📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀫𑀳𑀸𑀯𑀕𑁆𑀕𑀧𑀸𑀴𑀺

𑁧. 𑀫𑀳𑀸𑀔𑀦𑁆𑀥𑀓𑁄

𑁧. 𑀩𑁄𑀥𑀺𑀓𑀣𑀸

𑁧. [𑀉𑀤𑀸. 𑁧 𑀆𑀤𑀬𑁄] 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻 [𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻 (𑀓.)]. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺 𑁋 𑀏𑀯𑀫𑁂𑀢𑀲𑁆𑀲 ¶ 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄 ¶ , 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑁋 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 ¶ 𑀳𑁄𑀢𑀻’’𑀢𑀺.

𑀅𑀣 ¶ 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸;

𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺.

𑁨. [𑀉𑀤𑀸. 𑁨] 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁…𑀧𑁂… ¶ 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸;

𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻’’𑀢𑀺.

𑁩. [𑀉𑀤𑀸. 𑁩] 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁…𑀧𑁂… ¶ 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

𑀅𑀣 ¶ 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀯𑀺𑀥𑀽𑀧𑀬𑀁 𑀢𑀺𑀝𑁆𑀞𑀢𑀺 𑀫𑀸𑀭𑀲𑁂𑀦𑀁;

𑀲𑀽𑀭𑀺𑀬𑁄𑀯 [𑀲𑀼𑀭𑀺𑀬𑁄𑀯 (𑀲𑀻. 𑀲𑁆𑀬𑀸. 𑀓𑀁.)] 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺.

𑀩𑁄𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀚𑀧𑀸𑀮𑀓𑀣𑀸

𑁪. [𑀉𑀤𑀸. 𑁪] 𑀅𑀣 ¶ 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀳𑀼𑀁𑀳𑀼𑀗𑁆𑀓𑀚𑀸𑀢𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 ¶ 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 ¶ 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀢𑀫𑁂 𑀘 𑀧𑀦 𑀩𑁆𑀭𑀸𑀳𑁆𑀫𑀡𑀓𑀭𑀡𑀸 [𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 (𑀓.) 𑀩𑁆𑀭𑀸𑀳𑁆𑀫𑀡𑀓𑀭𑀸𑀡𑀸 (?)] 𑀥𑀫𑁆𑀫𑀸’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀦𑁂𑀢𑁆𑀢𑀺. 𑁧𑁦𑁩] 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁄;

𑀦𑀺𑀳𑀼𑀁𑀳𑀼𑀗𑁆𑀓𑁄 𑀦𑀺𑀓𑁆𑀓𑀲𑀸𑀯𑁄 𑀬𑀢𑀢𑁆𑀢𑁄;

𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀥𑀫𑁆𑀫𑁂𑀦 𑀲𑁄 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬;

𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑀅𑀚𑀧𑀸𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀼𑀘𑀮𑀺𑀦𑁆𑀤𑀓𑀣𑀸

𑁫. [𑀉𑀤𑀸. 𑁧𑁧] 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑀸 ¶ 𑀬𑁂𑀦 𑀫𑀼𑀘𑀮𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀼𑀘𑀮𑀺𑀦𑁆𑀤𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻. 𑀅𑀣 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀲𑀓𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 ¶ 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 𑁋 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢𑀁, 𑀫𑀸 𑀪𑀕𑀯𑀦𑁆𑀢𑀁 𑀉𑀡𑁆𑀳𑀁, 𑀫𑀸 𑀪𑀕𑀯𑀦𑁆𑀢𑀁 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁄’’𑀢𑀺 […𑀲𑀺𑀭𑀺𑀁 𑀲𑀧… (𑀲𑀻. 𑀲𑁆𑀬𑀸. 𑀓𑀁.)]. 𑀅𑀣 ¶ 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀯𑀺𑀤𑁆𑀥𑀁 𑀯𑀺𑀕𑀢𑀯𑀮𑀸𑀳𑀓𑀁 𑀤𑁂𑀯𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀸 𑀪𑁄𑀕𑁂 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀲𑀓𑀯𑀡𑁆𑀡𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀓𑀣𑀸. 𑁩𑁩𑁮 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑁂, 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄.

[𑀓𑀣𑀸. 𑁩𑁩𑁮 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂, 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄;

𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀫𑀼𑀘𑀮𑀺𑀦𑁆𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀸𑀚𑀸𑀬𑀢𑀦𑀓𑀣𑀸

𑁬. 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀼𑀘𑀮𑀺𑀦𑁆𑀤𑀫𑀽𑀮𑀸 𑀬𑁂𑀦 𑀭𑀸𑀚𑀸𑀬𑀢𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀢𑁂𑀦 𑀔𑁄 𑀧𑀦 ¶ 𑀲𑀫𑀬𑁂𑀦 𑀢𑀧𑀼𑀲𑁆𑀲 [𑀢𑀧𑀲𑁆𑀲𑀼 (𑀲𑀻.)] 𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀉𑀓𑁆𑀓𑀮𑀸 𑀢𑀁 𑀤𑁂𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀯𑀸𑀡𑀺𑀚𑀸𑀦𑀁 ¶ 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑁂 𑀯𑀸𑀡𑀺𑀚𑁂 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀯𑀺𑀳𑀭𑀢𑀺 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄; 𑀕𑀘𑁆𑀙𑀣 𑀢𑀁 𑀪𑀕𑀯𑀦𑁆𑀢𑀁 𑀫𑀦𑁆𑀣𑁂𑀦 𑀘 𑀫𑀥𑀼𑀧𑀺𑀡𑁆𑀟𑀺𑀓𑀸𑀬 𑀘 𑀧𑀢𑀺𑀫𑀸𑀦𑁂𑀣; 𑀢𑀁 𑀯𑁄 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘, 𑀬𑀁 𑀅𑀫𑁆𑀳𑀸𑀓𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 ¶ 𑀲𑀼𑀔𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀢𑀣𑀸𑀕𑀢𑀸 𑀳𑀢𑁆𑀣𑁂𑀲𑀼 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀁 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘𑀸’’𑀢𑀺? 𑀅𑀣 ¶ 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀘𑀢𑀼𑀤𑁆𑀤𑀺𑀲𑀸 𑀘𑀢𑁆𑀢𑀸𑀭𑁄 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀪𑀕𑀯𑀦𑁆𑀢𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 (𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁) [( ) 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘, 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 ¶ 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺. 𑀢𑁂 𑀘 𑀮𑁄𑀓𑁂 𑀧𑀞𑀫𑀁 𑀉𑀧𑀸𑀲𑀓𑀸 𑀅𑀳𑁂𑀲𑀼𑀁 𑀤𑁆𑀯𑁂𑀯𑀸𑀘𑀺𑀓𑀸.

𑀭𑀸𑀚𑀸𑀬𑀢𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁫. 𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸

𑁭. [𑀅𑀬𑀁 𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸 𑀤𑀻. 𑀦𑀺. 𑁨.𑁬𑁪 𑀆𑀤𑀬𑁄; 𑀫. 𑀦𑀺. 𑁧.𑁨𑁮𑁧 𑀆𑀤𑀬𑁄; 𑀫. 𑀦𑀺. 𑁨.𑁩𑁩𑁬 𑀆𑀤𑀬𑁄; 𑀲𑀁. 𑀦𑀺. 𑁧.𑁧𑁭𑁨 𑀆𑀤𑀬𑁄] 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 ¶ 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀅𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’’𑀢𑀺. 𑀅𑀧𑀺𑀲𑁆𑀲𑀼 𑀪𑀕𑀯𑀦𑁆𑀢𑀁 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘‘𑀓𑀺𑀘𑁆𑀙𑁂𑀦 ¶ 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘‘𑀧𑀝𑀺𑀲𑁄𑀢𑀕𑀸𑀫𑀺𑀁 ¶ 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸 [𑀆𑀯𑀝𑀸 (𑀲𑀻.)]’’𑀢𑀺.

𑀇𑀢𑀺𑀳 ¶ 𑀪𑀕𑀯𑀢𑁄 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬.

𑁮. 𑀅𑀣 𑀔𑁄 𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 [𑀦𑀫𑀺𑀲𑁆𑀲𑀢𑀺 (?)], 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺 ¶ , 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 [𑀅𑀯𑀸𑀧𑀼𑀭𑁂𑀢𑀁 (𑀲𑀻.)] 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 ¶ 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 ¶ 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 [𑀅𑀦𑀡 (𑀓.)] 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 [𑀤𑁂𑀲𑁂𑀢𑀼 (𑀓.)] 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

[[ ] 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀫𑀽𑀮𑀧𑀡𑁆𑀡𑀸𑀲𑀓𑁂𑀲𑀼 𑀧𑀸𑀲𑀭𑀸𑀲𑀺𑀲𑀼𑀢𑁆𑀣𑁂 𑀩𑁆𑀭𑀳𑁆𑀫𑀬𑀸𑀘𑀦𑀸 𑀲𑀓𑀺𑀁 𑀬𑁂𑀯 𑀆𑀕𑀢𑀸] [ 𑀏𑀯𑀁 ¶ 𑀯𑀼𑀢𑁆𑀢𑁂 𑀪𑀕𑀯𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀩𑁆𑀭𑀳𑁆𑀫𑁂, 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’𑀢𑀺.

𑀇𑀢𑀺𑀳 𑀫𑁂, 𑀩𑁆𑀭𑀳𑁆𑀫𑁂, 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁; 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 ¶ 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 ¶ 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀩𑁆𑀭𑀳𑁆𑀫𑁂, 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’𑀢𑀺.

𑀇𑀢𑀺𑀳 ¶ 𑀫𑁂, 𑀩𑁆𑀭𑀳𑁆𑀫𑁂, 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 ¶ 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑁯. 𑀅𑀣 ¶ 𑀔𑁄 𑀪𑀕𑀯𑀸 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀚𑁆𑀛𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 [𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁.)] 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺 ¶ , 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺 [𑀢𑀺𑀝𑁆𑀞𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦, 𑀏𑀯𑀫𑁂𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 ¶ 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 ¶ 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂; 𑀤𑀺𑀲𑁆𑀯𑀸𑀦 ¶ 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸;

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁;

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸

𑁧𑁦. [𑀫. 𑀦𑀺. 𑁧.𑁨𑁮𑁪 𑀆𑀤𑀬𑁄; 𑀫. 𑀦𑀺. 𑁨.𑁩𑁩𑁯 𑀆𑀤𑀬𑁄] 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄; 𑀬𑀁𑀦𑀽𑀦𑀸𑀳𑀁 𑀆𑀴𑀸𑀭𑀲𑁆𑀲 𑀓𑀸𑀮𑀸𑀫𑀲𑁆𑀲 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀦𑁆𑀢𑀭𑀳𑀺𑀢𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 𑁋 ‘‘𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄 𑀆𑀴𑀸𑀭𑁄 ¶ 𑀓𑀸𑀮𑀸𑀫𑁄’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 ¶ 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀸𑀚𑀸𑀦𑀺𑀬𑁄 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄; 𑀲𑀘𑁂 𑀳𑀺 𑀲𑁄 𑀇𑀫𑀁 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀉𑀤𑀓𑁄 [𑀉𑀤𑁆𑀤𑀓𑁄 (𑀲𑀻. 𑀲𑁆𑀬𑀸.)] 𑀭𑀸𑀫𑀧𑀼𑀢𑁆𑀢𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄; 𑀬𑀁𑀦𑀽𑀦𑀸𑀳𑀁 𑀉𑀤𑀓𑀲𑁆𑀲 𑀭𑀸𑀫𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀦𑁆𑀢𑀭𑀳𑀺𑀢𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 𑁋 ‘‘𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑁄 ¶ 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀸𑀚𑀸𑀦𑀺𑀬𑁄 𑀔𑁄 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄; 𑀲𑀘𑁂 𑀳𑀺 𑀲𑁄 𑀇𑀫𑀁 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑁂𑀬𑁆𑀬𑀸’’𑀢𑀺

𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 ¶ 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀩𑀳𑀼𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀬𑁂 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼; 𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀏𑀢𑀭𑀳𑀺 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑁂 ¶ 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑁧𑁧. 𑀅𑀤𑁆𑀤𑀲𑀸 𑀔𑁄 𑀉𑀧𑀓𑁄 𑀆𑀚𑀻𑀯𑀓𑁄 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄? 𑀓𑁄 𑀯𑀸 𑀢𑁂 𑀲𑀢𑁆𑀣𑀸? 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀉𑀧𑀓𑀁 𑀆𑀚𑀻𑀯𑀓𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

[𑀥. 𑀧. 𑁩𑁫𑁩; 𑀓𑀣𑀸. 𑁪𑁦𑁫] ‘‘𑀲𑀩𑁆𑀩𑀸𑀪𑀺𑀪𑀽 ¶ 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺,

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄;

𑀲𑀩𑁆𑀩𑀜𑁆𑀚𑀳𑁄 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄,

𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀁.

[𑀫𑀺. 𑀧. 𑁪.𑁫.𑁧𑁧 𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀧𑀺; 𑀓𑀣𑀸. 𑁪𑁦𑁫] ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺] ‘‘𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁, 𑀕𑀘𑁆𑀙𑀸𑀫𑀺 𑀓𑀸𑀲𑀺𑀦𑀁 𑀧𑀼𑀭𑀁;

𑀅𑀦𑁆𑀥𑀻𑀪𑀽𑀢𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀆𑀳𑀜𑁆𑀙𑀁 [𑀆𑀳𑀜𑁆𑀜𑀺𑀁 (𑀓.)] 𑀅𑀫𑀢𑀤𑀼𑀦𑁆𑀤𑀼𑀪𑀺’’𑀦𑁆𑀢𑀺.

𑀬𑀣𑀸 ¶ 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀧𑀝𑀺𑀚𑀸𑀦𑀸𑀲𑀺, 𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄𑀢𑀺.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺] ‘‘𑀫𑀸𑀤𑀺𑀲𑀸 𑀯𑁂 𑀚𑀺𑀦𑀸 𑀳𑁄𑀦𑁆𑀢𑀺, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁;

𑀚𑀺𑀢𑀸 ¶ 𑀫𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀢𑀲𑁆𑀫𑀸𑀳𑀫𑀼𑀧𑀓 [𑀢𑀲𑁆𑀫𑀸𑀳𑀫𑀼𑀧𑀓𑀸 (𑀲𑀻.)] 𑀚𑀺𑀦𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀉𑀧𑀓𑁄 𑀆𑀚𑀻𑀯𑀓𑁄 𑀳𑀼𑀧𑁂𑀬𑁆𑀬𑀧𑀸𑀯𑀼𑀲𑁄𑀢𑀺 [𑀳𑀼𑀯𑁂𑀬𑁆𑀬𑀧𑀸𑀯𑀼𑀲𑁄 (𑀲𑀻.) 𑀳𑀼𑀯𑁂𑀬𑁆𑀬𑀸𑀯𑀼𑀲𑁄 (𑀲𑁆𑀬𑀸.)] 𑀯𑀢𑁆𑀯𑀸 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸 𑀉𑀫𑁆𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁨. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄, 𑀬𑁂𑀦 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀁 [𑀇𑀤𑀁 𑀧𑀤𑀁 𑀓𑁂𑀲𑀼𑀘𑀺 𑀦𑀢𑁆𑀣𑀺] 𑀲𑀡𑁆𑀞𑀧𑁂𑀲𑀼𑀁 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀘𑁆𑀙𑀢𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 ¶ 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬. 𑀲𑁄 𑀦𑁂𑀯 𑀅𑀪𑀺𑀯𑀸𑀤𑁂𑀢𑀩𑁆𑀩𑁄, 𑀦 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑁄, 𑀦𑀸𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀅𑀧𑀺 𑀘 𑀔𑁄 𑀆𑀲𑀦𑀁 𑀞𑀧𑁂𑀢𑀩𑁆𑀩𑀁, 𑀲𑀘𑁂 𑀲𑁄 𑀆𑀓𑀗𑁆𑀔𑀺𑀲𑁆𑀲𑀢𑀺 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀬𑀣𑀸 𑀬𑀣𑀸 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀢𑀺, 𑀢𑀣𑀸 𑀢𑀣𑀸 [𑀢𑀣𑀸 𑀢𑀣𑀸 𑀢𑁂 (𑀲𑀻. 𑀲𑁆𑀬𑀸.)] 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀲𑀓𑀸𑀬 𑀓𑀢𑀺𑀓𑀸𑀬 𑀲𑀡𑁆𑀞𑀸𑀢𑀼𑀁 ¶ . 𑀅𑀲𑀡𑁆𑀞𑀳𑀦𑁆𑀢𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁, 𑀏𑀓𑁄 𑀧𑀸𑀤𑀧𑀻𑀞𑀁, 𑀏𑀓𑁄 𑀧𑀸𑀤𑀓𑀞𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂; 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀅𑀧𑀺𑀲𑁆𑀲𑀼 [𑀅𑀧𑀺 𑀘 𑀔𑁄 (𑀧𑀸𑀲𑀭𑀸𑀲𑀺𑀲𑀼𑀢𑁆𑀣)] 𑀪𑀕𑀯𑀦𑁆𑀢𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 ¶ 𑀲𑀫𑀼𑀤𑀸𑀘𑀭𑀣 [𑀲𑀫𑀼𑀤𑀸𑀘𑀭𑀺𑀢𑁆𑀣 (𑀲𑀻. 𑀲𑁆𑀬𑀸.)]. 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 [𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 (𑀲𑁆𑀬𑀸.)] 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀸𑀬𑀧𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀕𑁄𑀢𑀫, 𑀇𑀭𑀺𑀬𑀸𑀬 [𑀘𑀭𑀺𑀬𑀸𑀬 (𑀲𑁆𑀬𑀸.)], 𑀢𑀸𑀬 𑀧𑀝𑀺𑀧𑀤𑀸𑀬, 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀦𑁂𑀯𑀚𑁆𑀛𑀕𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 [𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 (𑀲𑁆𑀬𑀸. 𑀓.)] 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀭𑀳𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬, 𑀅𑀥𑀺𑀕𑀫𑀺𑀲𑁆𑀲𑀲𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀩𑀸𑀳𑀼𑀮𑁆𑀮𑀺𑀓𑁄, 𑀦 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀦 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬; 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺 ¶ , 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 ¶ 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁…𑀧𑁂…. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘…𑀧𑁂…. 𑀢𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀸𑀬𑀧𑀺 ¶ 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀕𑁄𑀢𑀫, 𑀇𑀭𑀺𑀬𑀸𑀬, 𑀢𑀸𑀬 𑀧𑀝𑀺𑀧𑀤𑀸𑀬, 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀦𑁂𑀯𑀚𑁆𑀛𑀕𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀭𑀳𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 ¶ 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬, 𑀅𑀥𑀺𑀕𑀫𑀺𑀲𑁆𑀲𑀲𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀚𑀸𑀦𑀸𑀣 𑀫𑁂 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀧𑀪𑀸𑀯𑀺𑀢𑀫𑁂𑀢’’𑀦𑁆𑀢𑀺 [𑀪𑀸𑀲𑀺𑀢𑀫𑁂𑀢𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓.) 𑀝𑀻𑀓𑀸𑀬𑁄 𑀑𑀮𑁄𑀓𑁂𑀢𑀩𑁆𑀩𑀸]? ‘‘𑀦𑁄𑀳𑁂𑀢𑀁, 𑀪𑀦𑁆𑀢𑁂’’. 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺. 𑀅𑀲𑀓𑁆𑀔𑀺 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁. 𑀅𑀣 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀲𑀼𑀲𑁆𑀲𑀽𑀲𑀺𑀁𑀲𑀼, 𑀲𑁄𑀢𑀁 𑀑𑀤𑀳𑀺𑀁𑀲𑀼, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑀼𑀁.

𑁧𑁩. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘[𑀲𑀁. 𑀦𑀺. 𑁫.𑁧𑁦𑁮𑁧 𑀆𑀤𑀬𑁄] 𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂 ¶ , 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸. 𑀓𑀢𑀫𑁂 𑀤𑁆𑀯𑁂 [𑀇𑀤𑀁 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺]? 𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀬𑁄 𑀘𑀸𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄. 𑀏𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑀸, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

𑁧𑁪. ‘‘𑀇𑀤𑀁 ¶ 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 ¶ 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀲𑀁𑀔𑀺𑀢𑁆𑀢𑁂𑀦, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 ¶ [𑀧𑀜𑁆𑀘𑀼𑀧𑀸𑀤𑀸𑀦𑀔𑀦𑁆𑀥𑀸𑀧𑀺 (𑀓)] 𑀤𑀼𑀓𑁆𑀔𑀸. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀏𑀢𑁆𑀣 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀤𑀻𑀲𑀼 𑀤𑀼𑀓𑁆𑀔𑀲𑀫𑀼𑀤𑀬𑁄 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀯𑀢𑁆𑀢𑀩𑁆𑀩𑁂 𑀤𑀼𑀓𑁆𑀔𑀲𑀫𑀼𑀤𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀢𑀢𑁄’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺𑀧𑀸𑀞𑀯𑀡𑁆𑀡𑀦𑀸𑀬𑀁 ‘‘𑀲𑀢𑀺𑀧𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂 𑀮𑀺𑀗𑁆𑀕𑀪𑁂𑀤𑁄 𑀕𑀳𑀺𑀢𑁄, 𑀬𑀣𑀸 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀲𑀓𑀮𑀺𑀗𑁆𑀕𑀺𑀓𑀧𑀸𑀞𑁄 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀧𑀸𑀴𑀺𑀬𑀸 𑀲𑀫𑁂𑀢𑀺.] 𑀅𑀭𑀺𑀬𑀲𑀘𑁆𑀘𑀁 𑁋 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀓.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀻. 𑀲𑁆𑀬𑀸.)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸.

‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑁋 𑀬𑁄 𑀢𑀲𑁆𑀲𑀸 𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄, 𑀘𑀸𑀕𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑁄, 𑀫𑀼𑀢𑁆𑀢𑀺, 𑀅𑀦𑀸𑀮𑀬𑁄. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑁋 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

𑁧𑁫. ‘‘𑀇𑀤𑀁 ¶ 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺 ¶ , 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀧𑀳𑀻𑀦𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 ¶ 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 ¶ 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀪𑀸𑀯𑀺𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 ¶ 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑁧𑁬. ‘‘𑀬𑀸𑀯𑀓𑀻𑀯𑀜𑁆𑀘 𑀫𑁂, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀦 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀬𑀢𑁄 𑀘 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 (𑀲𑀻. 𑀲𑁆𑀬𑀸.)] 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸 𑀅𑀢𑁆𑀢𑀫𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 [𑀇𑀤𑀫𑀯𑁄𑀘…𑀧𑁂… 𑀅𑀪𑀺𑀦𑀦𑁆𑀤𑀼𑀦𑁆𑀢𑀺𑀯𑀸𑀓𑁆𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺].

𑀇𑀫𑀲𑁆𑀫𑀺𑀜𑁆𑀘 ¶ 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑁧𑁭. 𑀧𑀯𑀢𑁆𑀢𑀺𑀢𑁂 ¶ 𑀘 𑀧𑀦 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑁂, 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀏𑀢𑀁 𑀪𑀕𑀯𑀢𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 ¶ 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁, 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁…𑀧𑁂… 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸…𑀧𑁂… 𑀬𑀸𑀫𑀸 𑀤𑁂𑀯𑀸…𑀧𑁂… 𑀢𑀼𑀲𑀺𑀢𑀸 𑀤𑁂𑀯𑀸…𑀧𑁂… 𑀦𑀺𑀫𑁆𑀫𑀸𑀦𑀭𑀢𑀻 ¶ 𑀤𑁂𑀯𑀸…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀏𑀢𑀁 𑀪𑀕𑀯𑀢𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀇𑀢𑀺𑀳, 𑀢𑁂𑀦 𑀔𑀡𑁂𑀦, 𑀢𑁂𑀦 𑀮𑀬𑁂𑀦 [𑀢𑁂𑀦 𑀮𑀬𑁂𑀦𑀸𑀢𑀺 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀁𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺 ¶ ; 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺, 𑀅𑀢𑀺𑀓𑁆𑀓𑀫𑁆𑀫 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄 𑀪𑀕𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄 𑀓𑁄𑀡𑁆𑀟𑀜𑁆𑀜𑁄, 𑀅𑀜𑁆𑀜𑀸𑀲𑀺 𑀯𑀢 𑀪𑁄 𑀓𑁄𑀡𑁆𑀟𑀜𑁆𑀜𑁄’’𑀢𑀺. 𑀇𑀢𑀺 𑀳𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 ‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’ 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑁧𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁧𑁯. 𑀅𑀣 𑀔𑁄 𑀪𑀕𑀯𑀸 𑀢𑀤𑀯𑀲𑁂𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀘 𑀯𑀧𑁆𑀧𑀲𑁆𑀲 𑀆𑀬𑀲𑁆𑀫𑀢𑁄 𑀘 𑀪𑀤𑁆𑀤𑀺𑀬𑀲𑁆𑀲 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺.

𑀢𑁂 ¶ 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 ¶ 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 ¶ 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀢𑀤𑀯𑀲𑁂𑀲𑁂 𑀪𑀺𑀓𑁆𑀔𑀽 𑀦𑀻𑀳𑀸𑀭𑀪𑀢𑁆𑀢𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀬𑀁 𑀢𑀬𑁄 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀢𑁂𑀦 𑀙𑀩𑁆𑀩𑀕𑁆𑀕𑁄 𑀬𑀸𑀧𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀘 𑀫𑀳𑀸𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀘 𑀅𑀲𑁆𑀲𑀚𑀺𑀲𑁆𑀲 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 ¶ . 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁨𑁦. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

[𑀲𑀁. 𑀦𑀺. 𑁩.𑁫𑁯 𑀆𑀤𑀬𑁄] ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸. 𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 ¶ 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀯𑁂𑀤𑀦𑀸, 𑀅𑀦𑀢𑁆𑀢𑀸. 𑀯𑁂𑀤𑀦𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀲𑀜𑁆𑀜𑀸, 𑀅𑀦𑀢𑁆𑀢𑀸. 𑀲𑀜𑁆𑀜𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 ¶ 𑀘 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺. 𑀲𑀗𑁆𑀔𑀸𑀭𑀸, 𑀅𑀦𑀢𑁆𑀢𑀸. 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀦𑀬𑀺𑀤𑀁 [𑀦𑀬𑀺𑀫𑁂 (𑀓.)] 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀁, 𑀮𑀩𑁆𑀪𑁂𑀣 𑀘 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁, 𑀅𑀦𑀢𑁆𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁 ¶ , 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬 ¶ , 𑀮𑀩𑁆𑀪𑁂𑀣 𑀘 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺.

𑁨𑁧. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂 ¶ . 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀯𑁂𑀤𑀦𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀲𑀜𑁆𑀜𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 ¶ 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂.

𑁨𑁨. ‘‘𑀢𑀲𑁆𑀫𑀸𑀢𑀺𑀳 ¶ , 𑀪𑀺𑀓𑁆𑀔𑀯𑁂, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 [𑀬𑀁 𑀤𑀽𑀭𑁂 𑀯𑀸 (𑀲𑁆𑀬𑀸.)] 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑁋 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀳𑀻𑀦𑀸 𑀯𑀸 𑀧𑀡𑀻𑀢𑀸 𑀯𑀸 𑀬𑀸 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀸 𑀯𑁂𑀤𑀦𑀸 𑁋 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀲𑀜𑁆𑀜𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀳𑀻𑀦𑀸 𑀯𑀸 𑀧𑀡𑀻𑀢𑀸 𑀯𑀸 𑀬𑀸 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀸 𑀲𑀜𑁆𑀜𑀸 𑁋 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀳𑀻𑀦𑀸 ¶ 𑀯𑀸 𑀧𑀡𑀻𑀢𑀸 𑀯𑀸 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑁋 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑁋 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑁋 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁.

𑁨𑁩. ‘‘𑀏𑀯𑀁 ¶ 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺; 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑁨𑁪. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 [𑀅𑀪𑀺𑀦𑀦𑁆𑀤𑀼𑀁 (𑀲𑁆𑀬𑀸.)]. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀺.

𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀪𑀸𑀡𑀯𑀸𑀭𑁄.

𑁭. 𑀧𑀩𑁆𑀩𑀚𑁆𑀚𑀸𑀓𑀣𑀸

𑁨𑁫. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀬𑀲𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀢𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀳𑁄𑀦𑁆𑀢𑀺 𑁋 𑀏𑀓𑁄 ¶ 𑀳𑁂𑀫𑀦𑁆𑀢𑀺𑀓𑁄, 𑀏𑀓𑁄 𑀕𑀺𑀫𑁆𑀳𑀺𑀓𑁄, 𑀏𑀓𑁄 𑀯𑀲𑁆𑀲𑀺𑀓𑁄. 𑀲𑁄 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 [𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 (𑀲𑀻.)] 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀢𑀺. 𑀅𑀣 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀲𑁆𑀲 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀧𑀭𑀺𑀘𑀸𑀭𑀬𑀫𑀸𑀦𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺, 𑀧𑀭𑀺𑀚𑀦𑀲𑁆𑀲𑀧𑀺 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺, 𑀲𑀩𑁆𑀩𑀭𑀢𑁆𑀢𑀺𑀬𑁄 𑀘 𑀢𑁂𑀮𑀧𑀤𑀻𑀧𑁄 𑀛𑀸𑀬𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀧𑀝𑀺𑀓𑀘𑁆𑀘𑁂𑀯 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀤𑁆𑀤𑀲 𑀲𑀓𑀁 𑀧𑀭𑀺𑀚𑀦𑀁 𑀲𑀼𑀧𑀦𑁆𑀢𑀁 𑁋 𑀅𑀜𑁆𑀜𑀺𑀲𑁆𑀲𑀸 𑀓𑀘𑁆𑀙𑁂 𑀯𑀻𑀡𑀁, 𑀅𑀜𑁆𑀜𑀺𑀲𑁆𑀲𑀸 𑀓𑀡𑁆𑀞𑁂 𑀫𑀼𑀤𑀺𑀗𑁆𑀕𑀁, 𑀅𑀜𑁆𑀜𑀺𑀲𑁆𑀲𑀸 𑀓𑀘𑁆𑀙𑁂 𑀆𑀴𑀫𑁆𑀩𑀭𑀁, 𑀅𑀜𑁆𑀜𑀁 𑀯𑀺𑀓𑁂𑀲𑀺𑀓𑀁, 𑀅𑀜𑁆𑀜𑀁 𑀯𑀺𑀓𑁆𑀔𑁂𑀴𑀺𑀓𑀁, 𑀅𑀜𑁆𑀜𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄, 𑀳𑀢𑁆𑀣𑀧𑁆𑀧𑀢𑁆𑀢𑀁 𑀲𑀼𑀲𑀸𑀦𑀁 𑀫𑀜𑁆𑀜𑁂. 𑀤𑀺𑀲𑁆𑀯𑀸𑀦𑀲𑁆𑀲 𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑁄𑀲𑀺, 𑀦𑀺𑀩𑁆𑀩𑀺𑀤𑀸𑀬 𑀘𑀺𑀢𑁆𑀢𑀁 𑀲𑀡𑁆𑀞𑀸𑀲𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺.

𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀬𑁄 𑀆𑀭𑁄𑀳𑀺𑀢𑁆𑀯𑀸 𑀬𑁂𑀦 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼 𑁋 𑀫𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑀫𑀓𑀸𑀲𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 ¶ . 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀦𑀕𑀭𑀤𑁆𑀯𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 ¶ 𑀯𑀺𑀯𑀭𑀺𑀁𑀲𑀼 𑁋 𑀫𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑀫𑀓𑀸𑀲𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀬𑁂𑀦 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁨𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀔𑁄, 𑀬𑀲, 𑀅𑀦𑀼𑀧𑀤𑁆𑀤𑀼𑀢𑀁, 𑀇𑀤𑀁 𑀅𑀦𑀼𑀧𑀲𑁆𑀲𑀝𑁆𑀞𑀁. 𑀏𑀳𑀺 𑀬𑀲, 𑀦𑀺𑀲𑀻𑀤, 𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑁋 𑀇𑀤𑀁 𑀓𑀺𑀭 𑀅𑀦𑀼𑀧𑀤𑁆𑀤𑀼𑀢𑀁 ¶ , 𑀇𑀤𑀁 𑀅𑀦𑀼𑀧𑀲𑁆𑀲𑀝𑁆𑀞𑀦𑁆𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀳𑀺 𑀑𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 ¶ 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀓𑀮𑁆𑀮𑀘𑀺𑀢𑁆𑀢𑀁, 𑀫𑀼𑀤𑀼𑀘𑀺𑀢𑁆𑀢𑀁, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁, 𑀉𑀤𑀕𑁆𑀕𑀘𑀺𑀢𑁆𑀢𑀁, 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺.

𑁨𑁭. 𑀅𑀣 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀸𑀢𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻 𑀬𑁂𑀦 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀢𑁆𑀢𑁄 𑀢𑁂, 𑀕𑀳𑀧𑀢𑀺, 𑀬𑀲𑁄 𑀦 𑀤𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀘𑀢𑀼𑀤𑁆𑀤𑀺𑀲𑀸 𑀅𑀲𑁆𑀲𑀤𑀽𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀸𑀫𑀁𑀬𑁂𑀯 𑀬𑁂𑀦 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀼𑀯𑀡𑁆𑀡𑀧𑀸𑀤𑀼𑀓𑀸𑀦𑀁 𑀦𑀺𑀓𑁆𑀔𑁂𑀧𑀁, 𑀤𑀺𑀲𑁆𑀯𑀸𑀦 𑀢𑀁𑀬𑁂𑀯 𑀅𑀦𑀼𑀕𑀫𑀸𑀲𑀺 [𑀅𑀦𑀼𑀕𑀫𑀸 (𑀲𑀻. 𑀲𑁆𑀬𑀸.)]. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀁 𑀬𑀣𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀇𑀥 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀦 𑀧𑀲𑁆𑀲𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁂𑀲𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀲𑁆𑀲𑁂𑀬𑁆𑀬𑀸’’𑀢𑀺? 𑀢𑁂𑀦 𑀳𑀺, 𑀕𑀳𑀧𑀢𑀺, 𑀦𑀺𑀲𑀻𑀤, 𑀅𑀧𑁆𑀧𑁂𑀯 𑀦𑀸𑀫 𑀇𑀥 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀲𑀻𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑁋 𑀇𑀥𑁂𑀯 𑀓𑀺𑀭𑀸𑀳𑀁 𑀦𑀺𑀲𑀺𑀦𑁆𑀦𑁄 𑀇𑀥 𑀦𑀺𑀲𑀺𑀦𑁆𑀦𑀁 ¶ 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 ¶ 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 ¶ 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀓𑀮𑁆𑀮𑀘𑀺𑀢𑁆𑀢𑀁, 𑀫𑀼𑀤𑀼𑀘𑀺𑀢𑁆𑀢𑀁, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁, 𑀉𑀤𑀕𑁆𑀕𑀘𑀺𑀢𑁆𑀢𑀁, 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀏𑀯𑀫𑁂𑀯 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 [𑀦𑀺𑀓𑀼𑀚𑁆𑀚𑀺𑀢𑀁 (𑀓.)] 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺 𑁋 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺 ¶ . 𑀲𑁄𑀯 𑀮𑁄𑀓𑁂 𑀧𑀞𑀫𑀁 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀢𑁂𑀯𑀸𑀘𑀺𑀓𑁄 ¶ .

𑁨𑁮. 𑀅𑀣 𑀔𑁄 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀦𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀲𑀲𑁆𑀲 𑀔𑁄 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀢𑀼𑀦𑁄 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀅𑀪𑀩𑁆𑀩𑁄 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄; 𑀬𑀁𑀦𑀽𑀦𑀸𑀳𑀁 𑀢𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀬𑀲𑀁 𑀓𑀼𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀢𑀸 𑀢𑁂 𑀢𑀸𑀢, 𑀬𑀲, 𑀧𑀭𑀺𑀤𑁂𑀯 [𑀧𑀭𑀺𑀤𑁂𑀯𑀻 (𑀓.)] 𑀲𑁄𑀓𑀲𑀫𑀸𑀧𑀦𑁆𑀦𑀸, 𑀤𑁂𑀳𑀺 𑀫𑀸𑀢𑀼𑀬𑀸 𑀚𑀻𑀯𑀺𑀢’’𑀦𑁆𑀢𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀮𑁆𑀮𑁄𑀓𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀳𑀧𑀢𑀺, 𑀬𑀲𑁆𑀲 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑁂𑀓𑁆𑀔𑁂𑀦 𑀤𑀲𑁆𑀲𑀦𑁂𑀦 𑀥𑀫𑁆𑀫𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑁂𑀬𑁆𑀬𑀣𑀸𑀧𑀺 𑀢𑀬𑀸? 𑀢𑀲𑁆𑀲 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 ¶ 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀕𑀳𑀧𑀢𑀺, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑀲𑀲𑁆𑀲 𑀔𑁄, 𑀕𑀳𑀧𑀢𑀺, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑁂𑀓𑁆𑀔𑁂𑀦 𑀤𑀲𑁆𑀲𑀦𑁂𑀦 ¶ 𑀥𑀫𑁆𑀫𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑁂𑀬𑁆𑀬𑀣𑀸𑀧𑀺 𑀢𑀬𑀸. 𑀢𑀲𑁆𑀲 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀯𑀺𑀤𑀺𑀢𑀁 𑀪𑀽𑀫𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 ¶ 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀅𑀪𑀩𑁆𑀩𑁄 𑀔𑁄, 𑀕𑀳𑀧𑀢𑀺, 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄’’𑀢𑀺. ‘‘𑀮𑀸𑀪𑀸, 𑀪𑀦𑁆𑀢𑁂, 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀲𑀼𑀮𑀤𑁆𑀥𑀁, 𑀪𑀦𑁆𑀢𑁂, 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀬𑀣𑀸 𑀬𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀬𑀲𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀲𑁂𑀝𑁆𑀞𑀺𑀫𑁆𑀳𑀺 𑀕𑀳𑀧𑀢𑀺𑀫𑁆𑀳𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 ¶ 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀺.

𑀬𑀲𑀲𑁆𑀲 𑀧𑀩𑁆𑀩𑀚𑁆𑀚𑀸 𑀦𑀺𑀝𑁆𑀞𑀺𑀢𑀸.

𑁨𑁯. 𑀅𑀣 ¶ 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀬𑀲𑁆𑀫𑀢𑀸 𑀬𑀲𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀬𑁂𑀦 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀫𑀸𑀢𑀸 𑀘 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀘 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀸𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑀸, 𑀫𑀼𑀤𑀼𑀘𑀺𑀢𑁆𑀢𑀸, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀸, 𑀉𑀤𑀕𑁆𑀕𑀘𑀺𑀢𑁆𑀢𑀸, 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁 ¶ . 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑀸𑀲𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀢𑀸 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀏𑀢𑀸 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 ¶ 𑀲𑀭𑀡𑀁 𑀕𑀘𑁆𑀙𑀸𑀫, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀺𑀓𑀸𑀬𑁄 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀸 𑀲𑀭𑀡𑀁 𑀕𑀢𑀸’’𑀢𑀺. 𑀢𑀸 𑀘 𑀮𑁄𑀓𑁂 𑀧𑀞𑀫𑀁 𑀉𑀧𑀸𑀲𑀺𑀓𑀸 𑀅𑀳𑁂𑀲𑀼𑀁 𑀢𑁂𑀯𑀸𑀘𑀺𑀓𑀸.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀘 𑀪𑀕𑀯𑀦𑁆𑀢𑀜𑁆𑀘 𑀆𑀬𑀲𑁆𑀫𑀦𑁆𑀢𑀜𑁆𑀘 𑀬𑀲𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 ¶ 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀫𑀸𑀢𑀭𑀜𑁆𑀘 𑀧𑀺𑀢𑀭𑀜𑁆𑀘 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀜𑁆𑀘 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁩𑁦. 𑀅𑀲𑁆𑀲𑁄𑀲𑀼𑀁 𑀔𑁄 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀘𑀢𑁆𑀢𑀸𑀭𑁄 𑀕𑀺𑀳𑀺𑀲𑀳𑀸𑀬𑀓𑀸 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸 𑁋 𑀯𑀺𑀫𑀮𑁄, 𑀲𑀼𑀩𑀸𑀳𑀼 ¶ , 𑀧𑀼𑀡𑁆𑀡𑀚𑀺, 𑀕𑀯𑀫𑁆𑀧𑀢𑀺 𑁋 𑀬𑀲𑁄 𑀓𑀺𑀭 𑀓𑀼𑀮𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄𑀢𑀺. 𑀲𑀼𑀢𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀓𑀸 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑁂 [𑀢𑁂 𑀘𑀢𑁆𑀢𑀸𑀭𑁄 𑀚𑀦𑀸 (𑀓.)] 𑀬𑁂𑀦𑀸𑀬𑀲𑁆𑀫𑀸 𑀬𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀬𑀲𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀢𑁂 𑀘𑀢𑁆𑀢𑀸𑀭𑁄 𑀕𑀺𑀳𑀺𑀲𑀳𑀸𑀬𑀓𑁂 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂 𑀫𑁂, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀕𑀺𑀳𑀺𑀲𑀳𑀸𑀬𑀓𑀸 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸 𑁋 𑀯𑀺𑀫𑀮𑁄, 𑀲𑀼𑀩𑀸𑀳𑀼, 𑀧𑀼𑀡𑁆𑀡𑀚𑀺, 𑀕𑀯𑀫𑁆𑀧𑀢𑀺. 𑀇𑀫𑁂 [𑀇𑀫𑁂 𑀘𑀢𑁆𑀢𑀸𑀭𑁄 (𑀓.)] 𑀪𑀕𑀯𑀸 𑀑𑀯𑀤𑀢𑀼 𑀅𑀦𑀼𑀲𑀸𑀲𑀢𑀽’’𑀢𑀺 ¶ . 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺, 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀲𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀢𑁂𑀲𑀁 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 ¶ 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀏𑀓𑀸𑀤𑀲 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀺.

𑀘𑀢𑀼𑀕𑀺𑀳𑀺𑀲𑀳𑀸𑀬𑀓𑀧𑀩𑁆𑀩𑀚𑁆𑀚𑀸 𑀦𑀺𑀝𑁆𑀞𑀺𑀢𑀸.

𑁩𑁧. 𑀅𑀲𑁆𑀲𑁄𑀲𑀼𑀁 ¶ ¶ 𑀔𑁄 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀧𑀜𑁆𑀜𑀸𑀲𑀫𑀢𑁆𑀢𑀸 𑀕𑀺𑀳𑀺𑀲𑀳𑀸𑀬𑀓𑀸 𑀚𑀸𑀦𑀧𑀤𑀸 𑀧𑀼𑀩𑁆𑀩𑀸𑀦𑀼𑀧𑀼𑀩𑁆𑀩𑀓𑀸𑀦𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸 𑁋 𑀬𑀲𑁄 𑀓𑀺𑀭 𑀓𑀼𑀮𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄𑀢𑀺. 𑀲𑀼𑀢𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀓𑀸 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑁂 𑀬𑁂𑀦𑀸𑀬𑀲𑁆𑀫𑀸 𑀬𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀬𑀲𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀢𑁂 𑀧𑀜𑁆𑀜𑀸𑀲𑀫𑀢𑁆𑀢𑁂 𑀕𑀺𑀳𑀺𑀲𑀳𑀸𑀬𑀓𑁂 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂 𑀫𑁂, 𑀪𑀦𑁆𑀢𑁂, 𑀧𑀜𑁆𑀜𑀸𑀲𑀫𑀢𑁆𑀢𑀸 𑀕𑀺𑀳𑀺𑀲𑀳𑀸𑀬𑀓𑀸 𑀚𑀸𑀦𑀧𑀤𑀸 𑀧𑀼𑀩𑁆𑀩𑀸𑀦𑀼𑀧𑀼𑀩𑁆𑀩𑀓𑀸𑀦𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸. 𑀇𑀫𑁂 𑀪𑀕𑀯𑀸 𑀑𑀯𑀤𑀢𑀼 𑀅𑀦𑀼𑀲𑀸𑀲𑀢𑀽’’𑀢𑀺. 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 ¶ 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀲𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀢𑁂𑀲𑀁 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀏𑀓𑀲𑀝𑁆𑀞𑀺 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀳𑁄𑀦𑁆𑀢𑀺.

𑀧𑀜𑁆𑀜𑀸𑀲𑀕𑀺𑀳𑀺𑀲𑀳𑀸𑀬𑀓𑀧𑀩𑁆𑀩𑀚𑁆𑀚𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀩𑁆𑀩𑀚𑁆𑀚𑀸𑀓𑀣𑀸.

𑁮. 𑀫𑀸𑀭𑀓𑀣𑀸

𑁩𑁨. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 [𑀲𑀁. 𑀦𑀺. 𑁧.𑁧𑁪𑁧 𑀫𑀸𑀭𑀲𑀁𑀬𑀼𑀢𑁆𑀢𑁂𑀧𑀺] 𑁋 ‘‘𑀫𑀼𑀢𑁆𑀢𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 ¶ 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸. 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂 ¶ , 𑀫𑀼𑀢𑁆𑀢𑀸 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸. 𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣. 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 ¶ 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸 ¶ , 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄. 𑀅𑀳𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀉𑀭𑀼𑀯𑁂𑀮𑀸 𑀲𑁂𑀦𑀸𑀦𑀺𑀕𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺.

𑁩𑁩. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀤𑁆𑀥𑁄𑀲𑀺 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀩𑀤𑁆𑀥𑁄𑀲𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀫𑀼𑀢𑁆𑀢𑀸𑀳𑀁 [𑀫𑀼𑀢𑁆𑀢𑁄𑀳𑀁 (𑀲𑀻. 𑀲𑁆𑀬𑀸.)] 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸𑀢𑀺.

[𑀲𑀁. 𑀦𑀺. 𑁧.𑁧𑁫𑁧 𑀫𑀸𑀭𑀲𑀁𑀬𑀼𑀢𑁆𑀢𑁂𑀧𑀺] ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;

𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺.

[𑀲𑀁. 𑀦𑀺. 𑁧.𑁧𑁧𑁫𑁧 𑀫𑀸𑀭𑀲𑀁𑀬𑀼𑀢𑁆𑀢𑁂𑀧𑀺] ‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀏𑀢𑁆𑀣 𑀫𑁂 𑀯𑀺𑀕𑀢𑁄 𑀙𑀦𑁆𑀤𑁄, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑁋 𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄

𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀫𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀓𑀣𑀸

𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀸𑀦𑀸𑀤𑀺𑀲𑀸 𑀦𑀸𑀦𑀸𑀚𑀦𑀧𑀤𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁂 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 ¶ 𑀘 𑀆𑀦𑁂𑀦𑁆𑀢𑀺 𑁋 𑀪𑀕𑀯𑀸 𑀦𑁂 𑀧𑀩𑁆𑀩𑀸𑀚𑁂𑀲𑁆𑀲𑀢𑀺 ¶ 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀘𑁂𑀯 𑀓𑀺𑀮𑀫𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀘. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀏𑀢𑀭𑀳𑀺 𑀔𑁄 𑀪𑀺𑀓𑁆𑀔𑀽 𑀦𑀸𑀦𑀸𑀤𑀺𑀲𑀸 𑀦𑀸𑀦𑀸𑀚𑀦𑀧𑀤𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁂 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀘 𑀆𑀦𑁂𑀦𑁆𑀢𑀺 𑁋 𑀪𑀕𑀯𑀸 𑀦𑁂 𑀧𑀩𑁆𑀩𑀸𑀚𑁂𑀲𑁆𑀲𑀢𑀺 ¶ 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀘𑁂𑀯 𑀓𑀺𑀮𑀫𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀘. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀚𑀸𑀦𑁂𑀬𑁆𑀬𑀁 𑁋 𑀢𑀼𑀫𑁆𑀳𑁂𑀯 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀲𑀼 𑀢𑀸𑀲𑀼 𑀤𑀺𑀲𑀸𑀲𑀼 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀩𑁆𑀩𑀸𑀚𑁂𑀣 𑀉𑀧𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 ¶ 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀏𑀢𑀭𑀳𑀺 𑀔𑁄 𑀪𑀺𑀓𑁆𑀔𑀽 𑀦𑀸𑀦𑀸𑀤𑀺𑀲𑀸 𑀦𑀸𑀦𑀸𑀚𑀦𑀧𑀤𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁂 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀘 𑀆𑀦𑁂𑀦𑁆𑀢𑀺 𑀪𑀕𑀯𑀸 𑀦𑁂 𑀧𑀩𑁆𑀩𑀸𑀚𑁂𑀲𑁆𑀲𑀢𑀺 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀽 𑀘𑁂𑀯 𑀓𑀺𑀮𑀫𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀘, 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀚𑀸𑀦𑁂𑀬𑁆𑀬𑀁 𑀢𑀼𑀫𑁆𑀳𑁂𑀯 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀲𑀼 𑀢𑀸𑀲𑀼 𑀤𑀺𑀲𑀸𑀲𑀼 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀩𑁆𑀩𑀸𑀚𑁂𑀣 𑀉𑀧𑀲𑀫𑁆𑀧𑀸𑀤𑁂𑀣𑀸’’’𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀯 𑀤𑀸𑀦𑀺 𑀢𑀸𑀲𑀼 𑀢𑀸𑀲𑀼 𑀤𑀺𑀲𑀸𑀲𑀼 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀩𑁆𑀩𑀸𑀚𑁂𑀣 𑀉𑀧𑀲𑀫𑁆𑀧𑀸𑀤𑁂𑀣. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 𑁋

𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑀸𑀧𑁂𑀢𑁆𑀯𑀸 ¶ [𑀑𑀳𑀸𑀭𑁂𑀢𑁆𑀯𑀸 (𑀓.)], 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸, 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸, 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄 𑁋 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀤𑀼𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀢𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀤𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀫𑀸𑀭𑀓𑀣𑀸

𑁩𑁫. 𑀅𑀣 𑀔𑁄 𑀪𑀕𑀯𑀸 𑀯𑀲𑁆𑀲𑀁𑀯𑀼𑀝𑁆𑀞𑁄 [𑀯𑀲𑁆𑀲𑀁𑀯𑀼𑀢𑁆𑀣𑁄 (𑀲𑀻.)] 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 [𑀲𑀁. 𑀦𑀺. 𑁧.𑁧𑁫𑁫] 𑁋 ‘‘𑀫𑀬𑁆𑀳𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀲𑀘𑁆𑀙𑀺𑀓𑀢𑀸 ¶ . 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 ¶ 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀅𑀦𑀼𑀧𑀸𑀧𑀼𑀡𑀸𑀣, 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀣𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀤𑁆𑀥𑁄𑀲𑀺 𑀫𑀸𑀭𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀩𑀤𑁆𑀥𑁄𑀲𑀺 [𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑁄𑀲𑀺 (𑀲𑀻. 𑀲𑁆𑀬𑀸.)], 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀫𑀼𑀢𑁆𑀢𑀸𑀳𑀁 𑀫𑀸𑀭𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺 ¶ [𑀫𑀸𑀭𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺 (𑀲𑀻. 𑀲𑁆𑀬𑀸.)], 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑁋 𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄

𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀤𑀼𑀢𑀺𑀬𑀫𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀪𑀤𑁆𑀤𑀯𑀕𑁆𑀕𑀺𑀬𑀯𑀢𑁆𑀣𑀼

𑁩𑁬. 𑀅𑀣 ¶ 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀉𑀭𑀼𑀯𑁂𑀮𑀸 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑁄 𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀁𑀲𑀫𑀢𑁆𑀢𑀸 𑀪𑀤𑁆𑀤𑀯𑀕𑁆𑀕𑀺𑀬𑀸 𑀲𑀳𑀸𑀬𑀓𑀸 𑀲𑀧𑀚𑀸𑀧𑀢𑀺𑀓𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀧𑀭𑀺𑀘𑀸𑀭𑁂𑀦𑁆𑀢𑀺. 𑀏𑀓𑀲𑁆𑀲 𑀧𑀚𑀸𑀧𑀢𑀺 𑀦𑀸𑀳𑁄𑀲𑀺; 𑀢𑀲𑁆𑀲 𑀅𑀢𑁆𑀣𑀸𑀬 𑀯𑁂𑀲𑀻 𑀆𑀦𑀻𑀢𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀯𑁂𑀲𑀻 𑀢𑁂𑀲𑀼 𑀧𑀫𑀢𑁆𑀢𑁂𑀲𑀼 𑀧𑀭𑀺𑀘𑀸𑀭𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀆𑀤𑀸𑀬 𑀧𑀮𑀸𑀬𑀺𑀢𑁆𑀣. 𑀅𑀣 𑀔𑁄 𑀢𑁂 𑀲𑀳𑀸𑀬𑀓𑀸 𑀲𑀳𑀸𑀬𑀓𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀸, 𑀢𑀁 𑀇𑀢𑁆𑀣𑀺𑀁 𑀕𑀯𑁂𑀲𑀦𑁆𑀢𑀸, 𑀢𑀁 𑀯𑀦𑀲𑀡𑁆𑀟𑀁 𑀆𑀳𑀺𑀡𑁆𑀟𑀦𑁆𑀢𑀸 𑀅𑀤𑁆𑀤𑀲𑀁𑀲𑀼 𑀪𑀕𑀯𑀦𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀁 𑀇𑀢𑁆𑀣𑀺𑀁 𑀧𑀲𑁆𑀲𑁂𑀬𑁆𑀬𑀸’’𑀢𑀺? ‘‘𑀓𑀺𑀁 𑀧𑀦 𑀯𑁄, 𑀓𑀼𑀫𑀸𑀭𑀸, 𑀇𑀢𑁆𑀣𑀺𑀬𑀸’’𑀢𑀺? ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸 𑀪𑀤𑁆𑀤𑀯𑀕𑁆𑀕𑀺𑀬𑀸 𑀲𑀳𑀸𑀬𑀓𑀸 𑀲𑀧𑀚𑀸𑀧𑀢𑀺𑀓𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀧𑀭𑀺𑀘𑀸𑀭𑀺𑀫𑁆𑀳𑀸. 𑀏𑀓𑀲𑁆𑀲 𑀧𑀚𑀸𑀧𑀢𑀺 𑀦𑀸𑀳𑁄𑀲𑀺; 𑀢𑀲𑁆𑀲 𑀅𑀢𑁆𑀣𑀸𑀬 𑀯𑁂𑀲𑀻 𑀆𑀦𑀻𑀢𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸, 𑀪𑀦𑁆𑀢𑁂 ¶ , 𑀯𑁂𑀲𑀻 𑀅𑀫𑁆𑀳𑁂𑀲𑀼 𑀧𑀫𑀢𑁆𑀢𑁂𑀲𑀼 𑀧𑀭𑀺𑀘𑀸𑀭𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀆𑀤𑀸𑀬 ¶ 𑀧𑀮𑀸𑀬𑀺𑀢𑁆𑀣. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀲𑀳𑀸𑀬𑀓𑀸 𑀲𑀳𑀸𑀬𑀓𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀸, 𑀢𑀁 𑀇𑀢𑁆𑀣𑀺𑀁 𑀕𑀯𑁂𑀲𑀦𑁆𑀢𑀸, 𑀇𑀫𑀁 𑀯𑀦𑀲𑀡𑁆𑀟𑀁 𑀆𑀳𑀺𑀡𑁆𑀟𑀸𑀫𑀸’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀯𑁄, 𑀓𑀼𑀫𑀸𑀭𑀸, 𑀓𑀢𑀫𑀁 𑀦𑀼 𑀔𑁄 𑀢𑀼𑀫𑁆𑀳𑀸𑀓𑀁 𑀯𑀭𑀁 ¶ 𑁋 𑀬𑀁 𑀯𑀸 𑀢𑀼𑀫𑁆𑀳𑁂 𑀇𑀢𑁆𑀣𑀺𑀁 𑀕𑀯𑁂𑀲𑁂𑀬𑁆𑀬𑀸𑀣, 𑀬𑀁 𑀯𑀸 𑀅𑀢𑁆𑀢𑀸𑀦𑀁 𑀕𑀯𑁂𑀲𑁂𑀬𑁆𑀬𑀸𑀣𑀸’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀯𑀭𑀁 𑀬𑀁 𑀫𑀬𑀁 𑀅𑀢𑁆𑀢𑀸𑀦𑀁 𑀕𑀯𑁂𑀲𑁂𑀬𑁆𑀬𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀯𑁄, 𑀓𑀼𑀫𑀸𑀭𑀸, 𑀦𑀺𑀲𑀻𑀤𑀣, 𑀥𑀫𑁆𑀫𑀁 𑀯𑁄 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀤𑁆𑀤𑀯𑀕𑁆𑀕𑀺𑀬𑀸 𑀲𑀳𑀸𑀬𑀓𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺, 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀲𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 ¶ 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 ¶ 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀪𑀤𑁆𑀤𑀯𑀕𑁆𑀕𑀺𑀬𑀲𑀳𑀸𑀬𑀓𑀸𑀦𑀁 𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑁧𑁨. 𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸

𑁩𑁭. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀉𑀭𑀼𑀯𑁂𑀮𑀸 𑀢𑀤𑀯𑀲𑀭𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬𑀁 𑀢𑀬𑁄 𑀚𑀝𑀺𑀮𑀸 𑀧𑀝𑀺𑀯𑀲𑀦𑁆𑀢𑀺 𑁋 𑀉𑀭𑀼𑀯𑁂𑀮𑀓𑀲𑁆𑀲𑀧𑁄, 𑀦𑀤𑀻𑀓𑀲𑁆𑀲𑀧𑁄, 𑀕𑀬𑀸𑀓𑀲𑁆𑀲𑀧𑁄𑀢𑀺. 𑀢𑁂𑀲𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 ¶ 𑀚𑀝𑀺𑀮𑁄 𑀧𑀜𑁆𑀘𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺, 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄. 𑀦𑀤𑀻𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀺𑀡𑁆𑀡𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺, 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄. 𑀕𑀬𑀸𑀓𑀲𑁆𑀲𑀧𑁄 𑀚𑀝𑀺𑀮𑁄 𑀤𑁆𑀯𑀺𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀳𑁄𑀢𑀺, 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁂, 𑀓𑀲𑁆𑀲𑀧 ¶ , 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀅𑀕𑁆𑀬𑀸𑀕𑀸𑀭𑁂’’𑀢𑀺? ‘‘𑀦 𑀔𑁄 𑀫𑁂, 𑀫𑀳𑀸𑀲𑀫𑀡, 𑀕𑀭𑀼, 𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸 𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 ¶ 𑀖𑁄𑀭𑀯𑀺𑀲𑁄, 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁂, 𑀓𑀲𑁆𑀲𑀧, 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀅𑀕𑁆𑀬𑀸𑀕𑀸𑀭𑁂’’𑀢𑀺? ‘‘𑀦 𑀔𑁄 𑀫𑁂, 𑀫𑀳𑀸𑀲𑀫𑀡, 𑀕𑀭𑀼, 𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸 𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 𑀖𑁄𑀭𑀯𑀺𑀲𑁄, 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁂, 𑀓𑀲𑁆𑀲𑀧, 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀅𑀕𑁆𑀬𑀸𑀕𑀸𑀭𑁂’’𑀢𑀺? ‘‘𑀦 𑀔𑁄 𑀫𑁂, 𑀫𑀳𑀸𑀲𑀫𑀡, 𑀕𑀭𑀼, 𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸 𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 𑀖𑁄𑀭𑀯𑀺𑀲𑁄, 𑀲𑁄 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻’’𑀢𑀺. ‘‘𑀅𑀧𑁆𑀧𑁂𑀯 𑀫𑀁 𑀦 𑀯𑀺𑀳𑁂𑀞𑁂𑀬𑁆𑀬, 𑀇𑀗𑁆𑀖 𑀢𑁆𑀯𑀁, 𑀓𑀲𑁆𑀲𑀧, 𑀅𑀦𑀼𑀚𑀸𑀦𑀸𑀳𑀺 𑀅𑀕𑁆𑀬𑀸𑀕𑀸𑀭’’𑀦𑁆𑀢𑀺. ‘‘𑀯𑀺𑀳𑀭, 𑀫𑀳𑀸𑀲𑀫𑀡, 𑀬𑀣𑀸𑀲𑀼𑀔’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀕𑁆𑀬𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑁩𑁮. 𑀅𑀤𑁆𑀤𑀲𑀸 𑀔𑁄 𑀲𑁄 𑀦𑀸𑀕𑁄 𑀪𑀕𑀯𑀦𑁆𑀢𑀁 𑀧𑀯𑀺𑀝𑁆𑀞𑀁, 𑀤𑀺𑀲𑁆𑀯𑀸𑀦 𑀤𑀼𑀫𑁆𑀫𑀦𑁄 [𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 (𑀲𑀻. 𑀲𑁆𑀬𑀸.)] 𑀧𑀥𑀽𑀧𑀸𑀬𑀺 [𑀧𑀔𑀽𑀧𑀸𑀲𑀺 (𑀓.)]. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀲𑁆𑀲 𑀦𑀸𑀕𑀲𑁆𑀲 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘 ¶ 𑀘𑀫𑁆𑀫𑀜𑁆𑀘 𑀫𑀁𑀲𑀜𑁆𑀘 𑀦𑁆𑀳𑀸𑀭𑀼𑀜𑁆𑀘 𑀅𑀝𑁆𑀞𑀺𑀜𑁆𑀘 𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀥𑀽𑀧𑀸𑀬𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀫𑀓𑁆𑀔𑀁 𑀅𑀲𑀳𑀫𑀸𑀦𑁄 𑀧𑀚𑁆𑀚𑀮𑀺. 𑀪𑀕𑀯𑀸𑀧𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀚𑁆𑀚𑀮𑀺. 𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀁 𑀅𑀕𑁆𑀬𑀸𑀕𑀸𑀭𑀁 𑀆𑀤𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀅𑀕𑁆𑀬𑀸𑀕𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀪𑀺𑀭𑀽𑀧𑁄 𑀯𑀢 𑀪𑁄 𑀫𑀳𑀸𑀲𑀫𑀡𑁄 𑀦𑀸𑀕𑁂𑀦 𑀯𑀺𑀳𑁂𑀞𑀺𑀬𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 ¶ 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀢𑀲𑁆𑀲 𑀦𑀸𑀕𑀲𑁆𑀲 ¶ 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘 𑀘𑀫𑁆𑀫𑀜𑁆𑀘 𑀫𑀁𑀲𑀜𑁆𑀘 𑀦𑁆𑀳𑀸𑀭𑀼𑀜𑁆𑀘 𑀅𑀝𑁆𑀞𑀺𑀜𑁆𑀘 𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀤𑀲𑁆𑀲𑁂𑀲𑀺 𑁋 ‘‘𑀅𑀬𑀁 𑀢𑁂, 𑀓𑀲𑁆𑀲𑀧, 𑀦𑀸𑀕𑁄 𑀧𑀭𑀺𑀬𑀸𑀤𑀺𑀦𑁆𑀦𑁄 [𑀧𑀭𑀺𑀬𑀸𑀤𑀺𑀡𑁆𑀡𑁄 (𑀓.)] 𑀅𑀲𑁆𑀲 𑀢𑁂𑀚𑀲𑀸 𑀢𑁂𑀚𑁄’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀡𑁆𑀟𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀇𑀤𑁆𑀥𑀺𑀫𑀢𑁄 𑀆𑀲𑀺𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺, 𑀦𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁩𑁯.

𑀦𑁂𑀭𑀜𑁆𑀚𑀭𑀸𑀬𑀁 𑀪𑀕𑀯𑀸, 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀅𑀯𑁄𑀘;

‘‘𑀲𑀘𑁂 𑀢𑁂 𑀓𑀲𑁆𑀲𑀧 𑀅𑀕𑀭𑀼, 𑀯𑀺𑀳𑀭𑁂𑀫𑀼 𑀅𑀚𑁆𑀚𑀡𑁆𑀳𑁄 𑀅𑀕𑁆𑀕𑀺𑀲𑀸𑀮𑀫𑁆𑀳𑀻’’𑀢𑀺 [𑀅𑀕𑁆𑀕𑀺𑀲𑀭𑀡𑀫𑁆𑀳𑀻𑀢𑀺 (𑀲𑀻. 𑀲𑁆𑀬𑀸.)].

‘‘𑀦 𑀔𑁄 𑀫𑁂 𑀫𑀳𑀸𑀲𑀫𑀡 𑀕𑀭𑀼;

𑀨𑀸𑀲𑀼𑀓𑀸𑀫𑁄𑀯 𑀢𑀁 𑀦𑀺𑀯𑀸𑀭𑁂𑀫𑀺;

𑀘𑀡𑁆𑀟𑁂𑀢𑁆𑀣 𑀦𑀸𑀕𑀭𑀸𑀚𑀸;

𑀇𑀤𑁆𑀥𑀺𑀫𑀸 𑀆𑀲𑀺𑀯𑀺𑀲𑁄 𑀖𑁄𑀭𑀯𑀺𑀲𑁄;

𑀲𑁄 ¶ 𑀢𑀁 𑀫𑀸 𑀯𑀺𑀳𑁂𑀞𑁂𑀲𑀻’’𑀢𑀺.

‘‘𑀅𑀧𑁆𑀧𑁂𑀯 𑀫𑀁 𑀦 𑀯𑀺𑀳𑁂𑀞𑁂𑀬𑁆𑀬;

𑀇𑀗𑁆𑀖 𑀢𑁆𑀯𑀁 𑀓𑀲𑁆𑀲𑀧 𑀅𑀦𑀼𑀚𑀸𑀦𑀸𑀳𑀺 𑀅𑀕𑁆𑀬𑀸𑀕𑀸𑀭’’𑀦𑁆𑀢𑀺;

𑀤𑀺𑀦𑁆𑀦𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸;

𑀅𑀪𑀻𑀢𑁄 [𑀅𑀲𑀫𑁆𑀪𑀻𑀢𑁄 (𑀲𑀻.)] 𑀧𑀸𑀯𑀺𑀲𑀺 𑀪𑀬𑀫𑀢𑀻𑀢𑁄.

𑀤𑀺𑀲𑁆𑀯𑀸 𑀇𑀲𑀺𑀁 𑀧𑀯𑀺𑀝𑁆𑀞𑀁, 𑀅𑀳𑀺𑀦𑀸𑀕𑁄 𑀤𑀼𑀫𑁆𑀫𑀦𑁄 𑀧𑀥𑀽𑀧𑀸𑀬𑀺;

𑀲𑀼𑀫𑀦𑀫𑀦𑀲𑁄 𑀅𑀥𑀺𑀫𑀦𑁄 [𑀅𑀯𑀺𑀫𑀦𑁄 (𑀓𑀢𑁆𑀣𑀘𑀺), 𑀦𑀯𑀺𑀫𑀦𑁄 (𑀲𑁆𑀬𑀸.)], 𑀫𑀦𑀼𑀲𑁆𑀲𑀦𑀸𑀕𑁄𑀧𑀺 𑀢𑀢𑁆𑀣 𑀧𑀥𑀽𑀧𑀸𑀬𑀺.

𑀫𑀓𑁆𑀔𑀜𑁆𑀘 ¶ 𑀅𑀲𑀳𑀫𑀸𑀦𑁄, 𑀅𑀳𑀺𑀦𑀸𑀕𑁄 𑀧𑀸𑀯𑀓𑁄𑀯 𑀧𑀚𑁆𑀚𑀮𑀺;

𑀢𑁂𑀚𑁄𑀥𑀸𑀢𑀼𑀲𑀼 𑀓𑀼𑀲𑀮𑁄, 𑀫𑀦𑀼𑀲𑁆𑀲𑀦𑀸𑀕𑁄𑀧𑀺 𑀢𑀢𑁆𑀣 𑀧𑀚𑁆𑀚𑀮𑀺.

𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀁;

𑀅𑀕𑁆𑀬𑀸𑀕𑀸𑀭𑀁 𑀆𑀤𑀺𑀢𑁆𑀢𑀁 𑀳𑁄𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁;

𑀉𑀤𑀺𑀘𑁆𑀙𑀭𑁂 𑀚𑀝𑀺𑀮𑀸;

‘‘𑀅𑀪𑀺𑀭𑀽𑀧𑁄 𑀯𑀢 𑀪𑁄 𑀫𑀳𑀸𑀲𑀫𑀡𑁄;

𑀦𑀸𑀕𑁂𑀦 𑀯𑀺𑀳𑁂𑀞𑀺𑀬𑀢𑀻’’𑀢𑀺 𑀪𑀡𑀦𑁆𑀢𑀺.

𑀅𑀣 ¶ 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 [𑀅𑀣 𑀭𑀢𑁆𑀢𑀺𑀬𑀸 (𑀲𑀻. 𑀲𑁆𑀬𑀸.)] 𑀅𑀘𑁆𑀘𑀬𑁂𑀦;

𑀳𑀢𑀸 𑀦𑀸𑀕𑀲𑁆𑀲 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺 [𑀅𑀳𑀺𑀦𑀸𑀕𑀲𑁆𑀲 𑀅𑀘𑁆𑀘𑀺𑀬𑁄 𑀦 𑀳𑁄𑀦𑁆𑀢𑀺 (𑀲𑀻. 𑀲𑁆𑀬𑀸.)];

𑀇𑀤𑁆𑀥𑀺𑀫𑀢𑁄 𑀧𑀦 𑀞𑀺𑀢𑀸 [𑀇𑀤𑁆𑀥𑀺𑀫𑀢𑁄 𑀧𑀦𑀼𑀝𑁆𑀞𑀺𑀢𑀸 (𑀲𑀻.)];

𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺.

𑀦𑀻𑀮𑀸 𑀅𑀣 𑀮𑁄𑀳𑀺𑀢𑀺𑀓𑀸;

𑀫𑀜𑁆𑀚𑀺𑀝𑁆𑀞𑀸 𑀧𑀻𑀢𑀓𑀸 𑀨𑀮𑀺𑀓𑀯𑀡𑁆𑀡𑀸𑀬𑁄;

𑀅𑀗𑁆𑀕𑀻𑀭𑀲𑀲𑁆𑀲 𑀓𑀸𑀬𑁂;

𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄 𑀳𑁄𑀦𑁆𑀢𑀺.

𑀧𑀢𑁆𑀢𑀫𑁆𑀳𑀺 ¶ 𑀑𑀤𑀳𑀺𑀢𑁆𑀯𑀸;

𑀅𑀳𑀺𑀦𑀸𑀕𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀺;

‘‘𑀅𑀬𑀁 𑀢𑁂 𑀓𑀲𑁆𑀲𑀧 𑀦𑀸𑀕𑁄;

𑀧𑀭𑀺𑀬𑀸𑀤𑀺𑀦𑁆𑀦𑁄 𑀅𑀲𑁆𑀲 𑀢𑁂𑀚𑀲𑀸 𑀢𑁂𑀚𑁄’’𑀢𑀺.

𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀢𑁄 𑀇𑀫𑀺𑀦𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀪𑀺𑀧𑁆𑀧𑀲𑀦𑁆𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑁂𑀯, 𑀫𑀳𑀸𑀲𑀫𑀡, 𑀯𑀺𑀳𑀭, 𑀅𑀳𑀁 𑀢𑁂 [𑀢𑁂 𑀉𑀧𑀝𑁆𑀞𑀸𑀫𑀺 (𑀇𑀢𑀺𑀧𑀺)] 𑀥𑀼𑀯𑀪𑀢𑁆𑀢𑁂𑀦𑀸’’𑀢𑀺.

𑀧𑀞𑀫𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁪𑁦. 𑀅𑀣 ¶ 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑀲𑁆𑀲 𑀅𑀯𑀺𑀤𑀽𑀭𑁂 ¶ 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺. 𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀅𑀝𑁆𑀞𑀁𑀲𑀼 𑀲𑁂𑀬𑁆𑀬𑀣𑀸𑀧𑀺 𑀫𑀳𑀦𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁. 𑀓𑁂 𑀦𑀼 𑀔𑁄 𑀢𑁂, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 ¶ , 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀅𑀝𑁆𑀞𑀁𑀲𑀼 ‘‘𑀲𑁂𑀬𑁆𑀬𑀣𑀸𑀧𑀺 𑀫𑀳𑀦𑁆𑀢𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸’’𑀢𑀺. ‘‘𑀏𑀢𑁂 𑀔𑁄, 𑀓𑀲𑁆𑀲𑀧, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀤𑀼𑀢𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁪𑁧. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 ¶ , 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 ¶ 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁. 𑀓𑁄 𑀦𑀼 𑀔𑁄 𑀲𑁄, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺? ‘‘𑀏𑀲𑁄 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑁆𑀓𑁄𑀧𑀺 ¶ 𑀤𑁂𑀯𑀸𑀦𑀫𑀺𑀦𑁆𑀤𑁄 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀢𑀢𑀺𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁪𑁨. 𑀅𑀣 ¶ 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 ¶ 𑀧𑀡𑀻𑀢𑀢𑀭𑁄 𑀘. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁. 𑀓𑁄 𑀦𑀼 𑀔𑁄 𑀲𑁄, 𑀫𑀳𑀸𑀲𑀫𑀡, 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑀦𑀲𑀡𑁆𑀟𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀢𑁆𑀯𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄, 𑀧𑀼𑀭𑀺𑀫𑀸𑀳𑀺 𑀯𑀡𑁆𑀡𑀦𑀺𑀪𑀸𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺? ‘‘𑀏𑀲𑁄 𑀔𑁄, 𑀓𑀲𑁆𑀲𑀧, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀸𑀧𑀺 𑀲𑀳𑀫𑁆𑀧𑀢𑀺 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀘𑀢𑀼𑀢𑁆𑀣𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁪𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺 ¶ . 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑁂 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀫𑀳𑀸𑀲𑀫𑀡𑁄 𑀫𑀳𑀸𑀚𑀦𑀓𑀸𑀬𑁂 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺 ¶ , 𑀫𑀳𑀸𑀲𑀫𑀡𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀫𑀫 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺. 𑀅𑀳𑁄 𑀦𑀽𑀦 𑀫𑀳𑀸𑀲𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 ¶ 𑀚𑀝𑀺𑀮𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀅𑀓𑀸𑀲𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 ¶ 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁. 𑀓𑀺𑀁 𑀦𑀼 𑀔𑁄, 𑀫𑀳𑀸𑀲𑀫𑀡, 𑀳𑀺𑀬𑁆𑀬𑁄 𑀦𑀸𑀕𑀫𑀸𑀲𑀺? 𑀅𑀧𑀺 𑀘 𑀫𑀬𑀁 𑀢𑀁 𑀲𑀭𑀸𑀫 𑁋 𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀡𑁄 𑀦𑀸𑀕𑀘𑁆𑀙𑀢𑀻𑀢𑀺? 𑀔𑀸𑀤𑀦𑀻𑀬𑀲𑁆𑀲 𑀘 𑀪𑁄𑀚𑀦𑀻𑀬𑀲𑁆𑀲 𑀘 𑀢𑁂 𑀧𑀝𑀺𑀯𑀻𑀲𑁄 [𑀧𑀝𑀺𑀯𑀺𑀁𑀲𑁄 (𑀲𑀻.), 𑀧𑀝𑀺𑀯𑀺𑀲𑁄 (𑀲𑁆𑀬𑀸.)] 𑀞𑀧𑀺𑀢𑁄’’𑀢𑀺. 𑀦𑀦𑀼 𑀢𑁂, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘‘𑀏𑀢𑀭𑀳𑀺 𑀔𑁄 𑀫𑁂 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀲𑀘𑁂 𑀫𑀳𑀸𑀲𑀫𑀡𑁄 𑀫𑀳𑀸𑀚𑀦𑀓𑀸𑀬𑁂 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀫𑀳𑀸𑀲𑀫𑀡𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀫𑀫 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀅𑀳𑁄 𑀦𑀽𑀦 𑀫𑀳𑀸𑀲𑀫𑀡𑁄 𑀲𑁆𑀯𑀸𑀢𑀦𑀸𑀬 𑀦𑀸𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀓𑀲𑁆𑀲𑀧, 𑀢𑀯 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀁 𑀅𑀜𑁆𑀜𑀸𑀬 𑀉𑀢𑁆𑀢𑀭𑀓𑀼𑀭𑀼𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀅𑀓𑀸𑀲𑀺’’𑀦𑁆𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀺𑀲𑁆𑀲𑀢𑀺 ¶ , 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀧𑀜𑁆𑀘𑀫𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁪𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀥𑁄𑀯𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀧𑀸𑀡𑀺𑀦𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀥𑁄𑀯𑀢𑀽’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑀢𑀽𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 [𑀅𑀳𑀁 𑀧𑀁𑀲𑀼𑀓𑀽𑀮𑀁 (𑀓.)] 𑀆𑀮𑀫𑁆𑀩𑀺𑀢𑁆𑀯𑀸 ¶ 𑀉𑀢𑁆𑀢𑀭𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀓𑀓𑀼𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀪𑀕𑀯𑀢𑁄 ¶ 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀸𑀔𑀁 𑀑𑀦𑀸𑀫𑁂𑀲𑀺 𑁋 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 ¶ 𑀉𑀢𑁆𑀢𑀭𑀢𑀽𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀽𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀮𑁄 ¶ , 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀁. 𑀓𑀺𑀁 𑀦𑀼 𑀔𑁄, 𑀫𑀳𑀸𑀲𑀫𑀡, 𑀦𑀸𑀬𑀁 𑀧𑀼𑀩𑁆𑀩𑁂 𑀇𑀥 𑀧𑁄𑀓𑁆𑀔𑀭𑀡𑀻, 𑀲𑀸𑀬𑀁 𑀇𑀥 𑀧𑁄𑀓𑁆𑀔𑀭𑀡𑀻. 𑀦𑀬𑀺𑀫𑀸 𑀲𑀺𑀮𑀸 𑀧𑀼𑀩𑁆𑀩𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀸. 𑀓𑁂𑀦𑀺𑀫𑀸 𑀲𑀺𑀮𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀸? 𑀦𑀬𑀺𑀫𑀲𑁆𑀲 𑀓𑀓𑀼𑀥𑀲𑁆𑀲 𑀧𑀼𑀩𑁆𑀩𑁂 𑀲𑀸𑀔𑀸 𑀑𑀦𑀢𑀸, 𑀲𑀸𑀬𑀁 𑀲𑀸𑀔𑀸 𑀑𑀦𑀢𑀸’’𑀢𑀺. 𑀇𑀥 𑀫𑁂, 𑀓𑀲𑁆𑀲𑀧, 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀁 𑀅𑀳𑁄𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀥𑁄𑀯𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀧𑀸𑀡𑀺𑀦𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀥𑁄𑀯𑀢𑀽’’𑀢𑀺. 𑀲𑀸𑀬𑀁 𑀓𑀲𑁆𑀲𑀧 𑀅𑀫𑀦𑀼𑀲𑁆𑀲𑁂𑀦 𑀧𑀸𑀡𑀺𑀦𑀸 𑀔𑀡𑀺𑀢𑀸 𑀧𑁄𑀓𑁆𑀔𑀭𑀡𑀻. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀧𑀭𑀺𑀫𑀤𑁆𑀤𑀢𑀽’’𑀢𑀺. 𑀲𑀸𑀬𑀁 𑀓𑀲𑁆𑀲𑀧 𑀅𑀫𑀦𑀼𑀲𑁆𑀲𑁂𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀸 𑀲𑀺𑀮𑀸. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀓𑀓𑀼𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀚 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀸𑀔𑀁 𑀑𑀦𑀸𑀫𑁂𑀲𑀺 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀉𑀢𑁆𑀢𑀭𑀢𑀽’’𑀢𑀺. 𑀲𑁆𑀯𑀸𑀬𑀁 𑀆𑀳𑀭𑀳𑀢𑁆𑀣𑁄 𑀓𑀓𑀼𑀥𑁄. 𑀢𑀲𑁆𑀲 𑀫𑀬𑁆𑀳𑀁, 𑀓𑀲𑁆𑀲𑀧, 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄, 𑀓𑀲𑁆𑀲𑀧, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀳𑀢𑀺𑀁 𑀲𑀺𑀮𑀁 𑀉𑀧𑀦𑀺𑀓𑁆𑀔𑀺𑀧𑀺 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀁𑀲𑀼𑀓𑀽𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀽’’𑀢𑀺 ¶ . 𑀲𑀸𑀬𑀁 𑀓𑀲𑁆𑀲𑀧 𑀅𑀫𑀦𑀼𑀲𑁆𑀲𑁂𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀸 𑀲𑀺𑀮𑀸𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑁆𑀓𑁄𑀧𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑀅𑀣 ¶ 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 ¶ 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀕𑀘𑁆𑀙 𑀢𑁆𑀯𑀁, 𑀓𑀲𑁆𑀲𑀧, 𑀆𑀬𑀸𑀫𑀳’’𑀦𑁆𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 ¶ ‘𑀚𑀫𑁆𑀩𑀼𑀤𑀻𑀧𑁄’ 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀦 𑀢𑁆𑀯𑀁, 𑀫𑀳𑀸𑀲𑀫𑀡, 𑀫𑀕𑁆𑀕𑁂𑀦 𑀆𑀕𑀢𑁄? 𑀅𑀳𑀁 𑀢𑀬𑀸 𑀧𑀞𑀫𑀢𑀭𑀁 𑀧𑀓𑁆𑀓𑀦𑁆𑀢𑁄, 𑀲𑁄 𑀢𑁆𑀯𑀁 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀇𑀥𑀸𑀳𑀁, 𑀓𑀲𑁆𑀲𑀧, 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 ‘𑀚𑀫𑁆𑀩𑀼𑀤𑀻𑀧𑁄’ 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄. 𑀇𑀤𑀁 𑀔𑁄, 𑀓𑀲𑁆𑀲𑀧, 𑀚𑀫𑁆𑀩𑀼𑀨𑀮𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀭𑀲𑀲𑀫𑁆𑀧𑀦𑁆𑀦𑀁. 𑀲𑀘𑁂 𑀆𑀓𑀗𑁆𑀔𑀲𑀺 𑀧𑀭𑀺𑀪𑀼𑀜𑁆𑀚𑀸’’𑀢𑀺. ‘‘𑀅𑀮𑀁, 𑀫𑀳𑀸𑀲𑀫𑀡, 𑀢𑁆𑀯𑀁𑀬𑁂𑀯 𑀢𑀁 𑀅𑀭𑀳𑀲𑀺 ¶ , 𑀢𑁆𑀯𑀁𑀬𑁂𑀯 𑀢𑀁 [𑀢𑁆𑀯𑀁𑀬𑁂𑀯𑁂𑀢𑀁 𑀆𑀳𑀭𑀲𑀺, 𑀢𑁆𑀯𑀁𑀬𑁂𑀯𑁂𑀢𑀁 (𑀲𑀻. 𑀲𑁆𑀬𑀸.)] 𑀧𑀭𑀺𑀪𑀼𑀜𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀫𑀁 𑀧𑀞𑀫𑀢𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 ‘𑀚𑀫𑁆𑀩𑀼𑀤𑀻𑀧𑁄’ 𑀧𑀜𑁆𑀜𑀸𑀬𑀢𑀺, 𑀢𑀢𑁄 𑀨𑀮𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀺𑀳𑀸𑀲𑀺.

𑁪𑁫. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀫𑀳𑀸𑀲𑀫𑀡, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀕𑀘𑁆𑀙 𑀢𑁆𑀯𑀁, 𑀓𑀲𑁆𑀲𑀧, 𑀆𑀬𑀸𑀫𑀳𑀦𑁆𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑀸𑀬 𑀚𑀫𑁆𑀩𑀼𑀬𑀸 ‘𑀚𑀫𑁆𑀩𑀼𑀤𑀻𑀧𑁄’ 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀅𑀫𑁆𑀩𑁄…𑀧𑁂… 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀆𑀫𑀮𑀓𑀻…𑀧𑁂… 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀳𑀭𑀻𑀢𑀓𑀻…𑀧𑁂… 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀦 𑀢𑁆𑀯𑀁, 𑀫𑀳𑀸𑀲𑀫𑀡, 𑀫𑀕𑁆𑀕𑁂𑀦 𑀆𑀕𑀢𑁄? 𑀅𑀳𑀁 𑀢𑀬𑀸 𑀧𑀞𑀫𑀢𑀭𑀁 𑀧𑀓𑁆𑀓𑀦𑁆𑀢𑁄, 𑀲𑁄 𑀢𑁆𑀯𑀁 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀇𑀥𑀸𑀳𑀁 ¶ , 𑀓𑀲𑁆𑀲𑀧, 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄. 𑀇𑀤𑀁 𑀔𑁄, 𑀓𑀲𑁆𑀲𑀧, 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 ¶ 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 [𑀲𑀼𑀕𑀦𑁆𑀥𑀺𑀓𑀁 (𑀓.)]. (𑀲𑀘𑁂 𑀆𑀓𑀗𑁆𑀔𑀲𑀺 𑀕𑀡𑁆𑀳𑀸’’𑀢𑀺. ‘‘𑀅𑀮𑀁, 𑀫𑀳𑀸𑀲𑀫𑀡, 𑀢𑁆𑀯𑀁𑀬𑁂𑀯 𑀢𑀁 𑀅𑀭𑀳𑀲𑀺, 𑀢𑁆𑀯𑀁𑀬𑁂𑀯 𑀢𑀁 𑀕𑀡𑁆𑀳𑀸’’𑀢𑀺) [( ) 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺]. ¶ 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀫𑀁 𑀧𑀞𑀫𑀢𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀅𑀕𑁆𑀬𑀸𑀕𑀸𑀭𑁂 𑀦𑀺𑀲𑀻𑀤𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁪𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑀼𑀓𑀸𑀫𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀓𑀝𑁆𑀞𑀸𑀦𑀺 𑀨𑀸𑀮𑁂𑀢𑀼𑀁 ¶ . 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀓𑀝𑁆𑀞𑀸𑀦𑀺 𑀨𑀸𑀮𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀨𑀸𑀮𑀺𑀬𑀦𑁆𑀢𑀼, 𑀓𑀲𑁆𑀲𑀧, 𑀓𑀝𑁆𑀞𑀸𑀦𑀻’’𑀢𑀺. ‘‘𑀨𑀸𑀮𑀺𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀓𑀝𑁆𑀞𑀲𑀢𑀸𑀦𑀺 𑀨𑀸𑀮𑀺𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀓𑀝𑁆𑀞𑀸𑀦𑀺𑀧𑀺 𑀨𑀸𑀮𑀺𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁪𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑀼𑀓𑀸𑀫𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀁 𑀉𑀚𑁆𑀚𑀮𑁂𑀢𑀼𑀁 [𑀚𑀸𑀮𑁂𑀢𑀼𑀁 (𑀲𑀻.), 𑀉𑀚𑁆𑀚𑀮𑀺𑀢𑀼𑀁 (𑀓.)]. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀅𑀕𑁆𑀕𑀺𑀁 ¶ 𑀉𑀚𑁆𑀚𑀮𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀚𑁆𑀚𑀮𑀺𑀬𑀦𑁆𑀢𑀼, 𑀓𑀲𑁆𑀲𑀧, 𑀅𑀕𑁆𑀕𑀻’’𑀢𑀺. ‘‘𑀉𑀚𑁆𑀚𑀮𑀺𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀅𑀕𑁆𑀕𑀺𑀲𑀢𑀸𑀦𑀺 𑀉𑀚𑁆𑀚𑀮𑀺𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀅𑀕𑁆𑀕𑀻𑀧𑀺 𑀉𑀚𑁆𑀚𑀮𑀺𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁪𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑀼𑀁. 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀬𑀣𑀸 𑀫𑀬𑀁 𑀦 𑀲𑀓𑁆𑀓𑁄𑀫 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 ¶ 𑁋 ‘‘𑀯𑀺𑀚𑁆𑀛𑀸𑀬𑀦𑁆𑀢𑀼, 𑀓𑀲𑁆𑀲𑀧, 𑀅𑀕𑁆𑀕𑀻’’𑀢𑀺. ‘‘𑀯𑀺𑀚𑁆𑀛𑀸𑀬𑀦𑁆𑀢𑀼, 𑀫𑀳𑀸𑀲𑀫𑀡𑀸’’𑀢𑀺. 𑀲𑀓𑀺𑀤𑁂𑀯 𑀧𑀜𑁆𑀘 𑀅𑀕𑁆𑀕𑀺𑀲𑀢𑀸𑀦𑀺 𑀯𑀺𑀚𑁆𑀛𑀸𑀬𑀺𑀁𑀲𑀼. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀅𑀕𑁆𑀕𑀻𑀧𑀺 𑀯𑀺𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁪𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂 𑀚𑀝𑀺𑀮𑀸 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀉𑀫𑁆𑀫𑀼𑀚𑁆𑀚𑀦𑁆𑀢𑀺𑀧𑀺, 𑀦𑀺𑀫𑀼𑀚𑁆𑀚𑀦𑁆𑀢𑀺𑀧𑀺, 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀫𑀦𑁆𑀤𑀸𑀫𑀼𑀔𑀺𑀲𑀢𑀸𑀦𑀺 𑀅𑀪𑀺𑀦𑀺𑀫𑁆𑀫𑀺𑀦𑀺, 𑀬𑀢𑁆𑀣 𑀢𑁂 𑀚𑀝𑀺𑀮𑀸 𑀉𑀢𑁆𑀢𑀭𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀲𑀼𑀁 ¶ . 𑀅𑀣 𑀔𑁄 𑀢𑁂𑀲𑀁 𑀚𑀝𑀺𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 ¶ 𑀫𑀳𑀸𑀲𑀫𑀡𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀬𑀣𑀬𑀺𑀫𑀸 𑀫𑀦𑁆𑀤𑀸𑀫𑀼𑀔𑀺𑀬𑁄 𑀦𑀺𑀫𑁆𑀫𑀺𑀢𑀸’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀢𑀸𑀯 𑀩𑀳𑀽 𑀫𑀦𑁆𑀤𑀸𑀫𑀼𑀔𑀺𑀬𑁄𑀧𑀺 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀢𑀺, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁫𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀧𑀸𑀯𑀲𑁆𑀲𑀺, 𑀫𑀳𑀸 𑀉𑀤𑀓𑀯𑀸𑀳𑀓𑁄 𑀲𑀜𑁆𑀚𑀸𑀬𑀺. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀲𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀦 𑀑𑀢𑁆𑀣𑀝𑁄 [𑀉𑀤𑀓𑁂𑀦 𑀑𑀢𑁆𑀣𑀝𑁄 (𑀲𑀻. 𑀲𑁆𑀬𑀸.)] 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑁋 𑀫𑀸𑀳𑁂𑀯 𑀔𑁄 𑀫𑀳𑀸𑀲𑀫𑀡𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄 𑀅𑀳𑁄𑀲𑀻𑀢𑀺 𑀦𑀸𑀯𑀸𑀬 𑀲𑀫𑁆𑀩𑀳𑀼𑀮𑁂𑀳𑀺 𑀚𑀝𑀺𑀮𑁂𑀳𑀺 𑀲𑀤𑁆𑀥𑀺𑀁 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀲𑀫𑀦𑁆𑀢𑀸 𑀉𑀤𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀫𑀚𑁆𑀛𑁂 𑀭𑁂𑀡𑀼𑀳𑀢𑀸𑀬 𑀪𑀽𑀫𑀺𑀬𑀸 𑀘𑀗𑁆𑀓𑀫𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀢𑁆𑀯𑀁, 𑀫𑀳𑀸𑀲𑀫𑀡𑀸’’𑀢𑀺? ‘‘𑀅𑀬𑀫𑀳𑀫𑀲𑁆𑀫𑀺 [𑀆𑀫 𑀅𑀳𑀫𑀲𑁆𑀫𑀺 (𑀲𑁆𑀬𑀸.)], 𑀓𑀲𑁆𑀲𑀧𑀸’’𑀢𑀺 𑀪𑀕𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀉𑀤𑀓𑀫𑁆𑀧𑀺 𑀦 𑀧𑀯𑀸𑀳𑀺𑀲𑁆𑀲𑀢𑀺 [𑀦𑀧𑁆𑀧𑀲𑀳𑀺𑀲𑁆𑀲𑀢𑀺 (𑀲𑀻.)], 𑀦 ¶ 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’’𑀦𑁆𑀢𑀺.

𑁫𑁧. 𑀅𑀣 ¶ 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀘𑀺𑀭𑀫𑁆𑀧𑀺 𑀔𑁄 𑀇𑀫𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀫𑀳𑀺𑀤𑁆𑀥𑀺𑀓𑁄 𑀔𑁄 𑀫𑀳𑀸𑀲𑀫𑀡𑁄 𑀫𑀳𑀸𑀦𑀼𑀪𑀸𑀯𑁄, 𑀦 𑀢𑁆𑀯𑁂𑀯 𑀘 𑀔𑁄 𑀅𑀭𑀳𑀸 𑀬𑀣𑀸 𑀅𑀳’𑀦𑁆𑀢𑀺; 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀚𑀝𑀺𑀮𑀁 𑀲𑀁𑀯𑁂𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀚𑀝𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀦𑁂𑀯 𑀘 𑀔𑁄 𑀢𑁆𑀯𑀁, 𑀓𑀲𑁆𑀲𑀧, 𑀅𑀭𑀳𑀸, 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀸𑀧𑀦𑁆𑀦𑁄. 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲𑀲𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀢𑁆𑀯𑀁 𑀔𑁄𑀲𑀺, 𑀓𑀲𑁆𑀲𑀧, 𑀧𑀜𑁆𑀘𑀦𑁆𑀦𑀁 𑀚𑀝𑀺𑀮𑀲𑀢𑀸𑀦𑀁 𑀦𑀸𑀬𑀓𑁄 𑀯𑀺𑀦𑀸𑀬𑀓𑁄 𑀅𑀕𑁆𑀕𑁄 𑀧𑀫𑀼𑀔𑁄 𑀧𑀸𑀫𑁄𑀓𑁆𑀔𑁄. 𑀢𑁂𑀧𑀺 𑀢𑀸𑀯 𑀅𑀧𑀮𑁄𑀓𑁂𑀳𑀺, 𑀬𑀣𑀸 𑀢𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺 𑀢𑀣𑀸 𑀢𑁂 𑀓𑀭𑀺𑀲𑁆𑀲𑀦𑁆𑀢𑀻𑀢𑀺. 𑀅𑀣 𑀔𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀚𑀝𑀺𑀮𑁄 𑀬𑁂𑀦 𑀢𑁂 𑀚𑀝𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀚𑀝𑀺𑀮𑁂 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁 ¶ , 𑀪𑁄, 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀬𑀣𑀸 𑀪𑀯𑀦𑁆𑀢𑁄 𑀫𑀜𑁆𑀜𑀦𑁆𑀢𑀺 𑀢𑀣𑀸 𑀓𑀭𑁄𑀦𑁆𑀢𑀽’’𑀢𑀺. ‘‘𑀘𑀺𑀭𑀧𑀝𑀺𑀓𑀸 𑀫𑀬𑀁, 𑀪𑁄, 𑀫𑀳𑀸𑀲𑀫𑀡𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀲𑀘𑁂 𑀪𑀯𑀁, 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀢𑀺, 𑀲𑀩𑁆𑀩𑁂𑀯 𑀫𑀬𑀁 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 ¶ 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁫𑁨. 𑀅𑀤𑁆𑀤𑀲𑀸 ¶ 𑀔𑁄 𑀦𑀤𑀻𑀓𑀲𑁆𑀲𑀧𑁄 𑀚𑀝𑀺𑀮𑁄 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀯𑀼𑀬𑁆𑀳𑀫𑀸𑀦𑁂, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀳𑁂𑀯 𑀫𑁂 𑀪𑀸𑀢𑀼𑀦𑁄 𑀉𑀧𑀲𑀕𑁆𑀕𑁄 𑀅𑀳𑁄𑀲𑀻’’𑀢𑀺. 𑀚𑀝𑀺𑀮𑁂 𑀧𑀸𑀳𑁂𑀲𑀺 𑁋 𑀕𑀘𑁆𑀙𑀣 𑀫𑁂 𑀪𑀸𑀢𑀭𑀁 𑀚𑀸𑀦𑀸𑀣𑀸𑀢𑀺. 𑀲𑀸𑀫𑀜𑁆𑀘 𑀢𑀻𑀳𑀺 𑀚𑀝𑀺𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀔𑁄, 𑀓𑀲𑁆𑀲𑀧, 𑀲𑁂𑀬𑁆𑀬𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀇𑀤𑀁 𑀲𑁂𑀬𑁆𑀬𑁄’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 ¶ 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁫𑁩. 𑀅𑀤𑁆𑀤𑀲𑀸 𑀔𑁄 𑀕𑀬𑀸𑀓𑀲𑁆𑀲𑀧𑁄 𑀚𑀝𑀺𑀮𑁄 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀯𑀼𑀬𑁆𑀳𑀫𑀸𑀦𑁂, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀳𑁂𑀯 𑀫𑁂 𑀪𑀸𑀢𑀽𑀦𑀁 𑀉𑀧𑀲𑀕𑁆𑀕𑁄 𑀅𑀳𑁄𑀲𑀻’’𑀢𑀺. 𑀚𑀝𑀺𑀮𑁂 𑀧𑀸𑀳𑁂𑀲𑀺 ¶ 𑁋 𑀕𑀘𑁆𑀙𑀣 𑀫𑁂 𑀪𑀸𑀢𑀭𑁄 𑀚𑀸𑀦𑀸𑀣𑀸𑀢𑀺. 𑀲𑀸𑀫𑀜𑁆𑀘 𑀤𑁆𑀯𑀻𑀳𑀺 𑀚𑀝𑀺𑀮𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦𑀸𑀬𑀲𑁆𑀫𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀦𑀼 𑀔𑁄, 𑀓𑀲𑁆𑀲𑀧, 𑀲𑁂𑀬𑁆𑀬𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀇𑀤𑀁 𑀲𑁂𑀬𑁆𑀬𑁄’’𑀢𑀺. 𑀅𑀣 𑀔𑁄 𑀢𑁂 𑀚𑀝𑀺𑀮𑀸 𑀓𑁂𑀲𑀫𑀺𑀲𑁆𑀲𑀁 𑀚𑀝𑀸𑀫𑀺𑀲𑁆𑀲𑀁 𑀔𑀸𑀭𑀺𑀓𑀸𑀚𑀫𑀺𑀲𑁆𑀲𑀁 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 ¶ 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀪𑀕𑀯𑀢𑁄 𑀅𑀥𑀺𑀝𑁆𑀞𑀸𑀦𑁂𑀦 𑀧𑀜𑁆𑀘 𑀓𑀝𑁆𑀞𑀲𑀢𑀸𑀦𑀺 𑀦 𑀨𑀸𑀮𑀺𑀬𑀺𑀁𑀲𑀼, 𑀨𑀸𑀮𑀺𑀬𑀺𑀁𑀲𑀼; 𑀅𑀕𑁆𑀕𑀻 𑀦 𑀉𑀚𑁆𑀚𑀮𑀺𑀬𑀺𑀁𑀲𑀼, 𑀉𑀚𑁆𑀚𑀮𑀺𑀬𑀺𑀁𑀲𑀼; 𑀦 𑀯𑀺𑀚𑁆𑀛𑀸𑀬𑀺𑀁𑀲𑀼, 𑀯𑀺𑀚𑁆𑀛𑀸𑀬𑀺𑀁𑀲𑀼; 𑀧𑀜𑁆𑀘𑀫𑀦𑁆𑀤𑀸𑀫𑀼𑀔𑀺𑀲𑀢𑀸𑀦𑀺 𑀅𑀪𑀺𑀦𑀺𑀫𑁆𑀫𑀺𑀦𑀺. 𑀏𑀢𑁂𑀦 𑀦𑀬𑁂𑀦 𑀅𑀟𑁆𑀠𑀼𑀟𑁆𑀠𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺.

𑁫𑁪. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀕𑀬𑀸𑀲𑀻𑀲𑀁 𑀢𑁂𑀦 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀩𑁆𑀩𑁂𑀳𑁂𑀯 𑀧𑀼𑀭𑀸𑀡𑀚𑀝𑀺𑀮𑁂𑀳𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀕𑀬𑀸𑀲𑀻𑀲𑁂 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

[𑀲𑀁. 𑀦𑀺. 𑁪.𑁨𑁯] ‘‘𑀲𑀩𑁆𑀩𑀁 ¶ ¶ , 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀆𑀤𑀺𑀢𑁆𑀢𑀁? 𑀘𑀓𑁆𑀔𑀼 ¶ 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀲𑁄𑀢𑀁 𑀆𑀤𑀺𑀢𑁆𑀢𑀁, 𑀲𑀤𑁆𑀤𑀸 𑀆𑀤𑀺𑀢𑁆𑀢𑀸, 𑀲𑁄𑀢𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀲𑁄𑀢𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀲𑁄𑀢𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀖𑀸𑀦𑀁 𑀆𑀤𑀺𑀢𑁆𑀢𑀁, 𑀕𑀦𑁆𑀥𑀸 𑀆𑀤𑀺𑀢𑁆𑀢𑀸, 𑀖𑀸𑀦𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀖𑀸𑀦𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀖𑀸𑀦𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀚𑀺𑀯𑁆𑀳𑀸 𑀆𑀤𑀺𑀢𑁆𑀢𑀸, 𑀭𑀲𑀸 𑀆𑀤𑀺𑀢𑁆𑀢𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀓𑀸𑀬𑁄 𑀆𑀤𑀺𑀢𑁆𑀢𑁄, 𑀨𑁄𑀝𑁆𑀞𑀩𑁆𑀩𑀸 𑀆𑀤𑀺𑀢𑁆𑀢𑀸, 𑀓𑀸𑀬𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀓𑀸𑀬𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀫𑀦𑁄 𑀆𑀤𑀺𑀢𑁆𑀢𑁄, 𑀥𑀫𑁆𑀫𑀸 𑀆𑀤𑀺𑀢𑁆𑀢𑀸, 𑀫𑀦𑁄𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁 𑀫𑀦𑁄𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁? 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺.

‘‘𑀏𑀯𑀁 ¶ 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀽𑀧𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀲𑁄𑀢𑀲𑁆𑀫𑀺𑀫𑁆𑀧𑀺 ¶ 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀤𑁆𑀤𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀖𑀸𑀦𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺 ¶ ¶ , 𑀕𑀦𑁆𑀥𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀚𑀺𑀯𑁆𑀳𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀭𑀲𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀓𑀸𑀬𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀨𑁄𑀝𑁆𑀞𑀩𑁆𑀩𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀫𑀦𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀥𑀫𑁆𑀫𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀫𑀦𑁄𑀯𑀺𑀜𑁆𑀜𑀸𑀡𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀫𑀦𑁄𑀲𑀫𑁆𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀬𑀫𑀺𑀤𑀁 𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀢𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼.

𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀁 𑀢𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁩. 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸

𑁫𑁫. 𑀅𑀣 𑀔𑁄 𑀪𑀕𑀯𑀸 𑀕𑀬𑀸𑀲𑀻𑀲𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀩𑁆𑀩𑁂𑀳𑁂𑀯 𑀧𑀼𑀭𑀸𑀡𑀚𑀝𑀺𑀮𑁂𑀳𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀮𑀝𑁆𑀞𑀺𑀯𑀦𑁂 [𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 (𑀲𑁆𑀬𑀸.)] 𑀲𑀼𑀧𑁆𑀧𑀢𑀺𑀝𑁆𑀞𑁂 𑀘𑁂𑀢𑀺𑀬𑁂. 𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑁋 𑀲𑀫𑀡𑁄 𑀔𑀮𑀼 ¶ 𑀪𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀭𑀸𑀚𑀕𑀳𑀁 𑀅𑀦𑀼𑀧𑁆𑀧𑀢𑁆𑀢𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀮𑀝𑁆𑀞𑀺𑀯𑀦𑁂 𑀲𑀼𑀧𑁆𑀧𑀢𑀺𑀝𑁆𑀞𑁂 𑀘𑁂𑀢𑀺𑀬𑁂. 𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 [𑀪𑀯𑀦𑁆𑀢𑀁 (𑀓.)] 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸 [𑀪𑀕𑀯𑀸𑀢𑀺 (𑀓.)]. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 ¶ 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺.

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀤𑁆𑀯𑀸𑀤𑀲𑀦𑀳𑀼𑀢𑁂𑀳𑀺 [𑀤𑁆𑀯𑀸𑀤𑀲𑀦𑀺𑀬𑀼𑀢𑁂𑀳𑀺 (𑀬𑁄𑀚𑀦𑀸)] 𑀫𑀸𑀕𑀥𑀺𑀓𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 ¶ 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀧𑀺 𑀔𑁄 𑀤𑁆𑀯𑀸𑀤𑀲𑀦𑀳𑀼𑀢𑀸 𑀫𑀸𑀕𑀥𑀺𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 ¶ 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀢𑁂𑀲𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀦𑀁 [𑀤𑁆𑀯𑀸𑀤𑀲𑀦𑀺𑀬𑀼𑀢𑀸𑀦𑀁 (𑀬𑁄𑀚𑀦𑀸)] 𑀫𑀸𑀕𑀥𑀺𑀓𑀸𑀦𑀁 ¶ 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀫𑀳𑀸𑀲𑀫𑀡𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀉𑀤𑀸𑀳𑀼 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀦𑀁 𑀫𑀸𑀕𑀥𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀫𑁂𑀯 𑀤𑀺𑀲𑁆𑀯𑀸 𑀉𑀭𑀼𑀯𑁂𑀮𑀯𑀸𑀲𑀺, 𑀧𑀳𑀸𑀲𑀺 𑀅𑀕𑁆𑀕𑀺𑀁 𑀓𑀺𑀲𑀓𑁄𑀯𑀤𑀸𑀦𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧, 𑀏𑀢𑀫𑀢𑁆𑀣𑀁 𑀓𑀣𑀁 𑀧𑀳𑀻𑀦𑀁 𑀢𑀯 𑀅𑀕𑁆𑀕𑀺𑀳𑀼𑀢𑁆𑀢𑀦𑁆𑀢𑀺.

‘‘𑀭𑀽𑀧𑁂 𑀘 𑀲𑀤𑁆𑀤𑁂 𑀘 𑀅𑀣𑁄 𑀭𑀲𑁂 𑀘;

𑀓𑀸𑀫𑀺𑀢𑁆𑀣𑀺𑀬𑁄 𑀘𑀸𑀪𑀺𑀯𑀤𑀦𑁆𑀢𑀺 𑀬𑀜𑁆𑀜𑀸;

𑀏𑀢𑀁 𑀫𑀮𑀦𑁆𑀢𑀺 𑀉𑀧𑀥𑀻𑀲𑀼 𑀜𑀢𑁆𑀯𑀸;

𑀢𑀲𑁆𑀫𑀸 𑀦 𑀬𑀺𑀝𑁆𑀞𑁂 𑀦 𑀳𑀼𑀢𑁂 𑀅𑀭𑀜𑁆𑀚𑀺𑀦𑁆𑀢𑀺.

‘‘𑀏𑀢𑁆𑀣𑁂𑀯 𑀢𑁂 𑀫𑀦𑁄 𑀦 𑀭𑀫𑀺𑀢𑁆𑀣 (𑀓𑀲𑁆𑀲𑀧𑀸𑀢𑀺 𑀪𑀕𑀯𑀸);

𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂;

𑀭𑀢𑁄 𑀫𑀦𑁄 𑀓𑀲𑁆𑀲𑀧, 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺.

‘‘𑀤𑀺𑀲𑁆𑀯𑀸 ¶ ¶ 𑀧𑀤𑀁 𑀲𑀦𑁆𑀢𑀫𑀦𑀽𑀧𑀥𑀻𑀓𑀁;

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀅𑀦𑀜𑁆𑀜𑀣𑀸𑀪𑀸𑀯𑀺𑀫𑀦𑀜𑁆𑀜𑀦𑁂𑀬𑁆𑀬𑀁;

𑀢𑀲𑁆𑀫𑀸 𑀦 𑀬𑀺𑀝𑁆𑀞𑁂 𑀦 𑀳𑀼𑀢𑁂 𑀅𑀭𑀜𑁆𑀚𑀺’’𑀦𑁆𑀢𑀺.

𑁫𑁬. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 ¶ 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺; 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺. 𑀅𑀣 𑀔𑁄 𑀢𑁂𑀲𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀦𑀁 𑀫𑀸𑀕𑀥𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀦𑀁 𑀫𑀸𑀕𑀥𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀘𑁂𑀢𑀲𑀸 ¶ 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀏𑀓𑀸𑀤𑀲𑀦𑀳𑀼𑀢𑀸𑀦𑀁 𑀫𑀸𑀕𑀥𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸𑀦𑀁 𑀢𑀲𑁆𑀫𑀺𑀁 𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀏𑀓𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 ¶ 𑀧𑀝𑀺𑀯𑁂𑀤𑁂𑀲𑀺.

𑁫𑁭. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀓𑀼𑀫𑀸𑀭𑀲𑁆𑀲 𑀲𑀢𑁄 𑀧𑀜𑁆𑀘 𑀅𑀲𑁆𑀲𑀸𑀲𑀓𑀸 𑀅𑀳𑁂𑀲𑀼𑀁, 𑀢𑁂 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑀸. 𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀓𑀼𑀫𑀸𑀭𑀲𑁆𑀲 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀅𑀳𑁄 𑀯𑀢 𑀫𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼’𑀦𑁆𑀢𑀺, 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀞𑀫𑁄 𑀅𑀲𑁆𑀲𑀸𑀲𑀓𑁄 𑀅𑀳𑁄𑀲𑀺, 𑀲𑁄 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑁄. ‘𑀢𑀲𑁆𑀲 𑀘 𑀫𑁂 𑀯𑀺𑀚𑀺𑀢𑀁 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀑𑀓𑁆𑀓𑀫𑁂𑀬𑁆𑀬𑀸’𑀢𑀺, 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑀼𑀢𑀺𑀬𑁄 𑀅𑀲𑁆𑀲𑀸𑀲𑀓𑁄 𑀅𑀳𑁄𑀲𑀺, 𑀲𑁄 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑁄. ‘𑀢𑀜𑁆𑀘𑀸𑀳𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬’𑀦𑁆𑀢𑀺, 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁄 ¶ 𑀅𑀲𑁆𑀲𑀸𑀲𑀓𑁄 𑀅𑀳𑁄𑀲𑀺, 𑀲𑁄 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑁄. ‘𑀲𑁄 𑀘 𑀫𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’𑀢𑀺, 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀘𑀢𑀼𑀢𑁆𑀣𑁄 𑀅𑀲𑁆𑀲𑀸𑀲𑀓𑁄 𑀅𑀳𑁄𑀲𑀺, 𑀲𑁄 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑁄. ‘𑀢𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬’𑀦𑁆𑀢𑀺, 𑀅𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀜𑁆𑀘𑀫𑁄 𑀅𑀲𑁆𑀲𑀸𑀲𑀓𑁄 𑀅𑀳𑁄𑀲𑀺, 𑀲𑁄 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑁄. 𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀓𑀼𑀫𑀸𑀭𑀲𑁆𑀲 𑀲𑀢𑁄 𑀇𑀫𑁂 𑀧𑀜𑁆𑀘 𑀅𑀲𑁆𑀲𑀸𑀲𑀓𑀸 𑀅𑀳𑁂𑀲𑀼𑀁, 𑀢𑁂 𑀫𑁂 𑀏𑀢𑀭𑀳𑀺 𑀲𑀫𑀺𑀤𑁆𑀥𑀸. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑀘𑀓𑁆𑀔𑀼𑀫𑀦𑁆𑀢𑁄 ¶ 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺 𑁋 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 [𑀫𑀁 𑀪𑀦𑁆𑀢𑁂 (𑀓.)], 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁, 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 ¶ , 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺 ¶ . 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁫𑁮. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀩𑁆𑀩𑁂𑀳𑁂𑀯 𑀧𑀼𑀭𑀸𑀡𑀚𑀝𑀺𑀮𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺 𑀇𑀫𑀸 𑀕𑀸𑀣𑀸𑀬𑁄 𑀕𑀸𑀬𑀫𑀸𑀦𑁄 𑁋

‘‘𑀤𑀦𑁆𑀢𑁄 𑀤𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀫𑀼𑀢𑁆𑀢𑁄 ¶ 𑀫𑀼𑀢𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄, 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀢𑀺𑀡𑁆𑀡𑁄 ¶ 𑀢𑀺𑀡𑁆𑀡𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺;

𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀼𑀯𑀡𑁆𑀡𑁄;

𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀲𑀦𑁆𑀢𑁄 𑀲𑀦𑁆𑀢𑁂𑀳𑀺 𑀲𑀳 𑀧𑀼𑀭𑀸𑀡𑀚𑀝𑀺𑀮𑁂𑀳𑀺;

𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁂𑀳𑀺;

𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄;

𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀪𑀕𑀯𑀸.

‘‘𑀤𑀲𑀯𑀸𑀲𑁄 𑀤𑀲𑀩𑀮𑁄, 𑀤𑀲𑀥𑀫𑁆𑀫𑀯𑀺𑀤𑀽 𑀤𑀲𑀪𑀺 𑀘𑀼𑀧𑁂𑀢𑁄;

𑀲𑁄 𑀤𑀲𑀲𑀢𑀧𑀭𑀺𑀯𑀸𑀭𑁄 [𑀧𑀭𑀺𑀯𑀸𑀭𑀓𑁄 (𑀓.)] 𑀭𑀸𑀚𑀕𑀳𑀁, 𑀧𑀸𑀯𑀺𑀲𑀺 𑀪𑀕𑀯𑀸’’𑀢𑀺.

𑀫𑀦𑀼𑀲𑁆𑀲𑀸 ¶ 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀪𑀺𑀭𑀽𑀧𑁄 𑀯𑀢𑀸𑀬𑀁 𑀫𑀸𑀡𑀯𑀓𑁄, 𑀤𑀲𑁆𑀲𑀦𑀻𑀬𑁄 𑀯𑀢𑀸𑀬𑀁 𑀫𑀸𑀡𑀯𑀓𑁄, 𑀧𑀸𑀲𑀸𑀤𑀺𑀓𑁄 𑀯𑀢𑀸𑀬𑀁 𑀫𑀸𑀡𑀯𑀓𑁄. 𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀫𑀸𑀡𑀯𑀓𑁄’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂 𑀫𑀦𑀼𑀲𑁆𑀲𑁂 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀬𑁄 𑀥𑀻𑀭𑁄 𑀲𑀩𑁆𑀩𑀥𑀺 𑀤𑀦𑁆𑀢𑁄, 𑀲𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀢𑀲𑁆𑀲𑀸𑀳𑀁 𑀧𑀭𑀺𑀘𑀸𑀭𑀓𑁄’’𑀢𑀺.

𑁫𑁯. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 ¶ 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 ¶ 𑀔𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 [𑀘𑀽𑀴𑀯. 𑁩𑁦𑁭] 𑁋 ‘‘𑀓𑀢𑁆𑀣 𑀦𑀼 𑀔𑁄 𑀪𑀕𑀯𑀸 𑀯𑀺𑀳𑀭𑁂𑀬𑁆𑀬? 𑀬𑀁 𑀅𑀲𑁆𑀲 𑀕𑀸𑀫𑀢𑁄 𑀦𑁂𑀯 𑀅𑀯𑀺𑀤𑀽𑀭𑁂 𑀦 𑀅𑀘𑁆𑀘𑀸𑀲𑀦𑁆𑀦𑁂, 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀓𑁆𑀓𑀫𑀦𑀻𑀬𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 [𑀅𑀧𑁆𑀧𑀓𑀺𑀡𑁆𑀡𑀁 (𑀲𑀻. 𑀲𑁆𑀬𑀸.), 𑀅𑀩𑁆𑀪𑁄𑀓𑀺𑀡𑁆𑀡𑀁 (𑀓.)], 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀯𑀺𑀚𑀦𑀯𑀸𑀢𑀁, 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁, 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧’’𑀦𑁆𑀢𑀺. 𑀅𑀣 𑀔𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀅𑀫𑁆𑀳𑀸𑀓𑀁 𑀯𑁂𑀴𑀼𑀯𑀦𑀁 𑀉𑀬𑁆𑀬𑀸𑀦𑀁 𑀕𑀸𑀫𑀢𑁄 𑀦𑁂𑀯 𑀅𑀯𑀺𑀤𑀽𑀭𑁂 𑀦 𑀅𑀘𑁆𑀘𑀸𑀲𑀦𑁆𑀦𑁂 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 ¶ 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀓𑁆𑀓𑀫𑀦𑀻𑀬𑀁 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀯𑀺𑀚𑀦𑀯𑀸𑀢𑀁 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁. 𑀬𑀁𑀦𑀽𑀦𑀸𑀳𑀁 𑀯𑁂𑀴𑀼𑀯𑀦𑀁 𑀉𑀬𑁆𑀬𑀸𑀦𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑁄𑀯𑀡𑁆𑀡𑀫𑀬𑀁 𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀑𑀡𑁄𑀚𑁂𑀲𑀺 𑁋 ‘‘𑀏𑀢𑀸𑀳𑀁, 𑀪𑀦𑁆𑀢𑁂, 𑀯𑁂𑀴𑀼𑀯𑀦𑀁 𑀉𑀬𑁆𑀬𑀸𑀦𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀆𑀭𑀸𑀫𑀁. 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫’’𑀦𑁆𑀢𑀺.

𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸

𑁬𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸.)] 𑀧𑀭𑀺𑀩𑁆𑀩𑀸𑀚𑀓𑁄 𑀭𑀸𑀚𑀕𑀳𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀬𑁆𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀲𑀜𑁆𑀘𑀬𑁂 𑀧𑀭𑀺𑀩𑁆𑀩𑀸𑀚𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀢𑁂𑀳𑀺 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 𑁋 𑀬𑁄 𑀧𑀞𑀫𑀁 𑀅𑀫𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀽𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦, 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄. 𑀅𑀤𑁆𑀤𑀲𑀸 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑁂 𑀯𑀢 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑁄. 𑀬𑀁𑀦𑀽𑀦𑀸𑀳𑀁 ¶ 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀧𑀼𑀘𑁆𑀙𑁂𑀬𑁆𑀬𑀁 𑁋 ‘𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’’𑀢𑀺? 𑀅𑀣 ¶ 𑀔𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺𑀢𑀼𑀁, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀁, 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀧𑀝𑀺𑀓𑁆𑀓𑀫𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀚𑀺 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀅𑀲𑁆𑀲𑀚𑀺𑀦𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺? ‘‘𑀅𑀢𑁆𑀣𑀸𑀯𑀼𑀲𑁄, 𑀫𑀳𑀸𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀢𑀸𑀳𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀲𑁄 𑀘 𑀫𑁂 𑀪𑀕𑀯𑀸 𑀲𑀢𑁆𑀣𑀸, 𑀢𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀭𑁄𑀘𑁂𑀫𑀻’’𑀢𑀺. ‘‘𑀓𑀺𑀁𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸, 𑀓𑀺𑀫𑀓𑁆𑀔𑀸𑀬𑀻’’𑀢𑀺? ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀦 𑀢𑀸𑀳𑀁 𑀲𑀓𑁆𑀓𑁄𑀫𑀺 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀅𑀧𑀺 𑀘 𑀢𑁂 𑀲𑀁𑀔𑀺𑀢𑁆𑀢𑁂𑀦 𑀅𑀢𑁆𑀣𑀁 𑀯𑀓𑁆𑀔𑀸𑀫𑀻’’𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀏𑀢𑀤𑀯𑁄𑀘 𑁋 ‘‘𑀳𑁄𑀢𑀼, 𑀆𑀯𑀼𑀲𑁄 𑁋

‘‘𑀅𑀧𑁆𑀧𑀁 ¶ 𑀯𑀸 𑀩𑀳𑀼𑀁 𑀯𑀸 𑀪𑀸𑀲𑀲𑁆𑀲𑀼, 𑀅𑀢𑁆𑀣𑀁𑀬𑁂𑀯 𑀫𑁂 𑀩𑁆𑀭𑀽𑀳𑀺;

𑀅𑀢𑁆𑀣𑁂𑀦𑁂𑀯 𑀫𑁂 𑀅𑀢𑁆𑀣𑁄, 𑀓𑀺𑀁 𑀓𑀸𑀳𑀲𑀺 𑀩𑁆𑀬𑀜𑁆𑀚𑀦𑀁 𑀩𑀳𑀼’’𑀦𑁆𑀢𑀺.

𑀅𑀣 ¶ 𑀔𑁄 𑀆𑀬𑀲𑁆𑀫𑀸 𑀅𑀲𑁆𑀲𑀚𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀪𑀸𑀲𑀺 𑁋

[𑀅𑀧. 𑁧.𑁧.𑁨𑁮𑁬 𑀣𑁂𑀭𑀸𑀧𑀤𑀸𑀦𑁂𑀧𑀺] ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳;

𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄, 𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄’’𑀢𑀺.

𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀼𑀢𑁆𑀯𑀸 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

[𑀅𑀧. 𑁧.𑁧.𑁨𑁮𑁯 𑀣𑁂𑀭𑀸𑀧𑀤𑀸𑀦𑁂𑀧𑀺] 𑀏𑀲𑁂𑀯 ¶ 𑀥𑀫𑁆𑀫𑁄 𑀬𑀤𑀺 𑀢𑀸𑀯𑀤𑁂𑀯, 𑀧𑀘𑁆𑀘𑀩𑁆𑀬𑀢𑁆𑀣 𑀧𑀤𑀫𑀲𑁄𑀓𑀁;

𑀅𑀤𑀺𑀝𑁆𑀞𑀁 𑀅𑀩𑁆𑀪𑀢𑀻𑀢𑀁, 𑀩𑀳𑀼𑀓𑁂𑀳𑀺 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺.

𑁬𑁧. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀸𑀭𑀺𑀧𑀼𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀲𑀸𑀭𑀺𑀧𑀼𑀢𑁆𑀢𑀁 ¶ 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀘𑁆𑀘𑀺 𑀦𑀼 𑀢𑁆𑀯𑀁, 𑀆𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢𑁄’’𑀢𑀺. ‘‘𑀬𑀣𑀸𑀓𑀣𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀅𑀫𑀢𑀁 𑀅𑀥𑀺𑀕𑀢𑁄’’𑀢𑀺? ‘‘𑀇𑀥𑀸𑀳𑀁, 𑀆𑀯𑀼𑀲𑁄, 𑀅𑀤𑁆𑀤𑀲𑀁 𑀅𑀲𑁆𑀲𑀚𑀺𑀁 ¶ 𑀪𑀺𑀓𑁆𑀔𑀼𑀁 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀯𑀢 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀬𑀁 𑀢𑁂𑀲𑀁 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑁄. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬𑀁 𑁋 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺𑀢𑀼𑀁 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀁 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕’’𑀦𑁆𑀢𑀺. 𑀅𑀣 𑀔𑁄, 𑀆𑀯𑀼𑀲𑁄, 𑀅𑀲𑁆𑀲𑀚𑀺 𑀪𑀺𑀓𑁆𑀔𑀼 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀧𑀝𑀺𑀓𑁆𑀓𑀫𑀺. 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀬𑁂𑀦 𑀅𑀲𑁆𑀲𑀚𑀺 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺𑀁, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀲𑁆𑀲𑀚𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺𑀁. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀲𑁆𑀲𑀚𑀺𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. ‘𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑁄 𑀯𑀸 𑀢𑁂 𑀲𑀢𑁆𑀣𑀸, 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’’𑀢𑀺? ‘𑀅𑀢𑁆𑀣𑀸𑀯𑀼𑀲𑁄, 𑀫𑀳𑀸𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀢𑀸𑀳𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 ¶ 𑀧𑀩𑁆𑀩𑀚𑀺𑀢𑁄, 𑀲𑁄 𑀘 𑀫𑁂 𑀪𑀕𑀯𑀸 𑀲𑀢𑁆𑀣𑀸, 𑀢𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀭𑁄𑀘𑁂𑀫𑀻’𑀢𑀺. ‘𑀓𑀺𑀁𑀯𑀸𑀤𑀻 𑀧𑀦𑀸𑀬𑀲𑁆𑀫𑀢𑁄 𑀲𑀢𑁆𑀣𑀸 𑀓𑀺𑀫𑀓𑁆𑀔𑀸𑀬𑀻’𑀢𑀺 ¶ . ‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀦𑀯𑁄 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀥𑀼𑀦𑀸𑀕𑀢𑁄 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀦 𑀢𑀸𑀳𑀁 𑀲𑀓𑁆𑀓𑁄𑀫𑀺 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀅𑀧𑀺 𑀘 𑀢𑁂 𑀲𑀁𑀔𑀺𑀢𑁆𑀢𑁂𑀦 𑀅𑀢𑁆𑀣𑀁 𑀯𑀓𑁆𑀔𑀸𑀫𑀻’’’𑀢𑀺 ¶ . 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀲𑁆𑀲𑀚𑀺𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘‘𑀳𑁄𑀢𑀼, 𑀆𑀯𑀼𑀲𑁄,

𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀪𑀸𑀲𑀲𑁆𑀲𑀼, 𑀅𑀢𑁆𑀣𑀁𑀬𑁂𑀯 𑀫𑁂 𑀩𑁆𑀭𑀽𑀳𑀺;

𑀅𑀢𑁆𑀣𑁂𑀦𑁂𑀯 𑀫𑁂 𑀅𑀢𑁆𑀣𑁄, 𑀓𑀺𑀁 𑀓𑀸𑀳𑀲𑀺 𑀩𑁆𑀬𑀜𑁆𑀚𑀦𑀁 𑀩𑀳𑀼’’𑀦𑁆𑀢𑀺.

𑀅𑀣 𑀔𑁄, 𑀆𑀯𑀼𑀲𑁄, 𑀅𑀲𑁆𑀲𑀚𑀺 𑀪𑀺𑀓𑁆𑀔𑀼 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀪𑀸𑀲𑀺 𑁋

‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳;

𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄, 𑀏𑀯𑀁𑀯𑀸𑀤𑀻 𑀫𑀳𑀸𑀲𑀫𑀡𑁄’’𑀢𑀺.

𑀅𑀣 𑀔𑁄 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 ¶ 𑀲𑀼𑀢𑁆𑀯𑀸 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺.

𑀏𑀲𑁂𑀯 𑀥𑀫𑁆𑀫𑁄 𑀬𑀤𑀺 𑀢𑀸𑀯𑀤𑁂𑀯, 𑀧𑀘𑁆𑀘𑀩𑁆𑀬𑀢𑁆𑀣 𑀧𑀤𑀫𑀲𑁄𑀓𑀁;

𑀅𑀤𑀺𑀝𑁆𑀞𑀁 𑀅𑀩𑁆𑀪𑀢𑀻𑀢𑀁, 𑀩𑀳𑀼𑀓𑁂𑀳𑀺 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺.

𑁬𑁨. 𑀅𑀣 𑀔𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀸𑀭𑀺𑀧𑀼𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂, 𑀲𑁄 𑀦𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺. ‘‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑀸𑀦𑀺 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂 𑀲𑀫𑁆𑀧𑀲𑁆𑀲𑀦𑁆𑀢𑀸 𑀇𑀥 𑀯𑀺𑀳𑀭𑀦𑁆𑀢𑀺, 𑀢𑁂𑀧𑀺 𑀢𑀸𑀯 𑀅𑀧𑀮𑁄𑀓𑁂𑀫 [𑀅𑀧𑀮𑁄𑀓𑀸𑀫 (𑀓)]. 𑀬𑀣𑀸 𑀢𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀢𑁂 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀬𑁂𑀦 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 ¶ 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂, 𑀲𑁄 𑀦𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺. ‘‘𑀫𑀬𑀁 𑀆𑀬𑀲𑁆𑀫𑀦𑁆𑀢𑁂 𑀦𑀺𑀲𑁆𑀲𑀸𑀬 𑀆𑀬𑀲𑁆𑀫𑀦𑁆𑀢𑁂 𑀲𑀫𑁆𑀧𑀲𑁆𑀲𑀦𑁆𑀢𑀸 𑀇𑀥 𑀯𑀺𑀳𑀭𑀸𑀫, 𑀲𑀘𑁂 𑀆𑀬𑀲𑁆𑀫𑀦𑁆𑀢𑀸 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀯 𑀫𑀬𑀁 𑀫𑀳𑀸𑀲𑀫𑀡𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀬𑁂𑀦 𑀲𑀜𑁆𑀘𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀜𑁆𑀘𑀬𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂, 𑀲𑁄 𑀦𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 ¶ 𑀅𑀕𑀫𑀺𑀢𑁆𑀣, 𑀲𑀩𑁆𑀩𑁂𑀯 𑀢𑀬𑁄 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 ¶ 𑀲𑀜𑁆𑀘𑀬𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂, 𑀲𑁄 𑀦𑁄 𑀪𑀕𑀯𑀸 𑀲𑀢𑁆𑀣𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀅𑀕𑀫𑀺𑀢𑁆𑀣, 𑀲𑀩𑁆𑀩𑁂𑀯 𑀢𑀬𑁄 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀢𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑀸𑀦𑀺 𑀆𑀤𑀸𑀬 𑀬𑁂𑀦 𑀯𑁂𑀴𑀼𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀲𑀜𑁆𑀘𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀢𑀢𑁆𑀣𑁂𑀯 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 [𑀪𑀕𑀯𑀸𑀢𑁂 (𑀓)] 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀢𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀳𑀸𑀬𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘. 𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁 𑀪𑀯𑀺𑀲𑁆𑀲𑀢𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕’’𑀦𑁆𑀢𑀺.

𑀕𑀫𑁆𑀪𑀻𑀭𑁂 ¶ 𑀜𑀸𑀡𑀯𑀺𑀲𑀬𑁂, 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂;

𑀯𑀺𑀫𑀼𑀢𑁆𑀢𑁂 𑀅𑀧𑁆𑀧𑀢𑁆𑀢𑁂 𑀯𑁂𑀴𑀼𑀯𑀦𑀁, 𑀅𑀣 𑀦𑁂 𑀲𑀢𑁆𑀣𑀸 𑀩𑁆𑀬𑀸𑀓𑀸𑀲𑀺.

𑀏𑀢𑁂 𑀤𑁆𑀯𑁂 𑀲𑀳𑀸𑀬𑀓𑀸, 𑀆𑀕𑀘𑁆𑀙𑀦𑁆𑀢𑀺 𑀓𑁄𑀮𑀺𑀢𑁄 𑀉𑀧𑀢𑀺𑀲𑁆𑀲𑁄 𑀘;

𑀏𑀢𑀁 𑀫𑁂 𑀲𑀸𑀯𑀓𑀬𑀼𑀕𑀁, 𑀪𑀯𑀺𑀲𑁆𑀲𑀢𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀦𑁆𑀢𑀺.

𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 ¶ , 𑀉𑀧𑀲𑀗𑁆𑀓𑀫𑀺𑀢𑁆𑀯𑀸

𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀪𑀺𑀜𑁆𑀜𑀸𑀢𑀸𑀦𑀁 𑀧𑀩𑁆𑀩𑀚𑁆𑀚𑀸

𑁬𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀫𑀸𑀕𑀥𑀺𑀓𑀸 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀅𑀧𑀼𑀢𑁆𑀢𑀓𑀢𑀸𑀬 𑀧𑀝𑀺𑀧𑀦𑁆𑀦𑁄 𑀲𑀫𑀡𑁄 𑀕𑁄𑀢𑀫𑁄, 𑀯𑁂𑀥𑀩𑁆𑀬𑀸𑀬 𑀧𑀝𑀺𑀧𑀦𑁆𑀦𑁄 𑀲𑀫𑀡𑁄 𑀕𑁄𑀢𑀫𑁄, 𑀓𑀼𑀮𑀼𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀦𑁆𑀦𑁄 𑀲𑀫𑀡𑁄 𑀕𑁄𑀢𑀫𑁄, 𑀇𑀤𑀸𑀦𑀺 𑀅𑀦𑁂𑀦 𑀚𑀝𑀺𑀮𑀲𑀳𑀲𑁆𑀲𑀁 𑀧𑀩𑁆𑀩𑀸𑀚𑀺𑀢𑀁, 𑀇𑀫𑀸𑀦𑀺 𑀘 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑀸𑀦𑀺 𑀲𑀜𑁆𑀘𑀬𑀸𑀦𑀺 [𑀲𑀜𑁆𑀚𑁂𑀬𑁆𑀬𑀸𑀦𑀺 (𑀲𑀻.), 𑀲𑀜𑁆𑀚𑀬𑀸𑀦𑀺 (𑀲𑁆𑀬𑀸.)] 𑀧𑀩𑁆𑀩𑀸𑀚𑀺𑀢𑀸𑀦𑀺. 𑀇𑀫𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀫𑀸𑀕𑀥𑀺𑀓𑀸 ¶ 𑀓𑀼𑀮𑀧𑀼𑀢𑁆𑀢𑀸 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻𑀢𑀺. 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀘𑁄𑀤𑁂𑀦𑁆𑀢𑀺 𑁋

‘‘𑀆𑀕𑀢𑁄 ¶ ¶ 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑀁;

𑀲𑀩𑁆𑀩𑁂 𑀲𑀜𑁆𑀘𑀬𑁂 𑀦𑁂𑀢𑁆𑀯𑀸𑀦 [𑀲𑀜𑁆𑀚𑁂𑀬𑁆𑀬𑀓𑁂 𑀦𑁂𑀢𑁆𑀯𑀸 (𑀲𑀻.)], 𑀓𑀁𑀲𑀼 𑀤𑀸𑀦𑀺 𑀦𑀬𑀺𑀲𑁆𑀲𑀢𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀲𑁄 𑀲𑀤𑁆𑀤𑁄 𑀘𑀺𑀭𑀁 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀢𑀸𑀳𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀬𑁂 𑀢𑀼𑀫𑁆𑀳𑁂 𑀇𑀫𑀸𑀬 𑀕𑀸𑀣𑀸𑀬 𑀘𑁄𑀤𑁂𑀦𑁆𑀢𑀺 𑁋

‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑀁;

𑀲𑀩𑁆𑀩𑁂 𑀲𑀜𑁆𑀘𑀬𑁂 𑀦𑁂𑀢𑁆𑀯𑀸𑀦, 𑀓𑀁𑀲𑀼 𑀤𑀸𑀦𑀺 𑀦𑀬𑀺𑀲𑁆𑀲𑀢𑀻’’𑀢𑀺.

𑀢𑁂 𑀢𑀼𑀫𑁆𑀳𑁂 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀣 𑁋

‘‘𑀦𑀬𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸, 𑀲𑀤𑁆𑀥𑀫𑁆𑀫𑁂𑀦 𑀢𑀣𑀸𑀕𑀢𑀸;

𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁 [𑀦𑀻𑀬𑀫𑀸𑀦𑀸𑀦𑀁 (𑀓.)], 𑀓𑀸 𑀉𑀲𑀽𑀬𑀸 [𑀉𑀲𑁆𑀲𑀼𑀬𑀸 (𑀓.)] 𑀯𑀺𑀚𑀸𑀦𑀢’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀘𑁄𑀤𑁂𑀦𑁆𑀢𑀺 𑁋

‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑀁;

𑀲𑀩𑁆𑀩𑁂 𑀲𑀜𑁆𑀘𑀬𑁂 𑀦𑁂𑀢𑁆𑀯𑀸𑀦, 𑀓𑀁𑀲𑀼 𑀤𑀸𑀦𑀺 𑀦𑀬𑀺𑀲𑁆𑀲𑀢𑀻’’𑀢𑀺.

𑀪𑀺𑀓𑁆𑀔𑀽 𑀢𑁂 𑀫𑀦𑀼𑀲𑁆𑀲𑁂 𑀇𑀫𑀸𑀬 𑀕𑀸𑀣𑀸𑀬 𑀧𑀝𑀺𑀘𑁄𑀤𑁂𑀦𑁆𑀢𑀺 𑁋

‘‘𑀦𑀬𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸, 𑀲𑀤𑁆𑀥𑀫𑁆𑀫𑁂𑀦 𑀢𑀣𑀸𑀕𑀢𑀸;

𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁, 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢’’𑀦𑁆𑀢𑀺.

