺𑀜𑁆𑀘𑀺 ‘‘𑀓𑀢𑀸𑀓𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁦𑁬) 𑀇𑀫𑀲𑁆𑀲 𑀧𑀦 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀯𑀼𑀝𑁆𑀞𑀯𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀳𑀺 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀓𑀣𑀺𑀦𑀢𑁆𑀣𑀸𑀭𑁄 𑀅𑀦𑀼𑀜𑁆𑀜𑀸𑀢𑁄 𑀧𑀭𑀺𑀯𑀸𑀭𑁂 ‘‘𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 (𑀧𑀭𑀺. 𑁪𑁧𑁨) 𑀯𑀼𑀢𑁆𑀢𑀢𑁆𑀢𑀸. ‘‘𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸’’𑀢𑀺 𑀇𑀤𑀜𑁆𑀘 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀁 𑀲𑀪𑀸𑀯𑀤𑀲𑁆𑀲𑀦𑀫𑀢𑁆𑀢𑀁, 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀸𑀧𑀺 ‘‘𑀯𑀼𑀝𑁆𑀞𑀯𑀲𑁆𑀲𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺.

‘‘𑀆𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀆𑀧𑀼𑀘𑁆𑀙𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀇𑀫𑀁 𑀓𑀼𑀝𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀝𑀺𑀚𑀕𑁆𑀕𑀦𑀓𑀁 𑀯𑀸 𑀦 𑀮𑀪𑀢𑀻𑀢𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀓𑀢𑁂 ¶ 𑀧𑀝𑀺𑀚𑀕𑁆𑀕𑀦𑀓𑀁 𑀦 𑀮𑀪𑀢𑀺. 𑀢𑁂 𑀧𑀦 𑀪𑀺𑀓𑁆𑀔𑀽 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑁆𑀥𑀸𑀦𑀕𑀫𑀦𑁂 𑀘𑀸𑀭𑀺𑀓𑀸𑀯𑁄𑀳𑀸𑀭𑁄 𑀲𑀸𑀲𑀦𑁂 𑀦𑀺𑀭𑀼𑀴𑁆𑀳𑁄. 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀘𑀸𑀭𑀺𑀓𑀸 𑀦𑀸𑀫 𑀫𑀳𑀸𑀚𑀦𑀲𑀗𑁆𑀕𑀳𑀢𑁆𑀣𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀢𑀺, 𑀩𑀼𑀤𑁆𑀥𑁂 𑀉𑀧𑀸𑀤𑀸𑀬 𑀧𑀦 𑀭𑀼𑀴𑁆𑀳𑀻𑀲𑀤𑁆𑀤𑀯𑀲𑁂𑀦 𑀲𑀸𑀯𑀓𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 𑀓𑀺𑀮𑀜𑁆𑀚𑀸𑀤𑀻𑀳𑀺 𑀓𑀢𑀩𑀻𑀚𑀦𑀻𑀦𑀫𑁆𑀧𑀺 𑀢𑀸𑀮𑀯𑀡𑁆𑀝𑀯𑁄𑀳𑀸𑀭𑁄 𑀯𑀺𑀬. 𑀲𑀗𑁆𑀕𑁄𑀧𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀭𑀸𑀲𑀺𑀁 𑀓𑀢𑁆𑀯𑀸. 𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀕𑁄𑀧𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀘 𑀞𑀧𑀺𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀦 𑀑𑀯𑀲𑁆𑀲𑀻𑀬𑀢𑀻𑀢𑀺 𑀅𑀦𑁄𑀯𑀲𑁆𑀲𑀓𑀁, 𑀓𑀫𑁆𑀫𑀦𑀺 𑀅𑀓-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘 𑀞𑀧𑀺𑀢𑀁 𑀦 𑀑𑀯𑀲𑁆𑀲𑀻𑀬𑀢𑀺 𑀦 𑀢𑁂𑀫𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀯𑀬𑁄𑀢𑀺 𑀏𑀢𑁆𑀣 𑀯𑀬𑁄𑀢𑀺 𑀳𑀸𑀦𑀺 ‘‘𑀆𑀬𑀯𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀢𑁆𑀢𑀦𑁄 𑀲𑀺𑀧𑁆𑀧𑁂 𑀯𑀬𑁄 𑀊𑀦𑀢𑀸𑀢𑀺 𑀅𑀯𑀬𑁄𑀢𑀺 𑀆𑀳 ‘‘𑀅𑀦𑀽𑀦𑁄 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄’’𑀢𑀺. 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀆𑀘𑀭𑀺𑀬𑀓𑀦𑁆𑀢𑀺 𑀆𑀳 ‘‘𑀆𑀘𑀭𑀺𑀬𑀓𑀫𑁆𑀫𑁂’’𑀢𑀺. 𑀧𑀺𑀝𑁆𑀞𑀲𑀗𑁆𑀖𑀸𑀝𑁄 𑀤𑁆𑀯𑀸𑀭𑀩𑀸𑀳𑀸, 𑀓𑀝𑁆𑀞𑀓𑀫𑁆𑀫𑀁 𑀣𑀫𑁆𑀪𑀸𑀤𑀺. 𑀢𑁂𑀮𑀢𑀫𑁆𑀩𑀫𑀢𑁆𑀢𑀺𑀓𑀸𑀬𑀸𑀢𑀺 𑀢𑁂𑀮𑀫𑀺𑀲𑁆𑀲𑀢𑀫𑁆𑀩𑀫𑀢𑁆𑀢𑀺𑀓𑀸𑀬.

𑁮𑁫. 𑀓𑀼𑀝𑀺𑀓𑀸𑀬 𑀓𑀭𑀡𑀪𑀸𑀯𑀦𑁆𑀢𑀺 𑀓𑀼𑀝𑀺𑀬𑀸 𑀓𑀢𑀪𑀸𑀯𑀁. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 𑀓𑀺𑀁-𑀲𑀤𑁆𑀤𑀬𑁄𑀕𑁂 𑀅𑀦𑀸𑀕𑀢𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀦𑁆𑀢𑀺 𑀫𑁂𑀢𑁆𑀢𑀸𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀽𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀫𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀦𑀦𑀼 𑀅𑀦𑀼𑀤𑁆𑀤𑀬𑀸-𑀲𑀤𑁆𑀤𑁄 𑀓𑀭𑀼𑀡𑀸𑀬 𑀧𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀅𑀦𑀼𑀤𑁆𑀤𑀬𑀸𑀲𑀤𑁆𑀤𑁄 𑀅𑀦𑀼𑀭𑀓𑁆𑀔𑀡𑀫𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀫𑀸𑀦𑁄 ¶ 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀏𑀢𑁂𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀁 𑀤𑀲𑁆𑀲𑁂𑀢𑀻’’𑀢𑀺. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀦𑁆𑀢𑀺 𑀓𑀭𑀼𑀡𑀸𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀽𑀢𑀁 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀫𑀢𑁆𑀢𑀁. 𑀘𑀺𑀓𑁆𑀔𑀮𑁆𑀮𑀁 𑀫𑀢𑁆𑀢𑀺𑀓𑀸, 𑀢𑀲𑁆𑀲 𑀫𑀤𑁆𑀤𑀦𑀁 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑀸𑀤𑀻𑀳𑀺 𑀧𑀭𑀺𑀫𑀤𑁆𑀤𑀦𑀁. 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀦𑁆𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁. 𑀓𑀺𑀜𑁆𑀘𑀸𑀧𑀺 𑀣𑁂𑀭𑁂𑀦 𑀲𑀜𑁆𑀘𑀺𑀘𑁆𑀘 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀧𑀸𑀡𑀸 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀦 𑀩𑁆𑀬𑀸𑀩𑀸𑀥𑀺𑀢𑀸, 𑀢𑀣𑀸𑀧𑀺 𑀓𑀭𑀼𑀡𑀸𑀬 𑀅𑀪𑀸𑀯𑁂𑀦 ‘‘𑀏𑀯𑀁 𑀓𑀢𑁂 𑀇𑀫𑁂 𑀧𑀸𑀡𑀸 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀢𑀢𑁆𑀢𑀸 𑀣𑁂𑀭𑀁 𑀯𑀺𑀕𑀭𑀳𑀺. 𑀚𑀦𑀸𑀦𑀁 𑀲𑀫𑀽𑀳𑁄 𑀚𑀦𑀢𑀸𑀢𑀺 𑀆𑀳 ‘‘𑀧𑀘𑁆𑀙𑀺𑀫𑁄 𑀚𑀦𑀲𑀫𑀽𑀳𑁄’’𑀢𑀺. 𑀧𑀸𑀢𑀩𑁆𑀬𑀪𑀸𑀯𑀦𑁆𑀢𑀺 𑀯𑀺𑀦𑀸𑀲𑁂𑀢𑀩𑁆𑀩𑀢𑀁. 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀣𑁂𑀭𑁂𑀦 𑀅𑀓𑀢𑁂𑀧𑀺 𑀧𑀸𑀡𑀸𑀢𑀺𑀧𑀸𑀢𑁂 𑀧𑀭𑁂𑀳𑀺 𑀲𑀮𑁆𑀮𑀓𑁆𑀔𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀦𑁆𑀢𑀺 𑀇𑀫𑀲𑁆𑀲 𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑀫𑀦𑀁. 𑀖𑀁𑀲𑀺𑀢𑀩𑁆𑀩𑁂𑀢𑀺 𑀖𑀝𑁆𑀝𑀬𑀺𑀢𑀩𑁆𑀩𑁂, 𑀯𑀺𑀦𑀸𑀲𑀺𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀏𑀯𑀁 𑀫𑀜𑁆𑀜𑀻𑀢𑀺 𑀬𑀣𑀸 𑀣𑁂𑀭𑁂𑀦 𑀓𑀢𑀁, 𑀏𑀯𑀁 𑀫𑀸 𑀫𑀜𑁆𑀜𑀺. ‘‘𑀫𑀸 𑀧𑀘𑁆𑀙𑀺𑀫𑀸 ¶ 𑀚𑀦𑀢𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀻’’𑀢𑀺 𑀯𑀘𑀦𑀢𑁄 𑀬𑁄 𑀪𑀺𑀓𑁆𑀔𑀼 𑀇𑀝𑁆𑀞𑀓𑀧𑀘𑀦𑀧𑀢𑁆𑀢𑀧𑀘𑀦𑀓𑀼𑀝𑀺𑀓𑀭𑀡𑀯𑀺𑀳𑀸𑀭𑀓𑀸𑀭𑀸𑀧𑀦𑀯𑀺𑀳𑀸𑀭𑀲𑀫𑁆𑀫𑀚𑁆𑀚𑀦𑀧𑀝𑀕𑁆𑀕𑀺𑀤𑀸𑀦𑀓𑀽𑀧𑀧𑁄𑀓𑁆𑀔𑀭𑀡𑀻𑀔𑀡𑀸𑀧𑀦𑀸𑀤𑀻𑀲𑀼 𑀬𑀢𑁆𑀣 ‘‘𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀁 𑀧𑀸𑀡𑀸𑀦𑀁 𑀯𑀺𑀳𑀺𑀁𑀲𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑁂𑀦 𑀢𑀸𑀤𑀺𑀲𑁂 𑀧𑀤𑁂𑀲𑁂 𑀓𑀧𑁆𑀧𑀺𑀬𑀯𑀘𑀦𑀁 𑀯𑀢𑁆𑀯𑀸𑀧𑀺 𑀦 𑀢𑀁 𑀓𑀫𑁆𑀫𑀁 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯 𑀆𑀧𑀢𑁆𑀢𑀺𑀦𑁆𑀢𑀺 𑀧𑀣𑀯𑀻𑀔𑀡𑀦𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀤𑀻𑀲𑀼 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀆𑀧𑀢𑁆𑀢𑀺𑀁. 𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀓𑀼𑀝𑀺𑀓𑀭𑀡𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺. 𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺𑀓𑀸 𑀓𑀸𑀢𑀩𑁆𑀩𑀸, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀬𑀤𑀺 𑀅𑀜𑁆𑀜𑁂𑀦 𑀓𑀢𑀁 𑀮𑀪𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸, 𑀦 𑀪𑀕𑀯𑀸 𑀢𑀁 𑀓𑀼𑀝𑀺𑀓𑀁 𑀪𑀺𑀦𑁆𑀤𑀸𑀧𑁂𑀬𑁆𑀬𑀸𑀢𑀺 𑀆𑀳 𑁋 ‘‘𑀓𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀬𑀣𑀸 𑀯𑀸 𑀢𑀣𑀸 𑀯𑀸 𑀫𑀺𑀲𑁆𑀲𑀸 𑀳𑁄𑀢𑀽𑀢𑀺 𑀳𑁂𑀝𑁆𑀞𑀸 𑀫𑀢𑁆𑀢𑀺𑀓𑀸 𑀉𑀧𑀭𑀺 𑀤𑀩𑁆𑀩𑀲𑀫𑁆𑀪𑀸𑀭𑀸𑀢𑀺𑀆𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀫𑀺𑀲𑁆𑀲𑀸 𑀳𑁄𑀢𑀼. 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁂𑀧𑁂𑀦𑀸𑀢𑀺 𑀏𑀢𑁆𑀣 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺 𑀏𑀯 𑀓𑀢𑁄 𑀆𑀯𑀲𑀣𑁄 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀇𑀝𑁆𑀞𑀓𑀸𑀫𑀬𑀲𑁆𑀲 𑀆𑀯𑀲𑀣𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀓𑀺𑀭 𑀆𑀯𑀲𑀣𑀁 𑀬𑀣𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀏𑀯𑀁 𑀇𑀝𑁆𑀞𑀓𑀸𑀳𑀺 𑀏𑀯 𑀘𑀺𑀦𑀺𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀢𑀼𑀮𑀸𑀤𑀡𑁆𑀟𑀓𑀯𑀸𑀝𑀨𑀮𑀓𑀸𑀦𑀺 𑀧𑀦 𑀤𑀸𑀭𑀼𑀫𑀬𑀸𑀦𑁂𑀯. 𑀯𑀺𑀓𑀺𑀭𑀦𑁆𑀢𑀸𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀸.

𑀓𑀺𑀲𑁆𑀲𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀯𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀻𑀢𑀺 𑀤𑁆𑀯𑀸𑀭𑀓𑀯𑀸𑀝𑀸𑀤𑀺𑀅𑀪𑀺𑀲𑀗𑁆𑀔𑀭𑀡𑀸𑀤𑀻𑀲𑀼 𑀓𑀢𑀯𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀺. 𑀪𑀺𑀓𑁆𑀔𑀽𑀦𑀁 𑀅𑀓𑀧𑁆𑀧𑀺𑀬𑀢𑁆𑀢𑀸 𑀏𑀯 𑀢𑀺𑀢𑁆𑀣𑀺𑀬𑀯𑀢𑀸𑀦𑀼𑀭𑀽𑀧𑀢𑁆𑀢𑀸 𑀢𑀺𑀢𑁆𑀣𑀺𑀬𑀥𑀚𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀓𑀸𑀭𑀡𑁂𑀲𑀼 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑁂𑀢𑀓𑀸𑀭𑀡𑀤𑁆𑀯𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑀭𑀸𑀦𑀺𑀧𑀺 𑀢𑀢𑁆𑀣 𑀯𑀼𑀢𑁆𑀢𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀢𑀢𑁆𑀣 ¶ 𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬𑀸𑀢𑀺 𑀢𑀸𑀤𑀺𑀲𑀸𑀬 𑀓𑀼𑀝𑀺𑀓𑀸𑀬 𑀓𑀭𑀡𑀧𑀘𑁆𑀘𑀬𑀸 𑀯𑀺𑀦𑀲𑁆𑀲𑀫𑀸𑀦𑀲𑀢𑁆𑀢𑁂𑀲𑀼 𑀅𑀦𑀼𑀤𑁆𑀤𑀬𑀸𑀬. 𑀬𑀲𑁆𑀫𑀸 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀲𑀼𑀓𑀭𑀸 𑀪𑀺𑀦𑁆𑀤𑀺𑀢𑀼𑀁, 𑀢𑀲𑁆𑀫𑀸 𑀢𑀢𑁆𑀣 𑀞𑀧𑀺𑀢𑀁 𑀧𑀢𑁆𑀢𑀘𑀻𑀯𑀭𑀸𑀤𑀺 𑀅𑀕𑀼𑀢𑁆𑀢𑀁 𑀳𑁄𑀢𑀺, 𑀘𑁄𑀭𑀸𑀤𑀻𑀳𑀺 𑀅𑀯𑀳𑀭𑀺𑀢𑀼𑀁 𑀲𑀓𑁆𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀸𑀬𑀸’’𑀢𑀺. 𑀲𑁂𑀦𑀸𑀲𑀦𑀩𑀸𑀳𑀼𑀮𑁆𑀮𑀧𑀝𑀺𑀲𑁂𑀥𑀦𑀢𑁆𑀣𑀸𑀬𑀸𑀢𑀺 𑀲𑁂𑀦𑀸𑀲𑀦𑀸𑀦𑀁 𑀩𑀳𑀼𑀪𑀸𑀯𑀦𑀺𑀲𑁂𑀥𑀦𑀢𑁆𑀣𑀸𑀬, 𑀢𑀸𑀤𑀺𑀲𑀲𑁆𑀲 𑀯𑀸 𑀲𑁂𑀦𑀸𑀲𑀦𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑁂 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀲𑁂𑀲𑀓𑀫𑁆𑀫𑀸𑀦𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀦𑀺𑀘𑁆𑀘𑀩𑁆𑀬𑀸𑀯𑀝𑀢𑀸𑀦𑀺𑀲𑁂𑀥𑀦𑀢𑁆𑀣𑀁. 𑀅𑀦𑀼𑀧𑀯𑀚𑁆𑀚𑁄𑀢𑀺 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀯𑀢𑁆𑀢𑀩𑁆𑀩𑁄.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀲𑀼 ¶ 𑀢𑀜𑁆𑀘 𑀔𑁄…𑀧𑁂… 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸𑀢𑀺 𑀇𑀤𑀁 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀲𑀮𑀸𑀓𑀧𑀜𑁆𑀚𑀭𑀯𑀺𑀦𑀦𑁆𑀥𑀦𑀁 𑀲𑀦𑁆𑀥𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀙𑀢𑁆𑀢𑀤𑀡𑁆𑀟𑁂 𑀲𑀩𑁆𑀩𑀢𑁆𑀣. 𑀆𑀭𑀕𑁆𑀕𑁂𑀦𑀸𑀢𑀺 𑀦𑀺𑀔𑀸𑀤𑀦𑀫𑀼𑀔𑁂𑀦. 𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀘𑁂 𑀢𑀸𑀤𑀺𑀲𑀁 𑀅𑀓𑀧𑁆𑀧𑀺𑀬𑀙𑀢𑁆𑀢𑀁 𑀮𑀪𑀢𑀺, 𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀁. 𑀲𑀼𑀢𑁆𑀢𑀓𑁂𑀦 𑀯𑀸 𑀤𑀡𑁆𑀟𑁄 𑀯𑁂𑀞𑁂𑀢𑀩𑁆𑀩𑁄𑀢𑀺 𑀬𑀣𑀸 𑀙𑀢𑁆𑀢𑀤𑀡𑁆𑀟𑁂 𑀮𑁂𑀔𑀸 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀯𑁂𑀞𑁂𑀢𑀩𑁆𑀩𑁄. 𑀤𑀡𑁆𑀟𑀩𑀼𑀦𑁆𑀤𑁂𑀢𑀺 𑀤𑀡𑁆𑀟𑀫𑀽𑀮𑁂, 𑀙𑀢𑁆𑀢𑀤𑀡𑁆𑀟𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂𑀢𑀺 𑀅𑀢𑁆𑀣𑁄. 𑀙𑀢𑁆𑀢𑀫𑀡𑁆𑀟𑀮𑀺𑀓𑀦𑁆𑀢𑀺 𑀙𑀢𑁆𑀢𑀲𑁆𑀲 𑀅𑀦𑁆𑀢𑁄 𑀔𑀼𑀤𑁆𑀤𑀓𑀫𑀡𑁆𑀟𑀮𑀁. 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀉𑀝𑁆𑀞𑀧𑁂𑀢𑁆𑀯𑀸. 𑀲𑀸 𑀯𑀝𑁆𑀝𑀢𑀻𑀢𑀺 𑀬𑀤𑀺𑀧𑀺 𑀭𑀚𑁆𑀚𑀼𑀓𑁂𑀳𑀺 𑀦 𑀩𑀦𑁆𑀥𑀦𑁆𑀢𑀺, 𑀩𑀦𑁆𑀥𑀺𑀢𑀼𑀁 𑀧𑀦 𑀬𑀼𑀢𑁆𑀢𑀝𑁆𑀞𑀸𑀦𑀢𑁆𑀢𑀸 𑀯𑀝𑁆𑀝𑀢𑀺.

𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀻𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺. 𑀇𑀤𑀜𑁆𑀘 𑀢𑀣𑀸 𑀓𑀭𑁄𑀦𑁆𑀢𑀸𑀦𑀁 𑀓𑀭𑀡𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀏𑀓𑀯𑀡𑁆𑀡𑀲𑀼𑀢𑁆𑀢𑀓𑁂𑀦𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀺𑀩𑁆𑀩𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀧𑀝𑁆𑀝𑀫𑀼𑀔𑁂𑀢𑀺 𑀧𑀝𑁆𑀝𑀓𑁄𑀝𑀺𑀬𑀁. 𑀤𑁆𑀯𑀺𑀦𑁆𑀦𑀁 𑀧𑀝𑁆𑀝𑀸𑀦𑀁 𑀲𑀗𑁆𑀖𑀝𑁆𑀝𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀺𑀬𑀦𑁆𑀢𑁂𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂. 𑀘𑀻𑀯𑀭𑀅𑀦𑀼𑀯𑀸𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑁂𑀡𑀺𑀦𑁆𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀲𑀗𑁆𑀔𑀮𑀺𑀓𑀦𑁆𑀢𑀺 𑀩𑀺𑀴𑀸𑀮𑀩𑀦𑁆𑀥𑀦𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. ‘‘𑀯𑁂𑀡𑀺𑀁 𑀲𑀗𑁆𑀔𑀮𑀺𑀓’’𑀦𑁆𑀢𑀺 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀁 ‘‘𑀓𑀭𑁄𑀦𑁆𑀢𑀻’’𑀢𑀺 𑀓𑀭𑀡𑀓𑀺𑀭𑀺𑀬𑀸𑀧𑁂𑀓𑁆𑀔𑀁. 𑀅𑀕𑁆𑀖𑀺𑀬𑀕𑀬𑀫𑀼𑀕𑁆𑀕𑀭𑀸𑀤𑀻𑀦𑀻𑀢𑀺 𑀏𑀢𑁆𑀣 𑀅𑀕𑁆𑀖𑀺𑀬𑀁 𑀦𑀸𑀫 𑀘𑁂𑀢𑀺𑀬𑀲𑀡𑁆𑀞𑀸𑀦𑁂𑀦 𑀲𑀺𑀩𑁆𑀩𑀦𑀁, 𑀫𑀽𑀮𑁂 𑀢𑀦𑀼𑀓𑀁 𑀅𑀕𑁆𑀕𑁂 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀕𑀤𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁 𑀕𑀬𑀸, 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀫𑀼𑀕𑁆𑀕𑀭𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁 𑀫𑀼𑀕𑁆𑀕𑀭𑁄. 𑀓𑀓𑁆𑀓𑀝𑀓𑁆𑀔𑀻𑀦𑀺 𑀉𑀓𑁆𑀓𑀺𑀭𑀦𑁆𑀢𑀻𑀢𑀺 𑀕𑀡𑁆𑀞𑀺𑀓𑀧𑀝𑁆𑀝𑀧𑀸𑀲𑀓𑀧𑀝𑁆𑀝𑀸𑀦𑀁 𑀅𑀦𑁆𑀢𑁂 𑀧𑀸𑀴𑀺𑀩𑀤𑁆𑀥𑀁 𑀓𑀢𑁆𑀯𑀸 𑀓𑀓𑁆𑀓𑀝𑀓𑀸𑀦𑀁 𑀅𑀓𑁆𑀔𑀺𑀲𑀡𑁆𑀞𑀸𑀦𑀁 𑀉𑀝𑁆𑀞𑀧𑁂𑀦𑁆𑀢𑀺, 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀳𑀺 𑀦𑀻𑀳𑀝𑀲𑀼𑀢𑁆𑀢𑀸𑀦𑀁 𑀓𑁄𑀝𑀺𑀬𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀢𑀸 𑀧𑀺𑀴𑀓𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀓𑀸𑀢𑀩𑁆𑀩𑀸𑀢𑀺? 𑀓𑁄𑀡𑁂𑀳𑀺 𑀦𑀻𑀳𑀝𑀲𑀼𑀢𑁆𑀢𑀸𑀦𑀁 𑀅𑀦𑁆𑀢𑁂𑀲𑀼 𑀏𑀓𑀯𑀸𑀭𑀁 𑀕𑀡𑁆𑀞𑀺𑀓𑀓𑀭𑀡𑁂𑀦 𑀯𑀸 𑀧𑀼𑀦 ¶ 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀺𑀩𑁆𑀩𑀦𑁂𑀦 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀁 𑀓𑀢𑁆𑀯𑀸 𑀲𑀼𑀢𑁆𑀢𑀓𑁄𑀝𑀺𑀬𑁄 𑀭𑀲𑁆𑀲𑀁 𑀓𑀢𑁆𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑀸. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁂𑀦 𑀧𑀦 𑁋

‘‘𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸, 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀓𑀧𑁆𑀧𑀭𑁂’’𑀢𑀺 𑁋

𑀯𑀼𑀢𑁆𑀢𑀁. 𑀢𑀣𑀸 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑁋

‘‘𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀢𑀢𑁆𑀣, 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀤𑀻𑀧𑀺𑀢𑀸’’𑀢𑀺 𑁋

𑀯𑀼𑀢𑁆𑀢𑀁 ¶ . 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀘 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀫𑀡𑀺𑀦𑀸𑀢𑀺 𑀫𑀲𑀸𑀭𑀕𑀮𑁆𑀮𑀸𑀤𑀺𑀧𑀸𑀲𑀸𑀡𑁂𑀦. 𑀦 𑀖𑀝𑁆𑀝𑁂𑀢𑀩𑁆𑀩𑀦𑁆𑀢𑀺 𑀦 𑀖𑀁𑀲𑀺𑀢𑀩𑁆𑀩𑀁, 𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀦𑀺 𑀧𑀦 𑀲𑀗𑁆𑀔𑀸𑀤𑀻𑀳𑀺 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀭𑀚𑀦𑀓𑀸𑀮𑁂 𑀩𑀦𑁆𑀥𑀺𑀢𑀩𑁆𑀩𑀁, 𑀲𑁂𑀲𑀓𑀸𑀮𑁂 𑀫𑁄𑀘𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀕𑀡𑁆𑀞𑀺𑀓𑁂𑀢𑀺 𑀤𑀦𑁆𑀢𑀫𑀬𑀸𑀤𑀺𑀕𑀡𑁆𑀞𑀺𑀓𑁂. 𑀧𑀺𑀴𑀓𑀸𑀢𑀺 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼𑀁 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀩𑁆𑀩𑀧𑀺𑀴𑀓𑀸.

‘‘𑀢𑁂𑀮𑀯𑀡𑁆𑀡𑁄𑀢𑀺 𑀲𑀫𑀡𑀲𑀸𑀭𑀼𑀧𑁆𑀧𑀯𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀡𑀺𑀯𑀡𑁆𑀡𑀁 𑀧𑀦 𑀧𑀢𑁆𑀢𑀁 𑀅𑀜𑁆𑀜𑁂𑀦 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀢𑁆𑀢𑀫𑀡𑁆𑀟𑀮𑁂𑀢𑀺 𑀢𑀺𑀧𑀼𑀲𑀻𑀲𑀸𑀤𑀺𑀫𑀬𑁂 𑀧𑀢𑁆𑀢𑀫𑀡𑁆𑀟𑀮𑁂. ‘‘𑀦, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀭𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀺 𑀪𑀺𑀢𑁆𑀢𑀺𑀓𑀫𑁆𑀫𑀓𑀢𑀸𑀦𑀻’’𑀢𑀺 (𑀘𑀽𑀴𑀯. 𑁨𑁫𑁩) 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀓𑀭𑀤𑀦𑁆𑀢𑀓𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄 ‘‘𑀫𑀓𑀭𑀤𑀦𑁆𑀢𑀓𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀫𑀓𑀭𑀫𑀼𑀔𑀦𑁆𑀢𑀺 𑀫𑀓𑀭𑀫𑀼𑀔𑀲𑀡𑁆𑀞𑀸𑀦𑀁. 𑀤𑁂𑀟𑁆𑀠𑀼𑀪𑀲𑀻𑀲𑀦𑁆𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀲𑀡𑁆𑀞𑀸𑀦𑀁. 𑀅𑀘𑁆𑀙𑀻𑀦𑀻𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀲𑀡𑁆𑀞𑀸𑀦𑀸𑀦𑀺. 𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀁 𑀏𑀓𑀫𑁂𑀯 𑀯𑀝𑁆𑀝𑀢𑀻𑀢𑀺 𑀭𑀚𑁆𑀚𑀼𑀓𑀁 𑀩𑀦𑁆𑀥𑀦𑁆𑀢𑁂𑀦 𑀏𑀓𑀕𑀼𑀡𑀫𑁂𑀯 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀺𑀕𑀼𑀡𑀁 𑀧𑀦 𑀅𑀓𑀢𑁆𑀯𑀸 𑀏𑀓𑀭𑀚𑁆𑀚𑀼𑀓𑀫𑁂𑀯 𑀲𑀢𑀯𑀸𑀭𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀺𑀚𑁆𑀚𑀺𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀏𑀓𑀕𑀼𑀡𑀫𑁆𑀧𑀺 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀩𑀳𑀼𑀭𑀚𑁆𑀚𑀼𑀓𑁂…𑀧𑁂... 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀓𑀸𑀬𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀤𑀲𑀸 𑀲𑀦𑁆𑀥𑀸𑀬. 𑀈𑀤𑀺𑀲𑀜𑁆𑀳𑀺 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑁋

‘‘𑀏𑀓𑀭𑀚𑁆𑀚𑀼𑀫𑀬𑀁 ¶ 𑀯𑀼𑀢𑁆𑀢𑀁, 𑀫𑀼𑀦𑀺𑀦𑀸 𑀓𑀸𑀬𑀩𑀦𑁆𑀥𑀦𑀁;

𑀧𑀜𑁆𑀘𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁, 𑀏𑀓𑀫𑁆𑀧𑀺 𑀘 𑀦 𑀯𑀝𑁆𑀝𑀢𑀺.

‘‘𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸, 𑀩𑀳𑀽 𑀏𑀓𑀸𑀬 𑀭𑀚𑁆𑀚𑀼𑀬𑀸;

𑀦𑀺𑀭𑀦𑁆𑀢𑀭𑀜𑁆𑀳𑀺 𑀯𑁂𑀞𑁂𑀢𑁆𑀯𑀸, 𑀓𑀢𑀁 𑀯𑀝𑁆𑀝𑀢𑀺 𑀩𑀦𑁆𑀥𑀺𑀢𑀼’’𑀦𑁆𑀢𑀺.

𑀫𑀼𑀭𑀚𑀁 𑀧𑀦 𑀓𑀸𑀬𑀩𑀦𑁆𑀥𑀦𑀁 𑀦 𑀯𑀝𑁆𑀝𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸𑀦𑀺 𑀓𑀸𑀬𑀩𑀦𑁆𑀥𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀓𑀮𑀸𑀩𑀼𑀓𑀁 𑀤𑁂𑀟𑁆𑀠𑀼𑀪𑀓𑀁 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁭𑁮) 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀁 𑀧𑀦 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 ¶ 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀫𑀼𑀭𑀚𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻𑀢𑀺? 𑀆𑀫 𑀦 𑀕𑀘𑁆𑀙𑀢𑀺. 𑀫𑀼𑀭𑀚𑀜𑁆𑀳𑀺 𑀦𑀸𑀫 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁. 𑀓𑁂𑀘𑀺 𑀧𑀦 ‘‘𑀫𑀼𑀭𑀚𑀦𑁆𑀢𑀺 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀧𑀮𑀺𑀯𑁂𑀞𑁂𑀢𑁆𑀯𑀸 𑀓𑀢𑀭𑀚𑁆𑀚𑀽’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀘𑁂𑀢𑀁 𑀫𑀼𑀭𑀚𑀁 𑀲𑀺𑀬𑀸, ‘‘𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, ‘‘𑀢𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀫𑀼𑀭𑀚𑀁 𑀧𑀦 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀜𑁆𑀘 𑀤𑀲𑀸𑀲𑀼 𑀯𑀝𑁆𑀝𑀢𑀺 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸 𑀚𑀻𑀭𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡’’𑀦𑁆𑀢𑀺 (𑀘𑀽𑀴𑀯. 𑁨𑁭𑁮) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀦𑁆𑀢𑀺 𑀇𑀤𑀁 𑀤𑀲𑀸𑀲𑀼𑀬𑁂𑀯 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺.

𑀓𑀸𑀬𑀩𑀦𑁆𑀥𑀦𑀯𑀺𑀥𑁂𑀢𑀺 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀧𑀯𑀦𑀦𑁆𑀢𑁄 𑀚𑀻𑀭𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀬𑀩𑀦𑁆𑀥𑀦𑀲𑁆𑀲 𑀧𑀸𑀲𑀦𑁆𑀢𑁂 𑀤𑀲𑀸𑀫𑀽𑀮𑁂 𑀢𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑁆𑀢𑀩𑁆𑀩𑁂 𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑁂 𑀯𑀺𑀥𑁂. ‘‘𑀅𑀝𑁆𑀞 𑀫𑀗𑁆𑀕𑀮𑀸𑀦𑀺 𑀦𑀸𑀫 𑀲𑀗𑁆𑀔𑁄 𑀘𑀓𑁆𑀓𑀁 𑀧𑀼𑀡𑁆𑀡𑀓𑀼𑀫𑁆𑀪𑁄 𑀕𑀬𑀸 𑀲𑀺𑀭𑀻𑀯𑀘𑁆𑀙𑁄 𑀅𑀗𑁆𑀓𑀼𑀲𑁄 𑀥𑀚𑀁 𑀲𑁄𑀯𑀢𑁆𑀣𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀦𑁆𑀢𑀺 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀓𑀸𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀭𑀸𑀚𑀺𑀫𑀢𑁆𑀢𑀁. ‘‘𑀉𑀚𑀼𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀲𑁆𑀲𑀸𑀤𑀺𑀯𑀗𑁆𑀓𑀕𑀢𑀺𑀓𑀁 𑀦 𑀯𑀝𑁆𑀝𑀢𑀺. ‘‘𑀙𑀢𑁆𑀢𑀤𑀡𑁆𑀟𑀥𑀫𑁆𑀫𑀓𑀭𑀡𑀅𑀜𑁆𑀚𑀦𑀦𑀸𑀴𑀺𑀓𑀸 𑀦𑀸𑀦𑀸𑀯𑀡𑁆𑀡𑀮𑁂𑀔𑀸𑀧𑀅𑀓𑀫𑁆𑀫𑀓𑀢𑀸 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀆𑀭𑀓𑀡𑁆𑀝𑀓𑁂𑀢𑀺 𑀧𑁄𑀢𑁆𑀣𑀓𑀸𑀤𑀺𑀅𑀪𑀺𑀲𑀗𑁆𑀔𑀭𑀡𑀢𑁆𑀣𑀁 𑀓𑀢𑁂 𑀤𑀻𑀖𑀫𑀼𑀔𑀲𑀢𑁆𑀣𑀓𑁂. 𑀯𑀝𑁆𑀝𑀫𑀡𑀺𑀓𑀦𑁆𑀢𑀺 𑀯𑀝𑁆𑀝𑀁 𑀓𑀢𑁆𑀯𑀸 𑀅𑀕𑁆𑀕𑀓𑁄𑀝𑀺𑀬𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀧𑀼𑀩𑁆𑀩𑀼𑀴𑀁. 𑀅𑀜𑁆𑀜𑀁 𑀯𑀸 𑀯𑀡𑁆𑀡𑀫𑀝𑁆𑀞𑀦𑁆𑀢𑀺 𑀇𑀫𑀺𑀦𑀸 𑀧𑀺𑀴𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀡𑀺𑀓𑀦𑁆𑀢𑀺 𑀏𑀓𑀸𑀯𑀝𑁆𑀝𑀫𑀡𑀺. 𑀧𑀺𑀴𑀓𑀦𑁆𑀢𑀺 𑀲𑀸𑀲𑀧𑀫𑀢𑁆𑀢𑀺𑀓𑀸 𑀫𑀼𑀢𑁆𑀢𑀭𑀸𑀚𑀺𑀲𑀤𑀺𑀲𑀸 𑀩𑀳𑀼𑀯𑀝𑁆𑀝𑀮𑁂𑀔𑀸. ‘‘𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀅𑀯𑀼𑀢𑁆𑀢𑀢𑁆𑀢𑀸 𑀮𑁂𑀔𑀦𑀺𑀬𑀁 𑀬𑀁 𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀮𑀺𑀢𑀓𑀦𑁆𑀢𑀺 𑀫𑀚𑁆𑀛𑁂 𑀯𑀮𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀫𑀡𑁆𑀟𑀮𑀁 𑀳𑁄𑀢𑀻𑀢𑀺 𑀉𑀢𑁆𑀢𑀭𑀸𑀭𑀡𑀺𑀬𑀸 𑀧𑀯𑁂𑀲𑀦𑀢𑁆𑀣𑀁 𑀆𑀳𑀝𑀫𑀡𑁆𑀟𑀮𑀁 𑀳𑁄𑀢𑀺.

𑀓𑀺𑀜𑁆𑀘𑀸𑀧𑀺 ¶ 𑀏𑀢𑁆𑀣 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺𑀬𑁂𑀯 𑀯𑀼𑀢𑁆𑀢𑀸, 𑀫𑀳𑀸𑀯𑀸𑀲𑀺𑀬𑀫𑁆𑀧𑀺 𑀧𑀦 𑀦 𑀯𑀝𑁆𑀝𑀢𑀺𑀬𑁂𑀯. 𑀉𑀚𑀼𑀓𑀫𑁂𑀯 𑀩𑀦𑁆𑀥𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀉𑀪𑁄𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀏𑀓𑀧𑀲𑁆𑀲𑁂𑀯𑀸’’𑀢𑀺 𑀯𑀘𑀦𑀲𑁂𑀲𑁄. 𑀓𑀢𑁆𑀢𑀭𑀬𑀝𑁆𑀞𑀺𑀓𑁄𑀝𑀺𑀬𑀁 𑀓𑀢𑀅𑀬𑁄𑀯𑀮𑀬𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀬𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑁂𑀦 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺.

𑀆𑀫𑀡𑁆𑀟𑀲𑀸𑀭𑀓𑁂𑀢𑀺 ¶ 𑀆𑀫𑀮𑀓𑁂𑀳𑀺 𑀓𑀢𑀪𑀸𑀚𑀦𑁂. 𑀪𑀽𑀫𑀢𑁆𑀣𑀭𑀡𑁂𑀢𑀺 𑀘𑀺𑀢𑁆𑀢𑀓𑀝𑀲𑀸𑀭𑀓𑀘𑀺𑀢𑁆𑀢𑀢𑁆𑀣𑀭𑀡𑀸𑀤𑀺𑀓𑁂 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀅𑀢𑁆𑀣𑀭𑀺𑀢𑀩𑁆𑀩𑀅𑀢𑁆𑀣𑀭𑀡𑁂. 𑀧𑀸𑀦𑀻𑀬𑀖𑀝𑁂𑀢𑀺 𑀇𑀫𑀺𑀦𑀸 𑀓𑀼𑀡𑁆𑀟𑀺𑀓𑀲𑀭𑀓𑁂𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀩𑀻𑀚𑀦𑁂𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑁂. 𑀲𑀩𑁆𑀩𑀁…𑀧𑁂… 𑀯𑀝𑁆𑀝𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀇𑀢𑁆𑀣𑀺𑀭𑀽𑀧𑀁 𑀯𑀺𑀦𑀸 𑀲𑀩𑁆𑀩𑀁 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺 𑀯𑀡𑁆𑀡𑀫𑀝𑁆𑀞𑀁 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑁂𑀲𑀼 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀧𑀦 𑀲𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺. 𑀅𑀜𑁆𑀜𑁂𑀲𑀦𑁆𑀢𑀺 𑀲𑀻𑀫𑀲𑀸𑀫𑀺𑀦𑁄 𑀯𑀼𑀢𑁆𑀢𑀸. 𑀭𑀸𑀚𑀯𑀮𑁆𑀮𑀪𑀸 𑀧𑀭𑀦𑀺𑀓𑀸𑀬𑀺𑀓𑀸𑀧𑀺 𑀏𑀓𑀦𑀺𑀓𑀸𑀬𑀺𑀓𑀸𑀧𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀸 𑀅𑀮𑀚𑁆𑀚𑀺𑀦𑁄 𑀭𑀸𑀚𑀓𑀼𑀮𑀽𑀧𑀕𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀮𑀚𑁆𑀚𑀺𑀧𑀭𑀺𑀲𑀸𑀢𑀺 𑀢𑁂𑀲𑀁 𑀲𑀻𑀫𑀲𑀸𑀫𑀺𑀓𑀸𑀦𑀁 𑀧𑀓𑁆𑀔𑀸 𑀳𑀼𑀢𑁆𑀯𑀸 𑀅𑀦𑀼𑀩𑀮𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸 𑀮𑀚𑁆𑀚𑀺𑀧𑀭𑀺𑀲𑀸. 𑀲𑀼𑀓𑀢𑀫𑁂𑀯𑀸𑀢𑀺 𑀅𑀜𑁆𑀜𑁂𑀲𑀁 𑀲𑀦𑁆𑀢𑀓𑁂𑀧𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄𑀯𑀼𑀢𑁆𑀢𑀯𑀺𑀥𑀺𑀦𑀸 𑀓𑀢𑀁 𑀲𑀼𑀓𑀢𑀫𑁂𑀯.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁬. 𑀤𑁂𑀯𑁂𑀦 𑀕𑀳𑀺𑀢𑀤𑀸𑀭𑀽𑀦𑀻𑀢𑀺 𑀭𑀜𑁆𑀜𑀸 𑀧𑀭𑀺𑀕𑁆𑀕𑀳𑀺𑀢𑀤𑀸𑀭𑀽𑀦𑀺, 𑀭𑀜𑁆𑀜𑁄 𑀲𑀦𑁆𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑁄𑀦𑁆𑀢𑁄𑀢𑀺 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀜𑁆𑀘 𑀔𑀡𑁆𑀟𑀁 𑀓𑀭𑁄𑀦𑁆𑀢𑁄.

𑁮𑁭. 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀫𑀳𑀢𑀻 𑀫𑀢𑁆𑀢𑀸 𑀧𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀫𑀢𑁆𑀢𑁄. 𑀢𑁂𑀦𑀸𑀳 𑁋 ‘‘𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑁮𑁮. 𑀅𑀯𑀚𑁆𑀛𑀸𑀬𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺, 𑀘𑀺𑀦𑁆𑀢𑁂𑀦𑁆𑀢𑀺 𑀯𑀸. 𑀢𑁂𑀦𑀸𑀳 ‘‘𑀅𑀯𑀚𑀸𑀦𑀦𑁆𑀢𑀸’’𑀢𑀺𑀆𑀤𑀺. 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀦𑀺𑀳𑀻𑀦𑀢𑁄 𑀘𑀺𑀦𑁆𑀢𑁂𑀦𑁆𑀢𑀺. 𑀓𑀣𑁂𑀦𑁆𑀢𑀻𑀢𑀺 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀓𑀣𑁂𑀦𑁆𑀢𑀺.

𑀓𑀣𑀁 𑀧𑀦𑁂𑀢𑁆𑀣 ‘‘𑀤𑀸𑀭𑀽𑀦𑀻’’𑀢𑀺 𑀩𑀳𑀼𑀯𑀘𑀦𑀁 ‘‘𑀅𑀤𑀺𑀦𑁆𑀦’’𑀦𑁆𑀢𑀺 𑀏𑀓𑀯𑀘𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀻𑀢𑀺 𑀆𑀳 𑁋 ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀢𑀻𑀢𑀺 𑀅𑀬𑀁 𑀉𑀚𑁆𑀛𑀸𑀬𑀦𑀢𑁆𑀣𑁄’’𑀢𑀺𑀆𑀤𑀺. 𑀉𑀚𑁆𑀛𑀸𑀬𑀦𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀲𑀬𑀢𑁆𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀁 𑀉𑀚𑁆𑀛𑀸𑀬𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀧𑀦𑁂𑀢𑁆𑀣 𑀕𑁄𑀧𑀓𑁂𑀦 𑀤𑀺𑀦𑁆𑀦𑀤𑀸𑀭𑀽𑀦𑀁 ¶ 𑀕𑀳𑀡𑁂 𑀉𑀚𑀼𑀓𑀁 𑀅𑀯𑀢𑁆𑀯𑀸 𑀮𑁂𑀲𑁂𑀦 𑀕𑀳𑀺𑀢𑀢𑁆𑀢𑀸 𑀣𑁂𑀭𑁄 ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀘𑀦𑀪𑁂𑀤𑁂𑀢𑀺 𑀏𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀁 𑀪𑁂𑀤𑁂.

𑀲𑀩𑁆𑀩𑀸𑀯𑀦𑁆𑀢𑀁 ¶ 𑀧𑀭𑀺𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀆𑀤𑀺𑀲𑀩𑁆𑀩𑀸𑀯𑀬𑀯𑀯𑀦𑁆𑀢𑀁 𑀧𑀭𑀺𑀲𑀁. 𑀲𑀩𑁆𑀩𑀸 𑀘𑀢𑀼𑀧𑀭𑀺𑀲𑀲𑀗𑁆𑀔𑀆𑀢𑀸 𑀧𑀚𑀸 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀲𑀩𑁆𑀩𑀸𑀯𑀦𑁆𑀢𑀸, 𑀧𑀭𑀺𑀲𑀸. 𑀲𑁂𑀦𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑁂𑀦𑀺𑀓𑁄, 𑀲𑁂𑀦𑀺𑀓𑁄 𑀏𑀯 𑀲𑁂𑀦𑀺𑀬𑁄. 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀦𑁆𑀢𑀺 𑀏𑀢𑁆𑀣 𑀩𑀺𑀫𑁆𑀩𑀻𑀢𑀺 𑀲𑀼𑀯𑀡𑁆𑀡𑀁, 𑀢𑀲𑁆𑀫𑀸 𑀲𑀸𑀭𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀢𑀸𑀬 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑁄 𑀪𑀸𑀕𑁄 𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀫𑀺𑀦𑀸𑀯 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲 𑀯𑀻𑀲𑀢𑀺𑀫𑁄 𑀪𑀸𑀕𑁄 𑀫𑀸𑀲𑀓𑁄𑀢𑀺 𑀇𑀤𑀜𑁆𑀘 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀉𑀧𑁆𑀧𑀸𑀤𑀺𑀢𑀸 𑀦𑀻𑀮𑀓𑀳𑀸𑀧𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀼𑀤𑁆𑀭𑀤𑀸𑀫𑁂𑀦 𑀉𑀧𑁆𑀧𑀸𑀤𑀺𑀢𑁄 𑀭𑀼𑀤𑁆𑀭𑀤𑀸𑀫𑀓𑁄. 𑀲𑁄 𑀓𑀺𑀭 𑀦𑀻𑀮𑀓𑀳𑀸𑀧𑀡𑀲𑁆𑀲 𑀢𑀺𑀪𑀸𑀕𑀁 𑀅𑀕𑁆𑀖𑀢𑀺. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀮𑀓𑀳𑀸𑀧𑀡𑀸 𑀦 𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀦𑀻𑀮𑀓𑀳𑀸𑀧𑀡𑀸𑀦𑀁 𑀯𑀴𑀜𑁆𑀚𑀦𑀝𑁆𑀞𑀸𑀦𑁂 𑀘 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑁂 𑀘 𑀲𑀫𑀸𑀦𑀅𑀕𑁆𑀖𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦𑀻𑀮𑀓𑀳𑀸𑀧𑀡𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀯𑀤𑀦𑁆𑀢𑀺.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀲𑁆𑀲𑀢𑁆𑀣𑁄…𑀧𑁂… 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 ‘‘𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀘, 𑀇𑀤𑀜𑁆𑀘 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀤𑀧𑀸𑀤𑀻’’𑀢𑀺 𑀏𑀯𑀁 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁩𑁯) 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀤𑀸𑀦𑀺 𑀬𑀁 𑀢𑀁 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀏𑀯𑀁 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀫𑁆𑀩𑀦𑁆𑀥𑁄 𑀘 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑁯𑁦-𑁯𑁧. 𑀭𑀚𑀓𑀸 𑀅𑀢𑁆𑀣𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀭𑀚𑀓𑀢𑁆𑀣𑀭𑀡𑀁, 𑀭𑀚𑀓𑀢𑁆𑀣𑀭𑀡𑀦𑁆𑀢𑀺 𑀭𑀚𑀓𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀭𑀚𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁯𑁨. ‘‘𑀅𑀪𑀺𑀦𑀯𑀦𑀺𑀯𑀺𑀝𑁆𑀞𑁄 𑀏𑀓𑀓𑀼𑀝𑀺𑀓𑀸𑀤𑀺𑀕𑀸𑀫𑁄 𑀬𑀸𑀯 𑀫𑀦𑀼𑀲𑁆𑀲𑀸 𑀧𑀯𑀺𑀲𑀺𑀢𑁆𑀯𑀸 𑀯𑀸𑀲𑀁 𑀦 𑀓𑀧𑁆𑀧𑁂𑀦𑁆𑀢𑀺, 𑀢𑀸𑀯 𑀕𑀸𑀫𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀼𑀘𑁆𑀙𑀸𑀤𑀺𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀺. 𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄𑀢𑀺 𑀲𑀉𑀧𑀤𑁆𑀤𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀓𑁆𑀔𑀦𑀕𑀭𑀸𑀤𑀺𑀁 𑀯𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀓𑁆𑀔𑀦𑀕𑀭𑀫𑁆𑀧𑀺 𑀆𑀧𑀡𑀸𑀤𑀻𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀕𑀸𑀫𑀲𑀗𑁆𑀔𑁆𑀬𑀁 ¶ 𑀕𑀘𑁆𑀙𑀢𑀺, 𑀅𑀤𑀺𑀲𑁆𑀲𑀫𑀸𑀦𑁂𑀲𑀼 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 ¶ 𑀬𑀓𑁆𑀔𑀦𑀕𑀭𑀫𑁆𑀧𑀺 𑀧𑀯𑀺𑀲𑀦𑁆𑀢𑁂𑀦 𑀆𑀧𑀡𑀸𑀤𑀻𑀲𑀼 𑀤𑀺𑀲𑁆𑀲𑀫𑀸𑀦𑁂𑀲𑀼 𑀲𑀩𑁆𑀩𑀁 𑀕𑀸𑀫𑀧𑁆𑀧𑀯𑁂𑀲𑀦𑀯𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀅𑀤𑀺𑀲𑁆𑀲𑀫𑀸𑀦𑁂𑀲𑀼 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀼𑀦𑀧𑀺 𑀆𑀕𑀦𑁆𑀢𑀼𑀓𑀸𑀫𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀢𑀢𑁆𑀣 𑀲𑀸𑀧𑁂𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀧𑀦 𑀦𑀺𑀭𑀧𑁂𑀓𑁆𑀔𑀸𑀯 𑀳𑀼𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀲𑁄 𑀕𑀸𑀫𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀼𑀘𑁆𑀙𑀸𑀤𑀺𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀺.

𑀦𑀦𑀼 𑀘 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀕𑀸𑀫𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀜𑁆𑀜𑀫𑁂𑀯 𑀤𑀲𑁆𑀲𑁂𑀢𑀩𑁆𑀩𑀁 𑀲𑀺𑀬𑀸, 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸𑀢𑀺𑀆𑀤𑀺 𑀧𑀦 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀕𑀸𑀫𑀽𑀧𑀘𑀸𑀭𑁄𑀢𑀺𑀆𑀤𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. 𑀕𑀸𑀫𑀽𑀧𑀘𑀸𑀭𑁂 𑀳𑀺 𑀤𑀲𑁆𑀲𑀺𑀢𑁂 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫𑀸𑀢𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑁄 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀁, 𑀇𑀤𑀜𑁆𑀘 𑀕𑀸𑀫𑀕𑀸𑀫𑀽𑀧𑀘𑀸𑀭𑁂 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀬𑀁 𑀧𑀦 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀸𑀫𑀽𑀧𑀘𑀸𑀭𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀕𑀸𑀫𑀽𑀧𑀘𑀸𑀭𑁄 𑀳𑀺 𑀮𑁄𑀓𑁂 𑀕𑀸𑀫𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀸𑀢𑀺𑀓𑀸𑀬 𑀅𑀦𑀯𑀲𑁂𑀲𑀅𑀯𑀳𑀭𑀡𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀇𑀦𑁆𑀤𑀔𑀻𑀮𑁂𑀢𑀺 𑀉𑀫𑁆𑀫𑀸𑀭𑁂. 𑀅𑀭𑀜𑁆𑀜𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀻𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀢𑁆𑀢𑀸. 𑀯𑁂𑀫𑀚𑁆𑀛𑀫𑁂𑀯 𑀇𑀦𑁆𑀤𑀔𑀻𑀮𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀦𑁆𑀤𑀔𑀻𑀮𑀝𑁆𑀞𑀸𑀦𑀺𑀬𑀢𑁆𑀢𑀸 𑀅𑀲𑀢𑀺𑀧𑀺 𑀇𑀦𑁆𑀤𑀔𑀻𑀮𑁂 𑀯𑁂𑀫𑀚𑁆𑀛𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺. 𑀬𑀢𑁆𑀣 𑀧𑀦 𑀤𑁆𑀯𑀸𑀭𑀩𑀸𑀳𑀸𑀧𑀺 𑀦𑀢𑁆𑀣𑀺, 𑀢𑀢𑁆𑀣 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀯𑀢𑀺𑀬𑀸 𑀯𑀸 𑀧𑀸𑀓𑀸𑀭𑀲𑁆𑀲 𑀯𑀸 𑀓𑁄𑀝𑀺𑀯𑁂𑀫𑀚𑁆𑀛𑀫𑁂𑀯 𑀇𑀦𑁆𑀤𑀔𑀻𑀮𑀝𑁆𑀞𑀸𑀦𑀺𑀬𑀢𑁆𑀢𑀸 ‘‘𑀇𑀦𑁆𑀤𑀔𑀻𑀮𑁄’’𑀢𑀺 𑀕𑀳𑁂𑀢𑀩𑁆𑀩𑀁. 𑀉𑀟𑁆𑀟𑀸𑀧𑁂𑀦𑁆𑀢𑁄𑀢𑀺 𑀧𑀮𑀸𑀧𑁂𑀦𑁆𑀢𑁄. 𑀮𑀼𑀞𑀺𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸.

𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀲𑀼𑀧𑁆𑀧𑀫𑀼𑀲𑀮𑀧𑀸𑀢𑁄𑀧𑀺 𑀩𑀮𑀤𑀲𑁆𑀲𑀦𑀯𑀲𑁂𑀦𑁂𑀯 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀖𑀭𑀽𑀧𑀘𑀸𑀭𑁄 𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀭𑁂𑀢𑀺 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀢𑀦𑀝𑁆𑀞𑀸𑀦𑀢𑁄 𑀅𑀩𑁆𑀪𑀦𑁆𑀢𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀕𑁂𑀳𑁂𑀢𑀺 𑀘 𑀧𑀫𑀼𑀔𑀲𑁆𑀲 𑀅𑀩𑁆𑀪𑀦𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀢𑀧𑀭𑀺𑀓𑁆𑀔𑁂𑀧𑁄𑀢𑀺 𑀇𑀫𑀺𑀦𑀸𑀯 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀢𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀖𑀭𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲 𑀧𑀦 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀕𑁄𑀭𑀽𑀧𑀸𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀁 𑀧𑀸𑀓𑀸𑀭𑀯𑀢𑀺𑀆𑀤𑀻𑀳𑀺 𑀧𑀭𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀺, 𑀢𑀢𑁆𑀣 𑀲𑁄𑀯 𑀧𑀭𑀺𑀓𑁆𑀔𑁂𑀧𑁄 𑀖𑀭𑀽𑀧𑀘𑀸𑀭𑁄, 𑀲𑀼𑀧𑁆𑀧𑀧𑀸𑀢𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑀖𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀇𑀤𑀫𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀕𑀸𑀫𑀕𑀸𑀫𑀽𑀧𑀘𑀸𑀭𑀸𑀦𑀁 𑀅𑀲𑀗𑁆𑀓𑀭𑀢𑁄 𑀯𑀺𑀦𑀺𑀘𑁆𑀙𑀬𑀲𑁆𑀲 𑀯𑁂𑀤𑀺𑀢𑀩𑁆𑀩𑀢𑁆𑀢𑀸. 𑀓𑀼𑀭𑀼𑀦𑁆𑀤𑀻𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀳𑀺 𑀖𑀭𑀽𑀧𑀘𑀸𑀭𑀲𑁆𑀲 𑀕𑀸𑀫𑁄𑀢𑀺 𑀆𑀧𑀦𑁆𑀦𑀢𑁆𑀢𑀸 𑀖𑀭𑀖𑀭𑀽𑀧𑀘𑀸𑀭𑀕𑀸𑀫𑀕𑀸𑀫𑀽𑀧𑀘𑀸𑀭𑀸𑀦𑀁 𑀲𑀗𑁆𑀓𑀭𑁄 𑀲𑀺𑀬𑀸. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 𑀇𑀫𑀺𑀦𑀸 𑀇𑀢𑁄 𑀧𑀼𑀩𑁆𑀩𑁂𑀧𑀺 𑀧𑀘𑁆𑀙𑀺𑀫𑀲𑁆𑀲𑁂𑀯 𑀯𑀸𑀤𑀲𑁆𑀲 𑀧𑀫𑀸𑀡𑀪𑀸𑀯𑀁 𑀤𑀲𑁆𑀲𑁂𑀢𑀺 ¶ . 𑀓𑁂𑀘𑀺 𑀧𑀦 ‘‘𑀇𑀢𑁄 𑀧𑀝𑁆𑀞𑀸𑀬 𑀯𑀓𑁆𑀔𑀫𑀸𑀦𑀯𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀲𑁂𑀲𑀫𑁆𑀧𑀻𑀢𑀺 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀕𑀸𑀫𑀽𑀧𑀘𑀸𑀭𑀕𑁆𑀕𑀳𑀡𑁂. 𑀢𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀢𑀲𑁆𑀲 𑀅𑀧𑀭𑀺𑀘𑁆𑀙𑁂𑀤𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 ‘‘𑀕𑀸𑀫𑁄 𑀦𑀸𑀫𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? ‘‘𑀕𑀸𑀫𑁄 𑀦𑀸𑀫𑀸𑀢𑀺 𑀇𑀥 𑀅𑀯𑀼𑀢𑁆𑀢𑀫𑁆𑀧𑀺 𑀅𑀥𑀺𑀓𑀸𑀭𑀯𑀲𑁂𑀦 𑀮𑀩𑁆𑀪𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀇𑀫𑀺𑀦𑀸𑀯 𑀕𑀸𑀫𑀲𑁆𑀲 𑀘 𑀕𑀸𑀫𑀽𑀧𑀘𑀸𑀭𑀲𑁆𑀲 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑀣𑀁? ‘𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀕𑀸𑀫𑀽𑀧𑀘𑀸𑀭𑁄’𑀢𑀺 𑀏𑀯𑀁 𑀯𑀺𑀕𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 ‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’𑀢𑀺 𑀇𑀫𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺, ‘𑀕𑀸𑀫𑀲𑀗𑁆𑀔𑀸𑀢𑁄 𑀉𑀧𑀘𑀸𑀭𑁄 𑀕𑀸𑀫𑀽𑀧𑀘𑀸𑀭𑁄’𑀢𑀺 𑀏𑀯𑀁 𑀧𑀦 𑀕𑀬𑁆𑀳𑀫𑀸𑀦𑁂 ‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’𑀢𑀺 𑀇𑀫𑀺𑀦𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺. ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀧𑀺 𑀕𑀸𑀫𑀲𑁆𑀲 𑀲𑀘𑁂 𑀮𑁂𑀟𑁆𑀟𑀼𑀧𑀸𑀢𑀢𑁄 𑀤𑀽𑀭𑁂 𑀧𑀭𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀮𑁂𑀟𑁆𑀟𑀼𑀧𑀸𑀢𑁄𑀬𑁂𑀯 𑀕𑀸𑀫𑀧𑀭𑀺𑀘𑁆𑀙𑁂𑀤𑁄𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀲𑀗𑁆𑀓𑀭𑀻𑀬𑀢𑀻𑀢𑀺 𑀫𑀺𑀲𑁆𑀲𑀻𑀬𑀢𑀺. 𑀏𑀢𑁆𑀣𑀸𑀢𑀺 𑀖𑀭𑀖𑀭𑀽𑀧𑀘𑀸𑀭𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼. ‘‘𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑁂 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁧𑁩) 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀕𑀸𑀫𑀽𑀧𑀘𑀸𑀭𑀸𑀦𑀁 𑀅𑀲𑀗𑁆𑀓𑀭𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 𑁋 ‘‘𑀅𑀲𑀗𑁆𑀓𑀭𑀢𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀽’’𑀢𑀺. 𑀏𑀢𑁆𑀣 𑀘 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 ¶ 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀧𑀤𑀪𑀸𑀚𑀦𑀺𑀬𑀁 𑀧𑀦 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁧𑁩) 𑀯𑀼𑀢𑁆𑀢𑀢𑁆𑀢𑀸. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀕𑀸𑀫𑀽𑀧𑀘𑀸𑀭𑀲𑁆𑀲 𑀑𑀓𑁆𑀓𑀫𑀦𑁂 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁫𑁧𑁨) ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀬𑁆𑀯𑀸𑀬𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀲 𑀯𑀲𑁂𑀦 ¶ 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺. 𑀬𑀤𑀺 𑀏𑀯𑀁 ‘‘𑀯𑀺𑀓𑀸𑀮𑁂 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺 𑀕𑀸𑀫𑀽𑀧𑀘𑀸𑀭𑀲𑁆𑀲𑀧𑀺 𑀕𑀸𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀖𑀭𑀖𑀭𑀽𑀧𑀘𑀸𑀭𑀸𑀤𑀻𑀲𑀼 𑀞𑀺𑀢𑀸𑀦𑀁 𑀉𑀧𑁆𑀧𑀦𑁆𑀦𑀮𑀸𑀪𑀪𑀸𑀚𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀸𑀯 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜’’𑀦𑁆𑀢𑀺 (𑀧𑀸𑀭𑀸. 𑁯𑁨) 𑀆𑀕𑀢𑀁, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀆𑀕𑀢𑀁. 𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀸 𑀉𑀪𑁄𑀧𑀺 𑀧𑀭𑀺𑀬𑀸𑀬𑀤𑁂𑀲𑀦𑀸 𑀦𑀸𑀫, 𑀅𑀪𑀺𑀥𑀫𑁆𑀫𑁄 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘 𑀕𑀸𑀫𑀯𑀺𑀦𑀺𑀫𑀼𑀢𑁆𑀢𑀁 𑀞𑀸𑀦𑀁 𑀅𑀭𑀜𑁆𑀜𑀫𑁂𑀯 𑀳𑁄𑀢𑀻𑀢𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀅𑀭𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸’’𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁. ‘‘𑀆𑀘𑀭𑀺𑀬𑀥𑀦𑀼 𑀦𑀸𑀫 𑀧𑀓𑀢𑀺𑀳𑀢𑁆𑀣𑁂𑀦 𑀦𑀯𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁, 𑀚𑀺𑀬𑀸𑀬 𑀧𑀦 𑀆𑀭𑁄𑀧𑀺𑀢𑀸𑀬 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀮𑁂𑀲𑁄𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀦𑁆𑀢𑀺 ‘‘𑀫𑀬𑀸 𑀦𑁂𑀯 𑀕𑀸𑀫𑁂, 𑀦 𑀅𑀭𑀜𑁆𑀜𑁂 𑀳𑀝𑀁, 𑀖𑀭𑁂 𑀯𑀸 𑀖𑀭𑀽𑀧𑀘𑀸𑀭𑁂𑀲𑀼 𑀯𑀸 𑀕𑀸𑀫𑀽𑀧𑀘𑀸𑀭𑁂𑀲𑀼 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀧𑁆𑀧𑀺𑀬𑀦𑁆𑀢𑀺 𑀅𑀦𑀼𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀫𑁆𑀧𑀺 𑀧𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀜𑁆𑀘𑁂, 𑀅𑀤𑀺𑀦𑁆𑀦𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑁆𑀳𑀺 𑀅𑀓𑀢𑁂 ‘‘𑀇𑀤𑀁 𑀫𑀬𑁆𑀳𑀁 𑀲𑀦𑁆𑀢𑀓’’𑀦𑁆𑀢𑀺 𑀅𑀯𑀺𑀤𑀺𑀢𑀫𑁆𑀧𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁂𑀯 ¶ 𑀫𑀸𑀢𑀸𑀧𑀺𑀢𑀽𑀦𑀁 𑀅𑀘𑁆𑀘𑀬𑁂𑀦 𑀫𑀦𑁆𑀤𑀸𑀦𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀦𑀁 𑀤𑀸𑀭𑀓𑀸𑀦𑀁 𑀲𑀦𑁆𑀢𑀓𑀫𑀺𑀯.

𑀬𑀲𑁆𑀲 𑀯𑀲𑁂𑀦 𑀧𑀼𑀭𑀺𑀲𑁄 𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀣𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑀗𑁆𑀔𑀸-𑀲𑀤𑁆𑀤𑁄 𑀜𑀸𑀡𑀓𑁄𑀝𑁆𑀞𑀸𑀲𑀧𑀜𑁆𑀜𑀢𑁆𑀢𑀺𑀕𑀡𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁬𑁮) 𑀳𑀺 𑀜𑀸𑀡𑁂 𑀤𑀺𑀲𑁆𑀲𑀢𑀺. ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁦𑁪) 𑀓𑁄𑀝𑁆𑀞𑀸𑀲𑁂. ‘‘𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁧𑁩) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁧𑁯𑁬; 𑀅𑀧. 𑀣𑁂𑀭. 𑁧.𑁧𑁦.𑁨) 𑀕𑀡𑀦𑀸𑀬𑀁. 𑀢𑀢𑁆𑀣 𑀓𑁄𑀝𑁆𑀞𑀸𑀲𑀯𑀘𑀦𑀁 𑀲𑀗𑁆𑀔𑀸-𑀲𑀤𑁆𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀗𑁆𑀔𑀸𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸. ‘‘𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀬𑀜𑁆𑀘 𑀧𑀼𑀩𑁆𑀩𑀪𑀸𑀕𑁂 𑀅𑀯𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁, 𑀬𑀜𑁆𑀘 𑀕𑀫𑀦𑀸𑀤𑀺𑀲𑀸𑀥𑀓𑀁 𑀧𑀭𑀸𑀫𑀲𑀦𑀸𑀤𑀺𑀲𑀸𑀥𑀓𑀁 𑀯𑀸 𑀫𑀚𑁆𑀛𑁂 𑀧𑀯𑀢𑁆𑀢𑀁, 𑀬𑀜𑁆𑀘 ¶ 𑀞𑀸𑀦𑀸𑀘𑀸𑀯𑀦𑀧𑁆𑀧𑀬𑁄𑀕𑀲𑀸𑀥𑀓𑀁, 𑀢𑁂𑀲𑀼 𑀅𑀬𑀫𑁂𑀯𑁂𑀓𑁄 𑀧𑀘𑁆𑀙𑀺𑀫𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀘𑀽𑀴𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀊𑀦𑀫𑀸𑀲𑀓𑀫𑀸𑀲𑀓𑀊𑀦𑀧𑀜𑁆𑀘𑀫𑀸𑀲𑀓𑀧𑀜𑁆𑀘𑀫𑀸𑀲𑀓𑀸𑀯𑀳𑀭𑀡𑀘𑀺𑀢𑁆𑀢𑁂𑀲𑀼 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑁂𑀓𑀧𑁆𑀧𑀪𑁂𑀤𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁. 𑀇𑀤𑀫𑁂𑀯𑁂𑀢𑁆𑀣 𑀲𑀼𑀦𑁆𑀤𑀭𑀢𑀭𑀁 ‘‘𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁂𑀦 𑀓𑀭𑀡𑀪𑀽𑀢𑁂𑀦, 𑀦 𑀯𑀺𑀲𑁆𑀲𑀸𑀲𑀢𑀸𑀯𑀓𑀸𑀮𑀺𑀓𑀸𑀤𑀺𑀕𑀸𑀳𑀯𑀲𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀬𑁄𑀕𑀯𑀲𑁂𑀦𑀸𑀢𑀺 𑀅𑀟𑁆𑀟𑀓𑀭𑀡𑀯𑀲𑁂𑀦. 𑀅𑀪𑀺𑀬𑀼𑀜𑁆𑀚𑀢𑀻𑀢𑀺 𑀘𑁄𑀤𑁂𑀢𑀺, 𑀅𑀟𑁆𑀟𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀦𑁆𑀢𑀺 𑀑𑀓𑀸𑀲𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀧𑀭𑀺𑀓𑀧𑁆𑀧𑀺𑀢𑀧𑁆𑀧𑀤𑁂𑀲𑀁. 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀏𑀢𑁆𑀣 𑀭𑀸𑀚𑀽𑀦𑀁 𑀤𑁂𑀬𑁆𑀬𑀪𑀸𑀕𑀲𑁆𑀲 𑀏𑀢𑀁 𑀅𑀥𑀺𑀯𑀘𑀦𑀁 𑀲𑀼𑀗𑁆𑀓𑁄𑀢𑀺, 𑀲𑁄 𑀏𑀢𑁆𑀣 𑀳𑀜𑁆𑀜𑀢𑀺 𑀅𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀻𑀢𑀺 𑀲𑀼𑀗𑁆𑀓𑀖𑀸𑀢𑁄. ‘‘𑀏𑀢𑁆𑀣 𑀧𑀯𑀺𑀝𑁆𑀞𑁂𑀳𑀺 𑀲𑀼𑀗𑁆𑀓𑁄 𑀤𑀸𑀢𑀩𑁆𑀩𑁄’’𑀢𑀺 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀺𑀲𑀜𑁆𑀜𑀸𑀡𑁂𑀦 𑀦𑀺𑀬𑀫𑀺𑀢𑀧𑁆𑀧𑀤𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑀆𑀓𑀼𑀮𑀸𑀢𑀺 ¶ 𑀲𑀗𑁆𑀓𑀼𑀮𑀸. 𑀮𑀼𑀴𑀺𑀢𑀸𑀢𑀺 𑀯𑀺𑀮𑁄𑀴𑀺𑀢𑀸. 𑀓𑀢𑁆𑀣𑀘𑀻𑀢𑀺 𑀏𑀓𑀺𑀲𑁆𑀲𑀸𑀬 𑀅𑀝𑁆𑀞𑀓𑀣𑀸𑀬𑀁. 𑀏𑀓𑀁 𑀧𑀜𑁆𑀘𑀓𑀁 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀻 𑀘, 𑀕𑀭𑀼𑀓𑁄 𑀘 𑀳𑁄𑀢𑀺 𑀧𑀭𑀺𑀓𑁆𑀔𑀸𑀭𑁄 𑀧𑀜𑁆𑀘𑀫𑀸𑀲𑀓𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁄 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁨𑁨) 𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀅𑀯𑀳𑀸𑀭𑀗𑁆𑀕𑀸𑀦𑀺 𑀏𑀓𑀁 𑀧𑀜𑁆𑀘𑀓𑀦𑁆𑀢𑀺 𑀤𑀲𑁆𑀲𑀺𑀢𑀁. 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 ‘‘𑀙𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀦 𑀘 𑀲𑀓𑀲𑀜𑁆𑀜𑀻, 𑀦 𑀘 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀻, 𑀦 𑀘 𑀢𑀸𑀯𑀓𑀸𑀮𑀺𑀓𑀁, 𑀕𑀭𑀼𑀓𑁄 𑀘 𑀳𑁄𑀢𑀺 𑀧𑀭𑀺𑀓𑁆𑀔𑀸𑀭𑁄 𑀧𑀜𑁆𑀘𑀫𑀸𑀲𑀓𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁄 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀏𑀓𑀁 𑀧𑀜𑁆𑀘𑀓𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀜𑁆𑀘𑀓𑀜𑁆𑀘 𑀕𑀳𑁂𑀢𑁆𑀯𑀸 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀏𑀢𑁆𑀣 𑀧𑀦𑀸𑀢𑀺 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼. 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀻𑀢𑀺 ‘‘𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺. 𑀮𑀩𑁆𑀪𑀫𑀸𑀦𑀸𑀦𑀺𑀬𑁂𑀯 𑀧𑀜𑁆𑀘𑀓𑀸𑀦𑀻𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑁂𑀲𑀼 𑀮𑀩𑁆𑀪𑀫𑀸𑀦𑀧𑀜𑁆𑀘𑀓𑀸𑀦𑀺.

𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀲𑀫𑀽𑀳𑁄 𑀧𑀜𑁆𑀘𑀓𑀁, 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻𑀢𑀺 ¶ 𑀲𑀸𑀳𑀢𑁆𑀣𑀺𑀓𑁄, 𑀅𑀯𑀳𑀸𑀭𑁄. 𑀲𑀸𑀳𑀢𑁆𑀣𑀺𑀓𑀸𑀤𑀺 𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀦𑁆𑀢𑀺 𑀆𑀤𑀺𑀧𑀤𑀯𑀲𑁂𑀦 𑀦𑀸𑀫𑀮𑀸𑀪𑁄 𑀤𑀝𑁆𑀞𑀩𑁆𑀩𑁄 𑀓𑀼𑀲𑀮𑀸𑀤𑀺𑀢𑁆𑀢𑀺𑀓𑀲𑁆𑀲 𑀓𑀼𑀲𑀮𑀢𑁆𑀢𑀺𑀓𑀯𑁄𑀳𑀸𑀭𑁄 𑀯𑀺𑀬. 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀼𑀩𑁆𑀩𑀧𑀬𑁄𑀕𑀸𑀤𑀺 𑀧𑀜𑁆𑀘𑀓𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁, 𑀣𑁂𑀬𑁆𑀬𑀸𑀯𑀳𑀸𑀭𑀸𑀤𑀺 𑀧𑀜𑁆𑀘𑀓𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺 𑀦𑀸𑀫𑀮𑀸𑀪𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀢𑀢𑀺𑀬𑀧𑀜𑁆𑀘𑀫𑁂𑀲𑀼 𑀧𑀜𑁆𑀘𑀓𑁂𑀲𑀽𑀢𑀺 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑁂𑀲𑀼. 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦𑀸𑀢𑀺 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑁂 𑀮𑀩𑁆𑀪𑀫𑀸𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀧𑀤𑀲𑁆𑀲 𑀯𑀲𑁂𑀦 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑁂 𑀮𑀩𑁆𑀪𑀫𑀸𑀦𑀲𑁆𑀲 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀧𑀤𑀲𑁆𑀲 𑀘 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀆𑀡𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑁄 𑀅𑀯𑀳𑀸𑀭𑁄 𑀆𑀡𑀢𑁆𑀢𑀺𑀓𑁄. 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑁂 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁂 𑀯𑀸 𑀞𑀢𑁆𑀯𑀸 𑀪𑀡𑁆𑀟𑀲𑁆𑀲 𑀩𑀳𑀺 𑀧𑀸𑀢𑀦𑀁. 𑀦𑀺𑀲𑁆𑀲𑀕𑁆𑀕𑁄𑀯 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 ¶ 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄. ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸’’𑀢𑀺 𑀏𑀯𑀭𑀽𑀧𑁄 𑀳𑀺 𑀆𑀡𑀸𑀧𑀦𑀧𑀬𑁄𑀕𑁄 𑀧𑀭𑀲𑁆𑀲 𑀢𑁂𑀮𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁 𑀅𑀯𑀲𑁆𑀲𑀁 𑀧𑀺𑀯𑀦𑀓𑀸𑀦𑀁 𑀉𑀧𑀸𑀳𑀦𑀸𑀤𑀻𑀦𑀁 𑀦𑀺𑀓𑁆𑀔𑁂𑀧𑀧𑀬𑁄𑀕𑁄 𑀘 𑀆𑀡𑀢𑁆𑀢𑀲𑁆𑀲 𑀪𑀡𑁆𑀟𑀕𑁆𑀕𑀳𑀡𑀢𑁄 𑀉𑀧𑀸𑀳𑀦𑀸𑀤𑀻𑀦𑀁 𑀢𑁂𑀮𑀧𑀸𑀢𑀦𑀢𑁄 𑀘 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀲𑀸𑀳𑀢𑁆𑀣𑀺𑀓𑀧𑀬𑁄𑀕𑁄𑀧𑀺 𑀳𑀺 𑀏𑀯𑀭𑀽𑀧𑁄 𑀅𑀢𑁆𑀣𑀲𑀸𑀥𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑁋

‘‘𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀢𑀁 𑀅𑀯𑀳𑀭𑀸’𑀢𑀺 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀭𑀲𑁆𑀲 𑀯𑀸 𑀧𑀦 𑀢𑁂𑀮𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁 𑀅𑀯𑀲𑁆𑀲𑀁 𑀧𑀺𑀯𑀦𑀓𑀸𑀦𑀺 𑀉𑀧𑀸𑀳𑀦𑀸𑀤𑀻𑀦𑀺 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀥𑀼𑀭𑀲𑁆𑀲 𑀦𑀺𑀓𑁆𑀔𑀺𑀧𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁄. 𑀆𑀭𑀸𑀫𑀸𑀪𑀺𑀬𑀼𑀜𑁆𑀚𑀦𑀸𑀤𑀻𑀲𑀼 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀤𑀸𑀦𑀕𑁆𑀕𑀳𑀡𑁂𑀲𑀼 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑀸𑀧𑀚𑁆𑀚𑀦𑀁. 𑀲𑀳𑀢𑁆𑀣𑀸 𑀅𑀯𑀳𑀭𑀢𑀻𑀢𑀺 𑀲𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺. ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀤𑀺 𑀏𑀯𑀁 𑀇𑀫𑀲𑁆𑀲, 𑀅𑀢𑁆𑀣𑀲𑀸𑀥𑀓𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄𑀢𑀺? 𑀢𑀗𑁆𑀔𑀡𑀜𑁆𑀜𑁂𑀯 𑀕𑀳𑀡𑁂 𑀦𑀺𑀬𑀼𑀜𑁆𑀚𑀦𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁄, 𑀓𑀸𑀮𑀦𑁆𑀢𑀭𑁂𑀦 𑀕𑀳𑀡𑀢𑁆𑀣𑀁 𑀦𑀺𑀬𑁄𑀕𑁄 𑀅𑀢𑁆𑀣𑀲𑀸𑀥𑀓𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸𑀢𑀺 𑀆𑀡𑀸𑀧𑁂𑀢𑀻’’𑀢𑀺. 𑀏𑀢𑁆𑀣 𑀘 𑀆𑀡𑀸𑀧𑀦𑀧𑀬𑁄𑀕𑁄𑀯 𑀅𑀢𑁆𑀣𑀲𑀸𑀥𑀓𑁄𑀢𑀺 𑀤𑀲𑁆𑀲𑀺𑀢𑁄, 𑀲𑀸𑀳𑀢𑁆𑀣𑀺𑀓𑀯𑀲𑁂𑀦𑀧𑀺 𑀅𑀢𑁆𑀣𑀲𑀸𑀥𑀓𑀧𑀬𑁄𑀕𑁄 𑀧𑀦 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀆𑀭𑀸𑀫𑀸𑀪𑀺𑀬𑀼𑀜𑁆𑀚𑀦𑀸𑀤𑀻𑀲𑀼𑀧𑀺 𑀢𑀸𑀯𑀓𑀸𑀮𑀺𑀓𑀪𑀡𑁆𑀟𑀤𑁂𑀬𑁆𑀬𑀸𑀦𑀁 𑀅𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀆𑀡𑀢𑁆𑀢𑀺𑀯𑀲𑁂𑀦 ¶ 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀦𑁆𑀢𑀭𑀸𑀬𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 ‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’𑀢𑀺 𑀆𑀡𑀸𑀧𑀦𑀁 𑀪𑀡𑁆𑀟𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀧𑀬𑁄𑀕𑁄, 𑀧𑀬𑁄𑀕𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄 𑀅𑀯𑀳𑀸𑀭𑁄 𑀲𑀳𑀧𑀬𑁄𑀕𑁄, ‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 ¶ 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀅𑀯𑀳𑀭𑀡𑀁 𑀲𑀁𑀯𑀺𑀤𑀸𑀯𑀳𑀸𑀭𑁄. 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀜𑁆𑀚𑀸𑀦𑀦𑀓𑀫𑁆𑀫𑀁, 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺𑀦𑀺𑀫𑀺𑀢𑁆𑀢𑀓𑀭𑀡𑀁. 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀲𑀳𑀧𑀬𑁄𑀕𑁄𑀢𑀺 𑀇𑀤𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀔𑀺𑀮𑀲𑀗𑁆𑀓𑀫𑀦𑀸𑀤𑀻𑀲𑀼𑀧𑀺 𑀅𑀲𑀢𑀺 𑀘 𑀞𑀸𑀦𑀸𑀘𑀸𑀯𑀦𑁂 𑀲𑀳𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀔𑀺𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀘 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀢𑁂𑀦 𑀅𑀯𑀳𑀭𑀡𑀁 𑀣𑁂𑀬𑁆𑀬𑀸𑀯𑀳𑀸𑀭𑁄. 𑀬𑁄 𑀳𑀺 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁄 𑀅𑀯𑀳𑀭𑀢𑀺, 𑀢𑀼𑀮𑀸𑀓𑀽𑀝𑀫𑀸𑀦𑀓𑀽𑀝𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀣𑁂𑀬𑁆𑀬𑀸𑀯𑀳𑀸𑀭𑁄. 𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀳𑀭𑀡𑀁 𑀧𑀲𑀬𑁆𑀳𑀸𑀯𑀳𑀸𑀭𑁄. 𑀬𑁄 𑀳𑀺 𑀧𑀲𑀬𑁆𑀳 𑀩𑀮𑀓𑁆𑀓𑀸𑀭𑁂𑀦 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀸𑀢𑀺 𑀕𑀸𑀫𑀖𑀸𑀢𑀓𑀸𑀤𑀬𑁄 𑀯𑀺𑀬, 𑀅𑀢𑁆𑀢𑀦𑁄 𑀧𑀢𑁆𑀢𑀩𑀮𑀺𑀢𑁄 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀓𑀁 𑀕𑀡𑁆𑀳𑀸𑀢𑀺 𑀭𑀸𑀚𑀪𑀝𑀸𑀤𑀬𑁄 𑀯𑀺𑀬, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄. 𑀪𑀡𑁆𑀟𑀯𑀲𑁂𑀦 𑀘 𑀑𑀓𑀸𑀲𑀯𑀲𑁂𑀦 𑀘 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀯𑀳𑀭𑀡𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄. 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀤𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀢𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄. 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀅𑀯𑀳𑀭𑀡𑀁 𑀓𑀼𑀲𑀸𑀯𑀳𑀸𑀭𑁄.

𑀢𑀼𑀮𑀬𑀺𑀢𑁆𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀲𑀸𑀫𑀻𑀘𑀻𑀢𑀺 𑀯𑀢𑁆𑀢𑀁, 𑀆𑀧𑀢𑁆𑀢𑀺 𑀧𑀦 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀚𑀦𑀲𑀫𑁆𑀫𑀤𑁆𑀤𑁄𑀢𑀺 𑀫𑀳𑀸𑀚𑀦𑀲𑀗𑁆𑀔𑁄𑀪𑁄. 𑀪𑀝𑁆𑀞𑁂 𑀚𑀦𑀓𑀸𑀬𑁂𑀢𑀺 𑀅𑀧𑀕𑀢𑁂 𑀚𑀦𑀓𑀸𑀬𑁂. ‘‘𑀇𑀤𑀜𑁆𑀘 𑀓𑀸𑀲𑀸𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀓𑀺𑀁𑀓𑀸𑀭𑀡𑀸 𑀏𑀯𑀫𑀸𑀳? 𑀘𑀻𑀯𑀭𑀲𑀸𑀫𑀺𑀓𑁂𑀦 𑀬𑀲𑁆𑀫𑀸 𑀥𑀼𑀭𑀦𑀺𑀓𑁆𑀔𑁂𑀧𑁄 𑀓𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀅𑀤𑀺𑀦𑁆𑀦𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀯𑀳𑀸𑀭𑀓𑁄𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀻𑀯𑀭𑀲𑀸𑀫𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀘𑀭𑀢𑀺 ‘‘𑀤𑀲𑁆𑀲𑀸𑀫𑀻’’𑀢𑀺, 𑀘𑀻𑀯𑀭𑀲𑀸𑀫𑀺𑀓𑁂𑀦 𑀘 ‘‘𑀫𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀏𑀢𑁂𑀦𑀧𑀺 𑀅𑀯𑀳𑀸𑀭𑀓𑁂𑀦 𑀆𑀮𑀬𑁄 𑀧𑀭𑀺𑀘𑁆𑀘𑀢𑁆𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀬𑀤𑀺 𑀏𑀯𑀁 𑀘𑀻𑀯𑀭𑀲𑀸𑀫𑀺𑀓𑁄𑀬𑁂𑀯 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺? 𑀉𑀪𑀺𑀦𑁆𑀦𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁. 𑀓𑀣𑀁? 𑀅𑀯𑀳𑀸𑀭𑀓𑀲𑁆𑀲 ‘‘𑀫𑀬𑀸 𑀲𑀳𑀢𑁆𑀣𑁂𑀦 𑀦 𑀤𑀺𑀦𑁆𑀦𑀁, 𑀪𑀡𑁆𑀟𑀤𑁂𑀬𑁆𑀬𑀫𑁂𑀢’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀇𑀢𑀭𑀲𑁆𑀲 ‘‘𑀫𑀬𑀸 𑀧𑀞𑀫𑀁 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀤𑀺𑀦𑁆𑀦𑀁 𑀕𑀳𑀺𑀢’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺.

𑀲𑀫𑀕𑁆𑀖𑀦𑁆𑀢𑀺 ¶ 𑀅𑀧𑁆𑀧𑀕𑁆𑀖𑀁. 𑀤𑀸𑀭𑀼𑀅𑀢𑁆𑀣𑀁 𑀨𑀭𑀢𑀻𑀢𑀺 𑀤𑀸𑀭𑀽𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀫𑀬𑀺 𑀲𑀦𑁆𑀢𑁂𑀢𑀺𑀆𑀤𑀺 ¶ 𑀲𑀩𑁆𑀩𑀁 𑀭𑀜𑁆𑀜𑀸 𑀧𑀲𑀸𑀤𑁂𑀦 𑀯𑀼𑀢𑁆𑀢𑀁, ‘‘𑀣𑁂𑀭𑁂𑀦 𑀧𑀦 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀢’’𑀦𑁆𑀢𑀺 𑀦 𑀫𑀜𑁆𑀜𑀺𑀢𑀩𑁆𑀩𑀁.

𑀏𑀓𑀤𑀺𑀯𑀲𑀁 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀸𑀤𑀺𑀦𑀸 𑀬𑀸 𑀅𑀬𑀁 𑀅𑀕𑁆𑀖𑀳𑀸𑀦𑀺 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸 𑀪𑀡𑁆𑀟𑀲𑀸𑀫𑀺𑀦𑀸

𑀓𑀺𑀡𑀺𑀢𑁆𑀯𑀸 𑀕𑀳𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀲𑀩𑁆𑀩𑀁 𑀧𑀦𑁂𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀲𑀸𑀡𑀜𑁆𑀘 𑀲𑀓𑁆𑀔𑀭𑀜𑁆𑀘 𑀧𑀸𑀲𑀸𑀡𑀲𑀓𑁆𑀔𑀭𑀁. 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄𑀢𑀺 𑀇𑀫𑀲𑁆𑀲𑁂𑀯 𑀯𑀺𑀯𑀭𑀡𑀁 ‘‘𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀧𑀢𑁆𑀢𑀺𑀁 𑀯𑀸’’𑀢𑀺𑀆𑀤𑀺.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑁆𑀔𑀤𑀲𑁆𑀲𑀸𑀢𑀺 𑀏𑀢𑁆𑀣 𑀅𑀓𑁆𑀔-𑀲𑀤𑁆𑀤𑁂𑀦 𑀓𑀺𑀭 𑀯𑀺𑀦𑀺𑀘𑁆𑀙𑀬𑀲𑀸𑀮𑀸 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀯𑀚𑁆𑀚𑀸𑀯𑀚𑁆𑀚𑀁 𑀧𑀲𑁆𑀲𑀦𑁆𑀢𑀻𑀢𑀺 𑀅𑀓𑁆𑀔𑀤𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀦𑀓𑀸. 𑀳𑀦𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 𑀳𑀦𑀦𑀁 𑀦𑀸𑀫 𑀳𑀢𑁆𑀣𑀧𑀸𑀤𑀸𑀤𑀻𑀳𑀺 𑀧𑁄𑀣𑀦𑀜𑁆𑀘𑁂𑀯 𑀲𑀻𑀲𑀸𑀤𑀺𑀘𑁆𑀙𑁂𑀤𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 𑁋 ‘‘𑀳𑀦𑁂𑀬𑁆𑀬𑀼𑀦𑁆𑀢𑀺 𑀧𑁄𑀣𑁂𑀬𑁆𑀬𑀼𑀜𑁆𑀘𑁂𑀯 𑀙𑀺𑀦𑁆𑀤𑁂𑀬𑁆𑀬𑀼𑀜𑁆𑀘𑀸’’𑀢𑀺. 𑀢𑁂𑀦𑁂𑀯 𑀧𑀤𑀪𑀸𑀚𑀦𑀺𑀬𑀜𑁆𑀘 ‘‘𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀓𑀲𑀸𑀬 𑀯𑀸 𑀯𑁂𑀢𑁆𑀢𑁂𑀦 𑀯𑀸 𑀅𑀟𑁆𑀠𑀤𑀡𑁆𑀟𑀓𑁂𑀦 𑀯𑀸 𑀙𑁂𑀚𑁆𑀚𑀸𑀬 𑀯𑀸 𑀳𑀦𑁂𑀬𑁆𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀟𑁆𑀠𑀤𑀡𑁆𑀟𑀓𑁂𑀦𑀸𑀢𑀺 𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀭𑀲𑁆𑀲𑀫𑀼𑀕𑁆𑀕𑀭𑁂𑀦 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸. 𑀙𑁂𑀚𑁆𑀚𑀸𑀬𑀸𑀢𑀺 𑀳𑀢𑁆𑀣𑀧𑀸𑀤𑀲𑀻𑀲𑀸𑀤𑀻𑀦𑀁 𑀙𑁂𑀤𑀦𑁂𑀦. 𑀦𑀻𑀳𑀭𑁂𑀬𑁆𑀬𑀼𑀦𑁆𑀢𑀺 𑀕𑀸𑀫𑀦𑀺𑀕𑀫𑀸𑀤𑀺𑀢𑁄 𑀦𑀻𑀳𑀭𑁂𑀬𑁆𑀬𑀼𑀁. 𑀘𑁄𑀭𑁄𑀲𑀺…𑀧𑁂… 𑀣𑁂𑀦𑁄𑀲𑀻𑀢𑀺 𑀏𑀢𑁆𑀣 ‘‘𑀧𑀭𑀺𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀘𑁄𑀭𑁄𑀲𑀻𑀢𑀺 𑀏𑀯𑀫𑀸𑀤𑀻𑀦𑀺 𑀘 𑀯𑀢𑁆𑀯𑀸 𑀧𑀭𑀺𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺.

𑁯𑁩. 𑀬𑀁 𑀢𑀁 𑀪𑀡𑁆𑀟𑀁 𑀤𑀲𑁆𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀦𑁆𑀢𑀺 𑀪𑀽𑀫𑀺𑀆𑀤𑀻𑀲𑀼 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀁. 𑀬𑀣𑀸 𑀬𑀣𑀸 𑀆𑀤𑀸𑀦𑀁 𑀕𑀘𑁆𑀙𑀢𑀻𑀢𑀺 𑀪𑀽𑀫𑀺𑀆𑀤𑀻𑀲𑀼 𑀞𑀺𑀢𑀁 𑀪𑀡𑁆𑀟𑀁 𑀲𑀩𑁆𑀩𑀲𑁄 𑀅𑀕𑁆𑀕𑀳𑀡𑁂𑀧𑀺 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀕𑀳𑀡𑀁 𑀉𑀧𑀕𑀘𑁆𑀙𑀢𑀺.

𑀪𑀽𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁪. 𑀨𑀦𑁆𑀤𑀸𑀧𑁂𑀢𑀺, 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀏𑀢𑁆𑀣 ‘‘𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀨𑀦𑁆𑀤𑀸𑀧𑁂𑀢𑁆𑀯𑀸 𑀧𑀼𑀦 𑀅𑀦𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀦𑁆𑀢𑀲𑁆𑀲𑀧𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀨𑀦𑁆𑀤𑀸𑀧𑁂𑀢𑁆𑀯𑀸 𑀏𑀓𑀧𑀬𑁄𑀕𑁂𑀦 𑀉𑀝𑁆𑀞𑀳𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀕𑀫𑀦𑀲𑁆𑀲 ¶ 𑀅𑀦𑀼𑀧𑀓𑀸𑀭𑁂𑀢𑀺 𑀬𑀣𑀸 𑀤𑁆𑀯𑀸𑀭𑀧𑀺𑀤𑀳𑀦𑁂 𑀓𑀼𑀫𑁆𑀪𑀺𑀝𑁆𑀞𑀸𑀦𑀕𑀫𑀦𑀲𑁆𑀲 𑀅𑀦𑀼𑀧𑀓𑀸𑀭𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀏𑀯𑀁 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀕𑀫𑀦𑀲𑁆𑀲 𑀅𑀦𑀼𑀧𑀓𑀸𑀭𑁂 𑀓𑀸𑀬𑀯𑀘𑀻𑀓𑀫𑁆𑀫𑁂 𑀅𑀦𑀸𑀧𑀢𑁆𑀢𑀺. 𑀯𑀸𑀘𑀸𑀬 𑀯𑀸𑀘𑀸𑀬𑀸𑀢𑀺 𑀏𑀓𑁂𑀓𑀢𑁆𑀣𑀤𑀻𑀧𑀺𑀓𑀸𑀬 𑀯𑀸𑀘𑀸𑀬 𑀯𑀸𑀘𑀸𑀬. 𑀉𑀧𑀮𑀤𑁆𑀥𑁄𑀢𑀺 𑀜𑀸𑀢𑁄. 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 ‘‘𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 ¶ 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀣𑀸 𑀳𑀺 ‘‘𑀬𑀁 𑀬𑀁 𑀯𑀘𑀦𑀁 𑀫𑀼𑀲𑀸, 𑀢𑀢𑁆𑀣 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀘 ‘‘𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀘 𑀯𑀓𑁆𑀔𑀢𑀺. 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀦 𑀯𑀺𑀭𑀼𑀚𑁆𑀛𑀢𑀺 ‘‘𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝’’𑀦𑁆𑀢𑀺. 𑀢𑀣𑀸 𑀳𑀺 ‘‘𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑁂𑀳𑀺 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀘 ‘‘𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻’’𑀢𑀺 𑀘 𑀯𑀓𑁆𑀔𑀢𑀺. 𑀲𑀘𑁂 𑀧𑀦 𑀓𑀼𑀲𑀮𑀘𑀺𑀢𑁆𑀢𑁄 ‘‘𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀅𑀦𑀸𑀧𑀢𑁆𑀢𑀺 ‘‘𑀩𑀼𑀤𑁆𑀥𑀧𑀽𑀚𑀁 𑀯𑀸 𑀥𑀫𑁆𑀫𑀧𑀽𑀚𑀁 𑀯𑀸 𑀲𑀗𑁆𑀖𑀪𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀸𑀢𑀺 𑀓𑀼𑀲𑀮𑀁 𑀉𑀧𑁆𑀧𑀸𑀤𑁂𑀢𑀺, 𑀓𑀼𑀲𑀮𑀘𑀺𑀢𑁆𑀢𑁂𑀦 𑀕𑀫𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀘 ‘‘𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀘 𑀯𑀓𑁆𑀔𑀫𑀸𑀦𑀢𑁆𑀢𑀸.

𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀧𑀭𑀪𑀸𑀕𑁂 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀓𑀸𑀮𑁂 𑀧𑀫𑀚𑁆𑀚𑀺𑀢𑁆𑀯𑀸 𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀲𑁂𑀲𑀅𑀝𑁆𑀞𑀓𑀣𑀸𑀲𑀼 𑀘 ‘‘𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸’’𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀯𑀢𑁆𑀯𑀸 𑀯𑀸𑀲𑀺𑀨𑀭𑀲𑀽𑀦𑀁 𑀅𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀫𑁆𑀧𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀤𑀻𑀲𑀼 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀢𑀢𑁆𑀢𑀸 ‘‘𑀤𑀼𑀓𑁆𑀓𑀝𑁂𑀳𑀺 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀲𑀩𑁆𑀩𑀓𑀺𑀭𑀺𑀬𑀸𑀲𑀽𑀢𑀺 𑀩𑀻𑀚𑀕𑁆𑀕𑀳𑀡𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀼. 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀬𑀸𑀯 𑀧𑀺𑀝𑀓𑀧𑀭𑀺𑀬𑁄𑀲𑀸𑀦𑀸 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁.

𑀣𑁂𑀭𑁂𑀳𑀺 𑀤𑀲𑁆𑀲𑀺𑀢𑀦𑁆𑀢𑀺 𑀧𑀼𑀩𑁆𑀩𑀧𑀬𑁄𑀕𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀤𑀲𑁆𑀲𑀺𑀢𑀁. ‘‘𑀲𑀩𑁆𑀩𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀸𑀦𑀁 𑀇𑀫𑁂𑀲𑀼𑀬𑁂𑀯 𑀅𑀝𑁆𑀞𑀲𑀼 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀇𑀢𑀭𑁂𑀳𑀺 𑀲𑀢𑁆𑀢𑀳𑀺 𑀤𑀼𑀓𑁆𑀓𑀝𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀁 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀲𑀯𑀺𑀥𑀁 𑀭𑀢𑀦𑀦𑁆𑀢𑀺 ‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀕𑁄 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺 𑀏𑀯𑀫𑀸𑀕𑀢𑀁 𑀤𑀲𑀯𑀺𑀥𑀁 𑀭𑀢𑀦𑀁.

‘‘𑀫𑀡𑀺 ¶ 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑁄 𑀘 𑀲𑀗𑁆𑀔𑁄,

𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀜𑁆𑀘 𑀳𑁂𑀫𑀁;

𑀲𑀮𑁄𑀳𑀺𑀢𑀗𑁆𑀕𑀜𑁆𑀘 𑀫𑀲𑀸𑀭𑀕𑀮𑁆𑀮𑀁,

𑀤𑀲𑁂𑀢𑀺 𑀥𑀻𑀭𑁄 𑀭𑀢𑀦𑀸𑀦𑀺 𑀚𑀜𑁆𑀜𑀸’’𑀢𑀺. 𑁋

𑀳𑀺 𑀯𑀼𑀢𑁆𑀢𑀁.

𑀲𑀢𑁆𑀢𑀯𑀺𑀥𑀁 ¶ 𑀥𑀜𑁆𑀜𑀦𑁆𑀢𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼 𑀓𑀼𑀤𑁆𑀭𑀽𑀲𑁄 𑀯𑀭𑀓𑁄 𑀕𑁄𑀥𑀼𑀫𑁄𑀢𑀺 𑀇𑀤𑀁 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁. 𑀆𑀯𑀼𑀥𑀪𑀡𑁆𑀟𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀽𑀭𑀺𑀬𑀪𑀡𑁆𑀟𑀇𑀢𑁆𑀣𑀺𑀭𑀽𑀧𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀫𑀲𑀺𑀢𑀩𑁆𑀩𑁂 𑀯𑀢𑁆𑀣𑀼𑀫𑁆𑀳𑀺 𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁. 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀦𑁆𑀢𑀺 ‘‘𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀸𑀭𑀺𑀢𑀲𑁆𑀲 𑀓𑀢𑀢𑁆𑀢𑀸 𑀤𑀼𑀝𑁆𑀞𑀼 𑀆𑀘𑀺𑀡𑁆𑀡𑀁 𑀘𑀭𑀺𑀢𑀦𑁆𑀢𑀺 𑀤𑀼𑀭𑀼𑀧𑀘𑀺𑀡𑁆𑀡𑀁, 𑀢𑀲𑁆𑀫𑀺𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. ‘‘𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀁𑀦𑀺𑀯𑀸𑀭𑀡𑀢𑁆𑀣𑀸𑀬 𑀜𑀸𑀢𑁂 𑀅𑀢𑁆𑀣𑁂 𑀅𑀯𑀤𑀦𑁆𑀢𑀲𑁆𑀲 𑀜𑀸𑀢𑀤𑀼𑀓𑁆𑀓𑀝𑀁. 𑀏𑀓𑀸𑀤𑀲 𑀲𑀫𑀦𑀼𑀪𑀸𑀲𑀦𑀸 𑀦𑀸𑀫 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑀸 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂 𑀏𑀓𑀁 𑀬𑀸𑀯𑀢𑀢𑀺𑀬𑀓𑀁 𑀧𑀸𑀭𑀸𑀚𑀺𑀓𑀁, 𑀘𑀢𑁆𑀢𑀸𑀭𑁄 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀘𑀡𑁆𑀟𑀓𑀸𑀴𑀻𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀙. 𑀯𑀲𑁆𑀲𑀸𑀯𑀸𑀲𑀸𑀤𑀺𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀝𑀺𑀲𑁆𑀲𑀯𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀓𑀝𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀁.

𑀧𑀼𑀩𑁆𑀩𑀲𑀳𑀧𑀬𑁄𑀕𑁂 𑀘, 𑀅𑀦𑀸𑀫𑀸𑀲𑀤𑀼𑀭𑀼𑀧𑀘𑀺𑀡𑁆𑀡𑁂;

𑀯𑀺𑀦𑀬𑁂 𑀘𑁂𑀯 𑀜𑀸𑀢𑁂 𑀘, 𑀜𑀢𑁆𑀢𑀺𑀬𑀸 𑀘 𑀧𑀝𑀺𑀲𑁆𑀲𑀯𑁂;

𑀅𑀝𑁆𑀞𑁂𑀢𑁂 𑀤𑀼𑀓𑁆𑀓𑀝𑀸 𑀯𑀼𑀢𑁆𑀢𑀸, 𑀯𑀺𑀦𑀬𑁂 𑀯𑀺𑀦𑀬𑀜𑁆𑀜𑀼𑀦𑀸.

𑀲𑀳𑀧𑀬𑁄𑀕𑀢𑁄 𑀧𑀝𑁆𑀞𑀸𑀬 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀆𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀆𑀳 ‘‘𑀅𑀣 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀔𑀡𑀦𑁆𑀢𑀲𑁆𑀲 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀻𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀆𑀕𑀢𑀸𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀧𑀁𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀉𑀲𑁆𑀲𑀸𑀳𑁄𑀯 𑀧𑀼𑀦 𑀔𑀡𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀔𑀡𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺.

𑀓𑀢𑀁 𑀓𑀭𑀡𑀁 𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀆𑀳 ‘‘𑀯𑀺𑀭𑀽𑀧𑀸 𑀲𑀸 𑀓𑀺𑀭𑀺𑀬𑀸’’𑀢𑀺. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀺𑀯𑀸𑀭𑀧𑀸𑀴𑀺𑀬𑀸 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀁 𑀔𑀮𑀺𑀢𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀓𑀝𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀜𑁆𑀳𑀺 𑀤𑀼𑀝𑁆𑀞𑀼 𑀓𑀢𑀁, 𑀯𑀺𑀭𑀽𑀧𑀁 𑀯𑀸 𑀓𑀢𑀁 ¶ , 𑀢𑀁 𑀤𑀼𑀓𑁆𑀓𑀝𑀁. 𑀢𑀁 𑀧𑀦𑁂𑀢𑀁 𑀬𑀣𑀸 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀁, 𑀏𑀯𑀁 𑀅𑀓𑀢𑀢𑁆𑀢𑀸 𑀅𑀧𑀭𑀤𑁆𑀥𑀁, 𑀓𑀼𑀲𑀮𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀯𑀺𑀭𑀤𑁆𑀥𑀁, 𑀅𑀭𑀺𑀬𑀯𑀁𑀲𑀧𑁆𑀧𑀝𑀺𑀧𑀤𑀁 𑀅𑀦𑀸𑀭𑀼𑀴𑁆𑀳𑀢𑁆𑀢𑀸 𑀔𑀮𑀺𑀢𑀁. 𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀬𑀁 𑀮𑁄𑀓𑁂 𑀫𑀦𑀼𑀲𑁆𑀲𑁄 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄 𑀧𑀸𑀧𑀁 𑀓𑀭𑁄𑀢𑀺, 𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀦 𑀮𑀸𑀫𑀓𑀪𑀸𑀯𑁂𑀦 𑀧𑀸𑀧𑀁, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀬𑀣𑀸 ¶ 𑀤𑀼𑀓𑁆𑀔𑀸, 𑀓𑀼𑀘𑁆𑀙𑀺𑀢𑀸 𑀯𑀸 𑀕𑀢𑀺 𑀤𑀼𑀕𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑀼𑀕𑁆𑀕𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀘 𑀓𑀝𑀼𑀓𑀁 𑀨𑀮𑀫𑁂𑀢𑀲𑁆𑀲𑀸𑀢𑀺 𑀓𑀝𑀼𑀓𑀨𑀮𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀣𑀽𑀮𑀢𑁆𑀢𑀸 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀽𑀮𑀘𑁆𑀘𑀬𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀻’’𑀢𑀺𑀆𑀤𑀺𑀫𑀸𑀳. 𑀲𑀁𑀬𑁄𑀕𑁂 𑀧𑀦 𑀓𑀢𑁂 𑀲𑀁𑀬𑁄𑀕𑀧𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀫𑀦𑀲𑀺 𑀓𑀢𑁆𑀯𑀸 ‘‘𑀲𑀁𑀬𑁄𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀏𑀓𑀲𑁆𑀲 𑀫𑀽𑀮𑁂𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂. 𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀻𑀢𑀺 𑀤𑁂𑀲𑀦𑀸𑀕𑀸𑀫𑀻𑀲𑀼 𑀅𑀘𑁆𑀘𑀬𑁂𑀲𑀼 𑀢𑁂𑀦 𑀲𑀫𑁄 𑀣𑀽𑀮𑁄 𑀅𑀘𑁆𑀘𑀬𑁄 𑀦𑀢𑁆𑀣𑀺. 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀣𑀽𑀮𑀢𑁆𑀢𑀸 𑀅𑀘𑁆𑀘𑀬𑀲𑁆𑀲 𑀏𑀢𑀁 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

‘‘𑀲𑀩𑁆𑀩𑀢𑁆𑀣𑀸𑀧𑀺 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀫𑀲𑀦𑀨𑀦𑁆𑀤𑀸𑀧𑀦𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀏𑀓𑀧𑀬𑁄𑀕𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀫𑁂𑀯, 𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑀳𑀧𑀬𑁄𑀕𑀁 𑀧𑀦 𑀅𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀦𑁆𑀦𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀲𑀳𑀧𑀬𑁄𑀕𑀁 𑀓𑀢𑁆𑀯𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁂𑀦 𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑀩𑁆𑀩𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀦 𑀓𑀢𑁂 𑀲𑀳𑀧𑀬𑁄𑀕𑁂 𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀦𑁆𑀦𑀸𑀧𑀢𑁆𑀢𑀻𑀦𑀫𑁆𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀤𑀻𑀧𑁂𑀢𑀺, 𑀅𑀜𑁆𑀜𑀣𑀸 ‘‘𑀲𑀳𑀧𑀬𑁄𑀕𑀁 𑀧𑀦 𑀅𑀓𑀢𑁆𑀯𑀸’’𑀢𑀺 𑀇𑀤𑀁 𑀯𑀺𑀲𑁂𑀲𑀦𑀫𑁂𑀯 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀬𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘‘𑀲𑀘𑁂 𑀧𑀦𑀲𑁆𑀲 𑀢𑀢𑁆𑀣𑀚𑀸𑀢𑀓𑁂 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀫𑁆𑀳𑀺 𑀙𑀺𑀦𑁆𑀦𑁂𑀧𑀺 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀙𑁂𑀤𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻’’𑀢𑀺, 𑀢𑀫𑁆𑀧𑀺 𑀲𑀳𑀧𑀬𑁄𑀕𑁂 𑀓𑀢𑁂 𑀧𑀼𑀩𑁆𑀩𑀧𑀬𑁄𑀕𑁂 𑀆𑀧𑀦𑁆𑀦𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑁂𑀯 𑀤𑀻𑀧𑁂𑀢𑀺 𑀲𑀳𑀧𑀬𑁄𑀕𑁂 𑀙𑁂𑀤𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀤𑀼𑀓𑁆𑀓𑀝𑀲𑁆𑀲𑁂𑀯 𑀤𑁂𑀲𑀦𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀲𑀳𑀧𑀬𑁄𑀕𑀢𑁄 𑀧𑀝𑁆𑀞𑀸𑀬𑁂𑀯𑀸𑀢𑀺 𑀘 𑀇𑀤𑀁 𑀲𑀳𑀧𑀬𑁄𑀕𑀁 𑀧𑀢𑁆𑀢𑀲𑁆𑀲 𑀢𑀢𑁄 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸𑀦𑀁 𑀧𑀼𑀩𑁆𑀩𑀧𑀬𑁄𑀕𑀸𑀧𑀢𑁆𑀢𑀻𑀦𑀫𑁆𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀤𑀻𑀧𑁂𑀢𑀺. 𑀢𑁂𑀦 𑀳𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 ‘‘𑀬𑀸𑀯 𑀲𑀳𑀧𑀬𑁄𑀕𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 ¶ 𑀳𑁄𑀢𑀺, 𑀲𑀳𑀧𑀬𑁄𑀕𑀁 𑀧𑀢𑁆𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀢𑀸𑀲𑀫𑁆𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀳𑁄𑀢𑀻’’𑀢𑀺, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀼, 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀔𑀡𑀦𑀯𑀺𑀬𑀽𑀳𑀦𑀼𑀤𑁆𑀥𑀭𑀡𑁂𑀲𑀼 𑀤𑀲 𑀤𑀲 𑀓𑀢𑁆𑀯𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑀸, 𑀢𑀸𑀲𑀼 𑀉𑀤𑁆𑀥𑀭𑀡𑁂 𑀤𑀲 𑀆𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺 𑀯𑀺𑀲𑀪𑀸𑀕𑀓𑀺𑀭𑀺𑀬𑀁 𑀧𑀢𑁆𑀯𑀸 𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺. 𑀚𑀸𑀢𑀺𑀯𑀲𑁂𑀦 𑀧𑀦 𑀲𑀫𑀸𑀦𑀓𑀺𑀭𑀺𑀬𑀸𑀬 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 ‘‘𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀺𑀦𑀸𑀧𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀯𑀘𑀦𑁂𑀦 𑀧𑀞𑀫𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑀼𑀭𑀺𑀫𑀸𑀧𑀢𑁆𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑁂𑀯 𑀲𑀫𑀢𑁆𑀣𑀬𑀢𑀺, 𑀦 𑀧𑀦 𑀉𑀪𑀺𑀦𑁆𑀦𑀁 𑀅𑀝𑁆𑀞𑀓𑀣𑀸𑀦𑀁 𑀅𑀢𑁆𑀣𑀢𑁄 𑀦𑀸𑀦𑀸𑀓𑀭𑀡𑀁 𑀅𑀢𑁆𑀣𑀺. 𑀅𑀧𑀭𑀫𑁆𑀧𑁂𑀢𑁆𑀣 𑀧𑀓𑀸𑀭𑀁 𑀯𑀡𑁆𑀡𑀬𑀦𑁆𑀢𑀺 ‘‘𑀲𑀫𑀸𑀦𑀓𑀺𑀭𑀺𑀬𑀸𑀲𑀼𑀧𑀺 𑀧𑀼𑀭𑀺𑀫𑀧𑀼𑀭𑀺𑀫𑀔𑀡𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀔𑀡𑀦𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 ¶ 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘𑀧𑀁𑀲𑀼𑀔𑀡𑀦𑀸𑀤𑀻𑀲𑀼 𑀘 𑀮𑀚𑁆𑀚𑀺𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀼, 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’’𑀦𑁆𑀢𑀺. ‘‘𑀏𑀯𑀜𑁆𑀘 𑀲𑀢𑀺 ‘𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀽’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀯𑀼𑀢𑁆𑀢𑀜𑁆𑀘, 𑀢𑀲𑁆𑀫𑀸 𑀯𑀺𑀲𑀪𑀸𑀕𑀓𑀺𑀭𑀺𑀬𑀫𑁂𑀯 𑀧𑀢𑁆𑀯𑀸 𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦𑁂𑀯 𑀩𑀳𑀼𑀓𑀸𑀲𑀼𑀧𑀺 𑀆𑀧𑀢𑁆𑀢𑀻𑀲𑀼 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀲𑀼𑀁𑀬𑁂𑀯𑁂𑀓𑁄 𑀤𑁂𑀲𑀦𑀸𑀓𑁆𑀓𑀫𑁄 𑀤𑀲𑁆𑀲𑀺𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀬𑀫𑁂𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀇𑀥 𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑀺𑀢𑀸, 𑀏𑀯𑀁 𑀩𑀳𑀼𑀓𑀸𑀲𑀼𑀧𑀺 𑀆𑀧𑀢𑁆𑀢𑀻𑀲𑀼 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀇𑀤𑀫𑁆𑀧𑀺 𑀇𑀥 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑀢𑁄𑀬𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀧𑀸𑀴𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀇𑀥 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀆𑀧𑀢𑁆𑀢𑀺𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄, 𑀏𑀯𑀁 𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀲𑁂𑀲𑁄 𑀘 𑀤𑁂𑀲𑀦𑀸𑀯𑀺𑀲𑁂𑀲𑁄 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀤𑀲𑁆𑀲𑀺𑀢𑁄𑀢𑀺.

𑀳𑁂𑀝𑁆𑀞𑀢𑁄 𑀑𑀲𑀻𑀤𑁂𑀦𑁆𑀢𑁄𑀢𑀺 ‘‘𑀲𑀸𑀫𑀺𑀓𑁂𑀲𑀼 𑀆𑀕𑀦𑁆𑀢𑁆𑀯𑀸 𑀅𑀧𑀲𑁆𑀲𑀺𑀢𑁆𑀯𑀸 𑀕𑀢𑁂𑀲𑀼 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀑𑀲𑀻𑀤𑁂𑀦𑁆𑀢𑁄. 𑀩𑀼𑀦𑁆𑀤𑁂𑀦𑀸𑀢𑀺 𑀓𑀼𑀫𑁆𑀪𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑁂𑀦. 𑀏𑀯𑀁 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸𑀬 𑀓𑀼𑀫𑁆𑀪𑀺𑀬𑀸 𑀞𑀸𑀦𑀸𑀘𑀸𑀯𑀦𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀮𑀬𑀁 𑀦𑀻𑀳𑀭𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀆𑀓𑀸𑀲𑀕𑀢𑀁 𑀅𑀓𑀢𑁆𑀯𑀸 𑀖𑀁𑀲𑀺𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀙𑀺𑀦𑁆𑀦𑀓𑁄𑀝𑀺𑀢𑁄 𑀦𑀻𑀳𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀻𑀢𑀺 𑀖𑀁𑀲𑀦𑁆𑀢𑁄𑀬𑁂𑀯 𑀆𑀓𑀸𑀲𑀕𑀢𑀁 𑀅𑀓𑀢𑁆𑀯𑀸 𑀲𑀸𑀭𑁂𑀢𑀺.

𑀙𑀺𑀦𑁆𑀦𑀫𑀢𑁆𑀢𑁂 ¶ 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀯𑀲𑁆𑀲𑀁 𑀘𑁂 𑀧𑀢𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀭𑀺𑀘𑁆𑀙𑁂𑀤𑁄𑀢𑀺 ‘‘𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸’’𑀢𑀺 𑀯𑀼𑀢𑁆𑀢𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀧𑀩𑁆𑀬𑀽𑀳𑀦𑁆𑀢𑁄𑀢𑀺 ‘‘𑀳𑁂𑀝𑁆𑀞𑀸 𑀞𑀺𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑁂𑀦 𑀤𑁆𑀯𑀺𑀥𑀸 𑀓𑀭𑁄𑀦𑁆𑀢𑁄. 𑀉𑀧𑀟𑁆𑀠𑀓𑀼𑀫𑁆𑀪𑀺𑀬𑀦𑁆𑀢𑀺 𑀉𑀧𑀟𑁆𑀠𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸. 𑀦𑀦𑀼 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀫𑁆𑀧𑀺 𑀓𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀳𑀺 𑀆𑀕𑀢𑁂 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺. 𑀯𑀺𑀦𑀬𑀥𑀫𑁆𑀫𑀢𑀸𑀢𑀺 𑀯𑀺𑀦𑀬𑀕𑀭𑀼𑀓𑀸𑀦𑀁 𑀥𑀫𑁆𑀫𑀢𑀸. 𑀯𑀺𑀦𑀬𑀕𑀭𑀼𑀓𑀸 𑀳𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀆𑀕𑀢𑁂 𑀕𑀭𑀼𑀓𑁂 𑀢𑀺𑀝𑁆𑀞𑀦𑁆𑀢𑀺. 𑀯𑀺𑀦𑀬𑀕𑀭𑀼𑀓𑀢𑀸𑀩𑁆𑀬𑀸𑀧𑀦𑀢𑁆𑀣𑀜𑁆𑀳𑀺 𑀯𑀺𑀦𑀬𑀕𑀭𑀼𑀓𑁄𑀬𑁂𑀯𑁂𑀢𑁆𑀣 𑀯𑀺𑀦𑀬-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀯𑀺𑀦𑀬𑀲𑁆𑀲 𑀯𑀸 𑀏𑀲𑀸 𑀥𑀫𑁆𑀫𑀢𑀸 𑀢𑁂𑀲𑀁 𑀕𑀭𑀼𑀕𑀸𑀭𑀯𑀝𑁆𑀞𑀸𑀦𑀲𑁆𑀲 𑀯𑀺𑀦𑀬𑀯𑀺𑀲𑀬𑀢𑁆𑀢𑀸.

𑀇𑀤𑀸𑀦𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀁 𑀧𑀸𑀴𑀺𑀬𑀸𑀧𑀺 𑀦 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀪𑀸𑀚𑀦𑀦𑁆𑀢𑀺 𑀧𑀢𑁆𑀢𑀸𑀤𑀺𑀪𑀸𑀚𑀦𑀁. 𑀧𑀢𑁆𑀢𑀸𑀤𑀺𑀁 𑀅𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀼𑀤𑁆𑀥𑀝𑁂𑀧𑀺 𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀉𑀤𑁆𑀥𑀭𑀡𑀓𑀸𑀮𑁂 𑀳𑁄𑀢𑀻𑀢𑀺 𑀆𑀳 ‘‘𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀉𑀤𑁆𑀥𑀸𑀭𑁂𑀦 𑀯𑀸’’𑀢𑀺. 𑀬𑀤𑀸 𑀧𑀦 𑀢𑁂𑀮𑀓𑀼𑀫𑁆𑀪𑀻𑀆𑀤𑀻𑀲𑀼 𑀢𑁂𑀮𑀸𑀤𑀻𑀦𑀁 𑀅𑀩𑀳𑀼𑀪𑀸𑀯𑀢𑁄 𑀪𑀸𑀚𑀦𑀁 ¶ 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀤𑀸 𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀳𑁄𑀢𑀺. 𑀘𑀺𑀓𑁆𑀓𑀦𑀦𑁆𑀢𑀺 𑀣𑀤𑁆𑀥𑀁. 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀬𑁄𑀕𑁆𑀕𑀦𑁆𑀢𑀺 𑀏𑀢𑁆𑀣 𑀅𑀪𑀺𑀫𑀼𑀔𑀁 𑀓𑀟𑁆𑀠𑀦𑀁 𑀆𑀓𑀟𑁆𑀠𑀦𑀁, 𑀧𑀭𑀢𑁄 𑀓𑀟𑁆𑀠𑀦𑀁 𑀯𑀺𑀓𑀟𑁆𑀠𑀦𑀁. 𑀧𑀝𑀺𑀦𑀻𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑀢𑁄 𑀧𑀝𑀺𑀦𑀻𑀳𑀭𑀺𑀢𑀼𑀁. 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸. 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 ‘‘𑀲𑀘𑁂𑀧𑀺 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀲𑀼𑀓𑁆𑀔𑀢𑀴𑀸𑀓𑀲𑁆𑀲 𑀉𑀤𑀓𑀦𑀺𑀩𑁆𑀩𑀳𑀦𑀝𑁆𑀞𑀸𑀦𑀁 𑀉𑀤𑀓𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀯𑀸 𑀧𑀺𑀤𑀳𑀢𑀺, 𑀅𑀜𑁆𑀜𑀢𑁄 𑀘 𑀕𑀫𑀦𑀫𑀕𑁆𑀕𑁂 𑀯𑀸 𑀧𑀸𑀴𑀺𑀁 𑀩𑀦𑁆𑀥𑀢𑀺, 𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸 𑀉𑀚𑀼𑀁 𑀓𑀭𑁄𑀢𑀺, 𑀧𑀘𑁆𑀙𑀸 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀫𑀭𑀺𑀬𑀸𑀤𑀁 𑀪𑀺𑀦𑁆𑀤𑀢𑀺, 𑀲𑀩𑁆𑀩𑀢𑁆𑀣 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀁 𑀧𑀦 𑀢𑀢𑁆𑀣𑁂𑀯 𑀲𑀼𑀓𑁆𑀔𑀢𑀴𑀸𑀓𑁂 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀯𑀳𑀸𑀭𑀮𑀓𑁆𑀔𑀡𑀦𑁆𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑁂𑀲𑀼 𑀏𑀓𑀫𑁆𑀧𑀺 𑀅𑀯𑀳𑀸𑀭𑀮𑀓𑁆𑀔𑀡𑀁, 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑁄 𑀏𑀯 𑀯𑀸. 𑀉𑀤𑁆𑀥𑀸𑀭𑁂𑀢𑀺 𑀓𑀼𑀫𑁆𑀪𑀺𑀬𑀸 𑀨𑀼𑀝𑁆𑀞𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑁂𑀧𑀺 𑀉𑀤𑁆𑀥𑀝𑁂. 𑀬𑀼𑀢𑁆𑀢𑀦𑁆𑀢𑀺 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑀲𑀩𑁆𑀪𑀸𑀯𑀢𑁄 𑀬𑀼𑀢𑁆𑀢𑀁. 𑀲𑀗𑁆𑀕𑁄𑀧𑀦𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀮𑀺𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀦𑀺𑀯𑀸𑀭𑁂𑀲𑁆𑀲𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 ¶ 𑀉𑀤𑁆𑀥𑀭𑀢𑀻𑀢𑀺 𑀓𑀼𑀫𑁆𑀪𑀺𑀬𑀁 𑀢𑁂𑀮𑀲𑁆𑀲 𑀆𑀓𑀺𑀭𑀡𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀼𑀤𑁆𑀥𑀘𑀺𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 𑀉𑀤𑁆𑀥𑀭𑀢𑀺. 𑀦𑁂𑀯 𑀅𑀯𑀳𑀸𑀭𑁄𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀭𑀡𑀧𑀬𑁄𑀕𑀲𑁆𑀲 𑀅𑀓𑀢𑀢𑁆𑀢𑀸. 𑀅𑀢𑁆𑀢𑀦𑁄 𑀪𑀸𑀚𑀦𑀢𑁆𑀢𑀸 𑀧𑀦 ‘‘𑀦 𑀕𑀻𑀯𑀸’’𑀢𑀺 𑀯𑀼𑀢𑁆𑀢𑀁, 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀏𑀯𑀁 𑀯𑀺𑀘𑀸𑀭𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸𑀧𑀺 𑀢𑀢𑁆𑀣 ‘‘𑀕𑀻𑀯𑀸’’𑀢𑀺 𑀯𑀘𑀦𑀸𑀪𑀸𑀯𑀢𑁄 ‘‘𑀦 𑀕𑀻𑀯𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀫𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀧𑀘𑁆𑀙𑀸 𑀤𑀲𑁆𑀲𑀺𑀢𑁂𑀦 𑀓𑀼𑀭𑀼𑀦𑁆𑀤𑀺𑀯𑀸𑀤𑁂𑀦𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄𑀯 𑀲𑀫𑀢𑁆𑀣𑀺𑀢𑁄. 𑀅𑀢𑁆𑀢𑀦𑁄 𑀪𑀡𑁆𑀟𑀦𑁆𑀢𑀺 𑀢𑁂𑀮𑀸𑀓𑀺𑀭𑀡𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀢𑁆𑀢𑀦𑁄 𑀓𑀼𑀫𑁆𑀪𑀺𑀬𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀞𑀧𑀺𑀢𑀁 𑀧𑀻𑀢𑀢𑁂𑀮𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁. 𑀲𑀫𑁆𑀫𑁄𑀳𑀝𑁆𑀞𑀸𑀦𑀦𑁆𑀢𑀺 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀲𑀫𑁆𑀫𑁄𑀳𑀝𑁆𑀞𑀸𑀦𑀁.

𑀩𑀳𑀺𑀕𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀮𑀲𑁆𑀲 𑀅𑀝𑁆𑀞𑀸𑀦𑀪𑀸𑀯𑀢𑁄 𑀅𑀥𑁄𑀫𑀼𑀔𑀪𑀸𑀯𑀢𑁄 𑀘 𑀩𑀳𑀺𑀕𑀢𑀁 𑀦𑀸𑀫 𑀳𑁄𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀙𑀺𑀤𑁆𑀤𑁂 𑀓𑀭𑀺𑀬𑀫𑀸𑀦𑁂 𑀢𑁂𑀮𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑀁 𑀪𑀸𑀚𑀦𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀆𑀳 𑁋 ‘‘𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲𑀸𑀢𑀺 𑀩𑀸𑀳𑀺𑀭𑀦𑁆𑀢𑀢𑁄 𑀅𑀩𑁆𑀪𑀦𑁆𑀢𑀭𑀢𑁄 𑀯𑀸 𑀧𑀝𑁆𑀞𑀸𑀬 𑀓𑀢𑀲𑁆𑀲. 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀓𑀢𑀙𑀺𑀤𑁆𑀤𑁂𑀢𑀺 𑀫𑀚𑁆𑀛𑁂 𑀣𑁄𑀓𑀁 𑀓𑀧𑀸𑀮𑀁 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑀁 𑀙𑀺𑀦𑁆𑀤𑀦𑁆𑀢𑁂𑀦 𑀓𑀢𑀙𑀺𑀤𑁆𑀤𑁂. ‘‘𑀫𑀭𑀺𑀬𑀸𑀤𑀘𑁆𑀙𑁂𑀤𑀦𑁂 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺𑀫𑀼𑀔𑁄 𑀙𑀺𑀦𑁆𑀤𑀦𑁆𑀢𑁄 𑀩𑀳𑀺 𑀅𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀩𑀳𑀺 𑀞𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁄 𑀙𑀺𑀦𑁆𑀤𑀦𑁆𑀢𑁄 𑀅𑀦𑁆𑀢𑁄 𑀅𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀅𑀦𑁆𑀢𑁄 𑀘 𑀩𑀳𑀺 𑀘 𑀙𑀺𑀦𑁆𑀤𑀺𑀢𑁆𑀯𑀸 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀢𑀁 𑀙𑀺𑀦𑁆𑀤𑀦𑁆𑀢𑁄 𑀫𑀚𑁆𑀛𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁮) 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀴𑀸𑀓𑀲𑁆𑀲 𑀘 𑀫𑀭𑀺𑀬𑀸𑀤𑀪𑁂𑀤𑁂𑀦 𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀬𑀼𑀢𑁆𑀢𑀦𑁆𑀢𑀺 ¶ 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀝𑁆𑀞𑀸𑀬 𑀓𑀢𑀙𑀺𑀤𑁆𑀤𑁂 𑀫𑀚𑁆𑀛𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀓𑀢𑁂 𑀧𑀦 𑀩𑀸𑀳𑀺𑀭𑀦𑁆𑀢𑁂𑀦, 𑀩𑀳𑀺 𑀧𑀝𑁆𑀞𑀸𑀬 𑀓𑀢𑁂 𑀅𑀩𑁆𑀪𑀦𑁆𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀬𑀁 𑀢𑀺𑀧𑁆𑀧𑀓𑀸𑀭𑁄𑀧𑀺 𑀏𑀢𑁆𑀣 𑀯𑁂𑀫𑀝𑁆𑀞𑀙𑀺𑀤𑁆𑀤𑁂 𑀬𑀼𑀢𑁆𑀢𑁄. 𑀉𑀤𑀓𑁂 𑀓𑀢𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄 ‘‘𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑀲𑁆𑀲 𑀅𑀪𑀸𑀯𑀸’’𑀢𑀺 𑀯𑀼𑀢𑁆𑀢𑀁.

𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀢𑁆𑀣𑀺𑀦𑁆𑀦𑀲𑁆𑀲 𑀔𑀸𑀤𑀦𑀁 𑀇𑀢𑀭𑀲𑁆𑀲 𑀧𑀸𑀦𑀜𑁆𑀘 𑀲𑀧𑁆𑀧𑀺𑀆𑀤𑀻𑀦𑀁 𑀧𑀭𑀺𑀪𑁄𑀕𑁄𑀢𑀺 𑀆𑀳 𑁋 ‘‘𑀅𑀔𑀸𑀤𑀺𑀢𑀩𑁆𑀩𑀁 𑀯𑀸 𑀅𑀧𑀸𑀢𑀩𑁆𑀩𑀁 𑀯𑀸 𑀓𑀭𑁄𑀢𑀻’’𑀢𑀺. 𑀓𑀣𑀁 𑀧𑀦 𑀢𑀣𑀸 𑀓𑀭𑁄𑀢𑀻𑀢𑀺 𑀆𑀳 ‘‘𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’’𑀦𑁆𑀢𑀺. 𑀧𑀼𑀭𑀺𑀫𑀤𑁆𑀯𑀬𑀦𑁆𑀢𑀺 𑀪𑁂𑀤𑀦𑀁 𑀙𑀟𑁆𑀟𑀦𑀜𑁆𑀘. 𑀓𑀲𑁆𑀫𑀸 𑀦 𑀲𑀫𑁂𑀢𑀻𑀢𑀺 ¶ 𑀆𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀓𑀼𑀫𑁆𑀪𑀺𑀚𑀚𑁆𑀚𑀭𑀓𑀭𑀡𑁂𑀦𑀸𑀢𑀺 𑀧𑀼𑀡𑁆𑀡𑀓𑀼𑀫𑁆𑀪𑀺𑀬𑀸 𑀚𑀚𑁆𑀚𑀭𑀓𑀭𑀡𑁂𑀦. 𑀫𑀸𑀢𑀺𑀓𑀸𑀉𑀚𑀉𑀓𑀭𑀡𑁂𑀦𑀸𑀢𑀺 𑀉𑀤𑀓𑀧𑀼𑀡𑁆𑀡𑀸𑀬 𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑁂𑀦. 𑀏𑀓𑀮𑀓𑁆𑀔𑀡𑀦𑁆𑀢𑀺 𑀪𑁂𑀤𑀦𑀁 𑀓𑀼𑀫𑁆𑀪𑀺𑀚𑀚𑁆𑀚𑀭𑀓𑀭𑀡𑁂𑀦 𑀙𑀟𑁆𑀟𑀦𑀁 𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑁂𑀦 𑀲𑀤𑁆𑀥𑀺𑀁 𑀏𑀓𑀲𑀪𑀸𑀯𑀁 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑀲𑀩𑁆𑀪𑀸𑀯𑀢𑁄. 𑀧𑀘𑁆𑀙𑀺𑀫𑀁 𑀧𑀦 𑀤𑁆𑀯𑀬𑀦𑁆𑀢𑀺 𑀛𑀸𑀧𑀦𑀁 𑀅𑀧𑀭𑀺𑀪𑁄𑀕𑀓𑀭𑀡𑀜𑁆𑀘.

𑀏𑀢𑁆𑀣 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀏𑀓𑁂 𑀆𑀘𑀭𑀺𑀬𑀸 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀺. 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀤𑁆𑀯𑀬𑁂 𑀯𑀺𑀦𑀺𑀘𑁆𑀙𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀓𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀣𑁂𑀬𑁆𑀬𑀘𑀺𑀢𑁆𑀢𑁂𑀦. 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀓𑁂𑀯𑀮𑀁 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬. 𑀧𑀼𑀭𑀺𑀫𑀤𑁆𑀯𑀬𑁂 𑀓𑀺𑀁 𑀳𑁄𑀢𑀺, 𑀓𑀺𑀁 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀼𑀭𑀺𑀫𑀤𑁆𑀯𑀬𑁂 𑀧𑀦…𑀧𑁂… 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀸𑀢𑀺 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀦𑁆𑀢𑀲𑁆𑀲 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀆𑀓𑀺𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂𑀢𑀺 𑀧𑀸𑀴𑀺𑀬𑀁 𑀧𑀼𑀭𑀺𑀫𑀧𑀤𑀤𑁆𑀯𑀬𑁂𑀧𑀺 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀭𑀺𑀫𑀤𑁆𑀯𑀬𑁂…𑀧𑁂… 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀤𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀬𑀤𑀺 𑀢𑀼𑀫𑁆𑀳𑀸𑀓𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀢𑀺 𑀅𑀬𑀼𑀢𑁆𑀢𑀪𑀸𑀯𑀧𑁆𑀧𑀲𑀗𑁆𑀕𑀁 𑀦𑀺𑀲𑁂𑀥𑁂𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄’’𑀢𑀺. 𑀓𑀣𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀸𑀴𑀺𑀬𑀁 𑀳𑀻’’𑀢𑀺𑀆𑀤𑀺. 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑀲𑁆𑀲 𑀅𑀯𑀺𑀭𑀼𑀚𑁆𑀛𑀦𑀢𑁄 ‘‘𑀣𑁂𑀬𑁆𑀬𑀘𑀺𑀢𑁆𑀢𑀧𑀓𑁆𑀔𑁂’’𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀻’’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀏𑀓𑀲𑁆𑀲𑁂𑀯 𑀯𑀘𑀦𑀢𑁆𑀢𑀸 ‘‘𑀏𑀯𑀫𑁂𑀓𑁂 𑀯𑀤𑀦𑁆𑀢𑀻’’𑀢𑀺 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀯𑀲𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀲𑁆𑀲 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀘𑀦𑁂 𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀤𑁂𑀲𑀼 ‘‘𑀙𑀟𑁆𑀟𑁂𑀢𑀺 ¶ 𑀯𑀸 𑀅𑀧𑀭𑀺𑀪𑁄𑀕𑀁 𑀯𑀸 𑀓𑀭𑁄𑀢𑀻’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘 𑀲𑀬𑀁 𑀅𑀜𑁆𑀜𑀣𑀸 𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 ‘‘𑀲𑀗𑁆𑀖𑀲𑁆𑀲 𑀧𑀼𑀜𑁆𑀚𑀓𑀺𑀢𑀁 𑀢𑀺𑀡𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀛𑀸𑀧𑁂𑀲𑀻’’𑀲𑀺 (𑀧𑀸𑀭𑀸. 𑁧𑁫𑁬) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀢𑀺𑀡𑀚𑁆𑀛𑀸𑀧𑀓𑁄 𑀯𑀺𑀬𑀸𑀢𑀺 𑀇𑀫𑀺𑀦𑀸𑀯 ¶ 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀯𑀸𑀢𑀺 𑀏𑀢𑁆𑀣𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀢𑀺 𑀇𑀤𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀙𑀟𑁆𑀟𑁂𑀢𑀼𑀓𑀸𑀫𑁄𑀬𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑀧𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑁂 𑀧𑀦𑀸’’𑀢𑀺𑀆𑀤𑀺. 𑀇𑀢𑀭𑀣𑀸𑀧𑀺 𑀬𑀼𑀚𑁆𑀚𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑀲𑁆𑀲𑀧𑀺 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀽𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀓𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁬. 𑀆𑀓𑀸𑀲𑀝𑁆𑀞𑀓𑀣𑀸𑀬𑀁 𑀫𑀼𑀔𑀢𑀼𑀡𑁆𑀟𑀓𑁂𑀦𑀸𑀢𑀺 𑀫𑀼𑀔𑀕𑁆𑀕𑁂𑀦. 𑀓𑀮𑀸𑀧𑀕𑁆𑀕𑁂𑀦𑀸𑀢𑀺 𑀧𑀺𑀜𑁆𑀙𑀓𑀮𑀸𑀧𑀲𑁆𑀲 𑀅𑀕𑁆𑀕𑁂𑀦. 𑀧𑀲𑀸𑀭𑁂𑀢𑀻𑀢𑀺 𑀕𑀳𑀡𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀅𑀕𑁆𑀕𑀳𑁂𑀢𑁆𑀯𑀸 𑀯𑀸𑀢𑀺 𑀮𑁂𑀟𑁆𑀟𑀼𑀆𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀦𑀬𑀦𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀯𑀸. 𑀆𑀓𑀸𑀲𑀝𑁆𑀞𑀯𑀺𑀦𑀺𑀘𑁆𑀙𑀬𑁂 𑀯𑀼𑀘𑁆𑀘𑀫𑀸𑀦𑁂𑀧𑀺 𑀢𑀧𑁆𑀧𑀲𑀗𑁆𑀕𑁂𑀦 𑀆𑀓𑀸𑀲𑀝𑁆𑀞𑀲𑁆𑀲 𑀯𑁂𑀳𑀸𑀲𑀝𑁆𑀞𑀸𑀤𑀺𑀪𑀸𑀯𑀫𑀼𑀧𑀕𑀢𑁂𑀧𑀺 𑀅𑀲𑀫𑁆𑀫𑁄𑀳𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀅𑀗𑁆𑀕𑁂 𑀦𑀺𑀮𑀻𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀻𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀯𑀢𑁆𑀣𑀼𑀲𑁆𑀲 𑀅𑀦𑁆𑀢𑁄. 𑀅𑀦𑁆𑀢𑁄𑀕𑀸𑀫𑁂𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀅𑀦𑁆𑀢𑁄. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀦 𑀯𑀢𑁆𑀣𑀼𑀫𑁆𑀳𑀺, 𑀕𑀸𑀫𑁂 𑀯𑀸 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀅𑀝𑀯𑀺𑀫𑀼𑀔𑀁 𑀓𑀭𑁄𑀢𑀻𑀢𑀺 𑀅𑀭𑀜𑁆𑀜𑀸𑀪𑀺𑀫𑀼𑀔𑀁 𑀓𑀭𑁄𑀢𑀺. 𑀭𑀓𑁆𑀔𑀢𑀻𑀢𑀺 𑀢𑁂𑀦 𑀧𑀬𑁄𑀕𑁂𑀦 𑀢𑀲𑁆𑀲 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀢𑀢𑁆𑀢𑀸 𑀭𑀓𑁆𑀔𑀢𑀺. 𑀪𑀽𑀫𑀺𑀬𑀸 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬 ‘‘𑀤𑀼𑀢𑀺𑀬𑀧𑀤𑀯𑀸𑀭𑁂 𑀯𑀸’’𑀢𑀺 𑀯𑀼𑀢𑁆𑀢𑀁. 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲. 𑀓𑀧𑀺𑀜𑁆𑀚𑀭𑁄 𑀦𑀸𑀫 𑀏𑀓𑀸 𑀧𑀓𑁆𑀔𑀺𑀚𑀸𑀢𑀺.

𑀆𑀓𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀳𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁭. 𑀯𑁂𑀳𑀸𑀲𑀝𑁆𑀞𑀓𑀣𑀸𑀬𑀁 𑀧𑀦 𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀲𑁆𑀲 𑀘𑀻𑀯𑀭𑀲𑁆𑀲 𑀆𑀓𑀟𑁆𑀠𑀦𑁂 𑀬𑀣𑀸𑀯𑀼𑀢𑁆𑀢𑀧𑁆𑀧𑀤𑁂𑀲𑀸𑀢𑀺𑀓𑁆𑀓𑀫𑁄 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀓𑀟𑁆𑀠𑀦𑁂𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀓𑀟𑁆𑀠𑀦𑁂𑀦𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀇𑀤𑀜𑁆𑀘 𑀢𑀸𑀤𑀺𑀲𑀁 𑀦𑀸𑀢𑀺𑀫𑀳𑀦𑁆𑀢𑀁 𑀘𑀻𑀯𑀭𑀯𑀁𑀲𑀤𑀡𑁆𑀟𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀳𑀦𑁆𑀢𑁂 𑀧𑀦 𑀢𑀢𑁄 𑀅𑀥𑀺𑀓𑀫𑀢𑁆𑀢𑀸𑀓𑀟𑁆𑀠𑀦𑁂𑀦𑁂𑀯 ¶ 𑀲𑀺𑀬𑀸. 𑀭𑀚𑁆𑀚𑀼𑀓𑁂𑀦 𑀩𑀦𑁆𑀥𑀺𑀢𑁆𑀯𑀸𑀢𑀺 𑀏𑀓𑀸𑀬 𑀭𑀚𑁆𑀚𑀼𑀓𑁄𑀝𑀺𑀬𑀸 𑀘𑀻𑀯𑀭𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀅𑀧𑀭𑀸𑀬 𑀓𑁄𑀝𑀺𑀬𑀸 𑀘𑀻𑀯𑀭𑀯𑀁𑀲𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀁. 𑀫𑀼𑀢𑁆𑀢𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀧𑀢𑀦𑀓𑀲𑀪𑀸𑀯𑀢𑁆𑀢𑀸 ‘‘𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀓𑀫𑁂𑀓𑀲𑁆𑀲 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀪𑀺𑀢𑁆𑀢𑀺𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑁂𑀲𑀼 𑀦𑀸𑀕𑀤𑀦𑁆𑀢𑀸𑀤𑀻𑀲𑀼𑀬𑁂𑀯 𑀆𑀭𑁄𑀧𑁂𑀢𑁆𑀯𑀸 𑀪𑀺𑀢𑁆𑀢𑀺𑀁 𑀨𑀼𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀁. 𑀧𑀡𑁆𑀡𑀦𑁆𑀢𑀭𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀸𑀢𑀺 𑀅𑀜𑁆𑀜𑁂𑀳𑀺 𑀞𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀯𑁂𑀳𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁮. 𑀉𑀤𑀓𑀝𑁆𑀞𑀓𑀣𑀸𑀬𑀁 𑀲𑀦𑁆𑀤𑀫𑀸𑀦𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀅𑀲𑀦𑁆𑀤𑀦𑀓𑁂 𑀉𑀤𑀓𑁂’’𑀢𑀺. 𑀅𑀦𑀸𑀧𑀢𑁆𑀢𑀻𑀢𑀺 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀟𑁆𑀠𑀢𑀻𑀢𑀺 𑀳𑁂𑀝𑁆𑀞𑀢𑁄 𑀑𑀲𑀸𑀭𑁂𑀢𑀺. 𑀉𑀧𑁆𑀧𑀮𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓𑀁. 𑀲𑁂𑀢𑀁 𑀯𑀸 𑀧𑀤𑀼𑀫𑀁, 𑀭𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁. 𑀅𑀣 𑀯𑀸 𑀭𑀢𑁆𑀢𑀁 𑀯𑀸 𑀳𑁄𑀢𑀼 𑀲𑁂𑀢𑀁 𑀯𑀸 𑀲𑀢𑀧𑀢𑁆𑀢𑀁 𑀧𑀤𑀼𑀫𑀁, 𑀊𑀦𑀲𑀢𑀧𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁. 𑀯𑀢𑁆𑀣𑀼 𑀧𑀽𑀭𑀢𑀻𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀧𑀳𑁄𑀢𑀺. 𑀢𑀲𑁆𑀫𑀺𑀁 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀉𑀤𑀓𑀢𑁄 𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀉𑀤𑀓𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀢𑁄 𑀙𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀯𑀢𑁆𑀣𑀼𑀁 𑀧𑀽𑀭𑁂𑀢𑀻𑀢𑀺 𑀬𑀁 𑀧𑀼𑀧𑁆𑀨𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀧𑀽𑀭𑁂𑀢𑀺. 𑀤𑀲𑀳𑀺 𑀧𑀼𑀧𑁆𑀨𑁂𑀳𑀺 𑀓𑀢𑀓𑀮𑀸𑀧𑁄 𑀳𑀢𑁆𑀣𑀓𑁄, 𑀫𑀳𑀦𑁆𑀢𑀁 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀤𑁆𑀥𑀁 𑀪𑀸𑀭𑀩𑀤𑁆𑀥𑀁. 𑀭𑀚𑁆𑀚𑀼𑀓𑁂𑀲𑀼 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀤𑁆𑀯𑁂 𑀭𑀚𑁆𑀚𑀼𑀓𑀸𑀦𑀺 𑀉𑀤𑀓𑀧𑀺𑀝𑁆𑀞𑁂 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀢𑀺𑀭𑀺𑀬𑀢𑁄 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀅𑀩𑀦𑁆𑀥𑀺𑀢𑁆𑀯𑀸 𑀯𑀸 𑀢𑀺𑀭𑀺𑀬𑀢𑁄𑀬𑁂𑀯 𑀧𑀼𑀧𑁆𑀨𑀸𑀦𑀺 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀢𑁄 𑀕𑀢𑀸𑀦𑀺 𑀤𑁆𑀯𑁂 𑀭𑀚𑁆𑀚𑀼𑀓𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀧𑁆𑀨𑀫𑀢𑁆𑀣𑀓𑁂 𑀞𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑁂𑀢𑀻𑀢𑀺 𑀧𑀸𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁, 𑀑𑀭𑀺𑀫𑀦𑁆𑀢𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀁 𑀘𑀸𑀯𑁂𑀢𑀺. 𑀲𑀓𑀮𑀫𑀼𑀤𑀓𑀦𑁆𑀢𑀺 𑀤𑀡𑁆𑀟𑁂𑀦 𑀨𑀼𑀝𑁆𑀞𑁄𑀓𑀸𑀲𑀕𑀢𑀁 𑀲𑀓𑀮𑀫𑀼𑀤𑀓𑀁. 𑀦 𑀉𑀤𑀓𑀁 𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀲𑁆𑀲 𑀅𑀝𑁆𑀞𑀸𑀦𑀢𑁆𑀢𑀸. 𑀇𑀤𑀁 𑀉𑀪𑀬𑀦𑁆𑀢𑀺 𑀏𑀢𑁆𑀣 ‘‘𑀩𑀦𑁆𑀥𑀦𑀁 𑀅𑀫𑁄𑀘𑁂𑀢𑁆𑀯𑀸…𑀧𑁂… 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀇𑀤𑀫𑁂𑀯𑁂𑀓𑀁, ‘‘𑀧𑀞𑀫𑀁 𑀩𑀦𑁆𑀥𑀦𑀁…𑀧𑁂… 𑀞𑀸𑀦𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀇𑀤𑀁 𑀤𑀼𑀢𑀺𑀬𑀁. 𑀧𑀤𑀼𑀫𑀺𑀦𑀺𑀬𑀦𑁆𑀢𑀺 𑀧𑀤𑀼𑀫𑀕𑀘𑁆𑀙𑁂. 𑀉𑀧𑁆𑀧𑀸𑀝𑀺𑀢𑀸𑀬𑀸𑀢𑀺 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀧𑁆𑀧𑀸𑀝𑀺𑀢𑀸𑀬.

𑀩𑀳𑀺 ¶ 𑀞𑀧𑀺𑀢𑁂𑀢𑀺 𑀉𑀤𑀓𑀢𑁄 𑀩𑀳𑀺 𑀞𑀧𑀺𑀢𑁂. 𑀳𑀢𑁆𑀣𑀓𑀯𑀲𑁂𑀦 𑀔𑀼𑀤𑁆𑀤𑀓𑀁 𑀓𑀢𑁆𑀯𑀸

𑀩𑀤𑁆𑀥𑀁 𑀓𑀮𑀸𑀧𑀩𑀤𑁆𑀥𑀁. 𑀫𑀼𑀴𑀸𑀮𑀦𑁆𑀢𑀺 𑀓𑀦𑁆𑀤𑀁. 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸𑀢𑀺 𑀇𑀤𑀁 𑀓𑀤𑁆𑀤𑀫𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀓𑀮𑀫𑀼𑀤𑀓𑀦𑁆𑀢𑀺 ¶ 𑀯𑀸𑀧𑀺𑀆𑀤𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑀁 𑀲𑀓𑀮𑀫𑀼𑀤𑀓𑀁. 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀦𑁆𑀢𑀺 𑀯𑀸𑀧𑀺𑀬𑀸 𑀉𑀤𑀓𑀲𑁆𑀲 𑀦𑀺𑀓𑁆𑀔𑀫𑀦𑀫𑀕𑁆𑀕𑀁. 𑀉𑀤𑀓𑀯𑀸𑀳𑀓𑀦𑁆𑀢𑀺 𑀫𑀳𑀸𑀫𑀸𑀢𑀺𑀓𑀁. 𑀦 𑀅𑀯𑀳𑀸𑀭𑁄𑀢𑀺 𑀇𑀤𑀁 𑀧𑀼𑀩𑁆𑀩𑀲𑀤𑀺𑀲𑀁 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀓𑀲𑁆𑀫𑀸…𑀧𑁂… 𑀏𑀯𑀭𑀽𑀧𑀸 𑀳𑀺 𑀢𑀢𑁆𑀣 𑀓𑀢𑀺𑀓𑀸’’𑀢𑀺. 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑁂 𑀅𑀧𑀭𑀺𑀕𑁆𑀕𑀳𑀝𑁆𑀞𑀸𑀦𑁂 𑀕𑀳𑀺𑀢𑀢𑁆𑀢𑀸. 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀔𑀼𑀤𑁆𑀤𑀓𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸. 𑀫𑀭𑀺𑀢𑁆𑀯𑀸…𑀧𑁂… 𑀢𑀺𑀝𑁆𑀞𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀫𑀢𑀫𑀘𑁆𑀙𑀸𑀦𑀁𑀬𑁂𑀯 𑀢𑁂𑀲𑀁 𑀲𑀦𑁆𑀢𑀓𑀢𑁆𑀢𑀸 𑀅𑀫𑀢𑁂 𑀕𑀡𑁆𑀳𑀦𑁆𑀢𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄’’𑀢𑀺 𑀯𑀤𑀦𑁆𑀢𑀺.

𑀉𑀤𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀯𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁯𑁯. 𑀦𑀸𑀯𑀝𑁆𑀞𑀓𑀣𑀸𑀬𑀁 𑀧𑀦 𑀬𑀸 𑀩𑀦𑁆𑀥𑀦𑀸 𑀫𑀼𑀢𑁆𑀢𑀫𑀢𑁆𑀢𑁂 𑀞𑀸𑀦𑀸 𑀦 𑀘𑀯𑀢𑀻𑀢𑀺 𑀇𑀫𑀺𑀦𑀸 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀦𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀸𑀯 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀩𑀦𑁆𑀥𑀦𑀁 𑀫𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀯𑀁 𑀫𑁄𑀘𑁂𑀦𑁆𑀢𑀲𑁆𑀲 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑀫𑁆𑀧𑀺 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀞𑀫𑀁 𑀞𑀸𑀦𑀸 𑀅𑀘𑀸𑀯𑁂𑀢𑁆𑀯𑀸 𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀞𑀫𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑁄 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀬𑀼𑀢𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯𑀸’’𑀢𑀺. 𑀯𑀺𑀧𑁆𑀧𑀦𑀝𑁆𑀞𑀸 𑀦𑀸𑀯𑀸𑀢𑀺 𑀯𑀺𑀲𑀫𑀯𑀸𑀢𑀸𑀤𑀻𑀳𑀺 𑀯𑀺𑀦𑀸𑀲𑀁 𑀧𑀢𑁆𑀯𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀳𑁂𑀝𑁆𑀞𑀸 𑀪𑀽𑀫𑀺𑀢𑀮𑀁 𑀅𑀧𑁆𑀧𑀢𑁆𑀯𑀸 𑀫𑀚𑁆𑀛𑁂 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑁂𑀯 ‘‘𑀅𑀥𑁄 𑀯𑀸 𑀑𑀧𑀺𑀮𑀸𑀧𑁂𑀦𑁆𑀢𑀲𑁆𑀲…𑀧𑁂… 𑀦𑀸𑀯𑀸𑀢𑀮𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀔𑀯𑀝𑁆𑀝𑀺𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀧𑀺𑀮𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀲𑁆𑀲. 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂𑀢𑀺 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂. 𑀏𑀲𑁂𑀯 𑀦𑀬𑁄𑀢𑀺 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀦𑀸𑀯𑀸𑀓𑀟𑁆𑀠𑀦𑀬𑁄𑀕𑁆𑀕𑀫𑀳𑀸𑀬𑁄𑀢𑁆𑀢𑀢𑀸𑀬 𑀬𑁄𑀢𑁆𑀢𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀓𑀮𑀫𑁆𑀧𑀺 ‘‘𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀲𑀢𑀺𑀧𑀺 𑀯𑀸𑀢𑁂 𑀬𑀣𑀸 𑀯𑀸𑀢𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀞𑀧𑀺𑀢𑀢𑁆𑀢𑀸 ‘‘𑀯𑀸𑀢𑀁 𑀕𑀡𑁆𑀳𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀩𑀮𑀯𑀸 𑀘 𑀯𑀸𑀢𑁄 𑀆𑀕𑀫𑁆𑀫𑀸𑀢𑀺 𑀇𑀫𑀺𑀦𑀸 ¶ 𑀅𑀲𑀢𑀺 𑀯𑀸𑀢𑁂 𑀅𑀬𑀁 𑀧𑀬𑁄𑀕𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺 𑀅𑀯𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀲𑀢𑀺 𑀧𑀦 𑀯𑀸𑀢𑁂 𑀓𑀢𑁄 𑀧𑀬𑁄𑀕𑁄 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑁄𑀬𑁂𑀯𑀸𑀢𑀺 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑁂 𑀯𑀺𑀬 𑀅𑀢𑁆𑀣𑁂𑀯 𑀅𑀯𑀳𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀞𑀸𑀦𑀸𑀘𑀸𑀯𑀦𑀧𑀬𑁄𑀕𑁄 𑀦 𑀳𑁄𑀢𑀻𑀢𑀺 𑀲𑀼𑀓𑁆𑀔𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑁂 𑀯𑀺𑀬 𑀅𑀲𑀢𑀺 𑀯𑀸𑀢𑁂 𑀓𑀢𑀧𑀬𑁄𑀕𑀢𑁆𑀢𑀸. 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺 𑀦𑀸𑀯𑀸𑀲𑀸𑀫𑀺𑀓𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺.

𑀦𑀸𑀯𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀸𑀦𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁦. 𑀬𑀸𑀦𑀝𑁆𑀞𑀓𑀣𑀸𑀬𑀁 ¶ 𑀤𑀼𑀓𑀬𑀼𑀢𑁆𑀢𑀲𑁆𑀲𑀸𑀢𑀺 𑀤𑁆𑀯𑀻𑀳𑀺 𑀕𑁄𑀡𑁂𑀳𑀺 𑀬𑀼𑀢𑁆𑀢𑀲𑁆𑀲. 𑀅𑀬𑀼𑀢𑁆𑀢𑀓𑀦𑁆𑀢𑀺 𑀕𑁄𑀡𑁂𑀳𑀺 𑀅𑀬𑀼𑀢𑁆𑀢𑀁. 𑀓𑀧𑁆𑀧𑀓𑀢𑀸𑀢𑀺 𑀬𑀣𑀸 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀓𑀢𑀸. 𑀢𑀻𑀡𑀺 𑀯𑀸 𑀘𑀢𑁆𑀢𑀸𑀭𑀺 𑀯𑀸 𑀞𑀸𑀦𑀸𑀦𑀻𑀢𑀺 𑀅𑀓𑀧𑁆𑀧𑀓𑀢𑀸𑀬 𑀉𑀧𑀢𑁆𑀣𑀫𑁆𑀪𑀦𑀺𑀬𑀸 𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀺, 𑀓𑀧𑁆𑀧𑀓𑀢𑀸𑀬 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀻𑀢𑀺. 𑀢𑀣𑀸 𑀧𑀣𑀯𑀺𑀬𑀁 𑀞𑀧𑀺𑀢𑀲𑁆𑀲 𑀢𑀻𑀡𑀺 𑀞𑀸𑀦𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀨𑀮𑀓𑀲𑁆𑀲 𑀯𑀸 𑀤𑀸𑀭𑀼𑀓𑀲𑁆𑀲 𑀯𑀸 𑀉𑀧𑀭𑀺 𑀞𑀧𑀺𑀢𑀁 𑀧𑀣𑀯𑀺𑀬𑀁 𑀞𑀧𑀺𑀢𑀜𑁆𑀘. 𑀤𑁆𑀯𑀻𑀳𑀺 𑀅𑀓𑁆𑀔𑀲𑀻𑀲𑁂𑀳𑀻𑀢𑀺 𑀤𑁆𑀯𑀻𑀳𑀺 𑀅𑀓𑁆𑀔𑀓𑁄𑀝𑀻𑀳𑀺. 𑀤𑀸𑀭𑀽𑀦𑀁 𑀉𑀧𑀭𑀺 𑀞𑀧𑀺𑀢𑀲𑁆𑀲𑀸𑀢𑀺 𑀤𑁆𑀯𑀺𑀦𑁆𑀦𑀁 𑀤𑀸𑀭𑀽𑀦𑀁 𑀉𑀧𑀭𑀺 𑀤𑁆𑀯𑀻𑀳𑀺 𑀅𑀓𑁆𑀔𑀓𑁄𑀝𑀻𑀳𑀺 𑀑𑀮𑀫𑁆𑀩𑁂𑀢𑁆𑀯𑀸 𑀲𑀓𑀝𑀲𑀸𑀮𑀸𑀬𑀁 𑀞𑀧𑀺𑀢𑀲𑁆𑀲. 𑀳𑁂𑀝𑁆𑀞𑀺𑀫𑀢𑀮𑀲𑁆𑀲𑀸𑀢𑀺 𑀲𑀓𑀝𑀩𑀸𑀳𑀸𑀬 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀳𑁂𑀝𑁆𑀞𑀺𑀫𑀪𑀸𑀕𑀲𑁆𑀲. 𑀲𑁂𑀲𑀁 𑀦𑀸𑀯𑀸𑀬𑀁 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺 𑀇𑀫𑀺𑀦𑀸 ‘‘𑀬𑀤𑀺 𑀧𑀦 𑀢𑀁 𑀏𑀯𑀁 𑀕𑀘𑁆𑀙𑀦𑁆𑀢𑀁 𑀧𑀓𑀢𑀺𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀤𑀺𑀲𑀸𑀪𑀸𑀕𑀁 𑀦𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀬𑀫𑁂𑀯 𑀬𑀁 𑀓𑀜𑁆𑀘𑀺 𑀕𑀸𑀫𑀁 𑀲𑀫𑁆𑀧𑀢𑁆𑀢𑀁 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁄𑀯 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀦𑁂𑀯𑀢𑁆𑀣𑀺 𑀅𑀯𑀳𑀸𑀭𑁄, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻’’𑀢𑀺 𑀇𑀫𑀁 𑀦𑀬𑀁 𑀅𑀢𑀺𑀤𑀺𑀲𑁆𑀲𑀢𑀺.

𑀬𑀸𑀦𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁧. 𑀪𑀸𑀭𑀝𑁆𑀞𑀓𑀣𑀸𑀬𑀁 𑀧𑀼𑀭𑀺𑀫𑀕𑀮𑁂 𑀕𑀮𑀯𑀸𑀝𑀓𑁄𑀢𑀺 𑀧𑀼𑀭𑀺𑀫𑀕𑀮𑁂 𑀉𑀧𑀭𑀺𑀫𑀕𑀮𑀯𑀸𑀝𑀓𑁄. 𑀉𑀭𑀧𑀭𑀺𑀘𑁆𑀙𑁂𑀤𑀫𑀚𑁆𑀛𑁂𑀢𑀺 𑀉𑀭𑀧𑀭𑀺𑀬𑀦𑁆𑀢𑀲𑁆𑀲 𑀫𑀚𑁆𑀛𑁂. 𑀅𑀦𑀸𑀡𑀢𑁆𑀢𑀢𑁆𑀢𑀸𑀢𑀺 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑁂𑀳𑀻’’𑀢𑀺 𑀅𑀦𑀸𑀡𑀢𑁆𑀢𑀢𑁆𑀢𑀸. 𑀬𑁄 𑀘𑀸𑀬𑀁 𑀲𑀻𑀲𑀪𑀸𑀭𑁂 ¶ 𑀯𑀼𑀢𑁆𑀢𑁄𑀢𑀺 𑀬𑁄 𑀘𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑀲𑀻𑀲𑀪𑀸𑀭𑁂 𑀯𑀼𑀢𑁆𑀢𑁄. 𑀲𑀻𑀲𑀸𑀤𑀻𑀳𑀺 𑀯𑀸 𑀕𑀳𑀺𑀢𑁄 𑀳𑁄𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀤𑀺𑀲𑀦𑁆𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀫𑀢𑁆𑀣𑀁.

𑀪𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁨. 𑀆𑀭𑀸𑀫𑀝𑁆𑀞𑀓𑀣𑀸𑀬𑀁 𑀩𑀦𑁆𑀥𑀦𑀦𑁆𑀢𑀺 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑁂 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁. 𑀅𑀪𑀺𑀬𑀼𑀜𑁆𑀚𑀢𑀻𑀢𑀺 𑀘𑁄𑀤𑁂𑀢𑀺 𑀅𑀟𑁆𑀟𑀁 𑀓𑀭𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸𑀢𑀺 𑀲𑀳𑀧𑀬𑁄𑀕𑀫𑀸𑀳 𑀯𑀢𑁆𑀣𑀼𑀫𑁆𑀳𑀺𑀬𑁂𑀯 𑀓𑀢𑀧𑀬𑁄𑀕𑀢𑁆𑀢𑀸. 𑀲𑀳𑀧𑀬𑁄𑀕𑀯𑀲𑁂𑀦 𑀳𑁂𑀢𑀁 𑀤𑀼𑀓𑁆𑀓𑀝𑀁. 𑀯𑀺𑀦𑀺𑀘𑁆𑀙𑀬𑀧𑁆𑀧𑀲𑀼𑀢𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑀁. 𑀓𑀓𑁆𑀔𑀴𑁄𑀢𑀺 𑀤𑀸𑀭𑀼𑀡𑁄. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀉𑀲𑁆𑀲𑀸𑀳𑀁 𑀞𑀧𑁂𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂 𑀦𑀺𑀭𑀼𑀲𑁆𑀲𑀸𑀳𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀽𑀝𑀟𑁆𑀟𑀓𑀸𑀭𑀓𑁄𑀧𑀺 ¶ 𑀲𑀘𑁂 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀦𑀢𑁆𑀣𑀺 𑀅𑀯𑀳𑀸𑀭𑁄𑀢𑀺 𑀆𑀳 ‘‘𑀲𑀘𑁂 𑀲𑀬𑀫𑁆𑀧𑀺 𑀓𑀢𑀥𑀼𑀭𑀦𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺. 𑀲𑀬𑀫𑁆𑀧𑀻𑀢𑀺 𑀅𑀪𑀺𑀬𑀼𑀜𑁆𑀚𑀓𑁄𑀧𑀺. 𑀓𑀢𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 ‘‘𑀦 𑀤𑀸𑀦𑀺 𑀦𑀁 𑀇𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀢𑀲𑁆𑀲 𑀤𑀸𑀦𑁂 𑀓𑀢𑀥𑀼𑀭𑀦𑀺𑀓𑁆𑀔𑁂𑀧𑁄. 𑀓𑀺𑀗𑁆𑀓𑀸𑀭𑀧𑁆𑀧𑀝𑀺𑀲𑁆𑀲𑀸𑀯𑀺𑀪𑀸𑀯𑁂𑀢𑀺 ‘‘𑀓𑀺𑀁 𑀓𑀭𑁄𑀫𑀺 𑀓𑀺𑀁 𑀓𑀭𑁄𑀫𑀻’’𑀢𑀺 𑀏𑀯𑀁 𑀓𑀺𑀗𑁆𑀓𑀸𑀭𑀫𑁂𑀯 𑀧𑀝𑀺𑀲𑁆𑀲𑀼𑀡𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻, 𑀢𑀲𑁆𑀲 𑀪𑀸𑀯𑁄 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀪𑀸𑀯𑁄, 𑀢𑀲𑁆𑀫𑀺𑀁, 𑀅𑀢𑁆𑀢𑀦𑁄 𑀯𑀲𑀯𑀢𑁆𑀢𑀺𑀪𑀸𑀯𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀓𑁆𑀓𑁄𑀘𑀁 𑀤𑀢𑁆𑀯𑀸𑀢𑀺 𑀮𑀜𑁆𑀚𑀁 𑀤𑀢𑁆𑀯𑀸. 𑀓𑀽𑀝𑀯𑀺𑀦𑀺𑀘𑁆𑀙𑀬𑀺𑀓𑀸𑀦𑀦𑁆𑀢𑀺 𑀓𑀽𑀝𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑀸𑀦𑀁 𑀯𑀺𑀦𑀬𑀥𑀭𑀸𑀦𑀁. ‘‘𑀕𑀡𑁆𑀳𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀲𑀸𑀫𑀺𑀓𑀲𑁆𑀲 𑀲𑀸𑀫𑀺𑀓𑁄 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀯𑀘𑀦𑀢𑁆𑀢𑀸 𑀓𑀽𑀝𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑀸𑀦𑀁 𑀓𑀽𑀝𑀲𑀓𑁆𑀔𑀻𑀦𑀜𑁆𑀘 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀲𑀢𑀺𑀧𑀺 𑀘𑁂𑀢𑁆𑀣 𑀞𑀸𑀦𑀸𑀘𑀸𑀯𑀦𑁂 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁄𑀬𑁂𑀯 𑀞𑀸𑀦𑀸𑀘𑀸𑀯𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀇𑀫𑀲𑁆𑀫𑀺𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑁂 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑀧𑀬𑁄𑀕𑁂 𑀓𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀲𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑀧𑀬𑁄𑀕𑁂 𑀦𑀺𑀧𑁆𑀨𑀸𑀤𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀬𑀁 𑀧𑀭𑀸𑀚𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀓𑀽𑀝𑀟𑁆𑀟𑀓𑀸𑀭𑀓𑁄 𑀧𑀭𑀸𑀚𑀬𑀁 𑀧𑀸𑀧𑀼𑀡𑀸𑀢𑀺.

𑀆𑀭𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀳𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁩. 𑀯𑀺𑀳𑀸𑀭𑀝𑁆𑀞𑀓𑀣𑀸𑀬𑀁 ¶ 𑀯𑀺𑀳𑀸𑀭𑁄𑀧𑀺 𑀧𑀭𑀺𑀯𑁂𑀡𑀫𑁆𑀧𑀺 𑀆𑀯𑀸𑀲𑁄𑀧𑀺 𑀯𑀺𑀳𑀸𑀭𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀯𑀺𑀳𑀸𑀭𑀁 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀳𑀸𑀭𑀦𑁆𑀢𑀺 𑀫𑀳𑀸𑀯𑀺𑀳𑀸𑀭𑀁. 𑀧𑀭𑀺𑀯𑁂𑀡𑀦𑁆𑀢𑀺 𑀫𑀳𑀸𑀯𑀺𑀳𑀸𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁. 𑀆𑀯𑀸𑀲𑀦𑁆𑀢𑀺 𑀏𑀓𑀁 𑀆𑀯𑀲𑀣𑀁. 𑀅𑀪𑀺𑀬𑁄𑀕𑁂 𑀓𑀢𑁂𑀧𑀺 𑀅𑀯𑀳𑀸𑀭𑀲𑁆𑀲 𑀅𑀲𑀺𑀚𑁆𑀛𑀦𑀢𑁄 𑀯𑀼𑀢𑁆𑀢𑀁 ‘‘𑀅𑀪𑀺𑀬𑁄𑀕𑁄 𑀦 𑀭𑀼𑀳𑀢𑀻’’𑀢𑀺. 𑀕𑀡𑀲𑀦𑁆𑀢𑀓𑁂 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑀸𑀫𑀺𑀓𑀢𑁆𑀢𑀸 𑀲𑀓𑁆𑀓𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑀼𑀦𑁆𑀢𑀺 𑀆𑀳 ‘‘𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲𑀸’’𑀢𑀺. 𑀇𑀥𑀸𑀧𑀺 𑀲𑀘𑁂 𑀏𑀓𑁄𑀧𑀺 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑁂𑀯 𑀳𑀺 𑀧𑀸𑀭𑀸𑀚𑀺𑀓𑀁.

𑀯𑀺𑀳𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑁂𑀢𑁆𑀢𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁪. 𑀔𑁂𑀢𑁆𑀢𑀝𑁆𑀞𑀓𑀣𑀸𑀬𑀁 𑀲𑀢𑁆𑀢 𑀥𑀜𑁆𑀜𑀸𑀦𑀻𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀓𑀗𑁆𑀕𑀼𑀓𑀼𑀤𑁆𑀭𑀽𑀲𑀯𑀭𑀓𑀕𑁄𑀥𑀼𑀫𑀸𑀦𑀁 𑀯𑀲𑁂𑀦 𑀲𑀢𑁆𑀢 𑀥𑀜𑁆𑀜𑀸𑀦𑀺 ¶ . 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀯𑀸𑀢𑀺𑀆𑀤𑀻𑀲𑀼 ‘‘𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀕𑀳𑀡𑀁 𑀦𑀸𑀫 𑀯𑀻𑀳𑀺𑀲𑀻𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀞𑀺𑀢𑀫𑁂𑀯 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀩𑀻𑀚𑀫𑀢𑁆𑀢𑀲𑁆𑀲𑁂𑀯 𑀕𑀳𑀡𑀁. 𑀏𑀓𑀫𑁂𑀓𑀦𑁆𑀢𑀺 𑀏𑀓𑀫𑁂𑀓𑀁 𑀯𑀻𑀳𑀺𑀲𑀻𑀲𑀁. 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀸𑀢𑀺 𑀫𑀼𑀕𑁆𑀕𑀫𑀸𑀲𑀸𑀤𑀻𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸. 𑀬𑀲𑁆𑀫𑀺𑀁 𑀩𑀻𑀚𑁂 𑀯𑀸𑀢𑀺𑀆𑀤𑀺 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀕𑀳𑀡𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀮𑀺𑀲𑀻𑀲𑀸𑀤𑀻𑀦𑀺 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀲𑁆𑀫𑀺𑀁 𑀩𑀻𑀚𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀏𑀓𑀫𑁂𑀓𑀁 𑀳𑀢𑁆𑀣𑁂𑀦𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀲𑁆𑀫𑀺𑀁 𑀲𑀻𑀲𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀅𑀲𑀺𑀢𑁂𑀦 𑀮𑀸𑀬𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀲𑁆𑀲𑀁 𑀫𑀼𑀝𑁆𑀞𑀺𑀬𑀁 𑀯𑀢𑁆𑀣𑀼 𑀧𑀽𑀭𑀢𑀺, 𑀩𑀳𑀽𑀦𑀺 𑀏𑀓𑀢𑁄 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀲𑁆𑀫𑀺𑀁 𑀫𑀼𑀕𑁆𑀕𑀫𑀸𑀲𑀸𑀤𑀺𑀨𑀮𑁂 𑀯𑀢𑁆𑀣𑀼 𑀧𑀽𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑀣𑀸𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑁄𑀘𑀺𑀢𑀫𑀢𑁆𑀢𑁂’’𑀢𑀺 𑀯𑀘𑀦𑀢𑁄 𑀢𑀲𑁆𑀫𑀺𑀁 𑀩𑀻𑀚𑀸𑀤𑀺𑀫𑁆𑀳𑀺 𑀩𑀦𑁆𑀥𑀦𑀸 𑀫𑁄𑀘𑀺𑀢𑁂 𑀲𑀢𑀺 𑀢𑀢𑁄 𑀅𑀦𑀧𑀦𑀻𑀢𑁂𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀘𑁆𑀙𑀺𑀚𑁆𑀚𑀫𑀸𑀦𑁄𑀢𑀺 𑀅𑀘𑁆𑀙𑀺𑀦𑁆𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄. 𑀚𑀝𑀺𑀢𑀸𑀦𑀻𑀢𑀺 𑀙𑀺𑀦𑁆𑀤𑀺𑀢𑀸𑀦𑀺 𑀅𑀘𑁆𑀙𑀺𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀚𑀝𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀪𑀼𑀲𑀦𑁆𑀢𑀺 𑀧𑀮𑀸𑀮𑀲𑀳𑀺𑀢𑀁. 𑀅𑀪𑀼𑀲𑀦𑁆𑀢𑀺 𑀧𑀮𑀸𑀮𑀭𑀳𑀺𑀢𑀁.

𑀔𑀻𑀮𑁂𑀦𑀸𑀢𑀺 ¶ 𑀔𑀸𑀡𑀼𑀓𑁂𑀦. 𑀏𑀢𑁆𑀣 𑀘 𑀔𑀻𑀮𑀲𑀗𑁆𑀓𑀫𑀦𑀸𑀤𑀻𑀲𑀼 𑀉𑀪𑀬𑀁 𑀲𑀫𑁆𑀪𑀯𑀢𑀺 𑀲𑀳𑀧𑀬𑁄𑀕𑁄 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘. 𑀬𑀤𑀸 𑀳𑀺 𑀧𑀭𑀲𑁆𑀲 𑀔𑁂𑀢𑁆𑀢𑀸𑀤𑀻𑀲𑀼 𑀏𑀓𑀤𑁂𑀲𑀁 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑁄𑀢𑀺, 𑀢𑀤𑀸 𑀲𑀢𑀺𑀧𑀺 𑀧𑀞𑀫𑀢𑀭𑀁 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀲𑀳𑀧𑀬𑁄𑀕𑀁 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀲𑀳𑀧𑀬𑁄𑀕𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀔𑀻𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀘 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀬𑀤𑀸 𑀧𑀦 𑀅𑀲𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀫𑀢𑁆𑀢𑀁 𑀓𑀢𑀁, 𑀢𑀤𑀸 𑀯𑀺𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀦 𑀳𑁄𑀢𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀢𑀜𑁆𑀘 𑀔𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀭𑀚𑁆𑀚𑀼𑀲𑀗𑁆𑀓𑀫𑀦𑀸𑀤𑀻𑀲𑀼𑀧𑀺 𑀅𑀢𑀺𑀤𑀺𑀲𑀢𑀺.

𑀬𑀝𑁆𑀞𑀺𑀦𑁆𑀢𑀺 𑀫𑀸𑀦𑀤𑀡𑁆𑀟𑀁. 𑀏𑀓𑀲𑁆𑀫𑀺𑀁 𑀅𑀦𑀸𑀕𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀲𑁆𑀫𑀺𑀁 𑀆𑀕𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 𑀲𑀘𑁂 𑀤𑀸𑀭𑀽𑀦𑀺 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀢𑀓𑁂𑀦𑁂𑀯 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀯𑀲𑀸𑀦𑁂 𑀤𑀸𑀭𑀼𑀫𑁆𑀳𑀺 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀢𑀢𑁆𑀣 𑀲𑀸𑀔𑀸𑀬𑁄𑀧𑀺 𑀓𑀢𑁆𑀯𑀸 𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀯𑀲𑀸𑀦𑀲𑀸𑀔𑀸𑀬 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀢𑀓𑁂𑀦 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀤𑀸𑀭𑀽𑀦𑀺 𑀦𑀺𑀔𑀡𑀺𑀢𑁆𑀯𑀸 𑀯𑀢𑀺𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀔𑁂𑀢𑁆𑀢𑀫𑀭𑀺𑀬𑀸𑀤𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑁂𑀤𑀸𑀭𑀧𑀸𑀴𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀢𑀁 𑀓𑀭𑁄𑀢𑀻𑀢𑀺 𑀧𑀼𑀩𑁆𑀩𑁂 𑀯𑀺𑀚𑁆𑀚𑀫𑀸𑀦𑀫𑁂𑀯 𑀫𑀭𑀺𑀬𑀸𑀤𑀁 𑀯𑀺𑀢𑁆𑀣𑀺𑀡𑁆𑀡𑀁 𑀓𑀭𑁄𑀢𑀺. 𑀅𑀓𑀢𑀁 𑀯𑀸 𑀧𑀦 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀧𑀼𑀩𑁆𑀩𑁂 𑀅𑀓𑀢𑀁 𑀯𑀸 𑀫𑀭𑀺𑀬𑀸𑀤𑀁 𑀞𑀧𑁂𑀢𑀺.

𑀔𑁂𑀢𑁆𑀢𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀣𑀼𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁫. 𑀯𑀢𑁆𑀣𑀼𑀝𑁆𑀞𑀓𑀣𑀸𑀬𑀁 ¶ 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀦𑁆𑀢𑀺 𑀇𑀝𑁆𑀞𑀓𑀲𑀺𑀮𑀸𑀤𑀸𑀭𑀽𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀁. 𑀏𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀪𑀽𑀫𑀺𑀁 𑀲𑁄𑀥𑁂𑀢𑁆𑀯𑀸…𑀧𑁂… 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀤𑀲𑁆𑀲𑁂𑀢𑀺.

𑀕𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁬. 𑀕𑀸𑀫𑀝𑁆𑀞𑀓𑀣𑀸𑀬𑀁 𑀕𑀸𑀫𑁄 𑀦𑀸𑀫𑀸𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀁 𑀲𑀩𑁆𑀩𑀲𑁄 𑀕𑀸𑀫𑀮𑀓𑁆𑀔𑀡𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸.

𑀅𑀭𑀜𑁆𑀜𑀝𑁆𑀞𑀓𑀣𑀸𑀯𑀡𑁆𑀡𑀦𑀸

𑁧𑁦𑁭. 𑀅𑀭𑀜𑁆𑀜𑀝𑁆𑀞𑀓𑀣𑀸𑀬𑀁 ¶ 𑀅𑀭𑀜𑁆𑀜𑀁 𑀦𑀸𑀫𑀸𑀢𑀺 𑀇𑀤𑀁 𑀧𑀦 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀭𑀜𑁆𑀜𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦 𑀅𑀭𑀜𑁆𑀜𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀓𑀺𑀦𑁆𑀢𑀼 𑀬𑀁 𑀅𑀢𑁆𑀢𑀦𑁄 𑀅𑀭𑀜𑁆𑀜𑀮𑀓𑁆𑀔𑀡𑁂𑀦 𑀅𑀭𑀜𑁆𑀜𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀢𑀁 𑀅𑀭𑀜𑁆𑀜𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀧𑀼𑀦 𑀅𑀭𑀜𑁆𑀜𑀯𑀘𑀦𑁂𑀦. 𑀦 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑁄 𑀅𑀭𑀜𑁆𑀜𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀬𑀤𑀺 𑀳𑀺 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑁄 𑀅𑀭𑀜𑁆𑀜𑀮𑀓𑁆𑀔𑀡𑀁 𑀲𑀺𑀬𑀸, ‘‘𑀅𑀭𑀜𑁆𑀜𑀁 𑀦𑀸𑀫 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀦𑁆𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀅𑀭𑀜𑁆𑀜𑀁 𑀧𑀭𑀸𑀫𑀝𑁆𑀞𑀦𑁆𑀢𑀺 𑀆𑀳 ‘‘𑀬𑀁 𑀧𑀦 𑀅𑀢𑁆𑀢𑀦𑁄 𑀅𑀭𑀜𑁆𑀜𑀮𑀓𑁆𑀔𑀡𑁂𑀦 𑀅𑀭𑀜𑁆𑀜’’𑀦𑁆𑀢𑀺.

𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀉𑀚𑀼𑀓𑀫𑁂𑀯 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸. 𑀧𑀡𑁆𑀡𑀁 𑀯𑀸𑀢𑀺 𑀢𑀸𑀮𑀧𑀡𑁆𑀡𑀸𑀤𑀺 𑀧𑀡𑁆𑀡𑀁 𑀯𑀸. 𑀅𑀤𑁆𑀥𑀕𑀢𑁄𑀧𑀻𑀢𑀺 𑀘𑀺𑀭𑀓𑀸𑀮𑀁 𑀢𑀢𑁆𑀣𑁂𑀯 𑀞𑀺𑀢𑁄𑀧𑀺. 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀧𑀦 𑀬𑁄 𑀧𑀭𑁂𑀳𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀳𑀢𑁆𑀣𑀢𑁄 𑀓𑀺𑀡𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑀺𑀢𑁄, 𑀲𑁄 𑀅𑀭𑀜𑁆𑀜𑀲𑀸𑀫𑀺𑀓𑁂𑀦 𑀅𑀦𑀼𑀜𑁆𑀜𑀸𑀢𑁄𑀧𑀺 𑀦 𑀕𑀳𑁂𑀢𑀩𑁆𑀩𑁄. 𑀲𑀸𑀫𑀺𑀓𑁂𑀳𑀺 𑀙𑀟𑁆𑀟𑀺𑀢𑁄𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀳𑀡𑀁 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀘𑁆𑀙𑀺𑀦𑁆𑀦𑀲𑁆𑀲𑀸𑀧𑀻𑀢𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀳𑀢𑁆𑀣𑀢𑁄 𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀳𑀺 𑀓𑀢𑀲𑀜𑁆𑀜𑀸𑀡𑀲𑁆𑀲. 𑀙𑀮𑁆𑀮𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀸𑀫𑀺𑀓𑀸𑀦𑀁 𑀦𑀺𑀭𑀧𑁂𑀓𑁆𑀔𑀢𑀁 𑀤𑀻𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀬𑀤𑀺 𑀲𑀸𑀫𑀺𑀓𑀸𑀦𑀁 𑀲𑀸𑀧𑁂𑀓𑁆𑀔𑀢𑀸 𑀅𑀢𑁆𑀣𑀺, 𑀦 𑀯𑀝𑁆𑀝𑀢𑀺. 𑀢𑀸𑀦𑀺 𑀓𑀢𑀸𑀦𑀺 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀕𑁂𑀳𑀸𑀤𑀻𑀦𑀺 𑀓𑀢𑀸𑀦𑀺 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺 𑀫𑀦𑀼𑀲𑁆𑀲𑁂𑀳𑀺 𑀘 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀳𑁄𑀦𑁆𑀢𑀺. 𑀤𑀸𑀭𑀽𑀦𑀺𑀧𑀻𑀢𑀺 𑀕𑁂𑀳𑀸𑀤𑀻𑀦𑀁 𑀓𑀢𑀢𑁆𑀢𑀸 𑀢𑀢𑁄 𑀅𑀯𑀲𑀺𑀝𑁆𑀞𑀤𑀸𑀭𑀽𑀦𑀺𑀧𑀺. 𑀏𑀢𑁂𑀲𑀦𑁆𑀢𑀺 𑀏𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀤𑀸𑀭𑀽𑀦𑀁.

𑀢𑁂𑀲𑀁 ¶ 𑀆𑀭𑀓𑁆𑀔𑀝𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀅𑀭𑀜𑁆𑀜𑀧𑀸𑀮𑀸𑀦𑀁 𑀞𑀺𑀢𑀝𑁆𑀞𑀸𑀦𑀁. 𑀤𑁂𑀳𑀻𑀢𑀺 𑀯𑀼𑀢𑁆𑀢𑁂 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀏𑀢𑁆𑀣 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀲𑀩𑁆𑀪𑀸𑀯𑀢𑁄 ‘‘𑀤𑁂𑀳𑀻’’𑀢𑀺 𑀅𑀯𑀼𑀢𑁆𑀢𑁂 𑀅𑀤𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀕𑀦𑁆𑀢𑀼𑀁 𑀤𑁂𑀣𑀸𑀢𑀺 𑀕𑀫𑀦𑀁 𑀤𑁂𑀣. 𑀅𑀤𑀺𑀲𑁆𑀯𑀸 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀻𑀢𑀸𑀦𑀫𑁆𑀧𑀺 𑀤𑀸𑀭𑀽𑀦𑀁 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁𑀬𑁂𑀯 𑀲𑀦𑁆𑀢𑀓𑀢𑁆𑀢𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀓𑁆𑀔𑀦𑁆𑀢𑁄𑀧𑀺 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀅𑀭𑀜𑁆𑀜𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑀓𑀓𑀣𑀸𑀯𑀡𑁆𑀡𑀦𑀸

𑁧𑁦𑁮. 𑀉𑀤𑀓𑀓𑀣𑀸𑀬𑀁 ¶ 𑀫𑀳𑀸𑀓𑀼𑀘𑁆𑀙𑀺𑀓𑀸 𑀉𑀤𑀓𑀘𑀸𑀝𑀺 𑀉𑀤𑀓𑀫𑀡𑀺𑀓𑁄. ‘‘𑀲𑀫𑁂𑀔𑀮𑀸 𑀘𑀸𑀝𑀺 𑀉𑀤𑀓𑀫𑀡𑀺𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑀸𑀚𑀦𑁂𑀲𑀼. 𑀦𑀺𑀩𑁆𑀩𑀳𑀦𑀉𑀤𑀓𑀦𑁆𑀢𑀺 ‘‘𑀫𑀳𑁄𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀴𑀸𑀓𑀫𑀭𑀺𑀬𑀸𑀤𑀁 𑀫𑀸 𑀙𑀺𑀦𑁆𑀤𑀻’’𑀢𑀺 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀁 𑀢𑀲𑁆𑀲 𑀏𑀓𑀧𑀲𑁆𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀉𑀤𑀓𑀁. 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀦𑁆𑀢𑀺 𑀲𑀲𑁆𑀲𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀤𑀓𑀦𑀺𑀓𑁆𑀔𑀫𑀦𑀫𑀕𑁆𑀕𑀁. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀅𑀯𑀲𑁆𑀲𑀁 𑀙𑀺𑀦𑁆𑀦𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀪𑀡𑁆𑀟𑀤𑁂𑀬𑁆𑀬𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀫𑀭𑀺𑀬𑀸𑀤𑀁 𑀤𑀼𑀩𑁆𑀩𑀮𑀁 𑀅𑀓𑀢𑁆𑀯𑀸𑀧𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀬𑁄𑀕𑁂 𑀓𑀢𑁂 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑀕𑁆𑀖𑀸𑀦𑀼𑀭𑀽𑀧𑁂𑀦 𑀅𑀯𑀳𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑀫𑁂𑀯.

𑀅𑀦𑀺𑀕𑁆𑀕𑀢𑁂𑀢𑀺 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀴𑀸𑀓𑀲𑁆𑀫𑀺𑀁𑀬𑁂𑀯 𑀉𑀤𑀓𑁂 𑀞𑀺𑀢𑁂. 𑀅𑀲𑀫𑁆𑀧𑀢𑁆𑀢𑁂𑀯𑀸𑀢𑀺 𑀢𑀴𑀸𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀸𑀢𑀺𑀓𑀸𑀬 𑀏𑀯 𑀞𑀺𑀢𑁂. 𑀅𑀦𑀺𑀓𑁆𑀔𑀦𑁆𑀢𑁂𑀢𑀺 𑀢𑀴𑀸𑀓𑀢𑁄 𑀅𑀦𑀺𑀓𑁆𑀔𑀦𑁆𑀢𑁂 𑀉𑀤𑀓𑁂. 𑀲𑀼𑀩𑀤𑁆𑀥𑀸𑀢𑀺 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺, 𑀢𑀴𑀸𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀭𑁂𑀲𑀁 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀫𑀼𑀔𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀫𑀳𑀸𑀫𑀸𑀢𑀺𑀓𑀸𑀬𑀁𑀬𑁂𑀯 𑀞𑀺𑀢𑁂 𑀩𑀤𑁆𑀥𑀸 𑀘𑁂, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸, 𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀳𑀺 𑀇𑀤𑀁 𑀤𑁆𑀯𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀓𑀧𑁆𑀧𑀤𑁆𑀯𑀬𑀲𑁆𑀲 𑀬𑀣𑀸𑀓𑁆𑀓𑀫𑁂𑀦 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀅𑀯𑀳𑀸𑀭𑁄𑀢𑀺 𑀏𑀢𑁆𑀣 ‘‘𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀴𑀸𑀓𑀕𑀢𑀉𑀤𑀓𑀲𑁆𑀲 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀢𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, ‘‘𑀅𑀦𑀺𑀓𑁆𑀔𑀦𑁆𑀢𑁂 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸’’𑀢𑀺 𑀇𑀫𑀺𑀦𑀸 𑀘 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀦 𑀲𑀫𑁂𑀢𑀺. 𑀯𑀢𑁆𑀣𑀼𑀁…𑀧𑁂… 𑀦 𑀲𑀫𑁂𑀢𑀻𑀢𑀺 𑀏𑀢𑁆𑀣 𑀢𑀴𑀸𑀓𑀕𑀢𑀉𑀤𑀓𑀲𑁆𑀲 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀅𑀧𑀭𑀺𑀕𑁆𑀕𑀳𑀺𑀢𑀁 𑀇𑀥 𑀯𑀢𑁆𑀣𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀤𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀦𑁆𑀢𑀧𑁄𑀦𑀓𑀣𑀸𑀯𑀡𑁆𑀡𑀦𑀸

𑁧𑁦𑁯. 𑀤𑀦𑁆𑀢𑀓𑀝𑁆𑀞𑀓𑀣𑀸𑀬𑀁 ¶ 𑀢𑀢𑁄 𑀧𑀝𑁆𑀞𑀸𑀬 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 ‘‘𑀬𑀣𑀸𑀲𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀞𑀧𑀺𑀢𑀢𑁆𑀢𑀸 𑀯𑀲𑁆𑀲𑀕𑁆𑀕𑁂𑀦 𑀅𑀪𑀸𑀚𑁂𑀢𑀩𑁆𑀩𑀢𑁆𑀢𑀸 𑀅𑀭𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀜𑁆𑀜𑀁 𑀲𑀗𑁆𑀖𑀺𑀓𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀦𑀢𑁆𑀣𑀺 𑀅𑀯𑀳𑀸𑀭𑁄 ¶ . 𑀯𑀢𑁆𑀢𑀦𑁆𑀢𑀺 𑀤𑀦𑁆𑀢𑀓𑀝𑁆𑀞𑀕𑁆𑀕𑀳𑀡𑁂 𑀯𑀢𑁆𑀢𑀁. 𑀇𑀤𑀸𑀦𑀺 𑀢𑀤𑁂𑀯 𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀧𑀼𑀦 𑀲𑀸𑀫𑀡𑁂𑀭𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀓𑁂𑀘𑀺 𑀣𑁂𑀭𑀸 𑀯𑀤𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀤𑀦𑁆𑀢𑀧𑁄𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀦𑀧𑁆𑀧𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁧𑁦. 𑀯𑀦𑀧𑁆𑀧𑀢𑀺𑀓𑀣𑀸𑀬𑀁 ‘‘𑀉𑀚𑀼𑀓𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀭𑀼𑀓𑁆𑀔𑀪𑀸𑀭𑁂𑀦 𑀓𑀺𑀜𑁆𑀘𑀺𑀤𑁂𑀯 𑀪𑀲𑁆𑀲𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀳𑁄𑀢𑀺𑀬𑁂𑀯 𑀞𑀸𑀦𑀸𑀘𑀸𑀯𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀸𑀢𑀫𑀼𑀔𑀁 𑀲𑁄𑀥𑁂𑀢𑀻𑀢𑀺 𑀬𑀣𑀸 𑀯𑀸𑀢𑁄 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀧𑀸𑀢𑁂𑀢𑀺, 𑀏𑀯𑀁 𑀯𑀸𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀭𑀼𑀦𑁆𑀥𑀺𑀢𑁆𑀯𑀸 𑀞𑀺𑀢𑀸𑀦𑀺 𑀲𑀸𑀔𑀸𑀕𑀼𑀫𑁆𑀩𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀦𑁆𑀢𑁄 𑀲𑁄𑀥𑁂𑀢𑀺. ‘‘𑀫𑀡𑁆𑀟𑀽𑀓𑀓𑀡𑁆𑀝𑀓𑀁 𑀯𑀸 𑀯𑀺𑀲𑀦𑁆𑀢𑀺 𑀫𑀡𑁆𑀟𑀽𑀓𑀸𑀦𑀁 𑀦𑀗𑁆𑀕𑀼𑀝𑁆𑀞𑁂 𑀅𑀕𑁆𑀕𑀓𑁄𑀝𑀺𑀬𑀁 𑀞𑀺𑀢𑀓𑀡𑁆𑀝𑀓’’𑀦𑁆𑀢𑀺 𑀯𑀤𑀦𑁆𑀢𑀺, ‘‘𑀏𑀓𑀁 𑀯𑀺𑀲𑀫𑀘𑁆𑀙𑀓𑀡𑁆𑀝𑀓’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀯𑀦𑀧𑁆𑀧𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀳𑀭𑀡𑀓𑀓𑀣𑀸𑀯𑀡𑁆𑀡𑀦𑀸

𑁧𑁧𑁧. 𑀳𑀭𑀡𑀓𑀓𑀣𑀸𑀬𑀁 𑀳𑀭𑀡𑀓𑀦𑁆𑀢𑀺 𑀳𑀭𑀺𑀬𑀫𑀸𑀦𑀁. 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀓𑀟𑁆𑀠𑀦𑀁 𑀆𑀓𑀟𑁆𑀠𑀦𑀁, 𑀲𑁂𑀲𑀤𑀺𑀲𑀸𑀓𑀟𑁆𑀠𑀦𑀁 𑀯𑀺𑀓𑀟𑁆𑀠𑀦𑀁. 𑀧𑀸𑀤𑀁 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀏𑀢𑁆𑀣 𑀅𑀦𑁆𑀢𑀁 𑀦 𑀕𑀡𑁆𑀳𑀸𑀫𑀻𑀢𑀺 𑀅𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸 𑀅𑀦𑁆𑀢𑀲𑁆𑀲 𑀘 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀮𑁆𑀮𑀓𑁆𑀔𑀺𑀢𑀲𑁆𑀲𑁂𑀯 𑀧𑀝𑀲𑁆𑀲 𑀏𑀓𑀤𑁂𑀲𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀲𑀳𑀪𑀡𑁆𑀟𑀳𑀸𑀭𑀓𑀦𑁆𑀢𑀺 𑀪𑀡𑁆𑀟𑀳𑀸𑀭𑀓𑁂𑀦 𑀲𑀤𑁆𑀥𑀺𑀁. 𑀲𑀦𑁆𑀢𑀚𑁆𑀚𑁂𑀢𑁆𑀯𑀸𑀢𑀺 𑀥𑀦𑀼𑀆𑀤𑀻𑀳𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸.

𑀲𑁄𑀢𑀺 𑀪𑀡𑁆𑀟𑀳𑀸𑀭𑀓𑁄. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀁, 𑀅𑀲𑀸𑀫𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀙𑀟𑁆𑀟𑁂𑀢𑁆𑀯𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀸𑀦𑀫𑁆𑀧𑀺 𑀦𑀺𑀭𑀸𑀮𑀬𑀸𑀦𑀁 𑀧𑀼𑀦 𑀆𑀳𑀭𑀸𑀧𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀧𑀭𑀺𑀓𑁆𑀔𑀸𑀭𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑁂𑀳𑀺 𑀕𑀳𑀺𑀢𑁂 𑀢𑀢𑁆𑀣 ¶ 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀧𑀺 𑀧𑀼𑀦 𑀢𑀁 𑀩𑀮𑀓𑁆𑀓𑀸𑀭𑁂𑀦𑀧𑀺 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑁂𑀲𑀯𑀸𑀲𑀺𑀦𑁄 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀲𑀻𑀳𑀴𑀤𑀻𑀧𑀯𑀸𑀲𑀺𑀦𑁄 𑀧𑀦 𑀢𑀁 𑀓𑁂𑀘𑀺 𑀆𑀘𑀭𑀺𑀬𑀸 𑀦 𑀇𑀘𑁆𑀙𑀦𑁆𑀢𑀺. 𑀢𑁂𑀦𑁂𑀯 ¶ 𑀫𑀳𑀸𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁 ‘‘𑀅𑀫𑁆𑀳𑀸𑀓𑀁 𑀧𑀦 𑀢𑀁 𑀦 𑀭𑀼𑀘𑁆𑀘𑀢𑀻’’𑀢𑀺. 𑀅𑀜𑁆𑀜𑁂𑀲𑀽𑀢𑀺 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼. 𑀯𑀺𑀘𑀸𑀭𑀡𑀸 𑀏𑀯 𑀦𑀢𑁆𑀣𑀻𑀢𑀺 𑀢𑀢𑁆𑀣𑀸𑀧𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀅𑀬𑀫𑁂𑀯𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀳𑀭𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀺𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁧𑁨. 𑀉𑀧𑀦𑀺𑀥𑀺𑀓𑀣𑀸𑀬𑀁 ‘‘𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀲𑁆𑀲 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀲𑀸𑀫𑀦𑀧𑀬𑁄𑀕𑀁 𑀯𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀧𑀬𑁄𑀕𑁂 𑀅𑀓𑀢𑁂𑀧𑀺 𑀭𑀚𑁆𑀚𑀲𑀗𑁆𑀔𑁄𑀪𑀸𑀤𑀺𑀓𑀸𑀮𑁂 ‘𑀦 𑀤𑀸𑀦𑀺 𑀢𑀲𑁆𑀲 𑀤𑀲𑁆𑀲𑀸𑀫𑀺, 𑀦 𑀫𑀬𑁆𑀳𑀁 𑀤𑀸𑀦𑀺 𑀤𑀲𑁆𑀲𑀢𑀻’𑀢𑀺 𑀉𑀪𑁄𑀳𑀺𑀧𑀺 𑀲𑀓𑀲𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀼𑀭𑀦𑀺𑀓𑁆𑀔𑁂𑀧𑁂 𑀓𑀢𑁂 𑀧𑀸𑀭𑀸𑀚𑀺𑀓𑀫𑁂𑀯 𑀧𑀝𑀺𑀲𑀸𑀫𑀦𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀆𑀭𑀓𑁆𑀔𑀸𑀬 𑀪𑀡𑁆𑀟𑀲𑀸𑀫𑀺𑀓𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀞𑀸𑀦𑀲𑁆𑀲 𑀘 𑀢𑀤𑀸𑀬𑀢𑁆𑀢𑀢𑀸𑀬 𑀞𑀸𑀦𑀸𑀘𑀸𑀯𑀦𑀲𑁆𑀲 𑀅𑀮𑀩𑁆𑀪𑀦𑀢𑁄 𑀦𑀢𑁆𑀣𑀺 𑀅𑀯𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀥𑀫𑁆𑀫𑀁 𑀯𑀸𑀘𑀸𑀧𑁂𑀢𑁆𑀯𑀸𑀢𑀺 𑀥𑀫𑁆𑀫𑀁 𑀓𑀣𑀸𑀧𑁂𑀢𑁆𑀯𑀸. 𑀏𑀲𑁂𑀯 𑀦𑀬𑁄𑀢𑀺 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀲𑁆𑀲 𑀅𑀪𑀺𑀜𑁆𑀜𑀸𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀜𑁆𑀜𑀁 𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀻𑀢𑀺 𑀇𑀤𑀁 𑀲𑀜𑁆𑀜𑀸𑀡𑀁 𑀓𑀣𑁂𑀦𑁆𑀢𑁂𑀦𑁂𑀯 ‘𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂’𑀢𑀺 𑀑𑀓𑀸𑀲𑀲𑁆𑀲 𑀘 𑀦𑀺𑀬𑀫𑀺𑀢𑀢𑁆𑀢𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀧𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀅𑀜𑁆𑀜𑀁 𑀢𑀸𑀤𑀺𑀲𑀫𑁂𑀯 𑀧𑀘𑁆𑀙𑀸 𑀞𑀧𑀺𑀢𑀁 𑀧𑀢𑁆𑀢𑀁 𑀲𑀦𑁆𑀥𑀸𑀬 𑀓𑀣𑀺𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀘𑁄𑀭𑁂𑀦 𑀲𑀮𑁆𑀮𑀓𑁆𑀔𑀺𑀢𑀧𑀢𑁆𑀢𑀲𑁆𑀲 𑀕𑀳𑀡𑀸𑀪𑀸𑀯𑁂𑀧𑀺 ‘‘𑀇𑀤𑀁 𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀞𑀺𑀢𑁂 𑀢𑀸𑀤𑀺𑀲𑁂 𑀯𑀢𑁆𑀣𑀼𑀫𑀢𑁆𑀢𑁂 𑀢𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑀲𑀩𑁆𑀪𑀸𑀯𑀢𑁄 𑀅𑀜𑁆𑀜𑀁 𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀻𑀢𑀺 𑀘𑁄𑀭𑀲𑁆𑀲 𑀅𑀯𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀧𑀤𑀯𑀸𑀭𑁂𑀦𑀸𑀢𑀺 𑀣𑁂𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑁄 𑀘𑁄𑀭𑀲𑁆𑀲 𑀧𑀤𑀯𑀸𑀭𑁂𑀦. 𑀢𑀁 𑀅𑀢𑀸𑀤𑀺𑀲𑀫𑁂𑀯 𑀕𑀡𑁆𑀳𑀦𑁆𑀢𑁂 𑀬𑀼𑀚𑁆𑀚𑀢𑀻𑀢𑀺 ‘‘𑀫𑀫𑀸𑀬𑀁 𑀧𑀢𑁆𑀢𑁄 𑀦 𑀳𑁄𑀢𑀻’’𑀢𑀺 𑀯𑀸 ‘‘𑀫𑀬𑀸 𑀓𑀣𑀺𑀢𑁄 𑀅𑀬𑀁 𑀧𑀢𑁆𑀢𑁄 𑀦 𑀳𑁄𑀢𑀻’’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀇𑀤𑀁 𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀣𑀼𑀫𑀢𑁆𑀢𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀅𑀯𑀳𑀸𑀭𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁.

