📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀘𑀽𑀴𑀯𑀕𑁆𑀕-𑀅𑀝𑁆𑀞𑀓𑀣𑀸

𑁧. 𑀓𑀫𑁆𑀫𑀓𑁆𑀔𑀦𑁆𑀥𑀓𑀁

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸

𑁧. 𑀘𑀽𑀴𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀢𑀸𑀯 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀢𑀺 𑀧𑀡𑁆𑀟𑀼𑀓𑁄 𑀘𑁂𑀯 𑀮𑁄𑀳𑀺𑀢𑀓𑁄 𑀘𑀸𑀢𑀺 𑀙𑀩𑁆𑀩𑀕𑁆𑀕𑀺𑀬𑁂𑀲𑀼 𑀤𑁆𑀯𑁂 𑀚𑀦𑀸; 𑀢𑁂𑀲𑀁 𑀦𑀺𑀲𑁆𑀲𑀺𑀢𑀓𑀸𑀧𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀦𑁆𑀢𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣𑀸𑀢𑀺 𑀲𑀼𑀝𑁆𑀞𑀼𑀩𑀮𑀯𑀁 𑀧𑀝𑀺𑀯𑀤𑀣. 𑀅𑀮𑀫𑀢𑁆𑀣𑀢𑀭𑀸𑀢𑀺 𑀲𑀫𑀢𑁆𑀣𑀢𑀭𑀸.

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸

𑁪. 𑀅𑀲𑀫𑁆𑀫𑀼𑀔𑀸 𑀓𑀢𑀦𑁆𑀢𑀺𑀆𑀤𑀻𑀲𑀼 𑀲𑀗𑁆𑀖𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀸𑀦𑀁 𑀯𑀺𑀦𑀸 𑀓𑀢𑀁, 𑀘𑀼𑀤𑀺𑀢𑀓𑀁 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀓𑀢𑀁, 𑀢𑀲𑁆𑀲𑁂𑀯 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀯𑀸. 𑀏𑀢𑁆𑀣 𑀧𑀼𑀭𑀺𑀫𑀓𑁂𑀲𑀼 𑀢𑀻𑀲𑀼 𑀢𑀺𑀓𑁂𑀲𑀼 𑀦𑀯 𑀧𑀤𑀸 𑀅𑀥𑀫𑁆𑀫𑁂𑀦𑀓𑀢𑀁 𑀯𑀕𑁆𑀕𑁂𑀦𑀓𑀢𑀦𑁆𑀢𑀺 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑁂𑀓𑀁 𑀕𑀳𑁂𑀢𑁆𑀯𑀸 𑀦𑀯 𑀢𑀺𑀓𑀸 𑀯𑀼𑀢𑁆𑀢𑀸. 𑀏𑀯𑀁 𑀲𑀩𑁆𑀩𑁂𑀧𑀺 𑀤𑁆𑀯𑀸𑀤𑀲 𑀢𑀺𑀓𑀸 𑀳𑁄𑀦𑁆𑀢𑀺. 𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀼𑀓𑁆𑀓𑀧𑀓𑁆𑀔𑁂𑀲𑀼𑀧𑀺 𑀏𑀢𑁂𑀬𑁂𑀯 𑀤𑁆𑀯𑀸𑀤𑀲 𑀢𑀺𑀓𑀸 𑀯𑀼𑀢𑁆𑀢𑀸.

𑁬. 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀻𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑁂𑀳𑀺 𑀲𑀳𑀲𑁄𑀓𑀺𑀢𑀸𑀤𑀻𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺.

𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀦𑁆𑀢𑀺𑀆𑀤𑀺 𑀏𑀓𑁂𑀓𑁂𑀦𑀸𑀧𑀺 𑀅𑀗𑁆𑀕𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀚𑁆𑀚𑀦𑀻𑀬𑀲𑁆𑀲 𑀳𑀺 𑀯𑀺𑀲𑁂𑀲𑁂𑀦 𑀪𑀡𑁆𑀟𑀦𑀓𑀸𑀭𑀓𑀢𑁆𑀢𑀁 𑀅𑀗𑁆𑀕𑀁, 𑀦𑀺𑀬𑀲𑁆𑀲𑀲𑁆𑀲 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀢𑁆𑀢𑀁, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀼𑀮𑀤𑀽𑀲𑀓𑀢𑁆𑀢𑀁 𑀯𑀼𑀢𑁆𑀢𑀁. 𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀅𑀗𑁆𑀕𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀩𑁆𑀩𑀸𑀦𑀺𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀏𑀯𑀁 𑀬𑀁 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁 𑁋 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀉𑀧𑀲𑀫𑁆𑀧𑀤𑀸𑀭𑀳𑀁 𑀅𑀩𑁆𑀪𑁂𑀢𑀺; 𑀏𑀯𑀁 𑀔𑁄 𑀉𑀧𑀸𑀮𑀺 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁, 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀇𑀤𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀢𑁄, ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀳𑀺 𑀯𑀘𑀦𑀲𑁆𑀲 𑀓𑀫𑁆𑀫𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀢𑁆𑀣𑁄. ‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀗𑁆𑀕𑀲𑀫𑁆𑀪𑀯𑁄, 𑀢𑀲𑁆𑀫𑀸 𑀬𑀤𑀸 𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀳𑁄𑀢𑀺, 𑀢𑀤𑀸 𑀓𑀫𑁆𑀫𑀸𑀭𑀳𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀸𑀤𑀺𑀓𑀭𑀡𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘𑁂𑀯 𑀅𑀯𑀺𑀦𑀬𑀓𑀫𑁆𑀫𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀲𑀼 𑀅𑀗𑁆𑀕𑁂𑀲𑀼 𑀅𑀜𑁆𑀜𑀢𑀭𑀁 𑀅𑀗𑁆𑀕𑀁 𑀅𑀢𑁆𑀣𑀺, 𑀢𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀬𑀣𑀸𑀦𑀼𑀜𑁆𑀜𑀸𑀢𑁂𑀲𑀼 𑀅𑀗𑁆𑀕𑁂𑀲𑀼 𑀘 𑀓𑀫𑁆𑀫𑁂𑀲𑀼 𑀘 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑁂𑀦 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀓𑀫𑁆𑀫𑀸𑀭𑀳𑀁 𑀓𑀢𑁆𑀯𑀸 𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀏𑀯𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀫𑁂𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑁂 𑀪𑀡𑁆𑀟𑀦𑀓𑀸𑀭𑀓𑀯𑀲𑁂𑀦 𑀓𑀫𑁆𑀫𑀯𑀸𑀘𑀸 𑀯𑀼𑀢𑁆𑀢𑀸, 𑀅𑀣 𑀔𑁄 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀆𑀧𑀢𑁆𑀢𑀺𑀩𑀳𑀼𑀮𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀩𑀸𑀮𑀅𑀩𑁆𑀬𑀢𑁆𑀢𑀯𑀲𑁂𑀦𑁂𑀯 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀓𑀢𑀁 𑀓𑀫𑁆𑀫𑀁 𑀳𑁄𑀢𑀺, 𑀦 𑀘 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀦𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀤𑀫𑁆𑀧𑀺 𑀅𑀦𑀼𑀜𑁆𑀜𑀸𑀢𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀝𑁆𑀞𑀸𑀭𑀲 𑀲𑀫𑁆𑀫𑀸𑀯𑀢𑁆𑀢𑀦𑀯𑀢𑁆𑀣𑀽𑀦𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀸𑀤𑀺𑀓𑀣𑀸

𑁮. 𑀮𑁄𑀫𑀁 𑀧𑀸𑀢𑁂𑀦𑁆𑀢𑀻𑀢𑀺 𑀧𑀦𑁆𑀦𑀮𑁄𑀫𑀸 𑀳𑁄𑀦𑁆𑀢𑀺; 𑀪𑀺𑀓𑁆𑀔𑀽 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀢𑁆𑀣𑀭𑀦𑁆𑀢𑀸𑀦𑀁 𑀏𑀢𑀦𑁆𑀢𑀺 𑀦𑁂𑀢𑁆𑀣𑀸𑀭𑀁; 𑀬𑁂𑀦 𑀲𑀓𑁆𑀓𑀸 𑀦𑀺𑀲𑁆𑀲𑀸𑀭𑀡𑀸 𑀦𑀺𑀢𑁆𑀣𑀭𑀺𑀢𑀼𑀁, 𑀢𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀲𑀫𑁆𑀫𑀸𑀯𑀢𑁆𑀢𑀦𑀁 𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀯𑀢𑁆𑀢𑀁 𑀧𑀽𑀭𑁂𑀢𑀩𑁆𑀩𑀦𑁆𑀢𑀺? 𑀤𑀲 𑀯𑀸 𑀧𑀜𑁆𑀘 𑀯𑀸 𑀤𑀺𑀯𑀲𑀸𑀦𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀏𑀢𑁆𑀢𑀓𑁂𑀦 𑀯𑀢𑁆𑀢𑀁 𑀧𑀽𑀭𑀺𑀢𑀫𑁂𑀯 𑀳𑁄𑀢𑀺.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸

𑁧𑁧. 𑀲𑁂𑀬𑁆𑀬𑀲𑀓𑀯𑀢𑁆𑀣𑀼𑀲𑁆𑀫𑀺𑀁 𑁋 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸𑀢𑀺 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀦𑀺𑀘𑁆𑀘𑀁 𑀩𑁆𑀬𑀸𑀯𑀝𑀸 𑀳𑁄𑀦𑁆𑀢𑀺. 𑀲𑁂𑀲𑀁 𑀢𑀚𑁆𑀚𑀦𑀻𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀣𑀸

𑁨𑁧. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀯𑀢𑁆𑀣𑀼 𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁.

𑁨𑁭. 𑀓𑀸𑀬𑀺𑀓𑁂𑀦 𑀤𑀯𑁂𑀦𑀸𑀢𑀺𑀆𑀤𑀻𑀲𑀼 𑀧𑀦𑁂𑀢𑁆𑀣 𑀓𑀸𑀬𑀺𑀓𑁄 𑀤𑀯𑁄 𑀦𑀸𑀫 𑀓𑀸𑀬𑀓𑀻𑀴𑀸 𑀯𑀼𑀘𑁆𑀘𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀺𑀓𑁄 𑀅𑀦𑀸𑀘𑀸𑀭𑁄 𑀦𑀸𑀫 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀯𑀼𑀘𑁆𑀘𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀺𑀓𑀁 𑀉𑀧𑀖𑀸𑀢𑀺𑀓𑀁 𑀦𑀸𑀫 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀲𑀺𑀓𑁆𑀔𑀦𑀪𑀸𑀯𑁂𑀦 𑀉𑀧𑀳𑀦𑀦𑀁 𑀯𑀼𑀘𑁆𑀘𑀢𑀺; 𑀦𑀸𑀲𑀦𑀁 𑀯𑀺𑀦𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀺𑀓𑁄 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫 𑀧𑀝𑀺𑀓𑁆𑀔𑀺𑀢𑁆𑀢𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑁂𑀮𑀧𑀘𑀦𑀅𑀭𑀺𑀝𑁆𑀞𑀧𑀘𑀦𑀸𑀤𑀻𑀦𑀺. 𑀯𑀸𑀘𑀲𑀺𑀓𑁄 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫 𑀕𑀺𑀳𑀻𑀦𑀁 𑀲𑀸𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑀸𑀭𑁄𑀘𑀦𑀸𑀤𑀻𑀦𑀺. 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀦𑀸𑀫 𑀢𑀤𑀼𑀪𑀬𑀁. 𑀲𑁂𑀲𑀁 𑀢𑀚𑁆𑀚𑀦𑀻𑀬𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀣𑀸

𑁩𑁩. 𑀲𑀼𑀥𑀫𑁆𑀫𑀯𑀢𑁆𑀣𑀼𑀲𑁆𑀫𑀺𑀁 𑀧𑀦 𑁋 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀦 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀏𑀢𑀤𑀯𑁄𑀘𑀸𑀢𑀺 𑀓𑀺𑀁 𑀢𑁂 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀧𑀝𑀺𑀬𑀢𑁆𑀢𑀦𑁆𑀢𑀺 𑀲𑀩𑁆𑀩𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑀺𑀲𑁆𑀯𑀸 𑀏𑀢𑀁 𑀅𑀯𑁄𑀘. 𑀏𑀓𑀸 𑀘 𑀔𑁄 𑀇𑀥 𑀦𑀢𑁆𑀣𑀺 𑀬𑀤𑀺𑀤𑀁 𑀢𑀺𑀮𑀲𑀁𑀕𑀼𑀴𑀺𑀓𑀸𑀢𑀺 𑀬𑀸 𑀅𑀬𑀁 𑀢𑀺𑀮𑀲𑀓𑁆𑀔𑀮𑀺𑀓𑀸 𑀦𑀸𑀫 𑀯𑀼𑀘𑁆𑀘𑀢𑀺, 𑀲𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀓𑀺𑀭 𑀕𑀳𑀧𑀢𑀺𑀦𑁄 𑀯𑀁𑀲𑁂 𑀆𑀤𑀺𑀫𑁆𑀳𑀺 𑀏𑀓𑁄 𑀧𑀽𑀯𑀺𑀬𑁄 𑀅𑀳𑁄𑀲𑀺. 𑀢𑁂𑀦 𑀦𑀁 𑀣𑁂𑀭𑁄 𑀚𑀸𑀢𑀺𑀬𑀸 𑀔𑀼𑀁𑀲𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀬𑀤𑁂𑀯 𑀓𑀺𑀜𑁆𑀘𑀻𑀢𑀺 𑀏𑀯𑀁 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁 𑀭𑀢𑀦𑀁 𑀧𑀳𑀸𑀬 𑀓𑀺𑀜𑁆𑀘𑀺𑀤𑁂𑀯 𑀢𑀺𑀮𑀲𑀁𑀕𑀼𑀴𑀺𑀓𑀸𑀯𑀘𑀦𑀁 𑀪𑀸𑀲𑀺𑀢𑀁. 𑀓𑀼𑀓𑁆𑀓𑀼𑀝𑀧𑁄𑀢𑀓𑀉𑀤𑀸𑀳𑀭𑀡𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀲𑁄 𑀦𑁂𑀯 𑀓𑀸𑀓𑀯𑀲𑁆𑀲𑀺𑀢𑀁 𑀦 𑀓𑀼𑀓𑁆𑀓𑀼𑀝𑀯𑀲𑁆𑀲𑀺𑀢𑀁 𑀅𑀓𑀸𑀲𑀺, 𑀏𑀯𑀁 𑀢𑀬𑀸𑀧𑀺 𑀦𑁂𑀯 𑀪𑀺𑀓𑁆𑀔𑀼𑀯𑀘𑀦𑀁 𑀦 𑀕𑀺𑀳𑀺𑀯𑀘𑀦𑀁 𑀯𑀼𑀢𑁆𑀢’’𑀦𑁆𑀢𑀺.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀫𑁆𑀫𑀓𑀫𑁆𑀫𑀸𑀤𑀺𑀤𑁆𑀯𑀸𑀤𑀲𑀓𑀓𑀣𑀸

𑁩𑁭. 𑀅𑀲𑀫𑁆𑀫𑀼𑀔𑀸 𑀓𑀢𑀦𑁆𑀢𑀺𑀆𑀤𑀬𑁄 𑀢𑀺𑀓𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯.

𑁩𑁯. 𑀅𑀗𑁆𑀕𑀲𑀫𑀦𑁆𑀦𑀸𑀕𑀫𑁄 𑀧𑀼𑀭𑀺𑀫𑁂𑀳𑀺 𑀅𑀲𑀤𑀺𑀲𑁄. 𑀢𑀢𑁆𑀣 𑀬𑀣𑀸 𑀮𑀸𑀪𑀁 𑀦 𑀮𑀪𑀦𑁆𑀢𑀺; 𑀏𑀯𑀁 𑀧𑀭𑀺𑀲𑀓𑁆𑀓𑀦𑁆𑀢𑁄 𑀧𑀭𑀓𑁆𑀓𑀫𑀦𑁆𑀢𑁄 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺 𑀦𑀸𑀫. 𑀏𑀲 𑀦𑀬𑁄 𑀅𑀦𑀢𑁆𑀣𑀸𑀤𑀻𑀲𑀼. 𑀢𑀢𑁆𑀣 𑀅𑀦𑀢𑁆𑀣𑁄𑀢𑀺 𑀅𑀢𑁆𑀣𑀪𑀗𑁆𑀕𑁄. 𑀅𑀦𑀸𑀯𑀸𑀲𑁄𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀯𑀲𑀦𑀁. 𑀕𑀺𑀳𑀻𑀦𑀁 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀦𑁆𑀢𑀺 𑀕𑀺𑀳𑀻𑀦𑀁 𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺. 𑀥𑀫𑁆𑀫𑀺𑀓𑀁 𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀻𑀢𑀺 𑀬𑀣𑀸 𑀲𑀘𑁆𑀘𑁄 𑀳𑁄𑀢𑀺, 𑀏𑀯𑀁 𑀦 𑀓𑀭𑁄𑀢𑀺; 𑀯𑀲𑁆𑀲𑀸𑀯𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 𑀓𑀭𑁄𑀢𑀺. 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀯𑁂𑀢𑀺𑀆𑀤𑀺 𑀏𑀓𑀗𑁆𑀕𑁂𑀦𑀧𑀺 𑀓𑀫𑁆𑀫𑀸𑀭𑀳𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀜𑁆𑀘𑁂𑀯, 𑀢𑀚𑁆𑀚𑀦𑀻𑀬𑁂 𑀘 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀥𑀫𑁆𑀫𑀓𑀫𑁆𑀫𑀸𑀤𑀺𑀤𑁆𑀯𑀸𑀤𑀲𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸

𑁪𑁬. 𑀙𑀦𑁆𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀆𑀯𑀸𑀲𑀧𑀭𑀫𑁆𑀧𑀭𑀜𑁆𑀘 𑀪𑀺𑀓𑁆𑀔𑀯𑁂 𑀲𑀁𑀲𑀣𑀸𑀢𑀺 𑀲𑀩𑁆𑀩𑀸𑀯𑀸𑀲𑁂𑀲𑀼 𑀆𑀭𑁄𑀘𑁂𑀣.

𑁫𑁦. 𑀪𑀡𑁆𑀟𑀦𑀓𑀸𑀭𑀓𑁄𑀢𑀺𑀆𑀤𑀻𑀲𑀼 𑀪𑀡𑁆𑀟𑀦𑀸𑀤𑀺𑀧𑀘𑁆𑀘𑀬𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀢𑀲𑁆𑀲𑀸 𑀅𑀤𑀲𑁆𑀲𑀦𑁂𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀢𑀺𑀓𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯.

𑁫𑁧. 𑀲𑀫𑁆𑀫𑀸𑀯𑀢𑁆𑀢𑀦𑀸𑀬𑀁 𑀧𑀦𑁂𑀢𑁆𑀣 𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺. 𑀢𑀢𑁆𑀣 𑀦 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄𑀢𑀺 𑀦 𑀘𑁄𑀤𑁂𑀢𑀩𑁆𑀩𑁄. 𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀻𑀢𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦 𑀪𑀺𑀦𑁆𑀤𑀺𑀢𑀩𑁆𑀩𑁄. 𑀦 𑀕𑀺𑀳𑀺𑀤𑁆𑀥𑀚𑁄𑀢𑀺 𑀑𑀤𑀸𑀢𑀯𑀢𑁆𑀣𑀸𑀦𑀺 𑀅𑀘𑁆𑀙𑀺𑀦𑁆𑀦𑀤𑀲𑀧𑀼𑀧𑁆𑀨𑀤𑀲𑀸𑀦𑀺 𑀘 𑀦 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑁄𑀢𑀺 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀦 𑀆𑀲𑀸𑀤𑁂𑀢𑀩𑁆𑀩𑁄𑀢𑀺 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄. 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸𑀢𑀺 𑀯𑀺𑀳𑀸𑀭𑀲𑁆𑀲 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸. 𑀦 𑀢𑀺𑀢𑁆𑀣𑀺𑀬𑀸𑀤𑀺𑀧𑀤𑀢𑁆𑀢𑀬𑀁 𑀉𑀢𑁆𑀢𑀸𑀦𑀫𑁂𑀯. 𑀲𑁂𑀲𑀁 𑀲𑀩𑁆𑀩𑀁 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑁂𑀲𑀁 𑀢𑀚𑁆𑀚𑀦𑀻𑀬𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀇𑀫𑀺𑀦𑀸 𑀲𑀤𑀺𑀲𑀫𑁂𑀯.

𑁬𑁫. 𑀅𑀭𑀺𑀝𑁆𑀞𑀯𑀢𑁆𑀣𑀼 𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁. ‘‘𑀪𑀡𑁆𑀟𑀦𑀓𑀸𑀭𑀓𑁄’’𑀢𑀺𑀆𑀤𑀻𑀲𑀼 𑀬𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀪𑀡𑁆𑀟𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀲𑁆𑀲𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑁂𑀲𑀁 𑀢𑀚𑁆𑀚𑀦𑀻𑀬𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀫𑁆𑀫𑀸𑀯𑀢𑁆𑀢𑀦𑀸𑀬𑀫𑁆𑀧𑀺 𑀳𑀺 𑀇𑀥 𑀢𑁂𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀯𑀢𑁆𑀢𑀸𑀦𑀻𑀢𑀺.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀁

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁭𑁫. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑁋 𑀧𑀸𑀭𑀺𑀯𑀸𑀲𑀺𑀓𑀸𑀢𑀺 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀸. 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑁄 𑀧𑀭𑀺𑀯𑀸𑀲𑁄 𑁋 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄, 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺. 𑀢𑁂𑀲𑀼 ‘‘𑀬𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁄𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁮𑁬) 𑀏𑀯𑀁 𑀫𑀳𑀸𑀔𑀦𑁆𑀥𑀓𑁂 𑀯𑀼𑀢𑁆𑀢𑁄 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀦𑀸𑀫. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑁄. 𑀲𑁂𑀲𑀸 𑀢𑀬𑁄 𑀬𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀆𑀧𑀦𑁆𑀦𑀸 𑀘𑁂𑀯 𑀳𑁄𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑀸 𑀘, 𑀢𑀲𑁆𑀲 𑀤𑀸𑀢𑀩𑁆𑀩𑀸. 𑀢𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀯𑀓𑁆𑀔𑀸𑀫. 𑀏𑀢𑁂 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀸 ‘‘𑀧𑀸𑀭𑀺𑀯𑀸𑀲𑀺𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀦𑀯𑀓𑀢𑀭𑀁 𑀧𑀸𑀭𑀺𑀯𑀸𑀲𑀺𑀓𑀁 𑀅𑀯𑀲𑁂𑀲𑀸𑀦𑀁 𑀅𑀦𑁆𑀢𑀫𑀲𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀻𑀦𑀫𑁆𑀧𑀺. 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀦𑁆𑀢𑀺 𑀬𑀁 𑀢𑁂 𑀅𑀪𑀺𑀯𑀸𑀤𑀦𑀸𑀤𑀺𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀸𑀤𑀺𑀬𑀦𑁆𑀢𑀺, 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺; 𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺 𑀞𑀧𑁂𑀢𑁆𑀯𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀅𑀜𑁆𑀜𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀲𑁆𑀲 𑀩𑀻𑀚𑀦𑀯𑀸𑀢𑀤𑀸𑀦𑀸𑀤𑀺𑀦𑁄 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀲𑀦𑀸𑀪𑀺𑀳𑀸𑀭𑀦𑁆𑀢𑀺 𑀆𑀲𑀦𑀲𑁆𑀲 𑀅𑀪𑀺𑀳𑀭𑀡𑀁, 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀅𑀪𑀺𑀕𑀫𑀦𑀁 𑀧𑀜𑁆𑀜𑀸𑀧𑀦𑀫𑁂𑀯 𑀯𑀸. 𑀲𑁂𑀬𑁆𑀬𑀸𑀪𑀺𑀳𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀤𑁄𑀤𑀓𑀦𑁆𑀢𑀺 𑀧𑀸𑀤𑀥𑁄𑀯𑀦𑀉𑀤𑀓𑀁. 𑀧𑀸𑀤𑀧𑀻𑀞𑀦𑁆𑀢𑀺 𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀁. 𑀧𑀸𑀤𑀓𑀣𑀮𑀺𑀓𑀦𑁆𑀢𑀺 𑀅𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀁 𑀧𑀸𑀤𑀖𑀁𑀲𑀦𑀁 𑀯𑀸. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀫𑁆𑀧𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯, 𑀢𑀲𑁆𑀫𑀸 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀳𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀫𑀺, 𑀫𑀬𑁆𑀳𑀁 𑀯𑀢𑁆𑀢𑀁 𑀫𑀸 𑀓𑀭𑁄𑀣, 𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀣𑀸’’𑀢𑀺. 𑀲𑀘𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀕𑀸𑀫𑀧𑁆𑀧𑀯𑁂𑀲𑀦𑀫𑁆𑀧𑀺 𑀆𑀧𑀼𑀘𑁆𑀙𑀦𑁆𑀢𑀺𑀬𑁂𑀯, 𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀸𑀧𑀢𑁆𑀢𑀺. 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀫𑀜𑁆𑀜𑀁 𑀬𑁄 𑀬𑁄 𑀯𑀼𑀟𑁆𑀠𑁄 𑀢𑁂𑀦 𑀢𑁂𑀦 𑀦𑀯𑀓𑀢𑀭𑀲𑁆𑀲 𑀲𑀸𑀤𑀺𑀢𑀼𑀁.

𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀧𑀓𑀢𑀢𑁆𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀏𑀯. 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀳𑀢𑁆𑀣𑀧𑀸𑀲𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀧𑀸𑀴𑀺𑀬𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀴𑀺𑀁 𑀯𑀺𑀳𑀸𑀬 𑀳𑀢𑁆𑀣𑀧𑀸𑀲𑀁 𑀅𑀫𑀼𑀜𑁆𑀘𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 𑀓𑀭𑀻𑀬𑀫𑀸𑀦𑁂 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀧𑀯𑀸𑀭𑀡𑀸𑀬𑀧𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑀻𑀬𑀫𑀸𑀦𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀑𑀡𑁄𑀚𑀦𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀘𑁆𑀘𑀢𑀺. 𑀲𑀘𑁂 𑀳𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀤𑁆𑀯𑁂 𑀢𑀻𑀡𑀺 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀅𑀜𑁆𑀜𑀸 𑀘𑀲𑁆𑀲 𑀧𑀼𑀕𑁆𑀕𑀮𑀺𑀓𑀪𑀢𑁆𑀢𑀧𑀘𑁆𑀘𑀸𑀲𑀸 𑀳𑁄𑀢𑀺, 𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀕𑀳𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀳𑁂𑀝𑁆𑀞𑀸 𑀕𑀸𑀳𑁂𑀣, 𑀅𑀚𑁆𑀚 𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀸 𑀅𑀢𑁆𑀣𑀺, 𑀲𑁆𑀯𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀢𑀸𑀦𑀺 𑀧𑀼𑀦𑀤𑀺𑀯𑀲𑁂𑀲𑀼 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑀧𑀞𑀫𑀁 𑀏𑀢𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀦 𑀕𑀡𑁆𑀳𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀼𑀦𑀤𑀺𑀯𑀲𑁂 𑀦 𑀮𑀪𑀢𑀺, 𑀇𑀤𑀁 𑀑𑀡𑁄𑀚𑀦𑀁 𑀦𑀸𑀫 𑀧𑀸𑀭𑀺𑀯𑀸𑀲𑀺𑀓𑀲𑁆𑀲𑁂𑀯 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀢𑁆𑀢𑀕𑁆𑀕𑁂 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀦 𑀯𑀸, 𑀢𑀲𑁆𑀫𑀸 𑀲𑁄 ‘‘𑀪𑀺𑀓𑁆𑀔𑀸𑀳𑀸𑀭𑁂𑀦 𑀫𑀸 𑀓𑀺𑀮𑀫𑀺𑀢𑁆𑀣𑀸’’𑀢𑀺 𑀇𑀤𑀫𑀲𑁆𑀲 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁.

𑀪𑀢𑁆𑀢𑀦𑁆𑀢𑀺 𑀆𑀕𑀢𑀸𑀕𑀢𑁂𑀳𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀁, 𑀏𑀢𑀁 𑀬𑀣𑀸𑀯𑀼𑀟𑁆𑀠𑀁 𑀮𑀪𑀢𑀺. 𑀧𑀸𑀴𑀺𑀬𑀸 𑀧𑀦 𑀕𑀦𑁆𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀦 𑀮𑀪𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀬𑀣𑀸 𑀲𑁂𑀦𑁄 𑀦𑀺𑀧𑀢𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀏𑀯𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀆𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀲𑀬𑀫𑁂𑀯 𑀆𑀳𑀭𑀦𑁆𑀢𑀺, 𑀯𑀝𑁆𑀝𑀢𑀺. 𑀭𑀜𑁆𑀜𑁄 𑀫𑀳𑀸𑀧𑁂𑀴𑀪𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑁂 𑀧𑀦 𑀲𑀘𑁂 𑀑𑀡𑁄𑀚𑀦𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀓𑁆𑀔𑀺𑀢𑁆𑀢𑁂 𑀧𑀺𑀡𑁆𑀟𑁂 ‘‘𑀅𑀚𑁆𑀚 𑀫𑁂 𑀪𑀢𑁆𑀢𑀁 𑀅𑀢𑁆𑀣𑀺, 𑀲𑁆𑀯𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀦𑀤𑀺𑀯𑀲𑁂 𑀤𑁆𑀯𑁂 𑀧𑀺𑀡𑁆𑀟𑁂 𑀮𑀪𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺𑀧𑀺 𑀧𑀸𑀴𑀺𑀢𑁄 𑀑𑀲𑀓𑁆𑀓𑀺𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀢𑁆𑀣 𑀧𑀦 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀺, 𑀢𑀢𑁆𑀣 𑀲𑀸𑀫𑀡𑁂𑀭𑀸𑀦𑀁 𑀚𑁂𑀝𑁆𑀞𑀓𑁂𑀦 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑀦𑀯𑀓𑁂𑀦 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁭𑁬. 𑀇𑀤𑀸𑀦𑀺 𑀬𑀸 𑀅𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑀯𑀼𑀢𑁆𑀢𑀸, 𑀢𑀢𑁆𑀣 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁; 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀘𑀭𑀺𑀬𑁂𑀦 𑀳𑀼𑀢𑁆𑀯𑀸𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀲𑀸𑀯𑁂𑀢𑀩𑁆𑀩𑀸, 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀺 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀸𑀯𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀦𑀺𑀲𑁆𑀲𑀬𑁄𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀦𑀺𑀲𑁆𑀲𑀬𑁄 𑀦 𑀤𑀸𑀢𑀩𑁆𑀩𑁄. 𑀬𑁂𑀳𑀺𑀧𑀺 𑀧𑀓𑀢𑀺𑀬𑀸𑀯 𑀦𑀺𑀲𑁆𑀲𑀬𑁄 𑀕𑀳𑀺𑀢𑁄, 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀳𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀫𑀺, 𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀦𑀸𑀫 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀡𑁆𑀳𑀣, 𑀫𑀬𑁆𑀳𑀁 𑀯𑀢𑁆𑀢𑀁 𑀫𑀸 𑀓𑀭𑁄𑀣, 𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀣𑀸’’𑀢𑀺. 𑀲𑀘𑁂 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀭𑁄𑀦𑁆𑀢𑀺𑀬𑁂𑀯, 𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀭𑁄𑀦𑁆𑀢𑁂𑀲𑀼𑀧𑀺 𑀅𑀦𑀸𑀧𑀢𑁆𑀢𑀺.

𑀦 𑀲𑀸𑀫𑀡𑁂𑀭𑁄𑀢𑀺 𑀅𑀜𑁆𑀜𑁄 𑀲𑀸𑀫𑀡𑁂𑀭𑁄 𑀦 𑀕𑀳𑁂𑀢𑀩𑁆𑀩𑁄. 𑀉𑀧𑀚𑁆𑀛𑀁 𑀤𑀢𑁆𑀯𑀸 𑀕𑀳𑀺𑀢𑀲𑀸𑀫𑀡𑁂𑀭𑀸𑀧𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀳𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀫𑀺, 𑀫𑀬𑁆𑀳𑀁 𑀯𑀢𑁆𑀢𑀁 𑀫𑀸 𑀓𑀭𑁄𑀣, 𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀣𑀸’’𑀢𑀺. 𑀲𑀘𑁂 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀭𑁄𑀦𑁆𑀢𑀺𑀬𑁂𑀯, 𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀭𑁄𑀦𑁆𑀢𑁂𑀲𑀼𑀧𑀺 𑀅𑀦𑀸𑀧𑀢𑁆𑀢𑀺. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀦𑀸𑀫 𑀆𑀥𑀺𑀧𑀘𑁆𑀘𑀝𑁆𑀞𑀸𑀦𑀪𑀽𑀢𑀸𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀢𑁆𑀢𑀩𑁆𑀩𑀁 𑁋 ‘‘𑀪𑀦𑁆𑀢𑁂, 𑀅𑀳𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀫𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀁 𑀚𑀸𑀦𑀸𑀣𑀸’’𑀢𑀺, 𑀧𑀝𑀺𑀩𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀪𑀸𑀭𑁄 𑀓𑀸𑀢𑀩𑁆𑀩𑁄. 𑀆𑀕𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀲𑀗𑁆𑀖𑀲𑀦𑁆𑀢𑀺𑀓𑀁 𑀕𑀘𑁆𑀙𑀣, 𑀲𑀗𑁆𑀖𑁄 𑀯𑁄 𑀑𑀯𑀸𑀤𑀤𑀸𑀬𑀓𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀅𑀳𑀁 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀫𑀺, 𑀅𑀲𑀼𑀓𑀪𑀺𑀓𑁆𑀔𑀼𑀲𑁆𑀲 𑀦𑀸𑀫 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣, 𑀲𑁄 𑀯𑁄 𑀑𑀯𑀸𑀤𑀁 𑀤𑀲𑁆𑀲𑀢𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀸.

𑀲𑀸 𑀆𑀧𑀢𑁆𑀢𑀻𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀭𑀺𑀯𑀸𑀲𑁂 𑀤𑀺𑀦𑁆𑀦𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀧𑀚𑁆𑀚𑀺𑀢𑀩𑁆𑀩𑀸. 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀕𑀭𑀼𑀓𑀸𑀧𑀢𑁆𑀢𑀺. 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺; 𑀲𑀢𑁆𑀢𑀲𑀼 𑀳𑀺 𑀆𑀧𑀢𑁆𑀢𑀻𑀲𑀼 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑀧𑀸𑀧𑀺𑀝𑁆𑀞𑀸; 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀧𑀸𑀧𑀺𑀝𑁆𑀞𑀢𑀭𑀸; 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀧𑀸𑀧𑀺𑀝𑁆𑀞𑀸, 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀏𑀯𑀁 𑀧𑀸𑀘𑀺𑀢𑁆𑀢𑀺𑀬𑀣𑀼𑀮𑁆𑀮𑀘𑁆𑀘𑀬𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄. 𑀢𑀸𑀲𑀁 𑀯𑀢𑁆𑀣𑀽𑀲𑀼𑀧𑀺 𑀤𑀼𑀩𑁆𑀪𑀸𑀲𑀺𑀢𑀯𑀢𑁆𑀣𑀼 𑀧𑀸𑀧𑀺𑀝𑁆𑀞𑀁, 𑀤𑀼𑀓𑁆𑀓𑀝𑀯𑀢𑁆𑀣𑀼 𑀧𑀸𑀧𑀺𑀝𑁆𑀞𑀢𑀭𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂 𑀧𑀦 𑀯𑀢𑁆𑀣𑀼𑀧𑀺 𑀆𑀧𑀢𑁆𑀢𑀺𑀧𑀺 𑀧𑀸𑀧𑀺𑀝𑁆𑀞𑀸. 𑀮𑁄𑀓𑀯𑀚𑁆𑀚𑁂 𑀉𑀪𑀬𑀫𑁆𑀧𑀺 𑀧𑀸𑀧𑀺𑀝𑁆𑀞𑀢𑀭𑀁.

𑀓𑀫𑁆𑀫𑀦𑁆𑀢𑀺 𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸 𑀯𑀼𑀘𑁆𑀘𑀢𑀺. 𑀢𑀁 𑀓𑀫𑁆𑀫𑀁 ‘‘𑀅𑀓𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀻𑀳𑀺 𑀯𑀸 ‘‘𑀓𑀺𑀁 𑀇𑀤𑀁 𑀓𑀫𑁆𑀫𑀁 𑀦𑀸𑀫 𑀓𑀲𑀺𑀓𑀫𑁆𑀫𑀁 𑀕𑁄𑀭𑀓𑁆𑀔𑀓𑀫𑁆𑀫’’𑀦𑁆𑀢𑀺𑀆𑀤𑀻𑀳𑀺 𑀯𑀸 𑀯𑀘𑀦𑁂𑀳𑀺 𑀦 𑀕𑀭𑀳𑀺𑀢𑀩𑁆𑀩𑀁. 𑀓𑀫𑁆𑀫𑀺𑀓𑀸𑀢𑀺 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀢𑀁, 𑀢𑁂 𑀯𑀼𑀘𑁆𑀘𑀦𑁆𑀢𑀺, 𑀢𑁂 ‘‘𑀩𑀸𑀮𑀸 𑀅𑀩𑁆𑀬𑀢𑁆𑀢𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀦𑁆𑀢𑀺 𑀧𑀮𑀺𑀩𑁄𑀥𑀢𑁆𑀣𑀸𑀬 𑀯𑀸 𑀧𑀓𑁆𑀓𑁄𑀲𑀦𑀢𑁆𑀣𑀸𑀬 𑀯𑀸 𑀲𑀯𑀘𑀦𑀻𑀬𑀁 𑀦 𑀓𑀸𑀢𑀩𑁆𑀩𑀁, 𑀧𑀮𑀺𑀩𑁄𑀥𑀢𑁆𑀣𑀸𑀬 𑀳𑀺 𑀓𑀭𑁄𑀦𑁆𑀢𑁄 ‘‘𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀯𑀘𑀦𑀻𑀬𑀁 𑀓𑀭𑁄𑀫𑀺, 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀏𑀓𑀧𑀤𑀫𑁆𑀧𑀺 𑀫𑀸 𑀧𑀓𑁆𑀓𑀸𑀫𑀺, 𑀬𑀸𑀯 𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀻’’𑀢𑀺 𑀏𑀯𑀁 𑀓𑀭𑁄𑀢𑀺. 𑀧𑀓𑁆𑀓𑁄𑀲𑀦𑀢𑁆𑀣𑀸𑀬 𑀓𑀭𑁄𑀦𑁆𑀢𑁄 ‘‘𑀅𑀳𑀁 𑀢𑁂 𑀲𑀯𑀘𑀦𑀻𑀬𑀁 𑀓𑀭𑁄𑀫𑀺, 𑀏𑀳𑀺 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀦𑀬𑀥𑀭𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀓𑀭𑁄𑀢𑀺; 𑀢𑀤𑀼𑀪𑀬𑀫𑁆𑀧𑀺 𑀦 𑀓𑀸𑀢𑀩𑁆𑀩𑀁.

𑀦 𑀅𑀦𑀼𑀯𑀸𑀤𑁄𑀢𑀺 𑀯𑀺𑀳𑀸𑀭𑁂 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩𑀁. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀸 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀯𑀸 𑀦 𑀪𑀯𑀺𑀢𑀩𑁆𑀩𑀁. 𑀦𑀸𑀧𑀺 𑀢𑁂𑀭𑀲𑀲𑀼 𑀲𑀫𑁆𑀫𑀼𑀢𑀻𑀲𑀼 𑀏𑀓𑀲𑀫𑁆𑀫𑀼𑀢𑀺𑀯𑀲𑁂𑀦𑀸𑀧𑀺 𑀇𑀲𑁆𑀲𑀭𑀺𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦 𑀑𑀓𑀸𑀲𑁄𑀢𑀺 ‘‘𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀧𑀓𑀢𑀢𑁆𑀢𑀲𑁆𑀲 𑀑𑀓𑀸𑀲𑁄 𑀦 𑀓𑀸𑀭𑁂𑀢𑀩𑁆𑀩𑁄, 𑀯𑀢𑁆𑀣𑀼𑀦𑀸 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀦 𑀘𑁄𑀤𑁂𑀢𑀩𑁆𑀩𑁄, ‘‘𑀅𑀬𑀁 𑀧𑀼𑀩𑁆𑀩𑁂 𑀢𑁂 𑀤𑁄𑀲𑁄’’𑀢𑀺 𑀦 𑀲𑀸𑀭𑁂𑀢𑀩𑁆𑀩𑁄. 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀬𑁄𑀚𑁂𑀢𑁆𑀯𑀸 𑀓𑀮𑀳𑁄 𑀦 𑀓𑀸𑀭𑁂𑀢𑀩𑁆𑀩𑁄.

𑀧𑀼𑀭𑀢𑁄𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦 𑀳𑀼𑀢𑁆𑀯𑀸 𑀧𑀼𑀭𑀢𑁄 𑀦 𑀕𑀦𑁆𑀢𑀩𑁆𑀩𑀁, 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀓𑁂𑀦 𑀕𑀦𑁆𑀢𑀩𑁆𑀩𑀁. 𑀦𑀺𑀲𑀻𑀤𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀲𑀦𑀧𑀭𑀺𑀬𑀦𑁆𑀢𑁄𑀢𑀺 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀲𑀗𑁆𑀖𑀦𑀯𑀓𑀸𑀲𑀦𑀁 𑀯𑀼𑀘𑁆𑀘𑀢𑀺; 𑀲𑁆𑀯𑀸𑀲𑁆𑀲 𑀤𑀸𑀢𑀩𑁆𑀩𑁄, 𑀢𑀢𑁆𑀣 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄𑀢𑀺 𑀲𑁂𑀬𑁆𑀬𑀸𑀦𑀁 𑀧𑀭𑀺𑀬𑀦𑁆𑀢𑁄, 𑀲𑀩𑁆𑀩𑀮𑀸𑀫𑀓𑀁 𑀫𑀜𑁆𑀘𑀧𑀻𑀞𑀁. 𑀅𑀬𑀜𑁆𑀳𑀺 𑀯𑀲𑁆𑀲𑀕𑁆𑀕𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀲𑁂𑀬𑁆𑀬𑀁 𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀲𑀩𑁆𑀩𑀪𑀺𑀓𑁆𑀔𑀽𑀳𑀺 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀸𑀯𑀲𑁂𑀲𑀸 𑀫𑀗𑁆𑀓𑀼𑀮𑀕𑀽𑀣𑀪𑀭𑀺𑀢𑀸 𑀯𑁂𑀢𑁆𑀢𑀮𑀢𑀸𑀤𑀺𑀯𑀺𑀦𑀤𑁆𑀥𑀸 𑀮𑀸𑀫𑀓𑀲𑁂𑀬𑁆𑀬𑀸 𑀅𑀲𑁆𑀲 𑀤𑀸𑀢𑀩𑁆𑀩𑀸. 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄𑀢𑀺 𑀬𑀣𑀸 𑀘 𑀲𑁂𑀬𑁆𑀬𑀸, 𑀏𑀯𑀁 𑀯𑀲𑀦𑀆𑀯𑀸𑀲𑁄𑀧𑀺 𑀯𑀲𑁆𑀲𑀕𑁆𑀕𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀲𑀩𑁆𑀩𑀪𑀺𑀓𑁆𑀔𑀽𑀳𑀺 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀸𑀯𑀲𑁂𑀲𑀸 𑀧𑀦 𑀭𑀚𑁄𑀳𑀢𑀪𑀽𑀫𑀺 𑀚𑀢𑀼𑀓𑀫𑀽𑀲𑀺𑀓𑀪𑀭𑀺𑀢𑀸 𑀧𑀡𑁆𑀡𑀲𑀸𑀮𑀸 𑀅𑀲𑁆𑀲 𑀤𑀸𑀢𑀩𑁆𑀩𑀸. 𑀲𑀘𑁂 𑀧𑀓𑀢𑀢𑁆𑀢𑀸 𑀲𑀩𑁆𑀩𑁂 𑀭𑀼𑀓𑁆𑀔𑀫𑀽𑀮𑀺𑀓𑀸 𑀅𑀩𑁆𑀪𑁄𑀓𑀸𑀲𑀺𑀓𑀸 𑀘 𑀳𑁄𑀦𑁆𑀢𑀺, 𑀙𑀦𑁆𑀦𑀁 𑀦 𑀉𑀧𑁂𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀏𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸𑀯𑀸𑀲𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀮𑀪𑀢𑀺. 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀘𑁆𑀘𑀬𑀁 𑀏𑀓𑀧𑀲𑁆𑀲𑁂 𑀞𑀢𑁆𑀯𑀸 𑀯𑀲𑁆𑀲𑀕𑁆𑀕𑁂𑀦 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀲𑁂𑀦𑀸𑀲𑀦𑀁 𑀦 𑀮𑀪𑀢𑀺, 𑀦𑀺𑀩𑀤𑁆𑀥𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑁂𑀦𑀸𑀲𑀦𑀁 𑀕𑀡𑁆𑀳𑀺𑀢𑀼𑀓𑀸𑀫𑁂𑀦 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄𑀢𑀺 𑀬𑀁 𑀅𑀲𑁆𑀲 𑀆𑀲𑀦𑀸𑀤𑀺𑀧𑀭𑀺𑀬𑀦𑁆𑀢𑀁 𑀪𑀺𑀓𑁆𑀔𑀽 𑀤𑁂𑀦𑁆𑀢𑀺, 𑀲𑁄 𑀏𑀯 𑀲𑀸𑀤𑀺𑀢𑀩𑁆𑀩𑁄. 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸𑀢𑀺 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂 ‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀦𑀺𑀫𑀦𑁆𑀢𑀺𑀢𑁂𑀦 ‘‘𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀲𑀺, 𑀏𑀣 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀲𑀁𑀯𑀺𑀥𑀸𑀬 𑀪𑀺𑀓𑁆𑀔𑀽 𑀧𑀼𑀭𑁂𑀲𑀫𑀡𑁂 𑀯𑀸 𑀧𑀘𑁆𑀙𑀸𑀲𑀫𑀡𑁂 𑀯𑀸 𑀓𑀢𑁆𑀯𑀸 𑀦 𑀕𑀦𑁆𑀢𑀩𑁆𑀩𑀁. ‘‘𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀁 𑀇𑀘𑁆𑀙𑀦𑁆𑀢𑀺, 𑀲𑀸𑀥𑀼 𑀯𑀢𑀲𑁆𑀲 𑀲𑀘𑁂 𑀢𑁂𑀲𑀁 𑀲𑀗𑁆𑀕𑀳𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀧𑀦 𑀧𑀭𑀺𑀬𑀸𑀬𑁂𑀦 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀦 𑀆𑀭𑀜𑁆𑀜𑀺𑀓𑀗𑁆𑀕𑀦𑁆𑀢𑀺 𑀆𑀕𑀢𑀸𑀕𑀢𑀸𑀦𑀁 𑀆𑀭𑁄𑀘𑁂𑀢𑀼𑀁 𑀳𑀭𑀸𑀬𑀫𑀸𑀦𑁂𑀦 𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑀁 𑀦 𑀲𑀫𑀸𑀤𑀸𑀢𑀩𑁆𑀩𑀁. 𑀬𑁂𑀦𑀸𑀧𑀺 𑀧𑀓𑀢𑀺𑀬𑀸 𑀲𑀫𑀸𑀤𑀺𑀦𑁆𑀦𑀁, 𑀢𑁂𑀦 𑀤𑀼𑀢𑀺𑀬𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁, 𑀦 𑀘 𑀏𑀓𑀓𑁂𑀦 𑀯𑀢𑁆𑀣𑀩𑁆𑀩𑀁. 𑀢𑀣𑀸 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀚𑁆𑀚𑀸𑀬 𑀳𑀭𑀸𑀬𑀫𑀸𑀦𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀫𑁆𑀧𑀺 𑀦 𑀲𑀫𑀸𑀤𑀸𑀢𑀩𑁆𑀩𑀁. 𑀬𑁄 𑀧𑀦 𑀧𑀓𑀢𑀺𑀬𑀸𑀯 𑀧𑀺𑀡𑁆𑀟𑀧𑀸𑀢𑀺𑀓𑁄 𑀢𑀲𑁆𑀲 𑀧𑀝𑀺𑀲𑁂𑀥𑁄 𑀦𑀢𑁆𑀣𑀺.

𑀦 𑀘 𑀢𑀧𑁆𑀧𑀘𑁆𑀘𑀬𑀸𑀢𑀺 ‘‘𑀦𑀻𑀳𑀝𑀪𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀭𑀢𑁆𑀢𑀺𑀬𑁄 𑀕𑀡𑀬𑀺𑀲𑁆𑀲𑀸𑀫𑀺, 𑀕𑀘𑁆𑀙𑀢𑁄 𑀫𑁂 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀲𑀺𑀬𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀺𑀡𑁆𑀟𑀧𑀸𑀢𑁄 𑀦 𑀦𑀻𑀳𑀭𑀸𑀧𑁂𑀢𑀩𑁆𑀩𑁄. 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺 ‘‘𑀫𑀸 𑀫𑀁 𑀏𑀓𑀪𑀺𑀓𑁆𑀔𑀼𑀧𑀺 𑀚𑀸𑀦𑀸𑀢𑀽’’𑀢𑀺 𑀘 𑀇𑀫𑀺𑀦𑀸 𑀅𑀚𑁆𑀛𑀸𑀲𑀬𑁂𑀦 𑀯𑀺𑀳𑀸𑀭𑁂 𑀲𑀸𑀫𑀡𑁂𑀭𑁂𑀳𑀺 𑀧𑀘𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺. 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀩𑁆𑀩𑀫𑁂𑀯. 𑀕𑀺𑀮𑀸𑀦𑀲𑁆𑀲 𑀧𑀦 𑀦𑀯𑀓𑀫𑁆𑀫𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀓𑀺𑀘𑁆𑀘𑀸𑀤𑀺𑀧𑀲𑀼𑀢𑀲𑁆𑀲 𑀯𑀸 𑀯𑀺𑀳𑀸𑀭𑁂𑀬𑁂𑀯 𑀅𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀕𑀸𑀫𑁂 𑀅𑀦𑁂𑀓𑀲𑀢𑀸 𑀪𑀺𑀓𑁆𑀔𑀽 𑀯𑀺𑀘𑀭𑀦𑁆𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀆𑀭𑁄𑀘𑁂𑀢𑀼𑀁, 𑀕𑀸𑀫𑀓𑀸𑀯𑀸𑀲𑀁 𑀕𑀦𑁆𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀆𑀕𑀦𑁆𑀢𑀼𑀓𑁂𑀦𑀸𑀢𑀺 𑀓𑀜𑁆𑀘𑀺 𑀯𑀺𑀳𑀸𑀭𑀁 𑀕𑀢𑁂𑀦 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀲𑀩𑁆𑀩𑁂 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂 𑀧𑀲𑁆𑀲𑀢𑀺, 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀦𑁂𑀯 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀣 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀜𑁆𑀘𑀺𑀘𑁆𑀘 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀳𑁄𑀢𑀺, 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁. 𑀅𑀣 𑀯𑀺𑀘𑀺𑀦𑀦𑁆𑀢𑁄 𑀏𑀓𑀘𑁆𑀘𑁂 𑀦 𑀧𑀲𑁆𑀲𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁.

𑀆𑀕𑀦𑁆𑀢𑀼𑀓𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀯𑀺𑀳𑀸𑀭𑀁 𑀆𑀕𑀢𑀲𑁆𑀲𑀸𑀧𑀺 𑀏𑀓𑀲𑁆𑀲 𑀯𑀸 𑀩𑀳𑀽𑀦𑀁 𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑁄𑀘𑁂𑀢𑀩𑁆𑀩𑀁. 𑀭𑀢𑁆𑀢𑀺𑀘𑁆𑀙𑁂𑀤𑀯𑀢𑁆𑀢𑀪𑁂𑀤𑀸𑀧𑀺 𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀯𑀸 𑀅𑀯𑀺𑀲𑁆𑀲𑀫𑀺𑀢𑁆𑀯𑀸 𑀏𑀯 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀦𑁆𑀢𑀺, 𑀅𑀬𑀜𑁆𑀘 𑀧𑀦 𑀕𑀢𑀓𑀸𑀮𑁂 𑀚𑀸𑀦𑀸𑀢𑀺, 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀬𑁂𑀧𑀺 𑀅𑀦𑁆𑀢𑁄𑀯𑀺𑀳𑀸𑀭𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀬𑀜𑁆𑀘 𑀦𑁂𑀲𑀁 𑀙𑀢𑁆𑀢𑀲𑀤𑁆𑀤𑀁 𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁 𑀯𑀸 𑀔𑀺𑀧𑀺𑀢𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸𑀯 𑀆𑀕𑀦𑁆𑀢𑀼𑀓𑀪𑀸𑀯𑀁 𑀚𑀸𑀦𑀸𑀢𑀺, 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀕𑀢𑀓𑀸𑀮𑁂 𑀚𑀸𑀦𑀦𑁆𑀢𑁂𑀦𑀧𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀫𑁂𑀯. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀬𑁄𑀧𑀺 𑀭𑀢𑁆𑀢𑀺𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁𑀬𑁂𑀯 𑀕𑀘𑁆𑀙𑀢𑀺, 𑀲𑁄𑀧𑀺𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀁 𑀓𑀭𑁄𑀢𑀺, 𑀅𑀜𑁆𑀜𑀸𑀢𑀢𑁆𑀢𑀸 𑀧𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁 𑀦𑀢𑁆𑀣𑀺. 𑀲𑀘𑁂 𑀅𑀚𑀸𑀦𑀺𑀢𑁆𑀯𑀸𑀯 𑀅𑀩𑁆𑀪𑀸𑀦𑀁 𑀓𑀭𑁄𑀢𑀺, 𑀅𑀓𑀢𑀫𑁂𑀯 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀥𑀺𑀓𑀸 𑀭𑀢𑁆𑀢𑀺𑀬𑁄 𑀕𑀳𑁂𑀢𑁆𑀯𑀸 𑀓𑀸𑀢𑀩𑁆𑀩𑀁, 𑀅𑀬𑀁 𑀅𑀧𑀡𑁆𑀡𑀓𑀧𑀝𑀺𑀧𑀤𑀸.

𑀦𑀤𑀻𑀆𑀤𑀻𑀲𑀼 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀭𑀢𑀻𑀭𑁂 𑀞𑀺𑀢𑀫𑁆𑀧𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀩𑁆𑀩𑀢𑀢𑀮𑀅𑀭𑀜𑁆𑀜𑀸𑀤𑀻𑀲𑀼 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀲𑀘𑁂 ‘‘𑀪𑀺𑀓𑁆𑀔𑀽’’𑀢𑀺 𑀯𑀯𑀢𑁆𑀣𑀸𑀦𑀁 𑀅𑀢𑁆𑀣𑀺, 𑀦𑀸𑀯𑀸𑀤𑀻𑀳𑀺 𑀯𑀸 𑀕𑀦𑁆𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀯𑀸 𑀆𑀭𑁄𑀘𑁂𑀢𑀩𑁆𑀩𑀁, 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀲𑀘𑁂 𑀯𑀸𑀬𑀫𑀦𑁆𑀢𑁄𑀧𑀺 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀯𑀸 𑀲𑀸𑀯𑁂𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀲𑀗𑁆𑀖𑀲𑁂𑀦𑀸𑀪𑀬𑀢𑁆𑀣𑁂𑀭𑁄 𑀧𑀦 𑀯𑀺𑀲𑀬𑀸𑀯𑀺𑀲𑀬𑁂𑀦 𑀓𑀣𑁂𑀢𑀺 𑁋 ‘‘𑀯𑀺𑀲𑀬𑁂 𑀓𑀺𑀭 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺, 𑀅𑀯𑀺𑀲𑀬𑁂 𑀧𑀦 𑀉𑀪𑀬𑀫𑁆𑀧𑀺 𑀦𑀢𑁆𑀣𑀻’’𑀢𑀺. 𑀓𑀭𑀯𑀻𑀓𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀲𑀫𑀡𑁄 𑀅𑀬𑀦𑁆𑀢𑀺 𑀯𑀯𑀢𑁆𑀣𑀸𑀦𑀫𑁂𑀯 𑀧𑀫𑀸𑀡𑀁, 𑀲𑀘𑁂𑀧𑀺 𑀅𑀯𑀺𑀲𑀬𑁄 𑀳𑁄𑀢𑀺, 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀫𑁂𑀯 𑀦𑀢𑁆𑀣𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺𑀬𑁂𑀯𑀸’’𑀢𑀺 𑀆𑀳.

𑀉𑀧𑁄𑀲𑀣𑁂𑀢𑀺 ‘‘𑀉𑀧𑁄𑀲𑀣𑀁 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀇𑀤𑁆𑀥𑀺𑀬𑀸 𑀕𑀘𑁆𑀙𑀦𑁆𑀢𑀸𑀧𑀺 𑀉𑀧𑁄𑀲𑀣𑀪𑀸𑀯𑀁 𑀜𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀕𑀦𑁆𑀢𑀼𑀓𑀲𑁄𑀥𑀦𑀢𑁆𑀣𑀁 𑀉𑀧𑁄𑀲𑀣𑀤𑀺𑀯𑀲𑁂 𑀆𑀭𑁄𑀘𑁂𑀢𑀩𑁆𑀩𑀁. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀕𑀺𑀮𑀸𑀦𑁄𑀢𑀺 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑁄. 𑀤𑀽𑀢𑁂𑀦𑀸𑀢𑀺 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑀸𑀧𑁂𑀢𑀩𑁆𑀩𑀁.

𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄𑀢𑀺 𑀲𑀼𑀜𑁆𑀜𑀯𑀺𑀳𑀸𑀭𑁄; 𑀬𑀢𑁆𑀣 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀦𑀢𑁆𑀣𑀺, 𑀢𑀢𑁆𑀣 𑀯𑀸𑀲𑀢𑁆𑀣𑀸𑀬 𑀦 𑀕𑀦𑁆𑀢𑀩𑁆𑀩𑀁. 𑀦 𑀳𑀺 𑀢𑀢𑁆𑀣 𑀯𑀼𑀢𑁆𑀣𑀭𑀢𑁆𑀢𑀺𑀬𑁄 𑀕𑀡𑀦𑀽𑀧𑀺𑀓𑀸 𑀳𑁄𑀦𑁆𑀢𑀺, 𑀧𑀓𑀢𑀢𑁆𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀯𑀝𑁆𑀝𑀢𑀺. 𑀤𑀲𑀯𑀺𑀥𑀦𑁆𑀢𑀭𑀸𑀬𑁂 𑀧𑀦 𑀲𑀘𑁂𑀧𑀺 𑀭𑀢𑁆𑀢𑀺𑀬𑁄 𑀕𑀡𑀦𑀽𑀧𑀺𑀓𑀸 𑀦 𑀳𑁄𑀦𑁆𑀢𑀺, 𑀅𑀦𑁆𑀢𑀭𑀸𑀬𑀢𑁄 𑀧𑀭𑀺𑀫𑀼𑀘𑁆𑀘𑀦𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸’’𑀢𑀺. 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀲𑀁 𑀅𑀦𑀸𑀭𑁄𑀘𑀦𑁂𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸’’𑀢𑀺. 𑀲𑁂𑀲𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁮𑁧. 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂𑀢𑀺𑀆𑀤𑀻𑀲𑀼 𑀆𑀯𑀸𑀲𑁄 𑀦𑀸𑀫 𑀯𑀲𑀦𑀢𑁆𑀣𑀸𑀬 𑀓𑀢𑀲𑁂𑀦𑀸𑀲𑀦𑀁. 𑀅𑀦𑀸𑀯𑀸𑀲𑁄 𑀦𑀸𑀫 𑀘𑁂𑀢𑀺𑀬𑀖𑀭𑀁 𑀩𑁄𑀥𑀺𑀖𑀭𑀁 𑀲𑀫𑁆𑀫𑀼𑀜𑁆𑀚𑀦𑀺𑀅𑀝𑁆𑀝𑀓𑁄 𑀤𑀸𑀭𑀼𑀅𑀝𑁆𑀝𑀓𑁄 𑀧𑀸𑀦𑀻𑀬𑀫𑀸𑀴𑁄 𑀯𑀘𑁆𑀘𑀓𑀼𑀝𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁄𑀢𑀺 𑀏𑀯𑀫𑀸𑀤𑀺. 𑀢𑀢𑀺𑀬𑀧𑀤𑁂𑀦 𑀢𑀤𑀼𑀪𑀬𑀫𑁆𑀧𑀺 𑀕𑀳𑀺𑀢𑀁. 𑀏𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑀘𑁆𑀙𑀦𑁆𑀦𑁂 𑀙𑀤𑀦𑀢𑁄 𑀉𑀤𑀓𑀧𑀢𑀦𑀝𑁆𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀦𑁂 𑀑𑀓𑀸𑀲𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀲𑀺𑀢𑀼𑀁 𑀦 𑀮𑀪𑀢𑀺. ‘‘𑀧𑀸𑀭𑀺𑀯𑀸𑀲𑀺𑀓𑁄 𑀧𑀦 𑀅𑀦𑁆𑀢𑁄𑀆𑀯𑀸𑀲𑁂𑀬𑁂𑀯 𑀦 𑀮𑀪𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀯𑀺𑀲𑁂𑀲𑁂𑀦 𑀉𑀤𑀓𑀧𑀸𑀢𑁂𑀦 𑀯𑀸𑀭𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀏𑀢𑁂𑀲𑀼 𑀏𑀢𑁆𑀢𑀓𑁂𑀲𑀼 𑀧𑀜𑁆𑀘𑀯𑀡𑁆𑀡𑀘𑁆𑀙𑀤𑀦𑀩𑀤𑁆𑀥𑀝𑁆𑀞𑀸𑀦𑁂𑀲𑀼 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀘 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀘 𑀧𑀓𑀢𑀢𑁆𑀢𑁂𑀦 𑀲𑀤𑁆𑀥𑀺𑀁 𑀉𑀤𑀓𑀧𑀸𑀢𑁂𑀦 𑀯𑀸𑀭𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀦𑀸𑀦𑀽𑀧𑀘𑀸𑀭𑁂𑀧𑀺 𑀏𑀓𑀘𑁆𑀙𑀦𑁆𑀦𑁂 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀧𑀓𑀢𑀢𑁆𑀢𑁂 𑀧𑀞𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀲𑀝𑁆𑀞𑀺𑀯𑀲𑁆𑀲𑁄𑀧𑀺 𑀧𑀸𑀭𑀺𑀯𑀸𑀲𑀺𑀓𑁄 𑀧𑀘𑁆𑀙𑀸 𑀧𑀯𑀺𑀲𑀺𑀢𑁆𑀯𑀸 𑀚𑀸𑀦𑀦𑁆𑀢𑁄 𑀦𑀺𑀧𑀚𑁆𑀚𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀅𑀚𑀸𑀦𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀧𑀞𑀫𑀁 𑀦𑀺𑀧𑀦𑁆𑀦𑁂 𑀧𑀘𑁆𑀙𑀸 𑀧𑀓𑀢𑀢𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀧𑀸𑀭𑀺𑀯𑀸𑀲𑀺𑀓𑁄 𑀘 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀦𑁄 𑀘𑁂 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁.

𑀯𑀼𑀝𑁆𑀞𑀸𑀢𑀩𑁆𑀩𑀁 𑀦𑀺𑀫𑀦𑁆𑀢𑁂𑀢𑀩𑁆𑀩𑁄𑀢𑀺 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑀫𑁆𑀧𑀺 𑀤𑀺𑀲𑁆𑀯𑀸 𑀯𑀼𑀝𑁆𑀞𑀸𑀢𑀩𑁆𑀩𑀫𑁂𑀯; 𑀯𑀼𑀝𑁆𑀞𑀸𑀬 𑀘 ‘‘𑀅𑀳𑀁 𑀇𑀫𑀺𑀦𑀸 𑀲𑀼𑀔𑀦𑀺𑀲𑀺𑀦𑁆𑀦𑁄 𑀯𑀼𑀝𑁆𑀞𑀸𑀧𑀺𑀢𑁄’’𑀢𑀺 𑀧𑀭𑀫𑁆𑀫𑀼𑀔𑁂𑀦 𑀦 𑀕𑀦𑁆𑀢𑀩𑁆𑀩𑀁, ‘‘𑀇𑀤𑀁 𑀆𑀘𑀭𑀺𑀬-𑀆𑀲𑀦𑀁, 𑀏𑀢𑁆𑀣 𑀦𑀺𑀲𑀻𑀤𑀣𑀸’’𑀢𑀺 𑀏𑀯𑀁 𑀦𑀺𑀫𑀦𑁆𑀢𑁂𑀢𑀩𑁆𑀩𑁄𑀬𑁂𑀯. 𑀦𑀯𑀓𑁂𑀦 𑀧𑀦 ‘‘𑀫𑀳𑀸𑀣𑁂𑀭𑀁 𑀑𑀩𑀤𑁆𑀥𑀁 𑀓𑀭𑁄𑀫𑀻’’𑀢𑀺 𑀧𑀸𑀭𑀺𑀯𑀸𑀲𑀺𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀦𑁆𑀢𑀩𑁆𑀩𑀁. 𑀏𑀓𑀸𑀲𑀦𑁂𑀢𑀺 𑀲𑀫𑀸𑀦𑀯𑀲𑁆𑀲𑀺𑀓𑀸𑀲𑀦𑁂 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸. 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂𑀢𑀺 𑀧𑀓𑀢𑀢𑁆𑀢𑁂 𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁂 𑀇𑀢𑀭𑁂𑀦 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑁂𑀧𑀺 𑀉𑀘𑁆𑀘𑀢𑀭𑁂 𑀯𑀸𑀮𑀺𑀓𑀸𑀢𑀮𑁂𑀧𑀺 𑀯𑀸 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀤𑁆𑀯𑀸𑀤𑀲𑀳𑀢𑁆𑀣𑀁 𑀧𑀦 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀘𑀗𑁆𑀓𑀫𑁂𑀢𑀺 𑀲𑀳𑀸𑀬𑁂𑀦 𑀯𑀺𑀬 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑁆𑀢𑁄 𑀏𑀓𑀲𑁆𑀫𑀺𑀁 𑀘𑀗𑁆𑀓𑀫𑁂.

𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑀦𑁆𑀢𑀺 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀓𑀢𑀧𑀭𑀺𑀘𑁆𑀙𑁂𑀤𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀦𑁆𑀢𑁂 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸𑀮𑀺𑀓𑀁 𑀆𑀓𑀺𑀭𑀺𑀢𑁆𑀯𑀸 𑀆𑀮𑀫𑁆𑀩𑀦𑀁 𑀬𑁄𑀚𑁂𑀢𑁆𑀯𑀸 𑀓𑀢𑀘𑀗𑁆𑀓𑀫𑁂 𑀦𑀻𑀘𑁂𑀧𑀺 𑀦 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀓𑁄 𑀧𑀦 𑀯𑀸𑀤𑁄 𑀇𑀝𑁆𑀞𑀓𑀸𑀘𑀬𑀲𑀫𑁆𑀧𑀦𑁆𑀦𑁂 𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁂𑀢𑀺! 𑀲𑀘𑁂 𑀧𑀦 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀬𑀼𑀢𑁆𑀢𑁄 𑀧𑀩𑁆𑀩𑀢𑀦𑁆𑀢𑀭𑀯𑀦𑀦𑁆𑀢𑀭𑀕𑀼𑀫𑁆𑀩𑀦𑁆𑀢𑀭𑁂𑀲𑀼 𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀢𑀸𑀤𑀺𑀲𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀝𑁆𑀝𑀢𑀺.

𑀯𑀼𑀟𑁆𑀠𑀢𑀭𑁂𑀦𑀸𑀢𑀺 𑀏𑀢𑁆𑀣 𑀲𑀘𑁂 𑀯𑀼𑀟𑁆𑀠𑀢𑀭𑁂 𑀧𑀸𑀭𑀺𑀯𑀸𑀲𑀺𑀓𑁂 𑀧𑀞𑀫𑀁 𑀦𑀺𑀧𑀦𑁆𑀦𑁂 𑀇𑀢𑀭𑁄 𑀚𑀸𑀦𑀦𑁆𑀢𑁄 𑀧𑀘𑁆𑀙𑀸 𑀦𑀺𑀧𑀚𑁆𑀚𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑀲𑁆𑀲 𑀳𑁄𑀢𑀺 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁. 𑀯𑀼𑀟𑁆𑀠𑀢𑀭𑀲𑁆𑀲 𑀧𑀦 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀅𑀚𑀸𑀦𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀢𑁆𑀢𑀪𑁂𑀤𑁄 𑀦𑀢𑁆𑀣𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺. 𑀅𑀣 𑀦𑀯𑀓𑀧𑀸𑀭𑀺𑀯𑀸𑀲𑀺𑀓𑁂 𑀧𑀞𑀫𑀁 𑀦𑀺𑀧𑀦𑁆𑀦𑁂 𑀯𑀼𑀟𑁆𑀠𑀢𑀭𑁄 𑀧𑀘𑁆𑀙𑀸 𑀦𑀺𑀧𑀚𑁆𑀚𑀢𑀺, 𑀦𑀯𑀓𑁄 𑀘 𑀚𑀸𑀦𑀸𑀢𑀺, 𑀭𑀢𑁆𑀢𑀺 𑀘𑀲𑁆𑀲 𑀙𑀺𑀚𑁆𑀚𑀢𑀺, 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀯𑀼𑀟𑁆𑀠𑀢𑀭𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀦 𑀯𑀢𑁆𑀢𑀪𑁂𑀤𑁄. 𑀦𑁄 𑀘𑁂 𑀚𑀸𑀦𑀸𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀢𑁆𑀢𑀪𑁂𑀤𑁄 𑀦𑀢𑁆𑀣𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀅𑀧𑀘𑁆𑀙𑀸𑀧𑀼𑀭𑀺𑀫𑀁 𑀦𑀺𑀧𑀚𑁆𑀚𑀦𑁆𑀢𑀺, 𑀯𑀼𑀟𑁆𑀠𑀢𑀭𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀇𑀢𑀭𑀲𑁆𑀲 𑀯𑀢𑁆𑀢𑀪𑁂𑀤𑁄𑀧𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀸𑀭𑀺𑀯𑀸𑀲𑀺𑀓𑀸 𑀲𑀫𑀯𑀲𑁆𑀲𑀸, 𑀏𑀓𑁄 𑀧𑀞𑀫𑀁 𑀦𑀺𑀧𑀦𑁆𑀦𑁄, 𑀏𑀓𑁄 𑀚𑀸𑀦𑀦𑁆𑀢𑁄𑀯 𑀧𑀘𑁆𑀙𑀸 𑀦𑀺𑀧𑀚𑁆𑀚𑀢𑀺, 𑀭𑀢𑁆𑀢𑀺 𑀘 𑀙𑀺𑀚𑁆𑀚𑀢𑀺, 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁. 𑀧𑀞𑀫𑀁 𑀦𑀺𑀧𑀦𑁆𑀦𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀦 𑀯𑀢𑁆𑀢𑀪𑁂𑀤𑁄. 𑀲𑀘𑁂 𑀧𑀘𑁆𑀙𑀸 𑀦𑀺𑀧𑀚𑁆𑀚𑀦𑁆𑀢𑁄𑀧𑀺 𑀦 𑀚𑀸𑀦𑀸𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀢𑁆𑀢𑀪𑁂𑀤𑁄 𑀦𑀢𑁆𑀣𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀅𑀧𑀘𑁆𑀙𑀸𑀧𑀼𑀭𑀺𑀫𑀁 𑀦𑀺𑀧𑀚𑁆𑀚𑀦𑁆𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄𑀬𑁂𑀯, 𑀦 𑀯𑀢𑁆𑀢𑀪𑁂𑀤𑁄. 𑀲𑀘𑁂 𑀳𑀺 𑀤𑁆𑀯𑁂 𑀧𑀸𑀭𑀺𑀯𑀸𑀲𑀺𑀓𑀸 𑀏𑀓𑀢𑁄 𑀯𑀲𑁂𑀬𑁆𑀬𑀼𑀁, 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀚𑁆𑀛𑀸𑀘𑀸𑀭𑀁 𑀜𑀢𑁆𑀯𑀸 𑀅𑀕𑀸𑀭𑀯𑀸 𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀯𑀸 𑀳𑀼𑀢𑁆𑀯𑀸 𑀧𑀸𑀧𑀺𑀝𑁆𑀞𑀢𑀭𑀁 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀼𑀁 𑀯𑀺𑀩𑁆𑀪𑀫𑁂𑀬𑁆𑀬𑀼𑀁 𑀯𑀸, 𑀢𑀲𑁆𑀫𑀸 𑀦𑁂𑀲𑀁 𑀲𑀳𑀲𑁂𑀬𑁆𑀬𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀬𑁄 𑀘𑁂𑀢𑁆𑀣 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀦𑁆𑀢𑀺 𑀏𑀢𑁆𑀣 𑀧𑀸𑀭𑀺𑀯𑀸𑀲𑀺𑀓𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀦𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀢𑁂𑀲𑁆𑀯𑁂𑀯𑀸𑀬𑀁 𑀕𑀡𑀧𑀽𑀭𑀓𑁄 𑀦 𑀳𑁄𑀢𑀺, 𑀲𑁂𑀲𑀲𑀗𑁆𑀖𑀓𑀫𑁆𑀫𑁂𑀲𑀼 𑀳𑁄𑀢𑀺. 𑀕𑀡𑁂 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀡𑀧𑀽𑀭𑀓𑁄 𑀓𑀸𑀢𑀩𑁆𑀩𑁄𑀢𑀺.

𑁮𑁩. 𑀇𑀫𑀁 𑀧𑀦 𑀯𑀢𑁆𑀢𑀓𑀣𑀁 𑀲𑀼𑀢𑁆𑀯𑀸 𑀯𑀺𑀦𑀬𑀥𑀭𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀭𑀳𑁄𑀕𑀢𑀲𑁆𑀲 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀪𑀕𑀯𑀢𑀸 𑀩𑀳𑀼 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀁 𑀧𑀜𑁆𑀜𑀢𑁆𑀢𑀁, 𑀓𑀢𑀺𑀳𑀺 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡𑁂𑀳𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀻’’𑀢𑀺! 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀘𑀲𑁆𑀲 𑀩𑁆𑀬𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺…𑀧𑁂… 𑀭𑀢𑁆𑀢𑀺𑀘𑁆𑀙𑁂𑀤𑀸’’𑀢𑀺. 𑀢𑀢𑁆𑀣 𑀲𑀳𑀯𑀸𑀲𑁄𑀢𑀺 𑀬𑁆𑀯𑀸𑀬𑀁 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀏𑀓𑀢𑁄 𑀯𑀸𑀲𑁄. 𑀯𑀺𑀧𑁆𑀧𑀯𑀸𑀲𑁄𑀢𑀺 𑀏𑀓𑀓𑀲𑁆𑀲𑁂𑀯 𑀯𑀸𑀲𑁄. 𑀅𑀦𑀸𑀭𑁄𑀘𑀦𑀸𑀢𑀺 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀅𑀦𑀸𑀭𑁄𑀘𑀦𑀸. 𑀏𑀢𑁂𑀲𑀼 𑀢𑀻𑀲𑀼 𑀏𑀓𑁂𑀓𑁂𑀦 𑀓𑀸𑀭𑀡𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺.

𑁮𑁪. 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀗𑁆𑀖𑀲𑁆𑀲 𑀫𑀳𑀦𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑁄𑀥𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀭𑀺𑀯𑀸𑀲𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀏𑀓𑁂𑀦𑀸𑀧𑀺 𑀦𑀺𑀓𑁆𑀔𑀺𑀢𑁆𑀢𑁄𑀯 𑀳𑁄𑀢𑀺 𑀧𑀭𑀺𑀯𑀸𑀲𑁄; 𑀤𑁆𑀯𑀻𑀳𑀺 𑀲𑀼𑀦𑀺𑀓𑁆𑀔𑀺𑀢𑁆𑀢𑁄𑀬𑁂𑀯. 𑀲𑀫𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀫𑀸𑀦𑀢𑁆𑀢𑀁 𑀕𑀡𑁆𑀳𑀢𑁄 𑀧𑀼𑀦 𑀯𑀢𑁆𑀢𑀲𑀫𑀸𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀫𑀸𑀤𑀺𑀦𑁆𑀦𑀯𑀢𑁆𑀢𑁄𑀬𑁂𑀯 𑀳𑁂𑀲 𑀢𑀲𑁆𑀫𑀸𑀲𑁆𑀲 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑁂𑀢𑀩𑁆𑀩𑁄. 𑀏𑀯𑀁 𑀅𑀦𑀸𑀧𑀢𑁆𑀢𑀺𑀓𑁄 𑀳𑀼𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀽𑀭𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺.

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀓𑀣𑀸

𑁮𑁬. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀦𑀯𑀓𑀢𑀭𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀅𑀯𑀲𑁂𑀲𑀸𑀦𑀁 𑀅𑀦𑁆𑀢𑀫𑀲𑁄 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀫𑁆𑀧𑀺. 𑀇𑀫𑁂𑀲𑀜𑁆𑀳𑀺 𑀧𑀸𑀭𑀺𑀯𑀸𑀲𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀸𑀘𑀸𑀭𑀺𑀓𑀩𑁆𑀪𑀸𑀦𑀸𑀭𑀳𑀸𑀦𑀁 𑀧𑀜𑁆𑀘𑀦𑁆𑀦𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀯𑀓𑀢𑀭𑀁, 𑀲𑁂𑀲𑀸 𑀲𑀩𑁆𑀩𑁂 𑀧𑀓𑀢𑀢𑁆𑀢𑀸 𑀏𑀯. 𑀓𑀲𑁆𑀫𑀸? 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀯𑀲𑁂𑀲𑀸𑀦𑀁 𑀅𑀦𑁆𑀢𑀫𑀲𑁄 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀫𑁆𑀧𑀻’’𑀢𑀺. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀺𑀮𑀓𑁆𑀔𑀡𑀁 𑀧𑀦 𑀦𑁂𑀲𑀁 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀫𑀸𑀦𑀢𑁆𑀢𑀸𑀭𑀳𑀸𑀤𑀺𑀯𑀢𑁆𑀢𑁂𑀲𑀼 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁮𑁭. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀘𑀢𑀼𑀢𑁆𑀣𑁄 𑀘𑁂𑀢𑀺𑀆𑀤𑀻𑀲𑀼𑀧𑀺 𑀬𑀣𑁂𑀯 𑀧𑀸𑀭𑀺𑀯𑀸𑀲𑀺𑀓𑁄; 𑀏𑀯𑀁 𑀏𑀢𑁂𑀧𑀺 𑀏𑀢𑁂𑀲𑀼 𑀯𑀺𑀦𑀬𑀓𑀫𑁆𑀫𑁂𑀲𑀼 𑀕𑀡𑀧𑀽𑀭𑀓𑀸 𑀦 𑀳𑁄𑀦𑁆𑀢𑀺, 𑀲𑁂𑀲𑀲𑀗𑁆𑀖𑀓𑀫𑁆𑀫𑁂𑀲𑀼 𑀳𑁄𑀦𑁆𑀢𑀺.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀸𑀦𑀢𑁆𑀢𑀘𑀸𑀭𑀺𑀓𑀯𑀢𑁆𑀢𑀓𑀣𑀸

𑁯𑁦. 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀯𑀢𑁆𑀢𑁂𑀲𑀼 ‘‘𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀯𑀺𑀲𑁂𑀲𑁄.

𑁯𑁨. 𑀭𑀢𑁆𑀢𑀺𑀘𑁆𑀙𑁂𑀤𑁂𑀲𑀼 𑀊𑀦𑁂 𑀕𑀡𑁂𑀢𑀺 𑀏𑀢𑁆𑀣 𑀕𑀡𑁄𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸; 𑀢𑀲𑁆𑀫𑀸 𑀲𑀘𑁂𑀧𑀺 𑀢𑀻𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺𑀬𑁂𑀯. 𑀫𑀸𑀦𑀢𑁆𑀢𑀦𑀺𑀓𑁆𑀔𑁂𑀧𑀲𑀫𑀸𑀤𑀸𑀦𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀸𑀦𑀢𑁆𑀢𑀘𑀸𑀭𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀁

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸

𑁯𑁭. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑁋 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀫𑀸𑀦𑀢𑁆𑀢𑀁 𑁋 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀧𑀓𑁆𑀔𑀫𑀸𑀦𑀢𑁆𑀢𑀁, 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫 𑁋 𑀬𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀅𑀤𑀢𑁆𑀯𑀸 𑀓𑁂𑀯𑀮𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑁂𑀦𑁂𑀯 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑀺𑀬𑁆𑀬𑀢𑀺. 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫 𑁋 𑀬𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀤𑀺𑀬𑁆𑀬𑀢𑀺. 𑀧𑀓𑁆𑀔𑀫𑀸𑀦𑀢𑁆𑀢𑀁 𑀦𑀸𑀫 𑁋 𑀬𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀯𑀸 𑀆𑀧𑀢𑁆𑀢𑀺𑀬𑀸 𑀅𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀺𑀬𑁆𑀬𑀢𑀺. 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁 𑀦𑀸𑀫 𑁋 𑀬𑀁 𑀑𑀥𑀸𑀬 𑀏𑀓𑀢𑁄 𑀓𑀢𑁆𑀯𑀸 𑀤𑀺𑀬𑁆𑀬𑀢𑀺. 𑀢𑁂𑀲𑀼 𑀇𑀤𑀁 ‘‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢’’𑀦𑁆𑀢𑀺 𑀯𑀘𑀦𑀢𑁄 ‘‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀤𑁂𑀦𑁆𑀢𑁂𑀦 𑀲𑀘𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀢𑀢𑀼𑀢𑁆𑀢𑀭𑀺𑀁 𑀯𑀸 𑀆𑀧𑀦𑁆𑀦𑁄, 𑀬𑀣𑁂𑀯 ‘‘𑀏𑀓𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀁; 𑀏𑀯𑀁 ‘‘𑀤𑁆𑀯𑁂 𑀆𑀧𑀢𑁆𑀢𑀺𑀬𑁄, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑀼𑀢𑁆𑀢𑀭𑀺 𑀧𑀦 𑀲𑀘𑁂𑀧𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀳𑁄𑀢𑀺, ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸, 𑀢𑀸𑀲𑀁 𑀤𑀸𑀦𑀯𑀺𑀥𑀺𑀁 𑀧𑀭𑀺𑀯𑀸𑀲𑀤𑀸𑀦𑁂 𑀓𑀣𑀬𑀺𑀲𑁆𑀲𑀸𑀫.

𑀏𑀯𑀁 𑀆𑀧𑀢𑁆𑀢𑀺𑀯𑀲𑁂𑀦 𑀓𑀫𑁆𑀫𑀯𑀸𑀘𑀁 𑀓𑀢𑁆𑀯𑀸 𑀤𑀺𑀦𑁆𑀦𑁂 𑀫𑀸𑀦𑀢𑁆𑀢𑁂 ‘‘𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀫𑀸𑀴𑀓𑀲𑀻𑀫𑀸𑀬𑀫𑁂𑀯 ‘‘𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀁 𑀲𑀫𑀸𑀤𑀸𑀢𑀩𑁆𑀩𑀁. 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀭𑁄𑀘𑁂𑀦𑁆𑀢𑁂𑀦 𑀘 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 𑁋

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀸𑀫𑀺, 𑀯𑁂𑀤𑀬𑀸𑀫𑀳𑀁, 𑀪𑀦𑁆𑀢𑁂 ‘𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺.

𑀇𑀫𑀜𑁆𑀘 𑀧𑀦 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀆𑀭𑁄𑀘𑁂𑀢𑁆𑀯𑀸 𑀲𑀘𑁂 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀖𑀫𑀚𑁆𑀛𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀸𑀴𑀓𑀢𑁄 𑀪𑀺𑀓𑁆𑀔𑀽𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀏𑀓𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀸𑀴𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀦𑁆𑀢𑁂𑀦 𑀲𑀳𑀕𑀘𑁆𑀙𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑁄𑀧𑀺 𑀧𑀓𑁆𑀓𑀦𑁆𑀢𑁄, 𑀅𑀜𑁆𑀜𑀲𑁆𑀲 𑀬𑀲𑁆𑀲 𑀫𑀸𑀴𑀓𑁂 𑀦𑀸𑀭𑁄𑀘𑀺𑀢𑀁, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀭𑁄𑀘𑁂𑀦𑁆𑀢𑁂𑀦 𑀧𑀦 𑀅𑀯𑀲𑀸𑀦𑁂 ‘‘𑀯𑁂𑀤𑀬𑀢𑀻𑀢𑀺 𑀫𑀁 𑀆𑀬𑀲𑁆𑀫𑀸 𑀥𑀸𑀭𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺.

𑀲𑀘𑁂 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀯𑀺𑀳𑀸𑀭𑁄 𑀳𑁄𑀢𑀺, 𑀲𑀪𑀸𑀕𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀯𑀢𑁆𑀢𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀭𑀢𑁆𑀢𑀺𑀬𑁄 𑀕𑀡𑁂𑀢𑀩𑁆𑀩𑀸. 𑀅𑀣 𑀦 𑀲𑀓𑁆𑀓𑀸 𑀲𑁄𑀥𑁂𑀢𑀼𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀕𑀼𑀫𑁆𑀩𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀲𑀘𑁂 𑀏𑀲 𑀢𑀁 𑀧𑀲𑁆𑀲𑀢𑀺, 𑀲𑀤𑁆𑀤𑀁 𑀯𑀸𑀲𑁆𑀲 𑀲𑀼𑀡𑀸𑀢𑀺, 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑁄 𑀘.

𑀅𑀣 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺 𑀏𑀯, 𑀯𑀢𑁆𑀢𑀪𑁂𑀤𑁄 𑀧𑀦 𑀦𑀢𑁆𑀣𑀺. 𑀆𑀭𑁄𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀲𑀢𑀺 𑀓𑀭𑀡𑀻𑀬𑁂 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑁄𑀧𑀺 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀁 𑀯𑀸 𑀆𑀕𑀦𑁆𑀢𑀼𑀓𑀁 𑀯𑀸 𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀬𑀲𑁆𑀫𑀸 𑀕𑀡𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀜𑁆𑀘 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀯𑀲𑀺, 𑀢𑁂𑀦𑀲𑁆𑀲 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀯𑀸 𑀯𑀺𑀧𑁆𑀧𑀯𑀸𑀲𑁄 𑀯𑀸 𑀦 𑀳𑁄𑀢𑀺. 𑀲𑀘𑁂 𑀦 𑀓𑀜𑁆𑀘𑀺 𑀧𑀲𑁆𑀲𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀢𑀪𑀺𑀓𑁆𑀔𑀽𑀲𑀼 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀅𑀬𑀁 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀭𑀺𑀳𑀸𑀭𑁄’’𑀢𑀺 𑀆𑀳.

𑀏𑀯𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀔𑀡𑁆𑀟𑀁 𑀘𑀭𑀺𑀢𑁆𑀯𑀸 𑀬𑀢𑁆𑀣 𑀲𑀺𑀬𑀸 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀢𑁆𑀣 𑀲𑁄 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄. 𑀅𑀩𑁆𑀪𑁂𑀦𑁆𑀢𑁂𑀳𑀺 𑀘 𑀧𑀞𑀫𑀁 𑀅𑀩𑁆𑀪𑀸𑀦𑀸𑀭𑀳𑁄 𑀓𑀸𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀢𑁆𑀢𑀸 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑁄, 𑀧𑀓𑀢𑀢𑁆𑀢𑀲𑁆𑀲 𑀘 𑀅𑀩𑁆𑀪𑀸𑀦𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀯𑀢𑁆𑀢𑀁 𑀲𑀫𑀸𑀤𑀸𑀧𑁂𑀢𑀩𑁆𑀩𑁄. 𑀯𑀢𑁆𑀢𑁂 𑀲𑀫𑀸𑀤𑀺𑀦𑁆𑀦𑁂 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺. 𑀢𑁂𑀦𑀸𑀧𑀺 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀅𑀩𑁆𑀪𑀸𑀦𑀁 𑀬𑀸𑀘𑀺𑀢𑀩𑁆𑀩𑀁. 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀼𑀦 𑀯𑀢𑁆𑀢𑀲𑀫𑀸𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑁄 𑀳𑀺 𑀙𑀸𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦𑁂𑀯 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀅𑀩𑁆𑀪𑁂𑀢𑀩𑁆𑀩𑁄. 𑀢𑀢𑁆𑀭 𑀬𑁆𑀯𑀸𑀬𑀁 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁂𑀢𑀩𑁆𑀩𑁄’’𑀢𑀺 𑀧𑀸𑀴𑀺𑀬𑀁𑀬𑁂𑀯 𑀅𑀩𑁆𑀪𑀸𑀦𑀯𑀺𑀥𑀺 𑀯𑀼𑀢𑁆𑀢𑁄, 𑀅𑀬𑀜𑁆𑀘 𑀏𑀓𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀘𑁂 𑀧𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀯𑀢𑁆𑀣𑀼𑀓𑀸 𑀯𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀢𑀸𑀲𑀁 𑀯𑀲𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀧𑀦 𑀬𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀧𑀭𑀺𑀯𑀸𑀲𑀓𑀣𑀸𑀬𑀁𑀬𑁂𑀯 𑀓𑀣𑀬𑀺𑀲𑁆𑀲𑀸𑀫.

𑀧𑀭𑀺𑀯𑀸𑀲𑀓𑀣𑀸

𑁧𑁦𑁨. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀬𑀁 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀯𑀸𑀲𑁄 𑀘 𑀫𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀁. 𑀢𑀲𑁆𑀲 𑀬𑀲𑁆𑀫𑀸 𑀆𑀕𑀢𑀸𑀕𑀢𑀝𑁆𑀞𑀸𑀦𑁂 𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀫𑀸𑀦𑁄 𑀧𑀸𑀴𑀺 𑀯𑀺𑀬 𑀅𑀢𑀺𑀯𑀺𑀢𑁆𑀣𑀸𑀭𑀁 𑀆𑀧𑀚𑁆𑀚𑀢𑀺, 𑀦 𑀘 𑀲𑀓𑁆𑀓𑀸 𑀳𑁄𑀢𑀺 𑀲𑀼𑀔𑁂𑀦 𑀧𑀭𑀺𑀕𑁆𑀕𑀳𑁂𑀢𑀼𑀁, 𑀢𑀲𑁆𑀫𑀸 𑀦𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀥𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀅𑀬𑀜𑁆𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀧𑀭𑀺𑀯𑀸𑀲𑁄 𑀦𑀸𑀫 𑁋 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄, 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀢𑀸𑀯 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀤𑀸𑀢𑀩𑁆𑀩𑁄. 𑀓𑀲𑁆𑀲𑀘𑀺 𑀳𑀺 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀬𑀣𑀸 𑀅𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲, 𑀓𑀲𑁆𑀲𑀘𑀺 𑀤𑁆𑀯𑀻𑀳𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀬𑀣𑀸 𑀧𑀭𑀢𑁄 𑀆𑀕𑀢𑀸 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲𑁂𑀯, 𑀓𑀲𑁆𑀲𑀘𑀺 𑀏𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀬𑀣𑀸 𑀅𑀬𑀁, 𑀓𑀲𑁆𑀲𑀘𑀺 𑀤𑁆𑀯𑁂 𑀢𑀺𑀲𑁆𑀲𑁄 𑀢𑀢𑀼𑀢𑁆𑀢𑀭𑀺 𑀯𑀸 𑀬𑀣𑀸 𑀧𑀭𑀢𑁄 𑀆𑀕𑀢𑀸, 𑀢𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑁂𑀦 𑀧𑀞𑀫𑀁 𑀢𑀸𑀯 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄.

𑀅𑀬𑀜𑁆𑀳𑀺 𑀆𑀧𑀢𑁆𑀢𑀺 𑀦𑀸𑀫 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀫𑀸𑀢𑀺𑀓𑀸 𑁋 𑀆𑀧𑀢𑁆𑀢𑀺 𑀘 𑀳𑁄𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻 𑀘, 𑀧𑀓𑀢𑀢𑁆𑀢𑁄 𑀘 𑀳𑁄𑀢𑀺 𑀧𑀓𑀢𑀢𑁆𑀢𑀲𑀜𑁆𑀜𑀻 𑀘, 𑀅𑀦𑀦𑁆𑀢𑀭𑀸𑀬𑀺𑀓𑁄 𑀘 𑀳𑁄𑀢𑀺 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀘, 𑀧𑀳𑀼 𑀘 𑀳𑁄𑀢𑀺 𑀧𑀳𑀼𑀲𑀜𑁆𑀜𑀻 𑀘, 𑀙𑀸𑀤𑁂𑀢𑀼𑀓𑀸𑀫𑁄 𑀘 𑀳𑁄𑀢𑀺 𑀙𑀸𑀤𑁂𑀢𑀺 𑀘𑀸𑀢𑀺.

𑀢𑀢𑁆𑀣 𑀆𑀧𑀢𑁆𑀢𑀺 𑀘 𑀳𑁄𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻 𑀘𑀸𑀢𑀺 𑀬𑀁 𑀆𑀧𑀦𑁆𑀦𑁄, 𑀲𑀸 𑀆𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀲𑁄𑀧𑀺 𑀘 𑀢𑀢𑁆𑀣 𑀆𑀧𑀢𑁆𑀢𑀺𑀲𑀜𑁆𑀜𑀻𑀬𑁂𑀯. 𑀇𑀢𑀺 𑀚𑀸𑀦𑀦𑁆𑀢𑁄 𑀙𑀸𑀤𑁂𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀺. 𑀅𑀣 𑀧𑀦𑀸𑀬𑀁 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻, 𑀅𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀅𑀦𑀸𑀧𑀢𑁆𑀢𑀺 𑀧𑀦 𑀆𑀧𑀢𑁆𑀢𑀺𑀲𑀜𑁆𑀜𑀸𑀬𑀧𑀺 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀸𑀬𑀧𑀺 𑀙𑀸𑀤𑁂𑀦𑁆𑀢𑁂𑀦𑀸𑀧𑀺 𑀅𑀘𑁆𑀙𑀸𑀤𑀺𑀢𑀸𑀯 𑀳𑁄𑀢𑀺. 𑀮𑀳𑀼𑀓𑀁 𑀯𑀸 𑀕𑀭𑀼𑀓𑀸𑀢𑀺 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀸𑀢𑀺 𑀙𑀸𑀤𑁂𑀢𑀺, 𑀅𑀮𑀚𑁆𑀚𑀺𑀧𑀓𑁆𑀔𑁂 𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀦 𑀅𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀕𑀭𑀼𑀓𑀁 𑀮𑀳𑀼𑀓𑀸𑀢𑀺 𑀫𑀜𑁆𑀜𑀫𑀸𑀦𑁄 𑀤𑁂𑀲𑁂𑀢𑀺, 𑀦𑁂𑀯 𑀤𑁂𑀲𑀺𑀢𑀸 𑀳𑁄𑀢𑀺, 𑀦 𑀙𑀦𑁆𑀦𑀸. 𑀕𑀭𑀼𑀓𑀁 𑀕𑀭𑀼𑀓𑀸𑀢𑀺 𑀜𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀕𑀭𑀼𑀓𑀮𑀳𑀼𑀓𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀙𑀸𑀤𑁂𑀫𑀻𑀢𑀺 𑀙𑀸𑀤𑁂𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀺.

𑀧𑀓𑀢𑀢𑁆𑀢𑁄𑀢𑀺 𑀢𑀺𑀯𑀺𑀥𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀢𑁄 𑁋 𑀲𑁄 𑀘𑁂 𑀧𑀓𑀢𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀅𑀣 ‘‘𑀫𑀬𑁆𑀳𑀁 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀅𑀧𑀓𑀢𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀅𑀧𑀓𑀢𑀢𑁆𑀢𑁂𑀦 𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸 𑀯𑀸 𑀅𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸 𑀯𑀸 𑀙𑀸𑀤𑀺𑀢𑀸𑀧𑀺 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀆𑀧𑀚𑁆𑀚𑀢𑀺 𑀕𑀭𑀼𑀓𑀁 𑀲𑀸𑀯𑀲𑁂𑀲𑀁,

𑀙𑀸𑀤𑁂𑀢𑀺 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘;

𑀦 𑀪𑀺𑀓𑁆𑀔𑀼𑀦𑀻 𑀦𑁄 𑀘 𑀨𑀼𑀲𑁂𑀬𑁆𑀬 𑀯𑀚𑁆𑀚𑀁,

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀉𑀓𑁆𑀔𑀺𑀢𑁆𑀢𑀓𑁂𑀦 𑀓𑀣𑀺𑀢𑁄.

𑀅𑀦𑀦𑁆𑀢𑀭𑀸𑀬𑀺𑀓𑁄𑀢𑀺 𑀬𑀲𑁆𑀲 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑁄 𑀘𑁂 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀲𑀘𑁂𑀧𑀺 𑀲𑁄 𑀪𑀻𑀭𑀼𑀓𑀚𑀸𑀢𑀺𑀓𑀢𑀸𑀬 𑀅𑀦𑁆𑀥𑀓𑀸𑀭𑁂 𑀅𑀫𑀦𑀼𑀲𑁆𑀲𑀘𑀡𑁆𑀟𑀫𑀺𑀕𑀪𑀬𑁂𑀦 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀬𑀲𑁆𑀲 𑀳𑀺 𑀧𑀩𑁆𑀩𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀓𑀦𑁆𑀤𑀭𑀁 𑀯𑀸 𑀦𑀤𑀺𑀁 𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀘𑀡𑁆𑀟𑀯𑀸𑀴𑀅𑀫𑀦𑀼𑀲𑁆𑀲𑀸𑀤𑀺𑀪𑀬𑀁 𑀅𑀢𑁆𑀣𑀺, 𑀫𑀕𑁆𑀕𑁂 𑀅𑀚𑀕𑀭𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀦𑀤𑀻 𑀧𑀽𑀭𑀸 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀧𑀦 𑀲𑀢𑀺𑀬𑁂𑀯 𑀅𑀦𑁆𑀢𑀭𑀸𑀬𑁂 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀺𑀓𑀲𑁆𑀲 𑀧𑀦 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀯𑀸 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀯𑀸 𑀙𑀸𑀤𑀬𑀢𑁄 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺.

𑀧𑀳𑀽𑀢𑀺 𑀬𑁄 𑀲𑀓𑁆𑀓𑁄𑀢𑀺 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀜𑁆𑀘𑁂𑀯 𑀆𑀭𑁄𑀘𑁂𑀢𑀼𑀜𑁆𑀘; 𑀲𑁄 𑀘𑁂 𑀧𑀳𑀼𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀲𑀘𑀲𑁆𑀲 𑀫𑀼𑀔𑁂 𑀅𑀧𑁆𑀧𑀫𑀢𑁆𑀢𑀓𑁄 𑀕𑀡𑁆𑀟𑁄 𑀯𑀸 𑀳𑁄𑀢𑀺, 𑀳𑀦𑀼𑀓𑀯𑀸𑀢𑁄 𑀯𑀸 𑀯𑀺𑀚𑁆𑀛𑀢𑀺, 𑀤𑀦𑁆𑀢𑁄 𑀯𑀸 𑀭𑀼𑀚𑁆𑀚𑀢𑀺, 𑀪𑀺𑀓𑁆𑀔𑀸 𑀯𑀸 𑀫𑀦𑁆𑀤𑀸 𑀮𑀤𑁆𑀥𑀸 𑀳𑁄𑀢𑀺, 𑀢𑀸𑀯𑀢𑀓𑁂𑀦 𑀧𑀦 𑀦𑁂𑀯 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀦 𑀕𑀦𑁆𑀢𑀼𑀁; 𑀅𑀧𑀺𑀘 𑀔𑁄 𑀦 𑀲𑀓𑁆𑀓𑁄𑀫𑀻𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀅𑀬𑀁 𑀧𑀳𑀼 𑀳𑀼𑀢𑁆𑀯𑀸 𑀅𑀧𑁆𑀧𑀳𑀼𑀲𑀜𑁆𑀜𑀻 𑀦𑀸𑀫. 𑀇𑀫𑀺𑀦𑀸 𑀙𑀸𑀤𑀺𑀢𑀸𑀧𑀺 𑀅𑀘𑁆𑀙𑀸𑀤𑀺𑀢𑀸. 𑀅𑀧𑁆𑀧𑀳𑀼𑀦𑀸 𑀧𑀦 𑀯𑀢𑁆𑀢𑀼𑀁 𑀯𑀸 𑀕𑀦𑁆𑀢𑀼𑀁 𑀯𑀸 𑀅𑀲𑀫𑀢𑁆𑀣𑁂𑀦 𑀧𑀳𑀼𑀲𑀜𑁆𑀜𑀺𑀦𑀸 𑀯𑀸 𑀅𑀧𑁆𑀧𑀳𑀼𑀲𑀜𑁆𑀜𑀺𑀦𑀸 𑀯𑀸 𑀙𑀸𑀤𑀺𑀢𑀸 𑀳𑁄𑀢𑀼, 𑀅𑀘𑁆𑀙𑀸𑀤𑀺𑀢𑀸𑀯.