𑀫𑀦𑀼𑀲𑁆𑀲𑀸 ¶ 𑀥𑀫𑁆𑀫𑁂𑀦 𑀓𑀺𑀭 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀦𑁂𑀦𑁆𑀢𑀺 ¶ 𑀦𑁄 𑀅𑀥𑀫𑁆𑀫𑁂𑀦𑀸𑀢𑀺 𑀲𑀢𑁆𑀢𑀸𑀳𑀫𑁂𑀯 𑀲𑁄 𑀲𑀤𑁆𑀤𑁄 𑀅𑀳𑁄𑀲𑀺, 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀅𑀦𑁆𑀢𑀭𑀥𑀸𑀬𑀺.

𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸

𑁬𑁪. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀚𑁆𑀛𑀸𑀬𑀓𑀸 𑀅𑀦𑀸𑀘𑀭𑀺𑀬𑀓𑀸 [𑀇𑀤𑀁 𑀧𑀤𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀅𑀦𑁄𑀯𑀤𑀺𑀬𑀫𑀸𑀦𑀸 𑀅𑀦𑀦𑀼𑀲𑀸𑀲𑀺𑀬𑀫𑀸𑀦𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 [𑀢𑁂 𑀫𑀦𑀼𑀲𑁆𑀲𑀸𑀦𑀁 (𑀓.)] 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀪𑁄𑀚𑀦𑁂’’𑀢𑀺.

𑀅𑀲𑁆𑀲𑁄𑀲𑀼𑀁 ¶ 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽…𑀧𑁂… 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺 ¶ 𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 ¶ 𑀉𑀧𑀦𑀸𑀫𑁂𑀦𑁆𑀢𑀺, 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 ¶ 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 ¶ 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬. 𑀅𑀣 𑀔𑁆𑀯𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬 𑀫𑀳𑀺𑀘𑁆𑀙𑀢𑀸𑀬 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀬 [𑀅𑀲𑀦𑁆𑀢𑀼𑀝𑁆𑀞𑀺𑀬𑀸 (𑀲𑀻.), 𑀅𑀲𑀦𑁆𑀢𑀼𑀝𑁆𑀞𑀢𑀸𑀬 (𑀲𑁆𑀬𑀸)] 𑀲𑀗𑁆𑀕𑀡𑀺𑀓𑀸𑀬 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀼𑀪𑀭𑀢𑀸𑀬 𑀲𑀼𑀧𑁄𑀲𑀢𑀸𑀬 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 [𑀯𑀺𑀭𑀺𑀬𑀸𑀭𑀫𑁆𑀪𑀲𑁆𑀲 (𑀲𑀻. 𑀲𑁆𑀬𑀸.)] 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁬𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀁. 𑀉𑀧𑀚𑁆𑀛𑀸𑀬𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀧𑀼𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺 ¶ , 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀫𑁆𑀳𑀺 𑀧𑀺𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑁄 𑀕𑀳𑁂𑀢𑀩𑁆𑀩𑁄 𑁋 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺; 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺; 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’𑀢𑀺. 𑀲𑀸𑀳𑀽𑀢𑀺 𑀯𑀸 𑀮𑀳𑀽𑀢𑀺 𑀯𑀸 𑀑𑀧𑀸𑀬𑀺𑀓𑀦𑁆𑀢𑀺 𑀯𑀸 𑀧𑀢𑀺𑀭𑀽𑀧𑀦𑁆𑀢𑀺 𑀯𑀸 𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 [𑀦 𑀯𑀸𑀘𑀸𑀬 (𑀓.)] 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺 ¶ ¶ , 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄.

𑁬𑁬. [𑀘𑀽𑀴𑀯. 𑁩𑁭𑁬 𑀆𑀤𑀬𑁄]‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 ¶ 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 ¶ 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 [𑀲𑀉𑀤𑀓𑁄 (𑀓.)] 𑀤𑀸𑀢𑀩𑁆𑀩𑁄. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩𑀁, 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀦𑁆𑀢𑀩𑁆𑀩𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸. 𑀉𑀧𑀚𑁆𑀛𑀸𑀬𑁄 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑁄 𑀦𑀺𑀯𑀸𑀭𑁂𑀢𑀩𑁆𑀩𑁄.

‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁; 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁, 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 ¶ . 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 ¶ 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 ¶ 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 ¶ 𑀉𑀧𑀚𑁆𑀛𑀸𑀬𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀉𑀧𑀚𑁆𑀛𑀸𑀬𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 ¶ 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀉𑀧𑀚𑁆𑀛𑀸𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀉𑀤𑁆𑀤𑀺𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑁆𑀤𑀺𑀲𑀺𑀢𑀩𑁆𑀩𑁄. 𑀲𑀘𑁂 𑀧𑀭𑀺𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑀚𑁆𑀛𑀸𑀬𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 ¶ 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 [𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸.)] 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 ¶ , 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ¶ 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 ¶ 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 ¶ 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 ¶ 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 ¶ 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 ¶ 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸 ¶ . 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 ¶ 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 [𑀦𑀺𑀬𑀲𑀁 (𑀓.)] 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 ¶ 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀥𑁄𑀯𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 ¶ 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀓𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀧𑀘𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 [𑀭𑀚𑁂𑀢𑀩𑁆𑀩𑀁 (𑀲𑀻. 𑀲𑁆𑀬𑀸.)] 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀭𑀚𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 [𑀭𑀚𑁂𑀦𑁆𑀢𑁂𑀦 (𑀲𑀻. 𑀲𑁆𑀬𑀸.)] 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁.

‘‘𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀓𑁂𑀲𑀸 𑀙𑁂𑀤𑁂𑀢𑀩𑁆𑀩𑀸 [𑀙𑁂𑀢𑁆𑀢𑀩𑁆𑀩𑀸 (𑀲𑀻.), 𑀙𑁂𑀤𑀺𑀢𑀩𑁆𑀩𑀸 (𑀓.)], 𑀦 𑀏𑀓𑀘𑁆𑀘𑁂𑀦 𑀓𑁂𑀲𑀸 𑀙𑁂𑀤𑀸𑀧𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀏𑀓𑀘𑁆𑀘𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑁄 [𑀯𑁂𑀬𑁆𑀬𑀸𑀯𑀘𑁆𑀘𑀁 (𑀓𑀢𑁆𑀣𑀘𑀺)] 𑀓𑀸𑀢𑀩𑁆𑀩𑁄 ¶ , 𑀦 𑀏𑀓𑀘𑁆𑀘𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀭𑀸𑀧𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁, 𑀦 𑀏𑀓𑀘𑁆𑀘𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀺𑀢𑀩𑁆𑀩𑁄, 𑀦 𑀏𑀓𑀘𑁆𑀘𑁂𑀦 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄; 𑀦 ¶ 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 ¶ 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄; 𑀦 𑀲𑀼𑀲𑀸𑀦𑀁 𑀕𑀦𑁆𑀢𑀩𑁆𑀩𑀁; 𑀦 𑀤𑀺𑀲𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁧𑁬. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸

𑁬𑁭. [𑀘𑀽𑀴𑀯. 𑁩𑁭𑁮 𑀆𑀤𑀬𑁄] ‘‘𑀉𑀧𑀚𑁆𑀛𑀸𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀉𑀧𑀚𑁆𑀛𑀸𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀺𑀬𑀸. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀢𑁆𑀢𑁄 𑀦 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀦 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀦 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 ¶ 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺.

‘‘𑀲𑀘𑁂 ¶ 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 ¶ 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 ¶ . 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁; 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁, 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 ¶ 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁 ¶ .

‘‘𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 ¶ 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ¶ 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 ¶ 𑀯𑀺𑀳𑀸𑀭𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 ¶ 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 ¶ 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 ¶ 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 ¶ 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸 ¶ . 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 ¶ 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 ¶ 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀉𑀧𑀚𑁆𑀛𑀸𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀏𑀯𑀁 𑀥𑁄𑀯𑁂𑀬𑁆𑀬𑀸𑀲𑀻𑀢𑀺 ¶ , 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 ¶ 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀏𑀯𑀁 𑀓𑀭𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀏𑀯𑀁 𑀧𑀘𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀏𑀯𑀁 𑀭𑀚𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁. 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁧𑁭. 𑀧𑀡𑀸𑀫𑀺𑀢𑀓𑀣𑀸

𑁬𑁮. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀉𑀧𑀚𑁆𑀛𑀸𑀬𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀉𑀧𑀚𑁆𑀛𑀸𑀬𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀉𑀧𑀚𑁆𑀛𑀸𑀬𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀉𑀧𑀚𑁆𑀛𑀸𑀬𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀻𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 ¶ 𑀉𑀧𑀚𑁆𑀛𑀸𑀬𑀫𑁆𑀳𑀺 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀬𑁄 𑀦 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 ¶ . 𑀦𑁂𑀯 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀧𑀡𑀸𑀫𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑁂𑀢𑀩𑁆𑀩𑁄 𑁋 ‘‘𑀧𑀡𑀸𑀫𑁂𑀫𑀺 𑀢’’𑀦𑁆𑀢𑀺 𑀯𑀸, ‘‘𑀫𑀸𑀬𑀺𑀥 𑀧𑀝𑀺𑀓𑁆𑀓𑀫𑀻’’𑀢𑀺 𑀯𑀸, ‘‘𑀦𑀻𑀳𑀭 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀯𑀸, ‘‘𑀦𑀸𑀳𑀁 𑀢𑀬𑀸 𑀉𑀧𑀝𑁆𑀞𑀸𑀢𑀩𑁆𑀩𑁄’’𑀢𑀺 𑀯𑀸, 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀡𑀸𑀫𑀺𑀢𑁄 𑀳𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀧𑀡𑀸𑀫𑀺𑀢𑁄 𑀳𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑀸𑀫𑀺𑀢𑀸 𑀦 𑀔𑀫𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑀫𑀸𑀧𑁂𑀢𑀼𑀦𑁆𑀢𑀺. 𑀦𑁂𑀯 𑀔𑀫𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑀺𑀢𑁂𑀦 𑀦 𑀔𑀫𑀸𑀧𑁂𑀢𑀩𑁆𑀩𑁄. 𑀬𑁄 𑀦 𑀔𑀫𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑀚𑁆𑀛𑀸𑀬𑀸 𑀔𑀫𑀸𑀧𑀺𑀬𑀫𑀸𑀦𑀸 𑀦 𑀔𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑀫𑀺𑀢𑀼𑀦𑁆𑀢𑀺. 𑀦𑁂𑀯 𑀔𑀫𑀦𑁆𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀓𑁆𑀓𑀫𑀦𑁆𑀢𑀺𑀧𑀺 𑀯𑀺𑀩𑁆𑀪𑀫𑀦𑁆𑀢𑀺𑀧𑀺 𑀢𑀺𑀢𑁆𑀣𑀺𑀬𑁂𑀲𑀼𑀧𑀺 𑀲𑀗𑁆𑀓𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀔𑀫𑀸𑀧𑀺𑀬𑀫𑀸𑀦𑁂𑀦 𑀦 𑀔𑀫𑀺𑀢𑀩𑁆𑀩𑀁. 𑀬𑁄 𑀦 𑀔𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑀚𑁆𑀛𑀸𑀬𑀸 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀧𑀡𑀸𑀫𑁂𑀦𑁆𑀢𑀺, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀦 𑀧𑀡𑀸𑀫𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀧𑀡𑀸𑀫𑁂𑀢𑀩𑁆𑀩𑁄. 𑀬𑁄 𑀧𑀡𑀸𑀫𑁂𑀬𑁆𑀬 ¶ , 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 ¶ . 𑀦 𑀘, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄. 𑀬𑁄 𑀦 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀡𑀸𑀫𑁂𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀡𑀸𑀫𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀮𑀁 𑀧𑀡𑀸𑀫𑁂𑀢𑀼𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 ¶ 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀮𑀁 𑀧𑀡𑀸𑀫𑁂𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦𑀸𑀮𑀁 𑀧𑀡𑀸𑀫𑁂𑀢𑀼𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 ¶ 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦𑀸𑀮𑀁 𑀧𑀡𑀸𑀫𑁂𑀢𑀼𑀁.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 ¶ 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑁬𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀦 𑀇𑀘𑁆𑀙𑀺𑀁𑀲𑀼 𑀧𑀩𑁆𑀩𑀸𑀚𑁂𑀢𑀼𑀁. 𑀲𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 ¶ 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀓𑀺𑀲𑀁 𑀮𑀽𑀔𑀁 𑀤𑀼𑀩𑁆𑀩𑀡𑁆𑀡𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀁 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺? 𑀏𑀲𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀦 𑀇𑀘𑁆𑀙𑀺𑀁𑀲𑀼 𑀧𑀩𑁆𑀩𑀸𑀚𑁂𑀢𑀼𑀁. 𑀲𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀲𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀲𑀻’’𑀢𑀺? ‘‘𑀇𑀥 𑀫𑁂, 𑀪𑀦𑁆𑀢𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺. 𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 ¶ 𑀲𑀭𑀸𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢, 𑀓𑀢𑀜𑁆𑀜𑀼𑀦𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀧𑁆𑀧𑀼𑀭𑀺𑀲𑀸 𑀓𑀢𑀯𑁂𑀤𑀺𑀦𑁄. 𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀳𑀺 𑀉𑀧𑀲𑀫𑁆𑀧𑀸𑀤𑁂𑀳𑀻’’𑀢𑀺 ¶ . ‘‘𑀓𑀣𑀸𑀳𑀁, 𑀪𑀦𑁆𑀢𑁂 ¶ , 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀫𑀺 𑀉𑀧𑀲𑀫𑁆𑀧𑀸𑀤𑁂𑀫𑀻’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀫𑀬𑀸 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀁 𑀅𑀚𑁆𑀚𑀢𑀕𑁆𑀕𑁂 𑀧𑀝𑀺𑀓𑁆𑀔𑀺𑀧𑀸𑀫𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 ¶ [𑀉𑀧𑀲𑀫𑁆𑀧𑀤𑀁 (𑀲𑀻. 𑀲𑁆𑀬𑀸.)]. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁭𑁦. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬 ¶ .

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸 𑀅𑀦𑀸𑀘𑀸𑀭𑀁 𑀆𑀘𑀭𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀯𑀼𑀲𑁄, 𑀏𑀯𑀭𑀽𑀧𑀁 𑀅𑀓𑀸𑀲𑀺, 𑀦𑁂𑀢𑀁 𑀓𑀧𑁆𑀧𑀢𑀻’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦𑁂𑀯𑀸𑀳𑀁 𑀆𑀬𑀲𑁆𑀫𑀦𑁆𑀢𑁂 𑀬𑀸𑀘𑀺𑀁 𑀉𑀧𑀲𑀫𑁆𑀧𑀸𑀤𑁂𑀣 𑀫𑀦𑁆𑀢𑀺. 𑀓𑀺𑀲𑁆𑀲 𑀫𑀁 𑀢𑀼𑀫𑁆𑀳𑁂 𑀅𑀬𑀸𑀘𑀺𑀢𑀸 𑀉𑀧𑀲𑀫𑁆𑀧𑀸𑀤𑀺𑀢𑁆𑀣𑀸’’𑀢𑀺? ¶ 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀅𑀬𑀸𑀘𑀺𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 ¶ . 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑀩𑁆𑀩𑁄. 𑀢𑁂𑀦 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀺, 𑀉𑀮𑁆𑀮𑀼𑀫𑁆𑀧𑀢𑀼 𑀫𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁭𑁨. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 ¶ , 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁭𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀧𑀡𑀻𑀢𑀸𑀦𑀁 𑀪𑀢𑁆𑀢𑀸𑀦𑀁 𑀪𑀢𑁆𑀢𑀧𑀝𑀺𑀧𑀸𑀝𑀺 𑀅𑀝𑁆𑀞𑀺𑀢𑀸 [𑀅𑀥𑀺𑀝𑁆𑀞𑀺𑀢𑀸 (𑀓.)] 𑀳𑁄𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀲𑀻𑀮𑀸 𑀲𑀼𑀔𑀲𑀫𑀸𑀘𑀸𑀭𑀸, 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑀬𑀦𑁂𑀲𑀼 𑀲𑀬𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀢𑀲𑁆𑀫𑀺𑀁 ¶ 𑀧𑀩𑁆𑀩𑀚𑀺𑀢𑁂 𑀪𑀢𑁆𑀢𑀧𑀝𑀺𑀧𑀸𑀝𑀺 𑀔𑀻𑀬𑀺𑀢𑁆𑀣. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀳𑀺 𑀤𑀸𑀦𑀺, 𑀆𑀯𑀼𑀲𑁄, 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦𑀸𑀳𑀁, 𑀆𑀯𑀼𑀲𑁄, 𑀏𑀢𑀁𑀓𑀸𑀭𑀡𑀸 𑀧𑀩𑁆𑀩𑀚𑀺𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻𑀢𑀺. 𑀲𑀘𑁂 𑀫𑁂 𑀤𑀲𑁆𑀲𑀣 𑀪𑀼𑀜𑁆𑀚𑀺𑀲𑁆𑀲𑀸𑀫𑀺 ¶ , 𑀦𑁄 𑀘𑁂 𑀫𑁂 𑀤𑀲𑁆𑀲𑀣 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀧𑀩𑁆𑀩𑀚𑀺𑀢𑁄’’𑀢𑀺 ¶ ¶ ? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀧𑀩𑁆𑀩𑀚𑀺𑀲𑁆𑀲𑀢𑀻𑀢𑀺. 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀧𑀩𑁆𑀩𑀚𑀺𑀢𑁄𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀧𑀩𑁆𑀩𑀚𑀺𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬’’…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀘𑀢𑁆𑀢𑀸𑀭𑁄 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑀺𑀢𑀼𑀁 𑁋 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄; 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀲𑀗𑁆𑀖𑀪𑀢𑁆𑀢𑀁, 𑀉𑀤𑁆𑀤𑁂𑀲𑀪𑀢𑁆𑀢𑀁, 𑀦𑀺𑀫𑀦𑁆𑀢𑀦𑀁, 𑀲𑀮𑀸𑀓𑀪𑀢𑁆𑀢𑀁, 𑀧𑀓𑁆𑀔𑀺𑀓𑀁, 𑀉𑀧𑁄𑀲𑀣𑀺𑀓𑀁, 𑀧𑀸𑀝𑀺𑀧𑀤𑀺𑀓𑀁. 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄; 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀁. 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄; 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀯𑀺𑀳𑀸𑀭𑁄 ¶ , 𑀅𑀟𑁆𑀠𑀬𑁄𑀕𑁄, 𑀧𑀸𑀲𑀸𑀤𑁄, 𑀳𑀫𑁆𑀫𑀺𑀬𑀁, 𑀕𑀼𑀳𑀸. 𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸, 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄; 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢’’𑀦𑁆𑀢𑀺.

𑀧𑀡𑀸𑀫𑀺𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀚𑁆𑀛𑀸𑀬𑀯𑀢𑁆𑀢𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.

𑀧𑀜𑁆𑀘𑀫𑀪𑀸𑀡𑀯𑀸𑀭𑁄

𑁧𑁮. 𑀆𑀘𑀭𑀺𑀬𑀯𑀢𑁆𑀢𑀓𑀣𑀸

𑁭𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀫𑀸𑀡𑀯𑀓𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀧𑀝𑀺𑀓𑀘𑁆𑀘𑁂𑀯 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁄 𑀏𑀯𑀫𑀸𑀳 𑁋 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑁂 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑁂𑀬𑁆𑀬𑀸𑀣, 𑀅𑀪𑀺𑀭𑀫𑁂𑀬𑁆𑀬𑀸𑀫𑀳𑀁 [𑀅𑀪𑀺𑀭𑀫𑁂𑀬𑁆𑀬𑀜𑁆𑀘𑀸𑀳𑀁 (𑀲𑀻.), 𑀅𑀪𑀺𑀭𑀫𑁂𑀬𑁆𑀬𑀁 𑀲𑁆𑀯𑀸𑀳𑀁 (𑀓.)]. 𑀦 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀲𑁆𑀲𑀸𑀫𑀺; 𑀚𑁂𑀕𑀼𑀘𑁆𑀙𑀸 𑀫𑁂 𑀦𑀺𑀲𑁆𑀲𑀬𑀸 ¶ 𑀧𑀝𑀺𑀓𑀽𑀮𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀓𑀘𑁆𑀘𑁂𑀯 𑀦𑀺𑀲𑁆𑀲𑀬𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀬𑁄 𑀆𑀘𑀺𑀓𑁆𑀔𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀤𑀼𑀯𑀕𑁆𑀕𑁂𑀦𑀧𑀺 𑀢𑀺𑀯𑀕𑁆𑀕𑁂𑀦𑀧𑀺 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 ¶ 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀕𑁆𑀕𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀕𑁆𑀕𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀕𑁆𑀕𑁂𑀦 𑀯𑀸 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 ¶ .

𑁭𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀏𑀓𑀯𑀲𑁆𑀲𑀸𑀧𑀺 𑀤𑀼𑀯𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀆𑀬𑀲𑁆𑀫𑀸𑀧𑀺 𑀉𑀧𑀲𑁂𑀦𑁄 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄 𑀏𑀓𑀯𑀲𑁆𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀲𑁄 𑀯𑀲𑁆𑀲𑀁𑀯𑀼𑀝𑁆𑀞𑁄 𑀤𑀼𑀯𑀲𑁆𑀲𑁄 𑀏𑀓𑀯𑀲𑁆𑀲𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀢𑁆𑀯𑀁 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸. 𑀅𑀧𑁆𑀧𑀓𑀺𑀮𑀫𑀣𑁂𑀦 𑀫𑀬𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑀸’’𑀢𑀺. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺; 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀤𑀼𑀯𑀲𑁆𑀲𑁄𑀳𑀁, 𑀪𑀕𑀯𑀸’’𑀢𑀺. ‘‘𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀓𑀢𑀺𑀯𑀲𑁆𑀲𑁄’’𑀢𑀺? ‘‘𑀏𑀓𑀯𑀲𑁆𑀲𑁄, 𑀪𑀕𑀯𑀸’’𑀢𑀺. ‘‘𑀓𑀺𑀁 𑀢𑀸𑀬𑀁 𑀪𑀺𑀓𑁆𑀔𑀼 𑀳𑁄𑀢𑀻’’𑀢𑀺? ‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑁂, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 ¶ 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀜𑁆𑀜𑁂𑀳𑀺 𑀑𑀯𑀤𑀺𑀬𑁄 𑀅𑀦𑀼𑀲𑀸𑀲𑀺𑀬𑁄 𑀅𑀜𑁆𑀜𑀁 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀫𑀜𑁆𑀜𑀺𑀲𑁆𑀲𑀲𑀺. 𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄, 𑀬𑀤𑀺𑀤𑀁 𑀕𑀡𑀩𑀦𑁆𑀥𑀺𑀓𑀁. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 ¶ 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬’’…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺.

𑁭𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 ¶ 𑀧𑀜𑁆𑀜𑀯𑀦𑁆𑀢𑁄. 𑀅𑀜𑁆𑀜𑀢𑀭𑁄𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 ¶ 𑀉𑀧𑀚𑁆𑀛𑀸𑀬𑁂𑀦 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀫𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 ¶ 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺.

𑁭𑁭. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀉𑀧𑀚𑁆𑀛𑀸𑀬𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼𑀧𑀺 𑀯𑀺𑀩𑁆𑀪𑀦𑁆𑀢𑁂𑀲𑀼𑀧𑀺 ¶ 𑀓𑀸𑀮𑀗𑁆𑀓𑀢𑁂𑀲𑀼𑀧𑀺 𑀧𑀓𑁆𑀔𑀲𑀗𑁆𑀓𑀦𑁆𑀢𑁂𑀲𑀼𑀧𑀺 𑀅𑀦𑀸𑀘𑀭𑀺𑀬𑀓𑀸 𑀅𑀦𑁄𑀯𑀤𑀺𑀬𑀫𑀸𑀦𑀸 𑀅𑀦𑀦𑀼𑀲𑀸𑀲𑀺𑀬𑀫𑀸𑀦𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑁋 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑁋 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑁋 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑁋 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀪𑁄𑀚𑀦𑁂’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁 ¶ …𑀧𑁂… 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁, 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 ¶ 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀁. 𑀆𑀘𑀭𑀺𑀬𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀧𑀼𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀫𑁆𑀳𑀺 𑀧𑀺𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀢𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁, 𑀤𑀲𑀯𑀲𑁆𑀲𑁂𑀦 𑀦𑀺𑀲𑁆𑀲𑀬𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑁄 𑀕𑀳𑁂𑀢𑀩𑁆𑀩𑁄. 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀺; 𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀺; 𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 ¶ 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’𑀢𑀺. ‘𑀲𑀸𑀳𑀽𑀢𑀺’ 𑀯𑀸 ‘𑀮𑀳𑀽𑀢𑀺’ 𑀯𑀸 ‘𑀑𑀧𑀸𑀬𑀺𑀓’𑀦𑁆𑀢𑀺 𑀯𑀸 ‘𑀧𑀢𑀺𑀭𑀽𑀧’𑀦𑁆𑀢𑀺 𑀯𑀸 ‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄.

𑁭𑁮. [𑀘𑀽𑀴𑀯. 𑁩𑁮𑁦 𑀆𑀤𑀬𑁄] ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 ¶ , 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀉𑀧𑀸𑀳𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸 ¶ . 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀆𑀘𑀭𑀺𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀆𑀘𑀭𑀺𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀆𑀘𑀭𑀺𑀬𑁄 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 ¶ 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩𑀁, 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀦𑁆𑀢𑀩𑁆𑀩𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦 𑀆𑀘𑀭𑀺𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸. 𑀆𑀘𑀭𑀺𑀬𑁄 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑁄 𑀦𑀺𑀯𑀸𑀭𑁂𑀢𑀩𑁆𑀩𑁄.

‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺 ¶ , 𑀆𑀘𑀭𑀺𑀬𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀆𑀘𑀭𑀺𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 ¶ 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀘𑀭𑀺𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀆𑀘𑀭𑀺𑀬𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀆𑀘𑀭𑀺𑀬𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀆𑀘𑀭𑀺𑀬𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 ¶ 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 ¶ 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀘𑀭𑀺𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀉𑀤𑁆𑀤𑀺𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑁆𑀤𑀺𑀲𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀧𑀭𑀺𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀘𑀭𑀺𑀬𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 ¶ 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄 ¶ ; 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 ¶ 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄 ¶ . 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸 ¶ . 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁 ¶ . 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀁 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀆𑀘𑀭𑀺𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀁 𑀅𑀩𑁆𑀪𑁂𑀬𑁆𑀬𑀸𑀢𑀺 ¶ . 𑀲𑀘𑁂 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 ¶ ¶ 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀥𑁄𑀯𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀓𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀧𑀘𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀭𑀚𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁.

‘‘𑀦 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀓𑁂𑀲𑀸 𑀙𑁂𑀤𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑁂𑀦 𑀓𑁂𑀲𑀸 𑀙𑁂𑀤𑀸𑀧𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀦 𑀏𑀓𑀘𑁆𑀘𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀭𑀸𑀧𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 ¶ 𑀳𑁄𑀢𑀩𑁆𑀩𑀁; 𑀦 𑀏𑀓𑀘𑁆𑀘𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀺𑀢𑀩𑁆𑀩𑁄; 𑀦 𑀏𑀓𑀘𑁆𑀘𑁂𑀦 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄. 𑀦 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀦 𑀲𑀼𑀲𑀸𑀦𑀁 𑀕𑀦𑁆𑀢𑀩𑁆𑀩𑀁, 𑀦 𑀤𑀺𑀲𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀆𑀘𑀭𑀺𑀬𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁧𑁯. 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁭𑁯. [𑀘𑀽𑀴𑀯. 𑁩𑁮𑁧-𑁩𑁮𑁨] ‘‘𑀆𑀘𑀭𑀺𑀬𑁂𑀦 ¶ , 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀆𑀘𑀭𑀺𑀬𑁂𑀦 ¶ , 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀺𑀬𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 ¶ 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄.

‘‘𑀏𑀢𑁆𑀢𑀸𑀯𑀢𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 ¶ 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 ¶ 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 ¶ 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀘 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 ¶ 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 ¶ ; ¶ 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀢𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 ¶ 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 ¶ 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 ¶ 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 ¶ 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 ¶ 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 ¶ 𑀯𑀸, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀏𑀯𑀁 𑀥𑁄𑀯𑁂𑀬𑁆𑀬𑀸𑀲𑀻’𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀏𑀯𑀁 𑀓𑀭𑁂𑀬𑁆𑀬𑀸𑀲𑀻’𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 ¶ 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀏𑀯𑀁 𑀧𑀘𑁂𑀬𑁆𑀬𑀸𑀲𑀻’𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 ¶ 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀏𑀯𑀁 𑀭𑀚𑁂𑀬𑁆𑀬𑀸𑀲𑀻’𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀙𑀝𑁆𑀞𑀪𑀸𑀡𑀯𑀸𑀭𑁄.

𑁨𑁦. 𑀧𑀡𑀸𑀫𑀦𑀸 𑀔𑀫𑀸𑀧𑀦𑀸

𑁮𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀘𑀭𑀺𑀬𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺…𑀧𑁂… 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀆𑀘𑀭𑀺𑀬𑀫𑁆𑀳𑀺 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀬𑁄 𑀦 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺. 𑀦𑁂𑀯 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀧𑀡𑀸𑀫𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑁂𑀢𑀩𑁆𑀩𑁄 𑁋 𑀧𑀡𑀸𑀫𑁂𑀫𑀺 𑀢𑀦𑁆𑀢𑀺 𑀯𑀸, 𑀫𑀸𑀬𑀺𑀥 𑀧𑀝𑀺𑀓𑁆𑀓𑀫𑀻𑀢𑀺 ¶ 𑀯𑀸, 𑀦𑀻𑀳𑀭 𑀢𑁂 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀯𑀸, 𑀦𑀸𑀳𑀁 𑀢𑀬𑀸 𑀉𑀧𑀝𑁆𑀞𑀸𑀢𑀩𑁆𑀩𑁄𑀢𑀺 𑀯𑀸. 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀡𑀸𑀫𑀺𑀢𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀧𑀡𑀸𑀫𑀺𑀢𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 ¶ 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀡𑀸𑀫𑀺𑀢𑀸 𑀦 𑀔𑀫𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑀫𑀸𑀧𑁂𑀢𑀼𑀦𑁆𑀢𑀺. 𑀦𑁂𑀯 𑀔𑀫𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑀺𑀢𑁂𑀦 𑀦 𑀔𑀫𑀸𑀧𑁂𑀢𑀩𑁆𑀩𑁄. 𑀬𑁄 𑀦 𑀔𑀫𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀘𑀭𑀺𑀬𑀸 𑀔𑀫𑀸𑀧𑀺𑀬𑀫𑀸𑀦𑀸 𑀦 𑀔𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑀫𑀺𑀢𑀼𑀦𑁆𑀢𑀺. 𑀦𑁂𑀯 𑀔𑀫𑀦𑁆𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀓𑁆𑀓𑀫𑀦𑁆𑀢𑀺𑀧𑀺 𑀯𑀺𑀩𑁆𑀪𑀫𑀦𑁆𑀢𑀺𑀧𑀺 𑀢𑀺𑀢𑁆𑀣𑀺𑀬𑁂𑀲𑀼𑀧𑀺 𑀲𑀗𑁆𑀓𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀔𑀫𑀸𑀧𑀺𑀬𑀫𑀸𑀦𑁂𑀦 𑀦 𑀔𑀫𑀺𑀢𑀩𑁆𑀩𑀁. 𑀬𑁄 𑀦 𑀔𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀘𑀭𑀺𑀬𑀸 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀧𑀡𑀸𑀫𑁂𑀦𑁆𑀢𑀺, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀦 𑀧𑀡𑀸𑀫𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀧𑀡𑀸𑀫𑁂𑀢𑀩𑁆𑀩𑁄. 𑀬𑁄 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄. 𑀬𑁄 𑀦 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁮𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀡𑀸𑀫𑁂𑀢𑀩𑁆𑀩𑁄. 𑀆𑀘𑀭𑀺𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀡𑀸𑀫𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄. 𑀆𑀘𑀭𑀺𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 ¶ 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀮𑀁 𑀧𑀡𑀸𑀫𑁂𑀢𑀼𑀁. 𑀆𑀘𑀭𑀺𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀮𑀁 𑀧𑀡𑀸𑀫𑁂𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀮𑀁 𑀧𑀡𑀸𑀫𑁂𑀢𑀼𑀁. 𑀆𑀘𑀭𑀺𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀮𑀁 𑀧𑀡𑀸𑀫𑁂𑀢𑀼𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀆𑀘𑀭𑀺𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀆𑀘𑀭𑀺𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 ¶ 𑀳𑀺𑀭𑀻 𑀳𑁄𑀢𑀺, 𑀅𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀅𑀧𑁆𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑀧𑀡𑀸𑀫𑀦𑀸 𑀔𑀫𑀸𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀩𑀸𑀮𑀅𑀩𑁆𑀬𑀢𑁆𑀢𑀯𑀢𑁆𑀣𑀼

𑁮𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽, 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀦𑀺𑀲𑁆𑀲𑀬𑀁 𑀤𑁂𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀩𑀸𑀮𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀡𑁆𑀟𑀺𑀢𑀸 ¶ . 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀅𑀩𑁆𑀬𑀢𑁆𑀢𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑁆𑀬𑀢𑁆𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑀳𑀼𑀲𑁆𑀲𑀼𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀜𑁆𑀜𑀯𑀦𑁆𑀢𑁄. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… ¶ 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽, 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀦𑀺𑀲𑁆𑀲𑀬𑀁 𑀤𑀲𑁆𑀲𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀩𑀸𑀮𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀅𑀩𑁆𑀬𑀢𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀅𑀧𑁆𑀧𑀲𑁆𑀲𑀼𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀆𑀘𑀭𑀺𑀬𑀸 𑀤𑀼𑀧𑁆𑀧𑀜𑁆𑀜𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀜𑁆𑀜𑀯𑀦𑁆𑀢𑁄’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽, 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀦𑀺𑀲𑁆𑀲𑀬𑀁 𑀤𑁂𑀦𑁆𑀢𑀺…𑀧𑁂… 𑀲𑀘𑁆𑀘𑀁, 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 ¶ 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀦𑀺𑀲𑁆𑀲𑀬𑀁 𑀤𑀸𑀢𑀼’’𑀦𑁆𑀢𑀺.

𑀩𑀸𑀮𑀅𑀩𑁆𑀬𑀢𑁆𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁨. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁮𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼𑀧𑀺 𑀯𑀺𑀩𑁆𑀪𑀦𑁆𑀢𑁂𑀲𑀼𑀧𑀺 𑀓𑀸𑀮𑀗𑁆𑀓𑀢𑁂𑀲𑀼𑀧𑀺 ¶ 𑀧𑀓𑁆𑀔𑀲𑀗𑁆𑀓𑀦𑁆𑀢𑁂𑀲𑀼𑀧𑀺 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀦 𑀚𑀸𑀦𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸 𑁋 𑀉𑀧𑀚𑁆𑀛𑀸𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑁄 𑀯𑀸, 𑀓𑀸𑀮𑀗𑁆𑀓𑀢𑁄 𑀯𑀸, 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸, 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸.

‘‘𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸 𑁋 𑀆𑀘𑀭𑀺𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑁄 𑀯𑀸, 𑀓𑀸𑀮𑀗𑁆𑀓𑀢𑁄 𑀯𑀸, 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸, 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻, 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀲𑀫𑁄𑀥𑀸𑀦𑀕𑀢𑁄 𑀳𑁄𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀙 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸’’.

𑀦𑀺𑀲𑁆𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩. 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀁

𑁮𑁪. ‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀅𑀲𑁂𑀓𑁆𑀔𑁂𑀦 [𑀦 𑀅𑀲𑁂𑀔𑁂𑀦 (𑀓.)] 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 ¶ 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 ¶ 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 ¶ 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 ¶ 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 ¶ , 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺 ¶ , 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 ¶ , 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 ¶ 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 [𑀅𑀦𑀪𑀺𑀭𑀢𑀺𑀁 (𑀲𑁆𑀬𑀸.), 𑀉𑀧𑁆𑀧𑀦𑁆𑀦𑀁 𑀅𑀦𑀪𑀺𑀭𑀢𑀺𑀁 (𑀓.)] 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸, 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁 [𑀯𑀺𑀦𑁄𑀤𑁂𑀢𑀼𑀁 𑀯𑀸 𑀯𑀺𑀦𑁄𑀤𑀸𑀧𑁂𑀢𑀼𑀁 𑀯𑀸 (𑀲𑀩𑁆𑀩𑀢𑁆𑀣, 𑀯𑀺𑀫𑀢𑀺𑀯𑀺𑀦𑁄𑀤𑀦𑀻 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸)] 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸, 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀅𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁, 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀁 𑁋 𑀇𑀫𑁂𑀳𑀺 𑀔𑁄 ¶ , 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 ¶ 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀅𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁, 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 ¶ 𑀯𑀺𑀯𑁂𑀘𑁂𑀢𑀼𑀁 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 ¶ 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 ¶ 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺.

𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁪. 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀙𑀓𑁆𑀓𑀁

𑁮𑁫. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 ¶ . 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 ¶ 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 ¶ 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 ¶ 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 ¶ 𑀲𑀫𑀸𑀤𑀧𑁂𑀢𑀸; 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 ¶ 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 ¶ , 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 ¶ 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺, 𑀊𑀦𑀤𑀲𑀯𑀲𑁆𑀲𑁄 ¶ 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸, 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁, 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀺, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸, 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁, 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀤𑀲𑀯𑀲𑁆𑀲𑁄 ¶ 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺 ¶ , 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀅𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁 ¶ , 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀁, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀅𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁, 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀁, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 ¶ , 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺 ¶ , 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺.

𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁫. 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀓𑀣𑀸

𑁮𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀬𑁄 𑀲𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 [𑀬𑁄 𑀲𑁄 𑀧𑀲𑀼𑀭𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 (𑀓.)] 𑀧𑀚𑁆𑀛𑀸𑀬𑁂𑀦 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀫𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀉𑀧𑀚𑁆𑀛𑀸𑀬𑁂𑀦 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 ¶ 𑀲𑀗𑁆𑀓𑀦𑁆𑀢𑁄, 𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁄𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 ¶ 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄 𑁋 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀤𑀼𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀢𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺.

𑀢𑁂𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 ¶ 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀸𑀫𑀺 𑀉𑀧𑀲𑀫𑁆𑀧𑀤𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁. 𑀲𑁄 𑀲𑀗𑁆𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁. 𑀲𑁄 𑀲𑀗𑁆𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 ¶ 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑁄. 𑀔𑀫𑀢𑀺 ¶ 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁮𑁭. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺, 𑀏𑀯𑀁 𑀅𑀦𑀸𑀭𑀸𑀥𑀓𑁄. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀢𑀺𑀓𑀸𑀮𑁂𑀦 ¶ 𑀕𑀸𑀫𑀁 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀯𑀺𑀥𑀯𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀧𑀡𑁆𑀟𑀓𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑁄 𑀯𑀸 𑀳𑁄𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀭𑀡𑀻𑀬𑀸𑀦𑀺, 𑀢𑀢𑁆𑀣 𑀦 𑀤𑀓𑁆𑀔𑁄 𑀳𑁄𑀢𑀺, 𑀦 𑀅𑀦𑀮𑀲𑁄, 𑀦 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀦 𑀅𑀮𑀁 𑀓𑀸𑀢𑀼𑀁, 𑀦 𑀅𑀮𑀁 𑀲𑀁𑀯𑀺𑀥𑀸𑀢𑀼𑀁. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀦 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀉𑀤𑁆𑀤𑁂𑀲𑁂, 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀥𑀺𑀲𑀻𑀮𑁂, 𑀅𑀥𑀺𑀘𑀺𑀢𑁆𑀢𑁂, 𑀅𑀥𑀺𑀧𑀜𑁆𑀜𑀸𑀬. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀬𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑀸 𑀲𑀗𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀢𑀲𑁆𑀲 𑀔𑀦𑁆𑀢𑀺𑀬𑀸 𑀢𑀲𑁆𑀲 𑀭𑀼𑀘𑀺𑀬𑀸 𑀢𑀲𑁆𑀲 𑀆𑀤𑀸𑀬𑀲𑁆𑀲 ¶ 𑀅𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀅𑀦𑀪𑀺𑀭𑀤𑁆𑀥𑁄, 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀉𑀤𑀕𑁆𑀕𑁄 𑀅𑀪𑀺𑀭𑀤𑁆𑀥𑁄. 𑀬𑀲𑁆𑀲 𑀯𑀸 𑀧𑀦 𑀢𑀺𑀢𑁆𑀣𑀸𑀬𑀢𑀦𑀸 𑀲𑀗𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀢𑀲𑁆𑀲 𑀔𑀦𑁆𑀢𑀺𑀬𑀸 𑀢𑀲𑁆𑀲 𑀭𑀼𑀘𑀺𑀬𑀸 𑀢𑀲𑁆𑀲 𑀆𑀤𑀸𑀬𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀉𑀤𑀕𑁆𑀕𑁄 𑀅𑀪𑀺𑀭𑀤𑁆𑀥𑁄, 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀅𑀦𑀪𑀺𑀭𑀤𑁆𑀥𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀢𑀦𑀺𑀓𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀅𑀦𑀸𑀭𑀸𑀥𑀦𑀻𑀬𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀅𑀦𑀸𑀭𑀸𑀥𑀓𑁄 𑀳𑁄𑀢𑀺. 𑀏𑀯𑀁 𑀅𑀦𑀸𑀭𑀸𑀥𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀁 𑀧𑀯𑀺𑀲𑀢𑀺 𑀦𑀸𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀦 𑀯𑁂𑀲𑀺𑀬𑀸𑀕𑁄𑀘𑀭𑁄 𑀳𑁄𑀢𑀺, 𑀦 𑀯𑀺𑀥𑀯𑀸𑀕𑁄𑀘𑀭𑁄 𑀳𑁄𑀢𑀺, 𑀦 𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀸𑀕𑁄𑀘𑀭𑁄 𑀳𑁄𑀢𑀺, 𑀦 𑀧𑀡𑁆𑀟𑀓𑀕𑁄𑀘𑀭𑁄 𑀳𑁄𑀢𑀺, 𑀦 𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑁄 𑀳𑁄𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 ¶ 𑀆𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀭𑀡𑀻𑀬𑀸𑀦𑀺, 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀺, 𑀅𑀦𑀮𑀲𑁄, 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀅𑀮𑀁 𑀓𑀸𑀢𑀼𑀁, 𑀅𑀮𑀁 𑀲𑀁𑀯𑀺𑀥𑀸𑀢𑀼𑀁. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂 ¶ , 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀉𑀤𑁆𑀤𑁂𑀲𑁂, 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀥𑀺𑀲𑀻𑀮𑁂, 𑀅𑀥𑀺𑀘𑀺𑀢𑁆𑀢𑁂, 𑀅𑀥𑀺𑀧𑀜𑁆𑀜𑀸𑀬. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺.

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀬𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑀸 𑀲𑀗𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀢𑀲𑁆𑀲 𑀔𑀦𑁆𑀢𑀺𑀬𑀸 𑀢𑀲𑁆𑀲 𑀭𑀼𑀘𑀺𑀬𑀸 𑀢𑀲𑁆𑀲 𑀆𑀤𑀸𑀬𑀲𑁆𑀲 𑀅𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀉𑀤𑀕𑁆𑀕𑁄 𑀅𑀪𑀺𑀭𑀤𑁆𑀥𑁄, 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀅𑀦𑀪𑀺𑀭𑀤𑁆𑀥𑁄. 𑀬𑀲𑁆𑀲 𑀯𑀸 𑀧𑀦 𑀢𑀺𑀢𑁆𑀣𑀸𑀬𑀢𑀦𑀸 𑀲𑀗𑁆𑀓𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀢𑀲𑁆𑀲 𑀔𑀦𑁆𑀢𑀺𑀬𑀸 𑀢𑀲𑁆𑀲 𑀭𑀼𑀘𑀺𑀬𑀸 𑀢𑀲𑁆𑀲 𑀆𑀤𑀸𑀬𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀦𑀢𑁆𑀢𑀫𑀦𑁄 𑀅𑀦𑀪𑀺𑀭𑀤𑁆𑀥𑁄, 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀉𑀤𑀕𑁆𑀕𑁄 𑀅𑀪𑀺𑀭𑀤𑁆𑀥𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀢𑀦𑀺𑀓𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀲𑁆𑀲 𑀆𑀭𑀸𑀥𑀦𑀻𑀬𑀲𑁆𑀫𑀺𑀁. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀭𑀸𑀥𑀓𑁄 𑀳𑁄𑀢𑀺. 𑀏𑀯𑀁 𑀆𑀭𑀸𑀥𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀦𑀕𑁆𑀕𑁄 𑀆𑀕𑀘𑁆𑀙𑀢𑀺, 𑀉𑀧𑀚𑁆𑀛𑀸𑀬𑀫𑀽𑀮𑀓𑀁 𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀲𑀘𑁂 𑀅𑀘𑁆𑀙𑀺𑀦𑁆𑀦𑀓𑁂𑀲𑁄 𑀆𑀕𑀘𑁆𑀙𑀢𑀺, 𑀲𑀗𑁆𑀖𑁄 𑀅𑀧𑀮𑁄𑀓𑁂𑀢𑀩𑁆𑀩𑁄 𑀪𑀡𑁆𑀟𑀼𑀓𑀫𑁆𑀫𑀸𑀬. 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀺𑀓𑀸 𑀚𑀝𑀺𑀮𑀓𑀸, 𑀢𑁂 𑀆𑀕𑀢𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀦 𑀢𑁂𑀲𑀁 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀓𑀫𑁆𑀫𑀯𑀸𑀤𑀺𑀦𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀓𑀺𑀭𑀺𑀬𑀯𑀸𑀤𑀺𑀦𑁄. 𑀲𑀘𑁂, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀬𑀸 𑀲𑀸𑀓𑀺𑀬𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀆𑀕𑀘𑁆𑀙𑀢𑀺 ¶ , 𑀲𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀦 𑀢𑀲𑁆𑀲 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀇𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀜𑀸𑀢𑀻𑀦𑀁 𑀆𑀯𑁂𑀡𑀺𑀓𑀁 𑀧𑀭𑀺𑀳𑀸𑀭𑀁 𑀤𑀫𑁆𑀫𑀻’’𑀢𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑀪𑀸𑀡𑀯𑀸𑀭𑁄.

𑁨𑁬. 𑀧𑀜𑁆𑀘𑀸𑀩𑀸𑀥𑀯𑀢𑁆𑀣𑀼

𑁮𑁮. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀫𑀕𑀥𑁂𑀲𑀼 𑀧𑀜𑁆𑀘 𑀆𑀩𑀸𑀥𑀸 𑀉𑀲𑁆𑀲𑀦𑁆𑀦𑀸 𑀳𑁄𑀦𑁆𑀢𑀺 𑁋 𑀓𑀼𑀝𑁆𑀞𑀁, 𑀕𑀡𑁆𑀟𑁄, 𑀓𑀺𑀮𑀸𑀲𑁄, 𑀲𑁄𑀲𑁄, 𑀅𑀧𑀫𑀸𑀭𑁄. 𑀫𑀦𑀼𑀲𑁆𑀲𑀸 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀲𑀸𑀥𑀼 𑀦𑁄, 𑀆𑀘𑀭𑀺𑀬, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀅𑀳𑀁 𑀔𑁆𑀯𑀬𑁆𑀬𑁄, 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄; 𑀭𑀸𑀚𑀸 𑀘 𑀫𑁂 𑀫𑀸𑀕𑀥𑁄 𑀲𑁂𑀦𑀺𑀬𑁄 ¶ 𑀩𑀺𑀫𑁆𑀩𑀺𑀲𑀸𑀭𑁄 𑀉𑀧𑀝𑁆𑀞𑀸𑀢𑀩𑁆𑀩𑁄 ¶ 𑀇𑀢𑁆𑀣𑀸𑀕𑀸𑀭𑀜𑁆𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼; 𑀫𑀬𑀜𑁆𑀘 𑀢𑁂 𑀤𑀸𑀲𑀸; 𑀲𑀸𑀥𑀼, 𑀦𑁄, 𑀆𑀘𑀭𑀺𑀬, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀅𑀳𑀁 𑀔𑁆𑀯𑀬𑁆𑀬𑁄, 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄 𑀭𑀸𑀚𑀸 𑀘 𑀫𑁂 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀉𑀧𑀝𑁆𑀞𑀸𑀢𑀩𑁆𑀩𑁄 𑀇𑀢𑁆𑀣𑀸𑀕𑀸𑀭𑀜𑁆𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀲𑀻𑀮𑀸 𑀲𑀼𑀔𑀲𑀫𑀸𑀘𑀸𑀭𑀸, 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑀬𑀦𑁂𑀲𑀼 𑀲𑀬𑀦𑁆𑀢𑀺. 𑀬𑀁𑀦𑀽𑀦 𑀫𑀬𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀸𑀫. 𑀢𑀢𑁆𑀣 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀚𑀻𑀯𑀓𑁄 𑀘 𑀓𑁄𑀫𑀸𑀭𑀪𑀘𑁆𑀘𑁄 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺 ¶ . 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁, 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀢𑁂 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀝𑁆𑀞𑀳𑀺𑀁𑀲𑀼 𑀚𑀻𑀯𑀓𑁄 𑀘 𑀓𑁄𑀫𑀸𑀭𑀪𑀘𑁆𑀘𑁄 𑀢𑀺𑀓𑀺𑀘𑁆𑀙𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀩𑀳𑀽 𑀕𑀺𑀮𑀸𑀦𑁂 𑀪𑀺𑀓𑁆𑀔𑀽 𑀉𑀧𑀝𑁆𑀞𑀳𑀦𑁆𑀢𑀸 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀺 𑁋 𑀕𑀺𑀮𑀸𑀦𑀪𑀢𑁆𑀢𑀁 𑀤𑁂𑀣, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑁂𑀣, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑁂𑀣𑀸𑀢𑀺. 𑀚𑀻𑀯𑀓𑁄𑀧𑀺 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀽 𑀕𑀺𑀮𑀸𑀦𑁂 𑀪𑀺𑀓𑁆𑀔𑀽 𑀢𑀺𑀓𑀺𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑀭𑀁 𑀭𑀸𑀚𑀓𑀺𑀘𑁆𑀘𑀁 𑀧𑀭𑀺𑀳𑀸𑀧𑁂𑀲𑀺.

𑁮𑁯. 𑀅𑀜𑁆𑀜𑀢𑀭𑁄𑀧𑀺 𑀧𑀼𑀭𑀺𑀲𑁄 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑀁, 𑀆𑀘𑀭𑀺𑀬, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀅𑀳𑀁 𑀔𑁆𑀯𑀬𑁆𑀬𑁄, 𑀩𑀳𑀼𑀓𑀺𑀘𑁆𑀘𑁄, 𑀩𑀳𑀼𑀓𑀭𑀡𑀻𑀬𑁄, 𑀭𑀸𑀚𑀸 𑀘 𑀫𑁂 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀉𑀧𑀝𑁆𑀞𑀸𑀢𑀩𑁆𑀩𑁄 𑀇𑀢𑁆𑀣𑀸𑀕𑀸𑀭𑀜𑁆𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼, 𑀅𑀳𑀜𑁆𑀘 𑀢𑁂 𑀤𑀸𑀲𑁄; 𑀲𑀸𑀥𑀼 𑀫𑀁, 𑀆𑀘𑀭𑀺𑀬, 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀅𑀳𑀁 𑀔𑁆𑀯𑀬𑁆𑀬𑁄, 𑀩𑀳𑀼𑀓𑀺𑀘𑁆𑀘𑁄 𑀩𑀳𑀼𑀓𑀭𑀡𑀻𑀬𑁄, 𑀭𑀸𑀚𑀸 𑀘 𑀫𑁂 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀉𑀧𑀝𑁆𑀞𑀸𑀢𑀩𑁆𑀩𑁄 𑀇𑀢𑁆𑀣𑀸𑀕𑀸𑀭𑀜𑁆𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀲𑀻𑀮𑀸 𑀲𑀼𑀔𑀲𑀫𑀸𑀘𑀸𑀭𑀸, 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑀬𑀦𑁂𑀲𑀼 𑀲𑀬𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀁. 𑀢𑀢𑁆𑀣 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀚𑀻𑀯𑀓𑁄 𑀘 𑀓𑁄𑀫𑀸𑀭𑀪𑀘𑁆𑀘𑁄 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀺. 𑀲𑁄𑀫𑁆𑀳𑀺 [𑀲𑁄𑀳𑀁 (𑀩𑀳𑀽𑀲𑀼, 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸)] 𑀅𑀭𑁄𑀕𑁄 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 ¶ . 𑀅𑀣 𑀔𑁄 𑀲𑁄 ¶ 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁, 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀢𑀁 𑀪𑀺𑀓𑁆𑀔𑀽 𑀘𑁂𑀯 𑀉𑀧𑀝𑁆𑀞𑀳𑀺𑀁𑀲𑀼, 𑀚𑀻𑀯𑀓𑁄 𑀘 𑀓𑁄𑀫𑀸𑀭𑀪𑀘𑁆𑀘𑁄 𑀢𑀺𑀓𑀺𑀘𑁆𑀙𑀺. 𑀲𑁄 𑀅𑀭𑁄𑀕𑁄 𑀯𑀺𑀩𑁆𑀪𑀫𑀺. 𑀅𑀤𑁆𑀤𑀲𑀸 𑀔𑁄 𑀚𑀻𑀯𑀓𑁄 ¶ 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀧𑀼𑀭𑀺𑀲𑀁 𑀯𑀺𑀩𑁆𑀪𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘‘𑀦𑀦𑀼 𑀢𑁆𑀯𑀁, 𑀅𑀬𑁆𑀬𑁄, 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀅𑀳𑁄𑀲𑀻’’𑀢𑀺? ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀅𑀬𑁆𑀬𑁄, 𑀏𑀯𑀭𑀽𑀧𑀫𑀓𑀸𑀲𑀻’’𑀢𑀺? 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 [𑀪𑀤𑁆𑀤𑀦𑁆𑀢𑀸 (𑀓.)] 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 ¶ 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀧𑀜𑁆𑀘𑀸𑀩𑀸𑀥𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁭. 𑀭𑀸𑀚𑀪𑀝𑀯𑀢𑁆𑀣𑀼

𑁯𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑁂𑀦𑀸𑀦𑀸𑀬𑀓𑁂 𑀫𑀳𑀸𑀫𑀢𑁆𑀢𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀧𑀘𑁆𑀘𑀦𑁆𑀢𑀁 𑀉𑀘𑁆𑀘𑀺𑀦𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀲𑁂𑀦𑀸𑀦𑀸𑀬𑀓𑀸 𑀫𑀳𑀸𑀫𑀢𑁆𑀢𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀅𑀪𑀺𑀜𑁆𑀜𑀸𑀢𑀸𑀦𑀁 𑀅𑀪𑀺𑀜𑁆𑀜𑀸𑀢𑀸𑀦𑀁 𑀬𑁄𑀥𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀔𑁄 𑀬𑀼𑀤𑁆𑀥𑀸𑀪𑀺𑀦𑀦𑁆𑀤𑀺𑀦𑁄 𑀕𑀘𑁆𑀙𑀦𑁆𑀢𑀸 𑀧𑀸𑀧𑀜𑁆𑀘 𑀓𑀭𑁄𑀫, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀸𑀫. 𑀓𑁂𑀦 𑀦𑀼 𑀔𑁄 𑀫𑀬𑀁 𑀉𑀧𑀸𑀬𑁂𑀦 𑀧𑀸𑀧𑀸 𑀘 𑀯𑀺𑀭𑀫𑁂𑀬𑁆𑀬𑀸𑀫 𑀓𑀮𑁆𑀬𑀸𑀡𑀜𑁆𑀘 𑀓𑀭𑁂𑀬𑁆𑀬𑀸𑀫𑀸’’𑀢𑀺? 𑀅𑀣 𑀔𑁄 𑀢𑁂𑀲𑀁 𑀬𑁄𑀥𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 ¶ 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀲𑀘𑁂 𑀔𑁄 𑀫𑀬𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀸𑀫, 𑀏𑀯𑀁 𑀫𑀬𑀁 𑀧𑀸𑀧𑀸 𑀘 𑀯𑀺𑀭𑀫𑁂𑀬𑁆𑀬𑀸𑀫 𑀓𑀮𑁆𑀬𑀸𑀡𑀜𑁆𑀘 𑀓𑀭𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀬𑁄𑀥𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁, 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀲𑁂𑀦𑀸𑀦𑀸𑀬𑀓𑀸 𑀫𑀳𑀸𑀫𑀢𑁆𑀢𑀸 𑀭𑀸𑀚𑀪𑀝𑁂 ¶ 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 ¶ 𑀔𑁄, 𑀪𑀡𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀬𑁄𑀥𑀸 𑀦 𑀤𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘, 𑀲𑀸𑀫𑀺, 𑀬𑁄𑀥𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀸’’𑀢𑀺. 𑀲𑁂𑀦𑀸𑀦𑀸𑀬𑀓𑀸 𑀫𑀳𑀸𑀫𑀢𑁆𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀭𑀸𑀚𑀪𑀝𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀲𑁂𑀦𑀸𑀦𑀸𑀬𑀓𑀸 𑀫𑀳𑀸𑀫𑀢𑁆𑀢𑀸 𑀭𑀜𑁆𑀜𑁄 ¶ 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀯𑁄𑀳𑀸𑀭𑀺𑀓𑁂 𑀫𑀳𑀸𑀫𑀢𑁆𑀢𑁂 𑀧𑀼𑀘𑁆𑀙𑀺 𑁋 ‘‘𑀬𑁄, 𑀪𑀡𑁂, 𑀭𑀸𑀚𑀪𑀝𑀁 𑀧𑀩𑁆𑀩𑀸𑀚𑁂𑀢𑀺, 𑀓𑀺𑀁 𑀲𑁄 𑀧𑀲𑀯𑀢𑀻’’𑀢𑀺? ‘‘𑀉𑀧𑀚𑁆𑀛𑀸𑀬𑀲𑁆𑀲, 𑀤𑁂𑀯, 𑀲𑀻𑀲𑀁 𑀙𑁂𑀢𑀩𑁆𑀩𑀁, 𑀅𑀦𑀼𑀲𑁆𑀲𑀸𑀯𑀓𑀲𑁆𑀲 [𑀅𑀦𑀼𑀲𑀸𑀯𑀓𑀲𑁆𑀲 (𑀓.)] 𑀚𑀺𑀯𑁆𑀳𑀸 𑀉𑀤𑁆𑀥𑀭𑀺𑀢𑀩𑁆𑀩𑀸, 𑀕𑀡𑀲𑁆𑀲 𑀉𑀧𑀟𑁆𑀠𑀨𑀸𑀲𑀼𑀓𑀸 𑀪𑀜𑁆𑀚𑀺𑀢𑀩𑁆𑀩𑀸’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀭𑀸𑀚𑀸𑀦𑁄 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀢𑁂 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀪𑀺𑀓𑁆𑀔𑀽 𑀯𑀺𑀳𑁂𑀞𑁂𑀬𑁆𑀬𑀼𑀁. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀭𑀸𑀚𑀪𑀝𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀭𑀸𑀚𑀪𑀝𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀭𑀸𑀚𑀪𑀝𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁮. 𑀅𑀗𑁆𑀕𑀼𑀮𑀺𑀫𑀸𑀮𑀘𑁄𑀭𑀯𑀢𑁆𑀣𑀼

𑁯𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑁄𑀭𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀺, 𑀉𑀢𑁆𑀢𑀲𑀦𑁆𑀢𑀺𑀧𑀺, 𑀧𑀮𑀸𑀬𑀦𑁆𑀢𑀺𑀧𑀺 ¶ , 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂𑀦𑀧𑀺 𑀫𑀼𑀔𑀁 𑀓𑀭𑁄𑀦𑁆𑀢𑀺, 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 ¶ 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀚𑀩𑀦𑁆𑀥𑀁 𑀘𑁄𑀭𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀥𑀚𑀩𑀦𑁆𑀥𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀅𑀗𑁆𑀕𑀼𑀮𑀺𑀫𑀸𑀮𑀘𑁄𑀭𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁯. 𑀓𑀸𑀭𑀪𑁂𑀤𑀓𑀘𑁄𑀭𑀯𑀢𑁆𑀣𑀼

𑁯𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 ¶ 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺 𑁋 ‘‘𑀬𑁂 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁; 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀦𑁆𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀓𑀸𑀭𑀸𑀬 𑀩𑀤𑁆𑀥𑁄 𑀳𑁄𑀢𑀺. 𑀲𑁄 𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀲𑁄 𑀓𑀸𑀭𑀪𑁂𑀤𑀓𑁄 𑀘𑁄𑀭𑁄. 𑀳𑀦𑁆𑀤, 𑀦𑀁 𑀦𑁂𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘𑀼𑀢𑁆𑀣. 𑀅𑀦𑀼𑀜𑁆𑀜𑀸𑀢𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑁋 ‘‘𑀬𑁂 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁; 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀦𑁆𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀪𑀬𑀽𑀯𑀭𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸, 𑀦𑀬𑀺𑀫𑁂 ¶ 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀓𑀸𑀭𑀪𑁂𑀤𑀓𑀁 𑀘𑁄𑀭𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀓𑀸𑀭𑀪𑁂𑀤𑀓𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀓𑀸𑀭𑀪𑁂𑀤𑀓𑀘𑁄𑀭𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁦. 𑀮𑀺𑀔𑀺𑀢𑀓𑀘𑁄𑀭𑀯𑀢𑁆𑀣𑀼

𑁯𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀘𑁄𑀭𑀺𑀓𑀁 𑀓𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀲𑁄 𑀘 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀮𑀺𑀔𑀺𑀢𑁄 𑀳𑁄𑀢𑀺 𑁋 𑀬𑀢𑁆𑀣 𑀧𑀲𑁆𑀲𑀢𑀺, 𑀢𑀢𑁆𑀣 𑀳𑀦𑁆𑀢𑀩𑁆𑀩𑁄𑀢𑀺. 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀲𑁄 𑀮𑀺𑀔𑀺𑀢𑀓𑁄 𑀘𑁄𑀭𑁄. 𑀳𑀦𑁆𑀤, 𑀦𑀁 𑀳𑀦𑀸𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘𑀼𑀢𑁆𑀣. 𑀅𑀦𑀼𑀜𑁆𑀜𑀸𑀢𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 ‘‘𑀬𑁂 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀦𑁆𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀪𑀬𑀽𑀯𑀭𑀸 ¶ 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸, 𑀦𑀬𑀺𑀫𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀮𑀺𑀔𑀺𑀢𑀓𑀁 𑀘𑁄𑀭𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀮𑀺𑀔𑀺𑀢𑀓𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀮𑀺𑀔𑀺𑀢𑀓𑀘𑁄𑀭𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁧. 𑀓𑀲𑀸𑀳𑀢𑀯𑀢𑁆𑀣𑀼

𑁯𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀓𑀲𑀸𑀳𑀢𑀁 𑀓𑀢𑀤𑀡𑁆𑀟𑀓𑀫𑁆𑀫𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦 ¶ , 𑀪𑀺𑀓𑁆𑀔𑀯𑁂, 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀓𑀲𑀸𑀳𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁨. 𑀮𑀓𑁆𑀔𑀡𑀸𑀳𑀢𑀯𑀢𑁆𑀣𑀼

𑁯𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀮𑀓𑁆𑀔𑀡𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀮𑀓𑁆𑀔𑀡𑀸𑀳𑀢𑀁 𑀓𑀢𑀤𑀡𑁆𑀟𑀓𑀫𑁆𑀫𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀮𑀓𑁆𑀔𑀡𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀮𑀓𑁆𑀔𑀡𑀸𑀳𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁩. 𑀇𑀡𑀸𑀬𑀺𑀓𑀯𑀢𑁆𑀣𑀼

𑁯𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀇𑀡𑀸𑀬𑀺𑀓𑁄 𑀧𑀮𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀥𑀦𑀺𑀬𑀸 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀲𑁄 𑀅𑀫𑁆𑀳𑀸𑀓𑀁 𑀇𑀡𑀸𑀬𑀺𑀓𑁄. 𑀳𑀦𑁆𑀤, 𑀦𑀁 𑀦𑁂𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘𑀼𑀢𑁆𑀣. 𑀅𑀦𑀼𑀜𑁆𑀜𑀸𑀢𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑁋 ‘‘𑀬𑁂 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁; 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀦𑁆𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀪𑀬𑀽𑀯𑀭𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸. 𑀦𑀬𑀺𑀫𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀇𑀡𑀸𑀬𑀺𑀓𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 ¶ 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀇𑀡𑀸𑀬𑀺𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀇𑀡𑀸𑀬𑀺𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁪. 𑀤𑀸𑀲𑀯𑀢𑁆𑀣𑀼

𑁯𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀤𑀸𑀲𑁄 𑀧𑀮𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 ¶ 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀅𑀬𑁆𑀬𑀓𑀸 [𑀅𑀬𑁆𑀬𑀺𑀓𑀸 (𑀓.), 𑀅𑀬𑀺𑀭𑀓𑀸 (𑀲𑀻.)] 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀲𑁄 𑀅𑀫𑁆𑀳𑀸𑀓𑀁 𑀤𑀸𑀲𑁄. 𑀳𑀦𑁆𑀤, 𑀦𑀁 𑀦𑁂𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘𑀼𑀢𑁆𑀣, 𑀅𑀦𑀼𑀜𑁆𑀜𑀸𑀢𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 ‘‘𑀬𑁂 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀦𑁆𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀪𑀬𑀽𑀯𑀭𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸, 𑀦𑀬𑀺𑀫𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀸𑀲𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀤𑀸𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀤𑀸𑀲𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁫. 𑀓𑀫𑁆𑀫𑀸𑀭𑀪𑀡𑁆𑀟𑀼𑀯𑀢𑁆𑀣𑀼

𑁯𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀓𑀫𑁆𑀫𑀸𑀭𑀪𑀡𑁆𑀟𑀼 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀓𑀫𑁆𑀫𑀸𑀭𑀪𑀡𑁆𑀟𑀼𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀓𑀫𑁆𑀫𑀸𑀭𑀪𑀡𑁆𑀟𑀼𑀁 𑀯𑀺𑀘𑀺𑀦𑀦𑁆𑀢𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀤𑀸𑀭𑀓𑀁 𑀧𑀲𑁆𑀲𑁂𑀬𑁆𑀬𑀸𑀣𑀸’’𑀢𑀺? 𑀪𑀺𑀓𑁆𑀔𑀽 𑀅𑀚𑀸𑀦𑀁𑀬𑁂𑀯 𑀆𑀳𑀁𑀲𑀼 𑁋 ‘‘𑀦 𑀚𑀸𑀦𑀸𑀫𑀸’’𑀢𑀺, 𑀅𑀧𑀲𑁆𑀲𑀁𑀬𑁂𑀯 𑀆𑀳𑀁𑀲𑀼 𑁋 ‘‘𑀦 𑀧𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑀲𑁆𑀲 𑀓𑀫𑁆𑀫𑀸𑀭𑀪𑀡𑁆𑀟𑀼𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀁 𑀓𑀫𑁆𑀫𑀸𑀭𑀪𑀡𑁆𑀟𑀼𑀁 𑀯𑀺𑀘𑀺𑀦𑀦𑁆𑀢𑀸 ¶ 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸, 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑁄. 𑀚𑀸𑀦𑀁𑀬𑁂𑀯 𑀆𑀳𑀁𑀲𑀼 𑁋 ‘𑀦 𑀚𑀸𑀦𑀸𑀫𑀸’𑀢𑀺, 𑀧𑀲𑁆𑀲𑀁𑀬𑁂𑀯 𑀆𑀳𑀁𑀲𑀼 𑁋 ‘𑀦 𑀧𑀲𑁆𑀲𑀸𑀫𑀸’𑀢𑀺. 𑀅𑀬𑀁 𑀤𑀸𑀭𑀓𑁄 𑀪𑀺𑀓𑁆𑀔𑀽𑀲𑀼 ¶ 𑀧𑀩𑁆𑀩𑀚𑀺𑀢𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀓𑀫𑁆𑀫𑀸𑀭𑀪𑀡𑁆𑀟𑀼𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 ¶ 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑀼𑀁 𑀪𑀡𑁆𑀟𑀼𑀓𑀫𑁆𑀫𑀸𑀬𑀸𑀢𑀺.

𑀓𑀫𑁆𑀫𑀸𑀭𑀪𑀡𑁆𑀟𑀼𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁬. 𑀉𑀧𑀸𑀮𑀺𑀤𑀸𑀭𑀓𑀯𑀢𑁆𑀣𑀼

𑁯𑁯. [𑀇𑀤𑀁 𑀯𑀢𑁆𑀣𑀼 𑀧𑀸𑀘𑀺. 𑁪𑁦𑁨 𑀆𑀤𑀬𑁄] 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀤𑀸𑀭𑀓𑀸 𑀲𑀳𑀸𑀬𑀓𑀸 𑀳𑁄𑀦𑁆𑀢𑀺. 𑀉𑀧𑀸𑀮𑀺𑀤𑀸𑀭𑀓𑁄 𑀢𑁂𑀲𑀁 𑀧𑀸𑀫𑁄𑀓𑁆𑀔𑁄 𑀳𑁄𑀢𑀺. 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀉𑀧𑀸𑀮𑀺 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬, 𑀦 𑀘 𑀓𑀺𑀮𑀫𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀉𑀧𑀸𑀮𑀺 𑀮𑁂𑀔𑀁 𑀲𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀔𑁄 𑀉𑀧𑀸𑀮𑀺 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬, 𑀦 𑀘 𑀓𑀺𑀮𑀫𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀉𑀧𑀸𑀮𑀺 𑀮𑁂𑀔𑀁 𑀲𑀺𑀓𑁆𑀔𑀺𑀲𑁆𑀲𑀢𑀺, 𑀅𑀗𑁆𑀕𑀼𑀮𑀺𑀬𑁄 𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀔𑁄 𑀉𑀧𑀸𑀮𑀺 𑀕𑀡𑀦𑀁 𑀲𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀔𑁄 𑀉𑀧𑀸𑀮𑀺 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬, 𑀦 𑀘 𑀓𑀺𑀮𑀫𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀉𑀧𑀸𑀮𑀺 𑀕𑀡𑀦𑀁 𑀲𑀺𑀓𑁆𑀔𑀺𑀲𑁆𑀲𑀢𑀺, 𑀉𑀭𑀲𑁆𑀲 𑀤𑀼𑀓𑁆𑀔𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀔𑁄 𑀉𑀧𑀸𑀮𑀺 𑀭𑀽𑀧𑀁 𑀲𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀔𑁄 𑀉𑀧𑀸𑀮𑀺 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬, 𑀦 𑀘 𑀓𑀺𑀮𑀫𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀉𑀧𑀸𑀮𑀺 𑀭𑀽𑀧𑀁 𑀲𑀺𑀓𑁆𑀔𑀺𑀲𑁆𑀲𑀢𑀺, 𑀅𑀓𑁆𑀔𑀻𑀦𑀺 𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀲𑀻𑀮𑀸 𑀲𑀼𑀔𑀲𑀫𑀸𑀘𑀸𑀭𑀸, 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑀬𑀦𑁂𑀲𑀼 𑀲𑀬𑀦𑁆𑀢𑀺 ¶ . 𑀲𑀘𑁂 𑀔𑁄 𑀉𑀧𑀸𑀮𑀺 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬, 𑀏𑀯𑀁 𑀔𑁄 𑀉𑀧𑀸𑀮𑀺 𑀅𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬, 𑀦 𑀘 𑀓𑀺𑀮𑀫𑁂𑀬𑁆𑀬𑀸’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀉𑀧𑀸𑀮𑀺𑀤𑀸𑀭𑀓𑁄 𑀫𑀸𑀢𑀸𑀧𑀺𑀢𑀽𑀦𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀉𑀧𑀸𑀮𑀺𑀤𑀸𑀭𑀓𑁄 𑀬𑁂𑀦 𑀢𑁂 𑀤𑀸𑀭𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀤𑀸𑀭𑀓𑁂 𑀏𑀢𑀤𑀯𑁄𑀘 𑁋 ‘‘𑀏𑀣 𑀫𑀬𑀁, 𑀅𑀬𑁆𑀬𑀸, 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂 𑀔𑁄 𑀢𑁆𑀯𑀁, 𑀅𑀬𑁆𑀬, 𑀧𑀩𑁆𑀩𑀚𑀺𑀲𑁆𑀲𑀲𑀺, 𑀏𑀯𑀁 𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀤𑀸𑀭𑀓𑀸 𑀏𑀓𑀫𑁂𑀓𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀦𑀼𑀚𑀸𑀦𑀸𑀣 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀸𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 ¶ 𑀫𑀸𑀢𑀸𑀧𑀺𑀢𑀭𑁄 𑁋 ‘‘𑀲𑀩𑁆𑀩𑁂𑀧𑀺𑀫𑁂 𑀤𑀸𑀭𑀓𑀸 𑀲𑀫𑀸𑀦𑀘𑁆𑀙𑀦𑁆𑀤𑀸 𑀓𑀮𑁆𑀬𑀸𑀡𑀸𑀥𑀺𑀧𑁆𑀧𑀸𑀬𑀸’’𑀢𑀺 𑁋 𑀅𑀦𑀼𑀚𑀸𑀦𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁 𑀉𑀧𑀲𑀫𑁆𑀧𑀸𑀤𑁂𑀲𑀼𑀁 ¶ . 𑀢𑁂 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀭𑁄𑀤𑀦𑁆𑀢𑀺 𑁋 ‘‘𑀬𑀸𑀕𑀼𑀁 𑀤𑁂𑀣, 𑀪𑀢𑁆𑀢𑀁 𑀤𑁂𑀣, 𑀔𑀸𑀤𑀦𑀻𑀬𑀁 𑀤𑁂𑀣𑀸’’𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀕𑀫𑁂𑀣, 𑀆𑀯𑀼𑀲𑁄, 𑀬𑀸𑀯 𑀭𑀢𑁆𑀢𑀺 𑀯𑀺𑀪𑀸𑀬𑀢𑀺. 𑀲𑀘𑁂 𑀬𑀸𑀕𑀼 𑀪𑀯𑀺𑀲𑁆𑀲𑀢𑀺 ¶ 𑀧𑀺𑀯𑀺𑀲𑁆𑀲𑀣, 𑀲𑀘𑁂 𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺 𑀪𑀼𑀜𑁆𑀚𑀺𑀲𑁆𑀲𑀣, 𑀲𑀘𑁂 𑀔𑀸𑀤𑀦𑀻𑀬𑀁 𑀪𑀯𑀺𑀲𑁆𑀲𑀢𑀺 𑀔𑀸𑀤𑀺𑀲𑁆𑀲𑀣; 𑀦𑁄 𑀘𑁂 𑀪𑀯𑀺𑀲𑁆𑀲𑀢𑀺 𑀬𑀸𑀕𑀼 𑀯𑀸 𑀪𑀢𑁆𑀢𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀣𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑀸 𑀭𑁄𑀤𑀦𑁆𑀢𑀺𑀬𑁂𑀯 ‘‘𑀬𑀸𑀕𑀼𑀁 𑀤𑁂𑀣, 𑀪𑀢𑁆𑀢𑀁 𑀤𑁂𑀣, 𑀔𑀸𑀤𑀦𑀻𑀬𑀁 𑀤𑁂𑀣𑀸’’𑀢𑀺; 𑀲𑁂𑀦𑀸𑀲𑀦𑀁 𑀉𑀳𑀤𑀦𑁆𑀢𑀺𑀧𑀺 𑀉𑀫𑁆𑀫𑀺𑀳𑀦𑁆𑀢𑀺𑀧𑀺.

𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 ¶ 𑀧𑀘𑁆𑀘𑀼𑀝𑁆𑀞𑀸𑀬 𑀤𑀸𑀭𑀓𑀲𑀤𑁆𑀤𑀁. 𑀲𑀼𑀢𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀤𑀸𑀭𑀓𑀲𑀤𑁆𑀤𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀊𑀦𑀯𑀻𑀲𑀢𑀺𑀯𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑁆𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀯𑀻𑀲𑀢𑀺𑀯𑀲𑁆𑀲𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀉𑀧𑀸𑀮𑀺𑀤𑀸𑀭𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁭. 𑀅𑀳𑀺𑀯𑀸𑀢𑀓𑀭𑁄𑀕𑀯𑀢𑁆𑀣𑀼

𑁧𑁦𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀁 𑀓𑀼𑀮𑀁 𑀅𑀳𑀺𑀯𑀸𑀢𑀓𑀭𑁄𑀕𑁂𑀦 𑀓𑀸𑀮𑀗𑁆𑀓𑀢𑀁 𑀳𑁄𑀢𑀺. 𑀢𑀲𑁆𑀲 𑀧𑀺𑀢𑀸𑀧𑀼𑀢𑁆𑀢𑀓𑀸 𑀲𑁂𑀲𑀸 𑀳𑁄𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 ¶ 𑀏𑀓𑀢𑁄𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀅𑀣 𑀔𑁄 𑀲𑁄 𑀤𑀸𑀭𑀓𑁄 𑀧𑀺𑀢𑀼𑀦𑁄 𑀪𑀺𑀓𑁆𑀔𑀸𑀬 𑀤𑀺𑀦𑁆𑀦𑀸𑀬 𑀉𑀧𑀥𑀸𑀯𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺, 𑀢𑀸𑀢, 𑀤𑁂𑀳𑀺; 𑀫𑀬𑁆𑀳𑀫𑁆𑀧𑀺 ¶ , 𑀢𑀸𑀢, 𑀤𑁂𑀳𑀻’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 ¶ 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸. 𑀅𑀬𑀫𑁆𑀧𑀺 𑀤𑀸𑀭𑀓𑁄 𑀪𑀺𑀓𑁆𑀔𑀼𑀦𑀺𑀬𑀸 𑀚𑀸𑀢𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 ¶ 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀊𑀦𑀧𑀦𑁆𑀦𑀭𑀲𑀯𑀲𑁆𑀲𑁄 𑀤𑀸𑀭𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀅𑀳𑀺𑀯𑀸𑀢𑀓𑀭𑁄𑀕𑁂𑀦 𑀓𑀸𑀮𑀗𑁆𑀓𑀢𑀁 𑀳𑁄𑀢𑀺, 𑀤𑁆𑀯𑁂 𑀘 𑀤𑀸𑀭𑀓𑀸 𑀲𑁂𑀲𑀸 𑀳𑁄𑀦𑁆𑀢𑀺. 𑀢𑁂 𑀧𑁄𑀭𑀸𑀡𑀓𑁂𑀦 𑀆𑀘𑀺𑀡𑁆𑀡𑀓𑀧𑁆𑀧𑁂𑀦 𑀪𑀺𑀓𑁆𑀔𑀽 𑀧𑀲𑁆𑀲𑀺𑀢𑁆𑀯𑀸 𑀉𑀧𑀥𑀸𑀯𑀦𑁆𑀢𑀺. 𑀪𑀺𑀓𑁆𑀔𑀽 𑀅𑀧𑀲𑀸𑀤𑁂𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀧𑀲𑀸𑀤𑀺𑀬𑀫𑀸𑀦𑀸 𑀭𑁄𑀤𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀊𑀦𑀧𑀦𑁆𑀦𑀭𑀲𑀯𑀲𑁆𑀲𑁄 𑀤𑀸𑀭𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’𑀢𑀺. 𑀇𑀫𑁂 𑀘 𑀤𑀸𑀭𑀓𑀸 𑀊𑀦𑀧𑀦𑁆𑀦𑀭𑀲𑀯𑀲𑁆𑀲𑀸. 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀇𑀫𑁂 𑀤𑀸𑀭𑀓𑀸 𑀦 𑀯𑀺𑀦𑀲𑁆𑀲𑁂𑀬𑁆𑀬𑀼’’𑀦𑁆𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀉𑀲𑁆𑀲𑀳𑀦𑁆𑀢𑀺 𑀧𑀦 𑀢𑁂, 𑀆𑀦𑀦𑁆𑀤, 𑀤𑀸𑀭𑀓𑀸 𑀓𑀸𑀓𑁂 𑀉𑀟𑁆𑀟𑀸𑀧𑁂𑀢𑀼𑀦𑁆𑀢𑀺? 𑀉𑀲𑁆𑀲𑀳𑀦𑁆𑀢𑀺, 𑀪𑀕𑀯𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀊𑀦𑀧𑀦𑁆𑀦𑀭𑀲𑀯𑀲𑁆𑀲𑀁 𑀤𑀸𑀭𑀓𑀁 𑀓𑀸𑀓𑀼𑀟𑁆𑀟𑁂𑀧𑀓𑀁 𑀧𑀩𑁆𑀩𑀸𑀚𑁂𑀢𑀼’’𑀦𑁆𑀢𑀺.

𑀅𑀳𑀺𑀯𑀸𑀢𑀓𑀭𑁄𑀕𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁮. 𑀓𑀡𑁆𑀝𑀓𑀯𑀢𑁆𑀣𑀼

𑁧𑁦𑁧. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀤𑁆𑀯𑁂 𑀲𑀸𑀫𑀡𑁂𑀭𑀸 𑀳𑁄𑀦𑁆𑀢𑀺 𑁋 𑀓𑀡𑁆𑀝𑀓𑁄 𑀘 𑀫𑀳𑀓𑁄 𑀘. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀤𑀽𑀲𑁂𑀲𑀼𑀁. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀸𑀫𑀡𑁂𑀭𑀸 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀏𑀓𑁂𑀦 𑀤𑁆𑀯𑁂 𑀲𑀸𑀫𑀡𑁂𑀭𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸. 𑀬𑁄 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀓𑀡𑁆𑀝𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁩𑁯. 𑀆𑀳𑀼𑀦𑁆𑀤𑀭𑀺𑀓𑀯𑀢𑁆𑀣𑀼

𑁧𑁦𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺, 𑀢𑀢𑁆𑀣 𑀳𑁂𑀫𑀦𑁆𑀢𑀁, 𑀢𑀢𑁆𑀣 𑀕𑀺𑀫𑁆𑀳𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀆𑀳𑀼𑀦𑁆𑀤𑀭𑀺𑀓𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀤𑀺𑀲𑀸 𑀅𑀦𑁆𑀥𑀓𑀸𑀭𑀸, 𑀦 𑀇𑀫𑁂𑀲𑀁 𑀤𑀺𑀲𑀸 𑀧𑀓𑁆𑀔𑀸𑀬𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 ¶ 𑁋 ‘‘𑀕𑀘𑁆𑀙𑀸𑀦𑀦𑁆𑀤, 𑀅𑀯𑀸𑀧𑀼𑀭𑀡𑀁 [𑀅𑀧𑀸𑀧𑀼𑀭𑀡𑀁 (𑀓.)] 𑀆𑀤𑀸𑀬 ¶ 𑀅𑀦𑀼𑀧𑀭𑀺𑀯𑁂𑀡𑀺𑀬𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀳𑀺 𑁋 ‘‘𑀇𑀘𑁆𑀙𑀢𑀸𑀯𑀼𑀲𑁄 𑀪𑀕𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀅𑀢𑁆𑀣𑁄, 𑀲𑁄 𑀆𑀕𑀘𑁆𑀙𑀢𑀽’’𑀢𑀺. 𑀏𑀯𑀁, 𑀪𑀦𑁆𑀢𑁂, 𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬 𑀅𑀦𑀼𑀧𑀭𑀺𑀯𑁂𑀡𑀺𑀬𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘𑀇𑀘𑁆𑀙𑀢𑀸𑀯𑀼𑀲𑁄 𑀪𑀕𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀅𑀢𑁆𑀣𑁄, 𑀲𑁄 𑀆𑀕𑀘𑁆𑀙𑀢𑀽’’’𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀕𑀯𑀢𑀸, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀜𑁆𑀜𑀢𑁆𑀢𑀁 𑀤𑀲𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁, 𑀤𑀲𑀯𑀲𑁆𑀲𑁂𑀦 ¶ 𑀦𑀺𑀲𑁆𑀲𑀬𑀁 𑀤𑀸𑀢𑀼𑀁. 𑀢𑀢𑁆𑀣 𑀘 𑀦𑁄 𑀕𑀦𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀦𑀺𑀲𑁆𑀲𑀬𑁄 𑀘 𑀕𑀳𑁂𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀇𑀢𑁆𑀢𑀭𑁄 𑀘 𑀯𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀧𑀼𑀦 𑀘 𑀧𑀘𑁆𑀘𑀸𑀕𑀦𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀧𑀼𑀦 𑀘 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀫𑀬𑀫𑁆𑀧𑀺 𑀕𑀫𑀺𑀲𑁆𑀲𑀸𑀫; 𑀦𑁄 𑀘𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀫𑀬𑀫𑁆𑀧𑀺 𑀦 𑀕𑀫𑀺𑀲𑁆𑀲𑀸𑀫. 𑀮𑀳𑀼𑀘𑀺𑀢𑁆𑀢𑀓𑀢𑀸 𑀦𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀑𑀕𑀡𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑀆𑀳𑀼𑀦𑁆𑀤𑀭𑀺𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁪𑁦. 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑀓𑀣𑀸

𑁧𑁦𑁩. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀘𑁆𑀙𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀑𑀕𑀡𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀧𑀜𑁆𑀘𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁, 𑀅𑀩𑁆𑀬𑀢𑁆𑀢𑁂𑀦 𑀬𑀸𑀯𑀚𑀻𑀯𑀁.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦, 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 ¶ 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦. 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀲𑀤𑁆𑀥𑁄 𑀳𑁄𑀢𑀺 ¶ , 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 ¶ 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀦 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺 ¶ , 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓 𑀧𑀜𑁆𑀘𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀤𑀲𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁦𑁪. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦, 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 ¶ 𑀳𑁄𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺 ¶ , 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 ¶ 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀦 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 ¶ 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 ¶ 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 ¶ 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’’𑀦𑁆𑀢𑀺.

𑀅𑀪𑀬𑀽𑀯𑀭𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀅𑀝𑁆𑀞𑀫𑁄.

𑀅𑀝𑁆𑀞𑀫𑀪𑀸𑀡𑀯𑀸𑀭𑁄.

𑁪𑁧. 𑀭𑀸𑀳𑀼𑀮𑀯𑀢𑁆𑀣𑀼

𑁧𑁦𑁫. 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀓𑀧𑀺𑀮𑀯𑀢𑁆𑀣𑀼 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀓𑀧𑀺𑀮𑀯𑀢𑁆𑀣𑀼 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀼𑀤𑁆𑀥𑁄𑀤𑀦𑀲𑁆𑀲 𑀲𑀓𑁆𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀭𑀸𑀳𑀼𑀮𑀫𑀸𑀢𑀸 𑀤𑁂𑀯𑀻 𑀭𑀸𑀳𑀼𑀮𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑁄 𑀢𑁂, 𑀭𑀸𑀳𑀼𑀮, 𑀧𑀺𑀢𑀸. 𑀕𑀘𑁆𑀙𑀲𑁆𑀲𑀼 [𑀕𑀘𑁆𑀙𑀲𑁆𑀲 (𑀲𑁆𑀬𑀸.)], 𑀤𑀸𑀬𑀚𑁆𑀚𑀁 𑀬𑀸𑀘𑀸𑀳𑀻’’𑀢𑀺. 𑀅𑀣 𑀔𑁄 𑀭𑀸𑀳𑀼𑀮𑁄 𑀓𑀼𑀫𑀸𑀭𑁄 𑀬𑁂𑀦 ¶ 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄, 𑀅𑀝𑁆𑀞𑀸𑀲𑀺 𑁋 ‘‘𑀲𑀼𑀔𑀸 𑀢𑁂, 𑀲𑀫𑀡, 𑀙𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀭𑀸𑀳𑀼𑀮𑁄 𑀓𑀼𑀫𑀸𑀭𑁄 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺 𑁋 ‘‘𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀺; 𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀭𑀸𑀳𑀼𑀮𑀁 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀭𑀸𑀳𑀼𑀮𑀁 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀫𑀻’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 𑁋 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 ¶ 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄 𑁋 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀤𑀼𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺; 𑀢𑀢𑀺𑀬𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 ¶ 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀳𑀼𑀮𑀁 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺.

𑀅𑀣 𑀔𑁄 𑀲𑀼𑀤𑁆𑀥𑁄𑀤𑀦𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀤𑁆𑀥𑁄𑀤𑀦𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀕𑁄𑀢𑀫, 𑀢𑀣𑀸𑀕𑀢𑀸’’𑀢𑀺. ‘‘𑀬𑀜𑁆𑀘, 𑀪𑀦𑁆𑀢𑁂, 𑀓𑀧𑁆𑀧𑀢𑀺, 𑀬𑀜𑁆𑀘 𑀅𑀦𑀯𑀚𑁆𑀚’’𑀦𑁆𑀢𑀺. ‘‘𑀯𑀤𑁂𑀳𑀺, 𑀕𑁄𑀢𑀫𑀸’’𑀢𑀺. ‘‘𑀪𑀕𑀯𑀢𑀺 𑀫𑁂, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑁂 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀅𑀳𑁄𑀲𑀺, 𑀢𑀣𑀸 𑀦𑀦𑁆𑀤𑁂, 𑀅𑀥𑀺𑀫𑀢𑁆𑀢𑀁 𑀭𑀸𑀳𑀼𑀮𑁂. 𑀧𑀼𑀢𑁆𑀢𑀧𑁂𑀫𑀁 ¶ , 𑀪𑀦𑁆𑀢𑁂, 𑀙𑀯𑀺𑀁 𑀙𑀺𑀦𑁆𑀤𑀢𑀺, 𑀙𑀯𑀺𑀁 𑀙𑁂𑀢𑁆𑀯𑀸 𑀘𑀫𑁆𑀫𑀁 𑀙𑀺𑀦𑁆𑀤𑀢𑀺, 𑀘𑀫𑁆𑀫𑀁 𑀙𑁂𑀢𑁆𑀯𑀸 𑀫𑀁𑀲𑀁 𑀙𑀺𑀦𑁆𑀤𑀢𑀺, 𑀫𑀁𑀲𑀁 𑀙𑁂𑀢𑁆𑀯𑀸 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀢𑀺, 𑀦𑁆𑀳𑀸𑀭𑀼𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀁 𑀙𑀺𑀦𑁆𑀤𑀢𑀺, 𑀅𑀝𑁆𑀞𑀺𑀁 𑀙𑁂𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀅𑀦𑀦𑀼𑀜𑁆𑀜𑀸𑀢𑀁 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀼𑀤𑁆𑀥𑁄𑀤𑀦𑀁 𑀲𑀓𑁆𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀲𑀼𑀤𑁆𑀥𑁄𑀤𑀦𑁄 𑀲𑀓𑁆𑀓𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀜𑁆𑀜𑀸𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀸𑀭𑀓𑀁 𑀧𑀸𑀳𑁂𑀲𑀺 𑁋 ‘‘𑀇𑀫𑀁 𑀤𑀸𑀭𑀓𑀁 𑀣𑁂𑀭𑁄 𑀧𑀩𑁆𑀩𑀸𑀚𑁂𑀢𑀽’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀏𑀓𑁂𑀦 𑀤𑁆𑀯𑁂 𑀲𑀸𑀫𑀡𑁂𑀭𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’𑀢𑀺. 𑀅𑀬𑀜𑁆𑀘 𑀫𑁂 𑀭𑀸𑀳𑀼𑀮𑁄 𑀲𑀸𑀫𑀡𑁂𑀭𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 ¶ 𑀧𑀝𑀺𑀩𑀮𑁂𑀦 𑀏𑀓𑁂𑀦 𑀤𑁆𑀯𑁂 𑀲𑀸𑀫𑀡𑁂𑀭𑁂 𑀉𑀧𑀝𑁆𑀞𑀸𑀧𑁂𑀢𑀼𑀁, 𑀬𑀸𑀯𑀢𑀓𑁂 ¶ 𑀯𑀸 𑀧𑀦 𑀉𑀲𑁆𑀲𑀳𑀢𑀺 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀢𑀸𑀯𑀢𑀓𑁂 𑀉𑀧𑀝𑁆𑀞𑀸𑀧𑁂𑀢𑀼𑀦𑁆𑀢𑀺.

𑀭𑀸𑀳𑀼𑀮𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁪𑁨. 𑀲𑀺𑀓𑁆𑀔𑀸𑀧𑀤𑀓𑀣𑀸

𑁧𑁦𑁬. 𑀅𑀣 𑀔𑁄 𑀲𑀸𑀫𑀡𑁂𑀭𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀓𑀢𑁆𑀣 𑀘 𑀅𑀫𑁆𑀳𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀲𑀺𑀓𑁆𑀔𑀺𑀢𑀼𑀁 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 [𑀯𑁂𑀭𑀫𑀡𑀺, 𑀯𑁂𑀭𑀫𑀡𑀺𑀁 (𑀓.)], 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻, 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑁂𑀭𑀫𑀡𑀻, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀻, 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀻, 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀯𑁂𑀭𑀫𑀡𑀻, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀯𑁂𑀭𑀫𑀡𑀻 ¶ , 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀯𑁂𑀭𑀫𑀡𑀻, 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀯𑁂𑀭𑀫𑀡𑀻. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀇𑀫𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀲𑀺𑀓𑁆𑀔𑀺𑀢𑀼𑀦𑁆𑀢𑀺.

𑀲𑀺𑀓𑁆𑀔𑀸𑀧𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪𑁩. 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼

𑁧𑁦𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀫𑀡𑁂𑀭𑀸 𑀪𑀺𑀓𑁆𑀔𑀽𑀲𑀼 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 ¶ 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀦𑁆𑀢𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀸𑀫𑀡𑁂𑀭𑀸 𑀪𑀺𑀓𑁆𑀔𑀽𑀲𑀼 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼𑀁. 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺.

𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀓𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀸𑀫𑀡𑁂𑀭𑀸𑀦𑀁 𑀲𑀩𑁆𑀩𑀁 𑀲𑀗𑁆𑀖𑀸𑀭𑀸𑀫𑀁 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺. 𑀲𑀸𑀫𑀡𑁂𑀭𑀸 𑀆𑀭𑀸𑀫𑀁 𑀧𑀯𑀺𑀲𑀺𑀢𑀼𑀁 𑀅𑀮𑀪𑀫𑀸𑀦𑀸 𑀧𑀓𑁆𑀓𑀫𑀦𑁆𑀢𑀺𑀧𑀺 ¶ , 𑀯𑀺𑀩𑁆𑀪𑀫𑀦𑁆𑀢𑀺𑀧𑀺, 𑀢𑀺𑀢𑁆𑀣𑀺𑀬𑁂𑀲𑀼𑀧𑀺 𑀲𑀗𑁆𑀓𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁄 𑀲𑀗𑁆𑀖𑀸𑀭𑀸𑀫𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀯𑀸 𑀯𑀲𑀢𑀺, 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀆𑀯𑀭𑀡𑀁 𑀓𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀸𑀫𑀡𑁂𑀭𑀸𑀦𑀁 𑀫𑀼𑀔𑀤𑁆𑀯𑀸𑀭𑀺𑀓𑀁 𑀆𑀳𑀸𑀭𑀁 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀬𑀸𑀕𑀼𑀧𑀸𑀦𑀫𑁆𑀧𑀺 𑀲𑀗𑁆𑀖𑀪𑀢𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀸 𑀲𑀸𑀫𑀡𑁂𑀭𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘‘𑀏𑀣, 𑀪𑀦𑁆𑀢𑁂, 𑀬𑀸𑀕𑀼𑀁 𑀧𑀺𑀯𑀣; 𑀏𑀣, 𑀪𑀦𑁆𑀢𑁂, 𑀪𑀢𑁆𑀢𑀁 𑀪𑀼𑀜𑁆𑀚𑀣𑀸’’𑀢𑀺. 𑀲𑀸𑀫𑀡𑁂𑀭𑀸 𑀏𑀯𑀁 ¶ 𑀯𑀤𑁂𑀦𑁆𑀢𑀺 𑁋 ‘‘𑀦𑀸𑀯𑀼𑀲𑁄, 𑀮𑀩𑁆𑀪𑀸. 𑀪𑀺𑀓𑁆𑀔𑀽𑀳𑀺 𑀆𑀯𑀭𑀡𑀁 𑀓𑀢’’𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 𑀲𑀸𑀫𑀡𑁂𑀭𑀸𑀦𑀁 𑀫𑀼𑀔𑀤𑁆𑀯𑀸𑀭𑀺𑀓𑀁 𑀆𑀳𑀸𑀭𑀁 𑀆𑀯𑀭𑀡𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀫𑀼𑀔𑀤𑁆𑀯𑀸𑀭𑀺𑀓𑁄 𑀆𑀳𑀸𑀭𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁪𑁪. 𑀅𑀦𑀸𑀧𑀼𑀘𑁆𑀙𑀸𑀯𑀭𑀡𑀯𑀢𑁆𑀣𑀼

𑁧𑁦𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀧𑀚𑁆𑀛𑀸𑀬𑁂 ¶ 𑀅𑀦𑀸𑀧𑀼𑀘𑁆𑀙𑀸 𑀲𑀸𑀫𑀡𑁂𑀭𑀸𑀦𑀁 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺. 𑀉𑀧𑀚𑁆𑀛𑀸𑀬𑀸 𑀕𑀯𑁂𑀲𑀦𑁆𑀢𑀺 𑁋 𑀓𑀣𑀁 [𑀓𑀳𑀁 (𑀓.)] 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀲𑀸𑀫𑀡𑁂𑀭𑀸 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀙𑀩𑁆𑀩𑀕𑁆𑀕𑀺𑀬𑁂𑀳𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀽𑀳𑀺 𑀆𑀯𑀭𑀡𑀁 𑀓𑀢’’𑀦𑁆𑀢𑀺. 𑀉𑀧𑀚𑁆𑀛𑀸𑀬𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀫𑁆𑀳𑁂 𑀅𑀦𑀸𑀧𑀼𑀘𑁆𑀙𑀸 𑀅𑀫𑁆𑀳𑀸𑀓𑀁 𑀲𑀸𑀫𑀡𑁂𑀭𑀸𑀦𑀁 𑀆𑀯𑀭𑀡𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑁂 𑀅𑀦𑀸𑀧𑀼𑀘𑁆𑀙𑀸 𑀆𑀯𑀭𑀡𑀁 𑀓𑀸𑀢𑀩𑁆𑀩𑀁. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀅𑀦𑀸𑀧𑀼𑀘𑁆𑀙𑀸𑀯𑀭𑀡𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁪𑁫. 𑀅𑀧𑀮𑀸𑀴𑀦𑀯𑀢𑁆𑀣𑀼

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀸𑀫𑀡𑁂𑀭𑁂 𑀅𑀧𑀮𑀸𑀴𑁂𑀦𑁆𑀢𑀺. 𑀣𑁂𑀭𑀸 𑀲𑀸𑀫𑀁 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀫𑀼𑀔𑁄𑀤𑀓𑀫𑁆𑀧𑀺 𑀕𑀡𑁆𑀳𑀦𑁆𑀢𑀸 𑀓𑀺𑀮𑀫𑀦𑁆𑀢𑀺 ¶ . 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀲𑁆𑀲 𑀧𑀭𑀺𑀲𑀸 𑀅𑀧𑀮𑀸𑀴𑁂𑀢𑀩𑁆𑀩𑀸. 𑀬𑁄 𑀅𑀧𑀮𑀸𑀴𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸 ¶ 𑀢𑀺.

𑀅𑀧𑀮𑀸𑀴𑀦𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁪𑁬. 𑀓𑀡𑁆𑀝𑀓𑀲𑀸𑀫𑀡𑁂𑀭𑀯𑀢𑁆𑀣𑀼

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀓𑀡𑁆𑀝𑀓𑁄 ¶ 𑀦𑀸𑀫 𑀲𑀸𑀫𑀡𑁂𑀭𑁄 𑀓𑀡𑁆𑀝𑀓𑀺𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀤𑀽𑀲𑁂𑀲𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀸𑀫𑀡𑁂𑀭𑁄 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀸𑀫𑀡𑁂𑀭𑀁 𑀦𑀸𑀲𑁂𑀢𑀼𑀁. 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀫𑀚𑁆𑀚𑀧𑀸𑀬𑀻 𑀳𑁄𑀢𑀺, 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀳𑁄𑀢𑀺 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀸𑀫𑀡𑁂𑀭𑀁 𑀦𑀸𑀲𑁂𑀢𑀼𑀦𑁆𑀢𑀺.

𑁪𑁭. 𑀧𑀡𑁆𑀟𑀓𑀯𑀢𑁆𑀣𑀼

𑁧𑁦𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀡𑁆𑀟𑀓𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀲𑁄 𑀤𑀳𑀭𑁂 𑀤𑀳𑀭𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀏𑀣, 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀤𑀽𑀲𑁂𑀣𑀸’’𑀢𑀺. 𑀪𑀺𑀓𑁆𑀔𑀽 𑀅𑀧𑀲𑀸𑀤𑁂𑀦𑁆𑀢𑀺 𑁋 ‘‘𑀦𑀲𑁆𑀲, 𑀧𑀡𑁆𑀟𑀓, 𑀯𑀺𑀦𑀲𑁆𑀲, 𑀧𑀡𑁆𑀟𑀓, 𑀓𑁄 𑀢𑀬𑀸 𑀅𑀢𑁆𑀣𑁄’’𑀢𑀺. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀧𑀲𑀸𑀤𑀺𑀢𑁄 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀫𑁄𑀴𑀺𑀕𑀮𑁆𑀮𑁂 𑀲𑀸𑀫𑀡𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀏𑀣, 𑀫𑀁 𑀆𑀯𑀼𑀲𑁄 𑀤𑀽𑀲𑁂𑀣𑀸’’𑀢𑀺. 𑀲𑀸𑀫𑀡𑁂𑀭𑀸 𑀅𑀧𑀲𑀸𑀤𑁂𑀦𑁆𑀢𑀺 𑁋 ‘‘𑀦𑀲𑁆𑀲, 𑀧𑀡𑁆𑀟𑀓, 𑀯𑀺𑀦𑀲𑁆𑀲, 𑀧𑀡𑁆𑀟𑀓, 𑀓𑁄 𑀢𑀬𑀸 𑀅𑀢𑁆𑀣𑁄’’𑀢𑀺. 𑀲𑁄 𑀲𑀸𑀫𑀡𑁂𑀭𑁂𑀳𑀺 𑀅𑀧𑀲𑀸𑀤𑀺𑀢𑁄 𑀳𑀢𑁆𑀣𑀺𑀪𑀡𑁆𑀟𑁂 𑀅𑀲𑁆𑀲𑀪𑀡𑁆𑀟𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀏𑀣, 𑀫𑀁, 𑀆𑀯𑀼𑀲𑁄 ¶ , 𑀤𑀽𑀲𑁂𑀣𑀸’’𑀢𑀺. 𑀳𑀢𑁆𑀣𑀺𑀪𑀡𑁆𑀟𑀸 𑀅𑀲𑁆𑀲𑀪𑀡𑁆𑀟𑀸 𑀤𑀽𑀲𑁂𑀲𑀼𑀁. 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀧𑀡𑁆𑀟𑀓𑀸 ¶ 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸. 𑀬𑁂𑀧𑀺 𑀇𑀫𑁂𑀲𑀁 𑀦 𑀧𑀡𑁆𑀟𑀓𑀸, 𑀢𑁂𑀧𑀺 𑀇𑀫𑁂 𑀧𑀡𑁆𑀟𑀓𑁂 𑀤𑀽𑀲𑁂𑀦𑁆𑀢𑀺. 𑀏𑀯𑀁 𑀇𑀫𑁂 𑀲𑀩𑁆𑀩𑁂𑀯 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀳𑀢𑁆𑀣𑀺𑀪𑀡𑁆𑀟𑀸𑀦𑀁 ¶ 𑀅𑀲𑁆𑀲𑀪𑀡𑁆𑀟𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁪𑁮. 𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀢𑁆𑀣𑀼

𑁧𑁧𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀸𑀡𑀓𑀼𑀮𑀧𑀼𑀢𑁆𑀢𑁄 𑀔𑀻𑀡𑀓𑁄𑀮𑀜𑁆𑀜𑁄 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀧𑀼𑀭𑀸𑀡𑀓𑀼𑀮𑀧𑀼𑀢𑁆𑀢𑀲𑁆𑀲 𑀔𑀻𑀡𑀓𑁄𑀮𑀜𑁆𑀜𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀲𑀼𑀔𑀼𑀫𑀸𑀮𑁄, 𑀦 𑀧𑀝𑀺𑀩𑀮𑁄 𑀅𑀦𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀅𑀥𑀺𑀕𑀦𑁆𑀢𑀼𑀁, 𑀅𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀨𑀸𑀢𑀺𑀁 𑀓𑀸𑀢𑀼𑀁. 𑀓𑁂𑀦 𑀦𑀼 𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀲𑀼𑀔𑀜𑁆𑀘 𑀚𑀻𑀯𑁂𑀬𑁆𑀬𑀁, 𑀦 𑀘 𑀓𑀺𑀮𑀫𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀢𑀲𑁆𑀲 𑀧𑀼𑀭𑀸𑀡𑀓𑀼𑀮𑀧𑀼𑀢𑁆𑀢𑀲𑁆𑀲 𑀔𑀻𑀡𑀓𑁄𑀮𑀜𑁆𑀜𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀔𑀲𑀻𑀮𑀸 𑀲𑀼𑀔𑀲𑀫𑀸𑀘𑀸𑀭𑀸, 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀯𑀸𑀢𑁂𑀲𑀼 𑀲𑀬𑀦𑁂𑀲𑀼 𑀲𑀬𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀲𑀸𑀫𑀁 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀸𑀡𑀓𑀼𑀮𑀧𑀼𑀢𑁆𑀢𑁄 𑀔𑀻𑀡𑀓𑁄𑀮𑀜𑁆𑀜𑁄 𑀲𑀸𑀫𑀁 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄’’𑀢𑀺? 𑀓𑀺𑀁 𑀏𑀢𑀁, 𑀆𑀯𑀼𑀲𑁄, 𑀓𑀢𑀺𑀯𑀲𑁆𑀲𑁄 𑀦𑀸𑀫𑀸𑀢𑀺? 𑀓𑁄 𑀧𑀦 𑀢𑁂, 𑀆𑀯𑀼𑀲𑁄, 𑀉𑀧𑀚𑁆𑀛𑀸𑀬𑁄𑀢𑀺? 𑀓𑀺𑀁 𑀏𑀢𑀁 ¶ , 𑀆𑀯𑀼𑀲𑁄, 𑀉𑀧𑀚𑁆𑀛𑀸𑀬𑁄 𑀦𑀸𑀫𑀸𑀢𑀺? 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀗𑁆𑀖𑀸𑀯𑀼𑀲𑁄 𑀉𑀧𑀸𑀮𑀺, 𑀇𑀫𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀸𑀡𑀓𑀼𑀮𑀧𑀼𑀢𑁆𑀢𑁄 𑀔𑀻𑀡𑀓𑁄𑀮𑀜𑁆𑀜𑁄 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀦𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁪𑁯. 𑀢𑀺𑀭𑀘𑁆𑀙𑀸𑀦𑀕𑀢𑀯𑀢𑁆𑀣𑀼

𑁧𑁧𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀦𑀸𑀕𑁄 𑀦𑀸𑀕𑀬𑁄𑀦𑀺𑀬𑀸 𑀅𑀝𑁆𑀝𑀻𑀬𑀢𑀺 ¶ 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀅𑀣 𑀔𑁄 𑀢𑀲𑁆𑀲 𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀦𑀸𑀕𑀬𑁄𑀦𑀺𑀬𑀸 𑀘 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀁 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀧𑀝𑀺𑀮𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 ¶ 𑀲𑀻𑀮𑀯𑀦𑁆𑀢𑁄 ¶ 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀲𑀘𑁂 𑀔𑁄 𑀅𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀁, 𑀏𑀯𑀸𑀳𑀁 𑀦𑀸𑀕𑀬𑁄𑀦𑀺𑀬𑀸 𑀘 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀁, 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀧𑀝𑀺𑀮𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀫𑀸𑀡𑀯𑀓𑀯𑀡𑁆𑀡𑁂𑀦 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁, 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀦𑀸𑀕𑁄 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀣 𑀔𑁄 𑀲𑁄 ¶ 𑀦𑀸𑀕𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀓𑁆𑀔𑀦𑁆𑀢𑁂 𑀯𑀺𑀲𑁆𑀲𑀝𑁆𑀞𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑀩𑁆𑀩𑁄 𑀯𑀺𑀳𑀸𑀭𑁄 𑀅𑀳𑀺𑀦𑀸 𑀧𑀼𑀡𑁆𑀡𑁄, 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑀸 𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀓𑀯𑀸𑀝𑀁 𑀧𑀡𑀸𑀫𑁂𑀦𑁆𑀢𑁄 𑀅𑀤𑁆𑀤𑀲 𑀲𑀩𑁆𑀩𑀁 𑀯𑀺𑀳𑀸𑀭𑀁 𑀅𑀳𑀺𑀦𑀸 𑀧𑀼𑀡𑁆𑀡𑀁, 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑁂 𑀦𑀺𑀓𑁆𑀔𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀪𑀺𑀓𑁆𑀔𑀽 𑀉𑀧𑀥𑀸𑀯𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀯𑀺𑀲𑁆𑀲𑀭𑀫𑀓𑀸𑀲𑀻’’𑀢𑀺? ‘‘𑀅𑀬𑀁, 𑀆𑀯𑀼𑀲𑁄, 𑀲𑀩𑁆𑀩𑁄 𑀯𑀺𑀳𑀸𑀭𑁄 𑀅𑀳𑀺𑀦𑀸 𑀧𑀼𑀡𑁆𑀡𑁄, 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑀸 𑀦𑀺𑀓𑁆𑀔𑀦𑁆𑀢𑀸’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀢𑁂𑀦 𑀲𑀤𑁆𑀤𑁂𑀦 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀦𑀸𑀕𑁄’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀏𑀯𑀭𑀽𑀧𑀁 𑀅𑀓𑀸𑀲𑀻’’𑀢𑀺? 𑀅𑀣 𑀔𑁄 𑀲𑁄 𑀦𑀸𑀕𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀦𑀸𑀕𑀁 𑀏𑀢𑀤𑀯𑁄𑀘 𑁋 ‘‘𑀢𑀼𑀫𑁆𑀳𑁂 𑀔𑁄𑀢𑁆𑀣 𑀦𑀸𑀕𑀸 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂. 𑀕𑀘𑁆𑀙 𑀢𑁆𑀯𑀁, 𑀦𑀸𑀕, 𑀢𑀢𑁆𑀣𑁂𑀯 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀁 𑀉𑀧𑀯𑀲, 𑀏𑀯𑀁 𑀢𑁆𑀯𑀁 𑀦𑀸𑀕𑀬𑁄𑀦𑀺𑀬𑀸 𑀘 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀲𑀺, 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀧𑀝𑀺𑀮𑀪𑀺𑀲𑁆𑀲𑀲𑀻’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄 𑀓𑀺𑀭𑀸𑀳𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀯𑀺𑀲𑁆𑀲𑀭𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀦𑀸𑀕𑀲𑁆𑀲 𑀲𑀪𑀸𑀯𑀧𑀸𑀢𑀼𑀓𑀫𑁆𑀫𑀸𑀬. 𑀬𑀤𑀸 𑀘 𑀲𑀚𑀸𑀢𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 ¶ 𑀧𑀝𑀺𑀲𑁂𑀯𑀢𑀺, 𑀬𑀤𑀸 𑀘 𑀯𑀺𑀲𑁆𑀲𑀝𑁆𑀞𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀘𑁆𑀘𑀬𑀸 𑀦𑀸𑀕𑀲𑁆𑀲 𑀲𑀪𑀸𑀯𑀧𑀸𑀢𑀼𑀓𑀫𑁆𑀫𑀸𑀬 ¶ . 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺.

𑁫𑁦. 𑀫𑀸𑀢𑀼𑀖𑀸𑀢𑀓𑀯𑀢𑁆𑀣𑀼

𑁧𑁧𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀫𑀸𑀡𑀯𑀓𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑁄 𑀢𑁂𑀦 𑀧𑀸𑀧𑀓𑁂𑀦 𑀓𑀫𑁆𑀫𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺 ¶ . 𑀅𑀣 𑀔𑁄 𑀢𑀲𑁆𑀲 𑀫𑀸𑀡𑀯𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀇𑀫𑀲𑁆𑀲 𑀧𑀸𑀧𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀓𑁆𑀔𑀦𑁆𑀢𑀺𑀁 𑀓𑀭𑁂𑀬𑁆𑀬’’𑀦𑁆𑀢𑀺? 𑀅𑀣 𑀔𑁄 𑀢𑀲𑁆𑀲 𑀫𑀸𑀡𑀯𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀫𑁆𑀫𑀘𑀸𑀭𑀺𑀦𑁄 ¶ 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸. 𑀲𑀘𑁂 𑀔𑁄 𑀅𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀁, 𑀏𑀯𑀸𑀳𑀁 𑀇𑀫𑀲𑁆𑀲 𑀧𑀸𑀧𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀓𑁆𑀔𑀦𑁆𑀢𑀺𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀼𑀩𑁆𑀩𑁂𑀧𑀺 𑀔𑁄, 𑀆𑀯𑀼𑀲𑁄 𑀉𑀧𑀸𑀮𑀺, 𑀦𑀸𑀕𑁄 𑀫𑀸𑀡𑀯𑀓𑀯𑀡𑁆𑀡𑁂𑀦 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄. 𑀇𑀗𑁆𑀖𑀸𑀯𑀼𑀲𑁄 𑀉𑀧𑀸𑀮𑀺, 𑀇𑀫𑀁 𑀫𑀸𑀡𑀯𑀓𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀦𑀸 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀫𑀸𑀢𑀼𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁫𑁧. 𑀧𑀺𑀢𑀼𑀖𑀸𑀢𑀓𑀯𑀢𑁆𑀣𑀼

𑁧𑁧𑁩. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀫𑀸𑀡𑀯𑀓𑁄 𑀧𑀺𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑁄 𑀢𑁂𑀦 𑀧𑀸𑀧𑀓𑁂𑀦 𑀓𑀫𑁆𑀫𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀅𑀣 𑀔𑁄 𑀢𑀲𑁆𑀲 𑀫𑀸𑀡𑀯𑀓𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀓𑁂𑀦 𑀦𑀼 𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀇𑀫𑀲𑁆𑀲 𑀧𑀸𑀧𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀓𑁆𑀔𑀦𑁆𑀢𑀺𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀫𑀸𑀡𑀯𑀓𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑁂 𑀔𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸, 𑀲𑀘𑁂 𑀔𑁄 𑀅𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀁, 𑀏𑀯𑀸𑀳𑀁 𑀇𑀫𑀲𑁆𑀲 𑀧𑀸𑀧𑀓𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀓𑁆𑀔𑀦𑁆𑀢𑀺𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀼𑀩𑁆𑀩𑁂𑀧𑀺 𑀔𑁄, 𑀆𑀯𑀼𑀲𑁄 𑀉𑀧𑀸𑀮𑀺, 𑀦𑀸𑀕𑁄 𑀫𑀸𑀡𑀯𑀓𑀯𑀡𑁆𑀡𑁂𑀦 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄, 𑀇𑀗𑁆𑀖𑀸𑀯𑀼𑀲𑁄, 𑀉𑀧𑀸𑀮𑀺, 𑀇𑀫𑀁 𑀫𑀸𑀡𑀯𑀓𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀦𑀸 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀺𑀢𑀼𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁫𑁨. 𑀅𑀭𑀳𑀦𑁆𑀢𑀖𑀸𑀢𑀓𑀯𑀢𑁆𑀣𑀼

𑁧𑁧𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀅𑀘𑁆𑀙𑀺𑀦𑁆𑀤𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀳𑀦𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀸 𑀭𑀸𑀚𑀪𑀝𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀘𑁆𑀘𑁂 𑀘𑁄𑀭𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 ¶ 𑀘𑁄𑀭𑀸 𑀧𑀮𑀸𑀬𑀺𑀁𑀲𑀼. 𑀬𑁂 𑀢𑁂 𑀧𑀮𑀸𑀬𑀺𑀁𑀲𑀼 𑀢𑁂 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀁𑀲𑀼, 𑀬𑁂 𑀢𑁂 𑀕𑀳𑀺𑀢𑀸 𑀢𑁂 𑀯𑀥𑀸𑀬 𑀑𑀦𑀺𑀬𑁆𑀬𑀦𑁆𑀢𑀺 ¶ . 𑀅𑀤𑁆𑀤𑀲𑀁𑀲𑀼 𑀔𑁄 𑀢𑁂 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀘𑁄𑀭𑁂 𑀯𑀥𑀸𑀬 𑀑𑀦𑀺𑀬𑁆𑀬𑀫𑀸𑀦𑁂, 𑀤𑀺𑀲𑁆𑀯𑀸𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀸𑀥𑀼 𑀔𑁄 𑀫𑀬𑀁 𑀧𑀮𑀸𑀬𑀺𑀫𑁆𑀳𑀸, 𑀲𑀘𑀸 𑀘 [𑀲𑀘𑁂 𑀘, 𑀲𑀘𑀚𑁆𑀚 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀸)] 𑀫𑀬𑀁 𑀕𑀬𑁆𑀳𑁂𑀬𑁆𑀬𑀸𑀫 [𑀕𑀡𑁆𑀳𑁂𑀬𑁆𑀬𑀸𑀫 (𑀓.)], 𑀫𑀬𑀫𑁆𑀧𑀺 𑀏𑀯𑀫𑁂𑀯 𑀳𑀜𑁆𑀜𑁂𑀬𑁆𑀬𑀸𑀫𑀸’’𑀢𑀺 ¶ . 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀓𑀢𑁆𑀣𑀸’’𑀢𑀺? 𑀅𑀣 𑀔𑁄 𑀢𑁂 𑀧𑀩𑁆𑀩𑀚𑀺𑀢𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀭𑀳𑀦𑁆𑀢𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽. 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁫𑁩. 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀯𑀢𑁆𑀣𑀼

𑁧𑁧𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀘𑁆𑀘𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀘𑁆𑀙𑀺𑀦𑁆𑀤𑀺𑀁𑀲𑀼, 𑀏𑀓𑀘𑁆𑀘𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀽𑀲𑁂𑀲𑀼𑀁. 𑀲𑀸𑀯𑀢𑁆𑀣𑀺𑀬𑀸 𑀭𑀸𑀚𑀪𑀝𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀘𑁆𑀘𑁂 𑀘𑁄𑀭𑁂 𑀅𑀕𑁆𑀕𑀳𑁂𑀲𑀼𑀁, 𑀏𑀓𑀘𑁆𑀘𑁂 𑀘𑁄𑀭𑀸 𑀧𑀮𑀸𑀬𑀺𑀁𑀲𑀼. 𑀬𑁂 𑀢𑁂 𑀧𑀮𑀸𑀬𑀺𑀁𑀲𑀼, 𑀢𑁂 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀁𑀲𑀼. 𑀬𑁂 𑀢𑁂 𑀕𑀳𑀺𑀢𑀸, 𑀢𑁂 𑀯𑀥𑀸𑀬 𑀑𑀦𑀺𑀬𑁆𑀬𑀦𑁆𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀢𑁂 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀘𑁄𑀭𑁂 𑀯𑀥𑀸𑀬 𑀑𑀦𑀺𑀬𑁆𑀬𑀫𑀸𑀦𑁂, 𑀤𑀺𑀲𑁆𑀯𑀸𑀦 𑀏𑀯𑀫𑀸𑀳𑀁𑀲𑀼 ‘‘𑀲𑀸𑀥𑀼 𑀔𑁄 𑀫𑀬𑀁 𑀧𑀮𑀸𑀬𑀺𑀫𑁆𑀳𑀸, 𑀲𑀘𑀸 𑀘 𑀫𑀬𑀁 𑀕𑀬𑁆𑀳𑁂𑀬𑁆𑀬𑀸𑀫, 𑀫𑀬𑀫𑁆𑀧𑀺 𑀏𑀯𑀫𑁂𑀯 𑀳𑀜𑁆𑀜𑁂𑀬𑁆𑀬𑀸𑀫𑀸’’𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀓𑀢𑁆𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀧𑀩𑁆𑀩𑀚𑀺𑀢𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀪𑀺𑀓𑁆𑀔𑀯𑁂 ¶ , 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺. 𑀲𑀗𑁆𑀖𑀪𑁂𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺. 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁫𑁪. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀢𑁆𑀣𑀼

𑁧𑁧𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀲𑁄 𑀓𑀭𑁄𑀢𑀺𑀧𑀺 𑀓𑀸𑀭𑀸𑀧𑁂𑀢𑀺𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄𑀢𑀺.

𑁫𑁫. 𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀯𑀢𑁆𑀣𑀽𑀦𑀺

𑁧𑁧𑁭. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀚𑁆𑀛𑀸𑀬𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀚𑁆𑀛𑀸𑀬𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀣𑁂𑀬𑁆𑀬𑀲𑀁𑀯𑀸𑀲𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 …𑀧𑁂… 𑀢𑀺𑀭𑀘𑁆𑀙𑀸𑀦𑀕𑀢𑀼𑀧𑀚𑁆𑀛𑀸𑀬𑁂𑀦 ¶ ¶ 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀫𑀸𑀢𑀼𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀧𑀺𑀢𑀼𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀅𑀭𑀳𑀦𑁆𑀢𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀲𑀗𑁆𑀖𑀪𑁂𑀤𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀣𑁂𑀬𑁆𑀬𑀲𑀁𑀯𑀸𑀲𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 …𑀧𑁂… 𑀦, 𑀪𑀺𑀓𑁆𑀔𑀯𑁂, 𑀧𑀺𑀢𑀼𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀖𑀸𑀢𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 ¶ …𑀧𑁂… 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀪𑁂𑀤𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁫𑁬. 𑀅𑀧𑀢𑁆𑀢𑀓𑀸𑀤𑀺𑀯𑀢𑁆𑀣𑀼

𑁧𑁧𑁮. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀧𑀢𑁆𑀢𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀧𑀢𑁆𑀢𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀘𑀻𑀯𑀭𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 ¶ . 𑀦𑀕𑁆𑀕𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀘𑀻𑀯𑀭𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀧𑀢𑁆𑀢𑀘𑀻𑀯𑀭𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀦𑀕𑁆𑀕𑀸 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀧𑀢𑁆𑀢𑀘𑀻𑀯𑀭𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑁂 𑀧𑀢𑁆𑀢𑀁 𑀧𑀝𑀺𑀳𑀭𑀦𑁆𑀢𑀺. 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀬𑀸𑀘𑀺𑀢𑀓𑁂𑀦 𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑁂 𑀘𑀻𑀯𑀭𑀁 𑀧𑀝𑀺𑀳𑀭𑀦𑁆𑀢𑀺. 𑀦𑀕𑁆𑀕𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑀓𑁂𑀦 𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑁂 𑀧𑀢𑁆𑀢𑀘𑀻𑀯𑀭𑀁 ¶ 𑀧𑀝𑀺𑀳𑀭𑀦𑁆𑀢𑀺. 𑀦𑀕𑁆𑀕𑀸 𑀳𑀢𑁆𑀣𑁂𑀲𑀼 ¶ 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ¶ 𑁋 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀦𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁂𑀓𑀯𑀻𑀲𑀢𑀺𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁫𑁭. 𑀦𑀧𑀩𑁆𑀩𑀸𑀚𑁂𑀢𑀩𑁆𑀩𑀤𑁆𑀯𑀢𑁆𑀢𑀺𑀁𑀲𑀯𑀸𑀭𑁄

𑁧𑁧𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀳𑀢𑁆𑀣𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀧𑀸𑀤𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀡𑁆𑀡𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀦𑀸𑀲𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀴𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀨𑀡𑀳𑀢𑁆𑀣𑀓𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀔𑀼𑀚𑁆𑀚𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀯𑀸𑀫𑀦𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀕𑀮𑀕𑀡𑁆𑀟𑀺𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀮𑀓𑁆𑀔𑀡𑀸𑀳𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀲𑀸𑀳𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀮𑀺𑀔𑀺𑀢𑀓𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀲𑀻𑀧𑀤𑀺𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀧𑀸𑀧𑀭𑁄𑀕𑀺𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀧𑀭𑀺𑀲𑀤𑀽𑀲𑀓𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀸𑀡𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀓𑀼𑀡𑀺𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀔𑀜𑁆𑀚𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀧𑀓𑁆𑀔𑀳𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀚𑀭𑀸𑀤𑀼𑀩𑁆𑀩𑀮𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀦𑁆𑀥𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀫𑀽𑀕𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀩𑀥𑀺𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀦𑁆𑀥𑀫𑀽𑀕𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀦𑁆𑀥𑀩𑀥𑀺𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀫𑀽𑀕𑀩𑀥𑀺𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑀺…𑀧𑁂… 𑀅𑀦𑁆𑀥𑀫𑀽𑀕𑀩𑀥𑀺𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 ¶ 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀧𑀸𑀤𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀦𑀸𑀲𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀴𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀨𑀡𑀳𑀢𑁆𑀣𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀔𑀼𑀚𑁆𑀚𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀯𑀸𑀫𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀕𑀮𑀕𑀡𑁆𑀟𑀻 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀮𑀓𑁆𑀔𑀡𑀸𑀳𑀢𑁄 ¶ 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀓𑀲𑀸𑀳𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀮𑀺𑀔𑀺𑀢𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀲𑀻𑀧𑀤𑀻 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀧𑀸𑀧𑀭𑁄𑀕𑀻 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀤𑀽𑀲𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀓𑀸𑀡𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦 ¶ , 𑀪𑀺𑀓𑁆𑀔𑀯𑁂, 𑀓𑀼𑀡𑀻 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀔𑀜𑁆𑀚𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀧𑀓𑁆𑀔𑀳𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀚𑀭𑀸𑀤𑀼𑀩𑁆𑀩𑀮𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀫𑀽𑀕𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀩𑀥𑀺𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀫𑀽𑀕𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀩𑀥𑀺𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀫𑀽𑀕𑀩𑀥𑀺𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀥𑀫𑀽𑀕𑀩𑀥𑀺𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀦𑀧𑀩𑁆𑀩𑀸𑀚𑁂𑀢𑀩𑁆𑀩𑀤𑁆𑀯𑀢𑁆𑀢𑀺𑀁𑀲𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀤𑀸𑀬𑀚𑁆𑀚𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀦𑀯𑀫𑁄.

𑁫𑁮. 𑀅𑀮𑀚𑁆𑀚𑀻𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀺

𑁧𑁨𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑀁 ¶ 𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀺. 𑀢𑁂𑀧𑀺 𑀦𑀘𑀺𑀭𑀲𑁆𑀲𑁂𑀯 𑀅𑀮𑀚𑁆𑀚𑀺𑀦𑁄 𑀳𑁄𑀦𑁆𑀢𑀺 𑀧𑀸𑀧𑀓𑀸𑀪𑀺𑀓𑁆𑀔𑀽. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩𑀁. 𑀬𑁄 𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩’𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀁 𑀚𑀸𑀦𑁂𑀬𑁆𑀬𑀸𑀫 𑀮𑀚𑁆𑀚𑀺𑀁 𑀯𑀸 𑀅𑀮𑀚𑁆𑀚𑀺𑀁 𑀯𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀧𑀜𑁆𑀘𑀸𑀳𑀁 𑀆𑀕𑀫𑁂𑀢𑀼𑀁 𑀬𑀸𑀯 𑀪𑀺𑀓𑁆𑀔𑀼𑀲𑀪𑀸𑀕𑀢𑀁 𑀚𑀸𑀦𑀸𑀫𑀻𑀢𑀺.

𑁫𑁯. 𑀕𑀫𑀺𑀓𑀸𑀤𑀺𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀺

𑁧𑁨𑁧. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀅𑀦𑀺𑀲𑁆𑀲𑀺𑀢𑁂𑀦 ¶ 𑀯𑀢𑁆𑀣𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀦𑀺𑀲𑁆𑀲𑀬𑀓𑀭𑀡𑀻𑀬𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀅𑀜𑁆𑀜𑀢𑀭𑀁 𑀆𑀯𑀸𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 ¶ 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀦𑀺𑀲𑁆𑀲𑀬𑀓𑀭𑀡𑀻𑀬𑁄 𑀕𑀺𑀮𑀸𑀦𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀦𑁆𑀢𑀺.

𑀅𑀣 𑀔𑁄 𑀢𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀦𑀺𑀲𑁆𑀲𑀬𑀓𑀭𑀡𑀻𑀬𑁄, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀬𑀸𑀘𑀺𑀬𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀲𑁆𑀲 𑀘 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀨𑀸𑀲𑀼 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀦𑀺𑀲𑁆𑀲𑀬𑀓𑀭𑀡𑀻𑀬𑁄 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫𑀺, 𑀫𑀬𑁆𑀳𑀜𑁆𑀘 𑀇𑀫𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀨𑀸𑀲𑀼 𑀳𑁄𑀢𑀺, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀨𑀸𑀲𑀼𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 𑁋 𑀬𑀤𑀸 𑀧𑀢𑀺𑀭𑀽𑀧𑁄 𑀦𑀺𑀲𑁆𑀲𑀬𑀤𑀸𑀬𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻𑀢𑀺.

𑁬𑁦. 𑀕𑁄𑀢𑁆𑀢𑁂𑀦 𑀅𑀦𑀼𑀲𑁆𑀲𑀸𑀯𑀦𑀸𑀦𑀼𑀚𑀸𑀦𑀦𑀸

𑁧𑁨𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀆𑀕𑀘𑁆𑀙𑀢𑀼 𑀆𑀦𑀦𑁆𑀤𑁄 𑀇𑀫𑀁 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀢𑀽𑀢𑀺 ¶ [𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀢𑀻𑀢𑀺 (𑀲𑁆𑀬𑀸.)]. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀯𑀫𑀸𑀳 𑁋 ‘‘𑀦𑀸𑀳𑀁 𑀉𑀲𑁆𑀲𑀳𑀸𑀫𑀺 𑀣𑁂𑀭𑀲𑁆𑀲 𑀦𑀸𑀫𑀁 ¶ 𑀕𑀳𑁂𑀢𑀼𑀁, 𑀕𑀭𑀼 𑀫𑁂 𑀣𑁂𑀭𑁄’’𑀢𑀺 ¶ . 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑁄𑀢𑁆𑀢𑁂𑀦𑀧𑀺 𑀅𑀦𑀼𑀲𑁆𑀲𑀸𑀯𑁂𑀢𑀼𑀦𑁆𑀢𑀺.

𑁬𑁧. 𑀤𑁆𑀯𑁂𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀤𑀺𑀯𑀢𑁆𑀣𑀼

𑁧𑁨𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀤𑁆𑀯𑁂 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀳𑁄𑀦𑁆𑀢𑀺. 𑀢𑁂 𑀯𑀺𑀯𑀤𑀦𑁆𑀢𑀺 𑁋 𑀅𑀳𑀁 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀳𑀁 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀳𑁄𑀦𑁆𑀢𑀺. 𑀢𑁂 𑀯𑀺𑀯𑀤𑀦𑁆𑀢𑀺 𑁋 𑀅𑀳𑀁 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀳𑀁 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺. 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀲𑀩𑁆𑀩𑁂𑀯 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀭𑁄𑀫𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁, 𑀢𑀜𑁆𑀘 𑀔𑁄 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸𑀢𑀺.

𑁬𑁨. 𑀕𑀩𑁆𑀪𑀯𑀻𑀲𑀽𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀸

𑁧𑁨𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀕𑀩𑁆𑀪𑀯𑀻𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀕𑀩𑁆𑀪𑀯𑀻𑀲𑁄 𑀉𑀧𑀲𑀫𑁆𑀧𑀦𑁆𑀦𑁄. 𑀉𑀧𑀲𑀫𑁆𑀧𑀦𑁆𑀦𑁄 𑀦𑀼 𑀔𑁄𑀫𑁆𑀳𑀺, 𑀦𑀦𑀼 𑀔𑁄 𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁 ¶ , 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀩𑁆𑀪𑀯𑀻𑀲𑀁 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺.

𑁬𑁩. 𑀉𑀧𑀲𑀫𑁆𑀧𑀤𑀸𑀯𑀺𑀥𑀺

𑁧𑁨𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑀲𑀫𑁆𑀧𑀦𑁆𑀦𑀸 𑀤𑀺𑀲𑁆𑀲𑀦𑁆𑀢𑀺 𑀓𑀼𑀝𑁆𑀞𑀺𑀓𑀸𑀧𑀺 𑀕𑀡𑁆𑀟𑀺𑀓𑀸𑀧𑀺 𑀓𑀺𑀮𑀸𑀲𑀺𑀓𑀸𑀧𑀺 𑀲𑁄𑀲𑀺𑀓𑀸𑀧𑀺 𑀅𑀧𑀫𑀸𑀭𑀺𑀓𑀸𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀢𑁂𑀭𑀲 [𑀢𑀲𑁆𑀲 (𑀓.)] 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀲𑀦𑁆𑀢𑀺 𑀢𑁂 𑀏𑀯𑀭𑀽𑀧𑀸 𑀆𑀩𑀸𑀥𑀸 𑁋 𑀓𑀼𑀝𑁆𑀞𑀁, 𑀕𑀡𑁆𑀟𑁄, 𑀓𑀺𑀮𑀸𑀲𑁄, 𑀲𑁄𑀲𑁄, 𑀅𑀧𑀫𑀸𑀭𑁄? 𑀫𑀦𑀼𑀲𑁆𑀲𑁄𑀲𑀺 ¶ ? 𑀧𑀼𑀭𑀺𑀲𑁄𑀲𑀺? 𑀪𑀼𑀚𑀺𑀲𑁆𑀲𑁄𑀲𑀺? 𑀅𑀡𑀡𑁄𑀲𑀺? 𑀦𑀲𑀺 𑀭𑀸𑀚𑀪𑀝𑁄? 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺? 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀲𑀺? 𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁? 𑀓𑀺𑀁𑀦𑀸𑀫𑁄𑀲𑀺? 𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺?

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀦𑀼𑀲𑀺𑀝𑁆𑀞𑁂 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑀦𑁆𑀢𑀺. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀯𑀺𑀢𑁆𑀣𑀸𑀬𑀦𑁆𑀢𑀺, 𑀫𑀗𑁆𑀓𑀽 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀧𑀘𑁆𑀙𑀸 𑀅𑀦𑁆𑀢𑀭𑀸𑀬𑀺𑀓𑁂 ¶ 𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑀼𑀦𑁆𑀢𑀺.

𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀅𑀦𑀼𑀲𑀸𑀲𑀦𑁆𑀢𑀺. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀢𑀣𑁂𑀯 𑀯𑀺𑀢𑁆𑀣𑀸𑀬𑀦𑁆𑀢𑀺, 𑀫𑀗𑁆𑀓𑀽 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀫𑀦𑁆𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑁋

𑁧𑁨𑁬. 𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑁆𑀯𑀸 ¶ 𑀧𑀢𑁆𑀢𑀘𑀻𑀯𑀭𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀅𑀬𑀁 𑀢𑁂 𑀧𑀢𑁆𑀢𑁄, 𑀅𑀬𑀁 𑀲𑀗𑁆𑀖𑀸𑀝𑀺, 𑀅𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀅𑀬𑀁 𑀅𑀦𑁆𑀢𑀭𑀯𑀸𑀲𑀓𑁄. 𑀕𑀘𑁆𑀙, 𑀅𑀫𑀼𑀫𑁆𑀳𑀺 𑀑𑀓𑀸𑀲𑁂 𑀢𑀺𑀝𑁆𑀞𑀸𑀳𑀻𑀢𑀺.

𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀦𑀼𑀲𑀸𑀲𑀦𑁆𑀢𑀺. 𑀤𑀼𑀭𑀦𑀼𑀲𑀺𑀝𑁆𑀞𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀯𑀺𑀢𑁆𑀣𑀸𑀬𑀦𑁆𑀢𑀺, 𑀫𑀗𑁆𑀓𑀽 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀬𑁄 𑀅𑀦𑀼𑀲𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀅𑀦𑀼𑀲𑀸𑀲𑀺𑀢𑀼𑀦𑁆𑀢𑀺.