𑀕𑀸𑀫𑀤𑁆𑀯𑀸𑀭𑀦𑁆𑀢𑀺 ¶ 𑀲𑀫𑀡𑀲𑀸𑀭𑀼𑀧𑁆𑀧𑀁 𑀯𑁄𑀳𑀸𑀭𑀫𑀢𑁆𑀢𑀫𑁂𑀢𑀁, 𑀅𑀦𑁆𑀢𑁄𑀕𑀸𑀫𑀁 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀣𑁂𑀭𑀲𑁆𑀲 ¶ 𑀧𑀸𑀭𑀸𑀚𑀺𑀓𑀦𑁆𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑁂𑀯 𑀧𑀭𑀲𑀦𑁆𑀢𑀓𑀲𑁆𑀲 𑀕𑀳𑀺𑀢𑀢𑁆𑀢𑀸 𑀉𑀤𑁆𑀥𑀸𑀭𑁂𑀬𑁂𑀯 𑀣𑁂𑀭𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀘𑁄𑀭𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸 𑀕𑀳𑀺𑀢𑀓𑀸𑀮𑁂 𑀘𑁄𑀭𑀲𑁆𑀲 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀘𑁄𑀭𑀲𑁆𑀲 𑀲𑀸𑀫𑀺𑀓𑁂𑀦 𑀤𑀺𑀦𑁆𑀦𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁, 𑀣𑁂𑀭𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀧𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀤𑀼𑀓𑁆𑀓𑀝𑀦𑁆𑀢𑀺.

𑀆𑀡𑀢𑁆𑀢𑀺𑀬𑀸 𑀕𑀳𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 ‘‘𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳, 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀣𑁂𑀭𑁂𑀦 𑀓𑀢𑀆𑀡𑀢𑁆𑀢𑀺𑀬𑀸 𑀯𑀺𑀳𑀸𑀭𑀲𑁆𑀲 𑀧𑀭𑀪𑀸𑀕𑁂 𑀉𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀢𑁄 𑀉𑀧𑀘𑀸𑀭𑁄, 𑀢𑀸𑀯 𑀲𑀩𑁆𑀩𑀁 𑀔𑁂𑀢𑁆𑀢𑀫𑁂𑀯 𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫𑀸𑀢𑀺 𑀏𑀢𑁆𑀣 𑀉𑀪𑀺𑀦𑁆𑀦𑀁 𑀲𑀓𑀝𑀘𑀓𑁆𑀓𑀫𑀕𑁆𑀕𑀸𑀦𑀁 𑀅𑀦𑁆𑀢𑀭𑀸𑀴𑀫𑁆𑀧𑀺 𑀫𑀕𑁆𑀕𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀲𑀸𑀤𑀻𑀲𑀼 𑀪𑀸𑀭𑀁 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀢𑀺𑀝𑁆𑀞𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑁄 𑀯𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂 𑀯𑀽𑀧𑀲𑀦𑁆𑀢𑁂 𑀧𑀼𑀦 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺 𑀘𑁂, 𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀉𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀢𑀸𑀯 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀧𑀼𑀭𑀺𑀫𑀲𑁆𑀫𑀺𑀁 𑀣𑁂𑀬𑁆𑀬𑀘𑀺𑀢𑁆𑀢𑁂 𑀅𑀯𑀽𑀧𑀲𑀦𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀢𑁄 𑀧𑀸𑀤𑀼𑀤𑁆𑀥𑀸𑀭𑁂𑀦 𑀉𑀤𑁆𑀥𑀸𑀭𑁂𑀦 𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀦𑁆𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂 𑀯𑀺𑀳𑀸𑀭𑀲𑀸𑀫𑀦𑁆𑀢𑀸 𑀲𑀩𑁆𑀩𑁄𑀧𑀺 𑀕𑁄𑀘𑀭𑀕𑀸𑀫𑁄 𑀔𑁂𑀢𑁆𑀢𑀫𑁂𑀯𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁂𑀲𑀦𑁆𑀢𑀺 𑀫𑀕𑁆𑀕𑀼𑀓𑁆𑀓𑀫𑀦𑀯𑀺𑀳𑀸𑀭𑀸𑀪𑀺𑀫𑀼𑀔𑀕𑀫𑀦𑀸𑀤𑀺 𑀲𑀩𑁆𑀩𑀁. 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀅𑀦𑀸𑀡𑀢𑁆𑀢𑀺𑀬𑀸 𑀕𑀳𑀺𑀢𑁂𑀧𑀺 𑀲𑀸𑀫𑀺𑀓𑀲𑁆𑀲 𑀓𑀣𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀳𑀸𑀭𑀽𑀧𑀘𑀸𑀭𑀸𑀤𑀺 𑀲𑀩𑁆𑀩𑀁 𑀔𑁂𑀢𑁆𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀏𑀲𑁂𑀯 𑀦𑀬𑁄𑀢𑀺 ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀬𑁆𑀬𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀁 𑀅𑀢𑀺𑀤𑀺𑀲𑀢𑀺. 𑀦𑀺𑀫𑀺𑀢𑁆𑀢𑁂 𑀯𑀸 𑀓𑀢𑁂𑀢𑀺 ‘‘𑀘𑀻𑀯𑀭𑀁 𑀫𑁂 𑀓𑀺𑀮𑀺𑀝𑁆𑀞𑀁, 𑀓𑁄 𑀦𑀼 𑀔𑁄 𑀭𑀚𑀺𑀢𑁆𑀯𑀸 𑀤𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀫𑀺𑀢𑁆𑀢𑁂 𑀓𑀢𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀦𑀸𑀡𑀢𑁆𑀢𑀲𑁆𑀲 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀫𑀦𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀏𑀓𑀧𑀲𑁆𑀲𑁂 𑀯𑀸𑀢𑀺 𑀯𑀺𑀳𑀸𑀭𑀲𑁆𑀲 𑀫𑀳𑀦𑁆𑀢𑀢𑀸𑀬 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀯𑀲𑀦𑁆𑀢𑁄 𑀯𑀸. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀚𑀻𑀭𑀸𑀧𑁂𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀞𑀸𑀦𑀸𑀘𑀸𑀯𑀦𑀁 𑀅𑀓𑀢𑁆𑀯𑀸 𑀦𑀺𑀯𑀢𑁆𑀣𑀧𑀸𑀭𑀼𑀢𑀦𑀻𑀳𑀸𑀭𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 ¶ 𑀚𑀻𑀭𑀸𑀧𑁂𑀢𑀺, 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀫𑁂𑀯 𑀲𑀻𑀲𑁂 𑀪𑀸𑀭𑀁 𑀔𑀦𑁆𑀥𑁂 𑀓𑀭𑀡𑀸𑀤𑀻𑀲𑀼 𑀯𑀺𑀬. 𑀬𑀣𑀸 𑀢𑀣𑀸 𑀯𑀸 𑀦𑀲𑁆𑀲𑀢𑀻𑀢𑀺 𑀅𑀕𑁆𑀕𑀺𑀆𑀤𑀺𑀦𑀸 𑀯𑀸 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀤𑀺𑀢𑀁 𑀯𑀸 𑀦𑀲𑁆𑀲𑀢𑀺.

𑀅𑀜𑁆𑀜𑁄 𑀯𑀸 𑀓𑁄𑀘𑀻𑀢𑀺 𑀇𑀫𑀺𑀦𑀸 𑀧𑀦 𑀬𑁂𑀦 𑀞𑀧𑀺𑀢𑀁, 𑀲𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀯 𑀣𑀽𑀮𑀲𑀸𑀝𑀓𑁄 𑀮𑀤𑁆𑀥𑁄𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤𑁂 𑀤𑀼𑀓𑁆𑀓𑀝𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀬𑁄𑀕𑀢𑁆𑀢𑀸. 𑀇𑀢𑀭𑀁 𑀕𑀡𑁆𑀳𑀢𑁄 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 ¶ 𑀏𑀢𑁆𑀣 ‘‘𑀧𑀯𑀺𑀲𑀺𑀢𑁆𑀯𑀸 𑀢𑀯 𑀲𑀸𑀝𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀇𑀫𑀺𑀦𑀸𑀯 𑀉𑀧𑀦𑀺𑀥𑀺𑀪𑀸𑀯𑀢𑁄 𑀫𑀼𑀢𑁆𑀢𑀢𑁆𑀢𑀸 𑀲𑀸𑀫𑀺𑀓𑀲𑁆𑀲 𑀇𑀢𑀭𑀁 𑀕𑀡𑁆𑀳𑀢𑁄𑀧𑀺 𑀅𑀢𑁆𑀢𑀦𑁄 𑀲𑀸𑀝𑀓𑁂 𑀆𑀮𑀬𑀲𑁆𑀲 𑀲𑀩𑁆𑀪𑀸𑀯𑀢𑁄 𑀘 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀦 𑀚𑀸𑀦𑀦𑁆𑀢𑀻𑀢𑀺 𑀢𑁂𑀦 𑀯𑀼𑀢𑁆𑀢𑀁 𑀯𑀘𑀦𑀁 𑀅𑀲𑀼𑀡𑀦𑁆𑀢𑀸 𑀦 𑀚𑀸𑀦𑀦𑁆𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀲𑀘𑁂 𑀚𑀸𑀦𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀏𑀲𑁂𑀯 𑀦𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀏𑀢𑁆𑀣 𑀘𑀺𑀢𑁆𑀢𑁂𑀦 𑀧𑀝𑀺𑀓𑁆𑀔𑁂𑀧𑁄𑀧𑀺 𑀲𑀗𑁆𑀕𑀳𑀺𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀸𑀘𑀺𑀢𑀸 𑀯𑀸 𑀅𑀬𑀸𑀘𑀺𑀢𑀸 𑀯𑀸𑀢𑀺 𑀏𑀢𑁆𑀣 𑀬𑀸𑀘𑀺𑀢𑀸 𑀬𑀤𑀺 𑀘𑀺𑀢𑁆𑀢𑁂𑀦𑀧𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀦𑀝𑁆𑀞𑁂 𑀕𑀻𑀯𑀸. 𑀅𑀬𑀸𑀘𑀺𑀢𑀸 𑀧𑀦 𑀬𑀤𑀺𑀧𑀺 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀦𑀢𑁆𑀣𑀺 𑀕𑀻𑀯𑀸.

𑀕𑀳𑁂𑀢𑁆𑀯𑀸 𑀞𑀧𑁂𑀢𑀻𑀢𑀺 𑀏𑀢𑁆𑀣 𑀘𑀸𑀮𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀧𑀺𑀢𑁂𑀧𑀺 𑀦𑀝𑁆𑀞𑁂 𑀕𑀻𑀯𑀸. 𑀉𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂𑀢𑀺 𑀪𑀡𑁆𑀟𑀸𑀕𑀸𑀭𑀲𑁆𑀲 𑀲𑀫𑀻𑀧𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑁂. 𑀫𑀬𑀺 𑀘 𑀫𑀢𑁂 𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑁂 𑀯𑀺𑀦𑀝𑁆𑀞𑁂𑀢𑀺 𑀏𑀢𑁆𑀣 ‘‘𑀓𑁂𑀯𑀮𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀁 𑀫𑀸 𑀦𑀲𑁆𑀲𑀻𑀢𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀯𑀺𑀯𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀳𑀺𑀧𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀲𑀸𑀫𑀻𑀘𑀻𑀢𑀺 𑀪𑀡𑁆𑀟𑀸𑀕𑀸𑀭𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀯𑀢𑁆𑀢𑀁.

𑀮𑁄𑀮𑀫𑀳𑀸𑀣𑁂𑀭𑁄𑀢𑀺 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀳𑀲𑀺𑀢𑀓𑀻𑀴𑀺𑀢𑀧𑁆𑀧𑀲𑀼𑀢𑁄 𑀯𑀸 𑀫𑀳𑀸𑀣𑁂𑀭𑁄. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀕𑀩𑁆𑀪𑁂𑀲𑀼 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀢𑀭𑁂𑀳𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀕𑀩𑁆𑀪𑁂 𑀯𑀲𑀦𑁆𑀢𑁂𑀳𑀺 𑀇𑀢𑀭𑀪𑀺𑀓𑁆𑀔𑀽𑀳𑀺. 𑀯𑀺𑀳𑀸𑀭𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀳𑀸𑀭𑀯𑀸𑀭𑀺𑀓𑁄, 𑀯𑀸𑀭𑀁 𑀓𑀢𑁆𑀯𑀸 𑀯𑀺𑀳𑀸𑀭𑀭𑀓𑁆𑀔𑀡𑀓𑁄. 𑀦𑀺𑀯𑀸𑀧𑀦𑁆𑀢𑀺 𑀪𑀢𑁆𑀢𑀯𑁂𑀢𑀦𑀁. 𑀧𑀝𑀺𑀧𑀣𑀁 𑀕𑀢𑁂𑀲𑀽𑀢𑀺 𑀘𑁄𑀭𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀧𑀞𑀫𑀢𑀭𑀁𑀬𑁂𑀯 𑀕𑀦𑁆𑀢𑁆𑀯𑀸 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑁄𑀭𑀸𑀦𑀁 𑀅𑀪𑀺𑀫𑀼𑀔𑀁 𑀕𑀢𑁂𑀲𑀼. 𑀦𑀺𑀲𑁆𑀲𑀺𑀢𑀓𑁂 𑀚𑀕𑁆𑀕𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀲𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑁄𑀲𑁂𑀦𑁆𑀢𑀸𑀧𑀺 𑀦𑀺𑀲𑁆𑀲𑀺𑀢𑀓𑁂 𑀯𑀺𑀳𑀸𑀭𑀁 𑀚𑀕𑁆𑀕𑀸𑀧𑁂𑀦𑁆𑀢𑀺. ‘‘𑀅𑀲𑀳𑀸𑀬𑀲𑁆𑀲 𑀅𑀤𑀼𑀢𑀺𑀬𑀲𑁆𑀲𑀸’’𑀢𑀺 𑀧𑀸𑀞𑁄 𑀬𑀼𑀢𑁆𑀢𑁄, 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀲𑀳𑀸𑀬𑀲𑁆𑀲 𑀯𑀸 𑀅𑀢𑁆𑀢𑀤𑀼𑀢𑀺𑀬𑀲𑁆𑀲 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀸𑀞𑁂 𑀏𑀓𑁂𑀦 𑀆𑀦𑀻𑀢𑀁 𑀤𑁆𑀯𑀺𑀦𑁆𑀦𑀁 𑀦𑀧𑁆𑀧𑀳𑁄𑀢𑀻𑀢𑀺 ¶ 𑀅𑀢𑁆𑀢𑀤𑀼𑀢𑀺𑀬𑀲𑁆𑀲𑀧𑀺 𑀯𑀸𑀭𑁄 𑀦𑀺𑀯𑀸𑀭𑀺𑀢𑁄𑀢𑀺 𑀯𑀤𑀦𑁆𑀢𑀺, 𑀢𑀁 ‘‘𑀬𑀲𑁆𑀲 𑀲𑀪𑀸𑀕𑁄 𑀪𑀺𑀓𑁆𑀔𑀼 𑀪𑀢𑁆𑀢𑀁 𑀆𑀦𑁂𑀢𑁆𑀯𑀸 𑀤𑀸𑀢𑀸 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀻𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀉𑀧𑀚𑀻𑀯𑀦𑁆𑀢𑁂𑀦 𑀞𑀸𑀢𑀩𑁆𑀩𑀦𑁆𑀢𑀺 𑀅𑀩𑁆𑀪𑁄𑀓𑀸𑀲𑀺𑀓𑁂𑀦 𑀭𑀼𑀓𑁆𑀔𑀫𑀽𑀮𑀺𑀓𑁂𑀦𑀧𑀺 𑀧𑀸𑀓𑀯𑀝𑁆𑀝𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁂𑀦 𑀧𑀢𑁆𑀢𑀘𑀻𑀯𑀭𑀭𑀓𑁆𑀔𑀡𑀢𑁆𑀣𑀸𑀬 𑀯𑀺𑀳𑀸𑀭𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀞𑀸𑀢𑀩𑁆𑀩𑀁. 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀅𑀝𑁆𑀞𑀓𑀣𑀁 𑀯𑀸. 𑀤𑀺𑀕𑀼𑀡𑀦𑁆𑀢𑀺 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑀺𑀢𑀁 𑀯𑀺𑀦𑀸𑀯 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂𑀢𑀺 𑀯𑀤𑀦𑁆𑀢𑀺. 𑀧𑀓𑁆𑀔𑀯𑀸𑀭𑁂𑀦𑀸𑀢𑀺 𑀅𑀟𑁆𑀠𑀫𑀸𑀲𑀯𑀸𑀭𑁂𑀦.

𑀉𑀧𑀦𑀺𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀗𑁆𑀓𑀖𑀸𑀢𑀓𑀣𑀸𑀯𑀡𑁆𑀡𑀦𑀸

𑁧𑁧𑁩. 𑀲𑀼𑀗𑁆𑀓𑀖𑀸𑀢𑀓𑀣𑀸𑀬𑀁 ¶ 𑀢𑀢𑁄 𑀳𑀦𑀦𑁆𑀢𑀻𑀢𑀺 𑀢𑀢𑁄 𑀦𑀻𑀳𑀭𑀦𑁆𑀢𑀸 𑀳𑀦𑀦𑁆𑀢𑀺. 𑀢𑀦𑁆𑀢𑀺 𑀲𑀼𑀗𑁆𑀓𑀝𑁆𑀞𑀸𑀦𑀁. 𑀬𑀢𑁄𑀢𑀺 𑀬𑀢𑁄 𑀦𑀻𑀳𑀭𑀺𑀬𑀫𑀸𑀦𑀪𑀡𑁆𑀟𑀢𑁄. 𑀭𑀸𑀚𑀓𑀦𑁆𑀢𑀺 𑀭𑀸𑀚𑀸𑀬𑀢𑁆𑀢𑀁. 𑀢𑀫𑁆𑀧𑀺 𑀭𑀸𑀚𑀸𑀭𑀳𑀫𑁂𑀯𑀸𑀢𑀺 𑀆𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺. 𑀇𑀢𑁄𑀢𑀺 𑀇𑀢𑁄 𑀪𑀡𑁆𑀟𑀢𑁄. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀏𑀢𑁆𑀣 ‘‘𑀧𑀞𑀫𑀁 𑀧𑀸𑀤𑀁 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑁂 𑀧𑀸𑀤𑁂 𑀉𑀤𑁆𑀥𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀧𑀺𑀢𑁄𑀧𑀺 𑀩𑀳𑀺 𑀞𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸. 𑀬𑀢𑁆𑀣 𑀬𑀢𑁆𑀣 𑀧𑀤𑀯𑀸𑀭𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸, 𑀢𑀢𑁆𑀣 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀯𑀤𑀦𑁆𑀢𑀺. 𑀲𑀼𑀗𑁆𑀓𑀖𑀸𑀢𑀢𑁄 𑀩𑀳𑀺 𑀩𑀳𑀺𑀲𑀼𑀗𑁆𑀓𑀖𑀸𑀢𑀁. 𑀅𑀯𑀲𑁆𑀲𑀁 𑀧𑀢𑀦𑀓𑀦𑁆𑀢𑀺 𑀅𑀯𑀲𑁆𑀲𑀁 𑀲𑀼𑀗𑁆𑀓𑀖𑀸𑀢𑀢𑁄 𑀩𑀳𑀺 𑀧𑀢𑀦𑀓𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀯𑀲𑁆𑀲𑀁 𑀧𑀢𑀦𑀓𑁂 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀝𑁆𑀝𑀦𑁆𑀢𑀁 𑀧𑀼𑀦 𑀅𑀦𑁆𑀢𑁄 𑀧𑀯𑀺𑀲𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀓𑀼𑀭𑀼𑀦𑁆𑀤𑀺𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀳𑀺 𑀅𑀥𑀺𑀧𑁆𑀧𑀸𑀬𑁄 𑀧𑀓𑀸𑀲𑀺𑀢𑁄. 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺 𑀕𑀘𑁆𑀙𑀦𑁆𑀢𑀁 𑀭𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼𑀦𑁄 𑀧𑀬𑁄𑀕𑁂𑀦 𑀕𑀫𑀦𑀯𑁂𑀕𑀲𑁆𑀲 𑀅𑀦𑁆𑀢𑁄𑀬𑁂𑀯 𑀯𑀽𑀧𑀲𑀦𑁆𑀢𑀢𑁆𑀢𑀸. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀩𑀳𑀺 𑀞𑀧𑁂𑀢𑀻𑀢𑀺 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀁 𑀧𑀼𑀝𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀩𑀳𑀺 𑀞𑀧𑁂𑀢𑀺. 𑀏𑀢𑁆𑀣 𑀘 ‘‘𑀅𑀩𑁆𑀪𑀦𑁆𑀢𑀭𑀺𑀫𑁂 𑀧𑀼𑀝𑀓𑁂 𑀪𑀽𑀫𑀺𑀢𑁄 𑀫𑁄𑀘𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺.

‘‘𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸…𑀧𑁂… 𑀞𑀧𑁂𑀢𑀻𑀢𑀺 𑀲𑀼𑀗𑁆𑀓𑀖𑀸𑀢𑀁 𑀅𑀧𑀯𑀺𑀲𑀺𑀢𑁆𑀯𑀸 𑀩𑀳𑀺𑀬𑁂𑀯 𑀞𑀧𑁂𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀧𑀺𑀢𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀆𑀘𑀭𑀺𑀬𑀸 𑀧𑀦 ‘‘𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀩𑀳𑀺 𑀞𑀺𑀢’’𑀦𑁆𑀢𑀺 𑀧𑀸𑀞𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 ‘‘𑀧𑀞𑀫𑀁 𑀅𑀦𑁆𑀢𑁄𑀲𑀼𑀗𑁆𑀓𑀖𑀸𑀢𑀁 𑀧𑀯𑀺𑀝𑁆𑀞𑁂𑀲𑀼𑀬𑁂𑀯 𑀬𑀸𑀦𑀸𑀤𑀻𑀲𑀼 𑀞𑀧𑀺𑀢𑀁 𑀧𑀘𑁆𑀙𑀸 𑀬𑀸𑀦𑁂𑀦 𑀲𑀤𑁆𑀥𑀺𑀁 𑀦𑀻𑀳𑀝𑀁 𑀲𑀼𑀗𑁆𑀓𑀖𑀸𑀢𑀲𑁆𑀲 𑀩𑀳𑀺 𑀞𑀺𑀢𑀁, 𑀦 𑀘 𑀢𑁂𑀦 𑀦𑀻𑀢’’𑀦𑁆𑀢𑀺 ¶ 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀅𑀬𑀁 𑀧𑀦 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀬𑀸𑀦𑀸𑀤𑀻𑀲𑀼 𑀞𑀧𑀺𑀢𑁂𑀧𑀺 𑀪𑀺𑀓𑁆𑀔𑀼𑀲𑁆𑀲 𑀧𑀬𑁄𑀕𑀁 𑀯𑀺𑀦𑀸 𑀅𑀜𑁆𑀜𑁂𑀦 𑀦𑀻𑀳𑀝𑀢𑁆𑀢𑀸 𑀦𑁂𑀯𑀢𑁆𑀣𑀺 𑀧𑀸𑀭𑀸𑀚𑀺𑀓𑀁, ‘‘𑀅𑀢𑁆𑀭 𑀧𑀯𑀺𑀝𑁆𑀞𑀲𑁆𑀲 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀦 𑀦𑀻𑀳𑀝𑀲𑁆𑀲 𑀩𑀳𑀺 𑀞𑀺𑀢𑁂 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀦 𑀳𑁄𑀢𑀻𑀢𑀺. 𑀅𑀬𑀫𑁂𑀯 𑀘 𑀦𑀬𑁄 ‘‘𑀯𑀝𑁆𑀝𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀻𑀢𑀺 𑀯𑀸 𑀅𑀜𑁆𑀜𑁄 𑀦𑀁 𑀯𑀝𑁆𑀝𑁂𑀲𑁆𑀲𑀢𑀻𑀢𑀺 𑀯𑀸 𑀅𑀦𑁆𑀢𑁄 𑀞𑀧𑀺𑀢𑀁 𑀧𑀘𑁆𑀙𑀸 𑀲𑀬𑀁 𑀯𑀸 𑀯𑀝𑁆𑀝𑀫𑀸𑀦𑀁 𑀅𑀜𑁆𑀜𑁂𑀦 𑀯𑀸 𑀯𑀝𑁆𑀝𑀺𑀢𑀁 𑀩𑀳𑀺 𑀕𑀘𑁆𑀙𑀢𑀺, 𑀭𑀓𑁆𑀔𑀢𑀺𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀫𑁂𑀢𑀻𑀢𑀺 𑀬𑀼𑀢𑁆𑀢𑀢𑀭𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀢𑁄𑀧𑀺 𑀢𑁂𑀦 𑀧𑀲𑁆𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀬𑀤𑀺 𑀢𑀢𑁄𑀧𑀺 𑀕𑀘𑁆𑀙𑀦𑁆𑀢𑀸𑀦𑀁 𑀳𑀢𑁆𑀣𑀢𑁄 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑀺, 𑀲𑀻𑀫𑀸𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀫𑁂𑀯.

𑀳𑀢𑁆𑀣𑀺𑀲𑀼𑀢𑁆𑀢𑀸𑀤𑀻𑀲𑀽𑀢𑀺 𑀳𑀢𑁆𑀣𑀺𑀲𑀺𑀓𑁆𑀔𑀸𑀤𑀻𑀲𑀼. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑀬𑀸𑀦𑀸𑀤𑀻𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀻𑀳𑀭𑀡𑁂. 𑀅𑀦𑀸𑀧𑀢𑁆𑀢𑀻𑀢𑀺 𑀢𑀢𑁆𑀣 ‘‘𑀲𑀳𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑁂𑀦 𑀦𑀻𑀳𑀭𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 ¶ 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂. 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀬𑀲𑁆𑀫𑀸 𑀏𑀴𑀓𑀮𑁄𑀫𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀅𑀦𑀸𑀧𑀢𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀯𑀳𑀸𑀭𑀸𑀪𑀸𑀯𑀸 𑀅𑀦𑀸𑀧𑀢𑁆𑀢𑀺. 𑀉𑀧𑀘𑀸𑀭𑀦𑁆𑀢𑀺 𑀲𑀼𑀗𑁆𑀓𑀖𑀸𑀢𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀲𑀫𑀦𑁆𑀢𑀸 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀯𑀢𑀺𑀆𑀲𑀦𑁆𑀦𑀧𑁆𑀧𑀤𑁂𑀲𑀲𑀗𑁆𑀔𑀸𑀢𑀁 𑀉𑀧𑀘𑀸𑀭𑀁. 𑀢𑀸𑀤𑀺𑀲𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀳𑀭𑀡𑁂 𑀲𑀸𑀤𑀻𑀦𑀯𑀢𑁆𑀢𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀲𑀼𑀗𑁆𑀓𑀖𑀸𑀢𑁂. ‘‘𑀤𑁆𑀯𑀻𑀳𑀺 𑀮𑁂𑀟𑁆𑀟𑀼𑀧𑀸𑀢𑁂𑀳𑀻𑀢𑀺 𑀅𑀬𑀁 𑀦𑀺𑀬𑀫𑁄 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑁄’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀲𑀼𑀗𑁆𑀓𑀖𑀸𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁧𑁪. 𑀧𑀸𑀡𑀓𑀣𑀸𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀏𑀓𑀦𑁆𑀢𑁂𑀦 𑀧𑀸𑀤𑀕𑁆𑀖𑀦𑀓𑀢𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳 𑁋 ‘‘𑀏𑀓𑀁𑀲𑁂𑀦 𑀅𑀯𑀳𑀸𑀭𑀓𑀧𑁆𑀧𑀳𑁄𑀦𑀓𑀧𑀸𑀡𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀪𑀼𑀚𑀺𑀲𑁆𑀲𑀁 𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀸𑀪𑀸𑀯𑀢𑁄. 𑀪𑀼𑀚𑀺𑀲𑁆𑀲𑁄𑀢𑀺 𑀅𑀤𑀸𑀲𑁄. 𑀆𑀞𑀧𑀺𑀢𑁄𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀇𑀡𑀁 𑀕𑀡𑁆𑀳𑀦𑁆𑀢𑁂𑀳𑀺 ‘‘𑀬𑀸𑀯 𑀇𑀡𑀤𑀸𑀦𑀸 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀳𑁄𑀢𑀽’’𑀢𑀺 𑀇𑀡𑀤𑀸𑀬𑀓𑀸𑀦𑀁 𑀦𑀺𑀬𑁆𑀬𑀸𑀢𑀺𑀢𑁄. 𑀬𑀲𑁆𑀫𑀸 𑀫𑀸𑀢𑀸𑀧𑀺𑀢𑀭𑁄 𑀤𑀸𑀲𑀸𑀦𑀁 𑀯𑀺𑀬 𑀧𑀼𑀢𑁆𑀢𑀸𑀦𑀁 𑀦 ¶ 𑀲𑀸𑀫𑀺𑀦𑁄. 𑀬𑁂𑀲𑀜𑁆𑀘 𑀲𑀦𑁆𑀢𑀺𑀓𑁂 𑀆𑀞𑀧𑀺𑀢𑁄, 𑀢𑁂𑀧𑀺 𑀢𑀲𑁆𑀲 𑀳𑀢𑁆𑀣𑀓𑀫𑁆𑀫𑁂 𑀲𑀸𑀫𑀺𑀦𑁄, 𑀦 𑀢𑀲𑁆𑀲𑀸𑀢𑀺 𑀆𑀳 ‘‘𑀅𑀯𑀳𑀸𑀭𑁄 𑀦𑀢𑁆𑀣𑀻’’𑀢𑀺. 𑀥𑀦𑀁 𑀧𑀦 𑀕𑀢𑀝𑁆𑀞𑀸𑀦𑁂 𑀯𑀟𑁆𑀠𑀢𑀻𑀢𑀺 𑀏𑀢𑁆𑀣 ‘‘𑀆𑀞𑀧𑁂𑀢𑁆𑀯𑀸 𑀕𑀳𑀺𑀢𑀥𑀦𑀁 𑀯𑀟𑁆𑀠𑀺𑀬𑀸 𑀲𑀳 𑀅𑀯𑀳𑀸𑀭𑀓𑀲𑁆𑀲 𑀕𑀻𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀅𑀦𑁆𑀢𑁄𑀚𑀸𑀢…𑀧𑁂… 𑀅𑀯𑀳𑀸𑀭𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀤𑁂𑀲𑀘𑀸𑀭𑀺𑀢𑁆𑀢𑀯𑀲𑁂𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀤𑀸𑀲𑀩𑁆𑀬𑀁 𑀉𑀧𑀕𑀢𑀁 𑀅𑀯𑀳𑀭𑀦𑁆𑀢𑀲𑁆𑀲𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑁂𑀳𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀤𑀸𑀲𑀲𑁆𑀲 𑀚𑀸𑀢𑁄𑀢𑀺 𑀏𑀯𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑀦𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀕𑁂𑀳𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀦 𑀅𑀜𑁆𑀜𑀲𑁆𑀲 𑀚𑀸𑀢𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑁄. 𑀓𑀭𑀫𑀭𑀸𑀦𑀻𑀢𑁄 𑀦𑀸𑀫 𑀩𑀦𑁆𑀥𑀕𑀸𑀳𑀕𑀳𑀺𑀢𑁄. 𑀢𑁂𑀦𑀸𑀳 ‘‘𑀧𑀭𑀤𑁂𑀲𑀢𑁄 𑀧𑀳𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀭𑀤𑁂𑀲𑀢𑁄 𑀧𑀳𑀭𑀺𑀢𑁆𑀯𑀸𑀢𑀺 𑀧𑀭𑀤𑁂𑀲𑀁 𑀯𑀺𑀮𑀼𑀫𑁆𑀧𑀓𑁂𑀳𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀫𑀳𑀸𑀘𑁄𑀭𑁂𑀳𑀺 𑀧𑀭𑀤𑁂𑀲𑀢𑁄 𑀧𑀳𑀭𑀺𑀢𑁆𑀯𑀸. 𑀅𑀦𑀸𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀬𑀤𑀺 𑀢𑀲𑁆𑀲 𑀯𑀘𑀦𑁂𑀦 𑀢𑀢𑁄 𑀅𑀥𑀺𑀓𑀁 𑀯𑁂𑀕𑀁 𑀦 𑀯𑀟𑁆𑀠𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀦. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑀓𑀣𑀸𑀬𑀧𑀺 𑀦 𑀫𑀼𑀘𑁆𑀘𑀢𑀺, 𑀇𑀥 𑀧𑀦 ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀆𑀤𑀸𑀦𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑀓𑀣𑀸𑀬 𑀫𑀼𑀘𑁆𑀘𑀢𑀺.

𑀧𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀤𑀓𑀣𑀸𑀯𑀡𑁆𑀡𑀦𑀸

𑀅𑀧𑀤𑀓𑀣𑀸𑀬𑀁 ¶ 𑀦𑀸𑀫𑁂𑀦𑀸𑀢𑀺 𑀲𑀧𑁆𑀧𑀦𑀸𑀫𑁂𑀦 𑀯𑀸 𑀲𑀸𑀫𑀺𑀓𑁂𑀦 𑀓𑀢𑀦𑀸𑀫𑁂𑀦 𑀯𑀸. 𑀓𑀭𑀡𑁆𑀟𑀧𑀼𑀝𑀦𑁆𑀢𑀺 𑀧𑁂𑀴𑀸𑀬 𑀧𑀺𑀥𑀸𑀦𑀁. 𑀆𑀳𑀘𑁆𑀘𑀸𑀢𑀺 𑀧𑀳𑀭𑀺𑀢𑁆𑀯𑀸.

𑀘𑀢𑀼𑀧𑁆𑀧𑀤𑀓𑀣𑀸𑀯𑀡𑁆𑀡𑀦𑀸

𑁧𑁧𑁬. 𑀘𑀢𑀼𑀧𑁆𑀧𑀤𑀓𑀣𑀸𑀬𑀁 𑀪𑀺𑀗𑁆𑀓𑀘𑁆𑀙𑀸𑀧𑀦𑁆𑀢𑀺 𑀪𑀺𑀗𑁆𑀓𑀪𑀺𑀗𑁆𑀓𑀸𑀢𑀺 𑀲𑀤𑁆𑀤𑀸𑀬𑀦𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑀁 𑀳𑀢𑁆𑀣𑀺𑀧𑁄𑀢𑀓𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀻𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺. 𑀭𑀸𑀚𑀗𑁆𑀕𑀡𑁂𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀦𑀕𑀭𑁂 𑀯𑀢𑁆𑀣𑀼𑀤𑁆𑀯𑀸𑀭𑀢𑁄 𑀩𑀳𑀺𑀭𑀸𑀚𑀗𑁆𑀕𑀡𑁂. 𑀳𑀢𑁆𑀣𑀺𑀲𑀸𑀮𑀸 𑀞𑀸𑀦𑀦𑁆𑀢𑀺 𑀦𑀺𑀩𑁆𑀩𑀓𑁄𑀲𑀢𑁄 𑀉𑀤𑀓𑀧𑀸𑀢𑀩𑁆𑀪𑀦𑁆𑀢𑀭𑀁 𑀞𑀸𑀦𑀁. 𑀩𑀳𑀺𑀦𑀕𑀭𑁂 𑀞𑀺𑀢𑀲𑁆𑀲𑀸𑀢𑀺 ¶ 𑀧𑀭𑀺𑀓𑁆𑀔𑀺𑀢𑁆𑀢𑀦𑀕𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀦𑀕𑀭𑁂 𑀧𑀦 𑀅𑀦𑁆𑀢𑁄𑀦𑀕𑀭𑁂 𑀞𑀺𑀢𑀲𑁆𑀲𑀧𑀺 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁. 𑀔𑀡𑁆𑀟𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀢𑀦𑀸 𑀔𑀡𑁆𑀟𑀺𑀢𑀤𑁆𑀯𑀸𑀭𑀁. 𑀲𑀸𑀔𑀸𑀪𑀗𑁆𑀕𑀦𑁆𑀢𑀺 𑀪𑀜𑁆𑀚𑀺𑀢𑀲𑀸𑀔𑀁. 𑀦𑀺𑀧𑀦𑁆𑀦𑀲𑁆𑀲 𑀤𑁆𑀯𑁂𑀢𑀺 𑀩𑀦𑁆𑀥𑀦𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂. 𑀖𑀸𑀢𑁂𑀢𑀻𑀢𑀺 𑀏𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀺𑀦𑀸𑀲𑁂𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯, 𑀦 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑀘𑀢𑀼𑀧𑁆𑀧𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀑𑀡𑀺𑀭𑀓𑁆𑀔𑀓𑀣𑀸𑀯𑀡𑁆𑀡𑀦𑀸

𑀑𑀡𑀺𑀭𑀓𑁆𑀔𑀓𑀣𑀸𑀬𑀁 𑀑𑀡𑀺𑀦𑁆𑀢𑀺 𑀑𑀡𑀻𑀢𑀁, 𑀆𑀦𑀻𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀑𑀡𑀺𑀭𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑀺𑀢𑀁 𑀪𑀡𑁆𑀟𑀁 𑀉𑀧𑀦𑀺𑀥𑀺 𑀯𑀺𑀬 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀑𑀮𑁄𑀓𑀦𑀢𑁆𑀣𑀸𑀬 𑀞𑀧𑀺𑀢𑀢𑁆𑀢𑀸 𑀢𑀲𑁆𑀲 𑀞𑀸𑀦𑀸𑀘𑀸𑀯𑀦𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀚𑀦𑁂𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸𑀬𑀁 ‘‘𑀲𑀫𑁆𑀩𑀳𑀼𑀮𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀧𑀸𑀴𑀺𑀬𑀁 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀆𑀡𑀸𑀧𑀓𑀸𑀦𑀁 𑀆𑀡𑀢𑁆𑀢𑀺𑀓𑁆𑀔𑀡𑁂 𑀆𑀧𑀢𑁆𑀢𑀺, 𑀅𑀯𑀳𑀸𑀭𑀓𑀲𑁆𑀲 𑀉𑀤𑁆𑀥𑀸𑀭𑁂𑀢𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀆𑀡𑀢𑁆𑀢𑀺𑀓𑀣𑀸𑀬𑀁 ‘‘𑀲𑁄 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀢𑁆𑀣𑀸𑀧𑀺 𑀳𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀅𑀣 𑀢𑀁 𑀪𑀡𑁆𑀟𑀁 𑀅𑀯𑀲𑁆𑀲𑀁 𑀳𑀸𑀭𑀺𑀬𑀁 𑀳𑁄𑀢𑀺, 𑀬𑀁 ¶ 𑀧𑀭𑀢𑁄 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀇𑀫𑀲𑁆𑀲 𑀢𑀗𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀬𑀁 𑀬𑀼𑀢𑁆𑀢𑀺 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁨𑁧). 𑀲𑀁𑀯𑀺𑀤𑀸𑀯𑀳𑀸𑀭𑁂 𑀘 ‘‘𑀆𑀡𑀢𑁆𑀢𑀺 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀏𑀓𑀫𑁂𑀓𑀲𑁆𑀲 𑀏𑀓𑁂𑀓𑁄 𑀫𑀸𑀲𑀓𑁄 𑀲𑀸𑀳𑀢𑁆𑀣𑀺𑀓𑁄 𑀳𑁄𑀢𑀺, 𑀧𑀜𑁆𑀘 𑀆𑀡𑀢𑁆𑀢𑀺𑀓𑀸’’𑀢𑀺 𑀯𑀘𑀦𑀢𑁄. 𑀆𑀡𑀢𑁆𑀢𑀺𑀬𑀸 𑀘 𑀲𑀢𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀉𑀤𑁆𑀥𑀸𑀭𑁂.

𑀬𑀤𑀺 𑀏𑀯𑀁 ‘‘𑀢𑁂𑀲𑀼 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀏𑀢𑁆𑀣 𑀳𑀺 𑀲𑀩𑁆𑀩𑁂𑀲𑀁𑀬𑁂𑀯 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ¶ 𑀅𑀯𑀳𑀸𑀭𑀓𑀲𑁆𑀲𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀆𑀳, 𑀦 𑀧𑀦 𑀆𑀡𑀸𑀧𑀓𑀸𑀦𑀫𑁆𑀧𑀺 𑀉𑀤𑁆𑀥𑀸𑀭𑁂𑀬𑁂𑀯 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀲𑀫𑁆𑀩𑀳𑀼𑀮𑀸 𑀏𑀓𑀁 𑀆𑀡𑀸𑀧𑁂𑀦𑁆𑀢𑀺 ‘𑀕𑀘𑁆𑀙𑁂𑀢𑀁 𑀆𑀳𑀭𑀸’𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀁𑀯𑀺𑀤𑀸𑀯𑀳𑀸𑀭𑁂 𑀆𑀡𑀸𑀧𑀓𑀸𑀦𑀫𑁆𑀧𑀺 𑀉𑀤𑁆𑀥𑀸𑀭𑁂𑀬𑁂𑀯 𑀆𑀧𑀢𑁆𑀢𑀺, 𑀦 𑀆𑀡𑀢𑁆𑀢𑀺𑀓𑁆𑀔𑀡𑁂𑀢𑀺 𑀆𑀯𑁂𑀡𑀺𑀓𑀫𑀺𑀤𑀁 𑀮𑀓𑁆𑀔𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁, 𑀇𑀢𑁄 𑀯𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀬𑀣𑀸 𑀅𑀝𑁆𑀞𑀓𑀣𑀸𑀬𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀲𑀁𑀯𑀺𑀥𑀸𑀬𑀸𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸. 𑀢𑁂𑀦 𑀦𑁂𑀲𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄𑀢𑀺 𑀆𑀡𑀢𑁆𑀢𑀺𑀯𑀲𑁂𑀦 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑁂 𑀲𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀢𑁂 𑀆𑀡𑀢𑁆𑀢𑀸 𑀅𑀯𑀲𑁆𑀲𑀁 𑀢𑀁 𑀳𑀭𑀦𑁆𑀢𑀺, 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯 𑀦𑁂𑀲𑀁 𑀤𑀝𑁆𑀞𑀩𑁆𑀩𑀸, 𑀦 𑀤𑀼𑀓𑁆𑀓𑀝𑀸𑀧𑀢𑁆𑀢𑀺. 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀪𑀺𑀦𑁆𑀦𑀓𑀸𑀮𑀯𑀺𑀲𑀬𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺. 𑀢𑀣𑀸 𑀳𑀺 𑀲𑀳𑀢𑁆𑀣𑀸 𑀅𑀯𑀳𑀭𑀦𑁆𑀢𑀲𑁆𑀲 𑀞𑀸𑀦𑀸𑀘𑀸𑀯𑀦𑁂 𑀆𑀧𑀢𑁆𑀢𑀺, 𑀆𑀡𑀢𑁆𑀢𑀺𑀬𑀸 𑀧𑀦 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀪𑀺𑀦𑁆𑀦𑀓𑀸𑀮𑀯𑀺𑀲𑀬𑀸 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑁂𑀳𑀺 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑁄.

𑀲𑀁𑀯𑀺𑀤𑀸𑀯𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁧𑁧𑁯. 𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸𑀬𑀁 𑀑𑀘𑀭𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀅𑀯𑀲𑁆𑀲𑀁 𑀳𑀸𑀭𑀺𑀬𑁂 𑀪𑀡𑁆𑀟𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀧𑀸𑀴𑀺𑀬𑀁 𑀢𑀁 𑀲𑀗𑁆𑀓𑁂𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀏𑀢𑁆𑀣 𑀢𑀁 𑀲𑀗𑁆𑀓𑁂𑀢𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀲 𑀲𑀗𑁆𑀓𑁂𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀁 𑀲𑀗𑁆𑀓𑁂𑀢𑀁 𑀅𑀲𑀫𑁆𑀧𑀢𑁆𑀯𑀸 𑀧𑀼𑀭𑁂 𑀯𑀸 𑀢𑀁 𑀲𑀗𑁆𑀓𑁂𑀢𑀁 𑀅𑀢𑀺𑀓𑁆𑀓𑀫𑁆𑀫 𑀧𑀘𑁆𑀙𑀸 𑀯𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 𑁋 ‘‘𑀅𑀚𑁆𑀚𑀸𑀢𑀺 𑀦𑀺𑀬𑀸𑀫𑀺𑀢𑀁 ¶ 𑀢𑀁 𑀲𑀗𑁆𑀓𑁂𑀢𑀁 𑀅𑀢𑀺𑀓𑁆𑀓𑀫𑁆𑀫𑀸’’𑀢𑀺𑀆𑀤𑀺. 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀓𑁂𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁧𑁨𑁦. 𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸𑀬𑀁 ¶ 𑀅𑀓𑁆𑀔𑀺𑀦𑀺𑀔𑀡𑀸𑀤𑀺𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀧𑀦 𑀮𑀳𑀼𑀓𑀁 𑀇𑀢𑁆𑀢𑀭𑀓𑀸𑀮𑀁, 𑀢𑀲𑁆𑀫𑀸 𑀢𑀗𑁆𑀔𑀡𑁂𑀬𑁂𑀯 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀢𑀣𑀸 𑀳𑀺 𑀓𑀺𑀜𑁆𑀘𑀺 𑀪𑀡𑁆𑀟𑀁 𑀤𑀽𑀭𑁂 𑀳𑁄𑀢𑀺 𑀓𑀺𑀜𑁆𑀘𑀺 𑀪𑀸𑀭𑀺𑀬𑀁, 𑀢𑀁 𑀕𑀳𑁂𑀢𑀼𑀁 𑀬𑀸𑀯 𑀕𑀘𑁆𑀙𑀢𑀺, 𑀬𑀸𑀯 𑀉𑀓𑁆𑀔𑀺𑀧𑀺𑀢𑀼𑀁 𑀯𑀸𑀬𑀫𑀢𑀺, 𑀢𑀸𑀯 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲 𑀧𑀘𑁆𑀙𑀸 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀺𑀫𑀺𑀢𑁆𑀢𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀕𑀡𑁆𑀳𑀺𑀢𑀼𑀁 𑀆𑀭𑀤𑁆𑀥𑀢𑁆𑀢𑀸 𑀢𑁂𑀦𑁂𑀯 𑀦𑀺𑀫𑀺𑀢𑁆𑀢𑁂𑀦 𑀅𑀯𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀏𑀯𑀁 ‘‘𑀧𑀼𑀭𑁂𑀪𑀢𑁆𑀢𑀧𑀬𑁄𑀕𑁄𑀯 𑀏𑀲𑁄’’𑀢𑀺 𑀯𑀸𑀤𑁄 𑀧𑀫𑀸𑀡𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀦 𑀳𑀺 𑀲𑀗𑁆𑀓𑁂𑀢𑀓𑀫𑁆𑀫𑀁 𑀯𑀺𑀬 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀳𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀇𑀥 𑀦𑀢𑁆𑀣𑀺. 𑀓𑀸𑀮𑀯𑀲𑁂𑀦 𑀳𑀺 𑀲𑀗𑁆𑀓𑁂𑀢𑀓𑀫𑁆𑀫𑀁 𑀯𑀼𑀢𑁆𑀢𑀁, 𑀓𑀺𑀭𑀺𑀬𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. ‘‘𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀧𑀦 𑀢𑁂𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑁂 𑀓𑀢𑁂 𑀕𑀡𑁆𑀳𑀺𑀢𑀼𑀁 𑀅𑀦𑀸𑀭𑀪𑀺𑀢𑁆𑀯𑀸 𑀲𑀬𑀫𑁂𑀯 𑀕𑀡𑁆𑀳𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁.

𑀦𑀺𑀫𑀺𑀢𑁆𑀢𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀡𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁨𑁧. 𑀆𑀡𑀢𑁆𑀢𑀺𑀓𑀣𑀸𑀬𑀁 𑀅𑀲𑀫𑁆𑀫𑁄𑀳𑀢𑁆𑀣𑀦𑁆𑀢𑀺 𑀬𑀲𑁆𑀫𑀸 𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄 𑀏𑀓𑁄 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀯𑀸 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀻𑀦𑀺 𑀯𑀸 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀏𑀓𑁄 𑀕𑀳𑁂𑀢𑀩𑁆𑀩𑀪𑀡𑁆𑀟𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 ‘‘𑀧𑀼𑀭𑁂𑀪𑀢𑁆𑀢𑀁 𑀏𑀯𑀁𑀯𑀡𑁆𑀡𑀲𑀡𑁆𑀞𑀸𑀦𑀁 𑀪𑀡𑁆𑀟𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀏𑀓𑁄 ‘‘𑀢𑁆𑀯𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤, 𑀲𑁄 𑀅𑀜𑁆𑀜𑀲𑁆𑀲 𑀧𑀸𑀯𑀤𑀢𑀽’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀝𑀺𑀧𑀸𑀝𑀺𑀬𑀸 𑀘 𑀆𑀡𑀸𑀧𑁂𑀢𑀺, 𑀢𑀲𑁆𑀫𑀸 𑀓𑀸𑀮𑀯𑀲𑁂𑀦 𑀓𑀺𑀭𑀺𑀬𑀸𑀯𑀲𑁂𑀦 𑀪𑀡𑁆𑀟𑀯𑀲𑁂𑀦 𑀧𑀼𑀕𑁆𑀕𑀮𑀯𑀲𑁂𑀦 𑀘 𑀆𑀡𑀢𑁆𑀢𑁂 𑀯𑀺𑀲𑀗𑁆𑀓𑁂𑀢𑀸𑀯𑀺𑀲𑀗𑁆𑀓𑁂𑀢𑀯𑀲𑁂𑀦 𑀏𑀢𑁂𑀲𑀼 𑀲𑀗𑁆𑀓𑁂𑀢𑀓𑀫𑁆𑀫𑀦𑀺𑀫𑀺𑀢𑁆𑀢𑀓𑀫𑁆𑀫𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁. 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 ‘‘𑀈𑀤𑀺𑀲𑀁 𑀦𑀸𑀫 𑀪𑀡𑁆𑀟’’𑀦𑁆𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀕𑀳𑀡𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸.

𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀘𑁆𑀙𑀢𑀻𑀢𑀺 𑀤𑀼𑀢𑀺𑀬𑁄 𑀢𑀢𑀺𑀬𑀲𑁆𑀲, 𑀢𑀢𑀺𑀬𑁄 𑀘𑀢𑀼𑀢𑁆𑀣𑀲𑁆𑀲𑀸𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀘𑁂 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀘𑁂 𑀧𑀦 𑀤𑀼𑀢𑀺𑀬𑁄 𑀘𑀢𑀼𑀢𑁆𑀣𑀲𑁆𑀲 𑀆𑀭𑁄𑀘𑁂𑀢𑀺, 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀆𑀡𑀢𑁆𑀢𑀺 𑀕𑀢𑀸𑀢𑀺 ¶ 𑀦𑁂𑀯𑀢𑁆𑀣𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀞𑀫𑀁 𑀯𑀼𑀢𑁆𑀢𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀢𑀤𑁂𑀯 𑀳𑁄𑀢𑀻𑀢𑀺 𑀪𑀡𑁆𑀟𑀕𑁆𑀕𑀳𑀡𑀁 𑀯𑀺𑀦𑀸 𑀓𑁂𑀯𑀮𑀁 𑀲𑀸𑀲𑀦𑀧𑁆𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀲𑁆𑀲𑁂𑀯 𑀲𑀺𑀤𑁆𑀥𑀢𑁆𑀢𑀸 𑀢𑀤𑁂𑀯 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺 ¶ , 𑀦 𑀤𑀼𑀓𑁆𑀓𑀝𑀁 𑀦𑀸𑀧𑀺 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀈𑀤𑀺𑀲𑁂𑀲𑀼 𑀲𑀩𑁆𑀩𑀝𑁆𑀞𑀸𑀦𑁂𑀲𑀼.

𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀆𑀭𑁄𑀘𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂𑀢𑀺 𑀏𑀢𑁆𑀣 𑀅𑀯𑀲𑁆𑀲𑀁 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀢𑁄 𑀧𑀼𑀩𑁆𑀩𑁂𑀯 𑀆𑀘𑀭𑀺𑀬𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀦 𑀧𑀦 𑀧𑀝𑀺𑀕𑁆𑀕𑀳𑀺𑀢𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀆𑀳 𑁋 ‘‘𑀫𑀳𑀸𑀚𑀦𑁄 𑀳𑀺 𑀢𑁂𑀦 𑀧𑀸𑀧𑁂 𑀦𑀺𑀬𑁄𑀚𑀺𑀢𑁄’’𑀢𑀺.

𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀁 𑀢𑀸𑀯 𑀅𑀝𑁆𑀞𑀓𑀣𑀸𑀦𑀬𑁄, 𑀆𑀘𑀭𑀺𑀬𑀸 𑀧𑀦 ‘‘𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀏𑀯 𑀫𑀽𑀮𑀝𑁆𑀞𑀲𑁆𑀲𑀸𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀢𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀫𑀺𑀦𑀸𑀯 𑀳𑁂𑀝𑁆𑀞𑀸 𑀆𑀕𑀢𑀯𑀸𑀭𑁂𑀲𑀼𑀧𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀧𑀦 𑀢𑀢𑁆𑀣 𑀑𑀓𑀸𑀲𑀸𑀪𑀸𑀯𑀢𑁄 𑀅𑀯𑀢𑁆𑀯𑀸 𑀇𑀥 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀏𑀯𑀁 𑀧𑀼𑀦 𑀆𑀡𑀢𑁆𑀢𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀧𑀞𑀫𑀁 𑀅𑀢𑁆𑀣𑀲𑀸𑀥𑀓𑀢𑁆𑀢𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀁 𑀯𑀺𑀬 𑀅𑀢𑁆𑀣𑀲𑀸𑀥𑀺𑀓𑀸𑀡𑀢𑁆𑀢𑀺𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄. 𑀩𑀥𑀺𑀭𑀢𑀸𑀬𑀸𑀢𑀺 𑀉𑀘𑁆𑀘𑀁 𑀪𑀡𑀦𑁆𑀢𑁄 𑀩𑀥𑀺𑀭𑀢𑀸𑀬 𑀯𑀸 𑀦 𑀲𑀸𑀯𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀆𑀡𑀢𑁆𑀢𑁄 𑀅𑀳𑀁 𑀢𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀧𑀼𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀢𑁆𑀣𑀲𑀸𑀥𑀓𑀢𑁆𑀢𑀸𑀪𑀸𑀯𑀢𑁄 𑀫𑀽𑀮𑀝𑁆𑀞𑀲𑁆𑀲 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀁. ‘‘𑀧𑀡𑁆𑀡𑁂 𑀯𑀸 𑀲𑀺𑀮𑀸𑀬 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 ‘𑀘𑁄𑀭𑀺𑀬𑀁 𑀓𑀸𑀢𑀩𑁆𑀩’𑀦𑁆𑀢𑀺 𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑁂 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀁 𑀧𑀦 𑀬𑀲𑁆𑀫𑀸 𑀅𑀤𑀺𑀦𑁆𑀦𑀸𑀤𑀸𑀦𑀢𑁄 𑀧𑀭𑀺𑀬𑀸𑀬𑀓𑀣𑀸𑀬 𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀧𑀦 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀞𑀺𑀢𑀁, 𑀢𑀁 𑀅𑀯𑀳𑀭𑀸’’𑀢𑀺 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀓𑀲𑁆𑀲𑀘𑀺 𑀧𑁂𑀲𑁂𑀢𑀺, 𑀲𑁄 𑀘𑁂 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀡𑀢𑁆𑀢𑀺𑀬𑀸 𑀅𑀯𑀳𑀝𑀁 𑀦𑀸𑀫 𑀳𑁄𑀢𑀻𑀢𑀺 𑀬𑀼𑀢𑁆𑀢𑀁 𑀆𑀡𑀸𑀧𑀓𑀲𑁆𑀲 𑀧𑀸𑀭𑀸𑀚𑀺𑀓𑀁.

𑀆𑀡𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁨𑁨. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀪𑀽𑀫𑀝𑁆𑀞𑀣𑀮𑀝𑁆𑀞𑀸𑀤𑀻𑀲𑀼. 𑀅𑀗𑁆𑀕𑀜𑁆𑀘 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀢𑁆𑀣𑀼𑀪𑁂𑀤𑁂𑀦𑀸𑀢𑀺 𑀅𑀯𑀳𑀭𑀺𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀲𑁆𑀲 𑀕𑀭𑀼𑀓𑀮𑀳𑀼𑀓𑀪𑁂𑀤𑁂𑀦. 𑀆𑀧𑀢𑁆𑀢𑀺𑀪𑁂𑀤𑀦𑁆𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁. 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀭𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀁.

𑁧𑁨𑁫. 𑀦 ¶ ¶ 𑀘 𑀲𑀓𑀲𑀜𑁆𑀜𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀯𑀢𑁆𑀣𑀼 𑀓𑀣𑀺𑀢𑀁. 𑀦 𑀘 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀻, 𑀦 𑀘 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀸 𑀓𑀣𑀺𑀢𑀸. 𑀦 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀺𑀢𑀸𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀅𑀕𑁆𑀕𑀳𑀺𑀢𑀪𑀸𑀯𑁄. 𑀦 𑀢𑀸𑀯𑀓𑀸𑀮𑀺𑀓𑀢𑀸𑀢𑀺 𑀧𑀘𑁆𑀙𑀸 𑀤𑀸𑀢𑀩𑁆𑀩𑀢𑀁 𑀓𑀢𑁆𑀯𑀸 𑀅𑀕𑁆𑀕𑀳𑀺𑀢𑀪𑀸𑀯𑁄. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 ‘‘𑀫𑀫𑁂𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀯𑀲𑁂𑀦 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀅𑀭𑀜𑁆𑀜𑁂 𑀤𑀸𑀭𑀼𑀢𑀺𑀡𑀧𑀡𑁆𑀡𑀸𑀤𑀺. 𑀙𑀟𑁆𑀟𑀺𑀢𑀦𑁆𑀢𑀺 𑀓𑀝𑁆𑀞𑀳𑀸𑀭𑀸𑀤𑀻𑀳𑀺 𑀅𑀢𑀺𑀪𑀸𑀭𑀸𑀤𑀺𑀢𑀸𑀬 𑀅𑀦𑀢𑁆𑀣𑀺𑀓𑀪𑀸𑀯𑁂𑀦 𑀅𑀭𑀜𑁆𑀜𑀸𑀤𑀻𑀲𑀼 𑀙𑀟𑁆𑀟𑀺𑀢𑀁. 𑀙𑀺𑀦𑁆𑀦𑀫𑀽𑀮𑀓𑀦𑁆𑀢𑀺 𑀦𑀝𑁆𑀞𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀮𑀬𑀲𑀗𑁆𑀔𑀸𑀢𑀲𑁆𑀲 𑀫𑀽𑀮𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀫𑀽𑀮𑀁. 𑀅𑀲𑀸𑀫𑀺𑀓𑀦𑁆𑀢𑀺 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀸𑀤𑀻𑀳𑀺 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀤𑀲𑁆𑀲𑀺𑀢𑀁 𑀅𑀲𑀸𑀫𑀺𑀓𑀯𑀢𑁆𑀣𑀼. 𑀉𑀪𑀬𑀫𑁆𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀅𑀲𑀸𑀫𑀺𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀜𑁆𑀘.

𑀆𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸

𑁧𑁩𑁧. 𑀬𑀸𑀬 𑀲𑁂𑀬𑁆𑀬𑀸𑀬 𑀲𑀬𑀺𑀢𑁄 𑀓𑀸𑀮𑀁 𑀓𑀭𑁄𑀢𑀺, 𑀲𑀸 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸 𑀦𑀸𑀫. ‘‘𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀓𑀺𑀜𑁆𑀘𑀺 𑀯𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀓𑀢𑀺𑀓𑀁 𑀓𑀸𑀢𑀼𑀦𑁆𑀢𑀺 𑀬𑀢𑁆𑀢𑀓𑀁 𑀕𑀳𑀺𑀢𑀁 𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀝𑀺𑀤𑀲𑁆𑀲𑀸𑀫𑀻𑀢𑀺 𑀬𑀁 𑀕𑀳𑀺𑀢𑀁, 𑀢𑀤𑁂𑀯 𑀯𑀸 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀧𑀼𑀦 𑀤𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑀦𑁆𑀢𑀓𑁂 𑀲𑀗𑁆𑀖𑀁 𑀅𑀦𑀼𑀚𑀸𑀦𑀸𑀧𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀓𑀲𑁆𑀲𑀘𑀺 𑀯𑀢𑁆𑀣𑀼𑀦𑁄 𑀅𑀦𑀦𑀼𑀚𑀸𑀦𑀺𑀢𑀩𑁆𑀩𑀢𑁄 𑀘 ‘‘𑀲𑀗𑁆𑀖𑀲𑀦𑁆𑀢𑀓𑀁 𑀧𑀦 𑀧𑀝𑀺𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀸𑀧𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀫𑀢𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀸𑀧𑀺. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀲𑀸𑀝𑀓𑀢𑀡𑁆𑀳𑀸𑀬 𑀢𑀲𑁆𑀫𑀺𑀁𑀬𑁂𑀯 𑀫𑀢𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀧𑁂𑀢𑁄 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀼𑀓𑁆𑀔𑀸𑀤𑀻𑀲𑀼 𑀮𑀕𑁆𑀕𑀺𑀢𑀲𑀸𑀝𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀫𑀦𑀼𑀲𑁆𑀲𑁂𑀳𑀺 𑀅𑀧𑀭𑀺𑀕𑁆𑀕𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀁 𑀆𑀭𑀓𑁆𑀔𑀓𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺.

𑀅𑀦𑀸𑀧𑀢𑁆𑀢𑀺𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀤𑀸𑀭𑀼𑀔𑀡𑁆𑀟𑀸𑀤𑀻𑀲𑀼 ¶ ¶ ‘‘𑀪𑀸𑀭𑀺𑀬𑀫𑀺𑀤𑀁, 𑀢𑁆𑀯𑀁 𑀏𑀓𑀧𑀲𑁆𑀲𑀁 𑀉𑀓𑁆𑀔𑀺𑀧𑀸𑀳𑀺, 𑀅𑀳𑀁 𑀏𑀓𑀧𑀲𑁆𑀲𑀁 𑀉𑀓𑁆𑀔𑀺𑀧𑀸𑀫𑀻’’𑀢𑀺 𑀉𑀪𑀬𑁂𑀲𑀁 𑀧𑀬𑁄𑀕𑁂𑀦 𑀏𑀓𑀲𑁆𑀲 𑀯𑀢𑁆𑀣𑀼𑀦𑁄 𑀞𑀸𑀦𑀸𑀘𑀸𑀯𑀦𑀁 𑀲𑀦𑁆𑀥𑀸𑀬 ‘‘𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀓𑀸𑀬𑀯𑀸𑀘𑀸𑀦𑀁 𑀈𑀤𑀺𑀲𑁂 𑀞𑀸𑀦𑁂 𑀅𑀗𑁆𑀕𑀪𑀸𑀯𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀯𑀸 𑀧𑀥𑀸𑀦𑀪𑀸𑀯𑁂𑀦 𑀞𑀸𑀦𑀸𑀘𑀸𑀯𑀦𑀁 𑀲𑀸𑀥𑁂𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺, 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲𑀸𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁩𑁨. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀲𑀦𑁆𑀥𑀸𑀯𑀢𑀻𑀢𑀺 𑀲𑀼𑀝𑁆𑀞𑀼 𑀥𑀸𑀯𑀢𑀺. 𑀯𑀺𑀥𑀸𑀯𑀢𑀻𑀢𑀺 𑀯𑀺𑀯𑀺𑀥𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀥𑀸𑀯𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑀪𑁂𑀤𑀁 𑀯𑀺𑀦𑀸𑀧𑀻𑀢𑀺 𑀓𑀸𑀬𑀘𑁄𑀧𑀦𑀁 𑀯𑀘𑀻𑀪𑁂𑀤𑀜𑁆𑀘 𑀯𑀺𑀦𑀸. 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦𑀸𑀢𑀺 𑀢𑀣𑀸𑀯𑀺𑀥𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑁂𑀦.

𑁧𑁩𑁫. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑀸𑀢𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑁂𑀦. 𑀦𑀺𑀭𑀼𑀢𑁆𑀢𑀺 𑀏𑀯 𑀧𑀣𑁄 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀢𑀲𑁆𑀫𑀺𑀁 𑀦𑀺𑀭𑀼𑀢𑁆𑀢𑀺𑀧𑀣𑁂. 𑀢𑁂𑀦𑀸𑀳 ‘‘𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑁂’’𑀢𑀺.

𑁧𑁩𑁭. 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀩𑁆𑀪𑀼𑀡𑁆𑀳𑁂𑀢𑀺 𑀇𑀫𑀺𑀦𑀸𑀧𑀺 𑀯𑀼𑀢𑁆𑀢𑀫𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀮𑁆𑀮𑀲𑀭𑀻𑀭𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀪𑀸𑀕𑀲𑀭𑀻𑀭𑁂𑀢𑀺 𑀇𑀢𑁆𑀣𑀺𑀲𑀭𑀻𑀭𑁂. 𑀯𑀺𑀲𑀪𑀸𑀕𑀲𑀭𑀻𑀭𑀢𑁆𑀢𑀸 𑀅𑀘𑁆𑀘𑀸𑀲𑀦𑁆𑀦𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀲𑁂 𑀯𑀸’’𑀢𑀺𑀆𑀤𑀺. 𑀯𑀝𑁆𑀝𑀢𑀻𑀢𑀺 𑀯𑀺𑀲𑀪𑀸𑀕𑀲𑀭𑀻𑀭𑁂𑀧𑀺 𑀅𑀢𑁆𑀢𑀦𑀸𑀯 𑀯𑀼𑀢𑁆𑀢𑀯𑀺𑀥𑀺𑀁 𑀓𑀸𑀢𑀼𑀁 𑀲𑀸𑀝𑀓𑀜𑁆𑀘 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀇𑀢𑁆𑀣𑀺𑀭𑀽𑀧𑀁 𑀧𑀦 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺.

𑁧𑁩𑁮. 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸𑀢𑀺 𑀓𑀼𑀲𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀯𑀜𑁆𑀘𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 ¶ 𑀓𑀽𑀝𑀫𑀸𑀦𑀁 𑀳𑀤𑀬𑀪𑁂𑀤𑀲𑀺𑀔𑀸𑀪𑁂𑀤𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀺𑀫𑀸𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁, 𑀢𑀲𑁆𑀲 𑀪𑁂𑀤𑁄 𑀙𑀺𑀤𑁆𑀤𑀓𑀭𑀡𑀁 𑀳𑀤𑀬𑀪𑁂𑀤𑁄, 𑀲𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀳𑁂𑀝𑁆𑀞𑀸𑀙𑀺𑀤𑁆𑀤𑁂𑀦 𑀫𑀸𑀦𑁂𑀦 ‘‘𑀲𑀡𑀺𑀓𑀁 𑀆𑀲𑀺𑀜𑁆𑀘𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀪𑀸𑀚𑀦𑁂 𑀩𑀳𑀼𑀁 𑀧𑀕𑁆𑀖𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀙𑀺𑀤𑁆𑀤𑀁 𑀧𑀺𑀥𑀸𑀬 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 ¶ 𑀤𑁂𑀢𑀺. 𑀲𑀺𑀔𑀸𑀪𑁂𑀤𑁄 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀲𑀡𑀺𑀓𑀁 𑀲𑀺𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑁂𑀦𑁆𑀢𑁄 𑀯𑁂𑀕𑁂𑀦 𑀧𑀽𑀭𑁂𑀢𑁆𑀯𑀸 𑀲𑀺𑀔𑀁 𑀙𑀺𑀦𑁆𑀤𑀦𑁆𑀢𑁄 𑀤𑁂𑀢𑀺. 𑀭𑀚𑁆𑀚𑀼𑀪𑁂𑀤𑁄 𑀔𑁂𑀢𑁆𑀢𑀯𑀢𑁆𑀣𑀼𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀔𑁂𑀢𑁆𑀢𑀸𑀤𑀺𑀁 𑀫𑀺𑀦𑀦𑁆𑀢𑀸 𑀳𑀺 𑀅𑀫𑀳𑀦𑁆𑀢𑀫𑁆𑀧𑀺 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀺𑀦𑀦𑁆𑀢𑀺, 𑀫𑀳𑀦𑁆𑀢𑀫𑁆𑀧𑀺 𑀅𑀫𑀳𑀦𑁆𑀢𑀁. 𑀓𑀽𑀝𑀓𑀳𑀸𑀧𑀡𑁄 𑀧𑀸𑀓𑀝𑁄𑀬𑁂𑀯.

𑀢𑀼𑀮𑀸𑀓𑀽𑀝𑀁 𑀧𑀦 𑀭𑀽𑀧𑀓𑀽𑀝𑀁 𑀅𑀗𑁆𑀕𑀓𑀽𑀝𑀁 𑀕𑀳𑀡𑀓𑀽𑀝𑀁 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑀽𑀝𑀁 𑀦𑀸𑀫 𑀤𑁆𑀯𑁂 𑀢𑀼𑀮𑀸 𑀲𑀭𑀽𑀧𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀫𑀳𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀔𑀼𑀤𑁆𑀤𑀺𑀓𑀸𑀬 𑀤𑁂𑀢𑀺. 𑀅𑀗𑁆𑀕𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺, 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀺. 𑀕𑀳𑀡𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀫𑀽𑀮𑁂 𑀭𑀚𑁆𑀚𑀼𑀁 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑁂. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀦𑀸𑀫 𑀢𑀼𑀮𑀁 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀬𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑀁 𑀧𑀘𑁆𑀙𑀸𑀪𑀸𑀕𑁂 𑀓𑀭𑁄𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑀪𑀸𑀕𑁂.

𑀓𑀁𑀲𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀧𑀸𑀢𑀺, 𑀢𑀸𑀬 𑀯𑀜𑁆𑀘𑀦𑀁 𑀓𑀁𑀲𑀓𑀽𑀝𑀁. 𑀓𑀣𑀁? 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀓𑀢𑁆𑀯𑀸 𑀅𑀜𑁆𑀜𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀮𑁄𑀳𑀧𑀸𑀢𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀺, 𑀢𑀢𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀟𑁆𑀠𑀁 𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀓𑀺𑀡𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀖𑁂 𑀧𑀼𑀘𑁆𑀙𑀺𑀢𑁂 𑀲𑀫𑀕𑁆𑀖𑀢𑀭𑀁 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀢𑀢𑁄 𑀢𑁂𑀳𑀺 ‘‘𑀓𑀣𑀁 𑀇𑀫𑁂𑀲𑀁 𑀲𑀼𑀯𑀡𑁆𑀡𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂 ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀲𑀩𑁆𑀩𑀧𑀸𑀢𑀺𑀬𑁄 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀯𑀜𑁆𑀘𑀦𑀁 𑀦𑀸𑀫 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑁂𑀲𑀁 𑀯𑀜𑁆𑀘𑀦𑀁. 𑀢𑀢𑁆𑀭𑀺𑀤𑀫𑁂𑀓𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀮𑀼𑀤𑁆𑀤𑀓𑁄 𑀫𑀺𑀕𑀜𑁆𑀘 𑀫𑀺𑀕𑀧𑁄𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀫𑁂𑀓𑁄 𑀥𑀼𑀢𑁆𑀢𑁄 ‘‘𑀓𑀺𑀁, 𑀪𑁄, 𑀫𑀺𑀕𑁄 𑀅𑀕𑁆𑀖𑀢𑀺, 𑀓𑀺𑀁 𑀫𑀺𑀕𑀧𑁄𑀢𑀓𑁄’’𑀢𑀺 𑀆𑀳. ‘‘𑀫𑀺𑀕𑁄 𑀤𑁆𑀯𑁂 𑀓𑀳𑀸𑀧𑀡𑁂, 𑀫𑀺𑀕𑀧𑁄𑀢𑀓𑁄 𑀏𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀏𑀓𑀁 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 ‘‘𑀦 𑀫𑁂, 𑀪𑁄, 𑀫𑀺𑀕𑀧𑁄𑀢𑀓𑁂𑀦 𑀅𑀢𑁆𑀣𑁄, 𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀳𑀻𑀢𑀺. 𑀲𑁄 𑀆𑀳 𑁋 ‘‘𑀦𑀦𑀼, 𑀪𑁄, 𑀫𑀬𑀸 𑀧𑀞𑀫𑀁 𑀏𑀓𑁄 𑀓𑀳𑀸𑀧𑀡𑁄 ¶ 𑀤𑀺𑀦𑁆𑀦𑁄’’𑀢𑀺? ‘‘𑀆𑀫 𑀤𑀺𑀦𑁆𑀦𑁄’’𑀢𑀺. ‘‘𑀇𑀫𑀁 𑀫𑀺𑀕𑀧𑁄𑀢𑀓𑀁 𑀕𑀡𑁆𑀳, 𑀏𑀯𑀁 𑀲𑁄 𑀘 𑀓𑀳𑀸𑀧𑀡𑁄, 𑀅𑀬𑀜𑁆𑀘 𑀓𑀳𑀸𑀧𑀡𑀕𑁆𑀖𑀦𑀓𑁄 𑀫𑀺𑀕𑀧𑁄𑀢𑀓𑁄𑀢𑀺 𑀤𑁆𑀯𑁂 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 ‘‘𑀓𑀸𑀭𑀡𑀁 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀫𑀺𑀕𑀁 𑀅𑀤𑀸𑀲𑀻𑀢𑀺.

𑀩𑀮𑀲𑀸𑀢𑀺 𑀩𑀮𑁂𑀦. 𑀧𑀦𑁆𑀣𑀖𑀸𑀢-𑀕𑁆𑀕𑀳𑀡𑁂𑀦 𑀳𑀺𑀫𑀯𑀺𑀧𑀭𑀸𑀫𑁄𑀲𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀬𑀁 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀚𑀦𑀁 𑀫𑀽𑀲𑀦𑁆𑀢𑀺, 𑀅𑀬𑀁 𑀳𑀺𑀫𑀯𑀺𑀧𑀭𑀸𑀫𑁄𑀲𑁄. 𑀬𑀁 𑀕𑀼𑀫𑁆𑀫𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀸 𑀚𑀦𑀁 𑀫𑀽𑀲𑀦𑁆𑀢𑀺, 𑀅𑀬𑀁 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄.

𑀉𑀤𑁆𑀥𑀸𑀭𑁂𑀬𑁂𑀯 ¶ 𑀧𑀸𑀭𑀸𑀚𑀺𑀓𑀦𑁆𑀢𑀺 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀲𑀸𑀝𑀓𑀲𑁆𑀲 𑀘 𑀢𑀢𑁆𑀣 𑀲𑀩𑁆𑀪𑀸𑀯𑀢𑁄. 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀯𑀻𑀫𑀁𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀅𑀦𑀼𑀩𑀤𑁆𑀥𑁄. 𑀤𑀺𑀲𑁆𑀯𑀸 𑀳𑀝𑀢𑁆𑀢𑀸 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀲𑁆𑀲 𑀅𑀲𑀫𑁆𑀪𑀯𑀁 𑀤𑀲𑁆𑀲𑁂𑀦𑁆𑀢𑁄 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼 𑀯𑀼𑀢𑁆𑀢𑀲𑁆𑀲 𑀅𑀬𑀼𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀦𑁆𑀢𑀺𑀆𑀤𑀺𑀦𑀸 𑀧𑀦 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀲𑀫𑁆𑀪𑀯𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀪𑀸𑀯𑀜𑁆𑀘 𑀯𑀺𑀪𑀸𑀯𑁂𑀦𑁆𑀢𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯 𑀲𑀼𑀯𑀼𑀢𑁆𑀢𑀦𑁆𑀢𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁄𑀯 𑀤𑀲𑁆𑀲𑀺𑀢𑁄.

𑀓𑁂𑀘𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀓𑁂𑀘𑀺𑀯𑀸𑀤𑀢𑁄 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀲𑁆𑀲 𑀯𑀺𑀲𑁂𑀲𑀲𑀦𑁆𑀤𑀲𑁆𑀲𑀦𑀢𑁆𑀣𑁄. 𑀢𑁂𑀦 𑀓𑁂𑀘𑀺𑀯𑀸𑀤𑁄 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁂𑀦𑀧𑀺 𑀦 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁄 𑀏𑀯 𑀘 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁂𑀦𑀧𑀺 𑀲𑀁𑀲𑀦𑁆𑀤𑀦𑀢𑁄 𑀬𑀼𑀢𑁆𑀢𑀢𑀭𑁄𑀢𑀺 𑀯𑀺𑀪𑀸𑀯𑁂𑀢𑀺.

𑀅𑀮𑀗𑁆𑀓𑀸𑀭𑀪𑀡𑁆𑀟𑀦𑁆𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀤𑀺 𑀅𑀮𑀗𑁆𑀓𑀸𑀭𑀪𑀡𑁆𑀟𑀁. 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸𑀢𑀺 𑀯𑀺𑀮𑀻𑀯𑀫𑀬𑀁 𑀯𑀸 𑀢𑀸𑀮𑀧𑀡𑁆𑀡𑀫𑀬𑀁 𑀯𑀸 𑀓𑀢𑀲𑀜𑁆𑀜𑀸𑀡𑀁 𑀬𑀁 𑀓𑀺𑀜𑁆𑀘𑀺 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸. 𑀲𑀫𑀕𑁆𑀖𑀢𑀭𑀦𑁆𑀢𑀺 𑀅𑀧𑁆𑀧𑀕𑁆𑀖𑀢𑀭𑀁. 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑁂 𑀉𑀤𑁆𑀥𑀝𑁂𑀧𑀺 𑀦 𑀢𑀸𑀯 𑀓𑀼𑀲𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀻’’𑀢𑀺. 𑀲𑀺𑀯𑁂𑀬𑁆𑀬𑀓𑀦𑁆𑀢𑀺 𑀲𑀺𑀯𑀺𑀭𑀝𑁆𑀞𑁂 𑀚𑀸𑀢𑀁.

𑁧𑁩𑁯. 𑀚𑀦𑁆𑀢𑀸𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀻’’𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀲𑀬𑀁 𑀪𑀕𑀯𑀢𑁄 𑀦𑀸𑀭𑁄𑀘𑁂𑀲𑀺, 𑀢𑀲𑁆𑀫𑀸 ‘‘𑀆𑀭𑁄𑀘𑁂𑀲𑀻’’𑀢𑀺 𑀏𑀓𑀯𑀘𑀦𑀁 𑀦 𑀯𑀼𑀢𑁆𑀢𑀁.

𑁧𑁪𑁦. 𑀯𑀺𑀖𑀸𑀲𑀦𑁆𑀢𑀺 ¶ 𑀔𑀸𑀤𑀺𑀢𑀸𑀯𑀲𑁂𑀲𑀁 𑀉𑀘𑁆𑀙𑀺𑀝𑁆𑀞𑀁 𑀯𑀸. 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀧𑀘𑀸𑀧𑁂𑀢𑁆𑀯𑀸. 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀸𑀬𑀸𑀢𑀺 𑀢𑀁𑀦𑀺𑀫𑀺𑀢𑁆𑀢𑀉𑀧𑀤𑁆𑀤𑀯𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀡𑀢𑁆𑀣𑀸𑀬. 𑀚𑀺𑀖𑀘𑁆𑀙𑀸𑀪𑀺𑀪𑀽𑀢𑀸 𑀳𑀺 𑀲𑀻𑀳𑀸𑀤𑀬𑁄 𑀅𑀢𑁆𑀢𑀦𑀸 𑀔𑀸𑀤𑀺𑀬𑀫𑀸𑀦𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀼𑀁. 𑀧𑀭𑀸𑀦𑀼𑀤𑁆𑀤𑀬𑀢𑀸𑀬𑀸𑀢𑀺 𑀲𑀻𑀳𑀸𑀤𑀻𑀲𑀼 𑀧𑀭𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀸𑀬. 𑀚𑀺𑀖𑀘𑁆𑀙𑀸𑀯𑀺𑀦𑁄𑀤𑀦𑀢𑁆𑀣𑀜𑁆𑀳𑀺 𑀢𑁂𑀳𑀺 𑀔𑀸𑀤𑀺𑀬𑀫𑀸𑀦𑀁 𑀢𑁂 𑀧𑀮𑀸𑀧𑁂𑀢𑁆𑀯𑀸 𑀕𑀡𑁆𑀳𑀢𑁄 𑀢𑁂𑀲𑀼 𑀅𑀦𑀼𑀓𑀫𑁆𑀧𑀸 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺.

𑁧𑁪𑁧. 𑀢𑁂𑀓𑀝𑀼𑀮𑀬𑀸𑀕𑀼𑀯𑀢𑁆𑀣𑀼𑀫𑁆𑀳𑀺 𑀯𑀺𑀬𑀸𑀢𑀺 𑀫𑀼𑀲𑀸𑀯𑀸𑀤𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀆𑀡𑀢𑁆𑀢𑁂𑀳𑀻𑀢𑀺 𑀲𑀫𑁆𑀫𑀢𑁂𑀦 𑀆𑀡𑀢𑁆𑀢𑁂𑀳𑀺. 𑀆𑀡𑀢𑁆𑀢𑁂𑀦𑀸𑀢𑀺 𑀲𑀸𑀫𑀺𑀓𑁂𑀳𑀺 𑀆𑀡𑀢𑁆𑀢𑁂𑀦. 𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻𑀢𑀺 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀕𑀳𑀺𑀢𑀢𑁆𑀢𑀸 ‘‘𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀫𑁆𑀫𑀢𑀸𑀤𑀻𑀳𑀺 𑀘𑀢𑀽𑀳𑀺 𑀅𑀜𑁆𑀜𑁂𑀦. ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀗𑁆𑀖𑀲𑀦𑁆𑀢𑀓𑀢𑁆𑀢𑀸 𑀅𑀫𑀽𑀮𑀓𑀫𑁂𑀯 𑀕𑀳𑀺𑀢𑀦𑁆𑀢𑀺 ‘‘𑀉𑀤𑁆𑀥𑀸𑀭𑁂𑀬𑁂𑀯 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀳𑀺 𑀤𑀻𑀬𑀫𑀸𑀦𑀦𑁆𑀢𑀺 𑀲𑀫𑁆𑀫𑀢𑁂𑀦, 𑀢𑁂𑀦 𑀆𑀡𑀢𑁆𑀢𑁂𑀦 𑀯𑀸 𑀤𑀻𑀬𑀫𑀸𑀦𑀁. 𑀏𑀯𑀁 𑀕𑀡𑁆𑀳𑀢𑁄𑀢𑀺 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄. 𑀲𑀼𑀤𑀺𑀦𑁆𑀦𑀦𑁆𑀢𑀺 𑀳𑁂𑀝𑁆𑀞𑀸 𑀲𑀸𑀫𑀺𑀓𑁂𑀦, 𑀢𑁂𑀦 𑀆𑀡𑀢𑁆𑀢𑁂𑀦 𑀯𑀸 𑀤𑀻𑀬𑀫𑀸𑀦𑀁 𑀕𑀺𑀳𑀺𑀲𑀦𑁆𑀢𑀓𑀁 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀢𑁄 𑀅𑀧𑀭𑀲𑁆𑀲 𑀅𑀪𑀸𑀯𑀢𑁄 𑀲𑀸𑀫𑀺𑀲𑀦𑁆𑀢𑀓𑀫𑁂𑀯 𑀳𑁄𑀢𑀻𑀢𑀺 𑀪𑀡𑁆𑀟𑀤𑁂𑀬𑁆𑀬𑀁 𑀚𑀸𑀢𑀁. 𑀇𑀥 𑀧𑀦 𑀢𑁂𑀳𑀺 𑀏𑀯𑀁 𑀤𑀻𑀬𑀫𑀸𑀦𑀁 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻𑀢𑀺 𑀯𑀢𑁆𑀯𑀸 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀦𑁂𑀯 𑀧𑀸𑀭𑀸𑀚𑀺𑀓𑀁 𑀦 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀲𑀼𑀤𑀺𑀦𑁆𑀦𑀫𑁂𑀯 𑀳𑁄𑀢𑀺.

𑁧𑁪𑁨-𑁩. 𑀧𑀭𑀺𑀓𑁆𑀔𑀸𑀭𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀧𑀭𑀺𑀓𑁆𑀔𑀸𑀭𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀪𑀡𑁆𑀟𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄? 𑀬𑀁 𑀧𑀭𑀺𑀪𑁄𑀕𑀬𑁄𑀕𑁆𑀕𑀁 𑀆𑀪𑀭𑀡𑀸𑀤𑀺𑀭𑀽𑀧𑀁 𑀅𑀓𑀢𑁆𑀯𑀸 𑀬𑀣𑀸𑀲𑀪𑀸𑀯𑀢𑁄 𑀞𑀧𑀺𑀢𑀁, 𑀢𑀁 𑀪𑀡𑁆𑀟𑀁. 𑀬𑀁 𑀧𑀦 𑀢𑀣𑀸 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸𑀓𑀸𑀭𑁂𑀦 𑀞𑀧𑀺𑀢𑀁 𑀆𑀪𑀭𑀡𑀸𑀤𑀺𑀓𑀁, 𑀢𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁪-𑁧𑁪𑁬. 𑀲𑀗𑁆𑀓𑀸𑀫𑁂𑀢𑁆𑀯𑀸𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀢𑁆𑀯𑀸. 𑀣𑀯𑀺𑀓𑀦𑁆𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀺 𑀬𑀁𑀓𑀺𑀜𑁆𑀘𑀺 𑀣𑀯𑀺𑀓𑀁. 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 ‘‘𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁩𑁫𑁬) 𑀯𑀘𑀦𑀢𑁄 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀕𑀳𑀺𑀢𑀫𑁆𑀧𑀺 ¶ 𑀧𑀼𑀦 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. ‘‘𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁩𑁭𑁯) 𑀯𑀘𑀦𑀢𑁄 𑀪𑀸𑀚𑀦𑀻𑀬𑀪𑀡𑁆𑀟𑀁 𑀉𑀧𑀘𑀸𑀭𑀲𑀻𑀫𑀝𑁆𑀞𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑁧𑁪𑁮-𑁯. ‘‘𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀉𑀪𑀺𑀦𑁆𑀦𑀁 𑀲𑀸𑀮𑀬𑀪𑀸𑀯𑁂 𑀲𑀢𑀺 𑀘𑁄𑀭𑀲𑁆𑀲 𑀯𑀸 𑀲𑀸𑀫𑀺𑀓𑀲𑁆𑀲 𑀯𑀸 𑀲𑀫𑁆𑀧𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀳𑀺𑀢𑁂 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀕𑀸𑀫𑁂𑀲𑀽𑀢𑀺 𑀕𑀸𑀫𑀺𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼. 𑀕𑀸𑀫-𑀕𑁆𑀕𑀳𑀡𑁂𑀦 𑀳𑁂𑀢𑁆𑀣 𑀕𑀸𑀫𑀝𑁆𑀞𑀸 𑀯𑀼𑀢𑁆𑀢𑀸. 𑀯𑀼𑀝𑁆𑀞𑀳𑀦𑁆𑀢𑁂𑀲𑀽𑀢𑀺 𑀕𑀸𑀫𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑁂𑀲𑀼. 𑀧𑀼𑀦 𑀆𑀯𑀲𑀦𑁆𑀢𑁂 𑀚𑀦𑀧𑀤𑁂𑀢𑀺 𑀚𑀸𑀦𑀧𑀤𑀺𑀓𑁂𑀲𑀼 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑁂𑀲𑀼.

𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀉𑀲𑁆𑀲𑀸𑀳𑀸 𑀯𑀸 𑀦𑀺𑀭𑀼𑀲𑁆𑀲𑀸𑀳𑀸 𑀯𑀸’’𑀢𑀺 𑀯𑀺𑀲𑁂𑀲𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀦 𑀳𑀺 𑀓𑀢𑀺𑀧𑀬𑀸𑀦𑀁 𑀅𑀦𑀼𑀲𑁆𑀲𑀸𑀳𑁂 𑀲𑀢𑀺 𑀲𑀗𑁆𑀖𑀺𑀓𑀁 𑀅𑀲𑀗𑁆𑀖𑀺𑀓𑀁 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀲𑀉𑀲𑁆𑀲𑀸𑀳𑀫𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀲𑀸𑀫𑀺𑀓𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀕𑀡𑀲𑀦𑁆𑀢𑀓𑀢𑁄 𑀧𑀼𑀕𑁆𑀕𑀮𑀲𑀦𑁆𑀢𑀓𑀢𑁄 𑀯𑀸. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀦𑁆𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 ¶ 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀸𑀬 𑀦𑀺𑀬𑀫𑀺𑀢𑁂𑀧𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀲𑁆𑀲𑀭𑀯𑀢𑀸𑀬𑀸𑀢𑀺 𑀧𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀤𑀸𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀬𑀫𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀇𑀲𑁆𑀲𑀭𑀪𑀸𑀯𑁂𑀦. 𑀅𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀕𑁆𑀖𑀸𑀦𑀼𑀭𑀽𑀧𑀁 𑀤𑀼𑀓𑁆𑀓𑀝𑁂𑀦 𑀣𑀼𑀮𑁆𑀮𑀘𑁆𑀘𑀬𑁂𑀦 𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀇𑀲𑁆𑀲𑀭𑀯𑀢𑀸𑀬 𑀧𑀭𑀺𑀪𑀼𑀜𑁆𑀚𑀢𑁄 𑀕𑀻𑀯𑀸𑀢𑀺 𑀦 𑀓𑁂𑀯𑀮𑀁 𑀏𑀢𑁆𑀣𑁂𑀯 𑀕𑀻𑀯𑀸, 𑀳𑁂𑀝𑁆𑀞𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀇𑀲𑁆𑀲𑀭𑀯𑀢𑀸𑀬 𑀯𑀸 𑀤𑀺𑀦𑁆𑀦𑁂𑀧𑀺 𑀕𑀻𑀯𑀸𑀬𑁂𑀯. 𑀲𑀼𑀔𑀸𑀤𑀺𑀢𑀫𑁂𑀯𑀸𑀢𑀺 𑀅𑀦𑁆𑀢𑁄𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀖𑀡𑁆𑀝𑀺𑀧𑁆𑀧𑀳𑀭𑀡𑀸𑀤𑀺𑀯𑀼𑀢𑁆𑀢𑀯𑀺𑀥𑀸𑀦𑀲𑁆𑀲 𑀓𑀢𑀢𑁆𑀢𑀸 𑀲𑀼𑀔𑀸𑀤𑀺𑀢𑀁. 𑀲𑀗𑁆𑀖𑀺𑀓𑀜𑁆𑀳𑀺 𑀯𑁂𑀪𑀗𑁆𑀕𑀺𑀬𑀪𑀡𑁆𑀟𑀁 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀸 𑀩𑀳𑀺𑀲𑀻𑀫𑀸𑀬 𑀯𑀸 𑀳𑁄𑀢𑀼, 𑀩𑀳𑀺𑀲𑀻𑀫𑀸𑀬𑀁 𑀞𑀺𑀢𑁂𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀪𑀬𑀢𑁆𑀣 𑀞𑀺𑀢𑀫𑁆𑀧𑀺 𑀧𑀦 𑀅𑀦𑁆𑀢𑁄𑀲𑀻𑀫𑀸𑀬𑀁 𑀞𑀺𑀢𑁂𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑁂𑀦𑁂𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 ‘‘𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀁 𑀓𑀢𑀢𑁆𑀢𑀸 𑀲𑀼𑀔𑀸𑀤𑀺𑀢𑀦𑁆𑀢𑀺 𑀆𑀳𑀸’’𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁧𑁫𑁦. 𑀯𑀼𑀢𑁆𑀢𑀯𑀸𑀤𑀓𑀯𑀢𑁆𑀣𑀽𑀲𑀼 𑀧𑀸𑀴𑀺𑀬𑀁 𑀬𑀼𑀕𑀲𑀸𑀝𑀓𑀦𑁆𑀢𑀺 𑀲𑀸𑀝𑀓𑀬𑀼𑀕𑀁. 𑀢𑀼𑀮𑀦𑁆𑀢𑀺 𑀧𑀮𑀲𑀢𑀁. 𑀤𑁄𑀡𑀦𑁆𑀢𑀺 𑀲𑁄𑀴𑀲𑀦𑀸𑀴𑀺𑀫𑀢𑁆𑀢𑀁. 𑀧𑀭𑀺𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸𑀢𑀺 𑀬𑀢𑁆𑀢𑀓𑀁 ¶ 𑀇𑀘𑁆𑀙𑀺𑀢𑀁, 𑀢𑀢𑁆𑀢𑀓𑀁 𑀅𑀕𑁆𑀖𑀯𑀲𑁂𑀦 𑀯𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀯𑀸 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀉𑀧𑀸𑀭𑀫𑁆𑀪𑀸𑀢𑀺 ‘‘𑀪𑀤𑀦𑁆𑀢𑀸 𑀅𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀤𑀦𑁆𑀢𑀻’’𑀢𑀺 𑀏𑀯𑀁 𑀤𑁄𑀲𑀸𑀭𑁄𑀧𑀦𑀢𑁄.

𑁧𑁫𑁩. 𑀙𑀸𑀢𑀚𑁆𑀛𑀢𑁆𑀢𑀦𑁆𑀢𑀺 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑀅𑀢𑁆𑀢𑀲𑀦𑁆𑀢𑀸𑀦𑀁. 𑀥𑀦𑀼𑀓𑀦𑁆𑀢𑀺 𑀔𑀼𑀤𑁆𑀤𑀓𑀥𑀦𑀼𑀓𑀁. 𑀩𑀤𑁆𑀥𑁄 𑀳𑁄𑀢𑀻𑀢𑀺 𑀢𑀺𑀭𑀺𑀬𑀁 𑀩𑀤𑁆𑀥𑁄 𑀳𑁄𑀢𑀺. 𑀲𑀼𑀦𑀔𑀤𑀝𑁆𑀞𑀦𑁆𑀢𑀺 𑀲𑀸𑀫𑀺𑀓𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀦𑀔𑁂𑀦 𑀕𑀳𑀺𑀢𑀁. 𑀬𑀝𑁆𑀞𑀺𑀬𑀸 𑀲𑀳 𑀧𑀸𑀢𑁂𑀢𑀻𑀢𑀺 𑀲𑀽𑀓𑀭𑀲𑁆𑀲 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀢𑀢𑁆𑀣 𑀅𑀩𑀚𑁆𑀛𑀦𑀢𑁆𑀣𑀸𑀬 𑀧𑀸𑀢𑁂𑀢𑀺. 𑀫𑀤𑁆𑀤𑀦𑁆𑀢𑁄 𑀕𑀘𑁆𑀙𑀢𑀺, 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀏𑀓𑀲𑀽𑀓𑀭𑀕𑁆𑀖𑀦𑀓𑀁 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀦 𑀳𑀺 𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀲𑀩𑁆𑀩𑁂𑀯 𑀲𑀽𑀓𑀭𑀸 𑀢𑁂𑀦 𑀧𑀸𑀲𑁂𑀦 𑀩𑀚𑁆𑀛𑀦𑁆𑀢𑀺, 𑀏𑀓𑁄𑀬𑁂𑀯 𑀧𑀞𑀫𑀢𑀭𑀁 𑀕𑀘𑁆𑀙𑀦𑁆𑀢𑁄 𑀩𑀚𑁆𑀛𑀢𑀺, 𑀢𑀲𑁆𑀫𑀸 𑀏𑀓𑀲𑀽𑀓𑀭𑀕𑁆𑀖𑀦𑀓𑀁 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀧𑀘𑁆𑀙𑀸 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀓𑀢𑀧𑀬𑁄𑀕𑁂𑀦 𑀅𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀲𑀬𑀫𑁂𑀯 𑀕𑀘𑁆𑀙𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀻𑀢𑀺 𑀧𑀼𑀭𑁂𑀢𑀭𑀫𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺. 𑀯𑀺𑀳𑀸𑀭𑀪𑀽𑀫𑀺𑀬𑀦𑁆𑀢𑀺 𑀯𑀺𑀳𑀸𑀭𑀲𑀸𑀫𑀦𑁆𑀢𑀸 𑀅𑀭𑀜𑁆𑀜𑀧𑁆𑀧𑀤𑁂𑀲𑁂. 𑀭𑀓𑁆𑀔𑀁 𑀬𑀸𑀘𑀺𑀢𑁆𑀯𑀸𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀦𑀼𑀤𑁆𑀤𑀺𑀲𑁆𑀲 𑀭𑀓𑁆𑀔𑀁 𑀬𑀸𑀘𑀺𑀢𑁆𑀯𑀸.

𑀓𑀼𑀫𑀻𑀦𑀫𑀼𑀔𑀦𑁆𑀢𑀺 𑀓𑀼𑀫𑀻𑀦𑀲𑁆𑀲 𑀅𑀦𑁆𑀢𑁄 𑀫𑀘𑁆𑀙𑀸𑀦𑀁 𑀧𑀯𑀺𑀲𑀦𑀫𑀼𑀔𑀁. 𑀕𑀼𑀫𑁆𑀩𑁂 𑀔𑀺𑀧𑀢𑀺, 𑀪𑀡𑁆𑀟𑀤𑁂𑀬𑁆𑀬𑀫𑁂𑀯𑀸𑀢𑀺 𑀓𑀼𑀫𑀻𑀦𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑀩𑁆𑀩𑀸𑀦𑀁 𑀫𑀘𑁆𑀙𑀸𑀦𑀁 𑀅𑀕𑁆𑀖𑁂𑀦 𑀪𑀡𑁆𑀟𑀤𑁂𑀬𑁆𑀬𑀁.

𑁧𑁫𑁬. 𑀯𑀻𑀲𑀢𑀺𑀁𑀲𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀪𑀺𑀓𑁆𑀔𑀽 𑀏𑀢𑁆𑀣𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑀼𑀓𑀁. 𑀣𑁂𑀭𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑀢𑁆𑀣𑁂𑀭𑀸𑀦𑀁 ¶ . 𑀢𑁂𑀲𑀫𑁆𑀧𑀻𑀢𑀺 𑀆𑀯𑀸𑀲𑀺𑀓𑀪𑀺𑀓𑁆𑀔𑀽𑀦𑀫𑁆𑀧𑀺. 𑀧𑀭𑀺𑀪𑁄𑀕𑀢𑁆𑀣𑀸𑀬𑀸𑀢𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑀸𑀬. 𑀕𑀳𑀡𑁂𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂. 𑀅𑀜𑁆𑀜𑁂𑀲𑀁 𑀅𑀢𑁆𑀣𑀺𑀪𑀸𑀯𑀦𑁆𑀢𑀺 𑀅𑀜𑁆𑀜𑁂𑀲𑀁 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀁. 𑀢𑀢𑁆𑀣𑀸𑀢𑀺 𑀢𑀸𑀤𑀺𑀲𑁂 𑀆𑀯𑀸𑀲𑁂. 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀫𑁆𑀧𑀺 𑀲𑀫𑁆𑀧𑀢𑁆𑀢𑀸𑀦𑀁 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀻𑀢𑀺 𑀅𑀫𑁆𑀩𑀨𑀮𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺. 𑀘𑀻𑀯𑀭𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸𑀢𑀺 ‘‘𑀇𑀫𑁂𑀲𑀁 𑀭𑀼𑀓𑁆𑀔𑀸𑀦𑀁 𑀨𑀮𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀘𑀻𑀯𑀭𑁂𑀲𑀼𑀬𑁂𑀯 𑀉𑀧𑀦𑁂𑀢𑀩𑁆𑀩𑀸𑀦𑀺, 𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸. 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 ¶ 𑀅𑀦𑀺𑀲𑁆𑀲𑀭𑀸𑀢𑀺 𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀅𑀦𑀺𑀲𑁆𑀲𑀭𑀸.

𑀦 𑀢𑁂𑀲𑀼…𑀧𑁂… 𑀞𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀆𑀕𑀦𑁆𑀢𑀼𑀓𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀦𑁆𑀢𑀺 ‘‘𑀪𑀸𑀚𑁂𑀢𑁆𑀯𑀸 𑀦 𑀔𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀸 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀁 𑀤𑀺𑀯𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀦 𑀓𑀺𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 𑀏𑀯𑀁 𑀓𑀢𑀸𑀬 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀆𑀕𑀦𑁆𑀢𑀼𑀓𑁂𑀳𑀺 𑀞𑀸𑀢𑀩𑁆𑀩𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀺𑀲𑁆𑀲𑀭𑀸’’𑀢𑀺 𑀯𑀘𑀦𑁂𑀦 𑀤𑀻𑀧𑀺𑀢𑁄𑀬𑁂𑀯 𑀅𑀢𑁆𑀣𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀧𑀭𑀺𑀪𑁄𑀕𑀯𑀲𑁂𑀦𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄. 𑀧𑀭𑀺𑀪𑁄𑀕𑀯𑀲𑁂𑀦 𑀢𑀫𑁂𑀯 𑀪𑀸𑀚𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀭𑀝𑁆𑀞𑁂 𑀯𑀸. 𑀲𑁂𑀦𑀸𑀲𑀦𑀧𑀘𑁆𑀘𑀬𑀦𑁆𑀢𑀺 𑀲𑁂𑀦𑀸𑀲𑀦𑀜𑁆𑀘 𑀢𑀤𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀜𑁆𑀘.

𑀮𑀸𑀫𑀓𑀓𑁄𑀝𑀺𑀬𑀸𑀢𑀺 𑀮𑀸𑀫𑀓𑀁 𑀆𑀤𑀺𑀁 𑀓𑀢𑁆𑀯𑀸, 𑀮𑀸𑀫𑀓𑀲𑁂𑀦𑀸𑀲𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀦𑀸𑀲𑀦𑁂𑀧𑀺 𑀢𑀺𑀡𑀸𑀤𑀻𑀦𑀺 𑀮𑀸𑀫𑀓𑀓𑁄𑀝𑀺𑀬𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺, 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀧𑀺 𑀮𑀸𑀫𑀓𑀓𑁄𑀝𑀺𑀬𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸. 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺? 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀢𑀸𑀯 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀮𑀸𑀫𑀓𑀓𑁄𑀝𑀺𑀬𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀳𑀺𑀧𑀺 𑀲𑁂𑀦𑀸𑀲𑀦𑀪𑀽𑀫𑀺𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀦𑁄 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀥𑀫𑁆𑀫𑀲𑀦𑁆𑀢𑀓𑁂𑀦 𑀩𑀼𑀤𑁆𑀥𑀧𑀽𑀚𑀁 𑀓𑀸𑀢𑀼𑀁, 𑀩𑀼𑀤𑁆𑀥𑀲𑀦𑁆𑀢𑀓𑁂𑀦 𑀯𑀸 𑀥𑀫𑁆𑀫𑀧𑀽𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? ‘‘𑀢𑀣𑀸𑀕𑀢𑀲𑁆𑀲 𑀔𑁄 𑀏𑀢𑀁 𑀯𑀸𑀲𑁂𑀝𑁆𑀞 𑀅𑀥𑀺𑀯𑀘𑀦𑀁 𑀥𑀫𑁆𑀫𑀓𑀸𑀬𑁄 𑀇𑀢𑀺𑀧𑀻𑀢𑀺 𑀘 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀘 𑀯𑀘𑀦𑀢𑁄 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀏𑀯𑀁 𑀲𑀦𑁆𑀢𑁂 ‘𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’𑀢𑀺 𑀯𑀘𑀦𑀢𑁄 𑀩𑀼𑀤𑁆𑀥𑀲𑀦𑁆𑀢𑀓𑁂𑀦 𑀕𑀺𑀮𑀸𑀦𑀲𑁆𑀲𑀧𑀺 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 ¶ 𑀅𑀓𑀸𑀭𑀡𑀁. 𑀦 𑀳𑀺 ‘‘𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀘 𑀕𑀺𑀮𑀸𑀦𑀲𑁆𑀲 𑀘 𑀏𑀓𑀲𑀤𑀺𑀲𑀢𑀸 𑀢𑀤𑀼𑀧𑀝𑁆𑀞𑀸𑀦𑀲𑁆𑀲 𑀯𑀸 ¶ 𑀲𑀫𑀨𑀮𑀢𑀸 𑀯𑀼𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀬𑁄 𑀫𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀓𑀭𑀡𑁂𑀦 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀫𑀫 𑀑𑀯𑀸𑀤𑀓𑀭𑀡𑁂𑀦 𑀕𑀺𑀮𑀸𑀦𑁄 𑀉𑀧𑀝𑁆𑀞𑀸𑀢𑀩𑁆𑀩𑁄’’𑀢𑀺. 𑀪𑀕𑀯𑀢𑁄 𑀘 𑀕𑀺𑀮𑀸𑀦𑀲𑁆𑀲 𑀘 𑀉𑀧𑀝𑁆𑀞𑀸𑀦𑀁 𑀏𑀓𑀲𑀤𑀺𑀲𑀦𑁆𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀸 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 ‘‘𑀅𑀳𑀜𑁆𑀘 𑀧𑀦𑀺𑀤𑀸𑀦𑀺 𑀏𑀓𑁄 𑀑𑀯𑀤𑀸𑀫𑀺 𑀅𑀦𑀼𑀲𑀸𑀲𑀸𑀫𑀺, 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀢𑀼𑀫𑁆𑀳𑁂 𑀑𑀯𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑀸𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀧𑀲𑀁𑀲𑀦𑁆𑀢𑁂𑀦 𑀘 ‘‘𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀦 𑀲𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀦𑀸𑀫, 𑀩𑀼𑀤𑁆𑀥𑁄 𑀦𑀸𑀫 𑀏𑀲 𑀘𑀼𑀦𑁆𑀤𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑀕𑀭𑀼𑀓𑀢𑁆𑀢𑀸 𑀘 𑀢𑀣𑀸𑀕𑀢𑀲𑁆𑀲 𑀧𑀼𑀩𑁆𑀩𑀦𑀬𑁄 𑀏𑀯 𑀧𑀲𑀢𑁆𑀣𑀢𑀭𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑁂𑀳𑁂𑀯 𑀭𑀼𑀓𑁆𑀔𑁂𑀳𑀺 𑀏𑀢𑁆𑀢𑀓𑀫𑁂𑀯 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸, 𑀮𑀺𑀔𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸. 𑀤𑀸𑀭𑀓𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄 𑀤𑀸𑀭𑀓𑀸. 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀕𑁄𑀧𑀓𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣𑀸𑀧𑀺 𑀕𑀺𑀳𑀻𑀦𑀁 𑀕𑁄𑀧𑀓𑀤𑀸𑀦𑁂 𑀬𑀢𑁆𑀢𑀓𑀁 𑀕𑁄𑀧𑀓𑀸 𑀤𑁂𑀦𑁆𑀢𑀺, 𑀢𑀢𑁆𑀢𑀓𑀁 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀺𑀓𑁂 𑀧𑀦 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑀺𑀢𑀢𑁆𑀢𑀸 ‘‘𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀭𑀡𑀢𑁆𑀣𑀸𑀬 𑀞𑀧𑀺𑀢𑀤𑀸𑀭𑀼𑀲𑀫𑁆𑀪𑀸𑀭𑀢𑁄. 𑀆𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀓𑀸𑀭𑀓𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀆𑀳𑀭𑀺𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑀸𑀯𑀓𑀸𑀮𑀺𑀓𑀁 𑀆𑀳𑀭𑀺𑀢𑁆𑀯𑀸. 𑀆𑀳𑀭𑀸𑀧𑁂𑀦𑁆𑀢𑁄𑀢𑀺 𑀏𑀢𑁆𑀣 𑀅𑀦𑀸𑀳𑀭𑀸𑀧𑁂𑀦𑁆𑀢𑁂𑀧𑀺 𑀤𑀸𑀢𑀩𑁆𑀩𑀫𑁂𑀯. 𑀅𑀬𑀫𑁂𑀯 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀧𑀼𑀡𑀦𑀝𑁆𑀞𑀸𑀦𑀁, 𑀢𑀢𑁄𑀬𑁂𑀯 𑀲𑁂𑀦𑀸𑀲𑀦𑀢𑁄 𑀢𑀲𑁆𑀲 𑀤𑀸𑀢𑀩𑁆𑀩𑀁, 𑀦 𑀘 𑀲𑁄 𑀢𑀢𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀉𑀤𑀓𑀧𑀽𑀚𑀦𑁆𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑁂𑀲𑀼 𑀲𑀺𑀜𑁆𑀘𑀦’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀯𑀢𑁆𑀢𑀲𑀻𑀲𑁂𑀦𑀸𑀢𑀺 𑀓𑁂𑀯𑀮𑀁 𑀲𑀤𑁆𑀥𑀸𑀬, 𑀦 𑀯𑁂𑀢𑀦𑀸𑀤𑀺𑀅𑀢𑁆𑀣𑀸𑀬. 𑀲𑀯𑀢𑁆𑀣𑀼𑀓𑀦𑁆𑀢𑀺 𑀲𑀳 𑀪𑀽𑀫𑀺𑀬𑀸. 𑀢𑀺𑀡𑀫𑀢𑁆𑀢𑀁 𑀧𑀦 𑀤𑀸𑀢𑀩𑁆𑀩𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀓𑀺𑀁 𑀢𑀁 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀅𑀭𑀓𑁆𑀔𑀺𑀢𑀅𑀕𑁄𑀧𑀺𑀢𑀝𑁆𑀞𑀸𑀦𑁂 𑀳𑀺 𑀯𑀺𑀦𑀲𑁆𑀲𑀓𑀪𑀸𑀯𑁂𑀦 𑀞𑀺𑀢𑀁 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀢𑀺𑀡𑀫𑀢𑁆𑀢𑀁 𑀧𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀚𑀕𑁆𑀕𑀺𑀢𑁆𑀯𑀸𑀢𑀺 𑀲𑀁𑀯𑀘𑁆𑀙𑀭𑁂 𑀲𑀁𑀯𑀘𑁆𑀙𑀭𑁂 𑀚𑀕𑁆𑀕𑀺𑀢𑁆𑀯𑀸.

𑀓𑀼𑀝𑁆𑀝𑀦𑁆𑀢𑀺 ¶ 𑀕𑁂𑀳𑀪𑀺𑀢𑁆𑀢𑀺𑀁. 𑀧𑀸𑀓𑀸𑀭𑀦𑁆𑀢𑀺 𑀧𑀭𑀺𑀓𑁆𑀔𑁂𑀧𑀧𑀸𑀓𑀸𑀭𑀁. 𑀢𑀢𑁄𑀢𑀺 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄. 𑀢𑀢𑁄 ¶ 𑀆𑀳𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀓𑀢𑀁 𑀳𑁄𑀢𑀻𑀢𑀺 𑀲𑀸𑀫𑀦𑁆𑀢𑀕𑀸𑀫𑀯𑀸𑀲𑀻𑀳𑀺 𑀪𑀺𑀓𑁆𑀔𑀽𑀳𑀺 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄 𑀤𑀸𑀭𑀼𑀲𑀫𑁆𑀪𑀸𑀭𑀸𑀤𑀺𑀁 𑀆𑀳𑀭𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀓𑀢𑀁 𑀳𑁄𑀢𑀺.

𑁧𑁫𑁭. 𑀘𑀢𑀼𑀪𑀸𑀕𑀉𑀤𑀓𑀲𑀫𑁆𑀪𑀺𑀦𑁆𑀦𑁂𑀢𑀺 𑀘𑀢𑀼𑀢𑁆𑀣𑀪𑀸𑀕𑁂𑀦 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀦𑁂. 𑀑𑀤𑀦𑀪𑀸𑀚𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 ‘‘𑀤𑁂𑀳𑀺 𑀅𑀧𑀭𑀲𑁆𑀲 𑀪𑀸𑀕’’𑀦𑁆𑀢𑀺 𑀆𑀕𑀢𑀯𑀢𑁆𑀣𑀼𑀲𑁆𑀫𑀺𑀁.

𑁧𑁫𑁯. 𑀅𑀬𑁆𑀬𑀸 𑀅𑀢𑁆𑀢𑀦𑀸 𑀓𑀸𑀢𑀼𑀁 𑀬𑀼𑀢𑁆𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺, 𑀅𑀢𑀺𑀯𑀺𑀬 𑀣𑀤𑁆𑀥𑀸𑀢𑀺 𑀧𑀲𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀓𑀼𑀧𑁆𑀧𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀲𑀸𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑁆𑀥𑀺𑀁 𑀧𑀝𑀺𑀲𑀁𑀳𑀭𑀻𑀢𑀺 𑀇𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀓𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀻𑀢𑀺 𑀇𑀤𑁆𑀥𑀺𑀬𑀸 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀏𑀯 ‘‘𑀧𑀸𑀲𑀸𑀤𑁄 𑀧𑀼𑀦 𑀆𑀕𑀘𑁆𑀙𑀢𑀽’’𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀧𑀺 𑀲𑀬𑀫𑁂𑀯 𑀆𑀕𑀦𑁆𑀢𑁆𑀯𑀸 𑀲𑀓𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺. ‘‘𑀬𑀸𑀯 𑀤𑀸𑀭𑀓𑀸 𑀧𑀸𑀲𑀸𑀤𑀁 𑀆𑀭𑁄𑀳𑀦𑁆𑀢𑀺, 𑀢𑀸𑀯 𑀧𑀸𑀲𑀸𑀤𑁄 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀳𑁄𑀢𑀽’’𑀢𑀺 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀘 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀺𑀢𑁂𑀦 𑀢𑀢𑁄 𑀧𑀭𑀁 𑀇𑀤𑁆𑀥𑀺 𑀯𑀺𑀲𑁆𑀲𑀚𑁆𑀚𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀣𑁂𑀭𑁄 𑀇𑀤𑁆𑀥𑀺𑀁 𑀧𑀝𑀺𑀲𑀁𑀳𑀭𑀻’’𑀢𑀺. 𑀬𑀲𑁆𑀫𑀸 𑀢𑁂 𑀤𑀸𑀭𑀓𑀸 𑀏𑀯𑀁 𑀕𑀳𑁂𑀢𑁆𑀯𑀸 𑀕𑀢𑀸𑀦𑀁 𑀲𑀦𑁆𑀢𑀓𑀸 𑀦 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀈𑀤𑀺𑀲𑁂𑀦 𑀧𑀬𑁄𑀕𑁂𑀦 𑀣𑁂𑀭𑁂𑀦 𑀢𑁂 𑀆𑀦𑀻𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀏𑀯𑀫𑀓𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀯𑁄𑀳𑀸𑀭𑀯𑀲𑁂𑀦𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀧𑀓𑀢𑀺𑀯𑀡𑁆𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀁 ‘‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁮; 𑀫. 𑀦𑀺. 𑁧.𑁧𑁪𑁭; 𑀲𑀁. 𑀦𑀺. 𑁫.𑁮𑁪𑁨) 𑀆𑀕𑀢𑀜𑁆𑀘 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀦𑀸𑀫. ‘‘𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀁 𑀆𑀕𑀢𑀸 𑀇𑀤𑁆𑀥𑀺 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫. 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀜𑁆𑀳𑀺 𑀦𑀸𑀫 𑀅𑀢𑁆𑀢𑀦𑁄 𑀧𑀓𑀢𑀺𑀭𑀽𑀧𑀲𑁆𑀲 𑀅𑀜𑁆𑀜𑁂𑀲𑀁 𑀅𑀤𑀲𑁆𑀲𑀦𑀁, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀭𑁄𑀥𑀦𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀳𑀢𑁆𑀣𑀺𑀆𑀤𑀺𑀤𑀲𑁆𑀲𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀇𑀤𑀁 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀫𑀽𑀮𑀧𑀤𑁂𑀦 𑀦 𑀯𑀺𑀭𑀼𑀚𑁆𑀛𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀅𑀦𑀼𑀲𑀸𑀲𑀦𑀻𑀓𑀣𑀸𑀯𑀡𑁆𑀡𑀦𑀸

𑀧𑀭𑀸𑀚𑀺𑀢𑀓𑀺𑀮𑁂𑀲𑁂𑀦𑀸𑀢𑀺 ¶ ¶ 𑀲𑀦𑁆𑀢𑀸𑀦𑁂 𑀧𑀼𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑁂𑀳𑀺 𑀲𑀳 𑀯𑀸𑀲𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀲𑀩𑁆𑀩𑀓𑀺𑀮𑁂𑀲𑁂𑀦. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀁 𑀅𑀜𑁆𑀜𑀁 𑀅𑀦𑁂𑀓𑀦𑀬𑀯𑁄𑀓𑀺𑀡𑁆𑀡𑀁 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀘 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀸, 𑀕𑀫𑁆𑀪𑀻𑀭𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀸 𑀅𑀲𑁆𑀲𑀸𑀢𑀺 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁. 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂𑀢𑀺 𑀘𑁄𑀤𑀦𑀸𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀖𑀫𑀚𑁆𑀛𑀁 𑀑𑀢𑀺𑀡𑁆𑀡𑁂, 𑀏𑀓𑁂𑀦 𑀏𑀓𑀲𑁆𑀫𑀺𑀁 𑀘𑁄𑀤𑀺𑀢𑁂, 𑀲𑀬𑀫𑁂𑀯 𑀯𑀸 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀯𑀻𑀢𑀺𑀓𑁆𑀓𑀫𑁂 𑀆𑀭𑁄𑀘𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀫𑁆𑀳𑀺.

𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑁂𑀦 𑀲𑀳𑀲𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀯𑀢𑁆𑀯𑀸 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀴𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄. 𑀅𑀯𑀢𑁆𑀯𑀸𑀯𑀸𑀢𑀺 ‘‘𑀢𑁆𑀯𑀁 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄’’𑀢𑀺 𑀅𑀯𑀢𑁆𑀯𑀸𑀯. 𑀓𑀧𑁆𑀧𑀺𑀬𑁂𑀧𑀺 𑀘 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀯𑀢𑁆𑀯𑀸𑀧𑀺 𑀕𑀡𑁆𑀳𑀺𑀢𑀼𑀁 𑀓𑀧𑁆𑀧𑀺𑀬𑁂 𑀫𑀸𑀢𑀼𑀧𑀺𑀢𑀼𑀲𑀦𑁆𑀢𑀓𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁. 𑀮𑀳𑀼𑀯𑀢𑁆𑀢𑀺𑀦𑁄𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀦𑁄. 𑀆𑀲𑀻𑀯𑀺𑀲𑀦𑁆𑀢𑀺 𑀲𑀻𑀖𑀫𑁂𑀯 𑀲𑀓𑀮𑀲𑀭𑀻𑀭𑁂 𑀨𑀭𑀡𑀲𑀫𑀢𑁆𑀣𑀯𑀺𑀲𑀁.

𑀅𑀦𑀼𑀲𑀸𑀲𑀦𑀻𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀓𑀡𑁆𑀟𑀝𑁆𑀞𑀓𑀣𑀸𑀬 𑀧𑀞𑀫𑀪𑀸𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑀢𑀻𑀳𑀻𑀢𑀺 ¶ 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺. 𑀯𑀺𑀪𑀸𑀯𑀺𑀢𑀦𑁆𑀢𑀺 𑀧𑀓𑀸𑀲𑀺𑀢𑀁, 𑀤𑁂𑀲𑀺𑀢𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸

𑁧𑁬𑁨. 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁂𑀦 𑀦𑀕𑀭𑀪𑀽𑀫𑀺𑀬𑀸 𑀯𑀟𑁆𑀠𑀦𑁂𑀦. 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸𑀢𑀺 𑀕𑀸𑀯𑀼𑀢𑀦𑁆𑀢𑀭𑀁 𑀕𑀸𑀯𑀼𑀢𑀦𑁆𑀢𑀭𑀁 𑀧𑀼𑀣𑀼𑀪𑀽𑀢𑀢𑁆𑀢𑀸. 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁬; 𑀔𑀼. 𑀧𑀸. 𑀅𑀝𑁆𑀞. 𑁬. 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸) 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 ¶ 𑀲𑀡𑁆𑀞𑀸𑀲𑀺, 𑀲𑀸 𑀜𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺, 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀲𑀫𑁆𑀫𑀸 𑀧𑀭𑀺𑀳𑀭𑀺𑀬𑀫𑀸𑀦𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀯𑀺𑀚𑀸𑀬𑀦𑀖𑀭𑀁 𑀧𑀸𑀯𑀺𑀲𑀺. 𑀧𑀼𑀜𑁆𑀜𑀯𑀦𑁆𑀢𑀻𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀅𑀮𑀢𑁆𑀢𑀓𑀧𑀝𑀮𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀁 𑀫𑀁𑀲𑀧𑁂𑀲𑀺𑀁 𑀯𑀺𑀚𑀸𑀬𑀺. 𑀢𑀢𑁄 ‘‘𑀅𑀜𑁆𑀜𑀸 𑀤𑁂𑀯𑀺𑀬𑁄 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀦𑁆𑀢𑀺, 𑀅𑀕𑁆𑀕𑀫𑀳𑁂𑀲𑀻 𑀫𑀁𑀲𑀧𑁂𑀲𑀺𑀦𑁆𑀢𑀺 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀫 𑀅𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀅𑀯𑀡𑁆𑀡𑀪𑀬𑁂𑀦 𑀢𑀁 𑀫𑀁𑀲𑀧𑁂𑀲𑀺𑀁 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀕𑀗𑁆𑀕𑀸𑀬 𑀲𑁄𑀢𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀲𑀼𑀯𑀡𑁆𑀡𑀧𑀝𑁆𑀝𑀺𑀓𑀜𑁆𑀘𑁂𑀢𑁆𑀣 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀚𑀸’’𑀢𑀺 𑀮𑀺𑀔𑀺𑀢𑁆𑀯𑀸 𑀩𑀦𑁆𑀥𑀺𑀁𑀲𑀼. 𑀢𑀢𑁄 𑀢𑀁 𑀪𑀸𑀚𑀦𑀁 𑀊𑀫𑀺𑀪𑀬𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀕𑀗𑁆𑀕𑀸𑀲𑁄𑀢𑁂𑀦 𑀧𑀸𑀬𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀕𑁄𑀧𑀸𑀮𑀓𑀓𑀼𑀮𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀢𑀻𑀭𑁂 𑀯𑀺𑀳𑀭𑀢𑀺. 𑀲𑁄 𑀧𑀸𑀢𑁄𑀯 𑀕𑀗𑁆𑀕𑀁 𑀑𑀢𑀺𑀡𑁆𑀡𑁄 𑀢𑀁 𑀪𑀸𑀚𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀅𑀣𑁂𑀢𑁆𑀣 𑀢𑀁 𑀅𑀓𑁆𑀔𑀭𑀧𑀝𑁆𑀝𑀺𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀸𑀮𑀜𑁆𑀙𑀦𑀜𑁆𑀘 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀺𑀬𑀸 𑀕𑀩𑁆𑀪𑁄, 𑀢𑀣𑀸 𑀳𑀺𑀲𑁆𑀲 𑀤𑀼𑀕𑁆𑀕𑀦𑁆𑀥𑀧𑀽𑀢𑀺𑀪𑀸𑀯𑁄 𑀦𑀢𑁆𑀣𑀻’’𑀢𑀺. 𑀉𑀤𑀓𑀧𑁆𑀧𑀯𑀸𑀳𑁂𑀦𑀸𑀕𑀢𑀲𑁆𑀲𑀧𑀺 𑀳𑀺 𑀉𑀲𑁆𑀫𑀸 𑀦 𑀯𑀺𑀕𑀘𑁆𑀙𑀢𑀺, 𑀉𑀲𑁆𑀫𑀸 𑀘 𑀦𑀸𑀫 𑀈𑀤𑀺𑀲𑀸𑀬 𑀲𑀯𑀺𑀜𑁆𑀜𑀸𑀡𑀓𑀢𑀸𑀬 𑀪𑀯𑁂𑀬𑁆𑀬𑀸𑀢𑀺 ‘‘𑀲𑀺𑀬𑀸 𑀕𑀩𑁆𑀪𑁄’’𑀢𑀺 ¶ 𑀘𑀺𑀦𑁆𑀢𑁂𑀲𑀺. 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀧𑀦 𑀤𑀼𑀕𑁆𑀕𑀦𑁆𑀥𑀁 𑀦𑀸𑀳𑁄𑀲𑀺 𑀲𑀉𑀲𑀼𑀫𑀕𑀢𑀸𑀬 𑀧𑀽𑀢𑀺𑀪𑀸𑀯𑁄 𑀘. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀦𑀁 𑀲𑀼𑀤𑁆𑀥𑁂 𑀑𑀓𑀸𑀲𑁂 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀤𑁆𑀯𑁂 𑀫𑀁𑀲𑀧𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀲𑀸𑀥𑀼𑀓𑀢𑀭𑀁 𑀞𑀧𑁂𑀲𑀺. 𑀢𑀢𑁄 𑀧𑀼𑀦 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀧𑁂𑀲𑀺𑀬𑀸 𑀳𑀢𑁆𑀣𑀧𑀸𑀤𑀲𑀻𑀲𑀸𑀦𑀫𑀢𑁆𑀣𑀸𑀬 𑀧𑀜𑁆𑀘 𑀧𑀜𑁆𑀘 𑀧𑀺𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀅𑀣 𑀢𑀢𑁄 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀸 𑀫𑀁𑀲𑀧𑁂𑀲𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄, 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺. 𑀢𑁂𑀲𑀼 𑀢𑀸𑀧𑀲𑀲𑁆𑀲 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺, 𑀤𑀸𑀭𑀓𑀸𑀦𑀁 𑀧𑀼𑀜𑁆𑀜𑀼𑀧𑀦𑀺𑀲𑁆𑀲𑀬𑀢𑁄 𑀅𑀗𑁆𑀕𑀼𑀝𑁆𑀞𑀓𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀔𑀻𑀭𑀪𑀢𑁆𑀢𑀁 𑀅𑀮𑀪𑀺𑀢𑁆𑀣. 𑀢𑀸𑀧𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀻𑀭𑀁 𑀤𑀸𑀭𑀓𑀸𑀦𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑁂𑀲𑀁 𑀧𑀦 𑀬𑀁 𑀬𑀁 𑀉𑀤𑀭𑀁 𑀧𑀯𑀺𑀲𑀢𑀺, 𑀢𑀁 𑀲𑀩𑁆𑀩𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀯𑀺𑀬 𑀉𑀤𑀭𑀘𑁆𑀙𑀯𑀺𑀬𑀸 ¶ 𑀅𑀘𑁆𑀙𑀯𑀺𑀧𑁆𑀧𑀲𑀦𑁆𑀦𑀢𑀸𑀬 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀆𑀳𑀼 ‘‘𑀲𑀺𑀩𑁆𑀩𑀺𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 ‘‘𑀮𑀺𑀘𑁆𑀙𑀯𑀻’’𑀢𑀺 𑀧𑀜𑁆𑀜𑀸𑀬𑀺𑀁𑀲𑀼.

𑀢𑀸𑀧𑀲𑁄 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀉𑀲𑁆𑀲𑀽𑀭𑁂 𑀕𑀸𑀫𑀁 𑀪𑀺𑀓𑁆𑀔𑀸𑀬 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀢𑀲𑁆𑀲 𑀢𑀁 𑀩𑁆𑀬𑀸𑀧𑀸𑀭𑀁 𑀜𑀢𑁆𑀯𑀸 𑀕𑁄𑀧𑀸𑀮𑀓𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀭𑀓𑀧𑁄𑀲𑀦𑀁 𑀧𑀮𑀺𑀩𑁄𑀥𑁄, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀤𑁂𑀣, 𑀫𑀬𑀁 𑀧𑁄𑀲𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀕𑁄𑀧𑀸𑀮𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀢𑁆𑀯𑀸 𑀥𑀚𑀧𑀝𑀸𑀓𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀅𑀲𑁆𑀲𑀫𑀁 𑀆𑀕𑀢𑀸. 𑀢𑀸𑀧𑀲𑁄 ‘‘𑀫𑀳𑀸𑀧𑀼𑀜𑁆𑀜𑀸 𑀤𑀸𑀭𑀓𑀸, 𑀅𑀧𑁆𑀧𑀫𑀸𑀤𑁂𑀦𑁂𑀯 𑀯𑀟𑁆𑀠𑁂𑀣, 𑀯𑀟𑁆𑀠𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀁 𑀓𑀭𑁄𑀣, 𑀧𑀜𑁆𑀘𑀕𑁄𑀭𑀲𑁂𑀦 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀣, 𑀢𑀢𑁆𑀣 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀸𑀭𑀓𑁂 𑀦𑁂𑀢𑁆𑀯𑀸 𑀧𑁄𑀲𑁂𑀲𑀼𑀁. 𑀤𑀸𑀭𑀓𑀸 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀓𑀻𑀴𑀦𑁆𑀢𑀸 𑀯𑀺𑀯𑀸𑀤𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑁂 𑀕𑁄𑀧𑀸𑀮𑀓𑀤𑀸𑀭𑀓𑁂 𑀳𑀢𑁆𑀣𑁂𑀦𑀧𑀺 𑀧𑀸𑀤𑁂𑀦𑀧𑀺 𑀧𑀳𑀭𑀦𑁆𑀢𑀺, 𑀢𑁂 𑀭𑁄𑀤𑀦𑁆𑀢𑀺. ‘‘𑀓𑀺𑀲𑁆𑀲 𑀭𑁄𑀤𑀣𑀸’’𑀢𑀺 𑀘 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀸 ‘‘𑀇𑀫𑁂 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑀸 𑀢𑀸𑀧𑀲𑀧𑁄𑀲𑀺𑀢𑀸 𑀅𑀫𑁆𑀳𑁂 𑀅𑀢𑀻𑀯 𑀧𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀦𑁂𑀲𑀁 𑀧𑁄𑀲𑀓𑀫𑀸𑀢𑀸𑀧𑀺𑀢𑀭𑁄𑀧𑀺 ‘‘𑀇𑀫𑁂 𑀤𑀸𑀭𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀯𑀺𑀳𑁂𑀲𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀇𑀫𑁂 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑁄 𑀧𑀤𑁂𑀲𑁄 ‘‘𑀯𑀚𑁆𑀚𑀻’’𑀢𑀺 𑀯𑀼𑀘𑁆𑀘𑀢𑀺 𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑁂𑀦.

𑀅𑀣 𑀢𑀁 𑀧𑀤𑁂𑀲𑀁 𑀕𑁄𑀧𑀸𑀮𑀓𑀸 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁. 𑀢𑀢𑁆𑀣 𑀘 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀅𑀲𑀫𑁆𑀪𑀺𑀦𑁆𑀦𑁂 𑀏𑀯 𑀭𑀸𑀚𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀜𑁆𑀘𑁄𑀤𑀺𑀢𑀸 𑀤𑁂𑀯𑀢𑀸𑀥𑀺𑀕𑁆𑀕𑀳𑀺𑀢𑀸 𑀅𑀓𑀁𑀲𑀽𑀢𑀺 𑀓𑁂𑀘𑀺. 𑀤𑀸𑀭𑀓𑀲𑁆𑀲 𑀤𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀯𑀸𑀭𑁂𑀬𑁆𑀬𑀁 𑀓𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 ‘‘𑀩𑀸𑀳𑀺𑀭𑀢𑁄 ¶ 𑀤𑀸𑀭𑀺𑀓𑀸 𑀦 𑀆𑀦𑁂𑀢𑀩𑁆𑀩𑀸, 𑀇𑀢𑁄 𑀤𑀸𑀭𑀺𑀓𑀸 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀲𑀁 𑀧𑀞𑀫𑀲𑀁𑀯𑀸𑀲𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘. 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀤𑁆𑀯𑁂 𑀤𑁆𑀯𑁂 𑀚𑀸𑀢𑀸. 𑀢𑀢𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑀦𑁆𑀢𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀓𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑁆𑀯𑁂𑀯 ¶ 𑀦𑀸𑀫𑀁 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀇𑀤𑀫𑁆𑀧𑀺 𑀘 𑀦𑀕𑀭𑀦𑁆𑀢𑀺 𑀦 𑀓𑁂𑀯𑀮𑀁 𑀭𑀸𑀚𑀕𑀳𑀲𑀸𑀯𑀢𑁆𑀣𑀺𑀬𑁄 𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫𑀸𑀢𑀺𑀆𑀤𑀺 𑀫𑀚𑁆𑀛𑀺𑀫𑀪𑀸𑀡𑀓𑀲𑀁𑀬𑀼𑀢𑁆𑀢𑀪𑀸𑀡𑀓𑀸𑀦𑀁 𑀲𑀫𑀸𑀦𑀝𑁆𑀞𑀓𑀣𑀸. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀜𑁆𑀳𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁬) 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁯𑁮𑁪-𑁯𑁮𑁫) 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀼𑀢𑁆𑀢𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁫𑁯) 𑀧𑀦 ‘‘𑀫𑀳𑀸𑀯𑀦𑁂𑀢𑀺 𑀩𑀳𑀺𑀦𑀕𑀭𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀲𑀬𑀁𑀚𑀸𑀢𑀁 𑀯𑀦𑀁 𑀅𑀢𑁆𑀣𑀺, 𑀬𑀁 𑀫𑀳𑀦𑁆𑀢𑀪𑀸𑀯𑁂𑀦𑁂𑀯 𑀫𑀳𑀸𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀫𑀳𑀸𑀯𑀦𑁂. 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀲𑀗𑁆𑀖𑀸𑀭𑀸𑀫𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀢𑀢𑁆𑀣 𑀓𑀡𑁆𑀡𑀺𑀓𑀁 𑀬𑁄𑀚𑁂𑀢𑁆𑀯𑀸 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀽𑀝𑀸𑀕𑀸𑀭𑀲𑀸𑀮𑀸𑀲𑀗𑁆𑀔𑁂𑀧𑁂𑀦 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀧𑀸𑀲𑀸𑀤𑀁 𑀅𑀓𑀁𑀲𑀼, 𑀢𑀁 𑀉𑀧𑀸𑀤𑀸𑀬 𑀲𑀓𑀮𑁄𑀧𑀺 𑀲𑀗𑁆𑀖𑀸𑀭𑀸𑀫𑁄 𑀓𑀽𑀝𑀸𑀕𑀸𑀭𑀲𑀸𑀮𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀯𑀦𑀫𑀚𑁆𑀛𑁂 𑀓𑀢𑀢𑁆𑀢𑀸 ‘‘𑀯𑀦𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀆𑀭𑀸𑀫𑁂𑀢𑀺 𑀲𑀗𑁆𑀖𑀸𑀭𑀸𑀫𑁂. 𑀳𑀁𑀲𑀯𑀝𑁆𑀝𑀓𑀘𑁆𑀙𑀤𑀦𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀧𑀝𑀺𑀘𑁆𑀙𑀦𑁆𑀦𑁂𑀦, 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬-𑀲𑀤𑁆𑀤𑁄 𑀓𑀸𑀭𑀡𑀯𑀘𑀦𑁄𑀢𑀺 𑀆𑀳 ‘‘𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺, 𑀅𑀬𑀁 𑀓𑀸𑀬𑁄 𑀅𑀯𑀺𑀜𑁆𑀜𑀸𑀡𑀓𑁄𑀧𑀺 𑀲𑀯𑀺𑀜𑁆𑀜𑀸𑀡𑀓𑁄𑀧𑀺 𑀏𑀯𑀫𑁆𑀧𑀺 𑀅𑀲𑀼𑀪𑁄 𑀏𑀯𑀫𑁆𑀧𑀺 𑀅𑀲𑀼𑀪𑁄𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀓𑀸𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀲𑀼𑀪𑀸𑀓𑀸𑀭𑀲𑀦𑁆𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀓𑁂𑀲𑀸𑀤𑀺𑀯𑀲𑁂𑀦 𑀢𑀢𑁆𑀣𑀸𑀧𑀺 𑀯𑀡𑁆𑀡𑀸𑀤𑀺𑀢𑁄 𑀅𑀲𑀼𑀪𑀸𑀓𑀸𑀭𑀲𑁆𑀲 𑀲𑀩𑁆𑀩𑀲𑁄 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁. 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀺𑀬𑀓𑀣𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀓𑀭𑀚𑀓𑀸𑀬𑁂 𑀯𑀺𑀘𑁆𑀙𑀦𑁆𑀤𑀦𑀼𑀧𑁆𑀧𑀸𑀤𑀦𑀓𑀣𑀁. 𑀫𑀼𑀢𑁆𑀢𑀁 𑀯𑀸𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀓𑀸𑀬𑀲𑁆𑀲 𑀅𑀫𑀦𑀼𑀜𑁆𑀜𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀤𑀺𑀢𑁄 𑀢𑀻𑀳𑀺 𑀧𑀤𑁂𑀳𑀺 𑀅𑀤𑀲𑁆𑀲𑀦𑀻𑀬𑀢𑀸𑀬 𑀅𑀲𑀸𑀭𑀓𑀢𑀸𑀬 𑀫𑀚𑁆𑀛𑁂 𑀘𑀢𑀽𑀳𑀺 𑀤𑀼𑀕𑁆𑀕𑀦𑁆𑀥𑀢𑀸𑀬, 𑀅𑀦𑁆𑀢𑁂 𑀏𑀓𑁂𑀦 𑀮𑁂𑀲𑀫𑀢𑁆𑀢𑁂𑀦𑀧𑀺 𑀫𑀦𑀼𑀜𑁆𑀜𑀢𑀸𑀪𑀸𑀯𑀫𑀲𑁆𑀲 𑀤𑀲𑁆𑀲𑁂𑀢𑀺. 𑀅𑀣 𑀔𑁄𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀲𑀭𑀽𑀧𑁂𑀦𑁂𑀯 𑀅𑀫𑀦𑀼𑀜𑁆𑀜𑀢𑀸𑀬 𑀤𑀲𑁆𑀲𑀦𑀁. 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑁄. 𑀭𑀸𑀕𑁄𑀢𑀺 𑀩𑀮𑀯𑀭𑀸𑀕𑁄. ‘‘𑀓𑁂𑀲𑀸 𑀮𑁄𑀫𑀸𑀤𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀪𑀸𑀢𑀺 𑀆𑀕𑀦𑁆𑀢𑀼𑀓𑁂𑀦 𑀲𑀼𑀪𑀸𑀓𑀸𑀭𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 𑀅𑀲𑀼𑀪𑀸. 𑀅𑀲𑀼𑀘𑀺𑀦𑁄𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀅𑀲𑀼𑀘𑀺𑀦𑁄. 𑀧𑀝𑀺𑀓𑀽𑀮𑀸𑀢𑀺 𑀦𑀸𑀕𑀭𑀺𑀓𑀲𑁆𑀲 𑀅𑀲𑀼𑀘𑀺𑀓𑀝𑁆𑀞𑀸𑀦𑀁 𑀯𑀺𑀬 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀧𑀝𑀺𑀓𑀽𑀮𑀸.

𑀓𑁂𑀲𑀸 ¶ ¶ 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑀽𑀮𑀸, 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑀽𑀮𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀘 𑀦𑁂𑀲𑀁…𑀧𑁂… 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀫𑀦𑀼𑀜𑁆𑀜𑁂𑀧𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁮𑁩; 𑀯𑀺𑀪. 𑀅𑀝𑁆𑀞. 𑁩𑁫𑁬) 𑀳𑀺 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀪𑀢𑁆𑀢𑀧𑀢𑁆𑀢𑁂 𑀯𑀸 𑀓𑁂𑀲𑀯𑀡𑁆𑀡𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 ‘‘𑀓𑁂𑀲𑀫𑀺𑀲𑁆𑀲𑀓𑀫𑀺𑀤𑀁, 𑀳𑀭𑀣 𑀦’’𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀓𑁂𑀲𑀸 𑀯𑀡𑁆𑀡𑀢𑁄 𑀧𑀝𑀺𑀓𑀽𑀮𑀸. 𑀭𑀢𑁆𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀧𑀺 𑀓𑁂𑀲𑀲𑀡𑁆𑀞𑀸𑀦𑀁 𑀅𑀓𑁆𑀓𑀯𑀸𑀓𑀁 𑀯𑀸 𑀫𑀓𑀘𑀺𑀯𑀸𑀓𑀁 𑀯𑀸 𑀙𑀼𑀧𑀺𑀢𑁆𑀯𑀸 𑀢𑀣𑁂𑀯 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀡𑁆𑀞𑀸𑀦𑀢𑁄𑀧𑀺 𑀧𑀝𑀺𑀓𑀽𑀮𑀸. 𑀢𑁂𑀮𑀫𑀓𑁆𑀔𑀦𑀧𑀼𑀧𑁆𑀨𑀥𑀽𑀧𑀸𑀤𑀺𑀲𑀗𑁆𑀔𑀸𑀭𑀯𑀺𑀭𑀳𑀺𑀢𑀸𑀦𑀜𑁆𑀘 𑀓𑁂𑀲𑀸𑀦𑀁 𑀕𑀦𑁆𑀥𑁄 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺, 𑀢𑀢𑁄 𑀚𑁂𑀕𑀼𑀘𑁆𑀙𑀢𑀭𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸𑀦𑀁. 𑀓𑁂𑀲𑀸 𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑀽𑀮𑀸𑀧𑀺 𑀲𑀺𑀬𑀼𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀸𑀬𑁂𑀯. 𑀬𑀣𑀸 𑀳𑀺 𑀤𑀳𑀭𑀲𑁆𑀲 𑀓𑀼𑀫𑀸𑀭𑀓𑀲𑁆𑀲 𑀯𑀘𑁆𑀘𑀁 𑀯𑀡𑁆𑀡𑀢𑁄 𑀳𑀮𑀺𑀤𑁆𑀤𑀺𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄𑀧𑀺 𑀳𑀮𑀺𑀤𑁆𑀤𑀺𑀧𑀺𑀡𑁆𑀟𑀲𑀡𑁆𑀞𑀸𑀦𑀁, 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀜𑁆𑀘 𑀉𑀤𑁆𑀥𑀼𑀫𑀸𑀢𑀓𑀓𑀸𑀴𑀲𑀼𑀦𑀔𑀲𑀭𑀻𑀭𑀁 𑀯𑀡𑁆𑀡𑀢𑁄 𑀢𑀸𑀮𑀧𑀓𑁆𑀓𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀁, 𑀤𑀸𑀞𑀸𑀧𑀺𑀲𑁆𑀲 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸𑀢𑀺 𑀉𑀪𑀬𑀫𑁆𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀲𑀺𑀬𑀸 𑀅𑀧𑁆𑀧𑀝𑀺𑀓𑀽𑀮𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀫𑁂𑀯, 𑀏𑀯𑀁 𑀓𑁂𑀲𑀸𑀧𑀺 𑀲𑀺𑀬𑀼𑀁 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑀽𑀮𑀸, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀸𑀬𑁂𑀯𑀸𑀢𑀺.

𑀬𑀣𑀸 𑀧𑀦 𑀅𑀲𑀼𑀘𑀺𑀝𑁆𑀞𑀸𑀦𑁂 𑀕𑀸𑀫𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀸𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀦𑀺 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸𑀦𑀁 𑀚𑁂𑀕𑀼𑀘𑁆𑀙𑀸𑀦𑀺 𑀳𑁄𑀦𑁆𑀢𑀺 𑀅𑀧𑀭𑀺𑀪𑁄𑀕𑀸𑀦𑀺, 𑀏𑀯𑀁 𑀓𑁂𑀲𑀸𑀧𑀺 𑀧𑀼𑀩𑁆𑀩𑀮𑁄𑀳𑀺𑀢𑀫𑀼𑀢𑁆𑀢𑀓𑀭𑀻𑀲𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀢𑁆𑀢𑀸 𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀢𑁂𑀲𑀁 𑀆𑀲𑀬𑀢𑁄 𑀧𑀸𑀝𑀺𑀓𑀼𑀮𑁆𑀬𑀁. 𑀇𑀫𑁂 𑀘 𑀓𑁂𑀲𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀉𑀝𑁆𑀞𑀺𑀢𑀓𑀡𑁆𑀡𑀓𑀁 𑀯𑀺𑀬 𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀚𑀸𑀢𑀸, 𑀢𑁂 𑀲𑀼𑀲𑀸𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀤𑀻𑀲𑀼 𑀚𑀸𑀢𑀲𑀸𑀓𑀁 𑀯𑀺𑀬 𑀧𑀭𑀺𑀔𑀸𑀤𑀻𑀲𑀼 𑀚𑀸𑀢𑀓𑀫𑀮𑀓𑀼𑀯𑀮𑀬𑀸𑀤𑀺𑀧𑀼𑀧𑁆𑀨𑀁 𑀯𑀺𑀬 𑀘 𑀅𑀲𑀼𑀘𑀺𑀝𑁆𑀞𑀸𑀦𑁂 𑀚𑀸𑀢𑀢𑁆𑀢𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀢𑀺 𑀇𑀤𑀁 𑀢𑁂𑀲𑀁 𑀑𑀓𑀸𑀲𑀢𑁄 𑀧𑀸𑀝𑀺𑀓𑀼𑀮𑁆𑀬𑀁. 𑀬𑀣𑀸 𑀘 𑀓𑁂𑀲𑀸𑀦𑀁, 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑀸𑀦𑀜𑁆𑀘 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀧𑀝𑀺𑀓𑀽𑀮𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀏𑀯𑀁 𑀮𑁄𑀫𑀸𑀤𑀻𑀦’’𑀦𑁆𑀢𑀺. 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦𑀸𑀢𑀺 𑀏𑀢𑁆𑀣 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄 𑀧𑀜𑁆𑀘 𑀧𑀜𑁆𑀘 𑀧𑀪𑁂𑀤𑀸 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁄𑀢𑀺.

𑀲𑀁𑀯𑀡𑁆𑀡𑁂𑀦𑁆𑀢𑁄𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑁄. 𑀅𑀲𑀼𑀪𑀸𑀬𑀸𑀢𑀺 𑀅𑀲𑀼𑀪𑀫𑀸𑀢𑀺𑀓𑀸𑀬. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀩𑀳𑀼𑀮𑀻𑀓𑀸𑀭𑁄. 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀏𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀣𑀺𑀦𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 ¶ 𑀧𑀳𑀸𑀦𑀯𑀲𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀏𑀢𑁂𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦𑀲𑁆𑀲𑁂𑀢𑀸𑀦𑀺 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀛𑀸𑀦𑀓𑁆𑀔𑀡𑁂 𑀅𑀜𑁆𑀜𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀢𑀣𑀸𑀧𑀺 𑀏𑀢𑀸𑀦𑁂𑀯 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀸𑀦𑀺. 𑀓𑀸𑀫𑀘𑁆𑀙𑀦𑁆𑀤𑁂𑀦 𑀳𑀺 𑀦𑀸𑀦𑀸𑀯𑀺𑀲𑀬𑀧𑀮𑁄𑀪𑀺𑀢𑀁 𑀘𑀺𑀢𑁆𑀢𑀁 𑀦 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀬𑀢𑀺, 𑀓𑀸𑀫𑀘𑁆𑀙𑀦𑁆𑀤𑀸𑀪𑀺𑀪𑀽𑀢𑀁 ¶ 𑀯𑀸 𑀘𑀺𑀢𑁆𑀢𑀁 𑀦 𑀓𑀸𑀫𑀥𑀸𑀢𑀼𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺, 𑀩𑁆𑀬𑀸𑀧𑀸𑀤𑁂𑀦 𑀘 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀫𑀸𑀦𑀁 𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺, 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀅𑀓𑀫𑁆𑀫𑀜𑁆𑀜𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑀁 𑀅𑀯𑀽𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑀳𑀢𑀁 𑀛𑀸𑀦𑀸𑀥𑀺𑀕𑀫𑀲𑀸𑀥𑀺𑀓𑀁 𑀧𑀝𑀺𑀧𑀤𑀁 𑀦𑀸𑀭𑁄𑀳𑀢𑀺. 𑀇𑀢𑀺 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀢𑁆𑀢𑀸 𑀏𑀢𑀸𑀦𑁂𑀯 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺.

𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀯𑀺𑀘𑀸𑀭𑁄 𑀅𑀦𑀼𑀧𑁆𑀧𑀩𑀦𑁆𑀥𑀢𑀺, 𑀢𑁂𑀳𑀺 𑀅𑀯𑀺𑀓𑁆𑀔𑁂𑀧𑀸𑀬 𑀲𑀫𑁆𑀧𑀸𑀤𑀺𑀢𑀧𑀬𑁄𑀕𑀲𑁆𑀲 𑀘𑁂𑀢𑀲𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀸 𑀧𑀻𑀢𑀺 𑀧𑀻𑀦𑀦𑀁, 𑀲𑀼𑀔𑀜𑁆𑀘 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺, 𑀅𑀣 𑀦𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀏𑀢𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀩𑀦𑁆𑀥𑀦𑀧𑀻𑀦𑀦𑀉𑀧𑀩𑁆𑀭𑀽𑀳𑀦𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀏𑀓𑀕𑁆𑀕𑀢𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀁 𑀲𑀫𑁆𑀫𑀸 𑀆𑀥𑀺𑀬𑀢𑀺, 𑀢𑀲𑁆𑀫𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑁂𑀲𑀼 𑀳𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀛𑀸𑀦𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑁂𑀦𑀲𑁆𑀲 𑀏𑀢𑀸𑀦𑀺 𑀧𑀜𑁆𑀘 𑀲𑀫𑀦𑁆𑀦𑀸𑀕𑀢𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀦 𑀏𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀜𑁆𑀜𑀤𑁂𑀯 𑀛𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑁄 𑀘 𑀫𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 ‘‘𑀧𑀜𑁆𑀘𑀗𑁆𑀕𑀺𑀓’’𑀦𑁆𑀢𑀺 𑀯𑀸 ‘‘𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑀸𑀦𑀺 𑀘 𑀧𑀜𑁆𑀘𑀗𑁆𑀕𑀸𑀦𑀺 𑀓𑀺𑀜𑁆𑀘𑀸𑀧𑀺 𑀉𑀧𑀘𑀸𑀭𑀓𑁆𑀔𑀡𑁂𑀧𑀺 𑀅𑀢𑁆𑀣𑀺, 𑀅𑀣 𑀔𑁄 𑀉𑀧𑀘𑀸𑀭𑁂 𑀧𑀓𑀢𑀺𑀘𑀺𑀢𑁆𑀢𑀢𑁄 𑀩𑀮𑀯𑀢𑀭𑀸𑀦𑀺, 𑀇𑀥 𑀧𑀦 𑀉𑀧𑀘𑀸𑀭𑀢𑁄𑀧𑀺 𑀩𑀮𑀯𑀢𑀭𑀸𑀦𑀺 𑀭𑀽𑀧𑀸𑀯𑀘𑀭𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺. 𑀏𑀢𑁆𑀣 𑀳𑀺 𑀯𑀺𑀢𑀓𑁆𑀓𑁄 𑀲𑀼𑀯𑀺𑀲𑀤𑁂𑀦 𑀆𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀸𑀭𑁄 𑀅𑀢𑀺𑀯𑀺𑀬 𑀆𑀭𑀫𑁆𑀫𑀡𑀁 𑀅𑀦𑀼𑀫𑀚𑁆𑀚𑀫𑀸𑀦𑁄, 𑀧𑀻𑀢𑀺𑀲𑀼𑀔𑀁 𑀲𑀩𑁆𑀩𑀸𑀯𑀦𑁆𑀢𑀫𑁆𑀧𑀺 𑀓𑀸𑀬𑀁 𑀨𑀭𑀫𑀸𑀦𑀁. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀻’’𑀢𑀺. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀳𑁂𑀝𑁆𑀞𑀺𑀫𑀫𑁆𑀳𑀺 𑀲𑀫𑀼𑀕𑁆𑀕𑀧𑀝𑀮𑁂 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀲𑀼𑀨𑀼𑀲𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑁂𑀢𑁂𑀲𑀁 ¶ 𑀇𑀢𑀭𑁂𑀳𑀺 𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀅𑀧𑁆𑀧𑀦𑀸𑀛𑀸𑀦𑀫𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀛𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸, 𑀢𑁂𑀲𑀁𑀬𑁂𑀯 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀮𑀓𑁆𑀔𑀡𑀯𑀲𑁂𑀦 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑁆𑀣𑀸𑀭𑀦𑀬𑀁 𑀧𑀦𑁂𑀢𑁆𑀣 𑀲𑀬𑀫𑁂𑀯 𑀧𑀓𑀸𑀲𑀬𑀺𑀲𑁆𑀲𑀢𑀺. 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀛𑀸𑀦𑀁 ‘‘𑀘𑀺𑀢𑁆𑀢𑀫𑀜𑁆𑀚𑀽𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀧𑀸𑀤𑀓𑀁 𑀓𑀢𑁆𑀯𑀸.

𑀤𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑁂𑀦𑁂𑀯 ¶ 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸𑀧𑀺 𑀯𑀺𑀪𑀸𑀯𑀺𑀢𑀸 𑀳𑁄𑀢𑀻𑀢𑀺 𑀤𑀲𑀮𑀓𑁆𑀔𑀡𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀫𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀭𑀺𑀧𑀦𑁆𑀣𑀺𑀓𑀢𑁄 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 ‘‘𑀢𑀢𑁆𑀭𑀸𑀬𑀁 𑀧𑀸𑀴𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀸𑀴𑀺𑀯𑀡𑁆𑀡𑀦𑀸𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀤𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑁂. 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀧𑀝𑀺𑀧𑀚𑁆𑀚𑀢𑀺 𑀛𑀸𑀦𑀁 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑁄 𑀧𑀼𑀩𑁆𑀩𑀪𑀸𑀕𑀺𑀬𑁄 𑀪𑀸𑀯𑀦𑀸𑀦𑀬𑁄. 𑀧𑀭𑀺𑀧𑀦𑁆𑀣𑀢𑁄 𑀯𑀺𑀲𑀼𑀚𑁆𑀛𑀦𑀁 𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀬 𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺. 𑀲𑀸 𑀧𑀦𑀸𑀬𑀁 𑀬𑀲𑁆𑀫𑀸 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻’’𑀢𑀺. 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀢𑀺 𑀯𑀺𑀲𑁄𑀥𑁂𑀢𑀩𑁆𑀩𑀢𑀸𑀤𑀻𑀦𑀁 𑀅𑀪𑀸𑀯𑀢𑁄 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀸. 𑀲𑀸 𑀧𑀦𑀸𑀬𑀁 𑀬𑀲𑁆𑀫𑀸 𑀯𑀺𑀲𑁂𑀲𑀢𑁄 𑀛𑀸𑀦𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀮𑀩𑁆𑀪𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂’’𑀢𑀺. 𑀲𑀫𑁆𑀧𑀳𑀁𑀲𑀦𑀸𑀢𑀺 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀲𑀸𑀥𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀭𑀺𑀬𑁄𑀤𑀧𑀦𑀸. 𑀲𑀸 𑀧𑀦 𑀬𑀲𑁆𑀫𑀸 𑀛𑀸𑀦𑀲𑁆𑀲 𑀑𑀲𑀸𑀦𑀓𑁆𑀔𑀡𑁂 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀻𑀢𑀺 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀚𑁆𑀛𑀦𑀸𑀓𑀸𑀭𑁄, 𑀫𑀚𑁆𑀛𑀺𑀫𑀲𑁆𑀲 𑀲𑀫𑀣𑀦𑀺𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀚𑁆𑀚𑀦𑀸𑀓𑀸𑀭𑁄, 𑀢𑀢𑁆𑀣 𑀧𑀓𑁆𑀔𑀦𑁆𑀤𑀦𑀸𑀓𑀸𑀭𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀛𑀸𑀦𑀲𑁆𑀲 𑀆𑀤𑀺𑀢𑁄 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀮𑀓𑁆𑀔𑀡𑀸𑀦𑀺. 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀯𑀺𑀦𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀲𑀢𑀺 𑀘 𑀅𑀧𑁆𑀧𑀦𑀸𑀬𑀁 𑀢𑀤𑀪𑀸𑀯𑀢𑁄 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘. 𑀇𑀫𑀺𑀦𑀸 𑀦𑀬𑁂𑀦 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀮𑀓𑁆𑀔𑀡𑀸𑀦𑀜𑁆𑀘 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑁂𑀘𑀺 ¶ 𑀧𑀦 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀲𑀫𑁆𑀪𑀸𑀭𑀺𑀓𑁄 𑀉𑀧𑀘𑀸𑀭𑁄, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫 𑀅𑀧𑁆𑀧𑀦𑀸, 𑀲𑀫𑁆𑀧𑀳𑀁𑀲𑀦𑀸 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 𑀯𑀡𑁆𑀡𑀬𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀢𑀺 𑀅𑀛𑀸𑀦𑀥𑀫𑁆𑀫𑁂𑀳𑀺 𑀛𑀸𑀦𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀦𑀸𑀫 𑀓𑀢𑀁 𑀳𑁄𑀢𑀺. 𑀦 𑀳𑀺 𑀪𑀽𑀫𑀦𑁆𑀢𑀭𑀁 𑀪𑀽𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀳𑁄𑀢𑀺, 𑀧𑀸𑀴𑀺𑀬𑀸 𑀘𑁂𑀢𑀁 𑀯𑀺𑀭𑀼𑀚𑁆𑀛𑀢𑀺. ‘‘𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀜𑁆𑀘𑁂𑀯 𑀳𑁄𑀢𑀺 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑀜𑁆𑀘 𑀜𑀸𑀡𑁂𑀦 𑀘 𑀲𑀫𑁆𑀧𑀳𑀁𑀲𑀺𑀢’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁫𑁮) 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀪𑀸𑀯𑁂𑀦 𑀏𑀓𑀕𑁆𑀕𑀢𑀸𑀬 𑀘 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀢𑀤𑀦𑀼𑀕𑀼𑀡𑀁 𑀏𑀓𑀢𑁆𑀢𑀕𑀢𑀁 𑀲𑀲𑀫𑁆𑀧𑀬𑀼𑀢𑁆𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯 𑀘 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀢𑀸𑀤𑀺 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀢𑁂. 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀏𑀓𑀲𑁆𑀫𑀺𑀁𑀬𑁂𑀯 𑀅𑀧𑁆𑀧𑀦𑀸𑀘𑀺𑀢𑁆𑀢𑀓𑁆𑀔𑀡𑁂 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀆𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀫𑁂𑀯 𑀧𑀭𑀺𑀓𑀫𑁆𑀫𑀸𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸, 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑁂𑀦 𑀧𑀭𑀺𑀬𑁄𑀤𑀸𑀧𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁? 𑀬𑀲𑁆𑀫𑀺𑀁 (𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁫𑁮; 𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁫) 𑀯𑀸𑀭𑁂 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺 ¶ , 𑀢𑀲𑁆𑀫𑀺𑀁 𑀬𑁄 𑀦𑀻𑀯𑀭𑀡𑀲𑀗𑁆𑀔𑀸𑀢𑁄 𑀓𑀺𑀮𑁂𑀲𑀕𑀡𑁄 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀆𑀯𑀭𑀡𑀯𑀺𑀭𑀳𑀺𑀢𑀁 𑀳𑀼𑀢𑁆𑀯𑀸 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺. 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀦𑀸𑀫 𑀲𑀫𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀦𑀸𑀲𑀫𑀸𑀥𑀺𑀬𑁂𑀯, 𑀮𑀻𑀦𑀼𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑀸𑀦𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀸𑀦𑀁 𑀅𑀦𑀼𑀧𑀕𑀫𑀦𑁂𑀦 𑀫𑀚𑁆𑀛𑀺𑀫𑁄, 𑀲𑀯𑀺𑀲𑁂𑀲𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀯𑀽𑀧𑀲𑀫𑀦𑀢𑁄 𑀲𑀫𑀣𑁄, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀢𑁆𑀯𑀸. 𑀢𑀲𑁆𑀲 𑀧𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀁 𑀲𑀢𑀺𑀧𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀪𑀸𑀯𑀪𑁂𑀤𑁂 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀪𑁂𑀤𑁂 𑀘 𑀏𑀓𑀺𑀲𑁆𑀲𑀸𑀬𑁂𑀯 𑀲𑀦𑁆𑀢𑀢𑀺𑀬𑀸 𑀧𑀭𑀺𑀡𑀸𑀫𑀽𑀧𑀕𑀫𑀦𑀢𑁄 𑀏𑀓𑀲𑀦𑁆𑀢𑀢𑀺𑀧𑀭𑀺𑀡𑀸𑀫𑀦𑀬𑁂𑀦 𑀢𑀣𑀢𑁆𑀢𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑀪𑀸𑀯𑀁 𑀉𑀧𑀕𑀘𑁆𑀙𑀫𑀸𑀦𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀣𑀢𑁆𑀢𑀼𑀧𑀕𑀫𑀦𑁂𑀦 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫. 𑀬𑀲𑁆𑀫𑀺𑀜𑁆𑀳𑀺 𑀔𑀡𑁂 𑀢𑀣𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀢𑀣𑀢𑁆𑀢𑀼𑀧𑀕𑀫𑀦𑁂𑀦 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀪𑀸𑀯𑀽𑀧𑀕𑀫𑀦𑁂𑀦 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀦𑀸𑀫. 𑀏𑀯𑀁 𑀢𑀸𑀯 𑀧𑀼𑀭𑀺𑀫𑀲𑁆𑀫𑀺𑀁 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀸 𑀧𑀭𑀺𑀧𑀦𑁆𑀣𑀯𑀺𑀲𑀼𑀤𑁆𑀥𑀺𑀫𑀚𑁆𑀛𑀺𑀫𑀲𑀫𑀣𑀧𑁆𑀧𑀝𑀺𑀧𑀢𑁆𑀢𑀺𑀧𑀓𑁆𑀔𑀦𑁆𑀤𑀦𑀸𑀓𑀸𑀭𑀸 𑀆𑀕𑀫𑀦𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀫𑀸𑀦𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀬𑁂𑀯 𑀳𑀺 𑀆𑀓𑀸𑀭𑀸 𑀧𑀘𑁆𑀘𑀬𑀯𑀺𑀲𑁂𑀲𑀢𑁄 𑀛𑀸𑀦𑀓𑁆𑀔𑀡𑁂 𑀦𑀺𑀧𑁆𑀨𑀚𑁆𑀚𑀫𑀸𑀦𑀸 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀸.

𑀏𑀯𑀁 ¶ 𑀯𑀺𑀲𑀼𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀼𑀦 𑀲𑁄𑀥𑁂𑀢𑀩𑁆𑀩𑀸𑀪𑀸𑀯𑀢𑁄 𑀯𑀺𑀲𑁄𑀥𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀲𑀫𑀣𑀪𑀸𑀯𑀽𑀧𑀕𑀫𑀦𑁂𑀦 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀦 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀲𑀫𑀣𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀢𑁄 𑀏𑀯 𑀘𑀲𑁆𑀲 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀧𑀼𑀦 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑁂 𑀩𑁆𑀬𑀸𑀧𑀸𑀭𑀁 𑀅𑀓𑀭𑁄𑀦𑁆𑀢𑁄 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀏𑀯𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀬𑁂 𑀧𑀦𑁂𑀢𑁂 𑀏𑀯𑀁 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑁂 𑀢𑀲𑁆𑀫𑀺𑀁 𑀛𑀸𑀦𑀘𑀺𑀢𑁆𑀢𑁂 𑀚𑀸𑀢𑀸 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀬𑀼𑀕𑀦𑀤𑁆𑀥𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸, 𑀬𑀸𑀦𑀺 𑀘 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀏𑀓𑀭𑀲𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸𑀦𑀺, 𑀬𑀜𑁆𑀘𑁂𑀲 𑀢𑀤𑀼𑀧𑀕𑀁 𑀢𑁂𑀲𑀁 𑀅𑀦𑀢𑀺𑀯𑀢𑁆𑀢𑀦𑀏𑀓𑀭𑀲𑀲𑀪𑀸𑀯𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀻𑀭𑀺𑀬𑀁 𑀯𑀸𑀳𑀬𑀢𑀺, 𑀬𑀸 𑀘𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀢𑁆𑀢𑀸 𑀆𑀲𑁂𑀯𑀦𑀸, 𑀲𑀩𑁆𑀩𑁂𑀧𑀺 𑀢𑁂 𑀆𑀓𑀸𑀭𑀸 𑀬𑀲𑁆𑀫𑀸 𑀜𑀸𑀡𑁂𑀦 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀢𑀁 𑀢𑀁 𑀆𑀤𑀻𑀦𑀯𑀜𑁆𑀘 𑀆𑀦𑀺𑀲𑀁𑀲𑀜𑁆𑀘 𑀤𑀺𑀲𑁆𑀯𑀸 𑀢𑀣𑀸 𑀢𑀣𑀸 𑀲𑀫𑁆𑀧𑀳𑀁𑀲𑀺𑀢𑀢𑁆𑀢𑀸 𑀯𑀺𑀲𑁄𑀥𑀺𑀢𑀢𑁆𑀢𑀸 𑀧𑀭𑀺𑀬𑁄𑀤𑀸𑀧𑀺𑀢𑀢𑁆𑀢𑀸 𑀦𑀺𑀧𑁆𑀨𑀦𑁆𑀦𑀸, 𑀢𑀲𑁆𑀫𑀸 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑁂𑀦 𑀧𑀭𑀺𑀬𑁄𑀤𑀸𑀧𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁.

𑀅𑀣 ¶ 𑀓𑀲𑁆𑀫𑀸 𑀲𑀫𑁆𑀧𑀳𑀁𑀲𑀦𑀸𑀯 ‘‘𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸, 𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀢𑀺? 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀪𑀸𑀯𑀦𑀸𑀘𑀺𑀢𑁆𑀢𑁂 𑀉𑀧𑁂𑀓𑁆𑀔𑀸𑀯𑀲𑁂𑀦 𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀜𑀸𑀡𑀓𑀺𑀘𑁆𑀘𑀪𑀽𑀢𑀸 𑀲𑀫𑁆𑀧𑀳𑀁𑀲𑀦𑀸 ‘‘𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀅𑀧𑁆𑀧𑀦𑀸𑀓𑀸𑀮𑁂 𑀪𑀸𑀯𑀦𑀸𑀬 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀲𑁆𑀲 𑀘 𑀲𑀼𑀧𑁆𑀧𑀳𑀸𑀦𑀢𑁄 𑀧𑀕𑁆𑀕𑀳𑀸𑀤𑀻𑀲𑀼 𑀩𑁆𑀬𑀸𑀧𑀸𑀭𑀲𑁆𑀲 𑀅𑀓𑀸𑀢𑀩𑁆𑀩𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀯 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺 𑀘 𑀆𑀤𑀺. 𑀲𑀸 𑀧𑀦𑀸𑀬𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀜𑀸𑀡𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀳𑁄𑀢𑀺 𑀯𑀺𑀲𑁂𑀲𑀢𑁄 𑀜𑀸𑀡𑀲𑀸𑀥𑀦𑀢𑁆𑀢𑀸 𑀅𑀧𑁆𑀧𑀦𑀸𑀩𑁆𑀬𑀸𑀧𑀸𑀭𑀲𑁆𑀲, 𑀢𑀲𑁆𑀫𑀸 𑀜𑀸𑀡𑀓𑀺𑀘𑁆𑀘𑀪𑀽𑀢𑀸 𑀲𑀫𑁆𑀧𑀳𑀁𑀲𑀦𑀸 ‘‘𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀏𑀯𑀁 𑀢𑀺𑀯𑀺𑀥𑀸𑀬 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀬𑀸 𑀮𑀤𑁆𑀥𑀯𑀺𑀲𑁂𑀲𑀸𑀬 𑀢𑀺𑀯𑀺𑀥𑀸𑀬 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀬 𑀲𑀸𑀢𑀺𑀲𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀪𑀸𑀯𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀲𑀫𑁆𑀧𑀳𑀁𑀲𑀦𑀸 𑀲𑀺𑀚𑁆𑀛𑀢𑀻𑀢𑀺 𑀆𑀕𑀫𑀦𑀼𑀧𑁂𑀓𑁆𑀔𑀸𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀤𑀲𑀧𑀺 𑀆𑀓𑀸𑀭𑀸 𑀛𑀸𑀦𑁂 𑀏𑀯 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 ¶ 𑀢𑀺𑀯𑀺𑀥𑀢𑁆𑀢𑀕𑀢𑀁 𑀘𑀺𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀣𑁄𑀫𑀦𑀯𑀘𑀦𑀸𑀦𑀺. 𑀢𑀢𑁆𑀣 𑀏𑀯𑀁 𑀢𑀺𑀯𑀺𑀥𑀢𑁆𑀢𑀕𑀢𑀦𑁆𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀦𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀜𑀸𑀡𑀲𑀫𑁆𑀧𑀳𑀁𑀲𑀦𑀸𑀯𑀲𑁂𑀦 𑀢𑀺𑀯𑀺𑀥𑀪𑀸𑀯𑀁 𑀕𑀢𑀁. 𑀯𑀺𑀢𑀓𑁆𑀓𑀲𑀫𑁆𑀧𑀦𑁆𑀦𑀦𑁆𑀢𑀺 𑀓𑀺𑀮𑁂𑀲𑀓𑁆𑀔𑁄𑀪𑀯𑀺𑀭𑀳𑀺𑀢𑀢𑁆𑀢𑀸 𑀯𑀺𑀢𑀓𑁆𑀓𑁂𑀦 𑀲𑀼𑀦𑁆𑀤𑀭𑀪𑀸𑀯𑀫𑀼𑀧𑀕𑀢𑀁. 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀅𑀥𑀺𑀝𑁆𑀞𑀸𑀦𑁂𑀦 𑀲𑀫𑁆𑀧𑀦𑁆𑀦𑀁 𑀅𑀦𑀽𑀦𑀁. 𑀬𑀣𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀬𑀁 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀛𑀸𑀦𑀧𑁆𑀧𑀯𑀢𑁆𑀢𑀺, 𑀢𑀣𑀸 𑀇𑀥𑀸𑀧𑀺 𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀬𑀼𑀚𑁆𑀚𑀢𑀺. 𑀢𑁂𑀦 𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀦 𑀏𑀢𑁆𑀣 𑀯𑀺𑀓𑁆𑀔𑀺𑀧𑀢𑀻𑀢𑀺. 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀫𑀸𑀥𑀺𑀲𑁆𑀲𑁂𑀯 𑀛𑀸𑀦𑀗𑁆𑀕𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀛𑀸𑀦𑀗𑁆𑀕𑀧𑀜𑁆𑀘𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀧𑀜𑁆𑀘𑀓𑀯𑀲𑁂𑀦.

𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦𑀸𑀢𑀺 𑀲𑀓𑀮𑀁 𑀓𑀸𑀬𑀁 𑀅𑀲𑀼𑀪𑀦𑁆𑀢𑀺 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀢𑁆𑀢𑀸 𑀛𑀸𑀦𑀁 𑀅𑀲𑀼𑀪𑀲𑀜𑁆𑀜𑀸, 𑀢𑁂𑀦 𑀧𑀭𑀺𑀘𑀺𑀢𑁂𑀦 𑀧𑀭𑀺𑀪𑀸𑀯𑀺𑀢𑁂𑀦. 𑀘𑁂𑀢𑀲𑀸𑀢𑀺 𑀘𑀺𑀢𑁆𑀢𑁂𑀦. 𑀩𑀳𑀼𑀮𑀦𑁆𑀢𑀺 𑀅𑀪𑀺𑀡𑁆𑀳𑀁. 𑀯𑀺𑀳𑀭𑀢𑁄𑀢𑀺 𑀯𑀺𑀳𑀭𑀦𑁆𑀢𑀲𑁆𑀲, 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀲𑀫𑀗𑁆𑀕𑀺𑀪𑀸𑀯𑀢𑁄. 𑀧𑀝𑀺𑀮𑀻𑀬𑀢𑀻𑀢𑀺 𑀏𑀓𑀧𑀲𑁆𑀲𑁂𑀦 𑀦𑀺𑀮𑀻𑀬𑀢𑀺 𑀦𑀺𑀮𑀻𑀦𑀁 𑀯𑀺𑀬 𑀳𑁄𑀢𑀺. 𑀧𑀝𑀺𑀓𑀼𑀝𑀢𑀻𑀢𑀺 𑀲𑀗𑁆𑀓𑀼𑀘𑀢𑀺. 𑀧𑀝𑀺𑀯𑀢𑁆𑀢𑀢𑀻𑀢𑀺 𑀦𑀺𑀯𑀢𑁆𑀢𑀢𑀺. 𑀦 𑀲𑀫𑁆𑀧𑀲𑀸𑀭𑀻𑀬𑀢𑀻𑀢𑀺 𑀦 𑀯𑀺𑀲𑀭𑀢𑀺, 𑀅𑀪𑀺𑀭𑀢𑀺𑀯𑀲𑁂𑀦 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀝𑀺𑀮𑀻𑀬𑀢𑀻𑀢𑀺 𑀲𑀗𑁆𑀓𑀼𑀘𑀢𑀺 𑀢𑀢𑁆𑀣 𑀧𑀝𑀺𑀓𑀽𑀮𑀢𑀸𑀬 𑀲𑀡𑁆𑀞𑀺𑀢𑀢𑁆𑀢𑀸. 𑀧𑀝𑀺𑀓𑀼𑀝𑀢𑀻𑀢𑀺 𑀅𑀧𑀲𑀓𑁆𑀓𑀢𑀺 𑀦 𑀉𑀧𑀲𑀓𑁆𑀓𑀢𑀺. 𑀧𑀝𑀺𑀯𑀢𑁆𑀢𑀢𑀻𑀢𑀺 𑀦𑀺𑀯𑀢𑁆𑀢𑀢𑀺, 𑀢𑀢𑁄 𑀏𑀯 𑀦 𑀲𑀫𑁆𑀧𑀲𑀸𑀭𑀻𑀬𑀢𑀻𑀢𑀺. 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀦𑁆𑀢𑀺 𑀦𑁆𑀳𑀸𑀭𑀼𑀔𑀡𑁆𑀟𑀁 𑀦𑁆𑀳𑀸𑀭𑀼𑀯𑀺𑀮𑁂𑀔𑀦𑀁 𑀯𑀸.

𑀅𑀤𑁆𑀥𑀫𑀸𑀲𑀦𑁆𑀢𑀺 ¶ 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀁 𑀧𑀝𑀺 𑀧𑀝𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀬𑀁 𑀥𑀫𑁆𑀫𑀘𑀺𑀦𑁆𑀢𑀸𑀬 𑀘𑀺𑀢𑁆𑀢𑀁 𑀦𑀺𑀮𑀻𑀬𑀺𑀢𑀼𑀁. 𑀧𑀬𑀼𑀢𑁆𑀢𑀯𑀸𑀘𑀦𑁆𑀢𑀺 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀘𑀁, 𑀩𑀼𑀤𑁆𑀥𑀸 𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀧𑀺𑀡𑁆𑀟𑀸𑀬 𑀦 𑀘𑀭𑀦𑁆𑀢𑀺, 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀦𑁆𑀢𑀺, 𑀢𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀆𑀤𑀺𑀯𑀘𑀦𑀁.

𑀓𑀮𑁆𑀬𑀸𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀬 𑀉𑀧𑀦𑀺𑀲𑁆𑀲𑀬𑀯𑀲𑁂𑀦. 𑀧𑀭𑁂 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀇𑀘𑁆𑀙𑀸𑀫𑀢𑁆𑀢’’𑀦𑁆𑀢𑀺, 𑀧𑀯𑀢𑁆𑀢𑀺𑀅𑀚𑀸𑀦𑀦𑀁 𑀆𑀭𑁄𑀘𑀬𑀺𑀢𑀸𑀪𑀸𑀯𑁄 𑀜𑀸𑀢𑁂 𑀦𑀺𑀯𑀸𑀭𑀡𑀜𑁆𑀘𑀸𑀢𑀺 𑀇𑀤𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀁 ¶ , 𑀦 𑀧𑀦 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺 ‘‘𑀏𑀢𑀲𑁆𑀫𑀺𑀁 𑀓𑀺𑀭 𑀅𑀟𑁆𑀠𑀫𑀸𑀲𑁂 𑀦 𑀓𑁄𑀘𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀅𑀳𑁄𑀲𑀺, 𑀅𑀣 𑀲𑀢𑁆𑀣𑀸 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀺, 𑀇𑀢𑀺 𑀫𑀬𑁆𑀳𑀜𑁆𑀘𑁂𑀯 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀘 𑀧𑀘𑁆𑀙𑀺𑀫𑀸 𑀚𑀦𑀢𑀸 ‘𑀲𑀢𑁆𑀣𑀸𑀧𑀺 𑀕𑀡𑀁 𑀧𑀳𑀸𑀬 𑀏𑀓𑀓𑁄 𑀯𑀺𑀳𑀸𑀲𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀲𑁆𑀲 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀯𑀫𑀸𑀳𑀸’’𑀢𑀺. 𑀦𑁂𑀯 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀞𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑀁 𑀅𑀜𑁆𑀜𑁄 𑀓𑁄𑀘𑀺 𑀦𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀦 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀤𑀸𑀲𑀺. 𑀲𑁄 𑀧𑀸𑀢𑁄𑀯 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀓𑀢𑁆𑀯𑀸 𑀅𑀧𑀕𑀘𑁆𑀙𑀢𑀺.

𑀅𑀦𑁂𑀓𑀓𑀸𑀭𑀡𑀲𑀫𑁆𑀫𑀺𑀲𑁆𑀲𑁄𑀢𑀺 𑀏𑀢𑁆𑀣 𑀓𑀸𑀬𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀢𑀸𑀯 𑀅𑀦𑁂𑀓𑀓𑀸𑀭𑀡𑀁. 𑀫𑀡𑁆𑀟𑀦𑀓𑀧𑀓𑀢𑀺𑀓𑁄𑀢𑀺 𑀅𑀮𑀗𑁆𑀓𑀸𑀭𑀓𑀲𑀪𑀸𑀯𑁄. 𑀓𑁄𑀘𑀺 𑀢𑀭𑀼𑀡𑁄𑀧𑀺 𑀬𑀼𑀯𑀸 𑀦 𑀳𑁄𑀢𑀺, 𑀓𑁄𑀘𑀺 𑀬𑀼𑀯𑀸𑀧𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀦 𑀳𑁄𑀢𑀺 𑀬𑀣𑀸 𑀉𑀧𑀲𑀦𑁆𑀢𑀲𑀪𑀸𑀯𑁄 𑀆𑀮𑀲𑀺𑀬𑀩𑁆𑀬𑀲𑀦𑀸𑀤𑀻𑀳𑀺 𑀯𑀸 𑀅𑀪𑀺𑀪𑀽𑀢𑁄, 𑀇𑀥 𑀧𑀦 𑀤𑀳𑀭𑁄 𑀘𑁂𑀯 𑀬𑀼𑀯𑀸 𑀘 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀘 𑀅𑀥𑀺𑀧𑁆𑀧𑁂𑀢𑁄. 𑀧𑀞𑀫𑀬𑁄𑀩𑁆𑀩𑀦𑀁 𑀦𑀸𑀫 𑀧𑀦𑁆𑀦𑀭𑀲𑀯𑀲𑁆𑀲𑀢𑁄 𑀬𑀸𑀯 𑀤𑁆𑀯𑀢𑁆𑀢𑀺𑀁𑀲 𑀲𑀁𑀯𑀘𑁆𑀙𑀭𑀸𑀦𑀺, 𑀲𑁄𑀴𑀲𑀯𑀲𑁆𑀲𑀢𑁄 𑀯𑀸 𑀬𑀸𑀯 𑀢𑁂𑀢𑁆𑀢𑀺𑀁𑀲 𑀯𑀲𑁆𑀲𑀸𑀦𑀺. 𑀓𑀼𑀡𑀧𑀦𑁆𑀢𑀺 𑀫𑀢𑀓𑀴𑁂𑀯𑀭𑀁, 𑀅𑀳𑀺𑀲𑁆𑀲 𑀓𑀼𑀡𑀧𑀁 𑀅𑀳𑀺𑀓𑀼𑀡𑀧𑀁. 𑀏𑀯𑀁 𑀇𑀢𑀭𑀸𑀦𑀺𑀧𑀺. 𑀅𑀢𑀺𑀧𑀝𑀺𑀓𑀽𑀮𑀚𑀺𑀕𑀼𑀘𑁆𑀙𑀦𑀻𑀬𑀲𑀪𑀸𑀯𑀢𑁄 𑀘𑁂𑀢𑁆𑀣 𑀇𑀫𑀸𑀦𑁂𑀯 𑀢𑀻𑀡𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀲𑀲𑀲𑀽𑀓𑀭𑀸𑀤𑀻𑀦𑀁 𑀓𑀼𑀡𑀧𑀁 𑀫𑀦𑀼𑀲𑁆𑀲𑀸 𑀓𑀝𑀼𑀓𑀪𑀡𑁆𑀟𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀧𑀺, 𑀇𑀫𑁂𑀲𑀁 𑀧𑀦 𑀓𑀼𑀡𑀧𑀁 𑀅𑀪𑀺𑀦𑀯𑀫𑁆𑀧𑀺 𑀚𑀺𑀕𑀼𑀘𑁆𑀙𑀦𑁆𑀢𑀺𑀬𑁂𑀯, 𑀓𑁄 𑀧𑀦 𑀯𑀸𑀤𑁄 𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀧𑀽𑀢𑀺𑀪𑀽𑀢𑁂. 𑀅𑀢𑀺𑀧𑀝𑀺𑀓𑀽𑀮𑀚𑀺𑀕𑀼𑀘𑁆𑀙𑀦𑀻𑀬𑀢𑀸 𑀘 𑀦𑁂𑀲𑀁 𑀅𑀢𑀺𑀯𑀺𑀬 𑀤𑀼𑀕𑁆𑀕𑀦𑁆𑀥𑀢𑀸𑀬, 𑀲𑀸 𑀘 𑀅𑀳𑀻𑀦𑀁 𑀢𑀺𑀔𑀺𑀡𑀓𑁄𑀧𑀢𑀸𑀬 𑀓𑀼𑀓𑁆𑀓𑀼𑀭𑀫𑀦𑀼𑀲𑁆𑀲𑀸𑀦𑀁 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀢𑀸𑀬 𑀘 𑀲𑀭𑀻𑀭𑀲𑁆𑀲 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀫𑀡𑀓𑀼𑀢𑁆𑀢𑀓𑁄𑀢𑀺 𑀲𑀫𑀡𑀓𑀺𑀘𑁆𑀘𑀓𑁄, 𑀓𑀸𑀲𑀸𑀯𑀦𑀺𑀯𑀸𑀲𑀦𑀸𑀤𑀺𑀯𑀲𑁂𑀦 𑀲𑀫𑀡𑀓𑀺𑀘𑁆𑀘𑀓𑀸𑀭𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀢𑁂𑀦𑀸𑀳 ‘‘𑀲𑀫𑀡𑀯𑁂𑀲𑀥𑀸𑀭𑀓𑁄’’𑀢𑀺. 𑀲𑀩𑁆𑀩𑀫𑀓𑀁𑀲𑀽𑀢𑀺 𑀧𑀼𑀣𑀼𑀚𑁆𑀚𑀦𑀸 𑀲𑀸𑀯𑀚𑁆𑀚𑁂𑀧𑀺 𑀢𑀢𑁆𑀣 𑀅𑀦𑀯𑀚𑁆𑀚𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀓𑀭𑀡𑀓𑀸𑀭𑀸𑀧𑀦𑀲𑀫𑀦𑀼𑀜𑁆𑀜𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑀓𑀁𑀲𑀼. 𑀮𑁄𑀳𑀺𑀢𑀓𑀦𑁆𑀢𑀺 𑀏𑀢𑁆𑀣 ‘‘𑀮𑁄𑀳𑀺𑀢𑀕𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀯𑀕𑁆𑀕𑀽𑀢𑀺 𑀫𑀢𑀸 𑀯𑀕𑁆𑀕𑀼𑀫𑀢𑀸. 𑀧𑀼𑀜𑁆𑀜𑀲𑀫𑁆𑀫𑀢𑀸𑀢𑀺 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑁂𑀦 ¶ 𑀲𑀢𑁆𑀢𑀸𑀦𑀁 𑀧𑀼𑀦𑀦𑁂𑀦 𑀯𑀺𑀲𑁄𑀥𑀦𑁂𑀦 𑀧𑀼𑀜𑁆𑀜𑀦𑁆𑀢𑀺 𑀲𑀫𑁆𑀫𑀢𑀸. 𑀧𑀯𑀸𑀳𑁂𑀲𑁆𑀲𑀸𑀫𑀻𑀢𑀺 𑀕𑀫𑀬𑀺𑀲𑁆𑀲𑀸𑀫𑀺, 𑀯𑀺𑀲𑁄𑀥𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁬𑁩. 𑀫𑀸𑀭𑀥𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸. 𑀯𑀘𑀦𑀢𑁆𑀣𑀢𑁄 𑀧𑀦 𑀫𑀸𑀭𑀲𑁆𑀲 𑀥𑁂𑀬𑁆𑀬𑀁 𑀫𑀸𑀭𑀥𑁂𑀬𑁆𑀬𑀁. 𑀥𑁂𑀬𑁆𑀬𑀦𑁆𑀢𑀺 𑀞𑀸𑀦𑀁 𑀯𑀢𑁆𑀣𑀼 𑀦𑀺𑀯𑀸𑀲𑁄 𑀕𑁄𑀘𑀭𑁄. 𑀫𑀸𑀭𑁄 𑀯𑀸 𑀏𑀢𑁆𑀣 𑀥𑀺𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀸𑀭𑀥𑁂𑀬𑁆𑀬𑀁, 𑀫𑀸𑀭𑁄𑀢𑀺 𑀘𑁂𑀢𑁆𑀣 𑀓𑀺𑀮𑁂𑀲𑀫𑀸𑀭𑁄 𑀅𑀥𑀺𑀧𑁆𑀧𑁂𑀢𑁄, 𑀓𑀺𑀮𑁂𑀲𑀫𑀸𑀭𑀯𑀲𑁂𑀦𑁂𑀯 𑀘 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀓𑀸𑀫𑀪𑀯𑁂 𑀆𑀥𑀺𑀧𑀘𑁆𑀘𑀦𑁆𑀢𑀺. 𑀫𑀸𑀭𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀏𑀯𑀫𑀬𑀁 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀫𑀸𑀭𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀧𑀺, 𑀫𑀬𑀸 𑀧𑀦 𑀏𑀯𑀁 𑀯𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 𑀲𑀁𑀯𑁂𑀕𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀫𑀸𑀭𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸. 𑀤𑁆𑀯𑀺𑀯𑀘𑀦𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀘𑀦𑀁, 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀬𑁄𑀚𑁂𑀦𑁆𑀢𑀻𑀢𑀺 𑀏𑀢𑁆𑀣 𑀅𑀬𑀁 𑀅𑀦𑁆𑀥𑀩𑀸𑀮𑀸 𑀤𑁂𑀯𑀢𑀸 𑀏𑀯𑀁 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀫𑀽𑀮𑀓𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 ‘‘𑀅𑀬𑀁 𑀫𑀸𑀭𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀧𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀜𑁆𑀜𑀸𑀡𑀢𑀸𑀬 ‘‘𑀫𑀢𑀸 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀏𑀯𑀁𑀮𑀤𑁆𑀥𑀺𑀓𑀸𑀧𑀺 𑀲𑀫𑀸𑀦𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀫𑀢𑀸 𑀪𑀺𑀓𑁆𑀔𑀽 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀢𑀁 𑀢𑀢𑁆𑀣 𑀦𑀺𑀬𑁄𑀚𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀺𑀜𑁆𑀘𑀸𑀧𑀺 𑀅𑀲𑀼𑀪𑀓𑀣𑀁 𑀓𑀣𑁂𑀦𑁆𑀢𑁂𑀦 𑀪𑀕𑀯𑀢𑀸 𑀬𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑀭𑀡𑀪𑀬𑀁 𑀦 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀤𑁂𑀲𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀜𑁆𑀘 𑀢𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀓𑀸𑀬𑁂 𑀯𑀺𑀕𑀢𑀙𑀦𑁆𑀤𑀭𑀸𑀕𑀢𑀸𑀬 𑀫𑀭𑀡𑀲𑁆𑀲 𑀅𑀪𑀺𑀧𑀢𑁆𑀣𑀺𑀢𑀪𑀸𑀯𑀢𑁄 𑀪𑀬𑀁 𑀦𑀢𑁆𑀣𑀺, 𑀢𑀁 𑀧𑀦 𑀅𑀲𑀺𑀳𑀢𑁆𑀣𑀁 𑀢𑀣𑀸 𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀤𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀚𑁆𑀚𑀦𑀓𑀪𑀬𑀁 𑀲𑀦𑁆𑀥𑀸𑀬 ‘‘𑀳𑁄𑀢𑀺𑀬𑁂𑀯 𑀪𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀧𑁆𑀧𑀓𑀜𑁆𑀳𑀺 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 ‘‘𑀧𑀜𑁆𑀘𑀲𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁂 𑀘 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀜𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽 𑀲𑀩𑁆𑀩𑁂 𑀘 𑀅𑀭𑀺𑀬𑁂 𑀅𑀬𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁬𑁪. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀲𑀓𑁆𑀓𑀺𑀢𑁆𑀯𑀸 𑀲𑀮𑁆𑀮𑀸𑀦𑀁 𑀦𑀺𑀮𑀻𑀬𑀦𑀁 𑀯𑀺𑀯𑁂𑀘𑀦𑀁, 𑀓𑀸𑀬𑀘𑀺𑀢𑁆𑀢𑁂𑀳𑀺 𑀢𑀢𑁄 𑀯𑀺𑀯𑀺𑀢𑁆𑀢𑀢𑀸 𑀏𑀓𑀻𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀏𑀓𑀻𑀪𑀸𑀯𑀢𑁄’’𑀢𑀺 ¶ , 𑀧𑀯𑀺𑀯𑁂𑀓𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀻𑀪𑀸𑀯𑁄𑀢𑀺 𑀳𑀺 ¶ 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄. 𑀯𑀼𑀝𑁆𑀞𑀺𑀢𑁄𑀢𑀺 𑀢𑀢𑁄 𑀤𑀼𑀯𑀺𑀥𑀯𑀺𑀯𑁂𑀓𑀢𑁄 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀲𑀗𑁆𑀔𑀸𑀭𑀲𑀫𑀸𑀬𑁄𑀕𑁂𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀤𑀺𑀲𑀢𑁆𑀢𑀲𑀫𑀸𑀕𑀫𑁂𑀦 𑀘 𑀅𑀧𑁂𑀢𑁄. 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀕𑀡𑁆𑀳𑀦𑁆𑀢𑀺. 𑀓𑀸𑀫𑀁 𑀤𑀲𑀸𑀦𑀼𑀲𑁆𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀺 𑀕𑀳𑀺𑀢𑀸, 𑀲𑀸 𑀧𑀦 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀲𑀼 𑀩𑀳𑀽𑀦𑀁 𑀲𑀧𑁆𑀧𑀸𑀬𑀸 𑀲𑀸𑀢𑁆𑀣𑀺𑀓𑀸 𑀘, 𑀢𑀲𑁆𑀫𑀸 𑀧𑀼𑀦 𑀕𑀳𑀺𑀢𑀸. 𑀢𑀣𑀸 𑀳𑀺 𑀪𑀕𑀯𑀸 𑀢𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀣𑁂𑀲𑀺. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀲𑀤𑀺𑀲𑀸, 𑀘𑀢𑁆𑀢𑀸𑀭𑁄 𑀧𑀦 𑀆𑀭𑀼𑀧𑁆𑀧𑀸 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀦𑀦𑀼𑀭𑀽𑀧𑀸𑀢𑀺 𑀢𑁂𑀲𑀁 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀯𑁂𑀲𑀸𑀮𑀻𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀦𑁆𑀢𑀺 𑀥𑀫𑁆𑀫𑀲𑀪𑀸𑀬𑀁. 𑀫𑀼𑀳𑀼𑀢𑁆𑀢𑁂𑀦𑁂𑀯𑀸𑀢𑀺 𑀲𑀢𑁆𑀣𑀭𑀺 𑀲𑀤𑁆𑀥𑀫𑁆𑀫𑁂 𑀘 𑀕𑀸𑀭𑀯𑁂𑀦 𑀉𑀧𑀕𑀢𑀪𑀺𑀓𑁆𑀔𑀽𑀦𑀁 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀉𑀝𑁆𑀞𑀳𑀺𑀁𑀲𑀽𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀤𑁂𑀲𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀑𑀳𑀺𑀢𑀲𑁄𑀢𑀸 𑀯𑀺𑀳𑀭𑀦𑁆𑀢𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲. 𑀓𑀸𑀮𑀦𑁆𑀢𑀺 𑀤𑁂𑀲𑀦𑀸𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀦𑀺𑀤𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁫. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀅𑀢𑁆𑀣𑀸𑀬. 𑀅𑀜𑁆𑀜𑀁 𑀧𑀭𑀺𑀬𑀸𑀬𑀦𑁆𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁆𑀣𑀸𑀬 𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀁. 𑀆𑀘𑀺𑀓𑁆𑀔𑀦𑁆𑀢𑁄𑀢𑀺 𑀧𑀲𑀁𑀲𑀸𑀧𑀼𑀩𑁆𑀩𑀓𑀁 𑀤𑁂𑀲𑁂𑀦𑁆𑀢𑁄, 𑀧𑀲𑀁𑀲𑀸 𑀘 𑀢𑀢𑁆𑀣 𑀅𑀪𑀺𑀭𑀼𑀘𑀺𑀚𑀦𑀦𑁂𑀦 𑀉𑀲𑁆𑀲𑀸𑀳𑀦𑀢𑁆𑀣𑀸. 𑀢𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 ‘‘𑀪𑀕𑀯𑀸 𑀇𑀫𑀁 𑀲𑀫𑀸𑀥𑀺𑀁 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑀁𑀲𑀢𑀺, 𑀲𑀦𑁆𑀢𑁄 𑀓𑀺𑀭𑀸𑀬𑀁 𑀲𑀫𑀸𑀥𑀺 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄, 𑀧𑀸𑀧𑀥𑀫𑁆𑀫𑁂 𑀘 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻’’𑀢𑀺 𑀲𑀜𑁆𑀚𑀸𑀢𑀸𑀪𑀺𑀭𑀼𑀘𑀺𑀦𑁄 𑀉𑀲𑁆𑀲𑀸𑀳𑀚𑀸𑀢𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺.

𑀅𑀢𑁆𑀣𑀬𑁄𑀚𑀦𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑀜𑁆𑀘 𑀬𑁄𑀚𑀦𑀓𑁆𑀓𑀫𑀜𑁆𑀘. 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀽𑀢𑀁 𑀲𑀫𑀸𑀥𑀺𑀁 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀢𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀆𑀲𑀦𑁆𑀦𑀁 𑀧𑀘𑁆𑀘𑀓𑁆𑀔𑀜𑁆𑀘 𑀓𑀭𑁄𑀦𑁆𑀢𑁄 ¶ 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 ‘‘𑀅𑀬𑀫𑁆𑀧𑀺 𑀔𑁄’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀭𑀺𑀕𑁆𑀕𑀸𑀳𑀺𑀓𑀸𑀢𑀺 𑀤𑀻𑀖𑀭𑀲𑁆𑀲𑀸𑀤𑀺𑀯𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀘𑁆𑀙𑀺𑀚𑁆𑀚 𑀕𑀸𑀳𑀺𑀓𑀸, 𑀢𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀦𑁄 𑀧𑀲𑁆𑀲𑀸𑀲𑁄 ¶ 𑀦𑁄 𑀅𑀲𑁆𑀲𑀸𑀲𑁄𑀢𑀺 𑀲𑁄 𑀲𑁄𑀬𑁂𑀯 𑀅𑀢𑁆𑀣𑁄 𑀧𑀝𑀺𑀲𑁂𑀥𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀅𑀲𑁆𑀲𑀸𑀲𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀝𑁆𑀞𑀸𑀦𑀁 𑀲𑀢𑀻𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀢𑀸𑀬 𑀢𑀫𑁂𑀯 𑀅𑀲𑁆𑀲𑀸𑀲𑀁 𑀧𑀲𑁆𑀲𑀸𑀲𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁 𑀲𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀆𑀦𑀸𑀧𑀸𑀦𑁂𑀲𑀼 𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀇𑀤𑀸𑀦𑀺 𑀲𑀢𑀺𑀯𑀲𑁂𑀦𑁂𑀯 𑀧𑀼𑀕𑁆𑀕𑀮𑀁 𑀦𑀺𑀤𑁆𑀤𑀺𑀲𑀺𑀢𑀼𑀓𑀸𑀫𑁂𑀦 ‘‘𑀬𑁄 𑀅𑀲𑁆𑀲𑀲𑀢𑀺, 𑀢𑀲𑁆𑀲𑀼𑀧𑀝𑁆𑀞𑀸𑀢𑀺, 𑀬𑁄 𑀧𑀲𑁆𑀲𑀲𑀢𑀺, 𑀢𑀲𑁆𑀲𑀼𑀧𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑁄 𑀅𑀲𑁆𑀲𑀲𑀢𑀺, 𑀢𑀲𑁆𑀲 𑀲𑀢𑀺 𑀅𑀲𑁆𑀲𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀲𑁆𑀲𑀲𑀢𑀺, 𑀢𑀲𑁆𑀲 𑀲𑀢𑀺 𑀧𑀲𑁆𑀲𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄.

𑀬𑀼𑀢𑁆𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁄. 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀧𑀘𑁆𑀘𑀬𑀪𑀽𑀢𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀫𑀸𑀥𑀺𑀲𑁆𑀲 𑀲𑀢𑀺𑀬𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀯𑀘𑀦𑀢𑁄, 𑀤𑀼𑀢𑀺𑀬𑀲𑁆𑀫𑀺𑀁 𑀧𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑁄𑀧𑀺. 𑀉𑀧𑀘𑀸𑀭𑀚𑁆𑀛𑀸𑀦𑀲𑀳𑀕𑀢𑀸 𑀳𑀺 𑀲𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀉𑀪𑀬𑀣𑀸𑀧𑀺 𑀲𑀳𑀚𑀸𑀢𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀧𑀼𑀦 𑀘𑀧𑀭𑀁, 𑀉𑀤𑀸𑀬𑀺, 𑀅𑀓𑁆𑀔𑀸𑀢𑀸 𑀫𑀬𑀸 𑀲𑀸𑀯𑀓𑀸𑀦𑀁 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑀸 𑀫𑁂 𑀲𑀸𑀯𑀓𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁪𑁭) 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀘𑀸’’𑀢𑀺 𑀆𑀳. 𑀢𑀢𑁆𑀣 𑀪𑀸𑀯𑀁 𑀯𑀺𑀚𑁆𑀚𑀫𑀸𑀦𑀢𑀁 𑀇𑀢𑁄 𑀕𑀢𑁄𑀢𑀺 𑀪𑀸𑀯𑀺𑀢𑁄, 𑀉𑀧𑁆𑀧𑀸𑀤𑀺𑀢𑁄 𑀧𑀝𑀺𑀮𑀤𑁆𑀥𑀫𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀦𑁆𑀦𑁄 𑀧𑀦 𑀮𑀤𑁆𑀥𑀸𑀲𑁂𑀯𑀦𑁄 𑀪𑀸𑀯𑀺𑀢𑁄, 𑀧𑀕𑀼𑀡𑀪𑀸𑀯𑀁 𑀆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀩𑀳𑀼𑀮𑀻𑀓𑀢𑁄𑀢𑀺 𑀩𑀳𑀼𑀮𑀁 𑀧𑀯𑀢𑁆𑀢𑀺𑀢𑁄. 𑀢𑁂𑀦 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀫𑀸𑀳. 𑀬𑁄 𑀳𑀺 𑀯𑀲𑀻𑀪𑀸𑀯𑀁 𑀆𑀧𑀸𑀤𑀺𑀢𑁄, 𑀲𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀢𑁄’’𑀢𑀺. 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧) 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨) 𑀘 𑀏𑀯𑀫𑀸𑀤𑀻𑀲𑀼 𑀧𑀞𑀫𑀧𑀤𑁂 𑀯𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄 ¶ 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀆𑀳 ‘‘𑀉𑀪𑀬𑀢𑁆𑀣 𑀏𑀯-𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀉𑀪𑀬𑀧𑀤𑀦𑀺𑀬𑀫𑁂𑀦 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑀁 𑀛𑀸𑀦𑀫𑀸𑀳. 𑀢𑀜𑁆𑀳𑀺 𑀅𑀲𑀼𑀪𑁂𑀲𑀼 𑀬𑁄𑀕𑀓𑀫𑁆𑀫𑀪𑀸𑀯𑀢𑁄 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀘 ‘‘𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀯𑀮𑀦𑁆𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀛𑀸𑀦𑀧𑀝𑀺𑀯𑁂𑀥𑀯𑀲𑁂𑀦. 𑀛𑀸𑀦𑀜𑁆𑀳𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀇𑀚𑁆𑀛𑀦𑁆𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀘𑀸𑀢𑀺 𑀧𑀝𑀺𑀯𑁂𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀩𑀻𑀪𑀘𑁆𑀙𑀸𑀭𑀫𑁆𑀫𑀡𑀢𑁆𑀢𑀸. 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸. 𑀧𑀭𑀺𑀬𑀸𑀬𑁂𑀦𑀸𑀢𑀺 ¶ 𑀓𑀸𑀭𑀡𑁂𑀦 𑀮𑁂𑀲𑀦𑁆𑀢𑀭𑁂𑀦 𑀯𑀸. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀺𑀘𑁂𑀢𑀩𑁆𑀩𑀢𑀁 𑀧𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀧𑀭𑀫𑀲𑀼𑀔𑀼𑀫𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀦𑁆𑀢𑁂 𑀳𑀺 𑀲𑀦𑁆𑀦𑀺𑀲𑀺𑀦𑁆𑀦𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀲𑀬𑀫𑁆𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄’’𑀢𑀺, 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀢𑀤𑀸𑀭𑀫𑁆𑀫𑀡𑀸𑀦𑀁 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀤𑀻𑀧𑁂𑀢𑀩𑁆𑀩𑀸.