𑀙𑀸𑀤𑁂𑀢𑀼𑀓𑀸𑀫𑁄 𑀘 𑀳𑁄𑀢𑀺 𑀙𑀸𑀤𑁂𑀢𑀺 𑀘𑀸𑀢𑀺 𑀇𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀘𑁂 𑀧𑀦 𑀙𑀸𑀤𑁂𑀲𑁆𑀲𑀸𑀫𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑁂 𑀯𑀸 𑀧𑀘𑁆𑀙𑀸𑀪𑀢𑁆𑀢𑁂 𑀯𑀸 𑀧𑀞𑀫𑀬𑀸𑀫𑀸𑀤𑀻𑀲𑀼 𑀯𑀸 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀭𑁄𑀘𑁂𑀢𑀺, 𑀅𑀬𑀁 𑀙𑀸𑀤𑁂𑀢𑀼𑀓𑀸𑀫𑁄 𑀦 𑀙𑀸𑀤𑁂𑀢𑀺 𑀦𑀸𑀫.

𑀬𑀲𑁆𑀲 𑀧𑀦 𑀅𑀪𑀺𑀓𑁆𑀔𑀼𑀓𑁂 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀁 𑀆𑀕𑀫𑁂𑀦𑁆𑀢𑀲𑁆𑀲 𑀲𑀪𑀸𑀕𑀲𑀦𑁆𑀢𑀺𑀓𑀁 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀤𑁆𑀥𑀫𑀸𑀲𑁄𑀧𑀺 𑀫𑀸𑀲𑁄𑀧𑀺 𑀅𑀢𑀺𑀓𑁆𑀓𑀫𑀢𑀺, 𑀅𑀬𑀁 𑀦 𑀙𑀸𑀤𑁂𑀢𑀼𑀓𑀸𑀫𑁄 𑀙𑀸𑀤𑁂𑀢𑀺 𑀦𑀸𑀫, 𑀅𑀬𑀫𑁆𑀧𑀺 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺.

𑀬𑁄 𑀧𑀦 𑀆𑀧𑀦𑁆𑀦𑀫𑀢𑁆𑀢𑁄𑀯 𑀅𑀕𑁆𑀕𑀺𑀁 𑀅𑀓𑁆𑀓𑀦𑁆𑀢𑀧𑀼𑀭𑀺𑀲𑁄 𑀯𑀺𑀬 𑀲𑀳𑀲𑀸 𑀅𑀧𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀯𑀺 𑀓𑀭𑁄𑀢𑀺, 𑀅𑀬𑀁 𑀦 𑀙𑀸𑀤𑁂𑀢𑀼𑀓𑀸𑀫𑁄𑀯 𑀦 𑀙𑀸𑀤𑁂𑀢𑀺 𑀦𑀸𑀫. 𑀲𑀘𑁂 𑀧𑀦 𑀲𑀪𑀸𑀕𑀁 𑀤𑀺𑀲𑁆𑀯𑀸𑀧𑀺 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸’’𑀢𑀺 𑀮𑀚𑁆𑀚𑀸𑀬 𑀦𑀸𑀭𑁄𑀘𑁂𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀺 𑀆𑀧𑀢𑁆𑀢𑀺. 𑀉𑀧𑀚𑁆𑀛𑀸𑀬𑀸𑀤𑀺𑀪𑀸𑀯𑁄 𑀳𑀺 𑀇𑀥 𑀅𑀧𑁆𑀧𑀫𑀸𑀡𑀁 𑀅𑀯𑁂𑀭𑀺𑀲𑀪𑀸𑀕𑀫𑀢𑁆𑀢𑀫𑁂𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀅𑀯𑁂𑀭𑀺𑀲𑀪𑀸𑀕𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑀩𑁆𑀩𑀸.

𑀬𑁄 𑀧𑀦 𑀯𑀺𑀲𑀪𑀸𑀕𑁄 𑀳𑁄𑀢𑀺 𑀲𑀼𑀢𑁆𑀯𑀸 𑀧𑀓𑀸𑀲𑁂𑀢𑀼𑀓𑀸𑀫𑁄, 𑀏𑀯𑀭𑀽𑀧𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀦 𑀆𑀭𑁄𑀘𑁂𑀢𑀩𑁆𑀩𑀸. 𑀢𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀼 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸, 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸 𑀬𑀸𑀯 𑀅𑀭𑀼𑀡𑀁 𑀦 𑀉𑀕𑁆𑀕𑀘𑁆𑀙𑀢𑀺 𑀢𑀸𑀯 𑀆𑀭𑁄𑀘𑁂𑀢𑀩𑁆𑀩𑀁. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀧𑀝𑀺𑀘𑁆𑀙𑀸𑀤𑀦𑀧𑀘𑁆𑀘𑀬𑀸 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀆𑀯𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀆𑀯𑀺 𑀓𑀭𑁄𑀢𑀺, 𑀆𑀧𑀢𑁆𑀢𑀺 𑀆𑀯𑀺𑀓𑀢𑀸 𑀳𑁄𑀢𑀺, 𑀤𑀼𑀓𑁆𑀓𑀝𑀸 𑀧𑀦 𑀦 𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀆𑀯𑀺𑀓𑀸𑀢𑀩𑁆𑀩𑀸. 𑀆𑀯𑀺𑀓𑀭𑁄𑀦𑁆𑀢𑁄 𑀘 ‘‘𑀢𑀼𑀬𑁆𑀳𑀁 𑀲𑀦𑁆𑀢𑀺𑀓𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻’’𑀢𑀺 𑀯𑀸 ‘‘𑀆𑀘𑀺𑀓𑁆𑀔𑀸𑀫𑀻’’𑀢𑀺 𑀯𑀸 ‘‘𑀆𑀭𑁄𑀘𑁂𑀫𑀻’’𑀢𑀺 𑀯𑀸 ‘‘𑀫𑀫 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺 𑀯𑀸 𑀯𑀤𑀢𑀼, ‘‘𑀏𑀓𑀁 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻’’𑀢𑀺𑀆𑀤𑀺𑀦𑀸 𑀯𑀸 𑀦𑀬𑁂𑀦 𑀯𑀤𑀢𑀼, 𑀲𑀩𑁆𑀩𑁂𑀳𑀺𑀧𑀺 𑀆𑀓𑀸𑀭𑁂𑀳𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀯 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀢𑀺, 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀯𑀢𑁆𑀣𑀼𑀁 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀉𑀪𑀬𑀁 𑀆𑀭𑁄𑀘𑁂𑀢𑀺, 𑀢𑀺𑀯𑀺𑀥𑁂𑀦𑀸𑀧𑀺 𑀆𑀭𑁄𑀘𑀺𑀢𑀸𑀯 𑀳𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀤𑀲 𑀓𑀸𑀭𑀡𑀸𑀦𑀺 𑀉𑀧𑀮𑀓𑁆𑀔𑁂𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑁂𑀦 𑀧𑀞𑀫𑀫𑁂𑀯 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄.

𑀢𑀢𑁄 𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑁂 𑀘 𑀆𑀧𑀢𑁆𑀢𑀺𑀬𑁄 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀏𑀯𑀁 𑀬𑀸𑀘𑀸𑀧𑁂𑀢𑁆𑀯𑀸 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀅𑀣 𑀤𑁆𑀯𑀻𑀳𑀢𑀻𑀳𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀤𑁆𑀯𑀻𑀳𑀧𑀝𑀺𑀘𑁆𑀙𑀦𑁆𑀦𑀁 𑀢𑀻𑀳𑀧𑀝𑀺𑀘𑁆𑀙𑀦𑁆𑀦𑀁 𑀘𑀢𑀽𑀳𑀧𑀝𑀺𑀘𑁆𑀙𑀦𑁆𑀦𑀁 𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀙𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀲𑀢𑁆𑀢𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀅𑀝𑁆𑀞𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀦𑀯𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀏𑀓𑀸𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀤𑁆𑀯𑀸𑀤𑀲𑀸𑀳𑀧𑀅𑀘𑁆𑀙𑀦𑁆𑀦𑀁 𑀢𑁂𑀭𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀁 𑀘𑀼𑀤𑁆𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀯𑀁 𑀬𑀸𑀯 𑀘𑀼𑀤𑁆𑀤𑀲 𑀤𑀺𑀯𑀲𑀸𑀦𑀺 𑀤𑀺𑀯𑀲𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀧𑀜𑁆𑀘𑀤𑀲 𑀤𑀺𑀯𑀲𑀸𑀦𑀺 𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀯𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁄 𑀬𑀸𑀯 𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀤𑀺𑀯𑀲𑁄, 𑀢𑀸𑀯 𑀅𑀢𑀺𑀭𑁂𑀓𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺.

𑀢𑀢𑁄 𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀤𑁆𑀯𑁂𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀤𑁆𑀯𑁂𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀢𑁂𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀢𑁂𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀘𑀢𑀼𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀘𑀢𑀼𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀧𑀜𑁆𑀘𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀙𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀙𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀲𑀢𑁆𑀢𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀲𑀢𑁆𑀢𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀝𑁆𑀞𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀅𑀝𑁆𑀞𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀦𑀯𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀦𑀯𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀤𑀲𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀤𑀲𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀏𑀓𑀸𑀤𑀲𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀏𑀓𑀸𑀤𑀲𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀁𑀯𑀘𑁆𑀙𑀭𑁂 𑀧𑀭𑀺𑀧𑀼𑀡𑁆𑀡𑁂 𑀏𑀓𑀲𑀁𑀯𑀘𑁆𑀙𑀭𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺. 𑀢𑀢𑁄 𑀧𑀭𑀁 𑀅𑀢𑀺𑀭𑁂𑀓𑀏𑀓𑀲𑀁𑀯𑀘𑁆𑀙𑀭… 𑀤𑁆𑀯𑁂𑀲𑀁𑀯𑀘𑁆𑀙𑀭… 𑀅𑀢𑀺𑀭𑁂𑀓𑀤𑁆𑀯𑁂𑀲𑀁𑀯𑀘𑁆𑀙𑀭… 𑀢𑀺𑀲𑀁𑀯𑀘𑁆𑀙𑀭… 𑀅𑀢𑀺𑀭𑀓𑁂𑀢𑀺𑀲𑀁𑀯𑀘𑁆𑀙𑀭… 𑀘𑀢𑀼𑀲𑀁𑀯𑀘𑁆𑀙𑀭… 𑀅𑀢𑀺𑀭𑁂𑀓𑀘𑀢𑀼𑀲𑀁𑀯𑀘𑁆𑀙𑀭… 𑀧𑀜𑁆𑀘𑀲𑀁𑀯𑀘𑁆𑀙𑀭… 𑀅𑀢𑀺𑀭𑁂𑀓𑀧𑀜𑁆𑀘𑀲𑀁𑀯𑀘𑁆𑀙𑀭𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀯𑀁 𑀬𑀸𑀯 𑀲𑀝𑁆𑀞𑀺𑀲𑀁𑀯𑀘𑁆𑀙𑀭… 𑀅𑀢𑀺𑀭𑁂𑀓𑀲𑀝𑁆𑀞𑀺𑀲𑀁𑀯𑀘𑁆𑀙𑀭𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀯𑀸 𑀢𑀢𑁄 𑀯𑀸 𑀪𑀺𑀬𑁆𑀬𑁄𑀧𑀺 𑀯𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀘𑁂 𑀧𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀢𑀢𑀼𑀢𑁆𑀢𑀭𑀺 𑀯𑀸 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀬𑀣𑀸 𑀇𑀥 𑀏𑀓𑀁 𑀆𑀧𑀢𑁆𑀢𑀺𑀦𑁆𑀢𑀺 𑀯𑀼𑀢𑁆𑀢𑀁; 𑀏𑀯𑀁 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀧𑀦 𑀲𑀢𑀁 𑀯𑀸 𑀳𑁄𑀢𑀼 𑀲𑀳𑀲𑁆𑀲𑀁 𑀯𑀸, 𑀲𑀫𑁆𑀩𑀳𑀼𑀮𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀸𑀦𑀸𑀯𑀢𑁆𑀣𑀼𑀓𑀸𑀲𑀼𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑁋 𑀏𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁, 𑀏𑀓𑀁 𑀓𑀸𑀬𑀲𑀁𑀲𑀕𑁆𑀕𑀁, 𑀏𑀓𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀁, 𑀏𑀓𑀁 𑀅𑀢𑁆𑀢𑀓𑀸𑀫𑀁, 𑀏𑀓𑀁 𑀲𑀜𑁆𑀘𑀭𑀺𑀢𑁆𑀢𑀁, 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸, ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑀢𑁆𑀣 𑀦𑀸𑀫𑀁 𑀤𑀼𑀯𑀺𑀥𑀁 𑁋 𑀲𑀚𑀸𑀢𑀺𑀲𑀸𑀥𑀸𑀭𑀡𑀜𑁆𑀘 𑀲𑀩𑁆𑀩𑀲𑀸𑀥𑀸𑀭𑀡𑀜𑁆𑀘. 𑀢𑀢𑁆𑀣 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀚𑀸𑀢𑀺𑀲𑀸𑀥𑀸𑀭𑀡𑀁, 𑀆𑀧𑀢𑁆𑀢𑀻𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁; 𑀢𑀲𑁆𑀫𑀸 ‘‘𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀜𑁆𑀳𑀺 𑀲𑀩𑁆𑀩𑀫𑁆𑀧𑀺 𑀧𑀭𑀺𑀯𑀸𑀲𑀸𑀤𑀺𑀓𑀁 𑀯𑀺𑀦𑀬𑀓𑀫𑁆𑀫𑀁 𑀯𑀢𑁆𑀣𑀼𑀯𑀲𑁂𑀦 𑀕𑁄𑀢𑁆𑀢𑀯𑀲𑁂𑀦 𑀦𑀸𑀫𑀯𑀲𑁂𑀦 𑀆𑀧𑀢𑁆𑀢𑀺𑀯𑀲𑁂𑀦 𑀘 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀢𑀢𑁆𑀣 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻’’𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘. ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘. ‘‘𑀓𑀸𑀬𑀲𑀁𑀲𑀕𑁆𑀕𑁄’’𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘. ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘, 𑀢𑀢𑁆𑀣 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀓𑀸𑀬𑀲𑀁𑀲𑀕𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀯𑀘𑀦𑁂𑀦𑀸𑀧𑀺 ‘‘𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄’’𑀢𑀺 𑀯𑀘𑀦𑁂𑀦𑀸𑀧𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑀕𑀳𑀺𑀢𑀁 𑀳𑁄𑀢𑀺. ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀘𑀦𑁂𑀦𑀸𑀧𑀺 ‘‘𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀘𑀦𑁂𑀦𑀸𑀧𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘 𑀕𑀳𑀺𑀢𑀸 𑀳𑁄𑀢𑀺. 𑀇𑀥 𑀧𑀦 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺’’𑀦𑁆𑀢𑀺 𑀦𑀸𑀫𑀫𑁆𑀧𑀺 𑀯𑀢𑁆𑀣𑀼𑀕𑁄𑀢𑁆𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯. 𑀬𑀣𑀸 𑀘 𑀇𑀥 ‘‘𑀅𑀬𑀁 𑀉𑀤𑀸𑀬𑀺 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁; 𑀏𑀯𑀁 𑀬𑁄 𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀽’’𑀢𑀺 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸.

𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀘 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀫𑀸𑀴𑀓𑀲𑀻𑀫𑀸𑀬𑀫𑁂𑀯 ‘‘𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀲𑀫𑀸𑀤𑀸𑀢𑀩𑁆𑀩𑀁. 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀭𑁄𑀘𑁂𑀦𑁆𑀢𑁂𑀦 𑀘 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 𑁋

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺, 𑀲𑁄𑀳𑀁 𑀧𑀭𑀺𑀯𑀲𑀸𑀫𑀺 𑁋 ‘𑀯𑁂𑀤𑀬𑀸𑀫𑀳𑀁, 𑀪𑀦𑁆𑀢𑁂, 𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺.

𑀇𑀫𑀜𑁆𑀘 𑀧𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀆𑀭𑁄𑀘𑁂𑀢𑁆𑀯𑀸 𑀲𑀘𑁂 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀖𑀫𑀚𑁆𑀛𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀸𑀴𑀓𑀢𑁄 𑀪𑀺𑀓𑁆𑀔𑀽𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀏𑀓𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀸𑀴𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀦𑁆𑀢𑁂𑀦 𑀲𑀳𑀕𑀘𑁆𑀙𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑁄𑀧𑀺 𑀧𑀓𑁆𑀓𑀦𑁆𑀢𑁄, 𑀅𑀜𑁆𑀜𑀲𑁆𑀲 𑀬𑀲𑁆𑀲 𑀫𑀸𑀴𑀓𑁂 𑀦𑀸𑀭𑁄𑀘𑀺𑀢𑀁, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀭𑁄𑀘𑁂𑀦𑁆𑀢𑁂𑀦 𑀘 𑀅𑀯𑀲𑀸𑀦𑁂 ‘‘𑀯𑁂𑀤𑀬𑀢𑀻𑀢𑀺 𑀫𑀁 𑀆𑀬𑀲𑁆𑀫𑀸 𑀥𑀸𑀭𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’’𑀢𑀺, 𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺.

𑀲𑀘𑁂 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀯𑀺𑀳𑀸𑀭𑁄 𑀳𑁄𑀢𑀺, 𑀲𑀪𑀸𑀕𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀯𑀢𑁆𑀢𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀭𑀢𑁆𑀢𑀺𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀅𑀣 𑀦 𑀲𑀓𑁆𑀓𑀸 𑀲𑁄𑀥𑁂𑀢𑀼𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀸𑀦𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀯𑀸𑀲𑁄 𑀆𑀭𑁄𑀘𑁂𑀢𑀩𑁆𑀩𑁄. 𑀆𑀭𑁄𑀘𑁂𑀦𑁆𑀢𑁂𑀦 𑀲𑀘𑁂 𑀦𑀯𑀓𑀢𑀭𑁄 𑀳𑁄𑀢𑀺, ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀼𑀟𑁆𑀠𑀢𑀭𑁄, ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀲𑀘𑁂 𑀏𑀲 𑀢𑀁 𑀧𑀲𑁆𑀲𑀢𑀺, 𑀲𑀤𑁆𑀤𑀁 𑀯𑀸𑀲𑁆𑀲 𑀲𑀼𑀡𑀸𑀢𑀺, 𑀆𑀭𑁄𑀘𑁂𑀢𑀩𑁆𑀩𑀁; 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑁄 𑀘. 𑀅𑀣 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀬𑁂𑀯 𑀳𑁄𑀢𑀺, 𑀯𑀢𑁆𑀢𑀪𑁂𑀤𑁄 𑀧𑀦 𑀦𑀢𑁆𑀣𑀺.

𑀉𑀕𑁆𑀕𑀢𑁂 𑀅𑀭𑀼𑀡𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀬𑀁 𑀅𑀜𑁆𑀜𑀁 𑀲𑀩𑁆𑀩𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀢𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀅𑀬𑀁 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀭𑀺𑀳𑀸𑀭𑁄’’𑀢𑀺 𑀆𑀳.

𑀏𑀯𑀁 𑀬𑀢𑁆𑀢𑀓𑀸𑀦𑀺 𑀤𑀺𑀯𑀲𑀸𑀦𑀺 𑀆𑀧𑀢𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀢𑁆𑀢𑀓𑀸𑀦𑀺 𑀢𑀢𑁄 𑀅𑀥𑀺𑀓𑀢𑀭𑀸𑀦𑀺 𑀯𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀸𑀬 𑀧𑀭𑀺𑀯𑀲𑀺𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀫𑀸𑀦𑀢𑁆𑀢𑀁 𑀬𑀸𑀘𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀯𑀢𑁆𑀢𑁂 𑀲𑀫𑀸𑀤𑀺𑀦𑁆𑀦𑁂 𑀏𑀯 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀧𑀭𑀺𑀯𑀼𑀢𑁆𑀣𑀢𑁆𑀢𑀸. 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀦 𑀧𑀼𑀦 𑀲𑀫𑀸𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑁄 𑀳𑀺 𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑀸𑀢𑀺𑀓𑁆𑀓𑀫𑁂𑀦𑁂𑀯 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀫𑁂𑀯. 𑀇𑀤𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫. 𑀢𑀁 𑀤𑁂𑀦𑁆𑀢𑁂𑀦 𑀲𑀘𑁂 𑀏𑀓𑀸𑀧𑀢𑁆𑀢𑀺 𑀳𑁄𑀢𑀺, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀸𑀢𑀩𑁆𑀩𑀁. 𑀅𑀣 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 ‘‘𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’’𑀢𑀺 𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀬𑁄 𑀘 𑀤𑀺𑀯𑀲𑁂 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀣𑀁? 𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀯𑀲𑀺𑀢𑁆𑀯𑀸 𑁋

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺, 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄. 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀦𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀘 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀘 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’’𑀢𑀺.

𑀅𑀣𑀲𑁆𑀲 𑀢𑀤𑀦𑀼𑀭𑀽𑀧𑀁 𑀓𑀫𑁆𑀫𑀯𑀸𑀘𑀁 𑀓𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀸 𑀤𑁆𑀯𑁂, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀏𑀓𑀸 ‘‘𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀣 𑀧𑀝𑀺𑀘𑁆𑀙𑀦𑁆𑀦𑀸 𑀏𑀓𑀸, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀤𑁆𑀯𑁂, ‘‘𑀧𑀝𑀺𑀘𑁆𑀙𑀦𑁆𑀦𑀸𑀬 𑀘 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀸𑀧𑀺 𑀤𑁆𑀯𑁂, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀧𑀺 𑀤𑁆𑀯𑁂, ‘‘𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀅𑀦𑀼𑀭𑀽𑀧𑀁 𑀓𑀫𑁆𑀫𑀯𑀸𑀘𑀁 𑀓𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀘𑀺𑀡𑁆𑀡𑀫𑀸𑀦𑀢𑁆𑀢𑀲𑁆𑀲 𑀘 𑀢𑀤𑀦𑀼𑀭𑀽𑀧𑀫𑁂𑀯 𑀓𑀫𑁆𑀫𑀯𑀸𑀘𑀁 𑀓𑀢𑁆𑀯𑀸 𑀅𑀩𑁆𑀪𑀸𑀦𑀁 𑀓𑀸𑀢𑀩𑁆𑀩𑀁. 𑀇𑀥 𑀧𑀦 𑀏𑀓𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑀺 𑀬𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀸𑀯𑀲𑀸𑀦𑁂 𑀫𑀸𑀦𑀢𑁆𑀢𑀁 𑀤𑀺𑀬𑁆𑀬𑀢𑀺, 𑀇𑀤𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫. 𑀏𑀯𑀫𑁂𑀢𑁆𑀣 𑀏𑀓𑁂𑀦𑁂𑀯 𑀬𑁄𑀚𑀦𑀸𑀫𑀼𑀔𑁂𑀦 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀘 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀓𑁆𑀔𑀫𑀸𑀦𑀢𑁆𑀢𑀁 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀜𑁆𑀘 𑀅𑀯𑀲𑁂𑀲𑀧𑀭𑀺𑀯𑀸𑀲𑀓𑀣𑀸𑀯𑀲𑀸𑀦𑁂 𑀓𑀣𑀬𑀺𑀲𑁆𑀲𑀸𑀫.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀳𑀺 𑀤𑁆𑀯𑁂 𑀧𑀭𑀺𑀯𑀸𑀲𑀸 𑀅𑀯𑀲𑁂𑀲𑀸. 𑀢𑀢𑁆𑀣 ‘‘𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄’’ 𑀦𑀸𑀫 𑀧𑀭𑀢𑁄 𑀅𑀥𑀫𑁆𑀫𑀺𑀓𑀫𑀸𑀦𑀢𑁆𑀢𑀘𑀸𑀭𑀸𑀯𑀲𑀸𑀦𑁂 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺, 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑀧𑀭𑀺𑀯𑀸𑀲𑁄. 𑀲𑁄 𑀤𑀼𑀯𑀺𑀥𑁄 𑁋 𑀘𑀽𑀴𑀲𑀼𑀤𑁆𑀥𑀦𑁆𑀢𑁄, 𑀫𑀳𑀸𑀲𑀼𑀤𑁆𑀥𑀦𑁆𑀢𑁄𑀢𑀺. 𑀤𑀼𑀯𑀺𑀥𑁄𑀧𑀺 𑀘𑁂𑀲 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀲𑀓𑀮𑀁 𑀯𑀸 𑀏𑀓𑀘𑁆𑀘𑀁 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀘 𑀅𑀲𑁆𑀲𑀭𑀦𑁆𑀢𑀲𑁆𑀲 𑀘 𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀸𑀢𑀩𑁆𑀩𑁄. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀧𑀦 𑀏𑀢𑁆𑀢𑀓𑀸 𑀅𑀳𑀁 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄𑀢𑀺 𑀚𑀸𑀦𑀸𑀢𑀼 𑀯𑀸 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁.

𑀢𑀢𑁆𑀣 𑀬𑁄 𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀓𑁆𑀓𑀫𑁂𑀦 𑀯𑀸 𑀆𑀭𑁄𑀘𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀯𑀸 ‘‘𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀤𑀺𑀯𑀲𑀁 𑀯𑀸 𑀧𑀓𑁆𑀔𑀁 𑀯𑀸 𑀫𑀸𑀲𑀁 𑀯𑀸 𑀲𑀁𑀯𑀘𑁆𑀙𑀭𑀁 𑀯𑀸 𑀢𑀯 𑀲𑀼𑀤𑁆𑀥𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀺, 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀳𑀁 𑀲𑀼𑀤𑁆𑀥𑁄’’𑀢𑀺 𑀯𑀤𑀢𑀺, 𑀢𑀲𑁆𑀲 𑀤𑀺𑀦𑁆𑀦𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 ‘‘𑀘𑀽𑀴𑀲𑀼𑀤𑁆𑀥𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀲𑀦𑁆𑀢𑁂𑀦 𑀬𑀢𑁆𑀢𑀓𑀁 𑀓𑀸𑀮𑀁 𑀅𑀢𑁆𑀢𑀦𑁄 𑀲𑀼𑀤𑁆𑀥𑀺𑀁 𑀚𑀸𑀦𑀸𑀢𑀺, 𑀢𑀢𑁆𑀢𑀓𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀁 𑀫𑀸𑀲𑀁 𑀯𑀸 𑀤𑁆𑀯𑁂𑀫𑀸𑀲𑀁 𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀫𑀸𑀲𑀫𑀢𑁆𑀢𑀁 𑀅𑀲𑀼𑀤𑁆𑀥𑁄𑀫𑁆𑀳𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀺 𑀧𑀭𑀺𑀯𑀲𑀦𑁆𑀢𑁄 𑀘 𑀧𑀼𑀦 𑀅𑀜𑁆𑀜𑀁 𑀫𑀸𑀲𑀁 𑀲𑀭𑀢𑀺, 𑀢𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀲𑀺𑀢𑀩𑁆𑀩𑀫𑁂𑀯. 𑀧𑀼𑀦 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀣 𑀤𑁆𑀯𑁂𑀫𑀸𑀲𑀁 𑀅𑀲𑀼𑀤𑁆𑀥𑁄𑀫𑁆𑀳𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀺, 𑀧𑀭𑀺𑀯𑀲𑀦𑁆𑀢𑁄 𑀘 𑀫𑀸𑀲𑀫𑀢𑁆𑀢𑀫𑁂𑀯𑀸𑀳𑀁 𑀅𑀲𑀼𑀤𑁆𑀥𑁄𑀫𑁆𑀳𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀫𑀸𑀲𑀫𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀧𑀼𑀦 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀺, 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀺, 𑀇𑀤𑀫𑀲𑁆𑀲 𑀮𑀓𑁆𑀔𑀡𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂 𑀇𑀤𑀁 𑀮𑀓𑁆𑀔𑀡𑀁 𑁋 𑀬𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺 𑀯𑀼𑀝𑁆𑀞𑀸𑀢𑀺. 𑀬𑁄 𑀧𑀝𑀺𑀘𑁆𑀙𑀦𑁆𑀦𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀦 𑀯𑀼𑀝𑁆𑀞𑀸𑀢𑀺. 𑀅𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀁 𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀯𑀼𑀝𑁆𑀞𑀸𑀢𑀺. 𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀁 𑀅𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀓𑀭𑁄𑀦𑁆𑀢𑀲𑁆𑀲 𑀦 𑀯𑀼𑀝𑁆𑀞𑀸𑀢𑀺. 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀫𑁆𑀩𑀳𑀼𑀮𑀸𑀢𑀺 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀯𑀼𑀝𑁆𑀞𑀸𑀢𑀺, 𑀏𑀓𑀁 𑀯𑀺𑀦𑀸 𑀲𑀫𑁆𑀩𑀳𑀼𑀮𑀸𑀦𑀁 𑀅𑀪𑀸𑀯𑀢𑁄. 𑀲𑀫𑁆𑀩𑀳𑀼𑀮𑀸 𑀧𑀦 𑀆𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀆𑀧𑀚𑁆𑀚𑀺𑀦𑁆𑀢𑀺 𑀓𑀭𑁄𑀦𑁆𑀢𑀲𑁆𑀲 𑀦 𑀯𑀼𑀝𑁆𑀞𑀸𑀢𑀺.

𑀬𑁄 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑁂𑀦 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺 𑀦𑁂𑀯 𑀲𑀭𑀢𑀺 𑀯𑁂𑀫𑀢𑀺𑀓𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀤𑀺𑀦𑁆𑀦𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 ‘‘𑀫𑀳𑀸𑀲𑀼𑀤𑁆𑀥𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀕𑀳𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀲𑀫𑁆𑀧𑀤𑀤𑀺𑀯𑀲𑁄, 𑀢𑀸𑀯 𑀭𑀢𑁆𑀢𑀺𑀬𑁄 𑀕𑀡𑁂𑀢𑁆𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀅𑀬𑀁 𑀉𑀤𑁆𑀥𑀁 𑀦𑀸𑀭𑁄𑀳𑀢𑀺, 𑀳𑁂𑀝𑁆𑀞𑀸 𑀧𑀦 𑀑𑀭𑁄𑀳𑀢𑀺. 𑀢𑀲𑁆𑀫𑀸 𑀲𑀘𑁂 𑀧𑀭𑀺𑀯𑀲𑀦𑁆𑀢𑁄 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀫𑀸𑀲𑁄 𑀯𑀸 𑀲𑀁𑀯𑀘𑁆𑀙𑀭𑁄 𑀯𑀸 𑀫𑀬𑁆𑀳𑀁 𑀆𑀧𑀦𑁆𑀦𑀲𑁆𑀲𑀸𑀢𑀺 𑀫𑀸𑀲𑀁 𑀯𑀸 𑀲𑀁𑀯𑀘𑁆𑀙𑀭𑀁 𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀧𑀭𑀺𑀯𑀸𑀲𑀬𑀸𑀘𑀦𑀤𑀸𑀦𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀧𑀭𑀢𑁄 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀯𑀢𑁆𑀢𑀲𑀫𑀸𑀤𑀸𑀦𑀫𑀸𑀦𑀢𑁆𑀢𑀅𑀩𑁆𑀪𑀸𑀦𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀅𑀬𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫.

‘‘𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄’’ 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀺 𑁋 𑀑𑀥𑀸𑀦𑀲𑀫𑁄𑀥𑀸𑀦𑁄, 𑀅𑀕𑁆𑀖𑀲𑀫𑁄𑀥𑀸𑀦𑁄, 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄𑀢𑀺. 𑀢𑀢𑁆𑀣 ‘‘𑀑𑀥𑀸𑀦𑀲𑀫𑁄𑀥𑀸𑀦𑁄’’ 𑀦𑀸𑀫 𑁋 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀑𑀥𑀼𑀦𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀫𑀽𑀮𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁂 𑀧𑀘𑁆𑀙𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀲𑀫𑁄𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀯𑀼𑀘𑁆𑀘𑀢𑀺. 𑀲𑁄 𑀧𑀭𑀢𑁄 ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀽’’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀯𑀺𑀢𑁆𑀣𑀸𑀭𑀢𑁄 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑁄.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀲𑀦𑁆𑀢𑁄 𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀯𑀸 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀯𑀸 𑀅𑀩𑁆𑀪𑀸𑀦𑀸𑀭𑀳𑁄 𑀯𑀸 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑀸 𑀯𑀸 𑀊𑀦𑀢𑀭𑀸 𑀯𑀸 𑀭𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀘 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑁂 𑀘 𑀲𑀩𑁆𑀩𑁂 𑀑𑀥𑀼𑀦𑀺𑀢𑁆𑀯𑀸 𑀅𑀤𑀺𑀯𑀲𑁂 𑀓𑀢𑁆𑀯𑀸 𑀧𑀘𑁆𑀙𑀸 𑀆𑀧𑀦𑁆𑀦𑀸𑀧𑀢𑁆𑀢𑀺𑀁 𑀫𑀽𑀮𑀸𑀧𑀢𑁆𑀢𑀺𑀬𑀁 𑀲𑀫𑁄𑀥𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀢𑁂𑀦 𑀲𑀘𑁂 𑀫𑀽𑀮𑀸𑀧𑀢𑁆𑀢𑀺 𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀸, 𑀅𑀦𑁆𑀢𑀭𑀸𑀧𑀢𑁆𑀢𑀺 𑀊𑀦𑀓𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀸, 𑀧𑀼𑀦 𑀧𑀓𑁆𑀔𑀫𑁂𑀯 𑀧𑀭𑀺𑀯𑀸𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄. 𑀅𑀣𑀸𑀧𑀺 𑀅𑀦𑁆𑀢𑀭𑀸𑀧𑀢𑁆𑀢𑀺 𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀸𑀯 𑀧𑀓𑁆𑀔𑀫𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀲𑀝𑁆𑀞𑀺𑀯𑀲𑁆𑀲𑀧𑀝𑀺𑀘𑁆𑀙𑀦𑁆𑀦𑀸 𑀫𑀽𑀮𑀸𑀧𑀢𑁆𑀢𑀺, 𑀢𑀸𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀢𑁆𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀳𑀼𑀢𑁆𑀯𑀸𑀧𑀺 𑀳𑀺 𑀏𑀓𑀤𑀺𑀯𑀲𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦𑀧𑀺 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀭𑀺𑀯𑀸𑀲𑀸𑀭𑀳𑁄 𑀳𑁄𑀢𑀺.

𑀲𑀘𑁂 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀺 𑀫𑀽𑀮𑀸𑀧𑀢𑁆𑀢𑀺𑀢𑁄 𑀅𑀢𑀺𑀭𑁂𑀓𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀢𑁆𑀣 ‘‘𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳 𑁋 ‘‘𑀅𑀢𑁂𑀓𑀺𑀘𑁆𑀙𑁄 𑀅𑀬𑀁 𑀧𑀼𑀕𑁆𑀕𑀮𑁄, 𑀅𑀢𑁂𑀓𑀺𑀘𑁆𑀙𑁄 𑀦𑀸𑀫 𑀆𑀯𑀺𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀲𑁆𑀫𑀸 𑀅𑀢𑁂𑀓𑀺𑀘𑁆𑀙𑁄 𑀦𑀸𑀫, 𑀦𑀦𑀼 𑀅𑀬𑀁 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁄 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀞𑀺𑀢𑀓𑀸𑀮𑀲𑀤𑀺𑀲𑁄, 𑀆𑀧𑀢𑁆𑀢𑀺 𑀦𑀸𑀫 𑀧𑀝𑀺𑀘𑁆𑀙𑀦𑁆𑀦𑀸 𑀯𑀸 𑀳𑁄𑀢𑀼 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀯𑀸 𑀲𑀫𑀓𑀊𑀦𑀢𑀭𑀅𑀢𑀺𑀭𑁂𑀓𑀧𑀝𑀺𑀘𑁆𑀙𑀦𑁆𑀦𑀸 𑀯𑀸 𑀯𑀺𑀦𑀬𑀥𑀭𑀲𑁆𑀲 𑀓𑀫𑁆𑀫𑀯𑀸𑀘𑀁 𑀬𑁄𑀚𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑁄𑀬𑁂𑀯𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 𑀬𑀸 𑀅𑀢𑀺𑀭𑁂𑀓𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀁 𑀫𑀽𑀮𑀸𑀧𑀢𑁆𑀢𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀇𑀢𑀭𑀁 𑀲𑀫𑁄𑀥𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄’’𑀢𑀺. 𑀅𑀬𑀁 ‘‘𑀑𑀥𑀸𑀦𑀲𑀫𑁄𑀥𑀸𑀦𑁄’’ 𑀦𑀸𑀫.

‘‘𑀅𑀕𑁆𑀖𑀲𑀫𑁄𑀥𑀸𑀦𑁄’’ 𑀦𑀸𑀫 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼 𑀬𑀸 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀬 𑀢𑀸𑀲𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀅𑀯𑀲𑁂𑀲𑀸𑀦𑀁 𑀊𑀦𑀢𑀭𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀁 𑀧𑀭𑀺𑀯𑀸𑀲𑁄 𑀤𑀺𑀬𑁆𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀕𑁆𑀖𑀲𑀫𑁄𑀥𑀸𑀦𑁄. 𑀲𑁄𑀧𑀺 𑀧𑀭𑀢𑁄 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺, 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸 𑀏𑀓𑀸 𑀆𑀧𑀢𑁆𑀢𑀺 𑀤𑁆𑀯𑀻𑀳𑀧𑀝𑀺𑀘𑁆𑀙𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀬𑀁 𑀆𑀕𑀢𑁄𑀬𑁂𑀯.

𑀬𑀲𑁆𑀲 𑀧𑀦 𑀲𑀢𑀁 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸, 𑀅𑀧𑀭𑀫𑁆𑀧𑀺 𑀲𑀢𑀁 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀏𑀯𑀁 𑀤𑀲𑀓𑁆𑀔𑀢𑁆𑀢𑀼𑀁 𑀓𑀢𑁆𑀯𑀸 𑀆𑀧𑀢𑁆𑀢𑀺𑀲𑀳𑀲𑁆𑀲𑀁 𑀤𑀺𑀯𑀲𑀲𑀢𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀲𑀩𑁆𑀩𑀁 𑀲𑀫𑁄𑀤𑀳𑀺𑀢𑁆𑀯𑀸 𑀤𑀲 𑀤𑀺𑀯𑀲𑁂 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀏𑀯𑀁 𑀏𑀓𑁂𑀦𑁂𑀯 𑀤𑀲𑀸𑀳𑁂𑀦 𑀤𑀺𑀯𑀲𑀲𑀢𑀫𑁆𑀧𑀺 𑀧𑀭𑀺𑀯𑀲𑀺𑀢𑀫𑁂𑀯 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀲𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄’’𑀢𑀺. (𑀧𑀭𑀺. 𑁪𑁭𑁭);

𑀅𑀬𑀁 𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫.

‘‘𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄’’ 𑀦𑀸𑀫 𑁋 𑀬𑁄 𑀦𑀸𑀦𑀸𑀯𑀢𑁆𑀣𑀼𑀓𑀸 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀤𑀺𑀬𑁆𑀬𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋

‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁, 𑀏𑀓𑀁 𑀓𑀸𑀬𑀲𑀁𑀲𑀕𑁆𑀕𑀁, 𑀏𑀓𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀁, 𑀏𑀓𑀁 𑀅𑀢𑁆𑀢𑀓𑀸𑀫𑀁, 𑀏𑀓𑀁 𑀲𑀜𑁆𑀘𑀭𑀺𑀢𑁆𑀢𑀁, 𑀏𑀓𑀁 𑀓𑀼𑀝𑀺𑀓𑀸𑀭𑀁, 𑀏𑀓𑀁 𑀯𑀺𑀳𑀸𑀭𑀓𑀸𑀭𑀁, 𑀏𑀓𑀁 𑀤𑀼𑀝𑁆𑀞𑀤𑁄𑀲𑀁, 𑀏𑀓𑀁 𑀅𑀜𑁆𑀜𑀪𑀸𑀕𑀺𑀬𑀁, 𑀏𑀓𑀁 𑀲𑀗𑁆𑀖𑀪𑁂𑀤𑀁, 𑀏𑀓𑀁 𑀪𑁂𑀤𑀸𑀦𑀼𑀯𑀢𑁆𑀢𑀓𑀁, 𑀏𑀓𑀁 𑀤𑀼𑀩𑁆𑀩𑀘𑀁, 𑀏𑀓𑀁 𑀓𑀼𑀮𑀤𑀽𑀲𑀓𑀁, 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺 𑁋

𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀸𑀬 𑀓𑀫𑁆𑀫𑀯𑀸𑀘𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑀏𑀢𑁆𑀣 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄𑀢𑀺𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀦𑁆𑀢𑀺𑀧𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀯𑀲𑁂𑀦𑀧𑀺 𑀕𑁄𑀢𑁆𑀢𑀯𑀲𑁂𑀦𑀧𑀺 𑀦𑀸𑀫𑀯𑀲𑁂𑀦𑀧𑀺 𑀆𑀧𑀢𑁆𑀢𑀺𑀯𑀲𑁂𑀦𑀧𑀺 𑀬𑁄𑀚𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀅𑀬𑀁 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄. 𑀲𑀩𑁆𑀩𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀯𑀲𑀸𑀦𑁂 𑀧𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀤𑀺𑀓𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀭𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀧𑀓𑁆𑀔𑀫𑀸𑀦𑀢𑁆𑀢𑀜𑁆𑀘 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀜𑁆𑀘 𑀅𑀯𑀲𑁂𑀲𑀧𑀭𑀺𑀯𑀸𑀲𑀓𑀣𑀸𑀯𑀲𑀸𑀦𑁂 𑀓𑀣𑀬𑀺𑀲𑁆𑀲𑀸𑀫𑀸’’𑀢𑀺, 𑀢𑀲𑁆𑀲𑁄𑀓𑀸𑀲𑁄 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀯𑀼𑀘𑁆𑀘𑀢𑀺 𑁋 ‘‘𑀧𑀓𑁆𑀔𑀫𑀸𑀦𑀢𑁆𑀢’’𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀁. 𑀢𑀁 𑀧𑀦 𑀧𑀝𑀺𑀘𑁆𑀙𑀦𑁆𑀦𑀸𑀬𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀅𑀟𑁆𑀠𑀫𑀸𑀲𑀫𑁂𑀯 𑀤𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁪𑁦𑁩). 𑀢𑀁 𑀧𑀦 𑀪𑀺𑀓𑁆𑀔𑀼𑀦𑀻𑀳𑀺 𑀅𑀢𑁆𑀢𑀦𑁄 𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀯𑀺𑀳𑀸𑀭𑀲𑀻𑀫𑀁 𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻𑀳𑀺 𑀔𑀡𑁆𑀟𑀲𑀻𑀫𑀸𑀬 𑀯𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀯𑀕𑁆𑀕𑀕𑀡𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀏𑀓𑀺𑀲𑁆𑀲𑀸 𑀯𑀲𑁂𑀦, 𑀲𑀘𑁂 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀯𑀢𑁆𑀣𑀼𑀓𑀸 𑀯𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀯𑀸 𑀢𑀸𑀲𑀁 𑀢𑀸𑀲𑀁 𑀯𑀲𑁂𑀦 𑀯𑀢𑁆𑀣𑀼𑀕𑁄𑀢𑁆𑀢𑀦𑀸𑀫𑀆𑀧𑀢𑁆𑀢𑀻𑀲𑀼 𑀬𑀁 𑀬𑀁 𑀇𑀘𑁆𑀙𑀢𑀺 𑀢𑀁 𑀢𑀁 𑀆𑀤𑀸𑀬 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑀢𑁆𑀭𑀺𑀤𑀁 𑀏𑀓𑀸𑀧𑀢𑁆𑀢𑀺𑀯𑀲𑁂𑀦 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁, 𑀢𑀸𑀬 𑀆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀅𑀬𑁆𑀬𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀕𑀸𑀫𑀦𑁆𑀢𑀭𑀁, 𑀲𑀸𑀳𑀁, 𑀅𑀬𑁆𑀬𑁂, 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’’𑀢𑀺.

𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂 𑀅𑀬𑁆𑀬𑁂 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀕𑀸𑀫𑀦𑁆𑀢𑀭𑀁, 𑀲𑀸 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂 𑀅𑀬𑁆𑀬𑁂 𑀲𑀗𑁆𑀖𑁄, 𑀅𑀬𑀁…𑀧𑁂… 𑀤𑀼𑀢𑀺𑀬𑀫𑁆𑀧𑀺… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀲𑀼𑀡𑀸𑀢𑀼 𑀫𑁂 𑀅𑀬𑁆𑀬𑁂 𑀲𑀗𑁆𑀖𑁄…𑀧𑁂… 𑀤𑁂𑀢𑀺… 𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻; 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀁 𑀯𑀲𑀺𑀢𑀼𑀓𑀸𑀫𑀸𑀬 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀧𑀓𑁆𑀓𑀦𑁆𑀢𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀏𑀓𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀤𑀼𑀢𑀺𑀬𑀺𑀓𑀸𑀬 𑀯𑀸 𑀲𑀦𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀜𑁆𑀜𑀺𑀲𑁆𑀲𑀸 𑀧𑀦 𑀆𑀕𑀦𑁆𑀢𑀼𑀓𑀸𑀬 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀧𑀼𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁 𑀦 𑀮𑀪𑀢𑀺. ‘‘𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀲𑁆𑀲𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀳𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀗𑁆𑀕𑀸𑀳𑀓𑀧𑀓𑁆𑀔𑁂 𑀞𑀺𑀢𑁄 𑀏𑀓𑁄 𑀫𑀳𑀸𑀣𑁂𑀭𑁄 𑀯𑀸 𑀥𑀫𑁆𑀫𑀓𑀣𑀺𑀓𑁄 𑀯𑀸 𑀪𑀺𑀓𑁆𑀔𑀼 𑀯𑀢𑁆𑀢𑀩𑁆𑀩𑁄 𑁋 ‘‘𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀫𑀢𑁆𑀣𑀺, 𑀢𑀢𑁆𑀭 𑀦𑁄 𑀅𑀬𑁆𑀬𑀸, 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑁂𑀲𑁂𑀣𑀸’’𑀢𑀺. 𑀲𑀗𑁆𑀕𑀳𑀁 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺, 𑀧𑁂𑀲𑁂𑀲𑁆𑀲𑀸𑀫𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀘𑀢𑀽𑀳𑀺 𑀧𑀓𑀢𑀢𑁆𑀢𑀪𑀺𑀓𑁆𑀔𑀼𑀦𑀻𑀳𑀺 𑀫𑀸𑀦𑀢𑁆𑀢𑀘𑀸𑀭𑀺𑀦𑀺𑀁 𑀪𑀺𑀓𑁆𑀔𑀼𑀦𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀕𑀼𑀫𑁆𑀩𑀯𑀢𑀺𑀆𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀯𑀺𑀳𑀸𑀭𑀽𑀧𑀘𑀸𑀭𑀢𑁄𑀧𑀺 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸 𑀘𑀢𑀽𑀳𑀺 𑀧𑀓𑀢𑀢𑁆𑀢𑀪𑀺𑀓𑁆𑀔𑀽𑀳𑀺𑀧𑀺 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀕𑀦𑁆𑀢𑁆𑀯𑀸 𑀧𑀦 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀦 𑀏𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀓𑀼𑀭𑀼𑀦𑁆𑀤𑀺𑀫𑀳𑀸𑀧𑀘𑁆𑀘𑀭𑀻𑀲𑀼 𑀧𑀦 ‘‘𑀪𑀺𑀓𑁆𑀔𑀼𑀦𑀻𑀳𑀺𑀧𑀺 𑀩𑁆𑀬𑀢𑁆𑀢𑀁 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀉𑀧𑀸𑀲𑀺𑀓𑀸𑀬𑁄 𑀪𑀺𑀓𑁆𑀔𑀽𑀳𑀺𑀧𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀉𑀧𑀸𑀲𑀓𑁂 𑀅𑀢𑁆𑀢𑀭𑀓𑁆𑀔𑀡𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁𑀬𑁂𑀯 𑀘 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑁆𑀲 𑀘 𑀯𑀺𑀳𑀸𑀭𑀲𑁆𑀲 𑀘 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀕𑀸𑀫𑀲𑁆𑀲𑀸𑀢𑀺 𑀦 𑀯𑀼𑀢𑁆𑀢𑀁.

𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀦 𑀪𑀺𑀓𑁆𑀔𑀽𑀲𑀼 𑀘 𑀪𑀺𑀓𑁆𑀔𑀼𑀦𑀻𑀲𑀼 𑀘 𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 ‘‘𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲 𑀢𑀸𑀯 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 𑁋

‘‘𑀅𑀳𑀁, 𑀅𑀬𑁆𑀬𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀕𑀸𑀫𑀦𑁆𑀢𑀭𑀁, 𑀲𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀕𑀸𑀫𑀦𑁆𑀢𑀭𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀅𑀤𑀸𑀲𑀺, 𑀲𑀸𑀳𑀁 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀸𑀫𑀺, ‘𑀯𑁂𑀤𑀬𑀸𑀫𑀳𑀁, 𑀅𑀬𑁆𑀬𑁂, 𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺.

𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 𑁋 ‘‘𑀅𑀳𑀁, 𑀅𑀬𑁆𑀬𑀸, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 …𑀧𑁂… 𑀯𑁂𑀤𑀬𑀸𑀫𑀳𑀁, 𑀅𑀬𑁆𑀬𑀸, 𑀯𑁂𑀤𑀬𑀢𑀻𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺. 𑀇𑀥𑀸𑀧𑀺 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺.

𑀆𑀭𑁄𑀘𑁂𑀢𑁆𑀯𑀸 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀆𑀭𑁄𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑀸𑀲𑀗𑁆𑀓𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀢𑀢𑁆𑀣𑁂𑀯 𑀞𑀸𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀢𑀁 𑀞𑀸𑀦𑀁 𑀏𑀢𑀺, 𑀧𑀲𑁆𑀲𑀦𑁆𑀢𑀺𑀬𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀦𑁄 𑀘𑁂 𑀆𑀭𑁄𑀘𑁂𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀲𑀘𑁂 𑀅𑀚𑀸𑀦𑀦𑁆𑀢𑀺𑀬𑀸 𑀏𑀯 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀢𑁆𑀢𑀓𑀭𑀡𑀢𑁆𑀣𑀁 𑀧𑀕𑁂𑀯 𑀕𑀦𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀑𑀳𑀻𑀬𑀦𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺𑀭𑀓𑁆𑀔𑀡𑀢𑁆𑀣𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀢𑀸𑀬 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀏𑀢𑁂𑀦𑀼𑀧𑀸𑀬𑁂𑀦 𑀅𑀔𑀡𑁆𑀟𑀸 𑀧𑀜𑁆𑀘𑀤𑀲 𑀭𑀢𑁆𑀢𑀺𑀬𑁄 𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁.

𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀬 𑀧𑀦 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀬𑀢𑁆𑀢𑀓𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀢𑀁 𑀕𑀸𑀫𑀁 𑀪𑀺𑀓𑁆𑀔𑀽 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀦𑀸𑀭𑁄𑀘𑁂𑀦𑁆𑀢𑀺𑀬𑀸 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀲𑀘𑁂𑀧𑀺 𑀭𑀢𑁆𑀢𑀺𑀁 𑀓𑁄𑀘𑀺 𑀪𑀺𑀓𑁆𑀔𑀼 𑀢𑀁 𑀕𑀸𑀫𑀽𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺𑀬𑁂𑀯, 𑀅𑀚𑀸𑀦𑀦𑀧𑀘𑁆𑀘𑀬𑀸 𑀧𑀦 𑀯𑀢𑁆𑀢𑀪𑁂𑀤𑀢𑁄 𑀫𑀼𑀘𑁆𑀘𑀢𑀺. 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼 𑀧𑀦 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀪𑀺𑀓𑁆𑀔𑀽𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀣𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀸𑀤𑀻𑀦𑀁 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑀼𑀢𑁆𑀢𑀢𑀭𑀁 𑀤𑀺𑀲𑁆𑀲𑀢𑀺. 𑀉𑀧𑁄𑀲𑀣𑁂 𑀆𑀭𑁄𑀘𑁂𑀢𑀩𑁆𑀩𑀁, 𑀧𑀯𑀸𑀭𑀡𑀸𑀬 𑀆𑀭𑁄𑀘𑁂𑀢𑀩𑁆𑀩𑀁, 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀪𑀺𑀓𑁆𑀔𑀽𑀦𑀁 𑀢𑀲𑁆𑀫𑀺𑀁 𑀕𑀸𑀫𑁂 𑀪𑀺𑀓𑁆𑀔𑀸𑀘𑀸𑀭𑁄 𑀲𑀫𑁆𑀧𑀚𑁆𑀚𑀢𑀺, 𑀢𑀢𑁆𑀣𑁂𑀯 𑀕𑀦𑁆𑀢𑀩𑁆𑀩𑀁. 𑀦𑁄 𑀘𑁂 𑀲𑀫𑁆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀘𑀭𑀺𑀢𑁆𑀯𑀸𑀧𑀺 𑀢𑀢𑁆𑀭 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀩𑀳𑀺𑀕𑀸𑀫𑁂 𑀯𑀸 𑀲𑀗𑁆𑀓𑁂𑀢𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀅𑀫𑁆𑀳𑁂 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺. 𑀢𑀸𑀬 𑀲𑀗𑁆𑀓𑁂𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀗𑁆𑀓𑁂𑀢𑀝𑁆𑀞𑀸𑀦𑁂 𑀅𑀤𑀺𑀲𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀯𑀺𑀳𑀸𑀭𑁂 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀲𑀩𑁆𑀩𑁂𑀲𑀁 𑀲𑀓𑁆𑀓𑀸 𑀦 𑀳𑁄𑀢𑀺 𑀆𑀭𑁄𑀘𑁂𑀢𑀼𑀁, 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑁂𑀲𑁂𑀢𑀩𑁆𑀩𑀸. 𑀢𑀸𑀳𑀺 𑀆𑀦𑀻𑀢𑀸𑀦𑀁 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁄 𑀤𑀽𑀭𑁄 𑀳𑁄𑀢𑀺 𑀲𑀸𑀲𑀗𑁆𑀓𑁄, 𑀉𑀧𑀸𑀲𑀓𑁂 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀅𑀬𑀁 𑀏𑀓𑀸 𑀯𑀲𑀢𑀺, 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸𑀲𑁆𑀲𑀸 𑀏𑀓𑀸 𑀧𑀓𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀻 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑀸𑀢𑀩𑁆𑀩𑀸 𑀏𑀓𑀘𑁆𑀙𑀦𑁆𑀦𑁂 𑀯𑀲𑀦𑀢𑁆𑀣𑀸𑀬.

𑀏𑀯𑀁 𑀅𑀔𑀡𑁆𑀟𑀁 𑀫𑀸𑀦𑀢𑁆𑀢𑀁 𑀘𑀭𑀺𑀢𑁆𑀯𑀸 𑀯𑀻𑀲𑀢𑀺𑀕𑀡𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀩𑁆𑀪𑀸𑀦𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀫𑀸𑀦𑀢𑁆𑀢𑀁 𑀘𑀭𑀫𑀸𑀦𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀇𑀤𑀁 ‘‘𑀧𑀓𑁆𑀔𑀫𑀸𑀦𑀢𑁆𑀢𑀁’’ 𑀦𑀸𑀫.

‘‘𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁’’ 𑀧𑀦 𑀢𑀺𑀯𑀺𑀥𑀁 𑀳𑁄𑀢𑀺 𑁋 𑀑𑀥𑀸𑀦𑀲𑀫𑁄𑀥𑀸𑀦𑀁, 𑀅𑀕𑁆𑀖𑀲𑀫𑁄𑀥𑀸𑀦𑀁, 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀦𑁆𑀢𑀺. 𑀢𑀢𑁆𑀣 𑀬𑀤𑁂𑀢𑀁 𑀧𑀭𑀢𑁄 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀲𑁆𑀲 𑀧𑀭𑀺𑀯𑀸𑀲𑁂 𑀘 𑀫𑀸𑀦𑀢𑁆𑀢𑀸𑀭𑀳𑀝𑁆𑀞𑀸𑀦𑁂 𑀘 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀲𑁆𑀲 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀽’’𑀢𑀺 𑀫𑀸𑀦𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁, 𑀇𑀤𑀁 ‘‘𑀑𑀥𑀸𑀦𑀲𑀫𑁄𑀥𑀸𑀦𑀁’’ 𑀦𑀸𑀫. 𑀇𑀤𑀜𑁆𑀳𑀺 𑀧𑀼𑀦𑀧𑁆𑀧𑀼𑀦𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀑𑀥𑀼𑀦𑀺𑀢𑁆𑀯𑀸 𑀧𑀼𑀭𑀺𑀫𑀸𑀧𑀢𑁆𑀢𑀻𑀳𑀺 𑀲𑀤𑁆𑀥𑀺𑀁 𑀲𑀫𑁄𑀥𑀸𑀬 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀑𑀥𑀸𑀦𑀲𑀫𑁄𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀯𑀼𑀢𑁆𑀣𑀲𑁆𑀲 𑀤𑀸𑀢𑀩𑁆𑀩𑀁 𑀫𑀸𑀦𑀢𑁆𑀢𑀁 𑀲𑀫𑁄𑀥𑀸𑀦𑀫𑀸𑀦𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺.

𑀅𑀕𑁆𑀖𑀲𑀫𑁄𑀥𑀸𑀦𑀁 𑀧𑀦 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀜𑁆𑀘 𑀅𑀕𑁆𑀖𑀲𑀫𑁄𑀥𑀸𑀦𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀸𑀯𑀲𑀸𑀦𑁂 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀫𑁂𑀯 𑀯𑀼𑀘𑁆𑀘𑀢𑀺, 𑀢𑀁 𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀦𑀼𑀲𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀬𑀁 𑀯𑀼𑀢𑁆𑀢𑀁 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀬𑀁 𑀅𑀦𑁂𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀯𑀸𑀲𑁄 𑀘 𑀫𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀁, 𑀢𑀲𑁆𑀲 𑀬𑀲𑁆𑀫𑀸 𑀆𑀕𑀢𑀸𑀕𑀢𑀞𑀸𑀦𑁂 𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀫𑀸𑀦𑁄 𑀧𑀸𑀴𑀺 𑀯𑀺𑀬 𑀅𑀢𑀺𑀯𑀺𑀢𑁆𑀣𑀸𑀭𑀁 𑀆𑀧𑀚𑁆𑀚𑀢𑀺, 𑀦 𑀘 𑀲𑀓𑁆𑀓𑀸 𑀳𑁄𑀢𑀺 𑀲𑀼𑀔𑁂𑀦 𑀧𑀭𑀺𑀕𑁆𑀕𑀳𑁂𑀢𑀼𑀁, 𑀢𑀲𑁆𑀫𑀸 𑀦𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀥𑁂𑀯 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺, 𑀢𑀤𑀺𑀤𑀁 𑀅𑀢𑁆𑀣𑀢𑁄 𑀲𑀫𑁆𑀧𑀸𑀤𑀺𑀢𑀁 𑀳𑁄𑀢𑀺.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸

𑁧𑁦𑁨. 𑀇𑀤𑀸𑀦𑀺 𑀬𑀸 𑀢𑀸𑀯 𑀅𑀬𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀧𑀸𑀴𑀺 𑀯𑀼𑀢𑁆𑀢𑀸, 𑀲𑀸 𑀉𑀢𑁆𑀢𑀸𑀦𑀢𑁆𑀣𑀸𑀯.

𑁧𑁦𑁮. 𑀢𑀢𑁄 𑀧𑀭𑀁 𑀤𑁆𑀯𑀻𑀳𑀢𑀻𑀳𑀘𑀢𑀽𑀳𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀯𑀲𑁂𑀦 𑀧𑀸𑀴𑀺𑀁 𑀯𑀢𑁆𑀯𑀸 𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀭𑀺𑀯𑀸𑀲𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀬𑀲𑁆𑀫𑀸 𑀧𑀦 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀢𑁆𑀣 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀅𑀦𑀼𑀜𑁆𑀜𑀸𑀢𑀁. 𑀲𑀘𑁂 𑀧𑀦 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀦 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀆𑀧𑀦𑁆𑀦𑁄, 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑁄 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀯𑀺𑀲𑀼𑀁 𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀧𑀭𑀺𑀯𑀸𑀲𑁄𑀧𑀺 𑀯𑀲𑀺𑀢𑀩𑁆𑀩𑁄. 𑀬𑀜𑁆𑀘𑁂𑀢𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀓𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸 𑀫𑀓𑁆𑀔𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀧𑀭𑀺𑀯𑀸𑀲𑁂 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀓𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀢𑀸𑀲𑀁 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀆𑀧𑀢𑁆𑀢𑀻𑀦𑀁 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀢𑀢𑁄 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀧𑀦 𑀧𑀝𑀺𑀓𑀲𑁆𑀲𑀦𑁂 𑀓𑀢𑁂 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑀸𑀧𑀺 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸𑀧𑀺 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀢𑁄 𑀅𑀩𑁆𑀪𑀸𑀦𑀸𑀭𑀳𑀲𑁆𑀲 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀫𑁆𑀧𑀺 𑀓𑀢𑁂 𑀲𑀩𑁆𑀩𑁂 𑀢𑁂 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀁 𑀲𑀩𑁆𑀩𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑁄 𑀬𑁄𑀚𑁂𑀢𑁆𑀯𑀸 𑀅𑀩𑁆𑀪𑀸𑀦𑀓𑀫𑁆𑀫𑀁 𑀤𑀲𑁆𑀲𑀺𑀢𑀁. 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑀯𑀸𑀭𑁂 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀤𑀺𑀯𑀲𑁂𑀦 𑀧𑀜𑁆𑀘, 𑀅𑀦𑁆𑀢𑀭𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑀲𑁆𑀲𑁄𑀢𑀺 𑀦𑀯 𑀓𑀫𑁆𑀫𑀯𑀸𑀘𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸

𑁧𑁨𑁫. 𑀢𑀢𑁄 𑀧𑀭𑀁 𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑁆𑀢𑁄𑀧𑀭𑀺𑀯𑀸𑀲𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀯𑀲𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀘, 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀜𑁆𑀘 𑀤𑀲𑁆𑀲𑀺𑀢𑀁. 𑀏𑀢𑁆𑀣 𑀘 𑀫𑀸𑀦𑀢𑁆𑀢𑀘𑀸𑀭𑀺𑀓𑀫𑀸𑀦𑀢𑁆𑀢𑀸𑀭𑀳𑀓𑀸𑀮𑁂𑀧𑀺 𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂 𑀓𑀢𑁂 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑀸𑀧𑀺 𑀧𑀭𑀺𑀯𑀸𑀲𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸𑀧𑀺 𑀲𑀩𑁆𑀩𑁂 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀸 𑀅𑀦𑁆𑀢𑀭𑀸𑀧𑀢𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀽’’𑀢𑀺. 𑀢𑀢𑁄 𑀧𑀭𑀁 𑀲𑀩𑁆𑀩𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑁄 𑀬𑁄𑀚𑁂𑀢𑁆𑀯𑀸 𑀅𑀩𑁆𑀪𑀸𑀦𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀯𑀢𑁆𑀣𑀼 𑀦𑀺𑀝𑁆𑀞𑀸𑀧𑀺𑀢𑀁.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸 𑀘 𑀦𑀺𑀝𑁆𑀞𑀺𑀢𑀸.

𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸

𑁧𑁩𑁪. 𑀢𑀢𑁄 𑀏𑀓𑀸𑀧𑀢𑁆𑀢𑀺𑀫𑀽𑀮𑀓𑀜𑁆𑀘 𑀆𑀧𑀢𑁆𑀢𑀺𑀯𑀟𑁆𑀠𑀦𑀓𑀜𑁆𑀘𑀸𑀢𑀺 𑀤𑁆𑀯𑁂 𑀦𑀬𑁂 𑀤𑀲𑁆𑀲𑁂𑀢𑁆𑀯𑀸 𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀲𑁆𑀲𑀺𑀢𑁄.

𑀢𑀢𑁄 𑀲𑀜𑁆𑀘𑀺𑀘𑁆𑀘 𑀅𑀦𑀸𑀭𑁄𑀘𑀺𑀢𑀸𑀧𑀢𑁆𑀢𑀺𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀲𑀜𑁆𑀘𑀺𑀘𑁆𑀘 𑀅𑀚𑀸𑀦𑀦𑀅𑀲𑁆𑀲𑀭𑀡𑀯𑁂𑀫𑀢𑀺𑀓𑀪𑀸𑀯𑁂𑀳𑀺 𑀅𑀦𑀸𑀭𑁄𑀘𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀧𑀘𑁆𑀙𑀸 𑀮𑀚𑁆𑀚𑀺𑀥𑀫𑁆𑀫𑁂 𑀯𑀸 𑀜𑀸𑀡𑀲𑀭𑀡𑀦𑀺𑀩𑁆𑀩𑁂𑀫𑀢𑀺𑀓𑀪𑀸𑀯𑁂𑀲𑀼 𑀯𑀸 𑀉𑀧𑁆𑀧𑀦𑁆𑀦𑁂𑀲𑀼 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺 𑀞𑀧𑀺𑀢𑀸. 𑀢𑀢𑁄 𑀅𑀚𑀸𑀦𑀦𑀅𑀲𑁆𑀲𑀭𑀡𑀯𑁂𑀫𑀢𑀺𑀓𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀢𑀣𑁂𑀯 𑀧𑀸𑀴𑀺 𑀞𑀧𑀺𑀢𑀸.

𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀓𑀣𑀸

𑁧𑁩𑁮. 𑀢𑀢𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀬𑀸𑀘𑀦𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀅𑀲𑀜𑁆𑀘𑀺𑀘𑁆𑀘 𑀅𑀚𑀸𑀦𑀦𑀅𑀲𑁆𑀲𑀭𑀡𑀯𑁂𑀫𑀢𑀺𑀓𑀪𑀸𑀯𑁂𑀳𑀺 𑀅𑀦𑀸𑀭𑁄𑀘𑀺𑀢𑁂 𑀇𑀢𑀭𑀲𑁆𑀫𑀺𑀁 𑀫𑀸𑀲𑁂 𑀧𑀘𑁆𑀙𑀸 𑀮𑀚𑁆𑀚𑀺𑀥𑀫𑁆𑀫𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀚𑀸𑀦𑀦𑀅𑀲𑁆𑀲𑀭𑀡𑀯𑁂𑀫𑀢𑀺𑀓𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀘 𑀆𑀧𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀸𑀴𑀺 𑀞𑀧𑀺𑀢𑀸.

𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀸𑀤𑀺𑀓𑀣𑀸

𑁧𑁫𑁬. 𑀢𑀢𑁄 ‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀲𑁆𑀲𑀺𑀢𑁄.

𑁧𑁬𑁦. 𑀢𑀢𑁄 𑀧𑀭𑀁 𑀧𑀸𑀭𑀺𑀯𑀸𑀲𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦𑀉𑀧𑀲𑀫𑁆𑀧𑀦𑁆𑀦𑀸𑀤𑀻𑀲𑀼 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺 𑀞𑀧𑀺𑀢𑀸.

𑁧𑁬𑁫. 𑀢𑀢𑁆𑀣 ‘‘𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺𑀆𑀤𑀻𑀲𑀼 𑀆𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀭𑀺𑀫𑀸𑀡𑀸𑀬𑁄 𑀘𑁂𑀯 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀘𑀸𑀢𑀺 𑀅𑀢𑁆𑀣𑁄.

𑁧𑁬𑁬. 𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀏𑀓𑁄𑀯 𑀲𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁄, 𑀧𑀘𑁆𑀙𑀸 𑀙𑀸𑀤𑀺𑀢𑀢𑁆𑀢𑀸 𑀧𑀦 ‘‘𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁧𑁮𑁦. 𑀯𑀯𑀢𑁆𑀣𑀺𑀢𑀸 𑀲𑀫𑁆𑀪𑀺𑀦𑁆𑀦𑀸𑀢𑀺 𑀲𑀪𑀸𑀕𑀯𑀺𑀲𑀪𑀸𑀕𑀸𑀦𑀫𑁂𑀯𑁂𑀢𑀁 𑀧𑀭𑀺𑀬𑀸𑀬𑀯𑀘𑀦𑀁.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀪𑀺𑀓𑁆𑀔𑀼𑀯𑀸𑀭𑀏𑀓𑀸𑀤𑀲𑀓𑀸𑀤𑀺𑀓𑀣𑀸

𑁧𑁮𑁧. 𑀢𑀢𑁄 𑀧𑀭𑀁 𑀬𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀺𑀲𑁆𑀲𑀓𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀳𑀺 𑀫𑀺𑀲𑁆𑀲𑀓𑀁. 𑀲𑀼𑀤𑁆𑀥𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀺𑀦𑀸 𑀮𑀳𑀼𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀫𑁂𑀯.

𑁧𑁮𑁪. 𑀢𑀢𑁄 𑀧𑀭𑀁 𑀅𑀯𑀺𑀲𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀥𑀺𑀧𑁆𑀧𑀸𑀬𑀢𑁄 𑀯𑀸 𑀅𑀦𑀼𑀢𑁆𑀢𑀸𑀦𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀜𑁆𑀘 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀜𑁆𑀘 𑀲𑀩𑁆𑀩𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑁆𑀯𑁂𑀪𑀺𑀓𑁆𑀔𑀼𑀯𑀸𑀭𑀏𑀓𑀸𑀤𑀲𑀓𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀣𑀓𑁆𑀔𑀦𑁆𑀥𑀓𑀁

𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸

𑁧𑁮𑁬-𑁧𑁮𑁭. 𑀲𑀫𑀣𑀓𑁆𑀔𑀦𑁆𑀥𑀓𑁂 𑁋 ‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀻𑀦𑀺 𑀙 𑀫𑀸𑀢𑀺𑀓𑀸𑀧𑀤𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀥𑀫𑁆𑀫𑀯𑀸𑀤𑀺𑀁 𑀧𑀼𑀕𑁆𑀕𑀮𑀁 𑀲𑀜𑁆𑀜𑀸𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀜𑁆𑀜𑀸𑀧𑁂𑀢𑀻𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀸𑀦𑀺 𑀯𑀢𑁆𑀯𑀸 𑀧𑀭𑀺𑀢𑁄𑀲𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑀺. 𑀦𑀺𑀚𑁆𑀛𑀸𑀧𑁂𑀢𑀻𑀢𑀺 𑀬𑀣𑀸 𑀲𑁄 𑀢𑀁 𑀅𑀢𑁆𑀣𑀁 𑀦𑀺𑀚𑁆𑀛𑀸𑀬𑀢𑀺, 𑀑𑀮𑁄𑀓𑁂𑀢𑀺; 𑀏𑀯𑀁 𑀓𑀭𑁄𑀢𑀺. 𑀧𑁂𑀓𑁆𑀔𑀢𑀺 𑀅𑀦𑀼𑀧𑁂𑀓𑁆𑀔𑀢𑀻𑀢𑀺 𑀬𑀣𑀸 𑀲𑁄 𑀢𑀁 𑀅𑀢𑁆𑀣𑀁 𑀧𑁂𑀓𑁆𑀔𑀢𑀺 𑀘𑁂𑀯 𑀧𑀼𑀦𑀧𑁆𑀧𑀼𑀦𑀜𑁆𑀘 𑀧𑁂𑀓𑁆𑀔𑀢𑀺; 𑀏𑀯𑀁 𑀓𑀭𑁄𑀢𑀺. 𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀻𑀢𑀺 𑀢𑁂𑀲𑀜𑁆𑀜𑁂𑀯 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀻𑀢𑀺 𑀬𑀲𑁆𑀫𑀸 𑀲𑁄 𑀅𑀥𑀫𑁆𑀫𑀫𑁂𑀯 ‘‘𑀅𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁄𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀅𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀦𑀸𑀫.

𑁧𑁮𑁮. 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀻𑀢𑀺 𑀬𑀲𑁆𑀫𑀸 𑀥𑀫𑁆𑀫𑀯𑀸𑀤𑀻 𑀥𑀫𑁆𑀫𑀫𑁂𑀯 ‘‘𑀅𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀫𑁄𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁂𑀦 𑀯𑀽𑀧𑀲𑀫𑁆𑀫𑀢𑀺 𑀦𑀸𑀫.

𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀺𑀯𑀺𑀦𑀬𑀓𑀣𑀸

𑁧𑁯𑁫. 𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑀺𑀓𑀸𑀦𑀺 𑀲𑀢𑀺𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀻𑀢𑀺 𑀏𑀢𑁆𑀣 𑀲𑀼𑀤𑁆𑀥𑀲𑁆𑀲 𑀅𑀦𑀸𑀧𑀢𑁆𑀢𑀺𑀓𑀲𑁆𑀲 𑀤𑀸𑀦𑀁 𑀏𑀓𑀁, 𑀅𑀦𑀼𑀯𑀤𑀺𑀢𑀲𑁆𑀲 𑀤𑀸𑀦𑀁 𑀏𑀓𑀁, 𑀬𑀸𑀘𑀺𑀢𑀲𑁆𑀲 𑀤𑀸𑀦𑀁 𑀏𑀓𑀁, 𑀲𑀗𑁆𑀖𑁂𑀦 𑀤𑀸𑀦𑀁 𑀏𑀓𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀤𑀸𑀦𑀁 𑀏𑀓𑀦𑁆𑀢𑀺 𑀏𑀯𑀁 𑀧𑀜𑁆𑀘. 𑀏𑀢𑀸𑀦𑀺 𑀧𑀦 𑀏𑀓𑁂𑀓𑀅𑀗𑁆𑀕𑀯𑀲𑁂𑀦 𑀦 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀧𑀦 𑀲𑀢𑀺𑀯𑀺𑀦𑀬𑀤𑀸𑀦𑀁 𑀥𑀫𑁆𑀫𑀺𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀢𑁆𑀣 𑀘 𑀅𑀦𑀼𑀯𑀤𑀦𑁆𑀢𑀻𑀢𑀺 𑀘𑁄𑀤𑁂𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀲𑀢𑀺𑀯𑀺𑀦𑀬𑁄 𑀔𑀻𑀡𑀸𑀲𑀯𑀲𑁆𑀲𑁂𑀯 𑀤𑀸𑀢𑀩𑁆𑀩𑁄 𑀦 𑀅𑀜𑁆𑀜𑀲𑁆𑀲, 𑀅𑀦𑁆𑀢𑀫𑀲𑁄 𑀅𑀦𑀸𑀕𑀸𑀫𑀺𑀦𑁄𑀧𑀺. 𑀲𑁄 𑀘 𑀔𑁄 𑀅𑀜𑁆𑀜𑁂𑀦 𑀘𑁄𑀤𑀺𑀬𑀫𑀸𑀦𑀲𑁆𑀲𑁂𑀯, 𑀦 𑀅𑀘𑁄𑀤𑀺𑀬𑀫𑀸𑀦𑀲𑁆𑀲. 𑀤𑀺𑀦𑁆𑀦𑁂 𑀘 𑀧𑀦 𑀢𑀲𑁆𑀫𑀺𑀁 𑀘𑁄𑀤𑀓𑀲𑁆𑀲 𑀓𑀣𑀸 𑀦 𑀭𑀼𑀳𑀢𑀺. 𑀘𑁄𑀤𑁂𑀦𑁆𑀢𑁄𑀧𑀺 ‘‘𑀅𑀬𑀁 𑀔𑀻𑀡𑀸𑀲𑀯𑁄 𑀲𑀢𑀺𑀯𑀺𑀦𑀬𑀮𑀤𑁆𑀥𑁄, 𑀓𑁄 𑀢𑀼𑀬𑁆𑀳𑀁 𑀓𑀣𑀁 𑀕𑀳𑁂𑀲𑁆𑀲𑀢𑀻’’𑀢𑀺 𑀅𑀧𑀲𑀸𑀤𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺.

𑀲𑀢𑀺𑀯𑀺𑀦𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀫𑀽𑀴𑁆𑀳𑀯𑀺𑀦𑀬𑀓𑀣𑀸

𑁧𑁯𑁬. 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀸𑀘𑀸𑀬 𑀪𑀸𑀲𑀺𑀢𑀁 𑀓𑀸𑀬𑁂𑀦 𑀧𑀭𑀺𑀓𑁆𑀓𑀦𑁆𑀢𑀁; 𑀧𑀭𑀺𑀓𑁆𑀓𑀫𑀺𑀢𑁆𑀯𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸𑀢𑀺 𑀏𑀢𑁆𑀣 𑀲𑀭𑀢𑀼 𑀆𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀸; 𑀆𑀬𑀲𑁆𑀫𑀸 𑀏𑀯𑀭𑀽𑀧𑀺𑀬𑀸 𑀆𑀧𑀢𑁆𑀢𑀺𑀬𑀸𑀢𑀺 𑀅𑀬𑀫𑀢𑁆𑀣𑁄. 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀧𑀞𑀫𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀢𑀁 𑀆𑀧𑀢𑁆𑀢𑀺𑀁 𑀲𑀭𑀢𑀼 𑀆𑀬𑀲𑁆𑀫𑀸𑀢𑀺.

𑀅𑀫𑀽𑀴𑁆𑀳𑀯𑀺𑀦𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑁂𑀪𑀼𑀬𑁆𑀬𑀲𑀺𑀓𑀸𑀓𑀣𑀸

𑁨𑁦𑁨. 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀯𑀽𑀧𑀲𑀫𑁂𑀢𑀼𑀦𑁆𑀢𑀺 𑀏𑀢𑁆𑀣 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬 𑀥𑀫𑁆𑀫𑀯𑀸𑀤𑀺𑀦𑁄 𑀩𑀳𑀼𑀢𑀭𑀸, 𑀏𑀲𑀸 𑀬𑁂𑀪𑀼𑀬𑁆𑀬𑀲𑀺𑀓𑀸 𑀦𑀸𑀫.

𑁨𑁦𑁪. 𑀅𑀥𑀫𑁆𑀫𑀺𑀓𑀲𑀮𑀸𑀓𑀕𑁆𑀕𑀸𑀳𑁂𑀲𑀼 𑀑𑀭𑀫𑀢𑁆𑀢𑀓𑀦𑁆𑀢𑀺 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀪𑀡𑁆𑀟𑀦𑀫𑀢𑁆𑀢𑀫𑁂𑀯. 𑀦 𑀘 𑀕𑀢𑀺𑀕𑀢𑀦𑁆𑀢𑀺 𑀤𑁆𑀯𑁂 𑀢𑀬𑁄 𑀆𑀯𑀸𑀲𑁂 𑀦 𑀕𑀢𑀁, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀦 𑀘 𑀲𑀭𑀺𑀢𑀲𑀸𑀭𑀺𑀢𑀦𑁆𑀢𑀺 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀬𑀁 𑀲𑀭𑀺𑀢𑀁 𑀯𑀸 𑀅𑀜𑁆𑀜𑁂𑀳𑀺 𑀲𑀸𑀭𑀺𑀢𑀁 𑀯𑀸 𑀦 𑀳𑁄𑀢𑀺. 𑀚𑀸𑀦𑀸𑀢𑀻𑀢𑀺 𑀲𑀮𑀸𑀓𑀁 𑀕𑀸𑀳𑁂𑀦𑁆𑀢𑁄 𑀚𑀸𑀦𑀸𑀢𑀺 ‘‘𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’’𑀢𑀺. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀲𑀮𑀸𑀓𑀸𑀬 𑀕𑀸𑀳𑀺𑀬𑀫𑀸𑀦𑀸𑀬 ‘‘𑀅𑀧𑀺 𑀦𑀸𑀫 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀳𑀼𑀢𑀭𑀸 𑀅𑀲𑁆𑀲𑀽’’𑀢𑀺 𑀅𑀬𑀫𑀲𑁆𑀲 𑀅𑀚𑁆𑀛𑀸𑀲𑀬𑁄 𑀳𑁄𑀢𑀺. 𑀅𑀧𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄.

𑀅𑀥𑀫𑁆𑀫𑁂𑀦 𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀫𑁆𑀫𑀯𑀸𑀤𑀺𑀦𑁄 ‘‘𑀏𑀯𑀁 𑀫𑀬𑀁 𑀩𑀳𑀽 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂 𑀤𑁆𑀯𑁂 𑀲𑀮𑀸𑀓𑀸𑀬𑁄 𑀕𑀡𑁆𑀳𑀦𑁆𑀢𑀺. 𑀯𑀕𑁆𑀕𑀸 𑀕𑀡𑁆𑀳𑀦𑁆𑀢𑀻𑀢𑀺 𑀤𑁆𑀯𑁂 𑀥𑀫𑁆𑀫𑀯𑀸𑀤𑀺𑀦𑁄 𑀏𑀓𑀁 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀺 ‘‘𑀏𑀯𑀁 𑀥𑀫𑁆𑀫𑀯𑀸𑀤𑀺𑀦𑁄 𑀦 𑀩𑀳𑀽 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸. 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀻𑀢𑀺 𑀥𑀫𑁆𑀫𑀯𑀸𑀤𑀺𑀦𑁄 𑀳𑀼𑀢𑁆𑀯𑀸 ‘‘𑀩𑀮𑀯𑀧𑀓𑁆𑀔𑀁 𑀪𑀚𑀺𑀲𑁆𑀲𑀸𑀫𑀸’’𑀢𑀺 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀺. 𑀥𑀫𑁆𑀫𑀺𑀓𑀲𑀮𑀸𑀓𑀕𑁆𑀕𑀸𑀳𑁂𑀲𑀼 𑀅𑀬𑀫𑁂𑀯𑀢𑁆𑀣𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀲𑀘𑁂 𑀩𑀳𑀼𑀢𑀭𑀸 𑀥𑀫𑁆𑀫𑀯𑀸𑀤𑀺𑀦𑁄 𑀳𑁄𑀦𑁆𑀢𑀺; 𑀬𑀣𑀸 𑀢𑁂 𑀯𑀤𑀦𑁆𑀢𑀺, 𑀏𑀯𑀁 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁, 𑀏𑀯𑀁 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀢𑁄𑀧𑀺 𑀆𑀕𑀫𑀺𑀲𑁆𑀲𑀢𑀺.

𑀬𑁂𑀪𑀼𑀬𑁆𑀬𑀲𑀺𑀓𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸

𑁨𑁦𑁭. 𑀅𑀲𑀼𑀘𑀻𑀢𑀺 𑀅𑀲𑀼𑀘𑀻𑀳𑀺 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀮𑀚𑁆𑀚𑀻𑀢𑀺 𑀲𑀜𑁆𑀘𑀺𑀘𑁆𑀘 𑀆𑀧𑀚𑁆𑀚𑀦𑀸𑀤𑀺𑀦𑀸 𑀅𑀮𑀚𑁆𑀚𑀺𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀸𑀦𑀼𑀯𑀸𑀤𑁄𑀢𑀺 𑀲𑀉𑀧𑀯𑀸𑀤𑁄. 𑀇𑀢𑀺 𑀇𑀫𑁂𑀲𑀜𑁆𑀘 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀢𑀻𑀡𑀺 𑀓𑀭𑀡𑀸𑀦𑀺, 𑀲𑀗𑁆𑀖𑁂𑀦 𑀓𑀭𑀡𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀦 𑀓𑀭𑀡𑀦𑁆𑀢𑀺 𑀇𑀫𑀸𑀦𑀺 𑀘 𑀤𑁆𑀯𑁂𑀢𑀺 𑀧𑀜𑁆𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀲𑁆𑀲 𑀓𑀭𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀢𑀚𑁆𑀚𑀦𑀻𑀬𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀇𑀤𑀜𑁆𑀳𑀺 𑀬𑁄 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀓𑀢𑁆𑀢𑀩𑁆𑀩𑀢𑁄 ‘‘𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀡𑀯𑀢𑁆𑀣𑀸𑀭𑀓𑀸𑀤𑀺𑀓𑀣𑀸

𑁨𑁧𑁨. 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬𑀸𑀢𑀺 𑀓𑀓𑁆𑀔𑀴𑀪𑀸𑀯𑀸𑀬 𑀘𑁂𑀯 𑀯𑀸𑀴𑀪𑀸𑀯𑀸𑀬 𑀘. 𑀪𑁂𑀤𑀸𑀬𑀸𑀢𑀺 𑀲𑀗𑁆𑀖𑀪𑁂𑀤𑀸𑀬. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀦𑁆𑀢𑀺 𑀓𑀲𑁆𑀲𑀘𑀺 𑀙𑀦𑁆𑀤𑀁 𑀅𑀦𑀸𑀳𑀭𑀺𑀢𑁆𑀯𑀸 𑀕𑀺𑀮𑀸𑀦𑁂𑀧𑀺 𑀢𑀢𑁆𑀣𑁂𑀯 𑀆𑀦𑁂𑀢𑁆𑀯𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁. 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀬𑁆𑀬𑀸𑀢𑀺 𑀏𑀢𑁆𑀣 𑀇𑀤𑀁 𑀓𑀫𑁆𑀫𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 ‘‘𑀢𑀺𑀡𑀯𑀢𑁆𑀣𑀸𑀭𑀓𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀕𑀽𑀣𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀖𑀝𑁆𑀝𑀺𑀬𑀫𑀸𑀦𑀁 𑀤𑀼𑀕𑁆𑀕𑀦𑁆𑀥𑀢𑀸𑀬 𑀩𑀸𑀥𑀢𑀺, 𑀢𑀺𑀡𑁂𑀳𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀲𑁆𑀲 𑀧𑀦𑀲𑁆𑀲 𑀲𑁄 𑀕𑀦𑁆𑀥𑁄 𑀦 𑀩𑀸𑀥𑀢𑀺; 𑀏𑀯𑀫𑁂𑀯 𑀬𑀁 𑀅𑀥𑀺𑀓𑀭𑀡𑀁 𑀫𑀽𑀮𑀸𑀦𑀼𑀫𑀽𑀮𑀁 𑀕𑀦𑁆𑀢𑁆𑀯𑀸 𑀯𑀽𑀧𑀲𑀫𑀺𑀬𑀫𑀸𑀦𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀯𑀽𑀧𑀲𑀦𑁆𑀢𑀁 𑀕𑀽𑀣𑀁 𑀯𑀺𑀬 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀲𑀼𑀯𑀽𑀧𑀲𑀦𑁆𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀓𑀫𑁆𑀫𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 ‘‘𑀢𑀺𑀡𑀯𑀢𑁆𑀣𑀸𑀭𑀓𑁄’’𑀢𑀺 𑀯𑀼𑀢𑁆𑀢𑀁.

𑁨𑁧𑁩. 𑀣𑀼𑀮𑁆𑀮𑀯𑀚𑁆𑀚𑀦𑁆𑀢𑀺 𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀕𑀺𑀳𑀻𑀦𑀁 𑀳𑀻𑀦𑁂𑀦 𑀔𑀼𑀁𑀲𑀦𑀯𑀫𑁆𑀪𑀦𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑁂𑀲𑀼 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁.

𑁨𑁧𑁪. 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀢𑁂 𑀪𑀺𑀓𑁆𑀔𑀽 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀬𑀢𑁆𑀢𑀓𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀸𑀧𑀺 𑀲𑀫𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀯𑀺𑀳𑀺𑀢𑀸𑀧𑀺 𑀲𑀩𑁆𑀩𑁂 𑀢𑁂 𑀪𑀺𑀓𑁆𑀔𑀽 𑀬𑀸𑀯 𑀉𑀧𑀲𑀫𑁆𑀧𑀤𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀣𑀼𑀮𑁆𑀮𑀯𑀚𑁆𑀚𑀜𑁆𑀘 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑀸, 𑀲𑀩𑁆𑀩𑀸𑀳𑀺 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀬𑁂 𑀧𑀦 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀢𑀢𑁆𑀣 𑀅𑀦𑀸𑀕𑀢𑀸, 𑀆𑀕𑀦𑁆𑀢𑁆𑀯𑀸 𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸, 𑀢𑁂 𑀆𑀧𑀢𑁆𑀢𑀻𑀳𑀺 𑀦 𑀯𑀼𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑀬𑁂 𑀦 𑀢𑀢𑁆𑀣 𑀳𑁄𑀦𑁆𑀢𑀻’’𑀢𑀺.

𑀢𑀺𑀡𑀯𑀢𑁆𑀣𑀸𑀭𑀓𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀓𑀣𑀸

𑁨𑁧𑁫. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑀔𑀚𑁆𑀚𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸. 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁 𑀯𑀘𑀦𑀢𑁆𑀣𑁄 𑀤𑀼𑀝𑁆𑀞𑀤𑁄𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀢𑁆𑀣𑀁 𑀯𑁄𑀳𑀸𑀭𑁄; 𑀨𑀭𑀼𑀲𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄𑀢𑀺 𑀬𑁄 𑀢𑁂𑀲𑀼 𑀅𑀦𑀼𑀯𑀤𑀦𑁆𑀢𑁂𑀲𑀼 𑀉𑀧𑀯𑀸𑀤𑁄. 𑀅𑀦𑀼𑀯𑀤𑀦𑀸𑀢𑀺 𑀆𑀓𑀸𑀭𑀦𑀺𑀤𑀲𑁆𑀲𑀦𑀫𑁂𑀢𑀁; 𑀉𑀧𑀯𑀤𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸𑀢𑀺 𑀉𑀪𑀬𑀁 𑀅𑀦𑀼𑀯𑀤𑀦𑀯𑁂𑀯𑀘𑀦𑀫𑀢𑁆𑀢𑀫𑁂𑀯. 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀸𑀬𑀘𑀺𑀢𑁆𑀢𑀯𑀸𑀘𑀸𑀳𑀺 𑀢𑀢𑁆𑀣𑁂𑀯 𑀲𑀫𑁆𑀧𑀯𑀗𑁆𑀓𑀢𑀸; 𑀅𑀦𑀼𑀯𑀤𑀦𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀼𑀲𑁆𑀲𑀳𑀦𑀢𑀸𑀢𑀺 ‘‘𑀓𑀲𑁆𑀫𑀸 𑀏𑀯𑀁 𑀦 𑀉𑀧𑀯𑀤𑀺𑀲𑁆𑀲𑀸𑀫𑀺, 𑀉𑀧𑀯𑀤𑀺𑀲𑁆𑀲𑀸𑀫𑀺𑀬𑁂𑀯𑀸’’𑀢𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀅𑀦𑀼𑀯𑀤𑀦𑀸. 𑀅𑀦𑀼𑀩𑀮𑀧𑁆𑀧𑀤𑀸𑀦𑀦𑁆𑀢𑀺 𑀧𑀼𑀭𑀺𑀫𑀯𑀘𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑀯𑀘𑀦𑁂𑀦 𑀩𑀮𑀧𑁆𑀧𑀤𑀸𑀦𑀁.

𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸𑀢𑀺 𑀏𑀢𑁆𑀣 𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀬𑀁, 𑀓𑀺𑀘𑁆𑀘𑀬𑀲𑁆𑀲 𑀪𑀸𑀯𑁄 𑀓𑀺𑀘𑁆𑀘𑀬𑀢𑀸, 𑀓𑀭𑀡𑀻𑀬𑀲𑁆𑀲 𑀪𑀸𑀯𑁄 𑀓𑀭𑀡𑀻𑀬𑀢𑀸; 𑀉𑀪𑀬𑀫𑁆𑀧𑁂𑀢𑀁 𑀲𑀗𑁆𑀖𑀓𑀫𑁆𑀫𑀲𑁆𑀲𑁂𑀯 𑀅𑀥𑀺𑀯𑀘𑀦𑀁. 𑀅𑀧𑀮𑁄𑀓𑀦𑀓𑀫𑁆𑀫𑀦𑁆𑀢𑀺𑀆𑀤𑀺 𑀧𑀦 𑀢𑀲𑁆𑀲𑁂𑀯 𑀧𑀪𑁂𑀤𑀯𑀘𑀦𑀁. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀏𑀓𑀸𑀬 𑀘 𑀅𑀦𑀼𑀲𑁆𑀲𑀸𑀯𑀦𑀸𑀬𑀸𑀢𑀺 𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸𑀳𑀻𑀢𑀺 𑀏𑀯𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀳𑀺 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀁.

𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀅𑀧𑀮𑁄𑀓𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀜𑀢𑁆𑀢𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺, 𑀅𑀓𑀢𑁆𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺. 𑀢𑀢𑁆𑀣 𑀲𑀻𑀫𑀸𑀲𑀫𑁆𑀫𑀼𑀢𑀺 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀣𑀺𑀦𑀤𑀸𑀦𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀸 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀙 𑀓𑀫𑁆𑀫𑀸𑀦𑀺 𑀕𑀭𑀼𑀓𑀸𑀦𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀸𑀦𑀺. 𑀅𑀯𑀲𑁂𑀲𑀸 𑀢𑁂𑀭𑀲 𑀲𑀫𑁆𑀫𑀼𑀢𑀺𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀫𑀢𑀓𑀘𑀻𑀯𑀭𑀤𑀸𑀦𑀸𑀤𑀺𑀲𑀫𑁆𑀫𑀼𑀢𑀺𑀬𑁄 𑀘𑀸𑀢𑀺 𑀏𑀯𑀭𑀽𑀧𑀸𑀦𑀺 𑀮𑀳𑀼𑀓𑀓𑀫𑁆𑀫𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀜𑀢𑁆𑀢𑀺𑀓𑀫𑁆𑀫𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀦 𑀦 𑀓𑀸𑀢𑀩𑁆𑀩𑀫𑁂𑀯. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀜𑀢𑁆𑀢𑀺𑀜𑁆𑀘 𑀢𑀺𑀲𑁆𑀲𑁄 𑀘 𑀓𑀫𑁆𑀫𑀯𑀸𑀘𑀸𑀬𑁄 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 ‘‘𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀕𑁆𑀕𑁂 𑀏𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑁄 𑀆𑀕𑀢𑁄𑀬𑁂𑀯. 𑀬𑀁 𑀧𑀦 𑀢𑀢𑁆𑀣 𑀅𑀦𑀼𑀢𑁆𑀢𑀸𑀦𑀁, 𑀢𑀁 𑀓𑀫𑁆𑀫𑀯𑀕𑁆𑀕𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀦 𑀅𑀝𑁆𑀞𑀸𑀦𑁂 𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀜𑁆𑀜𑀸𑀢𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀺.

𑁨𑁧𑁬. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀦𑁆𑀢𑀺𑀆𑀤𑀻𑀦𑀺 𑀧𑀸𑀴𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁨𑁦. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀆𑀤𑀻𑀲𑀼 𑀬𑁂𑀦 𑀯𑀺𑀯𑀤𑀦𑁆𑀢𑀺, 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀯𑀸𑀤𑁄, 𑀲𑀫𑀣𑁂𑀳𑀺 𑀘 𑀅𑀥𑀺𑀓𑀭𑀡𑀻𑀬𑀢𑀸𑀬 𑀅𑀥𑀺𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁨𑁨𑁨. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀦𑁆𑀢𑀺 𑀏𑀢𑁆𑀣 𑀲𑀦𑁆𑀥𑀸𑀬 𑀪𑀸𑀲𑀺𑀢𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀺𑀜𑁆𑀳𑀺 𑀧𑀣𑀯𑀺𑀔𑀡𑀦𑀸𑀤𑀺𑀓𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺, 𑀢𑀲𑁆𑀫𑀸 𑀦𑀬𑀺𑀤𑀁 𑀅𑀗𑁆𑀕𑀧𑁆𑀧𑀳𑁄𑀦𑀓𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀢𑀸𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀮𑁄𑀓𑀯𑀚𑁆𑀚𑀁, 𑀢𑀁 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀫𑁂𑀯, 𑀢𑀢𑁆𑀣 ‘‘𑀲𑀺𑀬𑀸 𑀅𑀓𑀼𑀲𑀮’’𑀦𑁆𑀢𑀺 𑀯𑀺𑀓𑀧𑁆𑀧𑁄 𑀦𑀢𑁆𑀣𑀺. 𑀬𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀁 𑀬𑀲𑁆𑀫𑀸 𑀲𑀜𑁆𑀘𑀺𑀘𑁆𑀘 ‘‘𑀇𑀫𑀁 𑀆𑀧𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀸𑀫𑀻’’𑀢𑀺 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀅𑀓𑀼𑀲𑀮𑀁 𑀳𑁄𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀧𑀦 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀢𑁄 𑀅𑀩𑁆𑀬𑀸𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀲𑀜𑁆𑀘𑀺𑀘𑁆𑀘𑀸𑀲𑀜𑁆𑀘𑀺𑀘𑁆𑀘𑀯𑀲𑁂𑀦 𑀇𑀫𑀁 𑀯𑀺𑀓𑀧𑁆𑀧𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺.

𑀲𑀘𑁂 𑀧𑀦 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀤𑁂𑀬𑁆𑀬, 𑀅𑀘𑀺𑀢𑁆𑀢𑀓𑀸𑀦𑀁 𑀧𑀦 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀁 𑀓𑀸𑀬𑀯𑀸𑀘𑀸𑀦𑀁 𑀅𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀁, 𑀢𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀩𑁆𑀬𑀸𑀓𑀢𑀦𑁆𑀢𑀺.

𑀬𑀁 𑀚𑀸𑀦𑀦𑁆𑀢𑁄𑀢𑀺𑀆𑀤𑀺𑀫𑁆𑀳𑀺 𑀧𑀦 𑀅𑀬𑀫𑀢𑁆𑀣𑁄 𑁋 𑀬𑀁 𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀺, 𑀢𑁂𑀦 𑀯𑀢𑁆𑀣𑀼𑀁 𑀚𑀸𑀦𑀦𑁆𑀢𑁄 ‘‘𑀇𑀤𑀁 𑀯𑀻𑀢𑀺𑀓𑁆𑀓𑀫𑀸𑀫𑀻’’𑀢𑀺 𑀘 𑀯𑀻𑀢𑀺𑀓𑁆𑀓𑀫𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀉𑀧𑀓𑁆𑀓𑀫𑀯𑀲𑁂𑀦 𑀫𑀤𑁆𑀤𑀦𑁆𑀢𑁄 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀯𑀻𑀢𑀺𑀓𑁆𑀓𑀫𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀏𑀯𑀁 𑀯𑀻𑀢𑀺𑀓𑁆𑀓𑀫𑀢𑁄 𑀬𑁄 𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮’’𑀦𑁆𑀢𑀺.

𑀅𑀩𑁆𑀬𑀸𑀓𑀢𑀯𑀸𑀭𑁂𑀧𑀺 𑀬𑀁 𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀺, 𑀢𑀲𑁆𑀲 𑀅𑀪𑀸𑀯𑁂𑀦 𑀅𑀚𑀸𑀦𑀦𑁆𑀢𑁄 𑀯𑀻𑀢𑀺𑀓𑁆𑀓𑀫𑀸𑀓𑀸𑀭𑁂𑀦 𑀘 𑀲𑀤𑁆𑀥𑀺𑀁 𑀅𑀚𑀸𑀦𑀦𑁆𑀢𑁄 𑀅𑀲𑀜𑁆𑀚𑀸𑀦𑀦𑁆𑀢𑁄 𑀆𑀧𑀢𑁆𑀢𑀺𑀅𑀗𑁆𑀕𑀪𑀽𑀢𑀸𑀬 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬 𑀅𑀪𑀸𑀯𑁂𑀦 𑀅𑀘𑁂𑀢𑁂𑀢𑁆𑀯𑀸 𑀲𑀜𑁆𑀘𑀺𑀘𑁆𑀘 𑀫𑀤𑁆𑀤𑀦𑀲𑁆𑀲 𑀅𑀪𑀸𑀯𑁂𑀦 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀁 𑀅𑀧𑁂𑀲𑁂𑀢𑁆𑀯𑀸 𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀯𑀻𑀢𑀺𑀓𑁆𑀓𑀫𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀏𑀯𑀁 𑀯𑀻𑀢𑀺𑀓𑁆𑀓𑀫𑀢𑁄 𑀬𑁄 𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺.

𑁨𑁨𑁪. 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀦𑁆𑀢𑀺𑀆𑀤𑀻𑀲𑀼 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸𑀬 𑀅𑀪𑀸𑀯𑀢𑁄 𑀦𑁄𑀅𑀥𑀺𑀓𑀭𑀡𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀥𑀺𑀓𑀭𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸

𑁨𑁨𑁮. 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀏𑀢𑁆𑀣 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄, 𑀧𑀜𑁆𑀘𑀯𑀕𑁆𑀕𑀓𑀭𑀡𑁂 𑀧𑀜𑁆𑀘, 𑀤𑀲𑀯𑀕𑁆𑀕𑀓𑀭𑀡𑁂 𑀤𑀲, 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀯𑀻𑀲𑀢𑀺 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁩𑁦. 𑀲𑀼𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀭𑀺𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘 𑀧𑀦 ‘‘𑀅𑀚𑁆𑀚 𑀪𑀡𑁆𑀟𑀓𑀁 𑀥𑁄𑀯𑀸𑀫, 𑀅𑀚𑁆𑀚 𑀧𑀢𑁆𑀢𑀁 𑀧𑀘𑀸𑀫, 𑀅𑀚𑁆𑀚𑁂𑀓𑁄 𑀧𑀮𑀺𑀩𑁄𑀥𑁄 𑀅𑀢𑁆𑀣𑀻’’𑀢𑀺 𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀸𑀬 𑀓𑀢𑀺𑀧𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁.