𑀅𑀲𑀫𑁆𑀫𑀢𑀸 𑀅𑀦𑀼𑀲𑀸𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀢𑁂𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀬𑁄 𑀅𑀦𑀼𑀲𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀢𑁂𑀦 𑀅𑀦𑀼𑀲𑀸𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 [𑀲𑀫𑁆𑀫𑀦𑀺𑀢𑀩𑁆𑀩𑁄 (𑀓.)] 𑁋 𑀅𑀢𑁆𑀢𑀦𑀸 𑀯𑀸 [𑀅𑀢𑁆𑀢𑀦𑀸𑀯 (𑀲𑁆𑀬𑀸.)] 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁, 𑀧𑀭𑁂𑀦 𑀯𑀸 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀓𑀣𑀜𑁆𑀘 ¶ 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁.

𑀓𑀣𑀜𑁆𑀘 𑀧𑀦 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬𑀸’’𑀢𑀺 ¶ . 𑀏𑀯𑀁 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀢𑁂𑀦 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀼𑀡𑀲𑀺, 𑀇𑀢𑁆𑀣𑀦𑁆𑀦𑀸𑀫, 𑀅𑀬𑀁 𑀢𑁂 𑀲𑀘𑁆𑀘𑀓𑀸𑀮𑁄 𑀪𑀽𑀢𑀓𑀸𑀮𑁄. 𑀬𑀁 𑀚𑀸𑀢𑀁 𑀢𑀁 𑀲𑀗𑁆𑀖𑀫𑀚𑁆𑀛𑁂 𑀧𑀼𑀘𑁆𑀙𑀦𑁆𑀢𑁂 𑀲𑀦𑁆𑀢𑀁 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀲𑀦𑁆𑀢𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀫𑀸 𑀔𑁄 𑀯𑀺𑀢𑁆𑀣𑀸𑀬𑀺, 𑀫𑀸 𑀔𑁄 𑀫𑀗𑁆𑀓𑀼 𑀅𑀳𑁄𑀲𑀺. 𑀏𑀯𑀁 𑀢𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑁋 ‘‘𑀲𑀦𑁆𑀢𑀺 𑀢𑁂 𑀏𑀯𑀭𑀽𑀧𑀸 𑀆𑀩𑀸𑀥𑀸 𑁋 𑀓𑀼𑀝𑁆𑀞𑀁, 𑀕𑀡𑁆𑀟𑁄, 𑀓𑀺𑀮𑀸𑀲𑁄, 𑀲𑁄𑀲𑁄, 𑀅𑀧𑀫𑀸𑀭𑁄? 𑀫𑀦𑀼𑀲𑁆𑀲𑁄𑀲𑀺? 𑀧𑀼𑀭𑀺𑀲𑁄𑀲𑀺? 𑀪𑀼𑀚𑀺𑀲𑁆𑀲𑁄𑀲𑀺? 𑀅𑀡𑀡𑁄𑀲𑀺? 𑀦𑀲𑀺 𑀭𑀸𑀚𑀪𑀝𑁄? 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺? 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀲𑀺? 𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁? 𑀓𑀺𑀁𑀦𑀸𑀫𑁄𑀲𑀺? 𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺?

𑀏𑀓𑀢𑁄 𑀆𑀕𑀘𑁆𑀙𑀦𑁆𑀢𑀺. 𑀦, 𑀪𑀺𑀓𑁆𑀔𑀯𑁂, 𑀏𑀓𑀢𑁄 𑀆𑀕𑀦𑁆𑀢𑀩𑁆𑀩𑀁. 𑀅𑀦𑀼𑀲𑀸𑀲𑀓𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 ¶ . 𑀅𑀦𑀼𑀲𑀺𑀝𑁆𑀞𑁄 𑀲𑁄 𑀫𑀬𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀆𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀢𑀩𑁆𑀩𑁄.

𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀧𑁂𑀢𑀩𑁆𑀩𑁄 𑁋 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀺. 𑀉𑀮𑁆𑀮𑀼𑀫𑁆𑀧𑀢𑀼 𑀫𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀤𑀼𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀺. 𑀉𑀮𑁆𑀮𑀼𑀫𑁆𑀧𑀢𑀼 𑀫𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 ¶ 𑀉𑀧𑀸𑀤𑀸𑀬. 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀺. 𑀉𑀮𑁆𑀮𑀼𑀫𑁆𑀧𑀢𑀼 𑀫𑀁 ¶ , 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 ¶ 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺? 𑀲𑀼𑀡𑀲𑀺, 𑀇𑀢𑁆𑀣𑀦𑁆𑀦𑀸𑀫, 𑀅𑀬𑀁 𑀢𑁂 𑀲𑀘𑁆𑀘𑀓𑀸𑀮𑁄 𑀪𑀽𑀢𑀓𑀸𑀮𑁄. 𑀬𑀁 𑀚𑀸𑀢𑀁 𑀢𑀁 𑀧𑀼𑀘𑁆𑀙𑀸𑀫𑀺. 𑀲𑀦𑁆𑀢𑀁 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀲𑀦𑁆𑀢𑀁 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀦𑁆𑀢𑀺 𑀢𑁂 𑀏𑀯𑀭𑀽𑀧𑀸 𑀆𑀩𑀸𑀥𑀸 𑁋 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑁂𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄, 𑀫𑀦𑀼𑀲𑁆𑀲𑁄𑀲𑀺, 𑀧𑀼𑀭𑀺𑀲𑁄𑀲𑀺, 𑀪𑀼𑀚𑀺𑀲𑁆𑀲𑁄𑀲𑀺, 𑀅𑀡𑀡𑁄𑀲𑀺, 𑀦𑀲𑀺 𑀭𑀸𑀚𑀪𑀝𑁄, 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺, 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀲𑀺, 𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁, 𑀓𑀺𑀁𑀦𑀸𑀫𑁄𑀲𑀺, 𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄𑀢𑀺? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦 ¶ . 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 ¶ 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀉𑀧𑀲𑀫𑁆𑀧𑀦𑁆𑀦𑁄 ¶ 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁.

𑁬𑁪. 𑀘𑀢𑁆𑀢𑀸𑀭𑁄 𑀦𑀺𑀲𑁆𑀲𑀬𑀸

𑁧𑁨𑁮. 𑀢𑀸𑀯𑀤𑁂𑀯 𑀙𑀸𑀬𑀸 𑀫𑁂𑀢𑀩𑁆𑀩𑀸, 𑀉𑀢𑀼𑀧𑁆𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀤𑀺𑀯𑀲𑀪𑀸𑀕𑁄 ¶ 𑀆𑀘𑀺𑀓𑁆𑀔𑀺𑀢𑀩𑁆𑀩𑁄, 𑀲𑀗𑁆𑀕𑀻𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸 ¶ , 𑀘𑀢𑁆𑀢𑀸𑀭𑁄 𑀦𑀺𑀲𑁆𑀲𑀬𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸 [𑀆𑀘𑀺𑀓𑁆𑀔𑀺𑀢𑀩𑁆𑀩𑀸, 𑀘𑀢𑁆𑀢𑀸𑀭𑀺 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀺. (𑀓.)] 𑁋

‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸. 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀲𑀗𑁆𑀖𑀪𑀢𑁆𑀢𑀁, 𑀉𑀤𑁆𑀤𑁂𑀲𑀪𑀢𑁆𑀢𑀁, 𑀦𑀺𑀫𑀦𑁆𑀢𑀦𑀁, 𑀲𑀮𑀸𑀓𑀪𑀢𑁆𑀢𑀁, 𑀧𑀓𑁆𑀔𑀺𑀓𑀁, 𑀉𑀧𑁄𑀲𑀣𑀺𑀓𑀁, 𑀧𑀸𑀝𑀺𑀧𑀤𑀺𑀓𑀁.

‘‘𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸. 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀁.

‘‘𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸. 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀯𑀺𑀳𑀸𑀭𑁄, 𑀅𑀟𑁆𑀠𑀬𑁄𑀕𑁄, 𑀧𑀸𑀲𑀸𑀤𑁄, 𑀳𑀫𑁆𑀫𑀺𑀬𑀁, 𑀕𑀼𑀳𑀸.

‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸. 𑀢𑀢𑁆𑀣 𑀢𑁂 𑀬𑀸𑀯𑀚𑀻𑀯𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀢𑀺𑀭𑁂𑀓𑀮𑀸𑀪𑁄 𑁋 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢’’𑀦𑁆𑀢𑀺.

𑀘𑀢𑁆𑀢𑀸𑀭𑁄 𑀦𑀺𑀲𑁆𑀲𑀬𑀸 𑀦𑀺𑀝𑁆𑀞𑀺𑀢𑀸.

𑁬𑁫. 𑀘𑀢𑁆𑀢𑀸𑀭𑀺 𑀅𑀓𑀭𑀡𑀻𑀬𑀸𑀦𑀺

𑁧𑁨𑁯. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀏𑀓𑀓𑀁 𑀑𑀳𑀸𑀬 𑀧𑀓𑁆𑀓𑀫𑀺𑀁𑀲𑀼. 𑀲𑁄 𑀧𑀘𑁆𑀙𑀸 𑀏𑀓𑀓𑁄𑀯 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀲𑀫𑀸𑀕𑀜𑁆𑀙𑀺. 𑀲𑀸 𑀏𑀯𑀫𑀸𑀳 𑁋 ‘‘𑀓𑀺𑀁𑀤𑀸𑀦𑀺 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺? ‘‘𑀆𑀫, 𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺. ‘‘𑀤𑀼𑀮𑁆𑀮𑀪𑁄 𑀔𑁄 𑀧𑀩𑁆𑀩𑀚𑀺𑀢𑀸𑀦𑀁 𑀫𑁂𑀣𑀼𑀦𑁄 𑀥𑀫𑁆𑀫𑁄; 𑀏𑀳𑀺, 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀸’’𑀢𑀺. 𑀲𑁄 𑀢𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 ¶ 𑀧𑀝𑀺𑀲𑁂𑀯𑀺𑀢𑁆𑀯𑀸 𑀘𑀺𑀭𑁂𑀦 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻’’𑀢𑀺? 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑀼𑀢𑀺𑀬𑀁 𑀤𑀸𑀢𑀼𑀁, 𑀘𑀢𑁆𑀢𑀸𑀭𑀺 𑀘 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑀺𑀢𑀼𑀁 𑁋

‘‘𑀉𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀦 𑀧𑀝𑀺𑀲𑁂𑀯𑀺𑀢𑀩𑁆𑀩𑁄, 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺. 𑀬𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀲𑀻𑀲𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦 𑀚𑀻𑀯𑀺𑀢𑀼𑀁, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑀁 𑀢𑁂 𑀬𑀸𑀯𑀚𑀻𑀯𑀁 𑀅𑀓𑀭𑀡𑀻𑀬𑀁.

‘‘𑀉𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀦 𑀆𑀤𑀸𑀢𑀩𑁆𑀩𑀁, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀮𑀸𑀓𑀁 𑀉𑀧𑀸𑀤𑀸𑀬. 𑀬𑁄 𑀪𑀺𑀓𑁆𑀔𑀼 𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄 𑀅𑀪𑀩𑁆𑀩𑁄 𑀳𑀭𑀺𑀢𑀢𑁆𑀣𑀸𑀬, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑀁 𑀢𑁂 𑀬𑀸𑀯𑀚𑀻𑀯𑀁 ¶ 𑀅𑀓𑀭𑀡𑀻𑀬𑀁.

‘‘𑀉𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀜𑁆𑀘𑀺𑀘𑁆𑀘 𑀧𑀸𑀡𑁄 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀢𑀩𑁆𑀩𑁄, 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬. 𑀬𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀅𑀦𑁆𑀢𑀫𑀲𑁄 𑀕𑀩𑁆𑀪𑀧𑀸𑀢𑀦𑀁 𑀉𑀧𑀸𑀤𑀸𑀬, 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀣𑀼𑀲𑀺𑀮𑀸 𑀤𑁆𑀯𑁂𑀥𑀸 𑀪𑀺𑀦𑁆𑀦𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀳𑁄𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 ¶ . 𑀢𑀁 𑀢𑁂 𑀬𑀸𑀯𑀚𑀻𑀯𑀁 𑀅𑀓𑀭𑀡𑀻𑀬𑀁.

‘‘𑀉𑀧𑀲𑀫𑁆𑀧𑀦𑁆𑀦𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦 𑀉𑀮𑁆𑀮𑀧𑀺𑀢𑀩𑁆𑀩𑁄, 𑀅𑀦𑁆𑀢𑀫𑀲𑁄 ‘𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻’𑀢𑀺. 𑀬𑁄 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺 𑀛𑀸𑀦𑀁 𑀯𑀸 𑀯𑀺𑀫𑁄𑀓𑁆𑀔𑀁 𑀯𑀸 𑀲𑀫𑀸𑀥𑀺𑀁 𑀯𑀸 𑀲𑀫𑀸𑀧𑀢𑁆𑀢𑀺𑀁 𑀯𑀸 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸, 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑀸𑀮𑁄 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀧𑀼𑀦 𑀯𑀺𑀭𑀼𑀴𑁆𑀳𑀺𑀬𑀸, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑀁 𑀢𑁂 𑀬𑀸𑀯𑀚𑀻𑀯𑀁 𑀅𑀓𑀭𑀡𑀻𑀬’’𑀦𑁆𑀢𑀺.

𑀘𑀢𑁆𑀢𑀸𑀭𑀺 𑀅𑀓𑀭𑀡𑀻𑀬𑀸𑀦𑀺 𑀦𑀺𑀝𑁆𑀞𑀺𑀢𑀸𑀦𑀺.

𑁬𑁬. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀯𑀢𑁆𑀣𑀽𑀦𑀺

𑁧𑁩𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀺𑀩𑁆𑀪𑀫𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀲𑁆𑀲𑀺𑀲𑁆𑀲𑀲𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀩𑁆𑀩𑀸𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀲𑁆𑀲𑀺𑀲𑁆𑀲𑀲𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺, 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀲𑁆𑀲𑀺𑀲𑁆𑀲𑀲𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 ¶ , 𑀑𑀲𑀸𑀭𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺, 𑀦 𑀑𑀲𑀸𑀭𑁂𑀢𑀩𑁆𑀩𑁄. 𑀑𑀲𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀲𑁆𑀲𑀲𑀺 [𑀧𑀲𑁆𑀲𑀸𑀳𑀺 (𑀲𑀻.)] 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑁂 𑀧𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀲𑁆𑀲𑀢𑀺, 𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀼𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀝𑀺𑀓𑀭𑀺𑀲𑁆𑀲𑀲𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ¶ . 𑀲𑀘𑀸𑀳𑀁 𑀦 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀩𑁆𑀩𑀸𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀓𑀭𑀺𑀲𑁆𑀲𑀲𑀺 ¶ 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀓𑀭𑀺𑀲𑁆𑀲𑀲𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀑𑀲𑀸𑀭𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺, 𑀦 𑀑𑀲𑀸𑀭𑁂𑀢𑀩𑁆𑀩𑁄. 𑀑𑀲𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑀘𑁂 𑀧𑀝𑀺𑀓𑀭𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀝𑀺𑀓𑀭𑁄𑀢𑀺 𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀼𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀲𑀺 𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀩𑁆𑀩𑀸𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀲𑀺 ¶ 𑀢𑀁 ¶ 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀲𑀺 𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺? 𑀲𑀘𑀸𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀑𑀲𑀸𑀭𑁂𑀢𑀩𑁆𑀩𑁄. 𑀲𑀘𑀸𑀳𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻𑀢𑀺, 𑀦 𑀑𑀲𑀸𑀭𑁂𑀢𑀩𑁆𑀩𑁄. 𑀑𑀲𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀳𑀺 𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀼𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂𑀢𑀺.

𑀫𑀳𑀸𑀔𑀦𑁆𑀥𑀓𑁄 𑀧𑀞𑀫𑁄.

𑁬𑁭. 𑀢𑀲𑁆𑀲𑀼𑀤𑁆𑀤𑀸𑀦𑀁

𑁧𑁩𑁧.

𑀯𑀺𑀦𑀬𑀫𑁆𑀳𑀺 𑀫𑀳𑀢𑁆𑀣𑁂𑀲𑀼, 𑀧𑁂𑀲𑀮𑀸𑀦𑀁 𑀲𑀼𑀔𑀸𑀯𑀳𑁂;

𑀦𑀺𑀕𑁆𑀕𑀳𑀸𑀦𑀜𑁆𑀘 𑀧𑀸𑀧𑀺𑀘𑁆𑀙𑁂, 𑀮𑀚𑁆𑀚𑀻𑀦𑀁 𑀧𑀕𑁆𑀕𑀳𑁂𑀲𑀼 𑀘.

𑀲𑀸𑀲𑀦𑀸𑀥𑀸𑀭𑀡𑁂 𑀘𑁂𑀯, 𑀲𑀩𑁆𑀩𑀜𑁆𑀜𑀼𑀚𑀺𑀦𑀕𑁄𑀘𑀭𑁂;

𑀅𑀦𑀜𑁆𑀜𑀯𑀺𑀲𑀬𑁂 𑀔𑁂𑀫𑁂, 𑀲𑀼𑀧𑀜𑁆𑀜𑀢𑁆𑀢𑁂 𑀅𑀲𑀁𑀲𑀬𑁂.

𑀔𑀦𑁆𑀥𑀓𑁂 𑀯𑀺𑀦𑀬𑁂 𑀘𑁂𑀯, 𑀧𑀭𑀺𑀯𑀸𑀭𑁂 𑀘 𑀫𑀸𑀢𑀺𑀓𑁂;

𑀬𑀣𑀸𑀢𑁆𑀣𑀓𑀸𑀭𑀻 𑀓𑀼𑀲𑀮𑁄, 𑀧𑀝𑀺𑀧𑀚𑁆𑀚𑀢𑀺 𑀬𑁄𑀦𑀺𑀲𑁄.

𑀬𑁄 ¶ 𑀕𑀯𑀁 𑀦 𑀯𑀺𑀚𑀸𑀦𑀸𑀢𑀺, 𑀦 𑀲𑁄 𑀭𑀓𑁆𑀔𑀢𑀺 𑀕𑁄𑀕𑀡𑀁;

𑀏𑀯𑀁 ¶ 𑀲𑀻𑀮𑀁 𑀅𑀚𑀸𑀦𑀦𑁆𑀢𑁄, 𑀓𑀺𑀁 𑀲𑁄 𑀭𑀓𑁆𑀔𑁂𑀬𑁆𑀬 𑀲𑀁𑀯𑀭𑀁.

𑀧𑀫𑀼𑀝𑁆𑀞𑀫𑁆𑀳𑀺 𑀘 𑀲𑀼𑀢𑁆𑀢𑀦𑁆𑀢𑁂, 𑀅𑀪𑀺𑀥𑀫𑁆𑀫𑁂 𑀘 𑀢𑀸𑀯𑀤𑁂;

𑀯𑀺𑀦𑀬𑁂 ¶ 𑀅𑀯𑀺𑀦𑀝𑁆𑀞𑀫𑁆𑀳𑀺, 𑀧𑀼𑀦 𑀢𑀺𑀝𑁆𑀞𑀢𑀺 𑀲𑀸𑀲𑀦𑀁.

𑀢𑀲𑁆𑀫𑀸 𑀲𑀗𑁆𑀕𑀸𑀳𑀡𑀸𑀳𑁂𑀢𑀼𑀁 [𑀲𑀗𑁆𑀕𑀸𑀳𑀦𑀸𑀳𑁂𑀢𑀼𑀁 (𑀓.)], 𑀉𑀤𑁆𑀤𑀸𑀦𑀁 𑀅𑀦𑀼𑀧𑀼𑀩𑁆𑀩𑀲𑁄;

𑀧𑀯𑀓𑁆𑀔𑀸𑀫𑀺 𑀬𑀣𑀸𑀜𑀸𑀬𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑀯𑀢𑁆𑀣𑀼 ¶ 𑀦𑀺𑀤𑀸𑀦𑀁 𑀆𑀧𑀢𑁆𑀢𑀺, 𑀦𑀬𑀸 𑀧𑁂𑀬𑁆𑀬𑀸𑀮𑀫𑁂𑀯 𑀘;

𑀤𑀼𑀓𑁆𑀓𑀭𑀁 𑀢𑀁 𑀅𑀲𑁂𑀲𑁂𑀢𑀼𑀁, 𑀦𑀬𑀢𑁄 𑀢𑀁 𑀯𑀺𑀚𑀸𑀦𑀣𑀸𑀢𑀺.

𑀩𑁄𑀥𑀺 𑀭𑀸𑀚𑀸𑀬𑀢𑀦𑀜𑁆𑀘, 𑀅𑀚𑀧𑀸𑀮𑁄 𑀲𑀳𑀫𑁆𑀧𑀢𑀺;

𑀩𑁆𑀭𑀳𑁆𑀫𑀸 𑀆𑀴𑀸𑀭𑁄 𑀉𑀤𑀓𑁄, 𑀪𑀺𑀓𑁆𑀔𑀼 𑀘 𑀉𑀧𑀓𑁄 𑀇𑀲𑀺.

𑀓𑁄𑀡𑁆𑀟𑀜𑁆𑀜𑁄 𑀯𑀧𑁆𑀧𑁄 𑀪𑀤𑁆𑀤𑀺𑀬𑁄, 𑀫𑀳𑀸𑀦𑀸𑀫𑁄 𑀘 𑀅𑀲𑁆𑀲𑀚𑀺;

𑀬𑀲𑁄 𑀘𑀢𑁆𑀢𑀸𑀭𑁄 𑀧𑀜𑁆𑀜𑀸𑀲, 𑀲𑀩𑁆𑀩𑁂 𑀧𑁂𑀲𑁂𑀲𑀺 𑀲𑁄 𑀤𑀺𑀲𑀸.

𑀯𑀢𑁆𑀣𑀼 𑀫𑀸𑀭𑁂𑀳𑀺 𑀢𑀺𑀁𑀲𑀸 𑀘, 𑀉𑀭𑀼𑀯𑁂𑀮𑀁 𑀢𑀬𑁄 𑀚𑀝𑀻;

𑀅𑀕𑁆𑀬𑀸𑀕𑀸𑀭𑀁 𑀫𑀳𑀸𑀭𑀸𑀚𑀸, 𑀲𑀓𑁆𑀓𑁄 𑀩𑁆𑀭𑀳𑁆𑀫𑀸 𑀘 𑀓𑁂𑀯𑀮𑀸.

𑀧𑀁𑀲𑀼𑀓𑀽𑀮𑀁 𑀧𑁄𑀓𑁆𑀔𑀭𑀡𑀻, 𑀲𑀺𑀮𑀸 𑀘 𑀓𑀓𑀼𑀥𑁄 𑀲𑀺𑀮𑀸;

𑀚𑀫𑁆𑀩𑀼 ¶ 𑀅𑀫𑁆𑀩𑁄 𑀘 𑀆𑀫𑀮𑁄, 𑀧𑀸𑀭𑀺𑀧𑀼𑀧𑁆𑀨𑀜𑁆𑀘 𑀆𑀳𑀭𑀺.

𑀨𑀸𑀮𑀺𑀬𑀦𑁆𑀢𑀼 𑀉𑀚𑁆𑀚𑀮𑀦𑁆𑀢𑀼, 𑀯𑀺𑀚𑁆𑀛𑀸𑀬𑀦𑁆𑀢𑀼 𑀘 𑀓𑀲𑁆𑀲𑀧;

𑀦𑀺𑀫𑀼𑀚𑁆𑀚𑀦𑁆𑀢𑀺 𑀫𑀼𑀔𑀻 𑀫𑁂𑀖𑁄, 𑀕𑀬𑀸 𑀮𑀝𑁆𑀞𑀺 𑀘 𑀫𑀸𑀕𑀥𑁄.

𑀉𑀧𑀢𑀺𑀲𑁆𑀲𑁄 𑀓𑁄𑀮𑀺𑀢𑁄 𑀘, 𑀅𑀪𑀺𑀜𑁆𑀜𑀸𑀢𑀸 𑀘 𑀧𑀩𑁆𑀩𑀚𑀼𑀁;

𑀤𑀼𑀦𑁆𑀦𑀺𑀯𑀢𑁆𑀣𑀸 𑀧𑀡𑀸𑀫𑀦𑀸, 𑀓𑀺𑀲𑁄 𑀮𑀽𑀔𑁄 𑀘 𑀩𑁆𑀭𑀸𑀳𑁆𑀫𑀡𑁄.

𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀉𑀤𑀭𑀁 𑀫𑀸𑀡𑀯𑁄 𑀕𑀡𑁄;

𑀯𑀲𑁆𑀲𑀁 𑀩𑀸𑀮𑁂𑀳𑀺 𑀧𑀓𑁆𑀓𑀦𑁆𑀢𑁄, 𑀤𑀲 𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀬𑁄.

𑀦 𑀯𑀢𑁆𑀢𑀦𑁆𑀢𑀺 𑀧𑀡𑀸𑀫𑁂𑀢𑀼𑀁, 𑀩𑀸𑀮𑀸 𑀧𑀲𑁆𑀲𑀤𑁆𑀥𑀺 𑀧𑀜𑁆𑀘 𑀙;

𑀬𑁄 𑀲𑁄 𑀅𑀜𑁆𑀜𑁄 𑀘 𑀦𑀕𑁆𑀕𑁄 𑀘, 𑀅𑀘𑁆𑀙𑀺𑀦𑁆𑀦𑀚𑀝𑀺𑀮𑀲𑀸𑀓𑀺𑀬𑁄.

𑀫𑀕𑀥𑁂𑀲𑀼 𑀧𑀜𑁆𑀘𑀸𑀩𑀸𑀥𑀸, 𑀏𑀓𑁄 𑀭𑀸𑀚𑀸 [𑀪𑀝𑁄 𑀘𑁄𑀭𑁄 (𑀲𑁆𑀬𑀸.)] 𑀘 𑀅𑀗𑁆𑀕𑀼𑀮𑀺;

𑀫𑀸𑀕𑀥𑁄 𑀘 𑀅𑀦𑀼𑀜𑁆𑀜𑀸𑀲𑀺, 𑀓𑀸𑀭𑀸 𑀮𑀺𑀔𑀺 𑀓𑀲𑀸𑀳𑀢𑁄.

𑀮𑀓𑁆𑀔𑀡𑀸 ¶ ¶ 𑀇𑀡𑀸 𑀤𑀸𑀲𑁄 𑀘, 𑀪𑀡𑁆𑀟𑀼𑀓𑁄 𑀉𑀧𑀸𑀮𑀺 𑀅𑀳𑀺;

𑀲𑀤𑁆𑀥𑀁 𑀓𑀼𑀮𑀁 𑀓𑀡𑁆𑀝𑀓𑁄 𑀘, 𑀆𑀳𑀼𑀦𑁆𑀤𑀭𑀺𑀓𑀫𑁂𑀯 𑀘.

𑀯𑀢𑁆𑀣𑀼𑀫𑁆𑀳𑀺 𑀤𑀸𑀭𑀓𑁄 𑀲𑀺𑀓𑁆𑀔𑀸, 𑀯𑀺𑀳𑀭𑀦𑁆𑀢𑀺 𑀘 𑀓𑀺𑀁 𑀦𑀼 𑀔𑁄;

𑀲𑀩𑁆𑀩𑀁 𑀫𑀼𑀔𑀁 𑀉𑀧𑀚𑁆𑀛𑀸𑀬𑁂, 𑀅𑀧𑀮𑀸𑀴𑀦 𑀓𑀡𑁆𑀝𑀓𑁄.

𑀧𑀡𑁆𑀟𑀓𑁄 𑀣𑁂𑀬𑁆𑀬𑀧𑀓𑁆𑀓𑀦𑁆𑀢𑁄, 𑀅𑀳𑀺 𑀘 𑀫𑀸𑀢𑀭𑀻 𑀧𑀺𑀢𑀸;

𑀅𑀭𑀳𑀦𑁆𑀢𑀪𑀺𑀓𑁆𑀔𑀼𑀦𑀻𑀪𑁂𑀤𑀸, 𑀭𑀼𑀳𑀺𑀭𑁂𑀦 𑀘 𑀩𑁆𑀬𑀜𑁆𑀚𑀦𑀁.

𑀅𑀦𑀼𑀧𑀚𑁆𑀛𑀸𑀬𑀲𑀗𑁆𑀖𑁂𑀦, 𑀕𑀡𑀧𑀡𑁆𑀟𑀓𑀧𑀢𑁆𑀢𑀓𑁄;

𑀅𑀘𑀻𑀯𑀭𑀁 ¶ 𑀢𑀤𑀼𑀪𑀬𑀁, 𑀬𑀸𑀘𑀺𑀢𑁂𑀦𑀧𑀺 𑀬𑁂 𑀢𑀬𑁄.

𑀳𑀢𑁆𑀣𑀸 𑀧𑀸𑀤𑀸 𑀳𑀢𑁆𑀣𑀧𑀸𑀤𑀸, 𑀓𑀡𑁆𑀡𑀸 𑀦𑀸𑀲𑀸 𑀢𑀤𑀽𑀪𑀬𑀁;

𑀅𑀗𑁆𑀕𑀼𑀮𑀺𑀅𑀴𑀓𑀡𑁆𑀟𑀭𑀁, 𑀨𑀡𑀁 𑀔𑀼𑀚𑁆𑀚𑀜𑁆𑀘 𑀯𑀸𑀫𑀦𑀁.

𑀕𑀮𑀕𑀡𑁆𑀟𑀻 𑀮𑀓𑁆𑀔𑀡𑀸 𑀘𑁂𑀯, 𑀓𑀲𑀸 𑀮𑀺𑀔𑀺𑀢𑀲𑀻𑀧𑀤𑀻;

𑀧𑀸𑀧𑀧𑀭𑀺𑀲𑀤𑀽𑀲𑀻 𑀘, 𑀓𑀸𑀡𑀁 𑀓𑀼𑀡𑀺 𑀢𑀣𑁂𑀯 𑀘.

𑀔𑀜𑁆𑀚𑀁 ¶ 𑀧𑀓𑁆𑀔𑀳𑀢𑀜𑁆𑀘𑁂𑀯, 𑀲𑀘𑁆𑀙𑀺𑀦𑁆𑀦𑀇𑀭𑀺𑀬𑀸𑀧𑀣𑀁;

𑀚𑀭𑀸𑀦𑁆𑀥𑀫𑀽𑀕𑀩𑀥𑀺𑀭𑀁, 𑀅𑀦𑁆𑀥𑀫𑀽𑀕𑀜𑁆𑀘 𑀬𑀁 𑀢𑀳𑀺𑀁.

𑀅𑀦𑁆𑀥𑀩𑀥𑀺𑀭𑀁 𑀬𑀁 𑀯𑀼𑀢𑁆𑀢𑀁, 𑀫𑀽𑀕𑀩𑀥𑀺𑀭𑀫𑁂𑀯 𑀘;

𑀅𑀦𑁆𑀥𑀫𑀽𑀕𑀩𑀥𑀺𑀭𑀜𑁆𑀘, 𑀅𑀮𑀚𑁆𑀚𑀻𑀦𑀜𑁆𑀘 𑀦𑀺𑀲𑁆𑀲𑀬𑀁.

𑀯𑀢𑁆𑀣𑀩𑁆𑀩𑀜𑁆𑀘 𑀢𑀣𑀸𑀤𑁆𑀥𑀸𑀦𑀁, 𑀬𑀸𑀘𑀫𑀸𑀦𑁂𑀦 𑀮𑀓𑁆𑀔𑀡𑀸 [𑀧𑁂𑀓𑁆𑀔𑀦𑀸 (𑀲𑀩𑁆𑀩𑀢𑁆𑀣)];

𑀆𑀕𑀘𑁆𑀙𑀢𑀼 𑀯𑀺𑀯𑀤𑀦𑁆𑀢𑀺, 𑀏𑀓𑀼𑀧𑀚𑁆𑀛𑀸𑀬𑁂𑀦 𑀓𑀲𑁆𑀲𑀧𑁄.

𑀤𑀺𑀲𑁆𑀲𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸, 𑀆𑀩𑀸𑀥𑁂𑀳𑀺 𑀘 𑀧𑀻𑀴𑀺𑀢𑀸;

𑀅𑀦𑀦𑀼𑀲𑀺𑀝𑁆𑀞𑀸 𑀯𑀺𑀢𑁆𑀣𑁂𑀦𑁆𑀢𑀺, 𑀢𑀢𑁆𑀣𑁂𑀯 𑀅𑀦𑀼𑀲𑀸𑀲𑀦𑀸.

𑀲𑀗𑁆𑀖𑁂𑀧𑀺 ¶ 𑀘 𑀅𑀣𑁄 𑀩𑀸𑀮𑀸, 𑀅𑀲𑀫𑁆𑀫𑀢𑀸 𑀘 𑀏𑀓𑀢𑁄;

𑀉𑀮𑁆𑀮𑀼𑀫𑁆𑀧𑀢𑀼𑀧𑀲𑀫𑁆𑀧𑀤𑀸, 𑀦𑀺𑀲𑁆𑀲𑀬𑁄 𑀏𑀓𑀓𑁄 𑀢𑀬𑁄𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀏𑀓𑀲𑀢𑀜𑁆𑀘 𑀤𑁆𑀯𑀸𑀲𑀢𑁆𑀢𑀢𑀺.

𑀫𑀳𑀸𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁄

𑁬𑁮. 𑀲𑀦𑁆𑀦𑀺𑀧𑀸𑀢𑀸𑀦𑀼𑀚𑀸𑀦𑀦𑀸

𑁧𑁩𑁨. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑁂 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀧𑁂𑀫𑀁, 𑀮𑀪𑀦𑁆𑀢𑀺 𑀧𑀲𑀸𑀤𑀁, 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀓𑁆𑀔𑀁. 𑀅𑀣 𑀔𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀏𑀢𑀭𑀳𑀺 𑀔𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑁂 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀧𑁂𑀫𑀁, 𑀮𑀪𑀦𑁆𑀢𑀺 𑀧𑀲𑀸𑀤𑀁, 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀓𑁆𑀔𑀁. 𑀬𑀁𑀦𑀽𑀦 𑀅𑀬𑁆𑀬𑀸𑀧𑀺 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘𑀏𑀢𑀭𑀳𑀺 𑀔𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑀸 ¶ 𑀉𑀧𑀲𑀗𑁆𑀓𑀫𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑁂 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀧𑁂𑀫𑀁, 𑀮𑀪𑀦𑁆𑀢𑀺 𑀧𑀲𑀸𑀤𑀁, 𑀮𑀪𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀧𑀓𑁆𑀔𑀁. 𑀬𑀁𑀦𑀽𑀦 𑀅𑀬𑁆𑀬𑀸𑀧𑀺 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑁂𑀬𑁆𑀬𑀼’𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸𑀧𑀺 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ¶ 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀼𑀦𑁆𑀢𑀺 𑁋 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀽𑀕𑀲𑀽𑀓𑀭𑀸. 𑀦𑀦𑀼 𑀦𑀸𑀫 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 ¶ 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀪𑀸𑀲𑀺𑀢𑀼’’𑀦𑁆𑀢𑀺.

𑁬𑁯. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀚𑀸𑀦𑀦𑀸

𑁧𑁩𑁩. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀬𑀸𑀦𑀺 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬𑀁. 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀉𑀧𑁄𑀲𑀣𑀓𑀫𑁆𑀫’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀇𑀥 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘𑀬𑀁𑀦𑀽𑀦𑀸𑀳𑀁 𑀬𑀸𑀦𑀺 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬𑀁. 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀉𑀧𑁄𑀲𑀣𑀓𑀫𑁆𑀫’𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁪. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 ¶ 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬. 𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀁? 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣 ¶ . 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺. 𑀢𑀁 𑀲𑀩𑁆𑀩𑁂𑀯 𑀲𑀦𑁆𑀢𑀸 𑀲𑀸𑀥𑀼𑀓𑀁 𑀲𑀼𑀡𑁄𑀫 𑀫𑀦𑀲𑀺 𑀓𑀭𑁄𑀫. 𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺 ¶ , 𑀲𑁄 𑀆𑀯𑀺𑀓𑀭𑁂𑀬𑁆𑀬. 𑀅𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁. 𑀢𑀼𑀡𑁆𑀳𑀻𑀪𑀸𑀯𑁂𑀦 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂 ¶ 𑀧𑀭𑀺𑀲𑀼𑀤𑁆𑀥𑀸𑀢𑀺 𑀯𑁂𑀤𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀧𑀘𑁆𑀘𑁂𑀓𑀧𑀼𑀝𑁆𑀞𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺, 𑀏𑀯𑀫𑁂𑀯𑀁 [𑀏𑀯𑀫𑁂𑀯 (𑀓)] 𑀏𑀯𑀭𑀽𑀧𑀸𑀬 𑀧𑀭𑀺𑀲𑀸𑀬 𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑁆𑀲𑀸𑀯𑀺𑀢𑀁 𑀳𑁄𑀢𑀺. 𑀬𑁄 𑀧𑀦 𑀪𑀺𑀓𑁆𑀔𑀼 𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑁆𑀲𑀸𑀯𑀺𑀬𑀫𑀸𑀦𑁂 𑀲𑀭𑀫𑀸𑀦𑁄 𑀲𑀦𑁆𑀢𑀺𑀁 𑀆𑀧𑀢𑁆𑀢𑀺𑀁 𑀦𑀸𑀯𑀺𑀓𑀭𑁂𑀬𑁆𑀬, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀳𑁄𑀢𑀺. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁄 𑀅𑀦𑁆𑀢𑀭𑀸𑀬𑀺𑀓𑁄 𑀥𑀫𑁆𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀢𑀲𑁆𑀫𑀸, 𑀲𑀭𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀆𑀧𑀦𑁆𑀦𑁂𑀦 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁂𑀦 𑀲𑀦𑁆𑀢𑀻 𑀆𑀧𑀢𑁆𑀢𑀺 𑀆𑀯𑀺𑀓𑀸𑀢𑀩𑁆𑀩𑀸; 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺.

𑁧𑁩𑁫. 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀆𑀤𑀺𑀫𑁂𑀢𑀁 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀆𑀬𑀲𑁆𑀫𑀦𑁆𑀢𑁄𑀢𑀺 𑀧𑀺𑀬𑀯𑀘𑀦𑀫𑁂𑀢𑀁 𑀕𑀭𑀼𑀯𑀘𑀦𑀫𑁂𑀢𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀦𑁆𑀢𑁄𑀢𑀺. 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻𑀢𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 ¶ 𑀉𑀢𑁆𑀢𑀸𑀦𑀺𑀁 𑀓𑀭𑀺𑀲𑁆𑀲𑀸𑀫𑀺 [𑀉𑀢𑁆𑀢𑀸𑀦𑀻 𑀓𑀭𑀺𑀲𑁆𑀲𑀸𑀫𑀺 (𑀲𑀻. 𑀲𑁆𑀬𑀸.)] 𑀧𑀓𑀸𑀲𑁂𑀲𑁆𑀲𑀸𑀫𑀺. 𑀢𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀯𑀼𑀘𑁆𑀘𑀢𑀺. 𑀲𑀩𑁆𑀩𑁂𑀯 𑀲𑀦𑁆𑀢𑀸𑀢𑀺 𑀬𑀸𑀯𑀢𑀺𑀓𑀸 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀣𑁂𑀭𑀸 𑀘 𑀦𑀯𑀸 𑀘 𑀫𑀚𑁆𑀛𑀺𑀫𑀸 𑀘, 𑀏𑀢𑁂 𑀯𑀼𑀘𑁆𑀘𑀦𑁆𑀢𑀺 𑀲𑀩𑁆𑀩𑁂𑀯 𑀲𑀦𑁆𑀢𑀸𑀢𑀺. 𑀲𑀸𑀥𑀼𑀓𑀁 𑀲𑀼𑀡𑁄𑀫𑀸𑀢𑀺 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 [𑀲𑀩𑁆𑀩𑀁 𑀘𑁂𑀢𑀲𑀸 (𑀲𑁆𑀬𑀸. 𑀓.)] 𑀲𑀫𑀦𑁆𑀦𑀸𑀳𑀭𑀸𑀫. 𑀫𑀦𑀲𑀺 𑀓𑀭𑁄𑀫𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀅𑀯𑀺𑀲𑀸𑀳𑀝𑀘𑀺𑀢𑁆𑀢𑀸 𑀦𑀺𑀲𑀸𑀫𑁂𑀫. 𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻𑀢𑀺 𑀣𑁂𑀭𑀲𑁆𑀲 𑀯𑀸 𑀦𑀯𑀲𑁆𑀲 𑀯𑀸 𑀫𑀚𑁆𑀛𑀺𑀫𑀲𑁆𑀲 𑀯𑀸, 𑀧𑀜𑁆𑀘𑀦𑁆𑀦𑀁 𑀯𑀸 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀢𑀭𑀸 𑀆𑀧𑀢𑁆𑀢𑀺, 𑀲𑀢𑁆𑀢𑀦𑁆𑀦𑀁 𑀯𑀸 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀢𑀭𑀸 𑀆𑀧𑀢𑁆𑀢𑀺. 𑀲𑁄 𑀆𑀯𑀺𑀓𑀭𑁂𑀬𑁆𑀬𑀸𑀢𑀺 𑀲𑁄 𑀤𑁂𑀲𑁂𑀬𑁆𑀬, 𑀲𑁄 𑀯𑀺𑀯𑀭𑁂𑀬𑁆𑀬, 𑀲𑁄 𑀉𑀢𑁆𑀢𑀸𑀦𑀺𑀁 𑀓𑀭𑁂𑀬𑁆𑀬, 𑀲𑁄 𑀧𑀓𑀸𑀲𑁂𑀬𑁆𑀬 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀕𑀡𑀫𑀚𑁆𑀛𑁂 𑀯𑀸 𑀏𑀓𑀧𑀼𑀕𑁆𑀕𑀮𑁂 𑀯𑀸. 𑀅𑀲𑀦𑁆𑀢𑀻 𑀦𑀸𑀫 𑀆𑀧𑀢𑁆𑀢𑀺 𑀅𑀦𑀚𑁆𑀛𑀸𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀆𑀧𑀚𑁆𑀚𑀺𑀢𑁆𑀯𑀸 𑀯𑀸 𑀯𑀼𑀝𑁆𑀞𑀺𑀢𑀸. 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀯𑀸𑀲𑁂𑀢𑀩𑁆𑀩𑀁 𑀦 𑀩𑁆𑀬𑀸𑀳𑀭𑀺𑀢𑀩𑁆𑀩𑀁. 𑀧𑀭𑀺𑀲𑀼𑀤𑁆𑀥𑀸𑀢𑀺 𑀯𑁂𑀤𑀺𑀲𑁆𑀲𑀸𑀫𑀻𑀢𑀺 𑀚𑀸𑀦𑀺𑀲𑁆𑀲𑀸𑀫𑀺 𑀥𑀸𑀭𑁂𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀧𑀘𑁆𑀘𑁂𑀓𑀧𑀼𑀝𑁆𑀞𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀻𑀢𑀺 𑀬𑀣𑀸 𑀏𑀓𑁂𑀦 𑀏𑀓𑁄 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀏𑀯𑀫𑁂𑀯 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀚𑀸𑀦𑀺𑀢𑀩𑁆𑀩𑀁 𑀫𑀁 𑀧𑀼𑀘𑁆𑀙𑀢𑀻𑀢𑀺. 𑀏𑀯𑀭𑀽𑀧𑀸 𑀦𑀸𑀫 𑀧𑀭𑀺𑀲𑀸 ¶ 𑀪𑀺𑀓𑁆𑀔𑀼𑀧𑀭𑀺𑀲𑀸 𑀯𑀼𑀘𑁆𑀘𑀢𑀺. 𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑁆𑀲𑀸𑀯𑀺𑀢𑀁 𑀳𑁄𑀢𑀻𑀢𑀺 𑀲𑀓𑀺𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀺𑀢𑀁 𑀳𑁄𑀢𑀺, 𑀤𑀼𑀢𑀺𑀬𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀺𑀢𑀁 𑀳𑁄𑀢𑀺, 𑀢𑀢𑀺𑀬𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀺𑀢𑀁 ¶ 𑀳𑁄𑀢𑀺. 𑀲𑀭𑀫𑀸𑀦𑁄𑀢𑀺 𑀚𑀸𑀦𑀫𑀸𑀦𑁄 𑀲𑀜𑁆𑀚𑀸𑀦𑀫𑀸𑀦𑁄. 𑀲𑀦𑁆𑀢𑀻 𑀦𑀸𑀫 𑀆𑀧𑀢𑁆𑀢𑀺 𑀅𑀚𑁆𑀛𑀸𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀆𑀧𑀚𑁆𑀚𑀺𑀢𑁆𑀯𑀸 𑀯𑀸 𑀅𑀯𑀼𑀝𑁆𑀞𑀺𑀢𑀸. 𑀦𑀸𑀯𑀺𑀓𑀭𑁂𑀬𑁆𑀬𑀸𑀢𑀺 𑀦 𑀤𑁂𑀲𑁂𑀬𑁆𑀬, 𑀦 𑀯𑀺𑀯𑀭𑁂𑀬𑁆𑀬, 𑀦 𑀉𑀢𑁆𑀢𑀸𑀦𑀺𑀁 𑀓𑀭𑁂𑀬𑁆𑀬, 𑀦 𑀧𑀓𑀸𑀲𑁂𑀬𑁆𑀬 𑀲𑀗𑁆𑀖𑀫𑀚𑁆𑀛𑁂 ¶ 𑀯𑀸 𑀕𑀡𑀫𑀚𑁆𑀛𑁂 𑀯𑀸 𑀏𑀓𑀧𑀼𑀕𑁆𑀕𑀮𑁂 𑀯𑀸. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀳𑁄𑀢𑀻𑀢𑀺. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀓𑀺𑀁 𑀳𑁄𑀢𑀺? 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀺𑀓𑁄 𑀥𑀫𑁆𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺. 𑀓𑀺𑀲𑁆𑀲 𑀅𑀦𑁆𑀢𑀭𑀸𑀬𑀺𑀓𑁄? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀅𑀦𑁆𑀢𑀭𑀸𑀬𑀺𑀓𑁄, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀅𑀦𑁆𑀢𑀭𑀸𑀬𑀺𑀓𑁄, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀅𑀦𑁆𑀢𑀭𑀸𑀬𑀺𑀓𑁄, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀅𑀦𑁆𑀢𑀭𑀸𑀬𑀺𑀓𑁄, 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀫𑀸𑀥𑀻𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀦𑁂𑀓𑁆𑀔𑀫𑁆𑀫𑀸𑀦𑀁 𑀦𑀺𑀲𑁆𑀲𑀭𑀡𑀸𑀦𑀁 𑀧𑀯𑀺𑀯𑁂𑀓𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀸𑀬 ¶ 𑀅𑀦𑁆𑀢𑀭𑀸𑀬𑀺𑀓𑁄. 𑀢𑀲𑁆𑀫𑀸𑀢𑀺 𑀢𑀗𑁆𑀓𑀸𑀭𑀡𑀸. 𑀲𑀭𑀫𑀸𑀦𑁂𑀦𑀸𑀢𑀺 𑀚𑀸𑀦𑀫𑀸𑀦𑁂𑀦 𑀲𑀜𑁆𑀚𑀸𑀦𑀫𑀸𑀦𑁂𑀦. 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁂𑀦𑀸𑀢𑀺 𑀯𑀼𑀝𑁆𑀞𑀸𑀢𑀼𑀓𑀸𑀫𑁂𑀦 𑀯𑀺𑀲𑀼𑀚𑁆𑀛𑀺𑀢𑀼𑀓𑀸𑀫𑁂𑀦. 𑀲𑀦𑁆𑀢𑀻 𑀦𑀸𑀫 𑀆𑀧𑀢𑁆𑀢𑀺 𑀅𑀚𑁆𑀛𑀸𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀆𑀧𑀚𑁆𑀚𑀺𑀢𑁆𑀯𑀸 𑀯𑀸 𑀅𑀯𑀼𑀝𑁆𑀞𑀺𑀢𑀸. 𑀆𑀯𑀺𑀓𑀸𑀢𑀩𑁆𑀩𑀸𑀢𑀺 𑀆𑀯𑀺𑀓𑀸𑀢𑀩𑁆𑀩𑀸 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀕𑀡𑀫𑀚𑁆𑀛𑁂 𑀯𑀸 𑀏𑀓𑀧𑀼𑀕𑁆𑀕𑀮𑁂 𑀯𑀸. 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻𑀢𑀺. 𑀓𑀺𑀲𑁆𑀲 𑀨𑀸𑀲𑀼 𑀳𑁄𑀢𑀺? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀨𑀸𑀲𑀼 𑀳𑁄𑀢𑀺, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀨𑀸𑀲𑀼 𑀳𑁄𑀢𑀺, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 ¶ 𑀅𑀥𑀺𑀕𑀫𑀸𑀬 𑀨𑀸𑀲𑀼 𑀳𑁄𑀢𑀺, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬 𑀨𑀸𑀲𑀼 𑀳𑁄𑀢𑀺, 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀫𑀸𑀥𑀻𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀦𑁂𑀓𑁆𑀔𑀫𑁆𑀫𑀸𑀦𑀁 𑀦𑀺𑀲𑁆𑀲𑀭𑀡𑀸𑀦𑀁 𑀧𑀯𑀺𑀯𑁂𑀓𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀸𑀬 𑀨𑀸𑀲𑀼 𑀳𑁄𑀢𑀻𑀢𑀺.

𑁧𑁩𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑁋 𑀤𑁂𑀯𑀲𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀲𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀉𑀧𑁄𑀲𑀣𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑁋 𑀧𑀓𑁆𑀔𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀓𑁆𑀔𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑀣𑀸𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺 𑀲𑀓𑀸𑀬 𑀲𑀓𑀸𑀬 𑀧𑀭𑀺𑀲𑀸𑀬. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀣𑀸𑀧𑀭𑀺𑀲𑀸𑀬 ¶ 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀓𑀸𑀬 𑀲𑀓𑀸𑀬 𑀧𑀭𑀺𑀲𑀸𑀬. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸𑀦𑀁 𑀉𑀧𑁄𑀲𑀣𑀓𑀫𑁆𑀫𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀲𑀫𑀕𑁆𑀕𑀸𑀦𑀁 𑀉𑀧𑁄𑀲𑀣𑀓𑀫𑁆𑀫’𑀦𑁆𑀢𑀺. 𑀓𑀺𑀢𑁆𑀢𑀸𑀯𑀢𑀸 ¶ 𑀦𑀼 𑀔𑁄 𑀲𑀸𑀫𑀕𑁆𑀕𑀻 𑀳𑁄𑀢𑀺, 𑀬𑀸𑀯𑀢𑀸 𑀏𑀓𑀸𑀯𑀸𑀲𑁄, 𑀉𑀤𑀸𑀳𑀼 𑀲𑀩𑁆𑀩𑀸 𑀧𑀣𑀯𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀢𑁆𑀢𑀸𑀯𑀢𑀸 𑀲𑀸𑀫𑀕𑁆𑀕𑀻 𑀬𑀸𑀯𑀢𑀸 𑀏𑀓𑀸𑀯𑀸𑀲𑁄𑀢𑀺.

𑁭𑁦. 𑀫𑀳𑀸𑀓𑀧𑁆𑀧𑀺𑀦𑀯𑀢𑁆𑀣𑀼

𑁧𑁩𑁭. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀫𑀤𑁆𑀤𑀓𑀼𑀘𑁆𑀙𑀺𑀫𑁆𑀳𑀺 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀉𑀧𑁄𑀲𑀣𑀁 𑀦 𑀯𑀸 𑀕𑀘𑁆𑀙𑁂𑀬𑁆𑀬𑀁, 𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀕𑀘𑁆𑀙𑁂𑀬𑁆𑀬𑀁, 𑀅𑀣 𑀔𑁆𑀯𑀸𑀳𑀁 𑀯𑀺𑀲𑀼𑀤𑁆𑀥𑁄 𑀧𑀭𑀫𑀸𑀬 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀫𑀤𑁆𑀤𑀓𑀼𑀘𑁆𑀙𑀺𑀫𑁆𑀳𑀺 𑀫𑀺𑀕𑀤𑀸𑀬𑁂 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀓𑀧𑁆𑀧𑀺𑀦𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀧𑁆𑀧𑀺𑀦𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦𑀦𑀼 𑀢𑁂, 𑀓𑀧𑁆𑀧𑀺𑀦, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀉𑀧𑁄𑀲𑀣𑀁 𑀦 𑀯𑀸 𑀕𑀘𑁆𑀙𑁂𑀬𑁆𑀬𑀁, 𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀕𑀘𑁆𑀙𑁂𑀬𑁆𑀬𑀁, 𑀅𑀣 𑀔𑁆𑀯𑀸𑀳𑀁 𑀯𑀺𑀲𑀼𑀤𑁆𑀥𑁄 𑀧𑀭𑀫𑀸𑀬 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀼𑀫𑁆𑀳𑁂 𑀘𑁂 𑀩𑁆𑀭𑀸𑀳𑁆𑀫𑀡𑀸 𑀉𑀧𑁄𑀲𑀣𑀁 𑀦 𑀲𑀓𑁆𑀓𑀭𑀺𑀲𑁆𑀲𑀣 𑀦 ¶ 𑀕𑀭𑀼𑀓𑀭𑀺𑀲𑁆𑀲𑀣 [𑀦 𑀕𑀭𑀼𑀁 𑀓𑀭𑀺𑀲𑁆𑀲𑀣 (𑀓.)] 𑀦 𑀫𑀸𑀦𑁂𑀲𑁆𑀲𑀣 𑀦 𑀧𑀽𑀚𑁂𑀲𑁆𑀲𑀣, 𑀅𑀣 𑀓𑁄 𑀘𑀭𑀳𑀺 𑀉𑀧𑁄𑀲𑀣𑀁 𑀲𑀓𑁆𑀓𑀭𑀺𑀲𑁆𑀲𑀢𑀺 𑀕𑀭𑀼𑀓𑀭𑀺𑀲𑁆𑀲𑀢𑀺 𑀫𑀸𑀦𑁂𑀲𑁆𑀲𑀢𑀺 𑀧𑀽𑀚𑁂𑀲𑁆𑀲𑀢𑀺? 𑀕𑀘𑁆𑀙 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀉𑀧𑁄𑀲𑀣𑀁, 𑀫𑀸 𑀦𑁄 𑀅𑀕𑀫𑀸𑀲𑀺. 𑀕𑀘𑁆𑀙 𑀢𑁆𑀯𑀁 𑀲𑀗𑁆𑀖𑀓𑀫𑁆𑀫𑀁, 𑀫𑀸 𑀦𑁄 𑀅𑀕𑀫𑀸𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 ¶ 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀧𑁆𑀧𑀺𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀫𑀤𑁆𑀤𑀓𑀼𑀘𑁆𑀙𑀺𑀫𑁆𑀳𑀺 𑀫𑀺𑀕𑀤𑀸𑀬𑁂 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀲𑀫𑁆𑀫𑀼𑀔𑁂 𑀅𑀦𑁆𑀢𑀭𑀳𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀸𑀢𑀼𑀭𑀳𑁄𑀲𑀺.

𑁭𑁧. 𑀲𑀻𑀫𑀸𑀦𑀼𑀚𑀸𑀦𑀦𑀸

𑁧𑁩𑁮. 𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀏𑀢𑁆𑀢𑀸𑀯𑀢𑀸 𑀲𑀸𑀫𑀕𑁆𑀕𑀻 𑀬𑀸𑀯𑀢𑀸 𑀏𑀓𑀸𑀯𑀸𑀲𑁄’𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀏𑀓𑀸𑀯𑀸𑀲𑁄 𑀳𑁄𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸 𑁋 𑀧𑀞𑀫𑀁 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸 𑁋 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁, 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁, 𑀯𑀦𑀦𑀺𑀫𑀺𑀢𑁆𑀢𑀁, 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁, 𑀫𑀕𑁆𑀕𑀦𑀺𑀫𑀺𑀢𑁆𑀢𑀁, 𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑀁, 𑀦𑀤𑀻𑀦𑀺𑀫𑀺𑀢𑁆𑀢𑀁, 𑀉𑀤𑀓𑀦𑀺𑀫𑀺𑀢𑁆𑀢𑀁. 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁯. ‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄 ¶ . 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀼𑀧𑁄𑀲𑀣𑀁 [𑀏𑀓𑀽𑀧𑁄𑀲𑀣𑀁 (𑀓.)]. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸. 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀼𑀧𑁄𑀲𑀣𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀸𑀬 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸.)] 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀼𑀧𑁄𑀲𑀣𑀸𑀬, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁪𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀲𑀻𑀫𑀸𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑁋 𑀅𑀢𑀺𑀫𑀳𑀢𑀺𑀬𑁄 𑀲𑀻𑀫𑀸𑀬𑁄 𑀲𑀫𑁆𑀫𑀦𑁆𑀦𑀦𑁆𑀢𑀺, 𑀘𑀢𑀼𑀬𑁄𑀚𑀦𑀺𑀓𑀸𑀧𑀺 𑀧𑀜𑁆𑀘𑀬𑁄𑀚𑀦𑀺𑀓𑀸𑀧𑀺 𑀙𑀬𑁄𑀚𑀦𑀺𑀓𑀸𑀧𑀺. 𑀪𑀺𑀓𑁆𑀔𑀽 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑀸 𑀉𑀤𑁆𑀤𑀺𑀲𑁆𑀲𑀫𑀸𑀦𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸𑀧𑀺 ¶ 𑀧𑀭𑀺𑀯𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀢𑀺𑀫𑀳𑀢𑀻 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀘𑀢𑀼𑀬𑁄𑀚𑀦𑀺𑀓𑀸 𑀯𑀸 𑀧𑀜𑁆𑀘𑀬𑁄𑀚𑀦𑀺𑀓𑀸 𑀯𑀸 𑀙𑀬𑁄𑀚𑀦𑀺𑀓𑀸 𑀯𑀸. 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀦𑀤𑀻𑀧𑀸𑀭𑀲𑀻𑀫𑀁 [𑀦𑀤𑀻𑀧𑀸𑀭𑀁 𑀲𑀻𑀫𑀁 (𑀲𑀻. 𑀲𑁆𑀬𑀸.)] 𑀲𑀫𑁆𑀫𑀦𑁆𑀦𑀦𑁆𑀢𑀺. 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑀸 𑀪𑀺𑀓𑁆𑀔𑀽𑀧𑀺 𑀯𑀼𑀬𑁆𑀳𑀦𑁆𑀢𑀺, 𑀧𑀢𑁆𑀢𑀸𑀧𑀺 𑀯𑀼𑀬𑁆𑀳𑀦𑁆𑀢𑀺 ¶ , 𑀘𑀻𑀯𑀭𑀸𑀦𑀺𑀧𑀺 𑀯𑀼𑀬𑁆𑀳𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀦𑀤𑀻𑀧𑀸𑀭𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣𑀲𑁆𑀲 𑀥𑀼𑀯𑀦𑀸𑀯𑀸 𑀯𑀸 𑀥𑀼𑀯𑀲𑁂𑀢𑀼 𑀯𑀸, 𑀏𑀯𑀭𑀽𑀧𑀁 𑀦𑀤𑀻𑀧𑀸𑀭𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀦𑁆𑀢𑀺.

𑁭𑁨. 𑀉𑀧𑁄𑀲𑀣𑀸𑀕𑀸𑀭𑀓𑀣𑀸

𑁧𑁪𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀭𑀺𑀯𑁂𑀡𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 ¶ 𑀉𑀤𑁆𑀤𑀺𑀲𑀦𑁆𑀢𑀺 𑀅𑀲𑀗𑁆𑀓𑁂𑀢𑁂𑀦. 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀦 𑀚𑀸𑀦𑀦𑁆𑀢𑀺 𑁋 ‘‘𑀓𑀢𑁆𑀣 𑀯𑀸 𑀅𑀚𑁆𑀚𑀼𑀧𑁄𑀲𑀣𑁄 𑀓𑀭𑀻𑀬𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀭𑀺𑀯𑁂𑀡𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁 𑀅𑀲𑀗𑁆𑀓𑁂𑀢𑁂𑀦. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 ¶ 𑀕𑀼𑀳𑀁 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀯𑀺𑀳𑀸𑀭𑁄 𑀉𑀧𑁄𑀲𑀣𑀸𑀕𑀸𑀭𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀢𑀸𑀦𑀺 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀉𑀪𑀬𑀢𑁆𑀣 𑀲𑀦𑁆𑀦𑀺𑀧𑀢𑀦𑁆𑀢𑀺 𑁋 ‘‘𑀇𑀥 𑀉𑀧𑁄𑀲𑀣𑁄 𑀓𑀭𑀻𑀬𑀺𑀲𑁆𑀲𑀢𑀺, 𑀇𑀥 𑀉𑀧𑁄𑀲𑀣𑁄 𑀓𑀭𑀻𑀬𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀦𑀺. 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀁 𑀲𑀫𑀽𑀳𑀦𑀺𑀢𑁆𑀯𑀸 [𑀲𑀫𑀼𑀳𑀦𑀺𑀢𑁆𑀯𑀸 (𑀓.)] 𑀏𑀓𑀢𑁆𑀣 𑀉𑀧𑁄𑀲𑀣𑀁 𑀓𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀽𑀳𑀦𑁆𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑀽𑀳𑀦𑁂𑀬𑁆𑀬 [𑀲𑀫𑀼𑀳𑀦𑁂𑀬𑁆𑀬 (𑀓.)]. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑀽𑀳𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀲𑁆𑀲 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑀽𑀳𑀢𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑁄𑀲𑀣𑀸𑀕𑀸𑀭𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁭𑁩. 𑀉𑀧𑁄𑀲𑀣𑀧𑁆𑀧𑀫𑀼𑀔𑀸𑀦𑀼𑀚𑀸𑀦𑀦𑀸

𑁧𑁪𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀅𑀢𑀺𑀔𑀼𑀤𑁆𑀤𑀓𑀁 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀢𑀁 𑀳𑁄𑀢𑀺, 𑀢𑀤𑀳𑀼𑀧𑁄𑀲𑀣𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑀅𑀲𑀫𑁆𑀫𑀢𑀸𑀬 𑀪𑀽𑀫𑀺𑀬𑀸 𑀦𑀺𑀲𑀺𑀦𑁆𑀦𑀸 𑀧𑀸𑀢𑀺𑀫𑁄𑀓𑁆𑀔𑀁 ¶ 𑀅𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 ¶ 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’𑀢𑀺, 𑀫𑀬𑀜𑁆𑀘𑀫𑁆𑀳𑀸 𑀅𑀲𑀫𑁆𑀫𑀢𑀸𑀬 𑀪𑀽𑀫𑀺𑀬𑀸 𑀦𑀺𑀲𑀺𑀦𑁆𑀦𑁄 𑀧𑀸𑀢𑀺𑀫𑁄𑀓𑁆𑀔𑀁 𑀅𑀲𑁆𑀲𑀼𑀫𑁆𑀳𑀸, 𑀓𑀢𑁄 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄, 𑀅𑀓𑀢𑁄 ¶ 𑀦𑀼 𑀔𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀫𑁆𑀫𑀢𑀸𑀬 𑀯𑀸, 𑀪𑀺𑀓𑁆𑀔𑀯𑁂, 𑀪𑀽𑀫𑀺𑀬𑀸 𑀦𑀺𑀲𑀺𑀦𑁆𑀦𑀸 𑀅𑀲𑀫𑁆𑀫𑀢𑀸𑀬 𑀯𑀸 𑀬𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀸𑀢𑀺, 𑀓𑀢𑁄𑀯𑀲𑁆𑀲 𑀉𑀧𑁄𑀲𑀣𑁄. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀬𑀸𑀯 𑀫𑀳𑀦𑁆𑀢𑀁 𑀉𑀧𑁄𑀲𑀣𑀧𑁆𑀧𑀫𑀼𑀔𑀁 [𑀉𑀧𑁄𑀲𑀣𑀫𑀼𑀔𑀁 (𑀲𑁆𑀬𑀸.)] 𑀆𑀓𑀗𑁆𑀔𑀢𑀺, 𑀢𑀸𑀯 𑀫𑀳𑀦𑁆𑀢𑀁 𑀉𑀧𑁄𑀲𑀣𑀧𑁆𑀧𑀫𑀼𑀔𑀁 𑀲𑀫𑁆𑀫𑀦𑁆𑀦𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁. 𑀧𑀞𑀫𑀁 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑁄𑀲𑀣𑀧𑁆𑀧𑀫𑀼𑀔𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸. 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑁄𑀲𑀣𑀧𑁆𑀧𑀫𑀼𑀔𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 ¶ 𑀔𑀫𑀢𑀺 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑁄𑀲𑀣𑀧𑁆𑀧𑀫𑀼𑀔𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀁 𑀲𑀗𑁆𑀖𑁂𑀦 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑁄𑀲𑀣𑀧𑁆𑀧𑀫𑀼𑀔𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀦𑀯𑀓𑀸 𑀪𑀺𑀓𑁆𑀔𑀽 𑀧𑀞𑀫𑀢𑀭𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀦 𑀢𑀸𑀯 𑀣𑁂𑀭𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑁋 𑀧𑀓𑁆𑀓𑀫𑀺𑀁𑀲𑀼. 𑀉𑀧𑁄𑀲𑀣𑁄 𑀯𑀺𑀓𑀸𑀮𑁂 𑀅𑀳𑁄𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀲𑀦𑁆𑀦𑀺𑀧𑀢𑀺𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀸 𑀲𑀫𑀸𑀦𑀲𑀻𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀆𑀯𑀸𑀲𑁂 𑀉𑀧𑁄𑀲𑀣𑁄 𑀓𑀭𑀻𑀬𑀢𑀼, 𑀅𑀫𑁆𑀳𑀸𑀓𑀁 𑀆𑀯𑀸𑀲𑁂 𑀉𑀧𑁄𑀲𑀣𑁄 𑀓𑀭𑀻𑀬𑀢𑀽’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀸 𑀲𑀫𑀸𑀦𑀲𑀻𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀆𑀯𑀸𑀲𑁂 𑀉𑀧𑁄𑀲𑀣𑁄 𑀓𑀭𑀻𑀬𑀢𑀼, 𑀅𑀫𑁆𑀳𑀸𑀓𑀁 𑀆𑀯𑀸𑀲𑁂 𑀉𑀧𑁄𑀲𑀣𑁄 𑀓𑀭𑀻𑀬𑀢𑀽’’𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀬𑀢𑁆𑀣 𑀯𑀸 𑀧𑀦 𑀣𑁂𑀭𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺, 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁭𑁪. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀼𑀚𑀸𑀦𑀦𑀸

𑁧𑁪𑁩. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀅𑀦𑁆𑀥𑀓𑀯𑀺𑀦𑁆𑀤𑀸 𑀭𑀸𑀚𑀕𑀳𑀁 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀺𑀁 𑀢𑀭𑀦𑁆𑀢𑁄 𑀫𑀦𑀁 𑀯𑀽𑀴𑁆𑀳𑁄 𑀅𑀳𑁄𑀲𑀺, 𑀘𑀻𑀯𑀭𑀸𑀦𑀺𑀲𑁆𑀲 [𑀢𑁂𑀦 𑀘𑀻𑀯𑀭𑀸𑀦𑀺𑀲𑁆𑀲 (𑀓.)] 𑀅𑀮𑁆𑀮𑀸𑀦𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀸𑀦𑀺 𑀅𑀮𑁆𑀮𑀸𑀦𑀻’’𑀢𑀺? ‘‘𑀇𑀥𑀸𑀳𑀁, 𑀆𑀯𑀼𑀲𑁄, 𑀅𑀦𑁆𑀥𑀓𑀯𑀺𑀦𑁆𑀤𑀸 𑀭𑀸𑀚𑀕𑀳𑀁 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀺𑀁 𑀢𑀭𑀦𑁆𑀢𑁄 𑀫𑀦𑀫𑁆𑀳𑀺 𑀯𑀽𑀴𑁆𑀳𑁄. 𑀢𑁂𑀦 𑀫𑁂 𑀘𑀻𑀯𑀭𑀸𑀦𑀺 𑀅𑀮𑁆𑀮𑀸𑀦𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸𑀬 [𑀅𑀯𑀺𑀧𑁆𑀧𑀯𑀸𑀲𑀲𑁆𑀲 (𑀲𑁆𑀬𑀸.)] 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸 [𑀅𑀯𑀺𑀧𑁆𑀧𑀯𑀸𑀲𑁄 (𑀲𑁆𑀬𑀸.)]. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀪𑀕𑀯𑀢𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀅𑀦𑁆𑀢𑀭𑀖𑀭𑁂 𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀦𑀲𑁆𑀲𑀦𑁆𑀢𑀺𑀧𑀺 𑀟𑀬𑁆𑀳𑀦𑁆𑀢𑀺𑀧𑀺 𑀉𑀦𑁆𑀤𑀽𑀭𑁂𑀳𑀺𑀧𑀺 𑀔𑀚𑁆𑀚𑀦𑁆𑀢𑀺. 𑀪𑀺𑀓𑁆𑀔𑀽 𑀤𑀼𑀘𑁆𑀘𑁄𑀴𑀸 𑀳𑁄𑀦𑁆𑀢𑀺 𑀮𑀽𑀔𑀘𑀻𑀯𑀭𑀸. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀤𑀼𑀘𑁆𑀘𑁄𑀴𑀸 𑀮𑀽𑀔𑀘𑀻𑀯𑀭𑀸’’𑀢𑀺? ‘‘𑀇𑀥 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀅𑀦𑁆𑀢𑀭𑀖𑀭𑁂 𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀺𑀫𑁆𑀳𑀸 ¶ . 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀦𑀝𑁆𑀞𑀸𑀦𑀺𑀧𑀺 𑀤𑀟𑁆𑀠𑀸𑀦𑀺𑀧𑀺, 𑀉𑀦𑁆𑀤𑀽𑀭𑁂𑀳𑀺𑀧𑀺 𑀔𑀸𑀬𑀺𑀢𑀸𑀦𑀺, 𑀢𑁂𑀦 𑀫𑀬𑀁 𑀤𑀼𑀘𑁆𑀘𑁄𑀴𑀸 𑀮𑀽𑀔𑀘𑀻𑀯𑀭𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀸 𑀲𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀼, 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁪𑁪. ‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 ¶ 𑀕𑀸𑀫𑀽𑀧𑀘𑀸𑀭𑀜𑁆𑀘. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀺, 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸𑀬 [𑀅𑀯𑀺𑀧𑁆𑀧𑀯𑀸𑀲𑀲𑁆𑀲 (𑀲𑁆𑀬𑀸.)] 𑀲𑀫𑁆𑀫𑀼𑀢𑀺, 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀸 ¶ 𑀲𑀻𑀫𑀸 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸 [𑀅𑀯𑀺𑀧𑁆𑀧𑀯𑀸𑀲𑁄 (𑀲𑁆𑀬𑀸.)], 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁭𑁫. 𑀲𑀻𑀫𑀸𑀲𑀫𑀽𑀳𑀦𑀦

‘‘𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀧𑀞𑀫𑀁 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 [𑀲𑀫𑀸𑀦𑀲𑀁𑀯𑀸𑀲𑀸 𑀲𑀻𑀫𑀸 (𑀲𑁆𑀬𑀸.)] 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸 ¶ , 𑀧𑀘𑁆𑀙𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑀽𑀳𑀦𑀦𑁆𑀢𑁂𑀦 𑀧𑀞𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑁆𑀢𑀩𑁆𑀩𑁄, 𑀧𑀘𑁆𑀙𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀲𑀫𑀽𑀳𑀦𑁆𑀢𑀩𑁆𑀩𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑁆𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁪𑁫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀢𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑀽𑀳𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀢𑁄, 𑀲𑀗𑁆𑀖𑁄 𑀢𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑀽𑀳𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀲𑁆𑀲 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑁆𑀲 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑀽𑀳𑀢𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸 [𑀲𑀫𑀸𑀦𑀲𑀁𑀯𑀸𑀲𑀸 𑀲𑀻𑀫𑀸 (𑀲𑁆𑀬𑀸.)]. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁪𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸 ¶ , 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀲𑀫𑀽𑀳𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀼𑀧𑁄𑀲𑀣𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 ¶ 𑀲𑀻𑀫𑀁 𑀲𑀫𑀽𑀳𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀼𑀧𑁄𑀲𑀣𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀼𑀧𑁄𑀲𑀣𑀸𑀬 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑀽𑀳𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁭𑁬. 𑀕𑀸𑀫𑀲𑀻𑀫𑀸𑀤𑀺

𑁧𑁪𑁭. 𑀅𑀲𑀫𑁆𑀫𑀢𑀸𑀬 ¶ , 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀅𑀝𑁆𑀞𑀧𑀺𑀢𑀸𑀬, 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀬𑀸 𑀢𑀲𑁆𑀲 𑀯𑀸 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸, 𑀦𑀺𑀕𑀫𑀲𑁆𑀲 ¶ 𑀯𑀸 𑀦𑀺𑀕𑀫𑀲𑀻𑀫𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 ¶ 𑀏𑀓𑀼𑀧𑁄𑀲𑀣𑀸. 𑀅𑀕𑀸𑀫𑀓𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸. 𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸; 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄; 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄. 𑀦𑀤𑀺𑀬𑀸 𑀯𑀸, 𑀪𑀺𑀓𑁆𑀔𑀯𑁂, 𑀲𑀫𑀼𑀤𑁆𑀤𑁂 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸𑀢𑀺.

𑁧𑁪𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀞𑀫𑀁 𑀲𑀫𑁆𑀫𑀢𑀸 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀥𑀫𑁆𑀫𑀺𑀓𑀁 𑀅𑀓𑀼𑀧𑁆𑀧𑀁 𑀞𑀸𑀦𑀸𑀭𑀳𑀁. 𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀘𑁆𑀙𑀸 𑀲𑀫𑁆𑀫𑀢𑀸 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁. 𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀲𑀻𑀫𑀸 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸. 𑀬𑁄 𑀲𑀫𑁆𑀪𑀺𑀦𑁆𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀞𑀫𑀁 𑀲𑀫𑁆𑀫𑀢𑀸 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀥𑀫𑁆𑀫𑀺𑀓𑀁 𑀅𑀓𑀼𑀧𑁆𑀧𑀁 𑀞𑀸𑀦𑀸𑀭𑀳𑀁. 𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀘𑁆𑀙𑀸 𑀲𑀫𑁆𑀫𑀢𑀸 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁. 𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀲𑀻𑀫𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑀩𑁆𑀩𑀸. 𑀬𑁄 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀦𑁆𑀢𑀺.

𑁭𑁭. 𑀉𑀧𑁄𑀲𑀣𑀪𑁂𑀤𑀸𑀤𑀺

𑁧𑁪𑁯. 𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀉𑀧𑁄𑀲𑀣𑀸’’𑀢𑀺? 𑀪𑀕𑀯𑀢𑁄 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑁄 𑀘 𑀧𑀦𑁆𑀦𑀭𑀲𑀺𑀓𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀉𑀧𑁄𑀲𑀣𑀸𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀉𑀧𑁄𑀲𑀣𑀓𑀫𑁆𑀫𑀸𑀦𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀓𑀫𑁆𑀫𑀸𑀦𑀺 ¶ 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀓𑀸𑀢𑀩𑁆𑀩𑀁. 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 ¶ 𑀉𑀧𑁄𑀲𑀣𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫𑀁, 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀏𑀯𑀭𑀽𑀧𑀜𑁆𑀘 𑀫𑀬𑀸 𑀉𑀧𑁄𑀲𑀣𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀦𑁆𑀢𑀺 𑁋 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

𑁭𑁮. 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺

𑁧𑁫𑁦. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑁋 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 ¶ 𑀧𑀞𑀫𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀤𑀼𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀢𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀯𑀺𑀢𑁆𑀣𑀸𑀭𑁂𑀦𑁂𑀯 𑀧𑀜𑁆𑀘𑀫𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑁋 𑀲𑀩𑁆𑀩𑀓𑀸𑀮𑀁 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀯𑀭𑀪𑀬𑀁 [𑀲𑀁𑀘𑀭𑀪𑀬𑀁 (𑀲𑁆𑀬𑀸.)] 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀯𑀺𑀢𑁆𑀣𑀸𑀭𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ¶ 𑀅𑀲𑀢𑀺𑀧𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀢𑀢𑁆𑀭𑀺𑀫𑁂 𑀅𑀦𑁆𑀢𑀭𑀸𑀬𑀸 𑁋 𑀭𑀸𑀚𑀦𑁆𑀢𑀭𑀸𑀬𑁄, 𑀘𑁄𑀭𑀦𑁆𑀢𑀭𑀸𑀬𑁄, 𑀅𑀕𑁆𑀬𑀦𑁆𑀢𑀭𑀸𑀬𑁄, 𑀉𑀤𑀓𑀦𑁆𑀢𑀭𑀸𑀬𑁄, 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄, 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 ¶ , 𑀯𑀸𑀴𑀦𑁆𑀢𑀭𑀸𑀬𑁄, 𑀲𑀭𑀻𑀲𑀧𑀦𑁆𑀢𑀭𑀸𑀬𑁄, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀯𑀺𑀢𑁆𑀣𑀸𑀭𑁂𑀦𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑁂𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄. 𑀬𑁄 𑀪𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀥𑀫𑁆𑀫𑀁 𑀪𑀸𑀲𑀺𑀢𑀼𑀁 𑀧𑀭𑀁 𑀯𑀸 𑀅𑀚𑁆𑀛𑁂𑀲𑀺𑀢𑀼𑀦𑁆𑀢𑀺.

𑁭𑁯. 𑀯𑀺𑀦𑀬𑀧𑀼𑀘𑁆𑀙𑀦𑀓𑀣𑀸

𑁧𑁫𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀲𑀫𑁆𑀫𑀢𑀸 𑀯𑀺𑀦𑀬𑀁 𑀧𑀼𑀘𑁆𑀙𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀲𑀫𑁆𑀫𑀢𑁂𑀦 𑀯𑀺𑀦𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀬𑁄 𑀧𑀼𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑁂𑀦 𑀯𑀺𑀦𑀬𑀁 𑀧𑀼𑀘𑁆𑀙𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀅𑀢𑁆𑀢𑀦𑀸 𑀯𑀸 [𑀅𑀢𑁆𑀢𑀦𑀸𑀯 (𑀲𑁆𑀬𑀸.)] 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁, 𑀧𑀭𑁂𑀦 𑀯𑀸 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀓𑀣𑀜𑁆𑀘 ¶ 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁.

𑀓𑀣𑀜𑁆𑀘 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺. 𑀏𑀯𑀁 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑀸 𑀯𑀺𑀦𑀬𑀁 𑀧𑀼𑀘𑁆𑀙𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀆𑀖𑀸𑀢𑀁, 𑀮𑀪𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁, 𑀯𑀥𑁂𑀦 𑀢𑀚𑁆𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑁂𑀦𑀧𑀺 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀕𑁆𑀕𑀮𑀁 𑀢𑀼𑀮𑀬𑀺𑀢𑁆𑀯𑀸 𑀯𑀺𑀦𑀬𑀁 𑀧𑀼𑀘𑁆𑀙𑀺𑀢𑀼𑀦𑁆𑀢𑀺.

𑁮𑁦. 𑀯𑀺𑀦𑀬𑀯𑀺𑀲𑁆𑀲𑀚𑁆𑀚𑀦𑀓𑀣𑀸

𑁧𑁫𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀲𑀫𑁆𑀫𑀢𑀸 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺 [𑀯𑀺𑀲𑁆𑀲𑀚𑁆𑀚𑀦𑁆𑀢𑀺 (𑀓.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀲𑀫𑁆𑀫𑀢𑁂𑀦 𑀯𑀺𑀦𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑁂𑀦 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁. 𑀅𑀢𑁆𑀢𑀦𑀸 𑀯𑀸 [𑀅𑀢𑁆𑀢𑀦𑀸𑀯 (𑀲𑁆𑀬𑀸.)] 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁, 𑀧𑀭𑁂𑀦 𑀯𑀸 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀓𑀣𑀜𑁆𑀘 ¶ 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 ¶ 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁.

𑀓𑀣𑀜𑁆𑀘 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺. 𑀏𑀯𑀁 𑀧𑀭𑁂𑀦 𑀧𑀭𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺.

𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑀸 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀆𑀖𑀸𑀢𑀁, 𑀮𑀪𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁, 𑀯𑀥𑁂𑀦 𑀢𑀚𑁆𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀲𑀫𑁆𑀫𑀢𑁂𑀦𑀧𑀺 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀕𑁆𑀕𑀮𑀁 𑀢𑀼𑀮𑀬𑀺𑀢𑁆𑀯𑀸 𑀯𑀺𑀦𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀦𑁆𑀢𑀺.

𑁮𑁧. 𑀘𑁄𑀤𑀦𑀸𑀓𑀣𑀸

𑁧𑁫𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀦𑁄𑀓𑀸𑀲𑀓𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀦𑁄𑀓𑀸𑀲𑀓𑀢𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀩𑁆𑀩𑁄. 𑀬𑁄 𑀘𑁄𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀼𑀁 𑁋 𑀓𑀭𑁄𑀢𑀼 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀆𑀖𑀸𑀢𑀁, 𑀮𑀪𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁, 𑀯𑀥𑁂𑀦 𑀢𑀚𑁆𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀢𑁂𑀧𑀺 𑀑𑀓𑀸𑀲𑁂 𑀧𑀼𑀕𑁆𑀕𑀮𑀁 𑀢𑀼𑀮𑀬𑀺𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 ¶ 𑀪𑀺𑀓𑁆𑀔𑀽 𑁋 𑀧𑀼𑀭𑀫𑁆𑀳𑀸𑀓𑀁 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀑𑀓𑀸𑀲𑀁 𑀓𑀸𑀭𑀸𑀧𑁂𑀦𑁆𑀢𑀻𑀢𑀺 𑁋 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀑𑀓𑀸𑀲𑁄 𑀓𑀸𑀭𑀸𑀧𑁂𑀢𑀩𑁆𑀩𑁄. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀁 𑀢𑀼𑀮𑀬𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀢𑀼 [𑀓𑀸𑀭𑀸𑀧𑁂𑀢𑀼𑀁 (𑀲𑁆𑀬𑀸.)] 𑀦𑁆𑀢𑀺.

𑁮𑁨. 𑀅𑀥𑀫𑁆𑀫𑀓𑀫𑁆𑀫𑀧𑀝𑀺𑀓𑁆𑀓𑁄𑀲𑀦𑀸𑀤𑀺

𑁧𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀥𑀫𑁆𑀫𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺. 𑀓𑀭𑁄𑀦𑁆𑀢𑀺𑀬𑁂𑀯 𑀅𑀥𑀫𑁆𑀫𑀓𑀫𑁆𑀫𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀺𑀢𑀼𑀦𑁆𑀢𑀺.

𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀥𑀫𑁆𑀫𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀆𑀖𑀸𑀢𑀁, 𑀮𑀪𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁, 𑀯𑀥𑁂𑀦 𑀢𑀚𑁆𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀫𑁆𑀧𑀺 𑀆𑀯𑀺𑀓𑀸𑀢𑀼𑀦𑁆𑀢𑀺. 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀤𑀺𑀝𑁆𑀞𑀺𑀁 𑀆𑀯𑀺𑀓𑀭𑁄𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀆𑀖𑀸𑀢𑀁, 𑀮𑀪𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀁, 𑀯𑀥𑁂𑀦 𑀢𑀚𑁆𑀚𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀧𑀝𑀺𑀓𑁆𑀓𑁄𑀲𑀺𑀢𑀼𑀁, 𑀤𑁆𑀯𑀻𑀳𑀺 𑀢𑀻𑀳𑀺 𑀤𑀺𑀝𑁆𑀞𑀺𑀁 𑀆𑀯𑀺𑀓𑀸𑀢𑀼𑀁, 𑀏𑀓𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑁋 ‘𑀦 𑀫𑁂𑀢𑀁 𑀔𑀫𑀢𑀻’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 ¶ 𑀉𑀤𑁆𑀤𑀺𑀲𑀫𑀸𑀦𑀸 𑀲𑀜𑁆𑀘𑀺𑀘𑁆𑀘 𑀦 𑀲𑀸𑀯𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀲𑀜𑁆𑀘𑀺𑀘𑁆𑀘 𑀦 𑀲𑀸𑀯𑁂𑀢𑀩𑁆𑀩𑀁. 𑀬𑁄 𑀦 𑀲𑀸𑀯𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀗𑁆𑀖𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀳𑁄𑀢𑀺 𑀓𑀸𑀓𑀲𑁆𑀲𑀭𑀓𑁄. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀲𑀸𑀯𑁂𑀢𑀩𑁆𑀩’𑀦𑁆𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀓𑀸𑀓𑀲𑁆𑀲𑀭𑀓𑁄, 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀸𑀬𑀫𑀺𑀢𑀼𑀁 𑁋 ‘𑀓𑀣𑀁 𑀲𑀸𑀯𑁂𑀬𑁆𑀬’𑀦𑁆𑀢𑀺. 𑀯𑀸𑀬𑀫𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁂𑀯𑀤𑀢𑁆𑀢𑁄 𑀲𑀕𑀳𑀝𑁆𑀞𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀕𑀳𑀝𑁆𑀞𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑀸𑀥𑀺𑀓𑀁 [𑀣𑁂𑀭𑀸𑀥𑁂𑀬𑁆𑀬𑀁 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁)] 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄 [𑀏𑀓𑀸𑀤𑀲𑀫𑁄 (𑀓.)].

𑁮𑁩. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀅𑀚𑁆𑀛𑁂𑀲𑀦𑀸𑀤𑀺

𑁧𑁫𑁫. 𑀅𑀣 ¶ ¶ ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀘𑁄𑀤𑀦𑀸𑀯𑀢𑁆𑀣𑀼 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀘𑁄𑀤𑀦𑀸𑀯𑀢𑁆𑀣𑀼 𑀢𑀤𑀯𑀲𑀭𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 ¶ . 𑀢𑀢𑁆𑀣 𑀣𑁂𑀭𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄. 𑀲𑁄 𑀦 𑀚𑀸𑀦𑀸𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀣𑁂𑀭𑀸𑀥𑀺𑀓𑀁 𑀧𑀸𑀢𑀺𑀫𑁄𑀓𑁆𑀔’𑀦𑁆𑀢𑀺, 𑀅𑀬𑀜𑁆𑀘 𑀅𑀫𑁆𑀳𑀸𑀓𑀁 𑀣𑁂𑀭𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄, 𑀦 𑀚𑀸𑀦𑀸𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄 𑀢𑀲𑁆𑀲𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀤𑀼𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀢𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼 ¶ , 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀪𑀦𑁆𑀢𑁂, 𑀯𑀢𑁆𑀢𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀤𑀼𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀢𑀢𑀺𑀬𑀁 ¶ 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀪𑀦𑁆𑀢𑁂, 𑀯𑀢𑁆𑀢𑀢𑀻’’𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 ¶ 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦 𑀆𑀕𑀘𑁆𑀙𑀸𑀳𑀻𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀧𑀸𑀳𑁂𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺. 𑀣𑁂𑀭𑁂𑀦 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀕𑀘𑁆𑀙𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 ¶ 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀕𑀦𑁆𑀢𑀩𑁆𑀩𑀁. 𑀬𑁄 𑀦 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁮𑁪. 𑀧𑀓𑁆𑀔𑀕𑀡𑀦𑀸𑀤𑀺𑀉𑀕𑁆𑀕𑀳𑀡𑀸𑀦𑀼𑀚𑀸𑀦𑀦𑀸

𑁧𑁫𑁬. 𑀅𑀣 𑀔𑁄 𑀪𑀕𑀯𑀸 𑀘𑁄𑀤𑀦𑀸𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀢𑀺𑀫𑀻, 𑀪𑀦𑁆𑀢𑁂, 𑀧𑀓𑁆𑀔𑀲𑁆𑀲𑀸’’𑀢𑀺? 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀚𑀸𑀦𑀸𑀫𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀧𑀓𑁆𑀔𑀕𑀡𑀦𑀫𑀢𑁆𑀢𑀫𑀫𑁆𑀧𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀦 𑀚𑀸𑀦𑀦𑁆𑀢𑀺, 𑀓𑀺𑀁 𑀧𑀦𑀺𑀫𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀮𑁆𑀬𑀸𑀡𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀓𑁆𑀔𑀕𑀡𑀦𑀁 𑀉𑀕𑁆𑀕𑀳𑁂𑀢𑀼𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀧𑀓𑁆𑀔𑀕𑀡𑀦𑀸 𑀉𑀕𑁆𑀕𑀳𑁂𑀢𑀩𑁆𑀩𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀳𑁂𑀯 𑀧𑀓𑁆𑀔𑀕𑀡𑀦𑀁 𑀉𑀕𑁆𑀕𑀳𑁂𑀢𑀼𑀦𑁆𑀢𑀺.

𑁧𑁫𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀻𑀯𑀢𑀺𑀓𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀽’’𑀢𑀺? 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀚𑀸𑀦𑀸𑀫𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀜𑁆𑀜𑀫𑀜𑁆𑀜𑀫𑁆𑀧𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀦 𑀚𑀸𑀦𑀦𑁆𑀢𑀺, 𑀓𑀺𑀁 𑀧𑀦𑀺𑀫𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 ¶ 𑀓𑀮𑁆𑀬𑀸𑀡𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀕𑀡𑁂𑀢𑀼𑀦𑁆𑀢𑀺.

𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀪𑀺𑀓𑁆𑀔𑀽 𑀕𑀡𑁂𑀢𑀩𑁆𑀩𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀦𑀸𑀫𑀕𑁆𑀕𑁂𑀦 [𑀦𑀸𑀫𑀫𑀢𑁆𑀢𑁂𑀦 (𑀲𑁆𑀬𑀸.), 𑀕𑀡𑀫𑀕𑁆𑀕𑁂𑀦 (𑀓.)] 𑀕𑀡𑁂𑀢𑀼𑀁, 𑀲𑀮𑀸𑀓𑀁 𑀯𑀸 𑀕𑀸𑀳𑁂𑀢𑀼𑀦𑁆𑀢𑀺.

𑁧𑁫𑁮. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀚𑀸𑀦𑀦𑁆𑀢𑀸 𑀅𑀚𑁆𑀚𑀼𑀧𑁄𑀲𑀣𑁄𑀢𑀺 𑀤𑀽𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀢𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀧𑀺 𑀆𑀕𑀘𑁆𑀙𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑁄𑀘𑁂𑀢𑀼𑀁 ‘𑀅𑀚𑁆𑀚𑀼𑀧𑁄𑀲𑀣𑁄’𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀆𑀭𑁄𑀘𑁂𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀮𑀯𑀢𑁄 𑀆𑀭𑁄𑀘𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀣𑁂𑀭𑁄 𑀓𑀸𑀮𑀯𑀢𑁄 𑀦𑀲𑁆𑀲𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀢𑁆𑀢𑀓𑀸𑀮𑁂𑀧𑀺 𑀆𑀭𑁄𑀘𑁂𑀢𑀼𑀦𑁆𑀢𑀺.

𑀪𑀢𑁆𑀢𑀓𑀸𑀮𑁂𑀧𑀺 𑀦𑀲𑁆𑀲𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀓𑀸𑀮𑀁 𑀲𑀭𑀢𑀺, 𑀢𑀁 𑀓𑀸𑀮𑀁 𑀆𑀭𑁄𑀘𑁂𑀢𑀼𑀦𑁆𑀢𑀺.

𑁮𑁫. 𑀧𑀼𑀩𑁆𑀩𑀓𑀭𑀡𑀸𑀦𑀼𑀚𑀸𑀦𑀦𑀸

𑁧𑁫𑁯. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀉𑀧𑁄𑀲𑀣𑀸𑀕𑀸𑀭𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺. 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 ¶ 𑀦𑀸𑀫 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀉𑀧𑁄𑀲𑀣𑀸𑀕𑀸𑀭𑀁 𑀦 𑀲𑀫𑁆𑀫𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀺𑀢𑀼𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺.

𑀣𑁂𑀭𑁂𑀦 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀲𑀫𑁆𑀫𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀬𑁄 𑀦 𑀲𑀫𑁆𑀫𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁧𑁬𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑁄𑀲𑀣𑀸𑀕𑀸𑀭𑁂 𑀆𑀲𑀦𑀁 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽 𑀙𑀫𑀸𑀬𑀁 ¶ 𑀦𑀺𑀲𑀻𑀤𑀦𑁆𑀢𑀺, 𑀕𑀢𑁆𑀢𑀸𑀦𑀺𑀧𑀺 𑀘𑀻𑀯𑀭𑀸𑀦𑀺𑀧𑀺 𑀧𑀁𑀲𑀼𑀓𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸𑀕𑀸𑀭𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑀼𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀉𑀧𑁄𑀲𑀣𑀸𑀕𑀸𑀭𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺.

𑀣𑁂𑀭𑁂𑀦 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀧𑀜𑁆𑀜𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀬𑁄 𑀦 𑀧𑀜𑁆𑀜𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁧𑁬𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑁄𑀲𑀣𑀸𑀕𑀸𑀭𑁂 𑀧𑀤𑀻𑀧𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀽 𑀅𑀦𑁆𑀥𑀓𑀸𑀭𑁂 𑀓𑀸𑀬𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀓𑁆𑀓𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀸𑀕𑀸𑀭𑁂 𑀧𑀤𑀻𑀧𑀁 ¶ 𑀓𑀸𑀢𑀼𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀉𑀧𑁄𑀲𑀣𑀸𑀕𑀸𑀭𑁂 𑀧𑀤𑀻𑀧𑁄 𑀓𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺.

𑀣𑁂𑀭𑁂𑀦 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀧𑀤𑀻𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀧𑀤𑀻𑀧𑁂𑀢𑀩𑁆𑀩𑁄. 𑀬𑁄 𑀦 𑀧𑀤𑀻𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁧𑁬𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀦𑁂𑀯 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀺, 𑀦 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀺. 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀦𑁂𑀯 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺, 𑀦 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀼𑀦𑁆𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩’’𑀦𑁆𑀢𑀺 ¶ ? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺.

𑀣𑁂𑀭𑁂𑀦 ¶ 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀬𑁄 𑀦 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁮𑁬. 𑀤𑀺𑀲𑀁𑀕𑀫𑀺𑀓𑀸𑀤𑀺𑀯𑀢𑁆𑀣𑀼

𑁧𑁬𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀤𑀺𑀲𑀁𑀕𑀫𑀺𑀓𑀸 ¶ 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀦 𑀆𑀧𑀼𑀘𑁆𑀙𑀺𑀁𑀲𑀼 [𑀦 𑀆𑀧𑀼𑀘𑁆𑀙𑀺𑀁𑀲𑀼 (𑀓.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀤𑀺𑀲𑀁𑀕𑀫𑀺𑀓𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀦 𑀆𑀧𑀼𑀘𑁆𑀙𑀦𑁆𑀢𑀺 [𑀦 𑀆𑀧𑀼𑀘𑁆𑀙𑀦𑁆𑀢𑀺 (𑀓.)]. 𑀢𑁂 [𑀢𑁂𑀳𑀺 (𑀓.)], 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀸 𑁋 ‘‘𑀓𑀳𑀁 𑀕𑀫𑀺𑀲𑁆𑀲𑀣, 𑀓𑁂𑀦 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀣𑀸’’𑀢𑀺? 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀜𑁆𑀜𑁂 𑀩𑀸𑀮𑁂 𑀅𑀩𑁆𑀬𑀢𑁆𑀢𑁂 𑀅𑀧𑀤𑀺𑀲𑁂𑀬𑁆𑀬𑀼𑀁, 𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀸. 𑀅𑀦𑀼𑀚𑀸𑀦𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀘, 𑀪𑀺𑀓𑁆𑀔𑀯𑁂, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀦𑀦𑀼𑀜𑁆𑀜𑀸𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀕𑀘𑁆𑀙𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑀢𑁆𑀣 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀲𑁄 𑀪𑀺𑀓𑁆𑀔𑀼 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀉𑀧𑀮𑀸𑀧𑁂𑀢𑀩𑁆𑀩𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑀘𑀼𑀡𑁆𑀡𑁂𑀦 𑀫𑀢𑁆𑀢𑀺𑀓𑀸𑀬 𑀤𑀦𑁆𑀢𑀓𑀝𑁆𑀞𑁂𑀦 𑀫𑀼𑀔𑁄𑀤𑀓𑁂𑀦. 𑀦𑁄 𑀘𑁂 𑀲𑀗𑁆𑀕𑀡𑁆𑀳𑁂𑀬𑁆𑀬𑀼𑀁 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀼𑀁 𑀉𑀧𑀮𑀸𑀧𑁂𑀬𑁆𑀬𑀼𑀁 𑀉𑀧𑀝𑁆𑀞𑀸𑀧𑁂𑀬𑁆𑀬𑀼𑀁 𑀘𑀼𑀡𑁆𑀡𑁂𑀦 𑀫𑀢𑁆𑀢𑀺𑀓𑀸𑀬 𑀤𑀦𑁆𑀢𑀓𑀝𑁆𑀞𑁂𑀦 𑀫𑀼𑀔𑁄𑀤𑀓𑁂𑀦, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 ¶ 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 ¶ 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 ¶ 𑀲𑀩𑁆𑀩𑁂𑀳𑁂𑀯 𑀬𑀢𑁆𑀣 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸, 𑀲𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 ¶ . 𑀦𑁄 𑀘𑁂 𑀕𑀘𑁆𑀙𑁂𑀬𑁆𑀬𑀼𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀯𑀲𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀏𑀓𑁄 𑀪𑀺𑀓𑁆𑀔𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀆𑀕𑀘𑁆𑀙𑀸’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀦, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀁. 𑀯𑀲𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁮𑁭. 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀓𑀣𑀸

𑁧𑁬𑁪. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀦𑀺𑀧𑀢𑀣, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ¶ 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄, 𑀲𑁄 𑀅𑀦𑀸𑀕𑀢𑁄’’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸 𑁋 𑀢𑁂𑀦 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺. 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀲𑁄, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀫𑀜𑁆𑀘𑁂𑀦 𑀯𑀸 𑀧𑀻𑀞𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀦𑁂𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀲𑀘𑁂 𑀔𑁄 𑀫𑀬𑀁 𑀕𑀺𑀮𑀸𑀦𑀁 𑀞𑀸𑀦𑀸 𑀘𑀸𑀯𑁂𑀲𑁆𑀲𑀸𑀫, 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺, 𑀦, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀞𑀸𑀦𑀸 𑀘𑀸𑀯𑁂𑀢𑀩𑁆𑀩𑁄. 𑀲𑀗𑁆𑀖𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 ¶ 𑀓𑀸𑀢𑀩𑁆𑀩𑁄. 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀸𑀭𑀺𑀲𑀼𑀤𑁆𑀥𑀺. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀢𑀢𑁆𑀣𑁂𑀯 𑀯𑀺𑀩𑁆𑀪𑀫𑀢𑀺,…𑀧𑁂… 𑀓𑀸𑀮𑀁 𑀓𑀭𑁄𑀢𑀺 𑁋 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺 ¶ 𑁋 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 ¶ 𑀧𑀝𑀺𑀚𑀸𑀦𑀸𑀢𑀺 𑁋 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀸𑀭𑀺𑀲𑀼𑀤𑁆𑀥𑀺.

𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀓𑁆𑀓𑀫𑀢𑀺, 𑀅𑀦𑀸𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀩𑁆𑀪𑀫𑀢𑀺,…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑀸𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺.

𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀓𑁆𑀓𑀫𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀺,…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺.

𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀼𑀢𑁆𑀢𑁄 𑀦 𑀆𑀭𑁄𑀘𑁂𑀢𑀺, 𑀧𑀫𑀢𑁆𑀢𑁄 𑀦 𑀆𑀭𑁄𑀘𑁂𑀢𑀺, 𑀲𑀫𑀸𑀧𑀦𑁆𑀦𑁄 𑀦 𑀆𑀭𑁄𑀘𑁂𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂 ¶ , 𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀜𑁆𑀘𑀺𑀘𑁆𑀘 𑀦 𑀆𑀭𑁄𑀘𑁂𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁮𑁮. 𑀙𑀦𑁆𑀤𑀤𑀸𑀦𑀓𑀣𑀸

𑁧𑁬𑁫. 𑀅𑀣 ¶ 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀦𑀺𑀧𑀢𑀣, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺 ¶ . 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄, 𑀲𑁄 𑀅𑀦𑀸𑀕𑀢𑁄’’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀙𑀦𑁆𑀤𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄. 𑀢𑁂𑀦 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀙𑀦𑁆𑀤𑀁 𑀤𑀫𑁆𑀫𑀺, 𑀙𑀦𑁆𑀤𑀁 𑀫𑁂 𑀳𑀭, 𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺. 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀤𑀺𑀦𑁆𑀦𑁄 𑀳𑁄𑀢𑀺 𑀙𑀦𑁆𑀤𑁄. 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀤𑀺𑀦𑁆𑀦𑁄 𑀳𑁄𑀢𑀺 𑀙𑀦𑁆𑀤𑁄. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀲𑁄, 𑀪𑀺𑀓𑁆𑀔𑀯𑁂 ¶ , 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀫𑀜𑁆𑀘𑁂𑀦 𑀯𑀸 𑀧𑀻𑀞𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀲𑀘𑁂 𑀔𑁄 𑀫𑀬𑀁 𑀕𑀺𑀮𑀸𑀦𑀁 𑀞𑀸𑀦𑀸 𑀘𑀸𑀯𑁂𑀲𑁆𑀲𑀸𑀫, 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺, 𑀦, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀞𑀸𑀦𑀸 𑀘𑀸𑀯𑁂𑀢𑀩𑁆𑀩𑁄. 𑀲𑀗𑁆𑀖𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀓𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀙𑀦𑁆𑀤𑀳𑀸𑀭𑀓𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄 𑀙𑀦𑁆𑀤𑁄. 𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀢𑀢𑁆𑀣𑁂𑀯 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀁𑀓𑀭𑁄𑀢𑀺 𑁋 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄 𑀙𑀦𑁆𑀤𑁄.

𑀙𑀦𑁆𑀤𑀳𑀸𑀭𑀓𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀓𑁆𑀓𑀫𑀢𑀺, 𑀅𑀦𑀸𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄. 𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀩𑁆𑀪𑀫𑀢𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑀸𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄.

𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀓𑁆𑀓𑀫𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄. 𑀙𑀦𑁆𑀤𑀳𑀸𑀭𑀓𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄.

𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 ¶ 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀼𑀢𑁆𑀢𑁄 𑀦 𑀆𑀭𑁄𑀘𑁂𑀢𑀺, 𑀧𑀫𑀢𑁆𑀢𑁄 𑀦 𑀆𑀭𑁄𑀘𑁂𑀢𑀺, 𑀲𑀫𑀸𑀧𑀦𑁆𑀦𑁄 𑀦 𑀆𑀭𑁄𑀘𑁂𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄. 𑀙𑀦𑁆𑀤𑀳𑀸𑀭𑀓𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀜𑁆𑀘𑀺𑀘𑁆𑀘 𑀦 𑀆𑀭𑁄𑀘𑁂𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄. 𑀙𑀦𑁆𑀤𑀳𑀸𑀭𑀓𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼𑀁, 𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀦𑁆𑀢𑀺.

𑁮𑁯. 𑀜𑀸𑀢𑀓𑀸𑀤𑀺𑀕𑁆𑀕𑀳𑀡𑀓𑀣𑀸

𑁧𑁬𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀢𑀤𑀳𑀼𑀧𑁄𑀲𑀣𑁂 𑀜𑀸𑀢𑀓𑀸 𑀕𑀡𑁆𑀳𑀺𑀁𑀲𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀢𑀤𑀳𑀼𑀧𑁄𑀲𑀣𑁂 𑀜𑀸𑀢𑀓𑀸 𑀕𑀡𑁆𑀳𑀦𑁆𑀢𑀺. 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀫𑀼𑀜𑁆𑀘𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀓𑀭𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀦𑀺𑀲𑁆𑀲𑀻𑀫𑀁 𑀦𑁂𑀣, 𑀬𑀸𑀯 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀢𑀤𑀳𑀼𑀧𑁄𑀲𑀣𑁂 𑀭𑀸𑀚𑀸𑀦𑁄 𑀕𑀡𑁆𑀳𑀦𑁆𑀢𑀺,…𑀧𑁂… 𑀘𑁄𑀭𑀸 𑀕𑀡𑁆𑀳𑀦𑁆𑀢𑀺 𑁋 𑀥𑀼𑀢𑁆𑀢𑀸 ¶ 𑀕𑀡𑁆𑀳𑀦𑁆𑀢𑀺 𑁋 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀫𑀼𑀜𑁆𑀘𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀓𑀭𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 ¶ 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀦𑀺𑀲𑁆𑀲𑀻𑀫𑀁 𑀦𑁂𑀣, 𑀬𑀸𑀯 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁯𑁦. 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺

𑁧𑁬𑁭. 𑀅𑀣 ¶ 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀦𑀺𑀧𑀢𑀣, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀕𑀕𑁆𑀕𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄, 𑀲𑁄 𑀅𑀦𑀸𑀕𑀢𑁄’’𑀢𑀺.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀉𑀫𑁆𑀫𑀢𑁆𑀢𑀓𑀸 𑁋 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑀲𑀭𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀲𑀭𑀢𑀺, 𑀲𑀭𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀲𑀭𑀢𑀺, 𑀅𑀢𑁆𑀣𑀺 𑀦𑁂𑀯 𑀲𑀭𑀢𑀺; 𑀆𑀕𑀘𑁆𑀙𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀆𑀕𑀘𑁆𑀙𑀢𑀺, 𑀅𑀢𑁆𑀣𑀺 𑀦𑁂𑀯 𑀆𑀕𑀘𑁆𑀙𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀉𑀫𑁆𑀫𑀢𑁆𑀢𑀓𑁄 𑀲𑀭𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀲𑀭𑀢𑀺, 𑀲𑀭𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀲𑀭𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 ¶ 𑀦𑀧𑀺 𑀆𑀕𑀘𑁆𑀙𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑁆𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑁋 𑀲𑀭𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀲𑀭𑀢𑀺, 𑀲𑀭𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀲𑀭𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀆𑀕𑀘𑁆𑀙𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺𑀁 ¶ 𑀤𑀤𑁂𑀬𑁆𑀬. 𑀲𑀭𑁂𑀬𑁆𑀬 𑀯𑀸 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀦 𑀯𑀸 𑀲𑀭𑁂𑀬𑁆𑀬, 𑀲𑀭𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀲𑀭𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀉𑀧𑁄𑀲𑀣𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑀗𑁆𑀖𑁄 𑀲𑀳 𑀯𑀸 𑀕𑀕𑁆𑀕𑁂𑀦 𑀯𑀺𑀦𑀸 𑀯𑀸 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀫𑁆𑀫𑀢𑁆𑀢𑀓𑁄 𑁋 𑀲𑀭𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀲𑀭𑀢𑀺, 𑀲𑀭𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀲𑀭𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀉𑀧𑁄𑀲𑀣𑀁 𑀦𑀧𑀺 𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀺𑀧𑀺 𑀲𑀗𑁆𑀖𑀓𑀫𑁆𑀫𑀁 𑀦𑀧𑀺 𑀆𑀕𑀘𑁆𑀙𑀢𑀺. 𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺𑀁 ¶ 𑀤𑁂𑀢𑀺. 𑀲𑀭𑁂𑀬𑁆𑀬 𑀯𑀸 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀦 𑀯𑀸 𑀲𑀭𑁂𑀬𑁆𑀬, 𑀲𑀭𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀲𑀭𑁂𑀬𑁆𑀬𑀁, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀉𑀧𑁄𑀲𑀣𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑀗𑁆𑀖𑁄 𑀲𑀳 𑀯𑀸 𑀕𑀕𑁆𑀕𑁂𑀦, 𑀯𑀺𑀦𑀸 𑀯𑀸 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 ¶ 𑀉𑀫𑁆𑀫𑀢𑁆𑀢𑀓𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁 𑁋 𑀲𑀭𑁂𑀬𑁆𑀬 𑀯𑀸 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀦 𑀯𑀸 𑀲𑀭𑁂𑀬𑁆𑀬, 𑀲𑀭𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀲𑀭𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀉𑀧𑁄𑀲𑀣𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑀗𑁆𑀖𑁄 𑀲𑀳 𑀯𑀸 𑀕𑀕𑁆𑀕𑁂𑀦, 𑀯𑀺𑀦𑀸 𑀯𑀸 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺. 𑀲𑀭𑁂𑀬𑁆𑀬 𑀯𑀸 𑀕𑀕𑁆𑀕𑁄 𑀪𑀺𑀓𑁆𑀔𑀼 𑀉𑀧𑁄𑀲𑀣𑀁 𑀦 𑀯𑀸 𑀲𑀭𑁂𑀬𑁆𑀬, 𑀲𑀭𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀲𑀭𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀉𑀧𑁄𑀲𑀣𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑀗𑁆𑀖𑁄 𑀲𑀳 𑀯𑀸 𑀕𑀕𑁆𑀕𑁂𑀦 𑀯𑀺𑀦𑀸 𑀯𑀸 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁯𑁧. 𑀲𑀗𑁆𑀖𑀼𑀧𑁄𑀲𑀣𑀸𑀤𑀺𑀧𑁆𑀧𑀪𑁂𑀤𑀁

𑁧𑁬𑁮. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’𑀢𑀺, 𑀫𑀬𑀜𑁆𑀘𑀫𑁆𑀳𑀸 𑀘𑀢𑁆𑀢𑀸𑀭𑁄 𑀚𑀦𑀸, 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 ¶ 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀫𑀬𑀜𑁆𑀘𑀫𑁆𑀳𑀸 𑀢𑀬𑁄 ¶ 𑀚𑀦𑀸, 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺.

𑀣𑁂𑀭𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺.

𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀢𑀺𑀡𑁆𑀡𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁. 𑀫𑀬𑀜𑁆𑀘𑀫𑁆𑀳𑀸 𑀤𑁆𑀯𑁂 𑀚𑀦𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁 ¶ . 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀯𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀳𑀺. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 ¶ 𑀫𑀁 𑀥𑀸𑀭𑁂𑀳𑀺. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺.

𑀦𑀯𑀓𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀣𑁂𑀭𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣. 𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂; 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀢𑀺𑀡𑁆𑀡𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁. 𑀅𑀳𑀜𑁆𑀘𑀫𑁆𑀳𑀺 𑀏𑀓𑀓𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀬𑀢𑁆𑀣 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸, 𑀫𑀡𑁆𑀟𑀧𑁂 𑀯𑀸, 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 ¶ 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀆𑀲𑀦𑀁 ¶ 𑀧𑀜𑁆𑀜𑀧𑁂𑀢𑁆𑀯𑀸 𑀧𑀤𑀻𑀧𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀦𑁄 𑀘𑁂 𑀆𑀕𑀘𑁆𑀙𑀦𑁆𑀢𑀺, 𑀅𑀚𑁆𑀚 𑀫𑁂 𑀉𑀧𑁄𑀲𑀣𑁄𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀦𑁄 𑀘𑁂 𑀅𑀥𑀺𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀢𑀻𑀳𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑀺𑀲𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀤𑁆𑀯𑀻𑀳𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑀭𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀏𑀓𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀅𑀥𑀺𑀝𑁆𑀞𑀳𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁯𑁨. 𑀆𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺

𑁧𑁬𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀤𑀳𑀼𑀧𑁄𑀲𑀣𑁂 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼𑀧𑁄𑀲𑀣𑁂 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ¶ 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀲𑁆𑀲𑀲𑀻’’𑀢𑀺. ‘‘𑀆𑀫 ¶ 𑀧𑀲𑁆𑀲𑀸𑀫𑀻’’𑀢𑀺. ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼𑀧𑁄𑀲𑀣𑁂 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄; 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀤𑁂𑀲𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀬𑁄 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀬𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁯𑁩. 𑀆𑀧𑀢𑁆𑀢𑀺𑀆𑀯𑀺𑀓𑀭𑀡𑀯𑀺𑀥𑀺

𑁧𑁭𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀆𑀧𑀢𑁆𑀢𑀺𑀁 𑀲𑀭𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 ¶ 𑀆𑀧𑀢𑁆𑀢𑀺𑀁 𑀲𑀭𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀸𑀫𑀦𑁆𑀢𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀇𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀸𑀫𑀦𑁆𑀢𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ¶ 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄. 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄𑀢𑀺.

𑁯𑁪. 𑀲𑀪𑀸𑀕𑀸𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺

𑁧𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀦 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸’𑀢𑀺 ¶ . 𑀅𑀬𑀜𑁆𑀘 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 ¶ 𑀆𑀕𑀘𑁆𑀙; 𑀫𑀬𑀁 𑀢𑁂 𑀲𑀦𑁆𑀢𑀺𑀓𑁂 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀬𑀤𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀼𑀤𑁆𑀥𑀁 𑀅𑀦𑀸𑀧𑀢𑁆𑀢𑀺𑀓𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄. 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀽𑀧𑀕𑀢𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀕𑀘𑁆𑀙; 𑀫𑀬𑀁 𑀢𑁂 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀏𑀓𑁄 𑀪𑀺𑀓𑁆𑀔𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀕𑀘𑁆𑀙; 𑀫𑀬𑀁 𑀢𑁂 𑀲𑀦𑁆𑀢𑀺𑀓𑁂 𑀢𑀁 ¶ 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀦 𑀚𑀸𑀦𑀸𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀦𑀸𑀫𑀕𑁄𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺, 𑀓𑀺𑀁 𑀦𑀸𑀫 ¶ 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺? 𑀲𑁄 𑀏𑀯𑀫𑀸𑀳 𑁋 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺, 𑀇𑀫𑀁 𑀦𑀸𑀫 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀫𑀁 𑀦𑀸𑀫 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀏𑀓𑁄𑀯 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀅𑀬𑀁 𑀲𑀩𑁆𑀩𑁄 ¶ 𑀲𑀗𑁆𑀖𑁄 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀢𑁂, 𑀆𑀯𑀼𑀲𑁄, 𑀓𑀭𑀺𑀲𑁆𑀲𑀢𑀺 𑀧𑀭𑁄 𑀆𑀧𑀦𑁆𑀦𑁄 𑀯𑀸 𑀅𑀦𑀸𑀧𑀦𑁆𑀦𑁄 𑀯𑀸. 𑀇𑀗𑁆𑀖, 𑀢𑁆𑀯𑀁, 𑀆𑀯𑀼𑀲𑁄, 𑀲𑀓𑀸𑀬 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀬𑁄 𑀓𑀺𑀭, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺, 𑀇𑀫𑀁 𑀦𑀸𑀫 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀫𑀁 𑀦𑀸𑀫 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸; 𑀧𑀝𑀺𑀓𑀭𑁄𑀣 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀦 𑀇𑀘𑁆𑀙𑀺𑀁𑀲𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦 ¶ 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀦 𑀚𑀸𑀦𑀸𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀦𑀸𑀫𑀕𑁄𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 ¶ 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀢𑀺 𑁋 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺, 𑀓𑀺𑀁 𑀦𑀸𑀫 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺, 𑀇𑀫𑀁 𑀦𑀸𑀫 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀫𑀁 𑀦𑀸𑀫 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄; 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀏𑀓𑁄𑀯 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀓𑀺𑀁 𑀢𑁂, 𑀆𑀯𑀼𑀲𑁄, 𑀓𑀭𑀺𑀲𑁆𑀲𑀢𑀺 𑀧𑀭𑁄 𑀆𑀧𑀦𑁆𑀦𑁄 𑀯𑀸 𑀅𑀦𑀸𑀧𑀦𑁆𑀦𑁄 𑀯𑀸. 𑀇𑀗𑁆𑀖, 𑀢𑁆𑀯𑀁, 𑀆𑀯𑀼𑀲𑁄, 𑀲𑀓𑀸𑀬 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀳𑀻’’𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀯𑀤𑁂𑀢𑀺 𑁋 ‘‘𑀬𑁄 𑀓𑀺𑀭, 𑀆𑀯𑀼𑀲𑁄, 𑀏𑀯𑀜𑁆𑀘𑁂𑀯𑀜𑁆𑀘 𑀓𑀭𑁄𑀢𑀺 𑀇𑀫𑀁 𑀦𑀸𑀫 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀇𑀫𑀁 𑀦𑀸𑀫 𑀢𑀼𑀫𑁆𑀳𑁂 𑀆𑀯𑀼𑀲𑁄 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸, 𑀧𑀝𑀺𑀓𑀭𑁄𑀣 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦 𑀢𑀁 𑀆𑀧𑀢𑁆𑀢𑀺𑀁 ¶ 𑀧𑀝𑀺𑀓𑀭𑁂𑀬𑁆𑀬𑀼𑀁, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀝𑀺𑀓𑀭𑁂𑀬𑁆𑀬𑀼𑀁, 𑀦 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀓𑀸𑀫𑀸 𑀯𑀘𑀦𑀻𑀬𑀸𑀢𑀺.

𑀘𑁄𑀤𑀦𑀸𑀯𑀢𑁆𑀣𑀼𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.

𑁯𑁫. 𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀁

𑁧𑁭𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀁𑀲𑀼 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀺𑀁𑀲𑀼 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺 ¶ . 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀅𑀓𑀁𑀲𑀼, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀁𑀲𑀼. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀺𑀁𑀲𑀼 𑀩𑀳𑀼𑀢𑀭𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 ¶ 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 ¶ 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 ¶ 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 ¶ 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 ¶ 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 ¶ 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 ¶ . 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 ¶ 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀸𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 ¶ 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁯𑁬. 𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀻𑀧𑀦𑁆𑀦𑀭𑀲𑀓𑀁

𑁧𑁭𑁩. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 ¶ , 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 ¶ 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺, 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸 ¶ . 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸𑀢𑀺 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 ¶ 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 ¶ 𑀧𑀭𑀺𑀲𑀸𑀬 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸…𑀧𑁂… 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀺𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁯𑁭. 𑀯𑁂𑀫𑀢𑀺𑀓𑀧𑀦𑁆𑀦𑀭𑀲𑀓𑀁

𑁧𑁭𑁪. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂, 𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁 𑀦 𑀦𑀼 𑀔𑁄 𑀓𑀧𑁆𑀧𑀢𑀻𑀢𑀺, 𑀯𑁂𑀫𑀢𑀺𑀓𑀸 ¶ 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺, 𑀢𑁂 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺, 𑀯𑁂𑀫𑀢𑀺𑀓𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 ¶ 𑀅𑀦𑀸𑀕𑀢𑀸𑀢𑀺, 𑀢𑁂 𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻𑀢𑀺, 𑀯𑁂𑀫𑀢𑀺𑀓𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂, ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺, 𑀯𑁂𑀫𑀢𑀺𑀓𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂,…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸…𑀧𑁂… 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀯𑁂𑀫𑀢𑀺𑀓𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁯𑁮. 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀧𑀦𑁆𑀦𑀭𑀲𑀓𑀁

𑁧𑁭𑁫. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 ¶ 𑀉𑀧𑁄𑀲𑀣𑁄 𑀓𑀸𑀢𑀼𑀁 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁, 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂 ¶ , 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑁄 𑀓𑀸𑀢𑀼𑀁 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂,…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸 ¶ …𑀧𑁂… 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁯𑁯. 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀧𑀦𑁆𑀦𑀭𑀲𑀓𑀁

𑁧𑁭𑁬. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 ¶ .

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀅𑀯𑀲𑁂𑀲𑀁 𑀲𑁄𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺 ¶ . 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 ¶ 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 ¶ 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀢𑁂𑀳𑀺 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸. 𑀉𑀤𑁆𑀤𑁂𑀲𑀓𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀜𑁆𑀘𑀯𑀻𑀲𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁦. 𑀲𑀻𑀫𑁄𑀓𑁆𑀓𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀁

𑁧𑁭𑁭. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀫𑀦𑁆𑀢𑀻’’𑀢𑀺 ¶ …𑀧𑁂… 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑀸’’𑀢𑀺…𑀧𑁂… 𑀢𑁂 𑀦 𑀧𑀲𑁆𑀲𑀦𑁆𑀢𑀺 𑀅𑀜𑁆𑀜𑁂 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀫𑀦𑁆𑀢𑁂 ¶ …𑀧𑁂… 𑀢𑁂 𑀦 𑀧𑀲𑁆𑀲𑀦𑁆𑀢𑀺 𑀅𑀜𑁆𑀜𑁂 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑁂…𑀧𑁂… 𑀢𑁂 𑀦 𑀲𑀼𑀡𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀫𑀦𑁆𑀢𑀻’’𑀢𑀺…𑀧𑁂… 𑀢𑁂 𑀦 𑀲𑀼𑀡𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑀸’’𑀢𑀺…𑀧𑁂….

𑀆𑀯𑀸𑀲𑀺𑀓𑁂𑀦 𑀆𑀯𑀸𑀲𑀺𑀓𑀸 𑀏𑀓𑀲𑀢𑀧𑀜𑁆𑀘𑀲𑀢𑁆𑀢𑀢𑀺 𑀢𑀺𑀓𑀦𑀬𑀢𑁄, 𑀆𑀯𑀸𑀲𑀺𑀓𑁂𑀦 𑀆𑀕𑀦𑁆𑀢𑀼𑀓𑀸, 𑀆𑀕𑀦𑁆𑀢𑀼𑀓𑁂𑀦 𑀆𑀯𑀸𑀲𑀺𑀓𑀸, 𑀆𑀕𑀦𑁆𑀢𑀼𑀓𑁂𑀦 𑀆𑀕𑀦𑁆𑀢𑀼𑀓𑀸 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀲𑀢𑁆𑀢 𑀢𑀺𑀓𑀲𑀢𑀸𑀦𑀺 𑀳𑁄𑀦𑁆𑀢𑀺.

𑁧𑁭𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀧𑀤𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 ¶ 𑀆𑀕𑀦𑁆𑀢𑀼𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻. 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻. 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 ¶ 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 ¶

𑀧𑀸𑀝𑀺𑀧𑀤𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸 𑀦𑀺𑀲𑁆𑀲𑀻𑀫𑀁 ¶ 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻. 𑀆𑀯𑀸𑀲𑀺𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄.

𑀲𑀻𑀫𑁄𑀓𑁆𑀓𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.

𑁧𑁦𑁧. 𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀁

𑁧𑁭𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑀺𑀓𑀸𑀓𑀸𑀭𑀁, 𑀆𑀯𑀸𑀲𑀺𑀓𑀮𑀺𑀗𑁆𑀕𑀁, 𑀆𑀯𑀸𑀲𑀺𑀓𑀦𑀺𑀫𑀺𑀢𑁆𑀢𑀁, 𑀆𑀯𑀸𑀲𑀺𑀓𑀼𑀤𑁆𑀤𑁂𑀲𑀁, 𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞𑀁, 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀲𑀽𑀧𑀝𑁆𑀞𑀺𑀢𑀁, 𑀧𑀭𑀺𑀯𑁂𑀡𑀁 𑀲𑀼𑀲𑀫𑁆𑀫𑀝𑁆𑀞𑀁; 𑀧𑀲𑁆𑀲𑀺𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺; 𑀅𑀯𑀺𑀘𑀺𑀦𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺; 𑀅𑀧𑀲𑁆𑀲𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 ¶ 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀼𑀡𑀦𑁆𑀢𑀺 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑀺𑀓𑀸𑀓𑀸𑀭𑀁, 𑀆𑀯𑀸𑀲𑀺𑀓𑀮𑀺𑀗𑁆𑀕𑀁, 𑀆𑀯𑀸𑀲𑀺𑀓𑀦𑀺𑀫𑀺𑀢𑁆𑀢𑀁, 𑀆𑀯𑀸𑀲𑀺𑀓𑀼𑀤𑁆𑀤𑁂𑀲𑀁, 𑀘𑀗𑁆𑀓𑀫𑀦𑁆𑀢𑀸𑀦𑀁 𑀧𑀤𑀲𑀤𑁆𑀤𑀁, 𑀲𑀚𑁆𑀛𑀸𑀬𑀲𑀤𑁆𑀤𑀁, 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁, 𑀔𑀺𑀧𑀺𑀢𑀲𑀤𑁆𑀤𑀁; 𑀲𑀼𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺; 𑀅𑀯𑀺𑀘𑀺𑀦𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺; 𑀅𑀧𑀲𑁆𑀲𑀺𑀢𑁆𑀯𑀸 𑀉𑀧𑁄𑀲𑀣𑀁 ¶ 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀸𑀓𑀸𑀭𑀁, 𑀆𑀕𑀦𑁆𑀢𑀼𑀓𑀮𑀺𑀗𑁆𑀕𑀁, 𑀆𑀕𑀦𑁆𑀢𑀼𑀓𑀦𑀺𑀫𑀺𑀢𑁆𑀢𑀁, 𑀆𑀕𑀦𑁆𑀢𑀼𑀓𑀼𑀤𑁆𑀤𑁂𑀲𑀁, 𑀅𑀜𑁆𑀜𑀸𑀢𑀓𑀁 𑀧𑀢𑁆𑀢𑀁, 𑀅𑀜𑁆𑀜𑀸𑀢𑀓𑀁 ¶ 𑀘𑀻𑀯𑀭𑀁, 𑀅𑀜𑁆𑀜𑀸𑀢𑀓𑀁 𑀦𑀺𑀲𑀻𑀤𑀦𑀁, 𑀧𑀸𑀤𑀸𑀦𑀁 𑀥𑁄𑀢𑀁, 𑀉𑀤𑀓𑀦𑀺𑀲𑁆𑀲𑁂𑀓𑀁; 𑀧𑀲𑁆𑀲𑀺𑀢𑁆𑀯𑀸 ¶ 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺; 𑀅𑀯𑀺𑀘𑀺𑀦𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺; 𑀅𑀧𑀲𑁆𑀲𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀼𑀡𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀸𑀓𑀸𑀭𑀁, 𑀆𑀕𑀦𑁆𑀢𑀼𑀓𑀮𑀺𑀗𑁆𑀕𑀁, 𑀆𑀕𑀦𑁆𑀢𑀼𑀓𑀦𑀺𑀫𑀺𑀢𑁆𑀢𑀁, 𑀆𑀕𑀦𑁆𑀢𑀼𑀓𑀼𑀤𑁆𑀤𑁂𑀲𑀁, 𑀆𑀕𑀘𑁆𑀙𑀦𑁆𑀢𑀸𑀦𑀁 𑀧𑀤𑀲𑀤𑁆𑀤𑀁, 𑀉𑀧𑀸𑀳𑀦𑀧𑀧𑁆𑀨𑁄𑀝𑀦𑀲𑀤𑁆𑀤𑀁, 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁, 𑀔𑀺𑀧𑀺𑀢𑀲𑀤𑁆𑀤𑀁; 𑀲𑀼𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺; 𑀅𑀯𑀺𑀘𑀺𑀦𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺; 𑀅𑀧𑀲𑁆𑀲𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺; 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺; 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂 ¶ , 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 ¶ .

𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁦𑁨. 𑀦𑀸𑀦𑀸𑀲𑀁𑀯𑀸𑀲𑀓𑀸𑀤𑀻𑀳𑀺 𑀉𑀧𑁄𑀲𑀣𑀓𑀭𑀡𑀁

𑁧𑁮𑁦. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑁂. 𑀢𑁂 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺; 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺; 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺; 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑁂. 𑀢𑁂 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺; 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺; 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺; 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑁂. 𑀢𑁂 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺; 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺; 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺 ¶ ; 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑁂. 𑀢𑁂 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺; 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺; 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺; 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺; 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀦𑀸𑀦𑀸𑀲𑀁𑀯𑀸𑀲𑀓𑀸𑀤𑀻𑀳𑀺 𑀉𑀧𑁄𑀲𑀣𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.

𑁧𑁦𑁩. 𑀦𑀕𑀦𑁆𑀢𑀩𑁆𑀩𑀯𑀸𑀭𑁄

𑁧𑁮𑁧. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂 ¶ , 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦 ¶ , 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂 ¶ , 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 ¶ 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 ¶ 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 ¶ 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦𑀕𑀦𑁆𑀢𑀩𑁆𑀩𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁦𑁪. 𑀕𑀦𑁆𑀢𑀩𑁆𑀩𑀯𑀸𑀭𑁄

𑁧𑁮𑁨. 𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑁋 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺. 𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑁋 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 ¶ 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑁋 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑁋 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁦𑁫. 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀸

𑁧𑁮𑁩. 𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀲𑀺𑀓𑁆𑀔𑀫𑀸𑀦𑀸𑀬…𑀧𑁂… 𑀦 𑀲𑀸𑀫𑀡𑁂𑀭𑀲𑁆𑀲 ¶ …𑀧𑁂… 𑀦 𑀲𑀸𑀫𑀡𑁂𑀭𑀺𑀬𑀸…𑀧𑁂… 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀲𑁆𑀲…𑀧𑁂… 𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀦 ¶ 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬…𑀧𑁂… 𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄.

𑀦 𑀧𑀡𑁆𑀟𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑀲𑁆𑀲…𑀧𑁂… ¶ 𑀦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀲𑁆𑀲…𑀧𑁂… 𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲…𑀧𑁂… ¶ 𑀦 𑀫𑀸𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀦 𑀧𑀺𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀦 𑀅𑀭𑀳𑀦𑁆𑀢𑀖𑀸𑀢𑀓𑀲𑁆𑀲…𑀧𑁂… 𑀦 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑁆𑀲…𑀧𑁂… 𑀦 𑀲𑀗𑁆𑀖𑀪𑁂𑀤𑀓𑀲𑁆𑀲…𑀧𑁂… 𑀦 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑁆𑀲…𑀧𑁂… 𑀦 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸𑀢𑀺.

𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁄 𑀤𑀼𑀢𑀺𑀬𑁄.

𑁧𑁦𑁬. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀢𑀺𑀢𑁆𑀣𑀺𑀬𑀸 𑀩𑀺𑀫𑁆𑀩𑀺𑀲𑀸𑀭𑁄 𑀘, 𑀲𑀦𑁆𑀦𑀺𑀧𑀢𑀺𑀢𑀼𑀁 𑀢𑀼𑀡𑁆𑀳𑀺𑀓𑀸;

𑀥𑀫𑁆𑀫𑀁 𑀭𑀳𑁄 𑀧𑀸𑀢𑀺𑀫𑁄𑀓𑁆𑀔𑀁, 𑀤𑁂𑀯𑀲𑀺𑀓𑀁 𑀢𑀤𑀸 𑀲𑀓𑀺𑀁.

𑀬𑀣𑀸𑀧𑀭𑀺𑀲𑀸 𑀲𑀫𑀕𑁆𑀕𑀁, 𑀲𑀸𑀫𑀕𑁆𑀕𑀻 𑀫𑀤𑁆𑀤𑀓𑀼𑀘𑁆𑀙𑀺 𑀘;

𑀲𑀻𑀫𑀸 𑀫𑀳𑀢𑀻 𑀦𑀤𑀺𑀬𑀸, 𑀅𑀦𑀼 𑀤𑁆𑀯𑁂 𑀔𑀼𑀤𑁆𑀤𑀓𑀸𑀦𑀺 𑀘.

𑀦𑀯𑀸 ¶ 𑀭𑀸𑀚𑀕𑀳𑁂 𑀘𑁂𑀯, 𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀦𑀸;

𑀲𑀫𑁆𑀫𑀦𑁆𑀦𑁂 [𑀲𑀫𑁆𑀫𑀦𑁂 (𑀓.)] 𑀧𑀞𑀫𑀁 𑀲𑀻𑀫𑀁, 𑀧𑀘𑁆𑀙𑀸 𑀲𑀻𑀫𑀁 𑀲𑀫𑀽𑀳𑀦𑁂.

𑀅𑀲𑀫𑁆𑀫𑀢𑀸 ¶ 𑀕𑀸𑀫𑀲𑀻𑀫𑀸, 𑀦𑀤𑀺𑀬𑀸 𑀲𑀫𑀼𑀤𑁆𑀤𑁂 𑀲𑀭𑁂;

𑀉𑀤𑀓𑀼𑀓𑁆𑀔𑁂𑀧𑁄 𑀪𑀺𑀦𑁆𑀤𑀦𑁆𑀢𑀺, 𑀢𑀣𑁂𑀯𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀘.

𑀓𑀢𑀺 ¶ 𑀓𑀫𑁆𑀫𑀸𑀦𑀺 𑀉𑀤𑁆𑀤𑁂𑀲𑁄, 𑀲𑀯𑀭𑀸 𑀅𑀲𑀢𑀻𑀧𑀺 𑀘;

𑀥𑀫𑁆𑀫𑀁 𑀯𑀺𑀦𑀬𑀁 𑀢𑀚𑁆𑀚𑁂𑀦𑁆𑀢𑀺, 𑀧𑀼𑀦 𑀯𑀺𑀦𑀬𑀢𑀚𑁆𑀚𑀦𑀸.

𑀘𑁄𑀤𑀦𑀸 𑀓𑀢𑁂 𑀑𑀓𑀸𑀲𑁂, 𑀅𑀥𑀫𑁆𑀫𑀧𑁆𑀧𑀝𑀺𑀓𑁆𑀓𑁄𑀲𑀦𑀸;

𑀘𑀢𑀼𑀧𑀜𑁆𑀘𑀧𑀭𑀸 𑀆𑀯𑀺, 𑀲𑀜𑁆𑀘𑀺𑀘𑁆𑀘 𑀘𑁂𑀧𑀺 𑀯𑀸𑀬𑀫𑁂.

𑀲𑀕𑀳𑀝𑁆𑀞𑀸 𑀅𑀦𑀚𑁆𑀛𑀺𑀝𑁆𑀞𑀸, 𑀘𑁄𑀤𑀦𑀫𑁆𑀳𑀺 𑀦 𑀚𑀸𑀦𑀢𑀺;

𑀲𑀫𑁆𑀩𑀳𑀼𑀮𑀸 𑀦 𑀚𑀸𑀦𑀦𑁆𑀢𑀺, 𑀲𑀚𑁆𑀚𑀼𑀓𑀁 𑀦 𑀘 𑀕𑀘𑁆𑀙𑀭𑁂.

𑀓𑀢𑀺𑀫𑀻 𑀓𑀻𑀯𑀢𑀺𑀓𑀸 𑀤𑀽𑀭𑁂, 𑀆𑀭𑁄𑀘𑁂𑀢𑀼𑀜𑁆𑀘 𑀦𑀲𑁆𑀲𑀭𑀺;

𑀉𑀓𑁆𑀮𑀸𑀧𑀁 𑀆𑀲𑀦𑀁 𑀤𑀻𑀧𑁄, 𑀤𑀺𑀲𑀸 𑀅𑀜𑁆𑀜𑁄 𑀩𑀳𑀼𑀲𑁆𑀲𑀼𑀢𑁄.

𑀲𑀚𑁆𑀚𑀼𑀓𑀁 [𑀲𑀚𑁆𑀚𑀼𑀯𑀲𑁆𑀲𑀭𑀼𑀧𑁄𑀲𑀣𑁄 (𑀓.)] 𑀯𑀲𑁆𑀲𑀼𑀧𑁄𑀲𑀣𑁄, 𑀲𑀼𑀤𑁆𑀥𑀺𑀓𑀫𑁆𑀫𑀜𑁆𑀘 𑀜𑀸𑀢𑀓𑀸;

𑀕𑀕𑁆𑀕𑁄 𑀘𑀢𑀼𑀢𑀬𑁄 𑀤𑁆𑀯𑁂𑀓𑁄, 𑀆𑀧𑀢𑁆𑀢𑀺𑀲𑀪𑀸𑀕𑀸 𑀲𑀭𑀺.

𑀲𑀩𑁆𑀩𑁄 𑀲𑀗𑁆𑀖𑁄 𑀯𑁂𑀫𑀢𑀺𑀓𑁄, 𑀦 𑀚𑀸𑀦𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑁄;

𑀩𑀳𑀽 𑀲𑀫𑀲𑀫𑀸 𑀣𑁄𑀓𑀸, 𑀧𑀭𑀺𑀲𑀸 𑀅𑀯𑀼𑀝𑁆𑀞𑀺𑀢𑀸𑀬 𑀘.