𑀦𑀸𑀲𑁆𑀲 𑀲𑀦𑁆𑀢𑀧𑀡𑀻𑀢𑀪𑀸𑀯𑀸𑀯𑀳𑀁 𑀓𑀺𑀜𑁆𑀘𑀺 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄, 𑀅𑀲𑁂𑀘𑀦𑀓𑀢𑁆𑀢𑀸 𑀅𑀦𑀸𑀲𑀺𑀢𑁆𑀢𑀓𑁄, 𑀅𑀦𑀸𑀲𑀺𑀢𑁆𑀢𑀓𑀢𑁆𑀢𑀸 𑀏𑀯 𑀅𑀩𑁆𑀩𑁄𑀓𑀺𑀡𑁆𑀡𑁄 𑀅𑀲𑀫𑁆𑀫𑀺𑀲𑁆𑀲𑁄 𑀧𑀭𑀺𑀓𑀫𑁆𑀫𑀸𑀤𑀺𑀦𑀸, 𑀢𑀢𑁄𑀬𑁂𑀯 𑀧𑀸𑀝𑀺𑀬𑁂𑀓𑁆𑀓𑁄, 𑀯𑀺𑀲𑀼𑀁𑀬𑁂𑀯𑁂𑀓𑁄 𑀆𑀯𑁂𑀡𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀲𑀩𑁆𑀩𑀫𑁂𑀢𑀁 𑀲𑀭𑀲𑀢𑁄 𑀏𑀯 𑀲𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀧𑀭𑀺𑀓𑀫𑁆𑀫𑀁 𑀯𑀸 𑀲𑀦𑁆𑀢𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀘 𑀓𑀲𑀺𑀡𑀓𑀭𑀡𑀸𑀤𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀁, 𑀢𑀸𑀤𑀺𑀲𑀁 𑀇𑀥 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀭𑀲𑁆𑀲𑀸𑀤𑀢𑁆𑀢𑀸 𑀅𑀲𑀦𑁆𑀢𑀁 𑀅𑀧𑁆𑀧𑀡𑀻𑀢𑀁 𑀲𑀺𑀬𑀸. 𑀉𑀧𑀘𑀸𑀭𑁂𑀦 𑀯𑀸 𑀦𑀢𑁆𑀣𑀺 𑀏𑀢𑁆𑀣 𑀲𑀦𑁆𑀢𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀉𑀧𑀘𑀸𑀭𑀓𑁆𑀔𑀡𑁂 𑀦𑀻𑀯𑀭𑀡𑀯𑀺𑀕𑀫𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘 𑀧𑀭𑁂𑀲𑀁 𑀲𑀦𑁆𑀢𑀢𑀸 𑀳𑁄𑀢𑀺, 𑀦 𑀏𑀯𑀫𑀺𑀫𑀲𑁆𑀲. 𑀅𑀬𑀁 𑀧𑀦 𑀆𑀤𑀺𑀫𑀦𑀲𑀺…𑀧𑁂… 𑀧𑀡𑀻𑀢𑁄 𑀘𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀅𑀦𑀸𑀲𑀺𑀢𑁆𑀢𑀓𑁄𑀢𑀺 𑀉𑀧𑀲𑁂𑀘𑀦𑁂𑀦 𑀅𑀦𑀸𑀲𑀺𑀢𑁆𑀢𑀓𑁄. 𑀢𑁂𑀦𑀸𑀳 ‘‘𑀑𑀚𑀯𑀦𑁆𑀢𑁄’’𑀢𑀺, 𑀑𑀚𑀯𑀦𑁆𑀢𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀫𑀥𑀼𑀭𑁄𑀢𑀺 𑀇𑀝𑁆𑀞𑁄. 𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀉𑀧𑁂𑀓𑁆𑀔𑀸𑀬 𑀯𑀸 𑀲𑀦𑁆𑀢𑀪𑀸𑀯𑁂𑀦 𑀲𑀼𑀔𑀕𑀢𑀺𑀓𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀲𑀭𑀻𑀭𑀢𑀸𑀯𑀲𑁂𑀦 𑀧𑀦 𑀓𑀸𑀬𑀺𑀓𑀲𑀼𑀔𑀧𑁆𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 ¶ 𑀤𑀝𑁆𑀞𑀩𑁆𑀩𑀁, 𑀢𑀜𑁆𑀘 𑀔𑁄 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁂. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂𑀢𑀺 𑀇𑀤𑀁 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀯𑀺𑀓𑁆𑀔𑀫𑁆𑀪𑀺𑀢𑁂𑀢𑀺 𑀛𑀸𑀦𑁂𑀦 𑀲𑀓𑀲𑀦𑁆𑀢𑀸𑀦𑀢𑁄 𑀅𑀦𑀻𑀳𑀝𑁂 𑀅𑀧𑁆𑀧𑀳𑀻𑀦𑁂. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀢𑀺 𑀅𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸, 𑀢𑀢𑁄 𑀲𑀫𑁆𑀪𑀽𑀢𑁂. 𑀅𑀯𑀺𑀚𑁆𑀚𑀸𑀧𑀼𑀩𑁆𑀩𑀗𑁆𑀕𑀫𑀸 𑀳𑀺 𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑀸. 𑀔𑀡𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀦𑁂𑀯. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀏𑀢𑁆𑀣 𑀅𑀦𑁆𑀢𑀭𑀥𑀸𑀧𑀦𑀁 𑀯𑀺𑀦𑀸𑀲𑀦𑀁. 𑀢𑀁 𑀧𑀦 𑀛𑀸𑀦𑀓𑀢𑁆𑀢𑀼𑀓𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀓𑁆𑀔𑀫𑁆𑀪𑁂𑀢𑀻’’𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀯𑀺𑀲𑁂𑀲𑁂𑀦 𑀉𑀧𑀲𑀫𑁂𑀢𑀺. 𑀯𑀺𑀲𑁂𑀲𑁂𑀦 𑀉𑀧𑀲𑀫𑀦𑀁 𑀧𑀦 𑀲𑀫𑁆𑀫𑀤𑁂𑀯 𑀉𑀧𑀲𑀫𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀻’’𑀢𑀺.

𑀦𑀦𑀼 𑀘 𑀅𑀜𑁆𑀜𑁄𑀧𑀺 𑀲𑀫𑀸𑀥𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀦𑁂𑀯 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀺, 𑀅𑀣 𑀓𑀲𑁆𑀫𑀸 𑀅𑀬𑀫𑁂𑀯 𑀲𑀫𑀸𑀥𑀺 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄𑀢𑀺? 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀦𑀸𑀦𑀸𑀯𑀺𑀢𑀓𑁆𑀓𑀯𑀽𑀧𑀲𑀫𑀦𑀲𑀩𑁆𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸’’𑀢𑀺 ¶ (𑀅. 𑀦𑀺. 𑁯.𑁧; 𑀉𑀤𑀸. 𑁩𑁧). 𑀅𑀧𑀺𑀘 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀜𑀸𑀡𑀼𑀢𑁆𑀢𑀭𑀲𑁆𑀲𑁂𑀢𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀜𑀸𑀡𑀼𑀢𑁆𑀢𑀭𑀲𑁆𑀲 𑀘 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀇𑀢𑀭𑁂𑀳𑀺 𑀲𑀸𑀢𑀺𑀲𑀬𑀁 𑀬𑀣𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲, 𑀢𑀲𑁆𑀫𑀸 𑀇𑀫𑀁 𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 ‘‘𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑁂 𑀲𑀢𑀺 𑀔𑀡𑁂𑀦𑁂𑀯 𑀅𑀗𑁆𑀕𑀧𑀸𑀢𑀼𑀪𑀸𑀯𑀲𑀩𑁆𑀪𑀸𑀯𑀢𑁄 𑀅𑀬𑀫𑁂𑀯 𑀲𑀫𑀸𑀥𑀺 ‘‘𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑁄 𑀬𑀣𑀸 𑀢𑀁 𑀫𑀳𑀢𑁄 𑀅𑀓𑀸𑀮𑀫𑁂𑀖𑀲𑁆𑀲 𑀉𑀝𑁆𑀞𑀺𑀢𑀲𑁆𑀲 𑀥𑀸𑀭𑀸𑀦𑀺𑀧𑀸𑀢𑁂 𑀔𑀡𑁂𑀦𑁂𑀯 𑀧𑀣𑀯𑀺𑀬𑀁 𑀭𑀚𑁄𑀚𑀮𑁆𑀮𑀲𑁆𑀲 𑀯𑀽𑀧𑀲𑀫𑁄. 𑀢𑁂𑀦𑁂𑀯𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀉𑀝𑁆𑀞𑀺𑀢𑁄’’𑀢𑀺𑀆𑀤𑀺. 𑀲𑀸𑀲𑀦𑀺𑀓𑀲𑁆𑀲 𑀛𑀸𑀦𑀪𑀸𑀯𑀦𑀸 𑀬𑁂𑀪𑀼𑀬𑁆𑀬𑁂𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸’’𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀏𑀓𑀁𑀲𑁂𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀯 𑀳𑁄𑀢𑀺. 𑀇𑀫𑀫𑁂𑀯 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀽𑀢𑁄 𑀅𑀬𑀁 𑀲𑀫𑀸𑀥𑀺 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄’’𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀲𑀫𑁆𑀫𑀤𑁂𑀯 𑀬𑀼𑀚𑁆𑀚𑀢𑀺.

𑀓𑀣𑀦𑁆𑀢𑀺 ¶ 𑀇𑀤𑀁 𑀧𑀼𑀘𑁆𑀙𑀦𑀸𑀓𑀸𑀭𑀯𑀺𑀪𑀸𑀯𑀦𑀧𑀤𑀁, 𑀧𑀼𑀘𑁆𑀙𑀸 𑀘𑁂𑀢𑁆𑀣 𑀓𑀣𑁂𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀅𑀜𑁆𑀜𑁂𑀲𑀁 𑀅𑀲𑀫𑁆𑀪𑀯𑀢𑁄, 𑀲𑀸 𑀘 𑀉𑀧𑀭𑀺 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸𑀦𑀁 𑀲𑀩𑁆𑀩𑁂𑀲𑀁 𑀧𑀓𑀸𑀭𑀯𑀺𑀲𑁂𑀲𑀸𑀦𑀁 𑀆𑀫𑀲𑀦𑀯𑀲𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣𑀦𑁆𑀢𑀺…𑀧𑁂… 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸’’𑀢𑀺 𑀆𑀳. 𑀓𑀣𑀁 𑀩𑀳𑀼𑀮𑀻𑀓𑀢𑁄𑀢𑀺 𑀏𑀢𑁆𑀣𑀸𑀧𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀣𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀩𑀳𑀼𑀮𑀻𑀓𑀸𑀭𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀩𑀳𑀼𑀮𑀻𑀓𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀢𑀣𑀸 𑀧𑀼𑀝𑁆𑀞𑀥𑀫𑁆𑀫𑀦𑀺𑀤𑀲𑁆𑀲𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸𑀬𑁂𑀯 𑀅𑀢𑀺𑀤𑀺𑀲𑁆𑀲𑀢𑀺. 𑀳𑁂𑀝𑁆𑀞𑀸 𑀧𑀧𑀜𑁆𑀘𑀯𑀲𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺 𑀆𑀳, 𑀧𑀺𑀡𑁆𑀟𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀫𑀢𑁆𑀣𑀦𑁆𑀢𑀺 𑀢𑀁 ‘‘𑀓𑀣𑀁 𑀪𑀸𑀯𑀺𑀢𑁄’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁. ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯𑁧; 𑀅. 𑀦𑀺. 𑁩.𑁬𑁧) 𑀇𑀥-𑀲𑀤𑁆𑀤𑁄 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄. ‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁬𑁯) 𑀑𑀓𑀸𑀲𑀁. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦) 𑀧𑀤𑀧𑀽𑀭𑀡𑀫𑀢𑁆𑀢𑀁. ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁭𑁩) 𑀧𑀦 𑀲𑀸𑀲𑀦𑀁. ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽’’𑀢𑀺 𑀇𑀥𑀸𑀧𑀺 𑀲𑀸𑀲𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀧𑁆𑀧𑀓𑀸𑀭𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀓𑀲𑁆𑀲𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀕𑁆𑀕𑀳𑀡𑀁 𑀲𑁄𑀴𑀲 𑀧𑀓𑀸𑀭𑁂 𑀲𑀦𑁆𑀥𑀸𑀬. 𑀢𑁂 𑀳𑀺 ¶ 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂. 𑀩𑀸𑀳𑀺𑀭𑀓𑀸 𑀳𑀺 𑀚𑀸𑀦𑀦𑁆𑀢𑀸 𑀆𑀤𑀺𑀢𑁄 𑀘𑀢𑀼𑀧𑁆𑀧𑀓𑀸𑀭𑀫𑁂𑀯 𑀚𑀸𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑁆𑀧𑀝𑀺𑀲𑁂𑀥𑀦𑁄’’𑀢𑀺, 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀧𑁆𑀧𑀝𑀺𑀲𑁂𑀥𑀦𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 ‘‘𑀇𑀥, 𑀪𑀺𑀓𑁆𑀔𑀯𑁂’’𑀢𑀺 𑀇𑀤𑀁 𑀅𑀦𑁆𑀢𑁄𑀕𑀥𑀏𑀯-𑀲𑀤𑁆𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀺 𑀳𑀺 𑀏𑀓𑀧𑀤𑀸𑀦𑀺𑀧𑀺 𑀅𑀯𑀥𑀸𑀭𑀡𑀸𑀦𑀺 𑀬𑀣𑀸 𑀯𑀸𑀬𑀼𑀪𑀓𑁆𑀔𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄’’𑀢𑀺𑀆𑀤𑀺. 𑀧𑀭𑀺𑀧𑀼𑀡𑁆𑀡𑀲𑀫𑀡𑀓𑀭𑀡𑀥𑀫𑁆𑀫𑁄 𑀳𑀺 𑀬𑁄, 𑀲𑁄 𑀲𑀩𑁆𑀩𑀧𑁆𑀧𑀓𑀸𑀭𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀓𑁄. 𑀧𑀭𑀧𑁆𑀧𑀯𑀸𑀤𑀸𑀢𑀺 𑀧𑀭𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀯𑀸𑀤𑀸 𑀢𑀺𑀢𑁆𑀣𑀸𑀬𑀢𑀦𑀸𑀦𑀺.

𑀅𑀭𑀜𑁆𑀜𑀸𑀤𑀺𑀓𑀲𑁆𑀲𑁂𑀯 ¶ 𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀤𑁆𑀤𑀫𑁄 𑀤𑀫𑀣𑀁 𑀅𑀦𑀼𑀧𑀕𑀢𑁄 𑀕𑁄𑀡𑁄 𑀓𑀽𑀝𑀕𑁄𑀡𑁄. 𑀬𑀣𑀸 𑀣𑀦𑁂𑀳𑀺 𑀲𑀩𑁆𑀩𑀲𑁄 𑀔𑀻𑀭𑀁 𑀦 𑀧𑀕𑁆𑀖𑀭𑀢𑀺, 𑀏𑀯𑀁 𑀤𑁄𑀳𑀧𑀝𑀺𑀩𑀦𑁆𑀥𑀺𑀦𑀻 𑀓𑀽𑀝𑀥𑁂𑀦𑀼. 𑀅𑀲𑁆𑀲𑀸𑀢𑀺 𑀕𑁄𑀧𑀲𑁆𑀲. 𑀭𑀽𑀧𑀲𑀤𑁆𑀤𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀅𑀲𑁆𑀲𑀸𑀤𑁄 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑁄. 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀦𑁆𑀢𑀺 𑀧𑀩𑁆𑀩𑀚𑀺𑀢𑀢𑁄 𑀧𑀼𑀩𑁆𑀩𑁂, 𑀅𑀦𑀸𑀤𑀺𑀫𑀢𑀺 𑀯𑀸 𑀲𑀁𑀲𑀸𑀭𑁂 𑀧𑀭𑀺𑀘𑀺𑀢𑀸𑀭𑀫𑁆𑀫𑀡𑀁. 𑀉𑀧𑀘𑀸𑀭𑀯𑀲𑁂𑀦 𑀉𑀧𑀦𑀺𑀲𑀻𑀤𑀢𑀺, 𑀅𑀧𑁆𑀧𑀦𑀸𑀯𑀲𑁂𑀦 𑀉𑀧𑀦𑀺𑀧𑀚𑁆𑀚𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀦𑀺𑀩𑀦𑁆𑀥𑁂𑀬𑁆𑀬𑀸𑀢𑀺 𑀩𑀦𑁆𑀥𑁂𑀬𑁆𑀬. 𑀲𑀢𑀺𑀬𑀸𑀢𑀺 𑀲𑀫𑁆𑀫𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀲𑀮𑁆𑀮𑀓𑁆𑀔𑀡𑀯𑀲𑀧𑁆𑀧𑀯𑀢𑁆𑀢𑀸𑀬 𑀲𑀢𑀺𑀬𑀸. 𑀆𑀭𑀫𑁆𑀫𑀡𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂. 𑀤𑀴𑁆𑀳𑀦𑁆𑀢𑀺 𑀣𑀺𑀭𑀁, 𑀬𑀣𑀸 𑀲𑀢𑁄𑀓𑀸𑀭𑀺𑀲𑁆𑀲 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄 𑀲𑀫𑀸𑀥𑀺 𑀇𑀚𑁆𑀛𑀢𑀺, 𑀢𑀣𑀸 𑀣𑀸𑀫𑀕𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀫𑀼𑀤𑁆𑀥𑀪𑀽𑀢𑀦𑁆𑀢𑀺 𑀲𑀦𑁆𑀢𑀢𑀸𑀤𑀺𑀯𑀺𑀲𑁂𑀲𑀕𑀼𑀡𑀯𑀦𑁆𑀢𑀢𑀸𑀬 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀲𑀫𑀸𑀲𑁂𑀯𑀺𑀢𑀪𑀸𑀯𑀢𑁄 𑀘 𑀫𑀼𑀤𑁆𑀥𑀲𑀤𑀺𑀲𑀁, 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁 𑀏𑀓𑀘𑁆𑀘𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀘𑁂𑀯 𑀅𑀜𑁆𑀜𑀓𑀫𑁆𑀫𑀝𑁆𑀞𑀸𑀦𑁂𑀦 𑀅𑀥𑀺𑀕𑀢𑀯𑀺𑀲𑁂𑀲𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲 𑀘 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀪𑀕𑀯𑀸 𑀬𑁄𑀕𑀻𑀦𑀁 𑀅𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀼𑀧𑀤𑀺𑀲𑁆𑀲𑀦𑀢𑁄. 𑀪𑀺𑀓𑁆𑀔𑀼 𑀤𑀻𑀧𑀺𑀲𑀤𑀺𑀲𑁄 𑀅𑀭𑀜𑁆𑀜𑁂 𑀏𑀓𑀓𑁄 𑀯𑀺𑀳𑀭𑀺𑀢𑁆𑀯𑀸 𑀧𑀝𑀺𑀧𑀓𑁆𑀔𑀦𑀺𑀫𑁆𑀫𑀣𑀦𑁂𑀦 𑀇𑀘𑁆𑀙𑀺𑀢𑀢𑁆𑀣𑀲𑀸𑀥𑀦𑀢𑁄. 𑀨𑀮𑀫𑀼𑀢𑁆𑀢𑀫𑀦𑁆𑀢𑀺 𑀲𑀸𑀫𑀜𑁆𑀜𑀨𑀮𑀫𑀸𑀳. 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀦𑁆𑀢𑀺 𑀪𑀸𑀯𑀦𑀼𑀲𑁆𑀲𑀸𑀳𑀚𑀯𑀲𑁆𑀲 𑀬𑁄𑀕𑁆𑀕𑀓𑀭𑀡𑀪𑀽𑀫𑀺𑀪𑀽𑀢𑀁.

𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀲𑀽𑀢𑀺 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀮𑀓𑁆𑀔𑀡𑁂𑀲𑀼. 𑀭𑀼𑀓𑁆𑀔𑀲𑀫𑀻𑀧𑀦𑁆𑀢𑀺 ‘‘𑀬𑀸𑀯𑀢𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑀝𑁆𑀞𑀸𑀦𑀁. 𑀅𑀯𑀲𑁂𑀲𑀲𑀢𑁆𑀢𑀯𑀺𑀥𑀲𑁂𑀦𑀸𑀲𑀦𑀦𑁆𑀢𑀺 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑁆𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀉𑀢𑀼𑀢𑁆𑀢𑀬𑀸𑀦𑀼𑀓𑀽𑀮𑀁 𑀥𑀸𑀢𑀼𑀘𑀭𑀺𑀬𑀸𑀦𑀼𑀓𑀽𑀮𑀦𑁆𑀢𑀺 𑀕𑀺𑀫𑁆𑀳𑀸𑀤𑀺𑀉𑀢𑀼𑀢𑁆𑀢𑀬𑀲𑁆𑀲 𑀲𑁂𑀫𑁆𑀳𑀸𑀤𑀺𑀥𑀸𑀢𑀼𑀢𑁆𑀢𑀬𑀲𑁆𑀲 𑀫𑁄𑀳𑀸𑀤𑀺𑀘𑀭𑀺𑀢𑀢𑁆𑀢𑀬𑀲𑁆𑀲 ¶ 𑀘 𑀅𑀦𑀼𑀓𑀽𑀮𑀁. 𑀢𑀣𑀸 𑀳𑀺 𑀕𑀺𑀫𑁆𑀳𑀓𑀸𑀮𑁂 𑀅𑀭𑀜𑁆𑀜𑀁 𑀅𑀦𑀼𑀓𑀽𑀮𑀁 𑀲𑁄𑀫𑁆𑀫𑀲𑀻𑀢𑀮𑀪𑀸𑀯𑀢𑁄, 𑀳𑁂𑀫𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑀁 𑀳𑀺𑀫𑀧𑀸𑀢𑀦𑀺𑀯𑀸𑀭𑀡𑀢𑁄, 𑀯𑀲𑁆𑀲𑀓𑀸𑀮𑁂 𑀲𑀼𑀜𑁆𑀜𑀸𑀕𑀸𑀭𑀁 𑀯𑀲𑁆𑀲𑀦𑀺𑀯𑀸𑀭𑀡𑀕𑁂𑀳𑀲𑀫𑁆𑀪𑀯𑀢𑁄. 𑀲𑁂𑀫𑁆𑀳𑀥𑀸𑀢𑀼𑀓𑀲𑁆𑀲 𑀲𑁂𑀫𑁆𑀳𑀧𑀓𑀢𑀺𑀓𑀲𑁆𑀲 𑀅𑀭𑀜𑁆𑀜𑀁 𑀅𑀦𑀼𑀓𑀽𑀮𑀁 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀡𑁂𑀦 𑀲𑁂𑀫𑁆𑀳𑀲𑁆𑀲 𑀯𑀽𑀧𑀲𑀫𑀦𑀢𑁄, 𑀧𑀺𑀢𑁆𑀢𑀥𑀸𑀢𑀼𑀓𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀅𑀦𑀼𑀓𑀽𑀮𑀁 𑀲𑀻𑀢𑀯𑀸𑀢𑀲𑀫𑁆𑀨𑀲𑁆𑀲𑀲𑀫𑁆𑀪𑀯𑀢𑁄 ¶ , 𑀯𑀸𑀢𑀥𑀸𑀢𑀼𑀓𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑀁 𑀅𑀦𑀼𑀓𑀽𑀮𑀁 𑀯𑀸𑀢𑀦𑀺𑀯𑀸𑀭𑀡𑀢𑁄. 𑀫𑁄𑀳𑀘𑀭𑀺𑀢𑀲𑁆𑀲 𑀅𑀭𑀜𑁆𑀜𑀁 𑀅𑀦𑀼𑀓𑀽𑀮𑀁. 𑀫𑀳𑀸𑀅𑀭𑀜𑁆𑀜𑁂 𑀳𑀺 𑀘𑀺𑀢𑁆𑀢𑀁 𑀦 𑀲𑀗𑁆𑀓𑀼𑀘𑀢𑀺 𑀯𑀺𑀯𑀝𑀗𑁆𑀕𑀡𑀪𑀸𑀯𑀢𑁄, 𑀤𑁄𑀲𑀘𑀭𑀺𑀢𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀅𑀦𑀼𑀓𑀽𑀮𑀁 𑀧𑀲𑀸𑀤𑀦𑀻𑀬𑀪𑀸𑀯𑀢𑁄, 𑀭𑀸𑀕𑀘𑀭𑀺𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑀁 𑀅𑀦𑀼𑀓𑀽𑀮𑀁 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀦𑀁 𑀧𑀯𑁂𑀲𑀦𑀺𑀯𑀸𑀭𑀡𑀢𑁄. 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀦𑁆𑀢𑀺 𑀅𑀲𑀗𑁆𑀓𑁄𑀘𑀸𑀯𑀺𑀓𑁆𑀔𑁂𑀧𑀧𑀓𑁆𑀔𑀺𑀓𑀁. 𑀲𑀬𑀦𑀜𑁆𑀳𑀺 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀁, 𑀞𑀸𑀦𑀘𑀗𑁆𑀓𑀫𑀦𑀸𑀦𑀺 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀺, 𑀦 𑀏𑀯𑀁 𑀦𑀺𑀲𑀚𑁆𑀚𑀸. 𑀢𑀢𑁄 𑀏𑀯 𑀢𑀲𑁆𑀲𑀸 𑀲𑀦𑁆𑀢𑀢𑀸. 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑀁 𑀧𑀮𑁆𑀮𑀗𑁆𑀓𑀸𑀪𑀼𑀚𑀦𑁂𑀦, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀦𑀲𑀼𑀔𑀢𑀁 𑀉𑀧𑀭𑀺𑀫𑀓𑀸𑀬𑀲𑁆𑀲 𑀉𑀚𑀼𑀓𑀝𑁆𑀞𑀧𑀦𑁂𑀦, 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑀁 𑀧𑀭𑀺𑀫𑀼𑀔𑀁 𑀲𑀢𑀺𑀬𑀸 𑀞𑀧𑀦𑁂𑀦 𑀤𑀲𑁆𑀲𑁂𑀦𑁆𑀢𑁄.

𑀊𑀭𑀼𑀩𑀤𑁆𑀥𑀸𑀲𑀦𑀦𑁆𑀢𑀺 𑀊𑀭𑀽𑀦𑀫𑀥𑁄𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀸. 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀅𑀦𑀼𑀚𑀼𑀓𑀁 𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺. 𑀉𑀚𑀼𑀁 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄𑀢𑀺 𑀆𑀳 𑁋 ‘‘𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀚𑀼𑀓𑀝𑁆𑀞𑀧𑀦𑀁 𑀲𑀭𑀽𑀧𑀢𑁄 𑀧𑀬𑁄𑀚𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀡𑀫𑀦𑁆𑀢𑀺. 𑀦 𑀧𑀭𑀺𑀧𑀢𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀯𑀻𑀣𑀺𑀁 𑀦 𑀯𑀺𑀮𑀗𑁆𑀖𑁂𑀢𑀺, 𑀢𑀢𑁄 𑀏𑀯 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺. 𑀇𑀥 𑀧𑀭𑀺-𑀲𑀤𑁆𑀤𑁄 𑀅𑀪𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬, 𑁨𑁦) 𑀯𑀺𑀬. 𑀦𑀺𑀬𑁆𑀬𑀸𑀦𑀝𑁆𑀞𑁄 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄, 𑀢𑀲𑁆𑀫𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀢𑁄𑀯𑀸𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀲𑀭𑀦𑁆𑀢𑁄 𑀏𑀯 𑀅𑀲𑁆𑀲𑀲𑀢𑀺, 𑀦𑀸𑀲𑁆𑀲 𑀓𑀸𑀘𑀺 𑀲𑀢𑀺𑀯𑀺𑀭𑀳𑀺𑀢𑀸 𑀅𑀲𑁆𑀲𑀸𑀲𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁄 𑀧𑀲𑁆𑀲𑀲𑀢𑀻𑀢𑀺 𑀏𑀢𑁆𑀣𑀸𑀧𑀺 𑀲𑀢𑁄𑀯 𑀧𑀲𑁆𑀲𑀲𑀢𑀻𑀢𑀺 𑀏𑀯-𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀲𑀢𑁄𑀓𑀸𑀭𑀻𑀢𑀺 𑀲𑀢𑁄 𑀏𑀯 𑀳𑀼𑀢𑁆𑀯𑀸 𑀲𑀢𑀺𑀬𑀸 𑀏𑀯 𑀯𑀸 𑀓𑀸𑀢𑀩𑁆𑀩𑀲𑁆𑀲 𑀓𑀢𑁆𑀢𑀸, 𑀓𑀭𑀡𑀲𑀻𑀮𑁄 𑀯𑀸.

𑀩𑀸𑀢𑁆𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀻𑀢𑀺 𑀘𑀢𑀽𑀲𑀼 𑀘𑀢𑀼𑀓𑁆𑀓𑁂𑀲𑀼 𑀆𑀕𑀢𑀸𑀦𑀺 𑀤𑀻𑀖𑀭𑀲𑁆𑀲𑀸𑀤𑀻𑀦𑀺 𑀲𑁄𑀴𑀲 𑀧𑀤𑀸𑀦𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀤𑀻𑀖𑀫𑀲𑁆𑀲𑀸𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀧𑀲𑁆𑀲𑀸𑀲𑀧𑀭𑀺𑀬𑀦𑁆𑀢𑁂𑀳𑀺 𑀩𑀸𑀢𑁆𑀢𑀺𑀁𑀲𑀸𑀓𑀸𑀭𑁂𑀳𑀺. 𑀬𑀤𑀺 ‘‘𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄 𑀧𑀲𑁆𑀲𑀲𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 ‘‘𑀅𑀲𑁆𑀲𑀲𑀢𑀺 ¶ 𑀧𑀲𑁆𑀲𑀲𑀢𑀺’’𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀲𑀢𑁄𑀓𑀸𑀭𑀻’’𑀢𑀺 ¶ 𑀯𑀼𑀢𑁆𑀢𑀁? 𑀏𑀓𑀭𑀲𑀁 𑀤𑁂𑀲𑀦𑀁 𑀓𑀸𑀢𑀼𑀓𑀸𑀫𑀢𑀸𑀬. 𑀧𑀞𑀫𑀘𑀢𑀼𑀓𑁆𑀓𑁂 𑀧𑀤𑀤𑁆𑀯𑀬𑀫𑁂𑀯 𑀳𑀺 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀆𑀕𑀢𑀁, 𑀇𑀢𑀭𑀸𑀦𑀺 𑀅𑀦𑀸𑀕𑀢𑀓𑀸𑀮𑀯𑀲𑁂𑀦, 𑀢𑀲𑁆𑀫𑀸 𑀏𑀓𑀭𑀲𑀁 𑀤𑁂𑀲𑀦𑀁 𑀓𑀸𑀢𑀼𑀓𑀸𑀫𑀢𑀸𑀬 𑀲𑀩𑁆𑀩𑀢𑁆𑀣 ‘‘𑀲𑀢𑁄𑀓𑀸𑀭𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀤𑀻𑀖𑀅𑀲𑁆𑀲𑀸𑀲𑀯𑀲𑁂𑀦, 𑀯𑀺𑀪𑀢𑁆𑀢𑀺𑀅𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀤𑀻𑀖𑀦𑁆𑀢𑀺 𑀯𑀸 𑀪𑀕𑀯𑀢𑀸 𑀯𑀼𑀢𑁆𑀢𑀅𑀲𑁆𑀲𑀸𑀲𑀯𑀲𑁂𑀦. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀦𑁆𑀢𑀺 𑀯𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀯𑀺𑀓𑁆𑀔𑁂𑀧𑁄𑀢𑀺 𑀮𑀤𑁆𑀥𑀦𑀸𑀫𑀁 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀲𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑁂𑀦 𑀘 𑀜𑀸𑀡𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑀻𑀖𑀁 𑀅𑀲𑁆𑀲𑀸𑀲𑀁 𑀆𑀭𑀫𑁆𑀫𑀡𑀪𑀽𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀯𑀸 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀢𑀢𑁆𑀣 𑀲𑀢𑀺 𑀉𑀧𑀝𑁆𑀞𑀺𑀢𑀸𑀯 𑀳𑁄𑀢𑀺, 𑀢𑀁 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀲𑀫𑁆𑀫𑁄𑀳𑀯𑀲𑁂𑀦 𑀯𑀸 𑀲𑀫𑁆𑀧𑀚𑀜𑁆𑀜𑀁, 𑀢𑀤𑀥𑀻𑀦𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀢𑀁𑀲𑀫𑀗𑁆𑀕𑀻 𑀬𑁄𑀕𑀸𑀯𑀘𑀭𑁄 𑀲𑀢𑁄𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀳𑀼𑀢𑁆𑀯𑀸 𑀅𑀲𑁆𑀲𑀲𑀦𑀲𑁆𑀲 𑀯𑀲𑁂𑀦. ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀯𑀲𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀅𑀲𑁆𑀲𑀸𑀲𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀅𑀲𑁆𑀲𑀸𑀲𑀸, 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀦𑁆𑀢𑁄 𑀉𑀝𑁆𑀞𑀺𑀢𑀲𑀲𑀦𑀁 𑀅𑀲𑁆𑀲𑀸𑀲𑁄, 𑀩𑀳𑀺 𑀉𑀝𑁆𑀞𑀺𑀢𑀲𑀲𑀦𑀁 𑀧𑀲𑁆𑀲𑀸𑀲𑁄𑀢𑀺 𑀆𑀳 𑁋 ‘‘𑀅𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄’’𑀢𑀺𑀆𑀤𑀺. 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 𑀩𑀳𑀺 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀅𑀦𑁆𑀢𑁄 𑀲𑀲𑀦𑀢𑁄 𑀅𑀲𑁆𑀲𑀸𑀲𑁄, 𑀅𑀦𑁆𑀢𑁄 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀩𑀳𑀺 𑀲𑀲𑀦𑀢𑁄 𑀧𑀲𑁆𑀲𑀸𑀲𑁄𑀢𑀺 𑀓𑀢𑁆𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑁄 𑀦𑀸𑀲𑀺𑀓𑀸𑀯𑀸𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀞𑀫𑀁 𑀩𑀳𑀺 𑀦𑀺𑀓𑁆𑀔𑀫𑀢𑀻𑀢𑀺 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁂𑀦 ‘‘𑀆𑀤𑀺𑀫𑁆𑀳𑀺 𑀲𑀸𑀲𑁄 𑀅𑀲𑁆𑀲𑀸𑀲𑁄’’𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦’’𑀦𑁆𑀢𑀺𑀆𑀤𑀺. 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 𑀧𑀦 𑀧𑀯𑀢𑁆𑀢𑀺𑀬𑀁 𑀪𑀸𑀯𑀦𑀸𑀭𑀫𑁆𑀪𑀲𑀫𑀬𑁂 𑀧𑀞𑀫𑀁 𑀦𑀸𑀲𑀺𑀓𑀸𑀯𑀸𑀢𑀲𑁆𑀲 𑀅𑀦𑁆𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 𑀧𑀘𑁆𑀙𑀸 𑀩𑀳𑀺 𑀯𑀺𑀲𑁆𑀲𑀚𑁆𑀚𑀦𑀢𑁄 𑀧𑀯𑀢𑁆𑀢𑀺𑀓𑁆𑀓𑀫𑁂𑀦 ‘‘𑀆𑀤𑀺𑀫𑁆𑀳𑀺 𑀲𑀸𑀲𑁄 𑀅𑀲𑁆𑀲𑀸𑀲𑁄’’𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀯𑀸𑀢𑁄 𑀯𑀼𑀢𑁆𑀢𑁄. 𑀲𑀼𑀢𑁆𑀢𑀦𑁆𑀢𑀦𑀬𑁄𑀬𑁂𑀯 𑀘𑁂𑀢𑁆𑀣 ‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘, 𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸 ¶ 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺 (𑀧𑀝𑀺. 𑀫. 𑁧.𑁧𑁫𑁭) 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀺. ‘‘𑀪𑀸𑀯𑀦𑀸𑀭𑀫𑁆𑀪𑁂 𑀧𑀯𑀢𑁆𑀢𑀺𑀓𑁆𑀓𑀫𑀲𑁆𑀲𑁂𑀯 𑀇𑀘𑁆𑀙𑀺𑀢𑀢𑁆𑀢𑀸 𑀲𑀼𑀦𑁆𑀤𑀭𑀢𑀭𑁄’’𑀢𑀺 𑀯𑀤𑀦𑁆𑀢𑀺. 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀩𑁆𑀩𑀸𑀬𑀢𑀻𑀢𑀺 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦 𑀓𑀺𑀭 𑀲𑀫𑁆𑀧𑀢𑀺𑀚𑀸𑀢𑁄 𑀩𑀸𑀮𑀤𑀸𑀭𑀓𑁄 𑀔𑀺𑀧𑀺𑀢𑀁 𑀓𑀭𑁄𑀢𑀺. 𑀏𑀯𑀁 𑀢𑀸𑀯𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀓𑁂𑀘𑀺 ‘‘𑀏𑀯𑀁 𑀢𑀸𑀯𑀸𑀢𑀺 𑀅𑀦𑁂𑀦 𑀧𑀯𑀢𑁆𑀢𑀺𑀓𑁆𑀓𑀫𑁂𑀦 𑀅𑀲𑁆𑀲𑀸𑀲𑁄 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀤𑀦𑁆𑀢𑀺.

𑀅𑀤𑁆𑀥𑀸𑀦𑀯𑀲𑁂𑀦𑀸𑀢𑀺 ¶ 𑀓𑀸𑀮𑀤𑁆𑀥𑀸𑀦𑀯𑀲𑁂𑀦. 𑀅𑀬𑀜𑁆𑀳𑀺 𑀅𑀤𑁆𑀥𑀸𑀦-𑀲𑀤𑁆𑀤𑁄 𑀓𑀸𑀮𑀲𑁆𑀲 𑀤𑁂𑀲𑀲𑁆𑀲 𑀘 𑀯𑀸𑀘𑀓𑁄𑀢𑀺. 𑀢𑀢𑁆𑀣 𑀤𑁂𑀲𑀤𑁆𑀥𑀸𑀦𑀁 𑀉𑀤𑀸𑀳𑀭𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀓𑀸𑀮𑀤𑁆𑀥𑀸𑀦𑀲𑁆𑀲 𑀯𑀲𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑀻𑀖𑀭𑀲𑁆𑀲𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀑𑀓𑀸𑀲𑀤𑁆𑀥𑀸𑀦𑀦𑁆𑀢𑀺 𑀑𑀓𑀸𑀲𑀪𑀽𑀢𑀁 𑀅𑀤𑁆𑀥𑀸𑀦𑀁. 𑀨𑀭𑀺𑀢𑁆𑀯𑀸𑀢𑀺 𑀩𑁆𑀬𑀸𑀧𑁂𑀢𑁆𑀯𑀸. 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀧𑀺 𑀅𑀦𑁂𑀓𑀓𑀮𑀸𑀧𑀪𑀸𑀯𑁂𑀦, 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀁 𑀧𑀤𑁂𑀲𑀁. 𑀢𑀲𑁆𑀫𑀸𑀢𑀺 𑀲𑀡𑀺𑀓𑀁 𑀧𑀯𑀢𑁆𑀢𑀺𑀬𑀸 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀤𑀻𑀖𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀘 𑀳𑀢𑁆𑀣𑀺𑀆𑀤𑀺𑀲𑀭𑀻𑀭𑁂 𑀲𑀼𑀦𑀔𑀸𑀤𑀺𑀲𑀭𑀻𑀭𑁂 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑁂𑀲𑀤𑁆𑀥𑀸𑀦𑀯𑀺𑀲𑀺𑀝𑁆𑀞𑁂𑀦 𑀓𑀸𑀮𑀤𑁆𑀥𑀸𑀦𑀯𑀲𑁂𑀦𑁂𑀯 𑀤𑀻𑀖𑀭𑀲𑁆𑀲𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 ‘‘𑀲𑀡𑀺𑀓𑀁 𑀧𑀽𑀭𑁂𑀢𑁆𑀯𑀸 𑀲𑀡𑀺𑀓𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀲𑀻𑀖𑀫𑁂𑀯 𑀦𑀺𑀓𑁆𑀔𑀫𑀦𑁆𑀢𑀻’’𑀢𑀺 𑀯𑀘𑀦𑀢𑁄. 𑀫𑀦𑀼𑀲𑁆𑀲𑁂𑀲𑀽𑀢𑀺 𑀲𑀫𑀸𑀦𑀧𑁆𑀧𑀫𑀸𑀡𑁂𑀲𑀼𑀧𑀺 𑀫𑀦𑀼𑀲𑁆𑀲𑀲𑀭𑀻𑀭𑁂𑀲𑀼. 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑀻𑀢𑀺 𑀤𑀻𑀖𑀁 𑀅𑀲𑁆𑀲𑀸𑀲𑀧𑁆𑀧𑀩𑀦𑁆𑀥𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀲𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀦𑀔𑀲𑀲𑀸𑀤𑀬𑁄 𑀯𑀺𑀬 𑀭𑀲𑁆𑀲𑀁 𑀅𑀲𑁆𑀲𑀲𑀦𑁆𑀢𑀺 𑀧𑀲𑁆𑀲𑀲𑀦𑁆𑀢𑀺 𑀘𑀸𑀢𑀺 𑀬𑁄𑀚𑀦𑀸. 𑀇𑀤𑀁 𑀧𑀦 𑀤𑀻𑀖𑀁 𑀭𑀲𑁆𑀲𑀜𑁆𑀘 𑀅𑀲𑁆𑀲𑀲𑀦𑀁 𑀧𑀲𑁆𑀲𑀲𑀦𑀜𑁆𑀘 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀭𑀻𑀭𑀲𑁆𑀲 𑀲𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁. 𑀢𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀇𑀢𑁆𑀢𑀭𑀫𑀤𑁆𑀥𑀸𑀦𑀦𑁆𑀢𑀺 𑀅𑀧𑁆𑀧𑀓𑀁 𑀓𑀸𑀮𑀁. 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀮𑀤𑁆𑀥𑀯𑀺𑀲𑁂𑀲𑀲𑁆𑀲 𑀓𑁂𑀯𑀮𑀁 𑀅𑀤𑁆𑀥𑀸𑀦𑀯𑀲𑁂𑀦 𑀆𑀤𑀺𑀢𑁄 𑀯𑀼𑀢𑁆𑀢𑀸 𑀢𑀬𑁄 𑀆𑀓𑀸𑀭𑀸, 𑀢𑁂 𑀘 𑀔𑁄 𑀏𑀓𑀘𑁆𑀘𑁄 𑀅𑀲𑁆𑀲𑀸𑀲𑀁 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑀺, 𑀏𑀓𑀘𑁆𑀘𑁄 𑀧𑀲𑁆𑀲𑀸𑀲𑀁, 𑀏𑀓𑀘𑁆𑀘𑁄 𑀢𑀤𑀼𑀪𑀬𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦. 𑀓𑁂𑀘𑀺 𑀧𑀦 ‘‘𑀅𑀲𑁆𑀲𑀲𑀢𑀺𑀧𑀺 𑀧𑀲𑁆𑀲𑀲𑀢𑀺𑀧𑀻𑀢𑀺 𑀏𑀓𑀚𑁆𑀛𑀁 𑀯𑀘𑀦𑀁 𑀪𑀸𑀯𑀦𑀸𑀬 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀯𑀤𑀦𑁆𑀢𑀺. 𑀙𑀦𑁆𑀤𑀯𑀲𑁂𑀦 𑀧𑀼𑀩𑁆𑀩𑁂 𑀯𑀺𑀬 𑀢𑀬𑁄, 𑀢𑀣𑀸 𑀧𑀸𑀫𑁄𑀚𑁆𑀚𑀯𑀲𑁂𑀦𑀸𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀬𑁄 𑀏𑀯 𑀆𑀓𑀸𑀭𑀸 𑀮𑀩𑁆𑀪𑀦𑁆𑀢𑀺, 𑀢𑀦𑁆𑀢𑀺𑀯𑀲𑁂𑀦 𑀧𑀦 𑀲𑀩𑁆𑀩𑁂𑀲𑀁 𑀧𑀸𑀴𑀺𑀆𑀭𑀼𑀴𑁆𑀳𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀧𑀭𑀺𑀓𑀫𑁆𑀫𑀲𑁆𑀲 𑀓𑀸𑀢𑀩𑁆𑀩𑀢𑁆𑀢𑀸 𑀘 ‘‘𑀢𑀢𑁆𑀭𑀸𑀬𑀁 ¶ 𑀪𑀺𑀓𑁆𑀔𑀼 𑀦𑀯𑀳𑀸𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀚𑀸𑀦𑀢𑁄𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀚𑀸𑀦𑀢𑁄, 𑀢𑀢𑁆𑀣 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀤𑀻𑀖𑀁𑀅𑀲𑁆𑀲𑀸𑀲𑀸𑀤𑀻𑀲𑀼 𑀘𑀢𑀽𑀲𑀼 𑀆𑀓𑀸𑀭𑁂𑀲𑀼 𑀏𑀓𑁂𑀦 𑀆𑀓𑀸𑀭𑁂𑀦, 𑀦𑀯𑀲𑀼 𑀢𑀻𑀲𑀼 𑀯𑀸 𑀏𑀓𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀤𑀻𑀖𑁄 𑀭𑀲𑁆𑀲𑁄 𑀘 𑀅𑀲𑁆𑀲𑀸𑀲𑁄,

𑀧𑀲𑁆𑀲𑀸𑀲𑁄𑀧𑀺 𑀘 𑀢𑀸𑀤𑀺𑀲𑁄;

𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀯𑀢𑁆𑀢𑀦𑁆𑀢𑀺,

𑀦𑀸𑀲𑀺𑀓𑀕𑁆𑀕𑁂𑀯 𑀪𑀺𑀓𑁆𑀔𑀼𑀦𑁄’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁫);

𑀅𑀬𑀁 𑀪𑀸𑀯𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑀇𑀤𑀸𑀦𑀺 ¶ 𑀧𑀸𑀴𑀺𑀯𑀲𑁂𑀦𑁂𑀯 𑀢𑁂 𑀦𑀯 𑀆𑀓𑀸𑀭𑁂 𑀪𑀸𑀯𑀦𑀸𑀯𑀺𑀥𑀺𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀓𑀣𑀁 𑀧𑀚𑀸𑀦𑀸𑀢𑀻’’𑀢𑀺 𑀧𑀚𑀸𑀦𑀦𑀯𑀺𑀥𑀺𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀢𑀺. 𑀤𑀻𑀖𑀁 𑀅𑀲𑁆𑀲𑀸𑀲𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀁 𑀤𑀻𑀖𑀁 𑀅𑀲𑁆𑀲𑀸𑀲𑀁. 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂𑀢𑀺 𑀅𑀤𑁆𑀥𑀸𑀦𑀦𑁆𑀢𑀺 𑀲𑀗𑁆𑀔𑀁 𑀕𑀢𑁂 𑀤𑀻𑀖𑁂 𑀓𑀸𑀮𑁂, 𑀤𑀻𑀖𑀁 𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄 𑀯𑀸 𑀲𑀗𑁆𑀔𑀸𑀢-𑀲𑀤𑁆𑀤𑁄 ‘‘𑀣𑁂𑀬𑁆𑀬𑀲𑀗𑁆𑀔𑀸𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑁂𑀢𑀺 𑀅𑀤𑁆𑀥𑀸𑀦𑀓𑁄𑀝𑁆𑀞𑀸𑀲𑁂 𑀤𑁂𑀲𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀺𑀬𑀸 𑀮𑀤𑁆𑀥𑀲𑁆𑀲𑀸𑀤𑀢𑁆𑀢𑀸 𑀢𑀢𑁆𑀣 𑀲𑀸𑀢𑀺𑀲𑀬𑁄 𑀓𑀢𑁆𑀢𑀼𑀓𑀸𑀫𑀢𑀸𑀮𑀓𑁆𑀔𑀡𑁄 𑀓𑀼𑀲𑀮𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀙𑀦𑁆𑀤𑀯𑀲𑁂𑀦𑀸𑀢𑀺 𑀢𑀣𑀸𑀧𑀯𑀢𑁆𑀢𑀙𑀦𑁆𑀤𑀲𑁆𑀲 𑀯𑀲𑁂𑀦 𑀯𑀺𑀲𑁂𑀲𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀕𑀫𑁂𑀦𑁆𑀢𑀲𑁆𑀲. 𑀢𑀢𑁄 𑀲𑀼𑀔𑀼𑀫𑀢𑀭𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀙𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀫𑀓𑀢𑁄 𑀲𑀼𑀔𑀼𑀫𑀢𑀭𑀁. 𑀪𑀸𑀯𑀦𑀸𑀩𑀮𑁂𑀦 𑀳𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀧𑀭𑀺𑀴𑀸𑀳𑀢𑀸𑀬 𑀓𑀸𑀬𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀼𑀔𑀼𑀫𑀢𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀼𑀔𑀼𑀫𑀢𑀭𑀪𑀸𑀯𑁂𑀦 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀢𑀭𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀘 𑀯𑀻𑀣𑀺𑀧𑁆𑀧𑀝𑀺𑀧𑀦𑁆𑀦𑀢𑀸𑀬 𑀪𑀸𑀯𑀦𑀸𑀘𑀺𑀢𑁆𑀢𑀲𑀳𑀕𑀢𑁄 𑀧𑀫𑁄𑀤𑁄 𑀔𑀼𑀤𑁆𑀤𑀺𑀓𑀸𑀤𑀺𑀪𑁂𑀤𑀸 𑀢𑀭𑀼𑀡𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑀁 𑀯𑀺𑀯𑀢𑁆𑀢𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀢𑀺𑀯𑀺𑀬 𑀲𑀼𑀔𑀼𑀫𑀢𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀧𑀝𑁆𑀞𑀳𑀦𑁂 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑁂𑀳𑀺 𑀢𑁂𑀳𑀺 ¶ 𑀘𑀺𑀢𑁆𑀢𑀁 𑀯𑀺𑀦𑀺𑀯𑀢𑁆𑀢𑀢𑀻𑀢𑀺 𑀓𑁂𑀘𑀺. 𑀪𑀸𑀯𑀦𑀸𑀩𑀮𑁂𑀦 𑀧𑀦 𑀲𑀼𑀔𑀼𑀫𑀢𑀭𑀪𑀸𑀯𑀧𑁆𑀧𑀢𑁆𑀢𑁂𑀲𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀢𑀢𑁆𑀣 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀧𑀓𑀢𑀺𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺. 𑀉𑀧𑁂𑀓𑁆𑀔𑀸 𑀲𑀡𑁆𑀞𑀸𑀢𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂 𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁 𑀩𑁆𑀬𑀸𑀧𑀸𑀭𑀸𑀪𑀸𑀯𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀳𑁄𑀢𑀺, 𑀲𑀸 𑀧𑀦𑀸𑀬𑀁 𑀉𑀧𑁂𑀓𑁆𑀔𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀸. 𑀤𑀻𑀖𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄𑀢𑀺 𑀤𑀻𑀖𑀸𑀓𑀸𑀭𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀧𑀺 𑀲𑀫𑀽𑀳𑀝𑁆𑀞𑁂𑀦 𑀓𑀸𑀬𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀦𑀺𑀫𑀺𑀢𑁆𑀢𑀫𑁆𑀧𑀺 𑀏𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑀝𑁆𑀞𑀸𑀦𑀁 𑀲𑀢𑀻𑀢𑀺 𑀢𑀁 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀲𑀢𑀺 𑀉𑀧𑀝𑁆𑀞𑀸𑀦𑀁 𑀦𑀸𑀫. 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀦𑁆𑀢𑀺 𑀲𑀫𑀣𑀯𑀲𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀢𑀦𑁆𑀦𑀺𑀲𑁆𑀲𑀬𑀜𑁆𑀘 𑀓𑀸𑀬𑀁 ‘‘𑀭𑀽𑀧’’𑀦𑁆𑀢𑀺, 𑀘𑀺𑀢𑁆𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 ‘‘𑀅𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀦𑀸𑀫𑀭𑀽𑀧𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀘 𑀜𑀸𑀡𑀁 𑀢𑀢𑁆𑀣 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑁄 𑀓𑀸𑀬𑁄 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀲𑀢𑀺 𑀏𑀢𑁆𑀣 𑀢𑀺𑀝𑁆𑀞𑀢𑀻𑀢𑀺 𑀉𑀧𑀝𑁆𑀞𑀸𑀦𑀁 𑀦𑀸𑀫. 𑀏𑀢𑁆𑀣 𑀘 ‘‘𑀓𑀸𑀬𑁄 𑀉𑀧𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀇𑀢𑀭𑀓𑀸𑀬𑀲𑁆𑀲𑀧𑀺 𑀲𑀗𑁆𑀕𑀳𑁄𑀢𑀺 𑀢𑀣𑀸 𑀯𑀼𑀢𑁆𑀢𑀁 𑀲𑀫𑁆𑀫𑀲𑀦𑀘𑀸𑀭𑀲𑁆𑀲𑀧𑀺 𑀇𑀥 𑀇𑀘𑁆𑀙𑀺𑀢𑀢𑁆𑀢𑀸. 𑀦𑁄 𑀲𑀢𑀻𑀢𑀺 𑀲𑁄 𑀓𑀸𑀬𑁄 𑀲𑀢𑀺 𑀦𑀸𑀫 𑀦 𑀳𑁄𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘 𑀲𑀭𑀡𑀝𑁆𑀞𑁂𑀦 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀘. 𑀢𑀸𑀬 𑀲𑀢𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀲𑀢𑀺𑀬𑀸. 𑀢𑁂𑀦 𑀜𑀸𑀡𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀜𑀸𑀡𑁂𑀦. 𑀢𑀁 𑀓𑀸𑀬𑀦𑁆𑀢𑀺 𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀜𑁆𑀘𑁂𑀯 𑀢𑀦𑁆𑀦𑀺𑀲𑁆𑀲𑀬𑀭𑀽𑀧𑀓𑀸𑀬𑀜𑁆𑀘. 𑀅𑀦𑀼𑀧𑀲𑁆𑀲𑀢𑀻𑀢𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 ¶ 𑀘 𑀅𑀦𑀼 𑀅𑀦𑀼 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺 𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀬𑀣𑀸𑀯𑀼𑀢𑁆𑀢𑁂 𑀓𑀸𑀬𑁂 𑀅𑀬𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀅𑀬𑀁 𑀬𑀣𑀸𑀯𑀼𑀢𑁆𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂 𑀓𑀭𑀚𑀓𑀸𑀬𑁂 𑀘 𑀓𑀸𑀬𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀸 𑀅𑀦𑀼𑀤𑀓𑀪𑀽𑀢𑀸𑀬 𑀫𑀭𑀻𑀘𑀺𑀬𑀸 𑀉𑀤𑀓𑀸𑀦𑀼𑀧𑀲𑁆𑀲𑀦𑀸 𑀯𑀺𑀬 𑀦 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀓𑀸𑀬𑁂 𑀦𑀺𑀘𑁆𑀘𑀸𑀤𑀺𑀪𑀸𑀯𑀸𑀦𑀼𑀧𑀲𑁆𑀲𑀦𑀸, 𑀅𑀣 𑀔𑁄 𑀬𑀣𑀸𑀭𑀳𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀸 𑀲𑀼𑀪𑀪𑀸𑀯𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀸. 𑀅𑀣 𑀯𑀸 𑀓𑀸𑀬𑁂 ‘‘𑀅𑀳𑀦𑁆𑀢𑀺 𑀯𑀸, 𑀫𑀫𑀦𑁆𑀢𑀺 𑀯𑀸, 𑀇𑀢𑁆𑀣𑀻𑀢𑀺 𑀯𑀸, 𑀧𑀼𑀭𑀺𑀲𑁄’’𑀢𑀺 𑀯𑀸 𑀕𑀳𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀢𑀸𑀤𑀺𑀲𑀁 𑀅𑀦𑀦𑀼𑀧𑀲𑁆𑀲𑀺𑀢𑁆𑀯𑀸 ¶ 𑀓𑀸𑀬𑀫𑀢𑁆𑀢𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸, 𑀢𑀸𑀬 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺𑀬𑁂𑀯 𑀉𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀲𑁆𑀲 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀢𑀺.

𑀏𑀲𑁂𑀯 𑀦𑀬𑁄𑀢𑀺 ‘‘𑀦𑀯𑀳𑀺 𑀆𑀓𑀸𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀺𑀁 𑀭𑀲𑁆𑀲-𑀧𑀤𑁂 𑀅𑀢𑀺𑀤𑀺𑀲𑁆𑀲𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀤𑀲𑁆𑀲𑀺𑀢𑁂 ‘‘𑀓𑀣𑀁 𑀤𑀻𑀖𑀁 𑀅𑀲𑁆𑀲𑀲𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀧𑀸𑀴𑀺𑀦𑀬𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀭𑀲𑁆𑀲𑀧𑀤𑀯𑀲𑁂𑀦 𑀆𑀕𑀢𑁂 𑀧𑀸𑀴𑀺𑀦𑀬𑁂. 𑀅𑀬𑀦𑁆𑀢𑀺 𑀬𑁄𑀕𑀸𑀯𑀘𑀭𑁄. 𑀅𑀤𑁆𑀥𑀸𑀦𑀯𑀲𑁂𑀦𑀸𑀢𑀺 𑀤𑀻𑀖𑀓𑀸𑀮𑀯𑀲𑁂𑀦. 𑀇𑀢𑁆𑀢𑀭𑀯𑀲𑁂𑀦𑀸𑀢𑀺 𑀧𑀭𑀺𑀢𑁆𑀢𑀓𑀸𑀮𑀯𑀲𑁂𑀦. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀆𑀓𑀸𑀭𑁂𑀳𑀺.

𑀢𑀸𑀤𑀺𑀲𑁄𑀢𑀺 𑀤𑀻𑀖𑁄 𑀭𑀲𑁆𑀲𑁄 𑀘. 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸𑀢𑀺 𑀘𑀢𑁆𑀢𑀸𑀭𑁄 𑀆𑀓𑀸𑀭𑀸 𑀢𑁂 𑀘 𑀤𑀻𑀖𑀸𑀤𑀬𑁄 𑀏𑀯. 𑀦𑀸𑀲𑀺𑀓𑀕𑁆𑀕𑁂𑀯 𑀪𑀺𑀓𑁆𑀔𑀼𑀦𑁄𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀸𑀲𑀺𑀓𑀕𑁆𑀕𑁂 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀉𑀢𑁆𑀢𑀭𑁄𑀝𑁆𑀞𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀲𑀩𑁆𑀩𑀲𑁆𑀲 𑀓𑀸𑀬𑀲𑁆𑀲 𑀧𑀝𑀺 𑀧𑀝𑀺 𑀧𑀘𑁆𑀘𑁂𑀓𑀁 𑀲𑀫𑁆𑀫𑀤𑁂𑀯 𑀯𑁂𑀤𑀦𑀲𑀻𑀮𑁄 𑀚𑀸𑀦𑀦𑀲𑀻𑀮𑁄, 𑀢𑀲𑁆𑀲 𑀯𑀸 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀯𑁂𑀤𑁄 𑀏𑀢𑀲𑁆𑀲 𑀅𑀢𑁆𑀣𑀺, 𑀢𑀁 𑀯𑀸 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀯𑁂𑀤𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣 𑀲𑀩𑁆𑀩-𑀕𑁆𑀕𑀳𑀡𑁂𑀦 𑀅𑀲𑁆𑀲𑀸𑀲𑀸𑀤𑀺𑀓𑀸𑀬𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑁂 𑀲𑀺𑀤𑁆𑀥𑁂𑀧𑀺 𑀅𑀦𑁂𑀓𑀓𑀮𑀸𑀧𑀲𑀫𑀼𑀤𑀸𑀬𑀪𑀸𑀯𑀢𑁄 𑀢𑀲𑁆𑀲 𑀲𑀩𑁆𑀩𑁂𑀲𑀫𑁆𑀧𑀺 𑀪𑀸𑀕𑀸𑀦𑀁 𑀲𑀁𑀯𑁂𑀤𑀦𑀤𑀲𑁆𑀲𑀦𑀢𑁆𑀣𑀁 𑀧𑀝𑀺-𑀲𑀤𑁆𑀤𑀕𑁆𑀕𑀳𑀡𑀁, 𑀢𑀢𑁆𑀣 𑀲𑀓𑁆𑀓𑀘𑁆𑀘𑀓𑀸𑀭𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀁-𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀮𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀲𑀫𑀸𑀦𑁂𑀲𑀼𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑁄𑀕𑀺𑀦𑁄 𑀧𑀝𑀺𑀧𑀢𑁆𑀢𑀺𑀯𑀺𑀥𑀸𑀦𑁂 𑀧𑀘𑁆𑀘𑁂𑀓𑀁 𑀲𑀓𑁆𑀓𑀘𑁆𑀘𑀁𑀬𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀤𑁂𑀲𑀦𑀸 𑀓𑀢𑀸, 𑀏𑀯𑀁 𑀢𑀫𑁂𑀯𑀢𑁆𑀣𑀁 𑀤𑀻𑀧𑁂𑀢𑀼𑀁 𑀲𑀢𑀺𑀧𑀺 𑀅𑀢𑁆𑀣𑀲𑁆𑀲 𑀲𑀫𑀸𑀦𑀢𑀸𑀬 ‘‘𑀲𑀓𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄𑀢𑀺 𑀯𑀺𑀪𑀽𑀢𑀁 𑀓𑀭𑁄𑀦𑁆𑀢𑁄, 𑀲𑀩𑁆𑀩𑀲𑁄 𑀯𑀺𑀪𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀓𑀝𑀻𑀓𑀭𑀡𑀁 𑀯𑀺𑀪𑀸𑀯𑀦𑀁 𑀢𑀢𑁆𑀣 𑀅𑀲𑀫𑁆𑀫𑀼𑀬𑁆𑀳𑀦𑀜𑀸𑀡𑁂𑀦𑁂𑀯 𑀦𑁂𑀲𑀁 𑀧𑀯𑀢𑁆𑀢𑀦𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀯𑀺𑀤𑀺𑀢𑀁 𑀓𑀭𑁄𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀯𑀢𑁆𑀢𑁂𑀢𑀺, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦, 𑀢𑀲𑁆𑀫𑀸 𑀏𑀯𑀁𑀪𑀽𑀢𑁄 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺 𑀩𑀼𑀤𑁆𑀥𑀸𑀤𑀻𑀳𑀻𑀢𑀺 𑀬𑁄𑀚𑀦𑀸. 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀯𑀺𑀲𑀝𑁂𑀢𑀺 𑀅𑀦𑁂𑀓𑀓𑀮𑀸𑀧𑀢𑀸𑀬 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑁂𑀦 𑀯𑀺𑀲𑀝𑁂. 𑀆𑀤𑀺 𑀧𑀸𑀓𑀝𑁄 ¶ 𑀳𑁄𑀢𑀺 𑀲𑀢𑀺𑀬𑀸 𑀜𑀸𑀡𑀲𑁆𑀲 𑀘 𑀯𑀲𑁂𑀦 𑀓𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀲𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀕𑁂𑀯 𑀲𑀢𑀺𑀁 𑀜𑀸𑀡𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀦𑀯𑀲𑁂𑀦𑁂𑀯. 𑀖𑀝𑀢𑀻𑀢𑀺 𑀉𑀲𑁆𑀲𑀳𑀢𑀺. 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀓𑀭𑁄𑀢𑀺, 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀲𑁆𑀲. 𑀲𑀁𑀯𑀭𑁄𑀢𑀺 𑀲𑀢𑀺 𑀯𑀻𑀭𑀺𑀬𑀫𑁆𑀧𑀺 𑀯𑀸. 𑀢𑀸𑀬 𑀲𑀢𑀺𑀬𑀸𑀢𑀺 𑀬𑀸 𑀲𑀸 𑀆𑀦𑀸𑀧𑀸𑀦𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀲𑀢𑀺, 𑀢𑀸𑀬. 𑀢𑁂𑀦 𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀬𑁄 𑀲𑁄 𑀢𑀢𑁆𑀣 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑁄 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄, 𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀲𑁂𑀯𑀢𑀻𑀢𑀺 ‘‘𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄’’𑀢𑀺 𑀯𑀼𑀢𑁆𑀢𑁂 𑀅𑀥𑀺𑀓𑀼𑀲𑀮𑀥𑀫𑁆𑀫𑁂 𑀆𑀲𑁂𑀯𑀢𑀺. 𑀢𑀤𑀸𑀲𑁂𑀯𑀦𑀜𑁆𑀳𑁂𑀢𑁆𑀣 𑀲𑀺𑀓𑁆𑀔𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀼𑀭𑀺𑀫𑀦𑀬𑁂𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀪𑀸𑀯𑀦𑀸𑀦𑀬𑁂, 𑀧𑀞𑀫𑀯𑀢𑁆𑀣𑀼𑀤𑁆𑀯𑀬𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀸𑀧𑀺 𑀓𑀸𑀫𑀁 𑀜𑀸𑀡𑀼𑀧𑁆𑀧𑀸𑀤𑀦𑀁 𑀮𑀩𑁆𑀪𑀢𑁂𑀯 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀬𑀸𑀣𑀸𑀯𑀢𑁄 𑀤𑀻𑀖𑀭𑀲𑁆𑀲𑀪𑀸𑀯𑀸𑀯𑀩𑁄𑀥𑀲𑀩𑁆𑀪𑀸𑀯𑀢𑁄, 𑀢𑀣𑀸𑀧𑀺 𑀢𑀁 𑀦 𑀤𑀼𑀓𑁆𑀓𑀭𑀁 𑀬𑀣𑀸𑀧𑀯𑀢𑁆𑀢𑀸𑀦𑀁 𑀢𑁂𑀲𑀁 𑀕𑀳𑀡𑀫𑀢𑁆𑀢𑀪𑀸𑀯𑀢𑁄𑀢𑀺 𑀢𑀢𑁆𑀣 𑀯𑀢𑁆𑀢𑀫𑀸𑀦𑀓𑀸𑀮𑀧𑁆𑀧𑀬𑁄𑀕𑁄 𑀓𑀢𑁄. 𑀇𑀤𑀁 𑀧𑀦 𑀤𑀼𑀓𑁆𑀓𑀭𑀁 𑀧𑀼𑀭𑀺𑀲𑀲𑁆𑀲 𑀔𑀼𑀭𑀥𑀸𑀭𑀸𑀬𑀁 𑀕𑀫𑀦𑀲𑀤𑀺𑀲𑀁, 𑀢𑀲𑁆𑀫𑀸 𑀲𑀸𑀢𑀺𑀲𑀬𑁂𑀦𑁂𑀢𑁆𑀣 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀼𑀁 𑀅𑀦𑀸𑀕𑀢𑀓𑀸𑀮𑀧𑁆𑀧𑀬𑁄𑀕𑁄 𑀓𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀜𑀸𑀡𑀼𑀧𑁆𑀧𑀸𑀤𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀬𑀲𑀗𑁆𑀔𑀸𑀭𑀧𑀲𑁆𑀲𑀫𑁆𑀪𑀦𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀲𑀁𑀯𑀭𑀲𑀫𑀸𑀤𑀸𑀦𑀸𑀦𑀁 𑀲𑀗𑁆𑀕𑀳𑁄’’𑀢𑀺 𑀯𑀤𑀦𑁆𑀢𑀺.

𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀁. 𑀲𑁄 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀧𑀺 𑀲𑀫𑀸𑀦𑁄 𑀓𑀭𑀚𑀓𑀸𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀢𑁂𑀦 𑀲𑀗𑁆𑀔𑀭𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁧𑁦𑁨) 𑀏𑀯𑀫𑀸𑀕𑀢𑁄 𑀓𑀸𑀬𑀲𑀗𑁆𑀔𑀸𑀭𑁄 𑀘𑁂𑀢𑀦𑀸𑀮𑀓𑁆𑀔𑀡𑁄 𑀲𑀢𑀺𑀧𑀺 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀬𑀸 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀘 𑀓𑀸𑀬𑀤𑁆𑀯𑀸𑀭𑁂𑀦 𑀮𑀓𑁆𑀔𑀺𑀢𑁄, 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀧𑀲𑁆𑀲𑀫𑁆𑀪𑁂𑀦𑁆𑀢𑁄𑀢𑀺𑀆𑀤𑀻𑀲𑀼 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀤𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀢𑀲𑁆𑀫𑀸 𑀧𑀲𑁆𑀲𑀫𑁆𑀪𑀦𑀁 𑀦𑀸𑀫 𑀯𑀽𑀧𑀲𑀫𑀦𑀁, 𑀢𑀜𑁆𑀘 𑀢𑀣𑀸𑀧𑀬𑁄𑀕𑁂 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀑𑀴𑀸𑀭𑀺𑀓𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀢𑀢𑁆𑀭𑀸𑀢𑀺 ‘‘𑀑𑀴𑀸𑀭𑀺𑀓𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄’’𑀢𑀺 𑀏𑀢𑁆𑀣. 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀦𑀸𑀭𑀤𑁆𑀥𑀓𑀸𑀮𑁂, 𑀢𑀢𑁄 𑀏𑀯 𑀓𑀸𑀬𑀘𑀺𑀢𑁆𑀢𑀸𑀦𑀫𑁆𑀧𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂. ‘‘𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸’’𑀢𑀺 𑀳𑀺 𑀇𑀫𑀺𑀦𑀸 𑀓𑀸𑀬𑀧𑀭𑀺𑀕𑁆𑀕𑀳𑁄 ¶ , ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀻’’𑀢𑀺. 𑀓𑀸𑀬𑁄𑀢𑀺 𑀓𑀭𑀚𑀓𑀸𑀬𑁄. 𑀲𑀤𑀭𑀣𑀸𑀢𑀺 𑀲𑀧𑀭𑀺𑀴𑀸𑀳𑀸. 𑀲𑀸 𑀘 𑀦𑁂𑀲𑀁 𑀲𑀤𑀭𑀣𑀢𑀸 𑀕𑀭𑀼𑀪𑀸𑀯𑁂𑀦 𑀯𑀺𑀬 𑀑𑀴𑀸𑀭𑀺𑀓𑀢𑀸𑀬 𑀅𑀯𑀺𑀦𑀸𑀪𑀸𑀯𑀺𑀦𑀻𑀢𑀺 𑀆𑀳 ‘‘𑀑𑀴𑀸𑀭𑀺𑀓𑀸’’𑀢𑀺. 𑀩𑀮𑀯𑀢𑀭𑀸𑀢𑀺 𑀲𑀩𑀮𑀸 𑀣𑀽𑀮𑀸. 𑀲𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀁 𑀢𑀸𑀯 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑁂𑀦 𑀏𑀓𑀕𑁆𑀕𑀁 𑀳𑀼𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀲𑀦𑁆𑀢𑀁 𑀳𑁄𑀢𑀺 𑀯𑀽𑀧𑀲𑀦𑁆𑀢𑀁, 𑀢𑀢𑁄 𑀏𑀯 𑀢𑀁𑀲𑀫𑀼𑀝𑁆𑀞𑀸𑀦𑀸 𑀭𑀽𑀧𑀥𑀫𑁆𑀫𑀸 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑀧𑁆𑀧𑀢𑁆𑀢𑀸, 𑀢𑀤𑀦𑀼𑀕𑀼𑀡𑀢𑀸𑀬 𑀲𑁂𑀲𑀁 𑀢𑀺𑀲𑀦𑁆𑀢𑀢𑀺𑀭𑀽𑀧𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑁂 𑀓𑀸𑀬𑁂 𑀘 𑀯𑀽𑀧𑀲𑀦𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀢𑀦𑁆𑀦𑀺𑀲𑁆𑀲𑀺𑀢𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀲𑀦𑁆𑀢𑀲𑀪𑀸𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀼𑀔𑀼𑀫𑀢𑀭𑀲𑀼𑀔𑀼𑀫𑀢𑀫𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀤𑀸 𑀧𑀦𑀲𑁆𑀲 𑀓𑀸𑀬𑁄𑀧𑀻’’𑀢𑀺𑀆𑀤𑀺. 𑀧𑀲𑁆𑀲𑀫𑁆𑀪𑁂𑀫𑀻𑀢𑀺 𑀧𑀞𑀫𑀸𑀯𑀚𑁆𑀚𑀦𑀸. 𑀆𑀪𑀼𑀚𑀦𑀁 𑀆𑀪𑁄𑀕𑁄, 𑀲𑀫𑁆𑀫𑀸 𑀅𑀦𑀼 𑀅𑀦𑀼 𑀆𑀳𑀭𑀡𑀁 𑀲𑀫𑀦𑁆𑀦𑀸𑀳𑀸𑀭𑁄, 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀆𑀯𑀚𑁆𑀚𑀦𑀸 𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀫𑀦𑀲𑀺𑀓𑀭𑀡𑀁 𑀘𑀺𑀢𑁆𑀢𑁂 𑀞𑀧𑀦𑀁 𑀫𑀦𑀲𑀺𑀓𑀸𑀭𑁄, 𑀯𑀻𑀫𑀁𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀸.

𑀲𑀸𑀭𑀤𑁆𑀥𑁂𑀢𑀺 𑀲𑀤𑀭𑀣𑁂 𑀲𑀧𑀭𑀺𑀴𑀸𑀳𑁂. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀩𑀮𑀯𑀁 𑀑𑀴𑀸𑀭𑀺𑀓𑀁, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀬𑀲𑀗𑁆𑀔𑀸𑀭𑁄 𑀳𑀺 𑀅𑀥𑀺𑀧𑁆𑀧𑁂𑀢𑁄. ‘‘𑀅𑀥𑀺𑀫𑀢𑁆𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻’’𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸 𑀏𑀢𑀁. 𑀲𑀼𑀔𑀼𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀫𑁆𑀳𑀻𑀢𑀺 𑀏𑀢𑁆𑀣 𑀘𑀺𑀢𑁆𑀢𑁂 𑀘𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀓𑀭𑀺𑀬𑀫𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀦𑀸𑀦𑀸𑀯𑀚𑁆𑀚𑀦𑀁 𑀧𑀭𑀺𑀓𑀫𑁆𑀫𑀁 𑀧𑀞𑀫𑀚𑁆𑀛𑀸𑀦𑀁 𑀯𑀺𑀬 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀧𑀝𑀺𑀧𑀓𑁆𑀔𑀦𑁆𑀢𑀺 𑀓𑀢𑁆𑀯𑀸 𑀢𑀁𑀲𑀫𑀼𑀝𑁆𑀞𑀸𑀦𑁄 𑀓𑀸𑀬𑀲𑀗𑁆𑀔𑀸𑀭𑁄 𑀧𑀞𑀫𑀚𑁆𑀛𑀸𑀦𑁂 𑀘 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀘 𑀑𑀴𑀸𑀭𑀺𑀓𑁄𑀢𑀺 𑀲𑀤𑀺𑀲𑁄 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑁂𑀲𑀼𑀧𑀘𑀸𑀭𑀤𑁆𑀯𑀬𑁂𑀧𑀺. 𑀅𑀣 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑀸𑀬 𑀧𑀝𑀺𑀧𑀚𑁆𑀚𑀢𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀯𑀲𑁂𑀦 𑀓𑀺𑀮𑀫𑀢𑁄 𑀬𑁄𑀕𑀺𑀦𑁄 𑀓𑀸𑀬𑀓𑀺𑀮𑀫𑀣𑀘𑀺𑀢𑁆𑀢𑀼𑀧𑀖𑀸𑀢𑀸𑀤𑀺𑀯𑀲𑁂𑀦 𑀯𑀺𑀢𑀓𑁆𑀓𑀸𑀤𑀺𑀲𑀗𑁆𑀔𑁄𑀪𑁂𑀦 𑀲𑀧𑀭𑀺𑀧𑁆𑀨𑀦𑁆𑀤𑀢𑀸𑀬 𑀘 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀉𑀧𑀘𑀸𑀭𑁂𑀲𑀼 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀑𑀴𑀸𑀭𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑀺𑀲𑀼𑀔𑀼𑀫𑁄𑀢𑀺 𑀅𑀜𑁆𑀜𑀢𑁆𑀣 𑀮𑀩𑁆𑀪𑀫𑀸𑀦𑁄 𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 ¶ 𑀅𑀢𑀺𑀓𑁆𑀓𑀦𑁆𑀢𑀲𑀼𑀔𑀼𑀫𑁄. 𑀲𑀼𑀔𑀼𑀫𑀪𑀸𑀯𑁄𑀧𑀺𑀲𑁆𑀲 𑀢𑀢𑁆𑀣 𑀦𑀢𑁆𑀣𑀺 𑀓𑀼𑀢𑁄 𑀑𑀴𑀸𑀭𑀺𑀓𑀢𑀸 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀯𑀢𑁆𑀢𑀺𑀫𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺.

𑀮𑀸𑀪𑀺𑀲𑁆𑀲 𑀲𑀢𑁄 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀯𑁂𑀮𑀁 𑀏𑀓𑀸𑀲𑀦𑁂𑀦𑁂𑀯 𑀯𑀸 𑀲𑀩𑁆𑀩𑁂𑀲𑀁 𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬 𑀫𑀚𑁆𑀛𑀺𑀫𑀪𑀸𑀡𑀓𑀸 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀢𑁄 𑀉𑀧𑀭𑀽𑀧𑀭𑀺𑀛𑀸𑀦𑀽𑀧𑀘𑀸𑀭𑁂𑀧𑀺 𑀲𑀼𑀔𑀼𑀫𑀢𑀭𑀁 𑀇𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀳𑀺 𑀲𑁄𑀧𑀘𑀸𑀭𑀸𑀦𑀁 𑀛𑀸𑀦𑀸𑀦𑀁 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀯𑀦𑁆𑀢𑀢𑀸 𑀲𑀦𑁆𑀢𑀢𑀸 𑀘 𑀲𑀫𑁆𑀪𑀯𑁂𑀬𑁆𑀬, 𑀏𑀓𑀸𑀯𑀚𑁆𑀚𑀦𑀽𑀧𑀘𑀸𑀭𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀸𑀤𑁂𑀦 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸. 𑀲𑀩𑁆𑀩𑁂𑀲𑀁𑀬𑁂𑀯𑀸𑀢𑀺 𑀉𑀪𑀬𑁂𑀲𑀫𑁆𑀧𑀺. 𑀬𑀲𑁆𑀫𑀸 𑀢𑁂 𑀲𑀩𑁆𑀩𑁂𑀧𑀺 𑀯𑀼𑀘𑁆𑀘𑀫𑀸𑀦𑁂𑀦 𑀯𑀺𑀥𑀺𑀦𑀸 𑀧𑀲𑁆𑀲𑀤𑁆𑀥𑀺𑀫𑀺𑀘𑁆𑀙𑀦𑁆𑀢𑀺𑀬𑁂𑀯 ¶ . 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀯𑀢𑁆𑀢𑀓𑀸𑀬𑀲𑀗𑁆𑀔𑀸𑀭𑁄 𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀇𑀤𑀁 𑀲𑀤𑀺𑀲𑀲𑀦𑁆𑀢𑀸𑀦𑀢𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀏𑀯 𑀑𑀴𑀸𑀭𑀺𑀓𑀸 𑀅𑀲𑁆𑀲𑀸𑀲𑀸𑀤𑀬𑁄 𑀲𑀼𑀔𑀼𑀫𑀸 𑀳𑁄𑀦𑁆𑀢𑀺. 𑀧𑀲𑁆𑀲𑀫𑁆𑀪𑀦𑀸𑀓𑀸𑀭𑁄 𑀧𑀦 𑀢𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄𑀢𑀺 𑀘𑀢𑀼𑀥𑀸𑀢𑀼𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀓𑀮𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄 𑀪𑀸𑀯𑀦𑀸𑀬 𑀉𑀧𑀭𑀽𑀧𑀭𑀺 𑀧𑀡𑀻𑀢𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁂 𑀲𑀼𑀔𑀼𑀫𑁄’’𑀢𑀺. 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀫𑀸𑀳. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀢𑁄 𑀧𑀝𑁆𑀞𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀢𑀢𑁄 𑀑𑀭𑀁 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀲𑀫𑀣𑀦𑀬𑁂 𑀯𑀼𑀢𑁆𑀢𑀦𑀬𑁂𑀦. ‘‘𑀅𑀧𑀭𑀺𑀕𑁆𑀕𑀳𑁂 𑀧𑀯𑀢𑁆𑀢𑁄 𑀓𑀸𑀬𑀲𑀗𑁆𑀔𑀸𑀭𑁄 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀦𑀸𑀦𑀬𑁂𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀬𑁄𑀚𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 ‘‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭’’𑀦𑁆𑀢𑀺 𑀧𑀤𑀲𑁆𑀲. 𑀘𑁄𑀤𑀦𑀸𑀲𑁄𑀥𑀦𑀸𑀳𑀻𑀢𑀺 𑀅𑀦𑀼𑀬𑁄𑀕𑀧𑀭𑀺𑀳𑀸𑀭𑁂𑀳𑀺. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀓𑀣𑀦𑁆𑀢𑀺 𑀬𑀁 𑀇𑀤𑀁 ‘‘𑀧𑀲𑁆𑀲𑀫𑁆𑀪𑀬𑀁…𑀧𑁂… 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀓𑁂𑀦 𑀧𑀓𑀸𑀭𑁂𑀦 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀬𑁄𑀕𑀺𑀦𑁄 𑀘 𑀲𑀺𑀓𑁆𑀔𑀦𑀁 𑀳𑁄𑀢𑀻𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀬 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀬𑀲𑀗𑁆𑀔𑀸𑀭𑁂 𑀲𑀭𑀽𑀧𑀢𑁄 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑁄 𑀯𑀽𑀧𑀲𑀫𑀢𑁄 𑀅𑀦𑀼𑀬𑁄𑀕𑀧𑀭𑀺𑀳𑀸𑀭𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁂 𑀓𑀸𑀬𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀸𑀬𑀺𑀓𑀸𑀢𑀺 𑀭𑀽𑀧𑀓𑀸𑀬𑁂 𑀪𑀯𑀸. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀸. 𑀓𑀸𑀬𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺, 𑀢𑀢𑁄 𑀏𑀯 𑀢𑁂 𑀅𑀓𑀸𑀬𑀲𑀫𑀼𑀝𑁆𑀞𑀸𑀦𑀸𑀧𑀺 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑀸. 𑀧𑀲𑁆𑀲𑀫𑁆𑀪𑁂𑀦𑁆𑀢𑁄𑀢𑀺 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀁 𑀧𑀲𑁆𑀲𑀫𑁆𑀪𑁂𑀦𑁆𑀢𑁄.

𑀲𑁂𑀲𑀧𑀤𑀤𑁆𑀯𑀬𑀁 ¶ 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀑𑀴𑀸𑀭𑀺𑀓𑀜𑁆𑀳𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀯𑀽𑀧𑀲𑀦𑁆𑀢𑀲𑀪𑀸𑀯𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀦𑁆𑀢𑁄 ‘‘𑀧𑀲𑁆𑀲𑀫𑁆𑀪𑁂𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀁 𑀧𑀸𑀧𑁂𑀦𑁆𑀢𑁄 ‘‘𑀦𑀺𑀭𑁄𑀥𑁂𑀦𑁆𑀢𑁄’’𑀢𑀺, 𑀲𑀼𑀝𑁆𑀞𑀼 𑀲𑀦𑁆𑀢𑀲𑀪𑀸𑀯𑀁 𑀦𑀬𑀦𑁆𑀢𑁄 ‘‘𑀯𑀽𑀧𑀲𑀫𑁂𑀦𑁆𑀢𑁄’’𑀢𑀺.

𑀬𑀣𑀸𑀭𑀽𑀧𑁂𑀳𑀻𑀢𑀺 𑀬𑀸𑀤𑀺𑀲𑁂𑀳𑀺. 𑀓𑀸𑀬𑀲𑀗𑁆𑀔𑀸𑀭𑁂𑀳𑀻𑀢𑀺 𑀑𑀴𑀸𑀭𑀺𑀓𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺. 𑀆𑀦𑀫𑀦𑀸𑀢𑀺 𑀅𑀪𑀺𑀫𑀼𑀔𑁂𑀦 𑀓𑀸𑀬𑀲𑁆𑀲 𑀦𑀫𑀦𑀸. 𑀯𑀺𑀦𑀫𑀦𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀲𑁆𑀲𑀢𑁄 𑀦𑀫𑀦𑀸. 𑀲𑀦𑁆𑀦𑀫𑀦𑀸𑀢𑀺 𑀲𑀩𑁆𑀩𑀢𑁄, 𑀲𑀼𑀝𑁆𑀞𑀼 𑀯𑀸 𑀦𑀫𑀦𑀸. 𑀧𑀡𑀫𑀦𑀸𑀢𑀺 𑀧𑀘𑁆𑀙𑀢𑁄 𑀦𑀫𑀦𑀸. 𑀇𑀜𑁆𑀚𑀦𑀸𑀤𑀻𑀦𑀺 𑀆𑀦𑀫𑀦𑀸𑀤𑀻𑀦𑀁 𑀯𑁂𑀯𑀘𑀦𑀸𑀦𑀺, 𑀅𑀥𑀺𑀫𑀢𑁆𑀢𑀸𑀦𑀺 𑀯𑀸 𑀅𑀪𑀺𑀫𑀼𑀔𑀘𑀮𑀦𑀸𑀤𑀻𑀦𑀺 𑀆𑀦𑀫𑀦𑀸𑀤𑀬𑁄, 𑀫𑀦𑁆𑀤𑀸𑀦𑀺 𑀇𑀜𑁆𑀚𑀦𑀸𑀤𑀬𑁄. 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 ¶ 𑀢𑀣𑀸𑀭𑀽𑀧𑀁 𑀆𑀦𑀫𑀦𑀸𑀤𑀻𑀦𑀁 𑀓𑀸𑀭𑀡𑀪𑀽𑀢𑀁 𑀑𑀴𑀸𑀭𑀺𑀓𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀧𑀲𑁆𑀲𑀫𑁆𑀪𑀺𑀢𑁂 𑀆𑀦𑀫𑀦𑀸𑀤𑀬𑁄𑀧𑀺 𑀧𑀲𑁆𑀲𑀫𑁆𑀪𑀺𑀢𑀸 𑀏𑀯 𑀳𑁄𑀦𑁆𑀢𑀺.

𑀲𑀦𑁆𑀢𑀁 𑀲𑀼𑀔𑀼𑀫𑀦𑁆𑀢𑀺 𑀬𑀣𑀸𑀭𑀽𑀧𑁂𑀳𑀺 𑀓𑀸𑀬𑀲𑀗𑁆𑀔𑀸𑀭𑁂𑀳𑀺 𑀓𑀸𑀬𑀲𑁆𑀲 𑀅𑀧𑀭𑀺𑀧𑁆𑀨𑀦𑁆𑀤𑀦𑀳𑁂𑀢𑀽𑀳𑀺 𑀆𑀦𑀫𑀦𑀸𑀤𑀬𑁄 𑀦 𑀳𑁄𑀦𑁆𑀢𑀺, 𑀢𑀣𑀸𑀭𑀽𑀧𑀁 𑀤𑀭𑀣𑀸𑀪𑀸𑀯𑀢𑁄 𑀲𑀦𑁆𑀢𑀁, 𑀅𑀦𑁄𑀴𑀸𑀭𑀺𑀓𑀢𑀸𑀬 𑀲𑀼𑀔𑀼𑀫𑀁. 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀏𑀓𑀁 𑀓𑀢𑁆𑀯𑀸 𑀯𑀤𑀢𑀺. 𑀅𑀣 𑀯𑀸 𑀧𑀼𑀩𑁆𑀩𑁂 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀓𑀸𑀬𑀲𑁆𑀲 𑀅𑀧𑀭𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀽𑀢𑁂 𑀲𑀼𑀔𑀼𑀫𑀲𑀼𑀔𑀼𑀫𑀢𑀭𑁂 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑁂𑀧𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀧𑀭𑀫𑀲𑀼𑀔𑀼𑀫𑀢𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀁 𑀲𑀼𑀔𑀼𑀫𑀁 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭’’𑀦𑁆𑀢𑀺.

𑀇𑀢𑀻𑀢𑀺𑀆𑀤𑀺 𑀘𑁄𑀤𑀓𑀯𑀘𑀦𑀁. 𑀢𑀢𑁆𑀣 𑀇𑀢𑀻𑀢𑀺 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀓𑀺𑀭𑀸𑀢𑀺 𑀅𑀭𑀼𑀘𑀺𑀲𑀽𑀘𑀦𑁂, 𑀏𑀯𑀜𑁆𑀘𑁂𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀬𑀤𑀺 𑀅𑀢𑀺𑀲𑀼𑀔𑀼𑀫𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀫𑁆𑀪𑁂𑀢𑀻’’𑀢𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀲𑀢𑀺 𑀢𑀬𑀸 𑀯𑀼𑀢𑁆𑀢𑀸𑀓𑀸𑀭𑁂 𑀮𑀩𑁆𑀪𑀫𑀸𑀦𑁂. 𑀯𑀸𑀢𑀽𑀧𑀮𑀤𑁆𑀥𑀺𑀬𑀸𑀢𑀺 𑀯𑀸𑀢𑀲𑁆𑀲 𑀉𑀧𑀮𑀤𑁆𑀥𑀺𑀬𑀸. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀅𑀲𑁆𑀲𑀸𑀲𑀸𑀤𑀺𑀯𑀸𑀢𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸 𑀧𑀯𑀢𑁆𑀢𑀦𑀸 𑀦 𑀳𑁄𑀢𑀺, 𑀢𑁂 𑀘 𑀢𑁂𑀦 𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀜𑁆𑀘 𑀧𑀪𑀸𑀯𑀦𑀸𑀢𑀺 𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀪𑀸𑀯𑀦𑀸𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀲𑀼𑀔𑀼𑀫𑀸𑀦𑀁 𑀢𑁂𑀲𑀁 𑀧𑀪𑀸𑀯𑀦𑀸 𑀘 𑀦 𑀳𑁄𑀢𑀺 𑀉𑀪𑀬𑁂𑀲𑀁 𑀢𑁂𑀲𑀁 𑀢𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁄. 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸𑀢𑀺 𑀆𑀦𑀸𑀧𑀸𑀦𑀸𑀭𑀫𑁆𑀫𑀡𑀸𑀬 𑀲𑀢𑀺𑀬𑀸 𑀘 𑀧𑀯𑀢𑁆𑀢𑀦𑀁 𑀦 𑀳𑁄𑀢𑀺 𑀆𑀦𑀸𑀧𑀸𑀦𑀸𑀦𑀁 ¶ 𑀅𑀪𑀸𑀯𑀢𑁄. 𑀢𑀢𑁄 𑀏𑀯 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀓𑀤𑀸𑀘𑀺 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀲𑀸𑀭𑀫𑁆𑀫𑀡𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀦 𑀘 𑀦𑀁 𑀢𑀦𑁆𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀯𑀺𑀥𑀸𑀦𑀁 𑀲𑀫𑀸𑀧𑀢𑁆𑀢𑀺𑀁 𑀧𑀡𑁆𑀟𑀺𑀢𑀸 𑀧𑀜𑁆𑀜𑀯𑀦𑁆𑀢𑁄 𑀦 𑀘𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀺𑀧𑀺 𑀢𑀢𑁄 𑀦 𑀯𑀼𑀝𑁆𑀞𑀳𑀦𑁆𑀢𑀺𑀧𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀘𑁄𑀤𑀓𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀽𑀧𑀦𑀬𑀦𑀁 𑀧𑀲𑁆𑀲𑀫𑁆𑀪𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑁂𑀢𑀺.

𑀧𑀼𑀦 𑀇𑀢𑀺 𑀓𑀺𑀭𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀬 𑀘𑁄𑀤𑀦𑀸𑀬 𑀯𑀺𑀲𑁆𑀲𑀚𑁆𑀚𑀦𑀸. 𑀢𑀢𑁆𑀣 𑀓𑀺𑀭𑀸𑀢𑀺 𑀬𑀤𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀢𑀺 𑀓𑀺𑀭 𑀲𑀺𑀓𑁆𑀔𑀢𑀺, 𑀫𑀬𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀬𑀤𑀺 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀧𑀲𑁆𑀲𑀫𑁆𑀪𑀦𑁂 𑀲𑀢𑀺. 𑀧𑀪𑀸𑀯𑀦𑀸 𑀳𑁄𑀢𑀻𑀢𑀺 𑀬𑀤𑀺𑀧𑀺 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀲𑀼𑀔𑀼𑀫𑀸 𑀧𑀦 𑀅𑀢𑁆𑀣𑁂𑀯𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀭𑀫𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀯𑀲𑁂𑀦 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀘 𑀧𑀪𑀸𑀯𑀦𑀸 𑀇𑀚𑁆𑀛𑀢𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀣𑀸 ¶ 𑀓𑀣𑀁 𑀯𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀢𑀁 𑀓𑀣𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁, 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀢𑀤𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑁂 𑀑𑀧𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀑𑀧𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀻𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀁𑀲𑁂𑀢𑀺 𑀓𑀁𑀲𑀪𑀸𑀚𑀦𑁂. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲, 𑀢𑁂𑀲𑀁 𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀸𑀓𑀸𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀺𑀅𑀢𑁆𑀣𑁂 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁. 𑀲𑀼𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀕𑀳𑀺𑀢𑀢𑁆𑀢𑀸. 𑀲𑀼𑀫𑀦𑀲𑀺𑀓𑀢𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀘𑀺𑀢𑁆𑀢𑁂 𑀞𑀧𑀺𑀢𑀢𑁆𑀢𑀸. 𑀲𑀽𑀧𑀥𑀸𑀭𑀺𑀢𑀢𑁆𑀢𑀸𑀢𑀺 𑀲𑀫𑁆𑀫𑀤𑁂𑀯 𑀉𑀧𑀥𑀸𑀭𑀺𑀢𑀢𑁆𑀢𑀸 𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸. 𑀲𑀼𑀔𑀼𑀫𑀓𑀸 𑀲𑀤𑁆𑀤𑀸𑀢𑀺 𑀅𑀦𑀼𑀭𑀯𑁂 𑀆𑀳, 𑀬𑁂 𑀅𑀧𑁆𑀧𑀓𑀸. 𑀅𑀧𑁆𑀧𑀢𑁆𑀣𑁄 𑀳𑀺 𑀅𑀬𑀁 𑀓-𑀲𑀤𑁆𑀤𑁄. 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀻𑀢𑀺 𑀲𑀼𑀔𑀼𑀫𑁄 𑀲𑀤𑁆𑀤𑁄𑀯 𑀦𑀺𑀫𑀺𑀢𑁆𑀢𑀁 𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀢𑀸𑀬𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑀁 𑀢𑀤𑀸 𑀲𑀼𑀔𑀼𑀫𑀸𑀧𑀺 𑀲𑀤𑁆𑀤𑀸 𑀦𑀺𑀭𑀼𑀤𑁆𑀥𑀸, 𑀲𑀤𑁆𑀤𑀦𑀺𑀫𑀺𑀢𑁆𑀢𑀲𑁆𑀲 𑀧𑀦 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀲𑀼𑀔𑀼𑀫𑀢𑀭𑀲𑀤𑁆𑀤𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀪𑀸𑀯𑁂𑀦𑀧𑀺 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀢𑀲𑁆𑀲 𑀢𑀲𑁆𑀲 𑀦𑀺𑀭𑀼𑀤𑁆𑀥𑀲𑁆𑀲 𑀲𑀤𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀬𑁄𑀲𑀸𑀦𑁂 𑀅𑀢𑀺𑀲𑀼𑀔𑀼𑀫𑀲𑀤𑁆𑀤𑀦𑀺𑀫𑀺𑀢𑁆𑀢𑀫𑁆𑀧𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑁂𑀯. 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑁂𑀧𑀁 𑀕𑀘𑁆𑀙𑀢𑀺 𑀢𑀲𑁆𑀫𑀺𑀁 𑀬𑀣𑀸𑀉𑀧𑀝𑁆𑀞𑀺𑀢𑁂 𑀦𑀺𑀫𑀺𑀢𑁆𑀢𑁂 𑀲𑀫𑀸𑀥𑀸𑀦𑀲𑀩𑁆𑀪𑀸𑀯𑀢𑁄.

𑀏𑀯𑀁 𑀲𑀦𑁆𑀢𑁂𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀲𑀤𑁆𑀥𑀺𑀁 𑀘𑁄𑀤𑀦𑀸𑀲𑁄𑀥𑀦𑀸𑀳𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀲𑁆𑀲𑀫𑁆𑀪𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁 ¶ . 𑀢𑀢𑁆𑀣 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀯𑀼𑀢𑁆𑀢𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀦𑁆𑀢𑀺 𑀏𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄; 𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀦𑁆𑀢𑁂𑀦 𑀧𑀞𑀫𑀘𑀢𑀼𑀓𑁆𑀓𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑁂𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 𑀤𑀻𑀖𑀁 𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁨.𑁧𑁪𑁯) 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀧𑀞𑀫𑀘𑀢𑀼𑀓𑁆𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀇𑀢𑀭𑀘𑀢𑀼𑀓𑁆𑀓𑁂𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀏𑀢𑁆𑀣𑀸𑀢𑀺 𑀧𑀞𑀫𑀘𑀢𑀼𑀓𑁆𑀓𑁂. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀻𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀧𑀦 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀅𑀪𑀺𑀜𑁆𑀜𑀸𑀧𑀺 𑀲𑀺𑀚𑁆𑀛𑀢𑀺𑀬𑁂𑀯. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀅𑀦𑀸𑀧𑀚𑁆𑀚𑀦𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀅𑀦𑀸𑀧𑀚𑁆𑀚𑀦𑀁. 𑀆𑀧𑀦𑁆𑀦𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀧𑀦𑁆𑀦𑀲𑀧𑁆𑀧𑀝𑀺𑀓𑀫𑁆𑀫𑀸𑀧𑀢𑁆𑀢𑀺𑀢𑁄 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀫𑁆𑀫𑀓𑀭𑀡𑁂𑀦 𑀯𑀼𑀝𑁆𑀞𑀸𑀦𑀁, 𑀤𑁂𑀲𑀦𑀸𑀕𑀸𑀫𑀺𑀦𑀺𑀢𑁄 𑀤𑁂𑀲𑀦𑀸𑀬, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀧𑀭𑀺𑀯𑀸𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑀓𑀭𑀡𑁂𑀦 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀤𑁂𑀲𑀦𑀸𑀬𑀧𑀺 𑀳𑀺 𑀆𑀧𑀦𑁆𑀦𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀲𑀸𑀧𑀺 𑀯𑀼𑀝𑁆𑀞𑀸𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀓𑀺𑀮𑁂𑀲𑁂𑀳𑀺 𑀘 𑀅𑀧𑁆𑀧𑀝𑀺𑀧𑀻𑀴𑀦𑀦𑁆𑀢𑀺 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀮𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄𑀢𑀺 𑀏𑀯𑀫𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀅𑀧𑁆𑀧𑀝𑀺𑀧𑀻𑀴𑀦𑀁, 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀫𑀺𑀤𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲𑀯𑀺𑀥𑀁 𑀫𑀳𑀸𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀫𑀳𑀸𑀯𑀢𑁆𑀢𑀁 𑀦𑀸𑀫 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀦𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀆𑀯𑀸𑀲𑀺𑀓𑀕𑀫𑀺𑀓𑀅𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀆𑀭𑀜𑁆𑀜𑀺𑀓𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀆𑀘𑀭𑀺𑀬𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀘𑀼𑀤𑁆𑀤𑀲 𑀯𑀢𑁆𑀢𑀸𑀦𑀺. 𑀢𑀢𑁄 𑀅𑀜𑁆𑀜𑀸𑀦𑀺 𑀧𑀦 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂𑀬𑁂𑀯 𑀘𑀭𑀺𑀢𑀩𑁆𑀩𑀸𑀦𑀺 𑀤𑁆𑀯𑀸𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀦 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀘𑀭𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀫𑀳𑀸𑀯𑀢𑁆𑀢𑁂𑀲𑀼 𑀅𑀕𑀡𑀺𑀢𑀸𑀦𑀺. 𑀢𑀢𑁆𑀣 ‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁭𑁬) 𑀯𑀼𑀢𑁆𑀢𑀯𑀢𑁆𑀢𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ¶ ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀫𑀸𑀦𑀢𑁆𑀢𑀸𑀭𑀳𑁂𑀦, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁮𑁨) 𑀯𑀼𑀢𑁆𑀢𑀸𑀦𑀺 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀢𑀸𑀦𑀺 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑀺𑀢𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺 𑀯𑀢𑁆𑀢𑀸𑀦𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀢𑁆𑀢𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁫𑁧) 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑀸𑀤𑀺𑀬𑀦𑀁 𑀏𑀓𑀁, ‘‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄’’𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁫𑁧) 𑀘 𑀤𑀲𑀸𑀢𑀺 𑀏𑀯𑀫𑁂𑀢𑀸𑀦𑀺 𑀤𑁆𑀯𑀸𑀲𑀻𑀢𑀺. 𑀏𑀢𑁂𑀲𑁆𑀯𑁂𑀯 𑀧𑀦 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀯𑀢𑁆𑀢𑀸𑀦𑀺 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺 𑀏𑀯. 𑀅𑀜𑁆𑀜𑀢𑁆𑀣 𑀧𑀦 𑀅𑀝𑁆𑀞𑀓𑀣𑀸𑀧𑀤𑁂𑀲𑁂 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀦𑁆𑀢𑀺 𑀏𑀢𑁆𑀣 𑀅𑀪𑀺𑀲𑀫𑀸𑀘𑀸𑀭𑁄𑀢𑀺 𑀉𑀢𑁆𑀢𑀫𑀲𑀫𑀸𑀘𑀸𑀭𑁄, 𑀅𑀪𑀺𑀲𑀫𑀸𑀘𑀸𑀭𑁄𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑀁, 𑀅𑀪𑀺𑀲𑀫𑀸𑀘𑀸𑀭𑀁 𑀯𑀸 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀁, 𑀢𑀤𑁂𑀯 𑀲𑀻𑀮𑀦𑁆𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁. 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀲𑀻𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀳𑀁 𑀲𑀻𑀮𑀁 𑀭𑀓𑁆𑀔𑀸𑀫𑀺, 𑀓𑀺𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀕𑀳𑁂𑀢𑀩𑁆𑀩𑀁 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀆𑀪𑀺𑀲𑀫𑀸𑀘𑀸𑀭𑀺𑀓𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑀼𑀡𑁆𑀡𑁂, 𑀧𑀭𑀺𑀧𑀽𑀭𑀺𑀢𑁂𑀢𑀺 𑀯𑀸 𑀅𑀢𑁆𑀣𑁄.

𑀢𑀢𑁄𑀢𑀺 ¶ 𑀬𑀣𑀸𑀯𑀼𑀢𑁆𑀢𑀲𑀻𑀮𑀯𑀺𑀲𑁄𑀥𑀦𑀢𑁄 𑀧𑀭𑀁. 𑀆𑀯𑀸𑀲𑁄𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑁄. 𑀓𑀼𑀮𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑀆𑀯𑀸𑀲𑁄𑀢𑀺 𑀏𑀓𑁄𑀧𑀺 𑀑𑀯𑀭𑀓𑁄 𑀯𑀼𑀘𑁆𑀘𑀢𑀺 𑀏𑀓𑀫𑁆𑀧𑀺 𑀧𑀭𑀺𑀯𑁂𑀡𑀁 𑀲𑀓𑀮𑁄𑀧𑀺 𑀲𑀗𑁆𑀖𑀸𑀭𑀸𑀫𑁄. 𑀲𑁆𑀯𑀸𑀬𑀁 𑀦 𑀲𑀩𑁆𑀩𑀲𑁆𑀲𑁂𑀯 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀬𑁄 𑀧𑀦𑁂𑀢𑁆𑀣 𑀦𑀯𑀓𑀫𑁆𑀫𑀸𑀤𑀺𑀉𑀲𑁆𑀲𑀼𑀓𑁆𑀓𑀁 𑀯𑀸 𑀆𑀧𑀚𑁆𑀚𑀢𑀺, 𑀩𑀳𑀼𑀪𑀡𑁆𑀟𑀲𑀦𑁆𑀦𑀺𑀘𑀬𑁄 𑀯𑀸 𑀳𑁄𑀢𑀺, 𑀬𑁂𑀦 𑀓𑁂𑀦𑀘𑀺 𑀯𑀸 𑀓𑀸𑀭𑀡𑁂𑀦 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀢𑀲𑁆𑀲𑁂𑀯 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀇𑀢𑀭𑀲𑁆𑀲.

𑀓𑀼𑀮𑀦𑁆𑀢𑀺 𑀜𑀸𑀢𑀺𑀓𑀼𑀮𑀁 𑀯𑀸 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸. 𑀏𑀓𑀘𑁆𑀘𑀲𑁆𑀲 𑀳𑀺 𑀉𑀧𑀝𑁆𑀞𑀸𑀓𑀓𑀼𑀮𑀫𑁆𑀧𑀺 ‘‘𑀲𑀼𑀔𑀺𑀢𑁂 𑀲𑀼𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀲𑁄 𑀓𑀼𑀮𑀫𑀸𑀦𑀼𑀲𑀓𑁂𑀳𑀺 𑀯𑀺𑀦𑀸 𑀥𑀫𑁆𑀫𑀲𑁆𑀲𑀯𑀦𑀸𑀬 𑀲𑀸𑀫𑀦𑁆𑀢𑀯𑀺𑀳𑀸𑀭𑀫𑁆𑀧𑀺 𑀦 𑀕𑀘𑁆𑀙𑀢𑀺. 𑀏𑀓𑀘𑁆𑀘𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀧𑀮𑀺𑀩𑁄𑀥𑀸 𑀦 𑀳𑁄𑀦𑁆𑀢𑀺 𑀓𑁄𑀭𑀡𑁆𑀟𑀓𑀯𑀺𑀳𑀸𑀭𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀤𑀳𑀭𑀪𑀺𑀓𑁆𑀔𑀼𑀦𑁄 𑀯𑀺𑀬.

𑀮𑀸𑀪𑁄𑀢𑀺 ¶ 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀢𑁂 𑀓𑀣𑀁 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺? 𑀧𑀼𑀜𑁆𑀜𑀯𑀦𑁆𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀕𑀢𑀕𑀢𑀝𑁆𑀞𑀸𑀦𑁂 𑀫𑀦𑀼𑀲𑁆𑀲𑀸 𑀫𑀳𑀸𑀧𑀭𑀺𑀯𑀸𑀭𑁂 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀦𑀼𑀫𑁄𑀤𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀧𑀞𑀫𑀬𑀸𑀫𑁄, 𑀢𑀸𑀯 𑀫𑀦𑀼𑀲𑁆𑀲𑀲𑀁𑀲𑀕𑁆𑀕𑁄 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀧𑀼𑀦 𑀩𑀮𑀯𑀧𑀘𑁆𑀘𑀽𑀲𑁂𑀬𑁂𑀯 𑀩𑀸𑀳𑀼𑀮𑁆𑀮𑀺𑀓𑀧𑀺𑀡𑁆𑀟𑀧𑀸𑀢𑀺𑀓𑀸 𑀆𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀲𑀼𑀓𑁄 𑀉𑀧𑀝𑁆𑀞𑀸𑀓𑁄 𑀉𑀧𑀸𑀲𑀓𑁄 𑀉𑀧𑀸𑀲𑀺𑀓𑀸 𑀅𑀫𑀘𑁆𑀘𑁄 𑀅𑀫𑀘𑁆𑀘𑀥𑀻𑀢𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀓𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑁄 ‘‘𑀕𑀡𑁆𑀳𑀸𑀯𑀼𑀲𑁄 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀕𑀫𑀦𑀲𑀚𑁆𑀚𑁄𑀯 𑀳𑁄𑀢𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑁄, 𑀢𑀲𑁆𑀲𑁂𑀯 𑀢𑁂 𑀧𑀘𑁆𑀘𑀬𑀸 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺. 𑀢𑁂𑀦 𑀕𑀡𑀁 𑀧𑀳𑀸𑀬 𑀬𑀢𑁆𑀣 𑀦𑀁 𑀦 𑀚𑀸𑀦𑀦𑁆𑀢𑀺, 𑀢𑀢𑁆𑀣 𑀏𑀓𑀓𑁂𑀦 𑀘𑀭𑀺𑀢𑀩𑁆𑀩𑀁. 𑀏𑀯𑀁 𑀲𑁄 𑀧𑀮𑀺𑀩𑁄𑀥𑁄 𑀉𑀧𑀘𑁆𑀙𑀺𑀚𑁆𑀚𑀢𑀺.

𑀕𑀡𑁄𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑁄 𑀯𑀸 𑀆𑀪𑀺𑀥𑀫𑁆𑀫𑀺𑀓𑀕𑀡𑁄 𑀯𑀸. 𑀬𑁄 𑀢𑀲𑁆𑀲 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀤𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀲𑁆𑀲 𑀑𑀓𑀸𑀲𑀁 𑀦 𑀮𑀪𑀢𑀺, 𑀢𑀲𑁆𑀲 𑀕𑀡𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀢𑁂𑀦 𑀲𑁄 𑀏𑀯𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄 𑁋 𑀲𑀘𑁂 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀁 𑀅𑀯𑀲𑀺𑀝𑁆𑀞𑀁, 𑀢𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀅𑀧𑁆𑀧𑀁 𑀓𑀢𑀁, 𑀩𑀳𑀼 𑀅𑀯𑀲𑀺𑀝𑁆𑀞𑀁, 𑀬𑁄𑀚𑀦𑀢𑁄 𑀧𑀭𑀁 𑀅𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑁂 𑀅𑀜𑁆𑀜𑀁 𑀕𑀡𑀯𑀸𑀘𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑁂 𑀆𑀬𑀲𑁆𑀫𑀸 𑀉𑀤𑁆𑀤𑁂𑀲𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀅𑀮𑀪𑀫𑀸𑀦𑁂𑀦 ‘‘𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀓𑀁 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀢𑀼𑀫𑁆𑀳𑁂 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀣𑀸’’𑀢𑀺 𑀕𑀡𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀓𑀫𑁆𑀫𑁂𑀦𑀸𑀢𑀺 𑀓𑀫𑁆𑀫𑀧𑀮𑀺𑀩𑁄𑀥𑁂𑀦. ‘‘𑀓𑀫𑁆𑀫𑀜𑁆𑀘 𑀧𑀜𑁆𑀘𑀫’’𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀁. 𑀢𑀁 𑀓𑀭𑁄𑀦𑁆𑀢𑁂𑀦 𑀯𑀟𑁆𑀠𑀓𑀻𑀆𑀤𑀻𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀢𑀸𑀓𑀢𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀣𑀸𑀧𑀺 ¶ 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀲𑁄𑀧𑀺 𑀏𑀯𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄 𑁋 𑀲𑀘𑁂 𑀅𑀧𑁆𑀧𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀦𑀺𑀝𑁆𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀩𑀳𑀼, 𑀲𑀗𑁆𑀖𑀺𑀓𑀁 𑀘𑁂, 𑀦𑀯𑀓𑀫𑁆𑀫𑀁 𑀲𑀗𑁆𑀖𑀲𑁆𑀲 𑀯𑀸 𑀪𑀸𑀭𑀳𑀸𑀭𑀓𑀪𑀺𑀓𑁆𑀔𑀽𑀦𑀁 𑀯𑀸 𑀦𑀺𑀬𑁆𑀬𑀸𑀢𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀘𑁂, 𑀅𑀢𑁆𑀢𑀦𑁄 𑀪𑀸𑀭𑀳𑀸𑀭𑀓𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑀩𑁆𑀩𑀁. 𑀢𑀸𑀤𑀺𑀲𑀁 𑀅𑀮𑀪𑀦𑁆𑀢𑁂𑀦 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀅𑀤𑁆𑀥𑀸𑀦𑀦𑁆𑀢𑀺 𑀫𑀕𑁆𑀕𑀕𑀫𑀦𑀁. 𑀬𑀲𑁆𑀲 𑀳𑀺 𑀓𑀢𑁆𑀣𑀘𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀘𑁆𑀘𑀬𑀚𑀸𑀢𑀁 𑀯𑀸 𑀓𑀺𑀜𑁆𑀘𑀺 𑀮𑀤𑁆𑀥𑀩𑁆𑀩𑀁 𑀳𑁄𑀢𑀺. 𑀲𑀘𑁂 𑀢𑀁 𑀅𑀮𑀪𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀅𑀥𑀺𑀯𑀸𑀲𑁂𑀢𑀼𑀁, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀕𑀫𑀺𑀓𑀘𑀺𑀢𑁆𑀢𑀁 𑀦𑀸𑀫 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀁 ¶ 𑀳𑁄𑀢𑀺, 𑀢𑀲𑁆𑀫𑀸 𑀕𑀦𑁆𑀢𑁆𑀯𑀸 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸𑀯 𑀲𑀫𑀡𑀥𑀫𑁆𑀫𑁂 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀜𑀸𑀢𑀻𑀢𑀺 𑀯𑀺𑀳𑀸𑀭𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀲𑀫𑀸𑀦𑀸𑀘𑀭𑀺𑀬𑀓𑀸, 𑀖𑀭𑁂 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸𑀢𑀺 𑀏𑀯𑀫𑀸𑀤𑀺𑀓𑀸. 𑀢𑁂 𑀕𑀺𑀮𑀸𑀦𑀸 𑀇𑀫𑀲𑁆𑀲 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀧𑀮𑀺𑀩𑁄𑀥𑁄 𑀢𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀁 𑀧𑀸𑀓𑀢𑀺𑀓𑀓𑀭𑀡𑁂𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀉𑀧𑀚𑁆𑀛𑀸𑀬𑁄 𑀢𑀸𑀯 𑀕𑀺𑀮𑀸𑀦𑁄 𑀲𑀘𑁂 𑀮𑀳𑀼𑀁 𑀦 𑀯𑀼𑀝𑁆𑀞𑀸𑀢𑀺, 𑀬𑀸𑀯𑀚𑀻𑀯𑀁 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄, 𑀢𑀣𑀸 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀲𑀫𑁆𑀧𑀸𑀤𑀺𑀢𑀧𑀩𑁆𑀩𑀸𑀚𑀺𑀢𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸 𑀘. 𑀦𑀺𑀲𑁆𑀲𑀬𑀸𑀘𑀭𑀺𑀬𑀉𑀤𑁆𑀤𑁂𑀲𑀸𑀘𑀭𑀺𑀬𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀸𑀘𑀭𑀺𑀬𑀓𑀸 𑀧𑀦 𑀬𑀸𑀯 𑀦𑀺𑀲𑁆𑀲𑀬𑀉𑀤𑁆𑀤𑁂𑀲𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸, 𑀢𑀸𑀯 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸. 𑀧𑀳𑁄𑀦𑁆𑀢𑁂𑀦 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸 𑀏𑀯. 𑀫𑀸𑀢𑀸𑀧𑀺𑀢𑀽𑀲𑀼 𑀉𑀧𑀚𑁆𑀛𑀸𑀬𑁂 𑀯𑀺𑀬 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀳𑀺 𑀢𑁂 𑀭𑀚𑁆𑀚𑁂 𑀞𑀺𑀢𑀸 𑀳𑁄𑀦𑁆𑀢𑀺, 𑀧𑀼𑀢𑁆𑀢𑀢𑁄 𑀘 𑀉𑀧𑀝𑁆𑀞𑀸𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀓𑀸𑀢𑀩𑁆𑀩𑀫𑁂𑀯. 𑀅𑀣 𑀢𑁂𑀲𑀁 𑀪𑁂𑀲𑀚𑁆𑀚𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀲𑀢𑀺, 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀫𑁂𑀯. 𑀪𑀸𑀢𑀼𑀪𑀕𑀺𑀦𑀻𑀦𑀁 𑀧𑀦 𑀢𑁂𑀲𑀁 𑀲𑀦𑁆𑀢𑀓𑀫𑁂𑀯 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀢𑀸𑀯𑀓𑀸𑀮𑀺𑀓𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀮𑀪𑀦𑁆𑀢𑁂𑀦 𑀕𑀡𑁆𑀳𑀺𑀢𑀩𑁆𑀩𑀁, 𑀅𑀮𑀪𑀦𑁆𑀢𑁂𑀦 𑀦 𑀘𑁄𑀤𑁂𑀢𑀩𑁆𑀩𑀸. 𑀅𑀜𑁆𑀜𑀸𑀢𑀓𑀲𑁆𑀲 𑀪𑀕𑀺𑀦𑀺𑀬𑀸 𑀲𑀸𑀫𑀺𑀓𑀲𑁆𑀲 𑀪𑁂𑀲𑀚𑁆𑀚𑀁 𑀦𑁂𑀯 𑀓𑀸𑀢𑀼𑀁, 𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺, ‘‘𑀢𑀼𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀦 𑀪𑀕𑀺𑀦𑀺𑀬𑀸 𑀤𑀸𑀢𑀩𑁆𑀩𑀁. 𑀪𑀸𑀢𑀼 𑀚𑀸𑀬𑀸𑀬𑀧𑀺 𑀏𑀲𑁂𑀯 𑀦𑀬𑁄, 𑀢𑁂𑀲𑀁 𑀧𑀦 𑀧𑀼𑀢𑁆𑀢𑀸 𑀇𑀫𑀲𑁆𑀲 𑀜𑀸𑀢𑀓𑀸𑀬𑁂𑀯𑀸𑀢𑀺 𑀢𑁂𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀆𑀩𑀸𑀥𑁄𑀢𑀺 𑀬𑁄 𑀓𑁄𑀘𑀺 𑀭𑁄𑀕𑁄. 𑀲𑁄 𑀩𑀸𑀥𑀬𑀫𑀸𑀦𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀪𑁂𑀲𑀚𑁆𑀚𑀓𑀭𑀡𑁂𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀢𑀺𑀧𑀸𑀳𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀦 𑀯𑀽𑀧𑀲𑀫𑁆𑀫𑀢𑀺, ‘‘𑀦𑀸𑀳𑀁 𑀢𑀼𑀬𑁆𑀳𑀁 𑀤𑀸𑀲𑁄, 𑀦 𑀪𑀢𑀓𑁄, 𑀢𑀁𑀬𑁂𑀯𑀫𑁆𑀳𑀺 𑀧𑁄𑀲𑁂𑀦𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀤𑀼𑀓𑁆𑀔𑀧𑁆𑀧𑀢𑁆𑀢𑁄’’𑀢𑀺 𑀅𑀢𑁆𑀢𑀪𑀸𑀯𑀁 𑀕𑀭𑀳𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄.

𑀕𑀦𑁆𑀣𑁄𑀢𑀺 ¶ 𑀧𑀭𑀺𑀬𑀢𑁆𑀢𑀺𑀧𑀭𑀺𑀳𑀭𑀡𑀁. 𑀢𑀁 𑀲𑀚𑁆𑀛𑀸𑀬𑀸𑀤𑀻𑀳𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑀲𑁆𑀲𑁂𑀯 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀇𑀢𑀭𑀲𑁆𑀲.

𑀇𑀤𑁆𑀥𑀺𑀬𑀸𑀢𑀺 ¶ 𑀇𑀤𑁆𑀥𑀺𑀧𑀮𑀺𑀩𑁄𑀥𑁂𑀦. ‘‘𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀇𑀤𑁆𑀥𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀸 𑀇𑀤𑁆𑀥𑀺. 𑀲𑀸 𑀳𑀺 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄 𑀯𑀺𑀬 𑀢𑀭𑀼𑀡𑀲𑀲𑁆𑀲𑀁 𑀯𑀺𑀬 𑀘 𑀤𑀼𑀧𑁆𑀧𑀭𑀺𑀳𑀸𑀭𑀸 𑀳𑁄𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀦 𑀘 𑀪𑀺𑀚𑁆𑀚𑀢𑀺. 𑀲𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀲 𑀲𑀫𑀸𑀥𑀺𑀁 𑀧𑀢𑁆𑀯𑀸 𑀧𑀢𑁆𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀢𑁆𑀣𑀺𑀓𑁂𑀦 𑀇𑀤𑁆𑀥𑀺𑀧𑀮𑀺𑀩𑁄𑀥𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀇𑀢𑀭𑁂𑀦 𑀅𑀯𑀲𑁂𑀲𑀸𑀢𑀺. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀁 𑀧𑀭𑀺𑀩𑀼𑀦𑁆𑀥𑁂𑀢𑀺 𑀉𑀧𑀭𑁄𑀥𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀧𑀮𑀺𑀩𑁄𑀥𑁄, 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀧𑀭𑀺𑀧𑀦𑁆𑀣𑁄𑀢𑀺 𑀅𑀢𑁆𑀣𑁄. 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀲𑀫𑀸𑀧𑀦𑁂𑀦 𑀲𑀗𑁆𑀕𑀳𑀡𑁂𑀦 𑀉𑀧𑀭𑀼𑀦𑁆𑀥𑀺𑀢𑀩𑁆𑀩𑁄, 𑀅𑀧𑀮𑀺𑀩𑁄𑀥𑁄 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑀼𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄. 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀲𑀳𑀯𑀸𑀲𑀻𑀦𑀦𑁆𑀢𑀺 𑀲𑀳𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁. 𑀫𑀼𑀤𑀼𑀘𑀺𑀢𑁆𑀢𑀢𑀁 𑀚𑀦𑁂𑀢𑀻𑀢𑀺 𑀅𑀢𑁆𑀢𑀦𑀺 𑀫𑀼𑀤𑀼𑀘𑀺𑀢𑁆𑀢𑀢𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀬𑀜𑁆𑀘 𑀲𑀳𑀯𑀸𑀲𑀻𑀦𑀁 𑀘𑀺𑀢𑁆𑀢𑀫𑀤𑁆𑀤𑀯𑀚𑀦𑀦𑀸𑀤𑀺𑀅𑀢𑁆𑀣𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀫𑁂𑀢𑁆𑀢𑀸𑀦𑀺𑀲𑀁𑀲𑀲𑀼𑀢𑁆𑀢𑁂𑀦 (𑀅. 𑀦𑀺. 𑁮.𑁧) 𑀤𑀻𑀧𑁂𑀢𑀩𑁆𑀩𑁄.

𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑁄𑀢𑀻𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀑𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑀻𑀦𑀯𑀻𑀭𑀺𑀬𑁄 𑀦 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼, 𑀧𑀕𑁂𑀯 𑀇𑀢𑀭𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀫𑀡𑀓𑀭𑀡𑀻𑀬𑁂, 𑀲𑀩𑁆𑀩𑀲𑁆𑀫𑀺𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂. 𑀅𑀢𑁆𑀣𑀬𑀺𑀢𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑀸𑀲𑁂𑀯𑀦𑀯𑀲𑁂𑀦 𑀅𑀢𑁆𑀣𑀬𑀺𑀢𑀩𑁆𑀩𑀁. 𑀬𑁄𑀕𑀲𑁆𑀲 𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁 𑀬𑁄𑀕𑀸𑀦𑀼𑀬𑁄𑀕𑁄, 𑀢𑀤𑁂𑀯 𑀓𑀭𑀡𑀻𑀬𑀝𑁆𑀞𑁂𑀦 𑀓𑀫𑁆𑀫𑀁, 𑀢𑀲𑁆𑀲 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲. 𑀧𑀤𑀝𑁆𑀞𑀸𑀦𑀢𑁆𑀢𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀳𑁂𑀢𑀼𑀢𑁆𑀢𑀸.

𑀑𑀤𑀸𑀢𑀓𑀲𑀺𑀡𑁂 𑀆𑀮𑁄𑀓𑀓𑀲𑀺𑀡𑀁, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀓𑀲𑀺𑀡𑁂 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀜𑁆𑀘 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀁 𑀭𑀽𑀧𑀚𑁆𑀛𑀸𑀦𑀸𑀭𑀫𑁆𑀫𑀡𑀸𑀦𑀁 𑀅𑀝𑁆𑀞𑀦𑁆𑀦𑀁𑀬𑁂𑀯 𑀓𑀲𑀺𑀡𑀸𑀦𑀁 𑀲𑀭𑀽𑀧𑀢𑁄 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀲𑀓𑀲𑀺𑀡𑀁 𑀆𑀮𑁄𑀓𑀓𑀲𑀺𑀡𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 ‘‘𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀽’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀦𑀬𑁂𑀦 𑀧𑀦 𑀆𑀓𑀸𑀲𑀓𑀲𑀺𑀡𑁂 𑀆𑀮𑁄𑀓𑀓𑀲𑀺𑀡𑁂 𑀘 𑀯𑀺𑀲𑀼𑀁 𑀕𑀳𑀺𑀢𑁂 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀢𑀢𑁆𑀭𑀺𑀫𑀸𑀦𑀺 𑀘𑀢𑁆𑀢𑀸𑀮𑀻𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑁋 𑀤𑀲 𑀓𑀲𑀺𑀡𑀸, 𑀤𑀲 𑀅𑀲𑀼𑀪𑀸 ¶ , 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀏𑀓𑀸 𑀲𑀜𑁆𑀜𑀸, 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺. 𑀢𑀢𑁆𑀣 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀓𑀲𑀺𑀡𑀁 𑀢𑁂𑀚𑁄𑀓𑀲𑀺𑀡𑀁 𑀯𑀸𑀬𑁄𑀓𑀲𑀺𑀡𑀁 𑀦𑀻𑀮𑀓𑀲𑀺𑀡𑀁 𑀧𑀻𑀢𑀓𑀲𑀺𑀡𑀁 ¶ 𑀮𑁄𑀳𑀺𑀢𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀁 𑀆𑀮𑁄𑀓𑀓𑀲𑀺𑀡𑀁 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀦𑁆𑀢𑀺 𑀇𑀫𑁂 𑀤𑀲 𑀓𑀲𑀺𑀡𑀸. 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀁 𑀯𑀺𑀘𑁆𑀙𑀺𑀤𑁆𑀤𑀓𑀁 𑀯𑀺𑀓𑁆𑀔𑀸𑀬𑀺𑀢𑀓𑀁 𑀯𑀺𑀓𑁆𑀔𑀺𑀢𑁆𑀢𑀓𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀮𑁄𑀳𑀺𑀢𑀓𑀁 𑀧𑀼𑀴𑀯𑀓𑀁 𑀅𑀝𑁆𑀞𑀺𑀓𑀦𑁆𑀢𑀺 𑀇𑀫𑁂 𑀤𑀲 𑀅𑀲𑀼𑀪𑀸. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫 𑀲𑀗𑁆𑀖 𑀲𑀻𑀮 𑀘𑀸𑀕 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀫𑀭𑀡𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺 𑀇𑀫𑀸 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄. 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 𑀏𑀓𑀸 𑀲𑀜𑁆𑀜𑀸. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺.

𑀬𑀁 𑀬𑀲𑁆𑀲 𑀘𑀭𑀺𑀢𑀸𑀦𑀼𑀓𑀽𑀮𑀦𑁆𑀢𑀺 𑀏𑀢𑁆𑀣 𑀭𑀸𑀕𑀘𑀭𑀺𑀢𑀲𑁆𑀲 𑀢𑀸𑀯 𑀤𑀲 𑀅𑀲𑀼𑀪𑀸 𑀓𑀸𑀬𑀕𑀢𑀸𑀲𑀢𑀻𑀢𑀺 𑀏𑀓𑀸𑀤𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀅𑀦𑀼𑀓𑀽𑀮𑀸𑀦𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀢𑁆𑀢𑀸𑀭𑀺 𑀯𑀡𑁆𑀡𑀓𑀲𑀺𑀡𑀸𑀦𑀻𑀢𑀺 𑀅𑀝𑁆𑀞, 𑀫𑁄𑀳𑀘𑀭𑀺𑀢𑀲𑁆𑀲 𑀘 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘 𑀏𑀓𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀫𑁂𑀯, 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀧𑀼𑀭𑀺𑀫𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄, 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀫𑀭𑀡𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀘𑀢𑁆𑀢𑀸𑀭𑀺, 𑀲𑁂𑀲𑀓𑀲𑀺𑀡𑀸𑀦𑀺 𑀘𑀢𑁆𑀢𑀸𑀭𑁄 𑀘 𑀆𑀭𑀼𑀧𑁆𑀧𑀸 𑀲𑀩𑁆𑀩𑀘𑀭𑀺𑀢𑀸𑀦𑀁 𑀅𑀦𑀼𑀓𑀽𑀮𑀸𑀦𑀺. 𑀓𑀲𑀺𑀡𑁂𑀲𑀼 𑀘 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 ‘‘𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸’’𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲𑁂𑀯 𑀯𑀲𑁂𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀇𑀫𑀺𑀦𑀸𑀯 𑀓𑀫𑁆𑀫𑀝𑁆𑀞𑀸𑀦𑁂𑀦…𑀧𑁂… 𑀉𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀅𑀭𑀳𑀦𑁆𑀢𑀸𑀤𑀬𑁄 𑀳𑀻𑀢𑀺𑀆𑀤𑀺 𑀏𑀓𑀘𑁆𑀘𑀔𑀻𑀡𑀸𑀲𑀯𑀢𑁄 𑀩𑀳𑀼𑀲𑁆𑀲𑀼𑀢𑁄𑀯 𑀓𑀫𑁆𑀫𑀝𑁆𑀞𑀸𑀦𑀤𑀸𑀦𑁂 𑀲𑁂𑀬𑁆𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀫𑀳𑀸𑀳𑀢𑁆𑀣𑀺𑀧𑀣𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀧𑀣𑀯𑀺𑀁 𑀫𑀳𑀸𑀳𑀢𑁆𑀣𑀺𑀧𑀣𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬. 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀢𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀁 𑀬𑀼𑀢𑁆𑀢𑀺𑀫𑀕𑁆𑀕𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑀇𑀤𑀸𑀦𑀺 ¶ 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁂𑀦 𑀥𑁄𑀢𑀫𑀓𑁆𑀔𑀺𑀢𑁂𑀳𑀺 𑀧𑀸𑀤𑁂𑀳𑀺 𑀉𑀧𑀸𑀳𑀦𑀸 𑀆𑀭𑀼𑀳𑀺𑀢𑁆𑀯𑀸 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑁂𑀮𑀦𑀸𑀴𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀯𑀼𑀢𑁂𑀦 𑀦 𑀕𑀦𑁆𑀢𑀩𑁆𑀩𑀁, 𑀕𑀫𑀺𑀓𑀯𑀢𑁆𑀢𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀁 𑀬𑀁 𑀯𑀺𑀳𑀸𑀭𑀁 𑀧𑀯𑀺𑀲𑀢𑀺, 𑀲𑀩𑁆𑀩𑀢𑁆𑀣 𑀧𑀯𑀺𑀝𑁆𑀞𑀓𑀸𑀮𑁂 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀦𑀺𑀓𑁆𑀔𑀫𑀦𑀓𑀸𑀮𑁂 𑀕𑀫𑀺𑀓𑀯𑀢𑁆𑀢𑀦𑁆𑀢𑀺 𑀬𑀣𑀸𑀭𑀳𑀁 𑀢𑀁 𑀢𑀁 𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀦 𑀲𑀮𑁆𑀮𑀳𑀼𑀓𑀧𑀭𑀺𑀓𑁆𑀔𑀸𑀭𑁂𑀦 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸 𑀳𑀼𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑀸 𑀯𑀺𑀦𑀬𑀸𑀘𑀸𑀭𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺 𑀆𑀳. 𑀏𑀯𑀁 𑀧𑀦 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 ¶ 𑀧𑀯𑀺𑀲𑀦𑁆𑀢𑁂𑀦 𑀅𑀦𑁆𑀢𑀭𑀸𑀬𑁂𑀯 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀁, 𑀦 𑀘 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀻𑀦𑀺 𑀓𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀁 𑀧𑀭𑀺𑀯𑁂𑀡𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀲𑀘𑁂 𑀳𑀺𑀲𑁆𑀲 𑀢𑀢𑁆𑀭 𑀆𑀘𑀭𑀺𑀬𑀲𑁆𑀲 𑀯𑀺𑀲𑀪𑀸𑀕𑀸 𑀪𑀺𑀓𑁆𑀔𑀽 𑀪𑀯𑁂𑀬𑁆𑀬𑀼𑀁, 𑀢𑀁 𑀢𑁂 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀦𑀝𑁆𑀞𑁄𑀲𑀺, 𑀲𑀘𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀬𑁂𑀦 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀆𑀘𑀭𑀺𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀚𑀼𑀓𑀁 𑀢𑀢𑁆𑀣𑁂𑀯 𑀕𑀦𑁆𑀢𑀩𑁆𑀩𑀁.

𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀸𑀘𑀭𑀺𑀬𑀦𑁆𑀢𑀺 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩) 𑁋

𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀏𑀓𑀦𑁆𑀢𑀳𑀺𑀢𑁂𑀲𑀺𑀁 𑀯𑀼𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀘𑀭𑀺𑀬𑀁. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀲𑀘𑁂 𑀆𑀘𑀭𑀺𑀬𑁄 𑀤𑀳𑀭𑀢𑀭𑁄 𑀳𑁄𑀢𑀺, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀸𑀤𑀻𑀦𑀺 𑀦 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀼𑀟𑁆𑀠𑀢𑀭𑁄, 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀞𑀸𑀢𑀩𑁆𑀩𑀁. ‘‘𑀦𑀺𑀓𑁆𑀔𑀺𑀧𑀸𑀯𑀼𑀲𑁄, 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. ‘‘𑀧𑀸𑀦𑀻𑀬𑀁 𑀧𑀺𑀯𑀸’’𑀢𑀺 𑀯𑀼𑀢𑁆𑀢𑁂𑀦 𑀲𑀘𑁂 𑀇𑀘𑁆𑀙𑀢𑀺, 𑀧𑀸𑀢𑀩𑁆𑀩𑀁. ‘‘𑀧𑀸𑀤𑁂 𑀥𑁄𑀯𑀸’’𑀢𑀺 𑀯𑀼𑀢𑁆𑀢𑁂𑀦 𑀦 𑀢𑀸𑀯 𑀥𑁄𑀯𑀺𑀢𑀩𑁆𑀩𑀸. 𑀲𑀘𑁂 𑀳𑀺 𑀆𑀘𑀭𑀺𑀬𑁂𑀦 𑀆𑀪𑀢𑀫𑀼𑀤𑀓𑀁 𑀪𑀯𑁂𑀬𑁆𑀬, 𑀦 𑀲𑀸𑀭𑀼𑀧𑁆𑀧𑀁 𑀲𑀺𑀬𑀸. ‘‘𑀥𑁄𑀯𑀸𑀯𑀼𑀲𑁄, 𑀦 𑀫𑀬𑀸 𑀆𑀪𑀢𑀁, 𑀅𑀜𑁆𑀜𑁂𑀳𑀺 𑀆𑀪𑀢’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀬𑀢𑁆𑀣 𑀆𑀘𑀭𑀺𑀬𑁄 𑀦 𑀧𑀲𑁆𑀲𑀢𑀺, 𑀏𑀯𑀭𑀽𑀧𑁂 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀑𑀓𑀸𑀲𑁂 𑀅𑀩𑁆𑀪𑁄𑀓𑀸𑀲𑀯𑀺𑀳𑀸𑀭𑀲𑁆𑀲𑀧𑀺 𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑁄 𑀢𑁂𑀮𑀦𑀸𑀴𑀺𑀁 𑀆𑀳𑀭𑀢𑀺, 𑀉𑀝𑁆𑀞𑀳𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 ¶ 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀦 𑀕𑀡𑁆𑀳𑁂𑀬𑁆𑀬, ‘‘𑀅𑀬𑀁 𑀪𑀺𑀓𑁆𑀔𑀼 𑀇𑀢𑁄 𑀏𑀯 𑀧𑀝𑁆𑀞𑀸𑀬 𑀲𑀫𑁆𑀪𑁄𑀕𑀁 𑀓𑁄𑀧𑁂𑀢𑀻’’𑀢𑀺 𑀆𑀘𑀭𑀺𑀬𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬. 𑀕𑀳𑁂𑀢𑁆𑀯𑀸 𑀧𑀦 𑀦 𑀆𑀤𑀺𑀢𑁄𑀯 𑀧𑀸𑀤𑀸 𑀫𑀓𑁆𑀔𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀢𑀁 𑀆𑀘𑀭𑀺𑀬𑀲𑁆𑀲 𑀕𑀢𑁆𑀢𑀩𑁆𑀪𑀜𑁆𑀚𑀦𑀢𑁂𑀮𑀁 𑀪𑀯𑁂𑀬𑁆𑀬, 𑀦 𑀲𑀸𑀭𑀼𑀧𑁆𑀧𑀁 𑀲𑀺𑀬𑀸, 𑀢𑀲𑁆𑀫𑀸 𑀧𑀞𑀫𑀁 𑀲𑀻𑀲𑀁 𑀫𑀓𑁆𑀔𑁂𑀢𑁆𑀯𑀸 𑀔𑀦𑁆𑀥𑀸𑀤𑀻𑀦𑀺 𑀫𑀓𑁆𑀔𑁂𑀢𑀩𑁆𑀩𑀸𑀦𑀺. ‘‘𑀲𑀩𑁆𑀩𑀧𑀸𑀭𑀺𑀳𑀸𑀭𑀺𑀬𑀢𑁂𑀮𑀫𑀺𑀤𑀁, 𑀆𑀯𑀼𑀲𑁄, 𑀧𑀸𑀤𑁂𑀧𑀺 𑀫𑀓𑁆𑀔𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 ‘‘𑀇𑀫𑀁 𑀢𑁂𑀮𑀦𑀸𑀴𑀺𑀁 𑀞𑀧𑁂𑀫𑀺, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑁂 𑀕𑀡𑁆𑀳𑀦𑁆𑀢𑁂 𑀤𑀸𑀢𑀩𑁆𑀩𑀸.

𑀕𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀫𑁂, 𑀪𑀦𑁆𑀢𑁂, 𑀓𑀣𑁂𑀣’’𑀇𑀘𑁆𑀘𑁂𑀯𑀁 𑀦 𑀯𑀢𑁆𑀢𑀩𑁆𑀩𑀁. 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺𑀉𑀧𑀝𑁆𑀞𑀸𑀓𑁄 𑀅𑀢𑁆𑀣𑀺, 𑀢𑀁 𑀬𑀸𑀘𑀺𑀢𑁆𑀯𑀸 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀬𑀸𑀘𑀺𑀢𑁄𑀧𑀺 ¶ 𑀦 𑀤𑁂𑀢𑀺, 𑀑𑀓𑀸𑀲𑁂 𑀮𑀤𑁆𑀥𑁂𑀬𑁂𑀯 𑀓𑀸𑀢𑀩𑁆𑀩𑀁. 𑀓𑀭𑁄𑀦𑁆𑀢𑁂𑀦 𑀘 𑀔𑀼𑀤𑁆𑀤𑀓𑀫𑀚𑁆𑀛𑀺𑀫𑀫𑀳𑀦𑁆𑀢𑀸𑀦𑀺 𑀢𑀻𑀡𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀉𑀧𑀦𑀸𑀫𑁂𑀢𑀩𑁆𑀩𑀸𑀦𑀺. 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀤𑀼𑀯𑀺𑀥𑀁 𑀫𑀼𑀔𑀥𑁄𑀯𑀦𑀼𑀤𑀓𑀜𑁆𑀘 𑀦𑁆𑀳𑀸𑀦𑁄𑀤𑀓𑀜𑁆𑀘 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀢𑀢𑁄 𑀬𑀁 𑀆𑀘𑀭𑀺𑀬𑁄 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀸𑀤𑀺𑀲𑀫𑁂𑀯 𑀦𑀺𑀘𑁆𑀘𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁, 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀬𑀣𑀸𑀮𑀤𑁆𑀥𑀁 𑀉𑀧𑀦𑀸𑀫𑁂𑀢𑀩𑁆𑀩𑀁. 𑀓𑀺𑀁 𑀩𑀳𑀼𑀦𑀸 𑀯𑀼𑀢𑁆𑀢𑁂𑀦, 𑀬𑀁 𑀢𑀁 𑀪𑀕𑀯𑀢𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸’’𑀢𑀺𑀆𑀤𑀺𑀓𑀁 (𑀫𑀳𑀸𑀯. 𑁬𑁬) 𑀔𑀦𑁆𑀥𑀓𑁂 𑀯𑀢𑁆𑀢𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀓𑀸𑀢𑀩𑁆𑀩𑀁. 𑀇𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀜𑁆𑀘𑀲𑀦𑁆𑀥𑀺𑀓𑀦𑁆𑀢𑀺 𑀧𑀜𑁆𑀘𑀧𑀩𑁆𑀩𑀁, 𑀧𑀜𑁆𑀘𑀪𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀢𑀤𑀢𑁆𑀣𑀧𑀭𑀺𑀧𑀼𑀘𑁆𑀙𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀭𑀺𑀧𑀼𑀘𑁆𑀙𑀦𑀸. 𑀅𑀣 𑀯𑀸 𑀕𑀦𑁆𑀣𑀢𑁄 𑀅𑀢𑁆𑀣𑀢𑁄 𑀘 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀁 𑀉𑀕𑁆𑀕𑀳𑁄, 𑀢𑀢𑁆𑀣 𑀲𑀁𑀲𑀬𑀧𑀭𑀺𑀧𑀼𑀘𑁆𑀙𑀦𑀸 𑀧𑀭𑀺𑀧𑀼𑀘𑁆𑀙𑀸. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀝𑁆𑀞𑀸𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀁, 𑀏𑀯𑀁 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 ‘‘𑀏𑀯𑀫𑀺𑀤𑀁 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀻’’𑀢𑀺 𑀉𑀧𑀥𑀸𑀭𑀡𑀁, 𑀢𑀣𑀸 𑀓𑀫𑁆𑀫𑀝𑁆𑀞𑀸𑀦𑀧𑁆𑀧𑀦𑀸 ‘‘𑀏𑀯𑀁 𑀛𑀸𑀦𑀫𑀧𑁆𑀧𑁂𑀢𑀻’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀨𑀼𑀲𑀦𑀸𑀦𑀁 𑀯𑀲𑁂𑀦 𑀪𑀸𑀯𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀞𑀧𑀦𑀸𑀬 𑀲𑀫𑁆𑀧𑀢𑁆𑀢𑀺, 𑀢𑀢𑁄 𑀧𑀭𑀫𑁆𑀧𑀺 𑀯𑀸 𑀲𑀮𑁆𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀲𑁆𑀲 𑀲𑀮𑁆𑀮𑀓𑁆𑀔𑀡𑀁. 𑀢𑁂𑀦𑀸𑀳 𑁋 ‘‘𑀓𑀫𑁆𑀫𑀝𑁆𑀞𑀸𑀦𑀲𑀪𑀸𑀯𑀼𑀧𑀥𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀅𑀢𑁆𑀢𑀦𑀸𑀧𑀺 ¶ 𑀦 𑀓𑀺𑀮𑀫𑀢𑀺 𑀑𑀥𑀺𑀲𑁄 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑀢𑁄, 𑀢𑀢𑁄 𑀏𑀯 𑀆𑀘𑀭𑀺𑀬𑀫𑁆𑀧𑀺 𑀦 𑀯𑀺𑀳𑁂𑀞𑁂𑀢𑀺 𑀥𑀫𑁆𑀫𑀸𑀥𑀺𑀓𑀭𑀡𑀫𑁆𑀧𑀺 𑀪𑀸𑀯𑀦𑀸𑀬 𑀫𑀢𑁆𑀣𑀓𑀁 𑀧𑀸𑀧𑀦𑀢𑁄. 𑀢𑀲𑁆𑀫𑀸𑀢𑀺 𑀢𑀁𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄𑀅𑀓𑀺𑀮𑀫𑀦𑀆𑀘𑀭𑀺𑀬𑀸𑀯𑀺𑀳𑁂𑀞𑀦𑀳𑁂𑀢𑀼. 𑀣𑁄𑀓𑀦𑁆𑀢𑀺 𑀣𑁄𑀓𑀁 𑀣𑁄𑀓𑀁. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀆𑀘𑀭𑀺𑀬𑁄 𑀯𑀲𑀢𑀺, 𑀢𑀢𑁆𑀣. 𑀲𑀧𑁆𑀧𑀸𑀬𑀁 𑀳𑁄𑀢𑀻𑀢𑀺 𑀆𑀯𑀸𑀲𑀲𑀧𑁆𑀧𑀸𑀬𑀸𑀤𑀺𑀮𑀸𑀪𑁂𑀦 𑀫𑀦𑀲𑀺𑀓𑀸𑀭𑀨𑀸𑀲𑀼𑀢𑀸 𑀪𑀸𑀯𑀦𑀸𑀦𑀼𑀓𑀽𑀮𑀢𑀸 𑀳𑁄𑀢𑀺. 𑀬𑁄𑀚𑀦𑀧𑀭𑀫𑀦𑁆𑀢𑀺 𑀇𑀫𑀺𑀦𑀸 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀲𑁆𑀫𑀸 𑀧𑀦 𑀫𑀦𑁆𑀤𑀧𑀜𑁆𑀜𑁄 𑀕𑀸𑀯𑀼𑀢𑁂 𑀅𑀟𑁆𑀠𑀬𑁄𑀚𑀦𑁂 𑀬𑁄𑀚𑀦𑀫𑀢𑁆𑀢𑁂 𑀯𑀸 𑀯𑀲𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀲𑀦𑁆𑀤𑁂𑀳𑁂 𑀯𑀸 𑀲𑀢𑀺𑀲𑀫𑁆𑀫𑁄𑀲𑁂 𑀯𑀸 𑀚𑀸𑀢𑁂 𑀓𑀸𑀮𑀲𑁆𑀲𑁂𑀯 𑀯𑀺𑀳𑀸𑀭𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀆𑀘𑀭𑀺𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀓𑀺𑀮𑀫𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁆𑀤𑀧𑀜𑁆𑀜𑁄 𑀬𑁄𑀚𑀦𑀧𑀭𑀫𑀁 𑀕𑀦𑁆𑀢𑁆𑀯𑀸’’𑀢𑀺. 𑀲𑀘𑁂 𑀢𑀺𑀓𑁆𑀔𑀧𑀜𑁆𑀜𑁄 𑀬𑁄𑀚𑀦𑀧𑀭𑀫𑁂 𑀨𑀸𑀲𑀼𑀓𑀝𑁆𑀞𑀸𑀦𑀁 𑀦 𑀮𑀪𑀢𑀺, 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀲𑀩𑁆𑀩𑀁 𑀕𑀡𑁆𑀞𑀺𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 ¶ 𑀯𑀺𑀲𑀼𑀤𑁆𑀥𑀁 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀢𑁆𑀯𑀸 𑀬𑁄𑀚𑀦𑀧𑀭𑀫𑀢𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀢𑀺𑀓𑁆𑀔𑀧𑀜𑁆𑀜𑁄 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸’’𑀢𑀺.

𑀅𑀝𑁆𑀞𑀸𑀭𑀲𑀲𑁂𑀦𑀸𑀲𑀦𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀫𑀳𑀢𑁆𑀢𑀁, 𑀦𑀯𑀢𑁆𑀢𑀁, 𑀚𑀺𑀡𑁆𑀡𑀢𑁆𑀢𑀁, 𑀧𑀦𑁆𑀣𑀦𑀺𑀲𑁆𑀲𑀺𑀢𑀢𑁆𑀢𑀁, 𑀲𑁄𑀡𑁆𑀟𑀻, 𑀧𑀡𑁆𑀡𑀁, 𑀧𑀼𑀧𑁆𑀨𑀁, 𑀨𑀮𑀁, 𑀧𑀢𑁆𑀣𑀦𑀻𑀬𑀢𑀸, 𑀦𑀕𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀤𑀸𑀭𑀼𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀯𑀺𑀲𑀪𑀸𑀕𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀺𑀢𑀸, 𑀧𑀝𑁆𑀝𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀧𑀘𑁆𑀘𑀦𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀅𑀲𑀧𑁆𑀧𑀸𑀬𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀲𑁂𑀦𑀸𑀲𑀦𑀤𑁄𑀲𑁂𑀳𑀺 𑀯𑀺𑀯𑀚𑁆𑀚𑀺𑀢𑀁. 𑀇𑀫𑁂𑀲𑀜𑁆𑀳𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁.

𑀓𑀲𑁆𑀫𑀸? 𑀫𑀳𑀸𑀯𑀺𑀳𑀸𑀭𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑀢𑀸𑀯 𑀩𑀳𑀽 𑀦𑀸𑀦𑀸𑀙𑀦𑁆𑀤𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀯𑀺𑀭𑀼𑀤𑁆𑀥𑀢𑀸𑀬 𑀯𑀢𑁆𑀢𑀁 𑀦 𑀓𑀭𑁄𑀦𑁆𑀢𑀺, 𑀩𑁄𑀥𑀺𑀬𑀗𑁆𑀕𑀡𑀸𑀤𑀻𑀦𑀺 𑀅𑀲𑀫𑁆𑀫𑀝𑁆𑀞𑀸𑀦𑁂𑀯 𑀳𑁄𑀦𑁆𑀢𑀺, 𑀅𑀦𑀼𑀧𑀝𑁆𑀞𑀸𑀧𑀺𑀢𑀁 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁. 𑀢𑀢𑁆𑀭𑀸𑀬𑀁 ‘‘𑀕𑁄𑀘𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀺𑀓𑁆𑀔𑀦𑁆𑀢𑁄𑀧𑀺 𑀲𑀘𑁂 𑀧𑀲𑁆𑀲𑀢𑀺 𑀯𑀢𑁆𑀢𑀁 𑀅𑀓𑀢𑀁, 𑀧𑀸𑀦𑀻𑀬𑀖𑀝𑀁 𑀯𑀸 𑀭𑀺𑀢𑁆𑀢𑀁, 𑀅𑀣𑀸𑀦𑁂𑀦 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁 ¶ , 𑀅𑀓𑀭𑁄𑀦𑁆𑀢𑁄 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀭𑁄𑀦𑁆𑀢𑀲𑁆𑀲 𑀓𑀸𑀮𑁄 𑀅𑀢𑀺𑀓𑁆𑀓𑀫𑀢𑀺, 𑀅𑀢𑀺𑀤𑀺𑀯𑀸 𑀧𑀯𑀺𑀝𑁆𑀞𑁄 𑀦𑀺𑀝𑁆𑀞𑀺𑀢𑀸𑀬 𑀪𑀺𑀓𑁆𑀔𑀸𑀬 𑀓𑀺𑀜𑁆𑀘𑀺 𑀦 𑀮𑀪𑀢𑀺. 𑀧𑀝𑀺𑀲𑀮𑁆𑀮𑀸𑀦𑀕𑀢𑁄𑀧𑀺 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽𑀦𑀁 𑀉𑀘𑁆𑀘𑀸𑀲𑀤𑁆𑀤𑁂𑀦 𑀲𑀗𑁆𑀖𑀓𑀫𑁆𑀫𑁂𑀳𑀺 𑀘 𑀯𑀺𑀓𑁆𑀔𑀺𑀧𑀢𑀺. 𑀬𑀢𑁆𑀣 𑀧𑀦 𑀲𑀩𑁆𑀩𑀁 𑀯𑀢𑁆𑀢𑀁 𑀓𑀢𑀫𑁂𑀯 𑀳𑁄𑀢𑀺, 𑀅𑀯𑀲𑁂𑀲𑀸𑀧𑀺 𑀘 𑀖𑀝𑁆𑀝𑀦𑀸 𑀦𑀢𑁆𑀣𑀺, 𑀏𑀯𑀭𑀽𑀧𑁂 𑀫𑀳𑀸𑀯𑀺𑀳𑀸𑀭𑁂𑀧𑀺 𑀯𑀺𑀳𑀸𑀢𑀩𑁆𑀩𑀁.

𑀦𑀯𑀯𑀺𑀳𑀸𑀭𑁂 𑀩𑀳𑀼 𑀦𑀯𑀓𑀫𑁆𑀫𑀁 𑀳𑁄𑀢𑀺, 𑀅𑀓𑀭𑁄𑀦𑁆𑀢𑀁 𑀉𑀚𑁆𑀛𑀸𑀬𑀦𑁆𑀢𑀺. 𑀬𑀢𑁆𑀣 𑀧𑀦 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀬𑀲𑁆𑀫𑀸 𑀬𑀣𑀸𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀼, 𑀫𑀬𑀁 𑀦𑀯𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺, 𑀏𑀯𑀭𑀽𑀧𑁂 𑀯𑀺𑀳𑀸𑀢𑀩𑁆𑀩𑀁.

𑀚𑀺𑀡𑁆𑀡𑀯𑀺𑀳𑀸𑀭𑁂 𑀧𑀦 𑀩𑀳𑀼 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑀫𑀲𑁄 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀫𑀢𑁆𑀢𑀫𑁆𑀧𑀺 𑀅𑀧𑁆𑀧𑀝𑀺𑀚𑀕𑁆𑀕𑀦𑁆𑀢𑀁 𑀉𑀚𑁆𑀛𑀸𑀬𑀦𑁆𑀢𑀺, 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀳𑀸𑀬𑀢𑀺.

𑀧𑀦𑁆𑀣𑀦𑀺𑀲𑁆𑀲𑀺𑀢𑁂 𑀫𑀳𑀸𑀧𑀣𑀯𑀺𑀳𑀸𑀭𑁂 𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀕𑀦𑁆𑀢𑀼𑀓𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀯𑀺𑀓𑀸𑀮𑁂 𑀆𑀕𑀢𑀸𑀦𑀁 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀤𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑁂 𑀯𑀸 𑀯𑀲𑀺𑀢𑀩𑁆𑀩𑀁 𑀳𑁄𑀢𑀺, 𑀧𑀼𑀦𑀤𑀺𑀯𑀲𑁂𑀧𑀺 𑀏𑀯𑀫𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺. 𑀬𑀢𑁆𑀣 𑀧𑀦 𑀏𑀯𑀭𑀽𑀧𑁄 𑀆𑀕𑀦𑁆𑀢𑀼𑀓𑀲𑀫𑁆𑀩𑀸𑀥𑁄 𑀦 𑀳𑁄𑀢𑀺, 𑀢𑀢𑁆𑀣 𑀯𑀺𑀳𑀸𑀢𑀩𑁆𑀩𑀁.

𑀲𑁄𑀡𑁆𑀟𑀻 ¶ 𑀦𑀸𑀫 𑀧𑀸𑀲𑀸𑀡𑀧𑁄𑀓𑁆𑀔𑀭𑀡𑀻 𑀳𑁄𑀢𑀺. 𑀢𑀢𑁆𑀣 𑀧𑀸𑀦𑀻𑀬𑀢𑁆𑀣𑀁 𑀫𑀳𑀸𑀚𑀦𑁄 𑀲𑀫𑁄𑀲𑀭𑀢𑀺, 𑀦𑀕𑀭𑀯𑀸𑀲𑀻𑀦𑀁 𑀭𑀸𑀚𑀓𑀼𑀮𑀽𑀧𑀓𑀢𑁆𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀭𑀚𑀦𑀓𑀫𑁆𑀫𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀪𑀸𑀚𑀦𑀤𑀸𑀭𑀼𑀤𑁄𑀡𑀺𑀓𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 ‘‘𑀅𑀲𑀼𑀓𑁂 𑀘 𑀅𑀲𑀼𑀓𑁂 𑀘 𑀞𑀸𑀦𑁂’’𑀢𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀓𑀸𑀮𑀫𑁆𑀧𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑁄 𑀳𑁄𑀢𑀺.

𑀬𑀢𑁆𑀣 𑀦𑀸𑀦𑀸𑀯𑀺𑀥𑀁 𑀲𑀸𑀓𑀧𑀡𑁆𑀡𑀁 𑀳𑁄𑀢𑀺, 𑀢𑀢𑁆𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀸𑀓𑀳𑀸𑀭𑀺𑀓𑀸 𑀕𑀸𑀬𑀫𑀸𑀦𑀸 𑀧𑀡𑁆𑀡𑀁 𑀉𑀘𑁆𑀘𑀺𑀦𑀦𑁆𑀢𑀺𑀬𑁄 𑀯𑀺𑀲𑀪𑀸𑀕𑀲𑀤𑁆𑀤𑀲𑀗𑁆𑀖𑀝𑁆𑀝𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀺.

𑀬𑀢𑁆𑀣 𑀧𑀦 𑀦𑀸𑀦𑀸𑀯𑀺𑀥𑀸 𑀫𑀸𑀮𑀸𑀕𑀘𑁆𑀙𑀸 𑀲𑀼𑀧𑀼𑀧𑁆𑀨𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀢𑀸𑀤𑀺𑀲𑁄𑀬𑁂𑀯 𑀉𑀧𑀤𑁆𑀤𑀯𑁄.

𑀬𑀢𑁆𑀣 𑀦𑀸𑀦𑀸𑀯𑀺𑀥𑀁 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀸𑀤𑀺𑀨𑀮𑀁 𑀳𑁄𑀢𑀺, 𑀢𑀢𑁆𑀣 𑀨𑀮𑀢𑁆𑀣𑀺𑀓𑀸 𑀆𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑀺, 𑀅𑀤𑁂𑀦𑁆𑀢𑀲𑁆𑀲 𑀓𑀼𑀚𑁆𑀛𑀦𑁆𑀢𑀺, 𑀩𑀮𑀓𑁆𑀓𑀸𑀭𑁂𑀦 𑀯𑀸 𑀕𑀡𑁆𑀳𑀦𑁆𑀢𑀺, 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀫𑀚𑁆𑀛𑁂 𑀘𑀗𑁆𑀓𑀫𑀦𑁆𑀢𑁂𑀦 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀉𑀧𑀸𑀲𑀓𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀸 𑀬𑀣𑀸𑀭𑀼𑀘𑀺 𑀅𑀓𑁆𑀓𑁄𑀲𑀦𑁆𑀢𑀺, 𑀅𑀯𑀸𑀲𑀸𑀬𑀧𑀺𑀲𑁆𑀲 𑀧𑀭𑀓𑁆𑀓𑀫𑀦𑁆𑀢𑀺.

𑀧𑀢𑁆𑀣𑀦𑀻𑀬𑁂 ¶ 𑀧𑀦 𑀮𑁄𑀓𑀲𑀫𑁆𑀫𑀢𑁂 𑀤𑀓𑁆𑀔𑀺𑀡𑀕𑀺𑀭𑀺𑀳𑀢𑁆𑀣𑀺𑀓𑀼𑀘𑁆𑀙𑀺𑀘𑁂𑀢𑀺𑀬𑀕𑀺𑀭𑀺𑀘𑀺𑀢𑁆𑀢𑀮𑀧𑀩𑁆𑀩𑀢𑀲𑀤𑀺𑀲𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑀁 ‘‘𑀅𑀬𑀁 𑀅𑀭𑀳𑀸’’𑀢𑀺 𑀲𑀫𑁆𑀪𑀸𑀯𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀫𑀦𑀼𑀲𑁆𑀲𑀸 𑀲𑀫𑀦𑁆𑀢𑀸 𑀑𑀲𑀭𑀦𑁆𑀢𑀺, 𑀢𑁂𑀦𑀲𑁆𑀲 𑀦 𑀨𑀸𑀲𑀼 𑀳𑁄𑀢𑀺. 𑀬𑀲𑁆𑀲 𑀧𑀦 𑀢𑀁 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀢𑁂𑀦 𑀤𑀺𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁 𑀯𑀲𑀺𑀢𑀩𑁆𑀩𑀁.

𑀦𑀕𑀭𑀲𑀦𑁆𑀦𑀺𑀲𑁆𑀲𑀺𑀢𑁂 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀦𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀓𑀼𑀫𑁆𑀪𑀤𑀸𑀲𑀺𑀬𑁄𑀧𑀺 𑀖𑀝𑁂𑀳𑀺 𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀑𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀁 𑀦 𑀤𑁂𑀦𑁆𑀢𑀺, 𑀇𑀲𑁆𑀲𑀭𑀫𑀦𑀼𑀲𑁆𑀲𑀸𑀧𑀺 𑀯𑀺𑀳𑀸𑀭𑀫𑀚𑁆𑀛𑁂 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺.

𑀤𑀸𑀭𑀼𑀲𑀦𑁆𑀦𑀺𑀲𑁆𑀲𑀬𑁂 𑀧𑀦 𑀬𑀢𑁆𑀣 𑀓𑀝𑁆𑀞𑀸𑀦𑀺 𑀘 𑀤𑀩𑁆𑀩𑀼𑀧𑀓𑀭𑀡𑀭𑀼𑀓𑁆𑀔𑀸 𑀘 𑀲𑀦𑁆𑀢𑀺, 𑀢𑀢𑁆𑀣 𑀓𑀝𑁆𑀞𑀳𑀸𑀭𑀺𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀸𑀓𑀧𑀼𑀧𑁆𑀨𑀳𑀸𑀭𑀺𑀓𑀸 𑀯𑀺𑀬 𑀅𑀨𑀸𑀲𑀼𑀓𑀁 𑀓𑀭𑁄𑀦𑁆𑀢𑀺. 𑀯𑀺𑀳𑀸𑀭𑁂 𑀭𑀼𑀓𑁆𑀔𑀸 𑀲𑀦𑁆𑀢𑀺, 𑀢𑁂 ‘‘𑀙𑀺𑀦𑁆𑀤𑀺𑀢𑁆𑀯𑀸 𑀖𑀭𑀸𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀺. 𑀲𑀘𑁂 𑀲𑀸𑀬𑀦𑁆𑀳𑀲𑀫𑀬𑁂 𑀧𑀥𑀸𑀦𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀘𑀗𑁆𑀓𑀫𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀉𑀧𑀸𑀲𑀓𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀬𑀣𑀸𑀭𑀼𑀘𑀺 𑀅𑀓𑁆𑀓𑁄𑀲𑀦𑁆𑀢𑀺, 𑀅𑀯𑀸𑀲𑀸𑀬𑀧𑀺𑀲𑁆𑀲 𑀧𑀭𑀓𑁆𑀓𑀫𑀦𑁆𑀢𑀺.

𑀬𑁄 ¶ 𑀧𑀦 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺 𑀲𑀫𑀦𑁆𑀢𑀸 𑀔𑁂𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀔𑀮𑀁 𑀓𑀢𑁆𑀯𑀸 𑀥𑀜𑁆𑀜𑀁 𑀫𑀤𑁆𑀤𑀦𑁆𑀢𑀺, 𑀧𑀫𑀼𑀔𑁂𑀲𑀼 𑀲𑀬𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀩𑀳𑀼𑀁 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺. 𑀬𑀢𑁆𑀭𑀧𑀺 𑀫𑀳𑀸𑀲𑀗𑁆𑀖𑀪𑁄𑀕𑁄 𑀳𑁄𑀢𑀺, 𑀆𑀭𑀸𑀫𑀺𑀓𑀓𑀼𑀮𑀸𑀦𑀁 𑀕𑀸𑀯𑁄 𑀭𑀼𑀦𑁆𑀥𑀦𑁆𑀢𑀺, 𑀉𑀤𑀓𑀯𑀸𑀭𑀁 𑀧𑀝𑀺𑀲𑁂𑀥𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀯𑀻𑀳𑀺𑀲𑀻𑀲𑀁 𑀕𑀳𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀢𑀼𑀫𑁆𑀳𑀸𑀓𑀁 𑀆𑀭𑀸𑀫𑀺𑀓𑀓𑀼𑀮𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀲𑀗𑁆𑀖𑀲𑁆𑀲 𑀤𑀲𑁆𑀲𑁂𑀦𑁆𑀢𑀺. 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀖𑀭𑀤𑁆𑀯𑀸𑀭𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀅𑀬𑀫𑁆𑀧𑀺 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑁄.

𑀬𑀢𑁆𑀣 𑀅𑀜𑁆𑀜𑀫𑀜𑁆𑀜𑀯𑀺𑀲𑀪𑀸𑀕𑀸 𑀯𑁂𑀭𑀻 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀬𑁂 𑀓𑀮𑀳𑀁 𑀓𑀭𑁄𑀦𑁆𑀢𑀸 ‘‘𑀫𑀸, 𑀪𑀦𑁆𑀢𑁂, 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀸𑀭𑀺𑀬𑀫𑀸𑀦𑀸 ‘‘𑀏𑀢𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀝𑁆𑀞𑀸𑀫𑁆𑀳𑀸’’𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺.

𑀬𑁄𑀧𑀺 𑀉𑀤𑀓𑀧𑀝𑁆𑀝𑀦𑀁 𑀯𑀸 𑀣𑀮𑀧𑀝𑁆𑀝𑀦𑀁 𑀯𑀸 𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀅𑀪𑀺𑀡𑁆𑀳𑀁 𑀦𑀸𑀯𑀸𑀳𑀺 𑀘 𑀲𑀢𑁆𑀣𑁂𑀳𑀺 𑀘 𑀆𑀕𑀢𑀫𑀦𑀼𑀲𑁆𑀲𑀸 ‘‘𑀑𑀓𑀸𑀲𑀁 𑀤𑁂𑀣, 𑀧𑀸𑀦𑀻𑀬𑀁 𑀤𑁂𑀣, 𑀮𑁄𑀡𑀁 𑀤𑁂𑀣𑀸’’𑀢𑀺 𑀖𑀝𑁆𑀝𑀬𑀦𑁆𑀢𑀸 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺.

𑀧𑀘𑁆𑀘𑀦𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁂 𑀧𑀦 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀸𑀤𑀻𑀲𑀼 𑀅𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺.

𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑁂 ¶ 𑀭𑀸𑀚𑀪𑀬𑀁 𑀳𑁄𑀢𑀺. 𑀢𑀜𑁆𑀳𑀺 𑀧𑀤𑁂𑀲𑀁 𑀏𑀓𑁄 𑀭𑀸𑀚𑀸 ‘‘𑀦 𑀫𑀬𑁆𑀳𑀁 𑀯𑀲𑁂 𑀯𑀢𑁆𑀢𑀢𑀻’’𑀢𑀺 𑀧𑀳𑀭𑀢𑀺, 𑀇𑀢𑀭𑁄𑀧𑀺 ‘‘𑀦 𑀫𑀬𑁆𑀳𑀁 𑀯𑀲𑁂 𑀯𑀢𑁆𑀢𑀢𑀻’’𑀢𑀺. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀓𑀤𑀸𑀘𑀺 𑀇𑀫𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑁂 𑀯𑀺𑀘𑀭𑀢𑀺, 𑀓𑀤𑀸𑀘𑀺 𑀏𑀢𑀲𑁆𑀲, 𑀅𑀣 𑀦𑀁 ‘‘𑀘𑀭𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺.

𑀅𑀲𑀧𑁆𑀧𑀸𑀬𑀢𑀸𑀢𑀺 𑀯𑀺𑀲𑀪𑀸𑀕𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀲𑀫𑁄𑀲𑀭𑀡𑁂𑀦 𑀯𑀸 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀢𑀸𑀬 𑀯𑀸 𑀅𑀲𑀧𑁆𑀧𑀸𑀬𑀢𑀸. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀣𑁂𑀭𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑀲𑁆𑀲 𑀏𑀓𑀸 𑀬𑀓𑁆𑀔𑀺𑀦𑀻 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀢𑁆𑀯𑀸 𑀕𑀸𑀬𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺, 𑀲𑀸 𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑀦𑀲𑀻𑀲𑁂 𑀕𑀸𑀬𑀺. 𑀣𑁂𑀭𑁄 𑀘𑀗𑁆𑀓𑀫𑀦𑀲𑀻𑀲𑀁 𑀅𑀕𑀫𑀸𑀲𑀺, 𑀲𑀸 𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀞𑀢𑁆𑀯𑀸 𑀕𑀸𑀬𑀺. 𑀣𑁂𑀭𑁄 𑀧𑀝𑀺𑀦𑀺𑀯𑀢𑁆𑀢𑀺, 𑀅𑀣 𑀦𑀁 𑀲𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀕𑀳𑁂𑀢𑁆𑀯𑀸 ‘‘𑀫𑀬𑀸, 𑀪𑀦𑁆𑀢𑁂, 𑀦 𑀏𑀓𑁄, 𑀦 𑀤𑁆𑀯𑁂 𑀢𑀼𑀫𑁆𑀳𑀸𑀤𑀺𑀲𑀸 𑀔𑀸𑀤𑀺𑀢𑀸’’𑀢𑀺 𑀆𑀳.

𑀬𑀢𑁆𑀣 𑀦 𑀲𑀓𑁆𑀓𑀸 𑀳𑁄𑀢𑀺 𑀆𑀘𑀭𑀺𑀬𑀁 𑀯𑀸 𑀆𑀘𑀭𑀺𑀬𑀲𑀫𑀁 𑀯𑀸 𑀉𑀧𑀚𑁆𑀛𑀸𑀬𑀁 𑀯𑀸 𑀉𑀧𑀚𑁆𑀛𑀸𑀬𑀲𑀫𑀁 𑀯𑀸 ¶ 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀤𑁆𑀥𑀼𑀁, 𑀢𑀢𑁆𑀣 𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄 𑀫𑀳𑀸𑀤𑁄𑀲𑁄𑀬𑁂𑀯. 𑀢𑀲𑁆𑀫𑀸 𑀇𑀫𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀁 𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨);

𑀧𑀜𑁆𑀘𑀲𑁂𑀦𑀸𑀲𑀦𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀲𑁂𑀦𑀸𑀲𑀦𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 ¶ 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺. 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧).

𑀏𑀢𑁆𑀣 𑀘 𑀦𑀸𑀢𑀺𑀤𑀽𑀭𑀁 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀓𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀦𑁆𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 ¶ 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸…𑀧𑁂… 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀻𑀢𑀺 𑀏𑀓𑀁. 𑀏𑀯𑀁 𑀧𑀜𑁆𑀘𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑁂𑀦 𑀤𑀻𑀖𑀸𑀦𑀺 𑀓𑁂𑀲𑀦𑀔𑀮𑁄𑀫𑀸𑀦𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀚𑀺𑀡𑁆𑀡𑀘𑀻𑀯𑀭𑁂𑀲𑀼 𑀅𑀕𑁆𑀕𑀴𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀤𑀸𑀦𑀸𑀤𑀺𑀦𑀸 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸 𑀢𑀦𑁆𑀢𑀼𑀘𑁆𑀙𑁂𑀤𑀸𑀤𑀻𑀲𑀼 𑀢𑀼𑀦𑁆𑀦𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁, 𑀓𑀺𑀮𑀺𑀝𑁆𑀞𑀸𑀦𑀺 𑀯𑀸 𑀭𑀚𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀢𑁆𑀢𑁂 𑀫𑀮𑀁 𑀳𑁄𑀢𑀺, 𑀧𑀢𑁆𑀢𑁄 𑀧𑀘𑀺𑀢𑀩𑁆𑀩𑁄, 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀲𑁄𑀥𑁂𑀢𑀩𑁆𑀩𑀸𑀦𑀺. 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀪𑁄𑀚𑀦𑀦𑀺𑀫𑀺𑀢𑁆𑀢𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀆𑀳𑀸𑀭𑁂 𑀳𑀺 𑀆𑀲𑀬𑀁 𑀧𑀯𑀺𑀝𑁆𑀞𑀫𑀢𑁆𑀢𑁂 𑀢𑀲𑁆𑀲 𑀆𑀕𑀦𑁆𑀢𑀼𑀓𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀲𑀺𑀬𑀸 𑀲𑀭𑀻𑀭𑀲𑁆𑀲 𑀓𑁄𑀘𑀺 𑀧𑀭𑀺𑀲𑁆𑀲𑀫𑁄, 𑀢𑀁 𑀯𑀽𑀧𑀲𑀫𑁂𑀢𑁆𑀯𑀸. 𑀢𑀲𑁆𑀫𑀺𑀜𑁆𑀳𑀺 𑀅𑀯𑀽𑀧𑀲𑀦𑁆𑀢𑁂 𑀲𑀭𑀻𑀭𑀔𑁂𑀤𑁂𑀦 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀦 𑀮𑀪𑁂𑀬𑁆𑀬𑀸𑀢𑀺. 𑀉𑀕𑁆𑀕𑀳𑁂𑀢𑀩𑁆𑀩𑀢𑁄 𑀉𑀕𑁆𑀕𑀳𑁄, 𑀲𑀩𑁆𑀩𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀺, 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀉𑀕𑁆𑀕𑀳𑀫𑀢𑁆𑀢𑀁. 𑀆𑀘𑀭𑀺𑀬𑀢𑁄 𑀉𑀕𑁆𑀕𑀳𑁄 𑀆𑀘𑀭𑀺𑀬𑀼𑀕𑁆𑀕𑀳𑁄, 𑀢𑀢𑁄. 𑀏𑀓𑀧𑀤𑀫𑁆𑀧𑀻𑀢𑀺 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺.

𑀅𑀦𑀼𑀩𑀦𑁆𑀥𑀦𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀕𑀫𑀦𑀯𑀲𑁂𑀦 𑀲𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑀯𑀢𑁆𑀢𑀦𑀸. 𑀨𑀼𑀲𑀦𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀕𑀡𑁂𑀦𑁆𑀢𑀲𑁆𑀲 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀢𑁂 𑀲𑀢𑀺𑀬𑀸 𑀅𑀦𑀼𑀩𑀦𑁆𑀥𑀦𑁆𑀢𑀲𑁆𑀲 𑀬𑀣𑀸 𑀅𑀧𑁆𑀧𑀦𑀸 𑀳𑁄𑀢𑀺, 𑀢𑀣𑀸 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑀲𑁆𑀲 𑀘 𑀦𑀸𑀲𑀺𑀓𑀕𑁆𑀕𑀸𑀤𑀺𑀝𑁆𑀞𑀸𑀦𑀲𑁆𑀲 𑀦𑁂𑀲𑀁 𑀨𑀼𑀲𑀦𑀸. 𑀬𑀲𑁆𑀫𑀸 𑀧𑀦 𑀕𑀡𑀦𑀸𑀤𑀺𑀯𑀲𑁂𑀦 𑀯𑀺𑀬 𑀨𑀼𑀲𑀦𑀸𑀤𑀺𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺, 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 ¶ 𑀕𑀡𑀦𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥 𑀨𑀼𑀲𑀦𑀸𑀕𑀳𑀡𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀨𑀼𑀲𑀦𑀸𑀢𑀺 𑀨𑀼𑀝𑁆𑀞𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀞𑀧𑀦𑀸𑀢𑀺 𑀲𑀫𑀸𑀥𑀸𑀦𑀁. 𑀢𑀜𑁆𑀳𑀺 𑀲𑀫𑁆𑀫𑀤𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀥𑀸𑀦𑀁 𑀞𑀧𑀦𑀁 𑀳𑁄𑀢𑀺. 𑀢𑀣𑀸 𑀳𑀺 𑀲𑀫𑀸𑀥𑀺 ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀻’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑀫𑀸𑀥𑀺𑀧𑁆𑀧𑀥𑀸𑀦𑀸 𑀧𑀦 𑀅𑀧𑁆𑀧𑀦𑀸𑀢𑀺 𑀆𑀳 ‘‘𑀞𑀧𑀦𑀸𑀢𑀺 𑀅𑀧𑁆𑀧𑀦𑀸’’𑀢𑀺. 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀲𑀁𑀮𑀓𑁆𑀔𑀡𑀢𑁄 𑀲𑀮𑁆𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸. 𑀧𑀯𑀢𑁆𑀢𑀢𑁄 𑀦𑀺𑀫𑀺𑀢𑁆𑀢𑀢𑁄 𑀘 𑀯𑀺𑀦𑀺𑀯𑀝𑁆𑀝𑀦𑀢𑁄 𑀯𑀺𑀦𑀺𑀯𑀝𑁆𑀝𑀦𑀸 𑀫𑀕𑁆𑀕𑁄. 𑀲𑀓𑀮𑀲𑀁𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀢𑁄 𑀲𑀩𑁆𑀩𑀲𑁄 𑀲𑀼𑀤𑁆𑀥𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺 𑀨𑀮𑀁. 𑀢𑁂𑀲𑀦𑁆𑀢𑀺 𑀯𑀺𑀯𑀝𑁆𑀝𑀦𑀸𑀧𑀸𑀭𑀺𑀲𑀼𑀤𑁆𑀥𑀻𑀦𑀁. 𑀧𑀝𑀺𑀧𑀲𑁆𑀲𑀦𑀸𑀢𑀺 𑀧𑀢𑀺 𑀧𑀢𑀺 𑀤𑀲𑁆𑀲𑀦𑀁 𑀧𑁂𑀓𑁆𑀔𑀦𑀁. 𑀢𑁂𑀦𑀸𑀳 ‘‘𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺.

𑀔𑀡𑁆𑀟𑀦𑁆𑀢𑀺 𑀏𑀓𑀁 𑀢𑀻𑀡𑀺 𑀧𑀜𑁆𑀘𑀸𑀢𑀺 𑀏𑀯𑀁 𑀕𑀡𑀦𑀸𑀬 𑀔𑀡𑁆𑀟𑀦𑀁. 𑀑𑀓𑀸𑀲𑁂𑀢𑀺 𑀕𑀡𑀦𑀸𑀯𑀺𑀥𑀺𑀁 𑀲𑀦𑁆𑀥𑀸𑀬𑀸𑀳, 𑀕𑀡𑀦𑀸𑀦𑀺𑀲𑁆𑀲𑀺𑀢𑁄𑀯 𑀦 𑀓𑀫𑁆𑀫𑀝𑁆𑀞𑀸𑀦𑀦𑀺𑀲𑁆𑀲𑀺𑀢𑁄. 𑀲𑀺𑀔𑀸𑀧𑁆𑀧𑀢𑁆𑀢𑀁 𑀦𑀼 𑀔𑁄𑀢𑀺 𑀇𑀤𑀁 𑀘𑀺𑀭𑀢𑀭𑀁 𑀕𑀡𑀦𑀸𑀬 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 𑀢𑀣𑀸 𑀮𑀤𑁆𑀥𑀁 𑀅𑀯𑀺𑀓𑁆𑀔𑁂𑀧𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀫𑀜𑁆𑀜𑁂𑀬𑁆𑀬. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑁄 𑀉𑀧𑀝𑁆𑀞𑀸𑀢𑀺, 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀇𑀤𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀲𑀼 𑀬𑀲𑁆𑀲 𑀏𑀓𑁄𑀯 𑀧𑀞𑀫𑀁 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀉𑀪𑁄𑀧𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀉𑀪𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀕𑀡𑁂𑀢𑀩𑁆𑀩𑀁 ¶ . 𑀬𑁄 𑀉𑀧𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸 𑀘 𑀤𑁆𑀯𑀻𑀲𑀼 𑀦𑀸𑀲𑀸𑀧𑀼𑀝𑀯𑀸𑀢𑁂𑀲𑀼 𑀬𑁄 𑀧𑀸𑀓𑀝𑀢𑀭𑁄 𑀉𑀧𑀝𑁆𑀞𑀸𑀢𑀺, 𑀲𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀫𑀸𑀦𑀦𑁆𑀢𑀺 𑀆𑀫𑁂𑀟𑀺𑀢𑀯𑀘𑀦𑁂𑀦 𑀦𑀺𑀭𑀦𑁆𑀢𑀭𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀉𑀧𑀮𑀓𑁆𑀔𑁂𑀢𑁆𑀯𑀸𑀯𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀏𑀓𑁂𑀓𑀲𑁆𑀫𑀺𑀁 𑀉𑀧𑀝𑁆𑀞𑀺𑀢𑁂𑀧𑀺 𑀉𑀧𑀮𑀓𑁆𑀔𑁂𑀢𑁆𑀯𑀸𑀯 𑀕𑀡𑁂𑀦𑁆𑀢𑀲𑁆𑀲 𑀓𑀫𑁂𑀦 𑀉𑀪𑁄𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺. 𑀢𑁂𑀦 ‘‘𑀉𑀧𑀮𑀓𑁆𑀔𑁂𑀢𑁆𑀯𑀸𑀯 𑀕𑀡𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀲𑁆𑀲 ‘‘𑀢𑀲𑁆𑀲𑁂𑀯𑀁 𑀕𑀡𑀬𑀢𑁄…𑀧𑁂… 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺 𑀇𑀤𑀁 𑀓𑀸𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀕𑀡𑀦𑀸𑀯𑀲𑁂𑀦 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀺𑀪𑀽𑀢𑀸 𑀳𑁄𑀦𑁆𑀢𑀺.

𑀧𑀮𑀺𑀖𑀸𑀬 𑀧𑀭𑀺𑀯𑀢𑁆𑀢𑀦𑀓𑀁 𑀬𑀢𑁆𑀣 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀲𑁄 𑀧𑀮𑀺𑀖𑀢𑁆𑀣𑀫𑁆𑀪𑁄. 𑀢𑀺𑀬𑀸𑀫𑀭𑀢𑁆𑀢𑀺𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀲𑀻𑀖𑀕𑀡𑀦𑀸𑀬, 𑀕𑁄𑀧𑀸𑀮𑀓𑀕𑀡𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘𑀸𑀢𑀺 𑀕𑀡𑀦𑀸𑀯𑀺𑀥𑀺𑀤𑀲𑁆𑀲𑀦𑀁. 𑀢𑀲𑁆𑀫𑀸 𑀅𑀝𑁆𑀞𑀸𑀢𑀺𑀆𑀤𑀻𑀲𑀼𑀧𑀺 𑀏𑀓𑀢𑁄 𑀧𑀝𑁆𑀞𑀸𑀬𑁂𑀯 𑀧𑀘𑁆𑀘𑁂𑀓𑀁 𑀅𑀝𑁆𑀞𑀸𑀤𑀻𑀦𑀺 𑀧𑀸𑀧𑁂𑀢𑀩𑁆𑀩𑀸𑀦𑀺. ‘‘𑀲𑀻𑀖𑀁 𑀲𑀻𑀖𑀁 𑀕𑀡𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 ¶ 𑀓𑀸𑀭𑀡𑀁 𑀦𑀺𑀤𑀲𑁆𑀲𑀦𑀜𑁆𑀘 𑀤𑀲𑁆𑀲𑁂𑀢𑀺 ‘‘𑀕𑀡𑀦𑀸𑀧𑀝𑀺𑀩𑀤𑁆𑀥𑁂 𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀅𑀭𑀻𑀬𑀢𑀺 𑀢𑁂𑀦 𑀦𑀸𑀯𑀸𑀢𑀺 𑀅𑀭𑀺𑀢𑁆𑀢𑀁, 𑀧𑀸𑀚𑀦𑀤𑀡𑁆𑀟𑁄. 𑀅𑀭𑀺𑀢𑁆𑀢𑁂𑀦 𑀉𑀧𑀢𑁆𑀣𑀫𑁆𑀪𑀦𑀁 𑀅𑀭𑀺𑀢𑁆𑀢𑀼𑀧𑀢𑁆𑀣𑀫𑁆𑀪𑀦𑀁, 𑀢𑀲𑁆𑀲 𑀯𑀲𑁂𑀦.

𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺 𑀦𑀸𑀫 𑀞𑀧𑀦𑀸𑀬𑀫𑁂𑀯𑀸𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀁 𑀯𑀺𑀬𑀸’’𑀢𑀺. 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑁆𑀢𑁄 𑀘𑀺𑀢𑁆𑀢𑀁 𑀧𑀯𑁂𑀲𑁂𑀢𑀺 𑀦𑀸𑀫. 𑀩𑀳𑀺 𑀘𑀺𑀢𑁆𑀢𑀦𑀻𑀳𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀸𑀢𑀩𑁆𑀪𑀸𑀳𑀢𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀕𑀢𑀯𑀸𑀢𑀁 𑀩𑀳𑀼𑀮𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀯𑀸𑀢𑁂𑀦 𑀢𑀁 𑀞𑀸𑀦𑀁 𑀅𑀩𑁆𑀪𑀸𑀳𑀢𑀁 𑀯𑀺𑀬 𑀫𑁂𑀤𑁂𑀦 𑀧𑀽𑀭𑀺𑀢𑀁 𑀯𑀺𑀬 𑀘 𑀳𑁄𑀢𑀺, 𑀢𑀣𑀸 𑀉𑀧𑀝𑁆𑀞𑀸𑀢𑀺. 𑀦𑀻𑀳𑀭𑀢𑁄𑀢𑀺 𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀻𑀳𑀭𑀢𑁄. 𑀢𑀣𑀸 𑀧𑀦 𑀦𑀻𑀳𑀭𑀢𑁄 𑀯𑀸𑀢𑀲𑁆𑀲 𑀕𑀢𑀺𑀲𑀫𑀦𑁆𑀯𑁂𑀲𑀦𑀫𑀼𑀔𑁂𑀦 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀻𑀢𑀺 𑀆𑀳 ‘‘𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀻’’𑀢𑀺.

𑀏𑀢𑀦𑁆𑀢𑀺 𑀏𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀚𑀸𑀢𑀁. 𑀅𑀦𑀼𑀕𑀫𑀦𑀦𑁆𑀢𑀺 𑀧𑀯𑀢𑁆𑀢𑀧𑀯𑀢𑁆𑀢𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀢𑀺𑀬𑀸 𑀅𑀦𑀼 𑀅𑀦𑀼 𑀧𑀯𑀢𑁆𑀢𑀦𑀁 𑀅𑀦𑀼𑀕𑀘𑁆𑀙𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀜𑁆𑀘 𑀔𑁄 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀼𑀕𑀫𑀦𑀯𑀲𑁂𑀦𑀸’’𑀢𑀺. 𑀦𑀸𑀪𑀺 𑀆𑀤𑀺 𑀢𑀢𑁆𑀣 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀧𑀞𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀳𑀺 𑀇𑀥 𑀆𑀤𑀺𑀘𑀺𑀦𑁆𑀢𑀸, 𑀦 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀯𑀲𑁂𑀦. 𑀢𑀣𑀸 𑀳𑀺 𑀢𑁂 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀸𑀲𑀺𑀓𑀕𑁆𑀕𑀸 𑀲𑀩𑁆𑀩𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑁂𑀯. 𑀬𑀢𑁆𑀣 𑀬𑀢𑁆𑀣 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺 𑀥𑀫𑁆𑀫𑀸𑀦𑀁 𑀕𑀫𑀦𑀸𑀪𑀸𑀯𑀢𑁄. 𑀬𑀣𑀸𑀧𑀘𑁆𑀘𑀬𑀁 𑀧𑀦 𑀤𑁂𑀲𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑀁 𑀕𑀢𑀺𑀲𑀫𑀜𑁆𑀜𑀸. 𑀳𑀤𑀬𑀁 𑀫𑀚𑁆𑀛𑀦𑁆𑀢𑀺 𑀳𑀤𑀬𑀲𑀫𑀻𑀧𑀁 𑀢𑀲𑁆𑀲 𑀉𑀧𑀭𑀺𑀪𑀸𑀕𑁄 𑀫𑀚𑁆𑀛𑀁. 𑀦𑀸𑀲𑀺𑀓𑀕𑁆𑀕𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀦𑀸𑀲𑀺𑀓𑀝𑁆𑀞𑀸𑀦𑀁 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀜𑁆𑀜𑀸𑀬 𑀢𑀤𑀯𑀥𑀺𑀪𑀸𑀯𑀢𑁄. 𑀢𑀣𑀸 𑀳𑁂𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀼𑀢𑁆𑀢𑀸, 𑀦 𑀘 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 ¶ 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀅𑀩𑁆𑀪𑀦𑁆𑀢𑀭𑀧𑀯𑀺𑀲𑀦𑀯𑀸𑀢𑀲𑁆𑀲 𑀦𑀸𑀲𑀺𑀓𑀕𑁆𑀕𑀁 𑀆𑀤𑀻’’𑀢𑀺. 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀧𑀭𑀺𑀬𑀸𑀬𑁄 𑀧𑀦 𑀢𑀁𑀲𑀤𑀺𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀓𑁆𑀔𑁂𑀧𑀕𑀢𑀦𑁆𑀢𑀺 𑀯𑀺𑀓𑁆𑀔𑁂𑀧𑀁 𑀉𑀧𑀕𑀢𑀁, 𑀯𑀺𑀓𑁆𑀔𑀺𑀢𑁆𑀢𑀁 𑀅𑀲𑀫𑀸𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀭𑀤𑁆𑀥𑀸𑀬𑀸𑀢𑀺 𑀲𑀤𑀭𑀣𑀪𑀸𑀯𑀸𑀬. 𑀇𑀜𑁆𑀚𑀦𑀸𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲 𑀘𑀮𑀦𑀸𑀬. 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀯𑀸. 𑀲𑀸𑀭𑀤𑁆𑀥𑀸𑀢𑀺 𑀲𑀤𑀭𑀣𑀸. 𑀇𑀜𑁆𑀚𑀺𑀢𑀸𑀢𑀺 𑀇𑀜𑁆𑀚𑀦𑀓𑀸 𑀘𑀮𑀦𑀓𑀸, 𑀢𑀣𑀸 𑀨𑀦𑁆𑀤𑀺𑀢𑀸.

𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦𑀸𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀼𑀕𑀫𑀦𑀯𑀲𑁂𑀦 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀼𑀩𑀦𑁆𑀥𑀦𑀸𑀬 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀨𑀼𑀲𑀦𑀸𑀯𑀲𑁂𑀦 ¶ 𑀞𑀧𑀦𑀸𑀯𑀲𑁂𑀦 𑀘 𑀫𑀦𑀲𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀯𑀲𑁂𑀦 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀻𑀢𑀺 𑀕𑀡𑀦𑀸𑀬 𑀅𑀦𑀼𑀩𑀦𑁆𑀥𑀦𑀸𑀬 𑀘 𑀯𑀺𑀦𑀸 𑀬𑀣𑀸𑀓𑁆𑀓𑀫𑀁 𑀓𑁂𑀯𑀮𑀁 𑀨𑀼𑀲𑀦𑀸𑀯𑀲𑁂𑀦 𑀞𑀧𑀦𑀸𑀯𑀲𑁂𑀦 𑀘 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺. 𑀦𑀦𑀼 𑀨𑀼𑀲𑀦𑀸𑀬 𑀯𑀺𑀦𑀸 𑀞𑀧𑀦𑀸𑀬 𑀯𑀺𑀬 𑀨𑀼𑀲𑀦𑀸𑀬 𑀯𑀺𑀦𑀸 𑀕𑀡𑀦𑀸𑀬𑀧𑀺 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀺𑀬𑁂𑀯𑀸𑀢𑀺? 𑀬𑀤𑀺𑀧𑀺 𑀦𑀢𑁆𑀣𑀺, 𑀕𑀡𑀦𑀸 𑀧𑀦 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲 𑀫𑀽𑀮𑀪𑀸𑀯𑀢𑁄 𑀧𑀥𑀸𑀦𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸, 𑀏𑀯𑀁 𑀅𑀦𑀼𑀩𑀦𑁆𑀥𑀦𑀸 𑀞𑀧𑀦𑀸𑀬 𑀢𑀸𑀬 𑀯𑀺𑀦𑀸 𑀞𑀧𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀲𑀢𑀺𑀧𑀺 𑀨𑀼𑀲𑀦𑀸𑀬 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑁂 𑀕𑀡𑀦𑀸𑀦𑀼𑀩𑀦𑁆𑀥𑀦𑀸 𑀏𑀯 𑀫𑀽𑀮𑀪𑀸𑀯𑀢𑁄 𑀧𑀥𑀸𑀦𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀇𑀢𑀭𑀸𑀲𑀁 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀕𑀡𑀦𑀸𑀦𑀼𑀩𑀦𑁆𑀥𑀦𑀸𑀯𑀲𑁂𑀦 𑀯𑀺𑀬 𑀳𑀺 𑀨𑀼𑀲𑀦𑀸𑀞𑀧𑀦𑀸𑀯𑀲𑁂𑀦 𑀯𑀺𑀲𑀼𑀁 𑀫𑀦𑀲𑀺𑀓𑀸𑀭𑁄 𑀦𑀢𑁆𑀣𑀻’’𑀢𑀺. 𑀬𑀤𑀺 𑀏𑀯𑀁 𑀢𑀸 𑀓𑀲𑁆𑀫𑀸 𑀉𑀤𑁆𑀤𑁂𑀲𑁂 𑀯𑀺𑀲𑀼𑀁 𑀕𑀳𑀺𑀢𑀸𑀢𑀺 𑀆𑀳 ‘‘𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀕𑀡𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀕𑀡𑀦𑀸𑀬 𑀨𑀼𑀲𑀦𑀸 𑀅𑀗𑁆𑀕𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋 ‘‘𑀕𑀡𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯. 𑀢𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂. 𑀲𑀢𑀺𑀬𑀸 𑀅𑀦𑀼𑀩𑀦𑁆𑀥𑀦𑁆𑀢𑁄𑀢𑀺 𑀕𑀡𑀦𑀸𑀯𑀺𑀥𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀲𑀢𑀺𑀬𑀸 𑀦𑀺𑀩𑀦𑁆𑀥𑀦𑁆𑀢𑁄, 𑀨𑀼𑀝𑁆𑀞𑁄𑀓𑀸𑀲𑁂𑀬𑁂𑀯 𑀢𑁂 𑀦𑀺𑀭𑀦𑁆𑀢𑀭𑀁 𑀉𑀧𑀥𑀸𑀭𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄𑀢𑀺 𑀬𑀣𑀸 𑀅𑀧𑁆𑀧𑀦𑀸 𑀳𑁄𑀢𑀺, 𑀏𑀯𑀁 𑀬𑀣𑀸𑀉𑀧𑀝𑁆𑀞𑀺𑀢𑁂 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀲𑀫𑀸𑀤𑀳𑀦𑁆𑀢𑁄. 𑀅𑀦𑀼𑀩𑀦𑁆𑀥𑀦𑀸𑀬 𑀘𑀸𑀢𑀺𑀆𑀤𑀻𑀲𑀼 𑀅𑀦𑀼𑀩𑀦𑁆𑀥𑀦𑀸𑀬 𑀘 𑀨𑀼𑀲𑀦𑀸𑀬 𑀘 𑀞𑀧𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀲𑁆𑀯𑀸𑀬𑀫𑀢𑁆𑀣𑁄𑀢𑀺 𑀬𑁆𑀯𑀸𑀬𑀁 ‘‘𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀕𑀡𑁂𑀦𑁆𑀢𑁄 𑀢𑀢𑁆𑀣𑁂𑀯 𑀕𑀡𑀦𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀢𑁂 𑀲𑀢𑀺𑀬𑀸 𑀅𑀦𑀼𑀩𑀦𑁆𑀥𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀅𑀬𑀫𑀢𑁆𑀣𑁄. 𑀬𑀸 𑀅𑀘𑁆𑀘𑀦𑁆𑀢𑀸𑀬 𑀦 𑀫𑀺𑀦𑁄𑀢𑀺 𑀦 𑀯𑀺𑀦𑀺𑀘𑁆𑀙𑀺𑀦𑀢𑀺, 𑀲𑀸 𑀫𑀸𑀦𑀲𑁆𑀲 𑀲𑀫𑀻𑀧𑁂𑀢𑀺 𑀉𑀧𑀫𑀸 𑀬𑀣𑀸 𑀕𑁄𑀡𑁄 𑀯𑀺𑀬 𑀕𑀯𑀬𑁄𑀢𑀺.

𑀧𑀗𑁆𑀕𑀼𑀴𑁄𑀢𑀺 𑀧𑀻𑀞𑀲𑀧𑁆𑀧𑀻. 𑀤𑁄𑀮𑀸𑀢𑀺 𑀧𑁂𑀗𑁆𑀔𑁄𑀮𑁄. 𑀓𑀻𑀴𑀢𑀦𑁆𑀢𑀺 𑀓𑀻𑀴𑀦𑁆𑀢𑀸𑀦𑀁. 𑀫𑀸𑀢𑀸𑀧𑀼𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀧𑀼𑀢𑁆𑀢𑀲𑁆𑀲 𑀘. 𑀉𑀪𑁄 𑀓𑁄𑀝𑀺𑀬𑁄𑀢𑀺 𑀆𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀫𑀓𑁄𑀝𑀺𑀁, 𑀕𑀘𑁆𑀙𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑀓𑁄𑀝𑀺𑀦𑁆𑀢𑀺 𑀤𑁆𑀯𑁂𑀧𑀺 𑀓𑁄𑀝𑀺𑀬𑁄. 𑀫𑀚𑁆𑀛𑀜𑁆𑀘𑀸𑀢𑀺 𑀤𑁄𑀮𑀸𑀨𑀮𑀓𑀲𑁆𑀲𑁂𑀯 𑀫𑀚𑁆𑀛𑀁. 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑀫𑁆𑀪𑁄 𑀯𑀺𑀬𑀸𑀢𑀺 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑀫𑁆𑀪𑁄, 𑀦𑀸𑀲𑀺𑀓𑀕𑁆𑀕𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀸, 𑀢𑀲𑁆𑀲 𑀫𑀽𑀮𑁂 𑀲𑀫𑀻𑀧𑁂 𑀞𑀢𑁆𑀯𑀸. 𑀓𑀣𑀁 𑀞𑀢𑁆𑀯𑀸 ¶ ? 𑀲𑀢𑀺𑀬𑀸 𑀯𑀲𑁂𑀦. 𑀲𑀢𑀺𑀜𑁆𑀳𑀺 𑀢𑀢𑁆𑀣 𑀲𑀽𑀧𑀝𑁆𑀞𑀺𑀢𑀁 𑀓𑀭𑁄𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀢𑀢𑁆𑀣 𑀞𑀺𑀢𑁄 𑀦𑀸𑀫 𑀳𑁄𑀢𑀺 𑀅𑀯𑀬𑀯𑀥𑀫𑁆𑀫𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 ¶ . 𑀦𑀺𑀫𑀺𑀢𑁆𑀢𑁂𑀢𑀺 𑀦𑀸𑀲𑀺𑀓𑀕𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑁂. 𑀲𑀢𑀺𑀬𑀸 𑀦𑀺𑀲𑀺𑀦𑁆𑀦𑁄𑀢𑀺 𑀲𑀢𑀺𑀯𑀲𑁂𑀦 𑀦𑀺𑀲𑀻𑀤𑀦𑁆𑀢𑁄. ‘‘𑀲𑀢𑀺𑀜𑁆𑀳𑀺 𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀞𑀸𑀦𑁂 𑀯𑀺𑀬 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀨𑀼𑀝𑁆𑀞𑀝𑁆𑀞𑀸𑀦𑁂. 𑀢𑁂𑀢𑀺 𑀦𑀕𑀭𑀲𑁆𑀲 𑀅𑀦𑁆𑀢𑁄 𑀩𑀳𑀺 𑀘 𑀕𑀢𑀸 𑀫𑀦𑀼𑀲𑁆𑀲𑀸 𑀢𑁂𑀲𑀁 𑀲𑀗𑁆𑀕𑀳𑀸 𑀘 𑀳𑀢𑁆𑀣𑀕𑀢𑀸. 𑀆𑀤𑀺𑀢𑁄 𑀧𑀪𑀼𑀢𑀻𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬.

𑀕𑀸𑀣𑀸𑀬𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀦𑀺𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀁. 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦 𑀆𑀭𑀫𑁆𑀫𑀡𑀁, 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀚𑀸𑀦𑀢𑁄 𑀘 𑀢𑀬𑁄 𑀥𑀫𑁆𑀫𑁂𑀢𑀺 𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄𑀢𑀺 𑀇𑀫𑁂 𑀦𑀺𑀫𑀺𑀢𑁆𑀢𑀸𑀤𑀬𑁄 𑀢𑀬𑁄 𑀥𑀫𑁆𑀫𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀯𑀺𑀦𑁆𑀤𑀦𑁆𑀢𑀲𑁆𑀲. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂. 𑀪𑀸𑀯𑀦𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸. 𑀦𑀼𑀧𑀮𑀩𑁆𑀪𑀢𑀻𑀢𑀺 𑀦 𑀉𑀧𑀮𑀩𑁆𑀪𑀢𑀺 𑀦 𑀲𑀺𑀚𑁆𑀛𑀢𑀻𑀢𑀺 𑀅𑀬𑀁 𑀘𑁄𑀤𑀦𑀸𑀕𑀸𑀣𑀸𑀬 𑀅𑀢𑁆𑀣𑁄. 𑀤𑀼𑀢𑀺𑀬𑀸 𑀧𑀦 𑀧𑀭𑀺𑀳𑀸𑀭𑀕𑀸𑀣𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.