𑁨𑁩𑁧. 𑀅𑀦𑀦𑁆𑀢𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀻𑀢𑀺 𑀅𑀧𑀭𑀺𑀫𑀸𑀡𑀸𑀦𑀺 𑀇𑀢𑁄 𑀘𑀺𑀢𑁄 𑀘 𑀯𑀘𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. ‘‘𑀪𑀸𑀲𑀸𑀦𑀻’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑀧𑀭𑀢𑁄 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀯𑀸 𑀓𑀫𑁆𑀫𑀯𑀸𑀘𑀸𑀬. 𑀏𑀯𑀁 𑀲𑀫𑁆𑀫𑀢𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀯𑀸 𑀧𑀭𑀺𑀲𑀸𑀬 ‘‘𑀅𑀜𑁆𑀜𑁂𑀳𑀺 𑀅𑀲𑀫𑁆𑀫𑀢𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀯𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁.

𑁨𑁩𑁩. 𑀢𑀢𑁆𑀭𑀸𑀲𑁆𑀲𑀸𑀢𑀺 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀪𑀯𑁂𑀬𑁆𑀬. 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀢𑀦𑁆𑀢𑀺 𑀦 𑀫𑀸𑀢𑀺𑀓𑀸 𑀆𑀕𑀢𑀸. 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄𑀢𑀺 𑀯𑀺𑀦𑀬𑁄𑀧𑀺 𑀦 𑀧𑀕𑀼𑀡𑁄. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀻𑀢𑀺 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀲𑁂𑀥𑁂𑀢𑀺. 𑀚𑀸𑀢𑀭𑀽𑀧𑀭𑀚𑀢𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀯𑀺𑀦𑀬𑀥𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀺𑀬𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀫𑁂 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀣, ‘𑀦𑀦𑀼 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’𑀢𑀺 𑀏𑀯𑀁 𑀲𑀼𑀢𑁆𑀢𑁂 𑀧𑀝𑀺𑀯𑀺𑀭𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀢𑀺. 𑀅𑀧𑀭𑁄 𑀥𑀫𑁆𑀫𑀓𑀣𑀺𑀓𑁄 𑀲𑀼𑀢𑁆𑀢𑀲𑁆𑀲 𑀆𑀕𑀢𑀢𑁆𑀢𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀸𑀦𑀁 𑀆𑀧𑀢𑁆𑀢𑀺𑀬𑀸 𑀆𑀭𑁄𑀧𑀺𑀬𑀫𑀸𑀦𑀸𑀬 ‘‘𑀓𑀺𑀁 𑀇𑀫𑁂𑀲𑀁 𑀆𑀧𑀢𑁆𑀢𑀺𑀁 𑀭𑁄𑀧𑁂𑀣, ‘𑀦𑀦𑀼 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’𑀢𑀺 𑀏𑀯𑀁 𑀲𑀺𑀓𑁆𑀔𑀸𑀓𑀭𑀡𑀫𑀢𑁆𑀢𑀫𑁂𑀯𑁂𑀢𑁆𑀣 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀢𑀺.

𑁨𑁩𑁪. 𑀬𑀣𑀸 𑀩𑀳𑀼𑀢𑀭𑀸 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀏𑀓𑁂𑀦𑀧𑀺 𑀅𑀥𑀺𑀓𑀸 𑀩𑀳𑀼𑀢𑀭𑀸𑀯 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀳𑀺 𑀢𑀻𑀳𑀻𑀢𑀺.

𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑀲𑀮𑀸𑀓𑀕𑁆𑀕𑀸𑀳𑀓𑀣𑀸

𑁨𑁩𑁫. 𑀲𑀜𑁆𑀜𑀢𑁆𑀢𑀺𑀬𑀸𑀢𑀺 𑀲𑀜𑁆𑀜𑀸𑀧𑀦𑀢𑁆𑀣𑀸𑀬. 𑀕𑀽𑀴𑁆𑀳𑀓𑀦𑁆𑀢𑀺𑀆𑀤𑀻𑀲𑀼 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀧𑀭𑀺𑀲𑀸𑀬 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀓𑀸𑀢𑀩𑁆𑀩𑁄, 𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀧𑀭𑀺𑀲𑀸𑀬 𑀯𑀺𑀯𑀝𑀓𑁄, 𑀩𑀸𑀮𑀼𑀲𑁆𑀲𑀦𑁆𑀦𑀸𑀬 𑀲𑀓𑀡𑁆𑀡𑀚𑀧𑁆𑀧𑀓𑁄. 𑀯𑀡𑁆𑀡𑀸𑀯𑀡𑁆𑀡𑀸𑀬𑁄 𑀓𑀢𑁆𑀯𑀸𑀢𑀺 𑀥𑀫𑁆𑀫𑀯𑀸𑀤𑀻𑀦𑀜𑁆𑀘 𑀅𑀥𑀫𑁆𑀫𑀯𑀸𑀤𑀻𑀦𑀜𑁆𑀘 𑀲𑀮𑀸𑀓𑀸𑀬𑁄 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀸 𑀓𑀸𑀢𑀩𑁆𑀩𑀸. 𑀢𑀢𑁄 𑀢𑀸 𑀲𑀩𑁆𑀩𑀸𑀧𑀺 𑀘𑀻𑀯𑀭𑀪𑁄𑀕𑁂 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀕𑀸𑀳𑁂𑀢𑀩𑁆𑀩𑀸. 𑀤𑀼𑀕𑁆𑀕𑀳𑁄𑀢𑀺 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀦𑁆𑀢𑀺 ‘‘𑀤𑀼𑀕𑁆𑀕𑀳𑀺𑀢𑀸 𑀲𑀮𑀸𑀓𑀸𑀬𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀕𑀳𑁂𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀕𑀸𑀳𑁂𑀢𑀩𑁆𑀩𑀸. 𑀲𑀼𑀕𑁆𑀕𑀳𑁄𑀢𑀺 𑀲𑀸𑀯𑁂𑀢𑀩𑁆𑀩𑀦𑁆𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀥𑀫𑁆𑀫𑀯𑀸𑀤𑀺𑀫𑁆𑀳𑀺 𑀅𑀢𑀺𑀭𑁂𑀓𑀚𑀸𑀢𑁂 ‘‘𑀲𑀼𑀕𑁆𑀕𑀳𑀺𑀢𑀸 𑀲𑀮𑀸𑀓𑀸𑀬𑁄’’𑀢𑀺 𑀲𑀸𑀯𑁂𑀢𑀩𑁆𑀩𑀁. 𑀬𑀣𑀸 𑀘 𑀢𑁂 𑀥𑀫𑁆𑀫𑀯𑀸𑀤𑀺𑀦𑁄 𑀯𑀤𑀦𑁆𑀢𑀺 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺. 𑀅𑀣 𑀬𑀸𑀯𑀢𑀢𑀺𑀬𑀫𑁆𑀧𑀺 𑀅𑀥𑀫𑁆𑀫𑀯𑀸𑀤𑀺𑀦𑁄𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀅𑀚𑁆𑀚 ‘‘𑀅𑀓𑀸𑀮𑁄, 𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀮𑀚𑁆𑀚𑀻𑀦𑀁 𑀧𑀓𑁆𑀔𑀪𑁂𑀤𑀢𑁆𑀣𑀸𑀬 𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀮𑀸𑀓𑀕𑁆𑀕𑀸𑀳𑁄 𑀓𑀸𑀢𑀩𑁆𑀩𑁄. 𑀅𑀬𑀁 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄.

𑀲𑀓𑀡𑁆𑀡𑀚𑀧𑁆𑀧𑀓𑁂 𑀧𑀦 𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑁄𑀢𑀺 𑀏𑀢𑁆𑀣 𑀲𑀘𑁂 𑀲𑀗𑁆𑀖𑀢𑁆𑀣𑁂𑀭𑁄 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁 𑀕𑀡𑁆𑀳𑀸𑀢𑀺, 𑀲𑁄 𑀏𑀯𑀁 𑀅𑀯𑀩𑁄𑀥𑁂𑀢𑀩𑁆𑀩𑁄 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀳𑀮𑁆𑀮𑀓𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀏𑀢𑀁 𑀦 𑀬𑀼𑀢𑁆𑀢𑀁, 𑀅𑀬𑀁 𑀧𑀦 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀸’’𑀢𑀺 𑀅𑀲𑁆𑀲 𑀇𑀢𑀭𑀸 𑀲𑀮𑀸𑀓𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀲𑀘𑁂 𑀲𑁄 𑀢𑀁 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀸. 𑀅𑀣 𑀦𑁂𑀯 𑀅𑀯𑀩𑀼𑀚𑁆𑀛𑀢𑀺, 𑀢𑀢𑁄 ‘‘𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀯𑀝𑀓𑁄 𑀯𑀺𑀯𑀝𑀢𑁆𑀣𑁄𑀬𑁂𑀯.

𑀢𑀺𑀯𑀺𑀥𑀲𑀮𑀸𑀓𑀕𑁆𑀕𑀸𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀯𑀺𑀦𑀬𑀓𑀣𑀸

𑁨𑁩𑁮. 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑁂 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀦𑀸𑀫 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀁. 𑀦𑀺𑀩𑁆𑀩𑁂𑀞𑁂𑀦𑁆𑀢𑀦𑁆𑀢𑀺 ‘‘𑀦 𑀲𑀭𑀸𑀫𑀻’’𑀢𑀺 𑀯𑀘𑀦𑁂𑀦 𑀦𑀺𑀩𑁆𑀩𑁂𑀞𑀬𑀫𑀸𑀦𑀁. 𑀅𑀢𑀺𑀯𑁂𑀞𑁂𑀢𑀻𑀢𑀺 ‘‘𑀇𑀗𑁆𑀖𑀸𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀅𑀢𑀺𑀯𑁂𑀞𑀺𑀬𑀢𑀺. 𑀲𑀭𑀸𑀫𑀺 𑀔𑁄 𑀅𑀳𑀁 𑀆𑀯𑀼𑀲𑁄𑀢𑀺 𑀧𑀸𑀭𑀸𑀚𑀺𑀓𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀸𑀬 𑀏𑀯𑀁 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀢𑁂𑀦 𑀅𑀢𑀺𑀯𑁂𑀞𑀺𑀬𑀫𑀸𑀦𑁄 ‘‘𑀲𑀭𑀸𑀫𑀺 𑀔𑁄’’𑀢𑀺 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀁 𑀦𑀸𑀲𑁂𑀲𑁆𑀲𑀦𑁆𑀢𑀻’’𑀢𑀺 𑀪𑀬𑁂𑀦 ‘‘𑀤𑀯𑀸𑀬 𑀫𑁂’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺, 𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀮𑀪𑀢𑀺, 𑀦𑁄 𑀘𑁂 𑀢𑀣𑀸 𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀯𑀺𑀦𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀁

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸

𑁨𑁪𑁩. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 𑁋 𑀫𑀮𑁆𑀮𑀫𑀼𑀝𑁆𑀞𑀺𑀓𑀸𑀢𑀺 𑀫𑀼𑀝𑁆𑀞𑀺𑀓𑀫𑀮𑁆𑀮𑀸. 𑀕𑀸𑀫𑀫𑀼𑀤𑁆𑀤𑀯𑀸𑀢𑀺 𑀙𑀯𑀺𑀭𑀸𑀕𑀫𑀡𑁆𑀟𑀦𑀸𑀦𑀼𑀬𑀼𑀢𑁆𑀢𑀸 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸. 𑀕𑀸𑀫𑀫𑁄𑀤𑁆𑀤𑀯𑀸𑀢𑀺𑀧𑀺 𑀧𑀸𑀞𑁄; 𑀏𑀲𑁂𑀯𑀢𑁆𑀣𑁄. 𑀣𑀫𑁆𑀪𑁂𑀢𑀺 𑀦𑁆𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀢𑁆𑀣𑀫𑁆𑀪𑁂.

𑀓𑀼𑀝𑁆𑀝𑁂𑀢𑀺 𑀇𑀝𑁆𑀞𑀓𑀸𑀲𑀺𑀮𑀸𑀤𑀸𑀭𑀼𑀓𑀼𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀅𑀝𑁆𑀝𑀸𑀦𑁂 𑀦𑁆𑀳𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀅𑀝𑁆𑀝𑀸𑀦𑀁 𑀦𑀸𑀫 𑀭𑀼𑀓𑁆𑀔𑀁 𑀨𑀮𑀓𑀁 𑀯𑀺𑀬 𑀢𑀘𑁆𑀙𑁂𑀢𑁆𑀯𑀸 𑀅𑀝𑁆𑀞𑀧𑀤𑀸𑀓𑀸𑀭𑁂𑀦 𑀭𑀸𑀚𑀺𑀬𑁄 𑀙𑀺𑀦𑁆𑀤𑀺𑀢𑁆𑀯𑀸 𑀦𑁆𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀡𑀦𑁆𑀢𑀺, 𑀢𑀢𑁆𑀣 𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 𑀓𑀸𑀬𑀁 𑀖𑀁𑀲𑀦𑁆𑀢𑀺. 𑀕𑀦𑁆𑀥𑀩𑁆𑀩𑀳𑀢𑁆𑀣𑀓𑁂𑀦𑀸𑀢𑀺 𑀦𑁆𑀳𑀸𑀦𑀢𑀺𑀢𑁆𑀣𑁂 𑀞𑀧𑀺𑀢𑁂𑀦 𑀤𑀸𑀭𑀼𑀫𑀬𑀳𑀢𑁆𑀣𑁂𑀦, 𑀢𑁂𑀦 𑀓𑀺𑀭 𑀘𑀼𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸𑀢𑀺 𑀓𑀼𑀭𑀼𑀯𑀺𑀦𑁆𑀤𑀓𑀧𑀸𑀲𑀸𑀡𑀘𑀼𑀡𑁆𑀡𑀸𑀦𑀺 𑀮𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀢𑀕𑀼𑀴𑀺𑀓𑀓𑀮𑀸𑀧𑀓𑁄 𑀯𑀼𑀘𑁆𑀘𑀢𑀺, 𑀢𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀯𑀺𑀕𑁆𑀕𑀬𑁆𑀳 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑁂𑀦 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀫𑀮𑁆𑀮𑀓𑀁 𑀦𑀸𑀫 𑀫𑀓𑀭𑀤𑀦𑁆𑀢𑀓𑁂 𑀙𑀺𑀦𑁆𑀤𑀺𑀢𑁆𑀯𑀸 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦 𑀓𑀢𑀁 𑀫𑀮𑁆𑀮𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀕𑀺𑀮𑀸𑀦𑀲𑁆𑀲𑀸𑀧𑀺 𑀦 𑀯𑀝𑁆𑀝𑀢𑀺.

𑁨𑁪𑁪. 𑀅𑀓𑀢𑀫𑀮𑁆𑀮𑀓𑀁 𑀦𑀸𑀫 𑀤𑀦𑁆𑀢𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀁, 𑀇𑀤𑀁 𑀅𑀕𑀺𑀮𑀸𑀦𑀲𑁆𑀲𑁂𑀯 𑀦 𑀯𑀝𑁆𑀝𑀢𑀺; 𑀇𑀝𑁆𑀞𑀓𑀸𑀔𑀡𑁆𑀟𑀁 𑀧𑀦 𑀓𑀧𑀸𑀮𑀔𑀡𑁆𑀟𑀁 𑀯𑀸 𑀯𑀝𑁆𑀝𑀢𑀺. 𑀉𑀓𑁆𑀓𑀸𑀲𑀺𑀓𑀦𑁆𑀢𑀺 𑀯𑀢𑁆𑀣𑀯𑀝𑁆𑀝𑀺𑀁; 𑀢𑀲𑁆𑀫𑀸 𑀦𑁆𑀳𑀸𑀬𑀦𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀦𑁆𑀳𑀸𑀦𑀲𑀸𑀝𑀓𑀯𑀝𑁆𑀝𑀺𑀬𑀸 𑀧𑀺𑀝𑁆𑀞𑀺𑀁 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀣𑀼𑀧𑀸𑀡𑀺𑀓𑀦𑁆𑀢𑀺 𑀳𑀢𑁆𑀣𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀳𑀢𑁆𑀣𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁪𑁫. 𑀯𑀮𑁆𑀮𑀺𑀓𑀸𑀢𑀺 𑀓𑀡𑁆𑀡𑀢𑁄 𑀦𑀺𑀓𑁆𑀔𑀦𑁆𑀢𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁; 𑀦 𑀓𑁂𑀯𑀮𑀜𑁆𑀘 𑀯𑀮𑁆𑀮𑀺𑀓𑀸 𑀏𑀯, 𑀬𑀁𑀓𑀺𑀜𑁆𑀘𑀺 𑀓𑀡𑁆𑀡𑀧𑀺𑀴𑀦𑁆𑀥𑀦𑀁 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀫𑀗𑁆𑀕𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀮𑀫𑁆𑀩𑀓𑀲𑀼𑀢𑁆𑀢𑀁. 𑀓𑀡𑁆𑀞𑀲𑀼𑀢𑁆𑀢𑀓𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀻𑀯𑀽𑀧𑀕𑀆𑀪𑀭𑀡𑀁. 𑀓𑀝𑀺𑀲𑀼𑀢𑁆𑀢𑀓𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀓𑀝𑀺𑀧𑀺𑀴𑀦𑁆𑀥𑀦𑀁 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀢𑀦𑁆𑀢𑀼𑀫𑀢𑁆𑀢𑀫𑁆𑀧𑀺. 𑀑𑀯𑀝𑁆𑀝𑀺𑀓𑀦𑁆𑀢𑀺 𑀯𑀮𑀬𑀁. 𑀓𑀸𑀬𑀽𑀭𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯, 𑀅𑀓𑁆𑀔𑀓𑀸𑀦𑀁 𑀳𑁂𑀝𑁆𑀞𑀸 𑀩𑀸𑀳𑀸𑀪𑀭𑀡𑀁 𑀬𑀁𑀓𑀺𑀜𑁆𑀘𑀺 𑀆𑀪𑀭𑀡𑀁 𑀦 𑀯𑀝𑁆𑀝𑀢𑀺.

𑁨𑁪𑁬. 𑀤𑀼𑀫𑀸𑀲𑀺𑀓𑀁 𑀯𑀸 𑀤𑀼𑀯𑀗𑁆𑀕𑀼𑀮𑀁 𑀯𑀸𑀢𑀺 𑀏𑀢𑁆𑀣 𑀲𑀘𑁂 𑀓𑁂𑀲𑀸 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂 𑀤𑁆𑀯𑀗𑁆𑀕𑀼𑀮𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂𑀯 𑀙𑀺𑀦𑁆𑀤𑀺𑀢𑀩𑁆𑀩𑀸. 𑀤𑁆𑀯𑀗𑁆𑀕𑀼𑀮𑁂𑀳𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀤𑀻𑀖𑀸, 𑀤𑁆𑀯𑁂𑀫𑀸𑀲𑀢𑁄 𑀏𑀓𑀤𑀺𑀯𑀲𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯; 𑀏𑀯𑀫𑀬𑀁 𑀉𑀪𑀬𑁂𑀦𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀯 𑀯𑀼𑀢𑁆𑀢𑁄, 𑀢𑀢𑁄 𑀑𑀭𑀁 𑀧𑀦 𑀦𑀯𑀝𑁆𑀝𑀦𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺.

𑀓𑁄𑀘𑁆𑀙𑁂𑀦 𑀑𑀲𑀡𑁆𑀞𑁂𑀦𑁆𑀢𑀻𑀢𑀺 𑀓𑁄𑀘𑁆𑀙𑁂𑀦 𑀑𑀮𑀺𑀔𑀺𑀢𑁆𑀯𑀸 𑀲𑀦𑁆𑀦𑀺𑀲𑀻𑀤𑀸𑀧𑁂𑀦𑁆𑀢𑀺. 𑀨𑀡𑀓𑁂𑀦𑀸𑀢𑀺 𑀤𑀦𑁆𑀢𑀫𑀬𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺. 𑀳𑀢𑁆𑀣𑀨𑀡𑀓𑁂𑀦𑀸𑀢𑀺 𑀳𑀢𑁆𑀣𑁂𑀦𑁂𑀯 𑀨𑀡𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸 𑀅𑀗𑁆𑀕𑀼𑀮𑀻𑀳𑀺 𑀑𑀲𑀡𑁆𑀞𑁂𑀦𑁆𑀢𑀺. 𑀲𑀺𑀢𑁆𑀣𑀢𑁂𑀮𑀓𑁂𑀦𑀸𑀢𑀺 𑀫𑀥𑀼𑀲𑀺𑀢𑁆𑀣𑀓𑀦𑀺𑀬𑁆𑀬𑀸𑀲𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀺𑀓𑁆𑀓𑀮𑁂𑀦. 𑀉𑀤𑀓𑀢𑁂𑀮𑀓𑁂𑀦𑀸𑀢𑀺 𑀉𑀤𑀓𑀫𑀺𑀲𑁆𑀲𑀓𑁂𑀦 𑀢𑁂𑀮𑁂𑀦. 𑀫𑀡𑁆𑀟𑀦𑀢𑁆𑀣𑀸𑀬 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁, 𑀉𑀤𑁆𑀥𑀮𑁄𑀫𑁂𑀦 𑀧𑀦 𑀅𑀦𑀼𑀮𑁄𑀫𑀦𑀺𑀧𑀸𑀢𑀦𑀢𑁆𑀣𑀁 𑀳𑀢𑁆𑀣𑀁 𑀢𑁂𑀫𑁂𑀢𑁆𑀯𑀸 𑀲𑀻𑀲𑀁 𑀧𑀼𑀜𑁆𑀙𑀺𑀢𑀩𑁆𑀩𑀁. 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑀲𑀺𑀭𑀸𑀦𑀫𑁆𑀧𑀺 𑀅𑀮𑁆𑀮𑀳𑀢𑁆𑀣𑁂𑀦 𑀧𑀼𑀜𑁆𑀙𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁪𑁭. 𑀦 𑀪𑀺𑀓𑁆𑀔𑀯𑁂 𑀆𑀤𑀸𑀲𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀯𑀸𑀢𑀺 𑀏𑀢𑁆𑀣 𑀓𑀁𑀲𑀧𑀢𑁆𑀢𑀸𑀤𑀻𑀦𑀺𑀧𑀺 𑀬𑁂𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀸𑀦𑀺 𑀆𑀤𑀸𑀲𑀲𑀗𑁆𑀔𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀓𑀜𑁆𑀚𑀺𑀬𑀸𑀤𑀻𑀦𑀺𑀧𑀺 𑀘 𑀉𑀤𑀓𑀧𑀢𑁆𑀢𑀲𑀗𑁆𑀔𑀫𑁂𑀯. 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 ‘‘𑀲𑀜𑁆𑀙𑀯𑀺 𑀦𑀼 𑀔𑁄 𑀫𑁂 𑀯𑀡𑁄, 𑀉𑀤𑀸𑀳𑀼 𑀦 𑀢𑀸𑀯𑀸’’𑀢𑀺 𑀚𑀸𑀦𑀦𑀢𑁆𑀣𑀁; ‘‘𑀚𑀺𑀡𑁆𑀡𑁄 𑀦𑀼 𑀔𑁄𑀫𑁆𑀳𑀺 𑀦𑁄’’𑀢𑀺 𑀏𑀯𑀁 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑀦𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁.

𑀫𑀼𑀔𑀁 𑀆𑀮𑀺𑀫𑁆𑀧𑀦𑁆𑀢𑀻𑀢𑀺 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀭𑀸𑀕𑀓𑀭𑁂𑀳𑀺 𑀫𑀼𑀔𑀸𑀮𑁂𑀧𑀦𑁂𑀳𑀺 𑀆𑀮𑀺𑀫𑁆𑀧𑀦𑁆𑀢𑀺. 𑀉𑀫𑁆𑀫𑀤𑁆𑀤𑁂𑀦𑁆𑀢𑀻𑀢𑀺 𑀦𑀸𑀦𑀸𑀉𑀫𑁆𑀫𑀤𑁆𑀤𑀦𑁂𑀳𑀺 𑀉𑀫𑁆𑀫𑀤𑁆𑀤𑁂𑀦𑁆𑀢𑀺. 𑀘𑀼𑀡𑁆𑀡𑁂𑀦𑁆𑀢𑀻𑀢𑀺 𑀫𑀼𑀔𑀘𑀼𑀡𑁆𑀡𑀓𑁂𑀦 𑀫𑀓𑁆𑀔𑁂𑀦𑁆𑀢𑀺. 𑀫𑀦𑁄𑀲𑀺𑀮𑀺𑀓𑀸𑀬 𑀫𑀼𑀔𑀁 𑀮𑀜𑁆𑀙𑁂𑀦𑁆𑀢𑀻𑀢𑀺 𑀫𑀦𑁄𑀲𑀺𑀮𑀸𑀬 𑀢𑀺𑀮𑀓𑀸𑀤𑀻𑀦𑀺 𑀮𑀜𑁆𑀙𑀦𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀦𑀺 𑀳𑀭𑀺𑀢𑀸𑀮𑀸𑀤𑀻𑀳𑀺𑀧𑀺 𑀦 𑀯𑀝𑁆𑀝𑀦𑁆𑀢𑀺𑀬𑁂𑀯. 𑀅𑀗𑁆𑀕𑀭𑀸𑀕𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁.

𑁨𑁪𑁮. 𑀦 𑀪𑀺𑀓𑁆𑀔𑀯𑁂 𑀦𑀘𑁆𑀘𑀁 𑀯𑀸𑀢𑀺𑀆𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀦𑀘𑁆𑀘𑀁 𑀅𑀦𑁆𑀢𑀫𑀲𑁄 𑀫𑁄𑀭𑀦𑀘𑁆𑀘𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀬𑀫𑁆𑀧𑀺 𑀦𑀘𑁆𑀘𑀦𑁆𑀢𑀲𑁆𑀲 𑀯𑀸 𑀦𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀕𑀻𑀢𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀦𑀝𑀕𑀻𑀢𑀁 𑀯𑀸 𑀲𑀸𑀥𑀼𑀕𑀻𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀤𑀦𑁆𑀢𑀕𑀻𑀢𑀫𑁆𑀧𑀺 ‘‘𑀬𑀁 𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀑𑀓𑀽𑀚𑀦𑁆𑀢𑀸 𑀓𑀭𑁄𑀦𑁆𑀢𑀺, 𑀏𑀢𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀲𑀬𑀁 𑀕𑀸𑀬𑀦𑁆𑀢𑀲𑁆𑀲𑀸𑀧𑀺 𑀕𑀸𑀬𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀯𑀸𑀤𑀺𑀢𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀦𑀺𑀝𑁆𑀞𑀼𑀪𑀦𑁆𑀢𑁄 𑀯𑀸 𑀲𑀸𑀲𑀗𑁆𑀓𑁂 𑀯𑀸 𑀞𑀺𑀢𑁄 𑀅𑀘𑁆𑀙𑀭𑀺𑀓𑀁 𑀯𑀸 𑀨𑁄𑀝𑁂𑀢𑀺, 𑀧𑀸𑀡𑀺𑀁 𑀯𑀸 𑀧𑀳𑀭𑀢𑀺, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀲𑀩𑁆𑀩𑀁 𑀅𑀦𑁆𑀢𑀭𑀸𑀭𑀸𑀫𑁂 𑀞𑀺𑀢𑀲𑁆𑀲 𑀧𑀲𑁆𑀲𑀢𑁄 𑀅𑀦𑀸𑀧𑀢𑁆𑀢𑀺. ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺. ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀢𑁄 𑀆𑀧𑀢𑁆𑀢𑀺. 𑀯𑀻𑀣𑀺𑀬𑀁 𑀞𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑁄𑀧𑀺 𑀆𑀧𑀢𑁆𑀢𑀺𑀬𑁂𑀯.

𑁨𑁪𑁯. 𑀲𑀭𑀓𑀼𑀢𑁆𑀢𑀺𑀦𑁆𑀢𑀺 𑀲𑀭𑀓𑀺𑀭𑀺𑀬𑀁. 𑀪𑀗𑁆𑀕𑁄 𑀳𑁄𑀢𑀻𑀢𑀺 𑀅𑀮𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀮𑀤𑁆𑀥𑀁 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀧𑀺 𑀉𑀧𑀚𑁆𑀛𑀸𑀬𑀸𑀧𑀺 𑀏𑀯𑀁 𑀕𑀸𑀬𑀺𑀁𑀲𑀽𑀢𑀺 𑀧𑀘𑁆𑀙𑀺𑀫𑁄 𑀚𑀦𑁄 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺; 𑀢𑀣𑁂𑀯 𑀕𑀸𑀬𑀢𑀺. 𑀦 𑀪𑀺𑀓𑁆𑀔𑀯𑁂 𑀆𑀬𑀢𑀓𑁂𑀦𑀸𑀢𑀺 𑀏𑀢𑁆𑀣 𑀆𑀬𑀢𑀓𑁄 𑀦𑀸𑀫 𑀢𑀁 𑀢𑀁 𑀯𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀯𑀺𑀦𑀸𑀲𑁂𑀢𑁆𑀯𑀸 𑀧𑀯𑀢𑁆𑀢𑁄. 𑀥𑀫𑁆𑀫𑁂 𑀧𑀦 𑀲𑀼𑀢𑁆𑀢𑀦𑁆𑀢𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀚𑀸𑀢𑀓𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀕𑀸𑀣𑀸𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑀺𑀤𑀻𑀖𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀲𑀭𑀪𑀜𑁆𑀜𑀦𑁆𑀢𑀺 𑀲𑀭𑁂𑀦 𑀪𑀡𑀦𑀁. 𑀲𑀭𑀪𑀜𑁆𑀜𑁂 𑀓𑀺𑀭 𑀢𑀭𑀗𑁆𑀕𑀯𑀢𑁆𑀢𑀥𑁄𑀢𑀓𑀯𑀢𑁆𑀢𑀕𑀮𑀺𑀢𑀯𑀢𑁆𑀢𑀸𑀤𑀻𑀦𑀺 𑀤𑁆𑀯𑀢𑁆𑀢𑀺𑀁𑀲 𑀯𑀢𑁆𑀢𑀸𑀦𑀺 𑀅𑀢𑁆𑀣𑀺. 𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀸𑀢𑀼𑀁 𑀮𑀪𑀢𑀺. 𑀲𑀩𑁆𑀩𑁂𑀲𑀁 𑀧𑀤𑀩𑁆𑀬𑀜𑁆𑀚𑀦𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀯𑀺𑀓𑀸𑀭𑀁 𑀅𑀓𑀢𑁆𑀯𑀸 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀘𑀢𑀼𑀭𑀲𑁆𑀲𑁂𑀦 𑀦𑀬𑁂𑀦 𑀧𑀯𑀢𑁆𑀢𑀦𑀁𑀬𑁂𑀯 𑀮𑀓𑁆𑀔𑀡𑀁.

𑀩𑀸𑀳𑀺𑀭𑀮𑁄𑀫𑀺𑀁 𑀉𑀡𑁆𑀡𑀺𑀦𑁆𑀢𑀺 𑀉𑀡𑁆𑀡𑀮𑁄𑀫𑀸𑀦𑀺 𑀩𑀳𑀺 𑀓𑀢𑁆𑀯𑀸 𑀉𑀡𑁆𑀡𑀧𑀸𑀯𑀸𑀭𑀁 𑀧𑀸𑀭𑀼𑀧𑀦𑁆𑀢𑀺; 𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀮𑁄𑀫𑀸𑀦𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀫𑀡𑀓𑀧𑁆𑀧𑀓𑀣𑀸 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸.

𑁨𑁫𑁧. 𑀦 𑀪𑀺𑀓𑁆𑀔𑀯𑁂 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁 𑀙𑀺𑀦𑁆𑀤𑀦𑁆𑀢𑀲𑁆𑀲𑁂𑀯 𑀣𑀼𑀮𑁆𑀮𑀘𑁆𑀘𑀬𑀁. 𑀅𑀜𑁆𑀜𑀁 𑀧𑀦 𑀓𑀡𑁆𑀡𑀦𑀸𑀲𑀸𑀅𑀗𑁆𑀕𑀼𑀮𑀺𑀆𑀤𑀺𑀁 𑀬𑀁𑀓𑀺𑀜𑁆𑀘𑀺 𑀙𑀺𑀦𑁆𑀤𑀦𑁆𑀢𑀲𑁆𑀲 𑀢𑀸𑀤𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀳𑀺𑀓𑀻𑀝𑀤𑀝𑁆𑀞𑀸𑀤𑀻𑀲𑀼 𑀧𑀦 𑀅𑀜𑁆𑀜𑀆𑀩𑀸𑀥𑀧𑀘𑁆𑀘𑀬𑀸 𑀯𑀸 𑀮𑁄𑀳𑀺𑀢𑀁 𑀯𑀸 𑀫𑁄𑀘𑁂𑀦𑁆𑀢𑀲𑁆𑀲 𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀦𑀸𑀧𑀢𑁆𑀢𑀺.

𑁨𑁫𑁨. 𑀘𑀦𑁆𑀤𑀦𑀕𑀡𑁆𑀞𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀻𑀢𑀺 𑀘𑀦𑁆𑀤𑀦𑀖𑀝𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 𑀓𑀺𑀭 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀚𑀸𑀮𑀸𑀦𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀓𑀻𑀴𑀢𑀺, 𑀢𑀲𑁆𑀲 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀸 𑀘𑀦𑁆𑀤𑀦𑀕𑀡𑁆𑀞𑀺 𑀆𑀕𑀦𑁆𑀢𑁆𑀯𑀸 𑀚𑀸𑀮𑁂 𑀮𑀕𑁆𑀕𑀸, 𑀢𑀫𑀲𑁆𑀲 𑀧𑀼𑀭𑀺𑀲𑀸 𑀆𑀳𑀭𑀺𑀢𑁆𑀯𑀸 𑀅𑀤𑀁𑀲𑀼; 𑀏𑀯𑀁 𑀲𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦 𑀪𑀺𑀓𑁆𑀔𑀯𑁂 𑀲𑁄𑀯𑀡𑁆𑀡𑀫𑀬𑁄 𑀧𑀢𑁆𑀢𑁄𑀢𑀺𑀆𑀤𑀻𑀲𑀼 𑀲𑀘𑁂𑀧𑀺 𑀕𑀺𑀳𑀻 𑀪𑀢𑁆𑀢𑀕𑁆𑀕𑁂 𑀲𑀼𑀯𑀡𑁆𑀡𑀢𑀝𑁆𑀝𑀺𑀓𑀸𑀤𑀻𑀲𑀼 𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀉𑀧𑀦𑀸𑀫𑁂𑀦𑁆𑀢𑀺, 𑀆𑀫𑀲𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀨𑀮𑀺𑀓𑀫𑀬𑀓𑀸𑀘𑀫𑀬𑀓𑀁𑀲𑀫𑀬𑀸𑀦𑀺 𑀧𑀦 𑀢𑀝𑁆𑀝𑀺𑀓𑀸𑀤𑀻𑀦𑀺 𑀪𑀸𑀚𑀦𑀸𑀦𑀺 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦𑁂𑀯 𑀦 𑀯𑀝𑁆𑀝𑀦𑁆𑀢𑀺, 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸 𑀯𑀝𑁆𑀝𑀦𑁆𑀢𑀺. ‘‘𑀢𑀫𑁆𑀩𑀮𑁄𑀳𑀫𑀬𑁄𑀧𑀺 𑀧𑀢𑁆𑀢𑁄𑀯 𑀦 𑀯𑀝𑁆𑀝𑀢𑀺, 𑀣𑀸𑀮𑀓𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀲𑀩𑁆𑀩𑀁 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀡𑀺𑀫𑀬𑁄𑀢𑀺 𑀏𑀢𑁆𑀣 𑀧𑀦 𑀇𑀦𑁆𑀤𑀦𑀻𑀮𑀸𑀤𑀺𑀫𑀡𑀺𑀫𑀬𑁄 𑀯𑀼𑀢𑁆𑀢𑁄. 𑀓𑀁𑀲𑀫𑀬𑁄𑀢𑀺 𑀏𑀢𑁆𑀣 𑀯𑀝𑁆𑀝𑀮𑁄𑀳𑀫𑀬𑁄𑀧𑀺 𑀲𑀗𑁆𑀕𑀳𑀺𑀢𑁄.

𑁨𑁫𑁩. 𑀮𑀺𑀔𑀺𑀢𑀼𑀦𑁆𑀢𑀺 𑀢𑀦𑀼𑀓𑀭𑀡𑀢𑁆𑀣𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀓𑀢𑀺𑀫𑀡𑁆𑀟𑀮𑀦𑁆𑀢𑀺 𑀫𑀓𑀭𑀤𑀦𑁆𑀢𑀘𑁆𑀙𑀺𑀦𑁆𑀦𑀓𑀫𑀡𑁆𑀟𑀮𑀫𑁂𑀯.

𑁨𑁫𑁪. 𑀆𑀯𑀝𑁆𑀝𑀺𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸. 𑀧𑀢𑁆𑀢𑀸𑀥𑀸𑀭𑀓𑀦𑁆𑀢𑀺 𑀏𑀢𑁆𑀣 ‘‘𑀤𑀦𑁆𑀢𑀯𑀮𑁆𑀮𑀺𑀯𑁂𑀢𑁆𑀢𑀸𑀤𑀻𑀳𑀺 𑀓𑀢𑁂 𑀪𑀽𑀫𑀺𑀆𑀥𑀸𑀭𑀓𑁂 𑀢𑀬𑁄, 𑀤𑀸𑀭𑀼𑀆𑀥𑀸𑀭𑀓𑁂 𑀤𑁆𑀯𑁂 𑀧𑀢𑁆𑀢𑁂 𑀉𑀧𑀭𑀽𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀪𑀽𑀫𑀺𑀆𑀥𑀸𑀭𑀓𑁂 𑀢𑀺𑀡𑁆𑀡𑀁 𑀧𑀢𑁆𑀢𑀸𑀦𑀁 𑀅𑀦𑁄𑀓𑀸𑀲𑁄, 𑀤𑁆𑀯𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀭𑀼𑀆𑀥𑀸𑀭𑀓𑀤𑀡𑁆𑀟𑀸𑀥𑀸𑀭𑀓𑁂𑀲𑀼𑀧𑀺 𑀲𑀼𑀲𑀚𑁆𑀚𑀺𑀢𑁂𑀲𑀼 𑀏𑀲𑁂𑀯 𑀦𑀬𑁄. 𑀪𑀫𑀓𑁄𑀝𑀺𑀲𑀤𑀺𑀲𑁄 𑀧𑀦 𑀤𑀸𑀭𑀼𑀆𑀥𑀸𑀭𑀓𑁄 𑀢𑀻𑀳𑀺 𑀤𑀡𑁆𑀟𑀓𑁂𑀳𑀺 𑀩𑀤𑁆𑀥𑁄 𑀤𑀡𑁆𑀟𑀓𑀸𑀥𑀸𑀭𑁄 𑀘 𑀏𑀓𑀲𑁆𑀲𑀧𑀺 𑀧𑀢𑁆𑀢𑀲𑁆𑀲 𑀅𑀦𑁄𑀓𑀸𑀲𑁄, 𑀢𑀢𑁆𑀣 𑀞𑀧𑁂𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀏𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀪𑀽𑀫𑀺𑀬𑀁 𑀧𑀦 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀏𑀓𑀫𑁂𑀯 𑀞𑀧𑁂𑀢𑀩𑁆𑀩’’𑀦𑁆𑀢𑀺.

𑀫𑀺𑀟𑁆𑀠𑀦𑁆𑀢𑁂𑀢𑀺 𑀆𑀮𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀁 𑀅𑀦𑁆𑀢𑁂. 𑀲𑀘𑁂 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀭𑀽𑀧𑀸𑀬 𑀯𑀺𑀢𑁆𑀣𑀺𑀡𑁆𑀡𑀸𑀬 𑀫𑀺𑀟𑁆𑀠𑀺𑀬𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀪𑀡𑁆𑀟𑀦𑁆𑀢𑁂𑀢𑀺 𑀩𑀸𑀳𑀺𑀭𑀧𑀲𑁆𑀲𑁂 𑀓𑀢𑀸𑀬 𑀢𑀦𑀼𑀓𑀫𑀺𑀟𑁆𑀠𑀺𑀓𑀸𑀬 𑀅𑀦𑁆𑀢𑁂. 𑀫𑀺𑀟𑁆𑀠𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣𑀸𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀘𑁄𑀴𑀓𑀦𑁆𑀢𑀺 𑀬𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀢𑁆𑀢𑁄 𑀞𑀧𑀻𑀬𑀢𑀺; 𑀢𑀲𑁆𑀫𑀺𑀁 𑀧𑀦 𑀅𑀲𑀢𑀺 𑀓𑀝𑀲𑀸𑀭𑀓𑁂 𑀯𑀸 𑀢𑀝𑁆𑀝𑀺𑀓𑀸𑀬 𑀯𑀸 𑀫𑀢𑁆𑀢𑀺𑀓𑀸𑀧𑀭𑀺𑀪𑀡𑁆𑀟𑀓𑀢𑀸𑀬 𑀪𑀽𑀫𑀺𑀬𑀸 𑀯𑀸 𑀬𑀢𑁆𑀣 𑀦 𑀤𑀼𑀲𑁆𑀲𑀢𑀺, 𑀢𑀣𑀸𑀭𑀽𑀧𑀸𑀬 𑀯𑀸𑀮𑀺𑀓𑀸𑀬 𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀁𑀲𑀼𑀭𑀚𑀸𑀤𑀻𑀲𑀼 𑀧𑀦 𑀔𑀭𑀪𑀽𑀫𑀺𑀬𑀁 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀢𑁆𑀢𑀫𑀸𑀴𑀓𑀁 𑀇𑀝𑁆𑀞𑀓𑀸𑀳𑀺 𑀯𑀸 𑀤𑀸𑀭𑀽𑀳𑀺 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀢𑁆𑀢𑀓𑀼𑀡𑁆𑀟𑁄𑀮𑀺𑀓𑀸𑀢𑀺 𑀫𑀳𑀸𑀫𑀼𑀔𑀓𑀼𑀡𑁆𑀟𑀲𑀡𑁆𑀞𑀸𑀦𑀸 𑀪𑀡𑁆𑀟𑀓𑀼𑀓𑁆𑀔𑀮𑀺𑀓𑀸 𑀯𑀼𑀘𑁆𑀘𑀢𑀺. 𑀬𑁄 𑀮𑀕𑁆𑀕𑁂𑀬𑁆𑀬𑀸𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀕𑁆𑀕𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀘𑀻𑀯𑀭𑀯𑀁𑀲𑁂𑀧𑀺 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀪𑀡𑁆𑀟𑀓𑀝𑁆𑀞𑀧𑀦𑀢𑁆𑀣𑀫𑁂𑀯 𑀯𑀸 𑀓𑀢𑀁 𑀳𑁄𑀢𑀼 𑀦𑀺𑀲𑀻𑀤𑀦𑀲𑀬𑀦𑀢𑁆𑀣𑀁 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀅𑀜𑁆𑀜𑁂𑀦 𑀧𑀦 𑀪𑀡𑁆𑀟𑀓𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀝𑀦𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑁂𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀩𑀦𑁆𑀥𑀺𑀢𑁆𑀯𑀸𑀧𑀺 𑀉𑀧𑀭𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑀸𑀤𑀻𑀲𑀼 𑀅𑀝𑁆𑀝𑀓𑀙𑀦𑁆𑀦𑁂𑀦 𑀞𑀧𑀺𑀢𑀁 𑀳𑁄𑀢𑀺, 𑀢𑀢𑁆𑀣 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀁𑀲𑀯𑀤𑁆𑀥𑀦𑀓𑁂𑀦 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀅𑀗𑁆𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀙𑀢𑁆𑀢𑁂 𑀪𑀢𑁆𑀢𑀧𑀽𑀭𑁄𑀧𑀺 𑀅𑀁𑀲𑀓𑀽𑀝𑁂 𑀮𑀕𑁆𑀕𑀺𑀢𑀧𑀢𑁆𑀢𑁄𑀧𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀪𑀡𑁆𑀟𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀅𑀝𑁆𑀝𑀓𑀁 𑀓𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀬𑁄 𑀓𑁄𑀘𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁫𑁫. 𑀧𑀢𑁆𑀢𑀳𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀬𑀲𑁆𑀲 𑀧𑀢𑁆𑀢𑁄 𑀳𑀢𑁆𑀣𑁂, 𑀲𑁄 𑀏𑀯 𑀧𑀢𑁆𑀢𑀳𑀢𑁆𑀣𑁄, 𑀦 𑀓𑁂𑀯𑀮𑀜𑁆𑀘 𑀓𑀯𑀸𑀝𑀫𑁂𑀯 𑀧𑀡𑀸𑀫𑁂𑀢𑀼𑀁 𑀦 𑀮𑀪𑀢𑀺; 𑀅𑀧𑀺𑀘 𑀔𑁄 𑀧𑀦 𑀳𑀢𑁆𑀣𑁂 𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂 𑀧𑀢𑁆𑀢𑀲𑁆𑀫𑀺𑀁 𑀲𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀲𑀻𑀲𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀓𑀯𑀸𑀝𑀁 𑀯𑀸 𑀧𑀡𑀸𑀫𑁂𑀢𑀼𑀁 𑀖𑀝𑀺𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑀼𑀁 𑀲𑀽𑀘𑀺𑀁 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀅𑀧𑀸𑀧𑀼𑀭𑀺𑀢𑀼𑀁 𑀦 𑀮𑀪𑀢𑀺. 𑀅𑀁𑀲𑀓𑀽𑀝𑁂 𑀧𑀦 𑀧𑀢𑁆𑀢𑀁 𑀮𑀕𑁆𑀕𑁂𑀢𑁆𑀯𑀸 𑀬𑀣𑀸𑀲𑀼𑀔𑀁 𑀅𑀯𑀸𑀧𑀼𑀭𑀺𑀢𑀼𑀁 𑀮𑀪𑀢𑀺.

𑀢𑀼𑀫𑁆𑀩𑀓𑀝𑀸𑀳𑀦𑁆𑀢𑀺 𑀮𑀸𑀩𑀼𑀓𑀝𑀸𑀳𑀁 𑀯𑀼𑀘𑁆𑀘𑀢𑀺, 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀮𑀪𑀺𑀢𑁆𑀯𑀸 𑀧𑀦 𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀖𑀝𑀺𑀓𑀝𑀸𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀖𑀝𑀺𑀓𑀝𑀸𑀳𑀦𑁆𑀢𑀺 𑀖𑀝𑀺𑀓𑀧𑀸𑀮𑀁. 𑀅𑀪𑀼𑀁 𑀫𑁂𑀢𑀺 𑀉𑀢𑁆𑀭𑀸𑀲𑀯𑀘𑀦𑀫𑁂𑀢𑀁. 𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁂𑀦𑀸𑀢𑀺 𑀏𑀢𑁆𑀣 𑀘𑀻𑀯𑀭𑀜𑁆𑀘 𑀫𑀜𑁆𑀘𑀧𑀻𑀞𑀜𑁆𑀘 𑀧𑀁𑀲𑀼𑀓𑀽𑀮𑀁 𑀯𑀝𑁆𑀝𑀢𑀺, 𑀅𑀚𑁆𑀛𑁄𑀳𑀭𑀡𑀻𑀬𑀁 𑀧𑀦 𑀤𑀺𑀦𑁆𑀦𑀓𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀘𑀮𑀓𑀸𑀦𑀻𑀢𑀺 𑀘𑀩𑁆𑀩𑁂𑀢𑁆𑀯𑀸 𑀅𑀧𑀯𑀺𑀤𑁆𑀥𑀸𑀫𑀺𑀲𑀸𑀦𑀺. 𑀅𑀝𑁆𑀞𑀺𑀓𑀸𑀦𑀻𑀢𑀺 𑀫𑀘𑁆𑀙𑀫𑀁𑀲𑀅𑀝𑁆𑀞𑀺𑀓𑀸𑀦𑀺. 𑀉𑀘𑁆𑀙𑀺𑀝𑁆𑀞𑁄𑀤𑀓𑀦𑁆𑀢𑀺 𑀫𑀼𑀔𑀯𑀺𑀓𑁆𑀔𑀸𑀮𑀦𑁄𑀤𑀓𑀁. 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀢𑁆𑀢𑁂𑀦 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺. 𑀳𑀢𑁆𑀣𑀥𑁄𑀢𑀧𑀸𑀤𑀥𑁄𑀢𑀉𑀤𑀓𑀫𑁆𑀧𑀺 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀦𑀼𑀘𑁆𑀙𑀺𑀝𑁆𑀞𑀁 𑀲𑀼𑀤𑁆𑀥𑀧𑀢𑁆𑀢𑀁 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀸𑀫𑀳𑀢𑁆𑀣𑁂𑀦 𑀧𑀦𑁂𑀢𑁆𑀣 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀏𑀓𑀁 𑀉𑀤𑀓𑀕𑀡𑁆𑀟𑀼𑀲𑀁 𑀕𑀳𑁂𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀳𑀺 𑀲𑁄 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑁄 𑀳𑁄𑀢𑀺, 𑀳𑀢𑁆𑀣𑀁 𑀧𑀦 𑀩𑀳𑀺 𑀉𑀤𑀓𑁂𑀦 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀘𑁆𑀙𑀫𑀁𑀲𑀨𑀮𑀸𑀨𑀮𑀸𑀤𑀻𑀦𑀺 𑀔𑀸𑀤𑀦𑁆𑀢𑁄 𑀬𑀁 𑀢𑀢𑁆𑀣 𑀅𑀝𑁆𑀞𑀺𑀁 𑀯𑀸 𑀘𑀮𑀓𑀁 𑀯𑀸 𑀙𑀟𑁆𑀟𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑀁 𑀧𑀦 𑀧𑀝𑀺𑀔𑀸𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀮𑀪𑀢𑀺. 𑀅𑀝𑁆𑀞𑀺𑀓𑀓𑀡𑁆𑀝𑀓𑀸𑀤𑀻𑀦𑀺 𑀢𑀢𑁆𑀣𑁂𑀯 𑀓𑀢𑁆𑀯𑀸 𑀳𑀢𑁆𑀣𑁂𑀦 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀔𑀢𑁄 𑀦𑀻𑀳𑀝𑀁 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀼𑀦 𑀔𑀸𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺. 𑀲𑀺𑀗𑁆𑀕𑀺𑀯𑁂𑀭𑀦𑀸𑀴𑀺𑀓𑁂𑀭𑀔𑀡𑁆𑀟𑀸𑀦𑀺 𑀟𑀁𑀲𑀺𑀢𑁆𑀯𑀸 𑀧𑀼𑀦 𑀞𑀧𑁂𑀢𑀼𑀁 𑀮𑀪𑀢𑀺.

𑁨𑁫𑁬. 𑀦𑀫𑀢𑀓𑀦𑁆𑀢𑀺 𑀲𑀢𑁆𑀣𑀓𑀯𑁂𑀞𑀦𑀓𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁. 𑀤𑀡𑁆𑀟𑀲𑀢𑁆𑀣𑀓𑀦𑁆𑀢𑀺 𑀧𑀺𑀧𑁆𑀨𑀮𑀓𑀁 𑀯𑀸 𑀅𑀜𑁆𑀜𑀫𑁆𑀧𑀺 𑀯𑀸 𑀬𑀁𑀓𑀺𑀜𑁆𑀘𑀺 𑀤𑀡𑁆𑀟𑀁 𑀬𑁄𑀚𑁂𑀢𑁆𑀯𑀸 𑀓𑀢𑀲𑀢𑁆𑀣𑀓𑀁.

𑀓𑀡𑁆𑀡𑀓𑀺𑀢𑀸 𑀳𑁄𑀦𑁆𑀢𑀻𑀢𑀺 𑀫𑀮𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀓𑀺𑀡𑁆𑀡𑁂𑀦 𑀧𑀽𑀭𑁂𑀢𑀼𑀦𑁆𑀢𑀺 𑀓𑀺𑀡𑁆𑀡𑀘𑀼𑀡𑁆𑀡𑁂𑀦 𑀧𑀽𑀭𑁂𑀢𑀼𑀁. 𑀲𑀢𑁆𑀢𑀼𑀬𑀸𑀢𑀺 𑀳𑀮𑀺𑀤𑁆𑀤𑀺𑀫𑀺𑀲𑁆𑀲𑀓𑁂𑀦 𑀧𑀺𑀝𑁆𑀞𑀘𑀼𑀡𑁆𑀡𑁂𑀦. 𑀲𑀭𑀺𑀢𑀓𑀦𑁆𑀢𑀺 𑀧𑀸𑀲𑀸𑀡𑀘𑀼𑀡𑁆𑀡𑀁 𑀯𑀼𑀘𑁆𑀘𑀢𑀺; 𑀢𑁂𑀦 𑀧𑀽𑀭𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀫𑀥𑀼𑀲𑀺𑀢𑁆𑀣𑀓𑁂𑀦 𑀲𑀸𑀭𑁂𑀢𑀼𑀦𑁆𑀢𑀺 𑀫𑀥𑀼𑀲𑀺𑀢𑁆𑀣𑀓𑁂𑀦 𑀫𑀓𑁆𑀔𑁂𑀢𑀼𑀁. 𑀲𑀭𑀺𑀢𑀓𑀁 𑀧𑀭𑀺𑀪𑀺𑀚𑁆𑀚𑀢𑀻𑀢𑀺 𑀢𑀁 𑀫𑀓𑁆𑀔𑀺𑀢𑀫𑀥𑀼𑀲𑀺𑀢𑁆𑀣𑀓𑀁 𑀪𑀺𑀚𑁆𑀚𑀢𑀺. 𑀲𑀭𑀺𑀢𑀲𑀺𑀧𑀸𑀝𑀺𑀓𑀦𑁆𑀢𑀺 𑀫𑀥𑀼𑀲𑀺𑀢𑁆𑀣𑀓𑀧𑀺𑀮𑁄𑀢𑀺𑀓𑀁; 𑀲𑀢𑁆𑀣𑀓𑁄𑀲𑀓𑀲𑀺𑀧𑀸𑀝𑀺𑀬𑀸 𑀧𑀦 𑀲𑀭𑀺𑀢𑀲𑀺𑀧𑀸𑀝𑀺𑀓𑀸𑀬 𑀅𑀦𑀼𑀮𑁄𑀫𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀓𑀣𑀺𑀦𑀦𑁆𑀢𑀺 𑀦𑀺𑀲𑁆𑀲𑁂𑀡𑀺𑀫𑁆𑀧𑀺 𑀢𑀢𑁆𑀣 𑀅𑀢𑁆𑀣𑀭𑀺𑀢𑀩𑁆𑀩𑀓𑀝𑀲𑀸𑀭𑀓𑀓𑀺𑀮𑀜𑁆𑀚𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺. 𑀓𑀣𑀺𑀦𑀭𑀚𑁆𑀚𑀼𑀦𑁆𑀢𑀺 𑀬𑀸𑀬 𑀤𑀼𑀧𑀝𑁆𑀝𑀘𑀻𑀯𑀭𑀁 𑀲𑀺𑀩𑁆𑀩𑀦𑁆𑀢𑀸 𑀓𑀣𑀺𑀦𑁂 𑀘𑀻𑀯𑀭𑀫𑁆𑀧𑀺 𑀩𑀦𑁆𑀥𑀦𑁆𑀢𑀺. 𑀓𑀣𑀺𑀦𑀁 𑀦𑀧𑁆𑀧𑀳𑁄𑀢𑀻𑀢𑀺 𑀤𑀻𑀖𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀫𑀸𑀡𑁂𑀦 𑀓𑀢𑀁 𑀓𑀣𑀺𑀦𑀁; 𑀢𑀢𑁆𑀣 𑀭𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀧𑀢𑁆𑀣𑀭𑀺𑀬𑀫𑀸𑀦𑀁 𑀦𑀧𑁆𑀧𑀳𑁄𑀢𑀺, 𑀅𑀦𑁆𑀢𑁄𑀬𑁂𑀯 𑀳𑁄𑀢𑀺; 𑀤𑀡𑁆𑀟𑀓𑁂 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀓𑀣𑀺𑀦𑀦𑁆𑀢𑀺 𑀢𑀲𑁆𑀲 𑀫𑀚𑁆𑀛𑁂 𑀇𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀫𑀸𑀡𑁂𑀦 𑀅𑀜𑁆𑀜𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀩𑀺𑀤𑀮𑀓𑀦𑁆𑀢𑀺 𑀤𑀡𑁆𑀟𑀓𑀣𑀺𑀦𑀧𑁆𑀧𑀫𑀸𑀡𑁂𑀦 𑀓𑀝𑀲𑀸𑀭𑀓𑀲𑁆𑀲 𑀧𑀭𑀺𑀬𑀦𑁆𑀢𑁂 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀤𑀼𑀕𑀼𑀡𑀓𑀭𑀡𑀁. 𑀲𑀮𑀸𑀓𑀦𑁆𑀢𑀺 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀅𑀦𑁆𑀢𑀭𑁂 𑀧𑀯𑁂𑀲𑀦𑀲𑀮𑀸𑀓𑀁. 𑀯𑀺𑀦𑀦𑁆𑀥𑀦𑀭𑀚𑁆𑀚𑀼𑀦𑁆𑀢𑀺 𑀫𑀳𑀸𑀦𑀺𑀲𑁆𑀲𑁂𑀡𑀺𑀬𑀸 𑀲𑀤𑁆𑀥𑀺𑀁 𑀔𑀼𑀤𑁆𑀤𑀓𑀁 𑀦𑀺𑀲𑁆𑀲𑁂𑀡𑀺𑀁 𑀯𑀺𑀦𑀦𑁆𑀥𑀺𑀢𑀼𑀁 𑀭𑀚𑁆𑀚𑀼𑀁. 𑀯𑀺𑀦𑀦𑁆𑀥𑀦𑀲𑀼𑀢𑁆𑀢𑀦𑁆𑀢𑀺 𑀔𑀼𑀤𑁆𑀤𑀓𑀦𑀺𑀲𑁆𑀲𑁂𑀡𑀺𑀬𑀸 𑀘𑀻𑀯𑀭𑀁 𑀯𑀺𑀦𑀦𑁆𑀥𑀺𑀢𑀼𑀁 𑀲𑀼𑀢𑁆𑀢𑀓𑀁. 𑀯𑀺𑀦𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀦𑁆𑀢𑀺 𑀢𑁂𑀦 𑀲𑀼𑀢𑁆𑀢𑀓𑁂𑀦 𑀢𑀢𑁆𑀣 𑀘𑀻𑀯𑀭𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑀼𑀁. 𑀯𑀺𑀲𑀫𑀸 𑀳𑁄𑀦𑁆𑀢𑀻𑀢𑀺 𑀓𑀸𑀘𑀺 𑀔𑀼𑀤𑁆𑀤𑀓𑀸 𑀳𑁄𑀦𑁆𑀢𑀺, 𑀓𑀸𑀘𑀺 𑀫𑀳𑀦𑁆𑀢𑀸. 𑀓𑀴𑀺𑀫𑁆𑀪𑀓𑀦𑁆𑀢𑀺 𑀧𑀫𑀸𑀡𑀲𑀜𑁆𑀜𑀸𑀓𑀭𑀡𑀁 𑀬𑀁𑀓𑀺𑀜𑁆𑀘𑀺 𑀢𑀸𑀮𑀧𑀡𑁆𑀡𑀸𑀤𑀺𑀁. 𑀫𑁄𑀖𑀲𑀼𑀢𑁆𑀢𑀓𑀦𑁆𑀢𑀺 𑀯𑀟𑁆𑀠𑀓𑀻𑀦𑀁 𑀤𑀸𑀭𑀽𑀲𑀼 𑀓𑀸𑀴𑀲𑀼𑀢𑁆𑀢𑁂𑀦 𑀯𑀺𑀬 𑀳𑀮𑀺𑀤𑁆𑀤𑀺𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀓𑀭𑀡𑀁. 𑀅𑀗𑁆𑀕𑀼𑀮𑀺𑀬𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀲𑀽𑀘𑀺𑀫𑀼𑀔𑀁 𑀅𑀗𑁆𑀕𑀼𑀮𑀺𑀬𑀸 𑀧𑀝𑀺𑀘𑁆𑀙𑀦𑁆𑀢𑀺. 𑀧𑀝𑀺𑀕𑁆𑀕𑀳𑀦𑁆𑀢𑀺 𑀅𑀗𑁆𑀕𑀼𑀮𑀺𑀓𑁄𑀲𑀓𑀁.

𑁨𑁫𑁭. 𑀆𑀯𑁂𑀲𑀦𑀯𑀺𑀢𑁆𑀣𑀓𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀧𑀸𑀢𑀺𑀘𑀗𑁆𑀓𑁄𑀝𑀓𑀸𑀤𑀺. 𑀉𑀘𑁆𑀘𑀯𑀢𑁆𑀣𑀼𑀓𑀦𑁆𑀢𑀺 𑀧𑀁𑀲𑀼𑀁 𑀆𑀓𑀺𑀭𑀺𑀢𑁆𑀯𑀸 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀦𑁆𑀢𑀺 𑀙𑀤𑀦𑀁 𑀑𑀥𑀼𑀦𑀺𑀢𑁆𑀯𑀸 𑀖𑀦𑀤𑀡𑁆𑀟𑀓𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀕𑁄𑀖𑀁𑀲𑀺𑀓𑀸𑀬𑀸𑀢𑀺 𑀯𑁂𑀴𑀼𑀁 𑀯𑀸 𑀭𑀼𑀓𑁆𑀔𑀤𑀡𑁆𑀟𑀁 𑀯𑀸 𑀅𑀦𑁆𑀢𑁄𑀓𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀩𑀦𑁆𑀥𑀦𑀭𑀚𑁆𑀚𑀼𑀦𑁆𑀢𑀺 𑀢𑀣𑀸 𑀲𑀗𑁆𑀖𑀭𑀺𑀢𑀲𑁆𑀲 𑀩𑀦𑁆𑀥𑀦𑀭𑀚𑁆𑀚𑀼𑀁.

𑁨𑁫𑁮. 𑀓𑀝𑀘𑁆𑀙𑀼𑀧𑀭𑀺𑀲𑁆𑀲𑀸𑀯𑀦𑀁 𑀦𑀸𑀫 𑀢𑀻𑀲𑀼 𑀤𑀡𑁆𑀟𑀓𑁂𑀲𑀼 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀢𑀁.

𑁨𑁫𑁯. 𑀬𑁄 𑀦 𑀤𑀤𑁂𑀬𑁆𑀬𑀸𑀢𑀺 𑀅𑀧𑀭𑀺𑀲𑁆𑀲𑀸𑀯𑀦𑀓𑀲𑁆𑀲𑁂𑀯 𑀬𑁄 𑀦 𑀤𑀤𑀸𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑀺𑀲𑁆𑀲𑀸𑀯𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀬𑀸𑀘𑀢𑀺, 𑀢𑀲𑁆𑀲 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑀁. 𑀤𑀡𑁆𑀟𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀺 𑀭𑀚𑀓𑀸𑀦𑀁 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀁 𑀯𑀺𑀬 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀩𑀤𑁆𑀥𑀦𑀺𑀲𑁆𑀲𑁂𑀡𑀺𑀓𑀸𑀬 𑀲𑀸𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂𑀤𑀡𑁆𑀟𑀓𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁, 𑀢𑀁 𑀉𑀪𑁄𑀧𑀺 𑀓𑁄𑀝𑁆𑀞𑀸𑀲𑁂 𑀧𑀽𑀭𑁂𑀢𑁆𑀯𑀸 𑀧𑀭𑀺𑀲𑁆𑀲𑀯𑀢𑀺. 𑀑𑀢𑁆𑀣𑀭𑀓𑀁 𑀦𑀸𑀫 𑀬𑀁 𑀉𑀤𑀓𑁂 𑀑𑀢𑁆𑀣𑀭𑀺𑀢𑁆𑀯𑀸 𑀖𑀝𑀓𑁂𑀦 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺, 𑀢𑀜𑁆𑀳𑀺 𑀘𑀢𑀽𑀲𑀼 𑀤𑀡𑁆𑀟𑀓𑁂𑀲𑀼 𑀯𑀢𑁆𑀣𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀘𑀢𑁆𑀢𑀸𑀭𑁄 𑀔𑀸𑀡𑀼𑀓𑁂 𑀦𑀺𑀔𑀡𑀺𑀢𑁆𑀯𑀸 𑀢𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀬𑀦𑁆𑀢𑁂 𑀉𑀤𑀓𑀢𑁄 𑀫𑁄𑀘𑁂𑀢𑁆𑀯𑀸 𑀫𑀚𑁆𑀛𑁂 𑀑𑀢𑁆𑀣𑀭𑀺𑀢𑁆𑀯𑀸 𑀖𑀝𑁂𑀦 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺. 𑀫𑀓𑀲𑀓𑀼𑀝𑀺𑀓𑀸𑀢𑀺 𑀘𑀻𑀯𑀭𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀺.

𑁨𑁬𑁦. 𑀅𑀪𑀺𑀲𑀦𑁆𑀦𑀓𑀸𑀬𑀸𑀢𑀺 𑀲𑁂𑀫𑁆𑀳𑀸𑀤𑀺𑀤𑁄𑀲𑀼𑀲𑁆𑀲𑀦𑁆𑀦𑀓𑀸𑀬𑀸. 𑀅𑀕𑁆𑀕𑀴𑀯𑀝𑁆𑀝𑀺 𑀦𑀸𑀫 𑀤𑁆𑀯𑀸𑀭𑀩𑀸𑀳𑀸𑀬 𑀲𑀫𑀧𑁆𑀧𑀫𑀸𑀡𑁄𑀬𑁂𑀯 𑀅𑀕𑁆𑀕𑀴𑀢𑁆𑀣𑀫𑁆𑀪𑁄 𑀯𑀼𑀘𑁆𑀘𑀢𑀺, 𑀬𑀢𑁆𑀣 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀙𑀺𑀤𑁆𑀤𑀸𑀦𑀺 𑀓𑀢𑁆𑀯𑀸 𑀲𑀽𑀘𑀺𑀬𑁄 𑀤𑁂𑀦𑁆𑀢𑀺. 𑀓𑀧𑀺𑀲𑀻𑀲𑀓𑀁 𑀦𑀸𑀫 𑀤𑁆𑀯𑀸𑀭𑀩𑀸𑀳𑀁 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀧𑀯𑁂𑀲𑀺𑀢𑁄 𑀅𑀕𑁆𑀕𑀴𑀧𑀸𑀲𑀓𑁄 𑀯𑀼𑀘𑁆𑀘𑀢𑀺. 𑀲𑀽𑀘𑀺𑀓𑀸𑀢𑀺 𑀢𑀢𑁆𑀣 𑀫𑀚𑁆𑀛𑁂 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀯𑁂𑀲𑀺𑀢𑀸. 𑀖𑀝𑀺𑀓𑀸𑀢𑀺 𑀉𑀧𑀭𑀺 𑀬𑁄𑀚𑀺𑀢𑀸. 𑀫𑀡𑁆𑀟𑀮𑀺𑀓𑀁 𑀓𑀸𑀢𑀼𑀦𑁆𑀢𑀺 𑀦𑀻𑀘𑀯𑀢𑁆𑀣𑀼𑀓𑀁 𑀘𑀺𑀦𑀺𑀢𑀼𑀁. 𑀥𑀽𑀫𑀦𑁂𑀢𑁆𑀢𑀦𑁆𑀢𑀺 𑀥𑀽𑀫𑀦𑀺𑀓𑁆𑀔𑀫𑀦𑀙𑀺𑀤𑁆𑀤𑀁. 𑀯𑀸𑀲𑁂𑀢𑀼𑀦𑁆𑀢𑀺 𑀕𑀦𑁆𑀥𑁂𑀦 𑀯𑀸𑀲𑁂𑀢𑀼𑀁. 𑀉𑀤𑀓𑀝𑁆𑀞𑀸𑀦𑀦𑁆𑀢𑀺 𑀉𑀤𑀓𑀢𑁆𑀣𑀧𑀦𑀝𑁆𑀞𑀸𑀦𑀁. 𑀢𑀢𑁆𑀣 𑀖𑀝𑁂𑀦 𑀉𑀤𑀓𑀁 𑀞𑀧𑁂𑀢𑁆𑀯𑀸 𑀲𑀭𑀸𑀯𑀓𑁂𑀦 𑀯𑀴𑀜𑁆𑀚𑁂𑀢𑀩𑁆𑀩𑀁. 𑀓𑁄𑀝𑁆𑀞𑀓𑁄𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁄.

𑁨𑁬𑁧. 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄𑀢𑀺 𑀏𑀢𑁆𑀣 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺 𑀘 𑀉𑀤𑀓𑀧𑀝𑀺𑀘𑁆𑀙𑀸𑀤𑀺 𑀘 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀯𑀝𑁆𑀝𑀢𑀺, 𑀲𑁂𑀲𑁂𑀲𑀼 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀦 𑀯𑀝𑁆𑀝𑀢𑀺. 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀓𑀫𑁆𑀫𑁂𑀲𑀼 𑀯𑀝𑁆𑀝𑀢𑀺. 𑀉𑀤𑀓𑀁 𑀦 𑀳𑁄𑀢𑀻𑀢𑀺 𑀦𑁆𑀳𑀸𑀦𑁄𑀤𑀓𑀁 𑀦 𑀳𑁄𑀢𑀺.

𑁨𑁬𑁨. 𑀢𑀼𑀮𑀦𑁆𑀢𑀺 𑀧𑀡𑁆𑀡𑀺𑀓𑀸𑀦𑀁 𑀯𑀺𑀬 𑀉𑀤𑀓𑀉𑀩𑁆𑀩𑀸𑀳𑀦𑀓𑀢𑀼𑀮𑀁. 𑀓𑀭𑀓𑀝𑀓𑁄 𑀯𑀼𑀘𑁆𑀘𑀢𑀺 𑀕𑁄𑀡𑁂 𑀯𑀸 𑀬𑁄𑀚𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀯𑀸 𑀕𑀳𑁂𑀢𑁆𑀯𑀸 𑀤𑀻𑀖𑀯𑀭𑀢𑁆𑀢𑀸𑀤𑀻𑀳𑀺 𑀆𑀓𑀟𑁆𑀠𑀦𑀬𑀦𑁆𑀢𑀁. 𑀘𑀓𑁆𑀓𑀯𑀝𑁆𑀝𑀓𑀦𑁆𑀢𑀺 𑀅𑀭𑀳𑀝𑀖𑀝𑀺𑀬𑀦𑁆𑀢𑀁. 𑀘𑀫𑁆𑀫𑀔𑀡𑁆𑀟𑀁 𑀦𑀸𑀫 𑀢𑀼𑀮𑀸𑀬 𑀯𑀸 𑀓𑀭𑀓𑀝𑀓𑁂 𑀯𑀸 𑀬𑁄𑀚𑁂𑀢𑀩𑁆𑀩𑀓𑀁 𑀘𑀫𑁆𑀫𑀪𑀸𑀚𑀦𑀁. 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺. 𑀉𑀤𑀓𑀧𑀼𑀜𑁆𑀙𑀦𑀻𑀢𑀺 𑀤𑀡𑁆𑀟𑀫𑀬𑀸𑀧𑀺 𑀯𑀺𑀲𑀸𑀡𑀫𑀬𑀸𑀧𑀺 𑀤𑀸𑀭𑀼𑀫𑀬𑀸𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀲𑀸 𑀅𑀲𑀢𑀺 𑀘𑁄𑀴𑀓𑁂𑀦𑀸𑀧𑀺 𑀉𑀤𑀓𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁬𑁩. 𑀉𑀤𑀓𑀫𑀸𑀢𑀺𑀓𑀦𑁆𑀢𑀺 𑀉𑀤𑀓𑀲𑁆𑀲 𑀆𑀕𑀫𑀦𑀫𑀸𑀢𑀺𑀓𑀁. 𑀦𑀺𑀮𑁆𑀮𑁂𑀔𑀚𑀦𑁆𑀢𑀸𑀖𑀭𑀁 𑀦𑀸𑀫 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀓𑀁 𑀯𑀼𑀘𑁆𑀘𑀢𑀺, 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀫𑀡𑁆𑀟𑀮𑁂 𑀧𑀓𑁆𑀔𑀧𑀸𑀲𑀓𑁂 𑀞𑀧𑁂𑀢𑁆𑀯𑀸 𑀓𑀢𑀓𑀽𑀝𑀘𑁆𑀙𑀤𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀘𑀸𑀢𑀼𑀫𑀸𑀲𑀁 𑀦𑀺𑀲𑀻𑀤𑀦𑁂𑀦𑀸𑀢𑀺 𑀦𑀺𑀲𑀻𑀤𑀦𑁂𑀦 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁨𑁬𑁪. 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑁂𑀲𑀽𑀢𑀺 𑀧𑀼𑀧𑁆𑀨𑁂𑀳𑀺 𑀲𑀦𑁆𑀣𑀢𑁂𑀲𑀼. 𑀦𑀫𑀢𑀓𑀁 𑀦𑀸𑀫 𑀏𑀴𑀓𑀮𑁄𑀫𑁂𑀳𑀺 𑀓𑀢𑀁 𑀅𑀯𑀸𑀬𑀺𑀫𑀁 𑀘𑀫𑁆𑀫𑀔𑀡𑁆𑀟𑀧𑀭𑀺𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀁 𑀦𑀸𑀫 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀓𑀢𑀸𑀬 𑀧𑁂𑀴𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁, 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀦 𑀤𑀸𑀭𑀼𑀫𑀬𑀸𑀧𑀺 𑀦 𑀯𑀝𑁆𑀝𑀢𑀺. 𑀫𑀴𑁄𑀭𑀺𑀓𑀸𑀢𑀺 𑀤𑀡𑁆𑀟𑀥𑀸𑀭𑀓𑁄 𑀯𑀼𑀘𑁆𑀘𑀢𑀺. 𑀬𑀝𑁆𑀞𑀺𑀆𑀥𑀸𑀭𑀓𑀧𑀡𑁆𑀡𑀸𑀥𑀸𑀭𑀓𑀧𑀘𑁆𑀙𑀺𑀓𑀧𑀺𑀝𑁆𑀞𑀸𑀦𑀺𑀧𑀺 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀸𑀦𑀺. 𑀆𑀥𑀸𑀭𑀓𑀲𑀗𑁆𑀔𑁂𑀧𑀕𑀫𑀦𑀢𑁄 𑀳𑀺 𑀧𑀝𑁆𑀞𑀸𑀬 𑀙𑀺𑀤𑁆𑀤𑀁 𑀯𑀺𑀤𑁆𑀥𑀫𑁆𑀧𑀺 𑀅𑀯𑀺𑀤𑁆𑀥𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀏𑀓𑀪𑀸𑀚𑀦𑁂𑀢𑀺 𑀏𑀢𑁆𑀣 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀪𑀸𑀚𑀦𑀢𑁄 𑀨𑀮𑀁 𑀯𑀸 𑀧𑀽𑀯𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀇𑀢𑀭𑀲𑁆𑀲 𑀲𑁂𑀲𑀓𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀢𑀭𑀲𑁆𑀲𑀸𑀧𑀺 𑀢𑀲𑁆𑀫𑀺𑀁 𑀔𑀻𑀡𑁂 𑀧𑀼𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁬𑁫. 𑀅𑀝𑁆𑀞𑀳𑀗𑁆𑀕𑁂𑀳𑀻𑀢𑀺 𑀏𑀢𑁆𑀣 𑀏𑀓𑁂𑀓𑁂𑀦𑀧𑀺 𑀅𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀦𑁆𑀢𑁄𑀲𑀻𑀫𑀸𑀬 𑀯𑀸 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀦𑀤𑀻𑀆𑀤𑀻𑀲𑀼 𑀯𑀸 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀏𑀯𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑁂 𑀧𑀦 𑀧𑀢𑁆𑀢𑁂 𑀢𑀲𑁆𑀲 𑀕𑁂𑀳𑁂 𑀓𑁄𑀘𑀺 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀕𑀳𑁂𑀢𑀩𑁆𑀩𑁄 𑁋 ‘‘𑀅𑀲𑀼𑀓𑀲𑁆𑀲 𑀕𑁂𑀳𑁂 𑀪𑀺𑀓𑁆𑀔𑀁 𑀫𑀸 𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀅𑀜𑁆𑀜𑁂𑀲𑀼 𑀯𑀺𑀳𑀸𑀭𑁂𑀲𑀼𑀧𑀺 𑀧𑁂𑀲𑁂𑀢𑀩𑁆𑀩𑀁. 𑀉𑀓𑁆𑀓𑀼𑀚𑁆𑀚𑀦𑀓𑀸𑀮𑁂 𑀧𑀦 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀸𑀧𑁂𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀉𑀓𑁆𑀓𑀼𑀚𑁆𑀚𑀺𑀢𑀩𑁆𑀩𑁄.

𑁨𑁬𑁮. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀕𑁆𑀕𑀢𑁄 𑀓𑀢𑁆𑀯𑀸. 𑀲𑀁𑀳𑀭𑀦𑁆𑀢𑀽𑀢𑀺 𑀲𑀁𑀳𑀭𑀺𑀬𑀦𑁆𑀢𑀼. 𑀘𑁂𑀮𑀧𑀝𑀺𑀓𑀦𑁆𑀢𑀺 𑀘𑁂𑀮𑀲𑀦𑁆𑀣𑀭𑀁. 𑀲𑁄 𑀓𑀺𑀭 ‘‘𑀲𑀘𑁂 𑀅𑀳𑀁 𑀧𑀼𑀢𑁆𑀢𑀁 𑀮𑀘𑁆𑀙𑀸𑀫𑀺, 𑀅𑀓𑁆𑀓𑀫𑀺𑀲𑁆𑀲𑀢𑀺 𑀫𑁂 𑀪𑀕𑀯𑀸 𑀘𑁂𑀮𑀧𑀝𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀅𑀚𑁆𑀛𑀸𑀲𑀬𑁂𑀦 𑀲𑀦𑁆𑀣𑀭𑀺, 𑀅𑀪𑀩𑁆𑀩𑁄 𑀘𑁂𑀲 𑀧𑀼𑀢𑁆𑀢𑀮𑀸𑀪𑀸𑀬; 𑀢𑀲𑁆𑀫𑀸 𑀪𑀕𑀯𑀸 𑀦 𑀅𑀓𑁆𑀓𑀫𑀺. 𑀬𑀤𑀺 𑀅𑀓𑁆𑀓𑀫𑁂𑀬𑁆𑀬, 𑀧𑀘𑁆𑀙𑀸 𑀧𑀼𑀢𑁆𑀢𑀁 𑀅𑀮𑀪𑀦𑁆𑀢𑁄 ‘‘𑀦𑀸𑀬𑀁 𑀲𑀩𑁆𑀩𑀜𑁆𑀜𑀽’’𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑁂𑀬𑁆𑀬. 𑀇𑀤𑀁 𑀢𑀸𑀯 𑀪𑀕𑀯𑀢𑁄 𑀅𑀦𑀓𑁆𑀓𑀫𑀦𑁂 𑀓𑀸𑀭𑀡𑀁. 𑀬𑀲𑁆𑀫𑀸 𑀧𑀦 𑀪𑀺𑀓𑁆𑀔𑀽𑀧𑀺 𑀬𑁂 𑀅𑀚𑀸𑀦𑀦𑁆𑀢𑀸 𑀅𑀓𑁆𑀓𑀫𑁂𑀬𑁆𑀬𑀼𑀁, 𑀢𑁂 𑀕𑀺𑀳𑀻𑀦𑀁 𑀧𑀭𑀺𑀪𑀽𑀢𑀸 𑀪𑀯𑁂𑀬𑁆𑀬𑀼𑀁; 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀧𑀭𑀺𑀪𑀯𑀢𑁄 𑀫𑁄𑀘𑁂𑀢𑀼𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂 𑀓𑀸𑀭𑀡𑀁.

𑀫𑀗𑁆𑀕𑀮𑀢𑁆𑀣𑀸𑀬 𑀬𑀸𑀘𑀺𑀬𑀫𑀸𑀦𑁂𑀦𑀸𑀢𑀺 𑀅𑀧𑀕𑀢𑀕𑀩𑁆𑀪𑀸 𑀯𑀸 𑀳𑁄𑀢𑀼 𑀕𑀭𑀼𑀕𑀩𑁆𑀪𑀸 𑀯𑀸, 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀫𑀗𑁆𑀕𑀮𑀢𑁆𑀣𑀸𑀬 𑀬𑀸𑀘𑀺𑀬𑀫𑀸𑀦𑁂𑀦 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺. 𑀥𑁄𑀢𑀧𑀸𑀤𑀓𑀁 𑀦𑀸𑀫 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑀢𑁆𑀣𑀸𑀬 𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀣𑀢𑀁 𑀳𑁄𑀢𑀺, 𑀢𑀁 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁬𑁯. 𑀓𑀢𑀓𑀁 𑀦𑀸𑀫 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑀁 𑀧𑀸𑀤𑀖𑀁𑀲𑀦𑀢𑁆𑀣𑀁 𑀓𑀡𑁆𑀝𑀓𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀁. 𑀢𑀁 𑀯𑀝𑁆𑀝𑀁 𑀯𑀸 𑀳𑁄𑀢𑀼 𑀘𑀢𑀼𑀭𑀲𑁆𑀲𑀸𑀤𑀺𑀪𑁂𑀤𑀁 𑀯𑀸, 𑀩𑀸𑀳𑀼𑀮𑀺𑀓𑀸𑀦𑀼𑀬𑁄𑀕𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯, 𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀓𑁆𑀔𑀭𑀸𑀢𑀺 𑀧𑀸𑀲𑀸𑀡𑁄 𑀯𑀼𑀘𑁆𑀘𑀢𑀺; 𑀧𑀸𑀲𑀸𑀡𑀨𑁂𑀡𑀓𑁄𑀧𑀺 𑀯𑀝𑁆𑀝𑀢𑀺. 𑀯𑀺𑀥𑀽𑀧𑀦𑀦𑁆𑀢𑀺 𑀯𑀻𑀚𑀦𑀻 𑀯𑀼𑀘𑁆𑀘𑀢𑀺. 𑀢𑀸𑀮𑀯𑀡𑁆𑀝𑀁 𑀧𑀦 𑀢𑀸𑀮𑀧𑀡𑁆𑀡𑁂𑀳𑀺 𑀯𑀸 𑀓𑀢𑀁 𑀳𑁄𑀢𑀼 𑀯𑁂𑀴𑀼𑀤𑀦𑁆𑀢𑀯𑀺𑀮𑀻𑀯𑁂𑀳𑀺 𑀯𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀯𑀸 𑀘𑀫𑁆𑀫𑀯𑀺𑀓𑀢𑀻𑀳𑀺 𑀯𑀸 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀫𑀓𑀲𑀩𑀻𑀚𑀦𑀻 𑀤𑀦𑁆𑀢𑀫𑀬𑀯𑀺𑀲𑀸𑀡𑀫𑀬𑀤𑀡𑁆𑀟𑀓𑀸𑀧𑀺 𑀯𑀝𑁆𑀝𑀢𑀺, 𑀯𑀸𑀓𑀫𑀬𑀩𑀻𑀚𑀦𑀺𑀬𑀸 𑀓𑁂𑀢𑀓𑀧𑀸𑀭𑁄𑀳𑀓𑀼𑀦𑁆𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀸𑀧𑀺 𑀲𑀗𑁆𑀕𑀳𑀺𑀢𑀸.

𑁨𑁭𑁦. 𑀕𑀺𑀮𑀸𑀦𑀲𑁆𑀲 𑀙𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑀲𑁆𑀲 𑀓𑀸𑀬𑀟𑀸𑀳𑁄 𑀯𑀸 𑀧𑀺𑀢𑁆𑀢𑀓𑁄𑀧𑁄 𑀯𑀸 𑀳𑁄𑀢𑀺, 𑀘𑀓𑁆𑀔𑀼 𑀯𑀸 𑀤𑀼𑀩𑁆𑀩𑀮𑀁, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀆𑀩𑀸𑀥𑁄 𑀯𑀺𑀦𑀸 𑀙𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀙𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀲𑁆𑀲𑁂 𑀧𑀦 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀁 𑀯𑀸𑀴𑀫𑀺𑀕𑀘𑁄𑀭𑀪𑀬𑁂𑀲𑀼 𑀘 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀺. 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀧𑀦 𑀲𑀩𑁆𑀩𑀢𑁆𑀣𑁂𑀯 𑀯𑀝𑁆𑀝𑀢𑀺.

𑀅𑀲𑀺𑀲𑁆𑀲𑀸𑀢𑀺 𑀅𑀲𑀺 𑀅𑀲𑁆𑀲. 𑀯𑀺𑀚𑁆𑀚𑁄𑀢𑀮𑀢𑀻𑀢𑀺 𑀯𑀺𑀚𑁆𑀚𑁄𑀢𑀢𑀺. 𑀤𑀡𑁆𑀟𑀲𑀫𑁆𑀫𑀼𑀢𑀺𑀦𑁆𑀢𑀺 𑀏𑀢𑁆𑀣 𑀧𑀫𑀸𑀡𑀬𑀼𑀢𑁆𑀢𑁄 𑀘𑀢𑀼𑀳𑀢𑁆𑀣𑁄𑀬𑁂𑀯 𑀤𑀡𑁆𑀟𑁄 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀢𑀢𑁄 𑀊𑀦𑀸𑀢𑀺𑀭𑀺𑀢𑁆𑀢𑁄 𑀯𑀺𑀦𑀸𑀧𑀺 𑀲𑀫𑁆𑀫𑀼𑀢𑀺𑀬𑀸 𑀲𑀩𑁆𑀩𑁂𑀲𑀁 𑀯𑀝𑁆𑀝𑀢𑀺. 𑀲𑀺𑀓𑁆𑀓𑀸 𑀧𑀦 𑀅𑀕𑀺𑀮𑀸𑀦𑀲𑁆𑀲 𑀦 𑀯𑀝𑁆𑀝𑀢𑀺, 𑀕𑀺𑀮𑀸𑀦𑀲𑁆𑀲𑀸𑀧𑀺 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀸.

𑁨𑁭𑁩. 𑀭𑁄𑀫𑀦𑁆𑀣𑀓𑀲𑁆𑀲𑀸𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀭𑁄𑀫𑀦𑁆𑀣𑀓𑀁 𑀲𑁂𑀲𑀸𑀦𑀁 𑀆𑀕𑀢𑀁 𑀉𑀕𑁆𑀕𑀸𑀭𑀁 𑀫𑀼𑀔𑁂 𑀲𑀦𑁆𑀥𑀸𑀭𑁂𑀢𑁆𑀯𑀸 𑀕𑀺𑀮𑀦𑁆𑀢𑀸𑀦𑀁 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀅𑀲𑀦𑁆𑀥𑀸𑀭𑀺𑀢𑀫𑁂𑀯 𑀧𑀭𑀕𑀮𑀁 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺.

𑀬𑀁 𑀤𑀺𑀬𑁆𑀬𑀫𑀸𑀦𑀦𑁆𑀢𑀺 𑀬𑀁 𑀤𑀸𑀬𑀓𑁂𑀳𑀺 𑀤𑀺𑀬𑁆𑀬𑀫𑀸𑀦𑀁 𑀧𑀝𑀺𑀕𑁆𑀕𑀳𑀺𑀢𑀪𑀸𑀚𑀦𑀢𑁄 𑀩𑀳𑀺 𑀧𑀢𑀺𑀢𑀁, 𑀢𑀁 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀪𑁄𑀚𑀦𑀯𑀕𑁆𑀕𑁂 𑀯𑀡𑁆𑀡𑀺𑀢𑀫𑁂𑀯.

𑁨𑁭𑁪. 𑀓𑀼𑀧𑁆𑀧𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫𑀺. 𑀦𑀔𑀸𑀤𑀻𑀳𑀺 𑀦𑀔𑀘𑁆𑀙𑁂𑀤𑀦𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀦 𑀦𑀔𑀘𑁆𑀙𑁂𑀤𑀦𑀁 𑀅𑀦𑀼𑀜𑁆𑀜𑀸𑀢𑀁. 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀯𑀻𑀲𑀢𑀺𑀧𑀺 𑀦𑀔𑁂 𑀮𑀺𑀔𑀺𑀢𑀫𑀝𑁆𑀞𑁂 𑀓𑀸𑀭𑀸𑀧𑁂𑀦𑁆𑀢𑀺. 𑀫𑀮𑀫𑀢𑁆𑀢𑀦𑁆𑀢𑀺 𑀦𑀔𑀢𑁄 𑀫𑀮𑀫𑀢𑁆𑀢𑀁 𑀅𑀧𑀓𑀟𑁆𑀠𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑁨𑁭𑁫. 𑀔𑀼𑀭𑀲𑀺𑀧𑀸𑀝𑀺𑀓𑀦𑁆𑀢𑀺 𑀔𑀼𑀭𑀓𑁄𑀲𑀓𑀁. 𑀫𑀲𑁆𑀲𑀼𑀁 𑀓𑀧𑁆𑀧𑀸𑀧𑁂𑀦𑁆𑀢𑀻𑀢𑀺 𑀓𑀢𑁆𑀢𑀭𑀺𑀬𑀸 𑀫𑀲𑁆𑀲𑀼𑀁 𑀙𑁂𑀤𑀸𑀧𑁂𑀦𑁆𑀢𑀺. 𑀫𑀲𑁆𑀲𑀼𑀁 𑀯𑀟𑁆𑀠𑀸𑀧𑁂𑀦𑁆𑀢𑀻𑀢𑀺 𑀫𑀲𑁆𑀲𑀼𑀁 𑀤𑀻𑀖𑀁 𑀓𑀸𑀭𑁂𑀦𑁆𑀢𑀺. 𑀕𑁄𑀮𑁄𑀫𑀺𑀓𑀦𑁆𑀢𑀺 𑀳𑀦𑀼𑀓𑀫𑁆𑀳𑀺 𑀤𑀻𑀖𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀏𑀴𑀓𑀫𑀲𑁆𑀲𑀼 𑀯𑀼𑀘𑁆𑀘𑀢𑀺. 𑀘𑀢𑀼𑀭𑀲𑁆𑀲𑀓𑀦𑁆𑀢𑀺 𑀘𑀢𑀼𑀓𑁄𑀡𑀁. 𑀧𑀭𑀺𑀫𑀼𑀔𑀦𑁆𑀢𑀺 𑀉𑀭𑁂 𑀮𑁄𑀫𑀲𑀁𑀳𑀭𑀡𑀁. 𑀅𑀟𑁆𑀠𑀤𑀼𑀓𑀦𑁆𑀢𑀺 𑀉𑀤𑀭𑁂 𑀮𑁄𑀫𑀭𑀸𑀚𑀺𑀝𑁆𑀞𑀧𑀦𑀁. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀫𑀲𑁆𑀲𑀼𑀓𑀧𑁆𑀧𑀸𑀧𑀦𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀆𑀩𑀸𑀥𑀧𑁆𑀧𑀘𑁆𑀘𑀬𑀸 𑀲𑀫𑁆𑀩𑀸𑀥𑁂 𑀮𑁄𑀫𑀦𑁆𑀢𑀺 𑀕𑀡𑁆𑀟𑀯𑀡𑀭𑀼𑀥𑀺𑀆𑀤𑀺𑀆𑀩𑀸𑀥𑀧𑁆𑀧𑀘𑁆𑀘𑀬𑀸. 𑀓𑀢𑁆𑀢𑀭𑀺𑀓𑀸𑀬𑀸𑀢𑀺 𑀕𑀡𑁆𑀟𑀯𑀡𑀭𑀼𑀥𑀺𑀲𑀻𑀲𑀭𑁄𑀕𑀸𑀩𑀸𑀥𑀧𑁆𑀧𑀘𑁆𑀘𑀬𑀸. 𑀲𑀓𑁆𑀔𑀭𑀸𑀤𑀻𑀳𑀺 𑀦𑀸𑀲𑀺𑀓𑀸𑀮𑁄𑀫𑀕𑁆𑀕𑀸𑀳𑀸𑀧𑀦𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀦 𑀲𑀡𑁆𑀟𑀸𑀲𑁄 𑀅𑀦𑀼𑀜𑁆𑀜𑀸𑀢𑁄. 𑀦 𑀪𑀺𑀓𑁆𑀔𑀯𑁂 𑀧𑀮𑀺𑀢𑀁 𑀕𑀸𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀁 𑀪𑀫𑀼𑀓𑀸𑀬 𑀯𑀸 𑀦𑀮𑀸𑀝𑁂 𑀯𑀸 𑀤𑀸𑀞𑀺𑀓𑀸𑀬 𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀩𑀻𑀪𑀘𑁆𑀙𑀁 𑀞𑀺𑀢𑀁, 𑀢𑀸𑀤𑀺𑀲𑀁 𑀮𑁄𑀫𑀁 𑀧𑀮𑀺𑀢𑀁 𑀯𑀸 𑀅𑀧𑀮𑀺𑀢𑀁 𑀯𑀸 𑀕𑀸𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁭𑁭. 𑀓𑀁𑀲𑀧𑀢𑁆𑀣𑀭𑀺𑀓𑀸𑀢𑀺 𑀓𑀁𑀲𑀪𑀡𑁆𑀟𑀯𑀸𑀡𑀺𑀚𑀸. 𑀩𑀦𑁆𑀥𑀦𑀫𑀢𑁆𑀢𑀦𑁆𑀢𑀺 𑀯𑀸𑀲𑀺𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀁 𑀩𑀦𑁆𑀥𑀦𑀫𑀢𑁆𑀢𑀁.

𑁨𑁭𑁮. 𑀦 𑀪𑀺𑀓𑁆𑀔𑀯𑁂 𑀅𑀓𑀸𑀬𑀩𑀦𑁆𑀥𑀦𑁂𑀦𑀸𑀢𑀺 𑀏𑀢𑁆𑀣 𑀅𑀩𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣 𑀩𑀦𑁆𑀥𑀺𑀢𑀩𑁆𑀩𑀁. 𑀆𑀲𑀦𑀲𑀸𑀮𑀸𑀬 𑀩𑀦𑁆𑀥𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀺𑀢𑁆𑀯𑀸 𑀬𑀸𑀯 𑀦 𑀩𑀦𑁆𑀥𑀢𑀺, 𑀦 𑀢𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀓𑀮𑀸𑀩𑀼𑀓𑀁 𑀦𑀸𑀫 𑀩𑀳𑀼𑀭𑀚𑁆𑀚𑀼𑀓𑀁. 𑀤𑁂𑀟𑁆𑀟𑀼𑀪𑀓𑀁 𑀦𑀸𑀫 𑀉𑀤𑀓𑀲𑀧𑁆𑀧𑀲𑀻𑀲𑀲𑀤𑀺𑀲𑀁. 𑀫𑀼𑀭𑀚𑀁 𑀦𑀸𑀫 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁. 𑀫𑀤𑁆𑀤𑀯𑀻𑀡𑀁 𑀦𑀸𑀫 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁. 𑀈𑀤𑀺𑀲𑀜𑁆𑀳𑀺 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀧𑀕𑁂𑀯 𑀩𑀳𑀽𑀦𑀺. 𑀧𑀝𑁆𑀝𑀺𑀓𑀁 𑀲𑀽𑀓𑀭𑀦𑁆𑀢𑀓𑀦𑁆𑀢𑀺 𑀏𑀢𑁆𑀣 𑀧𑀓𑀢𑀺𑀯𑀻𑀢𑀸 𑀯𑀸 𑀫𑀘𑁆𑀙𑀓𑀡𑁆𑀝𑀓𑀯𑀸𑀬𑀺𑀫𑀸 𑀯𑀸 𑀧𑀝𑁆𑀝𑀺𑀓𑀸 𑀯𑀝𑁆𑀝𑀢𑀺, 𑀲𑁂𑀲𑀸 𑀓𑀼𑀜𑁆𑀚𑀭𑀘𑁆𑀙𑀺𑀓𑀸𑀤𑀺𑀪𑁂𑀤𑀸 𑀦 𑀯𑀝𑁆𑀝𑀦𑁆𑀢𑀺. 𑀲𑀽𑀓𑀭𑀦𑁆𑀢𑀓𑀁 𑀦𑀸𑀫 𑀓𑀼𑀜𑁆𑀚𑀺𑀓𑀸𑀓𑁄𑀲𑀓𑀲𑀡𑁆𑀞𑀸𑀦𑀁 𑀳𑁄𑀢𑀺. 𑀏𑀓𑀭𑀚𑁆𑀚𑀼𑀓𑀁 𑀧𑀦 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀜𑁆𑀘 𑀲𑀽𑀓𑀭𑀦𑁆𑀢𑀓𑀁 𑀅𑀦𑀼𑀮𑁄𑀫𑁂𑀢𑀺. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀦𑁆𑀢𑀺 𑀇𑀤𑀁 𑀤𑀲𑀸𑀲𑀼𑀬𑁂𑀯 𑀅𑀦𑀼𑀜𑁆𑀜𑀸𑀢𑀁. 𑀧𑀸𑀫𑀗𑁆𑀕𑀤𑀲𑀸 𑀘𑁂𑀢𑁆𑀣 𑀘𑀢𑀼𑀦𑁆𑀦𑀁 𑀉𑀧𑀭𑀺 𑀦 𑀯𑀝𑁆𑀝𑀢𑀺. 𑀲𑁄𑀪𑀡𑀁 𑀦𑀸𑀫 𑀯𑁂𑀞𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀲𑀺𑀩𑁆𑀩𑀦𑀁. 𑀕𑀼𑀡𑀓𑀁 𑀦𑀸𑀫 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁂𑀦 𑀲𑀺𑀩𑁆𑀩𑀦𑀁; 𑀏𑀯𑀁 𑀲𑀺𑀩𑁆𑀩𑀺𑀢𑀸 𑀳𑀺 𑀅𑀦𑁆𑀢𑀸 𑀣𑀺𑀭𑀸 𑀳𑁄𑀦𑁆𑀢𑀺. 𑀧𑀯𑀦𑀦𑁆𑀢𑁄𑀢𑀺 𑀧𑀸𑀲𑀦𑁆𑀢𑁄 𑀯𑀼𑀘𑁆𑀘𑀢𑀺.

𑁨𑁮𑁦. 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀦𑀸𑀫 𑀦𑀸𑀪𑀺𑀫𑀽𑀮𑀢𑁄 𑀳𑀢𑁆𑀣𑀺𑀲𑁄𑀡𑁆𑀟𑀲𑀡𑁆𑀞𑀸𑀦𑀁 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀁 𑀘𑁄𑀴𑀺𑀓𑀇𑀢𑁆𑀣𑀻𑀦𑀁 𑀦𑀺𑀯𑀸𑀲𑀦𑀁 𑀯𑀺𑀬. 𑀫𑀘𑁆𑀙𑀯𑀸𑀴𑀓𑀁 𑀦𑀸𑀫 𑀏𑀓𑀢𑁄 𑀤𑀲𑀦𑁆𑀢𑀁 𑀏𑀓𑀢𑁄 𑀧𑀸𑀲𑀦𑁆𑀢𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀘𑀢𑀼𑀓𑀡𑁆𑀡𑀓𑀁 𑀦𑀸𑀫 𑀉𑀧𑀭𑀺 𑀤𑁆𑀯𑁂, 𑀳𑁂𑀝𑁆𑀞𑀢𑁄 𑀤𑁆𑀯𑁂𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀓𑀡𑁆𑀡𑁂 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀢𑀸𑀮𑀯𑀡𑁆𑀝𑀓𑀁 𑀦𑀸𑀫 𑀢𑀸𑀮𑀯𑀡𑁆𑀝𑀸𑀓𑀸𑀭𑁂𑀦 𑀲𑀸𑀝𑀓𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑀦𑀁. 𑀲𑀢𑀯𑀮𑀺𑀓𑀁 𑀦𑀸𑀫 𑀤𑀻𑀖𑀲𑀸𑀝𑀓𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀑𑀪𑀜𑁆𑀚𑀺𑀢𑁆𑀯𑀸 𑀑𑀯𑀝𑁆𑀝𑀺𑀓𑀁 𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀣𑀁, 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀯𑀸 𑀦𑀺𑀭𑀦𑁆𑀢𑀭𑀁 𑀯𑀮𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀲𑀘𑁂 𑀧𑀦 𑀚𑀸𑀡𑀼𑀢𑁄 𑀧𑀝𑁆𑀞𑀸𑀬 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀯𑀮𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀯𑀝𑁆𑀝𑀢𑀺.