𑀏𑀓𑀘𑁆𑀘𑀸 𑀯𑀼𑀝𑁆𑀞𑀺𑀢𑀸 𑀲𑀩𑁆𑀩𑀸, 𑀚𑀸𑀦𑀦𑁆𑀢𑀺 𑀘 𑀯𑁂𑀫𑀢𑀺𑀓𑀸;

𑀓𑀧𑁆𑀧𑀢𑁂𑀯𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀸, 𑀚𑀸𑀦𑀁 𑀧𑀲𑁆𑀲𑀁 𑀲𑀼𑀡𑀦𑁆𑀢𑀺 𑀘.

𑀆𑀯𑀸𑀲𑀺𑀓𑁂𑀦 𑀆𑀕𑀦𑁆𑀢𑀼, 𑀘𑀸𑀢𑀼𑀧𑀦𑁆𑀦𑀭𑀲𑁄 𑀧𑀼𑀦;

𑀧𑀸𑀝𑀺𑀧𑀤𑁄 𑀧𑀦𑁆𑀦𑀭𑀲𑁄, 𑀮𑀺𑀗𑁆𑀕𑀲𑀁𑀯𑀸𑀲𑀓𑀸 𑀉𑀪𑁄.

𑀧𑀸𑀭𑀺𑀯𑀸𑀲𑀸𑀦𑀼𑀧𑁄𑀲𑀣𑁄 ¶ , 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸;

𑀏𑀢𑁂 𑀯𑀺𑀪𑀢𑁆𑀢𑀸 𑀉𑀤𑁆𑀤𑀸𑀦𑀸, 𑀯𑀢𑁆𑀣𑀼𑀯𑀺𑀪𑀽𑀢𑀓𑀸𑀭𑀡𑀸𑀢𑀺.

𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀙𑀅𑀲𑀻𑀢𑀺.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁩. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁄

𑁧𑁦𑁭. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀦𑀼𑀚𑀸𑀦𑀦𑀸

𑁧𑁮𑁪. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀸𑀯𑀸𑀲𑁄 𑀅𑀧𑀜𑁆𑀜𑀢𑁆𑀢𑁄 𑀳𑁄𑀢𑀺. 𑀢𑁂𑀇𑀥 𑀪𑀺𑀓𑁆𑀔𑀽 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀦𑁆𑀢𑀺, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀫𑀤𑁆𑀤𑀦𑁆𑀢𑀸, 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸, 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸. 𑀇𑀫𑁂 𑀳𑀺 𑀦𑀸𑀫 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀗𑁆𑀓𑀲𑀸𑀬𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀳𑀺 𑀦𑀸𑀫 𑀲𑀓𑀼𑀦𑁆𑀢𑀓𑀸 𑀭𑀼𑀓𑁆𑀔𑀕𑁆𑀕𑁂𑀲𑀼 𑀓𑀼𑀮𑀸𑀯𑀓𑀸𑀦𑀺 𑀓𑀭𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀗𑁆𑀓𑀲𑀸𑀬𑀺𑀲𑁆𑀲𑀦𑁆𑀢𑀺 [𑀲𑀗𑁆𑀓𑀸𑀲𑀬𑀺𑀲𑁆𑀲𑀦𑁆𑀢𑀺 (𑀲𑀻. 𑀲𑁆𑀬𑀸.)]. 𑀇𑀫𑁂 𑀧𑀦 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀫𑀤𑁆𑀤𑀦𑁆𑀢𑀸, 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸, 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀸𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀦𑁆𑀢𑀺.

𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁

𑀆𑀭𑁄𑀘𑁂𑀲𑀼𑀁. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑁋 𑀧𑀼𑀭𑀺𑀫𑀺𑀓𑀸, 𑀧𑀘𑁆𑀙𑀺𑀫𑀺𑀓𑀸. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺.

𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦𑁮. 𑀯𑀲𑁆𑀲𑀸𑀦𑁂 𑀘𑀸𑀭𑀺𑀓𑀸𑀧𑀝𑀺𑀓𑁆𑀔𑁂𑀧𑀸𑀤𑀺

𑁧𑁮𑁫. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀢𑀣𑁂𑀯 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 ¶ 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀦𑁆𑀢𑀺, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀫𑀤𑁆𑀤𑀦𑁆𑀢𑀸, 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸, 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸. 𑀇𑀫𑁂 𑀳𑀺 𑀦𑀸𑀫 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀗𑁆𑀓𑀲𑀸𑀬𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀳𑀺 𑀦𑀸𑀫 𑀲𑀓𑀼𑀦𑁆𑀢𑀓𑀸 𑀭𑀼𑀓𑁆𑀔𑀕𑁆𑀕𑁂𑀲𑀼 𑀓𑀼𑀮𑀸𑀯𑀓𑀸𑀦𑀺 𑀓𑀭𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀁 𑀅𑀮𑁆𑀮𑀻𑀬𑀺𑀲𑁆𑀲𑀦𑁆𑀢𑀺 𑀲𑀗𑁆𑀓𑀲𑀸𑀬𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀧𑀦 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑁂𑀫𑀦𑁆𑀢𑀫𑁆𑀧𑀺 𑀕𑀺𑀫𑁆𑀳𑀫𑁆𑀧𑀺 𑀯𑀲𑁆𑀲𑀫𑁆𑀧𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺, 𑀳𑀭𑀺𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀫𑀤𑁆𑀤𑀦𑁆𑀢𑀸, 𑀏𑀓𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀸, 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀦𑁆𑀢𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ¶ 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀬𑁄 𑀧𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁧𑁮𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀦 𑀇𑀘𑁆𑀙𑀦𑁆𑀢𑀺 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀦 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀦 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑀤𑀳𑀼 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑀸 𑀲𑀜𑁆𑀘𑀺𑀘𑁆𑀘 𑀆𑀯𑀸𑀲𑀁 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑁂𑀦 𑀲𑀜𑁆𑀘𑀺𑀘𑁆𑀘 𑀆𑀯𑀸𑀲𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄. 𑀬𑁄 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀢𑀼𑀓𑀸𑀫𑁄

𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀬𑀤𑀺 𑀧𑀦𑀸𑀬𑁆𑀬𑀸 𑀆𑀕𑀫𑁂 𑀚𑀼𑀡𑁆𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼𑀦𑁆𑀢𑀺.

𑀯𑀲𑁆𑀲𑀸𑀦𑁂 𑀘𑀸𑀭𑀺𑀓𑀸𑀧𑀝𑀺𑀓𑁆𑀔𑁂𑀧𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁦𑁯. 𑀲𑀢𑁆𑀢𑀸𑀳𑀓𑀭𑀡𑀻𑀬𑀸𑀦𑀼𑀚𑀸𑀦𑀦𑀸

𑁧𑁮𑁭. 𑀅𑀣 ¶ ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 ¶ ¶ 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀉𑀤𑁂𑀦𑁂𑀦 𑀉𑀧𑀸𑀲𑀓𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀕𑀯𑀢𑀸, 𑀆𑀯𑀼𑀲𑁄, 𑀧𑀜𑁆𑀜𑀢𑁆𑀢𑀁 ‘𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸’𑀢𑀺. 𑀆𑀕𑀫𑁂𑀢𑀼 𑀉𑀤𑁂𑀦𑁄 𑀉𑀧𑀸𑀲𑀓𑁄, 𑀬𑀸𑀯 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀯𑀲𑀦𑁆𑀢𑀺. 𑀯𑀲𑁆𑀲𑀁𑀯𑀼𑀝𑁆𑀞𑀸 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀘𑁆𑀘𑀸𑀬𑀺𑀓𑀁 𑀓𑀭𑀡𑀻𑀬𑀁, 𑀢𑀢𑁆𑀣𑁂𑀯 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀯𑀺𑀳𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑀽’’𑀢𑀺. 𑀉𑀤𑁂𑀦𑁄 𑀉𑀧𑀸𑀲𑀓𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 𑀫𑀬𑀸 𑀧𑀳𑀺𑀢𑁂 𑀦 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀅𑀳𑀜𑁆𑀳𑀺 𑀤𑀸𑀬𑀓𑁄 𑀓𑀸𑀭𑀓𑁄 𑀲𑀗𑁆𑀖𑀼𑀧𑀝𑁆𑀞𑀸𑀓𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀉𑀤𑁂𑀦𑀲𑁆𑀲 𑀉𑀧𑀸𑀲𑀓𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂 𑀕𑀦𑁆𑀢𑀼𑀁, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬, 𑀲𑀸𑀫𑀡𑁂𑀭𑀲𑁆𑀲, 𑀲𑀸𑀫𑀡𑁂𑀭𑀺𑀬𑀸, 𑀉𑀧𑀸𑀲𑀓𑀲𑁆𑀲, 𑀉𑀧𑀸𑀲𑀺𑀓𑀸𑀬 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂 𑀕𑀦𑁆𑀢𑀼𑀁, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄’’.

𑁧𑁮𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 ¶ 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀅𑀟𑁆𑀠𑀬𑁄𑀕𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺…𑀧𑁂… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀯𑀘𑁆𑀘𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺 ¶ … 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺 ¶ … 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀁 𑀓𑀸𑀭𑀸𑀧𑀺𑀢𑀁 ¶ 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀅𑀟𑁆𑀠𑀬𑁄𑀕𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺 ¶ … 𑀳𑀫𑁆𑀫𑀺𑀬𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀯𑀘𑁆𑀘𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀲𑀺𑀓𑁆𑀔𑀫𑀸𑀦𑀸𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀺𑀓𑁆𑀔𑀫𑀸𑀦𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑁂 𑀲𑀸𑀫𑀡𑁂𑀭𑁂 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀸𑀫𑀡𑁂𑀭𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀲𑀸𑀫𑀡𑁂𑀭𑀺𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀸𑀫𑀡𑁂𑀭𑀺𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺…𑀧𑁂… 𑀅𑀟𑁆𑀠𑀬𑁄𑀕𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 ¶ 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺 ¶ … 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁 ¶ , 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁮𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀺𑀯𑁂𑀲𑀦𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺…𑀧𑁂… 𑀲𑀬𑀦𑀺𑀖𑀭𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀉𑀤𑁄𑀲𑀺𑀢𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀅𑀝𑁆𑀝𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀫𑀸𑀴𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀧𑀡𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀧𑀡𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀭𑀲𑀯𑀢𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺 ¶ … 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀧𑀼𑀢𑁆𑀢𑀲𑁆𑀲 𑀯𑀸 𑀯𑀸𑀭𑁂𑀬𑁆𑀬𑀁 𑀳𑁄𑀢𑀺… 𑀥𑀻𑀢𑀼𑀬𑀸 𑀯𑀸 𑀯𑀸𑀭𑁂𑀬𑁆𑀬𑀁 𑀳𑁄𑀢𑀺… 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺… 𑀅𑀪𑀺𑀜𑁆𑀜𑀸𑀢𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀪𑀡𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀧𑀼𑀭𑀸𑀬𑀁 𑀲𑀼𑀢𑁆𑀢𑀦𑁆𑀢𑁄 ¶ 𑀦 𑀧𑀮𑀼𑀚𑁆𑀚𑀢𑀻’𑀢𑀺. 𑀅𑀜𑁆𑀜𑀢𑀭𑀁 𑀯𑀸 𑀧𑀦𑀲𑁆𑀲 𑀓𑀺𑀘𑁆𑀘𑀁 𑀳𑁄𑀢𑀺 𑁋 𑀓𑀭𑀡𑀻𑀬𑀁 𑀯𑀸, 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁦. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀬 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀬 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀅𑀟𑁆𑀠𑀬𑁄𑀕𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺…𑀧𑁂… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀯𑀘𑁆𑀘𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀤𑀧𑀸𑀦𑀲𑀸𑀮𑀸 ¶ 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀚𑀦𑁆𑀢𑀸𑀖𑀭𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 ¶ 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀬 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀲𑀺𑀓𑁆𑀔𑀫𑀸𑀦𑀸𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀺𑀓𑁆𑀔𑀫𑀸𑀦𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑁂 𑀲𑀸𑀫𑀡𑁂𑀭𑁂 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀸𑀫𑀡𑁂𑀭𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀲𑀫𑁆𑀩𑀳𑀼𑀮𑀸 𑀲𑀸𑀫𑀡𑁂𑀭𑀺𑀬𑁄 𑀉𑀤𑁆𑀤𑀺𑀲𑁆𑀲…𑀧𑁂… 𑀏𑀓𑀁 𑀲𑀸𑀫𑀡𑁂𑀭𑀺𑀁 𑀉𑀤𑁆𑀤𑀺𑀲𑁆𑀲…𑀧𑁂….

𑁧𑁯𑁧. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀬 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀺𑀯𑁂𑀲𑀦𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺…𑀧𑁂… 𑀲𑀬𑀦𑀺𑀖𑀭𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀉𑀤𑁄𑀲𑀺𑀢𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀅𑀝𑁆𑀝𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀫𑀸𑀴𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀧𑀡𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀧𑀡𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 ¶ 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀭𑀲𑀯𑀢𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺 ¶ … 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀧𑀼𑀢𑁆𑀢𑀲𑁆𑀲 𑀯𑀸 𑀯𑀸𑀭𑁂𑀬𑁆𑀬𑀁 𑀳𑁄𑀢𑀺… 𑀥𑀻𑀢𑀼𑀬𑀸 𑀯𑀸 𑀯𑀸𑀭𑁂𑀬𑁆𑀬𑀁 𑀳𑁄𑀢𑀺… 𑀕𑀺𑀮𑀸𑀦𑀸 𑀯𑀸 𑀳𑁄𑀢𑀺… 𑀅𑀪𑀺𑀜𑁆𑀜𑀸𑀢𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀪𑀡𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀧𑀼𑀭𑀸𑀬𑀁 𑀲𑀼𑀢𑁆𑀢𑀦𑁆𑀢𑁄 𑀧𑀮𑀼𑀚𑁆𑀚𑀢𑀻’’𑀢𑀺. 𑀅𑀜𑁆𑀜𑀢𑀭𑀁 𑀯𑀸 𑀧𑀦𑀲𑁆𑀲𑀸 𑀓𑀺𑀘𑁆𑀘𑀁 𑀳𑁄𑀢𑀺 𑀓𑀭𑀡𑀻𑀬𑀁 𑀯𑀸, 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁨. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲…𑀧𑁂… 𑀪𑀺𑀓𑁆𑀔𑀼𑀦𑀺𑀬𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲… 𑀲𑀺𑀓𑁆𑀔𑀫𑀸𑀦𑀸𑀬 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲… 𑀲𑀸𑀫𑀡𑁂𑀭𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲… 𑀲𑀸𑀫𑀡𑁂𑀭𑀺𑀬𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 ¶ … 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲… 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲… 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲… 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁆𑀤𑀺𑀲𑁆𑀲… 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀉𑀤𑁆𑀤𑀺𑀲𑁆𑀲… 𑀲𑀫𑁆𑀩𑀳𑀼𑀮𑀸 𑀲𑀺𑀓𑁆𑀔𑀫𑀸𑀦𑀸𑀬𑁄 𑀉𑀤𑁆𑀤𑀺𑀲𑁆𑀲… 𑀏𑀓𑀁 𑀲𑀺𑀓𑁆𑀔𑀫𑀸𑀦𑀁 𑀉𑀤𑁆𑀤𑀺𑀲𑁆𑀲… 𑀲𑀫𑁆𑀩𑀳𑀼𑀮𑁂 𑀲𑀸𑀫𑀡𑁂𑀭𑁂 𑀉𑀤𑁆𑀤𑀺𑀲𑁆𑀲… 𑀏𑀓𑀁 𑀲𑀸𑀫𑀡𑁂𑀭𑀁 𑀉𑀤𑁆𑀤𑀺𑀲𑁆𑀲… 𑀲𑀫𑁆𑀩𑀳𑀼𑀮𑀸 ¶ 𑀲𑀸𑀫𑀡𑁂𑀭𑀺𑀬𑁄 𑀉𑀤𑁆𑀤𑀺𑀲𑁆𑀲… 𑀏𑀓𑀁 𑀲𑀸𑀫𑀡𑁂𑀭𑀺𑀁 𑀉𑀤𑁆𑀤𑀺𑀲𑁆𑀲… 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺…𑀧𑁂… 𑀅𑀟𑁆𑀠𑀬𑁄𑀕𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀧𑀸𑀲𑀸𑀤𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀳𑀫𑁆𑀫𑀺𑀬𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺… 𑀕𑀼𑀳𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺 ¶ … 𑀓𑁄𑀝𑁆𑀞𑀓𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀅𑀕𑁆𑀕𑀺𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀘𑀗𑁆𑀓𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀘𑀗𑁆𑀓𑀫𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀉𑀤𑀧𑀸𑀦𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀉𑀤𑀧𑀸𑀦𑀲𑀸𑀮𑀸 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀧𑁄𑀓𑁆𑀔𑀭𑀡𑀻 𑀓𑀸𑀭𑀸𑀧𑀺𑀢𑀸 𑀳𑁄𑀢𑀺… 𑀫𑀡𑁆𑀟𑀧𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺… 𑀆𑀭𑀸𑀫𑀯𑀢𑁆𑀣𑀼 𑀓𑀸𑀭𑀸𑀧𑀺𑀢𑀁 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 ¶ 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬… ‘‘𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄𑀢𑀺.

𑀲𑀢𑁆𑀢𑀸𑀳𑀓𑀭𑀡𑀻𑀬𑀸𑀦𑀼𑀚𑀸𑀦𑀢𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁦. 𑀧𑀜𑁆𑀘𑀦𑁆𑀦𑀁 𑀅𑀧𑁆𑀧𑀳𑀺𑀢𑁂𑀧𑀺 𑀅𑀦𑀼𑀚𑀸𑀦𑀦𑀸

𑁧𑁯𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬, 𑀲𑀸𑀫𑀡𑁂𑀭𑀲𑁆𑀲, 𑀲𑀸𑀫𑀡𑁂𑀭𑀺𑀬𑀸 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 ¶ 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀦𑀪𑀺𑀭𑀢𑀺 𑀫𑁂 𑀉𑀧𑁆𑀧𑀦𑁆𑀦𑀸, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀲𑁆𑀲𑀸𑀫𑀺 𑀯𑀸, 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀫𑁂 𑀉𑀧𑁆𑀧𑀦𑁆𑀦𑀁, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀺 𑀯𑀸, 𑀯𑀺𑀦𑁄𑀤𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 ¶ 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀤𑀺𑀝𑁆𑀞𑀺𑀕𑀢𑀁 𑀫𑁂 𑀉𑀧𑁆𑀧𑀦𑁆𑀦𑀁, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀤𑀺𑀝𑁆𑀞𑀺𑀕𑀢𑀁 𑀯𑀺𑀯𑁂𑀘𑁂𑀲𑁆𑀲𑀸𑀫𑀺 𑀯𑀸, 𑀯𑀺𑀯𑁂𑀘𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄. 𑀲𑁄 ¶ 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀧𑀭𑀺𑀯𑀸𑀲𑀸𑀭𑀳𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀧𑀭𑀺𑀯𑀸𑀲𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀫𑀸𑀦𑀢𑁆𑀢𑀸𑀭𑀳𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀫𑀸𑀦𑀢𑁆𑀢𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ¶ 𑁋 ‘‘𑀅𑀳𑀜𑁆𑀳𑀺 𑀅𑀩𑁆𑀪𑀸𑀦𑀸𑀭𑀳𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀅𑀩𑁆𑀪𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 ¶ 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺 𑀢𑀚𑁆𑀚𑀦𑀻𑀬𑀁 𑀯𑀸, 𑀦𑀺𑀬𑀲𑁆𑀲𑀁 𑀯𑀸, 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸, 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸, 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀲𑀗𑁆𑀖𑁄 𑀫𑁂 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀓𑀺𑀦𑁆𑀢𑀺 𑀦𑀼 ¶ 𑀔𑁄 𑀲𑀗𑁆𑀖𑁄 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ‘‘𑀲𑀗𑁆𑀖𑁄 𑀫𑁂 𑀓𑀫𑁆𑀫𑀁 𑀅𑀓𑀸𑀲𑀺, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁪. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 ¶ 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀦𑀪𑀺𑀭𑀢𑀺 𑀫𑁂 𑀉𑀧𑁆𑀧𑀦𑁆𑀦𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀲𑁆𑀲𑀸𑀫𑀺 𑀯𑀸, 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀫𑁂 𑀉𑀧𑁆𑀧𑀦𑁆𑀦𑀁, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 ¶ 𑀧𑀳𑀺𑀢𑁂 𑁋 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀺 𑀯𑀸, 𑀯𑀺𑀦𑁄𑀤𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀤𑀺𑀝𑁆𑀞𑀺𑀕𑀢𑀁 𑀫𑁂 𑀉𑀧𑁆𑀧𑀦𑁆𑀦𑀁, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀤𑀺𑀝𑁆𑀞𑀺𑀕𑀢𑀁 𑀯𑀺𑀯𑁂𑀘𑁂𑀲𑁆𑀲𑀸𑀫𑀺 𑀯𑀸, 𑀯𑀺𑀯𑁂𑀘𑀸𑀧𑁂𑀲𑁆𑀲𑀸𑀫𑀺 𑀯𑀸, 𑀥𑀫𑁆𑀫𑀓𑀣𑀁 𑀯𑀸𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀸 𑀳𑁄𑀢𑀺 𑀫𑀸𑀦𑀢𑁆𑀢𑀸𑀭𑀳𑀸. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀭𑀼𑀥𑀫𑁆𑀫𑀁 ¶ 𑀅𑀚𑁆𑀛𑀸𑀧𑀦𑁆𑀦𑀸 𑀫𑀸𑀦𑀢𑁆𑀢𑀸𑀭𑀳𑀸 ¶ , 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀫𑀸𑀦𑀢𑁆𑀢𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀅𑀩𑁆𑀪𑀸𑀦𑀸𑀭𑀳𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀅𑀩𑁆𑀪𑀸𑀦𑀸𑀭𑀳𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁 ¶ , 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀅𑀩𑁆𑀪𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺 𑁋 𑀢𑀚𑁆𑀚𑀦𑀻𑀬𑀁 𑀯𑀸, 𑀦𑀺𑀬𑀲𑁆𑀲𑀁 𑀯𑀸, 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸, 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸, 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀲𑀗𑁆𑀖𑁄 𑀫𑁂 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀓𑀢𑀁 ¶ 𑀯𑀸 𑀧𑀦𑀲𑁆𑀲𑀸 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁 𑁋 𑀢𑀚𑁆𑀚𑀦𑀻𑀬𑀁 𑀯𑀸 ¶ , 𑀦𑀺𑀬𑀲𑁆𑀲𑀁 𑀯𑀸, 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸, 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸, 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀲𑀗𑁆𑀖𑁄 𑀫𑁂 𑀓𑀫𑁆𑀫𑀁 𑀅𑀓𑀸𑀲𑀺, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀫𑀸𑀦𑀸 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺 𑁋 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀫𑀸𑀦𑀸𑀬 ¶ 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺…𑀧𑁂… 𑀲𑀺𑀓𑁆𑀔𑀫𑀸𑀦𑀸𑀬 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀺𑀓𑁆𑀔𑀫𑀸𑀦𑀸𑀬 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀺𑀓𑁆𑀔𑀫𑀸𑀦𑀸𑀬 𑀲𑀺𑀓𑁆𑀔𑀸 𑀓𑀼𑀧𑀺𑀢𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀲𑀺𑀓𑁆𑀔𑀸 𑀫𑁂 𑀓𑀼𑀧𑀺𑀢𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀫𑀸𑀦𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸 ¶ , 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 ¶ 𑀆𑀕𑀢’’𑀦𑁆𑀢𑀺 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 𑀉𑀧𑀲𑀫𑁆𑀧𑀤𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁬. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑁄 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽 ¶ , 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺…𑀧𑁂… 𑀲𑀸𑀫𑀡𑁂𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀸𑀫𑀡𑁂𑀭𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀸𑀫𑀡𑁂𑀭𑁄 𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑁄 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀉𑀧𑀲𑀫𑁆𑀧𑀤𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 ¶ 𑀯𑀸, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁭. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀻 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺 ¶ , 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀺𑀬𑀸 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺…𑀧𑁂… 𑀲𑀸𑀫𑀡𑁂𑀭𑀺𑀬𑀸 𑀓𑀼𑀓𑁆𑀓𑀼𑀘𑁆𑀘𑀁 ¶ 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀸𑀫𑀡𑁂𑀭𑀺𑀬𑀸 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺… 𑀲𑀸𑀫𑀡𑁂𑀭𑀻 𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀯𑀲𑁆𑀲𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀻 𑀲𑀺𑀓𑁆𑀔𑀁 𑀲𑀫𑀸𑀤𑀺𑀬𑀺𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀸 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀲𑀺𑀓𑁆𑀔𑀁 𑀲𑀫𑀸𑀤𑀺𑀬𑀺𑀢𑀼𑀓𑀸𑀫𑀸, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸, 𑀇𑀘𑁆𑀙𑀸𑀫𑀺 𑀅𑀬𑁆𑀬𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄𑀢𑀺.

𑀧𑀜𑁆𑀘𑀦𑁆𑀦𑀁 𑀅𑀧𑁆𑀧𑀳𑀺𑀢𑁂𑀧𑀺 𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁧. 𑀲𑀢𑁆𑀢𑀦𑁆𑀦𑀁 𑀅𑀧𑁆𑀧𑀳𑀺𑀢𑁂𑀧𑀺 𑀅𑀦𑀼𑀚𑀸𑀦𑀦𑀸

𑁧𑁯𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀸𑀢𑀸 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀢𑀼 𑀫𑁂 𑀧𑀼𑀢𑁆𑀢𑁄, 𑀇𑀘𑁆𑀙𑀸𑀫𑀺 𑀧𑀼𑀢𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂 𑀕𑀦𑁆𑀢𑀼𑀁, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂; 𑀧𑀜𑁆𑀘𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂𑀢𑀺. 𑀅𑀬𑀜𑁆𑀘 𑀫𑁂 𑀫𑀸𑀢𑀸 𑀕𑀺𑀮𑀸𑀦𑀸, 𑀲𑀸 𑀘 𑀅𑀦𑀼𑀧𑀸𑀲𑀺𑀓𑀸, 𑀓𑀣𑀁 ¶ 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬, 𑀲𑀸𑀫𑀡𑁂𑀭𑀲𑁆𑀲, 𑀲𑀸𑀫𑀡𑁂𑀭𑀺𑀬𑀸, 𑀫𑀸𑀢𑀼𑀬𑀸 𑀘 𑀧𑀺𑀢𑀼𑀲𑁆𑀲 𑀘 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀫𑀸𑀢𑀸 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀘𑁂 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀢𑀼 𑀫𑁂 𑀧𑀼𑀢𑁆𑀢𑁄, 𑀇𑀘𑁆𑀙𑀸𑀫𑀺 𑀧𑀼𑀢𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 ¶ 𑀧𑀺𑀢𑀸 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀢𑀼 𑀫𑁂 𑀧𑀼𑀢𑁆𑀢𑁄, 𑀇𑀘𑁆𑀙𑀸𑀫𑀺 𑀧𑀼𑀢𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸, 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀲𑀢𑁆𑀢𑀦𑁆𑀦𑀁 𑀅𑀧𑁆𑀧𑀳𑀺𑀢𑁂𑀧𑀺 𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁨. 𑀧𑀳𑀺𑀢𑁂𑀬𑁂𑀯 𑀅𑀦𑀼𑀚𑀸𑀦𑀦𑀸

𑁧𑁯𑁯. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀪𑀸𑀢𑀸 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀪𑀸𑀢𑀼𑀦𑁄 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀢𑀼 𑀫𑁂 𑀪𑀸𑀢𑀸, 𑀇𑀘𑁆𑀙𑀸𑀫𑀺 𑀪𑀸𑀢𑀼𑀦𑁄 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂 ¶ , 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀪𑀕𑀺𑀦𑀻 𑀕𑀺𑀮𑀸𑀦𑀸 𑀳𑁄𑀢𑀺. 𑀲𑀸 𑀘𑁂 𑀪𑀸𑀢𑀼𑀦𑁄 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑀸, 𑀆𑀕𑀘𑁆𑀙𑀢𑀼 𑀫𑁂 𑀪𑀸𑀢𑀸, 𑀇𑀘𑁆𑀙𑀸𑀫𑀺 𑀪𑀸𑀢𑀼𑀦𑁄 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀜𑀸𑀢𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀢𑀼 𑀪𑀤𑀦𑁆𑀢𑁄, 𑀇𑀘𑁆𑀙𑀸𑀫𑀺 𑀪𑀤𑀦𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀕𑀢𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 𑁋 ‘‘𑀅𑀳𑀜𑁆𑀳𑀺 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀪𑀤𑀦𑁆𑀢𑀸𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑁄 𑀉𑀦𑁆𑀤𑁆𑀭𑀺𑀬𑀢𑀺. 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀅𑀭𑀜𑁆𑀜𑁂 𑀪𑀡𑁆𑀟𑀁 𑀙𑁂𑀤𑀸𑀧𑀺𑀢𑀁 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀲𑀘𑁂 𑀪𑀤𑀦𑁆𑀢𑀸 𑀢𑀁 𑀪𑀡𑁆𑀟𑀁 𑀆𑀯𑀳𑀸𑀧𑁂𑀬𑁆𑀬𑀼𑀁, 𑀤𑀚𑁆𑀚𑀸𑀳𑀁 𑀢𑀁 𑀪𑀡𑁆𑀟’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁. 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄𑀢𑀺.

𑀧𑀳𑀺𑀢𑁂𑀬𑁂𑀯 𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀲𑁆𑀲𑀸𑀯𑀸𑀲𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁧𑁩. 𑀅𑀦𑁆𑀢𑀭𑀸𑀬𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀯𑀸𑀭𑁄

𑁨𑁦𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀯𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀕𑀡𑁆𑀳𑀺𑀁𑀲𑀼𑀧𑀺 𑀧𑀭𑀺𑀧𑀸𑀢𑀺𑀁𑀲𑀼𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀯𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀕𑀡𑁆𑀳𑀦𑁆𑀢𑀺𑀧𑀺 𑀧𑀭𑀺𑀧𑀸𑀢𑁂𑀦𑁆𑀢𑀺𑀧𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀲𑀭𑀻𑀲𑀧𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀟𑀁𑀲𑀦𑁆𑀢𑀺𑀧𑀺 𑀧𑀭𑀺𑀧𑀸𑀢𑁂𑀦𑁆𑀢𑀺𑀧𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲 ¶ .

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀘𑁄𑀭𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀯𑀺𑀮𑀼𑀫𑁆𑀧𑀦𑁆𑀢𑀺𑀧𑀺 𑀆𑀓𑁄𑀝𑁂𑀦𑁆𑀢𑀺𑀧𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀧𑀺𑀲𑀸𑀘𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀆𑀯𑀺𑀲𑀦𑁆𑀢𑀺𑀧𑀺 𑀳𑀦𑀦𑁆𑀢𑀺𑀧𑀺 [𑀑𑀚𑀫𑁆𑀧𑀺 𑀳𑀭𑀦𑁆𑀢𑀺 (𑀲𑀻.), 𑀳𑀭𑀦𑁆𑀢𑀺𑀧𑀺 (𑀲𑁆𑀬𑀸.)]. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀫𑁄 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀦𑁆𑀢𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁 𑀳𑁄𑀢𑀺. 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑁂𑀦 𑀓𑀺𑀮𑀫𑀦𑁆𑀢𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀫𑁄 𑀉𑀤𑀓𑁂𑀦 ¶ 𑀯𑀽𑀴𑁆𑀳𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀦𑁆𑀢𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀉𑀤𑀓𑁂𑀦 𑀯𑀽𑀴𑁆𑀳𑀁 𑀳𑁄𑀢𑀺. 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑁂𑀦 𑀓𑀺𑀮𑀫𑀦𑁆𑀢𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸𑀢𑀺.

𑁨𑁦𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀫𑁄 𑀘𑁄𑀭𑁂𑀳𑀺 𑀯𑀼𑀝𑁆𑀞𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀕𑀸𑀫𑁄 𑀢𑁂𑀦 𑀕𑀦𑁆𑀢𑀼𑀦𑁆𑀢𑀺.

𑀕𑀸𑀫𑁄 ¶ 𑀤𑁆𑀯𑁂𑀥𑀸 𑀪𑀺𑀚𑁆𑀚𑀺𑀢𑁆𑀣. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀩𑀳𑀼𑀢𑀭𑀸 𑀢𑁂𑀦 𑀕𑀦𑁆𑀢𑀼𑀦𑁆𑀢𑀺.

𑀩𑀳𑀼𑀢𑀭𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀢𑁂𑀦 𑀕𑀦𑁆𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀦 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀦 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 ¶ 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 ¶ , 𑀦 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦 𑀮𑀪𑀦𑁆𑀢𑀺 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁. 𑀏𑀲𑁂𑀯 𑀅𑀦𑁆𑀢𑀭𑀸𑀬𑁄𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀇𑀢𑁆𑀣𑀻 𑀦𑀺𑀫𑀦𑁆𑀢𑁂𑀢𑀺 𑁋 ‘‘𑀏𑀳𑀺, 𑀪𑀦𑁆𑀢𑁂, 𑀳𑀺𑀭𑀜𑁆𑀜𑀁 𑀯𑀸 𑀢𑁂 𑀤𑁂𑀫𑀺, 𑀲𑀼𑀯𑀡𑁆𑀡𑀁 𑀯𑀸 𑀢𑁂 𑀤𑁂𑀫𑀺, 𑀔𑁂𑀢𑁆𑀢𑀁 𑀯𑀸 𑀢𑁂 𑀤𑁂𑀫𑀺, 𑀯𑀢𑁆𑀣𑀼𑀁 𑀯𑀸 𑀢𑁂 𑀤𑁂𑀫𑀺, 𑀕𑀸𑀯𑀼𑀁 𑀯𑀸 𑀢𑁂 𑀤𑁂𑀫𑀺, 𑀕𑀸𑀯𑀺𑀁 𑀯𑀸 𑀢𑁂 𑀤𑁂𑀫𑀺, 𑀤𑀸𑀲𑀁 𑀯𑀸 𑀢𑁂 𑀤𑁂𑀫𑀺, 𑀤𑀸𑀲𑀺𑀁 𑀯𑀸 𑀢𑁂 𑀤𑁂𑀫𑀺, 𑀥𑀻𑀢𑀭𑀁 𑀯𑀸 𑀢𑁂 𑀤𑁂𑀫𑀺 𑀪𑀭𑀺𑀬𑀢𑁆𑀣𑀸𑀬, 𑀅𑀳𑀁 𑀯𑀸 𑀢𑁂 𑀪𑀭𑀺𑀬𑀸 𑀳𑁄𑀫𑀺, 𑀅𑀜𑁆𑀜𑀁 𑀯𑀸 𑀢𑁂 𑀪𑀭𑀺𑀬𑀁 𑀆𑀦𑁂𑀫𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀮𑀳𑀼𑀧𑀭𑀺𑀯𑀢𑁆𑀢𑀁 𑀔𑁄 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀲𑀺𑀬𑀸𑀧𑀺 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀯𑁂𑀲𑀻 𑀦𑀺𑀫𑀦𑁆𑀢𑁂𑀢𑀺…𑀧𑁂… 𑀣𑀼𑀮𑁆𑀮𑀓𑀼𑀫𑀸𑀭𑀻 𑀦𑀺𑀫𑀦𑁆𑀢𑁂𑀢𑀺… 𑀧𑀡𑁆𑀟𑀓𑁄 𑀦𑀺𑀫𑀦𑁆𑀢𑁂𑀢𑀺… 𑀜𑀸𑀢𑀓𑀸 𑀦𑀺𑀫𑀦𑁆𑀢𑁂𑀦𑁆𑀢𑀺… 𑀭𑀸𑀚𑀸𑀦𑁄 𑀦𑀺𑀫𑀦𑁆𑀢𑁂𑀦𑁆𑀢𑀺… 𑀘𑁄𑀭𑀸 𑀦𑀺𑀫𑀦𑁆𑀢𑁂𑀦𑁆𑀢𑀺… 𑀥𑀼𑀢𑁆𑀢𑀸 𑀦𑀺𑀫𑀦𑁆𑀢𑁂𑀦𑁆𑀢𑀺 𑁋 ‘‘𑀏𑀳𑀺, 𑀪𑀦𑁆𑀢𑁂, 𑀳𑀺𑀭𑀜𑁆𑀜𑀁 𑀯𑀸 𑀢𑁂 𑀤𑁂𑀫, 𑀲𑀼𑀯𑀡𑁆𑀡𑀁 𑀯𑀸 𑀢𑁂 𑀤𑁂𑀫, 𑀔𑁂𑀢𑁆𑀢𑀁 𑀯𑀸 𑀢𑁂 𑀤𑁂𑀫, 𑀯𑀢𑁆𑀣𑀼𑀁 𑀯𑀸 𑀢𑁂 𑀤𑁂𑀫 ¶ , 𑀕𑀸𑀯𑀼𑀁 𑀯𑀸 𑀢𑁂 𑀤𑁂𑀫, 𑀕𑀸𑀯𑀺𑀁 𑀯𑀸 𑀢𑁂 𑀤𑁂𑀫, 𑀤𑀸𑀲𑀁 𑀯𑀸 𑀢𑁂 𑀤𑁂𑀫, 𑀤𑀸𑀲𑀺𑀁 𑀯𑀸 𑀢𑁂 𑀤𑁂𑀫, 𑀥𑀻𑀢𑀭𑀁 𑀯𑀸 𑀢𑁂 𑀤𑁂𑀫 𑀪𑀭𑀺𑀬𑀢𑁆𑀣𑀸𑀬, 𑀅𑀜𑁆𑀜𑀁 𑀯𑀸 𑀢𑁂 𑀪𑀭𑀺𑀬𑀁 𑀆𑀦𑁂𑀫𑀸’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀮𑀳𑀼𑀧𑀭𑀺𑀯𑀢𑁆𑀢𑀁 𑀔𑁄 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀲𑀺𑀬𑀸𑀧𑀺 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀅𑀲𑁆𑀲𑀸𑀫𑀺𑀓𑀁 𑀦𑀺𑀥𑀺𑀁 𑀧𑀲𑁆𑀲𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀮𑀳𑀼𑀧𑀭𑀺𑀯𑀢𑁆𑀢𑀁 𑀔𑁄 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀲𑀺𑀬𑀸𑀧𑀺 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀅𑀦𑁆𑀢𑀭𑀸𑀬𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁧𑁪. 𑀲𑀗𑁆𑀖𑀪𑁂𑀤𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀯𑀸𑀭𑁄

𑁨𑁦𑁨. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑁂. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀕𑀭𑀼𑀓𑁄 𑀔𑁄 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸 𑀫𑀬𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀻’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺, ‘𑀕𑀭𑀼𑀓𑁄 𑀔𑁄 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸 𑀫𑀬𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀻’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑁂 𑀔𑁄 𑀫𑁂 𑀪𑀺𑀓𑁆𑀔𑀽 𑀫𑀺𑀢𑁆𑀢𑀸. 𑀢𑁆𑀬𑀸𑀳𑀁 𑀯𑀓𑁆𑀔𑀸𑀫𑀺 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 ¶ 𑀫𑁂 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 ¶ 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑁂 𑀔𑁄 𑀫𑁂 𑀪𑀺𑀓𑁆𑀔𑀽 𑀦 𑀫𑀺𑀢𑁆𑀢𑀸; 𑀅𑀧𑀺 𑀘 𑀬𑁂 𑀢𑁂𑀲𑀁 𑀫𑀺𑀢𑁆𑀢𑀸, 𑀢𑁂 𑀫𑁂 𑀫𑀺𑀢𑁆𑀢𑀸. 𑀢𑁆𑀬𑀸𑀳𑀁 𑀯𑀓𑁆𑀔𑀸𑀫𑀺. 𑀢𑁂 𑀯𑀼𑀢𑁆𑀢𑀸 𑀢𑁂 𑀯𑀓𑁆𑀔𑀦𑁆𑀢𑀺 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀢𑁂𑀲𑀁 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑁂 𑀔𑁄 𑀫𑁂 𑀪𑀺𑀓𑁆𑀔𑀽 𑀫𑀺𑀢𑁆𑀢𑀸. 𑀢𑁆𑀬𑀸𑀳𑀁 𑀯𑀓𑁆𑀔𑀸𑀫𑀺 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀫𑁂 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑁂 𑀔𑁄 𑀫𑁂 𑀪𑀺𑀓𑁆𑀔𑀽 𑀦 𑀫𑀺𑀢𑁆𑀢𑀸; 𑀅𑀧𑀺 𑀘, 𑀬𑁂 𑀢𑁂𑀲𑀁 𑀫𑀺𑀢𑁆𑀢𑀸 𑀢𑁂 𑀫𑁂 𑀫𑀺𑀢𑁆𑀢𑀸. 𑀢𑁆𑀬𑀸𑀳𑀁 𑀯𑀓𑁆𑀔𑀸𑀫𑀺. 𑀢𑁂 𑀯𑀼𑀢𑁆𑀢𑀸 𑀢𑁂 𑀯𑀓𑁆𑀔𑀦𑁆𑀢𑀺 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀢𑁂𑀲𑀁 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺 ¶ , 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 ¶ 𑀲𑀼𑀡𑀸𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑀸 𑀔𑁄 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀫𑀺𑀢𑁆𑀢𑀸. 𑀢𑀸𑀳𑀁 𑀯𑀓𑁆𑀔𑀸𑀫𑀺 ‘𑀕𑀭𑀼𑀓𑁄 𑀔𑁄, 𑀪𑀕𑀺𑀦𑀺𑀬𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸 𑀪𑀕𑀺𑀦𑀻𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀫𑁂 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑀸 𑀔𑁄 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀫𑀺𑀢𑁆𑀢𑀸. 𑀅𑀧𑀺 𑀘, 𑀬𑀸 𑀢𑀸𑀲𑀁 𑀫𑀺𑀢𑁆𑀢𑀸, 𑀢𑀸 𑀫𑁂 𑀫𑀺𑀢𑁆𑀢𑀸. 𑀢𑀸𑀳𑀁 𑀯𑀓𑁆𑀔𑀸𑀫𑀺. 𑀢𑀸 𑀯𑀼𑀢𑁆𑀢𑀸 𑀢𑀸 𑀯𑀓𑁆𑀔𑀦𑁆𑀢𑀺 ‘𑀕𑀭𑀼𑀓𑁄 ¶ 𑀔𑁄, 𑀪𑀕𑀺𑀦𑀺𑀬𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀫𑀸 𑀪𑀕𑀺𑀦𑀻𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀢𑀸𑀲𑀁 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑀸 𑀔𑁄 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀫𑀺𑀢𑁆𑀢𑀸. 𑀢𑀸𑀳𑀁 𑀯𑀓𑁆𑀔𑀸𑀫𑀺 ‘𑀕𑀭𑀼𑀓𑁄 𑀔𑁄, 𑀪𑀕𑀺𑀦𑀺𑀬𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀫𑀸 𑀪𑀕𑀺𑀦𑀻𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀫𑁂 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘‘𑀢𑀸 𑀔𑁄 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀫𑀺𑀢𑁆𑀢𑀸. 𑀅𑀧𑀺 𑀘, 𑀬𑀸 𑀢𑀸𑀲𑀁 𑀫𑀺𑀢𑁆𑀢𑀸 𑀢𑀸 𑀫𑁂 𑀫𑀺𑀢𑁆𑀢𑀸. 𑀢𑀸𑀳𑀁 𑀯𑀓𑁆𑀔𑀸𑀫𑀺. 𑀢𑀸 𑀯𑀼𑀢𑁆𑀢𑀸 𑀢𑀸 𑀯𑀓𑁆𑀔𑀦𑁆𑀢𑀺 ‘𑀕𑀭𑀼𑀓𑁄 𑀔𑁄, 𑀪𑀕𑀺𑀦𑀺𑀬𑁄 [𑀅𑀬𑁆𑀬𑀸𑀬𑁄 (𑀲𑀻.)], 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸; 𑀫𑀸 𑀪𑀕𑀺𑀦𑀻𑀦𑀁 [𑀅𑀬𑁆𑀬𑀸𑀦𑀁 (𑀲𑀻.)] 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺. 𑀓𑀭𑀺𑀲𑁆𑀲𑀦𑁆𑀢𑀺 𑀢𑀸𑀲𑀁 𑀯𑀘𑀦𑀁, 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸𑀢𑀺.

𑀲𑀗𑁆𑀖𑀪𑁂𑀤𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁧𑁫. 𑀯𑀚𑀸𑀤𑀻𑀲𑀼 𑀯𑀲𑁆𑀲𑀽𑀧𑀕𑀫𑀦𑀁

𑁨𑁦𑁩. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑀚𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑁄 ¶ 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀚𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀦𑁆𑀢𑀺. 𑀯𑀚𑁄 𑀯𑀼𑀝𑁆𑀞𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀚𑁄 𑀢𑁂𑀦 𑀕𑀦𑁆𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀲𑀢𑁆𑀣𑁂𑀦 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀦𑀸𑀯𑀸𑀬 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀦𑁆𑀢𑀺.

𑀯𑀚𑀸𑀤𑀻𑀲𑀼 𑀯𑀲𑁆𑀲𑀽𑀧𑀕𑀫𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁧𑁬. 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀸𑀦𑀺

𑁨𑁦𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀼𑀓𑁆𑀔𑀲𑀼𑀲𑀺𑀭𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀺𑀲𑀸𑀘𑀺𑀮𑁆𑀮𑀺𑀓𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀲𑀼𑀲𑀺𑀭𑁂 ¶ 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀼𑀓𑁆𑀔𑀯𑀺𑀝𑀪𑀺𑀬𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀫𑀺𑀕𑀮𑀼𑀤𑁆𑀤𑀓𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀯𑀺𑀝𑀪𑀺𑀬𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀭𑀼𑀓𑁆𑀔𑀫𑀽𑀮𑀫𑁆𑀧𑀺 ¶ 𑀦𑀺𑀩𑁆𑀩𑀓𑁄𑀲𑀫𑁆𑀧𑀺 𑀉𑀧𑀥𑀸𑀯𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑁄𑀓𑀸𑀲𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀲𑁂𑀦𑀸𑀲𑀦𑀺𑀓𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀲𑀻𑀢𑁂𑀦𑀧𑀺 𑀓𑀺𑀮𑀫𑀦𑁆𑀢𑀺, 𑀉𑀡𑁆𑀳𑁂𑀦𑀧𑀺 𑀓𑀺𑀮𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀯𑀓𑀼𑀝𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀙𑀯𑀟𑀸𑀳𑀓𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀙𑀯𑀓𑀼𑀝𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀢𑁆𑀢𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑁄𑀧𑀸𑀮𑀓𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 ¶ 𑀘𑀸𑀝𑀺𑀬𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀘𑀸𑀝𑀺𑀬𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀦𑀺𑀝𑁆𑀞𑀺𑀢𑀸.

𑁧𑁧𑁭. 𑀅𑀥𑀫𑁆𑀫𑀺𑀓𑀓𑀢𑀺𑀓𑀸

𑁨𑁦𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑁂𑀦 𑀏𑀯𑀭𑀽𑀧𑀸 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 𑁋 𑀅𑀦𑁆𑀢𑀭𑀸𑀯𑀲𑁆𑀲𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀦𑁆𑀢𑀺. 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀢𑁆𑀢𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀗𑁆𑀖𑁂𑀦 𑀔𑁄, 𑀆𑀯𑀼𑀲𑁄, 𑀏𑀯𑀭𑀽𑀧𑀸 𑀓𑀢𑀺𑀓𑀸 𑀓𑀢𑀸 ‘𑀅𑀦𑁆𑀢𑀭𑀸𑀯𑀲𑁆𑀲𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩’𑀦𑁆𑀢𑀺. 𑀆𑀕𑀫𑁂𑀳𑀺, 𑀆𑀯𑀼𑀲𑁄, 𑀬𑀸𑀯 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀯𑀲𑀦𑁆𑀢𑀺. 𑀯𑀲𑁆𑀲𑀁𑀯𑀼𑀝𑁆𑀞𑀸 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀢𑁆𑀢𑀸𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀳𑀺, 𑀤𑀸𑀦𑀺, 𑀆𑀯𑀼𑀲𑁄, 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀲𑀘𑀸𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑁄 𑀅𑀲𑁆𑀲𑀁, 𑀅𑀪𑀺𑀭𑀫𑁂𑀬𑁆𑀬𑀸𑀫𑀳𑀁 [𑀅𑀪𑀺𑀭𑀫𑁂𑀬𑁆𑀬𑀁 𑀘𑀸𑀳𑀁 (𑀲𑀻.)]. 𑀦 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 ¶ 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀏𑀯𑀭𑀽𑀧𑀁 𑀓𑀢𑀺𑀓𑀁 𑀓𑀭𑀺𑀲𑁆𑀲𑀦𑁆𑀢𑀺 ‘𑀦 𑀅𑀦𑁆𑀢𑀭𑀸𑀯𑀲𑁆𑀲𑀁 𑀧𑀩𑁆𑀩𑀸𑀚𑁂𑀢𑀩𑁆𑀩’𑀦𑁆𑀢𑀺. 𑀓𑀁 𑀓𑀸𑀮𑀁 𑀥𑀫𑁆𑀫𑁄 𑀦 𑀘𑀭𑀺𑀢𑀩𑁆𑀩𑁄’’𑀢𑀺? 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀉𑀚𑁆𑀛𑀸𑀬𑀦𑁆𑀢𑀺𑀬𑀸 𑀔𑀺𑀬𑁆𑀬𑀦𑁆𑀢𑀺𑀬𑀸 𑀯𑀺𑀧𑀸𑀘𑁂𑀦𑁆𑀢𑀺𑀬𑀸. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸 𑁋 ‘𑀦 𑀅𑀦𑁆𑀢𑀭𑀸𑀯𑀲𑁆𑀲𑀁 𑀧𑀩𑁆𑀩𑀸𑀚𑁂𑀢𑀩𑁆𑀩’𑀦𑁆𑀢𑀺. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀅𑀥𑀫𑁆𑀫𑀺𑀓𑀓𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁧𑁧𑁮. 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀸𑀧𑀢𑁆𑀢𑀺

𑁨𑁦𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑀸 𑀉𑀧𑀦𑀦𑁆𑀤𑁂𑀦 𑀲𑀓𑁆𑀬𑀧𑀼𑀢𑁆𑀢𑁂𑀦 ¶ 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁆𑀯𑁂 𑀆𑀯𑀸𑀲𑁂 𑀩𑀳𑀼𑀘𑀻𑀯𑀭𑀓𑁂. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑁂𑀬𑁆𑀬𑀁. 𑀏𑀯𑀁 𑀫𑁂 𑀩𑀳𑀼𑀁 𑀘𑀻𑀯𑀭𑀁 [𑀩𑀳𑀼𑀘𑀻𑀯𑀭𑀁 (𑀓.)] 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑁂𑀲𑀼 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀺. 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀲𑁆𑀲𑀢𑀺. 𑀦𑀦𑀼 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀼𑀲𑀸𑀯𑀸𑀤𑁄 𑀕𑀭𑀳𑀺𑀢𑁄, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 ¶ 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 ¶ 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀯𑀲𑁆𑀲𑀸𑀯𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀲𑁆𑀲𑀢𑀺. 𑀦𑀦𑀼 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀼𑀲𑀸𑀯𑀸𑀤𑁄 𑀕𑀭𑀳𑀺𑀢𑁄, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀯𑀲𑁆𑀲𑀸𑀯𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀯𑀲𑁆𑀲𑀸𑀯𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀲𑁆𑀲𑀲𑀺. 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 ¶ 𑀫𑀼𑀲𑀸𑀯𑀸𑀤𑁄 𑀕𑀭𑀳𑀺𑀢𑁄, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁨𑁦𑁭. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀧𑀲𑁆𑀲𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁆𑀯𑁂 𑀆𑀯𑀸𑀲𑁂 𑀩𑀳𑀼𑀘𑀻𑀯𑀭𑀓𑁂. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑁂𑀬𑁆𑀬𑀁. 𑀏𑀯𑀁 𑀫𑁂 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑁂𑀲𑀼 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 [𑀧𑀸𑀝𑀺𑀧𑀤𑁂𑀦 (𑀓.)] 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 ¶ 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 ¶ 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 ¶ . 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀅𑀦𑁆𑀢𑁄 𑀲𑀦𑁆𑀦𑀺𑀯𑀢𑁆𑀢𑀁 𑀓𑀭𑁄𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂 ¶ , 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺 ¶ , 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀼𑀭𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… ¶ 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀅𑀦𑁆𑀢𑁄 𑀲𑀦𑁆𑀦𑀺𑀯𑀢𑁆𑀢𑀁 𑀓𑀭𑁄𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 ¶ 𑀘 𑀅𑀦𑀸𑀧𑀢𑁆𑀢𑀺…𑀧𑁂… 𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑁨𑁦𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺 ¶ . 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 ¶ 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀅𑀦𑁆𑀢𑁄 𑀲𑀦𑁆𑀦𑀺𑀯𑀢𑁆𑀢𑀁 𑀓𑀭𑁄𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀦𑁆𑀢𑁄 𑀩𑀳𑀺𑀤𑁆𑀥𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀢𑀤𑀳𑁂𑀯 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀅𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺 ¶ …𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀲𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀲𑁄 𑀢𑀁 𑀲𑀢𑁆𑀢𑀸𑀳𑀁 ¶ 𑀅𑀦𑁆𑀢𑁄 𑀲𑀦𑁆𑀦𑀺𑀯𑀢𑁆𑀢𑀁 𑀓𑀭𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀸𑀯𑀸𑀲𑁄 𑀧𑀝𑀺𑀲𑁆𑀲𑀼𑀢𑁄 𑀳𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀧𑀸𑀝𑀺𑀧𑀤𑁂 𑀯𑀺𑀳𑀸𑀭𑀁 𑀉𑀧𑁂𑀢𑀺, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺. 𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺. 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺.

𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀦𑀺𑀝𑁆𑀞𑀺𑀢𑀸.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁄 𑀢𑀢𑀺𑀬𑁄.

𑁧𑁧𑁯. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀉𑀧𑀕𑀦𑁆𑀢𑀼𑀁 ¶ 𑀓𑀤𑀸 𑀘𑁂𑀯, 𑀓𑀢𑀺 𑀅𑀦𑁆𑀢𑀭𑀸𑀯𑀲𑁆𑀲 𑀘;

𑀦 𑀇𑀘𑁆𑀙𑀦𑁆𑀢𑀺 𑀘 𑀲𑀜𑁆𑀘𑀺𑀘𑁆𑀘, 𑀉𑀓𑁆𑀓𑀟𑁆𑀠𑀺𑀢𑀼𑀁 𑀉𑀧𑀸𑀲𑀓𑁄.

𑀕𑀺𑀮𑀸𑀦𑁄 ¶ 𑀫𑀸𑀢𑀸 𑀘 𑀧𑀺𑀢𑀸, 𑀪𑀸𑀢𑀸 𑀘 𑀅𑀣 𑀜𑀸𑀢𑀓𑁄;

𑀪𑀺𑀓𑁆𑀔𑀼𑀕𑀢𑀺𑀓𑁄 𑀯𑀺𑀳𑀸𑀭𑁄, 𑀯𑀸𑀴𑀸 𑀘𑀸𑀧𑀺 𑀲𑀭𑀻𑀲𑀧𑀸.

𑀘𑁄𑀭𑁄 𑀘𑁂𑀯 𑀧𑀺𑀲𑀸𑀘𑀸 𑀘, 𑀤𑀟𑁆𑀠𑀸 𑀢𑀤𑀼𑀪𑀬𑁂𑀦 𑀘;

𑀯𑀽𑀴𑁆𑀳𑁄𑀤𑀓𑁂𑀦 𑀯𑀼𑀝𑁆𑀞𑀸𑀲𑀺, 𑀩𑀳𑀼𑀢𑀭𑀸 𑀘 𑀤𑀸𑀬𑀓𑀸.

𑀮𑀽𑀔𑀧𑁆𑀧𑀡𑀻𑀢𑀲𑀧𑁆𑀧𑀸𑀬, 𑀪𑁂𑀲𑀚𑁆𑀚𑀼𑀧𑀝𑁆𑀞𑀓𑁂𑀦 ¶ 𑀘;

𑀇𑀢𑁆𑀣𑀻 𑀯𑁂𑀲𑀻 𑀓𑀼𑀫𑀸𑀭𑀻 𑀘, 𑀧𑀡𑁆𑀟𑀓𑁄 𑀜𑀸𑀢𑀓𑁂𑀦 𑀘.

𑀭𑀸𑀚𑀸 𑀘𑁄𑀭𑀸 𑀥𑀼𑀢𑁆𑀢𑀸 𑀦𑀺𑀥𑀺, 𑀪𑁂𑀤𑀅𑀝𑁆𑀞𑀯𑀺𑀥𑁂𑀦 [𑀪𑁂𑀤𑀸 𑀅𑀝𑁆𑀞𑀯𑀺𑀥𑁂𑀦 (𑀲𑀻. 𑀲𑁆𑀬𑀸.)] 𑀘;

𑀯𑀚𑀲𑀢𑁆𑀣𑀸 𑀘 𑀦𑀸𑀯𑀸 𑀘, 𑀲𑀼𑀲𑀺𑀭𑁂 𑀯𑀺𑀝𑀪𑀺𑀬𑀸 𑀘.

𑀅𑀚𑁆𑀛𑁄𑀓𑀸𑀲𑁂 ¶ 𑀯𑀲𑁆𑀲𑀸𑀯𑀸𑀲𑁄, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀘;

𑀙𑀯𑀓𑀼𑀝𑀺𑀓𑀸 𑀙𑀢𑁆𑀢𑁂 𑀘, 𑀘𑀸𑀝𑀺𑀬𑀸 𑀘 𑀉𑀧𑁂𑀦𑁆𑀢𑀺 𑀢𑁂.

𑀓𑀢𑀺𑀓𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸, 𑀩𑀳𑀺𑀤𑁆𑀥𑀸 𑀘 𑀉𑀧𑁄𑀲𑀣𑀸;

𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸, 𑀬𑀣𑀸𑀜𑀸𑀬𑁂𑀦 𑀬𑁄𑀚𑀬𑁂.

𑀅𑀓𑀭𑀡𑀻 𑀧𑀓𑁆𑀓𑀫𑀢𑀺, 𑀲𑀓𑀭𑀡𑀻 𑀢𑀣𑁂𑀯 𑀘;

𑀤𑁆𑀯𑀻𑀳𑀢𑀻𑀳𑀸 𑀘 𑀧𑀼𑀦 𑀘 [𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸𑀦 (𑀲𑀻.)], 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀘.

𑀲𑀢𑁆𑀢𑀸𑀳𑀦𑀸𑀕𑀢𑀸 𑀘𑁂𑀯, 𑀆𑀕𑀘𑁆𑀙𑁂𑀬𑁆𑀬 𑀦 𑀏𑀬𑁆𑀬 𑀯𑀸;

𑀯𑀢𑁆𑀣𑀼𑀤𑁆𑀤𑀸𑀦𑁂 𑀅𑀦𑁆𑀢𑀭𑀺𑀓𑀸, 𑀢𑀦𑁆𑀢𑀺𑀫𑀕𑁆𑀕𑀁 𑀦𑀺𑀲𑀸𑀫𑀬𑁂𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀤𑁆𑀯𑁂𑀧𑀡𑁆𑀡𑀸𑀲.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁪. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁄

𑁧𑁨𑁦. 𑀅𑀨𑀸𑀲𑀼𑀓𑀯𑀺𑀳𑀸𑀭𑁄

𑁨𑁦𑁯. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀫𑀬𑀁 𑀉𑀧𑀸𑀬𑁂𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀦𑁂𑀯 𑀆𑀮𑀧𑁂𑀬𑁆𑀬𑀸𑀫 𑀦 𑀲𑀮𑁆𑀮𑀧𑁂𑀬𑁆𑀬𑀸𑀫 𑁋 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑁂𑀬𑁆𑀬 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀲𑀘𑀲𑁆𑀲 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑁂𑀬𑁆𑀬 𑀪𑀼𑀜𑁆𑀚𑁂𑀬𑁆𑀬, 𑀦𑁄 𑀘𑁂 𑀆𑀓𑀗𑁆𑀔𑁂𑀬𑁆𑀬 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀬𑁆𑀬, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀬𑁆𑀬; 𑀲𑁄 𑀆𑀲𑀦𑀁 𑀉𑀤𑁆𑀥𑀭𑁂𑀬𑁆𑀬, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀬𑁆𑀬, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀬𑁆𑀬, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀬𑁆𑀬, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑁂𑀬𑁆𑀬; 𑀬𑁄 𑀧𑀲𑁆𑀲𑁂𑀬𑁆𑀬 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑁂𑀬𑁆𑀬 𑁋 𑀏𑀯𑀁 𑀔𑁄 𑀫𑀬𑀁 𑀲𑀫𑀕𑁆𑀕𑀸 ¶ 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀦𑁂𑀯 𑀆𑀮𑀧𑀺𑀁𑀲𑀼, 𑀦 𑀲𑀮𑁆𑀮𑀧𑀺𑀁𑀲𑀼. 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺 ¶ . 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺 𑀪𑀼𑀜𑁆𑀚𑀢𑀺, 𑀦𑁄 𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺; 𑀲𑁄 𑀆𑀲𑀦𑀁 𑀉𑀤𑁆𑀥𑀭𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 ¶ 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 ¶ 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺.

𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸 𑀢𑁂𑀫𑀸𑀲𑀘𑁆𑀘𑀬𑁂𑀦 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 ¶ 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸. 𑀲𑀫𑀕𑁆𑀕𑀸 𑀘 𑀫𑀬𑀁, 𑀪𑀦𑁆𑀢𑁂, 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸’’𑀢𑀺. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺. 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺. 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀬𑀣𑀸𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺.

𑀇𑀥 𑀫𑀬𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀫𑀬𑀁 𑀉𑀧𑀸𑀬𑁂𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸𑀫, 𑀦 𑀘 ¶ 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀦𑁂𑀯 𑀆𑀮𑀧𑁂𑀬𑁆𑀬𑀸𑀫 𑀦 𑀲𑀮𑁆𑀮𑀧𑁂𑀬𑁆𑀬𑀸𑀫 𑁋 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑁂𑀬𑁆𑀬 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀬𑁆𑀬, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 ¶ 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀲𑀘𑀲𑁆𑀲 𑀪𑀼𑀢𑁆𑀢𑀸𑀯𑀲𑁂𑀲𑁄 ¶ , 𑀲𑀘𑁂 𑀆𑀓𑀗𑁆𑀔𑁂𑀬𑁆𑀬 𑀪𑀼𑀜𑁆𑀚𑁂𑀬𑁆𑀬, 𑀦𑁄 𑀘𑁂 𑀆𑀓𑀗𑁆𑀔𑁂𑀬𑁆𑀬 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀬𑁆𑀬, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀬𑁆𑀬; 𑀲𑁄 𑀆𑀲𑀦𑀁 𑀉𑀤𑁆𑀥𑀭𑁂𑀬𑁆𑀬, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀬𑁆𑀬 ¶ , 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀬𑁆𑀬, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀬𑁆𑀬, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑁂𑀬𑁆𑀬; 𑀬𑁄 𑀧𑀲𑁆𑀲𑁂𑀬𑁆𑀬 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀬𑁆𑀬; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑁂𑀬𑁆𑀬 𑁋 𑀏𑀯𑀁 𑀔𑁄 𑀫𑀬𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀜𑁆𑀜𑀫𑀜𑁆𑀜𑀁 𑀦𑁂𑀯 𑀆𑀮𑀧𑀺𑀫𑁆𑀳𑀸 𑀦 𑀲𑀮𑁆𑀮𑀯𑀺𑀫𑁆𑀳𑀸. 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺 𑀪𑀼𑀜𑁆𑀚𑀢𑀺, 𑀦𑁄 𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺, 𑀲𑁄 𑀆𑀲𑀦𑀁 𑀉𑀤𑁆𑀥𑀭𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 ¶ 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀨𑀸𑀲𑀼𑀜𑁆𑀜𑁂𑀯 [𑀅𑀨𑀸𑀲𑀼𑀓𑀜𑁆𑀜𑁂𑀯 (𑀲𑀻.)] 𑀓𑀺𑀭𑀫𑁂 [𑀓𑀺𑀭𑀺𑀫𑁂 (𑀓.)], 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀯𑀼𑀝𑁆𑀞𑀸 [𑀯𑀼𑀢𑁆𑀣𑀸 (𑀓.)] 𑀲𑀫𑀸𑀦𑀸 𑀨𑀸𑀲𑀼𑀫𑁆𑀳𑀸 [𑀨𑀸𑀲𑀼𑀓𑀫𑁆𑀳𑀸 (𑀲𑀻.)] 𑀯𑀼𑀝𑁆𑀞𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀧𑀲𑀼𑀲𑀁𑀯𑀸𑀲𑀜𑁆𑀜𑁂𑀯 𑀓𑀺𑀭𑀫𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀯𑀼𑀝𑁆𑀞𑀸 𑀲𑀫𑀸𑀦𑀸 𑀨𑀸𑀲𑀼𑀫𑁆𑀳𑀸 𑀯𑀼𑀝𑁆𑀞𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀏𑀴𑀓𑀲𑀁𑀯𑀸𑀲𑀜𑁆𑀜𑁂𑀯 𑀓𑀺𑀭𑀫𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀯𑀼𑀝𑁆𑀞𑀸 𑀲𑀫𑀸𑀦𑀸 𑀨𑀸𑀲𑀼𑀫𑁆𑀳𑀸 𑀯𑀼𑀝𑁆𑀞𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀲𑀧𑀢𑁆𑀢𑀲𑀁𑀯𑀸𑀲𑀜𑁆𑀜𑁂𑀯 𑀓𑀺𑀭𑀫𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀯𑀼𑀝𑁆𑀞𑀸 𑀲𑀫𑀸𑀦𑀸 𑀨𑀸𑀲𑀼𑀫𑁆𑀳𑀸 𑀯𑀼𑀝𑁆𑀞𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀓𑀣𑀜𑁆𑀳𑀺 𑀦𑀸𑀫𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀫𑀽𑀕𑀩𑁆𑀩𑀢𑀁 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺𑀲𑁆𑀲’’𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 ¶ 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀦, 𑀪𑀺𑀓𑁆𑀔𑀯𑁂, 𑀫𑀽𑀕𑀩𑁆𑀩𑀢𑀁 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺𑀢𑀩𑁆𑀩𑀁. 𑀬𑁄 𑀲𑀫𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀼𑀁 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀲𑀸 𑀯𑁄 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑀢𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 ¶ 𑁋

𑁨𑁧𑁦. ‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀚𑁆𑀚 𑀧𑀯𑀸𑀭𑀡𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀗𑁆𑀖𑀁, 𑀆𑀯𑀼𑀲𑁄, 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺, 𑀆𑀯𑀼𑀲𑁄, 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀢𑀢𑀺𑀬𑀫𑁆𑀧𑀺, 𑀆𑀯𑀼𑀲𑁄, 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 ¶ 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁…𑀧𑁂… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑁨𑁧𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀣𑁂𑀭𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀯𑀸𑀭𑀬𑀫𑀸𑀦𑁂𑀲𑀼 𑀆𑀲𑀦𑁂𑀲𑀼 𑀅𑀘𑁆𑀙𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 ¶ 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀣𑁂𑀭𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀯𑀸𑀭𑀬𑀫𑀸𑀦𑁂𑀲𑀼 𑀆𑀲𑀦𑁂𑀲𑀼 𑀅𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀣𑁂𑀭𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀯𑀸𑀭𑀬𑀫𑀸𑀦𑁂𑀲𑀼 𑀆𑀲𑀦𑁂𑀲𑀼 𑀅𑀘𑁆𑀙𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 ¶ 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀣𑁂𑀭𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀯𑀸𑀭𑀬𑀫𑀸𑀦𑁂𑀲𑀼 𑀆𑀲𑀦𑁂𑀲𑀼 𑀅𑀘𑁆𑀙𑀺𑀲𑁆𑀲’’𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀲𑀼 𑀪𑀺𑀓𑁆𑀔𑀽𑀲𑀼 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀲𑀼 𑀧𑀯𑀸𑀭𑀬𑀫𑀸𑀦𑁂𑀲𑀼 𑀆𑀲𑀦𑁂𑀲𑀼 𑀅𑀘𑁆𑀙𑀺𑀢𑀩𑁆𑀩𑀁. 𑀬𑁄 𑀅𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀳𑁂𑀯 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀳𑀺 𑀧𑀯𑀸𑀭𑁂𑀢𑀼’’𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀣𑁂𑀭𑁄 𑀚𑀭𑀸𑀤𑀼𑀩𑁆𑀩𑀮𑁄 𑀬𑀸𑀯 𑀲𑀩𑁆𑀩𑁂 𑀧𑀯𑀸𑀭𑁂𑀦𑁆𑀢𑀻𑀢𑀺 [𑀬𑀸𑀯 𑀲𑀩𑁆𑀩𑁂 𑀧𑀯𑀸𑀭𑁂𑀦𑁆𑀢𑀺 (𑀲𑁆𑀬𑀸.)] 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁄 𑀆𑀕𑀫𑀬𑀫𑀸𑀦𑁄 𑀫𑀼𑀘𑁆𑀙𑀺𑀢𑁄 𑀧𑀧𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀫𑀦𑁆𑀢𑀭𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑀼𑀁 𑀬𑀸𑀯 𑀧𑀯𑀸𑀭𑁂𑀢𑀺, 𑀧𑀯𑀸𑀭𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀦𑁆𑀢𑀺.

𑀅𑀨𑀸𑀲𑀼𑀓𑀯𑀺𑀳𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁨𑁧. 𑀧𑀯𑀸𑀭𑀡𑀸𑀪𑁂𑀤𑀸

𑁨𑁧𑁨. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀧𑀯𑀸𑀭𑀡𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑀸 𑀘 𑀧𑀦𑁆𑀦𑀭𑀲𑀺𑀓𑀸 𑀘. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀯𑀸𑀭𑀡𑀸𑀢𑀺.

𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀧𑀯𑀸𑀭𑀡𑀓𑀫𑁆𑀫𑀸𑀦𑀻’’𑀢𑀺? [𑀧𑀯𑀸𑀭𑀡𑀸𑀓𑀫𑁆𑀫𑀸𑀦𑀻𑀢𑀺 (𑀲𑁆𑀬𑀸.)] 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀓𑀫𑁆𑀫𑀸𑀦𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀏𑀯𑀭𑀽𑀧𑀜𑁆𑀘 𑀫𑀬𑀸 𑀧𑀯𑀸𑀭𑀡𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀦𑁆𑀢𑀺, 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

𑀧𑀯𑀸𑀭𑀡𑀸𑀪𑁂𑀤𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁨. 𑀧𑀯𑀸𑀭𑀡𑀸𑀤𑀸𑀦𑀸𑀦𑀼𑀚𑀸𑀦𑀦𑀸

𑁨𑁧𑁩. 𑀅𑀣 ¶ 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀦𑀺𑀧𑀢𑀣, 𑀪𑀺𑀓𑁆𑀔𑀯𑁂. 𑀲𑀗𑁆𑀖𑁄 𑀧𑀯𑀸𑀭𑁂𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 ¶ , 𑀲𑁄 𑀅𑀦𑀸𑀕𑀢𑁄’’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀯𑀸𑀭𑀡𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸 𑁋 𑀢𑁂𑀦 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 ¶ 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀧𑀯𑀸𑀭𑀡𑀁 𑀤𑀫𑁆𑀫𑀺, 𑀧𑀯𑀸𑀭𑀡𑀁 𑀫𑁂 𑀳𑀭, 𑀧𑀯𑀸𑀭𑀡𑀁 𑀫𑁂 𑀆𑀭𑁄𑀘𑁂𑀳𑀺, 𑀫𑀫𑀢𑁆𑀣𑀸𑀬 𑀧𑀯𑀸𑀭𑁂𑀳𑀻’’𑀢𑀺 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀯𑀸𑀭𑀡𑀸; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀲𑁄, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀫𑀜𑁆𑀘𑁂𑀦 𑀯𑀸 𑀧𑀻𑀞𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀦𑁂𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀬𑀁 𑀕𑀺𑀮𑀸𑀦𑀁 𑀞𑀸𑀦𑀸 𑀘𑀸𑀯𑁂𑀲𑁆𑀲𑀸𑀫, 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀦, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀞𑀸𑀦𑀸 𑀘𑀸𑀯𑁂𑀢𑀩𑁆𑀩𑁄. 𑀲𑀗𑁆𑀖𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀧𑀯𑀸𑀭𑀡𑀳𑀸𑀭𑀓𑁄 [𑀧𑀯𑀸𑀭𑀡𑀸𑀳𑀸𑀭𑀓𑁄 (𑀲𑁆𑀬𑀸.)] 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀢𑀢𑁆𑀣𑁂𑀯 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀁𑀓𑀭𑁄𑀢𑀺… 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀡𑁆𑀟𑀓𑁄 ¶ 𑀧𑀝𑀺𑀚𑀸𑀦𑀸𑀢𑀺… 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺 ¶ … 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀯𑀸𑀭𑀡𑀸.

𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀓𑁆𑀓𑀫𑀢𑀺, 𑀅𑀦𑀸𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀁𑀓𑀭𑁄𑀢𑀺… 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 ¶ 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑀸𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸.

𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀓𑁆𑀓𑀫𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀁𑀓𑀭𑁄𑀢𑀺… 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺… 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸.

𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀼𑀢𑁆𑀢𑁄 𑀦𑀸𑀭𑁄𑀘𑁂𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 ¶ . 𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀫𑀢𑁆𑀢𑁄 𑀦𑀸𑀭𑁄𑀘𑁂𑀢𑀺…𑀧𑁂… 𑀲𑀫𑀸𑀧𑀦𑁆𑀦𑁄 𑀦𑀸𑀭𑁄𑀘𑁂𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀯𑀸𑀭𑀡𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂 ¶ , 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀜𑁆𑀘𑀺𑀘𑁆𑀘 𑀦𑀸𑀭𑁄𑀘𑁂𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀧𑀯𑀸𑀭𑀡𑀳𑀸𑀭𑀓𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼𑀁, 𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀦𑁆𑀢𑀺.

𑀧𑀯𑀸𑀭𑀡𑀸𑀤𑀸𑀦𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁩. 𑀜𑀸𑀢𑀓𑀸𑀤𑀺𑀕𑁆𑀕𑀳𑀡𑀓𑀣𑀸

𑁨𑁧𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀜𑀸𑀢𑀓𑀸 𑀕𑀡𑁆𑀳𑀺𑀁𑀲𑀼. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀜𑀸𑀢𑀓𑀸 𑀕𑀡𑁆𑀳𑀦𑁆𑀢𑀺. 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀫𑀼𑀜𑁆𑀘𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀯𑀸𑀭𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀯𑀸𑀭𑀡𑀁 𑀤𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀜𑀸𑀢𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀦𑀺𑀲𑁆𑀲𑀻𑀫𑀁 𑀦𑁂𑀣, 𑀬𑀸𑀯 𑀲𑀗𑁆𑀖𑁄 𑀧𑀯𑀸𑀭𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀭𑀸𑀚𑀸𑀦𑁄 𑀕𑀡𑁆𑀳𑀦𑁆𑀢𑀺…𑀧𑁂… 𑀘𑁄𑀭𑀸 𑀕𑀡𑁆𑀳𑀦𑁆𑀢𑀺 ¶ … 𑀥𑀼𑀢𑁆𑀢𑀸 𑀕𑀡𑁆𑀳𑀦𑁆𑀢𑀺… 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀕𑀡𑁆𑀳𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀫𑀼𑀜𑁆𑀘𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀯𑀸𑀭𑁂𑀢𑀻’’𑀢𑀺 ¶ . 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀏𑀓𑀫𑀦𑁆𑀢𑀁 𑀳𑁄𑀣, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀧𑀯𑀸𑀭𑀡𑀁 𑀤𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑁂 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀇𑀗𑁆𑀖, 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀫𑀼𑀳𑀼𑀢𑁆𑀢𑀁 𑀦𑀺𑀲𑁆𑀲𑀻𑀫𑀁 𑀦𑁂𑀣, 𑀬𑀸𑀯 𑀲𑀗𑁆𑀖𑁄 𑀧𑀯𑀸𑀭𑁂𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀦 ¶ 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀜𑀸𑀢𑀓𑀸𑀤𑀺𑀕𑁆𑀕𑀳𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁪. 𑀲𑀗𑁆𑀖𑀧𑀯𑀸𑀭𑀡𑀸𑀤𑀺𑀧𑁆𑀧𑀪𑁂𑀤𑀸

𑁨𑁧𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀧𑀜𑁆𑀘 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩’𑀦𑁆𑀢𑀺. 𑀫𑀬𑀜𑁆𑀘𑀫𑁆𑀳𑀸 𑀧𑀜𑁆𑀘 𑀚𑀦𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀲𑀗𑁆𑀖𑁂 𑀧𑀯𑀸𑀭𑁂𑀢𑀼𑀦𑁆𑀢𑀺.

𑁨𑁧𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀦𑁆𑀦𑀁 𑀲𑀗𑁆𑀖𑁂 𑀧𑀯𑀸𑀭𑁂𑀢𑀼𑀦𑁆𑀢𑀺. 𑀫𑀬𑀜𑁆𑀘𑀫𑁆𑀳𑀸 𑀘𑀢𑁆𑀢𑀸𑀭𑁄 𑀚𑀦𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄. 𑀅𑀚𑁆𑀚 𑀧𑀯𑀸𑀭𑀡𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 ¶ 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺.

𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 ¶ 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀦𑁆𑀦𑀁 𑀲𑀗𑁆𑀖𑁂 𑀧𑀯𑀸𑀭𑁂𑀢𑀼𑀁, 𑀘𑀢𑀼𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀫𑀬𑀜𑁆𑀘𑀫𑁆𑀳𑀸 𑀢𑀬𑁄 𑀚𑀦𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 ¶ 𑀫𑁂 𑀆𑀬𑀲𑁆𑀫𑀦𑁆𑀢𑀸. 𑀅𑀚𑁆𑀚 𑀧𑀯𑀸𑀭𑀡𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺.

𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… ¶ 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 ¶ .

𑁨𑁧𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀦𑁆𑀦𑀁 𑀲𑀗𑁆𑀖𑁂 𑀧𑀯𑀸𑀭𑁂𑀢𑀼𑀁, 𑀘𑀢𑀼𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁, 𑀢𑀺𑀡𑁆𑀡𑀁 ¶ 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀫𑀬𑀜𑁆𑀘𑀫𑁆𑀳𑀸 𑀤𑁆𑀯𑁂 𑀚𑀦𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀢𑀩𑁆𑀩𑀁. 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀯𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ¶ 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀣𑁂𑀭𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 ¶ 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑁨𑁧𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀦𑁆𑀦𑀁 𑀲𑀗𑁆𑀖𑁂 𑀧𑀯𑀸𑀭𑁂𑀢𑀼𑀁, 𑀘𑀢𑀼𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁, 𑀢𑀺𑀡𑁆𑀡𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁, 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀼𑀁. 𑀅𑀳𑀜𑁆𑀘𑀫𑁆𑀳𑀺 𑀏𑀓𑀓𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀬𑀢𑁆𑀣 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸 𑀫𑀡𑁆𑀟𑀧𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀤𑀻𑀧𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁; 𑀦𑁄 𑀘𑁂 𑀆𑀕𑀘𑁆𑀙𑀦𑁆𑀢𑀺, ‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀦𑁄 𑀘𑁂 𑀅𑀥𑀺𑀝𑁆𑀞𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀢𑀢𑁆𑀭 ¶ , 𑀪𑀺𑀓𑁆𑀔𑀯𑁂, 𑀬𑀢𑁆𑀣 ¶ 𑀧𑀜𑁆𑀘 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸

𑀘𑀢𑀽𑀳𑀺 𑀲𑀗𑁆𑀖𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 ¶ 𑀏𑀓𑀲𑁆𑀲 𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑁆𑀯𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀦 𑀏𑀓𑀲𑁆𑀲 𑀧𑀯𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀏𑀓𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀥𑀺𑀝𑁆𑀞𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀲𑀗𑁆𑀖𑀧𑀯𑀸𑀭𑀡𑀸𑀤𑀺𑀧𑁆𑀧𑀪𑁂𑀤𑀸 𑀦𑀺𑀝𑁆𑀞𑀺𑀢𑀸.

𑁧𑁨𑁫. 𑀆𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺

𑁨𑁧𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀧𑀯𑀸𑀭𑁂𑀢𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 [𑀆𑀭𑁄𑀘𑁂𑀲𑀺 (𑀓.)].

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀲𑁆𑀲𑀲𑀻’’𑀢𑀺. 𑀆𑀫 𑀧𑀲𑁆𑀲𑀸𑀫𑀻𑀢𑀺. 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄; 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄𑀢𑀺.

𑀆𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺 𑀦𑀺𑀝𑁆𑀞𑀺𑀢𑀸.

𑁧𑁨𑁬. 𑀆𑀧𑀢𑁆𑀢𑀺𑀆𑀯𑀺𑀓𑀭𑀡𑀯𑀺𑀥𑀺

𑁨𑁨𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀯𑀸𑀭𑀬𑀫𑀸𑀦𑁄 𑀆𑀧𑀢𑁆𑀢𑀺𑀁 𑀲𑀭𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀧𑀯𑀸𑀭𑁂𑀢𑀩𑁆𑀩’𑀦𑁆𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀯𑀸𑀭𑀬𑀫𑀸𑀦𑁄 𑀆𑀧𑀢𑁆𑀢𑀺𑀁 𑀲𑀭𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀸𑀫𑀦𑁆𑀢𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀇𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀯𑀸𑀭𑀬𑀫𑀸𑀦𑁄 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂,

𑀪𑀺𑀓𑁆𑀔𑀼𑀦𑀸 𑀲𑀸𑀫𑀦𑁆𑀢𑁄 𑀪𑀺𑀓𑁆𑀔𑀼 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄; 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄𑀢𑀺.

𑀆𑀧𑀢𑁆𑀢𑀺 𑀆𑀯𑀺𑀓𑀭𑀡𑀯𑀺𑀥𑀺 𑀦𑀺𑀝𑁆𑀞𑀺𑀢𑀸.

𑁧𑁨𑁭. 𑀲𑀪𑀸𑀕𑀸𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺

𑁨𑁨𑁧. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀦 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀦 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸’𑀢𑀺. 𑀅𑀬𑀜𑁆𑀘 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀕𑀘𑁆𑀙, 𑀫𑀬𑀁 𑀢𑁂 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀸𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄. 𑀬𑀤𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀼𑀤𑁆𑀥𑀁 𑀅𑀦𑀸𑀧𑀢𑁆𑀢𑀺𑀓𑀁 𑀧𑀲𑁆𑀲𑀺𑀲𑁆𑀲𑀢𑀺 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄 𑀳𑁄𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄. 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀢𑀺 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸, 𑀧𑀯𑀸𑀭𑁂𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀧𑀯𑀸𑀭𑀡𑀸𑀬 𑀅𑀦𑁆𑀢𑀭𑀸𑀬𑁄 𑀓𑀸𑀢𑀩𑁆𑀩𑁄𑀢𑀺.

𑀲𑀪𑀸𑀕𑀸𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁨𑁮. 𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀁

𑁨𑁨𑁨. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀺𑀁𑀲𑀼 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀲𑀼𑀁. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀺𑀁𑀲𑀼 𑀩𑀳𑀼𑀢𑀭𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 ¶ 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 ¶ 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 ¶ 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 ¶ 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 ¶ 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 ¶ 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 ¶ 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 ¶ 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀅𑀦𑀸𑀧𑀢𑁆𑀢𑀺.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁨𑁯. 𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀻𑀧𑀦𑁆𑀦𑀭𑀲𑀓𑀁

𑁨𑁨𑁩. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 ¶ 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 𑀥𑀫𑁆𑀫𑀲𑀜𑁆𑀜𑀺𑀦𑁄 𑀯𑀺𑀦𑀬𑀲𑀜𑁆𑀜𑀺𑀦𑁄 𑀯𑀕𑁆𑀕𑀸 𑀯𑀕𑁆𑀕𑀲𑀜𑁆𑀜𑀺𑀦𑁄 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂,…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸…𑀧𑁂… 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀻𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁦. 𑀯𑁂𑀫𑀢𑀺𑀓𑀧𑀦𑁆𑀦𑀭𑀲𑀓𑀁

𑁨𑁨𑁪. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 ¶ 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺 𑀯𑁂𑀫𑀢𑀺𑀓𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺 𑀯𑁂𑀫𑀢𑀺𑀓𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺 𑀯𑁂𑀫𑀢𑀺𑀓𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺 𑀯𑁂𑀫𑀢𑀺𑀓𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 ¶ 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸…𑀧𑁂… 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀯𑁂𑀫𑀢𑀺𑀓𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁧. 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀧𑀦𑁆𑀦𑀭𑀲𑀓𑀁

𑁨𑁨𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 ¶ 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 [𑀅𑀯𑀲𑁂𑀲𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 (𑀓.)] 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀇𑀥 ¶ ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀓𑀧𑁆𑀧𑀢𑁂𑀯 𑀅𑀫𑁆𑀳𑀸𑀓𑀁 𑀧𑀯𑀸𑀭𑁂𑀢𑀼𑀁, 𑀦𑀸𑀫𑁆𑀳𑀸𑀓𑀁 𑀦 𑀓𑀧𑁆𑀧𑀢𑀻’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂,…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸…𑀧𑁂… 𑀲𑀫𑀲𑀫𑀸…𑀧𑁂… 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁨. 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀧𑀦𑁆𑀦𑀭𑀲𑀓𑀁

𑁨𑁨𑁬. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 ¶ 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸 ¶ . 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂 ¶ , 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀅𑀯𑀲𑁂𑀲𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸, 𑀢𑁂𑀳𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁, 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 ¶ 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 ¶ 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀲𑀫𑀲𑀫𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸

𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀚𑀸𑀦𑀦𑁆𑀢𑀺 ‘‘𑀅𑀢𑁆𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑀸𑀕𑀢𑀸’’𑀢𑀺. 𑀢𑁂 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀢𑁂𑀳𑀺 𑀧𑀯𑀸𑀭𑀺𑀢𑀫𑀢𑁆𑀢𑁂, 𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬, 𑀅𑀣𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀣𑁄𑀓𑀢𑀭𑀸. 𑀧𑀯𑀸𑀭𑀺𑀢𑀸 𑀲𑀼𑀧𑁆𑀧𑀯𑀸𑀭𑀺𑀢𑀸, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀜𑁆𑀘𑀯𑀻𑀲𑀢𑁆𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑁧𑁩𑁩. 𑀲𑀻𑀫𑁄𑀢𑁆𑀢𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀁

𑁨𑁨𑁭. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸 𑀯𑀸. 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀫𑀦𑁆𑀢𑀻’’𑀢𑀺…𑀧𑁂… 𑀢𑁂 𑀦 𑀚𑀸𑀦𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑀸’’𑀢𑀺…𑀧𑁂… 𑀢𑁂 𑀦 𑀧𑀲𑁆𑀲𑀦𑁆𑀢𑀺 𑀅𑀜𑁆𑀜𑁂 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 ¶ 𑀑𑀓𑁆𑀓𑀫𑀦𑁆𑀢𑁂…𑀧𑁂… 𑀢𑁂 𑀦 𑀧𑀲𑁆𑀲𑀦𑁆𑀢𑀺 𑀅𑀜𑁆𑀜𑁂 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑁂…𑀧𑁂… 𑀢𑁂 𑀦 𑀲𑀼𑀡𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀫𑀦𑁆𑀢𑀻’’𑀢𑀺…𑀧𑁂… 𑀢𑁂 𑀦 𑀲𑀼𑀡𑀦𑁆𑀢𑀺 ‘‘𑀅𑀜𑁆𑀜𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀁 𑀑𑀓𑁆𑀓𑀦𑁆𑀢𑀸’’𑀢𑀺…𑀧𑁂….

𑀆𑀯𑀸𑀲𑀺𑀓𑁂𑀦 ¶ 𑀆𑀯𑀸𑀲𑀺𑀓𑀸 𑀏𑀓𑀲𑀢𑀧𑀜𑁆𑀘𑀲𑀢𑁆𑀢𑀢𑀺 𑀢𑀺𑀓𑀦𑀬𑀢𑁄, 𑀆𑀯𑀸𑀲𑀺𑀓𑁂𑀦 𑀆𑀕𑀦𑁆𑀢𑀼𑀓𑀸, 𑀆𑀕𑀦𑁆𑀢𑀼𑀓𑁂𑀦 𑀆𑀯𑀸𑀲𑀺𑀓𑀸, 𑀆𑀕𑀦𑁆𑀢𑀼𑀓𑁂𑀦 𑀆𑀕𑀦𑁆𑀢𑀼𑀓𑀸, 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀲𑀢𑁆𑀢 𑀢𑀺𑀓𑀲𑀢𑀸𑀦𑀺 𑀳𑁄𑀦𑁆𑀢𑀺.

𑀲𑀻𑀫𑁄𑀓𑁆𑀓𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁪. 𑀤𑀺𑀯𑀲𑀦𑀸𑀦𑀢𑁆𑀢𑀁

𑁨𑁨𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀧𑀤𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻; 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 ¶ 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻; 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁 ¶ . 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀸𑀝𑀺𑀧𑀤𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻; 𑀆𑀯𑀸𑀲𑀺𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁.

𑀤𑀺𑀯𑀲𑀦𑀸𑀦𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁫. 𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀁

𑁨𑁨𑁯. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑀺𑀓𑀸𑀓𑀸𑀭𑀁, 𑀆𑀯𑀸𑀲𑀺𑀓𑀮𑀺𑀗𑁆𑀕𑀁, 𑀆𑀯𑀸𑀲𑀺𑀓𑀦𑀺𑀫𑀺𑀢𑁆𑀢𑀁, 𑀆𑀯𑀸𑀲𑀺𑀓𑀼𑀤𑁆𑀤𑁂𑀲𑀁, 𑀲𑀼𑀧𑁆𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞𑀁 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀲𑀧𑀝𑁆𑀞𑀺𑀢𑀁, 𑀧𑀭𑀺𑀯𑁂𑀡𑀁 𑀲𑀼𑀲𑀫𑁆𑀫𑀝𑁆𑀞𑀁; 𑀧𑀲𑁆𑀲𑀺𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺, 𑀅𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀅𑀧𑀲𑁆𑀲𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀼𑀡𑀦𑁆𑀢𑀺 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑀺𑀓𑀸𑀓𑀸𑀭𑀁, 𑀆𑀯𑀸𑀲𑀺𑀓𑀮𑀺𑀗𑁆𑀕𑀁, 𑀆𑀯𑀸𑀲𑀺𑀓𑀦𑀺𑀫𑀺𑀢𑁆𑀢𑀁, 𑀆𑀯𑀸𑀲𑀺𑀓𑀼𑀤𑁆𑀤𑁂𑀲𑀁, 𑀘𑀗𑁆𑀓𑀫𑀦𑁆𑀢𑀸𑀦𑀁 𑀧𑀤𑀲𑀤𑁆𑀤𑀁, 𑀲𑀚𑁆𑀛𑀸𑀬𑀲𑀤𑁆𑀤𑀁, 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁, 𑀔𑀺𑀧𑀺𑀢𑀲𑀤𑁆𑀤𑀁; 𑀲𑀼𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺, 𑀅𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀅𑀧𑀲𑁆𑀲𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 ¶ 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 ¶ 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀸𑀓𑀸𑀭𑀁, 𑀆𑀕𑀦𑁆𑀢𑀼𑀓𑀮𑀺𑀗𑁆𑀕𑀁, 𑀆𑀕𑀦𑁆𑀢𑀼𑀓𑀦𑀺𑀫𑀺𑀢𑁆𑀢𑀁, 𑀆𑀕𑀦𑁆𑀢𑀼𑀓𑀼𑀤𑁆𑀤𑁂𑀲𑀁, 𑀅𑀜𑁆𑀜𑀸𑀢𑀓𑀁 𑀧𑀢𑁆𑀢𑀁, 𑀅𑀜𑁆𑀜𑀸𑀢𑀓𑀁 𑀘𑀻𑀯𑀭𑀁, 𑀅𑀜𑁆𑀜𑀸𑀢𑀓𑀁 𑀦𑀺𑀲𑀻𑀤𑀦𑀁, 𑀧𑀸𑀤𑀸𑀦𑀁 𑀥𑁄𑀢𑀁, 𑀉𑀤𑀓𑀦𑀺𑀲𑁆𑀲𑁂𑀓𑀁; 𑀧𑀲𑁆𑀲𑀺𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺, 𑀅𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 ¶ 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀅𑀧𑀲𑁆𑀲𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 ¶ 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑁋 𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀼𑀡𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀸𑀓𑀸𑀭𑀁,

𑀆𑀕𑀦𑁆𑀢𑀼𑀓𑀮𑀺𑀗𑁆𑀕𑀁, 𑀆𑀕𑀦𑁆𑀢𑀼𑀓𑀦𑀺𑀫𑀺𑀢𑁆𑀢𑀁, 𑀆𑀕𑀦𑁆𑀢𑀼𑀓𑀼𑀤𑁆𑀤𑁂𑀲𑀁, 𑀆𑀕𑀘𑁆𑀙𑀦𑁆𑀢𑀸𑀦𑀁 𑀧𑀤𑀲𑀤𑁆𑀤𑀁, 𑀉𑀧𑀸𑀳𑀦𑀧𑀧𑁆𑀨𑁄𑀝𑀦𑀲𑀤𑁆𑀤𑀁, 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁, 𑀔𑀺𑀧𑀺𑀢𑀲𑀤𑁆𑀤𑀁; 𑀲𑀼𑀢𑁆𑀯𑀸 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀦 𑀯𑀺𑀘𑀺𑀦𑀦𑁆𑀢𑀺, 𑀅𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀅𑀧𑀲𑁆𑀲𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀯𑁂𑀫𑀢𑀺𑀓𑀸 𑀯𑀺𑀘𑀺𑀦𑀦𑁆𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀧𑀲𑁆𑀲𑀺𑀢𑁆𑀯𑀸 𑁋 𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄𑀢𑀺 𑁋 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁩𑁬. 𑀦𑀸𑀦𑀸𑀲𑀁𑀯𑀸𑀲𑀓𑀸𑀤𑀻𑀳𑀺 𑀧𑀯𑀸𑀭𑀡𑀸

𑁨𑁩𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑁂. 𑀢𑁂 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 ¶ ¶ 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺, 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺, 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑁂. 𑀢𑁂 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺, 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺, 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑁂. 𑀢𑁂 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺, 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀺, 𑀅𑀦𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑁂. 𑀢𑁂 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀦𑀸𑀦𑀸𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸 ¶ 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺, 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀸𑀭𑁂𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀧𑀼𑀘𑁆𑀙𑀦𑁆𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀺𑀢𑀭𑀦𑁆𑀢𑀺, 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀏𑀓𑀢𑁄 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺.

𑀦𑀸𑀦𑀸𑀲𑀁𑀯𑀸𑀲𑀓𑀸𑀤𑀻𑀳𑀺 𑀧𑀯𑀸𑀭𑀡𑀸 𑀦𑀺𑀝𑁆𑀞𑀺𑀢𑀸.

𑁧𑁩𑁭. 𑀦 𑀕𑀦𑁆𑀢𑀩𑁆𑀩𑀯𑀸𑀭𑁄

𑁨𑁩𑁧. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦 ¶ , 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 ¶ 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸 ¶ . 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦 ¶ , 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸

𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑀦 𑀕𑀦𑁆𑀢𑀩𑁆𑀩𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁩𑁮. 𑀕𑀦𑁆𑀢𑀩𑁆𑀩𑀯𑀸𑀭𑁄

𑁨𑁩𑁨. 𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 ¶ , 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺. 𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑁄 ¶ , 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄

𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 ‘‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’’𑀦𑁆𑀢𑀺.

𑀕𑀦𑁆𑀢𑀩𑁆𑀩𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁩𑁯. 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀸

𑁨𑁩𑁩. 𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀫𑀸𑀦𑀸𑀬…𑀧𑁂… 𑀦 𑀲𑀸𑀫𑀡𑁂𑀭𑀲𑁆𑀲…𑀧𑁂… 𑀦 𑀲𑀸𑀫𑀡𑁂𑀭𑀺𑀬𑀸…𑀧𑁂… 𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀲𑁆𑀲…𑀧𑁂… 𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 ¶ .

𑀦 ¶ 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲…𑀧𑁂… 𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄.

𑀦 𑀧𑀡𑁆𑀟𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑀲𑁆𑀲…𑀧𑁂… 𑀦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀲𑁆𑀲…𑀧𑁂… 𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲…𑀧𑁂… 𑀦 𑀫𑀸𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀦 𑀧𑀺𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀦 𑀅𑀭𑀳𑀦𑁆𑀢𑀖𑀸𑀢𑀓𑀲𑁆𑀲…𑀧𑁂… 𑀦 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑁆𑀲 ¶ …𑀧𑁂… 𑀦 𑀲𑀗𑁆𑀖𑀪𑁂𑀤𑀓𑀲𑁆𑀲…𑀧𑁂… 𑀦 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑁆𑀲 ¶ …𑀧𑁂… 𑀦 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀧𑀯𑀸𑀭𑀡𑀸𑀤𑀸𑀦𑁂𑀦 𑀧𑀯𑀸𑀭𑁂𑀢𑀩𑁆𑀩𑀁, 𑀅𑀜𑁆𑀜𑀢𑁆𑀭 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀩𑁆𑀩𑀁, 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸𑀢𑀺.

𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧𑁪𑁦. 𑀤𑁆𑀯𑁂𑀯𑀸𑀘𑀺𑀓𑀸𑀤𑀺𑀧𑀯𑀸𑀭𑀡𑀸

𑁨𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀯𑀭𑀪𑀬𑀁 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀼𑀦𑁆𑀢𑀺.

𑀩𑀸𑀴𑁆𑀳𑀢𑀭𑀁 𑀲𑀯𑀭𑀪𑀬𑀁 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀼𑀦𑁆𑀢𑀺.

𑀩𑀸𑀴𑁆𑀳𑀢𑀭𑀁 𑀲𑀯𑀭𑀪𑀬𑀁 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀏𑀓𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀫𑀦𑀼𑀲𑁆𑀲𑁂𑀳𑀺 𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 ¶ 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀦𑀼𑀲𑁆𑀲𑁂𑀳𑀺 𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀺. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀫𑀦𑀼𑀲𑁆𑀲𑁂𑀳𑀺 𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸 𑀳𑁄𑀢𑀺. 𑀢𑀢𑁆𑀭 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀫𑀦𑀼𑀲𑁆𑀲𑁂𑀳𑀺 𑀤𑀸𑀦𑀁 ¶ 𑀤𑁂𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀻’’𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀫𑀦𑀼𑀲𑁆𑀲𑁂𑀳𑀺 𑀤𑀸𑀦𑀁 ¶ 𑀤𑁂𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀤𑁆𑀯𑁂𑀯𑀸𑀘𑀺𑀓𑀁, 𑀏𑀓𑀯𑀸𑀘𑀺𑀓𑀁, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑀁 𑀪𑀡𑀦𑁆𑀢𑁂𑀳𑀺…𑀧𑁂… 𑀲𑀼𑀢𑁆𑀢𑀦𑁆𑀢𑀺𑀓𑁂𑀳𑀺 𑀲𑀼𑀢𑁆𑀢𑀦𑁆𑀢𑀁 𑀲𑀗𑁆𑀕𑀸𑀬𑀦𑁆𑀢𑁂𑀳𑀺… 𑀯𑀺𑀦𑀬𑀥𑀭𑁂𑀳𑀺 𑀯𑀺𑀦𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀳𑀺… 𑀥𑀫𑁆𑀫𑀓𑀣𑀺𑀓𑁂𑀳𑀺 𑀥𑀫𑁆𑀫𑀁 𑀲𑀸𑀓𑀘𑁆𑀙𑀦𑁆𑀢𑁂𑀳𑀺… 𑀪𑀺𑀓𑁆𑀔𑀽𑀳𑀺 𑀓𑀮𑀳𑀁 𑀓𑀭𑁄𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀪𑀺𑀓𑁆𑀔𑀽𑀳𑀺 𑀓𑀮𑀳𑀁 𑀓𑀭𑁄𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀻’’𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀪𑀺𑀓𑁆𑀔𑀽𑀳𑀺 𑀓𑀮𑀳𑀁 𑀓𑀭𑁄𑀦𑁆𑀢𑁂𑀳𑀺 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺 𑀔𑁂𑀧𑀺𑀢𑀸. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀤𑁆𑀯𑁂𑀯𑀸𑀘𑀺𑀓𑀁, 𑀏𑀓𑀯𑀸𑀘𑀺𑀓𑀁, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 ¶ 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺 ¶ , 𑀧𑀭𑀺𑀢𑁆𑀢𑀜𑁆𑀘 𑀅𑀦𑁄𑀯𑀲𑁆𑀲𑀺𑀓𑀁 [𑀅𑀦𑁄𑀯𑀲𑁆𑀲𑀓𑀁 (𑀓.)] 𑀳𑁄𑀢𑀺, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄, 𑀧𑀭𑀺𑀢𑁆𑀢𑀜𑁆𑀘 𑀅𑀦𑁄𑀯𑀲𑁆𑀲𑀺𑀓𑀁, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀫𑁂𑀖𑁄 𑀧𑀯𑀲𑁆𑀲𑀺𑀲𑁆𑀲𑀢𑀺. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺, 𑀧𑀭𑀺𑀢𑁆𑀢𑀜𑁆𑀘 𑀅𑀦𑁄𑀯𑀲𑁆𑀲𑀺𑀓𑀁 𑀳𑁄𑀢𑀺, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄 𑀳𑁄𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄, 𑀧𑀭𑀺𑀢𑁆𑀢𑀜𑁆𑀘 𑀅𑀦𑁄𑀯𑀲𑁆𑀲𑀺𑀓𑀁, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀫𑁂𑀖𑁄 𑀧𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄, 𑀧𑀭𑀺𑀢𑁆𑀢𑀜𑁆𑀘 𑀅𑀦𑁄𑀯𑀲𑁆𑀲𑀺𑀓𑀁, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 ¶ 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀫𑁂𑀖𑁄 𑀧𑀯𑀲𑁆𑀲𑀺𑀲𑁆𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀤𑁆𑀯𑁂𑀯𑀸𑀘𑀺𑀓𑀁, 𑀏𑀓𑀯𑀸𑀘𑀺𑀓𑀁, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀭𑀸𑀚𑀦𑁆𑀢𑀭𑀸𑀬𑁄 𑀳𑁄𑀢𑀺…𑀧𑁂… 𑀘𑁄𑀭𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀅𑀕𑁆𑀬𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀉𑀤𑀓𑀦𑁆𑀢𑀭𑀸𑀬𑁄 ¶ 𑀳𑁄𑀢𑀺… 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀯𑀸𑀴𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀲𑀭𑀻𑀲𑀧𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺… 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 ¶ . 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄. 𑀲𑀘𑁂 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀲𑁆𑀲𑀢𑀺, 𑀅𑀧𑁆𑀧𑀯𑀸𑀭𑀺𑀢𑁄𑀯 𑀲𑀗𑁆𑀖𑁄 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 ¶ 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀤𑁆𑀯𑁂𑀯𑀸𑀘𑀺𑀓𑀁, 𑀏𑀓𑀯𑀸𑀘𑀺𑀓𑀁, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀤𑁆𑀯𑁂𑀯𑀸𑀘𑀺𑀓𑀸𑀤𑀺𑀧𑀯𑀸𑀭𑀡𑀸 𑀦𑀺𑀝𑁆𑀞𑀺𑀢𑀸.

𑁧𑁪𑁧. 𑀧𑀯𑀸𑀭𑀡𑀸𑀞𑀧𑀦𑀁

𑁨𑁩𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀸𑀧𑀢𑁆𑀢𑀺𑀓𑀸 𑀧𑀯𑀸𑀭𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀸𑀧𑀢𑁆𑀢𑀺𑀓𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀬𑁄 𑀧𑀯𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁄 𑀲𑀸𑀧𑀢𑁆𑀢𑀺𑀓𑁄 𑀧𑀯𑀸𑀭𑁂𑀢𑀺, 𑀢𑀲𑁆𑀲 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀑𑀓𑀸𑀲𑀁 𑀓𑀸𑀭𑀸𑀧𑀺𑀬𑀫𑀸𑀦𑀸 𑀦 𑀇𑀘𑁆𑀙𑀦𑁆𑀢𑀺 𑀑𑀓𑀸𑀲𑀁 𑀓𑀸𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀓𑀸𑀲𑀁 𑀅𑀓𑀭𑁄𑀦𑁆𑀢𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑀩𑁆𑀩𑀸. 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑀺𑀢𑀩𑁆𑀩𑀁 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀲𑀸𑀧𑀢𑁆𑀢𑀺𑀓𑁄 ¶ . 𑀢𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀫𑀺. 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺. 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀧𑀼𑀭𑀫𑁆𑀳𑀸𑀓𑀁 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀻𑀢𑀺 𑁋 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀺, 𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸. 𑀬𑁄 𑀞𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸. 𑀬𑁄 𑀞𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁨𑁩𑁬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸, 𑀏𑀯𑀁 𑀅𑀝𑁆𑀞𑀧𑀺𑀢𑀸. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸? 𑀢𑁂𑀯𑀸𑀘𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀪𑀸𑀲𑀺𑀢𑀸𑀬 𑀮𑀧𑀺𑀢𑀸𑀬 𑀧𑀭𑀺𑀬𑁄𑀲𑀺𑀢𑀸𑀬 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀅𑀝𑁆𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀤𑁆𑀯𑁂𑀯𑀸𑀘𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂,… 𑀏𑀓𑀯𑀸𑀘𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂,… 𑀲𑀫𑀸𑀦𑀯𑀲𑁆𑀲𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀪𑀸𑀲𑀺𑀢𑀸𑀬 𑀮𑀧𑀺𑀢𑀸𑀬 𑀧𑀭𑀺𑀬𑁄𑀲𑀺𑀢𑀸𑀬 𑀧𑀯𑀸𑀭𑀡𑀁 𑀞𑀧𑁂𑀢𑀺 ¶ , 𑀅𑀝𑁆𑀞𑀧𑀺𑀢𑀸 ¶ 𑀳𑁄𑀢𑀺 𑀧𑀯𑀸𑀭𑀡𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸.

𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸? 𑀢𑁂𑀯𑀸𑀘𑀺𑀓𑀸𑀬, 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀪𑀸𑀲𑀺𑀢𑀸𑀬 𑀮𑀧𑀺𑀢𑀸𑀬 𑀅𑀧𑀭𑀺𑀬𑁄𑀲𑀺𑀢𑀸𑀬 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀤𑁆𑀯𑁂𑀯𑀸𑀘𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂,… 𑀏𑀓𑀯𑀸𑀘𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂,… 𑀲𑀫𑀸𑀦𑀯𑀲𑁆𑀲𑀺𑀓𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀪𑀸𑀲𑀺𑀢𑀸𑀬 𑀮𑀧𑀺𑀢𑀸𑀬 𑀅𑀧𑀭𑀺𑀬𑁄𑀲𑀺𑀢𑀸𑀬 ¶ 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸.

𑁨𑁩𑁭. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺. 𑀢𑀁 𑀘𑁂 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺, ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀩𑀸𑀮𑁄, 𑀅𑀩𑁆𑀬𑀢𑁆𑀢𑁄, 𑀦 𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 𑀤𑀸𑀢𑀼’’𑀦𑁆𑀢𑀺, ‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺. 𑀢𑀁 𑀘𑁂 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺, ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀩𑀸𑀮𑁄, 𑀅𑀩𑁆𑀬𑀢𑁆𑀢𑁄, 𑀦 𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 ¶ 𑀤𑀸𑀢𑀼’’𑀦𑁆𑀢𑀺, ‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺. 𑀢𑀁 𑀘𑁂 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺, ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀩𑀸𑀮𑁄, 𑀅𑀩𑁆𑀬𑀢𑁆𑀢𑁄, 𑀦 𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 𑀤𑀸𑀢𑀼’’𑀦𑁆𑀢𑀺, ‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺. 𑀢𑀁 𑀘𑁂 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺, ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 ¶ , 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀩𑀸𑀮𑁄, 𑀅𑀩𑁆𑀬𑀢𑁆𑀢𑁄 ¶ , 𑀦 𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 𑀤𑀸𑀢𑀼’’𑀦𑁆𑀢𑀺, ‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁, 𑀫𑀸 𑀓𑀮𑀳𑀁, 𑀫𑀸 𑀯𑀺𑀕𑁆𑀕𑀳𑀁, 𑀫𑀸 𑀯𑀺𑀯𑀸𑀤’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺. 𑀢𑀁 𑀘𑁂 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺, ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀧𑀡𑁆𑀟𑀺𑀢𑁄, 𑀩𑁆𑀬𑀢𑁆𑀢𑁄, 𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 𑀤𑀸𑀢𑀼’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄, ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀫𑁆𑀳𑀺 𑀦𑀁 𑀞𑀧𑁂𑀲𑀺, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀲𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀲𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 ¶ 𑀯𑀸 𑀞𑀧𑁂𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀚𑀸𑀦𑀸𑀲𑀺 𑀧𑀦𑀸𑀬𑀲𑁆𑀫𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀚𑀸𑀦𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀓𑀢𑀫𑀸 𑀧𑀦𑀸𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺, 𑀓𑀢𑀫𑀸 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀅𑀬𑀁 𑀲𑀻𑀮𑀯𑀺𑀧𑀢𑁆𑀢𑀺; 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀤𑀼𑀓𑁆𑀓𑀝𑀁, 𑀤𑀼𑀩𑁆𑀪𑀸𑀲𑀺𑀢𑀁, 𑀅𑀬𑀁 𑀆𑀘𑀸𑀭𑀯𑀺𑀧𑀢𑁆𑀢𑀺; 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺, 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁 ¶ , 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀤𑀺𑀝𑁆𑀞𑁂𑀦 𑀯𑀸 𑀞𑀧𑁂𑀲𑀺, 𑀲𑀼𑀢𑁂𑀦 𑀯𑀸 𑀞𑀧𑁂𑀲𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀞𑀧𑁂𑀲𑀻’’𑀢𑀺? 𑀲𑁄 𑀘𑁂 ¶ 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀤𑀺𑀝𑁆𑀞𑁂𑀦 𑀯𑀸 𑀞𑀧𑁂𑀫𑀺, 𑀲𑀼𑀢𑁂𑀦 𑀯𑀸 𑀞𑀧𑁂𑀫𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀝𑁆𑀞𑁂𑀦 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀓𑀤𑀸 𑀢𑁂 𑀤𑀺𑀝𑁆𑀞𑀁, 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀢𑁆𑀣 𑀘 𑀢𑁆𑀯𑀁 𑀅𑀳𑁄𑀲𑀺, 𑀓𑀢𑁆𑀣 𑀘𑀸𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀓𑀺𑀜𑁆𑀘 𑀢𑁆𑀯𑀁 𑀓𑀭𑁄𑀲𑀺, 𑀓𑀺𑀜𑁆𑀘𑀸𑀬𑀁 𑀪𑀺𑀓𑁆𑀔𑀼 𑀓𑀭𑁄𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀝𑁆𑀞𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀺, 𑀅𑀧𑀺𑀘 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 ¶ 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀁 𑀢𑁂 𑀲𑀼𑀢𑀁, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁, 𑀓𑀤𑀸 𑀢𑁂 𑀲𑀼𑀢𑀁, 𑀓𑀢𑁆𑀣 𑀢𑁂 𑀲𑀼𑀢𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑀁, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑀁, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑀁, 𑀉𑀧𑀸𑀲𑀓𑀲𑁆𑀲 𑀲𑀼𑀢𑀁, 𑀉𑀧𑀸𑀲𑀺𑀓𑀸𑀬 𑀲𑀼𑀢𑀁, 𑀭𑀸𑀚𑀽𑀦𑀁 𑀲𑀼𑀢𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢’’𑀦𑁆𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁂𑀦 𑀧𑀯𑀸𑀭𑀡𑀁 𑀞𑀧𑁂𑀫𑀺 ¶ , 𑀅𑀧𑀺𑀘 𑀧𑀭𑀺𑀲𑀗𑁆𑀓𑀸𑀬 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀗𑁆𑀓𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀓𑀺𑀁 𑀧𑀭𑀺𑀲𑀗𑁆𑀓𑀲𑀺, 𑀓𑀺𑀦𑁆𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀓𑀤𑀸 𑀧𑀭𑀺𑀲𑀗𑁆𑀓𑀲𑀺, 𑀓𑀢𑁆𑀣 𑀧𑀭𑀺𑀲𑀗𑁆𑀓𑀲𑀺, 𑀧𑀸𑀭𑀸𑀚𑀺𑀓𑀁 ¶ 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀓𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀉𑀧𑀸𑀲𑀺𑀓𑀸𑀬 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀭𑀸𑀚𑀽𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀗𑁆𑀓𑀸𑀬 𑀧𑀯𑀸𑀭𑀡𑀁 𑀞𑀧𑁂𑀫𑀺, 𑀅𑀧𑀺 𑀘 𑀅𑀳𑀫𑁆𑀧𑀺 𑀦 𑀚𑀸𑀦𑀸𑀫𑀺 𑀓𑁂𑀦 𑀧𑀦𑀸𑀳𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁄𑀤𑀓𑁄 𑀪𑀺𑀓𑁆𑀔𑀼 𑀅𑀦𑀼𑀬𑁄𑀕𑁂𑀦 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀘𑀺𑀢𑁆𑀢𑀁 𑀦 𑀆𑀭𑀸𑀥𑁂𑀢𑀺, 𑀅𑀦𑀦𑀼𑀯𑀸𑀤𑁄 𑀘𑀼𑀤𑀺𑀢𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁄𑀤𑀓𑁄 𑀪𑀺𑀓𑁆𑀔𑀼 𑀅𑀦𑀼𑀬𑁄𑀕𑁂𑀦 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀲𑀸𑀦𑀼𑀯𑀸𑀤𑁄 𑀘𑀼𑀤𑀺𑀢𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁄𑀤𑀓𑁄 𑀪𑀺𑀓𑁆𑀔𑀼 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀲𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀘𑁄𑀤𑀓𑁄 𑀪𑀺𑀓𑁆𑀔𑀼 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁄𑀤𑀓𑁄, 𑀪𑀺𑀓𑁆𑀔𑀼 𑀅𑀫𑀽𑀮𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑁂𑀦… 𑀧𑀸𑀘𑀺𑀢𑁆𑀢𑀺𑀬𑁂𑀦… 𑀧𑀸𑀝𑀺𑀤𑁂𑀲𑀦𑀻𑀬𑁂𑀦… 𑀤𑀼𑀓𑁆𑀓𑀝𑁂𑀦… 𑀤𑀼𑀩𑁆𑀪𑀸𑀲𑀺𑀢𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 ¶ 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀲𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀘𑀼𑀤𑀺𑀢𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀦𑀸𑀲𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑀼𑀤𑀺𑀢𑁄 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑀼𑀤𑀺𑀢𑁄 𑀪𑀺𑀓𑁆𑀔𑀼 𑀣𑀼𑀮𑁆𑀮𑀘𑁆𑀘𑀬𑀁… 𑀧𑀸𑀘𑀺𑀢𑁆𑀢𑀺𑀬𑀁… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑀧𑀯𑀸𑀭𑀡𑀸𑀞𑀧𑀦𑀁 𑀦𑀺𑀝𑁆𑀞𑀺𑀢𑀁.

𑁧𑁪𑁨. 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑀸𑀤𑀺

𑁨𑁩𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄, 𑀢𑁂𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀲𑀸𑀲𑁆𑀲 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺𑀦𑁄 ¶ 𑀳𑁄𑀦𑁆𑀢𑀺…𑀧𑁂… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ¶ 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀓𑁆𑀓𑀝𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄, 𑀢𑁂𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀲𑀸𑀲𑁆𑀲 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺… 𑀤𑀼𑀓𑁆𑀓𑀝𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀬𑁂 ¶ 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄, 𑀢𑁂𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑀫𑀦𑁆𑀢𑀁 ¶ 𑀅𑀧𑀦𑁂𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀲𑀸𑀲𑁆𑀲 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺…𑀧𑁂… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺𑀦𑁄 ¶ 𑀳𑁄𑀦𑁆𑀢𑀺… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺… 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀤𑀼𑀓𑁆𑀓𑀝𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺𑀦𑁄, 𑀢𑁂𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀬𑀁 𑀔𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀲𑀸𑀲𑁆𑀲 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺.

𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁪𑁩. 𑀯𑀢𑁆𑀣𑀼𑀞𑀧𑀦𑀸𑀤𑀺

𑁨𑁩𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀯𑀢𑁆𑀣𑀼 𑀧𑀜𑁆𑀜𑀸𑀬𑀢𑀺, 𑀦 𑀧𑀼𑀕𑁆𑀕𑀮𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀯𑀢𑁆𑀣𑀼𑀁 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀯𑀺𑀲𑀼𑀤𑁆𑀥𑀸𑀦𑀁 𑀧𑀯𑀸𑀭𑀡𑀸 𑀧𑀜𑁆𑀜𑀢𑁆𑀢𑀸. 𑀲𑀘𑁂 𑀯𑀢𑁆𑀣𑀼 𑀧𑀜𑁆𑀜𑀸𑀬𑀢𑀺, 𑀦 𑀧𑀼𑀕𑁆𑀕𑀮𑁄, 𑀇𑀤𑀸𑀦𑁂𑀯 𑀦𑀁 𑀯𑀤𑁂𑀳𑀻’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀢𑁆𑀣𑀼. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀧𑀼𑀕𑁆𑀕𑀮𑀁 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀲𑀫𑀕𑁆𑀕𑀸𑀦𑀁 𑀧𑀯𑀸𑀭𑀡𑀸 𑀧𑀜𑁆𑀜𑀢𑁆𑀢𑀸. 𑀲𑀘𑁂 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀢𑁆𑀣𑀼, 𑀇𑀤𑀸𑀦𑁂𑀯 𑀦𑀁 𑀯𑀤𑁂𑀳𑀻’’𑀢𑀺.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀤𑀳𑀼 𑀧𑀯𑀸𑀭𑀡𑀸𑀬 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀯𑀢𑁆𑀣𑀼 𑀘 𑀧𑀼𑀕𑁆𑀕𑀮𑁄 𑀘 𑀧𑀜𑁆𑀜𑀸𑀬𑀢𑀺. 𑀬𑀤𑀺 ¶ 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀯𑀢𑁆𑀣𑀼𑀜𑁆𑀘 ¶ 𑀧𑀼𑀕𑁆𑀕𑀮𑀜𑁆𑀘 ¶ 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀯𑀺𑀲𑀼𑀤𑁆𑀥𑀸𑀦𑀜𑁆𑀘 𑀲𑀫𑀕𑁆𑀕𑀸𑀦𑀜𑁆𑀘 𑀧𑀯𑀸𑀭𑀡𑀸 𑀧𑀜𑁆𑀜𑀢𑁆𑀢𑀸. 𑀲𑀘𑁂 𑀯𑀢𑁆𑀣𑀼 𑀘 𑀧𑀼𑀕𑁆𑀕𑀮𑁄 𑀘 𑀧𑀜𑁆𑀜𑀸𑀬𑀢𑀺, 𑀇𑀤𑀸𑀦𑁂𑀯 𑀦𑀁 𑀯𑀤𑁂𑀳𑀻’’𑀢𑀺.

𑀧𑀼𑀩𑁆𑀩𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀯𑀢𑁆𑀣𑀼 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀸 𑀧𑀼𑀕𑁆𑀕𑀮𑁄, 𑀓𑀮𑁆𑀮𑀁 𑀯𑀘𑀦𑀸𑀬. 𑀧𑀼𑀩𑁆𑀩𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 ¶ 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀸 𑀯𑀢𑁆𑀣𑀼, 𑀓𑀮𑁆𑀮𑀁 𑀯𑀘𑀦𑀸𑀬. 𑀧𑀼𑀩𑁆𑀩𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀸𑀬 𑀯𑀢𑁆𑀣𑀼 𑀘 𑀧𑀼𑀕𑁆𑀕𑀮𑁄 𑀘 𑀧𑀜𑁆𑀜𑀸𑀬𑀢𑀺, 𑀢𑀁 𑀘𑁂 𑀓𑀢𑀸𑀬 𑀧𑀯𑀸𑀭𑀡𑀸𑀬 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺.

𑀯𑀢𑁆𑀣𑀼𑀞𑀧𑀦𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁪𑁪. 𑀪𑀡𑁆𑀟𑀦𑀓𑀸𑀭𑀓𑀯𑀢𑁆𑀣𑀼

𑁨𑁪𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀲𑀸𑀫𑀦𑁆𑀢𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼 𑁋 𑀫𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑁆𑀲𑀸𑀫𑀸𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀢𑁂 𑀪𑀺𑀓𑁆𑀔𑀽 𑁋 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀲𑀸𑀫𑀦𑁆𑀢𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀯𑀲𑁆𑀲𑀁 𑀉𑀧𑀕𑀢𑀸 𑁋 𑀫𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑁆𑀲𑀸𑀫𑀸’’𑀢𑀺. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀸𑀫𑀦𑁆𑀢𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 ¶ 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺 𑁋 𑀫𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑁆𑀲𑀸𑀫𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼𑀁 𑁋 𑀓𑀣𑀁 𑀫𑀬𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀧𑀯𑀸𑀭𑁂𑀬𑁆𑀬𑀸𑀫𑀸𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀮𑀳𑀼𑀁 𑀮𑀳𑀼𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀧𑀯𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀯𑀸𑀭𑀺𑀢𑀸 ¶ 𑀔𑁄 𑀫𑀬𑀁, 𑀆𑀯𑀼𑀲𑁄; 𑀬𑀣𑀸𑀬𑀲𑁆𑀫𑀦𑁆𑀢𑀸 𑀫𑀜𑁆𑀜𑀦𑁆𑀢𑀺 𑀢𑀣𑀸 ¶ 𑀓𑀭𑁄𑀦𑁆𑀢𑀽’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀅𑀲𑀁𑀯𑀺𑀳𑀺𑀢𑀸 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀸𑀦𑀻𑀬𑁂𑀦 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀸; 𑀢𑁂𑀲𑀁 𑀯𑀺𑀓𑁆𑀔𑀺𑀢𑁆𑀯𑀸 [𑀯𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 (𑀧𑀝𑀺𑀯𑀺𑀲𑁄𑀥𑀓𑀸𑀦𑀁 𑀫𑀢𑀺), 𑀆𑀘𑀺𑀓𑁆𑀔𑀺𑀢𑁆𑀯𑀸 (𑀓.)] 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀧𑀯𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀯𑀸𑀭𑀺𑀢𑀸 𑀔𑁄 𑀫𑀬𑀁, 𑀆𑀯𑀼𑀲𑁄; 𑀬𑀣𑀸𑀬𑀲𑁆𑀫𑀦𑁆𑀢𑀸 𑀫𑀜𑁆𑀜𑀦𑁆𑀢𑀺 𑀢𑀣𑀸 𑀓𑀭𑁄𑀦𑁆𑀢𑀽’’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀆𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀩𑁆𑀬𑀢𑁆𑀢𑁂𑀦 𑀧𑀝𑀺𑀩𑀮𑁂𑀦 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑁄 [𑀆𑀬𑀲𑁆𑀫𑀦𑁆𑀢𑀸 (𑀓.)], 𑀆𑀯𑀸𑀲𑀺𑀓𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫 ¶ , 𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 ¶ 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀸𑀥𑀸𑀯𑀼𑀲𑁄, 𑀇𑀤𑀸𑀦𑁂𑀯 𑀦𑁄 𑀧𑀯𑀸𑀭𑁂𑀣𑀸’’𑀢𑀺, 𑀢𑁂 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀦𑀺𑀲𑁆𑀲𑀭𑀸 𑀔𑁄 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀧𑀯𑀸𑀭𑀡𑀸𑀬; 𑀦 𑀢𑀸𑀯 𑀫𑀬𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀁 𑀓𑀸𑀴𑀁 𑀅𑀦𑀼𑀯𑀲𑁂𑀬𑁆𑀬𑀼𑀁, 𑀆𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀩𑁆𑀬𑀢𑁆𑀢𑁂𑀦 𑀧𑀝𑀺𑀩𑀮𑁂𑀦 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑁄, 𑀆𑀯𑀸𑀲𑀺𑀓𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀲𑀸𑀥𑀸𑀯𑀼𑀲𑁄, 𑀇𑀤𑀸𑀦𑁂𑀯 𑀦𑁄 𑀧𑀯𑀸𑀭𑁂𑀬𑁆𑀬𑀸𑀣𑀸’’𑀢𑀺, 𑀢𑁂 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀅𑀦𑀺𑀲𑁆𑀲𑀭𑀸 𑀔𑁄 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀧𑀯𑀸𑀭𑀡𑀸𑀬, 𑀦 𑀢𑀸𑀯 𑀫𑀬𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 ¶ 𑀢𑀫𑁆𑀧𑀺 𑀚𑀼𑀡𑁆𑀳𑀁 𑀅𑀦𑀼𑀯𑀲𑁂𑀬𑁆𑀬𑀼𑀁, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀲𑀩𑁆𑀩𑁂𑀳𑁂𑀯 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀓𑀸𑀫𑀸 𑀧𑀯𑀸𑀭𑁂𑀢𑀩𑁆𑀩𑀁.

𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀕𑀺𑀮𑀸𑀦𑁄 𑀅𑀕𑀺𑀮𑀸𑀦𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀆𑀬𑀲𑁆𑀫𑀸 𑀔𑁄 𑀕𑀺𑀮𑀸𑀦𑁄. 𑀕𑀺𑀮𑀸𑀦𑁄 𑀘 𑀅𑀦𑀦𑀼𑀬𑁄𑀕𑀓𑁆𑀔𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀆𑀕𑀫𑁂𑀳𑀺, 𑀆𑀯𑀼𑀲𑁄, 𑀬𑀸𑀯 𑀅𑀭𑁄𑀕𑁄 𑀳𑁄𑀲𑀺. 𑀅𑀭𑁄𑀕𑁄 𑀆𑀓𑀗𑁆𑀔𑀫𑀸𑀦𑁄 ¶ 𑀘𑁄𑀤𑁂𑀲𑁆𑀲𑀲𑀻’’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀘𑁄𑀤𑁂𑀢𑀺, 𑀅𑀦𑀸𑀤𑀭𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 ¶ 𑀅𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄. 𑀕𑀺𑀮𑀸𑀦𑁄 𑀘 𑀅𑀦𑀦𑀼𑀬𑁄𑀕𑀓𑁆𑀔𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀆𑀕𑀫𑁂𑀳𑀺, 𑀆𑀯𑀼𑀲𑁄, 𑀬𑀸𑀯𑀸𑀬𑀁 𑀪𑀺𑀓𑁆𑀔𑀼 𑀅𑀭𑁄𑀕𑁄 𑀳𑁄𑀢𑀺. 𑀅𑀭𑁄𑀕𑀁 𑀆𑀓𑀗𑁆𑀔𑀫𑀸𑀦𑁄 𑀘𑁄𑀤𑁂𑀲𑁆𑀲𑀲𑀻’’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀘𑁄𑀤𑁂𑀢𑀺, 𑀅𑀦𑀸𑀤𑀭𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀆𑀬𑀲𑁆𑀫𑀦𑁆𑀢𑀸 𑀔𑁄 𑀕𑀺𑀮𑀸𑀦𑀸. 𑀕𑀺𑀮𑀸𑀦𑁄 𑀘 𑀅𑀦𑀦𑀼𑀬𑁄𑀕𑀓𑁆𑀔𑀫𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸. 𑀆𑀕𑀫𑁂𑀳𑀺, 𑀆𑀯𑀼𑀲𑁄, 𑀬𑀸𑀯 𑀅𑀭𑁄𑀕𑀸 𑀳𑁄𑀣. 𑀅𑀭𑁄𑀕𑁄 𑀅𑀭𑁄𑀕𑀁 𑀆𑀓𑀗𑁆𑀔𑀫𑀸𑀦𑁄 𑀘𑁄𑀤𑁂𑀲𑁆𑀲𑀲𑀻’’𑀢𑀺 [𑀬𑀸𑀯 𑀅𑀭𑁄𑀕𑁄 𑀳𑁄𑀢𑀺, 𑀅𑀭𑁄𑀕𑀁 𑀆𑀓𑀗𑁆𑀔𑀫𑀸𑀦𑁄 𑀘𑁄𑀤𑁂𑀲𑁆𑀲𑀲𑀻𑀢𑀺 (𑀓.)]. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀘𑁄𑀤𑁂𑀢𑀺, 𑀅𑀦𑀸𑀤𑀭𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀕𑀺𑀮𑀸𑀦𑁄 𑀅𑀕𑀺𑀮𑀸𑀦𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀉𑀪𑁄 𑀲𑀗𑁆𑀖𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 [𑀲𑀫𑀦𑀼𑀪𑀸𑀲𑀺𑀢𑁆𑀯𑀸 (𑀲𑀻.)] 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺.

𑀪𑀡𑁆𑀟𑀦𑀓𑀸𑀭𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁪𑁫. 𑀧𑀯𑀸𑀭𑀡𑀸𑀲𑀗𑁆𑀕𑀳𑁄

𑁨𑁪𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 ¶ 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀔𑁄 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫 ¶ , 𑀲𑀺𑀬𑀸𑀧𑀺 ¶ 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀔𑁄 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁 𑁋 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀭𑁂𑀬𑁆𑀬, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 ¶ 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀲𑀗𑁆𑀖𑁄 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀭𑁄𑀢𑀺, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀯𑀸𑀭𑀡𑀸𑀲𑀗𑁆𑀕𑀳𑀲𑁆𑀲 𑀓𑀭𑀡𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑁄 ¶ 𑀲𑀗𑁆𑀖𑁂𑀦 𑀧𑀯𑀸𑀭𑀡𑀸𑀲𑀗𑁆𑀕𑀳𑁄, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀓𑀢𑁂 𑀧𑀯𑀸𑀭𑀡𑀸𑀲𑀗𑁆𑀕𑀳𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄, 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁; 𑀅𑀢𑁆𑀣𑀺 𑀫𑁂 𑀚𑀦𑀧𑀤𑁂 𑀓𑀭𑀡𑀻𑀬’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀸𑀥𑀸𑀯𑀼𑀲𑁄, 𑀧𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 𑀘𑁂 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀯𑀸𑀭𑀬𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀦𑀺𑀲𑁆𑀲𑀭𑁄 𑀔𑁄 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀧𑀯𑀸𑀭𑀡𑀸𑀬, 𑀦 𑀢𑀸𑀯𑀸𑀳𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀬𑀫𑀸𑀦𑀲𑁆𑀲 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀉𑀪𑁄 𑀲𑀗𑁆𑀖𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀸. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀦𑀧𑀤𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 ¶ 𑀧𑀼𑀦𑀤𑁂𑀯 𑀅𑀦𑁆𑀢𑁄 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀢𑀺, 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀦𑀺𑀲𑁆𑀲𑀭𑁄 𑀔𑁄 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀧𑀯𑀸𑀭𑀡𑀸𑀬; 𑀧𑀯𑀸𑀭𑀺𑀢𑁄 𑀅𑀳’’𑀦𑁆𑀢𑀺. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 ¶ 𑀞𑀧𑁂𑀢𑀺, 𑀉𑀪𑁄 𑀲𑀗𑁆𑀖𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺.

𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀦𑀺𑀝𑁆𑀞𑀺𑀢𑁄.

𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁄 𑀘𑀢𑀼𑀢𑁆𑀣𑁄.

𑁧𑁪𑁬. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀯𑀲𑁆𑀲𑀁𑀯𑀼𑀝𑁆𑀞𑀸 𑀓𑁄𑀲𑀮𑁂𑀲𑀼, 𑀅𑀕𑀫𑀼𑀁 𑀲𑀢𑁆𑀣𑀼 𑀤𑀲𑁆𑀲𑀦𑀁;

𑀅𑀨𑀸𑀲𑀼𑀁 𑀧𑀲𑀼𑀲𑀁𑀯𑀸𑀲𑀁, 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑀢𑀸.

𑀧𑀯𑀸𑀭𑁂𑀦𑁆𑀢𑀸 𑀧𑀡𑀸𑀫𑀜𑁆𑀘 [𑀧𑀯𑀸𑀭𑁂𑀦𑁆𑀢𑀸𑀲𑀦𑁂 𑀤𑁆𑀯𑁂 𑀘 (𑀲𑀻. 𑀲𑁆𑀬𑀸.)], 𑀓𑀫𑁆𑀫𑀁 𑀕𑀺𑀮𑀸𑀦𑀜𑀸𑀢𑀓𑀸;

𑀭𑀸𑀚𑀸 𑀘𑁄𑀭𑀸 𑀘 𑀥𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀣𑀸.

𑀧𑀜𑁆𑀘 𑀘𑀢𑀼𑀢𑀬𑁄 𑀤𑁆𑀯𑁂𑀓𑁄, 𑀆𑀧𑀦𑁆𑀦𑁄 𑀯𑁂𑀫𑀢𑀻 𑀲𑀭𑀺;

𑀲𑀩𑁆𑀩𑁄 𑀲𑀗𑁆𑀖𑁄 𑀯𑁂𑀫𑀢𑀺𑀓𑁄, 𑀩𑀳𑀽 𑀲𑀫𑀸 𑀘 𑀣𑁄𑀓𑀺𑀓𑀸.

𑀆𑀯𑀸𑀲𑀺𑀓𑀸 ¶ 𑀘𑀸𑀢𑀼𑀤𑁆𑀤𑀲, 𑀮𑀺𑀗𑁆𑀕𑀲𑀁𑀯𑀸𑀲𑀓𑀸 𑀉𑀪𑁄;

𑀕𑀦𑁆𑀢𑀩𑁆𑀩𑀁 ¶ 𑀦 𑀦𑀺𑀲𑀺𑀦𑁆𑀦𑀸𑀬, 𑀙𑀦𑁆𑀤𑀤𑀸𑀦𑁂 𑀧𑀯𑀸𑀭𑀡𑀸 [𑀙𑀦𑁆𑀤𑀤𑀸𑀦𑀧𑀯𑀸𑀭𑀡𑀸 (𑀓.)].

𑀲𑀯𑀭𑁂𑀳𑀺 𑀔𑁂𑀧𑀺𑀢𑀸 𑀫𑁂𑀖𑁄, 𑀅𑀦𑁆𑀢𑀭𑀸 𑀘 𑀧𑀯𑀸𑀭𑀡𑀸;

𑀦 𑀇𑀘𑁆𑀙𑀦𑁆𑀢𑀺 𑀧𑀼𑀭𑀫𑁆𑀳𑀸𑀓𑀁, 𑀅𑀝𑁆𑀞𑀧𑀺𑀢𑀸 𑀘 𑀪𑀺𑀓𑁆𑀔𑀼𑀦𑁄.

𑀓𑀺𑀫𑁆𑀳𑀺 𑀯𑀸𑀢𑀺 𑀓𑀢𑀫𑀜𑁆𑀘, 𑀤𑀺𑀝𑁆𑀞𑁂𑀦 𑀲𑀼𑀢𑀲𑀗𑁆𑀓𑀸𑀬;

𑀘𑁄𑀤𑀓𑁄 𑀘𑀼𑀤𑀺𑀢𑀓𑁄 𑀘, 𑀣𑀼𑀮𑁆𑀮𑀘𑁆𑀘𑀬𑀁 𑀯𑀢𑁆𑀣𑀼 𑀪𑀡𑁆𑀟𑀦𑀁;

𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀘, 𑀅𑀦𑀺𑀲𑁆𑀲𑀭𑁄 𑀧𑀯𑀸𑀭𑀬𑁂𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀙𑀘𑀢𑁆𑀢𑀸𑀭𑀻𑀲𑀸𑀢𑀺.

𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓𑁄

𑁧𑁪𑁭. 𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼

𑁨𑁪𑁨. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀲𑀻𑀢𑀺𑀬𑀸 𑀕𑀸𑀫𑀲𑀳𑀲𑁆𑀲𑁂𑀲𑀼 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀫𑁆𑀧𑀸𑀬𑀁 𑀲𑁄𑀡𑁄 𑀦𑀸𑀫 𑀓𑁄𑀴𑀺𑀯𑀺𑀲𑁄 [𑀓𑁄𑀴𑀺𑀯𑀻𑀲𑁄 (𑀲𑀻.)] 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀢𑀲𑁆𑀲 𑀧𑀸𑀤𑀢𑀮𑁂𑀲𑀼 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀆𑀕𑀘𑁆𑀙𑀢𑀼 𑀲𑁄𑀡𑁄, 𑀇𑀘𑁆𑀙𑀸𑀫𑀺 𑀲𑁄𑀡𑀲𑁆𑀲 𑀆𑀕𑀢𑀦𑁆𑀢𑀺. 𑀅𑀣 𑀔𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑁄𑀡𑀁 𑀓𑁄𑀴𑀺𑀯𑀺𑀲𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀭𑀸𑀚𑀸 𑀢𑁂, 𑀢𑀸𑀢 𑀲𑁄𑀡, 𑀧𑀸𑀤𑁂 𑀤𑀓𑁆𑀔𑀺𑀢𑀼𑀓𑀸𑀫𑁄. 𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀲𑁄𑀡, 𑀬𑁂𑀦 𑀭𑀸𑀚𑀸 𑀢𑁂𑀦 𑀧𑀸𑀤𑁂 𑀅𑀪𑀺𑀧𑁆𑀧𑀲𑀸𑀭𑁂𑀬𑁆𑀬𑀸𑀲𑀺. 𑀭𑀜𑁆𑀜𑁄 𑀧𑀼𑀭𑀢𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤. 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀭𑀸𑀚𑀸 𑀧𑀸𑀤𑁂 𑀤𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑁄𑀡𑀁 𑀓𑁄𑀴𑀺𑀯𑀺𑀲𑀁 𑀲𑀺𑀯𑀺𑀓𑀸𑀬 𑀆𑀦𑁂𑀲𑀼𑀁. 𑀅𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀤𑁆𑀤𑀲𑀸 ¶ 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀧𑀸𑀤𑀢𑀮𑁂𑀲𑀼 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀔𑁆𑀯𑀢𑁆𑀣, 𑀪𑀡𑁂, 𑀫𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀢𑀸; 𑀕𑀘𑁆𑀙𑀣, 𑀢𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀣; 𑀲𑁄 𑀦𑁄 𑀪𑀕𑀯𑀸 𑀲𑀫𑁆𑀧𑀭𑀸𑀬𑀺𑀓𑁂 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦𑀸𑀬𑀲𑁆𑀫𑀸 𑀲𑀸𑀕𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 ¶ 𑀲𑀸𑀕𑀢𑀁 𑀏𑀢𑀤𑀯𑁄𑀘𑀼𑀁 ¶ ¶ 𑁋 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀇𑀥𑀽𑀧𑀲𑀗𑁆𑀓𑀦𑁆𑀢𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀲𑀸𑀥𑀼 𑀫𑀬𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀢𑀸𑀯 𑀳𑁄𑀣, 𑀬𑀸𑀯𑀸𑀳𑀁 𑀪𑀕𑀯𑀦𑁆𑀢𑀁 𑀧𑀝𑀺𑀯𑁂𑀤𑁂𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀧𑀼𑀭𑀢𑁄 𑀧𑁂𑀓𑁆𑀔𑀫𑀸𑀦𑀸𑀦𑀁 𑀧𑀸𑀝𑀺𑀓𑀸𑀬 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀇𑀥𑀽𑀧𑀲𑀗𑁆𑀓𑀦𑁆𑀢𑀸𑀦𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀕𑀢, 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 ¶ 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀻𑀞𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀧𑀼𑀭𑀢𑁄 𑀧𑁂𑀓𑁆𑀔𑀫𑀸𑀦𑀸𑀦𑀁 𑀧𑀸𑀝𑀺𑀓𑀸𑀬 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺. 𑀅𑀣 𑀔𑁄 𑀪𑀕𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀲𑀸𑀕𑀢𑀁 𑀲𑀫𑀦𑁆𑀦𑀸𑀳𑀭𑀦𑁆𑀢𑀺, 𑀦𑁄 𑀢𑀣𑀸 𑀪𑀕𑀯𑀦𑁆𑀢𑀁. 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀕𑀢, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺, 𑀢𑀺𑀝𑁆𑀞𑀢𑀺𑀧𑀺, 𑀦𑀺𑀲𑀻𑀤𑀢𑀺𑀧𑀺, 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀥𑀽𑀫𑀸𑀬𑀢𑀺𑀧𑀺 [𑀥𑀽𑀧𑀸𑀬𑀢𑀺𑀧𑀺 (𑀲𑀻.), 𑀧𑀥𑀽𑀧𑀸𑀬𑀢𑀺𑀧𑀺 (𑀲𑁆𑀬𑀸.)] 𑀧𑀚𑁆𑀚𑀮𑀢𑀺𑀧𑀺, 𑀅𑀦𑁆𑀢𑀭𑀥𑀸𑀬𑀢𑀺𑀧𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀕𑀢𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀅𑀦𑁂𑀓𑀯𑀺𑀳𑀺𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸; 𑀲𑀸𑀯𑀓𑁄𑀳𑀫𑀲𑁆𑀫𑀺. 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸; 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀸𑀯𑀓𑁄𑀧𑀺 𑀦𑀸𑀫 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄, 𑀅𑀳𑁄 𑀦𑀽𑀦 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 𑀲𑀫𑀦𑁆𑀦𑀸𑀳𑀭𑀦𑁆𑀢𑀺, 𑀦𑁄 ¶ 𑀢𑀣𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁.

𑀅𑀣 ¶ 𑀔𑁄 𑀪𑀕𑀯𑀸 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 ¶ , 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂, 𑀫𑀼𑀤𑀼𑀘𑀺𑀢𑁆𑀢𑁂, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂, 𑀉𑀤𑀕𑁆𑀕𑀘𑀺𑀢𑁆𑀢𑁂, 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯𑀁 𑀢𑁂𑀲𑀁 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 ¶ 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫. 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀲𑁄𑀡𑀲𑁆𑀲 𑀧𑀩𑁆𑀩𑀚𑁆𑀚𑀸

𑁨𑁪𑁩. 𑀅𑀣 𑀔𑁄 𑀲𑁄𑀡𑀲𑁆𑀲 𑀓𑁄𑀴𑀺𑀯𑀺𑀲𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀬𑀣𑀸 𑀬𑀣𑀸 𑀔𑁄 𑀅𑀳𑀁 ¶ 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑀸𑀦𑀺 𑀅𑀲𑀻𑀢𑀺 𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀲𑀼𑀁. 𑀅𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀅𑀲𑀻𑀢𑀺𑀬𑀸 𑀕𑀸𑀫𑀺𑀓𑀲𑀳𑀲𑁆𑀲𑁂𑀲𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 ¶ 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺. 𑀅𑀮𑀢𑁆𑀣 𑀔𑁄 𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀼𑀧𑀲𑀫𑁆𑀧𑀦𑁆𑀦𑁄 𑀘 ¶ 𑀧𑀦𑀸𑀬𑀲𑁆𑀫𑀸 𑀲𑁄𑀡𑁄 𑀲𑀻𑀢𑀯𑀦𑁂 𑀯𑀺𑀳𑀭𑀢𑀺. 𑀢𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘𑀗𑁆𑀓𑀫𑀢𑁄 𑀧𑀸𑀤𑀸 𑀪𑀺𑀚𑁆𑀚𑀺𑀁𑀲𑀼. 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦𑀁. [𑀇𑀢𑁄 𑀧𑀭𑀁 𑀬𑀸𑀯 𑀇𑀫𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀯𑀲𑀸𑀦𑀁 𑀢𑀸𑀯 𑀧𑀸𑀞𑁄 𑀅. 𑀦𑀺. 𑁬.𑁫𑁫 𑀆𑀤𑀬𑁄] 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑁂 ¶ 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸; 𑀲𑀓𑁆𑀓𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀲𑀻𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀬𑁂𑀦𑀸𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑀗𑁆𑀓𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑀗𑁆𑀓𑀫𑀁 𑀮𑁄𑀳𑀺𑀢𑁂𑀦 𑀨𑀼𑀝𑀁, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀲𑁆𑀲 𑀦𑁆𑀯𑀸𑀬𑀁, 𑀪𑀺𑀓𑁆𑀔𑀯𑁂, 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦’’𑀦𑁆𑀢𑀺? ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀲𑁄𑀡𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘𑀗𑁆𑀓𑀫𑀢𑁄 𑀧𑀸𑀤𑀸 𑀪𑀺𑀚𑁆𑀚𑀺𑀁𑀲𑀼. 𑀢𑀲𑁆𑀲𑀸𑀬𑀁 𑀘𑀗𑁆𑀓𑀫𑁄 𑀮𑁄𑀳𑀺𑀢𑁂𑀦 𑀨𑀼𑀝𑁄, 𑀲𑁂𑀬𑁆𑀬𑀣𑀸𑀧𑀺 𑀕𑀯𑀸𑀖𑀸𑀢𑀦’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀬𑁂𑀦𑀸𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦𑀦𑀼 𑀢𑁂, 𑀲𑁄𑀡, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 ¶ 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦𑀸𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸; 𑀲𑀓𑁆𑀓𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 ¶ . ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀓𑀼𑀲𑀮𑁄 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄 𑀯𑀻𑀡𑀸𑀬 𑀢𑀦𑁆𑀢𑀺𑀲𑁆𑀲𑀭𑁂’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀢𑀺𑀲𑀺𑀣𑀺𑀮𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀦𑁂𑀯 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺 𑀦𑀸𑀢𑀺𑀲𑀺𑀣𑀺𑀮𑀸, 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺, 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀲𑁄𑀡, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺 ¶ , 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀲𑁄𑀡, 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀳, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 ¶ 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀲𑀻𑀢𑀯𑀦𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀫𑁆𑀫𑀼𑀔𑁂 𑀅𑀦𑁆𑀢𑀭𑀳𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀸𑀲𑀺, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 ¶ 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄, 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀦 𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑁋 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀪𑀺𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀲𑁄𑀡𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑁨𑁪𑁪. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀜𑁆𑀜𑁄𑀚𑀦𑁄 ¶ 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄 𑀙𑀝𑁆𑀞𑀸𑀦𑀸𑀦𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺 𑁋 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺 ¶ , 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀲𑁆𑀲𑀸𑀬 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀓𑀸𑀫𑀬𑀫𑀸𑀦𑁄 ¶ 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 [𑀓𑀭𑀡𑀻𑀬𑀁 𑀅𑀢𑁆𑀢𑀦𑁄 (𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁)] 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁, 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼, 𑀯𑀼𑀲𑀺𑀢𑀯𑀸, 𑀓𑀢𑀓𑀭𑀡𑀻𑀬𑁄, 𑀓𑀭𑀡𑀻𑀬𑀫𑀢𑁆𑀢𑀸𑀦𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 ¶ 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁, 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 ¶ 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 ¶ 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁂𑀮𑁄 𑀧𑀩𑁆𑀩𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀲𑀼𑀲𑀺𑀭𑁄 𑀏𑀓𑀕𑁆𑀖𑀦𑁄, 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬; 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 ¶ 𑀯𑀸𑀢𑀯𑀼𑀝𑁆𑀞𑀺…𑀧𑁂… 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀤𑀺𑀲𑀸𑀬…𑀧𑁂… 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺, 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺; 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺, 𑀞𑀺𑀢𑀁, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺.

𑀦𑁂𑀓𑁆𑀔𑀫𑁆𑀫𑀁 ¶ 𑀅𑀥𑀺𑀫𑀼𑀢𑁆𑀢𑀲𑁆𑀲, 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄;

𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘.

𑀢𑀡𑁆𑀳𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑀲𑁆𑀲 ¶ , 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄;

𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀁, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

𑀢𑀲𑁆𑀲 ¶ 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀢𑀲𑁆𑀲 𑀧𑀝𑀺𑀘𑀬𑁄 𑀦𑀢𑁆𑀣𑀺, 𑀓𑀭𑀡𑀻𑀬𑀁 𑀦 𑀯𑀺𑀚𑁆𑀚𑀢𑀺.

𑀲𑁂𑀮𑁄 𑀬𑀣𑀸 𑀏𑀓𑀕𑁆𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀭𑀽𑀧𑀸 𑀭𑀲𑀸 𑀲𑀤𑁆𑀤𑀸, 𑀕𑀦𑁆𑀥𑀸 𑀨𑀲𑁆𑀲𑀸 𑀘 𑀓𑁂𑀯𑀮𑀸.

𑀇𑀝𑁆𑀞𑀸 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸 𑀘, 𑀦 𑀧𑀯𑁂𑀥𑁂𑀦𑁆𑀢𑀺 𑀢𑀸𑀤𑀺𑀦𑁄;

𑀞𑀺𑀢𑀁 ¶ 𑀘𑀺𑀢𑁆𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻𑀢𑀺.

𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁪𑁮. 𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄

𑁨𑁪𑁫. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄, 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄. 𑀅𑀣 𑀘, 𑀧𑀦𑀺𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀳𑀲𑀫𑀸𑀦𑀓𑀁, 𑀫𑀜𑁆𑀜𑁂, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁆𑀯𑀁 𑀔𑁄𑀲𑀺, 𑀲𑁄𑀡, 𑀲𑀼𑀔𑀼𑀫𑀸𑀮𑁄. 𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀲𑁄𑀡, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀅𑀣𑀸𑀳𑀁 𑀪𑀦𑁆𑀢𑁂 𑀏𑀓𑀧𑀮𑀸𑀲𑀺𑀓𑀁 𑀘𑁂 𑀉𑀧𑀸𑀳𑀦𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀺, 𑀢𑀲𑁆𑀲 𑀫𑁂 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀲𑁄𑀡𑁄 𑀓𑁄𑀴𑀺𑀯𑀺𑀲𑁄 𑀅𑀲𑀻𑀢𑀺𑀲𑀓𑀝𑀯𑀸𑀳𑁂 𑀳𑀺𑀭𑀜𑁆𑀜𑀁 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀁. 𑀲𑁄 𑀤𑀸𑀦𑀸𑀬𑀁 𑀏𑀓𑀧𑀮𑀸𑀲𑀺𑀓𑀸𑀲𑀼 𑀉𑀧𑀸𑀳𑀦𑀸𑀲𑀼 𑀲𑀢𑁆𑀢𑁄’𑀢𑀺. 𑀲𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺 𑀅𑀳𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺; 𑀦𑁄 𑀘𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 ¶ 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦𑀁. 𑀦, 𑀪𑀺𑀓𑁆𑀔𑀯𑁂, 𑀤𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀢𑀺𑀕𑀼𑀡𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀦 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 [𑀕𑀡𑀗𑁆𑀕𑀡𑀽𑀧𑀸𑀳𑀦𑀸 (𑀩𑀳𑀽𑀲𑀼)] 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁪𑁯. 𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁪𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀩𑁆𑀩𑀦𑀻𑀮𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀧𑀻𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀮𑁄𑀳𑀺𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸 ¶ [𑀲𑀩𑁆𑀩𑀫𑀜𑁆𑀚𑁂𑀝𑁆𑀞𑀺𑀓𑀸 (𑀓.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺 ¶ … 𑀲𑀩𑁆𑀩𑀓𑀡𑁆𑀳𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺… 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀦𑀻𑀮𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀲𑀩𑁆𑀩𑀧𑀻𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀮𑁄𑀳𑀺𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀓𑀡𑁆𑀳𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 ¶ 𑀪𑀺𑀓𑁆𑀔𑀽 𑀦𑀻𑀮𑀓𑀯𑀤𑁆𑀥𑀺𑀓𑀸 [𑀯𑀝𑁆𑀝𑀺𑀓𑀸 (𑀲𑀻.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀧𑀻𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀮𑁄𑀳𑀺𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀜𑁆𑀚𑀺𑀝𑁆𑀞𑀺𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀓𑀡𑁆𑀳𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀳𑀸𑀭𑀗𑁆𑀕𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀳𑀸𑀦𑀸𑀫𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀦𑀻𑀮𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀧𑀻𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀮𑁄𑀳𑀺𑀢𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀜𑁆𑀚𑀺𑀝𑁆𑀞𑀺𑀓𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 ¶ 𑀓𑀡𑁆𑀳𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀳𑀸𑀭𑀗𑁆𑀕𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀳𑀸𑀦𑀸𑀫𑀭𑀢𑁆𑀢𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀔𑀮𑁆𑀮𑀓𑀩𑀤𑁆𑀥𑀸 […𑀩𑀦𑁆𑀥𑀸 (𑀓.)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀧𑀼𑀝𑀩𑀤𑁆𑀥𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀢𑀽𑀮𑀧𑀼𑀡𑁆𑀡𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺 ¶ , 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑁄𑀭𑀧𑀺𑀜𑁆𑀙 [𑀫𑁄𑀭𑀧𑀺𑀜𑁆𑀚 (𑀲𑀻. 𑀲𑁆𑀬𑀸.)] 𑀧𑀭𑀺𑀲𑀺𑀩𑁆𑀩𑀺𑀢𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂 ¶ , 𑀔𑀮𑁆𑀮𑀓𑀩𑀤𑁆𑀥𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀧𑀼𑀝𑀩𑀤𑁆𑀥𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀽𑀮𑀧𑀼𑀡𑁆𑀡𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀅𑀚𑀯𑀺𑀲𑀸𑀡𑀯𑀤𑁆𑀥𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑁄𑀭𑀧𑀺𑀜𑁆𑀙𑀧𑀭𑀺𑀲𑀺𑀩𑁆𑀩𑀺𑀢𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺…𑀧𑁂… 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 ¶ 𑀥𑀸𑀭𑁂𑀦𑁆𑀢𑀺, 𑀤𑀻𑀧𑀺𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀅𑀚𑀺𑀦𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀉𑀤𑁆𑀤𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀫𑀚𑁆𑀚𑀸𑀭𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀓𑀸𑀴𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺, 𑀮𑀼𑀯𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 [𑀉𑀮𑀽𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 (𑀬𑁄𑀚𑀦𑀸)] 𑀉𑀧𑀸𑀳𑀦𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸…𑀧𑁂… 𑀦 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀤𑀻𑀧𑀺𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀅𑀚𑀺𑀦𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀉𑀤𑁆𑀤𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀚𑁆𑀚𑀸𑀭𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀸𑀴𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀮𑀼𑀯𑀓𑀘𑀫𑁆𑀫𑀧𑀭𑀺𑀓𑁆𑀔𑀝𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁦. 𑀑𑀫𑀼𑀓𑁆𑀓𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀦𑀼𑀚𑀸𑀦𑀦𑀸

𑁨𑁪𑁭. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀲𑀫𑀡𑁂𑀦. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀔𑀜𑁆𑀚𑀫𑀸𑀦𑁄 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀤𑁆𑀤𑀲𑀸 𑀔𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸 𑀉𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀅𑀬𑁆𑀬𑁄 𑀔𑀜𑁆𑀚𑀢𑀻’’𑀢𑀺 ¶ ? ‘‘𑀧𑀸𑀤𑀸 𑀫𑁂, 𑀆𑀯𑀼𑀲𑁄, 𑀨𑀮𑀺𑀢𑀸’’𑀢𑀺 [𑀨𑀸𑀮𑀺𑀢𑀸𑀢𑀺 (𑀓.)]. ‘‘𑀳𑀦𑁆𑀤, 𑀪𑀦𑁆𑀢𑁂, 𑀉𑀧𑀸𑀳𑀦𑀸𑀬𑁄’’𑀢𑀺. ‘‘𑀅𑀮𑀁 ¶ , 𑀆𑀯𑀼𑀲𑁄, 𑀧𑀝𑀺𑀓𑁆𑀔𑀺𑀢𑁆𑀢𑀸 𑀪𑀕𑀯𑀢𑀸 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸’’𑀢𑀺. ‘‘𑀕𑀡𑁆𑀳𑀸𑀳𑁂𑀢𑀸, 𑀪𑀺𑀓𑁆𑀔𑀼, 𑀉𑀧𑀸𑀳𑀦𑀸𑀬𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀫𑀼𑀓𑁆𑀓𑀁 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁. 𑀦, 𑀪𑀺𑀓𑁆𑀔𑀯𑁂, 𑀦𑀯𑀸 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀑𑀫𑀼𑀓𑁆𑀓𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫𑁧. 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄

𑁨𑁪𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀚𑁆𑀛𑁄𑀓𑀸𑀲𑁂 𑀅𑀦𑀼𑀧𑀸𑀳𑀦𑁄 𑀘𑀗𑁆𑀓𑀫𑀢𑀺. 𑀲𑀢𑁆𑀣𑀸 𑀅𑀦𑀼𑀧𑀸𑀳𑀦𑁄 𑀘𑀗𑁆𑀓𑀫𑀢𑀻𑀢𑀺, 𑀣𑁂𑀭𑀸𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀫𑀸𑀦𑁂, 𑀣𑁂𑀭𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼, 𑀲𑀉𑀧𑀸𑀳𑀦𑀸 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀺. 𑀇𑀫𑁂 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂 ¶ , 𑀕𑀺𑀳𑀻 𑀑𑀤𑀸𑀢𑀯𑀢𑁆𑀣𑀯𑀲𑀦𑀓𑀸 𑀅𑀪𑀺𑀚𑀻𑀯𑀦𑀺𑀓𑀲𑁆𑀲 𑀲𑀺𑀧𑁆𑀧𑀲𑁆𑀲 𑀓𑀸𑀭𑀡𑀸 𑀆𑀘𑀭𑀺𑀬𑁂𑀲𑀼 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣, 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀆𑀘𑀭𑀺𑀬𑁂𑀲𑀼 𑀆𑀘𑀭𑀺𑀬𑀫𑀢𑁆𑀢𑁂𑀲𑀼 𑀉𑀧𑀚𑁆𑀛𑀸𑀬𑁂𑀲𑀼 𑀉𑀧𑀚𑁆𑀛𑀸𑀬𑀫𑀢𑁆𑀢𑁂𑀲𑀼 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 [𑀲𑀕𑀸𑀭𑀯𑀸 𑀲𑀕𑁆𑀕𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 (𑀓.)] 𑀯𑀺𑀳𑀭𑁂𑀬𑁆𑀬𑀸𑀣. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑁂𑀲𑀼 𑀆𑀘𑀭𑀺𑀬𑀫𑀢𑁆𑀢𑁂𑀲𑀼 𑀉𑀧𑀚𑁆𑀛𑀸𑀬𑁂𑀲𑀼 𑀉𑀧𑀚𑁆𑀛𑀸𑀬𑀫𑀢𑁆𑀢𑁂𑀲𑀼 𑀅𑀦𑀼𑀧𑀸𑀳𑀦𑁂𑀲𑀼 𑀘𑀗𑁆𑀓𑀫𑀫𑀸𑀦𑁂𑀲𑀼 𑀲𑀉𑀧𑀸𑀳𑀦𑁂𑀦 𑀘𑀗𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀘𑀗𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 ¶ . 𑀦 𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁨𑁪𑁯. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑀔𑀺𑀮𑀸𑀩𑀸𑀥𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 ¶ 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀧𑀸𑀤𑀔𑀺𑀮𑀸𑀩𑀸𑀥𑁄; 𑀇𑀫𑀁 𑀫𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 ¶ 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀧𑀸𑀤𑀸 𑀯𑀸 𑀤𑀼𑀓𑁆𑀔𑀸, 𑀧𑀸𑀤𑀸 𑀯𑀸 𑀨𑀮𑀺𑀢𑀸, 𑀧𑀸𑀤𑀔𑀺𑀮𑁄 𑀯𑀸 𑀆𑀩𑀸𑀥𑁄 [𑀧𑀸𑀤𑀔𑀺𑀮𑀸𑀩𑀸𑀥𑁄 𑀯𑀸 (𑀲𑁆𑀬𑀸.)] 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀫𑀜𑁆𑀘𑀫𑁆𑀧𑀺 𑀧𑀻𑀞𑀫𑁆𑀧𑀺 𑀅𑀪𑀺𑀭𑀼𑀳𑀦𑁆𑀢𑀺; 𑀘𑀻𑀯𑀭𑀫𑁆𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, ‘𑀇𑀤𑀸𑀦𑀺 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀭𑀼𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀉𑀧𑁄𑀲𑀣𑀕𑁆𑀕𑀫𑁆𑀧𑀺 𑀲𑀦𑁆𑀦𑀺𑀲𑀚𑁆𑀚𑀫𑁆𑀧𑀺 𑀕𑀘𑁆𑀙𑀦𑁆𑀢𑀸 𑀅𑀦𑁆𑀥𑀓𑀸𑀭𑁂 𑀔𑀸𑀡𑀼𑀫𑁆𑀧𑀺 𑀓𑀡𑁆𑀝𑀓𑀫𑁆𑀧𑀺 𑀅𑀓𑁆𑀓𑀫𑀦𑁆𑀢𑀺; 𑀧𑀸𑀤𑀸 𑀤𑀼𑀓𑁆𑀔𑀸 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼𑀁, 𑀉𑀓𑁆𑀓𑀁, 𑀧𑀤𑀻𑀧𑀁, 𑀓𑀢𑁆𑀢𑀭𑀤𑀡𑁆𑀟𑀦𑁆𑀢𑀺.

𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁨. 𑀓𑀝𑁆𑀞𑀧𑀸𑀤𑀼𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁫𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 [𑀇𑀫𑀸 𑀢𑀺𑀭𑀘𑁆𑀙𑀸𑀦𑀓𑀣𑀸𑀬𑁄 𑀧𑀸𑀘𑀺. 𑁫𑁦𑁮; 𑀤𑀻. 𑀦𑀺. 𑁧.𑁭; 𑀫. 𑀦𑀺. 𑁨.𑁨𑁨𑁩; 𑀲𑀁. 𑀦𑀺. 𑁫.𑁧𑁦𑁮𑁦; 𑀅. 𑀦𑀺. 𑁧𑁦.𑁬𑁯 𑀆𑀤𑀬𑁄] 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁, 𑀫𑀳𑀸𑀫𑀢𑁆𑀢𑀓𑀣𑀁, 𑀲𑁂𑀦𑀸𑀓𑀣𑀁, 𑀪𑀬𑀓𑀣𑀁, 𑀬𑀼𑀤𑁆𑀥𑀓𑀣𑀁, 𑀅𑀦𑁆𑀦𑀓𑀣𑀁, 𑀧𑀸𑀦𑀓𑀣𑀁, 𑀯𑀢𑁆𑀣𑀓𑀣𑀁, 𑀲𑀬𑀦𑀓𑀣𑀁, 𑀫𑀸𑀮𑀸𑀓𑀣𑀁, 𑀕𑀦𑁆𑀥𑀓𑀣𑀁, 𑀜𑀸𑀢𑀺𑀓𑀣𑀁, 𑀬𑀸𑀦𑀓𑀣𑀁, 𑀕𑀸𑀫𑀓𑀣𑀁, 𑀦𑀺𑀕𑀫𑀓𑀣𑀁, 𑀦𑀕𑀭𑀓𑀣𑀁, 𑀚𑀦𑀧𑀤𑀓𑀣𑀁, 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 (𑀓.)], 𑀲𑀽𑀭𑀓𑀣𑀁, 𑀯𑀺𑀲𑀺𑀔𑀸𑀓𑀣𑀁, 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 ¶ , 𑀧𑀼𑀩𑁆𑀩𑀧𑁂𑀢𑀓𑀣𑀁, 𑀦𑀸𑀦𑀢𑁆𑀢𑀓𑀣𑀁, 𑀮𑁄𑀓𑀓𑁆𑀔𑀸𑀬𑀺𑀓𑀁, 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁, 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸; 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀦𑁆𑀢𑀺. 𑀬𑁂 ¶ 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 ¶ 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀺𑀲𑁆𑀲𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸, 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀓𑀝𑁆𑀞𑀧𑀸𑀤𑀼𑀓𑀸𑀬𑁄 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀔𑀝𑀔𑀝𑀲𑀤𑁆𑀤𑀸, 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀸, 𑀲𑁂𑀬𑁆𑀬𑀣𑀺𑀤𑀁, 𑁋 𑀭𑀸𑀚𑀓𑀣𑀁, 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸, 𑀓𑀻𑀝𑀓𑀫𑁆𑀧𑀺 𑀅𑀓𑁆𑀓𑀫𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀲𑀫𑀸𑀥𑀺𑀫𑁆𑀳𑀸 ¶ 𑀘𑀸𑀯𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀓𑀝𑁆𑀞𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀓𑀝𑁆𑀞𑀧𑀸𑀤𑀼𑀓𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑁋 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 ¶ 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺; 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀻’’𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀢𑀸𑀮𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺; 𑀢𑀸𑀦𑀺 𑀢𑀸𑀮𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 ¶ 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀪𑀕𑀯𑀢𑀸 𑀢𑀸𑀮𑀧𑀢𑁆𑀢𑀧𑀸𑀤𑀼𑀓𑀸 𑀧𑀝𑀺𑀓𑁆𑀔𑀺𑀢𑁆𑀢𑀸’𑀢𑀺 𑀯𑁂𑀴𑀼𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀦𑁆𑀢𑀺. 𑀢𑀸𑀦𑀺 𑀯𑁂𑀴𑀼𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑁂𑀴𑀼𑀢𑀭𑀼𑀡𑁂 𑀙𑁂𑀤𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸𑀬𑁄 𑀥𑀸𑀭𑁂𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀯𑁂𑀴𑀼𑀢𑀭𑀼𑀡𑀸𑀦𑀺 𑀙𑀺𑀦𑁆𑀦𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 ¶ 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺𑀁…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀯𑁂𑀴𑀼𑀧𑀢𑁆𑀢𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁨𑁫𑁧. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀪𑀤𑁆𑀤𑀺𑀬𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀪𑀤𑁆𑀤𑀺𑀬𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀚𑀸𑀢𑀺𑀬𑀸 𑀯𑀦𑁂. 𑀢𑁂𑀦 𑀔𑁄 ¶ 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀼𑀜𑁆𑀚𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀧𑀩𑁆𑀩𑀚𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀓𑀫𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀓𑀫𑁆𑀩𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀼𑀜𑁆𑀚𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀧𑀩𑁆𑀩𑀚𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀓𑀫𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀓𑀫𑁆𑀩𑀮𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺…𑀧𑁂… 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 ¶ 𑀅𑀥𑀺𑀧𑀜𑁆𑀜’’𑀦𑁆𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺…𑀧𑁂… 𑀭𑀺𑀜𑁆𑀘𑀺𑀲𑁆𑀲𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀺𑀡𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀼𑀜𑁆𑀚𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀧𑀩𑁆𑀩𑀚𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀫𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸 ¶ , 𑀦 𑀓𑀫𑁆𑀩𑀮𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑁄𑀯𑀡𑁆𑀡𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀭𑀽𑀧𑀺𑀬𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀫𑀡𑀺𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀯𑁂𑀴𑀼𑀭𑀺𑀬𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 ¶ 𑀨𑀮𑀺𑀓𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀁𑀲𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀓𑀸𑀘𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀺𑀧𑀼𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀲𑀻𑀲𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀦 𑀢𑀫𑁆𑀩𑀮𑁄𑀳𑀫𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀓𑀸𑀘𑀺 𑀲𑀗𑁆𑀓𑀫𑀦𑀺𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀸𑀤𑀼𑀓𑀸 𑀥𑀼𑀯𑀝𑁆𑀞𑀸𑀦𑀺𑀬𑀸 𑀅𑀲𑀗𑁆𑀓𑀫𑀦𑀺𑀬𑀸𑀬𑁄 𑁋 𑀯𑀘𑁆𑀘𑀧𑀸𑀤𑀼𑀓𑀁, 𑀧𑀲𑁆𑀲𑀸𑀯𑀧𑀸𑀤𑀼𑀓𑀁, 𑀆𑀘𑀫𑀦𑀧𑀸𑀤𑀼𑀓’’𑀦𑁆𑀢𑀺.

𑁨𑁫𑁨. 𑀅𑀣 𑀔𑁄 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ¶ 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀓𑀡𑁆𑀡𑁂𑀲𑀼𑀧𑀺 𑀕𑀡𑁆𑀳𑀦𑁆𑀢𑀺, 𑀕𑀻𑀯𑀸𑀬𑀧𑀺 𑀕𑀡𑁆𑀳𑀦𑁆𑀢𑀺, 𑀙𑁂𑀧𑁆𑀧𑀸𑀧𑀺 𑀕𑀡𑁆𑀳𑀦𑁆𑀢𑀺, 𑀧𑀺𑀝𑁆𑀞𑀺𑀫𑁆𑀧𑀺 𑀅𑀪𑀺𑀭𑀼𑀳𑀦𑁆𑀢𑀺, 𑀭𑀢𑁆𑀢𑀘𑀺𑀢𑁆𑀢𑀸𑀧𑀺 𑀅𑀗𑁆𑀕𑀚𑀸𑀢𑀁 𑀙𑀼𑀧𑀦𑁆𑀢𑀺, 𑀯𑀘𑁆𑀙𑀢𑀭𑀺𑀫𑁆𑀧𑀺 𑀑𑀕𑀸𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀕𑀸𑀯𑀻𑀦𑀁 𑀢𑀭𑀦𑁆𑀢𑀻𑀦𑀁 𑀯𑀺𑀲𑀸𑀡𑁂𑀲𑀼𑀧𑀺 𑀕𑀳𑁂𑀲𑁆𑀲𑀦𑁆𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 ¶ 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂,…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀕𑀸𑀯𑀻𑀦𑀁 𑀯𑀺𑀲𑀸𑀡𑁂𑀲𑀼 𑀕𑀳𑁂𑀢𑀩𑁆𑀩𑀁, 𑀦 𑀓𑀡𑁆𑀡𑁂𑀲𑀼 𑀕𑀳𑁂𑀢𑀩𑁆𑀩𑀁, 𑀦 𑀕𑀻𑀯𑀸𑀬 𑀕𑀳𑁂𑀢𑀩𑁆𑀩𑀁, 𑀦 𑀙𑁂𑀧𑁆𑀧𑀸𑀬 𑀕𑀳𑁂𑀢𑀩𑁆𑀩𑀁, 𑀦 𑀧𑀺𑀝𑁆𑀞𑀺 𑀅𑀪𑀺𑀭𑀼𑀳𑀺𑀢𑀩𑁆𑀩𑀸 ¶ . 𑀬𑁄 𑀅𑀪𑀺𑀭𑀼𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁. 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀦 𑀯𑀘𑁆𑀙𑀢𑀭𑀻 𑀫𑀸𑀭𑁂𑀢𑀩𑁆𑀩𑀸. 𑀬𑁄 𑀫𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀓𑀝𑁆𑀞𑀧𑀸𑀤𑀼𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁩. 𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄

𑁨𑁫𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑀸𑀦𑁂𑀦 𑀬𑀸𑀬𑀦𑁆𑀢𑀺, 𑀇𑀢𑁆𑀣𑀺𑀬𑀼𑀢𑁆𑀢𑁂𑀦𑀧𑀺 𑀧𑀼𑀭𑀺𑀲𑀦𑁆𑀢𑀭𑁂𑀦, 𑀧𑀼𑀭𑀺𑀲𑀬𑀼𑀢𑁆𑀢𑁂𑀦𑀧𑀺 𑀇𑀢𑁆𑀣𑀦𑁆𑀢𑀭𑁂𑀦. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀗𑁆𑀕𑀸𑀫𑀳𑀺𑀬𑀸𑀬𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀬𑀸𑀦𑁂𑀦 𑀬𑀸𑀬𑀺𑀢𑀩𑁆𑀩𑀁 ¶ . 𑀬𑁄 𑀬𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀮𑀸𑀦𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀦𑀸𑀳𑀁, 𑀆𑀯𑀼𑀲𑁄, 𑀲𑀓𑁆𑀓𑁄𑀫𑀺, 𑀕𑀺𑀮𑀸𑀦𑁄𑀫𑁆𑀳𑀻’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀬𑀸𑀦𑀁 𑀅𑀪𑀺𑀭𑀼𑀳𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀧𑀝𑀺𑀓𑁆𑀔𑀺𑀢𑁆𑀢𑀁 𑀪𑀕𑀯𑀢𑀸 𑀬𑀸𑀦’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀬𑀸𑀦𑀁 𑀦𑀸𑀪𑀺𑀭𑀼𑀳𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀬𑀸𑀦𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁆𑀣𑀺𑀬𑀼𑀢𑁆𑀢𑀁 𑀦𑀼 𑀔𑁄 𑀧𑀼𑀭𑀺𑀲𑀬𑀼𑀢𑁆𑀢𑀁 𑀦𑀼 𑀔𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀬𑀼𑀢𑁆𑀢𑀁 𑀳𑀢𑁆𑀣𑀯𑀝𑁆𑀝𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀦𑀼𑀕𑁆𑀖𑀸𑀢𑁂𑀦 𑀩𑀸𑀴𑁆𑀳𑀢𑀭𑀁 𑀅𑀨𑀸𑀲𑀼 𑀅𑀳𑁄𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀺𑀯𑀺𑀓𑀁 𑀧𑀸𑀝𑀗𑁆𑀓𑀺𑀦𑁆𑀢𑀺.

𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁪. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀝𑀺𑀓𑁆𑀔𑁂𑀧𑁄

𑁨𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺𑀁, 𑀧𑀮𑁆𑀮𑀗𑁆𑀓𑀁, 𑀕𑁄𑀦𑀓𑀁, 𑀘𑀺𑀢𑁆𑀢𑀓𑀁, 𑀧𑀝𑀺𑀓𑀁, 𑀧𑀝𑀮𑀺𑀓𑀁, 𑀢𑀽𑀮𑀺𑀓𑀁, 𑀯𑀺𑀓𑀢𑀺𑀓𑀁, 𑀉𑀤𑁆𑀥𑀮𑁄𑀫𑀺𑀁 [𑀉𑀦𑁆𑀤𑀮𑁄𑀫𑀺𑀁 (𑀓.), 𑀉𑀤𑁆𑀤𑀮𑁄𑀫𑀺𑀁 (𑀓.)], 𑀏𑀓𑀦𑁆𑀢𑀮𑁄𑀫𑀺𑀁, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁 ¶ , 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑀯𑁂𑀡𑀺𑀁, 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺, 𑀧𑀮𑁆𑀮𑀗𑁆𑀓𑁄, 𑀕𑁄𑀦𑀓𑁄, 𑀘𑀺𑀢𑁆𑀢𑀓𑁄, 𑀧𑀝𑀺𑀓𑀸, 𑀧𑀝𑀮𑀺𑀓𑀸, 𑀢𑀽𑀮𑀺𑀓𑀸, 𑀯𑀺𑀓𑀢𑀺𑀓𑀸, 𑀉𑀤𑁆𑀥𑀮𑁄𑀫𑀺, 𑀏𑀓𑀦𑁆𑀢𑀮𑁄𑀫𑀺, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁, 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑀯𑁂𑀡𑀺, 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁫. 𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑁄

𑁨𑁫𑁫. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑁋 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁. 𑀢𑀸𑀦𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀻𑀞𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀫𑀳𑀸𑀘𑀫𑁆𑀫𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑁋 𑀕𑁄𑀘𑀫𑁆𑀫𑀸𑀦𑀺 𑀥𑀸𑀭𑁂𑀦𑁆𑀢𑀺. 𑀢𑀸𑀦𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀻𑀞𑀧𑁆𑀧𑀫𑀸𑀡𑁂𑀦𑀧𑀺 𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀧𑀻𑀞𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀧𑀸𑀧𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀓𑀼𑀮𑀽𑀧𑀓𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 ¶ 𑀧𑀸𑀧𑀼𑀧𑀸𑀲𑀓𑁄 𑀬𑁂𑀦 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲 𑀧𑀸𑀧𑀼𑀧𑀸𑀲𑀓𑀲𑁆𑀲 𑀯𑀘𑁆𑀙𑀓𑁄 𑀳𑁄𑀢𑀺 𑀢𑀭𑀼𑀡𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 ¶ 𑀧𑀸𑀲𑀸𑀤𑀺𑀓𑁄 𑀘𑀺𑀢𑁆𑀭𑁄, 𑀲𑁂𑀬𑁆𑀬𑀣𑀸𑀧𑀺 𑀤𑀻𑀧𑀺𑀘𑁆𑀙𑀸𑀧𑁄. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑀁 𑀯𑀘𑁆𑀙𑀓𑀁 𑀲𑀓𑁆𑀓𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀼𑀧𑀸𑀲𑀓𑁄 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀫𑀁 𑀯𑀘𑁆𑀙𑀓𑀁 𑀲𑀓𑁆𑀓𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀻’’𑀢𑀺? ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀇𑀫𑀲𑁆𑀲 𑀯𑀘𑁆𑀙𑀓𑀲𑁆𑀲 𑀘𑀫𑁆𑀫𑁂𑀦𑀸’’𑀢𑀺. 𑀅𑀣 𑀔𑁄 𑀲𑁄 𑀧𑀸𑀧𑀼𑀧𑀸𑀲𑀓𑁄 𑀢𑀁 𑀯𑀘𑁆𑀙𑀓𑀁 𑀯𑀥𑀺𑀢𑁆𑀯𑀸 𑀘𑀫𑁆𑀫𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀧𑀸𑀤𑀸𑀲𑀺. 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀢𑀁 𑀘𑀫𑁆𑀫𑀁 𑀲𑀗𑁆𑀖𑀸𑀝𑀺𑀬𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣 𑀔𑁄 𑀲𑀸 𑀕𑀸𑀯𑀻 𑀯𑀘𑁆𑀙𑀕𑀺𑀤𑁆𑀥𑀺𑀦𑀻 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑁆𑀬𑀸𑀬𑀁, 𑀆𑀯𑀼𑀲𑁄, 𑀕𑀸𑀯𑀻 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀻’’𑀢𑀺? ‘‘𑀅𑀳𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀦 𑀚𑀸𑀦𑀸𑀫𑀺 𑀓𑁂𑀦 [𑀓𑁂𑀦𑀘𑀺 (𑀓.)] 𑀫𑁆𑀬𑀸𑀬𑀁 𑀕𑀸𑀯𑀻 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀝𑀺 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀢𑀸 𑀳𑁄𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑀁 𑀧𑀦 𑀢𑁂, 𑀆𑀯𑀼𑀲𑁄, 𑀲𑀗𑁆𑀖𑀸𑀝𑀺 𑀓𑀺𑀁 𑀓𑀢𑀸’’𑀢𑀺? 𑀅𑀣 𑀔𑁄 𑀲𑁄 𑀧𑀸𑀧𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑁆𑀲𑀢𑀺, 𑀦𑀦𑀼 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀕𑀭𑀳𑀺𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 ¶ 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀧𑀸𑀧𑀪𑀺𑀓𑁆𑀔𑀼𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑀻’’𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀲𑁆𑀲𑀲𑀺, 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑁄 𑀕𑀭𑀳𑀺𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀲𑀢𑁆𑀣𑀸. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀩𑁆𑀩𑀁. 𑀬𑁄 𑀲𑀫𑀸𑀤𑀧𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀦, 𑀪𑀺𑀓𑁆𑀔𑀯𑁂, 𑀕𑁄𑀘𑀫𑁆𑀫𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀓𑀺𑀜𑁆𑀘𑀺 𑀘𑀫𑁆𑀫𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑁄 𑀦𑀺𑀝𑁆𑀞𑀺𑀢𑁄.

𑁧𑁫𑁬. 𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺

𑁨𑁫𑁬. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀫𑀜𑁆𑀘𑀫𑁆𑀧𑀺 𑀧𑀻𑀞𑀫𑁆𑀧𑀺 𑀘𑀫𑁆𑀫𑁄𑀦𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀘𑀫𑁆𑀫𑀯𑀺𑀦𑀤𑁆𑀥𑀸𑀦𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀯𑀺𑀓𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦 𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀘𑀫𑁆𑀫𑀯𑀤𑁆𑀥𑁂𑀳𑀺 𑀑𑀕𑀼𑀫𑁆𑀨𑀺𑀬𑀦𑁆𑀢𑀺 [𑀑𑀕𑀼𑀫𑁆𑀪𑀺𑀬𑀦𑁆𑀢𑀺 (𑀓.)]. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀦𑀫𑀢𑁆𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀳𑀦𑁂𑀦 ¶ 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺, 𑀦 𑀲𑀓𑁆𑀓𑁄𑀢𑀺 𑀯𑀺𑀦𑀸 𑀉𑀧𑀸𑀳𑀦𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀉𑀧𑀸𑀳𑀦𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑀼𑀦𑁆𑀢𑀺.

𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁫𑁭. 𑀲𑁄𑀡𑀓𑀼𑀝𑀺𑀓𑀡𑁆𑀡𑀯𑀢𑁆𑀣𑀼

𑁨𑁫𑁭. [𑀉𑀤𑀸. 𑁪𑁬 𑀲𑁄𑀓𑀲𑀼𑀢𑁆𑀢𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀲𑁆𑀲𑀺𑀢𑀩𑁆𑀩𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀯𑀦𑁆𑀢𑀻𑀲𑀼 𑀯𑀺𑀳𑀭𑀢𑀺 𑀓𑀼𑀭𑀭𑀖𑀭𑁂 [𑀓𑀼𑀭𑀼𑀭𑀖𑀭𑁂 (𑀓.)] 𑀧𑀧𑀢𑀓𑁂 [𑀧𑀧𑀸𑀢𑁂 (𑀲𑀻. 𑀲𑁆𑀬𑀸.) 𑀧𑀯𑀢𑁆𑀣𑁂 (𑀉𑀤𑀸. 𑁪𑁬)] 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀫𑀳𑀸𑀓𑀘𑁆𑀘𑀸𑀦𑁂𑀦 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁 ¶ . 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺. ( ) [(𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀏𑀢𑀤𑀯𑁄𑀘) (𑀲𑁆𑀬𑀸. 𑀉𑀤𑀸. 𑁪𑁬)] ‘‘𑀤𑀼𑀓𑁆𑀓𑀭𑀁 𑀔𑁄, 𑀲𑁄𑀡, 𑀬𑀸𑀯𑀚𑀻𑀯𑀁 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀗𑁆𑀖, 𑀢𑁆𑀯𑀁, 𑀲𑁄𑀡 ¶ , 𑀢𑀢𑁆𑀣𑁂𑀯 𑀅𑀕𑀸𑀭𑀺𑀓𑀪𑀽𑀢𑁄 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀅𑀦𑀼𑀬𑀼𑀜𑁆𑀚, 𑀓𑀸𑀮𑀬𑀼𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄𑀡𑀲𑁆𑀲 𑀉𑀧𑀸𑀲𑀓𑀲𑁆𑀲 𑀓𑀼𑀝𑀺𑀓𑀡𑁆𑀡𑀲𑁆𑀲 𑀬𑁄 𑀅𑀳𑁄𑀲𑀺 𑀧𑀩𑁆𑀩𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 ¶ …𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑁄 𑀉𑀧𑀸𑀲𑀓𑁄 𑀓𑀼𑀝𑀺𑀓𑀡𑁆𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀫𑀳𑀸𑀓𑀘𑁆𑀘𑀸𑀦𑁂𑀦 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 ¶ 𑀫𑀳𑀸𑀓𑀘𑁆𑀘𑀸𑀦𑁄 𑀲𑁄𑀡𑀁 𑀉𑀧𑀸𑀲𑀓𑀁 𑀓𑀼𑀝𑀺𑀓𑀡𑁆𑀡𑀁 𑀧𑀩𑁆𑀩𑀸𑀚𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀉𑀧𑀲𑀫𑁆𑀧𑀸𑀤𑁂𑀲𑀺.

𑀲𑁄𑀡𑀓𑀼𑀝𑀺𑀓𑀡𑁆𑀡𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁫𑁮. 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀜𑁆𑀘𑀯𑀭𑀧𑀭𑀺𑀤𑀲𑁆𑀲𑀦𑀸

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀲𑀼𑀢𑁄𑀬𑁂𑀯 𑀔𑁄 𑀫𑁂 𑀲𑁄 𑀪𑀕𑀯𑀸 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸𑀢𑀺, 𑀦 𑀘 𑀫𑀬𑀸 𑀲𑀫𑁆𑀫𑀼𑀔𑀸 ¶ 𑀤𑀺𑀝𑁆𑀞𑁄, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 ¶ 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀲𑀼𑀢𑁄 𑀬𑁂𑀯 𑀔𑁄 𑀫𑁂 𑀲𑁄 𑀪𑀕𑀯𑀸 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸𑀢𑀺, 𑀦 𑀘 𑀫𑀬𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑁂𑀬𑁆𑀬𑀸’𑀢𑀺; 𑀕𑀘𑁆𑀙𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁, 𑀲𑀘𑁂 𑀫𑀁 𑀉𑀧𑀚𑁆𑀛𑀸𑀬𑁄 𑀅𑀦𑀼𑀚𑀸𑀦𑀸𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑁄𑀡. 𑀕𑀘𑁆𑀙 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀤𑀓𑁆𑀔𑀺𑀲𑁆𑀲𑀲𑀺 𑀢𑁆𑀯𑀁, 𑀲𑁄𑀡, 𑀢𑀁 𑀪𑀕𑀯𑀦𑁆𑀢𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀢𑀫𑀸𑀦𑀲𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀁 𑀅𑀫𑀦𑀼𑀧𑁆𑀧𑀢𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀬𑀢𑀺𑀦𑁆𑀤𑁆𑀭𑀺𑀬𑀁 𑀦𑀸𑀕𑀁. 𑀢𑁂𑀦 𑀳𑀺 𑀢𑁆𑀯𑀁, 𑀲𑁄𑀡, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤 𑁋 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀦𑁆𑀢𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄, 𑀢𑀺𑀡𑁆𑀡𑀁 𑀫𑁂 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀅𑀮𑀢𑁆𑀣𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 ¶ 𑀅𑀧𑁆𑀧𑀢𑀭𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 ¶ 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀥𑀼𑀯𑀦𑀳𑀸𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 ¶ 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 [𑀫𑀚𑁆𑀛𑀸𑀭𑀽 (𑀓.)] 𑀚𑀦𑁆𑀢𑀽, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’’’𑀢𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀳𑀺 𑀢𑁂, 𑀆𑀯𑀼𑀲𑁄, 𑀫𑀦𑀼𑀲𑁆𑀲𑁂𑀳𑀺 𑀘𑀻𑀯𑀭𑀁 𑀤𑀺𑀦𑁆𑀦’𑀦𑁆𑀢𑀺 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀺 𑁋 ‘𑀫𑀸 𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀳𑁄𑀲𑀻’𑀢𑀺; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀘𑀻𑀯𑀭𑁂 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑁂𑀬𑁆𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀘𑁆𑀘𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ¶ 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲, 𑀆𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀬𑀲𑁆𑀲 𑀔𑁄 𑀫𑀁 𑀪𑀕𑀯𑀸 𑀆𑀡𑀸𑀧𑁂𑀢𑀺, ‘𑀇𑀫𑀲𑁆𑀲, 𑀆𑀦𑀦𑁆𑀤, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀳𑀻’𑀢𑀺, 𑀇𑀘𑁆𑀙𑀢𑀺 𑀪𑀕𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼𑀁, 𑀇𑀘𑁆𑀙𑀢𑀺 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀲𑁄𑀡𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀢𑁆𑀣𑀼’’𑀦𑁆𑀢𑀺 𑁋 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀸 𑀯𑀺𑀳𑀭𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀺.

𑁨𑁫𑁮. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀅𑀚𑁆𑀛𑁂𑀲𑀺 𑁋 ‘‘𑀧𑀝𑀺𑀪𑀸𑀢𑀼 𑀢𑀁, 𑀪𑀺𑀓𑁆𑀔𑀼, 𑀥𑀫𑁆𑀫𑁄 𑀪𑀸𑀲𑀺𑀢𑀼’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 𑀲𑀭𑁂𑀦 𑀅𑀪𑀸𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀅𑀩𑁆𑀪𑀸𑀦𑀼𑀫𑁄𑀤𑀺 𑁋 ‘‘𑀲𑀸𑀥𑀼, 𑀲𑀸𑀥𑀼, 𑀪𑀺𑀓𑁆𑀔𑀼. 𑀲𑀼𑀕𑁆𑀕𑀳𑀺𑀢𑀸𑀦𑀺 𑀔𑁄 𑀢𑁂, 𑀪𑀺𑀓𑁆𑀔𑀼, 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 ¶ , 𑀲𑀼𑀫𑀦𑀲𑀺𑀓𑀢𑀸𑀦𑀺 𑀲𑀽𑀧𑀥𑀸𑀭𑀺𑀢𑀸𑀦𑀺. 𑀓𑀮𑁆𑀬𑀸𑀡𑀺𑀬𑀸𑀧𑀺 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀲𑁆𑀲𑀝𑁆𑀞𑀸𑀬, 𑀅𑀦𑁂𑀮𑀕𑀮𑀸𑀬 [𑀅𑀦𑁂𑀴𑀕𑀮𑀸𑀬 (𑀓.)], 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀏𑀓𑀯𑀲𑁆𑀲𑁄𑀳𑀁, 𑀪𑀕𑀯𑀸’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻’’𑀢𑀺? ‘‘𑀘𑀺𑀭𑀁 𑀤𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂, 𑀓𑀸𑀫𑁂𑀲𑀼 𑀆𑀤𑀻𑀦𑀯𑁄, 𑀅𑀧𑀺 𑀘 𑀲𑀫𑁆𑀩𑀸𑀥𑀸 ¶ 𑀖𑀭𑀸𑀯𑀸𑀲𑀸 𑀩𑀳𑀼𑀓𑀺𑀘𑁆𑀘𑀸 𑀩𑀳𑀼𑀓𑀭𑀡𑀻𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁪𑁬 𑀉𑀤𑀸𑀦𑁂𑀧𑀺] ‘‘𑀤𑀺𑀲𑁆𑀯𑀸 ¶ 𑀆𑀤𑀻𑀦𑀯𑀁 𑀮𑁄𑀓𑁂, 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀁;

𑀅𑀭𑀺𑀬𑁄 𑀦 𑀭𑀫𑀢𑀻 𑀧𑀸𑀧𑁂, 𑀧𑀸𑀧𑁂 𑀦 𑀭𑀫𑀢𑀻 𑀲𑀼𑀘𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑁋 𑀧𑀝𑀺𑀲𑀫𑁆𑀫𑁄𑀤𑀢𑀺 𑀔𑁄 𑀫𑀁 𑀪𑀕𑀯𑀸, 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀧𑀭𑀺𑀤𑀲𑁆𑀲𑀻𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀏𑀢𑀤𑀯𑁄𑀘 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀦𑁆𑀢𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄. 𑀢𑀺𑀡𑁆𑀡𑀁 𑀫𑁂 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀢𑀢𑁄 𑀢𑀢𑁄 𑀤𑀲𑀯𑀕𑁆𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀅𑀮𑀢𑁆𑀣𑀁, 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀅𑀧𑁆𑀧𑀢𑀭𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸, 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀥𑀼𑀯𑀦𑀳𑀸𑀦𑀁 𑀅𑀦𑀼𑀚𑀸𑀦𑁂𑀬𑁆𑀬. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀦𑁆𑀢𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 𑀚𑀦𑁆𑀢𑀽 ¶ , 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’𑀢𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀳𑀺 𑀢𑁂, 𑀆𑀯𑀼𑀲𑁄, 𑀫𑀦𑀼𑀲𑁆𑀲𑁂𑀳𑀺 𑀘𑀻𑀯𑀭𑀁 𑀤𑀺𑀦𑁆𑀦’𑀦𑁆𑀢𑀺. 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀺 𑁋 ‘𑀫𑀸 𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀳𑁄𑀲𑀻’𑀢𑀺; 𑀅𑀧𑁆𑀧𑁂𑀯 𑀦𑀸𑀫 𑀪𑀕𑀯𑀸 𑀘𑀻𑀯𑀭𑁂 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑁂𑀬𑁆𑀬𑀸’’𑀢𑀺.

𑁨𑁫𑁯. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀪𑀺𑀓𑁆𑀔𑀼𑀓𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁. 𑀢𑀢𑁆𑀭𑀺𑀫𑁂 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸 𑁋 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 [𑀓𑀚𑀗𑁆𑀕𑀮𑀁 (𑀲𑀻. 𑀲𑁆𑀬𑀸.)] 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 [𑀲𑀮𑀮𑀯𑀢𑀻 (𑀲𑀻.)] 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂; 𑀉𑀢𑁆𑀢𑀭𑀸𑀬 ¶ 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀲𑀼 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 ¶ 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀓𑀡𑁆𑀳𑀼𑀢𑁆𑀢𑀭𑀸 𑀪𑀽𑀫𑀺 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀦𑀳𑀸𑀦𑀕𑀭𑀼𑀓𑀸 𑀫𑀦𑀼𑀲𑁆𑀲𑀸 𑀉𑀤𑀓𑀲𑀼𑀤𑁆𑀥𑀺𑀓𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀥𑀼𑀯𑀦𑀳𑀸𑀦𑀁. 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂, 𑀪𑀺𑀓𑁆𑀔𑀯𑁂, 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 ¶ 𑀫𑀺𑀕𑀘𑀫𑁆𑀫𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀏𑀭𑀕𑀽 𑀫𑁄𑀭𑀕𑀽 𑀫𑀚𑁆𑀚𑀸𑀭𑀽 𑀚𑀦𑁆𑀢𑀽, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀘𑀫𑁆𑀫𑀸𑀦𑀺 𑀅𑀢𑁆𑀣𑀭𑀡𑀸𑀦𑀺, 𑀏𑀴𑀓𑀘𑀫𑁆𑀫𑀁 𑀅𑀚𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀦𑀺𑀲𑁆𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀤𑀺𑀢𑀼𑀁, 𑀦 𑀢𑀸𑀯 𑀢𑀁 𑀕𑀡𑀦𑀽𑀧𑀕𑀁 𑀬𑀸𑀯 𑀦 𑀳𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺.

𑀫𑀳𑀸𑀓𑀘𑁆𑀘𑀸𑀦𑀲𑁆𑀲 𑀧𑀜𑁆𑀘𑀯𑀭𑀧𑀭𑀺𑀤𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀫𑀓𑁆𑀔𑀦𑁆𑀥𑀓𑁄 𑀧𑀜𑁆𑀘𑀫𑁄.

𑁧𑁫𑁯. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀭𑀸𑀚𑀸 𑀘 𑀫𑀸𑀕𑀥𑁄 𑀲𑁄𑀡𑁄, 𑀅𑀲𑀻𑀢𑀺𑀲𑀳𑀲𑁆𑀲𑀺𑀲𑁆𑀲𑀭𑁄;

𑀲𑀸𑀕𑀢𑁄 𑀕𑀺𑀚𑁆𑀛𑀓𑀽𑀝𑀲𑁆𑀫𑀺𑀁, 𑀩𑀳𑀼𑀁 𑀤𑀲𑁆𑀲𑁂𑀢𑀺 𑀉𑀢𑁆𑀢𑀭𑀺𑀁.

𑀧𑀩𑁆𑀩𑀚𑁆𑀚𑀸𑀭𑀤𑁆𑀥𑀪𑀺𑀚𑁆𑀚𑀺𑀁𑀲𑀼 ¶ , 𑀯𑀻𑀡𑀁 𑀏𑀓𑀧𑀮𑀸𑀲𑀺𑀓𑀁;

𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀺𑀓𑀸, 𑀫𑀜𑁆𑀚𑀺𑀝𑁆𑀞𑀸 𑀓𑀡𑁆𑀳𑀫𑁂𑀯 𑀘.

𑀫𑀳𑀸𑀭𑀗𑁆𑀕𑀫𑀳𑀸𑀦𑀸𑀫𑀸, 𑀯𑀤𑁆𑀥𑀺𑀓𑀸 𑀘 𑀧𑀝𑀺𑀓𑁆𑀔𑀺𑀧𑀺;

𑀔𑀮𑁆𑀮𑀓𑀸 𑀧𑀼𑀝𑀧𑀸𑀮𑀺 𑀘, 𑀢𑀽𑀮𑀢𑀺𑀢𑁆𑀢𑀺𑀭𑀫𑁂𑀡𑁆𑀟𑀚𑀸.

𑀯𑀺𑀘𑁆𑀙𑀺𑀓𑀸 𑀫𑁄𑀭𑀘𑀺𑀢𑁆𑀭𑀸 𑀘, 𑀲𑀻𑀳𑀩𑁆𑀬𑀕𑁆𑀖𑀸 𑀘 𑀤𑀻𑀧𑀺𑀓𑀸;

𑀅𑀚𑀺𑀦𑀼𑀤𑁆𑀤𑀸 𑀫𑀚𑁆𑀚𑀸𑀭𑀻 𑀘, 𑀓𑀸𑀴𑀮𑀼𑀯𑀓𑀧𑀭𑀺𑀓𑁆𑀔𑀝𑀸.

𑀨𑀮𑀺𑀢𑀼𑀧𑀸𑀳𑀦𑀸 ¶ 𑀔𑀺𑀮𑀸, 𑀥𑁄𑀢𑀔𑀸𑀡𑀼𑀔𑀝𑀔𑀝𑀸;

𑀢𑀸𑀮𑀯𑁂𑀴𑀼𑀢𑀺𑀡𑀁 𑀘𑁂𑀯, 𑀫𑀼𑀜𑁆𑀚𑀧𑀩𑁆𑀩𑀚𑀳𑀺𑀦𑁆𑀢𑀸𑀮𑀸.

𑀓𑀫𑀮𑀓𑀫𑁆𑀩𑀮𑀲𑁄𑀯𑀡𑁆𑀡𑀸 ¶ , 𑀭𑀽𑀧𑀺𑀓𑀸 𑀫𑀡𑀺𑀯𑁂𑀴𑀼𑀭𑀺𑀬𑀸;

𑀨𑀮𑀺𑀓𑀸 𑀓𑀁𑀲𑀓𑀸𑀘𑀸 𑀘, 𑀢𑀺𑀧𑀼𑀲𑀻𑀲𑀜𑁆𑀘 𑀢𑀫𑁆𑀩𑀓𑀸.

𑀕𑀸𑀯𑀻 𑀬𑀸𑀦𑀁 𑀕𑀺𑀮𑀸𑀦𑁄 𑀘, 𑀧𑀼𑀭𑀺𑀲𑀸𑀬𑀼𑀢𑁆𑀢𑀲𑀺𑀯𑀺𑀓𑀸;

𑀲𑀬𑀦𑀸𑀦𑀺 𑀫𑀳𑀸𑀘𑀫𑁆𑀫𑀸, 𑀕𑁄𑀘𑀫𑁆𑀫𑁂𑀳𑀺 𑀘 𑀧𑀸𑀧𑀓𑁄.

𑀕𑀺𑀳𑀻𑀦𑀁 𑀘𑀫𑁆𑀫𑀯𑀤𑁆𑀥𑁂𑀳𑀺, 𑀧𑀯𑀺𑀲𑀦𑁆𑀢𑀺 𑀕𑀺𑀮𑀸𑀬𑀦𑁄;

𑀫𑀳𑀸𑀓𑀘𑁆𑀘𑀸𑀬𑀦𑁄 𑀲𑁄𑀡𑁄, 𑀲𑀭𑁂𑀦 𑀅𑀝𑁆𑀞𑀓𑀯𑀕𑁆𑀕𑀺𑀓𑀁.

𑀉𑀧𑀲𑀫𑁆𑀧𑀤𑀁 𑀧𑀜𑁆𑀘𑀳𑀺, 𑀕𑀼𑀡𑀗𑁆𑀕𑀼𑀡𑀸 𑀥𑀼𑀯𑀲𑀺𑀦𑀸;

𑀘𑀫𑁆𑀫𑀢𑁆𑀣𑀭𑀡𑀸𑀦𑀼𑀜𑁆𑀜𑀸𑀲𑀺, 𑀦 𑀢𑀸𑀯 𑀕𑀡𑀦𑀽𑀧𑀕𑀁;

𑀅𑀤𑀸𑀲𑀺 𑀫𑁂 𑀯𑀭𑁂 𑀧𑀜𑁆𑀘, 𑀲𑁄𑀡𑀢𑁆𑀣𑁂𑀭𑀲𑁆𑀲 𑀦𑀸𑀬𑀓𑁄𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀢𑁂𑀲𑀝𑁆𑀞𑀺.

𑀘𑀫𑁆𑀫𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁬. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁄

𑁧𑁬𑁦. 𑀧𑀜𑁆𑀘𑀪𑁂𑀲𑀚𑁆𑀚𑀓𑀣𑀸

𑁨𑁬𑁦. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 𑀨𑀼𑀝𑁆𑀞𑀸𑀦𑀁 𑀬𑀸𑀕𑀼𑀧𑀺 𑀧𑀻𑀢𑀸 𑀉𑀕𑁆𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀉𑀕𑁆𑀕𑀘𑁆𑀙𑀢𑀺. 𑀢𑁂 𑀢𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀓𑀺𑀲𑁂 𑀮𑀽𑀔𑁂 𑀤𑀼𑀩𑁆𑀩𑀡𑁆𑀡𑁂 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁂 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀦𑀦𑁆𑀤, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀓𑀺𑀲𑀸, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸’’𑀢𑀺? ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 𑀨𑀼𑀝𑁆𑀞𑀸𑀦𑀁 𑀬𑀸𑀕𑀼𑀧𑀺 𑀧𑀻𑀢𑀸 𑀉𑀕𑁆𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀉𑀕𑁆𑀕𑀘𑁆𑀙𑀢𑀺. 𑀢𑁂 𑀢𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀏𑀢𑀭𑀳𑀺 𑀔𑁄 𑀪𑀺𑀓𑁆𑀔𑀽𑀦𑀁 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 𑀨𑀼𑀝𑁆𑀞𑀸𑀦𑀁 𑀬𑀸𑀕𑀼𑀧𑀺 𑀧𑀻𑀢𑀸 𑀉𑀕𑁆𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀉𑀕𑁆𑀕𑀘𑁆𑀙𑀢𑀺. 𑀢𑁂 𑀢𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸. 𑀓𑀺𑀁 𑀦𑀼 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀪𑁂𑀲𑀚𑁆𑀚𑀁 𑀅𑀦𑀼𑀚𑀸𑀦𑁂𑀬𑁆𑀬𑀁, 𑀬𑀁 𑀪𑁂𑀲𑀚𑁆𑀚𑀜𑁆𑀘𑁂𑀯 𑀅𑀲𑁆𑀲 𑀪𑁂𑀲𑀚𑁆𑀚𑀲𑀫𑁆𑀫𑀢𑀜𑁆𑀘 𑀮𑁄𑀓𑀲𑁆𑀲, 𑀆𑀳𑀸𑀭𑀢𑁆𑀣𑀜𑁆𑀘 𑀨𑀭𑁂𑀬𑁆𑀬, 𑀦 𑀘 𑀑𑀴𑀸𑀭𑀺𑀓𑁄 𑀆𑀳𑀸𑀭𑁄 𑀧𑀜𑁆𑀜𑀸𑀬𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 ¶ 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀸𑀦𑀺 𑀔𑁄 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢𑀁; 𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀪𑁂𑀲𑀚𑁆𑀚𑀲𑀫𑁆𑀫𑀢𑀸𑀦𑀺 𑀘 𑀮𑁄𑀓𑀲𑁆𑀲, 𑀆𑀳𑀸𑀭𑀢𑁆𑀣𑀜𑁆𑀘 𑀨𑀭𑀦𑁆𑀢𑀺, 𑀦 𑀘 𑀑𑀴𑀸𑀭𑀺𑀓𑁄 𑀆𑀳𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀇𑀫𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬𑀁, 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀏𑀢𑀭𑀳𑀺 𑀔𑁄 𑀪𑀺𑀓𑁆𑀔𑀽𑀦𑀁 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 ¶ 𑀨𑀼𑀝𑁆𑀞𑀸𑀦𑀁 𑀬𑀸𑀕𑀼𑀧𑀺 𑀧𑀻𑀢𑀸 𑀉𑀕𑁆𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀉𑀕𑁆𑀕𑀘𑁆𑀙𑀢𑀺. 𑀢𑁂 𑀢𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸. 𑀓𑀺𑀁 𑀦𑀼 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀪𑁂𑀲𑀚𑁆𑀚𑀁 𑀅𑀦𑀼𑀚𑀸𑀦𑁂𑀬𑁆𑀬𑀁, 𑀬𑀁 𑀪𑁂𑀲𑀚𑁆𑀚𑀜𑁆𑀘𑁂𑀯 𑀅𑀲𑁆𑀲 𑀪𑁂𑀲𑀚𑁆𑀚𑀲𑀫𑁆𑀫𑀢𑀜𑁆𑀘 𑀮𑁄𑀓𑀲𑁆𑀲, 𑀆𑀳𑀸𑀭𑀢𑁆𑀣𑀜𑁆𑀘 ¶ 𑀨𑀭𑁂𑀬𑁆𑀬, 𑀦 𑀘 𑀑𑀴𑀸𑀭𑀺𑀓𑁄 𑀆𑀳𑀸𑀭𑁄 𑀧𑀜𑁆𑀜𑀸𑀬𑁂𑀬𑁆𑀬𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 ‘𑀇𑀫𑀸𑀦𑀺 𑀔𑁄 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 ¶ , 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢𑀁; 𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀪𑁂𑀲𑀚𑁆𑀚𑀲𑀫𑁆𑀫𑀢𑀸𑀦𑀺 𑀘 𑀮𑁄𑀓𑀲𑁆𑀲, 𑀆𑀳𑀸𑀭𑀢𑁆𑀣𑀜𑁆𑀘 𑀨𑀭𑀦𑁆𑀢𑀺, 𑀦 𑀘 𑀑𑀴𑀸𑀭𑀺𑀓𑁄 𑀆𑀳𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀇𑀫𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀅𑀦𑀼𑀚𑀸𑀦𑁂𑀬𑁆𑀬𑀁, 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺.

𑁨𑁬𑁧. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂𑀲𑀁 𑀬𑀸𑀦𑀺𑀧𑀺 𑀢𑀸𑀦𑀺 𑀧𑀸𑀓𑀢𑀺𑀓𑀸𑀦𑀺 𑀮𑀽𑀔𑀸𑀦𑀺 𑀪𑁄𑀚𑀦𑀸𑀦𑀺 𑀢𑀸𑀦𑀺𑀧𑀺 𑀦𑀘𑁆𑀙𑀸𑀤𑁂𑀦𑁆𑀢𑀺, 𑀧𑀕𑁂𑀯 𑀲𑁂𑀦𑁂𑀲𑀺𑀢𑀸𑀦𑀺 [𑀲𑁂𑀦𑁂𑀲𑀺𑀓𑀸𑀦𑀺 (𑀲𑀻. 𑀲𑁆𑀬𑀸.), 𑀲𑁂𑀦𑁂𑀳𑀺𑀓𑀸𑀦𑀺 (𑀬𑁄𑀚𑀦𑀸)]. 𑀢𑁂 𑀢𑁂𑀦 𑀘𑁂𑀯 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 𑀨𑀼𑀝𑁆𑀞𑀸, 𑀇𑀫𑀺𑀦𑀸 𑀘 𑀪𑀢𑁆𑀢𑀸𑀘𑁆𑀙𑀸𑀤𑀓𑁂𑀦 [𑀪𑀢𑁆𑀢𑀸𑀘𑁆𑀙𑀦𑁆𑀦𑀓𑁂𑀦 (𑀓.)], 𑀢𑀤𑀼𑀪𑀬𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑀸 𑀳𑁄𑀦𑁆𑀢𑀺, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑁂 𑀮𑀽𑀔𑁂 𑀤𑀼𑀩𑁆𑀩𑀡𑁆𑀡𑁂 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁂 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀦𑀦𑁆𑀤, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑀸, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸’’𑀢𑀺? ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀢𑀸𑀦𑀺 𑀘 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀓𑀸𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂𑀲𑀁 𑀬𑀸𑀦𑀺𑀧𑀺 𑀢𑀸𑀦𑀺 𑀧𑀸𑀓𑀢𑀺𑀓𑀸𑀦𑀺 𑀮𑀽𑀔𑀸𑀦𑀺 𑀪𑁄𑀚𑀦𑀸𑀦𑀺 𑀢𑀸𑀦𑀺𑀧𑀺 𑀦𑀘𑁆𑀙𑀸𑀤𑁂𑀦𑁆𑀢𑀺, 𑀧𑀕𑁂𑀯 𑀲𑁂𑀦𑁂𑀲𑀺𑀓𑀸𑀦𑀺. 𑀢𑁂 𑀢𑁂𑀦 𑀘𑁂𑀯 𑀲𑀸𑀭𑀤𑀺𑀓𑁂𑀦 𑀆𑀩𑀸𑀥𑁂𑀦 𑀨𑀼𑀝𑁆𑀞𑀸, 𑀇𑀫𑀺𑀦𑀸 𑀘 𑀪𑀢𑁆𑀢𑀸𑀘𑁆𑀙𑀸𑀤𑀓𑁂𑀦, 𑀢𑀤𑀼𑀪𑀬𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑀸, 𑀮𑀽𑀔𑀸, 𑀤𑀼𑀩𑁆𑀩𑀡𑁆𑀡𑀸, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸, 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺.

𑁨𑁬𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀅𑀘𑁆𑀙𑀯𑀲𑀁, 𑀫𑀘𑁆𑀙𑀯𑀲𑀁, 𑀲𑀼𑀲𑀼𑀓𑀸𑀯𑀲𑀁 ¶ , 𑀲𑀽𑀓𑀭𑀯𑀲𑀁, 𑀕𑀤𑁆𑀭𑀪𑀯𑀲𑀁 𑁋 𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 [𑀦𑀺𑀧𑀓𑁆𑀓𑀁 (𑀓.)] 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀯𑀺𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 ¶ 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀅𑀦𑀸𑀧𑀢𑁆𑀢𑀻𑀢𑀺.

𑀧𑀜𑁆𑀘𑀪𑁂𑀲𑀚𑁆𑀚𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁧. 𑀫𑀽𑀮𑀸𑀤𑀺𑀪𑁂𑀲𑀚𑁆𑀚𑀓𑀣𑀸

𑁨𑁬𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀽𑀮𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀳𑀮𑀺𑀤𑁆𑀤𑀺𑀁, 𑀲𑀺𑀗𑁆𑀕𑀺𑀯𑁂𑀭𑀁, 𑀯𑀘𑀁, 𑀯𑀘𑀢𑁆𑀣𑀁 [𑀯𑀘𑀢𑁆𑀣𑀁 (𑀲𑀻. 𑀲𑁆𑀬𑀸.)], 𑀅𑀢𑀺𑀯𑀺𑀲𑀁, 𑀓𑀝𑀼𑀓𑀭𑁄𑀳𑀺𑀡𑀺𑀁, 𑀉𑀲𑀻𑀭𑀁, 𑀪𑀤𑁆𑀤𑀫𑀼𑀢𑁆𑀢𑀓𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀢𑀸𑀦𑀺 𑁋 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑀼𑀁; 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 ¶ 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀽𑀮𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀺𑀝𑁆𑀞𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀺𑀲𑀤𑀁 𑀦𑀺𑀲𑀤𑀧𑁄𑀢𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀲𑀸𑀯𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀲𑀸𑀯𑀸𑀦𑀺 [𑀓𑀲𑀸𑀯𑀪𑁂𑀲𑀚𑁆𑀚𑀸𑀦𑀺 (𑀓.)] 𑀪𑁂𑀲𑀚𑁆𑀚𑀸𑀦𑀺 𑁋 𑀦𑀺𑀫𑁆𑀩𑀓𑀲𑀸𑀯𑀁, 𑀓𑀼𑀝𑀚𑀓𑀲𑀸𑀯𑀁, 𑀧𑀝𑁄𑀮𑀓𑀲𑀸𑀯𑀁, 𑀨𑀕𑁆𑀕𑀯𑀓𑀲𑀸𑀯𑀁, 𑀦𑀢𑁆𑀢𑀫𑀸𑀮𑀓𑀲𑀸𑀯𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀓𑀲𑀸𑀯𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀢𑀸𑀦𑀺 𑁋 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑀼𑀁; 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀡𑁆𑀡𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀦𑀺𑀫𑁆𑀩𑀧𑀡𑁆𑀡𑀁, 𑀓𑀼𑀝𑀚𑀧𑀡𑁆𑀡𑀁, 𑀧𑀝𑁄𑀮𑀧𑀡𑁆𑀡𑀁, 𑀲𑀼𑀮𑀲𑀺𑀧𑀡𑁆𑀡𑀁, 𑀓𑀧𑁆𑀧𑀸𑀲𑀧𑀡𑁆𑀡𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺…𑀧𑁂….

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀮𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀮𑀸𑀦𑀺 ¶ 𑀪𑁂𑀲𑀚𑁆𑀚𑀸𑀦𑀺 𑁋 𑀩𑀺𑀮𑀗𑁆𑀕𑀁, 𑀧𑀺𑀧𑁆𑀧𑀮𑀺𑀁, 𑀫𑀭𑀺𑀘𑀁, 𑀳𑀭𑀻𑀢𑀓𑀁, 𑀯𑀺𑀪𑀻𑀢𑀓𑀁, 𑀆𑀫𑀮𑀓𑀁, 𑀕𑁄𑀝𑁆𑀞𑀨𑀮𑀁 [𑀕𑁄𑀞𑀨𑀮𑀁 (𑀲𑁆𑀬𑀸.), 𑀓𑁄𑀝𑁆𑀞𑀨𑀮𑀁 (𑀓.)], 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀨𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺…𑀧𑁂….

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀚𑀢𑀽𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀳𑀺𑀗𑁆𑀕𑀼𑀁, 𑀳𑀺𑀗𑁆𑀕𑀼𑀚𑀢𑀼𑀁, 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀁, 𑀢𑀓𑀁, 𑀢𑀓𑀧𑀢𑁆𑀢𑀺𑀁, 𑀢𑀓𑀧𑀡𑁆𑀡𑀺𑀁 ¶ , 𑀲𑀚𑁆𑀚𑀼𑀮𑀲𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺…𑀧𑁂….

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑁄𑀡𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀮𑁄𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑁋 𑀲𑀸𑀫𑀼𑀤𑁆𑀤𑀁, 𑀓𑀸𑀴𑀮𑁄𑀡𑀁, 𑀲𑀺𑀦𑁆𑀥𑀯𑀁, 𑀉𑀩𑁆𑀪𑀺𑀤𑀁 [𑀉𑀩𑁆𑀪𑀺𑀭𑀁 (𑀓.)], 𑀩𑀺𑀮𑀁 [𑀩𑀺𑀴𑀸𑀮𑀁 (𑀲𑀻.)], 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀮𑁄𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀢𑀸𑀦𑀺 𑁋 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑀼𑀁; 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁨𑁬𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 ¶ 𑀆𑀬𑀲𑁆𑀫𑀢𑁄 𑀩𑁂𑀮𑀝𑁆𑀞𑀲𑀻𑀲𑀲𑁆𑀲 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄 𑀳𑁄𑀢𑀺. 𑀢𑀲𑁆𑀲 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺, 𑀢𑀸𑀦𑀺 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄, 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺, 𑀢𑀸𑀦𑀺 𑀫𑀬𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀫𑀸’’𑀢𑀺 ¶ . 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀡𑁆𑀟𑀼 𑀯𑀸, 𑀧𑀺𑀴𑀓𑀸 𑀯𑀸, 𑀅𑀲𑁆𑀲𑀸𑀯𑁄 𑀯𑀸, 𑀣𑀼𑀮𑁆𑀮𑀓𑀘𑁆𑀙𑀼 𑀯𑀸 𑀆𑀩𑀸𑀥𑁄, 𑀓𑀸𑀬𑁄 𑀯𑀸 𑀤𑀼𑀕𑁆𑀕𑀦𑁆𑀥𑁄, 𑀘𑀼𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺; 𑀅𑀕𑀺𑀮𑀸𑀦𑀲𑁆𑀲 𑀙𑀓𑀡𑀁 𑀫𑀢𑁆𑀢𑀺𑀓𑀁 𑀭𑀚𑀦𑀦𑀺𑀧𑁆𑀧𑀓𑁆𑀓𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀼𑀓𑁆𑀔𑀮𑀁 𑀫𑀼𑀲𑀮’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀼𑀡𑁆𑀡𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀘𑀸𑀮𑀺𑀢𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺 ¶ . 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀼𑀡𑁆𑀡𑀘𑀸𑀮𑀺𑀦𑀺𑀦𑁆𑀢𑀺. 𑀲𑀡𑁆𑀳𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀘𑀸𑀮𑀺𑀦𑀺𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁄 𑀳𑁄𑀢𑀺. 𑀢𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀉𑀧𑀝𑁆𑀞𑀳𑀦𑁆𑀢𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀲𑁄 𑀲𑀽𑀓𑀭𑀲𑀽𑀦𑀁 𑀕𑀦𑁆𑀢𑁆𑀯𑀸 𑀆𑀫𑀓𑀫𑀁𑀲𑀁 𑀔𑀸𑀤𑀺, 𑀆𑀫𑀓𑀮𑁄𑀳𑀺𑀢𑀁 𑀧𑀺𑀯𑀺 ¶ . 𑀢𑀲𑁆𑀲 𑀲𑁄 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁂 𑀆𑀫𑀓𑀫𑀁𑀲𑀁 𑀆𑀫𑀓𑀮𑁄𑀳𑀺𑀢𑀦𑁆𑀢𑀺.

𑁨𑁬𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀭𑁄𑀕𑀸𑀩𑀸𑀥𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀘𑀓𑁆𑀔𑀼𑀭𑁄𑀕𑀸𑀩𑀸𑀥𑁄. 𑀇𑀫𑀁 𑀫𑀬𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀦𑀺𑀓𑁆𑀔𑀸𑀫𑁂𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀚𑀦𑀁 𑁋 𑀓𑀸𑀴𑀜𑁆𑀚𑀦𑀁, 𑀭𑀲𑀜𑁆𑀚𑀦𑀁, 𑀲𑁄𑀢𑀜𑁆𑀚𑀦𑀁, 𑀕𑁂𑀭𑀼𑀓𑀁, 𑀓𑀧𑀮𑁆𑀮’’𑀦𑁆𑀢𑀺. 𑀅𑀜𑁆𑀚𑀦𑀽𑀧𑀧𑀺𑀲𑀦𑁂𑀳𑀺 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀦𑀁, 𑀢𑀕𑀭𑀁, 𑀓𑀸𑀴𑀸𑀦𑀼𑀲𑀸𑀭𑀺𑀬𑀁, 𑀢𑀸𑀮𑀻𑀲𑀁, 𑀪𑀤𑁆𑀤𑀫𑀼𑀢𑁆𑀢𑀓𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀺𑀝𑁆𑀞𑀸𑀦𑀺 𑀅𑀜𑁆𑀚𑀦𑀸𑀦𑀺 𑀘𑀭𑀼𑀓𑁂𑀲𑀼𑀧𑀺 [𑀣𑀸𑀮𑀓𑁂𑀲𑀼𑀧𑀺 (𑀲𑀻. 𑀲𑁆𑀬𑀸.)] 𑀲𑀭𑀸𑀯𑀓𑁂𑀲𑀼𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺; 𑀢𑀺𑀡𑀘𑀼𑀡𑁆𑀡𑁂𑀳𑀺𑀧𑀺 𑀧𑀁𑀲𑀼𑀓𑁂𑀳𑀺𑀧𑀺 𑀑𑀓𑀺𑀭𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀚𑀦𑀺𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀯𑀘𑀸 𑀅𑀜𑁆𑀚𑀦𑀺𑀬𑁄 𑀥𑀸𑀭𑁂𑀦𑁆𑀢𑀺 𑁋 𑀲𑁄𑀯𑀡𑁆𑀡𑀫𑀬𑀁, 𑀭𑀽𑀧𑀺𑀬𑀫𑀬𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 ¶ 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸 𑀅𑀜𑁆𑀚𑀦𑀻 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀺𑀫𑀬𑀁, 𑀤𑀦𑁆𑀢𑀫𑀬𑀁, 𑀯𑀺𑀲𑀸𑀡𑀫𑀬𑀁, 𑀦𑀴𑀫𑀬𑀁, 𑀯𑁂𑀴𑀼𑀫𑀬𑀁, 𑀓𑀝𑁆𑀞𑀫𑀬𑀁, 𑀚𑀢𑀼𑀫𑀬𑀁, 𑀨𑀮𑀫𑀬𑀁, 𑀮𑁄𑀳𑀫𑀬𑀁, 𑀲𑀗𑁆𑀔𑀦𑀸𑀪𑀺𑀫𑀬𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀚𑀦𑀺𑀬𑁄 𑀅𑀧𑀸𑀭𑀼𑀢𑀸 𑀳𑁄𑀦𑁆𑀢𑀺, 𑀢𑀺𑀡𑀘𑀼𑀡𑁆𑀡𑁂𑀳𑀺𑀧𑀺 𑀧𑀁𑀲𑀼𑀓𑁂𑀳𑀺𑀧𑀺 𑀑𑀓𑀺𑀭𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀧𑀺𑀥𑀸𑀦𑀦𑁆𑀢𑀺. 𑀅𑀧𑀺𑀥𑀸𑀦𑀁 𑀦𑀺𑀧𑀢𑀢𑀺 ¶ . 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑁆𑀢𑀓𑁂𑀦 𑀩𑀦𑁆𑀥𑀺𑀢𑁆𑀯𑀸 𑀅𑀜𑁆𑀚𑀦𑀺𑀬𑀸 𑀩𑀦𑁆𑀥𑀺𑀢𑀼𑀦𑁆𑀢𑀺. 𑀅𑀜𑁆𑀚𑀦𑀻 𑀨𑀮𑀢𑀺 [𑀦𑀺𑀧𑀢𑀢𑀺 (𑀓.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑁆𑀢𑀓𑁂𑀦 𑀲𑀺𑀩𑁆𑀩𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀗𑁆𑀕𑀼𑀮𑀺𑀬𑀸 𑀅𑀜𑁆𑀚𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀤𑀼𑀓𑁆𑀔𑀸𑀦𑀺 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀚𑀦𑀺𑀲𑀮𑀸𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀯𑀘𑀸 𑀅𑀜𑁆𑀚𑀦𑀺𑀲𑀮𑀸𑀓𑀸𑀬𑁄 𑀥𑀸𑀭𑁂𑀦𑁆𑀢𑀺 𑁋 𑀲𑁄𑀯𑀡𑁆𑀡𑀫𑀬𑀁 𑀭𑀽𑀧𑀺𑀬𑀫𑀬𑀁. 𑀫𑀦𑀼𑀲𑁆𑀲𑀸 ¶ 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸 𑀅𑀜𑁆𑀚𑀦𑀺𑀲𑀮𑀸𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀺𑀫𑀬𑀁…𑀧𑁂… 𑀲𑀗𑁆𑀔𑀦𑀸𑀪𑀺𑀫𑀬𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀚𑀦𑀺𑀲𑀮𑀸𑀓𑀸 𑀪𑀽𑀫𑀺𑀬𑀁 𑀧𑀢𑀺𑀢𑀸 𑀨𑀭𑀼𑀲𑀸 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀮𑀸𑀓𑀞𑀸𑀦𑀺𑀬𑀦𑁆𑀢𑀺 [𑀲𑀮𑀸𑀓𑁄𑀥𑀸𑀦𑀺𑀬𑀦𑁆𑀢𑀺 (𑀲𑀻. 𑀲𑁆𑀬𑀸.)].

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀜𑁆𑀚𑀦𑀺𑀫𑁆𑀧𑀺 𑀅𑀜𑁆𑀚𑀦𑀺𑀲𑀮𑀸𑀓𑀫𑁆𑀧𑀺 𑀳𑀢𑁆𑀣𑁂𑀦 𑀧𑀭𑀺𑀳𑀭𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀚𑀦𑀺𑀢𑁆𑀣𑀯𑀺𑀓𑀦𑁆𑀢𑀺. 𑀅𑀁𑀲𑀩𑀤𑁆𑀥𑀓𑁄 𑀦 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀁𑀲𑀩𑀤𑁆𑀥𑀓𑀁 𑀩𑀦𑁆𑀥𑀦𑀲𑀼𑀢𑁆𑀢𑀓𑀦𑁆𑀢𑀺.

𑁨𑁬𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀲𑀻𑀲𑀸𑀪𑀺𑀢𑀸𑀧𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀤𑁆𑀥𑀦𑀺 𑀢𑁂𑀮𑀓𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀢𑁆𑀣𑀼𑀓𑀫𑁆𑀫𑀦𑁆𑀢𑀺. 𑀦𑀢𑁆𑀣𑀼 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀢𑁆𑀣𑀼𑀓𑀭𑀡𑀺𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀯𑀘𑀸 𑀦𑀢𑁆𑀣𑀼𑀓𑀭𑀡𑀺𑀬𑁄 𑀥𑀸𑀭𑁂𑀦𑁆𑀢𑀺 𑁋 𑀲𑁄𑀯𑀡𑁆𑀡𑀫𑀬𑀁 𑀭𑀽𑀧𑀺𑀬𑀫𑀬𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺, ‘‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸 𑀦𑀢𑁆𑀣𑀼𑀓𑀭𑀡𑀻 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀺𑀫𑀬𑀁…𑀧𑁂… 𑀲𑀗𑁆𑀔𑀦𑀸𑀪𑀺𑀫𑀬𑀦𑁆𑀢𑀺. 𑀦𑀢𑁆𑀣𑀼𑀁 𑀯𑀺𑀲𑀫𑀁 𑀆𑀲𑀺𑀜𑁆𑀘𑀦𑁆𑀢𑀺 [𑀦𑀢𑁆𑀣𑀼 𑀯𑀺𑀲𑀫𑀁 𑀆𑀲𑀺𑀜𑁆𑀘𑀺𑀬𑀢𑀺 (𑀲𑀻. 𑀲𑁆𑀬𑀸.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀬𑀫𑀓𑀦𑀢𑁆𑀣𑀼𑀓𑀭𑀡𑀺𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀥𑀽𑀫𑀁 𑀧𑀸𑀢𑀼𑀦𑁆𑀢𑀺. 𑀢𑀜𑁆𑀜𑁂𑀯 𑀯𑀝𑁆𑀝𑀺𑀁 𑀆𑀮𑀺𑀫𑁆𑀧𑁂𑀢𑁆𑀯𑀸 𑀧𑀺𑀯𑀦𑁆𑀢𑀺 ¶ , 𑀓𑀡𑁆𑀞𑁄 𑀤𑀳𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀥𑀽𑀫𑀦𑁂𑀢𑁆𑀢𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑀸𑀯𑀘𑀸𑀦𑀺 𑀥𑀽𑀫𑀦𑁂𑀢𑁆𑀢𑀸𑀦𑀺 𑀥𑀸𑀭𑁂𑀦𑁆𑀢𑀺 𑁋 𑀲𑁄𑀯𑀡𑁆𑀡𑀫𑀬𑀁 𑀭𑀽𑀧𑀺𑀬𑀫𑀬𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀯𑀘𑀸𑀦𑀺 𑀥𑀽𑀫𑀦𑁂𑀢𑁆𑀢𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀺𑀫𑀬𑀁…𑀧𑁂… 𑀲𑀗𑁆𑀔𑀦𑀸𑀪𑀺𑀫𑀬𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀥𑀽𑀫𑀦𑁂𑀢𑁆𑀢𑀸𑀦𑀺 𑀅𑀧𑀸𑀭𑀼𑀢𑀸𑀦𑀺 𑀳𑁄𑀦𑁆𑀢𑀺, 𑀧𑀸𑀡𑀓𑀸 𑀧𑀯𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀧𑀺𑀥𑀸𑀦𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀥𑀽𑀫𑀦𑁂𑀢𑁆𑀢𑀸𑀦𑀺 𑀳𑀢𑁆𑀣𑁂𑀦 𑀧𑀭𑀺𑀳𑀭𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀥𑀽𑀫𑀦𑁂𑀢𑁆𑀢𑀣𑀯𑀺𑀓𑀦𑁆𑀢𑀺. 𑀏𑀓𑀢𑁄 𑀖𑀁𑀲𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀫𑀓𑀣𑀯𑀺𑀓𑀦𑁆𑀢𑀺. 𑀅𑀁𑀲𑀩𑀤𑁆𑀥𑀓𑁄 𑀦 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀁𑀲𑀩𑀤𑁆𑀥𑀓𑀁 𑀩𑀦𑁆𑀥𑀦𑀲𑀼𑀢𑁆𑀢𑀓𑀦𑁆𑀢𑀺.

𑁨𑁬𑁭. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀯𑀸𑀢𑀸𑀩𑀸𑀥𑁄 ¶ 𑀳𑁄𑀢𑀺. 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀢𑁂𑀮𑀁 𑀧𑀘𑀺𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀮𑀧𑀸𑀓𑀦𑁆𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀢𑁂𑀮𑀧𑀸𑀓𑁂 𑀫𑀚𑁆𑀚𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀮𑀧𑀸𑀓𑁂 𑀫𑀚𑁆𑀚𑀁 𑀧𑀓𑁆𑀔𑀺𑀧𑀺𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀧𑀓𑁆𑀔𑀺𑀢𑁆𑀢𑀫𑀚𑁆𑀚𑀸𑀦𑀺 [𑀅𑀢𑀺𑀔𑀺𑀢𑁆𑀢𑀫𑀚𑁆𑀚𑀸𑀦𑀺 (𑀓.)] 𑀢𑁂𑀮𑀸𑀦𑀺 𑀧𑀘𑀦𑁆𑀢𑀺, 𑀢𑀸𑀦𑀺 𑀧𑀺𑀯𑀺𑀢𑁆𑀯𑀸 𑀫𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑀓𑁆𑀔𑀺𑀢𑁆𑀢𑀫𑀚𑁆𑀚𑀁 𑀢𑁂𑀮𑀁 𑀧𑀸𑀢𑀩𑁆𑀩𑀁. 𑀬𑁄 𑀧𑀺𑀯𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀢𑁂𑀮𑀧𑀸𑀓𑁂 𑀫𑀚𑁆𑀚𑀲𑁆𑀲 𑀦 𑀯𑀡𑁆𑀡𑁄 𑀦 𑀕𑀦𑁆𑀥𑁄 𑀦 𑀭𑀲𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑀁 𑀫𑀚𑁆𑀚𑀧𑀓𑁆𑀔𑀺𑀢𑁆𑀢𑀁 𑀢𑁂𑀮𑀁 𑀧𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀩𑀳𑀼𑀁 𑀅𑀢𑀺𑀧𑀓𑁆𑀔𑀺𑀢𑁆𑀢𑀫𑀚𑁆𑀚𑀁 𑀢𑁂𑀮𑀁 𑀧𑀓𑁆𑀓𑀁 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀅𑀢𑀺𑀧𑀓𑁆𑀔𑀺𑀢𑁆𑀢𑀫𑀚𑁆𑀚𑁂 𑀢𑁂𑀮𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀜𑁆𑀚𑀦𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀩𑀳𑀼𑀢𑀭𑀁 𑀢𑁂𑀮𑀁 𑀧𑀓𑁆𑀓𑀁 𑀳𑁄𑀢𑀺, 𑀢𑁂𑀮𑀪𑀸𑀚𑀦𑀁 𑀦 𑀯𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀢𑀼𑀫𑁆𑀩𑀸𑀦𑀺 𑁋 𑀮𑁄𑀳𑀢𑀼𑀫𑁆𑀩𑀁, 𑀓𑀝𑁆𑀞𑀢𑀼𑀫𑁆𑀩𑀁, 𑀨𑀮𑀢𑀼𑀫𑁆𑀩𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀅𑀗𑁆𑀕𑀯𑀸𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑁂𑀤𑀓𑀫𑁆𑀫𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀪𑀸𑀭𑀲𑁂𑀤𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑁂𑀤𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀗𑁆𑀕𑁄𑀤𑀓𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑀓𑁄𑀝𑁆𑀞𑀓𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀧𑀩𑁆𑀩𑀯𑀸𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀮𑁄𑀳𑀺𑀢𑀁 ¶ 𑀫𑁄𑀘𑁂𑀢𑀼𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀮𑁄𑀳𑀺𑀢𑀁 𑀫𑁄𑀘𑁂𑀢𑁆𑀯𑀸 𑀯𑀺𑀲𑀸𑀡𑁂𑀦 𑀕𑀸𑀳𑁂𑀢𑀼𑀦𑁆𑀢𑀺 [𑀕𑀳𑁂𑀢𑀼𑀦𑁆𑀢𑀺 (𑀲𑀻. 𑀲𑁆𑀬𑀸.)].

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀧𑀸𑀤𑀸 𑀨𑀮𑀺𑀢𑀸 [𑀨𑀸𑀮𑀺𑀢𑀸 (𑀓.)] 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀤𑀩𑁆𑀪𑀜𑁆𑀚𑀦𑀦𑁆𑀢𑀺. 𑀦𑀓𑁆𑀔𑀫𑀦𑀺𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀚𑁆𑀚𑀁 𑀅𑀪𑀺𑀲𑀗𑁆𑀔𑀭𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀡𑁆𑀟𑀸𑀩𑀸𑀥𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀓𑀫𑁆𑀫𑀦𑁆𑀢𑀺. 𑀓𑀲𑀸𑀯𑁄𑀤𑀓𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀲𑀸𑀯𑁄𑀤𑀓𑀦𑁆𑀢𑀺. 𑀢𑀺𑀮𑀓𑀓𑁆𑀓𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀮𑀓𑀓𑁆𑀓𑀦𑁆𑀢𑀺. 𑀓𑀩𑀴𑀺𑀓𑀸𑀬 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀩𑀴𑀺𑀓𑀦𑁆𑀢𑀺. 𑀯𑀡𑀩𑀦𑁆𑀥𑀦𑀘𑁄𑀴𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀡𑀩𑀦𑁆𑀥𑀦𑀘𑁄𑀴𑀦𑁆𑀢𑀺. 𑀯𑀡𑁄 𑀓𑀡𑁆𑀟𑀼𑀯𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀲𑀧𑀓𑀼𑀝𑁆𑀝𑁂𑀦 [𑀲𑀸𑀲𑀧𑀓𑀼𑀟𑁆𑀟𑁂𑀦 (𑀲𑀻. 𑀲𑁆𑀬𑀸.)] 𑀨𑁄𑀲𑀺𑀢𑀼𑀦𑁆𑀢𑀺. 𑀯𑀡𑁄 𑀓𑀺𑀮𑀺𑀚𑁆𑀚𑀺𑀢𑁆𑀣. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀥𑀽𑀫𑀁 ¶ 𑀓𑀸𑀢𑀼𑀦𑁆𑀢𑀺. 𑀯𑀟𑁆𑀠𑀫𑀁𑀲𑀁 𑀯𑀼𑀝𑁆𑀞𑀸𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀮𑁄𑀡𑀲𑀓𑁆𑀔𑀭𑀺𑀓𑀸𑀬 𑀙𑀺𑀦𑁆𑀤𑀺𑀢𑀼𑀦𑁆𑀢𑀺. 𑀯𑀡𑁄 𑀦 𑀭𑀼𑀳𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀡𑀢𑁂𑀮𑀦𑁆𑀢𑀺. 𑀢𑁂𑀮𑀁 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀯𑀺𑀓𑀸𑀲𑀺𑀓𑀁 𑀲𑀩𑁆𑀩𑀁 𑀯𑀡𑀧𑀝𑀺𑀓𑀫𑁆𑀫𑀦𑁆𑀢𑀺.

𑁨𑁬𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀳𑀺𑀦𑀸 𑀤𑀝𑁆𑀞𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀤𑀸𑀢𑀼𑀁 𑁋 𑀕𑀽𑀣𑀁, 𑀫𑀼𑀢𑁆𑀢𑀁, 𑀙𑀸𑀭𑀺𑀓𑀁, 𑀫𑀢𑁆𑀢𑀺𑀓𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀦𑀼 𑀔𑁄 𑀉𑀤𑀸𑀳𑀼 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂 𑀧𑀝𑀺𑀕𑁆𑀕𑀳𑀸𑀧𑁂𑀢𑀼𑀁, 𑀅𑀲𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀲𑀁 𑀧𑀻𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀕𑀽𑀣𑀁 𑀧𑀸𑀬𑁂𑀢𑀼𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀦𑀼 𑀔𑁄 𑀉𑀤𑀸𑀳𑀼 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀓𑀭𑁄𑀦𑁆𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑁆𑀯𑁂𑀯 𑀧𑀝𑀺𑀕𑁆𑀕𑀳𑁄 𑀓𑀢𑁄, 𑀦 𑀧𑀼𑀦 [𑀓𑀢𑁄 𑀧𑀦 (?)] 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺.

𑁨𑁬𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀖𑀭𑀤𑀺𑀦𑁆𑀦𑀓𑀸𑀩𑀸𑀥𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀢𑀸𑀮𑁄𑀴𑀺𑀁 𑀧𑀸𑀬𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀤𑀼𑀝𑁆𑀞𑀕𑀳𑀡𑀺𑀓𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀫𑀺𑀲𑀔𑀸𑀭𑀁 𑀧𑀸𑀬𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀡𑁆𑀟𑀼𑀭𑁄𑀕𑀸𑀩𑀸𑀥𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀢𑁆𑀢𑀳𑀭𑀻𑀢𑀓𑀁 𑀧𑀸𑀬𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑀯𑀺𑀤𑁄𑀲𑀸𑀩𑀸𑀥𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀦𑁆𑀥𑀸𑀮𑁂𑀧𑀁 𑀓𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀪𑀺𑀲𑀦𑁆𑀦𑀓𑀸𑀬𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀭𑁂𑀘𑀦𑀁 𑀧𑀸𑀢𑀼𑀦𑁆𑀢𑀺. 𑀅𑀘𑁆𑀙𑀓𑀜𑁆𑀚𑀺𑀬𑀸 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀓𑀜𑁆𑀚𑀺𑀦𑁆𑀢𑀺. 𑀅𑀓𑀝𑀬𑀽𑀲𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀓𑀝𑀬𑀽𑀲𑀦𑁆𑀢𑀺. 𑀓𑀝𑀸𑀓𑀝𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀝𑀸𑀓𑀝𑀦𑁆𑀢𑀺. 𑀧𑀝𑀺𑀘𑁆𑀙𑀸𑀤𑀦𑀻𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀙𑀸𑀤𑀦𑀻𑀬𑀦𑁆𑀢𑀺.

𑀫𑀽𑀮𑀸𑀤𑀺𑀪𑁂𑀲𑀚𑁆𑀚𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁨. 𑀧𑀺𑀮𑀺𑀦𑁆𑀤𑀯𑀘𑁆𑀙𑀯𑀢𑁆𑀣𑀼

𑁨𑁭𑁦. [𑀇𑀤𑀁 𑀯𑀢𑁆𑀣𑀼 𑀧𑀸𑀭𑀸. 𑁬𑁧𑁮 𑀆𑀤𑀬𑁄] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀸𑀚𑀕𑀳𑁂 𑀧𑀩𑁆𑀪𑀸𑀭𑀁 𑀲𑁄𑀥𑀸𑀧𑁂𑀢𑀺 𑀮𑁂𑀡𑀁 𑀓𑀢𑁆𑀢𑀼𑀓𑀸𑀫𑁄. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 ¶ 𑀩𑀺𑀫𑁆𑀩𑀺𑀲𑀸𑀭𑁄 𑀬𑁂𑀦𑀸𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀣𑁂𑀭𑁄 𑀓𑀸𑀭𑀸𑀧𑁂𑀢𑀻’’𑀢𑀺? ‘‘𑀧𑀩𑁆𑀪𑀸𑀭𑀁, 𑀫𑀳𑀸𑀭𑀸𑀚, 𑀲𑁄𑀥𑀸𑀧𑁂𑀫𑀺, 𑀮𑁂𑀡𑀁 𑀓𑀢𑁆𑀢𑀼𑀓𑀸𑀫𑁄’’𑀢𑀺. ‘‘𑀅𑀢𑁆𑀣𑁄, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 ¶ 𑀆𑀭𑀸𑀫𑀺𑀓𑁂𑀦𑀸’’𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀆𑀭𑀸𑀫𑀺𑀓𑁄 𑀅𑀦𑀼𑀜𑁆𑀜𑀸𑀢𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀫 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺. ‘𑀏𑀯𑀁, 𑀫𑀳𑀸𑀭𑀸𑀚𑀸’𑀢𑀺 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺, 𑀲𑀫𑀸𑀤𑀧𑁂𑀲𑀺, 𑀲𑀫𑀼𑀢𑁆𑀢𑁂𑀚𑁂𑀲𑀺, 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀆𑀬𑀲𑁆𑀫𑀢𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀆𑀭𑀸𑀫𑀺𑀓𑀁 𑀤𑀸𑀢𑀼𑀓𑀸𑀫𑁄. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀸𑀫𑀺𑀓’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀬𑁂𑀦𑀸𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀜𑁆𑀜𑀸𑀢𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀆𑀭𑀸𑀫𑀺𑀓𑁄’’𑀢𑀺? ‘‘𑀏𑀯𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀆𑀭𑀸𑀫𑀺𑀓𑀁 𑀤𑀫𑁆𑀫𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 ¶ 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀆𑀭𑀸𑀫𑀺𑀓𑀁 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀯𑀺𑀲𑁆𑀲𑀭𑀺𑀢𑁆𑀯𑀸, 𑀘𑀺𑀭𑁂𑀦 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸, 𑀅𑀜𑁆𑀜𑀢𑀭𑀁 𑀲𑀩𑁆𑀩𑀢𑁆𑀣𑀓𑀁 𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁄 𑀫𑀬𑀸, 𑀪𑀡𑁂, 𑀅𑀬𑁆𑀬𑀲𑁆𑀲 𑀆𑀭𑀸𑀫𑀺𑀓𑁄 𑀧𑀝𑀺𑀲𑁆𑀲𑀼𑀢𑁄, 𑀤𑀺𑀦𑁆𑀦𑁄 𑀲𑁄 𑀆𑀭𑀸𑀫𑀺𑀓𑁄’’𑀢𑀺? ‘‘𑀦 𑀔𑁄, 𑀤𑁂𑀯, 𑀅𑀬𑁆𑀬𑀲𑁆𑀲 𑀆𑀭𑀸𑀫𑀺𑀓𑁄 𑀤𑀺𑀦𑁆𑀦𑁄’’𑀢𑀺. ‘‘𑀓𑀻𑀯 𑀘𑀺𑀭𑀁 𑀦𑀼 𑀔𑁄, 𑀪𑀡𑁂, 𑀇𑀢𑁄 [𑀇𑀢𑁄 𑀭𑀢𑁆𑀢𑀺 (𑀲𑁆𑀬𑀸.)] 𑀳𑀺 𑀢𑀁 𑀳𑁄𑀢𑀻’’𑀢𑀺? 𑀅𑀣 𑀔𑁄 𑀲𑁄 ¶ 𑀫𑀳𑀸𑀫𑀢𑁆𑀢𑁄 𑀭𑀢𑁆𑀢𑀺𑀬𑁄 𑀕𑀡𑁂𑀢𑁆𑀯𑀸 [𑀯𑀺𑀕𑀡𑁂𑀢𑁆𑀯𑀸 (𑀲𑀻.)] 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘, 𑀤𑁂𑀯, 𑀭𑀢𑁆𑀢𑀺𑀲𑀢𑀸𑀦𑀻’’𑀢𑀺. 𑀢𑁂𑀦 𑀳𑀺, 𑀪𑀡𑁂, 𑀅𑀬𑁆𑀬𑀲𑁆𑀲 𑀧𑀜𑁆𑀘 𑀆𑀭𑀸𑀫𑀺𑀓𑀲𑀢𑀸𑀦𑀺 𑀤𑁂𑀳𑀻𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀧𑀜𑁆𑀘 𑀆𑀭𑀸𑀫𑀺𑀓𑀲𑀢𑀸𑀦𑀺 𑀧𑀸𑀤𑀸𑀲𑀺, 𑀧𑀸𑀝𑀺𑀬𑁂𑀓𑁆𑀓𑁄 𑀕𑀸𑀫𑁄 𑀦𑀺𑀯𑀺𑀲𑀺. ‘𑀆𑀭𑀸𑀫𑀺𑀓𑀕𑀸𑀫𑀓𑁄𑀢𑀺’𑀧𑀺 𑀦𑀁 𑀆𑀳𑀁𑀲𑀼 ¶ , ‘𑀧𑀺𑀮𑀺𑀦𑁆𑀤𑀕𑀸𑀫𑀓𑁄’𑀢𑀺𑀧𑀺 𑀦𑀁 𑀆𑀳𑀁𑀲𑀼.

𑁨𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀢𑀲𑁆𑀫𑀺𑀁 𑀕𑀸𑀫𑀓𑁂 𑀓𑀼𑀮𑀽𑀧𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀺𑀮𑀺𑀦𑁆𑀤𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀕𑀸𑀫𑀓𑁂 𑀉𑀲𑁆𑀲𑀯𑁄 𑀳𑁄𑀢𑀺. 𑀤𑀸𑀭𑀓𑀸 𑀅𑀮𑀗𑁆𑀓𑀢𑀸 𑀫𑀸𑀮𑀸𑀓𑀺𑀢𑀸 𑀓𑀻𑀴𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀧𑀺𑀮𑀺𑀦𑁆𑀤𑀕𑀸𑀫𑀓𑁂 ¶ 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀆𑀭𑀸𑀫𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀭𑀸𑀫𑀺𑀓𑀺𑀦𑀺𑀬𑀸 𑀥𑀻𑀢𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀅𑀮𑀗𑁆𑀓𑀢𑁂 𑀫𑀸𑀮𑀸𑀓𑀺𑀢𑁂 𑀧𑀲𑁆𑀲𑀺𑀢𑁆𑀯𑀸 𑀭𑁄𑀤𑀢𑀺 𑁋 ‘𑀫𑀸𑀮𑀁 𑀫𑁂 𑀤𑁂𑀣, 𑀅𑀮𑀗𑁆𑀓𑀸𑀭𑀁 𑀫𑁂 𑀤𑁂𑀣𑀸’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀢𑀁 𑀆𑀭𑀸𑀫𑀺𑀓𑀺𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲𑀸𑀬𑀁 𑀤𑀸𑀭𑀺𑀓𑀸 𑀭𑁄𑀤𑀢𑀻’’𑀢𑀺? ‘‘𑀅𑀬𑀁, 𑀪𑀦𑁆𑀢𑁂, 𑀤𑀸𑀭𑀺𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀅𑀮𑀗𑁆𑀓𑀢𑁂 𑀫𑀸𑀮𑀸𑀓𑀺𑀢𑁂 𑀧𑀲𑁆𑀲𑀺𑀢𑁆𑀯𑀸 𑀭𑁄𑀤𑀢𑀺 𑁋 ‘𑀫𑀸𑀮𑀁 𑀫𑁂 𑀤𑁂𑀣, 𑀅𑀮𑀗𑁆𑀓𑀸𑀭𑀁 𑀫𑁂 𑀤𑁂𑀣𑀸’𑀢𑀺. 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀤𑀼𑀕𑁆𑀕𑀢𑀸𑀦𑀁 𑀫𑀸𑀮𑀸, 𑀓𑀼𑀢𑁄 𑀅𑀮𑀗𑁆𑀓𑀸𑀭𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀅𑀜𑁆𑀜𑀢𑀭𑀁 𑀢𑀺𑀡𑀡𑁆𑀟𑀼𑀧𑀓𑀁 𑀕𑀳𑁂𑀢𑁆𑀯𑀸 𑀢𑀁 𑀆𑀭𑀸𑀫𑀺𑀓𑀺𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤𑀺𑀫𑀁 𑀢𑀺𑀡𑀡𑁆𑀟𑀼𑀧𑀓𑀁 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀸’’𑀢𑀺. 𑀅𑀣 𑀔𑁄 𑀲𑀸 𑀆𑀭𑀸𑀫𑀺𑀓𑀺𑀦𑀻 𑀢𑀁 𑀢𑀺𑀡𑀡𑁆𑀟𑀼𑀧𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀤𑀸𑀭𑀺𑀓𑀸𑀬 𑀲𑀻𑀲𑁂 𑀧𑀝𑀺𑀫𑀼𑀜𑁆𑀘𑀺. 𑀲𑀸 𑀅𑀳𑁄𑀲𑀺 𑀲𑀼𑀯𑀡𑁆𑀡𑀫𑀸𑀮𑀸 𑀅𑀪𑀺𑀭𑀽𑀧𑀸, 𑀤𑀲𑁆𑀲𑀦𑀻𑀬𑀸, 𑀧𑀸𑀲𑀸𑀤𑀺𑀓𑀸; 𑀦𑀢𑁆𑀣𑀺 𑀢𑀸𑀤𑀺𑀲𑀸 𑀭𑀜𑁆𑀜𑁄𑀧𑀺 𑀅𑀦𑁆𑀢𑁂𑀧𑀼𑀭𑁂 𑀲𑀼𑀯𑀡𑁆𑀡𑀫𑀸𑀮𑀸. 𑀫𑀦𑀼𑀲𑁆𑀲𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀫𑀼𑀓𑀲𑁆𑀲, 𑀤𑁂𑀯, 𑀆𑀭𑀸𑀫𑀺𑀓𑀲𑁆𑀲 𑀖𑀭𑁂 𑀲𑀼𑀯𑀡𑁆𑀡𑀫𑀸𑀮𑀸 𑀅𑀪𑀺𑀭𑀽𑀧𑀸, 𑀤𑀲𑁆𑀲𑀦𑀻𑀬𑀸, 𑀧𑀸𑀲𑀸𑀤𑀺𑀓𑀸; 𑀦𑀢𑁆𑀣𑀺 𑀢𑀸𑀤𑀺𑀲𑀸 𑀤𑁂𑀯𑀲𑁆𑀲𑀧𑀺 ¶ 𑀅𑀦𑁆𑀢𑁂𑀧𑀼𑀭𑁂 𑀲𑀼𑀯𑀡𑁆𑀡𑀫𑀸𑀮𑀸; 𑀓𑀼𑀢𑁄 𑀢𑀲𑁆𑀲 𑀤𑀼𑀕𑁆𑀕𑀢𑀲𑁆𑀲? 𑀦𑀺𑀲𑁆𑀲𑀁𑀲𑀬𑀁 𑀘𑁄𑀭𑀺𑀓𑀸𑀬 𑀆𑀪𑀢𑀸’’𑀢𑀺.

𑀅𑀣 ¶ 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑀁 𑀆𑀭𑀸𑀫𑀺𑀓𑀓𑀼𑀮𑀁 𑀩𑀦𑁆𑀥𑀸𑀧𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 ¶ 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀺𑀮𑀺𑀦𑁆𑀤𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀧𑀺𑀮𑀺𑀦𑁆𑀤𑀕𑀸𑀫𑀓𑁂 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀬𑁂𑀦 𑀢𑀲𑁆𑀲 𑀆𑀭𑀸𑀫𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀇𑀫𑀁 𑀆𑀭𑀸𑀫𑀺𑀓𑀓𑀼𑀮𑀁 𑀕𑀢’’𑀦𑁆𑀢𑀺? ‘‘𑀏𑀢𑀺𑀲𑁆𑀲𑀸, 𑀪𑀦𑁆𑀢𑁂, 𑀲𑀼𑀯𑀡𑁆𑀡𑀫𑀸𑀮𑀸𑀬 𑀓𑀸𑀭𑀡𑀸 𑀭𑀜𑁆𑀜𑀸 𑀩𑀦𑁆𑀥𑀸𑀧𑀺𑀢’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀬𑁂𑀦𑀸𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 ¶ 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲, 𑀫𑀳𑀸𑀭𑀸𑀚, 𑀆𑀭𑀸𑀫𑀺𑀓𑀓𑀼𑀮𑀁 𑀩𑀦𑁆𑀥𑀸𑀧𑀺𑀢’’𑀦𑁆𑀢𑀺? ‘‘𑀢𑀲𑁆𑀲, 𑀪𑀦𑁆𑀢𑁂, 𑀆𑀭𑀸𑀫𑀺𑀓𑀲𑁆𑀲 𑀖𑀭𑁂 𑀲𑀼𑀯𑀡𑁆𑀡𑀫𑀸𑀮𑀸 𑀅𑀪𑀺𑀭𑀽𑀧𑀸, 𑀤𑀲𑁆𑀲𑀦𑀻𑀬𑀸, 𑀧𑀸𑀲𑀸𑀤𑀺𑀓𑀸; 𑀦𑀢𑁆𑀣𑀺 𑀢𑀸𑀤𑀺𑀲𑀸 𑀅𑀫𑁆𑀳𑀸𑀓𑀫𑁆𑀧𑀺 𑀅𑀦𑁆𑀢𑁂𑀧𑀼𑀭𑁂 𑀲𑀼𑀯𑀡𑁆𑀡𑀫𑀸𑀮𑀸; 𑀓𑀼𑀢𑁄 𑀢𑀲𑁆𑀲 𑀤𑀼𑀕𑁆𑀕𑀢𑀲𑁆𑀲? 𑀦𑀺𑀲𑁆𑀲𑀁𑀲𑀬𑀁 𑀘𑁄𑀭𑀺𑀓𑀸𑀬 𑀆𑀪𑀢𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀸𑀲𑀸𑀤𑀁 𑀲𑀼𑀯𑀡𑁆𑀡𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺; 𑀲𑁄 𑀅𑀳𑁄𑀲𑀺 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁄. ‘‘𑀇𑀤𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀢𑀸𑀯 𑀩𑀳𑀼𑀁 𑀲𑀼𑀯𑀡𑁆𑀡𑀁 𑀓𑀼𑀢𑁄’’𑀢𑀺? ‘𑀅𑀜𑁆𑀜𑀸𑀢𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲𑁂𑀯𑁂𑀲𑁄 ¶ 𑀇𑀤𑁆𑀥𑀸𑀦𑀼𑀪𑀸𑀯𑁄’𑀢𑀺 𑀢𑀁 𑀆𑀭𑀸𑀫𑀺𑀓𑀓𑀼𑀮𑀁 𑀫𑀼𑀜𑁆𑀘𑀸𑀧𑁂𑀲𑀺.

𑀫𑀦𑀼𑀲𑁆𑀲𑀸 ‘‘𑀅𑀬𑁆𑀬𑁂𑀦 𑀓𑀺𑀭 𑀧𑀺𑀮𑀺𑀦𑁆𑀤𑀯𑀘𑁆𑀙𑁂𑀦 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑀺𑀢’’𑀦𑁆𑀢𑀺 𑀅𑀢𑁆𑀢𑀫𑀦𑀸 𑀅𑀪𑀺𑀧𑁆𑀧𑀲𑀦𑁆𑀦𑀸 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀅𑀪𑀺𑀳𑀭𑀺𑀁𑀲𑀼, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺𑀁, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼𑀁 [𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 (𑀓.)], 𑀨𑀸𑀡𑀺𑀢𑀁. 𑀧𑀓𑀢𑀺𑀬𑀸𑀧𑀺 𑀘 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀮𑀸𑀪𑀻 𑀳𑁄𑀢𑀺 𑀧𑀜𑁆𑀘𑀦𑁆𑀦𑀁 𑀪𑁂𑀲𑀚𑁆𑀚𑀸𑀦𑀁; 𑀮𑀤𑁆𑀥𑀁 𑀮𑀤𑁆𑀥𑀁 𑀧𑀭𑀺𑀲𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀧𑀭𑀺𑀲𑀸 𑀘𑀲𑁆𑀲 𑀳𑁄𑀢𑀺 𑀩𑀸𑀳𑀼𑀮𑁆𑀮𑀺𑀓𑀸; 𑀮𑀤𑁆𑀥𑀁 𑀮𑀤𑁆𑀥𑀁 𑀓𑁄𑀮𑀫𑁆𑀩𑁂𑀧𑀺 [𑀓𑁄𑀴𑀼𑀫𑁆𑀩𑁂𑀧𑀺 (𑀓.)], 𑀖𑀝𑁂𑀧𑀺, 𑀧𑀽𑀭𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺; 𑀧𑀭𑀺𑀲𑁆𑀲𑀸𑀯𑀦𑀸𑀦𑀺𑀧𑀺, 𑀣𑀯𑀺𑀓𑀸𑀬𑁄𑀧𑀺, 𑀧𑀽𑀭𑁂𑀢𑁆𑀯𑀸 𑀯𑀸𑀢𑀧𑀸𑀦𑁂𑀲𑀼 𑀮𑀕𑁆𑀕𑁂𑀢𑀺. 𑀢𑀸𑀦𑀺 𑀑𑀮𑀻𑀦𑀯𑀺𑀮𑀻𑀦𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀉𑀦𑁆𑀤𑀽𑀭𑁂𑀳𑀺𑀧𑀺 𑀯𑀺𑀳𑀸𑀭𑀸 𑀑𑀓𑀺𑀡𑁆𑀡𑀯𑀺𑀓𑀺𑀡𑁆𑀡𑀸 𑀳𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀦𑁆𑀢𑁄𑀓𑁄𑀝𑁆𑀞𑀸𑀕𑀸𑀭𑀺𑀓𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 ¶ , 𑀲𑁂𑀬𑁆𑀬𑀣𑀸𑀧𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 ¶ 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀬 𑀩𑀸𑀳𑀼𑀮𑁆𑀮𑀸𑀬 𑀘𑁂𑀢𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀬 𑀩𑀸𑀳𑀼𑀮𑁆𑀮𑀸𑀬 𑀘𑁂𑀢𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 ¶ 𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺, 𑀦𑀯𑀦𑀻𑀢𑀁, 𑀢𑁂𑀮𑀁, 𑀫𑀥𑀼, 𑀨𑀸𑀡𑀺𑀢𑀁, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀪𑁂𑀲𑀚𑁆𑀚𑀸𑀦𑀼𑀜𑁆𑀜𑀸𑀢𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁧𑁬𑁩. 𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀸

𑁨𑁭𑁨. 𑀅𑀣 𑀔𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 ¶ 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀓𑀗𑁆𑀔𑀸𑀭𑁂𑀯𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀼𑀴𑀓𑀭𑀡𑀁, 𑀑𑀓𑁆𑀓𑀫𑀺𑀢𑁆𑀯𑀸 𑀕𑀼𑀴𑁂 𑀧𑀺𑀝𑁆𑀞𑀫𑁆𑀧𑀺 𑀙𑀸𑀭𑀺𑀓𑀫𑁆𑀧𑀺 𑀧𑀓𑁆𑀔𑀺𑀧𑀦𑁆𑀢𑁂, 𑀤𑀺𑀲𑁆𑀯𑀸𑀦 ‘‘𑀅𑀓𑀧𑁆𑀧𑀺𑀬𑁄 𑀕𑀼𑀴𑁄 𑀲𑀸𑀫𑀺𑀲𑁄, 𑀦 𑀓𑀧𑁆𑀧𑀢𑀺 𑀕𑀼𑀴𑁄 𑀯𑀺𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀲𑀧𑀭𑀺𑀲𑁄 𑀕𑀼𑀴𑀁 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀬𑁂𑀧𑀺𑀲𑁆𑀲 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀧𑀺 𑀕𑀼𑀴𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀓𑀺𑀫𑀢𑁆𑀣𑀸𑀬 [𑀓𑀺𑀫𑀢𑁆𑀣𑀺𑀬𑀸 (𑀓.)], 𑀪𑀺𑀓𑁆𑀔𑀯𑁂, 𑀕𑀼𑀴𑁂 𑀧𑀺𑀝𑁆𑀞𑀫𑁆𑀧𑀺 𑀙𑀸𑀭𑀺𑀓𑀫𑁆𑀧𑀺 𑀧𑀓𑁆𑀔𑀺𑀧𑀦𑁆𑀢𑀻𑀢𑀺? 𑀣𑀤𑁆𑀥𑀢𑁆𑀣𑀸𑀬 [𑀩𑀦𑁆𑀥𑀦𑀢𑁆𑀣𑀸𑀬 (𑀲𑀻. 𑀲𑁆𑀬𑀸.)] 𑀪𑀕𑀯𑀸𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀣𑀤𑁆𑀥𑀢𑁆𑀣𑀸𑀬 𑀕𑀼𑀴𑁂 𑀧𑀺𑀝𑁆𑀞𑀫𑁆𑀧𑀺 𑀙𑀸𑀭𑀺𑀓𑀫𑁆𑀧𑀺 𑀧𑀓𑁆𑀔𑀺𑀧𑀦𑁆𑀢𑀺, 𑀲𑁄 𑀘 𑀕𑀼𑀴𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀲𑀼𑀔𑀁 𑀕𑀼𑀴𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀓𑀗𑁆𑀔𑀸𑀭𑁂𑀯𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀘𑁆𑀘𑁂 𑀫𑀼𑀕𑁆𑀕𑀁 𑀚𑀸𑀢𑀁, 𑀧𑀲𑁆𑀲𑀺𑀢𑁆𑀯𑀸 ‘‘𑀅𑀓𑀧𑁆𑀧𑀺𑀬𑀸 𑀫𑀼𑀕𑁆𑀕𑀸; 𑀧𑀓𑁆𑀓𑀸𑀧𑀺 𑀫𑀼𑀕𑁆𑀕𑀸 𑀚𑀸𑀬𑀦𑁆𑀢𑀻𑀢𑀺’’ 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀲𑀧𑀭𑀺𑀲𑁄 𑀫𑀼𑀕𑁆𑀕𑀁 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀬𑁂𑀧𑀺𑀲𑁆𑀲 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀧𑀺 𑀫𑀼𑀕𑁆𑀕𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀘𑁂 [𑀲𑀘𑁂𑀧𑀺 (?)], 𑀪𑀺𑀓𑁆𑀔𑀯𑁂, 𑀧𑀓𑁆𑀓𑀸𑀧𑀺 𑀫𑀼𑀕𑁆𑀕𑀸 𑀚𑀸𑀬𑀦𑁆𑀢𑀺 ¶ , 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀲𑀼𑀔𑀁 𑀫𑀼𑀕𑁆𑀕𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑁨𑁭𑁩. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑀭𑀯𑀸𑀢𑀸𑀩𑀸𑀥𑁄 𑀳𑁄𑀢𑀺. 𑀲𑁄 𑀮𑁄𑀡𑀲𑁄𑀯𑀻𑀭𑀓𑀁 𑀅𑀧𑀸𑀬𑀺. 𑀢𑀲𑁆𑀲 𑀲𑁄 𑀉𑀤𑀭𑀯𑀸𑀢𑀸𑀩𑀸𑀥𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀮𑁄𑀡𑀲𑁄𑀯𑀻𑀭𑀓𑀁; 𑀅𑀕𑀺𑀮𑀸𑀦𑀲𑁆𑀲 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀧𑀸𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁪. 𑀅𑀦𑁆𑀢𑁄𑀯𑀼𑀝𑁆𑀞𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁭𑁪. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀉𑀤𑀭𑀯𑀸𑀢𑀸𑀩𑀸𑀥𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘𑀧𑀼𑀩𑁆𑀩𑁂𑀧𑀺 𑀪𑀕𑀯𑀢𑁄 𑀉𑀤𑀭𑀯𑀸𑀢𑀸𑀩𑀸𑀥𑁄 𑀢𑁂𑀓𑀝𑀼𑀮𑀬𑀸𑀕𑀼𑀬𑀸 𑀨𑀸𑀲𑀼 𑀳𑁄𑀢𑀻’𑀢𑀺 𑁋 𑀲𑀸𑀫𑀁 𑀢𑀺𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀫𑀼𑀕𑁆𑀕𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸, 𑀅𑀦𑁆𑀢𑁄 𑀯𑀸𑀲𑁂𑀢𑁆𑀯𑀸, 𑀅𑀦𑁆𑀢𑁄 𑀲𑀸𑀫𑀁 𑀧𑀘𑀺𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀧𑀺𑀯𑀢𑀼 𑀪𑀕𑀯𑀸 𑀢𑁂𑀓𑀝𑀼𑀮𑀬𑀸𑀕𑀼’’𑀦𑁆𑀢𑀺. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺; 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 ¶ 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀼𑀢𑀸𑀬𑀁, 𑀆𑀦𑀦𑁆𑀤 ¶ , 𑀬𑀸𑀕𑀽’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀆𑀦𑀦𑁆𑀤, 𑀅𑀦𑀦𑀼𑀮𑁄𑀫𑀺𑀓𑀁, 𑀅𑀧𑁆𑀧𑀢𑀺𑀭𑀽𑀧𑀁, 𑀅𑀲𑁆𑀲𑀸𑀫𑀡𑀓𑀁, 𑀅𑀓𑀧𑁆𑀧𑀺𑀬𑀁, 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀆𑀦𑀦𑁆𑀤, 𑀏𑀯𑀭𑀽𑀧𑀸𑀬 𑀩𑀸𑀳𑀼𑀮𑁆𑀮𑀸𑀬 𑀘𑁂𑀢𑁂𑀲𑁆𑀲𑀲𑀺. 𑀬𑀤𑀧𑀺, 𑀆𑀦𑀦𑁆𑀤, 𑀅𑀦𑁆𑀢𑁄 𑀯𑀼𑀝𑁆𑀞𑀁 [𑀯𑀼𑀢𑁆𑀣𑀁 (𑀲𑀻. 𑀲𑁆𑀬𑀸. 𑀓.)] 𑀢𑀤𑀧𑀺 𑀅𑀓𑀧𑁆𑀧𑀺𑀬𑀁; 𑀬𑀤𑀧𑀺 𑀅𑀦𑁆𑀢𑁄 𑀧𑀓𑁆𑀓𑀁 𑀢𑀤𑀧𑀺 𑀅𑀓𑀧𑁆𑀧𑀺𑀬𑀁; 𑀬𑀤𑀧𑀺 𑀲𑀸𑀫𑀁 𑀧𑀓𑁆𑀓𑀁, 𑀢𑀤𑀧𑀺 𑀅𑀓𑀧𑁆𑀧𑀺𑀬𑀁. 𑀦𑁂𑀢𑀁, 𑀆𑀦𑀦𑁆𑀤, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀁 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀩𑀳𑀺 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀅𑀦𑁆𑀢𑁄 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀩𑀳𑀺 𑀧𑀓𑁆𑀓𑀁, 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀩𑀳𑀺 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀯𑀼𑀝𑁆𑀞𑀁, 𑀩𑀳𑀺 𑀧𑀓𑁆𑀓𑀁 ¶ ¶ , 𑀅𑀜𑁆𑀜𑁂𑀳𑀺 𑀧𑀓𑁆𑀓𑀁, 𑀢𑀜𑁆𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀅𑀦𑀸𑀧𑀢𑁆𑀢𑀻’’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 ‘‘𑀪𑀕𑀯𑀢𑀸 𑀲𑀸𑀫𑀁𑀧𑀸𑀓𑁄 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀧𑀼𑀦 𑀧𑀸𑀓𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀦 𑀧𑀸𑀓𑀁 𑀧𑀘𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀁 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀆𑀭𑀸𑀫𑀁 𑀆𑀳𑀭𑀦𑁆𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀽 𑀩𑀳𑀺 𑀯𑀸𑀲𑁂𑀦𑁆𑀢𑀺; 𑀉𑀓𑁆𑀓𑀧𑀺𑀡𑁆𑀟𑀓𑀸𑀧𑀺 𑀔𑀸𑀤𑀦𑁆𑀢𑀺, 𑀘𑁄𑀭𑀸𑀧𑀺 𑀳𑀭𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀯𑀸𑀲𑁂𑀢𑀼𑀦𑁆𑀢𑀺. 𑀅𑀦𑁆𑀢𑁄 𑀯𑀸𑀲𑁂𑀢𑁆𑀯𑀸 𑀩𑀳𑀺 𑀧𑀸𑀘𑁂𑀦𑁆𑀢𑀺. 𑀤𑀫𑀓𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀅𑀯𑀺𑀲𑁆𑀲𑀝𑁆𑀞𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀧𑀘𑀺𑀢𑀼𑀦𑁆𑀢𑀺. 𑀤𑀼𑀩𑁆𑀪𑀺𑀓𑁆𑀔𑁂 𑀓𑀧𑁆𑀧𑀺𑀬𑀓𑀸𑀭𑀓𑀸 𑀩𑀳𑀼𑀢𑀭𑀁 𑀳𑀭𑀦𑁆𑀢𑀺, 𑀅𑀧𑁆𑀧𑀢𑀭𑀁 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺. 𑀪𑀕𑀯𑀢𑁄 ¶ 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀁 𑀧𑀘𑀺𑀢𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀯𑀼𑀝𑁆𑀞𑀁, 𑀅𑀦𑁆𑀢𑁄 𑀧𑀓𑁆𑀓𑀁, 𑀲𑀸𑀫𑀁 𑀧𑀓𑁆𑀓𑀦𑁆𑀢𑀺.

𑀅𑀦𑁆𑀢𑁄𑀯𑀼𑀝𑁆𑀞𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁫. 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀡𑀸

𑁨𑁭𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦 𑀮𑀪𑀺𑀁𑀲𑀼 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁; 𑀩𑀳𑀼𑀜𑁆𑀘 𑀨𑀮𑀔𑀸𑀤𑀦𑀻𑀬𑀁 ¶ 𑀅𑀳𑁄𑀲𑀺; 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀦 𑀅𑀳𑁄𑀲𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀓𑀺𑀮𑀦𑁆𑀢𑀭𑀽𑀧𑀸 𑀬𑁂𑀦 𑀭𑀸𑀚𑀕𑀳𑀁 𑀯𑁂𑀴𑀼𑀯𑀦𑀁 𑀓𑀮𑀦𑁆𑀤𑀓𑀦𑀺𑀯𑀸𑀧𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 ¶ , 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀢𑁆𑀣 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑀸; 𑀓𑀼𑀢𑁄 𑀘 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑀣𑀸’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸. 𑀇𑀥 𑀫𑀬𑀁, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀭𑀸𑀚𑀕𑀳𑀁 𑀆𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦 𑀮𑀪𑀺𑀫𑁆𑀳𑀸 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁; 𑀩𑀳𑀼𑀜𑁆𑀘 𑀨𑀮𑀔𑀸𑀤𑀦𑀻𑀬𑀁 ¶ 𑀅𑀳𑁄𑀲𑀺; 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀦 𑀅𑀳𑁄𑀲𑀺; 𑀢𑁂𑀦 𑀫𑀬𑀁 𑀓𑀺𑀮𑀦𑁆𑀢𑀭𑀽𑀧𑀸 𑀅𑀤𑁆𑀥𑀸𑀦𑀁 𑀆𑀕𑀢𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀨𑀮𑀔𑀸𑀤𑀦𑀻𑀬𑀁 𑀧𑀲𑁆𑀲𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀦 𑀳𑁄𑀢𑀺, 𑀲𑀸𑀫𑀁 𑀕𑀳𑁂𑀢𑁆𑀯𑀸, 𑀳𑀭𑀺𑀢𑁆𑀯𑀸, 𑀓𑀧𑁆𑀧𑀺𑀬𑀓𑀸𑀭𑀓𑁂 𑀧𑀲𑁆𑀲𑀺𑀢𑁆𑀯𑀸, 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀕𑁆𑀕𑀳𑀺𑀢𑀁 𑀧𑀝𑀺𑀕𑁆𑀕𑀳𑀺𑀢𑀼’’𑀦𑁆𑀢𑀺.