𑀓𑀣𑀦𑁆𑀢𑀺 𑀢𑀸𑀲𑀁 𑀘𑁄𑀤𑀦𑀸𑀧𑀭𑀺𑀳𑀸𑀭𑀕𑀸𑀣𑀸𑀦𑀁 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀇𑀫𑁂 𑀢𑀬𑁄 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀧𑀤𑀬𑁄𑀚𑀦𑀸𑀬 𑀲𑀤𑁆𑀥𑀺𑀁 𑀅𑀬𑀫𑀢𑁆𑀣𑀦𑀺𑀤𑁆𑀤𑁂𑀲𑁄 𑁋 𑀇𑀫𑁂 𑀦𑀺𑀫𑀺𑀢𑁆𑀢𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀲𑁆𑀲 𑀓𑀣𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺, 𑀅𑀲𑀢𑀺𑀧𑀺 𑀆𑀭𑀫𑁆𑀫𑀡𑀪𑀸𑀯𑁂 𑀦 𑀘𑀺𑀫𑁂 𑀦 𑀘 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀓𑀣𑀜𑁆𑀘 𑀦 𑀳𑁄𑀦𑁆𑀢𑀺 𑀅𑀯𑀺𑀤𑀺𑀢𑀸, 𑀢𑁂𑀲𑀜𑁆𑀳𑀺 𑀅𑀯𑀺𑀤𑀺𑀢𑀢𑁆𑀢𑁂 𑀘𑀺𑀢𑁆𑀢𑀜𑁆𑀘 𑀓𑀣𑀁 𑀯𑀺𑀓𑁆𑀔𑁂𑀧𑀁 𑀦 𑀕𑀘𑁆𑀙𑀢𑀺, 𑀧𑀥𑀸𑀦𑀜𑁆𑀘 𑀪𑀸𑀯𑀦𑀸𑀬 𑀦𑀺𑀧𑁆𑀨𑀸𑀤𑀓𑀁 𑀯𑀻𑀭𑀺𑀬𑀜𑁆𑀘 𑀓𑀣𑀁 𑀧𑀜𑁆𑀜𑀸𑀬𑀢𑀺, 𑀦𑀻𑀯𑀭𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀓𑀁 𑀲𑀫𑁆𑀫𑀤𑁂𑀯 𑀲𑀫𑀸𑀥𑀸𑀦𑀸𑀯𑀳𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀧𑀬𑁄𑀕𑀜𑁆𑀘 𑀬𑁄𑀕𑀻 𑀓𑀣𑀁 𑀲𑀸𑀥𑁂𑀢𑀺, 𑀉𑀧𑀭𑀽𑀧𑀭𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑁆𑀘 𑀯𑀺𑀲𑁂𑀲𑀁 𑀓𑀣𑀫𑀥𑀺𑀕𑀘𑁆𑀙𑀢𑀻𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀓𑀓𑀘𑁄𑀧𑀫𑀸𑀬 𑀲𑀸𑀥𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀽𑀫𑀺𑀪𑀸𑀕𑀲𑁆𑀲 𑀯𑀺𑀲𑀫𑀢𑀸𑀬 𑀘𑀜𑁆𑀘𑀮𑁂 𑀭𑀼𑀓𑁆𑀔𑁂 𑀙𑁂𑀤𑀦𑀓𑀺𑀭𑀺𑀬𑀸 𑀦 𑀲𑀼𑀓𑀭𑀸 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀓𑀓𑀘𑀤𑀦𑁆𑀢𑀕𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀆𑀳 𑁋 ‘‘𑀲𑀫𑁂 𑀪𑀽𑀫𑀺𑀪𑀸𑀕𑁂’’𑀢𑀺. 𑀓𑀓𑀘𑁂𑀦𑀸𑀢𑀺 𑀔𑀼𑀤𑁆𑀤𑀓𑁂𑀦 𑀔𑀭𑀧𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀧𑀼𑀭𑀺𑀲𑁄’’𑀢𑀺. 𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀦𑁆𑀢𑀺 𑀨𑀼𑀝𑁆𑀞𑀨𑀼𑀝𑁆𑀞𑀓𑀓𑀘𑀤𑀦𑁆𑀢𑀸𑀦𑀁 𑀯𑀲𑁂𑀦. 𑀢𑁂𑀦 𑀓𑀓𑀘𑀤𑀦𑁆𑀢𑁂𑀳𑀺 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀧𑀼𑀭𑀺𑀲𑀲𑁆𑀲 𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋 ‘‘𑀦 𑀆𑀕𑀢𑁂 𑀯𑀸 𑀕𑀢𑁂 𑀯𑀸 𑀓𑀓𑀘𑀤𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀻’’𑀢𑀺.

𑀓𑀓𑀘𑀲𑁆𑀲 ¶ 𑀆𑀓𑀟𑁆𑀠𑀦𑀓𑀸𑀮𑁂 𑀧𑀼𑀭𑀺𑀲𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑀸 𑀆𑀕𑀢𑀸, 𑀧𑁂𑀮𑁆𑀮𑀦𑀓𑀸𑀮𑁂 𑀢𑀢𑁄 𑀯𑀺𑀕𑀢𑀸 𑀕𑀢𑀸𑀢𑀺 𑀯𑀼𑀢𑁆𑀢𑀸, 𑀦 𑀘 𑀆𑀕𑀢𑀸 𑀯𑀸 𑀕𑀢𑀸 𑀯𑀸 𑀓𑀓𑀘𑀤𑀦𑁆𑀢𑀸 𑀅𑀯𑀺𑀤𑀺𑀢𑀸 𑀳𑁄𑀦𑁆𑀢𑀺 𑀲𑀩𑁆𑀩𑀢𑁆𑀣 𑀲𑀢𑀺𑀬𑀸 𑀉𑀧𑀝𑁆𑀞𑀺𑀢𑀢𑁆𑀢𑀸 𑀙𑀺𑀦𑁆𑀤𑀺𑀢𑀩𑁆𑀩𑀝𑁆𑀞𑀸𑀦𑀁 𑀅𑀨𑀼𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀓𑀓𑀘𑀤𑀦𑁆𑀢𑀸𑀦𑀁 𑀅𑀪𑀸𑀯𑀢𑁄. 𑀧𑀥𑀸𑀦𑀦𑁆𑀢𑀺 ¶ 𑀭𑀼𑀓𑁆𑀔𑀲𑁆𑀲 𑀙𑁂𑀤𑀦𑀯𑀻𑀭𑀺𑀬𑀁. 𑀧𑀬𑁄𑀕𑀦𑁆𑀢𑀺 𑀢𑀲𑁆𑀲𑁂𑀯 𑀙𑁂𑀤𑀦𑀓𑀺𑀭𑀺𑀬𑀁. 𑀉𑀧𑀫𑀸𑀬𑀁 ‘‘𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻’’𑀢𑀺 𑀧𑀤𑀁 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀬𑁄𑀚𑁂𑀢𑁆𑀯𑀸 𑀧𑀦 𑀤𑀲𑁆𑀲𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁨𑁭) 𑀉𑀧𑀫𑀸𑀬𑀫𑁆𑀧𑀺 ‘‘𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻’’𑀢𑀺 𑀧𑀤𑀁 𑀬𑁄𑀚𑁂𑀢𑁆𑀯𑀸𑀯 𑀯𑀼𑀢𑁆𑀢𑀁. 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 ‘‘𑀯𑀺𑀲𑁂𑀲𑀦𑁆𑀢𑀺 𑀅𑀦𑁂𑀓𑀪𑀸𑀯𑀸𑀧𑀸𑀤𑀦𑀁, 𑀢𑁂𑀦 𑀘 𑀲𑀸𑀥𑁂𑀢𑀩𑁆𑀩𑀁 𑀧𑀬𑁄𑀚𑀦𑀯𑀺𑀲𑁂𑀲’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀬𑀣𑀸 𑀭𑀼𑀓𑁆𑀔𑁄𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀉𑀧𑀦𑀺𑀩𑀦𑁆𑀥𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀏𑀢𑀸𑀬𑀸𑀢𑀺 𑀲𑀢𑀺 𑀉𑀧𑀦𑀺𑀩𑀦𑁆𑀥𑀦𑀸 𑀦𑀸𑀫, 𑀢𑀲𑁆𑀲𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀮𑁆𑀮𑀓𑁆𑀔𑀡𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀦𑀺𑀩𑀦𑁆𑀥𑀦𑀸𑀦𑀺𑀫𑀺𑀢𑁆𑀢𑀁, 𑀦𑀸𑀲𑀺𑀓𑀕𑁆𑀕𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀸. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀓𑀓𑀘𑁂𑀦 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑁄 𑀆𑀕𑀢𑀕𑀢𑁂 𑀓𑀓𑀘𑀤𑀦𑁆𑀢𑁂 𑀅𑀫𑀦𑀲𑀺𑀓𑀭𑁄𑀦𑁆𑀢𑁄𑀧𑀺 𑀨𑀼𑀝𑁆𑀞𑀨𑀼𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀲𑀢𑀺𑀬𑀸 𑀉𑀧𑀝𑁆𑀞𑀧𑀦𑁂𑀦 𑀆𑀕𑀢𑀕𑀢𑁂 𑀓𑀓𑀘𑀤𑀦𑁆𑀢𑁂 𑀚𑀸𑀦𑀸𑀢𑀺, 𑀲𑀼𑀢𑁆𑀢𑀧𑀤𑀜𑁆𑀘 𑀅𑀯𑀺𑀭𑀚𑁆𑀛𑀦𑁆𑀢𑁄 𑀅𑀢𑁆𑀣𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀏𑀯𑀫𑁂𑀯𑀁. 𑀦𑀸𑀲𑀺𑀓𑀕𑁆𑀕𑁂 𑀫𑀼𑀔𑀦𑀺𑀫𑀺𑀢𑁆𑀢𑁂𑀢𑀺 𑀤𑀻𑀖𑀦𑀸𑀲𑀺𑀓𑁄 𑀦𑀸𑀲𑀺𑀓𑀕𑁆𑀕𑁂, 𑀇𑀢𑀭𑁄 𑀫𑀼𑀔𑀁 𑀅𑀲𑀦𑀁 𑀦𑀺𑀫𑀻𑀬𑀢𑀺 𑀙𑀸𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀉𑀢𑁆𑀢𑀭𑁄𑀝𑁆𑀞𑁂.

𑀇𑀤𑀁 𑀧𑀥𑀸𑀦𑀦𑁆𑀢𑀺 𑀬𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀬𑁄𑀕𑀺𑀦𑁄 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀓𑀫𑁆𑀫𑀦𑀺𑀬𑀁 𑀪𑀸𑀯𑀦𑀸𑀓𑀫𑁆𑀫𑀓𑁆𑀔𑀫𑀁 𑀪𑀸𑀯𑀦𑀸𑀓𑀫𑁆𑀫𑀬𑁄𑀕𑁆𑀕𑀁 𑀳𑁄𑀢𑀺, 𑀇𑀤𑀁 𑀯𑀻𑀭𑀺𑀬𑀁 𑀧𑀥𑀸𑀦𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑀓𑁆𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀪𑀽𑀢𑀸𑀦𑀺 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀯𑀺𑀢𑀓𑁆𑀓𑀸 𑀯𑀽𑀧𑀲𑀫𑁆𑀫𑀦𑁆𑀢𑀻𑀢𑀺 𑀢𑀢𑁄 𑀏𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀉𑀧𑀲𑀫𑀁 𑀕𑀘𑁆𑀙𑀦𑁆𑀢𑀺, 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀯𑀸 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀽𑀧𑀲𑀫𑀸𑀧𑀤𑁂𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀫𑀥𑀺𑀕𑀫𑀫𑀸𑀳. 𑀅𑀬𑀁 𑀧𑀬𑁄𑀕𑁄𑀢𑀺 𑀅𑀬𑀁 𑀛𑀸𑀦𑀸𑀥𑀺𑀕𑀫𑀲𑁆𑀲 𑀳𑁂𑀢𑀼𑀪𑀽𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀧𑀬𑁄𑀕𑁄. 𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀻𑀢𑀺 𑀤𑀲𑀧𑀺 𑀲𑀁𑀬𑁄𑀚𑀦𑀸𑀦𑀺 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀻𑀬𑀦𑁆𑀢𑀺. 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀻𑀢𑀺 𑀢𑀣𑀸 𑀲𑀢𑁆𑀢𑀧𑀺 𑀅𑀦𑀼𑀲𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀪𑀗𑁆𑀕𑀫𑀢𑁆𑀢𑀲𑁆𑀲𑀧𑀺 𑀅𑀦𑀯𑀲𑁂𑀲𑀢𑁄 𑀯𑀺𑀕𑀢𑀦𑁆𑀢𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁 𑀦𑀸𑀫 𑀅𑀦𑀼𑀲𑀬𑀦𑀺𑀭𑁄𑀥𑁂𑀦𑁂𑀯 ¶ 𑀳𑁄𑀢𑀺, 𑀧𑀳𑀻𑀦𑁂𑀲𑀼 𑀘 𑀲𑀁𑀬𑁄𑀚𑀦𑁂𑀲𑀼 𑀅𑀦𑀼𑀲𑀬𑀸𑀦𑀁 𑀮𑁂𑀲𑁄𑀧𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀘 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀁𑀬𑁄𑀚𑀦𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀇𑀫𑀁 𑀲𑀫𑀸𑀥𑀺𑀁 𑀦𑀺𑀲𑁆𑀲𑀸𑀬 𑀅𑀦𑀼𑀓𑁆𑀓𑀫𑁂𑀦 𑀮𑀩𑁆𑀪𑀫𑀸𑀦𑁄 𑀅𑀬𑀁 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀸𑀤𑀺𑀓𑁄 𑀇𑀫𑀲𑁆𑀲 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄.

𑀬𑀲𑁆𑀲𑀸𑀢𑀺 𑀬𑁂𑀦. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦. 𑀧𑀭𑀺𑀘𑀺𑀢𑀸𑀢𑀺 𑀧𑀭𑀺𑀘𑀺𑀡𑁆𑀡𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀆𑀦𑀸𑀧𑀸𑀦𑀲𑁆𑀲𑀢𑀺 𑀬𑀣𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀢𑀣𑀸 𑀬𑁂𑀦 𑀤𑀻𑀖𑀭𑀲𑁆𑀲𑀧𑀚𑀆𑀦𑀦𑀸𑀤𑀺𑀯𑀺𑀥𑀺𑀦𑀸 ¶ 𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸 𑀲𑀼𑀝𑁆𑀞𑀼 𑀪𑀸𑀯𑀺𑀢𑀸, 𑀢𑀢𑁄 𑀏𑀯 𑀧𑀭𑀺𑀧𑀼𑀡𑁆𑀡𑀸 𑀲𑁄𑀴𑀲𑀦𑁆𑀦𑀁 𑀯𑀢𑁆𑀣𑀽𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸, 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀺𑀮𑁄𑀓𑀁 𑀧𑀜𑁆𑀜𑁄𑀪𑀸𑀲𑁂𑀦 𑀧𑀪𑀸𑀲𑁂𑀢𑀺. 𑀬𑀣𑀸 𑀓𑀺𑀁? 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀘𑀦𑁆𑀤𑀺𑀫𑀸 𑀢𑀸𑀭𑀓𑀭𑀸𑀚𑀸 𑀯𑀺𑀬𑀸𑀢𑀺. ‘‘𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺 𑀳𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀫𑀳𑀺𑀓𑀸𑀤𑀻𑀦𑀫𑁆𑀧𑀺 𑀯𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀆𑀤𑀺-𑀲𑀤𑁆𑀤𑀮𑁄𑀧𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀥𑀸𑀢𑀺 𑀓𑀓𑀘𑀽𑀧𑀫𑀸𑀬. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀇𑀥𑀸𑀢𑀺 𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀅𑀲𑁆𑀲𑀸𑀢𑀺 𑀉𑀧𑀫𑀸𑀪𑀽𑀢𑀲𑁆𑀲 𑀓𑀓𑀘𑀲𑁆𑀲. 𑀆𑀕𑀢𑀕𑀢𑀯𑀲𑁂𑀦 𑀬𑀣𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑀦𑀲𑀺𑀓𑀸𑀭𑁄, 𑀏𑀯𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀆𑀕𑀢𑀕𑀢𑀯𑀲𑁂𑀦 𑀅𑀫𑀦𑀲𑀺𑀓𑀸𑀭𑀫𑀢𑁆𑀢𑀫𑁂𑀯 𑀆𑀦𑀬𑀦𑀧𑁆𑀧𑀬𑁄𑀚𑀦𑀁. 𑀦 𑀘𑀺𑀭𑁂𑀦𑁂𑀯𑀸𑀢𑀺 𑀇𑀤𑀁 𑀓𑀢𑀸𑀥𑀺𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀅𑀯𑀲𑁂𑀲𑀚𑁆𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸𑀢𑀺 𑀯𑀺𑀢𑀓𑁆𑀓𑀸𑀤𑀺𑀅𑀯𑀲𑁂𑀲𑀚𑁆𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸𑀢𑀺 𑀯𑀤𑀦𑁆𑀢𑀺, 𑀯𑀺𑀘𑀸𑀭𑀸𑀤𑀻𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀢𑀓𑁆𑀓𑀲𑁆𑀲 𑀅𑀧𑁆𑀧𑀦𑀸𑀪𑀸𑀯𑀢𑁄. 𑀲𑁄 𑀳𑀺 𑀧𑀸𑀴𑀺𑀬𑀁 ‘‘𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀁𑀲𑀫𑁆𑀧𑀬𑁄𑀕𑀢𑁄 𑀯𑀸 𑀬𑀲𑁆𑀫𑀸 𑀛𑀸𑀦𑀁 𑀅𑀧𑁆𑀧𑀦𑀸𑀢𑀺 𑀅𑀝𑁆𑀞𑀓𑀣𑀸𑀯𑁄𑀳𑀸𑀭𑁄, 𑀛𑀸𑀦𑀗𑁆𑀕𑁂𑀲𑀼 𑀘 𑀲𑀫𑀸𑀥𑀺 𑀧𑀥𑀸𑀦𑀁, 𑀢𑀲𑁆𑀫𑀸 𑀢𑀁 𑀅𑀧𑁆𑀧𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀲𑁂𑀲𑀚𑁆𑀛𑀸𑀦𑀗𑁆𑀕𑀧𑀝𑀺𑀫𑀡𑁆𑀟𑀺𑀢𑀸 𑀅𑀧𑁆𑀧𑀦𑀸𑀲𑀗𑁆𑀔𑀸𑀢𑀸 𑀞𑀧𑀦𑀸 𑀘 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀆𑀳. 𑀓𑀲𑁆𑀲𑀘𑀺 𑀧𑀦 𑀕𑀡𑀦𑀸𑀯𑀲𑁂𑀦𑁂𑀯 𑀫𑀦𑀲𑀺𑀓𑀸𑀭𑀓𑀸𑀮𑀢𑁄 𑀧𑀪𑀼𑀢𑀻𑀢𑀺 𑀏𑀢𑁆𑀣 ‘‘𑀅𑀦𑀼𑀓𑁆𑀓𑀫𑀢𑁄…𑀧𑁂… 𑀧𑀢𑁆𑀢𑀁 𑀯𑀺𑀬 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁄𑀯 𑀕𑀦𑁆𑀣𑁄 𑀧𑀭𑀺𑀳𑀻𑀦𑁄, 𑀧𑀼𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 𑀲𑁄 𑀕𑀦𑁆𑀣𑁄 𑀮𑀺𑀔𑀺𑀢𑁄𑀬𑁂𑀯 𑀢𑀺𑀝𑁆𑀞𑀢𑀺.

𑀲𑀸𑀭𑀤𑁆𑀥𑀓𑀸𑀬𑀲𑁆𑀲 ¶ 𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲. 𑀑𑀦𑀫𑀢𑀺 𑀯𑀢𑁆𑀣𑀺𑀓𑀸𑀤𑀺𑀧𑀮𑀫𑁆𑀩𑀦𑁂𑀦. 𑀯𑀺𑀓𑀽𑀚𑀢𑀻𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺. 𑀯𑀮𑀺𑀁 𑀕𑀡𑁆𑀳𑀸𑀢𑀻𑀢𑀺. 𑀢𑀢𑁆𑀣 𑀢𑀢𑁆𑀣 𑀯𑀮𑀺𑀦𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀸𑀭𑀤𑁆𑀥𑀓𑀸𑀬𑁄 𑀕𑀭𑀼𑀓𑁄 𑀳𑁄𑀢𑀻𑀢𑀺. 𑀓𑀸𑀬𑀤𑀭𑀣𑀯𑀽𑀧𑀲𑀫𑁂𑀦 𑀲𑀤𑁆𑀥𑀺𑀁 𑀲𑀺𑀚𑁆𑀛𑀫𑀸𑀦𑁄 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑁄 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀢𑀲𑁆𑀲 𑀲𑀸𑀥𑀦𑀁 𑀯𑀺𑀬 𑀯𑀼𑀢𑁆𑀢𑁄. 𑀑𑀴𑀸𑀭𑀺𑀓𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑀯𑀲𑁂𑀦𑀸𑀢𑀺 𑀅𑀦𑁆𑀯𑀬𑀯𑀲𑁂𑀦 𑀢𑀤𑀢𑁆𑀣𑀲𑁆𑀲 𑀲𑀸𑀥𑀦𑀁. 𑀓𑀸𑀬𑀤𑀭𑀣𑁂 𑀯𑀽𑀧𑀲𑀦𑁆𑀢𑁂𑀢𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀬𑁄 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀫𑁆𑀧𑀺 𑀮𑀳𑀼𑀆𑀤𑀺𑀪𑀸𑀯𑁄, 𑀲𑁄 𑀇𑀥 𑀓𑀸𑀬𑀲𑁆𑀲 𑀮𑀳𑀼𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁆𑀯𑀸𑀬𑀁 𑀬𑀲𑁆𑀫𑀸 𑀘𑀺𑀢𑁆𑀢𑀲𑁆𑀲 𑀮𑀳𑀼𑀆𑀤𑀺𑀪𑀸𑀯𑁂𑀦 𑀯𑀺𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀮𑀳𑀼𑀓𑀁 𑀳𑁄𑀢𑀻’’𑀢𑀺.

𑀑𑀴𑀸𑀭𑀺𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀺𑀭𑀼𑀤𑁆𑀥𑁂𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁆𑀳𑀺 𑀯𑀺𑀘𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀯𑀺𑀘𑀬𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀆𑀦𑀻𑀢𑀁.

𑀉𑀧𑀭𑀽𑀧𑀭𑀺 ¶ 𑀯𑀺𑀪𑀽𑀢𑀸𑀦𑀻𑀢𑀺 𑀪𑀸𑀯𑀦𑀸𑀩𑀮𑁂𑀦 𑀉𑀤𑁆𑀥𑀁 𑀉𑀤𑁆𑀥𑀁 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀤𑁂𑀲𑀢𑁄𑀢𑀺 𑀧𑀓𑀢𑀺𑀬𑀸 𑀨𑀼𑀲𑀦𑀤𑁂𑀲𑀢𑁄, 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀨𑀼𑀲𑀦𑀯𑀲𑁂𑀦 𑀉𑀧𑀥𑀸𑀭𑀺𑀢𑀝𑁆𑀞𑀸𑀦𑀢𑁄.

‘‘𑀓𑀢𑁆𑀣 𑀦𑀢𑁆𑀣𑀻’’𑀢𑀺 𑀞𑀸𑀦𑀯𑀲𑁂𑀦 ‘‘𑀓𑀲𑁆𑀲 𑀦𑀢𑁆𑀣𑀻’’𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀘 𑀯𑀻𑀫𑀁𑀲𑀺𑀬𑀫𑀸𑀦𑀫𑀢𑁆𑀣𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀦𑁆𑀢𑁄𑀫𑀸𑀢𑀼𑀓𑀼𑀘𑁆𑀙𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀬𑀣𑀸 𑀉𑀤𑀓𑁂 𑀦𑀺𑀫𑀼𑀕𑁆𑀕𑀲𑁆𑀲 𑀦𑀺𑀭𑀼𑀤𑁆𑀥𑁄𑀓𑀸𑀲𑀢𑀸𑀬 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀦𑁆𑀢𑁄𑀫𑀸𑀢𑀼𑀓𑀼𑀘𑁆𑀙𑀺𑀬𑀁. 𑀬𑀣𑀸 𑀫𑀢𑀸𑀦𑀁 𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀪𑀸𑀯𑀢𑁄, 𑀏𑀯𑀁 𑀅𑀲𑀜𑁆𑀜𑀻𑀪𑀽𑀢𑀸𑀦𑀁 𑀫𑀼𑀘𑁆𑀙𑀸𑀧𑀭𑁂𑀢𑀸𑀦𑀁 𑀅𑀲𑀜𑁆𑀜𑀻𑀲𑀼 𑀯𑀸 𑀚𑀸𑀢𑀸𑀦𑀁, 𑀢𑀣𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀫𑀼𑀘𑁆𑀙𑀸𑀧𑀭𑁂𑀢𑀸𑀦𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀩𑁆𑀩𑀮𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀸𑀦𑀁 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀦𑁂𑀲𑀁 𑀅𑀦𑀼𑀧𑁆𑀧𑀚𑁆𑀚𑀦𑀁, 𑀢𑀣𑀸 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻𑀦𑀁. 𑀓𑁂𑀘𑀺 𑀧𑀦 ‘‘𑀅𑀦𑀼𑀧𑀼𑀩𑁆𑀩𑀢𑁄 𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀲𑁆𑀲, 𑀭𑀽𑀧𑀪𑀯𑁂 𑀭𑀽𑀧𑀸𑀦𑀁 𑀪𑀯𑀗𑁆𑀕𑀲𑁆𑀲 𑀘 𑀲𑀼𑀔𑀼𑀫𑀪𑀸𑀯𑀢𑁄 𑀭𑀽𑀧𑀪𑀯𑀲𑀫𑀗𑁆𑀕𑀻𑀦𑀁 𑀦𑀢𑁆𑀣𑀻’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀅𑀢𑁆𑀣𑀺𑀬𑁂𑀯 𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀸𑀭𑀺𑀲𑁂𑀲𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀧𑀓𑀢𑀺𑀨𑀼𑀝𑁆𑀞𑀯𑀲𑁂𑀦𑀸𑀢𑀺 𑀧𑀓𑀢𑀺𑀬𑀸 𑀨𑀼𑀲𑀦𑀝𑁆𑀞𑀸𑀦𑀯𑀲𑁂𑀦. 𑀦𑀺𑀫𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀲𑀢𑀺𑀬𑀸 𑀢𑀢𑁆𑀣 𑀲𑀼𑀔𑀧𑁆𑀧𑀯𑀢𑁆𑀢𑀦𑀢𑁆𑀣𑀁 ¶ 𑀣𑀺𑀭𑀢𑀭𑀁 𑀲𑀜𑁆𑀜𑀸𑀡𑀁 𑀧𑀯𑀢𑁆𑀢𑁂𑀢𑀩𑁆𑀩𑀁. 𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸 𑀳𑀺 𑀲𑀢𑀺. 𑀇𑀫𑀫𑁂𑀯𑀸𑀢𑀺 𑀇𑀫𑀁 𑀏𑀯 𑀅𑀦𑀼𑀧𑀝𑁆𑀞𑀳𑀦𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀓𑀡𑁆𑀝𑀓𑀼𑀝𑁆𑀞𑀸𑀧𑀦𑀜𑀸𑀬𑁂𑀦 𑀉𑀧𑀝𑁆𑀞𑀸𑀧𑀦𑀯𑀺𑀥𑀺𑀫𑁂𑀯. 𑀅𑀢𑁆𑀣𑀯𑀲𑀦𑁆𑀢𑀺 𑀳𑁂𑀢𑀼𑀁. 𑀅𑀢𑁆𑀣𑁄 𑀳𑀺 𑀨𑀮𑀁. 𑀲𑁄 𑀬𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀲𑁄 𑀅𑀢𑁆𑀣𑀯𑀲𑁄𑀢𑀺. 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲𑀸𑀢𑀺 𑀯𑀺𑀦𑀝𑁆𑀞𑀲𑁆𑀲𑀢𑀺𑀲𑁆𑀲. 𑀅𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀲𑀫𑁆𑀧𑀚𑀜𑁆𑀜𑀯𑀺𑀭𑀳𑀺𑀢𑀲𑁆𑀲, 𑀪𑀸𑀯𑁂𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀯𑀻𑀫𑀁𑀲𑀺𑀢𑁆𑀯𑀸 ‘‘𑀇𑀫𑁂 𑀢𑁂’’𑀢𑀺 𑀉𑀧𑀥𑀸𑀭𑁂𑀢𑀼𑀁 𑀲𑀫𑁆𑀫𑀤𑁂𑀯 𑀚𑀸𑀦𑀺𑀢𑀼𑀜𑁆𑀘 𑀲𑀫𑀢𑁆𑀣𑀸𑀳𑀺 𑀲𑀢𑀺𑀧𑀜𑁆𑀜𑀸𑀳𑀺 𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑁄 𑀅𑀜𑁆𑀜𑀁 𑀓𑀫𑁆𑀫𑀝𑁆𑀞𑀸𑀦𑀁. 𑀕𑀭𑀼𑀓𑀦𑁆𑀢𑀺 𑀪𑀸𑀭𑀺𑀬𑀁. 𑀲𑀸 𑀘𑀲𑁆𑀲 𑀕𑀭𑀼𑀓𑀢𑀸 𑀪𑀸𑀯𑀦𑀸𑀬 𑀲𑀼𑀤𑀼𑀓𑁆𑀓𑀭𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀕𑀭𑀼𑀓𑀪𑀸𑀯𑀦’’𑀦𑁆𑀢𑀺.

𑀉𑀧𑀭𑀽𑀧𑀭𑀺 𑀲𑀦𑁆𑀢𑀲𑀼𑀔𑀼𑀫𑀪𑀸𑀯𑀸𑀧𑀢𑁆𑀢𑀺𑀢𑁄 ‘‘𑀩𑀮𑀯𑀢𑀻 𑀲𑀼𑀯𑀺𑀲𑀤𑀸 𑀲𑀽𑀭𑀸 𑀘 𑀲𑀢𑀺 𑀧𑀜𑁆𑀜𑀸 𑀘 𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀲𑀼𑀔𑀼𑀫𑀲𑁆𑀲 𑀦𑀸𑀫 𑀅𑀢𑁆𑀣𑀲𑁆𑀲 𑀲𑀸𑀥𑀦𑁂𑀦𑀧𑀺 𑀲𑀼𑀔𑀼𑀫𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀅𑀦𑀼𑀧𑀝𑁆𑀞𑀳𑀦𑁆𑀢𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀭𑀺𑀬𑁂𑀲𑀦𑀼𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀳𑀺 𑀘 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑀤𑀦𑁆𑀢𑀺 𑀧𑀤𑀸𑀦𑀼𑀧𑀤𑀁. 𑀘𑀭𑀺𑀢𑁆𑀯𑀸𑀢𑀺 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸. 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 𑀉𑀧𑀦𑀺𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀲𑀜𑁆𑀜𑀺𑀢𑁂 𑀞𑀸𑀦𑁂. 𑀬𑁄𑀚𑁂𑀢𑁆𑀯𑀸𑀢𑀺 𑀫𑀦𑀲𑀺𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸. ‘‘𑀲𑀢𑀺𑀭𑀲𑁆𑀫𑀺𑀬𑀸 𑀩𑀦𑁆𑀥𑀺𑀢𑁆𑀯𑀸’’𑀢𑀺 𑀯𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀫𑀸𑀳 ‘‘𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀬𑁄𑀚𑁂𑀢𑁆𑀯𑀸’’𑀢𑀺. 𑀦 𑀳𑀺 𑀉𑀧𑀫𑁂𑀬𑁆𑀬𑁂 𑀩𑀦𑁆𑀥𑀦𑀬𑁄𑀚𑀦𑀝𑁆𑀞𑀸𑀦𑀸𑀦𑀺 𑀯𑀺𑀲𑀼𑀁 𑀮𑀩𑁆𑀪𑀦𑁆𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀯𑀸. 𑀉𑀪𑀬𑀫𑁆𑀧𑀺 𑀳𑀺 ¶ 𑀇𑀥 𑀏𑀓𑀚𑁆𑀛𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀽𑀮𑀧𑀺𑀘𑀼𑀆𑀤𑀺 𑀉𑀧𑀫𑀢𑁆𑀢𑀬𑀁 𑀉𑀕𑁆𑀕𑀳𑁂 𑀬𑀼𑀚𑁆𑀚𑀢𑀺, 𑀲𑁂𑀲𑀁 𑀉𑀪𑀬𑀢𑁆𑀣. 𑀏𑀓𑀘𑁆𑀘𑁂𑀢𑀺 𑀏𑀓𑁂 𑀆𑀘𑀭𑀺𑀬𑀸.

𑀢𑀸𑀭𑀓𑀭𑀽𑀧𑀁 𑀯𑀺𑀬𑀸𑀢𑀺 𑀢𑀸𑀭𑀓𑀸𑀬 𑀧𑀪𑀸𑀭𑀽𑀧𑀁 𑀯𑀺𑀬. 𑀫𑀡𑀺𑀕𑀼𑀴𑀺𑀓𑀸𑀤𑀺𑀉𑀧𑀫𑀸 𑀧𑀝𑀺𑀪𑀸𑀕𑁂 𑀯𑀝𑁆𑀝𑀦𑁆𑀢𑀺. 𑀓𑀣𑀁 𑀧𑀦𑁂𑀢𑀁 𑀏𑀓𑀁𑀬𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑁂𑀓𑀸𑀓𑀸𑀭𑀢𑁄 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀢𑀜𑁆𑀘 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀲𑀼𑀢𑁆𑀢𑀦𑁆𑀢𑀦𑁆𑀢𑀺 𑀏𑀓𑀁 𑀲𑀼𑀢𑁆𑀢𑀁. 𑀧𑀕𑀼𑀡𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀅𑀯𑀺𑀘𑁆𑀙𑁂𑀤𑀁 𑀫𑀳𑀸𑀯𑀺𑀲𑀬𑀢𑀜𑁆𑀘 𑀲𑀦𑁆𑀥𑀸𑀬𑀸𑀳 ‘‘𑀫𑀳𑀢𑀻 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀯𑀺𑀬𑀸’’𑀢𑀺. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀢𑀪𑀤𑁆𑀤𑀓𑀁 𑀲𑀼𑀢𑁆𑀢𑀁 𑀲𑀩𑁆𑀩𑀪𑀸𑀕𑀫𑀦𑁄𑀳𑀭𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸 𑀯𑀦𑀖𑀝𑀸 𑀯𑀺𑀬𑀸𑀢𑀺 𑀆𑀳 ‘‘𑀏𑀓𑀸 𑀯𑀦𑀭𑀸𑀚𑀺 𑀯𑀺𑀬𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑁆𑀲𑀺𑀢𑀕𑁆𑀕𑁂’’𑀢𑀺 (𑀔𑀼. 𑀧𑀸. 𑁬.𑁧𑁩; 𑀲𑀼. 𑀦𑀺. 𑁨𑁩𑁬) 𑀦𑀸𑀦𑀸𑀦𑀼𑀲𑀦𑁆𑀥𑀺𑀬𑀁 𑀦𑀸𑀦𑀸𑀧𑁂𑀬𑁆𑀬𑀸𑀮𑀁 𑀯𑀺𑀯𑀺𑀥𑀦𑀬𑀦𑀺𑀧𑀼𑀡𑀁 𑀩𑀳𑀼𑀯𑀺𑀥𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑀁 𑀲𑀼𑀢𑁆𑀢𑀦𑁆𑀢𑀁 𑀅𑀢𑁆𑀣𑀺𑀓𑁂𑀳𑀺 𑀲𑀓𑁆𑀓𑀘𑁆𑀘𑀁 𑀲𑀫𑀼𑀧𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀲𑀻𑀢𑀘𑁆𑀙𑀸𑀬𑁄…𑀧𑁂… 𑀭𑀼𑀓𑁆𑀔𑁄 ¶ 𑀯𑀺𑀬𑀸’’𑀢𑀺. 𑀲𑀜𑁆𑀜𑀸𑀦𑀸𑀦𑀢𑀸𑀬𑀸𑀢𑀺 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀲𑀜𑁆𑀜𑀸𑀦𑀁 𑀦𑀸𑀦𑀸𑀯𑀺𑀥𑀪𑀸𑀯𑀢𑁄. 𑀲𑀜𑁆𑀜𑀚𑀦𑁆𑀢𑀺 𑀪𑀸𑀯𑀦𑀸𑀲𑀜𑁆𑀜𑀸𑀚𑀦𑀺𑀢𑀁 𑀪𑀸𑀯𑀦𑀸𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀁. 𑀦 𑀳𑀺 𑀅𑀲𑀪𑀸𑀯𑀲𑁆𑀲 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀺. 𑀢𑁂𑀦𑀸𑀳 𑁋 ‘‘𑀦𑀸𑀦𑀢𑁄 𑀉𑀧𑀝𑁆𑀞𑀸𑀢𑀻’’𑀢𑀺, 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑁂 𑀢𑀬𑁄 𑀥𑀫𑁆𑀫𑀸𑀢𑀺 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸. 𑀦𑀢𑁆𑀣𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀪𑀸𑀯𑁂𑀦 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺. 𑀦 𑀉𑀧𑀘𑀸𑀭𑀦𑁆𑀢𑀺 𑀉𑀧𑀘𑀸𑀭𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀺, 𑀧𑀕𑁂𑀯 𑀅𑀧𑁆𑀧𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀲 𑀧𑀦𑀸𑀢𑀺 𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀢𑁆𑀣𑀁 𑀓𑀓𑀘𑀽𑀧𑀫𑀸𑀬𑀁 𑀆𑀕𑀢𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀓𑀸 𑀕𑀸𑀣𑀸 𑀧𑀘𑁆𑀘𑀸𑀦𑀻𑀢𑀸. 𑀦𑀺𑀫𑀺𑀢𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀏𑀯𑀁 𑀳𑁄𑀢𑀻𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀼𑀦𑀧𑁆𑀧𑀼𑀦𑀁 𑀏𑀯𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀯𑁄𑀲𑀸𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀦𑀺𑀫𑀺𑀢𑁆𑀢𑀁 𑀦𑀸𑀫 𑀤𑀼𑀓𑁆𑀓𑀭𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀢𑀬𑀺𑀤𑀁 𑀮𑀤𑁆𑀥𑀁, 𑀳𑀦𑁆𑀤𑀸𑀳𑀁 𑀤𑀸𑀦𑀺 𑀬𑀤𑀸 𑀯𑀸 𑀢𑀤𑀸 𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑁂𑀬𑁆𑀬. 𑀯𑀺𑀲𑀻𑀤𑁂𑀬𑁆𑀬𑀸𑀢𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦𑀁, 𑀅𑀪𑀩𑁆𑀩𑁄 𑀫𑀜𑁆𑀜𑁂 𑀯𑀺𑀲𑁂𑀲𑀲𑁆𑀲𑀸’’𑀢𑀺 𑀯𑀺𑀲𑀸𑀤𑀁 𑀆𑀧𑀚𑁆𑀚𑁂𑀬𑁆𑀬. ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀣𑀁 𑀲𑀗𑁆𑀓𑁄𑀘𑀸𑀧𑀢𑁆𑀢𑀺, 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀉𑀲𑁆𑀲𑀸𑀳𑀫𑁂𑀯 𑀓𑀭𑁂𑀬𑁆𑀬𑀸𑀢𑀺 ‘‘𑀦𑀺𑀫𑀺𑀢𑁆𑀢𑀫𑀺𑀤𑀁…𑀧𑁂… 𑀯𑀢𑁆𑀢𑀩𑁆𑀩𑁄’’𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸 𑀆𑀳𑀼. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀬𑁂𑀯 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀞𑀧𑀦𑁂𑀦. 𑀇𑀢𑁄 𑀧𑀪𑀼𑀢𑀻𑀢𑀺 𑀇𑀢𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬. 𑀧𑀼𑀩𑁆𑀩𑁂 𑀬𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀩𑀦𑁆𑀥𑀦𑀸𑀬 𑀨𑀼𑀲𑀦𑀸𑀬 𑀞𑀧𑀦𑀸𑀬 𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸), 𑀢𑀢𑁆𑀣 ¶ 𑀅𑀦𑀼𑀩𑀦𑁆𑀥𑀦𑀁 𑀨𑀼𑀲𑀦𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀞𑀧𑀦𑀸𑀯𑀲𑁂𑀦𑁂𑀯 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀞𑀧𑀦𑀸𑀯𑀲𑁂𑀦 𑀪𑀸𑀯𑀦𑀸 𑀳𑁄𑀢𑀻’’𑀢𑀺.

𑀧𑁄𑀭𑀸𑀡𑁂𑀳𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀫𑀺𑀢𑁆𑀢𑁂’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀦𑀺𑀫𑀺𑀢𑁆𑀢𑁂𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀞𑀧𑀬𑀁 𑀘𑀺𑀢𑁆𑀢𑀦𑁆𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄, 𑀞𑀧𑀦𑀸𑀯𑀲𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀓𑀸𑀭𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀯𑀡𑁆𑀡𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀦𑀸𑀦𑀸𑀓𑀸𑀭𑀁. 𑀆𑀓𑀸𑀭𑀲𑀸𑀫𑀜𑁆𑀜𑀯𑀲𑁂𑀦 𑀳𑁂𑀢𑀁 𑀏𑀓𑀯𑀘𑀦𑀁. 𑀯𑀺𑀪𑀸𑀯𑀬𑀦𑁆𑀢𑀺 𑀯𑀺𑀪𑀸𑀯𑁂𑀦𑁆𑀢𑁄 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑁄. 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀢𑁂 𑀆𑀓𑀸𑀭𑀸 𑀅𑀫𑀦𑀲𑀺𑀓𑀸𑀭𑀢𑁄 𑀅𑀦𑁆𑀢𑀭𑀳𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀢𑀺 ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀬𑁄 𑀦𑀸𑀦𑀸𑀓𑀸𑀭𑁄, 𑀢𑀁 𑀯𑀺𑀪𑀸𑀯𑀬𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀫𑁆𑀪𑀽𑀢𑁂 𑀯𑀸 𑀦𑀺𑀫𑀺𑀢𑁆𑀢𑁂. 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀻𑀢𑀺 𑀢𑀸𑀬 𑀏𑀯 𑀞𑀧𑀦𑀸𑀬 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀅𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀯𑀺𑀪𑀸𑀯𑀬𑀦𑁆𑀢𑀺 𑀯𑀺𑀪𑀸𑀯𑁂𑀦𑁆𑀢𑁄, 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀬𑀼𑀚𑁆𑀚𑁂𑀬𑁆𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀥𑀺𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀥𑀻𑀭𑁄 𑀬𑁄𑀕𑀻 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦𑀸𑀦𑀸𑀓𑀸𑀭𑀁 𑀯𑀺𑀪𑀸𑀯𑁂𑀦𑁆𑀢𑁄 𑀦𑀸𑀦𑀸𑀓𑀸𑀭𑀢𑁄 𑀢𑁂 𑀧𑀚𑀸𑀦𑀦𑁆𑀢𑁄 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀭𑁄𑀦𑁆𑀢𑁄 𑀦𑀸𑀦𑀸𑀓𑀸𑀭𑀁 𑀯𑀸 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑁂 𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀢𑀢𑁆𑀣 𑀬𑀁 𑀮𑀤𑁆𑀥𑀁 𑀦𑀺𑀫𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀞𑀧𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀩𑀦𑁆𑀥𑀢𑀺 𑀅𑀧𑁆𑀧𑁂𑀢𑀻𑀢𑀺.

𑀬𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀯𑀺𑀲𑀤𑀸𑀦𑀺 𑀢𑀺𑀓𑁆𑀔𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀸𑀢𑀺𑀲𑀬𑀁 𑀣𑀸𑀫𑀧𑁆𑀧𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀩𑀮𑁂𑀳𑀺 𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯 𑀛𑀸𑀦𑀗𑁆𑀕𑀸𑀦𑀺 𑀩𑀳𑀽𑀦𑀺 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁄 𑀏𑀯 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀲𑀤𑁆𑀥𑀺𑀁 𑀢𑀤𑁂𑀓𑀝𑁆𑀞𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀯𑀺𑀤𑀽𑀭𑀻 𑀪𑀯𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁, 𑀢𑀁 𑀆𑀭𑀩𑁆𑀪 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀦𑁆𑀦𑀺𑀲𑀺𑀦𑁆𑀦𑀸𑀯𑀸𑀢𑀺 𑀲𑀫𑁆𑀫𑀤𑁂𑀯 𑀦𑀺𑀲𑀻𑀤𑀺𑀁𑀲𑀼 𑀏𑀯, 𑀉𑀧𑀲𑀦𑁆𑀢𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀲𑀦𑁆𑀦𑀺𑀲𑀺𑀦𑁆𑀦𑀸𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀧𑀦 𑀢𑀤𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀛𑀸𑀦𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁄 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺 𑀘𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀇𑀤𑀸𑀦𑀺 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀅𑀯𑀢𑁆𑀣𑀸𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀘𑀸𑀭𑀪𑀽𑀫𑀺𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀘𑀸𑀭𑀪𑀽𑀫𑀺𑀬𑀦𑁆𑀢𑀺 𑀉𑀧𑀘𑀸𑀭𑀸𑀯𑀢𑁆𑀣𑀸𑀬𑀁. 𑀬𑀤𑀺𑀧𑀺 𑀳𑀺 𑀢𑀤𑀸 𑀛𑀸𑀦𑀗𑁆𑀕𑀸𑀦𑀺 𑀧𑀝𑀼𑀢𑀭𑀸𑀦𑀺 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀦 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀢𑁂𑀦𑀸𑀳 ‘‘𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦𑀸’’𑀢𑀺. 𑀧𑀝𑀺𑀮𑀸𑀪𑀪𑀽𑀫𑀺𑀬𑀦𑁆𑀢𑀺 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀯𑀢𑁆𑀣𑀸𑀬𑀁. 𑀢𑀤𑀸 𑀳𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀦𑀁 𑀛𑀸𑀦𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀢𑁂𑀦𑀸𑀳 ‘‘𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸’’𑀢𑀺.

𑀉𑀧𑀘𑀸𑀭𑁂 ¶ 𑀅𑀗𑁆𑀕𑀸𑀦𑀺 𑀦 𑀣𑀸𑀫𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀅𑀗𑁆𑀕𑀸𑀦𑀁 𑀅𑀣𑀸𑀫𑀚𑀸𑀢𑀢𑁆𑀢𑀸. 𑀬𑀣𑀸 𑀦𑀸𑀫 𑀤𑀳𑀭𑁄 𑀓𑀼𑀫𑀸𑀭𑀓𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀬𑀫𑀸𑀦𑁄 𑀧𑀼𑀦𑀧𑁆𑀧𑀼𑀦𑀁 𑀪𑀽𑀫𑀺𑀬𑀁 𑀧𑀢𑀢𑀺, 𑀏𑀯𑀫𑁂𑀯 𑀉𑀧𑀘𑀸𑀭𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀁 𑀓𑀸𑀮𑁂𑀦 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑀸𑀮𑁂𑀦 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀘𑀸𑀭𑀲𑀫𑀸𑀥𑀺 𑀓𑀼𑀲𑀮𑀯𑀻𑀣𑀺𑀬𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀻’’𑀢𑀺. 𑀅𑀧𑁆𑀧𑀦𑀸𑀬𑀁 𑀧𑀦 𑀅𑀗𑁆𑀕𑀸𑀦𑀺 𑀣𑀸𑀫𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 ¶ 𑀢𑁂𑀲𑀁 𑀣𑀸𑀫𑀚𑀸𑀢𑀢𑁆𑀢𑀸. 𑀬𑀣𑀸 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀤𑀺𑀯𑀲𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬, 𑀏𑀯𑀫𑁂𑀯 𑀅𑀧𑁆𑀧𑀦𑀸𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀁 𑀲𑀓𑀺𑀁 𑀪𑀯𑀗𑁆𑀕𑀯𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀲𑀁 𑀢𑀺𑀝𑁆𑀞𑀢𑀺, 𑀓𑀼𑀲𑀮𑀚𑀯𑀦𑀧𑀝𑀺𑀧𑀸𑀝𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 𑁋 ‘‘𑀅𑀧𑁆𑀧𑀦𑀸𑀲𑀫𑀸𑀥𑀺…𑀧𑁂… 𑀦 𑀪𑀯𑀗𑁆𑀕𑀁 𑀑𑀢𑀭𑀢𑀻’’𑀢𑀺. 𑀯𑀡𑁆𑀡𑀢𑁄𑀢𑀺 𑀧𑀺𑀘𑀼𑀧𑀺𑀡𑁆𑀟𑀢𑀸𑀭𑀓𑀭𑀽𑀧𑀸𑀤𑀻𑀲𑀼 𑀯𑀺𑀬 𑀉𑀧𑀝𑁆𑀞𑀺𑀢𑀯𑀡𑁆𑀡𑀢𑁄. 𑀮𑀓𑁆𑀔𑀡𑀢𑁄𑀢𑀺 𑀔𑀭𑀪𑀸𑀯𑀸𑀤𑀺𑀲𑀪𑀸𑀯𑀢𑁄 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀢𑁄 𑀯𑀸. 𑀭𑀓𑁆𑀔𑀺𑀢𑀩𑁆𑀩𑀁 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀮𑀤𑁆𑀥𑀧𑀭𑀺𑀳𑀸𑀦𑀻𑀢𑀺 𑀮𑀤𑁆𑀥𑀉𑀧𑀘𑀸𑀭𑀚𑁆𑀛𑀸𑀦𑀧𑀭𑀺𑀳𑀸𑀦𑀺. 𑀦𑀺𑀫𑀺𑀢𑁆𑀢𑁂 𑀅𑀯𑀺𑀦𑀲𑁆𑀲𑀦𑁆𑀢𑁂 𑀢𑀤𑀸𑀭𑀫𑁆𑀫𑀡𑀁 𑀛𑀸𑀦𑀁 𑀅𑀧𑀭𑀺𑀳𑀻𑀦𑀫𑁂𑀯 𑀳𑁄𑀢𑀺, 𑀦𑀺𑀫𑀺𑀢𑁆𑀢𑁂 𑀧𑀦 𑀆𑀭𑀓𑁆𑀔𑀸𑀪𑀸𑀯𑁂𑀦 𑀯𑀺𑀦𑀝𑁆𑀞𑁂 𑀮𑀤𑁆𑀥𑀁 𑀮𑀤𑁆𑀥𑀁 𑀛𑀸𑀦𑀫𑁆𑀧𑀺 𑀯𑀺𑀦𑀲𑁆𑀲𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄. 𑀢𑁂𑀦𑀸𑀳 ‘‘𑀆𑀭𑀓𑁆𑀔𑀫𑁆𑀳𑀻’’𑀢𑀺𑀆𑀤𑀺.

𑀇𑀤𑀸𑀦𑀺 𑀢𑀢𑁆𑀭𑀸𑀬𑀁 𑀭𑀓𑁆𑀔𑀡𑀽𑀧𑀸𑀬𑁄𑀢𑀺𑀆𑀤𑀺𑀦𑀸 𑁋

‘‘𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼;

𑀇𑀭𑀺𑀬𑀸𑀧𑀣𑁄𑀢𑀺 𑀲𑀢𑁆𑀢𑁂𑀢𑁂, 𑀅𑀲𑀧𑁆𑀧𑀸𑀬𑁂 𑀯𑀺𑀯𑀚𑁆𑀚𑀬𑁂.

‘‘𑀲𑀧𑁆𑀧𑀸𑀬𑁂 𑀲𑀢𑁆𑀢 𑀲𑁂𑀯𑁂𑀣, 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄;

𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀳𑁄𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀦𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁯) 𑁋

𑀏𑀯𑀁 𑀯𑀼𑀢𑁆𑀢𑀁 𑀭𑀓𑁆𑀔𑀡𑀯𑀺𑀥𑀺𑀁 𑀲𑀗𑁆𑀔𑁂𑀧𑀢𑁄 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑁄 𑁋 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀁 𑀯𑀸 𑀯𑀺𑀦𑀲𑁆𑀲𑀢𑀺, 𑀅𑀦𑀼𑀧𑀝𑁆𑀞𑀺𑀢𑀸 𑀘 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀅𑀲𑀧𑁆𑀧𑀸𑀬𑁄. 𑀬𑀢𑁆𑀣 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀣𑀸𑀯𑀭𑀜𑁆𑀘 𑀳𑁄𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀲𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀩𑀳𑀽 𑀆𑀯𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑀫𑁂𑀓𑀲𑁆𑀫𑀺𑀁 𑀢𑀻𑀡𑀺 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀲𑀺𑀢𑁆𑀯𑀸 𑀬𑀢𑁆𑀣𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁.

𑀕𑁄𑀘𑀭𑀕𑀸𑀫𑁄 ¶ 𑀧𑀦 𑀬𑁄 𑀲𑁂𑀦𑀸𑀲𑀦𑀢𑁄 𑀉𑀢𑁆𑀢𑀭𑁂𑀦 𑀯𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀦𑀸𑀢𑀺𑀤𑀽𑀭𑁂 𑀤𑀺𑀬𑀟𑁆𑀠𑀓𑁄𑀲𑀩𑁆𑀪𑀦𑁆𑀢𑀭𑁂 𑀳𑁄𑀢𑀺 𑀲𑀼𑀮𑀪𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑁄, 𑀲𑁄 𑀲𑀧𑁆𑀧𑀸𑀬𑁄, 𑀯𑀺𑀧𑀭𑀻𑀢𑁄 𑀅𑀲𑀧𑁆𑀧𑀸𑀬𑁄.

𑀪𑀲𑁆𑀲𑀦𑁆𑀢𑀺 ¶ 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸𑀧𑀭𑀺𑀬𑀸𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁. 𑀢𑀜𑁆𑀳𑀺𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀲𑀧𑁆𑀧𑀸𑀬𑀁, 𑀢𑀫𑁆𑀧𑀺𑀫𑀢𑁆𑀢𑀸𑀬 𑀪𑀸𑀲𑀺𑀢𑀩𑁆𑀩𑀁.

𑀧𑀼𑀕𑁆𑀕𑀮𑁄𑀧𑀺 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀣𑀺𑀭𑀢𑀭𑀁 𑀳𑁄𑀢𑀺, 𑀏𑀯𑀭𑀽𑀧𑁄 𑀲𑀧𑁆𑀧𑀸𑀬𑁄. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀧𑀦 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄 𑀅𑀲𑀧𑁆𑀧𑀸𑀬𑁄. 𑀲𑁄 𑀳𑀺 𑀢𑀁 𑀓𑀤𑁆𑀤𑀫𑁄𑀤𑀓𑀫𑀺𑀯 𑀅𑀘𑁆𑀙𑀁 𑀉𑀤𑀓𑀁 𑀫𑀮𑀻𑀦𑀫𑁂𑀯 𑀓𑀭𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀆𑀕𑀫𑁆𑀫 𑀓𑁄𑀝𑀧𑀩𑁆𑀩𑀢𑀯𑀸𑀲𑀻𑀤𑀳𑀭𑀲𑁆𑀲𑁂𑀯 𑀲𑀫𑀸𑀧𑀢𑁆𑀢𑀺 𑀯𑀺𑀦𑀲𑁆𑀲𑀢𑀺, 𑀧𑀕𑁂𑀯 𑀦𑀺𑀫𑀺𑀢𑁆𑀢𑀁.

𑀪𑁄𑀚𑀦𑀁 𑀧𑀦 𑀓𑀲𑁆𑀲𑀘𑀺 𑀫𑀥𑀼𑀭𑀁, 𑀓𑀲𑁆𑀲𑀘𑀺 𑀅𑀫𑁆𑀩𑀺𑀮𑀁 𑀲𑀧𑁆𑀧𑀸𑀬𑀁 𑀳𑁄𑀢𑀺. 𑀉𑀢𑀼𑀧𑀺 𑀓𑀲𑁆𑀲𑀘𑀺 𑀲𑀻𑀢𑁄, 𑀓𑀲𑁆𑀲𑀘𑀺 𑀉𑀡𑁆𑀳𑁄 𑀲𑀧𑁆𑀧𑀸𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀁 𑀪𑁄𑀚𑀦𑀁 𑀯𑀸 𑀉𑀢𑀼𑀁 𑀯𑀸 𑀲𑁂𑀯𑀦𑁆𑀢𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀣𑀺𑀭𑀢𑀭𑀁 𑀳𑁄𑀢𑀺. 𑀢𑀁 𑀪𑁄𑀚𑀦𑀁, 𑀲𑁄 𑀘 𑀉𑀢𑀼 𑀲𑀧𑁆𑀧𑀸𑀬𑁄. 𑀇𑀢𑀭𑀁 𑀪𑁄𑀚𑀦𑀁, 𑀇𑀢𑀭𑁄 𑀘 𑀉𑀢𑀼 𑀅𑀲𑀧𑁆𑀧𑀸𑀬𑁄.

𑀇𑀭𑀺𑀬𑀸𑀧𑀣𑁂𑀲𑀼𑀧𑀺 𑀓𑀲𑁆𑀲𑀘𑀺 𑀘𑀗𑁆𑀓𑀫𑁄 𑀲𑀧𑁆𑀧𑀸𑀬𑁄 𑀳𑁄𑀢𑀺, 𑀓𑀲𑁆𑀲𑀘𑀺 𑀲𑀬𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀦𑀁 𑀅𑀜𑁆𑀜𑀢𑀭𑁄. 𑀢𑀲𑁆𑀫𑀸 𑀢𑀁 𑀆𑀯𑀸𑀲𑀁 𑀯𑀺𑀬 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀣𑀺𑀭𑀢𑀭𑀁 𑀳𑁄𑀢𑀺, 𑀲𑁄 𑀲𑀧𑁆𑀧𑀸𑀬𑁄, 𑀇𑀢𑀭𑁄 𑀅𑀲𑀧𑁆𑀧𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀇𑀫𑀁 𑀲𑀢𑁆𑀢𑀯𑀺𑀥𑀁 𑀅𑀲𑀧𑁆𑀧𑀸𑀬𑀁 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀳𑀺 𑀦𑀺𑀫𑀺𑀢𑁆𑀢𑀸𑀲𑁂𑀯𑀦𑀩𑀳𑀼𑀮𑀲𑁆𑀲 𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦 𑀳𑁄𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀦𑀸.

𑀬𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀧𑀝𑀺𑀧𑀚𑁆𑀚𑀢𑁄 𑀦 𑀳𑁄𑀢𑀺, 𑀢𑁂𑀦 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁫; 𑀫. 𑀦𑀺. 𑀅𑀝𑁆𑀞. 𑁧.𑁧𑁧𑁮; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁩𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁪𑁧𑁮) 𑀯𑀺𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀦𑀸𑀫 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸𑀦𑀺 𑀤𑀻𑀖𑀸𑀦𑀺 𑀳𑁄𑀦𑁆𑀢𑀺, 𑀲𑀭𑀻𑀭𑀁 𑀯𑀸 𑀲𑁂𑀤𑀫𑀮𑀕𑁆𑀕𑀳𑀺𑀢𑀁, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 𑀧𑀦𑀲𑁆𑀲 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁, 𑀢𑀤𑀸 𑀩𑀸𑀳𑀺𑀭𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀳𑀺 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 ¶ 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀦𑀺 ¶ 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀅𑀧𑀭𑀺𑀲𑀼𑀤𑁆𑀥𑁂𑀦 𑀘 𑀜𑀸𑀡𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑁄 𑀲𑀗𑁆𑀔𑀸𑀭𑀸𑀧𑀺 𑀅𑀯𑀺𑀪𑀽𑀢𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀦 𑀕𑀘𑁆𑀙𑀢𑀺. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀧𑀭𑀺𑀲𑀼𑀤𑁆𑀥𑁂𑀦 𑀘 𑀜𑀸𑀡𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑁄 𑀲𑀗𑁆𑀔𑀸𑀭𑀸𑀧𑀺 𑀯𑀺𑀪𑀽𑀢𑀸𑀳𑁄𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀕𑀘𑁆𑀙𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀅𑀣 𑀦𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁. 𑀢𑀲𑁆𑀫𑀸 𑀢𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀲𑁄𑀡𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀉𑀪𑀺𑀦𑁆𑀦𑀁 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺, 𑀩𑀮𑀯𑀯𑀻𑀭𑀺𑀬𑀁 𑀫𑀦𑁆𑀤𑀲𑀫𑀸𑀥𑀺𑀁𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺, 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀲𑀫𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺. 𑀅𑀧𑀺𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺 ¶ . 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺, 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬𑀧𑀺 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀲𑀸 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 ¶ 𑀦𑀸𑀫 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀅𑀓𑀢𑀲𑁆𑀲 𑀓𑀭𑀡𑀓𑁄𑀲𑀮𑁆𑀮𑀁, 𑀓𑀢𑀲𑁆𑀲 𑀪𑀸𑀯𑀦𑀸𑀓𑁄𑀲𑀮𑁆𑀮𑀁, 𑀪𑀸𑀯𑀦𑀸𑀬 𑀮𑀤𑁆𑀥𑀲𑁆𑀲 𑀭𑀓𑁆𑀔𑀡𑀓𑁄𑀲𑀮𑁆𑀮𑀜𑁆𑀘, 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁.

𑀓𑀣𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺? 𑀬𑀤𑀸𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 (𑀲𑀁. 𑀦𑀺. 𑁫.𑁨𑁩𑁪) 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺. 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀅𑀓𑀸𑀮𑁄 𑀯𑀻𑀭𑀺𑀬…𑀧𑁂… 𑀅𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀯𑀽𑀧𑀲𑀫𑀬𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀓𑀸𑀮𑁄 𑀲𑀫𑀸𑀥𑀺…𑀧𑁂… 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 ¶ 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀤𑀓𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂’’𑀢𑀺.

𑀏𑀢𑁆𑀣 𑀘 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 ¶ , 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀢𑀣𑀸 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺…𑀧𑁂… 𑀢𑀣𑀸 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀢𑁆𑀣 𑀬𑀣𑀸𑀲𑁆𑀲 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄𑀯 𑀢𑀻𑀲𑀼 𑀧𑀤𑁂𑀲𑀼𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀲𑀫𑀣𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀲𑀫𑀣𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀢𑀲𑁆𑀲𑁂𑀯 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸, 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑁆𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀯𑀢𑁆𑀣𑀼𑀯𑀺𑀲𑀤𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀡𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀡𑀢𑀸, 𑀦𑀺𑀭𑀲𑁆𑀲𑀸𑀤𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀤𑁆𑀥𑀸𑀲𑀁𑀯𑁂𑀕𑀯𑀲𑁂𑀦 ¶ 𑀲𑀫𑁆𑀧𑀳𑀁𑀲𑀦𑀢𑀸, 𑀲𑀫𑀧𑁆𑀧𑀯𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀏𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺.

𑀓𑀣𑀜𑁆𑀘 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺? 𑀬𑀤𑀸𑀲𑁆𑀲 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 ¶ 𑀘𑀺𑀢𑁆𑀢𑀁 𑀮𑀻𑀦𑀁 𑀳𑁄𑀢𑀺, 𑀢𑀤𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 (𑀲𑀁. 𑀦𑀺. 𑁫.𑁨𑁩𑁪) 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬…𑀧𑁂… 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀁 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺. 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀅𑀓𑀸𑀮𑁄 𑀲𑀫𑀸𑀥𑀺…𑀧𑁂… 𑀅𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬…𑀧𑁂… 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬…𑀧𑁂… 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀁 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂’’𑀢𑀺.

𑀏𑀢𑁆𑀣𑀸𑀧𑀺 ¶ 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 (𑀲𑀁. 𑀦𑀺. 𑁫.𑁨𑁩𑁨) 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀳𑀻𑀦𑀧𑁆𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀢𑀣𑀸 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀢𑀣𑀸 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 ¶ 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺.

𑀢𑀢𑁆𑀣 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 𑀓𑀼𑀲𑀮𑀸𑀤𑀻𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀦𑀁 𑀉𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀢𑀢𑁆𑀣 𑀆𑀭𑀫𑁆𑀪𑀥𑀸𑀢𑀽𑀢𑀺 𑀧𑀞𑀫𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀺. 𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀽𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀧𑀦 𑀧𑀻𑀢𑀺𑀬𑀸 𑀏𑀯𑁂𑀢𑀁 𑀦𑀸𑀫𑀁, 𑀢𑀲𑁆𑀲𑀸𑀧𑀺 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀧𑀸𑀬𑀸𑀤𑀺𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀯𑀻𑀭𑀺𑀬𑀸𑀬𑀢𑁆𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀺𑀲𑀁𑀲𑀤𑀲𑁆𑀲𑀺𑀢𑀸, ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀆𑀲𑀸𑀯𑀓𑁂𑀳𑀺 𑀕𑀢𑀫𑀕𑁆𑀕𑁄 𑀫𑀬𑀸 𑀕𑀦𑁆𑀢𑀩𑁆𑀩𑁄, 𑀲𑁄 ¶ 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀢𑀸𑀓𑀭𑀡𑁂𑀦 𑀧𑀺𑀡𑁆𑀟𑀸𑀧𑀘𑀸𑀬𑀦𑀢𑀸, ‘‘𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀻 𑀫𑁂 𑀲𑀢𑁆𑀣𑀸, 𑀲𑁄 𑀘 𑀅𑀦𑀢𑀺𑀓𑁆𑀓𑀫𑀦𑀻𑀬𑀲𑀸𑀲𑀦𑁄, 𑀅𑀫𑁆𑀳𑀸𑀓𑀜𑁆𑀘 𑀩𑀳𑀽𑀧𑀓𑀸𑀭𑁄, 𑀧𑀝𑀺𑀧𑀢𑁆𑀢𑀺𑀬𑀸 𑀘 𑀧𑀽𑀚𑀺𑀬𑀫𑀸𑀦𑁄 𑀧𑀽𑀚𑀺𑀢𑁄 𑀳𑁄𑀢𑀺, 𑀦 𑀇𑀢𑀭𑀣𑀸’’𑀢𑀺 𑀏𑀯𑀁 𑀲𑀢𑁆𑀣𑀼 𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, ‘‘𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀁 𑀫𑁂 𑀫𑀳𑀸𑀤𑀸𑀬𑀚𑁆𑀚𑀁 𑀕𑀳𑁂𑀢𑀩𑁆𑀩𑀁, 𑀢𑀜𑁆𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼’’𑀦𑁆𑀢𑀺 𑀏𑀯𑀁 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀅𑀩𑁆𑀪𑁄𑀓𑀸𑀲𑀲𑁂𑀯𑀦𑀸𑀤𑀻𑀳𑀺 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀏𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺.

𑀓𑀣𑀁 ¶ 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺? 𑀬𑀤𑀸𑀲𑁆𑀲 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀦𑀁 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺. 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀲𑁆𑀲 𑀧𑀲𑀸𑀤𑀁 𑀚𑀦𑁂𑀢𑀺. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺.

𑀓𑀣𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺? 𑀬𑀤𑀸𑀲𑁆𑀲 𑀏𑀯𑀁 𑀧𑀝𑀺𑀧𑀚𑁆𑀚𑀢𑁄 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑁆𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺 𑀲𑀸𑀭𑀣𑀺 𑀯𑀺𑀬 𑀘 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺.

𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 ¶ 𑀦𑀸𑀫 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀁 𑀅𑀦𑀸𑀭𑀼𑀴𑁆𑀳𑀧𑀼𑀩𑁆𑀩𑀸𑀦𑀁 𑀅𑀦𑁂𑀓𑀓𑀺𑀘𑁆𑀘𑀧𑁆𑀧𑀲𑀼𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀳𑀤𑀬𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀘𑁆𑀘𑀸𑀕𑁄. 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸𑀦𑀁 𑀲𑀫𑀸𑀥𑀺𑀮𑀸𑀪𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀲𑀫𑀸𑀥𑀺𑀫𑀼𑀢𑁆𑀢𑀢𑀸, 𑀲𑀫𑀸𑀥𑀺𑀕𑀭𑀼𑀲𑀫𑀸𑀥𑀺𑀦𑀺𑀦𑁆𑀦𑀲𑀫𑀸𑀥𑀺𑀧𑁄𑀡𑀲𑀫𑀸𑀥𑀺𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀇𑀫𑀸𑀦𑀺 𑀤𑀲 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀅𑀯𑀺𑀚𑀳𑀦𑁆𑀢𑁂𑀦𑀸’’𑀢𑀺. 𑀢𑀢𑁆𑀣 𑀬𑁂𑀦 𑀯𑀺𑀥𑀺𑀦𑀸 𑀅𑀧𑁆𑀧𑀦𑀸𑀬 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀤𑀲𑀯𑀺𑀥𑁄𑀧𑀺 𑀯𑀺𑀥𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀢𑀦𑁆𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁, 𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀝𑀺𑀮𑀤𑁆𑀥𑀦𑀺𑀫𑀺𑀢𑁆𑀢𑀲𑁆𑀫𑀺𑀁 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀏𑀯𑀜𑁆𑀳𑀺 𑀲𑀫𑁆𑀧𑀸𑀤𑀬𑀢𑁄, 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀇𑀫𑀁;

𑀧𑀝𑀺𑀮𑀤𑁆𑀥𑁂 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀅𑀧𑁆𑀧𑀦𑀸 𑀲𑀫𑁆𑀧𑀯𑀢𑁆𑀢𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁬𑁭);

𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲𑀧𑀺 𑀬𑀤𑀺 𑀅𑀧𑁆𑀧𑀦𑀸 𑀦 𑀳𑁄𑀢𑀺, 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀯𑀺𑀚𑀳𑀺𑀢𑁆𑀯𑀸 𑀭𑁂𑀡𑀼𑀆𑀤𑀻𑀲𑀼 𑀫𑀥𑀼𑀓𑀭𑀸𑀤𑀻𑀦𑀁 𑀧𑀯𑀢𑁆𑀢𑀺 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀮𑀻𑀦𑀼𑀤𑁆𑀥𑀢𑀪𑀸𑀯𑁂𑀳𑀺 𑀫𑀸𑀦𑀲𑀁 𑀫𑁄𑀘𑁂𑀢𑁆𑀯𑀸 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀦𑁆𑀢𑁂𑀦 𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀏𑀯𑀜𑁆𑀳𑀺 ¶ 𑀧𑀝𑀺𑀧𑀦𑁆𑀦𑀲𑁆𑀲, 𑀲𑀘𑁂 𑀲𑀸 𑀦𑀧𑁆𑀧𑀯𑀢𑁆𑀢𑀢𑀺;

𑀢𑀣𑀸𑀧𑀺 𑀦 𑀚𑀳𑁂 𑀬𑁄𑀕𑀁, 𑀯𑀸𑀬𑀫𑁂𑀣𑁂𑀯 𑀧𑀡𑁆𑀟𑀺𑀢𑁄.

‘‘𑀳𑀺𑀢𑁆𑀯𑀸 𑀳𑀺 𑀲𑀫𑁆𑀫𑀯𑀸𑀬𑀸𑀫𑀁, 𑀯𑀺𑀲𑁂𑀲𑀁 𑀦𑀸𑀫 𑀫𑀸𑀡𑀯𑁄;

𑀅𑀥𑀺𑀕𑀘𑁆𑀙𑁂 𑀧𑀭𑀺𑀢𑁆𑀢𑀫𑁆𑀧𑀺, 𑀞𑀸𑀦𑀫𑁂𑀢𑀁 𑀦 𑀯𑀺𑀚𑁆𑀚𑀢𑀺.

‘‘𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁, 𑀢𑀲𑁆𑀫𑀸 𑀲𑀮𑁆𑀮𑀓𑁆𑀔𑀬𑀁 𑀩𑀼𑀥𑁄;

𑀲𑀫𑀢𑀁 𑀯𑀻𑀭𑀺𑀬𑀲𑁆𑀲𑁂𑀯, 𑀬𑁄𑀚𑀬𑁂𑀣 𑀧𑀼𑀦𑀧𑁆𑀧𑀼𑀦𑀁.

‘‘𑀈𑀲𑀓𑀫𑁆𑀧𑀺 𑀮𑀬𑀁 𑀬𑀦𑁆𑀢𑀁, 𑀧𑀕𑁆𑀕𑀡𑁆𑀳𑁂𑀣𑁂𑀯 𑀫𑀸𑀦𑀲𑀁;

𑀅𑀘𑁆𑀘𑀸𑀭𑀤𑁆𑀥𑀁 𑀦𑀺𑀲𑁂𑀥𑁂𑀢𑁆𑀯𑀸, 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂.

‘‘𑀭𑁂𑀡𑀼𑀫𑁆𑀳𑀺 𑀉𑀧𑁆𑀧𑀮𑀤𑀮𑁂, 𑀲𑀼𑀢𑁆𑀢𑁂 𑀦𑀸𑀯𑀸𑀬 𑀦𑀸𑀴𑀺𑀬𑀸;

𑀬𑀣𑀸 𑀫𑀥𑀼𑀓𑀭𑀸𑀤𑀻𑀦𑀁, 𑀧𑀯𑀢𑁆𑀢𑀺 𑀲𑀫𑁆𑀫𑀯𑀡𑁆𑀡𑀺𑀢𑀸.

‘‘𑀮𑀻𑀦𑀉𑀤𑁆𑀥𑀢𑀪𑀸𑀯𑁂𑀳𑀺, 𑀫𑁄𑀘𑀬𑀺𑀢𑁆𑀯𑀸𑀦 𑀲𑀩𑁆𑀩𑀲𑁄;

𑀏𑀯𑀁 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁, 𑀫𑀸𑀦𑀲𑀁 𑀧𑀝𑀺𑀧𑀸𑀤𑀬𑁂’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁬𑁭);

𑀬𑀣𑀸 ¶ 𑀳𑀺 𑀅𑀙𑁂𑀓𑁄 𑀫𑀥𑀼𑀓𑀭𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀼𑀧𑁆𑀨𑀁 𑀧𑀼𑀧𑁆𑀨𑀺𑀢’’𑀦𑁆𑀢𑀺 𑀜𑀢𑁆𑀯𑀸 𑀢𑀺𑀓𑁆𑀔𑁂𑀦 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑁄 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀔𑀻𑀡𑁂 𑀭𑁂𑀡𑀼𑀫𑁆𑀳𑀺 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀅𑀧𑀭𑁄 𑀅𑀙𑁂𑀓𑁄 𑀫𑀦𑁆𑀤𑁂𑀦 𑀚𑀯𑁂𑀦 𑀧𑀓𑁆𑀔𑀦𑁆𑀤𑁄 𑀔𑀻𑀡𑁂𑀬𑁂𑀯 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀙𑁂𑀓𑁄 𑀧𑀦 𑀲𑀫𑁂𑀦 𑀚𑀯𑁂𑀦 𑀧𑀓𑁆𑀔𑀦𑁆𑀤𑁄 𑀲𑀼𑀔𑁂𑀦 𑀧𑀼𑀧𑁆𑀨𑀭𑀸𑀲𑀺𑀁 𑀲𑀫𑁆𑀧𑀢𑁆𑀯𑀸 𑀬𑀸𑀯𑀤𑀺𑀘𑁆𑀙𑀓𑀁 𑀭𑁂𑀡𑀼𑀁 𑀆𑀤𑀸𑀬 𑀫𑀥𑀼𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀥𑀼𑀁 𑀅𑀦𑀼𑀪𑀯𑀢𑀺, 𑀬𑀣𑀸 𑀘 𑀲𑀮𑁆𑀮𑀓𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀉𑀤𑀓𑀣𑀸𑀮𑀕𑀢𑁂 𑀉𑀧𑁆𑀧𑀮𑀧𑀢𑁆𑀢𑁂 𑀲𑀢𑁆𑀣𑀓𑀫𑁆𑀫𑀁 𑀲𑀺𑀓𑁆𑀔𑀦𑁆𑀢𑁂𑀲𑀼 𑀏𑀓𑁄 𑀅𑀙𑁂𑀓𑁄 𑀯𑁂𑀕𑁂𑀦 𑀲𑀢𑁆𑀣𑀁 𑀧𑀸𑀢𑁂𑀦𑁆𑀢𑁄 𑀉𑀧𑁆𑀧𑀮𑀧𑀢𑁆𑀢𑀁 𑀤𑁆𑀯𑀺𑀥𑀸 𑀯𑀸 𑀙𑀺𑀦𑁆𑀤𑀢𑀺, 𑀉𑀤𑀓𑁂 𑀯𑀸 𑀧𑀯𑁂𑀲𑁂𑀢𑀺, 𑀅𑀧𑀭𑁄 𑀅𑀙𑁂𑀓𑁄 𑀙𑀺𑀚𑁆𑀚𑀦𑀧𑀯𑁂𑀲𑀦𑀪𑀬𑀸 𑀲𑀢𑁆𑀣𑀓𑁂𑀦 𑀨𑀼𑀲𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺, 𑀙𑁂𑀓𑁄 𑀧𑀦 𑀲𑀫𑁂𑀦 𑀧𑀬𑁄𑀕𑁂𑀦 𑀢𑀢𑁆𑀣 𑀲𑀢𑁆𑀣𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺, 𑀬𑀣𑀸 𑀘 ‘‘𑀬𑁄 𑀘𑀢𑀼𑀩𑁆𑀬𑀸𑀫𑀧𑁆𑀧𑀫𑀸𑀡𑀁 𑀫𑀓𑁆𑀓𑀝𑀓𑀲𑀼𑀢𑁆𑀢𑀁 𑀆𑀳𑀭𑀢𑀺, 𑀲𑁄 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀮𑀪𑀢𑀻’’𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑁂 𑀏𑀓𑁄 𑀅𑀙𑁂𑀓𑀧𑀼𑀭𑀺𑀲𑁄 𑀯𑁂𑀕𑁂𑀦 𑀫𑀓𑁆𑀓𑀝𑀓𑀲𑀼𑀢𑁆𑀢𑀁 𑀆𑀓𑀟𑁆𑀠𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁 𑀙𑀺𑀦𑁆𑀤𑀢𑀺𑀬𑁂𑀯, 𑀅𑀧𑀭𑁄 𑀅𑀙𑁂𑀓𑁄 𑀙𑁂𑀤𑀦𑀪𑀬𑀸 𑀳𑀢𑁆𑀣𑁂𑀦 𑀨𑀼𑀲𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺, 𑀙𑁂𑀓𑁄 𑀧𑀦 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀫𑁂𑀦 𑀧𑀬𑁄𑀕𑁂𑀦 𑀤𑀡𑁆𑀟𑀓𑁂 𑀯𑁂𑀞𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺, 𑀬𑀣𑀸 𑀘 𑀅𑀙𑁂𑀓𑁄 𑀦𑀺𑀬𑀸𑀫𑀓𑁄 𑀩𑀮𑀯𑀯𑀸𑀢𑁂 𑀮𑀗𑁆𑀓𑀸𑀭𑀁 ¶ 𑀧𑀽𑀭𑁂𑀦𑁆𑀢𑁄 𑀦𑀸𑀯𑀁 𑀯𑀺𑀤𑁂𑀲𑀁 𑀧𑀓𑁆𑀔𑀦𑁆𑀤𑀸𑀧𑁂𑀢𑀺, 𑀅𑀧𑀭𑁄 𑀅𑀙𑁂𑀓𑁄 𑀫𑀦𑁆𑀤𑀯𑀸𑀢𑁂 𑀮𑀗𑁆𑀓𑀸𑀭𑀁 𑀑𑀭𑁄𑀧𑁂𑀦𑁆𑀢𑁄 𑀦𑀸𑀯𑀁 𑀢𑀢𑁆𑀣𑁂𑀯 𑀞𑀧𑁂𑀢𑀺, 𑀙𑁂𑀓𑁄 𑀧𑀦 𑀫𑀦𑁆𑀤𑀯𑀸𑀢𑁂 𑀧𑀽𑀭𑁂𑀢𑁆𑀯𑀸 𑀩𑀮𑀯𑀯𑀸𑀢𑁂 𑀅𑀟𑁆𑀠𑀮𑀗𑁆𑀓𑀸𑀭𑀁 𑀓𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀬𑀣𑀸 𑀘 ‘‘𑀬𑁄 𑀢𑁂𑀮𑁂𑀦 𑀅𑀙𑀟𑁆𑀟𑁂𑀦𑁆𑀢𑁄 𑀦𑀸𑀴𑀺𑀁 𑀧𑀽𑀭𑁂𑀢𑀺, 𑀲𑁄 𑀮𑀸𑀪𑀁 𑀮𑀪𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀼𑀢𑁆𑀢𑁂 𑀏𑀓𑁄 𑀅𑀙𑁂𑀓𑁄 𑀮𑀸𑀪𑀮𑀼𑀤𑁆𑀥𑁄 𑀯𑁂𑀕𑁂𑀦 𑀧𑀽𑀭𑁂𑀦𑁆𑀢𑁄 𑀢𑁂𑀮𑀁 𑀙𑀟𑁆𑀟𑁂𑀢𑀺, 𑀅𑀧𑀭𑁄 𑀅𑀙𑁂𑀓𑁄 𑀢𑁂𑀮𑀙𑀟𑁆𑀟𑀦𑀪𑀬𑀸 𑀆𑀲𑀺𑀜𑁆𑀘𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺, 𑀙𑁂𑀓𑁄 𑀧𑀦 𑀲𑀫𑁂𑀦 𑀧𑀬𑁄𑀕𑁂𑀦 𑀧𑀽𑀭𑁂𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺, 𑀏𑀯𑀫𑁂𑀯 𑀏𑀓𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀦𑀺𑀫𑀺𑀢𑁆𑀢𑁂 ‘‘𑀲𑀻𑀖𑀫𑁂𑀯 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀕𑀸𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸 𑀉𑀤𑁆𑀥𑀘𑁆𑀘𑁂 𑀧𑀢𑀢𑀺, 𑀲𑁄 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁. 𑀏𑀓𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀤𑁄𑀲𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀤𑀸𑀦𑀺 𑀫𑁂 𑀅𑀧𑁆𑀧𑀦𑀸𑀬𑀸’’𑀢𑀺 𑀯𑀻𑀭𑀺𑀬𑀁 𑀳𑀸𑀧𑁂𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑀺𑀮𑀻𑀦𑀯𑀻𑀭𑀺𑀬𑀢𑁆𑀢𑀸 𑀓𑁄𑀲𑀚𑁆𑀚𑁂 𑀧𑀢𑀢𑀺, 𑀲𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁. 𑀬𑁄 𑀧𑀦 𑀈𑀲𑀓𑀫𑁆𑀧𑀺 ¶ 𑀮𑀻𑀦𑀁 𑀮𑀻𑀦𑀪𑀸𑀯𑀢𑁄, 𑀉𑀤𑁆𑀥𑀢𑀁 𑀉𑀤𑁆𑀥𑀘𑁆𑀘𑀢𑁄 𑀫𑁄𑀘𑁂𑀢𑁆𑀯𑀸 𑀲𑀫𑁂𑀦 𑀧𑀬𑁄𑀕𑁂𑀦 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑁂𑀢𑀺, 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀅𑀧𑁆𑀧𑀦𑀸𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲𑁂𑀯𑀁 𑀅𑀦𑀼𑀬𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀁 𑀧𑀭𑀺𑀓𑀫𑁆𑀫𑀦𑁆𑀢𑀺𑀆𑀤𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀁, 𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀲𑀁 𑀲𑀩𑁆𑀩𑀸 𑀲𑀫𑀜𑁆𑀜𑀸. 𑀲𑀩𑁆𑀩𑀸𑀦𑀺𑀧𑀺 𑀳𑀺 𑀅𑀧𑁆𑀧𑀦𑀸𑀬 𑀧𑀭𑀺𑀓𑀫𑁆𑀫𑀢𑁆𑀢𑀸 𑀧𑀝𑀺𑀲𑀗𑁆𑀔𑀸𑀭𑀓𑀢𑁆𑀢𑀸 ‘‘𑀧𑀭𑀺𑀓𑀫𑁆𑀫𑀸𑀦𑀻’’𑀢𑀺𑀧𑀺, 𑀬𑀣𑀸 𑀕𑀸𑀫𑀸𑀤𑀻𑀦𑀁 𑀆𑀲𑀦𑁆𑀦𑀧𑁆𑀧𑀤𑁂𑀲𑁄 ‘‘𑀕𑀸𑀫𑀽𑀧𑀘𑀸𑀭𑁄 𑀖𑀭𑀽𑀧𑀘𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀧𑁆𑀧𑀦𑀸𑀬 𑀆𑀲𑀦𑁆𑀦𑀢𑁆𑀢𑀸 𑀲𑀫𑀻𑀧𑀘𑀸𑀭𑀺𑀢𑁆𑀢𑀸 𑀯𑀸 ‘‘𑀉𑀧𑀘𑀸𑀭𑀸𑀦𑀻’’𑀢𑀺𑀧𑀺, 𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀸𑀦𑀁 𑀉𑀧𑀭𑀺 𑀅𑀧𑁆𑀧𑀦𑀸𑀬 𑀘 𑀅𑀦𑀼𑀮𑁄𑀫𑀦𑀢𑁄 ‘‘𑀅𑀦𑀼𑀮𑁄𑀫𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀜𑁆𑀘𑁂𑀢𑁆𑀣 𑀲𑀩𑁆𑀩𑀦𑁆𑀢𑀺𑀫𑀁, 𑀢𑀁 𑀧𑀭𑀺𑀢𑁆𑀢𑀕𑁄𑀢𑁆𑀢𑀸𑀪𑀺𑀪𑀯𑀦𑀢𑁄 𑀫𑀳𑀕𑁆𑀕𑀢𑀕𑁄𑀢𑁆𑀢𑀪𑀸𑀯𑀦𑀢𑁄 𑀘 ‘‘𑀕𑁄𑀢𑁆𑀭𑀪𑀽’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀕𑀁 𑀢𑀸𑀬𑀢𑀻𑀢𑀺 𑀳𑀺 𑀕𑁄𑀢𑁆𑀢𑀁, 𑀧𑀭𑀺𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀧𑀭𑀺𑀢𑁆𑀢𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀯𑀺𑀥𑀼𑀭𑀁 𑀓𑀸𑀫𑀢𑀡𑁆𑀳𑀸𑀬 𑀕𑁄𑀘𑀭𑀪𑀽𑀢𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 𑀆𑀯𑁂𑀡𑀺𑀓𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀕𑁆𑀕𑀢𑀕𑁄𑀢𑁆𑀢𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀏𑀯𑀭𑀽𑀧𑀲𑁆𑀲 𑀧𑀭𑀺𑀢𑁆𑀢𑀕𑁄𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀢𑁄 𑀫𑀳𑀕𑁆𑀕𑀢𑀕𑁄𑀢𑁆𑀢𑀲𑁆𑀲 𑀘 𑀪𑀸𑀯𑀦𑀢𑁄 𑀉𑀧𑁆𑀧𑀸𑀤𑀦𑀢𑁄 𑀅𑀦𑁆𑀢𑀺𑀫𑀁 ‘‘𑀕𑁄𑀢𑁆𑀭𑀪𑀽’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀢𑁆𑀣𑀫𑁂𑀯 𑀳𑀺 𑀧𑀜𑁆𑀘𑀫𑀁 𑀯𑀸𑀢𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀤𑀦𑁆𑀥𑀸𑀪𑀺𑀜𑁆𑀜𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀳𑀺 𑀘𑀢𑀼𑀢𑁆𑀣𑀁 𑀅𑀧𑁆𑀧𑁂𑀢𑀺, 𑀤𑀦𑁆𑀥𑀸𑀪𑀺𑀜𑁆𑀜𑀲𑁆𑀲 𑀧𑀜𑁆𑀘𑀫𑀁. 𑀓𑀲𑁆𑀫𑀸 𑀧𑀦 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀦 𑀙𑀝𑁆𑀞𑀁 𑀯𑀸 𑀲𑀢𑁆𑀢𑀫𑀁 𑀯𑀸𑀢𑀺 𑀆𑀳 ‘‘𑀆𑀲𑀦𑁆𑀦𑀪𑀯𑀗𑁆𑀕𑀧𑀸𑀢𑀢𑁆𑀢𑀸’’𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀙𑀺𑀦𑁆𑀦𑀧𑀧𑀸𑀢𑀸𑀪𑀺𑀫𑀼𑀔𑁄 𑀥𑀸𑀯𑀦𑁆𑀢𑁄 𑀞𑀸𑀢𑀼𑀓𑀸𑀫𑁄𑀧𑀺 𑀧𑀭𑀺𑀬𑀦𑁆𑀢𑁂 𑀧𑀸𑀤𑀁 𑀓𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀧𑀸𑀢𑁂 𑀏𑀯 𑀧𑀢𑀢𑀺, 𑀏𑀯𑀁 𑀙𑀝𑁆𑀞𑀁 𑀯𑀸 𑀲𑀢𑁆𑀢𑀫𑀁 𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸. 𑀢𑀲𑁆𑀫𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼𑀬𑁂𑀯 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀧𑀼𑀭𑀺𑀫𑀸 ¶ 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁨) 𑀯𑀼𑀢𑁆𑀢𑀢𑁆𑀢𑀸 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀓𑀼𑀲𑀮𑀸 𑀥𑀫𑁆𑀫𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀻’’𑀢𑀺 𑀆𑀳. 𑀬𑀣𑀸 𑀅𑀮𑀤𑁆𑀥𑀸𑀲𑁂𑀯𑀦𑀁 𑀧𑀞𑀫𑀁 𑀚𑀯𑀦𑀁 𑀤𑀼𑀩𑁆𑀩𑀮𑀢𑁆𑀢𑀸 𑀕𑁄𑀢𑁆𑀭𑀪𑀼𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀮𑀤𑁆𑀥𑀸𑀲𑁂𑀯𑀦𑀁 𑀧𑀦 ¶ 𑀩𑀮𑀯𑀪𑀸𑀯𑀢𑁄 𑀤𑀼𑀢𑀺𑀬𑀁 𑀯𑀸 𑀢𑀢𑀺𑀬𑀁 𑀯𑀸 𑀕𑁄𑀢𑁆𑀭𑀪𑀼𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀩𑀮𑀯𑀪𑀸𑀯𑀢𑁄 𑀙𑀝𑁆𑀞𑀫𑁆𑀧𑀺 𑀲𑀢𑁆𑀢𑀫𑀫𑁆𑀧𑀺 𑀅𑀧𑁆𑀧𑁂𑀢𑀻𑀢𑀺 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀢𑀲𑁆𑀫𑀸 𑀙𑀝𑁆𑀞𑀁 𑀲𑀢𑁆𑀢𑀫𑀁 𑀯𑀸 𑀅𑀧𑁆𑀧𑁂𑀢𑀻’’𑀢𑀺. 𑀢𑀦𑁆𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁. 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂𑀳𑀺 𑀅𑀦𑀼𑀧𑀢𑁆𑀣𑀫𑁆𑀪𑀺𑀢𑀢𑁆𑀢𑀸 ‘‘𑀅𑀢𑁆𑀢𑀦𑁄𑀫𑀢𑀺𑀫𑀢𑁆𑀢𑀁 𑀣𑁂𑀭𑀲𑁆𑀲𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁. ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀧𑀦 𑀲𑀼𑀢𑁆𑀢𑀧𑀤𑀫𑀓𑀸𑀭𑀡𑀁 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑀲𑁆𑀲 𑀩𑀮𑀯𑀪𑀸𑀯𑁂 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀸𑀧𑀺 𑀧𑀞𑀫𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀳𑁄𑀢𑀺, 𑀮𑀤𑁆𑀥𑀸𑀲𑁂𑀯𑀦𑀸 𑀤𑀼𑀢𑀺𑀬𑀘𑁂𑀢𑀦𑀸 𑀬𑀸𑀯 𑀙𑀝𑁆𑀞𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸. 𑀬𑀤𑀺 𑀙𑀝𑁆𑀞𑀁 𑀲𑀢𑁆𑀢𑀫𑀜𑁆𑀘 𑀧𑀭𑀺𑀓𑁆𑀔𑀻𑀡𑀚𑀯𑀢𑁆𑀢𑀸 𑀤𑀼𑀩𑁆𑀩𑀮𑀁, 𑀦 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀩𑀮𑀯𑀁, 𑀓𑀣𑀁 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀆𑀦𑀦𑁆𑀢𑀭𑀺𑀬𑀸 𑀘 𑀳𑁄𑀢𑀻𑀢𑀺? 𑀦𑀸𑀬𑀁 𑀯𑀺𑀲𑁂𑀲𑁄 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑁂𑀦 𑀩𑀮𑀯𑀧𑁆𑀧𑀢𑁆𑀢𑀺𑀬𑀸 𑀓𑀺𑀜𑁆𑀘𑀭𑀳𑀺 𑀓𑀺𑀭𑀺𑀬𑀸𑀯𑀢𑁆𑀣𑀸𑀯𑀺𑀲𑁂𑀲𑀢𑁄. 𑀓𑀺𑀭𑀺𑀬𑀸𑀯𑀢𑁆𑀣𑀸 𑀳𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀧𑀭𑀺𑀬𑁄𑀲𑀸𑀦𑀸𑀯𑀢𑁆𑀣𑀸𑀬 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀪𑀸𑀯𑁂𑀦 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀤𑀺𑀢𑀸 𑀳𑁄𑀢𑀺, 𑀦 𑀩𑀮𑀯𑀪𑀸𑀯𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀢𑀣𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸’’𑀢𑀺 𑀘 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀙𑀝𑁆𑀞𑀲𑀢𑁆𑀢𑀫𑀸𑀦𑀁 𑀧𑀧𑀸𑀢𑀸𑀪𑀺𑀫𑀼𑀔𑀢𑀸𑀬 𑀧𑀭𑀺𑀓𑁆𑀔𑀻𑀡𑀚𑀯𑀢𑀸 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀻𑀢𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀘𑀺𑀢𑁆𑀢𑀸𑀦𑀺.

𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁. 𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀼𑀓𑀸𑀫𑁄𑀢𑀺 𑀅𑀥𑀺𑀕𑀦𑁆𑀢𑀼𑀓𑀸𑀫𑁄 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀘. 𑀢𑀢𑁆𑀣 𑀲𑀮𑁆𑀮𑀓𑁆𑀔𑀡𑀸𑀯𑀺𑀯𑀝𑁆𑀝𑀦𑀸𑀯𑀲𑁂𑀦 𑀅𑀥𑀺𑀕𑀦𑁆𑀢𑀼𑀓𑀸𑀫𑁄, 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦…𑀧𑁂… 𑀯𑀲𑀺𑀧𑁆𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀏𑀯𑀁 𑀢𑀸𑀯 𑀧𑀜𑁆𑀘 𑀯𑀲𑀺𑀬𑁄 𑀯𑁂𑀤𑀺𑀢𑀩𑁆𑀩𑀸 𑁋 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀞𑀫𑀁 𑀯𑀺𑀢𑀓𑁆𑀓𑀁 𑀆𑀯𑀚𑁆𑀚𑀬𑀢𑁄 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀢𑀢𑁄 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺, 𑀢𑀢𑁄 𑀧𑀦 𑀯𑀺𑀘𑀸𑀭𑀸𑀭𑀫𑁆𑀫𑀡𑀁 𑀆𑀯𑀚𑁆𑀚𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀯𑀦𑀸𑀦𑀻𑀢𑀺 𑀏𑀯𑀁 𑀧𑀜𑁆𑀘𑀲𑀼 𑀛𑀸𑀦𑀗𑁆𑀕𑁂𑀲𑀼 𑀬𑀤𑀸 𑀦𑀺𑀭𑀦𑁆𑀢𑀭𑀁 𑀘𑀺𑀢𑁆𑀢𑀁 𑀧𑁂𑀲𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀣𑀲𑁆𑀲 𑀆𑀯𑀚𑁆𑀚𑀦𑀯𑀲𑀻 𑀲𑀺𑀤𑁆𑀥𑀸 𑀳𑁄𑀢𑀺. 𑀅𑀬𑀁 𑀧𑀦 𑀪𑀯𑀗𑁆𑀕𑀤𑁆𑀯𑀬𑀦𑁆𑀢𑀭𑀺𑀢𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀯𑀲𑀻 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀮𑀩𑁆𑀪𑀢𑀺, 𑀅𑀜𑁆𑀜𑁂𑀲𑀁 𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀏𑀯𑀭𑀽𑀧𑁂 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀮𑀳𑀼𑀢𑀭𑀁 𑀆𑀯𑀚𑁆𑀚𑀦𑀯𑀲𑀻𑀦𑀺𑀩𑁆𑀩𑀢𑁆𑀢𑀦𑀓𑀸𑀮𑁂. 𑀲𑀸 𑀘 𑀔𑁄 𑀇𑀢𑁆𑀢𑀭𑀸 𑀧𑀭𑀺𑀢𑁆𑀢𑀓𑀸𑀮𑀸, 𑀦 𑀲𑀢𑁆𑀣𑀼 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 ¶ 𑀯𑀺𑀬 𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀯𑀢𑀻. 𑀢𑀣𑀸 𑀳𑀺 𑀢𑀁 𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀯𑀼𑀢𑁆𑀢𑀁. 𑀇𑀢𑁄 𑀧𑀭𑀁 𑀲𑀻𑀖𑀢𑀭𑀸 𑀆𑀯𑀚𑁆𑀚𑀦𑀯𑀲𑀻 𑀦𑀸𑀫 𑀦𑀢𑁆𑀣𑀺.

𑀆𑀬𑀲𑁆𑀫𑀢𑁄 ¶ 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀦𑀦𑁆𑀤𑁄𑀧𑀦𑀦𑁆𑀤𑀦𑀸𑀕𑀭𑀸𑀚𑀤𑀫𑀦𑁂 𑀯𑀺𑀬 𑀲𑀻𑀖𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫. 𑀏𑀢𑁆𑀣 𑀘 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀦𑀦𑁆𑀢𑀭𑀁 𑀤𑁆𑀯𑀻𑀲𑀼 𑀪𑀯𑀗𑁆𑀕𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀲𑀫𑀸𑀧𑀚𑁆𑀚𑀦𑀁 𑀲𑀻𑀖𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸. 𑀅𑀬𑀜𑁆𑀘 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬𑀁 𑀮𑀩𑁆𑀪𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀺, 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭). 𑀇𑀢𑁄 𑀲𑀻𑀖𑀢𑀭𑀸 𑀳𑀺 𑀲𑀫𑀸𑀧𑀚𑁆𑀚𑀦𑀯𑀲𑀻 𑀦𑀸𑀫 𑀦𑀢𑁆𑀣𑀺.

𑀅𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀤𑀲𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻 𑀦𑀸𑀫. 𑀢𑀣𑁂𑀯 𑀅𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀤𑀲𑀘𑁆𑀙𑀭𑀸𑀫𑀢𑁆𑀢𑀁 𑀯𑀸 𑀮𑀳𑀼𑀓𑀁 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻 𑀦𑀸𑀫. 𑀪𑀯𑀗𑁆𑀕𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑁂𑀯 𑀳𑁂𑀢𑁆𑀣 𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀏𑀢𑁆𑀣 𑀘 𑀬𑀣𑀸 ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀛𑀸𑀦𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻, 𑀏𑀯𑀁 ‘‘𑀏𑀢𑁆𑀢𑀓𑀫𑁂𑀯 𑀔𑀡𑀁 𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑀧𑀭𑀺𑀓𑀫𑁆𑀫𑀯𑀲𑁂𑀦 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀸 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻 𑀧𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀏𑀯 𑀯𑀼𑀢𑁆𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑁂𑀯 𑀳𑀺 𑀢𑀢𑁆𑀣 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀸𑀦𑀺. 𑀬𑀤𑀕𑁆𑀕𑁂𑀦 𑀳𑀺 𑀆𑀯𑀚𑁆𑀚𑀦𑀯𑀲𑀻𑀲𑀺𑀤𑁆𑀥𑀺, 𑀢𑀤𑀕𑁆𑀕𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀻𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸…𑀧𑁂… 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀥𑀫𑁆𑀫𑁂 𑀲𑀮𑀓𑁆𑀔𑀡𑀭𑀲𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. ‘‘𑀛𑀸𑀦𑀗𑁆𑀕𑀸𑀦𑀻’’𑀢𑀺 𑀳𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀛𑀸𑀦𑀗𑁆𑀕𑀸𑀦𑀺 𑀧𑀦 𑀧𑀲𑁆𑀲𑀦𑁆𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀥𑀫𑁆𑀫𑁂 𑀧𑀲𑁆𑀲𑀢𑀺. 𑀢𑁂𑀲𑀁 𑀦𑀺𑀲𑁆𑀲𑀬𑀁 𑀳𑀤𑀬𑀯𑀢𑁆𑀣𑀼𑀦𑁆𑀢𑀺 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀅𑀦𑁆𑀢𑁄𑀕𑁂𑀳𑁂 𑀲𑀧𑁆𑀧𑀁 𑀤𑀺𑀲𑁆𑀯𑀸 𑀅𑀦𑀼𑀩𑀦𑁆𑀥𑀫𑀸𑀦𑁄 𑀢𑀲𑁆𑀲 𑀆𑀲𑀬𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀔𑁄 𑀅𑀬𑀫𑁆𑀧𑀺 𑀬𑁄𑀕𑀸𑀯𑀘𑀭𑁄 𑀢𑁂 𑀅𑀭𑀽𑀧𑀥𑀫𑁆𑀫𑁂 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀇𑀫𑁂 𑀥𑀫𑁆𑀫𑀸 𑀓𑀺𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀭𑀺𑀬𑁂𑀲𑀫𑀸𑀦𑁄 𑀢𑁂𑀲𑀁 𑀦𑀺𑀲𑁆𑀲𑀬𑀁 ¶ 𑀳𑀤𑀬𑀯𑀢𑁆𑀣𑀼𑀁 𑀧𑀲𑁆𑀲𑀢𑀺. 𑀛𑀸𑀦𑀗𑁆𑀕𑀸𑀦𑀺 𑀅𑀭𑀽𑀧𑀦𑁆𑀢𑀺 𑀏𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑁂𑀲𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼…𑀧𑁂… 𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀸𑀦𑀺 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀓𑁂𑀲𑁂 𑀢𑀸𑀯 𑀣𑀤𑁆𑀥𑀮𑀓𑁆𑀔𑀡𑀁 𑀧𑀣𑀯𑀻𑀥𑀸𑀢𑀽𑀢𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀢𑁆𑀣𑁂𑀯 𑀆𑀩𑀦𑁆𑀥𑀦𑀮𑀓𑁆𑀔𑀡𑀁 𑀆𑀧𑁄𑀥𑀸𑀢𑀽𑀢𑀺, 𑀧𑀭𑀺𑀧𑀸𑀘𑀦𑀮𑀓𑁆𑀔𑀡𑀁 ¶ 𑀢𑁂𑀚𑁄𑀥𑀸𑀢𑀽𑀢𑀺, 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀯𑀸𑀬𑁄𑀥𑀸𑀢𑀽𑀢𑀺 𑀏𑀯𑀁 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀅𑀣𑀸𑀦𑁂𑀦 𑀬𑀸𑀣𑀸𑀯𑀢𑁄 𑀲𑀭𑀲𑀮𑀓𑁆𑀔𑀡𑀢𑁄 𑀆𑀯𑀺𑀪𑀽𑀢𑀸𑀲𑀼 𑀥𑀸𑀢𑀽𑀲𑀼 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁆𑀳𑀺 𑀢𑀸𑀯 𑀓𑁂𑀲𑁂 𑀯𑀼𑀢𑁆𑀢𑀮𑀓𑁆𑀔𑀡𑀸 𑀢𑀸 𑀘𑀢𑀲𑁆𑀲𑁄 𑀘 𑀥𑀸𑀢𑀼𑀬𑁄 𑀢𑀁𑀦𑀺𑀲𑁆𑀲𑀺𑀢𑁄 𑀘 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸 𑀚𑀻𑀯𑀺𑀢𑀁 𑀓𑀸𑀬𑀧𑀲𑀸𑀤𑁄𑀢𑀺 𑀏𑀯𑀁 𑀓𑀸𑀬𑀤𑀲𑀓𑀯𑀲𑁂𑀦 𑀤𑀲 𑀭𑀽𑀧𑀸𑀦𑀺, 𑀢𑀢𑁆𑀣𑁂𑀯 𑀪𑀸𑀯𑀲𑁆𑀲 𑀅𑀢𑁆𑀣𑀺𑀢𑀸𑀬 𑀪𑀸𑀯𑀤𑀲𑀓𑀯𑀲𑁂𑀦 𑀤𑀲 𑀭𑀽𑀧𑀸𑀦𑀺, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁 𑀑𑀚𑀝𑁆𑀞𑀫𑀓𑀁, 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀧𑀭𑀸𑀦𑀺𑀧𑀺 𑀘𑀢𑀼𑀯𑀻𑀲𑀢𑀻𑀢𑀺 𑀏𑀯𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀘𑀢𑀼𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂𑀲𑀼 𑀘𑀢𑀼𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀲𑁂𑀤𑁄 𑀅𑀲𑁆𑀲𑀼 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀇𑀫𑁂 𑀧𑀦 𑀘𑀢𑀽𑀲𑀼 𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀤𑁆𑀯𑀺𑀦𑁆𑀦𑀁 𑀑𑀚𑀝𑁆𑀞𑀫𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲 𑀲𑁄𑀴𑀲 𑀭𑀽𑀧𑀸𑀦𑀺. 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀼𑀩𑁆𑀩𑀁 𑀫𑀼𑀢𑁆𑀢𑀦𑁆𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀑𑀚𑀝𑁆𑀞𑀫𑀓𑀲𑁆𑀲 𑀯𑀲𑁂𑀦 𑀅𑀝𑁆𑀞 𑀅𑀝𑁆𑀞 𑀭𑀽𑀧𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀏𑀲 𑀢𑀸𑀯 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀦𑀬𑁄.

𑀬𑁂 𑀧𑀦 𑀇𑀫𑀲𑁆𑀫𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀆𑀯𑀺𑀪𑀽𑀢𑁂 𑀅𑀧𑀭𑁂 𑀘𑀢𑁆𑀢𑀸𑀭𑁄 𑀢𑁂𑀚𑁄𑀓𑁄𑀝𑁆𑀞𑀸𑀲𑀸, 𑀙 𑀯𑀸𑀬𑁄𑀓𑁄𑀝𑁆𑀞𑀸𑀲𑀸𑀢𑀺 𑀤𑀲 𑀆𑀓𑀸𑀭𑀸 𑀆𑀯𑀺 𑀪𑀯𑀦𑁆𑀢𑀺, 𑀢𑀢𑁆𑀣 𑀅𑀲𑀺𑀢𑀸𑀤𑀺𑀧𑀭𑀺𑀧𑀸𑀘𑀓𑁂 𑀢𑀸𑀯 𑀓𑀫𑁆𑀫𑀚𑀢𑁂𑀚𑁄𑀓𑁄𑀝𑁆𑀞𑀸𑀲𑀫𑁆𑀳𑀺 𑀑𑀚𑀝𑁆𑀞𑀫𑀓𑀜𑁆𑀘𑁂𑀯 𑀚𑀻𑀯𑀺𑀢𑀜𑁆𑀘𑀸𑀢𑀺 𑀦𑀯 𑀭𑀽𑀧𑀸𑀦𑀺, 𑀢𑀣𑀸 𑀘𑀺𑀢𑁆𑀢𑀚𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑁄𑀝𑁆𑀞𑀸𑀲𑁂 𑀑𑀚𑀝𑁆𑀞𑀫𑀓𑀜𑁆𑀘𑁂𑀯 𑀲𑀤𑁆𑀤𑁄 𑀘𑀸𑀢𑀺 𑀦𑀯, 𑀲𑁂𑀲𑁂𑀲𑀼 𑀘𑀢𑀼𑀲𑀫𑀼𑀝𑁆𑀞𑀸𑀦𑁂𑀲𑀼 𑀅𑀝𑁆𑀞𑀲𑀼 𑀚𑀻𑀯𑀺𑀢𑀦𑀯𑀓𑀜𑁆𑀘𑁂𑀯 𑀢𑀻𑀡𑀺 𑀘 𑀑𑀚𑀝𑁆𑀞𑀫𑀓𑀸𑀦𑀻𑀢𑀺 𑀢𑁂𑀢𑁆𑀢𑀺𑀁𑀲 𑀢𑁂𑀢𑁆𑀢𑀺𑀁𑀲 𑀭𑀽𑀧𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀓𑀸𑀭𑀯𑀲𑁂𑀦 𑀇𑀫𑁂𑀲𑀼 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀲𑀼 𑀧𑀸𑀓𑀝𑁂𑀲𑀼 𑀚𑀸𑀢𑁂𑀲𑀼 𑀯𑀢𑁆𑀣𑀼𑀤𑁆𑀯𑀸𑀭𑀯𑀲𑁂𑀦 𑀧𑀜𑁆𑀘 𑀘𑀓𑁆𑀔𑀼𑀤𑀲𑀓𑀸𑀤𑀬𑁄 𑀳𑀤𑀬𑀯𑀢𑁆𑀣𑀼𑀤𑀲𑀓𑀜𑁆𑀘𑀸𑀢𑀺 𑀅𑀧𑀭𑀸𑀦𑀺𑀧𑀺 𑀲𑀝𑁆𑀞𑀺 𑀭𑀽𑀧𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀦𑀲𑁆𑀲 𑀢𑁂𑀦 𑀢𑁂𑀦 𑀫𑀼𑀔𑁂𑀦 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀲𑀼𑀔𑀼𑀫𑀢𑁆𑀢𑀸 𑀅𑀭𑀽𑀧𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀭𑀽𑀧𑀫𑁂𑀯 ¶ 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀬𑀣𑀸 𑀬𑀣𑀸 𑀳𑀺𑀲𑁆𑀲 𑀭𑀽𑀧𑀁 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀳𑁄𑀢𑀺 𑀦𑀺𑀚𑁆𑀚𑀝𑀁 𑀲𑀼𑀧𑀭𑀺𑀲𑀼𑀤𑁆𑀥𑀁, 𑀢𑀣𑀸 𑀢𑀣𑀸 𑀢𑀤𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀬𑀣𑀸 𑀳𑀺 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦 𑀆𑀤𑀸𑀲𑀁 𑀙𑀟𑁆𑀟𑁂𑀢𑀺, 𑀅𑀣 𑀔𑁄 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀢𑀺, 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑁂 𑀦𑀺𑀫𑀺𑀢𑁆𑀢𑀁 𑀲𑀬𑀫𑁂𑀯 𑀧𑀸𑀓𑀝𑀁 𑀳𑁄𑀢𑀺, 𑀏𑀯𑀫𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀭𑀽𑀧𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀬𑀣𑀸 𑀬𑀣𑀸 𑀳𑀺𑀲𑁆𑀲 𑀭𑀽𑀧𑀁 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀳𑁄𑀢𑀺 𑀦𑀺𑀚𑁆𑀚𑀝𑀁 𑀲𑀼𑀧𑀭𑀺𑀲𑀼𑀤𑁆𑀥𑀁, 𑀢𑀣𑀸 𑀢𑀣𑀸 𑀢𑀤𑀸𑀭𑀫𑁆𑀫𑀡𑀸 𑀅𑀭𑀽𑀧𑀥𑀫𑁆𑀫𑀸 𑀲𑀬𑀫𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀯𑀺𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀧𑀦𑀲𑁆𑀲 𑀅𑀭𑀽𑀧𑀥𑀫𑁆𑀫𑀸 𑀢𑀻𑀳𑀸𑀓𑀸𑀭𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀺 𑀨𑀲𑁆𑀲𑀯𑀲𑁂𑀦 𑀯𑀸 𑀯𑁂𑀤𑀦𑀸𑀯𑀲𑁂𑀦 𑀯𑀸 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸.

𑀓𑀣𑀁 ¶ ? 𑀏𑀓𑀲𑁆𑀲 𑀢𑀸𑀯 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀤𑁆𑀥𑀺𑀁 𑀨𑀲𑁆𑀲𑁂𑀦 𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀅𑀭𑀽𑀧𑀥𑀫𑁆𑀫𑀸 𑀨𑀲𑁆𑀲𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀓𑀲𑁆𑀲 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀢𑀤𑀸𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀓𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀅𑀧𑀭𑀲𑁆𑀲 ‘‘𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸…𑀧𑁂… 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺 𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀯𑀲𑁂𑀦 𑀅𑀭𑀽𑀧𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀓𑁂𑀲𑁂 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀥𑀸𑀢𑀼𑀓𑁄𑀝𑁆𑀞𑀸𑀲𑁂𑀲𑀼 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀲𑁂𑀲𑁂𑀲𑀼𑀧𑀺 𑀯𑀢𑁆𑀣𑀼 𑀘𑀓𑁆𑀔𑀸𑀤𑀻𑀲𑀼 𑀤𑀲𑀓𑁂𑀲𑀼 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀳𑀤𑀬𑀯𑀢𑁆𑀣𑀼 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀮𑀓𑁆𑀔𑀡𑀁 𑀘𑀓𑁆𑀔𑀽𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀤𑁆𑀯𑀸𑀭𑀯𑀲𑁂𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀺𑀦𑀸 ¶ 𑀨𑀲𑁆𑀲𑀸𑀤𑀺𑀯𑀲𑁂𑀦 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀅𑀭𑀽𑀧𑀥𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀫𑁆𑀫𑀡𑀁 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀯𑀸 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀯𑀺𑀜𑁆𑀜𑀸𑀡𑀜𑁆𑀘 𑀧𑀲𑁆𑀲𑀢𑀻’’𑀢𑀺.

𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀳𑀻𑀢𑀺𑀆𑀤𑀺 𑀓𑀸𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀫𑀼𑀤𑀬𑀪𑀸𑀯𑀤𑀲𑁆𑀲𑀦𑀁. 𑀓𑀫𑁆𑀫𑀸𑀭𑀕𑀕𑁆𑀕𑀭𑀻𑀢𑀺 𑀓𑀫𑁆𑀫𑀸𑀭𑀸𑀦𑀁 𑀉𑀓𑁆𑀓𑀸𑀬 𑀅𑀕𑁆𑀕𑀺𑀥𑀫𑀦𑀪𑀲𑁆𑀢𑀸. 𑀥𑀫𑀫𑀸𑀦𑀸𑀬𑀸𑀢𑀺 𑀥𑀽𑀫𑀸𑀬𑀦𑁆𑀢𑀺𑀬𑀸, 𑀯𑀸𑀢𑀁 𑀕𑀸𑀳𑀸𑀧𑁂𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀚𑁆𑀚𑀦𑁆𑀢𑀺 𑀢𑀤𑀦𑀼𑀭𑀽𑀧𑀁. 𑀏𑀯𑀫𑁂𑀯𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀸𑀭𑀕𑀕𑁆𑀕𑀭𑀻 𑀯𑀺𑀬 𑀓𑀭𑀚𑀓𑀸𑀬𑁄, 𑀯𑀸𑀬𑀸𑀫𑁄 𑀯𑀺𑀬 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀓𑀭𑀚𑀓𑀸𑀬𑀁 𑀧𑀦 𑀯𑀺𑀦𑀸 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀦𑀢𑁄 ‘‘𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀧𑀝𑀺𑀘𑁆𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸’’𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀲𑀸𑀢𑀺 𑀦𑀸𑀫𑀭𑀽𑀧𑀲𑁆𑀲. 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀺𑀓𑀁 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀢𑀺 𑀯𑀻𑀫𑀁𑀲𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀓𑀗𑁆𑀔𑀁 𑀯𑀺𑀢𑀭𑀢𑀻𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑁄𑀴𑀲𑀯𑀢𑁆𑀣𑀼𑀓𑀁 𑀯𑀺𑀘𑀺𑀓𑀺𑀘𑁆𑀙𑀁 𑀅𑀢𑀺𑀓𑁆𑀓𑀫𑀢𑀺 𑀧𑀚𑀳𑀢𑀺. ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀓𑀮𑀸𑀧𑀲𑀫𑁆𑀫𑀲𑀦𑀁. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀭𑀺𑀬𑀸𑀧𑀦𑁆𑀦𑀸𑀬 ¶ 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀦𑁆𑀦𑁂. 𑀑𑀪𑀸𑀲𑀸𑀤𑀬𑁄𑀢𑀺 𑀑𑀪𑀸𑀲𑁄 𑀜𑀸𑀡𑀁 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀼𑀔𑀁 𑀅𑀥𑀺𑀫𑁄𑀓𑁆𑀔𑁄 𑀧𑀕𑁆𑀕𑀳𑁄 𑀉𑀧𑁂𑀓𑁆𑀔𑀸 𑀉𑀧𑀝𑁆𑀞𑀸𑀦𑀁 𑀦𑀺𑀓𑀦𑁆𑀢𑀻𑀢𑀺 𑀇𑀫𑁂 𑀑𑀪𑀸𑀲𑀸𑀤𑀬𑁄 𑀤𑀲.

𑀢𑀢𑁆𑀣 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁩; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁬) 𑀑𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑁄𑀪𑀸𑀲𑁄, 𑀲𑁄 𑀘 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁 𑀲𑀦𑁆𑀢𑀢𑀺𑀧𑀢𑀺𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀜𑁆𑀘 𑀧𑀪𑀲𑁆𑀲𑀭𑀭𑀽𑀧𑀁. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁 𑀬𑁄𑀕𑀺𑀦𑁄 𑀲𑀭𑀻𑀭𑀝𑁆𑀞𑀫𑁂𑀯 𑀧𑀪𑀲𑁆𑀲𑀭𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀲𑀭𑀻𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀩𑀳𑀺 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀇𑀢𑀭𑀁 𑀲𑀭𑀻𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀜𑀸𑀡𑀸𑀦𑀼𑀪𑀸𑀯𑀸𑀦𑀼𑀭𑀽𑀧𑀁 𑀲𑀫𑀦𑁆𑀢𑀢𑁄 𑀧𑀢𑁆𑀣𑀭𑀢𑀺, 𑀢𑀁 𑀢𑀲𑁆𑀲𑁂𑀯 𑀧𑀜𑁆𑀜𑀸𑀬𑀢𑀺. 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀭𑀽𑀧𑀕𑀢𑀫𑁆𑀧𑀺 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀢𑀺, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑁄 𑀯𑀺𑀬 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀲𑁄 𑀔𑁄 𑀧𑀦𑀸𑀬𑀁 𑀑𑀪𑀸𑀲𑁄 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀑𑀪𑀸𑀲𑁂𑀦𑁆𑀢𑁄 ¶ 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲𑀘𑀺 𑀅𑀦𑁆𑀢𑁄𑀕𑀩𑁆𑀪𑀁, 𑀓𑀲𑁆𑀲𑀘𑀺 𑀩𑀳𑀺𑀕𑀩𑁆𑀪𑀫𑁆𑀧𑀺, 𑀓𑀲𑁆𑀲𑀘𑀺 𑀲𑀓𑀮𑀯𑀺𑀳𑀸𑀭𑀁, 𑀕𑀸𑀯𑀼𑀢𑀁, 𑀅𑀟𑁆𑀠𑀬𑁄𑀚𑀦𑀁, 𑀬𑁄𑀚𑀦𑀁, 𑀤𑁆𑀯𑀺𑀬𑁄𑀚𑀦𑀁, 𑀢𑀺𑀬𑁄𑀚𑀦𑀁, 𑀓𑀲𑁆𑀲𑀘𑀺 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀸𑀮𑁄𑀓𑀁 𑀓𑀼𑀭𑀼𑀫𑀸𑀦𑁄. 𑀪𑀕𑀯𑀢𑁄 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀪𑀸𑀲𑁂𑀦𑁆𑀢𑁄 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀁 𑀧𑀦 𑀉𑀧𑁆𑀧𑀦𑁆𑀦𑁂 𑀬𑁄𑀕𑀸𑀯𑀘𑀭𑁄 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄, 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄𑀲𑁆𑀫𑀺 𑀨𑀮𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺, 𑀅𑀨𑀮𑀫𑁂𑀯 𑀘 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀅𑀫𑀕𑁆𑀕𑀁 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀁 𑀯𑀸 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀑𑀪𑀸𑀲𑀫𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺.

𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀲𑁆𑀲 𑀓𑀺𑀭 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀢𑀼𑀮𑀬𑀦𑁆𑀢𑀲𑁆𑀲 𑀢𑀻𑀭𑀬𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯 𑀅𑀯𑀺𑀳𑀢𑀯𑁂𑀕𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀅𑀢𑀺𑀯𑀺𑀲𑀤𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺.

𑀧𑀻𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀻𑀢𑀺. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺 𑀔𑀡𑀺𑀓𑀸 𑀧𑀻𑀢𑀺 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺 𑀉𑀩𑁆𑀩𑁂𑀕𑀸 𑀧𑀻𑀢𑀺 𑀨𑀭𑀡𑀸 𑀧𑀻𑀢𑀻𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺.

𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀲𑁆𑀲𑀤𑁆𑀥𑀺. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀁 𑀦𑁂𑀯 𑀤𑀭𑀣𑁄, 𑀦 𑀕𑀸𑀭𑀯𑀁, 𑀦 𑀓𑀓𑁆𑀔𑀴𑀢𑀸, 𑀦 𑀅𑀓𑀫𑁆𑀫𑀜𑁆𑀜𑀢𑀸, 𑀦 𑀕𑁂𑀮𑀜𑁆𑀜𑀁, 𑀦 𑀯𑀗𑁆𑀓𑀢𑀸 𑀳𑁄𑀢𑀺, 𑀅𑀣 𑀔𑁄 𑀧𑀦𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀺 𑀧𑀲𑁆𑀲𑀤𑁆𑀥𑀸𑀦𑀺 𑀮𑀳𑀽𑀦𑀺 𑀫𑀼𑀤𑀽𑀦𑀺 𑀓𑀫𑁆𑀫𑀜𑁆𑀜𑀸𑀦𑀺 ¶ 𑀲𑀼𑀯𑀺𑀲𑀤𑀸𑀦𑀺 𑀉𑀚𑀼𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀲𑁄 𑀇𑀫𑁂𑀳𑀺 𑀧𑀲𑁆𑀲𑀤𑁆𑀥𑀸𑀤𑀻𑀳𑀺 𑀅𑀦𑀼𑀕𑁆𑀕𑀳𑀺𑀢𑀓𑀸𑀬𑀘𑀺𑀢𑁆𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀫𑀸𑀦𑀼𑀲𑀺𑀁 𑀦𑀸𑀫 𑀭𑀢𑀺𑀁 𑀅𑀦𑀼𑀪𑀯𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁩-𑁩𑁭𑁪);

𑀏𑀯𑀫𑀲𑁆𑀲 𑀇𑀫𑀁 𑀅𑀫𑀸𑀦𑀼𑀲𑀺𑀁 𑀭𑀢𑀺𑀁 𑀲𑀸𑀥𑀬𑀫𑀸𑀦𑀸 𑀮𑀳𑀼𑀢𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺.

𑀲𑀼𑀔𑀦𑁆𑀢𑀺 ¶ 𑀯𑀺𑀧𑀲𑁆𑀲𑀦𑀸𑀲𑀼𑀔𑀁. 𑀢𑀲𑁆𑀲 𑀓𑀺𑀭 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀓𑀮𑀲𑀭𑀻𑀭𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀅𑀢𑀺𑀧𑀡𑀻𑀢𑀁 𑀲𑀼𑀔𑀫𑀼𑀧𑁆𑀧𑀚𑁆𑀚𑀢𑀺.

𑀅𑀥𑀺𑀫𑁄𑀓𑁆𑀔𑁄𑀢𑀺 𑀲𑀤𑁆𑀥𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀬𑁂𑀯 𑀳𑀺𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀢𑀺𑀲𑀬𑀧𑁆𑀧𑀲𑀸𑀤𑀪𑀽𑀢𑀸 𑀩𑀮𑀯𑀢𑀻 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀺.

𑀧𑀕𑁆𑀕𑀳𑁄𑀢𑀺 𑀯𑀻𑀭𑀺𑀬𑀁. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀳𑀺𑀲𑁆𑀲 𑀅𑀲𑀺𑀣𑀺𑀮𑀫𑀦𑀘𑁆𑀘𑀸𑀭𑀤𑁆𑀥𑀁 𑀲𑀼𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺.

𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀬𑁂𑀯 𑀳𑀺𑀲𑁆𑀲 𑀲𑀽𑀧𑀝𑁆𑀞𑀺𑀢𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀦𑀺𑀔𑀸𑀢𑀸 𑀅𑀘𑀮𑀸 𑀧𑀩𑁆𑀩𑀢𑀭𑀸𑀚𑀲𑀤𑀺𑀲𑀸 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀬𑀁 𑀬𑀁 𑀞𑀸𑀦𑀁 𑀆𑀯𑀚𑁆𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺 𑀫𑀦𑀲𑀺 𑀓𑀭𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀢𑀁 𑀞𑀸𑀦𑀫𑀲𑁆𑀲 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀭𑀮𑁄𑀓𑁄 𑀯𑀺𑀬 𑀲𑀢𑀺𑀬𑀸 𑀉𑀧𑀝𑁆𑀞𑀸𑀢𑀺.

𑀉𑀧𑁂𑀓𑁆𑀔𑀸𑀢𑀺 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀘𑁂𑀯 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸 𑀘. 𑀢𑀲𑁆𑀫𑀺𑀜𑁆𑀳𑀺𑀲𑁆𑀲 𑀲𑀫𑀬𑁂 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀪𑀽𑀢𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸𑀧𑀺. 𑀲𑀸 𑀳𑀺𑀲𑁆𑀲 𑀢𑀁 𑀢𑀁 𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯 𑀧𑀢𑁆𑀢𑀧𑀼𑀝𑁂 𑀧𑀓𑁆𑀔𑀦𑁆𑀤𑀢𑀢𑁆𑀢𑀦𑀸𑀭𑀸𑀘𑁄 𑀯𑀺𑀬 𑀘 𑀲𑀽𑀭𑀸 𑀢𑀺𑀔𑀺𑀡𑀸 𑀳𑀼𑀢𑁆𑀯𑀸 𑀯𑀳𑀢𑀺.

𑀦𑀺𑀓𑀦𑁆𑀢𑀻𑀢𑀺 ¶ 𑀯𑀺𑀧𑀲𑁆𑀲𑀦𑀸𑀦𑀺𑀓𑀦𑁆𑀢𑀺. 𑀏𑀯𑀁 𑀑𑀪𑀸𑀲𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸𑀬 𑀳𑀺𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀲𑀼𑀔𑀼𑀫𑀸 𑀲𑀦𑁆𑀢𑀸𑀓𑀸𑀭𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀬𑀸 ‘‘𑀓𑀺𑀮𑁂𑀲𑁄’’𑀢𑀺 𑀧𑀭𑀺𑀕𑁆𑀕𑀳𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀢𑀺.

𑀬𑀣𑀸 𑀘 𑀑𑀪𑀸𑀲𑁂, 𑀏𑀯𑀁 𑀏𑀢𑁂𑀲𑀼𑀧𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀬𑁄𑀕𑀸𑀯𑀘𑀭𑁄 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀜𑀸𑀡𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁, 𑀏𑀯𑀭𑀽𑀧𑀸 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀲𑀼𑀔𑀁, 𑀅𑀥𑀺𑀫𑁄𑀓𑁆𑀔𑁄, 𑀧𑀕𑁆𑀕𑀳𑁄, 𑀉𑀧𑀝𑁆𑀞𑀸𑀦𑀁, 𑀉𑀧𑁂𑀓𑁆𑀔𑀸, 𑀦𑀺𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀅𑀤𑁆𑀥𑀸 𑀫𑀕𑁆𑀕𑀧𑁆𑀧𑀢𑁆𑀢𑁄𑀲𑁆𑀫𑀺 𑀨𑀮𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀫𑁂𑀯 𑀘 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀅𑀫𑀕𑁆𑀕𑀁 ‘‘𑀫𑀕𑁆𑀕𑁄’’𑀢𑀺 𑀅𑀨𑀮𑀁 ‘‘𑀨𑀮’’𑀦𑁆𑀢𑀺 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸𑀯𑀻𑀣𑀺 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀓𑀦𑁆𑀢𑀺𑀫𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺.

𑀏𑀢𑁆𑀣 𑀘 𑀑𑀪𑀸𑀲𑀸𑀤𑀬𑁄 𑀉𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 ‘‘𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀸, 𑀦 𑀅𑀓𑀼𑀲𑀮𑀢𑁆𑀢𑀸, 𑀦𑀺𑀓𑀦𑁆𑀢𑀺 𑀧𑀦 𑀉𑀧𑀓𑁆𑀓𑀺𑀮𑁂𑀲𑁄 𑀘𑁂𑀯 𑀉𑀧𑀓𑁆𑀓𑀺𑀮𑁂𑀲𑀯𑀢𑁆𑀣𑀼 𑀘 ¶ . 𑀯𑀢𑁆𑀣𑀼𑀯𑀲𑁂𑀦𑁂𑀯 𑀘𑁂𑀢𑁂 𑀤𑀲, 𑀕𑀸𑀳𑀯𑀲𑁂𑀦 𑀧𑀦 𑀲𑀫𑀢𑀺𑀁𑀲 𑀳𑁄𑀦𑁆𑀢𑀺. 𑀓𑀣𑀁? ‘‘𑀫𑀫 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀡𑁆𑀳𑀢𑁄 𑀳𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀳𑁄𑀢𑀺, ‘‘𑀫𑀦𑀸𑀧𑁄 𑀯𑀢 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀕𑀡𑁆𑀳𑀢𑁄 𑀫𑀸𑀦𑀕𑁆𑀕𑀸𑀳𑁄, 𑀑𑀪𑀸𑀲𑀁 𑀅𑀲𑁆𑀲𑀸𑀤𑀬𑀢𑁄 𑀢𑀡𑁆𑀳𑀸𑀕𑀸𑀳𑁄. 𑀇𑀢𑀺 𑀑𑀪𑀸𑀲𑁂 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 𑀢𑀬𑁄 𑀕𑀸𑀳𑀸. 𑀢𑀣𑀸 𑀲𑁂𑀲𑁂𑀲𑀼𑀧𑀻𑀢𑀺 𑀏𑀯𑀁 𑀕𑀸𑀳𑀯𑀲𑁂𑀦 𑀲𑀫𑀢𑀺𑀁𑀲 𑀉𑀧𑀓𑁆𑀓𑀺𑀮𑁂𑀲𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀲𑁂𑀦 𑀅𑀓𑀼𑀲𑀮𑁄 𑀅𑀩𑁆𑀬𑀢𑁆𑀢𑁄 𑀬𑁄𑀕𑀸𑀯𑀘𑀭𑁄 𑀑𑀪𑀸𑀲𑀸𑀤𑀻𑀲𑀼 𑀓𑀫𑁆𑀧𑀢𑀺 𑀯𑀺𑀓𑁆𑀔𑀺𑀧𑀢𑀺, 𑀑𑀪𑀸𑀲𑀸𑀤𑀻𑀲𑀼 𑀏𑀓𑁂𑀓𑀁 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀑𑀪𑀸𑀲𑁂 𑀘𑁂𑀯 𑀜𑀸𑀡𑁂 𑀘, 𑀧𑀻𑀢𑀺𑀬𑀸 𑀘 𑀯𑀺𑀓𑀫𑁆𑀧𑀢𑀺;

𑀧𑀲𑁆𑀲𑀤𑁆𑀥𑀺𑀬𑀸 𑀲𑀼𑀔𑁂 𑀘𑁂𑀯, 𑀬𑁂𑀳𑀺 𑀘𑀺𑀢𑁆𑀢𑀁 𑀧𑀯𑁂𑀥𑀢𑀺.

‘‘𑀅𑀥𑀺𑀫𑁄𑀓𑁆𑀔𑁂 𑀘 𑀧𑀕𑁆𑀕𑀸𑀳𑁂, 𑀉𑀧𑀝𑁆𑀞𑀸𑀦𑁂 𑀘 𑀓𑀫𑁆𑀧𑀢𑀺;

𑀉𑀧𑁂𑀓𑁆𑀔𑀸𑀯𑀚𑁆𑀚𑀦𑀸𑀬 𑀘𑁂𑀯, 𑀉𑀧𑁂𑀓𑁆𑀔𑀸𑀬 𑀘 𑀦𑀺𑀓𑀦𑁆𑀢𑀺𑀬𑀸’’𑀢𑀺. (𑀧𑀝𑀺. 𑀫. 𑁨.𑁭)

𑀓𑀼𑀲𑀮𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀬𑁄𑀕𑀸𑀯𑀘𑀭𑁄 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀅𑀬𑀁 𑀔𑁄 𑀫𑁂 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀔𑁄 𑀧𑀦𑀸𑀬𑀁 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄’’𑀢𑀺 𑀇𑀢𑀺 𑀯𑀸 𑀢𑀁 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀉𑀧𑀧𑀭𑀺𑀓𑁆𑀔𑀢𑀺. 𑀅𑀣 𑀯𑀸 𑀧𑀦𑀲𑁆𑀲 ¶ 𑀏𑀯𑀁 𑀳𑁄𑀢𑀺 𑁋 𑀲𑀘𑁂 𑀑𑀪𑀸𑀲𑁄 𑀅𑀢𑁆𑀢𑀸 𑀪𑀯𑁂𑀬𑁆𑀬, 𑀅𑀢𑁆𑀢𑀸𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑁂𑀬𑁆𑀬, 𑀅𑀦𑀢𑁆𑀢𑀸𑀯 𑀧𑀦𑀸𑀬𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑀺𑀢𑁄. 𑀢𑀲𑁆𑀫𑀸 𑀲𑁄 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑁄, 𑀉𑀧𑁆𑀧𑀸𑀤𑀯𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑁄𑀢𑀺 𑀉𑀧𑀧𑀭𑀺𑀓𑁆𑀔𑀢𑀺. 𑀬𑀣𑀸 𑀘 𑀑𑀪𑀸𑀲𑁂, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑁄 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀑𑀪𑀸𑀲𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀜𑀸𑀡𑀁…𑀧𑁂… 𑀦𑀺𑀓𑀦𑁆𑀢𑀺𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀑𑀪𑀸𑀲𑀸𑀤𑀻𑀲𑀼 𑀦 𑀓𑀫𑁆𑀧𑀢𑀺 𑀦 𑀯𑁂𑀥𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀇𑀫𑀸𑀦𑀺 𑀤𑀲 𑀞𑀸𑀦𑀸𑀦𑀺, 𑀧𑀜𑁆𑀜𑀸 𑀬𑀲𑁆𑀲 𑀧𑀭𑀺𑀘𑁆𑀘𑀺𑀢𑀸;

𑀥𑀫𑁆𑀫𑀼𑀤𑁆𑀥𑀘𑁆𑀘𑀓𑀼𑀲𑀮𑁄 𑀳𑁄𑀢𑀺, 𑀦 𑀘 𑀯𑀺𑀓𑁆𑀔𑁂𑀧 𑀕𑀘𑁆𑀙𑀢𑀻’’𑀢𑀺. (𑀧𑀝𑀺. 𑀫. 𑁨.𑁭);

𑀲𑁄 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀅𑀕𑀘𑁆𑀙𑀦𑁆𑀢𑁄 𑀢𑀁 𑀲𑀫𑀢𑀺𑀁𑀲𑀯𑀺𑀥𑀁 𑀉𑀧𑀓𑁆𑀓𑀺𑀮𑁂𑀲𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 ‘‘𑀑𑀪𑀸𑀲𑀸𑀤𑀬𑁄 𑀥𑀫𑁆𑀫𑀸 𑀦 𑀫𑀕𑁆𑀕𑁄, 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀦 𑀯𑀻𑀣𑀺𑀧𑁆𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 ¶ 𑀫𑀕𑁆𑀕𑁄’’𑀢𑀺 𑀅𑀫𑀕𑁆𑀕𑀁 𑀫𑀕𑁆𑀕𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀬𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀑𑀪𑀸𑀲𑀸𑀤𑀬𑁄 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂 𑀧𑀳𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀧𑀝𑀺𑀧𑀤𑀸𑀜𑀸𑀡𑀁 𑀫𑀕𑁆𑀕𑁄𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸’’𑀢𑀺. 𑀉𑀤𑀬𑀁 𑀧𑀳𑀸𑀬𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀕𑀳𑀺𑀢𑀁 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑁂𑀲𑀁 𑀪𑀗𑁆𑀕𑀲𑁆𑀲𑁂𑀯 𑀅𑀦𑀼𑀧𑀲𑁆𑀲𑀦𑀢𑁄 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀢𑁆𑀯𑀸 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀼𑀮𑁄𑀫𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑁂𑀦 𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀅𑀭𑀺𑀬𑁄 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀬𑀣𑀸𑀓𑁆𑀓𑀫𑀁 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑁂 𑀧𑀸𑀧𑀼𑀡𑀺𑀢𑁆𑀯𑀸’’𑀢𑀺. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀲𑁆𑀲 𑀧𑀪𑁂𑀤𑁂𑀦 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀲𑁆𑀲. 𑀅𑀭𑀳𑀢𑁄 𑀳𑀺 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀪𑀸𑀯𑁂𑀦 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺. 𑀅𑀲𑁆𑀲𑀸𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲.

𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀞𑀫𑀘𑀢𑀼𑀓𑁆𑀓𑀯𑀲𑁂𑀦 𑀅𑀥𑀺𑀕𑀢𑀚𑁆𑀛𑀸𑀦𑀲𑁆𑀲 𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀢𑀺𑀡𑁆𑀡𑀁 𑀘𑀢𑀼𑀓𑁆𑀓𑀸𑀦𑀁. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀻𑀢𑀺𑀬𑀸 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀯𑁂𑀤𑀦𑀲𑀻𑀮𑁄, 𑀢𑀲𑁆𑀲𑀸 𑀯𑀸 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀯𑁂𑀤𑁄 𑀏𑀢𑀲𑁆𑀲 𑀅𑀢𑁆𑀣𑀺, 𑀢𑀁 𑀯𑀸 𑀧𑀝𑀺 𑀧𑀝𑀺 𑀲𑀫𑁆𑀫𑀤𑁂𑀯 𑀯𑁂𑀤𑀬𑀫𑀸𑀦𑁄. 𑀢𑀢𑁆𑀣 𑀓𑀸𑀫𑀁 𑀲𑀁𑀯𑁂𑀤𑀦𑀕𑁆𑀕𑀳𑀡𑁂𑀦𑁂𑀯 𑀧𑀻𑀢𑀺𑀬𑀸 𑀲𑀓𑁆𑀓𑀘𑁆𑀘𑀁 𑀯𑀺𑀤𑀺𑀢𑀪𑀸𑀯𑁄 𑀩𑁄𑀥𑀺𑀢𑁄 𑀳𑁄𑀢𑀺, 𑀬𑁂𑀳𑀺 𑀧𑀦 𑀧𑀓𑀸𑀭𑁂𑀳𑀺 𑀢𑀲𑁆𑀲𑀸 𑀲𑀁𑀯𑁂𑀤𑀦𑀁 𑀇𑀘𑁆𑀙𑀺𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺-𑀲𑀤𑁆𑀤𑀕𑁆𑀕𑀳𑀡𑀁 ‘‘𑀧𑀝𑀺 𑀧𑀝𑀺 𑀲𑀁𑀯𑁂𑀤𑀻𑀢𑀺 𑀧𑀝𑀺𑀲𑀁𑀯𑁂𑀤𑀻’’𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺.

𑀢𑀢𑁆𑀣 ¶ 𑀓𑀣𑀁 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀧𑀻𑀢𑀺𑀲𑀳𑀕𑀢𑀸𑀦𑀺 𑀤𑁆𑀯𑁂 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀢𑀺. 𑀢𑀲𑁆𑀲𑀸𑀢𑀺 𑀢𑁂𑀦. ‘‘𑀧𑀝𑀺𑀲𑀁𑀯𑀺𑀤𑀺𑀢𑀸’’𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀼𑀅𑀢𑁆𑀣𑁂 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂𑀢𑀺 𑀲𑀫𑀸𑀧𑀦𑁆𑀦𑀓𑁆𑀔𑀡𑁂. 𑀛𑀸𑀦𑀧𑀝𑀺𑀮𑀸𑀪𑁂𑀦𑀸𑀢𑀺 𑀛𑀸𑀦𑁂𑀦 𑀲𑀫𑀗𑁆𑀕𑀺𑀪𑀸𑀯𑁂𑀦. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀫𑀼𑀔𑁂𑀦, 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀦𑀸𑀫 𑀲𑀧𑁆𑀧𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑁂𑀦 𑀢𑀲𑁆𑀲 𑀆𑀲𑀬𑁂 ¶ 𑀧𑀝𑀺𑀲𑀁𑀯𑀺𑀤𑀺𑀢𑁂 𑀲𑁄𑀧𑀺 𑀧𑀝𑀺𑀲𑀁𑀯𑀺𑀤𑀺𑀢𑁄 𑀏𑀯 𑀳𑁄𑀢𑀺 𑀫𑀦𑁆𑀢𑀸𑀕𑀤𑀩𑀮𑁂𑀦 𑀢𑀲𑁆𑀲 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸, 𑀏𑀯𑀁 𑀧𑀻𑀢𑀺𑀬𑀸 𑀆𑀲𑀬𑀪𑀽𑀢𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀁𑀯𑀺𑀤𑀺𑀢𑁂 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀏𑀯 𑀳𑁄𑀢𑀺 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀢𑀲𑁆𑀲𑀸 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸𑀢𑀺.

𑀓𑀣𑀁 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀺𑀓𑁆𑀔𑀯𑀺𑀲𑀤𑀧𑁆𑀧𑀯𑀢𑁆𑀢𑀸𑀬 𑀯𑀺𑀲𑀬𑀢𑁄 𑀤𑀲𑁆𑀲𑀦𑀓𑁆𑀔𑀡𑁂. 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀧𑀻𑀢𑀺𑀬𑀸 𑀲𑀮𑀓𑁆𑀔𑀡𑀲𑁆𑀲 𑀲𑀸𑀫𑀜𑁆𑀜𑀮𑀓𑁆𑀔𑀡𑀲𑁆𑀲 𑀘 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀬𑀜𑁆𑀳𑀺 𑀬𑀲𑁆𑀲 𑀯𑀺𑀲𑁂𑀲𑀢𑁄 𑀲𑀸𑀫𑀜𑁆𑀜𑀢𑁄 𑀘 𑀮𑀓𑁆𑀔𑀡𑀁, 𑀢𑀲𑁆𑀫𑀺𑀁 𑀯𑀺𑀤𑀺𑀢𑁂 𑀲𑁄 𑀬𑀸𑀣𑀸𑀯𑀢𑁄 𑀯𑀺𑀤𑀺𑀢𑁄 𑀏𑀯 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’’𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀦 𑀲𑀢𑁄𑀓𑀸𑀭𑀺𑀢𑀸𑀤𑀲𑁆𑀲𑀦𑀯𑀲𑁂𑀦 𑀧𑀸𑀴𑀺 𑀆𑀕𑀢𑀸, 𑀇𑀥 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀸𑀯𑀲𑁂𑀦. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀸 𑀘 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀸 𑀏𑀯. 𑀅𑀧𑀺𑀘 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀤𑀻𑀖𑀲𑁆𑀲 𑀅𑀲𑁆𑀲𑀸𑀲𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀯𑀲𑁂𑀦 𑀧𑀚𑀸𑀦𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄𑀢𑀺 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀁 𑀅𑀯𑀺𑀓𑁆𑀔𑁂𑀧𑁄𑀢𑀺 𑀮𑀤𑁆𑀥𑀦𑀸𑀫𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀧𑀚𑀸𑀦𑀢𑁄. 𑀬𑀣𑁂𑀯 𑀳𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀧𑀝𑀺𑀲𑀁𑀯𑀺𑀤𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀻𑀢𑀺 𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀢𑀲𑁆𑀲 𑀆𑀭𑀫𑁆𑀫𑀡𑁂 𑀉𑀧𑀝𑁆𑀞𑀺𑀢𑀸 𑀆𑀭𑀫𑁆𑀫𑀡𑀫𑀼𑀔𑁂𑀦 𑀛𑀸𑀦𑁂𑀧𑀺 𑀉𑀧𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸𑀢𑀺 𑀏𑀯𑀁 𑀉𑀧𑀝𑁆𑀞𑀺𑀢𑀸𑀬 𑀢𑀸𑀬 𑀲𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑁂𑀦 𑀢𑁂𑀦 𑀜𑀸𑀡𑁂𑀦 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀸 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀤𑀻𑀖𑀁𑀧𑀲𑁆𑀲𑀸𑀲𑀯𑀲𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀞𑀫𑀘𑀢𑀼𑀓𑁆𑀓𑀯𑀲𑁂𑀦 𑀤𑀲𑁆𑀲𑀺𑀢𑀁 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀯𑀺𑀪𑀸𑀕𑀲𑁄 ¶ 𑀤𑀲𑁆𑀲𑁂𑀢𑀼𑀁 ‘‘𑀆𑀯𑀚𑁆𑀚𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀯𑀚𑁆𑀚𑀢𑁄𑀢𑀺 𑀛𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲. 𑀲𑀸 𑀧𑀻𑀢𑀻𑀢𑀺 𑀲𑀸 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀧𑀻𑀢𑀺. 𑀚𑀸𑀦𑀢𑁄𑀢𑀺 𑀲𑀫𑀸𑀧𑀦𑁆𑀦𑀓𑁆𑀔𑀡𑁂 𑀆𑀭𑀫𑁆𑀫𑀡𑀫𑀼𑀔𑁂𑀦 𑀚𑀸𑀦𑀢𑁄. 𑀢𑀲𑁆𑀲 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀲𑁆𑀲𑀢𑁄𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 ¶ 𑀜𑀸𑀡𑁂𑀦 𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀲𑁆𑀲𑀦𑁆𑀢𑀲𑁆𑀲. 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀛𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀢𑁄𑀢𑀺 ‘‘𑀏𑀢𑁆𑀢𑀓𑀁 𑀯𑁂𑀮𑀁 𑀛𑀸𑀦𑀲𑀫𑀗𑁆𑀕𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀛𑀸𑀦𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲. 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀯𑀲𑀻𑀪𑀸𑀯𑀸𑀦𑀁 𑀯𑀲𑁂𑀦 𑀛𑀸𑀦𑀲𑁆𑀲 𑀧𑀚𑀸𑀦𑀦𑀫𑀼𑀔𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀬𑀸 𑀧𑀝𑀺𑀲𑀁𑀯𑁂𑀤𑀦𑀸 𑀤𑀲𑁆𑀲𑀺𑀢𑀸.

𑀇𑀤𑀸𑀦𑀺 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀛𑀸𑀦𑀁 𑀯𑀺𑀧𑀲𑁆𑀲𑀦𑀸 𑀘 𑀲𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀜𑁆𑀘 𑀲𑀤𑁆𑀥𑀸𑀤𑀻𑀦𑀁 𑀯𑀲𑁂𑀦 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀥𑀺𑀫𑀼𑀘𑁆𑀘𑀢𑁄𑀢𑀺 𑀲𑀤𑁆𑀤𑀳𑀦𑁆𑀢𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀁. 𑀅𑀪𑀺𑀚𑀸𑀦𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀢𑁄. 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀧𑀭𑀺𑀚𑀸𑀦𑀢𑁄. 𑀧𑀳𑀸𑀢𑀩𑁆𑀩𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀧𑀚𑀳𑀢𑁄. 𑀪𑀸𑀯𑀬𑀢𑁄 𑀲𑀘𑁆𑀙𑀺𑀓𑀭𑁄𑀢𑁄 𑀪𑀸𑀯𑁂𑀢𑀩𑁆𑀩𑀁 𑀫𑀕𑁆𑀕𑀲𑀘𑁆𑀘𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀲𑀘𑁆𑀘𑀁. 𑀓𑁂𑀘𑀺 𑀧𑀦𑁂𑀢𑁆𑀣 𑀧𑀻𑀢𑀺𑀬𑀸 𑀏𑀯 𑀯𑀲𑁂𑀦 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀻𑀦𑀺 𑀉𑀤𑁆𑀥𑀭𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀛𑀸𑀦𑀸𑀤𑀺𑀲𑀫𑀼𑀤𑀸𑀬𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁄 𑀧𑀻𑀢𑀺𑀬𑀸 𑀦𑀺𑀤𑁆𑀥𑀸𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀏𑀢𑁆𑀣 𑀘 ‘‘𑀤𑀻𑀖𑀁𑀅𑀲𑁆𑀲𑀸𑀲𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀘𑀢𑀼𑀓𑁆𑀓𑀯𑀲𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀯𑀼𑀢𑁆𑀢𑀁, 𑀢𑀣𑀸 ‘‘𑀆𑀯𑀚𑁆𑀚𑀢𑁄’’𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺. ‘‘𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀢𑁄’’𑀢𑀺𑀆𑀤𑀻𑀳𑀺 𑀧𑀦 𑀅𑀲𑀫𑁆𑀫𑁄𑀳𑀢𑁄, ‘‘𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑁄’’𑀢𑀺𑀆𑀤𑀻𑀳𑀺 𑀉𑀪𑀬𑀣𑀸𑀧𑀺 𑀲𑀗𑁆𑀔𑁂𑀧𑀢𑁄 𑀲𑀫𑀣𑀯𑀲𑁂𑀦 𑀆𑀭𑀫𑁆𑀫𑀡𑀢𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀬𑀁 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀕𑀳𑀺𑀢𑀸, 𑀦 𑀲𑀭𑀽𑀧𑀢𑁄 𑀏𑀯𑀸𑀢𑀺? 𑀪𑀽𑀫𑀺𑀯𑀺𑀪𑀸𑀕𑀸𑀤𑀺𑀯𑀲𑁂𑀦 𑀯𑁂𑀤𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀥𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀼𑀁. 𑀅𑀧𑀺𑀘 𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀧𑀻𑀢𑀺𑀬𑀸 𑀑𑀴𑀸𑀭𑀺𑀓𑀢𑁆𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀼𑀔𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀻𑀢𑀺𑀲𑀻𑀲𑁂𑀦 𑀤𑀲𑁆𑀲𑁂𑀢𑀺.

𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀻𑀢𑀺 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀧𑀤𑀸𑀦𑀺 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻-𑀧𑀤𑁂 𑀆𑀕𑀢𑀦𑀬𑁂𑀦𑁂𑀯 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀓𑁆𑀓𑀸 𑀳𑀺 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀼𑀔𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀢𑁄’’𑀢𑀺𑀆𑀤𑀺𑀦𑀸 𑀧𑀻𑀢𑀺𑀝𑁆𑀞𑀸𑀦𑁂 𑀲𑀼𑀔𑀸𑀤𑀺𑀧𑀤𑀸𑀦𑀺 ¶ 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀼𑀔𑀲𑀳𑀕𑀢𑀸𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀯𑀸 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀁 𑀯𑀺𑀜𑁆𑀜𑀸𑀢𑀼𑀁. 𑀢𑁂𑀦𑀸𑀳 ‘‘𑀢𑀺𑀡𑁆𑀡𑀁 𑀛𑀸𑀦𑀸𑀦𑀁 𑀯𑀲𑁂𑀦𑀸’’𑀢𑀺𑀆𑀤𑀺. 𑀯𑁂𑀤𑀦𑀸𑀤𑀬𑁄𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀲𑀜𑁆𑀜𑀸 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀤𑁆𑀯𑁂 𑀔𑀦𑁆𑀥𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑀲𑀫𑁆𑀫𑀲𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑀼𑀔𑀦𑁆𑀢𑀺 𑀤𑁆𑀯𑁂 𑀲𑀼𑀔𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀫𑀣𑁂 𑀓𑀸𑀬𑀺𑀓𑀲𑀼𑀔𑀸𑀪𑀸𑀯𑀢𑁄. 𑀲𑁄𑀢𑀺 𑀲𑁄 𑀧𑀲𑁆𑀲𑀫𑁆𑀪𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄 𑀦𑀺𑀭𑁄𑀥𑁄. ‘‘𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀕𑁆𑀕𑀳𑀺𑀢𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀓𑀸𑀬𑀲𑀗𑁆𑀔𑀸𑀭𑁂 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀬𑀲𑀗𑁆𑀔𑀸𑀭𑀯𑀲𑁂𑀦 𑀆𑀕𑀢𑁄, 𑀇𑀥 𑀘𑀺𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀏𑀯𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀅𑀢𑀺𑀤𑁂𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀬𑀤𑀜𑁆𑀜𑀁 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀻𑀢𑀺𑀧𑀤𑁂𑀢𑀺 ‘‘𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻’’𑀢𑀺𑀆𑀤𑀺𑀦𑀸 𑀤𑁂𑀲𑀺𑀢𑀓𑁄𑀝𑁆𑀞𑀸𑀲𑁂. 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀧𑀻𑀢𑀺𑀅𑀧𑀤𑁂𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀦 𑀧𑀻𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀤𑁆𑀯𑀻𑀲𑀼 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑀽𑀢𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭’’𑀦𑁆𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑁂𑀦 𑀧𑀝𑀺𑀩𑀤𑁆𑀥𑀸𑀢𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸. 𑀢𑀢𑁄 𑀏𑀯 𑀓𑀸𑀫𑀁 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸, 𑀲𑀜𑁆𑀜𑀸𑀯𑁂𑀤𑀦𑀸𑀤𑀬𑁄, 𑀇𑀥 𑀧𑀦 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀲𑀜𑁆𑀜𑀸𑀯𑁂𑀤𑀦𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸’’𑀢𑀺.

𑀘𑀺𑀢𑁆𑀢𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘. 𑀓𑀣𑀁 𑀆𑀭𑀫𑁆𑀫𑀡𑀢𑁄? 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀧𑀝𑀺𑀮𑀸𑀪𑁂𑀦𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀆𑀳 𑁋 ‘‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀧𑀝𑀺𑀲𑀁𑀯𑀺𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀘𑀺𑀢𑁆𑀢𑀁 𑀫𑁄𑀤𑁂𑀦𑁆𑀢𑁄𑀢𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀬𑀸 𑀫𑁄𑀤𑀬𑀫𑀸𑀦𑁄, 𑀢𑀁 𑀯𑀸 𑀧𑀻𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀢𑀸𑀬 𑀏𑀯 𑀆𑀭𑀫𑁆𑀫𑀡𑀪𑀽𑀢𑀸𑀬 𑀧𑀻𑀢𑀺𑀬𑀸𑀫𑁄𑀤𑀬𑀫𑀸𑀦𑁄. 𑀧𑀫𑁄𑀤𑁂𑀦𑁆𑀢𑁄𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺 𑀧𑀻𑀢𑀺𑀧𑀭𑀺𑀬𑀸𑀬𑀪𑀸𑀯𑀢𑁄.

𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀆𑀫𑁄𑀤𑁂𑀢𑀻𑀢𑀺 𑀛𑀸𑀦𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀽𑀢𑀸𑀬 𑀑𑀤𑀕𑁆𑀬𑀮𑀓𑁆𑀔𑀡𑀸𑀬 𑀛𑀸𑀦𑀧𑀻𑀢𑀺𑀬𑀸 𑀢𑀫𑁂𑀯 𑀛𑀸𑀦𑀘𑀺𑀢𑁆𑀢𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 ¶ 𑀘𑁂𑀯 𑀛𑀸𑀦𑀧𑀘𑁆𑀘𑀬𑀯𑀲𑁂𑀦 𑀘 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀳𑀝𑁆𑀞𑀧𑁆𑀧𑀳𑀝𑁆𑀞𑀸𑀓𑀸𑀭𑀁 𑀧𑀸𑀧𑁂𑀦𑁆𑀢𑁄 𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀺 𑀘. 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀉𑀴𑀸𑀭𑀁 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀧𑀻𑀢𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀢𑀸𑀬 𑀏𑀯 𑀆𑀭𑀫𑁆𑀫𑀡𑀪𑀽𑀢𑀸𑀬 𑀧𑀻𑀢𑀺𑀬𑀸 𑀬𑁄𑀕𑀸𑀯𑀘𑀭𑁄 𑀳𑀝𑁆𑀞𑀧𑁆𑀧𑀳𑀝𑁆𑀞𑀸𑀓𑀸𑀭𑀁 𑀧𑀸𑀧𑁂𑀦𑁆𑀢𑁄 ‘‘𑀆𑀫𑁄𑀤𑁂𑀢𑀺 𑀧𑀫𑁄𑀤𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀁 ¶ 𑀞𑀧𑁂𑀦𑁆𑀢𑁄𑀢𑀺 𑀬𑀣𑀸 𑀈𑀲𑀓𑀫𑁆𑀧𑀺 𑀮𑀻𑀦𑀧𑀓𑁆𑀔𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀜𑁆𑀘 𑀅𑀦𑀼𑀧𑀕𑁆𑀕𑀫𑁆𑀫 𑀅𑀦𑁄𑀦𑀢𑀁 𑀅𑀦𑀼𑀦𑁆𑀦𑀢𑀁 𑀬𑀣𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀯𑀺𑀲𑀫𑀁, 𑀲𑀫𑀸𑀥𑀺𑀲𑁆𑀲 𑀯𑀸 𑀉𑀓𑁆𑀓𑀁𑀲𑀕𑀫𑀦𑁂𑀦 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀞𑀺𑀢𑀁 𑀳𑁄𑀢𑀺, 𑀏𑀯𑀁 𑀅𑀧𑁆𑀧𑀦𑀸𑀯𑀲𑁂𑀦 𑀞𑀧𑁂𑀦𑁆𑀢𑁄. 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀓𑀲𑁆𑀲 𑀮𑀓𑁆𑀔𑀡𑀲𑁆𑀲 𑀧𑀝𑀺 𑀧𑀝𑀺 𑀯𑀺𑀚𑁆𑀛𑀦𑁂𑀦 𑀔𑀡𑁂 𑀔𑀡𑁂 𑀅𑀯𑀩𑁄𑀥𑁂𑀦. 𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀔𑀡𑀫𑀢𑁆𑀢𑀝𑁆𑀞𑀺𑀢𑀺𑀓𑁄 𑀲𑀫𑀸𑀥𑀺. 𑀲𑁄𑀧𑀺 𑀳𑀺 𑀆𑀭𑀫𑁆𑀫𑀡𑁂 𑀦𑀺𑀭𑀦𑁆𑀢𑀭𑀁 𑀏𑀓𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑁄 𑀧𑀝𑀺𑀧𑀓𑁆𑀔𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑁆𑀧𑀺𑀢𑁄 𑀯𑀺𑀬 𑀘𑀺𑀢𑁆𑀢𑀁 𑀦𑀺𑀘𑁆𑀘𑀮𑀁 𑀞𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀉𑀧𑁆𑀧𑀦𑁆𑀦𑀸𑀬𑀸’’𑀢𑀺𑀆𑀤𑀺.

𑀫𑁄𑀘𑁂𑀦𑁆𑀢𑁄𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀯𑀺𑀯𑁂𑀘𑁂𑀦𑁆𑀢𑁄 𑀯𑀺𑀲𑀼𑀁 𑀓𑀭𑁄𑀦𑁆𑀢𑁄, 𑀦𑀻𑀯𑀭𑀡𑀸𑀦𑀺 𑀧𑀚𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀓𑁆𑀔𑀡𑁂. 𑀪𑀗𑁆𑀕𑁄 𑀳𑀺 𑀦𑀸𑀫 𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸 𑀓𑁄𑀝𑀺, 𑀢𑀲𑁆𑀫𑀸 𑀢𑀸𑀬 𑀪𑀗𑁆𑀕𑀸𑀦𑀼𑀧𑀲𑁆𑀲𑀓𑁄 𑀬𑁄𑀕𑀸𑀯𑀘𑀭𑁄 𑀘𑀺𑀢𑁆𑀢𑀫𑀼𑀔𑁂𑀦 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄, 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀢𑁆𑀢𑀢𑁆𑀢𑀸 𑀢𑀤𑁂𑀯 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄. 𑀬𑀲𑁆𑀫𑀸 𑀧𑀦 𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀦 𑀢𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀬𑀜𑁆𑀘 𑀦 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀦 𑀢𑀁 𑀭𑀜𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀪𑀗𑁆𑀕𑀤𑀲𑁆𑀲𑀦𑀸𑀦𑀼𑀲𑀸𑀭𑁂𑀦 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀭𑀕𑀢𑁂 𑀤𑀺𑀝𑁆𑀞𑁂 𑀢𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺, 𑀲𑁄 𑀏𑀯𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀮𑁄𑀓𑀺𑀬𑁂𑀦𑁂𑀯 𑀢𑀸𑀯 𑀜𑀸𑀡𑁂𑀦 𑀭𑀸𑀕𑀁 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀦𑀸𑀲𑁆𑀲 𑀲𑀫𑀼𑀤𑀬𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑁄 𑀏𑀯𑀁 𑀯𑀺𑀭𑀢𑁆𑀢𑁄 𑀬𑀣𑀸 𑀤𑀺𑀝𑁆𑀞𑀁 𑀲𑀗𑁆𑀔𑀸𑀭𑀕𑀢𑀁, 𑀢𑀁 𑀢𑀣𑀸 𑀤𑀺𑀝𑁆𑀞𑀁 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀦𑀺𑀭𑁄𑀥𑀫𑁂𑀯𑀲𑁆𑀲 𑀫𑀦𑀲𑀺 𑀓𑀭𑁄𑀢𑀺, 𑀦𑁄 𑀲𑀫𑀼𑀤𑀬𑀦𑁆𑀢𑀺 𑀅𑀢𑁆𑀣𑁄, 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀦𑀢𑁄 𑀘 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 ¶ 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀬𑁄𑀕𑀸𑀯𑀘𑀭𑁄 𑀯𑀼𑀢𑁆𑀢𑀦𑀬𑁂𑀦 𑀓𑀺𑀮𑁂𑀲𑁂 𑀘 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀸𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀢𑁄 𑀘𑀺𑀢𑁆𑀢𑀁 𑀫𑁄𑀘𑁂𑀦𑁆𑀢𑁄 𑀯𑀺𑀫𑁄𑀘𑁂𑀦𑁆𑀢𑁄 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘𑀸’’𑀢𑀺.

𑀢𑀢𑁆𑀣 𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀏𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀸𑀢𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 ‘‘𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀧𑀯𑀢𑁆𑀢𑀸𑀬 𑀫𑀺𑀘𑁆𑀙𑀸𑀲𑀜𑁆𑀜𑀸𑀬. 𑀲𑀜𑁆𑀜𑀸𑀲𑀻𑀲𑁂𑀦 𑀘𑀺𑀢𑁆𑀢𑀤𑀺𑀝𑁆𑀞𑀻𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀲𑀼𑀔𑀲𑀜𑁆𑀜𑀸𑀤𑀻𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 ¶ . 𑀦𑀦𑁆𑀤𑀺𑀢𑁄𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀢𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀢𑀣𑀸 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀸𑀕𑀢𑁄 𑀫𑁄𑀘𑁂𑀦𑁆𑀢𑁄’’𑀢𑀺. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬. 𑀬𑀣𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀫𑀼𑀤𑀬𑀢𑁄 𑀫𑁄𑀘𑁂𑀦𑁆𑀢𑁄’’𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀆𑀤𑀸𑀦𑀢𑁄𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀢𑁄, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀦𑀺𑀘𑁆𑀘𑀦𑁆𑀢𑀺 𑀅𑀦𑀼𑀧𑀲𑁆𑀲𑀻, 𑀅𑀦𑀺𑀘𑁆𑀘𑀲𑁆𑀲 𑀯𑀸 𑀅𑀦𑀼𑀧𑀲𑁆𑀲𑀦𑀲𑀻𑀮𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀓𑀺𑀁 𑀧𑀦 𑀢𑀁 𑀅𑀦𑀺𑀘𑁆𑀘𑀁, 𑀓𑀣𑀁 𑀯𑀸 𑀅𑀦𑀺𑀘𑁆𑀘𑀁, 𑀓𑀸 𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀓𑀲𑁆𑀲 𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀢𑀺 𑀘𑀢𑀼𑀓𑁆𑀓𑀁 𑀯𑀺𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀘𑁆𑀘𑀁 𑀦𑀸𑀫 𑀥𑀼𑀯𑀁 𑀲𑀲𑁆𑀲𑀢𑀁 𑀬𑀣𑀸 𑀢𑀁 𑀦𑀺𑀩𑁆𑀩𑀸𑀦𑀁, 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀯𑀦𑁆𑀢𑀁, 𑀅𑀢𑁆𑀣𑀢𑁄 𑀲𑀗𑁆𑀔𑀢𑀸 𑀥𑀫𑁆𑀫𑀸𑀢𑀺 𑀆𑀳 𑀅𑀦𑀺𑀘𑁆𑀘𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀓𑀲𑁆𑀫𑀸? 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀸𑀢𑀺, 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀲𑀩𑁆𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑀁 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑁄 𑀅𑀢𑁆𑀢𑀮𑀸𑀪𑁄 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀦𑁆𑀦𑀸𑀦𑀁 𑀢𑁂𑀲𑀁 𑀔𑀡𑀦𑀺𑀭𑁄𑀥𑁄 𑀯𑀺𑀦𑀸𑀲𑁄 𑀯𑀬𑁄, 𑀚𑀭𑀸𑀬 𑀅𑀜𑁆𑀜𑀣𑀸𑀪𑀸𑀯𑁄 𑀅𑀜𑁆𑀜𑀣𑀢𑁆𑀢𑀁. 𑀬𑀣𑀸 𑀳𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸𑀬 𑀪𑀗𑁆𑀕𑀸𑀯𑀢𑁆𑀣𑀸𑀬𑀁 𑀯𑀢𑁆𑀣𑀼𑀪𑁂𑀤𑁄 𑀦𑀢𑁆𑀣𑀺, 𑀏𑀯𑀁 𑀞𑀺𑀢𑀺𑀲𑀗𑁆𑀔𑀸𑀢𑀸𑀬𑀁 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸𑀬𑀫𑁆𑀧𑀺 𑀯𑀢𑁆𑀣𑀼𑀪𑁂𑀤𑁄 𑀦𑀢𑁆𑀣𑀺. 𑀬𑀢𑁆𑀣 𑀚𑀭𑀸𑀯𑁄𑀳𑀸𑀭𑁄, 𑀢𑀲𑁆𑀫𑀸 𑀏𑀓𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀚𑀭𑀸 𑀬𑀼𑀚𑁆𑀚𑀢𑀺, 𑀬𑀸 𑀔𑀡𑀺𑀓𑀚𑀭𑀸𑀢𑀺 ¶ 𑀯𑀼𑀘𑁆𑀘𑀢𑀺. 𑀏𑀓𑀁𑀲𑁂𑀦 𑀘 𑀉𑀧𑁆𑀧𑀸𑀤𑀪𑀗𑁆𑀕𑀸𑀯𑀢𑁆𑀣𑀸𑀲𑀼 𑀯𑀢𑁆𑀣𑀼𑀦𑁄 𑀅𑀪𑁂𑀤𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀜𑁆𑀜𑀣𑀸 ‘‘𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀪𑀺𑀚𑁆𑀚𑀢𑀻’’𑀢𑀺 𑀆𑀧𑀚𑁆𑀚𑁂𑀬𑁆𑀬. 𑀢𑀬𑀺𑀤𑀁 𑀔𑀡𑀺𑀓𑀚𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺.

𑀬𑀲𑁆𑀲 𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀪𑀸𑀯𑀸 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀲𑀫𑀜𑁆𑀜𑀸, 𑀢𑀲𑁆𑀫𑀺𑀁 𑀮𑀓𑁆𑀔𑀡𑀢𑁆𑀢𑀬𑁂 𑀅𑀦𑀺𑀘𑁆𑀘𑀢𑀸 𑀲𑀫𑀜𑁆𑀜𑀸𑀢𑀺 ‘‘𑀅𑀦𑀺𑀘𑁆𑀘𑀢𑀸𑀢𑀺 𑀢𑁂𑀲𑀁𑀬𑁂𑀯 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀲𑁂𑀲𑀢𑁄 𑀥𑀫𑁆𑀫𑀸𑀦𑀁 𑀔𑀡𑀺𑀓𑀦𑀺𑀭𑁄𑀥𑁂 𑀅𑀦𑀺𑀘𑁆𑀘𑀢𑀸𑀯𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀼𑀢𑁆𑀯𑀸 𑀅𑀪𑀸𑀯𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀸𑀤𑀧𑀼𑀩𑁆𑀩𑀓𑀢𑁆𑀢𑀸 𑀅𑀪𑀸𑀯𑀲𑁆𑀲 𑀳𑀼𑀢𑁆𑀯𑀸-𑀕𑀳𑀡𑀁. 𑀢𑁂𑀦 𑀧𑀸𑀓𑀝𑀪𑀸𑀯𑀧𑀼𑀩𑁆𑀩𑀓𑀢𑁆𑀢𑀁 𑀯𑀺𑀦𑀸𑀲𑀪𑀸𑀯𑀲𑁆𑀲 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀓𑀸𑀭𑁂𑀦𑀸𑀢𑀺 𑀦𑀺𑀩𑁆𑀩𑀢𑁆𑀢𑀦𑀸𑀓𑀸𑀭𑁂𑀦. 𑀔𑀡𑀪𑀗𑁆𑀕𑁂𑀦𑀸𑀢𑀺 𑀔𑀡𑀺𑀓𑀦𑀺𑀭𑁄𑀥𑁂𑀦. 𑀢𑀲𑁆𑀲𑀸 𑀅𑀦𑀺𑀘𑁆𑀘𑀢𑀸𑀬𑀸𑀢𑀺 𑀔𑀡𑀺𑀓𑀪𑀗𑁆𑀕𑀲𑀗𑁆𑀔𑀸𑀢𑀸𑀬 𑀅𑀦𑀺𑀘𑁆𑀘𑀢𑀸𑀬. 𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑀗𑁆𑀕𑀺𑀪𑀽𑀢𑁄 𑀬𑁄𑀕𑀸𑀯𑀘𑀭𑁄.

𑀔𑀬𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀯𑀺𑀦𑀸𑀲𑁄. 𑀯𑀺𑀭𑀚𑁆𑀚𑀦𑀁 𑀢𑁂𑀲𑀁𑀬𑁂𑀯 𑀯𑀺𑀮𑀼𑀚𑁆𑀚𑀦𑀁 𑀯𑀺𑀭𑀸𑀕𑁄, 𑀔𑀬𑁄 𑀏𑀯 𑀯𑀺𑀭𑀸𑀕𑁄 𑀔𑀬𑀯𑀺𑀭𑀸𑀕𑁄, 𑀔𑀡𑀺𑀓𑀦𑀺𑀭𑁄𑀥𑁄. 𑀅𑀘𑁆𑀘𑀦𑁆𑀢𑀫𑁂𑀢𑁆𑀣 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀲𑀗𑁆𑀔𑀸𑀭𑀸 𑀯𑀺𑀭𑀚𑁆𑀚𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄, ¶ 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀔𑀬𑀯𑀺𑀭𑀸𑀕𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑁄. 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑀤𑀼𑀪𑀬𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀔𑀬𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬, 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀫𑀕𑁆𑀕𑀲𑁆𑀲 𑀧𑀯𑀢𑁆𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀆𑀭𑀫𑁆𑀫𑀡𑀢𑁄 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀔𑀬𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀦𑁆𑀦𑀺𑀦𑁆𑀦𑀪𑀸𑀯𑀢𑁄 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦, 𑀫𑀕𑁆𑀕𑀲𑁆𑀲 𑀧𑀦 𑀅𑀲𑀫𑁆𑀫𑁄𑀳𑀢𑁄 𑀔𑀬𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦, 𑀆𑀭𑀫𑁆𑀫𑀡𑀢𑁄 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 ‘‘𑀤𑁆𑀯𑁂 𑀦𑀺𑀭𑁄𑀥𑀸 𑀔𑀬𑀦𑀺𑀭𑁄𑀥𑁄 𑀘 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄 𑀘𑀸’’𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑀯𑀡𑁆𑀡𑀦𑀁 𑀅𑀢𑀺𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀺𑀭𑀸𑀕𑀝𑁆𑀞𑀸𑀦𑁂 𑀦𑀺𑀭𑁄𑀥𑀧𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀔𑀬𑁄 𑀲𑀗𑁆𑀔𑀸𑀭𑀸𑀦𑀁 𑀯𑀺𑀦𑀸𑀲𑁄’’𑀢𑀺𑀆𑀤𑀺𑀦𑀸 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀁 𑀧𑀳𑀸𑀢𑀩𑁆𑀩𑀲𑁆𑀲 𑀢𑀤𑀗𑁆𑀕𑀯𑀲𑁂𑀦 𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀸 𑀧𑀭𑀺𑀘𑁆𑀘𑀚𑀦𑀁 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄. 𑀢𑀣𑀸 𑀲𑀩𑁆𑀩𑀼𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀪𑀽𑀢𑁂 𑀯𑀺𑀲𑀗𑁆𑀔𑀸𑀭𑁂 𑀅𑀢𑁆𑀢𑀦𑁄 𑀦𑀺𑀲𑁆𑀲𑀚𑁆𑀚𑀦𑀁 𑀢𑀦𑁆𑀦𑀺𑀦𑁆𑀦𑀢𑀸𑀬 𑀯𑀸 𑀢𑀤𑀸𑀭𑀫𑁆𑀫𑀡𑀢𑀸𑀬 𑀯𑀸 𑀢𑀢𑁆𑀣 𑀧𑀓𑁆𑀔𑀦𑁆𑀤𑀦𑀁 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄. 𑀢𑀤𑀗𑁆𑀕𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀢𑀸𑀯 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀦𑀺𑀘𑁆𑀘𑀲𑀜𑁆𑀜𑀁 𑀧𑀭𑀺𑀘𑁆𑀘𑀚𑀢𑀺, 𑀧𑀭𑀺𑀘𑁆𑀘𑀚𑀦𑁆𑀢𑀻 𑀘 𑀢𑀲𑁆𑀲𑀸 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀬𑀁 ¶ 𑀬𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀕𑀳𑀡𑀯𑀲𑁂𑀦 𑀓𑀺𑀮𑁂𑀲𑀸 𑀢𑀫𑁆𑀫𑀽𑀮𑀓𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀢𑀤𑀼𑀪𑀬𑀫𑀽𑀮𑀓𑀸 𑀘 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂 𑀲𑀩𑁆𑀩𑁂𑀧𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀧𑀭𑀺𑀘𑁆𑀘𑀚𑀢𑀺, 𑀢𑀣𑀸 𑀤𑀼𑀓𑁆𑀔𑀲𑀜𑁆𑀜𑀸𑀤𑀬𑁄. 𑀢𑁂𑀦𑀸𑀳 𑁋 ‘‘𑀯𑀺𑀧𑀲𑁆𑀲𑀦𑀸 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀻’’𑀢𑀺. 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦𑀸𑀢𑀺 𑀲𑀗𑁆𑀔𑀢𑁂 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀕𑀢𑁂 𑀅𑀦𑀺𑀘𑁆𑀘𑀢𑀸𑀤𑀺𑀤𑁄𑀲𑀤𑀲𑁆𑀲𑀦𑁂𑀦. 𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀢𑀩𑁆𑀩𑀺𑀧𑀭𑀻𑀢𑁂. 𑀢𑀦𑁆𑀦𑀺𑀦𑁆𑀦𑀢𑀸𑀬𑀸𑀢𑀺 𑀢𑀤𑀥𑀺𑀫𑀼𑀢𑁆𑀢𑀢𑀸𑀬. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀦𑀼𑀧𑀯𑀺𑀲𑀢𑀺 𑀅𑀦𑀼𑀧𑀯𑀺𑀲𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀲𑀤𑁆𑀥𑀺𑀁 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀢𑀻𑀢𑀺 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂𑀲𑀼 𑀧𑀭𑀺𑀘𑁆𑀘𑀢𑁆𑀢𑁂𑀲𑀼 𑀅𑀯𑀺𑀧𑀸𑀓𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀅𑀪𑀺𑀲𑀗𑁆𑀔𑀸𑀭𑀸 𑀢𑀫𑁆𑀫𑀽𑀮𑀓𑀸 𑀘 𑀔𑀦𑁆𑀥𑀸 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀪𑀸𑀯𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀫𑀕𑁆𑀕𑁄 𑀧𑀭𑀺𑀘𑁆𑀘𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀉𑀪𑀬𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑀜𑀸𑀡𑀜𑁆𑀘. 𑀫𑀕𑁆𑀕𑀜𑀸𑀡𑀫𑁆𑀧𑀺 𑀳𑀺 𑀕𑁄𑀢𑁆𑀭𑀪𑀼𑀜𑀸𑀡𑀲𑁆𑀲 𑀅𑀦𑀼 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 𑀅𑀦𑀼𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀜𑁆𑀘 𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑀁 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀧𑀼𑀭𑀺𑀫𑀸𑀦𑀺 𑀧𑀦 𑀢𑀻𑀡𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀏𑀯𑀁 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲𑀯𑀢𑁆𑀣𑀼𑀓𑀸𑀬 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑁄𑀴𑀲𑀯𑀢𑁆𑀣𑀼𑀯𑀲𑁂𑀦 𑀘 𑀅𑀬𑀁 𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑀺𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀏𑀯𑀁 𑀪𑀸𑀯𑀺𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀦𑁆𑀢𑀪𑀸𑀯𑀸𑀤𑀺𑀯𑀲𑁂𑀦 𑀫𑀳𑀸𑀦𑀺𑀲𑀁𑀲𑀢𑀸 𑀤𑀲𑁆𑀲𑀺𑀢𑀸. 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀲𑀫𑀢𑁆𑀣𑀢𑀸𑀬𑀧𑀺 𑀘𑀲𑁆𑀲 𑀫𑀳𑀸𑀦𑀺𑀲𑀁𑀲𑀢𑀸 ¶ 𑀤𑀝𑁆𑀞𑀩𑁆𑀩𑀸. 𑀅𑀬𑀜𑁆𑀳𑀺 𑀲𑀦𑁆𑀢𑀧𑀡𑀻𑀢𑀅𑀲𑁂𑀘𑀦𑀓𑀲𑀼𑀔𑀯𑀺𑀳𑀸𑀭𑀢𑁆𑀢𑀸 𑀲𑀫𑀸𑀥𑀺𑀅𑀦𑁆𑀢𑀭𑀸𑀬𑀓𑀭𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀘𑀺𑀢𑁆𑀢𑀲𑁆𑀲 𑀯𑀺𑀥𑀸𑀯𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀦𑀸𑀧𑀸𑀦𑀸𑀭𑀫𑁆𑀫𑀡𑀸𑀪𑀺𑀫𑀼𑀔𑀫𑁂𑀯 𑀘𑀺𑀢𑁆𑀢𑀁 𑀓𑀭𑁄𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸’’𑀢𑀺 (𑀅. 𑀦𑀺. 𑁯.𑁧; 𑀉𑀤𑀸. 𑁩𑁧). 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀧𑀽𑀭𑀺𑀬𑀸 𑀫𑀽𑀮𑀪𑀸𑀯𑁂𑀦𑀧𑀺 𑀘𑀲𑁆𑀲𑀸 𑀫𑀳𑀸𑀦𑀺𑀲𑀁𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀆𑀦𑀸𑀧𑀸𑀦𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀧𑀽𑀭𑁂𑀢𑀺, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁧𑁪𑁭).

𑀅𑀧𑀺𑀘 𑀘𑀭𑀺𑀫𑀓𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀺𑀤𑀺𑀢𑀪𑀸𑀯𑀓𑀭𑀡𑀢𑁄𑀧𑀺𑀲𑁆𑀲𑀸 𑀫𑀳𑀸𑀦𑀺𑀲𑀁𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀏𑀯𑀁 ¶ 𑀪𑀸𑀯𑀺𑀢𑀸𑀬, 𑀭𑀸𑀳𑀼𑀮, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸𑀬 𑀬𑁂𑀧𑀺 𑀢𑁂 𑀘𑀭𑀺𑀫𑀓𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀢𑁂𑀧𑀺 𑀯𑀺𑀤𑀺𑀢𑀸𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀯𑀺𑀤𑀺𑀢𑀸’’𑀢𑀺 (𑀫. 𑀦𑀺. 𑁨.𑁧𑁨𑁧).

𑀢𑀢𑁆𑀣 𑀦𑀺𑀭𑁄𑀥𑀯𑀲𑁂𑀦 𑀢𑀬𑁄 𑀘𑀭𑀺𑀫𑀓𑀸 𑀪𑀯𑀘𑀭𑀺𑀫𑀓𑀸 𑀛𑀸𑀦𑀘𑀭𑀺𑀫𑀓𑀸 𑀘𑀼𑀢𑀺𑀘𑀭𑀺𑀫𑀓𑀸𑀢𑀺. 𑀪𑀯𑁂𑀲𑀼 𑀳𑀺 𑀓𑀸𑀫𑀪𑀯𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀧𑀯𑀢𑁆𑀢𑀦𑁆𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀪𑀯𑀘𑀭𑀺𑀫𑀓𑀸. 𑀛𑀸𑀦𑁂𑀲𑀼 𑀧𑀼𑀭𑀺𑀫𑁂 𑀛𑀸𑀦𑀢𑁆𑀢𑀬𑁂 𑀧𑀯𑀢𑁆𑀢𑀦𑁆𑀢𑀺, 𑀘𑀢𑀼𑀢𑁆𑀣𑁂 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀛𑀸𑀦𑀘𑀭𑀺𑀫𑀓𑀸. 𑀬𑁂 𑀧𑀦 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀼𑀭𑀢𑁄 𑀲𑁄𑀴𑀲𑀫𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀇𑀫𑁂 𑀘𑀼𑀢𑀺𑀘𑀭𑀺𑀫𑀓𑀸 𑀦𑀸𑀫. 𑀇𑀫𑁂 𑀇𑀥 𑀘𑀭𑀺𑀫𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀇𑀫𑁂 𑀓𑀺𑀭 𑀇𑀫𑀁 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺 𑀆𑀦𑀸𑀧𑀸𑀦𑀸𑀭𑀫𑁆𑀫𑀡𑀲𑁆𑀲 𑀲𑀼𑀝𑁆𑀞𑀼 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀳𑀺 𑀧𑀼𑀭𑀢𑁄 𑀲𑁄𑀴𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑀁 𑀆𑀯𑀚𑁆𑀚𑀬𑀢𑁄 𑀉𑀧𑁆𑀧𑀸𑀤𑁄𑀧𑀺 𑀦𑁂𑀲𑀁 𑀧𑀸𑀓𑀝𑁄 𑀳𑁄𑀢𑀺, 𑀞𑀺𑀢𑀺𑀁 𑀆𑀯𑀚𑁆𑀚𑀬𑀢𑁄 𑀞𑀺𑀢𑀺𑀧𑀺 𑀦𑁂𑀲𑀁 𑀧𑀸𑀓𑀝𑀸 𑀳𑁄𑀢𑀺, 𑀪𑀗𑁆𑀕𑀁 𑀆𑀯𑀚𑁆𑀚𑀬𑀢𑁄 𑀪𑀗𑁆𑀕𑁄𑀧𑀺 𑀦𑁂𑀲𑀁 𑀧𑀸𑀓𑀝𑁄 𑀳𑁄𑀢𑀺. 𑀇𑀢𑁄 𑀅𑀜𑁆𑀜𑀁 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀺 𑀆𑀬𑀼𑀅𑀦𑁆𑀢𑀭𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀯𑀸 𑀳𑁄𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀁 𑀯𑀸, 𑀇𑀫𑀁 𑀧𑀦 𑀲𑁄𑀴𑀲𑀯𑀢𑁆𑀣𑀼𑀓𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀆𑀬𑀼𑀅𑀦𑁆𑀢𑀭𑀁 𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀲𑁄 ‘‘𑀏𑀢𑁆𑀢𑀓𑀁 𑀤𑀸𑀦𑀺 𑀫𑁂 𑀆𑀬𑀼𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦 𑀇𑀢𑁄 𑀧𑀭’’𑀦𑁆𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀻𑀦𑀺 ¶ 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑀺 𑀓𑁄𑀝𑀧𑀩𑁆𑀩𑀢𑀯𑀺𑀳𑀸𑀭𑀯𑀸𑀲𑀺𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬, 𑀫𑀳𑀸𑀓𑀭𑀜𑁆𑀚𑀺𑀬𑀯𑀺𑀳𑀸𑀭𑀯𑀸𑀲𑀺𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬, 𑀤𑁂𑀯𑀧𑀼𑀢𑁆𑀢𑀭𑀝𑁆𑀞𑁂 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁄 𑀯𑀺𑀬, 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀯𑀸𑀲𑀺𑀦𑁄 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑀸 𑀯𑀺𑀬 𑀘.

𑀢𑀢𑁆𑀭𑀺𑀤𑀁 𑀏𑀓𑀯𑀢𑁆𑀣𑀼𑀧𑀭𑀺𑀤𑀻𑀧𑀦𑀁 𑁋 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑀸𑀦𑀁 𑀓𑀺𑀭𑁂𑀓𑁄 𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑁂 𑀞𑀺𑀢𑁄 𑀚𑀼𑀡𑁆𑀳𑀧𑀓𑁆𑀔𑁂 𑀧𑀤𑁄𑀲𑀯𑁂𑀮𑀸𑀬𑀁 𑀘𑀦𑁆𑀤𑀸𑀮𑁄𑀓𑁂𑀦 𑀲𑀫𑀦𑁆𑀢𑀢𑁄 𑀆𑀲𑀺𑀜𑁆𑀘𑀫𑀸𑀦𑀔𑀻𑀭𑀥𑀸𑀭𑀁 𑀯𑀺𑀬 𑀕𑀕𑀦𑀢𑀮𑀁 𑀭𑀚𑀢𑀧𑀝𑁆𑀝𑀲𑀤𑀺𑀲𑀁 𑀯𑀸𑀮𑀺𑀓𑀸𑀲𑀦𑁆𑀣𑀢𑀜𑁆𑀘 𑀪𑀽𑀫𑀺𑀪𑀸𑀕𑀁 𑀤𑀺𑀲𑁆𑀯𑀸 ‘‘𑀭𑀫𑀡𑀻𑀬𑁄 𑀯𑀢𑀸𑀬𑀁 𑀓𑀸𑀮𑁄, 𑀤𑁂𑀲𑁄 𑀘 𑀫𑀫 𑀅𑀚𑁆𑀛𑀸𑀲𑀬𑀲𑀤𑀺𑀲𑁄, 𑀓𑀻𑀯 𑀘𑀺𑀭𑀁 𑀦𑀼 𑀔𑁄 𑀅𑀬𑀁 𑀤𑀼𑀓𑁆𑀔𑀪𑀸𑀭𑁄 ¶ 𑀯𑀳𑀺𑀢𑀩𑁆𑀩𑁄’’𑀢𑀺 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑁂 𑀉𑀧𑀥𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀓𑀣𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀸 𑀪𑀺𑀓𑁆𑀔𑀽 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺. 𑀢𑀢𑁆𑀭 𑀓𑁂𑀘𑀺 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑁂𑀳𑀺 𑀆𑀲𑀦𑁂 𑀦𑀺𑀲𑀺𑀦𑁆𑀦𑀓𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺. 𑀓𑁂𑀘𑀺 ‘‘𑀅𑀫𑁆𑀳𑁂𑀳𑀺 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸’’𑀢𑀺. 𑀣𑁂𑀭𑁄 𑀆𑀳 𑁋 ‘‘𑀅𑀳𑀁 𑀤𑀸𑀦𑀺 𑀯𑁄 𑀘𑀗𑁆𑀓𑀫𑀦𑁆𑀢𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀫𑀸𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀘𑀗𑁆𑀓𑀫𑁂 𑀢𑀺𑀭𑀺𑀬𑀁 𑀮𑁂𑀔𑀁 𑀓𑀢𑁆𑀯𑀸 ‘‘𑀅𑀳𑀁 𑀇𑀢𑁄 𑀘𑀗𑁆𑀓𑀫𑀓𑁄𑀝𑀺𑀢𑁄 𑀧𑀭𑀓𑁄𑀝𑀺𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄 𑀇𑀫𑀁 𑀮𑁂𑀔𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀘𑀗𑁆𑀓𑀫𑀁 𑀑𑀭𑀼𑀬𑁆𑀳 𑀧𑀭𑀪𑀸𑀕𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄 𑀏𑀓𑁂𑀦 𑀧𑀸𑀤𑁂𑀦 𑀮𑁂𑀔𑀁 𑀅𑀓𑁆𑀓𑀦𑁆𑀢𑀓𑁆𑀔𑀡𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁭. 𑀬𑀤𑀺𑀧𑀺 𑀅𑀭𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁, 𑀦𑀸𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁, 𑀦𑀸𑀧𑀺 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀸𑀤𑀧𑁂𑀲𑀼𑀁, 𑀢𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀫𑀢𑀸𑀦𑀁 𑀅𑀦𑁆𑀢𑀭𑁂 𑀅𑀭𑀺𑀬𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄 ‘‘𑀅𑀭𑀺𑀬𑀧𑀼𑀕𑁆𑀕𑀮𑀫𑀺𑀲𑁆𑀲𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀺𑀬𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑀺𑀁𑀲𑀼 𑀦 𑀲𑀫𑀸𑀤𑀧𑁂𑀲𑀼𑀁, 𑀦𑀸𑀧𑀺 𑀲𑀫𑀦𑀼𑀜𑁆𑀜𑀸 𑀅𑀳𑁂𑀲𑀼𑀁. 𑀅𑀣 𑀯𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑁆𑀯𑀸 𑀫𑀭𑀡𑀲𑀫𑀬𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀫𑀢𑀸𑀦𑀫𑁆𑀧𑀺 𑀅𑀭𑀺𑀬𑀸𑀦𑀁 𑀲𑀩𑁆𑀪𑀸𑀯𑀢𑁄 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀲𑁆𑀲 𑀅𑀭𑀺𑀬𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑀫𑀺𑀲𑁆𑀲𑀓𑀢𑁆𑀢𑀸 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀦 𑀯𑀼𑀢𑁆𑀢𑀁. ‘‘𑀢𑁂 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀢𑁂 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁧𑁬𑁮. 𑀇𑀢𑁆𑀣𑀻𑀲𑀼 ¶ 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀢𑀸 𑀦𑀸𑀫 𑀙𑀦𑁆𑀤𑀭𑀸𑀕𑁂𑀦 𑀲𑀸𑀭𑀢𑁆𑀢𑀢𑀸 𑀲𑀸𑀧𑁂𑀓𑁆𑀔𑀪𑀸𑀯𑁄𑀢𑀺 𑀆𑀳 ‘‘𑀲𑀸𑀭𑀢𑁆𑀢𑀸 𑀅𑀧𑁂𑀓𑁆𑀔𑀯𑀦𑁆𑀢𑁄’’𑀢𑀺. 𑀫𑀭𑀡𑀲𑁆𑀲 𑀕𑀼𑀡𑀓𑀺𑀢𑁆𑀢𑀦𑀁 𑀚𑀻𑀯𑀺𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀆𑀳 ‘‘𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. ‘‘𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦𑀸’’𑀢𑀺 𑀇𑀤𑀁 𑀚𑀻𑀯𑀺𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑀁. ‘‘𑀫𑀢𑀁 ¶ 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’’𑀢𑀺𑀆𑀤𑀺 𑀧𑀦 𑀫𑀭𑀡𑀕𑀼𑀡𑀓𑀺𑀢𑁆𑀢𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀪𑀸𑀤𑀻𑀦𑀁 𑀅𑀢𑀺𑀯𑀺𑀬 𑀉𑀲𑁆𑀲𑀦𑁆𑀦𑀢𑁆𑀢𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀢𑀁 𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀺𑀩𑁆𑀩𑀺𑀲𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀓𑀺𑀩𑁆𑀩𑀺𑀲𑀁 𑀲𑀸𑀳𑀲𑀺𑀓𑀓𑀫𑁆𑀫𑀁 𑀮𑁄𑀪𑀸𑀤𑀺𑀓𑀺𑀮𑁂𑀲𑀼𑀲𑁆𑀲𑀤’’𑀦𑁆𑀢𑀺. 𑀓𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁𑀬𑁂𑀯𑁂𑀤𑀁 𑀯𑀘𑀦𑀁. 𑀫𑀢-𑀲𑀤𑁆𑀤𑁄 ‘‘𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀪𑀸𑀯𑀯𑀘𑀦𑁄𑀢𑀺 𑀆𑀳 ‘‘𑀢𑀯 𑀫𑀭𑀡’’𑀦𑁆𑀢𑀺. 𑀓𑀢𑀓𑀸𑀮𑁄𑀢𑀺 𑀓𑀢𑀫𑀭𑀡𑀓𑀸𑀮𑁄. 𑀅𑀣 𑀯𑀸 𑀓𑀸𑀮𑁄𑀢𑀺 𑀫𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀓𑀢𑀓𑀸𑀮𑁄𑀢𑀺 𑀓𑀢𑀫𑀭𑀡𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀓𑀸𑀮𑀁 𑀓𑀢𑁆𑀯𑀸, 𑀫𑀭𑀺𑀢𑁆𑀯𑀸’’𑀢𑀺. 𑀤𑀺𑀯𑀺 𑀪𑀯𑀸 𑀤𑀺𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑁂𑀳𑀻’’𑀢𑀺. 𑀲𑀫𑀧𑁆𑀧𑀺𑀢𑁄𑀢𑀺 𑀬𑀼𑀢𑁆𑀢𑁄. 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀲𑀫𑁆𑀫𑀤𑁂𑀯 𑀏𑀓𑀻𑀪𑀸𑀯𑀁 𑀕𑀢𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁭𑁨. 𑀉𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀁. 𑀅𑀬𑀜𑁆𑀳𑀺 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀧𑀼𑀩𑁆𑀩𑀸𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀲𑀼 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀲𑁆𑀲 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑁄. 𑀲𑀜𑁆𑀘𑀺𑀘𑁆𑀘𑀸𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀚𑀸𑀦𑀺𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸’’𑀢𑀺 𑀏𑀯𑀁 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀁 𑀓𑀢𑁆𑀯𑀸 𑀧𑀤𑀪𑀸𑀚𑀦𑁂 𑀯𑀢𑁆𑀢𑀩𑁆𑀩𑁂 𑀢𑀣𑀸 𑀅𑀯𑀢𑁆𑀯𑀸 ‘‘𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 ‘‘𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀲𑁆𑀲 𑀘 𑀢𑀤𑀢𑁆𑀣𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸’’𑀢𑀺. ‘‘𑀚𑀸𑀦𑀦𑁆𑀢𑁄’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀡𑀯𑀺𑀲𑀬𑀫𑁂𑀢𑁆𑀣 𑀚𑀸𑀦𑀦𑀦𑁆𑀢𑀺 𑀆𑀳 ‘‘𑀧𑀸𑀡𑁄𑀢𑀺 𑀚𑀸𑀦𑀦𑁆𑀢𑁄’’𑀢𑀺, 𑀲𑀢𑁆𑀢𑁄 𑀅𑀬𑀦𑁆𑀢𑀺 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀡𑁄𑀢𑀺 𑀳𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀘𑁆𑀘𑀢𑀺. ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀢𑀺 𑀚𑀸𑀦𑀦𑁆𑀢𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀡𑁄𑀢𑀺 𑀚𑀸𑀦𑀦𑁆𑀢𑁄’’𑀢𑀺 𑀯𑀘𑀦𑀁 ‘‘𑀫𑀦𑀼𑀲𑁆𑀲𑁄 𑀅𑀬’’𑀦𑁆𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 𑀲𑀢𑁆𑀢𑀲𑀜𑁆𑀜𑀸𑀬 𑀖𑀸𑀢𑁂𑀦𑁆𑀢𑀲𑁆𑀲𑀧𑀺 𑀧𑀸𑀭𑀸𑀚𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀏𑀴𑀓𑀘𑀢𑀼𑀓𑁆𑀓𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁪) 𑀏𑀴𑀓𑀲𑀜𑁆𑀜𑀸𑀬 𑀫𑀦𑀼𑀲𑁆𑀲𑀧𑀸𑀡𑀁 𑀯𑀥𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀡𑁄𑀢𑀺 𑀚𑀸𑀦𑀦𑁆𑀢𑁄’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑀲𑀜𑁆𑀚𑀸𑀦𑀦𑁆𑀢𑁄𑀢𑀺 𑀏𑀢𑁆𑀣 𑀲𑀳-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀲𑀁-𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀢𑁂𑀦𑁂𑀯 𑀧𑀸𑀡𑀚𑀸𑀦𑀦𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 ¶ 𑀚𑀸𑀦𑀦𑁆𑀢𑁄’’𑀢𑀺, 𑀢𑁂𑀦𑁂𑀯 𑀧𑀸𑀡𑀚𑀸𑀦𑀦𑀸𑀓𑀸𑀭𑁂𑀦 ¶ 𑀲𑀤𑁆𑀥𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻𑀢𑀺 𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀏𑀓𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀉𑀪𑀬𑀸𑀭𑀫𑁆𑀫𑀡𑀪𑀸𑀯𑀸𑀲𑀫𑁆𑀪𑀯𑀢𑁄 𑀧𑀸𑀡𑁄𑀢𑀺 𑀚𑀸𑀦𑀦𑁂𑀦 𑀲𑀤𑁆𑀥𑀺𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻𑀢𑀺 𑀚𑀸𑀦𑀦𑀁 𑀏𑀓𑀓𑁆𑀔𑀡𑁂 𑀦 𑀲𑀫𑁆𑀪𑀯𑀢𑀺, 𑀧𑀸𑀡𑁄𑀢𑀺𑀲𑀜𑁆𑀜𑀁 𑀧𑀦 𑀅𑀯𑀺𑀚𑀳𑀺𑀢𑁆𑀯𑀸 𑀫𑀸𑀭𑁂𑀫𑀻𑀢𑀺 𑀚𑀸𑀦𑀦𑀁 𑀲𑀦𑁆𑀥𑀸𑀬 ‘‘𑀢𑁂𑀦𑁂𑀯…𑀧𑁂… 𑀲𑀤𑁆𑀥𑀺𑀁 𑀚𑀸𑀦𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀤𑁆𑀥𑀺𑀦𑁆𑀢𑀺 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀜𑀸𑀢𑀧𑀭𑀺𑀜𑁆𑀜𑀸𑀬 𑀤𑀺𑀝𑁆𑀞𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 ‘𑀭𑀽𑀧𑀁 𑀅𑀦𑀺𑀘𑁆𑀘’𑀦𑁆𑀢𑀺𑀆𑀤𑀺𑀦𑀸 𑀲𑀪𑀸𑀯𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀚𑀸𑀦𑀦𑀁 𑀯𑀺𑀬 ‘𑀇𑀫𑀁 𑀧𑀸𑀡𑀁 𑀫𑀸𑀭𑁂𑀫𑀻’𑀢𑀺 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀲𑀤𑁆𑀥𑀺𑀁𑀬𑁂𑀯 𑀚𑀸𑀦𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 𑀢𑀢𑁆𑀣𑀸𑀧𑀺 𑀏𑀯𑀁 𑀦 𑀓𑀣𑁂𑀦𑁆𑀢𑀺.

𑀯𑀥𑀓𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸𑀢𑀺 ‘‘𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀯𑀥𑀓𑀘𑁂𑀢𑀦𑀸𑀬 𑀘𑀺𑀦𑁆𑀢𑁂𑀢𑁆𑀯𑀸. 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 ‘‘𑀯𑀥𑀸𑀫𑀺 𑀦’’𑀦𑁆𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸’’𑀢𑀺. 𑀉𑀧𑀓𑁆𑀓𑀫𑀯𑀲𑁂𑀦𑀸𑀢𑀺 𑀲𑀸𑀳𑀢𑁆𑀣𑀺𑀓𑀸𑀤𑀺𑀉𑀧𑀓𑁆𑀓𑀫𑀯𑀲𑁂𑀦. 𑀏𑀯𑀁 𑀧𑀯𑀢𑁆𑀢𑀲𑁆𑀲𑀸𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀯𑀢𑁆𑀢𑀲𑁆𑀲. 𑀓𑀺𑀜𑁆𑀘𑀸𑀧𑀺 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀇𑀫𑀲𑁆𑀲 𑀯𑀺𑀧𑁆𑀧𑀓𑀢𑀯𑀘𑀦𑀢𑁆𑀢𑀸 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸𑀯 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀦 𑀲𑀩𑁆𑀩𑀣𑀸 𑀧𑀭𑀺𑀦𑀺𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀢𑀣𑀸𑀧𑀺 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀧𑀭𑀺𑀬𑁄𑀲𑀺𑀢𑀯𑀻𑀢𑀺𑀓𑁆𑀓𑀫𑀫𑁆𑀧𑀺 𑀅𑀯𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀬𑀁 𑀲𑀜𑁆𑀘𑀺𑀘𑁆𑀘𑀲𑀤𑁆𑀤𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀓𑀮𑀮𑀭𑀽𑀧𑀢𑁄 𑀧𑀝𑁆𑀞𑀸𑀬. 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁄 𑀕𑀩𑁆𑀪𑁄 𑀲𑁂𑀬𑁆𑀬𑀸 𑀏𑀢𑁂𑀲𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸, 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸 𑀘. 𑀢𑁂𑀲𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑀼𑀔𑀼𑀫𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑀺𑀬𑀫𑀦𑀢𑁆𑀣𑀁. 𑀑𑀧𑀧𑀸𑀢𑀺𑀓𑀲𑀁𑀲𑁂𑀤𑀚𑀸𑀧𑀺 𑀳𑀺 𑀫𑀦𑀼𑀲𑁆𑀲𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁂𑀯. 𑀦 𑀘𑁂𑀯𑀺𑀫𑀁 𑀲𑀩𑁆𑀩𑀧𑀞𑀫𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂𑀲𑀼 𑀧𑀦 𑀞𑀺𑀢𑁂𑀲𑀼𑀬𑁂𑀯 𑀲𑁄𑀴𑀲 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑀸𑀭𑀓𑀲𑁆𑀲 𑀯𑀸 𑀫𑀸𑀢𑀼𑀬𑀸 𑀯𑀸 𑀧𑀦𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀫𑀭𑀡𑀲𑁆𑀲 𑀅𑀦𑁄𑀓𑀸𑀲𑁄 𑀦𑀸𑀫. 𑀏𑀓𑀲𑁆𑀫𑀺𑀜𑁆𑀳𑀺 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑁂 𑀓𑀸𑀮𑁂 𑀤𑀸𑀭𑀓𑀲𑁆𑀲 𑀫𑀭𑀡𑀁 𑀦𑀢𑁆𑀣𑀺 𑀢𑀤𑀸 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀫𑀸𑀢𑀼𑀬𑀸𑀧𑀺 ¶ 𑀢𑀢𑁆𑀢𑀓𑀁 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑁂𑀬𑁂𑀯 𑀘𑀯𑀦𑀥𑀫𑁆𑀫𑀸𑀬 𑀕𑀩𑁆𑀪𑀕𑁆𑀕𑀳𑀡𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀘𑀺𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀅𑀯𑀺𑀦𑀸𑀪𑀸𑀯𑀢𑁄 𑀲𑁂𑀲𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀭𑀽𑀧𑀓𑀸𑀬𑀼𑀧𑀢𑁆𑀣𑀫𑁆𑀪𑀺𑀢𑀲𑁆𑀲𑁂𑀯 𑀘 𑀦𑀸𑀫𑀓𑀸𑀬𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀲𑀓𑀮𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻’’𑀢𑀺. 𑀢𑀢𑁆𑀣 𑀲𑀓𑀮𑀸𑀧𑀺 ¶ 𑀧𑀜𑁆𑀘𑀯𑁄𑀓𑀸𑀭𑀧𑀝𑀺𑀲𑀦𑁆𑀥𑀻𑀢𑀺 𑀧𑀭𑀺𑀧𑀼𑀡𑁆𑀡𑀸 𑀅𑀦𑀽𑀦𑀸 𑀭𑀽𑀧𑀸𑀤𑀺𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀧𑀝𑀺𑀲𑀦𑁆𑀥𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀲𑀓𑀮𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸 𑀢𑀜𑁆𑀘 𑀧𑀞𑀫𑀁 𑀘𑀺𑀢𑁆𑀢𑀁…𑀧𑁂… 𑀓𑀮𑀮𑀭𑀽𑀧𑀦𑁆𑀢𑀺 𑀅𑀬𑀁 𑀲𑀩𑁆𑀩𑀧𑀞𑀫𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄’’𑀢𑀺. ‘‘𑀢𑀤𑀳𑀼𑀚𑀸𑀢𑀲𑁆𑀲 𑀏𑀴𑀓𑀲𑁆𑀲 𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸’’𑀢𑀺 𑀓𑁂𑀘𑀺. ‘‘𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 𑀚𑀸𑀢𑀺𑀫𑀦𑁆𑀢𑀏𑀴𑀓𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸’’𑀢𑀺 𑀅𑀧𑀭𑁂. 𑀲𑀼𑀔𑀼𑀫𑀚𑀸𑀢𑀺𑀮𑁄𑀫𑀸 𑀏𑀯 𑀓𑀺𑀭 𑀓𑁂𑀘𑀺 𑀏𑀴𑀓𑀸 𑀳𑀺𑀫𑀯𑀦𑁆𑀢𑁂 𑀯𑀺𑀚𑁆𑀚𑀦𑁆𑀢𑀺. ‘‘𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀕𑀳𑀺𑀢𑀏𑀴𑀓𑀮𑁄𑀫𑀁 𑀚𑀸𑀢𑀺𑀉𑀡𑁆𑀡𑀸’’𑀢𑀺 𑀅𑀜𑁆𑀜𑁂.