𑀲𑀁𑀯𑁂𑀮𑁆𑀮𑀺𑀬𑀁 𑀦𑀺𑀯𑀸𑀲𑁂𑀦𑁆𑀢𑀻𑀢𑀺 𑀫𑀮𑁆𑀮𑀓𑀫𑁆𑀫𑀓𑀸𑀭𑀸𑀤𑀬𑁄 𑀯𑀺𑀬 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀺; 𑀏𑀯𑀁 𑀦𑀺𑀯𑀸𑀲𑁂𑀢𑀼𑀁 𑀕𑀺𑀮𑀸𑀦𑀲𑁆𑀲𑀧𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀧𑀺 𑀦 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁄𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑁂𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀢𑀣𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀺 𑀅𑀧𑀭𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀕𑀺𑀮𑀸𑀦𑁄 𑀧𑀦 𑀅𑀦𑁆𑀢𑁄 𑀓𑀸𑀲𑀸𑀯𑀲𑁆𑀲 𑀑𑀯𑀝𑁆𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀭𑀁 𑀉𑀧𑀭𑀺 𑀦𑀺𑀯𑀸𑀲𑁂𑀢𑀼𑀁 𑀮𑀪𑀢𑀺. 𑀅𑀕𑀺𑀮𑀸𑀦𑁂𑀦 𑀤𑁆𑀯𑁂 𑀦𑀺𑀯𑀸𑀲𑁂𑀦𑁆𑀢𑁂𑀦 𑀲𑀕𑀼𑀡𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀸𑀦𑀺. 𑀇𑀢𑀺 𑀬𑀜𑁆𑀘 𑀇𑀥 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀬𑀜𑁆𑀘 𑀲𑁂𑀔𑀺𑀬𑀯𑀡𑁆𑀡𑀦𑀸𑀬𑀁; 𑀢𑀁 𑀲𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑀁 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀩𑁆𑀩𑀁. 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁄 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀺. 𑀦 𑀪𑀺𑀓𑁆𑀔𑀯𑁂 𑀕𑀺𑀳𑀺𑀧𑀸𑀭𑀼𑀢𑀁 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀅𑀧𑀸𑀭𑀼𑀧𑀺𑀢𑁆𑀯𑀸, 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀸𑀭𑀼𑀧𑀦𑀁 𑀧𑀭𑀺𑀫𑀡𑁆𑀟𑀮𑀧𑀸𑀭𑀼𑀧𑀦𑀁 𑀦𑀸𑀫, 𑀢𑀁 𑀧𑀸𑀭𑀼𑀧𑀺𑀢𑀩𑁆𑀩𑀁.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀲𑁂𑀢𑀧𑀝𑀧𑀸𑀭𑀼𑀢𑀁 𑀧𑀭𑀺𑀩𑁆𑀩𑀸𑀚𑀓𑀧𑀸𑀭𑀼𑀢𑀁 𑀏𑀓𑀲𑀸𑀝𑀓𑀧𑀸𑀭𑀼𑀢𑀁 𑀲𑁄𑀡𑁆𑀟𑀧𑀸𑀭𑀼𑀢𑀁 𑀅𑀦𑁆𑀢𑁂𑀧𑀼𑀭𑀺𑀓𑀧𑀸𑀭𑀼𑀢𑀁 𑀫𑀳𑀸𑀚𑁂𑀝𑁆𑀞𑀓𑀧𑀸𑀭𑀼𑀢𑀁 𑀓𑀼𑀝𑀺𑀧𑀯𑁂𑀲𑀓𑀧𑀸𑀭𑀼𑀢𑀁 𑀩𑁆𑀭𑀸𑀳𑁆𑀫𑀡𑀧𑀸𑀭𑀼𑀢𑀁 𑀧𑀸𑀴𑀺𑀓𑀸𑀭𑀓𑀧𑀸𑀭𑀼𑀢𑀦𑁆𑀢𑀺 𑀏𑀯𑀫𑀸𑀤𑀺 𑀧𑀭𑀺𑀫𑀡𑁆𑀟𑀮𑀮𑀓𑁆𑀔𑀡𑀢𑁄 𑀅𑀜𑁆𑀜𑀣𑀸 𑀧𑀸𑀭𑀼𑀢𑀁, 𑀲𑀩𑁆𑀩𑀫𑁂𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫. 𑀢𑀲𑁆𑀫𑀸 𑀬𑀣𑀸 𑀲𑁂𑀢𑀧𑀝𑀸 𑀅𑀟𑁆𑀠𑀧𑀸𑀮𑀓𑀦𑀺𑀕𑀡𑁆𑀞𑀸 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀏𑀓𑀘𑁆𑀘𑁂 𑀧𑀭𑀺𑀩𑁆𑀩𑀸𑀚𑀓𑀸 𑀉𑀭𑀁 𑀯𑀺𑀯𑀭𑀺𑀢𑁆𑀯𑀸 𑀤𑁆𑀯𑀻𑀲𑀼 𑀅𑀁𑀲𑀓𑀽𑀝𑁂𑀲𑀼 𑀧𑀸𑀯𑀼𑀭𑀡𑀁 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀏𑀓𑀲𑀸𑀝𑀓𑀸 𑀫𑀦𑀼𑀲𑁆𑀲𑀸 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀏𑀓𑁂𑀦𑀦𑁆𑀢𑁂𑀦 𑀧𑀺𑀝𑁆𑀞𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀉𑀪𑁄𑀲𑀼 𑀅𑀁𑀲𑀓𑀽𑀝𑁂𑀲𑀼 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀲𑀸𑀝𑀓𑁂𑀦 𑀕𑀻𑀯𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀉𑀪𑁄 𑀅𑀦𑁆𑀢𑁂 𑀉𑀤𑀭𑁂 𑀯𑀸 𑀑𑀮𑀫𑁆𑀩𑁂𑀦𑁆𑀢𑀺; 𑀧𑀺𑀝𑁆𑀞𑀺𑀬𑀁 𑀯𑀸 𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀬𑁄 𑀅𑀓𑁆𑀔𑀺𑀢𑀸𑀭𑀓𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀑𑀕𑀼𑀡𑁆𑀞𑀺𑀓𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀫𑀳𑀸𑀚𑁂𑀝𑁆𑀞𑀸 𑀤𑀻𑀖𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀓𑀮𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀓𑀲𑁆𑀲𑀓𑀸 𑀔𑁂𑀢𑁆𑀢𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀸 𑀲𑀸𑀝𑀓𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀉𑀧𑀓𑀘𑁆𑀙𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀉𑀪𑀺𑀦𑁆𑀦𑀁 𑀉𑀧𑀓𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂𑀦 𑀲𑀸𑀝𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀁𑀲𑀓𑀽𑀝𑁂𑀲𑀼 𑀧𑀓𑁆𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀧𑀸𑀴𑀺𑀓𑀸𑀭𑀓𑁄 𑀪𑀺𑀓𑁆𑀔𑀼 𑀏𑀓𑀁𑀲𑀧𑀸𑀭𑀼𑀧𑀦𑁂𑀦 𑀧𑀸𑀭𑀼𑀢𑀁 𑀯𑀸𑀫𑀩𑀸𑀳𑀼𑀁 𑀯𑀺𑀯𑀭𑀺𑀢𑁆𑀯𑀸 𑀘𑀻𑀯𑀭𑀁 𑀅𑀁𑀲𑀓𑀽𑀝𑀁 𑀆𑀭𑁄𑀧𑁂𑀢𑀺; 𑀏𑀯𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀏𑀢𑁂 𑀅𑀜𑁆𑀜𑁂 𑀘 𑀏𑀯𑀭𑀽𑀧𑁂 𑀧𑀸𑀭𑀼𑀧𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑀁 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀢𑀣𑀸 𑀅𑀧𑀸𑀭𑀼𑀧𑀺𑀢𑁆𑀯𑀸 𑀆𑀭𑀸𑀫𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀅𑀦𑀸𑀤𑀭𑁂𑀦 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁮𑁧. 𑀫𑀼𑀡𑁆𑀟𑀯𑀝𑁆𑀝𑀻𑀢𑀺 𑀬𑀣𑀸 𑀭𑀜𑁆𑀜𑁄 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀢𑁄 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀯𑀳𑀦𑀫𑀦𑀼𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑁆𑀢𑀭𑀸𑀓𑀸𑀚𑀦𑁆𑀢𑀺 𑀫𑀚𑁆𑀛𑁂 𑀮𑀕𑁆𑀕𑁂𑀢𑁆𑀯𑀸 𑀤𑁆𑀯𑀻𑀳𑀺 𑀯𑀳𑀺𑀢𑀩𑁆𑀩𑀪𑀸𑀭𑀁.

𑁨𑁮𑁨. 𑀅𑀘𑀓𑁆𑀔𑀼𑀲𑁆𑀲𑀦𑁆𑀢𑀺 𑀘𑀓𑁆𑀔𑀽𑀦𑀁 𑀳𑀺𑀢𑀁 𑀦 𑀳𑁄𑀢𑀺; 𑀧𑀭𑀺𑀳𑀸𑀦𑀺𑀁 𑀚𑀦𑁂𑀢𑀺. 𑀦𑀘𑁆𑀙𑀸𑀤𑁂𑀢𑀻𑀢𑀺 𑀦 𑀭𑀼𑀘𑁆𑀘𑀢𑀺. 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀡𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁. 𑀅𑀢𑀺𑀫𑀝𑀸𑀳𑀓𑀦𑁆𑀢𑀺 𑀅𑀢𑀺𑀔𑀼𑀤𑁆𑀤𑀓𑀁.

𑁨𑁮𑁩. 𑀤𑀸𑀬𑀁 𑀆𑀮𑀺𑀫𑁆𑀧𑁂𑀦𑁆𑀢𑀻𑀢𑀺 𑀢𑀺𑀡𑀯𑀦𑀸𑀤𑀻𑀲𑀼 𑀅𑀕𑁆𑀕𑀺𑀁 𑀤𑁂𑀦𑁆𑀢𑀺. 𑀧𑀝𑀕𑁆𑀕𑀺𑀦𑁆𑀢𑀺 𑀧𑀝𑀺𑀅𑀕𑁆𑀕𑀺𑀁. 𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀳𑀭𑀺𑀢𑀓𑀭𑀡𑁂𑀦 𑀯𑀸 𑀧𑀭𑀺𑀔𑀸𑀔𑀡𑀦𑁂𑀦 𑀯𑀸 𑀧𑀭𑀺𑀢𑁆𑀢𑀸𑀡𑀁. 𑀏𑀢𑁆𑀣 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀲𑀢𑀺 𑀲𑀬𑀁 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀮𑀪𑀢𑀺, 𑀅𑀲𑀢𑀺 𑀅𑀕𑁆𑀕𑀺𑀫𑁆𑀧𑀺 𑀤𑀸𑀢𑀼𑀁 𑀮𑀪𑀢𑀺, 𑀪𑀽𑀫𑀺𑀁 𑀢𑀘𑁆𑀙𑁂𑀢𑁆𑀯𑀸 𑀢𑀺𑀡𑀸𑀦𑀺𑀧𑀺 𑀳𑀭𑀺𑀢𑀼𑀁, 𑀧𑀭𑀺𑀔𑀫𑁆𑀧𑀺 𑀔𑀡𑀺𑀢𑀼𑀁, 𑀅𑀮𑁆𑀮𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸𑀧𑀺 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀮𑀪𑀢𑀺, 𑀲𑁂𑀦𑀸𑀲𑀦𑀁 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀢𑀣𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀮𑀪𑀢𑀺𑀬𑁂𑀯. 𑀉𑀤𑀓𑁂𑀦 𑀧𑀦 𑀓𑀧𑁆𑀧𑀺𑀬𑁂𑀦𑁂𑀯 𑀮𑀪𑀢𑀺, 𑀦 𑀇𑀢𑀭𑁂𑀦.

𑁨𑁮𑁪. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀲𑀼𑀓𑁆𑀔𑀓𑀝𑁆𑀞𑀸𑀤𑀺𑀕𑁆𑀕𑀳𑀡𑀓𑀺𑀘𑁆𑀘𑁂 𑀲𑀢𑀺. 𑀧𑁄𑀭𑀺𑀲𑀺𑀬𑀦𑁆𑀢𑀺 𑀧𑀼𑀭𑀺𑀲𑀧𑁆𑀧𑀫𑀸𑀡𑀁. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀫𑀺𑀕𑀸𑀤𑀬𑁄 𑀯𑀸 𑀤𑀺𑀲𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑁄 𑀯𑀸 𑀤𑀺𑀲𑀸 𑀑𑀮𑁄𑀓𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀯𑀟𑀸𑀳𑀁 𑀯𑀸 𑀉𑀤𑀓𑁄𑀖𑀁 𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀢𑀺𑀉𑀘𑁆𑀘𑀫𑁆𑀧𑀺 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁫. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀢𑀺 𑀫𑀥𑀼𑀭𑀲𑀤𑁆𑀤𑀸. 𑀙𑀦𑁆𑀤𑀲𑁄 𑀆𑀭𑁄𑀧𑁂𑀫𑀸𑀢𑀺 𑀯𑁂𑀤𑀁 𑀯𑀺𑀬 𑀲𑀓𑁆𑀓𑀢𑀪𑀸𑀲𑀸𑀬 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑁂𑀫. 𑀲𑀓𑀸𑀬 𑀦𑀺𑀭𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀲𑀓𑀸 𑀦𑀺𑀭𑀼𑀢𑁆𑀢𑀺 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀫𑀸𑀕𑀥𑀺𑀓𑁄 𑀯𑁄𑀳𑀸𑀭𑁄.

𑁨𑁮𑁬. 𑀮𑁄𑀓𑀸𑀬𑀢𑀁 𑀦𑀸𑀫 𑀲𑀩𑁆𑀩𑀁 𑀉𑀘𑁆𑀙𑀺𑀝𑁆𑀞𑀁, 𑀲𑀩𑁆𑀩𑀁 𑀅𑀦𑀼𑀘𑁆𑀙𑀺𑀝𑁆𑀞𑀁, 𑀲𑁂𑀢𑁄 𑀓𑀸𑀓𑁄, 𑀓𑀸𑀴𑁄 𑀩𑀓𑁄; 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀓𑀸𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀲𑀢𑁆𑀣𑀁.

𑁨𑁮𑁮. 𑀅𑀦𑁆𑀢𑀭𑀸 𑀅𑀳𑁄𑀲𑀻𑀢𑀺 𑀅𑀦𑁆𑀢𑀭𑀺𑀢𑀸 𑀅𑀳𑁄𑀲𑀺 𑀧𑀝𑀺𑀘𑁆𑀙𑀦𑁆𑀦𑀸.

𑁨𑁮𑁯. 𑀆𑀩𑀸𑀥𑀧𑁆𑀧𑀘𑁆𑀘𑀬𑀸𑀢𑀺 𑀬𑀲𑁆𑀲 𑀆𑀩𑀸𑀥𑀲𑁆𑀲 𑀮𑀲𑀼𑀡𑀁 𑀪𑁂𑀲𑀚𑁆𑀚𑀁; 𑀢𑀧𑁆𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄.

𑁨𑁯𑁦. 𑀧𑀲𑁆𑀲𑀸𑀯𑀧𑀸𑀤𑀼𑀓𑀦𑁆𑀢𑀺 𑀏𑀢𑁆𑀣 𑀧𑀸𑀤𑀼𑀓𑀸 𑀇𑀝𑁆𑀞𑀓𑀸𑀳𑀺𑀧𑀺 𑀲𑀺𑀮𑀸𑀳𑀺𑀧𑀺 𑀤𑀸𑀭𑀽𑀳𑀺𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀯𑀘𑁆𑀘𑀧𑀸𑀤𑀼𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀯𑁂𑀡𑀦𑁆𑀢𑀺 𑀯𑀘𑁆𑀘𑀓𑀼𑀝𑀺𑀧𑀭𑀺𑀓𑁆𑀔𑁂𑀧𑀩𑁆𑀪𑀦𑁆𑀢𑀭𑀁.

𑁨𑁯𑁩. 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀳𑀺 𑀤𑀼𑀓𑁆𑀓𑀝𑁂𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀸𑀘𑀺𑀢𑁆𑀢𑀺𑀬𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀳𑀭𑀡𑀢𑁆𑀣𑀁 𑀓𑀢𑀁 𑀧𑀳𑀭𑀡𑀻𑀢𑀺 𑀯𑀼𑀘𑁆𑀘𑀢𑀺, 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀯𑀼𑀥𑀲𑀗𑁆𑀔𑀸𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀲𑀩𑁆𑀩𑀁 𑀮𑁄𑀳𑀪𑀡𑁆𑀟𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀢𑀓𑀜𑁆𑀘 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘𑀸𑀢𑀺 𑀏𑀢𑁆𑀣 𑀓𑀢𑀓𑀁 𑀯𑀼𑀢𑁆𑀢𑀫𑁂𑀯. 𑀓𑀼𑀫𑁆𑀪𑀓𑀸𑀭𑀺𑀓𑀜𑁆𑀘𑀸𑀢𑀺 𑀥𑀦𑀺𑀬𑀲𑁆𑀲𑁂𑀯 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀁

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸

𑁨𑁯𑁪. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑁋 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀅𑀦𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀯𑀺𑀳𑀸𑀭𑁄 𑀦𑀸𑀫 𑀅𑀟𑁆𑀠𑀬𑁄𑀕𑀸𑀤𑀺𑀫𑀼𑀢𑁆𑀢𑀓𑁄 𑀅𑀯𑀲𑁂𑀲𑀸𑀯𑀸𑀲𑁄. 𑀅𑀟𑁆𑀠𑀬𑁄𑀕𑁄𑀢𑀺 𑀲𑀼𑀧𑀡𑁆𑀡𑀯𑀗𑁆𑀓𑀕𑁂𑀳𑀁. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀉𑀧𑀭𑀺𑀆𑀓𑀸𑀲𑀢𑀮𑁂 𑀧𑀢𑀺𑀝𑁆𑀞𑀺𑀢𑀓𑀽𑀝𑀸𑀕𑀸𑀭𑁄 𑀧𑀸𑀲𑀸𑀤𑁄𑀬𑁂𑀯. 𑀕𑀼𑀳𑀸𑀢𑀺 𑀇𑀝𑁆𑀞𑀓𑀸𑀕𑀼𑀳𑀸 𑀲𑀺𑀮𑀸𑀕𑀼𑀳𑀸 𑀤𑀸𑀭𑀼𑀕𑀼𑀳𑀸 𑀧𑀁𑀲𑀼𑀕𑀼𑀳𑀸. 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲𑀸𑀢𑀺 𑀆𑀕𑀢𑀲𑁆𑀲 𑀘 𑀅𑀦𑀸𑀕𑀢𑀲𑁆𑀲 𑀘 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲.

𑁨𑁯𑁫. 𑀅𑀦𑀼𑀫𑁄𑀤𑀦𑀕𑀸𑀣𑀸𑀲𑀼 𑁋 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀉𑀢𑀼𑀯𑀺𑀲𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄𑀢𑀺 𑀏𑀢𑁆𑀣 𑀲𑀺𑀲𑀺𑀭𑁄𑀢𑀺 𑀲𑀫𑁆𑀨𑀼𑀲𑀺𑀢𑀓𑀯𑀸𑀢𑁄 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀺𑀬𑁄𑀢𑀺 𑀉𑀚𑀼𑀓𑀫𑁂𑀖𑀯𑀼𑀝𑁆𑀞𑀺𑀬𑁄 𑀏𑀯. 𑀏𑀢𑀸𑀦𑀺 𑀲𑀩𑁆𑀩𑀸𑀦𑀺 𑀧𑀝𑀺𑀳𑀦𑁆𑀢𑀻𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀧𑀝𑀺𑀳𑀜𑁆𑀜𑀢𑀻𑀢𑀺 𑀯𑀺𑀳𑀸𑀭𑁂𑀦 𑀧𑀝𑀺𑀳𑀜𑁆𑀜𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀺𑀮𑀻𑀬𑀦𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀲𑀻𑀢𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀲𑀼𑀔𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀇𑀤𑀫𑁆𑀧𑀺 𑀧𑀤𑀤𑁆𑀯𑀬𑀁 ‘‘𑀲𑀼𑀔𑀢𑁆𑀣𑀜𑁆𑀘𑀸’’𑀢𑀺 𑀇𑀫𑀺𑀦𑀸𑀯 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀼𑀔𑀢𑁆𑀣𑀜𑁆𑀘 𑀯𑀺𑀳𑀸𑀭𑀤𑀸𑀦𑀁, 𑀓𑀢𑀫𑀁 𑀲𑀼𑀔𑀢𑁆𑀣𑀁? 𑀛𑀸𑀬𑀺𑀢𑀼𑀁 𑀯𑀺𑀧𑀲𑁆𑀲𑀺𑀢𑀼𑀜𑁆𑀘 𑀬𑀁 𑀲𑀼𑀔𑀁, 𑀢𑀤𑀢𑁆𑀣𑀁. 𑀅𑀣 𑀯𑀸 𑀧𑀭𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁 𑁋 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀜𑁆𑀘 𑀯𑀺𑀳𑀸𑀭𑀤𑀸𑀦𑀁; 𑀇𑀥 𑀛𑀸𑀬𑀺𑀲𑁆𑀲𑀦𑁆𑀢𑀺 𑀯𑀺𑀧𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀤𑀤𑀢𑁄 𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁪𑁨).

𑀬𑀲𑁆𑀫𑀸 𑀘 𑀅𑀕𑁆𑀕𑀁 𑀯𑀡𑁆𑀡𑀺𑀢𑀁, ‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄’’𑀢𑀺 𑀕𑀸𑀣𑀸. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁂 𑀘 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁂 𑀘 𑀯𑀸𑀲𑁂𑀬𑁆𑀬. 𑀢𑁂𑀲𑀁 𑀅𑀦𑁆𑀦𑀜𑁆𑀘𑀸𑀢𑀺 𑀬𑀁 𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀸𑀦𑀺 𑀘 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑀸𑀦𑀺 𑀘, 𑀢𑀁 𑀲𑀩𑁆𑀩𑀁 𑀢𑁂𑀲𑀼 𑀉𑀚𑀼𑀪𑀽𑀢𑁂𑀲𑀼 𑀅𑀓𑀼𑀝𑀺𑀮𑀘𑀺𑀢𑁆𑀢𑁂𑀲𑀼. 𑀤𑀤𑁂𑀬𑁆𑀬𑀸𑀢𑀺 𑀦𑀺𑀤𑀳𑁂𑀬𑁆𑀬. 𑀢𑀜𑁆𑀘 𑀔𑁄 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀯𑀺𑀭𑀸𑀥𑁂𑀢𑁆𑀯𑀸, 𑀏𑀯𑀁 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀳𑀺 𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄𑀢𑀺.

𑁨𑁯𑁬. 𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀦𑁆𑀢𑀺 𑀏𑀢𑁆𑀣 𑀭𑀚𑁆𑀚𑀼 𑀦𑀸𑀫 𑀲𑀘𑁂𑀧𑀺 𑀤𑀻𑀧𑀺𑀦𑀗𑁆𑀕𑀼𑀝𑁆𑀞𑁂𑀦 𑀓𑀢𑀸 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯; 𑀦 𑀓𑀸𑀘𑀺 𑀦 𑀯𑀝𑁆𑀝𑀢𑀺. 𑀢𑀻𑀡𑀺 𑀢𑀸𑀴𑀸𑀦𑀻𑀢𑀺 𑀢𑀺𑀲𑁆𑀲𑁄 𑀓𑀼𑀜𑁆𑀘𑀺𑀓𑀸𑀬𑁄. 𑀬𑀦𑁆𑀢𑀓𑀁 𑀲𑀽𑀘𑀺𑀓𑀦𑁆𑀢𑀺 𑀏𑀢𑁆𑀣 𑀬𑀁 𑀬𑀁 𑀚𑀸𑀦𑀸𑀢𑀺 𑀢𑀁 𑀢𑀁 𑀬𑀦𑁆𑀢𑀓𑀁, 𑀢𑀲𑁆𑀲 𑀯𑀺𑀯𑀭𑀡𑀲𑀽𑀘𑀺𑀓𑀜𑁆𑀘 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀯𑁂𑀤𑀺𑀓𑀸𑀯𑀸𑀢𑀧𑀸𑀦𑀁 𑀦𑀸𑀫 𑀘𑁂𑀢𑀺𑀬𑁂 𑀯𑁂𑀤𑀺𑀓𑀸𑀲𑀤𑀺𑀲𑀁. 𑀚𑀸𑀮𑀯𑀸𑀢𑀧𑀸𑀦𑀁 𑀦𑀸𑀫 𑀚𑀸𑀮𑀓𑀩𑀤𑁆𑀥𑀁. 𑀲𑀮𑀸𑀓𑀯𑀸𑀢𑀧𑀸𑀦𑀁 𑀦𑀸𑀫 𑀣𑀫𑁆𑀪𑀓𑀯𑀸𑀢𑀧𑀸𑀦𑀁. 𑀘𑀓𑁆𑀓𑀮𑀺𑀓𑀦𑁆𑀢𑀺 𑀏𑀢𑁆𑀣 𑀘𑁄𑀴𑀓𑀧𑀸𑀤𑀧𑀼𑀜𑁆𑀙𑀦𑀁 𑀩𑀦𑁆𑀥𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀸𑀢𑀧𑀸𑀦𑀪𑀺𑀲𑀻𑀢𑀺 𑀯𑀸𑀢𑀧𑀸𑀦𑀧𑁆𑀧𑀫𑀸𑀡𑁂𑀦 𑀪𑀺𑀲𑀺𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀫𑀺𑀟𑁆𑀠𑀺𑀦𑁆𑀢𑀺 𑀫𑀺𑀟𑁆𑀠𑀓𑀁. 𑀩𑀺𑀤𑀮𑀫𑀜𑁆𑀘𑀓𑀦𑁆𑀢𑀺 𑀯𑁂𑀢𑁆𑀢𑀫𑀜𑁆𑀘𑀁; 𑀯𑁂𑀴𑀼𑀯𑀺𑀮𑀻𑀯𑁂𑀳𑀺 𑀯𑀸 𑀯𑀻𑀢𑀁.

𑁨𑁯𑁭. 𑀆𑀲𑀦𑁆𑀤𑀺𑀓𑁄𑀢𑀺 𑀘𑀢𑀼𑀭𑀲𑁆𑀲𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓𑀦𑁆𑀢𑀺 𑀯𑀘𑀦𑀢𑁄 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀫𑁂𑀯 𑀳𑀺 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀯𑀝𑁆𑀝𑀢𑀺, 𑀘𑀢𑀼𑀭𑀲𑁆𑀲𑀆𑀲𑀦𑁆𑀤𑀺𑀓𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀗𑁆𑀕𑁄 𑀦𑀸𑀫 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀓𑀢𑀫𑀜𑁆𑀘𑁄, 𑀅𑀬𑀫𑁆𑀧𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄 𑀯𑀝𑁆𑀝𑀢𑀺. 𑀪𑀤𑁆𑀤𑀧𑀻𑀞𑀦𑁆𑀢𑀺 𑀯𑁂𑀢𑁆𑀢𑀫𑀬𑀁 𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀧𑀻𑀞𑀺𑀓𑀸𑀢𑀺 𑀧𑀺𑀮𑁄𑀢𑀺𑀓𑀸𑀩𑀤𑁆𑀥𑀧𑀻𑀞𑀫𑁂𑀯. 𑀏𑀴𑀓𑀧𑀸𑀤𑀧𑀻𑀞𑀁 𑀦𑀸𑀫 𑀤𑀸𑀭𑀼𑀧𑀝𑁆𑀝𑀺𑀓𑀸𑀬 𑀉𑀧𑀭𑀺 𑀧𑀸𑀤𑁂 𑀞𑀧𑁂𑀢𑁆𑀯𑀸 𑀪𑁄𑀚𑀦𑀨𑀮𑀓𑀁 𑀯𑀺𑀬 𑀓𑀢𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀆𑀫𑀮𑀓𑀯𑀝𑁆𑀝𑀺𑀓𑀧𑀻𑀞𑀁 𑀦𑀸𑀫 𑀆𑀫𑀮𑀓𑀸𑀓𑀸𑀭𑁂𑀦 𑀬𑁄𑀚𑀺𑀢𑀁 𑀩𑀳𑀼𑀧𑀸𑀤𑀓𑀧𑀻𑀞𑀁. 𑀇𑀫𑀸𑀦𑀺 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀧𑀻𑀞𑀸𑀦𑀺. 𑀤𑀸𑀭𑀼𑀫𑀬𑀁 𑀧𑀦 𑀲𑀩𑁆𑀩𑀁 𑀧𑀻𑀞𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀓𑁄𑀘𑁆𑀙𑀦𑁆𑀢𑀺 𑀉𑀲𑀺𑀭𑀫𑀬𑀁 𑀯𑀸 𑀫𑀼𑀜𑁆𑀚𑀧𑀩𑁆𑀩𑀚𑀫𑀬𑀁 𑀯𑀸.

𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀫𑀜𑁆𑀘𑀧𑀝𑀺𑀧𑀸𑀤𑀓𑀦𑁆𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀡𑀗𑁆𑀕𑀼𑀮𑀫𑁂𑀯 𑀅𑀝𑁆𑀞𑀗𑁆𑀕𑀼𑀮𑀁. 𑀘𑀺𑀫𑀺𑀮𑀺𑀓𑀸 𑀦𑀸𑀫 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀙𑀯𑀺𑀲𑀁𑀭𑀓𑁆𑀔𑀡𑀢𑁆𑀣𑀸𑀬 𑀅𑀢𑁆𑀣𑀭𑀡𑀁 𑀯𑀼𑀘𑁆𑀘𑀢𑀺. 𑀭𑀼𑀓𑁆𑀔𑀢𑀽𑀮𑀦𑁆𑀢𑀺 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀭𑀼𑀓𑁆𑀔𑀸𑀦𑀁 𑀢𑀽𑀮𑀁. 𑀮𑀢𑀸𑀢𑀽𑀮𑀦𑁆𑀢𑀺 𑀔𑀻𑀭𑀯𑀮𑁆𑀮𑀺𑀆𑀤𑀻𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀯𑀮𑁆𑀮𑀻𑀦𑀁 𑀢𑀽𑀮𑀁. 𑀧𑁄𑀝𑀓𑀺𑀢𑀽𑀮𑀦𑁆𑀢𑀺 𑀧𑁄𑀝𑀓𑀺𑀢𑀺𑀡𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦𑀁 𑀅𑀦𑁆𑀢𑀫𑀲𑁄 𑀉𑀘𑁆𑀙𑀼𑀦𑀴𑀸𑀤𑀻𑀦𑀫𑁆𑀧𑀺 𑀢𑀽𑀮𑀁. 𑀏𑀢𑁂𑀳𑀺 𑀢𑀻𑀳𑀺 𑀲𑀩𑁆𑀩𑀪𑀽𑀢𑀕𑀸𑀫𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀭𑀼𑀓𑁆𑀔𑀯𑀮𑁆𑀮𑀺𑀢𑀺𑀡𑀚𑀸𑀢𑀺𑀬𑁄 𑀳𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀪𑀽𑀢𑀕𑀸𑀫𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀽𑀢𑀕𑀸𑀫𑀲𑁆𑀲 𑀢𑀽𑀮𑀁 𑀩𑀺𑀫𑁆𑀩𑁄𑀳𑀦𑁂 𑀯𑀝𑁆𑀝𑀢𑀺, 𑀪𑀺𑀲𑀺𑀁 𑀧𑀦 𑀧𑀸𑀧𑀼𑀡𑀺𑀢𑁆𑀯𑀸 𑀲𑀩𑁆𑀩𑀫𑁆𑀧𑁂𑀢𑀁 𑀅𑀓𑀧𑁆𑀧𑀺𑀬𑀢𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀓𑁂𑀯𑀮𑀜𑁆𑀘 𑀩𑀺𑀫𑁆𑀩𑁄𑀳𑀦𑁂 𑀏𑀢𑀁 𑀢𑀽𑀮𑀫𑁂𑀯, 𑀳𑀁𑀲𑀫𑁄𑀭𑀸𑀤𑀻𑀦𑀁 𑀲𑀩𑁆𑀩𑀲𑀓𑀼𑀡𑀸𑀦𑀁 𑀲𑀻𑀳𑀸𑀤𑀻𑀦𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀜𑁆𑀘 𑀮𑁄𑀫𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀺𑀬𑀗𑁆𑀕𑀼𑀧𑀼𑀧𑁆𑀨𑀩𑀓𑀼𑀴𑀧𑀼𑀧𑁆𑀨𑀸𑀤𑀺 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀦 𑀯𑀝𑁆𑀝𑀢𑀺. 𑀢𑀫𑀸𑀮𑀧𑀢𑁆𑀢𑀁 𑀲𑀼𑀤𑁆𑀥𑀫𑁂𑀯 𑀦 𑀯𑀝𑁆𑀝𑀢𑀺, 𑀫𑀺𑀲𑁆𑀲𑀓𑀁 𑀧𑀦 𑀯𑀝𑁆𑀝𑀢𑀺. 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀯𑀺𑀥𑀁 𑀉𑀡𑁆𑀡𑀸𑀤𑀺𑀢𑀽𑀮𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀤𑁆𑀥𑀓𑀸𑀬𑀺𑀓𑀸𑀦𑀻𑀢𑀺 𑀉𑀧𑀟𑁆𑀠𑀓𑀸𑀬𑀧𑁆𑀧𑀫𑀸𑀡𑀸𑀦𑀺, 𑀬𑁂𑀲𑀼 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀧𑀤𑀳𑀦𑁆𑀢𑀺. 𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀻𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺. 𑀤𑀻𑀖𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀯𑀸 𑀤𑁆𑀯𑀺𑀭𑀢𑀦𑀁 𑀯𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀲𑀻𑀲𑀧𑁆𑀧𑀫𑀸𑀡𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀇𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀧𑀦 𑀯𑀝𑁆𑀝𑀢𑀺. 𑀅𑀕𑀺𑀮𑀸𑀦𑀲𑁆𑀲 𑀲𑀻𑀲𑀼𑀧𑀥𑀸𑀦𑀜𑁆𑀘 𑀧𑀸𑀤𑀼𑀧𑀥𑀸𑀦𑀜𑁆𑀘𑀸𑀢𑀺 𑀤𑁆𑀯𑀬𑀫𑁂𑀯 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲 𑀩𑀺𑀫𑁆𑀩𑁄𑀳𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀬𑀸𑀦𑀺 𑀧𑀦 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀬𑀢𑀽𑀮𑀸𑀦𑀺, 𑀢𑁂𑀳𑀺 𑀩𑀺𑀫𑁆𑀩𑁄𑀳𑀦𑀁 𑀫𑀳𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀆𑀳. 𑀯𑀺𑀦𑀬𑀥𑀭𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀩𑀺𑀫𑁆𑀩𑁄𑀳𑀦𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀓𑀧𑁆𑀧𑀺𑀬𑀢𑀽𑀮𑀁 𑀯𑀸 𑀅𑀓𑀧𑁆𑀧𑀺𑀬𑀢𑀽𑀮𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀆𑀳.

𑀧𑀜𑁆𑀘 𑀪𑀺𑀲𑀺𑀬𑁄𑀢𑀺 𑀧𑀜𑁆𑀘𑀳𑀺 𑀉𑀡𑁆𑀡𑀸𑀤𑀻𑀳𑀺 𑀧𑀽𑀭𑀺𑀢𑀪𑀺𑀲𑀺𑀬𑁄. 𑀢𑀽𑀮𑀕𑀡𑀦𑀸𑀬 𑀳𑀺 𑀏𑀢𑀸𑀲𑀁 𑀕𑀡𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀉𑀡𑁆𑀡𑀕𑁆𑀕𑀳𑀡𑁂𑀦 𑀦 𑀓𑁂𑀯𑀮𑀁 𑀏𑀴𑀓𑀮𑁄𑀫𑀫𑁂𑀯 𑀕𑀳𑀺𑀢𑀁, 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀫𑀁 𑀬𑀁𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀚𑀸𑀢𑀻𑀦𑀁 𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁 𑀮𑁄𑀫𑀁, 𑀲𑀩𑁆𑀩𑀁 𑀇𑀥 𑀉𑀡𑁆𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁. 𑀢𑀲𑁆𑀫𑀸 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀙𑀦𑁆𑀦𑀁 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀜𑁆𑀘 𑀅𑀜𑁆𑀜𑀢𑀭𑁂𑀦 𑀪𑀺𑀲𑀺𑀘𑁆𑀙𑀯𑀺𑀁 𑀓𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀲𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀴𑀓𑀮𑁄𑀫𑀸𑀦𑀺 𑀧𑀦 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀫𑁆𑀩𑀮𑀫𑁂𑀯 𑀘𑀢𑀼𑀕𑁆𑀕𑀼𑀡𑀁 𑀯𑀸 𑀧𑀜𑁆𑀘𑀕𑀼𑀡𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸𑀧𑀺 𑀉𑀡𑁆𑀡𑀪𑀺𑀲𑀺𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.

𑀘𑁄𑀴𑀪𑀺𑀲𑀺𑀆𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀦𑀯𑀘𑁄𑀴𑀁 𑀯𑀸 𑀧𑀼𑀭𑀸𑀡𑀘𑁄𑀴𑀁 𑀯𑀸 𑀲𑀁𑀳𑀭𑀺𑀢𑁆𑀯𑀸 𑀯𑀸 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀓𑀢𑀸 𑀘𑁄𑀴𑀪𑀺𑀲𑀺, 𑀬𑀁𑀓𑀺𑀜𑁆𑀘𑀺 𑀯𑀸𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀯𑀸𑀓𑀪𑀺𑀲𑀺, 𑀬𑀁𑀓𑀺𑀜𑁆𑀘𑀺 𑀢𑀺𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀢𑀺𑀡𑀪𑀺𑀲𑀺, 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀢𑀫𑀸𑀮𑀧𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀧𑀡𑁆𑀡𑀪𑀺𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀫𑀸𑀮𑀧𑀢𑁆𑀢𑀁 𑀧𑀦 𑀅𑀜𑁆𑀜𑁂𑀦 𑀫𑀺𑀲𑁆𑀲𑀫𑁂𑀯 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀪𑀺𑀲𑀺𑀬𑀸 𑀧𑀫𑀸𑀡𑀦𑀺𑀬𑀫𑁄 𑀦𑀢𑁆𑀣𑀺, 𑀫𑀜𑁆𑀘𑀪𑀺𑀲𑀺 𑀧𑀻𑀞𑀪𑀺𑀲𑀺 𑀪𑀽𑀫𑀢𑁆𑀣𑀭𑀡𑀪𑀺𑀲𑀺 𑀘𑀗𑁆𑀓𑀫𑀦𑀪𑀺𑀲𑀺 𑀧𑀸𑀤𑀧𑀼𑀜𑁆𑀙𑀦𑀪𑀺𑀲𑀻𑀢𑀺 𑀏𑀢𑀸𑀲𑀁 𑀅𑀦𑀼𑀭𑀽𑀧𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁. 𑀬𑀁 𑀧𑀦𑁂𑀢𑀁 𑀉𑀡𑁆𑀡𑀸𑀤𑀺𑀧𑀜𑁆𑀘𑀯𑀺𑀥𑀢𑀽𑀮𑀫𑁆𑀧𑀺 𑀪𑀺𑀲𑀺𑀬𑀁 𑀯𑀝𑁆𑀝𑀢𑀺, 𑀢𑀁 ‘‘𑀫𑀲𑀽𑀭𑀓𑁂𑀧𑀺 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀫𑀲𑀽𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀫𑀜𑁆𑀘𑀪𑀺𑀲𑀺𑀁 𑀧𑀻𑀞𑁂 𑀲𑀦𑁆𑀣𑀭𑀦𑁆𑀢𑀻𑀢𑀺 𑀫𑀜𑁆𑀘𑀪𑀺𑀲𑀺𑀁 𑀧𑀻𑀞𑁂 𑀅𑀢𑁆𑀣𑀭𑀦𑁆𑀢𑀺; 𑀅𑀢𑁆𑀣𑀭𑀡𑀢𑁆𑀣𑀸𑀬 𑀳𑀭𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀉𑀮𑁆𑀮𑁄𑀓𑀁 𑀅𑀓𑀭𑀺𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀘𑀺𑀫𑀺𑀮𑀺𑀓𑀁 𑀅𑀤𑀢𑁆𑀯𑀸. 𑀨𑁄𑀲𑀺𑀢𑀼𑀦𑁆𑀢𑀺 𑀭𑀚𑀦𑁂𑀦 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀉𑀧𑀭𑀺 𑀨𑀼𑀲𑀺𑀢𑀸𑀦𑀺 𑀤𑀸𑀢𑀼𑀁. 𑀪𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀪𑀺𑀲𑀺𑀘𑁆𑀙𑀯𑀺𑀬𑀸 𑀉𑀧𑀭𑀺 𑀪𑀢𑁆𑀢𑀺𑀓𑀫𑁆𑀫𑀁. 𑀳𑀢𑁆𑀣𑀪𑀢𑁆𑀢𑀺𑀦𑁆𑀢𑀺 𑀧𑀜𑁆𑀘𑀗𑁆𑀕𑀼𑀮𑀺𑀪𑀢𑁆𑀢𑀺𑀁.

𑁨𑁯𑁮. 𑀇𑀓𑁆𑀓𑀸𑀲𑀦𑁆𑀢𑀺 𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑀁 𑀯𑀸 𑀲𑀺𑀮𑁂𑀲𑀁 𑀯𑀸. 𑀧𑀺𑀝𑁆𑀞𑀫𑀤𑁆𑀤𑀦𑁆𑀢𑀺 𑀧𑀺𑀝𑁆𑀞𑀔𑀮𑀺𑀁. 𑀓𑀼𑀡𑁆𑀟𑀓𑀫𑀢𑁆𑀢𑀺𑀓𑀦𑁆𑀢𑀺 𑀓𑀼𑀡𑁆𑀟𑀓𑀫𑀺𑀲𑁆𑀲𑀓𑀫𑀢𑁆𑀢𑀺𑀓𑀁. 𑀲𑀸𑀲𑀧𑀓𑀼𑀝𑁆𑀝𑀦𑁆𑀢𑀺 𑀲𑀸𑀲𑀧𑀧𑀺𑀝𑁆𑀞𑀁. 𑀲𑀺𑀢𑁆𑀣𑀢𑁂𑀮𑀓𑀦𑁆𑀢𑀺 𑀯𑀺𑀮𑀻𑀦𑀫𑀥𑀼𑀲𑀺𑀢𑁆𑀣𑀓𑀁. 𑀅𑀘𑁆𑀘𑀼𑀲𑁆𑀲𑀦𑁆𑀦𑀁 𑀳𑁄𑀢𑀻𑀢𑀺 𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀦𑁆𑀢𑀺 𑀧𑀼𑀜𑁆𑀙𑀺𑀢𑀼𑀁. 𑀕𑀡𑁆𑀟𑀼𑀫𑀢𑁆𑀢𑀺𑀓𑀦𑁆𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑀕𑀽𑀣𑀫𑀢𑁆𑀢𑀺𑀓𑀁. 𑀓𑀲𑀸𑀯𑀦𑁆𑀢𑀺 𑀆𑀫𑀮𑀓𑀳𑀭𑀻𑀢𑀓𑀸𑀦𑀁 𑀓𑀲𑀸𑀯𑀁.

𑁨𑁯𑁯. 𑀦 𑀪𑀺𑀓𑁆𑀔𑀯𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑁂𑀯, 𑀢𑀺𑀭𑀘𑁆𑀙𑀸𑀦𑀭𑀽𑀧𑀫𑁆𑀧𑀺 𑀅𑀦𑁆𑀢𑀫𑀲𑁄 𑀕𑀡𑁆𑀟𑀼𑀧𑁆𑀧𑀸𑀤𑀭𑀽𑀧𑀫𑁆𑀧𑀺 𑀪𑀺𑀓𑁆𑀔𑀼𑀦𑁄 𑀲𑀬𑀁 𑀓𑀸𑀢𑀼𑀁 𑀯𑀸 ‘‘𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺, ‘‘𑀉𑀧𑀸𑀲𑀓 𑀤𑁆𑀯𑀸𑀭𑀧𑀸𑀮𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀮𑀩𑁆𑀪𑀢𑀺. 𑀚𑀸𑀢𑀓𑀧𑀓𑀭𑀡𑀅𑀲𑀤𑀺𑀲𑀤𑀸𑀦𑀸𑀤𑀻𑀦𑀺 𑀧𑀦 𑀧𑀲𑀸𑀤𑀦𑀻𑀬𑀸𑀦𑀺 𑀦𑀺𑀩𑁆𑀩𑀺𑀤𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀯𑀸 𑀯𑀢𑁆𑀣𑀽𑀦𑀺 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀁 𑀮𑀩𑁆𑀪𑀢𑀺. 𑀫𑀸𑀮𑀸𑀓𑀫𑁆𑀫𑀸𑀤𑀻𑀦𑀺 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀮𑀩𑁆𑀪𑀢𑀺.

𑁩𑁦𑁦. 𑀅𑀴𑀓𑀫𑀦𑁆𑀤𑀸𑀢𑀺 𑀏𑀓𑀗𑁆𑀕𑀡𑀸 𑀫𑀦𑀼𑀲𑁆𑀲𑀸𑀪𑀺𑀓𑀺𑀡𑁆𑀡𑀸. 𑀢𑀬𑁄 𑀕𑀩𑁆𑀪𑁂𑀢𑀺 𑀏𑀢𑁆𑀣 𑀲𑀺𑀯𑀺𑀓𑀸𑀕𑀩𑁆𑀪𑁄𑀢𑀺 𑀘𑀢𑀼𑀭𑀲𑁆𑀲𑀕𑀩𑁆𑀪𑁄. 𑀦𑀸𑀴𑀺𑀓𑀸𑀕𑀩𑁆𑀪𑁄𑀢𑀺 𑀯𑀺𑀢𑁆𑀣𑀸𑀭𑀢𑁄 𑀤𑀺𑀕𑀼𑀡𑀢𑀺𑀕𑀼𑀡𑀸𑀬𑀸𑀫𑁄 𑀤𑀻𑀖𑀕𑀩𑁆𑀪𑁄. 𑀳𑀫𑁆𑀫𑀺𑀬𑀕𑀩𑁆𑀪𑁄𑀢𑀺 𑀆𑀓𑀸𑀲𑀢𑀮𑁂 𑀓𑀽𑀝𑀸𑀕𑀸𑀭𑀕𑀩𑁆𑀪𑁄 𑀯𑀸 𑀫𑀼𑀡𑁆𑀟𑀘𑁆𑀙𑀤𑀦𑀕𑀩𑁆𑀪𑁄 𑀯𑀸.

𑀓𑀮𑀗𑁆𑀓𑀧𑀸𑀤𑀓𑀦𑁆𑀢𑀺 𑀭𑀼𑀓𑁆𑀔𑀁 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 𑀓𑀢𑀁, 𑀢𑀁 𑀆𑀳𑀭𑀺𑀫𑀁 𑀪𑀺𑀢𑁆𑀢𑀺𑀧𑀸𑀤𑀁 𑀚𑀺𑀡𑁆𑀡𑀓𑀼𑀝𑁆𑀝𑀧𑀸𑀤𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀸𑀡𑀓𑀺𑀝𑀺𑀓𑀦𑁆𑀢𑀺 𑀯𑀲𑁆𑀲𑀧𑀭𑀺𑀢𑁆𑀢𑀸𑀡𑀢𑁆𑀣𑀁 𑀓𑀺𑀝𑀺𑀓𑀁. 𑀉𑀤𑁆𑀤𑀲𑀼𑀥𑀦𑁆𑀢𑀺 𑀯𑀘𑁆𑀙𑀓𑀕𑁄𑀫𑀬𑁂𑀦 𑀘𑁂𑀯 𑀙𑀸𑀭𑀺𑀓𑀸𑀬 𑀘 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑀫𑀢𑁆𑀢𑀺𑀓𑀁.

𑀆𑀴𑀺𑀦𑁆𑀤𑁄 𑀦𑀸𑀫 𑀧𑀫𑀼𑀔𑀁 𑀯𑀼𑀘𑁆𑀘𑀢𑀺. 𑀧𑀖𑀦𑀁 𑀦𑀸𑀫 𑀬𑀁 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀧𑀯𑀺𑀲𑀦𑁆𑀢𑀸 𑀘 𑀧𑀸𑀤𑁂𑀳𑀺 𑀳𑀦𑀦𑁆𑀢𑀺, 𑀢𑀲𑁆𑀲 𑀯𑀺𑀳𑀸𑀭𑀤𑁆𑀯𑀸𑀭𑁂 𑀉𑀪𑀢𑁄 𑀓𑀼𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀓𑀢𑀧𑀤𑁂𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀧𑀖𑀸𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀓𑀼𑀝𑁆𑀝𑀦𑁆𑀢𑀺 𑀫𑀚𑁆𑀛𑁂 𑀕𑀩𑁆𑀪𑀲𑁆𑀲 𑀲𑀫𑀦𑁆𑀢𑀸 𑀧𑀭𑀺𑀬𑀸𑀕𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀧𑀓𑀼𑀝’’𑀦𑁆𑀢𑀺𑀧𑀺 𑀧𑀸𑀞𑁄. 𑀑𑀲𑀸𑀭𑀓𑀦𑁆𑀢𑀺 𑀅𑀦𑀸𑀴𑀺𑀦𑁆𑀤𑀓𑁂 𑀯𑀺𑀳𑀸𑀭𑁂 𑀯𑀁𑀲𑀁 𑀤𑀢𑁆𑀯𑀸 𑀢𑀢𑁄 𑀤𑀡𑁆𑀟𑀓𑁂 𑀑𑀲𑀸𑀭𑁂𑀢𑁆𑀯𑀸 𑀓𑀢𑀙𑀤𑀦𑀧𑀫𑀼𑀔𑀁. 𑀲𑀁𑀲𑀸𑀭𑀡𑀓𑀺𑀝𑀺𑀓𑁄 𑀦𑀸𑀫 𑀘𑀓𑁆𑀓𑀮𑀬𑀼𑀢𑁆𑀢𑁄 𑀓𑀺𑀝𑀺𑀓𑁄.

𑁩𑁦𑁧. 𑀧𑀸𑀦𑀻𑀬𑀪𑀸𑀚𑀦𑀦𑁆𑀢𑀺 𑀧𑀺𑀯𑀦𑁆𑀢𑀸𑀦𑀁 𑀧𑀸𑀦𑀻𑀬𑀤𑀸𑀦𑀪𑀸𑀚𑀦𑀁. 𑀉𑀴𑀼𑀗𑁆𑀓𑁄 𑀘 𑀣𑀸𑀮𑀓𑀜𑁆𑀘 𑀧𑀸𑀦𑀻𑀬𑀲𑀗𑁆𑀔𑀲𑁆𑀲 𑀅𑀦𑀼𑀮𑁄𑀫𑀸𑀦𑀺.

𑁩𑁦𑁩. 𑀅𑀧𑁂𑀲𑀻𑀢𑀺 𑀤𑀻𑀖𑀤𑀸𑀭𑀼𑀫𑁆𑀳𑀺 𑀔𑀸𑀡𑀼𑀓𑁂 𑀧𑀯𑁂𑀲𑁂𑀢𑁆𑀯𑀸 𑀓𑀡𑁆𑀝𑀓𑀲𑀸𑀔𑀸𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀢𑀁 𑀤𑁆𑀯𑀸𑀭𑀣𑀓𑀦𑀓𑀁. 𑀧𑀮𑀺𑀖𑁄𑀢𑀺 𑀕𑀸𑀫𑀤𑁆𑀯𑀸𑀭𑁂𑀲𑀼 𑀯𑀺𑀬 𑀘𑀓𑁆𑀓𑀬𑀼𑀢𑁆𑀢𑀁 𑀤𑁆𑀯𑀸𑀭𑀣𑀓𑀦𑀓𑀁.

𑁩𑁦𑁫. 𑀅𑀲𑁆𑀲𑀢𑀭𑀻𑀳𑀺 𑀬𑀼𑀢𑁆𑀢𑀸 𑀭𑀣𑀸 𑀅𑀲𑁆𑀲𑀢𑀭𑀻𑀭𑀣𑀸. 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀢𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀦𑀺.

𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀻𑀢𑀺𑀪𑀽𑀢𑁄𑀢𑀺 𑀓𑀺𑀮𑁂𑀲𑀸𑀢𑀧𑀸𑀪𑀸𑀯𑁂𑀦 𑀲𑀻𑀢𑀺𑀪𑀽𑀢𑁄. 𑀦𑀺𑀭𑀽𑀧𑀥𑀻𑀢𑀺 𑀓𑀺𑀮𑁂𑀲𑀼𑀧𑀥𑀺𑀅𑀪𑀸𑀯𑁂𑀦 𑀦𑀺𑀭𑀽𑀧𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀲𑀩𑁆𑀩𑀸 𑀆𑀲𑀢𑁆𑀢𑀺𑀬𑁄 𑀙𑁂𑀢𑁆𑀯𑀸𑀢𑀺 𑀭𑀽𑀧𑀸𑀤𑀻𑀲𑀼 𑀯𑀸 𑀯𑀺𑀲𑀬𑁂𑀲𑀼 𑀲𑀩𑁆𑀩𑀪𑀯𑁂𑀲𑀼 𑀯𑀸 𑀧𑀢𑁆𑀣𑀦𑀸𑀬𑁄 𑀙𑀺𑀦𑁆𑀤𑀺𑀢𑁆𑀯𑀸. 𑀳𑀤𑀬𑁂 𑀤𑀭𑀦𑁆𑀢𑀺 𑀘𑀺𑀢𑁆𑀢𑁂 𑀓𑀺𑀮𑁂𑀲𑀤𑀭𑀣𑀁 𑀯𑀺𑀦𑁂𑀢𑁆𑀯𑀸. 𑀯𑁂𑀬𑁆𑀬𑀸𑀬𑀺𑀓𑀦𑁆𑀢𑀺 𑀯𑀬𑀓𑀭𑀡𑀁 𑀯𑀼𑀘𑁆𑀘𑀢𑀺.

𑁩𑁦𑁭. 𑀆𑀤𑁂𑀬𑁆𑀬𑀯𑀸𑀘𑁄𑀢𑀺 𑀢𑀲𑁆𑀲 𑀯𑀘𑀦𑀁 𑀩𑀳𑀽 𑀚𑀦𑀸 𑀆𑀤𑀺𑀬𑀺𑀢𑀩𑁆𑀩𑀁 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀸𑀫𑁂 𑀅𑀓𑀁𑀲𑀽𑀢𑀺 𑀬𑁂 𑀲𑀥𑀦𑀸, 𑀢𑁂 𑀅𑀢𑁆𑀢𑀦𑁄 𑀥𑀦𑁂𑀦 𑀅𑀓𑀁𑀲𑀼. 𑀬𑁂 𑀫𑀦𑁆𑀤𑀥𑀦𑀸 𑀘𑁂𑀯 𑀅𑀥𑀦𑀸 𑀘, 𑀢𑁂𑀲𑀁 𑀥𑀦𑀁 𑀅𑀤𑀸𑀲𑀺. 𑀇𑀢𑀺 𑀲𑁄 𑀲𑀢𑀲𑀳𑀲𑁆𑀲𑀓𑀳𑀸𑀧𑀡𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀜𑁆𑀘 𑀪𑀡𑁆𑀟𑀁 𑀤𑀢𑁆𑀯𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀺𑀓𑁂 𑀅𑀤𑁆𑀥𑀸𑀦𑁂 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀧𑀢𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺.

𑀓𑁄𑀝𑀺𑀲𑀦𑁆𑀣𑀭𑀁 𑀲𑀦𑁆𑀣𑀭𑀸𑀧𑁂𑀲𑀻𑀢𑀺 𑀓𑀳𑀸𑀧𑀡𑀓𑁄𑀝𑀺𑀬𑀸 𑀓𑀳𑀸𑀧𑀡𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀲𑀦𑁆𑀣𑀭𑀺. 𑀬𑁂 𑀢𑀢𑁆𑀣 𑀭𑀼𑀓𑁆𑀔𑀸 𑀯𑀸 𑀧𑁄𑀓𑁆𑀔𑀭𑀡𑀺𑀬𑁄 𑀯𑀸 𑀢𑁂𑀲𑀁 𑀧𑀭𑀺𑀓𑁆𑀔𑁂𑀧𑀧𑁆𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀲𑀦𑁆𑀣𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀏𑀯𑀫𑀲𑁆𑀲 𑀅𑀝𑁆𑀞𑀸𑀭𑀲𑀓𑁄𑀝𑀺𑀓𑀁 𑀦𑀺𑀥𑀸𑀦𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺.

𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀕𑀳𑀧𑀢𑀺𑀦𑁄 𑀏𑀯𑀁 𑀩𑀳𑀼𑀥𑀦𑀁 𑀘𑀚𑀦𑁆𑀢𑀲𑁆𑀲𑀸𑀧𑀺 𑀫𑀼𑀔𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 𑀏𑀢𑀁 𑀅𑀳𑁄𑀲𑀺. 𑀓𑁄𑀝𑁆𑀞𑀓𑀁 𑀫𑀸𑀧𑁂𑀲𑀻𑀢𑀺 𑀲𑀢𑁆𑀢𑀪𑀽𑀫𑀺𑀓𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀲𑀸𑀤𑀁 𑀫𑀸𑀧𑁂𑀲𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀲𑀺…𑀧𑁂… 𑀫𑀡𑁆𑀟𑀧𑁂 𑀓𑀸𑀭𑀸𑀧𑁂𑀲𑀻𑀢𑀺 𑀅𑀧𑀭𑀸𑀳𑀺𑀧𑀺 𑀅𑀝𑁆𑀞𑀸𑀭𑀲𑀳𑀺 𑀓𑁄𑀝𑀻𑀳𑀺 𑀏𑀢𑁂 𑀯𑀺𑀳𑀸𑀭𑀸𑀤𑀬𑁄 𑀓𑀸𑀭𑀸𑀧𑁂𑀲𑀺 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑀸𑀬 𑀪𑀽𑀫𑀺𑀬𑀸. 𑀯𑀺𑀧𑀲𑁆𑀲𑀺𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀦𑀩𑁆𑀩𑀲𑀼𑀫𑀺𑀢𑁆𑀢𑁄 𑀕𑀳𑀧𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑀁 𑀪𑀽𑀫𑀺𑀁 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀲𑀦𑁆𑀣𑀭𑁂𑀦 𑀓𑀺𑀡𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺. 𑀲𑀺𑀔𑀺𑀲𑁆𑀲 𑀧𑀦 𑀲𑀺𑀭𑀺𑀯𑀟𑁆𑀠𑁄 𑀕𑀳𑀧𑀢𑀺 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀬𑀝𑁆𑀞𑀺𑀲𑀦𑁆𑀣𑀭𑁂𑀦, 𑀯𑁂𑀲𑁆𑀲𑀪𑀼𑀲𑁆𑀲 𑀲𑁄𑀢𑁆𑀣𑀺𑀚𑁄 𑀕𑀳𑀧𑀢𑀺 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀨𑀸𑀮𑀲𑀦𑁆𑀣𑀭𑁂𑀦, 𑀓𑀓𑀼𑀲𑀦𑁆𑀥𑀲𑁆𑀲 𑀧𑀦 𑀅𑀘𑁆𑀘𑀼𑀢𑁄 𑀕𑀳𑀧𑀢𑀺 𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀳𑀢𑁆𑀣𑀺𑀧𑀤𑀲𑀦𑁆𑀣𑀭𑁂𑀦, 𑀓𑁄𑀡𑀸𑀕𑀫𑀦𑀲𑁆𑀲 𑀉𑀕𑁆𑀕𑁄 𑀕𑀳𑀧𑀢𑀺 𑀅𑀟𑁆𑀠𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀲𑀦𑁆𑀣𑀭𑁂𑀦, 𑀓𑀲𑁆𑀲𑀧𑀲𑁆𑀲 𑀲𑀼𑀫𑀗𑁆𑀕𑀮𑁄 𑀕𑀳𑀧𑀢𑀺 𑀯𑀻𑀲𑀢𑀺𑀉𑀲𑀪𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀓𑀘𑁆𑀙𑀧𑀲𑀦𑁆𑀣𑀭𑁂𑀦, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀼𑀤𑀢𑁆𑀢𑁄 𑀕𑀳𑀧𑀢𑀺 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑀁 𑀪𑀽𑀫𑀺𑀁 𑀓𑀳𑀸𑀧𑀡𑀲𑀦𑁆𑀣𑀭𑁂𑀦 𑀓𑀺𑀡𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀻𑀢𑀺; 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀅𑀮𑀫𑁂𑀯 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀲𑀼 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀦𑁆𑀢𑀺.

𑁩𑁦𑁮. 𑀔𑀡𑁆𑀟𑀦𑁆𑀢𑀺 𑀪𑀺𑀦𑁆𑀦𑁄𑀓𑀸𑀲𑁄. 𑀨𑀼𑀮𑁆𑀮𑀦𑁆𑀢𑀺 𑀨𑀮𑀺𑀢𑁄𑀓𑀸𑀲𑁄. 𑀧𑀝𑀺𑀲𑀗𑁆𑀔𑀭𑀺𑀲𑁆𑀲𑀢𑀻𑀢𑀺 𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀢𑀺. 𑀮𑀤𑁆𑀥𑀦𑀯𑀓𑀫𑁆𑀫𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀯𑀸𑀲𑀺𑀨𑀭𑀲𑀼𑀦𑀺𑀔𑀸𑀤𑀦𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀦 𑀓𑀸𑀢𑀩𑁆𑀩𑀁, 𑀓𑀢𑀸𑀓𑀢𑀁 𑀚𑀸𑀦𑀺𑀢𑀩𑁆𑀩𑀁.

𑁩𑁧𑁦. 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸𑀢𑀺 𑀣𑁂𑀭𑁄 𑀓𑀺𑀭 𑀕𑀺𑀮𑀸𑀦𑁂 𑀧𑀝𑀺𑀚𑀕𑁆𑀕𑀦𑁆𑀢𑁄 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀲𑀩𑁆𑀩𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀺. 𑀇𑀤𑀫𑀲𑁆𑀲 𑀘𑀸𑀭𑀺𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸’’𑀢𑀺. 𑀅𑀕𑁆𑀕𑀸𑀲𑀦𑀦𑁆𑀢𑀺 𑀣𑁂𑀭𑀸𑀲𑀦𑀁. 𑀅𑀕𑁆𑀕𑁄𑀤𑀓𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀁. 𑀅𑀕𑁆𑀕𑀧𑀺𑀡𑁆𑀟𑀦𑁆𑀢𑀺 𑀲𑀗𑁆𑀖𑀢𑁆𑀣𑁂𑀭𑀧𑀺𑀡𑁆𑀟𑀁. 𑀅𑀦𑁆𑀢𑀭𑀸 𑀲𑀢𑁆𑀣𑀻𑀦𑀁 𑀓𑀭𑀺𑀢𑁆𑀯𑀸𑀢𑀺 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑁂 𑀓𑀭𑀺𑀢𑁆𑀯𑀸.

𑁩𑁧𑁫. 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀅𑀝𑁆𑀞𑀸𑀭𑀲𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀏𑀯𑀁 𑀲𑀩𑁆𑀩𑀸𑀧𑀺 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀬𑁄 𑀧𑀭𑀺𑀘𑁆𑀘𑀚𑀺.

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀸𑀤𑀺𑀓𑀣𑀸

𑁩𑁧𑁬. 𑀯𑀺𑀧𑁆𑀧𑀓𑀢𑀪𑁄𑀚𑀦𑁄𑀢𑀺 𑀅𑀦𑁆𑀢𑀭𑀖𑀭𑁂 𑀯𑀸 𑀯𑀺𑀳𑀸𑀭𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀫𑀸𑀦𑁄 𑀪𑀺𑀓𑁆𑀔𑀼 𑀅𑀦𑀺𑀝𑁆𑀞𑀺𑀢𑁂 𑀪𑁄𑀚𑀦𑁂 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀦𑁆𑀢𑀭𑀖𑀭𑁂 𑀧𑀘𑁆𑀙𑀸 𑀆𑀕𑀢𑁂𑀦 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀯𑀸 𑀪𑀺𑀓𑁆𑀔𑀽 𑀯𑀸 ‘‘𑀧𑀯𑀺𑀲𑀣𑀸’’𑀢𑀺 𑀯𑀤𑀦𑁆𑀢𑀺, ‘‘𑀫𑀬𑀺 𑀧𑀯𑀺𑀲𑀦𑁆𑀢𑁂 𑀪𑀺𑀓𑁆𑀔𑀽 𑀉𑀝𑁆𑀞𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀏𑀣, 𑀪𑀦𑁆𑀢𑁂, 𑀆𑀲𑀦𑀁 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀯𑀤𑀢𑀺, 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀅𑀢𑀺𑀲𑀫𑀻𑀧𑀁 𑀅𑀕𑀦𑁆𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀞𑀸𑀢𑀩𑁆𑀩𑀁. 𑀑𑀓𑀸𑀲𑁂 𑀓𑀢𑁂 ‘‘𑀧𑀯𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀬𑀁 𑀆𑀲𑀦𑀁 𑀢𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀅𑀪𑀼𑀜𑁆𑀚𑀦𑁆𑀢𑁄 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀁 𑀉𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀲𑀼 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀺𑀯𑀺𑀢𑁆𑀯𑀸 𑀯𑀸 𑀔𑀸𑀤𑀺𑀢𑁆𑀯𑀸 𑀯𑀸 𑀬𑀸𑀯 𑀅𑀜𑁆𑀜𑁄 𑀆𑀕𑀘𑁆𑀙𑀢𑀺, 𑀢𑀸𑀯 𑀦𑀺𑀲𑀺𑀦𑁆𑀦𑀁 𑀭𑀺𑀢𑁆𑀢𑀳𑀢𑁆𑀣𑀫𑁆𑀧𑀺 𑀯𑀼𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀧𑁆𑀧𑀓𑀢𑀪𑁄𑀚𑀦𑁄𑀬𑁂𑀯 𑀳𑀺 𑀲𑁄 𑀳𑁄𑀢𑀺.

𑀲𑀘𑁂 𑀯𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀘𑁂 𑀆𑀧𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀯𑀼𑀝𑁆𑀞𑀸𑀧𑁂𑀢𑀺𑀬𑁂𑀯. 𑀧𑀯𑀸𑀭𑀺𑀢𑁄 𑀘 𑀳𑁄𑀢𑀻𑀢𑀺 𑀬𑀁 𑀲𑁄 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀧𑀯𑀸𑀭𑀺𑀢𑁄 𑀘 𑀳𑁄𑀢𑀺, 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀕𑀘𑁆𑀙 𑀉𑀤𑀓𑀁 𑀆𑀳𑀭𑀸𑀳𑀻’’𑀢𑀺. 𑀯𑀼𑀟𑁆𑀠𑀢𑀭𑀜𑁆𑀳𑀺 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀁 𑀇𑀤𑀫𑁂𑀯 𑀏𑀓𑀁 𑀞𑀸𑀦𑀦𑁆𑀢𑀺. 𑀲𑀘𑁂 𑀲𑁄 𑀉𑀤𑀓𑀫𑁆𑀧𑀺 𑀦 𑀆𑀳𑀭𑀢𑀺, 𑀢𑀢𑁄 𑀬𑀜𑁆𑀘 𑀦𑀯𑀓𑀢𑀭𑁂𑀦 𑀓𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀥𑀼𑀓𑀁 𑀲𑀺𑀢𑁆𑀣𑀸𑀦𑀻’’𑀢𑀺𑀆𑀤𑀺𑀫𑀸𑀳.

𑀕𑀺𑀮𑀸𑀦𑀲𑁆𑀲 𑀧𑀢𑀺𑀭𑀽𑀧𑀁 𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀬𑁄 𑀓𑀸𑀲𑀪𑀕𑀦𑁆𑀤𑀭𑀸𑀢𑀺𑀲𑀸𑀭𑀸𑀤𑀻𑀳𑀺 𑀕𑀺𑀮𑀸𑀦𑁄 𑀳𑁄𑀢𑀺, 𑀔𑁂𑀴𑀫𑀮𑁆𑀮𑀓𑀯𑀘𑁆𑀘𑀓𑀧𑀸𑀮𑀸𑀤𑀻𑀦𑀺 𑀞𑀧𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀓𑀼𑀝𑁆𑀞𑀺 𑀯𑀸 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀤𑀽𑀲𑁂𑀢𑀺; 𑀏𑀯𑀭𑀽𑀧𑀲𑁆𑀲 𑀳𑁂𑀝𑁆𑀞𑀸𑀧𑀸𑀲𑀸𑀤𑀧𑀡𑁆𑀡𑀲𑀸𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀏𑀓𑀫𑀦𑁆𑀢𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀯𑀲𑀦𑁆𑀢𑁂 𑀲𑁂𑀦𑀸𑀲𑀦𑀁 𑀦 𑀤𑀼𑀲𑁆𑀲𑀢𑀺, 𑀢𑀲𑁆𑀲 𑀯𑀭𑀲𑁂𑀬𑁆𑀬𑀸𑀧𑀺 𑀤𑀸𑀢𑀩𑁆𑀩𑀸𑀯. 𑀬𑁄𑀧𑀺 𑀲𑀺𑀦𑁂𑀳𑀧𑀸𑀦𑀯𑀺𑀭𑁂𑀘𑀦𑀦𑀢𑁆𑀣𑀼𑀓𑀫𑁆𑀫𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀪𑁂𑀲𑀚𑁆𑀚𑀁 𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀕𑀺𑀮𑀸𑀦𑁄𑀬𑁂𑀯, 𑀢𑀲𑁆𑀲𑀸𑀧𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀢𑀺𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁. 𑀮𑁂𑀲𑀓𑀧𑁆𑀧𑁂𑀦𑀸𑀢𑀺 𑀅𑀧𑁆𑀧𑀓𑁂𑀦 𑀲𑀻𑀲𑀸𑀩𑀸𑀥𑀸𑀤𑀺𑀫𑀢𑁆𑀢𑁂𑀦. 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀸 𑀦𑀸𑀫 𑀪𑀺𑀓𑁆𑀔𑀽’’𑀢𑀺 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀧𑀭𑀺𑀘𑁆𑀙𑁂𑀤𑀁 𑀜𑀢𑁆𑀯𑀸.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸

𑁩𑁧𑁮. 𑀲𑁂𑀬𑁆𑀬𑀸𑀢𑀺 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀬𑁆𑀬𑀕𑁆𑀕𑁂𑀦𑀸𑀢𑀺 𑀲𑁂𑀬𑁆𑀬𑀸𑀧𑀭𑀺𑀘𑁆𑀙𑁂𑀤𑁂𑀦, 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀏𑀓𑀫𑀜𑁆𑀘𑀝𑁆𑀞𑀸𑀦𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀸𑀳𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀦𑁆𑀢𑀸𑀢𑀺 𑀲𑁂𑀬𑁆𑀬𑀸𑀧𑀭𑀺𑀘𑁆𑀙𑁂𑀤𑁂𑀦 𑀕𑀸𑀳𑀺𑀬𑀫𑀸𑀦𑀸. 𑀲𑁂𑀬𑁆𑀬𑀸 𑀉𑀲𑁆𑀲𑀸𑀭𑀬𑀺𑀁𑀲𑀽𑀢𑀺 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀅𑀢𑀺𑀭𑁂𑀓𑀸𑀦𑀺 𑀅𑀳𑁂𑀲𑀼𑀁. 𑀯𑀺𑀳𑀸𑀭𑀕𑁆𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀪𑀸𑀕𑀦𑁆𑀢𑀺 𑀧𑀼𑀦 𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑀸𑀢𑀼𑀁. 𑀅𑀢𑀺𑀫𑀦𑁆𑀤𑁂𑀲𑀼 𑀳𑀺 𑀪𑀺𑀓𑁆𑀔𑀽𑀲𑀼 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀢𑀻𑀡𑀺 𑀧𑀭𑀺𑀯𑁂𑀡𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑁄𑀢𑀺 𑀅𑀦𑀺𑀘𑁆𑀙𑀸𑀬 𑀦 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀳𑀺𑀢𑁂 𑀅𑀦𑀼𑀪𑀸𑀕𑁂 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀦 𑀅𑀢𑁆𑀢𑀦𑁄 𑀅𑀭𑀼𑀘𑀺𑀬𑀸 𑀲𑁄 𑀅𑀦𑀼𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀬𑁂𑀦 𑀕𑀳𑀺𑀢𑁄, 𑀲𑁄 𑀘 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀢𑀁 𑀅𑀦𑀼𑀪𑀸𑀕𑀁 𑀯𑀸 𑀧𑀞𑀫𑀪𑀸𑀕𑀁 𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺.

𑀦𑀺𑀲𑁆𑀲𑀻𑀫𑁂 𑀞𑀺𑀢𑀲𑁆𑀲𑀸𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀞𑀺𑀢𑀲𑁆𑀲. 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀬 𑀧𑀦 𑀤𑀽𑀭𑁂 𑀞𑀺𑀢𑀲𑁆𑀲𑀸𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀳𑁂𑀢𑁆𑀯𑀸. 𑀲𑀩𑁆𑀩𑀓𑀸𑀮𑀁 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀉𑀢𑀼𑀓𑀸𑀮𑁂𑀧𑀺 𑀧𑀝𑀺𑀩𑀸𑀳𑀦𑁆𑀢𑀺. 𑀢𑀻𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼 𑀧𑀼𑀭𑀺𑀫𑀓𑁄 𑀘 𑀧𑀘𑁆𑀙𑀺𑀫𑀓𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀸𑀳𑀸 𑀣𑀸𑀯𑀭𑀸.

𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁂 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀳𑀸𑀮𑀸𑀪𑀲𑁂𑀦𑀸𑀲𑀦𑀁 𑀳𑁄𑀢𑀺. 𑀲𑁂𑀦𑀸𑀲𑀦𑀲𑀸𑀫𑀺𑀓𑀸 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀲𑀩𑁆𑀩𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀯𑀸𑀭𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀩𑀳𑀼𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀤𑁂𑀦𑁆𑀢𑀺. 𑀫𑀳𑀸𑀣𑁂𑀭𑀸 𑀤𑀽𑀭𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀢𑀁 𑀕𑀳𑁂𑀢𑁆𑀯𑀸 𑀨𑀸𑀲𑀼𑀁 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸 𑀮𑀸𑀪𑀁 𑀕𑀡𑁆𑀳𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀆𑀯𑀸𑀲𑀺𑀓𑀸 ‘‘𑀫𑀬𑀁 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀦 𑀮𑀪𑀸𑀫, 𑀦𑀺𑀘𑁆𑀘𑀁 𑀆𑀕𑀦𑁆𑀢𑀼𑀓𑀫𑀳𑀸𑀣𑁂𑀭𑀸𑀯 𑀮𑀪𑀦𑁆𑀢𑀺, 𑀢𑁂𑀬𑁂𑀯 𑀦𑀁 𑀆𑀕𑀦𑁆𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀮𑀼𑀚𑁆𑀚𑀦𑁆𑀢𑀫𑁆𑀧𑀺 𑀦 𑀑𑀮𑁄𑀓𑁂𑀦𑁆𑀢𑀺. 𑀪𑀕𑀯𑀸 𑀢𑀲𑁆𑀲 𑀧𑀝𑀺𑀚𑀕𑁆𑀕𑀦𑀢𑁆𑀣𑀁 ‘‘𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄’’𑀢𑀺 𑀆𑀳.

𑀢𑀁 𑀕𑀸𑀳𑁂𑀦𑁆𑀢𑁂𑀦 𑀲𑀗𑁆𑀖𑀢𑁆𑀣𑁂𑀭𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀪𑀦𑁆𑀢𑁂 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀲𑁂𑀦𑀸𑀲𑀦𑀁 𑀕𑀡𑁆𑀳𑀣𑀸’’𑀢𑀺. 𑀲𑀘𑁂 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁; 𑀦𑁄 𑀘𑁂 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀼𑀣𑁂𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀬𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀅𑀦𑁆𑀢𑀫𑀲𑁄 𑀲𑀸𑀫𑀡𑁂𑀭𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑀁. 𑀢𑁂𑀦 𑀢𑀁 𑀲𑁂𑀦𑀸𑀲𑀦𑀁 𑀅𑀝𑁆𑀞𑀫𑀸𑀲𑁂 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁. 𑀙𑀤𑀦𑀪𑀺𑀢𑁆𑀢𑀺𑀪𑀽𑀫𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀔𑀡𑁆𑀟𑀁 𑀯𑀸 𑀨𑀼𑀮𑁆𑀮𑀁 𑀯𑀸 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀗𑁆𑀔𑀭𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸 𑀭𑀢𑁆𑀢𑀺𑀁 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀭𑀢𑁆𑀢𑀺𑀁 𑀧𑀭𑀺𑀯𑁂𑀡𑁂 𑀯𑀲𑀺𑀢𑁆𑀯𑀸 𑀢𑀢𑁆𑀣 𑀤𑀺𑀯𑀲𑀁 𑀔𑁂𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁆𑀣𑁂𑀯 𑀯𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀉𑀢𑀼𑀓𑀸𑀮𑁂 𑀆𑀕𑀢𑀸𑀦𑀁 𑀯𑀼𑀟𑁆𑀠𑀸𑀦𑀁 𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀲𑀘𑁂 𑀲𑀗𑁆𑀖𑀢𑁆𑀣𑁂𑀭𑁄 ‘‘𑀫𑀬𑁆𑀳𑀁 𑀇𑀤𑀁 𑀲𑁂𑀦𑀸𑀲𑀦𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀦 𑀮𑀪𑀢𑀺. ‘‘𑀪𑀦𑁆𑀢𑁂, 𑀇𑀤𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀫𑀸𑀲𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀚𑀕𑁆𑀕𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁. 𑀅𑀝𑁆𑀞𑀫𑀸𑀲𑁂 𑀧𑀝𑀺𑀚𑀕𑁆𑀕𑀓𑀪𑀺𑀓𑁆𑀔𑀼𑀲𑁆𑀲𑁂𑀯 𑀕𑀳𑀺𑀢𑀁 𑀳𑁄𑀢𑀺.

𑀬𑀲𑁆𑀫𑀺𑀁 𑀧𑀦 𑀲𑁂𑀦𑀸𑀲𑀦𑁂 𑀏𑀓𑀲𑀁𑀯𑀘𑁆𑀙𑀭𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺 𑀙𑀫𑀸𑀲𑀘𑁆𑀘𑀬𑁂𑀦 𑀙𑀫𑀸𑀲𑀘𑁆𑀘𑀬𑁂𑀦, 𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀦𑁆𑀢𑀺 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀘𑀢𑀼𑀫𑀸𑀲𑀘𑁆𑀘𑀬𑁂𑀦, 𑀬𑀲𑁆𑀫𑀺𑀁 𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀤𑁂𑀦𑁆𑀢𑀺 𑀢𑁂𑀫𑀸𑀲𑀘𑁆𑀘𑀬𑁂𑀦 𑀢𑁂𑀫𑀸𑀲𑀘𑁆𑀘𑀬𑁂𑀦, 𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀧𑀘𑁆𑀘𑀬𑁂𑀦𑁂𑀯 𑀳𑀺 𑀢𑀁 𑀧𑀝𑀺𑀚𑀕𑁆𑀕𑀦𑀁 𑀮𑀪𑀺𑀲𑁆𑀲𑀢𑀺. 𑀬𑀲𑁆𑀫𑀺𑀁 𑀧𑀦 𑀏𑀓𑀲𑀁𑀯𑀘𑁆𑀙𑀭𑁂 𑀲𑀓𑀺𑀤𑁂𑀯 𑀩𑀳𑀼𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀏𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀕𑀸𑀳𑁂𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀢𑀸𑀯 𑀅𑀦𑁆𑀢𑁄𑀯𑀲𑁆𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂𑀦 𑀧𑀸𑀴𑀺𑀬𑀁 𑀆𑀕𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸.

𑀅𑀬𑀁 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘. 𑀢𑀢𑁆𑀣 𑀉𑀢𑀼𑀓𑀸𑀮𑁂 𑀢𑀸𑀯 𑀓𑁂𑀘𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀼𑀭𑁂𑀪𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀞𑀫𑀬𑀸𑀫𑀁 𑀯𑀸 𑀫𑀚𑁆𑀛𑀺𑀫𑀬𑀸𑀫𑀁 𑀯𑀸 𑀧𑀘𑁆𑀙𑀺𑀫𑀬𑀸𑀫𑀁 𑀯𑀸 𑀬𑁂 𑀬𑀤𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀤𑀸𑀯 𑀪𑀺𑀓𑁆𑀔𑀽 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁. 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁂𑀦 𑀧𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀺𑀓𑀸𑀮𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀣𑁂𑀭𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀪𑀦𑁆𑀢𑁂, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑁂 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀉𑀩𑁆𑀪𑀡𑁆𑀟𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀯𑀲𑀣𑀸’’𑀢𑀺.

𑀩𑀳𑀽𑀲𑀼 𑀧𑀦 𑀆𑀕𑀢𑁂𑀲𑀼 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑁂𑀓𑀁 𑀧𑀭𑀺𑀯𑁂𑀡𑀁 𑀧𑀳𑁄𑀢𑀺, 𑀏𑀓𑁂𑀓𑀁 𑀧𑀭𑀺𑀯𑁂𑀡𑀁 𑀤𑀸𑀢𑀩𑁆𑀩𑀁. 𑀢𑀢𑁆𑀣 𑀅𑀕𑁆𑀕𑀺𑀲𑀸𑀮𑀤𑀻𑀖𑀲𑀸𑀮𑀫𑀡𑁆𑀟𑀮𑀫𑀸𑀮𑀸𑀤𑀬𑁄 𑀲𑀩𑁆𑀩𑁂𑀧𑀺 𑀢𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀁 𑀅𑀧𑁆𑀧𑀳𑁄𑀦𑁆𑀢𑁂 𑀧𑀸𑀲𑀸𑀤𑀕𑁆𑀕𑁂𑀦 𑀤𑀸𑀢𑀩𑁆𑀩𑀁. 𑀧𑀸𑀲𑀸𑀤𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀑𑀯𑀭𑀓𑀕𑁆𑀕𑁂𑀦 𑀤𑀸𑀢𑀩𑁆𑀩𑀁. 𑀑𑀯𑀭𑀓𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀲𑁂𑀬𑁆𑀬𑀕𑁆𑀕𑁂𑀦 𑀤𑀸𑀢𑀩𑁆𑀩𑀁. 𑀲𑁂𑀬𑁆𑀬𑀕𑁆𑀕𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀫𑀜𑁆𑀘𑀝𑁆𑀞𑀸𑀦𑁂𑀦 𑀤𑀸𑀢𑀩𑁆𑀩𑀁. 𑀫𑀜𑁆𑀘𑀝𑁆𑀞𑀸𑀦𑁂 𑀅𑀧𑁆𑀧𑀳𑁄𑀦𑁆𑀢𑁂 𑀏𑀓𑀧𑀻𑀞𑀓𑀝𑁆𑀞𑀸𑀦𑀯𑀲𑁂𑀦 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑁄 𑀧𑀦 𑀞𑀺𑀢𑁄𑀓𑀸𑀲𑀫𑀢𑁆𑀢𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀏𑀢𑀜𑁆𑀳𑀺 𑀲𑁂𑀦𑀸𑀲𑀦𑀁 𑀦𑀸𑀫 𑀦 𑀳𑁄𑀢𑀺. 𑀧𑀻𑀞𑀓𑀝𑁆𑀞𑀸𑀦𑁂 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀧𑀻𑀞𑀓𑀝𑁆𑀞𑀸𑀦𑀁 𑀯𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀕𑀳𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀯𑀺𑀲𑁆𑀲𑀫𑀣𑀸’’𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀳𑀺 𑀲𑀓𑁆𑀓𑀸 𑀲𑀻𑀢𑀲𑀫𑀬𑁂 𑀲𑀩𑁆𑀩𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀲𑀺𑀢𑀼𑀁. 𑀫𑀳𑀸𑀣𑁂𑀭𑁂𑀦 𑀧𑀞𑀫𑀬𑀸𑀫𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀯𑀼𑀲𑁄, 𑀇𑀥 𑀧𑀯𑀺𑀲𑀸𑀳𑀻’’𑀢𑀺. 𑀲𑀘𑁂 𑀫𑀳𑀸𑀣𑁂𑀭𑁄 𑀦𑀺𑀤𑁆𑀤𑀸𑀕𑀭𑀼𑀓𑁄 𑀳𑁄𑀢𑀺, 𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀉𑀓𑁆𑀓𑀸𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀸𑀮𑁄 𑀚𑀸𑀢𑁄, 𑀲𑀻𑀢𑀁 𑀅𑀦𑀼𑀤𑀳𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀑𑀓𑀸𑀲𑁄 𑀤𑀸𑀢𑀩𑁆𑀩𑁄, 𑀅𑀤𑀸𑀢𑀼𑀁 𑀦 𑀮𑀪𑀢𑀺. 𑀤𑀼𑀢𑀺𑀬𑀢𑁆𑀣𑁂𑀭𑁂𑀦𑀧𑀺 𑀫𑀚𑁆𑀛𑀺𑀫𑀬𑀸𑀫𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀢𑀭𑀲𑁆𑀲 𑀤𑀸𑀢𑀩𑁆𑀩𑀁. 𑀦𑀺𑀤𑁆𑀤𑀸𑀕𑀭𑀼𑀓𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀏𑀓𑀭𑀢𑁆𑀢𑀺𑀁 𑀏𑀓𑀫𑀜𑁆𑀘𑀝𑁆𑀞𑀸𑀦𑀁 𑀢𑀺𑀡𑁆𑀡𑀁 𑀤𑀸𑀢𑀩𑁆𑀩𑀁. 𑀚𑀫𑁆𑀩𑀼𑀤𑀻𑀧𑁂 𑀧𑀦 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘‘𑀲𑁂𑀦𑀸𑀲𑀦𑀁 𑀦𑀸𑀫 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀧𑀻𑀞𑀝𑁆𑀞𑀸𑀦𑀁 𑀯𑀸 𑀓𑀺𑀜𑁆𑀘𑀺𑀤𑁂𑀯 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀓𑀲𑁆𑀲𑀘𑀺 𑀅𑀲𑀧𑁆𑀧𑀸𑀬’’𑀦𑁆𑀢𑀺 𑀆𑀕𑀦𑁆𑀢𑀼𑀓𑀸 𑀳𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀤𑁂𑀯𑀲𑀺𑀓𑀁 𑀲𑁂𑀦𑀸𑀲𑀦𑀁 𑀕𑀸𑀳𑁂𑀦𑁆𑀢𑀺. 𑀅𑀬𑀁 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫.

𑀯𑀲𑁆𑀲𑀸𑀯𑀸𑀲𑁂 𑀧𑀦 𑀅𑀢𑁆𑀣𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀅𑀢𑁆𑀣𑀺 𑀆𑀯𑀸𑀲𑀺𑀓𑀯𑀢𑁆𑀢𑀁, 𑀆𑀕𑀦𑁆𑀢𑀼𑀓𑁂𑀦 𑀢𑀸𑀯 𑀲𑀓𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀫𑁂𑀯 𑀢𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀳𑀺 𑀢𑀢𑁆𑀭 𑀲𑀫𑁆𑀩𑀸𑀥𑀁 𑀪𑀯𑁂𑀬𑁆𑀬, 𑀪𑀺𑀓𑁆𑀔𑀸𑀘𑀸𑀭𑁄 𑀯𑀸 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀦 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬. 𑀢𑀲𑁆𑀫𑀸 ‘‘𑀇𑀤𑀸𑀦𑀺 𑀫𑀸𑀲𑀫𑀢𑁆𑀢𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀯𑀲𑀦𑁆𑀢𑁄 𑀲𑀘𑁂 𑀉𑀤𑁆𑀤𑁂𑀲𑀢𑁆𑀣𑀺𑀓𑁄 𑀉𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀲𑀘𑁂 𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀲𑀘𑁂 𑀧𑀘𑁆𑀘𑀬𑀢𑁆𑀣𑀺𑀓𑁄 𑀧𑀘𑁆𑀘𑀬𑀮𑀸𑀪𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂 𑀲𑀼𑀔𑀁 𑀯𑀲𑀺𑀲𑁆𑀲𑀢𑀺.

𑀲𑀓𑀝𑁆𑀞𑀸𑀦𑀢𑁄 𑀘 𑀢𑀢𑁆𑀣 𑀕𑀘𑁆𑀙𑀦𑁆𑀢𑁂𑀦 𑀦 𑀕𑁄𑀘𑀭𑀕𑀸𑀫𑁄 𑀖𑀝𑁆𑀝𑁂𑀢𑀩𑁆𑀩𑁄, 𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸 𑁋 ‘‘𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀸 𑀦𑀢𑁆𑀣𑀺, 𑀅𑀬𑀁 𑀘𑁂𑀢𑀺𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑁄, 𑀅𑀬𑀁 𑀉𑀧𑁄𑀲𑀣𑀸𑀕𑀸𑀭𑀲𑁆𑀲, 𑀇𑀤𑀁 𑀢𑀸𑀴𑀜𑁆𑀘𑁂𑀯 𑀲𑀽𑀘𑀺 𑀘 𑀲𑀫𑁆𑀧𑀝𑀺𑀘𑁆𑀙𑀣 𑀢𑀼𑀫𑁆𑀳𑀸𑀓𑀁 𑀯𑀺𑀳𑀸𑀭’’𑀦𑁆𑀢𑀺. 𑀲𑁂𑀦𑀸𑀲𑀦𑀁 𑀧𑀦 𑀚𑀕𑁆𑀕𑀺𑀢𑁆𑀯𑀸 𑀤𑀸𑀭𑀼𑀪𑀡𑁆𑀟𑀫𑀢𑁆𑀢𑀺𑀓𑀸𑀪𑀡𑁆𑀟𑀸𑀦𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀏𑀯𑀁 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀤𑀳𑀭𑁂𑀳𑀺 𑀧𑀢𑁆𑀢𑀘𑀻𑀯𑀭𑀪𑀡𑁆𑀟𑀺𑀓𑀸𑀬𑁄 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑁂𑀮𑀦𑀸𑀴𑀺𑀓𑀢𑁆𑀢𑀭𑀤𑀡𑁆𑀟𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀙𑀢𑁆𑀢𑀁 𑀧𑀕𑁆𑀕𑀬𑁆𑀳 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀕𑀸𑀫𑀤𑁆𑀯𑀸𑀭𑁂𑀦𑁂𑀯 𑀦 𑀕𑀦𑁆𑀢𑀩𑁆𑀩𑀁, 𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀝𑀯𑀺𑀫𑀕𑁆𑀕𑁂𑀦 𑀕𑀦𑁆𑀢𑀩𑁆𑀩𑀁. 𑀅𑀝𑀯𑀺𑀫𑀕𑁆𑀕𑁂 𑀅𑀲𑀢𑀺 𑀕𑀼𑀫𑁆𑀩𑀸𑀤𑀻𑀦𑀺 𑀫𑀤𑁆𑀤𑀦𑁆𑀢𑁂𑀦 𑀦 𑀕𑀦𑁆𑀢𑀩𑁆𑀩𑀁, 𑀕𑀫𑀺𑀬𑀯𑀢𑁆𑀢𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀫𑀦𑀯𑀢𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀕𑀸𑀫𑀤𑁆𑀯𑀸𑀭𑁂𑀦 𑀫𑀕𑁆𑀕𑁄 𑀳𑁄𑀢𑀺, 𑀕𑀘𑁆𑀙𑀦𑁆𑀢𑀜𑁆𑀘 𑀦𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑀸𑀓𑀁 𑀣𑁂𑀭𑁄 𑀯𑀺𑀬𑀸’’𑀢𑀺 𑀉𑀧𑀥𑀸𑀯𑀺𑀢𑁆𑀯𑀸 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀼 𑀘𑁂 𑀏𑀓𑁄 𑀏𑀯𑀁 𑀯𑀤𑀢𑀺 𑁋 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁄 𑀦𑀸𑀫𑀸𑀬𑀁, 𑀬𑀢𑁆𑀣 𑀅𑀦𑁆𑀢𑁄𑀯𑀲𑁆𑀲𑁂 𑀦𑀺𑀩𑀤𑁆𑀥𑀪𑀺𑀓𑁆𑀔𑀸𑀘𑀸𑀭𑁄 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀜𑁆𑀘 𑀮𑀩𑁆𑀪𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀽 𑀕𑀘𑁆𑀙𑀦𑁆𑀢𑀻’’𑀢𑀺. 𑀢𑀲𑁆𑀲 𑀘𑁂 𑀲𑀼𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀫𑁆𑀧𑀺 𑀕𑀸𑀫𑁂 𑀚𑀦𑁄 𑀪𑀼𑀜𑁆𑀚𑀢𑀺 𑀘𑁂𑀯 𑀦𑀺𑀯𑀸𑀲𑁂𑀢𑀺 𑀘, 𑀫𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀯𑀺𑀳𑀸𑀭𑁂 𑀦𑀺𑀩𑀤𑁆𑀥𑀯𑀢𑁆𑀢𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀘 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀇𑀥𑁂𑀯 𑀪𑀦𑁆𑀢𑁂 𑀯𑀲𑀣𑀸’’𑀢𑀺 𑀬𑀸𑀘𑀦𑁆𑀢𑀺, 𑀲𑀩𑁆𑀩𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀩𑁆𑀩𑀜𑁆𑀳𑁂𑀢𑀁 𑀓𑀧𑁆𑀧𑀺𑀬𑀜𑁆𑀘𑁂𑀯 𑀅𑀦𑀯𑀚𑁆𑀚𑀜𑁆𑀘. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘‘𑀓𑀼𑀳𑀺𑀁 𑀕𑀘𑁆𑀙𑀣𑀸’𑀢𑀺 𑀯𑀼𑀢𑁆𑀢𑁂 ‘𑀅𑀲𑀼𑀓𑀝𑁆𑀞𑀸𑀦’𑀦𑁆𑀢𑀺 𑀯𑀢𑁆𑀯𑀸, ‘𑀓𑀲𑁆𑀫𑀸 𑀢𑀢𑁆𑀣 𑀕𑀘𑁆𑀙𑀣𑀸’𑀢𑀺 𑀯𑀼𑀢𑁆𑀢𑁂 ‘𑀓𑀸𑀭𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩’’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑁆𑀣 𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸𑀯 𑀅𑀦𑀯𑀚𑁆𑀚𑀁. 𑀇𑀤𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀦𑀸𑀫.

𑀇𑀤𑀁 𑀧𑀦 𑀆𑀯𑀸𑀲𑀺𑀓𑀯𑀢𑁆𑀢𑀁 𑁋 𑀧𑀝𑀺𑀓𑀘𑁆𑀘𑁂𑀯 𑀳𑀺 𑀆𑀯𑀸𑀲𑀺𑀓𑁂𑀳𑀺 𑀯𑀺𑀳𑀸𑀭𑁄 𑀚𑀕𑁆𑀕𑀺𑀢𑀩𑁆𑀩𑁄. 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀧𑀭𑀺𑀪𑀡𑁆𑀟𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀯𑀘𑁆𑀘𑀓𑀼𑀝𑀺𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀦𑀺 𑀧𑀥𑀸𑀦𑀖𑀭𑀯𑀺𑀳𑀸𑀭𑀫𑀕𑁆𑀕𑁄𑀢𑀺 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀺, 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁 𑀫𑀼𑀤𑁆𑀤𑀯𑁂𑀤𑀺𑀓𑀸𑀬 𑀢𑁂𑀮𑀫𑀓𑁆𑀔𑀦𑀁 𑀫𑀜𑁆𑀘𑀧𑀻𑀞𑀧𑀝𑀺𑀚𑀕𑁆𑀕𑀦𑀦𑁆𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁 𑁋 ‘‘𑀯𑀲𑁆𑀲𑀁 𑀯𑀲𑀺𑀢𑀼𑀓𑀸𑀫𑀸 𑀆𑀕𑀦𑁆𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀲𑀼𑀔𑀁 𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀓𑀢𑀧𑀭𑀺𑀓𑀫𑁆𑀫𑁂𑀳𑀺 𑀆𑀲𑀸𑀴𑁆𑀳𑀻𑀚𑀼𑀡𑁆𑀳𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀓𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀁? 𑀬𑀢𑁄 𑀧𑀓𑀢𑀺𑀬𑀸 𑀮𑀩𑁆𑀪𑀢𑀺. 𑀬𑁂𑀳𑀺 𑀧𑀦 𑀦 𑀤𑀺𑀦𑁆𑀦𑀧𑀼𑀩𑁆𑀩𑀁, 𑀢𑁂 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀧𑀼𑀘𑁆𑀙𑀺𑀢𑀩𑁆𑀩𑀁? 𑀓𑀤𑀸𑀘𑀺 𑀳𑀺 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀓𑀤𑀸𑀘𑀺 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀸 𑀦 𑀤𑁂𑀦𑁆𑀢𑀺. 𑀢𑀢𑁆𑀣 𑀬𑁂 𑀦 𑀤𑀲𑁆𑀲𑀦𑁆𑀢𑀺, 𑀢𑁂 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑁂 𑀕𑀸𑀳𑀺𑀢𑁂 𑀕𑀸𑀳𑀺𑀢𑀪𑀺𑀓𑁆𑀔𑀽𑀦𑀁 𑀮𑀸𑀪𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀸𑀳𑁂𑀢𑀩𑁆𑀩𑀁, 𑀧𑀼𑀘𑁆𑀙𑀦𑁆𑀢𑁂𑀦 ‘‘𑀢𑀼𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀕𑁆𑀕𑀸𑀳𑀓𑀓𑀸𑀮𑁄 𑀉𑀧𑀓𑀝𑁆𑀞𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀦𑁆𑀢𑀺 ‘‘𑀪𑀦𑁆𑀢𑁂, 𑀇𑀫𑀁 𑀲𑀁𑀯𑀘𑁆𑀙𑀭𑀁 𑀙𑀸𑀢𑀓𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀫𑁆𑀳, 𑀦 𑀲𑀓𑁆𑀓𑁄𑀫 𑀤𑀸𑀢𑀼’’𑀦𑁆𑀢𑀺 𑀯𑀸 ‘‘𑀬𑀁 𑀫𑀬𑀁 𑀧𑀼𑀩𑁆𑀩𑁂 𑀤𑁂𑀫, 𑀢𑀢𑁄 𑀊𑀦𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀇𑀤𑀸𑀦𑀺 𑀓𑀧𑁆𑀧𑀸𑀲𑁄 𑀲𑀼𑀮𑀪𑁄, 𑀬𑀁 𑀧𑀼𑀩𑁆𑀩𑁂 𑀤𑁂𑀫, 𑀢𑀢𑁄 𑀩𑀳𑀼𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀸 𑀯𑀤𑀦𑁆𑀢𑀺, 𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀦𑀬𑁂𑀦 𑀢𑁂𑀲𑀁 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀢𑀩𑁆𑀩𑀁.

𑀲𑀘𑁂 𑀫𑀦𑀼𑀲𑁆𑀲𑀸 𑀯𑀤𑀦𑁆𑀢𑀺 𑁋 ‘‘𑀬𑀲𑁆𑀲 𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀢𑁂𑀫𑀸𑀲𑀁 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀼, 𑀯𑀺𑀳𑀸𑀭𑀫𑀕𑁆𑀕𑀁 𑀚𑀕𑁆𑀕𑀢𑀼, 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀸𑀦𑀺 𑀚𑀕𑁆𑀕𑀢𑀼, 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀢𑀽’’𑀢𑀺, 𑀬𑀲𑁆𑀲 𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀬𑁄 𑀧𑀦 𑀕𑀸𑀫𑁄 𑀧𑀝𑀺𑀓𑁆𑀓𑀫𑁆𑀫 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀦𑁆𑀢𑀭𑁂 𑀳𑁄𑀢𑀺, 𑀢𑀢𑁆𑀭 𑀘𑁂 𑀓𑀼𑀮𑀸𑀦𑀺 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀯𑀺𑀳𑀸𑀭𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀦𑁆𑀢𑀺𑀬𑁂𑀯, 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀧𑀁𑀲𑀼𑀓𑀽𑀮𑀺𑀓𑁄 𑀯𑀲𑀢𑀺, 𑀆𑀕𑀢𑀜𑁆𑀘 𑀢𑀁 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀦 𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀪𑀸𑀕𑁄 𑀪𑀺𑀓𑁆𑀔𑀼 ‘‘𑀯𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀧𑀦𑁂𑀢𑀁 𑀦 𑀯𑀝𑁆𑀝𑀢𑀺, 𑀇𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑁂 𑀤𑀸𑀬𑀓𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀢𑀩𑁆𑀩𑀸.