𑁨𑁭𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀯𑀸 𑀘 𑀢𑀺𑀮𑀸 𑀦𑀯𑀜𑁆𑀘 𑀫𑀥𑀼 𑀉𑀧𑁆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 ¶ 𑁋 ‘‘𑀬𑀁𑀦𑀽𑀦𑀸𑀳𑀁 𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 ¶ . 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸, 𑀲𑀫𑀸𑀤𑀧𑁂𑀢𑁆𑀯𑀸, 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸, 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 ¶ 𑀔𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀲𑀁 𑀔𑁄 𑀫𑀬𑀸 𑀅𑀢𑁆𑀣𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, ‘𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼𑀁 𑀤𑀲𑁆𑀲𑀸𑀫𑀻’𑀢𑀺 ¶ , 𑀢𑁂 𑀫𑀬𑀸 𑀧𑀫𑀼𑀝𑁆𑀞𑀸 𑀤𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼𑀁 𑀓𑁄𑀮𑀫𑁆𑀩𑁂𑀳𑀺 𑀘 𑀖𑀝𑁂𑀳𑀺 𑀘 𑀆𑀭𑀸𑀫𑀁 𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼𑀁 𑀓𑁄𑀮𑀫𑁆𑀩𑁂𑀳𑀺 𑀘 𑀖𑀝𑁂𑀳𑀺 𑀘 𑀆𑀭𑀸𑀫𑀁 𑀳𑀭𑀸𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁂𑀲𑀁 𑀔𑁄 𑀫𑀬𑀸, 𑀪𑁄 𑀕𑁄𑀢𑀫, 𑀅𑀢𑁆𑀣𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, ‘𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼𑀁 𑀤𑀲𑁆𑀲𑀸𑀫𑀻’𑀢𑀺, 𑀢𑁂 𑀫𑀬𑀸 𑀧𑀫𑀼𑀝𑁆𑀞𑀸 𑀤𑀸𑀢𑀼𑀁. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀦𑀯𑁂 𑀘 𑀢𑀺𑀮𑁂 𑀦𑀯𑀜𑁆𑀘 𑀫𑀥𑀼’’𑀦𑁆𑀢𑀺. 𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀽𑀦𑀁 𑀤𑁂𑀳𑀻𑀢𑀺 ¶ . 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀤𑀼𑀩𑁆𑀪𑀺𑀓𑁆𑀔𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀯𑀸𑀭𑁂𑀦𑁆𑀢𑀺, 𑀧𑀝𑀺𑀲𑀗𑁆𑀔𑀸𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀲𑀩𑁆𑀩𑁄 𑀘 𑀲𑀗𑁆𑀖𑁄 𑀧𑀯𑀸𑀭𑀺𑀢𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀢𑁄 𑀦𑀻𑀳𑀝𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀡𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁬. 𑀧𑀝𑀺𑀕𑁆𑀕𑀳𑀺𑀢𑀸𑀤𑀺𑀅𑀦𑀼𑀚𑀸𑀦𑀦𑀸

𑁨𑁭𑁭. [𑀧𑀸𑀘𑀺. 𑁨𑁯𑁫] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀔𑀸𑀤𑀦𑀻𑀬𑀁 𑀧𑀸𑀳𑁂𑀲𑀺 𑁋 𑀅𑀬𑁆𑀬𑀲𑁆𑀲 𑀉𑀧𑀦𑀦𑁆𑀤𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 ¶ 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀳𑁄𑀢𑀺 ¶ . 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄’’𑀢𑀺? ‘‘𑀏𑀲𑀸𑀯𑀼𑀲𑁄, 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. ‘‘𑀇𑀤𑀁, 𑀪𑀦𑁆𑀢𑁂, 𑀔𑀸𑀤𑀦𑀻𑀬𑀁 𑀅𑀬𑁆𑀬𑀲𑁆𑀲 𑀉𑀧𑀦𑀦𑁆𑀤𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀣 𑀬𑀸𑀯 𑀉𑀧𑀦𑀦𑁆𑀤𑁄 𑀆𑀕𑀘𑁆𑀙𑀢𑀻𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀯𑀸 𑀆𑀕𑀘𑁆𑀙𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀤𑀼𑀩𑁆𑀪𑀺𑀓𑁆𑀔𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀯𑀸𑀭𑁂𑀦𑁆𑀢𑀺, 𑀧𑀝𑀺𑀲𑀗𑁆𑀔𑀸𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀲𑀩𑁆𑀩𑁄 𑀘 𑀲𑀗𑁆𑀖𑁄 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑁨𑁭𑁮. 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀓𑀸𑀬𑀟𑀸𑀳𑀸𑀩𑀸𑀥𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀩𑁆𑀩𑁂 𑀢𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀬𑀟𑀸𑀳𑀸𑀩𑀸𑀥𑁄 𑀓𑁂𑀦 𑀨𑀸𑀲𑀼 𑀳𑁄𑀢𑀻’’𑀢𑀺? ‘‘𑀪𑀺𑀲𑁂𑀳𑀺 𑀘 𑀫𑁂, 𑀆𑀯𑀼𑀲𑁄 ¶ , 𑀫𑀼𑀴𑀸𑀮𑀺𑀓𑀸𑀳𑀺 𑀘𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀫𑀦𑁆𑀤𑀸𑀓𑀺𑀦𑀺𑀬𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄 𑀅𑀜𑁆𑀜𑀢𑀭𑁄 𑀦𑀸𑀕𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀤𑀽𑀭𑀢𑁄𑀯 ¶ 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀼 𑀔𑁄, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄. 𑀲𑁆𑀯𑀸𑀕𑀢𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲. 𑀓𑁂𑀦, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀅𑀢𑁆𑀣𑁄; 𑀓𑀺𑀁 𑀤𑀫𑁆𑀫𑀻’’𑀢𑀺? ‘‘𑀪𑀺𑀲𑁂𑀳𑀺 𑀘 𑀫𑁂, 𑀆𑀯𑀼𑀲𑁄, 𑀅𑀢𑁆𑀣𑁄, 𑀫𑀼𑀴𑀸𑀮𑀺𑀓𑀸𑀳𑀺 𑀘𑀸’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀅𑀜𑁆𑀜𑀢𑀭𑀁 𑀦𑀸𑀕𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀅𑀬𑁆𑀬𑀲𑁆𑀲 𑀪𑀺𑀲𑁂 𑀘 𑀫𑀼𑀴𑀸𑀮𑀺𑀓𑀸𑀬𑁄 𑀘 𑀬𑀸𑀯𑀤𑀢𑁆𑀣𑀁 𑀤𑁂𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀫𑀦𑁆𑀤𑀸𑀓𑀺𑀦𑀺𑀁 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸, 𑀲𑁄𑀡𑁆𑀟𑀸𑀬 𑀪𑀺𑀲𑀜𑁆𑀘 𑀫𑀼𑀴𑀸𑀮𑀺𑀓𑀜𑁆𑀘 𑀅𑀩𑁆𑀩𑀸𑀳𑀺𑀢𑁆𑀯𑀸, 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 ¶ 𑀯𑀺𑀓𑁆𑀔𑀸𑀮𑁂𑀢𑁆𑀯𑀸, 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀫𑀦𑁆𑀤𑀸𑀓𑀺𑀦𑀺𑀬𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀲𑁄𑀧𑀺 𑀔𑁄 𑀦𑀸𑀕𑁄 𑀫𑀦𑁆𑀤𑀸𑀓𑀺𑀦𑀺𑀬𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀪𑀺𑀲𑁂 𑀘 𑀫𑀼𑀴𑀸𑀮𑀺𑀓𑀸𑀬𑁄 ¶ 𑀘 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀫𑀦𑁆𑀤𑀸𑀓𑀺𑀦𑀺𑀬𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀺𑀲𑁂 𑀘 𑀫𑀼𑀴𑀸𑀮𑀺𑀓𑀸𑀬𑁄 𑀘 𑀉𑀧𑀦𑀸𑀫𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀺𑀲𑁂 𑀘 𑀫𑀼𑀴𑀸𑀮𑀺𑀓𑀸𑀬𑁄 𑀘 𑀪𑀼𑀢𑁆𑀢𑀲𑁆𑀲 𑀓𑀸𑀬𑀟𑀸𑀳𑀸𑀩𑀸𑀥𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀩𑀳𑀽 𑀪𑀺𑀲𑀸 𑀘 ¶ 𑀫𑀼𑀴𑀸𑀮𑀺𑀓𑀸𑀬𑁄 𑀘 𑀅𑀯𑀲𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀤𑀼𑀩𑁆𑀪𑀺𑀓𑁆𑀔𑁂 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀯𑀸𑀭𑁂𑀦𑁆𑀢𑀺, 𑀧𑀝𑀺𑀲𑀗𑁆𑀔𑀸𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀲𑀩𑁆𑀩𑁄 𑀘 𑀲𑀗𑁆𑀖𑁄 𑀧𑀯𑀸𑀭𑀺𑀢𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀩𑀳𑀼𑀁 𑀨𑀮𑀔𑀸𑀤𑀦𑀻𑀬𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀦 𑀳𑁄𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀨𑀮𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀩𑀻𑀚𑀁 𑀦𑀺𑀩𑁆𑀩𑀢𑁆𑀢𑀩𑀻𑀚𑀁 [𑀦𑀺𑀩𑁆𑀩𑀝𑁆𑀝𑀩𑀻𑀚𑀁 (𑀲𑀻.), 𑀦𑀺𑀩𑁆𑀩𑀝𑀩𑀻𑀚𑀁 (𑀲𑁆𑀬𑀸.), 𑀦𑀺𑀧𑁆𑀧𑀝𑁆𑀝𑀩𑀻𑀚𑀁 (𑀓.)] 𑀅𑀓𑀢𑀓𑀧𑁆𑀧𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

𑀧𑀝𑀺𑀕𑁆𑀕𑀳𑀺𑀢𑀸𑀤𑀺 𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁭. 𑀲𑀢𑁆𑀣𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁭𑁯. 𑀅𑀣 𑀔𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀕𑀦𑁆𑀤𑀮𑀸𑀩𑀸𑀥𑁄 ¶ 𑀳𑁄𑀢𑀺. 𑀆𑀓𑀸𑀲𑀕𑁄𑀢𑁆𑀢𑁄 𑀯𑁂𑀚𑁆𑀚𑁄 𑀲𑀢𑁆𑀣𑀓𑀫𑁆𑀫𑀁 ¶ 𑀓𑀭𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀬𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀓𑀸𑀲𑀕𑁄𑀢𑁆𑀢𑁄 𑀯𑁂𑀚𑁆𑀚𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀘𑁆𑀙𑀢𑀼 𑀪𑀯𑀁 𑀕𑁄𑀢𑀫𑁄, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀢𑀼, 𑀲𑁂𑀬𑁆𑀬𑀣𑀸𑀧𑀺 𑀕𑁄𑀥𑀸𑀫𑀼𑀔’’𑀦𑁆𑀢𑀺 ¶ . 𑀅𑀣 𑀔𑁄 𑀪𑀕𑀯𑀸 𑁋 ‘‘𑀲𑁄 𑀫𑀁 𑀔𑁆𑀯𑀸𑀬𑀁 𑀫𑁄𑀖𑀧𑀼𑀭𑀺𑀲𑁄 𑀉𑀧𑁆𑀧𑀡𑁆𑀟𑁂𑀢𑀻’’𑀢𑀺 𑁋 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸, 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸, 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀫𑀼𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄’’𑀢𑀺? ‘‘𑀅𑀢𑁆𑀣𑀺 𑀪𑀕𑀯𑀸’’𑀢𑀺. ‘‘𑀓𑀺𑀁 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀢𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀪𑀕𑀦𑁆𑀤𑀮𑀸𑀩𑀸𑀥𑁄, 𑀆𑀓𑀸𑀲𑀕𑁄𑀢𑁆𑀢𑁄 𑀯𑁂𑀚𑁆𑀚𑁄 𑀲𑀢𑁆𑀣𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲, 𑀅𑀦𑀦𑀼𑀮𑁄𑀫𑀺𑀓𑀁, 𑀅𑀧𑁆𑀧𑀢𑀺𑀭𑀽𑀧𑀁, 𑀅𑀲𑁆𑀲𑀸𑀫𑀡𑀓𑀁, 𑀅𑀓𑀧𑁆𑀧𑀺𑀬𑀁, 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀲𑀫𑁆𑀩𑀸𑀥𑁂 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑁆𑀲𑀢𑀺. 𑀲𑀫𑁆𑀩𑀸𑀥𑁂, 𑀪𑀺𑀓𑁆𑀔𑀯𑁂, 𑀲𑀼𑀔𑀼𑀫𑀸 𑀙𑀯𑀺, 𑀤𑀼𑀭𑁄𑀧𑀬𑁄 𑀯𑀡𑁄 ¶ , 𑀤𑀼𑀧𑁆𑀧𑀭𑀺𑀳𑀸𑀭𑀁 𑀲𑀢𑁆𑀣𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀸𑀥𑁂 𑀲𑀢𑁆𑀣𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀲𑀢𑁆𑀣𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑁋 𑀯𑀢𑁆𑀣𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 ¶ 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀢𑁆𑀣𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀢𑁆𑀣𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀸𑀥𑀲𑁆𑀲 𑀲𑀸𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑀸 𑀲𑀢𑁆𑀣𑀓𑀫𑁆𑀫𑀁 𑀯𑀸 𑀯𑀢𑁆𑀣𑀺𑀓𑀫𑁆𑀫𑀁 𑀯𑀸 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀲𑀢𑁆𑀣𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁮. 𑀫𑀦𑀼𑀲𑁆𑀲𑀫𑀁𑀲𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁮𑁦. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑀺𑀬𑀁 𑀲𑀼𑀧𑁆𑀧𑀺𑀬𑁄 𑀘 𑀉𑀧𑀸𑀲𑀓𑁄 𑀲𑀼𑀧𑁆𑀧𑀺𑀬𑀸 ¶ 𑀘 𑀉𑀧𑀸𑀲𑀺𑀓𑀸 𑀉𑀪𑀢𑁄𑀧𑀲𑀦𑁆𑀦𑀸 𑀳𑁄𑀦𑁆𑀢𑀺, 𑀤𑀸𑀬𑀓𑀸, 𑀓𑀸𑀭𑀓𑀸, 𑀲𑀗𑁆𑀖𑀼𑀧𑀝𑁆𑀞𑀸𑀓𑀸. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑁄, 𑀪𑀦𑁆𑀢𑁂, 𑀕𑀺𑀮𑀸𑀦𑁄, 𑀓𑀲𑁆𑀲 𑀓𑀺𑀁 𑀆𑀳𑀭𑀺𑀬𑀢𑀽’’𑀢𑀺? 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀭𑁂𑀘𑀦𑀁 ¶ 𑀧𑀻𑀢𑀁 𑀳𑁄𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀸 𑀔𑁄, 𑀪𑀕𑀺𑀦𑀺, 𑀯𑀺𑀭𑁂𑀘𑀦𑀁 𑀧𑀻𑀢𑀁. 𑀅𑀢𑁆𑀣𑁄 𑀫𑁂 𑀧𑀝𑀺𑀘𑁆𑀙𑀸𑀤𑀦𑀻𑀬𑁂𑀦𑀸’’𑀢𑀺. ‘‘𑀲𑀼𑀝𑁆𑀞𑀼, 𑀅𑀬𑁆𑀬, 𑀆𑀳𑀭𑀺𑀬𑀺𑀲𑁆𑀲𑀢𑀻’’𑀢𑀺 𑀖𑀭𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂, 𑀧𑀯𑀢𑁆𑀢𑀫𑀁𑀲𑀁 𑀚𑀸𑀦𑀸𑀳𑀻’’𑀢𑀺. 𑀏𑀯𑀁, 𑀅𑀬𑁆𑀬𑁂𑀢𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀲𑀼𑀧𑁆𑀧𑀺𑀬𑀸𑀬 ¶ 𑀉𑀧𑀸𑀲𑀺𑀓𑀸𑀬 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑁂𑀯𑀮𑀓𑀧𑁆𑀧𑀁 𑀩𑀸𑀭𑀸𑀡𑀲𑀺𑀁 𑀆𑀳𑀺𑀡𑁆𑀟𑀦𑁆𑀢𑁄 𑀦 𑀅𑀤𑁆𑀤𑀲 𑀧𑀯𑀢𑁆𑀢𑀫𑀁𑀲𑀁. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀬𑁂𑀦 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂 𑀧𑀯𑀢𑁆𑀢𑀫𑀁𑀲𑀁. 𑀫𑀸𑀖𑀸𑀢𑁄 𑀅𑀚𑁆𑀚𑀸’’𑀢𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑀸𑀬 𑀉𑀧𑀸𑀲𑀺𑀓𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀢𑀲𑁆𑀲 𑀔𑁄 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀘𑁆𑀙𑀸𑀤𑀦𑀻𑀬𑀁 𑀅𑀮𑀪𑀦𑁆𑀢𑀲𑁆𑀲 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀗𑁆𑀓𑀺𑀭𑀺𑀬𑀸 ¶ 𑀯𑀸 𑀪𑀯𑀺𑀲𑁆𑀲𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑀸𑀳𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦 𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺. 𑀧𑁄𑀢𑁆𑀣𑀦𑀺𑀓𑀁 𑀕𑀳𑁂𑀢𑁆𑀯𑀸 𑀊𑀭𑀼𑀫𑀁𑀲𑀁 𑀉𑀓𑁆𑀓𑀦𑁆𑀢𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀺 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀫𑀼𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄, 𑀢𑀲𑁆𑀲 𑀤𑀚𑁆𑀚𑀸𑀳𑀺. 𑀬𑁄 𑀘 𑀫𑀁 𑀧𑀼𑀘𑁆𑀙𑀢𑀺, ‘𑀕𑀺𑀮𑀸𑀦𑀸’𑀢𑀺 𑀧𑀝𑀺𑀯𑁂𑀤𑁂𑀳𑀻’’𑀢𑀺. 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀊𑀭𑀼𑀁 𑀯𑁂𑀞𑁂𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀤𑀸𑀲𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀲𑀼𑀧𑁆𑀧𑀺𑀬𑀸’’𑀢𑀺? ‘‘𑀏𑀲𑀸𑀬𑁆𑀬 𑀑𑀯𑀭𑀓𑁂 𑀦𑀺𑀧𑀦𑁆𑀦𑀸’’𑀢𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀬𑁂𑀦 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀦𑀺𑀧𑀦𑁆𑀦𑀸𑀲𑀻’’𑀢𑀺? ‘‘𑀕𑀺𑀮𑀸𑀦𑀸𑀫𑁆𑀳𑀻’’𑀢𑀺. ‘‘𑀓𑀺𑀁 𑀢𑁂 𑀆𑀩𑀸𑀥𑁄’’𑀢𑀺? 𑀅𑀣 𑀔𑁄 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸 𑀲𑀼𑀧𑁆𑀧𑀺𑀬𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑁋 𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀬𑀸𑀯 𑀲𑀤𑁆𑀥𑀸𑀬𑀁 𑀲𑀼𑀧𑁆𑀧𑀺𑀬𑀸 𑀧𑀲𑀦𑁆𑀦𑀸, 𑀬𑀢𑁆𑀭 𑀳𑀺 𑀦𑀸𑀫 𑀅𑀢𑁆𑀢𑀦𑁄𑀧𑀺 𑀫𑀁𑀲𑀸𑀦𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀺! 𑀓𑀺𑀫𑁆𑀧𑀺𑀫𑀸𑀬 [𑀓𑀺𑀁 𑀧𑀦𑀺𑀫𑀸𑀬 (𑀲𑀻. 𑀲𑁆𑀬𑀸.)] 𑀅𑀜𑁆𑀜𑀁 𑀓𑀺𑀜𑁆𑀘𑀺 ¶ 𑀅𑀤𑁂𑀬𑁆𑀬𑀁 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀼𑀧𑁆𑀧𑀺𑀬𑀲𑁆𑀲 ¶ 𑀉𑀧𑀸𑀲𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 ¶ . 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀲𑀼𑀧𑁆𑀧𑀺𑀬𑀸’’𑀢𑀺? ‘‘𑀕𑀺𑀮𑀸𑀦𑀸 𑀪𑀕𑀯𑀸’’𑀢𑀺. ‘‘𑀢𑁂𑀦 𑀳𑀺 𑀆𑀕𑀘𑁆𑀙𑀢𑀽’’𑀢𑀺. ‘‘𑀦 𑀪𑀕𑀯𑀸 𑀉𑀲𑁆𑀲𑀳𑀢𑀻’’𑀢𑀺. ‘‘𑀢𑁂𑀦 𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀆𑀦𑁂𑀣𑀸’’𑀢𑀺. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀉𑀧𑀸𑀲𑀓𑁄 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ¶ 𑀆𑀦𑁂𑀲𑀺. 𑀢𑀲𑁆𑀲𑀸, 𑀲𑀳 𑀤𑀲𑁆𑀲𑀦𑁂𑀦 𑀪𑀕𑀯𑀢𑁄, 𑀢𑀸𑀯 𑀫𑀳𑀸𑀯𑀡𑁄 𑀭𑀼𑀴𑀳𑁄 𑀅𑀳𑁄𑀲𑀺, 𑀲𑀼𑀘𑁆𑀙𑀯𑀺𑀮𑁄𑀫𑀚𑀸𑀢𑁄. 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄 𑀘 𑀉𑀧𑀸𑀲𑀓𑁄 𑀲𑀼𑀧𑁆𑀧𑀺𑀬𑀸 𑀘 𑀉𑀧𑀸𑀲𑀺𑀓𑀸 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 ¶ 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀲𑀳 𑀤𑀲𑁆𑀲𑀦𑁂𑀦 𑀪𑀕𑀯𑀢𑁄 𑀢𑀸𑀯 𑀫𑀳𑀸𑀯𑀡𑁄 𑀭𑀼𑀴𑀳𑁄 𑀪𑀯𑀺𑀲𑁆𑀲𑀢𑀺, 𑀲𑀼𑀘𑁆𑀙𑀯𑀺𑀮𑁄𑀫𑀚𑀸𑀢𑁄’’𑀢𑀺 𑁋 𑀳𑀝𑁆𑀞𑀸 𑀉𑀤𑀕𑁆𑀕𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀲𑀼𑀧𑁆𑀧𑀺𑀬𑀜𑁆𑀘 𑀉𑀧𑀸𑀲𑀓𑀁 𑀲𑀼𑀧𑁆𑀧𑀺𑀬𑀜𑁆𑀘 𑀉𑀧𑀸𑀲𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽

𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀓𑁄, 𑀪𑀺𑀓𑁆𑀔𑀯𑁂, 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀫𑀁𑀲𑀁 𑀯𑀺𑀜𑁆𑀜𑀸𑀧𑁂𑀲𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀲𑀼𑀧𑁆𑀧𑀺𑀬𑀁 𑀉𑀧𑀸𑀲𑀺𑀓𑀁 𑀫𑀁𑀲𑀁 𑀯𑀺𑀜𑁆𑀜𑀸𑀧𑁂𑀲𑀺’’𑀦𑁆𑀢𑀺. ‘‘𑀆𑀳𑀭𑀺𑀬𑀺𑀢𑁆𑀣 𑀪𑀺𑀓𑁆𑀔𑀽’’𑀢𑀺? ‘‘𑀆𑀳𑀭𑀺𑀬𑀺𑀢𑁆𑀣 𑀪𑀕𑀯𑀸’’𑀢𑀺. ‘‘𑀧𑀭𑀺𑀪𑀼𑀜𑁆𑀚𑀺 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺? ‘‘𑀧𑀭𑀺𑀪𑀼𑀜𑁆𑀚𑀸𑀫𑀳𑀁 𑀪𑀕𑀯𑀸’’𑀢𑀺. ‘‘𑀧𑀝𑀺𑀯𑁂𑀓𑁆𑀔𑀺 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺? ‘‘𑀦𑀸𑀳𑀁 𑀪𑀕𑀯𑀸 𑀧𑀝𑀺𑀯𑁂𑀓𑁆𑀔𑀺’’𑀦𑁆𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺. 𑀫𑀦𑀼𑀲𑁆𑀲𑀫𑀁𑀲𑀁 𑀔𑁄 𑀢𑀬𑀸, 𑀫𑁄𑀖𑀧𑀼𑀭𑀺𑀲, 𑀧𑀭𑀺𑀪𑀼𑀢𑁆𑀢𑀁. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂𑀳𑀺 𑀅𑀢𑁆𑀢𑀦𑁄𑀧𑀺 𑀫𑀁𑀲𑀸𑀦𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀺. 𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 ¶ 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀫𑀦𑀼𑀲𑁆𑀲𑀫𑀁𑀲𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁯. 𑀳𑀢𑁆𑀣𑀺𑀫𑀁𑀲𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁮𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀳𑀢𑁆𑀣𑀻 𑀫𑀭𑀦𑁆𑀢𑀺 ¶ . 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑁂 𑀳𑀢𑁆𑀣𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 ¶ , 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀦𑀁 𑀳𑀢𑁆𑀣𑀺𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀳𑀢𑁆𑀣𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀳𑀢𑁆𑀣𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀭𑀸𑀚𑀗𑁆𑀕𑀁 𑀳𑀢𑁆𑀣𑀻, 𑀲𑀘𑁂 𑀭𑀸𑀚𑀸 𑀚𑀸𑀦𑁂𑀬𑁆𑀬, 𑀦 𑀦𑁂𑀲𑀁 𑀅𑀢𑁆𑀢𑀫𑀦𑁄 𑀅𑀲𑁆𑀲𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 ¶ 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀅𑀲𑁆𑀲𑀸 𑀫𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑁂 𑀅𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀦𑀁 𑀅𑀲𑁆𑀲𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀅𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀭𑀸𑀚𑀗𑁆𑀕𑀁 𑀅𑀲𑁆𑀲𑀸, 𑀲𑀘𑁂 𑀭𑀸𑀚𑀸 𑀚𑀸𑀦𑁂𑀬𑁆𑀬, 𑀦 𑀦𑁂𑀲𑀁 𑀅𑀢𑁆𑀢𑀫𑀦𑁄 𑀅𑀲𑁆𑀲𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑁂 𑀲𑀼𑀦𑀔𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀦𑀁 𑀲𑀼𑀦𑀔𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀼𑀦𑀔𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀼𑀦𑀔𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀚𑁂𑀕𑀼𑀘𑁆𑀙𑁄 ¶ 𑀲𑀼𑀦𑀔𑁄 𑀧𑀝𑀺𑀓𑀽𑀮𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀼𑀦𑀔𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀤𑀼𑀩𑁆𑀪𑀺𑀓𑁆𑀔𑁂 𑀅𑀳𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀦𑀁 𑀅𑀳𑀺𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀅𑀳𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀳𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀚𑁂𑀕𑀼𑀘𑁆𑀙𑁄 𑀅𑀳𑀺 𑀧𑀝𑀺𑀓𑀽𑀮𑁄’’𑀢𑀺. 𑀲𑀼𑀧𑀲𑁆𑀲𑁄𑀧𑀺 [𑀲𑀼𑀨𑀲𑁆𑀲𑁄 (𑀲𑀻.)] 𑀦𑀸𑀕𑀭𑀸𑀚𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀼𑀧𑀲𑁆𑀲𑁄 𑀦𑀸𑀕𑀭𑀸𑀚𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀦𑀸𑀕𑀸 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀢𑁂 𑀅𑀧𑁆𑀧𑀫𑀢𑁆𑀢𑀓𑁂𑀳𑀺𑀧𑀺 𑀪𑀺𑀓𑁆𑀔𑀽 𑀯𑀺𑀳𑁂𑀞𑁂𑀬𑁆𑀬𑀼𑀁. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀅𑀳𑀺𑀫𑀁𑀲𑀁 𑀦 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀼𑀧𑀲𑁆𑀲𑀁 𑀦𑀸𑀕𑀭𑀸𑀚𑀸𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺…𑀧𑁂… 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 ¶ 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀳𑀺𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀮𑀼𑀤𑁆𑀤𑀓𑀸 𑀲𑀻𑀳𑀁 𑀳𑀦𑁆𑀢𑁆𑀯𑀸 𑀲𑀻𑀳𑀫𑀁𑀲𑀁 [𑀫𑀁𑀲𑀁 (𑀓.)] 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 ¶ 𑀘𑀭𑀦𑁆𑀢𑀸𑀦𑀁 𑀲𑀻𑀳𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀻𑀳𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀺. 𑀲𑀻𑀳𑀸 𑀲𑀻𑀳𑀫𑀁𑀲𑀕𑀦𑁆𑀥𑁂𑀦 𑀪𑀺𑀓𑁆𑀔𑀽 𑀧𑀭𑀺𑀧𑀸𑀢𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀮𑀼𑀤𑁆𑀤𑀓𑀸 𑀩𑁆𑀬𑀕𑁆𑀖𑀁 𑀳𑀦𑁆𑀢𑁆𑀯𑀸…𑀧𑁂… 𑀤𑀻𑀧𑀺𑀁 𑀳𑀦𑁆𑀢𑁆𑀯𑀸…𑀧𑁂… 𑀅𑀘𑁆𑀙𑀁 𑀳𑀦𑁆𑀢𑁆𑀯𑀸…𑀧𑁂… 𑀢𑀭𑀘𑁆𑀙𑀁 𑀳𑀦𑁆𑀢𑁆𑀯𑀸 𑀢𑀭𑀘𑁆𑀙𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀦𑀁 ¶ 𑀢𑀭𑀘𑁆𑀙𑀫𑀁𑀲𑀁 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀢𑀭𑀘𑁆𑀙𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀺. 𑀢𑀭𑀘𑁆𑀙𑀸 𑀢𑀭𑀘𑁆𑀙𑀫𑀁𑀲𑀕𑀦𑁆𑀥𑁂𑀦 𑀪𑀺𑀓𑁆𑀔𑀽 𑀧𑀭𑀺𑀧𑀸𑀢𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀢𑀭𑀘𑁆𑀙𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀳𑀢𑁆𑀣𑀺𑀫𑀁𑀲𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀧𑁆𑀧𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.

𑁧𑁭𑁦. 𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀦𑀼𑀚𑀸𑀦𑀦𑀸

𑁨𑁮𑁨. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀅𑀦𑁆𑀥𑀓𑀯𑀺𑀦𑁆𑀤𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁, 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀸𑀦𑀧𑀤𑀸 𑀫𑀦𑀼𑀲𑁆𑀲𑀸 𑀩𑀳𑀼𑀁 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑁋 𑀬𑀤𑀸 𑀧𑀝𑀺𑀧𑀸𑀝𑀺𑀁 𑀮𑀪𑀺𑀲𑁆𑀲𑀸𑀫 𑀢𑀤𑀸 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀸𑀢𑀺, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀘 𑀯𑀺𑀖𑀸𑀲𑀸𑀤𑀲𑀢𑀸𑀦𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀅𑀦𑁆𑀥𑀓𑀯𑀺𑀦𑁆𑀤𑀁 𑀢𑀤𑀯𑀲𑀭𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀧𑀸𑀝𑀺𑀁 𑀅𑀮𑀪𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀻𑀢𑀸𑀦𑀺 [𑀅𑀥𑀺𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀔𑁄 𑀫𑁂 𑀤𑁆𑀯𑁂 𑀫𑀸𑀲𑀸𑀦𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀩𑀦𑁆𑀥𑀦𑁆𑀢𑀲𑁆𑀲 ‘𑀬𑀤𑀸 𑀧𑀝𑀺𑀧𑀸𑀝𑀺𑀁 𑀮𑀪𑀺𑀲𑁆𑀲𑀸𑀫𑀺 𑀢𑀤𑀸 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺, 𑀦 𑀘 𑀫𑁂 𑀧𑀝𑀺𑀧𑀸𑀝𑀺 𑀮𑀩𑁆𑀪𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀏𑀓𑀢𑁆𑀢𑀓𑁄 [𑀏𑀓𑀢𑁄 (𑀲𑀻. 𑀲𑁆𑀬𑀸.)], 𑀩𑀳𑀼 𑀘 𑀫𑁂 𑀖𑀭𑀸𑀯𑀸𑀲𑀢𑁆𑀣𑁄 𑀳𑀸𑀬𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀬𑁆𑀬𑀁; 𑀬𑀁 𑀪𑀢𑁆𑀢𑀕𑁆𑀕𑁂 𑀦𑀸𑀲𑁆𑀲, 𑀢𑀁 𑀧𑀝𑀺𑀬𑀸𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑁂 𑀦𑀸𑀤𑁆𑀤𑀲 𑁋 𑀬𑀸𑀕𑀼𑀜𑁆𑀘 ¶ 𑀫𑀥𑀼𑀕𑁄𑀴𑀓𑀜𑁆𑀘 ¶ . 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑁂, 𑀪𑁄 𑀆𑀦𑀦𑁆𑀤, 𑀧𑀝𑀺𑀧𑀸𑀝𑀺𑀁 𑀅𑀮𑀪𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 ‘𑀅𑀢𑀻𑀢𑀸𑀦𑀺 𑀔𑁄 𑀫𑁂 ¶ 𑀤𑁆𑀯𑁂 𑀫𑀸𑀲𑀸𑀦𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀩𑀦𑁆𑀥𑀦𑁆𑀢𑀲𑁆𑀲, 𑀬𑀤𑀸 𑀧𑀝𑀺𑀧𑀸𑀝𑀺𑀁 𑀮𑀪𑀺𑀲𑁆𑀲𑀸𑀫𑀺 𑀢𑀤𑀸 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀦 𑀘 𑀫𑁂 𑀧𑀝𑀺𑀧𑀸𑀝𑀺 𑀮𑀩𑁆𑀪𑀢𑀺 ¶ , 𑀅𑀳𑀜𑁆𑀘𑀫𑁆𑀳𑀺 𑀏𑀓𑀢𑁆𑀢𑀓𑁄, 𑀩𑀳𑀼 𑀘 𑀫𑁂 𑀖𑀭𑀸𑀯𑀸𑀲𑀢𑁆𑀣𑁄 𑀳𑀸𑀬𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀬𑁆𑀬𑀁; 𑀬𑀁 𑀪𑀢𑁆𑀢𑀕𑁆𑀕𑁂 𑀦𑀸𑀲𑁆𑀲, 𑀢𑀁 𑀧𑀝𑀺𑀬𑀸𑀤𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑁄 𑀆𑀦𑀦𑁆𑀤, 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑁂 𑀦𑀸𑀤𑁆𑀤𑀲𑀁 𑁋 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘. 𑀲𑀘𑀸𑀳𑀁, 𑀪𑁄 𑀆𑀦𑀦𑁆𑀤, 𑀧𑀝𑀺𑀬𑀸𑀤𑁂𑀬𑁆𑀬𑀁 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀫𑁂 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀦𑁆𑀢𑀁 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀳𑀸𑀦𑀦𑁆𑀤, 𑀧𑀝𑀺𑀬𑀸𑀤𑁂𑀢𑀽𑀢𑀺. 𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀧𑀝𑀺𑀬𑀸𑀤𑁂𑀳𑀻𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀳𑀽𑀢𑀁 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘𑀸𑀢𑀺. 𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀽𑀦𑀁 𑀤𑁂𑀳𑀻𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀳𑀽𑀢𑀸𑀬 𑀬𑀸𑀕𑀼𑀬𑀸 𑀘 𑀫𑀥𑀼𑀕𑁄𑀴𑀓𑁂𑀦 𑀘 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀥𑁄𑀢𑀳𑀢𑁆𑀣𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 ¶ 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀤𑀲𑀬𑀺𑀫𑁂, 𑀩𑁆𑀭𑀸𑀳𑁆𑀫𑀡, 𑀆𑀦𑀺𑀲𑀁𑀲𑀸 𑀬𑀸𑀕𑀼𑀬𑀸. 𑀓𑀢𑀫𑁂 𑀤𑀲? 𑀬𑀸𑀕𑀼𑀁 𑀤𑁂𑀦𑁆𑀢𑁄 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺, 𑀧𑀝𑀺𑀪𑀸𑀦𑀁 𑀤𑁂𑀢𑀺, 𑀬𑀸𑀕𑀼 𑀧𑀻𑀢𑀸 𑀔𑀼𑀤𑁆𑀤𑀁 [𑀔𑀼𑀤𑀁 (𑀲𑀻. 𑀲𑁆𑀬𑀸.)] 𑀧𑀝𑀺𑀳𑀦𑀢𑀺, 𑀧𑀺𑀧𑀸𑀲𑀁 𑀯𑀺𑀦𑁂𑀢𑀺, 𑀯𑀸𑀢𑀁 𑀅𑀦𑀼𑀮𑁄𑀫𑁂𑀢𑀺, 𑀯𑀢𑁆𑀣𑀺𑀁 𑀲𑁄𑀥𑁂𑀢𑀺, 𑀆𑀫𑀸𑀯𑀲𑁂𑀲𑀁 𑀧𑀸𑀘𑁂𑀢𑀺 𑁋 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑀲𑀸𑀦𑀺𑀲𑀁𑀲𑀸 𑀬𑀸𑀕𑀼𑀬𑀸’’𑀢𑀺 [𑀧𑀘𑁆𑀙𑀺𑀫𑀸 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀅. 𑀦𑀺. 𑁫.𑁨𑁦𑁭].

[𑀅. 𑀦𑀺. 𑁪.𑁫𑁮-𑁫𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁] 𑀬𑁄 𑀲𑀜𑁆𑀜𑀢𑀸𑀦𑀁 𑀧𑀭𑀤𑀢𑁆𑀢𑀪𑁄𑀚𑀺𑀦𑀁;

𑀓𑀸𑀮𑁂𑀦 𑀲𑀓𑁆𑀓𑀘𑁆𑀘 𑀤𑀤𑀸𑀢𑀺 𑀬𑀸𑀕𑀼𑀁;

𑀤𑀲𑀲𑁆𑀲 𑀞𑀸𑀦𑀸𑀦𑀺 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺;

𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘.

𑀧𑀝𑀺𑀪𑀸𑀦𑀫𑀲𑁆𑀲 ¶ 𑀉𑀧𑀚𑀸𑀬𑀢𑁂 𑀢𑀢𑁄;

𑀔𑀼𑀤𑁆𑀤𑀁 𑀧𑀺𑀧𑀸𑀲𑀜𑁆𑀘 𑀩𑁆𑀬𑀧𑀦𑁂𑀢𑀺 𑀯𑀸𑀢𑀁;

𑀲𑁄𑀥𑁂𑀢𑀺 𑀯𑀢𑁆𑀣𑀺𑀁 𑀧𑀭𑀺𑀡𑀸𑀫𑁂𑀢𑀺 𑀪𑀼𑀢𑁆𑀢𑀁;

𑀪𑁂𑀲𑀚𑁆𑀚𑀫𑁂𑀢𑀁 𑀲𑀼𑀕𑀢𑁂𑀦 𑀯𑀡𑁆𑀡𑀺𑀢𑀁.

𑀢𑀲𑁆𑀫𑀸 𑀳𑀺 𑀬𑀸𑀕𑀼𑀁 𑀅𑀮𑀫𑁂𑀯 𑀤𑀸𑀢𑀼𑀁;

𑀦𑀺𑀘𑁆𑀘𑀁 𑀫𑀦𑀼𑀲𑁆𑀲𑁂𑀦 𑀲𑀼𑀔𑀢𑁆𑀣𑀺𑀓𑁂𑀦;

𑀤𑀺𑀩𑁆𑀩𑀸𑀦𑀺 ¶ 𑀯𑀸 𑀧𑀢𑁆𑀣𑀬𑀢𑀸 𑀲𑀼𑀔𑀸𑀦𑀺;

𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀫𑀺𑀘𑁆𑀙𑀢𑀸 𑀯𑀸𑀢𑀺.

𑀅𑀣 ¶ 𑀔𑁄 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 ¶ 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘𑀸’’𑀢𑀺.

𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭𑁧. 𑀢𑀭𑀼𑀡𑀧𑀲𑀦𑁆𑀦𑀫𑀳𑀸𑀫𑀢𑁆𑀢𑀯𑀢𑁆𑀣𑀼

𑁨𑁮𑁩. 𑀅𑀲𑁆𑀲𑁄𑀲𑀼𑀁 𑀔𑁄 𑀫𑀦𑀼𑀲𑁆𑀲𑀸 𑀪𑀕𑀯𑀢𑀸 𑀓𑀺𑀭 𑀬𑀸𑀕𑀼 𑀅𑀦𑀼𑀜𑁆𑀜𑀸𑀢𑀸 𑀫𑀥𑀼𑀕𑁄𑀴𑀓𑀜𑁆𑀘𑀸𑀢𑀺. 𑀢𑁂 𑀓𑀸𑀮𑀲𑁆𑀲𑁂𑀯, 𑀪𑁄𑀚𑁆𑀚𑀬𑀸𑀕𑀼𑀁 𑀧𑀝𑀺𑀬𑀸𑀤𑁂𑀦𑁆𑀢𑀺 𑀫𑀥𑀼𑀕𑁄𑀴𑀓𑀜𑁆𑀘. 𑀪𑀺𑀓𑁆𑀔𑀽 𑀓𑀸𑀮𑀲𑁆𑀲𑁂𑀯 𑀪𑁄𑀚𑁆𑀚𑀬𑀸𑀕𑀼𑀬𑀸 𑀥𑀸𑀢𑀸 𑀫𑀥𑀼𑀕𑁄𑀴𑀓𑁂𑀦 𑀘 𑀪𑀢𑁆𑀢𑀕𑁆𑀕𑁂 𑀦 𑀘𑀺𑀢𑁆𑀢𑀭𑀽𑀧𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀢𑀭𑀼𑀡𑀧𑀲𑀦𑁆𑀦𑁂𑀦 𑀫𑀳𑀸𑀫𑀢𑁆𑀢𑁂𑀦 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀢𑀭𑀼𑀡𑀧𑀲𑀦𑁆𑀦𑀲𑁆𑀲 𑀫𑀳𑀸𑀫𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀅𑀟𑁆𑀠𑀢𑁂𑀮𑀲𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀟𑁆𑀠𑀢𑁂𑀮𑀲𑀸𑀦𑀺 𑀫𑀁𑀲𑀧𑀸𑀢𑀺𑀲𑀢𑀸𑀦𑀺 𑀧𑀝𑀺𑀬𑀸𑀤𑁂𑀬𑁆𑀬𑀁, 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀁 𑀫𑀁𑀲𑀧𑀸𑀢𑀺𑀁 𑀉𑀧𑀦𑀸𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀅𑀟𑁆𑀠𑀢𑁂𑀮𑀲𑀸𑀦𑀺 𑀘 𑀫𑀁𑀲𑀧𑀸𑀢𑀺𑀲𑀢𑀸𑀦𑀺, 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀲𑁆𑀲 𑀢𑀭𑀼𑀡𑀧𑀲𑀦𑁆𑀦𑀲𑁆𑀲 𑀫𑀳𑀸𑀫𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀪𑀢𑁆𑀢𑀕𑁆𑀕𑁂 𑀪𑀺𑀓𑁆𑀔𑀽 𑀧𑀭𑀺𑀯𑀺𑀲𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀣𑁄𑀓𑀁, 𑀆𑀯𑀼𑀲𑁄, 𑀤𑁂𑀳𑀺; 𑀣𑁄𑀓𑀁, 𑀆𑀯𑀼𑀲𑁄, 𑀤𑁂𑀳𑀻’’𑀢𑀺. ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑁋 ‘𑀅𑀬𑀁 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄’𑀢𑀺 ¶ ¶ 𑁋 𑀣𑁄𑀓𑀁 𑀣𑁄𑀓𑀁 𑀧𑀝𑀺𑀕𑁆𑀕𑀡𑁆𑀳𑀣. 𑀩𑀳𑀼𑀁 𑀫𑁂 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁, 𑀅𑀟𑁆𑀠𑀢𑁂𑀮𑀲𑀸𑀦𑀺 𑀘 𑀫𑀁𑀲𑀧𑀸𑀢𑀺𑀲𑀢𑀸𑀦𑀺. 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀁 𑀫𑀁𑀲𑀧𑀸𑀢𑀺𑀁 𑀉𑀧𑀦𑀸𑀫𑁂𑀲𑁆𑀲𑀸𑀫𑀻𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀸𑀯𑀤𑀢𑁆𑀣’’𑀦𑁆𑀢𑀺. ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀏𑀢𑀁𑀓𑀸𑀭𑀡𑀸 𑀣𑁄𑀓𑀁 𑀣𑁄𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀅𑀧𑀺 𑀘 𑀫𑀬𑀁 𑀓𑀸𑀮𑀲𑁆𑀲𑁂𑀯 𑀪𑁄𑀚𑁆𑀚𑀬𑀸𑀕𑀼𑀬𑀸 𑀥𑀸𑀢𑀸 𑀫𑀥𑀼𑀕𑁄𑀴𑀓𑁂𑀦 𑀘. 𑀢𑁂𑀦 𑀫𑀬𑀁 𑀣𑁄𑀓𑀁 𑀣𑁄𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 𑀫𑀬𑀸 𑀦𑀺𑀫𑀦𑁆𑀢𑀺𑀢𑀸 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀦 𑀘𑀸𑀳𑀁 𑀧𑀝𑀺𑀩𑀮𑁄 𑀬𑀸𑀯𑀤𑀢𑁆𑀣𑀁 𑀤𑀸𑀢𑀼’’𑀦𑁆𑀢𑀺 ¶ 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀆𑀲𑀸𑀤𑀦𑀸𑀧𑁂𑀓𑁆𑀔𑁄 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀧𑀽𑀭𑁂𑀦𑁆𑀢𑁄 𑀅𑀕𑀫𑀸𑀲𑀺 𑁋 𑀪𑀼𑀜𑁆𑀚𑀣 𑀯𑀸 𑀳𑀭𑀣 𑀯𑀸𑀢𑀺. 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 ¶ 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀢𑀭𑀼𑀡𑀧𑀲𑀦𑁆𑀦𑀁 𑀫𑀳𑀸𑀫𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀢𑀲𑁆𑀲 𑀢𑀭𑀼𑀡𑀧𑀲𑀦𑁆𑀦𑀲𑁆𑀲 𑀫𑀳𑀸𑀫𑀢𑁆𑀢𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑁄𑀳𑀁 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀆𑀲𑀸𑀤𑀦𑀸𑀧𑁂𑀓𑁆𑀔𑁄 𑀪𑀺𑀓𑁆𑀔𑀽𑀦𑀁 ¶ 𑀧𑀢𑁆𑀢𑁂 𑀧𑀽𑀭𑁂𑀦𑁆𑀢𑁄 𑀅𑀕𑀫𑀸𑀲𑀺𑀁 𑁋 ‘𑀪𑀼𑀜𑁆𑀚𑀣 𑀯𑀸 𑀳𑀭𑀣 𑀯𑀸’𑀢𑀺. 𑀓𑀺𑀁 𑀦𑀼 𑀔𑁄 𑀫𑀬𑀸 𑀩𑀳𑀼𑀁 𑀧𑀲𑀼𑀢𑀁 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸’’𑀢𑀺? 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 ‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑁄𑀳𑀁 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀆𑀲𑀸𑀤𑀦𑀸𑀧𑁂𑀓𑁆𑀔𑁄 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀧𑀽𑀭𑁂𑀦𑁆𑀢𑁄 𑀅𑀕𑀫𑀸𑀲𑀺𑀁 𑁋 𑀪𑀼𑀜𑁆𑀚𑀣 𑀯𑀸 𑀳𑀭𑀣 𑀯𑀸𑀢𑀺. 𑀓𑀺𑀁 𑀦𑀼 𑀔𑁄 𑀫𑀬𑀸 𑀩𑀳𑀼𑀁 𑀧𑀲𑀼𑀢𑀁, 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸’𑀢𑀺. 𑀓𑀺𑀁 𑀦𑀼 𑀔𑁄 𑀫𑀬𑀸, 𑀪𑀦𑁆𑀢𑁂, 𑀩𑀳𑀼𑀁 𑀧𑀲𑀼𑀢𑀁, 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸’’𑀢𑀺? ‘‘𑀬𑀤𑀕𑁆𑀕𑁂𑀦 𑀢𑀬𑀸, 𑀆𑀯𑀼𑀲𑁄, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄 𑀢𑀤𑀕𑁆𑀕𑁂𑀦 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁. 𑀬𑀤𑀕𑁆𑀕𑁂𑀦 𑀢𑁂 ¶ 𑀏𑀓𑀫𑁂𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀫𑁂𑀓𑀁 𑀲𑀺𑀢𑁆𑀣𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀕𑁆𑀕𑁂𑀦 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀲𑀕𑁆𑀕𑀸 𑀢𑁂 𑀆𑀭𑀤𑁆𑀥𑀸’’𑀢𑀺. 𑀅𑀣 𑀔𑁄 𑀲𑁄 𑀢𑀭𑀼𑀡𑀧𑀲𑀦𑁆𑀦𑁄 𑀫𑀳𑀸𑀫𑀢𑁆𑀢𑁄 𑁋 ‘‘𑀮𑀸𑀪𑀸 𑀓𑀺𑀭 𑀫𑁂, 𑀲𑀼𑀮𑀤𑁆𑀥𑀁 𑀓𑀺𑀭 𑀫𑁂, 𑀩𑀳𑀼𑀁 𑀓𑀺𑀭 𑀫𑀬𑀸 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀲𑀕𑁆𑀕𑀸 𑀓𑀺𑀭 𑀫𑁂 𑀆𑀭𑀤𑁆𑀥𑀸’’𑀢𑀺 𑁋 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 ¶ 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀺𑀢𑀸 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀺𑀢𑀸 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ¶ 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀺𑀢𑁂𑀦 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀢𑀭𑀼𑀡𑀧𑀲𑀦𑁆𑀦𑀫𑀳𑀸𑀫𑀢𑁆𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁨. 𑀩𑁂𑀮𑀝𑁆𑀞𑀓𑀘𑁆𑀘𑀸𑀦𑀯𑀢𑁆𑀣𑀼

𑁨𑁮𑁪. 𑀅𑀣 ¶ 𑀔𑁄 𑀪𑀕𑀯𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁, 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀭𑀸𑀚𑀕𑀳𑀸 𑀅𑀦𑁆𑀥𑀓𑀯𑀺𑀦𑁆𑀤𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀜𑁆𑀘𑀫𑀢𑁆𑀢𑁂𑀳𑀺 𑀲𑀓𑀝𑀲𑀢𑁂𑀳𑀺, 𑀲𑀩𑁆𑀩𑁂𑀳𑁂𑀯 𑀕𑀼𑀴𑀓𑀼𑀫𑁆𑀪𑀧𑀽𑀭𑁂𑀳𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑁂𑀮𑀝𑁆𑀞𑀁 𑀓𑀘𑁆𑀘𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀁 𑀕𑀼𑀴𑀓𑀼𑀫𑁆𑀪𑀁 𑀤𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀏𑀓𑀁𑀬𑁂𑀯 𑀕𑀼𑀴𑀓𑀼𑀫𑁆𑀪𑀁 ¶ 𑀆𑀳𑀭𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀏𑀓𑀁𑀬𑁂𑀯 𑀕𑀼𑀴𑀓𑀼𑀫𑁆𑀪𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀪𑀢𑁄 [𑀆𑀳𑀝𑁄 (𑀲𑀻. 𑀲𑁆𑀬𑀸. 𑀓.)], 𑀪𑀦𑁆𑀢𑁂, 𑀕𑀼𑀴𑀓𑀼𑀫𑁆𑀪𑁄; 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀪𑀺𑀓𑁆𑀔𑀽𑀦𑀁 𑀕𑀼𑀴𑀁 𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ¶ 𑀪𑀺𑀓𑁆𑀔𑀽𑀦𑀁 𑀕𑀼𑀴𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀦𑁆𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀕𑀼𑀴𑁄, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀪𑀺𑀓𑁆𑀔𑀽𑀦𑀁 𑀕𑀼𑀴𑀁 𑀬𑀸𑀯𑀤𑀢𑁆𑀣𑀁 𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀕𑀼𑀴𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀦𑁆𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀕𑀼𑀴𑁄 𑀬𑀸𑀯𑀤𑀢𑁆𑀣𑁄, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀪𑀺𑀓𑁆𑀔𑀽 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀪𑀺𑀓𑁆𑀔𑀽 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀢𑁆𑀢𑁂𑀧𑀺 𑀧𑀽𑀭𑁂𑀲𑀼𑀁 𑀧𑀭𑀺𑀲𑁆𑀲𑀸𑀯𑀦𑀸𑀦𑀺𑀧𑀺 𑀣𑀯𑀺𑀓𑀸𑀬𑁄𑀧𑀺 𑀧𑀽𑀭𑁂𑀲𑀼𑀁. 𑀅𑀣 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀺𑀓𑁆𑀔𑀽 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀧𑁆𑀧𑀺𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀕𑀼𑀴𑁂𑀳𑀺, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 ¶ 𑀢𑁆𑀯𑀁, 𑀓𑀘𑁆𑀘𑀸𑀦, 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑀁 𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀦𑁆𑀦𑁄, 𑀪𑀦𑁆𑀢𑁂 ¶ , 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑁄, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑀁 𑀬𑀸𑀯𑀤𑀢𑁆𑀣𑀁 𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀦𑁆𑀦𑁄, 𑀪𑀦𑁆𑀢𑁂, 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑁄 𑀬𑀸𑀯𑀤𑀢𑁆𑀣𑁄, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀯𑀺𑀖𑀸𑀲𑀸𑀤𑁂 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 ¶ 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀖𑀸𑀲𑀸𑀤𑁂 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀏𑀓𑀘𑁆𑀘𑁂 𑀯𑀺𑀖𑀸𑀲𑀸𑀤𑀸 𑀓𑁄𑀮𑀫𑁆𑀩𑁂𑀧𑀺 𑀖𑀝𑁂𑀧𑀺 𑀧𑀽𑀭𑁂𑀲𑀼𑀁, 𑀧𑀺𑀝𑀓𑀸𑀦𑀺𑀧𑀺 𑀉𑀘𑁆𑀙𑀗𑁆𑀕𑁂𑀧𑀺 𑀧𑀽𑀭𑁂𑀲𑀼𑀁. 𑀅𑀣 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀯𑀺𑀖𑀸𑀲𑀸𑀤𑁂 𑀕𑀼𑀴𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀧𑁆𑀧𑀺𑀢𑀸, 𑀪𑀦𑁆𑀢𑁂, 𑀯𑀺𑀖𑀸𑀲𑀸𑀤𑀸 𑀕𑀼𑀴𑁂𑀳𑀺, 𑀩𑀳𑀼 𑀘𑀸𑀬𑀁 𑀕𑀼𑀴𑁄 𑀅𑀯𑀲𑀺𑀝𑁆𑀞𑁄. 𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀦𑀸𑀳𑀁 𑀢𑀁, 𑀓𑀘𑁆𑀘𑀸𑀦, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀲𑁆𑀲 𑀲𑁄 𑀕𑀼𑀴𑁄 𑀧𑀭𑀺𑀪𑀼𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸. 𑀢𑁂𑀦 𑀳𑀺 𑀢𑁆𑀯𑀁, 𑀓𑀘𑁆𑀘𑀸𑀦, 𑀢𑀁 𑀕𑀼𑀴𑀁 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀳𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀁 𑀕𑀼𑀴𑀁 𑀅𑀧𑁆𑀧𑀸𑀡𑀓𑁂 𑀉𑀤𑀓𑁂 ¶ 𑀑𑀧𑀺𑀮𑀸𑀧𑁂𑀢𑀺. 𑀅𑀣 𑀔𑁄 𑀲𑁄 𑀕𑀼𑀴𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀧𑀥𑀽𑀧𑀸𑀬𑀢𑀺 ¶ [𑀲𑀦𑁆𑀥𑀽𑀧𑀸𑀬𑀢𑀺 (𑀲𑀻. 𑀲𑁆𑀬𑀸.)] 𑀲𑀫𑁆𑀧𑀥𑀽𑀧𑀸𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀨𑀸𑀮𑁄 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀧𑀥𑀽𑀧𑀸𑀬𑀢𑀺 𑀲𑀫𑁆𑀧𑀥𑀽𑀧𑀸𑀬𑀢𑀺, 𑀏𑀯𑀫𑁂𑀯 𑀲𑁄 𑀕𑀼𑀴𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀧𑀥𑀽𑀧𑀸𑀬𑀢𑀺 𑀲𑀫𑁆𑀧𑀥𑀽𑀧𑀸𑀬𑀢𑀺.

𑀅𑀣 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀩𑁂𑀮𑀝𑁆𑀞𑀲𑁆𑀲 𑀓𑀘𑁆𑀘𑀸𑀦𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀩𑁂𑀮𑀝𑁆𑀞𑀁 𑀓𑀘𑁆𑀘𑀸𑀦𑀁 𑀓𑀮𑁆𑀮𑀘𑀺𑀢𑁆𑀢𑀁, 𑀫𑀼𑀤𑀼𑀘𑀺𑀢𑁆𑀢𑀁, 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁, 𑀉𑀤𑀕𑁆𑀕𑀘𑀺𑀢𑁆𑀢𑀁, 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺…𑀧𑁂… 𑀏𑀯𑀫𑁂𑀯 𑀩𑁂𑀮𑀝𑁆𑀞𑀲𑁆𑀲 ¶ 𑀓𑀘𑁆𑀘𑀸𑀦𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀅𑀣 𑀔𑁄 𑀩𑁂𑀮𑀝𑁆𑀞𑁄 𑀓𑀘𑁆𑀘𑀸𑀦𑁄 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬…𑀧𑁂… ¶ 𑀏𑀯𑀫𑁂𑀯𑀁 𑀔𑁄 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀕𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀕𑀼𑀴𑁄 𑀉𑀲𑁆𑀲𑀦𑁆𑀦𑁄 𑀳𑁄𑀢𑀺. 𑀪𑀺𑀓𑁆𑀔𑀽 𑁋 𑀕𑀺𑀮𑀸𑀦𑀲𑁆𑀲𑁂𑀯 𑀪𑀕𑀯𑀢𑀸 𑀕𑀼𑀴𑁄 𑀅𑀦𑀼𑀜𑁆𑀜𑀸𑀢𑁄, 𑀦𑁄 𑀅𑀕𑀺𑀮𑀸𑀦𑀲𑁆𑀲𑀸𑀢𑀺 𑁋 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 ¶ 𑀕𑀼𑀴𑀁 𑀦 𑀪𑀼𑀜𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀕𑀼𑀴𑀁, 𑀅𑀕𑀺𑀮𑀸𑀦𑀲𑁆𑀲 𑀕𑀼𑀴𑁄𑀤𑀓𑀦𑁆𑀢𑀺.

𑀩𑁂𑀮𑀝𑁆𑀞𑀓𑀘𑁆𑀘𑀸𑀦𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁩. 𑀧𑀸𑀝𑀮𑀺𑀕𑀸𑀫𑀯𑀢𑁆𑀣𑀼

𑁨𑁮𑁫. [𑀇𑀢𑁄 𑀧𑀭𑀁 𑀫𑀳𑀸𑀯. 𑁨𑁮𑁬-𑁨𑁮𑁭 ‘𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸’𑀢𑀺 𑀧𑀸𑀞𑁄 𑀤𑀻. 𑀦𑀺. 𑁨.𑁧𑁪𑁮; 𑀉𑀤𑀸. 𑁭𑁬 𑀆𑀤𑀬𑁄] 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁, 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺, 𑀲𑀫𑀸𑀤𑀧𑁂𑀲𑀺, 𑀲𑀫𑀼𑀢𑁆𑀢𑁂𑀚𑁂𑀲𑀺, 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 ¶ 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀆𑀯𑀲𑀣𑀸𑀕𑀸𑀭𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 ¶ 𑀓𑀢𑁆𑀯𑀸 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀣𑀭𑀺𑀁 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸, 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸, 𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, 𑀢𑁂𑀮𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀁, 𑀪𑀦𑁆𑀢𑁂, 𑀆𑀯𑀲𑀣𑀸𑀕𑀸𑀭𑀁. 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀉𑀤𑀓𑀫𑀡𑀺𑀓𑁄 𑀧𑀢𑀺𑀝𑁆𑀞𑀸𑀧𑀺𑀢𑁄. 𑀢𑁂𑀮𑀧𑀤𑀻𑀧𑁄 𑀆𑀭𑁄𑀧𑀺𑀢𑁄. 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀧𑀸𑀝𑀮𑀺𑀕𑀸𑀫𑀺𑀓𑀸𑀧𑀺 𑀔𑁄 𑀉𑀧𑀸𑀲𑀓𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑀸 ¶ ¶ 𑀦𑀺𑀲𑀻𑀤𑀺𑀁𑀲𑀼, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀲𑀺 𑁋

¶ [𑀤𑀻. 𑀦𑀺. 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩 𑀆𑀤𑀬𑁄], 𑀕𑀳𑀧𑀢𑀬𑁄, 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁, 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁, 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁, 𑀬𑀤𑀺 𑀲𑀫𑀡𑀧𑀭𑀺𑀲𑀁, 𑀅𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

[𑀤𑀻. 𑀦𑀺. 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩 𑀆𑀤𑀬𑁄] ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀓𑀢𑀫𑁂 ¶ 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬 ¶ . 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺, 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁, 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁, 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁, 𑀬𑀤𑀺 𑀲𑀫𑀡𑀧𑀭𑀺𑀲𑀁, 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 ¶ 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄, 𑀕𑀳𑀧𑀢𑀬𑁄, 𑀭𑀢𑁆𑀢𑀺. 𑀬𑀲𑁆𑀲𑀤𑀸𑀦𑀺 𑀢𑀼𑀫𑁆𑀳𑁂 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺, 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 ¶ 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀧𑀸𑀝𑀮𑀺𑀕𑀸𑀫𑀺𑀓𑁂𑀲𑀼 𑀉𑀧𑀸𑀲𑀓𑁂𑀲𑀼 𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀧𑀸𑀝𑀮𑀺𑀕𑀸𑀫𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁪. 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀯𑀢𑁆𑀣𑀼

𑁨𑁮𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁂 𑀦𑀼 𑀔𑁄 𑀢𑁂, 𑀆𑀦𑀦𑁆𑀤, 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻’’𑀢𑀺? ‘‘𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 ¶ , 𑀪𑀦𑁆𑀢𑁂, 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸’’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀇𑀥𑀸𑀳𑀁, 𑀆𑀦𑀦𑁆𑀤, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀤𑁆𑀤𑀲𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 ¶ 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦𑀁, 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄, 𑀇𑀤𑀁 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀼𑀝𑀪𑁂𑀤𑀦𑀁. 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀢𑀬𑁄 𑀅𑀦𑁆𑀢𑀭𑀸𑀬𑀸 ¶ 𑀪𑀯𑀺𑀲𑁆𑀲𑀦𑁆𑀢𑀺 𑁋 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀅𑀩𑁆𑀪𑀦𑁆𑀢𑀭𑀢𑁄 𑀯𑀸 𑀫𑀺𑀣𑀼𑀪𑁂𑀤𑀸𑀢𑀺.

𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 ¶ 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀼𑀁 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀦𑀁 𑀫𑀕𑀥𑀫𑀳𑀸𑀫𑀢𑁆𑀢𑀸𑀦𑀁 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 ¶ . 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀪𑀕𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀲𑁆𑀫𑀺𑀁 𑀧𑀤𑁂𑀲𑁂 𑀓𑀧𑁆𑀧𑁂𑀢𑀺, 𑀯𑀸𑀲𑀁 𑀧𑀡𑁆𑀟𑀺𑀢𑀚𑀸𑀢𑀺𑀬𑁄;

𑀲𑀻𑀮𑀯𑀦𑁆𑀢𑁂𑀢𑁆𑀣 𑀪𑁄𑀚𑁂𑀢𑁆𑀯𑀸, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑁆𑀬𑀸.)].

‘‘𑀬𑀸 𑀢𑀢𑁆𑀣 𑀤𑁂𑀯𑀢𑀸 𑀆𑀲𑀼𑀁, 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂;

𑀢𑀸 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺, 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀺 𑀦𑀁.

‘‘𑀢𑀢𑁄 ¶ 𑀦𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁;

𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺, ‘‘𑀬𑁂𑀦𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺 ¶ ; 𑀬𑁂𑀦 𑀢𑀺𑀢𑁆𑀣𑁂𑀦 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀢𑀺𑀢𑁆𑀣𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀫𑀦𑀼𑀲𑁆𑀲𑀸 𑀅𑀜𑁆𑀜𑁂 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺 ¶ , 𑀅𑀜𑁆𑀜𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀜𑁆𑀜𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀺 𑀑𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀸. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀅𑀜𑁆𑀜𑁂 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑁂, 𑀅𑀜𑁆𑀜𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑁂, 𑀅𑀜𑁆𑀜𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑁂 𑀑𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁂, 𑀤𑀺𑀲𑁆𑀯𑀸𑀦 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀔𑁄 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑁄 𑀧𑀸𑀭𑀺𑀫𑀢𑀻𑀭𑁂 𑀧𑀘𑁆𑀘𑀼𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀢𑀭𑀦𑁆𑀢𑀺 𑀅𑀡𑁆𑀡𑀯𑀁 𑀲𑀭𑀁;

𑀲𑁂𑀢𑀼𑀁 𑀓𑀢𑁆𑀯𑀸𑀦 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺;

𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀩𑀦𑁆𑀥𑀢𑀺;

𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸’’𑀢𑀺.

𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁫. 𑀓𑁄𑀝𑀺𑀕𑀸𑀫𑁂 𑀲𑀘𑁆𑀘𑀓𑀣𑀸

𑁨𑁮𑁭. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀓𑁄𑀝𑀺𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 [𑀤𑀻. 𑀦𑀺. 𑁨.𑁧𑁫𑁫] ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀲𑁆𑀲 ¶ 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 ¶ 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀘𑀢𑀼𑀦𑁆𑀦𑀁 ¶ 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸;

𑀲𑀁𑀲𑀺𑀢𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀢𑀸𑀲𑀼 𑀢𑀸𑀲𑁆𑀯𑁂𑀯 𑀚𑀸𑀢𑀺𑀲𑀼.

𑀢𑀸𑀦𑀺 ¶ 𑀏𑀢𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸;

𑀉𑀘𑁆𑀙𑀺𑀦𑁆𑀦𑀁 𑀫𑀽𑀮𑀁 𑀤𑀼𑀓𑁆𑀔𑀲𑁆𑀲, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺.

𑀓𑁄𑀝𑀺𑀕𑀸𑀫𑁂 𑀲𑀘𑁆𑀘𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁭𑁬. 𑀅𑀫𑁆𑀩𑀧𑀸𑀮𑀻𑀯𑀢𑁆𑀣𑀼

𑁨𑁮𑁮. [𑀤𑀻. 𑀦𑀺. 𑁨.𑁧𑁬𑁧 𑀆𑀤𑀬𑁄] 𑀅𑀲𑁆𑀲𑁄𑀲𑀺 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑁋 𑀪𑀕𑀯𑀸 𑀓𑀺𑀭 𑀓𑁄𑀝𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄𑀢𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀭𑀁 𑀪𑀤𑁆𑀭𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸, 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 ¶ 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀫𑁆𑀩𑀧𑀸𑀮𑀻𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁭. 𑀮𑀺𑀘𑁆𑀙𑀯𑀻𑀯𑀢𑁆𑀣𑀼

𑁨𑁮𑁯. [𑀤𑀻. 𑀦𑀺. 𑁨.𑁧𑁬𑁧 𑀆𑀤𑀬𑁄] 𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑁋 𑀪𑀕𑀯𑀸 𑀓𑀺𑀭 𑀓𑁄𑀝𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀭𑀁 𑀪𑀤𑁆𑀭𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀼𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀦𑀻𑀮𑀸 𑀳𑁄𑀦𑁆𑀢𑀺 𑀦𑀻𑀮𑀯𑀡𑁆𑀡𑀸 𑀦𑀻𑀮𑀯𑀢𑁆𑀣𑀸 𑀦𑀻𑀮𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀧𑀻𑀢𑀸 𑀳𑁄𑀦𑁆𑀢𑀺 𑀧𑀻𑀢𑀯𑀡𑁆𑀡𑀸 𑀧𑀻𑀢𑀯𑀢𑁆𑀣𑀸 𑀧𑀻𑀢𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀮𑁄𑀳𑀺𑀢𑀸 𑀳𑁄𑀦𑁆𑀢𑀺 𑀮𑁄𑀳𑀺𑀢𑀯𑀡𑁆𑀡𑀸 𑀮𑁄𑀳𑀺𑀢𑀯𑀢𑁆𑀣𑀸 𑀮𑁄𑀳𑀺𑀢𑀸𑀮𑀗𑁆𑀓𑀸𑀭𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀑𑀤𑀸𑀢𑀸 𑀳𑁄𑀦𑁆𑀢𑀺 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀯𑀢𑁆𑀣𑀸 𑀑𑀤𑀸𑀢𑀸𑀮𑀗𑁆𑀓𑀸𑀭𑀸. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀈𑀲𑀸𑀬 𑀈𑀲𑀁 𑀬𑀼𑀕𑁂𑀦 𑀬𑀼𑀕𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀧𑀝𑀺𑀯𑀝𑁆𑀝𑁂𑀲𑀺 [𑀧𑀝𑀺𑀯𑀢𑁆𑀢𑁂𑀲𑀺 (𑀓.)]. 𑀅𑀣 ¶ ¶ 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 ¶ 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲, 𑀚𑁂 𑀅𑀫𑁆𑀩𑀧𑀸𑀮𑀺, 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 [𑀅𑀫𑁆𑀳𑀸𑀓𑀁 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 (𑀲𑀻. 𑀲𑁆𑀬𑀸.)] 𑀮𑀺𑀘𑁆𑀙𑀯𑀻𑀦𑀁 𑀈𑀲𑀸𑀬 𑀈𑀲𑀁 𑀬𑀼𑀕𑁂𑀦 𑀬𑀼𑀕𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀧𑀝𑀺𑀯𑀝𑁆𑀝𑁂𑀲𑀻’’𑀢𑀺? ‘‘𑀢𑀣𑀸 𑀳𑀺 𑀧𑀦 ¶ 𑀫𑀬𑀸, 𑀅𑀬𑁆𑀬𑀧𑀼𑀢𑁆𑀢𑀸, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄’’𑀢𑀺. ‘‘𑀤𑁂𑀳𑀺, 𑀚𑁂 𑀅𑀫𑁆𑀩𑀧𑀸𑀮𑀺, 𑀅𑀫𑁆𑀳𑀸𑀓𑀁 𑀏𑀢𑀁 𑀪𑀢𑁆𑀢𑀁 𑀲𑀢𑀲𑀳𑀲𑁆𑀲𑁂𑀦𑀸’’𑀢𑀺. ‘‘𑀲𑀘𑁂𑀧𑀺 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀯𑁂𑀲𑀸𑀮𑀺𑀁 𑀲𑀸𑀳𑀸𑀭𑀁 𑀤𑀚𑁆𑀚𑁂𑀬𑁆𑀬𑀸𑀣, 𑀦𑁂𑀯 𑀤𑀚𑁆𑀚𑀸𑀳𑀁 𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳𑀸 𑀯𑀢, 𑀪𑁄, 𑀅𑀫𑁆𑀩𑀓𑀸𑀬, 𑀧𑀭𑀸𑀚𑀺𑀢𑀫𑁆𑀳 𑀯𑀢, 𑀪𑁄, 𑀅𑀫𑁆𑀩𑀓𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀑𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀻𑀧𑀭𑀺𑀲𑀁; 𑀅𑀧𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀻𑀧𑀭𑀺𑀲𑀁; 𑀉𑀧𑀲𑀁𑀳𑀭𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀻𑀧𑀭𑀺𑀲𑀁 𑀢𑀸𑀯𑀢𑀺𑀁𑀲𑀧𑀭𑀺𑀲’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻, 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. ‘‘𑀅𑀥𑀺𑀯𑀼𑀝𑁆𑀞𑁄𑀫𑁆𑀳𑀺, 𑀮𑀺𑀘𑁆𑀙𑀯𑀻, 𑀲𑁆𑀯𑀸𑀢𑀦𑀸𑀬 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳 𑀯𑀢, 𑀪𑁄, 𑀅𑀫𑁆𑀩𑀓𑀸𑀬, 𑀧𑀭𑀸𑀚𑀺𑀢𑀫𑁆𑀳 𑀯𑀢 ¶ , 𑀪𑁄, 𑀅𑀫𑁆𑀩𑀓𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 [𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 𑀅𑀦𑀼𑀲𑀦𑁆𑀥𑀺 𑀅𑀜𑁆𑀜𑀣𑀸 𑀆𑀕𑀢𑁄] 𑀬𑁂𑀦 𑀦𑀸𑀢𑀺𑀓𑀸 [𑀦𑀸𑀤𑀺𑀓𑀸 (𑀲𑀻. 𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀆𑀭𑀸𑀫𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 ¶ . 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀫𑁆𑀩𑀯𑀦𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀆𑀭𑀸𑀫𑀁. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 ¶ 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀫𑀳𑀸𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁.

𑀮𑀺𑀘𑁆𑀙𑀯𑀻𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀮𑀺𑀘𑁆𑀙𑀯𑀺𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀢𑀢𑀺𑀬𑁄.

𑁧𑁭𑁮. 𑀲𑀻𑀳𑀲𑁂𑀦𑀸𑀧𑀢𑀺𑀯𑀢𑁆𑀣𑀼

𑁨𑁯𑁦. [𑀅. 𑀦𑀺. 𑁮.𑁧𑁨 𑀆𑀤𑀬𑁄] 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀥𑀸𑀕𑀸𑀭𑁂 [𑀲𑀦𑁆𑀣𑀸𑀕𑀸𑀭𑁂 (𑀲𑀻. 𑀲𑁆𑀬𑀸.)] 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀦𑀺𑀕𑀡𑁆𑀞𑀲𑀸𑀯𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀳𑀺𑀫𑁂 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀣𑀸𑀕𑀸𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. 𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀲𑀻𑀳, 𑀓𑀺𑀭𑀺𑀬𑀯𑀸𑀤𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀲𑀺? 𑀲𑀫𑀡𑁄 𑀳𑀺, 𑀲𑀻𑀳, 𑀕𑁄𑀢𑀫𑁄 𑀅𑀓𑀺𑀭𑀺𑀬𑀯𑀸𑀤𑁄 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺. 𑀅𑀣 𑀔𑁄 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀬𑁄 𑀅𑀳𑁄𑀲𑀺 𑀕𑀫𑀺𑀓𑀸𑀪𑀺𑀲𑀗𑁆𑀔𑀸𑀭𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀲𑁄 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀥𑀸𑀕𑀸𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀦𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀳𑀺𑀫𑁂 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀥𑀸𑀕𑀸𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀬𑁂𑀦 ¶ 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀲𑀻𑀳, 𑀓𑀺𑀭𑀺𑀬𑀯𑀸𑀤𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀲𑀺? 𑀲𑀫𑀡𑁄 𑀳𑀺, 𑀲𑀻𑀳, 𑀕𑁄𑀢𑀫𑁄 𑀅𑀓𑀺𑀭𑀺𑀬𑀯𑀸𑀤𑁄 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 ¶ , 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀬𑁄 𑀅𑀳𑁄𑀲𑀺 𑀕𑀫𑀺𑀓𑀸𑀪𑀺𑀲𑀗𑁆𑀔𑀸𑀭𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 ¶ 𑀮𑀺𑀘𑁆𑀙𑀯𑀻 𑀲𑀦𑁆𑀥𑀸𑀕𑀸𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀳𑀺𑀫𑁂 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀥𑀸𑀕𑀸𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀓𑀺𑀜𑁆𑀳𑀺 𑀫𑁂 𑀓𑀭𑀺𑀲𑁆𑀲𑀦𑁆𑀢𑀺 𑀦𑀺𑀕𑀡𑁆𑀞𑀸 𑀅𑀧𑀮𑁄𑀓𑀺𑀢𑀸 𑀯𑀸 𑀅𑀦𑀧𑀮𑁄𑀓𑀺𑀢𑀸 𑀯𑀸? 𑀬𑀁𑀦𑀽𑀦𑀸𑀳𑀁 𑀅𑀦𑀧𑀮𑁄𑀓𑁂𑀢𑁆𑀯𑀸𑀯 𑀦𑀺𑀕𑀡𑁆𑀞𑁂 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺.

𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀤𑀺𑀯𑀸 𑀤𑀺𑀯𑀲𑁆𑀲 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂 𑀢𑀁, 𑀪𑀦𑁆𑀢𑁂, ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’𑀢𑀺. 𑀬𑁂 𑀢𑁂, 𑀪𑀦𑁆𑀢𑁂, 𑀏𑀯𑀫𑀸𑀳𑀁𑀲𑀼 ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 ¶ 𑀕𑁄𑀢𑀫𑁄, 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’𑀢𑀺. 𑀓𑀘𑁆𑀘𑀺 𑀢𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 ¶ 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺? 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸 𑀳𑀺 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢’’𑀦𑁆𑀢𑀺.

𑁨𑁯𑁧. ‘‘𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄 𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄 𑀉𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄, 𑀚𑁂𑀕𑀼𑀘𑁆𑀙𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄, 𑀢𑀧𑀲𑁆𑀲𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 ¶ 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀧𑀕𑀩𑁆𑀪𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺. 𑀅𑀢𑁆𑀣𑀺, 𑀲𑀻𑀳 ¶ , 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀲𑁆𑀲𑀢𑁆𑀣𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀲𑁆𑀲𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

𑁨𑁯𑁨. ‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 ¶ , 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄 ¶ , 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀓𑀺𑀭𑀺𑀬𑀁 𑀯𑀤𑀸𑀫𑀺 𑀓𑀸𑀬𑀲𑀼𑀘𑀭𑀺𑀢𑀲𑁆𑀲 𑀯𑀘𑀻𑀲𑀼𑀘𑀭𑀺𑀢𑀲𑁆𑀲 𑀫𑀦𑁄𑀲𑀼𑀘𑀭𑀺𑀢𑀲𑁆𑀲, 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄, 𑀉𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺. 𑀅𑀬𑀁 𑀔𑁄 ¶ , 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄 𑀉𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄, 𑀚𑁂𑀕𑀼𑀘𑁆𑀙𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀚𑀺𑀕𑀼𑀘𑁆𑀙𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀚𑀺𑀕𑀼𑀘𑁆𑀙𑀸𑀫𑀺. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 ¶ 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄, 𑀚𑁂𑀕𑀼𑀘𑁆𑀙𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲; 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 ¶ 𑀥𑀫𑁆𑀫𑀸𑀦𑀁 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄, 𑀢𑀧𑀲𑁆𑀲𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀢𑀧𑀦𑀻𑀬𑀸𑀳𑀁, 𑀲𑀻𑀳, 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀤𑀸𑀫𑀺 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀬𑀲𑁆𑀲 𑀔𑁄, 𑀲𑀻𑀳, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 ¶ 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀫𑀳𑀁 𑀢𑀧𑀲𑁆𑀲𑀻𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀲𑀻𑀳, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀻𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 ‘‘𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄 ¶ 𑀢𑀧𑀲𑁆𑀲𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄 𑀅𑀧𑀕𑀩𑁆𑀪𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀬𑀲𑁆𑀲 𑀔𑁄, 𑀲𑀻𑀳, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀫𑀳𑀁 𑀅𑀧𑀕𑀩𑁆𑀪𑁄𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀲𑀻𑀳, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀧𑀕𑀩𑁆𑀪𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺.

‘‘𑀓𑀢𑀫𑁄 𑀘, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀲𑁆𑀲𑀢𑁆𑀣𑁄 𑀲𑀫𑀡𑁄 𑀕𑁄𑀢𑀫𑁄 𑀅𑀲𑁆𑀲𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻𑀢𑀺? 𑀅𑀳𑀜𑁆𑀳𑀺, 𑀲𑀻𑀳, 𑀅𑀲𑁆𑀲𑀢𑁆𑀣𑁄 ¶ 𑀧𑀭𑀫𑁂𑀦 𑀅𑀲𑁆𑀲𑀸𑀲𑁂𑀦, 𑀅𑀲𑁆𑀲𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀫𑀺. 𑀅𑀬𑀁 𑀔𑁄, 𑀲𑀻𑀳, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 ¶ 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 𑀅𑀲𑁆𑀲𑀢𑁆𑀣𑁄 𑀲𑀫𑀡𑁄 𑀕𑁄𑀢𑀫𑁄 𑀅𑀲𑁆𑀲𑀸𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺.

𑁨𑁯𑁩. 𑀏𑀯𑀁 ¶ 𑀯𑀼𑀢𑁆𑀢𑁂 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. ‘‘𑀅𑀦𑀼𑀯𑀺𑀘𑁆𑀘𑀓𑀸𑀭𑀁 [𑀅𑀦𑀼𑀯𑀺𑀚𑁆𑀚𑀓𑀸𑀭𑀁 (𑀓.)] 𑀔𑁄, 𑀲𑀻𑀳, 𑀓𑀭𑁄𑀳𑀺; 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀲𑀸𑀥𑀼 𑀳𑁄𑀢𑀻’’𑀢𑀺. ‘‘𑀇𑀫𑀺𑀦𑀸𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄, 𑀬𑀁 𑀫𑀁 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀅𑀦𑀼𑀯𑀺𑀘𑁆𑀘𑀓𑀸𑀭𑀁 𑀔𑁄, 𑀲𑀻𑀳, 𑀓𑀭𑁄𑀳𑀺; 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀲𑀸𑀥𑀼 𑀳𑁄𑀢𑀻’𑀢𑀺. 𑀫𑀫𑀜𑁆𑀳𑀺, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀸𑀯𑀓𑀁 𑀮𑀪𑀺𑀢𑁆𑀯𑀸 𑀓𑁂𑀯𑀮𑀓𑀧𑁆𑀧𑀁 𑀯𑁂𑀲𑀸𑀮𑀺𑀁 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼𑀁 𑁋 ‘𑀲𑀻𑀳𑁄 𑀔𑁄 𑀅𑀫𑁆𑀳𑀸𑀓𑀁 𑀲𑁂𑀦𑀸𑀧𑀢𑀺 𑀲𑀸𑀯𑀓𑀢𑁆𑀢𑀁 𑀉𑀧𑀕𑀢𑁄’𑀢𑀺. 𑀅𑀣 𑀘 𑀧𑀦 𑀫𑀁 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀅𑀦𑀼𑀯𑀺𑀘𑁆𑀘𑀓𑀸𑀭𑀁 𑀔𑁄, 𑀲𑀻𑀳, 𑀓𑀭𑁄𑀳𑀺; 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀲𑀸𑀥𑀼 𑀳𑁄𑀢𑀻’𑀢𑀺. 𑀏𑀲𑀸𑀳𑀁, 𑀪𑀦𑁆𑀢𑁂, 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 ¶ 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. ‘‘𑀤𑀻𑀖𑀭𑀢𑁆𑀢𑀁 𑀔𑁄 𑀢𑁂, 𑀲𑀻𑀳, 𑀦𑀺𑀕𑀡𑁆𑀞𑀸𑀦𑀁 𑀑𑀧𑀸𑀦𑀪𑀽𑀢𑀁 𑀓𑀼𑀮𑀁, 𑀬𑁂𑀦 𑀦𑁂𑀲𑀁 𑀉𑀧𑀕𑀢𑀸𑀦𑀁 𑀧𑀺𑀡𑁆𑀟𑀓𑀁 𑀤𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀲𑀻’’𑀢𑀺. ‘‘𑀇𑀫𑀺𑀦𑀸𑀧𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄, 𑀬𑀁 𑀫𑀁 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀤𑀻𑀖𑀭𑀢𑁆𑀢𑀁 𑀔𑁄 𑀢𑁂, 𑀲𑀻𑀳, 𑀦𑀺𑀕𑀡𑁆𑀞𑀸𑀦𑀁 𑀑𑀧𑀸𑀦𑀪𑀽𑀢𑀁 𑀓𑀼𑀮𑀁, 𑀬𑁂𑀦 𑀦𑁂𑀲𑀁 𑀉𑀧𑀕𑀢𑀸𑀦𑀁 𑀧𑀺𑀡𑁆𑀟𑀓𑀁 𑀤𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀲𑀻’𑀢𑀺. 𑀲𑀼𑀢𑀁 𑀫𑁂 𑀢𑀁, 𑀪𑀦𑁆𑀢𑁂, 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳 𑁋 ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁; 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁 ¶ ; 𑀫𑀬𑁆𑀳𑀫𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦 𑀅𑀜𑁆𑀜𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁; 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺. 𑀅𑀣 𑀘 𑀧𑀦 𑀫𑀁 𑀪𑀕𑀯𑀸 𑀦𑀺𑀕𑀡𑁆𑀞𑁂𑀲𑀼𑀧𑀺 𑀤𑀸𑀦𑁂 𑀲𑀫𑀸𑀤𑀧𑁂𑀢𑀺. 𑀅𑀧𑀺 𑀘, 𑀪𑀦𑁆𑀢𑁂, 𑀫𑀬𑀫𑁂𑀢𑁆𑀣 𑀓𑀸𑀮𑀁 𑀚𑀸𑀦𑀺𑀲𑁆𑀲𑀸𑀫. 𑀏𑀲𑀸𑀳𑀁, 𑀪𑀦𑁆𑀢𑁂, 𑀢𑀢𑀺𑀬𑀫𑁆𑀧𑀺 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁…𑀧𑁂… ¶ 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 ¶ 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁨𑁯𑁪. 𑀅𑀣 ¶ 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂, 𑀧𑀯𑀢𑁆𑀢𑀫𑀁𑀲𑀁 𑀚𑀸𑀦𑀸𑀳𑀻’’𑀢𑀺. 𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀦𑀺𑀕𑀡𑁆𑀞𑀸 𑀯𑁂𑀲𑀸𑀮𑀺𑀬𑀁 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺 𑁋 ‘‘𑀅𑀚𑁆𑀚 𑀲𑀻𑀳𑁂𑀦 𑀲𑁂𑀦𑀸𑀧𑀢𑀺𑀦𑀸 𑀣𑀽𑀮𑀁 𑀧𑀲𑀼𑀁 𑀯𑀥𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀪𑀢𑁆𑀢𑀁 𑀓𑀢𑀁, 𑀢𑀁 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 ¶ 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀺 𑀧𑀝𑀺𑀘𑁆𑀘𑀓𑀫𑁆𑀫’’𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀬𑁂𑀦 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀻𑀳𑀲𑁆𑀲 𑀲𑁂𑀦𑀸𑀧𑀢𑀺𑀲𑁆𑀲 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑁂𑀲𑀺 ‘‘𑀬𑀕𑁆𑀖𑁂, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸𑀲𑀺, 𑀏𑀢𑁂 𑀲𑀫𑁆𑀩𑀳𑀼𑀮𑀸 𑀦𑀺𑀕𑀡𑁆𑀞𑀸 𑀯𑁂𑀲𑀸𑀮𑀺𑀬𑀁 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺 𑁋 ‘𑀅𑀚𑁆𑀚 𑀲𑀻𑀳𑁂𑀦 𑀲𑁂𑀦𑀸𑀧𑀢𑀺𑀦𑀸 𑀣𑀽𑀮𑀁 𑀧𑀲𑀼𑀁 𑀯𑀥𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀪𑀢𑁆𑀢𑀁 𑀓𑀢𑀁, 𑀢𑀁 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀺 𑀧𑀝𑀺𑀘𑁆𑀘𑀓𑀫𑁆𑀫’’’𑀦𑁆𑀢𑀺. ‘‘𑀅𑀮𑀁 𑀅𑀬𑁆𑀬𑁄, 𑀤𑀻𑀖𑀭𑀢𑁆𑀢𑀫𑁆𑀧𑀺 𑀢𑁂 𑀆𑀬𑀲𑁆𑀫𑀦𑁆𑀢𑀸 𑀅𑀯𑀡𑁆𑀡𑀓𑀸𑀫𑀸 𑀩𑀼𑀤𑁆𑀥𑀲𑁆𑀲, 𑀅𑀯𑀡𑁆𑀡𑀓𑀸𑀫𑀸 𑀥𑀫𑁆𑀫𑀲𑁆𑀲, 𑀅𑀯𑀡𑁆𑀡𑀓𑀸𑀫𑀸 𑀲𑀗𑁆𑀖𑀲𑁆𑀲; 𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑀸 𑀚𑀺𑀭𑀺𑀤𑀦𑁆𑀢𑀺 𑀢𑀁 𑀪𑀕𑀯𑀦𑁆𑀢𑀁 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀸; 𑀦 𑀘 𑀫𑀬𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 ¶ 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀻𑀳𑀁 𑀲𑁂𑀦𑀸𑀧𑀢𑀺𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀚𑀸 𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 ¶ 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 ¶ 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀫𑀘𑁆𑀙𑀫𑀁𑀲𑀁 𑁋 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺.

𑀲𑀻𑀳𑀲𑁂𑀦𑀸𑀧𑀢𑀺𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁭𑁯. 𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀸

𑁨𑁯𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀲𑀼𑀪𑀺𑀓𑁆𑀔𑀸 𑀳𑁄𑀢𑀺 𑀲𑀼𑀲𑀲𑁆𑀲𑀸 𑀲𑀼𑀮𑀪𑀧𑀺𑀡𑁆𑀟𑀸, 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑀸𑀦𑀺 𑀢𑀸𑀦𑀺 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀤𑀼𑀩𑁆𑀪𑀺𑀓𑁆𑀔𑁂 𑀤𑀼𑀲𑁆𑀲𑀲𑁆𑀲𑁂 𑀤𑀼𑀮𑁆𑀮𑀪𑀧𑀺𑀡𑁆𑀟𑁂 𑀅𑀦𑁆𑀢𑁄 𑀯𑀼𑀝𑁆𑀞𑀁 𑀅𑀦𑁆𑀢𑁄 𑀧𑀓𑁆𑀓𑀁 𑀲𑀸𑀫𑀁 𑀧𑀓𑁆𑀓𑀁 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀺𑀢𑀓𑀁 𑀢𑀢𑁄 𑀦𑀻𑀳𑀝𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀁, 𑀅𑀚𑁆𑀚𑀸𑀧𑀺 𑀦𑀼 𑀔𑁄 𑀢𑀸𑀦𑀺 𑀪𑀺𑀓𑁆𑀔𑀽 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀸𑀦𑀺 𑀢𑀸𑀦𑀺, 𑀆𑀦𑀦𑁆𑀤, 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀤𑀼𑀩𑁆𑀪𑀺𑀓𑁆𑀔𑁂 𑀤𑀼𑀲𑁆𑀲𑀲𑁆𑀲𑁂 𑀤𑀼𑀮𑁆𑀮𑀪𑀧𑀺𑀡𑁆𑀟𑁂 𑀅𑀦𑁆𑀢𑁄 𑀯𑀼𑀝𑁆𑀞𑀁 𑀅𑀦𑁆𑀢𑁄 𑀧𑀓𑁆𑀓𑀁 𑀲𑀸𑀫𑀁 𑀧𑀓𑁆𑀓𑀁 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀺𑀢𑀓𑀁 𑀢𑀢𑁄 𑀦𑀻𑀳𑀝𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀁, 𑀅𑀚𑁆𑀚𑀸𑀧𑀺 𑀦𑀼 𑀔𑁄 𑀢𑀸𑀦𑀺 𑀪𑀺𑀓𑁆𑀔𑀽 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺? ‘‘𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀪𑀕𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀸𑀦𑀺 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀤𑀼𑀩𑁆𑀪𑀺𑀓𑁆𑀔𑁂 𑀤𑀼𑀲𑁆𑀲𑀲𑁆𑀲𑁂 𑀤𑀼𑀮𑁆𑀮𑀪𑀧𑀺𑀡𑁆𑀟𑁂 𑀅𑀦𑁆𑀢𑁄 𑀯𑀼𑀝𑁆𑀞𑀁 𑀅𑀦𑁆𑀢𑁄 𑀧𑀓𑁆𑀓𑀁 𑀲𑀸𑀫𑀁 𑀧𑀓𑁆𑀓𑀁 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀺𑀢𑀓𑀁 𑀢𑀢𑁄 𑀦𑀻𑀳𑀝𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀁, 𑀢𑀸𑀦𑀸𑀳𑀁 𑀅𑀚𑁆𑀚𑀢𑀕𑁆𑀕𑁂 𑀧𑀝𑀺𑀓𑁆𑀔𑀺𑀧𑀸𑀫𑀺. 𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁄 𑀯𑀼𑀝𑁆𑀞𑀁 𑀅𑀦𑁆𑀢𑁄 𑀧𑀓𑁆𑀓𑀁 𑀲𑀸𑀫𑀁 𑀧𑀓𑁆𑀓𑀁 ¶ 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀺𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀢𑀢𑁄 𑀦𑀻𑀳𑀝𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀸𑀦𑀧𑀤𑀸 𑀫𑀦𑀼𑀲𑁆𑀲𑀸 𑀩𑀳𑀼𑀁 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑁂 𑀲𑀓𑀝𑀧𑀭𑀺𑀯𑀝𑁆𑀝𑀁 𑀓𑀭𑀺𑀢𑁆𑀯𑀸 𑀅𑀘𑁆𑀙𑀦𑁆𑀢𑀺 𑁋 𑀬𑀤𑀸 𑀧𑀝𑀺𑀧𑀸𑀝𑀺𑀁 𑀮𑀪𑀺𑀲𑁆𑀲𑀸𑀫, 𑀢𑀤𑀸 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀫𑀳𑀸 𑀘 𑀫𑁂𑀖𑁄 ¶ 𑀉𑀕𑁆𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑀳𑀼𑀁 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀓𑀝𑁂𑀲𑀼 𑀆𑀭𑁄𑀧𑀺𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀫𑀳𑀸 𑀘 𑀫𑁂𑀖𑁄 𑀉𑀕𑁆𑀕𑀢𑁄 ¶ ; 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂 𑀆𑀦𑀦𑁆𑀤, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀢𑁂𑀦 𑀳𑀸𑀦𑀦𑁆𑀤, 𑀲𑀗𑁆𑀖𑁄 𑀧𑀘𑁆𑀘𑀦𑁆𑀢𑀺𑀫𑀁 𑀯𑀺𑀳𑀸𑀭𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑀢𑁆𑀣 𑀯𑀸𑀲𑁂𑀢𑀼, 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 𑀕𑀼𑀳𑀁 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀫𑁆𑀫𑀦𑁆𑀦𑀢𑀺 ¶ . 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀯𑀺𑀳𑀸𑀭𑁄 𑀓𑀧𑁆𑀧𑀺𑀬𑀪𑀽𑀫𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀢𑀢𑁆𑀣𑁂𑀯 𑀲𑀫𑁆𑀫𑀼𑀢𑀺𑀬𑀸 [𑀲𑀫𑁆𑀫𑀢𑀺𑀓𑀸𑀬 (𑀲𑁆𑀬𑀸.)] 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀬𑀸𑀕𑀼𑀬𑁄 𑀧𑀘𑀦𑁆𑀢𑀺, 𑀪𑀢𑁆𑀢𑀸𑀦𑀺 𑀧𑀘𑀦𑁆𑀢𑀺, 𑀲𑀽𑀧𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀫𑀁𑀲𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀉𑀘𑁆𑀘𑀸𑀲𑀤𑁆𑀤𑀁 𑀫𑀳𑀸𑀲𑀤𑁆𑀤𑀁 𑀓𑀸𑀓𑁄𑀭𑀯𑀲𑀤𑁆𑀤𑀁, 𑀲𑀼𑀢𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑁄 𑀫𑀳𑀸𑀲𑀤𑁆𑀤𑁄 𑀓𑀸𑀓𑁄𑀭𑀯𑀲𑀤𑁆𑀤𑁄’’𑀢𑀺? ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀢𑀢𑁆𑀣𑁂𑀯 𑀲𑀫𑁆𑀫𑀼𑀢𑀺𑀬𑀸 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀬𑀸𑀕𑀼𑀬𑁄 𑀧𑀘𑀦𑁆𑀢𑀺, 𑀪𑀢𑁆𑀢𑀸𑀦𑀺 𑀧𑀘𑀦𑁆𑀢𑀺, 𑀲𑀽𑀧𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀫𑀁𑀲𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑀺. 𑀲𑁄 𑀏𑀲𑁄, 𑀪𑀕𑀯𑀸, 𑀉𑀘𑁆𑀘𑀸𑀲𑀤𑁆𑀤𑁄 𑀫𑀳𑀸𑀲𑀤𑁆𑀤𑁄 𑀓𑀸𑀓𑁄𑀭𑀯𑀲𑀤𑁆𑀤𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺𑀓𑀸 (𑀲𑁆𑀬𑀸.)] 𑀓𑀧𑁆𑀧𑀺𑀬𑀪𑀽𑀫𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑁋 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀁 𑀕𑁄𑀦𑀺𑀲𑀸𑀤𑀺𑀓𑀁 𑀕𑀳𑀧𑀢𑀺’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀬𑀲𑁄𑀚𑁄 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲𑀢𑁆𑀣𑀸𑀬 𑀪𑁂𑀲𑀚𑁆𑀚𑀸𑀦𑀺 𑀆𑀳𑀭𑀺𑀬𑀦𑁆𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀽 𑀩𑀳𑀺 𑀯𑀸𑀲𑁂𑀦𑁆𑀢𑀺. 𑀉𑀓𑁆𑀓𑀧𑀺𑀡𑁆𑀟𑀺𑀓𑀸𑀧𑀺 ¶ 𑀔𑀸𑀤𑀦𑁆𑀢𑀺, 𑀘𑁄𑀭𑀸𑀧𑀺 𑀳𑀭𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀼𑀢𑀺𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 ¶ . 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑁋 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀁 𑀕𑁄𑀦𑀺𑀲𑀸𑀤𑀺𑀓𑀁 𑀕𑀳𑀧𑀢𑀺𑀁 𑀲𑀫𑁆𑀫𑀼𑀢𑀺𑀦𑁆𑀢𑀺.

𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀻𑀳𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄.

𑁧𑁮𑁦. 𑀫𑁂𑀡𑁆𑀟𑀓𑀕𑀳𑀧𑀢𑀺𑀯𑀢𑁆𑀣𑀼

𑁨𑁯𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀳𑁄𑀢𑀺 𑁋 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀦𑀺𑀲𑀻𑀤𑀢𑀺, 𑀅𑀦𑁆𑀢𑀮𑀺𑀓𑁆𑀔𑀸 𑀥𑀜𑁆𑀜𑀲𑁆𑀲 𑀥𑀸𑀭𑀸 𑀑𑀧𑀢𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀧𑀽𑀭𑁂𑀢𑀺. 𑀪𑀭𑀺𑀬𑀸𑀬 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀳𑁄𑀢𑀺 𑁋 𑀏𑀓𑀁𑀬𑁂𑀯 𑀆𑀴𑁆𑀳𑀓𑀣𑀸𑀮𑀺𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀜𑁆𑀘 𑀲𑀽𑀧𑀪𑀺𑀜𑁆𑀚𑀦𑀓𑀁 [𑀲𑀽𑀧𑀪𑀺𑀜𑁆𑀚𑀭𑀓𑀁 (𑀲𑀻.)] 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀁 𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 [𑀔𑀻𑀬𑀢𑀺 (𑀲𑀻. 𑀲𑁆𑀬𑀸.)] 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. 𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀳𑁄𑀢𑀺 𑁋 𑀏𑀓𑀁𑀬𑁂𑀯 𑀲𑀳𑀲𑁆𑀲𑀣𑀯𑀺𑀓𑀁 𑀕𑀳𑁂𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀙𑀫𑀸𑀲𑀺𑀓𑀁 𑀯𑁂𑀢𑀦𑀁 𑀤𑁂𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯𑀲𑁆𑀲 𑀳𑀢𑁆𑀣𑀕𑀢𑀸. 𑀲𑀼𑀡𑀺𑀲𑀸𑀬 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀳𑁄𑀢𑀺 𑁋 𑀏𑀓𑀁𑀬𑁂𑀯 𑀘𑀢𑀼𑀤𑁄𑀡𑀺𑀓𑀁 𑀧𑀺𑀝𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀙𑀫𑀸𑀲𑀺𑀓𑀁 𑀪𑀢𑁆𑀢𑀁 𑀤𑁂𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. 𑀤𑀸𑀲𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑀳𑁄𑀢𑀺 𑁋 𑀏𑀓𑁂𑀦 𑀦𑀗𑁆𑀕𑀮𑁂𑀦 𑀓𑀲𑀦𑁆𑀢𑀲𑁆𑀲 𑀲𑀢𑁆𑀢 𑀲𑀻𑀢𑀸𑀬𑁄 𑀕𑀘𑁆𑀙𑀦𑁆𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑁋 ‘‘𑀅𑀫𑁆𑀳𑀸𑀓𑀁 ¶ 𑀓𑀺𑀭 𑀯𑀺𑀚𑀺𑀢𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑁋 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀦𑀺𑀲𑀻𑀤𑀢𑀺, 𑀅𑀦𑁆𑀢𑀮𑀺𑀓𑁆𑀔𑀸 𑀥𑀜𑁆𑀜𑀲𑁆𑀲 𑀥𑀸𑀭𑀸 𑀑𑀧𑀢𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀧𑀽𑀭𑁂𑀢𑀺. 𑀪𑀭𑀺𑀬𑀸𑀬 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑁋 𑀏𑀓𑀁𑀬𑁂𑀯 𑀆𑀴𑁆𑀳𑀓𑀣𑀸𑀮𑀺𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀜𑁆𑀘 𑀲𑀽𑀧𑀪𑀺𑀜𑁆𑀚𑀦𑀓𑀁 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀁 𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. 𑀧𑀼𑀢𑁆𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑁋 𑀏𑀓𑀁𑀬𑁂𑀯 𑀲𑀳𑀲𑁆𑀲𑀣𑀯𑀺𑀓𑀁 𑀕𑀳𑁂𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀙𑀫𑀸𑀲𑀺𑀓𑀁 𑀯𑁂𑀢𑀦𑀁 𑀤𑁂𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯𑀲𑁆𑀲 𑀳𑀢𑁆𑀣𑀕𑀢𑀸. 𑀲𑀼𑀡𑀺𑀲𑀸𑀬 𑀏𑀯𑀭𑀽𑀧𑁄 ¶ 𑀇𑀤𑁆𑀥𑀸𑀦𑀼𑀪𑀸𑀯𑁄 𑁋 𑀏𑀓𑀁𑀬𑁂𑀯 𑀘𑀢𑀼𑀤𑁄𑀡𑀺𑀓𑀁 𑀧𑀺𑀝𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀙𑀫𑀸𑀲𑀺𑀓𑀁 𑀪𑀢𑁆𑀢𑀁 𑀤𑁂𑀢𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. 𑀤𑀸𑀲𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 𑁋 𑀏𑀓𑁂𑀦 𑀦𑀗𑁆𑀕𑀮𑁂𑀦 𑀓𑀲𑀦𑁆𑀢𑀲𑁆𑀲 𑀲𑀢𑁆𑀢 𑀲𑀻𑀢𑀸𑀬𑁄 𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀜𑁆𑀜𑀢𑀭𑀁 𑀲𑀩𑁆𑀩𑀢𑁆𑀣𑀓𑀁 𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀓𑀺𑀭, 𑀪𑀡𑁂, 𑀯𑀺𑀚𑀺𑀢𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄 ¶ 𑁋 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀦𑀺𑀲𑀻𑀤𑀢𑀺, 𑀅𑀦𑁆𑀢𑀮𑀺𑀓𑁆𑀔𑀸 𑀥𑀜𑁆𑀜𑀲𑁆𑀲 𑀥𑀸𑀭𑀸 𑀑𑀧𑀢𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀧𑀽𑀭𑁂𑀢𑀺. 𑀪𑀭𑀺𑀬𑀸𑀬…𑀧𑁂… 𑀧𑀼𑀢𑁆𑀢𑀲𑁆𑀲… 𑀲𑀼𑀡𑀺𑀲𑀸𑀬… 𑀤𑀸𑀲𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀏𑀓𑁂𑀦 𑀦𑀗𑁆𑀕𑀮𑁂𑀦 𑀓𑀲𑀦𑁆𑀢𑀲𑁆𑀲 𑀲𑀢𑁆𑀢 𑀲𑀻𑀢𑀸𑀬𑁄 𑀕𑀘𑁆𑀙𑀦𑁆𑀢𑀻𑀢𑀺. 𑀕𑀘𑁆𑀙, 𑀪𑀡𑁂, 𑀚𑀸𑀦𑀸𑀳𑀺. 𑀬𑀣𑀸 𑀫𑀬𑀸 𑀲𑀸𑀫𑀁 𑀤𑀺𑀝𑁆𑀞𑁄, 𑀏𑀯𑀁 𑀢𑀯 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑁨𑁯𑁭. 𑀏𑀯𑀁 ¶ , 𑀤𑁂𑀯𑀸𑀢𑀺 ¶ 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀬𑁂𑀦 𑀪𑀤𑁆𑀤𑀺𑀬𑀁 𑀢𑁂𑀦 𑀧𑀸𑀬𑀸𑀲𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀪𑀤𑁆𑀤𑀺𑀬𑀁 𑀬𑁂𑀦 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀳𑀺, 𑀕𑀳𑀧𑀢𑀺, 𑀭𑀜𑁆𑀜𑀸 𑀆𑀡𑀢𑁆𑀢𑁄 ‘𑀅𑀫𑁆𑀳𑀸𑀓𑀁 𑀓𑀺𑀭, 𑀪𑀡𑁂, 𑀯𑀺𑀚𑀺𑀢𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀧𑀝𑀺𑀯𑀲𑀢𑀺, 𑀢𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸…𑀧𑁂… 𑀪𑀭𑀺𑀬𑀸𑀬… 𑀧𑀼𑀢𑁆𑀢𑀲𑁆𑀲… 𑀲𑀼𑀡𑀺𑀲𑀸𑀬… 𑀤𑀸𑀲𑀲𑁆𑀲 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄, 𑀏𑀓𑁂𑀦 𑀦𑀗𑁆𑀕𑀮𑁂𑀦 𑀓𑀲𑀦𑁆𑀢𑀲𑁆𑀲 𑀲𑀢𑁆𑀢 𑀲𑀻𑀢𑀸𑀬𑁄 𑀕𑀘𑁆𑀙𑀦𑁆𑀢𑀻’𑀢𑀺, 𑀕𑀘𑁆𑀙, 𑀪𑀡𑁂, 𑀚𑀸𑀦𑀸𑀳𑀺. 𑀬𑀣𑀸 𑀫𑀬𑀸 𑀲𑀸𑀫𑀁 𑀤𑀺𑀝𑁆𑀞𑁄, 𑀏𑀯𑀁 𑀢𑀯 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀧𑀲𑁆𑀲𑀸𑀫 𑀢𑁂, 𑀕𑀳𑀧𑀢𑀺, 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀦𑀺𑀲𑀻𑀤𑀺, 𑀅𑀦𑁆𑀢𑀮𑀺𑀓𑁆𑀔𑀸 𑀥𑀜𑁆𑀜𑀲𑁆𑀲 𑀥𑀸𑀭𑀸 𑀑𑀧𑀢𑀺𑀢𑁆𑀯𑀸 𑀥𑀜𑁆𑀜𑀸𑀕𑀸𑀭𑀁 𑀧𑀽𑀭𑁂𑀲𑀺. ‘‘𑀤𑀺𑀝𑁆𑀞𑁄 𑀢𑁂, 𑀕𑀳𑀧𑀢𑀺, 𑀇𑀤𑁆𑀥𑀸𑀦𑀼𑀪𑀸𑀯𑁄. 𑀪𑀭𑀺𑀬𑀸𑀬 𑀢𑁂 𑀇𑀤𑁆𑀥𑀸𑀦𑀼𑀪𑀸𑀯𑀁 ¶ 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀭𑀺𑀬𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀪𑀭𑀺𑀬𑀸 𑀏𑀓𑀁𑀬𑁂𑀯 𑀆𑀴𑁆𑀳𑀓𑀣𑀸𑀮𑀺𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀜𑁆𑀘 𑀲𑀽𑀧𑀪𑀺𑀜𑁆𑀚𑀦𑀓𑀁 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺, 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. ‘‘𑀤𑀺𑀝𑁆𑀞𑁄 𑀢𑁂, 𑀕𑀳𑀧𑀢𑀺, 𑀪𑀭𑀺𑀬𑀸𑀬𑀧𑀺 𑀇𑀤𑁆𑀥𑀸𑀦𑀼𑀪𑀸𑀯𑁄. 𑀧𑀼𑀢𑁆𑀢𑀲𑁆𑀲 𑀢𑁂 𑀇𑀤𑁆𑀥𑀸𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀙𑀫𑀸𑀲𑀺𑀓𑀁 𑀯𑁂𑀢𑀦𑀁 𑀤𑁂𑀳𑀻’’𑀢𑀺 ¶ . 𑀅𑀣 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀢𑁆𑀢𑁄 𑀏𑀓𑀁𑀬𑁂𑀯 𑀲𑀳𑀲𑁆𑀲𑀣𑀯𑀺𑀓𑀁 𑀕𑀳𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀙𑀫𑀸𑀲𑀺𑀓𑀁 𑀯𑁂𑀢𑀦𑀁 𑀅𑀤𑀸𑀲𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺, 𑀬𑀸𑀯𑀲𑁆𑀲 𑀳𑀢𑁆𑀣𑀕𑀢𑀸. ‘‘𑀤𑀺𑀝𑁆𑀞𑁄 𑀢𑁂, 𑀕𑀳𑀧𑀢𑀺, 𑀧𑀼𑀢𑁆𑀢𑀲𑁆𑀲𑀧𑀺 𑀇𑀤𑁆𑀥𑀸𑀦𑀼𑀪𑀸𑀯𑁄. 𑀲𑀼𑀡𑀺𑀲𑀸𑀬 𑀢𑁂 𑀇𑀤𑁆𑀥𑀸𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀲𑀼𑀡𑀺𑀲𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀙𑀫𑀸𑀲𑀺𑀓𑀁 𑀪𑀢𑁆𑀢𑀁 𑀤𑁂𑀳𑀻’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀲𑀼𑀡𑀺𑀲𑀸 𑀏𑀓𑀁𑀬𑁂𑀯 𑀘𑀢𑀼𑀤𑁄𑀡𑀺𑀓𑀁 𑀧𑀺𑀝𑀓𑀁 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀙𑀫𑀸𑀲𑀺𑀓𑀁 𑀪𑀢𑁆𑀢𑀁 𑀅𑀤𑀸𑀲𑀺, 𑀦 𑀢𑀸𑀯 𑀢𑀁 𑀔𑀺𑀬𑁆𑀬𑀢𑀺 𑀬𑀸𑀯 𑀲𑀸 𑀦 𑀯𑀼𑀝𑁆𑀞𑀸𑀢𑀺. ‘‘𑀤𑀺𑀝𑁆𑀞𑁄 𑀢𑁂, 𑀕𑀳𑀧𑀢𑀺, 𑀲𑀼𑀡𑀺𑀲𑀸𑀬𑀧𑀺 𑀇𑀤𑁆𑀥𑀸𑀦𑀼𑀪𑀸𑀯𑁄. 𑀤𑀸𑀲𑀲𑁆𑀲 𑀢𑁂 𑀇𑀤𑁆𑀥𑀸𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺. ‘‘𑀫𑀬𑁆𑀳𑀁 𑀔𑁄, 𑀲𑀸𑀫𑀺, 𑀤𑀸𑀲𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄 𑀔𑁂𑀢𑁆𑀢𑁂 𑀧𑀲𑁆𑀲𑀺𑀢𑀩𑁆𑀩𑁄’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀤𑀺𑀝𑁆𑀞𑁄 𑀢𑁂 𑀤𑀸𑀲𑀲𑁆𑀲𑀧𑀺 𑀇𑀤𑁆𑀥𑀸𑀦𑀼𑀪𑀸𑀯𑁄’’𑀢𑀺. 𑀅𑀣 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

𑁨𑁯𑁮. 𑀅𑀣 ¶ 𑀔𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀪𑀤𑁆𑀤𑀺𑀬𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 ¶ 𑀘𑀭𑀫𑀸𑀦𑁄 𑀬𑁂𑀦 ¶ 𑀪𑀤𑁆𑀤𑀺𑀬𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀚𑀸𑀢𑀺𑀬𑀸 𑀯𑀦𑁂. 𑀅𑀲𑁆𑀲𑁄𑀲𑀺 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀪𑀤𑁆𑀤𑀺𑀬𑀁 𑀅𑀦𑀼𑀧𑁆𑀧𑀢𑁆𑀢𑁄 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀚𑀸𑀢𑀺𑀬𑀸 𑀯𑀦𑁂. 𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’ [𑀪𑀕𑀯𑀸𑀢𑀺 (𑀓.)]. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀤𑁆𑀭𑀸𑀦𑀺 𑀪𑀤𑁆𑀭𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀭𑀁 𑀪𑀤𑁆𑀭𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 ¶ 𑀪𑀤𑁆𑀤𑀺𑀬𑀸 𑀦𑀺𑀬𑁆𑀬𑀸𑀲𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀤𑁆𑀤𑀲𑀁𑀲𑀼 𑀔𑁄 𑀲𑀫𑁆𑀩𑀳𑀼𑀮𑀸 𑀢𑀺𑀢𑁆𑀣𑀺𑀬𑀸 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀳𑀁 𑀢𑁆𑀯𑀁, 𑀕𑀳𑀧𑀢𑀺, 𑀕𑀘𑁆𑀙𑀲𑀻’’𑀢𑀺? ‘‘𑀕𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 [𑀇𑀤𑀁 𑀧𑀤𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀓𑀺𑀭𑀺𑀬𑀯𑀸𑀤𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀲𑀺? 𑀲𑀫𑀡𑁄 𑀳𑀺, 𑀕𑀳𑀧𑀢𑀺, 𑀕𑁄𑀢𑀫𑁄 𑀅𑀓𑀺𑀭𑀺𑀬𑀯𑀸𑀤𑁄 𑀅𑀓𑀺𑀭𑀺𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀘 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁, 𑀔𑁄 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀬𑀣𑀬𑀺𑀫𑁂 𑀢𑀺𑀢𑁆𑀣𑀺𑀬𑀸 𑀉𑀲𑀽𑀬𑀦𑁆𑀢𑀻’’𑀢𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁…𑀧𑁂… 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… ¶ 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁 ¶ . 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀪𑀭𑀺𑀬𑀸 𑀘 𑀧𑀼𑀢𑁆𑀢𑁄 𑀘 𑀲𑀼𑀡𑀺𑀲𑀸 𑀘 𑀤𑀸𑀲𑁄 𑀘 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 ¶ , 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁…𑀧𑁂… ¶ 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 ¶ 𑀕𑀢𑁂’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀢𑀸𑀯 𑀅𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀥𑀼𑀯𑀪𑀢𑁆𑀢𑁂𑀦𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀫𑁂𑀡𑁆𑀟𑀓𑀕𑀳𑀧𑀢𑀺𑀯𑀢𑁆𑀣 𑀦𑀺𑀝𑁆𑀞𑀺𑀢𑀁.

𑁧𑁮𑁧. 𑀧𑀜𑁆𑀘𑀕𑁄𑀭𑀲𑀸𑀤𑀺𑀅𑀦𑀼𑀚𑀸𑀦𑀦𑀸

𑁨𑁯𑁯. 𑀅𑀣 𑀔𑁄 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀅𑀦𑀸𑀧𑀼𑀘𑁆𑀙𑀸 𑀬𑁂𑀦 𑀅𑀗𑁆𑀕𑀼𑀢𑁆𑀢𑀭𑀸𑀧𑁄 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀲𑁆𑀲𑁄𑀲𑀺 𑀔𑁄 ¶ 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑁋 ‘‘𑀪𑀕𑀯𑀸 𑀓𑀺𑀭 𑀬𑁂𑀦 𑀅𑀗𑁆𑀕𑀼𑀢𑁆𑀢𑀭𑀸𑀧𑁄 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀤𑀸𑀲𑁂 𑀘 𑀓𑀫𑁆𑀫𑀓𑀭𑁂 𑀘 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀩𑀳𑀼𑀁 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀆𑀕𑀘𑁆𑀙𑀣, 𑀅𑀟𑁆𑀠𑀢𑁂𑀮𑀲𑀸𑀦𑀺 𑀘 𑀕𑁄𑀧𑀸𑀮𑀓𑀲𑀢𑀸𑀦𑀺 𑀅𑀟𑁆𑀠𑀢𑁂𑀮𑀲𑀸𑀦𑀺 𑀘 𑀥𑁂𑀦𑀼𑀲𑀢𑀸𑀦𑀺 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑀼, 𑀬𑀢𑁆𑀣 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫 𑀢𑀢𑁆𑀣 𑀢𑀭𑀼𑀡𑁂𑀦 [𑀥𑀸𑀭𑀼𑀡𑁆𑀳𑁂𑀦 (𑀲𑀻. 𑀲𑁆𑀬𑀸.)] 𑀔𑀻𑀭𑁂𑀦 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 ¶ 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀦𑁆𑀢𑀸𑀭𑁂 𑀲𑀫𑁆𑀪𑀸𑀯𑁂𑀲𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 ¶ 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 ¶ ; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀅𑀟𑁆𑀠𑀢𑁂𑀮𑀲𑀸𑀦𑀺 𑀕𑁄𑀧𑀸𑀮𑀓𑀲𑀢𑀸𑀦𑀺 𑀆𑀡𑀸𑀧𑁂𑀲𑀺 ¶ 𑁋 ‘‘𑀢𑁂𑀦𑀳𑀺, 𑀪𑀡𑁂, 𑀏𑀓𑀫𑁂𑀓𑀁 𑀥𑁂𑀦𑀼𑀁 𑀕𑀳𑁂𑀢𑁆𑀯𑀸 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀢𑀺𑀝𑁆𑀞𑀣 𑀢𑀭𑀼𑀡𑁂𑀦 𑀔𑀻𑀭𑁂𑀦 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺, 𑀢𑀭𑀼𑀡𑁂𑀦 𑀘 𑀔𑀻𑀭𑁂𑀦. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀔𑀻𑀭𑀁 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀅𑀣 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀢𑀭𑀼𑀡𑁂𑀦 𑀘 𑀔𑀻𑀭𑁂𑀦 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑁂𑀡𑁆𑀟𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀫𑀕𑁆𑀕𑀸 𑀓𑀦𑁆𑀢𑀸𑀭𑀸, 𑀅𑀧𑁆𑀧𑁄𑀤𑀓𑀸 𑀅𑀧𑁆𑀧𑀪𑀓𑁆𑀔𑀸, 𑀦 𑀲𑀼𑀓𑀭𑀸 𑀅𑀧𑀸𑀣𑁂𑀬𑁆𑀬𑁂𑀦 𑀕𑀦𑁆𑀢𑀼𑀁. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀣𑁂𑀬𑁆𑀬𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀫𑁂𑀡𑁆𑀟𑀓𑀁 𑀕𑀳𑀧𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀕𑁄𑀭𑀲𑁂 𑁋 𑀔𑀻𑀭𑀁, 𑀤𑀥𑀺𑀁, 𑀢𑀓𑁆𑀓𑀁, 𑀦𑀯𑀦𑀻𑀢𑀁, 𑀲𑀧𑁆𑀧𑀺𑀁. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑀸 𑀓𑀦𑁆𑀢𑀸𑀭𑀸 𑀅𑀧𑁆𑀧𑁄𑀤𑀓𑀸 𑀅𑀧𑁆𑀧𑀪𑀓𑁆𑀔𑀸, 𑀦 𑀲𑀼𑀓𑀭𑀸 𑀅𑀧𑀸𑀣𑁂𑀬𑁆𑀬𑁂𑀦 𑀕𑀦𑁆𑀢𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀣𑁂𑀬𑁆𑀬𑀁 𑀧𑀭𑀺𑀬𑁂𑀲𑀺𑀢𑀼𑀁 𑀢𑀡𑁆𑀟𑀼𑀮𑁄 𑀢𑀡𑁆𑀟𑀼𑀮𑀢𑁆𑀣𑀺𑀓𑁂𑀦, 𑀫𑀼𑀕𑁆𑀕𑁄 𑀫𑀼𑀕𑁆𑀕𑀢𑁆𑀣𑀺𑀓𑁂𑀦, 𑀫𑀸𑀲𑁄 𑀫𑀸𑀲𑀢𑁆𑀣𑀺𑀓𑁂𑀦, 𑀮𑁄𑀡𑀁 𑀮𑁄𑀡𑀢𑁆𑀣𑀺𑀓𑁂𑀦 ¶ ¶ , 𑀕𑀼𑀴𑁄 𑀕𑀼𑀴𑀢𑁆𑀣𑀺𑀓𑁂𑀦, 𑀢𑁂𑀮𑀁 𑀢𑁂𑀮𑀢𑁆𑀣𑀺𑀓𑁂𑀦, 𑀲𑀧𑁆𑀧𑀺 𑀲𑀧𑁆𑀧𑀺𑀢𑁆𑀣𑀺𑀓𑁂𑀦. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸, 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀳𑀺𑀭𑀜𑁆𑀜𑀁 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀺 𑁋 ‘𑀇𑀫𑀺𑀦𑀸 𑀅𑀬𑁆𑀬𑀲𑁆𑀲 𑀬𑀁 𑀓𑀧𑁆𑀧𑀺𑀬𑀁 𑀢𑀁 𑀤𑁂𑀣𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀢𑁄 𑀓𑀧𑁆𑀧𑀺𑀬𑀁 𑀢𑀁 𑀲𑀸𑀤𑀺𑀢𑀼𑀁; 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’’𑀢𑀺.

𑀧𑀜𑁆𑀘𑀕𑁄𑀭𑀲𑀸𑀤𑀺𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮𑁨. 𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼

𑁩𑁦𑁦. [𑀫. 𑀦𑀺. 𑁨.𑁩𑁯𑁬 𑀆𑀤𑀬𑁄; 𑀲𑀼. 𑀦𑀺. 𑀲𑁂𑀮𑀲𑀼𑀢𑁆𑀢𑀫𑁆𑀧𑀺 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀆𑀧𑀡𑀁 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀺 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀆𑀧𑀡𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄…𑀧𑁂… 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺. 𑀅𑀣 𑀔𑁄 𑀓𑁂𑀡𑀺𑀬𑀲𑁆𑀲 ¶ ¶ 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀓𑁂𑀡𑀺𑀬𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 ¶ 𑀩𑁆𑀭𑀸𑀳𑁆𑀫𑀡𑀸𑀦𑀁 [𑀅𑀬𑀁 𑀧𑀸𑀞𑁄 𑀤𑀻. 𑀦𑀺. 𑁧.𑁨𑁮𑁫, 𑁫𑁨𑁬, 𑁫𑁩𑁬; 𑀫. 𑀦𑀺. 𑁨.𑁪𑁨𑁭; 𑀅. 𑀦𑀺. 𑁫.𑁧𑁯𑁧-𑁧𑁯𑁨 𑀆𑀤𑀬𑁄] 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 [𑀬𑀫𑀤𑀕𑁆𑀕𑀺 (𑀓.)] 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼 [𑀅𑀬𑀁 𑀧𑀸𑀞𑁄 𑀤𑀻. 𑀦𑀺. 𑁧.𑁨𑁮𑁫, 𑁫𑁨𑁬, 𑁫𑁩𑁬; 𑀫. 𑀦𑀺. 𑁨.𑁪𑁨𑁭; 𑀅. 𑀦𑀺. 𑁫.𑁧𑁯𑁧-𑁧𑁯𑁨 𑀆𑀤𑀬𑁄], 𑀭𑀢𑁆𑀢𑀽𑀧𑀭𑀢𑀸 𑀯𑀺𑀭𑀢𑀸 𑀯𑀺𑀓𑀸𑀮𑀪𑁄𑀚𑀦𑀸, 𑀢𑁂 𑀏𑀯𑀭𑀽𑀧𑀸𑀦𑀺 𑀧𑀸𑀦𑀸𑀦𑀺 𑀲𑀸𑀤𑀺𑀬𑀺𑀁𑀲𑀼. 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸, 𑀅𑀭𑀳𑀢𑀺 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀏𑀯𑀭𑀽𑀧𑀸𑀦𑀺 𑀧𑀸𑀦𑀸𑀦𑀺 𑀲𑀸𑀤𑀺𑀬𑀺𑀢𑀼’’𑀦𑁆𑀢𑀺 𑀧𑀳𑀽𑀢𑀁 𑀧𑀸𑀦𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀓𑀸𑀚𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀧𑀸𑀦’’𑀦𑁆𑀢𑀺. 𑀢𑁂𑀦 𑀳𑀺, 𑀓𑁂𑀡𑀺𑀬, 𑀪𑀺𑀓𑁆𑀔𑀽𑀦𑀁 𑀤𑁂𑀳𑀻𑀢𑀺. 𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀳𑀽𑀢𑁂𑀳𑀺 𑀧𑀸𑀦𑁂𑀳𑀺 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀥𑁄𑀢𑀳𑀢𑁆𑀣𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀓𑁂𑀡𑀺𑀬𑀁 𑀚𑀝𑀺𑀮𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 ¶ 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 ¶ 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀫𑀳𑀸 𑀔𑁄, 𑀓𑁂𑀡𑀺𑀬, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀟𑁆𑀠𑀢𑁂𑀮𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀢𑁆𑀯𑀜𑁆𑀘 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀜𑁆𑀘𑀸𑀧𑀺 𑀔𑁄, 𑀪𑁄 𑀕𑁄𑀢𑀫, 𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀟𑁆𑀠𑀢𑁂𑀮𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀅𑀳𑀜𑁆𑀘 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀫𑀳𑀸 𑀔𑁄, 𑀓𑁂𑀡𑀺𑀬, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀟𑁆𑀠𑀢𑁂𑀮𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀢𑁆𑀯𑀜𑁆𑀘 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄𑀢𑀺 ¶ . 𑀢𑀢𑀺𑀬𑀫𑁆𑀧𑀺 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀜𑁆𑀘𑀸𑀧𑀺 𑀔𑁄, 𑀪𑁄 𑀕𑁄𑀢𑀫, 𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀟𑁆𑀠𑀢𑁂𑀮𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀅𑀳𑀜𑁆𑀘 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀅𑀥𑀺𑀯𑀸𑀲𑁂𑀢𑀼 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀧𑀸𑀦𑀸𑀦𑀺 𑁋 𑀅𑀫𑁆𑀩𑀧𑀸𑀦𑀁 𑀚𑀫𑁆𑀩𑀼𑀧𑀸𑀦𑀁 𑀘𑁄𑀘𑀧𑀸𑀦𑀁 𑀫𑁄𑀘𑀧𑀸𑀦𑀁 𑀫𑀥𑀽𑀓𑀧𑀸𑀦𑀁 [𑀫𑀥𑀼𑀧𑀸𑀦𑀁 (𑀲𑀻. 𑀲𑁆𑀬𑀸.)] 𑀫𑀼𑀤𑁆𑀤𑀺𑀓𑀧𑀸𑀦𑀁 𑀲𑀸𑀮𑀽𑀓𑀧𑀸𑀦𑀁 𑀨𑀸𑀭𑀼𑀲𑀓𑀧𑀸𑀦𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 𑀞𑀧𑁂𑀢𑁆𑀯𑀸 𑀥𑀜𑁆𑀜𑀨𑀮𑀭𑀲𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀢𑁆𑀢𑀭𑀲𑀁 𑀞𑀧𑁂𑀢𑁆𑀯𑀸 ¶ 𑀟𑀸𑀓𑀭𑀲𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀼𑀧𑁆𑀨𑀭𑀲𑀁 𑀞𑀧𑁂𑀢𑁆𑀯𑀸 𑀫𑀥𑀽𑀓𑀧𑀼𑀧𑁆𑀨𑀭𑀲𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀭𑀲’’𑀦𑁆𑀢𑀺.

𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 ¶ 𑀅𑀘𑁆𑀘𑀬𑁂𑀦 𑀲𑀓𑁂 𑀅𑀲𑁆𑀲𑀫𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀓𑁂𑀡𑀺𑀬𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀓𑁂𑀡𑀺𑀬𑀁 𑀚𑀝𑀺𑀮𑀁 𑀪𑀕𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸 𑀬𑀜𑁆𑀜𑀸, 𑀲𑀸𑀯𑀺𑀢𑁆𑀢𑀻 𑀙𑀦𑁆𑀤𑀲𑁄 𑀫𑀼𑀔𑀁;

𑀭𑀸𑀚𑀸 𑀫𑀼𑀔𑀁 𑀫𑀦𑀼𑀲𑁆𑀲𑀸𑀦𑀁, 𑀦𑀤𑀻𑀦𑀁 𑀲𑀸𑀕𑀭𑁄 𑀫𑀼𑀔𑀁.

‘‘𑀦𑀓𑁆𑀔𑀢𑁆𑀢𑀸𑀦𑀁 𑀫𑀼𑀔𑀁 𑀘𑀦𑁆𑀤𑁄, 𑀆𑀤𑀺𑀘𑁆𑀘𑁄 𑀢𑀧𑀢𑀁 𑀫𑀼𑀔𑀁;

𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑀸𑀦𑀁 𑀲𑀗𑁆𑀖𑁄, 𑀯𑁂 𑀬𑀚𑀢𑀁 𑀫𑀼𑀔’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀓𑁂𑀡𑀺𑀬𑀁 𑀚𑀝𑀺𑀮𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁮𑁩. 𑀭𑁄𑀚𑀫𑀮𑁆𑀮𑀯𑀢𑁆𑀣𑀼

𑁩𑁦𑁧. 𑀅𑀣 ¶ ¶ 𑀔𑁄 𑀪𑀕𑀯𑀸 𑀆𑀧𑀡𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺. 𑀢𑁂 𑀲𑀗𑁆𑀕𑀭𑀁 [𑀲𑀗𑁆𑀓𑀭𑀁 (𑀓.)] 𑀅𑀓𑀁𑀲𑀼 𑁋 ‘‘𑀬𑁄 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 ¶ 𑀓𑀭𑀺𑀲𑁆𑀲𑀢𑀺, 𑀧𑀜𑁆𑀘𑀲𑀢𑀸𑀦𑀺𑀲𑁆𑀲 𑀤𑀡𑁆𑀟𑁄’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑁄𑀚𑁄 𑀫𑀮𑁆𑀮𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀳𑀸𑀬𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀢𑀤𑀯𑀲𑀭𑀺. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀁𑀲𑀼. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 ¶ 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀭𑁄𑀚𑀁 𑀫𑀮𑁆𑀮𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋 ‘‘𑀉𑀴𑀸𑀭𑀁 𑀔𑁄 𑀢𑁂 𑀇𑀤𑀁, 𑀆𑀯𑀼𑀲𑁄 𑀭𑁄𑀚, 𑀬𑀁 𑀢𑁆𑀯𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀻’’𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑀳𑀼𑀓𑀢𑁄 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸; 𑀅𑀧𑀺 𑀘 𑀜𑀸𑀢𑀻𑀳𑀺 𑀲𑀗𑁆𑀕𑀭𑁄 𑀓𑀢𑁄 𑁋 ‘𑀬𑁄 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑀺𑀲𑁆𑀲𑀢𑀺, 𑀧𑀜𑁆𑀘𑀲𑀢𑀸𑀦𑀺𑀲𑁆𑀲 𑀤𑀡𑁆𑀟𑁄’’’𑀢𑀺; 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀜𑀸𑀢𑀻𑀦𑀁 𑀤𑀡𑁆𑀟𑀪𑀬𑀸 𑀏𑀯𑀸𑀳𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺’ 𑀓𑀣𑀜𑁆𑀳𑀺 𑀦𑀸𑀫 𑀭𑁄𑀚𑁄 𑀫𑀮𑁆𑀮𑁄 𑀏𑀯𑀁 𑀯𑀓𑁆𑀔𑀢𑀻’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀭𑁄𑀚𑁄 𑀫𑀮𑁆𑀮𑁄 𑀅𑀪𑀺𑀜𑁆𑀜𑀸𑀢𑁄 𑀜𑀸𑀢𑀫𑀦𑀼𑀲𑁆𑀲𑁄. 𑀫𑀳𑀢𑁆𑀣𑀺𑀓𑁄 𑀔𑁄 𑀧𑀦 𑀏𑀯𑀭𑀽𑀧𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀸𑀤𑁄. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 ¶ 𑀓𑀭𑁄𑀢𑀼, 𑀬𑀣𑀸 𑀭𑁄𑀚𑁄 𑀫𑀮𑁆𑀮𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀻𑀤𑁂𑀬𑁆𑀬𑀸’’𑀢𑀺. ‘‘𑀦 𑀔𑁄 𑀢𑀁, 𑀆𑀦𑀦𑁆𑀤, 𑀤𑀼𑀓𑁆𑀓𑀭𑀁 𑀢𑀣𑀸𑀕𑀢𑁂𑀦, 𑀬𑀣𑀸 𑀭𑁄𑀚𑁄 𑀫𑀮𑁆𑀮𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀻𑀤𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀭𑁄𑀚𑀁 𑀫𑀮𑁆𑀮𑀁 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀪𑀕𑀯𑀢𑁄 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀼𑀝𑁆𑀞𑁄, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀸𑀯𑀺𑀁 𑀢𑀭𑀼𑀡𑀯𑀘𑁆𑀙𑁄, 𑀏𑀯𑀫𑁂𑀯, 𑀯𑀺𑀳𑀸𑀭𑁂𑀦 ¶ 𑀯𑀺𑀳𑀸𑀭𑀁 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑀳𑀁 𑀦𑀼 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. ‘‘𑀏𑀲𑀸𑀯𑀼𑀲𑁄 𑀭𑁄𑀚, 𑀯𑀺𑀳𑀸𑀭𑁄 ¶ 𑀲𑀁𑀯𑀼𑀢𑀤𑁆𑀯𑀸𑀭𑁄, 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀴𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀳𑀺, 𑀯𑀺𑀯𑀭𑀺𑀲𑁆𑀲𑀢𑀺 𑀢𑁂 𑀪𑀕𑀯𑀸 𑀤𑁆𑀯𑀸𑀭’’𑀦𑁆𑀢𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀬𑁂𑀦 𑀲𑁄 𑀯𑀺𑀳𑀸𑀭𑁄 𑀲𑀁𑀯𑀼𑀢𑀤𑁆𑀯𑀸𑀭𑁄, 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀴𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀺. 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀁. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀭𑁄𑀚𑀲𑁆𑀲 𑀫𑀮𑁆𑀮𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁…𑀧𑁂… ¶ 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀫𑀫𑀜𑁆𑀜𑁂𑀯 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀼𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀦𑁄 𑀅𑀜𑁆𑀜𑁂𑀲’’𑀦𑁆𑀢𑀺. ‘‘𑀬𑁂𑀲𑀁 𑀔𑁄, 𑀭𑁄𑀚, 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦 𑀲𑁂𑀓𑁆𑀔𑁂𑀦 𑀤𑀲𑁆𑀲𑀦𑁂𑀦 𑀥𑀫𑁆𑀫𑁄 𑀤𑀺𑀝𑁆𑀞𑁄 𑀲𑁂𑀬𑁆𑀬𑀣𑀸𑀧𑀺 𑀢𑀬𑀸, 𑀢𑁂𑀲𑀫𑁆𑀧𑀺 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀦𑀽𑀦 𑀅𑀬𑁆𑀬𑀸 𑀅𑀫𑁆𑀳𑀸𑀓𑀜𑁆𑀜𑁂𑀯 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀼𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀦𑁄 𑀅𑀜𑁆𑀜𑁂𑀲’𑀦𑁆𑀢𑀺. 𑀢𑁂𑀦 𑀳𑀺, 𑀭𑁄𑀚, 𑀢𑀯 𑀘𑁂𑀯 𑀧𑀝𑀺𑀕𑁆𑀕𑀳𑀺𑀲𑁆𑀲𑀦𑁆𑀢𑀺 𑀅𑀜𑁆𑀜𑁂𑀲𑀜𑁆𑀘𑀸’’𑀢𑀺.