𑀏𑀓𑁂𑀦 𑀅𑀁𑀲𑀼𑀦𑀸𑀢𑀺 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 ‘‘𑀕𑀩𑁆𑀪𑀲𑁂𑀬𑁆𑀬𑀓𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀏𑀓𑀢𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀧𑀸𑀢𑀼𑀪𑀽𑀢𑀸 𑀓𑀮𑀮𑀲𑀗𑁆𑀔𑀸𑀢𑀸 𑀭𑀽𑀧𑀲𑀦𑁆𑀢𑀢𑀺 𑀧𑀭𑀺𑀢𑁆𑀢𑀸 𑀳𑁄𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀏𑀓𑀯𑀸𑀬𑀸𑀫𑁂𑀦 𑀧𑀸𑀢𑀩𑁆𑀩𑀫𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀢𑀺𑀩𑀳𑀼𑀁 𑀏𑀢𑀁, 𑀲𑀡𑁆𑀳𑀲𑀽𑀘𑀺𑀬𑀸 𑀢𑁂𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀸𑀬 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀓𑀓𑁂𑀲𑁂 𑀢𑁂𑀮𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑁂 𑀢𑀲𑁆𑀲 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑁂 𑀅𑀝𑁆𑀞𑀥𑀸 𑀨𑀸𑀮𑀺𑀢𑁂 𑀢𑀢𑁄 𑀏𑀓𑀓𑁄𑀝𑁆𑀞𑀸𑀲𑀧𑁆𑀧𑀫𑀸𑀡𑁄 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀓𑁂𑀲𑁄, 𑀢𑀲𑁆𑀲 𑀧𑀲𑀦𑁆𑀦𑀢𑀺𑀮𑀢𑁂𑀮𑀢𑁄 𑀉𑀤𑁆𑀥𑀝𑀲𑁆𑀲 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀚𑀸𑀢𑀺𑀉𑀡𑁆𑀡𑀸 𑀦𑀸𑀫 𑀲𑀼𑀔𑀼𑀫𑀸, 𑀢𑀲𑁆𑀲𑀸 𑀏𑀓𑀅𑀁𑀲𑀼𑀦𑁄 𑀧𑀲𑀦𑁆𑀦𑀢𑀺𑀮𑀢𑁂𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑁆𑀲 𑀧𑀕𑁆𑀖𑀭𑀺𑀢𑁆𑀯𑀸 𑀅𑀕𑁆𑀕𑁂 𑀞𑀺𑀢𑀩𑀺𑀦𑁆𑀤𑀼𑀫𑀢𑁆𑀢’’𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁨𑁬) 𑀔𑀼𑀤𑁆𑀤𑀓𑀪𑀸𑀡𑀓𑁂𑀳𑀺 𑀯𑀼𑀢𑁆𑀢𑀁. 𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀧𑀦 ‘‘𑀢𑀻𑀳𑀺 𑀚𑀸𑀢𑀺𑀉𑀡𑁆𑀡𑀁𑀲𑀽𑀳𑀺 𑀓𑀢𑀲𑀼𑀢𑁆𑀢𑀕𑁆𑀕𑁂 𑀲𑀡𑁆𑀞𑀺𑀢𑀢𑁂𑀮𑀩𑀺𑀦𑁆𑀤𑀼𑀧𑁆𑀧𑀫𑀸𑀡𑀁 𑀓𑀮𑀮𑀁 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫) 𑀯𑀤𑀦𑁆𑀢𑀺. ‘‘𑀅𑀘𑁆𑀙’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀺 ‘‘𑀯𑀺𑀧𑁆𑀧𑀲𑀦𑁆𑀦’’𑀦𑁆𑀢𑀺.

𑀲𑀧𑁆𑀧𑀺𑀫𑀡𑁆𑀟𑁄𑀢𑀺 𑀧𑀲𑀦𑁆𑀦𑀲𑀧𑁆𑀧𑀺. 𑀬𑀣𑀸𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀏𑀢𑁆𑀣𑀸𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀲𑀧𑁆𑀧𑀺𑀫𑀡𑁆𑀟𑁄𑀧𑀺 𑀯𑀼𑀢𑁆𑀢𑀩𑀺𑀦𑁆𑀤𑀼𑀧𑁆𑀧𑀫𑀸𑀡𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀲𑀡𑁆𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀦𑀁 ¶ . 𑀅𑀣 𑀯𑀸 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀏𑀯𑀁𑀯𑀡𑁆𑀡𑀁 𑀏𑀯𑀁𑀲𑀡𑁆𑀞𑀸𑀦𑀜𑁆𑀘. 𑀧𑀝𑀺𑀪𑀚𑀦𑀁 𑀯𑀸 𑀧𑀝𑀺𑀪𑀸𑀕𑁄, 𑀲𑀤𑀺𑀲𑀢𑀸𑀪𑀚𑀦𑀁 𑀲𑀤𑀺𑀲𑀢𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁𑀯𑀺𑀥𑁄 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑁄 𑀭𑀽𑀧𑀢𑁄 𑀲𑀡𑁆𑀞𑀸𑀦𑀢𑁄 𑀘 𑀲𑀤𑀺𑀲𑀢𑀸𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁. 𑀓𑀮𑀮𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀪𑀽𑀢𑀼𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀅𑀢𑁆𑀢𑀪𑀸𑀯𑁄 𑀓𑀮𑀮𑀁 𑀦𑀸𑀫𑀸𑀢𑀺 𑀓𑀣𑀻𑀬𑀢𑀺. 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀢𑀢𑁄 𑀊𑀦𑀸𑀥𑀺𑀓𑀸𑀬𑀼𑀓𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄.

𑀓𑀮𑀮𑀓𑀸𑀮𑁂𑀧𑀻𑀢𑀺 𑀧𑀞𑀫𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀬𑀁 𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀓𑀮𑀮𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁄 𑀯𑀸 𑀉𑀤𑁆𑀥𑀦𑁆𑀢𑀺 𑀤𑀼𑀢𑀺𑀬𑀲𑀢𑁆𑀢𑀸𑀳𑀸𑀤𑀻𑀲𑀼 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀦𑀼 𑀘 𑀉𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀭𑀲𑀦𑀺𑀭𑁄𑀥𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀢𑁄 𑀅𑀦𑁆𑀢𑀭𑀸 𑀉𑀧𑀘𑁆𑀙𑁂𑀤𑁄 𑀦 𑀲𑀓𑁆𑀓𑀸 𑀓𑀸𑀢𑀼𑀁, ‘‘𑀢𑀲𑁆𑀫𑀸…𑀧𑁂… 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀉𑀧𑀭𑁄𑀥𑁂𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑁂𑀡𑀻𑀖𑀝𑀦𑀁…𑀧𑁂… 𑀉𑀧𑀭𑁄𑀥𑁂𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀓𑀣𑀜𑁆𑀘𑀸𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀲𑁆𑀯𑀸𑀬𑀫𑀢𑁆𑀣𑁄’’𑀢𑀺𑀆𑀤𑀺.

𑀏𑀢𑁆𑀣𑀸𑀳 (𑀲𑀸𑀭𑀢𑁆𑀣. 𑀝𑀻. 𑁧.𑁫; 𑀇𑀢𑀺𑀯𑀼. 𑀅𑀝𑁆𑀞. 𑁭𑁪) 𑁋 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑁄 𑀳𑀦𑁆𑀢𑀺, 𑀓𑁄 𑀯𑀸 𑀳𑀜𑁆𑀜𑀢𑀺, 𑀬𑀤𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀲𑁄 𑀅𑀭𑀽𑀧𑀢𑀸𑀬 𑀦 𑀙𑁂𑀤𑀦𑀪𑁂𑀤𑀦𑀸𑀤𑀺𑀯𑀲𑁂𑀦 𑀯𑀺𑀓𑁄𑀧𑀦𑀲𑀫𑀢𑁆𑀣𑁄, 𑀦𑀧𑀺 𑀯𑀺𑀓𑁄𑀧𑀦𑀻𑀬𑁄. 𑀅𑀣 𑀭𑀽𑀧𑀲𑀦𑁆𑀢𑀸𑀦𑁄, 𑀲𑁄 𑀅𑀘𑁂𑀢𑀦𑀢𑀸𑀬 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄𑀢𑀺 𑀦 𑀢𑀢𑁆𑀣 𑀙𑁂𑀤𑀦𑀸𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀮𑀩𑁆𑀪𑀢𑀺 𑀬𑀣𑀸 𑀫𑀢𑀲𑀭𑀻𑀭𑁂. 𑀧𑀬𑁄𑀕𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑁄 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺𑀓𑁄 𑀅𑀢𑀻𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀪𑀯𑁂𑀬𑁆𑀬 𑀅𑀦𑀸𑀕𑀢𑁂𑀲𑀼 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸, 𑀢𑀢𑁆𑀣 𑀦 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀫𑁆𑀪𑀯𑀢𑀺 𑀢𑁂𑀲𑀁 𑀅𑀪𑀸𑀯𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀢𑁆𑀢𑀸 𑀲𑀭𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑀸𑀬 𑀯𑀺𑀦𑀸𑀲𑀸𑀪𑀺𑀫𑀼𑀔𑁂𑀲𑀼 𑀦𑀺𑀧𑁆𑀧𑀬𑁄𑀚𑀦𑁄 𑀧𑀬𑁄𑀕𑁄 𑀲𑀺𑀬𑀸, 𑀯𑀺𑀦𑀸𑀲𑀲𑁆𑀲 𑀘 𑀓𑀸𑀭𑀡𑀭𑀳𑀺𑀢𑀢𑁆𑀢𑀸 𑀦 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺𑀧𑁆𑀧𑀬𑁄𑀕𑀳𑁂𑀢𑀼𑀓𑀁 𑀫𑀭𑀡𑀁, 𑀦𑀺𑀭𑀻𑀳𑀓𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀲𑁆𑀲 𑀲𑁄 𑀧𑀬𑁄𑀕𑁄, 𑀔𑀡𑀺𑀓𑀢𑁆𑀢𑀸 𑀯𑀥𑀸𑀥𑀺𑀧𑁆𑀧𑀸𑀬𑀲𑀫𑀓𑀸𑀮𑀪𑀺𑀚𑁆𑀚𑀦𑀓𑀲𑁆𑀲 𑀓𑀺𑀭𑀺𑀬𑀸𑀧𑀭𑀺𑀬𑁄𑀲𑀸𑀦𑀓𑀆𑀮𑀸𑀦𑀯𑀝𑁆𑀞𑀸𑀦𑀢𑁄 𑀓𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀩𑀤𑁆𑀥𑁄𑀢𑀺?

𑀯𑀼𑀘𑁆𑀘𑀢𑁂 ¶ 𑁋 𑀯𑀥𑀓𑀘𑁂𑀢𑀦𑀸𑀲𑀳𑀺𑀢𑁄 𑀲𑀗𑁆𑀔𑀸𑀭𑀸𑀦𑀁 𑀧𑀼𑀜𑁆𑀚𑁄 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑀦𑁆𑀢𑀺. 𑀢𑁂𑀦 𑀧𑀯𑀢𑁆𑀢𑀺𑀢𑀯𑀥𑀧𑁆𑀧𑀬𑁄𑀕𑀦𑀺𑀫𑀺𑀢𑁆𑀢𑀁 𑀅𑀧𑀕𑀢𑀼𑀲𑁆𑀫𑀸𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀫𑀢𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀬𑀣𑀸𑀯𑀼𑀢𑁆𑀢𑀯𑀥𑀧𑁆𑀧𑀬𑁄𑀕𑀸𑀓𑀭𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀳𑀜𑁆𑀜𑀢𑀺, 𑀓𑁂𑀯𑀮𑁄 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄 𑀯𑀥𑀧𑁆𑀧𑀬𑁄𑀕𑀸𑀯𑀺𑀲𑀬𑀪𑀸𑀯𑁂𑀧𑀺 𑀢𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑀦𑁆𑀢𑀸𑀦𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀲𑀦𑁆𑀢𑀸𑀦𑁂 𑀧𑀭𑁂𑀦 𑀧𑀬𑁄𑀚𑀺𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀯𑀺𑀦𑀺𑀩𑀦𑁆𑀥𑀓𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀳𑀢𑁂 𑀯𑀺𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀲𑀫𑁆𑀪𑀯𑁄, 𑀦𑀧𑀺 𑀅𑀳𑁂𑀢𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀦 𑀘 𑀧𑀬𑁄𑀕𑁄 𑀦𑀺𑀧𑁆𑀧𑀬𑁄𑀚𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀢𑀧𑁆𑀧𑀬𑁄𑀕𑀯𑀲𑁂𑀦 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀓𑀮𑀸𑀧𑀲𑁆𑀲 𑀢𑀣𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀔𑀡𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀫𑀭𑀡𑀲𑁆𑀲 𑀇𑀥 𑀫𑀭𑀡𑀪𑀸𑀯𑁂𑀦 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀦𑁆𑀢𑀢𑀺𑀫𑀭𑀡𑀲𑁆𑀲 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀳𑁂𑀢𑀼𑀓𑀪𑀸𑀯𑀢𑁄 𑀦 𑀅𑀳𑁂𑀢𑀼𑀓𑀁 𑀫𑀭𑀡𑀁, 𑀦 𑀘 𑀓𑀢𑁆𑀢𑀼𑀭𑀳𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑁄 𑀦𑀺𑀭𑀻𑀳𑀓𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼 𑀲𑀦𑁆𑀦𑀺𑀳𑀺𑀢𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀸𑀤𑀦𑁂 𑀦𑀺𑀬𑀢𑁂𑀲𑀼 𑀓𑀸𑀭𑀡𑁂𑀲𑀼 𑀓𑀢𑁆𑀢𑀼𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀬𑀣𑀸 ‘‘𑀧𑀤𑀻𑀧𑁄 𑀧𑀓𑀸𑀲𑁂𑀢𑀺, 𑀦𑀺𑀲𑀸𑀓𑀭𑁄 𑀘𑀦𑁆𑀤𑀺𑀫𑀸’’𑀢𑀺. 𑀦 𑀘 𑀓𑁂𑀯𑀮𑀲𑁆𑀲 𑀯𑀥𑀸𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀓𑀮𑀸𑀧𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀇𑀘𑁆𑀙𑀺𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀲𑁆𑀲𑁂𑀯 𑀧𑀝𑀺𑀚𑀸𑀦𑀦𑀢𑁄, 𑀲𑀦𑁆𑀢𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀧𑀤𑀻𑀧𑀸𑀤𑀻𑀦𑀁 𑀅𑀢𑁆𑀣𑀓𑀺𑀭𑀺𑀬𑀸𑀲𑀺𑀤𑁆𑀥𑀺 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀯 𑀧𑀸𑀡𑀸𑀢𑀺𑀧𑀸𑀢𑁂𑀦 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀉𑀧𑀓𑁆𑀓𑀫𑁂𑀦 𑀯𑁄𑀭𑁄𑀧𑁂𑀢𑀼𑀁 𑀦 𑀲𑀓𑁆𑀓𑀸. 𑀲𑀢𑁆𑀢𑀝𑁆𑀞𑀚𑀯𑀦𑀯𑀸𑀭𑀫𑀢𑁆𑀢𑀦𑁆𑀢𑀺 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀲𑀁𑀬𑀼𑀢𑁆𑀢𑀪𑀸𑀡𑀓𑀸 𑀧𑀦 ‘‘𑀭𑀽𑀧𑀲𑀦𑁆𑀢𑀢𑀺 𑀅𑀭𑀽𑀧𑀲𑀦𑁆𑀢𑀢𑀻’’𑀢𑀺 𑀤𑁆𑀯𑁂 𑀲𑀦𑁆𑀢𑀢𑀺𑀬𑁄 𑀯𑀢𑁆𑀯𑀸 ‘‘𑀉𑀤𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀕𑀢𑀲𑁆𑀲 𑀬𑀸𑀯 𑀢𑀻𑀭𑁂 𑀅𑀓𑁆𑀓𑀦𑁆𑀢𑀉𑀤𑀓𑀮𑁂𑀔𑀸 𑀦 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀤𑁆𑀥𑀸𑀦𑀢𑁄 𑀆𑀕𑀢𑀲𑁆𑀲 𑀬𑀸𑀯 𑀓𑀸𑀬𑁂 𑀉𑀲𑀼𑀫𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀆𑀢𑀧𑀸 𑀆𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀲𑁆𑀲 𑀬𑀸𑀯 𑀅𑀦𑁆𑀥𑀓𑀸𑀭𑀪𑀸𑀯𑁄 𑀦 𑀯𑀺𑀕𑀘𑁆𑀙𑀢𑀺, 𑀅𑀦𑁆𑀢𑁄𑀕𑀩𑁆𑀪𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀤𑀺𑀯𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀬𑀸𑀯 𑀅𑀓𑁆𑀔𑀻𑀦𑀁 𑀨𑀦𑁆𑀤𑀦𑀪𑀸𑀯𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀭𑀽𑀧𑀲𑀦𑁆𑀢𑀢𑀺 𑀦𑀸𑀫. 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀅𑀭𑀽𑀧𑀲𑀦𑁆𑀢𑀢𑀺 𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺 ¶ . 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀯𑀤𑀦𑁆𑀢𑀺 ‘‘𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀢𑁆𑀣 𑀅𑀦𑁆𑀥𑀓𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀮𑁄𑀓𑀝𑁆𑀞𑀸𑀦𑀁 𑀕𑀢𑀲𑁆𑀲 𑀦 𑀘 𑀢𑀸𑀯 𑀆𑀭𑀫𑁆𑀫𑀡𑀁 𑀧𑀸𑀓𑀝𑀁 𑀳𑁄𑀢𑀺. 𑀬𑀸𑀯 𑀧𑀦 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀸 𑀭𑀽𑀧𑀲𑀦𑁆𑀢𑀢𑀺 𑀅𑀭𑀽𑀧𑀲𑀦𑁆𑀢𑀢𑀺 𑀯𑀸 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀮𑁄𑀓𑀝𑁆𑀞𑀸𑀦𑁂 𑀘𑀭𑀺𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲𑀧𑀺 𑀦 𑀢𑀸𑀯 𑀲𑀳𑀲𑀸 𑀭𑀽𑀧𑀁 𑀧𑀸𑀓𑀝𑀁 𑀳𑁄𑀢𑀺. 𑀬𑀸𑀯 𑀧𑀦 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀸 𑀭𑀽𑀧𑀲𑀦𑁆𑀢𑀢𑀺 𑀅𑀭𑀽𑀧𑀲𑀦𑁆𑀢𑀢𑀺 𑀯𑀸 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀽𑀭𑁂 𑀞𑀢𑁆𑀯𑀸 𑀧𑀦 𑀭𑀚𑀓𑀸𑀦𑀁 𑀳𑀢𑁆𑀣𑀯𑀺𑀓𑀸𑀭𑀁 𑀖𑀡𑁆𑀝𑀺𑀪𑁂𑀭𑀺𑀆𑀓𑁄𑀝𑀦𑀯𑀺𑀓𑀸𑀭𑀜𑁆𑀘 𑀤𑀺𑀲𑁆𑀯𑀸𑀧𑀺 𑀦 𑀢𑀸𑀯 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀬𑀸𑀯 𑀧𑀦 𑀢𑀁 𑀲𑀼𑀡𑀸𑀢𑀺, 𑀏𑀢𑀲𑁆𑀫𑀺𑀫𑁆𑀧𑀺 𑀅𑀦𑁆𑀢𑀭𑁂 𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀏𑀢𑁆𑀣 𑀘 𑀆𑀮𑁄𑀓𑀝𑁆𑀞𑀸𑀦𑀢𑁄 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲 𑀧𑀕𑁂𑀯 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀬𑀸𑀯 𑀭𑀽𑀧𑀕𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀢𑁆𑀣 𑀉𑀧𑀟𑁆𑀠𑀯𑁂𑀮𑀸 𑀅𑀯𑀺𑀪𑀽𑀢𑀧𑁆𑀧𑀸𑀬𑀸, 𑀉𑀧𑀟𑁆𑀠𑀯𑁂𑀮𑀸 𑀯𑀺𑀪𑀽𑀢𑀧𑁆𑀧𑀸𑀬𑀸 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀁, 𑀢𑀬𑀺𑀤𑀁 𑀦 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀏𑀓𑀘𑁆𑀘𑀲𑁆𑀲 𑀲𑀻𑀖𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀻𑀢𑀺 ‘‘𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀏𑀓𑀕𑁆𑀕𑀳𑀡𑀫𑁆𑀧𑀺 𑀓𑀢𑀁.

𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀦𑀸 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦. 𑀇𑀫𑀺𑀦𑀸 𑀅𑀭𑀽𑀧𑀲𑀦𑁆𑀢𑀢𑀺 𑀤𑀲𑁆𑀲𑀺𑀢𑀸. 𑀲𑀢𑁆𑀢𑀝𑁆𑀞𑀚𑀯𑀦𑀯𑀸𑀭𑀫𑀢𑁆𑀢𑀦𑁆𑀢𑀺 𑀘 𑀓𑀸𑀫𑀸𑀯𑀘𑀭𑀚𑀯𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀇𑀢𑀭𑀚𑀯𑀦𑀯𑀲𑁂𑀦. 𑀦 𑀳𑀺 𑀢𑁂 𑀧𑀭𑀺𑀫𑀺𑀢𑀓𑀸𑀮𑀸, 𑀅𑀦𑁆𑀢𑀭𑀸 𑀧𑀯𑀢𑁆𑀢𑀪𑀯𑀗𑁆𑀕𑀸𑀤𑀬𑁄𑀧𑀺 𑀢𑀤𑀦𑁆𑀢𑁄𑀕𑀥𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀸𑀯 𑀯𑀸 𑀉𑀡𑁆𑀳𑀢𑁄 𑀆𑀕𑀦𑁆𑀢𑁆𑀯𑀸𑀢𑀺𑀆𑀤𑀺𑀦𑀸 𑀧𑀦 𑀭𑀽𑀧𑀲𑀦𑁆𑀢𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀥𑀓𑀸𑀭𑀁 𑀳𑁄𑀢𑀻𑀢𑀺 𑀅𑀦𑁆𑀥𑀓𑀸𑀭𑀁 𑀦 𑀯𑀺𑀕𑀘𑁆𑀙𑀢𑀺. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀁, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀼𑀢𑁆𑀢𑁂. 𑀢𑀣𑀸 𑀳𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑁂 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ‘‘𑀬𑁄 𑀘𑀸𑀯𑀼𑀲𑁄 𑀫𑀦𑁄, 𑀬𑁂 𑀘 𑀥𑀫𑁆𑀫𑀸, 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 ¶ 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻’’𑀢𑀺 (𑀫. 𑀦𑀺. 𑁩.𑁨𑁮𑁪) 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀫𑀦𑁄𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀜𑁆𑀜𑀸𑀡𑀫𑀸𑀳. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀫𑀦𑁄𑀢𑀺 𑀯𑀸 𑀫𑀦𑀸𑀬𑀢𑀦𑀁. 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸𑀤𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀏𑀢𑀁 𑀉𑀪𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀺𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀯𑀲𑁂𑀦 𑀧𑀝𑀺𑀩𑀤𑁆𑀥𑀁 𑀳𑁄𑀢𑀺. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀳𑀺 𑀅𑀪𑀺𑀦𑀦𑁆𑀤𑀢𑀺 ¶ . 𑀢𑀣𑀸𑀪𑀽𑀢𑁄 𑀘 𑀯𑀢𑁆𑀣𑀼𑀧𑀭𑀺𑀜𑁆𑀜𑀸𑀬 𑀅𑀪𑀸𑀯𑀢𑁄 𑀢𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀺, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀓𑀟𑁆𑀠𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀏𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀢𑀢𑁆𑀣 𑀧𑀯𑀢𑁆𑀢𑁄 𑀙𑀦𑁆𑀤𑀭𑀸𑀕𑁄 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄, 𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀻𑀢𑀺. 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯𑀸𑀢𑀺 𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀢𑀺𑀧𑀸𑀢𑀦𑀯𑀺𑀥𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀻𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄. 𑀬𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀸 𑀢𑀸𑀤𑀺𑀲𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀢𑁂𑀦𑀸𑀳 ‘‘𑀬𑀸𑀬 𑀘𑁂𑀢𑀦𑀸𑀬𑀸’’𑀢𑀺𑀆𑀤𑀺.

𑀧𑀳𑀭𑀡𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁. 𑀆𑀡𑀸𑀧𑀦𑀦𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁. 𑀢𑁂𑀦𑁂𑀯 ‘‘𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀓𑁆𑀔𑀺𑀧𑀦𑀦𑁆𑀢𑀺 𑀅𑀲𑀺𑀆𑀤𑀻𑀦𑀁 𑀢𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀦𑀁.

𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀫𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀔𑁂𑀧𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀦𑁆𑀢𑀺 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀁. 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀲𑀼 𑀯𑀺𑀢𑁆𑀣𑀸𑀭𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀓𑀣𑀸𑀲𑀼 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀆𑀣𑀩𑁆𑀩𑀡𑀺𑀓𑀸𑀢𑀺 𑀆𑀣𑀩𑁆𑀩𑀡𑀯𑁂𑀤𑀯𑁂𑀤𑀺𑀦𑁄. 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀻𑀢𑀺 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑀁 𑀫𑀦𑁆𑀢𑀁 𑀢𑀢𑁆𑀣 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀬𑁄𑀚𑁂𑀦𑁆𑀢𑀺. 𑀆𑀣𑀩𑁆𑀩𑀡𑀺𑀓𑀸 𑀳𑀺 𑀲𑀢𑁆𑀢𑀸𑀳𑀁 𑀅𑀮𑁄𑀡𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀩𑁆𑀩𑁂 𑀅𑀢𑁆𑀣𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀲𑀬𑀫𑀸𑀦𑀸 𑀢𑀧𑀁 𑀘𑀭𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀲𑀸𑀦𑀪𑀽𑀫𑀺𑀁 𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀢𑀫𑁂 𑀧𑀤𑁂 𑀞𑀢𑁆𑀯𑀸 𑀳𑀢𑁆𑀣𑀁 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀫𑀼𑀔𑁂𑀦 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀦𑁆𑀢𑀺, 𑀅𑀣 𑀦𑁂𑀲𑀁 𑀓𑀫𑁆𑀫𑀁 𑀲𑀫𑀺𑀚𑁆𑀛𑀢𑀺. 𑀧𑀝𑀺𑀲𑁂𑀦𑀸𑀬𑀸𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀉𑀧𑀭𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺. 𑀈𑀢𑀺𑀁 ¶ 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀟𑀁𑀲𑀺𑀢𑁆𑀯𑀸 𑀫𑀸𑀭𑀡𑀢𑁆𑀣𑀸𑀬 𑀯𑀺𑀘𑁆𑀙𑀺𑀓𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀻𑀴𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 ¶ . 𑀏𑀢𑀻𑀢𑀺 𑀈𑀢𑀺. 𑀉𑀧𑀤𑁆𑀤𑀯𑀦𑁆𑀢𑀺 𑀢𑀢𑁄 𑀅𑀥𑀺𑀓𑀢𑀭𑀧𑀻𑀴𑀁. 𑀧𑀚𑁆𑀚𑀭𑀓𑀦𑁆𑀢𑀺 𑀯𑀺𑀲𑀫𑀚𑁆𑀚𑀭𑀁. 𑀲𑀽𑀘𑀺𑀓𑀦𑁆𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀽𑀘𑀻𑀳𑀺 𑀯𑀺𑀬 𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀲𑀽𑀮𑀁. 𑀯𑀺𑀲𑀽𑀘𑀺𑀓𑀦𑁆𑀢𑀺 𑀲𑀲𑀽𑀮𑀁 𑀆𑀫𑀸𑀢𑀺𑀲𑀸𑀭𑀁. 𑀧𑀓𑁆𑀔𑀦𑁆𑀤𑀺𑀬𑀦𑁆𑀢𑀺 𑀭𑀢𑁆𑀢𑀸𑀢𑀺𑀲𑀸𑀭𑀁. 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀕𑀦𑁆𑀥𑀸𑀭𑀯𑀺𑀚𑁆𑀚𑀸𑀤𑀺𑀓𑀁 𑀅𑀢𑁆𑀢𑀦𑁄 𑀯𑀺𑀚𑁆𑀚𑀁 𑀓𑀢𑀼𑀧𑀘𑀸𑀭𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀫𑀦𑁆𑀢𑀧𑀞𑀦𑀓𑁆𑀓𑀫𑁂𑀦 𑀧𑀞𑀺𑀢𑁆𑀯𑀸. 𑀢𑁂𑀳𑀻𑀢𑀺 𑀢𑁂𑀳𑀺 𑀯𑀢𑁆𑀣𑀽𑀳𑀺.

𑀧𑀬𑁄𑀚𑀦𑀦𑁆𑀢𑀺 𑀧𑀯𑀢𑁆𑀢𑀫𑀸𑀦𑀁. 𑀤𑀺𑀲𑁆𑀯𑀸𑀢𑀺𑀆𑀤𑀺 𑀤𑀺𑀝𑁆𑀞𑀯𑀺𑀲𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑁂𑀦 𑀯𑀼𑀢𑁆𑀢𑀁. 𑀤𑁆𑀯𑀢𑁆𑀢𑀺𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑀦𑀸𑀕𑀼𑀤𑁆𑀥𑀭𑀡𑁂𑀢𑀺 𑀤𑁆𑀯𑀢𑁆𑀢𑀺𑀩𑁆𑀬𑀸𑀫𑀲𑀢𑀧𑁆𑀧𑀫𑀸𑀡𑁂 𑀫𑀳𑀸𑀓𑀸𑀬𑁂 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀞𑀺𑀢𑀸𑀦𑀁 𑀦𑀸𑀕𑀸𑀦𑀁 𑀉𑀤𑁆𑀥𑀭𑀡𑁂. 𑀓𑀼𑀫𑁆𑀪𑀡𑁆𑀟𑀸𑀦𑀦𑁆𑀢𑀺 𑀓𑀼𑀫𑁆𑀪𑀡𑁆𑀟𑀤𑁂𑀯𑀸𑀦𑀁. 𑀢𑁂 𑀓𑀺𑀭 𑀤𑁂𑀯𑀸 𑀫𑀳𑁄𑀤𑀭𑀸 𑀳𑁄𑀦𑁆𑀢𑀺, 𑀭𑀳𑀲𑁆𑀲𑀗𑁆𑀕𑀫𑁆𑀧𑀺 𑀘 𑀦𑁂𑀲𑀁 𑀓𑀼𑀫𑁆𑀪𑁄 𑀯𑀺𑀬 𑀫𑀳𑀦𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀼𑀫𑁆𑀪𑀡𑁆𑀟𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑁂𑀲𑁆𑀲𑀯𑀡𑀲𑁆𑀲 𑀬𑀓𑁆𑀔𑀸𑀥𑀺𑀧𑀢𑀺𑀪𑀸𑀯𑁂𑀧𑀺 𑀦𑀬𑀦𑀸𑀯𑀼𑀥𑁂𑀦 𑀓𑀼𑀫𑁆𑀪𑀡𑁆𑀟𑀸𑀦𑀁 𑀫𑀭𑀡𑀲𑁆𑀲 𑀇𑀥 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀼𑀧𑀺 𑀢𑀲𑁆𑀲 𑀆𑀡𑀸𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑁂𑀘𑀻𑀢𑀺 𑀫𑀳𑀸𑀲𑀗𑁆𑀖𑀺𑀓𑀸. ‘‘𑀅𑀳𑁄 𑀯𑀢 𑀬𑀁 𑀢𑀁 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑀢𑀭𑁄. ‘‘𑀅𑀳𑁄 𑀯𑀢𑀸𑀬𑀁 𑀢’’𑀦𑁆𑀢𑀺𑀧𑀺 𑀧𑀸𑀞𑁄. ‘‘𑀅𑀬𑀁 𑀇𑀢𑁆𑀣𑀻 𑀢𑀁 𑀓𑀼𑀘𑁆𑀙𑀺𑀕𑀢𑀁 𑀕𑀩𑁆𑀪𑀁 𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀓𑁆𑀔𑀸𑀫𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀼𑀮𑀼𑀫𑁆𑀩𑀲𑁆𑀲𑀸𑀢𑀺 𑀕𑀩𑁆𑀪𑀲𑁆𑀲 𑀓𑀼𑀮𑀲𑁆𑀲𑁂𑀯 𑀯𑀸, 𑀓𑀼𑀝𑀼𑀫𑁆𑀩𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀖𑀝𑀪𑁂𑀤𑀦𑀁 𑀯𑀺𑀬 𑀇𑀤𑁆𑀥𑀺𑀯𑀺𑀦𑀸𑀲𑁄, 𑀅𑀕𑁆𑀕𑀺𑀦𑀺𑀩𑁆𑀩𑀸𑀧𑀦𑀁 𑀯𑀺𑀬 𑀧𑀭𑀽𑀧𑀖𑀸𑀢𑁄𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀢𑀼𑀫𑁆𑀳𑁂 𑀇𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑀁 𑀯𑀤𑁂𑀣, 𑀇𑀤𑁆𑀥𑀺 𑀦𑀸𑀫 𑀘𑁂𑀲𑀸 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀫𑀦𑁄𑀫𑀬𑀺𑀤𑁆𑀥𑀺 𑀜𑀸𑀡𑀯𑀺𑀧𑁆𑀨𑀸𑀭𑀺𑀤𑁆𑀥𑀺 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀺𑀤𑁆𑀥𑀺 𑀅𑀭𑀺𑀬𑀺𑀤𑁆𑀥𑀺 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺 𑀧𑀼𑀜𑁆𑀜𑀯𑀢𑁄𑀇𑀤𑁆𑀥𑀺 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀻𑀢𑀺 𑀤𑀲𑀯𑀺𑀥𑀸. 𑀢𑀢𑁆𑀣 𑀓𑀢𑀭𑀁 𑀇𑀤𑁆𑀥𑀺𑀁 𑀯𑀤𑁂𑀣𑀸𑀢𑀺? 𑀪𑀸𑀯𑀦𑀸𑀫𑀬𑀦𑁆𑀢𑀺. 𑀓𑀺𑀁 𑀧𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻𑀢𑀺? 𑀆𑀫 𑀏𑀓𑀯𑀸𑀭𑀁 𑀳𑁄𑀢𑀺. 𑀬𑀣𑀸 𑀳𑀺 𑀆𑀤𑀺𑀢𑁆𑀢𑀖𑀭𑀲𑁆𑀲 𑀉𑀧𑀭𑀺 𑀉𑀤𑀓𑀪𑀭𑀺𑀢𑁂 𑀖𑀝𑁂 𑀔𑀺𑀢𑁆𑀢𑁂 𑀖𑀝𑁄𑀧𑀺 𑀪𑀺𑀚𑁆𑀚𑀢𑀺, 𑀅𑀕𑁆𑀕𑀺𑀧𑀺 𑀦𑀺𑀩𑁆𑀩𑀸𑀬𑀢𑀺, 𑀏𑀯𑀫𑁂𑀯 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀏𑀓𑀯𑀸𑀭𑀁 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀸 𑀦𑀲𑁆𑀲𑀢𑀻𑀢𑀺. 𑀅𑀣 𑀦𑁂 ‘‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸 𑀦𑁂𑀯 𑀏𑀓𑀯𑀸𑀭𑀁, 𑀦 𑀤𑁆𑀯𑁂 𑀯𑀸𑀭𑁂 𑀧𑀭𑀽𑀧𑀖𑀸𑀢𑀓𑀫𑁆𑀫𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀲𑀜𑁆𑀜𑀢𑁆𑀢𑀺𑀁 𑀆𑀕𑀘𑁆𑀙𑀦𑁆𑀢𑀸 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀓𑀺𑀁 𑀓𑀼𑀲𑀮𑀸, 𑀅𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀸, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀤𑀼𑀓𑁆𑀔𑀸𑀬 ¶ , 𑀅𑀤𑀼𑀓𑁆𑀔𑀫𑀲𑀼𑀔𑀸𑀬, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸’’𑀢𑀺.

𑀇𑀫𑀁 𑀧𑀦 𑀧𑀜𑁆𑀳𑀁 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀏𑀯𑀁 𑀯𑀓𑁆𑀔𑀦𑁆𑀢𑀺 ‘‘𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀓𑀼𑀲𑀮𑀸 𑀯𑀸 𑀳𑁄𑀢𑀺 𑀅𑀩𑁆𑀬𑀸𑀓𑀢𑀸 ¶ 𑀯𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀸 𑀏𑀯, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀏𑀯, 𑀭𑀽𑀧𑀸𑀯𑀘𑀭𑀸 𑀏𑀯𑀸’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀲𑀼 𑀓𑀢𑀭𑀁 𑀓𑁄𑀝𑁆𑀞𑀸𑀲𑀁 𑀪𑀚𑀢𑀻’’𑀢𑀺. 𑀚𑀸𑀦𑀦𑁆𑀢𑀸 𑀯𑀓𑁆𑀔𑀦𑁆𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀅𑀓𑀼𑀲𑀮𑀸𑀯, 𑀤𑀼𑀓𑁆𑀔𑀯𑁂𑀤𑀦𑀻𑀬𑀸𑀯, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀯, 𑀓𑀸𑀫𑀸𑀯𑀘𑀭𑀸 𑀏𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑁂 ‘‘𑀢𑀼𑀫𑁆𑀳𑀸𑀓𑀁 𑀓𑀣𑀸 𑀦𑁂𑀯 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀫𑁂𑀢𑀺, 𑀦 𑀯𑁂𑀤𑀦𑀸𑀢𑁆𑀢𑀺𑀓𑁂𑀦, 𑀦 𑀯𑀺𑀢𑀓𑁆𑀓𑀢𑁆𑀢𑀺𑀓𑁂𑀦, 𑀦 𑀧𑀭𑀺𑀢𑁆𑀢𑀢𑁆𑀢𑀺𑀓𑁂𑀦𑀸’’𑀢𑀺. 𑀓𑀺𑀁 𑀧𑀦 𑀏𑀯𑀁 𑀫𑀳𑀦𑁆𑀢𑀁 𑀲𑀼𑀢𑁆𑀢𑀁 𑀦𑀺𑀭𑀢𑁆𑀣𑀓𑀦𑁆𑀢𑀺? 𑀦𑁄 𑀦𑀺𑀭𑀢𑁆𑀣𑀓𑀁, 𑀢𑀼𑀫𑁆𑀳𑁂 𑀧𑀦𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀸𑀣. 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀏𑀢𑁆𑀣 𑀳𑀺 𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸, 𑀆𑀣𑀩𑁆𑀩𑀡𑀺𑀤𑁆𑀥𑀺 𑀧𑀦 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀳𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀸 𑀮𑀩𑁆𑀪𑀢𑀻𑀢𑀺.

𑀳𑀭𑀺𑀢𑀩𑁆𑀩𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀳𑀸𑀭𑀁, 𑀳𑀸𑀭𑀫𑁂𑀯 𑀳𑀸𑀭𑀓𑀦𑁆𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀚𑀻𑀯𑀺𑀢𑀳𑀭𑀡𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀯𑀸 𑀲𑀢𑁆𑀣𑀁 𑀲𑀢𑁆𑀣𑀳𑀸𑀭𑀓𑀦𑁆𑀢𑀺 𑀯𑀺𑀓𑀧𑁆𑀧𑀤𑁆𑀯𑀬𑁂𑀦𑀸𑀳. ‘‘𑀳𑀸𑀭𑀓𑀲𑀢𑁆𑀣’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑁂 𑀲𑀢𑁆𑀣𑀳𑀸𑀭𑀓𑀦𑁆𑀢𑀺 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀣𑀸 𑀮𑀪𑀢𑀺, 𑀢𑀣𑀸 𑀓𑀭𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀫𑀸𑀳. 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 ‘‘𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀢𑀭𑀣𑀸𑀢𑀺 ‘‘𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀤𑀺 𑀧𑀭𑀺𑀬𑁂𑀲𑀦𑀫𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀺𑀝𑁆𑀞𑀫𑀢𑁆𑀢𑁂𑀦𑀸𑀢𑀺 𑀧𑀭𑀺𑀬𑁂𑀲𑀺𑀢𑀫𑀢𑁆𑀢𑁂𑀦. ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀢𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸’’𑀢𑀺. 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑁆𑀣𑀁, 𑀲𑀲𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀢𑁂𑀦𑀸𑀢𑀺 𑀯𑀸 𑀲𑀢𑁆𑀣𑀦𑁆𑀢𑀺 𑀮𑀕𑀼𑀴𑀧𑀸𑀲𑀸𑀡𑀸𑀤𑀻𑀦𑀫𑁆𑀧𑀺 𑀲𑀢𑁆𑀣𑀲𑀗𑁆𑀕𑀳𑀺𑀢𑀢𑁆𑀢𑀸 𑀆𑀳 𑁋 ‘‘𑀬𑀁 𑀏𑀢𑁆𑀣 𑀣𑀸𑀯𑀭𑀧𑁆𑀧𑀬𑁄𑀕𑀲𑀗𑁆𑀕𑀳𑀺𑀢𑀁 𑀲𑀢𑁆𑀣𑀁, 𑀢𑀤𑁂𑀯 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀯𑀼𑀢𑁆𑀢𑀸𑀯𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀅𑀲𑀺𑀆𑀤𑀻𑀳𑀺 𑀅𑀯𑀲𑀺𑀝𑁆𑀞𑀁. 𑀮𑀕𑀼𑀴𑀦𑁆𑀢𑀺 𑀫𑀼𑀕𑁆𑀕𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀢𑁆𑀣𑀲𑀗𑁆𑀕𑀳𑁄𑀢𑀺 𑀫𑀸𑀢𑀺𑀓𑀸𑀬𑀁 ‘‘𑀲𑀢𑁆𑀣𑀳𑀸𑀭𑀓’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀢𑁆𑀣𑀲𑀗𑁆𑀕𑀳𑁄. 𑀬𑀲𑁆𑀫𑀸…𑀧𑁂… 𑀢𑀲𑁆𑀫𑀸 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀈𑀤𑀺𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀭𑀓𑁂 𑀯𑀸 𑀧𑀧𑀢𑀸𑀢𑀺𑀆𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀧𑀸𑀢𑁂 𑀯𑀸 𑀧𑀧𑀢𑀸’’𑀢𑀺 𑀧𑀭𑀢𑁄 𑀯𑀼𑀢𑁆𑀢𑀁 𑀅𑀯𑀼𑀢𑁆𑀢𑀜𑁆𑀘 ‘‘𑀭𑀼𑀓𑁆𑀔𑀢𑁄 𑀯𑀸 𑀧𑀧𑀢𑀸’’𑀢𑀺𑀆𑀤𑀺 𑀲𑀩𑁆𑀩𑀁 𑀫𑀭𑀡𑀽𑀧𑀸𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯𑀸𑀳 ¶ ‘‘𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀭𑀽𑀧𑁂𑀦𑁂𑀯 𑀯𑀢𑁆𑀢𑀼’’𑀦𑁆𑀢𑀺. 𑀧𑀭𑀢𑁄 𑀯𑀼𑀢𑁆𑀢𑀦𑀬𑀢𑁆𑀢𑀸𑀢𑀺 𑀧𑀭𑀢𑁄 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑀢𑁆𑀢𑀸. 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯𑀸𑀢𑀺 𑀫𑀭𑀡𑀽𑀧𑀸𑀬𑀲𑁆𑀲 𑀩𑀳𑀼𑀯𑀺𑀥𑀢𑀸𑀦𑀺𑀤𑀲𑁆𑀲𑀦𑀢𑁆𑀣𑀁, 𑀢𑀢𑁄 𑀏𑀓𑀤𑁂𑀲𑁂 𑀤𑀲𑁆𑀲𑀺𑀢𑁂 𑀲𑀩𑁆𑀩𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀲𑀓𑁆𑀓𑀸…𑀧𑁂… 𑀯𑀢𑁆𑀢𑀼𑀦𑁆𑀢𑀺 ‘‘𑀭𑀼𑀓𑁆𑀔𑀢𑁄 𑀯𑀸 𑀧𑀧𑀢𑀸’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀲𑀩𑁆𑀩𑀁 𑀫𑀭𑀡𑀽𑀧𑀸𑀬𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀫𑀢𑀁 ¶ 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀫𑀭𑀡𑀁 𑀬𑀲𑁆𑀫𑀸 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀫𑀭𑀡𑀁 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄𑀢𑀺 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀫𑀭𑀡𑀘𑀺𑀢𑁆𑀢𑁄 𑀫𑀭𑀡𑀫𑀦𑁄𑀢𑀺 𑀅𑀢𑁆𑀣𑁄’’𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺 𑀘𑀺𑀢𑁆𑀢-𑀲𑀤𑁆𑀤𑀲𑁆𑀲 𑀯𑀺𑀘𑀺𑀢𑁆𑀢𑀸𑀤𑀺𑀅𑀦𑁂𑀓𑀢𑁆𑀣𑀯𑀺𑀲𑀬𑀢𑁆𑀢𑀸 𑀦𑀸𑀬𑀁 𑀘𑀺𑀢𑁆𑀢-𑀲𑀤𑁆𑀤𑁄 𑀇𑀥 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀤𑀝𑁆𑀞𑀩𑁆𑀩𑁄, 𑀅𑀧𑀺 𑀢𑀼 𑀯𑀺𑀜𑁆𑀜𑀸𑀡𑀲𑁆𑀫𑀺𑀁𑀬𑁂𑀯 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀲𑁆𑀲𑀧𑀺 𑀇𑀥 𑀅𑀦𑀯𑀓𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀢𑀸𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 ‘‘𑀇𑀢𑀺 𑀘𑀺𑀢𑁆𑀢𑀫𑀦𑁄’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀇𑀢𑀺-𑀲𑀤𑁆𑀤𑀦𑀺𑀤𑀲𑁆𑀲𑀺𑀢𑀲𑁆𑀲 𑀫𑀭𑀡𑀲𑁆𑀲 𑀅𑀧𑀭𑀸𑀫𑀝𑁆𑀞𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑀸𑀯-𑀲𑀤𑁆𑀤𑁂𑀦 𑀧𑀦 𑀧𑀭𑀢𑁄 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀫𑀭𑀡𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀇𑀢𑀺𑀲𑀤𑁆𑀤𑀢𑁆𑀣𑀲𑁆𑀲 𑀯𑀓𑁆𑀔𑀫𑀸𑀦𑀢𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀳𑀺 𑀇𑀢𑀺-𑀲𑀤𑁆𑀤𑀦𑀺𑀤𑀲𑁆𑀲𑀺𑀢𑀁 𑀫𑀭𑀡𑀲𑀗𑁆𑀔𑀸𑀢𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀫𑀭𑀡𑀲𑀜𑁆𑀜𑀻 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀅𑀥𑀺𑀓𑀸𑀭𑀯𑀲𑁂𑀦 𑀇𑀢𑀺𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄’’𑀢𑀺. 𑀓𑀲𑁆𑀫𑀸 𑀆𑀳𑀭𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺. 𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀣𑀸 𑀳𑀺𑀲𑁆𑀲𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀇𑀢𑀺-𑀲𑀤𑁆𑀤𑀲𑁆𑀲. 𑀢𑀫𑁂𑀯 𑀅𑀢𑁆𑀣𑀦𑁆𑀢𑀺 𑀫𑀭𑀡𑀲𑀗𑁆𑀔𑀸𑀢𑀫𑀢𑁆𑀣𑀁. ‘‘𑀫𑀭𑀡𑀲𑀜𑁆𑀜𑀻’’𑀢𑀺𑀆𑀤𑀻𑀲𑀼 𑀳𑀺 𑀫𑀭𑀡𑀁 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, ‘‘𑀲𑀜𑁆𑀜𑀻’’𑀢𑀺𑀆𑀤𑀺 𑀲𑀗𑁆𑀓𑀧𑁆𑀧𑀲𑀤𑁆𑀤𑀲𑁆𑀲. 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀧𑀦𑁂𑀢𑁆𑀣 𑀯𑀺𑀘𑀺𑀢𑁆𑀢𑀯𑀘𑀦𑀢𑀸 𑀲𑀗𑁆𑀓𑀧𑁆𑀧𑀲𑀤𑁆𑀤𑀲𑁆𑀲 𑀲𑀜𑁆𑀜𑀸𑀘𑁂𑀢𑀦𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀢𑀺𑀥𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 𑁋 ‘‘𑀘𑀺𑀢𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀺. 𑀅𑀥𑀺𑀧𑁆𑀧𑀸𑀬𑀲𑀤𑁆𑀤𑁂𑀦 𑀓𑀺𑀫𑁂𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑀺𑀢𑀓𑁆𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀦 𑀇𑀤𑀁 𑀯𑀺𑀢𑀓𑁆𑀓𑀲𑁆𑀲 𑀦𑀸𑀫𑀦𑁆𑀢𑀺 𑀇𑀤𑀁 𑀧𑀦 𑀦 𑀓𑁂𑀯𑀮𑀁 𑀯𑀺𑀢𑀓𑁆𑀓𑀲𑁆𑀲𑁂𑀯 𑀦𑀸𑀫𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀸𑀓𑀝𑀢𑁆𑀢𑀸 𑀑𑀴𑀸𑀭𑀺𑀓𑀢𑁆𑀢𑀸 𑀘 𑀉𑀘𑁆𑀘𑀸𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀧𑀸𑀓𑀝𑀢𑁆𑀢𑀸 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀘 𑀅𑀯𑀘𑀸𑀓𑀸𑀭𑀢𑀸.

𑁧𑁭𑁪. 𑀓𑀸𑀬𑁂𑀓𑀤𑁂𑀲𑁂𑀧𑀺 ¶ 𑀓𑀸𑀬-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀳𑀢𑁆𑀣𑁂𑀦 𑀯𑀸’’𑀢𑀺𑀆𑀤𑀺. 𑀧𑀳𑀭𑀡𑁂𑀦𑀸𑀢𑀺 𑀲𑀢𑁆𑀣𑁂𑀦. 𑀲𑀢𑁆𑀣𑀜𑁆𑀳𑀺 𑀧𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀳𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺, 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀓𑁄𑀘𑀺 𑀫𑀭𑀢𑀽𑀢𑀺 𑀏𑀢𑁆𑀣 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀓𑀲𑁆𑀲𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑀸 𑀯𑀥𑀓𑀘𑁂𑀢𑀦𑀸 𑀧𑀯𑀢𑁆𑀢𑀢𑀺, 𑀦 𑀧𑀳𑀸𑀭𑀧𑀘𑁆𑀘𑀬𑀸 𑀫𑀭𑀦𑁆𑀢𑀲𑁆𑀲𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑀸, 𑀦𑀸𑀧𑀺 𑀲𑀫𑀽𑀳𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀪𑀬𑀣𑀸𑀧𑀻𑀢𑀺 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀸𑀦𑀁 𑀯𑀲𑁂𑀦. 𑀯𑀥𑀓𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦𑀸’’𑀢𑀺𑀆𑀤𑀺. 𑀬𑁂𑀦 𑀳𑀺 𑀧𑀩𑀦𑁆𑀥𑁄 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀸𑀤𑀺𑀲𑀁 𑀧𑀬𑁄𑀕𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀢𑀤𑀸 𑀯𑀥𑀓𑀘𑀺𑀢𑁆𑀢𑀁 𑀧𑀯𑀢𑁆𑀢𑀦𑁆𑀢𑀁 𑀧𑀳𑀭𑀺𑀢𑀫𑀢𑁆𑀢𑁂𑀬𑁂𑀯 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀲𑀢𑁆𑀣𑀧𑁆𑀧𑀳𑀸𑀭𑁂 𑀯𑀸 𑀯𑀺𑀲𑁂 𑀯𑀸 𑀤𑀺𑀦𑁆𑀦𑁂𑀧𑀺 𑀬𑀤𑀺 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀫𑀭𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀳𑁄𑀢𑀺𑀬𑁂𑀯. 𑀬𑀁 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺.

𑀦𑀦𑀼 ¶ 𑀘 𑀬𑀣𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀤𑀸𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀧𑀳𑀸𑀭𑁂𑀦 𑀫𑀢𑁂 𑀓𑀲𑁆𑀫𑀸 𑀅𑀭𑀳𑀦𑁆𑀢𑀖𑀸𑀢𑀓𑁄𑀬𑁂𑀯 𑀳𑁄𑀢𑀺, 𑀦 𑀧𑀼𑀣𑀼𑀚𑁆𑀚𑀦𑀖𑀸𑀢𑀓𑁄𑀢𑀺? 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀤𑀸𑀦𑀜𑁆𑀳𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀸𑀕𑀫𑀢𑁆𑀢𑁂𑀦 𑀳𑁄𑀢𑀺. 𑀢𑀣𑀸 𑀳𑀺 𑀤𑀸𑀦𑀘𑁂𑀢𑀦𑀸 𑀘𑀚𑀺𑀢𑀩𑁆𑀩𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀚𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀲𑀦𑁆𑀢𑀓𑀓𑀭𑀡𑀁𑀯 𑀢𑀲𑁆𑀲 𑀘𑀚𑀦𑀁, 𑀢𑀲𑁆𑀫𑀸 𑀬𑀲𑁆𑀲 𑀢𑀁 𑀲𑀦𑁆𑀢𑀓𑀁 𑀓𑀢𑀁, 𑀢𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀦 𑀏𑀯𑀁 𑀯𑀥𑁄. 𑀲𑁄 𑀳𑀺 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑁂𑀢𑀦𑀸 𑀉𑀧𑀓𑁆𑀓𑀫𑁄 𑀢𑁂𑀦 𑀫𑀭𑀡𑀦𑁆𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸𑀯 𑀳𑁄𑀢𑀺, 𑀦 𑀅𑀧𑀸𑀭𑀺𑀧𑀽𑀭𑀺𑀬𑀸. 𑀢𑀲𑁆𑀫𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲𑁂𑀯 𑀫𑀭𑀡𑀦𑁆𑀢𑀺 𑀅𑀭𑀳𑀦𑁆𑀢𑀖𑀸𑀢𑀓𑁄𑀬𑁂𑀯 𑀳𑁄𑀢𑀺, 𑀦 𑀧𑀼𑀣𑀼𑀚𑁆𑀚𑀦𑀖𑀸𑀢𑀓𑁄. 𑀬𑀲𑁆𑀫𑀸 𑀧𑀦 ‘‘𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀬𑀁 𑀲𑀦𑁆𑀢𑀸𑀦𑀁 𑀆𑀭𑀩𑁆𑀪 𑀫𑀸𑀭𑀡𑀺𑀘𑁆𑀙𑀸, 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀪𑀸𑀯𑁂𑀦 𑀧𑀬𑁄𑀕𑀫𑀭𑀡𑀓𑁆𑀔𑀡𑀸𑀦𑀁 𑀯𑀲𑁂𑀦 𑀲𑀢𑀺𑀧𑀺 𑀲𑀦𑁆𑀢𑀸𑀦𑀪𑁂𑀤𑁂 𑀅𑀪𑁂𑀤𑁄𑀬𑁂𑀯, 𑀬𑀤𑀸 𑀘 𑀅𑀢𑁆𑀣𑀲𑀺𑀤𑁆𑀥𑀺, 𑀢𑀤𑀸 𑀔𑀻𑀡𑀸𑀲𑀯𑀪𑀸𑀯𑁄, 𑀢𑀲𑁆𑀫𑀸 𑀅𑀭𑀳𑀦𑁆𑀢𑀖𑀸𑀢𑀓𑁄𑀬𑁂𑀯 𑀳𑁄𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀅𑀜𑁆𑀜𑀘𑀺𑀢𑁆𑀢𑁂𑀦𑀸𑀢𑀺 𑀅𑀯𑀥𑀸𑀥𑀺𑀧𑁆𑀧𑀸𑀬𑁂𑀦 𑀅𑀫𑀸𑀭𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦. 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀅𑀫𑀸𑀭𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦 𑀧𑀳𑀝𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑁆𑀧𑀳𑀸𑀭𑁄 ¶ 𑀦 𑀲𑀬𑀫𑁂𑀯 𑀲𑀓𑁆𑀓𑁄𑀢𑀺 𑀫𑀸𑀭𑁂𑀢𑀼𑀁, 𑀤𑀼𑀢𑀺𑀬𑀁 𑀧𑀦 𑀮𑀪𑀺𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑁄 𑀚𑀻𑀯𑀺𑀢𑀯𑀺𑀦𑀸𑀲𑀦𑀳𑁂𑀢𑀼 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀬𑁄𑀕𑁄 𑀢𑁂𑀦 𑀘 𑀫𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀲𑀦𑁆𑀤𑀦𑀢𑁄 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄 𑀬𑀼𑀢𑁆𑀢𑁄, 𑀦 𑀤𑀼𑀢𑀺𑀬𑁂𑀦 𑀢𑀲𑁆𑀲 𑀅𑀜𑁆𑀜𑀘𑀺𑀢𑁆𑀢𑁂𑀦 𑀤𑀺𑀦𑁆𑀦𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀬𑁂𑀳𑀺 𑀫𑀢𑁂𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄’’𑀢𑀺.

𑀓𑀫𑁆𑀫𑀸𑀧𑀢𑁆𑀢𑀺𑀩𑁆𑀬𑀢𑁆𑀢𑀺𑀪𑀸𑀯𑀢𑁆𑀣𑀦𑁆𑀢𑀺 𑀆𑀦𑀦𑁆𑀢𑀭𑀺𑀬𑀸𑀤𑀺𑀓𑀫𑁆𑀫𑀯𑀺𑀪𑀸𑀕𑀲𑁆𑀲 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀺𑀪𑀸𑀕𑀲𑁆𑀲 𑀘 𑀯𑀺𑀪𑀸𑀯𑀦𑀢𑁆𑀣𑀁. ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀧𑀯𑀢𑁆𑀢𑀘𑁂𑀢𑀦𑀸𑀬 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 ‘‘𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀢𑀤𑀸 𑀲𑀦𑁆𑀦𑀺𑀳𑀺𑀢𑀢𑁆𑀢𑀸 𑀬𑀣𑀸𑀯𑀢𑁆𑀣𑀼𑀓𑀁 𑀓𑀫𑁆𑀫𑀩𑀤𑁆𑀥𑁄 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀇𑀫𑀁 𑀯𑀢𑁆𑀣𑀼𑀁 𑀫𑀸𑀭𑁂𑀫𑀻𑀢𑀺 𑀘𑁂𑀢𑀦𑀸𑀬 𑀅𑀢𑁆𑀣𑀺𑀪𑀸𑀯𑀢𑁄’’𑀢𑀺𑀆𑀤𑀺. 𑀲𑀩𑁆𑀩𑀢𑁆𑀣 𑀳𑀺 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁 𑀢𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀅𑀪𑀸𑀯𑀢𑁄, 𑀯𑀥𑀓𑀘𑀺𑀢𑁆𑀢𑀁 𑀧𑀦 𑀢𑀤𑀸𑀭𑀫𑁆𑀫𑀡𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀦𑀦𑁆𑀢𑀭𑀺𑀬𑀸𑀤𑀺𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀖𑀸𑀢𑀓𑁄 𑀘 𑀳𑁄𑀢𑀻𑀢𑀺 𑀧𑀸𑀡𑀖𑀸𑀢𑀓𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀼𑀦𑀸𑀯 𑀩𑀤𑁆𑀥𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀫𑀸𑀢𑀸𑀧𑀺𑀢𑀼𑀅𑀭𑀳𑀦𑁆𑀢𑀸𑀦𑀁 𑀅𑀜𑁆𑀜𑀢𑀭𑀁 𑀫𑀸𑀭𑁂𑀫𑀻’’𑀢𑀺 𑀕𑀼𑀡𑀫𑀳𑀦𑁆𑀢𑁂𑀲𑀼 𑀧𑀯𑀢𑁆𑀢𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀬 𑀤𑀸𑀭𑀼𑀡𑀪𑀸𑀯𑀢𑁄 𑀢𑀣𑀸𑀯𑀺𑀥𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀧𑀭𑀺𑀯𑀸𑀭𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀸𑀭𑀼𑀡𑀸𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀇𑀥 𑀧𑀦 𑀘𑁂𑀢𑀦𑀸 𑀤𑀸𑀭𑀼𑀡𑀸 𑀳𑁄𑀢𑀻’’𑀢𑀺. 𑀇𑀫𑀺𑀦𑀸 𑀘 ‘‘𑀏𑀴𑀓𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀫𑀸𑀭𑀡𑁂𑀧𑀺 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀬 𑀅𑀤𑀸𑀭𑀼𑀡𑀢𑁆𑀢𑀸 𑀅𑀜𑁆𑀜𑀣𑀸 𑀧𑀯𑀢𑁆𑀢𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀢𑁄 𑀏𑀯𑀁 𑀧𑀯𑀢𑁆𑀢𑀸𑀦𑀦𑁆𑀢𑀭𑀺𑀬𑀲𑁆𑀲 𑀦𑀸𑀢𑀺𑀤𑀸𑀭𑀼𑀡𑀢𑀸 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀮𑁄𑀳𑀺𑀢𑀓𑀦𑁆𑀢𑀺 ¶ 𑀮𑁄𑀳𑀺𑀢𑀫𑀓𑁆𑀔𑀺𑀢𑀁. 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀢𑀺 𑀬𑀼𑀤𑁆𑀥𑀓𑀫𑁆𑀫𑀁 𑀓𑀭𑁄𑀦𑁆𑀢𑁂. 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀢𑁂𑀢𑀺 𑀬𑁄𑀥𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀺𑀢𑀭𑀺 𑀯𑀺𑀤𑁆𑀥𑁂. 𑀇𑀤𑀜𑁆𑀘 𑀬𑀣𑀸𑀥𑀺𑀧𑁆𑀧𑀸𑀬𑀁 𑀢𑁂𑀦 𑀢𑀣𑀸𑀯𑀺𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀣𑀸𑀥𑀺𑀧𑁆𑀧𑀸𑀬𑀁 𑀧𑀦 𑀉𑀚𑀼𑀓𑀫𑁂𑀯 𑀕𑀦𑁆𑀢𑁆𑀯𑀸 𑀧𑀺𑀢𑀭𑀺 𑀯𑀺𑀤𑁆𑀥𑁂𑀧𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀦𑀸𑀯 𑀓𑀢𑀧𑁆𑀧𑀬𑁄𑀕𑀢𑁆𑀢𑀸 𑀦𑁂𑀯𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄𑀢𑀺 𑀯𑀤𑀦𑁆𑀢𑀺. 𑀆𑀦𑀦𑁆𑀢𑀭𑀺𑀬𑀁 𑀧𑀦 𑀦𑀢𑁆𑀣𑀻𑀢𑀺 𑀧𑀺𑀢𑀭𑀁 𑀉𑀤𑁆𑀤𑀺𑀲𑁆𑀲 𑀓𑀢𑀧𑁆𑀧𑀬𑁄𑀕𑀸𑀪𑀸𑀯𑀢𑁄.

𑀅𑀥𑀺𑀝𑁆𑀞𑀸𑀬𑀸𑀢𑀺 𑀫𑀸𑀢𑀺𑀓𑀸𑀯𑀲𑁂𑀦 𑀆𑀡𑀢𑁆𑀢𑀺𑀓𑀧𑀬𑁄𑀕𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 ¶ 𑀯𑀺𑀚𑁆𑀛𑀸𑀢𑀺 𑀏𑀯𑀁 𑀥𑀦𑀼𑀁 𑀓𑀟𑁆𑀠𑁂𑀢𑁆𑀯𑀸 𑀯𑀺𑀚𑁆𑀛. 𑀏𑀯𑀁 𑀧𑀳𑀭𑀸𑀢𑀺 𑀏𑀯𑀁 𑀤𑀴𑁆𑀳𑀁 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀧𑀳𑀭. 𑀏𑀯𑀁 𑀖𑀸𑀢𑁂𑀳𑀻𑀢𑀺 𑀏𑀯𑀁 𑀓𑀫𑁆𑀫𑀓𑀸𑀭𑀡𑀁 𑀓𑀢𑁆𑀯𑀸 𑀫𑀸𑀭𑁂𑀳𑀺. 𑀫𑀚𑁆𑀛𑁂𑀢𑀺 𑀳𑀢𑁆𑀣𑀺𑀦𑁄 𑀧𑀺𑀝𑁆𑀞𑀺𑀫𑀚𑁆𑀛𑁂. 𑀏𑀢𑁂𑀦𑀸𑀢𑀺 ‘‘𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀡𑀸𑀧𑁂𑀢𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣𑀸𑀢𑀺 𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑁂.

𑀓𑀺𑀜𑁆𑀘𑀸𑀧𑀺 𑀓𑀺𑀭𑀺𑀬𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑁄, 𑀧𑀸𑀴𑀺𑀬𑀁 𑀧𑀦 ‘‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀙𑁂𑀤𑀦𑀦𑁆𑀢𑀺 𑀳𑀢𑁆𑀣𑀸𑀤𑀺𑀙𑁂𑀤𑀦𑀁. 𑀪𑁂𑀤𑀦𑀦𑁆𑀢𑀺 𑀓𑀼𑀘𑁆𑀙𑀺𑀆𑀤𑀺𑀨𑀸𑀮𑀦𑀁. 𑀅𑀣 𑀯𑀸 𑀉𑀲𑀼𑀦𑀸 𑀯𑀺𑀚𑁆𑀛𑀦𑀁, 𑀅𑀲𑀺𑀦𑀸 𑀙𑁂𑀤𑀦𑀁, 𑀫𑀼𑀕𑁆𑀕𑀭𑀸𑀤𑀻𑀳𑀺 𑀲𑀻𑀲𑀸𑀤𑀺𑀪𑁂𑀤𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀔𑀫𑀼𑀡𑁆𑀟𑀓𑀦𑁆𑀢𑀺 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀢𑁆𑀢𑀭𑁄𑀝𑁆𑀞𑀉𑀪𑀢𑁄𑀓𑀡𑁆𑀡𑀘𑀽𑀴𑀺𑀓𑀕𑀮𑀯𑀸𑀝𑀓𑀧𑀭𑀺𑀘𑁆𑀙𑁂𑀤𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀩𑁆𑀩𑀓𑁂𑀲𑁂 𑀏𑀓𑀢𑁄 𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑀡𑁆𑀟𑀓𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑀺, 𑀲𑀳 𑀓𑁂𑀲𑁂𑀳𑀺 𑀘𑀫𑁆𑀫𑀁 𑀉𑀝𑁆𑀞𑀳𑀢𑀺, 𑀢𑀢𑁄 𑀲𑀻𑀲𑀓𑀝𑀸𑀳𑀁 𑀣𑀽𑀮𑀲𑀓𑁆𑀔𑀭𑀸𑀳𑀺 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑁆𑀢𑀸 𑀲𑀗𑁆𑀔𑀯𑀡𑁆𑀡𑀁 𑀓𑀭𑁄𑀦𑁆𑀢𑀺. 𑀏𑀯𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑀺𑀮𑀗𑁆𑀕𑀣𑀸𑀮𑀺𑀓𑀁 𑀭𑀸𑀳𑀼𑀫𑀼𑀔𑀁 𑀚𑁄𑀢𑀺𑀫𑀸𑀮𑀺𑀓𑀁 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀁 𑀏𑀭𑀓𑀯𑀢𑁆𑀢𑀺𑀓𑀁 𑀘𑀻𑀭𑀓𑀯𑀸𑀲𑀺𑀓𑀁 𑀏𑀡𑁂𑀬𑁆𑀬𑀓𑀁 𑀩𑀴𑀺𑀲𑀫𑀁𑀲𑀺𑀓𑀁 𑀓𑀳𑀸𑀧𑀡𑀺𑀓𑀁 𑀔𑀸𑀭𑀸𑀧𑀢𑀘𑁆𑀙𑀺𑀓𑀁 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀁 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀩𑁆𑀩𑀁 𑀓𑀫𑁆𑀫𑀓𑀸𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀢𑁆𑀣 (𑀅. 𑀦𑀺. 𑀅𑀝𑁆𑀞. 𑁨.𑁨.𑁧) 𑀩𑀺𑀮𑀗𑁆𑀕𑀣𑀸𑀮𑀺𑀓𑀦𑁆𑀢𑀺 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀻𑀲𑀓𑀧𑀸𑀮𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺, 𑀢𑁂𑀦 𑀫𑀢𑁆𑀣𑀮𑀼𑀗𑁆𑀕𑀁 𑀧𑀓𑁆𑀓𑀼𑀣𑀺𑀢𑁆𑀯𑀸 𑀉𑀧𑀭𑀺 𑀉𑀢𑁆𑀢𑀭𑀢𑀺. 𑀭𑀸𑀳𑀼𑀫𑀼𑀔𑀦𑁆𑀢𑀺 𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑁄 𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑁂 𑀤𑀻𑀧𑀁 𑀚𑀸𑀮𑁂𑀦𑁆𑀢𑀺, 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀯𑀸 𑀧𑀝𑁆𑀞𑀸𑀬 𑀫𑀼𑀔𑀁 𑀦𑀺𑀔𑀸𑀤𑀦𑁂𑀦 𑀔𑀡𑀦𑁆𑀢𑀺, 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺𑀢𑁆𑀯𑀸 𑀫𑀼𑀔𑀁 𑀧𑀽𑀭𑁂𑀢𑀺. 𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀆𑀮𑀺𑀫𑁆𑀧𑁂𑀦𑁆𑀢𑀺. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑁂 𑀢𑁂𑀮𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀤𑀻𑀧𑀁 𑀯𑀺𑀬 𑀧𑀚𑁆𑀚𑀸𑀮𑁂𑀦𑁆𑀢𑀺. 𑀏𑀭𑀓𑀯𑀢𑁆𑀢𑀺𑀓𑀦𑁆𑀢𑀺 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀳𑁂𑀝𑁆𑀞𑀸𑀕𑀻𑀯𑀢𑁄 𑀧𑀝𑁆𑀞𑀸𑀬 𑀘𑀫𑁆𑀫𑀯𑀝𑁆𑀝𑁂 ¶ 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂 ¶ 𑀧𑀸𑀢𑁂𑀦𑁆𑀢𑀺, 𑀅𑀣 𑀦𑀁 𑀬𑁄𑀢𑁆𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀦𑁆𑀢𑀺, 𑀲𑁄 𑀅𑀢𑁆𑀢𑀦𑁄𑀯 𑀘𑀫𑁆𑀫𑀯𑀝𑁆𑀝𑁂 𑀅𑀓𑁆𑀓𑀫𑀺𑀢𑁆𑀯𑀸 𑀧𑀢𑀢𑀺. 𑀘𑀻𑀭𑀓𑀯𑀸𑀲𑀺𑀓𑀦𑁆𑀢𑀺 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀢𑀣𑁂𑀯 𑀘𑀫𑁆𑀫𑀯𑀝𑁆𑀝𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀁 𑀞𑀧𑁂𑀦𑁆𑀢𑀺, 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀺, 𑀉𑀧𑀭𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑀲𑀭𑀻𑀭𑀁 𑀘𑀻𑀭𑀓𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀯𑀺𑀬 𑀳𑁄𑀢𑀺. 𑀏𑀡𑁂𑀬𑁆𑀬𑀓𑀦𑁆𑀢𑀺 𑀏𑀡𑁂𑀬𑁆𑀬𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀉𑀪𑁄𑀲𑀼 𑀓𑀧𑁆𑀧𑀭𑁂𑀲𑀼 𑀘 𑀚𑀡𑁆𑀡𑀼𑀓𑁂𑀲𑀼 𑀘 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀲𑁄 𑀘𑀢𑀽𑀳𑀺 𑀅𑀬𑀲𑀽𑀮𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀢𑀺, 𑀅𑀣 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑀺, 𑀢𑀁 𑀓𑀸𑀮𑁂𑀦 𑀓𑀸𑀮𑀁 𑀲𑀦𑁆𑀥𑀺𑀢𑁄 𑀲𑀽𑀮𑀸𑀦𑀺 𑀅𑀧𑀦𑁂𑀢𑁆𑀯𑀸 𑀘𑀢𑀽𑀳𑀺 𑀅𑀝𑁆𑀞𑀺𑀓𑁄𑀝𑀻𑀳𑀺𑀬𑁂𑀯 𑀞𑀧𑁂𑀦𑁆𑀢𑀺.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀉𑀪𑀢𑁄𑀫𑀼𑀔𑁂𑀳𑀺 𑀩𑀴𑀺𑀲𑁂𑀳𑀺 𑀧𑀳𑀭𑀺𑀢𑁆𑀯𑀸 𑀘𑀫𑁆𑀫𑀫𑀁𑀲𑀦𑀳𑀸𑀭𑀽𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀺. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀲𑀓𑀮𑀲𑀭𑀻𑀭𑀁 𑀢𑀺𑀔𑀺𑀡𑀸𑀳𑀺 𑀯𑀸𑀲𑀻𑀳𑀺 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀓𑀳𑀸𑀧𑀡𑀫𑀢𑁆𑀢𑀁 𑀓𑀳𑀸𑀧𑀡𑀫𑀢𑁆𑀢𑀁 𑀧𑀸𑀢𑁂𑀦𑁆𑀢𑀸 𑀓𑁄𑀝𑁆𑀝𑁂𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀲𑀭𑀻𑀭𑀁 𑀢𑀢𑁆𑀣 𑀢𑀢𑁆𑀣 𑀆𑀯𑀼𑀥𑁂𑀳𑀺 𑀧𑀳𑀭𑀺𑀢𑁆𑀯𑀸 𑀓𑁄𑀘𑁆𑀙𑁂𑀳𑀺 𑀔𑀸𑀭𑀁 𑀖𑀁𑀲𑀦𑁆𑀢𑀺, 𑀘𑀫𑁆𑀫𑀫𑀁𑀲𑀦𑀳𑀸𑀭𑀽𑀦𑀺 𑀧𑀕𑁆𑀖𑀭𑀺𑀢𑁆𑀯𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀯 𑀢𑀺𑀝𑁆𑀞𑀢𑀺. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀡𑁆𑀡𑀙𑀺𑀤𑁆𑀤𑁂 𑀅𑀬𑀲𑀽𑀮𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺, 𑀅𑀣 𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀯𑀺𑀜𑁆𑀙𑀦𑁆𑀢𑀺. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀙𑁂𑀓𑁄 𑀓𑀸𑀭𑀡𑀺𑀓𑁄 𑀙𑀯𑀺𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑀤𑀧𑁄𑀢𑁂𑀳𑀺 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀫𑀁𑀲𑀭𑀸𑀲𑀺𑀬𑁂𑀯 𑀳𑁄𑀢𑀺, 𑀅𑀣 𑀦𑀁 𑀓𑁂𑀲𑁂𑀳𑁂𑀯 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸 𑀧𑀮𑀺𑀯𑁂𑀞𑁂𑀦𑁆𑀢𑀺.

𑀯𑀢𑁆𑀣𑀼𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀫𑀸𑀭𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀧𑀲𑁆𑀲𑀸𑀤𑀻𑀦𑀫𑁆𑀧𑀺 𑀯𑀢𑁆𑀣𑀼𑀲𑀪𑀸𑀕𑀢𑁄 𑀯𑀢𑁆𑀣𑀼𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑁂𑀦 ‘‘𑀧𑀼𑀭𑀢𑁄 𑀯𑀸’’𑀢𑀺 𑀦𑀺𑀬𑀫𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸 ‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑀺, 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀗𑁆𑀓𑁂𑀢𑁄𑀯 𑀳𑁄𑀢𑀺. 𑀘𑀺𑀢𑁆𑀢𑁂𑀦 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀳𑀭𑀺𑀢𑁆𑀯𑀸 𑀫𑀸𑀭𑀡𑀁 𑀇𑀘𑁆𑀙𑀦𑁆𑀢𑁄𑀧𑀺 𑀲𑀘𑁂 ‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀯𑀤𑀢𑀺, 𑀢𑀲𑁆𑀲 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀫𑀢𑁆𑀣𑀁 𑀞𑀧𑁂𑀢𑁆𑀯𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀯𑀺𑀜𑁆𑀜𑀢𑁆𑀢𑀺𑀓𑀢𑁆𑀢𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀢𑁄 𑀧𑀭𑀺𑀬𑀸𑀬𑁂𑀦 𑀅𑀫𑀼𑀘𑁆𑀘𑀦𑀢𑁄 ‘‘𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀫𑀸𑀭𑀺𑀢𑁂𑀧𑀺 𑀦𑁂𑀯𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀧𑀦 𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀯𑀢𑁆𑀣𑀼𑀯𑀺𑀲𑁂𑀲𑁂𑀦𑀸𑀢𑀺 𑀫𑀸𑀢𑀼𑀆𑀤𑀺𑀯𑀢𑁆𑀣𑀼𑀯𑀺𑀲𑁂𑀲𑁂𑀦 ¶ . 𑀓𑀫𑁆𑀫𑀯𑀺𑀲𑁂𑀲𑁄𑀢𑀺 𑀆𑀦𑀦𑁆𑀢𑀭𑀺𑀬𑀸𑀤𑀺𑀓𑀫𑁆𑀫𑀯𑀺𑀲𑁂𑀲𑁄. 𑀆𑀧𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀺𑀲𑁂𑀲𑁄.

‘‘𑀏𑀢𑀁 𑀕𑀸𑀫𑁂 𑀞𑀺𑀢’’𑀦𑁆𑀢𑀺 𑀕𑀸𑀫𑁄 𑀧𑀼𑀕𑁆𑀕𑀮𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀦 𑀑𑀓𑀸𑀲𑀦𑀺𑀬𑀫𑀦𑀢𑁆𑀣𑀁, 𑀢𑀲𑁆𑀫𑀸 𑀑𑀓𑀸𑀲𑀁 𑀅𑀦𑀺𑀬𑀫𑁂𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲𑁂𑀯 𑀦𑀺𑀬𑀫𑀺𑀢𑀢𑁆𑀢𑀸 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄. ‘‘𑀕𑀸𑀫𑁂𑀬𑁂 𑀯𑀸’’𑀢𑀺𑀆𑀤𑀻𑀲𑀼 𑀧𑀦 𑀑𑀓𑀸𑀲𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸 𑀅𑀜𑁆𑀜𑀢𑁆𑀣 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑁄 𑀯𑀼𑀢𑁆𑀢𑁄.

𑀢𑀼𑀡𑁆𑀟𑁂𑀦𑀸𑀢𑀺 ¶ 𑀔𑀕𑁆𑀕𑀓𑁄𑀝𑀺𑀬𑀸. 𑀣𑀭𑀼𑀦𑀸𑀢𑀺 𑀔𑀕𑁆𑀕𑀫𑀼𑀝𑁆𑀞𑀺𑀦𑀸.

‘‘𑀏𑀢𑀁 𑀕𑀘𑁆𑀙𑀦𑁆𑀢’’𑀦𑁆𑀢𑀺 𑀕𑀫𑀦𑁂𑀦 𑀧𑀼𑀕𑁆𑀕𑀮𑁄𑀯 𑀦𑀺𑀬𑀫𑀺𑀢𑁄, 𑀦 𑀇𑀭𑀺𑀬𑀸𑀧𑀣𑁄. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄’’𑀢𑀺. ‘‘𑀕𑀘𑁆𑀙𑀦𑁆𑀢𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀇𑀭𑀺𑀬𑀸𑀧𑀣𑁄 𑀦𑀺𑀬𑀫𑀺𑀢𑁄. 𑀢𑁂𑀦𑀸𑀳 ‘‘𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀻’’𑀢𑀺.

‘‘𑀤𑀻𑀖𑀁 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑀻𑀖𑀲𑀡𑁆𑀞𑀸𑀦𑀸𑀦𑀁 𑀩𑀳𑀼𑀪𑀸𑀯𑀢𑁄 𑀇𑀢𑁆𑀣𑀦𑁆𑀦𑀸𑀫𑀁 𑀏𑀯𑀭𑀽𑀧𑀜𑁆𑀘 𑀤𑀻𑀖𑀦𑁆𑀢𑀺 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀮𑀓𑁆𑀔𑀡𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀺𑀜𑁆𑀘𑀺 𑀢𑀸𑀤𑀺𑀲𑀁 𑀫𑀸𑀭𑁂𑀢𑀻’’𑀢𑀺. 𑀏𑀢𑁆𑀣 𑀘 ‘‘𑀘𑀺𑀢𑁆𑀢𑁂𑀦 𑀩𑀳𑀽𑀲𑀼 𑀤𑀻𑀖𑀲𑀡𑁆𑀞𑀸𑀦𑁂𑀲𑀼 𑀏𑀓𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀯𑀸𑀘𑀸𑀬 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀢𑀸𑀤𑀺𑀲𑁂 𑀫𑀸𑀭𑀺𑀢𑁂 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀯𑀤𑀦𑁆𑀢𑀺. 𑀧𑀭𑀧𑀸𑀡𑀺𑀫𑁆𑀳𑀺 𑀧𑀸𑀡𑀲𑀜𑁆𑀜𑀺𑀢𑀸𑀮𑀓𑁆𑀔𑀡𑀲𑁆𑀲 𑀅𑀗𑁆𑀕𑀲𑁆𑀲 𑀅𑀪𑀸𑀯𑀢𑁄 𑀦𑁂𑀯𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀆𑀳 ‘‘𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀻’’𑀢𑀺. 𑀬𑀤𑀺 𑀏𑀯𑀁 𑀑𑀓𑀸𑀲𑀦𑀺𑀬𑀫𑁂 𑀲𑀢𑀺 𑀓𑀣𑀁 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀑𑀓𑀸𑀲𑀁 𑀦𑀺𑀬𑀫𑁂𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀑𑀓𑀸𑀲𑀜𑁆𑀳𑀺 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀫𑀸𑀭𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀬𑀁 𑀧𑀦 𑀢𑀤𑀸 𑀢𑀢𑁆𑀣 𑀦𑀢𑁆𑀣𑀺, 𑀢𑀲𑁆𑀫𑀸 𑀑𑀓𑀸𑀲𑁂𑀦 𑀲𑀳 𑀅𑀢𑁆𑀢𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺.

𑀅𑀥𑀺𑀝𑁆𑀞𑀸𑀬𑀸𑀢𑀺 𑀫𑀸𑀢𑀺𑀓𑀸𑀯𑀲𑁂𑀦 𑀆𑀡𑀢𑁆𑀢𑀺𑀓𑀧𑀬𑁄𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀽𑀢𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀢𑀸𑀯 𑀤𑀼𑀓𑁆𑀓𑀝𑀦𑁆𑀢𑀺 𑀲𑀘𑁂 𑀲𑀸 𑀆𑀡𑀢𑁆𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀕𑀘𑁆𑀙𑀢𑀺, 𑀆𑀘𑀭𑀺𑀬𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀤𑀼𑀓𑁆𑀓𑀝𑀁. 𑀲𑀘𑁂 ¶ 𑀧𑀦 𑀲𑀸 𑀆𑀡𑀢𑁆𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀘𑁆𑀙𑀢𑀺, 𑀬𑀁 𑀧𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀢𑀤𑁂𑀯 𑀳𑁄𑀢𑀺. 𑀅𑀣 𑀲𑁄 𑀢𑀁 𑀅𑀯𑀲𑁆𑀲𑀁 𑀖𑀸𑀢𑁂𑀢𑀺, 𑀬𑀁 𑀧𑀭𑀢𑁄 ‘‘𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀇𑀫𑀲𑁆𑀲 𑀢𑀗𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀆𑀘𑀭𑀺𑀬𑁂𑀦 𑀧𑀦 𑀳𑁂𑀝𑁆𑀞𑀸 𑀅𑀤𑀺𑀦𑁆𑀦𑀸𑀤𑀸𑀦𑀓𑀣𑀸𑀬𑀁 (𑀧𑀸𑀭𑀸. 𑁧𑁨𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀬𑀫𑀢𑁆𑀣𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀇𑀥 𑀦 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀢𑀸𑀯 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀲𑀸 𑀆𑀡𑀢𑁆𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀘𑁆𑀙𑀢𑀺, 𑀬𑀁 𑀧𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀢𑀤𑁂𑀯 𑀳𑁄𑀢𑀺. 𑀅𑀣 𑀢𑀁 𑀪𑀡𑁆𑀟𑀁 𑀅𑀯𑀲𑁆𑀲𑀁 𑀳𑀸𑀭𑀺𑀬𑀁 𑀳𑁄𑀢𑀺, 𑀬𑀁 𑀧𑀭𑀢𑁄 ‘𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀇𑀫𑀲𑁆𑀲 𑀢𑀗𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀬𑀁 𑀬𑀼𑀢𑁆𑀢𑀺 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀆𑀭𑁄𑀘𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑁂𑀢𑀺 𑀏𑀢𑁆𑀣 𑀅𑀯𑀲𑁆𑀲𑀁 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀢𑁄 𑀧𑀼𑀩𑁆𑀩𑁂𑀯 𑀆𑀘𑀭𑀺𑀬𑀲𑁆𑀲 ¶ 𑀣𑀼𑀮𑁆𑀮𑀘𑁆𑀘𑀬𑀁, 𑀦 𑀧𑀦 𑀧𑀝𑀺𑀕𑁆𑀕𑀳𑀺𑀢𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀆𑀳 ‘‘𑀫𑀳𑀸𑀚𑀦𑁄 𑀳𑀺 𑀢𑁂𑀦 𑀧𑀸𑀧𑁂 𑀦𑀺𑀬𑁄𑀚𑀺𑀢𑁄’’𑀢𑀺.

𑀫𑀽𑀮𑀝𑁆𑀞𑀲𑁆𑀲𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑀤𑀲𑁆𑀲𑀦𑀫𑀢𑁆𑀢𑀁, 𑀦 𑀧𑀦 𑀢𑀁 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺, 𑀏𑀯𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸𑀢𑀺 𑀯𑀥𑀓𑀲𑁆𑀲 ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀫𑀸𑀭𑀡𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀦 𑀲𑀺𑀬𑀸, 𑀏𑀯𑀁 𑀅𑀦𑁄𑀴𑀸𑀭𑀺𑀓𑀯𑀺𑀲𑀬𑁂𑀧𑀺 𑀢𑀸𑀯 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀭𑀡𑀧𑀝𑀺𑀕𑁆𑀕𑀳𑀡𑁂𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀜𑁆𑀘𑀭𑀺𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺 𑀦𑀺𑀤𑀲𑁆𑀲𑀺𑀢𑀁. ‘‘𑀅𑀳𑁄 𑀯𑀢 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺 𑀏𑀯𑀁 𑀫𑀭𑀡𑀸𑀪𑀺𑀦𑀦𑁆𑀤𑀦𑁂𑀧𑀺 𑀤𑀼𑀓𑁆𑀓𑀝𑁂 𑀲𑀢𑀺 𑀧𑀕𑁂𑀯 𑀫𑀸𑀭𑀡𑀧𑀝𑀺𑀕𑁆𑀕𑀳𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑁂𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀅𑀯𑀥𑀸𑀭𑀡𑁂𑀦 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀇𑀫𑀲𑁆𑀲 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀫𑀽𑀮𑀝𑁆𑀞𑀲𑁆𑀲 𑀦𑀢𑁆𑀣𑁂𑀯 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀇𑀥 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯𑀸𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀥𑀸𑀭𑀡𑁂𑀦 𑀤𑀲𑁆𑀲𑀺𑀢𑀁, 𑀦 𑀧𑀦 𑀫𑀽𑀮𑀝𑁆𑀞𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀼𑀭𑀺𑀫𑀦𑀬𑁂𑀢𑀺 𑀲𑀫𑀦𑀦𑁆𑀢𑀭𑀸𑀢𑀻𑀢𑁂 𑀅𑀯𑀺𑀲𑀓𑁆𑀓𑀺𑀬𑀤𑀽𑀢𑀦𑀺𑀤𑁆𑀤𑁂𑀲𑁂. 𑀏𑀢𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀓𑀸𑀲𑀸𑀪𑀸𑀯𑁂𑀦𑀸’’𑀢𑀺. 𑀢𑀢𑁆𑀣 𑀫𑀽𑀮𑀝𑁆𑀞𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀯𑀘𑀦𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀢𑁆𑀢𑀼𑀁 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀑𑀓𑀸𑀲𑀸𑀪𑀸𑀯𑁂𑀦 𑀦 𑀯𑀼𑀢𑁆𑀢𑀁, 𑀦 𑀧𑀦 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀆𑀡𑀢𑁆𑀢𑀺𑀓𑁆𑀔𑀡𑁂 ¶ 𑀧𑀼𑀣𑀼𑀚𑁆𑀚𑀦𑁄𑀢𑀺 𑀏𑀢𑁆𑀣 𑀅𑀦𑀸𑀕𑀢𑁂 𑀯𑁄𑀭𑁄𑀧𑁂𑀢𑀩𑁆𑀩𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀅𑀢𑁆𑀣𑀲𑀸𑀥𑀺𑀓𑀘𑁂𑀢𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 𑀅𑀭𑀳𑀦𑁆𑀢𑀖𑀸𑀢𑀓𑁄 𑀚𑀸𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀽𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭𑁫. 𑀲𑀬𑀁 𑀲𑀗𑁆𑀖𑀢𑁆𑀣𑁂𑀭𑀢𑁆𑀢𑀸 ‘‘𑀉𑀧𑀝𑁆𑀞𑀸𑀦𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀬𑁄 𑀓𑁄𑀘𑀺 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀁 𑀥𑀸𑀭𑁂𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑀢𑁆𑀯𑀸 𑀓𑁂𑀯𑀮𑀁 𑀫𑀭𑀡𑀸𑀪𑀺𑀦𑀦𑁆𑀤𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀘𑁄𑀭𑀸𑀧𑀺 𑀦𑀸𑀫 𑀢𑀁 𑀦 𑀳𑀦𑀦𑁆𑀢𑀻’’𑀢𑀺𑀆𑀤𑀺𑀯𑀸𑀘𑀸𑀲𑀼𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀅𑀬𑀫𑀢𑁆𑀣𑁄 𑀏𑀢𑁂𑀦 𑀯𑀼𑀢𑁆𑀢𑁄𑀢𑀺 𑀬𑀣𑀸 𑀲𑁄 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀓𑁆𑀬𑀪𑁂𑀤𑀦𑁆𑀢𑀺 𑀯𑀘𑀻𑀪𑁂𑀤𑀁. 𑀤𑁆𑀯𑀺𑀦𑁆𑀦𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀤𑁆𑀯𑁂 𑀉𑀤𑁆𑀤𑀺𑀲𑁆𑀲, 𑀤𑁆𑀯𑀺𑀦𑁆𑀦𑀁 𑀯𑀸 𑀫𑀭𑀡𑀁 𑀉𑀤𑁆𑀤𑀺𑀲𑁆𑀲. 𑀉𑀪𑁄 𑀉𑀤𑁆𑀤𑀺𑀲𑁆𑀲 𑀫𑀭𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀬 𑀏𑀓𑀢𑁆𑀢𑁂𑀧𑀺 ‘‘𑀤𑁆𑀯𑁂 𑀧𑀸𑀡𑀸𑀢𑀺𑀧𑀸𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑀢𑁄 𑀩𑀮𑀯𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀲𑀫𑀦𑀦𑁆𑀢𑀭𑀁 𑀧𑀯𑀢𑁆𑀢𑀺𑀬𑀁 𑀅𑀦𑁂𑀓𑀸𑀲𑀼𑀧𑀺 𑀚𑀸𑀢𑀻𑀲𑀼 𑀅𑀧𑀭𑀸𑀧𑀭𑀺𑀬𑀘𑁂𑀢𑀦𑀸𑀯𑀲𑁂𑀦 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀢𑁄 𑀫𑀳𑀸𑀯𑀺𑀧𑀸𑀓𑀢𑁆𑀢𑀸 ‘‘𑀅𑀓𑀼𑀲𑀮𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀩𑀳𑀽 𑀉𑀤𑁆𑀤𑀺𑀲𑁆𑀲 𑀫𑀭𑀡𑀲𑀁𑀯𑀡𑁆𑀡𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀦𑁆𑀢𑀺 ¶ ‘‘𑀲𑀻𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀧𑀸𑀢𑁂 𑀯𑀸 𑀧𑀧𑀢𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀆𑀭𑁄𑀘𑀺𑀢𑀫𑀢𑁆𑀢𑁂𑀢𑀺 𑀯𑀼𑀢𑁆𑀢𑀫𑀢𑁆𑀢𑁂. 𑀬𑀣𑀸 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘 𑀓𑀺𑀘𑁆𑀘𑀯𑀲𑁂𑀦 𑀇𑀚𑁆𑀛𑀦𑁆𑀢𑀺, 𑀏𑀯𑀁 𑀘𑁂𑀢𑀦𑀸𑀬 𑀏𑀓𑀢𑁆𑀢𑁂𑀧𑀺 𑀓𑀺𑀘𑁆𑀘𑀯𑀲𑁂𑀦 𑀅𑀦𑁂𑀓𑀸 𑀧𑀸𑀡𑀸𑀢𑀺𑀧𑀸𑀢𑀸 𑀇𑀚𑁆𑀛𑀦𑁆𑀢𑀻𑀢𑀺 𑀆𑀳 ‘‘𑀢𑀢𑁆𑀢𑀓𑀸 𑀧𑀸𑀡𑀸𑀢𑀺𑀧𑀸𑀢𑀸’’𑀢𑀺. 𑀬𑀣𑀸 𑀳𑀺 𑀅𑀢𑁆𑀢𑀸𑀦𑀁 𑀲𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑀲𑁆𑀲 ‘‘𑀲𑀢𑀁 𑀳𑁄𑀫𑀺 𑀲𑀢𑀁 𑀳𑁄𑀫𑀻’’𑀢𑀺 𑀓𑀢𑀧𑀭𑀺𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁 𑀲𑀢𑀦𑁆𑀢𑁄𑀕𑀥𑀸𑀦𑀁 𑀯𑀡𑁆𑀡𑁂𑀲𑀼 𑀏𑀓𑀲𑁆𑀲 𑀯𑀡𑁆𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀧𑀺 𑀲𑀢𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀬𑀣𑀸 𑀘 𑀏𑀓𑀲𑁆𑀲 𑀫𑀭𑀡𑁂 𑀧𑀯𑀢𑁆𑀢𑀫𑀸𑀦𑀸𑀧𑀺 𑀯𑀥𑀓𑀘𑁂𑀢𑀦𑀸 𑀲𑀓𑀮𑀲𑀭𑀻𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀺𑀭𑀼𑀚𑁆𑀛𑀫𑀸𑀦𑀜𑁆𑀘 𑀲𑀓𑀮𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀮𑀫𑁆𑀩𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀞𑀸𑀦𑀧𑁆𑀧𑀢𑁆𑀢𑀁 𑀏𑀓𑀤𑁂𑀲𑀧𑁆𑀧𑀯𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀪𑀽𑀢𑀁 𑀲𑀓𑀮𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀏𑀯𑀫𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀯𑀥𑀓𑀘𑁂𑀢𑀦𑀸𑀬 𑀫𑀸𑀭𑁂𑀢𑀼𑀓𑀸𑀫𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀲𑀢𑁆𑀢𑁂𑀲𑀼 𑀏𑀓𑀲𑁆𑀲𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀆𑀭𑀫𑁆𑀫𑀡𑁂 𑀓𑀢𑁂𑀧𑀺 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀩𑁆𑀩𑁂𑀧𑀺 𑀫𑀸𑀭𑀺𑀢𑀸𑀯 𑀳𑁄𑀦𑁆𑀢𑀺.

𑁧𑁭𑁬. 𑀬𑁂𑀲𑀁 ¶ 𑀳𑀢𑁆𑀣𑀢𑁄𑀢𑀺 𑀬𑁂𑀲𑀁 𑀜𑀸𑀢𑀓𑀧𑀯𑀸𑀭𑀺𑀢𑀸𑀦𑀁 𑀳𑀢𑁆𑀣𑀢𑁄. 𑀢𑁂𑀲𑀁 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀢𑁂𑀦 𑀓𑀢𑀧𑀬𑁄𑀕𑀲𑁆𑀲 𑀧𑀼𑀦 𑀧𑀸𑀓𑀢𑀺𑀓𑀪𑀸𑀯𑀸𑀧𑀸𑀤𑀦𑀁 𑀅𑀯𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. ‘‘𑀫𑀽𑀮𑁂𑀦 𑀓𑀻𑀢𑀁 𑀧𑀦 𑀧𑁄𑀢𑁆𑀣𑀓𑀁 𑀧𑁄𑀢𑁆𑀣𑀓𑀲𑀸𑀫𑀺𑀓𑀸𑀦𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀺𑀬𑁂𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀲𑀘𑁂 𑀧𑁄𑀢𑁆𑀣𑀓𑀁 𑀲𑀸𑀫𑀺𑀓𑀸𑀦𑀁 𑀤𑀢𑁆𑀯𑀸 𑀫𑀽𑀮𑀁 𑀦 𑀕𑀡𑁆𑀳𑀸𑀢𑀺, 𑀦 𑀫𑀼𑀘𑁆𑀘𑀢𑀺 𑀅𑀢𑁆𑀢𑀦𑀺𑀬𑀪𑀸𑀯𑀢𑁄 𑀅𑀫𑁄𑀘𑀺𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀩𑀳𑀼𑀥𑀸 𑀧𑀧𑀜𑁆𑀘𑀺𑀢𑀁, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀧𑁄𑀢𑁆𑀣𑀓𑀲𑀸𑀫𑀺𑀓𑀸𑀦𑀜𑁆𑀳𑀺 𑀧𑁄𑀢𑁆𑀣𑀓𑁂 𑀤𑀺𑀦𑁆𑀦𑁂 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀧𑀬𑁄𑀕𑀲𑁆𑀲 𑀦𑀸𑀲𑀺𑀢𑀢𑁆𑀢𑀸 𑀓𑀣𑀁 𑀲𑁄 𑀦 𑀫𑀼𑀘𑁆𑀘𑁂𑀬𑁆𑀬, 𑀦 𑀘 𑀧𑀭𑀺𑀘𑁆𑀘𑀢𑁆𑀢𑀲𑁆𑀲 𑀅𑀢𑁆𑀢𑀦𑀺𑀬𑀪𑀸𑀯𑁄 𑀤𑀺𑀝𑁆𑀞𑁄𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀘𑁂 𑀫𑀽𑀮𑁂𑀦 𑀓𑀻𑀢𑁄 𑀳𑁄𑀢𑀺, 𑀧𑁄𑀢𑁆𑀣𑀓𑀲𑀸𑀫𑀺𑀓𑀸𑀦𑀁 𑀧𑁄𑀢𑁆𑀣𑀓𑀁, 𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢𑀁, 𑀢𑁂𑀲𑀁 𑀫𑀽𑀮𑀁 𑀤𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀧𑁄𑀢𑁆𑀣𑀓𑀦𑀺𑀫𑀺𑀢𑁆𑀢𑀁 𑀫𑀽𑀮𑀲𑁆𑀲 𑀕𑀳𑀺𑀢𑀢𑁆𑀢𑀸 𑀅𑀓𑀧𑁆𑀧𑀺𑀬𑀫𑁂𑀢𑀁. 𑀬𑀤𑀺 𑀳𑀺 𑀧𑁄𑀢𑁆𑀣𑀓𑀲𑀸𑀫𑀺𑀓𑀲𑁆𑀲 𑀧𑁄𑀢𑁆𑀣𑀓𑀁 𑀤𑀢𑁆𑀯𑀸 𑀲𑀬𑀫𑁂𑀯 𑀫𑀽𑀮𑀁 𑀕𑀡𑁆𑀳𑁂𑀬𑁆𑀬, 𑀅𑀓𑀧𑁆𑀧𑀺𑀬𑀫𑁂𑀯 𑀢𑀁. 𑀅𑀣𑀸𑀧𑀺 𑀧𑁄𑀢𑁆𑀣𑀓𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀸 𑀫𑀽𑀮𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁 𑀧𑁄𑀢𑁆𑀣𑀓𑀁 𑀛𑀸𑀧𑁂𑀬𑁆𑀬, 𑀢𑀣𑀸𑀧𑀺 𑀅𑀜𑁆𑀜𑀸 𑀬𑁂𑀦 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑁂 𑀆𑀧𑀢𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀦𑀬𑁄𑀯𑁂𑀢𑁆𑀣 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑁄. ‘‘𑀫𑀭𑀡𑀯𑀡𑁆𑀡𑀁 𑀮𑀺𑀔𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸𑀢𑀺 𑀇𑀤𑀁 𑀢𑀣𑀸 𑀓𑀭𑁄𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀁 𑀧𑀦 𑀅𑀲𑀁𑀯𑀺𑀤𑀳𑀺𑀢𑁆𑀯𑀸𑀧𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀫𑀺𑀁 𑀧𑁄𑀢𑁆𑀣𑀓𑁂 𑀯𑀼𑀢𑁆𑀢𑀯𑀺𑀥𑀺𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯.

𑀧𑀫𑀸𑀡𑁂𑀢𑀺 𑀅𑀢𑁆𑀢𑀦𑀸 𑀲𑀮𑁆𑀮𑀓𑁆𑀔𑀺𑀢𑁂 𑀧𑀫𑀸𑀡𑁂. 𑀢𑀘𑁆𑀙𑁂𑀢𑁆𑀯𑀸𑀢𑀺 𑀉𑀦𑁆𑀦𑀢𑀧𑁆𑀧𑀤𑁂𑀲𑀁 𑀢𑀘𑁆𑀙𑁂𑀢𑁆𑀯𑀸. 𑀧𑀁𑀲𑀼𑀧𑀘𑁆𑀙𑀺𑀦𑁆𑀢𑀺 𑀲𑀩𑁆𑀩𑀦𑁆𑀢𑀺𑀫𑀁 𑀧𑀁𑀲𑀼𑀧𑀘𑁆𑀙𑀺𑀁. ‘‘𑀏𑀢𑁆𑀢𑀓𑀁 𑀅𑀮’’𑀦𑁆𑀢𑀺 𑀦𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀩𑁆𑀩𑀦𑁆𑀢𑀺𑀫𑀧𑀬𑁄𑀕𑀲𑀸𑀥𑀺𑀓𑀸 𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 ¶ . 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸𑀢𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑁄 𑀲𑀼𑀢𑁆𑀢𑀦𑁆𑀢𑀪𑀸𑀡𑀓𑀸. 𑀫𑀳𑀸𑀅𑀝𑁆𑀞𑀓𑀣𑀸𑀘𑀭𑀺𑀬𑀢𑁆𑀣𑁂𑀭𑁂𑀬𑁂𑀯 𑀲𑀦𑁆𑀥𑀸𑀬 ‘‘𑀯𑀺𑀦𑀬𑀁 𑀢𑁂 𑀦 𑀚𑀸𑀦𑀦𑁆𑀢𑀻𑀢𑀺 𑀉𑀧𑀳𑀸𑀲𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀆𑀯𑀸𑀝𑁂 𑀦𑀺𑀝𑁆𑀞𑀺𑀢𑁂 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀼, 𑀅𑀦𑀺𑀝𑁆𑀞𑀺𑀢𑁂 𑀫𑀸 𑀫𑀭𑀦𑁆𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀓𑀭𑁄𑀦𑁆𑀢𑀁 𑀲𑀦𑁆𑀥𑀸𑀬 𑀲𑀩𑁆𑀩𑀦𑁆𑀢𑀺𑀫𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀸, 𑀫𑀳𑀸𑀧𑀘𑁆𑀘𑀭𑀺𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀲𑀼 𑀧𑀦 𑀧𑀞𑀫𑀧𑁆𑀧𑀳𑀸𑀭𑀢𑁄 𑀧𑀝𑁆𑀞𑀸𑀬 ‘‘𑀇𑀫𑀲𑁆𑀫𑀺𑀁 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀓𑀭𑁄𑀦𑁆𑀢𑀲𑁆𑀲 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀬𑁄𑀕𑁂 𑀓𑀢𑁂 𑀢𑀢𑁆𑀣 𑀧𑀢𑀺𑀢𑀸 𑀫𑀭𑀦𑁆𑀢𑀺, 𑀢𑀁𑀢𑀁𑀧𑀬𑁄𑀕𑀲𑀸𑀥𑀺𑀓𑀁 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀁 ¶ 𑀲𑀦𑁆𑀥𑀸𑀬 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀓𑀼𑀤𑀸𑀮𑀧𑁆𑀧𑀳𑀸𑀭𑁂 𑀤𑀺𑀦𑁆𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀓𑀣𑀸𑀯𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑁄𑀥𑁄 𑀬𑀼𑀢𑁆𑀢𑁄. 𑀅𑀣 𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀏𑀓𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀅𑀯𑀽𑀧𑀲𑀦𑁆𑀢𑁂𑀦𑁂𑀯 𑀧𑀬𑁄𑀕𑁂𑀦 𑀔𑀡𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀦𑁆𑀢𑀁 𑀲𑀦𑁆𑀥𑀸𑀬 𑀲𑀩𑁆𑀩𑀦𑁆𑀢𑀺𑀫𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀸, 𑀇𑀢𑀭𑀸𑀲𑀼 𑀧𑀦 ‘‘𑀇𑀫𑀲𑁆𑀫𑀺𑀁 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀽’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀓𑀺𑀜𑁆𑀘𑀺 𑀔𑀡𑀺𑀢𑁆𑀯𑀸 𑀅𑀧𑀭𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀢𑀣𑁂𑀯 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀔𑀡𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀝𑁆𑀞𑀓𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑁄𑀥𑁄 𑀬𑀼𑀢𑁆𑀢𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀚𑀸𑀦𑀺𑀢𑁆𑀯𑀸 𑀧𑀓𑁆𑀔𑀮𑀺𑀢𑁆𑀯𑀸 𑀯𑀸. 𑀅𑀭𑀳𑀦𑁆𑀢𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑁂𑀳𑀺 𑀧𑀸𑀢𑀺𑀬𑀫𑀸𑀦𑀸𑀦𑀁 𑀅𑀫𑀭𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀅𑀭𑀳𑀦𑁆𑀢𑀸𑀦𑀁 𑀫𑀭𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀢𑀺 ‘‘𑀫𑀭𑀺𑀢𑀼𑀓𑀸𑀫𑀸 𑀇𑀥 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁂. 𑀢𑀢𑁆𑀣 𑀧𑀢𑀺𑀢𑀁 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀇𑀫𑀲𑁆𑀫𑀺𑀁 𑀆𑀯𑀸𑀝𑁂𑀬𑁂𑀯 𑀫𑀭𑀦𑁆𑀢𑀽𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀫𑀸𑀭𑀺𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀣𑁄𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀕𑀳𑁂𑀢𑁆𑀯𑀸 𑀫𑀸𑀭𑀺𑀢𑁂 𑀆𑀯𑀸𑀝𑀲𑁆𑀫𑀺𑀁𑀬𑁂𑀯 𑀅𑀕𑁆𑀕𑀳𑀺𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀢𑀺𑀢𑀧𑁆𑀧𑀬𑁄𑀕𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀳𑁂𑀢𑀼𑀲𑁆𑀲 𑀇𑀥𑀸𑀧𑀺 𑀲𑀫𑁆𑀪𑀯𑀢𑁄 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀫𑀭𑀺𑀢𑀼𑀓𑀸𑀫𑀸 𑀯𑀸𑀢𑀺𑀧𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀲𑀫𑁆𑀪𑀯𑀢𑁄 𑀑𑀧𑀧𑀸𑀢𑀺𑀓𑁂 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 𑀫𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀢𑀦𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀘𑁂? 𑀑𑀧𑀧𑀸𑀢𑀺𑀓𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀬𑁂𑀯 𑀧𑀢𑀦𑀦𑁆𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀬𑀲𑁆𑀫𑀸 𑀫𑀸𑀢𑀼𑀬𑀸 𑀧𑀢𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑀸𑀬 𑀫𑀢𑀸𑀬 𑀲𑁄 𑀫𑀸𑀢𑀼𑀖𑀸𑀢𑀓𑁄 𑀳𑁄𑀢𑀺, 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀧𑀼𑀭𑀺𑀲𑀖𑀸𑀢𑀓𑁄, 𑀢𑀲𑁆𑀫𑀸 𑀧𑀢𑀺𑀢𑀲𑁆𑀲𑁂𑀯 𑀯𑀲𑁂𑀦 𑀆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀢𑀦𑀭𑀽𑀧𑀁 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀅𑀓𑀸𑀭𑀡𑀁. ‘‘𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀢𑀢𑁆𑀣 𑀘 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂𑀧𑀺 𑀲𑁄 𑀏𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀪𑀯𑀗𑁆𑀕𑀧𑁆𑀧𑀩𑀦𑁆𑀥𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑁄 𑀘, 𑀦 𑀅𑀜𑁆𑀜𑁄𑀢𑀺 ‘‘𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁄 𑀳𑀺 𑀮𑀺𑀗𑁆𑀕𑁂 𑀅𑀧𑀭𑀺𑀯𑀢𑁆𑀢𑁂 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀪𑀯𑀗𑁆𑀕𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑁄 ¶ , 𑀲𑁄 𑀏𑀯 𑀧𑀭𑀺𑀯𑀢𑁆𑀢𑁂𑀧𑀺 𑀮𑀺𑀗𑁆𑀕𑁂 𑀢𑀁𑀬𑁂𑀯 𑀘 𑀉𑀧𑀸𑀤𑀸𑀬 𑀏𑀓𑀚𑀸𑀢𑀺𑀲𑀫𑀜𑁆𑀜𑀸. 𑀦 𑀘𑁂𑀢𑁆𑀣 𑀪𑀸𑀯𑀓𑀮𑀸𑀧𑀕𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸 𑀢𑀤𑀜𑁆𑀜𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀜𑁆𑀳𑀺 𑀢𑀢𑁆𑀣 𑀅𑀯𑀺𑀘𑁆𑀙𑁂𑀤𑀯𑀼𑀢𑁆𑀢𑀺𑀬𑀸 𑀧𑀩𑀦𑁆𑀥𑀯𑁄𑀳𑀸𑀭𑀁 𑀮𑀪𑀢𑀺, 𑀇𑀢𑀭𑀫𑁆𑀧𑀺 ¶ 𑀯𑀸 𑀪𑀸𑀯𑀸𑀦𑀼𑀧𑀸𑀮𑀢𑀸𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀦𑁄𑀓𑀸𑀲𑀸𑀯 𑀘𑁄𑀤𑀦𑀸. 𑀢𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀧𑀺 𑀮𑀺𑀗𑁆𑀕𑁂 𑀢𑀲𑁆𑀲𑁂𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀢𑁄 𑀯𑁄𑀳𑀸𑀭𑀪𑁂𑀤𑀢𑁄 𑀲𑁄 𑀇𑀢𑁆𑀣𑀺𑀖𑀸𑀢𑀓𑁄 𑀯𑀸 𑀳𑁄𑀢𑀼 𑀧𑀼𑀭𑀺𑀲𑀖𑀸𑀢𑀓𑁄 𑀯𑀸, 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀇𑀥 𑀧𑀦 𑀬𑀁𑀬𑀁𑀚𑀸𑀢𑀺𑀓𑀸 𑀲𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂 𑀫𑀭𑀡𑀲𑀫𑀬𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀚𑀸𑀢𑀺𑀭𑀽𑀧𑁂𑀦𑁂𑀯 𑀫𑀭𑀦𑁆𑀢𑀺, 𑀦𑀸𑀜𑁆𑀜𑀭𑀽𑀧𑁂𑀦, 𑀚𑀸𑀢𑀺𑀯𑀲𑁂𑀦𑁂𑀯 𑀘 𑀧𑀸𑀘𑀺𑀢𑁆𑀢𑀺𑀬𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀬𑀓𑁆𑀔𑀭𑀽𑀧𑁂𑀦 𑀯𑀸 𑀧𑁂𑀢𑀭𑀽𑀧𑁂𑀦 𑀯𑀸 𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀢𑀺𑀭𑀘𑁆𑀙𑀸𑀦𑀭𑀽𑀧𑁂𑀦 𑀫𑀭𑀢𑀺, 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀢𑁆𑀢𑀁, 𑀦 𑀣𑀼𑀮𑁆𑀮𑀘𑁆𑀘𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑁂𑀯 𑀫𑀢𑀢𑁆𑀢𑀸. 𑀢𑁂𑀦𑁂𑀯 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀫𑀭𑀡𑀭𑀽𑀧𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀯 𑀘 𑀯𑀸𑀤𑁄 𑀬𑀼𑀢𑁆𑀢𑀢𑀭𑁄, 𑀢𑁂𑀦𑁂𑀯 𑀲𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄.

𑀇𑀫𑀺𑀦𑀸𑀯 𑀦𑀬𑁂𑀦 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀦𑀸𑀕𑀲𑀼𑀧𑀡𑁆𑀡𑀲𑀤𑀺𑀲𑁂 𑀢𑀺𑀭𑀘𑁆𑀙𑀸𑀦𑀕𑀢𑁂 𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀽𑀧𑁂𑀦 𑀫𑀢𑁂 𑀧𑀸𑀘𑀺𑀢𑁆𑀢𑀺𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂 𑀧𑀸𑀴𑀺𑀬𑀁 ‘‘𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸 𑀢𑀲𑁆𑀫𑀺𑀁 𑀧𑀢𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺 𑁋 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸𑀢𑀺 𑀧𑀞𑀫𑀁 𑀲𑀓𑀭𑀽𑀧𑁂𑀦𑁂𑀯 𑀞𑀺𑀢𑁂 𑀬𑀓𑁆𑀔𑀧𑁂𑀢𑁂 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀜𑁆𑀜𑀭𑀽𑀧𑁂𑀦𑀧𑀺 𑀞𑀺𑀢𑁂 𑀢𑁂𑀬𑁂𑀯 𑀬𑀓𑁆𑀔𑀧𑁂𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀢𑀸𑀤𑀺𑀲𑀁 𑀢𑀺𑀭𑀘𑁆𑀙𑀸𑀦𑀕𑀢𑀁 𑀯𑀺𑀲𑀼𑀁 𑀤𑀲𑁆𑀲𑁂𑀢𑀼𑀁. 𑀢𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀯𑀺𑀕𑁆𑀕𑀳𑁄 𑀯𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 𑀢𑀻𑀲𑀼𑀧𑀺 ‘‘𑀧𑀸𑀴𑀺𑀬𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀦 𑀞𑀺𑀢𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀓𑀣𑀺𑀢𑀁. 𑀬𑀓𑁆𑀔𑀭𑀽𑀧𑀧𑁂𑀢𑀭𑀽𑀧𑁂𑀦 𑀫𑀢𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀫𑀭𑀡𑀭𑀽𑀧𑀲𑁆𑀲𑁂𑀯 𑀧𑀫𑀸𑀡𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀅𑀢𑀺𑀤𑀺𑀲𑁆𑀲𑀢𑀺.

𑀫𑀼𑀥𑀸𑀢𑀺 𑀅𑀫𑀽𑀮𑁂𑀦, 𑀓𑀺𑀜𑁆𑀘𑀺 𑀫𑀽𑀮𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀦𑀺𑀤𑁆𑀤𑁄𑀲𑁄𑀢𑀺 𑀢𑁂𑀦 𑀢𑀢𑁆𑀣 𑀓𑀢𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀧𑀦 𑀲𑁄𑀧𑀺 𑀢𑀢𑁆𑀣 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀭𑁄𑀢𑀺, 𑀦 𑀫𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀁 𑀧𑀢𑀺𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀦𑁆𑀢𑀺 𑀏𑀯𑀁 𑀫𑀬𑀸 𑀓𑀢𑁂𑀢𑀺 𑀅𑀢𑁆𑀣𑁄. 𑀦 𑀦𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀤𑀲𑁆𑀲𑀦𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀦 𑀧𑀮𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂𑀢𑀺 𑀫𑀽𑀮𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀧𑀘𑁆𑀙𑀺𑀫𑁄𑀧𑀺 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀏𑀯𑀁 𑀓𑀭𑁄𑀢𑀺, 𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀧𑀁𑀲𑀼𑀫𑁆𑀳𑀺 𑀧𑀢𑀺𑀢𑁆𑀯𑀸 𑀫𑀭𑀢𑀻𑀢𑀺 ¶ 𑀅𑀪𑀺𑀦𑀯𑀧𑀽𑀭𑀺𑀢𑁂 ¶ 𑀧𑀁𑀲𑀼𑀫𑁆𑀳𑀺 𑀧𑀸𑀤𑁂 𑀧𑀯𑁂𑀲𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀧𑀢𑀺𑀢𑁆𑀯𑀸 𑀫𑀭𑀢𑀺. 𑀚𑀸𑀢𑀧𑀣𑀯𑀻 𑀚𑀸𑀢𑀸𑀢𑀺 𑀇𑀤𑀁 𑀲𑀩𑁆𑀩𑀣𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀣𑀺𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀁𑀲𑀼𑀦𑀸 𑀧𑀽𑀭𑁂𑀦𑁆𑀢𑁂𑀦 𑀧𑀦 𑀧𑀸𑀤𑀤𑀡𑁆𑀟𑀸𑀤𑀻𑀳𑀺 𑀫𑀤𑁆𑀤𑀦𑀢𑀸𑀴𑀦𑀸𑀤𑀺𑀦𑀸 𑀲𑀼𑀝𑁆𑀞𑀼𑀢𑀭𑀁 𑀣𑀺𑀭𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸 𑀧𑀓𑀢𑀺𑀧𑀣𑀯𑀺𑀬𑀸 𑀦𑀺𑀩𑁆𑀩𑀺𑀲𑁂𑀲𑁂 𑀓𑀢𑁂 𑀚𑀸𑀢𑀧𑀣𑀯𑀻𑀮𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑁂𑀧𑀺 𑀫𑀼𑀘𑁆𑀘𑀢𑀺𑀬𑁂𑀯. 𑀑𑀧𑀸𑀢𑀁 𑀳𑀭𑀢𑀻𑀢𑀺 𑀏𑀢𑁆𑀣 𑀧𑁄𑀓𑁆𑀔𑀭𑀡𑀻𑀲𑀤𑀺𑀲𑀢𑁆𑀢𑀸 𑀫𑀼𑀘𑁆𑀘𑀢𑀺.

𑀳𑀢𑁆𑀣𑀸 𑀫𑀼𑀢𑁆𑀢𑀫𑀢𑁆𑀢𑁂𑀢𑀺 𑀑𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂. 𑀯𑀢𑀺𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀬𑀤𑀺 𑀲𑁄 𑀧𑀸𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀦 𑀓𑀭𑁄𑀢𑀺, 𑀅𑀢𑁆𑀢𑀦𑀸 𑀓𑀢𑀯𑀢𑀺𑀬𑀸 𑀯𑀺𑀤𑁆𑀥𑀁𑀲𑀺𑀢𑀸𑀬 𑀫𑀼𑀘𑁆𑀘𑀢𑀺. 𑀣𑀤𑁆𑀥𑀢𑀭𑀁 𑀯𑀸 𑀧𑀸𑀲𑀬𑀝𑁆𑀞𑀺𑀁 𑀞𑀧𑁂𑀢𑀻𑀢𑀺 𑀣𑀺𑀭𑀪𑀸𑀯𑀢𑁆𑀣𑀁 𑀅𑀧𑀭𑀸𑀬 𑀧𑀸𑀲𑀬𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀢𑀫𑁂𑀯 𑀯𑀸 𑀲𑀺𑀣𑀺𑀮𑀪𑀽𑀢𑀁 𑀣𑀤𑁆𑀥𑀢𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀺. 𑀤𑀴𑁆𑀳𑀢𑀭𑀁 𑀯𑀸 𑀣𑀺𑀭𑀢𑀭𑀁 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀔𑀸𑀡𑀼𑀓𑀦𑁆𑀢𑀺 𑀧𑀸𑀲𑀬𑀝𑁆𑀞𑀺𑀩𑀦𑁆𑀥𑀦𑀔𑀸𑀡𑀼𑀓𑀁. 𑀲𑀩𑁆𑀩𑀢𑁆𑀣𑁂𑀯 𑀫𑀸𑀭𑀡𑀢𑁆𑀣𑀸𑀬 𑀓𑀢𑀧𑁆𑀧𑀬𑁄𑀕𑀢𑁆𑀢𑀸 𑀦 𑀫𑀼𑀘𑁆𑀘𑀢𑀺. 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂𑀢𑀺 𑀫𑀽𑀮𑀝𑁆𑀞𑀲𑁆𑀲𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂.

𑀢𑁂𑀦 𑀅𑀮𑀸𑀢𑁂𑀦…𑀧𑁂… 𑀦 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑁂 𑀓𑀢𑀧𑁆𑀧𑀬𑁄𑀕𑀁 𑀯𑀺𑀦𑀸𑀲𑁂𑀢𑁆𑀯𑀸 𑀧𑀘𑁆𑀙𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀧𑀬𑁄𑀕𑁂 𑀓𑀢𑁂𑀧𑀺 𑀦 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸 𑁋 𑀆𑀤𑀺𑀢𑁄𑀬𑁂𑀯 𑀫𑀸𑀭𑀡𑀢𑁆𑀣𑀸𑀬 𑀓𑀢𑀧𑁆𑀧𑀬𑁄𑀕𑀢𑁆𑀢𑀸 𑀓𑀢𑀧𑀭𑀺𑀬𑁄𑀲𑀺𑀢𑀸𑀬 𑀧𑀸𑀲𑀬𑀝𑁆𑀞𑀺𑀬𑀸 𑀢𑀧𑁆𑀧𑀘𑁆𑀘𑀬𑀸 𑀬𑁂 𑀬𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀯𑀲𑁂𑀦 𑀧𑀞𑀫𑀢𑀭𑀁𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀅𑀜𑁆𑀜𑀣𑀸 𑀓𑀢𑁂𑀧𑀺 𑀦 𑀫𑀼𑀘𑁆𑀘𑀢𑀻𑀢𑀺. 𑀭𑀚𑁆𑀚𑀼𑀓𑁂𑀢𑀺 𑀔𑀼𑀤𑁆𑀤𑀓𑀭𑀚𑁆𑀚𑀼𑀓𑁂. 𑀲𑀬𑀁 𑀯𑀝𑁆𑀝𑀺𑀢𑀦𑁆𑀢𑀺 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀯𑀝𑁆𑀝𑀺𑀢𑀁. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀢𑁂 𑀭𑀚𑁆𑀚𑀼𑀓𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸. 𑀕𑀭𑀼𑀓𑀢𑀭𑀁 𑀓𑀭𑁄𑀢𑀻𑀢𑀺 𑀅𑀢𑀺𑀪𑀸𑀭𑀺𑀬𑀁 𑀓𑀭𑁄𑀢𑀺. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀢𑀦𑁆𑀢𑀺 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀓𑀢𑀁.

𑁧𑁭𑁭. 𑀆𑀮𑀫𑁆𑀩𑀦𑀭𑀼𑀓𑁆𑀔𑁄 𑀯𑀸𑀢𑀺 𑀢𑀢𑁆𑀣𑀚𑀸𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀢𑁆𑀣𑀫𑁂𑀯𑀸𑀢𑀺 𑀫𑀸𑀭𑀡𑀢𑁆𑀣𑀫𑁂𑀯. 𑀯𑀺𑀲𑀫𑀡𑁆𑀟𑀮𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀆𑀮𑀺𑀢𑁆𑀢𑀁 𑀯𑀺𑀲𑀫𑀡𑁆𑀟𑀮𑀁. 𑀯𑀢𑁆𑀯𑀸 𑀅𑀲𑀺𑀁 𑀉𑀧𑀦𑀺𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣 𑀫𑀼𑀔𑁂𑀦 𑀅𑀯𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀧𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 ‘‘𑀬𑁂𑀲𑀁 𑀳𑀢𑁆𑀣𑀢𑁄 𑀫𑀽𑀮𑀁 𑀕𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸. 𑀲𑀭𑀻𑀭𑀲𑁆𑀲 𑀯𑀺𑀭𑀽𑀧𑀪𑀸𑀯𑀓𑀭𑀡𑀢𑁄 𑀓𑀼𑀝𑁆𑀞𑀸𑀤𑀺 𑀯𑀺𑀲𑀪𑀸𑀕𑀭𑁄𑀕𑁄 𑀦𑀸𑀫, 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀅𑀲𑀪𑀸𑀕𑀢𑁆𑀢𑀸 𑀅𑀦𑀦𑀼𑀓𑀽𑀮𑀢𑁆𑀢𑀸 𑀕𑀡𑁆𑀟𑀧𑀺𑀴𑀓𑀸𑀤𑀺 𑀬𑁄 𑀓𑁄𑀘𑀺 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀦𑀻𑀓𑁄 𑀯𑀺𑀲𑀪𑀸𑀕𑀭𑁄𑀕𑁄.

𑁧𑁭𑁮. 𑀧𑀭𑀁 ¶ 𑀯𑀸 𑀅𑀫𑀦𑀸𑀧𑀭𑀽𑀧𑀦𑁆𑀢𑀺 𑀏𑀢𑁆𑀣 𑀅𑀫𑀦𑀸𑀧𑀁 𑀭𑀽𑀧𑀁 𑀏𑀢𑀲𑁆𑀲𑀸𑀢𑀺 𑀅𑀫𑀦𑀸𑀧𑀭𑀽𑀧𑁄𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 ¶ 𑀤𑀝𑁆𑀞𑀩𑁆𑀩𑁄. 𑀫𑀦𑀸𑀧𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁂𑀦 𑀫𑀦𑀸𑀧𑀺𑀓𑀁 𑀭𑀽𑀧𑀁 𑀉𑀧𑀲𑀁𑀳𑀭𑀢𑀻𑀢𑀺 𑀏𑀢𑁆𑀣 𑀧𑀭𑀁 𑀯𑀸 𑀫𑀦𑀸𑀧𑀭𑀽𑀧𑀁 𑀢𑀲𑁆𑀲 𑀲𑀫𑀻𑀧𑁂 𑀞𑀧𑁂𑀢𑀺, 𑀅𑀢𑁆𑀢𑀦𑀸 𑀯𑀸 𑀫𑀦𑀸𑀧𑀺𑀬𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄 𑀢𑀺𑀝𑁆𑀞𑀢𑀻𑀢𑀺𑀆𑀤𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 𑁋

‘‘𑀫𑀫𑀸𑀮𑀸𑀪𑁂𑀦 𑀏𑀲𑀺𑀢𑁆𑀣𑀻, 𑀫𑀭𑀢𑀽𑀢𑀺 𑀲𑀫𑀻𑀧𑀕𑁄;

𑀤𑀼𑀝𑁆𑀞𑀘𑀺𑀢𑁆𑀢𑁄 𑀲𑀘𑁂 𑀬𑀸𑀢𑀺, 𑀳𑁄𑀢𑀺 𑀲𑁄 𑀇𑀢𑁆𑀣𑀺𑀫𑀸𑀭𑀓𑁄.

‘‘𑀪𑀺𑀓𑁆𑀔𑀢𑁆𑀣𑀸𑀬 𑀲𑀘𑁂 𑀬𑀸𑀢𑀺, 𑀚𑀸𑀦𑀦𑁆𑀢𑁄𑀧𑀺 𑀦 𑀫𑀸𑀭𑀓𑁄;

𑀅𑀦𑀢𑁆𑀣𑀺𑀓𑁄 𑀳𑀺 𑀲𑁄 𑀢𑀲𑁆𑀲𑀸, 𑀫𑀭𑀡𑁂𑀦 𑀉𑀧𑁂𑀓𑁆𑀔𑀓𑁄’’𑀢𑀺.

𑀅𑀧𑀭𑀫𑁆𑀧𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 𑁋

‘‘𑀯𑀺𑀬𑁄𑀕𑁂𑀦 𑀘 𑀫𑁂 𑀚𑀸𑀬𑀸, 𑀚𑀦𑀦𑀻 𑀘 𑀦 𑀚𑀻𑀯𑀢𑀺;

𑀇𑀢𑀺 𑀚𑀸𑀦𑀁 𑀯𑀺𑀬𑀼𑀜𑁆𑀚𑀦𑁆𑀢𑁄, 𑀢𑀤𑀢𑁆𑀣𑀻 𑀳𑁄𑀢𑀺 𑀫𑀸𑀭𑀓𑁄.

‘‘𑀧𑀩𑁆𑀩𑀚𑁆𑀚𑀸𑀤𑀺𑀦𑀺𑀫𑀺𑀢𑁆𑀢𑀜𑁆𑀘𑁂, 𑀬𑀸𑀢𑀺 𑀚𑀸𑀦𑀁 𑀦 𑀫𑀸𑀭𑀓𑁄;

𑀅𑀦𑀢𑁆𑀣𑀺𑀓𑁄 𑀳𑀺 𑀲𑁄 𑀢𑁂𑀲𑀁, 𑀫𑀭𑀡𑁂𑀦 𑀉𑀧𑁂𑀓𑁆𑀔𑀓𑁄’’𑀢𑀺.

𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀧𑀲𑀁𑀳𑀭𑀢𑀻𑀢𑀺 ‘‘𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀽’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀁𑀳𑀭𑀢𑀺. 𑀢𑁂𑀦𑁂𑀯 ‘‘𑀲𑀘𑁂 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀢𑀺, 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀢𑀻𑀢𑀺 𑀏𑀢𑁆𑀣 𑀘 𑀧𑀸𑀭𑀸𑀚𑀺𑀓𑀦𑁆𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀼𑀡𑀧𑀕𑀦𑁆𑀥𑀸 𑀘𑀸𑀢𑀺 𑀅𑀳𑀺𑀆𑀤𑀺𑀓𑀼𑀡𑀧𑀸𑀦𑀁 𑀕𑀦𑁆𑀥𑀸. 𑀳𑀁𑀲𑀧𑀼𑀧𑁆𑀨𑀦𑁆𑀢𑀺 𑀳𑀁𑀲𑀸𑀤𑀻𑀦𑀁 𑀧𑀓𑁆𑀔𑀮𑁄𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁧𑁭𑁯. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀇𑀤𑀁 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀉𑀧𑀓𑁆𑀓𑀫𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦𑀸’’𑀢𑀺𑀆𑀤𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀦 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀉𑀧𑀓𑁆𑀓𑀫𑀓𑀭𑀡𑀲𑁆𑀲 𑀅𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀫𑀺𑀦𑀸 𑀅𑀬𑀁 𑀫𑀭𑀺𑀲𑁆𑀲𑀢𑀻’’𑀢𑀺𑀆𑀤𑀺. 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀇𑀤𑀁 𑀉𑀧𑀓𑁆𑀓𑀫𑀁 𑀚𑀸𑀦𑀦𑁆𑀢𑀲𑁆𑀲𑀧𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀫𑀭𑀡𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑁂𑀯 ¶ ¶ 𑀪𑀡𑀢𑀻𑀢𑀺 𑀇𑀫𑀺𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔𑀩𑀳𑀼𑀮𑀢𑀸𑀬 𑀳𑀺 𑀭𑀸𑀚𑀸𑀦𑁄 𑀳𑀲𑀫𑀸𑀦𑀸𑀧𑀺 ‘‘𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀳𑀸𑀲𑁄 𑀧𑀦 𑀦𑁂𑀲𑀁 𑀅𑀦𑀢𑁆𑀣𑀯𑀽𑀧𑀲𑀫𑀸𑀤𑀺𑀅𑀜𑁆𑀜𑀯𑀺𑀲𑀬𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀏𑀯. 𑀲𑀢𑀺 𑀧𑀦 𑀤𑁄𑀫𑀦𑀲𑁆𑀲𑁂 𑀓𑀣𑀁 𑀢𑀁 𑀦𑀧𑁆𑀧𑀓𑀸𑀲𑀢𑀻𑀢𑀺 𑀆𑀳 ‘‘𑀲𑀼𑀔𑀯𑁄𑀓𑀺𑀡𑁆𑀡𑀢𑁆𑀢𑀸’’𑀢𑀺𑀆𑀤𑀺, 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑁂𑀳𑀺 𑀆𑀓𑀺𑀡𑁆𑀡𑀢𑁆𑀢𑀸 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑁂𑀦 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀢𑀤𑀸 𑀉𑀧𑁆𑀧𑀦𑁆𑀦𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀦𑀧𑁆𑀧𑀓𑀸𑀲𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁮𑁦. 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑁂𑀦 𑀲𑀕𑁆𑀕𑀧𑀸𑀧𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀢𑁆𑀣𑀢𑁄 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸. 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸𑀢𑀺 𑀏𑀯𑀁 𑀅𑀥𑀺𑀧𑁆𑀧𑀸𑀬𑀺𑀦𑁄 𑀫𑀭𑀡𑀢𑁆𑀣𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸. 𑀦 𑀳𑀺 𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑁄𑀳𑀸𑀭𑀯𑀲𑁂𑀦, 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂 𑀓𑀭𑀼𑀡𑀸𑀬 𑀅𑀪𑀸𑀯𑀢𑁄 𑀓𑀸𑀭𑀼𑀜𑁆𑀜𑁂𑀦 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀬𑀼𑀦𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢𑀁, 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀬𑀣𑀸𑀬𑀼𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀬𑀣𑀸𑀦𑀼𑀧𑁆𑀧𑀩𑀦𑁆𑀥𑁂𑀦, 𑀬𑀸𑀯 𑀢𑀲𑁆𑀫𑀺𑀁 𑀪𑀯𑁂 𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑁄 𑀅𑀯𑀺𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀢𑀸𑀯 𑀞𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀲𑀗𑁆𑀓𑀫𑀦𑁆𑀢𑀻𑀢𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀑𑀓𑀸𑀲𑀤𑀸𑀦𑀢𑁆𑀣𑀁 𑀦𑀺𑀲𑀺𑀦𑁆𑀦𑀧𑀸𑀴𑀺𑀬𑀸 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀕𑀘𑁆𑀙𑀦𑁆𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀉𑀧𑀧𑀭𑀺𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀳𑁂𑀝𑁆𑀞𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀲𑀸𑀝𑀓𑀁 𑀯𑀮𑀺 𑀦 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀧𑀝𑀺𑀯𑁂𑀓𑁆𑀔𑀡𑀜𑁆𑀘𑁂𑀤𑀁 𑀕𑀺𑀳𑀻𑀦𑀁 𑀲𑀦𑁆𑀢𑀓𑁂𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀸𑀴𑀺𑀬𑀁 𑀫𑀼𑀲𑀮𑁂 𑀉𑀲𑁆𑀲𑀺𑀢𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀤𑁆𑀯𑀻𑀲𑀼 𑀫𑀼𑀲𑀮𑁂𑀲𑀼 𑀉𑀲𑁆𑀲𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀉𑀤𑀼𑀓𑁆𑀔𑀮𑀪𑀡𑁆𑀟𑀺𑀓𑀦𑁆𑀢𑀺 𑀉𑀤𑀼𑀓𑁆𑀔𑀮𑀢𑁆𑀣𑀸𑀬 𑀆𑀦𑀻𑀢𑀁 𑀤𑀸𑀭𑀼𑀪𑀡𑁆𑀟𑀁. 𑀧𑀝𑀺𑀩𑀤𑁆𑀥𑀦𑁆𑀢𑀺 𑀪𑁄𑀚𑀦𑀧𑀝𑀺𑀩𑀤𑁆𑀥𑀁, 𑀪𑁄𑀚𑀦𑀦𑁆𑀢𑀭𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁮𑁧. 𑀅𑀕𑁆𑀕𑀓𑀸𑀭𑀺𑀓𑀦𑁆𑀢𑀺 ¶ ¶ 𑀏𑀢𑁆𑀣 𑀓𑀸𑀭𑀺𑀓𑀸-𑀲𑀤𑁆𑀤𑀲𑁆𑀲 𑀪𑀸𑀯𑀯𑀘𑀦𑀢𑁆𑀢𑀸 ‘‘𑀅𑀕𑁆𑀕𑀓𑀺𑀭𑀺𑀬’’𑀦𑁆𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸𑀧𑀺 𑀬𑀲𑁆𑀫𑀸 𑀓𑀺𑀭𑀺𑀬𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑀸𑀦𑀲𑀗𑁆𑀔𑀸𑀢𑀸𑀬 𑀅𑀕𑁆𑀕𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀫𑁂𑀯 𑀇𑀥 𑀉𑀧𑀘𑀸𑀭𑀯𑀼𑀢𑁆𑀢𑀺𑀬𑀸 ‘‘𑀅𑀕𑁆𑀕𑀓𑀺𑀭𑀺𑀬𑀸’’𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀞𑀫𑀁 𑀮𑀤𑁆𑀥𑀧𑀺𑀡𑁆𑀟𑀧𑀸𑀢’’𑀦𑁆𑀢𑀺𑀆𑀤𑀺.

𑁧𑁮𑁨-𑁧𑁮𑁩. 𑀤𑀡𑁆𑀟𑀫𑀼𑀕𑁆𑀕𑀭𑀦𑁆𑀢𑀺 𑀦𑀺𑀔𑀸𑀤𑀦𑀫𑀼𑀕𑁆𑀕𑀭𑀁. 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦𑀸𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁄𑀢𑀺 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸 𑀘 𑀅𑀢𑀺𑀯𑀺𑀬 𑀧𑀸𑀓𑀝𑀢𑁆𑀢𑀸 ‘‘𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑀘𑁆𑀙𑀺𑀦𑁆𑀤𑀢𑀻𑀢𑀺 ‘‘𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀺𑀓𑁆𑀔𑁂𑀧𑁄 𑀫𑀸 𑀳𑁄𑀢𑀽’’𑀢𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀝𑀺𑀮𑀸𑀪𑀁. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀆𑀭𑁄𑀘𑁂𑀢𑁆𑀯𑀸. 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀬𑀲𑁆𑀫𑀸 𑀲𑀪𑀸𑀕𑀸𑀦𑀁 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 𑀆𑀭𑁄𑀘𑁂𑀦𑁆𑀢𑀺, 𑀢𑁂 𑀘 𑀪𑀺𑀓𑁆𑀔𑀽 𑀅𑀧𑁆𑀧𑀢𑀺𑀭𑀽𑀧𑀸𑀬 𑀅𑀦𑁂𑀲𑀦𑀸𑀬 𑀧𑀘𑁆𑀘𑀬𑀁 𑀦 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀧𑀭𑀺𑀬𑁂𑀲𑀺𑀢𑀧𑀘𑁆𑀘𑀬𑁂 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀸𑀦𑀜𑁆𑀳𑀺 𑀩𑁆𑀬𑀸𑀓𑀢𑀢𑁆𑀢𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀮𑀪𑀢𑀺. 𑀢𑁂 𑀳𑀺 𑀓𑀧𑁆𑀧𑀺𑀬𑀔𑁂𑀢𑁆𑀢𑀁. 𑀢𑁂𑀦𑁂𑀯 ‘‘𑀲𑀪𑀸𑀕𑀸𑀦𑀜𑁆𑀳𑀺 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 ‘‘𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀅𑀣 𑀯𑀸 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀇𑀤𑀁 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀥𑀺𑀕𑀫𑀦𑁆𑀢𑀭𑀸𑀬𑀁 𑀅𑀲𑀗𑁆𑀓𑀦𑁆𑀢𑁂𑀦𑁂𑀯 𑀘 𑀆𑀳𑀸𑀭𑀼𑀧𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀅𑀥𑀺𑀕𑀢𑁂𑀦 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀅𑀜𑁆𑀜𑁂𑀲𑀁 𑀆𑀭𑁄𑀘𑁂𑀦𑁆𑀢𑀻𑀢𑀺 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 ‘‘𑀲𑀪𑀸𑀕𑀸𑀦𑀜𑁆𑀳𑀺 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀢𑀭𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀕𑀡𑁆𑀞𑀺𑀧𑀤𑁂𑀧𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺. 𑀪𑀡𑁆𑀟𑀓𑀁 𑀥𑁄𑀯𑀦𑁆𑀢𑀸𑀢𑀺 𑀘𑀻𑀯𑀭𑀁 𑀥𑁄𑀯𑀦𑁆𑀢𑀸. 𑀥𑁄𑀯𑀦𑀤𑀡𑁆𑀟𑀓𑀦𑁆𑀢𑀺 𑀪𑀡𑁆𑀟𑀥𑁄𑀯𑀦𑀤𑀡𑁆𑀟𑀁.

𑁧𑁮𑁪. 𑀅𑀳𑀁 𑀓𑀼𑀓𑁆𑀓𑀼𑀘𑁆𑀘𑀓𑁄𑀢𑀺 ‘‘𑀫𑀫 𑀓𑀺𑀭𑀺𑀬𑀸𑀬 𑀫𑀭𑁂𑀬𑁆𑀬 𑀦𑀼 𑀔𑁄, 𑀦𑁄 𑀯𑀸’’𑀢𑀺 𑀏𑀯𑀁 𑀚𑀸𑀢𑀓𑀼𑀓𑁆𑀓𑀼𑀘𑁆𑀘𑀓𑁄. 𑀲𑀩𑁆𑀩𑀢𑁆𑀣𑀸𑀧𑀺 𑀧𑀦𑁂𑀢𑁆𑀣 𑀏𑀯𑀭𑀽𑀧𑁂𑀲𑀼 𑀯𑀢𑁆𑀣𑀽𑀲𑀼 𑀅𑀫𑀢𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀓𑀢𑀧𑁆𑀧𑀬𑁄𑀕𑁂𑀦 𑀤𑀼𑀓𑁆𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀼 𑀯𑀸 𑀫𑀸 𑀯𑀸, 𑀧𑀸𑀭𑀸𑀚𑀺𑀓𑀸𑀬 𑀅𑀪𑀸𑀯𑀢𑁄 𑀪𑀕𑀯𑀢𑁄 𑀯𑀘𑀦𑁂𑀦 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑀸𑀢𑀺 𑀯𑀤𑀦𑁆𑀢𑀺.

𑁧𑁮𑁫. 𑀕𑀩𑁆𑀪𑁄 ¶ 𑀧𑀢𑀢𑀺 𑀏𑀢𑁂𑀦𑀸𑀢𑀺 𑀕𑀩𑁆𑀪𑀧𑀸𑀢𑀦𑀁, 𑀢𑀸𑀤𑀺𑀲𑀁 𑀪𑁂𑀲𑀚𑁆𑀚𑀁. 𑀢𑁂𑀦𑀸𑀳 ‘‘𑀬𑁂𑀦 𑀧𑀭𑀺𑀪𑀼𑀢𑁆𑀢𑁂𑀦𑀸’’𑀢𑀺𑀆𑀤𑀺 ¶ . ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑀢𑁄 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀬𑀸𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺.

𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀕𑀩𑁆𑀪𑀁 𑀦 𑀥𑀸𑀭𑁂𑀢𑀺. 𑀯𑀸𑀢𑁂𑀦 𑀧𑀸𑀡𑀓𑁂𑀳𑀺 𑀯𑀸 𑀕𑀩𑁆𑀪𑁄 𑀯𑀺𑀦𑀲𑁆𑀲𑀦𑁆𑀢𑁄 𑀓𑀫𑁆𑀫𑀁 𑀯𑀺𑀦𑀸 𑀦 𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁬) 𑀧𑀦 ‘‘𑀕𑀩𑁆𑀪𑁄 𑀳𑀺 𑀯𑀸𑀢𑁂𑀦 𑀧𑀸𑀡𑀓𑁂𑀳𑀺 𑀓𑀫𑁆𑀫𑀼𑀦𑀸 𑀘𑀸𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀦𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀫𑁆𑀫𑀼𑀦𑀸 𑀯𑀺𑀦𑀲𑁆𑀲𑀦𑁆𑀢𑁂 𑀧𑀦 𑀩𑀼𑀤𑁆𑀥𑀸𑀧𑀺 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀢𑁂𑀦 𑀧𑀸𑀡𑀓𑁂𑀳𑀺 𑀯𑀸 𑀕𑀩𑁆𑀪𑁂 𑀯𑀺𑀦𑀲𑁆𑀲𑀦𑁆𑀢𑁂 𑀦 𑀧𑀼𑀭𑀺𑀫𑀓𑀫𑁆𑀫𑀼𑀦𑀸 𑀑𑀓𑀸𑀲𑁄 𑀓𑀢𑁄, 𑀅𑀧𑀺𑀘 𑀢𑀧𑁆𑀧𑀘𑁆𑀘𑀬𑀸 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺, 𑀲𑀬𑀫𑁂𑀯 𑀧𑀦 𑀓𑀫𑁆𑀫𑀼𑀦𑀸 𑀑𑀓𑀸𑀲𑁂 𑀓𑀢𑁂 𑀦 𑀏𑀓𑀦𑁆𑀢𑁂𑀦 𑀯𑀸𑀢𑁄 𑀧𑀸𑀡𑀓𑀸 𑀯𑀸 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀓𑀫𑁆𑀫𑀲𑁆𑀲 𑀯𑀺𑀲𑀼𑀁 𑀓𑀸𑀭𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀡𑀓𑀸 𑀔𑀸𑀤𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀯𑀺𑀚𑀸𑀬𑀦𑀢𑁆𑀣𑀸𑀬 𑀪𑁂𑀲𑀚𑁆𑀚𑀁 𑀤𑁂𑀦𑁆𑀢𑀲𑁆𑀲 𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑁂 𑀑𑀧𑀸𑀢𑀓𑁆𑀔𑀡𑀦𑀸𑀤𑀻𑀲𑀼 𑀯𑀺𑀬 𑀓𑀫𑁆𑀫𑀩𑀤𑁆𑀥𑁄, 𑀓𑀼𑀘𑁆𑀙𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑁂 𑀦𑁂𑀯𑀢𑁆𑀣𑀺 𑀓𑀫𑁆𑀫𑀩𑀤𑁆𑀥𑁄.

𑀲𑀳𑀥𑀫𑁆𑀫𑀺𑀓𑀸𑀦𑀦𑁆𑀢𑀺 𑀏𑀓𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀲𑀦𑁂 𑀲𑀳𑀲𑀺𑀓𑁆𑀔𑀫𑀸𑀦𑀥𑀫𑁆𑀫𑀸𑀦𑀁. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀲𑀻𑀮𑀢𑁆𑀢𑀸 ‘‘𑀲𑀫𑀲𑀻𑀮𑀲𑀤𑁆𑀥𑀸𑀧𑀜𑁆𑀜𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀢𑀦𑁄 𑀢𑁂𑀲𑀁 𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄. 𑀕𑀺𑀮𑀸𑀦𑀲𑁆𑀲𑀢𑁆𑀣𑀸𑀬 𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀓𑀢𑀸𑀧𑀺 𑀅𑀓𑀢𑀸 𑀯𑀺𑀬𑀸𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺, ‘‘𑀯𑀤, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸’’𑀢𑀺 𑀏𑀯𑀁 𑀅𑀓𑀢𑀧𑀯𑀸𑀭𑀡𑀝𑁆𑀞𑀸𑀦𑁂 𑀘 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺.

𑀧𑀝𑀺𑀬𑀸𑀤𑀺𑀬𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑀺. 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀁 𑀯𑀤𑀦𑁆𑀢𑀺. 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀇𑀫𑁂𑀲𑀫𑁆𑀧𑀺 𑀧𑀜𑁆𑀘𑀦𑁆𑀦𑀁 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀓𑀣𑀺𑀢𑀁. 𑀬𑀸𑀯 𑀜𑀸𑀢𑀓𑀸 𑀧𑀲𑁆𑀲𑀦𑁆𑀢𑀻𑀢𑀺 𑀬𑀸𑀯 𑀢𑀲𑁆𑀲 𑀜𑀸𑀢𑀓𑀸 𑀧𑀲𑁆𑀲𑀦𑁆𑀢𑀺. 𑀧𑀺𑀢𑀼 𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸. 𑀫𑀸𑀢𑀼 𑀪𑀸𑀢𑀸 𑀫𑀸𑀢𑀼𑀮𑁄. 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀘𑁂𑀧𑀺 𑀦 𑀬𑀸𑀘𑀦𑁆𑀢𑀻𑀢𑀺 ‘‘𑀬𑀸𑀘𑀺𑀢𑀼𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀬𑀤𑀺 𑀦 𑀬𑀸𑀘𑀦𑁆𑀢𑀺. 𑀆𑀪𑁄𑀕𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀓𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀆𑀪𑁄𑀕𑀁 𑀧𑀦 𑀅𑀓𑀢𑁆𑀯𑀸𑀧𑀺 ¶ 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀮𑀺𑀔𑀺𑀢𑀁. 𑀏𑀢𑁂 𑀤𑀲 𑀜𑀸𑀢𑀓𑁂 𑀞𑀧𑁂𑀢𑁆𑀯𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀜𑀸𑀢𑀓𑀸 𑀏𑀯𑀸𑀢𑀺 𑀢𑁂𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸. 𑀢𑁂𑀦 𑀅𑀜𑁆𑀜𑁂𑀲𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀸𑀢𑀓𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀏𑀢𑁂𑀲𑀁 𑀧𑀼𑀢𑁆𑀢𑀧𑀭𑀫𑁆𑀧𑀭𑀸𑀬𑀸’’𑀢𑀺𑀆𑀤𑀺. 𑀓𑀼𑀮𑀧𑀭𑀺𑀯𑀝𑁆𑀝𑁄𑀢𑀺 𑀓𑀼𑀮𑀸𑀦𑀁 𑀧𑀝𑀺𑀧𑀸𑀝𑀺, 𑀓𑀼𑀮𑀧𑀭𑀫𑁆𑀧𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀬𑁆𑀳𑀁 𑀤𑀲𑁆𑀲𑀦𑁆𑀢𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀘𑁆𑀘𑀸𑀲𑀸𑀬 𑀓𑀭𑁄𑀦𑁆𑀢𑀲𑁆𑀲𑀧𑀺 𑀬𑀸𑀘𑀺𑀢𑁆𑀯𑀸𑀧𑀺 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀜𑀸𑀢𑀓𑁂𑀲𑀼 ¶ 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀧𑀤𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀘𑀽𑀴𑀫𑀸𑀢𑀼𑀬𑀸𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 ‘‘𑀘𑀽𑀴𑀫𑀸𑀢𑀼𑀬𑀸 𑀲𑀸𑀫𑀺𑀓𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑀺 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀅𑀢𑀺𑀤𑀺𑀲𑁆𑀲𑀢𑀺. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 ‘‘𑀫𑀬𑁆𑀳𑀁 𑀤𑀲𑁆𑀲𑀦𑁆𑀢𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀦 𑀉𑀧𑀓𑀸𑀭𑀓𑀢𑁆𑀢𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺. ‘‘𑀪𑁂𑀲𑀚𑁆𑀚𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀬𑀣𑀸 ‘‘𑀅𑀜𑁆𑀜𑀫𑀜𑁆𑀜𑀁 𑀧𑀦 𑀓𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀇𑀤𑀁 𑀧𑀭𑀺𑀬𑀸𑀬𑀢𑁆𑀢𑀸 𑀯𑀝𑁆𑀝𑀢𑀺, 𑀏𑀯𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀣𑁂𑀦𑁆𑀢𑀲𑁆𑀲𑀧𑀺 𑀦𑁂𑀯𑀢𑁆𑀣𑀺 𑀤𑁄𑀲𑁄𑀢𑀺 𑀆𑀘𑀭𑀺𑀬𑀸.

𑀯𑀺𑀦𑀬𑀮𑀓𑁆𑀔𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀘𑀭𑀺𑀬𑀲𑁆𑀲 𑀢𑀤𑀦𑀼𑀭𑀽𑀧𑀯𑁄𑀳𑀸𑀭𑀸𑀲𑀫𑁆𑀪𑀯𑀢𑁄 𑀈𑀤𑀺𑀲𑀲𑁆𑀲 𑀮𑀸𑀪𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 ‘‘𑀆𑀘𑀭𑀺𑀬𑀪𑀸𑀕𑁄 𑀦𑀸𑀫𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀦𑀸 𑀆𑀘𑀭𑀺𑀬𑁂𑀦 𑀮𑀪𑀺𑀢𑀩𑁆𑀩𑀪𑀸𑀕𑁄 𑀅𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬 𑀤𑀺𑀦𑁆𑀦𑁂𑀧𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀺𑀥𑀸𑀦𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸 ‘‘𑀓𑀧𑁆𑀧𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀧𑀼𑀧𑁆𑀨𑀁 𑀆𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀬𑀤𑀺 ‘‘𑀧𑀭𑀺𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀭𑁄𑀦𑁆𑀢𑀺, 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 ‘‘𑀧𑀭𑀺𑀢𑁆𑀢𑀁 𑀓𑀭𑁄𑀣, 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑁂 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀥𑀫𑁆𑀫𑀓𑀣𑀸𑀬 𑀅𑀚𑁆𑀛𑁂𑀲𑀦𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀜𑁆𑀳𑀺 𑀅𑀦𑀚𑁆𑀛𑀺𑀝𑁆𑀞𑁂𑀦𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀕𑁂𑀯 𑀅𑀚𑁆𑀛𑀺𑀝𑁆𑀞𑁂𑀦. 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀓𑀸𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀯𑀺𑀳𑀸𑀭𑀢𑁄…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀅𑀜𑁆𑀜𑀸𑀢𑀓𑀸𑀦𑀁𑀬𑁂𑀯 𑀤𑀤𑀢𑁄 𑀤𑀼𑀓𑁆𑀓𑀝𑀁. 𑀦𑁄 𑀘𑁂 𑀚𑀸𑀦𑀦𑁆𑀢𑀻𑀢𑀺 𑀬𑀤𑀺 𑀏𑀯𑀁 𑀯𑀢𑁆𑀢𑀼𑀁 𑀦 𑀚𑀸𑀦𑀦𑁆𑀢𑀺. 𑀉𑀤𑀓𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀁. 𑀧𑀸𑀤𑁂𑀲𑀼 𑀅𑀧𑀦𑀻𑀢𑁂𑀲𑀼 𑀅𑀯𑀫𑀗𑁆𑀕𑀮𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀦 𑀧𑀸𑀤𑀸 𑀅𑀧𑀦𑁂𑀢𑀩𑁆𑀩𑀸’’𑀢𑀺 ¶ . 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀧𑀭𑀺𑀯𑀸𑀭𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄𑀢𑀺 𑀅𑀧𑀩𑁆𑀩𑀚𑀺𑀢𑀲𑁆𑀲 𑀳𑀢𑁆𑀣𑀢𑁄 𑀮𑀤𑁆𑀥𑁄 𑀅𑀢𑁆𑀢𑀦𑀸 𑀅𑀜𑁆𑀜𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀅𑀕𑁆𑀕𑀳𑀺𑀢𑀅𑀕𑁆𑀕𑁄 𑀧𑀺𑀡𑁆𑀟𑀧𑀸𑀢𑁄. 𑀣𑀸𑀮𑀓𑁂𑀢𑀺 𑀇𑀫𑀺𑀦𑀸 𑀧𑀢𑁆𑀢𑁄𑀧𑀺 𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀸𑀫𑀭𑀺𑀓𑀘𑁄𑀭𑀲𑁆𑀲𑀸𑀢𑀺 𑀭𑀚𑁆𑀚𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀸𑀓𑀝𑀘𑁄𑀭𑀲𑁆𑀲. 𑀘𑁄𑀭𑀦𑀸𑀕𑀯𑀢𑁆𑀣𑀽𑀢𑀺 𑀏𑀢𑁆𑀣 ‘‘𑀘𑁄𑀭𑀦𑀸𑀕𑀲𑁆𑀲 𑀓𑀺𑀭 𑀆𑀫𑀝𑁆𑀞𑀁 𑀤𑁂𑀦𑁆𑀢𑁄 𑀓𑀼𑀚𑁆𑀛𑀺𑀲𑁆𑀲𑀢𑀺, 𑀅𑀦𑀸𑀫𑀝𑁆𑀞𑀁 𑀦 𑀯𑀝𑁆𑀝𑀢𑀻𑀢𑀺 𑀣𑁂𑀭𑁄 𑀧𑀢𑁆𑀢𑀕𑁆𑀕𑀳𑀡𑀳𑀢𑁆𑀣𑁂𑀦𑁂𑀯 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑁂 𑀪𑀢𑁆𑀢𑀁 ¶ 𑀲𑀩𑁆𑀩𑀫𑀤𑀸𑀲𑀺, 𑀲𑁄 𑀢𑁂𑀦 𑀢𑀼𑀲𑁆𑀲𑀺. ‘𑀏𑀢𑁆𑀢𑀓𑀁 𑀫𑀬𑁆𑀳’𑀦𑁆𑀢𑀺 𑀪𑀢𑁆𑀢𑀲𑁆𑀲 𑀏𑀓𑀧𑀲𑁆𑀲𑁂𑀬𑁂𑀯 𑀣𑁄𑀓𑀁 𑀞𑀧𑁂𑀢𑁆𑀯𑀸𑀧𑀺 𑀧𑀼𑀦 𑀢𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀆𑀫𑀺𑀲𑀲𑁆𑀲 𑀥𑀫𑁆𑀫𑀲𑁆𑀲 𑀘 𑀅𑀮𑀸𑀪𑁂𑀦 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀫𑁆𑀪𑀯𑀦𑁆𑀢𑀲𑁆𑀲 𑀙𑀺𑀤𑁆𑀤𑀲𑁆𑀲 𑀯𑀺𑀯𑀭𑀲𑁆𑀲 𑀪𑁂𑀤𑀲𑁆𑀲 𑀧𑀝𑀺𑀲𑀦𑁆𑀣𑀭𑀡𑀁 𑀧𑀺𑀤𑀳𑀦𑀁 𑀕𑀡𑁆𑀳𑀦𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀅𑀬𑀜𑁆𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀮𑀩𑁆𑀪𑀫𑀸𑀦𑁂𑀦 𑀆𑀫𑀺𑀲𑁂𑀦 𑀘 𑀥𑀫𑁆𑀫𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀙𑀺𑀤𑁆𑀤𑁄, 𑀢𑀲𑁆𑀲 𑀢𑀁 𑀙𑀺𑀤𑁆𑀤𑀁 𑀬𑀣𑀸 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀻𑀞𑀲𑁆𑀲 𑀯𑀺𑀬 𑀧𑀘𑁆𑀘𑀢𑁆𑀣𑀭𑀡𑁂𑀦 𑀆𑀫𑀺𑀲𑁂𑀦 𑀘 𑀥𑀫𑁆𑀫𑁂𑀦 𑀘 𑀧𑀝𑀺𑀲𑀦𑁆𑀣𑀭𑀡𑀁 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀓𑀲𑁆𑀲𑀘𑀺 𑀦 𑀓𑀸𑀢𑀩𑁆𑀩𑁄 𑀦𑀢𑁆𑀣𑀺. 𑀬𑀲𑁆𑀲 𑀓𑀲𑁆𑀲𑀘𑀺 𑀳𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀥𑀫𑁆𑀫𑁂𑀦 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀬𑁂𑀯. ‘‘𑀧𑀝𑀺𑀲𑀦𑁆𑀣𑀸𑀭𑁄 𑀧𑀦 𑀓𑀲𑁆𑀲 𑀓𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀓𑀸𑀢𑀩𑁆𑀩𑁄’’𑀢𑀺 𑀇𑀤𑀁 𑀧𑀦 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀩𑁆𑀩𑀸𑀲𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀢𑀺𑀬𑁄𑀚𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑁄 𑀫𑀦𑀼𑀲𑁆𑀲𑁂 𑀧𑀮𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀯𑀸𑀲𑀁 𑀓𑀢𑁆𑀯𑀸. 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀆𑀳𑀝𑀸𑀢𑀺 𑀧𑀸𑀓𑀯𑀝𑁆𑀝𑀢𑁄 𑀢𑀁𑀤𑀺𑀯𑀲𑀲𑁆𑀲𑀢𑁆𑀣𑀸𑀬 𑀆𑀳𑀝𑀸. 𑀯𑀭𑀧𑁄𑀢𑁆𑀣𑀘𑀺𑀢𑁆𑀢𑀢𑁆𑀣𑀭𑀡𑀦𑁆𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀉𑀢𑁆𑀢𑀫𑀭𑀽𑀧𑀯𑀺𑀘𑀺𑀢𑁆𑀢𑀢𑁆𑀣𑀭𑀡𑀁.

𑁧𑁮𑁭. 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂𑀲𑀼 𑀧𑀼𑀩𑁆𑀩𑁂 𑀏𑀓𑀲𑁆𑀲 𑀅𑀗𑁆𑀕𑀼𑀮𑀺𑀧𑀢𑁄𑀤𑁂𑀦 𑀫𑀸𑀭𑀺𑀢𑀢𑁆𑀢𑀸 𑀲𑁂𑀲𑀲𑁄𑀴𑀲𑀚𑀦𑁂𑀲𑀼 𑀉𑀤𑀭𑀁 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑁂𑀓𑀁 𑀞𑀧𑁂𑀢𑁆𑀯𑀸 ‘‘𑀲𑁂𑀲𑀸𑀧𑀺 𑀧𑀦𑁆𑀦𑀭𑀲 𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀤𑀽𑀳𑀮𑀧𑀸𑀲𑀸𑀡𑀸 𑀯𑀺𑀬𑀸𑀢𑀺 𑀅𑀤𑀽𑀳𑀮𑁂 𑀆𑀭𑁄𑀧𑀺𑀢𑀧𑀸𑀲𑀸𑀡𑀸 𑀯𑀺𑀬. 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑀸𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀸𑀥𑀺𑀧𑁆𑀧𑀸𑀬𑀸. 𑀆𑀯𑀸𑀳𑁂𑀢𑁆𑀯𑀸𑀢𑀺 𑀆𑀯𑀺𑀲𑀸𑀧𑁂𑀢𑁆𑀯𑀸. 𑀯𑀸𑀴𑀯𑀺𑀳𑀸𑀭𑀦𑁆𑀢𑀺 𑀘𑀡𑁆𑀟𑀲𑀢𑁆𑀢𑁂𑀳𑀺 𑀅𑀥𑀺𑀝𑁆𑀞𑀺𑀢𑀯𑀺𑀳𑀸𑀭𑀁.

𑁧𑁮𑁯. 𑀬𑁄 ¶ 𑀭𑀼𑀓𑁆𑀔𑁂𑀦 𑀑𑀢𑁆𑀣𑀢𑁄𑀧𑀺 𑀦 𑀫𑀭𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 (𑀧𑀸𑀘𑀺. 𑀅𑀝𑁆𑀞. 𑁯𑁨) 𑁋

‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀧𑀦 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 ‘𑀲𑀘𑁂 𑀪𑀺𑀓𑁆𑀔𑀼 𑀭𑀼𑀓𑁆𑀔𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀢𑁄 𑀳𑁄𑀢𑀺 𑀑𑀧𑀸𑀢𑁂 𑀯𑀸 𑀧𑀢𑀺𑀢𑁄, 𑀲𑀓𑁆𑀓𑀸 𑀘 𑀳𑁄𑀢𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀢𑁆𑀢𑀦𑀸 𑀦 𑀓𑀸𑀢𑀩𑁆𑀩𑀁, 𑀅𑀜𑁆𑀜𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀮𑁆𑀮𑀭𑀼𑀓𑁆𑀔𑀢𑁄 𑀯𑀸 𑀤𑀡𑁆𑀟𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀧𑀯𑀝𑁆𑀝𑁂𑀢𑁆𑀯𑀸 𑀦𑀺𑀓𑁆𑀔𑀫𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀦𑀸𑀧𑀢𑁆𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺, ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀯𑀟𑀸𑀳𑁂 𑀟𑀬𑁆𑀳𑀫𑀸𑀦𑁂 𑀧𑀝𑀕𑁆𑀕𑀺𑀁 𑀤𑀸𑀢𑀼𑀁 𑀧𑀭𑀺𑀢𑁆𑀢𑀁 𑀓𑀸𑀢𑀼’𑀦𑁆𑀢𑀺 (𑀘𑀽𑀴𑀯. 𑁨𑁮𑁩) 𑀇𑀤𑀁 𑀧𑀦 𑀏𑀓𑀫𑁂𑀯 𑀲𑀼𑀢𑁆𑀢𑀁 𑀤𑀺𑀲𑁆𑀲𑀢𑀺. 𑀲𑀘𑁂 𑀏𑀢𑀲𑁆𑀲 𑀅𑀦𑀼𑀮𑁄𑀫𑀁, 𑀅𑀢𑁆𑀢𑀦𑁄 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 ¶ 𑀓𑀭𑁄𑀦𑁆𑀢𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀓𑀭𑁄𑀢𑀺, 𑀧𑀭𑁄 𑀧𑀦 𑀓𑀸𑀭𑀼𑀜𑁆𑀜𑁂𑀦. 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂, 𑀏𑀢𑀫𑁆𑀧𑀺 𑀅𑀓𑀸𑀭𑀡𑀁. 𑀓𑀼𑀲𑀮𑀘𑀺𑀢𑁆𑀢𑁂𑀦𑀧𑀺 𑀳𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀁, 𑀕𑀯𑁂𑀲𑀺𑀢𑀩𑁆𑀩𑀸 𑀏𑀢𑁆𑀣 𑀬𑀼𑀢𑁆𑀢𑀺, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀸 𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀢𑀲𑁆𑀫𑀸 𑀬𑀁 𑀏𑀢𑁆𑀣 𑀇𑀢𑁄 𑀅𑀜𑁆𑀜𑀣𑀸 𑀓𑁂𑀦𑀘𑀺 𑀧𑀧𑀜𑁆𑀘𑀺𑀢𑀁, 𑀕𑀡𑁆𑀞𑀺𑀧𑀤𑁂𑀲𑀼 𑀘 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑁧𑁯𑁦. 𑀅𑀮𑁆𑀮…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀼𑀓𑁆𑀔𑀝𑁆𑀞𑀸𑀦𑁂𑀧𑀺 𑀅𑀕𑁆𑀕𑀺𑀁 𑀧𑀸𑀢𑁂𑀢𑁆𑀯𑀸 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀆𑀮𑀺𑀫𑁆𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀤𑀼𑀓𑁆𑀓𑀝𑀦𑁆𑀢𑀺 𑀲𑀼𑀓𑁆𑀔𑀝𑁆𑀞𑀸𑀦𑁂 𑀯𑀸 𑀲𑀼𑀓𑁆𑀔𑀁 ‘‘𑀅𑀲𑀼𑀓𑁆𑀔’’𑀦𑁆𑀢𑀺 𑀅𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀻𑀴𑀸𑀥𑀺𑀧𑁆𑀧𑀸𑀬𑁄 𑀘 𑀧𑀝𑀧𑀝𑀸𑀬𑀫𑀸𑀦𑀲𑀤𑁆𑀤𑀲𑁆𑀲𑀸𑀤𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀕𑁆𑀕𑀺 𑀧𑀝𑀕𑁆𑀕𑀺. 𑀧𑀭𑀺𑀢𑁆𑀢𑀓𑀭𑀡𑀦𑁆𑀢𑀺 𑀆𑀭𑀓𑁆𑀔𑀓𑀭𑀡𑀁. 𑀲𑀬𑀁 𑀯𑀸 𑀉𑀝𑁆𑀞𑀺𑀢𑀦𑁆𑀢𑀺 𑀯𑀸𑀢𑁂𑀭𑀺𑀢𑀸𑀦𑀁 𑀯𑁂𑀴𑀼𑀆𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑁂𑀦 𑀲𑀫𑀼𑀝𑁆𑀞𑀺𑀢𑀁. 𑀦𑀺𑀭𑀼𑀧𑀸𑀤𑀸𑀦𑁄𑀢𑀺 𑀇𑀦𑁆𑀥𑀦𑀭𑀳𑀺𑀢𑁄.

𑁧𑁯𑁧-𑁧𑁯𑁨. 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 ‘‘𑀤𑁆𑀯𑀻𑀳𑀻’’𑀢𑀺 𑀯𑀼𑀢𑁆𑀢𑁂 𑀤𑁆𑀯𑀻𑀳𑀺𑀧𑀺 𑀧𑀳𑀸𑀭𑁂𑀳𑀺 𑀫𑀭𑀡𑀲𑁆𑀲 𑀧𑀘𑁆𑀘𑀸𑀲𑀻𑀲𑀦𑀢𑁄 𑀏𑀓𑁂𑀦 𑀯𑀺𑀦𑀸 𑀤𑁆𑀯𑀺𑀦𑁆𑀦𑀁 𑀅𑀪𑀸𑀯𑀢𑁄 ¶ 𑀘 𑀧𑀸𑀭𑀸𑀚𑀺𑀓𑀁. ‘‘𑀤𑁆𑀯𑀻𑀳𑀺𑀬𑁂𑀯𑀸𑀢𑀺 𑀦𑀺𑀬𑀫𑀺𑀢𑁂 𑀧𑀦 𑀏𑀓𑁂𑀦 𑀧𑀳𑀸𑀭𑁂𑀦 𑀫𑀸𑀭𑀺𑀢𑁂 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀞𑀫𑀁 𑀆𑀳𑀺𑀢𑀩𑀮𑀯𑁂𑀕𑀲𑁆𑀲 𑀧𑀼𑀩𑁆𑀩𑀸𑀦𑀼𑀘𑀺𑀡𑁆𑀡𑀯𑀲𑁂𑀦 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀕𑀫𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘‘𑀲𑀻𑀲𑀘𑁆𑀙𑁂𑀤𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀯𑀢𑁆𑀣𑀼𑀲𑁆𑀲𑀸𑀢𑀺 𑀆𑀖𑀸𑀢𑀦𑀯𑀢𑁆𑀣𑀼𑀲𑁆𑀲. ‘‘𑀧𑀸𑀦𑀧𑀭𑀺𑀪𑁄𑀕𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑁄𑀡𑀲𑁄𑀯𑀻𑀭𑀓𑀁 𑀬𑀸𑀫𑀓𑀸𑀮𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑀘𑀢𑀼𑀲𑀘𑁆𑀘𑀯𑀺𑀤𑀽𑀢𑀺 ¶ 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑀸𑀳𑀝𑀸𑀦𑀺 𑀘𑀢𑀼𑀲𑀘𑁆𑀘𑀁, 𑀢𑀁 𑀅𑀯𑁂𑀤𑀺 𑀧𑀝𑀺𑀯𑀺𑀚𑁆𑀛𑀻𑀢𑀺 𑀘𑀢𑀼𑀲𑀘𑁆𑀘𑀯𑀺𑀤𑀽. 𑀲𑀢𑀺𑀧𑀺 𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀘𑀢𑀼𑀲𑀘𑁆𑀘𑀯𑀺𑀤𑀼𑀪𑀸𑀯𑁂 𑀅𑀦𑀜𑁆𑀜𑀧𑀼𑀩𑁆𑀩𑀓𑀢𑁆𑀢𑀸 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑁆𑀲 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀧𑀢𑁆𑀢𑀺𑀢𑁄 𑀧𑀭𑀲𑀦𑁆𑀢𑀸𑀦𑁂𑀲𑀼 𑀧𑀲𑀸𑀭𑀺𑀢𑀪𑀸𑀯𑁂𑀦 𑀧𑀸𑀓𑀝𑀢𑁆𑀢𑀸 𑀘 𑀪𑀕𑀯𑀸𑀯 𑀯𑀺𑀲𑁂𑀲𑁂𑀦 ‘‘𑀘𑀢𑀼𑀲𑀘𑁆𑀘𑀯𑀺𑀤𑀽’’𑀢𑀺 𑀣𑁄𑀫𑀦𑀁 𑀅𑀭𑀳𑀢𑀺.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁩. 𑀅𑀥𑀺𑀝𑁆𑀞𑁂𑀫𑀸𑀢𑀺 𑀲𑀁𑀯𑀺𑀤𑀳𑀸𑀫. 𑀤𑀽𑀢𑀓𑀫𑁆𑀫𑀦𑁆𑀢𑀺 𑀕𑀺𑀳𑀻𑀦𑀁 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸𑀢𑀺 𑀧𑀥𑀸𑀦𑀸𑀦𑀼𑀭𑀽𑀧𑀁 𑀓𑀢𑁆𑀯𑀸. 𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀸𑀢𑀺 ‘‘𑀅𑀬𑁆𑀬𑀸 𑀲𑀦𑁆𑀢𑀇𑀭𑀺𑀬𑀸𑀧𑀣𑀸 𑀅𑀢𑀺𑀯𑀺𑀬 𑀉𑀧𑀲𑀦𑁆𑀢𑀸, 𑀓𑀢𑀭𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀺𑀁𑀲𑀽’’𑀢𑀺 𑀧𑀼𑀘𑁆𑀙𑀦𑁆𑀢𑀸𑀦𑀁. 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀧𑀦 𑀅𑀲𑀢𑀻𑀢𑀺 ‘‘𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀸𑀞𑀲𑁂𑀲𑀁 𑀓𑀢𑁆𑀯𑀸 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀅𑀲𑀢𑀺. ‘‘𑀪𑀸𑀲𑀺𑀢𑁄’’𑀢𑀺 𑀅𑀢𑀻𑀢𑀯𑀘𑀦𑀁 𑀓𑀣𑀁 𑀅𑀦𑀸𑀕𑀢𑀯𑀘𑀦𑁂𑀦 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀮𑀓𑁆𑀔𑀡𑀁 𑀧𑀦 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺. 𑀈𑀤𑀺𑀲𑁂 𑀳𑀺 𑀞𑀸𑀦𑁂 ‘‘𑀥𑀸𑀢𑀼𑀲𑀫𑁆𑀩𑀦𑁆𑀥𑁂 𑀧𑀘𑁆𑀘𑀬𑀸’’𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀥𑀸𑀢𑁆𑀯𑀢𑁆𑀣𑀲𑀫𑁆𑀩𑀦𑁆𑀥𑁂 𑀲𑀢𑀺 𑀅𑀬𑀣𑀸𑀓𑀸𑀮𑀯𑀺𑀳𑀺𑀢𑀸𑀧𑀺 𑀧𑀘𑁆𑀘𑀬𑀸 𑀲𑀸𑀥𑀯𑁄 𑀪𑀯𑀦𑁆𑀢𑀻𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑁧𑁯𑁪. 𑀯𑀡𑁆𑀡𑀯𑀸𑀢𑀺 ¶ 𑀇𑀫𑀺𑀦𑀸 𑀲𑀓𑀮𑀲𑀭𑀻𑀭𑀸𑀦𑀼𑀕𑀢𑀯𑀡𑁆𑀡𑀲𑁆𑀲 𑀫𑀦𑀸𑀧𑀢𑀸 𑀯𑀼𑀢𑁆𑀢𑀸. 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑀺 𑀇𑀫𑀺𑀦𑀸 𑀲𑀓𑀮𑀲𑀭𑀻𑀭𑀯𑀡𑁆𑀡𑀢𑁄𑀧𑀺 𑀅𑀥𑀺𑀓𑀢𑀭𑀁 𑀫𑀼𑀔𑀯𑀡𑁆𑀡𑀲𑁆𑀲 𑀫𑀦𑀸𑀧𑀢𑀸 𑀯𑀼𑀢𑁆𑀢𑀸. 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸𑀢𑀺 𑀇𑀫𑀺𑀦𑀸 𑀧𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀲𑀭𑀻𑀭𑀯𑀡𑁆𑀡𑀲𑁆𑀲 𑀅𑀢𑀺𑀯𑀺𑀬 𑀧𑀲𑀦𑁆𑀦𑀢𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀡𑀢𑁆𑀢𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀙𑀝𑁆𑀞𑀲𑁆𑀲 𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑁄 𑀳𑀤𑀬𑀯𑀢𑁆𑀣𑀼, 𑀧𑀜𑁆𑀘𑀧𑀲𑀸𑀤𑀸𑀦𑀁 𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸𑀯𑀘𑀦𑁂𑀦𑁂𑀯 𑀳𑀤𑀬𑀯𑀢𑁆𑀣𑀼𑀆𑀤𑀺𑀲𑀓𑀮𑀲𑀭𑀻𑀭𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸 𑀤𑀲𑁆𑀲𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀫𑀦𑀘𑁆𑀙𑀝𑁆𑀞𑀸𑀦𑀁 ¶ 𑀇𑀦𑁆𑀤𑁆𑀭𑀺𑀬𑀸𑀦’’𑀦𑁆𑀢𑀺. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑀸𑀢𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀲𑁆𑀲 𑀅𑀚𑀸𑀦𑀦𑀢𑁄 𑀪𑀦𑁆𑀢𑀫𑀺𑀕𑀲𑀤𑀺𑀲𑀸. 𑀘𑀢𑀼𑀘𑀓𑁆𑀓𑀦𑁆𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀁. 𑀇𑀭𑀺𑀬𑀸𑀧𑀣𑁄 𑀳𑀺 𑀇𑀥 𑀧𑀯𑀢𑁆𑀢𑀦𑀝𑁆𑀞𑁂𑀦 ‘‘𑀘𑀓𑁆𑀓’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀦𑀯𑀤𑁆𑀯𑀸𑀭𑀦𑁆𑀢𑀺 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀦𑀯𑀤𑁆𑀯𑀸𑀭𑀁. 𑀤𑀼𑀓𑁆𑀔𑀦𑁆𑀢𑀺 𑀲𑀻𑀲𑀭𑁄𑀕𑀸𑀤𑀺𑀤𑀼𑀓𑁆𑀔𑀁. 𑀲𑀩𑁆𑀩𑀓𑀺𑀘𑁆𑀘𑁂𑀲𑀽𑀢𑀺 𑀧𑀢𑁆𑀢𑀧𑀘𑀦𑀘𑀻𑀯𑀭𑀭𑀚𑀦𑀬𑁄𑀕𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑁂𑀲𑀼. 𑀬𑀸𑀧𑁂𑀢𑀼𑀦𑁆𑀢𑀺 𑀯𑀳𑀺𑀢𑀼𑀁 𑀧𑀯𑀢𑁆𑀢𑁂𑀢𑀼𑀁. 𑀢𑁂𑀦𑀸𑀳 ‘‘𑀕𑀫𑁂𑀢𑀼’’𑀦𑁆𑀢𑀺.

𑁧𑁯𑁫. 𑀲𑀦𑁆𑀢𑁄𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀯𑀺𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀺, 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀇𑀫𑀺𑀦𑀸 𑀧𑀦 𑀢𑁂𑀲𑀁 𑀉𑀧𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺 𑀘𑁂𑀯 𑀉𑀧𑀮𑀩𑁆𑀪𑀦𑁆𑀢𑀺 𑀘𑀸’’𑀢𑀺. 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀤𑀺𑀲𑁆𑀲𑀦𑁆𑀢𑀺, 𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀦𑁆𑀢𑀺 𑀧𑀦𑁆𑀣𑀖𑀸𑀢𑀦𑀓𑀫𑁆𑀫𑀁. 𑀳𑀦𑀦𑁆𑀢𑁄𑀢𑀺 𑀫𑀸𑀭𑁂𑀦𑁆𑀢𑁄. 𑀖𑀸𑀢𑁂𑀦𑁆𑀢𑁄𑀢𑀺 𑀫𑀸𑀭𑀸𑀧𑁂𑀦𑁆𑀢𑁄. 𑀅𑀣 𑀯𑀸 𑀳𑀦𑀦𑁆𑀢𑁄𑀢𑀺 𑀩𑀦𑁆𑀥𑀦𑀢𑀸𑀴𑀦𑀸𑀤𑀻𑀳𑀺 𑀳𑀺𑀁𑀲𑀦𑁆𑀢𑁄. 𑀖𑀸𑀢𑁂𑀦𑁆𑀢𑁄𑀢𑀺 𑀫𑀸𑀭𑁂𑀦𑁆𑀢𑁄. 𑀙𑀺𑀦𑁆𑀤𑀦𑁆𑀢𑁄𑀢𑀺 𑀧𑀭𑁂𑀲𑀁 𑀳𑀢𑁆𑀣𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑁄. 𑀧𑀘𑀦𑁆𑀢𑁄𑀢𑀺 𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑁄. 𑀧𑀘𑀦𑀜𑁆𑀳𑁂𑀢𑁆𑀣 𑀤𑀳𑀦𑀁 𑀯𑀺𑀩𑀸𑀥𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀘𑀦𑁆𑀢𑁄𑀢𑀺 𑀯𑀸 𑀢𑀚𑁆𑀚𑁂𑀦𑁆𑀢𑁄 𑀢𑀸𑀲𑁂𑀦𑁆𑀢𑁄. 𑀅𑀣 𑀯𑀸 𑀧𑀘𑀦𑁆𑀢𑁄𑀢𑀺 𑀕𑀸𑀫𑁂𑀲𑀼 𑀅𑀕𑁆𑀕𑀺𑀧𑀸𑀢𑀦𑀯𑀲𑁂𑀦 𑀕𑁂𑀳𑀸𑀤𑀻𑀦𑀺 𑀛𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀚𑁂𑀴𑀓𑀸𑀤𑀻𑀦𑀺 𑀧𑀘𑀦𑁆𑀢𑁄.

𑀬𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀩𑀳𑀼𑀮𑀕𑀸𑀭𑀯𑀸 𑀦 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀩𑀳𑀼𑀮𑀸, 𑀢𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀢𑀺𑀩𑁆𑀩𑀕𑀸𑀭𑀯𑀸. 𑀉𑀤𑁆𑀥𑀢𑁂𑀢𑀺 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀘 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑁂. 𑀉𑀦𑁆𑀦𑀴𑁂𑀢𑀺 𑀉𑀕𑁆𑀕𑀢𑀦𑀴𑁂, 𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀧𑀮𑁂𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑁂. 𑀫𑀼𑀔𑀭𑁂𑀢𑀺 𑀫𑀼𑀔𑀔𑀭𑁂 ¶ , 𑀔𑀭𑀯𑀘𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑀺𑀡𑁆𑀡𑀯𑀸𑀘𑁂𑀢𑀺 𑀅𑀲𑀁𑀬𑀢𑀯𑀘𑀦𑁂 𑀤𑀺𑀯𑀲𑀫𑁆𑀧𑀺 𑀦𑀺𑀭𑀢𑁆𑀣𑀓𑀯𑀘𑀦𑀧𑁆𑀧𑀮𑀸𑀧𑀺𑀦𑁂. 𑀫𑀼𑀝𑁆𑀞𑀸 𑀦𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀻, 𑀲𑀢𑀺𑀯𑀺𑀭𑀳𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀫𑁆𑀧𑀚𑀸𑀦𑁂𑀢𑀺 𑀦𑀺𑀧𑁆𑀧𑀜𑁆𑀜𑁂. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂𑀢𑀺 𑀲𑀁𑀯𑀭𑀸𑀪𑀸𑀯𑁂𑀦 𑀕𑀺𑀳𑀺𑀓𑀸𑀮𑁂 𑀯𑀺𑀬 𑀯𑀺𑀯𑀝𑀇𑀦𑁆𑀤𑁆𑀭𑀺𑀬𑁂. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀓𑁂𑀢𑀺 𑀥𑀫𑁆𑀫𑁂𑀦 𑀆𑀫𑀺𑀲𑁂𑀦 𑀘 𑀅𑀲𑀗𑁆𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑁂 𑀅𑀦𑀸𑀣𑁂 𑀅𑀧𑁆𑀧𑀢𑀺𑀝𑁆𑀞𑁂. 𑀮𑀸𑀪𑀕𑀭𑀼𑀓𑁂𑀢𑀺 𑀧𑀘𑁆𑀘𑀬𑀕𑀭𑀼𑀓𑁂.

𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁮𑁭) 𑀳𑀺 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀯𑀲𑁂𑀦 𑀢𑀺𑀯𑀺𑀥𑀁 𑀓𑀼𑀳𑀓𑀯𑀢𑁆𑀣𑀼 𑀆𑀕𑀢𑀁. 𑀢𑀢𑁆𑀣 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀲𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀓𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀫𑁆𑀳𑀸𑀧𑀦𑀁 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀓𑀯𑀢𑁆𑀣𑀼. 𑀢𑀣𑀸 𑀘𑀻𑀯𑀭𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀢𑀤𑀢𑁆𑀣𑀺𑀓𑀲𑁆𑀲𑁂𑀯 𑀲𑀢𑁄 𑀧𑀸𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑁂𑀧𑀦𑁂𑀦 𑀢𑁂 𑀘 𑀕𑀳𑀧𑀢𑀺𑀓𑁂 𑀅𑀢𑁆𑀢𑀦𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁂 𑀜𑀢𑁆𑀯𑀸 𑀧𑀼𑀦 𑀢𑁂𑀲𑀁 ‘‘𑀅𑀳𑁄 𑀅𑀬𑁆𑀬𑁄 𑀅𑀧𑁆𑀧𑀺𑀘𑁆𑀙𑁄, 𑀦 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀢𑀺, 𑀲𑀼𑀮𑀤𑁆𑀥𑀁 𑀯𑀢 𑀦𑁄 𑀅𑀲𑁆𑀲, 𑀲𑀘𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 ¶ 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀉𑀧𑀦𑁂𑀦𑁆𑀢𑀸𑀦𑀁 𑀢𑀤𑀦𑀼𑀕𑁆𑀕𑀳𑀓𑀸𑀫𑀢𑀁𑀬𑁂𑀯 𑀆𑀯𑀺𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀢𑀢𑁄 𑀧𑀪𑀼𑀢𑀺 𑀅𑀲𑀻𑀢𑀺𑀲𑀓𑀝𑀪𑀸𑀭𑁂𑀳𑀺 𑀉𑀧𑀦𑀸𑀫𑀦𑀳𑁂𑀢𑀼𑀪𑀽𑀢𑀁 𑀯𑀺𑀫𑁆𑀳𑀸𑀧𑀦𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀓𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀧𑀺𑀘𑁆𑀙𑀲𑁆𑀲𑁂𑀯 𑀧𑀦 𑀲𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀯𑀸𑀘𑀸𑀬 𑀢𑀣𑀸 𑀢𑀣𑀸 𑀯𑀺𑀫𑁆𑀳𑀸𑀧𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀓𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀺𑀢𑁆𑀢𑀮𑀧𑀩𑁆𑀩𑀢𑀸𑀤𑀺𑀯𑀺𑀳𑀸𑀭𑁄 𑀮𑁄𑀓𑀲𑀫𑁆𑀫𑀢𑀲𑁂𑀦𑀸𑀲𑀦𑀁 𑀦𑀸𑀫. 𑀮𑁄𑀓𑀲𑀫𑁆𑀫𑀢 …𑀧𑁂… 𑀉𑀧𑀸𑀬𑁂𑀳𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀕𑀼𑀡𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀧𑀸𑀘𑁂𑀢𑀼𑀦𑁆𑀢𑀺 𑀧𑀭𑀺𑀡𑀸𑀫𑁂𑀢𑀼𑀁. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀕𑀦𑁆𑀣𑀥𑀼𑀭𑀸𑀤𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀢𑀫𑁆𑀫𑀽𑀮𑀓𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀸𑀘𑀸𑀭𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀮𑀪𑀺𑀢𑀩𑁆𑀩𑀧𑀺𑀡𑁆𑀟𑀧𑀸𑀢𑁂 𑀅𑀲𑀫𑁆𑀧𑀚𑁆𑀚𑀦𑁆𑀢𑁂. 𑀢𑁂 𑀘 𑀯𑀢𑁆𑀢𑀲𑀻𑀲𑁂𑀦 𑀲𑀩𑁆𑀩𑀫𑁆𑀧𑁂𑀢𑀁 𑀓𑀭𑁄𑀦𑁆𑀢𑀺, 𑀦 𑀮𑀸𑀪𑀦𑀺𑀫𑀺𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀦𑁆𑀢𑀺𑀧𑀯𑁂𑀡𑀺𑀖𑀝𑀦𑀓𑀸 𑀲𑀸𑀲𑀦𑀚𑁄𑀢𑀓𑀸’’𑀢𑀺.

𑀓𑀺𑀘𑁆𑀙𑁂𑀦𑀸𑀢𑀺 𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀸𑀧𑀝𑀺𑀧𑀤𑀸𑀯 𑀳𑁄𑀦𑁆𑀢𑀺, 𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦 𑀲𑀭𑀸𑀕𑀤𑁄𑀲𑀫𑁄𑀳𑀲𑁆𑀲𑁂𑀯 𑀲𑀢𑁄 𑀆𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀲𑀻𑀲𑀁 𑀓𑀦𑁆𑀢𑀺𑀢𑁆𑀯𑀸 𑀕𑀮𑀮𑁄𑀳𑀺𑀢𑀁 ¶ 𑀦𑀻𑀳𑀭𑀺𑀢𑁆𑀯𑀸 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 𑀫𑀦𑀸𑀧𑀘𑀸𑀭𑀺𑀦𑀺𑀁 𑀪𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀦𑀺𑀧𑀺 𑀔𑀦𑁆𑀢𑀺𑀯𑀸𑀤𑀻𑀲𑀤𑀺𑀲𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀙𑁂𑀚𑁆𑀚𑀪𑁂𑀚𑁆𑀚𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀲𑁆𑀲 𑀆𑀕𑀫𑀦𑀻𑀬𑀧𑀝𑀺𑀧𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀲𑀺𑀭𑁂𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀏𑀓𑀲𑁆𑀲𑁂𑀯 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀕𑀭𑀼𑀪𑀸𑀯𑀢𑁄 ‘‘𑀕𑀭𑀼𑀪𑀡𑁆𑀟𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑁂𑀲𑀁 𑀪𑀸𑀚𑁂𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀸𑀥𑀸𑀭𑀡𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦𑀸𑀢𑀺 𑀲𑀗𑁆𑀖𑀺𑀓𑀢𑁆𑀢𑀸 𑀲𑀩𑁆𑀩𑀪𑀺𑀓𑁆𑀔𑀼𑀲𑀸𑀥𑀸𑀭𑀡𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦. 𑀲𑀗𑁆𑀕𑀡𑁆𑀳𑀸𑀢𑀺 𑀉𑀧𑀮𑀸𑀧𑁂𑀢𑀻𑀢𑀺 𑀇𑀤𑀁 𑀅𑀣𑁂𑀬𑁆𑀬𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀣𑀸𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸’’𑀢𑀺, 𑀅𑀯𑀺𑀲𑁆𑀲𑀚𑁆𑀚𑀺𑀬𑀅𑀯𑁂𑀪𑀗𑁆𑀕𑀺𑀬𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑀭𑀼𑀪𑀡𑁆𑀟𑀜𑁆𑀳𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀯𑀺𑀪𑀚𑀦𑁆𑀢𑁄 𑀘 𑀢𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀬𑀅𑀯𑀏𑀪𑀗𑁆𑀕𑀺𑀬𑀪𑀸𑀯𑀁 𑀣𑁂𑀦𑁂𑀢𑀺. 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀣𑀼𑀮𑁆𑀮𑀘𑁆𑀘𑀬𑁂𑀦𑀧𑀺 𑀦 𑀫𑀼𑀘𑁆𑀘𑀢𑀺.

𑀅𑀲𑀦𑁆𑀢𑀦𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀪𑀽𑀢𑀦𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀁. 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀳𑀺 𑀢𑀲𑁆𑀲 𑀢𑀁 𑀅𑀲𑀦𑁆𑀢𑀦𑁆𑀢𑀺. 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀓𑀸𑀭𑀡𑀯𑀘𑀦𑀁. 𑀉𑀮𑁆𑀮𑀧𑀢𑀻𑀢𑀺 𑀉𑀕𑁆𑀕𑀢𑀸𑀬𑀼𑀓𑁄 𑀮𑀧𑀢𑀺. 𑀲𑀻𑀮𑀜𑁆𑀳𑀺 𑀪𑀺𑀓𑁆𑀔𑀼𑀦𑁄 𑀆𑀬𑀼, 𑀢𑀁 𑀢𑀲𑁆𑀲 𑀢𑀣𑀸𑀮𑀧𑀦𑀲𑀫𑀓𑀸𑀮𑀫𑁂𑀯 𑀯𑀺𑀕𑀘𑁆𑀙𑀢𑀺. 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬𑀸𑀢𑀺 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀪𑀸𑀯𑀦𑀸𑀬. 𑀏𑀯𑀜𑁆𑀳𑀺 𑀕𑀡𑁆𑀳𑀢𑀸…𑀧𑁂… 𑀣𑁂𑀦𑁂𑀢𑁆𑀯𑀸 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬 𑀭𑀝𑁆𑀞𑀧𑀺𑀡𑁆𑀟𑀲𑁆𑀲 ¶ 𑀣𑁂𑀦𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀧𑀺 𑀣𑁂𑀦𑀺𑀢𑁄𑀬𑁂𑀯 𑀳𑁄𑀢𑀺. 𑀓𑀺𑀢𑀯𑀲𑁆𑀲𑁂𑀯𑀸𑀢𑀺 𑀓𑀺𑀢𑀯𑀲𑁆𑀲 𑀲𑀓𑀼𑀡𑀕𑁆𑀕𑀳𑀡𑀫𑀺𑀯. 𑀓𑁂𑀭𑀸𑀝𑀺𑀓𑀲𑁆𑀲𑀸𑀢𑀺 𑀲𑀞𑀲𑁆𑀲. 𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀸𑀥𑀸𑀭𑀡𑀦𑀸𑀫𑀁, 𑀫𑀢𑁆𑀢-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀲𑀫𑀡𑀸𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑀯𑀦𑁆𑀢𑀺 𑀥𑀸𑀭𑁂𑀦𑁆𑀢𑀻𑀢𑀺 𑀕𑁄𑀢𑁆𑀭𑀪𑀼𑀦𑁄, 𑀦𑀸𑀫𑀫𑀢𑁆𑀢𑀲𑀫𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁬. 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀜𑀸𑀢𑀫𑀭𑀺𑀬𑀸𑀤𑀸𑀬 𑀏𑀯 𑀚𑀸𑀦𑀦𑀢𑁄 𑀅𑀜𑁆𑀜𑀸 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸, 𑀢𑀲𑁆𑀲𑀸 𑀨𑀮𑀪𑀸𑀯𑀢𑁄 𑀅𑀕𑁆𑀕𑀨𑀮𑀧𑀜𑁆𑀜𑀸 𑀢𑀁𑀲𑀳𑀕𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀘 𑀅𑀜𑁆𑀜𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀁𑀲𑀽’’𑀢𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀧𑀳𑀻𑀦𑀸𑀥𑀺𑀫𑀸𑀦𑀧𑀘𑁆𑀘𑀬𑀢𑁆𑀢𑀸 𑀦𑀼𑀧𑁆𑀧𑀚𑁆𑀚𑀢𑀺 ¶ . 𑀲𑀻𑀮𑀯𑀢𑁄𑀧𑀺…𑀧𑁂… 𑀦𑀼𑀧𑁆𑀧𑀚𑁆𑀚𑀢𑀺 𑀅𑀓𑀸𑀭𑀓𑀪𑀸𑀯𑀢𑁄. 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲. 𑀲𑀼𑀤𑁆𑀥𑀲𑀫𑀣𑀮𑀸𑀪𑀻 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀅𑀓𑀢𑁆𑀯𑀸𑀧𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀓𑁂𑀯𑀮𑀁 𑀅𑀜𑁆𑀜𑀸𑀡𑀩𑀮𑁂𑀦 ‘‘𑀅𑀭𑀺𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀜𑁆𑀜𑀢𑀻𑀢𑀺 𑀆𑀳 ‘‘𑀲𑀼𑀤𑁆𑀥𑀲𑀫𑀣𑀮𑀸𑀪𑀺𑀁 𑀯𑀸’’𑀢𑀺. ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀫𑀜𑁆𑀜𑀢𑀺 𑀉𑀘𑁆𑀘𑀯𑀸𑀮𑀗𑁆𑀓𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬.

𑀢𑀮𑀗𑁆𑀕𑀭𑀯𑀸𑀲𑀻 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫 𑀏𑀓𑁄 𑀧𑀪𑀺𑀦𑁆𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀫𑀳𑀸𑀔𑀻𑀡𑀸𑀲𑀯𑁄 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀤𑀸𑀬𑀓𑁄 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀉𑀘𑁆𑀘𑀯𑀸𑀮𑀗𑁆𑀓𑀯𑀸𑀲𑀻𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀲𑀫𑀡𑀪𑀸𑀯𑀓𑀺𑀘𑁆𑀘𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁, 𑀦𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀫𑁂𑀯𑀲𑁆𑀲 𑀤𑀺𑀲𑁆𑀯𑀸 ‘‘𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀫𑁂𑀯 𑀓𑀭𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀑𑀭𑁄𑀳𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. ‘‘𑀓𑀺𑀁, 𑀆𑀯𑀼𑀲𑁄 𑀥𑀫𑁆𑀫𑀤𑀺𑀦𑁆𑀦, 𑀅𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀘 𑀯𑀼𑀢𑁆𑀢𑁄 ‘‘𑀧𑀜𑁆𑀳𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀺𑀢𑀼𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀆𑀳. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀼𑀲𑁄, 𑀚𑀸𑀦𑀫𑀸𑀦𑀸 𑀓𑀣𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁄 𑀧𑀜𑁆𑀳𑀲𑀳𑀲𑁆𑀲𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀅𑀲𑀚𑁆𑀚𑀫𑀸𑀦𑁄𑀯 𑀓𑀣𑁂𑀲𑀺. 𑀢𑀢𑁄 ‘‘𑀅𑀢𑀺𑀢𑀺𑀓𑁆𑀔𑀁 𑀯𑁄, 𑀪𑀦𑁆𑀢𑁂, 𑀜𑀸𑀡𑀁, 𑀓𑀤𑀸 𑀢𑀼𑀫𑁆𑀳𑁂𑀳𑀺 𑀅𑀬𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄’’𑀢𑀺 𑀯𑀼𑀢𑁆𑀢𑁄 ‘‘𑀇𑀢𑁄 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂, 𑀆𑀯𑀼𑀲𑁄’’𑀢𑀺 𑀆𑀳. 𑀲𑀫𑀸𑀥𑀺𑀫𑁆𑀳𑀺, 𑀪𑀦𑁆𑀢𑁂, 𑀯𑀴𑀜𑁆𑀚𑁂𑀣𑀸𑀢𑀺. 𑀦 𑀇𑀤𑀁, 𑀆𑀯𑀼𑀲𑁄, 𑀪𑀸𑀭𑀺𑀬𑀦𑁆𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀏𑀓𑀁 𑀳𑀢𑁆𑀣𑀺𑀁 𑀫𑀸𑀧𑁂𑀣𑀸𑀢𑀺. 𑀣𑁂𑀭𑁄 𑀲𑀩𑁆𑀩𑀲𑁂𑀢𑀁 𑀳𑀢𑁆𑀣𑀺𑀁 𑀫𑀸𑀧𑁂𑀲𑀺. 𑀇𑀤𑀸𑀦𑀺, 𑀪𑀦𑁆𑀢𑁂, 𑀬𑀣𑀸 𑀅𑀬𑀁 𑀳𑀢𑁆𑀣𑀻 𑀅𑀜𑁆𑀚𑀺𑀢𑀓𑀡𑁆𑀡𑁄 𑀧𑀲𑀸𑀭𑀺𑀢𑀦𑀗𑁆𑀕𑀼𑀝𑁆𑀞𑁄 𑀲𑁄𑀡𑁆𑀟𑀁 ¶ 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑁂𑀭𑀯𑀁 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀢𑀺, 𑀢𑀣𑀸 𑀦𑀁 𑀓𑀭𑁄𑀣𑀸𑀢𑀺. 𑀣𑁂𑀭𑁄 𑀢𑀣𑀸 𑀓𑀢𑁆𑀯𑀸 𑀯𑁂𑀕𑁂𑀦 𑀆𑀕𑀘𑁆𑀙𑀢𑁄 𑀳𑀢𑁆𑀣𑀺𑀲𑁆𑀲 𑀪𑁂𑀭𑀯𑀁 𑀆𑀓𑀸𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀢𑀫𑁂𑀦𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀲𑀸𑀭𑀚𑁆𑀚𑀁 𑀦𑀸𑀫 𑀳𑁄𑀢𑀻’’𑀢𑀺 𑀆𑀳. 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀯𑀲𑁆𑀲𑀬𑁄 𑀫𑁂, 𑀆𑀯𑀼𑀲𑁄, 𑀥𑀫𑁆𑀫𑀤𑀺𑀦𑁆𑀦 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀯𑀲𑁆𑀲𑀬𑁄 𑀪𑀯𑀺𑀲𑁆𑀲𑀸𑀫𑀺𑀘𑁆𑀘𑁂𑀯𑀸𑀳𑀁 𑀆𑀕𑀢𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 ¶ 𑀓𑀣𑁂𑀲𑀺. 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀘𑀗𑁆𑀓𑀫𑀁 𑀑𑀭𑀼𑀬𑁆𑀳 𑀢𑀢𑀺𑀬𑁂 𑀧𑀤𑀯𑀸𑀭𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀓𑀺𑀭 𑀤𑁄𑀲𑀘𑀭𑀺𑀢𑁄 𑀅𑀳𑁄𑀲𑀺.