𑀢𑀢𑁆𑀭𑀼𑀧𑁆𑀧𑀸𑀤𑁂 𑀧𑀦 𑀓𑀧𑁆𑀧𑀺𑀬𑀓𑀸𑀭𑀓𑀸 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀓𑀣𑀁 𑀧𑀼𑀘𑁆𑀙𑀺𑀢𑀩𑁆𑀩𑀸? ‘‘𑀓𑀺𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀘𑁂 𑀯𑀤𑀦𑁆𑀢𑀺 𑁋 ‘‘𑀪𑀯𑀺𑀲𑁆𑀲𑀢𑀺, 𑀪𑀦𑁆𑀢𑁂, 𑀏𑀓𑁂𑀓𑀲𑁆𑀲 𑀦𑀯𑀳𑀢𑁆𑀣𑀁 𑀲𑀸𑀝𑀓𑀁 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀣𑀸’’𑀢𑀺, 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀯𑀤𑀦𑁆𑀢𑀺 𑁋 ‘‘𑀲𑀸𑀝𑀓𑀁 𑀦𑀢𑁆𑀣𑀺; 𑀯𑀢𑁆𑀣𑀼 𑀧𑀦 𑀅𑀢𑁆𑀣𑀺, 𑀕𑀸𑀳𑁂𑀣, 𑀪𑀦𑁆𑀢𑁂’’𑀢𑀺, 𑀯𑀢𑁆𑀣𑀼𑀫𑁆𑀳𑀺 𑀲𑀦𑁆𑀢𑁂𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀜𑁆𑀳𑀺 𑀳𑀢𑁆𑀣𑁂 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀬𑀁 𑀬𑀁 𑀓𑀧𑁆𑀧𑀁, 𑀢𑀁 𑀢𑀁 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁.

𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀕𑀺𑀮𑀸𑀦𑀧𑀘𑁆𑀘𑀬𑀢𑁆𑀣𑀸𑀬 𑀯𑀸 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀢𑀁 𑀘𑀻𑀯𑀭𑁂 𑀉𑀧𑀦𑀸𑀫𑁂𑀦𑁆𑀢𑁂𑀳𑀺 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑁂𑀢𑁆𑀯𑀸 𑀉𑀧𑀦𑀸𑀫𑁂𑀢𑀩𑁆𑀩𑀁. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀘𑀻𑀯𑀭𑀯𑀲𑁂𑀦𑁂𑀯 𑀘𑀢𑀼𑀧𑀘𑁆𑀘𑀬𑀯𑀲𑁂𑀦 𑀯𑀸 𑀤𑀺𑀦𑁆𑀦𑀁 𑀘𑀻𑀯𑀭𑁂 𑀉𑀧𑀦𑀸𑀫𑁂𑀦𑁆𑀢𑀸𑀦𑀁 𑀅𑀧𑀮𑁄𑀓𑀦𑀓𑀫𑁆𑀫𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀘 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀁, 𑀲𑀗𑁆𑀖𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀚𑀸𑀢𑀭𑀽𑀧𑀭𑀚𑀢𑀯𑀲𑁂𑀦𑀸𑀧𑀺 𑀆𑀫𑀓𑀥𑀜𑁆𑀜𑀯𑀲𑁂𑀦 𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦 𑀘𑀻𑀯𑀭𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦𑁂𑀯 𑀘 𑀯𑀝𑁆𑀝𑀢𑀺. 𑀢𑀁 𑀧𑀦 𑀏𑀯𑀁 𑀓𑀢𑁆𑀢𑀩𑁆𑀩𑀁 𑁋 ‘‘𑀇𑀤𑀸𑀦𑀺 𑀲𑀼𑀪𑀺𑀓𑁆𑀔𑀁 𑀲𑀼𑀮𑀪𑀧𑀺𑀡𑁆𑀟𑀁, 𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺. ‘‘𑀕𑀺𑀮𑀸𑀦𑀧𑀘𑁆𑀘𑀬𑁄 𑀲𑀼𑀮𑀪𑁄 𑀕𑀺𑀮𑀸𑀦𑁄 𑀯𑀸 𑀦𑀢𑁆𑀣𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺.

𑀏𑀯𑀁 𑀘𑀻𑀯𑀭𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀦𑀸𑀲𑀦𑀲𑁆𑀲 𑀓𑀸𑀮𑁂 𑀖𑁄𑀲𑀺𑀢𑁂 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀘 𑀤𑁆𑀯𑁂 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀦𑀯𑀓𑁄 𑀯𑀼𑀟𑁆𑀠𑀢𑀭𑀲𑁆𑀲, 𑀯𑀼𑀟𑁆𑀠𑁄 𑀘 𑀦𑀯𑀓𑀲𑁆𑀲 𑀕𑀸𑀳𑁂𑀲𑁆𑀲𑀢𑀺. 𑀫𑀳𑀦𑁆𑀢𑁂 𑀧𑀦 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑁂 𑀯𑀺𑀳𑀸𑀭𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀚𑀦𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀲𑀫𑁆𑀫𑀼𑀢𑀺 𑀓𑀫𑁆𑀫𑀯𑀸𑀘𑀸𑀬𑀧𑀺 𑀅𑀧𑀮𑁄𑀓𑀦𑁂𑀦𑀧𑀺 𑀯𑀝𑁆𑀝𑀢𑀺𑀬𑁂𑀯.

𑀢𑁂𑀳𑀺 𑀲𑀫𑁆𑀫𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑁂𑀦𑀸𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁, 𑀘𑁂𑀢𑀺𑀬𑀖𑀭𑀁 𑀩𑁄𑀥𑀺𑀖𑀭𑀁 𑀆𑀲𑀦𑀖𑀭𑀁 𑀲𑀫𑁆𑀫𑀼𑀜𑁆𑀚𑀦𑀺𑀅𑀝𑁆𑀝𑁄 𑀤𑀸𑀭𑀼𑀅𑀝𑁆𑀝𑁄 𑀯𑀘𑁆𑀘𑀓𑀼𑀝𑀺 𑀇𑀝𑁆𑀞𑀓𑀲𑀸𑀮𑀸 𑀯𑀟𑁆𑀠𑀓𑀺𑀲𑀸𑀮𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀧𑀸𑀦𑀻𑀬𑀫𑀸𑀴𑁄 𑀫𑀕𑁆𑀕𑁄 𑀧𑁄𑀓𑁆𑀔𑀭𑀡𑀻𑀢𑀺 𑀏𑀢𑀸𑀦𑀺 𑀳𑀺 𑀅𑀲𑁂𑀦𑀸𑀲𑀦𑀸𑀦𑀺, 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸 𑀫𑀡𑁆𑀟𑀧𑁄 𑀭𑀼𑀓𑁆𑀔𑀫𑀽𑀮𑀁 𑀯𑁂𑀴𑀼𑀕𑀼𑀫𑁆𑀩𑁄𑀢𑀺 𑀇𑀫𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀢𑀸𑀦𑀺 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀕𑀸𑀳𑁂𑀦𑁆𑀢𑁂𑀦 𑀘 ‘‘𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀲𑀗𑁆𑀖𑀺𑀓𑁄 𑀘 𑀲𑀤𑁆𑀥𑀸𑀤𑁂𑀬𑁆𑀬𑁄 𑀘𑀸𑀢𑀺 𑀤𑁆𑀯𑁂 𑀘𑀻𑀯𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀬𑀁 𑀪𑀺𑀓𑁆𑀔𑀽 𑀧𑀞𑀫𑀁 𑀕𑀡𑁆𑀳𑀺𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀕𑀸𑀳𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬 𑀇𑀢𑀭𑁄 𑀕𑀸𑀳𑁂𑀢𑀩𑁆𑀩𑁄.

𑀲𑀘𑁂 𑀧𑀦 𑀪𑀺𑀓𑁆𑀔𑀽𑀦𑀁 𑀅𑀧𑁆𑀧𑀢𑀸𑀬 𑀧𑀭𑀺𑀯𑁂𑀡𑀕𑁆𑀕𑁂𑀦 𑀲𑁂𑀦𑀸𑀲𑀦𑁂 𑀕𑀸𑀳𑀺𑀬𑀫𑀸𑀦𑁂 𑀏𑀓𑀁 𑀧𑀭𑀺𑀯𑁂𑀡𑀁 𑀫𑀳𑀸𑀮𑀸𑀪𑀁 𑀳𑁄𑀢𑀺, 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀦𑁆𑀢𑀺, 𑀢𑀁 𑀯𑀺𑀚𑀝𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀅𑀮𑀸𑀪𑀓𑁂𑀲𑀼 𑀆𑀯𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀦 𑀏𑀯𑀁 𑀓𑀸𑀢𑀩𑁆𑀩𑀁, 𑀫𑀦𑀼𑀲𑁆𑀲𑀸 𑀳𑀺 𑀅𑀢𑁆𑀢𑀦𑁄 𑀆𑀯𑀸𑀲𑀚𑀕𑁆𑀕𑀦𑀢𑁆𑀣𑀸𑀬 𑀧𑀘𑁆𑀘𑀬𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀫𑀳𑀸𑀣𑁂𑀭𑁄 𑀧𑀝𑀺𑀓𑁆𑀓𑁄𑀲𑀢𑀺 𑁋 ‘‘𑀫𑀸𑀯𑀼𑀲𑁄, 𑀏𑀯𑀁 𑀕𑀸𑀳𑁂𑀣, 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀁 𑀓𑀭𑁄𑀣, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑁂𑀡𑀕𑁆𑀕𑁂𑀦 𑀕𑀸𑀳𑁂𑀢𑀼’’’𑀦𑁆𑀢𑀺 𑀢𑀲𑁆𑀲 𑀧𑀝𑀺𑀓𑁆𑀓𑁄𑀲𑀦𑀸𑀬 𑀅𑀝𑁆𑀞𑀢𑁆𑀯𑀸 ‘‘𑀪𑀦𑁆𑀢𑁂 𑀪𑀺𑀓𑁆𑀔𑀽 𑀩𑀳𑀽, 𑀧𑀘𑁆𑀘𑀬𑁄 𑀫𑀦𑁆𑀤𑁄, 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀫𑁂𑀯.

𑀕𑀸𑀳𑁂𑀦𑁆𑀢𑁂𑀦 𑀘 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀕𑀡𑁆𑀳𑀣 𑀧𑀘𑁆𑀘𑀬𑀁 𑀥𑀸𑀭𑁂𑀣𑀸’’𑀢𑀺. ‘‘𑀅𑀲𑀼𑀓𑀓𑀼𑀮𑀲𑁆𑀲 𑀧𑀘𑁆𑀘𑀬𑁄 𑀅𑀲𑀼𑀓𑀲𑁂𑀦𑀸𑀲𑀦𑀜𑁆𑀘 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀆𑀯𑀼𑀲𑁄’’𑀢𑀺, ‘‘𑀧𑀸𑀧𑀼𑀡𑀸𑀢𑀺, 𑀪𑀦𑁆𑀢𑁂, 𑀕𑀡𑁆𑀳𑀣 𑀦’’𑀦𑁆𑀢𑀺, ‘‘𑀕𑀡𑁆𑀳𑀸𑀫𑀺, 𑀆𑀯𑀼𑀲𑁄’’𑀢𑀺, 𑀕𑀳𑀺𑀢𑀁 𑀳𑁄𑀢𑀺. 𑀲𑀘𑁂 𑀧𑀦 ‘‘𑀕𑀳𑀺𑀢𑀁 𑀯𑁄, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀕𑀳𑀺𑀢𑀁 𑀫𑁂’’𑀢𑀺 𑀯𑀸 ‘‘𑀕𑀡𑁆𑀳𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑀢𑀺, ‘‘𑀅𑀕𑀳𑀺𑀢𑀁 𑀳𑁄𑀢𑀻’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀅𑀢𑀻𑀢𑀸𑀦𑀸𑀕𑀢𑀯𑀘𑀦𑀁 𑀯𑀸 𑀳𑁄𑀢𑀼, 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀸, 𑀲𑀢𑀼𑀧𑁆𑀧𑀸𑀤𑀫𑀢𑁆𑀢𑀆𑀮𑀬𑀓𑀭𑀡𑀫𑀢𑁆𑀢𑀫𑁂𑀯 𑀘𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺.

𑀬𑁄𑀧𑀺 𑀧𑀁𑀲𑀼𑀓𑀽𑀮𑀺𑀓𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀫𑁆𑀧𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀆𑀯𑀸𑀲𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑁂𑀡𑁂 𑀅𑀕𑁆𑀕𑀺𑀲𑀸𑀮𑀸𑀬 𑀯𑀸 𑀤𑀻𑀖𑀲𑀸𑀮𑀸𑀬 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀅𑀜𑁆𑀜𑀲𑁆𑀲 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄 ‘‘𑀯𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀚𑀕𑁆𑀕𑀺𑀲𑁆𑀲𑀢𑀺, 𑀇𑀢𑀭𑁄 ‘‘𑀧𑀘𑁆𑀘𑀬𑀁 𑀕𑀡𑁆𑀳𑀸𑀫𑀻’’𑀢𑀺, 𑀏𑀯𑀁 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑁂𑀦𑀸𑀲𑀦𑀁 𑀲𑀼𑀚𑀕𑁆𑀕𑀺𑀢𑀢𑀭𑀁 𑀪𑀯𑀺𑀲𑁆𑀲𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀧𑀁𑀲𑀼𑀓𑀽𑀮𑀺𑀓𑁂 𑀯𑀸𑀲𑀢𑁆𑀣𑀸𑀬 𑀲𑁂𑀦𑀸𑀲𑀦𑀁 𑀕𑀡𑁆𑀳𑀦𑁆𑀢𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀯𑀢𑁆𑀢𑀩𑁆𑀩𑀁 𑁋 ‘𑀪𑀦𑁆𑀢𑁂, 𑀇𑀥 𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀲𑁄 𑀓𑀺𑀁 𑀓𑀸𑀢𑀩𑁆𑀩𑁄’𑀢𑀺. 𑀢𑁂𑀦 ‘𑀳𑁂𑀝𑁆𑀞𑀸 𑀅𑀜𑁆𑀜𑀁 𑀕𑀸𑀳𑀸𑀧𑁂𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀯𑀲𑀢𑀺, 𑀯𑀼𑀢𑁆𑀣𑀯𑀲𑁆𑀲𑀲𑁆𑀲 𑀘 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀸𑀝𑀓𑀁 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑁆𑀲𑀁𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺. 𑀬𑁂𑀲𑀁 𑀧𑀦 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺; 𑀓𑁂𑀯𑀮𑀁 𑀧𑀘𑁆𑀘𑀬𑀫𑁂𑀯 𑀤𑁂𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀁 𑀅𑀯𑀲𑁆𑀲𑀸𑀯𑀸𑀲𑀺𑀓𑁂 𑀲𑁂𑀦𑀸𑀲𑀦𑁂 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀫𑀦𑀼𑀲𑁆𑀲𑀸 𑀣𑀽𑀧𑀁 𑀓𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑀸𑀧𑁂𑀦𑁆𑀢𑀺, 𑀣𑀽𑀧𑁄 𑀦𑀸𑀫 𑀅𑀲𑁂𑀦𑀸𑀲𑀦𑀁, 𑀢𑀲𑁆𑀲 𑀲𑀫𑀻𑀧𑁂 𑀭𑀼𑀓𑁆𑀔𑁂 𑀯𑀸 𑀫𑀡𑁆𑀟𑀧𑁂 𑀯𑀸 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑀸𑀧𑁂𑀢𑀩𑁆𑀩𑀁. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀘𑁂𑀢𑀺𑀬𑀁 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁. 𑀩𑁄𑀥𑀺𑀭𑀼𑀓𑁆𑀔𑀩𑁄𑀥𑀺𑀖𑀭𑀆𑀲𑀦𑀖𑀭𑀲𑀫𑁆𑀫𑀼𑀜𑁆𑀚𑀦𑀺𑀅𑀝𑁆𑀝𑀤𑀸𑀭𑀼𑀅𑀝𑁆𑀝𑀯𑀘𑁆𑀘𑀓𑀼𑀝𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀦𑀻𑀬𑀫𑀸𑀴𑀓𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑁄𑀚𑀦𑀲𑀸𑀮𑀸 𑀧𑀦 𑀲𑁂𑀦𑀸𑀲𑀦𑀫𑁂𑀯, 𑀢𑀲𑁆𑀫𑀸 𑀢𑀁 𑀏𑀓𑀲𑁆𑀲 𑀯𑀸 𑀩𑀳𑀽𑀦𑀁 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀩𑁆𑀩𑀫𑀺𑀤𑀁 𑀯𑀺𑀢𑁆𑀣𑀸𑀭𑁂𑀦 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀧𑀦 𑀧𑀸𑀝𑀺𑀧𑀤𑀅𑀭𑀼𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀼𑀦 𑀅𑀭𑀼𑀡𑀁 𑀦 𑀪𑀺𑀚𑁆𑀚𑀢𑀺 𑀢𑀸𑀯 𑀕𑀸𑀳𑁂𑀢𑀩𑁆𑀩𑀁, 𑀇𑀤𑀜𑁆𑀳𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀔𑁂𑀢𑁆𑀢𑀁. 𑀲𑀘𑁂 𑀧𑀸𑀢𑁄𑀯 𑀕𑀸𑀳𑀺𑀢𑁂 𑀲𑁂𑀦𑀸𑀲𑀦𑁂 𑀅𑀜𑁆𑀜𑁄 𑀯𑀺𑀢𑀓𑁆𑀓𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀬𑀸𑀘𑀢𑀺, ‘‘𑀕𑀳𑀺𑀢𑀁, 𑀪𑀦𑁆𑀢𑁂, 𑀲𑁂𑀦𑀸𑀲𑀦𑀁, 𑀯𑀲𑁆𑀲𑀽𑀧𑀕𑀢𑁄 𑀲𑀗𑁆𑀖𑁄, 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄, 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀬𑀢𑁆𑀣 𑀇𑀘𑁆𑀙𑀣 𑀢𑀢𑁆𑀣 𑀯𑀲𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀯𑀲𑁆𑀲𑀽𑀧𑀕𑀢𑁂𑀳𑀺 𑀅𑀦𑁆𑀢𑁄𑀯𑀲𑁆𑀲𑁂 𑀦𑀺𑀩𑀤𑁆𑀥𑀯𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 ‘‘𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀩𑀦𑁆𑀥𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀲𑀼𑀮𑀪𑀸 𑀘𑁂 𑀤𑀡𑁆𑀟𑀓𑀸 𑀘𑁂𑀯 𑀲𑀮𑀸𑀓𑀸𑀬𑁄 𑀘 𑀳𑁄𑀦𑁆𑀢𑀺, 𑀏𑀓𑁂𑀓𑁂𑀦 𑀙 𑀧𑀜𑁆𑀘 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄, 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀯𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀤𑀼𑀮𑁆𑀮𑀪𑀸 𑀘𑁂 𑀳𑁄𑀦𑁆𑀢𑀺, 𑀤𑁆𑀯𑁂 𑀢𑀺𑀲𑁆𑀲𑁄 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀏𑀓𑀸 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀻 𑀩𑀦𑁆𑀥𑀺𑀢𑀩𑁆𑀩𑀸. 𑀲𑀸𑀫𑀡𑁂𑀭𑁂𑀳𑀺 𑀧𑀜𑁆𑀘 𑀧𑀜𑁆𑀘 𑀉𑀓𑁆𑀓𑀸 𑀓𑁄𑀝𑁆𑀝𑁂𑀢𑀩𑁆𑀩𑀸. 𑀯𑀲𑀦𑀝𑁆𑀞𑀸𑀦𑁂 𑀓𑀲𑀸𑀯𑀧𑀭𑀺𑀪𑀡𑁆𑀟𑀁 𑀓𑀸𑀢𑀩𑁆𑀩𑀁.

𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀳𑀺 𑀧𑀦 ‘‘𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀉𑀤𑁆𑀤𑀺𑀲𑀸𑀧𑁂𑀢𑀩𑁆𑀩𑀁, 𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀁, 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀥𑀫𑁆𑀫𑀲𑀯𑀦𑀁 𑀓𑀸𑀢𑀩𑁆𑀩𑀁, 𑀲𑀩𑁆𑀩𑁂𑀯 𑀳𑀺 𑀏𑀢𑁂 𑀧𑀧𑀜𑁆𑀘𑀸. 𑀦𑀺𑀧𑁆𑀧𑀧𑀜𑁆𑀘𑀸 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀫𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀲𑀩𑁆𑀩𑁂 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀼, 𑀲𑁂𑀬𑁆𑀬𑀁 𑀅𑀓𑀧𑁆𑀧𑁂𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑁂𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑀼, 𑀫𑀽𑀕𑀩𑁆𑀩𑀢𑀁 𑀕𑀡𑁆𑀳𑀦𑁆𑀢𑀼, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀧𑀺 𑀪𑀸𑀚𑀦𑀻𑀬𑀪𑀡𑁆𑀟𑀁 𑀮𑀪𑀦𑁆𑀢𑀽’’𑀢𑀺 𑀯𑀸 𑀏𑀯𑀭𑀽𑀧𑀁 𑀅𑀥𑀫𑁆𑀫𑀺𑀓𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. 𑀏𑀯𑀁 𑀧𑀦 𑀓𑀸𑀢𑀩𑁆𑀩𑀁 𑁋 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀦𑀸𑀫 𑀢𑀺𑀯𑀺𑀥𑀫𑁆𑀧𑀺 𑀲𑀤𑁆𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀺; 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀣, 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀧𑀥𑀸𑀦𑀖𑀭𑁂 𑀯𑀲𑀦𑁆𑀢𑀸𑀦𑀁 𑀲𑀗𑁆𑀖𑀝𑁆𑀝𑀦𑀁 𑀅𑀓𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀺𑀲𑀣, 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀥𑀫𑁆𑀫𑀲𑀯𑀦𑀁 𑀲𑀫𑀺𑀤𑁆𑀥𑀁 𑀓𑀭𑁄𑀣, 𑀧𑀩𑁆𑀩𑀸𑀚𑁂𑀦𑁆𑀢𑀸 𑀲𑁄𑀥𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀣, 𑀲𑁄𑀥𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀣, 𑀲𑁄𑀥𑁂𑀢𑁆𑀯𑀸 𑀦𑀺𑀲𑁆𑀲𑀬𑀁 𑀤𑁂𑀣, 𑀏𑀓𑁄𑀧𑀺 𑀳𑀺 𑀓𑀼𑀮𑀧𑀼𑀢𑁆𑀢𑁄 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀲𑀓𑀮𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀬𑀢𑁆𑀢𑀓𑀸𑀦𑀺 𑀲𑀓𑁆𑀓𑁄𑀣 𑀢𑀢𑁆𑀢𑀓𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀣. 𑀅𑀦𑁆𑀢𑁄𑀯𑀲𑁆𑀲𑀁 𑀦𑀸𑀫𑁂𑀢𑀁 𑀲𑀓𑀮𑀤𑀺𑀯𑀲𑀁 𑀭𑀢𑁆𑀢𑀺𑀬𑀸 𑀘 𑀧𑀞𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀯𑀻𑀭𑀺𑀬𑀁 𑀆𑀭𑀪𑀺𑀢𑀩𑁆𑀩𑀁. 𑀧𑁄𑀭𑀸𑀡𑀓𑀫𑀳𑀸𑀣𑁂𑀭𑀸𑀧𑀺 𑀲𑀩𑁆𑀩𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂 𑀏𑀓𑀘𑀸𑀭𑀺𑀓𑀯𑀢𑁆𑀢𑀁 𑀧𑀽𑀭𑀬𑀺𑀁𑀲𑀼, 𑀪𑀲𑁆𑀲𑁂 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀤𑀲𑀯𑀢𑁆𑀣𑀼𑀓𑀓𑀣𑀁 𑀤𑀲𑀅𑀲𑀼𑀪𑀤𑀲𑀸𑀦𑀼𑀲𑁆𑀲𑀢𑀺𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀓𑀣𑀜𑁆𑀘 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀯𑀢𑁆𑀢𑀁 𑀓𑀸𑀢𑀼𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁.

𑀅𑀧𑀺𑀘 𑀪𑀺𑀓𑁆𑀔𑀽 𑀑𑀯𑀤𑀺𑀢𑀩𑁆𑀩𑀸 𑁋 ‘‘𑀯𑀺𑀕𑁆𑀕𑀸𑀳𑀺𑀓𑀧𑀺𑀲𑀼𑀡𑀨𑀭𑀼𑀲𑀯𑀘𑀦𑀸𑀦𑀺 𑀫𑀸 𑀯𑀤𑀣, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀻𑀮𑀸𑀦𑀺 𑀆𑀯𑀚𑁆𑀚𑁂𑀦𑁆𑀢𑀸 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸 𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀣𑀸’’𑀢𑀺. 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀯𑀦𑁆𑀤𑀦𑁆𑀢𑁂𑀦 𑀕𑀦𑁆𑀥𑀫𑀸𑀮𑀁 𑀯𑀸 𑀧𑀽𑀚𑁂𑀦𑁆𑀢𑁂𑀦 𑀧𑀢𑁆𑀢𑀁 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀦 𑀦 𑀓𑀣𑁂𑀢𑀩𑁆𑀩𑀁, 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀅𑀦𑁆𑀢𑁄𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀬𑀲𑀜𑁆𑀜𑀼𑀢𑁆𑀢𑀓𑀣𑀸 𑀯𑀸 𑀯𑀺𑀲𑀪𑀸𑀕𑀓𑀣𑀸 𑀯𑀸 𑀦 𑀓𑀣𑁂𑀢𑀩𑁆𑀩𑀸, 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀧𑀽𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀭𑀽𑀧𑀸 𑀩𑀳𑀼𑀓𑀸𑀧𑀺 𑀦𑀺𑀬𑁆𑀬𑀸𑀦𑀺𑀓𑀓𑀣𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦 𑀲𑀘𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀓𑁄𑀘𑀺 𑀤𑀲𑀳𑀢𑁆𑀣𑀁 𑀯𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀆𑀕𑀦𑁆𑀢𑀼𑀓𑁄 𑀲𑀘𑁂 𑀪𑀺𑀓𑁆𑀔𑀼 𑀲𑀗𑁆𑀖𑀢𑁆𑀣𑁂𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀦𑀯𑀓𑁄 𑀘𑁂 𑀳𑁄𑀢𑀺, 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀢𑁆𑀣𑁂𑀭𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀲𑀘𑁂 𑀪𑀦𑁆𑀢𑁂 𑀇𑀘𑁆𑀙𑀣, 𑀧𑀞𑀫𑀪𑀸𑀕𑀁 𑀫𑀼𑀜𑁆𑀘𑀺𑀢𑁆𑀯𑀸 𑀇𑀤𑀁 𑀯𑀢𑁆𑀣𑀁 𑀕𑀡𑁆𑀳𑀣𑀸’’𑀢𑀺, 𑀅𑀫𑀼𑀜𑁆𑀘𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀼𑀩𑁆𑀩𑁂 𑀕𑀸𑀳𑀺𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀤𑀼𑀢𑀺𑀬𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀢𑁆𑀢𑀝𑁆𑀞𑀸𑀦𑁂 𑀆𑀕𑀦𑁆𑀢𑀼𑀓𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀯𑀢𑁆𑀣𑀸𑀦𑀺 𑀅𑀮𑀢𑁆𑀣𑀼𑀁, 𑀮𑀤𑁆𑀥𑀁 𑀮𑀤𑁆𑀥𑀁 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀬𑀸𑀯 𑀆𑀕𑀦𑁆𑀢𑀼𑀓𑀲𑁆𑀲 𑀲𑀫𑀓𑀁 𑀳𑁄𑀢𑀺, 𑀢𑀸𑀯 𑀤𑀸𑀢𑀩𑁆𑀩𑀁. 𑀢𑁂𑀦 𑀧𑀦 𑀲𑀫𑀓𑁂 𑀮𑀤𑁆𑀥𑁂 𑀅𑀯𑀲𑀺𑀝𑁆𑀞𑁄 𑀅𑀦𑀼𑀪𑀸𑀕𑁄 𑀣𑁂𑀭𑀸𑀲𑀦𑁂 𑀤𑀸𑀢𑀩𑁆𑀩𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀮𑀸𑀪𑁂 𑀲𑀢𑀺 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀼𑀁 𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀲𑀘𑁂 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀤𑁆𑀯𑀻𑀲𑀼𑀧𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀲𑀼 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀬 𑀓𑀺𑀮𑀫𑀦𑁆𑀢𑀸 ‘‘𑀆𑀯𑀼𑀲𑁄, 𑀇𑀥 𑀯𑀲𑀦𑁆𑀢𑀸 𑀲𑀩𑁆𑀩𑁂𑀯 𑀓𑀺𑀮𑀫𑀸𑀫, 𑀲𑀸𑀥𑀼 𑀯𑀢 𑀤𑁆𑀯𑁂𑀪𑀸𑀕𑀸 𑀳𑁄𑀫, 𑀬𑁂𑀲𑀁 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑀸𑀦𑀺 𑀅𑀢𑁆𑀣𑀺, 𑀢𑁂 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀼 𑀬𑁂 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀅𑀧𑀮𑁄𑀓𑁂𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀸𑀢𑀩𑁆𑀩𑀁. 𑀲𑀸𑀤𑀺𑀬𑀦𑁆𑀢𑀸𑀧𑀺 𑀳𑀺 𑀢𑁂 𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄, 𑀔𑀻𑀬𑀦𑁆𑀢𑀸𑀧𑀺 𑀘 𑀆𑀯𑀸𑀲𑀺𑀓𑀸 𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀓𑀢𑀺𑀓𑀯𑀢𑁆𑀢𑀁 𑀓𑀸𑀢𑀩𑁆𑀩𑀁 𑁋 ‘𑀲𑀩𑁆𑀩𑁂𑀲𑀁 𑀦𑁄 𑀇𑀥 𑀬𑀸𑀕𑀼𑀪𑀢𑁆𑀢𑀁 𑀦𑀧𑁆𑀧𑀳𑁄𑀢𑀺, 𑀲𑀪𑀸𑀕𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀆𑀕𑀘𑁆𑀙𑀣, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀪𑀺𑀲𑁆𑀲𑀣𑀸’𑀢𑀺. 𑀢𑀜𑁆𑀘𑁂 𑀏𑀓𑁄 𑀧𑀝𑀺𑀩𑀸𑀳𑀢𑀺, 𑀲𑀼𑀧𑀝𑀺𑀩𑀸𑀳𑀺𑀢𑀁; 𑀦𑁄 𑀘𑁂 𑀧𑀝𑀺𑀩𑀸𑀳𑀢𑀺, 𑀓𑀢𑀺𑀓𑀸 𑀲𑀼𑀓𑀢𑀸. 𑀧𑀘𑁆𑀙𑀸 𑀢𑁂𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀆𑀕𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺. 𑀧𑀼𑀦𑀧𑀺 𑀯𑀼𑀢𑁆𑀢𑀁 𑁋 ‘‘𑀲𑀘𑁂 𑀯𑀲𑁆𑀲𑀽𑀧𑀕𑀢𑁂𑀲𑀼 𑀏𑀓𑀘𑁆𑀘𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑁂 𑀅𑀧𑀸𑀧𑀼𑀡𑀦𑁆𑀢𑁂 𑀪𑀺𑀓𑁆𑀔𑀽 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺 𑁋 ‘𑀙𑀺𑀦𑁆𑀦𑀯𑀲𑁆𑀲𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀫𑁂𑀲𑀁 𑀤𑀸𑀢𑀼𑀁 𑀭𑀼𑀘𑁆𑀘𑀢𑀻’𑀢𑀺 𑀏𑀯𑀁 𑀓𑀢𑀺𑀓𑀸𑀬 𑀓𑀢𑀸𑀬 𑀕𑀸𑀳𑀺𑀢𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀁 𑀢𑁂𑀲𑀫𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺.

𑀢𑁂𑀫𑀸𑀲𑀁 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀫𑀕𑁆𑀕𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀸𑀦𑀺 𑀚𑀕𑁆𑀕𑀺𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁄𑀧𑀺 𑀯𑀺𑀩𑁆𑀪𑀦𑁆𑀢𑁄𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀪𑀢𑀺𑀬𑁂𑀯. 𑀪𑀢𑀺𑀦𑀺𑀯𑀺𑀝𑁆𑀞𑀜𑁆𑀳𑀺 𑀢𑁂𑀦 𑀓𑀢𑀁. 𑀲𑀗𑁆𑀖𑀺𑀓𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑁂𑀯. 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀦 𑀮𑀪𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀘𑁂 𑀯𑀼𑀢𑁆𑀣𑀯𑀲𑁆𑀲𑁄 𑀤𑀺𑀲𑀁𑀕𑀫𑀺𑀓𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑀲𑁆𑀲 𑀳𑀢𑁆𑀣𑀢𑁄 𑀓𑀺𑀜𑁆𑀘𑀺𑀤𑁂𑀯 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑀓𑀼𑀮𑁂 𑀫𑀬𑁆𑀳𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀁, 𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀯𑀺𑀩𑁆𑀪𑀫𑀢𑀺, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑁂 𑀲𑀫𑁆𑀫𑀼𑀔𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀮𑀪𑀢𑀺. ‘‘𑀇𑀤𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑁂 𑀯𑀼𑀢𑁆𑀣𑀪𑀺𑀓𑁆𑀔𑀼𑀦𑁄 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂, 𑀬𑀲𑁆𑀲 𑀕𑀸𑀳𑀺𑀢𑀁 𑀢𑀲𑁆𑀲𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁂𑀦𑀸𑀲𑀦𑀲𑀸𑀫𑀺𑀓𑀲𑁆𑀲 𑀧𑀺𑀬𑀓𑀫𑁆𑀬𑀢𑀸𑀬 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑁂 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀢𑀢𑁆𑀣 𑀯𑀲𑁆𑀲𑀽𑀧𑀕𑀢𑀲𑁆𑀲 𑀏𑀓𑀫𑁂𑀯 𑀯𑀢𑁆𑀣𑀁 𑀤𑀸𑀢𑀩𑁆𑀩𑀁, 𑀲𑁂𑀲𑀸𑀦𑀺 𑀲𑀗𑁆𑀖𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀯𑀲𑁆𑀲𑀸𑀯𑀸𑀲𑀺𑀓𑀝𑁆𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀞𑀺𑀢𑀺𑀓𑀸𑀬 𑀅𑀲𑀢𑀺 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑁂𑀦𑀸𑀲𑀦𑁂 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀲𑁂𑀦𑀸𑀲𑀦𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲𑁂𑀯 𑀳𑁄𑀦𑁆𑀢𑀺.

𑀏𑀓𑀲𑁆𑀲 𑀕𑁂𑀳𑁂 𑀤𑁆𑀯𑁂 𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀺 𑁋 𑀧𑀞𑀫𑀪𑀸𑀕𑁄 𑀲𑀸𑀫𑀡𑁂𑀭𑀲𑁆𑀲 𑀕𑀸𑀳𑀺𑀢𑁄 𑀳𑁄𑀢𑀺, 𑀤𑀼𑀢𑀺𑀬𑁄 𑀣𑁂𑀭𑀸𑀲𑀦𑁂. 𑀲𑁄 𑀏𑀓𑀁 𑀤𑀲𑀳𑀢𑁆𑀣𑀁, 𑀏𑀓𑀁 𑀅𑀝𑁆𑀞𑀳𑀢𑁆𑀣𑀁 𑀲𑀸𑀝𑀓𑀁 𑀧𑁂𑀲𑁂𑀢𑀺 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺 𑀯𑀺𑀘𑀺𑀦𑀺𑀢𑁆𑀯𑀸 𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸 𑀅𑀦𑀼𑀪𑀸𑀕𑁄 𑀣𑁂𑀭𑀸𑀲𑀦𑁂 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀉𑀪𑁄𑀧𑀺 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀲𑀬𑀫𑁂𑀯 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺, 𑀬𑀁 𑀬𑀲𑁆𑀲 𑀤𑀺𑀦𑁆𑀦𑀁, 𑀢𑀤𑁂𑀯 𑀢𑀲𑁆𑀲 𑀳𑁄𑀢𑀺.

𑀇𑀢𑁄 𑀧𑀭𑀁 𑀫𑀳𑀸𑀧𑀘𑁆𑀘𑀭𑀺𑀬𑀁 𑀆𑀕𑀢𑀦𑀬𑁄 𑀳𑁄𑀢𑀺 𑁋 ‘‘𑀏𑀓𑀲𑁆𑀲 𑀖𑀭𑁂 𑀤𑀳𑀭𑀲𑀸𑀫𑀡𑁂𑀭𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀘𑁂 𑀧𑀼𑀘𑁆𑀙𑀢𑀺 𑁋 ‘𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀓𑀲𑁆𑀲 𑀧𑀢𑁆𑀢’𑀦𑁆𑀢𑀺, ‘𑀲𑀸𑀫𑀡𑁂𑀭𑀲𑁆𑀲𑀸’𑀢𑀺 𑀅𑀯𑀢𑁆𑀯𑀸 ‘𑀤𑀸𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀲𑀻’𑀢𑀺 𑀯𑀢𑁆𑀯𑀸 𑀤𑀸𑀦𑀤𑀺𑀯𑀲𑁂 𑀏𑀓𑀁 𑀫𑀳𑀸𑀣𑁂𑀭𑀁 𑀧𑁂𑀲𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀁, 𑀲𑁄 𑀯𑀺𑀩𑁆𑀪𑀫𑀢𑀺 𑀯𑀸 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀫𑀦𑀼𑀲𑁆𑀲𑀸 𑀘𑁂 𑀧𑀼𑀘𑁆𑀙𑀦𑁆𑀢𑀺 𑁋 ‘𑀓𑀲𑁆𑀲 𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢’𑀦𑁆𑀢𑀺, 𑀢𑁂𑀲𑀁 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀢𑁂 𑀯𑀤𑀦𑁆𑀢𑀺 𑁋 ‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸’𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀧𑀼𑀡𑀸𑀢𑀺. 𑀅𑀣 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀤𑁂𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀯𑀲𑁆𑀲𑀽𑀧𑀕𑀢𑀸 𑀲𑀼𑀤𑁆𑀥𑀧𑀁𑀲𑀼𑀓𑀽𑀮𑀺𑀓𑀸𑀬𑁂𑀯 𑀳𑁄𑀦𑁆𑀢𑀺, 𑀆𑀦𑁂𑀢𑁆𑀯𑀸 𑀤𑀺𑀦𑁆𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀁 𑀯𑀸 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀩𑀺𑀫𑁆𑀩𑁄𑀳𑀦𑀸𑀤𑀻𑀦𑀺 𑀯𑀸 𑀓𑀸𑀢𑀩𑁆𑀩𑀸𑀦𑀻’’𑀢𑀺. 𑀇𑀤𑀁 𑀦𑁂𑀯𑀸𑀲𑀺𑀓𑀯𑀢𑁆𑀢𑀁.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸

𑁩𑁧𑁯. 𑀉𑀧𑀦𑀦𑁆𑀤𑀯𑀢𑁆𑀣𑀼𑀲𑁆𑀫𑀺𑀁 𑁋 𑀢𑀢𑁆𑀣 𑀢𑀬𑀸 𑀫𑁄𑀖𑀧𑀼𑀭𑀺𑀲 𑀕𑀳𑀺𑀢𑀁 𑀇𑀥 𑀫𑀼𑀢𑁆𑀢𑀁, 𑀇𑀥 𑀢𑀬𑀸 𑀕𑀳𑀺𑀢𑀁 𑀢𑀢𑁆𑀭 𑀫𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀬𑀫𑀢𑁆𑀣𑁄 𑁋 𑀬𑀁 𑀢𑀬𑀸 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀕𑀳𑀺𑀢𑀁, 𑀢𑀁 𑀢𑁂 𑀕𑀡𑁆𑀳𑀦𑁆𑀢𑁂𑀦𑁂𑀯 𑀇𑀥 𑀫𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀥 𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀫𑀼𑀜𑁆𑀘𑀸𑀫𑀻’’𑀢𑀺 𑀯𑀤𑀦𑁆𑀢𑁂𑀦 𑀧𑀦 𑀢𑀁 𑀢𑀢𑁆𑀭𑀸𑀧𑀺 𑀫𑀼𑀢𑁆𑀢𑀁. 𑀏𑀯𑀁 𑀢𑁆𑀯𑀁 𑀉𑀪𑀬𑀢𑁆𑀣 𑀧𑀭𑀺𑀩𑀸𑀳𑀺𑀭𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀕𑀳𑀡𑁂𑀦 𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀕𑀳𑀡𑁂𑀦 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀮𑀬𑁂𑀦 𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀮𑀬𑁂𑀦 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀭𑀸𑀧𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀕𑀳𑀡𑁂𑀦 𑀧𑀼𑀭𑀺𑀫𑀁 𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀧𑀭𑁄 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀫𑀢𑁆𑀢𑀁 𑀓𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀕𑀳𑀡𑁂𑀦 𑀧𑀼𑀭𑀺𑀫𑁄 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀏𑀓𑁄 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀆𑀮𑀬𑀁 𑀯𑀸 𑀓𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀥𑁂𑀯 𑀤𑀸𑀦𑀺 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀁 𑀓𑀭𑁄𑀢𑀺, 𑀇𑀘𑁆𑀘𑀲𑁆𑀲 𑀆𑀮𑀬𑁂𑀦 𑀯𑀸 𑀕𑀳𑀡𑀁 𑀆𑀮𑀬𑁂𑀦 𑀯𑀸 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑀩𑁆𑀩𑀢𑁆𑀣 𑀧𑀘𑁆𑀙𑀺𑀫𑁂 𑀕𑀳𑀡𑁂 𑀯𑀸 𑀆𑀮𑀬𑁂 𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 ‘‘𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑀺, 𑀢𑀲𑁆𑀲 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀬𑀤𑀺 𑀧𑀦 ‘‘𑀢𑀢𑁆𑀣 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀯𑀲𑀺𑀲𑁆𑀲𑀸𑀫𑀺; 𑀦𑁄 𑀘𑁂, 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀅𑀨𑀸𑀲𑀼𑀪𑀸𑀯𑀁 𑀜𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺.

𑁩𑁨𑁦. 𑀢𑀺𑀯𑀲𑁆𑀲𑀦𑁆𑀢𑀭𑁂𑀦𑀸𑀢𑀺 𑀏𑀢𑁆𑀣 𑀢𑀺𑀯𑀲𑁆𑀲𑀦𑁆𑀢𑀭𑁄 𑀦𑀸𑀫 𑀬𑁄 𑀤𑁆𑀯𑀻𑀳𑀺 𑀯𑀲𑁆𑀲𑁂𑀳𑀺 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸 𑀳𑁄𑀢𑀺. 𑀬𑁄 𑀧𑀦 𑀏𑀓𑁂𑀦 𑀯𑀲𑁆𑀲𑁂𑀦 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸 𑀳𑁄𑀢𑀺, 𑀬𑁄 𑀯𑀸 𑀲𑀫𑀸𑀦𑀯𑀲𑁆𑀲𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀇𑀫𑁂 𑀲𑀩𑁆𑀩𑁂 𑀏𑀓𑀲𑁆𑀫𑀺𑀁 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀤𑁆𑀯𑁂 𑀤𑁆𑀯𑁂 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀮𑀪𑀦𑁆𑀢𑀺. 𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀢𑀁 𑀲𑀁𑀳𑀸𑀭𑀺𑀫𑀁 𑀯𑀸 𑀳𑁄𑀢𑀼 𑀅𑀲𑀁𑀳𑀸𑀭𑀺𑀫𑀁 𑀯𑀸, 𑀢𑀣𑀸𑀭𑀽𑀧𑁂 𑀅𑀧𑀺 𑀨𑀮𑀓𑀔𑀡𑁆𑀟𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀧𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺.

𑀳𑀢𑁆𑀣𑀺𑀦𑀔𑀓𑀦𑁆𑀢𑀺 𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑀁; 𑀏𑀯𑀁 𑀓𑀢𑀲𑁆𑀲 𑀓𑀺𑀭𑁂𑀢𑀁 𑀦𑀸𑀫𑀁. 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕𑀦𑁆𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀺 𑀓𑀯𑀸𑀝𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀢𑀸𑀮𑀯𑀡𑁆𑀝𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀫𑀬𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀭𑀸𑀯𑀸𑀦𑀺 𑀬𑀁𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀁, 𑀲𑀩𑁆𑀩𑀁 𑀯𑀝𑁆𑀝𑀢𑀺. ‘‘𑀧𑀸𑀲𑀸𑀤𑀲𑁆𑀲 𑀤𑀸𑀲𑀺𑀤𑀸𑀲𑀁 𑀔𑁂𑀢𑁆𑀢𑀯𑀢𑁆𑀣𑀼𑀁 𑀕𑁄𑀫𑀳𑀺𑀁𑀲𑀁 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀲𑀸𑀤𑁂 𑀧𑀝𑀺𑀕𑁆𑀕𑀳𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀕𑁄𑀦𑀓𑀸𑀤𑀻𑀦𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸 𑀫𑀜𑁆𑀘𑀧𑀻𑀞𑀓𑁂𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀥𑀫𑁆𑀫𑀸𑀲𑀦𑁂 𑀧𑀦 𑀕𑀺𑀳𑀺𑀯𑀺𑀓𑀝𑀦𑀺𑀳𑀸𑀭𑁂𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸

𑁩𑁨𑁧. 𑀧𑀜𑁆𑀘𑀺𑀫𑀸𑀦𑀻𑀢𑀺 𑀭𑀸𑀲𑀺𑀯𑀲𑁂𑀦 𑀧𑀜𑁆𑀘, 𑀲𑀭𑀽𑀧𑀯𑀲𑁂𑀦 𑀧𑀦𑁂𑀢𑀸𑀦𑀺 𑀩𑀳𑀽𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀆𑀭𑀸𑀫𑀯𑀢𑁆𑀣𑀼 𑀦𑀸𑀫 𑀢𑁂𑀲𑀁𑀬𑁂𑀯 𑀆𑀭𑀸𑀫𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄𑀓𑀸𑀲𑁄; 𑀢𑁂𑀲𑀼 𑀯𑀸 𑀆𑀭𑀸𑀫𑁂𑀲𑀼 𑀯𑀺𑀦𑀝𑁆𑀞𑁂𑀲𑀼 𑀢𑁂𑀲𑀁 𑀧𑁄𑀭𑀸𑀡𑀓𑀪𑀽𑀫𑀺𑀪𑀸𑀕𑁄. 𑀯𑀺𑀳𑀸𑀭𑁄 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀧𑀸𑀲𑀸𑀤𑀸𑀤𑀺𑀲𑁂𑀦𑀸𑀲𑀦𑀁. 𑀯𑀺𑀳𑀸𑀭𑀯𑀢𑁆𑀣𑀼 𑀦𑀸𑀫 𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄. 𑀫𑀜𑁆𑀘𑁄 𑀦𑀸𑀫 𑁋 𑀫𑀲𑀸𑀭𑀓𑁄, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀇𑀫𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀜𑁆𑀘𑀸𑀦𑀁 𑀅𑀜𑁆𑀜𑀢𑀭𑁄. 𑀧𑀻𑀞𑀁 𑀦𑀸𑀫 𑀫𑀲𑀸𑀭𑀓𑀸𑀤𑀻𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀧𑀻𑀞𑀸𑀦𑀁 𑀅𑀜𑁆𑀜𑀢𑀭𑀁. 𑀪𑀺𑀲𑀺 𑀦𑀸𑀫 𑀉𑀡𑁆𑀡𑀪𑀺𑀲𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀸. 𑀩𑀺𑀫𑁆𑀩𑁄𑀳𑀦𑀁 𑀦𑀸𑀫 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀩𑀺𑀫𑁆𑀩𑁄𑀳𑀦𑀸𑀦𑀁 𑀅𑀜𑁆𑀜𑀢𑀭𑀁. 𑀮𑁄𑀳𑀓𑀼𑀫𑁆𑀪𑀻 𑀦𑀸𑀫 𑀓𑀸𑀴𑀮𑁄𑀳𑁂𑀦 𑀯𑀸 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀸 𑀓𑀼𑀫𑁆𑀪𑀻. 𑀮𑁄𑀳𑀪𑀸𑀡𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀪𑀸𑀡𑀓𑀦𑁆𑀢𑀺 𑀅𑀭𑀜𑁆𑀚𑀭𑁄 𑀯𑀼𑀘𑁆𑀘𑀢𑀺. 𑀯𑀸𑀭𑀓𑁄𑀢𑀺 𑀖𑀝𑁄. 𑀓𑀝𑀸𑀳𑀁 𑀓𑀝𑀸𑀳𑀫𑁂𑀯. 𑀯𑀸𑀲𑀺𑀆𑀤𑀻𑀲𑀼 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑁋

𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀘𑀢𑀼𑀲𑀗𑁆𑀕𑀳𑀁;

𑀘𑀢𑀼𑀢𑁆𑀣𑀁 𑀦𑀯𑀓𑁄𑀝𑁆𑀞𑀸𑀲𑀁, 𑀧𑀜𑁆𑀘𑀫𑀁 𑀅𑀝𑁆𑀞𑀪𑁂𑀤𑀦𑀁.

𑀇𑀢𑀺 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄;

𑀧𑀜𑁆𑀘𑀯𑀻𑀲𑀯𑀺𑀥𑀁 𑀦𑀸𑀣𑁄, 𑀕𑀭𑀼𑀪𑀡𑁆𑀟𑀁 𑀧𑀓𑀸𑀲𑀬𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀇𑀤𑀜𑁆𑀳𑀺 𑀲𑀩𑁆𑀩𑀫𑁆𑀧𑀺 𑀕𑀭𑀼𑀪𑀡𑁆𑀟𑀁 𑀇𑀥 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀓𑀻𑀝𑀸𑀕𑀺𑀭𑀺𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀯𑁂𑀪𑀗𑁆𑀕𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 𑀧𑀦 𑁋

‘‘𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀧𑀜𑁆𑀘 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸;

𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺,

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯) 𑁋

𑀆𑀕𑀢𑀁. 𑀢𑀲𑁆𑀫𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀜𑁆𑀘 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀇𑀤𑀁 𑀢𑀸𑀯 𑀧𑀜𑁆𑀘𑀯𑀺𑀥𑀫𑁆𑀧𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀪𑁂𑀲𑀚𑁆𑀚𑀢𑁆𑀣𑀸𑀬 𑀉𑀧𑀦𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀣𑀸𑀯𑀭𑁂𑀦 𑀘 𑀣𑀸𑀯𑀭𑀁 𑀕𑀭𑀼𑀪𑀡𑁆𑀟𑁂𑀦 𑀘 𑀕𑀭𑀼𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀣𑀸𑀯𑀭𑁂 𑀧𑀦 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀢𑀴𑀸𑀓𑀁 𑀫𑀸𑀢𑀺𑀓𑀸𑀢𑀺 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀸 𑀅𑀥𑀺𑀯𑀸𑀲𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑁂𑀯 𑀯𑀺𑀘𑀸𑀭𑀺𑀢𑀢𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀝𑁆𑀝𑀢𑀺. 𑀆𑀭𑀸𑀫𑁂𑀦 𑀧𑀦 𑀆𑀭𑀸𑀫𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀁 𑀯𑀺𑀳𑀸𑀭𑀯𑀢𑁆𑀣𑀼𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺.

𑀢𑀢𑁆𑀭𑀸𑀬𑀁 𑀧𑀭𑀺𑀯𑀢𑁆𑀢𑀦𑀦𑀬𑁄 𑁋 𑀲𑀗𑁆𑀖𑀲𑁆𑀲 𑀦𑀸𑀴𑀺𑀓𑁂𑀭𑀸𑀭𑀸𑀫𑁄 𑀤𑀽𑀭𑁂 𑀳𑁄𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑀸 𑀯𑀸 𑀩𑀳𑀼𑀢𑀭𑀁 𑀔𑀸𑀤𑀦𑁆𑀢𑀺. 𑀬𑀫𑁆𑀧𑀺 𑀦 𑀔𑀸𑀤𑀦𑁆𑀢𑀺, 𑀢𑀢𑁄 𑀲𑀓𑀝𑀯𑁂𑀢𑀦𑀁 𑀤𑀢𑁆𑀯𑀸 𑀅𑀧𑁆𑀧𑀫𑁂𑀯 𑀳𑀭𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀢𑀲𑁆𑀲 𑀆𑀭𑀸𑀫𑀲𑁆𑀲 𑀅𑀯𑀺𑀤𑀽𑀭𑀕𑀸𑀫𑀯𑀸𑀲𑀻𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀲𑁆𑀲 𑀲𑀫𑀻𑀧𑁂 𑀆𑀭𑀸𑀫𑁄 𑀳𑁄𑀢𑀺, 𑀢𑁂 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂𑀦 𑀆𑀭𑀸𑀫𑁂𑀦 𑀢𑀁 𑀆𑀭𑀸𑀫𑀁 𑀬𑀸𑀘𑀦𑁆𑀢𑀺, 𑀲𑀗𑁆𑀖𑁂𑀦 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂𑀧𑀺 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀲𑀳𑀲𑁆𑀲𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀘 𑀲𑀢𑀸𑀦𑀺, ‘‘𑀢𑀼𑀫𑁆𑀳𑀸𑀓𑀁 𑀆𑀭𑀸𑀫𑁄 𑀔𑀼𑀤𑁆𑀤𑀓𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀬𑀁 𑀔𑀼𑀤𑁆𑀤𑀓𑁄, 𑀅𑀣 𑀔𑁄 𑀇𑀢𑀭𑀢𑁄 𑀩𑀳𑀼𑀢𑀭𑀁 𑀆𑀬𑀁 𑀤𑁂𑀢𑀺. 𑀲𑀘𑁂𑀧𑀺 𑀲𑀫𑀓𑀫𑁂𑀯 𑀤𑁂𑀢𑀺; 𑀏𑀯𑀫𑁆𑀧𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀕𑀳𑁂𑀢𑀩𑁆𑀩𑀫𑁂𑀯. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀅𑀢𑀺𑀭𑁂𑀓𑀁 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀳𑁄𑀢𑀼, 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀦 𑀕𑀡𑁆𑀳𑀦𑁆𑀢𑀺, 𑀦 𑀘𑀺𑀭𑁂𑀦 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀯. 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀪𑀺𑀓𑁆𑀔𑀽𑀦𑀁 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺; 𑀏𑀯𑀁 𑀆𑀭𑀸𑀫𑁂𑀦 𑀆𑀭𑀸𑀫𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁄𑀧𑀺 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀆𑀭𑀸𑀫𑀯𑀢𑁆𑀣𑀼𑀦𑀸 𑀘 𑀫𑀳𑀦𑁆𑀢𑁂𑀦 𑀯𑀸 𑀔𑀼𑀤𑁆𑀤𑀓𑁂𑀦 𑀯𑀸 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀽𑀦𑀺.

𑀓𑀣𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄? 𑀲𑀗𑁆𑀖𑀲𑁆𑀲 𑀅𑀦𑁆𑀢𑁄𑀕𑀸𑀫𑁂 𑀕𑁂𑀳𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀫𑀚𑁆𑀛𑁂 𑀧𑀸𑀲𑀸𑀤𑁄, 𑀉𑀪𑁄𑀧𑀺 𑀅𑀕𑁆𑀖𑁂𑀦 𑀲𑀫𑀓𑀸, 𑀲𑀘𑁂 𑀫𑀦𑀼𑀲𑁆𑀲𑀸 𑀢𑁂𑀦 𑀧𑀸𑀲𑀸𑀤𑁂𑀦 𑀢𑀁 𑀕𑁂𑀳𑀁 𑀬𑀸𑀘𑀦𑁆𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀘𑁂 𑀫𑀳𑀕𑁆𑀖𑀢𑀭𑀁 𑀕𑁂𑀳𑀁 𑀳𑁄𑀢𑀺, ‘‘𑀫𑀳𑀕𑁆𑀖𑀢𑀭𑀁 𑀅𑀫𑁆𑀳𑀸𑀓𑀁 𑀕𑁂𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀜𑁆𑀘𑀸𑀧𑀺 𑀫𑀳𑀕𑁆𑀖𑀢𑀭𑀁, 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀸𑀭𑀼𑀧𑁆𑀧𑀁, 𑀦 𑀲𑀓𑁆𑀓𑀸 𑀢𑀢𑁆𑀣 𑀧𑀩𑁆𑀩𑀚𑀺𑀢𑁂𑀳𑀺 𑀯𑀲𑀺𑀢𑀼𑀁, 𑀇𑀤𑀁 𑀧𑀦 𑀲𑀸𑀭𑀼𑀧𑁆𑀧𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺; 𑀏𑀯𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀫𑀳𑀕𑁆𑀖𑀁 𑀳𑁄𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀕𑁂𑀳𑀁 𑀫𑀳𑀕𑁆𑀖’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁄𑀧𑀺 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀘 𑀫𑀳𑀕𑁆𑀖𑁂𑀦 𑀯𑀸 𑀅𑀧𑁆𑀧𑀕𑁆𑀖𑁂𑀦 𑀯𑀸 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀽𑀦𑀺. 𑀏𑀯𑀁 𑀢𑀸𑀯 𑀣𑀸𑀯𑀭𑁂𑀦 𑀣𑀸𑀯𑀭𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑁂 𑀧𑀦 𑀫𑀜𑁆𑀘𑀧𑀻𑀞𑀁 𑀫𑀳𑀦𑁆𑀢𑀁 𑀯𑀸 𑀳𑁄𑀢𑀼 𑀔𑀼𑀤𑁆𑀤𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 𑀯𑀸 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀲𑀘𑁂𑀧𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀜𑁆𑀘𑀲𑀢𑀁 𑀯𑀸 𑀫𑀜𑁆𑀘𑀲𑀳𑀲𑁆𑀲𑀁 𑀯𑀸 𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑀸, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀦 𑀤𑀸𑀢𑀩𑁆𑀩𑀸. 𑀅𑀢𑀺𑀭𑁂𑀓𑀫𑀜𑁆𑀘𑁂 𑀪𑀡𑁆𑀟𑀸𑀕𑀸𑀭𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀩𑀳𑀺𑀲𑀻𑀫𑀸𑀬 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀫𑀜𑁆𑀘𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀘𑁂 𑀩𑀳𑀽 𑀫𑀜𑁆𑀘𑀸 𑀳𑁄𑀦𑁆𑀢𑀺, 𑀫𑀜𑁆𑀘𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺; 𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀢𑁆𑀣 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑁄. 𑀫𑀳𑀕𑁆𑀖𑁂𑀦 𑀲𑀢𑀕𑁆𑀖𑀦𑀓𑁂𑀦 𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸 𑀫𑀜𑁆𑀘𑁂𑀦 𑀅𑀜𑁆𑀜𑀁 𑀫𑀜𑁆𑀘𑀲𑀢𑀁 𑀮𑀪𑀢𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀁 𑀫𑀜𑁆𑀘𑁂𑀦 𑀫𑀜𑁆𑀘𑁄𑀬𑁂𑀯, 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀏𑀲 𑀦𑀬𑁄 𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂𑀲𑀼𑀧𑀺. 𑀏𑀢𑁂𑀲𑀼 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀬𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀓𑀧𑁆𑀧𑀺𑀬𑀁 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀓𑀧𑁆𑀧𑀺𑀬𑀁 𑀯𑀸 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀼𑀢𑁆𑀢𑀯𑀢𑁆𑀣𑀽𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀅𑀕𑀭𑀼𑀪𑀡𑁆𑀟𑀼𑀧𑀕𑀁 𑀧𑀦 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀁 𑀦𑀸𑀫 𑀦𑀢𑁆𑀣𑀺.

𑀮𑁄𑀳𑀓𑀼𑀫𑁆𑀪𑀻 𑀮𑁄𑀳𑀪𑀸𑀡𑀓𑀁 𑀮𑁄𑀳𑀓𑀝𑀸𑀳𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀦𑁆𑀢𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀔𑀼𑀤𑁆𑀤𑀓𑀸𑀦𑀺 𑀯𑀸 𑀅𑀦𑁆𑀢𑀫𑀲𑁄 𑀧𑀲𑀢𑀫𑀢𑁆𑀢𑀉𑀤𑀓𑀕𑀡𑁆𑀳𑀦𑀓𑀸𑀦𑀺𑀧𑀺 𑀕𑀭𑀼𑀪𑀡𑁆𑀟𑀸𑀦𑀺𑀬𑁂𑀯. 𑀮𑁄𑀳𑀯𑀸𑀭𑀓𑁄 𑀧𑀦 𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀓𑀢𑁄 𑀲𑀻𑀳𑀴𑀤𑀻𑀧𑁂 𑀧𑀸𑀤𑀕𑀡𑁆𑀳𑀦𑀓𑁄 𑀪𑀸𑀚𑁂𑀢𑀩𑁆𑀩𑁄. 𑀧𑀸𑀤𑁄 𑀘 𑀦𑀸𑀫 𑀫𑀕𑀥𑀦𑀸𑀴𑀺𑀬𑀸 𑀧𑀜𑁆𑀘𑀦𑀸𑀴𑀺𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀢𑀢𑁄 𑀅𑀥𑀺𑀓𑀕𑀡𑁆𑀳𑀦𑀓𑁄 𑀕𑀭𑀼𑀪𑀡𑁆𑀟𑀁. 𑀇𑀫𑀸𑀦𑀺 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀮𑁄𑀳𑀪𑀸𑀚𑀦𑀸𑀦𑀺.

𑀧𑀸𑀴𑀺𑀬𑀁 𑀧𑀦 𑀅𑀦𑀸𑀕𑀢𑀸𑀦𑀺𑀧𑀺 𑀪𑀺𑀗𑁆𑀕𑀸𑀭𑀧𑀝𑀺𑀕𑁆𑀕𑀳𑀉𑀴𑀼𑀗𑁆𑀓𑀤𑀩𑁆𑀩𑀺𑀓𑀝𑀘𑁆𑀙𑀼𑀧𑀸𑀢𑀺𑀢𑀝𑁆𑀝𑀓𑀲𑀭𑀓𑀲𑀫𑀼𑀕𑁆𑀕𑀅𑀗𑁆𑀕𑀸𑀭𑀓𑀧𑀮𑁆𑀮𑀥𑀽𑀫𑀓𑀝𑀘𑁆𑀙𑀼𑀆𑀤𑀻𑀦𑀺 𑀔𑀼𑀤𑁆𑀤𑀓𑀸𑀦𑀺 𑀯𑀸 𑀫𑀳𑀦𑁆𑀢𑀸𑀦𑀺 𑀯𑀸 𑀲𑀩𑁆𑀩𑀸𑀦𑀺 𑀕𑀭𑀼𑀪𑀡𑁆𑀟𑀸𑀦𑀺. 𑀧𑀢𑁆𑀢𑁄, 𑀅𑀬𑀣𑀸𑀮𑀓𑀁, 𑀢𑀫𑁆𑀩𑀮𑁄𑀳𑀣𑀸𑀮𑀓𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀪𑀸𑀚𑀦𑀻𑀬𑀸𑀦𑀺. 𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀪𑀸𑀚𑀦𑀯𑀺𑀓𑀢𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸 𑀯𑀸 𑀯𑀝𑁆𑀝𑀢𑀺, 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀦 𑀯𑀝𑁆𑀝𑀢𑀺. 𑀓𑀁𑀲𑀮𑁄𑀳𑀸𑀤𑀺𑀪𑀸𑀚𑀦𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁆𑀧𑀺 𑀳𑀺 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀺. ‘‘𑀕𑀺𑀳𑀺𑀯𑀺𑀓𑀝𑀦𑀺𑀳𑀸𑀭𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀞𑀧𑁂𑀢𑁆𑀯𑀸 𑀧𑀦 𑀪𑀸𑀚𑀦𑀯𑀺𑀓𑀢𑀺𑀁 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀓𑀧𑁆𑀧𑀺𑀬𑀮𑁄𑀳𑀪𑀡𑁆𑀟𑁂 𑁋 𑀅𑀜𑁆𑀚𑀦𑀻, 𑀅𑀜𑁆𑀚𑀦𑀺𑀲𑀮𑀸𑀓𑀸, 𑀓𑀡𑁆𑀡𑀫𑀮𑀳𑀭𑀡𑀻, 𑀲𑀽𑀘𑀺, 𑀧𑀡𑁆𑀡𑀲𑀽𑀘𑀺, 𑀔𑀼𑀤𑁆𑀤𑀓𑁄, 𑀧𑀺𑀧𑁆𑀨𑀮𑀓𑁄, 𑀔𑀼𑀤𑁆𑀤𑀓𑀁, 𑀆𑀭𑀓𑀡𑁆𑀝𑀓𑀁, 𑀓𑀼𑀜𑁆𑀘𑀺𑀓𑀸, 𑀢𑀸𑀴𑀁, 𑀓𑀢𑁆𑀢𑀭𑀬𑀝𑁆𑀞𑀺 𑀯𑁂𑀥𑀓𑁄, 𑀦𑀢𑁆𑀣𑀼𑀤𑀸𑀦𑀁, 𑀪𑀺𑀦𑁆𑀤𑀺𑀯𑀸𑀮𑁄, 𑀮𑁄𑀳𑀓𑀽𑀝𑁄, 𑀮𑁄𑀳𑀓𑀼𑀝𑁆𑀝𑀺, 𑀮𑁄𑀳𑀕𑀼𑀴𑁄, 𑀮𑁄𑀳𑀧𑀺𑀡𑁆𑀟𑀺, 𑀮𑁄𑀳𑀘𑀓𑁆𑀓𑀮𑀺𑀓𑀁, 𑀅𑀜𑁆𑀜𑀫𑁆𑀧𑀺 𑀯𑀺𑀧𑁆𑀧𑀓𑀢𑀮𑁄𑀳𑀪𑀡𑁆𑀟𑀁 𑀪𑀸𑀚𑀦𑀻𑀬𑀁. 𑀥𑀽𑀫𑀦𑁂𑀢𑁆𑀢𑀨𑀸𑀮𑀤𑀻𑀧𑀭𑀼𑀓𑁆𑀔𑀤𑀻𑀧𑀓𑀧𑀮𑁆𑀮𑀓𑀑𑀮𑀫𑁆𑀩𑀓𑀤𑀻𑀧𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀭𑀽𑀧𑀓𑀸𑀦𑀺 𑀧𑀦 𑀅𑀜𑁆𑀜𑀸𑀦𑀺 𑀯𑀸 𑀪𑀺𑀢𑁆𑀢𑀺𑀘𑁆𑀙𑀤𑀦𑀓𑀯𑀸𑀝𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀸𑀦𑀺, 𑀅𑀦𑁆𑀢𑀫𑀲𑁄 𑀮𑁄𑀳𑀔𑀺𑀮𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸𑀦𑀺 𑀮𑁄𑀳𑀪𑀡𑁆𑀟𑀸𑀦𑀺 𑀕𑀭𑀼𑀪𑀡𑁆𑀟𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀅𑀢𑁆𑀢𑀦𑀸 𑀮𑀤𑁆𑀥𑀸𑀦𑀺𑀧𑀺 𑀧𑀭𑀺𑀳𑀭𑀺𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺, 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸 𑀯𑀝𑁆𑀝𑀦𑁆𑀢𑀺. 𑀢𑀺𑀧𑀼𑀪𑀡𑁆𑀟𑁂𑀧𑀺 𑀏𑀲𑁂𑀯 𑀦𑀬𑁄. 𑀔𑀻𑀭𑀧𑀸𑀲𑀸𑀡𑀫𑀬𑀸𑀦𑀺 𑀢𑀝𑁆𑀝𑀓𑀲𑀭𑀓𑀸𑀤𑀻𑀦𑀺 𑀕𑀭𑀼𑀪𑀡𑁆𑀟𑀸𑀦𑀺𑀬𑁂𑀯.

𑀖𑀝𑀓𑁄 𑀧𑀦 𑀢𑁂𑀮𑀪𑀸𑀚𑀦𑀁 𑀯𑀸 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀢𑀺𑀭𑁂𑀓𑀫𑁂𑀯 𑀕𑀭𑀼𑀪𑀡𑁆𑀟𑀁. 𑀲𑀼𑀯𑀡𑁆𑀡𑀭𑀚𑀢𑀳𑀸𑀭𑀓𑀽𑀝𑀚𑀸𑀢𑀺𑀨𑀮𑀺𑀓𑀪𑀸𑀚𑀦𑀸𑀦𑀺 𑀕𑀺𑀳𑀺𑀯𑀺𑀓𑀝𑀸𑀦𑀺𑀧𑀺 𑀦 𑀯𑀝𑁆𑀝𑀦𑁆𑀢𑀺, 𑀧𑀕𑁂𑀯 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀦 𑀆𑀫𑀸𑀲𑀫𑁆𑀧𑀺 𑀅𑀦𑀸𑀫𑀸𑀲𑀫𑁆𑀧𑀺 𑀲𑀩𑁆𑀩𑀁 𑀯𑀝𑁆𑀝𑀢𑀺.

𑀯𑀸𑀲𑀺𑀆𑀤𑀻𑀲𑀼 𑀬𑀸𑀬 𑀯𑀸𑀲𑀺𑀬𑀸 𑀞𑀧𑁂𑀢𑁆𑀯𑀸 𑀤𑀡𑁆𑀟𑀓𑀝𑁆𑀞𑀘𑁆𑀙𑁂𑀤𑀦𑀁 𑀯𑀸 𑀉𑀘𑁆𑀙𑀼𑀢𑀘𑁆𑀙𑀦𑀁 𑀯𑀸 𑀅𑀜𑁆𑀜𑀁 𑀫𑀳𑀸𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀅𑀬𑀁 𑀪𑀸𑀚𑀦𑀻𑀬𑀸. 𑀢𑀢𑁄 𑀫𑀳𑀢𑁆𑀢𑀭𑀻 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀓𑀢𑀸 𑀯𑀸𑀲𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀨𑀭𑀲𑀼 𑀧𑀦 𑀅𑀦𑁆𑀢𑀫𑀲𑁄 𑀯𑁂𑀚𑁆𑀚𑀸𑀦𑀁 𑀲𑀺𑀭𑀸𑀯𑁂𑀥𑀦𑀨𑀭𑀲𑀼𑀧𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀓𑀼𑀞𑀸𑀭𑀺𑀬𑀁 𑀨𑀭𑀲𑀼𑀲𑀤𑀺𑀲𑁄 𑀏𑀯 𑀯𑀺𑀦𑀺𑀘𑁆𑀙𑀬𑁄. 𑀬𑀸 𑀧𑀦 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸, 𑀅𑀬𑀁 𑀅𑀦𑀸𑀫𑀸𑀲𑀸. 𑀓𑀼𑀤𑀸𑀮𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀦𑀺𑀔𑀸𑀤𑀦𑀁 𑀘𑀢𑀼𑀭𑀲𑁆𑀲𑀫𑀼𑀔𑀁 𑀯𑀸 𑀳𑁄𑀢𑀼 𑀤𑁄𑀡𑀺𑀫𑀼𑀔𑀁 𑀯𑀸 𑀯𑀗𑁆𑀓𑀁 𑀯𑀸 𑀉𑀚𑀼𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀜𑁆𑀚𑀦𑀺𑀤𑀡𑁆𑀟𑀓𑀯𑁂𑀥𑀦𑀫𑁆𑀧𑀺 𑀤𑀡𑁆𑀟𑀩𑀤𑁆𑀥𑀁 𑀘𑁂, 𑀕𑀭𑀼𑀪𑀡𑁆𑀟𑀫𑁂𑀯. 𑀲𑀫𑁆𑀫𑀼𑀜𑁆𑀚𑀦𑀺𑀤𑀡𑁆𑀟𑀔𑀡𑀦𑀓𑀁 𑀧𑀦 𑀅𑀤𑀡𑁆𑀟𑀓𑀁 𑀨𑀮𑀫𑀢𑁆𑀢𑀫𑁂𑀯, 𑀬𑀁 𑀲𑀓𑁆𑀓𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁, 𑀢𑀁 𑀪𑀸𑀚𑀦𑀻𑀬𑀁. 𑀲𑀺𑀔𑀭𑀫𑁆𑀧𑀺 𑀦𑀺𑀔𑀸𑀤𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀬𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀯𑀺𑀳𑀸𑀭𑁂 𑀯𑀸𑀲𑀺𑀆𑀤𑀻𑀦𑀺 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀘 𑀖𑀭𑁂 𑀤𑀟𑁆𑀠𑁂 𑀯𑀸 𑀘𑁄𑀭𑁂𑀳𑀺 𑀯𑀸 𑀯𑀺𑀮𑀼𑀢𑁆𑀢𑁂 ‘‘𑀤𑁂𑀣 𑀦𑁄, 𑀪𑀦𑁆𑀢𑁂, 𑀉𑀧𑀓𑀭𑀡𑁂, 𑀧𑀼𑀦 𑀧𑀸𑀓𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀤𑀸𑀢𑀩𑁆𑀩𑀸. 𑀲𑀘𑁂 𑀆𑀳𑀭𑀦𑁆𑀢𑀺, 𑀦 𑀯𑀸𑀭𑁂𑀢𑀩𑁆𑀩𑀸; 𑀅𑀦𑀸𑀳𑀭𑀦𑁆𑀢𑀸𑀧𑀺 𑀦 𑀘𑁄𑀤𑁂𑀢𑀩𑁆𑀩𑀸.

𑀓𑀫𑁆𑀫𑀸𑀭𑀢𑀝𑁆𑀝𑀓𑀸𑀭𑀘𑀼𑀦𑁆𑀤𑀓𑀸𑀭𑀦𑀴𑀓𑀸𑀭𑀫𑀡𑀺𑀓𑀸𑀭𑀧𑀢𑁆𑀢𑀩𑀦𑁆𑀥𑀓𑀸𑀦𑀁 𑀅𑀥𑀺𑀓𑀭𑀡𑀺𑀫𑀼𑀝𑁆𑀞𑀺𑀓𑀲𑀡𑁆𑀟𑀸𑀲𑀢𑀼𑀮𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀮𑁄𑀳𑀫𑀬𑀉𑀧𑀓𑀭𑀡𑀸𑀦𑀺 𑀲𑀗𑁆𑀖𑁂 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀸𑀦𑀺. 𑀢𑀺𑀧𑀼𑀓𑁄𑀝𑁆𑀝𑀓𑀲𑀼𑀯𑀡𑁆𑀡𑀓𑀸𑀭𑀘𑀫𑁆𑀫𑀓𑀸𑀭𑀉𑀧𑀓𑀭𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀺𑀧𑀼𑀓𑁄𑀝𑁆𑀝𑀓𑀉𑀧𑀓𑀭𑀡𑁂𑀲𑀼𑀧𑀺 𑀢𑀺𑀧𑀼𑀘𑁆𑀙𑁂𑀤𑀦𑀲𑀢𑁆𑀣𑀓𑀁, 𑀲𑀼𑀯𑀡𑁆𑀡𑀓𑀸𑀭𑀉𑀧𑀓𑀭𑀡𑁂𑀲𑀼 𑀲𑀼𑀯𑀡𑁆𑀡𑀘𑁆𑀙𑁂𑀤𑀦𑀲𑀢𑁆𑀣𑀓𑀁, 𑀘𑀫𑁆𑀫𑀓𑀸𑀭𑀉𑀧𑀓𑀭𑀡𑁂𑀲𑀼 𑀓𑀢𑀧𑀭𑀺𑀓𑀫𑁆𑀫𑀘𑀫𑁆𑀫𑀙𑀺𑀤𑁆𑀤𑀦𑀓𑀁 𑀔𑀼𑀤𑁆𑀤𑀓𑀲𑀢𑁆𑀣𑀓𑀦𑁆𑀢𑀺 𑀇𑀫𑀸𑀦𑀺 𑀪𑀸𑀚𑀦𑀻𑀬𑀪𑀡𑁆𑀟𑀸𑀦𑀺. 𑀦𑀳𑀸𑀧𑀺𑀢𑀢𑀼𑀦𑁆𑀦𑀓𑀸𑀭𑀉𑀧𑀓𑀭𑀡𑁂𑀲𑀼𑀧𑀺 𑀞𑀧𑁂𑀢𑁆𑀯𑀸 𑀫𑀳𑀸𑀓𑀢𑁆𑀢𑀭𑀺𑀁 𑀫𑀳𑀸𑀲𑀡𑁆𑀟𑀸𑀲𑀁 𑀫𑀳𑀸𑀧𑀺𑀧𑁆𑀨𑀮𑀓𑀜𑁆𑀘 𑀲𑀩𑁆𑀩𑀁 𑀪𑀸𑀚𑀦𑀻𑀬𑀁. 𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺 𑀕𑀭𑀼𑀪𑀡𑁆𑀟𑀸𑀦𑀺.

𑀯𑀮𑁆𑀮𑀺𑀆𑀤𑀻𑀲𑀼 𑀯𑁂𑀢𑁆𑀢𑀯𑀮𑁆𑀮𑀺𑀆𑀤𑀺𑀓𑀸 𑀬𑀸 𑀓𑀸𑀘𑀺 𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀯𑀮𑁆𑀮𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀸 𑀯𑀸 𑀢𑀢𑁆𑀣𑀚𑀸𑀢𑀓𑀸 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀸 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀲𑀸 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀲𑀘𑁂 𑀅𑀢𑀺𑀭𑁂𑀓𑀸 𑀳𑁄𑀢𑀺, 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺; 𑀅𑀭𑀓𑁆𑀔𑀺𑀢𑀸 𑀧𑀦 𑀕𑀭𑀼𑀪𑀡𑁆𑀟𑀫𑁂𑀯 𑀦 𑀳𑁄𑀢𑀺. 𑀲𑀼𑀢𑁆𑀢𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀘𑀫𑁆𑀫𑀫𑀬𑀸 𑀭𑀚𑁆𑀚𑀼𑀓𑀸 𑀯𑀸 𑀬𑁄𑀢𑁆𑀢𑀸𑀦𑀺 𑀯𑀸 𑀯𑀸𑀓𑁂 𑀘 𑀦𑀸𑀴𑀺𑀓𑁂𑀭𑀳𑀻𑀭𑁂 𑀘 𑀯𑀝𑁆𑀝𑁂𑀢𑁆𑀯𑀸 𑀓𑀢𑀸 𑀏𑀓𑀯𑀝𑁆𑀝𑀸 𑀯𑀸 𑀤𑁆𑀯𑀺𑀯𑀝𑁆𑀝𑀸 𑀯𑀸 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁. 𑀲𑀼𑀢𑁆𑀢𑀁 𑀧𑀦 𑀅𑀯𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀁 𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀸 𑀘 𑀪𑀸𑀚𑀦𑀻𑀬𑀸. 𑀬𑁂𑀳𑀺 𑀧𑀦𑁂𑀢𑀸𑀦𑀺 𑀭𑀚𑁆𑀚𑀼𑀓𑀬𑁄𑀢𑁆𑀢𑀸𑀤𑀻𑀦𑀺 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀓𑀭𑀡𑀻𑀬𑁂𑀦 𑀳𑀭𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸.

𑀬𑁄 𑀓𑁄𑀘𑀺 𑀅𑀦𑁆𑀢𑀫𑀲𑁄 𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀧𑀺 𑀯𑁂𑀴𑀼 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀕𑀭𑀼𑀪𑀡𑁆𑀟𑀁, 𑀲𑁄𑀧𑀺 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑁄 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀤𑀕𑀡𑁆𑀳𑀦𑀓𑀢𑁂𑀮𑀦𑀸𑀴𑀺 𑀧𑀦 𑀓𑀢𑁆𑀢𑀭𑀬𑀝𑁆𑀞𑀺, 𑀉𑀧𑀸𑀳𑀦𑀤𑀡𑁆𑀟𑀓𑁄, 𑀙𑀢𑁆𑀢𑀤𑀡𑁆𑀟𑁄, 𑀙𑀢𑁆𑀢𑀲𑀮𑀸𑀓𑀸𑀢𑀺 𑀇𑀤𑀫𑁂𑀢𑁆𑀣 𑀪𑀸𑀚𑀦𑀻𑀬𑀪𑀡𑁆𑀟𑀁. 𑀤𑀟𑁆𑀠𑀕𑁂𑀳𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸. 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀯𑁂𑀴𑀼𑀁 𑀕𑀡𑁆𑀳𑀦𑁆𑀢𑁂𑀦 𑀲𑀫𑀓𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀣𑀸𑀯𑀭𑀁 𑀅𑀦𑁆𑀢𑀫𑀲𑁄 𑀢𑀁𑀅𑀕𑁆𑀖𑀦𑀓𑀫𑁆𑀧𑀺 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀨𑀸𑀢𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀦 𑀢𑀢𑁆𑀣𑁂𑀯 𑀯𑀴𑀜𑁆𑀚𑁂𑀢𑀩𑁆𑀩𑁄, 𑀕𑀫𑀦𑀓𑀸𑀮𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀕𑀳𑁂𑀢𑁆𑀯𑀸 𑀕𑀢𑁂𑀦 𑀧𑀳𑀺𑀡𑀺𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀤𑁂𑀲𑀦𑁆𑀢𑀭𑀁 𑀕𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑀩𑁆𑀩𑁄.

𑀢𑀺𑀡𑀦𑁆𑀢𑀺 𑀫𑀼𑀜𑁆𑀚𑀁 𑀧𑀩𑁆𑀩𑀚𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀬𑀁𑀓𑀺𑀜𑁆𑀘𑀺 𑀢𑀺𑀡𑀁. 𑀬𑀢𑁆𑀣 𑀧𑀦 𑀢𑀺𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀧𑀡𑁆𑀡𑁂𑀳𑀺 𑀙𑀸𑀤𑁂𑀦𑁆𑀢𑀺; 𑀢𑀲𑁆𑀫𑀸 𑀧𑀡𑁆𑀡𑀫𑁆𑀧𑀺 𑀢𑀺𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀇𑀢𑀺 𑀫𑀼𑀜𑁆𑀚𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀺 𑀢𑀺𑀡𑀁 𑀢𑀸𑀮𑀧𑀡𑁆𑀡𑀸𑀤𑀻𑀲𑀼 𑀘 𑀏𑀓𑀁 𑀧𑀡𑁆𑀡𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀢𑀢𑁆𑀣𑀚𑀸𑀢𑀓𑀁 𑀯𑀸 𑀩𑀳𑀸𑀭𑀸𑀫𑁂 𑀲𑀗𑁆𑀖𑀲𑁆𑀲 𑀢𑀺𑀡𑀯𑀢𑁆𑀣𑀼𑀢𑁄 𑀚𑀸𑀢𑀢𑀺𑀡𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀢𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀤𑀟𑁆𑀠𑀕𑁂𑀳𑀫𑀦𑀼𑀲𑁆𑀲𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀺 𑀭𑀺𑀢𑁆𑀢𑀧𑁄𑀢𑁆𑀣𑀓𑁄 𑀕𑀭𑀼𑀪𑀡𑁆𑀟𑀫𑁂𑀯.

𑀫𑀢𑁆𑀢𑀺𑀓𑀸 𑀧𑀓𑀢𑀺𑀫𑀢𑁆𑀢𑀺𑀓𑀸 𑀯𑀸 𑀳𑁄𑀢𑀼 𑀧𑀜𑁆𑀘𑀯𑀡𑁆𑀡𑀸 𑀯𑀸 𑀲𑀼𑀥𑀸 𑀯𑀸 𑀲𑀚𑁆𑀚𑀼𑀭𑀲𑀓𑀗𑁆𑀕𑀼𑀝𑁆𑀞𑀲𑀺𑀮𑁂𑀲𑀸𑀤𑀻𑀲𑀼 𑀯𑀸 𑀬𑀁𑀓𑀺𑀜𑁆𑀘𑀺, 𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀆𑀦𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀁 𑀢𑀢𑁆𑀣𑀚𑀸𑀢𑀓𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀢𑀸𑀮𑀨𑀮𑀧𑀓𑁆𑀓𑀫𑀢𑁆𑀢𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀢𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀦𑀺𑀝𑁆𑀞𑀺𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀳𑀺𑀗𑁆𑀕𑀼𑀳𑀺𑀗𑁆𑀕𑀼𑀮𑀓𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀜𑁆𑀚𑀦𑀸𑀦𑀺 𑀧𑀦 𑀪𑀸𑀚𑀦𑀻𑀬𑀪𑀡𑁆𑀟𑀸𑀦𑀺.

𑀤𑀸𑀭𑀼𑀪𑀡𑁆𑀟𑁂 𑀬𑁄 𑀓𑁄𑀘𑀺 𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀧𑀺 𑀤𑀸𑀭𑀼𑀪𑀡𑁆𑀟𑀓𑁄 𑀤𑀸𑀭𑀼𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑁄, 𑀅𑀬𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀤𑀸𑀭𑀼𑀯𑁂𑀴𑀼𑀘𑀫𑁆𑀫𑀧𑀸𑀲𑀸𑀡𑀸𑀤𑀺𑀯𑀺𑀓𑀢𑀺𑀁 𑀤𑀸𑀭𑀼𑀪𑀡𑁆𑀟𑁂𑀦 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀆𑀲𑀦𑁆𑀤𑀺𑀓𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀼𑀤𑁆𑀥𑀸𑀭𑁄, 𑀆𑀲𑀦𑁆𑀤𑀺𑀓𑁄, 𑀲𑀢𑁆𑀢𑀗𑁆𑀕𑁄, 𑀪𑀤𑁆𑀤𑀧𑀻𑀞𑀁, 𑀧𑀻𑀞𑀺𑀓𑀸, 𑀏𑀴𑀓𑀧𑀸𑀤𑀓𑀧𑀻𑀞𑀁, 𑀆𑀫𑀮𑀓𑀯𑀝𑁆𑀝𑀓𑀧𑀻𑀞𑀁, 𑀨𑀮𑀓𑀁, 𑀓𑁄𑀘𑁆𑀙𑀁, 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀇𑀫𑁂𑀲𑀼 𑀢𑀸𑀯 𑀬𑀁𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀁 𑀯𑀸 𑀳𑁄𑀢𑀼 𑀫𑀳𑀦𑁆𑀢𑀁 𑀯𑀸, 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀧𑀮𑀸𑀮𑀧𑀻𑀞𑁂𑀦 𑀘𑁂𑀢𑁆𑀣 𑀓𑀤𑀮𑀺𑀧𑀢𑁆𑀢𑀸𑀤𑀺𑀧𑀻𑀞𑀸𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀩𑁆𑀬𑀕𑁆𑀖𑀘𑀫𑁆𑀫𑀑𑀦𑀤𑁆𑀥𑀫𑁆𑀧𑀺 𑀯𑀸𑀴𑀭𑀽𑀧𑀧𑀭𑀺𑀓𑁆𑀔𑀺𑀢𑁆𑀢𑀁, 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁, 𑀓𑁄𑀘𑁆𑀙𑀓𑀁 𑀕𑀭𑀼𑀪𑀡𑁆𑀟𑀫𑁂𑀯.

𑀯𑀗𑁆𑀓𑀨𑀮𑀓𑀁, 𑀤𑀻𑀖𑀨𑀮𑀓𑀁, 𑀘𑀻𑀯𑀭𑀥𑁄𑀯𑀦𑀨𑀮𑀓𑀁, 𑀖𑀝𑁆𑀝𑀦𑀨𑀮𑀓𑀁, 𑀖𑀝𑁆𑀝𑀦𑀫𑀼𑀕𑁆𑀕𑀭𑁄, 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀕𑀡𑁆𑀞𑀺𑀓𑀸, 𑀤𑀡𑁆𑀟𑀫𑀼𑀕𑁆𑀕𑀭𑁄, 𑀅𑀫𑁆𑀩𑀡𑀁, 𑀭𑀚𑀦𑀤𑁄𑀡𑀺, 𑀉𑀤𑀓𑀧𑀝𑀺𑀘𑁆𑀙𑀓𑁄, 𑀤𑀸𑀭𑀼𑀫𑀬𑁄 𑀯𑀸 𑀤𑀦𑁆𑀢𑀫𑀬𑁄 𑀯𑀸 𑀯𑁂𑀴𑀼𑀫𑀬𑁄 𑀯𑀸 𑀲𑀧𑀸𑀤𑀓𑁄𑀧𑀺 𑀅𑀧𑀸𑀤𑀓𑁄𑀧𑀺 𑀲𑀫𑀼𑀕𑁆𑀕𑁄, 𑀫𑀜𑁆𑀚𑀽𑀲𑀸, 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄 𑀓𑀭𑀡𑁆𑀟𑁄, 𑀉𑀤𑀓𑀤𑁄𑀡𑀺, 𑀉𑀤𑀓𑀓𑀝𑀸𑀳𑀁, 𑀉𑀴𑀼𑀗𑁆𑀓𑁄, 𑀓𑀝𑀘𑁆𑀙𑀼, 𑀧𑀸𑀦𑀻𑀬𑀲𑀭𑀸𑀯𑀁, 𑀧𑀸𑀦𑀻𑀬𑀲𑀗𑁆𑀔𑁄𑀢𑀺 𑀏𑀢𑁂𑀲𑀼𑀧𑀺 𑀬𑀁𑀓𑀺𑀜𑁆𑀘𑀺 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁. 𑀲𑀗𑁆𑀔𑀣𑀸𑀮𑀓𑀁 𑀧𑀦 𑀪𑀸𑀚𑀦𑀻𑀬𑀁, 𑀢𑀣𑀸 𑀤𑀸𑀭𑀼𑀫𑀬𑁄 𑀉𑀤𑀓𑀢𑀼𑀫𑁆𑀩𑁄.

𑀧𑀸𑀤𑀓𑀣𑀮𑀺𑀓𑀫𑀡𑁆𑀟𑀮𑀁 𑀤𑀸𑀭𑀼𑀫𑀬𑀁 𑀯𑀸 𑀳𑁄𑀢𑀼 𑀘𑁄𑀴𑀧𑀡𑁆𑀡𑀸𑀤𑀺𑀫𑀬𑀁 𑀯𑀸 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀁. 𑀆𑀥𑀸𑀭𑀓𑁄 𑀧𑀢𑁆𑀢𑀧𑀺𑀥𑀸𑀦𑀁, 𑀢𑀸𑀮𑀯𑀡𑁆𑀝𑀁, 𑀩𑀻𑀚𑀦𑀻, 𑀘𑀗𑁆𑀓𑁄𑀝𑀓𑀁, 𑀧𑀘𑁆𑀙𑀺, 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀻 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀻𑀢𑀺 𑀏𑀢𑁂𑀲𑀼𑀧𑀺 𑀬𑀁𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀤𑀸𑀭𑀼𑀯𑁂𑀴𑀼𑀧𑀡𑁆𑀡𑀘𑀫𑁆𑀫𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀕𑀭𑀼𑀪𑀡𑁆𑀟𑀫𑁂𑀯.

𑀣𑀫𑁆𑀪𑀢𑀼𑀮𑀸𑀲𑁄𑀧𑀸𑀦𑀨𑀮𑀓𑀸𑀤𑀻𑀲𑀼 𑀤𑀸𑀭𑀼𑀫𑀬𑀁 𑀯𑀸 𑀧𑀸𑀲𑀸𑀡𑀫𑀬𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀕𑁂𑀳𑀲𑀫𑁆𑀪𑀸𑀭𑀭𑀽𑀧𑀁, 𑀬𑁄 𑀓𑁄𑀘𑀺 𑀓𑀝𑀲𑀸𑀭𑀓𑁄, 𑀬𑀁𑀓𑀺𑀜𑁆𑀘𑀺 𑀪𑀽𑀫𑀢𑁆𑀣𑀭𑀡𑀁, 𑀬𑀁𑀓𑀺𑀜𑁆𑀘𑀺 𑀅𑀓𑀧𑁆𑀧𑀺𑀬𑀘𑀫𑁆𑀫𑀁, 𑀲𑀩𑁆𑀩𑀁 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁, 𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀴𑀓𑀘𑀫𑁆𑀫𑀁 𑀧𑀦 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀁 𑀳𑁄𑀢𑀺, 𑀢𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀓𑀧𑁆𑀧𑀺𑀬𑀘𑀫𑁆𑀫𑀸𑀦𑀺 𑀪𑀸𑀚𑀦𑀻𑀬𑀸𑀦𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀲𑀩𑁆𑀩𑀁 𑀫𑀜𑁆𑀘𑀧𑁆𑀧𑀫𑀸𑀡𑀁 𑀘𑀫𑁆𑀫𑀁 𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁.

𑀉𑀤𑀼𑀓𑁆𑀔𑀮𑀁, 𑀫𑀼𑀲𑀮𑀁, 𑀲𑀼𑀧𑁆𑀧𑀁, 𑀦𑀺𑀲𑀤𑀁, 𑀦𑀺𑀲𑀤𑀧𑁄𑀢𑁄, 𑀧𑀸𑀲𑀸𑀡𑀤𑁄𑀡𑀺, 𑀧𑀸𑀲𑀸𑀡𑀓𑀝𑀸𑀳𑀁, 𑀢𑀼𑀭𑀺𑀯𑁂𑀫𑀪𑀲𑁆𑀢𑀸𑀤𑀺 𑀲𑀩𑁆𑀩𑀁 𑀧𑁂𑀲𑀓𑀸𑀭𑀸𑀤𑀺𑀪𑀡𑁆𑀟𑀁, 𑀲𑀩𑁆𑀩𑀁 𑀓𑀲𑀺𑀪𑀡𑁆𑀟𑀁, 𑀲𑀩𑁆𑀩𑀁 𑀘𑀓𑁆𑀓𑀬𑀼𑀢𑁆𑀢𑀓𑀬𑀸𑀦𑀁 𑀕𑀭𑀼𑀪𑀡𑁆𑀟𑀫𑁂𑀯. 𑀫𑀜𑁆𑀘𑀧𑀸𑀤𑁄, 𑀫𑀜𑁆𑀘𑀅𑀝𑀦𑀻, 𑀧𑀻𑀞𑀧𑀸𑀤𑁄, 𑀧𑀻𑀞𑀅𑀝𑀦𑀻, 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀁 𑀤𑀡𑁆𑀟𑀸𑀢𑀺 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀯𑀺𑀧𑁆𑀧𑀓𑀢𑀢𑀘𑁆𑀙𑀦𑀓𑀫𑁆𑀫𑀁 𑀅𑀦𑀺𑀝𑁆𑀞𑀺𑀢𑀫𑁂𑀯 𑀪𑀸𑀚𑀦𑀻𑀬𑀁, 𑀢𑀘𑁆𑀙𑀺𑀢𑀫𑀝𑁆𑀞𑀁 𑀧𑀦 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀬𑀸 𑀧𑀦 𑀤𑀡𑁆𑀟𑁄 𑀙𑀢𑁆𑀢𑀫𑀼𑀝𑁆𑀞𑀺𑀧𑀡𑁆𑀡𑀁 𑀓𑀢𑁆𑀢𑀭𑀬𑀝𑁆𑀞𑀺 𑀉𑀧𑀸𑀳𑀦𑀸 𑀅𑀭𑀡𑀺𑀲𑀳𑀺𑀢𑀁 𑀥𑀫𑁆𑀫𑀓𑀭𑀡𑁄 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀦𑀢𑀺𑀭𑀺𑀢𑁆𑀢𑀁 𑀆𑀫𑀮𑀓𑀢𑀼𑀫𑁆𑀩𑀁 𑀆𑀫𑀮𑀓𑀖𑀝𑁄 𑀮𑀸𑀩𑀼𑀓𑀢𑀼𑀫𑁆𑀩𑀁 𑀮𑀸𑀩𑀼𑀖𑀝𑁄 𑀯𑀺𑀲𑀸𑀡𑀓𑀢𑀼𑀫𑁆𑀩𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀪𑀸𑀚𑀦𑀻𑀬𑀁, 𑀢𑀢𑁄 𑀫𑀳𑀦𑁆𑀢𑀢𑀭𑀁 𑀕𑀭𑀼𑀪𑀡𑁆𑀟𑀁.

𑀳𑀢𑁆𑀣𑀺𑀤𑀦𑁆𑀢𑁄 𑀯𑀸 𑀬𑀁𑀓𑀺𑀜𑁆𑀘𑀺 𑀯𑀺𑀲𑀸𑀡𑀁 𑀯𑀸 𑀅𑀢𑀘𑁆𑀙𑀺𑀢𑀁 𑀬𑀣𑀸𑀚𑀸𑀢𑀫𑁂𑀯 𑀪𑀸𑀚𑀦𑀻𑀬𑀁, 𑀢𑁂𑀳𑀺 𑀓𑀢𑀫𑀜𑁆𑀘𑀧𑀸𑀤𑀸𑀤𑀻𑀲𑀼 𑀧𑀼𑀭𑀺𑀫𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀢𑀘𑁆𑀙𑀺𑀢𑀦𑀺𑀝𑁆𑀞𑀺𑀢𑁄𑀧𑀺 𑀳𑀺𑀗𑁆𑀕𑀼𑀓𑀭𑀡𑁆𑀟𑀓𑁄 𑀅𑀜𑁆𑀚𑀦𑀓𑀭𑀡𑁆𑀟𑀓𑁄 𑀕𑀡𑁆𑀞𑀺𑀓𑀸 𑀯𑀺𑀥𑁄 𑀅𑀜𑁆𑀚𑀦𑀻 𑀅𑀜𑁆𑀚𑀦𑀺𑀲𑀮𑀸𑀓𑀸 𑀉𑀤𑀓𑀧𑀼𑀜𑁆𑀙𑀦𑀻𑀢𑀺 𑀇𑀤𑀁 𑀲𑀩𑁆𑀩𑀁 𑀪𑀸𑀚𑀦𑀻𑀬𑀫𑁂𑀯.