𑁩𑁦𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀓𑀼𑀲𑀺𑀦𑀸𑀭𑀸𑀬𑀁 𑀧𑀡𑀻𑀢𑀸𑀦𑀁 𑀪𑀢𑁆𑀢𑀸𑀦𑀁 𑀪𑀢𑁆𑀢𑀧𑀝𑀺𑀧𑀸𑀝𑀺 𑀅𑀝𑁆𑀞𑀺𑀢𑀸 𑀳𑁄𑀢𑀺. 𑀅𑀣 𑀔𑁄 𑀭𑁄𑀚𑀲𑁆𑀲 𑀫𑀮𑁆𑀮𑀲𑁆𑀲 𑀧𑀝𑀺𑀧𑀸𑀝𑀺𑀁 𑀅𑀮𑀪𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀬𑁆𑀬𑀁, 𑀬𑀁 𑀪𑀢𑁆𑀢𑀕𑁆𑀕𑁂 𑀦𑀸𑀲𑁆𑀲, 𑀢𑀁 𑀧𑀝𑀺𑀬𑀸𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑁂 𑀦𑀸𑀤𑁆𑀤𑀲 𑁋 𑀟𑀸𑀓𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑀜𑁆𑀘. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 ¶ 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀧𑀝𑀺𑀧𑀸𑀝𑀺𑀁 𑀅𑀮𑀪𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀬𑁆𑀬𑀁, 𑀬𑀁 𑀪𑀢𑁆𑀢𑀕𑁆𑀕𑁂 𑀦𑀸𑀲𑁆𑀲, 𑀢𑀁 𑀧𑀝𑀺𑀬𑀸𑀤𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀢𑁆𑀢𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑁂 𑀦𑀸𑀤𑁆𑀤𑀲𑀁 𑁋 𑀟𑀸𑀓𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑀜𑁆𑀘. 𑀲𑀘𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀧𑀝𑀺𑀬𑀸𑀤𑁂𑀬𑁆𑀬𑀁 𑀟𑀸𑀓𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑀜𑁆𑀘, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀫𑁂 𑀪𑀕𑀯𑀸’’𑀢𑀺? ‘‘𑀢𑁂𑀦 𑀳𑀺, 𑀭𑁄𑀚, 𑀪𑀕𑀯𑀦𑁆𑀢𑀁 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀢𑁂𑀦 𑀳𑀸𑀦𑀦𑁆𑀤, 𑀧𑀝𑀺𑀬𑀸𑀤𑁂𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀭𑁄𑀚, 𑀧𑀝𑀺𑀬𑀸𑀤𑁂𑀳𑀻’’𑀢𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 ¶ 𑀧𑀳𑀽𑀢𑀁 𑀟𑀸𑀓𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀟𑀸𑀓𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑀜𑁆𑀘𑀸’’𑀢𑀺. ‘‘𑀢𑁂𑀦 𑀳𑀺, 𑀭𑁄𑀚, 𑀪𑀺𑀓𑁆𑀔𑀽𑀦𑀁 𑀤𑁂𑀳𑀻’’𑀢𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 ¶ . ‘‘𑀧𑀝𑀺𑀕𑁆𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺. 𑀅𑀣 𑀔𑁄 𑀭𑁄𑀚𑁄 𑀫𑀮𑁆𑀮𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀳𑀽𑀢𑁂𑀳𑀺 𑀟𑀸𑀓𑁂𑀳𑀺 𑀘 𑀧𑀺𑀝𑁆𑀞𑀔𑀸𑀤𑀦𑀻𑀬𑁂𑀳𑀺 𑀘 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀥𑁄𑀢𑀳𑀢𑁆𑀣𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑁄𑀚𑀁 𑀫𑀮𑁆𑀮𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀜𑁆𑀘 𑀟𑀸𑀓𑀁 𑀲𑀩𑁆𑀩𑀜𑁆𑀘 𑀧𑀺𑀝𑁆𑀞𑀔𑀸𑀤𑀦𑀻𑀬’’𑀦𑁆𑀢𑀺.

𑀭𑁄𑀚𑀫𑀮𑁆𑀮𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁮𑁪. 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑁩𑁦𑁩. 𑀅𑀣 ¶ 𑀔𑁄 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀆𑀢𑀼𑀫𑀸 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀆𑀢𑀼𑀫𑀸𑀬𑀁 𑀧𑀝𑀺𑀯𑀲𑀢𑀺 𑀦𑀳𑀸𑀧𑀺𑀢𑀧𑀼𑀩𑁆𑀩𑁄. 𑀢𑀲𑁆𑀲 𑀤𑁆𑀯𑁂 𑀤𑀸𑀭𑀓𑀸 𑀳𑁄𑀦𑁆𑀢𑀺, 𑀫𑀜𑁆𑀚𑀼𑀓𑀸 𑀧𑀝𑀺𑀪𑀸𑀦𑁂𑀬𑁆𑀬𑀓𑀸, 𑀤𑀓𑁆𑀔𑀸 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑀸 𑀲𑀓𑁂 𑀆𑀘𑀭𑀺𑀬𑀓𑁂 𑀦𑀳𑀸𑀧𑀺𑀢𑀓𑀫𑁆𑀫𑁂. 𑀅𑀲𑁆𑀲𑁄𑀲𑀺 𑀔𑁄 𑀲𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑁋 ‘‘𑀪𑀕𑀯𑀸 𑀓𑀺𑀭 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 ¶ 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑁂 𑀤𑀸𑀭𑀓𑁂 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸 𑀓𑀺𑀭, 𑀢𑀸𑀢𑀸, 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀢𑀸𑀢𑀸, 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸𑀯𑀸𑀧𑀓𑁂𑀦 𑀅𑀦𑀼𑀖𑀭𑀓𑀁 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀣, 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀁𑀳𑀭𑀣, 𑀪𑀕𑀯𑀢𑁄 𑀆𑀕𑀢𑀲𑁆𑀲 𑀬𑀸𑀕𑀼𑀧𑀸𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀢𑀸𑀢𑀸’’𑀢𑀺 𑀔𑁄 𑀢𑁂 𑀤𑀸𑀭𑀓𑀸 𑀢𑀲𑁆𑀲 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸𑀯𑀸𑀧𑀓𑁂𑀦 𑀅𑀦𑀼𑀖𑀭𑀓𑀁 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀦𑁆𑀢𑀺, 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀁𑀳𑀭𑀦𑁆𑀢𑀸. 𑀫𑀦𑀼𑀲𑁆𑀲𑀸 𑀢𑁂 𑀤𑀸𑀭𑀓𑁂 𑀫𑀜𑁆𑀚𑀼𑀓𑁂 𑀧𑀝𑀺𑀪𑀸𑀦𑁂𑀬𑁆𑀬𑀓𑁂 𑀧𑀲𑁆𑀲𑀺𑀢𑁆𑀯𑀸 𑀬𑁂𑀧𑀺 𑀦 𑀓𑀸𑀭𑀸𑀧𑁂𑀢𑀼𑀓𑀸𑀫𑀸 𑀢𑁂𑀧𑀺 𑀓𑀸𑀭𑀸𑀧𑁂𑀦𑁆𑀢𑀺, 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀩𑀳𑀼𑀁 𑀤𑁂𑀦𑁆𑀢𑀺. 𑀅𑀣 𑀔𑁄 𑀢𑁂 𑀤𑀸𑀭𑀓𑀸 𑀩𑀳𑀼𑀁 𑀮𑁄𑀡𑀫𑁆𑀧𑀺, 𑀢𑁂𑀮𑀫𑁆𑀧𑀺, 𑀢𑀡𑁆𑀟𑀼𑀮𑀫𑁆𑀧𑀺, 𑀔𑀸𑀤𑀦𑀻𑀬𑀫𑁆𑀧𑀺 𑀲𑀁𑀳𑀭𑀺𑀁𑀲𑀼.

𑀅𑀣 ¶ 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 ¶ 𑀆𑀢𑀼𑀫𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀆𑀢𑀼𑀫𑀸𑀬𑀁 𑀯𑀺𑀳𑀭𑀢𑀺 𑀪𑀼𑀲𑀸𑀕𑀸𑀭𑁂. 𑀅𑀣 𑀔𑁄 𑀲𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀳𑀽𑀢𑀁 𑀬𑀸𑀕𑀼𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀬𑀸𑀕𑀼’’𑀦𑁆𑀢𑀺. 𑀚𑀸𑀦𑀦𑁆𑀢𑀸𑀧𑀺 ¶ 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺…𑀧𑁂… 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀼𑀢𑀸𑀬𑀁, 𑀪𑀺𑀓𑁆𑀔𑀼 𑀬𑀸𑀕𑀽’’𑀢𑀺? 𑀅𑀣 𑀔𑁄 𑀲𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸, ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑀩𑁆𑀩𑀚𑀺𑀢𑁄 𑀅𑀓𑀧𑁆𑀧𑀺𑀬𑁂 𑀲𑀫𑀸𑀤𑀧𑁂𑀲𑁆𑀲𑀲𑀺 [𑀲𑀫𑀸𑀤𑀧𑁂𑀲𑀺 (𑀓.)]. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑁂𑀦 𑀅𑀓𑀧𑁆𑀧𑀺𑀬𑁂 𑀲𑀫𑀸𑀤𑀧𑁂𑀢𑀩𑁆𑀩𑀁, 𑀬𑁄 𑀲𑀫𑀸𑀤𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀦𑀳𑀸𑀧𑀺𑀢𑀧𑀼𑀩𑁆𑀩𑁂𑀦 𑀔𑀼𑀭𑀪𑀡𑁆𑀟𑀁 𑀧𑀭𑀺𑀳𑀭𑀺𑀢𑀩𑁆𑀩𑀁. 𑀬𑁄 𑀧𑀭𑀺𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀢𑀼𑀫𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 ¶ 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀩𑀳𑀼𑀁 𑀨𑀮𑀔𑀸𑀤𑀦𑀻𑀬𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀨𑀮𑀔𑀸𑀤𑀦𑀻𑀬𑀁 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀔𑀸𑀤𑀦𑀻𑀬’’𑀦𑁆𑀢𑀺.

𑁩𑁦𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀺𑀓𑀸𑀦𑀺 𑀩𑀻𑀚𑀸𑀦𑀺 𑀧𑀼𑀕𑁆𑀕𑀮𑀺𑀓𑀸𑀬 𑀪𑀽𑀫𑀺𑀬𑀸 𑀭𑁄𑀧𑀺𑀬𑀦𑁆𑀢𑀺, 𑀧𑀼𑀕𑁆𑀕𑀮𑀺𑀓𑀸𑀦𑀺 𑀩𑀻𑀚𑀸𑀦𑀺 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀭𑁄𑀧𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀗𑁆𑀖𑀺𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀸𑀦𑀺 𑀧𑀼𑀕𑁆𑀕𑀮𑀺𑀓𑀸𑀬 𑀪𑀽𑀫𑀺𑀬𑀸 𑀭𑁄𑀧𑀺𑀢𑀸𑀦𑀺 𑀪𑀸𑀕𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀧𑀼𑀕𑁆𑀕𑀮𑀺𑀓𑀸𑀦𑀺 𑀩𑀻𑀚𑀸𑀦𑀺 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀭𑁄𑀧𑀺𑀢𑀸𑀦𑀺 𑀪𑀸𑀕𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺.

𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁧𑁮𑁫. 𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸

𑁩𑁦𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀢𑀜𑁆𑀘𑁂 ¶ 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 ¶ 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁 𑀢𑀜𑁆𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 ¶ 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀫𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀫𑀓𑀸𑀮𑀺𑀓𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀫𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀫𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀫𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀺. 𑀬𑀸𑀫𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 ¶ 𑀦 𑀓𑀧𑁆𑀧𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺.

𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁄 𑀙𑀝𑁆𑀞𑁄.

𑁧𑁮𑁬. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀲𑀸𑀭𑀤𑀺𑀓𑁂 ¶ 𑀯𑀺𑀓𑀸𑀮𑁂𑀧𑀺, 𑀯𑀲𑀁 𑀫𑀽𑀮𑁂 𑀧𑀺𑀝𑁆𑀞𑁂𑀳𑀺 𑀘;

𑀓𑀲𑀸𑀯𑁂𑀳𑀺 𑀧𑀡𑁆𑀡𑀁 𑀨𑀮𑀁, 𑀚𑀢𑀼 𑀮𑁄𑀡𑀁 𑀙𑀓𑀡𑀜𑁆𑀘.

𑀘𑀼𑀡𑁆𑀡𑀁 𑀘𑀸𑀮𑀺𑀦𑀺 𑀫𑀁𑀲𑀜𑁆𑀘, 𑀅𑀜𑁆𑀚𑀦𑀁 𑀉𑀧𑀧𑀺𑀲𑀦𑀻 [𑀉𑀧𑀧𑀺𑀁 𑀲𑀦𑀻 (𑀲𑀻.), 𑀉𑀧𑀧𑀺𑀁 𑀲𑀦𑀁 (𑀲𑁆𑀬𑀸.)];

𑀅𑀜𑁆𑀚𑀦𑀻 𑀉𑀘𑁆𑀘𑀸𑀧𑀸𑀭𑀼𑀢𑀸, 𑀲𑀮𑀸𑀓𑀸 𑀲𑀮𑀸𑀓𑀞𑀸𑀦𑀺𑀁 [𑀲𑀮𑀸𑀓𑁄𑀥𑀦𑀻 (𑀲𑀻. 𑀲𑁆𑀬𑀸.)].

𑀣𑀯𑀺𑀓𑀁𑀲𑀩𑀤𑁆𑀥𑀓𑀁 ¶ 𑀲𑀼𑀢𑁆𑀢𑀁, 𑀫𑀼𑀤𑁆𑀥𑀦𑀺𑀢𑁂𑀮𑀦𑀢𑁆𑀣𑀼 𑀘;

𑀦𑀢𑁆𑀣𑀼𑀓𑀭𑀡𑀻 𑀥𑀽𑀫𑀜𑁆𑀘, 𑀦𑁂𑀢𑁆𑀢𑀜𑁆𑀘𑀸𑀧𑀺𑀥𑀦𑀢𑁆𑀣𑀯𑀺.

𑀢𑁂𑀮𑀧𑀸𑀓𑁂𑀲𑀼 𑀫𑀚𑁆𑀚𑀜𑁆𑀘, 𑀅𑀢𑀺𑀓𑁆𑀔𑀺𑀢𑁆𑀢𑀁 𑀅𑀩𑁆𑀪𑀜𑁆𑀚𑀦𑀁;

𑀢𑀼𑀫𑁆𑀩𑀁 𑀲𑁂𑀤𑀁 𑀲𑀫𑁆𑀪𑀸𑀭𑀜𑁆𑀘, 𑀫𑀳𑀸 𑀪𑀗𑁆𑀕𑁄𑀤𑀓𑀁 𑀢𑀣𑀸.

𑀤𑀓𑀓𑁄𑀝𑁆𑀞𑀁 𑀮𑁄𑀳𑀺𑀢𑀜𑁆𑀘, 𑀯𑀺𑀲𑀸𑀡𑀁 𑀧𑀸𑀤𑀩𑁆𑀪𑀜𑁆𑀚𑀦𑀁;

𑀧𑀚𑁆𑀚𑀁 𑀲𑀢𑁆𑀣𑀁 𑀓𑀲𑀸𑀯𑀜𑁆𑀘, 𑀢𑀺𑀮𑀓𑀓𑁆𑀓𑀁 𑀓𑀩𑀴𑀺𑀓𑀁.

𑀘𑁄𑀴𑀁 ¶ 𑀲𑀸𑀲𑀧𑀓𑀼𑀝𑁆𑀝𑀜𑁆𑀘, 𑀥𑀽𑀫 𑀲𑀓𑁆𑀔𑀭𑀺𑀓𑀸𑀬 𑀘;

𑀯𑀡𑀢𑁂𑀮𑀁 𑀯𑀺𑀓𑀸𑀲𑀺𑀓𑀁, 𑀯𑀺𑀓𑀝𑀜𑁆𑀘 𑀧𑀝𑀺𑀕𑁆𑀕𑀳𑀁.

𑀕𑀽𑀣𑀁 𑀓𑀭𑁄𑀦𑁆𑀢𑁄 𑀮𑁄𑀴𑀺𑀜𑁆𑀘, 𑀔𑀸𑀭𑀁 𑀫𑀼𑀢𑁆𑀢𑀳𑀭𑀻𑀢𑀓𑀁;

𑀕𑀦𑁆𑀥𑀸 𑀯𑀺𑀭𑁂𑀘𑀦𑀜𑁆𑀘𑁂𑀯, 𑀅𑀘𑁆𑀙𑀸𑀓𑀝𑀁 𑀓𑀝𑀸𑀓𑀝𑀁.

𑀧𑀝𑀺𑀘𑁆𑀙𑀸𑀤𑀦𑀺 ¶ ¶ 𑀧𑀩𑁆𑀪𑀸𑀭𑀸, 𑀆𑀭𑀸𑀫 𑀲𑀢𑁆𑀢𑀸𑀳𑁂𑀦 𑀘;

𑀕𑀼𑀴𑀁 𑀫𑀼𑀕𑁆𑀕𑀁 𑀲𑁄𑀯𑀻𑀭𑀜𑁆𑀘, 𑀲𑀸𑀫𑀁𑀧𑀸𑀓𑀸 𑀧𑀼𑀦𑀸𑀧𑀘𑁂.

𑀧𑀼𑀦𑀸𑀦𑀼𑀜𑁆𑀜𑀸𑀲𑀺 𑀤𑀼𑀩𑁆𑀪𑀺𑀓𑁆𑀔𑁂, 𑀨𑀮𑀜𑁆𑀘 𑀢𑀺𑀮𑀔𑀸𑀤𑀦𑀻;

𑀧𑀼𑀭𑁂𑀪𑀢𑁆𑀢𑀁 𑀓𑀸𑀬𑀟𑀸𑀳𑁄, 𑀦𑀺𑀩𑁆𑀩𑀢𑁆𑀢𑀜𑁆𑀘 𑀪𑀕𑀦𑁆𑀤𑀮𑀁.

𑀯𑀢𑁆𑀣𑀺𑀓𑀫𑁆𑀫𑀜𑁆𑀘 𑀲𑀼𑀧𑁆𑀧𑀺𑀜𑁆𑀘, 𑀫𑀦𑀼𑀲𑁆𑀲𑀫𑀁𑀲𑀫𑁂𑀯 𑀘;

𑀳𑀢𑁆𑀣𑀺𑀅𑀲𑁆𑀲𑀸 𑀲𑀼𑀦𑀔𑁄 𑀘, 𑀅𑀳𑀺 𑀲𑀻𑀳𑀜𑁆𑀘 𑀤𑀻𑀧𑀺𑀓𑀁 [𑀳𑀢𑁆𑀣𑀺𑀅𑀲𑁆𑀲𑀲𑀼𑀦𑀔𑀸𑀳𑀺, 𑀲𑀻𑀳𑀩𑁆𑀬𑀕𑁆𑀖𑀜𑁆𑀘 𑀤𑀻𑀧𑀺𑀓𑀁 (𑀲𑀻.)].

𑀅𑀘𑁆𑀙𑀢𑀭𑀘𑁆𑀙𑀫𑀁𑀲𑀜𑁆𑀘, 𑀧𑀝𑀺𑀧𑀸𑀝𑀺 𑀘 𑀬𑀸𑀕𑀼 𑀘;

𑀢𑀭𑀼𑀡𑀁 𑀅𑀜𑁆𑀜𑀢𑁆𑀭 𑀕𑀼𑀴𑀁, 𑀲𑀼𑀦𑀺𑀥𑀸𑀯𑀲𑀣𑀸𑀕𑀸𑀭𑀁.

𑀕𑀗𑁆𑀕𑀸 𑀓𑁄𑀝𑀺𑀲𑀘𑁆𑀘𑀓𑀣𑀸, 𑀅𑀫𑁆𑀩𑀧𑀸𑀮𑀻 𑀘 𑀮𑀺𑀘𑁆𑀙𑀯𑀻;

𑀉𑀤𑁆𑀤𑀺𑀲𑁆𑀲 𑀓𑀢𑀁 𑀲𑀼𑀪𑀺𑀓𑁆𑀔𑀁, 𑀧𑀼𑀦𑀤𑁂𑀯 𑀧𑀝𑀺𑀓𑁆𑀔𑀺𑀧𑀺.

𑀫𑁂𑀖𑁄 𑀬𑀲𑁄 𑀫𑁂𑀡𑁆𑀟𑀓𑁄, 𑀘 𑀕𑁄𑀭𑀲𑀁 𑀧𑀸𑀣𑁂𑀬𑁆𑀬𑀓𑁂𑀦 𑀘;

𑀓𑁂𑀡𑀺 𑀅𑀫𑁆𑀩𑁄 𑀚𑀫𑁆𑀩𑀼 𑀘𑁄𑀘, 𑀫𑁄𑀘𑀫𑀥𑀼𑀫𑀼𑀤𑁆𑀤𑀺𑀓𑀲𑀸𑀮𑀼𑀓𑀁.

𑀨𑀸𑀭𑀼𑀲𑀓𑀸 𑀟𑀸𑀓𑀧𑀺𑀝𑁆𑀞𑀁, 𑀆𑀢𑀼𑀫𑀸𑀬𑀁 𑀦𑀳𑀸𑀧𑀺𑀢𑁄;

𑀲𑀸𑀯𑀢𑁆𑀣𑀺𑀬𑀁 𑀨𑀮𑀁 𑀩𑀻𑀚𑀁, 𑀓𑀺𑀲𑁆𑀫𑀺𑀁 𑀞𑀸𑀦𑁂 𑀘 𑀓𑀸𑀮𑀺𑀓𑁂𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀏𑀓𑀲𑀢𑀁 𑀙𑀯𑀢𑁆𑀣𑀼.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁭. 𑀓𑀣𑀺𑀦𑀓𑁆𑀔𑀦𑁆𑀥𑀓𑁄

𑁧𑁮𑁭. 𑀓𑀣𑀺𑀦𑀸𑀦𑀼𑀚𑀸𑀦𑀦𑀸

𑁩𑁦𑁬. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 [𑀧𑀸𑀞𑁂𑀬𑁆𑀬𑀓𑀸 (𑀲𑀻. 𑀲𑁆𑀬𑀸.)] 𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸 𑀲𑀩𑁆𑀩𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸 𑀲𑀩𑁆𑀩𑁂 𑀢𑁂𑀘𑀻𑀯𑀭𑀺𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀦𑀸𑀲𑀓𑁆𑀔𑀺𑀁𑀲𑀼 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀁 𑀲𑀫𑁆𑀪𑀸𑀯𑁂𑀢𑀼𑀁; 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑀸 𑀯𑀲𑁆𑀲𑀁 𑀯𑀲𑀺𑀁𑀲𑀼 𑁋 𑀆𑀲𑀦𑁆𑀦𑁂𑀯 𑀦𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀇𑀢𑁄 𑀙𑀲𑀼 𑀬𑁄𑀚𑀦𑁂𑀲𑀼, 𑀦 𑀘 𑀫𑀬𑀁 𑀮𑀪𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀫𑀸𑀲𑀘𑁆𑀘𑀬𑁂𑀦 𑀓𑀢𑀸𑀬 𑀧𑀯𑀸𑀭𑀡𑀸𑀬, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂, 𑀉𑀤𑀓𑀲𑀗𑁆𑀕𑀳𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑁂 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀓𑀺𑀮𑀦𑁆𑀢𑀭𑀽𑀧𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀲𑀫𑀕𑁆𑀕𑀸 𑀘 𑀫𑀬𑀁, 𑀪𑀦𑁆𑀢𑁂, 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸 ¶ . 𑀇𑀥 𑀫𑀬𑀁, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀦𑀸𑀲𑀓𑁆𑀔𑀺𑀫𑁆𑀳𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀁 𑀲𑀫𑁆𑀪𑀸𑀯𑁂𑀢𑀼𑀁, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀫𑁆𑀳𑀸. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸 ¶ 𑁋 ‘𑀆𑀲𑀦𑁆𑀦𑁂𑀯 𑀦𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀇𑀢𑁄 𑀙𑀲𑀼 𑀬𑁄𑀚𑀦𑁂𑀲𑀼, 𑀦 𑀘 𑀫𑀬𑀁 𑀮𑀪𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀫𑀸𑀲𑀘𑁆𑀘𑀬𑁂𑀦 𑀓𑀢𑀸𑀬 𑀧𑀯𑀸𑀭𑀡𑀸𑀬, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂, 𑀉𑀤𑀓𑀲𑀗𑁆𑀕𑀳𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑁂 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀓𑀺𑀮𑀦𑁆𑀢𑀭𑀽𑀧𑀸 𑀅𑀤𑁆𑀥𑀸𑀦𑀁 𑀆𑀕𑀢𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 ¶ 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 ¶ 𑀓𑀣𑀺𑀦𑀁 [𑀓𑀞𑀺𑀦𑀁 (𑀲𑀻. 𑀲𑁆𑀬𑀸.)] 𑀅𑀢𑁆𑀣𑀭𑀺𑀢𑀼𑀁. 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀺 𑁋 𑀅𑀦𑀸𑀫𑀦𑁆𑀢𑀘𑀸𑀭𑁄, 𑀅𑀲𑀫𑀸𑀤𑀸𑀦𑀘𑀸𑀭𑁄, 𑀕𑀡𑀪𑁄𑀚𑀦𑀁, 𑀬𑀸𑀯𑀤𑀢𑁆𑀣𑀘𑀻𑀯𑀭𑀁, 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀇𑀫𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁦𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁. 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 ¶ 𑀅𑀢𑁆𑀣𑀭𑀺𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁦𑁮. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀏𑀯𑀁 𑀅𑀦𑀢𑁆𑀣𑀢𑀁. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀥𑁄𑀯𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀘𑀻𑀯𑀭𑀯𑀺𑀘𑀸𑀭𑀡𑀫𑀢𑁆𑀢𑁂𑀦 [𑀦 𑀕𑀡𑁆𑀝𑀼𑀲𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀙𑁂𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀩𑀦𑁆𑀥𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀝𑁆𑀝𑀺𑀬𑀓𑀭𑀡𑀫𑀢𑁆𑀢𑁂𑀦 [𑀦 𑀑𑀯𑀝𑁆𑀝𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀲𑀻. 𑀲𑁆𑀬𑀸.), 𑀦 𑀑𑀯𑀤𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀡𑁆𑀟𑀼𑀲𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀤𑀴𑁆𑀳𑀻𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀦𑀼𑀯𑀸𑀢𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀤𑁆𑀥𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀫𑁆𑀩𑀮𑀫𑀤𑁆𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 ¶ 𑀳𑁄𑀢𑀺 𑀓𑀣𑀺𑀦𑀁 ¶ , 𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 ¶ 𑀅𑀜𑁆𑀜𑀢𑁆𑀭 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 ¶ 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁; 𑀲𑀫𑁆𑀫𑀸 𑀘𑁂𑀯 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀢𑀜𑁆𑀘𑁂 𑀦𑀺𑀲𑁆𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁆𑀧𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑁩𑁦𑁯. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀅𑀳𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀳𑀢𑀓𑀧𑁆𑀧𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀺𑀮𑁄𑀢𑀺𑀓𑀸𑀬 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀁𑀲𑀼𑀓𑀽𑀮𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀸𑀧𑀡𑀺𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁; 𑀲𑀫𑁆𑀫𑀸 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀢𑀜𑁆𑀘𑁂 𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 ¶ . 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑁩𑁧𑁦. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀩𑁆𑀪𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬 𑁋 𑀧𑀓𑁆𑀓𑀫𑀦𑀦𑁆𑀢𑀺𑀓𑀸, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀦𑀸𑀲𑀦𑀦𑁆𑀢𑀺𑀓𑀸, 𑀲𑀯𑀦𑀦𑁆𑀢𑀺𑀓𑀸, 𑀆𑀲𑀸𑀯𑀘𑁆𑀙𑁂𑀤𑀺𑀓𑀸, 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸, 𑀲𑀳𑀼𑀩𑁆𑀪𑀸𑀭𑀸’’𑀢𑀺 [𑀲𑀉𑀩𑁆𑀪𑀸𑀭𑀸𑀢𑀺 (𑀓.)].

𑀓𑀣𑀺𑀦𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮𑁮. 𑀆𑀤𑀸𑀬𑀲𑀢𑁆𑀢𑀓𑀁

𑁩𑁧𑁧. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 ‘‘𑀉𑀩𑁆𑀪𑀢𑀁 ¶ 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 ¶ . 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀆𑀤𑀸𑀬𑀲𑀢𑁆𑀢𑀓𑀁 𑀦𑀺𑀝𑁆𑀞𑀺𑀢𑀁 […𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁 (𑀓.)].

𑁧𑁮𑁯. 𑀲𑀫𑀸𑀤𑀸𑀬𑀲𑀢𑁆𑀢𑀓𑀁

𑁩𑁧𑁨. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 ¶ 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀲𑀫𑀸𑀤𑀸𑀬𑀲𑀢𑁆𑀢𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁦. 𑀆𑀤𑀸𑀬𑀙𑀓𑁆𑀓𑀁

𑁩𑁧𑁩. 𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲𑀁 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 ¶ 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀆𑀤𑀸𑀬𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁧. 𑀲𑀫𑀸𑀤𑀸𑀬𑀙𑀓𑁆𑀓𑀁

𑁩𑁧𑁪. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 ¶ 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 ¶ 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀲𑀫𑀸𑀤𑀸𑀬𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁨. 𑀆𑀤𑀸𑀬𑀧𑀦𑁆𑀦𑀭𑀲𑀓𑀁

𑁩𑁧𑁫. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋

‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 ¶ 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 ¶ ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺 ¶ . 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 ¶ . 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 ¶ ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀆𑀤𑀸𑀬 ¶ 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀲𑀫𑁆𑀪𑀼𑀡𑀸𑀢𑀺 ¶ 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀙𑀓𑁆𑀓𑀁.

𑀆𑀤𑀸𑀬𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁩. 𑀲𑀫𑀸𑀤𑀸𑀬𑀧𑀦𑁆𑀦𑀭𑀲𑀓𑀸𑀤𑀺

𑁩𑁧𑁬. 𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺…𑀧𑁂….

(𑀆𑀤𑀸𑀬𑀯𑀸𑀭𑀲𑀤𑀺𑀲𑀁 ¶ 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.)

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄…𑀧𑁂….

(𑀲𑀫𑀸𑀤𑀸𑀬𑀯𑀸𑀭𑀲𑀤𑀺𑀲𑀁 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.)

𑀲𑀫𑀸𑀤𑀸𑀬𑀧𑀦𑁆𑀦𑀭𑀲𑀓𑀸𑀤𑀺 𑀦𑀺𑀝𑁆𑀞𑀺𑀢𑀸.

𑁧𑁯𑁪. 𑀯𑀺𑀧𑁆𑀧𑀓𑀢𑀲𑀫𑀸𑀤𑀸𑀬𑀧𑀦𑁆𑀦𑀭𑀲𑀓𑀁

𑁩𑁧𑁭. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 ¶ 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 ¶ 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ¶ 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀺𑀓𑀁.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 ¶ . 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 ¶ 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀙𑀓𑁆𑀓𑀁.

𑀯𑀺𑀧𑁆𑀧𑀓𑀢𑀲𑀫𑀸𑀤𑀸𑀬𑀧𑀦𑁆𑀦𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀤𑀸𑀬𑀪𑀸𑀡𑀯𑀸𑀭𑁄.

𑁧𑁯𑁫. 𑀅𑀦𑀸𑀲𑀸𑀤𑁄𑀴𑀲𑀓𑀁

𑁩𑁧𑁮. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺 ¶ . 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 ¶ 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺 ¶ . 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 ¶ ¶ 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀅𑀦𑀸𑀲𑀸𑀤𑁄𑀴𑀲𑀓𑀁 [𑀅𑀦𑀸𑀲𑀸𑀤𑁆𑀯𑀸𑀤𑀲𑀓𑀁 (𑀲𑀻.)] 𑀦𑀺𑀝𑁆𑀞𑀺𑀢𑀁.

𑁧𑁯𑁬. 𑀆𑀲𑀸𑀤𑁄𑀴𑀲𑀓𑀁

𑁩𑁧𑁯. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 ¶ 𑀩𑀳𑀺𑀲𑀻𑀫𑀕𑀢𑁄 ¶ 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 ¶ 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀬𑀢𑁄 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀉𑀩𑁆𑀪𑀢𑀁 𑀓𑀣𑀺𑀦𑀁, 𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺 ¶ , 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀬𑀢𑁄 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀉𑀩𑁆𑀪𑀢𑀁 𑀓𑀣𑀺𑀦𑀁, 𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀬𑀢𑁄 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀉𑀩𑁆𑀪𑀢𑀁 𑀓𑀣𑀺𑀦𑀁, 𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 ¶ 𑀧𑀬𑀺𑀭𑀼𑀧𑀸𑀲𑀺𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀬𑀢𑁄 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀉𑀩𑁆𑀪𑀢𑀁 𑀓𑀣𑀺𑀦𑀁, 𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 𑁋 ‘‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀘𑀻𑀯𑀭𑀸𑀲𑀸𑀬 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀆𑀲𑀸𑀬 𑀮𑀪𑀢𑀺, 𑀅𑀦𑀸𑀲𑀸𑀬 𑀦 𑀮𑀪𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 ¶ 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑁋 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀆𑀲𑀸𑀤𑁄𑀴𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁭. 𑀓𑀭𑀡𑀻𑀬𑀤𑁄𑀴𑀲𑀓𑀁

𑁩𑁨𑁦. 𑀪𑀺𑀓𑁆𑀔𑀼 ¶ ¶ ¶ 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 ¶ 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 ¶ 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ¶ 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 ¶ 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 ¶ 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀦𑀸𑀲𑀸𑀬 𑀮𑀪𑀢𑀺, 𑀆𑀲𑀸𑀬 𑀦 𑀮𑀪𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 ¶ 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀢𑀺 𑀅𑀦𑀥𑀺𑀝𑁆𑀞𑀺𑀢𑁂𑀦; 𑀦𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦 𑀧𑀦𑀲𑁆𑀲 𑀳𑁄𑀢𑀺 𑁋 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀘𑀻𑀯𑀭𑀸𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀢𑀲𑁆𑀲 𑀲𑀸 𑀘𑀻𑀯𑀭𑀸𑀲𑀸 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀓𑀭𑀡𑀻𑀬𑀤𑁄𑀴𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁮. 𑀅𑀧𑀯𑀺𑀮𑀸𑀬𑀦𑀦𑀯𑀓𑀁

𑁩𑁨𑁧. 𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺 𑀘𑀻𑀯𑀭𑀧𑀝𑀺𑀯𑀻𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄 [𑀅𑀧𑀯𑀺𑀦𑀬𑀫𑀸𑀦𑁄 (𑀲𑀻.), 𑀅𑀧𑀘𑀺𑀦𑀬𑀫𑀸𑀦𑁄 (𑀓.)]. 𑀢𑀫𑁂𑀦𑀁 𑀤𑀺𑀲𑀗𑁆𑀕𑀢𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀳𑀁 𑀢𑁆𑀯𑀁, 𑀆𑀯𑀼𑀲𑁄, 𑀯𑀲𑁆𑀲𑀁𑀯𑀼𑀝𑁆𑀞𑁄, 𑀓𑀢𑁆𑀣 𑀘 𑀢𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀝𑁆𑀞𑁄𑀫𑁆𑀳𑀺. 𑀢𑀢𑁆𑀣 𑀘 𑀫𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀘𑀻𑀯𑀭𑀁 𑀆𑀳𑀭, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑀳𑀁 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀬𑀁 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄; 𑀓𑀳𑀁 𑀕𑀫𑀺𑀲𑁆𑀲𑀲𑀻’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 [𑀅𑀫𑀼𑀓𑀜𑁆𑀘 (𑀓.)] 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀫𑁂 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀅𑀕𑀫𑀸𑀲𑀺. 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺…𑀧𑁂… ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ ¶ 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺…𑀧𑁂… ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑁩𑁨𑁨. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺 𑀘𑀻𑀯𑀭𑀧𑀝𑀺𑀯𑀻𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄. 𑀢𑀫𑁂𑀦𑀁 𑀤𑀺𑀲𑀁𑀕𑀢𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀳𑀁 𑀢𑁆𑀯𑀁, 𑀆𑀯𑀼𑀲𑁄, 𑀯𑀲𑁆𑀲𑀁𑀯𑀼𑀝𑁆𑀞𑁄 ¶ , 𑀓𑀢𑁆𑀣 𑀘 𑀢𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀝𑁆𑀞𑁄𑀫𑁆𑀳𑀺, 𑀢𑀢𑁆𑀣 𑀘 𑀫𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀘𑀻𑀯𑀭𑀁 𑀆𑀳𑀭, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑀳𑀁 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀬𑀁 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀆𑀤𑀸𑀬 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀫𑁂𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀆𑀯𑀼𑀲𑁄, 𑀓𑀳𑀁 𑀕𑀫𑀺𑀲𑁆𑀲𑀲𑀻’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀫𑁂 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀅𑀕𑀫𑀸𑀲𑀺, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺 𑀘𑀻𑀯𑀭𑀧𑀝𑀺𑀯𑀻𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄. 𑀢𑀫𑁂𑀦𑀁 𑀤𑀺𑀲𑀁𑀕𑀢𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀳𑀁 𑀢𑁆𑀯𑀁, 𑀆𑀯𑀼𑀲𑁄, 𑀯𑀲𑁆𑀲𑀁𑀯𑀼𑀝𑁆𑀞𑁄, 𑀓𑀢𑁆𑀣 𑀘 𑀢𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀝𑁆𑀞𑁄𑀫𑁆𑀳𑀺, 𑀢𑀢𑁆𑀣 𑀘 𑀫𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀘𑀻𑀯𑀭𑀁 𑀆𑀳𑀭, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑀳𑀁 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀬𑀁 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀆𑀤𑀸𑀬 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀫𑁂𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀺𑀓𑁆𑀔𑀽 ¶ 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀆𑀯𑀼𑀲𑁄, 𑀓𑀳𑀁 𑀕𑀫𑀺𑀲𑁆𑀲𑀲𑀻’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀫𑁂 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀅𑀕𑀫𑀸𑀲𑀺, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺…𑀧𑁂… ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 ¶ . 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑁩𑁨𑁩. 𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺 𑀘𑀻𑀯𑀭𑀧𑀝𑀺𑀯𑀻𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄. 𑀢𑀫𑁂𑀦𑀁 𑀤𑀺𑀲𑀁𑀕𑀢𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀓𑀳𑀁 𑀢𑁆𑀯𑀁, 𑀆𑀯𑀼𑀲𑁄, 𑀯𑀲𑁆𑀲𑀁𑀯𑀼𑀝𑁆𑀞𑁄, 𑀓𑀢𑁆𑀣 𑀘 𑀢𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀫𑀼𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀝𑁆𑀞𑁄𑀫𑁆𑀳𑀺, 𑀢𑀢𑁆𑀣 𑀘 𑀫𑁂 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀘𑀻𑀯𑀭𑀁 𑀆𑀳𑀭, 𑀫𑀬𑀁 𑀢𑁂 𑀇𑀥 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀁 𑀆𑀯𑀸𑀲𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 𑁋 ‘‘𑀓𑀳𑀁 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺? 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀅𑀬𑀁 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀧𑀝𑀺𑀯𑀻𑀲𑁄’’𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀆𑀤𑀸𑀬 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀢𑀁 𑀆𑀯𑀸𑀲𑀁 𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺…𑀧𑁂… ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀺…𑀧𑁂… ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀅𑀧𑀯𑀺𑀮𑀸𑀬𑀦𑀦𑀯𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁯𑁯. 𑀨𑀸𑀲𑀼𑀯𑀺𑀳𑀸𑀭𑀧𑀜𑁆𑀘𑀓𑀁

𑁩𑁨𑁪. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀨𑀸𑀲𑀼𑀯𑀺𑀳𑀸𑀭𑀺𑀓𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺 ¶ , 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 ¶ 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 ¶ 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀨𑀸𑀲𑀼𑀯𑀺𑀳𑀸𑀭𑀺𑀓𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀨𑀸𑀲𑀼𑀯𑀺𑀳𑀸𑀭𑀺𑀓𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 ¶ 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀓𑀬𑀺𑀭𑀫𑀸𑀦𑀁 𑀦𑀲𑁆𑀲𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀨𑀸𑀲𑀼𑀯𑀺𑀳𑀸𑀭𑀺𑀓𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 𑁋 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 ¶ 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀪𑀺𑀓𑁆𑀔𑀼 ¶ 𑀅𑀢𑁆𑀣𑀢𑀓𑀣𑀺𑀦𑁄 𑀨𑀸𑀲𑀼𑀯𑀺𑀳𑀸𑀭𑀺𑀓𑁄 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺 𑁋 ‘‘𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀅𑀫𑀼𑀓𑀁 𑀦𑀸𑀫 𑀆𑀯𑀸𑀲𑀁 𑀕𑀫𑀺𑀲𑁆𑀲𑀸𑀫𑀺; 𑀢𑀢𑁆𑀣 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂 ¶ 𑀫𑁂 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺. 𑀲𑁄 𑀓𑀢𑀘𑀻𑀯𑀭𑁄 ‘‘𑀧𑀘𑁆𑀘𑁂𑀲𑁆𑀲𑀁 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀲𑀫𑁆𑀪𑀼𑀡𑀸𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀪𑀺𑀓𑁆𑀔𑀽𑀳𑀺 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀨𑀸𑀲𑀼𑀯𑀺𑀳𑀸𑀭𑀧𑀜𑁆𑀘𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁦𑁦. 𑀧𑀮𑀺𑀩𑁄𑀥𑀸𑀧𑀮𑀺𑀩𑁄𑀥𑀓𑀣𑀸

𑁩𑁨𑁫. 𑀤𑁆𑀯𑁂𑀫𑁂 ¶ , 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸, 𑀤𑁆𑀯𑁂 𑀅𑀧𑀮𑀺𑀩𑁄𑀥𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸? 𑀆𑀯𑀸𑀲𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑀧𑀮𑀺𑀩𑁄𑀥𑁄 𑀘. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀲𑀢𑀺 𑀯𑀸 𑀢𑀲𑁆𑀫𑀺𑀁 𑀆𑀯𑀸𑀲𑁂, 𑀲𑀸𑀧𑁂𑀓𑁆𑀔𑁄 𑀯𑀸 𑀧𑀓𑁆𑀓𑀫𑀢𑀺 ‘‘𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀅𑀓𑀢𑀁 𑀯𑀸 𑀳𑁄𑀢𑀺 𑀯𑀺𑀧𑁆𑀧𑀓𑀢𑀁 𑀯𑀸, 𑀘𑀻𑀯𑀭𑀸𑀲𑀸 𑀯𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸.

𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀅𑀧𑀮𑀺𑀩𑁄𑀥𑀸? 𑀆𑀯𑀸𑀲𑀅𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑀅𑀧𑀮𑀺𑀩𑁄𑀥𑁄 𑀘. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀅𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀓𑁆𑀓𑀫𑀢𑀺 𑀢𑀫𑁆𑀳𑀸 𑀆𑀯𑀸𑀲𑀸 𑀘𑀢𑁆𑀢𑁂𑀦 𑀯𑀦𑁆𑀢𑁂𑀦 𑀫𑀼𑀢𑁆𑀢𑁂𑀦 𑀅𑀦𑀧𑁂𑀓𑁆𑀔𑁄 [𑀅𑀦𑀧𑁂𑀓𑁆𑀔𑁂𑀦 (𑀓.)] ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀅𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀅𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀓𑀢𑀁 𑀯𑀸 𑀳𑁄𑀢𑀺, 𑀦𑀝𑁆𑀞𑀁 𑀯𑀸 𑀯𑀺𑀦𑀝𑁆𑀞𑀁 𑀯𑀸 𑀤𑀟𑁆𑀠𑀁 ¶ 𑀯𑀸, 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀅𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀅𑀧𑀮𑀺𑀩𑁄𑀥𑀸𑀢𑀺.

𑀧𑀮𑀺𑀩𑁄𑀥𑀸𑀧𑀮𑀺𑀩𑁄𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀣𑀺𑀦𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄 𑀲𑀢𑁆𑀢𑀫𑁄.

𑁨𑁦𑁧. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀢𑀺𑀁𑀲 ¶ ¶ 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽, 𑀲𑀸𑀓𑁂𑀢𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀼𑀁;

𑀯𑀲𑁆𑀲𑀁𑀯𑀼𑀝𑁆𑀞𑁄𑀓𑀧𑀼𑀡𑁆𑀡𑁂𑀳𑀺, 𑀅𑀕𑀫𑀼𑀁 𑀚𑀺𑀦𑀤𑀲𑁆𑀲𑀦𑀁.

𑀇𑀤𑀁 𑀯𑀢𑁆𑀣𑀼 𑀓𑀣𑀺𑀦𑀲𑁆𑀲, 𑀓𑀧𑁆𑀧𑀺𑀲𑁆𑀲𑀦𑁆𑀢𑀺 𑀘 𑀧𑀜𑁆𑀘𑀓𑀸;

𑀅𑀦𑀸𑀫𑀦𑁆𑀢𑀸 𑀅𑀲𑀫𑀸𑀘𑀸𑀭𑀸, 𑀢𑀣𑁂𑀯 𑀕𑀡𑀪𑁄𑀚𑀦𑀁.

𑀬𑀸𑀯𑀤𑀢𑁆𑀣𑀜𑁆𑀘 𑀉𑀧𑁆𑀧𑀸𑀤𑁄, 𑀅𑀢𑁆𑀣𑀢𑀸𑀦𑀁 𑀪𑀯𑀺𑀲𑁆𑀲𑀢𑀺;

𑀜𑀢𑁆𑀢𑀺 𑀏𑀯𑀢𑁆𑀣𑀢𑀜𑁆𑀘𑁂𑀯, 𑀏𑀯𑀜𑁆𑀘𑁂𑀯 𑀅𑀦𑀢𑁆𑀣𑀢𑀁.

𑀉𑀮𑁆𑀮𑀺𑀔𑀺 𑀥𑁄𑀯𑀦𑀸 𑀘𑁂𑀯, 𑀯𑀺𑀘𑀸𑀭𑀡𑀜𑁆𑀘 𑀙𑁂𑀤𑀦𑀁;

𑀩𑀦𑁆𑀥𑀦𑁄 𑀯𑀝𑁆𑀝𑀺 𑀓𑀡𑁆𑀟𑀼𑀲, 𑀤𑀴𑁆𑀳𑀻𑀓𑀫𑁆𑀫𑀸𑀦𑀼𑀯𑀸𑀢𑀺𑀓𑀸.

𑀧𑀭𑀺𑀪𑀡𑁆𑀟𑀁 ¶ 𑀑𑀯𑀤𑁆𑀥𑁂𑀬𑁆𑀬𑀁, 𑀫𑀤𑁆𑀤𑀦𑀸 𑀦𑀺𑀫𑀺𑀢𑁆𑀢𑀁 𑀓𑀣𑀸;

𑀓𑀼𑀓𑁆𑀓𑀼 𑀲𑀦𑁆𑀦𑀺𑀥𑀺 𑀦𑀺𑀲𑁆𑀲𑀕𑁆𑀕𑀺, 𑀦 𑀓𑀧𑁆𑀧𑀜𑁆𑀜𑀢𑁆𑀭 𑀢𑁂 𑀢𑀬𑁄.

𑀅𑀜𑁆𑀜𑀢𑁆𑀭 𑀧𑀜𑁆𑀘𑀸𑀢𑀺𑀭𑁂𑀓𑁂, 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻;

𑀦𑀸𑀜𑁆𑀜𑀢𑁆𑀭 𑀧𑀼𑀕𑁆𑀕𑀮𑀸 𑀲𑀫𑁆𑀫𑀸, 𑀦𑀺𑀲𑁆𑀲𑀻𑀫𑀝𑁆𑀞𑁄𑀦𑀼𑀫𑁄𑀤𑀢𑀺.

𑀓𑀣𑀺𑀦𑀸𑀦𑀢𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀅𑀳𑀢𑀸𑀓𑀧𑁆𑀧𑀧𑀺𑀮𑁄𑀢𑀺, 𑀧𑀁𑀲𑀼 𑀧𑀸𑀧𑀡𑀺𑀓𑀸𑀬 𑀘.

𑀅𑀦𑀺𑀫𑀺𑀢𑁆𑀢𑀸𑀧𑀭𑀺𑀓𑀣𑀸, 𑀅𑀓𑀼𑀓𑁆𑀓𑀼 𑀘 𑀅𑀲𑀦𑁆𑀦𑀺𑀥𑀺;

𑀅𑀦𑀺𑀲𑁆𑀲𑀕𑁆𑀕𑀺 𑀓𑀧𑁆𑀧𑀓𑀢𑁂, 𑀢𑀣𑀸 𑀢𑀺𑀘𑀻𑀯𑀭𑁂𑀦 𑀘.

𑀧𑀜𑁆𑀘𑀓𑁂 𑀯𑀸𑀢𑀺𑀭𑁂𑀓𑁂 𑀯𑀸, 𑀙𑀺𑀦𑁆𑀦𑁂 𑀲𑀫𑀡𑁆𑀟𑀮𑀻𑀓𑀢𑁂;

𑀧𑀼𑀕𑁆𑀕𑀮𑀲𑁆𑀲𑀢𑁆𑀣𑀸𑀭𑀸 ¶ 𑀲𑀫𑁆𑀫𑀸, 𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺.

𑀏𑀯𑀁 ¶ 𑀓𑀣𑀺𑀦𑀢𑁆𑀣𑀭𑀡𑀁, 𑀉𑀩𑁆𑀪𑀸𑀭𑀲𑁆𑀲𑀝𑁆𑀞𑀫𑀸𑀢𑀺𑀓𑀸;

𑀧𑀓𑁆𑀓𑀫𑀦𑀦𑁆𑀢𑀺 𑀦𑀺𑀝𑁆𑀞𑀸𑀦𑀁, 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘 𑀦𑀸𑀲𑀦𑀁.

𑀲𑀯𑀦𑀁 ¶ 𑀆𑀲𑀸𑀯𑀘𑁆𑀙𑁂𑀤𑀺, 𑀲𑀻𑀫𑀸 𑀲𑀳𑀼𑀩𑁆𑀪𑀸𑀭𑀝𑁆𑀞𑀫𑀻;

𑀓𑀢𑀘𑀻𑀯𑀭𑀫𑀸𑀤𑀸𑀬, ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀕𑀘𑁆𑀙𑀢𑀺.

𑀢𑀲𑁆𑀲 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑀸,𑀏 𑀳𑁄𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑁄;

𑀆𑀤𑀸𑀬 𑀘𑀻𑀯𑀭𑀁 𑀬𑀸𑀢𑀺, 𑀦𑀺𑀲𑁆𑀲𑀻𑀫𑁂 𑀇𑀤𑀁 𑀘𑀺𑀦𑁆𑀢𑀬𑀺.

‘‘𑀓𑀸𑀭𑁂𑀲𑁆𑀲𑀁 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀦𑀺𑀝𑁆𑀞𑀸𑀦𑁂 𑀓𑀣𑀺𑀦𑀼𑀤𑁆𑀥𑀸𑀭𑁄;

𑀆𑀤𑀸𑀬 𑀦𑀺𑀲𑁆𑀲𑀻𑀫𑀁 𑀦𑁂𑀯, ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀫𑀸𑀦𑀲𑁄.

𑀢𑀲𑁆𑀲 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀪𑀯𑁂;

𑀆𑀤𑀸𑀬 𑀘𑀻𑀯𑀭𑀁 𑀬𑀸𑀢𑀺, 𑀦𑀺𑀲𑁆𑀲𑀻𑀫𑁂 𑀇𑀤𑀁 𑀘𑀺𑀦𑁆𑀢𑀬𑀺.

‘‘𑀓𑀸𑀭𑁂𑀲𑁆𑀲𑀁 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀓𑀬𑀺𑀭𑀁 𑀢𑀲𑁆𑀲 𑀦𑀲𑁆𑀲𑀢𑀺;

𑀢𑀲𑁆𑀲 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀪𑀯𑀢𑀺 𑀦𑀸𑀲𑀦𑀦𑁆𑀢𑀺𑀓𑁄.

𑀆𑀤𑀸𑀬 𑀬𑀸𑀢𑀺 ‘‘𑀧𑀘𑁆𑀘𑁂𑀲𑁆𑀲𑀁’’, 𑀩𑀳𑀺 𑀓𑀸𑀭𑁂𑀢𑀺 𑀘𑀻𑀯𑀭𑀁;

𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺, 𑀉𑀩𑁆𑀪𑀢𑀁 𑀓𑀣𑀺𑀦𑀁 𑀢𑀳𑀺𑀁.

𑀢𑀲𑁆𑀲 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀪𑀯𑀢𑀺 𑀲𑀯𑀦𑀦𑁆𑀢𑀺𑀓𑁄;

𑀆𑀤𑀸𑀬 𑀬𑀸𑀢𑀺 ‘‘𑀧𑀘𑁆𑀘𑁂𑀲𑁆𑀲𑀁’’, 𑀩𑀳𑀺 𑀓𑀸𑀭𑁂𑀢𑀺 𑀘𑀻𑀯𑀭𑀁.

𑀓𑀢𑀘𑀻𑀯𑀭𑁄 𑀩𑀳𑀺𑀤𑁆𑀥𑀸, 𑀦𑀸𑀫𑁂𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁;

𑀢𑀲𑁆𑀲 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀪𑀯𑁂.

𑀆𑀤𑀸𑀬 𑀬𑀸𑀢𑀺 ‘‘𑀧𑀘𑁆𑀘𑁂𑀲𑁆𑀲𑀁’’, 𑀩𑀳𑀺 𑀓𑀸𑀭𑁂𑀢𑀺 𑀘𑀻𑀯𑀭𑀁;

𑀓𑀢𑀘𑀻𑀯𑀭𑁄 ¶ 𑀧𑀘𑁆𑀘𑁂𑀲𑁆𑀲𑀁, 𑀲𑀫𑁆𑀪𑁄𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁.

𑀢𑀲𑁆𑀲 ¶ 𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀲𑀳 𑀪𑀺𑀓𑁆𑀔𑀽𑀳𑀺 𑀚𑀸𑀬𑀢𑀺;

𑀆𑀤𑀸𑀬 𑀘 𑀲𑀫𑀸𑀤𑀸𑀬, 𑀲𑀢𑁆𑀢-𑀲𑀢𑁆𑀢𑀯𑀺𑀥𑀸 𑀕𑀢𑀺.

𑀧𑀓𑁆𑀓𑀫𑀦𑀦𑁆𑀢𑀺𑀓𑀸 𑀦𑀢𑁆𑀣𑀺, 𑀙𑀓𑁆𑀓𑁂 𑀯𑀺𑀧𑁆𑀧𑀓𑀢𑁂 [𑀙𑀝𑁆𑀞𑁂 𑀯𑀺𑀧𑁆𑀧𑀓𑀢𑀸 (𑀲𑀻.), 𑀙𑀘𑁆𑀘𑀸 𑀯𑀺𑀧𑁆𑀧𑀓𑀣𑀸 (𑀓.)] 𑀕𑀢𑀺;

𑀆𑀤𑀸𑀬 𑀦𑀺𑀲𑁆𑀲𑀻𑀫𑀕𑀢𑀁, 𑀓𑀸𑀭𑁂𑀲𑁆𑀲𑀁 𑀇𑀢𑀺 𑀚𑀸𑀬𑀢𑀺.

𑀦𑀺𑀝𑁆𑀞𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘, 𑀦𑀸𑀲𑀦𑀜𑁆𑀘 𑀇𑀫𑁂 𑀢𑀬𑁄;

𑀆𑀤𑀸𑀬 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀩𑀳𑀺𑀲𑀻𑀫𑁂 𑀓𑀭𑁄𑀫𑀺𑀢𑀺.

𑀦𑀺𑀝𑁆𑀞𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀫𑁆𑀧𑀺, 𑀦𑀸𑀲𑀦𑀫𑁆𑀧𑀺 𑀇𑀤𑀁 𑀢𑀬𑁄;

𑀅𑀦𑀥𑀺𑀝𑁆𑀞𑀺𑀢𑁂𑀦 𑀦𑁂𑀯𑀲𑁆𑀲, 𑀳𑁂𑀝𑁆𑀞𑀸 𑀢𑀻𑀡𑀺 𑀦𑀬𑀸𑀯𑀺𑀥𑀺.

𑀆𑀤𑀸𑀬 ¶ ¶ 𑀬𑀸𑀢𑀺 𑀧𑀘𑁆𑀘𑁂𑀲𑁆𑀲𑀁, 𑀩𑀳𑀺𑀲𑀻𑀫𑁂 𑀓𑀭𑁄𑀫𑀺𑀢𑀺;

‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀓𑀸𑀭𑁂𑀢𑀺, 𑀦𑀺𑀝𑁆𑀞𑀸𑀦𑁂 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀲𑀦𑁆𑀦𑀺𑀝𑁆𑀞𑀸𑀦𑀁 𑀦𑀸𑀲𑀦𑀜𑁆𑀘, 𑀲𑀯𑀦𑀲𑀻𑀫𑀸𑀢𑀺𑀓𑁆𑀓𑀫𑀸;

𑀲𑀳 𑀪𑀺𑀓𑁆𑀔𑀽𑀳𑀺 𑀚𑀸𑀬𑁂𑀣, 𑀏𑀯𑀁 𑀧𑀦𑁆𑀦𑀭𑀲𑀁 𑀕𑀢𑀺.

𑀲𑀫𑀸𑀤𑀸𑀬 𑀯𑀺𑀧𑁆𑀧𑀓𑀢𑀸, 𑀲𑀫𑀸𑀤𑀸𑀬 𑀧𑀼𑀦𑀸 𑀢𑀣𑀸;

𑀇𑀫𑁂 𑀢𑁂 𑀘𑀢𑀼𑀭𑁄 𑀯𑀸𑀭𑀸, 𑀲𑀩𑁆𑀩𑁂 𑀧𑀦𑁆𑀦𑀭𑀲𑀯𑀺𑀥𑀺.

𑀅𑀦𑀸𑀲𑀸𑀬 𑀘 𑀆𑀲𑀸𑀬, 𑀓𑀭𑀡𑀻𑀬𑁄 𑀘 𑀢𑁂 𑀢𑀬𑁄;

𑀦𑀬𑀢𑁄 𑀢𑀁 𑀯𑀺𑀚𑀸𑀦𑁂𑀬𑁆𑀬, 𑀢𑀬𑁄 𑀤𑁆𑀯𑀸𑀤𑀲 𑀤𑁆𑀯𑀸𑀤𑀲.

𑀅𑀧𑀯𑀺𑀮𑀸𑀦𑀸 𑀦𑀯𑁂𑀢𑁆𑀣 [𑀅𑀧𑀯𑀺𑀮𑀸𑀬𑀫𑀸𑀦𑁂𑀯 (𑀲𑁆𑀬𑀸.), 𑀅𑀧𑀯𑀺𑀦𑀸 𑀦𑀯 𑀘𑁂𑀢𑁆𑀣 (𑀲𑀻.)], 𑀨𑀸𑀲𑀼 𑀧𑀜𑁆𑀘𑀯𑀺𑀥𑀸 𑀢𑀳𑀺𑀁;

𑀧𑀮𑀺𑀩𑁄𑀥𑀸𑀧𑀮𑀺𑀩𑁄𑀥𑀸, 𑀉𑀤𑁆𑀤𑀸𑀦𑀁 𑀦𑀬𑀢𑁄 𑀓𑀢𑀦𑁆𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀤𑁄𑀴𑀲𑀓𑀧𑁂𑀬𑁆𑀬𑀸𑀮𑀫𑀼𑀔𑀸𑀦𑀺 𑀏𑀓𑀲𑀢𑀁 𑀅𑀝𑁆𑀞𑀸𑀭𑀲.

𑀓𑀣𑀺𑀦𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓𑁄

𑁨𑁦𑁨. 𑀚𑀻𑀯𑀓𑀯𑀢𑁆𑀣𑀼

𑁩𑁨𑁬. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀺𑀢𑀸 [𑀨𑀻𑀢𑀸 (𑀩𑀳𑀽𑀲𑀼)] 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀸; 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺; 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀸; 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄; 𑀅𑀫𑁆𑀩𑀧𑀸𑀮𑀻 𑀘 𑀕𑀡𑀺𑀓𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀧𑀤𑀓𑁆𑀔𑀺𑀡𑀸 [𑀧𑀤𑀓𑁆𑀔𑀸 (𑀲𑁆𑀬𑀸.)] 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀸 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀸𑀲𑀸𑀬 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀢𑀺; 𑀢𑀸𑀬 𑀘 𑀯𑁂𑀲𑀸𑀮𑀻 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀁 𑀇𑀤𑁆𑀥𑀜𑁆𑀘𑁂𑀯 𑀨𑀺𑀢𑀜𑁆𑀘 𑀩𑀳𑀼𑀚𑀦𑀜𑁆𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀜𑁆𑀘 𑀲𑀼𑀪𑀺𑀓𑁆𑀔𑀜𑁆𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀸𑀲𑀸𑀤𑁂; 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀓𑀽𑀝𑀸𑀕𑀸𑀭𑀸𑀦𑀺; 𑀲𑀢𑁆𑀢 𑀘 𑀆𑀭𑀸𑀫𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑀲𑀢𑀸𑀦𑀺 𑀲𑀢𑁆𑀢 𑀘 𑀆𑀭𑀸𑀫𑁂; 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀧𑁄𑀓𑁆𑀔𑀭𑀡𑀺𑀬𑁄 ¶ ; 𑀅𑀫𑁆𑀩𑀧𑀸𑀮𑀺𑀜𑁆𑀘 𑀕𑀡𑀺𑀓𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀧𑀤𑀓𑁆𑀔𑀺𑀡𑀁 [𑀧𑀤𑀓𑁆𑀔𑀁 (𑀲𑁆𑀬𑀸.)] 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀁 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀸𑀲𑀸𑀬 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺𑀁, 𑀢𑀸𑀬 𑀘 𑀯𑁂𑀲𑀸𑀮𑀺𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀦𑁆𑀢𑀺𑀁.

𑁩𑁨𑁭. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀯𑁂𑀲𑀸𑀮𑀺𑀬𑀁 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 ¶ 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 ¶ 𑀏𑀢𑀤𑀯𑁄𑀘 𑁋 ‘‘𑀯𑁂𑀲𑀸𑀮𑀻, 𑀤𑁂𑀯, 𑀇𑀤𑁆𑀥𑀸 𑀘𑁂𑀯 𑀨𑀺𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀲𑀢𑁆𑀢 𑀘 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺…𑀧𑁂… 𑀢𑀸𑀬 𑀘 𑀯𑁂𑀲𑀸𑀮𑀻 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀧𑀲𑁄𑀪𑀢𑀺. 𑀲𑀸𑀥𑀼, 𑀤𑁂𑀯, 𑀫𑀬𑀫𑁆𑀧𑀺 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺 [𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀫 (𑀓.)]. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀸𑀤𑀺𑀲𑀺𑀁 𑀓𑀼𑀫𑀸𑀭𑀺𑀁 𑀚𑀸𑀦𑀸𑀣 𑀬𑀁 𑀢𑀼𑀫𑁆𑀳𑁂 𑀕𑀡𑀺𑀓𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀣𑀸’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀲𑀸𑀮𑀯𑀢𑀻 𑀦𑀸𑀫 ¶ 𑀓𑀼𑀫𑀸𑀭𑀻 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀲𑀸𑀮𑀯𑀢𑀺𑀁 𑀓𑀼𑀫𑀸𑀭𑀺𑀁 𑀕𑀡𑀺𑀓𑀁 ¶ 𑀯𑀼𑀝𑁆𑀞𑀸𑀧𑁂𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀦𑀘𑀺𑀭𑀲𑁆𑀲𑁂𑀯 𑀧𑀤𑀓𑁆𑀔𑀺𑀡𑀸 𑀅𑀳𑁄𑀲𑀺 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘, 𑀅𑀪𑀺𑀲𑀝𑀸 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀢𑁂𑀦 𑀘 𑀭𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀇𑀢𑁆𑀣𑀻 𑀔𑁄 𑀕𑀩𑁆𑀪𑀺𑀦𑀻 𑀧𑀼𑀭𑀺𑀲𑀸𑀦𑀁 𑀅𑀫𑀦𑀸𑀧𑀸. 𑀲𑀘𑁂 𑀫𑀁 𑀓𑁄𑀘𑀺 𑀚𑀸𑀦𑀺𑀲𑁆𑀲𑀢𑀺 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀕𑀩𑁆𑀪𑀺𑀦𑀻𑀢𑀺, 𑀲𑀩𑁆𑀩𑁄 𑀫𑁂 𑀲𑀓𑁆𑀓𑀸𑀭𑁄 𑀪𑀜𑁆𑀚𑀺𑀲𑁆𑀲𑀢𑀺 [ 𑀧𑀭𑀺𑀳𑀸𑀬𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)]. 𑀬𑀁𑀦𑀽𑀦𑀸𑀳𑀁 𑀕𑀺𑀮𑀸𑀦𑀁 𑀧𑀝𑀺𑀯𑁂𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀤𑁄𑀯𑀸𑀭𑀺𑀓𑀁 𑀆𑀡𑀸𑀧𑁂𑀲𑀺 𑁋 ‘‘𑀫𑀸, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀸𑀯𑀺𑀲𑀺. 𑀬𑁄 𑀘 𑀫𑀁 𑀧𑀼𑀘𑁆𑀙𑀢𑀺, ‘𑀕𑀺𑀮𑀸𑀦𑀸’𑀢𑀺 𑀧𑀝𑀺𑀯𑁂𑀤𑁂𑀳𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣 𑀔𑁄 𑀲𑀸𑀮𑀯𑀢𑀻 𑀕𑀡𑀺𑀓𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀤𑀸𑀭𑀓𑀁 𑀓𑀢𑁆𑀢𑀭𑀲𑀼𑀧𑁆𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀳𑀻’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑀸 𑀤𑀸𑀲𑀻 𑀲𑀸𑀮𑀯𑀢𑀺𑀬𑀸 𑀕𑀡𑀺𑀓𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀓𑀢𑁆𑀢𑀭𑀲𑀼𑀧𑁆𑀧𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀲𑀺.

𑁩𑁨𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀪𑀬𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀓𑀸𑀮𑀲𑁆𑀲𑁂𑀯 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀢𑀁 𑀤𑀸𑀭𑀓𑀁 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 ¶ , 𑀤𑀺𑀲𑁆𑀯𑀸𑀦 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀏𑀢𑀁, 𑀪𑀡𑁂, 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡’’𑀦𑁆𑀢𑀺? ‘‘𑀤𑀸𑀭𑀓𑁄, 𑀤𑁂𑀯𑀸’’𑀢𑀺. ‘‘𑀚𑀻𑀯𑀢𑀺, 𑀪𑀡𑁂’’𑀢𑀺? ‘‘𑀚𑀻𑀯𑀢𑀺, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀁 𑀤𑀸𑀭𑀓𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀤𑁂𑀣 𑀧𑁄𑀲𑁂𑀢𑀼’’𑀦𑁆𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 ¶ 𑀤𑀸𑀭𑀓𑀁 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀅𑀤𑀁𑀲𑀼 𑁋 ‘‘𑀧𑁄𑀲𑁂𑀣𑀸’’𑀢𑀺. 𑀢𑀲𑁆𑀲 𑀚𑀻𑀯𑀢𑀻𑀢𑀺 ‘𑀚𑀻𑀯𑀓𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀓𑀼𑀫𑀸𑀭𑁂𑀦 𑀧𑁄𑀲𑀸𑀧𑀺𑀢𑁄𑀢𑀺 ‘𑀓𑁄𑀫𑀸𑀭𑀪𑀘𑁆𑀘𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀓𑀸 𑀫𑁂, 𑀤𑁂𑀯, 𑀫𑀸𑀢𑀸, 𑀓𑁄 𑀧𑀺𑀢𑀸’’𑀢𑀺? ‘‘𑀅𑀳𑀫𑁆𑀧𑀺 𑀔𑁄 𑀢𑁂, 𑀪𑀡𑁂 𑀚𑀻𑀯𑀓, 𑀫𑀸𑀢𑀭𑀁 𑀦 𑀚𑀸𑀦𑀸𑀫𑀺; 𑀅𑀧𑀺 𑀘𑀸𑀳𑀁 𑀢𑁂 𑀧𑀺𑀢𑀸; 𑀫𑀬𑀸𑀲𑀺 [𑀫𑀬𑀸𑀧𑀺 (𑀓.)] 𑀧𑁄𑀲𑀸𑀧𑀺𑀢𑁄’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀸𑀦𑀺 ¶ 𑀔𑁄 𑀭𑀸𑀚𑀓𑀼𑀮𑀸𑀦𑀺 𑀦 𑀲𑀼𑀓𑀭𑀸𑀦𑀺 𑀅𑀲𑀺𑀧𑁆𑀧𑁂𑀦 𑀉𑀧𑀚𑀻𑀯𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀺𑀧𑁆𑀧𑀁 𑀲𑀺𑀓𑁆𑀔𑁂𑀬𑁆𑀬’’𑀦𑁆𑀢𑀺.

𑁩𑁨𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀓𑁆𑀓𑀲𑀺𑀮𑀸𑀬𑀁 [𑀢𑀓𑁆𑀓𑀲𑀻𑀮𑀸𑀬𑀁 (𑀓.)] 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀯𑁂𑀚𑁆𑀚𑁄 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀅𑀦𑀸𑀧𑀼𑀘𑁆𑀙𑀸 𑀬𑁂𑀦 𑀢𑀓𑁆𑀓𑀲𑀺𑀮𑀸 𑀢𑁂𑀦 ¶ 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀢𑀓𑁆𑀓𑀲𑀺𑀮𑀸, 𑀬𑁂𑀦 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀘𑀭𑀺𑀬, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 ¶ 𑀚𑀻𑀯𑀓, 𑀲𑀺𑀓𑁆𑀔𑀲𑁆𑀲𑀽’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀼𑀜𑁆𑀘 𑀕𑀡𑁆𑀳𑀸𑀢𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀢𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀢𑀺, 𑀕𑀳𑀺𑀢𑀜𑁆𑀘𑀲𑁆𑀲 𑀦 𑀲𑀫𑁆𑀫𑀼𑀲𑁆𑀲𑀢𑀺 [𑀦 𑀧𑀫𑀼𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)]. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁, 𑀔𑁄 𑀩𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀫𑀺, 𑀕𑀳𑀺𑀢𑀜𑁆𑀘 𑀫𑁂 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑁆𑀢 𑀘 𑀫𑁂 𑀯𑀲𑁆𑀲𑀸𑀦𑀺 𑀅𑀥𑀻𑀬𑀦𑁆𑀢𑀲𑁆𑀲, 𑀦𑀬𑀺𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀓𑀤𑀸 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁄 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀆𑀘𑀭𑀺𑀬, 𑀩𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀮𑀳𑀼𑀜𑁆𑀘 𑀕𑀡𑁆𑀳𑀸𑀫𑀺 𑀲𑀼𑀝𑁆𑀞𑀼 𑀘 𑀉𑀧𑀥𑀸𑀭𑁂𑀫𑀺, 𑀕𑀳𑀺𑀢𑀜𑁆𑀘 𑀫𑁂 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑁆𑀢 𑀘 𑀫𑁂 𑀯𑀲𑁆𑀲𑀸𑀦𑀺 𑀅𑀥𑀻𑀬𑀦𑁆𑀢𑀲𑁆𑀲, 𑀦𑀬𑀺𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀓𑀤𑀸 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺? ‘‘𑀢𑁂𑀦 𑀳𑀺, 𑀪𑀡𑁂 𑀚𑀻𑀯𑀓, 𑀔𑀡𑀺𑀢𑁆𑀢𑀺𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀸𑀬 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀆𑀳𑀺𑀡𑁆𑀟𑀺𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀪𑁂𑀲𑀚𑁆𑀚𑀁 𑀧𑀲𑁆𑀲𑁂𑀬𑁆𑀬𑀸𑀲𑀺 𑀢𑀁 𑀆𑀳𑀭𑀸’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀔𑀡𑀺𑀢𑁆𑀢𑀺𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀸𑀬 ¶ 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀆𑀳𑀺𑀡𑁆𑀟𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀅𑀪𑁂𑀲𑀚𑁆𑀚𑀁 𑀅𑀤𑁆𑀤𑀲. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁄 𑀯𑁂𑀚𑁆𑀚𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀚𑁆𑀚𑀁 𑀏𑀢𑀤𑀯𑁄𑀘 𑁋 ‘‘𑀆𑀳𑀺𑀡𑁆𑀟𑀦𑁆𑀢𑁄𑀫𑁆𑀳𑀺, 𑀆𑀘𑀭𑀺𑀬, 𑀢𑀓𑁆𑀓𑀲𑀺𑀮𑀸𑀬 𑀲𑀫𑀦𑁆𑀢𑀸 𑀬𑁄𑀚𑀦𑀁, 𑀦 𑀓𑀺𑀜𑁆𑀘𑀺 [𑀆𑀳𑀺𑀡𑁆𑀝𑀦𑁆𑀢𑁄 𑀦 𑀓𑀺𑀜𑁆𑀘𑀺 (𑀓.)] 𑀅𑀪𑁂𑀲𑀚𑁆𑀚𑀁 𑀅𑀤𑁆𑀤𑀲’’𑀦𑁆𑀢𑀺. ‘‘𑀲𑀼𑀲𑀺𑀓𑁆𑀔𑀺𑀢𑁄𑀲𑀺 ¶ , 𑀪𑀡𑁂 𑀚𑀻𑀯𑀓. 𑀅𑀮𑀁 𑀢𑁂 𑀏𑀢𑁆𑀢𑀓𑀁 𑀚𑀻𑀯𑀺𑀓𑀸𑀬𑀸’’𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀧𑀸𑀤𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀆𑀤𑀸𑀬 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀢𑀁 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀫𑀕𑁆𑀕𑀸 𑀓𑀦𑁆𑀢𑀸𑀭𑀸 𑀅𑀧𑁆𑀧𑁄𑀤𑀓𑀸 𑀅𑀧𑁆𑀧𑀪𑀓𑁆𑀔𑀸, 𑀦 𑀲𑀼𑀓𑀭𑀸 𑀅𑀧𑀸𑀣𑁂𑀬𑁆𑀬𑁂𑀦 𑀕𑀦𑁆𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀧𑀸𑀣𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬’’𑀦𑁆𑀢𑀺.

𑀚𑀻𑀯𑀓𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁩. 𑀲𑁂𑀝𑁆𑀞𑀺𑀪𑀭𑀺𑀬𑀸𑀯𑀢𑁆𑀣𑀼

𑁩𑁩𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀓𑁂𑀢𑁂 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀻𑀲𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑀸𑀓𑁂𑀢𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑁄, 𑀪𑀡𑁂, 𑀕𑀺𑀮𑀸𑀦𑁄, 𑀓𑀁 𑀢𑀺𑀓𑀺𑀘𑁆𑀙𑀸𑀫𑀻’’𑀢𑀺? ‘‘𑀏𑀢𑀺𑀲𑁆𑀲𑀸, 𑀆𑀘𑀭𑀺𑀬, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑁄 ¶ 𑀲𑀻𑀲𑀸𑀩𑀸𑀥𑁄; 𑀕𑀘𑁆𑀙, 𑀆𑀘𑀭𑀺𑀬, 𑀲𑁂𑀝𑁆𑀞𑀺𑀪𑀭𑀺𑀬𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀤𑁄𑀯𑀸𑀭𑀺𑀓, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀸𑀯𑀤 𑁋 ‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀆𑀕𑀢𑁄, 𑀲𑁄 𑀢𑀁 𑀤𑀝𑁆𑀞𑀼𑀓𑀸𑀫𑁄’’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀯𑁂𑀚𑁆𑀚𑁄 ¶ , 𑀅𑀬𑁆𑀬𑁂, 𑀆𑀕𑀢𑁄; 𑀲𑁄 𑀢𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺. ‘‘𑀓𑀻𑀤𑀺𑀲𑁄, 𑀪𑀡𑁂 𑀤𑁄𑀯𑀸𑀭𑀺𑀓, 𑀯𑁂𑀚𑁆𑀚𑁄’’𑀢𑀺? ‘‘𑀤𑀳𑀭𑀓𑁄, 𑀅𑀬𑁆𑀬𑁂’’𑀢𑀺. ‘‘𑀅𑀮𑀁, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑀺𑀁 𑀫𑁂 𑀤𑀳𑀭𑀓𑁄 𑀯𑁂𑀚𑁆𑀚𑁄 𑀓𑀭𑀺𑀲𑁆𑀲𑀢𑀺? 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 ¶ 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀽’’𑀢𑀺. 𑀅𑀣 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀝𑁆𑀞𑀺𑀪𑀭𑀺𑀬𑀸, 𑀆𑀘𑀭𑀺𑀬, 𑀏𑀯𑀫𑀸𑀳 𑁋 ‘𑀅𑀮𑀁, 𑀪𑀡𑁂 𑀤𑁄𑀯𑀸𑀭𑀺𑀓, 𑀓𑀺𑀁 𑀫𑁂 𑀤𑀳𑀭𑀓𑁄 𑀯𑁂𑀚𑁆𑀚𑁄 𑀓𑀭𑀺𑀲𑁆𑀲𑀢𑀺? 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀽’’’𑀢𑀺. ‘‘𑀕𑀘𑁆𑀙, 𑀪𑀡𑁂 𑀤𑁄𑀯𑀸𑀭𑀺𑀓, 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀸𑀯𑀤 𑁋 ‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀏𑀯𑀫𑀸𑀳 𑁋 𑀫𑀸 𑀓𑀺𑀭, 𑀅𑀬𑁆𑀬𑁂, 𑀧𑀼𑀭𑁂 𑀓𑀺𑀜𑁆𑀘𑀺 𑀅𑀤𑀸𑀲𑀺. 𑀬𑀤𑀸 𑀅𑀭𑁄𑀕𑀸 𑀅𑀳𑁄𑀲𑀺 𑀢𑀤𑀸 𑀬𑀁 𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑀁 𑀤𑀚𑁆𑀚𑁂𑀬𑁆𑀬𑀸𑀲𑀻’’’𑀢𑀺. ‘‘𑀏𑀯𑀁, 𑀆𑀘𑀭𑀺𑀬𑀸’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀯𑁂𑀚𑁆𑀚𑁄, 𑀅𑀬𑁆𑀬𑁂, 𑀏𑀯𑀫𑀸𑀳 𑁋 ‘𑀫𑀸 𑀓𑀺𑀭, 𑀅𑀬𑁆𑀬𑁂, 𑀧𑀼𑀭𑁂 𑀓𑀺𑀜𑁆𑀘𑀺 𑀅𑀤𑀸𑀲𑀺. 𑀬𑀤𑀸 𑀅𑀭𑁄𑀕𑀸 𑀅𑀳𑁄𑀲𑀺 𑀢𑀤𑀸 𑀬𑀁 𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑀁 𑀤𑀚𑁆𑀚𑁂𑀬𑁆𑀬𑀸𑀲𑀻’’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀤𑁄𑀯𑀸𑀭𑀺𑀓, 𑀯𑁂𑀚𑁆𑀚𑁄 𑀆𑀕𑀘𑁆𑀙𑀢𑀽’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑁄 𑀤𑁄𑀯𑀸𑀭𑀺𑀓𑁄 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑀁, 𑀆𑀘𑀭𑀺𑀬, 𑀧𑀓𑁆𑀓𑁄𑀲𑀢𑀻’’𑀢𑀺 ¶ .

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀲𑁂𑀝𑁆𑀞𑀺𑀪𑀭𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑀢𑁂𑀦, 𑀅𑀬𑁆𑀬𑁂, 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄’’𑀢𑀺 ¶ . 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀲𑀢𑀁 𑀲𑀧𑁆𑀧𑀺𑀁 𑀤𑀸𑀧𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀧𑀲𑀢𑀁 𑀲𑀧𑁆𑀧𑀺𑀁 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀦𑀺𑀧𑁆𑀧𑀘𑀺𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀁 𑀫𑀜𑁆𑀘𑀓𑁂 𑀉𑀢𑁆𑀢𑀸𑀦𑀁 𑀦𑀺𑀧𑀸𑀢𑁂𑀢𑁆𑀯𑀸 [𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀦𑀢𑁆𑀣𑀼𑀢𑁄 𑀅𑀤𑀸𑀲𑀺. 𑀅𑀣 𑀔𑁄 𑀢𑀁 𑀲𑀧𑁆𑀧𑀺𑀁 𑀦𑀢𑁆𑀣𑀼𑀢𑁄 𑀤𑀺𑀦𑁆𑀦𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀧𑀝𑀺𑀕𑁆𑀕𑀳𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀳𑀦𑁆𑀤, 𑀚𑁂, 𑀇𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀡𑁆𑀳𑀸𑀳𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 [𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄 (𑀲𑁆𑀬𑀸.)] 𑀬𑀸𑀯 𑀮𑀽𑀔𑀸𑀬𑀁 𑀖𑀭𑀡𑀻, 𑀬𑀢𑁆𑀭 𑀳𑀺 𑀦𑀸𑀫 𑀇𑀫𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀸𑀳𑀸𑀧𑁂𑀲𑁆𑀲𑀢𑀺. 𑀩𑀳𑀼𑀓𑀸𑀦𑀺 ¶ 𑀘 𑀫𑁂 𑀫𑀳𑀕𑁆𑀖𑀸𑀦𑀺 [𑀫𑀳𑀕𑁆𑀖𑀸𑀦𑀺 𑀫𑀳𑀕𑁆𑀖𑀸𑀦𑀺 (𑀲𑀻. 𑀲𑁆𑀬𑀸.)] 𑀪𑁂𑀲𑀚𑁆𑀚𑀸𑀦𑀺 𑀉𑀧𑀕𑀢𑀸𑀦𑀺. 𑀓𑀺𑀫𑁆𑀧𑀺 𑀫𑀸𑀬𑀁 𑀓𑀺𑀜𑁆𑀘𑀺 [𑀓𑀜𑁆𑀘𑀺 (𑀲𑁆𑀬𑀸.)] 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀚𑀻𑀯𑀓𑀲𑁆𑀲 ¶ 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀘𑀭𑀺𑀬, 𑀯𑀺𑀫𑀦𑁄𑀲𑀻’’𑀢𑀺? 𑀇𑀥 𑀫𑁂 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀬𑀸𑀯 𑀮𑀽𑀔𑀸𑀬𑀁 𑀥𑀭𑀡𑀻, 𑀬𑀢𑁆𑀭 𑀳𑀺 𑀦𑀸𑀫 𑀇𑀫𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀲𑀧𑁆𑀧𑀺𑀁 𑀧𑀺𑀘𑀼𑀦𑀸 𑀕𑀸𑀳𑀸𑀧𑁂𑀲𑁆𑀲𑀢𑀺. 𑀩𑀳𑀼𑀓𑀸𑀦𑀺 𑀘 𑀫𑁂 𑀫𑀳𑀕𑁆𑀖𑀸𑀦𑀺 𑀲𑀚𑁆𑀚𑀸𑀦𑀺 𑀉𑀧𑀕𑀢𑀸𑀦𑀺. 𑀓𑀺𑀫𑁆𑀧𑀺 𑀫𑀸𑀬𑀁 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀤𑀲𑁆𑀲𑀢𑀻’’𑀢𑀺. ‘‘𑀫𑀬𑀁 ¶ 𑀔𑁄, 𑀆𑀘𑀭𑀺𑀬, 𑀆𑀕𑀸𑀭𑀺𑀓𑀸 𑀦𑀸𑀫 𑀉𑀧𑀚𑀸𑀦𑀸𑀫𑁂𑀢𑀲𑁆𑀲 𑀲𑀁𑀬𑀫𑀲𑁆𑀲. 𑀯𑀭𑀫𑁂𑀢𑀁 𑀲𑀧𑁆𑀧𑀺 𑀤𑀸𑀲𑀸𑀦𑀁 𑀯𑀸 𑀓𑀫𑁆𑀫𑀓𑀭𑀸𑀦𑀁 𑀯𑀸 𑀧𑀸𑀤𑀩𑁆𑀪𑀜𑁆𑀚𑀦𑀁 𑀯𑀸 𑀧𑀤𑀻𑀧𑀓𑀭𑀡𑁂 𑀯𑀸 𑀆𑀲𑀺𑀢𑁆𑀢𑀁. 𑀫𑀸 𑀔𑁄 𑀢𑁆𑀯𑀁, 𑀆𑀘𑀭𑀺𑀬, 𑀯𑀺𑀫𑀦𑁄 𑀅𑀳𑁄𑀲𑀺. 𑀦 𑀢𑁂 𑀤𑁂𑀬𑁆𑀬𑀥𑀫𑁆𑀫𑁄 𑀳𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑀁 𑀲𑀻𑀲𑀸𑀩𑀸𑀥𑀁 𑀏𑀓𑁂𑀦𑁂𑀯 𑀦𑀢𑁆𑀣𑀼𑀓𑀫𑁆𑀫𑁂𑀦 𑀅𑀧𑀓𑀟𑁆𑀠𑀺. 𑀅𑀣 𑀔𑁄 𑀲𑁂𑀝𑁆𑀞𑀺𑀪𑀭𑀺𑀬𑀸 𑀅𑀭𑁄𑀕𑀸 𑀲𑀫𑀸𑀦𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀧𑀼𑀢𑁆𑀢𑁄 𑁋 𑀫𑀸𑀢𑀸 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀲𑀼𑀡𑀺𑀲𑀸 𑁋 𑀲𑀲𑁆𑀲𑀼 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀲𑁂𑀝𑁆𑀞𑀺 𑀕𑀳𑀧𑀢𑀺 𑁋 𑀪𑀭𑀺𑀬𑀸 𑀫𑁂 𑀅𑀭𑁄𑀕𑀸 𑀞𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺 𑀤𑀸𑀲𑀜𑁆𑀘 𑀤𑀸𑀲𑀺𑀜𑁆𑀘 𑀅𑀲𑁆𑀲𑀭𑀣𑀜𑁆𑀘.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀸𑀦𑀺 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀆𑀤𑀸𑀬 𑀤𑀸𑀲𑀜𑁆𑀘 𑀤𑀸𑀲𑀺𑀜𑁆𑀘 𑀅𑀲𑁆𑀲𑀭𑀣𑀜𑁆𑀘 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀕𑀳𑀁 𑀬𑁂𑀦 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀫𑁂, 𑀤𑁂𑀯, 𑀧𑀞𑀫𑀓𑀫𑁆𑀫𑀁 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀤𑀸𑀲𑁄 𑀘 𑀤𑀸𑀲𑀻 𑀘 𑀅𑀲𑁆𑀲𑀭𑀣𑁄 𑀘. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀤𑁂𑀯𑁄 𑀧𑁄𑀲𑀸𑀯𑀦𑀺𑀓’’𑀦𑁆𑀢𑀺. ‘‘𑀅𑀮𑀁, 𑀪𑀡𑁂 𑀚𑀻𑀯𑀓; 𑀢𑀼𑀬𑁆𑀳𑀫𑁂𑀯 𑀳𑁄𑀢𑀼. 𑀅𑀫𑁆𑀳𑀸𑀓𑀜𑁆𑀜𑁂𑀯 𑀅𑀦𑁆𑀢𑁂𑀧𑀼𑀭𑁂 𑀦𑀺𑀯𑁂𑀲𑀦𑀁 𑀫𑀸𑀧𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀅𑀦𑁆𑀢𑁂𑀧𑀼𑀭𑁂 𑀦𑀺𑀯𑁂𑀲𑀦𑀁 𑀫𑀸𑀧𑁂𑀲𑀺.

𑀲𑁂𑀝𑁆𑀞𑀺𑀪𑀭𑀺𑀬𑀸𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁪. 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀯𑀢𑁆𑀣𑀼

𑁩𑁩𑁧. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀪𑀕𑀦𑁆𑀤𑀮𑀸𑀩𑀸𑀥𑁄 𑀳𑁄𑀢𑀺. 𑀲𑀸𑀝𑀓𑀸 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀬𑀦𑁆𑀢𑀺. 𑀤𑁂𑀯𑀺𑀬𑁄 𑀤𑀺𑀲𑁆𑀯𑀸 𑀉𑀧𑁆𑀧𑀡𑁆𑀟𑁂𑀦𑁆𑀢𑀺 𑁋 ‘‘𑀉𑀢𑀼𑀦𑀻 𑀤𑀸𑀦𑀺 𑀤𑁂𑀯𑁄, 𑀧𑀼𑀧𑁆𑀨𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀦 𑀘𑀺𑀭𑀁 [𑀦𑀘𑀺𑀭𑀲𑁆𑀲𑁂𑀯 (𑀲𑁆𑀬𑀸.)] 𑀤𑁂𑀯𑁄 𑀯𑀺𑀚𑀸𑀬𑀺𑀲𑁆𑀲𑀢𑀻’’𑀢𑀺. 𑀢𑁂𑀦 𑀭𑀸𑀚𑀸 𑀫𑀗𑁆𑀓𑀼 𑀳𑁄𑀢𑀺 ¶ . 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀪𑀬𑀁 𑀭𑀸𑀚𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑀡𑁂 𑀅𑀪𑀬, 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀲𑀸𑀝𑀓𑀸 𑀮𑁄𑀳𑀺𑀢𑁂𑀦 𑀫𑀓𑁆𑀔𑀺𑀬𑀦𑁆𑀢𑀺, 𑀤𑁂𑀯𑀺𑀬𑁄 𑀫𑀁 𑀤𑀺𑀲𑁆𑀯𑀸 𑀉𑀧𑁆𑀧𑀡𑁆𑀟𑁂𑀦𑁆𑀢𑀺 𑁋 ‘𑀉𑀢𑀼𑀦𑀻 𑀤𑀸𑀦𑀺 𑀤𑁂𑀯𑁄, 𑀧𑀼𑀧𑁆𑀨𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦𑀁, 𑀦 𑀘𑀺𑀭𑀁 𑀤𑁂𑀯𑁄 𑀯𑀺𑀚𑀸𑀬𑀺𑀲𑁆𑀲𑀢𑀻’𑀢𑀺. 𑀇𑀗𑁆𑀖, 𑀪𑀡𑁂 𑀅𑀪𑀬, 𑀢𑀸𑀤𑀺𑀲𑀁 𑀯𑁂𑀚𑁆𑀚𑀁 𑀚𑀸𑀦𑀸𑀳𑀺 𑀬𑁄 𑀫𑀁 𑀢𑀺𑀓𑀺𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀅𑀬𑀁, 𑀤𑁂𑀯, 𑀅𑀫𑁆𑀳𑀸𑀓𑀁 𑀚𑀻𑀯𑀓𑁄 𑀯𑁂𑀚𑁆𑀚𑁄 𑀢𑀭𑀼𑀡𑁄 𑀪𑀤𑁆𑀭𑀓𑁄. 𑀲𑁄 𑀤𑁂𑀯𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀅𑀪𑀬, 𑀚𑀻𑀯𑀓𑀁 ¶ 𑀯𑁂𑀚𑁆𑀚𑀁 𑀆𑀡𑀸𑀧𑁂𑀳𑀺; 𑀲𑁄 𑀫𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀭𑀸𑀚𑀸𑀦𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀅𑀪𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀔𑁂𑀦 𑀪𑁂𑀲𑀚𑁆𑀚𑀁 𑀆𑀤𑀸𑀬 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀆𑀩𑀸𑀥𑀁 𑀢𑁂, 𑀤𑁂𑀯, 𑀧𑀲𑁆𑀲𑀸𑀫𑀸’’𑀢𑀺 [𑀧𑀲𑁆𑀲𑀸𑀫𑀻𑀢𑀺 (𑀲𑁆𑀬𑀸.)]. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀪𑀕𑀦𑁆𑀤𑀮𑀸𑀩𑀸𑀥𑀁 𑀏𑀓𑁂𑀦𑁂𑀯 𑀆𑀮𑁂𑀧𑁂𑀦 𑀅𑀧𑀓𑀟𑁆𑀠𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 ¶ 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀭𑁄𑀕𑁄 𑀲𑀫𑀸𑀦𑁄 𑀧𑀜𑁆𑀘 𑀇𑀢𑁆𑀣𑀺𑀲𑀢𑀸𑀦𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀪𑀽𑀲𑀸𑀧𑁂𑀢𑁆𑀯𑀸 𑀑𑀫𑀼𑀜𑁆𑀘𑀸𑀧𑁂𑀢𑁆𑀯𑀸 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀁, 𑀪𑀡𑁂 𑀚𑀻𑀯𑀓, 𑀧𑀜𑁆𑀘𑀦𑁆𑀦𑀁 𑀇𑀢𑁆𑀣𑀺𑀲𑀢𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀢𑀼𑀬𑁆𑀳𑀁 𑀳𑁄𑀢𑀽’’𑀢𑀺. ‘‘𑀅𑀮𑀁, 𑀤𑁂𑀯, 𑀅𑀥𑀺𑀓𑀸𑀭𑀁 𑀫𑁂 𑀤𑁂𑀯𑁄 𑀲𑀭𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀚𑀻𑀯𑀓, 𑀫𑀁 𑀉𑀧𑀝𑁆𑀞𑀳, 𑀇𑀢𑁆𑀣𑀸𑀕𑀸𑀭𑀜𑁆𑀘, 𑀩𑀼𑀤𑁆𑀥𑀧𑁆𑀧𑀫𑀼𑀔𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁫. 𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼

𑁩𑁩𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀻𑀲𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄 𑀳𑁄𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 ¶ 𑁋 ‘‘𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀣 ¶ 𑀔𑁄 𑀭𑀸𑀚𑀕𑀳𑀓𑀲𑁆𑀲 𑀦𑁂𑀕𑀫𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀩𑀳𑀽𑀧𑀓𑀸𑀭𑁄 𑀭𑀜𑁆𑀜𑁄 𑀘𑁂𑀯 𑀦𑁂𑀕𑀫𑀲𑁆𑀲 𑀘. 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 ‘𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’𑀢𑀺. 𑀅𑀬𑀜𑁆𑀘 𑀭𑀜𑁆𑀜𑁄 𑀚𑀻𑀯𑀓𑁄 𑀯𑁂𑀚𑁆𑀚𑁄 𑀢𑀭𑀼𑀡𑁄 𑀪𑀤𑁆𑀭𑀓𑁄. 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀸𑀦𑀁 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀬𑀸𑀘𑁂𑀬𑁆𑀬𑀸𑀫 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 ¶ 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀩𑀳𑀽𑀧𑀓𑀸𑀭𑁄 𑀤𑁂𑀯𑀲𑁆𑀲 𑀘𑁂𑀯 𑀦𑁂𑀕𑀫𑀲𑁆𑀲 𑀘; 𑀅𑀧𑀺 𑀘, 𑀯𑁂𑀚𑁆𑀚𑁂𑀳𑀺 𑀧𑀘𑁆𑀘𑀓𑁆𑀔𑀸𑀢𑁄. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺. 𑀏𑀓𑀘𑁆𑀘𑁂 𑀯𑁂𑀚𑁆𑀚𑀸 𑀏𑀯𑀫𑀸𑀳𑀁𑀲𑀼 𑁋 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺. 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀢𑀼 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺 ¶ .

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁆𑀯𑀁, 𑀕𑀳𑀧𑀢𑀺, 𑀅𑀭𑁄𑀕𑁄 𑀪𑀯𑁂𑀬𑁆𑀬𑀸𑀲𑀺 [𑀲𑀘𑀸𑀳𑀁 𑀢𑀁 𑀕𑀳𑀧𑀢𑀺 𑀅𑀭𑁄𑀕𑀸𑀧𑁂𑀬𑁆𑀬𑀁 (𑀲𑀻.), 𑀲𑀘𑀸𑀳𑀁 𑀢𑀁 𑀕𑀳𑀧𑀢𑀺 𑀅𑀭𑁄𑀕𑀁 𑀓𑀭𑁂𑀬𑁆𑀬𑀁 (𑀲𑁆𑀬𑀸.)] 𑀓𑀺𑀁 𑀫𑁂 𑀅𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺? ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼, 𑀅𑀳𑀜𑁆𑀘 𑀢𑁂 𑀤𑀸𑀲𑁄’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 ¶ . ‘‘𑀲𑀓𑁆𑀔𑀺𑀲𑁆𑀲𑀲𑀺 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀲𑁂𑀝𑁆𑀞𑀺𑀁 𑀕𑀳𑀧𑀢𑀺𑀁 𑀫𑀜𑁆𑀘𑀓𑁂 𑀦𑀺𑀧𑀸𑀢𑁂𑀢𑁆𑀯𑀸 [𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀫𑀜𑁆𑀘𑀓𑁂 [𑀫𑀜𑁆𑀘𑀓𑁂𑀦 (𑀲𑀻.)] 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀻𑀲𑀘𑁆𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 [𑀨𑀸𑀮𑁂𑀢𑁆𑀯𑀸 (𑀲𑀻.)] 𑀲𑀺𑀩𑁆𑀩𑀺𑀦𑀺𑀁 𑀯𑀺𑀦𑀸𑀫𑁂𑀢𑁆𑀯𑀸 𑀤𑁆𑀯𑁂 ¶ 𑀧𑀸𑀡𑀓𑁂 𑀦𑀻𑀳𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀲𑀺 𑁋 ‘‘𑀧𑀲𑁆𑀲𑀣𑀬𑁆𑀬𑁂 [𑀧𑀲𑁆𑀲𑁂𑀲𑁆𑀬𑀸𑀣 (𑀲𑀻.), 𑀧𑀲𑁆𑀲𑀣 (𑀲𑁆𑀬𑀸.), 𑀧𑀲𑁆𑀲𑀣𑀬𑁆𑀬𑁄 (𑀓.)], 𑀇𑀫𑁂 𑀤𑁆𑀯𑁂 𑀧𑀸𑀡𑀓𑁂, 𑀏𑀓𑀁 𑀔𑀼𑀤𑁆𑀤𑀓𑀁 𑀏𑀓𑀁 𑀫𑀳𑀮𑁆𑀮𑀓𑀁. 𑀬𑁂 𑀢𑁂 𑀆𑀘𑀭𑀺𑀬𑀸 𑀏𑀯𑀫𑀸𑀳𑀁𑀲𑀼 𑁋 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑁋 𑀢𑁂𑀳𑀸𑀬𑀁 𑀫𑀳𑀮𑁆𑀮𑀓𑁄 𑀧𑀸𑀡𑀓𑁄 𑀤𑀺𑀝𑁆𑀞𑁄. 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺. 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀭𑀺𑀬𑀸𑀤𑀸𑀦𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀤𑀺𑀝𑁆𑀞𑁄 𑀢𑁂𑀳𑀺 𑀆𑀘𑀭𑀺𑀬𑁂𑀳𑀺. 𑀬𑁂 𑀢𑁂 𑀆𑀘𑀭𑀺𑀬𑀸 𑀏𑀯𑀫𑀸𑀳𑀁𑀲𑀼 𑁋 𑀲𑀢𑁆𑀢𑀫𑀁 𑀤𑀺𑀯𑀲𑀁 ¶ 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻𑀢𑀺 𑁋 𑀢𑁂𑀳𑀸𑀬𑀁 𑀔𑀼𑀤𑁆𑀤𑀓𑁄 𑀧𑀸𑀡𑀓𑁄 𑀤𑀺𑀝𑁆𑀞𑁄. 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀁 𑀧𑀭𑀺𑀬𑀸𑀤𑀺𑀬𑀺𑀲𑁆𑀲𑀢𑀺. 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀧𑀭𑀺𑀬𑀸𑀤𑀸𑀦𑀸 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀤𑀺𑀝𑁆𑀞𑁄 𑀢𑁂𑀳𑀺 𑀆𑀘𑀭𑀺𑀬𑁂𑀳𑀻’’𑀢𑀺. 𑀲𑀺𑀩𑁆𑀩𑀺𑀦𑀺𑀁 𑀲𑀫𑁆𑀧𑀝𑀺𑀧𑀸𑀝𑁂𑀢𑁆𑀯𑀸 𑀲𑀻𑀲𑀘𑁆𑀙𑀯𑀺𑀁 𑀲𑀺𑀩𑁆𑀩𑀺𑀢𑁆𑀯𑀸 𑀆𑀮𑁂𑀧𑀁 𑀅𑀤𑀸𑀲𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 ¶ 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 ¶ 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀸𑀳𑀻’’𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀆𑀘𑀭𑀺𑀬, 𑀲𑀓𑁆𑀓𑁄𑀫𑀺 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀦𑀦𑀼 𑀫𑁂 𑀢𑁆𑀯𑀁, 𑀕𑀳𑀧𑀢𑀺, 𑀧𑀝𑀺𑀲𑁆𑀲𑀼𑀡𑀺 𑁋 𑀲𑀓𑁆𑀓𑁄𑀫𑀳𑀁, 𑀆𑀘𑀭𑀺𑀬, 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀸𑀳𑀁, 𑀆𑀘𑀭𑀺𑀬, 𑀧𑀝𑀺𑀲𑁆𑀲𑀼𑀡𑀺𑀁, 𑀅𑀧𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀉𑀢𑁆𑀢𑀸𑀦𑁄 𑀲𑀢𑁆𑀢𑀫𑀸𑀲𑁂 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀅𑀳𑀁 𑀘𑁂 𑀢𑀁, 𑀕𑀳𑀧𑀢𑀺, 𑀦 𑀯𑀤𑁂𑀬𑁆𑀬𑀁, 𑀏𑀢𑁆𑀢𑀓𑀫𑁆𑀧𑀺 𑀢𑁆𑀯𑀁 𑀦 𑀦𑀺𑀧𑀚𑁆𑀚𑁂𑀬𑁆𑀬𑀸𑀲𑀺, 𑀅𑀧𑀺 𑀘 𑀧𑀝𑀺𑀓𑀘𑁆𑀘𑁂𑀯 𑀫𑀬𑀸 𑀜𑀸𑀢𑁄 𑁋 𑀢𑀻𑀳𑀺 𑀲𑀢𑁆𑀢𑀸𑀳𑁂𑀳𑀺 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀅𑀭𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀉𑀝𑁆𑀞𑁂𑀳𑀺 ¶ , 𑀕𑀳𑀧𑀢𑀺, 𑀅𑀭𑁄𑀕𑁄𑀲𑀺. 𑀚𑀸𑀦𑀸𑀲𑀺 𑀓𑀺𑀁 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺? ‘‘𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀜𑁆𑀘 𑀢𑁂, 𑀆𑀘𑀭𑀺𑀬, 𑀳𑁄𑀢𑀼, 𑀅𑀳𑀜𑁆𑀘 𑀢𑁂 𑀤𑀸𑀲𑁄’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀫𑀸 𑀫𑁂 ¶ 𑀢𑁆𑀯𑀁 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀅𑀤𑀸𑀲𑀺, 𑀫𑀸 𑀘 𑀫𑁂 𑀤𑀸𑀲𑁄. 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀤𑁂𑀳𑀺, 𑀫𑀬𑁆𑀳𑀁 𑀲𑀢𑀲𑀳𑀲𑁆𑀲’’𑀦𑁆𑀢𑀺. 𑀅𑀣 𑀔𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀅𑀭𑁄𑀕𑁄 𑀲𑀫𑀸𑀦𑁄 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀢𑀲𑀳𑀲𑁆𑀲𑀁.

𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁬. 𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑁩𑁩𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀫𑁄𑀓𑁆𑀔𑀘𑀺𑀓𑀸𑀬 𑀓𑀻𑀴𑀦𑁆𑀢𑀲𑁆𑀲 𑀅𑀦𑁆𑀢𑀕𑀡𑁆𑀞𑀸𑀩𑀸𑀥𑁄 𑀳𑁄𑀢𑀺, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 ¶ 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀳𑁄𑀢𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀬𑀁𑀦𑀽𑀦𑀸𑀳𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀬𑀸𑀘𑁂𑀬𑁆𑀬𑀁 𑀧𑀼𑀢𑁆𑀢𑀁 𑀫𑁂 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀲𑁂𑀦𑀺𑀬𑀁 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀤𑁂𑀯, 𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀬𑁂𑀦 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄. 𑀲𑁄 𑀢𑁂𑀦 𑀓𑀺𑀲𑁄 𑀮𑀽𑀔𑁄 ¶ 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 ¶ 𑀆𑀡𑀸𑀧𑁂𑀢𑀼 𑀧𑀼𑀢𑁆𑀢𑀁 𑀫𑁂 𑀢𑀺𑀓𑀺𑀘𑁆𑀙𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀚𑀦𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 ¶ 𑀢𑀺𑀭𑁄𑀓𑀭𑀡𑀺𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀣𑀫𑁆𑀪𑁂 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 [𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀪𑀭𑀺𑀬𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀉𑀤𑀭𑀘𑁆𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀦𑁆𑀢𑀕𑀡𑁆𑀞𑀺𑀁 𑀦𑀻𑀳𑀭𑀺𑀢𑁆𑀯𑀸 𑀪𑀭𑀺𑀬𑀸𑀬 𑀤𑀲𑁆𑀲𑁂𑀲𑀺 𑁋 ‘‘𑀧𑀲𑁆𑀲 𑀢𑁂 𑀲𑀸𑀫𑀺𑀓𑀲𑁆𑀲 𑀆𑀩𑀸𑀥𑀁, 𑀇𑀫𑀺𑀦𑀸 𑀬𑀸𑀕𑀼𑀧𑀺 𑀧𑀻𑀢𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀫𑁆𑀧𑀺 𑀪𑀼𑀢𑁆𑀢𑀁 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀲𑁆𑀲𑀸𑀯𑁄𑀧𑀺 𑀦 𑀧𑀕𑀼𑀡𑁄; 𑀇𑀫𑀺𑀦𑀸𑀬𑀁 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺. 𑀅𑀦𑁆𑀢𑀕𑀡𑁆𑀞𑀺𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀅𑀦𑁆𑀢𑀸𑀦𑀺 𑀧𑀝𑀺𑀧𑀯𑁂𑀲𑁂𑀢𑁆𑀯𑀸 𑀉𑀤𑀭𑀘𑁆𑀙𑀯𑀺𑀁 𑀲𑀺𑀩𑁆𑀩𑀺𑀢𑁆𑀯𑀸 𑀆𑀮𑁂𑀧𑀁 𑀅𑀤𑀸𑀲𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑁄𑀕𑁄 𑀅𑀳𑁄𑀲𑀺. 𑀅𑀣 𑀔𑁄 𑀩𑀸𑀭𑀸𑀡𑀲𑁂𑀬𑁆𑀬𑀓𑁄 𑀲𑁂𑀝𑁆𑀞𑀺 ‘𑀧𑀼𑀢𑁆𑀢𑁄 𑀫𑁂 𑀅𑀭𑁄𑀕𑁄 𑀞𑀺𑀢𑁄’𑀢𑀺 [𑀅𑀭𑁄𑀕𑀸𑀧𑀺𑀢𑁄𑀢𑀺 (𑀲𑀻.)] 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀧𑀸𑀤𑀸𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀸𑀦𑀺 𑀲𑁄𑀴𑀲𑀲𑀳𑀲𑁆𑀲𑀸𑀦𑀺 𑀆𑀤𑀸𑀬 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺 ¶ .

𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁭. 𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼

𑁩𑁩𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 [𑀉𑀚𑁆𑀚𑁂𑀦𑀺𑀬𑀁 𑀭𑀜𑁆𑀜𑁄 (𑀲𑁆𑀬𑀸.)] 𑀧𑀚𑁆𑀚𑁄𑀢𑀲𑁆𑀲 𑀧𑀡𑁆𑀟𑀼𑀭𑁄𑀕𑀸𑀩𑀸𑀥𑁄 𑀳𑁄𑀢𑀺. 𑀩𑀳𑀽 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑀸 𑀯𑁂𑀚𑁆𑀚𑀸 𑀆𑀕𑀦𑁆𑀢𑁆𑀯𑀸 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑁄𑀕𑀁 𑀓𑀸𑀢𑀼𑀁. 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀆𑀤𑀸𑀬 𑀅𑀕𑀫𑀁𑀲𑀼. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀢𑀸𑀤𑀺𑀲𑁄 𑀆𑀩𑀸𑀥𑁄, 𑀲𑀸𑀥𑀼 𑀤𑁂𑀯𑁄 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀆𑀡𑀸𑀧𑁂𑀢𑀼, 𑀲𑁄 𑀫𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀚𑀻𑀯𑀓; 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀢𑀺𑀓𑀺𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀚𑁆𑀚𑁂𑀦𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀯𑀺𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀧𑁆𑀧𑀺𑀁 𑀤𑁂𑀳𑀺 [𑀇𑀤𑀁 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺], 𑀲𑀧𑁆𑀧𑀺𑀁 𑀤𑁂𑀯, 𑀦𑀺𑀧𑁆𑀧𑀘𑀺𑀲𑁆𑀲𑀸𑀫𑀺. 𑀢𑀁 𑀤𑁂𑀯𑁄 𑀧𑀺𑀯𑀺𑀲𑁆𑀲𑀢𑀻’’𑀢𑀺. ‘‘𑀅𑀮𑀁, 𑀪𑀡𑁂 𑀚𑀻𑀯𑀓, 𑀬𑀁 𑀢𑁂 𑀲𑀓𑁆𑀓𑀸 𑀯𑀺𑀦𑀸 𑀲𑀧𑁆𑀧𑀺𑀦𑀸 𑀅𑀭𑁄𑀕𑀁 𑀓𑀸𑀢𑀼𑀁 𑀢𑀁 𑀓𑀭𑁄𑀳𑀺. 𑀚𑁂𑀕𑀼𑀘𑁆𑀙𑀁 𑀫𑁂 𑀲𑀧𑁆𑀧𑀺, 𑀧𑀝𑀺𑀓𑀽𑀮’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 ¶ 𑁋 ‘‘𑀇𑀫𑀲𑁆𑀲 𑀔𑁄 𑀭𑀜𑁆𑀜𑁄 𑀢𑀸𑀤𑀺𑀲𑁄 𑀆𑀩𑀸𑀥𑁄 ¶ , 𑀦 𑀲𑀓𑁆𑀓𑀸 𑀯𑀺𑀦𑀸 𑀲𑀧𑁆𑀧𑀺𑀦𑀸 𑀅𑀭𑁄𑀕𑀁 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀧𑁆𑀧𑀺𑀁 𑀦𑀺𑀧𑁆𑀧𑀘𑁂𑀬𑁆𑀬𑀁 ¶ 𑀓𑀲𑀸𑀯𑀯𑀡𑁆𑀡𑀁 𑀓𑀲𑀸𑀯𑀕𑀦𑁆𑀥𑀁 𑀓𑀲𑀸𑀯𑀭𑀲’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀲𑀧𑁆𑀧𑀺𑀁 𑀦𑀺𑀧𑁆𑀧𑀘𑀺 𑀓𑀲𑀸𑀯𑀯𑀡𑁆𑀡𑀁 𑀓𑀲𑀸𑀯𑀕𑀦𑁆𑀥𑀁 𑀓𑀲𑀸𑀯𑀭𑀲𑀁. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀔𑁄 𑀭𑀜𑁆𑀜𑁄 𑀲𑀧𑁆𑀧𑀺 𑀧𑀻𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀁 𑀉𑀤𑁆𑀤𑁂𑀓𑀁 𑀤𑀲𑁆𑀲𑀢𑀺. 𑀘𑀡𑁆𑀟𑁄𑀬𑀁 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀫𑀁. 𑀬𑀁𑀦𑀽𑀦𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀆𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀁 𑀔𑁄, 𑀤𑁂𑀯, 𑀯𑁂𑀚𑁆𑀚𑀸 𑀦𑀸𑀫 𑀢𑀸𑀤𑀺𑀲𑁂𑀦 𑀫𑀼𑀳𑀼𑀢𑁆𑀢𑁂𑀦 𑀫𑀽𑀮𑀸𑀦𑀺 𑀉𑀤𑁆𑀥𑀭𑀸𑀫 𑀪𑁂𑀲𑀚𑁆𑀚𑀸𑀦𑀺 𑀲𑀁𑀳𑀭𑀸𑀫. 𑀲𑀸𑀥𑀼 𑀤𑁂𑀯𑁄 𑀯𑀸𑀳𑀦𑀸𑀕𑀸𑀭𑁂𑀲𑀼 𑀘 𑀤𑁆𑀯𑀸𑀭𑁂𑀲𑀼 𑀘 𑀆𑀡𑀸𑀧𑁂𑀢𑀼 𑁋 𑀬𑁂𑀦 𑀯𑀸𑀳𑀦𑁂𑀦 𑀚𑀻𑀯𑀓𑁄 𑀇𑀘𑁆𑀙𑀢𑀺 𑀢𑁂𑀦 𑀯𑀸𑀳𑀦𑁂𑀦 𑀕𑀘𑁆𑀙𑀢𑀼, 𑀬𑁂𑀦 𑀤𑁆𑀯𑀸𑀭𑁂𑀦 𑀇𑀘𑁆𑀙𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀧𑀯𑀺𑀲𑀢𑀽’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀯𑀸𑀳𑀦𑀸𑀕𑀸𑀭𑁂𑀲𑀼 𑀘 𑀤𑁆𑀯𑀸𑀭𑁂𑀲𑀼 𑀘 𑀆𑀡𑀸𑀧𑁂𑀲𑀺 𑁋 ‘‘𑀬𑁂𑀦 𑀯𑀸𑀳𑀦𑁂𑀦 𑀚𑀻𑀯𑀓𑁄 𑀇𑀘𑁆𑀙𑀢𑀺 𑀢𑁂𑀦 𑀯𑀸𑀳𑀦𑁂𑀦 𑀕𑀘𑁆𑀙𑀢𑀼, 𑀬𑁂𑀦 𑀤𑁆𑀯𑀸𑀭𑁂𑀦 𑀇𑀘𑁆𑀙𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀕𑀘𑁆𑀙𑀢𑀼, 𑀬𑀁 𑀓𑀸𑀮𑀁 𑀇𑀘𑁆𑀙𑀢𑀺 𑀢𑀁 𑀓𑀸𑀮𑀁 𑀧𑀯𑀺𑀲𑀢𑀽’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀪𑀤𑁆𑀤𑀯𑀢𑀺𑀓𑀸 𑀦𑀸𑀫 𑀳𑀢𑁆𑀣𑀺𑀦𑀺𑀓𑀸 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑀸 𑀳𑁄𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀲𑀧𑁆𑀧𑀺𑀁 [𑀢𑀁 𑀲𑀧𑁆𑀧𑀺𑀁 (𑀲𑁆𑀬𑀸.)] 𑀉𑀧𑀦𑀸𑀫𑁂𑀲𑀺 ¶ 𑁋 ‘‘𑀓𑀲𑀸𑀯𑀁 𑀤𑁂𑀯𑁄 𑀧𑀺𑀯𑀢𑀽’’𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀸𑀚𑀸𑀦𑀁 𑀧𑀚𑁆𑀚𑁄𑀢𑀁 𑀲𑀧𑁆𑀧𑀺𑀁 𑀧𑀸𑀬𑁂𑀢𑁆𑀯𑀸 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀪𑀤𑁆𑀤𑀯𑀢𑀺𑀓𑀸𑀬 𑀳𑀢𑁆𑀣𑀺𑀦𑀺𑀓𑀸𑀬 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺 ¶ .

𑀅𑀣 𑀔𑁄 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀢𑀁 𑀲𑀧𑁆𑀧𑀺 𑀧𑀻𑀢𑀁 𑀧𑀭𑀺𑀡𑀸𑀫𑁂𑀦𑁆𑀢𑀁 𑀉𑀤𑁆𑀤𑁂𑀓𑀁 𑀅𑀤𑀸𑀲𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀫𑀦𑀼𑀲𑁆𑀲𑁂 𑀏𑀢𑀤𑀯𑁄𑀘 𑁋 ‘‘𑀤𑀼𑀝𑁆𑀞𑁂𑀦, 𑀪𑀡𑁂, 𑀚𑀻𑀯𑀓𑁂𑀦 𑀲𑀧𑁆𑀧𑀺𑀁 𑀧𑀸𑀬𑀺𑀢𑁄𑀫𑁆𑀳𑀺. 𑀢𑁂𑀦 𑀳𑀺, 𑀪𑀡𑁂, 𑀚𑀻𑀯𑀓𑀁 𑀯𑁂𑀚𑁆𑀚𑀁 𑀯𑀺𑀘𑀺𑀦𑀣𑀸’’𑀢𑀺. ‘‘𑀪𑀤𑁆𑀤𑀯𑀢𑀺𑀓𑀸𑀬, 𑀤𑁂𑀯, 𑀳𑀢𑁆𑀣𑀺𑀦𑀺𑀓𑀸𑀬 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺𑀢𑁄’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀓𑀸𑀓𑁄 𑀦𑀸𑀫 𑀤𑀸𑀲𑁄 𑀲𑀝𑁆𑀞𑀺𑀬𑁄𑀚𑀦𑀺𑀓𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑁂𑀦 𑀧𑀝𑀺𑀘𑁆𑀘 𑀚𑀸𑀢𑁄. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀓𑀸𑀓𑀁 𑀤𑀸𑀲𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀪𑀡𑁂 𑀓𑀸𑀓, 𑀚𑀻𑀯𑀓𑀁 𑀯𑁂𑀚𑁆𑀚𑀁 ¶ 𑀦𑀺𑀯𑀢𑁆𑀢𑁂𑀳𑀺 𑁋 𑀭𑀸𑀚𑀸 𑀢𑀁, 𑀆𑀘𑀭𑀺𑀬, 𑀦𑀺𑀯𑀢𑁆𑀢𑀸𑀧𑁂𑀢𑀻𑀢𑀺. 𑀏𑀢𑁂 𑀔𑁄, 𑀪𑀡𑁂 𑀓𑀸𑀓, 𑀯𑁂𑀚𑁆𑀚𑀸 𑀦𑀸𑀫 𑀩𑀳𑀼𑀫𑀸𑀬𑀸. 𑀫𑀸 𑀘𑀲𑁆𑀲 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺.

𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑁄𑀲𑀫𑁆𑀩𑀺𑀬𑀁 𑀲𑀫𑁆𑀪𑀸𑀯𑁂𑀲𑀺

𑀧𑀸𑀢𑀭𑀸𑀲𑀁 𑀓𑀭𑁄𑀦𑁆𑀢𑀁. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 ¶ 𑁋 ‘‘𑀭𑀸𑀚𑀸 𑀢𑀁, 𑀆𑀘𑀭𑀺𑀬, 𑀦𑀺𑀯𑀢𑁆𑀢𑀸𑀧𑁂𑀢𑀻’’𑀢𑀺. ‘‘𑀆𑀕𑀫𑁂𑀳𑀺, 𑀪𑀡𑁂 𑀓𑀸𑀓, 𑀬𑀸𑀯 𑀪𑀼𑀜𑁆𑀚𑀸𑀫 [𑀪𑀼𑀜𑁆𑀚𑀸𑀫𑀺 (𑀲𑀻. 𑀲𑁆𑀬𑀸.)]. 𑀳𑀦𑁆𑀤, 𑀪𑀡𑁂 𑀓𑀸𑀓, 𑀪𑀼𑀜𑁆𑀚𑀲𑁆𑀲𑀽’’𑀢𑀺. ‘‘𑀅𑀮𑀁, 𑀆𑀘𑀭𑀺𑀬, 𑀭𑀜𑁆𑀜𑀸𑀫𑁆𑀳𑀺 𑀆𑀡𑀢𑁆𑀢𑁄 𑁋 𑀏𑀢𑁂 𑀔𑁄, 𑀪𑀡𑁂 𑀓𑀸𑀓, 𑀯𑁂𑀚𑁆𑀚𑀸 𑀦𑀸𑀫 𑀩𑀳𑀼𑀫𑀸𑀬𑀸, 𑀫𑀸 𑀘𑀲𑁆𑀲 𑀓𑀺𑀜𑁆𑀘𑀺 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀦𑀔𑁂𑀦 𑀪𑁂𑀲𑀚𑁆𑀚𑀁 𑀑𑀮𑀼𑀫𑁆𑀧𑁂𑀢𑁆𑀯𑀸 𑀆𑀫𑀮𑀓𑀜𑁆𑀘 𑀔𑀸𑀤𑀢𑀺 𑀧𑀸𑀦𑀻𑀬𑀜𑁆𑀘 𑀧𑀺𑀯𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀓𑀸𑀓𑀁 𑀤𑀸𑀲𑀁 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀪𑀡𑁂 𑀓𑀸𑀓, 𑀆𑀫𑀮𑀓𑀜𑁆𑀘 𑀔𑀸𑀤 𑀧𑀸𑀦𑀻𑀬𑀜𑁆𑀘 𑀧𑀺𑀯𑀲𑁆𑀲𑀽’’𑀢𑀺. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑁋 𑀅𑀬𑀁 𑀔𑁄 𑀯𑁂𑀚𑁆𑀚𑁄 𑀆𑀫𑀮𑀓𑀜𑁆𑀘 ¶ 𑀔𑀸𑀤𑀢𑀺 𑀧𑀸𑀦𑀻𑀬𑀜𑁆𑀘 𑀧𑀺𑀯𑀢𑀺, 𑀦 𑀅𑀭𑀳𑀢𑀺 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀳𑁄𑀢𑀼𑀦𑁆𑀢𑀺 𑁋 𑀉𑀧𑀟𑁆𑀠𑀸𑀫𑀮𑀓𑀜𑁆𑀘 𑀔𑀸𑀤𑀺 𑀧𑀸𑀦𑀻𑀬𑀜𑁆𑀘 𑀅𑀧𑀸𑀬𑀺. 𑀢𑀲𑁆𑀲 𑀢𑀁 𑀉𑀧𑀟𑁆𑀠𑀸𑀫𑀮𑀓𑀁 𑀔𑀸𑀤𑀺𑀢𑀁 𑀢𑀢𑁆𑀣𑁂𑀯 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀔𑁄 𑀓𑀸𑀓𑁄 𑀤𑀸𑀲𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀫𑁂, 𑀆𑀘𑀭𑀺𑀬, 𑀚𑀻𑀯𑀺𑀢’’𑀦𑁆𑀢𑀺? ‘‘𑀫𑀸, 𑀪𑀡𑁂 𑀓𑀸𑀓, 𑀪𑀸𑀬𑀺, 𑀢𑁆𑀯𑀁 𑀘𑁂𑀯 𑀅𑀭𑁄𑀕𑁄 𑀪𑀯𑀺𑀲𑁆𑀲𑀲𑀺 𑀭𑀸𑀚𑀸 𑀘. 𑀘𑀡𑁆𑀟𑁄 𑀲𑁄 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀫𑀁, 𑀢𑁂𑀦𑀸𑀳𑀁 𑀦 𑀦𑀺𑀯𑀢𑁆𑀢𑀸𑀫𑀻’’𑀢𑀺 𑀪𑀤𑁆𑀤𑀯𑀢𑀺𑀓𑀁 𑀳𑀢𑁆𑀣𑀺𑀦𑀺𑀓𑀁 𑀓𑀸𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀲𑀼𑀝𑁆𑀞𑀼, 𑀪𑀡𑁂 𑀚𑀻𑀯𑀓, 𑀅𑀓𑀸𑀲𑀺 𑀬𑀫𑁆𑀧𑀺 𑀦 𑀦𑀺𑀯𑀢𑁆𑀢𑁄, 𑀘𑀡𑁆𑀟𑁄 𑀲𑁄 𑀭𑀸𑀚𑀸 𑀖𑀸𑀢𑀸𑀧𑁂𑀬𑁆𑀬𑀸𑀧𑀺 𑀢’’𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀅𑀭𑁄𑀕𑁄 𑀲𑀫𑀸𑀦𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀆𑀕𑀘𑁆𑀙𑀢𑀼 𑀚𑀻𑀯𑀓𑁄, 𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀅𑀮𑀁, 𑀅𑀬𑁆𑀬𑁄 [𑀤𑁂𑀯 (𑀲𑁆𑀬𑀸.)], 𑀅𑀥𑀺𑀓𑀸𑀭𑀁 𑀫𑁂 𑀤𑁂𑀯𑁄 𑀲𑀭𑀢𑀽’’𑀢𑀺.

𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁦𑁮. 𑀲𑀺𑀯𑁂𑀬𑁆𑀬𑀓𑀤𑀼𑀲𑁆𑀲𑀬𑀼𑀕𑀓𑀣𑀸

𑁩𑁩𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 𑀩𑀳𑀽𑀦𑀁 [𑀩𑀳𑀼𑀦𑁆𑀦𑀁 (𑀲𑀻. 𑀲𑁆𑀬𑀸.)] 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 ¶ 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀅𑀣 𑀔𑁄 𑀭𑀸𑀚𑀸 𑀧𑀚𑁆𑀚𑁄𑀢𑁄 𑀢𑀁 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀧𑀸𑀳𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 ¶ 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀫𑁂 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀭𑀜𑁆𑀜𑀸 𑀧𑀚𑁆𑀚𑁄𑀢𑁂𑀦 𑀧𑀳𑀺𑀢𑀁 𑁋 𑀩𑀳𑀽𑀦𑀁 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀦𑀬𑀺𑀤𑀁 𑀅𑀜𑁆𑀜𑁄 𑀓𑁄𑀘𑀺 𑀧𑀘𑁆𑀘𑀸𑀭𑀳𑀢𑀺 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀭𑀜𑁆𑀜𑀸 𑀯𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦𑀸’’𑀢𑀺.

𑀲𑀺𑀯𑁂𑀬𑁆𑀬𑀓𑀤𑀼𑀲𑁆𑀲𑀬𑀼𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁦𑁯. 𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸

𑁩𑁩𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀓𑀸𑀬𑁄 𑀤𑁄𑀲𑀸𑀪𑀺𑀲𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑁄𑀲𑀸𑀪𑀺𑀲𑀦𑁆𑀦𑁄 ¶ 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀇𑀘𑁆𑀙𑀢𑀺 𑀢𑀣𑀸𑀕𑀢𑁄 𑀯𑀺𑀭𑁂𑀘𑀦𑀁 𑀧𑀸𑀢𑀼’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀤𑁄𑀲𑀸𑀪𑀺𑀲𑀦𑁆𑀦𑁄 𑀔𑁄, 𑀆𑀯𑀼𑀲𑁄 𑀚𑀻𑀯𑀓, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀇𑀘𑁆𑀙𑀢𑀺 𑀢𑀣𑀸𑀕𑀢𑁄 𑀯𑀺𑀭𑁂𑀘𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑁄 𑀓𑀸𑀬𑀁 𑀓𑀢𑀺𑀧𑀸𑀳𑀁 𑀲𑀺𑀦𑁂𑀳𑁂𑀣𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀓𑀸𑀬𑀁 𑀓𑀢𑀺𑀧𑀸𑀳𑀁 𑀲𑀺𑀦𑁂𑀳𑁂𑀢𑁆𑀯𑀸 𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀲𑀺𑀦𑀺𑀤𑁆𑀥𑁄 𑀔𑁄, 𑀆𑀯𑀼𑀲𑁄 𑀚𑀻𑀯𑀓, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀪𑀕𑀯𑀢𑁄 𑀑𑀴𑀸𑀭𑀺𑀓𑀁 𑀯𑀺𑀭𑁂𑀘𑀦𑀁 𑀤𑀤𑁂𑀬𑁆𑀬’’𑀦𑁆𑀢𑀺. 𑀢𑀻𑀡𑀺 𑀉𑀧𑁆𑀧𑀮𑀳𑀢𑁆𑀣𑀸𑀦𑀺 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀧𑀭𑀺𑀪𑀸𑀯𑁂𑀢𑁆𑀯𑀸 𑀬𑁂𑀦 ¶ 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀧𑀞𑀫𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺. 𑀤𑀼𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀤𑀼𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺. 𑀢𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀫𑀁, 𑀪𑀦𑁆𑀢𑁂 ¶ , 𑀪𑀕𑀯𑀸 𑀢𑀢𑀺𑀬𑀁 𑀉𑀧𑁆𑀧𑀮𑀳𑀢𑁆𑀣𑀁 𑀉𑀧𑀲𑀺𑀗𑁆𑀖𑀢𑀼. 𑀇𑀤𑀁 𑀪𑀕𑀯𑀦𑁆𑀢𑀁 𑀤𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀻’’𑀢𑀺 ¶ . 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 ¶ . 𑀦 𑀪𑀕𑀯𑀦𑁆𑀢𑀁 𑀲𑀫𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀦𑀦𑁆𑀤, 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀦 𑀪𑀕𑀯𑀦𑁆𑀢𑀁 𑀲𑀫𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀢𑁂𑀦 𑀳𑀸𑀦𑀦𑁆𑀤, 𑀉𑀡𑁆𑀳𑁄𑀤𑀓𑀁 𑀧𑀝𑀺𑀬𑀸𑀤𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 ¶ 𑀧𑀝𑀺𑀬𑀸𑀤𑁂𑀲𑀺.

𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀭𑀺𑀢𑁆𑀢𑁄, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺? ‘‘𑀯𑀺𑀭𑀺𑀢𑁆𑀢𑁄𑀫𑁆𑀳𑀺, 𑀚𑀻𑀯𑀓𑀸’’𑀢𑀺. 𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀸 𑀔𑁄 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀤𑀺𑀦𑁆𑀦𑀁. 𑀤𑁄𑀲𑀸𑀪𑀺𑀲𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄. 𑀦 𑀪𑀕𑀯𑀦𑁆𑀢𑀁 𑀲𑀫𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀯𑀺𑀭𑁂𑀘𑁂𑀲𑁆𑀲𑀢𑀺, 𑀏𑀓𑀽𑀦𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀅𑀧𑀺 𑀘, 𑀪𑀕𑀯𑀸 𑀯𑀺𑀭𑀺𑀢𑁆𑀢𑁄 𑀦𑀳𑀸𑀬𑀺𑀲𑁆𑀲𑀢𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑁆𑀲𑀢𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀦𑀳𑀸𑀬𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀦𑀳𑀸𑀬𑀢𑀼 𑀲𑀼𑀕𑀢𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀡𑁆𑀳𑁄𑀤𑀓𑀁 𑀦𑀳𑀸𑀬𑀺. 𑀦𑀳𑀸𑀢𑀁 𑀪𑀕𑀯𑀦𑁆𑀢𑀁 𑀲𑀓𑀺𑀁 𑀯𑀺𑀭𑁂𑀘𑁂𑀲𑀺. 𑀏𑀯𑀁 𑀪𑀕𑀯𑀢𑁄 𑀲𑀫𑀢𑁆𑀢𑀺𑀁𑀲𑀸𑀬 𑀯𑀺𑀭𑁂𑀘𑀦𑀁 𑀅𑀳𑁄𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 ¶ 𑀏𑀢𑀤𑀯𑁄𑀘 𑁋 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀸𑀬𑁄 𑀧𑀓𑀢𑀢𑁆𑀢𑁄 𑀳𑁄𑀢𑀺, 𑀅𑀮𑀁 [𑀅𑀳𑀁 𑀢𑀸𑀯 𑀬𑀽𑀲𑀧𑀺𑀡𑁆𑀝𑀧𑀸𑀢𑁂𑀦𑀸𑀢𑀺 (𑀲𑀻.), 𑀅𑀮𑀁 𑀬𑀽𑀲𑀧𑀺𑀡𑁆𑀝𑀓𑁂𑀦𑀸𑀢𑀺 (𑀲𑁆𑀬𑀸.)] 𑀬𑀽𑀲𑀧𑀺𑀡𑁆𑀟𑀧𑀸𑀢𑁂𑀦𑀸’’𑀢𑀺.

𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁦. 𑀯𑀭𑀬𑀸𑀘𑀦𑀸𑀓𑀣𑀸

𑁩𑁩𑁭. 𑀅𑀣 ¶ 𑀔𑁄 𑀪𑀕𑀯𑀢𑁄 𑀓𑀸𑀬𑁄 𑀦𑀘𑀺𑀭𑀲𑁆𑀲𑁂𑀯 𑀧𑀓𑀢𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 ¶ , 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀚𑀻𑀯𑀓, 𑀢𑀣𑀸𑀕𑀢𑀸’’𑀢𑀺. ‘‘𑀬𑀜𑁆𑀘, 𑀪𑀦𑁆𑀢𑁂, 𑀓𑀧𑁆𑀧𑀢𑀺 𑀬𑀜𑁆𑀘 𑀅𑀦𑀯𑀚𑁆𑀚’’𑀦𑁆𑀢𑀺. ‘‘𑀯𑀤𑁂𑀳𑀺, 𑀚𑀻𑀯𑀓𑀸’’𑀢𑀺. ‘‘𑀪𑀕𑀯𑀸, 𑀪𑀦𑁆𑀢𑁂, 𑀧𑀁𑀲𑀼𑀓𑀽𑀮𑀺𑀓𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘. 𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀭𑀜𑁆𑀜𑀸 𑀧𑀚𑁆𑀚𑁄𑀢𑁂𑀦 𑀧𑀳𑀺𑀢𑀁 𑁋 𑀩𑀳𑀽𑀦𑀁 𑀤𑀼𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀳𑀲𑁆𑀲𑀸𑀦𑀁 𑀩𑀳𑀽𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀲𑀳𑀲𑁆𑀲𑀸𑀦𑀁 𑀅𑀕𑁆𑀕𑀜𑁆𑀘 𑀲𑁂𑀝𑁆𑀞𑀜𑁆𑀘 𑀫𑁄𑀓𑁆𑀔𑀜𑁆𑀘 𑀉𑀢𑁆𑀢𑀫𑀜𑁆𑀘 𑀧𑀯𑀭𑀜𑁆𑀘. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁; 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁. 𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁. 𑀬𑁄 𑀇𑀘𑁆𑀙𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀼. 𑀬𑁄 𑀇𑀘𑁆𑀙𑀢𑀺, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀢𑀼. 𑀇𑀢𑀭𑀻𑀢𑀭𑁂𑀦𑀧𑀸𑀳𑀁 [𑀧𑀳𑀁 (𑀲𑀻.), 𑀘𑀸𑀳𑀁 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁 𑀯𑀡𑁆𑀡𑁂𑀫𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸 𑁋 ‘‘𑀪𑀕𑀯𑀢𑀸 𑀓𑀺𑀭 ¶ 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 ¶ 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀳𑀝𑁆𑀞𑀸 𑀅𑀳𑁂𑀲𑀼𑀁 𑀉𑀤𑀕𑁆𑀕𑀸 ‘‘𑀇𑀤𑀸𑀦𑀺 𑀔𑁄 𑀫𑀬𑀁 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫, 𑀬𑀢𑁄 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀏𑀓𑀸𑀳𑁂𑀦𑁂𑀯 𑀭𑀸𑀚𑀕𑀳𑁂 𑀩𑀳𑀽𑀦𑀺 𑀘𑀻𑀯𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀅𑀲𑁆𑀲𑁄𑀲𑀼𑀁 ¶ 𑀔𑁄 𑀚𑀸𑀦𑀧𑀤𑀸 𑀫𑀦𑀼𑀲𑁆𑀲𑀸 𑁋 ‘‘𑀪𑀕𑀯𑀢𑀸 𑀓𑀺𑀭 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀳𑀝𑁆𑀞𑀸 𑀅𑀳𑁂𑀲𑀼𑀁 𑀉𑀤𑀕𑁆𑀕𑀸 𑁋 ‘‘𑀇𑀤𑀸𑀦𑀺 𑀔𑁄 𑀫𑀬𑀁 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀸𑀫, 𑀬𑀢𑁄 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀚𑀦𑀧𑀤𑁂𑀧𑀺 𑀏𑀓𑀸𑀳𑁂𑀦𑁂𑀯 𑀩𑀳𑀽𑀦𑀺 𑀘𑀻𑀯𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀧𑀸𑀯𑀸𑀭𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀯𑀸𑀭𑀦𑁆𑀢𑀺.