𑀅𑀥𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭-𑁧𑁯𑁮. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺 ‘‘𑀅𑀲𑀦𑁆𑀢𑀁 𑀅𑀪𑀽𑀢𑀁 𑀅𑀲𑀁𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀏𑀢𑁂𑀲𑀁 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀣 𑀬𑀦𑁆𑀢𑀺 𑀬𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀅𑀦𑀪𑀺𑀚𑀸𑀦𑀦𑁆𑀢𑀺 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄. 𑀲𑀫𑀼𑀤𑀸𑀘𑀭𑀢𑀻𑀢𑀺 ‘‘𑀅𑀢𑁆𑀣𑀺 𑀫𑀬𑁆𑀳𑀁 𑀏𑀲 𑀥𑀫𑁆𑀫𑁄’’𑀢𑀺 𑀓𑀣𑁂𑀢𑀺 𑀚𑀸𑀦𑀸𑀧𑁂𑀢𑀺 𑀯𑀸. ‘‘𑀅𑀲𑀦𑁆𑀢𑀁 𑀅𑀪𑀽𑀢’’𑀦𑁆𑀢𑀺 𑀇𑀫𑀲𑁆𑀲 𑀓𑀸𑀭𑀡𑀯𑀘𑀦𑀁 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀦𑁆𑀦𑁄𑀢𑀺. 𑀜𑀸𑀡𑁂𑀦 𑀘 𑀅𑀲𑀘𑁆𑀙𑀺𑀓𑀢𑁄𑀢𑀺 𑀇𑀤𑀁 𑀧𑀦 ‘‘𑀅𑀲𑀁𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀧𑀓𑀢𑀺𑀫𑀦𑀼𑀲𑁆𑀲𑁂𑀳𑀺 𑀉𑀢𑁆𑀢𑀭𑀺𑀢𑀭𑀸𑀦𑀁 𑀩𑀼𑀤𑁆𑀥𑀸𑀤𑀺𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀅𑀥𑀺𑀕𑀫𑀥𑀫𑁆𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀆𑀳 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺. 𑀢𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀅𑀣 𑀧𑀤𑀪𑀸𑀚𑀦𑁂 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀲𑁆𑀫𑀸 𑀓𑀢𑁄𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑁄𑀧𑀺 𑀳𑁄𑀢𑀺, 𑀆𑀭𑁄𑀕𑁆𑀬𑀝𑁆𑀞𑁂𑀦 𑀧𑀦 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 𑀯𑀺𑀬 ‘‘𑀓𑀼𑀲𑀮𑁂 𑀥𑀫𑁆𑀫𑁂’’𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲. 𑀔𑀡𑀮𑀬𑀫𑀼𑀳𑀼𑀢𑁆𑀢-𑀲𑀤𑁆𑀤𑀸 𑀅𑀜𑁆𑀜𑀢𑁆𑀣 𑀪𑀺𑀦𑁆𑀦𑀢𑁆𑀣𑀸𑀧𑀺 𑀳𑁄𑀦𑁆𑀢𑀺, 𑀇𑀥 𑀧𑀦 𑀔𑀡𑀧𑀭𑀺𑀬𑀸𑀬𑀯𑀲𑁂𑀦𑁂𑀯 ‘‘𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁.

𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀅𑀥𑀺𑀕𑀫𑁄, 𑀛𑀸𑀦𑀸𑀤𑀺, 𑀅𑀥𑀺𑀕𑀫𑀲𑁆𑀲 𑀧𑀼𑀘𑁆𑀙𑀸 𑀅𑀥𑀺𑀕𑀫𑀧𑀼𑀘𑁆𑀙𑀸. 𑀢𑁂𑀦𑀸𑀳 ‘‘𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀽’’𑀢𑀺𑀆𑀤𑀺. 𑀉𑀧𑀸𑀬𑀧𑀼𑀘𑁆𑀙𑀸𑀢𑀺 𑀅𑀥𑀺𑀕𑀫𑀼𑀧𑀸𑀬𑀧𑀼𑀘𑁆𑀙𑀸. 𑀓𑀺𑀦𑁆𑀢𑀻𑀢𑀺 𑀓𑁂𑀦 𑀧𑀓𑀸𑀭𑁂𑀦, 𑀓𑁂𑀦 𑀯𑀺𑀥𑀺𑀦𑀸𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑁂 ‘‘𑀓𑀺𑀁 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀅𑀦𑀺𑀤𑁆𑀥𑀸𑀭𑀺𑀢𑀪𑁂𑀤𑀸 𑀛𑀸𑀦𑀸𑀤𑀺𑀯𑀺𑀲𑁂𑀲𑀸 𑀧𑀼𑀘𑁆𑀙𑀺𑀢𑀸𑀢𑀺 𑀇𑀤𑀸𑀦𑀺 𑀢𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀦𑀸𑀓𑀸𑀭𑀤𑀲𑁆𑀲𑀦𑀁.

𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀙𑀳𑀸𑀓𑀸𑀭𑁂𑀳𑀺 𑀅𑀥𑀺𑀕𑀫𑀩𑁆𑀬𑀸𑀓𑀭𑀡𑀁 𑀲𑁄𑀥𑁂𑀢𑀩𑁆𑀩𑀁, 𑀢𑀲𑁆𑀫𑀸. 𑀏𑀢𑁆𑀢𑀸𑀯𑀢𑀸𑀯𑀸𑀢𑀺 𑀏𑀢𑁆𑀢𑀓𑁂𑀦 𑀩𑁆𑀬𑀸𑀓𑀭𑀡𑀫𑀢𑁆𑀢𑁂𑀦𑁂𑀯 𑀦 𑀲𑀓𑁆𑀓𑀸𑀢𑀩𑁆𑀩𑁄. 𑀩𑁆𑀬𑀸𑀓𑀭𑀡𑀜𑁆𑀳𑀺 𑀏𑀓𑀘𑁆𑀘𑀲𑁆𑀲 𑀅𑀬𑀸𑀣𑀸𑀯𑀢𑁄𑀧𑀺 𑀳𑁄𑀢𑀻𑀢𑀺. 𑀇𑀫𑁂𑀲𑀼 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄𑀢𑀺 𑀬𑀣𑀸 𑀦𑀸𑀫 𑀚𑀸𑀢𑀭𑀽𑀧𑀧𑀢𑀺𑀭𑀽𑀧𑀓𑀫𑁆𑀧𑀺 ¶ 𑀚𑀸𑀢𑀭𑀽𑀧𑀁 𑀯𑀺𑀬 𑀔𑀸𑀬𑀢𑀻𑀢𑀺 𑀚𑀸𑀢𑀭𑀽𑀧𑀁 𑀦𑀺𑀖𑀁𑀲𑀦𑀢𑀸𑀧𑀦𑀘𑁆𑀙𑁂𑀤𑀦𑁂𑀳𑀺 𑀲𑁄𑀥𑁂𑀢𑀩𑁆𑀩𑀁, 𑀏𑀯𑀫𑁂𑀯 𑀇𑀫𑁂𑀲𑀼 𑀇𑀤𑀸𑀦𑁂𑀯 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄. 𑀯𑀺𑀫𑁄𑀓𑁆𑀔𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀅𑀥𑀺𑀕𑀢𑀯𑀺𑀲𑁂𑀲𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑀸𑀪𑀸𑀯𑀢𑁄. 𑀲𑁂𑀲𑀧𑀼𑀘𑁆𑀙𑀸𑀲𑀼𑀧𑀺 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀧𑀤𑁂 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀲𑁆𑀲𑀘𑀺 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑁂𑀲𑀼 𑀲𑀦𑁆𑀤𑁂𑀳𑁄 𑀉𑀧𑁆𑀧𑀚𑁆𑀚𑀢𑀺𑀬𑁂𑀯 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀬. 𑀲𑁄 𑀳𑀺 𑀲𑀓𑀤𑀸𑀕𑀸𑀫𑀻 𑀲𑀫𑀸𑀦𑁄𑀧𑀺 ‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 ‘𑀓𑁄 𑀲𑀼 𑀦𑀸𑀫 𑀫𑁂 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀅𑀧𑁆𑀧𑀳𑀻𑀦𑁄, 𑀬𑁂𑀦 𑀫𑁂 𑀏𑀓𑀤𑀸 𑀮𑁄𑀪𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀤𑁄𑀲𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀫𑁄𑀳𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻’’’𑀢𑀺 (𑀫. 𑀦𑀺. 𑁧.𑁧𑁭𑁫) 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀅𑀬𑀁 𑀓𑀺𑀭 𑀭𑀸𑀚𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀮𑁄𑀪𑀤𑁄𑀲𑀫𑁄𑀳𑀸 𑀦𑀺𑀭𑀯𑀲𑁂𑀲𑀸 𑀧𑀳𑀻𑀬𑀦𑁆𑀢𑀻𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺. 𑀓𑀺𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀯𑀁 𑀲𑀦𑁆𑀤𑁂𑀳𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀧𑀡𑁆𑀡𑀢𑁆𑀢𑀺𑀬𑀁 𑀅𑀓𑁄𑀯𑀺𑀤𑀢𑁆𑀢𑀸. ‘‘𑀅𑀬𑀁 𑀓𑀺𑀮𑁂𑀲𑁄 𑀅𑀲𑀼𑀓𑀫𑀕𑁆𑀕𑀯𑀚𑁆𑀛𑁄’’𑀢𑀺 𑀇𑀫𑀺𑀲𑁆𑀲𑀸 𑀧𑀡𑁆𑀡𑀢𑁆𑀢𑀺𑀬𑀸 𑀅𑀓𑁄𑀯𑀺𑀤𑀲𑁆𑀲 𑀳𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀯𑀁 𑀳𑁄𑀢𑀺. 𑀓𑀺𑀁 𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀲𑀸 𑀧𑀦 𑀦 𑀲𑀩𑁆𑀩𑁂𑀲𑀁 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺. 𑀏𑀓𑁄 𑀳𑀺 𑀧𑀳𑀻𑀦𑀓𑀺𑀮𑁂𑀲𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀏𑀓𑁄 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀫𑁂𑀯, 𑀏𑀓𑁄 𑀫𑀕𑁆𑀕𑀫𑁂𑀯, 𑀏𑀓𑁄 𑀨𑀮𑀫𑁂𑀯, 𑀏𑀓𑁄 𑀦𑀺𑀩𑁆𑀩𑀸𑀦𑀫𑁂𑀯. 𑀇𑀫𑀸𑀲𑀼 𑀧𑀦 𑀧𑀜𑁆𑀘𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑁄 𑀮𑀤𑁆𑀥𑀼𑀁 𑀦 𑀯𑀝𑁆𑀝𑀢𑀺. 𑀇𑀢𑀺 𑀬𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦 𑀧𑀭𑀺𑀧𑀼𑀡𑁆𑀡𑀸, 𑀢𑀲𑁆𑀲 𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀧𑀡𑁆𑀡𑀢𑁆𑀢𑀺𑀬𑀁 𑀅𑀓𑁄𑀯𑀺𑀤𑀢𑁆𑀢𑀸 𑀏𑀯𑀁 𑀳𑁄𑀢𑀺. 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸𑀢𑀺 𑀲𑀚𑁆𑀛𑀸𑀬𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 𑀦𑀺𑀧𑀼𑀡𑀸.

𑀬𑀸𑀬 𑀧𑀝𑀺𑀧𑀤𑀸𑀬 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑁄 𑀆𑀕𑀘𑁆𑀙𑀢𑀺, 𑀲𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺 𑀆𑀕𑀫𑀦𑀧𑀝𑀺𑀧𑀤𑀸. 𑀲𑁄𑀥𑁂𑀢𑀩𑁆𑀩𑀸𑀢𑀺 𑀲𑀼𑀤𑁆𑀥𑀸 𑀉𑀤𑀸𑀳𑀼 𑀦 𑀲𑀼𑀤𑁆𑀥𑀸𑀢𑀺 𑀯𑀺𑀘𑀸𑀭𑀡𑀯𑀲𑁂𑀦 𑀲𑁄𑀥𑁂𑀢𑀩𑁆𑀩𑀸. 𑀦 𑀲𑀼𑀚𑁆𑀛𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀅𑀧𑀦𑁂𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀸𑀬 𑀅𑀧𑀦𑁂𑀢𑀩𑁆𑀩𑁄. ‘‘𑀲𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀯𑀸 𑀲𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀻𑀖𑀭𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀬𑀤𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑀤𑀺 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀧𑀝𑀺𑀧𑀤𑀸𑀬 𑀧𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 ¶ 𑀅𑀮𑀕𑁆𑀕𑀢𑁆𑀢𑀸 ‘‘𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀓𑀭𑀡𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀲𑀤𑀺𑀲𑀁, 𑀲𑀫𑀦𑁆𑀢𑀺 𑀅𑀢𑁆𑀣𑁄.

𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀻𑀢𑀺 𑀤𑀻𑀖𑀭𑀢𑁆𑀢𑀁 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑁆𑀢𑀸. 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫…𑀧𑁂… 𑀦 𑀳𑁄𑀢𑀻𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀘 𑀅𑀪𑀸𑀯𑀢𑁄 𑀦 𑀳𑁄𑀢𑀺. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀲𑀩𑁆𑀪𑀸𑀯𑀢𑁄 𑀘 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀳𑁄𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑁄 𑀓𑀺𑀭 𑀏𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑀳𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀢𑀁 𑀦𑀳𑀸𑀬𑀫𑀸𑀦𑀁 𑀓𑀮𑁆𑀬𑀸𑀡𑀻𑀦𑀤𑀻𑀫𑀼𑀔𑀤𑁆𑀯𑀸𑀭𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄 ‘‘𑀓𑀼𑀫𑁆𑀪𑀻𑀮𑁄’’𑀢𑀺 𑀲𑀜𑁆𑀜𑀸𑀬 𑀫𑀳𑀸𑀲𑀤𑁆𑀤𑀁 𑀅𑀓𑀸𑀲𑀺, 𑀢𑀤𑀸 𑀦𑀁 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀚𑀸𑀦𑀺𑀁𑀲𑀼. 𑀘𑀦𑁆𑀤𑀫𑀼𑀔𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀧𑀦 𑀫𑀳𑀸𑀯𑀺𑀳𑀸𑀭𑁂 𑀲𑀗𑁆𑀖𑀢𑁆𑀣𑁂𑀭𑁄 𑀔𑀻𑀡𑀸𑀲𑀯𑁄 𑀤𑀼𑀩𑁆𑀩𑀮𑀘𑀓𑁆𑀔𑀼𑀓𑁄 𑀯𑀺𑀳𑀸𑀭𑁂𑀬𑁂𑀯 𑀅𑀘𑁆𑀙𑀢𑀺. 𑀢𑀁 𑀭𑀸𑀚𑀸 ‘‘𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑁂𑀲𑀼 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀧𑁆𑀧𑁄 𑀯𑀺𑀬 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀣𑁂𑀭𑁄 𑀲𑀺𑀮𑀸𑀣𑀫𑁆𑀪𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. 𑀅𑀳𑀁, 𑀪𑀦𑁆𑀢𑁂, 𑀢𑀺𑀲𑁆𑀲𑁄𑀢𑀺. 𑀲𑀼𑀕𑀦𑁆𑀥𑀁 𑀯𑀸𑀬𑀲𑀺 𑀦𑁄 𑀢𑀺𑀲𑁆𑀲𑀸𑀢𑀺. 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀪𑀬𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀘𑁆𑀘𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄𑀧𑀺 𑀅𑀢𑀺𑀲𑀽𑀭𑁄 𑀳𑁄𑀢𑀺 𑀦𑀺𑀩𑁆𑀪𑀬𑁄, 𑀲𑁄 𑀭𑀚𑀦𑀻𑀬𑁂𑀦 𑀆𑀭𑀫𑁆𑀫𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄. 𑀯𑀲𑀪𑀭𑀸𑀚𑀸𑀧𑀺 𑀳𑀺 𑀏𑀓𑀁 𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀖𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑀤𑀭𑀲𑀸𑀴𑀯𑀁 𑀫𑀤𑁆𑀤𑀫𑀸𑀦𑁄 𑀦𑀺𑀲𑀻𑀤𑀺. 𑀫𑀳𑀸𑀣𑁂𑀭𑀲𑁆𑀲 𑀔𑁂𑀴𑁄 𑀘𑀮𑀺𑀢𑁄, 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀆𑀯𑀺𑀪𑀽𑀢𑁄. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀭𑀲𑀢𑀡𑁆𑀳𑀸 𑀦𑀸𑀫 𑀲𑀼𑀧𑁆𑀧𑀳𑀻𑀦𑀸, 𑀤𑀺𑀩𑁆𑀩𑁂𑀲𑀼𑀧𑀺 𑀭𑀲𑁂𑀲𑀼 𑀦𑀺𑀓𑀦𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀢𑀲𑁆𑀫𑀸 𑀇𑀫𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑀲𑁆𑀲 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀭𑀲𑀢𑀡𑁆𑀳𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺, ‘‘𑀦 𑀢𑁆𑀯𑀁 𑀅𑀭𑀳𑀸’’𑀢𑀺 𑀅𑀧𑀦𑁂𑀢𑀩𑁆𑀩𑁄.

𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀮𑀓𑁆𑀔𑀡𑀸 𑀧𑀸𑀧𑀺𑀘𑁆𑀙𑀸𑀢𑀺 𑀆𑀳 𑁋 ‘‘𑀬𑀸 𑀲𑀸 𑀇𑀥𑁂𑀓𑀘𑁆𑀘𑁄…𑀧𑁂… 𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄𑀯 𑀲𑀫𑀸𑀦𑁄 ‘𑀩𑀳𑀼𑀲𑁆𑀲𑀼𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀲𑀗𑁆𑀕𑀡𑀺𑀓𑀸𑀭𑀸𑀫𑁄𑀯 𑀲𑀫𑀸𑀦𑁄 ‘𑀧𑀯𑀺𑀯𑀺𑀢𑁆𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀓𑀼𑀲𑀻𑀢𑁄𑀯 𑀲𑀫𑀸𑀦𑁄 ¶ ‘𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀫𑀼𑀝𑁆𑀞𑀲𑁆𑀲𑀢𑀻𑀯 𑀲𑀫𑀸𑀦𑁄 ‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀅𑀲𑀫𑀸𑀳𑀺𑀢𑁄𑀯 𑀲𑀫𑀸𑀦𑁄 ‘𑀲𑀫𑀸𑀳𑀺𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀤𑀼𑀧𑁆𑀧𑀜𑁆𑀜𑁄𑀯 𑀲𑀫𑀸𑀦𑁄 ‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀅𑀔𑀻𑀡𑀸𑀲𑀯𑁄𑀯 𑀲𑀫𑀸𑀦𑁄 ‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀺, 𑀬𑀸 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀇𑀘𑁆𑀙𑀸𑀕𑀢𑀸 𑀧𑀸𑀧𑀺𑀘𑁆𑀙𑀢𑀸 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀸𑀧𑀺𑀘𑁆𑀙𑀢𑀸’’𑀢𑀺 (𑀯𑀺𑀪. 𑁮𑁫𑁧) 𑀏𑀯𑀁 𑀯𑀼𑀢𑁆𑀢𑀁 𑀧𑀸𑀴𑀺𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀧𑀺𑀓𑀸𑀬𑀸𑀢𑀺 ¶ 𑀮𑀸𑀫𑀺𑀓𑀸𑀬 𑀇𑀘𑁆𑀙𑀸𑀬. 𑀅𑀧𑀓𑀢𑁄𑀢𑀺 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀲𑀫𑁆𑀫𑀸𑀆𑀚𑀻𑀯𑀢𑁄 𑀅𑀧𑁂𑀢𑁄 𑀓𑀢𑁄𑀢𑀺 𑀇𑀘𑁆𑀙𑀸𑀬 𑀅𑀧𑀓𑀢𑁄. 𑀢𑀣𑀸𑀪𑀽𑀢𑁄 𑀘 𑀫𑀺𑀘𑁆𑀙𑀸𑀚𑀻𑀯𑁂𑀦 𑀅𑀪𑀺𑀪𑀽𑀢𑁄 𑀧𑀭𑀸𑀚𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀪𑀺𑀪𑀽𑀢𑁄 𑀧𑀭𑀸𑀚𑀺𑀢𑁄’’𑀢𑀺.

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻𑀢𑀺 𑀬𑀣𑀸 𑀓𑀼𑀲𑁄 𑀬𑁂𑀦 𑀤𑀼𑀕𑁆𑀕𑀳𑀺𑀢𑁄, 𑀢𑀲𑁆𑀲 𑀳𑀢𑁆𑀣𑀁 𑀅𑀦𑀼𑀓𑀦𑁆𑀢𑀢𑀺 𑀨𑀸𑀮𑁂𑀢𑀺, 𑀏𑀯𑀫𑁂𑀯 𑀲𑀫𑀡𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜𑀫𑁆𑀧𑀺 𑀔𑀡𑁆𑀟𑀲𑀻𑀮𑀸𑀤𑀺𑀢𑀸𑀬 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀦𑀺𑀭𑀬𑀸𑀬 𑀉𑀧𑀓𑀟𑁆𑀠𑀢𑀺, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀺𑀣𑀺𑀮𑁄𑀢𑀺 𑀑𑀮𑀻𑀬𑀺𑀢𑁆𑀯𑀸 𑀓𑀭𑀡𑁂𑀦 𑀲𑀺𑀣𑀺𑀮𑀕𑁆𑀕𑀸𑀳𑁂𑀦 𑀓𑀢𑁄. 𑀧𑀭𑀺𑀩𑁆𑀩𑀸𑀚𑁄𑀢𑀺 𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁄 𑀲𑀫𑀡𑀥𑀫𑁆𑀫𑁄. 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂 𑀯𑀺𑀚𑁆𑀚𑀫𑀸𑀦𑀁 𑀭𑀸𑀕𑀭𑀚𑀸𑀤𑀺𑀁 𑀏𑀯𑀭𑀽𑀧𑁄 𑀲𑀫𑀡𑀥𑀫𑁆𑀫𑁄 𑀅𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀢𑀲𑁆𑀲 𑀉𑀧𑀭𑀺 𑀅𑀧𑀭𑀫𑁆𑀧𑀺 𑀭𑀸𑀕𑀭𑀚𑀸𑀤𑀺𑀁 𑀆𑀓𑀺𑀭𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄𑀢𑀺 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀲𑀫𑀡𑁄 𑀅𑀳’’𑀦𑁆𑀢𑀺 𑀧𑀝𑀺𑀚𑀸𑀦𑀦𑀢𑁄 𑀯𑁄𑀳𑀸𑀭𑀫𑀢𑁆𑀢𑀲𑀺𑀤𑁆𑀥𑁄 𑀪𑀺𑀓𑁆𑀔𑀼𑀪𑀸𑀯𑁄. 𑀅𑀚𑀸𑀦𑀫𑁂𑀯𑀸𑀢𑀺 𑀧𑀸𑀞𑁂 𑀏𑀯𑀸𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀚𑀸𑀦𑀫𑁂𑀯𑀦𑁆𑀢𑀺 𑀧𑀸𑀞𑁂 𑀧𑀦 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀻𑀢𑀺 𑀅𑀯𑀘𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁯𑁯. 𑀅𑀲𑀼𑀪𑀚𑁆𑀛𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀬𑀕𑀢𑀸𑀲𑀢𑀺𑀚𑁆𑀛𑀸𑀦𑀜𑁆𑀘 𑀓𑀲𑀺𑀡𑀚𑁆𑀛𑀸𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 ‘‘𑀓𑀸𑀬𑀕𑀢𑀸𑀲𑀢𑀺𑀚𑁆𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀁 𑀯𑀤𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀫𑁄𑀓𑁆𑀔𑁄𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑁄 𑀯𑀺𑀯𑀺𑀥𑀢𑁆𑀣𑁄 𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀝𑁆𑀞𑀼 𑀫𑀼𑀢𑁆𑀢𑁄’’𑀢𑀺𑀆𑀤𑀺. 𑀯𑀺𑀫𑁄𑀓𑁆𑀔𑁄𑀢𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸. 𑀢𑀲𑁆𑀲 𑀲𑀕𑀼𑀡𑀢𑁄 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀧𑀦𑀸𑀬’’ ¶ 𑀦𑁆𑀢𑀺𑀆𑀤𑀺. 𑀫𑀕𑁆𑀕𑁄 𑀳𑀺 𑀦𑀸𑀫 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀮𑀪𑀢𑀺 𑀲𑀭𑀲𑁂𑀦 𑀯𑀸 𑀧𑀘𑁆𑀘𑀦𑀻𑀓𑁂𑀦 𑀯𑀸 𑀲𑀕𑀼𑀡𑁂𑀦 𑀯𑀸 𑀆𑀭𑀫𑁆𑀫𑀡𑁂𑀦 𑀯𑀸 𑀆𑀕𑀫𑀦𑁂𑀦 𑀯𑀸. 𑀲𑀘𑁂 𑀳𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺, 𑀲𑀘𑁂 𑀤𑀼𑀓𑁆𑀔𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺, 𑀲𑀘𑁂 𑀅𑀦𑀢𑁆𑀢𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺, 𑀇𑀤𑀁 𑀲𑀭𑀲𑀢𑁄 𑀦𑀸𑀫𑀁 𑀦𑀸𑀫. 𑀬𑀲𑁆𑀫𑀸 𑀧𑀦𑁂𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑀸𑀦𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀥𑀼𑀯𑀦𑀺𑀫𑀺𑀢𑁆𑀢𑀲𑀲𑁆𑀲𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀚𑀳𑀦𑁆𑀢𑁄 𑀆𑀕𑀢𑁄, 𑀢𑀲𑁆𑀫𑀸 𑀅𑀦𑀺𑀫𑀺𑀢𑁆𑀢𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀦 𑀲𑀼𑀔𑀲𑀜𑁆𑀜𑀁 𑀧𑀳𑀸𑀬 𑀧𑀡𑀺𑀥𑀺𑀁 𑀧𑀢𑁆𑀣𑀦𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀢𑁆𑀢𑀧𑀼𑀕𑁆𑀕𑀮𑀲𑀜𑁆𑀜𑀁 𑀧𑀳𑀸𑀬 𑀲𑀗𑁆𑀔𑀸𑀭𑀸𑀦𑀁 𑀲𑀼𑀜𑁆𑀜𑀢𑁄 𑀤𑀺𑀝𑁆𑀞𑀢𑁆𑀢𑀸 𑀲𑀼𑀜𑁆𑀜𑀢𑁄𑀢𑀺 𑀇𑀤𑀁 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀁 𑀦𑀸𑀫.

𑀭𑀸𑀕𑀸𑀤𑀻𑀳𑀺 ¶ 𑀧𑀦𑁂𑀲 𑀲𑀼𑀜𑁆𑀜𑀢𑀢𑁆𑀢𑀸 𑀲𑀼𑀜𑁆𑀜𑀢𑁄. 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁𑀬𑁂𑀯 𑀯𑀸 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑁄. 𑀭𑀸𑀕𑀸𑀤𑀺𑀧𑀡𑀺𑀥𑀺𑀆𑀤𑀻𑀦𑀁 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀇𑀤𑀫𑀲𑁆𑀲 𑀲𑀕𑀼𑀡𑀢𑁄 𑀦𑀸𑀫𑀁. 𑀲𑁆𑀯𑀸𑀬𑀁 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀫𑀲𑁆𑀲 𑀆𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀆𑀕𑀫𑀦𑀁 𑀧𑀦 𑀤𑀼𑀯𑀺𑀥𑀁 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀫𑀕𑁆𑀕𑀸𑀕𑀫𑀦𑀜𑁆𑀘. 𑀢𑀢𑁆𑀣 𑀫𑀕𑁆𑀕𑁂 𑀯𑀺𑀧𑀲𑁆𑀲𑀦𑀸𑀕𑀫𑀦𑀁 𑀮𑀩𑁆𑀪𑀢𑀺, 𑀨𑀮𑁂 𑀫𑀕𑁆𑀕𑀸𑀕𑀫𑀦𑀁. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀳𑀺 𑀲𑀼𑀜𑁆𑀜𑀢𑀸 𑀦𑀸𑀫, 𑀲𑀼𑀜𑁆𑀜𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀲𑀼𑀜𑁆𑀜𑀢𑁄. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄. 𑀇𑀤𑀁 𑀧𑀦 𑀦𑀸𑀫𑀁 𑀦 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀢𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲 𑀅𑀯𑀺𑀚𑀳𑀦𑀢𑁄 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀁, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀮𑀩𑁆𑀪𑀢𑀺. 𑀢𑀢𑁆𑀭 𑀳𑀺 𑀕𑁄𑀢𑁆𑀭𑀪𑀼𑀜𑀸𑀡𑀁 𑀅𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀺𑀫𑀺𑀢𑁆𑀢𑀦𑀸𑀫𑀓𑀁 𑀳𑀼𑀢𑁆𑀯𑀸 𑀲𑀬𑀁 𑀆𑀕𑀫𑀦𑀺𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀫𑀕𑁆𑀕𑀲𑁆𑀲 𑀦𑀸𑀫𑀁 𑀤𑁂𑀢𑀻𑀢𑀺 𑀯𑀤𑀦𑁆𑀢𑀺, 𑀢𑁂𑀦 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀫𑀕𑁆𑀕𑀸𑀕𑀫𑀦𑁂𑀦 𑀧𑀦 𑀨𑀮𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁂𑀲𑀼 𑀧𑀡𑀺𑀥𑀺𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫, 𑀅𑀧𑁆𑀧𑀡𑀺𑀳𑀺𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀧𑁆𑀧𑀡𑀺𑀳𑀺𑀢𑁄, 𑀅𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀲𑁆𑀲 𑀨𑀮𑀁 𑀅𑀧𑁆𑀧𑀡𑀺𑀳𑀺𑀢𑀁. 𑀏𑀯𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀦𑀸𑀫𑀁 𑀫𑀕𑁆𑀕𑀲𑁆𑀲 𑀤𑁂𑀢𑀺, 𑀫𑀕𑁆𑀕𑁄 𑀨𑀮𑀲𑁆𑀲𑀸𑀢𑀺 𑀇𑀤𑀁 𑀆𑀕𑀫𑀦𑀢𑁄 𑀦𑀸𑀫𑀁. 𑀲𑀼𑀜𑁆𑀜𑀢𑁆𑀢𑀸𑀢𑀺 𑀯𑀺𑀯𑀺𑀢𑁆𑀢𑀢𑁆𑀢𑀸. 𑀦 𑀳𑀺 𑀫𑀕𑁆𑀕𑁂 𑀭𑀸𑀕𑀸𑀤𑀬𑁄 𑀲𑀦𑁆𑀢𑀺, 𑀉𑀧𑀭𑀽𑀧𑀭𑀺 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀭𑀸𑀕𑀸𑀤𑀬𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑀺𑀢𑁆𑀢𑁂𑀳𑀻’’𑀢𑀺. 𑀲𑀯𑀺𑀕𑁆𑀕𑀳𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀦𑀫𑁆𑀧𑁂𑀢𑁆𑀣 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀭𑀸𑀕𑀸𑀤𑀬𑁄𑀯 ¶ 𑀧𑀯𑀢𑁆𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀡𑀺𑀥𑀻𑀢𑀺 𑀆𑀳 ‘‘𑀭𑀸𑀕𑀤𑁄𑀲𑀫𑁄𑀳𑀧𑀡𑀺𑀥𑀻𑀦’’𑀦𑁆𑀢𑀺.

𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀺𑀁 𑀲𑀦𑁆𑀥𑀸𑀬 𑀅𑀯𑀘𑀦𑀢𑁄 ‘‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑁄𑀢𑀺. 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀘𑀢𑀼𑀓𑁆𑀓𑀸𑀤𑀺𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦. 𑀓𑀺𑀜𑁆𑀘𑀸𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑁂𑀯 𑀤𑀲𑁆𑀲𑀺𑀢𑀁, 𑀢𑀢𑁆𑀣 𑀧𑀦 ‘‘𑀮𑁄𑀓𑀼𑀢𑁆𑀢𑀭𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀮𑁄𑀓𑀼𑀢𑁆𑀢𑀭-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀇𑀥 𑀮𑁄𑀓𑀼𑀢𑁆𑀢𑀭-𑀲𑀤𑁆𑀤𑁂𑀦 𑀯𑀺𑀦𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼.

𑀦𑀦𑀼 𑀘 ‘‘𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀫𑀢𑁆𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀳𑁄𑀢𑀻𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀲𑀦𑁆𑀥𑀸𑀬 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸 𑀓𑀺𑀘𑁆𑀘𑀯𑀲𑁂𑀦 𑀫𑀕𑁆𑀕𑁄 𑀤𑀻𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀭𑀸𑀕𑀁 𑀲𑀦𑁆𑀥𑀸𑀬 ‘‘𑀢𑀢𑀺𑀬𑀫𑀕𑁆𑀕𑁂𑀦 𑀳𑀺 𑀭𑀸𑀕𑀤𑁄𑀲𑀸𑀦𑀁 𑀧𑀳𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑁂 𑀲𑀦𑁆𑀥𑀸𑀬. 𑀦 𑀳𑀺 𑀢𑁂 𑀢𑁂𑀦 𑀧𑀳𑀻𑀬𑀦𑁆𑀢𑀺 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸.

𑀭𑀸𑀕𑀸 ¶ 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸𑀢𑀺 𑀭𑀸𑀕𑀸 𑀘𑀺𑀢𑁆𑀢𑀲𑁆𑀲 𑀯𑀺𑀦𑀻𑀯𑀭𑀡𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀕𑀸 𑀯𑀺𑀫𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀲𑁆𑀲𑁂𑀯 𑀭𑀸𑀕𑀦𑀻𑀯𑀭𑀡𑀲𑁆𑀲 𑀅𑀪𑀸𑀯𑁂𑀦 𑀯𑀺𑀕𑀢𑀦𑀻𑀯𑀭𑀡𑀢𑁆𑀢𑀸 𑀯𑀺𑀦𑀻𑀯𑀭𑀡𑀢𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀬𑀸 𑀘 𑀧𑀜𑁆𑀘 𑀯𑀺𑀚𑁆𑀚𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀩𑁆𑀩𑀝𑁆𑀝𑀺𑀢𑀮𑁄𑀓𑀼𑀢𑁆𑀢𑀭𑀢𑁆𑀢𑀸𑀢𑀺 𑀯𑀺𑀲𑀼𑀁𑀬𑁂𑀯 𑀮𑁄𑀓𑀢𑁄 𑀅𑀧𑀕𑀢𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀬𑀣𑀸 𑀯𑀺𑀦𑀸 𑀮𑁄𑀓𑀼𑀢𑁆𑀢𑀭-𑀲𑀤𑁆𑀤𑁂𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻𑀢𑀺 𑀯𑀼𑀢𑁆𑀢𑁂𑀧𑀺 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀓𑀺𑀜𑁆𑀘𑀸𑀧𑀺 𑀬𑀼𑀚𑁆𑀚𑀢𑀺, 𑀅𑀣 𑀔𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀏𑀯𑀫𑀺𑀤𑀁 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦…𑀧𑁂… 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀧𑀫𑀸𑀡𑀁 𑀓𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀢𑀢𑁆𑀣𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁦𑁦. 𑀉𑀮𑁆𑀮𑀧𑀦𑀸𑀓𑀸𑀭𑀦𑁆𑀢𑀺 ¶ 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀆𑀤𑀺𑀉𑀮𑁆𑀮𑀧𑀦𑀸𑀓𑀸𑀭𑀁. 𑀆𑀧𑀢𑁆𑀢𑀺𑀪𑁂𑀤𑀦𑁆𑀢𑀺 ‘‘𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀆𑀧𑀢𑁆𑀢𑀺𑀪𑁂𑀤𑀁. 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀦 𑀬𑁄𑀚𑀺𑀢𑀦𑁆𑀢𑀺 𑀏𑀢𑁆𑀣 ‘‘𑀧𑀞𑀫𑀚𑁆𑀛𑀸𑀦𑁂𑀦𑀸’’𑀢𑀺 𑀧𑀸𑀞𑁄𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀤𑁂𑀯 𑀬𑀼𑀢𑁆𑀢𑀁.

𑀓𑀢𑁆𑀢𑀼𑀲𑀸𑀥𑀦𑁄𑀧𑀺 𑀪𑀡𑀺𑀢-𑀲𑀤𑁆𑀤𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀬𑁂𑀦 𑀘𑀺𑀢𑁆𑀢𑁂𑀦 𑀫𑀼𑀲𑀸 𑀪𑀡𑀢𑀺, 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀦 𑀲𑀓𑁆𑀓𑀸 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀺𑀢𑀼𑀁, 𑀅𑀦𑁆𑀢𑀭𑀦𑁆𑀢𑀭𑀸 𑀧𑀦 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻’’𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀼𑀲𑀸𑀯𑀸𑀤𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀆𑀪𑁄𑀕𑀁 𑀓𑀢𑁆𑀯𑀸 𑀪𑀡𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀁. 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀯𑀺𑀦𑀸 𑀲𑀳𑀲𑀸 𑀪𑀡𑀦𑁆𑀢𑀲𑁆𑀲 𑀯𑀘𑀦𑀓𑁆𑀔𑀡𑁂 ‘‘𑀫𑀼𑀲𑀸 𑀏𑀢’’𑀦𑁆𑀢𑀺 𑀉𑀧𑀝𑁆𑀞𑀺𑀢𑁂𑀧𑀺 𑀦𑀺𑀯𑀢𑁆𑀢𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀯𑀺𑀲𑀬𑀪𑀸𑀯𑀢𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀤𑀯𑀸𑀢𑀺 𑀲𑀳𑀲𑀸. 𑀭𑀯𑀸𑀢𑀺 𑀅𑀜𑁆𑀜𑀁 𑀯𑀢𑁆𑀢𑀼𑀓𑀸𑀫𑀲𑁆𑀲 𑀔𑀮𑀺𑀢𑁆𑀯𑀸 𑀅𑀜𑁆𑀜𑀪𑀡𑀦𑀁.

𑀢𑀁 𑀚𑀸𑀦𑀸𑀢𑀻𑀢𑀺 𑀢𑀁𑀜𑀸𑀡𑀁, 𑀢𑀲𑁆𑀲 𑀪𑀸𑀯𑁄 𑀢𑀁𑀜𑀸𑀡𑀢𑀸, 𑀜𑀸𑀡𑀲𑁆𑀲 𑀅𑀢𑁆𑀣𑀲𑀁𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀲𑀫𑁄𑀥𑀸𑀦𑀦𑁆𑀢𑀺 𑀜𑀸𑀡𑀲𑁆𑀲 𑀩𑀳𑀼𑀪𑀸𑀯𑁄, 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀦𑁂𑀓𑀜𑀸𑀡𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀓𑁆𑀓𑀸…𑀧𑁂… 𑀚𑀸𑀦𑀺𑀢𑀼𑀦𑁆𑀢𑀺 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑀸𑀯𑀩𑁄𑀥𑁄 𑀘 𑀈𑀤𑀺𑀲𑀲𑁆𑀲 ¶ 𑀜𑀸𑀡𑀲𑁆𑀲 𑀦𑀢𑁆𑀣𑀺, ‘‘𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀁 ‘‘𑀪𑀡𑀸𑀫𑀻’’𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀜𑁆𑀘 ‘‘𑀪𑀡𑀺𑀢’’𑀦𑁆𑀢𑀺 𑀧𑀯𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸𑀢𑀺 𑀆𑀳 𑁋 ‘‘𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀦…𑀧𑁂… 𑀦𑀺𑀭𑀼𑀚𑁆𑀛𑀢𑀻’’𑀢𑀺. 𑀢𑀲𑁆𑀫𑀺𑀁 𑀧𑀼𑀩𑁆𑀩𑀪𑀸𑀕𑁂 𑀲𑀢𑀺 ‘‘𑀲𑁂𑀲𑀤𑁆𑀯𑀬𑀁 𑀦 𑀳𑁂𑀲𑁆𑀲𑀢𑀻’’𑀢𑀺 𑀏𑀢𑀁 𑀦𑀢𑁆𑀣𑀺, 𑀅𑀯𑀲𑁆𑀲𑀁 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀡𑀺𑀲𑁆𑀲𑀸𑀫𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀲𑀢𑀺 ‘‘𑀪𑀡𑀸𑀫𑀺 𑀪𑀡𑀺𑀢’’𑀦𑁆𑀢𑀺 𑀏𑀢𑀁 𑀤𑁆𑀯𑀬𑀁 𑀦 𑀦 𑀳𑁄𑀢𑀺, 𑀳𑁄𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀁 𑀯𑀺𑀬 𑀧𑀓𑀸𑀲𑀢𑀻𑀢𑀺 𑀅𑀦𑁂𑀓𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀁 𑀏𑀓𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑀤𑀺𑀲𑀁 𑀳𑀼𑀢𑁆𑀯𑀸 𑀧𑀓𑀸𑀲𑀢𑀺. 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄𑀢𑀺 ¶ 𑀇𑀫𑀸𑀦𑀺 𑀤𑁆𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀦𑁆𑀦𑁄𑀢𑀺 𑀇𑀫𑁂𑀲𑀁 𑀅𑀲𑀢𑀺𑀧𑀺 𑀓𑀸𑀮𑀦𑀸𑀦𑀢𑁆𑀢𑁂 𑀯𑀘𑀦𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀺𑀲𑀼𑀁 𑀕𑀳𑀡𑀁.

𑁨𑁦𑁭. 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦. 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀺𑀬 ‘‘𑀲𑀭𑀸𑀕𑁄 𑀲𑀤𑁄𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀸𑀪𑀸𑀯𑀢𑁄 𑀘𑀢𑁆𑀢𑀫𑁆𑀧𑀺 𑀓𑁂𑀘𑀺 𑀕𑀡𑁆𑀳𑀦𑁆𑀢𑀺, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀁 𑀬𑁂𑀦 𑀯𑀦𑁆𑀢𑀁, 𑀲𑁄 𑀧𑀼𑀦 𑀢𑀁 𑀆𑀤𑀺𑀬𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀯𑀦𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀲𑀦𑁆𑀢𑀢𑀺𑀮𑀕𑁆𑀕𑀁 𑀲𑀺𑀬𑀸, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀦𑁆𑀢𑀢𑀺𑀢𑁄 𑀯𑀺𑀫𑁄𑀘𑀦𑀯𑀲𑁂𑀦𑀸’’𑀢𑀺. 𑀫𑀼𑀢𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀩𑀦𑁆𑀥𑀦𑀁 𑀯𑀺𑀬 𑀨𑀮𑀁 𑀓𑀼𑀳𑀺𑀜𑁆𑀘𑀺 𑀢𑀺𑀝𑁆𑀞𑀢𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀳𑀻𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑁆𑀯𑀘𑀺 𑀅𑀦𑀯𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀬𑀣𑀸 𑀓𑀺𑀜𑁆𑀘𑀺 𑀤𑀼𑀦𑁆𑀦𑀺𑀲𑁆𑀲𑀝𑁆𑀞𑀁 𑀧𑀼𑀦 𑀆𑀤𑀸𑀬 𑀲𑀫𑁆𑀫𑀤𑁂𑀯 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑀝𑁆𑀞𑀁 𑀆𑀤𑀺𑀦𑁆𑀦𑀲𑀤𑀺𑀲𑀁 𑀫𑀕𑁆𑀕𑁂𑀦 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀦𑀺𑀲𑁆𑀲𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀉𑀓𑁆𑀔𑁂𑀝𑀺𑀢𑁄𑀢𑀺 𑀉𑀢𑁆𑀢𑀸𑀲𑀺𑀢𑁄, 𑀉𑀢𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀘 𑀉𑀢𑁆𑀢𑀸𑀲𑁂𑀢𑁆𑀯𑀸 𑀧𑀮𑀸𑀧𑀺𑀢𑁄, 𑀦 𑀧𑀼𑀦 𑀲𑁄 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑀺𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀔𑀺𑀝-𑀲𑀤𑁆𑀤𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀉𑀢𑁆𑀢𑀸𑀲𑀢𑁆𑀣𑁂 𑀧𑀞𑀦𑁆𑀢𑀻𑀢𑀺 𑀆𑀳 𑁋 ‘‘𑀲𑁆𑀯𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄’’𑀢𑀺. 𑀅𑀡𑀼𑀬𑁂𑀯 𑀅𑀡𑀼𑀲𑀳𑀕𑀢𑀁, 𑀅𑀢𑀺𑀔𑀼𑀤𑁆𑀤𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀓𑁂𑀯𑀮𑀜𑁆𑀳𑀺𑀬𑀦𑁆𑀢𑀺 𑀓𑁂𑀯𑀮𑀜𑁆𑀳𑀺 𑀅𑀬𑀁. ‘‘𑀯𑀸𑀭𑁄’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀗𑁆𑀔𑀡𑀜𑁆𑀜𑁂𑀯 𑀚𑀸𑀦𑀸𑀢𑀻𑀢𑀺 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂 𑀢𑀤𑀢𑁆𑀣𑀲𑁆𑀲 𑀧𑀓𑀢𑀺𑀬𑀸 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁. 𑀏𑀯𑀁 𑀧𑀦 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀧𑀓𑁆𑀓𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 ‘‘𑀫𑀁 𑀅𑀭𑀳𑀸𑀢𑀺 𑀚𑀸𑀦𑀸𑀢𑀽’’𑀢𑀺 𑀢𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀢𑀻𑀢𑀺 𑀆𑀕𑀢𑀯𑀢𑁆𑀣𑀼𑀫𑁆𑀳𑀺 𑀯𑀺𑀬 𑀢𑀲𑁆𑀫𑀺𑀁 𑀔𑀡𑁂 𑀅𑀯𑀺𑀤𑀺𑀢𑁂𑀧𑀺 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀚𑀸𑀦𑀦𑀮𑀓𑁆𑀔𑀡𑀦𑁆𑀢𑀺 ‘‘𑀢𑀗𑁆𑀔𑀡𑁂 𑀚𑀸𑀦𑀦𑀁 𑀦𑀸𑀫 𑀈𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀁 ¶ . 𑀯𑀺𑀜𑁆𑀜𑀢𑁆𑀢𑀺𑀧𑀣𑁂𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀦𑀁 𑀕𑀳𑀡𑀬𑁄𑀕𑁆𑀕𑁂 𑀧𑀤𑁂𑀲𑁂, 𑀧𑀓𑀢𑀺𑀘𑀓𑁆𑀔𑀼𑀦𑀸 𑀧𑀓𑀢𑀺𑀲𑁄𑀢𑁂𑀦 𑀘 𑀤𑀝𑁆𑀞𑀼𑀁 𑀲𑁄𑀢𑀼𑀜𑁆𑀘 𑀅𑀭𑀳𑀝𑁆𑀞𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀯𑀺𑀜𑁆𑀜𑀢𑁆𑀢𑀺𑀧𑀣𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀘𑁂 𑀓𑁄𑀘𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀤𑀺𑀩𑁆𑀩𑀸𑀬 𑀘 𑀲𑁄𑀢𑀥𑀸𑀢𑀼𑀬𑀸 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀚𑀸𑀦𑀸𑀢𑀺, 𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀲𑁆𑀲𑀼𑀢𑀧𑀼𑀩𑁆𑀩𑀲𑁆𑀲 ‘‘𑀓𑀺𑀫𑀺𑀤𑀁 𑀯𑀼𑀢𑁆𑀢’’𑀦𑁆𑀢𑀺 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀲𑀼𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀁 𑀯𑀘𑀦𑀫𑀢𑁆𑀢𑀁 𑀅𑀲𑁆𑀲𑀼𑀢𑀧𑀼𑀩𑁆𑀩𑁂𑀦𑀧𑀺 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀫𑀺𑀤’’𑀦𑁆𑀢𑀺 𑀲𑀦𑁆𑀤𑁂𑀳𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 ‘‘𑀛𑀸𑀦𑀁 𑀦𑀸𑀫 𑀓𑀺𑀭𑁂𑀲 𑀲𑀫𑀸𑀧𑀚𑁆𑀚𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑁂𑀧𑀺 𑀜𑀸𑀢𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺𑀬𑁂𑀯.

𑀅𑀦𑀸𑀧𑀢𑁆𑀢𑀺𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁨𑁨𑁨. 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀯𑀢𑁆𑀢𑀼𑀓𑀸𑀫𑀲𑁆𑀲, ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀽𑀧𑀢𑁄 𑀧𑀦 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀯𑀢𑁆𑀣𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀦𑁆𑀢𑁄𑀧𑀺 𑀯𑁄𑀳𑀸𑀭𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀬𑀦𑁆𑀢𑁄𑀧𑀻𑀢𑀺 ‘‘𑀇𑀫𑀲𑁆𑀲 𑀫𑀬𑀺 𑀦𑀢𑁆𑀣𑀺𑀪𑀸𑀯𑀁 𑀅𑀜𑁆𑀜𑁂𑀧𑀺 𑀚𑀸𑀦𑀦𑁆𑀢𑀸 𑀅𑀢𑁆𑀣𑀺 𑀦𑀼 𑀔𑁄’’𑀢𑀺 𑀪𑀸𑀬𑀦𑁆𑀢𑁄𑀧𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁨𑁩. 𑀲𑁂𑀓𑁆𑀔𑀪𑀽𑀫𑀺𑀬𑀦𑁆𑀢𑀺 𑀇𑀫𑀺𑀦𑀸 𑀛𑀸𑀦𑀪𑀽𑀫𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸𑀦𑀁.

𑀧𑀺𑀡𑁆𑀟𑀸𑀬 𑀘𑀭𑀡𑀲𑁆𑀲 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀪𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲𑀧𑀺 ¶ 𑀧𑀼𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀘𑀻𑀯𑀭𑀲𑀡𑁆𑀞𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑁨𑁨𑁫. 𑀆𑀭𑀸𑀥𑀦𑀻𑀬𑁄, 𑀆𑀯𑀼𑀲𑁄, 𑀥𑀫𑁆𑀫𑁄 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀢𑀺 𑀯𑀢𑁆𑀣𑀼𑀤𑁆𑀯𑀬𑀁 𑀏𑀓𑀲𑀤𑀺𑀲𑀫𑁆𑀧𑀺 𑀤𑁆𑀯𑀻𑀳𑀺 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑁄𑀘𑀺𑀢𑀢𑁆𑀢𑀸 𑀪𑀕𑀯𑀢𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀆𑀭𑁄𑀧𑁂𑀢𑀩𑁆𑀩𑀦𑁆𑀢𑀺 𑀧𑀸𑀴𑀺𑀬𑀁 𑀆𑀭𑁄𑀧𑀺𑀢𑀁.

𑁨𑁨𑁬. 𑀧𑀲𑀸𑀤𑀪𑀜𑁆𑀜𑀦𑁆𑀢𑀺 ¶ 𑀓𑁂𑀯𑀮𑀁 𑀧𑀲𑀸𑀤𑀫𑀢𑁆𑀢𑁂𑀦 𑀪𑀡𑀦𑀁, 𑀦 𑀧𑀦 ‘‘𑀲𑀪𑀸𑀯𑀢𑁄 𑀏𑀢𑁂 𑀅𑀭𑀳𑀦𑁆𑀢𑁄𑀬𑁂𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. 𑀢𑁂𑀦𑁂𑀯𑁂𑀢𑁆𑀣 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀬𑀤𑀺 𑀧𑀦 ‘‘𑀏𑀢𑁂 𑀲𑀪𑀸𑀯𑀢𑁄 𑀅𑀭𑀳𑀦𑁆𑀢𑁄𑀬𑁂𑀯𑀸’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀆𑀬𑀦𑁆𑀢𑀼 𑀪𑁄𑀦𑁆𑀢𑁄 𑀅𑀭𑀳𑀦𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁.

𑁨𑁨𑁭. 𑀧𑀤𑀲𑀸 𑀕𑀫𑀦𑀁 𑀲𑀦𑁆𑀥𑀸𑀬 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 ‘‘𑀬𑀸𑀦𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 ‘‘𑀇𑀤𑁆𑀥𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀻𑀢𑀺 ‘‘𑀬𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀢𑀁 𑀫𑀬𑀁 ‘𑀅𑀭𑀳𑀸’𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀘𑁆𑀙𑀦𑁆𑀢𑀸𑀧𑀺 𑀲𑀳 𑀦𑀺𑀓𑁆𑀔𑀦𑁆𑀢𑀪𑀸𑀯𑀢𑁄 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀕𑀘𑁆𑀙𑀦𑁆𑀢𑁄𑀧𑀺 ‘𑀉𑀝𑁆𑀞𑁂𑀣 𑀕𑀘𑁆𑀙𑀸𑀫, 𑀏𑀣 𑀕𑀘𑁆𑀙𑀸𑀫𑀸’𑀢𑀺 𑀏𑀯𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀫𑀦𑁂 𑀧𑀼𑀩𑁆𑀩𑀸𑀧𑀭𑀁 𑀕𑀘𑁆𑀙𑀦𑁆𑀢𑁄𑀧𑀺 𑀦𑀸𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑀁 𑀧𑀦 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀦𑁆𑀢𑀺 ‘‘𑀇𑀥 𑀅𑀭𑀳𑀦𑁆𑀢𑁄𑀬𑁂𑀯 𑀯𑀲𑀦𑁆𑀢𑀽𑀢𑀺 𑀬𑀤𑀺 𑀪𑀺𑀓𑁆𑀔𑀽 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺, 𑀏𑀢𑀁 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢’’𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀓𑀢𑀺𑀓𑀯𑀢𑁆𑀢𑀁 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀢𑀺 𑀦𑀸𑀦𑀸𑀚𑀦𑀧𑀤𑀯𑀸𑀲𑀺𑀦𑁄. 𑀲𑀗𑁆𑀖𑀮𑀸𑀪𑁄𑀢𑀺 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑁄. 𑀅𑀬𑀜𑁆𑀘 𑀧𑀝𑀺𑀓𑁆𑀔𑁂𑀧𑁄 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀩𑀳𑀺𑀲𑀻𑀫𑀝𑁆𑀞𑀸𑀦𑀁 𑀅𑀯𑀺𑀲𑁂𑀲𑁂𑀦 𑀲𑀗𑁆𑀖𑀮𑀸𑀪𑀲𑁆𑀲 𑀲𑀸𑀫𑀺𑀪𑀸𑀯𑀸𑀧𑀸𑀤𑀦𑀁 𑀲𑀦𑁆𑀥𑀸𑀬 𑀓𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀢𑁄 ‘‘𑀏𑀢𑁆𑀢𑀓𑀁 𑀤𑀸𑀢𑀼𑀁, 𑀈𑀤𑀺𑀲𑀁 𑀯𑀸 𑀤𑀸𑀢𑀼𑀁, 𑀏𑀢𑁆𑀢𑀓𑀸𑀦𑀁 𑀯𑀸 𑀤𑀸𑀢𑀼𑀁, 𑀈𑀤𑀺𑀲𑀲𑁆𑀲 𑀯𑀸 𑀤𑀸𑀢𑀼𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁨𑁮. 𑀆𑀬𑀲𑁆𑀫𑀸 𑀘 𑀮𑀓𑁆𑀔𑀡𑁄𑀢𑀺𑀆𑀤𑀻𑀲𑀼 𑀓𑁄 𑀧𑀦𑀸𑀬𑀲𑁆𑀫𑀸 𑀮𑀓𑁆𑀔𑀡𑁄, 𑀓𑀲𑁆𑀫𑀸 𑀘𑀲𑁆𑀲 𑀮𑀓𑁆𑀔𑀡𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀓𑁄 𑀘𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀲𑁆𑀫𑀸 𑀘 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀢𑀼𑀁 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦. 𑀩𑁆𑀭𑀳𑁆𑀫𑀲𑀫𑁂𑀦𑀸𑀢𑀺 ¶ 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀲𑀫𑁂𑀦. 𑀈𑀲𑀓𑀁 𑀳𑀲𑀺𑀢𑀁 𑀲𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀦𑁆𑀤𑀳𑀲𑀺𑀢’’𑀦𑁆𑀢𑀺. 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀦𑁆𑀢𑀺 𑀦𑀬𑀺𑀤𑀁 𑀅𑀯𑀺𑀜𑁆𑀜𑀸𑀡𑀓𑀁 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑀢𑁆𑀢𑀁, 𑀅𑀣 𑀔𑁄 𑀏𑀓𑁄 𑀧𑁂𑀢𑁄𑀢𑀺 𑀆𑀳 ‘‘𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀲𑀢𑁆𑀢’’𑀦𑁆𑀢𑀺. 𑀏𑀢𑁂 𑀅𑀢𑁆𑀢𑀪𑀸𑀯𑀸𑀢𑀺 𑀧𑁂𑀢𑀢𑁆𑀢𑀪𑀸𑀯𑀸. 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀤𑁂𑀯𑀢𑁆𑀢𑀪𑀸𑀯𑀸 𑀯𑀺𑀬 𑀧𑀓𑀢𑀺𑀬𑀸 𑀆𑀧𑀸𑀣𑀁 𑀦 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀧𑀦 ¶ 𑀭𑀼𑀘𑀺𑀬𑀸 𑀆𑀧𑀸𑀣𑀁 𑀆𑀕𑀘𑁆𑀙𑁂𑀬𑁆𑀬𑀼𑀁. 𑀫𑀦𑀼𑀲𑁆𑀲𑀸𑀦𑀁 𑀤𑀼𑀓𑁆𑀔𑀸𑀪𑀺𑀪𑀽𑀢𑀸𑀦𑀁 𑀅𑀦𑀸𑀣𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸 𑀓𑀭𑀼𑀡𑀸𑀢𑀺 𑀆𑀳 ‘‘𑀓𑀸𑀭𑀼𑀜𑁆𑀜𑁂 𑀓𑀢𑁆𑀢𑀩𑁆𑀩𑁂’’𑀢𑀺. 𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀩𑀼𑀤𑁆𑀥𑀜𑀸𑀡𑀲𑁆𑀲 𑀘 𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀧𑀢𑁆𑀢𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀤𑀼𑀪𑀬𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀥𑀫𑁆𑀫𑀥𑀸𑀢𑀽𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀥𑀫𑁆𑀫𑀥𑀸𑀢𑀽𑀢𑀺 𑀯𑀸 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄. 𑀉𑀧𑀧𑀢𑁆𑀢𑀻𑀢𑀺 𑀚𑀸𑀢𑀺. 𑀉𑀧𑀧𑀢𑁆𑀢𑀺𑀲𑀻𑀲𑁂𑀦 𑀳𑀺 𑀢𑀣𑀸𑀭𑀽𑀧𑀁 𑀅𑀢𑁆𑀢𑀪𑀸𑀯𑀁 𑀯𑀤𑀢𑀺. 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀳𑁄𑀦𑁆𑀢𑀺, 𑀢𑀤𑀲𑁆𑀲 𑀢𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀤𑀼𑀲𑁆𑀲𑀤𑁆𑀥𑀸𑀧𑀬𑀸𑀢𑀺 𑀇𑀤𑀜𑁆𑀘 𑀦 𑀮𑀓𑁆𑀔𑀡𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑁂 𑀧𑀦 𑀲𑀼𑀡𑀦𑁆𑀢𑀺 ‘‘𑀏𑀯𑀁 𑀓𑀺𑀭 𑀯𑀼𑀢𑁆𑀢’’𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬. 𑀅𑀣 𑀮𑀓𑁆𑀔𑀡𑀢𑁆𑀣𑁂𑀭𑁄 𑀓𑀲𑁆𑀫𑀸 𑀦 𑀅𑀤𑁆𑀤𑀲, 𑀓𑀺𑀫𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀦 𑀆𑀯𑀚𑁆𑀚𑁂𑀦𑁆𑀢𑁄 𑀅𑀤𑁆𑀤𑀲, 𑀇𑀢𑀭𑁄 𑀅𑀦𑀸𑀯𑀚𑁆𑀚𑀦𑁂𑀦 𑀦 𑀅𑀤𑁆𑀤𑀲.

𑀯𑀺𑀢𑀼𑀟𑁂𑀦𑁆𑀢𑀻𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀟𑁂𑀦𑁆𑀢𑀺, 𑀅𑀲𑀺𑀥𑀸𑀭𑀽𑀧𑀫𑁂𑀳𑀺 𑀢𑀺𑀔𑀺𑀡𑁂𑀳𑀺 𑀮𑁄𑀳𑀢𑀼𑀡𑁆𑀟𑀓𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀯𑀺𑀢𑀼𑀤𑀦𑁆𑀢𑀻’’𑀢𑀺 𑀯𑀸 𑀧𑀸𑀞𑁄. 𑀨𑀸𑀲𑀼𑀴𑀦𑁆𑀢𑀭𑀺𑀓𑀸𑀳𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀮𑁄𑀳𑀢𑀼𑀡𑁆𑀟𑀓𑁂𑀳𑀻𑀢𑀺 𑀮𑁄𑀳𑀲𑀮𑀸𑀓𑀸𑀲𑀤𑀺𑀲𑁂𑀳𑀺, 𑀓𑀸𑀴𑀮𑁄𑀳𑀫𑀬𑁂𑀳𑁂𑀯 𑀯𑀸 𑀢𑀼𑀡𑁆𑀟𑀓𑁂𑀳𑀺. 𑀧𑀲𑀸𑀤𑀼𑀲𑁆𑀲𑀤𑀸𑀢𑀺 𑀇𑀫𑀺𑀦𑀸 𑀅𑀝𑁆𑀞𑀺𑀲𑀗𑁆𑀖𑀸𑀢𑀫𑀢𑁆𑀢𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀫𑀸𑀦𑀸𑀦𑀫𑁆𑀧𑀺 𑀓𑀸𑀬𑀧𑁆𑀧𑀲𑀸𑀤𑀲𑁆𑀲 𑀩𑀮𑀯𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀓𑁆𑀓𑀕𑀡𑁆𑀟𑀲𑀤𑀺𑀲𑀸𑀢𑀺 𑀇𑀫𑀺𑀦𑀸 𑀧𑀦 𑀅𑀢𑀺𑀯𑀺𑀬 𑀫𑀼𑀤𑀼𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀺. 𑀅𑀘𑁆𑀙𑀭𑀺𑀬𑀁 𑀯𑀢𑀸𑀢𑀺 𑀕𑀭𑀳𑀦𑀘𑁆𑀙𑀭𑀺𑀬𑀁 𑀦𑀸𑀫𑁂𑀢𑀁.

𑀘𑀓𑁆𑀔𑀼𑀪𑀽𑀢𑀸𑀢𑀺 𑀲𑀫𑁆𑀧𑀢𑁆𑀢𑀤𑀺𑀩𑁆𑀩𑀘𑀓𑁆𑀔𑀼𑀓𑀸, 𑀮𑁄𑀓𑀲𑁆𑀲 𑀘𑀓𑁆𑀔𑀼𑀪𑀽𑀢𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀢𑁆𑀭𑀸𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀬𑀢𑁆𑀭𑀸𑀢𑀺 𑀓𑀸𑀭𑀡𑀯𑀘𑀦’’𑀦𑁆𑀢𑀺. 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑀦𑀺𑀓𑀸𑀬𑁂, 𑀢𑁂 𑀘 𑀔𑁄 𑀯𑀺𑀪𑀸𑀕𑁂𑀦 𑀓𑀸𑀫𑀪𑀯𑀸𑀤𑀺𑀪𑁂𑀤𑁂 𑀪𑀯𑁂, 𑀦𑀺𑀭𑀬𑀸𑀤𑀺𑀪𑁂𑀤𑀸 𑀕𑀢𑀺𑀬𑁄, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀆𑀤𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀢𑀣𑀸𑀭𑀽𑀧𑁂 𑀲𑀢𑁆𑀢𑀸𑀯𑀸𑀲𑁂 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀫𑁂 𑀉𑀧𑀦𑁂𑀢𑀼𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁂𑀦.

𑀕𑁄𑀖𑀸𑀢𑀓𑁄𑀢𑀺 𑀕𑀼𑀦𑁆𑀦𑀁 𑀅𑀪𑀺𑀡𑁆𑀳𑀁 𑀳𑀦𑀦𑀓𑁄. 𑀢𑁂𑀦𑀸𑀳 ‘‘𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸’’𑀢𑀺. 𑀢𑀲𑁆𑀲𑀸𑀢𑀺 𑀕𑀼𑀦𑁆𑀦𑀁 𑀳𑀦𑀦𑀓𑀫𑁆𑀫𑀲𑁆𑀲. 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀲𑁆𑀲𑀸𑀢𑀺 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀲𑁆𑀲. 𑀩𑀮𑀯𑀢𑀸 𑀕𑁄𑀖𑀸𑀢𑀓𑀓𑀫𑁆𑀫𑁂𑀦 𑀯𑀺𑀧𑀸𑀓𑁂 ¶ 𑀤𑀻𑀬𑀫𑀸𑀦𑁂 ¶ 𑀅𑀮𑀤𑁆𑀥𑁄𑀓𑀸𑀲𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁, 𑀢𑀲𑁆𑀫𑀺𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑁂 𑀇𑀤𑀸𑀦𑀺 𑀮𑀤𑁆𑀥𑁄𑀓𑀸𑀲𑀁 ‘‘𑀅𑀯𑀲𑁂𑀲𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀲𑀪𑀸𑀕𑀢𑀸𑀬𑀸𑀢𑀺 𑀓𑀫𑁆𑀫𑀲𑁆𑀲 𑀲𑀪𑀸𑀕𑀪𑀸𑀯𑁂𑀦 𑀲𑀤𑀺𑀲𑀪𑀸𑀯𑁂𑀦. 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀲𑀪𑀸𑀕𑀪𑀸𑀯𑁂𑀦 𑀲𑀤𑀺𑀲𑀪𑀸𑀯𑁂𑀦. 𑀬𑀸𑀤𑀺𑀲𑁂 𑀳𑀺 𑀆𑀭𑀫𑁆𑀫𑀡𑁂 𑀧𑀼𑀩𑁆𑀩𑁂 𑀢𑀁 𑀓𑀫𑁆𑀫𑀁 𑀢𑀲𑁆𑀲 𑀘 𑀯𑀺𑀧𑀸𑀓𑁄 𑀧𑀯𑀢𑁆𑀢𑁄, 𑀢𑀸𑀤𑀺𑀲𑁂𑀬𑁂𑀯 𑀆𑀭𑀫𑁆𑀫𑀡𑁂 𑀇𑀤𑀁 𑀓𑀫𑁆𑀫𑀁 𑀇𑀫𑀲𑁆𑀲 𑀯𑀺𑀧𑀸𑀓𑁄 𑀘 𑀧𑀯𑀢𑁆𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 𑀲𑁄 𑀏𑀯 𑀢𑀺𑀢𑁆𑀢𑀺𑀭𑁄, 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻𑀢𑀺. 𑀬𑀲𑁆𑀫𑀸 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀲𑀬𑁂 ‘‘𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸’’𑀢𑀺 𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀘 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀺𑀬 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘 𑀓𑀫𑁆𑀫𑀢𑁄 𑀪𑀺𑀦𑁆𑀦𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀸𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀬𑀢𑁆𑀣 𑀓𑀫𑁆𑀫𑀲𑀭𑀺𑀓𑁆𑀔𑀓𑁂𑀦 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀢𑁆𑀣 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀕𑀳𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀲𑁆𑀲 𑀓𑀺𑀭…𑀧𑁂… 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀻’’𑀢𑀺. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀓𑀢𑀽𑀧𑀘𑀺𑀢𑀲𑁆𑀲 𑀧𑁂𑀢𑀽𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀢𑁄𑀓𑀸𑀲𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀇𑀤𑀸𑀦𑀺 𑀢𑀣𑀸 𑀉𑀧𑀝𑁆𑀞𑀳𑀦𑁆𑀢𑀁 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀳𑁄𑀲𑀺. 𑀲𑁄𑀢𑀺 𑀕𑁄𑀖𑀸𑀢𑀓𑁄. 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀧𑁂𑀢𑁄 𑀚𑀸𑀢𑁄 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀯𑀲𑁂𑀦.

𑁨𑁨𑁯. 𑀧𑁂𑀲𑀺𑀬𑁄 𑀓𑀢𑁆𑀯𑀸𑀢𑀺 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀕𑁄𑀫𑀁𑀲𑀁 𑀨𑀸𑀮𑁂𑀢𑁆𑀯𑀸 𑀧𑁂𑀲𑀺𑀬𑁄 𑀓𑀢𑁆𑀯𑀸. 𑀲𑀼𑀓𑁆𑀔𑀸𑀧𑁂𑀢𑁆𑀯𑀸𑀢𑀺 𑀓𑀸𑀮𑀦𑁆𑀢𑀭𑀁 𑀞𑀧𑀦𑀢𑁆𑀣𑀁 𑀲𑀼𑀓𑁆𑀔𑀸𑀧𑁂𑀢𑁆𑀯𑀸. 𑀲𑀼𑀓𑁆𑀔𑀸𑀧𑀺𑀢𑀫𑀁𑀲𑀧𑁂𑀲𑀻𑀦𑀜𑁆𑀳𑀺 𑀯𑀮𑁆𑀮𑀽𑀭𑀲𑀫𑀜𑁆𑀜𑀸𑀢𑀺. 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂𑀢𑀺 𑀯𑀺𑀕𑀢𑀧𑀓𑁆𑀔𑀘𑀫𑁆𑀫𑁂. 𑀉𑀭𑀩𑁆𑀪𑁂 𑀳𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀏𑀴𑀓𑁂𑀢𑀺 𑀅𑀚𑁂. 𑀦𑀺𑀯𑀸𑀧𑀧𑀼𑀝𑁆𑀞𑁂𑀢𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀦𑀺𑀯𑀸𑀧𑁂𑀦 𑀧𑁄𑀲𑀺𑀢𑁂 𑀅𑀲𑀺𑀦𑀸 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄. 𑀏𑀓𑀁 𑀫𑀺𑀕𑀦𑁆𑀢𑀺 𑀤𑀻𑀧𑀓𑀫𑀺𑀕𑀁. 𑀓𑀸𑀭𑀡𑀸𑀳𑀻𑀢𑀺 𑀬𑀸𑀢𑀦𑀸𑀳𑀺. 𑀜𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀜𑀢𑁆𑀯𑀸. 𑀧𑁂𑀲𑀼𑀜𑁆𑀜𑀼𑀧𑀲𑀁𑀳𑀸𑀭𑀯𑀲𑁂𑀦 𑀇𑀢𑁄 𑀲𑀼𑀢𑀁 𑀅𑀫𑀼𑀢𑁆𑀭, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑀁 𑀇𑀥 𑀲𑀽𑀘𑁂𑀢𑀻𑀢𑀺 𑀲𑀽𑀘𑀓𑁄. 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺 𑀫𑀦𑀼𑀲𑁆𑀲𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄𑀢𑀺 𑀭𑀜𑁆𑀜𑀸 𑀅𑀟𑁆𑀟𑀓𑀭𑀡𑁂 𑀞𑀧𑀺𑀢𑁄 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑁄. 𑀲𑁄 𑀳𑀺 𑀕𑀸𑀫𑀚𑀦𑀓𑀸𑀬𑀁 𑀓𑀽𑀝𑀝𑁆𑀞𑁂𑀦 𑀯𑀜𑁆𑀘𑁂𑀢𑀻𑀢𑀺 ‘‘𑀕𑀸𑀫𑀓𑀽𑀝𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 ‘‘𑀢𑀸𑀤𑀺𑀲𑁄𑀬𑁂𑀯 𑀕𑀸𑀫𑀚𑁂𑀝𑁆𑀞𑀓𑁄 𑀕𑀸𑀫𑀓𑀽𑀝𑁄’’𑀢𑀺 𑀯𑀤𑀦𑁆𑀢𑀺. 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁 ¶ 𑀥𑀫𑁆𑀫𑀝𑁆𑀞𑁄𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀭𑀳𑀲𑁆𑀲𑀗𑁆𑀕𑁂 𑀦𑀺𑀲𑀻𑀤𑀦𑀯𑀲𑁂𑀦 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸 𑀅𑀳𑁄𑀲𑀺. 𑀨𑀼𑀲𑀦𑁆𑀢𑁄𑀢𑀺 𑀣𑁂𑀬𑁆𑀬𑀸𑀬 𑀨𑀼𑀲𑀦𑁆𑀢𑁄.

𑁨𑁩𑁦. 𑀅𑀦𑀺𑀲𑁆𑀲𑀭𑁄𑀢𑀺 𑀫𑀸𑀢𑀼𑀕𑀸𑀫𑁄 𑀲𑀲𑀸𑀫𑀺𑀓𑁄 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄. 𑀥𑀁𑀲𑀺𑀢𑁆𑀯𑀸𑀢𑀺 𑀪𑀲𑁆𑀲𑀺𑀢𑁆𑀯𑀸 ¶ 𑀅𑀧𑀕𑀦𑁆𑀢𑁆𑀯𑀸. 𑀫𑀗𑁆𑀕𑀦𑀯𑀲𑁂𑀦 𑀉𑀮𑀢𑀻𑀢𑀺 𑀫𑀗𑁆𑀕𑀼𑀮𑀺, 𑀯𑀺𑀭𑀽𑀧𑀩𑀻𑀪𑀘𑁆𑀙𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙’’𑀦𑁆𑀢𑀺.

𑀉𑀤𑁆𑀥𑀁 𑀉𑀤𑁆𑀥𑀁 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀢𑀸𑀬 𑀉𑀧𑁆𑀧𑀓𑁆𑀓𑀁, 𑀳𑁂𑀝𑁆𑀞𑀢𑁄 𑀧𑀕𑁆𑀖𑀭𑀡𑀯𑀲𑁂𑀦 𑀓𑀺𑀮𑀺𑀦𑁆𑀦𑀲𑀭𑀻𑀭𑀢𑀸𑀬 𑀑𑀓𑀺𑀮𑀺𑀦𑀻, 𑀇𑀢𑁄 𑀘𑀺𑀢𑁄 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀢𑀸𑀬 𑀑𑀓𑀺𑀭𑀺𑀦𑀻. 𑀢𑁂𑀦𑀸𑀳 ‘‘𑀲𑀸 𑀓𑀺𑀭𑀸’’𑀢𑀺𑀆𑀤𑀺. 𑀅𑀗𑁆𑀕𑀸𑀭𑀘𑀺𑀢𑀓𑁂𑀢𑀺 𑀅𑀗𑁆𑀕𑀸𑀭𑀲𑀜𑁆𑀘𑀬𑁂. 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀸𑀦𑀺 𑀲𑁂𑀤𑀕𑀢𑀸𑀦𑀺. 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄𑀢𑀺 𑀓𑀸𑀮𑀺𑀗𑁆𑀕𑀲𑁆𑀲 𑀭𑀜𑁆𑀜𑁄. 𑀦𑀸𑀝𑀓𑀺𑀦𑀻𑀢𑀺 𑀦𑀘𑁆𑀘𑀦𑀓𑀺𑀘𑁆𑀘𑁂 𑀅𑀥𑀺𑀕𑀢𑀸 𑀇𑀢𑁆𑀣𑀻. 𑀲𑁂𑀤𑀦𑁆𑀢𑀺 𑀲𑁂𑀤𑀦𑀁, 𑀢𑀸𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁂 𑀢𑀣𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀧𑀭𑀺𑀘𑀬𑀢𑁄. 𑀮𑀸𑀫𑀓𑀪𑀺𑀓𑁆𑀔𑀽𑀢𑀺 𑀳𑀻𑀦𑀸𑀘𑀸𑀭𑀢𑀸𑀬 𑀮𑀸𑀫𑀓𑁄, 𑀪𑀺𑀓𑁆𑀔𑀼𑀯𑁂𑀲𑀢𑀸𑀬 𑀪𑀺𑀓𑁆𑀔𑀸𑀳𑀸𑀭𑁂𑀦 𑀚𑀻𑀯𑀦𑀢𑁄 𑀘 𑀪𑀺𑀓𑁆𑀔𑀼. 𑀘𑀺𑀢𑁆𑀢𑀓𑁂𑀴𑀺𑀦𑁆𑀢𑀺 𑀘𑀺𑀢𑁆𑀢𑀭𑀼𑀘𑀺𑀬𑀁 𑀢𑀁 𑀢𑀁 𑀓𑀻𑀴𑀦𑁆𑀢𑁄. 𑀅𑀬𑀫𑁂𑀯𑀸𑀢𑀺 𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁄 𑀏𑀯.

𑁨𑁩𑁧. 𑀦𑀺𑀲𑁆𑀲𑁂𑀯𑀸𑀮𑀧𑀡𑀓𑀓𑀤𑁆𑀤𑀫𑁄𑀢𑀺 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑁂𑀦 𑀲𑁂𑀯𑀸𑀮𑁂𑀦 𑀦𑀻𑀮𑀫𑀡𑁆𑀟𑀽𑀓𑀧𑀺𑀝𑁆𑀞𑀺𑀯𑀡𑁆𑀡𑁂𑀦 𑀉𑀤𑀓𑀧𑀺𑀝𑁆𑀞𑀁 𑀙𑀸𑀤𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀧𑀡𑀓𑁂𑀦 𑀓𑀤𑁆𑀤𑀫𑁂𑀦 𑀘 𑀯𑀺𑀭𑀳𑀺𑀢𑁄. 𑀲𑀼𑀦𑁆𑀤𑀭𑁂𑀳𑀺 𑀢𑀺𑀢𑁆𑀣𑁂𑀳𑀻𑀢𑀺 𑀲𑀼𑀔𑀸𑀯𑀕𑀸𑀳𑀡𑀝𑁆𑀞𑀸𑀦𑀢𑀸𑀬 𑀓𑀤𑁆𑀤𑀫𑀸𑀤𑀺𑀤𑁄𑀲𑀯𑀺𑀭𑀳𑀢𑁄 𑀘 𑀲𑀼𑀦𑁆𑀤𑀭𑁂𑀳𑀺 𑀢𑀺𑀢𑁆𑀣𑁂𑀳𑀺. 𑀢𑀢𑁄 𑀉𑀤𑀓𑀤𑀳𑀢𑁄 𑀢𑀁𑀳𑁂𑀢𑀼, 𑀢𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀕𑀪𑀯𑀦𑀕𑀢𑁄𑀧𑀺 𑀳𑀺 𑀲𑁄 𑀭𑀳𑀤𑁄 𑀢𑀢𑁄 𑀉𑀧𑀭𑀺𑀫𑀦𑀼𑀲𑁆𑀲𑀮𑁄𑀓𑁂 𑀚𑀮𑀸𑀲𑀬𑁂𑀦 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁄 𑀅𑀬𑀁 𑀢𑀧𑁄𑀤𑀸 𑀲𑀦𑁆𑀤𑀢𑀻’’𑀢𑀺. 𑀅𑀣 𑀯𑀸 𑀢𑀢𑁄𑀢𑀺 𑀦𑀸𑀕𑀪𑀯𑀦𑁂 𑀉𑀤𑀓𑀤𑀳𑀢𑁄 𑀅𑀬𑀁 𑀢𑀧𑁄𑀤𑀸 𑀲𑀦𑁆𑀤𑀢𑀺. 𑀢𑀜𑁆𑀳𑀺 𑀉𑀧𑀭𑀺𑀪𑀽𑀫𑀺𑀢𑀮𑀁 𑀆𑀭𑁄𑀳𑀢𑀺, 𑀉𑀡𑁆𑀳𑀪𑀸𑀯𑁂𑀦 𑀢𑀧𑀦𑀢𑁄 𑀢𑀧𑀁 𑀉𑀤𑀓𑀁 𑀏𑀢𑀺𑀲𑁆𑀲𑀸𑀢𑀺 𑀅𑀦𑁆𑀯𑀢𑁆𑀣𑀦𑀸𑀫𑀯𑀲𑁂𑀦 𑀢𑀧𑁄𑀤𑀸𑀢𑀺 𑀯𑀼𑀘𑁆𑀘𑀢𑀺. 𑀧𑁂𑀢𑀮𑁄𑀓𑁄𑀢𑀺 𑀧𑁂𑀢𑀸𑀦𑀁 𑀆𑀯𑀸𑀲𑀝𑁆𑀞𑀸𑀦𑀁. 𑀓𑁂𑀘𑀺 𑀧𑀦 ‘‘𑀧𑁂𑀢𑀮𑁄𑀓𑁄𑀢𑀺 𑀮𑁄𑀳𑀓𑀼𑀫𑁆𑀪𑀻𑀦𑀺𑀭𑀬𑀸 𑀇𑀥𑀸𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀤𑀦𑁆𑀢𑀺, 𑀦𑀕𑀭𑀲𑁆𑀲 𑀧𑀦 ¶ 𑀧𑀭𑀺𑀢𑁄 𑀧𑀩𑁆𑀩𑀢𑀧𑀸𑀤𑀯𑀦𑀦𑁆𑀢𑀭𑁂𑀲𑀼 𑀩𑀳𑀽 𑀧𑁂𑀢𑀸𑀯𑀸𑀲𑀸𑀧𑀺 𑀲𑀦𑁆𑀢𑁂𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀧𑁂𑀢𑀯𑀢𑁆𑀣𑀼𑀧𑀸𑀴𑀺𑀬𑀸 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂𑀦 𑀇𑀫𑀸𑀬 𑀘 𑀯𑀺𑀦𑀻𑀢𑀯𑀢𑁆𑀣𑀼𑀧𑀸𑀴𑀺𑀬𑀸 𑀤𑀻𑀧𑁂𑀢𑀩𑁆𑀩𑁄.

𑀓𑀢𑀳𑀢𑁆𑀣𑀸𑀢𑀺 𑀣𑀺𑀭𑀢𑀭𑀁 𑀮𑀓𑁆𑀔𑁂𑀲𑀼 𑀅𑀯𑀺𑀭𑀚𑁆𑀛𑀦𑀲𑀭𑀓𑁆𑀔𑁂𑀧𑀸. 𑀈𑀤𑀺𑀲𑀸 𑀧𑀦 𑀢𑀢𑁆𑀣 𑀯𑀲𑀻𑀪𑀽𑀢𑀸 𑀓𑀢𑀳𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑁄 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺, 𑀲𑁄 𑀓𑀢𑀳𑀢𑁆𑀣𑁄 𑀦𑀸𑀫 𑀦 𑀳𑁄𑀢𑀺, 𑀇𑀫𑁂 𑀧𑀦 𑀓𑀢𑀳𑀢𑁆𑀣𑀸, 𑀘𑀺𑀡𑁆𑀡𑀯𑀲𑀻𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀧𑁆𑀧𑀤𑀲𑁆𑀲𑀦𑀯𑀲𑁂𑀦 𑀓𑀢𑀁 𑀭𑀸𑀚𑀓𑀼𑀮𑀸𑀦𑀺 𑀉𑀧𑁂𑀘𑁆𑀘 𑀅𑀲𑀦𑀁 𑀲𑀭𑀓𑁆𑀔𑁂𑀧𑁄 𑀏𑀢𑁂𑀳𑀻𑀢𑀺 𑀓𑀢𑀼𑀧𑀸𑀲𑀦𑀸, 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀪𑀕𑁆𑀕𑁄𑀢𑀺 𑀧𑀭𑀸𑀚𑀺𑀢𑁄.

𑁨𑁩𑁨. 𑀤𑁄𑀲𑀤𑀲𑁆𑀲𑀦 ¶ 𑀧𑀼𑀩𑁆𑀩𑀓 𑀭𑀽𑀧 𑀯𑀺𑀭𑀸𑀕 𑀪𑀸𑀯𑀦𑀸 𑀲𑀗𑁆𑀔𑀸𑀢 𑀧𑀝𑀺𑀧𑀓𑁆𑀔 𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀖𑀲𑀜𑁆𑀜𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀫𑀳𑀢𑀸𑀧𑀺 𑀲𑀤𑁆𑀤𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀦 𑀯𑀼𑀝𑁆𑀞𑀸𑀢𑀺, 𑀢𑀣𑀸 𑀧𑀦 𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀲𑀺𑀬𑀸𑀢𑀺 𑀇𑀥 𑀆𑀦𑁂𑀜𑁆𑀚𑀲𑀫𑀸𑀥𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀦𑁂𑀚𑀁 𑀅𑀘𑀮𑀁 𑀓𑀸𑀬𑀯𑀸𑀘𑀸𑀯𑀺𑀧𑁆𑀨𑀦𑁆𑀤𑀯𑀺𑀭𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺’’𑀦𑁆𑀢𑀺. 𑀅𑀜𑁆𑀜𑀢𑁆𑀣 𑀧𑀦 𑀲𑀫𑀸𑀥𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀢𑀺𑀤𑀽𑀭𑀢𑀸𑀬 𑀦 𑀇𑀜𑁆𑀚𑀢𑀻𑀢𑀺 𑀆𑀦𑁂𑀜𑁆𑀚𑁄𑀢𑀺 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀓𑁂 𑀥𑀫𑁆𑀫𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀺𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀢𑀓𑁆𑀓𑀸𑀤𑀻𑀲𑀼 𑀆𑀤𑀻𑀦𑀯𑀲𑀮𑁆𑀮𑀓𑁆𑀔𑀡𑀲𑁆𑀲 𑀦 𑀲𑀼𑀝𑁆𑀞𑀼𑀓𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀲𑀼𑀝𑁆𑀞𑀼 𑀧𑀭𑀺𑀲𑁄𑀥𑁂𑀢𑁆𑀯𑀸’’𑀢𑀺.

𑀦𑀦𑀼 𑀘𑀸𑀬𑀫𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀞𑀫𑀯𑀲𑁆𑀲𑁂𑀯 𑀅𑀪𑀺𑀦𑀯𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑁄, 𑀇𑀤𑀜𑁆𑀘 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀁 𑀯𑀻𑀲𑀢𑀺𑀫𑀯𑀲𑁆𑀲𑀢𑁄 𑀉𑀧𑀭𑀺 𑀧𑀜𑁆𑀜𑀢𑁆𑀢𑀁, 𑀓𑀣𑀁 𑀇𑀫𑀲𑁆𑀲 𑀯𑀢𑁆𑀣𑀼𑀦𑁄 𑀇𑀫𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑁂 𑀪𑀕𑀯𑀢𑀸 𑀯𑀺𑀦𑀺𑀘𑁆𑀙𑀺𑀢𑀪𑀸𑀯𑁄 𑀯𑀼𑀢𑁆𑀢𑁄𑀢𑀺? 𑀦𑀸𑀬𑀁 𑀤𑁄𑀲𑁄. 𑀅𑀬𑀜𑁆𑀳𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀓𑀣𑀸𑀫𑀕𑁆𑀕𑁄 𑁋 𑀅𑀧𑀜𑁆𑀜𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀅𑀧𑁆𑀧𑀢𑀺𑀭𑀽𑀧𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀏𑀲 𑀯𑀤𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀦𑁆𑀢𑀸 𑀉𑀚𑁆𑀛𑀸𑀬𑀺𑀁𑀲𑀼. 𑀪𑀕𑀯𑀸 𑀘 𑀣𑁂𑀭𑀲𑁆𑀲 𑀢𑀣𑀸𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀤𑁆𑀤𑁄𑀲𑀪𑀸𑀯𑀁 𑀓𑀭𑁄𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀸’’𑀢𑀺 𑀆𑀳. 𑀲𑀗𑁆𑀕𑀻𑀢𑀺𑀓𑀸𑀭𑀓𑀸 𑀧𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀓𑀸𑀭𑀢𑁆𑀢𑀸 𑀢𑀫𑁆𑀧𑀺 𑀯𑀢𑁆𑀣𑀼𑀁 𑀆𑀦𑁂𑀢𑁆𑀯𑀸 𑀇𑀥 𑀆𑀭𑁄𑀧𑁂𑀲𑀼𑀦𑁆𑀢𑀺.

𑀲𑀸𑀯𑀓𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀡𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸’’𑀢𑀺 𑀆𑀳. 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀲𑀜𑁆𑀜𑀸𑀯𑀺𑀭𑀸𑀕𑀪𑀸𑀯𑀦𑀸𑀬 𑀯𑀸𑀬𑁄𑀓𑀲𑀺𑀡𑀦𑀺𑀩𑁆𑀩𑀢𑁆𑀢𑀺𑀢𑀁 ¶ 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀁 𑀯𑀤𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀫𑁆𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀓𑁆𑀓𑀫𑀯𑀦𑁆𑀢𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦𑁂𑀯 𑀕𑀡𑁆𑀳𑀸𑀢𑀻𑀢𑀺 𑀆𑀳 𑁋 ‘‘𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀫𑁂𑀯 𑀅𑀤𑁆𑀤𑀲𑀸’’𑀢𑀺. 𑀦𑀬𑀢𑁄 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀯𑀝𑁆𑀝𑁂 𑀲𑀁𑀲𑀭𑀡𑀓𑀲𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀅𑀪𑀸𑀯𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺, 𑀅𑀲𑀜𑁆𑀜𑀪𑀯𑁂 𑀧𑀦 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀲𑀮𑁆𑀮𑀓𑁆𑀔𑁂𑀲𑀺. 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺 𑀔𑀦𑁆𑀥𑀯𑀺𑀓𑀮𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀳𑀺 𑀓𑀸𑀢𑀼𑀦𑁆𑀢𑀺 𑀦𑀬𑀢𑁄 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀧𑀺 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀝𑀺𑀯𑀺𑀤𑁆𑀥𑀲𑀤𑀺𑀲𑀸. 𑀬𑀣𑀸 𑀦𑀸𑀫 𑀓𑁄𑀘𑀺 𑀥𑀦𑀼𑀲𑀺𑀧𑁆𑀧𑁂 𑀓𑀢𑀳𑀢𑁆𑀣𑁄 𑀏𑀓𑀁 𑀓𑁂𑀲𑀲𑀗𑁆𑀔𑀸𑀢𑀁 𑀯𑀸𑀮𑀁 𑀲𑀢𑀓𑁆𑀔𑀢𑁆𑀢𑀼𑀁 𑀯𑀺𑀤𑀸𑀮𑁂𑀢𑁆𑀯𑀸 𑀢𑀢𑁄 𑀏𑀓𑀁 𑀅𑀁𑀲𑀼𑀁 𑀕𑀳𑁂𑀢𑁆𑀯𑀸 𑀯𑀸𑀢𑀺𑀗𑁆𑀕𑀡𑀨𑀮𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑁆𑀯𑀸 𑀅𑀧𑀭𑀁 𑀅𑀁𑀲𑀼𑀁 𑀓𑀡𑁆𑀟𑀲𑁆𑀲 𑀅𑀕𑁆𑀕𑀓𑁄𑀝𑀺𑀬𑀁 𑀬𑀣𑀸 𑀢𑀲𑁆𑀲 𑀅𑀁𑀲𑀼𑀲𑁆𑀲 𑀊𑀓𑀸𑀫𑀢𑁆𑀢𑀁 𑀯𑀸 𑀮𑀺𑀓𑁆𑀔𑀸𑀫𑀢𑁆𑀢𑀁 𑀯𑀸 𑀓𑀡𑁆𑀟𑀲𑁆𑀲 𑀅𑀕𑁆𑀕𑀓𑁄𑀝𑀺𑀢𑁄 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸 𑀉𑀲𑀪𑀫𑀢𑁆𑀢𑁂 𑀞𑀸𑀦𑁂 𑀞𑀺𑀢𑁄 𑀓𑀡𑁆𑀟𑀩𑀤𑁆𑀥𑀸𑀬 𑀯𑀸𑀮𑀓𑁄𑀝𑀺𑀬𑀸 𑀯𑀸𑀢𑀺𑀗𑁆𑀕𑀡𑀩𑀤𑁆𑀥𑀁 𑀯𑀸𑀮𑀲𑁆𑀲 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬 ¶ , 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀓𑀢𑀁 𑀤𑀼𑀓𑁆𑀓𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀬𑀤𑀺𑀤𑀦𑁆𑀢𑀺 𑀬𑁄 𑀅𑀬𑀁. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁨𑁩𑁩. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂. 𑀉𑀤𑁆𑀤𑀺𑀝𑁆𑀞𑀸𑀢𑀺 𑀇𑀥 𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦 𑀅𑀦𑁄𑀲𑀸𑀭𑀺𑀢𑀢𑁆𑀢𑀸 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸𑀯 𑀉𑀤𑁆𑀤𑀺𑀝𑁆𑀞𑀸 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀤𑀺 𑀏𑀯𑀁 𑀳𑁂𑀝𑁆𑀞𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀫𑁆𑀧𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀯 𑀉𑀤𑁆𑀤𑀺𑀝𑁆𑀞𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀸𑀢𑀺? 𑀧𑀸𑀭𑀸𑀚𑀺𑀓𑀸𑀥𑀺𑀓𑀸𑀭𑀢𑁆𑀢𑀸 𑀲𑀦𑁆𑀢𑁂𑀲𑀼𑀧𑀺 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑁂𑀲𑀼 𑀇𑀥 𑀧𑀸𑀭𑀸𑀚𑀺𑀓𑀸𑀯 𑀯𑀼𑀢𑁆𑀢𑀸. 𑀬𑁂𑀲𑀁…𑀧𑁂… 𑀅𑀲𑀁𑀯𑀸𑀲𑁄𑀢𑀺 𑀇𑀫𑀫𑀢𑁆𑀣𑀁 𑀯𑀸 𑀤𑀻𑀧𑁂𑀢𑀼𑀓𑀸𑀫𑁄 𑀢𑀁𑀲𑀫𑁆𑀩𑀦𑁆𑀥𑁂𑀦 ‘‘𑀉𑀤𑁆𑀤𑀺𑀝𑁆𑀞𑀸 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸’’𑀢𑀺 𑀆𑀳. 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂𑀢𑀺𑀆𑀤𑀺𑀓𑀁 𑀧𑀦 𑀅𑀦𑀼𑀜𑁆𑀜𑀸𑀢𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁆𑀓𑀫𑁄𑀧𑀺 𑀅𑀬𑀫𑁂𑀯, 𑀦𑀸𑀜𑁆𑀜𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀦𑀸𑀫. 𑀏𑀢𑁂𑀲𑀼 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 𑀦𑀸𑀫 𑀬𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀸 𑀢𑁂𑀦𑁂𑀯 𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀲𑁆𑀲 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀅𑀓𑁆𑀔𑀓𑀸𑀦𑀁 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 ¶ 𑀓𑀧𑁆𑀧𑀭𑀸𑀦𑀜𑁆𑀘 𑀉𑀧𑀭𑀺 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀆𑀫𑀲𑀦𑀸𑀤𑀺𑀁 𑀲𑀸𑀤𑀺𑀬𑀢𑀺, 𑀢𑀲𑁆𑀲𑀸 𑀅𑀥𑀺𑀯𑀘𑀦𑀁. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀁 𑀯𑀚𑁆𑀚𑀁 𑀚𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸 𑀦𑀸𑀫. 𑀲𑀫𑀕𑁆𑀕𑁂𑀦 𑀧𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀁 𑀬𑀸 𑀪𑀺𑀓𑁆𑀔𑀼𑀦𑀻 𑀬𑀁𑀤𑀺𑀝𑁆𑀞𑀺𑀓𑁄 𑀲𑁄 𑀳𑁄𑀢𑀺, 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀕𑀳𑀡𑀯𑀲𑁂𑀦 𑀅𑀦𑀼𑀯𑀢𑁆𑀢𑀢𑀺, 𑀲𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀦𑀸𑀫. 𑀬𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀸 𑀢𑀣𑀸𑀯𑀺𑀥𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑀢𑀺, 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸, 𑀢𑀢𑁆𑀣 𑀞𑀢𑁆𑀯𑀸 𑀲𑀮𑁆𑀮𑀧𑀢𑀺 𑀯𑀸, 𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑀢𑀺, 𑀧𑀼𑀭𑀺𑀲𑀲𑁆𑀲 𑀆𑀕𑀫𑀦𑀁 𑀯𑀸 𑀲𑀸𑀤𑀺𑀬𑀢𑀺, 𑀓𑁂𑀦𑀘𑀺 𑀯𑀸 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀁 𑀧𑀯𑀺𑀲𑀢𑀺, 𑀳𑀢𑁆𑀣𑀧𑀸𑀲𑁂 𑀯𑀸 𑀞𑀢𑁆𑀯𑀸 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀢𑀺 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀪𑀸𑀯𑀢𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸. 𑀦𑁂𑀲𑀜𑁆𑀳𑀺 ‘‘𑀦, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀪𑀩𑁆𑀩𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑀤𑀺𑀲𑀢𑀸𑀬 ‘‘𑀧𑀸𑀭𑀸𑀚𑀺𑀓𑀸’’𑀢𑀺 ¶ 𑀯𑀼𑀢𑁆𑀢𑀸. 𑀢𑀩𑁆𑀪𑀸𑀯𑀪𑀸𑀯𑀺𑀢𑀸𑀬 𑀪𑀺𑀓𑁆𑀔𑀼𑀪𑀸𑀯𑁄 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀧𑀼𑀕𑁆𑀕𑀮𑀸𑀦𑀁 𑀪𑀺𑀓𑁆𑀔𑀼𑀪𑀸𑀯𑀸𑀭𑀳𑀢𑀸. 𑀲𑀸 𑀧𑀦 𑀧𑀩𑁆𑀩𑀚𑁆𑀚𑀓𑁆𑀔𑀦𑁆𑀥𑀓𑀸𑀕𑀢𑀲𑀩𑁆𑀩𑀤𑁄𑀲𑀯𑀺𑀭𑀳𑀺𑀢𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀸. 𑀢𑀁 𑀯𑀺𑀧𑀦𑁆𑀦𑀁 𑀧𑀡𑁆𑀟𑀓𑀪𑀸𑀯𑀸𑀤𑀺𑀬𑁄𑀕𑁂𑀦 𑀬𑁂𑀲𑀁 𑀢𑁂 𑀯𑀢𑁆𑀣𑀼𑀯𑀺𑀧𑀦𑁆𑀦𑀸. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀫𑀕𑁆𑀕𑀸𑀯𑀭𑀡𑁂 𑀓𑀸𑀭𑀡𑀫𑀸𑀳. 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑀤𑀺𑀲𑀢𑁆𑀢𑀸 𑀧𑀸𑀭𑀸𑀚𑀺𑀓𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀺𑀓𑀫𑁆𑀫𑀁 𑀫𑀸𑀢𑀼𑀖𑀸𑀢𑀸𑀤𑀺𑀓𑀁 𑀯𑀺𑀬 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄’’𑀢𑀺.

𑀤𑀻𑀖𑀢𑀸𑀬 𑀮𑀫𑁆𑀩𑀫𑀸𑀦𑀁 𑀅𑀗𑁆𑀕𑀚𑀸𑀢𑀫𑁂𑀢𑀲𑁆𑀲𑀸𑀢𑀺 𑀮𑀫𑁆𑀩𑀻. 𑀲𑁄 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓𑁄, 𑀅𑀣 𑀔𑁄 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂 𑀯𑀸 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀫𑀼𑀤𑀼 𑀧𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀓𑀢𑀧𑀭𑀺𑀓𑀫𑁆𑀫𑀸𑀬 𑀫𑀼𑀤𑀼𑀓𑀸𑀬 𑀧𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑁄𑀧𑀺 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑀯𑀘𑁆𑀘𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑀁 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂𑀦 𑀕𑀡𑁆𑀳𑀸𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀫𑀢𑁆𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂𑀦 ¶ 𑀕𑀡𑁆𑀳𑀸𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑁂𑀦 𑀢𑀲𑁆𑀲𑀽𑀧𑀭𑀺 𑀦𑀺𑀲𑀻𑀤𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀳 𑁋 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸 𑀏𑀯𑀸𑀢𑀺 𑀓𑀣𑀁 𑀘𑀢𑀼𑀯𑀻𑀲𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀧𑀦 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺. 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀉𑀪𑀺𑀦𑁆𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀧𑀭𑀺𑀬𑀸𑀬𑁂𑀦. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀓𑀘𑁆𑀘𑀺𑀢𑁆𑀣𑀸𑀢𑀺 𑀏𑀢𑁆𑀣 𑀓𑀘𑁆𑀘𑀺 𑀅𑀢𑁆𑀣𑀸𑀢𑀺 𑀧𑀤𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀕𑀫𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ ¶ 𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀲𑀫𑀦𑀦𑁆𑀢𑀭𑀸 𑀬𑀸 𑀢𑁂𑀭𑀲𑀓𑀸𑀤𑀺𑀲𑀁𑀯𑀡𑁆𑀡𑀦𑀸 𑀲𑀫𑀸𑀭𑀤𑁆𑀥𑀸, 𑀢𑀲𑁆𑀲𑀸𑀧𑀺 𑁋

𑀅𑀦𑀸𑀓𑀼𑀮𑀸 𑀅𑀲𑀦𑁆𑀤𑁂𑀳𑀸, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀸;

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀸, 𑀳𑁄𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀻.

𑀢𑁂𑀭𑀲𑀓𑀲𑁆𑀲𑀸𑀢𑀺 𑀢𑁂𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀭𑀺𑀫𑀸𑀡𑀸𑀦𑀺 𑀅𑀲𑁆𑀲 𑀓𑀡𑁆𑀟𑀲𑁆𑀲𑀸𑀢𑀺 𑀢𑁂𑀭𑀲𑀓𑀁, 𑀢𑀲𑁆𑀲 𑀢𑁂𑀭𑀲𑀓𑀲𑁆𑀲 𑀓𑀡𑁆𑀟𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁨𑁩𑁪. 𑀅𑀦𑀪𑀺𑀭𑀢𑁄𑀢𑀺 𑀅𑀜𑁆𑀜𑀢𑁆𑀣 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀓𑀸𑀫𑀭𑀸𑀕𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑀢𑀸𑀬 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺𑀆𑀤𑀺.

𑁨𑁩𑁬-𑁨𑁩𑁭. 𑀲𑀜𑁆𑀘𑁂𑀢𑀦𑀺𑀓𑀸𑀢𑀺 𑀏𑀢𑁆𑀣 𑀲𑀁-𑀲𑀤𑁆𑀤𑁄 𑀯𑀺𑀚𑁆𑀚𑀫𑀸𑀦𑀢𑁆𑀣𑀢𑀸𑀬 𑀲𑀸𑀢𑁆𑀣𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀲𑀁𑀯𑀺𑀚𑁆𑀚𑀢𑀺 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺. 𑀢𑀢𑁆𑀣 𑀘𑁂𑀢𑀦𑀸𑀢𑀺 𑀯𑀻𑀢𑀺𑀓𑁆𑀓𑀫𑀯𑀲𑀧𑁆𑀧𑀯𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸. 𑀅𑀲𑁆𑀲𑀸𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸. 𑀇𑀫𑀲𑁆𑀫𑀺𑀁 𑀯𑀺𑀓𑀧𑁆𑀧𑁂 𑀇𑀓-𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺 𑀆𑀳 𑀲𑀜𑁆𑀘𑁂𑀢𑀦𑀸𑀯 𑀲𑀜𑁆𑀘𑁂𑀢𑀦𑀺𑀓𑀸𑀢𑀺. 𑀇𑀤𑀸𑀦𑀺 𑀲𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀇𑀓-𑀲𑀤𑁆𑀤𑁄𑀯 𑀅𑀲𑁆𑀲𑀢𑁆𑀣𑀺𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀜𑁆𑀘𑁂𑀢𑀦𑀸 𑀯𑀸 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀸𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀫𑀸𑀳. 𑀲𑀁𑀯𑀺𑀚𑁆𑀚𑀢𑀺 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀧𑀤𑀪𑀸𑀚𑀦𑁂 𑀯𑀢𑁆𑀢𑀩𑁆𑀩𑁂 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀚𑀸𑀦𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀓𑁆𑀓𑀫𑀸𑀫𑀻𑀢𑀺 𑀚𑀸𑀦𑀦𑁆𑀢𑁄𑀢𑀺 𑀫𑁄𑀘𑀦𑀢𑁆𑀣𑀁 𑀉𑀧𑀓𑁆𑀓𑀫𑀸𑀫𑀻𑀢𑀺 𑀚𑀸𑀦𑀦𑁆𑀢𑁄.

𑀆𑀲𑀬𑀪𑁂𑀤𑀢𑁄𑀢𑀺 𑀧𑀺𑀢𑁆𑀢𑀸𑀤𑀺𑀆𑀲𑀬𑀪𑁂𑀤𑀢𑁄. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀭𑀜𑁆𑀜𑁄𑀧𑀺 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀲𑀬𑁂𑀲𑀼 ¶ 𑀘𑀢𑀽𑀲𑀼 𑀅𑀜𑁆𑀜𑀢𑀭𑁄 𑀆𑀲𑀬𑁄 𑀳𑁄𑀢𑀺𑀬𑁂𑀯, 𑀫𑀦𑁆𑀤𑀧𑀜𑁆𑀜𑀸𑀦𑀁 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀆𑀲𑀬𑀸 𑀳𑁄𑀦𑁆𑀢𑀺. 𑀥𑀸𑀢𑀼𑀦𑀸𑀦𑀢𑁆𑀢𑀢𑁄𑀢𑀺 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁, 𑀘𑀓𑁆𑀔𑀸𑀤𑀻𑀦𑀁 𑀯𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁, 𑀭𑀲𑀲𑁄𑀡𑀺𑀢𑀸𑀤𑀻𑀦𑀁 𑀯𑀸 𑀥𑀸𑀢𑀽𑀦𑀁 𑀦𑀸𑀦𑀢𑁆𑀢𑀢𑁄.

𑀯𑀢𑁆𑀣𑀺𑀲𑀻𑀲𑀦𑁆𑀢𑀺 ¶ 𑀯𑀢𑁆𑀣𑀺𑀧𑀼𑀝𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀫𑀢𑁆𑀣𑀓𑀧𑀲𑁆𑀲𑀁. ‘‘𑀭𑀸𑀕…𑀧𑁂… 𑀅𑀲𑀓𑁆𑀓𑁄𑀦𑁆𑀢𑁄’’𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀸𑀚𑀸 𑀧𑀦 ‘‘𑀲𑀫𑁆𑀪𑀯𑀲𑁆𑀲 𑀲𑀓𑀮𑀓𑀸𑀬𑁄 𑀞𑀸𑀦’’𑀦𑁆𑀢𑀺 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀯𑀻𑀫𑀁𑀲𑀦𑀢𑁆𑀣𑀁 𑀏𑀯𑀫𑀓𑀸𑀲𑀻𑀢𑀺 𑀯𑀤𑀦𑁆𑀢𑀺. 𑀤𑀓𑀲𑁄𑀢𑀦𑁆𑀢𑀺 𑀫𑀼𑀢𑁆𑀢𑀫𑀕𑁆𑀕𑀁, 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀓𑀲𑁄𑀢𑁄𑀭𑁄𑀳𑀡𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑀸𑀤𑀺𑀦𑁆𑀦𑀢𑁄 𑀯𑀺𑀦𑀺𑀫𑀼𑀢𑁆𑀢𑀢𑀸𑀬 𑀲𑀫𑁆𑀪𑀯𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯 𑀭𑀽𑀧𑀁 𑀅𑀯𑀲𑀺𑀲𑁆𑀲𑀢𑀺, 𑀲𑁂𑀲𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀧𑁄𑀥𑀸𑀢𑀼𑀬𑀸 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀲𑀫𑁆𑀪𑀯𑁄, 𑀲𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑁄 𑀅𑀝𑁆𑀞𑀓𑀣𑀸𑀬𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑁂𑀲𑀼 𑀲𑀫𑁆𑀪𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀲𑁄 𑀧𑀦 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀭𑀸𑀕𑀯𑀲𑁂𑀦 𑀞𑀸𑀦𑀸𑀘𑀸𑀯𑀦𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀻’’𑀢𑀺, 𑀢𑀁 𑀲𑀫𑁆𑀪𑀯𑀲𑁆𑀲 𑀞𑀸𑀦𑀸𑀘𑀸𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀦 𑀧𑀦 𑀲𑀫𑁆𑀪𑀯𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀼𑀁, 𑀢𑁂𑀦𑁂𑀯 𑀢𑀢𑁆𑀣 𑀯𑀺𑀲𑁆𑀲𑀝𑁆𑀞𑀺𑀕𑁆𑀕𑀳𑀡𑀁 𑀓𑀢𑀁. ‘‘𑀔𑀻𑀡𑀸𑀲𑀯𑀸𑀦𑀁 𑀧𑀦 𑀩𑁆𑀭𑀳𑁆𑀫𑀸𑀦𑀜𑁆𑀘 𑀲𑀫𑁆𑀪𑀯𑁄 𑀦𑀢𑁆𑀣𑀻’’𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁩𑁦𑁭) ‘‘𑀢𑀸𑀲𑀁 𑀤𑁂𑀯𑀢𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀦𑀢𑁆𑀣𑀻’’𑀢𑀺, 𑀢𑀫𑁆𑀧𑀺 𑀞𑀸𑀦𑀸𑀘𑀸𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀧𑀦 𑀤𑁂𑀯𑀢𑀸𑀦𑀁 𑀲𑀩𑁆𑀩𑀲𑁄 𑀲𑀫𑁆𑀪𑀯𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬. 𑀙𑀦𑁆𑀦𑀫𑁆𑀧𑀺 𑀧𑀦 𑀓𑀸𑀫𑀸𑀯𑀘𑀭𑀤𑁂𑀯𑀢𑀸𑀦𑀁 𑀓𑀸𑀫𑀸 𑀧𑀸𑀓𑀢𑀺𑀓𑀸𑀬𑁂𑀯. 𑀫𑀦𑀼𑀲𑁆𑀲𑀸 𑀯𑀺𑀬 𑀳𑀺 𑀢𑁂 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀦𑀺𑀲𑁆𑀲𑀦𑁆𑀤𑀸𑀪𑀸𑀯𑁄 𑀢𑁂𑀲𑀁 𑀯𑀢𑁆𑀢𑀩𑁆𑀩𑁄. 𑀢𑀗𑁆𑀔𑀡𑀺𑀓𑀧𑀭𑀺𑀴𑀸𑀳𑀯𑀽𑀧𑀲𑀫𑀸𑀯𑀳𑀁 𑀲𑀫𑁆𑀨𑀲𑁆𑀲𑀲𑀼𑀔𑀫𑁂𑀯 𑀳𑀺 𑀢𑁂𑀲𑀁 𑀓𑀸𑀫𑀓𑀺𑀘𑁆𑀘𑀁. 𑀓𑁂𑀘𑀺 𑀧𑀦 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀸𑀦𑀁𑀬𑁂𑀯 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀬𑀸 𑀓𑀸𑀫𑀓𑀺𑀘𑁆𑀘𑀁 𑀇𑀚𑁆𑀛𑀢𑀺, 𑀬𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑀦𑀫𑀢𑁆𑀢𑁂𑀦, 𑀢𑀼𑀲𑀺𑀢𑀸𑀦𑀁 𑀳𑀢𑁆𑀣𑀸𑀫𑀲𑀦𑀫𑀢𑁆𑀢𑁂𑀦, 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀳𑀲𑀺𑀢𑀫𑀢𑁆𑀢𑁂𑀦, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀑𑀮𑁄𑀓𑀺𑀢𑀫𑀢𑁆𑀢𑁂𑀦 𑀓𑀸𑀫𑀓𑀺𑀘𑁆𑀘𑀁 𑀇𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀢𑀸𑀤𑀺𑀲𑀲𑁆𑀲 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑀦𑀲𑁆𑀲 𑀢𑁂𑀲𑀼 𑀅𑀪𑀸𑀯𑀢𑁄 𑀓𑀸𑀫𑀸𑀦𑀜𑁆𑀘 𑀉𑀢𑁆𑀢𑀭𑀼𑀢𑁆𑀢𑀭𑀺 𑀧𑀡𑀻𑀢𑀢𑀭𑀧𑀡𑀻𑀢𑀢𑀫𑀪𑀸𑀯𑀢𑁄.

𑀢𑀣𑁂𑀯𑀸𑀢𑀺 ‘‘𑀫𑁄𑀘𑀦𑀲𑁆𑀲𑀸𑀤𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄’’𑀢𑀺𑀆𑀤𑀺𑀁 𑀅𑀢𑀺𑀤𑀺𑀲𑀢𑀺. ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄 𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀢𑀻𑀲𑀼𑀧𑀺 𑀯𑀸𑀤𑁂𑀲𑀼. 𑀅𑀥𑀺𑀯𑀸𑀲𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸 ¶ 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀅𑀥𑀺𑀯𑀸𑀲𑁂𑀢𑁆𑀯𑀸. 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀦𑁆𑀢𑀺 𑀞𑀸𑀦𑀢𑁄 𑀘𑀼𑀢𑀁 𑀤𑀓𑀲𑁄𑀢𑀁 𑀑𑀢𑀭𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑀸𑀳 𑁋 𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀻𑀢𑀺 ¶ . 𑀞𑀸𑀦𑀸𑀘𑀸𑀯𑀦𑀫𑀢𑁆𑀢𑁂𑀦𑁂𑀯𑀸𑀢𑀺 𑀤𑀓𑀲𑁄𑀢𑀁 𑀅𑀦𑁄𑀢𑀺𑀡𑁆𑀡𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 ‘‘𑀲𑀓𑀮𑁄 𑀓𑀸𑀬𑁄 𑀞𑀸𑀦’’𑀦𑁆𑀢𑀺 𑀯𑀸𑀤𑁂 𑀞𑀸𑀦𑀸𑀘𑀸𑀯𑀦𑀁 𑀯𑀤𑀦𑁆𑀢𑁂𑀦 𑀲𑀓𑀮𑀲𑀭𑀻𑀭𑀢𑁄 𑀘𑀼𑀢𑀲𑁆𑀲𑀧𑀺 𑀤𑀓𑀲𑁄𑀢𑁄𑀭𑁄𑀳𑀡𑀢𑁄 𑀧𑀼𑀩𑁆𑀩𑁂 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀅𑀦𑁆𑀢𑀭𑀸𑀴𑀲𑁆𑀲 𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁. 𑀲𑀓𑀮𑀲𑀭𑀻𑀭𑁂 𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑀲𑁆𑀲 𑀞𑀸𑀦𑀸 𑀘𑀼𑀢𑀁 𑀲𑀦𑁆𑀥𑀸𑀬 ‘‘𑀞𑀸𑀦𑀸𑀘𑀸𑀯𑀦𑀫𑀢𑁆𑀢𑁂𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑁂𑀯𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲. 𑀳𑀢𑁆𑀣𑀧𑀭𑀺𑀓𑀫𑁆𑀫𑀸𑀤𑀻𑀲𑀼 𑀲𑀢𑀺𑀧𑀺 𑀫𑁄𑀘𑀦𑀲𑁆𑀲𑀸𑀤𑁂 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀸𑀪𑀸𑀯𑀢𑁄 𑀦𑀢𑁆𑀣𑀺 𑀆𑀧𑀢𑁆𑀢𑀻𑀢𑀺 𑀆𑀳 ‘‘𑀳𑀢𑁆𑀢𑀧𑀭𑀺𑀓𑀫𑁆𑀫…𑀧𑁂… 𑀅𑀦𑀸𑀧𑀢𑁆𑀢𑀻’’𑀢𑀺. 𑀅𑀬𑀁 𑀲𑀩𑁆𑀩𑀸𑀘𑀭𑀺𑀬𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄𑀢𑀺 ‘‘𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀢𑀺𑀡𑁆𑀡𑀫𑁆𑀧𑀺 𑀆𑀘𑀭𑀺𑀬𑀸𑀦𑀁 𑀲𑀸𑀥𑀸𑀭𑀡𑁄 𑀯𑀺𑀦𑀺𑀘𑁆𑀙𑀬𑁄.

𑀔𑁄𑀪𑀓𑀭𑀡𑀧𑀘𑁆𑀘𑀬𑁄 𑀦𑀸𑀫 𑀯𑀺𑀲𑀪𑀸𑀕𑀪𑁂𑀲𑀚𑁆𑀚𑀲𑁂𑀦𑀸𑀲𑀦𑀸𑀳𑀸𑀭𑀸𑀤𑀺𑀧𑀘𑁆𑀘𑀬𑁄. 𑀅𑀢𑁆𑀣𑀓𑀸𑀫𑀢𑀸𑀬 𑀯𑀸 𑀅𑀦𑀢𑁆𑀣𑀓𑀸𑀫𑀢𑀸𑀬 𑀯𑀸𑀢𑀺 𑀧𑀲𑀦𑁆𑀦𑀸 𑀅𑀢𑁆𑀣𑀓𑀸𑀫𑀢𑀸𑀬, 𑀓𑀼𑀤𑁆𑀥𑀸 𑀅𑀦𑀢𑁆𑀣𑀓𑀸𑀫𑀢𑀸𑀬. 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸𑀢𑀺 𑀲𑀪𑀸𑀯𑀢𑁄 𑀪𑀯𑀺𑀢𑀩𑁆𑀩𑀸𑀬 𑀅𑀢𑁆𑀣𑀸𑀬 𑀯𑀸 𑀅𑀦𑀢𑁆𑀣𑀸𑀬 𑀯𑀸. 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀤𑁂𑀯𑀸𑀦𑀼𑀪𑀸𑀯𑁂𑀦 𑀉𑀧𑀦𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀤𑀸 𑀓𑀺𑀭 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 𑀘𑀢𑁆𑀢𑀸𑀭𑁄 𑀓𑀺𑀭 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀭𑀚𑀢𑀧𑀩𑁆𑀩𑀢𑁄, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀸𑀘𑀻𑀦𑀢𑁄 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀺. 𑀇𑀫𑀁 𑀲𑀼𑀧𑀺𑀦𑀁 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀬 𑀧𑀼𑀢𑁆𑀢𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀧𑀜𑁆𑀘 ¶ 𑀫𑀳𑀸𑀲𑀼𑀧𑀺𑀦𑁂𑀢𑀺 (𑀅. 𑀦𑀺. 𑀅𑀝𑁆𑀞. 𑁩.𑁫.𑁧𑁯𑁬) 𑀫𑀳𑀦𑁆𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀧𑀲𑁆𑀲𑀺𑀢𑀩𑁆𑀩𑀢𑁄 𑀫𑀳𑀦𑁆𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀫𑀳𑀸𑀲𑀼𑀧𑀺𑀦𑁂. 𑀢𑁂 𑀧𑀦 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀦𑁂𑀯 𑀮𑁄𑀓𑀺𑀬𑀫𑀳𑀸𑀚𑀦𑁄 𑀧𑀲𑁆𑀲𑀢𑀺, 𑀦 𑀫𑀳𑀸𑀭𑀸𑀚𑀸𑀦𑁄, 𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄, 𑀦 𑀅𑀕𑁆𑀕𑀲𑀸𑀯𑀓𑀸, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀏𑀓𑁄 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄𑀬𑁂𑀯 𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂’’𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀓𑀤𑀸 𑀢𑁂 𑀲𑀼𑀧𑀺𑀦𑁂 𑀧𑀲𑁆𑀲𑀻𑀢𑀺? ‘‘𑀲𑁆𑀯𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀭𑀢𑁆𑀢𑀺𑀯𑀺𑀪𑀸𑀬𑀦𑀓𑀸𑀮𑁂 𑀧𑀲𑁆𑀲𑀺. 𑀓𑀸𑀮𑀯𑀲𑁂𑀦 𑀳𑀺 𑀤𑀺𑀯𑀸 𑀤𑀺𑀝𑁆𑀞𑁄 ¶ 𑀲𑀼𑀧𑀺𑀦𑁄 𑀦 𑀲𑀫𑁂𑀢𑀺, 𑀢𑀣𑀸 𑀧𑀞𑀫𑀬𑀸𑀫𑁂 𑀫𑀚𑁆𑀛𑀺𑀫𑀬𑀸𑀫𑁂 𑀘. 𑀧𑀘𑁆𑀙𑀺𑀫𑀬𑀸𑀫𑁂 𑀩𑀮𑀯𑀧𑀘𑁆𑀘𑀽𑀲𑁂 𑀧𑀦 𑀅𑀲𑀺𑀢𑀧𑀻𑀢𑀲𑀸𑀬𑀺𑀢𑁂 𑀲𑀫𑁆𑀫𑀸𑀧𑀭𑀺𑀡𑀸𑀫𑀕𑀢𑁂 𑀓𑀸𑀬𑀲𑁆𑀫𑀺𑀁 𑀑𑀚𑀸𑀬 𑀧𑀢𑀺𑀝𑁆𑀞𑀺𑀢𑀸𑀬 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀫𑀸𑀦𑁂 𑀤𑀺𑀝𑁆𑀞𑀲𑀼𑀧𑀺𑀦𑁄 𑀲𑀫𑁂𑀢𑀺. 𑀇𑀝𑁆𑀞𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀇𑀝𑁆𑀞𑀁 𑀧𑀝𑀺𑀮𑀪𑀢𑀺, 𑀅𑀦𑀺𑀝𑁆𑀞𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀅𑀦𑀺𑀝𑁆𑀞𑀁, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀭𑀢𑁆𑀢𑀺𑀯𑀺𑀪𑀸𑀬𑀦𑀓𑀸𑀮𑁂 𑀧𑀲𑁆𑀲𑀺.

𑀓𑁂 𑀧𑀦 𑀢𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸𑀢𑀺? 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸 𑀧𑀸𑀢𑀼𑀭𑀳𑁂𑀲𑀼𑀁 (𑀅. 𑀦𑀺. 𑁫.𑁧𑁯𑁬) 𑁋 𑀅𑀬𑀁 𑀫𑀳𑀸𑀧𑀣𑀯𑀻 𑀫𑀳𑀸𑀲𑀬𑀦𑀁 𑀅𑀳𑁄𑀲𑀺, 𑀳𑀺𑀫𑀯𑀸 𑀧𑀩𑁆𑀩𑀢𑀭𑀸𑀚𑀸 𑀩𑀺𑀫𑁆𑀩𑁄𑀳𑀦𑀁 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑁂 𑀲𑀫𑀼𑀤𑁆𑀤𑁂 𑀯𑀸𑀫𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀧𑀘𑁆𑀙𑀺𑀫𑁂 𑀲𑀫𑀼𑀤𑁆𑀤𑁂 𑀤𑀓𑁆𑀔𑀺𑀡𑀳𑀢𑁆𑀣𑁄 𑀑𑀳𑀺𑀢𑁄 𑀅𑀳𑁄𑀲𑀺, 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑁂 𑀉𑀪𑁄 𑀧𑀸𑀤𑀸 𑀑𑀳𑀺𑀢𑀸 𑀅𑀳𑁂𑀲𑀼𑀁, 𑀅𑀬𑀁 𑀧𑀞𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

𑀧𑀼𑀦 𑀘𑀧𑀭𑀁 𑀤𑀩𑁆𑀩𑀢𑀺𑀡𑀲𑀗𑁆𑀔𑀸𑀢𑀸 𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀺 𑀦𑀗𑁆𑀕𑀮𑀫𑀢𑁆𑀢𑁂𑀦 𑀭𑀢𑁆𑀢𑀤𑀡𑁆𑀟𑁂𑀦 𑀦𑀸𑀪𑀺𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀩𑁆𑀬𑀸𑀫𑀫𑀢𑁆𑀢𑀁 𑀬𑀝𑁆𑀞𑀺𑀫𑀢𑁆𑀢𑀁 𑀕𑀸𑀯𑀼𑀢𑀫𑀢𑁆𑀢𑀁 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀬𑁄𑀚𑀦𑀫𑀢𑁆𑀢𑀦𑁆𑀢𑀺 𑀏𑀯𑀁 𑀉𑀕𑁆𑀕𑀦𑁆𑀢𑁆𑀯𑀸 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀁 𑀦𑀪𑀁 𑀆𑀳𑀘𑁆𑀘 𑀞𑀺𑀢𑀸 𑀅𑀳𑁄𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

𑀧𑀼𑀦 𑀘𑀧𑀭𑀁 𑀲𑁂𑀢𑀸 𑀓𑀺𑀫𑀻 𑀓𑀡𑁆𑀳𑀲𑀻𑀲𑀸 𑀧𑀸𑀤𑁂𑀳𑀺 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀬𑀸𑀯 𑀚𑀸𑀡𑀼𑀫𑀡𑁆𑀟𑀮𑀸 𑀧𑀝𑀺𑀘𑁆𑀙𑀸𑀤𑁂𑀲𑀼𑀁, 𑀅𑀬𑀁 𑀢𑀢𑀺𑀬𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

𑀧𑀼𑀦 𑀘𑀧𑀭𑀁 𑀘𑀢𑁆𑀢𑀸𑀭𑁄 𑀲𑀓𑀼𑀡𑀸 𑀦𑀸𑀦𑀸𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀲𑀩𑁆𑀩𑀲𑁂𑀢𑀸 𑀲𑀫𑁆𑀧𑀚𑁆𑀚𑀺𑀁𑀲𑀼, 𑀅𑀬𑀁 𑀘𑀢𑀼𑀢𑁆𑀣𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺.

𑀧𑀼𑀦 ¶ 𑀘𑀧𑀭𑀁 𑀩𑁄𑀥𑀺𑀲𑀢𑁆𑀢𑁄 𑀫𑀳𑀢𑁄 𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲 𑀉𑀧𑀭𑀽𑀧𑀭𑀺 𑀘𑀗𑁆𑀓𑀫𑀢𑀺 𑀅𑀮𑀺𑀧𑁆𑀧𑀫𑀸𑀦𑁄 𑀫𑀻𑀴𑁆𑀳𑁂𑀦, 𑀅𑀬𑀁 𑀧𑀜𑁆𑀘𑀫𑁄 𑀫𑀳𑀸𑀲𑀼𑀧𑀺𑀦𑁄 𑀧𑀸𑀢𑀼𑀭𑀳𑁄𑀲𑀺. 𑀇𑀫𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸.

𑀢𑀢𑁆𑀣 𑀧𑀞𑀫𑁄 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑀼𑀢𑀺𑀬𑁄 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀼𑀧𑁆𑀧𑀓𑀸𑀲𑀺𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀢𑀢𑀺𑀬𑁄 𑀩𑀳𑀽𑀦𑀁 𑀑𑀤𑀸𑀢𑀯𑀲𑀦𑀸𑀦𑀁 𑀕𑀺𑀳𑀻𑀦𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀭𑀡𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀘𑀢𑀼𑀢𑁆𑀣𑁄 𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀯𑀺𑀫𑀼𑀢𑁆𑀢𑀺𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀜𑁆𑀘𑀫𑁄 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀮𑀸𑀪𑀺𑀢𑀸𑀬 𑀢𑁂𑀲𑀼 𑀘 𑀅𑀦𑀼𑀧𑀮𑀺𑀢𑁆𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀅𑀧𑀺𑀘 ¶ 𑀬𑀁 𑀲𑁄 𑀘𑀓𑁆𑀓𑀯𑀸𑀴𑀫𑀳𑀸𑀧𑀣𑀯𑀺𑀁 𑀲𑀺𑀭𑀺𑀲𑀬𑀦𑀪𑀽𑀢𑀁 𑀅𑀤𑁆𑀤𑀲, 𑀢𑀁 𑀩𑀼𑀤𑁆𑀥𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀩𑀺𑀫𑁆𑀩𑁄𑀳𑀦𑀁 𑀅𑀤𑁆𑀤𑀲, 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀩𑀺𑀫𑁆𑀩𑁄𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀘𑀢𑁆𑀢𑀸𑀭𑁄 𑀳𑀢𑁆𑀣𑀧𑀸𑀤𑁂 𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀽𑀧𑀭𑀺𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀢𑁆𑀣𑀓𑁂 𑀞𑀺𑀢𑁂 𑀅𑀤𑁆𑀤𑀲, 𑀢𑀁 𑀥𑀫𑁆𑀫𑀘𑀓𑁆𑀓𑀲𑁆𑀲 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀪𑀸𑀯𑁂 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀅𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀓𑀁 𑀦𑀺𑀧𑀦𑁆𑀦𑀁 𑀅𑀤𑁆𑀤𑀲, 𑀢𑀁 𑀢𑀻𑀲𑀼 𑀪𑀯𑁂𑀲𑀼 𑀅𑀯𑀓𑀼𑀚𑁆𑀚𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀫𑀼𑀔𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀬𑀸𑀯 𑀪𑀯𑀕𑁆𑀕𑀸 𑀏𑀓𑀸𑀮𑁄𑀓𑀁 𑀅𑀳𑁄𑀲𑀺, 𑀢𑀁 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑀺 𑀢𑀁𑀢𑀁𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀫𑀺𑀢𑁆𑀢𑀪𑀽𑀢𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑁄 𑀯𑀺𑀬 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂’’𑀢𑀺.

𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂𑀢𑀺 𑁋

‘‘𑀉𑀲𑀪𑀸 𑀭𑀼𑀓𑁆𑀔𑀸 𑀕𑀸𑀯𑀺𑀬𑁄 𑀕𑀯𑀸 𑀘,

𑀅𑀲𑁆𑀲𑁄 𑀓𑀁𑀲𑁄 𑀲𑀺𑀗𑁆𑀕𑀸𑀮𑀻 𑀘 𑀓𑀼𑀫𑁆𑀪𑁄;

𑀧𑁄𑀓𑁆𑀔𑀭𑀡𑀻 𑀘 𑀅𑀧𑀸𑀓𑀘𑀦𑁆𑀤𑀦𑀁,

𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺 𑀲𑀺𑀮𑀸 𑀧𑁆𑀮𑀯𑀦𑁆𑀢𑀺.

‘‘𑀫𑀡𑁆𑀟𑀽𑀓𑀺𑀬𑁄 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑁆𑀢𑀺,

𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀺;

𑀢𑀲𑀸 𑀯𑀓𑀸 𑀏𑀴𑀓𑀸𑀦𑀁 𑀪𑀬𑀸 𑀳𑀻’’𑀢𑀺. (𑀚𑀸. 𑁧.𑁧.𑁭𑁭) 𑁋

𑀇𑀫𑁂 𑀲𑁄𑀴𑀲 𑀲𑀼𑀧𑀺𑀦𑁂 𑀧𑀲𑁆𑀲𑀦𑁆𑀢𑁄 𑀓𑁄𑀲𑀮𑀭𑀸𑀚𑀸 𑀯𑀺𑀬.

𑁧. 𑀏𑀓𑀤𑀺𑀯𑀲𑀁 ¶ 𑀓𑀺𑀭 𑀓𑁄𑀲𑀮𑀭𑀸𑀚𑀸 𑀭𑀢𑁆𑀢𑀺𑀁 𑀦𑀺𑀤𑁆𑀤𑀽𑀧𑀕𑀢𑁄 𑀧𑀘𑁆𑀙𑀺𑀫𑀬𑀸𑀫𑁂 𑀲𑁄𑀴𑀲 𑀲𑀼𑀧𑀺𑀦𑁂 𑀧𑀲𑁆𑀲𑀺 (𑀚𑀸. 𑀅𑀝𑁆𑀞. 𑁧.𑁧.𑀫𑀳𑀸𑀲𑀼𑀧𑀺𑀦𑀚𑀸𑀢𑀓𑀯𑀡𑁆𑀡𑀦𑀸). 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀜𑁆𑀚𑀦𑀯𑀡𑁆𑀡𑀸 𑀓𑀸𑀴𑀉𑀲𑀪𑀸 ‘‘𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀭𑀸𑀚𑀗𑁆𑀕𑀡𑀁 𑀆𑀕𑀦𑁆𑀢𑁆𑀯𑀸 ‘‘𑀉𑀲𑀪𑀬𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀢𑀺𑀢𑁂 𑀬𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀦𑀤𑀺𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀅𑀬𑀼𑀚𑁆𑀛𑀺𑀢𑁆𑀯𑀸𑀯 𑀧𑀝𑀺𑀓𑁆𑀓𑀦𑁆𑀢𑀸. 𑀇𑀫𑀁 𑀧𑀞𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲.

𑁨. 𑀔𑀼𑀤𑁆𑀤𑀓𑀸 ¶ 𑀭𑀼𑀓𑁆𑀔𑀸 𑀘𑁂𑀯 𑀕𑀘𑁆𑀙𑀸 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺 𑀭𑀢𑀦𑀫𑀢𑁆𑀢𑀫𑁆𑀧𑀺 𑀅𑀦𑀼𑀕𑁆𑀕𑀦𑁆𑀢𑁆𑀯𑀸𑀯 𑀧𑀼𑀧𑁆𑀨𑀦𑁆𑀢𑀺 𑀘𑁂𑀯 𑀨𑀮𑀦𑁆𑀢𑀺 𑀘. 𑀇𑀫𑀁 𑀤𑀼𑀢𑀺𑀬𑀁 𑀅𑀤𑁆𑀤𑀲.

𑁩. 𑀕𑀸𑀯𑀺𑀬𑁄 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀅𑀤𑁆𑀤𑀲. 𑀅𑀬𑀁 𑀢𑀢𑀺𑀬𑁄 𑀲𑀼𑀧𑀺𑀦𑁄.

𑁪. 𑀥𑀼𑀭𑀯𑀸𑀳𑁂 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑁂 𑀫𑀳𑀸𑀕𑁄𑀡𑁂 𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑁂𑀢𑁆𑀯𑀸 𑀢𑀭𑀼𑀡𑁂 𑀕𑁄𑀤𑀫𑁆𑀫𑁂 𑀥𑀼𑀭𑁂 𑀬𑁄𑀚𑁂𑀦𑁆𑀢𑁂 𑀅𑀤𑁆𑀤𑀲, 𑀢𑁂 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀙𑀟𑁆𑀟𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀲𑀓𑀝𑀸𑀦𑀺 𑀦𑀧𑁆𑀧𑀯𑀢𑁆𑀢𑀺𑀁𑀲𑀼. 𑀅𑀬𑀁 𑀘𑀢𑀼𑀢𑁆𑀣𑁄 𑀲𑀼𑀧𑀺𑀦𑁄.

𑁫. 𑀏𑀓𑀁 𑀉𑀪𑀢𑁄𑀫𑀼𑀔𑀁 𑀅𑀲𑁆𑀲𑀁 𑀅𑀤𑁆𑀤𑀲, 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀬𑀯𑀲𑀻𑀲𑀁 𑀤𑁂𑀦𑁆𑀢𑀺, 𑀲𑁄 𑀤𑁆𑀯𑀻𑀳𑀺𑀧𑀺 𑀫𑀼𑀔𑁂𑀳𑀺 𑀔𑀸𑀤𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀲𑀼𑀧𑀺𑀦𑁄.

𑁬. 𑀫𑀳𑀸𑀚𑀦𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 ‘‘𑀇𑀥 𑀧𑀲𑁆𑀲𑀸𑀯𑀁 𑀓𑀭𑁄𑀳𑀻’’𑀢𑀺 𑀏𑀓𑀲𑁆𑀲 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀉𑀧𑀦𑀸𑀫𑁂𑀲𑀺, 𑀢𑀁 𑀢𑀢𑁆𑀣 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀁 𑀅𑀤𑁆𑀤𑀲. 𑀅𑀬𑀁 𑀙𑀝𑁆𑀞𑁄 𑀲𑀼𑀧𑀺𑀦𑁄.

𑁭. 𑀏𑀓𑁄 𑀧𑀼𑀭𑀺𑀲𑁄 𑀭𑀚𑁆𑀚𑀼𑀁 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀦𑀺𑀲𑀺𑀦𑁆𑀦𑀧𑀻𑀞𑀲𑁆𑀲 𑀳𑁂𑀝𑁆𑀞𑀸 𑀲𑀬𑀺𑀢𑀸 𑀙𑀸𑀢𑀲𑀺𑀗𑁆𑀕𑀸𑀮𑀻 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀢𑀁 𑀔𑀸𑀤𑀢𑀺. 𑀇𑀫𑀁 𑀲𑀢𑁆𑀢𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲.

𑁮. 𑀭𑀸𑀚𑀤𑁆𑀯𑀸𑀭𑁂 𑀩𑀳𑀽𑀳𑀺 𑀢𑀼𑀘𑁆𑀙𑀓𑀼𑀫𑁆𑀪𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀧𑀺𑀢𑀁 𑀏𑀓𑀁 𑀫𑀳𑀦𑁆𑀢𑀁 𑀧𑀽𑀭𑀺𑀢𑀓𑀼𑀫𑁆𑀪𑀁 𑀅𑀤𑁆𑀤𑀲, 𑀘𑀢𑁆𑀢𑀸𑀭𑁄𑀧𑀺 𑀧𑀦 𑀯𑀡𑁆𑀡𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀘𑀢𑀽𑀳𑀺 𑀅𑀦𑀼𑀤𑀺𑀲𑀸𑀳𑀺 𑀘 𑀖𑀝𑁂𑀳𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑀫𑁂𑀯 𑀧𑀽𑀭𑁂𑀦𑁆𑀢𑀺, 𑀧𑀽𑀭𑀺𑀢𑀧𑀽𑀭𑀺𑀢𑀁 𑀉𑀤𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀺, 𑀢𑀼𑀘𑁆𑀙𑀓𑀼𑀫𑁆𑀪𑁂 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀅𑀝𑁆𑀞𑀫𑁄 𑀲𑀼𑀧𑀺𑀦𑁄.

𑁯. 𑀏𑀓𑀁 ¶ 𑀧𑀜𑁆𑀘𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀕𑀫𑁆𑀪𑀻𑀭𑀁 𑀲𑀩𑁆𑀩𑀢𑁄𑀢𑀺𑀢𑁆𑀣𑀁 𑀧𑁄𑀓𑁆𑀔𑀭𑀡𑀺𑀁 𑀅𑀤𑁆𑀤𑀲, 𑀲𑀫𑀦𑁆𑀢𑀢𑁄 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺, 𑀢𑀲𑁆𑀲𑀸 𑀫𑀚𑁆𑀛𑁂 𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀉𑀤𑀓𑀁 𑀆𑀯𑀺𑀮𑀁, 𑀢𑀻𑀭𑀧𑁆𑀧𑀤𑁂𑀲𑁂 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀅𑀓𑁆𑀓𑀫𑀦𑀝𑁆𑀞𑀸𑀦𑁂 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁. 𑀅𑀬𑀁 𑀦𑀯𑀫𑁄 𑀲𑀼𑀧𑀺𑀦𑁄.

𑁧𑁦. 𑀏𑀓𑀺𑀲𑁆𑀲𑀸𑀬𑁂𑀯 𑀘 𑀓𑀼𑀫𑁆𑀪𑀺𑀬𑀸 𑀧𑀘𑁆𑀘𑀫𑀸𑀦𑀁 𑀑𑀤𑀦𑀁 𑀅𑀧𑀸𑀓𑀁 𑀅𑀤𑁆𑀤𑀲, ‘‘𑀅𑀧𑀸𑀓’’𑀦𑁆𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀢𑀻𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀫𑀸𑀦𑀁 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀅𑀢𑀺𑀓𑀺𑀮𑀺𑀦𑁆𑀦𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀉𑀢𑁆𑀢𑀡𑁆𑀟𑀼𑀮𑁄, 𑀏𑀓𑀲𑁆𑀫𑀺𑀁 𑀲𑀼𑀧𑀓𑁆𑀓𑁄𑀢𑀺. 𑀅𑀬𑀁 𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁧. 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 ¶ 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑁂 𑀅𑀤𑁆𑀤𑀲. 𑀅𑀬𑀁 𑀏𑀓𑀸𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁨. 𑀢𑀼𑀘𑁆𑀙𑀮𑀸𑀩𑀽𑀦𑀺 𑀉𑀤𑀓𑁂 𑀲𑀻𑀤𑀦𑁆𑀢𑀸𑀦𑀺 𑀅𑀤𑁆𑀤𑀲. 𑀅𑀬𑀁 𑀤𑁆𑀯𑀸𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁩. 𑀫𑀳𑀦𑁆𑀢𑀫𑀳𑀦𑁆𑀢𑀸 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀸 𑀖𑀦𑀲𑀺𑀮𑀸 𑀦𑀸𑀯𑀸 𑀯𑀺𑀬 𑀉𑀤𑀓𑁂 𑀧𑁆𑀮𑀯𑀫𑀸𑀦𑀸 𑀅𑀤𑁆𑀤𑀲. 𑀅𑀬𑀁 𑀢𑁂𑀭𑀲𑀫𑁄 𑀲𑀼𑀧𑀺𑀦𑁄.

𑁧𑁪. 𑀔𑀼𑀤𑁆𑀤𑀓𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸 𑀫𑀡𑁆𑀟𑀽𑀓𑀺𑀬𑁄 𑀫𑀳𑀦𑁆𑀢𑁂 𑀓𑀡𑁆𑀳𑀲𑀧𑁆𑀧𑁂 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀮𑀦𑀸𑀴𑁂 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀺𑀮𑀦𑁆𑀢𑀺𑀬𑁄 𑀅𑀤𑁆𑀤𑀲. 𑀅𑀬𑀁 𑀘𑀼𑀤𑁆𑀤𑀲𑀫𑁄 𑀲𑀼𑀧𑀺𑀦𑁄.

𑁧𑁫. 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀕𑀸𑀫𑀕𑁄𑀘𑀭𑀁 𑀓𑀸𑀓𑀁 𑀓𑀜𑁆𑀘𑀦𑀯𑀡𑁆𑀡𑀯𑀡𑁆𑀡𑀢𑀸𑀬 ‘‘𑀲𑀼𑀯𑀡𑁆𑀡𑀸’’𑀢𑀺 𑀮𑀤𑁆𑀥𑀦𑀸𑀫𑁂 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂 𑀧𑀭𑀺𑀯𑀸𑀭𑁂𑀦𑁆𑀢𑁂 𑀅𑀤𑁆𑀤𑀲. 𑀅𑀬𑀁 𑀧𑀦𑁆𑀦𑀭𑀲𑀫𑁄 𑀲𑀼𑀧𑀺𑀦𑁄.

𑁧𑁬. 𑀧𑀼𑀩𑁆𑀩𑁂 𑀤𑀻𑀧𑀺𑀦𑁄 𑀏𑀴𑀓𑁂 𑀔𑀸𑀤𑀦𑁆𑀢𑀺, 𑀢𑁂 𑀧𑀦 𑀏𑀴𑀓𑁂 𑀤𑀻𑀧𑀺𑀦𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑀼𑀭𑀸𑀫𑀼𑀭𑀸𑀢𑀺 𑀔𑀸𑀤𑀦𑁆𑀢𑁂 𑀅𑀤𑁆𑀤𑀲, 𑀅𑀣𑀜𑁆𑀜𑁂 𑀢𑀲𑀸 𑀯𑀓𑀸 𑀏𑀴𑀓𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀢𑀲𑀺𑀢𑀸 𑀢𑀸𑀲𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀏𑀴𑀓𑀸𑀦𑀁 𑀪𑀬𑀸 𑀧𑀮𑀸𑀬𑀺𑀢𑁆𑀯𑀸 𑀕𑀼𑀫𑁆𑀩𑀕𑀳𑀦𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀬𑀺𑀁𑀲𑀼. 𑀅𑀬𑀁 𑀲𑁄𑀴𑀲𑀫𑁄 𑀲𑀼𑀧𑀺𑀦𑁄.

𑁧. 𑀢𑀢𑁆𑀣 𑀅𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁 𑀅𑀥𑀫𑁆𑀫𑀺𑀓𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀁 𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑁂 𑀓𑀼𑀲𑀮𑁂 𑀑𑀲𑀦𑁆𑀦𑁂 𑀅𑀓𑀼𑀲𑀮𑁂 𑀉𑀲𑁆𑀲𑀦𑁆𑀦𑁂 𑀮𑁄𑀓𑀲𑁆𑀲 𑀧𑀭𑀺𑀳𑀻𑀦𑀓𑀸𑀮𑁂 ¶ 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑁆𑀲𑀺𑀲𑁆𑀲𑀢𑀺, 𑀫𑁂𑀖𑀧𑀸𑀤𑀸 𑀙𑀺𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀲𑁆𑀲𑀸𑀦𑀺 𑀫𑀺𑀮𑀸𑀬𑀺𑀲𑁆𑀲𑀦𑁆𑀢𑀺, 𑀤𑀼𑀩𑁆𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀯𑀲𑁆𑀲𑀺𑀢𑀼𑀓𑀸𑀫𑀸 𑀯𑀺𑀬 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀫𑁂𑀖𑀸 𑀉𑀝𑁆𑀞𑀳𑀺𑀢𑁆𑀯𑀸 𑀇𑀢𑁆𑀣𑀺𑀓𑀸𑀳𑀺 𑀆𑀢𑀧𑁂 𑀧𑀢𑁆𑀣𑀝𑀸𑀦𑀁 𑀯𑀻𑀳𑀺𑀆𑀤𑀻𑀦𑀁 𑀢𑁂𑀫𑀦𑀪𑀬𑁂𑀦 𑀅𑀦𑁆𑀢𑁄 𑀧𑀯𑁂𑀲𑀺𑀢𑀓𑀸𑀮𑁂 𑀧𑀼𑀭𑀺𑀲𑁂𑀲𑀼 𑀓𑀼𑀤𑀸𑀮𑀧𑀺𑀝𑀓𑁂 𑀆𑀤𑀸𑀬 𑀆𑀴𑀺𑀩𑀦𑁆𑀥𑀦𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁂𑀲𑀼 𑀯𑀲𑁆𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀕𑀚𑁆𑀚𑀺𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀉𑀲𑀪𑀸 𑀯𑀺𑀬 𑀅𑀬𑀼𑀚𑁆𑀛𑀺𑀢𑁆𑀯𑀸 𑀅𑀯𑀲𑁆𑀲𑀺𑀢𑁆𑀯𑀸𑀯 𑀧𑀮𑀸𑀬𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀞𑀫𑀲𑁆𑀲 𑀯𑀺𑀧𑀸𑀓𑁄.

𑁨. 𑀮𑁄𑀓𑀲𑁆𑀲 𑀧𑀭𑀺𑀳𑀻𑀦𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀸𑀬𑀼𑀓𑀓𑀸𑀮𑁂 𑀲𑀢𑁆𑀢𑀸 𑀢𑀺𑀩𑁆𑀩𑀭𑀸𑀕𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀲𑀫𑁆𑀧𑀢𑁆𑀢𑀯𑀬𑀸𑀯 𑀓𑀼𑀫𑀸𑀭𑀺𑀬𑁄 𑀧𑀼𑀭𑀺𑀲𑀦𑁆𑀢𑀭𑀁 𑀕𑀦𑁆𑀢𑁆𑀯𑀸 𑀉𑀢𑀼𑀦𑀺𑀬𑁄 𑀘𑁂𑀯 𑀕𑀩𑁆𑀪𑀺𑀦𑀺𑀬𑁄 𑀘 𑀳𑀼𑀢𑁆𑀯𑀸 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀔𑀼𑀤𑁆𑀤𑀓𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀁 𑀯𑀺𑀬 𑀳𑀺 𑀢𑀸𑀲𑀁 𑀉𑀢𑀼𑀦𑀺𑀪𑀸𑀯𑁄, 𑀨𑀮𑀁 𑀯𑀺𑀬 𑀘 𑀧𑀼𑀢𑁆𑀢𑀥𑀻𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀤𑀼𑀢𑀺𑀬𑀲𑁆𑀲 𑀯𑀺𑀧𑀸𑀓𑁄.

𑁩. 𑀫𑀦𑀼𑀲𑁆𑀲𑀸𑀦𑀁 ¶ 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑀲𑁆𑀲 𑀦𑀝𑁆𑀞𑀓𑀸𑀮𑁂 𑀲𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀲𑀼 𑀯𑀸 𑀲𑀲𑁆𑀲𑀼𑀲𑀲𑀼𑀭𑁂𑀲𑀼 𑀯𑀸 𑀮𑀚𑁆𑀚𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀓𑀼𑀝𑀼𑀫𑁆𑀩𑀁 𑀲𑀁𑀯𑀺𑀤𑀳𑀦𑁆𑀢𑀸𑀯 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑀳𑀮𑁆𑀮𑀓𑀸𑀦𑀁 𑀤𑀸𑀢𑀼𑀓𑀸𑀫𑀸 𑀤𑀲𑁆𑀲𑀦𑁆𑀢𑀺, 𑀅𑀤𑀸𑀢𑀼𑀓𑀸𑀫𑀸 𑀦 𑀤𑀲𑁆𑀲𑀦𑁆𑀢𑀺, 𑀫𑀳𑀮𑁆𑀮𑀓𑀸 𑀅𑀦𑀸𑀣𑀸 𑀳𑀼𑀢𑁆𑀯𑀸 𑀅𑀲𑀬𑀁𑀯𑀲𑀻 𑀤𑀸𑀭𑀓𑁂 𑀆𑀭𑀸𑀥𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀤𑀳𑀼𑀚𑀸𑀢𑀸𑀦𑀁 𑀯𑀘𑁆𑀙𑀸𑀦𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀳𑀸𑀕𑀸𑀯𑀺𑀬𑁄 𑀯𑀺𑀬. 𑀅𑀬𑀁 𑀢𑀢𑀺𑀬𑀲𑁆𑀲 𑀯𑀺𑀧𑀸𑀓𑁄.

𑁪. 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀓𑀸𑀮𑁂 𑀅𑀥𑀫𑁆𑀫𑀺𑀓𑀭𑀸𑀚𑀸𑀦𑁄 𑀧𑀡𑁆𑀟𑀺𑀢𑀸𑀦𑀁 𑀧𑀯𑁂𑀡𑀺𑀓𑀼𑀲𑀮𑀸𑀦𑀁 𑀓𑀫𑁆𑀫𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑀸𑀦𑀁 𑀫𑀳𑀸𑀫𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀥𑀫𑁆𑀫𑀲𑀪𑀸𑀬𑀁 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀧𑀡𑁆𑀟𑀺𑀢𑁂 𑀯𑁄𑀳𑀸𑀭𑀓𑀼𑀲𑀮𑁂 𑀫𑀳𑀮𑁆𑀮𑀓𑁂 𑀅𑀫𑀘𑁆𑀘𑁂 𑀦 𑀞𑀧𑁂𑀲𑁆𑀲𑀦𑁆𑀢𑀺. 𑀢𑀩𑁆𑀩𑀺𑀧𑀭𑀻𑀢𑀸𑀦𑀁 𑀧𑀦 𑀢𑀭𑀼𑀡𑀢𑀭𑀼𑀡𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺, 𑀢𑀣𑀸𑀭𑀽𑀧𑁂 𑀏𑀯 𑀘 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀭𑀸𑀚𑀓𑀫𑁆𑀫𑀸𑀦𑀺 𑀘𑁂𑀯 𑀬𑀼𑀢𑁆𑀢𑀸𑀬𑀼𑀢𑁆𑀢𑀜𑁆𑀘 𑀅𑀚𑀸𑀦𑀦𑁆𑀢𑀸 𑀦𑁂𑀯 𑀢𑀁 𑀬𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀦 𑀭𑀸𑀚𑀓𑀫𑁆𑀫𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁, 𑀢𑁂 𑀅𑀲𑀓𑁆𑀓𑁄𑀦𑁆𑀢𑀸 𑀓𑀫𑁆𑀫𑀥𑀼𑀭𑀁 𑀙𑀟𑁆𑀟𑁂𑀲𑁆𑀲𑀦𑁆𑀢𑀺, 𑀫𑀳𑀮𑁆𑀮𑀓𑀸𑀧𑀺 𑀧𑀡𑁆𑀟𑀺𑀢𑀸 𑀅𑀫𑀘𑁆𑀘𑀸 𑀬𑀲𑀁 𑀅𑀮𑀪𑀦𑁆𑀢𑀸 𑀓𑀺𑀘𑁆𑀘𑀸𑀦𑀺 𑀦𑀺𑀢𑁆𑀣𑀭𑀺𑀢𑀼𑀁 𑀲𑀫𑀢𑁆𑀣𑀸𑀧𑀺 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀏𑀢𑁂𑀳𑀺, 𑀫𑀬𑀁 𑀩𑀸𑀳𑀺𑀭𑀓𑀸 𑀚𑀸𑀢𑀸, 𑀅𑀩𑁆𑀪𑀦𑁆𑀢𑀭𑀺𑀓𑀸 𑀢𑀭𑀼𑀡𑀤𑀸𑀭𑀓𑀸 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀢𑁂𑀲𑀁 𑀭𑀸𑀚𑀽𑀦𑀁 𑀳𑀸𑀦𑀺𑀬𑁂𑀯 𑀪𑀯𑀺𑀲𑁆𑀲𑀢𑀺, 𑀥𑀼𑀭𑀁 𑀯𑀳𑀺𑀢𑀼𑀁 𑀅𑀲𑀫𑀢𑁆𑀣𑀸𑀦𑀁 𑀯𑀘𑁆𑀙𑀤𑀫𑁆𑀫𑀸𑀦𑀁 𑀥𑀼𑀭𑁂 𑀬𑁄𑀚𑀺𑀢𑀓𑀸𑀮𑁄 𑀯𑀺𑀬, 𑀥𑀼𑀭𑀯𑀸𑀳𑀸𑀦𑀜𑁆𑀘 ¶ 𑀫𑀳𑀸𑀕𑁄𑀡𑀸𑀦𑀁 𑀬𑀼𑀕𑀧𑀭𑀫𑁆𑀧𑀭𑀸𑀬 𑀅𑀬𑁄𑀚𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀘𑀢𑀼𑀢𑁆𑀣𑀲𑁆𑀲 𑀯𑀺𑀧𑀸𑀓𑁄.

𑁫. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 𑀅𑀥𑀫𑁆𑀫𑀺𑀓𑀩𑀸𑀮𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑁂 𑀮𑁄𑀮𑀫𑀦𑀼𑀲𑁆𑀲𑁂 𑀯𑀺𑀦𑀺𑀘𑁆𑀙𑀬𑁂 𑀞𑀧𑁂𑀲𑁆𑀲𑀦𑁆𑀢𑀺, 𑀢𑁂 𑀧𑀸𑀧𑀧𑀼𑀜𑁆𑀜𑁂𑀲𑀼 𑀅𑀦𑀸𑀤𑀭𑀸 𑀩𑀸𑀮𑀸 𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀤𑁂𑀦𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀦𑁆𑀢𑀺 𑀅𑀲𑁆𑀲𑁄 𑀯𑀺𑀬 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺 𑀬𑀯𑀲𑀻𑀲𑀁. 𑀅𑀬𑀁 𑀧𑀜𑁆𑀘𑀫𑀲𑁆𑀲 𑀯𑀺𑀧𑀸𑀓𑁄.

𑁬. 𑀅𑀥𑀫𑁆𑀫𑀺𑀓𑀸𑀬𑁂𑀯 𑀯𑀺𑀚𑀸𑀢𑀺𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀲𑀗𑁆𑀓𑀸𑀬 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑁂 𑀯𑀟𑁆𑀠𑁂𑀲𑁆𑀲𑀦𑁆𑀢𑀺, 𑀏𑀯𑀁 𑀫𑀳𑀸𑀓𑀼𑀮𑀸𑀦𑀺 𑀤𑀼𑀕𑁆𑀕𑀢𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀮𑀸𑀫𑀓𑀓𑀼𑀮𑀸𑀦𑀺 𑀇𑀲𑁆𑀲𑀭𑀸𑀦𑀺. 𑀢𑁂 𑀘 𑀓𑀼𑀮𑀻𑀦𑀸 𑀧𑀼𑀭𑀺𑀲𑀸 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀇𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀓𑀼𑀮𑀻𑀦𑀸𑀦𑀁 𑀥𑀻𑀢𑀭𑁄 𑀤𑀲𑁆𑀲𑀦𑁆𑀢𑀺, 𑀇𑀢𑀺 𑀢𑀸𑀲𑀁 𑀓𑀼𑀮𑀥𑀻𑀢𑀸𑀦𑀁 𑀅𑀓𑀼𑀮𑀻𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀲𑁆𑀲𑀸𑀯𑀓𑀭𑀡𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀙𑀝𑁆𑀞𑀲𑁆𑀲 𑀯𑀺𑀧𑀸𑀓𑁄.

𑁭. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀮𑁄𑀮𑀸 𑀲𑀼𑀭𑀸𑀮𑁄𑀮𑀸 𑀅𑀮𑀗𑁆𑀓𑀸𑀭𑀮𑁄𑀮𑀸 𑀯𑀺𑀲𑀺𑀔𑀸𑀮𑁄𑀮𑀸 𑀆𑀫𑀺𑀲𑀮𑁄𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀤𑀼𑀭𑀸𑀘𑀸𑀭𑀸. 𑀢𑀸 𑀲𑀸𑀫𑀺𑀓𑁂𑀳𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 ¶ 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀲𑀫𑁆𑀪𑀢𑀁 𑀥𑀦𑀁 𑀚𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀼𑀭𑀁 𑀧𑀺𑀯𑀦𑁆𑀢𑀺𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀫𑀸𑀦𑀸 𑀅𑀦𑁆𑀢𑁄𑀕𑁂𑀳𑁂 𑀅𑀘𑁆𑀘𑀸𑀬𑀺𑀓𑀫𑁆𑀧𑀺 𑀓𑀺𑀘𑁆𑀘𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀕𑁂𑀳𑀧𑀭𑀺𑀓𑁆𑀔𑁂𑀧𑀲𑁆𑀲 𑀉𑀧𑀭𑀺𑀪𑀸𑀕𑁂𑀦𑀧𑀺 𑀙𑀺𑀤𑁆𑀤𑀝𑁆𑀞𑀸𑀦𑁂𑀳𑀺𑀧𑀺 𑀚𑀸𑀭𑁂 𑀉𑀧𑀥𑀸𑀭𑀬𑀫𑀸𑀦𑀸 𑀲𑁆𑀯𑁂 𑀯𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀩𑀻𑀚𑀫𑁆𑀧𑀺 𑀓𑁄𑀝𑁆𑀝𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀔𑀸𑀤𑀫𑀸𑀦𑀸 𑀯𑀺𑀮𑀼𑀫𑁆𑀧𑀺𑀲𑁆𑀲𑀦𑁆𑀢𑀺 𑀳𑁂𑀝𑁆𑀞𑀸𑀧𑀻𑀞𑀓𑀦𑀺𑀧𑀦𑁆𑀦𑀓𑀙𑀸𑀢𑀓𑀲𑀺𑀗𑁆𑀕𑀸𑀮𑀻 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀢𑁆𑀢𑀭𑀚𑁆𑀚𑀼𑀁. 𑀅𑀬𑀁 𑀲𑀢𑁆𑀢𑀫𑀲𑁆𑀲 𑀯𑀺𑀧𑀸𑀓𑁄.

𑁮. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀮𑁄𑀓𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀭𑀝𑁆𑀞𑀁 𑀦𑀺𑀭𑁄𑀚𑀁 𑀪𑀯𑀺𑀲𑁆𑀲𑀢𑀺, 𑀭𑀸𑀚𑀸𑀦𑁄 𑀤𑀼𑀕𑁆𑀕𑀢𑀸 𑀓𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁄 𑀇𑀲𑁆𑀲𑀭𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯𑀁 𑀤𑀼𑀕𑁆𑀕𑀢𑀸 𑀲𑀩𑁆𑀩𑁂 𑀚𑀦𑀧𑀤𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀸𑀭𑀬𑀺𑀲𑁆𑀲𑀦𑁆𑀢𑀺, 𑀉𑀧𑀤𑁆𑀤𑀼𑀢𑀸 𑀫𑀦𑀼𑀲𑁆𑀲𑀸 𑀲𑀓𑁂 𑀓𑀫𑁆𑀫𑀦𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀭𑀸𑀚𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀺 𑀯𑀧𑀦𑁆𑀢𑀸 ¶ 𑀭𑀓𑁆𑀔𑀦𑁆𑀢𑀸 𑀮𑀸𑀬𑀦𑁆𑀢𑀸 𑀫𑀤𑁆𑀤𑀦𑁆𑀢𑀸 𑀧𑀯𑁂𑀲𑁂𑀦𑁆𑀢𑀸 𑀉𑀘𑁆𑀙𑀼𑀔𑁂𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀸 𑀬𑀦𑁆𑀢𑀸𑀦𑀺 𑀯𑀸𑀳𑁂𑀦𑁆𑀢𑀸 𑀨𑀸𑀡𑀺𑀢𑀸𑀤𑀻𑀦𑀺 𑀧𑀘𑀦𑁆𑀢𑀸 𑀧𑀼𑀧𑁆𑀨𑀸𑀭𑀸𑀫𑁂 𑀨𑀮𑀸𑀭𑀸𑀫𑁂 𑀘 𑀓𑀭𑁄𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀸𑀦𑀺 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀓𑁄𑀝𑁆𑀞𑀸𑀕𑀸𑀭𑀫𑁂𑀯 𑀧𑀽𑀭𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀢𑀼𑀘𑁆𑀙𑀓𑁄𑀝𑁆𑀞𑁂 𑀑𑀮𑁄𑀓𑁂𑀦𑁆𑀢𑀸𑀧𑀺 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀘𑁆𑀙𑀢𑀼𑀘𑁆𑀙𑀓𑀼𑀫𑁆𑀪𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀽𑀭𑀺𑀢𑀓𑀼𑀫𑁆𑀪𑀧𑀽𑀭𑀡𑀲𑀤𑀺𑀲𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀅𑀝𑁆𑀞𑀫𑀲𑁆𑀲 𑀯𑀺𑀧𑀸𑀓𑁄.

𑁯. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑀸 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀦𑁆𑀢𑀺, 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀦 𑀤𑀲𑁆𑀲𑀦𑁆𑀢𑀺, 𑀮𑀜𑁆𑀚𑀯𑀺𑀢𑁆𑀢𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀥𑀦𑀮𑁄𑀮𑀸, 𑀭𑀝𑁆𑀞𑀯𑀸𑀲𑀺𑀓𑁂𑀲𑀼 𑀢𑁂𑀲𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀁 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀓𑀓𑁆𑀔𑀴𑀸 𑀨𑀭𑀼𑀲𑀸 𑀉𑀘𑁆𑀙𑀼𑀬𑀦𑁆𑀢𑁂 𑀉𑀘𑁆𑀙𑀼𑀕𑀡𑁆𑀞𑀺𑀓𑀸 𑀯𑀺𑀬 𑀫𑀦𑀼𑀲𑁆𑀲𑁂 𑀧𑀻𑀴𑁂𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀁 𑀩𑀮𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀥𑀦𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀩𑀮𑀺𑀧𑀻𑀴𑀺𑀢𑀸 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑀸𑀫𑀦𑀺𑀕𑀫𑀸𑀤𑀬𑁄 𑀙𑀟𑁆𑀟𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀺, 𑀫𑀚𑁆𑀛𑀺𑀫𑀚𑀦𑀧𑀤𑁄 𑀲𑀼𑀜𑁆𑀜𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑀦𑁆𑀢𑁄 𑀖𑀦𑀯𑀸𑀲𑁄 𑀲𑁂𑀬𑁆𑀬𑀣𑀸𑀧𑀺 𑀧𑁄𑀓𑁆𑀔𑀭𑀡𑀺𑀬𑀸 𑀫𑀚𑁆𑀛𑁂 𑀉𑀤𑀓𑀁 𑀆𑀯𑀺𑀮𑀁 𑀧𑀭𑀺𑀬𑀦𑁆𑀢𑁂 𑀯𑀺𑀧𑁆𑀧𑀲𑀦𑁆𑀦𑀁. 𑀅𑀬𑀁 𑀦𑀯𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁦. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀭𑀸𑀚𑀬𑀼𑀢𑁆𑀢𑀸𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀦𑁂𑀕𑀫𑀚𑀸𑀦𑀧𑀤𑀸𑀧𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸𑀢𑀺 𑀏𑀯𑀁 𑀤𑁂𑀯𑀢𑀸𑀧𑀺 𑀅𑀥𑀫𑁆𑀫𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀸𑀢𑀸 𑀯𑀺𑀲𑀫𑀸 𑀔𑀭𑀸 𑀯𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀓𑀫𑁆𑀧𑁂𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀓𑀫𑁆𑀧𑀺𑀢𑁂𑀲𑀼 𑀤𑁂𑀯𑀢𑀸 𑀓𑀼𑀧𑀺𑀢𑀸 𑀤𑁂𑀯𑀁 𑀯𑀲𑁆𑀲𑀺𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺, 𑀯𑀲𑁆𑀲𑀫𑀸𑀦𑁄𑀧𑀺 𑀲𑀓𑀮𑀭𑀝𑁆𑀞𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀯𑀲𑁆𑀲𑀫𑀸𑀦𑁄𑀧𑀺 𑀲𑀩𑁆𑀩𑀢𑁆𑀣 𑀓𑀲𑀺𑀓𑀫𑁆𑀫𑀲𑁆𑀲 𑀯𑀸 𑀯𑀧𑁆𑀧𑀓𑀫𑁆𑀫𑀲𑁆𑀲 𑀯𑀸 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸 𑀦 𑀯𑀲𑁆𑀲𑀺𑀲𑁆𑀲𑀢𑀺. 𑀬𑀣𑀸 ¶ 𑀘 𑀭𑀝𑁆𑀞𑁂, 𑀏𑀯𑀁 𑀚𑀦𑀧𑀤𑁂𑀧𑀺 𑀕𑀸𑀫𑁂𑀧𑀺 𑀏𑀓𑀢𑀴𑀸𑀓𑀲𑁆𑀲𑀭𑁂𑀧𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀢𑀴𑀸𑀓𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀲𑁆𑀲𑀦𑁆𑀢𑁄 𑀳𑁂𑀝𑁆𑀞𑀸𑀪𑀸𑀕𑁂 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀳𑁂𑀝𑁆𑀞𑀸 𑀯𑀲𑁆𑀲𑀦𑁆𑀢𑁄 𑀉𑀧𑀭𑀺 𑀦 𑀯𑀲𑁆𑀲𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀪𑀸𑀕𑁂 𑀲𑀲𑁆𑀲𑀁 𑀅𑀢𑀺𑀯𑀲𑁆𑀲𑁂𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀅𑀯𑀲𑁆𑀲𑀦𑁆𑀢𑁄 𑀫𑀺𑀮𑀸𑀬𑀺𑀲𑁆𑀲𑀢𑀺, 𑀏𑀓𑀲𑁆𑀫𑀺𑀁 𑀲𑀫𑁆𑀫𑀸 𑀯𑀲𑁆𑀲𑀫𑀸𑀦𑁄 𑀲𑀫𑁆𑀧𑀸𑀤𑁂𑀲𑁆𑀲𑀢𑀺, 𑀏𑀯𑀁 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁂 𑀯𑀼𑀢𑁆𑀢𑀸 ¶ 𑀲𑀲𑁆𑀲𑀸 𑀢𑀺𑀧𑁆𑀧𑀓𑀸𑀭𑀸 𑀪𑀯𑀺𑀲𑁆𑀲𑀦𑁆𑀢𑀺 𑀏𑀓𑀓𑀼𑀫𑁆𑀪𑀺𑀬𑀸 𑀑𑀤𑀦𑁄 𑀯𑀺𑀬. 𑀅𑀬𑀁 𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁧. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀸𑀲𑀦𑁂 𑀧𑀭𑀺𑀳𑀸𑀬𑀦𑁆𑀢𑁂 𑀧𑀘𑁆𑀘𑀬𑀮𑁄𑀮𑀸 𑀅𑀮𑀚𑁆𑀚𑀺𑀓𑀸 𑀩𑀳𑀽 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀪𑀕𑀯𑀢𑀸 𑀧𑀘𑁆𑀘𑀬𑀮𑁄𑀮𑀼𑀧𑁆𑀧𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑀤𑁂𑀲𑀦𑀁 𑀘𑀻𑀯𑀭𑀸𑀤𑀺𑀘𑀢𑀼𑀧𑀘𑁆𑀘𑀬𑀳𑁂𑀢𑀼 𑀧𑀭𑁂𑀲𑀁 𑀤𑁂𑀲𑁂𑀲𑁆𑀲𑀦𑁆𑀢𑀺, 𑀧𑀘𑁆𑀘𑀬𑁂𑀳𑀺 𑀫𑀼𑀘𑁆𑀙𑀺𑀢𑁆𑀯𑀸 𑀦𑀺𑀭𑀢𑁆𑀣𑀓𑀧𑀓𑁆𑀔𑁂 𑀞𑀺𑀢𑀸 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀓𑁂𑀯𑀮𑀁 ‘‘𑀧𑀤𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀫𑀥𑀼𑀭𑀲𑀤𑁆𑀤𑀜𑁆𑀘 𑀲𑀼𑀢𑁆𑀯𑀸 𑀫𑀳𑀕𑁆𑀖𑀸𑀦𑀺 𑀘𑀻𑀯𑀭𑀸𑀦𑀺 𑀤𑀲𑁆𑀲𑀦𑁆𑀢𑀺’’𑀇𑀘𑁆𑀘𑁂𑀯𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀅𑀧𑀭𑁂 𑀅𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀭𑀸𑀚𑀤𑁆𑀯𑀸𑀭𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀓𑀳𑀸𑀧𑀡𑀅𑀟𑁆𑀠𑀓𑀳𑀸𑀧𑀡𑀧𑀸𑀤𑀫𑀸𑀲𑀓𑀭𑀽𑀧𑀸𑀤𑀻𑀦𑀺𑀧𑀺 𑀦𑀺𑀲𑁆𑀲𑀸𑀬 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀇𑀢𑀺 𑀪𑀕𑀯𑀢𑀸 𑀦𑀺𑀩𑁆𑀩𑀸𑀦𑀕𑁆𑀖𑀦𑀓𑀁 𑀓𑀢𑁆𑀯𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀘𑁂𑀯 𑀓𑀳𑀸𑀧𑀡𑀅𑀟𑁆𑀠𑀓𑀳𑀸𑀧𑀡𑀸𑀤𑀺𑀅𑀢𑁆𑀣𑀸𑀬 𑀘 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀤𑁂𑀲𑁂𑀦𑁆𑀢𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀘𑀦𑁆𑀤𑀦𑀲𑀸𑀭𑀁 𑀧𑀽𑀢𑀺𑀢𑀓𑁆𑀓𑁂𑀦 𑀯𑀺𑀓𑁆𑀓𑀺𑀡𑀦𑁆𑀢𑀸 𑀯𑀺𑀬 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀏𑀓𑀸𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁨. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂 𑀮𑁄𑀓𑁂 𑀯𑀺𑀧𑀭𑀺𑀯𑀢𑁆𑀢𑀦𑁆𑀢𑁂𑀬𑁂𑀯 𑀭𑀸𑀚𑀸𑀦𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀬𑀲𑀁 𑀦 𑀤𑀲𑁆𑀲𑀦𑁆𑀢𑀺, 𑀅𑀓𑀼𑀮𑀻𑀦𑀸𑀦𑀜𑁆𑀜𑁂𑀯 𑀤𑀲𑁆𑀲𑀦𑁆𑀢𑀺, 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑀭𑁂 𑀤𑀮𑀺𑀤𑁆𑀤𑀸. 𑀭𑀸𑀚𑀲𑀫𑁆𑀫𑀼𑀔𑁂𑀧𑀺 𑀭𑀸𑀚𑀤𑁆𑀯𑀸𑀭𑁂𑀧𑀺 𑀅𑀫𑀘𑁆𑀘𑀲𑀫𑁆𑀫𑀼𑀔𑁂𑀧𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀧𑀺 𑀢𑀼𑀘𑁆𑀙𑀮𑀸𑀩𑀼𑀲𑀤𑀺𑀲𑀸𑀦𑀁 𑀅𑀓𑀼𑀮𑀻𑀦𑀸𑀦𑀁𑀬𑁂𑀯 𑀓𑀣𑀸 𑀑𑀲𑀻𑀤𑀺𑀢𑁆𑀯𑀸 𑀞𑀺𑀢𑀸 𑀯𑀺𑀬 𑀦𑀺𑀘𑁆𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂𑀧𑀺 𑀲𑀗𑁆𑀖𑀓𑀫𑁆𑀫𑀕𑀡𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀘𑁂𑀯 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀲𑀼 𑀘 𑀤𑀼𑀲𑁆𑀲𑀻𑀮𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀓𑀣𑀸 𑀦𑀺𑀬𑁆𑀬𑀸𑀦𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀦 𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀢𑀼𑀘𑁆𑀙𑀮𑀸𑀩𑀽𑀦𑀁 𑀲𑀻𑀤𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀤𑁆𑀯𑀸𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁩. 𑀢𑀸𑀤𑀺𑀲𑁂𑀬𑁂𑀯 𑀓𑀸𑀮𑁂 𑀅𑀥𑀫𑁆𑀫𑀺𑀓𑀭𑀸𑀚𑀸𑀦𑁄 𑀅𑀓𑀼𑀮𑀻𑀦𑀸𑀦𑀁 𑀬𑀲𑀁 𑀤𑀲𑁆𑀲𑀦𑁆𑀢𑀺, 𑀢𑁂 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀤𑀼𑀕𑁆𑀕𑀢𑀸. 𑀢𑁂𑀲𑀼 𑀦 𑀓𑁂𑀘𑀺 𑀕𑀸𑀭𑀯𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀇𑀢𑀭𑁂𑀲𑀼𑀬𑁂𑀯 𑀓𑀭𑀺𑀲𑁆𑀲𑀦𑁆𑀢𑀺, 𑀭𑀸𑀚𑀲𑀫𑁆𑀫𑀼𑀔𑁂 𑀯𑀸 𑀅𑀫𑀘𑁆𑀘𑀲𑀫𑁆𑀫𑀼𑀔𑁂 𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀯𑀸 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸𑀦𑀁 𑀖𑀦𑀲𑀺𑀮𑀸𑀲𑀤𑀺𑀲𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀓𑀣𑀸 𑀦 𑀑𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀢𑁂𑀲𑀼 𑀓𑀣𑁂𑀦𑁆𑀢𑁂𑀲𑀼 ‘‘𑀓𑀺𑀁 𑀇𑀫𑁂 𑀓𑀣𑁂𑀦𑁆𑀢𑀻’’𑀢𑀺 𑀇𑀢𑀭𑁂 𑀧𑀭𑀺𑀳𑀸𑀲𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁂𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀞𑀸𑀦𑁂𑀲𑀼 𑀦𑁂𑀯 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀕𑀭𑀼𑀓𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀦𑀸𑀧𑀺 𑀦𑁂𑀲𑀁 ¶ ¶ 𑀓𑀣𑀸 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀲𑀺𑀮𑀸𑀦𑀁 𑀧𑁆𑀮𑀯𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀢𑁂𑀭𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁪. 𑀮𑁄𑀓𑁂 𑀧𑀭𑀺𑀳𑀸𑀬𑀦𑁆𑀢𑁂𑀬𑁂𑀯 𑀫𑀦𑀼𑀲𑁆𑀲𑀸 𑀢𑀺𑀩𑁆𑀩𑀭𑀸𑀕𑀸𑀤𑀺𑀚𑀸𑀢𑀺𑀓𑀸 𑀓𑀺𑀮𑁂𑀲𑀸𑀦𑀼𑀯𑀢𑁆𑀢𑀓𑀸 𑀳𑀼𑀢𑁆𑀯𑀸 𑀢𑀭𑀼𑀡𑀢𑀭𑀼𑀡𑀸𑀦𑀁 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀯𑀲𑁂 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀕𑁂𑀳𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄𑀧𑀺 𑀕𑁄𑀫𑀳𑀺𑀁𑀲𑀸𑀤𑀬𑁄𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁆𑀧𑀺 𑀲𑀩𑁆𑀩𑀁 𑀢𑀸𑀲𑀁𑀬𑁂𑀯 𑀆𑀬𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, ‘‘𑀅𑀲𑀼𑀓𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑀸𑀤𑀺𑀚𑀸𑀢𑀁 𑀯𑀸 𑀓𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀳𑁄𑀢𑀼, 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦, 𑀢𑁆𑀯𑀁 𑀫𑀬𑁆𑀳𑀁 𑀖𑀭𑁂 𑀲𑀦𑁆𑀢𑀁 𑀯𑀸 𑀅𑀲𑀦𑁆𑀢𑀁 𑀯𑀸 𑀚𑀸𑀦𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀼𑀔𑀲𑀢𑁆𑀢𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀤𑀸𑀲𑀘𑁂𑀝𑀓𑀁 𑀯𑀺𑀬 𑀯𑀲𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀲𑁆𑀲𑀦𑁆𑀢𑀺, 𑀏𑀯𑀁 𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀫𑀡𑁆𑀟𑀽𑀓𑀧𑁄𑀢𑀺𑀓𑀸𑀦𑀁 𑀆𑀲𑀻𑀯𑀺𑀲𑁂 𑀓𑀡𑁆𑀳𑀲𑀧𑁆𑀧𑁂 𑀕𑀺𑀮𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀘𑀼𑀤𑁆𑀤𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁫. 𑀤𑀼𑀩𑁆𑀩𑀮𑀭𑀸𑀚𑀓𑀸𑀮𑁂 𑀭𑀸𑀚𑀸𑀦𑁄 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀅𑀓𑀼𑀲𑀮𑀸 𑀬𑀼𑀤𑁆𑀥𑁂𑀲𑀼 𑀅𑀯𑀺𑀲𑀸𑀭𑀤𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀭𑀸𑀚𑀸𑀥𑀺𑀧𑀘𑁆𑀘𑀁 𑀆𑀲𑀗𑁆𑀓𑀫𑀸𑀦𑀸 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀫𑀽𑀮𑀺𑀓𑀦𑁆𑀳𑀸𑀧𑀓𑀓𑀧𑁆𑀧𑀓𑀸𑀤𑀻𑀦𑀁 𑀤𑀲𑁆𑀲𑀦𑁆𑀢𑀺, 𑀚𑀸𑀢𑀺𑀕𑁄𑀢𑁆𑀢𑀲𑀫𑁆𑀧𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸 𑀭𑀸𑀚𑀓𑀼𑀮𑁂 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀼𑀁 𑀅𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑁂 𑀚𑀸𑀢𑀺𑀕𑁄𑀢𑁆𑀢𑀳𑀻𑀦𑁂 𑀅𑀓𑀼𑀮𑀻𑀦𑁂 𑀉𑀧𑀝𑁆𑀞𑀳𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀲𑀼𑀯𑀡𑁆𑀡𑀭𑀸𑀚𑀳𑀁𑀲𑁂𑀳𑀺 𑀓𑀸𑀓𑀲𑁆𑀲 𑀧𑀭𑀺𑀯𑀸𑀭𑀺𑀢𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁆𑀦𑀭𑀲𑀫𑀲𑁆𑀲 𑀯𑀺𑀧𑀸𑀓𑁄.

𑁧𑁬. 𑀅𑀥𑀫𑁆𑀫𑀺𑀓𑀭𑀸𑀚𑀓𑀸𑀮𑁂𑀬𑁂𑀯 𑀘 𑀅𑀓𑀼𑀮𑀻𑀦𑀸𑀯 𑀭𑀸𑀚𑀯𑀮𑁆𑀮𑀪𑀸 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀮𑀻𑀦𑀸 𑀅𑀧𑁆𑀧𑀜𑁆𑀜𑀸𑀢𑀸 𑀤𑀼𑀕𑁆𑀕𑀢𑀸. 𑀢𑁂 𑀭𑀸𑀚𑀯𑀮𑁆𑀮𑀪𑀸 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀓𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀩𑀮𑀯𑀦𑁆𑀢𑁄 𑀳𑀼𑀢𑁆𑀯𑀸 𑀤𑀼𑀩𑁆𑀩𑀮𑀸𑀦𑀁 𑀧𑀯𑁂𑀡𑀺𑀆𑀕𑀢𑀸𑀦𑀺 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀻𑀦𑀺 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀸𑀦𑀺 𑀏𑀢𑀸𑀦𑀻’’𑀢𑀺 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀢𑁂 ‘‘𑀦 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓’’𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀯𑀤𑀦𑁆𑀢𑁂 𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀧𑀳𑀸𑀭𑀸𑀧𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀧𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀣, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀺𑀯𑀤𑀣, 𑀇𑀤𑀸𑀦𑀺 𑀯𑁄 𑀭𑀜𑁆𑀜𑁄 𑀓𑀣𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀻𑀦𑀺 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀲𑁆𑀲𑀦𑁆𑀢𑀺, 𑀢𑁂 𑀢𑁂𑀲𑀁 𑀪𑀬𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀺 𑀔𑁂𑀢𑁆𑀢𑀯𑀢𑁆𑀣𑀽𑀦𑀺 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 ¶ 𑀢𑀸𑀦𑀺, 𑀕𑀡𑁆𑀳𑀣𑀸’’𑀢𑀺 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀸𑀦𑀺 𑀧𑀯𑀺𑀲𑀺𑀢𑁆𑀯𑀸 𑀪𑀻𑀢𑀸 𑀦𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀧𑀸𑀧𑀪𑀺𑀓𑁆𑀔𑀽𑀧𑀺 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀬𑀣𑀸𑀭𑀼𑀘𑀺 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺, 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀝𑀺𑀲𑀭𑀡𑀁 𑀅𑀮𑀪𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂𑀲𑀼 𑀦𑀺𑀮𑀻𑀬𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀳𑀻𑀦𑀚𑀘𑁆𑀘𑁂𑀳𑀺 𑀘𑁂𑀯 𑀧𑀸𑀧𑀪𑀺𑀓𑁆𑀔𑀽𑀳𑀺 𑀘 𑀉𑀧𑀤𑁆𑀤𑀼𑀢𑀸𑀦𑀁 𑀚𑀸𑀢𑀺𑀫𑀦𑁆𑀢𑀓𑀼𑀮𑀧𑀼𑀢𑁆𑀢𑀸𑀦𑀜𑁆𑀘𑁂𑀯 𑀧𑁂𑀲𑀮𑀪𑀺𑀓𑁆𑀔𑀽𑀦𑀜𑁆𑀘 𑀏𑀴𑀓𑀸𑀦𑀁 𑀪𑀬𑁂𑀦 𑀢𑀲𑀯𑀓𑀸𑀦𑀁 𑀧𑀮𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺 ¶ . 𑀅𑀬𑀁 𑀲𑁄𑀴𑀲𑀫𑀲𑁆𑀲 𑀯𑀺𑀧𑀸𑀓𑁄. 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑁂 𑀲𑁄𑀴𑀲 𑀲𑀼𑀧𑀺𑀦𑁂 𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑁄𑀲𑀮𑀭𑀸𑀚𑀸 𑀯𑀺𑀬 𑀲𑁄𑀴𑀲 𑀲𑀼𑀧𑀺𑀦𑁂’’𑀢𑀺. 𑀏𑀢𑁆𑀣 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀦𑀢𑁆𑀣𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀲𑁆𑀲𑀢𑀺, 𑀓𑁄𑀲𑀮𑀭𑀸𑀚𑀸 𑀯𑀺𑀬 𑀮𑁄𑀓𑀲𑁆𑀲 𑀅𑀢𑁆𑀣𑀸𑀦𑀢𑁆𑀣𑀦𑀺𑀫𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄 𑀧𑀦 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀼𑀤𑁆𑀥𑀸 𑀳𑀺 𑀤𑁂𑀯𑀢𑀸𑀢𑀺 𑀦𑀸𑀕𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀤𑁂𑀯𑀢𑀸 𑀯𑀺𑀬. 𑀭𑁄𑀳𑀡𑁂 𑀓𑀺𑀭 𑀦𑀸𑀕𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸𑀯 𑀏𑀓𑀁 𑀦𑀸𑀕𑀭𑀼𑀓𑁆𑀔𑀁 𑀙𑀺𑀦𑁆𑀤𑀸𑀧𑁂𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀓𑀼𑀤𑁆𑀥𑀸 𑀧𑀞𑀫𑀫𑁂𑀯 𑀦𑀁 𑀲𑀘𑁆𑀘𑀲𑀼𑀧𑀺𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀇𑀢𑁄 𑀢𑁂 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀉𑀧𑀝𑁆𑀞𑀸𑀓𑁄 𑀭𑀸𑀚𑀸 𑀫𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀧𑀺𑀦𑁂 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀢𑀁 𑀓𑀣𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑁄𑀭𑁄𑀥𑀸𑀦𑀁 𑀆𑀘𑀺𑀓𑁆𑀔𑀺. 𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 ‘𑀏𑀯𑀁 𑀣𑁂𑀭𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀤𑀺𑀯𑀲𑁂 𑀕𑀡𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀣𑁂𑀭𑀲𑁆𑀲 𑀳𑀢𑁆𑀣𑀧𑀸𑀤𑁂 𑀙𑀺𑀦𑁆𑀤𑀸𑀧𑁂𑀲𑀺. 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀻𑀢𑀺 𑀨𑀮𑀲𑁆𑀲 𑀲𑀘𑁆𑀘𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀤𑀲𑁆𑀲𑀦𑀁 𑀧𑀦 𑀯𑀺𑀧𑀮𑁆𑀮𑀢𑁆𑀣𑀫𑁂𑀯. 𑀢𑁂𑀦𑁂𑀯 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀫𑁆𑀧𑀺 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀦𑁆𑀢𑀺, 𑀤𑁆𑀯𑀻𑀳𑀺 𑀢𑀻𑀳𑀺 𑀯𑀸 𑀓𑀸𑀭𑀡𑁂𑀳𑀺 𑀓𑀤𑀸𑀘𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀲𑀁𑀲𑀕𑁆𑀕𑀪𑁂𑀤𑀢𑁄’’𑀢𑀺. ‘‘𑀅𑀲𑁂𑀓𑁆𑀔𑀸 𑀦 𑀧𑀲𑁆𑀲𑀦𑁆𑀢𑀺 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸’’𑀢𑀺 𑀯𑀘𑀦𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀓𑀸𑀭𑀡𑀸𑀦𑀁 𑀯𑀺𑀧𑀮𑁆𑀮𑀸𑀲𑁄 𑀏𑀯 𑀫𑀽𑀮𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀦𑁆𑀢𑀺 𑀲𑀼𑀧𑀺𑀦𑀓𑀸𑀮𑁂 𑀧𑀯𑀢𑁆𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀦𑁆𑀢𑀺 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀈𑀤𑀺𑀲𑀸𑀦𑀻𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀘𑁂𑀯 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦𑀸𑀢𑀺 𑀧𑀓𑀢𑀺𑀘𑀺𑀢𑁆𑀢𑁂𑀦. 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄𑀢𑀺 ¶ 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑁄. 𑀆𑀯𑀚𑁆𑀚𑀦𑀢𑀤𑀸𑀭𑀫𑁆𑀫𑀡𑀓𑁆𑀔𑀡𑁂𑀢𑀺 𑀇𑀤𑀁 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀘𑀺𑀢𑁆𑀢𑀯𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀼𑀧𑀺𑀦𑁂𑀦𑁂𑀯 𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂𑀢𑀺 𑀓𑀣𑀦𑀓𑀸𑀮𑁂 𑀧𑀦 𑀅𑀩𑁆𑀬𑀸𑀓𑀢𑁄𑀬𑁂𑀯 𑀆𑀯𑀚𑁆𑀚𑀦𑀫𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀤𑀼𑀢𑀺𑀬𑀫𑁄𑀖𑀯𑀸𑀭𑁂 𑀯𑀺𑀬 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀯𑀚𑁆𑀚𑀦𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 ‘‘𑀤𑀺𑀝𑁆𑀞𑀁 𑀯𑀺𑀬 𑀫𑁂, 𑀲𑀼𑀢𑀁 𑀯𑀺𑀬 𑀫𑁂’’𑀢𑀺 𑀓𑀧𑁆𑀧𑀦𑀸𑀬 𑀅𑀲𑀫𑁆𑀪𑀯𑀢𑁄.

𑀏𑀢𑁆𑀣 𑀘 ‘‘𑀲𑀼𑀧𑀺𑀦𑀦𑁆𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀯𑀘𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸 𑀅𑀢𑀻𑀢𑀯𑀲𑁂𑀦 𑀯𑀸 𑀲𑀪𑀸𑀯𑀥𑀫𑁆𑀫𑀸𑀧𑀺 𑀲𑀼𑀧𑀺𑀦𑀦𑁆𑀢𑁂 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀬𑀤𑀺𑀧𑀺 𑀲𑀼𑀧𑀺𑀦𑀦𑁆𑀢𑁂 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀺𑀢𑁂 ¶ 𑀭𑀽𑀧𑀸𑀤𑀺𑀯𑀢𑁆𑀣𑀼𑀫𑁆𑀳𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀲𑀼𑀧𑀺𑀦𑀦𑁆𑀢𑁂 𑀉𑀧𑀝𑁆𑀞𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀧𑀭𑀺𑀓𑀧𑁆𑀧𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑀢𑁄 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀓𑀭𑀚𑀓𑀸𑀬𑀲𑁆𑀲 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀁 𑀳𑀤𑀬𑀯𑀢𑁆𑀣𑀼 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦 𑀲𑀼𑀧𑁆𑀧𑀲𑀦𑁆𑀦𑀸 𑀅𑀲𑀼𑀧𑁆𑀧𑀲𑀦𑁆𑀦𑀯𑀝𑁆𑀝𑀺𑀦𑀺𑀲𑁆𑀲𑀺𑀢𑀤𑀻𑀧𑀧𑁆𑀧𑀪𑀸 𑀯𑀺𑀬, 𑀢𑀲𑁆𑀫𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀏𑀢𑁆𑀣 𑀤𑀼𑀩𑁆𑀩𑀮𑀳𑀤𑀬𑀯𑀢𑁆𑀣𑀼𑀓𑀢𑁆𑀢𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀼𑀧𑀺𑀦𑀦𑁆𑀢𑁂 𑀘𑁂𑀢𑀦𑀸. 𑀲𑀼𑀧𑀺𑀦𑀜𑁆𑀳𑀺 𑀧𑀲𑁆𑀲𑀦𑁆𑀢𑁄 𑀫𑀦𑁄𑀤𑁆𑀯𑀸𑀭𑀺𑀓𑁂𑀦𑁂𑀯 𑀚𑀯𑀦𑁂𑀦 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀧𑀝𑀺𑀩𑀼𑀚𑁆𑀛𑀦𑁆𑀢𑁄 𑀘 𑀫𑀦𑁄𑀤𑁆𑀯𑀸𑀭𑀺𑀓𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀳𑀺 𑀫𑀳𑀸𑀯𑀝𑁆𑀝𑀺𑀁 𑀚𑀸𑀮𑁂𑀢𑁆𑀯𑀸 𑀤𑀻𑀧𑁂 𑀘𑀓𑁆𑀔𑀼𑀲𑀫𑀻𑀧𑀁 𑀉𑀧𑀦𑀻𑀢𑁂 𑀧𑀞𑀫𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀁 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺, 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀁 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺, 𑀢𑁂𑀦 𑀘𑀺𑀢𑁆𑀢𑁂𑀦 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀮𑁄𑀓𑁄’’𑀢𑀺 𑀚𑀸𑀦𑀸𑀢𑀺. 𑀢𑀣𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀓𑀡𑁆𑀡𑀲𑀫𑀻𑀧𑁂 𑀢𑀽𑀭𑀺𑀬𑁂𑀲𑀼 𑀧𑀕𑁆𑀕𑀳𑀺𑀢𑁂𑀲𑀼 𑀖𑀸𑀦𑀲𑀫𑀻𑀧𑁂 𑀲𑀼𑀕𑀦𑁆𑀥𑁂𑀲𑀼 𑀯𑀸 𑀤𑀼𑀕𑁆𑀕𑀦𑁆𑀥𑁂𑀲𑀼 𑀯𑀸 𑀧𑀼𑀧𑁆𑀨𑁂𑀲𑀼 𑀉𑀧𑀦𑀻𑀢𑁂𑀲𑀼 𑀫𑀼𑀔𑁂 𑀲𑀧𑁆𑀧𑀺𑀫𑁆𑀳𑀺 𑀯𑀸 𑀨𑀸𑀡𑀺𑀢𑁂 𑀯𑀸 𑀧𑀓𑁆𑀔𑀺𑀢𑁆𑀢𑁂 𑀧𑀺𑀝𑁆𑀞𑀺𑀬𑀁 𑀧𑀸𑀡𑀺𑀦𑀸 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀞𑀫𑀁 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀦 𑀆𑀯𑀝𑁆𑀝𑁂𑀦𑁆𑀢𑀺 ¶ , 𑀫𑀦𑁄𑀤𑁆𑀯𑀸𑀭𑀺𑀓𑀫𑁂𑀯 𑀆𑀯𑀝𑁆𑀝𑁂𑀢𑀺, 𑀅𑀣 𑀚𑀯𑀦𑀁 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀤𑀼𑀢𑀺𑀬𑀯𑀸𑀭𑁂 𑀲𑁄𑀢𑀤𑁆𑀯𑀸𑀭𑀺𑀓𑀸𑀤𑀻𑀦𑀺 𑀆𑀯𑀚𑁆𑀚𑀦𑀸𑀦𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀦𑁆𑀢𑀺, 𑀢𑀢𑁄 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀁 𑀧𑀯𑀢𑁆𑀢𑀢𑀺. 𑀢𑀢𑀺𑀬𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑀺𑀓𑀆𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂 𑀆𑀯𑀝𑁆𑀝𑀺𑀢𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀚𑀯𑀢𑀺, 𑀢𑁂𑀦 𑀘𑀺𑀢𑁆𑀢𑁂𑀦 𑀜𑀢𑁆𑀯𑀸 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀤𑁆𑀤𑁄, 𑀲𑀗𑁆𑀔𑀲𑀤𑁆𑀤𑁄 𑀪𑁂𑀭𑀺𑀲𑀤𑁆𑀤𑁄’’𑀢𑀺 𑀯𑀸 ‘‘𑀓𑀺𑀁 𑀅𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀕𑀦𑁆𑀥𑁄, 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄’’𑀢𑀺 𑀯𑀸 ‘‘𑀓𑀺𑀁 𑀇𑀤𑀁 𑀫𑀬𑁆𑀳𑀁 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀁, 𑀲𑀧𑁆𑀧𑀺 𑀨𑀸𑀡𑀺𑀢’’𑀦𑁆𑀢𑀺 𑀯𑀸 ‘‘𑀓𑁂𑀦𑀫𑁆𑀳𑀺 𑀧𑀺𑀝𑁆𑀞𑀺𑀬𑀁 𑀧𑀳𑀝𑁄, 𑀅𑀢𑀺𑀣𑀤𑁆𑀥𑁄 𑀫𑁂 𑀧𑀳𑀸𑀭𑁄’’𑀢𑀺 𑀯𑀸 𑀯𑀢𑁆𑀢𑀸 𑀳𑁄𑀢𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦𑁂𑀯 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦. 𑀲𑀼𑀧𑀺𑀦𑀫𑁆𑀧𑀺 𑀢𑁂𑀦𑁂𑀯 𑀧𑀲𑁆𑀲𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁂𑀦.

𑀅𑀲𑁆𑀲𑀸𑀢𑀺 𑀅𑀲𑁆𑀲 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲. 𑀦𑀦𑀼 𑀘 𑀅𑀬𑀼𑀢𑁆𑀢𑁄𑀬𑀁 𑀦𑀺𑀤𑁆𑀤𑁂𑀲𑁄 ‘‘𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸’’𑀢𑀺. 𑀦 𑀳𑀺 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀲𑀗𑁆𑀖𑁄 𑀇𑀘𑁆𑀙𑀺𑀢𑁄, 𑀓𑀺𑀜𑁆𑀘𑀭𑀳𑀺 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀇𑀫𑀁 𑀘𑁄𑀤𑀦𑀁 𑀫𑀦𑀲𑀺 𑀲𑀦𑁆𑀦𑀺𑀥𑀸𑀬 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 ¶ 𑀘 𑀇𑀘𑁆𑀙𑀺𑀢𑁄 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸𑀯 𑀇𑀘𑁆𑀙𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁, 𑀅𑀦𑀸𑀧𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀘𑀦𑀓𑀸𑀭𑀡𑀦𑁆𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀏𑀯𑀁 𑀯𑀘𑀦𑁂 𑀓𑀸𑀭𑀡𑀁. 𑀲𑀫𑀼𑀤𑀸𑀬𑁂 𑀦𑀺𑀭𑀼𑀴𑁆𑀳𑁄 𑀦𑀺𑀓𑀸𑀬-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 𑀢𑀸𑀬 𑀏𑀯 𑀭𑀼𑀴𑁆𑀳𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 𑀭𑀼𑀴𑀻𑀲𑀤𑁆𑀤𑁂𑀦𑀸𑀢𑀺. 𑀅𑀣 𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀢𑀁𑀦𑀺𑀫𑀺𑀢𑁆𑀢𑀬𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀺𑀲𑀬𑁂 𑀲𑀫𑁆𑀫𑀼𑀢𑀺𑀬𑀸 𑀘𑀺𑀭𑀓𑀸𑀮𑀢𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀧𑀺 𑀧𑀯𑀢𑁆𑀢𑀦𑀺𑀭𑀼𑀴𑁆𑀳𑁄 𑀭𑀼𑀴𑁆𑀳𑀻 𑀦𑀸𑀫. 𑀬𑀣𑀸 𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄, 𑀕𑀘𑁆𑀙𑀢𑀻𑀢𑀺 𑀕𑁄𑀢𑀺, 𑀏𑀯𑀁 𑀦𑀺𑀓𑀸𑀬-𑀲𑀤𑁆𑀤𑀲𑁆𑀲𑀧𑀺 𑀭𑀼𑀴𑁆𑀳𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀲𑁆𑀫𑀺𑀫𑁆𑀧𑀺 𑀯𑀺𑀲𑀺𑀝𑁆𑀞𑁂 𑀲𑀢𑀺𑀧𑀺 𑀲𑀸𑀫𑀜𑁆𑀜𑀸 𑀯𑀺𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀯𑁄𑀳𑀸𑀭𑁄 𑀅𑀯𑀬𑀯𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀆𑀳 𑀅𑀯𑀬𑀯𑁂 𑀲𑀫𑀽𑀳𑀯𑁄𑀳𑀸𑀭𑁂𑀦 𑀯𑀸𑀢𑀺. 𑀦𑀯𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀯𑀻𑀫𑀁𑀲𑀸𑀥𑀺𑀧𑁆𑀧𑀸𑀬𑀲𑁆𑀲.

𑁨𑁩𑁮-𑁨𑁩𑁯. 𑀮𑁄𑀫𑀸 𑀏𑀢𑁂𑀲𑀁 𑀲𑀦𑁆𑀢𑀻𑀢𑀺 𑀮𑁄𑀫𑀲𑀸, 𑀩𑀳𑀼𑀮𑁄𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀭𑀸𑀕𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁄 𑀦𑀺𑀭𑁄𑀕𑁄 𑀪𑀯𑀺𑀲𑁆𑀲𑀸𑀫𑀺. 𑀫𑁄𑀘𑀦𑁂𑀦𑀸𑀢𑀺 𑀫𑁄𑀘𑀦𑀢𑁆𑀣𑀸𑀬 𑀉𑀧𑀓𑁆𑀓𑀫𑀓𑀭𑀡𑁂𑀦. 𑀉𑀧𑀓𑁆𑀓𑀫𑀓𑀭𑀡𑀜𑁆𑀳𑁂𑀢𑁆𑀣 𑀫𑁄𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀫𑁄𑀘𑁂𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀩𑀻𑀚𑀁 𑀪𑀯𑀺𑀲𑁆𑀲𑀢𑀻𑀢𑀺 𑀘𑁄𑀴𑀕𑁆𑀕𑀳𑀡𑀸𑀤𑀺𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁪𑁦. 𑀤𑁆𑀯𑁂 ¶ 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀔𑀡𑁆𑀟𑀘𑀓𑁆𑀓𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀘𑁆𑀙𑀦𑁆𑀢𑁂𑀦 𑀧𑀦 𑀔𑀡𑁆𑀟𑀘𑀓𑁆𑀓𑀸𑀤𑀺𑀪𑁂𑀤𑁂𑀦𑀧𑀺 𑀆𑀧𑀢𑁆𑀢𑀺𑀕𑀡𑀦𑀸 𑀓𑀸𑀢𑀩𑁆𑀩𑀸. 𑀫𑀺𑀲𑁆𑀲𑀓𑀘𑀓𑁆𑀓𑀦𑁆𑀢𑀺 𑀉𑀪𑀢𑁄𑀯𑀟𑁆𑀠𑀦𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀦𑀻𑀮𑀜𑁆𑀘 𑀧𑀻𑀢𑀓𑀜𑁆𑀘𑀸𑀢𑀺𑀆𑀤𑀺𑀦𑀸 𑀏𑀓𑀓𑁆𑀔𑀡𑁂 𑀅𑀦𑁂𑀓𑀯𑀡𑁆𑀡𑀸𑀦𑀁 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀯𑀘𑀦𑀁 𑀬𑀣𑀸𑀥𑀺𑀧𑁆𑀧𑀸𑀬𑁂𑀦 𑀫𑁄𑀘𑀦𑀁 𑀪𑀯𑀢𑀼 𑀯𑀸 𑀫𑀸 𑀯𑀸, 𑀇𑀫𑀺𑀦𑀸𑀧𑀺 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑁄𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀦𑀻𑀮𑀸𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀫𑀼𑀢𑁆𑀢𑀺 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀅𑀢𑁆𑀢𑀦𑁄 𑀤𑁄𑀲𑀁 𑀉𑀚𑀼𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀪𑀡𑀢𑀺.

𑀫𑁄𑀘𑀦𑀲𑁆𑀲𑀸𑀤𑁄𑀢𑀺 𑀫𑁄𑀘𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀅𑀲𑁆𑀲𑀸𑀤𑁄. 𑀢𑁂𑀦𑁂𑀯 ‘‘𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑀁. 𑀕𑁂𑀳𑀲𑁆𑀲𑀺𑀢𑀧𑁂𑀫𑀦𑁆𑀢𑀺 𑀏𑀢𑁆𑀣 𑀕𑁂𑀳-𑀲𑀤𑁆𑀤𑁂𑀦 𑀕𑁂𑀳𑁂 𑀞𑀺𑀢𑀸 𑀫𑀸𑀢𑀼𑀪𑀕𑀺𑀦𑀻𑀆𑀤𑀬𑁄 𑀅𑀚𑁆𑀛𑀢𑁆𑀢𑀺𑀓𑀜𑀸𑀢𑀓𑀸 𑀕𑀳𑀺𑀢𑀸. 𑀢𑁂𑀲𑀼 𑀫𑀸𑀢𑀼𑀧𑁂𑀫𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀲𑀺𑀦𑁂𑀳𑁄 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀅𑀜𑁆𑀜𑀢𑁆𑀣 𑀧𑀦 𑀕𑁂𑀳𑀲𑁆𑀲𑀺𑀢𑀧𑁂𑀫𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄 𑀯𑀼𑀘𑁆𑀘𑀢𑀺. 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦𑀸𑀢𑀺 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀲𑀼𑀔𑀯𑁂𑀤𑀦𑀸𑀫𑀼𑀔𑁂𑀦. 𑀏𑀓𑁂𑀦 𑀧𑀤𑁂𑀦𑀸𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫-𑀧𑀤𑁂𑀦.