𑀫𑀢𑁆𑀢𑀺𑀓𑀸𑀪𑀡𑁆𑀟𑁂 𑀲𑀩𑁆𑀩𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀖𑀝𑀧𑀺𑀞𑀭𑀸𑀤𑀺𑀓𑀼𑀮𑀸𑀮𑀪𑀸𑀚𑀦𑀁 𑀧𑀢𑁆𑀢𑀓𑀝𑀸𑀳𑀁 𑀅𑀗𑁆𑀕𑀸𑀭𑀓𑀝𑀸𑀳𑀁 𑀥𑀽𑀫𑀤𑀸𑀦𑀓𑀁 𑀤𑀻𑀧𑀭𑀼𑀓𑁆𑀔𑀓𑁄 𑀤𑀻𑀧𑀓𑀧𑀮𑁆𑀮𑀺𑀓𑀸 𑀘𑀬𑀦𑀺𑀝𑁆𑀞𑀓𑀸 𑀙𑀤𑀦𑀺𑀝𑁆𑀞𑀓𑀸 𑀣𑀽𑀧𑀺𑀓𑀸𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁, 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑁄 𑀧𑀦 𑀖𑀝𑀓𑁄 𑀧𑀢𑁆𑀢𑀁 𑀣𑀸𑀮𑀓𑀁 𑀓𑀜𑁆𑀘𑀦𑀓𑁄 𑀓𑀼𑀡𑁆𑀟𑀺𑀓𑀸𑀢𑀺 𑀇𑀤𑀫𑁂𑀢𑁆𑀣 𑀪𑀸𑀚𑀦𑀻𑀬𑀪𑀡𑁆𑀟𑀁. 𑀬𑀣𑀸 𑀘 𑀫𑀢𑁆𑀢𑀺𑀓𑀸𑀪𑀡𑁆𑀟𑁂; 𑀏𑀯𑀁 𑀮𑁄𑀳𑀪𑀡𑁆𑀟𑁂𑀧𑀺 𑀓𑀼𑀡𑁆𑀟𑀺𑀓𑀸 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀺𑀓𑀣𑀸.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸

𑁩𑁨𑁩. 𑀪𑀡𑁆𑀟𑀺𑀓𑀸𑀝𑁆𑀞𑀧𑀦𑀫𑀢𑁆𑀢𑁂𑀦𑀸𑀢𑀺 𑀤𑁆𑀯𑀸𑀭𑀩𑀸𑀳𑀸𑀦𑀁 𑀉𑀧𑀭𑀺 𑀓𑀧𑁄𑀢𑀪𑀡𑁆𑀟𑀺𑀓𑀬𑁄𑀚𑀦𑀫𑀢𑁆𑀢𑁂𑀦. 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦𑀸𑀢𑀺 𑀕𑁄𑀫𑀬𑀧𑀭𑀺𑀪𑀡𑁆𑀟𑀓𑀲𑀸𑀯𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦. 𑀥𑀽𑀫𑀓𑀸𑀮𑀺𑀓𑀦𑁆𑀢𑀺 𑀇𑀤𑀁 𑀬𑀸𑀯𑀲𑁆𑀲 𑀘𑀺𑀢𑀓𑀥𑀽𑀫𑁄 𑀦 𑀧𑀜𑁆𑀜𑀸𑀬𑀢𑀺, 𑀢𑀸𑀯 𑀅𑀬𑀁 𑀯𑀺𑀳𑀸𑀭𑁄 𑀏𑀢𑀲𑁆𑀲𑁂𑀯𑀸𑀢𑀺 𑀏𑀯𑀁 𑀥𑀽𑀫𑀓𑀸𑀮𑁂 𑀅𑀧𑀮𑁄𑀓𑁂𑀢𑁆𑀯𑀸 𑀓𑀢𑀧𑀭𑀺𑀬𑁄𑀲𑀺𑀢𑀁 𑀯𑀺𑀳𑀸𑀭𑀁 𑀤𑁂𑀦𑁆𑀢𑀺. 𑀯𑀺𑀧𑁆𑀧𑀓𑀢𑀦𑁆𑀢𑀺 𑀏𑀢𑁆𑀣 𑀯𑀺𑀧𑁆𑀧𑀓𑀢𑁄 𑀦𑀸𑀫 𑀬𑀸𑀯 𑀕𑁄𑀧𑀸𑀦𑀲𑀺𑀬𑁄 𑀦 𑀆𑀭𑁄𑀳𑀦𑁆𑀢𑀺. 𑀕𑁄𑀧𑀸𑀦𑀲𑀻𑀲𑀼 𑀧𑀦 𑀆𑀭𑀼𑀴𑁆𑀳𑀸𑀲𑀼 𑀩𑀳𑀼𑀓𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀦 𑀤𑀸𑀢𑀩𑁆𑀩𑁄, 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀲𑁆𑀲𑀢𑀺. 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀙𑀧𑁆𑀧𑀜𑁆𑀘𑀯𑀲𑁆𑀲𑀺𑀓𑀦𑁆𑀢𑀺 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀘𑀢𑀼𑀳𑀢𑁆𑀣𑀯𑀺𑀳𑀸𑀭𑁂 𑀘𑀢𑀼𑀯𑀲𑁆𑀲𑀺𑀓𑀁, 𑀧𑀜𑁆𑀘𑀳𑀢𑁆𑀣𑁂 𑀧𑀜𑁆𑀘𑀯𑀲𑁆𑀲𑀺𑀓𑀁, 𑀙𑀳𑀢𑁆𑀣𑁂 𑀙𑀯𑀲𑁆𑀲𑀺𑀓𑀁 𑀤𑀸𑀢𑀩𑁆𑀩𑀁. 𑀅𑀟𑁆𑀠𑀬𑁄𑀕𑁄 𑀧𑀦 𑀬𑀲𑁆𑀫𑀸 𑀲𑀢𑁆𑀢𑀝𑁆𑀞𑀳𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀢𑁆𑀣 ‘‘𑀲𑀢𑁆𑀢𑀝𑁆𑀞𑀯𑀲𑁆𑀲𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀲𑁄 𑀦𑀯𑀳𑀢𑁆𑀣𑁄 𑀳𑁄𑀢𑀺 𑀦𑀯𑀯𑀲𑁆𑀲𑀺𑀓𑀫𑁆𑀧𑀺 𑀤𑀸𑀢𑀩𑁆𑀩𑀁. 𑀫𑀳𑀮𑁆𑀮𑀓𑁂 𑀧𑀦 𑀤𑀲𑀳𑀢𑁆𑀣𑁂 𑀏𑀓𑀸𑀤𑀲𑀳𑀢𑁆𑀣𑁂 𑀯𑀺𑀳𑀸𑀭𑁂 𑀯𑀸 𑀧𑀸𑀲𑀸𑀤𑁂 𑀯𑀸 𑀤𑀲𑀯𑀲𑁆𑀲𑀺𑀓𑀁 𑀯𑀸 𑀏𑀓𑀸𑀤𑀲𑀯𑀲𑁆𑀲𑀺𑀓𑀁 𑀯𑀸 𑀤𑀸𑀢𑀩𑁆𑀩𑀁. 𑀤𑁆𑀯𑀸𑀤𑀲𑀳𑀢𑁆𑀣𑁂 𑀧𑀦 𑀢𑀢𑁄 𑀅𑀥𑀺𑀓𑁂 𑀯𑀸 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑁂𑀧𑀺 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀫𑁂𑀯 𑀤𑀸𑀢𑀩𑁆𑀩𑀁, 𑀦 𑀢𑀢𑁄 𑀉𑀢𑁆𑀢𑀭𑀺.

𑀦𑀯𑀓𑀫𑁆𑀫𑀺𑀓𑁄 𑀪𑀺𑀓𑁆𑀔𑀼 𑀅𑀦𑁆𑀢𑁄𑀯𑀲𑁆𑀲𑁂 𑀢𑀁 𑀆𑀯𑀸𑀲𑀁 𑀮𑀪𑀢𑀺, 𑀉𑀢𑀼𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀲𑁄 𑀆𑀯𑀸𑀲𑁄 𑀚𑀻𑀭𑀢𑀺, 𑀆𑀯𑀸𑀲𑀲𑀸𑀫𑀺𑀓𑀲𑁆𑀲 𑀯𑀸 𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀓𑀣𑁂𑀢𑀩𑁆𑀩𑀁 𑁋 ‘‘𑀆𑀯𑀸𑀲𑁄 𑀢𑁂 𑀦𑀲𑁆𑀲𑀢𑀺, 𑀚𑀕𑁆𑀕𑀣 𑀏𑀢𑀁 𑀆𑀯𑀸𑀲’’𑀦𑁆𑀢𑀺. 𑀲𑀘𑁂 𑀲𑁄 𑀦 𑀲𑀓𑁆𑀓𑁄𑀢𑀺, 𑀪𑀺𑀓𑁆𑀔𑀽𑀳𑀺 𑀜𑀸𑀢𑀻 𑀯𑀸 𑀉𑀧𑀝𑁆𑀞𑀸𑀓𑁂 𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀚𑀕𑁆𑀕𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀗𑁆𑀖𑀺𑀓𑁂𑀦 𑀧𑀘𑁆𑀘𑀬𑁂𑀦 𑀚𑀕𑁆𑀕𑀺𑀢𑀩𑁆𑀩𑁄. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀏𑀓𑀁 𑀆𑀯𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸 𑀚𑀕𑁆𑀕𑀺𑀢𑀩𑁆𑀩𑀸. 𑀩𑀳𑀽 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀁 𑀲𑀡𑁆𑀞𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑀤𑀼𑀩𑁆𑀪𑀺𑀓𑁆𑀔𑁂 𑀪𑀺𑀓𑁆𑀔𑀽𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀲𑀩𑁆𑀩𑁂 𑀆𑀯𑀸𑀲𑀸 𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀆𑀯𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀬𑀸𑀕𑀼𑀪𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀳𑀺 𑀲𑁂𑀲𑀸𑀯𑀸𑀲𑀸 𑀚𑀕𑁆𑀕𑀺𑀢𑀩𑁆𑀩𑀸𑀬𑁂𑀯. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀺𑀓𑁂 𑀧𑀘𑁆𑀘𑀬𑁂 𑀅𑀲𑀢𑀺 𑀏𑀓𑁄 𑀪𑀺𑀓𑁆𑀔𑀼 ‘𑀢𑀼𑀬𑁆𑀳𑀁 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀚𑀕𑁆𑀕𑀸𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀩𑀳𑀼𑀢𑀭𑀁 𑀇𑀘𑁆𑀙𑀢𑀺, 𑀢𑀺𑀪𑀸𑀕𑀁 𑀯𑀸 𑀉𑀧𑀟𑁆𑀠𑀪𑀸𑀕𑀁 𑀯𑀸 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑀁. 𑀅𑀣 ‘𑀣𑀫𑁆𑀪𑀫𑀢𑁆𑀢𑀫𑁂𑀯𑁂𑀢𑁆𑀣 𑀅𑀯𑀲𑀺𑀝𑁆𑀞𑀁, 𑀩𑀳𑀼𑀓𑀫𑁆𑀫𑀁 𑀓𑀸𑀢𑀩𑁆𑀩’𑀦𑁆𑀢𑀺 𑀦 𑀇𑀘𑁆𑀙𑀢𑀺, ‘𑀢𑀼𑀬𑁆𑀳𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀓𑀢𑁆𑀯𑀸 𑀚𑀕𑁆𑀕; 𑀏𑀯𑀫𑁆𑀧𑀺 𑀳𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀓𑀝𑁆𑀞𑀧𑀦𑀝𑁆𑀞𑀸𑀦𑀁 𑀦𑀯𑀓𑀸𑀦𑀜𑁆𑀘 𑀯𑀲𑀦𑀝𑁆𑀞𑀸𑀦𑀁 𑀮𑀪𑀺𑀲𑁆𑀲𑀢𑀻’𑀢𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀚𑀕𑁆𑀕𑀺𑀢𑁄 𑀧𑀦 𑀢𑀲𑁆𑀫𑀺𑀁 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀢𑁂 𑀲𑀗𑁆𑀖𑀺𑀓𑁄𑀬𑁂𑀯. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀢𑀺𑀪𑀸𑀕𑀁 𑀯𑀸 𑀉𑀧𑀟𑁆𑀠𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀓𑀢𑁆𑀯𑀸 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀁 𑀮𑀪𑀢𑀺. 𑀏𑀯𑀁 𑀚𑀕𑁆𑀕𑀦𑀓𑁂 𑀧𑀦 𑀅𑀲𑀢𑀺 ‘𑀏𑀓𑀁 𑀆𑀯𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀕𑁆𑀕𑀸𑀧𑁂𑀢𑀩𑁆𑀩𑁄’’𑀢𑀺.

𑀇𑀤𑀫𑁆𑀧𑀺 𑀘 𑀅𑀜𑁆𑀜𑀁 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 𑁋 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀁 𑀪𑀽𑀫𑀺𑀁 𑀕𑀳𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺. 𑀬𑁂𑀦 𑀲𑀸 𑀪𑀽𑀫𑀺 𑀧𑀞𑀫𑀁 𑀕𑀳𑀺𑀢𑀸, 𑀲𑁄 𑀲𑀸𑀫𑀻. 𑀉𑀪𑁄𑀧𑀺 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀦𑁆𑀢𑀺, 𑀲𑁄𑀬𑁂𑀯 𑀲𑀸𑀫𑀻. 𑀲𑁄 𑀲𑀗𑁆𑀖𑀺𑀓𑀁 𑀓𑀭𑁄𑀢𑀺, 𑀇𑀢𑀭𑁄 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀢𑀺, 𑀅𑀜𑁆𑀜𑀁 𑀘𑁂 𑀩𑀳𑀼𑀁 𑀲𑁂𑀦𑀸𑀲𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀦 𑀯𑀸𑀭𑁂𑀢𑀩𑁆𑀩𑁄. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀢𑀸𑀤𑀺𑀲𑁂 𑀧𑀝𑀺𑀭𑀽𑀧𑁂 𑀞𑀸𑀦𑁂 𑀅𑀲𑀢𑀺 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀗𑁆𑀖𑀺𑀓𑀁 𑀓𑀭𑁄𑀦𑁆𑀢𑁂𑀦𑁂𑀯 𑀓𑀸𑀢𑀩𑁆𑀩𑀁. 𑀬𑀁 𑀧𑀦 𑀢𑀲𑁆𑀲 𑀢𑀢𑁆𑀣 𑀯𑀬𑀓𑀫𑁆𑀫𑀁 𑀓𑀢𑀁, 𑀢𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑀢𑀸𑀯𑀸𑀲𑁂 𑀯𑀸 𑀆𑀯𑀸𑀲𑀓𑀭𑀡𑀝𑁆𑀞𑀸𑀦𑁂 𑀯𑀸 𑀙𑀸𑀬𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀳𑀸𑀭𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀺𑀓𑀸 𑀘𑁂 𑀳𑁄𑀦𑁆𑀢𑀺, 𑀲𑀸𑀫𑀺𑀓𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀸; 𑀦𑁄 𑀘𑁂 𑀤𑁂𑀦𑁆𑀢𑀺, 𑀬𑀸𑀯𑀢𑀢𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀼𑀓𑁆𑀔𑀅𑀕𑁆𑀖𑀦𑀓𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀳𑀸𑀭𑁂𑀢𑀩𑁆𑀩𑀸.

𑀬𑁄 𑀧𑀦 𑀲𑀗𑁆𑀖𑀺𑀓𑀯𑀮𑁆𑀮𑀺𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀆𑀳𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀁 𑀓𑀸𑀭𑁂𑀢𑀺, 𑀉𑀧𑀟𑁆𑀠𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺; 𑀉𑀧𑀟𑁆𑀠𑀁 𑀧𑀼𑀕𑁆𑀕𑀮𑀺𑀓𑀁. 𑀧𑀸𑀲𑀸𑀤𑁄 𑀘𑁂 𑀳𑁄𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑁄 𑀲𑀗𑁆𑀖𑀺𑀓𑁄; 𑀉𑀧𑀭𑀺 𑀧𑀼𑀕𑁆𑀕𑀮𑀺𑀓𑁄. 𑀲𑀘𑁂 𑀲𑁄 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀳𑁄𑀢𑀺. 𑀅𑀣 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀇𑀘𑁆𑀙𑀢𑀺, 𑀉𑀪𑀬𑀢𑁆𑀣 𑀉𑀧𑀟𑁆𑀠𑀁 𑀮𑀪𑀢𑀺. 𑀤𑁆𑀯𑁂 𑀲𑁂𑀦𑀸𑀲𑀦𑀸𑀦𑀺 𑀓𑀸𑀭𑁂𑀢𑀺 𑁋 𑀏𑀓𑀁 𑀲𑀗𑁆𑀖𑀺𑀓𑀁, 𑀏𑀓𑀁 𑀧𑀼𑀕𑁆𑀕𑀮𑀺𑀓𑀁. 𑀲𑀘𑁂 𑀯𑀺𑀳𑀸𑀭𑁂 𑀉𑀝𑁆𑀞𑀺𑀢𑁂𑀦 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀓𑀸𑀭𑁂𑀢𑀺, 𑀢𑀢𑀺𑀬𑀪𑀸𑀕𑀁 𑀮𑀪𑀢𑀺. 𑀲𑀘𑁂 𑀅𑀓𑀢𑀝𑁆𑀞𑀸𑀦𑁂 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸 𑀓𑀭𑁄𑀢𑀺, 𑀩𑀳𑀺𑀓𑀼𑀝𑁆𑀝𑁂 𑀉𑀧𑀟𑁆𑀠𑀁 𑀲𑀗𑁆𑀖𑀲𑁆𑀲, 𑀉𑀧𑀟𑁆𑀠𑀁 𑀢𑀲𑁆𑀲. 𑀅𑀣 𑀫𑀳𑀦𑁆𑀢𑀁 𑀯𑀺𑀲𑀫𑀁 𑀧𑀽𑀭𑁂𑀢𑁆𑀯𑀸 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀦𑀺𑀲𑁆𑀲𑀭𑁄 𑀢𑀢𑁆𑀣 𑀲𑀗𑁆𑀖𑁄.

𑀏𑀓𑀁 𑀯𑀭𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀦𑀯𑀓𑀫𑁆𑀫𑀤𑀸𑀦𑀝𑁆𑀞𑀸𑀦𑁂 𑀯𑀸 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂 𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀏𑀓𑀁 𑀯𑀭𑀲𑁂𑀬𑁆𑀬𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀬𑁄𑀲𑀺𑀢𑁂 𑀧𑀓𑁆𑀓𑀫𑀢𑀺 𑀢𑀲𑁆𑀲𑁂𑀯𑁂𑀢𑀦𑁆𑀢𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀅𑀦𑁆𑀢𑁄𑀯𑀲𑁆𑀲𑀁 𑀢𑀲𑁆𑀲𑁂𑀯 𑀢𑀁; 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀜𑁆𑀜𑀢𑁆𑀭𑀧𑀝𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸

𑁩𑁨𑁪. 𑀦𑀸𑀢𑀺𑀳𑀭𑀦𑁆𑀢𑀻𑀢𑀺 𑀅𑀜𑁆𑀜𑀢𑁆𑀭 𑀳𑀭𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀕𑀼𑀢𑁆𑀢𑀢𑁆𑀣𑀸𑀬𑀸𑀢𑀺 𑀬𑀁 𑀢𑀢𑁆𑀣 𑀫𑀜𑁆𑀘𑀧𑀻𑀞𑀸𑀤𑀺, 𑀢𑀲𑁆𑀲 𑀕𑀼𑀢𑁆𑀢𑀢𑁆𑀣𑀸𑀬, 𑀢𑀁 𑀅𑀜𑁆𑀜𑀢𑁆𑀭 𑀳𑀭𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀁 𑀅𑀜𑁆𑀜𑀢𑁆𑀭 𑀳𑀭𑀺𑀢𑁆𑀯𑀸 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀲𑀼𑀦𑀝𑁆𑀞𑀁, 𑀚𑀺𑀡𑁆𑀡𑀁 𑀲𑀼𑀚𑀺𑀡𑁆𑀡𑀁. 𑀲𑀘𑁂 𑀅𑀭𑁄𑀕𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀲𑀗𑁆𑀔𑀢𑁂 𑀧𑀼𑀦 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁. 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀦𑀝𑁆𑀞𑀁 𑀯𑀸 𑀚𑀺𑀡𑁆𑀡𑀁 𑀯𑀸 𑀕𑀻𑀯𑀸 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀲𑀗𑁆𑀔𑀢𑁂 𑀤𑀸𑀢𑀩𑁆𑀩𑀫𑁂𑀯. 𑀲𑀘𑁂 𑀢𑀢𑁄 𑀕𑁄𑀧𑀸𑀦𑀲𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀲𑀗𑁆𑀖𑀺𑀓𑀸𑀯𑀸𑀲𑁂 𑀬𑁄𑀚𑁂𑀦𑁆𑀢𑀺, 𑀲𑀼𑀬𑁄𑀚𑀺𑀢𑀸𑀦𑀺. 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑁂 𑀬𑁄𑀚𑁂𑀦𑁆𑀢𑁂𑀳𑀺 𑀧𑀦 𑀫𑀽𑀮𑀁 𑀯𑀸 𑀤𑀸𑀢𑀩𑁆𑀩𑀁, 𑀧𑀝𑀺𑀧𑀸𑀓𑀢𑀺𑀓𑀁 𑀯𑀸 𑀓𑀸𑀢𑀩𑁆𑀩𑀁 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀼𑀦 𑀆𑀯𑀸𑀲𑀺𑀓𑀓𑀸𑀮𑁂 𑀤𑀲𑁆𑀲𑀸𑀫𑀻𑀢𑀺 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀲𑀼𑀦𑀝𑁆𑀞𑀁, 𑀚𑀺𑀡𑁆𑀡𑀁 𑀲𑀼𑀚𑀺𑀡𑁆𑀡𑀁. 𑀅𑀭𑁄𑀕𑀜𑁆𑀘𑁂 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁. 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀕𑀻𑀯𑀸 𑀳𑁄𑀢𑀺. 𑀢𑀢𑁄 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀻𑀦𑀺 𑀲𑀗𑁆𑀖𑀺𑀓𑀸𑀯𑀸𑀲𑁂 𑀯𑀸 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑁂 𑀯𑀸 𑀬𑁄𑀚𑀺𑀢𑀸𑀦𑀺 𑀧𑀝𑀺𑀤𑀸𑀢𑀩𑁆𑀩𑀸𑀦𑀺𑀬𑁂𑀯.

𑀨𑀸𑀢𑀺𑀓𑀫𑁆𑀫𑀢𑁆𑀣𑀸𑀬𑀸𑀢𑀺 𑀯𑀟𑁆𑀠𑀺𑀓𑀫𑁆𑀫𑀢𑁆𑀣𑀸𑀬. 𑀨𑀸𑀢𑀺𑀓𑀫𑁆𑀫𑀜𑁆𑀘𑁂𑀢𑁆𑀣 𑀲𑀫𑀓𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑀫𑁂𑀯 𑀯𑀝𑁆𑀝𑀢𑀺.

𑀘𑀓𑁆𑀓𑀮𑀺𑀓𑀦𑁆𑀢𑀺 𑀓𑀫𑁆𑀩𑀮𑀸𑀤𑀻𑀳𑀺 𑀯𑁂𑀞𑁂𑀢𑁆𑀯𑀸 𑀓𑀢𑀘𑀓𑁆𑀓𑀮𑀺𑀓𑀁. 𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀻𑀢𑀺 𑀬𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀳𑀺 𑀧𑀸𑀤𑁂𑀳𑀺 𑀧𑀭𑀺𑀪𑀡𑁆𑀟𑀓𑀢𑀪𑀽𑀫𑀺 𑀯𑀸 𑀲𑁂𑀦𑀸𑀲𑀦𑀁 𑀯𑀸 𑀦 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀤𑀓𑀲𑀺𑀦𑁂𑀳𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀉𑀤𑀓𑀁, 𑀯𑀝𑁆𑀝𑀢𑀺. 𑀧𑀸𑀤𑀧𑀼𑀜𑁆𑀙𑀦𑀺𑀁 𑀧𑀦 𑀅𑀮𑁆𑀮𑀧𑀸𑀤𑁂𑀳𑀺𑀧𑀺 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀉𑀧𑀸𑀳𑀦𑁂𑀦 𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑁂𑀬𑁂𑀯 𑀦 𑀯𑀝𑁆𑀝𑀢𑀺.

𑀘𑁄𑀴𑀓𑁂𑀦 𑀧𑀮𑀺𑀯𑁂𑀞𑁂𑀢𑀼𑀦𑁆𑀢𑀺 𑀲𑀼𑀥𑀸𑀪𑀽𑀫𑀺𑀬𑀁 𑀯𑀸 𑀧𑀭𑀺𑀪𑀡𑁆𑀟𑀪𑀽𑀫𑀺𑀬𑀁 𑀯𑀸 𑀲𑀘𑁂 𑀢𑀝𑁆𑀝𑀺𑀓𑀸 𑀯𑀸 𑀓𑀝𑀲𑀸𑀭𑀓𑁄 𑀯𑀸 𑀦𑀢𑁆𑀣𑀺, 𑀘𑁄𑀴𑀓𑁂𑀦 𑀧𑀸𑀤𑀸 𑀯𑁂𑀞𑁂𑀢𑀩𑁆𑀩𑀸, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀡𑁆𑀡𑀫𑁆𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀺𑀜𑁆𑀘𑀺 𑀅𑀦𑀢𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲 𑀧𑀦 𑀤𑀼𑀓𑁆𑀓𑀝𑀁. 𑀬𑀤𑀺 𑀧𑀦 𑀢𑀢𑁆𑀣 𑀦𑁂𑀯𑀸𑀲𑀺𑀓𑀸 𑀅𑀦𑀢𑁆𑀣𑀢𑀸𑀬𑀧𑀺 𑀪𑀽𑀫𑀺𑀬𑀸 𑀞𑀧𑁂𑀦𑁆𑀢𑀺, 𑀅𑀥𑁄𑀢𑀧𑀸𑀤𑁂𑀳𑀺𑀧𑀺 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀣𑁂𑀯 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺.

𑀦 𑀪𑀺𑀓𑁆𑀔𑀯𑁂 𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀻𑀢𑀺 𑀲𑁂𑀢𑀪𑀺𑀢𑁆𑀢𑀺 𑀯𑀸 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀸. 𑀦 𑀓𑁂𑀯𑀮𑀜𑁆𑀘 𑀪𑀺𑀢𑁆𑀢𑀺𑀫𑁂𑀯, 𑀤𑁆𑀯𑀸𑀭𑀫𑁆𑀧𑀺 𑀯𑀸𑀢𑀧𑀸𑀦𑀫𑁆𑀧𑀺 𑀅𑀧𑀲𑁆𑀲𑁂𑀦𑀨𑀮𑀓𑀫𑁆𑀧𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑀫𑁆𑀧𑀺 𑀭𑀼𑀓𑁆𑀔𑀢𑁆𑀣𑀫𑁆𑀪𑀫𑁆𑀧𑀺 𑀘𑀻𑀯𑀭𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑀲𑁆𑀲𑀬𑀺𑀢𑀼𑀁 𑀦 𑀮𑀩𑁆𑀪𑀢𑀺𑀬𑁂𑀯.

𑀥𑁄𑀢𑀧𑀸𑀤𑀓𑀸𑀢𑀺 𑀥𑁄𑀢𑀧𑀸𑀤𑀓𑀸 𑀳𑀼𑀢𑁆𑀯𑀸 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀺𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺. ‘‘𑀥𑁄𑀢𑀧𑀸𑀤𑀓𑁂’’𑀢𑀺𑀧𑀺 𑀧𑀸𑀞𑁄. 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀢𑀺 𑀧𑀭𑀺𑀪𑀡𑁆𑀟𑀓𑀢𑀁 𑀪𑀽𑀫𑀺𑀁 𑀯𑀸 𑀪𑀽𑀫𑀢𑁆𑀣𑀭𑀡𑀲𑁂𑀦𑀸𑀲𑀦𑀁 𑀯𑀸 𑀲𑀗𑁆𑀖𑀺𑀓𑀫𑀜𑁆𑀘𑀧𑀻𑀞𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀘𑁆𑀘𑀢𑁆𑀣𑀭𑀡𑁂𑀦 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀦𑀺𑀤𑁆𑀤𑀸𑀬𑀢𑁄𑀧𑀺 𑀧𑀘𑁆𑀘𑀢𑁆𑀣𑀭𑀡𑁂 𑀲𑀗𑁆𑀓𑀼𑀝𑀺𑀢𑁂 𑀓𑁄𑀘𑀺 𑀲𑀭𑀻𑀭𑀸𑀯𑀬𑀯𑁄 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀨𑀼𑀲𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀮𑁄𑀫𑁂𑀲𑀼 𑀧𑀦 𑀮𑁄𑀫𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁂𑀯. 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀧𑀲𑁆𑀲𑀬𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀢𑀮𑀧𑀸𑀤𑀢𑀮𑁂𑀳𑀺 𑀧𑀦 𑀨𑀼𑀲𑀺𑀢𑀼𑀁 𑀯𑀸 𑀅𑀓𑁆𑀓𑀫𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺. 𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀦𑁆𑀢𑀲𑁆𑀲 𑀓𑀸𑀬𑁂 𑀧𑀝𑀺𑀳𑀜𑁆𑀜𑀢𑀺, 𑀅𑀦𑀸𑀧𑀢𑁆𑀢𑀺.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸

𑁩𑁨𑁫. 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀦𑁆𑀢𑀺 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀉𑀤𑁆𑀤𑁂𑀲𑀪𑀢𑁆𑀢𑀦𑁆𑀢𑀺𑀆𑀤𑀻𑀲𑀼 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸…𑀧𑁂… 𑀤𑀲 𑀯𑀸 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺 𑀏𑀯𑀁 𑀉𑀤𑁆𑀤𑁂𑀲𑁂𑀦 𑀮𑀤𑁆𑀥𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺. 𑀅𑀧𑀭𑁂 𑀢𑀣𑁂𑀯 𑀪𑀺𑀓𑁆𑀔𑀽 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀪𑀢𑁆𑀢𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺. 𑀅𑀧𑀭𑁂 𑀲𑀮𑀸𑀓𑀸𑀬𑁄 𑀙𑀺𑀦𑁆𑀤𑀺𑀢𑁆𑀯𑀸, 𑀅𑀧𑀭𑁂 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀦𑁆𑀢𑀺 𑀏𑀯𑀁 𑀦𑀺𑀬𑀸𑀫𑁂𑀢𑁆𑀯𑀸, 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸…𑀧𑁂… 𑀤𑀲𑀦𑁆𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺. 𑀇𑀢𑀺 𑀏𑀢𑀸𑀦𑀺 𑀪𑀢𑁆𑀢𑀸𑀦𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀦𑁆𑀢𑀺 𑀇𑀫𑀁 𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀺. 𑀬𑀲𑁆𑀫𑀸 𑀧𑀦 𑀢𑁂 𑀲𑀘𑁂𑀧𑀺 𑀤𑀼𑀩𑁆𑀪𑀺𑀓𑁆𑀔𑁂 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀼𑀪𑀺𑀓𑁆𑀔𑁂 𑀚𑀸𑀢𑁂 𑀧𑀦 𑀧𑀼𑀦 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀗𑁆𑀖𑀪𑀢𑁆𑀢𑁂 𑀞𑀺𑀢𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀫𑁆𑀳𑀸𑀓𑀁 𑀅𑀚𑁆𑀚 𑀤𑀲 𑀤𑁆𑀯𑀸𑀤𑀲 𑀤𑀺𑀯𑀲𑀸 𑀪𑀼𑀜𑁆𑀚𑀦𑁆𑀢𑀸𑀦𑀁 𑀇𑀤𑀸𑀦𑀺 𑀅𑀜𑁆𑀜𑀢𑁄 𑀪𑀺𑀓𑁆𑀔𑀽 𑀆𑀦𑁂𑀣𑀸’’𑀢𑀺 𑀦 𑀏𑀯𑀁 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁. ‘‘𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀅𑀫𑁆𑀳𑁂𑀳𑀺 𑀦 𑀮𑀤𑁆𑀥𑀁, 𑀇𑀤𑀸𑀦𑀺 𑀢𑀁 𑀅𑀫𑁆𑀳𑀸𑀓𑀁 𑀕𑀸𑀳𑁂𑀣𑀸’’𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀢𑀺. 𑀢𑀜𑁆𑀳𑀺 𑀆𑀕𑀢𑀸𑀕𑀢𑀸𑀦𑀁 𑀧𑀸𑀧𑀼𑀡𑀸𑀢𑀺𑀬𑁂𑀯.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸

𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀲𑀼 𑀧𑀦 𑀅𑀬𑀁 𑀦𑀬𑁄 𑁋 𑀭𑀜𑁆𑀜𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀦 𑀯𑀸 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀆𑀦𑁂𑀣𑀸’’𑀢𑀺 𑀧𑀳𑀺𑀢𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀞𑀺𑀢𑀺𑀓𑀸 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀲𑀘𑁂 𑀅𑀢𑁆𑀣𑀺, 𑀢𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁; 𑀦𑁄 𑀘𑁂, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀦 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁. 𑀢𑁂 𑀧𑀦 𑀥𑀼𑀢𑀗𑁆𑀕𑀁 𑀭𑀓𑁆𑀔𑀦𑁆𑀢𑀸 𑀲𑀬𑀫𑁂𑀯 𑀅𑀢𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺; 𑀏𑀯𑀁 𑀕𑀸𑀳𑀺𑀬𑀫𑀸𑀦𑁂 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀕𑀸𑀳𑀺𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀕𑀸𑀳𑁂𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. ‘‘𑀅𑀲𑀼𑀓𑀯𑀺𑀳𑀸𑀭𑁂 𑀩𑀳𑀼𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀕𑀸𑀳𑁂𑀢𑀩𑁆𑀩𑀫𑁂𑀯. 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀕𑀸𑀳𑁂𑀣𑀸𑀢𑀺 𑀯𑀤𑀦𑁆𑀢𑀺, 𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀸𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀕𑀸𑀳𑁂𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀧𑀼𑀦 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑁂𑀢𑀩𑁆𑀩𑀁.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑀁 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀸𑀬𑀧𑀺 𑀉𑀧𑀘𑀸𑀭𑀲𑀻𑀫𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑁄𑀘𑀺𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁, 𑀢𑀲𑁆𑀫𑀺𑀁𑀬𑁂𑀯 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑁂 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀺𑀡𑀸𑀢𑀺 ‘‘𑀲𑁆𑀯𑁂𑀧𑀺 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀲 𑀪𑀺𑀓𑁆𑀔𑀽 𑀧𑀳𑀺𑀡𑀣𑀸’’𑀢𑀺, 𑀢𑁂𑀦 𑀲𑁄 𑀅𑀢𑁆𑀣𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑁄. 𑀲𑀘𑁂 𑀢𑀁 𑀤𑀺𑀯𑀲𑀁 𑀧𑀫𑀼𑀲𑁆𑀲𑀢𑀺, 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄𑀯 𑀆𑀭𑁄𑀘𑁂𑀢𑀩𑁆𑀩𑁄. 𑀅𑀣 𑀧𑀫𑀼𑀲𑁆𑀲𑀺𑀢𑁆𑀯𑀸𑀯 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀲𑀭𑀢𑀺, 𑀬𑀸𑀯 𑀉𑀧𑀘𑀸𑀭𑀲𑀻𑀫𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀬𑀸 𑀪𑁄𑀚𑀦𑀲𑀸𑀮𑀸𑀬 𑀧𑀓𑀢𑀺𑀝𑁆𑀞𑀺𑀢𑀺𑀓𑀸, 𑀢𑀲𑁆𑀲𑀸𑀬𑁂𑀯 𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽 𑀘 𑀉𑀧𑀘𑀸𑀭𑀲𑀻𑀫𑀝𑁆𑀞𑀓𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀭𑀁 𑀅𑀯𑀺𑀚𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀧𑀓𑀢𑀺𑀝𑁆𑀞𑀺𑀢𑀺𑀓𑀸𑀬 𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀽𑀦𑀁 𑀧𑀦 𑀢𑀸𑀤𑀺𑀲𑁂 𑀏𑀓𑀸𑀩𑀤𑁆𑀥𑁂 𑀅𑀲𑀢𑀺 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀭𑀢𑀺, 𑀢𑀢𑁆𑀣 𑀦𑀯𑀁 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀅𑀦𑁆𑀢𑁄𑀕𑀸𑀫𑁂 𑀆𑀲𑀦𑀲𑀸𑀮𑀸𑀬 𑀲𑀭𑀦𑁆𑀢𑁂𑀦 𑀆𑀲𑀦𑀲𑀸𑀮𑀸𑀬 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀫𑁂𑀯, 𑀅𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀦 𑀳𑀺 𑀏𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀮𑀩𑁆𑀪𑀢𑀻𑀢𑀺.

𑀲𑀘𑁂 𑀲𑀓𑀯𑀺𑀳𑀸𑀭𑀢𑁄 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀓𑁄𑀘𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀉𑀤𑁆𑀤𑀺𑀲𑀸𑀧𑁂𑀢𑀺, 𑀬𑀸𑀯 𑀅𑀦𑁆𑀢𑁄𑀉𑀧𑀘𑀸𑀭𑁂 𑀯𑀸 𑀉𑀧𑀘𑀸𑀭𑀲𑀻𑀫𑀝𑁆𑀞𑀓𑁂𑀳𑀺 𑀲𑀤𑁆𑀥𑀺𑀁 𑀯𑀼𑀢𑁆𑀢𑀦𑀬𑁂𑀦 𑀏𑀓𑀸𑀩𑀤𑁆𑀥𑀸 𑀯𑀸 𑀳𑁄𑀦𑁆𑀢𑀺, 𑀢𑀸𑀯 𑀲𑀓𑀯𑀺𑀳𑀸𑀭𑁂 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀩𑀳𑀺𑀉𑀧𑀘𑀸𑀭𑁂 𑀞𑀺𑀢𑀸𑀦𑀁 𑀤𑀺𑀦𑁆𑀦𑀁 𑀧𑀦 ‘‘𑀲𑀗𑁆𑀖𑀢𑁄 𑀪𑀦𑁆𑀢𑁂 𑀏𑀢𑁆𑀢𑀓𑁂 𑀦𑀸𑀫 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀢𑁆𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀭𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀦𑀬𑁂𑀦 𑀤𑀽𑀭𑁂 𑀞𑀺𑀢𑀸𑀧𑀺 𑀲𑀫𑁆𑀧𑀢𑁆𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀬𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 𑀆𑀭𑁄𑀘𑁂𑀦𑁆𑀢𑀺, 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀞𑀺𑀢𑀺𑀓𑀸𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀕𑀸𑀫𑀤𑁆𑀯𑀸𑀭𑁂 𑀯𑀸 𑀯𑀻𑀣𑀺𑀬𑀁 𑀯𑀸 𑀘𑀢𑀼𑀓𑁆𑀓𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀓𑁄𑀘𑀺 𑀲𑀗𑁆𑀖𑀼𑀤𑁆𑀤𑁂𑀲𑀁 𑀆𑀭𑁄𑀘𑁂𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀁.

𑀖𑀭𑀽𑀧𑀘𑀸𑀭𑁄 𑀘𑁂𑀢𑁆𑀣 ‘‘𑀏𑀓𑀁 𑀖𑀭𑀁 𑀏𑀓𑀽𑀧𑀘𑀸𑀭𑀁, 𑀏𑀓𑀁 𑀖𑀭𑀁 𑀦𑀸𑀦𑀽𑀧𑀘𑀸𑀭𑀁, 𑀦𑀸𑀦𑀸𑀖𑀭𑀁 𑀏𑀓𑀽𑀧𑀘𑀸𑀭𑀁, 𑀦𑀸𑀦𑀸𑀖𑀭𑀁 𑀦𑀸𑀦𑀽𑀧𑀘𑀸𑀭’’𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀏𑀓𑀓𑀼𑀮𑀲𑁆𑀲 𑀖𑀭𑀁 𑀏𑀓𑀯𑀴𑀜𑁆𑀚𑀁 𑀳𑁄𑀢𑀺, 𑀢𑀁 𑀲𑀼𑀧𑁆𑀧𑀧𑀸𑀢𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑁄 𑀏𑀓𑀽𑀧𑀘𑀸𑀭𑀁 𑀦𑀸𑀫. 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀢𑀲𑁆𑀫𑀺𑀁 𑀉𑀧𑀘𑀸𑀭𑁂 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦𑀧𑀺 𑀞𑀺𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺, 𑀏𑀢𑀁 ‘‘𑀏𑀓𑀁 𑀖𑀭𑀁 𑀏𑀓𑀽𑀧𑀘𑀸𑀭𑀁’’ 𑀦𑀸𑀫.

𑀬𑀁 𑀧𑀦 𑀏𑀓𑀁 𑀖𑀭𑀁 𑀤𑁆𑀯𑀺𑀦𑁆𑀦𑀁 𑀪𑀭𑀺𑀬𑀸𑀦𑀁 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬 𑀫𑀚𑁆𑀛𑁂 𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀦𑀸𑀦𑀸𑀤𑁆𑀯𑀸𑀭𑀯𑀴𑀜𑁆𑀚𑀁 𑀓𑀢𑀁, 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀪𑀺𑀢𑁆𑀢𑀺𑀅𑀦𑁆𑀢𑀭𑀺𑀓𑀲𑁆𑀲 𑀦 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺, 𑀏𑀢𑀁 ‘‘𑀏𑀓𑀁 𑀖𑀭𑀁 𑀦𑀸𑀦𑀽𑀧𑀘𑀸𑀭𑀁’’ 𑀦𑀸𑀫.

𑀬𑀲𑁆𑀫𑀺𑀁 𑀧𑀦 𑀖𑀭𑁂 𑀩𑀳𑀽 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀢𑁄 𑀧𑀝𑁆𑀞𑀸𑀬 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑀖𑀭𑀸𑀦𑀺𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀦𑁆𑀢𑀺, 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑀫𑁆𑀧𑀺 𑀦𑀸𑀦𑀸𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀫𑀚𑁆𑀛𑁂 𑀪𑀺𑀢𑁆𑀢𑀺𑀁 𑀅𑀓𑀢𑁆𑀯𑀸 𑀏𑀓𑀤𑁆𑀯𑀸𑀭𑁂𑀦𑁂𑀯 𑀯𑀴𑀜𑁆𑀚𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑀁 ‘‘𑀦𑀸𑀦𑀸𑀖𑀭𑀁 𑀏𑀓𑀽𑀧𑀘𑀸𑀭𑀁’’ 𑀦𑀸𑀫.

𑀬𑁄 𑀧𑀦 𑀦𑀸𑀦𑀸𑀦𑀺𑀯𑁂𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑁂𑀲𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀜𑁆𑀘𑀸𑀧𑀺 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑁂𑀦 𑀪𑀺𑀓𑁆𑀔𑀽 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀦𑀺𑀲𑀺𑀦𑁆𑀦𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀏𑀢𑀁 ‘‘𑀦𑀸𑀦𑀸𑀖𑀭𑀁 𑀦𑀸𑀦𑀽𑀧𑀘𑀸𑀭𑀁’’ 𑀦𑀸𑀫.

𑀬𑁄 𑀧𑀦 𑀕𑀸𑀫𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀞𑀸𑀦𑁂 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀺 𑀅𑀢𑁆𑀢𑀦𑁄𑀯 𑀧𑀸𑀧𑀼𑀡𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀜𑁆𑀜𑀁 𑀮𑀪𑀢𑀺, 𑀢𑁂𑀦 𑀬𑀁 𑀅𑀜𑁆𑀜𑀁 𑀦𑀯𑀓𑀁 𑀯𑀸 𑀯𑀼𑀟𑁆𑀠𑀁 𑀯𑀸 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀓𑁄𑀘𑀺 𑀦𑀢𑁆𑀣𑀺, 𑀅𑀢𑁆𑀢𑀦𑁄𑀯 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀲𑀘𑁂 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣, 𑀉𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣, 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀢𑁆𑀢𑀁 𑀤𑁂𑀣, 𑀲𑀗𑁆𑀖𑀺𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀸 𑀯𑀤𑀢𑀺, 𑀉𑀤𑁆𑀤𑁂𑀲𑀧𑀢𑁆𑀢𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀲𑀗𑁆𑀖𑀼𑀤𑁆𑀤𑁂𑀲𑀪𑀺𑀓𑁆𑀔𑀼𑀁 𑀤𑁂𑀣, 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀁 𑀤𑁂𑀣, 𑀲𑀗𑁆𑀖𑀺𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀉𑀤𑁆𑀤𑁂𑀲𑀓𑁄 𑀧𑀦𑁂𑀢𑁆𑀣 𑀧𑁂𑀲𑀮𑁄 𑀮𑀚𑁆𑀚𑀻 𑀫𑁂𑀥𑀸𑀯𑀻 𑀇𑀘𑁆𑀙𑀺𑀢𑀩𑁆𑀩𑁄, 𑀢𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀞𑀺𑀢𑀺𑀓𑀁 𑀚𑀸𑀦𑀦𑁆𑀢𑁄 𑀦𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀳𑀁 𑀚𑀸𑀦𑀸𑀫𑀺, 𑀤𑀲𑀯𑀲𑁆𑀲𑁂𑀦 𑀮𑀤𑁆𑀥’’𑀦𑁆𑀢𑀺 𑀓𑁄𑀘𑀺 𑀪𑀡𑀢𑀺, ‘‘𑀅𑀢𑁆𑀣𑀸𑀯𑀼𑀲𑁄, 𑀤𑀲𑀯𑀲𑁆𑀲𑀸 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 𑀢𑀲𑁆𑀲 𑀲𑀼𑀢𑁆𑀯𑀸 ‘‘𑀤𑀲𑀯𑀲𑁆𑀲𑀫𑁆𑀳 𑀤𑀲𑀯𑀲𑁆𑀲𑀫𑁆𑀳𑀸’’𑀢𑀺 𑀩𑀳𑀽 𑀆𑀕𑀘𑁆𑀙𑀦𑁆𑀢𑀺, ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀲𑀩𑁆𑀩𑁂 𑀅𑀧𑁆𑀧𑀲𑀤𑁆𑀤𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑀩𑁆𑀩𑀸. 𑀞𑀧𑁂𑀢𑁆𑀯𑀸 ‘‘𑀓𑀢𑀺 𑀇𑀘𑁆𑀙𑀣𑀸’’𑀢𑀺 𑀉𑀧𑀸𑀲𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. ‘‘𑀏𑀢𑁆𑀢𑀓𑁂 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀦𑀯𑀓𑀲𑁆𑀲 𑀯𑀲𑁆𑀲𑀕𑁆𑀕𑀜𑁆𑀘 𑀉𑀢𑀼 𑀘 𑀤𑀺𑀯𑀲𑀪𑀸𑀕𑁄 𑀘 𑀙𑀸𑀬𑀸 𑀘 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀲𑀘𑁂 𑀙𑀸𑀬𑀸𑀬𑀧𑀺 𑀧𑀼𑀘𑁆𑀙𑀺𑀬𑀫𑀸𑀦𑀸𑀬 𑀅𑀜𑁆𑀜𑁄 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀅𑀣 𑀙𑀸𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀦 𑀮𑀪𑀢𑀺. 𑀓𑀣𑀸𑀧𑀧𑀜𑁆𑀘𑁂𑀦 𑀳𑀺 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀺 𑀕𑀸𑀳𑀺𑀢𑀁 𑀲𑀼𑀕𑁆𑀕𑀸𑀳𑀺𑀢𑀁, 𑀅𑀢𑀺𑀓𑁆𑀓𑀦𑁆𑀢𑀁 𑀲𑀼𑀅𑀢𑀺𑀓𑁆𑀓𑀦𑁆𑀢𑀁, 𑀪𑀸𑀚𑀦𑀻𑀬𑀪𑀡𑁆𑀟𑀜𑁆𑀳𑀺 𑀦𑀸𑀫𑁂𑀢𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀲𑀫𑁆𑀧𑀢𑁆𑀢𑀪𑀸𑀯𑁄 𑀉𑀧𑀘𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀆𑀲𑀦𑀲𑀸𑀮𑀸𑀬 𑀘 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁄 𑀉𑀧𑀘𑀸𑀭𑁄, 𑀢𑀲𑁆𑀫𑀺𑀁 𑀞𑀺𑀢𑀲𑁆𑀲 𑀮𑀸𑀪𑁄 𑀧𑀸𑀧𑀼𑀡𑀸𑀢𑀻𑀢𑀺.

𑀓𑁄𑀘𑀺 𑀆𑀲𑀦𑀲𑀸𑀮𑀢𑁄 𑀅𑀝𑁆𑀞 𑀉𑀤𑁆𑀤𑁂𑀲𑀧𑀢𑁆𑀢𑁂 𑀆𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀢 𑀧𑀢𑁆𑀢𑁂 𑀧𑀡𑀻𑀢𑀪𑁄𑀚𑀦𑀸𑀦𑀁 𑀏𑀓𑀁 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀲𑀦𑀲𑀸𑀮𑀸𑀬𑀁 𑀧𑀳𑀺𑀡𑀸𑀢𑀺, 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀬𑁂𑀦 𑀬𑀁 𑀮𑀤𑁆𑀥𑀁, 𑀢𑀲𑁆𑀲𑁂𑀯 𑀢𑀁 𑀳𑁄𑀢𑀺. 𑀬𑁂𑀦 𑀧𑀦 𑀉𑀤𑀓𑀁 𑀮𑀤𑁆𑀥𑀁, 𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁. 𑀢𑀜𑁆𑀘 𑀮𑀽𑀔𑀁 𑀯𑀸 𑀮𑀪𑀢𑀼 𑀧𑀡𑀻𑀢𑀁 𑀯𑀸 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀁 𑀯𑀸, 𑀢𑀲𑁆𑀲𑁂𑀯𑁂𑀢𑀁. 𑀈𑀤𑀺𑀲𑁄 𑀳𑀺𑀲𑁆𑀲 𑀧𑀼𑀜𑁆𑀜𑀯𑀺𑀲𑁂𑀲𑁄. 𑀉𑀤𑀓𑀁 𑀧𑀦 𑀬𑀲𑁆𑀫𑀸 𑀆𑀫𑀺𑀲𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀩𑁆𑀪𑀢𑀺.

𑀲𑀘𑁂 𑀧𑀦 𑀢𑁂 𑀕𑀳𑁂𑀢𑁆𑀯𑀸 𑀆𑀕𑀢𑀸 ‘‘𑀇𑀤𑀁 𑀓𑀺𑀭 𑀪𑀦𑁆𑀢𑁂 𑀲𑀩𑁆𑀩𑀁 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀉𑀤𑀓𑀁 𑀧𑀸𑀢𑀩𑁆𑀩𑀁. 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀅𑀝𑁆𑀞 𑀫𑀳𑀸𑀣𑁂𑀭𑁂 𑀤𑁂𑀣, 𑀫𑀚𑁆𑀛𑀺𑀫𑁂 𑀤𑁂𑀣, 𑀦𑀯𑀓𑁂 𑀤𑁂𑀣, 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀲𑀸𑀫𑀡𑁂𑀭𑁂 𑀤𑁂𑀣, 𑀫𑀚𑁆𑀛𑀺𑀫𑀪𑀸𑀡𑀓𑀸𑀤𑀬𑁄 𑀤𑁂𑀣, 𑀫𑀬𑁆𑀳𑀁 𑀜𑀸𑀢𑀺𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀲𑁆𑀲 𑀧𑀦 ‘‘𑀉𑀧𑀸𑀲𑀓, 𑀢𑁆𑀯𑀁 𑀏𑀯𑀁 𑀯𑀤𑀲𑀺, 𑀞𑀺𑀢𑀺𑀓𑀸𑀬 𑀧𑀦 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀤𑀸𑀢𑀩𑁆𑀩𑀸. 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂𑀲𑀼 𑀮𑀤𑁆𑀥𑁂𑀲𑀼 𑀲𑀘𑁂 𑀤𑀸𑀬𑀓𑀸𑀦𑀁 𑀖𑀭𑁂 𑀫𑀗𑁆𑀕𑀮𑀁 𑀳𑁄𑀢𑀺, ‘‘𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀧𑁂𑀲𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀬𑀲𑁆𑀫𑀺𑀁 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂 𑀧𑀞𑀫𑀪𑀸𑀕𑁄 𑀲𑀸𑀫𑀡𑁂𑀭𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀦𑀼𑀪𑀸𑀕𑁄 𑀫𑀳𑀸𑀣𑁂𑀭𑀸𑀦𑀁, 𑀦 𑀢𑀢𑁆𑀣 𑀲𑀸𑀫𑀡𑁂𑀭𑀸 ‘‘𑀫𑀬𑀁 𑀧𑀞𑀫𑀪𑀸𑀕𑀁 𑀮𑀪𑀺𑀫𑁆𑀳𑀸’’𑀢𑀺 𑀧𑀼𑀭𑀢𑁄 𑀕𑀦𑁆𑀢𑀼𑀁 𑀮𑀪𑀦𑁆𑀢𑀺, 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀏𑀯 𑀕𑀦𑁆𑀢𑀩𑁆𑀩𑀁. ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘𑀢𑀼𑀫𑁆𑀳𑁂 𑀏𑀣𑀸’𑀢𑀺 𑀯𑀼𑀢𑁆𑀢𑁂 ‘𑀫𑀬𑁆𑀳𑀁 𑀅𑀜𑁆𑀜𑀤𑀸𑀧𑀺 𑀚𑀸𑀦𑀺𑀲𑁆𑀲𑀲𑀺, 𑀞𑀺𑀢𑀺𑀓𑀸 𑀧𑀦 𑀏𑀯𑀁 𑀕𑀘𑁆𑀙𑀢𑀻’’’𑀢𑀺 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀅𑀣 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑀸𑀳𑀺𑀢𑁂𑀬𑁂𑀯 𑀧𑀢𑁆𑀢𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀳𑀭𑀢𑀺, 𑀆𑀳𑀝𑀫𑁆𑀧𑀺 𑀞𑀺𑀢𑀺𑀓𑀸𑀬 𑀏𑀯 𑀕𑀸𑀳𑁂𑀢𑀩𑁆𑀩𑀁.

𑀏𑀓𑁄 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀧𑁂𑀲𑀺𑀢𑁄 ‘‘𑀪𑀦𑁆𑀢𑁂, 𑀏𑀓𑀁 𑀧𑀢𑁆𑀢𑀁 𑀤𑁂𑀣, 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀲𑁄 𑀘𑁂 𑀉𑀤𑁆𑀤𑁂𑀲𑀪𑀢𑁆𑀢𑀖𑀭𑀢𑁄 𑀅𑀬𑀁 𑀆𑀕𑀢𑁄𑀢𑀺 𑀜𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 ‘‘𑀦𑀦𑀼 𑀢𑁆𑀯𑀁 𑀅𑀲𑀼𑀓𑀖𑀭𑀢𑁄 𑀆𑀕𑀢𑁄’’𑀢𑀺 𑀯𑀼𑀢𑁆𑀢𑁄 ‘‘𑀆𑀫, 𑀪𑀦𑁆𑀢𑁂, 𑀦 𑀦𑀺𑀫𑀦𑁆𑀢𑀦𑀪𑀢𑁆𑀢𑀁, 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺 𑀪𑀡𑀢𑀺, 𑀞𑀺𑀢𑀺𑀓𑀸𑀬 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 ‘‘𑀏𑀓𑀁 𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁄 ‘‘‘𑀓𑀺’𑀦𑁆𑀢𑀺 𑀯𑀢𑁆𑀯𑀸 𑀆𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀬𑀣𑀸 𑀢𑁂 𑀭𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑁄 𑀆𑀕𑀘𑁆𑀙𑀢𑀺, 𑀅𑀬𑀁 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀦𑀸𑀫. 𑀉𑀤𑁆𑀤𑁂𑀲𑀧𑀢𑁆𑀢𑀁 𑀯𑀸 𑀧𑀝𑀺𑀧𑀸𑀝𑀺𑀧𑀢𑁆𑀢𑀁 𑀯𑀸 𑀧𑀼𑀕𑁆𑀕𑀮𑀺𑀓𑀧𑀢𑁆𑀢𑀁 𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀓𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 ‘‘𑀉𑀤𑁆𑀤𑁂𑀲𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀧𑁂𑀲𑀺𑀢𑁄 𑀯𑀢𑁆𑀢𑀼𑀁 𑀦 𑀚𑀸𑀦𑀸𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄 𑀢𑀺𑀝𑁆𑀞𑀢𑀺, 𑀲𑁄 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀸 ‘‘𑀓𑀲𑁆𑀲 𑀧𑀢𑁆𑀢𑀁 𑀳𑀭𑀺𑀲𑁆𑀲𑀲𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀯𑀼𑀢𑁆𑀢𑁄 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄𑀫𑁆𑀳𑀻’’𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑁂𑀬𑁆𑀬, 𑀢𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀺𑀕𑀼𑀘𑁆𑀙𑀦𑁆𑀢𑀸 𑀦 𑀑𑀮𑁄𑀓𑁂𑀬𑁆𑀬𑀼𑀁. ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀲 ‘‘𑀉𑀤𑁆𑀤𑁂𑀲𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀕𑀸𑀳𑁂𑀢𑁆𑀯𑀸 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄.

𑀏𑀓𑀸 𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫 𑀳𑁄𑀢𑀺. 𑀭𑀜𑁆𑀜𑁄 𑀯𑀸 𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀕𑁂𑀳𑁂 𑀅𑀢𑀺𑀧𑀡𑀻𑀢𑀸𑀦𑀺 𑀅𑀝𑁆𑀞 𑀉𑀤𑁆𑀤𑁂𑀲𑀪𑀢𑁆𑀢𑀸𑀦𑀺 𑀦𑀺𑀘𑁆𑀘𑀁 𑀤𑀺𑀬𑁆𑀬𑀦𑁆𑀢𑀺, 𑀢𑀸𑀦𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘‘𑀲𑁆𑀯𑁂 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀞𑀺𑀢𑀺𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀢𑀸, 𑀢𑁂𑀲𑀼 𑀅𑀦𑀸𑀕𑀢𑁂𑀲𑀼𑀬𑁂𑀯 𑀅𑀜𑁆𑀜𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀦𑁆𑀢𑀺; 𑀢𑀗𑁆𑀔𑀡𑀜𑁆𑀜𑁂𑀯 𑀭𑀸𑀚𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 ‘‘𑀧𑀡𑀻𑀢𑀪𑀢𑁆𑀢𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀆𑀕𑀦𑁆𑀢𑀼𑀓𑀸 𑀞𑀺𑀢𑀺𑀓𑀁 𑀅𑀚𑀸𑀦𑀦𑁆𑀢𑀸 𑀕𑀸𑀳𑁂𑀦𑁆𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀘 𑀞𑀺𑀢𑀺𑀓𑀁 𑀚𑀸𑀦𑀦𑀓𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀕𑀸𑀳𑁂𑀣𑀸’’𑀢𑀺 𑀯𑀤𑀦𑁆𑀢𑀺. ‘‘𑀭𑀸𑀚𑀕𑁂𑀳𑁂 𑀧𑀡𑀻𑀢𑀪𑀢𑁆𑀢’’𑀦𑁆𑀢𑀺. ‘‘𑀓𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺? ‘‘𑀏𑀢𑁆𑀢𑀓𑀯𑀲𑁆𑀲𑀢𑁄 𑀦𑀸𑀫𑀸’’𑀢𑀺. ‘‘𑀫𑀸 𑀕𑀸𑀳𑁂𑀣𑀸’’𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀕𑀸𑀳𑀺𑀢𑁂 𑀆𑀕𑀢𑁂𑀳𑀺𑀧𑀺 𑀧𑀢𑁆𑀢𑀤𑀸𑀦𑀓𑀸𑀮𑁂 𑀆𑀕𑀢𑁂𑀳𑀺𑀧𑀺 𑀤𑀺𑀦𑁆𑀦𑀓𑀸𑀮𑁂 𑀆𑀕𑀢𑁂𑀳𑀺𑀧𑀺 𑀭𑀸𑀚𑀕𑁂𑀳𑀢𑁄 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀆𑀳𑀝𑀓𑀸𑀮𑁂 𑀆𑀕𑀢𑁂𑀳𑀺𑀧𑀺 𑀭𑀸𑀚𑀸 ‘‘𑀅𑀚𑁆𑀚 𑀪𑀺𑀓𑁆𑀔𑀽𑀬𑁂𑀯 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑀢𑁆𑀣𑁂 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺; 𑀏𑀯𑀁 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑀓𑀸𑀮𑁂 𑀆𑀕𑀢𑁂𑀳𑀺𑀧𑀺 𑀞𑀺𑀢𑀺𑀓𑀁 𑀚𑀸𑀦𑀦𑀓𑀪𑀺𑀓𑁆𑀔𑀽𑀳𑀺 ‘‘𑀫𑀸 𑀪𑀼𑀜𑁆𑀚𑀺𑀢𑁆𑀣𑀸’’𑀢𑀺 𑀯𑀸𑀭𑁂𑀢𑁆𑀯𑀸 𑀞𑀺𑀢𑀺𑀓𑀸𑀬𑀫𑁂𑀯 𑀕𑀸𑀳𑁂𑀢𑀩𑁆𑀩𑀁.

𑀅𑀣 𑀦𑁂 𑀭𑀸𑀚𑀸 𑀪𑁄𑀚𑁂𑀢𑁆𑀯𑀸 𑀧𑀢𑁆𑀢𑁂𑀧𑀺 𑀦𑁂𑀲𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀬𑀁 𑀆𑀳𑀝𑀁 𑀢𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀫𑀸 𑀢𑀼𑀘𑁆𑀙𑀳𑀢𑁆𑀣𑀸 𑀕𑀘𑁆𑀙𑀦𑁆𑀢𑀽’’𑀢𑀺 𑀣𑁄𑀓𑀫𑁂𑀯 𑀧𑀢𑁆𑀢𑁂𑀲𑀼 𑀧𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀅𑀣 𑀪𑀼𑀜𑁆𑀚𑀺𑀢𑁆𑀯𑀸 𑀢𑀼𑀘𑁆𑀙𑀧𑀢𑁆𑀢𑀸𑀯 𑀆𑀕𑀘𑁆𑀙𑀦𑁆𑀢𑀺, 𑀬𑀁 𑀢𑁂𑀳𑀺 𑀪𑀼𑀢𑁆𑀢𑀁, 𑀢𑀁 𑀦𑁂𑀲𑀁 𑀕𑀻𑀯𑀸 𑀳𑁄𑀢𑀻𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀕𑀻𑀯𑀸𑀓𑀺𑀘𑁆𑀘𑀁 𑀏𑀢𑁆𑀣 𑀦𑀢𑁆𑀣𑀺, 𑀞𑀺𑀢𑀺𑀓𑀁 𑀧𑀦 𑀅𑀚𑀸𑀦𑀦𑁆𑀢𑁂𑀳𑀺 𑀬𑀸𑀯 𑀚𑀸𑀦𑀦𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁 𑀲𑀺𑀬𑀸; 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀼𑀢𑁆𑀢𑀁 𑀲𑀼𑀪𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀢𑁆𑀢𑀝𑁆𑀞𑀸𑀦𑁂𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺.

𑀏𑀓𑁄 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑁄 𑀲𑀢𑀕𑁆𑀖𑀦𑀓𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁄, 𑀯𑀺𑀳𑀸𑀭𑁂 𑀘 ‘‘𑀏𑀯𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀲𑁆𑀲 𑀧𑀢𑁆𑀢𑁄’’𑀢𑀺 𑀮𑀺𑀔𑀺𑀢𑁆𑀯𑀸 𑀞𑀧𑁂𑀲𑀼𑀁. 𑀅𑀣 𑀲𑀝𑁆𑀞𑀺𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑁄 𑀢𑀣𑀸𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀓𑀺𑀁 𑀅𑀯𑀲𑁆𑀲𑀺𑀓𑀝𑁆𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑁄, 𑀉𑀤𑀸𑀳𑀼 𑀲𑀝𑁆𑀞𑀺𑀯𑀲𑁆𑀲𑀺𑀓𑀝𑁆𑀞𑀺𑀢𑀺𑀓𑀸𑀬𑀸𑀢𑀺. 𑀲𑀝𑁆𑀞𑀺𑀯𑀲𑁆𑀲𑀺𑀓𑀝𑁆𑀞𑀺𑀢𑀺𑀓𑀸𑀬𑀸𑀢𑀺 𑀯𑀼𑀢𑁆𑀢𑀁, 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼 𑀞𑀺𑀢𑀺𑀓𑀁 𑀕𑀳𑁂𑀢𑁆𑀯𑀸𑀬𑁂𑀯 𑀯𑀟𑁆𑀠𑀺𑀢𑁄𑀢𑀺.

𑀏𑀓𑁄 𑀉𑀤𑁆𑀤𑁂𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑁄 𑀚𑀸𑀢𑁄, 𑀧𑀼𑀦 𑀢𑀁 𑀪𑀢𑁆𑀢𑀁 𑀲𑀸𑀫𑀡𑁂𑀭𑀝𑁆𑀞𑀺𑀢𑀺𑀓𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀅𑀬𑀁 𑀓𑀺𑀭 𑀅𑀦𑁆𑀢𑀭𑀸𑀪𑀝𑁆𑀞𑀓𑁄 𑀦𑀸𑀫. 𑀬𑁄 𑀧𑀦 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀲𑀸𑀫𑀡𑁂𑀭𑁄 ‘‘𑀲𑁆𑀯𑁂 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀅𑀚𑁆𑀚𑁂𑀯 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀅𑀢𑀺𑀓𑁆𑀓𑀦𑁆𑀢𑀸 𑀢𑀲𑁆𑀲 𑀞𑀺𑀢𑀺𑀓𑀸. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀪𑀢𑁆𑀢𑀁 𑀧𑀢𑁆𑀢𑀁, 𑀧𑀢𑁆𑀢𑁄 𑀘𑀲𑁆𑀲 𑀦 𑀢𑀼𑀘𑁆𑀙𑁄 𑀳𑁄𑀢𑀺, 𑀲𑁄 𑀅𑀜𑁆𑀜𑀲𑁆𑀲 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀢𑁆𑀢𑀁 𑀤𑀸𑀧𑁂𑀢𑀺, 𑀢𑀜𑁆𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺, 𑀕𑀻𑀯𑀸 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀧𑀢𑁆𑀢𑀁 𑀤𑀫𑁆𑀫𑀻’’𑀢𑀺 𑀲𑀬𑀫𑁂𑀯 𑀤𑁂𑀢𑀺, 𑀅𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺. 𑀅𑀣𑀸𑀧𑀺 𑀢𑁂𑀦 𑀪𑀢𑁆𑀢𑁂𑀦 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 ‘‘𑀅𑀮𑀁 𑀫𑀬𑁆𑀳𑀁, 𑀢𑀯𑁂𑀢𑀁 𑀪𑀢𑁆𑀢𑀁 𑀤𑀫𑁆𑀫𑀺, 𑀧𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀆𑀳𑀭𑀸𑀧𑁂𑀳𑀻’’𑀢𑀺 𑀅𑀜𑁆𑀜𑀁 𑀯𑀤𑀢𑀺, 𑀬𑀁 𑀢𑀢𑁄 𑀆𑀳𑀭𑀻𑀬𑀢𑀺 𑀲𑀩𑁆𑀩𑀁 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀳𑁄𑀢𑀺. 𑀧𑀢𑁆𑀢𑀜𑁆𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺, 𑀲𑀼𑀳𑀝𑁄; 𑀪𑀢𑁆𑀢𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀕𑀻𑀯𑀸 𑀦 𑀳𑁄𑀢𑀺.

𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀢𑁂𑀲𑀼 𑀦𑀯 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀏𑀓𑁄 𑀲𑀸𑀤𑀺𑀬𑀦𑀓𑁄. ‘‘𑀤𑀲 𑀉𑀤𑁆𑀤𑁂𑀲𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀕𑀳𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀇𑀢𑀭𑁄 𑀪𑀺𑀓𑁆𑀔𑀼 ‘‘𑀲𑀩𑁆𑀩𑀸𑀦𑀺 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀦 𑀳𑁄𑀢𑀺. 𑀏𑀓𑁂𑀓𑀁 𑀘𑁂 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀕𑀸𑀳𑁂𑀢𑁆𑀯𑀸 𑀤𑀲𑀳𑀺𑀧𑀺 𑀧𑀢𑁆𑀢𑁂𑀳𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀦𑀯 𑀧𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀤𑁂𑀢𑀺, 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁 𑀦𑀸𑀫𑁂𑀢𑀁, 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺.

𑀲𑀘𑁂 𑀲𑁄 𑀉𑀧𑀸𑀲𑀓𑁄 ‘‘𑀪𑀦𑁆𑀢𑁂, 𑀖𑀭𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 ‘‘𑀏𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀳𑀸𑀬𑀸 𑀳𑁄𑀣𑀸’’𑀢𑀺 𑀢𑀲𑁆𑀲 𑀖𑀭𑀁 𑀕𑀘𑁆𑀙𑀢𑀺. 𑀬𑀁 𑀢𑀢𑁆𑀣 𑀮𑀪𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀳𑁄𑀢𑀺. 𑀇𑀢𑀭𑁂 𑀢𑁂𑀦 𑀤𑀺𑀦𑁆𑀦𑀁 𑀮𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀖𑀭𑁂𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑁂𑀦𑁆𑀢𑀺, ‘‘𑀪𑀦𑁆𑀢𑁂, 𑀬𑀁 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀁 𑀕𑀡𑁆𑀳𑀣𑀸’’𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦𑁂𑀯 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺. 𑀪𑀼𑀢𑁆𑀢𑀸𑀯𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀕𑀫𑀦𑀢𑁆𑀣𑀸𑀬 𑀤𑁂𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺, 𑀢𑁂𑀦 𑀤𑀺𑀦𑁆𑀦𑀁 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺.

𑀬𑀤𑀺 𑀧𑀦 𑀢𑁂 𑀯𑀺𑀳𑀸𑀭𑁂𑀬𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀫𑀦𑀼𑀲𑁆𑀲𑀸𑀦𑀜𑁆𑀘 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀬𑀁 𑀢𑀢𑁆𑀣 𑀪𑀼𑀜𑁆𑀚𑀦𑁆𑀢𑀺 𑀘𑁂𑀯 𑀦𑀻𑀳𑀭𑀦𑁆𑀢𑀺 𑀘, 𑀲𑀩𑁆𑀩𑀁 𑀢𑀁 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁. 𑀅𑀣𑀸𑀧𑀺 ‘‘𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀼𑀢𑁆𑀢𑀸 ‘‘𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀘𑁂 𑀏𑀓𑀲𑁆𑀲 𑀫𑀥𑀼𑀭𑁂𑀦 𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀣𑁂𑀭𑀸𑀦𑀜𑁆𑀘 𑀉𑀧𑀲𑀫𑁂 𑀧𑀲𑀻𑀤𑀺𑀢𑁆𑀯𑀸 𑀩𑀳𑀼𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀤𑁂𑀦𑁆𑀢𑀺, 𑀅𑀬𑀁 𑀣𑁂𑀭𑁂𑀲𑀼 𑀧𑀲𑀸𑀤𑁂𑀦 𑀉𑀧𑁆𑀧𑀦𑁆𑀦𑁄 ‘‘𑀅𑀓𑀢𑀪𑀸𑀕𑁄’’ 𑀦𑀸𑀫, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺.

𑀏𑀓𑁄 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑀺𑀢𑀁 𑀧𑀢𑁆𑀢𑀁 𑀳𑀭𑀺𑀢𑁆𑀯𑀸 𑀧𑀡𑀻𑀢𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀁, 𑀪𑀦𑁆𑀢𑁂, 𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀤𑁂𑀢𑀺, 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀧𑀦 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀅𑀣 ‘‘𑀧𑀞𑀫𑀁𑀬𑁂𑀯 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀏𑀓𑀲𑁆𑀲 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑁄 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. 𑀆𑀳𑀭𑀺𑀢𑁆𑀯𑀸 𑀘 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀯𑀼𑀢𑁆𑀢𑁂 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀏𑀓𑁄 𑀧𑀸𑀢𑀺𑀬𑀸 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀗𑁆𑀖𑀼𑀤𑁆𑀤𑁂𑀲𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀏𑀓𑁂𑀓𑀁 𑀆𑀮𑁄𑀧𑀁 𑀅𑀤𑀢𑁆𑀯𑀸 𑀞𑀺𑀢𑀺𑀓𑀸𑀬 𑀏𑀓𑀲𑁆𑀲 𑀬𑀸𑀧𑀦𑀫𑀢𑁆𑀢𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀅𑀣 𑀲𑁄 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀚𑀸𑀦𑀦𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄 𑀅𑀘𑁆𑀙𑀢𑀺, ‘‘𑀓𑀲𑁆𑀲 𑀢𑁂 𑀆𑀦𑀻𑀢𑀁, 𑀓𑀲𑁆𑀲 𑀤𑀸𑀢𑀼𑀓𑀸𑀫𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 ‘‘𑀢𑀼𑀫𑁆𑀳𑀸𑀓𑀁 𑀆𑀦𑀻𑀢𑀁, 𑀢𑀼𑀫𑁆𑀳𑀸𑀓𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀤𑁂𑀬𑁆𑀬, 𑀢𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀺𑀕𑀼𑀘𑁆𑀙𑀦𑁆𑀢𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬𑀼𑀁. 𑀲𑀘𑁂 𑀧𑀦 ‘‘𑀓𑀼𑀳𑀺𑀁 𑀬𑀸𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀉𑀤𑁆𑀤𑁂𑀲𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀢𑀺, 𑀏𑀓𑁂𑀦 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀆𑀪𑀢𑀁 𑀩𑀳𑀼 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀧𑀳𑁄𑀢𑀺, 𑀞𑀺𑀢𑀺𑀓𑀸𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀆𑀳𑀭𑀺𑀲𑁆𑀲𑀲𑀻’’𑀢𑀺 𑀅𑀯𑀢𑁆𑀯𑀸 𑀧𑀓𑀢𑀺𑀝𑁆𑀞𑀺𑀢𑀺𑀓𑀸𑀬 𑀏𑀯 𑀕𑀸𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀧𑀸𑀬𑀸𑀲𑁄 𑀯𑀸 𑀭𑀲𑀧𑀺𑀡𑁆𑀟𑀧𑀸𑀢𑁄 𑀯𑀸 𑀦𑀺𑀘𑁆𑀘𑀁 𑀮𑀩𑁆𑀪𑀢𑀺; 𑀏𑀯𑀭𑀽𑀧𑀸𑀦𑀁 𑀧𑀡𑀻𑀢𑀪𑁄𑀚𑀦𑀸𑀦𑀁 𑀆𑀯𑁂𑀡𑀺𑀓𑀸 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸, 𑀢𑀣𑀸 𑀲𑀧𑀭𑀺𑀯𑀸𑀭𑀸𑀬 𑀬𑀸𑀕𑀼𑀬𑀸 𑀫𑀳𑀕𑁆𑀖𑀸𑀦𑀁 𑀨𑀮𑀸𑀦𑀁 𑀧𑀡𑀻𑀢𑀸𑀦𑀜𑁆𑀘 𑀔𑀚𑁆𑀚𑀓𑀸𑀦𑀁. 𑀧𑀓𑀢𑀺𑀪𑀢𑁆𑀢𑀬𑀸𑀕𑀼𑀨𑀮𑀔𑀚𑁆𑀚𑀓𑀸𑀦𑀁 𑀧𑀦 𑀏𑀓𑀸𑀯 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸. ‘‘𑀲𑀧𑁆𑀧𑀺𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀲𑀧𑁆𑀧𑀻𑀦𑀁 𑀏𑀓𑀸𑀯 𑀞𑀺𑀢𑀺𑀓𑀸 𑀯𑀝𑁆𑀝𑀢𑀺, 𑀢𑀣𑀸 𑀲𑀩𑁆𑀩𑀢𑁂𑀮𑀸𑀦𑀁. ‘‘𑀫𑀥𑀼𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀫𑀥𑀼𑀦𑁄 𑀏𑀓𑀸𑀯 𑀞𑀺𑀢𑀺𑀓𑀸 𑀯𑀝𑁆𑀝𑀢𑀺, 𑀢𑀣𑀸 𑀨𑀸𑀡𑀺𑀢𑀲𑁆𑀲 𑀮𑀝𑁆𑀞𑀺𑀫𑀥𑀼𑀓𑀸𑀤𑀻𑀦𑀜𑁆𑀘 𑀪𑁂𑀲𑀚𑁆𑀚𑀸𑀦𑀁. 𑀲𑀘𑁂 𑀧𑀦 𑀕𑀦𑁆𑀥𑀫𑀸𑀮𑀁 𑀲𑀗𑁆𑀖𑀼𑀤𑁆𑀤𑁂𑀲𑀁 𑀤𑁂𑀦𑁆𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺. 𑀆𑀫𑀺𑀲𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺, 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀧𑀦 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸

𑀦𑀺𑀫𑀦𑁆𑀢𑀦𑀁 𑀧𑀼𑀕𑁆𑀕𑀮𑀺𑀓𑀜𑁆𑀘𑁂, 𑀲𑀬𑀫𑁂𑀯 𑀇𑀲𑁆𑀲𑀭𑁄. 𑀲𑀗𑁆𑀖𑀺𑀓𑀁 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦𑁂𑀢𑁆𑀣 𑀤𑀽𑀢𑁄 𑀩𑁆𑀬𑀢𑁆𑀢𑁄 𑀳𑁄𑀢𑀺, ‘‘𑀪𑀦𑁆𑀢𑁂, 𑀭𑀸𑀚𑀕𑁂𑀳𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀣 𑀤𑀽𑀢𑁄 𑀅𑀩𑁆𑀬𑀢𑁆𑀢𑁄 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀩𑁆𑀬𑀢𑁆𑀢𑁄 ‘‘𑀪𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀬𑀸𑀣𑀸’’𑀢𑀺 𑀯𑀤𑀢𑀺; 𑀏𑀯𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀼𑀫𑁆𑀳𑀸𑀓𑀁 𑀧𑀝𑀺𑀧𑀸𑀝𑀺𑀬𑀸 ‘‘𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀯𑀝𑁆𑀝𑀢𑀺. 𑀲𑀘𑁂 𑀦𑀺𑀫𑀦𑁆𑀢𑁂𑀢𑀼𑀁 𑀆𑀕𑀢𑀫𑀦𑀼𑀲𑁆𑀲𑁄 𑀆𑀲𑀦𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀸 ‘‘𑀅𑀝𑁆𑀞 𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀸 𑀯𑀤𑀢𑀺; 𑀏𑀯𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺, ‘‘𑀢𑀼𑀫𑁆𑀳𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣; 𑀪𑀢𑁆𑀢𑀁 𑀕𑀡𑁆𑀳𑀣, 𑀅𑀝𑁆𑀞 𑀧𑀢𑁆𑀢𑁂 𑀤𑁂𑀣; 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀧𑀝𑀺𑀧𑀸𑀝𑀺𑀬𑀸 𑀕𑀸𑀳𑁂𑀢𑀩𑁆𑀩𑀁. 𑀕𑀸𑀳𑁂𑀦𑁆𑀢𑁂𑀦 𑀧𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀪𑀢𑁆𑀢’’𑀦𑁆𑀢𑀺 𑀅𑀯𑀤𑀦𑁆𑀢𑁂𑀦 ‘‘𑀢𑀼𑀫𑁆𑀳𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀤𑁂𑀣, 𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀸𑀥𑀼, 𑀉𑀧𑀸𑀲𑀓𑀸’’𑀢𑀺 𑀕𑀦𑁆𑀢𑀩𑁆𑀩𑀁. 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀬𑀣𑀸𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁.

𑀦𑀺𑀫𑀦𑁆𑀢𑀦𑀪𑀢𑁆𑀢𑀖𑀭𑀢𑁄 𑀧𑀦 𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑀲𑁆𑀲 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀞𑀺𑀢𑀺𑀓𑀸𑀬 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. 𑀏𑀓𑁄 ‘‘𑀲𑀗𑁆𑀖𑀢𑁄 𑀧𑀝𑀺𑀧𑀸𑀝𑀺𑀬𑀸 𑀧𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀏𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑀸𑀳𑀺𑀢𑁂𑀬𑁂𑀯 𑀧𑀢𑁆𑀢𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀳𑀭𑀢𑀺, 𑀢𑀁 𑀧𑀢𑁆𑀢𑀲𑀸𑀫𑀺𑀓𑀲𑁆𑀲𑁂𑀯 𑀳𑁄𑀢𑀺, 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀺𑀬 𑀞𑀺𑀢𑀺𑀓𑀸𑀬 𑀦 𑀕𑀸𑀳𑁂𑀢𑀩𑁆𑀩𑀁. 𑀇𑀥𑀸𑀧𑀺 𑀬𑁄 𑀆𑀕𑀦𑁆𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀢𑀺𑀝𑁆𑀞𑀢𑀺, 𑀲𑁄 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀸 ‘‘𑀓𑀲𑁆𑀲 𑀧𑀢𑁆𑀢𑀁 𑀳𑀭𑀺𑀲𑁆𑀲𑀲𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄.

𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑁂𑀬𑁆𑀬, 𑀢𑀢𑁄 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀲𑁆𑀲. ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀧𑀦 𑀯𑀼𑀢𑁆𑀢𑁂 ‘‘𑀢𑀲𑁆𑀲 𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑁆𑀯𑀸 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. ‘‘𑀪𑀢𑁆𑀢𑀸𑀳𑀭𑀡𑀓𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀝𑀺𑀧𑀸𑀝𑀺𑀬𑀸 𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀏𑀯 𑀤𑀸𑀢𑀩𑁆𑀩𑁄. 𑀲𑀘𑁂 𑀆𑀳𑀭𑀺𑀢𑁆𑀯𑀸 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀪𑀼𑀜𑁆𑀚𑀢𑀽’’𑀢𑀺 𑀯𑀤𑀢𑀺, 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀧𑀸𑀝𑀺𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁.

𑀏𑀓𑁄 𑀧𑀸𑀢𑀺𑀬𑀸 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀆𑀮𑁄𑀧𑀪𑀢𑁆𑀢𑀝𑁆𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬 𑀆𑀮𑁄𑀧𑀲𑀗𑁆𑀔𑁂𑀧𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑁄 𑀅𑀘𑁆𑀙𑀢𑀺, ‘‘𑀓𑀲𑁆𑀲 𑀢𑁂 𑀆𑀪𑀢𑀁, 𑀓𑀲𑁆𑀲 𑀤𑀸𑀢𑀼𑀓𑀸𑀫𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀗𑁆𑀖𑀲𑁆𑀲 𑀫𑁂 𑀪𑀢𑁆𑀢𑀁 𑀆𑀪𑀢𑀁, 𑀣𑁂𑀭𑀸𑀦𑀁 𑀫𑁂 𑀪𑀢𑁆𑀢𑀁 𑀆𑀪𑀢’’𑀦𑁆𑀢𑀺 𑀯𑀤𑀢𑀺, 𑀕𑀳𑁂𑀢𑁆𑀯𑀸 𑀆𑀮𑁄𑀧𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀏𑀯𑀁 𑀆𑀪𑀢𑀁 𑀩𑀳𑀼𑀁 𑀳𑁄𑀢𑀺, 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀩𑀳𑀼 𑀳𑁄𑀢𑀺, 𑀅𑀪𑀺𑀳𑀝𑀪𑀺𑀓𑁆𑀔𑀸 𑀦𑀸𑀫 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀞𑀺𑀢𑀺𑀓𑀸𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀉𑀧𑀸𑀲𑀓𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑀲𑁆𑀲 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀯𑀸 𑀧𑀳𑀺𑀡𑀸𑀢𑀺 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀕𑀳𑀡𑀢𑁆𑀣𑀸𑀬 𑀅𑀝𑁆𑀞 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺, 𑀲𑀘𑁂𑀧𑀺 𑀜𑀸𑀢𑀺𑀉𑀧𑀝𑁆𑀞𑀸𑀓𑁂𑀳𑀺 𑀧𑁂𑀲𑀺𑀢𑀁 𑀳𑁄𑀢𑀺, 𑀇𑀫𑁂 𑀢𑀬𑁄 𑀚𑀦𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀦𑁆𑀢𑀺, 𑀆𑀭𑀼𑀴𑁆𑀳𑀸𑀬𑁂𑀯 𑀫𑀸𑀢𑀺𑀓𑀁, 𑀲𑀗𑁆𑀖𑀢𑁄 𑀅𑀝𑁆𑀞 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀯𑀫𑁂𑀳𑀺 𑀕𑀦𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀺 𑀏𑀢𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀕𑀦𑁆𑀣𑀥𑀼𑀢𑀗𑁆𑀕𑀸𑀤𑀻𑀳𑀺 𑀧𑀦 𑀅𑀦𑀪𑀺𑀜𑁆𑀜𑀸𑀢𑁄 𑀆𑀯𑀸𑀲𑀺𑀓𑀪𑀺𑀓𑁆𑀔𑀼 𑀧𑀼𑀘𑁆𑀙𑀺𑀢𑀼𑀁 𑀮𑀪𑀢𑀺, 𑀢𑀲𑁆𑀫𑀸 𑀢𑁂𑀦 ‘‘𑀓𑀺𑀁 𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀺, 𑀉𑀤𑀸𑀳𑀼 𑀬𑁂 𑀚𑀸𑀦𑀸𑀫𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. ‘‘𑀢𑀼𑀫𑁆𑀳𑀸𑀓𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸 𑀬𑁂 𑀯𑀸 𑀚𑀸𑀦𑀸𑀣, 𑀢𑁂 𑀕𑀳𑁂𑀢𑁆𑀯𑀸 𑀏𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑁂 𑀇𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀼𑀁 𑀮𑀪𑀢𑀺. 𑀲𑀘𑁂 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀧𑀳𑀺𑀡𑀣𑀸’’𑀢𑀺 𑀧𑁂𑀲𑁂𑀦𑁆𑀢𑀺, 𑀲𑀗𑁆𑀖𑀢𑁄𑀯 𑀧𑁂𑀲𑁂𑀢𑀩𑁆𑀩𑀸. 𑀅𑀢𑁆𑀢𑀦𑀸 𑀲𑀘𑁂 𑀅𑀜𑁆𑀜𑀲𑁆𑀫𑀺𑀁 𑀕𑀸𑀫𑁂 𑀲𑀓𑁆𑀓𑀸 𑀳𑁄𑀢𑀺 𑀪𑀺𑀓𑁆𑀔𑀸 𑀮𑀪𑀺𑀢𑀼𑀁, 𑀅𑀜𑁆𑀜𑁄 𑀕𑀸𑀫𑁄 𑀕𑀦𑁆𑀢𑀩𑁆𑀩𑁄. 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺 𑀮𑀪𑀺𑀢𑀼𑀁, 𑀲𑁄𑀬𑁂𑀯 𑀕𑀸𑀫𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀩𑁆𑀩𑁄.

𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀽 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀭 𑀘𑁂 𑀫𑀦𑀼𑀲𑁆𑀲𑀸 ‘‘𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀆𑀕𑀘𑁆𑀙𑀦𑁆𑀢𑀺, 𑀅𑀦𑀺𑀫𑀦𑁆𑀢𑀺𑀢𑁂𑀳𑀺 𑀦 𑀤𑀸𑀢𑀩𑁆𑀩𑀸. ‘‘𑀏𑀢𑁂 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀢𑀼𑀫𑁆𑀳𑁂𑀧𑀺 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀲𑁆𑀲𑀯𑀸𑀤𑀻𑀲𑀼 𑀫𑀦𑀼𑀲𑁆𑀲𑀸 𑀲𑀬𑀫𑁂𑀯 𑀧𑀭𑀺𑀯𑁂𑀡𑀸𑀦𑀺 𑀘 𑀧𑀥𑀸𑀦𑀖𑀭𑀸𑀦𑀺 𑀘 𑀕𑀦𑁆𑀢𑁆𑀯𑀸 𑀢𑀺𑀧𑀺𑀝𑀓𑁂 𑀘 𑀥𑀫𑁆𑀫𑀓𑀣𑀺𑀓𑁂 𑀘 𑀪𑀺𑀓𑁆𑀔𑀼𑀲𑀢𑁂𑀦𑀧𑀺 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑁂𑀦𑁆𑀢𑀺. 𑀢𑀤𑀸 𑀬𑁂𑀧𑀺 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀦 𑀳𑀺 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀸 𑀧𑀭𑀺𑀯𑁂𑀡𑀸𑀦𑀺 𑀘 𑀧𑀥𑀸𑀦𑀖𑀭𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄𑀯 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺.

𑀲𑀘𑁂 𑀧𑀦 𑀲𑀗𑁆𑀖𑀢𑁆𑀣𑁂𑀭𑁄 𑀯𑀸 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑀓𑁄 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀓𑀢𑁆𑀣𑀘𑀺 𑀯𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀓𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀘 𑀆𑀕𑀦𑁆𑀢𑀼𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀓𑀯𑀸𑀭𑀁 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀧𑀝𑀺𑀩𑀤𑁆𑀥𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀤𑀼𑀢𑀺𑀬𑀯𑀸𑀭𑁂 𑀆𑀭𑀤𑁆𑀥𑁂 𑀲𑀗𑁆𑀖𑀢𑁄𑀬𑁂𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀪𑀺𑀦𑀯𑀆𑀕𑀦𑁆𑀢𑀼𑀓𑀸𑀯 𑀳𑀼𑀢𑁆𑀯𑀸 𑀜𑀸𑀢𑀻 𑀯𑀸 𑀉𑀧𑀝𑁆𑀞𑀸𑀓𑁂 𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀢𑁂𑀲𑀁 𑀜𑀸𑀢𑀻 𑀘 𑀉𑀧𑀝𑁆𑀞𑀸𑀓𑀸 𑀘 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀣 𑀧𑀦 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀬𑁄 𑀧𑀦 𑀅𑀢𑀺𑀮𑀸𑀪𑀻 𑀳𑁄𑀢𑀺, 𑀲𑀓𑀝𑁆𑀞𑀸𑀦𑀜𑁆𑀘 𑀆𑀕𑀦𑁆𑀢𑀼𑀓𑀝𑁆𑀞𑀸𑀦𑀜𑁆𑀘 𑀏𑀓𑀲𑀤𑀺𑀲𑀁, 𑀲𑀩𑁆𑀩𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺, 𑀢𑁂𑀦 𑀲𑀗𑁆𑀖𑀢𑁄𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀦𑀺𑀫𑀦𑁆𑀢𑀦𑁂 𑀯𑀺𑀲𑁂𑀲𑁄. 𑀅𑀯𑀲𑁂𑀲𑁄 𑀲𑀩𑁆𑀩𑀧𑀜𑁆𑀳𑁄 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀅𑀝𑁆𑀞 𑀫𑀳𑀸𑀣𑁂𑀭𑁂 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀝𑁆𑀞 𑀫𑀳𑀸𑀣𑁂𑀭𑀸𑀯 𑀤𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀫𑀚𑁆𑀛𑀺𑀫𑀸𑀤𑀻𑀲𑀼. 𑀲𑀘𑁂 𑀧𑀦 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀤𑀢𑀺, 𑀲𑀗𑁆𑀖𑀢𑁄 𑀤𑀸𑀢𑀩𑁆𑀩𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀮𑀸𑀓𑀪𑀢𑁆𑀢𑀓𑀣𑀸

𑀲𑀮𑀸𑀓𑀪𑀢𑁆𑀢𑁂 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀮𑀸𑀓𑀸𑀬 𑀯𑀸 𑀧𑀝𑁆𑀝𑀺𑀓𑀸𑀬 𑀯𑀸 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀑𑀧𑀼𑀜𑁆𑀚𑀺𑀢𑁆𑀯𑀸 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀭𑀼𑀓𑁆𑀔𑀲𑀸𑀭𑀫𑀬𑀸𑀬 𑀲𑀮𑀸𑀓𑀸𑀬 𑀯𑀸 𑀯𑁂𑀴𑀼𑀯𑀺𑀮𑀻𑀯𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀸𑀬 𑀧𑀝𑁆𑀝𑀺𑀓𑀸𑀬 𑀯𑀸 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀲𑀮𑀸𑀓𑀪𑀢𑁆𑀢’’𑀦𑁆𑀢𑀺 𑀏𑀯𑀁 𑀅𑀓𑁆𑀔𑀭𑀸𑀦𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀺𑀬𑀁 𑀯𑀸 𑀘𑀻𑀯𑀭𑀪𑁄𑀕𑁂 𑀯𑀸 𑀓𑀢𑁆𑀯𑀸 𑀲𑀩𑁆𑀩𑀸 𑀲𑀮𑀸𑀓𑀸𑀬𑁄 𑀑𑀧𑀼𑀜𑁆𑀚𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀳𑁂𑀝𑁆𑀞𑀼𑀧𑀭𑀺𑀯𑀲𑁂𑀦𑁂𑀯 𑀆𑀮𑁄𑀴𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀲𑀘𑁂 𑀞𑀺𑀢𑀺𑀓𑀸 𑀅𑀢𑁆𑀣𑀺, 𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬; 𑀦𑁄 𑀘𑁂 𑀅𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀲𑀮𑀸𑀓𑀸 𑀤𑀸𑀢𑀩𑁆𑀩𑀸. 𑀧𑀘𑁆𑀙𑀸 𑀆𑀕𑀢𑀸𑀦𑀫𑁆𑀧𑀺 𑀏𑀓𑀸𑀩𑀤𑁆𑀥𑀯𑀲𑁂𑀦 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀸𑀢𑀩𑁆𑀩𑀸.

𑀲𑀘𑁂 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀩𑀳𑀽 𑀕𑁄𑀘𑀭𑀕𑀸𑀫𑀸, 𑀪𑀺𑀓𑁆𑀔𑀽 𑀧𑀦 𑀦 𑀩𑀳𑀼𑀓𑀸, 𑀕𑀸𑀫𑀯𑀲𑁂𑀦𑀧𑀺 𑀲𑀮𑀸𑀓𑀸𑀬𑁄 𑀧𑀸𑀧𑀼𑀡𑀦𑁆𑀢𑀺, ‘‘𑀢𑀼𑀫𑁆𑀳𑀸𑀓𑀁 𑀅𑀲𑀼𑀓𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀸𑀫𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀸. 𑀏𑀯𑀁 𑀕𑀸𑀳𑁂𑀦𑁆𑀢𑁂𑀦 𑀲𑀘𑁂𑀧𑀺 𑀏𑀓𑁂𑀓𑀲𑁆𑀫𑀺𑀁 𑀕𑀸𑀫𑁂 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀲𑀝𑁆𑀞𑀺𑀲𑀮𑀸𑀓𑀪𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀕𑀸𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀲 𑀧𑀢𑁆𑀢𑀕𑀸𑀫𑀲𑀫𑀻𑀧𑁂 𑀅𑀜𑁆𑀜𑀸𑀦𑀺𑀧𑀺 𑀤𑁆𑀯𑁂 𑀢𑀻𑀡𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺𑀧𑀺 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀸𑀦𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀲𑀁 𑀓𑀸𑀭𑀡𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀳𑀺𑀡𑀺𑀢𑀼𑀦𑁆𑀢𑀺.

𑀲𑀘𑁂 𑀏𑀓𑀘𑁆𑀘𑁂𑀲𑀼 𑀕𑀸𑀫𑁂𑀲𑀼 𑀩𑀳𑀽𑀦𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀸𑀦𑀺. 𑀤𑀤𑀦𑁆𑀢𑁂𑀦 𑀧𑀦 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀪𑀢𑁆𑀢𑀸𑀦𑀁 𑀲𑀮𑀸𑀓𑀸𑀬𑁄 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀢𑀁 𑀕𑀸𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑁄 𑀕𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀏𑀓𑀫𑁂𑀯 𑀲𑀮𑀸𑀓𑀪𑀢𑁆𑀢𑀁, 𑀢𑀁 𑀧𑀦 𑀧𑀸𑀢𑁄𑀯 𑀤𑁂𑀦𑁆𑀢𑀺, 𑀢𑀫𑁆𑀧𑀺 𑀏𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀲𑁆𑀲 𑀦𑀺𑀕𑁆𑀕𑀳𑁂𑀦 𑀤𑀢𑁆𑀯𑀸 ‘‘𑀧𑀸𑀢𑁄𑀯 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀑𑀭𑀺𑀫𑀕𑀸𑀫𑁂 𑀇𑀢𑀭𑀸𑀦𑀺 𑀪𑀢𑁆𑀢𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀑𑀭𑀺𑀫𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑁂𑀲𑀼 𑀅𑀕𑀸𑀳𑀺𑀢𑁂𑀲𑁆𑀯𑁂𑀯 𑀕𑀸𑀳𑀺𑀢𑀲𑀜𑁆𑀜𑀸𑀬 𑀕𑀘𑁆𑀙𑀢𑀺, 𑀧𑀭𑀪𑀸𑀕𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀸𑀳𑁂𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀇𑀢𑀭𑀸𑀦𑀺 𑀕𑀸𑀳𑁂𑀢𑁆𑀯𑀸 𑀑𑀭𑀺𑀫𑀕𑀸𑀫𑁄 𑀕𑀦𑁆𑀢𑀩𑁆𑀩𑁄. ‘‘𑀦 𑀳𑀺 𑀩𑀳𑀺𑀲𑀻𑀫𑀸𑀬 𑀲𑀗𑁆𑀖𑀮𑀸𑀪𑁄 𑀕𑀸𑀳𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺 𑀅𑀬𑀁 𑀦𑀬𑁄 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑁄.

𑀲𑀘𑁂 𑀧𑀦 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, 𑀕𑀸𑀫𑀯𑀲𑁂𑀦 𑀲𑀮𑀸𑀓𑀸 𑀦 𑀧𑀸𑀧𑀼𑀡𑀦𑁆𑀢𑀺, 𑀯𑀻𑀣𑀺𑀯𑀲𑁂𑀦 𑀯𑀸 𑀯𑀻𑀣𑀺𑀬𑀁 𑀏𑀓𑀕𑁂𑀳𑀯𑀲𑁂𑀦 𑀯𑀸 𑀓𑀼𑀮𑀯𑀲𑁂𑀦 𑀯𑀸 𑀕𑀸𑀳𑁂𑀢𑀩𑁆𑀩𑀸. 𑀯𑀻𑀣𑀺𑀆𑀤𑀻𑀲𑀼 𑀘 𑀬𑀢𑁆𑀣 𑀩𑀳𑀽𑀦𑀺 𑀪𑀢𑁆𑀢𑀸𑀦𑀺, 𑀢𑀢𑁆𑀣 𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑀮𑀸𑀓𑀸𑀲𑀼 𑀅𑀲𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀕𑀸𑀳𑁂𑀢𑀩𑁆𑀩𑀸𑀦𑀺.

𑀲𑀮𑀸𑀓𑀤𑀸𑀬𑀓𑁂𑀦 𑀧𑀦 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑁂𑀦 𑀳𑀺 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀪𑁄𑀚𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀞𑀫𑀫𑁂𑀯 𑀯𑀸𑀭𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁. ‘‘𑀢𑀼𑀬𑁆𑀳𑀁 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀸𑀭𑀕𑀸𑀫𑁂 𑀲𑀮𑀸𑀓𑀸 𑀧𑀸𑀧𑀼𑀡𑀸𑀢𑀺 𑀢𑀢𑁆𑀭 𑀕𑀘𑁆𑀙𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀘𑁂 𑀅𑀢𑀺𑀭𑁂𑀓𑀕𑀸𑀯𑀼𑀢𑁂 𑀕𑀸𑀫𑁄 𑀳𑁄𑀢𑀺, 𑀢𑀁 𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, ‘‘𑀲𑁆𑀯𑁂 𑀢𑀼𑀬𑁆𑀳𑀁 𑀯𑀸𑀭𑀕𑀸𑀫𑁂 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀚𑁆𑀚𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀬𑁄 𑀯𑀸𑀭𑀕𑀸𑀫𑀁 𑀧𑁂𑀲𑀺𑀬𑀫𑀸𑀦𑁄 𑀦 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀲𑀮𑀸𑀓𑀁 𑀫𑀕𑁆𑀕𑀢𑀺, 𑀦 𑀤𑀸𑀢𑀩𑁆𑀩𑀸. 𑀲𑀤𑁆𑀥𑀸𑀦𑀜𑁆𑀳𑀺 𑀫𑀦𑀼𑀲𑁆𑀲𑀸𑀦𑀁 𑀧𑀼𑀜𑁆𑀜𑀳𑀸𑀦𑀺 𑀲𑀗𑁆𑀖𑀲𑁆𑀲 𑀘 𑀮𑀸𑀪𑀘𑁆𑀙𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀤𑀼𑀢𑀺𑀬𑁂𑀧𑀺 𑀢𑀢𑀺𑀬𑁂𑀧𑀺 𑀤𑀺𑀯𑀲𑁂 𑀅𑀜𑁆𑀜𑀸 𑀲𑀮𑀸𑀓𑀸 𑀦 𑀤𑀸𑀢𑀩𑁆𑀩𑀸, ‘‘𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀻𑀡𑀺 𑀧𑀦 𑀤𑀺𑀯𑀲𑀸𑀦𑀺 𑀅𑀕𑀘𑁆𑀙𑀦𑁆𑀢𑀲𑁆𑀲 𑀯𑀸𑀭𑀕𑀸𑀫𑀢𑁄 𑀑𑀭𑀺𑀫𑀯𑀸𑀭𑀕𑀸𑀫𑁂 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸. 𑀢𑀜𑁆𑀘𑁂 𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀅𑀜𑁆𑀜𑀁 𑀲𑀮𑀸𑀓𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀧𑀦 𑀕𑀸𑀴𑁆𑀳𑀁 𑀓𑀸𑀢𑀩𑁆𑀩𑀁, 𑀲𑀝𑁆𑀞𑀺𑀢𑁄 𑀯𑀸 𑀧𑀡𑁆𑀡𑀸𑀲𑀢𑁄 𑀯𑀸 𑀦 𑀧𑀭𑀺𑀳𑀸𑀧𑁂𑀢𑀩𑁆𑀩𑀁. 𑀯𑀸𑀭𑀕𑀸𑀫𑁂 𑀕𑀸𑀳𑁂𑀢𑁆𑀯𑀸 𑀯𑀺𑀳𑀸𑀭𑀯𑀸𑀭𑁄 𑀕𑀸𑀳𑁂𑀢𑀩𑁆𑀩𑁄, ‘‘𑀢𑀼𑀬𑁆𑀳𑀁 𑀯𑀺𑀳𑀸𑀭𑀯𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀳𑀸𑀭𑀯𑀸𑀭𑀺𑀓𑀲𑁆𑀲 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸𑀬𑁄 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀯𑀸 𑀪𑀢𑁆𑀢𑀲𑀮𑀸𑀓𑀸𑀬𑁄 𑀘 𑀤𑀸𑀢𑀩𑁆𑀩𑀸, 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸 𑀧𑀦 𑀦 𑀤𑀸𑀢𑀩𑁆𑀩𑀸. 𑀬𑀸𑀕𑀼𑀪𑀢𑁆𑀢𑀤𑀸𑀬𑀓𑀸 𑀳𑀺 ‘‘𑀅𑀫𑁆𑀳𑀸𑀓𑀁 𑀬𑀸𑀕𑀼𑀪𑀢𑁆𑀢𑀁 𑀯𑀺𑀳𑀸𑀭𑀕𑁄𑀧𑀓𑀸𑀯 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀤𑀸𑀢𑀩𑁆𑀩𑀸.

𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁 𑀲𑀪𑀸𑀕𑀸 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂, 𑀯𑀸𑀭𑀁 𑀕𑀸𑀳𑁂𑀢𑁆𑀯𑀸 𑀢𑁂𑀲𑀁 𑀬𑀸𑀕𑀼𑀪𑀢𑁆𑀢𑀁 𑀆𑀳𑀭𑀸𑀧𑁂𑀢𑀩𑁆𑀩𑀁. 𑀢𑀸𑀯 𑀦𑁂𑀲𑀁 𑀲𑀮𑀸𑀓𑀸 𑀨𑀸𑀢𑀺𑀓𑀫𑁆𑀫𑀫𑁂𑀯 𑀪𑀯𑀦𑁆𑀢𑀺, 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂 𑀧𑀦 𑀅𑀜𑁆𑀜𑀫𑁆𑀧𑀺 𑀧𑀡𑀻𑀢𑀪𑀢𑁆𑀢𑀲𑀮𑀸𑀓𑀁 𑀕𑀡𑁆𑀳𑀺𑀢𑀼𑀁 𑀮𑀪𑀦𑁆𑀢𑀺𑀬𑁂𑀯. 𑀅𑀢𑀺𑀭𑁂𑀓𑀉𑀢𑁆𑀢𑀭𑀺𑀪𑀗𑁆𑀕𑀲𑁆𑀲 𑀏𑀓𑀘𑀸𑀭𑀺𑀓𑀪𑀢𑁆𑀢𑀲𑁆𑀲 𑀯𑀺𑀲𑀼𑀁 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀲𑀮𑀸𑀓𑀸 𑀤𑀸𑀢𑀩𑁆𑀩𑀸.

𑀲𑀘𑁂 𑀬𑁂𑀦 𑀲𑀮𑀸𑀓𑀸 𑀮𑀤𑁆𑀥𑀸, 𑀲𑁄 𑀢𑀁𑀤𑀺𑀯𑀲𑀁 𑀢𑀁 𑀪𑀢𑁆𑀢𑀁 𑀦 𑀮𑀪𑀢𑀺, 𑀧𑀼𑀦𑀤𑀺𑀯𑀲𑁂 𑀕𑀸𑀳𑁂𑀢𑀩𑁆𑀩𑀁. 𑀪𑀢𑁆𑀢𑀫𑁂𑀯 𑀮𑀪𑀢𑀺, 𑀦 𑀉𑀢𑁆𑀢𑀭𑀺𑀪𑀗𑁆𑀕𑀁; 𑀏𑀯𑀫𑁆𑀧𑀺 𑀧𑀼𑀦 𑀕𑀸𑀳𑁂𑀢𑀩𑁆𑀩𑀁. 𑀔𑀻𑀭𑀪𑀢𑁆𑀢𑀲𑁆𑀲 𑀲𑀮𑀸𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀔𑀻𑀭𑀫𑁂𑀯 𑀮𑀪𑀢𑀺, 𑀦 𑀪𑀢𑁆𑀢𑀁; 𑀔𑀻𑀭𑀮𑀸𑀪𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦 𑀕𑀸𑀳𑁂𑀢𑀩𑁆𑀩𑀁. 𑀤𑁆𑀯𑁂 𑀢𑀻𑀡𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀺, 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂 𑀯𑀺𑀚𑀝𑁂𑀢𑁆𑀯𑀸 𑀯𑀺𑀲𑀼𑀁 𑀕𑀸𑀳𑁂𑀢𑀩𑁆𑀩𑀸𑀦𑀺, 𑀧𑀸𑀓𑀢𑀺𑀓𑀲𑀮𑀸𑀓𑀪𑀢𑁆𑀢𑀁 𑀅𑀮𑀤𑁆𑀥𑀲𑁆𑀲𑀸𑀧𑀺 𑀧𑀼𑀦𑀤𑀺𑀯𑀲𑁂 𑀕𑀸𑀳𑁂𑀢𑀩𑁆𑀩𑀁.

𑀲𑀘𑁂 𑀔𑀼𑀤𑁆𑀤𑀓𑁄 𑀯𑀺𑀳𑀸𑀭𑁄 𑀳𑁄𑀢𑀺, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀏𑀓𑀲𑀫𑁆𑀪𑁄𑀕𑀸, 𑀉𑀘𑁆𑀙𑀼𑀲𑀮𑀸𑀓𑀁 𑀕𑀸𑀳𑁂𑀦𑁆𑀢𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀧𑀸𑀧𑁂𑀢𑁆𑀯𑀸 𑀫𑀳𑀸𑀣𑁂𑀭𑀸𑀤𑀻𑀦𑀁 𑀤𑀺𑀯𑀸 𑀢𑀘𑁆𑀙𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀭𑀲𑀲𑀮𑀸𑀓𑀁 𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀯𑀸 𑀨𑀸𑀡𑀺𑀢𑀁 𑀯𑀸 𑀓𑀸𑀭𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑀸𑀤𑀻𑀦𑀫𑁆𑀧𑀺 𑀤𑀸𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑀸𑀦𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑀁 𑀜𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀸, 𑀫𑀳𑀸𑀆𑀯𑀸𑀲𑁂 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀸.

𑀢𑀓𑁆𑀓𑀲𑀮𑀸𑀓𑀫𑁆𑀧𑀺 𑀲𑀪𑀸𑀕𑀝𑁆𑀞𑀸𑀦𑁂 𑀧𑀸𑀧𑁂𑀢𑁆𑀯𑀸 𑀯𑀸 𑀧𑀘𑀸𑀧𑁂𑀢𑁆𑀯𑀸 𑀯𑀸 𑀥𑀽𑀫𑀸𑀧𑁂𑀢𑁆𑀯𑀸 𑀯𑀸 𑀣𑁂𑀭𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀆𑀯𑀸𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀨𑀮𑀲𑀮𑀸𑀓𑀧𑀽𑀯𑀲𑀮𑀸𑀓𑀪𑁂𑀲𑀚𑁆𑀚𑀕𑀦𑁆𑀥𑀫𑀸𑀮𑀲𑀮𑀸𑀓𑀸𑀬𑁄𑀧𑀺 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀸. 𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸𑀬𑁄 𑀘𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀦𑁆𑀢𑀺, 𑀲𑀮𑀸𑀓𑀯𑀲𑁂𑀦 𑀕𑀸𑀳𑀺𑀢𑀢𑁆𑀢𑀸 𑀧𑀦 𑀦 𑀲𑀸𑀤𑀺𑀢𑀩𑁆𑀩𑀸. 𑀅𑀕𑁆𑀕𑀪𑀺𑀓𑁆𑀔𑀸𑀫𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑀺, 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀞𑀺𑀢𑀺𑀓𑀸𑀬 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀢𑀸𑀤𑀺𑀲𑀸𑀦𑀺 𑀪𑀢𑁆𑀢𑀸𑀦𑀺 𑀩𑀳𑀽𑀦𑀺 𑀳𑁄𑀦𑁆𑀢𑀺, 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀢𑀻𑀡𑀺 𑀤𑀸𑀢𑀩𑁆𑀩𑀸𑀦𑀺; 𑀦𑁄 𑀘𑁂, 𑀏𑀓𑁂𑀓𑀫𑁂𑀯 𑀤𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀕𑀢𑀸𑀬 𑀧𑀼𑀦 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑀭𑀸𑀯 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀞𑀺𑀢𑀺𑀓𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀬𑀤𑀺 𑀧𑀦 𑀢𑀸𑀤𑀺𑀲𑀁 𑀪𑀢𑁆𑀢𑀁 𑀦𑀺𑀩𑀤𑁆𑀥𑀫𑁂𑀯 𑀳𑁄𑀢𑀺, 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀲𑁆𑀯𑁂𑀧𑀺 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺. 𑀏𑀓𑀁 𑀅𑀦𑀺𑀩𑀤𑁆𑀥𑀁 𑀳𑁄𑀢𑀺, 𑀮𑀪𑀦𑀤𑀺𑀯𑀲𑁂 𑀧𑀦 𑀬𑀸𑀯𑀤𑀢𑁆𑀣𑀁 𑀮𑀪𑀢𑀺, 𑀅𑀮𑀪𑀦𑀤𑀺𑀯𑀲𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀢𑀁 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀲𑁄 𑀅𑀮𑀪𑀺𑀢𑁆𑀯𑀸 ‘‘𑀲𑁆𑀯𑁂 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀬𑁄 𑀲𑀮𑀸𑀓𑀸𑀲𑀼 𑀕𑀸𑀳𑀺𑀢𑀸𑀲𑀼 𑀧𑀘𑁆𑀙𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀸𑀯 𑀲𑀮𑀸𑀓𑀸 𑀦 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀲𑀮𑀸𑀓𑀁 𑀦𑀸𑀫 𑀖𑀡𑁆𑀝𑀺𑀧𑁆𑀧𑀳𑀭𑀡𑀢𑁄 𑀧𑀝𑁆𑀞𑀸𑀬 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄𑀯 𑀮𑀪𑀢𑀺. 𑀅𑀜𑁆𑀜𑀲𑁆𑀲 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀲𑁆𑀲𑀸𑀧𑀺 𑀅𑀢𑀺𑀓𑁆𑀓𑀦𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀸𑀯 𑀳𑁄𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑁄 𑀕𑀡𑁆𑀳𑀦𑁆𑀢𑁄 𑀅𑀢𑁆𑀣𑀺, 𑀲𑀬𑀁 𑀅𑀦𑀸𑀕𑀢𑁄𑀧𑀺 𑀮𑀪𑀢𑀺. 𑀲𑀪𑀸𑀕𑀝𑁆𑀞𑀸𑀦𑁂 𑀅𑀲𑀼𑀓𑁄 𑀅𑀦𑀸𑀕𑀢𑁄𑀢𑀺 𑀜𑀢𑁆𑀯𑀸 ‘‘𑀅𑀬𑀁 𑀢𑀲𑁆𑀲 𑀲𑀮𑀸𑀓𑀸’’𑀢𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 ‘‘𑀅𑀦𑀸𑀕𑀢𑀲𑁆𑀲 𑀦 𑀤𑀸𑀢𑀩𑁆𑀩𑀸’’𑀢𑀺 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑀺𑀓𑀸 𑀳𑁄𑀢𑀺. 𑀅𑀦𑁆𑀢𑁄𑀉𑀧𑀘𑀸𑀭𑁂 𑀞𑀺𑀢𑀲𑁆𑀲 𑀳𑀺 𑀪𑀸𑀚𑀦𑀻𑀬𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 ‘‘𑀅𑀦𑀸𑀕𑀢𑀲𑁆𑀲 𑀤𑁂𑀣𑀸’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀞𑀧𑁂𑀢𑀩𑁆𑀩𑀁, ‘‘𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁.

𑀙𑀧𑁆𑀧𑀜𑁆𑀘𑀲𑀮𑀸𑀓𑀸 𑀦𑀝𑁆𑀞𑀸 𑀳𑁄𑀦𑁆𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀤𑀸𑀬𑀓𑀸𑀦𑀁 𑀦𑀸𑀫𑀁 𑀦𑀲𑁆𑀲𑀭𑀢𑀺, 𑀲𑁄 𑀘𑁂 𑀦𑀝𑁆𑀞𑀲𑀮𑀸𑀓𑀸 𑀫𑀳𑀸𑀣𑁂𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀯𑀤𑁂𑀬𑁆𑀬, ‘‘𑀫𑀬𑀸 𑀅𑀲𑀼𑀓𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀫𑀬𑁆𑀳𑀁 𑀧𑀸𑀧𑀺𑀢𑀁, 𑀢𑀼𑀫𑁆𑀳𑁂 𑀢𑀢𑁆𑀣 𑀮𑀤𑁆𑀥𑀁 𑀲𑀮𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺, 𑀯𑀝𑁆𑀝𑀢𑀺. 𑀯𑀺𑀳𑀸𑀭𑁂 𑀅𑀧𑀸𑀧𑀺𑀢𑀁 𑀧𑀦 𑀆𑀲𑀦𑀲𑀸𑀮𑀸𑀬 𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀭 𑀆𑀲𑀦𑀲𑀸𑀮𑀸𑀬 𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. ‘‘𑀲𑁆𑀯𑁂 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀲𑁆𑀯𑁂 𑀧𑀝𑁆𑀞𑀸𑀬 𑀅𑀲𑀼𑀓𑀓𑀼𑀮𑀁 𑀦𑀸𑀫 𑀲𑀮𑀸𑀓𑀪𑀢𑁆𑀢𑀁 𑀤𑁂𑀢𑀺, 𑀲𑀮𑀸𑀓𑀕𑁆𑀕𑀸𑀳𑀡𑀓𑀸𑀮𑁂 𑀲𑀭𑁂𑀬𑁆𑀬𑀸𑀲𑀻’’𑀢𑀺. 𑀤𑀼𑀩𑁆𑀪𑀺𑀓𑁆𑀔𑁂 𑀲𑀮𑀸𑀓𑀪𑀢𑁆𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀪𑀺𑀓𑁆𑀔𑁂 𑀚𑀸𑀢𑁂 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀼𑀦 𑀧𑀝𑁆𑀞𑀧𑁂𑀦𑁆𑀢𑀺, 𑀅𑀦𑁆𑀢𑁄𑀕𑀸𑀫𑁂 𑀅𑀕𑀸𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸𑀯 𑀕𑀸𑀳𑁂𑀢𑀩𑁆𑀩𑀁. 𑀇𑀤𑀜𑁆𑀳𑀺 ‘‘𑀲𑀮𑀸𑀓𑀪𑀢𑁆𑀢𑀁’’ 𑀦𑀸𑀫. 𑀉𑀤𑁆𑀤𑁂𑀲𑀪𑀢𑁆𑀢𑀲𑀤𑀺𑀲𑀁 𑀦 𑀳𑁄𑀢𑀺, 𑀯𑀺𑀳𑀸𑀭𑀫𑁂𑀯 𑀲𑀦𑁆𑀥𑀸𑀬 𑀤𑀺𑀬𑁆𑀬𑀢𑀺, 𑀢𑀲𑁆𑀫𑀸 𑀩𑀳𑀺𑀉𑀧𑀘𑀸𑀭𑁂 𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀲𑁆𑀯𑁂 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀺𑀳𑀸𑀭𑁂 𑀕𑀸𑀳𑁂𑀢𑀩𑁆𑀩𑀫𑁂𑀯.

𑀕𑀫𑀺𑀓𑁄 𑀪𑀺𑀓𑁆𑀔𑀼 𑀬𑀁 𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀢𑁆𑀣 𑀅𑀜𑁆𑀜𑁂𑀦 𑀯𑀸𑀭𑀕𑀸𑀫𑀲𑀮𑀸𑀓𑀸 𑀮𑀤𑁆𑀥𑀸 𑀳𑁄𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀇𑀢𑀭𑀁 𑀪𑀺𑀓𑁆𑀔𑀼𑀁 ‘‘𑀫𑀬𑁆𑀳𑀁 𑀧𑀢𑁆𑀢𑀲𑀮𑀸𑀓𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀲𑁆𑀫𑀺𑀁 𑀢𑀲𑁆𑀲 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸.

𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀫𑀦𑀼𑀲𑁆𑀲𑀸 𑀩𑁄𑀥𑀺𑀘𑁂𑀢𑀺𑀬𑀸𑀤𑀻𑀦𑀺 𑀚𑀕𑁆𑀕𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀽𑀢𑀺 𑀲𑀮𑀸𑀓𑀪𑀢𑁆𑀢𑀁 𑀧𑀝𑁆𑀞𑀧𑁂𑀦𑁆𑀢𑀺, 𑀪𑀺𑀓𑁆𑀔𑀽 𑀲𑀓𑀝𑁆𑀞𑀸𑀦𑁂𑀲𑀼 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀢𑁆𑀢𑀁 𑀓𑀭𑀺𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀢𑁂𑀲𑀼 𑀲𑁆𑀯𑀸𑀢𑀦𑀸𑀬 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀢𑁂𑀲𑀼 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀯𑀢𑁆𑀢𑀁 𑀓𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀁 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀘𑁆𑀙𑀢𑀺, 𑀲𑁄𑀯 𑀢𑀲𑁆𑀲 𑀪𑀢𑁆𑀢𑀲𑁆𑀲 𑀇𑀲𑁆𑀲𑀭𑁄. 𑀬𑁄 𑀧𑀦 𑀪𑀺𑀓𑁆𑀔𑀽𑀲𑀼 𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀲𑀼𑀬𑁂𑀯 𑀪𑀽𑀫𑀺𑀬𑀁 𑀤𑁆𑀯𑁂 𑀢𑀬𑁄 𑀲𑀫𑁆𑀫𑀼𑀜𑁆𑀚𑀦𑀺𑀧𑁆𑀧𑀳𑀸𑀭𑁂 𑀤𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 ‘‘𑀥𑀼𑀭𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀘𑁄𑀭𑀺𑀓𑀸𑀬 𑀕𑀳𑀺𑀢𑀢𑁆𑀢𑀸 𑀦 𑀧𑀸𑀧𑀼𑀡𑀸𑀢𑀺, 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀕𑀢𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑁄𑀢𑀺.

𑀏𑀓𑁄 𑀕𑀸𑀫𑁄 𑀅𑀢𑀺𑀤𑀽𑀭𑁂 𑀳𑁄𑀢𑀺, 𑀪𑀺𑀓𑁆𑀔𑀽 𑀦𑀺𑀘𑁆𑀘𑀁 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀫𑀦𑀼𑀲𑁆𑀲𑀸 ‘‘𑀫𑀬𑀁 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀳𑁄𑀫𑀸’’𑀢𑀺 𑀯𑀤𑀦𑁆𑀢𑀺, 𑀬𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀆𑀲𑀦𑁆𑀦𑀯𑀺𑀳𑀸𑀭𑁂 𑀲𑀪𑀸𑀕𑀪𑀺𑀓𑁆𑀔𑀽, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀕𑀢𑀤𑀺𑀯𑀲𑁂 𑀢𑀼𑀫𑁆𑀳𑁂 𑀪𑀼𑀜𑁆𑀚𑀣𑀸’’𑀢𑀺. 𑀲𑀮𑀸𑀓𑀸 𑀧𑀦 𑀤𑁂𑀯𑀲𑀺𑀓𑀁 𑀧𑀸𑀧𑁂𑀢𑀩𑁆𑀩𑀸, 𑀢𑀸 𑀘 𑀔𑁄 𑀧𑀦 𑀖𑀡𑁆𑀝𑀺𑀧𑁆𑀧𑀳𑀭𑀡𑀫𑀢𑁆𑀢𑁂𑀦 𑀯𑀸 𑀧𑀘𑁆𑀙𑀺𑀘𑀸𑀮𑀦𑀫𑀢𑁆𑀢𑁂𑀦 𑀯𑀸 𑀧𑀸𑀧𑀺𑀢𑀸 𑀦 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀁 𑀧𑀦 𑀕𑀳𑁂𑀢𑁆𑀯𑀸 𑀲𑀮𑀸𑀓𑀸 𑀧𑀻𑀞𑀓𑁂 𑀆𑀓𑀺𑀭𑀺𑀢𑀩𑁆𑀩𑀸, 𑀧𑀘𑁆𑀙𑀺 𑀧𑀦 𑀫𑀼𑀔𑀯𑀝𑁆𑀝𑀺𑀬𑀁 𑀦 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀢𑀢𑁆𑀣 𑀅𑀳𑀺 𑀯𑀸 𑀯𑀺𑀘𑁆𑀙𑀺𑀓𑁄 𑀯𑀸 𑀪𑀯𑁂𑀬𑁆𑀬, 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀬𑁆𑀬; 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀁 𑀧𑀭𑀫𑁆𑀫𑀼𑀔𑀁 𑀓𑀢𑁆𑀯𑀸 𑀲𑀮𑀸𑀓𑀸 𑀆𑀓𑀺𑀭𑀺𑀢𑀩𑁆𑀩𑀸 ‘‘𑀲𑀘𑁂𑀧𑀺 𑀲𑀧𑁆𑀧𑁄 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑁄𑀯 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀲𑀮𑀸𑀓𑀸 𑀆𑀓𑀺𑀭𑀺𑀢𑁆𑀯𑀸 𑀕𑀸𑀫𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀸. 𑀅𑀧𑀺𑀘 𑀏𑀓𑀁 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑁂𑀢𑁆𑀯𑀸 ‘‘𑀅𑀯𑀲𑁂𑀲𑀸 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀧𑀸𑀧𑀺𑀢𑀸, 𑀆𑀯𑀼𑀲𑁄, 𑀲𑀮𑀸𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀕𑀢𑀕𑀢𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁; 𑀏𑀯𑀁 𑀧𑀸𑀧𑀺𑀢𑀸𑀧𑀺 𑀳𑀺 𑀲𑀼𑀧𑀸𑀧𑀺𑀢𑀸𑀯 𑀳𑁄𑀦𑁆𑀢𑀺.

𑀪𑀺𑀓𑁆𑀔𑀽 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑀯𑀦𑀢𑁆𑀣𑀁 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 ‘‘𑀫𑀬𑀁 𑀢𑀢𑁆𑀣 𑀤𑀸𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀅𑀫𑁆𑀳𑀸𑀓𑀁 𑀕𑁄𑀘𑀭𑀕𑀸𑀫𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀮𑀸𑀓𑀸 𑀅𑀕𑁆𑀕𑀳𑁂𑀢𑁆𑀯𑀸𑀯 𑀕𑀢𑀸, 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀧𑀢𑁆𑀢𑀲𑀮𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣 𑀫𑀳𑀸𑀣𑁂𑀭𑁄𑀧𑀺 ‘‘𑀅𑀳𑀁 𑀇𑀥 𑀓𑀺𑀁 𑀓𑀭𑁄𑀫𑀻’’𑀢𑀺 𑀢𑁂𑀳𑀺𑀬𑁂𑀯 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀢𑁂𑀳𑀺 𑀕𑀢𑀯𑀺𑀳𑀸𑀭𑁂 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀕𑁄𑀘𑀭𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁂𑀳𑀺 ‘‘𑀤𑁂𑀣, 𑀪𑀦𑁆𑀢𑁂, 𑀧𑀢𑁆𑀢𑁂 𑀲𑀮𑀸𑀓𑀬𑀸𑀕𑀼𑀆𑀤𑀻𑀦𑀺 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀢𑁆𑀢𑀸 𑀦 𑀤𑀸𑀢𑀩𑁆𑀩𑀸. ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀤𑁂𑀣𑀸’’𑀢𑀺 ‘‘𑀯𑀺𑀳𑀸𑀭𑀝𑁆𑀞𑀓𑀁 𑀪𑀢𑁆𑀢𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀫𑀬𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀸’’𑀢𑀺. ‘‘𑀤𑁂𑀣, 𑀪𑀦𑁆𑀢𑁂, 𑀦 𑀫𑀬𑀁 𑀯𑀺𑀳𑀸𑀭𑁂 𑀧𑀸𑀮𑀺𑀓𑀸𑀬 𑀤𑁂𑀫, 𑀢𑀼𑀫𑁆𑀳𑀸𑀓𑀁 𑀤𑁂𑀫, 𑀕𑀡𑁆𑀳𑀣 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺.

𑀲𑀮𑀸𑀓𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸

𑀧𑀓𑁆𑀔𑀺𑀓𑀸𑀤𑀻𑀲𑀼 𑀧𑀦 𑀬𑀁 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀘𑀸𑀢𑀼𑀤𑁆𑀤𑀲𑀻 𑀧𑀜𑁆𑀘𑀤𑀲𑀻 𑀧𑀜𑁆𑀘𑀫𑀻 𑀅𑀝𑁆𑀞𑀫𑀻𑀢𑀺 𑀇𑀫𑁂𑀲𑀼 𑀧𑀓𑁆𑀔𑁂𑀲𑀼 𑀓𑀫𑁆𑀫𑀧𑁆𑀧𑀲𑀼𑀢𑁂𑀳𑀺 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀲𑀢𑀺𑀓𑀭𑀡𑀢𑁆𑀣𑀸𑀬 𑀤𑀺𑀬𑁆𑀬𑀢𑀺, 𑀢𑀁 𑀧𑀓𑁆𑀔𑀺𑀓𑀁 𑀦𑀸𑀫. 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀕𑀸𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀲𑀮𑀸𑀓𑀪𑀢𑁆𑀢𑀫𑁆𑀧𑀺 𑀧𑀓𑁆𑀔𑀺𑀓𑀪𑀢𑁆𑀢𑀫𑁆𑀧𑀺 𑀩𑀳𑀼 𑀲𑀩𑁆𑀩𑁂𑀲𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀤𑁆𑀯𑁂𑀧𑀺 𑀪𑀢𑁆𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀳𑀸, 𑀧𑀓𑁆𑀔𑀺𑀓𑀁 𑀕𑀸𑀳𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀸𑀬 𑀲𑀮𑀸𑀓𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁, 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀸𑀬 𑀧𑀓𑁆𑀔𑀺𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀬𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀪𑀢𑁆𑀢𑀸𑀦𑀺 𑀩𑀳𑀽𑀦𑀺, 𑀪𑀺𑀓𑁆𑀔𑀽 𑀫𑀦𑁆𑀤𑀸; 𑀲𑀮𑀸𑀓𑀪𑀢𑁆𑀢𑀁 𑀦𑀸𑀫 𑀤𑁂𑀯𑀲𑀺𑀓𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀁 𑀞𑀧𑁂𑀢𑁆𑀯𑀸 ‘‘𑀧𑀓𑁆𑀔𑀺𑀓𑀁 𑀆𑀯𑀼𑀲𑁄 𑀪𑀼𑀜𑁆𑀚𑀣𑀸’’𑀢𑀺 𑀧𑀓𑁆𑀔𑀺𑀓𑀫𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀧𑀓𑁆𑀔𑀺𑀓𑀁 𑀧𑀡𑀻𑀢𑀁 𑀤𑁂𑀦𑁆𑀢𑀺, 𑀯𑀺𑀲𑀼𑀁 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸. ‘‘𑀲𑁆𑀯𑁂 𑀧𑀓𑁆𑀔𑁄’’𑀢𑀺 𑀅𑀚𑁆𑀚 𑀧𑀓𑁆𑀔𑀺𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀸𑀬𑀓𑀸 𑀯𑀤𑀦𑁆𑀢𑀺 ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀖𑀭𑁂 𑀮𑀽𑀔𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀧𑀓𑁆𑀔𑀺𑀓𑀪𑀢𑁆𑀢𑀁 𑀉𑀤𑁆𑀤𑀺𑀲𑀣𑀸’’𑀢𑀺, 𑀏𑀯𑀁 𑀯𑀝𑁆𑀝𑀢𑀺.

𑀉𑀧𑁄𑀲𑀣𑀺𑀓𑀁 𑀦𑀸𑀫 𑀅𑀦𑁆𑀯𑀟𑁆𑀠𑀫𑀸𑀲𑁂 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀬𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀢𑀤𑁂𑀯 𑀤𑀺𑀬𑁆𑀬𑀢𑀺. 𑀧𑀸𑀝𑀺𑀧𑀤𑀺𑀓𑀁 𑀦𑀸𑀫 ‘‘𑀉𑀧𑁄𑀲𑀣𑁂 𑀩𑀳𑀽 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀪𑀺𑀓𑁆𑀔𑀽𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀧𑀸𑀝𑀺𑀧𑀤𑁂 𑀧𑀦 𑀪𑀺𑀓𑁆𑀔𑀽 𑀓𑀺𑀮𑀫𑀦𑁆𑀢𑀺, 𑀧𑀸𑀝𑀺𑀧𑀤𑁂 𑀤𑀺𑀦𑁆𑀦𑀁 𑀤𑀼𑀩𑁆𑀪𑀺𑀓𑁆𑀔𑀤𑀸𑀦𑀲𑀤𑀺𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀉𑀧𑁄𑀲𑀣𑀓𑀫𑁆𑀫𑁂𑀦 𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀸𑀝𑀺𑀧𑀤𑁂 𑀤𑀺𑀬𑁆𑀬𑀦𑀓𑀤𑀸𑀦𑀁, 𑀢𑀫𑁆𑀧𑀺 𑀉𑀪𑀬𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯. 𑀇𑀢𑀺 𑀇𑀫𑀸𑀦𑀺 𑀲𑀢𑁆𑀢𑀧𑀺 𑀪𑀢𑁆𑀢𑀸𑀦𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀦 𑀯𑀝𑁆𑀝𑀦𑁆𑀢𑀺, 𑀥𑀼𑀢𑀗𑁆𑀕𑀪𑁂𑀤𑀁 𑀓𑀭𑁄𑀦𑁆𑀢𑀺𑀬𑁂𑀯.

𑀅𑀧𑀭𑀸𑀦𑀺𑀧𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀯𑀺𑀲𑀸𑀔𑀸𑀬 𑀯𑀭𑀁 𑀬𑀸𑀘𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀕𑀫𑀺𑀬𑀪𑀢𑁆𑀢𑀁 𑀕𑀺𑀮𑀸𑀦𑀪𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀦𑁆𑀢𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑁂𑀯, 𑀢𑀢𑁆𑀣 𑀆𑀕𑀦𑁆𑀢𑀼𑀓𑀸𑀦𑀁 𑀤𑀺𑀦𑁆𑀦𑀁 𑀪𑀢𑁆𑀢𑀁 ‘‘𑀆𑀕𑀦𑁆𑀢𑀼𑀓𑀪𑀢𑁆𑀢𑀁’’. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀲𑀘𑁂 𑀧𑀦𑁂𑀢𑁆𑀣 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀦𑀺𑀧𑀺 𑀆𑀕𑀦𑁆𑀢𑀼𑀓𑀸𑀧𑀺 𑀩𑀳𑀽 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑁂𑀓𑀁 𑀕𑀸𑀳𑁂𑀢𑀩𑁆𑀩𑀁, 𑀪𑀢𑁆𑀢𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀆𑀕𑀦𑁆𑀢𑀼𑀓𑁄 𑀧𑀞𑀫𑀫𑁂𑀯 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀅𑀢𑁆𑀢𑀦𑁄 𑀕𑀸𑀳𑁂𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀳𑁄𑀢𑀺, 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀆𑀕𑀦𑁆𑀢𑀼𑀓𑁂𑀳𑀺 𑀢𑁂𑀦 𑀤𑀺𑀦𑁆𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀢𑁂𑀦𑀧𑀺 𑀏𑀓𑀁 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀲𑁂𑀲𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀅𑀬𑀁 𑀉𑀴𑀸𑀭𑁄.

𑀲𑀘𑁂 𑀧𑀦 𑀬𑁄 𑀧𑀞𑀫𑀁 𑀆𑀕𑀦𑁆𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀅𑀕𑁆𑀕𑀳𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀻𑀤𑀢𑀺, 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀧𑀸𑀝𑀺𑀬𑀸 𑀕𑀡𑁆𑀳𑀺𑀢𑀩𑁆𑀩𑀁. 𑀲𑀘𑁂 𑀦𑀺𑀘𑁆𑀘𑀁 𑀆𑀕𑀦𑁆𑀢𑀼𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀢𑀤𑀺𑀯𑀲𑁂𑀬𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀅𑀦𑁆𑀢𑀭𑀦𑁆𑀢𑀭𑀸 𑀘𑁂 𑀆𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀲𑀢𑁆𑀢 𑀤𑀺𑀯𑀲𑀸𑀦𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀆𑀯𑀸𑀲𑀺𑀓𑁄 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀆𑀕𑀢𑁄, 𑀢𑁂𑀦𑀸𑀧𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀁 𑀯𑀺𑀳𑀸𑀭𑁂 𑀦𑀺𑀩𑀦𑁆𑀥𑀸𑀧𑀺𑀢𑀁 𑀳𑁄𑀢𑀺, 𑀯𑀺𑀳𑀸𑀭𑁂 𑀕𑀸𑀳𑁂𑀢𑀩𑁆𑀩𑀁. 𑀅𑀣 𑀯𑀺𑀳𑀸𑀭𑁄 𑀤𑀽𑀭𑁂 𑀳𑁄𑀢𑀺, 𑀆𑀲𑀦𑀲𑀸𑀮𑀸𑀬 𑀦𑀺𑀩𑀦𑁆𑀥𑀸𑀧𑀺𑀢𑀁 𑀆𑀲𑀦𑀲𑀸𑀮𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀸𑀬𑀓𑀸 ‘‘𑀆𑀕𑀦𑁆𑀢𑀼𑀓𑁂𑀲𑀼 𑀅𑀲𑀢𑀺 𑀆𑀯𑀸𑀲𑀺𑀓𑀸𑀧𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀺, 𑀯𑀝𑁆𑀝𑀢𑀺.

𑀕𑀫𑀺𑀬𑀪𑀢𑁆𑀢𑁂𑀧𑀺 𑀅𑀬𑀫𑁂𑀯 𑀓𑀣𑀸𑀫𑀕𑁆𑀕𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁂𑀯 𑀮𑀪𑀢𑀺, 𑀕𑀫𑀺𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁆𑀧𑀺 𑀕𑀫𑀺𑀬𑀪𑀢𑁆𑀢𑀫𑁆𑀧𑀺. 𑀆𑀯𑀸𑀲𑀺𑀓𑁄𑀧𑀺 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀕𑀫𑀺𑀓𑁄 𑀳𑁄𑀢𑀺; 𑀕𑀫𑀺𑀬𑀪𑀢𑁆𑀢𑀁 𑀮𑀪𑀢𑀺. 𑀬𑀣𑀸 𑀧𑀦 𑀆𑀕𑀦𑁆𑀢𑀼𑀓𑀪𑀢𑁆𑀢𑀁; 𑀏𑀯𑀫𑀺𑀤𑀁 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀲𑀢𑁆𑀢 𑀯𑀸 𑀤𑀺𑀯𑀲𑀸𑀦𑀺 𑀦 𑀮𑀩𑁆𑀪𑀢𑀺. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑁄 𑀢𑀁𑀤𑀺𑀯𑀲𑀁 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀦 𑀕𑀢𑁄, 𑀧𑀼𑀦𑀤𑀺𑀯𑀲𑁂𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀉𑀲𑁆𑀲𑀸𑀳𑀢𑁆𑀢𑀸. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀲𑁆𑀲 𑀘𑁄𑀭𑀸 𑀯𑀸 𑀧𑀦𑁆𑀣𑀁 𑀭𑀼𑀦𑁆𑀥𑀦𑁆𑀢𑀺 𑀉𑀤𑀓𑀁 𑀯𑀸, 𑀤𑁂𑀯𑁄 𑀯𑀸 𑀯𑀲𑁆𑀲𑀢𑀺, 𑀲𑀢𑁆𑀣𑁄 𑀯𑀸 𑀦 𑀕𑀘𑁆𑀙𑀢𑀺, 𑀲𑀉𑀲𑁆𑀲𑀸𑀳𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀏𑀢𑁂 𑀉𑀧𑀤𑁆𑀤𑀯𑁂 𑀑𑀮𑁄𑀓𑁂𑀦𑁆𑀢𑁂𑀦 ‘‘𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀢𑀺.

𑀕𑀺𑀮𑀸𑀦𑀪𑀢𑁆𑀢𑀫𑁆𑀧𑀺 𑀲𑀘𑁂 𑀲𑀩𑁆𑀩𑁂𑀲𑀁 𑀕𑀺𑀮𑀸𑀦𑀸𑀦𑀁 𑀧𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀁; 𑀦𑁄 𑀘𑁂, 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀕𑀺𑀮𑀸𑀦𑁄 𑀅𑀭𑁄𑀕𑀭𑀽𑀧𑁄 𑀲𑀓𑁆𑀓𑁄𑀢𑀺 𑀅𑀦𑁆𑀢𑁄𑀕𑀸𑀫𑀁 𑀕𑀦𑁆𑀢𑀼𑀁, 𑀏𑀓𑁄 𑀦 𑀲𑀓𑁆𑀓𑁄𑀢𑀺, 𑀅𑀬𑀁 ‘‘𑀫𑀳𑀸𑀕𑀺𑀮𑀸𑀦𑁄’’ 𑀦𑀸𑀫. 𑀏𑀢𑀲𑁆𑀲 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀤𑁆𑀯𑁂 𑀫𑀳𑀸𑀕𑀺𑀮𑀸𑀦𑀸 𑁋 𑀏𑀓𑁄 𑀮𑀸𑀪𑀻 𑀅𑀪𑀺𑀜𑁆𑀜𑀸𑀢𑁄 𑀩𑀳𑀼𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀮𑀪𑀢𑀺, 𑀏𑀓𑁄 𑀅𑀦𑀸𑀣𑁄 𑀅𑀧𑁆𑀧𑀮𑀸𑀪𑀢𑀸𑀬 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀢𑀺 𑁋 𑀏𑀢𑀲𑁆𑀲 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀕𑀺𑀮𑀸𑀦𑀪𑀢𑁆𑀢𑁂 𑀧𑀦 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀲𑀧𑁆𑀧𑀸𑀬𑀪𑁄𑀚𑀦𑀁 𑀅𑀪𑀼𑀜𑁆𑀚𑀦𑁆𑀢𑁄 𑀦 𑀬𑀸𑀧𑁂𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀤𑀸 𑀧𑀦 𑀫𑀺𑀲𑁆𑀲𑀓𑀬𑀸𑀕𑀼𑀁 𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀯𑀸 𑀪𑀼𑀢𑁆𑀢𑀲𑁆𑀲𑀸𑀧𑀺 𑀭𑁄𑀕𑁄 𑀦 𑀓𑀼𑀧𑁆𑀧𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀫𑁆𑀧𑀺 𑀬𑀁 𑀲𑀩𑁆𑀩𑁂𑀲𑀁 𑀧𑀳𑁄𑀢𑀺, 𑀢𑀁 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀁; 𑀦𑁄 𑀘𑁂 𑀧𑀳𑁄𑀢𑀺, 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀇𑀤𑀫𑁆𑀧𑀺 𑀤𑁆𑀯𑀻𑀲𑀼 𑀕𑀺𑀮𑀸𑀦𑁂𑀲𑀼 𑀫𑀳𑀸𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀕𑀸𑀳𑁂𑀢𑀩𑁆𑀩𑀁, 𑀤𑁆𑀯𑀻𑀲𑀼 𑀫𑀳𑀸𑀕𑀺𑀮𑀸𑀦𑁂𑀲𑀼 𑀅𑀦𑀸𑀣𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲. 𑀬𑀁 𑀓𑀼𑀮𑀁 𑀕𑀺𑀮𑀸𑀦𑀪𑀢𑁆𑀢𑀫𑁆𑀧𑀺 𑀤𑁂𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀫𑁆𑀧𑀺, 𑀢𑀢𑁆𑀣 𑀬𑀲𑁆𑀲 𑀕𑀺𑀮𑀸𑀦𑀲𑁆𑀲 𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀺 𑀢𑀤𑀼𑀧𑀝𑁆𑀞𑀸𑀓𑀲𑁆𑀲𑀸𑀧𑀺 𑀢𑀢𑁆𑀣𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑁂𑀧𑀺 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯 𑀕𑀺𑀮𑀸𑀦𑁄 𑀮𑀪𑀢𑀺, 𑀢𑀸𑀯𑀲𑁆𑀲 𑀉𑀧𑀝𑁆𑀞𑀸𑀓𑁄𑀧𑀺 𑀮𑀪𑀢𑀻𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀲𑀘𑁂 𑀏𑀯𑀁 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 ‘‘𑀆𑀕𑀦𑁆𑀢𑀼𑀓𑀕𑀫𑀺𑀓𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀫𑀫 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀪𑀢𑁆𑀢𑀁 𑀦𑀺𑀩𑀦𑁆𑀥𑀸𑀧𑁂𑀫𑀺, ‘‘𑀫𑀫 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀯𑀁 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺.

𑀅𑀧𑀭𑀸𑀦𑀺𑀧𑀺 ‘‘𑀥𑀼𑀭𑀪𑀢𑁆𑀢𑀁, 𑀓𑀼𑀝𑀺𑀪𑀢𑁆𑀢𑀁, 𑀯𑀸𑀭𑀪𑀢𑁆𑀢’’𑀦𑁆𑀢𑀺 𑀢𑀻𑀡𑀺 𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀥𑀼𑀭𑀪𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀢𑀁 𑀤𑀼𑀯𑀺𑀥𑀁 𑁋 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀜𑁆𑀘. 𑀢𑀢𑁆𑀣 𑀬𑀁 ‘‘𑀲𑀗𑁆𑀖𑀲𑁆𑀲 𑀥𑀼𑀭𑀪𑀢𑁆𑀢𑀁 𑀤𑁂𑀫𑀸’’𑀢𑀺 𑀦𑀺𑀩𑀦𑁆𑀥𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀁. ‘‘𑀫𑀫 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀼𑀕𑁆𑀕𑀮𑀺𑀓𑁂𑀧𑀺 ‘‘𑀢𑀼𑀫𑁆𑀳𑀸𑀓𑀁 𑀥𑀼𑀭𑀪𑀢𑁆𑀢𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂, 𑀦 𑀯𑀝𑁆𑀝𑀢𑀺. ‘‘𑀫𑀫 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺, 𑀲𑀸𑀤𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀧𑀘𑁆𑀙𑀸 𑀓𑀢𑀺𑀧𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 ‘‘𑀥𑀼𑀭𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀫𑀽𑀮𑁂 𑀲𑀼𑀝𑁆𑀞𑀼 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀯𑀝𑁆𑀝𑀢𑀺.

𑀓𑀼𑀝𑀺𑀪𑀢𑁆𑀢𑀁 𑀦𑀸𑀫 𑀬𑀁 𑀲𑀗𑁆𑀖𑀲𑁆𑀲 𑀆𑀯𑀸𑀲𑀁 𑀓𑀸𑀭𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁𑀬𑁂𑀯 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀯𑀁 𑀦𑀺𑀩𑀦𑁆𑀥𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁𑀬𑁂𑀯 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀁 𑀧𑀦 𑀧𑀼𑀕𑁆𑀕𑀮𑁂 𑀧𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀯𑀸 𑀆𑀯𑀸𑀲𑀁 𑀓𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀢𑁆𑀣𑀘𑀺 𑀕𑀢𑁂 𑀦𑀺𑀲𑁆𑀲𑀺𑀢𑀓𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀯𑀸𑀭𑀪𑀢𑁆𑀢𑀁 𑀦𑀸𑀫 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 ‘‘𑀯𑀸𑀭𑁂𑀦 𑀪𑀺𑀓𑁆𑀔𑀽 𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀥𑀼𑀭𑀕𑁂𑀳𑀢𑁄 𑀧𑀝𑁆𑀞𑀸𑀬 𑀤𑀺𑀦𑁆𑀦𑀁, 𑀢𑀫𑁆𑀧𑀺 𑀪𑀺𑀓𑁆𑀔𑀸𑀯𑀘𑀦𑁂𑀦 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. ‘‘𑀯𑀸𑀭𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀁 𑀳𑁄𑀢𑀺. 𑀲𑀘𑁂 𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑁂𑀲𑁂𑀦𑁆𑀢𑀺, ‘‘𑀲𑀸𑀫𑀡𑁂𑀭𑀸 𑀧𑀘𑀺𑀢𑁆𑀯𑀸 𑀤𑁂𑀦𑁆𑀢𑀽’’𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀢𑀻𑀡𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀤𑀻𑀦𑀺 𑀘 𑀘𑀢𑁆𑀢𑀸𑀭𑀻𑀢𑀺 𑀲𑀢𑁆𑀢, 𑀢𑀸𑀦𑀺 𑀲𑀗𑁆𑀖𑀪𑀢𑁆𑀢𑀸𑀤𑀻𑀳𑀺 𑀲𑀳 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀳𑀸𑀭𑀪𑀢𑁆𑀢𑀁, 𑀅𑀝𑁆𑀞𑀓𑀪𑀢𑁆𑀢𑀁, 𑀘𑀢𑀼𑀓𑁆𑀓𑀪𑀢𑁆𑀢𑀁, 𑀕𑀼𑀴𑁆𑀳𑀓𑀪𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀯𑀺𑀳𑀸𑀭𑀪𑀢𑁆𑀢𑀁 𑀦𑀸𑀫 𑀯𑀺𑀳𑀸𑀭𑁂 𑀢𑀢𑁆𑀭𑀼𑀧𑁆𑀧𑀸𑀤𑀪𑀢𑁆𑀢𑀁, 𑀢𑀁 𑀲𑀗𑁆𑀖𑀪𑀢𑁆𑀢𑁂𑀦 𑀕𑀳𑀺𑀢𑀁. 𑀢𑀁 𑀧𑀦 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀘𑀺𑀢𑁆𑀢𑀮𑀧𑀩𑁆𑀩𑀢𑀸𑀤𑀻𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀬𑀣𑀸 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀲𑀓𑁆𑀓𑀸 𑀳𑁄𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀘𑀢𑀼𑀦𑁆𑀦𑀁 𑀤𑁂𑀫𑀸’’𑀢𑀺 𑀏𑀯𑀁 𑀤𑀺𑀦𑁆𑀦𑀁 𑀧𑀦 𑀅𑀝𑁆𑀞𑀓𑀪𑀢𑁆𑀢𑀜𑁆𑀘𑁂𑀯 𑀘𑀢𑀼𑀓𑁆𑀓𑀪𑀢𑁆𑀢𑀜𑁆𑀘; 𑀢𑀫𑁆𑀧𑀺 𑀪𑀺𑀓𑁆𑀔𑀸𑀯𑀘𑀦𑁂𑀦 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀫𑀳𑀸𑀪𑀺𑀲𑀗𑁆𑀔𑀸𑀭𑀺𑀓𑁂𑀦 𑀅𑀢𑀺𑀭𑀲𑀓𑀧𑀽𑀯𑁂𑀦 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀣𑀓𑁂𑀢𑁆𑀯𑀸 𑀤𑀺𑀦𑁆𑀦𑀁 𑀕𑀼𑀴𑁆𑀳𑀓𑀪𑀢𑁆𑀢𑀁 𑀦𑀸𑀫. 𑀇𑀫𑀸𑀦𑀺 𑀢𑀻𑀡𑀺 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀸𑀦𑁂𑀯.

𑀅𑀧𑀭𑀫𑁆𑀧𑀺 𑀕𑀼𑀴𑀓𑀪𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀇𑀥𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀫𑀳𑀸𑀥𑀫𑁆𑀫𑀲𑀯𑀦𑀜𑁆𑀘 𑀯𑀺𑀳𑀸𑀭𑀧𑀽𑀚𑀜𑁆𑀘 𑀓𑀸𑀭𑁂𑀢𑁆𑀯𑀸 𑀲𑀓𑀮𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀸𑀢𑀺, ‘‘𑀤𑁆𑀯𑁂 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑀺𑀓𑁆𑀔𑀼𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀁 𑀕𑀼𑀴𑀓𑁂 𑀤𑁂𑀦𑁆𑀢𑀺, 𑀇𑀤𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀘𑀻𑀯𑀭𑀪𑀸𑀚𑀦𑀻𑀬𑀁, 𑀇𑀫𑀲𑁆𑀫𑀺𑀁 𑀧𑀦 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀲𑁂𑀦𑀸𑀲𑀦𑀪𑀸𑀚𑀦𑀻𑀬𑀜𑁆𑀘𑁂𑀯 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀻𑀬𑀜𑁆𑀘 𑀯𑀼𑀢𑁆𑀢𑀁.

𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀻𑀬𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀲𑀧𑁆𑀧𑀺𑀆𑀤𑀻𑀲𑀼 𑀪𑁂𑀲𑀚𑁆𑀚𑁂𑀲𑀼 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀲𑀧𑁆𑀧𑀺𑀲𑁆𑀲 𑀢𑀸𑀯 𑀓𑀼𑀫𑁆𑀪𑀲𑀢𑀫𑁆𑀧𑀺 𑀓𑀼𑀫𑁆𑀪𑀲𑀳𑀲𑁆𑀲𑀫𑁆𑀧𑀺 𑀯𑀺𑀳𑀸𑀭𑀁 𑀧𑁂𑀲𑁂𑀦𑁆𑀢𑀺, 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀳𑀺𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀺𑀬𑁆𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀁.

‘‘𑀅𑀲𑀼𑀓𑀯𑀺𑀳𑀸𑀭𑁂 𑀩𑀳𑀼 𑀲𑀧𑁆𑀧𑀺 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀫𑁂𑀯. ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀸𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀤𑀸𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑀁. 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀲𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂𑀬𑁂𑀯 𑀪𑀸𑀚𑁂𑀢𑀩𑁆𑀩𑀁.

𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽, 𑀤𑀲𑁂𑀯 𑀘 𑀲𑀧𑁆𑀧𑀺𑀓𑀼𑀫𑁆𑀪𑀸 𑀤𑀺𑀬𑁆𑀬𑀦𑁆𑀢𑀺, 𑀏𑀓𑁂𑀓𑀓𑀼𑀫𑁆𑀪𑀯𑀲𑁂𑀦𑁂𑀯 𑀪𑀸𑀚𑁂𑀢𑀩𑁆𑀩𑀁. 𑀏𑀓𑁄 𑀲𑀧𑁆𑀧𑀺𑀓𑀼𑀫𑁆𑀪𑁄 𑀳𑁄𑀢𑀺, 𑀤𑀲 𑀪𑀺𑀓𑁆𑀔𑀽𑀳𑀺 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀬𑀣𑀸𑀞𑀺𑀢𑀁𑀬𑁂𑀯 ‘‘𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀤𑀼𑀕𑁆𑀕𑀳𑀺𑀢𑀁; 𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀺. 𑀓𑀼𑀫𑁆𑀪𑀁 𑀧𑀦 𑀆𑀯𑀚𑁆𑀚𑁂𑀢𑁆𑀯𑀸 𑀣𑀸𑀮𑀓𑁂 𑀣𑁄𑀓𑀁 𑀲𑀧𑁆𑀧𑀺𑀁 𑀓𑀢𑁆𑀯𑀸 ‘‘𑀇𑀤𑀁 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑀲𑁂𑀲𑀁 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁆𑀧𑀺 𑀓𑀼𑀫𑁆𑀪𑁂𑀬𑁂𑀯 𑀆𑀓𑀺𑀭𑀺𑀢𑁆𑀯𑀸 𑀬𑀣𑀺𑀘𑁆𑀙𑀺𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀣𑀺𑀦𑀁 𑀲𑀧𑁆𑀧𑀺 𑀳𑁄𑀢𑀺, 𑀮𑁂𑀔𑀁 𑀓𑀢𑁆𑀯𑀸 ‘‘𑀮𑁂𑀔𑀢𑁄 𑀧𑀭𑀪𑀸𑀕𑁄 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑀲𑁂𑀲𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀕𑀳𑀺𑀢𑀫𑁆𑀧𑀺 𑀲𑀼𑀕𑁆𑀕𑀳𑀺𑀢𑀁, 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀊𑀦𑀸𑀥𑀺𑀓𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀘 𑀲𑀧𑁆𑀧𑀺𑀓𑀼𑀫𑁆𑀪𑁂𑀲𑀼 𑀘 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀪𑀸𑀚𑁂𑀢𑀩𑁆𑀩𑀁.

𑀲𑀘𑁂 𑀧𑀦𑁂𑀓𑁄 𑀪𑀺𑀓𑁆𑀔𑀼, 𑀏𑀓𑁄𑀧𑀺 𑀓𑀼𑀫𑁆𑀪𑁄 𑀳𑁄𑀢𑀺, 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀬𑀁 𑀧𑀞𑀫𑀪𑀸𑀕𑁄 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑀪𑀸𑀕𑁄’’𑀢𑀺 𑀏𑀯𑀁 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀦𑀯𑀦𑀻𑀢𑀸𑀤𑀻𑀲𑀼𑀧𑀺. 𑀬𑀲𑁆𑀫𑀺𑀁 𑀧𑀦 𑀯𑀺𑀧𑁆𑀧𑀲𑀦𑁆𑀦𑁂 𑀢𑀺𑀮𑀢𑁂𑀮𑀸𑀤𑀺𑀫𑁆𑀳𑀺 𑀮𑁂𑀔𑀸 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁. 𑀲𑀺𑀗𑁆𑀕𑀺𑀯𑁂𑀭𑀫𑀭𑀺𑀘𑀸𑀤𑀺𑀪𑁂𑀲𑀚𑁆𑀚𑀫𑁆𑀧𑀺 𑀅𑀯𑀲𑁂𑀲𑀧𑀢𑁆𑀢𑀣𑀸𑀮𑀓𑀸𑀤𑀺𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀧𑀺 𑀲𑀩𑁆𑀩𑁄 𑀯𑀼𑀢𑁆𑀢𑀸𑀦𑀼𑀭𑀽𑀧𑁂𑀦𑁂𑀯 𑀦𑀬𑁂𑀦 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑁄𑀢𑀺.

𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀑𑀮𑁄𑀓𑁂𑀢𑁆𑀯𑀸 𑀯𑀺𑀘𑀓𑁆𑀔𑀡𑁄;

𑀲𑀗𑁆𑀖𑀺𑀓𑁂 𑀧𑀘𑁆𑀘𑀬𑁂 𑀏𑀯𑀁, 𑀅𑀧𑁆𑀧𑀫𑀢𑁆𑀢𑁄𑀯 𑀪𑀸𑀚𑀬𑁂𑀢𑀺.

𑀇𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀘𑁆𑀘𑀬𑀪𑀸𑀚𑀦𑀻𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀬𑀸𑀕𑀼𑀪𑀸𑀚𑀓𑀸𑀤𑀻𑀳𑀺 𑀪𑀸𑀚𑀦𑀻𑀬𑀝𑁆𑀞𑀸𑀦𑀁 𑀆𑀕𑀢𑀫𑀦𑀼𑀲𑁆𑀲𑀸𑀦𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀉𑀧𑀟𑁆𑀠𑀪𑀸𑀕𑁄 𑀤𑀸𑀢𑀩𑁆𑀩𑁄, 𑀅𑀲𑀫𑁆𑀫𑀢𑁂𑀳𑀺 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀲𑀫𑁆𑀫𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀦𑀓𑁂𑀦 𑀪𑀺𑀓𑁆𑀔𑀼𑀦𑀸 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 ‘‘𑀲𑀽𑀘𑀺𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀏𑀓𑀸 𑀤𑀻𑀖𑀸, 𑀏𑀓𑀸 𑀭𑀲𑁆𑀲𑀸𑀢𑀺 𑀤𑁆𑀯𑁂 𑀲𑀽𑀘𑀺𑀬𑁄 𑀤𑀸𑀢𑀩𑁆𑀩𑀸. ‘‘𑀅𑀯𑀺𑀪𑀢𑁆𑀢𑀁 𑀲𑀗𑁆𑀖𑀺𑀓𑀁 𑀪𑀡𑁆𑀟’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀺𑀧𑁆𑀨𑀮𑀓𑀢𑁆𑀣𑀺𑀓𑀲𑁆𑀲 𑀏𑀓𑁄 𑀧𑀺𑀧𑁆𑀨𑀮𑀓𑁄, 𑀅𑀤𑁆𑀥𑀸𑀦𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀉𑀧𑀸𑀳𑀦𑀬𑀼𑀕𑀴𑀁, 𑀓𑀸𑀬𑀩𑀦𑁆𑀥𑀦𑀢𑁆𑀣𑀺𑀓𑀲𑁆𑀲 𑀓𑀸𑀬𑀩𑀦𑁆𑀥𑀦𑀁, ‘‘𑀅𑀁𑀲𑀩𑀤𑁆𑀥𑀓𑁄 𑀫𑁂 𑀚𑀺𑀡𑁆𑀡𑁄’’𑀢𑀺 𑀆𑀕𑀢𑀲𑁆𑀲 𑀅𑀁𑀲𑀩𑀤𑁆𑀥𑀓𑁄, 𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀺𑀓𑀲𑁆𑀲 𑀧𑀭𑀺𑀲𑁆𑀲𑀸𑀯𑀦𑀁 𑀤𑀸𑀢𑀩𑁆𑀩𑀁. 𑀥𑀫𑁆𑀫𑀓𑀭𑀡𑀢𑁆𑀣𑀺𑀓𑀲𑁆𑀲 𑀥𑀫𑁆𑀫𑀓𑀭𑀡𑁄. 𑀲𑀘𑁂 𑀧𑀝𑀓𑁄 𑀦 𑀳𑁄𑀢𑀺, 𑀥𑀫𑁆𑀫𑀓𑀭𑀡𑁄 𑀧𑀝𑀓𑁂𑀦 𑀲𑀤𑁆𑀥𑀺𑀁 𑀤𑀸𑀢𑀩𑁆𑀩𑁄. ‘‘𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀘𑀦𑁆𑀢𑀲𑁆𑀲 𑀓𑀼𑀲𑀺𑀬𑀸 𑀘 𑀅𑀟𑁆𑀠𑀓𑀼𑀲𑀺𑀬𑀸 𑀘 𑀧𑀳𑁄𑀦𑀓𑀁 𑀤𑀸𑀢𑀩𑁆𑀩𑀁. ‘‘𑀫𑀡𑁆𑀟𑀮𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀆𑀕𑀢𑀲𑁆𑀲 𑀫𑀡𑁆𑀟𑀮𑀁 𑀏𑀓𑀁 𑀤𑀸𑀢𑀩𑁆𑀩𑀁, 𑀅𑀟𑁆𑀠𑀫𑀡𑁆𑀟𑀮𑀸𑀦𑀺 𑀤𑁆𑀯𑁂 𑀤𑀸𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀫𑀡𑁆𑀟𑀮𑀸𑀦𑀺 𑀬𑀸𑀘𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀸𑀦𑀺. 𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀢𑁆𑀣𑀺𑀓𑀲𑁆𑀲 𑀏𑀓𑀲𑁆𑀲 𑀘𑀻𑀯𑀭𑀲𑁆𑀲 𑀧𑀳𑁄𑀦𑀓𑀁 𑀤𑀸𑀢𑀩𑁆𑀩𑀁. 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀅𑀢𑁆𑀣𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲 𑀏𑀓𑀁 𑀪𑁂𑀲𑀚𑁆𑀚𑀁 𑀦𑀸𑀴𑀺𑀫𑀢𑁆𑀢𑀁 𑀓𑀢𑁆𑀯𑀸 𑀢𑀢𑁄 𑀢𑀢𑀺𑀬𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀤𑀢𑁆𑀯𑀸 𑀦𑀸𑀴𑀺𑀬𑀸 𑀧𑀭𑀺𑀧𑀼𑀡𑁆𑀡𑀸𑀬 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀁 𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀕𑀼𑀴𑀧𑀺𑀡𑁆𑀟𑁂𑀧𑀺 𑀏𑀓𑀤𑀺𑀯𑀲𑀁 𑀢𑀢𑀺𑀬𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀦𑀺𑀝𑁆𑀞𑀺𑀢𑁂 𑀧𑀺𑀡𑁆𑀟𑁂 𑀢𑀢𑁄 𑀧𑀭𑀁 𑀲𑀗𑁆𑀖𑀁 𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀁

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸

𑁩𑁩𑁦. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸𑀢𑀺 𑀧𑀸𑀓𑀝𑀸 𑀧𑀸𑀓𑀝𑀸. 𑀲𑀓𑁆𑀬𑀓𑀼𑀫𑀸𑀭𑀸 𑀦𑀸𑀫 𑀓𑀸𑀴𑀼𑀤𑀸𑀬𑀺𑀧𑁆𑀧𑀪𑀼𑀢𑀬𑁄 𑀤𑀲 𑀤𑀽𑀢𑀸 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀳𑀺 𑀅𑀜𑁆𑀜𑁂 𑀘 𑀩𑀳𑀽 𑀚𑀦𑀸. 𑀅𑀫𑁆𑀳𑀸𑀓𑀦𑁆𑀢𑀺 𑀅𑀫𑁆𑀳𑁂𑀲𑀼; 𑀅𑀫𑁆𑀳𑀸𑀓𑀁 𑀓𑀼𑀮𑀢𑁄𑀢𑀺 𑀯𑀸 𑀯𑀼𑀢𑁆𑀢𑀁 𑀳𑁄𑀢𑀺. 𑀖𑀭𑀸𑀯𑀸𑀲𑀢𑁆𑀣𑀁 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀻𑀢𑀺 𑀖𑀭𑀸𑀯𑀸𑀲𑁂 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀺. 𑀉𑀤𑀓𑀁 𑀦𑀺𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀉𑀤𑀓𑀁 𑀲𑀩𑁆𑀩𑀝𑁆𑀞𑀸𑀦𑁂 𑀲𑀫𑀁 𑀳𑁄𑀢𑀺, 𑀏𑀯𑀁 𑀓𑀸𑀢𑀩𑁆𑀩𑀁. 𑀦𑀺𑀤𑁆𑀥𑀸𑀧𑁂𑀢𑀩𑁆𑀩𑀦𑁆𑀢𑀺 𑀢𑀺𑀡𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀪𑀼𑀲𑀺𑀓𑀸 𑀉𑀤𑁆𑀥𑀭𑀸𑀧𑁂𑀢𑀩𑁆𑀩𑀸𑀢𑀺 𑀲𑀼𑀔𑀼𑀫𑀧𑀮𑀸𑀮𑀫𑀺𑀲𑁆𑀲𑀥𑀜𑁆𑀜𑀸 𑀧𑀮𑀸𑀮𑀺𑀓𑀸 𑀧𑀮𑀸𑀧𑁂𑀢𑀩𑁆𑀩𑀸. 𑀑𑀧𑀼𑀦𑀸𑀧𑁂𑀢𑀩𑁆𑀩𑀦𑁆𑀢𑀺 𑀲𑀼𑀔𑀼𑀫𑀧𑀮𑀸𑀮𑀁 𑀅𑀧𑀦𑁂𑀢𑀩𑁆𑀩𑀁. 𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀢𑁆𑀣𑁂𑀦 𑀉𑀧𑀚𑀸𑀦𑀸𑀳𑀻𑀢𑀺 𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀢𑁆𑀣𑀁 𑀚𑀸𑀦𑀸𑀳𑀺. 𑀅𑀳𑀁 𑀢𑀬𑀸 𑀬𑀣𑀸𑀲𑀼𑀔𑀁 𑀧𑀩𑁆𑀩𑀚𑀸𑀳𑀻𑀢𑀺 𑀏𑀢𑁆𑀣 𑀅𑀳𑀁 𑀢𑀬𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀲𑀳𑀸𑀬𑀲𑀺𑀦𑁂𑀳𑁂𑀦 𑀲𑀳𑀲𑀸 𑀯𑀢𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀧𑀼𑀦 𑀭𑀚𑁆𑀚𑀲𑀺𑀭𑀺𑀮𑁄𑀪𑁂𑀦 𑀧𑀭𑀺𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑁄 ‘‘𑀅𑀳𑀁 𑀢𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 𑀲𑁂𑀲𑀁 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁩𑁧. 𑀦𑀺𑀧𑁆𑀧𑀸𑀢𑀺𑀢𑀸𑀢𑀺 𑀦𑀺𑀓𑁆𑀔𑀫𑀺𑀢𑀸. 𑀫𑀸𑀦𑀲𑁆𑀲𑀺𑀦𑁄𑀢𑀺 𑀫𑀸𑀦𑀲𑁆𑀲𑀬𑀺𑀦𑁄; 𑀫𑀸𑀦𑀦𑀺𑀲𑁆𑀲𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁨. 𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀢𑀢𑀺𑀬𑀫𑀕𑁆𑀕𑁂𑀦 𑀲𑀫𑀽𑀳𑀢𑀢𑁆𑀢𑀸 𑀬𑀲𑁆𑀲 𑀘𑀺𑀢𑁆𑀢𑁂 𑀓𑁄𑀧𑀸 𑀦 𑀲𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀪𑀯𑁄𑀢𑀺 𑀲𑀫𑁆𑀧𑀢𑁆𑀢𑀺, 𑀯𑀺𑀪𑀯𑁄𑀢𑀺 𑀯𑀺𑀧𑀢𑁆𑀢𑀺; 𑀢𑀣𑀸 𑀪𑀯𑁄𑀢𑀺 𑀯𑀼𑀟𑁆𑀠𑀺, 𑀯𑀺𑀪𑀯𑁄𑀢𑀺 𑀳𑀸𑀦𑀺; 𑀪𑀯𑁄𑀢𑀺 𑀲𑀲𑁆𑀲𑀢𑀁, 𑀯𑀺𑀪𑀯𑁄𑀢𑀺 𑀉𑀘𑁆𑀙𑁂𑀤𑁄; 𑀪𑀯𑁄𑀢𑀺 𑀧𑀼𑀜𑁆𑀜𑀁, 𑀯𑀺𑀪𑀯𑁄𑀢𑀺 𑀧𑀸𑀧𑀁; 𑀯𑀺𑀪𑀯𑁄𑀢𑀺 𑀘 𑀅𑀪𑀯𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀢𑀲𑁆𑀫𑀸 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀏𑀢𑁆𑀣 𑀬𑀸 𑀏𑀲𑀸 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀼𑀟𑁆𑀠𑀺𑀳𑀸𑀦𑀺𑀲𑀲𑁆𑀲𑀢𑀼𑀘𑁆𑀙𑁂𑀤𑀧𑀼𑀜𑁆𑀜𑀧𑀸𑀧𑀯𑀲𑁂𑀦 𑀇𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀪𑀯𑀸𑀪𑀯𑀢𑀸 𑀯𑀼𑀘𑁆𑀘𑀢𑀺; 𑀘𑀢𑀽𑀳𑀺𑀧𑀺 𑀫𑀕𑁆𑀕𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀢𑁂𑀦 𑀢𑁂𑀦 𑀦𑀬𑁂𑀦 𑀢𑀁 𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀸𑀦𑀼𑀪𑀯𑀦𑁆𑀢𑀻𑀢𑀺 𑀦 𑀲𑀫𑁆𑀧𑀸𑀧𑀼𑀡𑀦𑁆𑀢𑀺; 𑀢𑀲𑁆𑀲 𑀤𑀲𑁆𑀲𑀦𑀁 𑀤𑁂𑀯𑀸𑀦𑀫𑁆𑀧𑀺 𑀤𑀼𑀮𑁆𑀮𑀪𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁩𑁩. 𑀅𑀳𑀺𑀫𑁂𑀔𑀮𑀺𑀓𑀸𑀢𑀺 𑀅𑀳𑀺𑀁 𑀓𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀘𑁆𑀙𑀗𑁆𑀕𑁂𑀢𑀺 𑀅𑀗𑁆𑀓𑁂.

𑁩𑁩𑁪. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀲𑀫𑁆𑀫𑀸𑀦𑁂𑀢𑀺. 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀻𑀢𑀺 𑀬𑀁 𑀲𑁄 𑀓𑀭𑀺𑀲𑁆𑀲𑀢𑀺.

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀸𑀲𑀦𑀻𑀬𑀓𑀫𑁆𑀫𑀸𑀤𑀺𑀓𑀣𑀸

𑁩𑁩𑁬. 𑀔𑁂𑀴𑀸𑀲𑀓𑀲𑁆𑀲𑀸𑀢𑀺 𑀏𑀢𑁆𑀣 𑀫𑀺𑀘𑁆𑀙𑀸𑀚𑀻𑀯𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀅𑀭𑀺𑀬𑁂𑀳𑀺 𑀯𑀦𑁆𑀢𑀩𑁆𑀩𑀸 𑀔𑁂𑀴𑀲𑀤𑀺𑀲𑀸, 𑀢𑀣𑀸𑀭𑀽𑀧𑁂 𑀧𑀘𑁆𑀘𑀬𑁂 𑀅𑀬𑀁 𑀅𑀚𑁆𑀛𑁄𑀳𑀭𑀢𑀻𑀢𑀺 𑀓𑀢𑁆𑀯𑀸 𑀔𑁂𑀴𑀸𑀲𑀓𑁄𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑁄.

𑁩𑁪𑁦. 𑀧𑀢𑁆𑀣𑀤𑁆𑀥𑁂𑀦 𑀓𑀸𑀬𑁂𑀦𑀸𑀢𑀺 𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑁂𑀦 𑀦𑀺𑀘𑁆𑀘𑀮𑁂𑀦 𑀓𑀸𑀬𑁂𑀦.

𑁩𑁪𑁨. 𑀫𑀬𑀁 𑀔𑁄 𑀪𑀡𑁂 𑀭𑀸𑀚𑀜𑀸𑀢𑀓𑀸 𑀦𑀸𑀫𑀸𑀢𑀺 𑀭𑀸𑀚𑀸 𑀅𑀫𑁆𑀳𑁂 𑀚𑀸𑀦𑀸𑀢𑀻𑀢𑀺 𑀭𑀸𑀚𑀜𑀸𑀢𑀓𑀲𑁆𑀲 𑀪𑀸𑀯𑁂𑀦 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑀦𑁆𑀢𑁄 𑀆𑀳. 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁄𑀢𑀺 𑀩𑀦𑁆𑀥𑀦𑁂 𑀦𑀺𑀘𑁆𑀘𑀮𑁂 𑀓𑀢𑁆𑀯𑀸.

𑀤𑀼𑀓𑁆𑀔𑀜𑁆𑀳𑀺 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄𑀢𑀺 𑀪𑁄 𑀓𑀼𑀜𑁆𑀚𑀭 𑀩𑀼𑀤𑁆𑀥𑀦𑀸𑀕𑀁 𑀆𑀲𑀸𑀤𑀦𑀁 𑀯𑀥𑀓𑀘𑀺𑀢𑁆𑀢𑁂𑀦 𑀉𑀧𑀕𑀫𑀦𑀁 𑀦𑀸𑀫 𑀤𑀼𑀓𑁆𑀔𑀁. 𑀦𑀸𑀕𑀳𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀦𑀸𑀕𑀁 𑀖𑀸𑀢𑀓𑀲𑁆𑀲.

𑀧𑀝𑀺𑀓𑀼𑀝𑀺𑀬𑁄𑀯 𑀑𑀲𑀓𑁆𑀓𑀻𑀢𑀺 𑀢𑀣𑀸𑀕𑀢𑀸𑀪𑀺𑀫𑀼𑀔𑁄𑀬𑁂𑀯 𑀧𑀺𑀝𑁆𑀞𑀺𑀫𑁂𑀳𑀺 𑀧𑀸𑀤𑁂𑀳𑀺 𑀅𑀯𑀲𑀓𑁆𑀓𑀺. 𑀅𑀮𑀓𑁆𑀔𑀺𑀓𑁄𑀢𑀺 𑀏𑀢𑁆𑀣 𑀦 𑀮𑀓𑁆𑀔𑁂𑀢𑀻𑀢𑀺 𑀅𑀮𑀓𑁆𑀔𑀺𑀓𑁄; 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄, 𑀅𑀳𑀁 𑀧𑀸𑀧𑀓𑀫𑁆𑀫𑀁 𑀓𑀭𑁄𑀫𑀻𑀢𑀺 𑀦 𑀚𑀸𑀦𑀸𑀢𑀺. 𑀦 𑀮𑀓𑁆𑀔𑀺𑀢𑀩𑁆𑀩𑁄𑀢𑀺 𑀯𑀸 𑀅𑀮𑀓𑁆𑀔𑀺𑀓𑁄; 𑀦 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁩𑁪𑁩. 𑀢𑀺𑀓𑀪𑁄𑀚𑀦𑀦𑁆𑀢𑀺 𑀏𑀢𑁆𑀣 𑀢𑀻𑀳𑀺 𑀚𑀦𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀚𑀦𑀁. 𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺. 𑀕𑀡𑀪𑁄𑀚𑀦𑁂 𑀧𑀦 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀧𑀜𑁆𑀘𑀯𑀢𑁆𑀣𑀼𑀬𑀸𑀘𑀦𑀓𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸. 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀁 𑀧𑀼𑀜𑁆𑀜𑀁. 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀻𑀢𑀺 𑀆𑀬𑀼𑀓𑀧𑁆𑀧𑀫𑁂𑀯.

𑀧𑀓𑀸𑀲𑀦𑀻𑀬𑀓𑀫𑁆𑀫𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑁂𑀤𑀓𑀓𑀣𑀸

𑁩𑁪𑁪. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑁄 𑀓𑀺𑀭 𑀏𑀯𑀁 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀆𑀯𑁂𑀡𑀺𑀓𑀁 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀕𑀢𑁄, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁩𑁪𑁫. 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻𑀢𑀺 𑀘𑀺𑀭𑀦𑀺𑀲𑀚𑁆𑀚𑀸𑀬 𑀯𑁂𑀤𑀦𑀸𑀪𑀺𑀪𑀽𑀢𑀸 𑀩𑀸𑀥𑀢𑀺. 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻𑀢𑀺 𑀢𑀁 𑀅𑀳𑀁 𑀧𑀲𑀸𑀭𑁂𑀲𑁆𑀲𑀸𑀫𑀺. 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀻 𑀦𑀸𑀫 ‘‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀢𑀣𑀸𑀧𑀺 𑀢𑁂 𑀫𑀦𑁄’’𑀢𑀺 𑀏𑀯𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀸 𑀥𑀫𑁆𑀫𑀤𑁂𑀲𑀦𑀸.

𑁩𑁪𑁬. 𑀫𑀫𑀸𑀦𑀼𑀓𑀼𑀩𑁆𑀩𑀦𑁆𑀢𑀺 𑀫𑀫𑀸𑀦𑀼𑀓𑀺𑀭𑀺𑀬𑀁 𑀓𑀼𑀭𑀼𑀫𑀸𑀦𑁄. 𑀓𑀧𑀡𑁄𑀢𑀺 𑀤𑀼𑀓𑁆𑀔𑀺𑀢𑁄. 𑀫𑀳𑀸𑀯𑀭𑀸𑀳𑀲𑁆𑀲𑀸𑀢𑀺 𑀫𑀳𑀸𑀦𑀸𑀕𑀲𑁆𑀲. 𑀫𑀳𑀺𑀁 𑀯𑀺𑀓𑀼𑀩𑁆𑀩𑀢𑁄𑀢𑀺 𑀧𑀣𑀯𑀺𑀁 𑀧𑀤𑀸𑀮𑁂𑀦𑁆𑀢𑀲𑁆𑀲. 𑀪𑀺𑀲𑀁 𑀖𑀲𑀫𑀸𑀦𑀲𑁆𑀲𑀸𑀢𑀺 𑀪𑀺𑀲𑀁 𑀔𑀸𑀤𑀦𑁆𑀢𑀲𑁆𑀲. 𑀦𑀤𑀻𑀲𑀼 𑀚𑀕𑁆𑀕𑀢𑁄𑀢𑀺 𑀏𑀢𑁆𑀣 𑀲𑁄 𑀓𑀺𑀭 𑀳𑀢𑁆𑀣𑀺𑀦𑀸𑀕𑁄 𑀲𑀸𑀬𑀦𑁆𑀳𑀲𑀫𑀬𑀁 𑀢𑀁 𑀦𑀤𑀺𑀦𑀸𑀫𑀓𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀓𑀺𑀮𑀦𑁆𑀢𑁄 𑀲𑀩𑁆𑀩𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀚𑀸𑀮𑀺𑀓𑀁 𑀓𑀭𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀤𑀻𑀲𑀼 𑀚𑀕𑁆𑀕𑀢𑁄’’𑀢𑀺.

𑁩𑁪𑁭. 𑀲𑀼𑀢𑀸𑀢𑀺 𑀲𑁄𑀢𑀸. 𑀅𑀲𑀦𑁆𑀤𑀺𑀤𑁆𑀥𑁄 𑀘 𑀅𑀓𑁆𑀔𑀸𑀢𑀻𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁄 𑀳𑀼𑀢𑁆𑀯𑀸 𑀅𑀓𑁆𑀔𑀸𑀢𑀺 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀬𑁄𑀚𑁂𑀢𑁆𑀯𑀸.

𑁩𑁫𑁦. 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀧𑀸𑀬𑀺𑀓𑁄. 𑀏𑀯𑀁 𑀦𑁂𑀭𑀬𑀺𑀓𑁄. 𑀓𑀧𑁆𑀧𑀁 𑀞𑀲𑁆𑀲𑀢𑀻𑀢𑀺 𑀓𑀧𑁆𑀧𑀝𑁆𑀞𑁄. 𑀇𑀤𑀸𑀦𑀺 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀸𑀧𑀺 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁂𑀓𑀺𑀘𑁆𑀙𑁄.

𑀫𑀸 𑀚𑀸𑀢𑀼 𑀓𑁄𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺 𑀫𑀸 𑀓𑀤𑀸𑀘𑀺𑀧𑀺 𑀓𑁄𑀘𑀺 𑀲𑀢𑁆𑀢𑁄 𑀮𑁄𑀓𑀲𑁆𑀫𑀺𑀁. 𑀉𑀤𑀧𑀚𑁆𑀚𑀣𑀸𑀢𑀺 𑀉𑀧𑀧𑀚𑁆𑀚𑀣. 𑀚𑀮𑀁𑀯 𑀬𑀲𑀲𑀸 𑀅𑀝𑁆𑀞𑀸𑀢𑀺 𑀬𑀲𑀲𑀸 𑀚𑀮𑀦𑁆𑀢𑁄 𑀯𑀺𑀬 𑀞𑀺𑀢𑁄. 𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢𑀦𑁆𑀢𑀺 ‘‘𑀈𑀤𑀺𑀲𑁄 𑀤𑁂𑀯𑀤𑀢𑁆𑀢𑁄’’𑀢𑀺 𑀪𑀕𑀯𑀢𑀸 𑀲𑀼𑀢𑀫𑁆𑀧𑀺 𑀅𑀢𑁆𑀣𑀺, 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁. 𑀲𑁄 𑀧𑀫𑀸𑀤𑀫𑀦𑀼𑀘𑀺𑀡𑁆𑀡𑁄𑀢𑀺 𑀏𑀢𑁆𑀣 𑀧𑀫𑀸𑀤𑀁 𑀅𑀦𑀼𑀘𑀺𑀦𑀸𑀢𑀻𑀢𑀺 𑀅𑀦𑀼𑀘𑀺𑀡𑁆𑀡𑁄, 𑀧𑀫𑀸𑀤𑁄 𑀅𑀧𑁆𑀧𑀳𑀻𑀦𑁄𑀢𑀺 𑀅𑀢𑁆𑀣𑁄. 𑀆𑀲𑀚𑁆𑀚 𑀦𑀦𑁆𑀢𑀺 𑀧𑀸𑀧𑀓𑁂𑀦 𑀘𑀺𑀢𑁆𑀢𑁂𑀦 𑀧𑀢𑁆𑀯𑀸, 𑀯𑀺𑀲𑁄𑀲𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀆𑀲𑀻𑀲𑀸𑀬𑀁 𑀅𑀢𑀻𑀢𑀯𑀘𑀦𑀁. 𑀪𑁂𑀲𑁆𑀫𑀸𑀢𑀺 𑀪𑀬𑀸𑀦𑀓𑁄.

𑀲𑀗𑁆𑀖𑀪𑁂𑀤𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀧𑀜𑁆𑀳𑀸𑀓𑀣𑀸

𑁩𑁫𑁧. 𑀏𑀓𑀢𑁄 𑀉𑀧𑀸𑀮𑀺 𑀏𑀓𑁄𑀢𑀺 𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑁂 𑀏𑀓𑁄. 𑀏𑀓𑀢𑁄 𑀤𑁆𑀯𑁂𑀢𑀺 𑀅𑀥𑀫𑁆𑀫𑀯𑀸𑀤𑀺𑀧𑀓𑁆𑀔𑁂 𑀤𑁆𑀯𑁂. 𑀘𑀢𑀼𑀢𑁆𑀣𑁄 𑀅𑀦𑀼𑀲𑁆𑀲𑀸𑀯𑁂𑀢𑀻𑀢𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀅𑀥𑀫𑁆𑀫𑀯𑀸𑀤𑀺𑀘𑀢𑀼𑀢𑁆𑀣𑁄 𑀳𑀼𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑁂𑀢𑀺; 𑀅𑀦𑀼𑀦𑀬𑀦𑁆𑀢𑁄 𑀲𑀸𑀯𑁂𑀢𑀺 ‘‘𑀦 𑀢𑀼𑀫𑁆𑀳𑀸𑀓𑀁𑀬𑁂𑀯 𑀦𑀭𑀓𑀪𑀬𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀫𑁆𑀧𑀺 𑀅𑀢𑁆𑀣𑀺, 𑀦 𑀅𑀫𑁆𑀳𑀸𑀓𑀁 𑀅𑀯𑀻𑀘𑀺𑀫𑀕𑁆𑀕𑁄 𑀧𑀺𑀳𑀺𑀢𑁄, 𑀦 𑀫𑀬𑀁 𑀅𑀓𑀼𑀲𑀮𑀸 𑀦 𑀪𑀸𑀬𑀸𑀫. 𑀬𑀤𑀺 𑀳𑀺 𑀅𑀬𑀁 𑀅𑀥𑀫𑁆𑀫𑁄 𑀅𑀯𑀺𑀦𑀬𑁄 𑀅𑀲𑀢𑁆𑀣𑀼𑀲𑀸𑀲𑀦𑀁 𑀯𑀸 𑀪𑀯𑁂𑀬𑁆𑀬, 𑀦 𑀫𑀬𑀁 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀩𑁄𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀮𑀸𑀓𑀁 𑀕𑀸𑀳𑁂𑀢𑀻𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀧𑀦 ‘‘𑀇𑀤𑀁 𑀕𑀡𑁆𑀳𑀣, 𑀇𑀤𑀁 𑀭𑁄𑀘𑁂𑀣𑀸’’𑀢𑀺 𑀯𑀤𑀦𑁆𑀢𑁄 𑀲𑀮𑀸𑀓𑀁 𑀕𑀸𑀳𑁂𑀢𑀺.

𑀏𑀓𑀢𑁄 𑀉𑀧𑀸𑀮𑀺 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀔𑁄 𑀉𑀧𑀸𑀮𑀺 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸𑀢𑀺 𑀏𑀯𑀁 𑀳𑁄𑀢𑀺; 𑀦 𑀧𑀦 𑀏𑀢𑁆𑀢𑀸𑀯𑀢𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺.

𑀪𑀺𑀓𑁆𑀔𑀼 𑀔𑁄 𑀉𑀧𑀸𑀮𑀺 𑀧𑀓𑀢𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺 𑀏𑀢𑁆𑀣 𑀲𑀺𑀬𑀸 𑀏𑀯𑀁 ‘‘𑀤𑁂𑀯𑀤𑀢𑁆𑀢𑁄 𑀓𑀣𑀁 𑀧𑀓𑀢𑀢𑁆𑀢𑁄’’𑀢𑀺. 𑀓𑀣𑀁 𑀢𑀸𑀯 𑀦 𑀧𑀓𑀢𑀢𑁆𑀢𑁄, 𑀭𑀜𑁆𑀜𑁄 𑀖𑀸𑀢𑀸𑀧𑀺𑀢𑀢𑁆𑀢𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀲𑁆𑀲 𑀘 𑀓𑀢𑀢𑁆𑀢𑀸𑀢𑀺? 𑀢𑀢𑁆𑀣 𑀯𑀤𑀸𑀫 𑁋 𑀆𑀡𑀢𑁆𑀢𑀺𑀬𑀸 𑀢𑀸𑀯 𑀯𑀺𑀭𑀤𑁆𑀥𑀢𑁆𑀢𑀸 𑀭𑀜𑁆𑀜𑁄 𑀖𑀸𑀢𑀸𑀧𑀦𑀁 𑀦𑀢𑁆𑀣𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀼𑀫𑀸𑀭, 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸 𑀭𑀸𑀚𑀸 𑀳𑁄𑀳𑀺, 𑀅𑀳𑀁 𑀪𑀕𑀯𑀦𑁆𑀢𑀁 𑀳𑀦𑁆𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀜𑁆𑀳𑀺 𑀢𑀲𑁆𑀲 𑀆𑀡𑀢𑁆𑀢𑀺. 𑀓𑀼𑀫𑀸𑀭𑁄 𑀧𑀦 𑀭𑀸𑀚𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀧𑀺𑀢𑀭𑀁 𑀫𑀸𑀭𑁂𑀲𑀺; 𑀏𑀯𑀁 𑀢𑀸𑀯 𑀆𑀡𑀢𑁆𑀢𑀺𑀬𑀸 𑀯𑀺𑀭𑀤𑁆𑀥𑀢𑁆𑀢𑀸 𑀭𑀜𑁆𑀜𑁄 𑀖𑀸𑀢𑀸𑀧𑀦𑀁 𑀦𑀢𑁆𑀣𑀺. 𑀭𑀼𑀳𑀺𑀭𑀼𑀧𑁆𑀧𑀸𑀤𑁂 𑀧𑀦 𑀓𑀢𑀫𑀢𑁆𑀢𑁂𑀬𑁂𑀯 𑀭𑀼𑀳𑀺𑀭𑀼𑀧𑁆𑀧𑀸𑀤𑀧𑀘𑁆𑀘𑀬𑀸 𑀪𑀕𑀯𑀢𑀸 𑀅𑀪𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸, 𑀦 𑀘 𑀲𑀓𑁆𑀓𑀸 𑀪𑀕𑀯𑀢𑁄 𑀯𑀘𑀦𑀁 𑀯𑀺𑀦𑀸𑀬𑁂𑀯 𑀢𑀲𑁆𑀲 𑀅𑀪𑀩𑁆𑀩𑀢𑀸 𑀆𑀭𑁄𑀧𑁂𑀢𑀼𑀁.

‘‘𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑁋

𑀇𑀤𑀁 𑀧𑀦 𑀪𑀕𑀯𑀢𑀸 𑀲𑀗𑁆𑀖𑀪𑁂𑀤𑀢𑁄 𑀧𑀘𑁆𑀙𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀓𑀢𑀢𑁆𑀢𑁂𑀦𑁂𑀯 𑀢𑁂𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺.

𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀻𑀢𑀺𑀆𑀤𑀻𑀲𑀼 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀸𑀯 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀥𑀫𑁆𑀫𑁄, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀥𑀫𑁆𑀫𑁄. 𑀢𑀣𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀥𑀫𑁆𑀫𑁄 𑀦𑀸𑀫; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀢𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀢𑀬𑁄 𑀇𑀤𑁆𑀥𑀺𑀧𑀸𑀤𑀸, 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀙 𑀩𑀮𑀸𑀦𑀺, 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸, 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀘 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀦𑀸, 𑀧𑀜𑁆𑀘 𑀦𑀻𑀯𑀭𑀡𑀸, 𑀲𑀢𑁆𑀢 𑀅𑀦𑀼𑀲𑀬𑀸, 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀢𑀺 𑀘 𑀅𑀬𑀁 𑀅𑀥𑀫𑁆𑀫𑁄.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀓𑀭𑀺𑀲𑁆𑀲𑀸𑀫; 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀓𑀼𑀮𑀁 𑀦𑀺𑀲𑁆𑀲𑀸𑀬 𑀦𑀺𑀬𑁆𑀬𑀸𑀦𑀺𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀜𑁆𑀘 𑀮𑁄𑀓𑁂 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑀬𑀦𑁆𑀢𑀸 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀢𑀣𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀘 𑀏𑀓𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀅𑀥𑀫𑁆𑀫𑁄𑀢𑀺 𑀓𑀣𑁂𑀦𑁆𑀢𑀸 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀧𑀦 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀥𑀫𑁆𑀫𑁄 𑀦𑀸𑀫, 𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀅𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀅𑀥𑀫𑁆𑀫𑁄 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀭𑀸𑀕𑀯𑀺𑀦𑀬𑁄 𑀤𑁄𑀲𑀯𑀺𑀦𑀬𑁄 𑀫𑁄𑀳𑀯𑀺𑀦𑀬𑁄 𑀲𑀁𑀯𑀭𑁄 𑀧𑀳𑀸𑀦𑀁 𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫, 𑀭𑀸𑀕𑀸𑀤𑀻𑀦𑀁 𑀅𑀯𑀺𑀦𑀬𑁄 𑀅𑀲𑀁𑀯𑀭𑁄 𑀅𑀧𑁆𑀧𑀳𑀸𑀦𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀢𑁆𑀢𑀺 𑀲𑀻𑀫𑀸𑀲𑀫𑁆𑀧𑀢𑁆𑀢𑀺 𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀻𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫, 𑀯𑀢𑁆𑀣𑀼𑀯𑀺𑀧𑀢𑁆𑀢𑀺…𑀧𑁂… 𑀧𑀭𑀺𑀲𑀸𑀯𑀺𑀧𑀢𑁆𑀢𑀻𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸… 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀢𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀢𑀬𑁄 𑀇𑀤𑁆𑀥𑀺𑀧𑀸𑀤𑀸, 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀙 𑀩𑀮𑀸𑀦𑀺, 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸, 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀤𑁆𑀯𑁂 𑀅𑀦𑀺𑀬𑀢𑀸, 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦; 𑀢𑀬𑁄 𑀧𑀸𑀭𑀸𑀚𑀺𑀓𑀸, 𑀘𑀼𑀤𑁆𑀤𑀲 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀢𑀬𑁄 𑀅𑀦𑀺𑀬𑀢𑀸, 𑀏𑀓𑀢𑁆𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑁂𑀯𑀲𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀯𑁄𑀮𑁄𑀓𑀦𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸, 𑀚𑀸𑀢𑀓𑀓𑀣𑀸𑀢𑀺 𑀇𑀤𑀁 𑀆𑀘𑀺𑀡𑁆𑀡𑀁; 𑀦 𑀤𑁂𑀯𑀲𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁…𑀧𑁂… 𑀦 𑀚𑀸𑀢𑀓𑀓𑀣𑀸𑀢𑀺 𑀇𑀤𑀁 𑀅𑀦𑀸𑀘𑀺𑀡𑁆𑀡𑀁. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀘𑀸𑀭𑀺𑀬𑀧𑀓𑁆𑀓𑀫𑀦𑀁, 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀬𑀧𑀓𑁆𑀓𑀫𑀦𑀁, 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀦𑁆𑀢𑀺 𑀇𑀤𑀁 𑀆𑀘𑀺𑀡𑁆𑀡𑀁; 𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀲𑁆𑀲 𑀅𑀓𑀭𑀡𑀁 𑀅𑀦𑀸𑀘𑀺𑀡𑁆𑀡𑀁 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀁 𑀦𑀸𑀫; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸…𑀧𑁂… 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀁 𑀦𑀸𑀫; 𑀢𑀬𑁄 𑀧𑀸𑀭𑀸𑀚𑀺𑀓𑀸…𑀧𑁂… 𑀏𑀓𑀢𑁆𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫.

‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲, 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀸 𑀅𑀦𑀸𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀺 𑀦𑀸𑀫. ‘‘𑀚𑀸𑀦𑀦𑁆𑀢𑀲𑁆𑀲, 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺 𑀆𑀧𑀢𑁆𑀢𑀺 𑀦𑀸𑀫. 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀮𑀳𑀼𑀓𑀸𑀧𑀢𑁆𑀢𑀺 𑀦𑀸𑀫, 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀕𑀭𑀼𑀓𑀸𑀧𑀢𑁆𑀢𑀺 𑀦𑀸𑀫. 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀸𑀯𑀲𑁂𑀲𑀸𑀧𑀢𑁆𑀢𑀺 𑀦𑀸𑀫, 𑀏𑀓𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀅𑀦𑀯𑀲𑁂𑀲𑀸𑀧𑀢𑁆𑀢𑀺 𑀦𑀸𑀫. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀦𑀸𑀫, 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀦𑀸𑀫.

𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀦𑁂𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀥𑀫𑁆𑀫𑀁 ‘‘𑀅𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑀬𑀦𑁆𑀢𑀸 ‘‘𑀥𑀫𑁆𑀫𑀁 𑀅𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀅𑀯𑀺𑀦𑀬𑀁 ‘‘𑀯𑀺𑀦𑀬𑁄 𑀅𑀬’’𑀦𑁆𑀢𑀺…𑀧𑁂… 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀁 ‘‘𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀅𑀬’’𑀦𑁆𑀢𑀺 𑀓𑀣𑀬𑀦𑁆𑀢𑀸 ‘‘𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻’’𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀏𑀯𑀁 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀯𑀸…𑀧𑁂… ‘‘𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻’’𑀢𑀺 𑀯𑀸 𑀤𑀻𑀧𑁂𑀢𑁆𑀯𑀸 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀁 𑀲𑀗𑁆𑀖𑀓𑀫𑁆𑀫𑀁 𑀏𑀓𑀲𑀻𑀫𑀸𑀬𑀁 𑀯𑀺𑀲𑀼𑀁 𑀓𑀭𑁄𑀦𑁆𑀢𑁂𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀧𑀓𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀅𑀧𑀓𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀲𑀁 𑀆𑀓𑀟𑁆𑀠𑀦𑁆𑀢𑀺, 𑀯𑀺𑀚𑀝𑁂𑀦𑁆𑀢𑀺, 𑀏𑀓𑀫𑀦𑁆𑀢𑀁 𑀉𑀲𑁆𑀲𑀸𑀭𑁂𑀦𑁆𑀢𑀺 𑀘. 𑀅𑀯𑀧𑀓𑀸𑀲𑀦𑁆𑀢𑀻𑀢𑀺 𑀅𑀢𑀺 𑀯𑀺𑀬 𑀧𑀓𑀸𑀲𑁂𑀦𑁆𑀢𑀺 𑀬𑀣𑀸 𑀯𑀺𑀲𑀁𑀲𑀝𑁆𑀞𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀺. 𑀆𑀯𑁂𑀦𑀺𑀦𑁆𑀢𑀺 𑀯𑀺𑀲𑀼𑀁. 𑀏𑀢𑁆𑀢𑀸𑀯𑀢𑀸 𑀔𑁄 𑀉𑀧𑀸𑀮𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀻𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀯𑀢𑁆𑀣𑀼𑀁 𑀤𑀻𑀧𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 ‘‘𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀮𑀸𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑁂 𑀓𑀢𑁂 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀧𑀭𑀺𑀯𑀸𑀭𑁂 𑀧𑀦 ‘‘𑀧𑀜𑁆𑀘𑀳𑀺 𑀉𑀧𑀸𑀮𑀺 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀇𑀫𑀺𑀦𑀸 𑀇𑀥 𑀯𑀼𑀢𑁆𑀢𑁂𑀦 𑀲𑀗𑁆𑀖𑀪𑁂𑀤𑀮𑀓𑁆𑀔𑀡𑁂𑀦 𑀅𑀢𑁆𑀣𑀢𑁄 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺. 𑀢𑀁 𑀧𑀦𑀲𑁆𑀲 𑀦𑀸𑀦𑀸𑀓𑀭𑀡𑀸𑀪𑀸𑀯𑀁 𑀢𑀢𑁆𑀣𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀧𑀸𑀮𑀺𑀧𑀜𑁆𑀳𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑀁

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸

𑁩𑁫𑁭. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀇𑀤𑀸𑀦𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀲𑀻𑀫𑀲𑀫𑀻𑀧𑀁 𑀤𑀲𑁆𑀲𑁂𑀢𑀺; 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀁 𑀧𑀢𑁆𑀯𑀸 𑀉𑀧𑀸𑀳𑀦𑀸𑀑𑀫𑀼𑀜𑁆𑀘𑀦𑀸𑀤𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁. 𑀕𑀳𑁂𑀢𑁆𑀯𑀸𑀢𑀺 𑀉𑀧𑀸𑀳𑀦𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀧𑀢𑁆𑀣𑀭𑀺𑀢𑀩𑁆𑀩𑀁. 𑀕𑁄𑀘𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 ‘‘𑀕𑁄𑀘𑀭𑀕𑀸𑀫𑁄 𑀆𑀲𑀦𑁆𑀦𑁂 𑀉𑀤𑀸𑀳𑀼 𑀤𑀽𑀭𑁂, 𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁 𑀉𑀤𑀸𑀳𑀼 𑀤𑀺𑀯𑀸’’𑀢𑀺 𑀏𑀯𑀁 𑀪𑀺𑀓𑁆𑀔𑀸𑀘𑀸𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀅𑀕𑁄𑀘𑀭𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀸 𑀕𑀸𑀫𑁄 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑁄 𑀯𑀸 𑀕𑀸𑀫𑁄; 𑀬𑀢𑁆𑀣 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀪𑀺𑀓𑁆𑀔𑀸 𑀤𑀺𑀬𑁆𑀬𑀢𑀺, 𑀲𑁄𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀧𑀸𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 ‘‘𑀓𑀺𑀁 𑀇𑀫𑀺𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀧𑀸𑀦𑀻𑀬𑀁𑀬𑁂𑀯 𑀧𑀺𑀯𑀦𑁆𑀢𑀺, 𑀦𑀳𑀸𑀦𑀸𑀤𑀺𑀧𑀭𑀺𑀪𑁄𑀕𑀫𑁆𑀧𑀺 𑀓𑀭𑁄𑀦𑁆𑀢𑀻’’𑀢𑀺 𑀏𑀯𑀁 𑀧𑀸𑀦𑀻𑀬𑀜𑁆𑀘𑁂𑀯 𑀧𑀭𑀺𑀪𑁄𑀚𑀦𑀻𑀬𑀜𑁆𑀘 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀓𑁂𑀲𑀼𑀘𑀺 𑀞𑀸𑀦𑁂𑀲𑀼 𑀯𑀸𑀴𑀫𑀺𑀕𑀸 𑀯𑀸 𑀅𑀫𑀦𑀼𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀓𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀓𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀁.

𑀩𑀳𑀺 𑀞𑀺𑀢𑁂𑀦𑀸𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀅𑀳𑀺𑀦𑁄 𑀯𑀸 𑀅𑀫𑀦𑀼𑀲𑁆𑀲𑀲𑁆𑀲 𑀯𑀸 𑀫𑀕𑁆𑀕𑀁 𑀤𑀢𑁆𑀯𑀸 𑀞𑀺𑀢𑁂𑀦 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄. 𑀲𑀘𑁂 𑀉𑀲𑁆𑀲𑀳𑀢𑀺 𑀲𑁄𑀥𑁂𑀢𑀩𑁆𑀩𑁄𑀢𑀺 𑀬𑀤𑀺 𑀲𑀓𑁆𑀓𑁄𑀢𑀺, 𑀲𑀩𑁆𑀩𑁄 𑀯𑀺𑀳𑀸𑀭𑁄 𑀲𑁄𑀥𑁂𑀢𑀩𑁆𑀩𑁄. 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑁄 𑀚𑀕𑁆𑀕𑀺𑀢𑀩𑁆𑀩𑁄. 𑀲𑀩𑁆𑀩𑀁 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀦 𑀤𑀲𑁆𑀲𑀺𑀢𑁂 𑀯𑀺𑀳𑀸𑀭𑀲𑁄𑀥𑀦𑀯𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄 𑀫𑀳𑀸𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁩𑁫𑁯. 𑀆𑀯𑀸𑀲𑀺𑀓𑀯𑀢𑁆𑀢𑁂 𑁋 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀯𑀼𑀟𑁆𑀠𑀢𑀭𑁂 𑀆𑀕𑀢𑁂 𑀘𑀻𑀯𑀭𑀓𑀫𑁆𑀫𑀁 𑀯𑀸 𑀦𑀯𑀓𑀫𑁆𑀫𑀁 𑀯𑀸 𑀞𑀧𑁂𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀦𑁆𑀢𑁂𑀦 𑀲𑀫𑁆𑀫𑀚𑁆𑀚𑀦𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀢𑀁 𑀓𑀸𑀢𑀼𑀁 𑀆𑀭𑀪𑀺𑀢𑀩𑁆𑀩𑀁. 𑀧𑀡𑁆𑀟𑀺𑀢𑁄 𑀳𑀺 𑀆𑀕𑀦𑁆𑀢𑀼𑀓𑁄 ‘‘𑀲𑀫𑁆𑀫𑀚𑁆𑀚𑀸𑀳𑀺 𑀢𑀸𑀯 𑀘𑁂𑀢𑀺𑀬𑀗𑁆𑀕𑀡’’𑀦𑁆𑀢𑀺 𑀯𑀓𑁆𑀔𑀢𑀺. 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁂𑀦 𑀧𑀦 𑀲𑀘𑁂 𑀦𑀸𑀢𑀺𑀆𑀢𑀼𑀭𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀪𑁂𑀲𑀚𑁆𑀚𑀁 𑀅𑀓𑀢𑁆𑀯𑀸 𑀯𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁. 𑀫𑀳𑀸𑀕𑀺𑀮𑀸𑀦𑀲𑁆𑀲 𑀧𑀦 𑀪𑁂𑀲𑀚𑁆𑀚𑀫𑁂𑀯 𑀓𑀸𑀢𑀩𑁆𑀩𑀁. 𑀧𑀡𑁆𑀟𑀺𑀢𑁄 𑀳𑀺 𑀆𑀕𑀦𑁆𑀢𑀼𑀓𑁄 ‘‘𑀓𑀭𑁄𑀳𑀺 𑀢𑀸𑀯 𑀪𑁂𑀲𑀚𑁆𑀚’’𑀦𑁆𑀢𑀺 𑀯𑀓𑁆𑀔𑀢𑀺. 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑁆𑀢𑁂𑀦 𑀲𑀘𑁂 𑀲𑀓𑀺𑀁 𑀆𑀦𑀻𑀢𑀁 𑀧𑀸𑀦𑀻𑀬𑀁 𑀲𑀩𑁆𑀩𑀁 𑀧𑀺𑀯𑀢𑀺, ‘‘𑀧𑀼𑀦 𑀆𑀦𑁂𑀫𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄𑀬𑁂𑀯. 𑀅𑀧𑀺𑀘 𑀩𑀻𑀚𑀦𑁂𑀦𑀧𑀺 𑀩𑀻𑀚𑀺𑀢𑀩𑁆𑀩𑁄, 𑀩𑀻𑀚𑀦𑁆𑀢𑁂𑀦 𑀲𑀓𑀺𑀁 𑀧𑀸𑀤𑀧𑀺𑀝𑁆𑀞𑀺𑀬𑀁 𑀩𑀻𑀚𑀺𑀢𑁆𑀯𑀸 𑀲𑀓𑀺𑀁 𑀫𑀚𑁆𑀛𑁂 𑀲𑀓𑀺𑀁 𑀲𑀻𑀲𑁂 𑀩𑀻𑀚𑀺𑀢𑀩𑁆𑀩𑀁, ‘‘𑀅𑀮𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂𑀦 𑀢𑀢𑁄 𑀫𑀦𑁆𑀤𑀢𑀭𑀁 𑀩𑀻𑀚𑀺𑀢𑀩𑁆𑀩𑀁. 𑀧𑀼𑀦 ‘‘𑀅𑀮’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀢𑀢𑁄 𑀫𑀦𑁆𑀤𑀢𑀭𑀁 𑀩𑀻𑀚𑀺𑀢𑀩𑁆𑀩𑀁. 𑀢𑀢𑀺𑀬𑀯𑀸𑀭𑀁 𑀯𑀼𑀢𑁆𑀢𑁂𑀦 𑀩𑀻𑀚𑀦𑀻 𑀞𑀧𑁂𑀢𑀩𑁆𑀩𑀸. 𑀧𑀸𑀤𑀸𑀧𑀺𑀲𑁆𑀲 𑀥𑁄𑀯𑀺𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑁄 𑀢𑁂𑀮𑀁 𑀅𑀢𑁆𑀣𑀺, 𑀢𑁂𑀦 𑀫𑀓𑁆𑀔𑁂𑀢𑀩𑁆𑀩𑀸. 𑀦𑁄 𑀘𑁂 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀓𑁂𑀦 𑀫𑀓𑁆𑀔𑁂𑀢𑀩𑁆𑀩𑀸. 𑀉𑀧𑀸𑀳𑀦𑀸𑀧𑀼𑀜𑁆𑀙𑀦𑀁 𑀧𑀦 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀢𑁂𑀦𑁂𑀯 𑀳𑁂𑀢𑁆𑀣 ‘‘𑀲𑀘𑁂 𑀉𑀲𑁆𑀲𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀉𑀧𑀸𑀳𑀦𑀸 𑀅𑀧𑀼𑀜𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. ‘‘𑀓𑀢𑁆𑀣 𑀫𑀬𑁆𑀳𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, ‘‘𑀏𑀢𑀁 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀧𑁆𑀨𑁄𑀝𑁂𑀢𑁆𑀯𑀸 𑀳𑀺 𑀧𑀢𑁆𑀣𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺𑀬𑁂𑀯.