𑀢𑀣𑁂𑀯𑀸𑀢𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀏𑀯. 𑀧𑀼𑀩𑁆𑀩𑀪𑀸𑀕𑁂 𑀫𑁄𑀘𑀦𑀲𑁆𑀲𑀸𑀤𑀯𑀲𑁂𑀦 𑀓𑀢𑀧𑁆𑀧𑀬𑁄𑀕𑀁 𑀅𑀯𑀺𑀚𑀳𑀺𑀢𑁆𑀯𑀸𑀯 𑀲𑀬𑀺𑀢𑀢𑁆𑀢𑀸 ‘‘𑀲𑀘𑁂 𑀧𑀦…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀲𑀼𑀤𑁆𑀥𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 ¶ 𑀧𑀬𑁄𑀕𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 ‘‘𑀲𑀼𑀤𑁆𑀥𑀘𑀺𑀢𑁆𑀢𑁄…𑀧𑁂… 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀕𑁆𑀕𑀦𑀢𑁆𑀣𑀸𑀬𑀸𑀢𑀺 𑀥𑁄𑀯𑀦𑀢𑁆𑀣𑀸𑀬. 𑀅𑀦𑁄𑀓𑀸𑀲𑀦𑁆𑀢𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁.

𑁨𑁬𑁩-𑁨𑁬𑁪. 𑀕𑁂𑀳𑀲𑁆𑀲𑀺𑀢𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀸𑀫𑀯𑀺𑀢𑀓𑁆𑀓𑀁. 𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸𑀢𑀺 𑀅𑀗𑁆𑀕𑀚𑀸𑀢𑀲𑁆𑀲 𑀅𑀕𑁆𑀕𑁂 𑀧𑀲𑁆𑀲𑀸𑀯𑀦𑀺𑀕𑁆𑀕𑀫𑀦𑀝𑁆𑀞𑀸𑀦𑁂 𑀘𑀫𑁆𑀫𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀸𑀪𑀸𑀯𑀢𑁄 ‘‘𑀫𑁄𑀘𑀦𑀲𑁆𑀲𑀸𑀤𑀸𑀥𑀺𑀧𑁆𑀧𑀸𑀬𑀲𑁆𑀲𑀧𑀺 𑀫𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁬𑁫. ‘‘𑀏𑀳𑀺 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀲𑀸𑀫𑀡𑁂𑀭𑀸𑀢𑀺 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑁂𑀦 𑀓𑀢𑁄𑀧𑀺 𑀧𑀬𑁄𑀕𑁄 𑀅𑀢𑁆𑀢𑀦𑀸𑀯 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀬𑀤𑀺 𑀧𑀦 𑀅𑀦𑀸𑀡𑀢𑁆𑀢𑁄 𑀲𑀬𑀫𑁂𑀯 𑀓𑀭𑁄𑀢𑀺, 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀼𑀢𑁆𑀢𑀲𑀸𑀫𑀡𑁂𑀭𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀘𑀺𑀫𑁆𑀳𑀺 𑀫𑀼𑀢𑁆𑀢𑁂𑀧𑀺 𑀅𑀗𑁆𑀕𑀚𑀸𑀢𑀲𑁆𑀲 𑀕𑀳𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦 𑀧𑀦 𑀫𑀼𑀢𑁆𑀢𑀧𑀘𑁆𑀘𑀬𑀸.

𑁨𑁬𑁬. 𑀓𑀸𑀬𑀢𑁆𑀣𑀫𑁆𑀪𑀦𑀯𑀢𑁆𑀣𑀼𑀲𑁆𑀫𑀺𑀁 ¶ 𑀘𑀮𑀦𑀯𑀲𑁂𑀦 𑀬𑀣𑀸 𑀅𑀗𑁆𑀕𑀚𑀸𑀢𑁂𑀧𑀺 𑀉𑀧𑀓𑁆𑀓𑀫𑁄 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀯𑀺𑀚𑀫𑁆𑀪𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀧𑀘𑁆𑀙𑀢𑁄 𑀯𑀸’’𑀢𑀺 𑀯𑀘𑀦𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀝𑀺𑀬𑀁 𑀊𑀭𑀼𑀧𑁆𑀧𑀤𑁂𑀲𑁄𑀧𑀺 𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 𑀉𑀪𑁄𑀲𑀼𑀧𑀺 𑀧𑀲𑁆𑀲𑁂𑀲𑀼 𑀞𑀢𑁆𑀯𑀸 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀯𑀘𑀦𑀢𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑁄𑀯 𑀯𑀼𑀢𑁆𑀢𑁄. 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀯𑀲𑁂𑀦 𑀧𑀦 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀧𑁆𑀧𑀬𑁄𑀕𑀯𑀲𑀏𑀦 𑀆𑀧𑀢𑁆𑀢𑀺𑀪𑁂𑀤𑁄 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀓𑁆𑀔𑀢𑁆𑀢𑀼𑀫𑁆𑀧𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑀺𑀫𑀻𑀮𑁂𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀏𑀓𑀫𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑁆𑀔𑀻𑀦𑀺 𑀅𑀯𑀺𑀧𑁆𑀨𑀦𑁆𑀤𑁂𑀢𑁆𑀯𑀸 𑀅𑀪𑀺𑀫𑀼𑀔𑀁 𑀲𑀫𑁆𑀧𑀢𑁆𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀦𑀺𑀫𑀺𑀢𑁆𑀢𑁄𑀮𑁄𑀓𑀦𑁂𑀧𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀤𑀸𑀭𑀼𑀥𑀻𑀢𑀮𑀺𑀓𑀮𑁂𑀧𑀘𑀺𑀢𑁆𑀢𑀸𑀦𑀁 𑀅𑀗𑁆𑀕𑀚𑀸𑀢𑀼𑀧𑀦𑀺𑀚𑁆𑀛𑀸𑀦𑁂𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺.

𑁨𑁬𑁭. 𑀧𑀼𑀧𑁆𑀨𑀸𑀯𑀮𑀻𑀢𑀺 𑀓𑀻𑀴𑀸𑀯𑀺𑀲𑁂𑀲𑀲𑁆𑀲𑀸𑀥𑀺𑀯𑀘𑀦𑀁. 𑀢𑀁 𑀓𑀻𑀴𑀦𑁆𑀢𑀸 𑀦𑀤𑀻𑀆𑀤𑀻𑀲𑀼 𑀙𑀺𑀦𑁆𑀦𑀢𑀝𑀁 𑀉𑀤𑀓𑁂𑀦 𑀘𑀺𑀓𑁆𑀔𑀮𑁆𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀪𑁄 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀧𑀧𑀢𑀦𑁆𑀢𑀺. ‘‘𑀧𑀼𑀧𑁆𑀨𑀸𑀯𑀮𑀺𑀬’’𑀦𑁆𑀢𑀺𑀧𑀺 𑀧𑀸𑀞𑁄. 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 𑀯𑀸𑀮𑀺𑀓𑀁 𑀅𑀗𑁆𑀕𑀚𑀸𑀢𑀦𑁆𑀢𑀺 𑀉𑀪𑀬𑀢𑁆𑀣𑀸𑀧𑀺 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀯𑀸𑀮𑀺𑀓𑀦𑁆𑀢𑀺 𑀯𑀸𑀮𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸, 𑀉𑀧𑀓𑁆𑀓𑀫𑁄, 𑀫𑀼𑀘𑁆𑀘𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁯. 𑀤𑀼𑀢𑀺𑀬𑁂 ¶ 𑀬𑁂𑀲𑀼 𑀯𑀺𑀯𑀝𑁂𑀲𑀼 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺, 𑀢𑀸𑀦𑀺 𑀯𑀺𑀯𑀭𑀦𑁆𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑁄 𑀏𑀯𑀫𑀓𑀸𑀲𑀺. 𑀢𑁂𑀦 𑀓𑀢𑀲𑁆𑀲𑀧𑀺 𑀯𑀺𑀧𑁆𑀧𑀓𑀸𑀭𑀲𑁆𑀲 𑀅𑀢𑁆𑀢𑀦𑀺 𑀓𑀢𑀢𑁆𑀢𑀸 ‘‘𑀅𑀢𑁆𑀢𑀦𑁄 𑀯𑀺𑀧𑁆𑀧𑀓𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀴𑀸𑀭𑀢𑁆𑀢𑀢𑀸𑀢𑀺 𑀉𑀴𑀸𑀭𑀘𑀺𑀢𑁆𑀢𑀢𑀸, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁭𑁦. 𑀑𑀢𑀺𑀡𑁆𑀡𑁄𑀢𑀺 𑀇𑀤𑀁 𑀓𑀫𑁆𑀫𑀲𑀸𑀥𑀦𑀁 𑀓𑀢𑁆𑀢𑀼𑀲𑀸𑀥𑀦𑀁 𑀯𑀸 𑀳𑁄𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀓𑁆𑀔𑀸𑀤𑀻𑀳𑀺 𑀯𑀺𑀬 𑀲𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑀫𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀬𑀣𑀸𑀲𑀪𑀸𑀯𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀬𑀣𑀸 𑀢𑁂 𑀭𑀢𑀺𑀚𑀦𑀓𑀸 𑀭𑀽𑀧𑀸𑀤𑀬𑁄 ¶ 𑀯𑀺𑀲𑀬𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀲𑀼𑀪𑀸𑀦𑀢𑁆𑀢𑀸𑀓𑀸𑀭𑁂𑀦 𑀅𑀯𑀢𑁆𑀣𑀺𑀢𑀸, 𑀢𑀣𑀸 𑀅𑀧𑀲𑁆𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁭𑁧. 𑀲𑀜𑁆𑀜𑀫𑀯𑁂𑀮𑀦𑁆𑀢𑀺 𑀲𑀻𑀮𑀫𑀭𑀺𑀬𑀸𑀤𑀁. 𑀆𑀘𑀸𑀭𑁄𑀢𑀺 𑀆𑀘𑀭𑀡𑀁 𑀳𑀢𑁆𑀣𑀕𑀳𑀡𑀸𑀤𑀺𑀓𑀺𑀭𑀺𑀬𑀸. 𑀅𑀲𑁆𑀲𑀸𑀢𑀺 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲.

𑁨𑁭𑁩. 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦𑀸𑀢𑀺 𑀆𑀫𑀲𑀦𑀸𑀤𑀺𑀧𑀤𑀸𑀦𑀁 𑀯𑀲𑁂𑀦. 𑀇𑀢𑁄 𑀘𑀺𑀢𑁄 𑀘…𑀧𑁂… 𑀲𑀜𑁆𑀘𑁄𑀧𑁂𑀢𑀻𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀯𑀸 𑀓𑀸𑀬𑀁 𑀯𑀸 𑀢𑀺𑀭𑀺𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀢𑀺. ‘‘𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸𑀯𑀸𑀢𑀺 𑀯𑀘𑀦𑀢𑁄 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀁 𑀑𑀢𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀦𑀺𑀯𑀢𑁆𑀣𑀲𑀸𑀝𑀓𑀽𑀧𑀭𑀺 𑀑𑀫𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀲𑀸𑀝𑀓𑀢𑁄 𑀑𑀢𑀸𑀭𑁂𑀢𑁆𑀯𑀸 𑀚𑀗𑁆𑀖𑀢𑁄 𑀧𑀝𑁆𑀞𑀸𑀬 𑀓𑀸𑀬𑀁 𑀑𑀫𑀲𑀦𑁆𑀢𑀲𑁆𑀲 𑀧𑀼𑀦 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀤𑀦𑁆𑀢𑀺.

𑀤𑁆𑀯𑀸𑀤𑀲𑀲𑀼𑀧𑀺 𑀆𑀫𑀲𑀦𑀸𑀤𑀺𑀧𑁆𑀧𑀬𑁄𑀕𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀬𑁄𑀕𑁂 𑀓𑀸𑀬𑀢𑁄 𑀅𑀫𑁄𑀘𑀺𑀢𑁂 𑀏𑀓𑁂𑀓𑀸𑀯 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀫𑀽𑀮𑀕𑁆𑀕𑀳𑀡𑀫𑁂𑀯 𑀧𑀫𑀸𑀡’’𑀦𑁆𑀢𑀺. 𑀇𑀤𑀜𑁆𑀘 𑀏𑀓𑁂𑀦 𑀳𑀢𑁆𑀣𑁂𑀦 𑀓𑀸𑀬𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀓𑀸𑀬𑀧𑀭𑀸𑀫𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑁂𑀦 𑀧𑀦 𑀳𑀢𑁆𑀣𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀢𑀢𑁆𑀣 𑀢𑀢𑁆𑀣 𑀓𑀸𑀬𑀁 𑀧𑀭𑀸𑀫𑀲𑀢𑁄 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺. 𑀅𑀬𑀁 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀓𑁂𑀯𑀮𑀁 𑀯𑀢𑁆𑀣𑀼𑀯𑀲𑁂𑀦𑁂𑀯, 𑀅𑀧𑀺𑀘 𑀲𑀜𑁆𑀜𑀸𑀯𑀲𑁂𑀦𑀧𑀻𑀢𑀺 𑀆𑀳 ‘‘𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀧𑀸𑀴𑀺𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑁄 𑀘 𑀳𑁄𑀢𑀻𑀢𑀺 𑀏𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀘 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀲𑀸𑀭𑀸𑀕𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀏𑀓𑀲𑀤𑀺𑀲𑀭𑀸𑀕𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀡𑁂 𑀯𑀼𑀢𑁆𑀢𑀦𑀬𑁂𑀦. 𑀧𑀼𑀦 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀲𑀫𑀲𑀸𑀭𑀸𑀕𑁄 𑀯𑀼𑀢𑁆𑀢𑁄. 𑀅𑀦𑀦𑁆𑀢𑀭𑀦𑀬𑁂𑀦𑁂𑀯𑀸𑀢𑀺 𑀓𑀸𑀬𑀧𑀝𑀺𑀩𑀤𑁆𑀥𑀆𑀫𑀲𑀦𑀦𑀬𑁂𑀦 ¶ . 𑀯𑁂𑀡𑀺𑀕𑁆𑀕𑀳𑀡𑁂𑀦 𑀮𑁄𑀫𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀮𑁄𑀫𑀸𑀦𑀁 𑀨𑀼𑀲𑀦𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀉𑀧𑀸𑀤𑀺𑀦𑁆𑀦𑀓𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳.

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀬𑀲𑀁𑀲𑀕𑁆𑀕𑀦𑀺𑀤𑁆𑀤𑁂𑀲𑁂. 𑀢𑁂𑀦𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦. 𑀲𑀜𑁆𑀜𑀸𑀬 𑀯𑀺𑀭𑀸𑀕𑀺𑀢𑀫𑁆𑀳𑀻𑀢𑀺 𑀲𑀜𑁆𑀜𑀸𑀬 𑀯𑀺𑀭𑀤𑁆𑀥𑀸𑀬. 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 ‘‘𑀯𑀺𑀭𑀸𑀕𑀺𑀢𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀁 𑀦𑀸𑀫 𑀯𑀢𑁆𑀣𑀼𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀁 ¶ 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀤𑀢𑀻𑀢𑀺𑀧𑀺 𑀓𑁂𑀘𑀺. 𑀲𑀸𑀭𑀢𑁆𑀢𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀲𑀸𑀭𑀢𑁆𑀢𑀁. 𑀯𑀺𑀭𑀢𑁆𑀢𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀭𑀳𑀺𑀢𑀁 𑀫𑀸𑀢𑀼𑀪𑀕𑀺𑀦𑀻𑀆𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀭𑀢𑁆𑀢𑀁 𑀕𑀡𑁆𑀳𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀫𑀸𑀢𑀼𑀧𑁂𑀫𑀸𑀤𑀺𑀯𑀲𑁂𑀦 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀲𑀫𑁂𑀢𑀻𑀢𑀺 𑀘𑁂? 𑀬𑀤𑀺 𑀳𑀺 ‘‘𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀪𑀯𑁂𑀬𑁆𑀬, 𑀓𑀸𑀬𑀧𑀝𑀺𑀩𑀤𑁆𑀥𑀕𑁆𑀕𑀳𑀡𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀘𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀼𑀢𑁆𑀢𑀜𑁆𑀘, 𑀢𑀲𑁆𑀫𑀸 ‘‘𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀁 𑀕𑀡𑁆𑀳𑀦𑁆𑀢𑀲𑁆𑀲 𑀇𑀢𑁆𑀣𑀺𑀲𑀜𑁆𑀜𑀸 𑀯𑀺𑀭𑀸𑀕𑀺𑀢𑀸 𑀦𑀸𑀫 𑀦 𑀳𑁄𑀢𑀻𑀢𑀺 ‘‘𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀓𑀸𑀬𑀁 𑀕𑀡𑁆𑀳𑀦𑁆𑀢𑁄 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀆𑀧𑀚𑁆𑀚𑀢𑀻’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀯𑀸𑀤𑁄 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀬𑁄 𑀧𑀦𑁂𑀢𑁆𑀣 ‘‘𑀲𑀢𑀺𑀧𑀺 𑀇𑀢𑁆𑀣𑀺𑀲𑀜𑁆𑀜𑀸𑀬 𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀡𑀲𑀫𑀬𑁂 ‘𑀓𑀸𑀬𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸 ‘𑀇𑀢𑁆𑀣𑀺𑀁 𑀕𑀡𑁆𑀳𑀸𑀫𑀻’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀯𑀢𑁆𑀣𑀼𑀲𑀜𑁆𑀜𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀅𑀬𑀼𑀢𑁆𑀢’’𑀦𑁆𑀢𑀺 𑀯𑀤𑁂𑀬𑁆𑀬, 𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀓𑀺𑀁 𑀓𑀸𑀬𑀧𑀝𑀺𑀩𑀤𑁆𑀥𑀁 𑀯𑀢𑁆𑀣𑀸𑀤𑀺𑀁 𑀕𑀡𑁆𑀳𑀦𑁆𑀢𑁄 𑀇𑀢𑁆𑀣𑀺𑀬𑀸 𑀭𑀸𑀕𑁂𑀦 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀯𑀢𑁆𑀣𑀸𑀤𑀻𑀲𑀼 𑀭𑀸𑀕𑁂𑀦𑀸’’𑀢𑀺. 𑀬𑀤𑀺 ‘‘𑀯𑀢𑁆𑀣𑀸𑀤𑀻𑀲𑀼 𑀭𑀸𑀕𑁂𑀦 𑀕𑀡𑁆𑀳𑀸𑀢𑀻’’𑀢𑀺 𑀯𑀤𑁂𑀬𑁆𑀬, 𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀅𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀞𑀺𑀢𑀁 𑀯𑀢𑁆𑀣𑀸𑀤𑀺𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸, 𑀢𑀲𑁆𑀫𑀸 𑀇𑀢𑁆𑀣𑀻 𑀇𑀢𑁆𑀣𑀺𑀲𑀜𑁆𑀜𑀸 𑀲𑀸𑀭𑀢𑁆𑀢𑀪𑀸𑀯𑁄 𑀕𑀳𑀡𑀜𑁆𑀘𑀸𑀢𑀺 𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀲𑀩𑁆𑀪𑀸𑀯𑀢𑁄 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁄𑀯 𑀬𑀼𑀢𑁆𑀢𑀯𑀸𑀤𑁄. 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁂𑀳𑀺 𑀘 𑀲𑀫𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀲𑀜𑁆𑀜𑀸𑀯𑀺𑀭𑀸𑀕𑁂𑀦 𑀯𑀺𑀭𑀸𑀕𑀺𑀢𑀁 𑀦𑀸𑀫 𑀲𑀺𑀬𑀸, ‘‘𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀩𑀸𑀳𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀫𑀻’’𑀢𑀺 𑀏𑀯𑀁𑀲𑀜𑁆𑀜𑀺𑀲𑁆𑀲 ‘‘𑀫𑀚𑁆𑀛𑀕𑀢𑀺𑀢𑁆𑀣𑀺𑀬𑁄 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀕𑀡𑁆𑀳𑀸𑀫𑀻’’𑀢𑀺 𑀏𑀯𑀭𑀽𑀧𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀫𑀚𑁆𑀛𑀕𑀢𑀸𑀦𑀁 𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀦 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀬 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀜𑁆𑀜𑀸𑀯𑀺𑀭𑀸𑀕𑁂𑀦 𑀯𑀺𑀭𑀸𑀕𑀺𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺. 𑀦𑀻𑀮𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀢𑁄 𑀓𑀸𑀴𑀺𑀢𑁆𑀣𑀻 𑀯𑀼𑀢𑁆𑀢𑀸.

𑁨𑁭𑁯. 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀨𑀲𑁆𑀲𑀲𑀼𑀔𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄. 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀧𑀝𑀺𑀩𑀤𑁆𑀥𑀸𑀫𑀲𑀦𑀯𑀸𑀭𑁂𑀧𑀺 ¶ 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀓𑀸𑀬𑀧𑀝𑀺𑀩𑀤𑁆𑀥𑀸𑀫𑀲𑀦𑁂𑀧𑀺 𑀓𑀸𑀬𑀲𑀫𑁆𑀩𑀦𑁆𑀥𑀲𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀸𑀭𑁂. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀧𑀞𑀫𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂 𑀲𑀢𑀺𑀧𑀺 𑀧𑀘𑁆𑀙𑀸 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁨𑁮𑁧. 𑀧𑀸𑀭𑀺𑀧𑀦𑁆𑀣𑀺𑀓𑀸𑀢𑀺 ¶ 𑀯𑀺𑀮𑀼𑀫𑁆𑀧𑀦𑀺𑀓𑀸, 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀫𑀸𑀢𑀭𑀦𑁆𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀸𑀲𑀼𑀧𑀺 𑀧𑀦 𑀇𑀢𑁆𑀣𑀻𑀲𑀼 𑀓𑀸𑀭𑀼𑀜𑁆𑀜𑀸𑀥𑀺𑀧𑁆𑀧𑀸𑀬𑁂𑀦 𑀫𑀸𑀢𑀭𑀺 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀦𑁂𑀯𑀢𑁆𑀣𑀺 𑀤𑁄𑀲𑁄𑀢𑀺 𑀯𑀤𑀦𑁆𑀢𑀺. ‘‘𑀫𑀸𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀸𑀲𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀸𑀧𑀺 𑀅𑀢𑁆𑀣𑀺. 𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 𑀳𑀺𑀭𑀻𑀯𑁂𑀭𑀸𑀤𑀺𑀫𑀽𑀮𑁂𑀳𑀺 𑀓𑀢𑀘𑀼𑀫𑁆𑀩𑀝𑀓𑀁. 𑀢𑀸𑀮𑀧𑀡𑁆𑀡𑀫𑀼𑀤𑁆𑀤𑀺𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑁂𑀳𑀺 𑀓𑀢𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸, 𑀘𑀻𑀯𑀭𑀢𑁆𑀣𑀸𑀬 𑀅𑀧𑀦𑀸𑀫𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀻𑀯𑀭𑀢𑁆𑀣𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀧𑀘𑁆𑀘𑀢𑁆𑀣𑀭𑀡𑀯𑀺𑀢𑀸𑀦𑀸𑀤𑀺𑀅𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯, 𑀧𑀽𑀚𑀸𑀤𑀺𑀅𑀢𑁆𑀣𑀁 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀇𑀢𑁆𑀣𑀺𑀲𑀡𑁆𑀞𑀸𑀦𑁂𑀦 𑀓𑀢𑀦𑁆𑀢𑀺 𑀏𑀢𑁆𑀣 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀫𑁆𑀧𑀺 𑀅𑀦𑀸𑀫𑀸𑀲𑀪𑀸𑀯𑀢𑁄 𑀢𑀸𑀤𑀺𑀲𑀁 𑀇𑀢𑁆𑀣𑀺𑀲𑀡𑁆𑀞𑀸𑀦𑁂𑀦 𑀓𑀢𑀁 𑀢𑀺𑀭𑀘𑁆𑀙𑀸𑀦𑀕𑀢𑀭𑀽𑀧𑀫𑁆𑀧𑀺 𑀅𑀦𑀸𑀫𑀸𑀲𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀪𑀺𑀓𑁆𑀔𑀼𑀦𑀻𑀳𑀺 𑀧𑀝𑀺𑀫𑀸𑀭𑀽𑀧𑀁 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸. 𑀇𑀢𑁆𑀣𑀺𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀢𑁆𑀣𑀜𑁆𑀘 𑀧𑀘𑁆𑀘𑀢𑁆𑀣𑀭𑀡𑀜𑁆𑀘 𑀪𑀺𑀢𑁆𑀢𑀺𑀜𑁆𑀘 𑀇𑀢𑁆𑀣𑀺𑀭𑀽𑀧𑀁 𑀅𑀦𑀸𑀫𑀲𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀳𑀢𑁆𑀣𑁂𑀦 𑀅𑀕𑁆𑀕𑀳𑁂𑀢𑁆𑀯𑀸𑀯 𑀓𑁂𑀦𑀘𑀺𑀤𑁂𑀯 𑀤𑀡𑁆𑀟𑀸𑀤𑀺𑀦𑀸 𑀪𑀺𑀦𑁆𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 ‘‘𑀅𑀦𑀸𑀫𑀸𑀲𑀫𑁆𑀧𑀺 𑀳𑀢𑁆𑀣𑁂𑀦 𑀅𑀧𑀭𑀸𑀫𑀲𑀺𑀢𑁆𑀯𑀸 𑀤𑀡𑁆𑀟𑀸𑀤𑀺𑀦𑀸 𑀓𑁂𑀦𑀘𑀺 𑀪𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀥 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀦𑁆𑀢𑁂𑀦 𑀫𑀸𑀢𑀼𑀕𑀸𑀫𑀲𑀭𑀻𑀭𑁂𑀧𑀺 𑀲𑀢𑁆𑀣𑀸𑀤𑀻𑀳𑀺 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀕𑀳𑀺𑀢𑀫𑀡𑁆𑀟𑀽𑀓𑀲𑀧𑁆𑀧𑀺𑀦𑀺𑀁 𑀤𑀡𑁆𑀟𑀸𑀤𑀻𑀳𑀺 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀫𑀡𑁆𑀟𑀽𑀓𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 𑀫𑀕𑁆𑀕𑁂 𑀕𑀘𑁆𑀙𑀸𑀫𑀻𑀢𑀺 𑀏𑀯𑀁 𑀫𑀕𑁆𑀕𑀲𑀜𑁆𑀜𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀻𑀴𑀦𑁆𑀢𑁂𑀦𑀸𑀢𑀺 𑀇𑀤𑀁 𑀕𑀺𑀳𑀺𑀲𑀦𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀧𑀦 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀸𑀫𑀲𑀺𑀢𑀩𑁆𑀩𑀫𑁂𑀯 𑀤𑀼𑀭𑀼𑀧𑀘𑀺𑀡𑁆𑀡𑀪𑀸𑀯𑀢𑁄. 𑀢𑀸𑀮𑀧𑀦𑀲𑀸𑀤𑀻𑀦𑀻𑀢𑀺 𑀘𑁂𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀴𑀺𑀓𑁂𑀭𑀮𑀩𑀼𑀚𑀢𑀺𑀧𑀼𑀲𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀏𑀴𑀸𑀮𑀼𑀓𑀨𑀮𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀣𑀸𑀯𑀼𑀢𑁆𑀢𑀨𑀮𑀸𑀦𑀁𑀬𑁂𑀯 𑀘𑁂𑀢𑁆𑀣 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀆𑀫𑀲𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀤𑀻𑀦𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀫𑀼𑀢𑁆𑀢𑀸𑀢𑀺 𑀳𑀢𑁆𑀣𑀺𑀓𑀼𑀫𑁆𑀪𑀚𑀸𑀤𑀺𑀓𑀸 𑀅𑀝𑁆𑀞𑀯𑀺𑀥𑀸 𑀫𑀼𑀢𑁆𑀢𑀸. 𑀢𑀣𑀸 𑀳𑀺 𑀳𑀢𑁆𑀣𑀺𑀓𑀼𑀫𑁆𑀪𑀁, 𑀯𑀭𑀸𑀳𑀤𑀸𑀞𑀁, 𑀪𑀼𑀚𑀗𑁆𑀕𑀲𑀻𑀲𑀁, 𑀯𑀮𑀸𑀳𑀓𑀁, 𑀯𑁂𑀴𑀼, 𑀫𑀘𑁆𑀙𑀲𑀺𑀭𑁄, 𑀲𑀗𑁆𑀔𑁄, 𑀲𑀺𑀧𑁆𑀧𑀻𑀢𑀺 𑀅𑀝𑁆𑀞 𑀫𑀼𑀢𑁆𑀢𑀸𑀬𑁄𑀦𑀺𑀬𑁄. 𑀢𑀢𑁆𑀣 𑀳𑀢𑁆𑀣𑀺𑀓𑀼𑀫𑁆𑀪𑀚𑀸 ¶ 𑀧𑀻𑀢𑀯𑀡𑁆𑀡𑀸 𑀧𑀪𑀸𑀯𑀺𑀳𑀻𑀦𑀸. 𑀯𑀭𑀸𑀳𑀤𑀸𑀞𑀚𑀸 ¶ 𑀯𑀭𑀸𑀳𑀤𑀸𑀞𑀯𑀡𑁆𑀡𑀸𑀯. 𑀪𑀼𑀚𑀗𑁆𑀕𑀲𑀻𑀲𑀚𑀸 𑀦𑀻𑀮𑀸𑀤𑀺𑀯𑀡𑁆𑀡𑀸 𑀲𑀼𑀯𑀺𑀲𑀼𑀤𑁆𑀥𑀸 𑀯𑀝𑁆𑀝𑀮𑀸. 𑀯𑀮𑀸𑀳𑀓𑀚𑀸 𑀆𑀪𑀸𑀲𑀽𑀭𑀸 𑀤𑀼𑀩𑁆𑀩𑀺𑀪𑀸𑀕𑀭𑀽𑀧𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀫𑀦𑁆𑀢𑀺𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀤𑁂𑀯𑀽𑀧𑀪𑁄𑀕𑀸 𑀏𑀯 𑀘 𑀳𑁄𑀦𑁆𑀢𑀺. 𑀯𑁂𑀴𑀼𑀚𑀸 𑀓𑀭𑀓𑀨𑀮𑀲𑀫𑀸𑀦𑀯𑀡𑁆𑀡𑀸 𑀦 𑀆𑀪𑀸𑀲𑀽𑀭𑀸, 𑀢𑁂 𑀘 𑀯𑁂𑀴𑀽 𑀅𑀫𑀦𑀼𑀲𑁆𑀲𑀕𑁄𑀘𑀭𑁂 𑀏𑀯 𑀧𑀤𑁂𑀲𑁂 𑀚𑀸𑀬𑀦𑁆𑀢𑀺. 𑀫𑀘𑁆𑀙𑀲𑀺𑀭𑀚𑀸 𑀧𑀸𑀞𑀻𑀦𑀧𑀺𑀝𑁆𑀞𑀺𑀲𑀫𑀆𑀦𑀯𑀡𑁆𑀡𑀸 𑀯𑀝𑁆𑀝𑀮𑀸 𑀮𑀖𑀯𑁄 𑀘 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸 𑀘, 𑀢𑁂 𑀘 𑀫𑀘𑁆𑀙𑀸 𑀲𑀫𑀼𑀤𑁆𑀤𑀫𑀚𑁆𑀛𑁂𑀬𑁂𑀯 𑀚𑀸𑀬𑀦𑁆𑀢𑀺. 𑀲𑀗𑁆𑀔𑀚𑀸 𑀲𑀗𑁆𑀔𑀉𑀤𑀭𑀘𑁆𑀙𑀯𑀺𑀯𑀡𑁆𑀡𑀸 𑀓𑁄𑀮𑀨𑀮𑀧𑁆𑀧𑀫𑀸𑀡𑀸𑀧𑀺 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸𑀯. 𑀲𑀺𑀧𑁆𑀧𑀺𑀚𑀸 𑀧𑀪𑀸𑀯𑀺𑀲𑁂𑀲𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀯𑀁 𑀚𑀸𑀢𑀺𑀢𑁄 𑀅𑀝𑁆𑀞𑀯𑀺𑀥𑀸𑀲𑀼 𑀫𑀼𑀢𑁆𑀢𑀸𑀲𑀼 𑀬𑀸 𑀫𑀘𑁆𑀙𑀲𑀗𑁆𑀔𑀲𑀺𑀧𑁆𑀧𑀺𑀚𑀸, 𑀢𑀸 𑀲𑀸𑀫𑀼𑀤𑁆𑀤𑀺𑀓𑀸. 𑀪𑀼𑀚𑀗𑁆𑀕𑀚𑀸𑀧𑀺 𑀓𑀸𑀘𑀺 𑀲𑀸𑀫𑀼𑀤𑁆𑀤𑀺𑀓𑀸 𑀳𑁄𑀦𑁆𑀢𑀺, 𑀇𑀢𑀭𑀸 𑀅𑀲𑀸𑀫𑀼𑀤𑁆𑀤𑀺𑀓𑀸. 𑀬𑀲𑁆𑀫𑀸 𑀩𑀳𑀼𑀮𑀁 𑀲𑀸𑀫𑀼𑀤𑁆𑀤𑀺𑀓𑀸𑀯 𑀫𑀼𑀢𑁆𑀢𑀸 𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀲𑀧𑁆𑀧𑀺𑀚𑀸𑀯, 𑀇𑀢𑀭𑀸 𑀓𑀤𑀸𑀘𑀺 𑀓𑀸𑀘𑀺, 𑀢𑀲𑁆𑀫𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀸 𑀫𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀫𑀡𑀻𑀢𑀺 𑀞𑀧𑁂𑀢𑁆𑀯𑀸 𑀯𑁂𑀴𑀼𑀭𑀺𑀬𑀸𑀤𑀺𑀓𑁂 𑀲𑁂𑀲𑁄 𑀚𑁄𑀢𑀺𑀭𑀲𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀯𑀁𑀲𑀯𑀡𑁆𑀡𑀫𑀡𑀺. 𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸𑀧𑀡𑁆𑀟𑀼𑀲𑀺𑀮𑀸𑀲𑁂𑀢𑀲𑀺𑀮𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀲𑀺𑀮𑀸. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑀸𑀤𑀺𑀓𑀁 𑀯𑀼𑀢𑁆𑀢𑀸𑀯𑀲𑁂𑀲𑀁 𑀭𑀢𑀦𑀲𑀫𑁆𑀫𑀢𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀮𑁄𑀳𑀺𑀢𑀗𑁆𑀓𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀫𑀡𑀺. 𑀪𑀡𑁆𑀟𑀫𑀽𑀮𑀢𑁆𑀣𑀸𑀬𑀸𑀢𑀺 𑀧𑀢𑁆𑀢𑀘𑀻𑀯𑀭𑀸𑀤𑀺𑀪𑀡𑁆𑀟𑀫𑀽𑀮𑀢𑁆𑀣𑀸𑀬. 𑀓𑀼𑀝𑁆𑀞𑀭𑁄𑀕𑀲𑁆𑀲𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀸𑀬 𑀯𑀽𑀧𑀲𑀫𑁂𑀢𑀩𑁆𑀩𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀭𑁄𑀕𑀲𑁆𑀲𑀢𑁆𑀣𑀸𑀬𑀧𑀺 𑀯𑀝𑁆𑀝𑀢𑀺𑀬𑁂𑀯. ‘‘𑀪𑁂𑀲𑀚𑁆𑀚𑀢𑁆𑀣𑀜𑁆𑀘 𑀅𑀥𑀺𑀝𑁆𑀞𑀸𑀬𑁂𑀯 𑀫𑀼𑀢𑁆𑀢𑀸 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀆𑀓𑀭𑀫𑀼𑀢𑁆𑀢𑁄𑀢𑀺 𑀆𑀓𑀭𑀢𑁄 𑀫𑀼𑀢𑁆𑀢𑀫𑀢𑁆𑀢𑁄. ‘‘𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀘 𑀆𑀫𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑀺𑀢𑁆𑀯𑀸 𑀓𑀢𑁄𑀢𑀺 𑀓𑀸𑀘𑀓𑀸𑀭𑁂𑀳𑀺 𑀧𑀘𑀺𑀢𑁆𑀯𑀸 𑀓𑀢𑁄.

𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄𑀢𑀺 𑀅𑀮𑀗𑁆𑀓𑀸𑀭𑀢𑁆𑀣𑀁 𑀓𑀜𑁆𑀘𑀦𑀮𑀢𑀸𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀭𑀢𑀦𑀔𑀘𑀺𑀢𑁄 𑀥𑁄𑀢𑀯𑀺𑀤𑁆𑀥𑁄 𑀅𑀦𑀸𑀫𑀸𑀲𑁄. 𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄 𑀘𑀸𑀢𑀺 𑀯𑀺𑀲𑀼𑀁 𑀯𑀸 𑀧𑀤𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀸𑀦𑀻𑀬𑀲𑀗𑁆𑀔𑁄𑀢𑀺 𑀇𑀫𑀺𑀦𑀸 𑀘 𑀲𑀗𑁆𑀔𑁂𑀦 𑀓𑀢𑀧𑀸𑀦𑀻𑀬𑀪𑀸𑀚𑀦𑀧𑀺𑀥𑀸𑀦𑀸𑀤𑀺𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀧𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀲𑁂𑀲𑀦𑁆𑀢𑀺 𑀭𑀢𑀦𑀫𑀺𑀲𑁆𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁. 𑀫𑀼𑀕𑁆𑀕𑀯𑀡𑁆𑀡𑀁𑀬𑁂𑀯 𑀭𑀢𑀦𑀲𑀫𑁆𑀫𑀺𑀲𑁆𑀲𑀁 ¶ 𑀓𑀭𑁄𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀫𑀼𑀕𑁆𑀕𑀯𑀡𑁆𑀡𑀸𑀯𑀸’’𑀢𑀺, 𑀫𑀼𑀕𑁆𑀕𑀯𑀡𑁆𑀡𑀸 𑀭𑀢𑀦𑀫𑀺𑀲𑁆𑀲𑀸𑀯 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀸𑀢𑀺 𑀭𑀢𑀦𑀲𑀫𑁆𑀫𑀺𑀲𑁆𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀫𑀼𑀕𑁆𑀕𑀯𑀡𑁆𑀡𑀸 𑀦𑀻𑀮𑀲𑀺𑀮𑀸.

𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀥𑀸𑀢𑀼𑀧𑀸𑀲𑀸𑀡𑀢𑁄 𑀧𑀝𑁆𑀞𑀸𑀬. 𑀲𑀼𑀯𑀡𑁆𑀡𑀘𑁂𑀢𑀺𑀬𑀦𑁆𑀢𑀺 𑀥𑀸𑀢𑀼𑀓𑀭𑀡𑁆𑀟𑀓𑀁. 𑀧𑀝𑀺𑀓𑁆𑀔𑀺𑀧𑀻𑀢𑀺 ‘‘𑀥𑀸𑀢𑀼𑀝𑁆𑀞𑀧𑀦𑀢𑁆𑀣𑀸𑀬 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀣𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺. 𑀲𑀼𑀯𑀡𑁆𑀡𑀩𑀼𑀩𑁆𑀩𑀼𑀴𑀓𑀦𑁆𑀢𑀺 𑀲𑀼𑀯𑀡𑁆𑀡𑀢𑀸𑀭𑀓𑀁. ‘‘𑀓𑁂𑀴𑀸𑀧𑀬𑀺𑀢𑀼𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑀦𑁆𑀢𑁂𑀳𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 ¶ 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑁂𑀢𑀺𑀬𑀕𑁄𑀧𑀓𑀸 𑀯𑀸 𑀪𑀺𑀓𑁆𑀔𑀽 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸, 𑀳𑀢𑁆𑀣𑁂𑀦𑀧𑀺 𑀧𑀼𑀜𑁆𑀙𑀺𑀢𑁆𑀯𑀸 𑀓𑀘𑀯𑀭𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀫𑀮𑀫𑁆𑀧𑀺 𑀧𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀆𑀭𑀓𑀽𑀝𑀮𑁄𑀳𑀦𑁆𑀢𑀺 𑀓𑀺𑀢𑁆𑀢𑀺𑀫𑀮𑁄𑀳𑀁. 𑀢𑀻𑀡𑀺 𑀳𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺 𑀓𑀁𑀲𑀮𑁄𑀳𑀁, 𑀯𑀝𑁆𑀝𑀮𑁄𑀳𑀁, 𑀆𑀭𑀓𑀽𑀝𑀦𑁆𑀢𑀺. 𑀢𑀢𑁆𑀣 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁, 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁, 𑀧𑀓𑀢𑀺𑀭𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀆𑀭𑀓𑀽𑀝𑀁. 𑀢𑁂𑀦𑁂𑀯 𑀢𑀁𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀓𑀺𑀢𑁆𑀢𑀺𑀫𑀮𑁄𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀭𑀓𑀽𑀝𑀁 𑀲𑀼𑀯𑀡𑁆𑀡𑀲𑀤𑀺𑀲𑀫𑁂𑀯 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀆𑀭𑀓𑀽𑀝𑀁 𑀅𑀦𑀸𑀫𑀲𑀺𑀢𑀩𑁆𑀩𑀢𑁄 𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯𑀸𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀪𑀬𑀫𑁆𑀧𑀺 𑀚𑀸𑀢𑀭𑀽𑀧𑀁 𑀯𑀺𑀬 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀞𑀫𑀁 𑀯𑀼𑀢𑁆𑀢𑁄𑀬𑁂𑀯 𑀘 𑀅𑀢𑁆𑀣𑁄 𑀕𑀡𑁆𑀞𑀺𑀧𑀤𑀓𑀸𑀭𑁂𑀳𑀺 𑀅𑀥𑀺𑀧𑁆𑀧𑁂𑀢𑁄. 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑁂𑀦𑀸𑀲𑀦𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁.

𑀲𑀸𑀫𑀺𑀓𑀸𑀦𑀁 𑀧𑁂𑀲𑁂𑀢𑀩𑁆𑀩𑀦𑁆𑀢𑀺 𑀲𑀸𑀫𑀺𑀓𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀢𑀩𑁆𑀩𑀁. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀳𑀢𑁆𑀣𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀪𑀺𑀦𑁆𑀤𑀺𑀢𑁆𑀯𑀸. 𑀪𑁂𑀭𑀺𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀪𑁂𑀭𑀻. 𑀯𑀻𑀡𑀸𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀯𑀻𑀡𑀸. 𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀁 𑀪𑁂𑀭𑀺𑀯𑀻𑀡𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀼𑀘𑁆𑀙𑀧𑁄𑀓𑁆𑀔𑀭𑀦𑁆𑀢𑀺 𑀅𑀯𑀺𑀦𑀤𑁆𑀥𑀘𑀫𑁆𑀫𑀁 𑀪𑁂𑀭𑀺𑀧𑁄𑀓𑁆𑀔𑀭𑀁 𑀯𑀻𑀡𑀸𑀧𑁄𑀓𑁆𑀔𑀭𑀜𑁆𑀘. 𑀆𑀭𑁄𑀧𑀺𑀢𑀘𑀫𑁆𑀫𑀦𑁆𑀢𑀺 𑀪𑁂𑀭𑀺𑀆𑀤𑀻𑀦𑀁 𑀯𑀺𑀦𑀤𑁆𑀥𑀦𑀢𑁆𑀣𑀸𑀬 𑀫𑀼𑀔𑀯𑀝𑁆𑀝𑀺𑀬𑀁 𑀆𑀭𑁄𑀧𑀺𑀢𑀘𑀫𑁆𑀫𑀁 𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑀼𑀁 𑀞𑀧𑀺𑀢𑀘𑀫𑁆𑀫𑀜𑁆𑀘. 𑀑𑀦𑀳𑀺𑀢𑀼𑀁 𑀯𑀸𑀢𑀺 𑀪𑁂𑀭𑀺𑀧𑁄𑀓𑁆𑀔𑀭𑀸𑀤𑀻𑀦𑀺 𑀘𑀫𑁆𑀫𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀦𑀦𑁆𑀥𑀺𑀢𑀼𑀁. 𑀑𑀦𑀳𑀸𑀧𑁂𑀢𑀼𑀁 𑀯𑀸𑀢𑀺 𑀢𑀣𑁂𑀯 𑀅𑀜𑁆𑀜𑁂𑀳𑀺 𑀯𑀺𑀦𑀦𑁆𑀥𑀸𑀧𑁂𑀢𑀼𑀁. 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀓𑀸𑀮𑁂𑀢𑀺 𑀅𑀓𑀼𑀣𑀺𑀢𑀓𑀸𑀮𑁂.

𑁨𑁮𑁨. 𑀲𑀗𑁆𑀓𑀫𑀸𑀤𑀺 ¶ 𑀪𑀽𑀫𑀺𑀕𑀢𑀺𑀓𑀢𑁆𑀢𑀸 𑀦 𑀓𑀸𑀬𑀧𑀝𑀺𑀩𑀤𑁆𑀥𑀝𑁆𑀞𑀸𑀦𑀺𑀬𑀦𑁆𑀢𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀏𑀓𑀧𑀤𑀺𑀓𑀲𑀗𑁆𑀓𑀫𑁄𑀢𑀺 𑀔𑀼𑀤𑁆𑀤𑀓𑀲𑁂𑀢𑀼. 𑀲𑀓𑀝𑀫𑀕𑁆𑀕𑀲𑀗𑁆𑀓𑀫𑁄𑀢𑀺 𑀲𑀓𑀝𑀫𑀕𑁆𑀕𑀪𑀽𑀢𑁄 𑀫𑀳𑀸𑀲𑁂𑀢𑀼. 𑀞𑀸𑀦𑀸 𑀘𑀸𑀮𑁂𑀢𑀼𑀦𑁆𑀢𑀺 𑀭𑀚𑁆𑀚𑀼𑀁 𑀞𑀸𑀦𑀸 𑀘𑀸𑀮𑁂𑀢𑀼𑀁. 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀸𑀢𑀺 𑀅𑀧𑀦𑁂𑀢𑀩𑁆𑀩𑀸. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀸𑀬𑀸𑀫𑁄, 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁩. 𑀢𑀢𑀺𑀬𑁂 ¶ 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀙𑀺𑀦𑁆𑀦𑀑𑀢𑁆𑀢𑀧𑁆𑀧𑀸 ‘‘𑀙𑀺𑀦𑁆𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀙𑀺𑀦𑁆𑀦𑀺𑀓𑀸𑀢𑀺 𑀙𑀺𑀦𑁆𑀦𑀑𑀢𑀧𑁆𑀧𑀸’’𑀢𑀺.

𑁨𑁮𑁫. 𑀬𑀣𑀸 𑀬𑀼𑀯𑀸 𑀬𑀼𑀯𑀢𑀺𑀦𑁆𑀢𑀺 𑀏𑀢𑁂𑀦 𑀑𑀪𑀸𑀲𑀦𑁂 𑀦𑀺𑀭𑀸𑀲𑀗𑁆𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀫𑁂𑀣𑀼𑀦𑀼𑀧𑀲𑀜𑁆𑀳𑀺𑀢𑀸𑀳𑀻𑀢𑀺 𑀇𑀤𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀲𑀺𑀔𑀸𑀧𑁆𑀧𑀢𑁆𑀢𑀮𑀓𑁆𑀔𑀡𑀤𑀲𑁆𑀲𑀦𑀁. 𑀇𑀢𑁆𑀣𑀺𑀮𑀓𑁆𑀔𑀡𑁂𑀦𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀲𑀼𑀪𑀮𑀓𑁆𑀔𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀦 𑀢𑀸𑀯 𑀲𑀻𑀲𑀁 𑀏𑀢𑀻𑀢𑀺 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺𑀆𑀤𑀺𑀦𑀸 𑀯𑀡𑁆𑀡𑀪𑀡𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀚𑀦𑀓𑀁 𑀳𑀼𑀢𑁆𑀯𑀸 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀺. 𑀯𑀡𑁆𑀡𑀪𑀡𑀦𑀜𑁆𑀳𑀺 𑀬𑁂𑀦𑀸𑀓𑀸𑀭𑁂𑀦 𑀪𑀡𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀪𑀡𑀦𑁆𑀢𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀁 𑀦𑀸𑀫 𑀳𑁄𑀢𑀺. ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻𑀢𑀺𑀆𑀤𑀺𑀓𑀁 𑀧𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀖𑀝𑀺𑀢𑁂 𑀲𑀻𑀲𑀁 𑀦 𑀏𑀢𑀻𑀢𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀖𑀝𑀺𑀢𑁂 𑀅𑀯𑀡𑁆𑀡𑀪𑀡𑀦𑀁 𑀲𑀻𑀲𑀁 𑀦 𑀏𑀢𑀺, 𑀅𑀯𑀡𑁆𑀡𑀪𑀡𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀖𑀝𑀺𑀢𑁂𑀧𑀻𑀢𑀺 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀯𑀡𑁆𑀡𑀪𑀡𑀦𑁂 𑀖𑀝𑀺𑀢𑁂𑀧𑀺. 𑀇𑀫𑁂𑀳𑀺 𑀢𑀻𑀳𑀺 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 ‘‘𑀲𑀺𑀔𑀭𑀡𑀻’’𑀢𑀺𑀆𑀤𑀻𑀳𑀺 𑀢𑀻𑀳𑀺𑀬𑁂𑀯 𑀧𑀤𑁂𑀳𑀺 𑀅𑀯𑀡𑁆𑀡𑀪𑀡𑀦𑁂 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲 𑀦𑀺𑀬𑀢𑀯𑀘𑀦𑀢𑁆𑀢𑀸 𑀅𑀘𑁆𑀘𑁄𑀴𑀸𑀭𑀺𑀓𑀢𑁆𑀢𑀸 𑀘. 𑀅𑀦𑀺𑀫𑀺𑀢𑁆𑀢𑀸𑀲𑀻𑀢𑀺𑀆𑀤𑀻𑀳𑀺 𑀧𑀦 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀖𑀝𑀺𑀢𑁂 𑀓𑁂𑀯𑀮𑀁 𑀅𑀯𑀡𑁆𑀡𑀪𑀡𑀦𑀫𑁂𑀯 ¶ 𑀲𑀫𑁆𑀧𑀚𑁆𑀚𑀢𑀺, 𑀦 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀸𑀦𑀺 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀦𑀻𑀢𑀺 𑀓𑁂𑀘𑀺. 𑀅𑀓𑁆𑀓𑁄𑀲𑀦𑀫𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀻𑀢𑀺 𑀅𑀧𑀭𑁂. 𑀧𑀭𑀺𑀩𑁆𑀩𑀸𑀚𑀺𑀓𑀸𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑀁 𑀤𑀺𑀲𑁆𑀲𑀢𑀺. 𑀓𑀼𑀜𑁆𑀘𑀺𑀓𑀧𑀡𑀸𑀮𑀺𑀫𑀢𑁆𑀢𑀦𑁆𑀢𑀺 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑀫𑀢𑁆𑀢𑀁.

𑁨𑁮𑁬-𑁨𑁮𑁭. 𑀕𑀭𑀼𑀓𑀸𑀧𑀢𑁆𑀢𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀳𑀲𑀦𑁆𑀢𑁄 𑀳𑀲𑀦𑁆𑀢𑁄𑀢𑀺 𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀳𑀲𑀦𑁆𑀢𑁄𑀧𑀺 𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀤𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀓𑀸𑀬𑀘𑀺𑀢𑁆𑀢𑀢𑁄𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀑𑀪𑀸𑀲𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺.

𑁨𑁮𑁮. 𑀢𑀲𑁆𑀫𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑀳𑁂𑀢𑀼 𑀤𑀼𑀓𑁆𑀓𑀝𑀁, 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀧𑀦 𑀅𑀔𑁂𑀢𑁆𑀢𑀧𑀤𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀧𑀭𑀺𑀩𑁆𑀩𑀸𑀚𑀺𑀓𑀸𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀓𑁆𑀔𑀢𑀺.

𑁨𑁮𑁯. 𑀅𑀲𑀤𑁆𑀥𑀫𑁆𑀫𑀁 ¶ 𑀲𑀦𑁆𑀥𑀸𑀬𑀸𑀳𑀸𑀢𑀺 ‘‘𑀯𑀸𑀧𑀺𑀢’’𑀦𑁆𑀢𑀺 𑀇𑀫𑀲𑁆𑀲 𑀩𑀻𑀚𑀦𑀺𑀓𑁆𑀔𑁂𑀧𑀯𑀘𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀁𑀲𑀻𑀤𑀢𑀻𑀢𑀺 𑀯𑀳𑀢𑀺 𑀧𑀯𑀢𑁆𑀢𑀢𑀺. 𑀅𑀣 𑀯𑀸 𑀲𑀁𑀲𑀻𑀤𑀢𑀻𑀢𑀺 𑀲𑀁𑀲𑀻𑀤𑀺𑀲𑁆𑀲𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀑𑀪𑀸𑀲𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁦. 𑀘𑀢𑀼𑀢𑁆𑀣𑁂 𑀘𑀻𑀯𑀭𑀦𑁆𑀢𑀺 𑀦𑀺𑀯𑀸𑀲𑀦𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑁄 𑀓𑁄𑀘𑀺 𑀆𑀳𑀸𑀭𑁄. 𑀲𑁄 𑀳𑀺 𑀧𑀺𑀡𑁆𑀟𑁄𑀮𑁆𑀬𑁂𑀦 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀧𑀢𑀦𑀢𑁄 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀪𑀺𑀓𑁆𑀔𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀲𑀦𑁆𑀦𑀺𑀧𑀸𑀢𑁄𑀢𑀺 𑀯𑀸 𑀧𑀺𑀡𑁆𑀟𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀦𑀸𑀲𑀦𑀦𑁆𑀢𑀺 𑀲𑀬𑀦𑀜𑁆𑀘 𑀆𑀲𑀦𑀜𑁆𑀘. 𑀬𑀢𑁆𑀣 𑀳𑀺 𑀯𑀺𑀳𑀸𑀭𑀸𑀤𑀺𑀓𑁂 𑀲𑁂𑀢𑀺 𑀦𑀺𑀧𑀚𑁆𑀚𑀢𑀺 𑀆𑀲𑀢𑀺 𑀦𑀺𑀲𑀻𑀤𑀢𑀺, 𑀢𑀁 𑀲𑁂𑀦𑀸𑀲𑀦𑀁. 𑀧𑀢𑀺 𑀏𑀢𑀺 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀧𑀢𑀺𑀓𑀭𑀡𑀝𑁆𑀞𑁂𑀦 𑀧𑀘𑁆𑀘𑀬𑁄’’𑀢𑀺. 𑀭𑁄𑀕𑀲𑁆𑀲 𑀧𑀢𑀺𑀅𑀬𑀦𑀝𑁆𑀞𑁂𑀦 𑀯𑀸 𑀧𑀘𑁆𑀘𑀬𑁄, 𑀧𑀘𑁆𑀘𑀦𑀻𑀓𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄, 𑀯𑀽𑀧𑀲𑀫𑀦𑀢𑁆𑀣𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀸𑀢𑀼𑀓𑁆𑀔𑁄𑀪𑀮𑀓𑁆𑀔𑀡𑀲𑁆𑀲 𑀳𑀺 𑀢𑀁𑀳𑁂𑀢𑀼𑀓𑀤𑀼𑀓𑁆𑀔𑀯𑁂𑀤𑀦𑀸𑀮𑀓𑁆𑀔𑀡𑀲𑁆𑀲 𑀯𑀸 𑀭𑁄𑀕𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀢𑀺𑀅𑀬𑀦𑀝𑁆𑀞𑁄. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀲𑀧𑁆𑀧𑀺𑀆𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺. 𑀲𑀧𑁆𑀧𑀸𑀬𑀲𑁆𑀲𑀸𑀢𑀺 𑀳𑀺𑀢𑀲𑁆𑀲 𑀯𑀺𑀓𑀸𑀭𑀯𑀽𑀧𑀲𑀫𑁂𑀦𑀸𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀪𑀺𑀲𑀓𑁆𑀓𑀲𑁆𑀲 𑀓𑀫𑁆𑀫𑀁 𑀢𑁂𑀦 𑀯𑀺𑀥𑀸𑀢𑀩𑁆𑀩𑀢𑁄, 𑀢𑁂𑀦𑀸𑀳 ‘‘𑀅𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺. 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀻𑀢𑀺 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀡𑀓𑁂𑀳𑀺. 𑀆𑀯𑀸𑀝𑀧𑀭𑀺𑀓𑁆𑀔𑁂𑀧𑁄 𑀧𑀭𑀺𑀔𑀸 𑀉𑀤𑁆𑀤𑀸𑀧𑁄 𑀧𑀸𑀓𑀸𑀭𑁄 𑀏𑀲𑀺𑀓𑀸 𑀧𑀮𑀺𑀖𑁄 𑀧𑀸𑀓𑀸𑀭𑀫𑀢𑁆𑀣𑀓𑀫𑀡𑁆𑀟𑀮𑀦𑁆𑀢𑀺 𑀲𑀢𑁆𑀢 𑀦𑀕𑀭𑀧𑀭𑀺𑀓𑁆𑀔𑀸𑀭𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀢𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀸𑀮𑀗𑁆𑀓𑀸𑀭𑁄. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀇𑀥 ‘‘𑀭𑀣𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀘 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀅𑀮𑀗𑁆𑀓𑀸𑀭𑀝𑁆𑀞𑁂𑀦 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀯𑀼𑀢𑁆𑀢𑀸. 𑀘𑀓𑁆𑀓𑀯𑀻𑀭𑀺𑀬𑁄𑀢𑀺 𑀯𑀻𑀭𑀺𑀬𑀘𑀓𑁆𑀓𑁄. 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀢𑀺 𑀚𑀻𑀯𑀺𑀢𑀲𑁆𑀲 𑀧𑀯𑀢𑁆𑀢𑀺𑀓𑀸𑀭𑀡𑀸𑀦𑀺. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑁆𑀫𑀸 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀦𑁂𑀢𑀩𑁆𑀩𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀦𑀁 𑀧𑀭𑀺𑀢𑁄 𑀯𑀸𑀭𑀡𑀢𑁄, 𑀢𑁂𑀦𑀸𑀳 𑁋 ‘‘𑀚𑀻𑀯𑀺𑀢…𑀧𑁂… 𑀭𑀓𑁆𑀔𑀡𑀢𑁄’’𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀦𑁆𑀢𑀺 𑀯𑀺𑀯𑀭𑀁, 𑀑𑀓𑀸𑀲𑁄𑀢𑀺 𑀅𑀢𑁆𑀣𑁄. 𑀭𑀓𑁆𑀔𑀡𑀢𑁄𑀢𑀺 𑀯𑁂𑀭𑀺𑀓𑀸𑀦𑀁 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀻𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑁂𑀯𑀓𑀸 𑀯𑀺𑀬 𑀭𑀓𑁆𑀔𑀡𑀢𑁄. 𑀅𑀲𑁆𑀲𑀸𑀢𑀺 𑀚𑀻𑀯𑀺𑀢𑀲𑁆𑀲. 𑀓𑀸𑀭𑀡𑀪𑀸𑀯𑀢𑁄𑀢𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄. 𑀭𑀲𑀸𑀬𑀦𑀪𑀽𑀢𑀜𑁆𑀳𑀺 𑀪𑁂𑀲𑀚𑁆𑀚𑀁 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀢𑀺𑀬𑁂𑀯.

𑁨𑁯𑁧. 𑀉𑀧𑀘𑀸𑀭𑁂𑀢𑀺 𑀬𑀢𑁆𑀣 𑀞𑀺𑀢𑁄 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑁂. 𑀓𑀸𑀫𑁄 𑀘𑁂𑀯 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄. 𑀲𑁂𑀲𑀁 𑀩𑁆𑀬𑀜𑁆𑀚𑀦𑀦𑁆𑀢𑀺𑀆𑀤𑀻𑀲𑀼 𑀧𑀸𑀴𑀺𑀬𑀁 ‘‘𑀅𑀢𑁆𑀢𑀓𑀸𑀫’’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀓𑀸𑀫𑀁, 𑀅𑀢𑁆𑀢𑀦𑁄 𑀳𑁂𑀢𑀼𑀁, 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁, 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸. 𑀢𑁂𑀲𑀼 𑀧𑀞𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀓𑀸𑀫𑁄 𑀘 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄, 𑀲𑁂𑀲𑀁 𑀅𑀥𑀺𑀧𑁆𑀧𑀸𑀬𑀧𑀤𑀫𑁂𑀓𑀁 𑀩𑁆𑀬𑀜𑁆𑀚𑀦𑀁 𑀧𑀞𑀫𑀯𑀺𑀕𑁆𑀕𑀳𑁂 𑀢𑀤𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑀪𑀸𑀯𑀢𑁄 𑀦𑀺𑀭𑀢𑁆𑀣𑀓𑀢𑁆𑀢𑀸. 𑀤𑀼𑀢𑀺𑀬𑁂 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀥𑀺𑀧𑁆𑀧𑀸𑀬𑁄 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀢𑁆𑀣𑁄, 𑀓𑀸𑀫𑁄 𑀘 𑀳𑁂𑀢𑀼 𑀘𑀸𑀢𑀺 𑀲𑁂𑀲𑀁 𑀧𑀤𑀤𑁆𑀯𑀬𑀁 𑀩𑁆𑀬𑀜𑁆𑀚𑀦𑀁 𑀢𑁂𑀲𑀁 𑀢𑀢𑁆𑀣 𑀅𑀢𑁆𑀣𑀸𑀪𑀸𑀯𑀢𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀤𑁆𑀯𑀺𑀦𑁆𑀦𑀁 𑀯𑀺𑀕𑁆𑀕𑀳𑀸𑀦𑀁 𑀯𑀲𑁂𑀦 𑀬𑁄𑀚𑀺𑀢𑀸𑀦𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀕𑀡𑁆𑀞𑀺𑀧𑀤𑁂 𑀘 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀘𑀽𑀴𑀫𑀚𑁆𑀛𑀺𑀫𑀫𑀳𑀸𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀧𑀞𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀓𑀸𑀫𑁄 𑀘 𑀳𑁂𑀢𑀼 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀥𑀺𑀧𑁆𑀧𑀸𑀬𑀢𑁆𑀣𑁄, 𑀲𑁂𑀲𑀁 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦𑀸𑀢𑀺𑀆𑀤𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑀁 𑀅𑀓𑁆𑀔𑀭𑀯𑀺𑀯𑀭𑀡𑀫𑀢𑁆𑀢𑀢𑁄 𑀩𑁆𑀬𑀜𑁆𑀚𑀦𑀫𑀢𑁆𑀢𑀁. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀥𑀺𑀧𑁆𑀧𑀸𑀬𑁄 𑀘 𑀧𑀸𑀭𑀺𑀘𑀭𑀺𑀬𑀸 𑀘 𑀅𑀥𑀺𑀧𑁆𑀧𑀸𑀬𑀢𑁆𑀣𑁄, 𑀲𑁂𑀲𑀁 𑀅𑀢𑁆𑀢𑀦𑀸 𑀓𑀸𑀫𑀺𑀢𑀸 𑀇𑀘𑁆𑀙𑀺𑀢𑀸𑀢𑀺𑀆𑀤𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑀁 𑀅𑀓𑁆𑀔𑀭𑀯𑀺𑀯𑀭𑀡𑀫𑀢𑁆𑀢𑀢𑁄 𑀩𑁆𑀬𑀜𑁆𑀚𑀦𑀫𑀢𑁆𑀢’’𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑀼𑀢𑁆𑀢𑁄 ¶ . ‘‘𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀅𑀬𑀫𑁂𑀯𑀢𑁆𑀣𑁄 𑀇𑀥 𑀬𑀼𑀢𑁆𑀢𑀢𑀭𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀺𑀕𑁆𑀕𑀳𑀯𑀲𑁂𑀦 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀤𑀪𑀸𑀚𑀦𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀢𑁆𑀢𑀦𑁄 𑀳𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀢𑀺 𑀅𑀬𑀫𑀢𑁆𑀣𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀽 𑀚𑀸𑀦𑀺𑀲𑁆𑀲𑀦𑁆𑀢𑀺. ‘‘𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀥𑀺𑀧𑁆𑀧𑀸𑀬𑀲𑀤𑁆𑀤𑀲𑁆𑀲 𑀓𑀸𑀫𑀺𑀢𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀪𑀸𑀯𑀢𑁄 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀇𑀫𑀲𑁆𑀲 𑀘 𑀉𑀪𑀬𑀯𑀺𑀕𑁆𑀕𑀳𑀲𑀸𑀫𑀜𑁆𑀜𑀢𑁄 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀓𑀸𑀫𑀺𑀢𑀝𑁆𑀞𑁂𑀦 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀢𑀺 𑀅𑀬𑀫𑀢𑁆𑀣𑀯𑀺𑀓𑀧𑁆𑀧𑁄 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀤𑀲𑁆𑀲𑀺𑀢𑁄𑀢𑀺 𑀯𑀺𑀜𑁆𑀜𑀽 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺.

𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑀸 𑀅𑀕𑁆𑀕𑀸. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂 𑀓𑀺𑀜𑁆𑀘𑀸𑀧𑀺 𑀫𑁂𑀣𑀼𑀦𑀬𑀸𑀘𑀦𑀁 𑀆𑀕𑀢𑀁, 𑀢𑀣𑀸𑀧𑀺 𑀢𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀅𑀢𑁆𑀢𑀦𑁄 𑀫𑁂𑀣𑀼𑀦𑀲𑁆𑀲𑀸𑀤𑀭𑀸𑀕𑀯𑀲𑁂𑀦𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 ‘‘𑀢𑁂𑀦 𑀳𑀺 𑀪𑀕𑀺𑀦𑀺 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀡𑁆𑀡𑀪𑀡𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁬. 𑀧𑀜𑁆𑀘𑀫𑁂 ¶ 𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀧𑀡𑁆𑀟𑀺𑀘𑁆𑀘𑀁, 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀕𑀢𑀺𑀫𑀦𑁆𑀢𑀸𑀢𑀺 𑀜𑀸𑀡𑀕𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀧𑀡𑁆𑀟𑀺𑀢𑀸𑀢𑀺 𑀇𑀫𑀺𑀦𑀸 𑀲𑀪𑀸𑀯𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑀸 𑀯𑀼𑀢𑁆𑀢𑀸, 𑀩𑁆𑀬𑀢𑁆𑀢𑀸𑀢𑀺 𑀇𑀫𑀺𑀦𑀸 𑀇𑀢𑁆𑀣𑀺𑀓𑀢𑁆𑀢𑀩𑁆𑀩𑁂𑀲𑀼 𑀯𑀺𑀲𑀸𑀭𑀤𑀧𑀜𑁆𑀜𑀸𑀬. 𑀢𑁂𑀦𑀸𑀳 ‘‘𑀉𑀧𑀸𑀬𑀜𑁆𑀜𑀽 𑀯𑀺𑀲𑀸𑀭𑀤𑀸’’𑀢𑀺. 𑀫𑁂𑀥𑀸𑀯𑀺𑀦𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑀓𑀺𑀘𑁆𑀘𑁂 𑀉𑀧𑀝𑁆𑀞𑀺𑀢𑁂 𑀞𑀸𑀦𑀲𑁄 𑀢𑀗𑁆𑀔𑀡𑁂 𑀏𑀯 ¶ 𑀉𑀧𑁆𑀧𑀚𑁆𑀚𑀦𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀓𑀭𑁄𑀢𑀻’’𑀢𑀺. 𑀙𑁂𑀓𑀸𑀢𑀺 𑀬𑀸𑀕𑀼𑀪𑀢𑁆𑀢𑀲𑀫𑁆𑀧𑀸𑀤𑀦𑀸𑀤𑀻𑀲𑀼 𑀦𑀺𑀧𑀼𑀡𑀸. 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀸𑀢𑀺 𑀓𑀸𑀬𑀺𑀓𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀬𑀣𑀸 𑀅𑀜𑁆𑀜𑀸 𑀓𑀼𑀲𑀻𑀢𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀯, 𑀏𑀯𑀁 𑀅𑀳𑀼𑀢𑁆𑀯𑀸 𑀯𑀺𑀧𑁆𑀨𑀸𑀭𑀺𑀓𑁂𑀦 𑀘𑀺𑀢𑁆𑀢𑁂𑀦 𑀲𑀩𑁆𑀩𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀫𑀸𑀭𑀺𑀓𑀸𑀬𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀳𑁂𑀢𑀼𑀫𑁆𑀳𑀺 𑀯𑀸 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀓𑀼𑀫𑀸𑀭𑀺𑀓𑀸𑀬 𑀓𑀸𑀭𑀡𑀸’’𑀢𑀺. 𑀆𑀯𑀳𑀦𑀁 𑀆𑀯𑀸𑀳𑁄, 𑀧𑀭𑀺𑀕𑁆𑀕𑀳𑀪𑀸𑀯𑁂𑀦 𑀤𑀸𑀭𑀺𑀓𑀸𑀬 𑀕𑀡𑁆𑀳𑀸𑀧𑀦𑀁, 𑀢𑀣𑀸 𑀤𑀸𑀧𑀦𑀁 𑀯𑀺𑀯𑀸𑀳𑁄. 𑀢𑁂𑀦𑀸𑀳 ‘‘𑀤𑀸𑀭𑀓𑀲𑁆𑀲𑀸’’𑀢𑀺𑀆𑀤𑀺.

𑁨𑁯𑁭-𑁨𑁯𑁮. 𑀪𑀢𑁆𑀢𑀧𑀸𑀘𑀦𑀁 𑀲𑀦𑁆𑀥𑀸𑀬 𑀭𑀦𑁆𑀥𑀸𑀧𑀦𑀁 𑀯𑀼𑀢𑁆𑀢𑀁, 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀸𑀘𑀦𑀁 𑀲𑀦𑁆𑀥𑀸𑀬 𑀧𑀘𑀸𑀧𑀦𑀁 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀼𑀁 𑀓𑀼𑀮𑀁 𑀕𑀢𑀸 𑀤𑀼𑀕𑁆𑀕𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀣 𑀯𑀸 𑀕𑀢𑀸’’𑀢𑀺𑀆𑀤𑀺𑀫𑀸𑀳. 𑀆𑀳𑀭𑀡𑀁 𑀆𑀳𑀸𑀭𑁄. 𑀦 𑀉𑀧𑀸𑀳𑀝𑀦𑁆𑀢𑀺 𑀦 𑀤𑀺𑀦𑁆𑀦𑀁. 𑀓𑀬𑁄 𑀕𑀳𑀡𑀁, 𑀯𑀺𑀓𑁆𑀓𑀬𑁄 𑀤𑀸𑀦𑀁. 𑀢𑀤𑀼𑀪𑀬𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀯𑁄𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄𑀢𑀺 𑀏𑀢𑁆𑀣 𑀩𑀸𑀳𑀺𑀭𑀼𑀧𑀓𑀭𑀡𑁂𑀦 𑀅𑀮𑀗𑁆𑀓𑀭𑀡𑀁 𑀫𑀡𑁆𑀟𑀦𑀁, 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀓𑁂𑀲𑀸𑀤𑀻𑀦𑀁𑀬𑁂𑀯 𑀲𑀡𑁆𑀞𑀧𑀦𑀁 𑀧𑀲𑀸𑀥𑀦𑀁.

𑁩𑁦𑁦. ‘‘𑀅𑀩𑁆𑀪𑀼𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀧𑀭𑀸𑀚𑀺𑀢𑁂𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀤𑁂𑀦𑁆𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀘𑀺𑀭𑀓𑀸𑀮𑁂 𑀅𑀥𑀺𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀘𑀺𑀭𑀓𑀸𑀮𑀸𑀥𑀺𑀓𑀸𑀭𑀺𑀓𑀁, 𑀲𑀜𑁆𑀘𑀭𑀺𑀢𑁆𑀢𑀁. ‘‘𑀅𑀘𑀺𑀭𑀓𑀸𑀮𑀸𑀘𑀸𑀭𑀺𑀓’’𑀦𑁆𑀢𑀺 𑀯𑀸 𑀧𑀸𑀞𑁄, 𑀅𑀘𑀺𑀭𑀓𑀸𑀮𑁂 𑀆𑀘𑀸𑀭𑁄 𑀅𑀚𑁆𑀛𑀸𑀘𑀸𑀭𑁄 𑀏𑀢𑀲𑁆𑀲𑀸𑀢𑀺 𑀅𑀘𑀺𑀭𑀓𑀸𑀮𑀸𑀘𑀸𑀭𑀺𑀓𑀁.

𑀓𑀺𑀜𑁆𑀘𑀸𑀧𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀦𑁆𑀦𑀸 𑀘𑁂𑀯 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀦𑁆𑀦𑀸 𑀘 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀦 𑀦 𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸 𑀢𑁂 𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀓𑀸𑀮𑀸𑀦𑀼𑀭𑀽𑀧𑀁 𑀢𑀦𑁆𑀢𑀺𑀁 𑀞𑀧𑁂𑀦𑁆𑀢𑁄 𑀪𑀕𑀯𑀸 𑀇𑀥𑀸𑀧𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽’’𑀢𑀺 𑀧𑀤𑀪𑀸𑀚𑀦𑀁 𑀆𑀳, 𑀦 𑀧𑀦 𑀦𑁂𑀲𑀁 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀆𑀧𑀚𑁆𑀚𑀦𑁂 𑀅𑀪𑀩𑁆𑀩𑀪𑀸𑀯𑀢𑁄. 𑀔𑀻𑀡𑀸𑀲𑀯𑀸𑀧𑀺 𑀳𑀺 𑀅𑀧𑁆𑀧𑀲𑁆𑀲𑀼𑀢𑀸 𑀓𑀺𑀜𑁆𑀘𑀸𑀧𑀺 𑀮𑁄𑀓𑀯𑀚𑁆𑀚𑀁 𑀦𑀸𑀧𑀚𑁆𑀚𑀦𑁆𑀢𑀺, 𑀧𑀡𑁆𑀡𑀢𑁆𑀢𑀺𑀬𑀁 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀯𑀺𑀳𑀸𑀭𑀓𑀸𑀭𑀁 𑀓𑀼𑀝𑀺𑀓𑀸𑀭𑀁 𑀲𑀳𑀸𑀕𑀸𑀭𑀁 𑀲𑀳𑀲𑁂𑀬𑁆𑀬𑀦𑁆𑀢𑀺 𑀏𑀯𑀭𑀽𑀧𑀸 ¶ 𑀓𑀸𑀬𑀤𑁆𑀯𑀸𑀭𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀦𑁆𑀢𑀺, 𑀲𑀜𑁆𑀘𑀭𑀺𑀢𑁆𑀢𑀁 𑀧𑀤𑀲𑁄𑀥𑀫𑁆𑀫𑀁 𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀁 𑀪𑀽𑀢𑀸𑀭𑁄𑀘𑀦𑀦𑁆𑀢𑀺 𑀏𑀯𑀭𑀽𑀧𑀸 𑀯𑀘𑀻𑀤𑁆𑀯𑀸𑀭𑁂 ¶ 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀦𑁆𑀢𑀺, 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑁂 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺.

𑁩𑁦𑁧. 𑀲𑀜𑁆𑀘𑀭𑀡𑀁 𑀲𑀜𑁆𑀘𑀭𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑀭𑀻, 𑀢𑀲𑁆𑀲 𑀪𑀸𑀯𑁄 𑀲𑀜𑁆𑀘𑀭𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀜𑁆𑀘𑀭𑀡𑀪𑀸𑀯’’𑀦𑁆𑀢𑀺, 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀜𑁆𑀘𑀭𑀡𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀬𑀢𑁆𑀢𑀦𑁂 𑀚𑀸𑀭𑀢𑁆𑀢𑀦𑁂𑀢𑀺 𑀘 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀚𑀸𑀬𑀪𑀸𑀯𑀢𑁆𑀣𑀁 𑀚𑀸𑀭𑀪𑀸𑀯𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀬𑀪𑀸𑀯𑁂𑀢𑀺 𑀪𑀭𑀺𑀬𑀪𑀸𑀯𑀸𑀬. 𑀚𑀸𑀭𑀪𑀸𑀯𑁂𑀢𑀺 𑀲𑀸𑀫𑀺𑀓𑀪𑀸𑀯𑀸𑀬. 𑀓𑀺𑀜𑁆𑀘𑀸𑀧𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀚𑀸𑀭𑀻 𑀪𑀯𑀺𑀲𑁆𑀲𑀲𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁, 𑀚𑀸𑀭𑀢𑁆𑀢𑀦𑁂𑀢𑀺 𑀧𑀦 𑀦𑀺𑀤𑁆𑀤𑁂𑀲𑀲𑁆𑀲 𑀉𑀪𑀬𑀮𑀺𑀗𑁆𑀕𑀲𑀸𑀥𑀸𑀭𑀡𑀢𑁆𑀢𑀸 𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑀧𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 ‘‘𑀚𑀸𑀭𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀺 𑀦𑀸𑀫. 𑀧𑀸𑀴𑀺𑀬𑀁 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦𑁂𑀯 𑀬𑁄𑀚𑀦𑀸 𑀓𑀢𑀸, 𑀢𑀤𑀦𑀼𑀲𑀸𑀭𑁂𑀦 𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑀧𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺.

𑀇𑀤𑀸𑀦𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀢𑀺 𑀪𑀯𑀺𑀲𑁆𑀲𑀲𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀚𑀸𑀭𑀢𑁆𑀢𑀦𑁂𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀉𑀪𑀬𑀮𑀺𑀗𑁆𑀕𑀲𑀸𑀥𑀸𑀭𑀡𑀢𑁆𑀢𑀸 𑀯𑀼𑀢𑁆𑀢𑀁. 𑀫𑀼𑀳𑀼𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀲𑀻𑀢𑀺 𑀅𑀲𑀸𑀫𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀚𑀸𑀭𑀻 𑀪𑀯𑀺𑀲𑁆𑀲𑀲𑀻𑀢𑀺 𑀲𑀲𑀸𑀫𑀺𑀓𑀁 𑀲𑀦𑁆𑀥𑀸𑀬. 𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁂𑀦𑁂𑀯𑀼𑀧𑀸𑀬𑁂𑀦𑀸’’𑀢𑀺𑀆𑀤𑀺.

𑁩𑁦𑁩. 𑀲𑁂𑀭𑀺𑀯𑀺𑀳𑀸𑀭𑀦𑁆𑀢𑀺 𑀲𑀘𑁆𑀙𑀦𑁆𑀤𑀘𑀸𑀭𑀁. 𑀅𑀢𑁆𑀢𑀦𑁄 𑀯𑀲𑀦𑁆𑀢𑀺 𑀅𑀢𑁆𑀢𑀦𑁄 𑀆𑀡𑀁. 𑀕𑁄𑀢𑁆𑀢𑀦𑁆𑀢𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀺𑀓𑀁 𑀕𑁄𑀢𑁆𑀢𑀁. 𑀥𑀫𑁆𑀫𑁄𑀢𑀺 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁, 𑀢𑁂𑀲𑀁 𑀢𑁂𑀲𑀁 𑀯𑀸 𑀓𑀼𑀮𑀸𑀦𑀁 𑀥𑀫𑁆𑀫𑁄. 𑀕𑁄𑀢𑁆𑀢𑀯𑀦𑁆𑀢𑁂𑀲𑀼 𑀕𑁄𑀢𑁆𑀢𑀲𑀤𑁆𑀤𑁄, 𑀥𑀫𑁆𑀫𑀘𑀸𑀭𑀻𑀲𑀼 𑀘 𑀥𑀫𑁆𑀫𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀕𑁄𑀢𑁆𑀢𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀕𑁄𑀢𑁆𑀢𑁂𑀳𑀻𑀢𑀺 𑀲𑀫𑀸𑀦𑀕𑁄𑀢𑁆𑀢𑁂𑀳𑀺, 𑀏𑀓𑀯𑀁𑀲𑀚𑀸𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀳𑀥𑀫𑁆𑀫𑀺𑀓𑁂𑀳𑀻𑀢𑀺 𑀏𑀓𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑁂 𑀲𑀳𑀘𑀭𑀺𑀢𑀩𑁆𑀩𑀥𑀫𑁆𑀫𑁂𑀳𑀺, 𑀲𑀫𑀸𑀦𑀓𑀼𑀮𑀥𑀫𑁆𑀫𑁂𑀳𑀺 𑀯𑀸. 𑀢𑁂𑀦𑁂𑀯𑀸𑀳 ‘‘𑀏𑀓𑀁 𑀲𑀢𑁆𑀣𑀸𑀭’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀏𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀻’’𑀢𑀺 𑀇𑀫𑀺𑀦𑀸 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀯𑀼𑀢𑁆𑀢𑀸, 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀻𑀢𑀺 𑀫𑀸𑀮𑀸𑀓𑀸𑀭𑀸𑀤𑀺𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺.

𑀲𑀲𑀸𑀫𑀺𑀓𑀸 ¶ 𑀲𑀸𑀭𑀓𑁆𑀔𑀸. 𑀬𑀲𑁆𑀲𑀸 𑀕𑀫𑀦𑁂 𑀭𑀜𑁆𑀜𑀸 𑀤𑀡𑁆𑀟𑁄 𑀞𑀧𑀺𑀢𑁄, 𑀲𑀸 𑀲𑀧𑀭𑀺𑀤𑀡𑁆𑀟𑀸. 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺 𑀢𑀸𑀲𑀁 𑀲𑀲𑀸𑀫𑀺𑀓𑀪𑀸𑀯𑀢𑁄. 𑀦 𑀇𑀢𑀭𑀸𑀲𑀦𑁆𑀢𑀺 𑀇𑀢𑀭𑀸𑀲𑀁 ¶ 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀧𑀼𑀭𑀺𑀲𑀦𑁆𑀢𑀭𑀕𑀫𑀦𑁂 𑀦𑀢𑁆𑀣𑀺 𑀫𑀺𑀘𑁆𑀙𑀸𑀘𑀸𑀭𑁄 𑀢𑀸𑀲𑀁 𑀅𑀲𑀸𑀫𑀺𑀓𑀪𑀸𑀯𑀢𑁄. 𑀬𑀸 𑀳𑀺 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀓𑀁 𑀨𑀲𑁆𑀲𑀁 𑀣𑁂𑀦𑁂𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀸𑀲𑀁 𑀫𑀺𑀘𑁆𑀙𑀸𑀘𑀸𑀭𑁄, 𑀦 𑀘 𑀫𑀸𑀢𑀸𑀤𑀬𑁄 𑀢𑀸𑀲𑀁 𑀨𑀲𑁆𑀲𑁂 𑀇𑀲𑁆𑀲𑀭𑀸. 𑀫𑀸𑀢𑀸𑀤𑀬𑁄 𑀳𑀺 𑀦 𑀅𑀢𑁆𑀢𑀦𑀸 𑀨𑀲𑁆𑀲𑀸𑀦𑀼𑀪𑀯𑀦𑀢𑁆𑀣𑀁 𑀢𑀸 𑀭𑀓𑁆𑀔𑀦𑁆𑀢𑀺, 𑀓𑁂𑀯𑀮𑀁 𑀅𑀦𑀸𑀘𑀸𑀭𑀁 𑀦𑀺𑀲𑁂𑀥𑁂𑀦𑁆𑀢𑀸 𑀧𑀼𑀭𑀺𑀲𑀦𑁆𑀢𑀭𑀕𑀫𑀦𑀁 𑀢𑀸𑀲𑀁 𑀯𑀸𑀭𑁂𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀧𑀦 𑀏𑀢𑀸𑀲𑀼 𑀅𑀝𑁆𑀞𑀲𑀼𑀧𑀺 𑀳𑁄𑀢𑀺𑀬𑁂𑀯 𑀫𑀺𑀘𑁆𑀙𑀸𑀘𑀸𑀭𑁄 𑀫𑀸𑀢𑀸𑀤𑀻𑀳𑀺 𑀬𑀣𑀸 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀓𑀧𑁆𑀧𑁂𑀢𑀺, 𑀢𑀣𑀸 𑀭𑀓𑁆𑀔𑀺𑀢𑀢𑁆𑀢𑀸 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀨𑀲𑁆𑀲𑀁 𑀣𑁂𑀦𑁂𑀢𑁆𑀯𑀸 𑀨𑀼𑀝𑁆𑀞𑀪𑀸𑀯𑀢𑁄.

𑀥𑀦𑁂𑀦 𑀓𑀻𑀢𑀸𑀢𑀺 𑀪𑀭𑀺𑀬𑀪𑀸𑀯𑀢𑁆𑀣𑀁 𑀥𑀦𑁂𑀦 𑀓𑀻𑀢𑀸. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀪𑁄𑀕𑁂𑀦𑀸𑀢𑀺 𑀪𑁄𑀕𑀳𑁂𑀢𑀼. 𑀪𑁄𑀕𑀢𑁆𑀣𑀜𑁆𑀳𑀺 𑀯𑀲𑀦𑁆𑀢𑀻 ‘‘𑀪𑁄𑀕𑀯𑀸𑀲𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀮𑀪𑀺𑀢𑁆𑀯𑀸𑀢𑀺 𑀬𑁄 𑀦𑀁 𑀯𑀸𑀲𑁂𑀢𑀺, 𑀢𑀲𑁆𑀲 𑀳𑀢𑁆𑀣𑀢𑁄 𑀮𑀪𑀺𑀢𑁆𑀯𑀸. 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑀸 𑀑𑀤𑀧𑀢𑁆𑀢𑀓𑀺𑀦𑀻. 𑀢𑁂𑀦𑀸𑀳 ‘‘𑀉𑀪𑀺𑀦𑁆𑀦’’𑀦𑁆𑀢𑀺𑀆𑀤𑀺. 𑀥𑀚𑁂𑀦 𑀆𑀳𑀝𑀸𑀢𑀺 𑀏𑀢𑁆𑀣 𑀥𑀚𑀬𑁄𑀕𑀢𑁄 𑀲𑁂𑀦𑀸𑀯 𑀥𑀚𑀲𑀤𑁆𑀤𑁂𑀦 𑀯𑀼𑀢𑁆𑀢𑀸, 𑀉𑀲𑁆𑀲𑀺𑀢𑀤𑁆𑀥𑀚𑀸𑀬 𑀲𑁂𑀦𑀸𑀬 𑀆𑀳𑀝𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀉𑀲𑁆𑀲𑀺𑀢𑀤𑁆𑀥𑀚𑀸𑀬𑀸’’𑀢𑀺𑀆𑀤𑀺.

𑁩𑁦𑁫. 𑀩𑀳𑀺𑀤𑁆𑀥𑀸 𑀯𑀺𑀫𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀜𑁆𑀜𑀢𑁆𑀣 𑀆𑀭𑁄𑀘𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀢𑀲𑁆𑀲𑀸 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑀼 𑀯𑀸 𑀫𑀸 𑀯𑀸, 𑀢𑀁𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂 𑀬𑁄𑀕𑁆𑀬𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀸𑀭𑀓𑀁 𑀤𑀸𑀭𑀺𑀓𑀜𑁆𑀘 𑀅𑀚𑀸𑀦𑀸𑀧𑁂𑀢𑁆𑀯𑀸 𑀢𑁂𑀲𑀁 𑀫𑀸𑀢𑀸𑀧𑀺𑀢𑀼𑀆𑀤𑀻𑀳𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁𑀬𑁂𑀯 𑀲𑀦𑁆𑀢𑀺𑀓𑀁 𑀲𑀸𑀲𑀦𑁂 𑀧𑁂𑀲𑀺𑀢𑁂𑀧𑀺 𑀳𑀭𑀡𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀉𑀤𑁆𑀤𑀺𑀲𑁆𑀲 𑀲𑀸𑀲𑀦𑀁 𑀧𑁂𑀲𑀺𑀢𑀁, 𑀢𑀁𑀬𑁂𑀯 𑀲𑀦𑁆𑀥𑀸𑀬 𑀢𑀲𑁆𑀲𑀸 𑀫𑀸𑀢𑀼𑀆𑀤𑀻𑀦𑀁 𑀆𑀭𑁄𑀘𑀺𑀢𑁂 𑀯𑀢𑁆𑀣𑀼𑀦𑁄 𑀏𑀓𑀢𑁆𑀢𑀸 𑀫𑀸𑀢𑀼𑀆𑀤𑀬𑁄𑀧𑀺 𑀔𑁂𑀢𑁆𑀢𑀫𑁂𑀯𑀸𑀢𑀺 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺 𑀉𑀤𑀸𑀳𑀝𑀁. 𑀇𑀫𑀺𑀦𑀸 𑀲𑀫𑁂𑀢𑀻𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀲𑀬𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀜𑁆𑀜𑁂𑀦 𑀅𑀦𑁆𑀢𑁂𑀯𑀸𑀲𑀺𑀆𑀤𑀺𑀦𑀸 𑀆𑀭𑁄𑀘𑀸𑀧𑁂𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀏𑀯𑀁 𑀢𑀲𑁆𑀲𑀸 𑀲𑀬𑀁 ¶ 𑀅𑀦𑀸𑀭𑁄𑀘𑁂𑀢𑁆𑀯𑀸 𑀆𑀭𑁄𑀘𑀦𑀢𑁆𑀣𑀁 𑀫𑀸𑀢𑀼𑀆𑀤𑀻𑀦𑀁 𑀯𑀤𑀦𑁆𑀢𑀲𑁆𑀲𑀧𑀺 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄𑀢𑀺. 𑀖𑀭𑀁 𑀦𑀬𑀢𑀻𑀢𑀺 𑀖𑀭𑀡𑀻. 𑀫𑀽𑀮𑀝𑁆𑀞𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀆𑀤𑀬𑁄 𑀲𑀸𑀲𑀦𑀧𑁂𑀲𑀦𑁂 𑀫𑀽𑀮𑀪𑀽𑀢𑀢𑁆𑀢𑀸 ‘‘𑀫𑀽𑀮𑀝𑁆𑀞𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀯𑀸 𑀥𑀻𑀢𑀼 𑀲𑀦𑁆𑀢𑀺𑀓𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀳𑁄𑀢𑀽’’𑀢𑀺 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺, 𑀧𑀼𑀭𑀺𑀲𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁 ‘‘𑀫𑀫 𑀥𑀻𑀢𑀸 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀳𑁄𑀢𑀽’’𑀢𑀺 𑀧𑀳𑀺𑀡𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸𑀢𑀺 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑁂 𑀯𑀼𑀢𑁆𑀢𑀦𑀬𑀢𑁆𑀢𑀸.

𑁩𑁩𑁮. 𑀏𑀢𑁆𑀢𑁄𑀯 𑀧𑀓𑁆𑀓𑀫𑀢𑀻𑀢𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀆𑀡𑀸𑀧𑀓𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸 𑀢𑀢𑁄𑀬𑁂𑀯 𑀧𑀓𑁆𑀓𑀫𑀢𑀺. 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦𑀸𑀢𑀺 𑀕𑀫𑀦𑀳𑁂𑀢𑀼𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀧𑀦 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸𑀧𑀺 ¶ 𑀓𑀺𑀜𑁆𑀘𑀺 𑀅𑀦𑀸𑀭𑁄𑀘𑁂𑀦𑁆𑀢𑁄 𑀦 𑀯𑀻𑀫𑀁𑀲𑀢𑀺 𑀦𑀸𑀫. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀇𑀤𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀢𑀺𑀧𑀺 𑀅𑀪𑀺𑀦𑀦𑁆𑀤𑀦𑁂 𑀲𑀸𑀲𑀦𑀁 𑀅𑀦𑀸𑀭𑁄𑀘𑁂𑀦𑁆𑀢𑁄 𑀧𑀦 𑀦 𑀯𑀻𑀫𑀁𑀲𑀢𑀺 𑀦𑀸𑀫. 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑁄 𑀢𑀲𑁆𑀲𑀸 𑀯𑀘𑀦𑀁 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀯𑀢𑁆𑀣𑀼𑀕𑀡𑀦𑀸𑀬𑀸𑀢𑀺 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀫𑀪𑀸𑀯𑁂 𑀲𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀯𑀢𑁆𑀣𑀽𑀦𑀁 𑀕𑀡𑀦𑀸𑀬. 𑀲𑀘𑁂 𑀧𑀦 𑀏𑀓𑀢𑁄 𑀅𑀥𑀺𑀓𑀸 𑀳𑁄𑀦𑁆𑀢𑀺, 𑀅𑀥𑀺𑀓𑀸𑀦𑀁 𑀕𑀡𑀦𑀸𑀬 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁩𑁯-𑁩𑁪𑁦. 𑀧𑀸𑀴𑀺𑀬𑀁 𑀘𑀢𑀼𑀢𑁆𑀣𑀯𑀸𑀭𑁂 𑀅𑀲𑀢𑀺𑀧𑀺 ‘‘𑀕𑀘𑁆𑀙𑀦𑁆𑀢𑁄 𑀦 𑀲𑀫𑁆𑀧𑀸𑀤𑁂𑀢𑀺, 𑀆𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑁂 𑀅𑀦𑀸𑀧𑀢𑁆𑀢𑀻’’𑀢𑀺. 𑀓𑀸𑀭𑀼𑀓𑀸𑀦𑀦𑁆𑀢𑀺 𑀯𑀟𑁆𑀠𑀓𑀻𑀆𑀤𑀻𑀦𑀁. 𑀢𑀘𑁆𑀙𑀓𑀅𑀬𑁄𑀓𑀸𑀭𑀢𑀦𑁆𑀢𑀯𑀸𑀬𑀭𑀚𑀓𑀦𑁆𑀳𑀸𑀧𑀺𑀢𑀓𑀸 𑀧𑀜𑁆𑀘 𑀓𑀸𑀭𑀯𑁄 ‘‘𑀓𑀸𑀭𑀼𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀭𑀽𑀧𑁂𑀦…𑀧𑁂… 𑀅𑀦𑀸𑀧𑀢𑁆𑀢𑀻𑀢𑀺 𑀢𑀸𑀤𑀺𑀲𑀁 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀮𑀁𑀯𑀘𑀦𑀻𑀬𑀸 𑀳𑁄𑀦𑁆𑀢𑀻𑀢𑀺 𑀤𑁂𑀲𑀘𑀸𑀭𑀺𑀢𑁆𑀢𑀯𑀲𑁂𑀦 𑀧𑀡𑁆𑀡𑀤𑀸𑀦𑀸𑀤𑀺𑀦𑀸 𑀧𑀭𑀺𑀘𑁆𑀘𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀡𑁆𑀡𑀢𑁆𑀢𑀺𑀁 ¶ 𑀧𑀦 𑀚𑀸𑀦𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸𑀢𑀺 𑀘 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀤𑀼𑀪𑀬𑀁 𑀧𑀦 𑀚𑀸𑀦𑀺𑀢𑁆𑀯𑀸 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀢𑀸𑀦𑁂𑀯 𑀢𑀻𑀡𑀺 𑀢𑀤𑀼𑀪𑀬𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀢𑀤𑀼𑀪𑀬𑀚𑀸𑀦𑀦𑀁 𑀯𑀢𑁆𑀢𑀩𑁆𑀩𑀁. 𑀪𑀺𑀓𑁆𑀔𑀼𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀤𑀺𑀦𑁆𑀦𑀁 𑀳𑀭𑀦𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺 𑀳𑁄𑀢𑀺, 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀘𑀺𑀢𑁆𑀢𑀓𑀢𑁆𑀢𑀸𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 ‘‘𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀜𑁆𑀘 𑀢𑀢𑁆𑀣 𑀢𑀢𑁆𑀣 𑀆𑀭𑁄𑀘𑀦𑀲𑁆𑀲𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁩𑁪𑁧. 𑀤𑀼𑀝𑁆𑀞𑀼𑀮𑁆𑀮𑀸𑀤𑀻𑀲𑀼𑀧𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀜𑁆𑀘𑀭𑀺𑀢𑁆𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀻 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀧𑀼𑀭𑀺𑀲𑁄 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀦 𑀬𑀓𑁆𑀔𑁄𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀯 𑀇𑀢𑁆𑀣𑀺𑀧𑀼𑀭𑀺𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀬𑁂𑀲𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸, 𑀦 𑀦𑀸𑀮𑀁𑀯𑀘𑀦𑀻𑀬𑀢𑀸, 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀻𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘𑀗𑁆𑀕𑀸𑀦𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀙𑀝𑁆𑀞𑁂 ¶ 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑁆𑀢𑀓𑁂𑀦 𑀤𑀸𑀭𑀼𑀆𑀤𑀺𑀦𑀸. 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀸𑀬𑁄𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀤𑀸𑀭𑀼𑀆𑀤𑀺𑀧𑁆𑀧𑀫𑀸𑀡𑀸𑀬𑁄. 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀧𑀼𑀭𑀺𑀲𑀁 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀭𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀬𑀸𑀘𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑀸𑀲𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀤𑀺𑀬𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯 ‘‘𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀘𑀦𑀢𑁄. 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀧𑀦 𑀤𑀸𑀲𑀁 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀦𑁆𑀢𑀲𑁆𑀲 𑀲𑀸𑀤𑀺𑀬𑀦𑀯𑀲𑁂𑀦 𑀤𑀼𑀓𑁆𑀓𑀝𑀁. 𑀲𑀓𑀓𑀫𑁆𑀫𑀁 𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑀺𑀓𑁆𑀔𑀸𑀧𑀤𑀭𑀓𑁆𑀔𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀣𑀸 𑀕𑀸𑀳𑀲𑁆𑀲𑀧𑀺 𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 ¶ 𑀲𑀩𑁆𑀩𑀲𑁄 𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀁. 𑀫𑀽𑀮𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑀲𑁆𑀫𑀸 𑀫𑀽𑀮𑀁 𑀤𑀲𑁆𑀲𑀸𑀫𑀸𑀢𑀺 𑀢𑁂𑀳𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, 𑀬𑀲𑁆𑀫𑀸 𑀘 𑀫𑀽𑀮𑀦𑁆𑀢𑀺 𑀪𑀡𑀺𑀢𑀁 𑀲𑀸𑀫𑀜𑁆𑀜𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀫𑀽𑀮𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀁. 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺𑀁 𑀅𑀲𑀸𑀤𑀺𑀬𑀦𑁆𑀢𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀢𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸𑀧𑀺 𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀘 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀅𑀢𑁆𑀣𑀻𑀢𑀺 𑀯𑀺𑀳𑁂𑀞𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺𑀤𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀣𑁂𑀯 𑀧𑀸𑀘𑁂𑀢𑁆𑀯𑀸𑀢𑀺 𑀳𑀢𑁆𑀣𑀓𑀫𑁆𑀫𑀯𑀲𑁂𑀦𑁂𑀯 𑀧𑀸𑀘𑁂𑀢𑁆𑀯𑀸. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀏𑀢𑁆𑀢𑀓𑁂𑀧𑀺 𑀧𑀼𑀘𑁆𑀙𑀺𑀢𑁂 𑀬𑀤𑀢𑁆𑀣𑀸𑀬 𑀧𑀯𑀺𑀝𑁆𑀞𑁄, 𑀢𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀢𑁆𑀢𑀸.

𑀯𑀢𑁆𑀢𑀦𑁆𑀢𑀺 𑀘𑀸𑀭𑀺𑀢𑁆𑀢𑀁, 𑀆𑀧𑀢𑁆𑀢𑀺 𑀧𑀦 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀸𑀔𑀸𑀬 𑀮𑀕𑁆𑀕𑀭𑀚𑀲𑁆𑀫𑀺𑀁 𑀧𑀢𑁆𑀢𑁂 𑀧𑀢𑀺𑀢𑁂𑀧𑀺 𑀲𑀸𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀢𑀸𑀬𑀧𑀺 𑀲𑀢𑀺 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀦𑀤𑀺𑀁 𑀯𑀸…𑀧𑁂… 𑀆𑀳𑀭𑀸’’𑀢𑀺 𑀯𑀢𑁆𑀣𑀼𑀁 𑀯𑀝𑁆𑀝𑀢𑀻𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀕𑁂𑀳𑀢𑁄…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀉𑀤𑀓𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀮𑀚𑁆𑀚𑀻𑀳𑀺…𑀧𑁂… 𑀦 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀉𑀢𑁆𑀢𑀭𑀺𑀪𑀗𑁆𑀕𑀸𑀥𑀺𑀓𑀸𑀭𑀢𑁆𑀢𑀸 𑀅𑀚𑁆𑀛𑁄𑀳𑀭𑀡𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀧𑀭𑀺𑀪𑁄𑀕𑁂𑀲𑀼 𑀧𑀦 𑀅𑀮𑀚𑁆𑀚𑀻𑀳𑀺𑀧𑀺 𑀳𑀢𑁆𑀣𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀕𑁄𑀡𑀁 𑀧𑀦…𑀧𑁂… 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀤𑀺𑀬𑀦𑁂𑀧𑀺 ¶ 𑀤𑀼𑀓𑁆𑀓𑀝𑀫𑁂𑀯 ‘‘𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀭𑀓𑁆𑀔𑀺𑀢𑁆𑀯𑀸𑀢𑀺 𑀬𑀣𑀸 𑀘𑁄𑀭𑀸 𑀦 𑀳𑀭𑀦𑁆𑀢𑀺, 𑀏𑀯𑀁 𑀭𑀓𑁆𑀔𑀺𑀢𑁆𑀯𑀸. 𑀚𑀕𑁆𑀕𑀺𑀢𑁆𑀯𑀸𑀢𑀺 𑀢𑀺𑀡𑀤𑀸𑀦𑀸𑀤𑀻𑀳𑀺 𑀚𑀕𑁆𑀕𑀺𑀢𑁆𑀯𑀸. 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑁄𑀡𑁂 𑀲𑀸𑀤𑀺𑀬𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀲𑀓𑀝𑀁 𑀤𑁂𑀣𑀸𑀢𑀺…𑀧𑁂… 𑀯𑀝𑁆𑀝𑀢𑀻𑀢𑀺 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀲𑀓𑀝𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀻𑀢𑀺 𑀢𑀸𑀯𑀓𑀸𑀮𑀺𑀓𑀁 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀏𑀲𑁂𑀯 𑀦𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁 ¶ . 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀼𑀬𑁂𑀯 𑀘 𑀯𑀮𑁆𑀮𑀺𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀴𑀼𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀫𑀢𑁆𑀢𑀺𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀁 𑀧𑀦 𑀯𑀢𑁆𑀣𑀼𑀯𑀲𑁂𑀦 𑀅𑀧𑁆𑀧𑀁 𑀳𑀼𑀢𑁆𑀯𑀸 𑀅𑀕𑁆𑀖𑀯𑀲𑁂𑀦 𑀫𑀳𑀦𑁆𑀢𑀁 𑀳𑀭𑀺𑀢𑀸𑀮𑀳𑀺𑀗𑁆𑀕𑀼𑀮𑀓𑀸𑀤𑀺, 𑀢𑀁 𑀕𑀭𑀼𑀪𑀡𑁆𑀟𑀁 𑀅𑀧𑁆𑀧𑀳𑁄𑀦𑁆𑀢𑀫𑁆𑀧𑀺 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀁 𑀧𑀭𑀸𑀫𑀲𑀢𑀺. 𑀲𑀸 𑀘 𑀇𑀥 𑀧𑀭𑀺𑀓𑀣𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁 𑀯𑀺𑀜𑁆𑀜𑀢𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀦 𑀲𑀩𑁆𑀩’’𑀦𑁆𑀢𑀺, 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀧𑀭𑀺𑀓𑀣𑀸𑀤𑀺𑀯𑀲𑁂𑀦𑀧𑀺 𑀯𑀺𑀜𑁆𑀜𑀸𑀧𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀤𑀻𑀧𑁂𑀢𑀺. 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀫𑁆𑀧𑀺 𑀳𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑁂𑀲𑀼 𑀤𑁆𑀯𑀻𑀲𑀼 𑀧𑀘𑁆𑀘𑀬𑁂𑀲𑀼 𑀦 𑀯𑀝𑁆𑀝𑀢𑀺. 𑀇𑀤𑀸𑀦𑀺 𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀜𑁆𑀜𑀢𑁆𑀢𑀺𑀁 𑀧𑀭𑀺𑀓𑀣𑀸𑀤𑀻𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀳𑀭 𑀤𑁂𑀳𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀝𑁆𑀝𑀦𑁆𑀢𑀻𑀢𑀺 𑀏𑀢𑁆𑀣 𑀧𑀭𑀺𑀓𑀣𑀸 𑀦𑀸𑀫 𑀧𑀭𑀺𑀬𑀸𑀬𑁂𑀦 𑀓𑀣𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀁 𑀲𑀫𑁆𑀩𑀸𑀥𑀦𑁆𑀢𑀺𑀆𑀤𑀺𑀯𑀘𑀦𑀁. 𑀑𑀪𑀸𑀲𑁄 𑀦𑀸𑀫 𑀉𑀚𑀼𑀓𑀫𑁂𑀯 𑀅𑀓𑀣𑁂𑀢𑁆𑀯𑀸 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑀺𑀪𑀽𑀢𑁄 𑀳𑁄𑀢𑀺, 𑀏𑀯𑀁 𑀑𑀪𑀸𑀲𑀦𑀁, 𑀉𑀧𑀸𑀲𑀓𑀸, 𑀢𑀼𑀫𑁆𑀳𑁂 𑀓𑀼𑀳𑀺𑀁 𑀯𑀲𑀣𑀸𑀢𑀺? 𑀧𑀸𑀲𑀸𑀤𑁂, 𑀪𑀦𑁆𑀢𑁂𑀢𑀺. 𑀪𑀺𑀓𑁆𑀔𑀽𑀦𑀁 𑀧𑀦, 𑀉𑀧𑀸𑀲𑀓𑀸, 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻𑀢𑀺𑀆𑀤𑀺𑀯𑀘𑀦𑀁. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀧𑀘𑁆𑀘𑀬𑁂 𑀉𑀤𑁆𑀤𑀺𑀲𑁆𑀲 𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁, 𑀲𑁂𑀦𑀸𑀲𑀦𑀢𑁆𑀣𑀁 𑀪𑀽𑀫𑀺𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 ‘‘𑀓𑀺𑀁, 𑀪𑀦𑁆𑀢𑁂, 𑀓𑀭𑁄𑀲𑀺, 𑀓𑁄 𑀓𑀸𑀭𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑁄𑀘𑀻’’𑀢𑀺𑀆𑀤𑀺𑀯𑀘𑀦𑀁.

𑀇𑀤𑀸𑀦𑀺 𑀕𑀺𑀮𑀸𑀦𑀧𑀘𑁆𑀘𑀬𑁂 𑀯𑀺𑀜𑁆𑀜𑀢𑁆𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀉𑀧𑁆𑀧𑀦𑁆𑀦𑀁 𑀧𑀦 𑀪𑁂𑀲𑀚𑁆𑀚𑀁 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀢𑀢𑁆𑀣 𑀯𑀺𑀦𑀬𑀥𑀭𑀸 ‘‘𑀪𑀕𑀯𑀢𑀸 𑀭𑁄𑀕𑀲𑀻𑀲𑁂𑀦 𑀧𑀭𑀺𑀪𑁄𑀕𑀲𑁆𑀲 𑀤𑁆𑀯𑀸𑀭𑀁 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀅𑀭𑁄𑀕𑀓𑀸𑀮𑁂𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀺𑀓𑀸 𑀧𑀦 ‘‘𑀓𑀺𑀜𑁆𑀘𑀸𑀧𑀺 ¶ 𑀆𑀧𑀢𑁆𑀢𑀺 𑀦 𑀳𑁄𑀢𑀺, 𑀆𑀚𑀻𑀯𑀁 𑀧𑀦 𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀲𑀮𑁆𑀮𑁂𑀔𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀝𑁆𑀝𑀢𑀺, 𑀲𑀮𑁆𑀮𑁂𑀔𑀁 𑀓𑁄𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀉𑀓𑁆𑀓𑀫𑀦𑁆𑀢𑀻𑀢𑀺 𑀅𑀧𑀕𑀘𑁆𑀙𑀦𑁆𑀢𑀺.

𑁩𑁪𑁪. 𑀫𑀡𑀺 𑀓𑀡𑁆𑀞𑁂 𑀅𑀲𑁆𑀲𑀸𑀢𑀺 𑀫𑀡𑀺𑀓𑀡𑁆𑀞𑁄, 𑀫𑀡𑀺𑀦𑀸 𑀉𑀧𑀮𑀓𑁆𑀔𑀺𑀢𑁄 𑀯𑀸 𑀓𑀡𑁆𑀞𑁄 𑀅𑀲𑁆𑀲𑀸𑀢𑀺 𑀫𑀡𑀺𑀓𑀡𑁆𑀞𑁄𑀢𑀺 𑀫𑀚𑁆𑀛𑀧𑀤𑀮𑁄𑀧𑀻𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀤𑁂𑀯𑀯𑀡𑁆𑀡𑀦𑁆𑀢𑀺 𑀤𑁂𑀯𑀢𑁆𑀢𑀪𑀸𑀯𑀁. 𑀧𑀲𑀦𑁆𑀦𑀸𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀁, 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀲𑀗𑁆𑀔𑀸𑀢𑀁 𑀉𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀡𑀺𑀬𑀸𑀘𑀦𑀸𑀬 𑀢𑀲𑁆𑀲 𑀅𑀦𑀸𑀕𑀫𑀦𑁂𑀦 ¶ 𑀅𑀢𑁆𑀢𑀦𑁄 𑀯𑀟𑁆𑀠𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺, 𑀫𑀦𑁆𑀢𑀧𑀤𑀦𑀻𑀳𑀸𑀭𑁂𑀦 𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁪𑁫. 𑀯𑀢𑁆𑀢𑀫𑀸𑀦𑀲𑀫𑀻𑀧𑁂𑀢𑀺 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀻𑀧𑁂 𑀅𑀢𑀻𑀢𑁂. 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀻𑀢𑀺 ‘‘𑀆𑀕𑀢𑁄𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀢𑁆𑀢𑀫𑀸𑀦𑀲𑀫𑀻𑀧𑀢𑁆𑀢𑀸 ‘‘𑀆𑀕𑀘𑁆𑀙𑀲𑀻’’𑀢𑀺 𑀏𑀯𑀁 𑀯𑀢𑁆𑀢𑀫𑀸𑀦𑀯𑁄𑀳𑀸𑀭𑁂𑀦 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀏𑀯 𑀦𑀬𑁄𑀢𑀺 ‘‘𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀕𑀘𑁆𑀙𑀸𑀫𑀻’’𑀢𑀺 𑀅𑀬𑀫𑁆𑀧𑀺 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺.

𑁩𑁪𑁮-𑁩𑁪𑁯. 𑀬𑀲𑁆𑀫𑀸 𑀧𑀦 𑀦 𑀲𑀓𑁆𑀓𑀸 𑀓𑁂𑀯𑀮𑀁 𑀬𑀸𑀘𑀦𑀸𑀬 𑀓𑀺𑀜𑁆𑀘𑀺 𑀓𑀸𑀢𑀼𑀁, 𑀢𑀲𑁆𑀫𑀸 ‘‘𑀲𑀬𑀁 𑀬𑀸𑀘𑀺𑀢𑀓𑁂𑀳𑀺 𑀉𑀧𑀓𑀭𑀡𑁂𑀳𑀻’’𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑁄 𑀯𑀼𑀢𑁆𑀢𑁄. 𑀉𑀤𑁆𑀥𑀁𑀫𑀼𑀔𑀁 𑀮𑀺𑀢𑁆𑀢𑀸 𑀉𑀮𑁆𑀮𑀺𑀢𑁆𑀢𑀸, 𑀅𑀥𑁄𑀫𑀼𑀔𑀁 𑀮𑀺𑀢𑁆𑀢𑀸 𑀅𑀯𑀮𑀺𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀉𑀤𑁆𑀥𑀁𑀫𑀼𑀔𑀁 𑀮𑀺𑀫𑁆𑀧𑀦𑁆𑀢𑀸 𑀬𑁂𑀪𑀼𑀬𑁆𑀬𑁂𑀦 𑀅𑀦𑁆𑀢𑁄 𑀮𑀺𑀫𑁆𑀧𑀦𑁆𑀢𑀺, 𑀅𑀥𑁄𑀫𑀼𑀔𑀁 𑀮𑀺𑀫𑁆𑀧𑀦𑁆𑀢𑀸 𑀘 𑀩𑀳𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀮𑁆𑀮𑀺𑀢𑁆𑀢𑀸𑀢𑀺 𑀅𑀦𑁆𑀢𑁄𑀮𑀺𑀢𑁆𑀢𑀸, 𑀅𑀯𑀮𑀺𑀢𑁆𑀢𑀸𑀢𑀺 𑀩𑀳𑀺𑀮𑀺𑀢𑁆𑀢𑀸’’𑀢𑀺. 𑀢𑀢𑁆𑀣 𑀉𑀮𑁆𑀮𑀺𑀢𑁆𑀢𑀸 𑀦𑀸𑀫 𑀞𑀧𑁂𑀢𑁆𑀯𑀸 𑀢𑀼𑀮𑀸𑀧𑀺𑀝𑁆𑀞𑀲𑀗𑁆𑀖𑀸𑀢𑀯𑀸𑀢𑀧𑀸𑀦𑀥𑀽𑀫𑀙𑀺𑀤𑁆𑀤𑀸𑀤𑀺𑀪𑁂𑀤𑀁 𑀅𑀮𑁂𑀧𑁄𑀓𑀸𑀲𑀁 𑀅𑀯𑀲𑁂𑀲𑁂 𑀮𑁂𑀧𑁄𑀓𑀸𑀲𑁂 𑀓𑀼𑀝𑁆𑀝𑁂𑀳𑀺 𑀲𑀤𑁆𑀥𑀺𑀁 𑀖𑀝𑁂𑀢𑁆𑀯𑀸 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀲𑀼𑀥𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀮𑀺𑀢𑁆𑀢𑀸. 𑀅𑀯𑀮𑀺𑀢𑁆𑀢𑀸 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀤𑀦𑀲𑁆𑀲 𑀩𑀳𑀺 𑀮𑀺𑀢𑁆𑀢𑀸. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀦𑀸𑀫 𑀢𑀣𑁂𑀯 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀢𑁆𑀢𑀸.

𑀩𑁆𑀬𑀜𑁆𑀚𑀦𑀁 𑀲𑀫𑁂𑀢𑀻𑀢𑀺 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀧𑀤𑀲𑁆𑀲 ‘‘𑀓𑀸𑀭𑀸𑀧𑁂𑀦𑁆𑀢𑁂𑀦𑀸’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦𑁂𑀯 𑀦𑀺𑀤𑁆𑀤𑁂𑀲𑀲𑁆𑀲 𑀓𑀢𑀢𑁆𑀢𑀸 𑀩𑁆𑀬𑀜𑁆𑀚𑀦𑀁 𑀲𑀫𑁂𑀢𑀺. 𑀬𑀤𑀺 𑀏𑀯𑀁 ‘‘𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀓𑀲𑁆𑀫𑀸 𑀢𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. ‘‘𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀓𑀭𑁄𑀦𑁆𑀢𑁂𑀦𑀧𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀉𑀪𑁄𑀧𑁂𑀢𑁂𑀢𑀺 𑀓𑀸𑀭𑀓𑀓𑀸𑀭𑀸𑀧𑀓𑀸. 𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀓𑀣𑀁 𑀲𑀗𑁆𑀕𑀳𑀺𑀢𑀸. 𑀦 𑀳𑀺 𑀓𑀸𑀭𑀬𑀫𑀸𑀦𑁄 𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀏𑀯𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀲𑁆𑀫𑀸 𑀓𑀭𑁄𑀦𑁆𑀢𑁂𑀦𑀧𑀺 𑀓𑀸𑀭𑀬𑀫𑀸𑀦𑁂𑀦𑀧𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀸𑀭𑀬𑀫𑀸𑀦𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀧𑀕𑁂𑀯 𑀓𑀭𑁄𑀦𑁆𑀢𑁂𑀦𑀸𑀢𑀺 𑀇𑀤𑀁 𑀅𑀢𑁆𑀣𑀢𑁄 ¶ 𑀆𑀕𑀢𑀫𑁂𑀯𑀸𑀢𑀺 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀢𑀢𑁄 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀫𑀸𑀦𑁄𑀧𑀺 𑀅𑀢𑁆𑀣𑁄 𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺. 𑀩𑁆𑀬𑀜𑁆𑀚𑀦𑀁 ¶ 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬𑀸𑀢𑀺 𑀬𑀲𑁆𑀫𑀸 ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀇𑀫𑀲𑁆𑀲 ‘‘𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀇𑀤𑀁 𑀧𑀭𑀺𑀬𑀸𑀬𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸𑀢𑀺 𑀧𑀤𑀢𑁆𑀣𑀯𑀲𑁂𑀦 𑀦𑀺𑀤𑁆𑀤𑁂𑀲𑁂 𑀓𑀢𑁂 𑀩𑁆𑀬𑀜𑁆𑀚𑀦𑀁 𑀯𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀫𑀢𑁆𑀢𑀫𑁂𑀯𑀸𑀢𑀺 𑀧𑀤𑀢𑁆𑀣𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀮𑀩𑁆𑀪𑀫𑀸𑀦𑀁 𑀅𑀢𑁆𑀣𑀫𑀢𑁆𑀢𑀫𑁂𑀯.

𑀉𑀤𑁆𑀤𑁂𑀲𑁄𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄. 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀅𑀧𑁆𑀧𑀫𑀸𑀡𑀁. ‘‘𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸’’𑀢𑀺 𑀅𑀯𑀢𑁆𑀯𑀸 𑀯𑀺𑀓𑀧𑁆𑀧𑀢𑁆𑀣𑀲𑁆𑀲 𑀯𑀸-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀏𑀓𑀢𑁄𑀪𑀸𑀕𑁂𑀦 𑀯𑀟𑁆𑀠𑀺𑀢𑁂𑀧𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀺𑀳𑀢𑁆𑀣𑀸𑀢𑀺 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀸. 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄𑀢𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑁄 𑀫𑀜𑁆𑀘𑁄. 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸𑀢𑀺 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡𑀬𑀼𑀢𑁆𑀢𑀸𑀯 𑀓𑀼𑀝𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀦 𑀯𑀝𑁆𑀝𑀢𑀺, 𑀧𑀫𑀸𑀡𑀢𑁄 𑀧𑀦 𑀊𑀦𑀢𑀭𑀸 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀧𑀺 𑀯𑀝𑁆𑀝𑀢𑀻𑀢𑀺 𑀓𑀲𑁆𑀲𑀘𑀺 𑀲𑀦𑁆𑀤𑁂𑀳𑁄 𑀲𑀺𑀬𑀸𑀢𑀺 𑀢𑀁𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀫𑀸𑀡𑀢𑁄 𑀊𑀦𑀢𑀭𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀊𑀦𑀢𑀭𑀁. 𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦 𑀘𑀢𑀼𑀳𑀢𑁆𑀣𑀢𑁄 𑀊𑀦𑀢𑀭𑀸 𑀓𑀼𑀝𑀺 𑀦𑀸𑀫 𑀦 𑀳𑁄𑀢𑀻𑀢𑀺 𑀘𑀢𑀼𑀳𑀢𑁆𑀣𑀢𑁄 𑀧𑀝𑁆𑀞𑀸𑀬 𑀓𑀼𑀝𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀓𑀼𑀝𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀳𑀢𑁆𑀣𑀁 𑀧𑀜𑁆𑀘𑀳𑀢𑁆𑀣𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀓𑀮𑀮𑀮𑁂𑀧𑁄𑀢𑀺 𑀓𑁂𑀦𑀘𑀺 𑀲𑀺𑀮𑁂𑀲𑁂𑀦 𑀓𑀢𑀮𑁂𑀧𑁄, 𑀢𑀫𑁆𑀩𑀫𑀢𑁆𑀢𑀺𑀓𑀸𑀤𑀺𑀓𑀮𑀮𑀮𑁂𑀧𑁄 𑀯𑀸. 𑀅𑀮𑁂𑀧𑁄 𑀏𑀯𑀸𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀺𑀝𑁆𑀞𑀲𑀗𑁆𑀖𑀸𑀝𑁄 𑀤𑁆𑀯𑀸𑀭𑀩𑀸𑀳𑀸. 𑀑𑀮𑁄𑀓𑁂𑀢𑁆𑀯𑀸𑀧𑀻𑀢𑀺 𑀅𑀧𑀮𑁄𑀓𑁂𑀢𑁆𑀯𑀸𑀧𑀺, 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁩. 𑀬𑀣𑀸 𑀲𑀻𑀳𑀸𑀤𑀻𑀦𑀁 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑁆𑀢𑀸𑀦𑀁 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄 𑀦 𑀯𑀝𑁆𑀝𑀢𑀺, 𑀏𑀯𑀁 𑀳𑀢𑁆𑀣𑀻𑀦𑀫𑁆𑀧𑀺 𑀦𑀺𑀩𑀤𑁆𑀥𑀕𑀫𑀦𑀫𑀕𑁆𑀕𑁄 𑀦 𑀯𑀝𑁆𑀝𑀢𑀺. 𑀏𑀢𑁂𑀲𑀦𑁆𑀢𑀺 𑀲𑀻𑀳𑀸𑀤𑀻𑀦𑀁. 𑀘𑀸𑀭𑀺𑀪𑀽𑀫𑀻𑀢𑀺 𑀕𑁄𑀘𑀭𑀪𑀽𑀫𑀺. 𑀦 𑀕𑀳𑀺𑀢𑀸𑀢𑀺 𑀦 𑀯𑀸𑀭𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀭𑁄𑀕𑁆𑀬𑀢𑁆𑀣𑀸𑀬𑀸𑀢𑀺 𑀦𑀺𑀭𑀼𑀧𑀤𑁆𑀤𑀯𑀢𑁆𑀣𑀸𑀬. 𑀲𑁂𑀲𑀸𑀦𑀻𑀢𑀺 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀸𑀤𑀻𑀦𑀺. 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀢𑁆𑀣 𑀧𑀼𑀩𑁆𑀩𑀡𑁆𑀡𑀯𑀺𑀭𑀼𑀳𑀦𑀝𑁆𑀞𑀸𑀦𑀁 𑀧𑀼𑀩𑁆𑀩𑀡𑁆𑀡-𑀲𑀤𑁆𑀤𑁂𑀦 𑀕𑀳𑀺𑀢𑀁. 𑀢𑁂𑀦𑀸𑀳 𑁋 ‘‘𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁…𑀧𑁂… 𑀞𑀺𑀢’’𑀦𑁆𑀢𑀺. 𑀅𑀪𑀺𑀳𑀦𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀩𑁆𑀪𑀸𑀖𑀸𑀢𑀁. ‘‘𑀯𑁂𑀭𑀺𑀖𑀭’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀘𑁄𑀭𑀸𑀦𑀁 𑀫𑀸𑀭𑀡𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀕𑀦𑁆𑀥𑀺𑀓𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀙𑀺𑀦𑁆𑀤𑀦𑀕𑀦𑁆𑀥𑀺𑀓𑀸.

𑀆𑀯𑀺𑀚𑁆𑀚𑀺𑀢𑀼𑀁 ¶ 𑀦 𑀲𑀓𑁆𑀓𑀸 𑀳𑁄𑀢𑀻𑀢𑀺 𑀙𑀺𑀦𑁆𑀤𑀢𑀝𑀸𑀤𑀺𑀲𑀫𑁆𑀪𑀯𑀢𑁄 𑀦 𑀲𑀓𑁆𑀓𑀸 𑀳𑁄𑀢𑀺 𑀆𑀯𑀺𑀚𑁆𑀚𑀺𑀢𑀼𑀁. 𑀧𑀸𑀘𑀺𑀦𑀦𑁆𑀢𑀺 𑀓𑀼𑀝𑀺𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀘𑀺𑀦𑀺𑀢𑀩𑁆𑀩𑀅𑀥𑀺𑀝𑁆𑀞𑀸𑀦𑀁. 𑀓𑀺𑀜𑁆𑀘𑀸𑀧𑀺 𑀇𑀥 𑀧𑀼𑀩𑁆𑀩𑀧𑀬𑁄𑀕𑀲𑀳𑀧𑀬𑁄𑀕𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀢𑁂𑀲𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 ¶ 𑀓𑀼𑀝𑀺𑀬𑀸 𑀪𑁂𑀤𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀘𑁆𑀙𑀦𑀢𑁆𑀣𑀸𑀬. 𑀏𑀯𑀁 𑀓𑀢𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀸 𑀓𑀢𑀁. 𑀤𑀸𑀭𑀼𑀦𑀸 𑀓𑀢𑀁 𑀓𑀼𑀝𑁆𑀝𑀁 𑀏𑀢𑁆𑀣𑀸𑀢𑀺 𑀤𑀸𑀭𑀼𑀓𑀼𑀝𑁆𑀝𑀺𑀓𑀸, 𑀓𑀼𑀝𑀺. 𑀲𑀺𑀮𑀸𑀓𑀼𑀝𑁆𑀝𑀺𑀓𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀡𑁆𑀡𑀲𑀸𑀮𑀦𑁆𑀢𑀺 𑀩𑀳𑀺 𑀧𑀡𑁆𑀡𑁂𑀳𑀺 𑀙𑀸𑀤𑁂𑀢𑀩𑁆𑀩𑀁 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀼𑀝𑀺𑀫𑁂𑀯 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀪𑀺𑀢𑁆𑀢𑀺𑀘𑁆𑀙𑀤𑀦𑀁 𑀮𑀺𑀫𑁆𑀧𑀺𑀲𑁆𑀲𑀸𑀫𑀻’’𑀢𑀺.

𑀅𑀦𑁆𑀢𑁄𑀮𑁂𑀧𑁂𑀦𑁂𑀯 𑀦𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀁 𑀲𑀦𑁆𑀥𑀸𑀬 ‘‘𑀅𑀦𑁆𑀢𑁄𑀮𑁂𑀧𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀺𑀮𑁂𑀧𑁂 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀁 𑀤𑁆𑀯𑀸𑀭𑀩𑀤𑁆𑀥𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸 𑀞𑀧𑀺𑀢𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲𑁄𑀓𑀸𑀲𑀦𑁆𑀢𑀺 𑀢𑀲𑁆𑀲 𑀤𑁆𑀯𑀸𑀭𑀩𑀤𑁆𑀥𑀲𑁆𑀲 𑀯𑀸 𑀯𑀸𑀢𑀧𑀸𑀦𑀲𑁆𑀲 𑀯𑀸 𑀑𑀓𑀸𑀲𑀁. 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀯𑀸𑀢𑀺 𑀧𑀼𑀩𑁆𑀩𑁂𑀯 𑀞𑀧𑀺𑀢𑁄𑀓𑀸𑀲𑀁 𑀔𑀼𑀤𑁆𑀤𑀓𑀁 𑀘𑁂, 𑀪𑁂𑀤𑀦𑁂𑀦 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸. 𑀮𑁂𑀧𑁄 𑀦 𑀖𑀝𑀺𑀬𑀢𑀻𑀢𑀺 𑀧𑀼𑀩𑁆𑀩𑁂 𑀤𑀺𑀦𑁆𑀦𑀮𑁂𑀧𑁄 𑀤𑁆𑀯𑀸𑀭𑀩𑀤𑁆𑀥𑁂𑀦 𑀯𑀸 𑀯𑀸𑀢𑀧𑀸𑀦𑁂𑀦 𑀯𑀸 𑀲𑀤𑁆𑀥𑀺𑀁 𑀦 𑀖𑀝𑀺𑀬𑀢𑀺, 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀤𑁆𑀯𑀸𑀭𑀩𑀤𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸. 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀮𑁂𑀧𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀤𑁆𑀯𑀸𑀭𑀩𑀤𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀞𑀧𑀦𑀢𑁄 𑀧𑀼𑀩𑁆𑀩𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁂𑀦 𑀅𑀧𑁆𑀧𑀢𑁆𑀢𑀘𑁆𑀙𑀤𑀦𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀏𑀯𑀁 𑀫𑁂 𑀆𑀧𑀢𑁆𑀢𑀺 𑀦 𑀲𑀺𑀬𑀸𑀢𑀺 𑀪𑀺𑀢𑁆𑀢𑀺𑀬𑀁 𑀯𑀸 𑀙𑀤𑀦𑁂 𑀯𑀸 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀑𑀓𑀸𑀲𑀁 𑀮𑁂𑀧𑁂𑀦 𑀅𑀖𑀝𑁂𑀢𑁆𑀯𑀸 𑀞𑀧𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑀫𑁂𑀯 𑀫𑀢𑁆𑀢𑀺𑀓𑀸𑀮𑁂𑀧𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀆𑀳 𑁋 ‘‘𑀲𑀘𑁂 𑀫𑀢𑁆𑀢𑀺𑀓𑀸𑀬 𑀓𑀼𑀝𑁆𑀝𑀁 𑀓𑀭𑁄𑀢𑀺, 𑀙𑀤𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀦𑁂 𑀆𑀧𑀢𑁆𑀢𑀻’’𑀢𑀺. 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀧𑀼𑀭𑀺𑀫𑀲𑁆𑀲 𑀮𑁂𑀧𑀲𑁆𑀲 𑀅𑀖𑀝𑀺𑀢𑀢𑁆𑀢𑀸 𑀤𑀼𑀢𑀺𑀬𑀲𑁆𑀲 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸𑀲𑀫𑁆𑀪𑀯𑀢𑁄 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀯𑀢𑁆𑀢𑀲𑀻𑀲𑁂𑀦 𑀢𑁂𑀦 𑀅𑀦𑀸𑀡𑀢𑁆𑀢𑁄 𑀢𑀲𑁆𑀲 𑀓𑀭𑁄𑀫𑀻𑀢𑀺 𑀓𑀭𑁄𑀢𑀺, 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀲𑀘𑁂 𑀢𑁂𑀦 𑀆𑀡𑀢𑁆𑀢𑁄 𑀓𑀭𑁄𑀢𑀺, 𑀫𑀽𑀮𑀝𑁆𑀞𑀲𑁆𑀲𑁂𑀯 𑀆𑀧𑀢𑁆𑀢𑀺.

𑁩𑁫𑁪. 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺 𑀦𑀸𑀫 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀯𑀸𑀭𑁂 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀘𑀢𑀼𑀓𑁆𑀓𑀁 𑀤𑁂𑀲𑀺𑀢𑀯𑀢𑁆𑀣𑀼𑀓𑀘𑀢𑀼𑀓𑁆𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀘𑀢𑀼𑀓𑁆𑀓𑀁 𑀧𑀫𑀸𑀡𑀺𑀓𑀘𑀢𑀼𑀓𑁆𑀓𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀘𑀢𑀼𑀓𑁆𑀓𑀁 𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑁆𑀧𑀫𑀸𑀡𑀺𑀓𑀘𑀢𑀼𑀓𑁆𑀓𑀦𑁆𑀢𑀺 ¶ 𑀙 𑀘𑀢𑀼𑀓𑁆𑀓𑀸𑀦𑀺, 𑀏𑀯𑀁 𑀲𑀫𑀸𑀤𑀺𑀲𑀢𑀺𑀯𑀸𑀭𑀸𑀤𑀻𑀲𑀼𑀧𑀺 𑀧𑀜𑁆𑀘𑀲𑀽𑀢𑀺 𑀙𑀢𑁆𑀢𑀺𑀁𑀲. 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀻𑀢𑀺 ‘‘𑀲𑀸𑀭𑀫𑁆𑀪𑁂 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂’’𑀢𑀺 𑀅𑀯𑀺𑀲𑁂𑀲𑁂𑀦 𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀢𑁆𑀢𑀸 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑁂𑀲𑀼𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀲𑀺𑀬𑀸𑀢𑀺 𑀫𑀺𑀘𑁆𑀙𑀸𑀕𑀸𑀳𑀦𑀺𑀯𑀢𑁆𑀢𑀦𑀢𑁆𑀣𑀁 𑀲𑀸𑀭𑀫𑁆𑀪𑁂 𑀅𑀧𑀭𑀺𑀓𑁆𑀓𑀫𑀦𑁂 𑀘 𑀤𑀼𑀓𑁆𑀓𑀝𑀁, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸𑀬 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸𑀬 𑀘 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀯𑀁 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺.

𑁩𑁫𑁫-𑁩𑁬𑁧. ‘‘𑀤𑁆𑀯𑀻𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦 𑀘 𑀯𑀘𑀦𑀩𑁆𑀬𑀢𑁆𑀢𑀬𑁂𑀦 𑀘 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑀻𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺…𑀧𑁂… 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. ‘‘𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀧𑁆𑀧𑀓𑀢𑀁 𑀓𑀼𑀝𑀺𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲𑀧𑀺 𑀆𑀤𑀺𑀢𑁄 ¶ 𑀧𑀝𑁆𑀞𑀸𑀬 𑀅𑀓𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀅𑀧𑀘𑀺𑀦𑀺𑀢𑀩𑁆𑀩𑀸𑀢𑀺 𑀯𑀺𑀤𑁆𑀥𑀁𑀲𑁂𑀢𑀩𑁆𑀩𑀸. 𑀪𑀽𑀫𑀺𑀲𑀫𑀁 𑀓𑀢𑁆𑀯𑀸𑀢𑀺 𑀓𑀼𑀝𑀺𑀯𑀢𑁆𑀣𑀼𑀲𑀫𑀁 𑀓𑀢𑁆𑀯𑀸.

𑁩𑁬𑁪. 𑀦 𑀳𑁂𑀢𑁆𑀣 𑀮𑁂𑀧𑁄 𑀖𑀝𑀺𑀬𑀢𑀻𑀢𑀺 𑀙𑀤𑀦𑀮𑁂𑀧𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀯𑀺𑀲𑀼𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀦 𑀲𑀘𑁂𑀧𑀺 𑀮𑁂𑀡𑀲𑁆𑀲 𑀅𑀦𑁆𑀢𑁄 𑀉𑀧𑀭𑀺𑀪𑀸𑀕𑁂 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀓𑀭𑀡𑀢𑁆𑀣𑀁 𑀮𑁂𑀧𑀁 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀮𑁂𑀧𑀤𑀸𑀦𑀯𑀲𑁂𑀦 𑀅𑀓𑀢𑀸 𑀇𑀝𑁆𑀞𑀓𑀸𑀤𑀺𑀕𑀼𑀳𑀸 𑀕𑀼𑀳𑀸 𑀦𑀸𑀫𑀸𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀙𑀸𑀤𑀺𑀢𑀓𑀼𑀝𑀺𑀓𑀸𑀯 𑀯𑀼𑀢𑁆𑀢𑀸𑀢𑀺 ‘‘𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 ‘‘𑀙𑀤𑀦𑀁 𑀤𑀡𑁆𑀟𑀓𑁂𑀳𑀻’’𑀢𑀺𑀆𑀤𑀺𑀦𑀸 𑀧𑀼𑀦 𑀢𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑀸 𑀓𑀼𑀝𑀺𑀓𑀸𑀯 𑀯𑀼𑀢𑁆𑀢𑀸. 𑀙𑀤𑀦𑀁 𑀤𑀡𑁆𑀟𑀓𑁂𑀳𑀺 𑀚𑀸𑀮𑀩𑀦𑁆𑀥𑀁 𑀓𑀢𑁆𑀯𑀸𑀢𑀺 𑀙𑀤𑀦𑀁 𑀤𑀻𑀖𑀢𑁄 𑀢𑀺𑀭𑀺𑀬𑀢𑁄 𑀘 𑀞𑀧𑀺𑀢𑀤𑀡𑁆𑀟𑀓𑁂𑀳𑀺 𑀚𑀸𑀮𑀁 𑀯𑀺𑀬 𑀩𑀦𑁆𑀥𑀺𑀢𑁆𑀯𑀸. 𑀑𑀕𑀼𑀫𑁆𑀨𑁂𑀢𑁆𑀯𑀸𑀢𑀺 𑀢𑀺𑀡𑀸𑀤𑀺𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸. 𑀪𑀺𑀢𑁆𑀢𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀮𑁂𑀧𑁂 𑀖𑀝𑀺𑀢𑁂𑀢𑀺 𑀏𑀢𑁆𑀣 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀪𑀸𑀯𑀲𑁆𑀲 𑀙𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀲𑀘𑁂𑀧𑀺 𑀪𑀺𑀢𑁆𑀢𑀺𑀮𑁂𑀧𑁂𑀦 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺, 𑀙𑀤𑀦𑀮𑁂𑀧𑁂 𑀲𑀫𑀦𑁆𑀢𑀢𑁄 𑀪𑀺𑀢𑁆𑀢𑀺𑀬𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀖𑀝𑀺𑀢𑁂 𑀪𑀺𑀢𑁆𑀢𑀺𑀮𑁂𑀧𑁂𑀦 𑀯𑀺𑀦𑀸𑀧𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀧𑀸𑀲𑀸𑀡𑀓𑀼𑀝𑁆𑀝𑀁 𑀓𑀢𑁆𑀯𑀸 𑀢𑀁 𑀅𑀮𑀺𑀫𑁆𑀧𑀺𑀢𑁆𑀯𑀸 𑀉𑀧𑀭𑀺 𑀮𑀺𑀫𑁆𑀧𑀢𑀺, 𑀮𑁂𑀧𑁄 𑀦 𑀖𑀝𑀺𑀬𑀢𑀺 𑀦𑀸𑀫, 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀢𑀁 𑀦 𑀲𑀫𑁂𑀢𑀺. 𑀢𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀪𑀺𑀢𑁆𑀢𑀺𑀁 𑀅𑀮𑀺𑀫𑁆𑀧𑀺𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀢𑁄 𑀙𑀤𑀦𑀮𑁂𑀧𑁂 𑀧𑀸𑀲𑀸𑀡𑀓𑀼𑀝𑁆𑀝𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑁂𑀧𑀺 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺, 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀁. ‘‘𑀉𑀧𑀘𑀺𑀓𑀸𑀫𑁄𑀘𑀦𑀢𑁆𑀣𑀫𑁂𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀲𑀸𑀡𑀓𑀼𑀝𑁆𑀝𑁂 𑀧𑀼𑀦 𑀮𑀺𑀫𑁆𑀧𑀺𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑁄𑀬𑁂𑀯 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑁂𑀯 ‘‘𑀢𑀁 𑀅𑀮𑀺𑀫𑁆𑀧𑀺𑀢𑁆𑀯𑀸’’𑀢𑀺 ¶ 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄…𑀧𑁂… 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄’’𑀢𑀺 𑀇𑀤𑀁 𑀲𑀢𑀺𑀧𑀺 𑀪𑀺𑀢𑁆𑀢𑀺𑀮𑁂𑀧𑁂 𑀙𑀤𑀦𑀮𑁂𑀧𑁂𑀦 𑀯𑀺𑀦𑀸 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀙𑀤𑀦𑀮𑁂𑀧𑀲𑁆𑀲 𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀪𑀺𑀢𑁆𑀢𑀺𑀮𑁂𑀧𑁂𑀦 𑀯𑀺𑀦𑀸𑀧𑀺 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀤𑀦𑁆𑀢𑀺, 𑀇𑀤𑀫𑁂𑀯 𑀘𑁂𑀢𑁆𑀣 𑀬𑀼𑀢𑁆𑀢𑀢𑀭𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀢𑀺𑀡𑀓𑀼𑀝𑀺𑀓𑀸𑀬.

𑀏𑀢𑁆𑀣 𑀘 𑀢𑀺𑀡𑀓𑀼𑀝𑀺𑀓𑀸𑀬 𑀏𑀯 𑀲𑀩𑁆𑀩𑀣𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑀲𑁆𑀲 𑀤𑀲𑁆𑀲𑀦𑀁 𑀧𑀭𑀺𑀯𑀸𑀭𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀢𑀺𑀡𑀓𑀼𑀝𑀺𑀓𑀸𑀬 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀲𑀼𑀔𑁂𑀦 𑀲𑀓𑁆𑀓𑀸 𑀲𑀸𑀥𑁂𑀢𑀼𑀦𑁆𑀢𑀺 𑀓𑀢𑀁. 𑀢𑀺𑀡𑀓𑀼𑀝𑀺𑀓𑀸𑀬 𑀘 𑀲𑀩𑁆𑀩𑀣𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑁂 𑀲𑀸𑀥𑀺𑀢𑁂 𑀢𑁂𑀦𑁂𑀯 𑀦𑀬𑁂𑀦 𑀮𑁂𑀡𑀕𑀼𑀳𑀸𑀤𑀻𑀲𑀼𑀧𑀺 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀢𑁂𑀦𑁂𑀯 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀺𑀡𑀓𑀼𑀝𑀺𑀓𑀸𑀬 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁂 𑀲𑀸𑀥𑀺𑀢𑁂 𑀢𑁂𑀦𑁂𑀯 𑀦𑀬𑁂𑀦 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲𑀧𑀺 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑁄𑀬𑁂𑀯 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺, 𑀲𑀫𑀸𑀤𑀺𑀲𑀢𑀺 𑀘 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸𑀢𑀺, 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. ‘‘𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺 𑀧𑀸𑀴𑀺𑀬𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 ¶ 𑀓𑀭𑁄𑀦𑁆𑀢𑀲𑁆𑀲𑀧𑀺 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀓𑀝𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀇𑀫𑀁 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 ‘‘𑀬𑀁 𑀧𑀦…𑀧𑁂… 𑀅𑀓𑀭𑀡𑀧𑀘𑁆𑀘𑀬𑀸 𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲𑀧𑀺 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. ‘‘𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺 𑀇𑀤𑀁 𑀧𑀦 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀦 𑀲𑀸𑀭𑀫𑁆𑀪𑀸𑀤𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑀭𑀳𑀺 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬 𑀅𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀬𑀲𑁆𑀫𑀸 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀲𑀢𑀲𑁄𑀥𑀺𑀢𑀲𑀫𑁆𑀫𑀢𑁂 𑀘 𑀧𑀼𑀭𑀸𑀡𑀧𑁄𑀢𑁆𑀣𑀓𑁂 𑀅𑀬𑀫𑁂𑀯 𑀧𑀸𑀞𑀓𑁆𑀓𑀫𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀬𑀣𑀸𑀤𑀺𑀝𑁆𑀞𑀧𑀸𑀞𑀸𑀦𑀼𑀓𑁆𑀓𑀫𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀧𑀦 ‘‘𑀓𑀼𑀝𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀫𑁆𑀧𑀺 𑀓𑀼𑀝𑀺𑀁…𑀧𑁂… 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺𑀧𑀸𑀞𑀁 𑀮𑀺𑀔𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀧𑀸𑀓𑀝𑁄𑀬𑁂𑀯. 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀯𑀸𑀢𑀺 𑀉𑀧𑁄𑀲𑀣𑀸𑀕𑀸𑀭𑀜𑁆𑀘 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀻𑀢𑀺𑀆𑀤𑀻𑀲𑀼 𑀯𑀸𑀲𑀸𑀕𑀸𑀭𑀢𑁆𑀣𑀸𑀬 𑀏𑀯 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀯𑀸.

𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑀼𑀝𑀺𑀓𑀭𑀡𑀮𑀓𑁆𑀔𑀡𑀸 ¶ 𑀓𑀺𑀭𑀺𑀬𑀸𑀬𑁂𑀯, 𑀅𑀤𑁂𑀲𑀺𑀢𑀯𑀢𑁆𑀣𑀼𑀫𑀽𑀮𑀺𑀓𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀫𑀽𑀮𑀺𑀓𑀸𑀬𑀧𑀺, 𑀢𑀤𑀼𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀁 𑀅𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀬𑀼𑀢𑁆𑀢𑀁 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀅𑀓𑀺𑀭𑀺𑀬𑀸𑀬 𑀓𑀼𑀝𑀺𑀓𑀭𑀡𑀓𑀺𑀭𑀺𑀬𑀸𑀬 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄𑀯 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀅𑀚𑀸𑀦𑀦𑀘𑀺𑀢𑁆𑀢𑁂𑀦 𑀅𑀘𑀺𑀢𑁆𑀢𑀓𑀁. 𑀉𑀮𑁆𑀮𑀺𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑀸, 𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑀲𑀫𑁆𑀪𑀯𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀢𑀸, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀯𑀸𑀲𑀸𑀕𑀸𑀭𑀢𑀸, 𑀮𑁂𑀧𑀖𑀝𑁆𑀝𑀦𑀸𑀢𑀺 𑀇𑀫𑀸𑀦𑁂𑀢𑁆𑀣 𑀙 𑀯𑀸 𑀲𑀢𑁆𑀢 𑀯𑀸 𑀅𑀗𑁆𑀕𑀸𑀦𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁫. 𑀲𑀢𑁆𑀢𑀫𑁂 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂𑀢𑀺 𑀓𑁄𑀲𑀫𑁆𑀩𑀻𑀦𑀸𑀫𑀓𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑁄𑀲𑀫𑁆𑀩𑀭𑀼𑀓𑁆𑀔𑀸𑀯 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀓𑁄𑀲𑀫𑁆𑀩𑀻𑀢𑀺 𑀲𑀗𑁆𑀔𑁆𑀬𑀁 𑀅𑀕𑀫𑀸𑀲𑀺. 𑀓𑀼𑀲𑀼𑀫𑁆𑀩𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀫𑀸𑀧𑀺𑀢𑀢𑁆𑀢𑀸𑀢𑀺 𑀏𑀓𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀼𑀲𑀼𑀫𑁆𑀩𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀪𑀽𑀫𑀺 𑀓𑁄𑀲𑀫𑁆𑀩𑀻, 𑀢𑀲𑁆𑀲 𑀘 𑀅𑀯𑀺𑀤𑀽𑀭𑁂 𑀪𑀯𑀢𑁆𑀢𑀸 𑀦𑀕𑀭𑀁 𑀓𑁄𑀲𑀫𑁆𑀩𑀻𑀢𑀺 𑀲𑀗𑁆𑀔𑁆𑀬𑀁 𑀕𑀢𑀦𑁆𑀢𑀺. 𑀖𑁄𑀲𑀺𑀢𑀦𑀸𑀫𑀓𑁂𑀦 𑀓𑀺𑀭 𑀲𑁂𑀝𑁆𑀞𑀺𑀦𑀸 𑀲𑁄 𑀓𑀸𑀭𑀺𑀢𑁄𑀢𑀺 𑀏𑀢𑁆𑀣 𑀓𑁄 𑀖𑁄𑀲𑀺𑀢𑀲𑁂𑀝𑁆𑀞𑀺, 𑀓𑀣𑀜𑁆𑀘𑀸𑀦𑁂𑀦 𑀲𑁄 𑀆𑀭𑀸𑀫𑁄 𑀓𑀸𑀭𑀺𑀢𑁄𑀢𑀺? 𑀧𑀼𑀩𑁆𑀩𑁂 𑀓𑀺𑀭 𑀅𑀤𑁆𑀤𑀺𑀮𑀭𑀝𑁆𑀞𑀁 𑀦𑀸𑀫 𑀅𑀳𑁄𑀲𑀺. 𑀢𑀢𑁄 𑀓𑁄𑀢𑀽𑀳𑀮𑀓𑁄 𑀦𑀸𑀫 𑀤𑀮𑀺𑀤𑁆𑀤𑁄 𑀙𑀸𑀢𑀓𑀪𑀬𑁂𑀦 𑀲𑀧𑀼𑀢𑁆𑀢𑀤𑀸𑀭𑁄 𑀲𑀼𑀪𑀺𑀓𑁆𑀔𑀁 𑀭𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀧𑀼𑀢𑁆𑀢𑀁 ¶ 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀸𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀕𑀢𑀸. 𑀢𑁂 𑀏𑀓𑀁 𑀕𑁄𑀧𑀸𑀮𑀓𑀕𑀸𑀫𑀁 𑀧𑀯𑀺𑀲𑀺𑀁𑀲𑀼. 𑀕𑁄𑀧𑀸𑀮𑀓𑀸𑀦𑀜𑁆𑀘 𑀢𑀤𑀸 𑀩𑀳𑀼𑀧𑀸𑀬𑀸𑀲𑁄 𑀧𑀝𑀺𑀬𑀢𑁆𑀢𑁄 𑀳𑁄𑀢𑀺, 𑀢𑀢𑁄 𑀧𑀸𑀬𑀸𑀲𑀁 𑀮𑀪𑀺𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀲𑁄 𑀧𑀼𑀭𑀺𑀲𑁄 𑀩𑀳𑀼𑀢𑀭𑀁 𑀧𑀸𑀬𑀸𑀲𑀁 𑀪𑀼𑀢𑁆𑀢𑁄 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀦𑀔𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀓𑀼𑀓𑁆𑀓𑀼𑀭𑁄 𑀚𑀸𑀢𑁄, 𑀲𑁄 𑀕𑁄𑀧𑀸𑀮𑀓𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺. 𑀕𑁄𑀧𑀸𑀮𑀓𑁄 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀸𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀓𑀸𑀮𑁂 𑀓𑀼𑀓𑁆𑀓𑀼𑀭𑀲𑁆𑀲 𑀏𑀓𑀁 𑀧𑀺𑀡𑁆𑀟𑀁 𑀤𑁂𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑁄𑀧𑀸𑀮𑀓𑁂𑀦 𑀲𑀤𑁆𑀥𑀺𑀁 𑀧𑀡𑁆𑀡𑀲𑀸𑀮𑀫𑁆𑀧𑀺 𑀕𑀘𑁆𑀙𑀢𑀺, 𑀕𑁄𑀧𑀸𑀮𑀓𑁂 ¶ 𑀅𑀲𑀦𑁆𑀦𑀺𑀳𑀺𑀢𑁂 𑀪𑀢𑁆𑀢𑀯𑁂𑀮𑀸𑀬𑀁 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀓𑀸𑀮𑀸𑀭𑁄𑀘𑀦𑀢𑁆𑀣𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀪𑀼𑀲𑁆𑀲𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀺 𑀘𑀡𑁆𑀟𑀫𑀺𑀕𑁂 𑀤𑀺𑀲𑁆𑀯𑀸 𑀪𑀼𑀲𑁆𑀲𑀺𑀢𑁆𑀯𑀸 𑀧𑀮𑀸𑀧𑁂𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀫𑀼𑀤𑀼𑀓𑁂𑀦 𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀭𑀸𑀲𑁆𑀲 ‘‘𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑀲𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀅𑀧𑀼𑀢𑁆𑀢𑀓𑁄 𑀓𑀺𑀭 𑀲𑁂𑀝𑁆𑀞𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀥𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀚𑀸𑀢𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀖𑀸𑀢𑀸𑀧𑁂𑀢𑀼𑀁 𑀉𑀧𑀓𑁆𑀓𑀫𑀺. 𑀲𑁄 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀫𑀭𑀡𑀁 𑀅𑀧𑁆𑀧𑀢𑁆𑀯𑀸 𑀅𑀯𑀲𑀸𑀦𑁂 𑀏𑀓𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀮𑀤𑁆𑀥𑀚𑀻𑀯𑀺𑀓𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄. 𑀅𑀜𑁆𑀜𑁂𑀧𑀺 𑀓𑁄𑀲𑀫𑁆𑀩𑀺𑀬𑀁 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺, 𑀧𑀸𑀯𑀸𑀭𑀺𑀬𑀲𑁂𑀝𑁆𑀞𑀻𑀢𑀺 𑀤𑁆𑀯𑁂 𑀲𑁂𑀝𑁆𑀞𑀺𑀦𑁄 𑀅𑀢𑁆𑀣𑀺, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀢𑀬𑁄 𑀅𑀳𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀢𑁂𑀲𑀁 𑀲𑀳𑀸𑀬𑀓𑀸𑀦𑀁 𑀲𑁂𑀝𑁆𑀞𑀻𑀦𑀁 𑀓𑀼𑀮𑀽𑀧𑀓𑀸 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀧𑀩𑁆𑀩𑀢𑀧𑀸𑀤𑁂 𑀯𑀲𑀺𑀁𑀲𑀼. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀁 𑀫𑀦𑀼𑀲𑁆𑀲𑀧𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀯𑀸𑀭𑁂 𑀕𑀺𑀫𑁆𑀳𑀲𑀫𑀬𑁂 𑀫𑀦𑀼𑀲𑁆𑀲𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 𑀦𑀺𑀭𑀼𑀤𑀓𑀁 𑀫𑀳𑀸𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀦𑁆𑀢𑀸𑀭𑀧𑀭𑀺𑀬𑁄𑀲𑀸𑀦𑁂 𑀫𑀳𑀦𑁆𑀢𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀼𑀁 ‘‘𑀬𑀸𑀤𑀺𑀲𑁄 𑀅𑀬𑀁 𑀭𑀼𑀓𑁆𑀔𑁄, 𑀅𑀤𑁆𑀥𑀸 𑀏𑀢𑁆𑀣 𑀫𑀳𑁂𑀲𑀓𑁆𑀔𑀸𑀬 𑀤𑁂𑀯𑀢𑀸𑀬 𑀪𑀯𑀺𑀢𑀩𑁆𑀩𑀁, 𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀦𑁄 𑀧𑀸𑀦𑀻𑀬𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬𑀸’’𑀢𑀺. 𑀤𑁂𑀯𑀢𑀸 𑀇𑀲𑀻𑀦𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀇𑀫𑁂𑀲𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀯𑀺𑀝𑀧𑀦𑁆𑀢𑀭𑀢𑁄 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀁 𑀉𑀤𑀓𑀥𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀇𑀲𑀺𑀕𑀡𑁄 𑀭𑀚𑀢𑀓𑁆𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀯𑀝𑁆𑀝𑀺𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀤𑁂𑀯𑀢𑀸𑀬 𑀅𑀫𑁆𑀳𑀸𑀓𑀁 𑀧𑀭𑀺𑀪𑁄𑀕𑀼𑀤𑀓𑀁 𑀤𑀺𑀦𑁆𑀦𑀁, 𑀇𑀤𑀁 𑀧𑀦 𑀅𑀕𑀸𑀫𑀓𑀁 𑀫𑀳𑀸𑀭𑀜𑁆𑀜𑀁, 𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀦𑁄 𑀆𑀳𑀸𑀭𑀫𑁆𑀧𑀺 𑀤𑀤𑁂𑀬𑁆𑀬𑀸’’𑀢𑀺. 𑀤𑁂𑀯𑀢𑀸 𑀇𑀲𑀻𑀦𑀁 𑀉𑀧𑀓𑀧𑁆𑀧𑀦𑀯𑀲𑁂𑀦 𑀤𑀺𑀩𑁆𑀩𑀸𑀦𑀺 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀲𑀦𑁆𑀢𑀧𑁆𑀧𑁂𑀲𑀺.

𑀇𑀲𑀬𑁄 𑀘𑀺𑀦𑁆𑀢𑀬𑀺𑀁𑀲𑀼 ‘‘𑀤𑁂𑀯𑀢𑀸𑀬 𑀅𑀫𑁆𑀳𑀸𑀓𑀁 𑀧𑀭𑀺𑀪𑁄𑀕𑀼𑀤𑀓𑀫𑁆𑀧𑀺 𑀪𑁄𑀚𑀦𑀫𑁆𑀧𑀺 𑀲𑀩𑁆𑀩𑀁 𑀤𑀺𑀦𑁆𑀦𑀁, 𑀲𑀸𑀥𑀼 𑀯𑀢𑀲𑁆𑀲 ¶ , 𑀲𑀘𑁂 𑀦𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀬𑁆𑀬𑀸’’𑀢𑀺. 𑀤𑁂𑀯𑀢𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀉𑀧𑀟𑁆𑀠𑀓𑀸𑀬𑀁 𑀤𑀲𑁆𑀲𑁂𑀲𑀺. 𑀤𑁂𑀯𑀢𑁂 𑀫𑀳𑀢𑀻 𑀢𑁂 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑀸𑀲𑀻𑀢𑀺. 𑀦𑀸𑀢𑀺𑀫𑀳𑀦𑁆𑀢𑀁 𑀧𑀭𑀺𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺. 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀳𑀺 𑀤𑁂𑀯𑀢𑀸𑀬 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 ¶ 𑀓𑀺𑀭 𑀕𑁂𑀳𑁂 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀓𑀫𑁆𑀫𑀓𑀸𑀭𑁄 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀲𑁆𑀲 𑀳𑀺 𑀕𑁂𑀳𑁂 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀸𑀭𑁂 𑀉𑀧𑀸𑀤𑀸𑀬 𑀲𑀩𑁆𑀩𑁄 𑀚𑀦𑁄 𑀉𑀧𑁄𑀲𑀣𑀺𑀓𑁄 𑀳𑁄𑀢𑀺. 𑀏𑀓𑀤𑀺𑀯𑀲𑀁 𑀅𑀬𑀁 𑀓𑀫𑁆𑀫𑀓𑀸𑀭𑁄 𑀏𑀓𑀓𑁄𑀯 𑀧𑀸𑀢𑁄 𑀉𑀝𑁆𑀞𑀸𑀬 𑀓𑀫𑁆𑀫𑀦𑁆𑀢𑀁 𑀕𑀢𑁄. 𑀫𑀳𑀸𑀲𑁂𑀝𑁆𑀞𑀺 𑀦𑀺𑀯𑀸𑀧𑀁 𑀮𑀪𑀫𑀸𑀦𑀫𑀦𑀼𑀲𑁆𑀲𑁂 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀢𑀲𑁆𑀲𑁂𑀯𑁂𑀓𑀲𑁆𑀲 𑀅𑀭𑀜𑁆𑀜𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀅𑀲𑁆𑀲 𑀲𑀸𑀬𑀫𑀸𑀲𑀢𑁆𑀣𑀸𑀬 𑀦𑀺𑀯𑀸𑀧𑀁 𑀅𑀤𑀸𑀲𑀺. 𑀪𑀢𑁆𑀢𑀓𑀸𑀭𑀤𑀸𑀲𑀻 𑀏𑀓𑀲𑁆𑀲𑁂𑀯 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀅𑀭𑀜𑁆𑀜𑀢𑁄 𑀆𑀕𑀢𑀲𑁆𑀲 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀤𑀸𑀲𑀺. 𑀓𑀫𑁆𑀫𑀓𑀸𑀭𑁄 𑀘𑀺𑀦𑁆𑀢𑀬𑀺 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀕𑁂𑀳𑀁 𑀏𑀓𑀲𑀤𑁆𑀤𑀁 𑀅𑀳𑁄𑀲𑀺, 𑀅𑀚𑁆𑀚 𑀅𑀢𑀺𑀯𑀺𑀬 𑀲𑀦𑁆𑀦𑀺𑀲𑀺𑀦𑁆𑀦𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺. 𑀢𑀲𑁆𑀲 𑀲𑀸 𑀆𑀘𑀺𑀓𑁆𑀔𑀺 ‘‘𑀅𑀚𑁆𑀚 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀉𑀧𑁄𑀲𑀣𑀺𑀓𑀸, 𑀫𑀳𑀸𑀲𑁂𑀝𑁆𑀞𑀺 𑀢𑀼𑀬𑁆𑀳𑁂𑀯𑁂𑀓𑀲𑁆𑀲 𑀦𑀺𑀯𑀸𑀧𑀁 𑀅𑀤𑀸𑀲𑀻’’𑀢𑀺. 𑀏𑀯𑀁 𑀅𑀫𑁆𑀫𑀸𑀢𑀺. 𑀆𑀫 𑀲𑀸𑀫𑀻𑀢𑀺. ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀉𑀧𑁄𑀲𑀣𑀁 𑀲𑀫𑀸𑀤𑀺𑀦𑁆𑀦𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀁 𑀳𑁄𑀢𑀺, 𑀦 𑀳𑁄𑀢𑀻’’𑀢𑀺 𑀫𑀳𑀸𑀲𑁂𑀝𑁆𑀞𑀺𑀁 𑀧𑀼𑀘𑁆𑀙 𑀅𑀫𑁆𑀫𑀸𑀢𑀺. 𑀢𑀸𑀬 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 𑀫𑀳𑀸𑀲𑁂𑀝𑁆𑀞𑀺 𑀆𑀳 𑁋 ‘‘𑀲𑀓𑀮𑀉𑀧𑁄𑀲𑀣𑀓𑀫𑁆𑀫𑀁 𑀦 𑀳𑁄𑀢𑀺, 𑀉𑀧𑀟𑁆𑀠𑀓𑀫𑁆𑀫𑀁 𑀧𑀦 𑀳𑁄𑀢𑀺, 𑀉𑀧𑁄𑀲𑀣𑀺𑀓𑁄 𑀳𑁄𑀢𑀻’’𑀢𑀺. 𑀓𑀫𑁆𑀫𑀓𑀸𑀭𑁄 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀆𑀳𑀸𑀭𑀧𑀭𑀺𑀓𑁆𑀔𑀻𑀡𑀓𑀸𑀬𑀲𑁆𑀲 𑀭𑀢𑁆𑀢𑀺𑀁 𑀯𑀸𑀢𑁄 𑀓𑀼𑀧𑁆𑀧𑀺. 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀓𑀸𑀮𑀁 𑀓𑀢𑁆𑀯𑀸 𑀉𑀧𑀟𑁆𑀠𑀼𑀧𑁄𑀲𑀣𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀫𑀳𑀸𑀯𑀢𑁆𑀢𑀦𑀺𑀅𑀝𑀯𑀺𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀇𑀲𑀻𑀦𑀁 𑀆𑀭𑁄𑀘𑁂𑀲𑀺. 𑀇𑀲𑀬𑁄 𑀧𑀼𑀘𑁆𑀙𑀺𑀁𑀲𑀼 ‘‘𑀢𑀼𑀫𑁆𑀳𑁂𑀳𑀺 𑀫𑀬𑀁 ‘𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄’𑀢𑀺 𑀅𑀲𑁆𑀲𑀼𑀢𑀧𑀼𑀩𑁆𑀩𑀁 𑀲𑀸𑀯𑀺𑀢𑀸, 𑀉𑀧𑁆𑀧𑀦𑁆𑀦𑁄 𑀦𑀼 𑀔𑁄 𑀮𑁄𑀓𑁂 𑀩𑀼𑀤𑁆𑀥𑁄’’𑀢𑀺. 𑀆𑀫, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑁄𑀢𑀺. 𑀇𑀤𑀸𑀦𑀺 𑀓𑀼𑀳𑀺𑀁 𑀯𑀲𑀢𑀻𑀢𑀺. 𑀲𑀸𑀯𑀢𑁆𑀣𑀺𑀬𑀁 𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂, 𑀪𑀦𑁆𑀢𑁂𑀢𑀺. 𑀇𑀲𑀬𑁄 ‘‘𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀫𑀬𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑁄𑀲𑀫𑁆𑀩𑀻𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀫𑀳𑀸𑀲𑁂𑀝𑁆𑀞𑀺𑀦𑁄 ‘‘𑀇𑀲𑀬𑁄 𑀆𑀕𑀢𑀸’’𑀢𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀇𑀲𑀺𑀕𑀡𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀇𑀲𑀬𑁄 ‘‘𑀪𑀼𑀢𑁆𑀯𑀸𑀯 𑀕𑀘𑁆𑀙𑀸𑀫𑀸’’𑀢𑀺 𑀆𑀧𑀼𑀘𑁆𑀙𑀺𑀁𑀲𑀼. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀏𑀓𑀫𑁆𑀧𑀺 𑀫𑀸𑀲𑀁 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀘𑀢𑁆𑀢𑀸𑀭𑁄𑀧𑀺 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀕𑀘𑁆𑀙𑀣, 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑁂 𑀳𑀺𑀬𑁆𑀬𑁄 𑀆𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀯𑀤𑀣, 𑀓𑀺𑀁 𑀇𑀤𑀦𑁆𑀢𑀺. 𑀆𑀫 𑀕𑀳𑀧𑀢𑀬𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦 𑀔𑁄 𑀧𑀦 𑀲𑀓𑁆𑀓𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀚𑀸𑀦𑀺𑀢𑀼𑀁, 𑀢𑁂𑀦 𑀫𑀬𑀁 𑀢𑀼𑀭𑀺𑀢𑀸 𑀕𑀘𑁆𑀙𑀸𑀫𑀸𑀢𑀺 ¶ . 𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀆𑀕𑀘𑁆𑀙𑀸𑀫, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀣𑀸𑀢𑀺. ‘‘𑀢𑀼𑀫𑁆𑀳𑁂 𑀅𑀕𑀸𑀭𑀺𑀬𑀸 𑀦𑀸𑀫 𑀫𑀳𑀸𑀚𑀝𑀸, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀫𑀬𑀁 𑀧𑀼𑀭𑁂𑀢𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀏𑀓𑀝𑁆𑀞𑀸𑀦𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀅𑀯𑀲𑀺𑀢𑁆𑀯𑀸 𑀢𑀼𑀭𑀺𑀢𑀕𑀫𑀦𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁆𑀣 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀢𑁂𑀧𑀺 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀧𑀝𑁆𑀝𑀼𑀡𑁆𑀡𑀤𑀼𑀓𑀽𑀮𑀸𑀤𑀻𑀦𑀺 𑀘 𑀆𑀤𑀸𑀬 𑀓𑁄𑀲𑀫𑁆𑀩𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀲𑀸𑀫𑀦𑁆𑀢𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀺𑀡𑁆𑀡𑀫𑁆𑀧𑀺 𑀲𑀳𑀸𑀬𑀸𑀦𑀁 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑁂 𑀩𑀮𑀯𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼, 𑀧𑀼𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂𑀢𑀺 𑀏𑀯𑀁 𑀅𑀟𑁆𑀠𑀫𑀸𑀲𑀁 𑀤𑀸𑀦𑀁 𑀤𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀚𑀦𑀧𑀤𑀁 𑀆𑀕𑀫𑀦𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀁𑀲𑀼. 𑀪𑀕𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄 𑀕𑀳𑀧𑀢𑀬𑁄 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀆𑀳. ‘‘𑀏𑀢𑁆𑀢𑀸𑀯𑀢𑀸 𑀧𑀝𑀺𑀜𑁆𑀜𑀸 𑀤𑀺𑀦𑁆𑀦𑀸 𑀦𑀸𑀫 𑀳𑁄𑀢𑀻’’𑀢𑀺 𑀕𑀳𑀧𑀢𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀤𑀺𑀦𑁆𑀦𑀸 𑀦𑁄 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸’’𑀢𑀺 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑁄𑀲𑀫𑁆𑀩𑀺𑀁 𑀧𑀢𑁆𑀯𑀸 ‘‘𑀮𑁄𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀓𑀣𑀬𑀺𑀁𑀲𑀼. 𑀢𑀬𑁄 𑀚𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀭𑀸𑀫𑁂 𑀫𑀳𑀦𑁆𑀢𑀁 𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀲𑀼𑀁. 𑀢𑀢𑁆𑀣 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁄 𑀓𑀼𑀓𑁆𑀓𑀼𑀝𑀸𑀭𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑀸 𑀅𑀫𑁆𑀩𑀯𑀦𑁂 𑀓𑀸𑀭𑀺𑀢𑁄 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑀁 𑀦𑀸𑀫. 𑀖𑁄𑀲𑀺𑀢𑁂𑀦 𑀓𑀸𑀭𑀺𑀢𑁄 𑀖𑁄𑀲𑀺𑀢𑀸𑀭𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀖𑁄𑀲𑀺𑀢𑀦𑀸𑀫𑀓𑁂𑀦 𑀓𑀺𑀭 𑀲𑁂𑀝𑁆𑀞𑀺𑀦𑀸 𑀲𑁄 𑀓𑀸𑀭𑀺𑀢𑁄’’𑀢𑀺.

𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑁄, 𑀬𑀲𑁆𑀲 𑀘 𑀲𑀢𑁆𑀣𑀸𑀭𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀩𑁆𑀭𑀳𑁆𑀫𑀤𑀡𑁆𑀟𑁄 𑀆𑀡𑀢𑁆𑀢𑁄, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀸𑀓𑀙𑀦𑁆𑀦𑀲𑁆𑀲𑀸’’𑀢𑀺. 𑀇𑀫𑀺𑀦𑀸 𑀘 𑀬𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁮𑁯 𑀆𑀤𑀬𑁄) 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀑𑀯𑀤𑀺𑀬𑀫𑀸𑀦𑁄𑀧𑀺 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀓𑀡𑁆𑀞𑀦𑀸𑀴𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀭𑀡𑀪𑀬𑁂 𑀉𑀧𑁆𑀧𑀦𑁆𑀦𑁂 𑀕𑀢𑀺𑀦𑀺𑀫𑀺𑀢𑁆𑀢𑁂 𑀘 𑀉𑀧𑀝𑁆𑀞𑀺𑀢𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀭𑀳𑀢𑁆𑀢𑀁 ¶ 𑀧𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀬𑀁 𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀽𑀚𑀸𑀯𑀘𑀦𑀧𑁆𑀧𑀬𑁄𑀕𑁂 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀲𑁆𑀲𑀧𑀺 𑀇𑀘𑁆𑀙𑀺𑀢𑀢𑁆𑀢𑀸 𑀆𑀳 ‘‘𑀕𑀸𑀫𑀲𑁆𑀲 𑀯𑀸 𑀧𑀽𑀚𑀺𑀢’’𑀦𑁆𑀢𑀺. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀏𑀓𑁂𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀏𑀓𑁂𑀓𑁄 𑀪𑀸𑀕𑁄.

𑁩𑁬𑁬. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀦𑀪𑀸𑀯𑁄𑀢𑀺 𑀓𑁂𑀯𑀮𑀁 𑀓𑀺𑀭𑀺𑀬𑀸𑀫𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀯𑀢𑁆𑀣𑀼𑀦𑁄 𑀧𑀦 𑀅𑀤𑁂𑀲𑀦𑀸𑀬 𑀓𑀼𑀝𑀺𑀓𑀭𑀡𑀓𑀺𑀭𑀺𑀬𑀸𑀬 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁 ¶ . 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 ‘‘𑀅𑀬𑀁 𑀯𑀸 𑀲𑁄 𑀫𑀳𑀸𑀦𑀸𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀯𑀥𑀸𑀭𑀡𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁦. 𑀅𑀝𑁆𑀞𑀫𑁂 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀦𑁆𑀢𑀺 𑀤𑁆𑀯𑀸𑀭𑀧𑀸𑀲𑀸𑀤𑁂𑀦 𑀘 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀸𑀭𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀧𑀺𑀢𑀅𑀝𑁆𑀝𑀸𑀮𑀓𑁂𑀳𑀺 𑀘 𑀬𑀼𑀢𑁆𑀢𑀁. 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑁂 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀲𑀜𑁆𑀙𑀦𑁆𑀦𑀢𑁆𑀢𑀸 𑀘 𑀦𑀻𑀮𑁄𑀪𑀸𑀲𑀁. 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀫𑀦𑁄𑀭𑀫𑀁. 𑀓𑀸𑀴𑀓𑀯𑁂𑀲𑁂𑀦𑀸𑀢𑀺 𑀓𑀮𑀦𑁆𑀤𑀓𑀭𑀽𑀧𑁂𑀦. 𑀦𑀺𑀯𑀸𑀧𑀦𑁆𑀢𑀺 𑀪𑁄𑀚𑀦𑀁. 𑀢𑀦𑁆𑀢𑀺 𑀉𑀬𑁆𑀬𑀸𑀦𑀁. 𑀤𑀩𑁆𑀩𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀦𑁆𑀢𑀺 𑀤𑀩𑁆𑀩𑀢𑁆𑀣𑀫𑁆𑀪𑁂 𑀧𑀢𑀺𑀢𑀢𑁆𑀢𑀸 𑀤𑀩𑁆𑀩𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁄𑀲𑀓𑁆𑀓𑀦𑀓𑀸𑀮𑁂 𑀓𑀺𑀭 𑀲𑀢𑁆𑀢 𑀪𑀺𑀓𑁆𑀔𑀽 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂 𑀲𑀸𑀲𑀦𑁂 𑀅𑀕𑀸𑀭𑀯𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀥 𑀓𑀺𑀁 𑀓𑀭𑁄𑀫, 𑀏𑀓𑀫𑀦𑁆𑀢𑁂 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀉𑀘𑁆𑀘𑀁 𑀧𑀩𑁆𑀩𑀢𑀲𑀺𑀔𑀭𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀩𑀮𑀁 𑀚𑀸𑀦𑀦𑁆𑀢𑀸 ‘‘𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀦𑁆𑀢𑀼, 𑀚𑀻𑀯𑀺𑀢𑁂 𑀲𑀸𑀮𑀬𑀸 𑀑𑀢𑀭𑀦𑁆𑀢𑀼, 𑀫𑀸 𑀧𑀘𑁆𑀙𑀸𑀦𑀼𑀢𑀧𑁆𑀧𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑀸 𑀳𑁄𑀣, 𑀆𑀯𑀼𑀲𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀑𑀯𑀤𑀺𑀢𑁆𑀯𑀸 𑀘𑀺𑀢𑁆𑀢𑀭𑀼𑀘𑀺𑀬𑁂𑀲𑀼 𑀞𑀸𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀢𑀢𑁆𑀭𑁂𑀓𑁄 ¶ 𑀣𑁂𑀭𑁄 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀫𑀫 𑀓𑀺𑀘𑁆𑀘𑀁 𑀦𑀺𑀧𑁆𑀨𑀦𑁆𑀦𑀁, 𑀅𑀳𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀤𑁆𑀥𑀺𑀬𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄, 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣, 𑀪𑀺𑀓𑁆𑀔𑀸𑀘𑀸𑀭𑀓𑀺𑀘𑁆𑀘𑀁 𑀫𑀫𑀸𑀬𑀢𑁆𑀢𑀁 𑀳𑁄𑀢𑀼, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀓𑀺𑀁 𑀦𑀼 𑀫𑀬𑀁, 𑀆𑀯𑀼𑀲𑁄, 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀦𑁆𑀢𑀸 𑀏𑀯𑀁 𑀅𑀯𑀘𑀼𑀫𑁆𑀳 ‘‘𑀬𑁄 𑀧𑀞𑀫𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀪𑀺𑀓𑁆𑀔𑀁 𑀆𑀳𑀭𑀢𑀼, 𑀢𑁂𑀦𑀸𑀪𑀢𑀁 𑀲𑁂𑀲𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀢𑁆𑀣𑀺, 𑀆𑀯𑀼𑀲𑁄𑀢𑀺. 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀳𑁂𑀢𑀼𑀦𑀸𑀯 𑀮𑀪𑀺𑀢𑁆𑀣, 𑀫𑀬𑀫𑁆𑀧𑀺 𑀲𑀓𑁆𑀓𑁄𑀦𑁆𑀢𑀸 𑀯𑀝𑁆𑀝𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫, 𑀕𑀘𑁆𑀙𑀣 𑀢𑀼𑀫𑁆𑀳𑁂𑀢𑀺. 𑀣𑁂𑀭𑁄 𑀢𑁂 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀕𑀢𑁄. 𑀅𑀧𑀭𑁄𑀧𑀺 𑀣𑁂𑀭𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀇𑀢𑀭𑁂 𑀣𑁂𑀭𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀏𑀓𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀦𑀕𑀭𑁂 𑀭𑀸𑀚𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀧𑀘𑁆𑀘𑀦𑁆𑀢𑀺𑀫𑀭𑀝𑁆𑀞𑁂 ¶ 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀩𑀸𑀳𑀺𑀬𑀭𑀝𑁆𑀞𑁂 𑀓𑀼𑀝𑀼𑀫𑁆𑀩𑀺𑀬𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀭𑀸𑀚𑀕𑀳𑁂 𑀓𑀼𑀝𑀼𑀫𑁆𑀩𑀺𑀬𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄.

𑀅𑀬𑀁 𑀧𑀦 𑀤𑀩𑁆𑀩𑀢𑁆𑀣𑁂𑀭𑁄 𑀫𑀮𑁆𑀮𑀭𑀝𑁆𑀞𑁂 𑀅𑀦𑀼𑀧𑀺𑀬𑀦𑀕𑀭𑁂 𑀏𑀓𑀲𑁆𑀲 𑀫𑀮𑁆𑀮𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀫𑀸𑀢𑀸 𑀉𑀧𑀯𑀺𑀚𑀜𑁆𑀜𑀸 𑀓𑀸𑀮𑀫𑀓𑀸𑀲𑀺. 𑀫𑀢𑀲𑀭𑀻𑀭𑀁 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀤𑀸𑀭𑀼𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀅𑀤𑀁𑀲𑀼. 𑀅𑀕𑁆𑀕𑀺𑀯𑁂𑀕𑀲𑀦𑁆𑀢𑀢𑁆𑀢𑀁 𑀉𑀤𑀭𑀧𑀝𑀮𑀁 𑀤𑁆𑀯𑁂𑀥𑀸 𑀅𑀳𑁄𑀲𑀺. 𑀤𑀸𑀭𑀓𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀤𑀩𑁆𑀩𑀢𑁆𑀣𑀫𑁆𑀪𑁂 𑀦𑀺𑀧𑀢𑀺, 𑀢𑀁 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀅𑀬𑁆𑀬𑀺𑀓𑀸𑀬 𑀅𑀤𑀁𑀲𑀼. 𑀲𑀸 𑀢𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀻 𑀤𑀩𑁆𑀩𑀢𑁆𑀣𑀫𑁆𑀪𑁂 𑀧𑀢𑀺𑀢𑁆𑀯𑀸 𑀮𑀤𑁆𑀥𑀚𑀻𑀯𑀺𑀓𑀢𑁆𑀢𑀸 ‘‘𑀤𑀩𑁆𑀩𑁄’’𑀢𑀺 𑀢𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀩𑁆𑀩𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫’’𑀦𑁆𑀢𑀺.

𑀢𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀮𑁆𑀮𑀭𑀝𑁆𑀞𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀺𑀬𑀦𑀺𑀕𑀫𑀁 𑀧𑀢𑁆𑀯𑀸 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀢𑀺. 𑀤𑀩𑁆𑀩𑀓𑀼𑀫𑀸𑀭𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀅𑀳𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀬𑁆𑀬𑀺𑀓𑀁 𑀆𑀧𑀼𑀘𑁆𑀙𑀺. 𑀲𑀸 ‘‘𑀲𑀸𑀥𑀼 𑀢𑀸𑀢𑀸’’𑀢𑀺 𑀤𑀩𑁆𑀩𑀓𑀼𑀫𑀸𑀭𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀪𑀺𑀓𑁆𑀔𑀼 𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀩𑁆𑀩𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑁄 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄 ¶ 𑀧𑀞𑀫𑀓𑁂𑀲𑀯𑀝𑁆𑀝𑀺𑀬𑀸 𑀯𑁄𑀭𑁄𑀧𑀦𑀓𑁆𑀔𑀡𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺, 𑀤𑀼𑀢𑀺𑀬𑀸𑀬 𑀓𑁂𑀲𑀯𑀝𑁆𑀝𑀺𑀬𑀸 𑀑𑀭𑁄𑀧𑀺𑀬𑀫𑀸𑀦𑀸𑀬 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀢𑀢𑀺𑀬𑀸𑀬 𑀅𑀦𑀸𑀕𑀸𑀫𑀺𑀨𑀮𑁂, 𑀲𑀩𑁆𑀩𑀓𑁂𑀲𑀸𑀦𑀁 𑀧𑀦 𑀑𑀭𑁄𑀧𑀦𑀜𑁆𑀘 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀣𑁂𑀭𑁄 𑀓𑀺𑀭 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀦𑁆𑀢𑀺 𑀬𑀣𑀼𑀧𑀦𑀺𑀲𑁆𑀲𑀬𑀁 𑀢𑁂𑀦 𑀢𑁂𑀦 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺𑀆𑀤𑀺 𑀬𑀣𑀸𑀲𑀫𑁆𑀪𑀯𑀯𑀲𑁂𑀦 𑀯𑀼𑀢𑁆𑀢𑀁. 𑀕𑀼𑀡𑀚𑀸𑀢𑀦𑁆𑀢𑀺 ‘‘𑀬𑀜𑁆𑀘 𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀲𑀫𑀼𑀤𑀬𑀧𑁆𑀧𑀳𑀸𑀦𑀁 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸 𑀫𑀕𑁆𑀕𑀪𑀸𑀯𑀦𑀸𑀢𑀺 𑀏𑀓𑁂𑀓𑀲𑁆𑀲 𑀫𑀕𑁆𑀕𑀲𑁆𑀲 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦 𑀲𑁄𑀴𑀲𑀯𑀺𑀥𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸. 𑀢𑀢𑁄 𑀢𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀢𑀢𑁄 𑀢𑀢𑁄 𑀓𑀺𑀘𑁆𑀘𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀧𑀝𑀺𑀯𑀢𑁆𑀢𑀺𑀢𑁆𑀯𑀸. 𑀲𑀺𑀮𑀸𑀧𑀝𑁆𑀝𑀓𑁂𑀢𑀺 𑀧𑀸𑀲𑀸𑀡𑀨𑀮𑀓𑁂. 𑀢𑁂𑀭𑀲𑀸𑀧𑀻𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀪𑀡𑁆𑀟𑀸𑀕𑀸𑀭𑀺𑀓𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀘𑀻𑀯𑀭𑀪𑀸𑀚𑀦𑀓𑀬𑀸𑀕𑀼𑀪𑀸𑀚𑀦𑀓𑀨𑀮𑀪𑀸𑀚𑀦𑀓𑀔𑀚𑁆𑀚𑀪𑀸𑀚𑀦𑀓𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑀆𑀭𑀸𑀫𑀺𑀓𑀧𑁂𑀲𑀓𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀦𑀁 ¶ 𑀯𑀲𑁂𑀦 𑀢𑁂𑀭𑀲𑀸𑀧𑀺 𑀲𑀫𑁆𑀫𑀼𑀢𑀺𑀬𑁄 𑀤𑀸𑀢𑀼𑀁 𑀯𑀝𑁆𑀝𑀦𑁆𑀢𑀺.

𑁩𑁮𑁨. 𑀅𑀧𑀺𑀲𑀽𑀢𑀺 𑀏𑀢𑁆𑀣 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀧𑀺-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 ‘‘𑀯𑀺𑀓𑀸𑀮𑁂’’𑀢𑀺 𑀇𑀫𑀲𑁆𑀲 𑀅𑀦𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑁄, 𑀯𑀺𑀓𑀸𑀮𑁂𑀧𑀺 𑀆𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀦𑁆𑀢𑀸𑀢𑀺 𑀤𑀽𑀭𑀪𑀸𑀯𑀁 𑀚𑀸𑀦𑀦𑁆𑀢𑀸. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀽𑀢𑀺 𑀏𑀢𑁆𑀣 𑀓𑀢𑀺𑀓𑀲𑀡𑁆𑀞𑀸𑀦𑀸𑀤𑀻𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑁆𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀢𑀺𑀓𑀯𑀢𑁆𑀢𑀸𑀤𑀻𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀣𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀘 𑀕𑀫𑀦𑀫𑀕𑁆𑀕𑁂 𑀲𑀫𑀧𑁆𑀧𑀫𑀸𑀡𑁂 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀳𑀺 𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀸𑀦𑀁 𑀅𑀬𑀁 ‘‘𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀥𑀫𑁆𑀫𑀢𑀸. 𑀢𑀣𑀸 𑀳𑀺 𑀬𑁂 𑀯𑀡𑁆𑀡𑀯𑀬𑀲𑀭𑀻𑀭𑀸𑀯𑀬𑀯𑀧𑀭𑀺𑀓𑁆𑀔𑀸𑀭𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀤𑀻𑀳𑀺 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀦𑀺𑀫𑁆𑀫𑀺𑀢𑀸 𑀳𑁄𑀦𑁆𑀢𑀺, 𑀢𑁂 𑀅𑀦𑀺𑀬𑀫𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀢𑁆𑀢𑀸 𑀇𑀤𑁆𑀥𑀺𑀫𑀢𑀸 𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀪𑀸𑀲𑀺𑀢𑀢𑀼𑀡𑁆𑀳𑀻𑀪𑀸𑀯𑀸𑀤𑀻𑀲𑀼 𑀯𑀸 𑀬𑀁 𑀬𑀁 𑀇𑀤𑁆𑀥𑀺𑀫𑀸 𑀓𑀭𑁄𑀢𑀺, 𑀢𑀁 𑀢𑀤𑁂𑀯 𑀓𑀭𑁄𑀦𑁆𑀢𑀺. 𑀲𑀘𑁂 𑀧𑀦 𑀦𑀸𑀦𑀧𑁆𑀧𑀓𑀸𑀭𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀓𑁂𑀘𑀺 𑀧𑀞𑀫𑀯𑀬𑁂, 𑀓𑁂𑀘𑀺 𑀫𑀚𑁆𑀛𑀺𑀫𑀯𑀬𑁂, 𑀓𑁂𑀘𑀺 𑀧𑀘𑁆𑀙𑀺𑀫𑀯𑀬𑁂, 𑀢𑀣𑀸 𑀤𑀻𑀖𑀓𑁂𑀲𑁂, 𑀉𑀧𑀟𑁆𑀠𑀫𑀼𑀡𑁆𑀟𑁂 ¶ , 𑀫𑀺𑀲𑁆𑀲𑀓𑀓𑁂𑀲𑁂, 𑀉𑀧𑀟𑁆𑀠𑀭𑀢𑁆𑀢𑀘𑀻𑀯𑀭𑁂, 𑀧𑀡𑁆𑀟𑀼𑀓𑀘𑀻𑀯𑀭𑁂, 𑀧𑀤𑀪𑀸𑀡𑀥𑀫𑁆𑀫𑀓𑀣𑀸𑀲𑀭𑀪𑀜𑁆𑀜𑀧𑀜𑁆𑀳𑀧𑀼𑀘𑁆𑀙𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀘𑀻𑀯𑀭𑀲𑀺𑀩𑁆𑀩𑀦𑀥𑁄𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂, 𑀅𑀧𑀭𑁂𑀧𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀞𑀫𑀯𑀬𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀓𑀸𑀭𑀸𑀬𑁂𑀯 𑀳𑁄𑀦𑁆𑀢𑀺. 𑀅𑀯𑀢𑁆𑀣𑀼𑀓𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀦𑀺𑀫𑁆𑀫𑀺𑀢𑀸𑀦𑀁 ‘‘𑀅𑀬𑀁 𑀫𑀜𑁆𑀘𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑀢𑁆𑀣𑀼𑀓𑀁 𑀦 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑀻𑀞𑀸𑀦𑀁 𑀲𑀫𑁆𑀪𑀯𑀢𑁄.

𑁩𑁮𑁩. 𑀏𑀓𑀘𑀸𑀭𑀺𑀓𑀪𑀢𑁆𑀢𑀦𑁆𑀢𑀺 𑀅𑀢𑀺𑀫𑀦𑀸𑀧𑀢𑁆𑀢𑀸 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀧𑀸𑀧𑁂𑀢𑀩𑁆𑀩𑀁 𑀪𑀢𑁆𑀢𑀁. 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦𑀸𑀢𑀺 𑀘𑀢𑁆𑀢𑀸𑀭𑀺 𑀧𑀭𑀺𑀫𑀸𑀡𑀫𑀲𑁆𑀲 𑀘𑀢𑀼𑀓𑁆𑀓𑀦𑁆𑀢𑀺 𑀏𑀯𑀁 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦. 𑀑𑀤𑀦𑀲𑁆𑀲 𑀧𑀼𑀘𑁆𑀙𑀸𑀬 𑀲𑀸𑀥𑀓𑀢𑀫𑀢𑁆𑀢𑀸 𑀆𑀳 𑁋 ‘‘𑀓𑀭𑀡𑀢𑁆𑀣𑁂𑀬𑁂𑀯 𑀓𑀭𑀡𑀯𑀘𑀦’’𑀦𑁆𑀢𑀺, 𑀑𑀤𑀦𑁂𑀦 𑀓𑀭𑀡𑀪𑀽𑀢𑁂𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂 𑀘 𑀑𑀤𑀦𑁂𑀦 𑀓𑀭𑀡𑀪𑀽𑀢𑁂𑀦 𑀧𑀼𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀧𑀼𑀘𑁆𑀙𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀓𑀺𑀁, 𑀪𑀦𑁆𑀢𑁂, 𑀑𑀤𑀦𑀁 𑀤𑁂𑀫𑀸𑀢𑀺 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀪𑀯𑁄𑀢𑀺 𑀪𑀯𑀺𑀢𑀩𑁆𑀩𑁄. 𑀅𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀆𑀪𑁄𑀕𑀁 𑀅𑀓𑀢𑁆𑀯𑀸. 𑀭𑀢𑁆𑀢𑀺𑀁 𑀲𑀫𑁆𑀫𑀦𑁆𑀢𑀬𑀫𑀸𑀦𑀸𑀢𑀺 𑀓𑀜𑁆𑀘𑀺 𑀓𑀸𑀮𑀁 𑀲𑀼𑀧𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀫𑁆𑀫𑀦𑁆𑀢𑀬𑀫𑀸𑀦𑀸. 𑀭𑀢𑁆𑀢𑀺𑀬𑀜𑁆𑀳𑀺 𑀧𑀞𑀫𑀬𑀸𑀫𑀫𑀚𑁆𑀛𑀺𑀫𑀬𑀸𑀫𑁂𑀲𑀼 𑀲𑀼𑀧𑀺𑀢𑁆𑀯𑀸 𑀧𑀩𑀼𑀤𑁆𑀥𑀸𑀦𑀁 𑀅𑀚𑁆𑀚𑀢𑀦𑀓𑀸𑀮𑁂𑀧𑀺 𑀅𑀦𑀚𑁆𑀚𑀢𑀦𑀸𑀪𑀺𑀫𑀸𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑁂 ‘‘𑀳𑀺𑀬𑁆𑀬𑁄’’𑀢𑀺 𑀆𑀳𑀁𑀲𑀼. 𑀬𑁂 𑀧𑀦 𑀭𑀢𑁆𑀢𑀺𑀬𑀁 𑀓𑀫𑁆𑀫𑀧𑁆𑀧𑀲𑀼𑀢𑀸 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀚𑁆𑀚𑀢𑀦𑀸𑀪𑀺𑀫𑀸𑀦𑁄𑀬𑁂𑀯, 𑀢𑀲𑁆𑀫𑀸 𑀢𑁂 ‘‘𑀅𑀚𑁆𑀚’’𑀇𑀘𑁆𑀘𑁂𑀯 𑀯𑁄𑀳𑀭𑀦𑁆𑀢𑀺, 𑀦 ‘‘𑀳𑀺𑀬𑁆𑀬𑁄’’𑀢𑀺. 𑀧𑀥𑀽𑀧𑀸𑀬𑀦𑁆𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀓𑀓𑁄𑀥𑀯𑀲𑁂𑀦 𑀧𑀥𑀽𑀧𑀸𑀬𑀦𑁆𑀢𑀸.

𑁩𑁮𑁪. 𑀤𑀩𑁆𑀩 ¶ 𑀤𑀩𑁆𑀩𑀸𑀢𑀺 𑀤𑀼𑀢𑀺𑀬𑁄 𑀤𑀩𑁆𑀩-𑀲𑀤𑁆𑀤𑁄 𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑁄𑀢𑀺 𑀆𑀳 ‘‘𑀤𑀩𑁆𑀩𑀸 𑀧𑀡𑁆𑀟𑀺𑀢𑀸’’𑀢𑀺. 𑀏𑀯𑀁 𑀦 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀅𑀢𑁆𑀢𑀸𑀦𑀁 𑀤𑁄𑀲𑀢𑁄 𑀫𑁄𑀘𑁂𑀦𑁆𑀢𑀺. 𑀯𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀫𑀜𑁆𑀜𑀫𑀸𑀦𑀸𑀢𑀺 𑀯𑀼𑀝𑁆𑀞𑀸𑀦𑀮𑀓𑁆𑀔𑀡𑀦𑁆𑀢𑀺 𑀫𑀜𑁆𑀜𑀫𑀸𑀦𑀸. 𑀦 𑀖𑀝𑀺𑀬𑀢𑀻𑀢𑀺 𑀣𑁂𑀭𑀲𑁆𑀲 𑀲𑀼𑀲𑀻𑀮𑀧𑀝𑀺𑀜𑁆𑀜𑀸𑀬 𑀢𑀲𑁆𑀲𑀸 𑀤𑀼𑀲𑁆𑀲𑀻𑀮𑀧𑀝𑀺𑀜𑁆𑀜𑀸𑀯𑀘𑀦𑀁 𑀦 𑀖𑀝𑀺𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀦𑀸𑀲𑁂𑀣𑀸𑀢𑀺 𑀲𑁂𑀢𑀓𑀁 𑀤𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀸𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀦𑀸𑀲𑀦𑀸 𑀳𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸. 𑀇𑀫𑀫𑁂𑀯 𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄 𑀦𑀸𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑀲𑁆𑀲 𑀅𑀓𑀭𑀡𑀁 𑀲𑀁𑀯𑀸𑀲𑀦𑀸𑀲𑀦𑀸. 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀦𑀸𑀫 𑀯𑀸𑀮𑀼𑀓𑀸𑀤𑀻𑀦𑀺 𑀑𑀓𑀺𑀭𑀺𑀢𑁆𑀯𑀸 𑀬𑀸𑀯 𑀔𑀫𑀸𑀧𑁂𑀢𑀺, 𑀢𑀸𑀯 𑀤𑀡𑁆𑀟𑀓𑀫𑁆𑀫𑀯𑀲𑁂𑀦 ¶ 𑀦𑀺𑀓𑁆𑀓𑀟𑁆𑀠𑀦𑀁. 𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲𑀸𑀢𑀺 𑀦𑀺𑀓𑁆𑀓𑀟𑁆𑀠𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀘𑀭𑀸𑀢𑀺 𑀕𑀘𑁆𑀙, 𑀅𑀧𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀺𑀭𑁂𑀢𑀺 𑀧𑀭 𑀅𑀫𑀸𑀫𑀓, 𑀅𑀫𑁆𑀳𑀸𑀓𑀁 𑀅𑀦𑀚𑁆𑀛𑀢𑁆𑀢𑀺𑀓𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀧𑀺𑀭𑁂𑀢𑀺 𑀳𑀺 𑀧𑀭-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀲𑀫𑁆𑀩𑁄𑀥𑀦𑀯𑀘𑀦𑀁. 𑀅𑀣 𑀯𑀸 𑀧𑀺𑀭𑁂𑀢𑀺 ‘‘𑀧𑀭𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀁, 𑀢𑀲𑁆𑀫𑀸 𑀘𑀭 𑀧𑀺𑀭𑁂𑀢𑀺 𑀧𑀭𑀢𑁄 𑀕𑀘𑁆𑀙, 𑀫𑀸 𑀇𑀥 𑀢𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀲𑁆𑀲𑀸𑀢𑀺 𑀅𑀤𑀲𑁆𑀲𑀦𑀁 𑀕𑀘𑁆𑀙.

𑀬𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀸𑀦𑀁 𑀅𑀧𑁆𑀧𑀓𑀸𑀲𑁂𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀅𑀦𑀼𑀬𑀼𑀜𑁆𑀚𑀣𑀸𑀢𑀺 𑀇𑀫𑀲𑁆𑀲 𑀕𑀯𑁂𑀲𑀣 𑀚𑀸𑀦𑀸𑀣𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀓𑀸𑀭𑀓𑁄 𑀳𑁄𑀢𑀻𑀢𑀺 ‘‘𑀅𑀬𑁆𑀬𑁂𑀦𑀫𑁆𑀳𑀺 𑀤𑀽𑀲𑀺𑀢𑀸’’𑀢𑀺 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀢𑀸𑀬 𑀧𑀝𑀺𑀜𑁆𑀜𑀸𑀬 𑀬𑀤𑀺 𑀦𑀸𑀲𑀺𑀢𑀸, 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺, 𑀲𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀅𑀓𑀸𑀭𑀓𑁄 𑀳𑁄𑀢𑀻𑀢𑀺 𑀢𑀸𑀬 𑀓𑀢𑀧𑀝𑀺𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑀤𑀺 𑀪𑀕𑀯𑀢𑀸 𑀧𑀓𑀢𑀺𑀤𑀼𑀲𑁆𑀲𑀻𑀮𑀪𑀸𑀯𑀁𑀬𑁂𑀯 𑀲𑀦𑁆𑀥𑀸𑀬 𑀲𑀸 𑀦𑀸𑀲𑀺𑀢𑀸, 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑁆𑀬𑁂𑀦𑀫𑁆𑀳𑀺 𑀤𑀽𑀲𑀺𑀢𑀸’’𑀢𑀺 𑀢𑀸𑀬 𑀓𑀢𑀧𑀝𑀺𑀜𑁆𑀜𑀸𑀬 𑀪𑀽𑀢𑀢𑀸 𑀆𑀧𑀚𑁆𑀚𑀢𑀻𑀢𑀺 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺 𑀲𑀤𑁄𑀲𑁄’’𑀢𑀺. 𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑀺𑀦𑀸 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑁂𑀲𑀼. 𑀇𑀢𑁄 𑀧𑀝𑁆𑀞𑀸𑀬 ‘‘𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀻’’𑀢𑀺 𑀯𑀘𑀦𑀧𑀭𑀺𑀬𑀦𑁆𑀢𑀁 𑀤𑁆𑀯𑀻𑀲𑀼𑀧𑀺 𑀅𑀝𑁆𑀞𑀓𑀣𑀸𑀲𑀼 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀢𑀺 ‘‘𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀅𑀝𑁆𑀞𑀓𑀣𑀸𑀦𑀬𑁂. 𑀤𑀼𑀓𑁆𑀓𑀝𑀫𑁂𑀯 𑀬𑀼𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀺𑀫𑀦𑀬𑁂𑀧𑀺 ‘‘𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀻𑀦𑀬𑁂𑀧𑀺 𑀫𑀼𑀲𑀸𑀯𑀸𑀤𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀻𑀢𑀺 𑀯𑀺𑀲𑀁𑀯𑀸𑀤𑀧𑀼𑀭𑁂𑀓𑁆𑀔𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 ¶ 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀘 𑀫𑀼𑀲𑀸𑀯𑀸𑀤𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀢𑀢𑁆𑀣 𑀲𑀢𑀺𑀧𑀺 𑀫𑀼𑀲𑀸𑀯𑀸𑀤𑁂 𑀯𑀘𑀦𑀧𑁆𑀧𑀫𑀸𑀡𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀑𑀫𑀲𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑁂𑀳𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀘𑀦𑀧𑁆𑀧𑀫𑀸𑀡𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀘𑀦𑀧𑁆𑀧𑀫𑀸𑀡𑀢𑁄𑀢𑀺 ¶ 𑀪𑀕𑀯𑀢𑀸 𑀯𑀼𑀢𑁆𑀢𑀧𑀸𑀴𑀺𑀯𑀘𑀦𑀧𑁆𑀧𑀫𑀸𑀡𑀢𑁄. 𑀇𑀤𑀸𑀦𑀺 𑀢𑀁 𑀯𑀘𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀯𑀘𑀦𑀁 𑀦𑀢𑁆𑀣𑀻𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀼𑀤𑁆𑀥𑀁𑀲𑀦𑁂 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀦𑁆𑀢𑀺 𑀯𑀘𑀦𑀁 𑀦𑀢𑁆𑀣𑀺 𑀢𑀣𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀘𑀦𑀫𑀢𑁆𑀣𑀻𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀤𑁆𑀯𑀻𑀲𑀼𑀧𑀺 𑀅𑀝𑁆𑀞𑀓𑀣𑀸𑀯𑀸𑀤𑁂𑀲𑀼 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑁆𑀯𑀸 𑀢𑁂𑀲𑀼 𑀧𑀘𑁆𑀙𑀺𑀫𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀭𑀺𑀫𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄 𑀆𑀘𑀭𑀺𑀬𑁄 ‘‘𑀢𑀢𑁆𑀭 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀢𑀺 ‘‘𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀬𑀼𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀯𑀸𑀤𑁂. 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 𑀅𑀲𑀢𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀑𑀓𑀸𑀲𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀢𑁄 𑀯𑀺𑀲𑀼𑀁 𑀅𑀜𑁆𑀜𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁂𑀳𑀺 𑀦𑀸𑀲𑀦𑀸 𑀦𑀢𑁆𑀣𑀻𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀇𑀫𑀺𑀲𑁆𑀲𑀸 𑀧𑀦 𑀤𑀼𑀓𑁆𑀓𑀝𑁂𑀦 𑀦𑀸𑀲𑀦𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀦𑀁 𑀪𑀕𑀯𑀸 𑀦𑀸𑀲𑁂𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺.

𑁩𑁮𑁫-𑁩𑁮𑁬. 𑀤𑀽𑀲𑀺𑀢𑁄𑀢𑀺 𑀤𑀼𑀝𑁆𑀞𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀁 𑀤𑀲𑁆𑀲𑁂𑀢𑀺. 𑀤𑀽𑀲𑀬𑀢𑀺 𑀧𑀭𑀁 𑀯𑀺𑀦𑀸𑀲𑁂𑀢𑀻𑀢𑀺 𑀤𑀽𑀲𑀓𑁄. 𑀇𑀫𑀺𑀦𑀸 ‘‘𑀤𑀽𑀲𑀬𑀢𑀻𑀢𑀺 𑀤𑁄𑀲𑁄’’𑀢𑀺 𑀤𑁄𑀲𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀸 𑀯𑀼𑀢𑁆𑀢𑀸. 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀺𑀢𑁄𑀢𑀺 𑀤𑀼𑀲𑀲𑀤𑁆𑀤𑀲𑁆𑀲 𑀯𑀺𑀓𑀢𑀺𑀬𑀁 𑀧𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀧𑀓𑀢𑀺𑀬𑀸 𑀲𑁄𑀫𑁆𑀫𑀪𑀸𑀯𑀁 𑀚𑀳𑀸𑀧𑀺𑀢𑁄𑀢𑀺 𑀅𑀢𑁆𑀣𑁄, 𑀯𑀺𑀓𑀸𑀭𑀫𑀸𑀧𑀸𑀤𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀓𑀸𑀭𑀦𑀸𑀦𑀢𑁆𑀢𑁂𑀦𑀸𑀢𑀺 𑀤𑀽𑀲𑀺𑀢𑀸𑀓𑀸𑀭𑀲𑁆𑀲 𑀤𑀽𑀲𑀓𑀸𑀓𑀸𑀭𑀲𑁆𑀲 𑀘 𑀦𑀸𑀦𑀢𑁆𑀢𑁂𑀦. 𑀅𑀦𑀪𑀺𑀭𑀤𑁆𑀥𑁄𑀢𑀺 𑀅𑀢𑀼𑀝𑁆𑀞𑁄. 𑀬𑁄 𑀧𑀦 𑀅𑀢𑀼𑀝𑁆𑀞𑁄, 𑀲𑁄 𑀲𑀼𑀔𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀆𑀳 ‘‘𑀦 𑀲𑀼𑀔𑀺𑀢𑁄’’𑀢𑀺. ‘‘𑀆𑀭𑀸𑀥𑀺𑀢𑁄 𑀭𑀸𑀚𑀸’’𑀢𑀺𑀆𑀤𑀻𑀲𑀼 𑀧𑀲𑀸𑀤𑀺𑀢𑁄𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 ‘‘𑀦 𑀯𑀸 𑀧𑀲𑀸𑀤𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀔𑀻𑀮𑀲𑀤𑁆𑀤𑁄 𑀣𑀤𑁆𑀥𑀪𑀸𑀯𑀯𑀘𑀦𑁄 𑀓𑀘𑀯𑀭𑀧𑀭𑀺𑀬𑀸𑀬𑁄 𑀘 𑀳𑁄𑀢𑀻𑀢𑀺 𑀆𑀳 𑁋 ‘‘𑀘𑀺𑀢𑁆𑀢𑀣𑀤𑁆𑀥𑀪𑀸𑀯𑀘𑀺𑀢𑁆𑀢𑀓𑀘𑀯𑀭𑀲𑀗𑁆𑀔𑀸𑀢𑀁 𑀧𑀝𑀺𑀖𑀔𑀻𑀮’’𑀦𑁆𑀢𑀺. 𑀔𑀻𑀮𑀬𑀢𑀺 𑀢𑁂𑀦 𑀘𑀺𑀢𑁆𑀢𑀁 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺 𑀔𑀻𑀮𑀁, 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄. 𑀲𑁄 𑀘 𑀅𑀢𑁆𑀣𑀢𑁄 𑀧𑀝𑀺𑀖𑁄𑀬𑁂𑀯. 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀮𑀓𑁆𑀔𑀡𑁄 𑀳𑀺 𑀧𑀝𑀺𑀖𑁄, 𑀢𑀲𑁆𑀫𑀺𑀜𑁆𑀘 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀁 𑀉𑀓𑁆𑀮𑀸𑀧𑀚𑀸𑀢𑀝𑁆𑀞𑀸𑀦𑀁 𑀯𑀺𑀬 𑀅𑀫𑀦𑀼𑀜𑁆𑀜𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀘𑀯𑀭𑀲𑀤𑀺𑀲𑀢𑁆𑀢𑀸𑀧𑀺 𑀧𑀝𑀺𑀖𑁄𑀯 ‘‘𑀔𑀻𑀮’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀝𑀺𑀖𑀔𑀻𑀮’’𑀦𑁆𑀢𑀺. 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀢𑁆𑀢𑀸 𑀓𑀘𑀯𑀭𑀲𑀤𑀺𑀲𑀢𑁆𑀢𑀸 𑀘 𑀧𑀝𑀺𑀖𑁄𑀬𑁂𑀯 𑀔𑀻𑀮𑀁 𑀧𑀝𑀺𑀖𑀔𑀻𑀮𑀁. 𑀦𑀧𑁆𑀧𑀢𑀻𑀢𑁄𑀢𑀺 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀦 𑀅𑀪𑀺𑀕𑀢𑁄 𑀦 𑀅𑀦𑀼𑀕𑀢𑁄, 𑀦 𑀉𑀧𑁂𑀢𑁄𑀢𑀺 𑀅𑀢𑁆𑀣𑁄. 𑀬𑁄 𑀘 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀅𑀦𑀼𑀧𑀕𑀢𑁄, 𑀲𑁄 𑀢𑁂𑀳𑀺 ¶ 𑀯𑀚𑁆𑀚𑀺𑀢𑁄 ¶ 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀯𑀚𑁆𑀚𑀺𑀢𑁄’’𑀢𑀺. 𑀬𑁄 𑀘 𑀢𑁂𑀳𑀺 𑀯𑀚𑁆𑀚𑀺𑀢𑁄, 𑀦 𑀲𑁄 𑀢𑁂𑀦 𑀅𑀪𑀺𑀲𑀝𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦 𑀅𑀪𑀺𑀲𑀝𑁄’’𑀢𑀺, 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀦 𑀧𑀢𑁆𑀣𑀝𑁄𑀢𑀺 𑀅𑀢𑁆𑀣𑁄.

𑀬𑁂𑀦𑀸𑀢𑀺 𑀬𑁂𑀦 𑀓𑁄𑀧𑁂𑀦. 𑀤𑀼𑀝𑁆𑀞𑁄𑀢𑀺 𑀫𑀸𑀢𑀺𑀓𑀸𑀬 𑀆𑀕𑀢𑀧𑀤𑀁 𑀤𑀲𑁆𑀲𑁂𑀢𑀺, 𑀓𑀼𑀧𑀺𑀢𑁄𑀢𑀺 𑀧𑀤𑀪𑀸𑀚𑀦𑁂 𑀆𑀕𑀢𑀧𑀤𑀁. 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀧𑀺 𑀉𑀪𑀺𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 ‘‘𑀉𑀪𑀬𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 ‘‘𑀢𑁂𑀦 𑀘 𑀓𑁄𑀧𑁂𑀦 𑀢𑁂𑀦 𑀘 𑀤𑁄𑀲𑁂𑀦𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀻𑀳𑀻’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀤𑁄𑀲𑁄𑀬𑁂𑀯. 𑀲𑁄 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀆𑀳 ‘‘𑀇𑀫𑁂𑀳𑀺 𑀤𑁆𑀯𑀻𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑁂𑀯 𑀤𑀲𑁆𑀲𑁂𑀢𑀻’’𑀢𑀺. ‘‘𑀅𑀦𑀢𑁆𑀢𑀫𑀦𑀢𑀸 𑀅𑀦𑀪𑀺𑀭𑀤𑁆𑀥𑀻’’𑀢𑀺 𑀯𑀘𑀦𑁂𑀳𑀺 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀻’’𑀢𑀺.

𑀬𑀤𑀸 𑀧𑀦 𑀘𑁄𑀤𑀓𑁂𑀦 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀯𑀸 𑀳𑁄𑀢𑀺, 𑀢𑀤𑀸 𑀅𑀫𑀽𑀮𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀢𑀁 𑀧𑀦𑀲𑁆𑀲…𑀧𑁂… 𑀘𑁄𑀤𑀓𑀯𑀲𑁂𑀦 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀬𑀤𑀺 𑀘𑀼𑀤𑀺𑀢𑀓𑀯𑀲𑁂𑀦 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, 𑀅𑀫𑀽𑀮𑀓𑀁 𑀦𑀸𑀫 𑀅𑀦𑀚𑁆𑀛𑀸𑀧𑀦𑁆𑀦𑀦𑁆𑀢𑀺 𑀧𑀤𑀪𑀸𑀚𑀦𑀁 𑀯𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀅𑀜𑁆𑀜𑀢𑀭𑀁. 𑀧𑀤𑀪𑀸𑀚𑀦𑁂 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀘𑀼𑀤𑀺𑀢𑀓𑀲𑁆𑀲 𑀆𑀧𑀦𑁆𑀦𑀸𑀦𑀸𑀧𑀦𑁆𑀦𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑀢𑀣𑁂𑀯𑀸𑀢𑀺 𑀧𑀲𑀸𑀤𑀲𑁄𑀢𑁂𑀦 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀲𑀼𑀢𑁆𑀯𑀸𑀯 𑀚𑀸𑀦𑀺𑀢𑀩𑁆𑀩𑀢𑁄 ‘‘𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀲𑀗𑁆𑀓𑀦𑀁 𑀧𑀭𑀺𑀲𑀗𑁆𑀓𑀺𑀢𑀁, 𑀤𑀺𑀝𑁆𑀞𑀸𑀦𑀼𑀕𑀢𑀁 𑀧𑀭𑀺𑀲𑀗𑁆𑀓𑀺𑀢𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀇𑀫𑁂𑀲𑀦𑁆𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀇𑀫𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀭𑀺𑀲𑁆𑀲𑀦𑁆𑀢𑀺 𑀯𑀸𑀢𑀺 𑀏𑀢𑁆𑀣 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀇𑀫𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀺𑀝𑁆𑀞𑀁 𑀅𑀢𑁆𑀣𑀺 𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀅𑀫𑀽𑀮𑀓𑀦𑁆𑀢𑀺 𑀇𑀤𑀁 𑀅𑀚𑁆𑀛𑀸𑀘𑀸𑀭𑀲𑁆𑀲 𑀲𑀩𑁆𑀪𑀸𑀯𑀸𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀁, 𑀅𑀢𑁆𑀣𑀺 𑀲𑀜𑁆𑀜𑀸𑀅𑀫𑀽𑀮𑀓𑀦𑁆𑀢𑀺 𑀇𑀤𑀁 𑀧𑀦 𑀤𑀺𑀝𑁆𑀞𑀲𑀜𑁆𑀜𑀸𑀬 𑀲𑀩𑁆𑀪𑀸𑀯𑀸𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬.

𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀯𑀤𑀦𑁆𑀢𑀻𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀧𑀭𑀢𑁄 𑀧𑀦 ‘‘𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀦 𑀏𑀢𑀻’’𑀢𑀺 𑀧𑀭𑀫𑁆𑀫𑀼𑀔𑀸𑀘𑁄𑀤𑀦𑀸𑀬 𑀏𑀯 𑀅𑀦𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀻𑀧𑁂 𑀞𑀢𑁆𑀯𑀸’’𑀢𑀺 𑀇𑀤𑀁 𑀲𑀫𑁆𑀫𑀼𑀔𑀪𑀸𑀯𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 ¶ . 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀅𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸𑀘𑁄𑀤𑀦𑀸’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀲𑀫𑁆𑀫𑀼𑀔𑀪𑀸𑀯𑁄 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 ¶ 𑀦𑀺𑀬𑀫𑁄 𑀲𑀓𑁆𑀓𑀸 𑀯𑀢𑁆𑀣𑀼𑀁. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀜𑁆𑀘 𑀧𑀢𑁆𑀯𑀸 𑀕𑀭𑀼𑀓𑁂𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀘𑁄𑀤𑀸𑀧𑀓𑀲𑁆𑀲𑁂𑀯 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀆𑀡𑀢𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀘𑁄𑀤𑀸𑀧𑀓𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀫𑀬𑀸𑀧𑀺 𑀤𑀺𑀝𑁆𑀞𑀁 𑀲𑀼𑀢𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀆𑀡𑀢𑁆𑀢𑀲𑁆𑀲𑀧𑀺 𑀘𑁄𑀤𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀏𑀯𑀁 𑀧𑀦 𑀅𑀯𑀢𑁆𑀯𑀸𑀧𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺 𑀇𑀤𑀫𑁂𑀯 𑀯𑀘𑀦𑀁 𑀧𑀭𑀲𑁆𑀲 𑀯𑀘𑀦𑀁 𑀯𑀺𑀬 𑀅𑀓𑀢𑁆𑀯𑀸 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯. 𑀲𑀢𑀺𑀧𑀺 𑀧𑀦 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 ‘‘𑀅𑀲𑀼𑀓𑁂𑀦 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀦𑀢𑁆𑀣𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀯𑀤𑀦𑁆𑀢𑀺.

𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀺 𑀘𑁄𑀤𑁂𑀦𑁆𑀢𑀻𑀢𑀺 𑀏𑀢𑁆𑀣 𑀲𑀫𑁆𑀩𑀳𑀼𑀮𑁂𑀢𑀺 𑀩𑀳𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀯𑀢𑁆𑀣𑀼𑀘𑁄𑀤𑀓𑀸𑀦𑀁𑀬𑁂𑀯 𑀳𑀺 𑀏𑀓𑀸𑀦𑁂𑀓𑀯𑀲𑁂𑀦 𑀇𑀤𑀁 𑀘𑀢𑀼𑀓𑁆𑀓𑀫𑀸𑀕𑀢𑀁, 𑀦 𑀘𑀼𑀤𑀺𑀢𑀓𑀲𑁆𑀲𑀧𑀺 𑀏𑀓𑀸𑀦𑁂𑀓𑀯𑀲𑁂𑀦. 𑀢𑀣𑀸 𑀳𑀺 𑀏𑀓𑀲𑁆𑀲𑁂𑀯 𑀘𑀼𑀤𑀺𑀢𑀓𑀲𑁆𑀲 𑀯𑀲𑁂𑀦 𑀏𑀓𑀯𑀢𑁆𑀣𑀼𑀏𑀓𑀘𑁄𑀤𑀓𑀏𑀓𑀯𑀢𑁆𑀣𑀼𑀦𑀸𑀦𑀸𑀘𑁄𑀤𑀓𑀦𑀸𑀦𑀸𑀯𑀢𑁆𑀣𑀼𑀏𑀓𑀘𑁄𑀤𑀓𑀦𑀸𑀦𑀸𑀯𑀢𑁆𑀣𑀼𑀦𑀸𑀦𑀸𑀘𑁄𑀤𑀓𑀧𑁆𑀧𑀪𑁂𑀤𑀁 𑀇𑀤𑀁 𑀘𑀢𑀼𑀓𑁆𑀓𑀫𑀸𑀕𑀢𑀁, 𑀢𑁂𑀦𑁂𑀯 𑀘𑀢𑀼𑀢𑁆𑀣𑀘𑁄𑀤𑀦𑀁 𑀤𑀲𑁆𑀲𑁂𑀦𑁆𑀢𑁂𑀦𑀧𑀺 ‘‘𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 𑀦𑀸𑀦𑀸𑀯𑀢𑁆𑀣𑀽𑀦𑀺 𑀦𑀸𑀦𑀸𑀘𑁄𑀤𑀓𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀦𑀸𑀦𑀸𑀘𑀼𑀤𑀺𑀢𑀓𑀸’’𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀩𑀳𑀼𑀮𑁂’’𑀢𑀺 𑀩𑀳𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀅𑀣 𑀯𑀸 𑀧𑀞𑀫𑀁 𑀢𑀻𑀲𑀼𑀧𑀺 𑀘𑁄𑀤𑀦𑀸𑀲𑀼 𑀏𑀓𑀢𑁆𑀢𑁂𑀦 𑀘𑀼𑀤𑀺𑀢𑀓𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀇𑀥 𑀩𑀳𑀼𑀢𑁆𑀢𑁂𑀦 𑀦𑀺𑀤𑁆𑀤𑁂𑀲𑁄 ‘‘𑀦 𑀓𑁂𑀯𑀮𑀁 𑀏𑀓𑀲𑁆𑀫𑀺𑀁𑀬𑁂𑀯 𑀘𑀼𑀤𑀺𑀢𑀓𑁂 𑀘𑁄𑀤𑀦𑀸 𑀲𑀫𑁆𑀪𑀯𑀢𑀺, 𑀅𑀣 𑀔𑁄 𑀲𑀫𑁆𑀩𑀳𑀼𑀮𑁂𑀲𑀼𑀧𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀓𑀢𑁄.

𑀘𑁄𑀤𑁂𑀢𑀼𑀁 𑀧𑀦 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀻𑀢𑀺𑀆𑀤𑀺 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸𑀧𑀺 𑀘𑁄𑀤𑀦𑀸𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀇𑀤𑀁 𑀤𑀼𑀲𑁆𑀲𑀻𑀮𑀲𑁆𑀲 𑀯𑀘𑀦𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 𑀪𑀺𑀓𑁆𑀔𑀼𑀁 𑀘𑁄𑀤𑁂𑀢𑀼𑀁 𑀅𑀦𑀺𑀲𑁆𑀲𑀭𑀢𑁆𑀢𑀸 ‘‘𑀪𑀺𑀓𑁆𑀔𑀼𑀦𑀺𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀅𑀦𑀺𑀲𑁆𑀲𑀭𑀪𑀸𑀯𑁂 𑀢𑀸𑀳𑀺 𑀓𑀢𑀘𑁄𑀤𑀦𑀸𑀧𑀺 𑀘𑁄𑀤𑀦𑀸𑀭𑀼𑀳𑀢𑁆𑀢𑀸 𑀘𑁄𑀤𑀦𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀜𑁆𑀘𑀧𑀺 𑀲𑀳𑀥𑀫𑁆𑀫𑀺𑀓𑀸 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀘𑁄𑀤𑁂𑀢𑀻𑀢𑀺𑀆𑀤𑀺𑀦𑀸 𑀘𑁄𑀤𑀓𑁄 𑀬𑁂𑀲𑀁 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀢𑁂𑀲𑀫𑁆𑀧𑀺 𑀯𑀘𑀦𑀁 𑀧𑀫𑀸𑀡𑀫𑁂𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀢𑁂𑀲𑀁 𑀘𑁄𑀤𑀦𑀸𑀧𑀺 𑀭𑀼𑀳𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀣𑁂𑀭𑁄 𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀲𑀺.

𑀤𑀽𑀢𑀁 ¶ 𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸𑀢𑀺 ‘‘𑀢𑁆𑀯𑀁𑀬𑁂𑀯 𑀕𑀦𑁆𑀢𑁆𑀯𑀸 𑀘𑁄𑀤𑁂𑀳𑀻’’𑀢𑀺 𑀤𑀽𑀢𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀬𑁄 𑀢𑀁 𑀘𑁄𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀫𑀼𑀔𑀲𑀸𑀲𑀦𑀁 𑀯𑀸 𑀧𑀡𑁆𑀡𑀁 𑀯𑀸 𑀧𑁂𑀲𑁂𑀢𑁆𑀯𑀸. 𑀲𑀻𑀲𑀁 𑀦 𑀏𑀢𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘‘𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀤𑀽𑀢𑀲𑀸𑀲𑀦𑀸𑀤𑀻𑀳𑀺 𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀧𑀜𑁆𑀜𑀸𑀬𑀢𑀺, ‘‘𑀲𑀻𑀲𑀁 𑀦 𑀏𑀢𑀻’’𑀢𑀺 ¶ 𑀇𑀤𑀁 𑀧𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀲𑀫𑀬𑁂𑀦𑀸𑀢𑀺 𑀧𑀓𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀢𑁆𑀣𑀯𑀺𑀚𑀸𑀦𑀦𑀲𑀫𑀬𑁂𑀦.

𑀕𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁. 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦𑀸𑀢𑀺 𑀧𑀜𑁆𑀘𑀮𑀳𑀼𑀓𑀸𑀧𑀢𑁆𑀢𑀻𑀦𑀁 𑀯𑀲𑁂𑀦. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. ‘‘𑀅𑀦𑁆𑀢𑀯𑀸 𑀮𑁄𑀓𑁄, 𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸. 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦𑀸𑀢𑀺 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸𑀢𑀺 𑀪𑀡𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀇𑀫𑀸 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀭𑀺𑀯𑀸𑀭𑀧𑀸𑀴𑀺𑀬𑀁 (𑀧𑀭𑀺. 𑁨𑁮𑁭) 𑀤𑀲𑁆𑀲𑀺𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀳𑀺 𑀘𑁄𑀤𑁂𑀦𑁆𑀢𑁄𑀧𑀺 𑀢𑀫𑁆𑀫𑀽𑀮𑀺𑀓𑀸𑀬 𑀆𑀧𑀢𑁆𑀢𑀺𑀬𑀸 𑀏𑀯 𑀘𑁄𑀤𑁂𑀢𑀺.

‘‘𑀓𑀲𑁆𑀫𑀸 𑀫𑀁 𑀦 𑀯𑀦𑁆𑀤𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀅𑀲𑁆𑀲𑀫𑀡𑁄𑀲𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺 𑀅𑀯𑀦𑁆𑀤𑀦𑀓𑀸𑀭𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀦 𑀯𑀦𑁆𑀤𑀺𑀢𑀩𑁆𑀩𑁄𑀢𑀺 𑀯𑀤𑀦𑁆𑀢𑀺. 𑀘𑁄𑀤𑁂𑀢𑀼𑀓𑀸𑀫𑀢𑀸𑀬 𑀏𑀯 𑀅𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀲𑁆𑀲 𑀯𑀼𑀢𑁆𑀢𑀫𑀢𑁆𑀣𑀁 𑀞𑀧𑁂𑀢𑁆𑀯𑀸 𑀅𑀯𑀦𑁆𑀤𑀺𑀬𑀪𑀸𑀯𑁂 𑀢𑀁 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 ¶ 𑀘 𑀯𑀼𑀢𑁆𑀢𑀁. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀅𑀯𑀦𑁆𑀤𑀦𑀻𑀬𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀬𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀢𑀲𑁆𑀲 𑀘 𑀧𑀝𑀺𑀕𑁆𑀕𑀳𑀡𑀲𑁆𑀲 𑀭𑀼𑀳𑀦𑀢𑁄 𑀢𑀤𑁂𑀯 𑀬𑀼𑀢𑁆𑀢𑀢𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀺𑀜𑁆𑀘𑀸𑀧𑀺 𑀬𑀸𑀯 𑀲𑁄 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 𑀯𑀦𑁆𑀤𑀺𑀢𑀩𑁆𑀩𑁄. 𑀬𑀤𑀸 𑀧𑀦 ‘‘𑀅𑀲𑁆𑀲𑀫𑀡𑁄𑀫𑁆𑀳𑀻’’𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀢𑀤𑀸 𑀦 𑀯𑀦𑁆𑀤𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀪𑀸𑀯𑁄, 𑀦 𑀢𑀢𑁄 𑀧𑀭𑀁. 𑀪𑀺𑀓𑁆𑀔𑀼𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀧𑀓𑁆𑀔𑀁 𑀪𑀚𑀢𑀺. 𑀬𑀲𑁆𑀫𑀸 𑀆𑀫𑀺𑀲𑀁 𑀤𑁂𑀦𑁆𑀢𑁄 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀝𑁆𑀞𑀸𑀦𑁂𑀬𑁂𑀯 𑀤𑁂𑀢𑀺, 𑀢𑀲𑁆𑀫𑀸 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀺𑀦𑁆𑀦𑀸𑀦𑀁 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑁂𑀦𑁆𑀢𑁂𑀦 𑀏𑀓𑀲𑁆𑀲 𑀘𑁄𑀤𑁂𑀢𑀼𑀓𑀸𑀫𑀢𑀸𑀬 𑀅𑀤𑀺𑀦𑁆𑀦𑁂𑀧𑀺 𑀘𑁄𑀤𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀆𑀳 ‘‘𑀦 𑀢𑀸𑀯𑀢𑀸 𑀘𑁄𑀤𑀦𑀸 𑀳𑁄𑀢𑀻’’𑀢𑀺.

𑀢𑀺𑀁𑀲𑀸𑀦𑀻𑀢𑀺 ¶ 𑀢𑀺𑀁𑀲 𑀏𑀢𑁂𑀲𑀫𑀢𑁆𑀣𑀻𑀢𑀺 𑀢𑀺𑀁𑀲𑀸𑀦𑀺, 𑀢𑀺𑀁𑀲𑀯𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄, 𑀢𑀺𑀁𑀲𑀸𑀥𑀺𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀼𑀡𑀯𑀘𑀦𑀢𑁆𑀢𑀸 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 ‘‘𑀢𑀺𑀁𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀺𑀁𑀲 𑀘𑁄𑀤𑀦𑀸 𑀅𑀥𑀺𑀓𑀸 𑀏𑀢𑁂𑀲𑀽𑀢𑀺 𑀢𑀺𑀁𑀲𑀸𑀦𑀺. 𑀢𑀲𑁆𑀫𑀺𑀁 𑀅𑀥𑀺𑀓𑀫𑀺𑀢𑀺 𑀟𑀓𑀸𑀭𑀧𑀘𑁆𑀘𑀬𑁂 𑀲𑀢𑀺 𑀭𑀽𑀧𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀦𑀯𑀼𑀢𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀉𑀩𑁆𑀩𑀸𑀳𑀺𑀓𑀸𑀬 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀦𑁆𑀢𑀺 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑁂𑀳𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀳𑀺 𑀧𑀭𑀺𑀲𑀸𑀬 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. ‘‘𑀲𑀻𑀮𑀯𑀸 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀲𑀫𑀣𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁩𑁧) 𑀯𑀼𑀢𑁆𑀢𑀤𑀲𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀫𑀢𑁂𑀳𑀺 𑀧𑀦 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀯𑀸 𑀧𑀭𑀺𑀲𑀸𑀬 ‘‘𑀅𑀜𑁆𑀜𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀯𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀢𑀼𑀫𑁆𑀳𑀸𑀓𑀦𑁆𑀢𑀺 𑀘𑀼𑀤𑀺𑀢𑀓𑀘𑁄𑀤𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀓𑀺𑀫𑁆𑀳𑀻𑀢𑀺 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀓𑀺𑀫𑁆𑀳𑀺 𑀦𑀫𑁆𑀧𑀺 𑀦 𑀚𑀸𑀦𑀸𑀲𑀻𑀢𑀺 𑀓𑀺𑀫𑁆𑀳𑀺 𑀦𑀦𑁆𑀢𑀺 𑀯𑀘𑀦𑀫𑁆𑀧𑀺 𑀦 𑀚𑀸𑀦𑀸𑀲𑀺. 𑀦𑀸𑀲𑁆𑀲 𑀅𑀦𑀼𑀬𑁄𑀕𑁄 𑀤𑀸𑀢𑀩𑁆𑀩𑁄𑀢𑀺 𑀦𑀸𑀲𑁆𑀲 𑀧𑀼𑀘𑁆𑀙𑀸 𑀧𑀝𑀺𑀧𑀼𑀘𑁆𑀙𑀸 𑀤𑀸𑀢𑀩𑁆𑀩𑀸. ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀅𑀮𑀚𑁆𑀚𑀻𑀦𑀺𑀕𑁆𑀕𑀳𑀢𑁆𑀣𑀸𑀬…𑀧𑁂… 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀳𑀺𑀢𑀻𑀢𑀺 𑀆𑀕𑀫𑀺𑀲𑁆𑀲𑀢𑀺. 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦𑀸𑀢𑀺 𑀤𑀺𑀝𑁆𑀞𑀲𑀫𑁆𑀩𑀦𑁆𑀥𑁂𑀦, 𑀤𑀺𑀝𑁆𑀞𑀦𑀺𑀬𑀸𑀫𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀯𑀸𑀤𑀯𑀢𑁆𑀣𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 ¶ 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀣𑀧𑁆𑀧𑀘𑁆𑀘𑀢𑁆𑀣𑀺𑀓𑀸. 𑀲𑀜𑁆𑀜𑀁 𑀤𑀢𑁆𑀯𑀸𑀢𑀺 𑀢𑁂𑀲𑀁 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀘𑀦𑀁 𑀲𑀸𑀥𑁂𑀢𑀼𑀁 𑀲𑀜𑁆𑀜𑀁 𑀓𑀢𑁆𑀯𑀸. 𑀅𑀲𑀼𑀤𑁆𑀥𑀲𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀅𑀦𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀆𑀳. 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀸 𑀢𑁂𑀲𑀁 𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀪𑁄𑀕𑁂 𑀬𑁄𑀚𑀦𑀢𑁆𑀣𑀁. 𑀯𑀺𑀦𑀺𑀘𑁆𑀙𑀬𑁄 𑀦 𑀓𑀸𑀢𑀩𑁆𑀩𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀯𑀘𑀦𑁂 𑀅𑀝𑁆𑀞𑀸𑀢𑀩𑁆𑀩𑀲𑀪𑀸𑀯𑀸 𑀏𑀢𑁂 𑀅𑀮𑀚𑁆𑀚𑀺𑀦𑁄’’𑀢𑀺 𑀚𑀸𑀦𑀦𑁆𑀢𑁂𑀦 𑀯𑀺𑀦𑀺𑀘𑁆𑀙𑀬𑁄 𑀦 𑀓𑀸𑀢𑀩𑁆𑀩𑁄.

𑀯𑀺𑀭𑀤𑁆𑀥𑀁 𑀳𑁄𑀢𑀻𑀢𑀺 𑀅𑀢𑁆𑀢𑀦𑀸 𑀓𑀢𑀤𑁄𑀲𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀓𑀜𑁆𑀘𑀺 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀯𑀺𑀭𑀤𑁆𑀥𑀁 𑀳𑁄𑀢𑀺. 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀻𑀢𑀺 𑀲𑀘𑁂 𑀫𑀬𑀸 𑀓𑀢𑀤𑁄𑀲𑀁 𑀯𑀓𑁆𑀔𑀸𑀫𑀺, 𑀫𑀬𑁆𑀳𑀁 𑀅𑀦𑀼𑀯𑀢𑁆𑀢𑀓𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 ‘‘𑀓𑀢𑀁 𑀫𑀬𑀸’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺. 𑀲𑀼𑀤𑁆𑀥𑁄 𑀳𑁄𑀢𑀽𑀢𑀺 𑀢𑁂𑀲𑀁 𑀯𑀘𑀦𑁂𑀦 𑀲𑀼𑀤𑁆𑀥𑁄 𑀦𑀸𑀫 𑀳𑁄𑀢𑀼, 𑀢𑁂𑀲𑀁 𑀯𑀘𑀦𑁂𑀦 𑀏𑀓𑀤𑁆𑀯𑁂𑀯𑀸𑀭𑀫𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀤𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀻𑀢𑀺 𑀮𑀚𑁆𑀚𑀺𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀦 𑀤𑀸𑀢𑀩𑁆𑀩𑁄𑀢𑀺 𑀅𑀮𑀚𑁆𑀚𑀺𑀪𑀸𑀯𑀫𑀸𑀧𑀦𑁆𑀦𑀢𑁆𑀢𑀸 𑀦 𑀤𑀸𑀢𑀩𑁆𑀩𑁄.

𑀅𑀫𑀽𑀮𑀓𑀫𑁆𑀧𑀺 𑀲𑀫𑀽𑀮𑀓𑀫𑁆𑀧𑀺 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀫𑀽𑀮𑀸𑀦𑀻’’𑀢𑀺. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼 ¶ 𑀏𑀓𑁄 𑀏𑀓𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑁄 𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂 𑀲𑀮𑀸𑀓𑀕𑁆𑀕𑀬𑀸𑀕𑀼𑀅𑀕𑁆𑀕𑀯𑀺𑀢𑀓𑁆𑀓𑀫𑀸𑀴𑀓𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀆𑀲𑀦𑀲𑀸𑀮𑀸𑀤𑀻𑀲𑀼 𑀉𑀧𑀝𑁆𑀞𑀸𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀓𑁆𑀔𑀡𑁂 𑀯𑀸 𑀘𑁄𑀤𑁂𑀦𑁆𑀢𑁄 𑀅𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀢𑀘𑁆𑀙𑁂𑀦 𑀯𑀤𑀦𑁆𑀢𑁄 𑀪𑀽𑀢𑁂𑀦 𑀯𑀤𑀢𑀺 𑀦𑀸𑀫. ‘‘𑀅𑀫𑁆𑀪𑁄 𑀫𑀳𑀮𑁆𑀮𑀓-𑀧𑀭𑀺𑀲𑀸𑀯𑀘𑀭-𑀧𑀁𑀲𑀼𑀓𑀽𑀮𑀺𑀓-𑀥𑀫𑁆𑀫𑀓𑀣𑀺𑀓-𑀧𑀢𑀺𑀭𑀽𑀧𑀁 𑀢𑀯 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀨𑀭𑀼𑀲𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀧𑀦 𑀓𑀢𑁆𑀯𑀸 ‘‘𑀪𑀦𑁆𑀢𑁂 𑀫𑀳𑀮𑁆𑀮𑀓𑀸𑀢𑁆𑀣, 𑀧𑀭𑀺𑀲𑀸𑀯𑀘𑀭𑀸 𑀧𑀁𑀲𑀼𑀓𑀽𑀮𑀺𑀓𑀸 𑀥𑀫𑁆𑀫𑀓𑀣𑀺𑀓𑀸𑀢𑁆𑀣, 𑀧𑀢𑀺𑀭𑀽𑀧𑀁 𑀢𑀼𑀫𑁆𑀳𑀸𑀓𑀁 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀲𑀡𑁆𑀳𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀦𑁆𑀢𑁄 𑀅𑀢𑁆𑀣𑀲𑀜𑁆𑀳𑀺𑀢𑁂𑀦 𑀯𑀤𑀢𑀺 𑀦𑀸𑀫. 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺, 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀓𑁆𑀔𑀸𑀫𑀺, 𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸. 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀽𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀢𑀸, 𑀩𑀳𑀼𑀲𑁆𑀲𑀼𑀢𑀢𑀸, 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀲𑀼𑀯𑀺𑀪𑀢𑁆𑀢𑀲𑀼𑀧𑁆𑀧𑀯𑀢𑁆𑀢𑀲𑀼𑀯𑀺𑀦𑀺𑀘𑁆𑀙𑀺𑀢𑀢𑀸, ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀜𑁆𑀘𑀥𑀫𑁆𑀫𑀸, 𑀓𑀸𑀭𑀼𑀜𑁆𑀜𑀢𑀸, 𑀳𑀺𑀢𑁂𑀲𑀺𑀢𑀸, 𑀅𑀦𑀼𑀓𑀫𑁆𑀧𑀢𑀸, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸, 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸𑀢𑀺 𑀇𑀫𑁂𑀲𑀼 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀼. 𑀢𑀢𑁆𑀣 𑀓𑀸𑀭𑀼𑀜𑁆𑀜𑀢𑀸𑀢𑀺 𑀓𑀸𑀭𑀼𑀡𑀺𑀓𑀪𑀸𑀯𑁄. 𑀇𑀫𑀺𑀦𑀸 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘 𑀤𑀲𑁆𑀲𑀺𑀢𑁄. 𑀳𑀺𑀢𑁂𑀲𑀺𑀢𑀸𑀢𑀺 𑀳𑀺𑀢𑀕𑀯𑁂𑀲𑀦𑀢𑀸. 𑀅𑀦𑀼𑀓𑀫𑁆𑀧𑀢𑀸𑀢𑀺 𑀢𑁂𑀦 ¶ 𑀳𑀺𑀢𑁂𑀦 𑀲𑀁𑀬𑁄𑀚𑀦𑀸. 𑀤𑁆𑀯𑀻𑀳𑀺𑀧𑀺 𑀫𑁂𑀢𑁆𑀢𑀸 𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀘 𑀤𑀲𑁆𑀲𑀺𑀢𑁄. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸𑀢𑀺 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑀦𑀸. 𑀯𑀢𑁆𑀣𑀼𑀁 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀓𑀭𑀡𑀁 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸 𑀦𑀸𑀫. 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺 𑀯𑀘𑀻𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑀢𑀸𑀬 𑀘. 𑀘𑀼𑀤𑀺𑀢𑀓𑁂𑀦 𑀳𑀺 𑀲𑀘𑁆𑀘𑀜𑁆𑀘 𑀯𑀢𑁆𑀢𑀩𑁆𑀩𑀁, 𑀓𑁄𑀧𑁄 𑀘 𑀦 𑀓𑀸𑀢𑀩𑁆𑀩𑁄, 𑀦𑁂𑀯 𑀅𑀢𑁆𑀢𑀦𑀸 𑀓𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀧𑀭𑁄 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀪𑀼𑀫𑁆𑀫𑀧𑁆𑀧𑀢𑁆𑀢𑀺𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑁂 𑀲𑀫𑁆𑀧𑀢𑁆𑀢𑁂, 𑀪𑀼𑀫𑁆𑀫𑀢𑁆𑀣𑁂 𑀇𑀤𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀓𑀭𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀸𑀦𑀺. 𑀓𑁂 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀣𑀸. 𑀓𑀣𑀁 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀦𑀯𑀲𑁂𑀦. 𑀅𑀥𑀺𑀓𑀭𑀡𑀁 𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀳𑀺 𑀲𑀫𑀣𑀸. 𑀅𑀣 𑀯𑀸 𑀲𑀫𑀦𑀢𑁆𑀣𑀸𑀬 𑀧𑀯𑀢𑁆𑀢𑀫𑀸𑀦𑁂𑀳𑀺 𑀲𑀫𑀣𑁂𑀳𑀺 𑀅𑀥𑀺𑀓𑀸𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀓𑀭𑀡𑀸𑀦𑀺. 𑀬𑀣𑀸 𑀳𑀺 𑀲𑀫𑀦𑀯𑀲𑁂𑀦 𑀲𑀫𑀣𑀸𑀦𑀁 𑀯𑀺𑀯𑀸𑀤𑀸𑀤𑀻𑀲𑀼 𑀅𑀥𑀺𑀓𑀢𑁆𑀢𑀼𑀪𑀸𑀯𑁄, 𑀏𑀯𑀁 𑀯𑀺𑀯𑀸𑀤𑀸𑀤𑀻𑀦𑀁 𑀢𑁂𑀳𑀺 𑀅𑀥𑀺𑀓𑀢𑁆𑀢𑀩𑁆𑀩𑀢𑀸𑀧𑀺. 𑀢𑁂𑀦𑀸𑀳 ‘‘𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸’’𑀢𑀺. 𑀇𑀫𑀺𑀦𑀸 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀸 𑀯𑀼𑀢𑁆𑀢𑀸. 𑀕𑀸𑀳𑀦𑁆𑀢𑀺 ‘‘𑀅𑀲𑀼𑀓𑀁 𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀸 𑀘𑁄𑀤𑀦𑀸𑀬 𑀕𑀳𑀡𑀁. 𑀘𑁂𑀢𑀦𑀦𑁆𑀢𑀺 ‘‘𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀘𑁂𑀢𑀦𑀁. 𑀅𑀓𑁆𑀔𑀦𑁆𑀢𑀺𑀦𑁆𑀢𑀺 𑀘𑀼𑀤𑀺𑀢𑀓𑁂 𑀉𑀧𑁆𑀧𑀦𑁆𑀦𑀁 𑀅𑀓𑁆𑀔𑀦𑁆𑀢𑀺𑀁. 𑀯𑁄𑀳𑀸𑀭𑀦𑁆𑀢𑀺 𑀘𑁄𑀤𑀦𑀸𑀯𑀲𑀧𑁆𑀧𑀢𑁆𑀢𑀯𑀘𑀦𑀁. 𑀧𑀡𑁆𑀡𑀢𑁆𑀢𑀺𑀦𑁆𑀢𑀺 𑀘𑁄𑀤𑀦𑀸𑀯𑀲𑀧𑁆𑀧𑀯𑀢𑁆𑀢𑀦𑀸𑀫𑀧𑀡𑁆𑀡𑀢𑁆𑀢𑀺𑀁. 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀸 𑀕𑀳𑁂𑀢𑁆𑀯𑀸. 𑀢𑀁 𑀅𑀥𑀺𑀓𑀭𑀡𑀦𑁆𑀢𑀺 𑀢𑀁 𑀕𑀸𑀳𑀮𑀓𑁆𑀔𑀡𑀁 𑀅𑀥𑀺𑀓𑀭𑀡𑀁.

𑀢𑀲𑁆𑀫𑀸 ¶ 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀧𑀸𑀭𑀸𑀚𑀺𑀓𑀥𑀫𑁆𑀫𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀅𑀘𑁆𑀘𑀦𑁆𑀢𑀅𑀓𑀼𑀲𑀮𑀢𑁆𑀢𑀸𑀢𑀺 𑀮𑁄𑀓𑀯𑀚𑁆𑀚𑀪𑀸𑀯𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀅𑀓𑀼𑀲𑀮𑀢𑁆𑀢𑀸. 𑀬𑀸𑀬 𑀧𑀡𑁆𑀡𑀢𑁆𑀢𑀺𑀬𑀸𑀢𑀺 𑀦𑀸𑀫𑀧𑀡𑁆𑀡𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀪𑀺𑀮𑀸𑀧𑁂𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀜𑁆𑀜𑀢𑁆𑀢𑁄𑀢𑀺 𑀯𑁄𑀳𑀸𑀭𑀯𑀲𑁂𑀦 𑀓𑀣𑀺𑀢𑁄. 𑀅𑀥𑀺𑀓𑀭𑀡𑁂 𑀧𑀯𑀢𑁆𑀢𑀢𑁆𑀢𑀸 𑀘 𑀅𑀥𑀺𑀓𑀭𑀡𑀦𑁆𑀢𑀺 𑀫𑀜𑁆𑀘𑀝𑁆𑀞𑁂𑀲𑀼 𑀫𑀜𑁆𑀘𑀯𑁄𑀳𑀸𑀭𑁄 𑀯𑀺𑀬. 𑀬𑀲𑁆𑀫𑀸 𑀅𑀫𑀽𑀮𑀓𑁂𑀦 𑀘𑁄𑀤𑁂𑀦𑁆𑀢𑁄 𑀘𑀼𑀤𑀺𑀢𑀓𑁂 𑀧𑀼𑀕𑁆𑀕𑀮𑁂 𑀢𑀁 𑀅𑀥𑀺𑀓𑀭𑀡𑀁 𑀦𑀢𑁆𑀣𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀯𑀘𑀦𑀁 𑀅𑀪𑀺𑀥𑁂𑀬𑁆𑀬𑀲𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀲𑀪𑀸𑀯𑀢𑁄 𑀦𑀢𑁆𑀣𑀻’’𑀢𑀺. 𑀢𑀜𑁆𑀘 𑀔𑁄 𑀇𑀥𑁂𑀯𑀸𑀢𑀺 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀧𑀡𑁆𑀡𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀪𑀸𑀯𑁄 𑀇𑀥𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀲𑀺𑀓𑁆𑀔𑀸𑀧𑀤𑁂. ‘‘𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 ¶ 𑀯𑀺𑀯𑀸𑀤𑀲𑁆𑀲 𑀅𑀥𑀺𑀓𑀭𑀡𑀪𑀸𑀯𑁄 𑀦 𑀲𑀫𑁆𑀪𑀯𑀢𑀺 𑀲𑀫𑀣𑁂𑀳𑀺 𑀅𑀦𑀥𑀺𑀓𑀭𑀡𑀻𑀬𑀢𑁆𑀢𑀸𑀢𑀺 𑀆𑀳 ‘‘𑀇𑀥𑁂𑀓𑀘𑁆𑀘𑁄 𑀯𑀺𑀯𑀸𑀤𑁄’’𑀢𑀺.

𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀻𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁 𑀬𑀣𑀸 ‘‘𑀬𑀤𑀺 𑀫𑁂 𑀩𑁆𑀬𑀸𑀥𑀺𑀢𑀸 𑀤𑀳𑁂𑀬𑁆𑀬𑀼𑀁, 𑀤𑀸𑀢𑀩𑁆𑀩𑀫𑀺𑀤𑀫𑁄𑀲𑀥’’𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 ‘‘𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀯𑀸𑀤𑁄𑀢𑀺 𑀉𑀧𑀯𑀤𑀦𑀸 𑀘𑁂𑀯 𑀘𑁄𑀤𑀦𑀸 𑀘. 𑀢𑀢𑁆𑀣 𑀉𑀧𑀯𑀤𑀦𑀸 𑀦𑀸𑀫 𑀅𑀓𑁆𑀓𑁄𑀲𑁄. 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀫𑀸𑀢𑀺𑀓𑀸𑀬 𑀆𑀕𑀢𑀸 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀲𑀢𑁆𑀢𑀸𑀢𑀺 𑀢𑁂𑀬𑁂𑀯 𑀧𑀜𑁆𑀘, 𑀯𑀺𑀪𑀗𑁆𑀕𑁂 𑀆𑀕𑀢𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀬𑁄 𑀤𑁆𑀯𑁂𑀢𑀺 𑀲𑀢𑁆𑀢. 𑀓𑀺𑀘𑁆𑀘𑀬𑀢𑀸𑀢𑀺 𑀓𑀢𑁆𑀢𑀩𑁆𑀩𑀢𑀸. 𑀓𑀭𑀡𑀻𑀬𑀢𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀪𑀬𑁂𑀦𑀧𑀺 𑀅𑀧𑀮𑁄𑀓𑀦𑀸𑀤𑀺𑀲𑀗𑁆𑀖𑀓𑀫𑁆𑀫𑀁𑀬𑁂𑀯 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀅𑀧𑀮𑁄𑀓𑀦𑀓𑀫𑁆𑀫’’𑀦𑁆𑀢𑀺𑀆𑀤𑀺.

𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀥𑀺𑀓𑀭𑀡𑁂𑀳𑀺 𑀘𑁄𑀤𑀦𑀸𑀬𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂…𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀲𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀲𑁆𑀲𑀸𑀢𑀺 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑁄, 𑀧𑀤𑀪𑀸𑀚𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦 𑀲𑀳 𑀯𑀢𑁆𑀢𑀫𑀸𑀦𑀁 𑀲𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀁, 𑀲𑀺𑀓𑁆𑀔𑀸𑀧𑀤𑀁, 𑀢𑀲𑁆𑀲 𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀲𑀳𑀺𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀧𑀤𑀪𑀸𑀚𑀦𑀲𑀳𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑁆𑀲𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑁂𑀦 𑀘𑁄𑀤𑀓𑁂𑀦𑀸’’𑀢𑀺𑀆𑀤𑀺. 𑀇𑀥𑀸𑀕𑀢𑁂𑀲𑀽𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑁂𑀲𑀼. 𑀅𑀜𑁆𑀜𑀢𑁆𑀭 𑀆𑀕𑀢𑁂𑀲𑀽𑀢𑀺 𑀇𑀢𑁄 𑀅𑀜𑁆𑀜𑀢𑁆𑀭 𑀑𑀫𑀲𑀯𑀸𑀤𑀸𑀤𑀺𑀲𑀺𑀓𑁆𑀔𑀸𑀧𑀤𑀧𑀸𑀴𑀺𑀬𑀁 𑀆𑀕𑀢𑁂𑀲𑀼. 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄 𑀲𑀻𑀮𑀯𑀺𑀭𑀳𑀺𑀢𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀮𑀸𑀫𑀓𑀲𑀪𑀸𑀯𑁄. 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀢𑀸𑀬 𑀅𑀲𑀼𑀘𑀺 𑀳𑀼𑀢𑁆𑀯𑀸 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀤𑀼𑀲𑁆𑀲𑀻𑀮𑁄 𑀳𑀺 𑀓𑀺𑀜𑁆𑀘𑀺𑀤𑁂𑀯 ¶ 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀅𑀲𑀼𑀓𑁂𑀦 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀲𑀁 𑀆𑀲𑀗𑁆𑀓𑀦𑀻𑀬𑁄 𑀳𑁄𑀢𑀺, 𑀓𑁂𑀦𑀘𑀺𑀤𑁂𑀯 𑀯𑀸 𑀓𑀭𑀡𑀻𑀬𑁂𑀦 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀫𑁂 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄𑀢𑀺 𑀮𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀓𑀫𑁆𑀫𑀦𑁆𑀢𑁄. 𑀅𑀲𑁆𑀲𑀫𑀡𑁄𑀢𑀺 ¶ 𑀦 𑀲𑀫𑀡𑁄. 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀲𑀫𑀡𑀧𑀝𑀺𑀜𑁆𑀜𑁄. 𑀅𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀅𑀩𑁆𑀭𑀳𑁆𑀫𑀘𑀸𑀭𑀻. 𑀉𑀧𑁄𑀲𑀣𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺. 𑀙𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀯𑀲𑁆𑀲𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑁄. 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀘 𑀓𑀲𑀫𑁆𑀩𑀼𑀚𑀸𑀢𑁄.

𑀇𑀥 𑀧𑀸𑀴𑀺𑀬𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀸𑀴𑀺𑀬𑀁. 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀢𑀺 𑀓𑀮𑀺𑀤𑁂𑀯𑀻𑀯𑀢𑀦𑀺𑀬𑀼𑀢𑁆𑀢𑁄. 𑀓𑀮𑀺𑀤𑁂𑀯𑀻 𑀓𑀺𑀭 𑀲𑀺𑀭𑀻𑀤𑁂𑀯𑀺𑀬𑀸 𑀚𑁂𑀝𑁆𑀞𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀢𑀥𑀭𑁄 ‘‘𑀚𑁂𑀝𑁆𑀞𑀩𑁆𑀩𑀢𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀯𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑀓𑀮𑀲𑀭𑀻𑀭𑁂 𑀫𑀲𑀺𑀁 𑀫𑀓𑁆𑀔𑁂𑀢𑁆𑀯𑀸 𑀓𑀸𑀓𑀧𑀢𑁆𑀢𑀸𑀦𑀺 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀓𑀮𑀺𑀤𑁂𑀯𑀺𑀁 𑀨𑀮𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑀁 𑀓𑀸𑀚𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀣𑁄𑀫𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀬𑀤𑀕𑁆𑀕𑁂𑀦𑀸𑀢𑀺 𑀬𑀢𑁆𑀢𑀓𑁂𑀦. 𑀢𑀤𑀕𑁆𑀕𑁂𑀦𑀸𑀢𑀺 𑀢𑀢𑁆𑀢𑀓𑁂𑀦. 𑀦𑁄 𑀓𑀧𑁆𑀧𑁂𑀢𑀻𑀢𑀺𑀆𑀤𑀺 𑀯𑁂𑀫𑀢𑀺𑀓𑀪𑀸𑀯𑀤𑀻𑀧𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀢𑀺𑀬𑀢𑁆𑀣𑁂𑀭𑁄 𑀧𑀦 ‘‘𑀦𑁄 𑀓𑀧𑁆𑀧𑁂𑀢𑀺, 𑀦𑀲𑁆𑀲𑀭𑀢𑀺, 𑀧𑀫𑀼𑀝𑁆𑀞𑁄’’𑀢𑀺 𑀏𑀢𑁂𑀳𑀺 𑀯𑁂𑀫𑀢𑀺𑀓𑀪𑀸𑀯𑀸𑀯𑀢𑁆𑀣𑀸𑀬 𑀅𑀤𑀻𑀧𑀦𑀢𑁄 𑀅𑀜𑁆𑀜𑁄 𑀯𑁂𑀫𑀢𑀺𑀓𑀪𑀸𑀯𑁄, 𑀅𑀜𑁆𑀜𑀸𑀦𑀺 𑀦𑁄 𑀓𑀧𑁆𑀧𑀦𑀸𑀤𑀻𑀦𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀯𑀺𑀪𑀸𑀕𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀯𑀸𑀤𑁄 𑀬𑀼𑀢𑁆𑀢𑀢𑀭𑁄𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑁄. 𑀤𑀲𑁆𑀲𑀦𑁂 𑀯𑁂𑀫𑀢𑀺𑀓𑁄 𑀳𑁄𑀢𑀻𑀢𑀺 𑀧𑀼𑀕𑁆𑀕𑀮𑁂 𑀜𑀸𑀢𑁂𑀧𑀺 𑀢𑀲𑁆𑀲 𑀓𑀺𑀭𑀺𑀬𑀸𑀬 𑀲𑀫𑁆𑀫𑀸 𑀅𑀤𑀺𑀝𑁆𑀞𑀪𑀸𑀯𑀢𑁄 𑀘𑀺𑀭𑀓𑀸𑀮𑀸𑀢𑀺𑀓𑁆𑀓𑀫𑀢𑁄 𑀯𑀸 𑀢𑀁 𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 ‘‘𑀏𑀲 𑀫𑀬𑀸 𑀤𑀺𑀝𑁆𑀞𑁄 𑀯𑀸, 𑀦 𑀯𑀸’’𑀢𑀺 𑀤𑀲𑁆𑀲𑀦𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀧𑀼𑀕𑁆𑀕𑀮𑁂 𑀯𑁂𑀫𑀢𑀺𑀓𑁄 𑀳𑁄𑀢𑀻𑀢𑀺 𑀢𑁂𑀦 𑀓𑀢𑀓𑀫𑁆𑀫𑁂 𑀜𑀸𑀢𑁂𑀧𑀺 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀲𑀫𑁆𑀫𑀸 𑀅𑀤𑀺𑀝𑁆𑀞𑀪𑀸𑀯𑀢𑁄 𑀓𑀸𑀮𑀦𑁆𑀢𑀭𑀪𑀸𑀯𑀢𑁄 𑀯𑀸 ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀅𑀬𑀁 𑀯𑀸, 𑀦𑁄’’𑀢𑀺 𑀧𑀼𑀕𑁆𑀕𑀮𑁂 𑀯𑁂𑀫𑀢𑀺𑀓𑁄 𑀳𑁄𑀢𑀺.

𑁩𑁮𑁯. ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄. ‘‘𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄. 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

‘‘𑀏𑀯𑀁 𑀲𑀁𑀯𑀤𑁆𑀥𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀧𑀭𑀺𑀲𑀸 𑀬𑀤𑀺𑀤𑀁 𑀅𑀜𑁆𑀜𑀫𑀜𑁆𑀜𑀯𑀘𑀦𑁂𑀦 𑀅𑀜𑁆𑀜𑀫𑀜𑁆𑀜𑀯𑀼𑀝𑁆𑀞𑀸𑀧𑀦𑁂𑀦𑀸’’𑀢𑀺 𑀯𑀘𑀦𑀢𑁄 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀦𑀬𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 ‘‘𑀓𑀼𑀭𑀼𑀦𑁆𑀤𑀺𑀬𑀁 ¶ 𑀧𑀦𑀸’’𑀢𑀺𑀆𑀤𑀺𑀫𑀸𑀳 ¶ . 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼. 𑀬𑁆𑀬-𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀭𑁂-𑀓𑀸𑀭𑁄 𑀅𑀢𑀺𑀓𑁆𑀓𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀭𑁂-𑀓𑀸𑀭𑁂 𑀅𑀦𑀢𑀺𑀓𑁆𑀓𑀦𑁆𑀢𑁂’’𑀢𑀺. 𑀉𑀧𑁄𑀲𑀣𑀲𑁆𑀲 𑀜𑀢𑁆𑀢𑀺𑀓𑀫𑁆𑀫𑀪𑀸𑀯𑀢𑁄 𑀜𑀢𑁆𑀢𑀺𑀬𑀸 𑀲𑀫𑀢𑁆𑀢𑀸𑀬 𑀉𑀧𑁄𑀲𑀣𑁄 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀬𑁆𑀬-𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀦 𑀮𑀩𑁆𑀪𑀢𑀻’’𑀢𑀺.

𑀇𑀤𑀜𑁆𑀘𑀺𑀤𑀜𑁆𑀘𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀅𑀤𑀺𑀦𑁆𑀦𑀸𑀤𑀸𑀦’’𑀦𑁆𑀢𑀺𑀆𑀤𑀺𑀁. ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀅𑀲𑁆𑀲𑀫𑀡𑁄 𑀅𑀦𑀼𑀧𑀸𑀲𑀓𑁄’’𑀢𑀺 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀬𑀣𑀸 ‘‘𑀅𑀲𑀽𑀭𑀺𑀬𑀁 𑀧𑀲𑁆𑀲𑀢𑀺 𑀓𑀜𑁆𑀜𑀸’’𑀢𑀺 𑀏𑀢𑁆𑀣 ‘‘𑀲𑀽𑀭𑀺𑀬𑀁 𑀦 𑀧𑀲𑁆𑀲𑀢𑀺 𑀓𑀜𑁆𑀜𑀸’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀏𑀯𑀁 ‘‘𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀑𑀓𑀸𑀲𑀁 𑀅𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀗𑁆𑀔𑁆𑀬𑀽𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸 𑀘𑁄𑀤𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁧. 𑀦𑀯𑀫𑁂 𑀤𑀺𑀲𑁆𑀯𑀸𑀢𑀺 𑀅𑀚𑀺𑀓𑀸𑀬 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁 𑀙𑀕𑀮𑀓𑀁 𑀤𑀺𑀲𑁆𑀯𑀸. 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀓𑀸𑀮𑀁 𑀕𑀳𑁂𑀢𑁆𑀯𑀸 𑀪𑀽𑀢𑀧𑀼𑀩𑁆𑀩𑀯𑁄𑀳𑀸𑀭𑁂𑀦 𑀯𑁄𑀳𑀭𑀦𑁆𑀢𑀺. 𑀯𑁂𑀴𑀼𑀯𑀦𑁂𑀬𑁂𑀯𑀸𑀢𑀺 𑀣𑁂𑀭𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑁂𑀳𑀺 𑀯𑀼𑀢𑁆𑀢𑀪𑀢𑁆𑀢𑀼𑀤𑁆𑀤𑁂𑀲𑀯𑁂𑀮𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀘𑁆𑀘𑀺 𑀦𑁄𑀢𑀺 𑀓𑀘𑁆𑀘𑀺 𑀦𑀼. 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑀪𑀸𑀯𑀁 𑀆𑀭𑁄𑀘𑁂𑀲𑀼𑀁.

𑀅𑀜𑁆𑀜𑀪𑀸𑀕𑀲𑁆𑀲𑀸𑀢𑀺 𑀅𑀜𑁆𑀜𑀓𑁄𑀝𑁆𑀞𑀸𑀲𑀲𑁆𑀲, 𑀣𑁂𑀭𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀪𑀺𑀓𑁆𑀔𑀼𑀪𑀸𑀯𑀢𑁄 𑀅𑀜𑁆𑀜𑀲𑁆𑀲 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀙𑀕𑀮𑀓𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁂𑀦 𑀙𑀕𑀮𑀓𑀁 𑀦𑀺𑀤𑁆𑀤𑀺𑀲𑀢𑀺, 𑀇𑀤𑀁 𑀙𑀕𑀮𑀓𑀚𑀸𑀢𑀦𑁆𑀢𑀺 𑀅𑀢𑁆𑀣𑁄, 𑀅𑀬𑀁 𑀙𑀕𑀮𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀓𑀭𑀡𑀲𑀤𑁆𑀤𑀸𑀧𑁂𑀓𑁆𑀔𑁄 𑀯𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀇𑀤𑀁 𑀙𑀕𑀮𑀓𑀲𑀗𑁆𑀔𑀸𑀢𑀁 ¶ 𑀅𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀪𑀸𑀕𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀙𑀕𑀮𑀓𑀪𑀸𑀯𑀲𑀗𑁆𑀔𑀸𑀢𑁄 𑀅𑀜𑁆𑀜𑀪𑀸𑀕𑁄, 𑀅𑀜𑁆𑀜𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀙𑀕𑀮𑀓𑀲𑁆𑀲. ‘‘𑀅𑀜𑁆𑀜𑀪𑀸𑀕𑀲𑀫𑁆𑀩𑀦𑁆𑀥𑀻 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀧𑀞𑀫𑀯𑀺𑀕𑁆𑀕𑀳𑀲𑁆𑀲 𑀅𑀢𑁆𑀣𑁄, ‘‘𑀅𑀜𑁆𑀜𑀪𑀸𑀕𑀯𑀦𑁆𑀢𑀁 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀤𑀼𑀢𑀺𑀬𑀯𑀺𑀕𑁆𑀕𑀳𑀲𑁆𑀲. 𑀤𑁆𑀯𑀻𑀳𑀺𑀧𑀺 𑀯𑀺𑀕𑁆𑀕𑀳𑁂𑀳𑀺 𑀅𑀜𑁆𑀜𑀪𑀸𑀕𑀺𑀬𑀦𑁆𑀢𑀺 𑀙𑀕𑀮𑀓𑁄𑀯 ¶ 𑀯𑀼𑀢𑁆𑀢𑁄. 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀙𑀕𑀮𑀓𑀪𑀸𑀯𑀜𑁆𑀘 𑀞𑀧𑁂𑀢𑁆𑀯𑀸 𑀧𑀭𑀫𑀢𑁆𑀣𑀢𑁄 𑀯𑀺𑀲𑀼𑀁 𑀙𑀕𑀮𑀓𑁂 𑀅𑀲𑀢𑀺𑀧𑀺 ‘‘𑀧𑀝𑀺𑀫𑀸𑀬 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑁂𑀤𑁂𑀧𑀺 𑀪𑁂𑀤𑀓𑀧𑁆𑀧𑀦𑀸𑀬 𑀧𑀯𑀢𑁆𑀢𑀮𑁄𑀓𑀯𑁄𑀳𑀸𑀭𑀯𑀲𑁂𑀦 ‘‘𑀅𑀜𑁆𑀜𑀪𑀸𑀕𑀲𑁆𑀲 𑀇𑀤𑀁, 𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀤𑁆𑀯𑀻𑀳𑀺𑀧𑀺 𑀯𑀺𑀕𑁆𑀕𑀳𑁂𑀳𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀺 𑀲𑁄’’𑀢𑀺𑀆𑀤𑀺𑀫𑀸𑀳. 𑀲𑁄𑀢𑀺 𑀲𑁄 𑀙𑀕𑀮𑀓𑁄. 𑀢𑀲𑁆𑀲 ‘‘𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀢𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀢𑁄 𑀪𑀺𑀓𑁆𑀔𑀼𑀪𑀸𑀯𑀢𑁄 𑀘. 𑀲𑁄 𑀯𑀸 𑀅𑀜𑁆𑀜𑀪𑀸𑀕𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀙𑀕𑀮𑀓𑀪𑀸𑀯𑀲𑀗𑁆𑀔𑀸𑀢𑁄 𑀅𑀜𑁆𑀜𑀪𑀸𑀕𑁄. 𑀅𑀲𑁆𑀲𑀸𑀢𑀺 𑀙𑀕𑀮𑀓𑀲𑁆𑀲. 𑀲𑁄 𑀙𑀕𑀮𑀓𑁄 𑀅𑀜𑁆𑀜𑀪𑀸𑀕𑀺𑀬𑀲𑀗𑁆𑀔𑀸𑀢𑀁 𑀮𑀪𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀥𑀺𑀓𑀭𑀡𑀦𑁆𑀢𑀺 𑀆𑀥𑀸𑀭𑁄, 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑀢𑁆𑀣𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀦𑁆𑀢𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁. 𑀇𑀫𑀦𑁆𑀢𑀺 𑀙𑀕𑀮𑀓𑀁. 𑀦𑀸𑀫𑀓𑀭𑀡𑀲𑀜𑁆𑀜𑀸𑀬𑀸𑀢𑀺 𑀦𑀸𑀫𑀓𑀭𑀡𑀲𑀗𑁆𑀔𑀸𑀢𑀸𑀬 𑀲𑀜𑁆𑀜𑀸𑀬 𑀲𑁄 𑀙𑀕𑀮𑀓𑁄 𑀅𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀜𑁆𑀳𑀺 𑀲𑀦𑁆𑀥𑀸𑀬𑀸𑀢𑀺 ‘‘𑀅𑀯𑀲𑁆𑀲𑀁 𑀢𑀼𑀫𑁆𑀳𑁂𑀳𑀺 𑀮𑁂𑀲𑁄 𑀑𑀟𑁆𑀟𑀺𑀢𑁄, 𑀓𑀺𑀁 𑀯𑀤𑀣, 𑀓𑀺𑀁 𑀧𑀲𑁆𑀲𑀺𑀢𑁆𑀣𑀸’’𑀢𑀺 𑀅𑀦𑀼𑀬𑀼𑀢𑁆𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀙𑀕𑀮𑀓𑀲𑁆𑀲 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀤𑀩𑁆𑀩𑀲𑁆𑀲 𑀦𑀸𑀫𑀁 𑀢𑀲𑁆𑀲 𑀓𑀭𑀺𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀢𑀁 𑀙𑀕𑀮𑀓𑀁 𑀲𑀦𑁆𑀥𑀸𑀬. 𑀢𑁂 𑀪𑀺𑀓𑁆𑀔𑀽𑀢𑀺 𑀢𑁂 𑀅𑀦𑀼𑀬𑀼𑀜𑁆𑀚𑀓𑀸 𑀪𑀺𑀓𑁆𑀔𑀽. 𑀆𑀧𑀢𑁆𑀢𑀺𑀮𑁂𑀲𑀫𑁆𑀧𑀺 𑀧𑀼𑀕𑁆𑀕𑀮𑀲𑁆𑀫𑀺𑀁𑀬𑁂𑀯 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀁. 𑀧𑀤𑀪𑀸𑀚𑀦𑁂 𑀧𑀦…𑀧𑁂… 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀆𑀥𑀸𑀭𑀪𑀽𑀢𑀲𑁆𑀲 𑀙𑀕𑀮𑀓𑀲𑀗𑁆𑀔𑀸𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑁩𑁯𑁩. ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀏𑀢𑁆𑀣 𑀧𑀸𑀴𑀺𑀆𑀕𑀢𑀅𑀥𑀺𑀓𑀭𑀡𑀲𑀤𑁆𑀤𑀧𑀢𑀺𑀭𑀽𑀧𑀓𑀁 𑀅𑀜𑁆𑀜𑀁 𑀅𑀥𑀺𑀓𑀭𑀡𑀲𑀤𑁆𑀤𑀁 𑀧𑀸𑀴𑀺𑀆𑀕𑀢𑀢𑀤𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀉𑀪𑀬𑀧𑀤𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀧𑀸𑀴𑀺𑀬𑀁 𑀆𑀕𑀢𑀲𑀤𑁆𑀤𑀧𑀢𑀺𑀭𑀽𑀧𑀓𑁄 𑀅𑀜𑁆𑀜𑁄 𑀲𑀤𑁆𑀤𑁄 𑀉𑀪𑀬𑀧𑀤𑀢𑁆𑀣𑁄 𑀉𑀤𑁆𑀥𑀭𑀺𑀢𑀩𑁆𑀩𑁄, 𑀦 𑀘 𑀅𑀜𑁆𑀜𑀁 𑀉𑀤𑁆𑀥𑀭𑀺𑀢𑁆𑀯𑀸 ¶ 𑀅𑀜𑁆𑀜𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀧𑀸𑀴𑀺𑀆𑀕𑀢𑀅𑀥𑀺𑀓𑀭𑀡𑀲𑀤𑁆𑀤𑀧𑀢𑀺𑀭𑀽𑀧𑀓𑁄 𑀅𑀜𑁆𑀜𑁄𑀬𑁂𑀯 𑀉𑀪𑀬𑀧𑀤𑀢𑁆𑀣𑀲𑀸𑀥𑀸𑀭𑀡𑁄 𑀅𑀥𑀺𑀓𑀭𑀡𑀲𑀤𑁆𑀤𑁄 𑀉𑀤𑁆𑀥𑀝𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺. 𑀬𑀸 𑀘 𑀲𑀸 𑀅𑀯𑀲𑀸𑀦𑁂…𑀧𑁂… 𑀘𑁄𑀤𑀦𑀸 𑀯𑀼𑀢𑁆𑀢𑀸𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀻 𑀳𑁄𑀢𑀺, 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀻𑀢𑀺𑀆𑀤𑀺𑀘𑁄𑀤𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀸𑀧𑀢𑁆𑀢𑀺𑀬𑁄 𑀯𑀢𑁆𑀣𑀼𑀢𑁄 𑀲𑀪𑀸𑀕𑀸, 𑀇𑀢𑀭𑀸𑀲𑀁 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀆𑀧𑀢𑁆𑀢𑀻𑀦𑀁 𑀲𑀫𑀸𑀦𑁂𑀧𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀪𑀸𑀯𑁂 𑀯𑀢𑁆𑀣𑀼𑀢𑁄 𑀯𑀺𑀲𑀪𑀸𑀕𑀸𑀢𑀺 𑀆𑀳 ‘‘𑀲𑀪𑀸𑀕𑀯𑀺𑀲𑀪𑀸𑀕𑀯𑀢𑁆𑀣𑀼𑀢𑁄’’𑀢𑀺. 𑀲𑀪𑀸𑀯𑀲𑀭𑀺𑀓𑁆𑀔𑀸𑀲𑀭𑀺𑀓𑁆𑀔𑀢𑁄𑀢𑀺 ¶ 𑀲𑀪𑀸𑀯𑁂𑀦 𑀲𑀤𑀺𑀲𑀸𑀲𑀤𑀺𑀲𑀪𑀸𑀯𑀢𑁄. 𑀧𑀞𑀫𑀧𑀸𑀭𑀸𑀚𑀺𑀓𑀜𑁆𑀳𑀺 𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀫𑁂𑀣𑀼𑀦𑀭𑀸𑀕𑁂𑀦 𑀲𑀪𑀸𑀯𑀢𑁄 𑀲𑀤𑀺𑀲𑀁, 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀦 𑀅𑀲𑀤𑀺𑀲𑀁. 𑀦𑀦𑀼 𑀘 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀺𑀬𑀸 𑀢𑀩𑁆𑀪𑀸𑀕𑀺𑀬𑀁, 𑀲𑀺𑀬𑀸 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀢𑀩𑁆𑀪𑀸𑀕𑀺𑀬𑀢𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀅𑀜𑁆𑀜𑀪𑀸𑀕𑀺𑀬𑀢𑀸 𑀧𑀞𑀫𑀁 𑀓𑀲𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀆𑀳 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀪𑀸𑀕𑀯𑀺𑀲𑀪𑀸𑀕𑀯𑀢𑁆𑀣𑀼𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

‘‘𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀢𑁄 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀯𑀺𑀲𑀼𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀓𑀺𑀁 𑀧𑀦𑀸’’𑀢𑀺𑀆𑀤𑀺. ‘‘𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀸𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀗𑁆𑀖𑀓𑀫𑁆𑀫𑀸𑀦𑀫𑁂𑀯𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 ‘‘𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀢𑀲𑁆𑀲 𑀢𑀲𑁆𑀲 𑀲𑀗𑁆𑀖𑀓𑀫𑁆𑀫𑀲𑁆𑀲 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀮𑀓𑁆𑀔𑀡𑀁𑀬𑁂𑀯 𑀢𑀢𑁄 𑀲𑀗𑁆𑀖𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀢𑁄 𑀨𑀮𑀽𑀧𑀘𑀸𑀭𑁂𑀦 𑀲𑀗𑁆𑀖𑀓𑀫𑁆𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀆𑀳 ‘‘𑀬𑀁 𑀓𑀫𑁆𑀫𑀮𑀓𑁆𑀔𑀡𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺. 𑀧𑀭𑀺𑀯𑀸𑀲𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀫𑀸𑀦𑀢𑁆𑀢𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀤𑀻𑀦𑀺 𑀇𑀲𑁆𑀲𑀸𑀬 𑀑𑀲𑀸𑀭𑀡𑀲𑀻𑀫𑀸𑀲𑀫𑀽𑀳𑀦𑀦𑀸𑀤𑀺𑀓𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀘 ‘‘𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀲𑀗𑁆𑀖𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁯𑁫-𑁪𑁦𑁦. 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. 𑀤𑀻𑀖𑀸𑀤𑀺𑀦𑁄𑀢𑀺 𑀤𑀻𑀖𑀭𑀲𑁆𑀲𑀓𑀸𑀴𑀑𑀤𑀸𑀢𑀸𑀤𑀺𑀦𑁄. 𑀤𑀺𑀝𑁆𑀞𑀸𑀤𑀺𑀦𑁄𑀢𑀺 𑀤𑀺𑀝𑁆𑀞𑀲𑀼𑀢𑀸𑀤𑀺𑀦𑁄. 𑀮𑁄𑀳𑀧𑀢𑁆𑀢𑀲𑀤𑀺𑀲𑁄𑀢𑀺 ¶ 𑀅𑀬𑁄𑀧𑀢𑁆𑀢𑀲𑀤𑀺𑀲𑁄. 𑀅𑀗𑁆𑀕𑀸𑀦𑀺 𑀧𑀞𑀫𑀤𑀼𑀝𑁆𑀞𑀤𑁄𑀲𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑀺, 𑀇𑀥 𑀧𑀦 𑀓𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀺𑀬𑀦𑀸 𑀅𑀥𑀺𑀓𑀸.

𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁦. 𑀤𑀲𑀫𑁂 𑀬𑁂 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺 𑀅𑀧𑁆𑀧𑀣𑀸𑀫𑀸, 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀭𑀜𑁆𑀜𑀓𑀸𑀤𑀻𑀦𑀺 𑀲𑁂𑀯𑀦𑁆𑀢𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁, 𑀢𑁂 𑀲𑀦𑁆𑀥𑀸𑀬𑀸𑀳 ‘‘𑀩𑀳𑀽𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀕𑁆𑀕𑀦𑁆𑀢𑀭𑀸𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀲𑀫𑁆𑀧𑀦𑁆𑀦𑁄𑀢𑀺 ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀻𑀢𑀼𑀡𑁆𑀳𑀸𑀤𑀺𑀲𑀳𑀦𑀮𑀓𑁆𑀔𑀡𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄. 𑀬𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺 ¶ , 𑀅𑀬𑀁 ‘‘𑀧𑀤𑀧𑀭𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑀫𑁆𑀪𑀼𑀡𑀺𑀢𑁆𑀯𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑁆𑀯𑀸. 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀻𑀢𑀺 𑀦 𑀲𑀫𑁆𑀧𑀸𑀤𑁂𑀢𑀺, 𑀅𑀭𑀜𑁆𑀜𑀯𑀸𑀲𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀅𑀧𑁂𑀢𑀁 𑀉𑀤𑁆𑀥𑀫𑁆𑀫𑀁. 𑀅𑀲𑀩𑁆𑀩𑀜𑁆𑀜𑀽 𑀅𑀲𑁆𑀲𑀸𑀢𑀺 𑀢𑁂𑀲𑀁 𑀅𑀦𑀼𑀭𑀽𑀧𑀲𑁆𑀲 𑀅𑀚𑀸𑀦𑀦𑀢𑁄 𑀅𑀲𑀩𑁆𑀩𑀜𑁆𑀜𑀽 𑀪𑀯𑁂𑀬𑁆𑀬. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀧𑀦…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀫𑁆𑀧𑀺 ‘‘𑀅𑀝𑁆𑀞 𑀫𑀸𑀲𑁂 𑀔𑁄 𑀫𑀬𑀸 𑀤𑁂𑀯𑀤𑀢𑁆𑀢 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀻𑀳𑀺 𑀓𑁄𑀝𑀻𑀳𑀻𑀢𑀺 𑀢𑀻𑀳𑀺 𑀆𑀓𑀸𑀭𑁂𑀳𑀺, 𑀢𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀤𑀺𑀝𑁆𑀞𑀁 𑀲𑀼𑀢𑀦𑁆𑀢𑀺 𑀇𑀤𑀁 𑀉𑀪𑀬𑀁 𑀅𑀦𑀺𑀲𑁆𑀲𑀸𑀬 ‘‘𑀓𑀺𑀁 𑀦𑀼 𑀔𑁄 𑀇𑀤𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀯𑀥𑀺𑀢𑁆𑀯𑀸 𑀲𑀫𑁆𑀧𑀸𑀤𑀺𑀢’’𑀦𑁆𑀢𑀺 𑀓𑁂𑀯𑀮𑀫𑁂𑀯 𑀧𑀭𑀺𑀲𑀗𑁆𑀓𑀺𑀢𑀁. 𑀫𑀘𑁆𑀙𑀩𑀦𑁆𑀥𑀦𑀁 𑀚𑀸𑀮𑀁, 𑀯𑀸𑀕𑀼𑀭𑀸 𑀫𑀺𑀕𑀩𑀦𑁆𑀥𑀦𑀻. 𑀓𑀧𑁆𑀧𑀢𑀻𑀢𑀺 𑀬𑀤𑀺 𑀢𑁂𑀲𑀁 𑀯𑀘𑀦𑁂𑀦 𑀆𑀲𑀗𑁆𑀓𑀸 𑀉𑀧𑀘𑁆𑀙𑀺𑀦𑁆𑀦𑀸 𑀳𑁄𑀢𑀺, 𑀯𑀝𑁆𑀝𑀢𑀺. 𑀧𑀯𑀢𑁆𑀢𑀫𑀁𑀲𑀦𑁆𑀢𑀺 𑀯𑀺𑀓𑁆𑀓𑀸𑀬𑀺𑀓𑀫𑀁𑀲𑀁. 𑀫𑀗𑁆𑀕𑀮𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀳𑀼𑀦𑀧𑀸𑀳𑀼𑀦𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀅𑀓𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀽𑀦𑀜𑁆𑀘 𑀤𑀲𑁆𑀲𑀸𑀫, 𑀫𑀗𑁆𑀕𑀮𑀸𑀤𑀻𑀦𑀜𑁆𑀘 𑀅𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀪𑀺𑀓𑁆𑀔𑀽𑀦𑀁𑀬𑁂𑀯𑀸𑀢𑀺 ¶ 𑀅𑀯𑀥𑀸𑀭𑀡𑁂𑀦 𑀪𑀺𑀓𑁆𑀔𑀽𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀅𑀢𑁆𑀣𑀸𑀬 𑀓𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑁂𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀲𑀗𑁆𑀓𑀺𑀢𑀸𑀪𑀸𑀯𑀫𑀸𑀳. 𑀢𑀫𑁂𑀯𑀢𑁆𑀣𑀁 𑀆𑀯𑀺𑀓𑀸𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀁 𑀯𑀝𑁆𑀝𑀢𑀻𑀢𑀺 𑀅𑀚𑀸𑀦𑀦𑁆𑀢𑀸𑀦𑀁 𑀯𑀝𑁆𑀝𑀢𑀺, 𑀚𑀸𑀦𑀢𑁄 𑀏𑀯𑁂𑀢𑁆𑀣 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀢𑁂𑀬𑁂𑀯𑀸𑀢𑀺 𑀬𑁂 𑀉𑀤𑁆𑀤𑀺𑀲𑁆𑀲 𑀓𑀢𑀁, 𑀢𑁂𑀬𑁂𑀯. 𑀉𑀤𑁆𑀤𑀺𑀲𑀓𑀢𑀫𑀁𑀲𑀧𑀭𑀺𑀪𑁄𑀕𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀧𑀭𑀺𑀪𑁄𑀕𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺, 𑀇𑀢𑀭𑀲𑁆𑀫𑀺𑀁 𑀅𑀘𑀺𑀢𑁆𑀢𑀓𑀸. 𑀢𑁂𑀦𑀸𑀳 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺. ‘‘𑀧𑀭𑀺𑀪𑁄𑀕𑀓𑀸𑀮𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸. 𑀅𑀚𑀸𑀦𑀺𑀢𑁆𑀯𑀸𑀧𑀺 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀳𑀺 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀯𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀮𑁆𑀮𑁂𑀔𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑁄. 𑀩𑀸𑀳𑀼𑀮𑀺𑀓𑁄𑀢𑀺 𑀏𑀓𑀲𑁆𑀲 𑀮-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀲𑀗𑁆𑀖𑀪𑁂𑀤𑀓𑁄 𑀳𑀺 𑀏𑀓𑀁 𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀦𑀺𑀭𑀬𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 ‘‘𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀧𑁆𑀧𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁮𑁦𑁯) 𑀧𑀦 ‘‘𑀲𑀡𑁆𑀞𑀳𑀦𑁆𑀢𑁂 𑀳𑀺 𑀓𑀧𑁆𑀧𑁂 𑀓𑀧𑁆𑀧𑀯𑁂𑀫𑀚𑁆𑀛𑁂 𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀳𑀺 𑀲𑁆𑀯𑁂 𑀓𑀧𑁆𑀧𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀚𑁆𑀚 𑀲𑀗𑁆𑀖𑀪𑁂𑀤𑀁 𑀓𑀭𑁄𑀢𑀺, 𑀲𑁆𑀯𑁂𑀯 ¶ 𑀫𑀼𑀘𑁆𑀘𑀢𑀺, 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀆𑀬𑀼𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀲𑀡𑁆𑀞𑀳𑀦𑁆𑀢𑁂𑀢𑀺 𑀇𑀤𑀫𑁆𑀧𑀺 ‘‘𑀲𑁆𑀯𑁂 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀯𑀺𑀬 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀢𑀢𑁄 𑀧𑀭𑀁 𑀓𑀧𑁆𑀧𑀸𑀪𑀸𑀯𑁂 𑀆𑀬𑀼𑀓𑀧𑁆𑀧𑀲𑁆𑀲𑀧𑀺 𑀅𑀪𑀸𑀯𑀢𑁄𑀢𑀺 𑀅𑀯𑀺𑀭𑁄𑀥𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀁 𑀧𑀼𑀜𑁆𑀜𑀁. 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻𑀢𑀺 𑀏𑀢𑁆𑀣𑀸𑀧𑀺 𑀆𑀬𑀼𑀓𑀧𑁆𑀧𑀫𑁂𑀯.

𑁪𑁧𑁧. 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀦𑀸𑀢𑀺 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄, 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑀣𑀸 𑀦𑀸𑀦𑀸𑀲𑀁𑀯𑀸𑀲𑀓𑁂𑀦 𑀲𑀳𑀺𑀢𑀲𑁆𑀲 𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲𑀧𑀺 ¶ 𑀲𑀗𑁆𑀖𑀲𑁆𑀲 𑀅𑀲𑀫𑀸𑀦𑀲𑀁𑀯𑀸𑀲𑀓𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄 𑀦𑀸𑀫 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁄. 𑀲𑁄 𑀳𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀦𑀸𑀦𑀸𑀲𑀁𑀯𑀸𑀲𑀓𑁄 𑀚𑀸𑀢𑁄𑀢𑀺 ‘‘𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄 𑀦𑀸𑀫 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄. 𑀲𑁄 𑀳𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀲𑁂𑀦 𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀭𑀳𑀺𑀢𑁄𑀢𑀺 𑀯𑀺𑀫𑀼𑀢𑁆𑀢𑁄. 𑀓𑀸𑀬𑀲𑀸𑀫𑀕𑁆𑀕𑀻𑀤𑀸𑀦𑀁 𑀢𑁂𑀲𑀼 𑀢𑁂𑀲𑀼 𑀲𑀗𑁆𑀖𑀓𑀫𑁆𑀫𑁂𑀲𑀼 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

‘‘𑀪𑁂𑀤𑀸𑀬 𑀧𑀭𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀲𑀫𑀸𑀤𑀸𑀬 𑀧𑀕𑁆𑀕𑀡𑁆𑀳𑀢𑁄 𑀧𑀼𑀩𑁆𑀩𑁂𑀧𑀺 𑀧𑀓𑁆𑀔𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀦𑀺 𑀯𑀢𑁆𑀣𑀽𑀦𑀻𑀢𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺. 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀸𑀭𑁂𑀦𑀸𑀢𑀺 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀤𑀻𑀧𑀓𑁂𑀦 𑀯𑁄𑀳𑀸𑀭𑁂𑀦. 𑀅𑀦𑀼𑀲𑁆𑀲𑀸𑀯𑀦𑀸𑀬𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁, 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀁 𑀯𑀺𑀬 𑀲𑀻𑀢𑀮𑁄, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦. 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀪𑁂𑀤𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀲𑀗𑁆𑀖𑀪𑁂𑀤𑁂 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑀏𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀅𑀩𑁆𑀪𑀼𑀲𑁆𑀲𑀺𑀢𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑀁. 𑀅𑀘𑁆𑀙𑁂𑀬𑁆𑀬𑀸𑀢𑀺 𑀯𑀺𑀳𑀭𑁂𑀬𑁆𑀬, 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

‘‘𑀮𑀚𑁆𑀚𑀻 ¶ 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀢𑁄 𑀆𑀧𑀢𑁆𑀢𑀺𑀪𑀬𑁂𑀦 𑀆𑀭𑁄𑀘𑀦𑀁 𑀮𑀚𑁆𑀚𑀻𑀦𑀁𑀬𑁂𑀯 𑀪𑀸𑀭𑁄𑀢𑀺 𑀆𑀳 ‘‘𑀮𑀚𑁆𑀚𑀻𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺. 𑀅𑀮𑀚𑁆𑀚𑀺𑀲𑁆𑀲𑀧𑀺 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯 ‘‘𑀬𑁂 𑀧𑀲𑁆𑀲𑀦𑁆𑀢𑀺, 𑀬𑁂 𑀲𑀼𑀡𑀦𑁆𑀢𑀻’’𑀢𑀺 𑀯𑀘𑀦𑀢𑁄. 𑀲𑀫𑀸𑀕𑀘𑁆𑀙𑀢𑀽𑀢𑀺 𑀏𑀓𑀻 ¶ 𑀪𑀯𑀢𑀼. 𑀏𑀓𑀻𑀪𑀸𑀯𑁄 𑀘 𑀲𑀫𑀸𑀦𑀮𑀤𑁆𑀥𑀺𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀮𑀤𑁆𑀥𑀺𑀓𑁄 𑀳𑁄𑀢𑀽’’𑀢𑀺. 𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 ‘‘𑀲𑁄𑀢𑁆𑀣𑀺𑀪𑀸𑀯𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀤𑀦𑁆𑀢𑀸𑀦𑀁 𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀧𑀳𑁄𑀦𑁆𑀢𑁂𑀦𑀸𑀢𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑁂𑀦 𑀅𑀕𑀺𑀮𑀸𑀦𑁂𑀦. 𑀲𑀗𑁆𑀖𑀪𑁂𑀤𑀲𑁆𑀲 𑀕𑀭𑀼𑀓𑀪𑀸𑀯𑀢𑁄 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 ‘‘𑀤𑀽𑀭𑁂𑀧𑀺 𑀪𑀸𑀭𑁄𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀆𑀧𑀢𑁆𑀢𑀺 𑀧𑀦 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀦𑁆𑀢𑀼𑀁 𑀲𑀫𑀢𑁆𑀣𑀲𑁆𑀲 𑀅𑀕𑀺𑀮𑀸𑀦𑀲𑁆𑀲𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁬. 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀓𑀫𑁆𑀫𑀓𑀸𑀭𑀓𑁂 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲𑀸’’𑀢𑀺. 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑁂 𑀘 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲. 𑀓𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂𑀦 𑀓𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀭𑀼𑀘𑀺𑀫𑀢𑁆𑀢𑁂𑀦 𑀯𑀤𑁂𑀬𑁆𑀬𑀸𑀢𑀺𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑁂𑀬𑁆𑀬. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀲𑁆𑀲𑁂𑀯 𑀅𑀪𑀸𑀯𑀢𑁄 ‘‘𑀦 𑀳𑀺 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁂𑀦𑁂𑀯 𑀳𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁄𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑁄𑀫𑀦𑁆𑀣𑀓𑀲𑁆𑀲 𑀭𑁄𑀫𑀦𑁆𑀣𑀦’’𑀦𑁆𑀢𑀺𑀆𑀤𑀺𑀁 (𑀘𑀽𑀴𑀯. 𑁨𑁭𑁩) 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺𑀬𑀦𑁆𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂. 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑁄𑀢𑀺 𑀅𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀭𑀡𑀢𑁆𑀣𑀁 𑀆𑀭𑁄𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀆𑀧𑀢𑁆𑀢𑀺𑀬𑁂𑀯 𑀦 𑀚𑀸𑀢𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀦 𑀚𑀸𑀢𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦𑁂𑀲𑀸𑀢𑀺 𑀲𑀸 𑀧𑀦 𑀏𑀲𑀸 𑀅𑀦𑀸𑀧𑀢𑁆𑀢𑀺. 𑀢𑀺𑀯𑀗𑁆𑀕𑀺𑀓𑀦𑁆𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀲𑁂𑀦 𑀢𑀺𑀯𑀗𑁆𑀕𑀺𑀓𑀁, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀲𑀘𑀺𑀢𑁆𑀢𑀓𑀦𑁆𑀢𑀺 ‘‘𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁. 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀥𑀫𑁆𑀫𑀓𑀫𑁆𑀫𑁂𑀦 𑀲𑀫𑀦𑀼𑀪𑀸𑀲𑀦𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀁, 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁭-𑁪𑁧𑁮. 𑀏𑀓𑀸𑀤𑀲𑀫𑁂 ¶ ¶ 𑀬𑀁 𑀯𑀘𑀦𑀁 𑀲𑀫𑀕𑁆𑀕𑁂𑀧𑀺 𑀯𑀕𑁆𑀕𑁂 𑀅𑀯𑀬𑀯𑀪𑀽𑀢𑁂 𑀓𑀭𑁄𑀢𑀺 𑀪𑀺𑀦𑁆𑀤𑀢𑀺, 𑀢𑀁 𑀓𑀮𑀳𑀓𑀸𑀭𑀓𑀯𑀘𑀦𑀁 𑀇𑀥 𑀯𑀕𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑀕𑁆𑀕𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁 𑀯𑀤𑀦𑁆𑀢𑀻’’𑀢𑀺. 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑁂 𑀪𑀯𑀸 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀸, 𑀓𑀮𑀳𑀓𑀸. 𑀢𑁂𑀲𑀁 𑀯𑀘𑀦𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁, 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑁂 𑀯𑀸 𑀪𑀯𑀁 𑀯𑀘𑀦𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁. 𑀬𑀲𑁆𑀫𑀸 𑀉𑀩𑁆𑀩𑀸𑀳𑀺𑀓𑀸𑀤𑀺𑀓𑀫𑁆𑀫𑀁 𑀩𑀳𑀽𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀦 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀇𑀤𑀁 𑀦𑀺𑀕𑁆𑀕𑀳𑀯𑀲𑁂𑀦 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁 𑀧𑀳𑀸𑀬 𑀅𑀦𑀼𑀯𑀢𑁆𑀢𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯.

𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪. 𑀤𑁆𑀯𑀸𑀤𑀲𑀫𑁂 𑀯𑀫𑁆𑀪𑀦𑀯𑀘𑀦𑀦𑁆𑀢𑀺 𑀕𑀭𑀳𑀯𑀘𑀦𑀁. 𑀅𑀧𑀲𑀸𑀤𑁂𑀢𑀼𑀓𑀸𑀫𑁄𑀢𑀺 𑀔𑀺𑀧𑀺𑀢𑀼𑀓𑀸𑀫𑁄, 𑀢𑀚𑁆𑀚𑁂𑀢𑀼𑀓𑀸𑀫𑁄 𑀯𑀸, 𑀖𑀝𑁆𑀝𑁂𑀢𑀼𑀓𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀝𑀲𑀤𑁆𑀤𑁄 𑀧𑀢𑀺𑀢𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄. 𑀯𑀺𑀲𑁂𑀲𑀦𑀲𑁆𑀲 𑀘 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 𑀢𑀺𑀡𑀓𑀝𑁆𑀞𑀧𑀡𑁆𑀡𑀲𑀝𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀢𑁆𑀣 𑀢𑀢𑁆𑀣 𑀧𑀢𑀺𑀢𑀁 𑀢𑀺𑀡𑀓𑀝𑁆𑀞𑀧𑀡𑁆𑀡’’𑀦𑁆𑀢𑀺. 𑀓𑁂𑀦𑀸𑀧𑀻𑀢𑀺 𑀯𑀸𑀢𑀲𑀤𑀺𑀲𑁂𑀦 𑀦𑀤𑀻𑀲𑀤𑀺𑀲𑁂𑀦 𑀘 𑀓𑁂𑀦𑀸𑀧𑀺.

𑁪𑁨𑁫-𑁪𑁨𑁬. 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀘𑁆𑀘𑀫𑀸𑀦𑁂 𑀅𑀲𑀳𑀦𑀢𑁄 𑀑𑀯𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀓𑀽𑀮𑀕𑁆𑀕𑀸𑀳𑁂 𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑁂 𑀅𑀦𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀯𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺. 𑀤𑀼𑀩𑁆𑀩𑀘𑀪𑀸𑀯𑀓𑀭𑀡𑀻𑀬𑁂𑀳𑀻𑀢𑀺 𑀤𑀼𑀩𑁆𑀩𑀘𑀪𑀸𑀯𑀓𑀸𑀭𑀓𑁂𑀳𑀺. 𑀓𑀢𑁆𑀢𑀼𑀅𑀢𑁆𑀣𑁂 𑀅𑀦𑀻𑀬𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀬𑁂 𑀥𑀫𑁆𑀫𑀸 𑀤𑀼𑀩𑁆𑀩𑀘𑀁 𑀧𑀼𑀕𑁆𑀕𑀮𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀺. 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸, 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀧𑀸𑀧𑀺𑀘𑁆𑀙𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀢𑀼𑀓𑁆𑀓𑀁𑀲𑀓𑀸 𑀘 𑀢𑁂 𑀧𑀭𑀯𑀫𑁆𑀪𑀓𑀸 𑀘𑀸𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀓𑀧𑀭𑀯𑀫𑁆𑀪𑀓𑀸. 𑀬𑁂 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑀦𑁆𑀢𑀺 𑀉𑀓𑁆𑀔𑀺𑀧𑀦𑁆𑀢𑀺 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀧𑀭𑀜𑁆𑀘 𑀯𑀫𑁆𑀪𑁂𑀦𑁆𑀢𑀺 𑀕𑀭𑀳𑀦𑁆𑀢𑀺 𑀦𑀻𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺, 𑀢𑁂𑀲𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀁 𑀪𑀸𑀯𑁄 𑀅𑀢𑁆𑀢𑀼𑀓𑁆𑀓𑀁𑀲𑀓𑀧𑀭𑀯𑀫𑁆𑀪𑀓𑀢𑀸. 𑀓𑀼𑀚𑁆𑀛𑀦𑀲𑀻𑀮𑁄 𑀓𑁄𑀥𑀦𑁄, 𑀢𑀲𑁆𑀲 𑀪𑀸𑀯𑁄 𑀓𑁄𑀥𑀦𑀢𑀸. 𑀓𑀼𑀚𑁆𑀛𑀦𑀮𑀓𑁆𑀔𑀡𑀲𑁆𑀲 𑀓𑁄𑀥𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀧𑀼𑀩𑁆𑀩𑀓𑀸𑀮𑁂 ¶ ¶ 𑀓𑁄𑀥𑁄, 𑀅𑀧𑀭𑀓𑀸𑀮𑁂 𑀉𑀧𑀦𑀸𑀳𑁄𑀢𑀺 𑀆𑀳 ‘‘𑀓𑁄𑀥𑀳𑁂𑀢𑀼 𑀉𑀧𑀦𑀸𑀳𑀺𑀢𑀸’’𑀢𑀺. 𑀢𑀢𑁆𑀣 𑀉𑀧𑀦𑀳𑀦𑀲𑀻𑀮𑁄, 𑀉𑀧𑀦𑀸𑀳𑁄 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑀦𑀸𑀳𑀻, 𑀢𑀲𑁆𑀲 𑀪𑀸𑀯𑁄 𑀉𑀧𑀦𑀸𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀧𑀭𑀺𑀬𑁄𑀦𑀤𑁆𑀥𑀮𑀓𑁆𑀔𑀡𑀲𑁆𑀲 𑀓𑁄𑀥𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀓𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑁄 𑀓𑁄𑀥𑁄 𑀓𑁄𑀥𑁄𑀬𑁂𑀯, 𑀢𑀢𑀼𑀢𑁆𑀢𑀭𑀺 𑀉𑀧𑀦𑀸𑀳𑁄. 𑀅𑀪𑀺𑀲𑀗𑁆𑀕𑁄𑀢𑀺 𑀤𑀼𑀫𑁆𑀫𑁄𑀘𑀦𑀻𑀬𑁄 𑀩𑀮𑀯𑀉𑀧𑀦𑀸𑀳𑁄. 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀪𑀺𑀲𑀗𑁆𑀕𑀻, 𑀢𑀲𑁆𑀲 𑀪𑀸𑀯𑁄 𑀅𑀪𑀺𑀲𑀗𑁆𑀕𑀺𑀢𑀸. 𑀤𑀼𑀫𑁆𑀫𑁄𑀘𑀦𑀻𑀬𑀲𑁆𑀲 𑀩𑀮𑀯𑀉𑀧𑀦𑀸𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀘𑁄𑀤𑀓𑀁 𑀧𑀝𑀺𑀧𑁆𑀨𑀭𑀡𑀢𑀸𑀢𑀺 𑀘𑁄𑀤𑀓𑀲𑁆𑀲 𑀧𑀝𑀺𑀯𑀺𑀭𑀼𑀤𑁆𑀥𑁂𑀦 𑀧𑀘𑁆𑀘𑀦𑀻𑀓𑁂𑀦 𑀳𑀼𑀢𑁆𑀯𑀸 𑀅𑀯𑀝𑁆𑀞𑀸𑀦𑀁. 𑀘𑁄𑀤𑀓𑀁 𑀅𑀧𑀲𑀸𑀤𑀦𑀢𑀸𑀢𑀺 ‘‘𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦, 𑀢𑁆𑀯𑀫𑁆𑀧𑀺 𑀦𑀸𑀫 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀘𑁄𑀤𑀓𑀲𑁆𑀲 𑀖𑀝𑁆𑀝𑀦𑀸. 𑀘𑁄𑀤𑀓𑀲𑁆𑀲 𑀧𑀘𑁆𑀘𑀸𑀭𑁄𑀧𑀦𑀢𑀸𑀢𑀺 ‘‘𑀢𑁆𑀯𑀫𑁆𑀧𑀺 𑀔𑁄𑀲𑀺 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀢𑀸𑀯 𑀧𑀝𑀺𑀓𑀭𑁄𑀳𑀻’’𑀢𑀺 𑀏𑀯𑀁 𑀘𑁄𑀤𑀓𑀲𑁆𑀲 𑀉𑀧𑀭𑀺 𑀧𑀝𑀺𑀆𑀭𑁄𑀧𑀦𑀢𑀸.

𑀅𑀜𑁆𑀜𑁂𑀦 𑀅𑀜𑁆𑀜𑀁 𑀧𑀝𑀺𑀘𑀭𑀡𑀢𑀸𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦, 𑀯𑀘𑀦𑁂𑀦 𑀯𑀸 𑀅𑀜𑁆𑀜𑀲𑁆𑀲 𑀓𑀸𑀭𑀡𑀲𑁆𑀲, 𑀯𑀘𑀦𑀲𑁆𑀲 𑀯𑀸 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀘𑀭𑀡𑀢𑀸. 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄 𑀏𑀯 𑀯𑀸 𑀘𑀭𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀢𑀸𑀢𑀺 𑀅𑀢𑁆𑀣𑁄. 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑀺 𑀧𑀼𑀕𑁆𑀕𑀮𑁄 𑀬𑀁 𑀘𑁄𑀤𑀓𑁂𑀦 𑀤𑁄𑀲𑀯𑀺𑀪𑀸𑀯𑀦𑀓𑀸𑀭𑀡𑀁, 𑀯𑀘𑀦𑀁 𑀯𑀸 𑀯𑀼𑀢𑁆𑀢𑀁, 𑀢𑀁 𑀢𑀢𑁄 𑀅𑀜𑁆𑀜𑁂𑀦𑁂𑀯 𑀘𑁄𑀤𑀦𑀸𑀬 𑀅𑀫𑀽𑀮𑀺𑀓𑀪𑀸𑀯𑀤𑀻𑀧𑀦𑁂𑀦 𑀓𑀸𑀭𑀡𑁂𑀦, 𑀢𑀤𑀢𑁆𑀣𑀩𑁄𑀥𑀓𑁂𑀦 𑀯𑀘𑀦𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺 𑀯𑀸 𑀯𑀢𑁆𑀯𑀸 ‘‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀁 𑀯𑀸 𑀉𑀧𑀦𑀸𑀫𑁂𑀢𑁆𑀯𑀸 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄𑀧𑀺 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀝𑁆𑀞𑁂 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀧𑀼𑀘𑁆𑀙𑀸𑀫, 𑀆𑀧𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁄 ‘‘𑀭𑀸𑀚𑀕𑀳𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 ‘‘𑀭𑀸𑀚𑀕𑀳𑀁 𑀯𑀸 𑀬𑀸𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀁 𑀯𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀩𑀳𑀺𑀤𑁆𑀥𑀸 𑀓𑀣𑀸𑀯𑀺𑀓𑁆𑀔𑀺𑀧𑀦𑀫𑁆𑀧𑀺 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀫𑁂𑀯𑀸𑀢𑀺 𑀯𑀺𑀲𑀼𑀁 𑀦 𑀕𑀳𑀺𑀢𑀁.

𑀅𑀧𑀤𑀸𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀘𑀭𑀺𑀬𑀸𑀬. 𑀅𑀧𑀤𑀻𑀬𑀦𑁆𑀢𑀺 𑀳𑀺 𑀤𑁄𑀲𑀸 𑀏𑀢𑁂𑀦 𑀤𑀓𑁆𑀔𑀻𑀬𑀦𑁆𑀢𑀺, 𑀮𑀼𑀬𑀦𑁆𑀢𑀺 𑀙𑀺𑀚𑁆𑀚𑀦𑁆𑀢𑀻𑀢𑀺 𑀯𑀸 𑀅𑀧𑀤𑀸𑀦𑀁, 𑀲𑀢𑁆𑀢𑀸𑀦𑀁 𑀲𑀫𑁆𑀫𑀸 𑀫𑀺𑀘𑁆𑀙𑀸 𑀯𑀸 𑀯𑀢𑁆𑀢𑀧𑁆𑀧𑀬𑁄𑀕𑁄. 𑀦 𑀲𑀫𑁆𑀧𑀸𑀬𑀦𑀢𑀸𑀢𑀺 ‘‘𑀆𑀯𑀼𑀲𑁄, 𑀢𑁆𑀯𑀁 𑀓𑀼𑀳𑀺𑀁 𑀯𑀲𑀲𑀺, 𑀓𑀁 𑀦𑀺𑀲𑁆𑀲𑀸𑀬 𑀯𑀲𑀲𑀻’’𑀢𑀺 𑀯𑀸 ‘‘𑀬𑀁 𑀢𑁆𑀯𑀁 𑀯𑀤𑁂𑀲𑀺 ‘𑀫𑀬𑀸 𑀏𑀲 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄’𑀢𑀺, 𑀢𑁆𑀯𑀁 ¶ 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀁 𑀓𑀭𑁄𑀲𑀺, 𑀅𑀬𑀁 𑀓𑀺𑀁 𑀓𑀭𑁄𑀢𑀺, 𑀓𑀢𑁆𑀣 𑀘 𑀢𑁆𑀯𑀁 𑀅𑀳𑁄𑀲𑀺, 𑀓𑀢𑁆𑀣 𑀅𑀬’’𑀦𑁆𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀘𑀭𑀺𑀬𑀁 𑀧𑀼𑀝𑁆𑀞𑁂𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀓𑀣𑀦𑀁.

𑀫𑀓𑁆𑀔𑀺𑀧𑀴𑀸𑀲𑀺𑀢𑀸𑀢𑀺 𑀏𑀢𑁆𑀣 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀓𑁆𑀔𑀻. 𑀢𑀸𑀤𑀺𑀲𑁄 ¶ 𑀧𑀼𑀕𑁆𑀕𑀮𑁄 𑀅𑀕𑀸𑀭𑀺𑀬𑁄 𑀅𑀦𑀕𑀸𑀭𑀺𑀬𑁄 𑀯𑀸 𑀲𑀫𑀸𑀦𑁄 𑀧𑀭𑁂𑀲𑀁 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺. 𑀅𑀕𑀸𑀭𑀺𑀬𑁄𑀧𑀺 𑀳𑀺 𑀓𑁂𑀦𑀘𑀺 𑀅𑀦𑀼𑀓𑀫𑁆𑀧𑀓𑁂𑀦 𑀤𑀮𑀺𑀤𑁆𑀤𑁄 𑀲𑀫𑀸𑀦𑁄 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀅𑀧𑀭𑁂𑀦 𑀲𑀫𑀬𑁂𑀦 ‘‘𑀓𑀺𑀁 𑀢𑀬𑀸 𑀫𑀬𑁆𑀳𑀁 𑀓𑀢’’𑀦𑁆𑀢𑀺 𑀢𑀲𑁆𑀲 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺. 𑀅𑀦𑀕𑀸𑀭𑀺𑀬𑁄𑀧𑀺 𑀲𑀸𑀫𑀡𑁂𑀭𑀓𑀸𑀮𑀢𑁄 𑀧𑀪𑀼𑀢𑀺 𑀆𑀘𑀭𑀺𑀬𑁂𑀦 𑀯𑀸 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀦𑀬𑀧𑀓𑀭𑀡𑀓𑁄𑀲𑀮𑁆𑀮𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀺𑀢𑁄, 𑀅𑀧𑀭𑁂𑀦 𑀲𑀫𑀬𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀘𑀺𑀢𑁆𑀢𑀻𑀓𑀢𑁄 𑀘𑀭𑀫𑀸𑀦𑁄 ‘‘𑀅𑀬𑀁 𑀅𑀫𑁆𑀳𑁂𑀳𑀺 𑀤𑀳𑀭𑀓𑀸𑀮𑁂 𑀏𑀯 𑀅𑀦𑀼𑀕𑁆𑀕𑀳𑀺𑀢𑁄 𑀲𑀁𑀯𑀤𑁆𑀥𑀺𑀢𑁄 𑀘, 𑀅𑀣 𑀘 𑀧𑀦𑀺𑀤𑀸𑀦𑀺 𑀦𑀺𑀲𑁆𑀲𑀺𑀦𑁂𑀳𑁄 𑀚𑀸𑀢𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀓𑀺𑀁 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀢𑁂𑀲𑀁 𑀲𑀼𑀓𑀢𑀓𑀭𑀡𑀁 𑀯𑀺𑀦𑀸𑀲𑁂𑀢𑀺.

‘‘𑀩𑀳𑀼𑀲𑁆𑀲𑀼𑀢𑁂𑀧𑀺 𑀧𑀼𑀕𑁆𑀕𑀮𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀈𑀤𑀺𑀲𑀲𑁆𑀲 𑀘𑁂𑀯 𑀩𑀳𑀼𑀲𑁆𑀲𑀼𑀢𑀲𑁆𑀲 𑀅𑀦𑀺𑀬𑀢𑀸 𑀕𑀢𑀺, 𑀢𑀯 𑀯𑀸 𑀫𑀫 𑀯𑀸 𑀓𑁄 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄. 𑀲𑁄 𑀧𑀭𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀲𑀫𑀓𑀭𑀡𑀭𑀲𑁄. 𑀢𑀣𑀸 𑀳𑁂𑀲 𑀧𑀭𑁂𑀲𑀁 𑀕𑀼𑀡𑁂 𑀟𑀁𑀲𑀺𑀢𑁆𑀯𑀸 𑀯𑀺𑀬 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑁂 𑀓𑀭𑁄𑀢𑀻𑀢𑀺 𑀧𑀴𑀸𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀴𑀸𑀲𑀻. 𑀫𑀓𑁆𑀔𑀻 𑀘 𑀧𑀴𑀸𑀲𑀻 𑀘 𑀫𑀓𑁆𑀔𑀺𑀧𑀴𑀸𑀲𑀺𑀦𑁄, 𑀢𑁂𑀲𑀁 𑀪𑀸𑀯𑁄 𑀫𑀓𑁆𑀔𑀺𑀧𑀴𑀸𑀲𑀺𑀢𑀸. 𑀅𑀢𑁆𑀣𑀢𑁄 𑀧𑀦 𑀫𑀓𑁆𑀔𑁄 𑀘𑁂𑀯 𑀧𑀴𑀸𑀲𑁄 𑀘.

𑀇𑀲𑁆𑀲𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀁 𑀦 𑀲𑀳𑀢𑀻𑀢𑀺 𑀇𑀲𑁆𑀲𑀼𑀓𑀻. 𑀫𑀘𑁆𑀙𑀭𑀸𑀬𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀦𑀺𑀕𑀽𑀳𑀢𑀺, 𑀧𑀭𑁂𑀲𑀁 𑀲𑀸𑀥𑀸𑀭𑀡𑀪𑀸𑀯𑀁 𑀦 𑀲𑀳𑀢𑀺, 𑀫𑀘𑁆𑀙𑁂𑀭𑀁 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀘𑁆𑀙𑀭𑀻. 𑀲𑀞𑀬𑀢𑀺 𑀦 𑀲𑀫𑁆𑀫𑀸 𑀪𑀸𑀲𑀢𑀻𑀢𑀺 𑀲𑀞𑁄, 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑁂𑀦 𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁂𑀭𑀸𑀝𑀺𑀓𑀧𑀼𑀕𑁆𑀕𑀮𑁄. 𑀓𑁂𑀭𑀸𑀝𑀺𑀓𑁄 𑀘 𑀆𑀦𑀦𑁆𑀤𑀫𑀘𑁆𑀙𑁄 𑀯𑀺𑀬 𑀳𑁄𑀢𑀺. 𑀆𑀦𑀦𑁆𑀤𑀫𑀘𑁆𑀙𑁄 𑀦𑀸𑀫 𑀓𑀺𑀭 𑀫𑀘𑁆𑀙𑀸𑀦𑀁 𑀦𑀗𑁆𑀕𑀼𑀝𑁆𑀞𑀁 𑀤𑀲𑁆𑀲𑁂𑀢𑀺, 𑀲𑀧𑁆𑀧𑀸𑀦𑀁 𑀲𑀻𑀲𑀁 ‘‘𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀅𑀳’’𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁, 𑀏𑀯𑀫𑁂𑀯 𑀓𑁂𑀭𑀸𑀝𑀺𑀓𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀲𑀼𑀢𑁆𑀢𑀦𑁆𑀢𑀺𑀓𑀁 𑀯𑀸 𑀆𑀪𑀺𑀥𑀫𑁆𑀫𑀺𑀓𑀁 ¶ 𑀯𑀸 𑀉𑀧𑀲𑀗𑁆𑀓𑀫𑀢𑀺, 𑀢𑀁 𑀢𑀁 𑀏𑀯𑀁 𑀯𑀤𑀢𑀺 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀻, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀅𑀦𑀼𑀓𑀫𑁆𑀧𑀓𑀸, 𑀦𑀸𑀳𑀁 𑀢𑀼𑀫𑁆𑀳𑁂 𑀫𑀼𑀜𑁆𑀘𑀸𑀫𑀻’’𑀢𑀺 ‘‘𑀏𑀯𑀫𑁂𑀢𑁂 ‘𑀲𑀕𑀸𑀭𑀯𑁄 𑀅𑀬𑀁 𑀅𑀫𑁆𑀳𑁂𑀲𑀼 𑀲𑀧𑁆𑀧𑀢𑀺𑀲𑁆𑀲𑁄’𑀢𑀺 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀸𑀞𑁂𑀬𑁆𑀬𑁂𑀦 𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑁂𑀦 𑀘𑀺𑀢𑁆𑀢𑀸𑀦𑀼𑀭𑀽𑀧𑀓𑀺𑀭𑀺𑀬𑀸𑀯𑀺𑀳𑀭𑀢𑁄 ‘‘𑀏𑀯𑀁𑀘𑀺𑀢𑁆𑀢𑁄 𑀏𑀯𑀁𑀓𑀺𑀭𑀺𑀬𑁄’’𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀼𑀘𑁆𑀙𑀺𑀁 𑀯𑀸 𑀧𑀺𑀝𑁆𑀞𑀺𑀁 𑀯𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀢𑁄 𑀲𑁄 𑁋

‘‘𑀯𑀸𑀫𑁂𑀦 𑀲𑀽𑀓𑀭𑁄 𑀳𑁄𑀢𑀺, 𑀤𑀓𑁆𑀔𑀺𑀡𑁂𑀦 𑀅𑀚𑀸𑀫𑀺𑀕𑁄;

𑀲𑀭𑁂𑀦 𑀦𑁂𑀮𑀓𑁄 𑀳𑁄𑀢𑀺, 𑀯𑀺𑀲𑀸𑀡𑁂𑀦 𑀚𑀭𑀕𑁆𑀕𑀯𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁯𑁬; 𑀯𑀺𑀪. 𑀅𑀝𑁆𑀞. 𑁮𑁯𑁪; 𑀫𑀳𑀸𑀦𑀺. 𑀅𑀝𑁆𑀞. 𑁧𑁬𑁬) 𑁋

𑀏𑀯𑀁 ¶ 𑀯𑀼𑀢𑁆𑀢𑀬𑀓𑁆𑀔𑀲𑀽𑀓𑀭𑀲𑀤𑀺𑀲𑁄 𑀳𑁄𑀢𑀺. 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀸𑀬𑀸𑀯𑀻.

𑀣𑀫𑁆𑀪𑀲𑀫𑀗𑁆𑀕𑀺𑀢𑀸𑀬 𑀣𑀤𑁆𑀥𑁄. 𑀯𑀸𑀢𑀪𑀭𑀺𑀢𑀪𑀲𑁆𑀢𑀸𑀲𑀤𑀺𑀲𑀣𑀤𑁆𑀥𑀪𑀸𑀯𑀧𑀕𑁆𑀕𑀳𑀺𑀢𑀲𑀺𑀭𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀓𑀸𑀭𑀓𑀭𑁄𑀢𑀺 𑀣𑀫𑁆𑀪𑁄. 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀕𑀺𑀮𑀺𑀢𑀦𑀗𑁆𑀕𑀮𑀲𑀤𑀺𑀲𑁄 𑀯𑀺𑀬 𑀅𑀚𑀕𑀭𑁄, 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀘 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑁂 𑀤𑀺𑀲𑁆𑀯𑀸 𑀑𑀦𑀫𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺, 𑀧𑀭𑀺𑀬𑀦𑁆𑀢𑁂𑀦𑁂𑀯 𑀘𑀭𑀢𑀺. 𑀅𑀩𑁆𑀪𑀼𑀦𑁆𑀦𑀢𑀺𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑀺𑀫𑀸𑀦𑀻.

𑀲𑀁 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀧𑀭𑀸𑀫𑀲𑀢𑀺 𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻. 𑀆𑀥𑀸𑀦𑀁 𑀕𑀡𑁆𑀳𑀸𑀢𑀻𑀢𑀺 𑀆𑀥𑀸𑀦𑀕𑁆𑀕𑀸𑀳𑀻. ‘‘𑀆𑀥𑀸𑀦’’𑀦𑁆𑀢𑀺 𑀤𑀴𑁆𑀳𑀁 𑀯𑀼𑀘𑁆𑀘𑀢𑀺, 𑀤𑀴𑁆𑀳𑀕𑁆𑀕𑀸𑀳𑀻𑀢𑀺 𑀅𑀢𑁆𑀣𑁄. 𑀬𑀼𑀢𑁆𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸𑀯 𑀮𑀤𑁆𑀥𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀻𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀩𑀳𑀼𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀁 𑀓𑀸𑀢𑀼𑀦𑁆𑀢𑀺 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀬𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀤𑀺𑀲𑁄 𑀳𑀺 𑀧𑀼𑀕𑁆𑀕𑀮𑁄 𑀬𑀁 𑀬𑀤𑁂𑀯 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸 𑀲𑀼𑀡𑀸𑀢𑀺, 𑀢𑀁 𑀲𑀩𑁆𑀩𑀁 ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁂𑀳𑀺 𑀓𑀣𑀺𑀢𑀁, 𑀏𑀯𑀁 𑀅𑀫𑁆𑀳𑁂𑀳𑀺 𑀲𑀼𑀢’’𑀦𑁆𑀢𑀺 𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀅𑀦𑁆𑀢𑁄𑀬𑁂𑀯 𑀲𑀫𑁄𑀤𑀳𑀢𑀺. 𑀬𑀣𑀸 𑀳𑀺 𑀓𑀘𑁆𑀙𑀧𑁄 𑀅𑀢𑁆𑀢𑀦𑁄 𑀧𑀸𑀤𑀸𑀤𑀺𑀓𑁂 𑀅𑀗𑁆𑀕𑁂 𑀓𑁂𑀦𑀘𑀺 𑀖𑀝𑁆𑀝𑀺𑀢𑁂 𑀲𑀩𑁆𑀩𑀸𑀦𑀺 𑀅𑀗𑁆𑀕𑀸𑀦𑀺 𑀅𑀢𑁆𑀢𑀦𑁄 𑀓𑀧𑀸𑀮𑁂𑀬𑁂𑀯 𑀲𑀫𑁄𑀤𑀳𑀢𑀺, 𑀦 𑀩𑀳𑀺 𑀦𑀻𑀳𑀭𑀢𑀺, 𑀏𑀯𑀫𑀬𑀫𑁆𑀧𑀺 ‘‘𑀦 𑀲𑀼𑀦𑁆𑀤𑀭𑁄 𑀢𑀯 𑀕𑀸𑀳𑁄, 𑀙𑀟𑁆𑀟𑁂𑀳𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑁄 𑀢𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀳𑀤𑀬𑁂 𑀏𑀯 𑀞𑀧𑁂𑀢𑁆𑀯𑀸 𑀯𑀺𑀘𑀭𑀢𑀺. 𑀬𑀣𑀸 𑀓𑀼𑀫𑁆𑀪𑀻𑀮𑀸 𑀕𑀳𑀺𑀢𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀏𑀯𑀁 𑀓𑀼𑀫𑁆𑀪𑀻𑀮𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀫𑀓𑁆𑀔𑀺𑀧𑀴𑀸𑀲𑀺𑀢𑀸𑀤𑀺𑀬𑀼𑀕𑀴𑀢𑁆𑀢𑀬𑁂𑀦 ¶ 𑀤𑀲𑁆𑀲𑀺𑀢𑁂 𑀫𑀓𑁆𑀔𑀧𑀴𑀸𑀲𑀸𑀤𑀬𑁄 𑀙 𑀥𑀫𑁆𑀫𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀽𑀦𑀯𑀻𑀲𑀢𑀺 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀫𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁮𑁧) 𑀧𑀦 𑀫𑀓𑁆𑀔𑀧𑀴𑀸𑀲𑀸𑀤𑀬𑁄𑀧𑀺 𑀬𑀼𑀕𑀴𑀯𑀲𑁂𑀦 𑀏𑀓𑀁 𑀓𑀢𑁆𑀯𑀸 ‘‘𑀲𑁄𑀴𑀲 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁.

𑀧𑀓𑀸𑀭𑁂𑀳𑀺 𑀆𑀯𑀳𑀦𑀁 𑀧𑀤𑀓𑁆𑀔𑀺𑀡𑀁, 𑀢𑀢𑁄 𑀧𑀤𑀓𑁆𑀔𑀺𑀡𑀢𑁄 𑀕𑀳𑀡𑀲𑀻𑀮𑁄 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻, 𑀦 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻. 𑀬𑁄 𑀯𑀼𑀘𑁆𑀘𑀫𑀸𑀦𑁄 ‘‘𑀢𑀼𑀫𑁆𑀳𑁂 𑀫𑀁 𑀓𑀲𑁆𑀫𑀸 𑀯𑀤𑀣, 𑀅𑀳𑀁 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀅𑀢𑁆𑀣𑀸𑀦𑀢𑁆𑀣𑀁 𑀚𑀸𑀦𑀸𑀫𑀻’’𑀢𑀺 𑀯𑀤𑀢𑀺, 𑀅𑀬𑀁 𑀅𑀦𑀼𑀲𑀸𑀲𑀦𑀺𑀁 𑀧𑀤𑀓𑁆𑀔𑀺𑀡𑀢𑁄 𑀦 𑀕𑀡𑁆𑀳𑀸𑀢𑀺, 𑀯𑀸𑀫𑀢𑁄𑀯 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑀸𑀳 ‘‘𑀬𑀣𑀸𑀦𑀼𑀲𑀺𑀝𑁆𑀞’’𑀦𑁆𑀢𑀺𑀆𑀤𑀺.

𑀉𑀤𑁆𑀤𑁂𑀲𑁂𑀢𑀺 ¶ 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂. 𑀅𑀣 𑀲𑀩𑁆𑀩𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀣𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀸𑀦𑀻𑀢𑀺 𑀆𑀳 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 𑀆𑀯𑀺𑀓𑀭𑁂𑀬𑁆𑀬𑀸𑀢𑀺 𑀏𑀯𑀁 𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺. ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀳𑀺 𑀇𑀫𑀺𑀦𑀸 𑀲𑀩𑁆𑀩𑀸𑀧𑀺 𑀆𑀧𑀢𑁆𑀢𑀺𑀬𑁄 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀲𑀗𑁆𑀕𑀳𑀺𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸𑀢𑀺 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀳𑀥𑀫𑁆𑀫𑀺𑀓𑁂𑀦 𑀲𑀳𑀓𑀸𑀭𑀡𑁂𑀦𑀸𑀢𑀺𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀯𑀘𑀦𑀸𑀬𑀸’’𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀢𑁄 𑀫𑀫 𑀯𑀘𑀦𑀢𑁄’’𑀢𑀺. 𑀅𑀗𑁆𑀕𑀸𑀦𑀺 𑀘𑁂𑀢𑁆𑀣 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀏𑀯𑀁 𑀇𑀥 𑀅𑀯𑀘𑀦𑀻𑀬𑀓𑀭𑀡𑀢𑀸 𑀤𑀝𑁆𑀞𑀩𑁆𑀩𑀸.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁧. 𑀢𑁂𑀭𑀲𑀫𑁂 𑀓𑀻𑀝𑀸𑀕𑀺𑀭𑀻𑀢𑀺 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀦𑀸𑀫𑀁. 𑀢𑀜𑁆𑀳𑀺 𑀲𑀦𑁆𑀥𑀸𑀬 𑀧𑀭𑀢𑁄 ‘‘𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀦 𑀬𑁄𑀕𑀢𑁄 𑀲𑁄 𑀚𑀦𑀧𑀤𑁄𑀧𑀺 ‘‘𑀓𑀻𑀝𑀸𑀕𑀺𑀭𑀺’’𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄𑀢𑀺 𑀆𑀳 ‘‘𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂’’𑀢𑀺. 𑀆𑀯𑀸𑀲𑁂 𑀦𑀺𑀬𑀼𑀢𑁆𑀢𑀸 𑀆𑀯𑀸𑀲𑀺𑀓𑀸, 𑀦𑀺𑀩𑀤𑁆𑀥𑀯𑀸𑀲𑀺𑀦𑁄. 𑀢𑁂 𑀅𑀓𑀢𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀚𑀺𑀡𑁆𑀡𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺, 𑀓𑀢𑁂 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑁄 𑀬𑁂𑀲𑀁 𑀆𑀬𑀢𑁆𑀢𑁄…𑀧𑁂… 𑀢𑁂 𑀆𑀯𑀸𑀲𑀺𑀓𑀸’’𑀢𑀺 ¶ . 𑀦𑀺𑀯𑀸𑀲𑁄 𑀦𑀺𑀯𑀸𑀲𑀫𑀢𑁆𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀦𑁂𑀯𑀸𑀲𑀺𑀓𑀸𑀢𑀺 𑀆𑀳 ‘‘𑀬𑁂 𑀧𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀢𑁂𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸. 𑀙 𑀚𑀦𑀸𑀢𑀺 𑀧𑀡𑁆𑀟𑀼𑀓𑁄 𑀮𑁄𑀳𑀺𑀢𑀓𑁄 𑀫𑁂𑀢𑁆𑀢𑀺𑀬𑁄 𑀪𑀽𑀫𑀚𑀓𑁄 𑀅𑀲𑁆𑀲𑀚𑀺 𑀧𑀼𑀦𑀩𑁆𑀩𑀲𑀼𑀓𑁄𑀢𑀺 𑀇𑀫𑁂 𑀙 𑀚𑀦𑀸. 𑀲𑀫𑁆𑀫𑀸𑀢𑀺 𑀆𑀮𑀧𑀦𑀯𑀘𑀦𑀫𑁂𑀢𑀁. 𑀆𑀬𑀫𑀼𑀔𑀪𑀽𑀢𑀸𑀢𑀺 𑀆𑀬𑀲𑁆𑀲 𑀫𑀼𑀔𑀪𑀽𑀢𑀸. 𑀥𑀼𑀭𑀝𑁆𑀞𑀸𑀦𑁂𑀢𑀺 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂. 𑀯𑀲𑁆𑀲𑀸𑀦𑁂 𑀳𑁂𑀫𑀦𑁆𑀢𑁂 𑀘𑀸𑀢𑀺 𑀤𑁆𑀯𑀻𑀲𑀼 𑀉𑀢𑀽𑀲𑀼 𑀯𑀲𑁆𑀲𑀦𑀢𑁄 ‘‘𑀤𑁆𑀯𑀻𑀳𑀺 𑀫𑁂𑀖𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀤𑀺𑀬𑀟𑁆𑀠𑀪𑀺𑀓𑁆𑀔𑀼𑀲𑀳𑀲𑁆𑀲𑀢𑁄 𑀕𑀡𑀸𑀘𑀭𑀺𑀬𑀸𑀦𑀁 𑀙𑀦𑁆𑀦𑀁 𑀚𑀦𑀸𑀦𑀁 𑀅𑀥𑀺𑀓𑀢𑁆𑀢𑀸 ‘‘𑀲𑀫𑀥𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸𑀥𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄. 𑀅𑀓𑀢𑀯𑀢𑁆𑀣𑀼𑀦𑁆𑀢𑀺 𑀅𑀓𑀢𑀧𑀼𑀩𑁆𑀩𑀁 𑀅𑀪𑀺𑀦𑀯𑀯𑀢𑁆𑀣𑀼𑀁.

𑀓𑀡𑀺𑀓𑀸𑀭𑀸𑀤𑀬𑁄 𑀧𑀼𑀧𑁆𑀨𑀭𑀼𑀓𑁆𑀔𑀸, 𑀚𑀸𑀢𑀺𑀲𑀼𑀫𑀦𑀸𑀤𑀬𑁄 𑀧𑀼𑀧𑁆𑀨𑀕𑀘𑁆𑀙𑀸. 𑀓𑁄𑀝𑁆𑀝𑀦𑀦𑁆𑀢𑀺 𑀲𑀬𑀁 𑀙𑀺𑀦𑁆𑀤𑀦𑀁. 𑀓𑁄𑀝𑁆𑀝𑀸𑀧𑀦𑀦𑁆𑀢𑀺 ‘‘𑀇𑀫𑀁 𑀙𑀺𑀦𑁆𑀤 𑀪𑀺𑀦𑁆𑀤𑀸’’𑀢𑀺 𑀅𑀜𑁆𑀜𑁂𑀳𑀺 𑀙𑁂𑀤𑀸𑀧𑀦𑀁. 𑀆𑀴𑀺𑀬𑀸 𑀩𑀦𑁆𑀥𑀦𑀦𑁆𑀢𑀺 𑀬𑀣𑀸 𑀕𑀘𑁆𑀙𑀫𑀽𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀣𑀸 𑀲𑀫𑀦𑁆𑀢𑀢𑁄 𑀩𑀦𑁆𑀥𑀦𑀁. 𑀉𑀤𑀓𑀲𑁆𑀲𑀸𑀢𑀺 𑀅𑀓𑀧𑁆𑀧𑀺𑀬𑀉𑀤𑀓𑀲𑁆𑀲. 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀜𑁆𑀘𑀸𑀧𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 ‘‘𑀉𑀤𑀓𑀲𑁆𑀲 𑀲𑁂𑀘𑀦𑀁 𑀲𑁂𑀘𑀸𑀧𑀦’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀸𑀫𑀜𑁆𑀜𑀢𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺𑀁 𑀲𑀓𑁆𑀓𑀸 𑀲𑀗𑁆𑀕𑀳𑁂𑀢𑀼𑀁, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 ¶ 𑀓𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺? ‘‘𑀆𑀭𑀸𑀫𑀸𑀤𑀺𑀅𑀢𑁆𑀣𑀁 𑀭𑁄𑀧𑀺𑀢𑁂 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀲𑀼𑀧𑀺 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀝𑁆𑀝𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥𑀸𑀧𑀺 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀺𑀲𑀼𑀁 𑀤𑀲𑁆𑀲𑀺𑀢𑀁. 𑀳𑀢𑁆𑀣𑀫𑀼𑀔𑀧𑀸𑀤𑀥𑁄𑀯𑀦𑀦𑁆𑀳𑀸𑀦𑁄𑀤𑀓𑀲𑀺𑀜𑁆𑀘𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀧𑀓𑀸𑀭𑀦𑁆𑀢𑀭𑁂𑀦 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄’’𑀢𑀺 𑀓𑁄𑀝𑁆𑀝𑀦𑀔𑀡𑀦𑀸𑀤𑀺𑀯𑀲𑁂𑀦 𑀲𑀬𑀁 𑀓𑀭𑀡𑀲𑁆𑀲𑀧𑀺 𑀓𑀣𑀁 𑀲𑀗𑁆𑀕𑀳𑁄𑀢𑀺? 𑀅𑀓𑀧𑁆𑀧𑀺𑀬𑀦𑁆𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄𑀢𑀺 𑀅𑀓𑀧𑁆𑀧𑀺𑀬𑀪𑀽𑀢𑀁 𑀓𑀭𑀡𑀓𑀸𑀭𑀸𑀧𑀦𑀸𑀤𑀺 𑀲𑀩𑁆𑀩𑀫𑁂𑀯 𑀲𑀗𑁆𑀕𑀳𑀺𑀢𑀁, 𑀦 𑀧𑀦 𑀅𑀓𑀧𑁆𑀧𑀺𑀬𑀯𑀘𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀸𑀡𑀧𑀡𑁆𑀡𑀸𑀤𑀺𑀳𑀭𑀡𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀤𑀸𑀮𑀸𑀤𑀻𑀦𑀺 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀞𑀸𑀦𑀢𑁄 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀞𑀸𑀦𑀫𑁂𑀯 𑀧𑀸𑀓𑀝𑀢𑀭𑀦𑁆𑀢𑀺 ‘‘𑀑𑀪𑀸𑀲𑁄’’𑀢𑀺 𑀯𑀼𑀢𑁆𑀢𑀁.

𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀫𑁆𑀳𑀺 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄 𑀧𑀘𑁆𑀙𑀸 𑀯𑀤𑀢𑀺. 𑀯𑀦𑀢𑁆𑀣𑀸𑀬𑀸𑀢𑀺 𑀇𑀤𑀁 𑀓𑁂𑀘𑀺 ‘‘𑀯𑀢𑀢𑁆𑀣𑀸𑀬𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀯𑀢𑀺𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀏𑀓𑀘𑁆𑀘𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮𑀜𑁆𑀘 𑀲𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀓𑀺𑀜𑁆𑀘𑀺 𑀫𑀸𑀢𑀺𑀓𑀦𑁆𑀢𑀺 𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸 𑀅𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸. ‘‘𑀓𑀧𑁆𑀧𑀺𑀬𑀉𑀤𑀓𑀁 ¶ 𑀲𑀺𑀜𑁆𑀘𑀺𑀢𑀼’’𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀧𑁆𑀧𑀺𑀬𑀉𑀤𑀓𑀁 𑀲𑀺𑀜𑁆𑀘𑀣𑀸𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 ‘‘𑀭𑁄𑀧𑁂𑀳𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺𑀧𑀺 𑀲𑀺𑀤𑁆𑀥𑀁. 𑀅𑀜𑁆𑀜𑀢𑁆𑀣𑀸𑀬 𑀯𑀸 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀁 𑀓𑀭𑁄𑀦𑁆𑀢𑀲𑁆𑀲. 𑀓𑀲𑁆𑀫𑀸 𑀦 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀕𑀦𑁆𑀣𑀦𑀸𑀤𑀻𑀲𑀼 𑀓𑀲𑁆𑀫𑀸 𑀦 𑀅𑀦𑀸𑀧𑀢𑁆𑀢𑀺. 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀧𑀝𑀺𑀯𑀘𑀦𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑀼𑀓𑁆𑀔𑀭𑁄𑀧𑀦𑁂. 𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀭𑀢𑀦𑀢𑁆𑀢𑀬𑀧𑀽𑀚𑀦𑀢𑁆𑀣𑀸𑀬𑀧𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀭𑀺𑀬𑀸𑀬𑀸𑀤𑀻𑀳𑀺 𑀘 𑀕𑀦𑁆𑀣𑀸𑀧𑀦𑁂 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

‘‘𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀸’’𑀢𑀺 𑀳𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 ‘‘𑀬𑀣𑀸 𑀳𑀺 𑀢𑀢𑁆𑀣 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀭𑀺𑀬𑀸𑀬𑀸𑀤𑀻𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑀸𑀤𑀻𑀳𑀺 𑀕𑀦𑁆𑀣𑀸𑀧𑀦𑁂 𑀏𑀯 𑀅𑀦𑀸𑀧𑀢𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀲𑀬𑀁 𑀕𑀦𑁆𑀣𑀦𑁂, 𑀢𑁂𑀦𑁂𑀯 𑀧𑀭𑁄 𑀲𑀬𑀁 𑀕𑀦𑁆𑀣𑀦𑀫𑁆𑀧𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀘𑁄𑀤𑁂𑀦𑁆𑀢𑁄 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀆𑀭𑀸𑀫𑀸𑀤𑀺𑀅𑀢𑁆𑀣𑀁 𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀲𑀬𑀁 𑀕𑀦𑁆𑀣𑀦𑁂𑀧𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑁆𑀢𑀺𑀆𑀤𑀺 𑀆𑀘𑀭𑀺𑀬𑀲𑁆𑀲 𑀧𑀭𑀺𑀳𑀸𑀭𑁄. 𑀅𑀣 ‘‘𑀦 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀤𑀢𑀺. 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼 𑀯𑀼𑀢𑁆𑀢𑀫𑁆𑀧𑀺 𑀳𑀺 𑀧𑀫𑀸𑀡𑀫𑁂𑀯𑀸𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀫𑀸𑀡𑀫𑁂𑀯𑀸𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀢𑀁 𑀓𑀣𑀦𑁆𑀢𑀺 𑀫𑀜𑁆𑀜𑁂𑀬𑁆𑀬𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀓𑀧𑁆𑀧𑀺𑀬𑀉𑀤𑀓𑀲𑁂𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄. 𑀓𑀺𑀜𑁆𑀘𑀸𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 ¶ 𑀓𑀧𑁆𑀧𑀺𑀬𑀧𑀣𑀯𑀺𑀬𑀁 𑀲𑀬𑀁 𑀭𑁄𑀧𑀦𑀁 𑀦 𑀯𑀼𑀢𑁆𑀢𑀁, 𑀓𑀧𑁆𑀧𑀺𑀬𑀉𑀤𑀓𑀲𑁆𑀲 𑀧𑀦 𑀲𑀬𑀁 𑀲𑀺𑀜𑁆𑀘𑀦𑀁 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀬𑀣𑀸 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀓𑀧𑁆𑀧𑀺𑀬𑀉𑀤𑀓𑀁 𑀲𑀬𑀁 𑀲𑀺𑀜𑁆𑀘𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀣𑀸 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀲𑀬𑀁 𑀕𑀦𑁆𑀣𑀦𑀫𑁆𑀧𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺. 𑀢𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀬𑀤𑁂𑀢𑀁 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀲𑀬𑀁 𑀭𑁄𑀧𑀦𑀁 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀜𑁆𑀘 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀣𑀁 𑀢𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀢𑀢𑁆𑀭𑀳𑀻’’𑀢𑀺𑀆𑀤𑀺. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀻𑀢𑀺 𑀏𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀭 𑀧𑀦 𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀻’’𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀭𑁄𑀧𑀦𑀲𑀺𑀜𑁆𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀢𑁆𑀭 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑁂 𑀧𑀭𑀺𑀬𑀸𑀬𑁄 𑀅𑀢𑁆𑀣𑀺. 𑀢𑀢𑁆𑀣 𑀧𑀭𑀺𑀬𑀸𑀬𑀁 𑀇𑀥 ¶ 𑀘 𑀧𑀭𑀺𑀬𑀸𑀬𑀸𑀪𑀸𑀯𑀁 𑀜𑀢𑁆𑀯𑀸𑀢𑀺 𑀢𑀢𑁆𑀣 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 ‘‘𑀫𑀸𑀮𑀸𑀯𑀘𑁆𑀙’’𑀦𑁆𑀢𑀺 𑀯𑀺𑀲𑁂𑀲𑀯𑀘𑀦𑀲𑀩𑁆𑀪𑀸𑀯𑀢𑁄 𑀧𑀭𑀺𑀬𑀸𑀬𑀁, 𑀇𑀥 ‘‘𑀕𑀦𑁆𑀣𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀢𑀣𑀸𑀯𑀺𑀥𑀯𑀺𑀲𑁂𑀲𑀯𑀘𑀦𑀸𑀪𑀸𑀯𑀢𑁄 𑀧𑀭𑀺𑀬𑀸𑀬𑀸𑀪𑀸𑀯𑀜𑁆𑀘 𑀜𑀢𑁆𑀯𑀸.

𑀦𑀦𑀼 𑀘 𑀬𑀣𑀸 ‘‘𑀕𑀦𑁆𑀣𑁂𑀦𑁆𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀸𑀬 𑀲𑀬𑀁 𑀕𑀦𑁆𑀣𑀦𑀁 𑀦 𑀯𑀝𑁆𑀝𑀢𑀺, 𑀏𑀯𑀁 ‘‘𑀕𑀦𑁆𑀣𑀸𑀧𑁂𑀦𑁆𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀕𑀦𑁆𑀣𑀸𑀧𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀏𑀯𑀜𑁆𑀘 𑀲𑀢𑀺 𑀧𑀭𑀢𑁄 ‘‘𑀏𑀯𑀁 𑀚𑀸𑀦, 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬, 𑀬𑀣𑀸 𑀏𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀢𑀣𑀸 𑀓𑀭𑁄𑀳𑀻𑀢𑀺𑀆𑀤𑀺𑀦𑀸 𑀓𑀧𑁆𑀧𑀺𑀬𑀯𑀘𑀦𑁂𑀦 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺, 𑀧𑀭𑀺𑀬𑀸𑀬𑁂𑀦 𑀳𑀺 𑀓𑀸𑀭𑀸𑀧𑀦𑀁 𑀕𑀦𑁆𑀣𑀸𑀧𑀦𑀫𑁂𑀯 𑀦 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀓𑀸𑀭𑀸𑀧𑀦𑀁 𑀯𑀝𑁆𑀝𑀢𑀺. 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀯𑀺𑀦𑀺𑀘𑁆𑀙𑀬𑀫𑁂𑀯 𑀲𑀗𑁆𑀔𑁂𑀧𑀢𑁄 𑀦𑀺𑀕𑀫𑁂𑀢𑀺. 𑀳𑀭𑀡𑀸𑀤𑀻𑀲𑀼 𑀓𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀳𑀭𑀡𑀸𑀤𑀻𑀲𑀼 𑀓𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀓𑀼𑀮𑀺𑀢𑁆𑀣𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀡𑀢𑁄𑀢𑀺 𑀓𑀼𑀮𑀺𑀢𑁆𑀣𑀺𑀆𑀤𑀻𑀦𑀁 𑀳𑀭𑀡𑀲𑁆𑀲 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀳𑀭𑀡𑀸𑀥𑀺𑀓𑀸𑀭𑁂 𑀳𑀻’’𑀢𑀺𑀆𑀤𑀺. 𑀫𑀸𑀮𑀦𑁆𑀢𑀺 𑀧𑀼𑀧𑁆𑀨𑀤𑀸𑀫𑀁. 𑀫𑀜𑁆𑀚𑀭𑀻 𑀯𑀺𑀬𑀸𑀢𑀺 𑀓𑀼𑀲𑀼𑀫𑀫𑀜𑁆𑀚𑀭𑀻 𑀯𑀺𑀬. 𑀳𑀸𑀭𑀲𑀤𑀺𑀲𑀦𑁆𑀢𑀺 𑀫𑀼𑀢𑁆𑀢𑀸𑀳𑀸𑀭𑀲𑀤𑀺𑀲𑀁.

𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀧𑀣𑀯𑀻𑀔𑀡𑀦𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀸𑀢𑀺 ‘‘𑀇𑀤𑀁 𑀔𑀡, 𑀇𑀤𑀁 𑀭𑁄𑀧𑁂𑀳𑀻’’𑀢𑀺𑀆𑀤𑀺𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦. 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀣𑀸𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀣𑀯𑀺𑀬𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀓𑀼𑀮𑀲𑀗𑁆𑀕𑀳𑀧𑀭𑀺𑀪𑁄𑀕𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑁄𑀧𑀺𑀢𑁂. 𑀤𑀼𑀓𑁆𑀓𑀝𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀓𑀧𑁆𑀧𑀺𑀬𑁂𑀦𑀸𑀢𑀺 𑀓𑀧𑁆𑀧𑀺𑀬𑁂𑀦 𑀉𑀤𑀓𑁂𑀦. 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀦𑁆𑀢𑀺 𑀓𑀼𑀮𑀤𑀽𑀲𑀦𑀧𑀭𑀺𑀪𑁄𑀕𑀸𑀦𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀲𑀬𑀁 𑀲𑀺𑀜𑁆𑀘𑀦𑁂 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀲𑀺𑀜𑁆𑀘𑀸𑀧𑀦𑁂 𑀘 𑀤𑀼𑀓𑁆𑀓𑀝𑀁, 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀦 𑀲𑀬𑀁 𑀲𑀺𑀜𑁆𑀘𑀦𑁂 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀲𑀺𑀜𑁆𑀘𑀸𑀧𑀦𑁂 𑀘 𑀤𑀼𑀓𑁆𑀓𑀝𑀁. 𑀆𑀧𑀢𑁆𑀢𑀺𑀩𑀳𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀲𑀬𑀁 𑀲𑀺𑀜𑁆𑀘𑀦𑁂 ¶ 𑀥𑀸𑀭𑀸𑀧𑀘𑁆𑀙𑁂𑀤𑀕𑀡𑀦𑀸𑀬 𑀆𑀧𑀢𑁆𑀢𑀺𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀺𑀜𑁆𑀘𑀸𑀧𑀦𑁂 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀆𑀧𑀢𑁆𑀢𑀺, 𑀲𑀓𑀺𑀁 𑀆𑀡𑀢𑁆𑀢𑀲𑁆𑀲 𑀩𑀳𑀽𑀦𑀁 𑀲𑀺𑀜𑁆𑀘𑀦𑁂𑀧𑀺 𑀏𑀓𑀸𑀯.

𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀑𑀘𑀺𑀦𑀦𑁂. 𑀲𑀓𑀺𑀁 𑀆𑀡𑀢𑁆𑀢𑁄𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀡𑀢𑁆𑀢𑁄. 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 ¶ 𑀆𑀡𑀢𑁆𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀧𑁆𑀧𑀺𑀬𑀯𑀘𑀦𑁂𑀦 𑀧𑀦 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀑𑀘𑀺𑀦𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀕𑀦𑁆𑀣𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀕𑀦𑁆𑀢𑀺𑀫𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦 𑀯𑀝𑁆𑀝𑀢𑀻𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀓𑀭𑁄𑀦𑁆𑀢𑀲𑁆𑀲 𑀘 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀪𑀺𑀓𑁆𑀔𑀼𑀲𑁆𑀲 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀥𑀫𑁆𑀫𑀸𑀲𑀦𑀯𑀺𑀢𑀸𑀦𑁂 𑀩𑀤𑁆𑀥𑀓𑀡𑁆𑀝𑀓𑁂𑀲𑀼 𑀧𑀼𑀧𑁆𑀨𑀸𑀦𑀺 𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀭𑀽𑀧𑀭𑀺 𑀯𑀺𑀚𑁆𑀛𑀺𑀢𑁆𑀯𑀸 𑀙𑀢𑁆𑀢𑀲𑀤𑀺𑀲𑀁 𑀓𑀢𑁆𑀯𑀸 𑀆𑀯𑀼𑀡𑀦𑀢𑁄 ‘‘𑀙𑀢𑁆𑀢𑀸𑀢𑀺𑀙𑀢𑁆𑀢𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀤𑀮𑀺𑀓𑁆𑀔𑀦𑁆𑀥𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁂𑀯 𑀲𑀦𑁆𑀥𑀸𑀬 ‘‘𑀢𑀁 𑀅𑀢𑀺𑀑𑀴𑀸𑀭𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲 𑀅𑀓𑀧𑁆𑀧𑀺𑀬𑀯𑀘𑀦𑁂𑀦𑁂𑀯 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀸𑀦𑀺 𑀯𑀺𑀚𑁆𑀛𑀺𑀢𑀼𑀁𑀬𑁂𑀯 𑀓𑀡𑁆𑀝𑀓𑀁 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀤𑀸𑀫𑀸𑀤𑀺𑀩𑀦𑁆𑀥𑀦𑀢𑁆𑀣𑀁 𑀧𑀦 𑀯𑀝𑁆𑀝𑀢𑀺. 𑀓𑀡𑁆𑀝𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀘 𑀇𑀤𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀯𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀘𑁆𑀙𑀺𑀤𑁆𑀤𑁂 𑀅𑀧𑀯𑁂𑀲𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀚𑀸𑀮𑀫𑀬𑀁 𑀯𑀺𑀢𑀸𑀦𑀁 𑀚𑀸𑀮𑀯𑀺𑀢𑀸𑀦𑀁. 𑀦𑀸𑀕𑀤𑀦𑁆𑀢𑀓𑀫𑁆𑀧𑀺 𑀲𑀘𑁆𑀙𑀺𑀤𑁆𑀤𑀓𑀁𑀬𑁂𑀯 𑀕𑀳𑁂𑀢𑀩𑁆𑀩𑀁. 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀁 𑀤𑀡𑁆𑀟𑀸𑀤𑀻𑀳𑀺 𑀓𑀢𑀧𑀼𑀧𑁆𑀨𑀸𑀥𑀸𑀭𑀡𑀁, 𑀢𑀫𑁆𑀧𑀺 𑀲𑀘𑁆𑀙𑀺𑀤𑁆𑀤𑀫𑁂𑀯 𑀇𑀥 𑀯𑀼𑀢𑁆𑀢𑀁. 𑀅𑀲𑁄𑀓𑀧𑀺𑀡𑁆𑀟𑀺𑀬𑀸𑀢𑀺 𑀅𑀲𑁄𑀓𑀧𑀼𑀧𑁆𑀨𑀫𑀜𑁆𑀚𑀭𑀺𑀓𑀸𑀬. ‘‘𑀥𑀫𑁆𑀫𑀭𑀚𑁆𑀚𑀼 𑀦𑀸𑀫 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀼𑀧𑁆𑀨𑀧𑀯𑁂𑀲𑀦𑀢𑁆𑀣𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑀭𑀚𑁆𑀚𑀽’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀣𑀸𑀩𑀤𑁆𑀥𑀸𑀬 𑀭𑀚𑁆𑀚𑀼𑀬𑀸 𑀘𑁂𑀢𑀺𑀬𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀥𑀫𑁆𑀫𑀭𑀚𑁆𑀚𑀼𑀦𑁆𑀢𑀺 𑀲𑀺𑀣𑀺𑀮𑀁 𑀯𑀝𑁆𑀝𑀺𑀓𑀁 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀩𑁄𑀥𑀺𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀯𑀸 𑀮𑀫𑁆𑀩𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀺𑀣𑀺𑀮𑀯𑀝𑁆𑀝𑀺𑀓𑀸𑀬 𑀭𑀚𑁆𑀚𑀼𑀬𑀸 𑀅𑀦𑁆𑀢𑀭𑁂𑀧𑀺 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀉𑀪𑀬𑀢𑁆𑀣𑀸𑀧𑀺 𑀧𑀦𑁂𑀢𑁆𑀣 𑀦𑁂𑀯𑀢𑁆𑀣𑀺 𑀯𑀺𑀭𑁄𑀥𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀫𑀢𑁆𑀣𑀓𑀤𑀸𑀫𑀦𑁆𑀢𑀺 𑀥𑀫𑁆𑀫𑀸𑀲𑀦𑀸𑀤𑀺𑀫𑀢𑁆𑀣𑀓𑁂 𑀮𑀫𑁆𑀩𑀓𑀤𑀸𑀫𑀁. 𑀧𑀼𑀧𑁆𑀨𑁂𑀳𑀺 𑀯𑁂𑀞𑁂𑀦𑁆𑀢𑀻𑀢𑀺 𑀧𑀼𑀧𑁆𑀨𑀤𑀸𑀫𑁂𑀦 𑀯𑁂𑀞𑁂𑀦𑁆𑀢𑀺. 𑀢𑁂𑀲𑀁𑀬𑁂𑀯𑀸𑀢𑀺 𑀉𑀧𑁆𑀧𑀮𑀸𑀤𑀻𑀦𑀁𑀬𑁂𑀯. 𑀯𑀸𑀓𑁂𑀦 𑀯𑀸 𑀤𑀡𑁆𑀟𑀓𑁂𑀦 𑀯𑀸𑀢𑀺 𑀯𑀺𑀲𑀼𑀁 𑀅𑀘𑁆𑀙𑀺𑀦𑁆𑀦𑁂𑀦 𑀧𑀼𑀧𑁆𑀨𑀲𑀳𑀺𑀢𑁂𑀦𑁂𑀯 𑀯𑀸𑀓𑁂𑀦 𑀯𑀸 𑀤𑀡𑁆𑀟𑀓𑁂𑀦 𑀯𑀸. 𑀔𑀦𑁆𑀥𑁂 𑀞𑀧𑀺𑀢𑀓𑀸𑀲𑀸𑀯𑀲𑁆𑀲𑀸𑀢𑀺 𑀔𑀦𑁆𑀥𑁂 𑀞𑀧𑀺𑀢𑀲𑀗𑁆𑀖𑀸𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀢𑀣𑀸 𑀩𑀦𑁆𑀥𑀺𑀢𑀼𑀁 ¶ 𑀲𑀓𑁆𑀓𑀸 𑀪𑀯𑁂𑀬𑁆𑀬. 𑀇𑀫𑀺𑀦𑀸𑀯 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀓𑀸𑀲𑀸𑀯𑀁 𑀯𑀸 𑀯𑀢𑁆𑀣𑀁 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀅𑀁𑀲𑀪𑀡𑁆𑀟𑀺𑀓𑀁 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀢𑁆𑀢𑀲𑀤𑀺𑀲𑀢𑁆𑀢𑀸 𑀯𑁂𑀞𑀺𑀫𑀁 𑀦𑀸𑀫 𑀦 𑀚𑀸𑀢𑀁, 𑀢𑀲𑁆𑀫𑀸 𑀲𑀺𑀣𑀺𑀮𑀩𑀦𑁆𑀥𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀧𑀼𑀧𑁆𑀨𑀧𑀝𑁂 ¶ 𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑀢𑁄 𑀧𑀼𑀧𑁆𑀨𑀤𑀸𑀫𑀲𑁆𑀲 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀺𑀭𑀺𑀬𑀢𑁄 𑀳𑀭𑀡𑀁 𑀧𑀦 𑀯𑀸𑀬𑀺𑀫𑀁 𑀦𑀸𑀫 𑀳𑁄𑀢𑀺, 𑀦 𑀧𑀽𑀭𑀺𑀫𑀁. 𑀧𑀼𑀭𑀺𑀫𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀏𑀢𑁆𑀣 ‘‘𑀅𑀨𑀼𑀲𑀸𑀧𑁂𑀢𑁆𑀯𑀸𑀧𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀧𑀼𑀭𑀺𑀫𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀬𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀅𑀜𑁆𑀜𑀫𑀜𑁆𑀜𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀧𑁆𑀨𑀭𑀳𑀺𑀢𑀸𑀬 𑀲𑀼𑀢𑁆𑀢𑀓𑁄𑀝𑀺𑀬𑀸 𑀯𑀸𑀓𑀓𑁄𑀝𑀺𑀬𑀸 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀯𑀸𑀭𑀁 𑀳𑀭𑀺𑀢𑁆𑀯𑀸 𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁂𑀢𑀺𑀬𑀸𑀤𑀺𑀧𑀭𑀺𑀓𑁆𑀔𑁂𑀧𑀁 𑀧𑀼𑀧𑁆𑀨𑀧𑀝𑀓𑀭𑀡𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁, 𑀢𑁂𑀦𑀧𑀺 𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑁂𑀦 𑀘 𑀏𑀓𑀯𑀸𑀭𑀁 𑀳𑀭𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁, 𑀢𑁂𑀦𑀧𑀺 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀤𑁆𑀯𑁂𑀬𑁂𑀯 𑀪𑀺𑀓𑁆𑀔𑀽 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀳𑀭𑀦𑁆𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀧𑀽𑀭𑀺𑀢𑀦𑁆𑀢𑀺 𑀤𑀻𑀖𑀢𑁄 𑀧𑀲𑀸𑀭𑀡𑀯𑀲𑁂𑀦 𑀧𑀽𑀭𑀺𑀢𑀁. 𑀯𑀸𑀬𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀤𑀻𑀖𑀢𑁄 𑀧𑀲𑀸𑀭𑀺𑀢𑁂 𑀢𑀺𑀭𑀺𑀬𑀢𑁄 𑀳𑀭𑀡𑀁 𑀯𑀸𑀬𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀓𑀯𑀸𑀭𑀫𑁆𑀧𑀺 𑀧𑀼𑀧𑁆𑀨𑀕𑀼𑀡𑀁 𑀢𑀺𑀭𑀺𑀬𑀢𑁄 𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦𑀸𑀢𑀺 𑀅𑀕𑀦𑁆𑀣𑀺𑀢𑀸𑀦𑀺 𑀧𑀸𑀓𑀢𑀺𑀓𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦. 𑀧𑀼𑀧𑁆𑀨𑀤𑀸𑀫𑀁 𑀧𑀦 𑀧𑀽𑀚𑀦𑀢𑁆𑀣𑀸𑀬 𑀪𑀽𑀫𑀺𑀬𑀁 𑀞𑀧𑁂𑀦𑁆𑀢𑁂𑀦 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 𑀅𑀦𑁆𑀢𑁂 𑀖𑀝𑀺𑀓𑀸𑀓𑀸𑀭𑀬𑀼𑀢𑁆𑀢𑁄 𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄. 𑀏𑀓𑁂𑀓𑀁 𑀧𑀦 𑀤𑀸𑀫𑀁 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸𑀯 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀤𑀸𑀫𑀤𑁆𑀯𑀬𑀁 𑀲𑀗𑁆𑀖𑀝𑀺𑀢𑀼𑀓𑀸𑀫𑁂𑀦𑀧𑀺 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸𑀯 𑀲𑀼𑀢𑁆𑀢𑀓𑁄𑀝𑀺𑀁 𑀲𑀗𑁆𑀖𑀝𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑁂𑀧𑁄𑀢𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀦𑀁. 𑀢𑁂𑀦𑁂𑀯 𑀢𑀁 𑀧𑀽𑀭𑀺𑀫𑁂 𑀧𑀯𑀺𑀝𑁆𑀞𑀁, 𑀢𑀲𑁆𑀫𑀸 𑀏𑀢𑀫𑁆𑀧𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑀺𑀢𑀁 𑀦 𑀯𑀝𑁆𑀝𑀢𑀺. 𑀏𑀓𑀯𑀸𑀭𑀁 𑀧𑀦 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀼𑀧𑁆𑀨𑀤𑀸𑀫𑀓𑀭𑀡𑀦𑁆𑀢𑀺 𑀏𑀢𑁆𑀣 𑀲𑀼𑀢𑁆𑀢𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸𑀧𑀺 𑀏𑀓𑀢𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀕𑁂𑀡𑁆𑀟𑀼𑀓𑀔𑀭𑀧𑀢𑁆𑀢𑀤𑀸𑀫𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑁂𑀮𑀸𑀤𑀻𑀳𑀺 𑀓𑀢𑀤𑀸𑀫𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸𑀢𑀺 𑀯𑀤𑀦𑁆𑀢𑀺.

‘‘𑀮𑀸𑀲𑀺𑀬𑀦𑀸𑀝𑀓𑀁 ¶ ¶ 𑀦𑀸𑀝𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑁂𑀘𑀓𑀁 𑀤𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀪𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀏𑀯𑀁 𑀦𑀘𑁆𑀘𑀺𑀢𑀩𑁆𑀩’’𑀦𑁆𑀢𑀺 𑀧𑀞𑀫𑀁 𑀉𑀝𑁆𑀞𑀳𑀺𑀢𑁆𑀯𑀸 𑀦𑀘𑁆𑀘𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀫𑀼𑀔𑁂 𑀅𑀗𑁆𑀕𑀼𑀮𑀺𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀘𑀓𑁆𑀓𑀫𑀺𑀯 𑀅𑀢𑁆𑀢𑀸𑀦𑀁 𑀪𑀫𑀬𑀫𑀸𑀦𑀸 𑀭𑁂𑀘𑀓𑀁 𑀤𑁂𑀦𑁆𑀢𑀺 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑁂𑀓𑀸𑀬 𑀧𑀦𑁆𑀢𑀺𑀬𑀸 𑀅𑀝𑁆𑀞 𑀅𑀝𑁆𑀞 𑀧𑀤𑀸𑀦𑀺 𑀅𑀲𑁆𑀲𑀸𑀢𑀺 𑀅𑀝𑁆𑀞𑀧𑀤𑀁. ‘‘𑀅𑀝𑁆𑀞𑀸𑀧𑀤’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀤𑀲𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀤𑀸𑀦𑀻𑀢𑀺 𑀘 𑀲𑀸𑀭𑀺𑀆𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀸𑀦𑀺. 𑀤𑀲𑀧𑀤𑀁 𑀦𑀸𑀫 𑀤𑁆𑀯𑀻𑀳𑀺 𑀧𑀦𑁆𑀢𑀻𑀳𑀺 𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀓𑀻𑀴𑀦𑀚𑀽𑀢𑀁. 𑀆𑀓𑀸𑀲𑁂𑀬𑁂𑀯 𑀓𑀻𑀴𑀦𑁆𑀢𑀻𑀢𑀺 ‘‘𑀅𑀬𑀁 𑀲𑀸𑀭𑀻 𑀅𑀲𑀼𑀓𑀧𑀤𑀁 𑀫𑀬𑀸 𑀦𑀻𑀢𑀸, 𑀅𑀬𑀁 𑀅𑀲𑀼𑀓𑀧𑀤’’𑀦𑁆𑀢𑀺 𑀓𑁂𑀯𑀮𑀁 𑀫𑀼𑀔𑁂𑀦𑁂𑀯 𑀯𑀤𑀦𑁆𑀢𑀸 𑀆𑀓𑀸𑀲𑁂𑀬𑁂𑀯 𑀚𑀽𑀢𑀁 𑀓𑀻𑀴𑀦𑁆𑀢𑀺. 𑀚𑀽𑀢𑀨𑀮𑀓𑁂𑀢𑀺 𑀚𑀽𑀢𑀫𑀡𑁆𑀟𑀮𑁂. 𑀧𑀸𑀲𑀓𑀓𑀻𑀴𑀸𑀬 𑀓𑀻𑀴𑀦𑁆𑀢𑀻𑀢𑀺 𑀧𑀸𑀲𑀓𑀁 𑀯𑀼𑀘𑁆𑀘𑀢𑀺 𑀙𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀁 𑀬𑀸𑀯 𑀙𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀓𑀻𑀴𑀦𑀁, 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑀏𑀓𑀓𑀸𑀤𑀺𑀯𑀲𑁂𑀦 𑀲𑀸𑀭𑀺𑀬𑁄 𑀅𑀧𑀦𑁂𑀦𑁆𑀢𑀸 𑀉𑀧𑀦𑁂𑀦𑁆𑀢𑀸 𑀘 𑀓𑀻𑀴𑀦𑁆𑀢𑀺. 𑀖𑀝𑁂𑀦 𑀓𑀻𑀴𑀸 𑀖𑀝𑀺𑀓𑀸𑀢𑀺 𑀏𑀓𑁂.

𑀫𑀜𑁆𑀚𑀝𑁆𑀞𑀺𑀬𑀸 𑀯𑀸𑀢𑀺 𑀫𑀜𑁆𑀚𑀝𑁆𑀞𑀺𑀭𑀼𑀓𑁆𑀔𑀲𑀸𑀭𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀓𑀲𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀮𑀸𑀓𑀳𑀢𑁆𑀣𑀦𑁆𑀢𑀺 𑀢𑀸𑀮𑀳𑀻𑀭𑀸𑀤𑀻𑀦𑀁 𑀓𑀮𑀸𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑀳𑀽𑀲𑀼 𑀲𑀮𑀸𑀓𑀸𑀲𑀼 𑀯𑀺𑀲𑁂𑀲𑀭𑀳𑀺𑀢𑀁 𑀏𑀓𑀁 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀢𑀸𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑀁𑀬𑁂𑀯 𑀉𑀤𑁆𑀥𑀭𑀦𑁆𑀢𑀸 𑀲𑀮𑀸𑀓𑀳𑀢𑁆𑀣𑁂𑀦 𑀓𑀻𑀴𑀦𑁆𑀢𑀻𑀢𑀺 𑀓𑁂𑀘𑀺. 𑀧𑀡𑁆𑀡𑁂𑀦 𑀯𑀁𑀲𑀸𑀓𑀸𑀭𑁂𑀦 𑀓𑀢𑀸 𑀦𑀸𑀴𑀺𑀓𑀸 𑀧𑀡𑁆𑀡𑀦𑀸𑀴𑀺𑀓𑀸. 𑀢𑁂𑀦𑁂𑀯𑀸𑀳 ‘‘𑀢𑀁 𑀥𑀫𑀦𑁆𑀢𑀸’’𑀢𑀺. 𑀧𑀼𑀘𑁆𑀙𑀦𑁆𑀢𑀲𑁆𑀲 𑀫𑀼𑀔𑀸𑀕𑀢𑀁 𑀅𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀦𑀝𑁆𑀞𑀫𑀼𑀝𑁆𑀞𑀺𑀮𑀸𑀪𑀸𑀮𑀸𑀪𑀸𑀤𑀺𑀚𑀸𑀦𑀦𑀓𑀻𑀴𑀸 𑀅𑀓𑁆𑀔𑀭𑀺𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀳𑀢𑁆𑀣𑀺𑀦𑀺𑀫𑀺𑀢𑁆𑀢𑀲𑀺𑀧𑁆𑀧𑁂𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀲𑁆𑀫𑀺𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀉𑀲𑁆𑀲𑁂𑀴𑁂𑀦𑁆𑀢𑀺 𑀅𑀧𑁆𑀨𑁄𑀝𑁂𑀦𑁆𑀢𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀧𑀸𑀓𑀝𑁄𑀬𑁂𑀯𑀸𑀢𑀺 𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀉𑀲𑁆𑀲𑁂𑀴𑁂𑀦𑁆𑀢𑀻𑀢𑀺 𑀫𑀼𑀔𑁂𑀦 𑀉𑀲𑁆𑀲𑁂𑀴𑀦𑀲𑀤𑁆𑀤𑀁 𑀧𑀫𑀼𑀜𑁆𑀘𑀦𑁆𑀢𑀺, 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀚𑀸𑀦𑀁 𑀲𑀜𑁆𑀜𑀁 𑀤𑁂𑀦𑁆𑀢𑀸 𑀅𑀚𑀧𑀸𑀮𑀓𑀸 𑀯𑀺𑀬 𑀫𑀼𑀔𑁂𑀦 𑀯𑀸𑀢𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀸 𑀲𑀼𑀔𑀼𑀫𑀁 𑀅𑀩𑁆𑀬𑀢𑁆𑀢𑀦𑀸𑀤𑀁 𑀧𑀯𑀢𑁆𑀢𑁂𑀦𑁆𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀧𑁆𑀨𑁄𑀝𑁂𑀦𑁆𑀢𑀻𑀢𑀺 𑀪𑀼𑀚𑀳𑀢𑁆𑀣𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀯𑀸𑀫𑀳𑀢𑁆𑀣𑀁 𑀉𑀭𑁂 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀸𑀡𑀺𑀦𑀸 𑀢𑀢𑁆𑀣 𑀢𑀸𑀴𑀦𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀔𑀟𑀺𑀡𑁆𑀟𑀺𑀫𑀦𑁆𑀢𑀺 𑀫𑀼𑀔𑀪𑁂𑀭𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁.

𑁪𑁩𑁨. 𑀧𑀲𑀸𑀤𑀸𑀯𑀳𑁂𑀦𑀸𑀢𑀺 ¶ 𑀧𑀲𑀸𑀤𑀚𑀦𑀦𑀓𑁂𑀦. 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀕𑀫𑀦𑁂𑀦𑀸’’𑀢𑀺. 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑀁. 𑀦𑀺𑀯𑀢𑁆𑀢𑀦𑁂𑀦𑀸𑀢𑀺 𑀦𑀺𑀯𑀢𑁆𑀢𑀺𑀫𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀦 𑀕𑀫𑀦𑀁 𑀕𑀫𑀦𑀫𑁂𑀯. 𑀅𑀪𑀺𑀫𑀼𑀔𑀁 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄 𑀤𑀲𑁆𑀲𑀦𑁂𑀦𑀸’’𑀢𑀺. 𑀇𑀢𑁄 𑀘𑀺𑀢𑁄 𑀘 𑀤𑀲𑁆𑀲𑀦𑁂𑀦𑀸𑀢𑀺 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁 𑀤𑀲𑁆𑀲𑁂𑀢𑀺. 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺, 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀁 𑀆𑀮𑁄𑀓𑀺𑀢𑀁, 𑀢𑀤𑀦𑀼𑀕𑀢𑀤𑀺𑀲𑀸𑀮𑁄𑀓𑀦𑀁 ‘‘𑀯𑀺𑀮𑁄𑀓𑀺𑀢’’𑀦𑁆𑀢𑀺 𑀳𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀘𑁆𑀙𑀢𑁄 𑀧𑁂𑀓𑁆𑀔𑀦𑀯𑀲𑁂𑀦 𑀑𑀮𑁄𑀓𑀺𑀢𑀉𑀮𑁆𑀮𑁄𑀓𑀺𑀢𑀸𑀧𑀮𑁄𑀓𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 ¶ 𑀧𑀦 𑀦 𑀲𑀫𑀡𑀲𑀸𑀭𑀼𑀧𑁆𑀧𑀸𑀦𑀺 𑀅𑀧𑁆𑀧𑀲𑀸𑀤𑀸𑀯𑀳𑀸𑀦𑀺, 𑀢𑁂𑀦𑁂𑀯𑁂𑀢𑁆𑀣 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀦𑁂𑀯 𑀕𑀳𑀺𑀢𑀸𑀦𑀺. 𑀢𑁂𑀲𑀦𑁆𑀢𑀺 𑀲𑀫𑀸𑀲𑁂 𑀕𑀼𑀡𑀻𑀪𑀽𑀢𑀸𑀦𑀺𑀧𑀺 𑀧𑀩𑁆𑀩𑀸𑀦𑀺 𑀧𑀭𑀸𑀫𑀲𑀢𑀺. ‘‘𑀧𑀩𑁆𑀩𑀲𑀗𑁆𑀓𑁄𑀘𑀦𑁂𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀧𑀩𑁆𑀩𑀸𑀦𑀺 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀦𑀺 𑀲𑀗𑁆𑀓𑁄𑀘𑀦𑀲𑁆𑀲 𑀧𑀥𑀸𑀦𑀢𑁆𑀢𑀸. 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀻𑀢𑀺 𑀲𑀸𑀢𑁆𑀣𑀓𑀢𑀸𑀤𑀺𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀢𑀣𑀸𑀧𑀯𑀢𑁆𑀢𑀲𑀫𑁆𑀧𑀚𑀜𑁆𑀜𑁂𑀦 𑀘 𑀲𑀫𑀦𑁆𑀢𑀢𑁄 𑀧𑀓𑀸𑀭𑁂𑀳𑀺, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀢𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁. 𑀢𑀣𑀸𑀧𑀯𑀢𑁆𑀢𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀪𑀺𑀲𑀗𑁆𑀔𑀢𑀢𑁆𑀢𑀸𑀢𑀺 𑀲𑀫𑁆𑀫𑀸 𑀧𑀯𑀢𑁆𑀢𑀺𑀢𑀢𑁆𑀢𑀸. 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀔𑀦𑁆𑀥𑀁 𑀅𑀦𑀸𑀫𑁂𑀢𑁆𑀯𑀸𑀯 𑀅𑀥𑁄𑀔𑀺𑀢𑁆𑀢𑀘𑀓𑁆𑀔𑀼. 𑀔𑀦𑁆𑀥𑀁 𑀦𑀸𑀫𑁂𑀢𑁆𑀯𑀸 𑀳𑀺 𑀳𑁂𑀝𑁆𑀞𑀸𑀯𑀮𑁄𑀓𑀦𑀁 𑀦 𑀲𑀫𑀡𑀲𑀸𑀭𑀼𑀧𑁆𑀧𑀁. ‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽’’𑀢𑀺 𑀘 𑀇𑀫𑀺𑀦𑀸 𑀬𑀼𑀕𑀫𑀢𑁆𑀢𑀤𑀲𑁆𑀲𑀺𑀢𑀸 𑀯𑀼𑀢𑁆𑀢𑀸.

𑀩𑁄𑀦𑁆𑀤𑁄𑀢𑀺 𑀮𑁄𑀮𑁄 𑀫𑀦𑁆𑀤𑀥𑀸𑀢𑀼𑀓𑁄𑀢𑀺 𑀅𑀢𑁆𑀣𑁄. 𑀪𑀓𑀼𑀝𑀺𑀁 𑀓𑀢𑁆𑀯𑀸𑀢𑀺 𑀪𑀫𑀼𑀓𑀪𑁂𑀤𑀁 𑀓𑀢𑁆𑀯𑀸. 𑀲𑀸𑀔𑀮𑁆𑀬𑁂𑀦 𑀬𑀼𑀢𑁆𑀢𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬𑀁? 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁩𑁫𑁦) 𑀦𑀬𑁂𑀦 𑀯𑀼𑀢𑁆𑀢𑀲𑀸𑀔𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀫𑀼𑀤𑀼𑀯𑀘𑀦𑀸𑀢𑀺 𑀅𑀢𑁆𑀣𑁄. 𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀦𑀸 𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀤𑀸𑀦𑀦𑀺𑀩𑀤𑁆𑀥𑀸𑀦𑀻𑀢𑀺 𑀦𑀺𑀩𑀤𑁆𑀥𑀤𑀸𑀦𑀸𑀦𑀺.

‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀯𑀘𑀦𑀢𑁄 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀇𑀤𑀁 𑀏𑀓𑀲𑁂𑀲𑀦𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄𑀬𑁂𑀯𑀸𑀢𑀺 𑀦 𑀯𑀼𑀢𑁆𑀢𑁄. ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀳𑀺 𑀇𑀤𑀁 𑀏𑀓𑀲𑁂𑀲𑀦𑀬𑁂𑀦 𑀯𑀼𑀢𑁆𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀲𑁆𑀲𑀧𑀺 𑀇𑀘𑁆𑀙𑀺𑀢𑀢𑁆𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀲𑀤𑁆𑀥𑀲𑁆𑀲 𑀧𑀲𑀦𑁆𑀦𑀲𑁆𑀲𑀸𑀢𑀺 𑀭𑀢𑀦𑀢𑁆𑀢𑀬𑀲𑁆𑀲 𑀲𑀤𑁆𑀥𑀸𑀬 ¶ 𑀲𑀫𑀦𑁆𑀦𑀸𑀕𑀢𑀲𑁆𑀲 𑀢𑀢𑁄𑀬𑁂𑀯 𑀘 𑀧𑀲𑀦𑁆𑀦𑀲𑁆𑀲, 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀯𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁆𑀥𑀲𑁆𑀲 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀩𑀳𑀼𑀮𑀢𑀸𑀬 𑀧𑀲𑀦𑁆𑀦𑀲𑁆𑀲.

𑁪𑁩𑁩. 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑀸𑀢𑀺 𑀓𑀼𑀮𑀤𑀽𑀲𑀓𑀓𑀫𑁆𑀫𑁂𑀦 𑀆𑀧𑀦𑁆𑀦𑀸𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑀸. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀩𑀳𑀺𑀕𑀸𑀫𑁂 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀕𑀸𑀫𑁂 𑀯𑀺𑀳𑀸𑀭𑁄 𑀧𑀦 ‘‘𑀢𑀲𑁆𑀫𑀺𑀁 𑀕𑀸𑀫𑁂 𑀦 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. ‘‘𑀢𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺 𑀯𑀘𑀦𑀢𑁄 𑀢𑀲𑁆𑀲 𑀕𑀸𑀫𑀲𑁆𑀲 𑀲𑀸𑀫𑀦𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀸𑀫𑀦𑁆𑀢𑀕𑀸𑀫𑁂 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀸𑀲𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀬𑀤𑀺 𑀢𑀢𑁆𑀣 𑀯𑀲𑀢𑀺, 𑀢𑁂𑀦 𑀲𑀸𑀫𑀦𑁆𑀢𑀕𑀸𑀫𑁂𑀧𑀺 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀺𑀁 𑀕𑀸𑀫𑁂 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀫𑀺𑀁 𑀕𑀸𑀫𑁂 𑀦 𑀘𑀭𑀺𑀢𑀩𑁆𑀩𑀁. 𑀬𑀲𑁆𑀫𑀺𑀜𑁆𑀳𑀺 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀬𑀲𑁆𑀫𑀺𑀜𑁆𑀘 𑀯𑀺𑀳𑀸𑀭𑁂 𑀯𑀲𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀘𑀭𑀺𑀢𑀼𑀁 𑀮𑀩𑁆𑀪𑀢𑀺, 𑀦 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀧𑀦 𑀲𑀸𑀫𑀦𑁆𑀢𑀕𑀸𑀫𑁂 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺 𑀢𑀢𑁆𑀣 𑀯𑀸𑀲𑀲𑁆𑀲 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸.

𑁪𑁩𑁫. 𑀅𑀝𑁆𑀞𑀸𑀭𑀲 ¶ 𑀯𑀢𑁆𑀢𑀸𑀦𑀻𑀢𑀺 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸, 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀦 𑀲𑀸 𑀆𑀧𑀢𑁆𑀢𑀺 𑀆𑀧𑀚𑁆𑀚𑀺𑀢𑀩𑁆𑀩𑀸 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸, 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸, 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀕𑀢𑀸𑀦𑀺 𑀅𑀝𑁆𑀞𑀸𑀭𑀲 𑀯𑀢𑁆𑀢𑀸𑀦𑀺.

𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀧𑁆𑀧𑀥𑀸𑀦𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀢𑀺 𑀯𑀼𑀢𑁆𑀢𑀸 𑀲𑀳𑀘𑀭𑀡𑀜𑀸𑀬𑁂𑀦. 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑀸𑀬𑀸𑀢𑀺 𑀬𑀣𑀸𑀧𑀜𑁆𑀜𑀢𑁆𑀢𑀲𑀫𑁆𑀫𑀸𑀯𑀢𑁆𑀢𑀲𑀗𑁆𑀔𑀸𑀢𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑀸𑀬, 𑀬𑁂𑀦 𑀯𑀢𑁆𑀢𑁂𑀦 𑀘𑀺𑀡𑁆𑀡𑁂𑀦 𑀲𑀗𑁆𑀖𑁄 𑀅𑀦𑀼𑀮𑁄𑀫𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀯𑀢𑁆𑀢𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀧𑀦𑁆𑀦𑀮𑁄𑀫𑀸 𑀳𑁄𑀦𑁆𑀢𑀻𑀢𑀺 𑀧𑀢𑀺𑀢𑀮𑁄𑀫𑀸 𑀦 𑀳𑁄𑀦𑁆𑀢𑀺, 𑀅𑀦𑀼𑀓𑀽𑀮𑀯𑀼𑀢𑁆𑀢𑀺𑀦𑁄 𑀦 𑀳𑁄𑀦𑁆𑀢𑀻𑀢𑀺 ¶ 𑀅𑀢𑁆𑀣𑁄. 𑀦𑀺𑀢𑁆𑀣𑀭𑀡𑀫𑀕𑁆𑀕𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀯𑀢𑁆𑀢𑀲𑀗𑁆𑀔𑀸𑀢𑀁 𑀦𑀺𑀢𑁆𑀣𑀭𑀡𑀽𑀧𑀸𑀬𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂𑀦 𑀯𑀢𑁆𑀢𑁂𑀦 𑀘𑀺𑀡𑁆𑀡𑁂𑀦 𑀲𑀸𑀧𑀢𑁆𑀢𑀺𑀓𑀪𑀸𑀯𑀢𑁄 𑀦𑀺𑀢𑁆𑀢𑀺𑀡𑁆𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀦𑀺𑀢𑁆𑀣𑀭𑀡𑀓𑀯𑀢𑁆𑀢𑀲𑁆𑀫𑀺𑀁 𑀦 𑀯𑀢𑁆𑀢𑀦𑁆𑀢𑀺, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑁆𑀣𑀁 𑀢𑀼𑀭𑀺𑀢𑀢𑀼𑀭𑀺𑀢𑀸 𑀙𑀦𑁆𑀤𑀚𑀸𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀻𑀢𑀺 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀆𑀧𑀢𑁆𑀢𑀺𑀳𑀻𑀦𑀲𑀗𑁆𑀔𑀸𑀢𑁂𑀳𑀺𑀤𑀲𑀳𑀺 𑀅𑀓𑁆𑀓𑁄𑀲𑀓𑀸𑀭𑀡𑁂𑀳𑀺. 𑀙𑀦𑁆𑀤𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀻𑀢𑀺𑀆𑀤𑀻𑀲𑀼 𑀬-𑀓𑀸𑀭𑁄 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀙𑀦𑁆𑀤𑀕𑀸𑀫𑀺𑀢𑀸𑀬𑀧𑀺 𑀧𑀸𑀧𑁂𑀦𑁆𑀢𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀕𑀡𑀧𑀸𑀫𑁄𑀓𑁆𑀔𑀸𑀦𑀁.

𑁪𑁩𑁬-𑁪𑁩𑁭. 𑀦𑀺𑀕𑀫𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀧𑀭𑀲𑀦𑁆𑀢𑀓𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀧𑀭𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀤𑁂𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀘 𑀔𑁄 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀤𑁂𑀦𑁆𑀢𑁂𑀦 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬 𑀏𑀯 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀡𑁆𑀟𑀦𑀢𑁆𑀣𑀸𑀬 𑀧𑀦 𑀲𑀺𑀯𑀮𑀺𑀗𑁆𑀕𑀸𑀤𑀺𑀧𑀽𑀚𑀦𑀢𑁆𑀣𑀸𑀬𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀇𑀫𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀫𑁆𑀧𑀺 𑀓𑀧𑁆𑀧𑁂𑀲𑁆𑀲𑀦𑁆𑀢𑀻𑀢𑀺 𑀫𑀸𑀢𑀼𑀆𑀤𑀻𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀲𑀘𑀺𑀧𑀻𑀢𑀺 𑀜𑀸𑀢𑀓𑀲𑁆𑀲 𑀅𑀜𑁆𑀜𑀸𑀢𑀓𑀲𑁆𑀲 𑀯𑀸 𑀓𑀲𑁆𑀲𑀘𑀺𑀧𑀺. 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀫𑁆𑀧𑀢𑁆𑀢𑀸𑀦𑀁 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀪𑀸𑀕𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀗𑁆𑀖𑀺𑀓𑀲𑁆𑀲 𑀮𑀸𑀪𑀲𑁆𑀲 𑀉𑀧𑀘𑀸𑀭𑀲𑀻𑀫𑀕𑀢𑀸𑀦𑀁 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀲𑀦𑁆𑀢𑀓𑀢𑁆𑀢𑀸 𑀢𑁂𑀲𑀫𑁆𑀧𑀺 𑀉𑀧𑀟𑁆𑀠𑀪𑀸𑀕𑁄 𑀮𑀩𑁆𑀪𑀢𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀽𑀴𑀓𑀦𑁆𑀢𑀺 𑀉𑀧𑀟𑁆𑀠𑀪𑀸𑀕𑀢𑁄𑀧𑀺 𑀉𑀧𑀟𑁆𑀠𑀁. 𑀘𑀢𑀼𑀢𑁆𑀣𑀪𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀲𑀸𑀫𑀡𑁂𑀭𑀸…𑀧𑁂… 𑀞𑀧𑁂𑀦𑁆𑀢𑀻’’𑀢𑀺 𑀇𑀤𑀁 𑀯𑀲𑁆𑀲𑀕𑁆𑀕𑁂𑀦 𑀅𑀪𑀸𑀚𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀫𑀕𑁆𑀕𑁂 ¶ 𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀯𑀸. 𑀤𑀸𑀧𑁂𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀲𑀸𑀫𑀡𑁂𑀭𑁂𑀳𑀺 𑀤𑀸𑀧𑁂𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀲𑀺𑀬𑀸. 𑀬𑀤𑀺 𑀳𑀺 𑀢𑀣𑀸 𑀆𑀕𑀢𑀸𑀦𑀁 𑀢𑁂𑀲𑀁 𑀤𑀸𑀦𑀁 𑀧𑀼𑀧𑁆𑀨𑀤𑀸𑀦𑀁 𑀪𑀯𑁂𑀬𑁆𑀬, 𑀲𑀸𑀫𑀡𑁂𑀭𑁂𑀳𑀺𑀧𑀺 𑀤𑀸𑀢𑀼𑀁 𑀦 𑀮𑀩𑁆𑀪𑁂𑀬𑁆𑀬. 𑀲𑀬𑀫𑁂𑀯𑀸𑀢𑀺 𑀲𑀸𑀫𑀡𑁂𑀭𑀸 𑀲𑀬𑀫𑁂𑀯. 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀆𑀤𑀸𑀬𑀸𑀢𑀺 𑀇𑀤𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀬𑀸𑀕𑀼𑀪𑀢𑁆𑀢𑀸𑀤𑀺𑀲𑀫𑁆𑀧𑀸𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀢𑀸𑀯 𑀳𑀭𑀺𑀢𑁆𑀯𑀸𑀧𑀺 𑀳𑀭𑀸𑀧𑁂𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀺𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀓𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀯. 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀳𑀭𑀸𑀧𑁂𑀦𑁆𑀢𑁂𑀦 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯 𑀳𑀭𑀸𑀧𑁂𑀢𑀩𑁆𑀩𑀁, 𑀇𑀢𑀭𑁂 𑀧𑀦 𑀬𑀤𑀺 𑀲𑀬𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀇𑀫𑀁 𑀧𑀼𑀧𑁆𑀨𑁂 𑀯𑀼𑀢𑁆𑀢𑀦𑀬𑀁 𑀨𑀮𑁂𑀧𑀺 ¶ 𑀅𑀢𑀺𑀤𑀺𑀲𑀢𑀺, 𑀢𑀲𑁆𑀫𑀸 𑀨𑀮𑀫𑁆𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀳𑀭𑀡𑀳𑀭𑀸𑀧𑀦𑀸𑀤𑀺𑀦𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀻𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀯. 𑀇𑀤𑀸𑀦𑀺 ‘‘𑀬𑁄 𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸 𑀯𑀸…𑀧𑁂… 𑀇𑀲𑁆𑀲𑀭𑀯𑀢𑀸𑀬 𑀤𑀤𑀢𑁄 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀇𑀫𑀁 𑀧𑀼𑀧𑁆𑀨𑁂 𑀯𑀼𑀢𑁆𑀢𑀦𑀬𑀁 𑀨𑀮𑁂𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀔𑀻𑀡𑀧𑀭𑀺𑀩𑁆𑀩𑀬𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀨𑀮𑀧𑀭𑀺𑀘𑁆𑀙𑁂𑀤𑁂𑀦 𑀯𑀸𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀨𑀮𑀧𑀭𑀺𑀘𑁆𑀙𑁂𑀤𑁂𑀦 𑀯𑀸. 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸𑀢𑀺 ‘‘𑀇𑀫𑁂𑀳𑀺 𑀭𑀼𑀓𑁆𑀔𑁂𑀳𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸. 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼𑀧𑀺 𑀭𑀼𑀓𑁆𑀔𑁂𑀲𑀼 ‘‘𑀇𑀥 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀺, 𑀇𑀢𑁄 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑁂𑀦 𑀓𑀼𑀮𑀲𑀗𑁆𑀕𑀳𑁄 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀭𑀼𑀓𑁆𑀔𑀘𑁆𑀙𑀮𑁆𑀮𑀻𑀢𑀺 𑀭𑀼𑀓𑁆𑀔𑀢𑁆𑀢𑀘𑁄. 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀲𑀸𑀲𑀦𑀧𑀝𑀺𑀲𑀸𑀲𑀦𑀳𑀭𑀡𑀁 𑀚𑀗𑁆𑀖𑀧𑁂𑀲𑀦𑀺𑀓𑀁. 𑀢𑁂𑀦𑀸𑀳 ‘‘𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀁 𑀲𑀸𑀲𑀦𑀳𑀭𑀡𑀓𑀫𑁆𑀫’’𑀦𑁆𑀢𑀺. 𑀤𑀽𑀢𑀲𑁆𑀲 𑀓𑀫𑁆𑀫𑀁 𑀤𑀽𑀢𑁂𑀬𑁆𑀬𑀁. 𑀧𑀞𑀫𑀁 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺…𑀧𑁂… 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀦 𑀲𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀓𑀸𑀭𑀼𑀜𑁆𑀜𑁂 𑀞𑀺𑀢𑁄 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 ‘‘𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀺𑀓𑁆𑀔𑀸𑀧𑀤𑁂 𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀓𑁆𑀓𑀫𑀢𑀸𑀬𑀲𑁆𑀫𑀸𑀢𑀺 𑀇𑀤𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀼𑀦 𑀧𑀓𑁆𑀓𑀫𑀢𑀸𑀬𑀲𑁆𑀫𑀸𑀢𑀺 𑀇𑀤𑀁 𑀧𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀯𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑁂𑀯𑀸𑀢𑀺 𑀏𑀢𑁆𑀣 𑀅𑀗𑁆𑀕𑁂𑀲𑀼𑀧𑀺 𑀬𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑀦𑀁, 𑀏𑀯𑀁 𑀇𑀥 𑀙𑀦𑁆𑀤𑀸𑀤𑀻𑀳𑀺 𑀧𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁪𑁪𑁨. 𑀧𑀞𑀫𑀁 ¶ 𑀆𑀧𑀢𑁆𑀢𑀺 𑀆𑀧𑀚𑁆𑀚𑀦𑀁 𑀏𑀢𑁂𑀲𑀦𑁆𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑀸. 𑀢𑀢𑁆𑀢𑀓𑀸𑀦𑀺 𑀅𑀳𑀸𑀦𑀻𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀭𑁄𑀘𑀺𑀢𑀤𑀺𑀯𑀲𑁄, 𑀢𑀸𑀯 𑀤𑀺𑀯𑀲𑀧𑀓𑁆𑀔𑀫𑀸𑀲𑀲𑀁𑀯𑀘𑁆𑀙𑀭𑀯𑀲𑁂𑀦 𑀬𑀢𑁆𑀢𑀓𑁄 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀫𑁂𑀦 𑀅𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀧𑁆𑀧𑀝𑀺𑀓𑀫𑁆𑀫𑀓𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀕𑁆𑀕𑀫𑁄𑀓𑁆𑀔𑀸𑀯𑀭𑀡𑀪𑀸𑀯𑀢𑁄 𑀅𑀦𑀺𑀘𑁆𑀙𑀦𑁆𑀢𑁂𑀦𑀧𑀺 𑀧𑀭𑀺𑀯𑀲𑀺𑀢𑀩𑁆𑀩𑀦𑁆𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀅𑀯𑁆𑀳𑀸𑀢𑀩𑁆𑀩𑁄𑀢𑀺 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀧𑀓𑁆𑀓𑁄𑀲𑀺𑀢𑀩𑁆𑀩𑁄. 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸𑀢𑀺 𑀏𑀢𑁆𑀣 𑀬𑁂 𑀊𑀦𑀪𑀸𑀯𑀁 𑀜𑀢𑁆𑀯𑀸 𑀅𑀩𑁆𑀪𑁂𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀽 𑀘 𑀕𑀭𑀳𑀺𑀢𑀩𑁆𑀩𑀸 𑀲𑀸𑀢𑀺𑀲𑀸𑀭𑀸 𑀲𑀤𑁄𑀲𑀸, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄𑀬𑁂𑀯𑀸𑀢𑀺 𑀦 𑀯𑀼𑀢𑁆𑀢𑁄. 𑀲𑀸𑀫𑀻𑀘𑀻𑀢𑀺 𑀯𑀢𑁆𑀢𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀢𑁂𑀭𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀺𑀬𑀢𑀓𑀡𑁆𑀟𑀁

𑁧. 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪𑁩. 𑀧𑀼𑀢𑁆𑀢𑀲𑀤𑁆𑀤𑁂𑀦 ¶ ¶ 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀢𑁄 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀧𑀼𑀢𑁆𑀢𑀻𑀧𑀺 𑀕𑀳𑀺𑀢𑀸𑀢𑀺 𑀆𑀳 ‘‘𑀩𑀳𑀽 𑀥𑀻𑀢𑀭𑁄 𑀘𑀸’’𑀢𑀺. 𑀤𑀸𑀦𑀧𑁆𑀧𑀤𑀸𑀦𑁂𑀲𑀽𑀢𑀺 𑀔𑀼𑀤𑁆𑀤𑀓𑁂𑀲𑀼 𑀘𑁂𑀯 𑀫𑀳𑀦𑁆𑀢𑁂𑀲𑀼 𑀘 𑀤𑀸𑀦𑁂𑀲𑀼. 𑀙𑀡𑀁 𑀦𑀸𑀫 𑀅𑀢𑁆𑀢𑀦𑁄 𑀕𑁂𑀳𑁂 𑀓𑀢𑁆𑀢𑀩𑁆𑀩𑀫𑀗𑁆𑀕𑀮𑀦𑁆𑀢𑀺 𑀆𑀳 ‘‘𑀆𑀯𑀸𑀳𑀯𑀺𑀯𑀸𑀳𑀫𑀗𑁆𑀕𑀮𑀸𑀤𑀻𑀲𑀽’’𑀢𑀺. 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀨𑀕𑁆𑀕𑀼𑀡𑀫𑀸𑀲𑀸𑀤𑀻𑀲𑀼 𑀉𑀢𑁆𑀢𑀭𑀨𑀕𑁆𑀕𑀼𑀡𑀸𑀤𑀺𑀅𑀪𑀺𑀮𑀓𑁆𑀔𑀺𑀢𑀤𑀺𑀯𑀲𑁂𑀲𑀼 𑀲𑀧𑀭𑀺𑀚𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀫𑀗𑁆𑀕𑀮𑀓𑀭𑀡𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑀭𑀼𑀲𑁆𑀲𑀯𑁂𑀲𑀽𑀢𑀺 𑀫𑀳𑀼𑀲𑁆𑀲𑀯𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀺𑀢𑀉𑀲𑁆𑀲𑀯𑁂𑀲𑀼. 𑀆𑀲𑀸𑀴𑁆𑀳𑀻𑀧𑀯𑀸𑀭𑀡𑀦𑀓𑁆𑀔𑀢𑁆𑀢𑀸𑀤𑀻𑀲𑀽𑀢𑀺 𑀏𑀢𑁆𑀣 𑀦𑀓𑁆𑀔𑀢𑁆𑀢𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀆𑀲𑀸𑀴𑁆𑀳𑀻𑀦𑀓𑁆𑀔𑀢𑁆𑀢𑀦𑁆𑀢𑀺 𑀯𑀲𑁆𑀲𑀽𑀧𑀕𑀫𑀦𑀧𑀽𑀚𑀸𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀯𑀸𑀭𑀡𑀦𑀓𑁆𑀔𑀢𑁆𑀢𑀦𑁆𑀢𑀺 𑀧𑀯𑀸𑀭𑀡𑀧𑀽𑀚𑀸𑀤𑀺𑀯𑀲𑀁 𑀲𑀦𑁆𑀥𑀸𑀬. 𑀆𑀤𑀺-𑀲𑀤𑁆𑀤𑁂𑀦 𑀬𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑁂 𑀕𑀸𑀫𑀦𑀺𑀕𑀫𑀯𑀸𑀲𑀺𑀦𑁄 𑀢𑀬𑁄 𑀲𑀢𑁆𑀢 𑀯𑀸 𑀤𑀺𑀯𑀲𑁂 𑀦𑀓𑁆𑀔𑀢𑁆𑀢𑀖𑁄𑀲𑀦𑀁 𑀓𑀢𑁆𑀯𑀸 𑀬𑀣𑀸𑀯𑀺𑀪𑀯𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀦𑀓𑁆𑀔𑀢𑁆𑀢𑀓𑀻𑀴𑀁 𑀓𑀻𑀴𑀦𑁆𑀢𑀺, 𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑁂𑀧𑀺 𑀤𑀸𑀭𑀓𑀸𑀢𑀺 𑀅𑀢𑁆𑀢𑀦𑁄 𑀤𑀸𑀭𑀓𑁂 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀢𑀤𑀦𑀦𑁆𑀢𑀭𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀪𑁄𑀚𑀦𑀸𑀦𑀦𑁆𑀢𑀭𑀁.

𑁪𑁪𑁪-𑁪𑁪𑁫. 𑀢𑀁 𑀓𑀫𑁆𑀫𑀦𑁆𑀢𑀺 𑀢𑀁 𑀅𑀚𑁆𑀛𑀸𑀘𑀸𑀭𑀓𑀫𑁆𑀫𑀁. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀪𑀼𑀫𑁆𑀫𑀯𑀘𑀦𑀲𑁆𑀲 𑀯𑀸 𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀫𑁆𑀳𑀺 𑀦𑀺𑀲𑀺𑀦𑁆𑀦𑁂’’𑀢𑀺. 𑀧𑀸𑀴𑀺𑀬𑀁 ‘‘𑀲𑁄𑀢𑀲𑁆𑀲 𑀭𑀳𑁄’’𑀢𑀺 𑀇𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂’’𑀢𑀺 𑀧𑀦 𑀯𑀘𑀦𑀢𑁄 ‘‘𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀭𑀳𑁄 𑀦𑀺𑀲𑀚𑁆𑀚𑀸𑀧𑀢𑁆𑀢𑀺𑀬𑀸 𑀧𑀭𑀺𑀘𑁆𑀙𑁂𑀤𑁄 𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀸𑀦𑀺 𑀘𑀓𑁆𑀔𑀼𑀲𑁆𑀲 𑀭𑀳𑁂𑀦𑁂𑀯 𑀆𑀧𑀢𑁆𑀢𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂𑀧𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀺𑀳𑀺𑀢𑀓𑀯𑀸𑀝𑀲𑁆𑀲𑀸𑀢𑀺 𑀇𑀫𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀢𑁄 𑀘𑀓𑁆𑀔𑀼𑀲𑁆𑀲 𑀭𑀳𑁄𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀧𑀺𑀳𑀺𑀢𑀓𑀯𑀸𑀝𑀲𑁆𑀲𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀘 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀦𑀬𑁂𑀦 𑀲𑁄𑀢𑀲𑁆𑀲 𑀭𑀳𑀯𑀲𑁂𑀦𑀧𑀺 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂𑀧𑀺 𑀑𑀓𑀸𑀲𑁂’’𑀢𑀺 ¶ . ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂’’𑀢𑀺 𑀳𑀺 𑀇𑀤𑀁 𑀲𑁄𑀢𑀲𑁆𑀲 𑀭𑀳𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀘𑀓𑁆𑀔𑀼𑀲𑁆𑀲𑁂𑀯 𑀭𑀳𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑁂𑀬𑁆𑀬 ¶ , ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂’’𑀢𑀺 𑀦 𑀯𑀤𑁂𑀬𑁆𑀬 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀢𑀢𑁄 𑀤𑀽𑀭𑀢𑀭𑁂 𑀦𑀺𑀲𑀺𑀦𑁆𑀦𑁂𑀧𑀺 𑀘𑀓𑁆𑀔𑀼𑀲𑁆𑀲 𑀭𑀳𑀸𑀲𑀫𑁆𑀪𑀯𑀢𑁄. 𑀬𑀲𑁆𑀫𑀸 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀓𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑀺, 𑀓𑀜𑁆𑀘𑀺 𑀓𑀸𑀮𑀁 𑀦𑀺𑀫𑀻𑀮𑁂𑀢𑀺, 𑀦 𑀘 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀢𑀲𑁆𑀫𑀸 ‘‘𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀦 𑀓𑀭𑁄𑀢𑀻’’𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀝𑀺𑀮𑀤𑁆𑀥𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀢𑀺 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀅𑀭𑀺𑀬𑀲𑀸𑀯𑀺𑀓𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸. 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑀲𑁆𑀲 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀲𑀫𑀸𑀬𑁄𑀕𑁄 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀧𑀸𑀭𑀸𑀚𑀺𑀓𑁂𑀦 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀘 𑀧𑀸𑀘𑀺𑀢𑁆𑀢𑀺𑀬𑁂𑀦 𑀘 𑀢𑁂𑀦𑀸𑀓𑀸𑀭𑁂𑀦 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑁄𑀯 𑀓𑀸𑀭𑁂𑀢𑀩𑁆𑀩𑁄. 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀅𑀮𑀚𑁆𑀚𑀻𑀧𑀺 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 𑀬𑀸𑀯 𑀦 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 𑀦𑁂𑀯 𑀲𑀼𑀤𑁆𑀥𑁄, 𑀦 𑀅𑀲𑀼𑀤𑁆𑀥𑁄𑀢𑀺 𑀯𑀸 𑀯𑀢𑁆𑀢𑀩𑁆𑀩𑁄, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀦𑀸 𑀧𑀦 𑀓𑀸𑀭𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀝𑀺𑀜𑁆𑀜𑀸 𑀮𑀚𑁆𑀚𑀻𑀲𑀼 𑀓𑀢𑀸, 𑀅𑀮𑀚𑁆𑀚𑀻𑀲𑀼 𑀏𑀯𑀁 𑀦 𑀯𑀺𑀚𑁆𑀚𑀢𑀺;

𑀩𑀳𑀼𑀫𑁆𑀧𑀺 𑀅𑀮𑀚𑁆𑀚𑀻 𑀪𑀸𑀲𑁂𑀬𑁆𑀬, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂’’𑀢𑀺. (𑀧𑀭𑀺. 𑁩𑁫𑁯);

𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀧𑀝𑀺𑀚𑀸𑀦𑀫𑀸𑀦𑁄’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀥𑀺𑀓𑀸𑀭𑀢𑁆𑀢𑀸 ‘‘𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑀸𑀬 𑀉𑀧𑀸𑀲𑀺𑀓𑀸𑀬 𑀯𑀘𑀦𑁂𑀦 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑀢𑁄 𑀤𑀺𑀝𑁆𑀞𑀁 𑀦𑀸𑀫 𑀢𑀣𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑁂𑀦 𑀅𑀜𑁆𑀜𑀣𑀢𑁆𑀢𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀫𑀳𑀺𑀤𑁆𑀥𑀺𑀓𑀸 𑀦𑀸𑀫…𑀧𑁂… 𑀯𑀤𑀸𑀧𑁂𑀣𑀸𑀢𑀺 𑀇𑀤𑀁 ‘‘𑀏𑀯𑀁 𑀫𑀳𑀺𑀤𑁆𑀥𑀺𑀓𑀸𑀧𑀺 𑀢𑀼𑀫𑁆𑀳𑁂 𑀏𑀯𑀭𑀽𑀧𑁂 𑀆𑀲𑀗𑁆𑀓𑀦𑀻𑀬𑁂 𑀞𑀸𑀦𑁂 𑀓𑀲𑁆𑀫𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀣, 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀦𑀸𑀫 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀦𑁆𑀢𑁂𑀳𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀣𑁂𑀭𑀁 𑀑𑀯𑀤𑀦𑁆𑀢𑁄 𑀆𑀳, 𑀦 𑀧𑀦 𑀅𑀲𑀤𑁆𑀤𑀳𑀦𑁆𑀢𑁄. 𑀣𑁂𑀭𑁄 𑀅𑀢𑁆𑀢𑀦𑁄 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀦𑀺𑀲𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀢𑀭𑀖𑀭𑀲𑁆𑀲𑁂𑀯𑁂𑀲𑁄 𑀆𑀯𑀼𑀲𑁄 𑀤𑁄𑀲𑁄’’𑀢𑀺 𑀆𑀳. 𑀏𑀯𑀫𑀓𑀸𑀲𑀺𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀕𑀽𑀳𑀺𑀢𑀩𑁆𑀩𑀫𑁆𑀧𑀺 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀏𑀯𑀁 ¶ 𑀯𑀺𑀬 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺𑀁. 𑀭𑀓𑁆𑀔𑁂𑀬𑁆𑀬𑀸𑀲𑀺 𑀫𑀦𑁆𑀢𑀺 ‘‘𑀫𑀸 𑀫𑀁 𑀅𑀜𑁆𑀜𑁂𑀧𑀺 𑀏𑀯𑀁 𑀚𑀸𑀦𑀦𑁆𑀢𑀽’’𑀢𑀺 𑀅𑀢𑁆𑀢𑀦𑁄 𑀕𑀼𑀡𑀁 𑀅𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀯𑀤𑀢𑀺.

𑁪𑁪𑁬-𑁪𑁫𑁧. 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄𑀢𑀺 𑀏𑀢𑁆𑀣 ‘‘𑀫𑀕𑁆𑀕𑁂’’𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 ¶ 𑀆𑀳 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀫𑀕𑁆𑀕𑁂’’𑀢𑀺. 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑀲𑁆𑀲 𑀅𑀲𑀢𑀺𑀧𑀺 𑀫𑁂𑀣𑀼𑀦𑀭𑀸𑀕𑀪𑀸𑀯𑁂 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺, 𑀢𑁂𑀦𑁂𑀯 𑀲𑀦𑁆𑀦𑀺𑀲𑁆𑀲𑀺𑀢𑀕𑁆𑀕𑀳𑀡𑀁 𑀓𑀢𑀁. 𑀢𑀁 𑀲𑀦𑁆𑀥𑀸𑀬 𑀅𑀕𑀢𑁂𑀧𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀢𑀢𑁆𑀢𑀸 ‘‘𑀅𑀲𑁆𑀲𑀸𑀤𑁂 𑀉𑀧𑁆𑀧𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀳𑀲𑁆𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀢𑁆𑀣 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀬𑀢𑁄𑀢𑀺 𑀏𑀢𑁆𑀣 𑀢𑀺𑀡𑁆𑀡𑀁 𑀆𑀧𑀢𑁆𑀢𑀻𑀦𑀁 𑀬𑀁 𑀆𑀧𑀢𑁆𑀢𑀺𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲 𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑀢𑀸𑀬 𑀅𑀦𑀺𑀬𑀢𑁄𑀢𑀺 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄𑀬𑁂𑀯𑀸𑀢𑀺 𑀦 𑀯𑀼𑀢𑁆𑀢𑁄. 𑀬𑀁 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀯𑀲𑁂𑀦𑁂𑀢𑁆𑀣 𑀅𑀗𑁆𑀕𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.