𑀦𑀯𑀓𑀲𑁆𑀲 𑀯𑀢𑁆𑀢𑁂 𑁋 𑀧𑀸𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 ‘‘𑀏𑀢𑀁 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀺𑀯𑀸𑀳𑀻’’𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀭𑀺𑀪𑁄𑀚𑀦𑀻𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀫𑀳𑀸𑀆𑀯𑀸𑀲𑁂𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀁 𑀅𑀓𑀸𑀢𑀼𑀁 𑀦 𑀮𑀪𑀢𑀺.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀕𑀫𑀺𑀓𑀯𑀢𑁆𑀢𑀓𑀣𑀸

𑁩𑁬𑁦. 𑀕𑀫𑀺𑀓𑀯𑀢𑁆𑀢𑁂𑀲𑀼 𑀤𑀸𑀭𑀼𑀪𑀡𑁆𑀟𑀦𑁆𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁 𑀫𑀜𑁆𑀘𑀧𑀻𑀞𑀸𑀤𑀺. 𑀫𑀢𑁆𑀢𑀺𑀓𑀸𑀪𑀡𑁆𑀟𑀫𑁆𑀧𑀺 𑀭𑀚𑀦𑀪𑀸𑀚𑀦𑀸𑀤𑀺 𑀲𑀩𑁆𑀩𑀁 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀪𑁂𑀤𑀫𑁂𑀯. 𑀢𑀁 𑀲𑀩𑁆𑀩𑀁 𑀅𑀕𑁆𑀕𑀺𑀲𑀸𑀮𑀸𑀬 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑁄𑀯𑀲𑁆𑀲𑀓𑁂 𑀧𑀩𑁆𑀪𑀸𑀭𑁂𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁, 𑀬𑀢𑁆𑀣 𑀉𑀧𑀘𑀺𑀓𑀸 𑀦𑀸𑀭𑁄𑀳𑀦𑁆𑀢𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀘𑀢𑀽𑀲𑀼 𑀧𑀸𑀲𑀸𑀡𑀓𑁂𑀲𑀽𑀢𑀺𑀆𑀤𑀺 𑀉𑀧𑀘𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀧𑀡𑁆𑀡𑀲𑀸𑀮𑀸𑀤𑀺𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀧𑁆𑀧𑁂𑀯 𑀦𑀸𑀫 𑀅𑀗𑁆𑀕𑀸𑀦𑀺𑀧𑀺 𑀲𑁂𑀲𑁂𑀬𑁆𑀬𑀼𑀦𑁆𑀢𑀺 𑀅𑀬𑀁 𑀅𑀚𑁆𑀛𑁄𑀓𑀸𑀲𑁂 𑀞𑀧𑀺𑀢𑀫𑁆𑀳𑀺 𑀆𑀦𑀺𑀲𑀁𑀲𑁄. 𑀑𑀯𑀲𑁆𑀲𑀓𑀕𑁂𑀳𑁂 𑀧𑀦 𑀢𑀺𑀡𑁂𑀲𑀼 𑀘 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀲𑀼 𑀘 𑀉𑀧𑀭𑀺 𑀧𑀢𑀦𑁆𑀢𑁂𑀲𑀼 𑀫𑀜𑁆𑀘𑀧𑀻𑀞𑀸𑀦𑀁 𑀅𑀗𑁆𑀕𑀸𑀦𑀺𑀧𑀺 𑀯𑀺𑀦𑀲𑁆𑀲𑀦𑁆𑀢𑀺.

𑀕𑀫𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸

𑁩𑁬𑁨. 𑀅𑀦𑀼𑀫𑁄𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀇𑀤𑁆𑀥𑀁 𑀅𑀳𑁄𑀲𑀻𑀢𑀺 𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀺. 𑀘𑀢𑀽𑀳𑀺 𑀧𑀜𑁆𑀘𑀳𑀻𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂 𑀳𑁂𑀝𑁆𑀞𑀸 𑀧𑀝𑀺𑀧𑀸𑀝𑀺𑀬𑀸 𑀘𑀢𑀽𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀦𑀼𑀣𑁂𑀭𑁂 𑀦𑀺𑀲𑀺𑀦𑁆𑀦𑁂 𑀫𑀳𑀸𑀣𑁂𑀭𑁂𑀦 𑀘 𑀳𑁂𑀝𑁆𑀞𑀸 𑀘 𑀢𑀻𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀧𑀜𑁆𑀘𑀫𑁂 𑀦𑀺𑀲𑀺𑀦𑁆𑀦𑁂 𑀉𑀧𑀭𑀺 𑀘𑀢𑀽𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀗𑁆𑀖𑀢𑁆𑀣𑁂𑀭𑁂𑀦 𑀳𑁂𑀝𑁆𑀞𑀸 𑀤𑀳𑀭𑀪𑀺𑀓𑁆𑀔𑀼𑀲𑁆𑀫𑀺𑀁 𑀅𑀚𑁆𑀛𑀺𑀝𑁆𑀞𑁂𑀧𑀺 𑀲𑀗𑁆𑀖𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀘𑀢𑀽𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀫𑁂𑀯. 𑀲𑀘𑁂 𑀧𑀦 𑀅𑀦𑀼𑀫𑁄𑀤𑀓𑁄 𑀪𑀺𑀓𑁆𑀔𑀼 ‘‘𑀕𑀘𑁆𑀙𑀣 𑀪𑀦𑁆𑀢𑁂, 𑀆𑀕𑀫𑁂𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀣𑁂𑀭𑁂𑀦 ‘‘𑀕𑀘𑁆𑀙𑀸𑀫 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀕𑀘𑁆𑀙𑀣𑀸’’𑀢𑀺 𑀯𑀤𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀩𑀳𑀺𑀕𑀸𑀫𑁂 𑀆𑀕𑀫𑁂𑀲𑁆𑀲𑀸𑀫𑀸’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸𑀧𑀺 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 ‘‘𑀢𑀼𑀫𑁆𑀳𑁂 𑀢𑀲𑁆𑀲 𑀆𑀕𑀫𑀦𑀁 𑀆𑀕𑀫𑁂𑀣𑀸’’𑀢𑀺 𑀯𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀭𑀼𑀘𑀺𑀓𑁂𑀦 𑀏𑀓𑁂𑀦 𑀅𑀦𑀼𑀫𑁄𑀤𑀦𑀁 𑀓𑀸𑀭𑁂𑀦𑁆𑀢𑀺, 𑀦𑁂𑀯 𑀢𑀲𑁆𑀲 𑀅𑀦𑀼𑀫𑁄𑀤𑀢𑁄 𑀆𑀧𑀢𑁆𑀢𑀺, 𑀦 𑀫𑀳𑀸𑀣𑁂𑀭𑀲𑁆𑀲 𑀪𑀸𑀭𑁄 𑀳𑁄𑀢𑀺. 𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀬𑀫𑁂𑀯 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀓𑀣𑀸𑀧𑁂𑀦𑁆𑀢𑁂𑀲𑀼 𑀫𑀳𑀸𑀣𑁂𑀭𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄, 𑀫𑀳𑀸𑀣𑁂𑀭𑁂𑀦 𑀘 𑀅𑀦𑀼𑀫𑁄𑀤𑀦𑀸𑀬 𑀅𑀚𑁆𑀛𑀺𑀝𑁆𑀞𑁄𑀯 𑀆𑀕𑀫𑁂𑀢𑀩𑁆𑀩𑁄𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁. 𑀯𑀘𑁆𑀘𑀺𑀢𑁄𑀢𑀺 𑀲𑀜𑁆𑀚𑀸𑀢𑀯𑀘𑁆𑀘𑁄; 𑀯𑀘𑁆𑀘𑀧𑀻𑀴𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸

𑁩𑁬𑁪. 𑀪𑀢𑁆𑀢𑀕𑁆𑀕𑀯𑀢𑁆𑀢𑁂 ‘‘𑀅𑀦𑁆𑀢𑁄𑀕𑀸𑀫𑁄 𑀯𑀸 𑀳𑁄𑀢𑀼 𑀯𑀺𑀳𑀸𑀭𑁄 𑀯𑀸, 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁂𑀦 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀦𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀸𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀢𑀺𑀅𑀮𑁆𑀮𑀻𑀬𑀺𑀢𑁆𑀯𑀸 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀫𑀳𑀸𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀸𑀲𑀦𑁂𑀦 𑀲𑀫𑀓𑀁 𑀆𑀲𑀦𑀁 𑀳𑁄𑀢𑀺, 𑀩𑀳𑀽𑀲𑀼 𑀆𑀲𑀦𑁂𑀲𑀼 𑀲𑀢𑀺 𑀏𑀓𑀁 𑀤𑁆𑀯𑁂 𑀆𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀅𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀸𑀣𑁂𑀭𑁂𑀦 𑀦𑀺𑀲𑀻𑀤𑀸𑀢𑀺 𑀯𑀼𑀢𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦𑁄 𑀘𑁂 𑀫𑀳𑀸𑀣𑁂𑀭𑁄 𑀯𑀤𑀢𑀺, ‘‘𑀇𑀤𑀁, 𑀪𑀦𑁆𑀢𑁂, 𑀆𑀲𑀦𑀁 𑀉𑀘𑁆𑀘’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀦𑀺𑀲𑀻𑀤𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀏𑀯𑀁 𑀆𑀧𑀼𑀘𑁆𑀙𑀺𑀢𑁂𑀧𑀺 𑀦 𑀯𑀤𑀢𑀺, 𑀦𑀺𑀲𑀻𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺; 𑀫𑀳𑀸𑀣𑁂𑀭𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀦𑀯𑀓𑁄 𑀳𑀺 𑀏𑀯𑀭𑀽𑀧𑁂 𑀆𑀲𑀦𑁂 𑀅𑀦𑀸𑀧𑀼𑀘𑁆𑀙𑀸 𑀦𑀺𑀲𑀻𑀤𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀣𑁂𑀭𑁄 𑀆𑀧𑀼𑀘𑁆𑀙𑀺𑀢𑁂 𑀅𑀦𑀦𑀼𑀚𑀸𑀦𑀦𑁆𑀢𑁄. 𑀦 𑀲𑀗𑁆𑀖𑀸𑀝𑀺𑀁 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀦 𑀲𑀗𑁆𑀖𑀸𑀝𑀺𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀉𑀪𑁄𑀳𑀺 𑀳𑀢𑁆𑀣𑁂𑀳𑀻𑀢𑀺 𑀧𑀢𑁆𑀢𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀓𑁆𑀔𑀺𑀡𑁄𑀤𑀓𑀁 𑀧𑀦 𑀧𑀼𑀭𑀢𑁄 𑀆𑀥𑀸𑀭𑀓𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀸𑀥𑀼𑀓𑀦𑁆𑀢𑀺 𑀉𑀤𑀓𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦.

𑀲𑀽𑀧𑀲𑁆𑀲 𑀑𑀓𑀸𑀲𑁄𑀢𑀺 𑀬𑀣𑀸 𑀲𑀽𑀧𑀲𑁆𑀲 𑀑𑀓𑀸𑀲𑁄 𑀳𑁄𑀢𑀺; 𑀏𑀯𑀁 𑀫𑀢𑁆𑀢𑀸𑀬 𑀑𑀤𑀦𑁄 𑀕𑀡𑁆𑀳𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀫𑀓𑀁 𑀲𑀫𑁆𑀧𑀸𑀤𑁂𑀳𑀻𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀲𑀧𑁆𑀧𑀺𑀆𑀤𑀻𑀲𑀼𑀬𑁂𑀯 𑀑𑀤𑀦𑁂𑀧𑀺 𑀯𑀢𑁆𑀢𑀩𑁆𑀩𑀁. 𑀲𑀧𑁆𑀧𑀺𑀆𑀤𑀻𑀲𑀼 𑀧𑀦 𑀬𑀁 𑀅𑀧𑁆𑀧𑀁 𑀳𑁄𑀢𑀺 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀅𑀦𑀼𑀭𑀽𑀧𑀓𑀁, 𑀢𑀁 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀲𑀫𑁆𑀧𑀸𑀤𑁂𑀳𑀻𑀢𑀺 𑀯𑀼𑀢𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀲𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀲𑁂𑀲𑀁 𑀦 𑀕𑀳𑁂𑀢𑀩𑁆𑀩𑀁.

𑀦 𑀢𑀸𑀯 𑀣𑁂𑀭𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀬𑀁 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑀼𑀓𑀁 𑀪𑀢𑁆𑀢𑀕𑁆𑀕𑀁, 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀲𑀩𑁆𑀩𑁂𑀲𑀁 𑀧𑀸𑀧𑁂𑀢𑁆𑀯𑀸 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀫𑀳𑀸𑀪𑀢𑁆𑀢𑀕𑁆𑀕𑀁 𑀳𑁄𑀢𑀺, 𑀬𑀢𑁆𑀣 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀪𑀼𑀜𑁆𑀚𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀉𑀤𑀓𑀁 𑀤𑀺𑀬𑁆𑀬𑀢𑀺, 𑀢𑀢𑁆𑀣 𑀬𑀣𑀸𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀦 𑀢𑀸𑀯 𑀉𑀤𑀓𑀦𑁆𑀢𑀺 𑀇𑀤𑀁 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸 𑀧𑀺𑀧𑀸𑀲𑀺𑀢𑁂𑀦 𑀧𑀦 𑀕𑀮𑁂 𑀯𑀺𑀮𑀕𑁆𑀕𑀸𑀫𑀺𑀲𑁂𑀦 𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀸 𑀦 𑀥𑁄𑀯𑀺𑀢𑀩𑁆𑀩𑀸. 𑀲𑀘𑁂 𑀫𑀦𑀼𑀲𑁆𑀲𑀸 ‘‘𑀥𑁄𑀯𑀣 𑀪𑀦𑁆𑀢𑁂 𑀧𑀢𑁆𑀢𑀜𑁆𑀘 𑀳𑀢𑁆𑀣𑁂 𑀘𑀸’’𑀢𑀺 𑀯𑀤𑀦𑁆𑀢𑀺, 𑀪𑀺𑀓𑁆𑀔𑀽 𑀯𑀸 ‘‘𑀢𑀼𑀫𑁆𑀳𑁂 𑀉𑀤𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀯𑀝𑁆𑀝𑀢𑀺.

𑀦𑀺𑀯𑀢𑁆𑀢𑀦𑁆𑀢𑁂𑀦𑀸𑀢𑀺 𑀪𑀢𑁆𑀢𑀕𑁆𑀕𑀢𑁄 𑀉𑀝𑁆𑀞𑀸𑀬 𑀦𑀺𑀯𑀢𑁆𑀢𑀦𑁆𑀢𑁂𑀦 𑀲𑀗𑁆𑀖𑁂𑀦 𑀏𑀯𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁? ‘‘𑀦𑀯𑀓𑁂𑀳𑀻’’𑀢𑀺 𑀲𑀩𑁆𑀩𑀁 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀩𑀸𑀥𑁂𑀲𑀼 𑀳𑀺 𑀖𑀭𑁂𑀲𑀼 𑀫𑀳𑀸𑀣𑁂𑀭𑀸𑀦𑀁 𑀦𑀺𑀓𑁆𑀔𑀫𑀦𑁄𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀁 𑀦𑀺𑀯𑀢𑁆𑀢𑀦𑁆𑀢𑁂𑀳𑀺 𑀧𑀦 𑀦𑀯𑀓𑁂𑀳𑀺 𑀕𑁂𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑀣𑁂𑀭𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀫𑀳𑀸𑀣𑁂𑀭𑀸 𑀥𑀼𑀭𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀦𑀯𑀓𑀸 𑀅𑀦𑁆𑀢𑁄𑀕𑁂𑀳𑁂, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀝𑀺𑀧𑀸𑀝𑀺𑀬𑀸 𑀏𑀯 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀓𑀸𑀬𑁂𑀦 𑀓𑀸𑀬𑀁 𑀅𑀖𑀝𑁆𑀝𑁂𑀦𑁆𑀢𑁂𑀦 𑀬𑀣𑀸 𑀅𑀦𑁆𑀢𑀭𑁂𑀦 𑀫𑀦𑀼𑀲𑁆𑀲𑀸 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀯𑀺𑀭𑀴𑀸𑀬 𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀩𑁆𑀩𑀁.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸

𑁩𑁬𑁬. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂 𑁋 𑀓𑀫𑁆𑀫𑀁 𑀯𑀸 𑀦𑀺𑀓𑁆𑀔𑀺𑀧𑀢𑀻𑀢𑀺 𑀓𑀧𑁆𑀧𑀸𑀲𑀁 𑀯𑀸 𑀲𑀼𑀧𑁆𑀧𑀁 𑀯𑀸 𑀫𑀼𑀲𑀮𑀁 𑀯𑀸 𑀬𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀳𑁄𑀦𑁆𑀢𑀺, 𑀢𑀁 𑀦𑀺𑀓𑁆𑀔𑀺𑀧𑀢𑀺. 𑀦 𑀘 𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀬𑀸𑀢𑀺 𑀇𑀢𑁆𑀣𑀻 𑀯𑀸 𑀳𑁄𑀢𑀼 𑀧𑀼𑀭𑀺𑀲𑁄 𑀯𑀸, 𑀪𑀺𑀓𑁆𑀔𑀸𑀤𑀸𑀦𑀲𑀫𑀬𑁂 𑀫𑀼𑀔𑀁 𑀦 𑀉𑀮𑁆𑀮𑁄𑀓𑁂𑀢𑀩𑁆𑀩𑀁.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸

𑁩𑁬𑁮. 𑀆𑀭𑀜𑁆𑀜𑀺𑀓𑀯𑀢𑁆𑀢𑁂 𑁋 𑀲𑁂𑀦𑀸𑀲𑀦𑀸 𑀑𑀢𑀭𑀺𑀢𑀩𑁆𑀩𑀦𑁆𑀢𑀺 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀲𑀘𑁂 𑀩𑀳𑀺𑀕𑀸𑀫𑁂 𑀉𑀤𑀓𑀁 𑀦𑀢𑁆𑀣𑀺, 𑀅𑀦𑁆𑀢𑁄𑀕𑀸𑀫𑁂𑀬𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀣 𑀩𑀳𑀺𑀕𑀸𑀫𑁂 𑀅𑀢𑁆𑀣𑀺, 𑀩𑀳𑀺𑀕𑀸𑀫𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑁄 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑁄 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑀩𑁆𑀩𑁄.

𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀦𑁆𑀢𑀺 𑀲𑀘𑁂 𑀪𑀸𑀚𑀦𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀺, 𑀧𑀸𑀦𑀻𑀬𑀫𑁂𑀯 𑀧𑀭𑀺𑀪𑁄𑀚𑀦𑀻𑀬𑀫𑁆𑀧𑀺 𑀓𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀪𑀸𑀚𑀦𑀁 𑀅𑀮𑀪𑀦𑁆𑀢𑁂𑀦 𑀯𑁂𑀴𑀼𑀦𑀸𑀴𑀺𑀓𑀸𑀬𑀧𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀬𑀣𑀸 𑀲𑀫𑀻𑀧𑁂 𑀉𑀤𑀓𑀆𑀯𑀸𑀝𑁄 𑀳𑁄𑀢𑀺, 𑀏𑀯𑀁 𑀓𑀸𑀢𑀩𑁆𑀩𑀁. 𑀅𑀭𑀡𑀺𑀲𑀳𑀺𑀢𑁂 𑀲𑀢𑀺 𑀅𑀕𑁆𑀕𑀺𑀁 𑀅𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀣𑀸 𑀘 𑀆𑀭𑀜𑁆𑀜𑀺𑀓𑀲𑁆𑀲, 𑀏𑀯𑀁 𑀓𑀦𑁆𑀢𑀸𑀭𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀕𑀡𑀯𑀸𑀲𑀺𑀦𑁄 𑀧𑀦 𑀢𑁂𑀦 𑀯𑀺𑀦𑀸𑀧𑀺 𑀯𑀝𑁆𑀝𑀢𑀺. 𑀦𑀓𑁆𑀔𑀢𑁆𑀢𑀸𑀦𑁂𑀯 𑀦𑀓𑁆𑀔𑀢𑁆𑀢𑀧𑀤𑀸𑀦𑀺.

𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸

𑁩𑁬𑁯. 𑀲𑁂𑀦𑀸𑀲𑀦𑀯𑀢𑁆𑀢𑁂 𑁋 𑀤𑁆𑀯𑀸𑀭𑀁 𑀦𑀸𑀫 𑀬𑀲𑁆𑀫𑀸 𑀫𑀳𑀸𑀯𑀴𑀜𑁆𑀚𑀁, 𑀢𑀲𑁆𑀫𑀸 𑀢𑀢𑁆𑀣 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑁂𑀲𑀸𑀦𑀺 𑀧𑀦 𑀉𑀤𑁆𑀤𑁂𑀲𑀤𑀸𑀦𑀸𑀤𑀻𑀦𑀺 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑀸𑀦𑀺. 𑀤𑁂𑀯𑀲𑀺𑀓𑀫𑁆𑀧𑀺 𑀆𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣𑀸𑀧𑀺 ‘‘𑀪𑀦𑁆𑀢𑁂 𑀆𑀧𑀼𑀘𑁆𑀙𑀺𑀢𑀫𑁂𑀯 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀯𑀼𑀟𑁆𑀠𑀢𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑀬𑀫𑁂𑀯 𑀯𑀸 ‘‘𑀢𑁆𑀯𑀁 𑀬𑀣𑀸𑀲𑀼𑀔𑀁 𑀯𑀺𑀳𑀭𑀸𑀳𑀻’’𑀢𑀺 𑀯𑀤𑀢𑀺; 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀪𑀸𑀕𑀲𑁆𑀲 𑀯𑀺𑀲𑁆𑀲𑀸𑀲𑁂𑀦𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀬𑁂𑀦 𑀯𑀼𑀟𑁆𑀠𑁄 𑀢𑁂𑀦 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀯𑀼𑀟𑁆𑀠𑀸𑀪𑀺𑀫𑀼𑀔𑁂𑀦 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀁. 𑀪𑁄𑀚𑀦𑀲𑀸𑀮𑀸𑀤𑀻𑀲𑀼𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀚𑀦𑁆𑀢𑀸𑀖𑀭𑀯𑀢𑁆𑀢𑀸𑀤𑀺𑀓𑀣𑀸

𑁩𑁭𑁧. 𑀚𑀦𑁆𑀢𑀸𑀖𑀭𑀯𑀢𑁆𑀢𑁂 𑁋 𑀧𑀭𑀺𑀪𑀡𑁆𑀟𑀦𑁆𑀢𑀺 𑀩𑀳𑀺𑀚𑀕𑀢𑀺.

𑁩𑁭𑁩. 𑀆𑀘𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑀢𑀺 𑀉𑀤𑀓𑁂𑀢𑀺 𑀏𑀢𑁆𑀣 𑀲𑀘𑁂 𑀉𑀤𑀓𑀁 𑀅𑀢𑁆𑀣𑀺, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀧𑀦 𑀦𑀢𑁆𑀣𑀺, 𑀪𑀸𑀚𑀦𑁂𑀦 𑀦𑀻𑀳𑀭𑀺𑀢𑁆𑀯𑀸 𑀆𑀘𑀫𑀺𑀢𑀩𑁆𑀩𑀁. 𑀪𑀸𑀚𑀦𑁂 𑀅𑀲𑀢𑀺 𑀧𑀢𑁆𑀢𑁂𑀦 𑀦𑀻𑀳𑀭𑀺𑀢𑀩𑁆𑀩𑀁. 𑀧𑀢𑁆𑀢𑁂𑀧𑀺 𑀅𑀲𑀢𑀺 𑀅𑀲𑀦𑁆𑀢𑀁 𑀦𑀸𑀫 𑀳𑁄𑀢𑀺. ‘‘𑀇𑀤𑀁 𑀅𑀢𑀺𑀯𑀺𑀯𑀝𑀁 𑀧𑀼𑀭𑀢𑁄 𑀅𑀜𑁆𑀜𑀁 𑀉𑀤𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀢𑀲𑁆𑀲 𑀉𑀤𑀓𑀁 𑀅𑀮𑀪𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀳𑁄𑀢𑀺, 𑀓𑀝𑁆𑀞𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀅𑀦𑀼𑀫𑁄𑀤𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀆𑀕𑀢𑀧𑀝𑀺𑀧𑀸𑀝𑀺𑀬𑀸𑀢𑀺 𑀯𑀘𑁆𑀘𑀓𑀼𑀝𑀺𑀬𑀁 𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀦𑁆𑀳𑀸𑀦𑀢𑀺𑀢𑁆𑀣𑁂𑀢𑀺 𑀢𑀻𑀲𑀼𑀧𑀺 𑀆𑀕𑀢𑀧𑀝𑀺𑀧𑀸𑀝𑀺𑀬𑁂𑀯 𑀧𑀫𑀸𑀡𑀁.

𑁩𑁭𑁪. 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑁂 𑁋 𑀦 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑁂𑀦𑀸𑀢𑀺 𑀅𑀬𑀁 𑀯𑀘𑁆𑀘𑀓𑀼𑀝𑀺𑀬𑀸𑀧𑀺 𑀅𑀯𑀘𑁆𑀘𑀓𑀼𑀝𑀺𑀬𑀸𑀧𑀺 𑀲𑀩𑁆𑀩𑀢𑁆𑀣𑁂𑀯 𑀧𑀝𑀺𑀓𑁆𑀔𑁂𑀧𑁄. 𑀦 𑀨𑀭𑀼𑀲𑁂𑀦 𑀓𑀝𑁆𑀞𑁂𑀦𑀸𑀢𑀺 𑀨𑀸𑀮𑀺𑀢𑀓𑀝𑁆𑀞𑁂𑀦 𑀯𑀸 𑀔𑀭𑁂𑀦 𑀯𑀸 𑀕𑀡𑁆𑀞𑀺𑀓𑁂𑀦 𑀯𑀸 𑀓𑀡𑁆𑀝𑀓𑁂𑀦 𑀯𑀸 𑀲𑀼𑀲𑀺𑀭𑁂𑀦 𑀯𑀸 𑀧𑀽𑀢𑀺𑀦𑀸 𑀯𑀸 𑀦 𑀅𑀯𑀮𑁂𑀔𑀺𑀢𑀩𑁆𑀩𑀁. 𑀅𑀯𑀮𑁂𑀔𑀦𑀓𑀝𑁆𑀞𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀧𑀯𑀺𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀦𑀢𑁆𑀣𑀺.

𑀦 𑀆𑀘𑀫𑀦𑀲𑀭𑀸𑀯𑀓𑁂𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀭 𑀳𑀺 𑀅𑀜𑁆𑀜𑁂 𑀅𑀜𑁆𑀜𑁂 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀉𑀤𑀓𑀁 𑀦 𑀲𑁂𑀲𑁂𑀢𑀩𑁆𑀩𑀁. 𑀬𑀁 𑀧𑀦 𑀲𑀗𑁆𑀖𑀺𑀓𑁂𑀧𑀺 𑀯𑀺𑀳𑀸𑀭𑁂 𑀏𑀓𑀤𑁂𑀲𑁂 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬 𑀓𑀢𑀁 𑀞𑀸𑀦𑀁 𑀳𑁄𑀢𑀺 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀯𑀸, 𑀢𑀲𑁆𑀫𑀺𑀁 𑀯𑀝𑁆𑀝𑀢𑀺. 𑀯𑀺𑀭𑁂𑀘𑀦𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀯𑀺𑀲𑀦𑁆𑀢𑀲𑁆𑀲𑀸𑀧𑀺 𑀯𑀝𑁆𑀝𑀢𑀺𑀬𑁂𑀯.

𑀊𑀳𑀢𑀸𑀢𑀺 𑀊𑀳𑀤𑀺𑀢𑀸; 𑀩𑀳𑀺 𑀯𑀘𑁆𑀘𑀫𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑁄. 𑀥𑁄𑀯𑀺𑀢𑀩𑁆𑀩𑀸𑀢𑀺 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀥𑁄𑀯𑀺𑀢𑀩𑁆𑀩𑀸. 𑀉𑀤𑀓𑀁 𑀅𑀢𑁆𑀣𑀺, 𑀪𑀸𑀚𑀦𑀁 𑀦𑀢𑁆𑀣𑀺, 𑀅𑀲𑀦𑁆𑀢𑀁 𑀦𑀸𑀫 𑀳𑁄𑀢𑀺. 𑀪𑀸𑀚𑀦𑀁 𑀅𑀢𑁆𑀣𑀺, 𑀉𑀤𑀓𑀁 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀅𑀲𑀦𑁆𑀢𑀁. 𑀉𑀪𑀬𑁂 𑀧𑀦 𑀅𑀲𑀢𑀺 𑀅𑀲𑀦𑁆𑀢𑀫𑁂𑀯, 𑀓𑀝𑁆𑀞𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀚𑀦𑁆𑀢𑀸𑀖𑀭𑀯𑀢𑁆𑀢𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀁

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸

𑁩𑁮𑁩. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 𑁋 (𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸𑀢𑀺 𑀅𑀭𑀼𑀡𑀼𑀝𑁆𑀞𑀺𑀢𑀓𑀸𑀮𑁂𑀧𑀺 𑀳𑀺 𑀦𑀦𑁆𑀤𑀺𑀫𑀼𑀔𑀸 𑀯𑀺𑀬 𑀭𑀢𑁆𑀢𑀺 𑀔𑀸𑀬𑀢𑀺. 𑀢𑁂𑀦𑀸𑀳 ‘‘𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸’’𑀢𑀺. 𑀅𑀦𑁆𑀢𑁄𑀧𑀽𑀢𑀺𑀦𑁆𑀢𑀺 𑀅𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀺𑀮𑁂𑀲𑀧𑀽𑀢𑀺𑀪𑀸𑀯𑁂𑀦 𑀅𑀦𑁆𑀢𑁄𑀧𑀽𑀢𑀺𑀁. 𑀅𑀯𑀲𑁆𑀲𑀼𑀢𑀦𑁆𑀢𑀺 𑀓𑀺𑀮𑁂𑀲𑀯𑀲𑁆𑀲𑀦𑀯𑀲𑁂𑀦 𑀅𑀯𑀲𑁆𑀲𑀼𑀢𑀁. 𑀓𑀲𑀫𑁆𑀩𑀼𑀓𑀚𑀸𑀢𑀦𑁆𑀢𑀺 𑀆𑀓𑀺𑀡𑁆𑀡𑀤𑁄𑀲𑀢𑀸𑀬 𑀲𑀁𑀓𑀺𑀮𑀺𑀝𑁆𑀞𑀚𑀸𑀢𑀁.) 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫𑀸𑀢𑀺 ‘‘𑀅𑀧𑀭𑀺𑀲𑀼𑀤𑁆𑀥𑀸 𑀆𑀦𑀦𑁆𑀤 𑀧𑀭𑀺𑀲𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀬𑁂𑀯 𑀳𑀺 𑀢𑁂𑀦 𑀧𑀓𑁆𑀓𑀫𑀺𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀅𑀧𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑁂𑀲𑁆𑀲𑀢𑀺, 𑀅𑀘𑁆𑀙𑀭𑀺𑀬𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩𑁮𑁪. 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄𑀢𑀺 𑀦 𑀧𑀞𑀫𑀫𑁂𑀯 𑀕𑀫𑁆𑀪𑀻𑀭𑁄; 𑀅𑀦𑀼𑀧𑀼𑀩𑁆𑀩𑁂𑀦 𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄. 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀯𑀻𑀘𑀻𑀦𑀁 𑀑𑀲𑀓𑁆𑀓𑀦𑀓𑀦𑁆𑀤𑀭𑀁 𑀫𑀭𑀺𑀬𑀸𑀤𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀢𑀺. 𑀢𑀻𑀭𑀁 𑀯𑀸𑀳𑁂𑀢𑀻𑀢𑀺 𑀢𑀻𑀭𑀢𑁄 𑀅𑀧𑁆𑀧𑁂𑀢𑀺; 𑀉𑀲𑁆𑀲𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀧𑀝𑀺𑀯𑁂𑀥𑁄𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺.

𑁩𑁮𑁫. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀯𑀭𑀦𑁆𑀢𑁄 𑀅𑀜𑁆𑀜𑀁 𑀦𑀸𑀧𑀚𑁆𑀚𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸

𑁩𑁮𑁬. 𑀞𑀧𑀺𑀢𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀢𑁆𑀣 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀞𑀧𑀺𑀢𑀫𑁆𑀧𑀺 𑀅𑀝𑁆𑀞𑀧𑀺𑀢𑀁 𑀳𑁄𑀢𑀺, 𑀔𑁂𑀢𑁆𑀢𑁂 𑀞𑀧𑀺𑀢𑀫𑁂𑀯 𑀧𑀦 𑀞𑀧𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑀸𑀯 𑀭𑁂-𑀓𑀸𑀭𑀁 𑀪𑀡𑀢𑀺, 𑀢𑀸𑀯 𑀞𑀧𑁂𑀢𑀩𑁆𑀩𑀁, 𑀇𑀤𑀜𑁆𑀳𑀺 𑀔𑁂𑀢𑁆𑀢𑀁. 𑀬𑁆𑀬-𑀓𑀸𑀭𑁂 𑀧𑀦 𑀯𑀼𑀢𑁆𑀢𑁂 𑀞𑀧𑁂𑀦𑁆𑀢𑁂𑀦 𑀧𑀘𑁆𑀙𑀸 𑀞𑀧𑀺𑀢𑀁 𑀦𑀸𑀫 𑀳𑁄𑀢𑀺. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀅𑀦𑀸𑀭𑀤𑁆𑀥𑁂𑀬𑁂𑀯 𑀞𑀧𑁂𑀦𑁆𑀢𑁂𑀦 𑀧𑀼𑀭𑁂 𑀞𑀧𑀺𑀢𑀁 𑀳𑁄𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸

𑁩𑁮𑁭. 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬𑀸𑀢𑀺 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀲𑀸 𑀯𑀺𑀧𑀢𑁆𑀢𑀺 𑀓𑀢𑀸 𑀯𑀸 𑀳𑁄𑀢𑀼 𑀅𑀓𑀢𑀸 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀲𑁆𑀲 𑀲𑀜𑁆𑀜𑀸𑀅𑀫𑀽𑀮𑀺𑀓𑀯𑀲𑁂𑀦 𑀅𑀫𑀽𑀮𑀺𑀓𑀸 𑀳𑁄𑀢𑀺. 𑀓𑀢𑀸𑀓𑀢𑀸𑀬𑀸𑀢𑀺 𑀓𑀢𑀜𑁆𑀘 𑀅𑀓𑀢𑀜𑁆𑀘 𑀉𑀪𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀻𑀢𑀺 𑀓𑀫𑁆𑀫𑀁 𑀓𑁄𑀧𑁂𑀢𑀼𑀓𑀸𑀫𑀢𑀸𑀬 𑀲𑀗𑁆𑀖𑀲𑁆𑀲 𑀓𑀫𑁆𑀫𑁂 𑀓𑀭𑀻𑀬𑀫𑀸𑀦𑁂 𑀦𑁂𑀯 𑀆𑀕𑀘𑁆𑀙𑀢𑀺, 𑀦 𑀙𑀦𑁆𑀤𑀁 𑀤𑁂𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑁄𑀯 𑀧𑀝𑀺𑀓𑁆𑀓𑁄𑀲𑀢𑀺, 𑀢𑁂𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀇𑀘𑁆𑀘𑀲𑁆𑀲𑀸𑀧𑀺 𑀲𑀸𑀧𑀢𑁆𑀢𑀺𑀓𑀲𑁆𑀲𑁂𑀯 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑀺𑀢𑀁 𑀳𑁄𑀢𑀺. 𑀧𑀘𑁆𑀘𑀸𑀤𑀺𑀬𑀢𑀻𑀢𑀺 ‘‘𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀧𑀘𑁆𑀘𑀸𑀤𑀺𑀬𑀢𑀺, 𑀢𑁂𑀦 𑀉𑀓𑁆𑀓𑁄𑀝𑀦𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺. 𑀇𑀘𑁆𑀘𑀲𑁆𑀲𑀸𑀧𑀺 𑀲𑀸𑀧𑀢𑁆𑀢𑀺𑀓𑀲𑁆𑀲𑁂𑀯 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑀺𑀢𑀁 𑀳𑁄𑀢𑀺.

𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸

𑁩𑁮𑁮. 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀻𑀢𑀺 𑀏𑀢𑁆𑀣 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀸𑀤𑀦𑀸𑀤𑀻𑀲𑀼 𑀆𑀓𑀸𑀭𑀸𑀤𑀺𑀲𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀜𑁆𑀘 𑀲𑀼𑀢𑀜𑁆𑀘 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀲𑀘𑁂 𑀧𑀦 𑀢𑁂𑀳𑀺 𑀤𑀺𑀝𑁆𑀞𑀲𑀼𑀢𑁂𑀳𑀺 𑀧𑀭𑀺𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀸𑀬 𑀧𑀭𑀺𑀲𑀗𑁆𑀓𑀸𑀬𑀸’’𑀢𑀺.

𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸

𑁩𑁯𑁮. 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦𑀸𑀢𑀺 𑀏𑀢𑁆𑀣 𑀲𑀸𑀲𑀦𑀁 𑀲𑁄𑀥𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀬𑀁 𑀅𑀥𑀺𑀓𑀭𑀡𑀁 𑀅𑀢𑁆𑀢𑀦𑀸 𑀆𑀤𑀺𑀬𑀢𑀺, 𑀢𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀓𑀸𑀮𑁄 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀦𑁆𑀢𑀺 𑀏𑀢𑁆𑀣 𑀭𑀸𑀚𑀪𑀬𑀁 𑀘𑁄𑀭𑀪𑀬𑀁 𑀤𑀼𑀩𑁆𑀪𑀺𑀓𑁆𑀔𑀪𑀬𑀁 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀅𑀬𑀁 𑀅𑀓𑀸𑀮𑁄, 𑀯𑀺𑀧𑀭𑀻𑀢𑁄 𑀓𑀸𑀮𑁄.

𑀅𑀪𑀽𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀅𑀲𑀦𑁆𑀢𑀫𑀺𑀤𑀁, 𑀫𑀬𑀸 𑀅𑀥𑀫𑁆𑀫𑁄 𑀯𑀸 𑀥𑀫𑁆𑀫𑁄𑀢𑀺, 𑀥𑀫𑁆𑀫𑁄 𑀯𑀸 𑀅𑀥𑀫𑁆𑀫𑁄𑀢𑀺, 𑀅𑀯𑀺𑀦𑀬𑁄 𑀯𑀸 𑀯𑀺𑀦𑀬𑁄𑀢𑀺, 𑀯𑀺𑀦𑀬𑁄 𑀯𑀸 𑀅𑀯𑀺𑀦𑀬𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀯𑀸 𑀧𑀼𑀕𑁆𑀕𑀮𑁄 𑀲𑀻𑀮𑀯𑀸𑀢𑀺, 𑀲𑀻𑀮𑀯𑀸 𑀯𑀸 𑀤𑀼𑀲𑁆𑀲𑀻𑀮𑁄𑀢𑀺 𑀕𑀳𑀺𑀢𑁄𑀢𑀺 𑀅𑀢𑁆𑀣𑁄; 𑀯𑀺𑀧𑀭𑀺𑀬𑀸𑀬𑁂𑀦 𑀪𑀽𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀢𑁆𑀣𑀲𑀁𑀳𑀺𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀬𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀬 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀸𑀬 𑀯𑀸 𑀲𑀁𑀯𑀢𑁆𑀢𑀢𑀺, 𑀇𑀤𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀯𑀺𑀧𑀭𑀻𑀢𑀁 𑀅𑀢𑁆𑀣𑀲𑀁𑀳𑀺𑀢𑀁 𑀦𑀸𑀫.

𑀦 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽𑀢𑀺 𑀅𑀧𑁆𑀧𑁂𑀓𑀤𑀸 𑀳𑀺 𑀭𑀸𑀚𑀪𑀬𑀸𑀤𑀻𑀲𑀼 𑀏𑀯𑀭𑀽𑀧𑀸 𑀅𑀢𑁆𑀢𑀦𑁄 𑀧𑀓𑁆𑀔𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀸 𑀪𑀺𑀓𑁆𑀔𑀽 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀅𑀧𑁆𑀧𑁂𑀓𑀤𑀸 𑀧𑀦 𑀔𑁂𑀫𑀲𑀼𑀪𑀺𑀓𑁆𑀔𑀸𑀤𑀻𑀲𑀼 𑀮𑀤𑁆𑀥𑀼𑀁 𑀲𑀓𑁆𑀓𑀸 𑀳𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁.

𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀦𑁆𑀢𑀺 𑀓𑁄𑀲𑀫𑁆𑀩𑀓𑀸𑀦𑀁 𑀯𑀺𑀬 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀘 𑀪𑀯𑀺𑀲𑁆𑀲𑀢𑀻𑀢𑀺. 𑀧𑀘𑁆𑀙𑀸𑀧𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀪𑀯𑀺𑀲𑁆𑀲𑀢𑀻𑀢𑀺 𑀲𑀼𑀪𑀤𑁆𑀤𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑁂𑀯, 𑀤𑀲𑀯𑀢𑁆𑀣𑀼𑀓𑁂 𑀅𑀥𑀺𑀓𑀭𑀡𑁂 𑀤𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀲𑀢𑀺𑀓𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲𑁂𑀯, 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀳𑀲𑁆𑀲𑀺𑀓𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲𑁂𑀯 𑀘 𑀧𑀘𑁆𑀙𑀸 𑀲𑀫𑀦𑀼𑀲𑁆𑀲𑀭𑀡𑀓𑀭𑀡𑀁 𑀳𑁄𑀢𑀺, 𑀲𑀸𑀲𑀦𑀲𑁆𑀲 𑀘 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑀘𑀦𑁆𑀤𑀺𑀫𑀲𑀽𑀭𑀺𑀬𑀲𑀲𑁆𑀲𑀺𑀭𑀺𑀓𑀢𑀸𑀬 𑀲𑀁𑀯𑀢𑁆𑀢𑀢𑀺.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑁄𑀤𑀓𑁂𑀦𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀓𑀣𑀸

𑁩𑁯𑁯. 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦𑀸𑀢𑀺𑀆𑀤𑀻𑀲𑀼 𑀬𑁂𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀬𑁄 𑀓𑁄𑀘𑀺 𑀧𑀳𑀝𑁄 𑀯𑀸 𑀳𑁄𑀢𑀺, 𑀕𑀺𑀳𑀻𑀦𑀁 𑀕𑀡𑁆𑀟𑀨𑀸𑀮𑀦𑀸𑀤𑀻𑀦𑀺 𑀯𑁂𑀚𑁆𑀚𑀓𑀫𑁆𑀫𑀸𑀦𑀺 𑀯𑀸 𑀓𑀢𑀸𑀦𑀺, 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑁄 𑀉𑀧𑀘𑀺𑀓𑀸𑀳𑀺 𑀔𑀸𑀬𑀺𑀢𑀢𑀸𑀮𑀧𑀡𑁆𑀡𑀫𑀺𑀯 𑀙𑀺𑀤𑁆𑀤𑁄 𑀘 𑀧𑀝𑀺𑀫𑀸𑀲𑀺𑀢𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀧𑁆𑀧𑀝𑀺𑀫𑀁𑀲𑁄 𑀘 𑀳𑁄𑀢𑀺, 𑀯𑀺𑀧𑀭𑀻𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀧𑁆𑀧𑀝𑀺𑀫𑀁𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀯𑀘𑀻𑀲𑀫𑀸𑀘𑀸𑀭𑁄 𑀧𑀦 𑀫𑀼𑀲𑀸𑀯𑀸𑀤𑀑𑀫𑀲𑀯𑀸𑀤𑀧𑁂𑀲𑀼𑀜𑁆𑀜𑀅𑀫𑀽𑀮𑀓𑀸𑀦𑀼𑀤𑁆𑀥𑀁𑀲𑀦𑀸𑀤𑀻𑀳𑀺 𑀙𑀺𑀤𑁆𑀤𑁄 𑀘 𑀲𑀧𑁆𑀧𑀝𑀺𑀫𑀁𑀲𑁄 𑀘 𑀳𑁄𑀢𑀺, 𑀯𑀺𑀧𑀭𑀻𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀧𑁆𑀧𑀝𑀺𑀫𑀁𑀲𑁄.

𑀫𑁂𑀢𑁆𑀢𑀁 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀦𑁆𑀢𑀺 𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀅𑀥𑀺𑀕𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀁. 𑀅𑀦𑀸𑀖𑀸𑀢𑀦𑁆𑀢𑀺 𑀆𑀖𑀸𑀢𑀯𑀺𑀭𑀳𑀺𑀢𑀁, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀸𑀖𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀢𑀭𑀲𑁆𑀫𑀺𑀁 𑀦𑀕𑀭𑁂 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀘𑁄𑀤𑀓𑁂𑀦𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑁄𑀤𑀓𑁂𑀦𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀓𑀣𑀸

𑁪𑁦𑁦. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼 𑀏𑀓𑁄 𑀏𑀓𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑁄 𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑀕𑀡𑀫𑀚𑁆𑀛𑀲𑀮𑀸𑀓𑀕𑁆𑀕𑀬𑀸𑀕𑀼𑀅𑀕𑁆𑀕𑀯𑀺𑀢𑀓𑁆𑀓𑀫𑀸𑀴𑀓𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀆𑀲𑀦𑀲𑀸𑀮𑀸𑀤𑀻𑀲𑀼 𑀉𑀧𑀝𑁆𑀞𑀸𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀓𑁆𑀔𑀡𑁂 𑀯𑀸 𑀘𑁄𑀤𑁂𑀦𑁆𑀢𑁄 𑀅𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀢𑀘𑁆𑀙𑁂𑀦 𑀯𑀤𑀦𑁆𑀢𑁄 𑀪𑀽𑀢𑁂𑀦 𑀯𑀤𑀢𑀺 𑀦𑀸𑀫. ‘‘𑀅𑀫𑁆𑀪𑁄 𑀫𑀳𑀮𑁆𑀮𑀓, 𑀧𑀭𑀺𑀲𑀸𑀯𑀘𑀭, 𑀧𑀁𑀲𑀼𑀓𑀽𑀮𑀺𑀓, 𑀥𑀫𑁆𑀫𑀓𑀣𑀺𑀓, 𑀧𑀢𑀺𑀭𑀽𑀧𑀁 𑀢𑀯 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀨𑀭𑀼𑀲𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀧𑀦 𑀓𑀢𑁆𑀯𑀸 ‘‘𑀪𑀦𑁆𑀢𑁂 𑀫𑀳𑀮𑁆𑀮𑀓𑀢𑁆𑀣, 𑀧𑀭𑀺𑀲𑀸𑀯𑀘𑀭𑀸, 𑀧𑀁𑀲𑀼𑀓𑀽𑀮𑀺𑀓𑀸, 𑀥𑀫𑁆𑀫𑀓𑀣𑀺𑀓𑀢𑁆𑀣, 𑀧𑀢𑀺𑀭𑀽𑀧𑀁 𑀢𑀼𑀫𑁆𑀳𑀸𑀓𑀁 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑁄 𑀲𑀡𑁆𑀳𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀦𑁆𑀢𑁄 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀤𑀢𑀺 𑀦𑀸𑀫. 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀯𑀓𑁆𑀔𑀸𑀫𑀺, 𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸.

𑀘𑁄𑀤𑀓𑁂𑀦𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑁄𑀤𑀓𑀘𑀼𑀤𑀺𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸

𑁪𑁦𑁧. 𑀅𑀚𑁆𑀛𑀢𑁆𑀢𑀁 𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀓𑀸𑀭𑀼𑀜𑁆𑀜𑀢𑀸𑀢𑀺 𑀓𑀭𑀼𑀡𑀸𑀪𑀸𑀯𑁄. 𑀇𑀫𑀺𑀦𑀸 𑀓𑀭𑀼𑀡𑀜𑁆𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀜𑁆𑀘 𑀤𑀲𑁆𑀲𑁂𑀢𑀺. 𑀳𑀺𑀢𑁂𑀲𑀺𑀢𑀸𑀢𑀺 𑀳𑀺𑀢𑀕𑀯𑁂𑀲𑀦𑀢𑀸. 𑀅𑀦𑀼𑀓𑀫𑁆𑀧𑀺𑀢𑀸𑀢𑀺 𑀢𑁂𑀦 𑀳𑀺𑀢𑁂𑀦 𑀲𑀁𑀬𑁄𑀚𑀦𑀢𑀸. 𑀤𑁆𑀯𑀻𑀳𑀺𑀧𑀺 𑀫𑁂𑀢𑁆𑀢𑀜𑁆𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘 𑀤𑀲𑁆𑀲𑁂𑀢𑀺. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸𑀢𑀺 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑀦𑀸. 𑀯𑀢𑁆𑀣𑀼𑀁 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀓𑀭𑀡𑀁 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸 𑀦𑀸𑀫. 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂𑀢𑀺 𑀬𑁂 𑀏𑀢𑁂 𑀓𑀸𑀭𑀼𑀜𑁆𑀜𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸, 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄𑀢𑀺.

𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺 𑀯𑀘𑀻𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑀦𑀢𑀸𑀬 𑀘. 𑀘𑀼𑀤𑀺𑀢𑀓𑁂𑀦 𑀳𑀺 𑀲𑀘𑁆𑀘𑀜𑁆𑀘 𑀯𑀢𑁆𑀢𑀩𑁆𑀩𑀁, 𑀓𑁄𑀧𑁄 𑀘 𑀦 𑀓𑀸𑀢𑀩𑁆𑀩𑁄. 𑀦𑁂𑀯 𑀅𑀢𑁆𑀢𑀦𑀸 𑀓𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀧𑀭𑁄 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀘𑁄𑀤𑀓𑀘𑀼𑀤𑀺𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀁

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸

𑁪𑁦𑁨. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 𑁋 𑀅𑀮𑀁 𑀕𑁄𑀢𑀫𑀺 𑀫𑀸 𑀢𑁂 𑀭𑀼𑀘𑁆𑀘𑀻𑀢𑀺 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀦𑀦𑀼 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀳𑁄𑀦𑁆𑀢𑀻𑀢𑀺? 𑀓𑀸𑀫𑀁 𑀳𑁄𑀦𑁆𑀢𑀺, 𑀓𑀺𑀮𑀫𑁂𑀢𑁆𑀯𑀸 𑀧𑀦 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁂𑀦 𑀅𑀦𑀼𑀜𑁆𑀜𑀸𑀢𑀁 𑀧𑀩𑁆𑀩𑀚𑁆𑀚𑀁 ‘‘𑀤𑀼𑀓𑁆𑀔𑁂𑀦 𑀮𑀤𑁆𑀥𑀸 𑀅𑀬𑀁 𑀅𑀫𑁆𑀳𑁂𑀳𑀻’’𑀢𑀺 𑀲𑀫𑁆𑀫𑀸 𑀧𑀭𑀺𑀧𑀸𑀮𑁂𑀲𑁆𑀲𑀦𑁆𑀢𑀻𑀢𑀺 𑀪𑀤𑁆𑀤𑀓𑀁 𑀓𑀢𑁆𑀯𑀸 𑀅𑀦𑀼𑀚𑀸𑀦𑀺𑀢𑀼𑀓𑀸𑀫𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀝𑁆𑀞𑀕𑀭𑀼𑀥𑀫𑁆𑀫𑀓𑀣𑀸 𑀫𑀳𑀸𑀯𑀺𑀪𑀗𑁆𑀕𑁂𑀬𑁂𑀯 𑀓𑀣𑀺𑀢𑀸.

𑁪𑁦𑁩. 𑀓𑀼𑀫𑁆𑀪𑀣𑁂𑀦𑀓𑁂𑀳𑀻𑀢𑀺 𑀓𑀼𑀫𑁆𑀪𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑁂𑀦 𑀆𑀮𑁄𑀓𑁂𑀦 𑀧𑀭𑀖𑀭𑁂 𑀪𑀡𑁆𑀟𑀁 𑀯𑀺𑀘𑀺𑀦𑀺𑀢𑁆𑀯𑀸 𑀣𑁂𑀦𑀓𑀘𑁄𑀭𑁂𑀳𑀺.

𑀲𑁂𑀢𑀝𑁆𑀞𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻𑀢𑀺 𑀏𑀓𑁄 𑀧𑀸𑀡𑀓𑁄 𑀦𑀸𑀴𑀺𑀫𑀚𑁆𑀛𑀕𑀢𑀁 𑀓𑀡𑁆𑀟𑀁 𑀯𑀺𑀚𑁆𑀛𑀢𑀺, 𑀬𑁂𑀦 𑀯𑀺𑀤𑁆𑀥𑀢𑁆𑀢𑀸 𑀦𑀺𑀓𑁆𑀔𑀦𑁆𑀢𑀫𑁆𑀧𑀺 𑀲𑀸𑀮𑀺𑀲𑀻𑀲𑀁 𑀔𑀻𑀭𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀫𑀜𑁆𑀚𑀺𑀝𑁆𑀞𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻𑀢𑀺 𑀉𑀘𑁆𑀙𑀽𑀦𑀁 𑀅𑀦𑁆𑀢𑁄𑀭𑀢𑁆𑀢𑀪𑀸𑀯𑁄. 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 𑀆𑀴𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀆𑀴𑀺𑀬𑀸 𑀅𑀩𑀤𑁆𑀥𑀸𑀬𑀧𑀺 𑀓𑀺𑀜𑁆𑀘𑀺 𑀉𑀤𑀓𑀁 𑀢𑀺𑀝𑁆𑀞𑁂𑀬𑁆𑀬, 𑀧𑀞𑀫𑀫𑁂𑀯 𑀩𑀤𑁆𑀥𑀸𑀬 𑀧𑀦 𑀬𑀁 𑀅𑀩𑀤𑁆𑀥𑀧𑀘𑁆𑀘𑀬𑀸 𑀦 𑀢𑀺𑀝𑁆𑀞𑁂𑀬𑁆𑀬, 𑀢𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬; 𑀏𑀯𑀫𑁂𑀯 𑀬𑁂 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀓𑀘𑁆𑀘𑁂𑀯 𑀅𑀯𑀻𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀕𑀭𑀼𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸. 𑀢𑁂𑀲𑀼 𑀅𑀧𑀜𑁆𑀜𑀢𑁆𑀢𑁂𑀲𑀼𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀜𑁆𑀘𑁂𑀯 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬. 𑀧𑀝𑀺𑀓𑀘𑁆𑀘𑁂𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀦 𑀅𑀧𑀭𑀸𑀦𑀺𑀧𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀞𑀲𑁆𑀲𑀢𑀻𑀢𑀺 𑀏𑀯𑀁 𑀧𑀞𑀫𑀁 𑀯𑀼𑀢𑁆𑀢𑀁 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀞𑀲𑁆𑀲𑀢𑀻𑀢𑀺. 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀢𑁄 𑀧𑀦 𑀉𑀢𑁆𑀢𑀭𑀺𑀫𑁆𑀧𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀅𑀦𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀓𑀤𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑁄𑀢𑀸𑀧𑀦𑁆𑀦𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀢𑀸𑀦𑀺𑀬𑁂𑀯. 𑀦 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀺, 𑀦𑀸𑀧𑀺 𑀧𑀭𑀺𑀬𑀢𑁆𑀢𑀺𑀬𑀸 𑀲𑀢𑀺 𑀧𑀝𑀺𑀯𑁂𑀥𑁄 𑀦 𑀳𑁄𑀢𑀺; 𑀮𑀺𑀗𑁆𑀕𑀁 𑀧𑀦 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬𑀧𑀺 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺.

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸

𑁪𑁦𑁪. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀇𑀫𑀸𑀬 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀬𑁄 𑀓𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀇𑀢𑀺 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀅𑀳𑁂𑀲𑀼𑀁. 𑀬𑁂 𑀔𑁄 𑀢𑁆𑀯𑀁 𑀕𑁄𑀢𑀫𑀻𑀢𑀺 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀕𑁄𑀢𑀫𑀻 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸.

𑁪𑁦𑁯. 𑀓𑀫𑁆𑀫𑀁 𑀦 𑀓𑀭𑀻𑀬𑀢𑀻𑀢𑀺 𑀢𑀚𑁆𑀚𑀦𑀻𑀬𑀸𑀤𑀺 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀦 𑀓𑀭𑀻𑀬𑀢𑀺. 𑀔𑀫𑀸𑀧𑁂𑀦𑁆𑀢𑀻𑀢𑀺 𑀦 𑀧𑀼𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀔𑀫𑀸𑀧𑁂𑀦𑁆𑀢𑀺.

𑁪𑁧𑁦. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀭𑁄𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀢𑀼𑀦𑁆𑀢𑀺 𑀏𑀢𑁆𑀣 𑀢𑀚𑁆𑀚𑀦𑀻𑀬𑀸𑀤𑀻𑀲𑀼 ‘‘𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀏𑀢𑀺𑀲𑁆𑀲𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀭𑁄𑀧𑁂𑀢𑁆𑀯𑀸 ‘‘𑀢𑀁 𑀤𑀸𑀦𑀺 𑀢𑀼𑀫𑁆𑀳𑁂𑀯 𑀓𑀭𑁄𑀣𑀸’’𑀢𑀺 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀭𑁄𑀧𑀺𑀢𑁂 𑀅𑀜𑁆𑀜𑀁 𑀓𑀭𑁄𑀦𑁆𑀢𑀺, ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀺.

𑁪𑁧𑁧. 𑀓𑀤𑁆𑀤𑀫𑁄𑀤𑀓𑁂𑀦𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀓𑀤𑁆𑀤𑀫𑁄𑀤𑀓𑁂𑀦, 𑀯𑀺𑀧𑁆𑀧𑀲𑀦𑁆𑀦𑀉𑀤𑀓𑀭𑀚𑀦𑀓𑀤𑁆𑀤𑀫𑀸𑀤𑀻𑀲𑀼𑀧𑀺 𑀬𑁂𑀦 𑀓𑁂𑀦𑀘𑀺 𑀑𑀲𑀺𑀜𑁆𑀘𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀅𑀯𑀦𑁆𑀤𑀺𑀬𑁄 𑀲𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑁄𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀅𑀬𑁆𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀅𑀧𑀲𑀸𑀤𑀦𑀻𑀬𑀁 𑀤𑀲𑁆𑀲𑁂𑀢𑀺, 𑀏𑀢𑀲𑁆𑀲 𑀅𑀬𑁆𑀬𑀲𑁆𑀲 𑀅𑀯𑀦𑁆𑀤𑀺𑀬𑀓𑀭𑀡𑀁 𑀭𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀅𑀯𑀦𑁆𑀤𑀺𑀬𑁄 𑀓𑀢𑁄 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀲𑀸𑀫𑀡𑁂𑀭𑁂 𑀤𑀺𑀲𑁆𑀯𑀸 𑀦 𑀯𑀦𑁆𑀤𑀦𑁆𑀢𑀺; 𑀏𑀯𑀫𑁂𑀯 𑀤𑀺𑀲𑁆𑀯𑀸𑀧𑀺 𑀦 𑀯𑀦𑁆𑀤𑀺𑀢𑀩𑁆𑀩𑁄. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀏𑀓𑀧𑀼𑀕𑁆𑀕𑀮𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀫𑀬𑁆𑀳𑀁 𑀔𑀫𑀢𑀽’’𑀢𑀺 𑀔𑀫𑀸𑀧𑁂𑀢𑀩𑁆𑀩𑀁. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀏𑀲𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑁂 𑀔𑀫𑀸𑀧𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀯𑀦𑁆𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀓𑀫𑁆𑀫𑀯𑀺𑀪𑀗𑁆𑀕𑁂 𑀯𑀓𑁆𑀔𑀸𑀫.

𑀑𑀪𑀸𑀲𑁂𑀦𑁆𑀢𑀻𑀢𑀺 𑀅𑀲𑀤𑁆𑀥𑀫𑁆𑀫𑁂𑀦 𑀑𑀪𑀸𑀲𑁂𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀧𑀼𑀭𑀺𑀲𑁂 𑀅𑀲𑀤𑁆𑀥𑀫𑁆𑀫𑁂𑀦 𑀲𑀫𑁆𑀧𑀬𑁄𑀚𑁂𑀦𑁆𑀢𑀺. 𑀅𑀯𑀦𑁆𑀤𑀺𑀬𑀓𑀭𑀡𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀯𑀭𑀡𑀦𑁆𑀢𑀺 𑀯𑀺𑀳𑀸𑀭𑀧𑁆𑀧𑀯𑁂𑀲𑀦𑁂 𑀦𑀺𑀯𑀸𑀭𑀡𑀁. 𑀑𑀯𑀸𑀤𑀁 𑀞𑀧𑁂𑀢𑀼𑀦𑁆𑀢𑀺 𑀏𑀢𑁆𑀣 𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀞𑀧𑁂𑀢𑀩𑁆𑀩𑁄. 𑀑𑀯𑀸𑀤𑀢𑁆𑀣𑀸𑀬 𑀧𑀦 𑀆𑀕𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀢𑁆𑀢𑀩𑁆𑀩𑀸 ‘‘𑀅𑀲𑀼𑀓𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀲𑀸𑀧𑀢𑁆𑀢𑀺𑀓𑀸, 𑀢𑀲𑁆𑀲𑀸 𑀑𑀯𑀸𑀤𑀁 𑀞𑀧𑁂𑀫𑀺, 𑀫𑀸 𑀢𑀸𑀬 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀢𑁆𑀣𑀸’’𑀢𑀺. 𑀓𑀸𑀬𑀯𑀺𑀯𑀭𑀡𑀸𑀤𑀻𑀲𑀼𑀧𑀺 𑀤𑀡𑁆𑀟𑀓𑀫𑁆𑀫𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁪𑁧𑁩. 𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀺𑀬𑀸 𑀑𑀯𑀸𑀤𑁄 𑀦 𑀕𑀦𑁆𑀢𑀩𑁆𑀩𑁄𑀢𑀺𑀆𑀤𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁪𑁧𑁬. 𑀨𑀸𑀲𑀼𑀓𑀸 𑀦𑀫𑁂𑀦𑁆𑀢𑀻𑀢𑀺 𑀕𑀺𑀳𑀺𑀤𑀸𑀭𑀺𑀓𑀸𑀬𑁄 𑀯𑀺𑀬 𑀖𑀦𑀧𑀝𑁆𑀝𑀓𑁂𑀦 𑀓𑀸𑀬𑀩𑀦𑁆𑀥𑀦𑁂𑀦 𑀨𑀸𑀲𑀼𑀓𑀸 𑀦𑀫𑀦𑀢𑁆𑀣𑀸𑀬 𑀩𑀦𑁆𑀥𑀦𑁆𑀢𑀺. 𑀏𑀓𑀧𑀭𑀺𑀬𑀸𑀓𑀢𑀦𑁆𑀢𑀺 𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀦𑀓𑀁.

𑀯𑀺𑀮𑀻𑀯𑁂𑀦 𑀧𑀝𑁆𑀝𑁂𑀦𑀸𑀢𑀺 𑀲𑀡𑁆𑀳𑁂𑀳𑀺 𑀯𑁂𑀴𑀼𑀯𑀺𑀮𑀻𑀯𑁂𑀳𑀺 𑀓𑀢𑀧𑀝𑁆𑀝𑁂𑀦. 𑀤𑀼𑀲𑁆𑀲𑀧𑀝𑁆𑀝𑁂𑀦𑀸𑀢𑀺 𑀲𑁂𑀢𑀯𑀢𑁆𑀣𑀧𑀝𑁆𑀝𑁂𑀦. 𑀤𑀼𑀲𑁆𑀲𑀯𑁂𑀡𑀺𑀬𑀸𑀢𑀺 𑀤𑀼𑀲𑁆𑀲𑁂𑀦 𑀓𑀢𑀯𑁂𑀡𑀺𑀬𑀸. 𑀤𑀼𑀲𑁆𑀲𑀯𑀝𑁆𑀝𑀺𑀬𑀸𑀢𑀺 𑀤𑀼𑀲𑁆𑀲𑁂𑀦 𑀓𑀢𑀯𑀝𑁆𑀝𑀺𑀬𑀸. 𑀘𑁄𑀴𑀧𑀝𑁆𑀝𑀸𑀤𑀻𑀲𑀼 𑀘𑁄𑀴𑀓𑀸𑀲𑀸𑀯𑀁 𑀘𑁄𑀴𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀺𑀮𑁆𑀮𑁂𑀦𑀸𑀢𑀺 𑀕𑁄𑀚𑀗𑁆𑀖𑀝𑁆𑀞𑀺𑀓𑁂𑀦. 𑀚𑀖𑀦𑀦𑁆𑀢𑀺 𑀓𑀝𑀺𑀧𑁆𑀧𑀤𑁂𑀲𑁄 𑀯𑀼𑀘𑁆𑀘𑀢𑀺. 𑀳𑀢𑁆𑀣𑀁 𑀓𑁄𑀝𑁆𑀝𑀸𑀧𑁂𑀦𑁆𑀢𑀻𑀢𑀺 𑀅𑀕𑁆𑀕𑀩𑀸𑀳𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀫𑁄𑀭𑀧𑀢𑁆𑀢𑀸𑀤𑀻𑀳𑀺 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀳𑀢𑁆𑀣𑀓𑁄𑀘𑁆𑀙𑀦𑁆𑀢𑀺 𑀧𑀺𑀝𑁆𑀞𑀺𑀳𑀢𑁆𑀣𑀁. 𑀧𑀸𑀤𑀦𑁆𑀢𑀺 𑀚𑀗𑁆𑀖𑀁. 𑀧𑀸𑀤𑀓𑁄𑀘𑁆𑀙𑀦𑁆𑀢𑀺 𑀧𑀺𑀝𑁆𑀞𑀺𑀧𑀸𑀤𑀁.

𑁪𑁧𑁭. 𑀫𑀼𑀔𑀮𑀺𑀫𑁆𑀧𑀦𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀅𑀯𑀗𑁆𑀕𑀁 𑀓𑀭𑁄𑀦𑁆𑀢𑀻𑀢𑀺 𑀅𑀓𑁆𑀔𑀻 𑀅𑀜𑁆𑀚𑀦𑁆𑀢𑀺𑀬𑁄 𑀅𑀯𑀗𑁆𑀕𑀤𑁂𑀲𑁂 𑀅𑀥𑁄𑀫𑀼𑀔𑀁 𑀮𑁂𑀔𑀁 𑀓𑀭𑁄𑀦𑁆𑀢𑀺. 𑀯𑀺𑀲𑁂𑀲𑀓𑀦𑁆𑀢𑀺 𑀕𑀡𑁆𑀟𑀧𑁆𑀧𑀤𑁂𑀲𑁂 𑀯𑀺𑀘𑀺𑀢𑁆𑀭𑀲𑀡𑁆𑀞𑀸𑀦𑀁 𑀯𑀺𑀲𑁂𑀲𑀓𑀁 𑀓𑀭𑁄𑀦𑁆𑀢𑀺. 𑀑𑀮𑁄𑀓𑁂𑀦𑁆𑀢𑀻𑀢𑀺 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀺. 𑀲𑀸𑀮𑁄𑀓𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀉𑀧𑀟𑁆𑀠𑀓𑀸𑀬𑀁 𑀤𑀲𑁆𑀲𑁂𑀦𑁆𑀢𑀺𑀬𑁄 𑀢𑀺𑀝𑁆𑀞𑀦𑁆𑀢𑀺. 𑀦𑀘𑁆𑀘𑀦𑁆𑀢𑀺 𑀦𑀝𑀲𑀫𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀯𑁂𑀲𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀧𑀸𑀦𑀸𑀕𑀸𑀭𑀁 𑀞𑀧𑁂𑀦𑁆𑀢𑀻𑀢𑀺 𑀲𑀼𑀭𑀁 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀲𑀽𑀦𑀁 𑀞𑀧𑁂𑀦𑁆𑀢𑀻𑀢𑀺 𑀫𑀁𑀲𑀁 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀆𑀧𑀡𑀦𑁆𑀢𑀺 𑀦𑀸𑀦𑀸𑀪𑀡𑁆𑀟𑀸𑀦𑀁 𑀅𑀦𑁂𑀓𑀯𑀺𑀥𑀁 𑀆𑀧𑀡𑀁 𑀧𑀲𑀸𑀭𑁂𑀦𑁆𑀢𑀺. 𑀤𑀸𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀤𑀸𑀲𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀸𑀭𑁂𑀦𑁆𑀢𑀺. 𑀤𑀸𑀲𑀻𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀳𑀭𑀺𑀢𑀓𑀧𑀓𑁆𑀓𑀺𑀓𑀁 𑀧𑀓𑀺𑀡𑀦𑁆𑀢𑀻𑀢𑀺 𑀳𑀭𑀺𑀢𑀓𑀜𑁆𑀘𑁂𑀯 𑀧𑀓𑁆𑀓𑀜𑁆𑀘 𑀧𑀓𑀺𑀡𑀦𑁆𑀢𑀺; 𑀧𑀓𑀺𑀡𑁆𑀡𑀓𑀸𑀧𑀡𑀁 𑀧𑀲𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁧𑁮. 𑀲𑀩𑁆𑀩𑀦𑀻𑀮𑀓𑀸𑀤𑀺𑀓𑀣𑀸 𑀓𑀣𑀺𑀢𑀸𑀬𑁂𑀯.

𑁪𑁧𑁯. 𑀪𑀺𑀓𑁆𑀔𑀼𑀦𑀻 𑀘𑁂, 𑀪𑀺𑀓𑁆𑀔𑀯𑁂, 𑀓𑀸𑀮𑀁 𑀓𑀭𑁄𑀦𑁆𑀢𑀻𑀢𑀺𑀆𑀤𑀻𑀲𑀼 𑀅𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀳𑀺 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑁄 𑀓𑁄𑀘𑀺 𑀓𑀸𑀮𑀁 𑀓𑀭𑁄𑀦𑁆𑀢𑁄 ‘‘𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀧𑀭𑀺𑀓𑁆𑀔𑀸𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀳𑁄𑀢𑀼, 𑀆𑀘𑀭𑀺𑀬𑀲𑁆𑀲 𑀳𑁄𑀢𑀼, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀳𑁄𑀢𑀼, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀳𑁄𑀢𑀼, 𑀫𑀸𑀢𑀼 𑀳𑁄𑀢𑀼, 𑀧𑀺𑀢𑀼 𑀳𑁄𑀢𑀼, 𑀅𑀜𑁆𑀜𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁄𑀢𑀽’’𑀢𑀺 𑀯𑀤𑀢𑀺 𑀢𑁂𑀲𑀁 𑀦 𑀳𑁄𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺. 𑀦 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀘𑁆𑀘𑀬𑀤𑀸𑀦𑀁 𑀭𑀼𑀳𑀢𑀺, 𑀕𑀺𑀳𑀻𑀦𑀁 𑀧𑀦 𑀭𑀼𑀳𑀢𑀺. 𑀪𑀺𑀓𑁆𑀔𑀼 𑀳𑀺 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑁂 𑀓𑀸𑀮𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀯𑀺𑀳𑀸𑀭𑁂 𑀓𑀸𑀮𑀁 𑀓𑀭𑁄𑀢𑀺, 𑀢𑀲𑁆𑀲𑀸 𑀧𑀭𑀺𑀓𑁆𑀔𑀸𑀭𑁄 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀳𑁄𑀢𑀺.

𑁪𑁨𑁦. 𑀧𑀼𑀭𑀸𑀡𑀫𑀮𑁆𑀮𑀻𑀢𑀺 𑀧𑀼𑀭𑀸𑀡𑁂 𑀕𑀺𑀳𑀺𑀓𑀸𑀮𑁂 𑀫𑀮𑁆𑀮𑀓𑀲𑁆𑀲 𑀪𑀭𑀺𑀬𑀸. 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁, 𑀙𑀺𑀦𑁆𑀦𑀁 𑀯𑀸 𑀳𑁄𑀢𑀼 𑀅𑀘𑁆𑀙𑀺𑀦𑁆𑀦𑀁 𑀯𑀸, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀸. 𑀲𑀘𑁂 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀤𑀼𑀓𑁆𑀓𑀝𑀁.

𑁪𑁨𑁧. 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀺𑀦𑁆𑀦𑀁 𑀦𑀸𑀫 𑀬𑀁 ‘‘𑀢𑀼𑀫𑁆𑀳𑁂𑀬𑁂𑀯 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁, 𑀢𑀁 𑀅𑀜𑁆𑀜𑀲𑁆𑀲 𑀤𑀤𑀢𑁄 𑀤𑀼𑀓𑁆𑀓𑀝𑀁. 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀲𑀧𑁆𑀧𑀸𑀬𑀁, 𑀲𑀩𑁆𑀩𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀘𑀻𑀯𑀭𑀁 𑀏𑀓𑀸𑀳𑀁 𑀯𑀸 𑀤𑁆𑀯𑀻𑀳𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀥𑀺𑀁 𑀪𑀺𑀓𑁆𑀔𑀼𑀦𑀻𑀳𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀳𑀺𑀬𑁆𑀬𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀫𑀁𑀲𑀁 𑀅𑀚𑁆𑀚 𑀅𑀜𑁆𑀜𑀲𑁆𑀫𑀺𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀲𑀢𑀺 𑀪𑀺𑀓𑁆𑀔𑀽𑀳𑀺 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀪𑀺𑀓𑁆𑀔𑀽𑀳𑀺 𑀧𑀝𑀺𑀕𑁆𑀕𑀳𑀺𑀢𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀪𑀺𑀓𑁆𑀔𑀽𑀲𑀼 𑀏𑀲𑁂𑀯 𑀦𑀬𑁄.

𑁪𑁨𑁬. 𑀆𑀲𑀦𑀁 𑀲𑀁𑀓𑀲𑀸𑀬𑀦𑁆𑀢𑀺𑀬𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀼𑀦𑁆𑀢𑀺 𑀅𑀜𑁆𑀜𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀦𑀺𑀲𑀻𑀤𑀸𑀧𑁂𑀦𑁆𑀢𑀺𑀬𑁄 𑀪𑁄𑀚𑀦𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑁂𑀲𑀼𑀁.

𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀏𑀢𑁆𑀣 𑀲𑀘𑁂 𑀧𑀼𑀭𑁂 𑀅𑀝𑁆𑀞𑀲𑀼 𑀦𑀺𑀲𑀺𑀦𑁆𑀦𑀸𑀲𑀼 𑀢𑀸𑀲𑀁 𑀅𑀩𑁆𑀪𑀦𑁆𑀢𑀭𑀺𑀫𑀸 𑀅𑀜𑁆𑀜𑀸 𑀆𑀕𑀘𑁆𑀙𑀢𑀺, 𑀲𑀸 𑀅𑀢𑁆𑀢𑀦𑁄 𑀦𑀯𑀓𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀮𑀪𑀢𑀺. 𑀬𑀸 𑀧𑀦 𑀅𑀝𑁆𑀞𑀳𑀺𑀧𑀺 𑀦𑀯𑀓𑀢𑀭𑀸, 𑀲𑀸 𑀲𑀘𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑀸 𑀳𑁄𑀢𑀺, 𑀆𑀕𑀢𑀧𑀝𑀺𑀧𑀸𑀝𑀺𑀬𑀸𑀯 𑀦𑀺𑀲𑀻𑀤𑀺𑀢𑀼𑀁 𑀮𑀪𑀢𑀺. 𑀅𑀜𑁆𑀜𑀢𑁆𑀣 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀟𑁆𑀠𑀁 𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀞𑀧𑁂𑀢𑁆𑀯𑀸 𑀪𑀢𑁆𑀢𑀕𑁆𑀕𑀁 𑀅𑀜𑁆𑀜𑀲𑁆𑀫𑀺𑀁 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀝𑁆𑀞𑀸𑀦𑁂 ‘‘𑀅𑀳𑀁 𑀧𑀼𑀩𑁆𑀩𑁂 𑀆𑀕𑀢𑀸’’𑀢𑀺 𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀺𑀜𑁆𑀘𑀺 𑀦 𑀕𑀳𑁂𑀢𑀩𑁆𑀩𑀁; 𑀬𑀣𑀸𑀯𑀼𑀟𑁆𑀠𑀫𑁂𑀯 𑀯𑀝𑁆𑀝𑀢𑀺. 𑀧𑀯𑀸𑀭𑀡𑀸𑀓𑀣𑀸 𑀓𑀣𑀺𑀢𑀸𑀬𑁂𑀯.

𑁪𑁨𑁯. 𑀇𑀢𑁆𑀣𑀺𑀬𑀼𑀢𑁆𑀢𑀦𑁆𑀢𑀺𑀆𑀤𑀻𑀳𑀺 𑀲𑀩𑁆𑀩𑀬𑀸𑀦𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺. 𑀧𑀸𑀝𑀗𑁆𑀓𑀺𑀦𑁆𑀢𑀺 𑀧𑀝𑀧𑁄𑀝𑁆𑀝𑀮𑀺𑀓𑀁.

𑁪𑁩𑁦. 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀤𑀲𑀦𑁆𑀦𑀁 𑀅𑀦𑁆𑀢𑀭𑀸𑀬𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀯𑀝𑁆𑀝𑀢𑀺. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀞𑀺𑀢𑀸 𑀯𑀸 𑀳𑁄𑀢𑀼 𑀦𑀺𑀧𑀦𑁆𑀦𑀸 𑀯𑀸 𑀚𑀸𑀕𑀭𑀸 𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀸 𑀯𑀸, 𑀉𑀧𑀲𑀫𑁆𑀧𑀦𑁆𑀦𑀸𑀯 𑀳𑁄𑀢𑀺. 𑀢𑀸𑀯𑀤𑁂𑀯 𑀙𑀸𑀬𑀸𑀤𑀻𑀦𑀺 𑀆𑀕𑀢𑀸𑀬 𑀤𑀽𑀢𑀪𑀺𑀓𑁆𑀔𑀼𑀦𑀺𑀬𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀺.

𑁪𑁩𑁧. 𑀉𑀤𑁄𑀲𑀺𑀢𑁄𑀢𑀺 𑀪𑀡𑁆𑀟𑀲𑀸𑀮𑀸. 𑀦 𑀲𑀫𑁆𑀫𑀢𑀻𑀢𑀺 𑀦𑀧𑁆𑀧𑀳𑁄𑀢𑀺. 𑀉𑀧𑀲𑁆𑀲𑀬𑀦𑁆𑀢𑀺 𑀖𑀭𑀁. 𑀦𑀯𑀓𑀫𑁆𑀫𑀦𑁆𑀢𑀺 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀦𑀯𑀓𑀫𑁆𑀫𑀫𑁆𑀧𑀺 𑀓𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑁪𑁩𑁨. 𑀢𑀲𑁆𑀲𑀸 𑀧𑀩𑁆𑀩𑀚𑀺𑀢𑀸𑀬𑀸𑀢𑀺 𑀢𑀲𑁆𑀲𑀸 𑀧𑀩𑁆𑀩𑀚𑀺𑀢𑀓𑀸𑀮𑁂. 𑀬𑀸𑀯 𑀲𑁄 𑀤𑀸𑀭𑀓𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑀸𑀯 𑀔𑀸𑀤𑀺𑀢𑀼𑀁 𑀪𑀼𑀜𑁆𑀚𑀺𑀢𑀼𑀁 𑀦𑀳𑀸𑀬𑀺𑀢𑀼𑀜𑁆𑀘 𑀫𑀡𑁆𑀟𑀺𑀢𑀼𑀜𑁆𑀘 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄.

𑀞𑀧𑁂𑀢𑁆𑀯𑀸 𑀲𑀸𑀕𑀸𑀭𑀦𑁆𑀢𑀺 𑀲𑀳𑀕𑀸𑀭𑀲𑁂𑀬𑁆𑀬𑀫𑀢𑁆𑀢𑀁 𑀞𑀧𑁂𑀢𑁆𑀯𑀸. 𑀬𑀣𑀸 𑀅𑀜𑁆𑀜𑀲𑁆𑀫𑀺𑀁 𑀧𑀼𑀭𑀺𑀲𑁂; 𑀏𑀯𑀁 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀲𑁆𑀫𑀺𑀁 𑀤𑀸𑀭𑀓𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀢𑀸 𑀧𑀦 𑀦𑀳𑀸𑀧𑁂𑀢𑀼𑀁 𑀧𑀸𑀬𑁂𑀢𑀼𑀁 𑀪𑁄𑀚𑁂𑀢𑀼𑀁 𑀫𑀡𑁆𑀟𑁂𑀢𑀼𑀁 𑀉𑀭𑁂 𑀓𑀢𑁆𑀯𑀸 𑀲𑀬𑀺𑀢𑀼𑀜𑁆𑀘 𑀮𑀪𑀢𑀺.

𑁪𑁩𑁪. 𑀬𑀤𑁂𑀯 𑀲𑀸 𑀯𑀺𑀩𑁆𑀪𑀦𑁆𑀢𑀸𑀢𑀺 𑀬𑀲𑁆𑀫𑀸 𑀲𑀸 𑀯𑀺𑀩𑁆𑀪𑀦𑁆𑀢𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀦𑁆𑀢𑀺𑀬𑀸 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸, 𑀢𑀲𑁆𑀫𑀸𑀬𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻, 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀧𑀼𑀦 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀺.

𑀲𑀸 𑀆𑀕𑀢𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀦 𑀓𑁂𑀯𑀮𑀁 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺. 𑀑𑀤𑀸𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀩𑁆𑀪𑀦𑁆𑀢𑀸 𑀧𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀁 𑀮𑀪𑀢𑀺.

𑀅𑀪𑀺𑀯𑀸𑀤𑀦𑀦𑁆𑀢𑀺𑀆𑀤𑀻𑀲𑀼 𑀧𑀼𑀭𑀺𑀲𑀸 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑀸 𑀯𑀦𑁆𑀤𑀦𑁆𑀢𑀺, 𑀓𑁂𑀲𑁂 𑀙𑀺𑀦𑁆𑀤𑀦𑁆𑀢𑀺, 𑀦𑀔𑁂 𑀙𑀺𑀦𑁆𑀤𑀦𑁆𑀢𑀺, 𑀯𑀡𑀧𑀝𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀭𑁂𑀓𑁂 𑀆𑀘𑀭𑀺𑀬𑀸 ‘‘𑀲𑀘𑁂 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀅𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀲𑀸𑀭𑀢𑁆𑀢𑀸, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯’’. 𑀏𑀓𑁂 𑀆𑀘𑀭𑀺𑀬𑀸 ‘‘𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀆𑀘𑀭𑀺𑀬𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀧𑀫𑀸𑀡𑀁. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀸𑀤𑀺𑀢𑀼’’𑀦𑁆𑀢𑀺 𑀳𑀺 𑀯𑀘𑀦𑁂𑀦𑁂𑀯 𑀢𑀁 𑀓𑀧𑁆𑀧𑀺𑀬𑀁.

𑁪𑁩𑁫. 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀻𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀅𑀟𑁆𑀠𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀓𑀁 𑀧𑀸𑀤𑀁 𑀆𑀪𑀼𑀚𑀺𑀢𑁆𑀯𑀸 𑀓𑀢𑀧𑀮𑁆𑀮𑀗𑁆𑀓𑀁. 𑀳𑁂𑀝𑁆𑀞𑀸 𑀯𑀺𑀯𑀝𑁂 𑀉𑀧𑀭𑀺 𑀧𑀝𑀺𑀘𑁆𑀙𑀦𑁆𑀦𑁂𑀢𑀺 𑀏𑀢𑁆𑀣 𑀲𑀘𑁂 𑀓𑀽𑀧𑁄 𑀔𑀢𑁄 𑀳𑁄𑀢𑀺, 𑀉𑀧𑀭𑀺 𑀧𑀦 𑀧𑀤𑀭𑀫𑀢𑁆𑀢𑀫𑁂𑀯 𑀲𑀩𑁆𑀩𑀤𑀺𑀲𑀸𑀲𑀼 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀧𑀺 𑀯𑀝𑁆𑀝𑀢𑀺.

𑁪𑁩𑁬. 𑀓𑀼𑀓𑁆𑀓𑀼𑀲𑀁 𑀫𑀢𑁆𑀢𑀺𑀓𑀦𑁆𑀢𑀺 𑀓𑀼𑀡𑁆𑀟𑀓𑀜𑁆𑀘𑁂𑀯 𑀫𑀢𑁆𑀢𑀺𑀓𑀜𑁆𑀘. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸

𑁪𑁪𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑁋 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻𑀢𑀺 𑀏𑀯𑀫𑀸𑀤𑀺 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀇𑀤𑀁 𑀯𑁄 𑀲𑀫𑀡𑀸𑀦𑀦𑁆𑀢𑀺 𑀇𑀤𑀁 𑀲𑀫𑀡𑀸𑀦𑀁. 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑁄𑀓𑀸𑀭𑁄.

𑁪𑁪𑁩. 𑀇𑀤𑀫𑁆𑀧𑀺 𑀢𑁂 𑀆𑀯𑀼𑀲𑁄 𑀆𑀦𑀦𑁆𑀤 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀇𑀤𑀁 𑀢𑀬𑀸 𑀤𑀼𑀝𑁆𑀞𑀼 𑀓𑀢’’𑀦𑁆𑀢𑀺 𑀓𑁂𑀯𑀮𑀁 𑀕𑀭𑀳𑀦𑁆𑀢𑁂𑀳𑀺 𑀣𑁂𑀭𑁂𑀳𑀺 𑀯𑀼𑀢𑁆𑀢𑀁, 𑀦 𑀆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀢𑁂 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺. 𑀇𑀤𑀸𑀦𑁂𑀯 𑀘𑁂𑀢𑀁 𑀅𑀦𑀼𑀲𑁆𑀲𑀸𑀯𑀺𑀢𑀁 𑁋 ‘‘𑀲𑀗𑁆𑀖𑁄 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀻’’𑀢𑀺. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀫𑁆𑀧𑀺 𑀘 ‘‘𑀆𑀫, 𑀪𑀦𑁆𑀢𑁂, 𑀤𑀼𑀝𑁆𑀞𑀼 𑀫𑀬𑀸 𑀓𑀢’’𑀦𑁆𑀢𑀺 𑀏𑀯𑀁 𑀧𑀝𑀺𑀚𑀸𑀦𑀸𑀳𑀺, 𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀆𑀧𑀢𑁆𑀢𑀺𑀤𑁂𑀲𑀦𑀁. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀅𑀲𑀢𑀺𑀬𑀸 𑀦 𑀧𑀼𑀘𑁆𑀙𑀺 𑀦 𑀅𑀦𑀸𑀤𑀭𑁂𑀦, 𑀢𑀲𑁆𑀫𑀸 𑀢𑀢𑁆𑀣 𑀤𑀼𑀝𑁆𑀞𑀼𑀓𑀢𑀪𑀸𑀯𑀫𑁆𑀧𑀺 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀲𑀼 𑀕𑀸𑀭𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀦𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀆𑀳. 𑀬𑀣𑀸 𑀢𑀼𑀫𑁆𑀳𑁂 𑀯𑀤𑀣, 𑀢𑀣𑀸 𑀧𑀝𑀺𑀚𑀸𑀦𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲𑁂𑀯 𑀦𑀬𑁄 𑀅𑀯𑀲𑁂𑀲𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑀁.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀤𑀲𑀯𑀢𑁆𑀣𑀼𑀓𑀣𑀸

𑁪𑁪𑁬. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑁋 𑀪𑀺𑀓𑁆𑀔𑀕𑁆𑀕𑁂𑀦𑀸𑀢𑀺 𑀪𑀺𑀓𑁆𑀔𑀼𑀅𑀕𑁆𑀕𑁂𑀦, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀢𑀢𑁆𑀢𑀓𑁂 𑀧𑀝𑀺𑀯𑀻𑀲𑁂 𑀞𑀧𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀺𑀬𑀸𑀢𑀺 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑀯𑀮𑀸𑀳𑀓𑀸.

𑁪𑁪𑁭. 𑀅𑀯𑀺𑀚𑁆𑀚𑀸𑀦𑀺𑀯𑀼𑀝𑀸𑀢𑀺 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀦𑁆𑀦𑀸. 𑀧𑁄𑀲𑀸𑀢𑀺 𑀧𑀼𑀭𑀺𑀲𑀸. 𑀧𑀺𑀬𑀭𑀽𑀧𑀁 𑀅𑀪𑀺𑀦𑀦𑁆𑀤𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀻𑀢𑀺 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀯𑀺𑀚𑀸𑀦𑀦𑁆𑀢𑀸. 𑀭𑀸𑀕𑀭𑀚𑁂𑀳𑀺 𑀲𑀭𑀚𑀸. 𑀫𑀕𑀲𑀤𑀺𑀲𑀸𑀢𑀺 𑀫𑀕𑀸. 𑀲𑀳 𑀦𑁂𑀢𑁆𑀢𑀺𑀬𑀸𑀢𑀺 𑀲𑀦𑁂𑀢𑁆𑀢𑀺𑀓𑀸. 𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀴𑁂𑀯𑀭𑀁 𑀦𑀺𑀓𑁆𑀔𑀺𑀧𑀫𑀸𑀦𑀸 𑀪𑀽𑀫𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀏𑀯𑀁 𑀯𑀟𑁆𑀠𑁂𑀦𑁆𑀢𑀸𑀯 𑀖𑁄𑀭𑀁 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁪𑁫𑁪. 𑀧𑀸𑀧𑀓𑀁 𑀦𑁄 𑀆𑀯𑀼𑀲𑁄 𑀓𑀢𑀦𑁆𑀢𑀺 𑀆𑀯𑀼𑀲𑁄 𑀅𑀫𑁆𑀳𑁂𑀳𑀺 𑀧𑀸𑀧𑀓𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑁪𑁫𑁫. 𑀓𑀢𑀫𑁂𑀦 𑀢𑁆𑀯𑀁 𑀪𑀽𑀫𑀺 𑀯𑀺𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀪𑀽𑀫𑀻𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀧𑀺𑀬𑀁 𑀯𑀢𑁆𑀢𑀼𑀓𑀸𑀫𑁄 𑀓𑀺𑀭 𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀦𑀯𑀓𑁂 𑀪𑀺𑀓𑁆𑀔𑀽 𑀏𑀯𑀁 𑀆𑀫𑀦𑁆𑀢𑁂𑀢𑀺. 𑀓𑀼𑀮𑁆𑀮𑀓𑀯𑀺𑀳𑀸𑀭𑁂𑀦𑀸𑀢𑀺 𑀉𑀢𑁆𑀢𑀸𑀦𑀯𑀺𑀳𑀸𑀭𑁂𑀦.

𑁪𑁫𑁭. 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀓𑀣𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺? 𑀢𑀢𑁆𑀭 𑀳𑀺 ‘‘𑀲𑀦𑁆𑀦𑀺𑀥𑀺 𑀦𑀸𑀫 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀽’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀆𑀧𑀢𑁆𑀢𑀺𑀁 𑀯𑀤𑀦𑁆𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑁂𑀓𑁂 𑀫𑀜𑁆𑀜𑀦𑁆𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀮𑁄𑀡𑀁 𑀦𑀸𑀫 𑀬𑀸𑀯𑀚𑀻𑀯𑀺𑀓𑀢𑁆𑀢𑀸 𑀲𑀦𑁆𑀦𑀺𑀥𑀺𑀪𑀸𑀯𑀁 𑀦𑀸𑀧𑀚𑁆𑀚𑀢𑀺. 𑀬𑀫𑁆𑀧𑀺 𑀅𑀮𑁄𑀡𑀓𑀁 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯, 𑀢𑀲𑁆𑀫𑀸 ‘‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻’𑀢𑀺 𑀯𑀘𑀦𑀢𑁄 𑀤𑀼𑀓𑁆𑀓𑀝𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀤𑀼𑀓𑁆𑀓𑀝𑁂𑀦𑀧𑀺 𑀦 𑀪𑀯𑀺𑀢𑀩𑁆𑀩𑀁, 𑀦 𑀳𑀺 𑀏𑀢𑁆𑀣 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀬𑀸𑀯𑀓𑀸𑀮𑀺𑀓𑀫𑁂𑀯 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀦 𑀘 𑀢𑀁 𑀯𑀺𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑀁. 𑀬𑀤𑀺 𑀯𑀸 ‘‘𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑁂𑀦 𑀢𑀼𑀫𑁆𑀳𑁂 𑀤𑀼𑀓𑁆𑀓𑀝𑀁 𑀫𑀜𑁆𑀜𑁂𑀣, 𑀬𑀸𑀯𑀚𑀻𑀯𑀺𑀓𑀫𑀺𑀲𑁆𑀲𑀁 𑀬𑀸𑀯𑀓𑀸𑀮𑀺𑀓𑀁 𑀯𑀺𑀓𑀸𑀮𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀁 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄.

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀤𑀺 𑀲𑀫𑁆𑀪𑀺𑀦𑁆𑀦𑀭𑀲𑀁 𑀳𑁄𑀢𑀺, 𑀬𑀸𑀯𑀓𑀸𑀮𑀺𑀓𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀯𑀺𑀓𑀸𑀮𑁂 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀦 𑀇𑀥 ‘‘𑀦 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑀫𑀢𑁆𑀢𑁂𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀬𑀣𑁂𑀯 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀓𑀸𑀮𑀺𑀓𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺, 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀸𑀯𑀳𑀁 𑀳𑁄𑀢𑀺. 𑀏𑀯𑀁 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀅𑀧𑀭𑀚𑁆𑀚𑀼 𑀬𑀸𑀯𑀓𑀸𑀮𑀺𑀓𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀦 𑀓𑀧𑁆𑀧𑀢𑀺, 𑀲𑀦𑁆𑀦𑀺𑀥𑀺𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀸𑀯𑀳𑀁 𑀳𑁄𑀢𑀺. 𑀢𑀁 ‘‘𑀲𑀦𑁆𑀦𑀺𑀥𑀺𑀓𑀢𑀁 𑀇𑀤’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺. 𑀢𑀲𑁆𑀫𑀸 ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀼𑀘𑁆𑀙𑀸𑀬 ‘‘𑀧𑀭𑀺𑀲𑀼𑀤𑁆𑀥𑀫𑀺𑀤𑀁 𑀩𑁆𑀬𑀸𑀓𑀭𑀡𑀁 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺.

𑀭𑀸𑀚𑀕𑀳𑁂 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂𑀢𑀺 𑀇𑀤𑀁 ‘‘𑀦 𑀪𑀺𑀓𑁆𑀔𑀯𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀦𑀺; 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀦𑀬𑀸𑀢𑀺𑀲𑀸𑀭𑁂 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀦 𑀪𑀺𑀓𑁆𑀔𑀯𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀦𑀻’’𑀢𑀺 𑀏𑀢𑀲𑁆𑀲 𑀯𑀺𑀦𑀬𑀲𑁆𑀲 𑀅𑀢𑀺𑀲𑀸𑀭𑁂 𑀤𑀼𑀓𑁆𑀓𑀝𑀁. 𑀘𑀫𑁆𑀧𑁂𑀬𑁆𑀬𑀓𑁂 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀇𑀤𑀁 ‘‘𑀅𑀥𑀫𑁆𑀫𑁂𑀦 𑀘𑁂 𑀪𑀺𑀓𑁆𑀔𑀯𑁂 𑀯𑀕𑁆𑀕𑀓𑀫𑁆𑀫𑀁, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀓𑀢𑁆𑀯𑀸 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀆𑀕𑀢𑀁 𑀯𑀺𑀦𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀏𑀓𑀘𑁆𑀘𑁄 𑀓𑀧𑁆𑀧𑀢𑀻𑀢𑀺 𑀇𑀤𑀁 𑀥𑀫𑁆𑀫𑀺𑀓𑀁 𑀆𑀘𑀺𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑁂𑀤𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀳𑀺 ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀆𑀕𑀢𑀁, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀲𑀼𑀕𑀢𑀯𑀺𑀤𑀢𑁆𑀣𑀻𑀦𑀁 𑀉𑀧𑀭𑀺 𑀤𑀲𑀸𑀬𑁂𑀯 𑀯𑀺𑀤𑀢𑁆𑀣𑀺𑀫𑀢𑁆𑀢𑀸 𑀮𑀩𑁆𑀪𑀢𑀺. 𑀤𑀲𑀸𑀬 𑀯𑀺𑀦𑀸 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲 𑀇𑀤𑀁 𑀆𑀕𑀢𑀫𑁂𑀯 𑀳𑁄𑀢𑀺 𑁋 ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀢𑀲𑁆𑀫𑀸 ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀧𑀼𑀝𑁆𑀞𑁄 ‘‘𑀙𑁂𑀤𑀦𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀳. 𑀙𑁂𑀤𑀦𑀓𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀲𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀺𑀯𑀕𑁆𑀕𑀲𑀗𑁆𑀕𑀳𑀸 𑀯𑀼𑀢𑁆𑀢𑀸, 𑀤𑁆𑀯𑀸𑀯𑀻𑀲𑀢𑀺𑀧𑀪𑁂𑀤𑀦𑀸;

𑀔𑀦𑁆𑀥𑀓𑀸 𑀲𑀸𑀲𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀧𑁆𑀧𑀳𑀸𑀬𑀺𑀦𑁄.

𑀬𑀸 𑀢𑁂𑀲𑀁 𑀯𑀡𑁆𑀡𑀦𑀸 𑀏𑀲𑀸, 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸;

𑀲𑀺𑀤𑁆𑀥𑀸 𑀲𑀺𑀚𑁆𑀛𑀦𑁆𑀢𑀼 𑀓𑀮𑁆𑀬𑀸𑀡𑀸, 𑀏𑀯𑀁 𑀆𑀲𑀸𑀧𑀺 𑀧𑀸𑀡𑀺𑀦𑀦𑁆𑀢𑀺.

𑀘𑀽𑀴𑀯𑀕𑁆𑀕-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.