𑀓𑁄𑀲𑁂𑀬𑁆𑀬𑀧𑀸𑀯𑀸𑀭𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀲𑁂𑀬𑁆𑀬𑀧𑀸𑀯𑀸𑀭𑀦𑁆𑀢𑀺.

𑀓𑁄𑀚𑀯𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀚𑀯𑀦𑁆𑀢𑀺.

𑀯𑀭𑀬𑀸𑀘𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁧𑁧. 𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸

𑁩𑁩𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀲𑀺𑀭𑀸𑀚𑀸 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀟𑁆𑀠𑀓𑀸𑀲𑀺𑀓𑀁 𑀓𑀫𑁆𑀩𑀮𑀁 𑀧𑀸𑀳𑁂𑀲𑀺 𑀉𑀧𑀟𑁆𑀠𑀓𑀸𑀲𑀺𑀦𑀁 𑀔𑀫𑀫𑀸𑀦𑀁. 𑀅𑀣 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀢𑀁 𑀅𑀟𑁆𑀠𑀓𑀸𑀲𑀺𑀓𑀁 𑀓𑀫𑁆𑀩𑀮𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀪𑀕𑀯𑀦𑁆𑀢𑀁 ¶ 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀫𑁂, 𑀪𑀦𑁆𑀢𑁂, 𑀅𑀟𑁆𑀠𑀓𑀸𑀲𑀺𑀓𑁄 𑀓𑀫𑁆𑀩𑀮𑁄 𑀓𑀸𑀲𑀺𑀭𑀜𑁆𑀜𑀸 𑀧𑀳𑀺𑀢𑁄 𑀉𑀧𑀟𑁆𑀠𑀓𑀸𑀲𑀺𑀦𑀁 𑀔𑀫𑀫𑀸𑀦𑁄. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀓𑀫𑁆𑀩𑀮𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀓𑀫𑁆𑀩𑀮𑀁. 𑀅𑀣 𑀔𑁄 𑀪𑀕𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺…𑀧𑁂… 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀩𑀮’’𑀦𑁆𑀢𑀺.

𑁩𑁩𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀉𑀘𑁆𑀘𑀸𑀯𑀘𑀸𑀦𑀺 𑀘𑀻𑀯𑀭𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁 ¶ , 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀘𑀻𑀯𑀭𑀸𑀦𑀺 𑁋 𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕𑀦𑁆𑀢𑀺.

𑁩𑁪𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑁂 𑀢𑁂 𑀪𑀺𑀓𑁆𑀔𑀽 𑀕𑀳𑀧𑀢𑀺𑀘𑀻𑀯𑀭𑀁 ¶ 𑀲𑀸𑀤𑀺𑀬𑀦𑁆𑀢𑀺 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 ¶ 𑀧𑀁𑀲𑀼𑀓𑀽𑀮𑀁 𑀦 𑀲𑀸𑀤𑀺𑀬𑀦𑁆𑀢𑀺 𑁋 𑀏𑀓𑀁𑀬𑁂𑀯 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀤𑁆𑀯𑁂𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀦𑁆𑀢𑁂𑀦 𑀧𑀁𑀲𑀼𑀓𑀽𑀮𑀫𑁆𑀧𑀺 𑀲𑀸𑀤𑀺𑀬𑀺𑀢𑀼𑀁; 𑀢𑀤𑀼𑀪𑀬𑁂𑀦𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁 𑀯𑀡𑁆𑀡𑁂𑀫𑀻𑀢𑀺.

𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁨. 𑀧𑀁𑀲𑀼𑀓𑀽𑀮𑀧𑀭𑀺𑀬𑁂𑀲𑀦𑀓𑀣𑀸

𑁩𑁪𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 ¶ 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦𑀸𑀕𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀕𑀫𑁂𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀕𑀫𑁂𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 ¶ 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼 𑀢𑁂 𑀦 𑀮𑀪𑀺𑀁𑀲𑀼. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄 ¶ , 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀤𑀺𑀲𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼 ¶ . 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼, 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀤𑀺𑀲𑀸𑀦𑀁 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀓𑀢𑀺𑀓𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫. 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀢𑀺𑀓𑀁 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀧𑀁𑀲𑀼𑀓𑀽𑀮𑀧𑀭𑀺𑀬𑁂𑀲𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁩. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀓𑀣𑀸

𑁩𑁪𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀘𑀻𑀯𑀭𑀁 𑀆𑀤𑀸𑀬 𑀆𑀭𑀸𑀫𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂 𑀧𑀝𑀺𑀕𑁆𑀕𑀸𑀳𑀓𑀁 𑀅𑀮𑀪𑀫𑀸𑀦𑀸 𑀧𑀝𑀺𑀳𑀭𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀢𑁆𑀢𑀁 ¶ 𑀉𑀧𑁆𑀧𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 ¶ 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀉𑀚𑁆𑀛𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀘𑀻𑀯𑀭𑀁 𑀦𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦𑀺𑀳𑀺𑀢𑀸𑀦𑀺𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 ¶ 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀦𑀺𑀤𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀦𑀺𑀤𑀳𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁪. 𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸

𑁩𑁪𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀦𑀺𑀤𑀳𑀓𑁄 𑀪𑀺𑀓𑁆𑀔𑀼 𑀫𑀡𑁆𑀟𑀧𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀦𑀺𑀩𑁆𑀩𑀓𑁄𑀲𑁂𑀧𑀺 𑀘𑀻𑀯𑀭𑀁 𑀦𑀺𑀤𑀳𑀢𑀺, 𑀉𑀦𑁆𑀤𑀽𑀭𑁂𑀳𑀺𑀧𑀺 𑀉𑀧𑀘𑀺𑀓𑀸𑀳𑀺𑀧𑀺 𑀔𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 𑀕𑀼𑀳𑀁 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀪𑀡𑁆𑀟𑀸𑀕𑀸𑀭𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 ¶ 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀯𑀺𑀳𑀸𑀭𑁄 𑀪𑀡𑁆𑀟𑀸𑀕𑀸𑀭𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲 ¶ , 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀘𑀻𑀯𑀭𑀁 𑀅𑀕𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀼𑀢𑁆𑀢𑀸𑀕𑀼𑀢𑁆𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀡𑁆𑀟𑀸𑀕𑀸𑀭𑀺𑀓𑁄. 𑀔𑀫𑀢𑀺 ¶ 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀡𑁆𑀟𑀸𑀕𑀸𑀭𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀘𑀻𑀯𑀭𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑁄 𑀘𑀻𑀯𑀭𑀁 𑀪𑀸𑀚𑁂𑀦𑁆𑀢𑁄 𑀓𑁄𑀮𑀸𑀳𑀮𑀁 𑀅𑀓𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀚𑀺𑀢𑀸𑀪𑀸𑀚𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄; 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀪𑀸𑀚𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀪𑀸𑀚𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀧𑀝𑀺𑀯𑀻𑀲𑀁 𑀞𑀧𑁂𑀢𑀼𑀦𑁆𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀲𑀸𑀫𑀡𑁂𑀭𑀸𑀦𑀁 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 ¶ 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀓𑁂𑀦 𑀪𑀸𑀕𑁂𑀦 𑀉𑀢𑁆𑀢𑀭𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀦𑁆𑀢𑀲𑁆𑀲 𑀲𑀓𑀁 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀢𑀺𑀭𑁂𑀓𑀪𑀸𑀕𑁂𑀦 𑀉𑀢𑁆𑀢𑀭𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀓𑁆𑀔𑁂𑀧𑁂 𑀤𑀺𑀦𑁆𑀦𑁂 𑀅𑀢𑀺𑀭𑁂𑀓𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄, 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 [𑀆𑀕𑀢𑀸𑀕𑀢𑀧𑀝𑀺𑀧𑀸𑀝𑀺𑀬𑀸 (𑀓.)] 𑀦𑀼 𑀔𑁄 𑀉𑀤𑀸𑀳𑀼 𑀬𑀣𑀸𑀯𑀼𑀟𑁆𑀠’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀓𑀮𑀓𑁂 𑀢𑁄𑀲𑁂𑀢𑁆𑀯𑀸 𑀓𑀼𑀲𑀧𑀸𑀢𑀁 𑀓𑀸𑀢𑀼𑀦𑁆𑀢𑀺.

𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁫. 𑀘𑀻𑀯𑀭𑀭𑀚𑀦𑀓𑀣𑀸

𑁩𑁪𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀓𑀡𑁂𑀦𑀧𑀺 𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬𑀧𑀺 ¶ 𑀘𑀻𑀯𑀭𑀁 𑀭𑀚𑀦𑁆𑀢𑀺. 𑀘𑀻𑀯𑀭𑀁 𑀤𑀼𑀩𑁆𑀩𑀡𑁆𑀡𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀙 𑀭𑀚𑀦𑀸𑀦𑀺 𑁋 𑀫𑀽𑀮𑀭𑀚𑀦𑀁, 𑀔𑀦𑁆𑀥𑀭𑀚𑀦𑀁, 𑀢𑀘𑀭𑀚𑀦𑀁, 𑀧𑀢𑁆𑀢𑀭𑀚𑀦𑀁, 𑀧𑀼𑀧𑁆𑀨𑀭𑀚𑀦𑀁, 𑀨𑀮𑀭𑀚𑀦𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀻𑀢𑀼𑀤𑀓𑀸𑀬 [𑀲𑀻𑀢𑀼𑀦𑁆𑀤𑀺𑀓𑀸𑀬 (𑀲𑀻.), 𑀲𑀻𑀢𑀽𑀤𑀓𑀸𑀬 (𑀲𑁆𑀬𑀸.)] 𑀘𑀻𑀯𑀭𑀁 𑀭𑀚𑀦𑁆𑀢𑀺. 𑀘𑀻𑀯𑀭𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀁 𑀧𑀘𑀺𑀢𑀼𑀁 𑀘𑀼𑀮𑁆𑀮𑀁 𑀭𑀚𑀦𑀓𑀼𑀫𑁆𑀪𑀺𑀦𑁆𑀢𑀺. 𑀭𑀚𑀦𑀁 𑀉𑀢𑁆𑀢𑀭𑀺𑀬𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀸𑀴𑀼𑀫𑁆𑀧𑀁 [𑀉𑀢𑁆𑀢𑀭𑀸𑀴𑀼𑀧𑀁 (𑀬𑁄𑀚𑀦𑀸), 𑀉𑀢𑁆𑀢𑀭𑀸𑀴𑀼𑀧𑀁 (𑀲𑁆𑀬𑀸.)] 𑀩𑀦𑁆𑀥𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦 𑀚𑀸𑀦𑀦𑁆𑀢𑀺 𑀭𑀚𑀦𑀁 𑀧𑀓𑁆𑀓𑀁 𑀯𑀸 𑀅𑀧𑀓𑁆𑀓𑀁 𑀯𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑁂 𑀯𑀸 𑀦𑀔𑀧𑀺𑀝𑁆𑀞𑀺𑀓𑀸𑀬 𑀯𑀸 𑀣𑁂𑀯𑀓𑀁 ¶ 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀭𑀚𑀦𑀁 𑀑𑀭𑁄𑀧𑁂𑀦𑁆𑀢𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑀦𑁆𑀢𑀺 [𑀆𑀯𑀺𑀜𑁆𑀚𑀦𑁆𑀢𑀺 (𑀲𑀻.), 𑀆𑀯𑀝𑁆𑀝𑀦𑁆𑀢𑀺 (𑀲𑁆𑀬𑀸.)]. 𑀓𑀼𑀫𑁆𑀪𑀻 𑀪𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀼𑀴𑀼𑀗𑁆𑀓𑀁 [𑀭𑀚𑀦𑀸𑀴𑀼𑀗𑁆𑀓𑀁 (𑀬𑁄𑀚𑀦𑀸)] 𑀤𑀡𑁆𑀟𑀓𑀣𑀸𑀮𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀭𑀚𑀦𑀪𑀸𑀚𑀦𑀁 𑀦 𑀲𑀁𑀯𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀓𑁄𑀮𑀫𑁆𑀩𑀁 𑀭𑀚𑀦𑀖𑀝𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀸𑀢𑀺𑀬𑀸𑀧𑀺 𑀧𑀢𑁆𑀢𑁂𑀧𑀺 𑀘𑀻𑀯𑀭𑀁 𑀑𑀫𑀤𑁆𑀤𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀪𑀺𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀚𑀦𑀤𑁄𑀡𑀺𑀓𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀫𑀸𑀬 𑀘𑀻𑀯𑀭𑀁 𑀧𑀢𑁆𑀣𑀭𑀦𑁆𑀢𑀺. 𑀘𑀻𑀯𑀭𑀁 𑀧𑀁𑀲𑀼𑀓𑀺𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑀲𑀦𑁆𑀣𑀸𑀭𑀓𑀦𑁆𑀢𑀺.

𑀢𑀺𑀡𑀲𑀦𑁆𑀣𑀸𑀭𑀓𑁄 𑀉𑀧𑀘𑀺𑀓𑀸𑀳𑀺 𑀔𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼𑀦𑁆𑀢𑀺.

𑀫𑀚𑁆𑀛𑁂𑀦 𑀮𑀕𑁆𑀕𑁂𑀦𑁆𑀢𑀺. 𑀭𑀚𑀦𑀁 𑀉𑀪𑀢𑁄 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑁂 𑀩𑀦𑁆𑀥𑀺𑀢𑀼𑀦𑁆𑀢𑀺.

𑀓𑀡𑁆𑀡𑁄 ¶ 𑀚𑀻𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓𑀦𑁆𑀢𑀺.

𑀭𑀚𑀦𑀁 𑀏𑀓𑀢𑁄 𑀕𑀮𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑁂𑀢𑀼𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀁 𑀧𑀢𑁆𑀣𑀺𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑁂 𑀑𑀲𑀸𑀭𑁂𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀻𑀯𑀭𑀁 𑀨𑀭𑀼𑀲𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀧𑀸𑀡𑀺𑀦𑀸 𑀆𑀓𑁄𑀝𑁂𑀢𑀼𑀦𑁆𑀢𑀺 ¶ .

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺 𑀤𑀦𑁆𑀢𑀓𑀸𑀲𑀸𑀯𑀸𑀦𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 [𑀲𑁂𑀬𑁆𑀬𑀣𑀸𑀧𑀺 (?)] 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀘𑀻𑀯𑀭𑀭𑀚𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁬. 𑀙𑀺𑀦𑁆𑀦𑀓𑀘𑀻𑀯𑀭𑀸𑀦𑀼𑀚𑀸𑀦𑀦𑀸

𑁩𑁪𑁫. 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀤𑀓𑁆𑀔𑀺𑀡𑀸𑀕𑀺𑀭𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀕𑀥𑀔𑁂𑀢𑁆𑀢𑀁 𑀅𑀘𑁆𑀙𑀺𑀩𑀤𑁆𑀥𑀁 [𑀅𑀘𑁆𑀘𑀺𑀩𑀤𑁆𑀥𑀁 (𑀲𑀻. 𑀲𑁆𑀬𑀸.), 𑀅𑀘𑁆𑀙𑀺𑀩𑀦𑁆𑀥𑀁 (𑀓.)] 𑀧𑀸𑀴𑀺𑀩𑀤𑁆𑀥𑀁 𑀫𑀭𑀺𑀬𑀸𑀤𑀩𑀤𑁆𑀥𑀁 𑀲𑀺𑀗𑁆𑀖𑀸𑀝𑀓𑀩𑀤𑁆𑀥𑀁, 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀆𑀦𑀦𑁆𑀤, 𑀫𑀕𑀥𑀔𑁂𑀢𑁆𑀢𑀁 𑀅𑀘𑁆𑀙𑀺𑀩𑀤𑁆𑀥𑀁 𑀧𑀸𑀴𑀺𑀩𑀤𑁆𑀥𑀁 𑀫𑀭𑀺𑀬𑀸𑀤𑀩𑀤𑁆𑀥𑀁 𑀲𑀺𑀗𑁆𑀖𑀸𑀝𑀓𑀩𑀤𑁆𑀥’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀉𑀲𑁆𑀲𑀳𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀏𑀯𑀭𑀽𑀧𑀸𑀦𑀺 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑀼’’𑀦𑁆𑀢𑀺? ‘‘𑀉𑀲𑁆𑀲𑀳𑀸𑀫𑀺, 𑀪𑀕𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑁆𑀲𑀢𑀼 𑀫𑁂 [𑀧𑀲𑁆𑀲𑀣 𑀢𑀼𑀫𑁆𑀳𑁂 (𑀓.)], 𑀪𑀦𑁆𑀢𑁂, 𑀪𑀕𑀯𑀸 𑀘𑀻𑀯𑀭𑀸𑀦𑀺 𑀲𑀁𑀯𑀺𑀤𑀳𑀺𑀢𑀸𑀦𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 ¶ 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀬𑀢𑁆𑀭 𑀳𑀺 𑀦𑀸𑀫 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀢𑀺, 𑀓𑀼𑀲𑀺𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀅𑀟𑁆𑀠𑀓𑀼𑀲𑀺𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀫𑀡𑁆𑀟𑀮𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺 ¶ , 𑀅𑀟𑁆𑀠𑀫𑀡𑁆𑀟𑀮𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀯𑀺𑀯𑀝𑁆𑀝𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀅𑀦𑀼𑀯𑀺𑀯𑀝𑁆𑀝𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀕𑀻𑀯𑁂𑀬𑁆𑀬𑀓𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀚𑀗𑁆𑀖𑁂𑀬𑁆𑀬𑀓𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀩𑀸𑀳𑀦𑁆𑀢𑀫𑁆𑀧𑀺 𑀦𑀸𑀫 𑀓𑀭𑀺𑀲𑁆𑀲𑀢𑀺, 𑀙𑀺𑀦𑁆𑀦𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀮𑀽𑀔𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘 𑀅𑀦𑀪𑀺𑀘𑁆𑀙𑀺𑀢𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺.

𑀙𑀺𑀦𑁆𑀦𑀓𑀘𑀻𑀯𑀭𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁭. 𑀢𑀺𑀘𑀻𑀯𑀭𑀸𑀦𑀼𑀚𑀸𑀦𑀦𑀸

𑁩𑁪𑁬. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀤𑁆𑀤𑀲 𑀔𑁄 𑀪𑀕𑀯𑀸 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀯𑁂𑀲𑀸𑀮𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀘𑀻𑀯𑀭𑁂𑀳𑀺 𑀉𑀩𑁆𑀪𑀡𑁆𑀟𑀺𑀢𑁂 [𑀉𑀩𑁆𑀪𑀡𑁆𑀟𑀻𑀓𑀢𑁂 (𑀲𑁆𑀬𑀸.)] 𑀲𑀻𑀲𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀔𑀦𑁆𑀥𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀓𑀝𑀺𑀬𑀸𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀮𑀳𑀼𑀁 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸 𑀘𑀻𑀯𑀭𑁂 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀸 ¶ . 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 ¶ 𑀪𑀕𑀯𑀸 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀏𑀓𑀘𑀻𑀯𑀭𑁄 𑀦𑀺𑀲𑀻𑀤𑀺. 𑀦 𑀪𑀕𑀯𑀦𑁆𑀢𑀁 ¶ 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀤𑀼𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀢𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺. 𑀘𑀢𑀼𑀢𑁆𑀣𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀻𑀢𑀸𑀮𑀼𑀓𑀸 𑀲𑀻𑀢𑀪𑀻𑀭𑀼𑀓𑀸 𑀢𑁂𑀧𑀺 𑀲𑀓𑁆𑀓𑁄𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀬𑀸𑀧𑁂𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀁, 𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀯𑁂𑀲𑀸𑀮𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀤𑁆𑀤𑀲𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 ¶ 𑀘𑀻𑀯𑀭𑁂𑀳𑀺 𑀉𑀩𑁆𑀪𑀡𑁆𑀟𑀺𑀢𑁂 𑀲𑀻𑀲𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀔𑀦𑁆𑀥𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀓𑀝𑀺𑀬𑀸𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀮𑀳𑀼𑀁 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸 𑀘𑀻𑀯𑀭𑁂 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀸. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬’𑀦𑁆𑀢𑀺. 𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀏𑀓𑀘𑀻𑀯𑀭𑁄 𑀦𑀺𑀲𑀻𑀤𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀤𑀼𑀢𑀺𑀬𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 ¶ 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀢𑀢𑀺𑀬𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀲𑀻𑀢𑀁 𑀫𑀁 𑀅𑀳𑁄𑀲𑀺. 𑀘𑀢𑀼𑀢𑁆𑀣𑀸𑀳𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀁. 𑀦 𑀫𑀁 𑀲𑀻𑀢𑀁 𑀅𑀳𑁄𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀻𑀢𑀸𑀮𑀼𑀓𑀸 𑀲𑀻𑀢𑀪𑀻𑀭𑀼𑀓𑀸 𑀢𑁂𑀧𑀺 𑀲𑀓𑁆𑀓𑁄𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀬𑀸𑀧𑁂𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀁 ¶ , 𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑁂𑀬𑁆𑀬’𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑁋 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀏𑀓𑀘𑁆𑀘𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀏𑀓𑀘𑁆𑀘𑀺𑀬𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺.

𑀢𑀺𑀘𑀻𑀯𑀭𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁮. 𑀅𑀢𑀺𑀭𑁂𑀓𑀘𑀻𑀯𑀭𑀓𑀣𑀸

𑁩𑁪𑁭. [𑀧𑀸𑀭𑀸. 𑁪𑁬𑁧] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑀸 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀅𑀜𑁆𑀜𑁂𑀦𑁂𑀯 𑀢𑀺𑀘𑀻𑀯𑀭𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀅𑀜𑁆𑀜𑁂𑀦 𑀢𑀺𑀘𑀻𑀯𑀭𑁂𑀦 𑀆𑀭𑀸𑀫𑁂 𑀅𑀘𑁆𑀙𑀦𑁆𑀢𑀺, 𑀅𑀜𑁆𑀜𑁂𑀦 𑀢𑀺𑀘𑀻𑀯𑀭𑁂𑀦 ¶ 𑀦𑀳𑀸𑀦𑀁 𑀑𑀢𑀭𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺.

[𑀧𑀸𑀭𑀸. 𑁪𑁬𑁧] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀢𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀆𑀬𑀲𑁆𑀫𑀸 𑀘 ¶ 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 ‘𑀦 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’𑀦𑁆𑀢𑀺. 𑀇𑀤𑀜𑁆𑀘 𑀫𑁂 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 ¶ . 𑀅𑀳𑀜𑁆𑀘𑀺𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄. 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀻𑀯𑀘𑀺𑀭𑀁 𑀧𑀦𑀸𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺? ‘‘𑀦𑀯𑀫𑀁 𑀯𑀸, 𑀪𑀕𑀯𑀸, 𑀤𑀺𑀯𑀲𑀁, 𑀤𑀲𑀫𑀁 𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀅𑀢𑀺𑀭𑁂𑀓𑀘𑀻𑀯𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑁩𑁪𑁮. 𑀅𑀣 𑀔𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀯𑀸𑀲𑀓𑁄 𑀙𑀺𑀤𑁆𑀤𑁄 𑀳𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁 𑁋 𑀤𑀺𑀕𑀼𑀡𑀸 𑀲𑀗𑁆𑀖𑀸𑀝𑀺, 𑀏𑀓𑀘𑁆𑀘𑀺𑀬𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 ¶ ¶ , 𑀏𑀓𑀘𑁆𑀘𑀺𑀬𑁄 𑀅𑀦𑁆𑀢𑀭𑀯𑀸𑀲𑀓𑁄. 𑀅𑀬𑀜𑁆𑀘 𑀫𑁂 𑀅𑀦𑁆𑀢𑀭𑀯𑀸𑀲𑀓𑁄 𑀙𑀺𑀤𑁆𑀤𑁄. 𑀬𑀁𑀦𑀽𑀦𑀸𑀳𑀁 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀬𑁆𑀬𑀁, 𑀲𑀫𑀦𑁆𑀢𑀢𑁄 𑀤𑀼𑀧𑀝𑁆𑀝𑀁 𑀪𑀯𑀺𑀲𑁆𑀲𑀢𑀺, 𑀫𑀚𑁆𑀛𑁂 𑀏𑀓𑀘𑁆𑀘𑀺𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀦𑁆𑀢𑀁 [𑀅𑀘𑁆𑀙𑀼𑀧𑀦𑁆𑀢𑀁 (𑀓.)], 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀭𑁄𑀲𑀻’’𑀢𑀺? ‘‘𑀅𑀕𑁆𑀕𑀴𑀁, 𑀪𑀕𑀯𑀸, 𑀅𑀘𑁆𑀙𑀼𑀧𑁂𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼; 𑀲𑀸𑀥𑀼 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀕𑁆𑀕𑀴𑀁 𑀅𑀘𑁆𑀙𑀼𑀧𑁂𑀲𑀻’’𑀢𑀺 ¶ . 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀅𑀳𑀢𑀓𑀧𑁆𑀧𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀏𑀓𑀘𑁆𑀘𑀺𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀏𑀓𑀘𑁆𑀘𑀺𑀬𑀁 𑀅𑀦𑁆𑀢𑀭𑀯𑀸𑀲𑀓𑀁; 𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀤𑀺𑀕𑀼𑀡𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀤𑀺𑀕𑀼𑀡𑀁 ¶ 𑀅𑀦𑁆𑀢𑀭𑀯𑀸𑀲𑀓𑀁; 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣𑀁; 𑀧𑀸𑀧𑀡𑀺𑀓𑁂 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀴𑀁 𑀢𑀼𑀦𑁆𑀦𑀁 𑀑𑀯𑀝𑁆𑀝𑀺𑀓𑀁 𑀓𑀡𑁆𑀟𑀼𑀲𑀓𑀁 𑀤𑀴𑁆𑀳𑀻𑀓𑀫𑁆𑀫’’𑀦𑁆𑀢𑀺.

𑀅𑀢𑀺𑀭𑁂𑀓𑀘𑀻𑀯𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁯. 𑀯𑀺𑀲𑀸𑀔𑀸𑀯𑀢𑁆𑀣𑀼

𑁩𑁪𑁯. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 ¶ 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸, 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸, 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀣𑀸, 𑀪𑀺𑀓𑁆𑀔𑀯𑁂, 𑀚𑁂𑀢𑀯𑀦𑁂 𑀯𑀲𑁆𑀲𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀯𑀲𑁆𑀲𑀢𑀺. 𑀑𑀯𑀲𑁆𑀲𑀸𑀧𑁂𑀣, 𑀪𑀺𑀓𑁆𑀔𑀯𑁂, 𑀓𑀸𑀬𑀁. 𑀅𑀬𑀁 𑀧𑀘𑁆𑀙𑀺𑀫𑀓𑁄 𑀘𑀸𑀢𑀼𑀤𑁆𑀤𑀻𑀧𑀺𑀓𑁄 𑀫𑀳𑀸𑀫𑁂𑀖𑁄’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ¶ 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑀸 𑀤𑀸𑀲𑀻 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀪𑀺𑀓𑁆𑀔𑀽 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 ‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’𑀢𑀺 𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 ¶ ; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 ¶ 𑀧𑀡𑁆𑀟𑀺𑀢𑀸𑀬 𑀯𑀺𑀬𑀢𑁆𑀢𑀸𑀬 𑀫𑁂𑀥𑀸𑀯𑀺𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀅𑀬𑁆𑀬𑀸 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀺. 𑀲𑀸𑀬𑀁 ¶ 𑀩𑀸𑀮𑀸 𑀫𑀜𑁆𑀜𑀺𑀢𑁆𑀣 𑁋 𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺, 𑀧𑀼𑀦 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀕𑀢𑁆𑀢𑀸𑀦𑀺 𑀲𑀻𑀢𑀺𑀁 𑀓𑀭𑀺𑀢𑁆𑀯𑀸 [𑀲𑀻𑀢𑀻𑀓𑀭𑀺𑀢𑁆𑀯𑀸 (𑀲𑁆𑀬𑀸.)] 𑀓𑀮𑁆𑀮𑀓𑀸𑀬𑀸 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀬𑀣𑀸𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀲𑀸 𑀤𑀸𑀲𑀻 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀅𑀧𑀲𑁆𑀲𑀦𑁆𑀢𑀻 ‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’𑀢𑀺 𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’’𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀡𑁆𑀟𑀺𑀢𑀸𑀬 𑀯𑀺𑀬𑀢𑁆𑀢𑀸𑀬 𑀫𑁂𑀥𑀸𑀯𑀺𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀅𑀬𑁆𑀬𑀸 𑀕𑀢𑁆𑀢𑀸𑀦𑀺 𑀲𑀻𑀢𑀺𑀁 𑀓𑀭𑀺𑀢𑁆𑀯𑀸 𑀓𑀮𑁆𑀮𑀓𑀸𑀬𑀸 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀬𑀣𑀸𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀸. 𑀲𑀸𑀬𑀁 𑀩𑀸𑀮𑀸 𑀫𑀜𑁆𑀜𑀺𑀢𑁆𑀣 𑁋 𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀲𑀼𑀜𑁆𑀜𑁄 𑀆𑀭𑀸𑀫𑁄’’𑀢𑀺, 𑀧𑀼𑀦 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁩𑁫𑁦. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀦𑁆𑀤𑀳𑀣 [𑀲𑀦𑁆𑀦𑀳𑀣 (𑀲𑀻. 𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀧𑀢𑁆𑀢𑀘𑀻𑀯𑀭𑀁; 𑀓𑀸𑀮𑁄 𑀪𑀢𑁆𑀢𑀲𑁆𑀲𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀓𑁄𑀝𑁆𑀞𑀓𑁂 ¶ 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀚𑀡𑁆𑀡𑀼𑀓𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼, 𑀓𑀝𑀺𑀫𑀢𑁆𑀢𑁂𑀲𑀼𑀧𑀺 𑀑𑀖𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼, 𑀦 𑀳𑀺 𑀦𑀸𑀫 ¶ 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 [𑀧𑀯𑀢𑁆𑀢𑀫𑀸𑀦𑁂𑀲𑀼 𑀦 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 (?)] 𑀧𑀸𑀤𑀸 𑀯𑀸 𑀘𑀻𑀯𑀭𑀸𑀦𑀺 𑀯𑀸 𑀅𑀮𑁆𑀮𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑁋 𑀳𑀝𑁆𑀞𑀸 𑀉𑀤𑀕𑁆𑀕𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀝𑁆𑀞𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀯𑀭𑀸𑀦𑀺 𑀬𑀸𑀘𑀸𑀫𑀻’’𑀢𑀺. ‘‘𑀅𑀢𑀺𑀓𑁆𑀓𑀦𑁆𑀢𑀯𑀭𑀸 𑀔𑁄, 𑀯𑀺𑀲𑀸𑀔𑁂, 𑀢𑀣𑀸𑀕𑀢𑀸’’𑀢𑀺. ‘‘𑀬𑀸𑀦𑀺 𑀘, 𑀪𑀦𑁆𑀢𑁂, 𑀓𑀧𑁆𑀧𑀺𑀬𑀸𑀦𑀺 ¶ 𑀬𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻’’𑀢𑀺. ‘‘𑀯𑀤𑁂𑀳𑀺, 𑀯𑀺𑀲𑀸𑀔𑁂’’𑀢𑀺. ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀢𑀼𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀫𑀺𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑀸𑀢𑀼𑀁, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑀸𑀢𑀼𑀁, 𑀥𑀼𑀯𑀬𑀸𑀕𑀼𑀁 𑀤𑀸𑀢𑀼𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 ¶ 𑀉𑀤𑀓𑀲𑀸𑀝𑀺𑀓𑀁 𑀤𑀸𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀯𑀺𑀲𑀸𑀔𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺?

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺𑀁 𑁋 ‘𑀕𑀘𑁆𑀙, 𑀚𑁂. 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’’𑀦𑁆𑀢𑀺. 𑀅𑀣 𑀔𑁄 𑀲𑀸, 𑀪𑀦𑁆𑀢𑁂, 𑀤𑀸𑀲𑀻 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀪𑀺𑀓𑁆𑀔𑀽 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 ¶ ‘‘𑀦𑀢𑁆𑀣𑀺 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀦𑀢𑁆𑀣𑀬𑁆𑀬𑁂, 𑀆𑀭𑀸𑀫𑁂 𑀪𑀺𑀓𑁆𑀔𑀽, 𑀆𑀚𑀻𑀯𑀓𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀻’’𑀢𑀺. 𑀅𑀲𑀼𑀘𑀺, 𑀪𑀦𑁆𑀢𑁂, 𑀦𑀕𑁆𑀕𑀺𑀬𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀦 𑀯𑀻𑀣𑀺𑀓𑀼𑀲𑀮𑁄 𑀦 𑀕𑁄𑀘𑀭𑀓𑀼𑀲𑀮𑁄 𑀓𑀺𑀮𑀦𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀲𑁄 𑀫𑁂 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀣𑀺𑀓𑀼𑀲𑀮𑁄 𑀕𑁄𑀘𑀭𑀓𑀼𑀲𑀮𑁄 𑀅𑀓𑀺𑀮𑀦𑁆𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀫𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀧𑀭𑀺𑀬𑁂𑀲𑀫𑀸𑀦𑁄 𑀲𑀢𑁆𑀣𑀸 𑀯𑀸 𑀯𑀺𑀳𑀸𑀬𑀺𑀲𑁆𑀲𑀢𑀺, 𑀬𑀢𑁆𑀣 𑀯𑀸 𑀯𑀸𑀲𑀁 𑀕𑀦𑁆𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀯𑀺𑀓𑀸𑀮𑁂 𑀉𑀧𑀕𑀘𑁆𑀙𑀺𑀲𑁆𑀲𑀢𑀺, 𑀓𑀺𑀮𑀦𑁆𑀢𑁄 𑀅𑀤𑁆𑀥𑀸𑀦𑀁 𑀕𑀫𑀺𑀲𑁆𑀲𑀢𑀺. 𑀲𑁄 𑀫𑁂 𑀕𑀫𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀣𑀸 𑀦 𑀯𑀺𑀳𑀸𑀬𑀺𑀲𑁆𑀲𑀢𑀺, 𑀬𑀢𑁆𑀣 𑀯𑀸𑀲𑀁 𑀕𑀦𑁆𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀓𑀸𑀮𑁂 𑀉𑀧𑀕𑀘𑁆𑀙𑀺𑀲𑁆𑀲𑀢𑀺, 𑀅𑀓𑀺𑀮𑀦𑁆𑀢𑁄 𑀅𑀤𑁆𑀥𑀸𑀦𑀁 𑀕𑀫𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀫𑀺𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀅𑀮𑀪𑀦𑁆𑀢𑀲𑁆𑀲 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀫𑁂 𑀕𑀺𑀮𑀸𑀦𑀪𑀢𑁆𑀢𑀁 𑀪𑀼𑀢𑁆𑀢𑀲𑁆𑀲 𑀆𑀩𑀸𑀥𑁄 ¶ 𑀦 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀼𑀁 ¶ . ‘‘𑀧𑀼𑀦 ¶ 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀧𑀭𑀺𑀬𑁂𑀲𑀫𑀸𑀦𑁄 𑀕𑀺𑀮𑀸𑀦𑀲𑁆𑀲 𑀉𑀲𑁆𑀲𑀽𑀭𑁂 𑀪𑀢𑁆𑀢𑀁 𑀦𑀻𑀳𑀭𑀺𑀲𑁆𑀲𑀢𑀺, 𑀪𑀢𑁆𑀢𑀘𑁆𑀙𑁂𑀤𑀁 𑀓𑀭𑀺𑀲𑁆𑀲𑀢𑀺. 𑀲𑁄 𑀫𑁂 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀺𑀮𑀸𑀦𑀲𑁆𑀲 ¶ 𑀓𑀸𑀮𑁂𑀦 𑀪𑀢𑁆𑀢𑀁 𑀦𑀻𑀳𑀭𑀺𑀲𑁆𑀲𑀢𑀺, 𑀪𑀢𑁆𑀢𑀘𑁆𑀙𑁂𑀤𑀁 𑀦 𑀓𑀭𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀮𑀪𑀦𑁆𑀢𑀲𑁆𑀲 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀫𑁂 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀩𑀸𑀥𑁄 𑀦 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀤𑀸𑀢𑀼𑀁.

‘‘𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀅𑀦𑁆𑀥𑀓𑀯𑀺𑀦𑁆𑀤𑁂 𑀤𑀲𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀬𑀸𑀕𑀼 𑀅𑀦𑀼𑀜𑁆𑀜𑀸𑀢𑀸. 𑀢𑁆𑀬𑀸𑀳𑀁, 𑀪𑀦𑁆𑀢𑁂, 𑀆𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀲𑀗𑁆𑀖𑀲𑁆𑀲 𑀬𑀸𑀯𑀚𑀻𑀯𑀁 𑀥𑀼𑀯𑀬𑀸𑀕𑀼𑀁 𑀤𑀸𑀢𑀼𑀁.

‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀯𑁂𑀲𑀺𑀬𑀸𑀳𑀺 𑀲𑀤𑁆𑀥𑀺𑀁 𑀦𑀕𑁆𑀕𑀸 𑀏𑀓𑀢𑀺𑀢𑁆𑀣𑁂 𑀦𑀳𑀸𑀬𑀦𑁆𑀢𑀺. 𑀢𑀸, 𑀪𑀦𑁆𑀢𑁂, 𑀯𑁂𑀲𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑁆𑀧𑀡𑁆𑀟𑁂𑀲𑀼𑀁 𑁋 ‘𑀓𑀺𑀁 𑀦𑀼 𑀔𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑁂, 𑀤𑀳𑀭𑀸𑀦𑀁 [𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 (𑀲𑀻.)] 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀡𑁆𑀡𑁂𑀦, 𑀦𑀦𑀼 𑀦𑀸𑀫 𑀓𑀸𑀫𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸; 𑀬𑀤𑀸 𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀣 𑀢𑀤𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀣. 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀉𑀪𑁄 𑀅𑀢𑁆𑀣𑀸 𑀧𑀭𑀺𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀢𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑁂𑀲𑀺𑀬𑀸𑀳𑀺 𑀉𑀧𑁆𑀧𑀡𑁆𑀟𑀺𑀬𑀫𑀸𑀦𑀸 𑀫𑀗𑁆𑀓𑀽 𑀅𑀳𑁂𑀲𑀼𑀁. 𑀅𑀲𑀼𑀘𑀺, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀦𑀕𑁆𑀕𑀺𑀬𑀁 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁. 𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 ¶ 𑀬𑀸𑀯𑀚𑀻𑀯𑀁 𑀉𑀤𑀓𑀲𑀸𑀝𑀺𑀓𑀁 𑀤𑀸𑀢𑀼’’𑀦𑁆𑀢𑀺.

𑁩𑁫𑁧. ‘‘𑀓𑀺𑀁 𑀧𑀦 𑀢𑁆𑀯𑀁, 𑀯𑀺𑀲𑀸𑀔𑁂, 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀻’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’𑀢𑀺? 𑀢𑀁 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀅𑀭𑀳𑀢𑁆𑀢𑁂 𑀯𑀸. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑁋 ‘𑀆𑀕𑀢𑀧𑀼𑀩𑁆𑀩𑀸 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀦 𑀅𑀬𑁆𑀬𑁂𑀦 𑀲𑀸𑀯𑀢𑁆𑀣𑀻’𑀢𑀺? 𑀲𑀘𑁂 𑀫𑁂 ¶ 𑀯𑀓𑁆𑀔𑀦𑁆𑀢𑀺 𑁋 ‘𑀆𑀕𑀢𑀧𑀼𑀩𑁆𑀩𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀯𑀢𑁆𑀣𑀻’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 ¶ 𑀕𑀘𑁆𑀙𑀺𑀲𑁆𑀲𑀸𑀫𑀺 𑁋 𑀦𑀺𑀲𑁆𑀲𑀁𑀲𑀬𑀁 𑀫𑁂 𑀧𑀭𑀺𑀪𑀼𑀢𑁆𑀢𑀁 𑀢𑁂𑀦 𑀅𑀬𑁆𑀬𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀸 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀯𑀸 𑀕𑀫𑀺𑀓𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀥𑀼𑀯𑀬𑀸𑀕𑀼 𑀯𑀸𑀢𑀺. 𑀢𑀲𑁆𑀲𑀸 𑀫𑁂 𑀢𑀤𑀦𑀼𑀲𑁆𑀲𑀭𑀦𑁆𑀢𑀺𑀬𑀸 𑀧𑀸𑀫𑀼𑀚𑁆𑀚𑀁 𑀚𑀸𑀬𑀺𑀲𑁆𑀲𑀢𑀺, 𑀧𑀫𑀼𑀤𑀺𑀢𑀸𑀬 𑀧𑀻𑀢𑀺 𑀚𑀸𑀬𑀺𑀲𑁆𑀲𑀢𑀺, 𑀧𑀻𑀢𑀺𑀫𑀦𑀸𑀬 𑀓𑀸𑀬𑁄 𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑀸 𑀲𑀼𑀔𑀁 ¶ 𑀯𑁂𑀤𑀺𑀬𑀺𑀲𑁆𑀲𑀸𑀫𑀺, 𑀲𑀼𑀔𑀺𑀦𑀺𑀬𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀺𑀲𑁆𑀲𑀢𑀺. 𑀲𑀸 𑀫𑁂 𑀪𑀯𑀺𑀲𑁆𑀲𑀢𑀺 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀩𑀮𑀪𑀸𑀯𑀦𑀸 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸. 𑀇𑀫𑀸𑀳𑀁, 𑀪𑀦𑁆𑀢𑁂, 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀸𑀫𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀯𑀺𑀲𑀸𑀔𑁂; 𑀲𑀸𑀥𑀼 𑀔𑁄 𑀢𑁆𑀯𑀁, 𑀯𑀺𑀲𑀸𑀔𑁂, 𑀇𑀫𑀁 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀁 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀲𑀺. 𑀅𑀦𑀼𑀚𑀸𑀦𑀸𑀫𑀺 𑀢𑁂, 𑀯𑀺𑀲𑀸𑀔𑁂, 𑀅𑀝𑁆𑀞 𑀯𑀭𑀸𑀦𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀇𑀫𑀸𑀳𑀺 ¶ 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀸 𑀅𑀦𑁆𑀦𑀧𑀸𑀦𑀁 𑀤𑀤𑀢𑀺𑀧𑁆𑀧𑀫𑁄𑀤𑀺𑀢𑀸;

𑀲𑀻𑀮𑀽𑀧𑀧𑀦𑁆𑀦𑀸 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸;

𑀤𑀤𑀸𑀢𑀺 𑀤𑀸𑀦𑀁 𑀅𑀪𑀺𑀪𑀼𑀬𑁆𑀬 𑀫𑀘𑁆𑀙𑀭𑀁;

𑀲𑁄𑀯𑀕𑁆𑀕𑀺𑀓𑀁 𑀲𑁄𑀓𑀦𑀼𑀤𑀁 𑀲𑀼𑀔𑀸𑀯𑀳𑀁.

‘‘𑀤𑀺𑀩𑁆𑀩𑀁 𑀲𑀸 𑀮𑀪𑀢𑁂 𑀆𑀬𑀼𑀁 [𑀤𑀺𑀩𑁆𑀩𑀁 𑀩𑀮𑀁 𑀲𑀸 𑀮𑀪𑀢𑁂 𑀘 𑀆𑀬𑀼𑀁 (𑀲𑀻. 𑀲𑁆𑀬𑀸.)];

𑀆𑀕𑀫𑁆𑀫 𑀫𑀕𑁆𑀕𑀁 𑀯𑀺𑀭𑀚𑀁 𑀅𑀦𑀗𑁆𑀕𑀡𑀁;

𑀲𑀸 𑀧𑀼𑀜𑁆𑀜𑀓𑀸𑀫𑀸 𑀲𑀼𑀔𑀺𑀦𑀻 𑀅𑀦𑀸𑀫𑀬𑀸;

𑀲𑀕𑁆𑀕𑀫𑁆𑀳𑀺 𑀓𑀸𑀬𑀫𑁆𑀳𑀺 𑀘𑀺𑀭𑀁 𑀧𑀫𑁄𑀤𑀢𑀻’’𑀢𑀺.

𑁩𑁫𑁨. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀕𑀫𑀺𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑀢𑁆𑀢𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁, 𑀥𑀼𑀯𑀬𑀸𑀕𑀼𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀲𑀸𑀝𑀺𑀓’’𑀦𑁆𑀢𑀺.

𑀯𑀺𑀲𑀸𑀔𑀸𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀯𑀺𑀲𑀸𑀔𑀸𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁨𑁦. 𑀦𑀺𑀲𑀻𑀤𑀦𑀸𑀤𑀺𑀅𑀦𑀼𑀚𑀸𑀦𑀦𑀸

𑁩𑁫𑁩. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀬𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀤𑁆𑀤𑀲 𑀲𑁂𑀦𑀸𑀲𑀦𑀁 ¶ 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀁, 𑀤𑀺𑀲𑁆𑀯𑀸𑀦 ¶ 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀏𑀢𑀁, 𑀆𑀦𑀦𑁆𑀤, 𑀲𑁂𑀦𑀸𑀲𑀦𑀁 𑀫𑀓𑁆𑀔𑀺𑀢’’𑀦𑁆𑀢𑀺? ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 ¶ 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺; 𑀢𑀬𑀺𑀤𑀁, 𑀪𑀕𑀯𑀸, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢’’𑀦𑁆𑀢𑀺. ‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤. 𑀫𑀼𑀘𑁆𑀘𑀢𑀺 𑀳𑀺, 𑀆𑀦𑀦𑁆𑀤, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺. 𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀬𑁂𑀧𑀺 𑀢𑁂, 𑀆𑀦𑀦𑁆𑀤, 𑀧𑀼𑀣𑀼𑀚𑁆𑀚𑀦𑀸 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀸, 𑀢𑁂𑀲𑀫𑁆𑀧𑀺 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀤𑁆𑀤𑀲𑀁 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀁, 𑀤𑀺𑀲𑁆𑀯𑀸𑀦 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺𑀁 ‘𑀓𑀺𑀁 𑀏𑀢𑀁, 𑀆𑀦𑀦𑁆𑀤, 𑀲𑁂𑀦𑀸𑀲𑀦𑀁 𑀫𑀓𑁆𑀔𑀺𑀢’𑀦𑁆𑀢𑀺? ‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀧𑀡𑀻𑀢𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺. 𑀢𑁂𑀲𑀁 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺; 𑀢𑀬𑀺𑀤𑀁, 𑀪𑀕𑀯𑀸, 𑀲𑁂𑀦𑀸𑀲𑀦𑀁 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢’𑀦𑁆𑀢𑀺. ‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀫𑀼𑀘𑁆𑀘𑀢𑀺 𑀳𑀺, 𑀆𑀦𑀦𑁆𑀤, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀅𑀲𑀫𑁆𑀧𑀚𑀸𑀦𑀸𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦 ¶ 𑀅𑀲𑀼𑀘𑀺. 𑀬𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀲𑀫𑁆𑀧𑀚𑀸𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀬𑁂𑀧𑀺 𑀢𑁂, 𑀆𑀦𑀦𑁆𑀤, 𑀧𑀼𑀣𑀼𑀚𑁆𑀚𑀦𑀸 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀸 𑀢𑁂𑀲𑀫𑁆𑀧𑀺 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬𑀸’’’𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄 𑁋 𑀤𑀼𑀓𑁆𑀔𑀁 𑀲𑀼𑀧𑀢𑀺, 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀤𑁂𑀯𑀢𑀸 𑀦 𑀭𑀓𑁆𑀔𑀦𑁆𑀢𑀺, 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄.

‘‘𑀧𑀜𑁆𑀘𑀺𑀫𑁂 ¶ , 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄 𑁋 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑁄.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀕𑀼𑀢𑁆𑀢𑀺𑀬𑀸 𑀘𑀻𑀯𑀭𑀕𑀼𑀢𑁆𑀢𑀺𑀬𑀸 𑀲𑁂𑀦𑀸𑀲𑀦𑀕𑀼𑀢𑁆𑀢𑀺𑀬𑀸 𑀦𑀺𑀲𑀻𑀤𑀦’’𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀢𑀺𑀔𑀼𑀤𑁆𑀤𑀓𑀁 𑀦𑀺𑀲𑀻𑀤𑀦𑀁 𑀦 𑀲𑀩𑁆𑀩𑀁 𑀲𑁂𑀦𑀸𑀲𑀦𑀁 𑀲𑀁𑀕𑁄𑀧𑁂𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀆𑀓𑀗𑁆𑀔𑀢𑀺 𑀢𑀸𑀯𑀫𑀳𑀦𑁆𑀢𑀁 𑀧𑀘𑁆𑀘𑀢𑁆𑀣𑀭𑀡𑀁 𑀓𑀸𑀢𑀼𑀦𑁆𑀢𑀺.

𑁩𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀆𑀬𑀲𑁆𑀫𑀢𑁄 𑀩𑁂𑀮𑀝𑁆𑀞𑀲𑀻𑀲𑀲𑁆𑀲 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄 𑀳𑁄𑀢𑀺. 𑀢𑀲𑁆𑀲 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀢𑁂 ¶ 𑀪𑀺𑀓𑁆𑀔𑀽 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀇𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 ¶ 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄. 𑀮𑀲𑀺𑀓𑀸𑀬 𑀘𑀻𑀯𑀭𑀸𑀦𑀺 𑀓𑀸𑀬𑁂 𑀮𑀕𑁆𑀕𑀦𑁆𑀢𑀺. 𑀢𑀸𑀦𑀺 𑀫𑀬𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀧𑀓𑀟𑁆𑀠𑀸𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀡𑁆𑀟𑀼 𑀯𑀸 𑀧𑀺𑀴𑀓𑀸 𑀯𑀸 𑀅𑀲𑁆𑀲𑀸𑀯𑁄 𑀯𑀸 𑀣𑀼𑀮𑁆𑀮𑀓𑀘𑁆𑀙𑀼 𑀯𑀸 𑀆𑀩𑀸𑀥𑁄 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺.

𑁩𑁫𑁫. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 [𑀫𑀼𑀔𑀧𑀼𑀜𑁆𑀚𑀦𑀘𑁄𑀴𑀁 (𑀓.)] 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁. 𑀅𑀣 𑀔𑁄 𑀪𑀕𑀯𑀸 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 ¶ 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓’’𑀦𑁆𑀢𑀺 [𑀫𑀼𑀔𑀧𑀼𑀜𑁆𑀙𑀦𑀘𑁄𑀮𑀦𑁆𑀢𑀺 (𑀲𑁆𑀬𑀸.)].

𑁩𑁫𑁬. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀭𑁄𑀚𑁄 𑀫𑀮𑁆𑀮𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀳𑀸𑀬𑁄 𑀳𑁄𑀢𑀺. 𑀭𑁄𑀚𑀲𑁆𑀲 𑀫𑀮𑁆𑀮𑀲𑁆𑀲 𑀔𑁄𑀫𑀧𑀺𑀮𑁄𑀢𑀺𑀓𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺. 𑀆𑀬𑀲𑁆𑀫𑀢𑁄 𑀘 𑀆𑀦𑀦𑁆𑀤𑀲𑁆𑀲 𑀔𑁄𑀫𑀧𑀺𑀮𑁄𑀢𑀺𑀓𑀸𑀬 𑀅𑀢𑁆𑀣𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁 𑁋 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 ¶ 𑀘, 𑀚𑀻𑀯𑀢𑀺 𑀘, 𑀚𑀸𑀦𑀸𑀢𑀺 𑀘, 𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀦𑁆𑀢𑀺.

𑁩𑁫𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁. 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀸𑀭𑀘𑁄𑀴𑀓𑀦𑁆𑀢𑀺.

𑀦𑀺𑀲𑀻𑀤𑀦𑀸𑀤𑀺𑀅𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁧. 𑀧𑀘𑁆𑀙𑀺𑀫𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀸𑀤𑀺𑀓𑀣𑀸

𑁩𑁫𑁮. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀬𑀸𑀦𑀺 𑀢𑀸𑀦𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸𑀦𑀺 𑀢𑀺𑀘𑀻𑀯𑀭𑀦𑁆𑀢𑀺 𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺 𑀯𑀸 𑀦𑀺𑀲𑀻𑀤𑀦𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀯𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻𑀢𑀺 ¶ 𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀦𑁆𑀢𑀺 𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀯𑀸, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺 𑀦𑀼 𑀔𑁄, 𑀉𑀤𑀸𑀳𑀼, 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀦𑀺𑀲𑀻𑀤𑀦𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀘𑁆𑀘𑀢𑁆𑀣𑀭𑀡𑀁 𑀅𑀥𑀺𑀝𑁆𑀞𑀸𑀢𑀼𑀁 ¶ 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑀅𑀣 ¶ 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀦𑀼 𑀔𑁄 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺.

𑁩𑁫𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀁𑀲𑀼𑀓𑀽𑀮𑀓𑀢𑁄 𑀕𑀭𑀼𑀓𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑁆𑀢𑀮𑀽𑀔𑀁 𑀓𑀸𑀢𑀼𑀦𑁆𑀢𑀺. 𑀯𑀺𑀓𑀡𑁆𑀡𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀓𑀡𑁆𑀡𑀁 𑀉𑀤𑁆𑀥𑀭𑀺𑀢𑀼𑀦𑁆𑀢𑀺. 𑀲𑀼𑀢𑁆𑀢𑀸 𑀑𑀓𑀺𑀭𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀸𑀢𑀁 𑀧𑀭𑀺𑀪𑀡𑁆𑀟𑀁 𑀆𑀭𑁄𑀧𑁂𑀢𑀼𑀦𑁆𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀸𑀝𑀺𑀬𑀸 𑀧𑀢𑁆𑀢𑀸 𑀮𑀼𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀧𑀤𑀓𑀁 𑀓𑀸𑀢𑀼𑀦𑁆𑀢𑀺.

𑁩𑁬𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀦𑁆𑀢𑀺.

𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀦𑁆𑀢𑀺.

𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 ¶ 𑀏𑀓𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼𑀁, 𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀅𑀘𑁆𑀙𑀺𑀦𑁆𑀦𑀓𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁩𑁬𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀲𑁄 𑀘 𑀢𑀁 𑀘𑀻𑀯𑀭𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀫𑀸𑀢𑀸𑀧𑀺𑀢𑀭𑁄𑀢𑀺 [𑀫𑀸𑀢𑀸𑀧𑀺𑀢𑀽𑀦𑀁 𑀔𑁄 (𑀲𑀻.)] 𑀔𑁄, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁂 [𑀯𑀤𑀫𑀸𑀦𑁄 (𑀓.), 𑀯𑀤𑀫𑀸𑀦𑁂 (?)] 𑀓𑀺𑀁 𑀯𑀤𑁂𑀬𑁆𑀬𑀸𑀫? 𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀤𑀸𑀢𑀼𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀩𑁆𑀩𑀁. 𑀬𑁄 𑀯𑀺𑀦𑀺𑀧𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑁩𑁬𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀦𑁆𑀥𑀯𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀘𑁄𑀭𑀸 𑀢𑀁 𑀘𑀻𑀯𑀭𑀁 𑀅𑀯𑀳𑀭𑀺𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀤𑀼𑀘𑁆𑀘𑁄𑀴𑁄 𑀳𑁄𑀢𑀺 𑀮𑀽𑀔𑀘𑀻𑀯𑀭𑁄. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀤𑀼𑀘𑁆𑀘𑁄𑀴𑁄 𑀮𑀽𑀔𑀘𑀻𑀯𑀭𑁄𑀲𑀻’’𑀢𑀺? ‘‘𑀇𑀥𑀸𑀳𑀁 [𑀲𑁄 𑀅𑀳𑀁 (𑀓𑀢𑁆𑀣𑀘𑀺)], 𑀆𑀯𑀼𑀲𑁄, 𑀅𑀦𑁆𑀥𑀯𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀘𑁄𑀭𑀸 𑀢𑀁 𑀘𑀻𑀯𑀭𑀁 𑀅𑀯𑀳𑀭𑀺𑀁𑀲𑀼. 𑀢𑁂𑀦𑀸𑀳𑀁 𑀤𑀼𑀘𑁆𑀘𑁄𑀴𑁄 𑀮𑀽𑀔𑀘𑀻𑀯𑀭𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀲𑁆𑀲𑀢𑀺𑀬𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀦𑀦𑀼 ¶ , 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑁋 ‘𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄’𑀢𑀺? 𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 ¶ 𑀕𑀸𑀫𑀁 𑀧𑀯𑀺𑀝𑁆𑀞𑁄’’𑀢𑀺? ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑁋 ‘𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄’𑀢𑀺. 𑀅𑀧𑀺 𑀘𑀸𑀳𑀁 𑀅𑀲𑁆𑀲𑀢𑀺𑀬𑀸 𑀧𑀯𑀺𑀝𑁆𑀞𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀲𑀗𑁆𑀖𑀸𑀝𑀺𑀬𑀸 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀅𑀢𑁆𑀣𑀢𑀓𑀣𑀺𑀦𑀁 𑀯𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀲𑀗𑁆𑀖𑀸𑀝𑀺𑀬𑀸 𑀦𑀺𑀓𑁆𑀔𑁂𑀧𑀸𑀬.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀦𑀺𑀓𑁆𑀔𑁂𑀧𑀸𑀬…𑀧𑁂… 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀅𑀢𑁆𑀣𑀢𑀓𑀣𑀺𑀦𑀁 𑀯𑀸 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀓𑁆𑀔𑁂𑀧𑀸𑀬.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀺𑀓𑁆𑀔𑁂𑀧𑀸𑀬 𑁋 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸 𑀳𑁄𑀢𑀺, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀓𑀢𑀸 𑀯𑀸 𑀳𑁄𑀢𑀺 𑀯𑀺𑀧𑁆𑀧𑀓𑀢𑀸 ¶ 𑀯𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀘𑁆𑀘𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀺𑀓𑁆𑀔𑁂𑀧𑀸𑀬𑀸𑀢𑀺.

𑀧𑀘𑁆𑀙𑀺𑀫𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁨. 𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁬𑁩. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀏𑀓𑁄 𑀯𑀲𑁆𑀲𑀁 𑀯𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀅𑀤𑀁𑀲𑀼. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀘𑀢𑀼𑀯𑀕𑁆𑀕𑁄 𑀧𑀘𑁆𑀙𑀺𑀫𑁄 𑀲𑀗𑁆𑀖𑁄’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀏𑀓𑀓𑁄. 𑀇𑀫𑁂 𑀘 𑀫𑀦𑀼𑀲𑁆𑀲𑀸 ¶ 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀅𑀤𑀁𑀲𑀼. 𑀬𑀁𑀦𑀽𑀦𑀸𑀳𑀁 𑀇𑀫𑀸𑀦𑀺 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀲𑀸𑀯𑀢𑁆𑀣𑀺𑀁 𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀢𑀼𑀬𑁆𑀳𑁂𑀯, 𑀪𑀺𑀓𑁆𑀔𑀼, 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑁄 𑀯𑀲𑁆𑀲𑀁 𑀯𑀲𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸𑀢𑀺.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀉𑀢𑀼𑀓𑀸𑀮𑀁 𑀏𑀓𑁄 𑀯𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀅𑀤𑀁𑀲𑀼. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀘𑀢𑀼𑀯𑀕𑁆𑀕𑁄 𑀧𑀘𑁆𑀙𑀺𑀫𑁄 𑀲𑀗𑁆𑀖𑁄’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀏𑀓𑀓𑁄. 𑀇𑀫𑁂 𑀘 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀅𑀤𑀁𑀲𑀼. 𑀬𑀁𑀦𑀽𑀦𑀸𑀳𑀁 𑀇𑀫𑀸𑀦𑀺 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀲𑀸𑀯𑀢𑁆𑀣𑀺𑀁 𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂 ¶ , 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀢𑀼𑀓𑀸𑀮𑀁 𑀏𑀓𑁄 𑀯𑀲𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀼𑀁 𑁋 ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀁 𑀘𑀻𑀯𑀭𑀁 𑀅𑀦𑀥𑀺𑀝𑁆𑀞𑀺𑀢𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀲𑀫𑀓𑁄 𑀤𑀸𑀢𑀩𑁆𑀩𑁄 𑀪𑀸𑀕𑁄. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀁 𑀘𑀻𑀯𑀭𑀁 𑀪𑀸𑀚𑀺𑀬𑀫𑀸𑀦𑁂, 𑀅𑀧𑀸𑀢𑀺𑀢𑁂 𑀓𑀼𑀲𑁂, 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀲𑀫𑀓𑁄 𑀤𑀸𑀢𑀩𑁆𑀩𑁄 𑀪𑀸𑀕𑁄. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀢𑀁 𑀘𑀻𑀯𑀭𑀁 𑀪𑀸𑀚𑀺𑀬𑀫𑀸𑀦𑁂, 𑀧𑀸𑀢𑀺𑀢𑁂 𑀓𑀼𑀲𑁂, 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑁄 𑀪𑀸𑀕𑁄𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀸𑀢𑀺𑀓𑀸 𑀣𑁂𑀭𑀸, 𑀆𑀬𑀲𑁆𑀫𑀸 𑀘 𑀇𑀲𑀺𑀤𑀸𑀲𑁄 𑀆𑀬𑀲𑁆𑀫𑀸 𑀘 𑀇𑀲𑀺𑀪𑀝𑁄, 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑀸 𑀅𑀜𑁆𑀜𑀢𑀭𑀁 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀁𑀲𑀼. 𑀫𑀦𑀼𑀲𑁆𑀲𑀸 𑀘𑀺𑀭𑀲𑁆𑀲𑀸𑀧𑀺 𑀣𑁂𑀭𑀸 𑀆𑀕𑀢𑀸𑀢𑀺 𑀲𑀘𑀻𑀯𑀭𑀸𑀦𑀺 𑀪𑀢𑁆𑀢𑀸𑀦𑀺 ¶ 𑀅𑀤𑀁𑀲𑀼. 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀣𑁂𑀭𑁂 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀇𑀫𑀸𑀦𑀺, 𑀪𑀦𑁆𑀢𑁂, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀣𑁂𑀭𑁂 𑀆𑀕𑀫𑁆𑀫 𑀉𑀧𑁆𑀧𑀦𑁆𑀦𑀸𑀦𑀺, 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀣𑁂𑀭𑀸 𑀪𑀸𑀕’’𑀦𑁆𑀢𑀺. 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀣𑀸 𑀔𑁄 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀬𑁄 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲

𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ¶ ‘𑀘𑀢𑀼𑀯𑀕𑁆𑀕𑁄 𑀧𑀘𑁆𑀙𑀺𑀫𑁄 𑀲𑀗𑁆𑀖𑁄’𑀢𑀺. 𑀫𑀬𑀜𑁆𑀘𑀫𑁆𑀳𑀸 𑀢𑀬𑁄 𑀚𑀦𑀸. 𑀇𑀫𑁂 𑀘 𑀫𑀦𑀼𑀲𑁆𑀲𑀸 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀘𑀻𑀯𑀭𑀸𑀦𑀺 ¶ 𑀤𑁂𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸, 𑀆𑀬𑀲𑁆𑀫𑀸 𑀘 𑀦𑀺𑀮𑀯𑀸𑀲𑀻 𑀆𑀬𑀲𑁆𑀫𑀸 𑀘 𑀲𑀸𑀡𑀯𑀸𑀲𑀻 𑀆𑀬𑀲𑁆𑀫𑀸 𑀘 𑀕𑁄𑀢𑀓𑁄 𑀆𑀬𑀲𑁆𑀫𑀸 𑀘 𑀪𑀕𑀼 𑀆𑀬𑀲𑁆𑀫𑀸 𑀘 𑀨𑀴𑀺𑀓𑀲𑀦𑁆𑀢𑀸𑀦𑁄, 𑀧𑀸𑀝𑀮𑀺𑀧𑀼𑀢𑁆𑀢𑁂 𑀯𑀺𑀳𑀭𑀦𑁆𑀢𑀺 𑀓𑀼𑀓𑁆𑀓𑀼𑀝𑀸𑀭𑀸𑀫𑁂. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀣𑀸 𑀔𑁄 𑀫𑀬𑀁 𑀆𑀯𑀼𑀲𑁄 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺.

𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁩. 𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼

𑁩𑁬𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑀭𑀁 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀘 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’’𑀦𑁆𑀢𑀺? ‘‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀘𑀻𑀯𑀭𑀪𑀸𑀕𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀧𑀺 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’’𑀦𑁆𑀢𑀺? ‘‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄𑀧𑀺 𑀘𑀻𑀯𑀭𑀪𑀸𑀕𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀧𑀺 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’’𑀦𑁆𑀢𑀺? ‘‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄𑀧𑀺 𑀘𑀻𑀯𑀭𑀪𑀸𑀕𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀘𑀻𑀯𑀭𑀪𑀡𑁆𑀟𑀺𑀓𑀁 𑀆𑀤𑀸𑀬 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀳𑀸𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 ¶ , 𑀆𑀯𑀼𑀲𑁄 𑀉𑀧𑀦𑀦𑁆𑀤, 𑀩𑀳𑀼𑀁 𑀢𑁂 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. ‘‘𑀓𑀼𑀢𑁄 𑀫𑁂 ¶ , 𑀆𑀯𑀼𑀲𑁄, 𑀧𑀼𑀜𑁆𑀜𑀁? 𑀇𑀥𑀸𑀳𑀁, 𑀆𑀯𑀼𑀲𑁄, 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑀭𑀁 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀸𑀲𑀺𑀁. 𑀢𑀢𑁆𑀣 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂 𑀫𑀁 𑀏𑀯𑀫𑀸𑀳𑀁𑀲𑀼 𑁋 ‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’𑀦𑁆𑀢𑀺? ‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’𑀢𑀺. 𑀢𑀢𑁄 𑀘𑀻𑀯𑀭𑀪𑀸𑀕𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺𑀁. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀧𑀺 𑀫𑀁 𑀏𑀯𑀫𑀸𑀳𑀁𑀲𑀼 𑁋 ‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’’’𑀦𑁆𑀢𑀺? ‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’𑀢𑀺. 𑀢𑀢𑁄𑀧𑀺 𑀘𑀻𑀯𑀭𑀪𑀸𑀕𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀆𑀯𑀸𑀲𑀁 ¶ 𑀅𑀕𑀫𑀸𑀲𑀺𑀁. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀪𑀸𑀚𑁂𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀧𑀺 𑀫𑀁 𑀏𑀯𑀫𑀸𑀳𑀁𑀲𑀼 𑁋 ‘𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀸𑀦𑀺 𑀘𑀻𑀯𑀭𑀸𑀦𑀺 𑀪𑀸𑀚𑀺𑀬𑀺𑀲𑁆𑀲𑀦𑁆𑀢𑀺, 𑀲𑀸𑀤𑀺𑀬𑀺𑀲𑁆𑀲𑀲𑀺 𑀪𑀸𑀕’𑀦𑁆𑀢𑀺? ‘𑀆𑀫𑀸𑀯𑀼𑀲𑁄, 𑀲𑀸𑀤𑀺𑀬𑀺𑀲𑁆𑀲𑀸𑀫𑀻’𑀢𑀺. 𑀢𑀢𑁄𑀧𑀺 𑀘𑀻𑀯𑀭𑀪𑀸𑀕𑀁 𑀅𑀕𑁆𑀕𑀳𑁂𑀲𑀺𑀁. 𑀏𑀯𑀁 𑀫𑁂 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀉𑀧𑀦𑀦𑁆𑀤, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀺𑀲𑁆𑀲𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 ¶ 𑀘𑀻𑀯𑀭𑀪𑀸𑀕𑀁 𑀲𑀸𑀤𑀺𑀬𑀺𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 ¶ 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁂𑀦 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑁄 𑀲𑀸𑀤𑀺𑀢𑀩𑁆𑀩𑁄. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀏𑀓𑁄 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀺 𑁋 ‘‘𑀏𑀯𑀁 𑀫𑁂 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀤𑁂𑀣, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀲𑁆𑀲 𑀏𑀓𑀸𑀥𑀺𑀧𑁆𑀧𑀸𑀬𑀁. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀓𑁄 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀢𑀺 𑁋 ‘‘𑀏𑀯𑀁 𑀫𑁂 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑀘𑁂 𑀅𑀫𑀼𑀢𑁆𑀭 𑀉𑀧𑀟𑁆𑀠𑀁 𑀅𑀫𑀼𑀢𑁆𑀭 𑀉𑀧𑀟𑁆𑀠𑀁 𑀯𑀲𑀢𑀺, 𑀅𑀫𑀼𑀢𑁆𑀭 𑀉𑀧𑀟𑁆𑀠𑁄 𑀅𑀫𑀼𑀢𑁆𑀭 𑀉𑀧𑀟𑁆𑀠𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄. 𑀬𑀢𑁆𑀣 𑀯𑀸 𑀧𑀦 𑀩𑀳𑀼𑀢𑀭𑀁 𑀯𑀲𑀢𑀺, 𑀢𑀢𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄𑀢𑀺.

𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁨𑁪. 𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸

𑁩𑁬𑁫. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀘𑁆𑀙𑀺𑀯𑀺𑀓𑀸𑀭𑀸𑀩𑀸𑀥𑁄 𑀳𑁄𑀢𑀺. 𑀲𑁄 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄 𑀲𑁂𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀬𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑀬𑀫𑀸𑀦𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀢𑁂, 𑀪𑀺𑀓𑁆𑀔𑀼, 𑀆𑀩𑀸𑀥𑁄’’𑀢𑀺? ‘‘𑀓𑀼𑀘𑁆𑀙𑀺𑀯𑀺𑀓𑀸𑀭𑁄 𑀫𑁂, 𑀪𑀕𑀯𑀸’’𑀢𑀺. ‘‘𑀅𑀢𑁆𑀣𑀺 ¶ 𑀧𑀦 𑀢𑁂, 𑀪𑀺𑀓𑁆𑀔𑀼, 𑀉𑀧𑀝𑁆𑀞𑀸𑀓𑁄’’𑀢𑀺? ‘‘𑀦𑀢𑁆𑀣𑀺, 𑀪𑀕𑀯𑀸’’𑀢𑀺 ¶ . ‘‘𑀓𑀺𑀲𑁆𑀲 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺? ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀓𑀸𑀭𑀓𑁄; 𑀢𑁂𑀦 𑀫𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀸𑀦𑀦𑁆𑀤, 𑀉𑀤𑀓𑀁 𑀆𑀳𑀭, 𑀇𑀫𑀁 𑀪𑀺𑀓𑁆𑀔𑀼𑀁 𑀦𑀳𑀸𑀧𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀤𑀓𑀁 𑀆𑀳𑀭𑀺. 𑀪𑀕𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀭𑀺𑀥𑁄𑀯𑀺. 𑀪𑀕𑀯𑀸 𑀲𑀻𑀲𑀢𑁄 𑀅𑀕𑁆𑀕𑀳𑁂𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀸𑀤𑀢𑁄 𑀉𑀘𑁆𑀘𑀸𑀭𑁂𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀸𑀢𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀫𑀼𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄’’𑀢𑀺? ‘‘𑀅𑀢𑁆𑀣𑀺, 𑀪𑀕𑀯𑀸’’𑀢𑀺. ‘‘𑀓𑀺𑀁 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀩𑀸𑀥𑁄’’𑀢𑀺? ‘‘𑀢𑀲𑁆𑀲, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀓𑀼𑀘𑁆𑀙𑀺𑀯𑀺𑀓𑀸𑀭𑀸𑀩𑀸𑀥𑁄’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀝𑁆𑀞𑀸𑀓𑁄’’𑀢𑀺? ‘‘𑀦𑀢𑁆𑀣𑀺, 𑀪𑀕𑀯𑀸’’𑀢𑀺 ¶ . ‘‘𑀓𑀺𑀲𑁆𑀲 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺? ‘‘𑀏𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀅𑀓𑀸𑀭𑀓𑁄; 𑀢𑁂𑀦 𑀢𑀁 𑀪𑀺𑀓𑁆𑀔𑀽 𑀦 𑀉𑀧𑀝𑁆𑀞𑁂𑀦𑁆𑀢𑀻’’𑀢𑀺. ‘‘𑀦𑀢𑁆𑀣𑀺 𑀯𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀬𑁂 𑀯𑁄 𑀉𑀧𑀝𑁆𑀞𑀳𑁂𑀬𑁆𑀬𑀼𑀁. 𑀢𑀼𑀫𑁆𑀳𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀫𑀜𑁆𑀜𑀁 𑀦 𑀉𑀧𑀝𑁆𑀞𑀳𑀺𑀲𑁆𑀲𑀣, 𑀅𑀣 𑀓𑁄 𑀘𑀭𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀢𑀺? 𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀭𑀺𑀬𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀳𑁄𑀢𑀺 ¶ , 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄 ¶ ; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀸𑀘𑀭𑀺𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀸𑀘𑀭𑀺𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀦 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁄 𑀯𑀸 𑀲𑀗𑁆𑀖𑁂𑀦 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀦𑁄 𑀘𑁂 𑀉𑀧𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲’’.

𑁩𑁬𑁬. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑁄 𑀳𑁄𑀢𑀺 𑁋 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀦 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀦𑀸𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑁄 𑀳𑁄𑀢𑀺.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂 ¶ , 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑁄 𑀳𑁄𑀢𑀺 𑁋 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀆𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 ¶ 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑁄 𑀳𑁄𑀢𑀺.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑁋 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀦 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺 𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀆𑀫𑀺𑀲𑀦𑁆𑀢𑀭𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 ¶ 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁.

𑀧𑀜𑁆𑀘𑀳𑀺 ¶ , 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑁋 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺 𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺 𑀦𑁄 𑀆𑀫𑀺𑀲𑀦𑁆𑀢𑀭𑁄, 𑀅𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀦𑁆𑀢𑀺.

𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁫. 𑀫𑀢𑀲𑀦𑁆𑀢𑀓𑀓𑀣𑀸

𑁩𑁬𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀅𑀜𑁆𑀜𑀢𑀭𑀁 𑀆𑀯𑀸𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑀢𑁆𑀣 ¶ 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀯𑀡𑁆𑀡𑀺𑀢𑀁. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀧𑀝𑁆𑀞𑀳𑁂𑀫𑀸’’𑀢𑀺. 𑀢𑁂 𑀢𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 𑀢𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀓𑀸𑀮𑀫𑀓𑀸𑀲𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀗𑁆𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 ¶ 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁. 𑀢𑁂𑀦 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄. 𑀇𑀤𑀁 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘𑀸’’’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄. 𑀇𑀤𑀁 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 ¶ 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄. 𑀇𑀤𑀁 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘. 𑀲𑀗𑁆𑀖𑁄 𑀇𑀫𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀢𑀺𑀘𑀻𑀯𑀭𑀲𑁆𑀲 𑀘 𑀧𑀢𑁆𑀢𑀲𑁆𑀲 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 ¶ 𑀇𑀤𑀁 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 ¶ .

𑁩𑁬𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀲𑀸𑀫𑀡𑁂𑀭𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀸𑀫𑀡𑁂𑀭𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀗𑁆𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁. 𑀢𑁂𑀦 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀲𑀸𑀫𑀡𑁂𑀭𑁄 𑀓𑀸𑀮𑀗𑁆𑀓𑀢𑁄, 𑀇𑀤𑀁 𑀢𑀲𑁆𑀲 𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘𑀸’’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀓𑀸𑀮𑀗𑁆𑀓𑀢𑁄. 𑀇𑀤𑀁 𑀢𑀲𑁆𑀲 𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀓𑀸𑀮𑀗𑁆𑀓𑀢𑁄. 𑀇𑀤𑀁 𑀢𑀲𑁆𑀲 𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘. 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀘𑀻𑀯𑀭𑀲𑁆𑀲 𑀘 𑀧𑀢𑁆𑀢𑀲𑁆𑀲 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁬𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀘 𑀲𑀸𑀫𑀡𑁂𑀭𑁄 𑀘 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 𑀢𑁂𑀳𑀺 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀓𑀸𑀮𑀫𑀓𑀸𑀲𑀺. 𑀅𑀣 𑀔𑁄 𑀢𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 ¶ 𑁋 ‘‘𑀓𑀣𑀁 𑀦𑀼 𑀔𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 ¶ 𑀲𑀸𑀫𑀡𑁂𑀭𑀲𑁆𑀲 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺 ¶ ? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀲𑀫𑀓𑀁 𑀧𑀝𑀺𑀯𑀻𑀲𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀗𑁆𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 ¶ 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁. 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓𑀦𑁆𑀢𑀺.

𑀫𑀢𑀲𑀦𑁆𑀢𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁬. 𑀦𑀕𑁆𑀕𑀺𑀬𑀧𑀝𑀺𑀓𑁆𑀔𑁂𑀧𑀓𑀣𑀸

𑁩𑁭𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸, 𑀪𑀦𑁆𑀢𑁂, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀇𑀤𑀁, 𑀪𑀦𑁆𑀢𑁂, 𑀦𑀕𑁆𑀕𑀺𑀬𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀢𑀸𑀬 𑀲𑀮𑁆𑀮𑁂𑀔𑀸𑀬 𑀥𑀼𑀢𑀢𑀸𑀬 [𑀥𑀼𑀢𑀢𑁆𑀢𑀸𑀬 (𑀓.)] 𑀧𑀸𑀲𑀸𑀤𑀺𑀓𑀢𑀸𑀬 𑀅𑀧𑀘𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀦𑀕𑁆𑀕𑀺𑀬𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀦𑀕𑁆𑀕𑀺𑀬𑀁 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂…’’ 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀦𑀕𑁆𑀕𑀺𑀬𑀁 ¶ 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀺𑀢𑀩𑁆𑀩𑀁. 𑀬𑁄 𑀲𑀫𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀦𑀕𑁆𑀕𑀺𑀬𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁭. 𑀓𑀼𑀲𑀘𑀻𑀭𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁩𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑀼𑀲𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀯𑀸𑀓𑀘𑀻𑀭𑀁 ¶ 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀨𑀮𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀓𑁂𑀲𑀓𑀫𑁆𑀩𑀮𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀯𑀸𑀴𑀓𑀫𑁆𑀩𑀮𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀉𑀮𑀽𑀓𑀧𑀓𑁆𑀔𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀚𑀺𑀦𑀓𑁆𑀔𑀺𑀧𑀁 𑀦𑀺𑀯𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸, 𑀪𑀦𑁆𑀢𑁂, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀇𑀤𑀁, 𑀪𑀦𑁆𑀢𑁂, 𑀅𑀚𑀺𑀦𑀓𑁆𑀔𑀺𑀧𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀢𑀸𑀬 𑀲𑀮𑁆𑀮𑁂𑀔𑀸𑀬 𑀥𑀼𑀢𑀢𑀸𑀬 𑀧𑀸𑀲𑀸𑀤𑀺𑀓𑀢𑀸𑀬 𑀅𑀧𑀘𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀸𑀥𑀼, 𑀪𑀦𑁆𑀢𑁂 ¶ , 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀚𑀺𑀦𑀓𑁆𑀔𑀺𑀧𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 ¶ 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀚𑀺𑀦𑀓𑁆𑀔𑀺𑀧𑀁 𑀢𑀺𑀢𑁆𑀣𑀺𑀬𑀥𑀚𑀁 𑀥𑀸𑀭𑁂𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀚𑀺𑀦𑀓𑁆𑀔𑀺𑀧𑀁 𑀢𑀺𑀢𑁆𑀣𑀺𑀬𑀥𑀚𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀓𑁆𑀓𑀦𑀸𑀴𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀧𑁄𑀢𑁆𑀣𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸, 𑀪𑀦𑁆𑀢𑁂, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲, 𑀯𑀡𑁆𑀡𑀯𑀸𑀤𑀻. 𑀅𑀬𑀁, 𑀪𑀦𑁆𑀢𑁂, 𑀧𑁄𑀢𑁆𑀣𑀓𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀬 ¶ 𑀲𑀦𑁆𑀢𑀼𑀝𑁆𑀞𑀺𑀢𑀸𑀬 𑀲𑀮𑁆𑀮𑁂𑀔𑀸𑀬 𑀥𑀼𑀢𑀢𑀸𑀬 𑀧𑀸𑀲𑀸𑀤𑀺𑀓𑀢𑀸𑀬 𑀅𑀧𑀘𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑁄𑀢𑁆𑀣𑀓𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑁄𑀢𑁆𑀣𑀓𑀁 𑀦𑀺𑀯𑀸𑀲𑁂𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑁄𑀢𑁆𑀣𑀓𑁄 𑀦𑀺𑀯𑀸𑀲𑁂𑀢𑀩𑁆𑀩𑁄. 𑀬𑁄 𑀦𑀺𑀯𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀓𑀼𑀲𑀘𑀻𑀭𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁮. 𑀲𑀩𑁆𑀩𑀦𑀻𑀮𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁩𑁭𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀩𑁆𑀩𑀦𑀻𑀮𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀧𑀻𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀮𑁄𑀳𑀺𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀓𑀸𑀦𑀺 [𑀲𑀩𑁆𑀩𑀫𑀜𑁆𑀚𑁂𑀝𑁆𑀞𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀓𑀡𑁆𑀳𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺 ¶ …𑀧𑁂… 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀅𑀘𑁆𑀙𑀺𑀦𑁆𑀦𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀤𑀻𑀖𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀧𑀼𑀧𑁆𑀨𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀨𑀡𑀤𑀲𑀸𑀦𑀺 [𑀨𑀮𑀤𑀲𑀸𑀦𑀺 (𑀓.)] 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺…𑀧𑁂… 𑀓𑀜𑁆𑀘𑀼𑀓𑀁 𑀥𑀸𑀭𑁂𑀦𑁆𑀢𑀺…𑀧𑁂… 𑀢𑀺𑀭𑀻𑀝𑀓𑀁 𑀥𑀸𑀭𑁂𑀦𑁆𑀢𑀺…𑀧𑁂… 𑀯𑁂𑀞𑀦𑀁 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑁂𑀞𑀦𑀁 𑀥𑀸𑀭𑁂𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 ¶ . 𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀦𑀻𑀮𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀩𑁆𑀩𑀧𑀻𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀩𑁆𑀩𑀮𑁄𑀳𑀺𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀩𑁆𑀩𑀫𑀜𑁆𑀚𑀺𑀝𑁆𑀞𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀩𑁆𑀩𑀓𑀡𑁆𑀳𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀲𑀩𑁆𑀩𑀫𑀳𑀸𑀭𑀗𑁆𑀕𑀭𑀢𑁆𑀢𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 ¶ 𑀲𑀩𑁆𑀩𑀫𑀳𑀸𑀦𑀸𑀫𑀭𑀢𑁆𑀢𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀅𑀘𑁆𑀙𑀺𑀦𑁆𑀦𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀤𑀻𑀖𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀧𑀼𑀧𑁆𑀨𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀨𑀡𑀤𑀲𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀦 𑀓𑀜𑁆𑀘𑀼𑀓𑀁 𑀥𑀸𑀭𑁂𑀢𑀩𑁆𑀩𑀁, 𑀦 𑀢𑀺𑀭𑀻𑀝𑀓𑀁 𑀥𑀸𑀭𑁂𑀢𑀩𑁆𑀩𑀁, 𑀦 𑀯𑁂𑀞𑀦𑀁 𑀥𑀸𑀭𑁂𑀢𑀩𑁆𑀩𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀲𑀩𑁆𑀩𑀦𑀻𑀮𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁨𑁯. 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀘𑀻𑀯𑀭𑀓𑀣𑀸

𑁩𑁭𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 ¶ 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀺, 𑀓𑀸𑀮𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀸𑀫𑀡𑁂𑀭𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀉𑀫𑁆𑀫𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀔𑀺𑀢𑁆𑀢𑀘𑀺𑀢𑁆𑀢𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀯𑁂𑀤𑀦𑀸𑀝𑁆𑀝𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀧𑀡𑁆𑀟𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀫𑀸𑀢𑀼𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀧𑀺𑀢𑀼𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀲𑀗𑁆𑀖𑀪𑁂𑀤𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑁩𑁭𑁪. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀧𑀓𑁆𑀓𑀫𑀢𑀺, 𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂 𑀤𑀸𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀯𑀺𑀩𑁆𑀪𑀫𑀢𑀺, 𑀓𑀸𑀮𑀁 𑀓𑀭𑁄𑀢𑀺, 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 ¶ , 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑁄 𑀲𑀸𑀫𑀻.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 ¶ 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂 𑀤𑀸𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑁄 𑀲𑀸𑀫𑀻.

𑁩𑁭𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀧𑀓𑁆𑀓𑀫𑀢𑀺, 𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂 𑀤𑀸𑀢𑀩𑁆𑀩𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀯𑀺𑀩𑁆𑀪𑀫𑀢𑀺, 𑀓𑀸𑀮𑀁 𑀓𑀭𑁄𑀢𑀺, 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑁄 𑀲𑀸𑀫𑀻.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺. 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂 𑀤𑀸𑀢𑀩𑁆𑀩𑀁.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑁄 𑀲𑀸𑀫𑀻.

𑀯𑀲𑁆𑀲𑀁 𑀯𑀼𑀝𑁆𑀞𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀘𑀻𑀯𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁦. 𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁭𑁬. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 ¶ 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺. 𑀲𑀗𑁆𑀖𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀲𑀗𑁆𑀖𑀲𑁆𑀲 ¶ 𑀤𑁂𑀫𑀸𑀢𑀺. 𑀲𑀗𑁆𑀖𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀧𑀓𑁆𑀔𑀲𑁆𑀲 𑀤𑁂𑀫𑀸𑀢𑀺. 𑀧𑀓𑁆𑀔𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀧𑀓𑁆𑀔𑀲𑁆𑀲 𑀤𑁂𑀫𑀸𑀢𑀺. 𑀧𑀓𑁆𑀔𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺.

𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁧. 𑀤𑀼𑀕𑁆𑀕𑀳𑀺𑀢𑀲𑀼𑀕𑁆𑀕𑀳𑀺𑀢𑀸𑀤𑀺𑀓𑀣𑀸

𑁩𑁭𑁭. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑁂 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀘𑀻𑀯𑀭𑀁 𑀧𑀸𑀳𑁂𑀲𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀣𑁂𑀭𑀲𑁆𑀲 𑀤𑁂𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸𑀫𑀕𑁆𑀕𑁂 𑀆𑀬𑀲𑁆𑀫𑀢𑁄 𑀭𑁂𑀯𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀢𑀁 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀫𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀧𑀸𑀳𑁂𑀲𑀺𑀁. 𑀲𑀫𑁆𑀧𑀢𑁆𑀢𑀁 𑀢𑀁 𑀘𑀻𑀯𑀭’’𑀦𑁆𑀢𑀺? ‘‘𑀦𑀸𑀳𑀁 𑀢𑀁, 𑀆𑀯𑀼𑀲𑁄, 𑀘𑀻𑀯𑀭𑀁 𑀧𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀆𑀯𑀼𑀲𑁄 ¶ , 𑀆𑀬𑀲𑁆𑀫𑀢𑁄 𑀳𑀢𑁆𑀣𑁂 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀧𑀸𑀳𑁂𑀲𑀺𑀁. 𑀓𑀳𑀁 𑀢𑀁 𑀘𑀻𑀯𑀭’’𑀦𑁆𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑁄 𑀯𑀺𑀲𑁆𑀲𑀸𑀲𑀸 𑀢𑀁 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑁩𑁭𑁮. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 𑁋 𑀬𑁄 𑀧𑀳𑀺𑀡𑀢𑀺 𑀲𑁄 𑀓𑀸𑀮𑀗𑁆𑀓𑀢𑁄𑀢𑀺. 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 𑁋 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀲𑁄 𑀓𑀸𑀮𑀗𑁆𑀓𑀢𑁄𑀢𑀺. 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 ¶ 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 𑁋 𑀉𑀪𑁄 𑀓𑀸𑀮𑀗𑁆𑀓𑀢𑀸𑀢𑀺. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 ¶ 𑀅𑀥𑀺𑀝𑁆𑀞𑀸𑀢𑀺. 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 ¶ 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀤𑁆𑀯𑀸𑀥𑀺𑀝𑁆𑀞𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 𑁋 ‘‘𑀬𑁄 𑀧𑀳𑀺𑀡𑀢𑀺 𑀲𑁄 ¶ 𑀓𑀸𑀮𑀗𑁆𑀓𑀢𑁄’’𑀢𑀺. 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀲𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 𑁋 ‘‘𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀲𑁄 𑀓𑀸𑀮𑀗𑁆𑀓𑀢𑁄’’𑀢𑀺. 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺. 𑀤𑀼𑀕𑁆𑀕𑀳𑀺𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 𑁋 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀉𑀪𑁄 𑀓𑀸𑀮𑀗𑁆𑀓𑀢𑀸’’𑀢𑀺. 𑀬𑁄 𑀧𑀳𑀺𑀡𑀢𑀺 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺. 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀤𑀼𑀕𑁆𑀕𑀳𑀺𑀢𑀲𑀼𑀕𑁆𑀕𑀳𑀺𑀢𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁨. 𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸

𑁩𑁭𑁯. 𑀅𑀝𑁆𑀞𑀺𑀫𑀸 ¶ , 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀘𑀻𑀯𑀭𑀲𑁆𑀲 𑀉𑀧𑁆𑀧𑀸𑀤𑀸𑀬 𑁋 𑀲𑀻𑀫𑀸𑀬 𑀤𑁂𑀢𑀺 ¶ , 𑀓𑀢𑀺𑀓𑀸𑀬 𑀤𑁂𑀢𑀺, 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀤𑁂𑀢𑀺, 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀆𑀤𑀺𑀲𑁆𑀲 𑀤𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺.

𑀲𑀻𑀫𑀸𑀬 𑀤𑁂𑀢𑀺 𑁋 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀕𑀢𑀸 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁. 𑀓𑀢𑀺𑀓𑀸𑀬 𑀤𑁂𑀢𑀺 𑁋 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀸 𑀲𑀫𑀸𑀦𑀮𑀸𑀪𑀸 𑀳𑁄𑀦𑁆𑀢𑀺 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑀺𑀦𑁆𑀦𑁂 𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀁 𑀳𑁄𑀢𑀺. 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀤𑁂𑀢𑀺, 𑀬𑀢𑁆𑀣 𑀲𑀗𑁆𑀖𑀲𑁆𑀲 𑀥𑀼𑀯𑀓𑀸𑀭𑀸 𑀓𑀭𑀺𑀬𑁆𑀬𑀦𑁆𑀢𑀺, 𑀢𑀢𑁆𑀣 𑀤𑁂𑀢𑀺. 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀩𑀳𑀼𑀓𑀸𑀧𑀺 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀏𑀓𑀸 𑀪𑀺𑀓𑁆𑀔𑀼𑀦𑀻 𑀳𑁄𑀢𑀺, 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀁, 𑀩𑀳𑀼𑀓𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀳𑁄𑀦𑁆𑀢𑀺, 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀁. 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁. 𑀆𑀤𑀺𑀲𑁆𑀲 𑀤𑁂𑀢𑀺, 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑁂 𑀯𑀸 𑀔𑀸𑀤𑀦𑀻𑀬𑁂 𑀯𑀸 𑀘𑀻𑀯𑀭𑁂 𑀯𑀸 𑀲𑁂𑀦𑀸𑀲𑀦𑁂 𑀯𑀸 𑀪𑁂𑀲𑀚𑁆𑀚𑁂 𑀯𑀸 ¶ . 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺, ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺.

𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀓𑁆𑀔𑀦𑁆𑀥𑀓𑁄 𑀅𑀝𑁆𑀞𑀫𑁄.

𑁨𑁩𑁩. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀭𑀸𑀚𑀕𑀳𑀓𑁄 ¶ 𑀦𑁂𑀕𑀫𑁄, 𑀤𑀺𑀲𑁆𑀯𑀸 𑀯𑁂𑀲𑀸𑀮𑀺𑀬𑀁 𑀕𑀡𑀺𑀁;

𑀧𑀼𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀢𑀁 𑀧𑀝𑀺𑀯𑁂𑀤𑀬𑀺.

𑀧𑀼𑀢𑁆𑀢𑁄 ¶ 𑀲𑀸𑀮𑀯𑀢𑀺𑀓𑀸𑀬, 𑀅𑀪𑀬𑀲𑁆𑀲 𑀳𑀺 𑀅𑀢𑁆𑀭𑀚𑁄;

𑀚𑀻𑀯𑀢𑀻𑀢𑀺 𑀓𑀼𑀫𑀸𑀭𑁂𑀦, 𑀲𑀗𑁆𑀔𑀸𑀢𑁄 𑀚𑀻𑀯𑀓𑁄 𑀇𑀢𑀺.

𑀲𑁄 𑀳𑀺 𑀢𑀓𑁆𑀓𑀲𑀻𑀮𑀁 𑀕𑀦𑁆𑀢𑁆𑀯𑀸, 𑀉𑀕𑁆𑀕𑀳𑁂𑀢𑁆𑀯𑀸 𑀫𑀳𑀸𑀪𑀺𑀲𑁄;

𑀲𑀢𑁆𑀢𑀯𑀲𑁆𑀲𑀺𑀓𑀆𑀩𑀸𑀥𑀁, 𑀦𑀢𑁆𑀣𑀼𑀓𑀫𑁆𑀫𑁂𑀦 𑀦𑀸𑀲𑀬𑀺.

𑀭𑀜𑁆𑀜𑁄 ¶ 𑀪𑀕𑀦𑁆𑀤𑀮𑀸𑀩𑀸𑀥𑀁, 𑀆𑀮𑁂𑀧𑁂𑀦 𑀅𑀧𑀸𑀓𑀟𑁆𑀠𑀺;

𑀫𑀫𑀜𑁆𑀘 𑀇𑀢𑁆𑀣𑀸𑀕𑀸𑀭𑀜𑁆𑀘, 𑀩𑀼𑀤𑁆𑀥𑀲𑀗𑁆𑀖𑀁 𑀘𑀼𑀧𑀝𑁆𑀞𑀳𑀺.

𑀭𑀸𑀚𑀕𑀳𑀓𑁄 𑀘 𑀲𑁂𑀝𑁆𑀞𑀺, 𑀅𑀦𑁆𑀢𑀕𑀡𑁆𑀞𑀺 𑀢𑀺𑀓𑀺𑀘𑁆𑀙𑀺𑀢𑀁;

𑀧𑀚𑁆𑀚𑁄𑀢𑀲𑁆𑀲 𑀫𑀳𑀸𑀭𑁄𑀕𑀁, 𑀖𑀢𑀧𑀸𑀦𑁂𑀦 𑀦𑀸𑀲𑀬𑀺.

𑀅𑀥𑀺𑀓𑀸𑀭𑀜𑁆𑀘 𑀲𑀺𑀯𑁂𑀬𑁆𑀬𑀁, 𑀅𑀪𑀺𑀲𑀦𑁆𑀦𑀁 𑀲𑀺𑀦𑁂𑀳𑀢𑀺;

𑀢𑀻𑀳𑀺 𑀉𑀧𑁆𑀧𑀮𑀳𑀢𑁆𑀣𑁂𑀳𑀺, 𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀁.

𑀧𑀓𑀢𑀢𑁆𑀢𑀁 𑀯𑀭𑀁 𑀬𑀸𑀘𑀺, 𑀲𑀺𑀯𑁂𑀬𑁆𑀬𑀜𑁆𑀘 𑀧𑀝𑀺𑀕𑁆𑀕𑀳𑀺;

𑀘𑀻𑀯𑀭𑀜𑁆𑀘 𑀕𑀺𑀳𑀺𑀤𑀸𑀦𑀁, 𑀅𑀦𑀼𑀜𑁆𑀜𑀸𑀲𑀺 𑀢𑀣𑀸𑀕𑀢𑁄.

𑀭𑀸𑀚𑀕𑀳𑁂 𑀚𑀦𑀧𑀤𑁂 𑀩𑀳𑀼𑀁, 𑀉𑀧𑁆𑀧𑀚𑁆𑀚𑀺 𑀘𑀻𑀯𑀭𑀁;

𑀧𑀸𑀯𑀸𑀭𑁄 𑀓𑁄𑀲𑀺𑀬𑀜𑁆𑀘𑁂𑀯, 𑀓𑁄𑀚𑀯𑁄 𑀅𑀟𑁆𑀠𑀓𑀸𑀲𑀺𑀓𑀁.

𑀉𑀘𑁆𑀘𑀸𑀯𑀘𑀸 𑀘 𑀲𑀦𑁆𑀢𑀼𑀝𑁆𑀞𑀺, 𑀦𑀸𑀕𑀫𑁂𑀲𑀸𑀕𑀫𑁂𑀲𑀼𑀁 𑀘;

𑀧𑀞𑀫𑀁 𑀧𑀘𑁆𑀙𑀸 𑀲𑀤𑀺𑀲𑀸, 𑀓𑀢𑀺𑀓𑀸 𑀘 𑀧𑀝𑀺𑀳𑀭𑀼𑀁.

𑀪𑀡𑁆𑀟𑀸𑀕𑀸𑀭𑀁 𑀅𑀕𑀼𑀢𑁆𑀢𑀜𑁆𑀘, 𑀯𑀼𑀝𑁆𑀞𑀸𑀧𑁂𑀦𑁆𑀢𑀺 𑀢𑀣𑁂𑀯 𑀘;

𑀉𑀲𑁆𑀲𑀦𑁆𑀦𑀁 𑀓𑁄𑀮𑀸𑀳𑀮𑀜𑁆𑀘, 𑀓𑀣𑀁 𑀪𑀸𑀚𑁂 𑀓𑀣𑀁 𑀤𑀤𑁂.

𑀲𑀓𑀸𑀢𑀺𑀭𑁂𑀓𑀪𑀸𑀕𑁂𑀦, 𑀧𑀝𑀺𑀯𑀻𑀲𑁄 𑀓𑀣𑀁 𑀤𑀤𑁂;

𑀙𑀓𑀡𑁂𑀦 ¶ 𑀲𑀻𑀢𑀼𑀤𑀓𑀸 [𑀲𑀻𑀢𑀼𑀦𑁆𑀤𑀻 𑀘 (𑀲𑀻.), 𑀲𑀻𑀢𑀼𑀡𑁆𑀳𑀺 𑀘 (𑀓𑀢𑁆𑀣𑀘𑀺)], 𑀉𑀢𑁆𑀢𑀭𑀺𑀢𑀼 𑀦 𑀚𑀸𑀦𑀭𑁂.

𑀆𑀭𑁄𑀧𑁂𑀦𑁆𑀢𑀸 𑀪𑀸𑀚𑀦𑀜𑁆𑀘, 𑀧𑀸𑀢𑀺𑀬𑀸 𑀘 𑀙𑀫𑀸𑀬 𑀘;

𑀉𑀧𑀘𑀺𑀓𑀸𑀫𑀚𑁆𑀛𑁂 𑀚𑀻𑀭𑀦𑁆𑀢𑀺, 𑀏𑀓𑀢𑁄 𑀧𑀢𑁆𑀣𑀺𑀦𑁆𑀦𑁂𑀦 𑀘.

𑀨𑀭𑀼𑀲𑀸𑀘𑁆𑀙𑀺𑀦𑁆𑀦𑀘𑁆𑀙𑀺𑀩𑀦𑁆𑀥𑀸 ¶ , 𑀅𑀤𑁆𑀤𑀲𑀸𑀲𑀺 𑀉𑀩𑁆𑀪𑀡𑁆𑀟𑀺𑀢𑁂;

𑀯𑀻𑀫𑀁𑀲𑀺𑀢𑁆𑀯𑀸 𑀲𑀓𑁆𑀬𑀫𑀼𑀦𑀺, 𑀅𑀦𑀼𑀜𑁆𑀜𑀸𑀲𑀺 𑀢𑀺𑀘𑀻𑀯𑀭𑀁.

𑀅𑀜𑁆𑀜𑁂𑀦 ¶ 𑀅𑀢𑀺𑀭𑁂𑀓𑁂𑀦, 𑀉𑀧𑁆𑀧𑀚𑁆𑀚𑀺 𑀙𑀺𑀤𑁆𑀤𑀫𑁂𑀯 𑀘;

𑀘𑀸𑀢𑀼𑀤𑁆𑀤𑀻𑀧𑁄 𑀯𑀭𑀁 𑀬𑀸𑀘𑀺, 𑀤𑀸𑀢𑀼𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁.

𑀆𑀕𑀦𑁆𑀢𑀼𑀕𑀫𑀺𑀕𑀺𑀮𑀸𑀦𑀁, 𑀉𑀧𑀝𑁆𑀞𑀸𑀓𑀜𑁆𑀘 𑀪𑁂𑀲𑀚𑁆𑀚𑀁;

𑀥𑀼𑀯𑀁 𑀉𑀤𑀓𑀲𑀸𑀝𑀺𑀜𑁆𑀘, 𑀧𑀡𑀻𑀢𑀁 𑀅𑀢𑀺𑀔𑀼𑀤𑁆𑀤𑀓𑀁.

𑀣𑀼𑀮𑁆𑀮𑀓𑀘𑁆𑀙𑀼𑀫𑀼𑀔𑀁 𑀔𑁄𑀫𑀁, 𑀧𑀭𑀺𑀧𑀼𑀡𑁆𑀡𑀁 𑀅𑀥𑀺𑀝𑁆𑀞𑀸𑀦𑀁;

𑀧𑀘𑁆𑀙𑀺𑀫𑀁 𑀓𑀢𑁄 𑀕𑀭𑀼𑀓𑁄, 𑀯𑀺𑀓𑀡𑁆𑀡𑁄 𑀲𑀼𑀢𑁆𑀢𑀫𑁄𑀓𑀺𑀭𑀺.

𑀮𑀼𑀚𑁆𑀚𑀦𑁆𑀢𑀺 ¶ 𑀦𑀧𑁆𑀧𑀳𑁄𑀦𑁆𑀢𑀺, 𑀘 𑀅𑀦𑁆𑀯𑀸𑀥𑀺𑀓𑀁 𑀩𑀳𑀽𑀦𑀺 𑀘;

𑀅𑀦𑁆𑀥𑀯𑀦𑁂 𑀅𑀲𑁆𑀲𑀢𑀺𑀬𑀸, 𑀏𑀓𑁄 𑀯𑀲𑁆𑀲𑀁 𑀉𑀢𑀼𑀫𑁆𑀳𑀺 𑀘.

𑀤𑁆𑀯𑁂 𑀪𑀸𑀢𑀼𑀓𑀸 𑀭𑀸𑀚𑀕𑀳𑁂, 𑀉𑀧𑀦𑀦𑁆𑀤𑁄 𑀧𑀼𑀦 𑀤𑁆𑀯𑀺𑀲𑀼;

𑀓𑀼𑀘𑁆𑀙𑀺𑀯𑀺𑀓𑀸𑀭𑁄 𑀕𑀺𑀮𑀸𑀦𑁄, 𑀉𑀪𑁄 𑀘𑁂𑀯 𑀕𑀺𑀮𑀸𑀦𑀓𑀸 [𑀕𑀺𑀮𑀸𑀬𑀦𑀸 (𑀓.)].

𑀦𑀕𑁆𑀕𑀸 𑀓𑀼𑀲𑀸 𑀯𑀸𑀓𑀘𑀻𑀭𑀁, 𑀨𑀮𑀓𑁄 𑀓𑁂𑀲𑀓𑀫𑁆𑀩𑀮𑀁;

𑀯𑀸𑀴𑀉𑀮𑀽𑀓𑀧𑀓𑁆𑀔𑀜𑁆𑀘, 𑀅𑀚𑀺𑀦𑀁 𑀅𑀓𑁆𑀓𑀦𑀸𑀴𑀓𑀁.

𑀧𑁄𑀢𑁆𑀣𑀓𑀁 𑀦𑀻𑀮𑀧𑀻𑀢𑀜𑁆𑀘, 𑀮𑁄𑀳𑀺𑀢𑀁 𑀫𑀜𑁆𑀚𑀺𑀝𑁆𑀞𑁂𑀦 𑀘;

𑀓𑀡𑁆𑀳𑀸 𑀫𑀳𑀸𑀭𑀗𑁆𑀕𑀦𑀸𑀫, 𑀅𑀘𑁆𑀙𑀺𑀦𑁆𑀦𑀤𑀲𑀺𑀓𑀸 𑀢𑀣𑀸.

𑀤𑀻𑀖𑀧𑀼𑀧𑁆𑀨𑀨𑀡𑀤𑀲𑀸 ¶ , 𑀓𑀜𑁆𑀘𑀼𑀢𑀺𑀭𑀻𑀝𑀯𑁂𑀞𑀦𑀁;

𑀅𑀦𑀼𑀧𑁆𑀧𑀦𑁆𑀦𑁂 𑀧𑀓𑁆𑀓𑀫𑀢𑀺, 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑀢𑀸𑀯𑀤𑁂.

𑀧𑀓𑁆𑀔𑁂 𑀤𑀤𑀦𑁆𑀢𑀺 𑀲𑀗𑁆𑀖𑀲𑁆𑀲, 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀧𑀳𑀺;

𑀯𑀺𑀲𑁆𑀲𑀸𑀲𑀕𑀸𑀳𑀸𑀥𑀺𑀝𑁆𑀞𑀸𑀢𑀺, 𑀅𑀝𑁆𑀞 𑀘𑀻𑀯𑀭𑀫𑀸𑀢𑀺𑀓𑀸𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀙𑀦𑁆𑀦𑀯𑀼𑀢𑀺.

𑀘𑀻𑀯𑀭𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁯. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁄

𑁨𑁩𑁪. 𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑁩𑁮𑁦. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀲𑁆𑀲𑀧𑀕𑁄𑀢𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑁄 𑀳𑁄𑀢𑀺 𑀢𑀦𑁆𑀢𑀺𑀩𑀤𑁆𑀥𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑁋 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀬𑀜𑁆𑀘 𑀆𑀯𑀸𑀲𑁄 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑀤𑀯𑀲𑀭𑀼𑀁. 𑀅𑀤𑁆𑀤𑀲𑀸 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀺, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀤𑁆𑀤𑀓𑁄 𑀔𑁄 𑀅𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀇𑀥𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁄 𑀔𑁄 𑀇𑀫𑁂𑀲𑀁 ¶ 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀓𑀺𑀮𑀫𑀣𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄. 𑀬𑁂𑀧𑀺𑀫𑁂 𑀕𑁄𑀘𑀭𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀢𑁂𑀤𑀸𑀦𑀺𑀫𑁂 𑀕𑁄𑀘𑀭𑁂 𑀧𑀓𑀢𑀜𑁆𑀜𑀼𑀦𑁄. 𑀤𑀼𑀓𑁆𑀓𑀭𑀁 𑀔𑁄 𑀧𑀦 𑀧𑀭𑀓𑀼𑀮𑁂𑀲𑀼 𑀬𑀸𑀯𑀚𑀻𑀯𑀁 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀼𑀁, 𑀯𑀺𑀜𑁆𑀜𑀢𑁆𑀢𑀺 𑀘 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸. 𑀬𑀁𑀦𑀽𑀦𑀸𑀳𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺’’𑀦𑁆𑀢𑀺. 𑀲𑁄 𑀦 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 ¶ 𑀏𑀢𑀤𑀳𑁄𑀲𑀺 𑁋 ‘‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀸𑀬𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀤𑀼𑀝𑁆𑀞𑁄𑀤𑀸𑀦𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑀁 ¶ [𑀇𑀫𑀁 𑀆𑀯𑀸𑀲𑀺𑀓𑀁 (𑀲𑁆𑀬𑀸.)] 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 ¶ 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀺 𑀢𑁆𑀯𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄. 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼.

𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀏𑀢𑀁 𑀦 𑀚𑀸𑀦𑀸𑀫𑀺 ‘𑀆𑀧𑀢𑁆𑀢𑀺 𑀯𑀸 𑀏𑀲𑀸 𑀅𑀦𑀸𑀧𑀢𑁆𑀢𑀺 𑀯𑀸, 𑀆𑀧𑀦𑁆𑀦𑁄 𑀘𑀫𑁆𑀳𑀺 [𑀯𑀫𑁆𑀳𑀺 (?)] 𑀅𑀦𑀸𑀧𑀦𑁆𑀦𑁄 𑀯𑀸, 𑀉𑀓𑁆𑀔𑀺𑀢𑁆𑀢𑁄 𑀘𑀫𑁆𑀳𑀺 ¶ 𑀅𑀦𑀼𑀓𑁆𑀔𑀺𑀢𑁆𑀢𑁄 𑀯𑀸, 𑀥𑀫𑁆𑀫𑀺𑀓𑁂𑀦 𑀯𑀸 𑀅𑀥𑀫𑁆𑀫𑀺𑀓𑁂𑀦 𑀯𑀸, 𑀓𑀼𑀧𑁆𑀧𑁂𑀦 𑀯𑀸 𑀅𑀓𑀼𑀧𑁆𑀧𑁂𑀦 𑀯𑀸, 𑀞𑀸𑀦𑀸𑀭𑀳𑁂𑀦 𑀯𑀸 𑀅𑀝𑁆𑀞𑀸𑀦𑀸𑀭𑀳𑁂𑀦 𑀯𑀸’. 𑀬𑀁𑀦𑀽𑀦𑀸𑀳𑀁 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀫𑁆𑀧𑀸 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀘𑀫𑁆𑀧𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀓𑀼𑀢𑁄 𑀘 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀕𑀘𑁆𑀙𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘𑀸𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄. 𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫. 𑀢𑀢𑁆𑀣𑀸𑀳𑀁, 𑀪𑀕𑀯𑀸, 𑀆𑀯𑀸𑀲𑀺𑀓𑁄 𑀢𑀦𑁆𑀢𑀺𑀩𑀤𑁆𑀥𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀬𑀜𑁆𑀘 𑀆𑀯𑀸𑀲𑁄 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀸’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑀤𑀯𑀲𑀭𑀼𑀁. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀧𑀸𑀦𑀻𑀬𑁂𑀦 𑀅𑀧𑀼𑀘𑁆𑀙𑀺𑀁, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺𑀁, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁 ¶ . 𑀅𑀣 𑀔𑁄 𑀢𑁂𑀲𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀤𑁆𑀤𑀓𑁄 𑀔𑁄 ¶ 𑀅𑀬𑀁 𑀆𑀯𑀼𑀲𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀇𑀥𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀫𑀸’𑀢𑀺. 𑀅𑀣 𑀔𑁄 ¶ 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀬𑁄 𑀔𑁄 𑀇𑀫𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀓𑀺𑀮𑀫𑀣𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄. 𑀬𑁂𑀧𑀺𑀫𑁂 𑀕𑁄𑀘𑀭𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀢𑁂𑀤𑀸𑀦𑀺𑀫𑁂 𑀕𑁄𑀘𑀭𑁂 𑀧𑀓𑀢𑀜𑁆𑀜𑀼𑀦𑁄. 𑀤𑀼𑀓𑁆𑀓𑀭𑀁 𑀔𑁄 𑀧𑀦 𑀧𑀭𑀓𑀼𑀮𑁂𑀲𑀼 ¶ 𑀬𑀸𑀯𑀚𑀻𑀯𑀁 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀼𑀁, 𑀯𑀺𑀜𑁆𑀜𑀢𑁆𑀢𑀺 𑀘 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸. 𑀬𑀁𑀦𑀽𑀦𑀸𑀳𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀦 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀸𑀬𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀤𑀼𑀝𑁆𑀞𑁄𑀤𑀸𑀦𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑀁 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀸𑀫𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀺 𑀢𑁆𑀯𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄. 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’𑀦𑁆𑀢𑀺 ¶ ? ‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀫𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀏𑀢𑀁 𑀦 𑀚𑀸𑀦𑀸𑀫𑀺 ‘𑀆𑀧𑀢𑁆𑀢𑀺 𑀯𑀸 𑀏𑀲𑀸 𑀅𑀦𑀸𑀧𑀢𑁆𑀢𑀺 𑀯𑀸, 𑀆𑀧𑀦𑁆𑀦𑁄 𑀘𑀫𑁆𑀳𑀺 𑀅𑀦𑀸𑀧𑀦𑁆𑀦𑁄 𑀯𑀸, 𑀉𑀓𑁆𑀔𑀺𑀢𑁆𑀢𑁄 𑀘𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄 𑀯𑀸, 𑀥𑀫𑁆𑀫𑀺𑀓𑁂𑀦 𑀯𑀸 𑀅𑀥𑀫𑁆𑀫𑀺𑀓𑁂𑀦 𑀯𑀸, 𑀓𑀼𑀧𑁆𑀧𑁂𑀦 𑀯𑀸 𑀅𑀓𑀼𑀧𑁆𑀧𑁂𑀦 𑀯𑀸, 𑀞𑀸𑀦𑀸𑀭𑀳𑁂𑀦 𑀯𑀸 𑀅𑀝𑁆𑀞𑀸𑀦𑀸𑀭𑀳𑁂𑀦 𑀯𑀸’. 𑀬𑀁𑀦𑀽𑀦𑀸𑀳𑀁 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀢𑀢𑁄 𑀅𑀳𑀁, 𑀪𑀕𑀯𑀸, 𑀆𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀪𑀺𑀓𑁆𑀔𑀼, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀲𑀺, 𑀦𑀲𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀲𑀺, 𑀦𑀲𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀸𑀲𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀕𑀘𑁆𑀙 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑁂𑀦 𑀧𑀓𑁆𑀓𑀸𑀫𑀺.

𑁩𑁮𑁧. 𑀅𑀣 ¶ 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘‘𑀅𑀮𑀸𑀪𑀸 𑀯𑀢 𑀦𑁄, 𑀦 𑀯𑀢 𑀦𑁄 𑀮𑀸𑀪𑀸, 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀦𑁄, 𑀦 𑀯𑀢 𑀦𑁄 𑀲𑀼𑀮𑀤𑁆𑀥𑀁, 𑀬𑁂 𑀫𑀬𑀁 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀫𑁆𑀳𑀸. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑁂𑀲𑁂𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀫𑁆𑀧𑀸 𑀢𑁂𑀦 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 ¶ 𑀬𑁂𑀦 𑀘𑀫𑁆𑀧𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀢𑁆𑀣 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑀸, 𑀓𑀼𑀢𑁄 𑀘 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑀣𑀸’’𑀢𑀺 ¶ ? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘 𑀫𑀬𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑀸. 𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫. 𑀢𑀢𑁄 𑀫𑀬𑀁, 𑀪𑀕𑀯𑀸, 𑀆𑀕𑀘𑁆𑀙𑀸𑀫𑀸’’𑀢𑀺. ‘‘𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀁 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀺𑀢𑁆𑀣𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀭𑀡𑁂’’𑀢𑀺? ‘‘𑀅𑀯𑀢𑁆𑀣𑀼𑀲𑁆𑀫𑀺𑀁, 𑀪𑀕𑀯𑀸, 𑀅𑀓𑀸𑀭𑀡𑁂’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀦𑀦𑀼𑀮𑁄𑀫𑀺𑀓𑀁 ¶ 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀲𑁆𑀲𑀣. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂…’’ 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑁄 𑀪𑀺𑀓𑁆𑀔𑀼 𑀅𑀦𑀸𑀧𑀢𑁆𑀢𑀺𑀓𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀬𑁄 𑀉𑀓𑁆𑀔𑀺𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀘𑁆𑀘𑀬𑁄 𑀦𑁄, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 ¶ 𑀬𑀣𑀸𑀅𑀓𑀼𑀲𑀮𑁂, 𑀬𑁂 𑀫𑀬𑀁 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. ‘‘𑀢𑀕𑁆𑀖, 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 𑀬𑀣𑀸𑀅𑀓𑀼𑀲𑀮𑁂, 𑀬𑁂 𑀢𑀼𑀫𑁆𑀳𑁂 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀢𑁆𑀣. 𑀬𑀢𑁄 𑀘 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀣, 𑀢𑀁 𑀯𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺𑀳𑁂𑀲𑀸 ¶ , 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 [𑀆𑀬𑀢𑀺𑀁 𑀘 (𑀲𑀻.)] 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺.

𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁩𑁫. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸𑀤𑀺𑀓𑀫𑁆𑀫𑀓𑀣𑀸

𑁩𑁮𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀫𑁆𑀧𑀸𑀬𑀁 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀏𑀓𑁄𑀧𑀺 𑀏𑀓𑀁 𑀉𑀓𑁆𑀔𑀺𑀧𑀢𑀺, 𑀏𑀓𑁄𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀢𑀺, 𑀏𑀓𑁄𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀢𑀺, 𑀏𑀓𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑀺; 𑀤𑁆𑀯𑁂𑀧𑀺 𑀏𑀓𑀁 𑀉𑀓𑁆𑀔𑀺𑀧𑀦𑁆𑀢𑀺, 𑀤𑁆𑀯𑁂𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀦𑁆𑀢𑀺, 𑀤𑁆𑀯𑁂𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀦𑁆𑀢𑀺, 𑀤𑁆𑀯𑁂𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀦𑁆𑀢𑀺 ¶ ; 𑀲𑀫𑁆𑀩𑀳𑀼𑀮𑀸𑀧𑀺 ¶ 𑀏𑀓𑀁 𑀉𑀓𑁆𑀔𑀺𑀧𑀦𑁆𑀢𑀺; 𑀲𑀫𑁆𑀩𑀳𑀼𑀮𑀸𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀦𑁆𑀢𑀺; 𑀲𑀗𑁆𑀖𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀘𑀫𑁆𑀧𑀸𑀬𑀁 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀏𑀓𑁄𑀧𑀺 𑀏𑀓𑀁 𑀉𑀓𑁆𑀔𑀺𑀧𑀺𑀲𑁆𑀲𑀢𑀺, 𑀏𑀓𑁄𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀺𑀲𑁆𑀲𑀢𑀺, 𑀏𑀓𑁄𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀺𑀲𑁆𑀲𑀢𑀺, 𑀏𑀓𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀺𑀲𑁆𑀲𑀢𑀺, 𑀤𑁆𑀯𑁂𑀧𑀺 𑀏𑀓𑀁 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀤𑁆𑀯𑁂𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀤𑁆𑀯𑁂𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀤𑁆𑀯𑁂𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀏𑀓𑀁 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀲𑀗𑁆𑀖𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀘𑀫𑁆𑀧𑀸𑀬𑀁 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 ¶ 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺…𑀧𑁂… 𑀲𑀗𑁆𑀖𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀲𑀗𑁆𑀖𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀺𑀲𑁆𑀲𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁮𑁩. ‘‘𑀅𑀥𑀫𑁆𑀫𑁂𑀦 ¶ 𑀘𑁂, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀅𑀥𑀫𑁆𑀫𑁂𑀦 [𑀅𑀥𑀫𑁆𑀫𑁂𑀦 𑀘𑁂 𑀪𑀺𑀓𑁆𑀔𑀯𑁂 (𑀲𑁆𑀬𑀸.)] 𑀲𑀫𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀏𑀓𑁄𑀧𑀺 𑀏𑀓𑀁 𑀉𑀓𑁆𑀔𑀺𑀧𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀏𑀓𑁄𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀏𑀓𑁄𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀏𑀓𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀤𑁆𑀯𑁂𑀧𑀺 𑀏𑀓𑀁 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀤𑁆𑀯𑁂𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀤𑁆𑀯𑁂𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀤𑁆𑀯𑁂𑀧𑀺 ¶ 𑀲𑀗𑁆𑀖𑀁 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀲𑀫𑁆𑀩𑀳𑀼𑀮𑀸𑀧𑀺 𑀏𑀓𑀁 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀲𑀫𑁆𑀩𑀳𑀼𑀮𑀸𑀧𑀺 𑀤𑁆𑀯𑁂 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀫𑁆𑀩𑀳𑀼𑀮𑁂 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁, 𑀲𑀫𑁆𑀩𑀳𑀼𑀮𑀸𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀦𑁆𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀲𑀗𑁆𑀖𑁄𑀧𑀺 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑀺 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑁩𑁮𑁪. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 ¶ , 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀇𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀥𑀫𑁆𑀫𑀢𑁆𑀢𑀸 𑀯𑀕𑁆𑀕𑀢𑁆𑀢𑀸 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁; 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀇𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀥𑀫𑁆𑀫𑀢𑁆𑀢𑀸 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁; 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀇𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀕𑁆𑀕𑀢𑁆𑀢𑀸 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁; 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀘 𑀫𑀬𑀸 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀇𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀥𑀫𑁆𑀫𑀢𑁆𑀢𑀸 𑀲𑀫𑀕𑁆𑀕𑀢𑁆𑀢𑀸 𑀅𑀓𑀼𑀧𑁆𑀧𑀁 𑀞𑀸𑀦𑀸𑀭𑀳𑀁; 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀏𑀯𑀭𑀽𑀧𑀜𑁆𑀘 𑀫𑀬𑀸 𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀦𑁆𑀢𑀺 𑁋 𑀏𑀯𑀜𑁆𑀳𑀺 ¶ 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀅𑀥𑀫𑁆𑀫𑁂𑀦 𑀯𑀕𑁆𑀕𑀸𑀤𑀺𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁬. 𑀜𑀢𑁆𑀢𑀺𑀯𑀺𑀧𑀦𑁆𑀦𑀓𑀫𑁆𑀫𑀸𑀤𑀺𑀓𑀣𑀸

𑁩𑁮𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 ¶ 𑀓𑀭𑁄𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀜𑀢𑁆𑀢𑀺𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀦𑁆𑀦𑀁, 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀦𑁆𑀦𑀁, 𑀜𑀢𑁆𑀢𑀺𑀯𑀺𑀧𑀦𑁆𑀦𑀫𑁆𑀧𑀺 ¶ 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀅𑀜𑁆𑀜𑀢𑁆𑀭𑀸𑀧𑀺 𑀥𑀫𑁆𑀫𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀦𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀢𑁆𑀭𑀸𑀧𑀺 𑀲𑀢𑁆𑀣𑀼𑀲𑀸𑀲𑀦𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀧𑀝𑀺𑀓𑀼𑀝𑁆𑀞𑀓𑀢𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺; 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺; 𑀜𑀢𑁆𑀢𑀺𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀦𑁆𑀦𑀁, 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀦𑁆𑀦𑀁, 𑀜𑀢𑁆𑀢𑀺𑀯𑀺𑀧𑀦𑁆𑀦𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺; 𑀅𑀜𑁆𑀜𑀢𑁆𑀭𑀸𑀧𑀺 𑀥𑀫𑁆𑀫𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀦𑀬𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀢𑁆𑀭𑀸𑀧𑀺 𑀲𑀢𑁆𑀣𑀼𑀲𑀸𑀲𑀦𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺; 𑀧𑀝𑀺𑀓𑀼𑀝𑁆𑀞𑀓𑀢𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 ¶ 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺…𑀧𑁂… 𑀧𑀝𑀺𑀓𑀼𑀝𑁆𑀞𑀓𑀢𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳’’𑀦𑁆𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁮𑁬. ‘‘𑀅𑀥𑀫𑁆𑀫𑁂𑀦 𑀘𑁂, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁 ¶ ; 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀜𑀢𑁆𑀢𑀺𑀯𑀺𑀧𑀦𑁆𑀦𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀦𑁆𑀦𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀜𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀜𑀢𑁆𑀢𑀺𑀯𑀺𑀧𑀦𑁆𑀦𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀅𑀜𑁆𑀜𑀢𑁆𑀭𑀸𑀧𑀺 𑀥𑀫𑁆𑀫𑀸 𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀦𑀬𑀸 𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀅𑀜𑁆𑀜𑀢𑁆𑀭𑀸𑀧𑀺 𑀲𑀢𑁆𑀣𑀼𑀲𑀸𑀲𑀦𑀸 𑀓𑀫𑁆𑀫𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁; 𑀧𑀝𑀺𑀓𑀼𑀝𑁆𑀞𑀓𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀥𑀫𑁆𑀫𑀺𑀓𑀁 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀁 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑁩𑁮𑁭. 𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁, 𑀯𑀕𑁆𑀕𑀓𑀫𑁆𑀫𑀁, 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁.

𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀤𑁆𑀯𑀻𑀳𑀺 𑀜𑀢𑁆𑀢𑀻𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 ¶ 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁 ¶ . 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀤𑁆𑀯𑀻𑀳𑀺 𑀜𑀢𑁆𑀢𑀻𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀢𑀻𑀳𑀺 𑀜𑀢𑁆𑀢𑀻𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀘𑀢𑀽𑀳𑀺 𑀜𑀢𑁆𑀢𑀻𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 ¶ 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀢𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀘𑀢𑀽𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁.

𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 ¶ 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 ¶ 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀯𑀕𑁆𑀕𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀕𑁆𑀕𑀓𑀫𑁆𑀫𑀁.

𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀲𑀫𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀲𑀫𑀕𑁆𑀕𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀓𑀫𑁆𑀫𑀁.

𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂 ¶ , 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 ¶ 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 ¶ 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺 ¶ , 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁.

𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 ¶ 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁.

𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀧𑀘𑁆𑀙𑀸 𑀏𑀓𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀧𑀞𑀫𑀁 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀧𑀘𑁆𑀙𑀸 𑀢𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁.

𑀜𑀢𑁆𑀢𑀺𑀯𑀺𑀧𑀦𑁆𑀦𑀓𑀫𑁆𑀫𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁭. 𑀘𑀢𑀼𑀯𑀕𑁆𑀕𑀓𑀭𑀡𑀸𑀤𑀺𑀓𑀣𑀸

𑁩𑁮𑁮. 𑀧𑀜𑁆𑀘 ¶ 𑀲𑀗𑁆𑀖𑀸 𑁋 𑀘𑀢𑀼𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀜𑁆𑀘𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀤𑀲𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀯𑀻𑀲𑀢𑀺𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀘𑀢𑀼𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀓𑀫𑁆𑀫𑀸𑀦𑀺 𑁋 𑀉𑀧𑀲𑀫𑁆𑀧𑀤𑀁 𑀧𑀯𑀸𑀭𑀡𑀁 𑀅𑀩𑁆𑀪𑀸𑀦𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑁄 ¶ 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀜𑁆𑀘𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀓𑀫𑁆𑀫𑀸𑀦𑀺 𑁋 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀉𑀧𑀲𑀫𑁆𑀧𑀤𑀁 𑀅𑀩𑁆𑀪𑀸𑀦𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑁄 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀤𑀲𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀞𑀧𑁂𑀢𑁆𑀯𑀸 𑀏𑀓𑀁 𑀓𑀫𑁆𑀫𑀁 𑁋 𑀅𑀩𑁆𑀪𑀸𑀦𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑁄 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀯𑀻𑀲𑀢𑀺𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀥𑀫𑁆𑀫𑁂𑀦 𑀲𑀫𑀕𑁆𑀕𑁄 𑀲𑀩𑁆𑀩𑀓𑀫𑁆𑀫𑁂𑀲𑀼 ¶ 𑀓𑀫𑁆𑀫𑀧𑁆𑀧𑀢𑁆𑀢𑁄. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 ¶ 𑀥𑀫𑁆𑀫𑁂𑀦 𑀲𑀫𑀕𑁆𑀕𑁄 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄.

𑁩𑁮𑁯. 𑀘𑀢𑀼𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀪𑀺𑀓𑁆𑀔𑀼𑀦𑀺𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀘𑀢𑀼𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀺𑀓𑁆𑀔𑀫𑀸𑀦𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁…𑀧𑁂…. 𑀲𑀸𑀫𑀡𑁂𑀭𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀲𑀸𑀫𑀡𑁂𑀭𑀺𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀧𑀡𑁆𑀟𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀣𑁂𑀬𑁆𑀬𑀲𑀁𑀯𑀸𑀲𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀢𑀺𑀭𑀘𑁆𑀙𑀸𑀦𑀕𑀢𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀫𑀸𑀢𑀼𑀖𑀸𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀧𑀺𑀢𑀼𑀖𑀸𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀅𑀭𑀳𑀦𑁆𑀢𑀖𑀸𑀢𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀲𑀗𑁆𑀖𑀪𑁂𑀤𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀦𑀸𑀦𑀸𑀲𑀁𑀯𑀸𑀲𑀓𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑁂 𑀞𑀺𑀢𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 ¶ 𑀦 𑀘 𑀓𑀭𑀡𑀻𑀬𑀁. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 ¶ … 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑀘𑀢𑀼𑀯𑀭𑀡𑀁.

𑁩𑁯𑁦. 𑀧𑀜𑁆𑀘𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀪𑀺𑀓𑁆𑀔𑀼𑀦𑀺𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀧𑀜𑁆𑀘𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀺𑀓𑁆𑀔𑀫𑀸𑀦𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬…𑀧𑁂…. 𑀲𑀸𑀫𑀡𑁂𑀭𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀲𑀸𑀫𑀡𑁂𑀭𑀺𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 ¶ … 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀡𑁆𑀟𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀣𑁂𑀬𑁆𑀬𑀲𑀁𑀯𑀸𑀲𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀢𑀺𑀭𑀘𑁆𑀙𑀸𑀦𑀕𑀢𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀫𑀸𑀢𑀼𑀖𑀸𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀺𑀢𑀼𑀖𑀸𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀭𑀳𑀦𑁆𑀢𑀖𑀸𑀢𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀲𑀗𑁆𑀖𑀪𑁂𑀤𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀦𑀸𑀦𑀸𑀲𑀁𑀯𑀸𑀲𑀓𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑁂 𑀞𑀺𑀢𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑀧𑀜𑁆𑀘𑀯𑀕𑁆𑀕𑀓𑀭𑀡𑀁.

𑁩𑁯𑁧. 𑀤𑀲𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀪𑀺𑀓𑁆𑀔𑀼𑀦𑀺𑀤𑀲𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀤𑀲𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀺𑀓𑁆𑀔𑀫𑀸𑀦𑀤𑀲𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁…𑀧𑁂… ¶ . 𑀤𑀲𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁𑀤𑀲𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑀤𑀲𑀯𑀕𑁆𑀕𑀓𑀭𑀡𑀁.

𑁩𑁯𑁨. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀪𑀺𑀓𑁆𑀔𑀼𑀦𑀺𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀺𑀓𑁆𑀔𑀫𑀸𑀦𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 ¶ …𑀧𑁂… 𑀲𑀸𑀫𑀡𑁂𑀭𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀲𑀸𑀫𑀡𑁂𑀭𑀺𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀡𑁆𑀟𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀢𑀺𑀭𑀘𑁆𑀙𑀸𑀦𑀕𑀢𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀫𑀸𑀢𑀼𑀖𑀸𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀧𑀺𑀢𑀼𑀖𑀸𑀢𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀅𑀭𑀳𑀦𑁆𑀢𑀖𑀸𑀢𑀓𑀯𑀻𑀲𑁄 ¶ 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀲𑀗𑁆𑀖𑀪𑁂𑀤𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀦𑀸𑀦𑀸𑀲𑀁𑀯𑀸𑀲𑀓𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑁂 𑀞𑀺𑀢𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬… 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁𑀯𑀻𑀲𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀁.

𑀘𑀢𑀼𑀯𑀕𑁆𑀕𑀓𑀭𑀡𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁮. 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀣𑀸

𑁩𑁯𑁩. 𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀫𑀸𑀦𑀢𑁆𑀢𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬 ¶ 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀫𑀸𑀦𑀢𑁆𑀢𑀘𑀸𑀭𑀺𑀓𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁. 𑀅𑀩𑁆𑀪𑀸𑀦𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬 𑁋 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬𑀁.

𑁩𑁯𑁪. 𑀏𑀓𑀘𑁆𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀭𑀼𑀳𑀢𑀺, 𑀏𑀓𑀘𑁆𑀘𑀲𑁆𑀲 𑀦 𑀭𑀼𑀳𑀢𑀺. 𑀓𑀲𑁆𑀲 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀦 𑀭𑀼𑀳𑀢𑀺? 𑀪𑀺𑀓𑁆𑀔𑀼𑀦𑀺𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀦 𑀭𑀼𑀳𑀢𑀺. 𑀲𑀺𑀓𑁆𑀔𑀫𑀸𑀦𑀸𑀬, 𑀪𑀺𑀓𑁆𑀔𑀯𑁂…𑀧𑁂… 𑀲𑀸𑀫𑀡𑁂𑀭𑀲𑁆𑀲, 𑀪𑀺𑀓𑁆𑀔𑀯𑁂… 𑀲𑀸𑀫𑀡𑁂𑀭𑀺𑀬𑀸, 𑀪𑀺𑀓𑁆𑀔𑀯𑁂… 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀲𑁆𑀲 𑀪𑀺𑀓𑁆𑀔𑀯𑁂… 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀲𑁆𑀲, 𑀪𑀺𑀓𑁆𑀔𑀯𑁂 ¶ … 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂… 𑀯𑁂𑀤𑀦𑀸𑀝𑁆𑀝𑀲𑁆𑀲, 𑀪𑀺𑀓𑁆𑀔𑀯𑁂… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 ¶ 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀧𑀡𑁆𑀟𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀣𑁂𑀬𑁆𑀬𑀲𑀁𑀯𑀸𑀲𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂 ¶ … 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀪𑀺𑀓𑁆𑀔𑀯𑁂… 𑀫𑀸𑀢𑀼𑀖𑀸𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀧𑀺𑀢𑀼𑀖𑀸𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀅𑀭𑀳𑀦𑁆𑀢𑀖𑀸𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀲𑀗𑁆𑀖𑀪𑁂𑀤𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲, 𑀪𑀺𑀓𑁆𑀔𑀯𑁂… 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂… 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑁂 𑀞𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀘 [𑀢𑀲𑁆𑀲 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀦 𑀭𑀼𑀳𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀦 𑀭𑀼𑀳𑀢𑀺.

𑀓𑀲𑁆𑀲 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀭𑀼𑀳𑀢𑀺? 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀓𑀢𑀢𑁆𑀢𑀲𑁆𑀲

𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲 𑀲𑀫𑀸𑀦𑀲𑀻𑀫𑀸𑀬 𑀞𑀺𑀢𑀲𑁆𑀲 𑀅𑀦𑁆𑀢𑀫𑀲𑁄 𑀆𑀦𑀦𑁆𑀢𑀭𑀺𑀓𑀲𑁆𑀲𑀸𑀧𑀺 [𑀅𑀦𑀦𑁆𑀢𑀭𑀺𑀓𑀲𑁆𑀲𑀸𑀧𑀺 (𑀲𑁆𑀬𑀸.)] 𑀪𑀺𑀓𑁆𑀔𑀼𑀦𑁄 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀭𑀼𑀳𑀢𑀺. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀭𑀼𑀳𑀢𑀺.

𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁩𑁯. 𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸

𑁩𑁯𑁫. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀭𑀡𑀸. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁. 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺, 𑀏𑀓𑀘𑁆𑀘𑁄 𑀲𑀼𑀦𑀺𑀲𑁆𑀲𑀸𑀭𑀺𑀢𑁄, 𑀏𑀓𑀘𑁆𑀘𑁄 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀤𑁆𑀥𑁄 𑀳𑁄𑀢𑀺 𑀅𑀦𑀸𑀧𑀢𑁆𑀢𑀺𑀓𑁄. 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄.

𑀓𑀢𑀫𑁄 ¶ 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀲𑀼𑀦𑀺𑀲𑁆𑀲𑀸𑀭𑀺𑀢𑁄? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 ¶ 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺, 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀲𑀼𑀦𑀺𑀲𑁆𑀲𑀸𑀭𑀺𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑁋 𑀲𑀼𑀦𑀺𑀲𑁆𑀲𑀸𑀭𑀺𑀢𑁄.

𑁩𑁯𑁬. 𑀤𑁆𑀯𑁂𑀫𑀸 ¶ , 𑀪𑀺𑀓𑁆𑀔𑀯𑁂, 𑀑𑀲𑀸𑀭𑀡𑀸. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀏𑀓𑀘𑁆𑀘𑁄 𑀲𑁄𑀲𑀸𑀭𑀺𑀢𑁄, 𑀏𑀓𑀘𑁆𑀘𑁄 ¶ 𑀤𑁄𑀲𑀸𑀭𑀺𑀢𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑁄? 𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑁄. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑁄. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀪𑀺𑀓𑁆𑀔𑀯𑁂…𑀧𑁂… 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀪𑀺𑀓𑁆𑀔𑀯𑁂… 𑀫𑀸𑀢𑀼𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂… 𑀧𑀺𑀢𑀼𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂… 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀪𑀺𑀓𑁆𑀔𑀯𑁂… 𑀲𑀗𑁆𑀖𑀪𑁂𑀤𑀓𑁄, 𑀪𑀺𑀓𑁆𑀔𑀯𑁂… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀪𑀺𑀓𑁆𑀔𑀯𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄, 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀅𑀧𑁆𑀧𑀢𑁆𑀢𑀸 𑀑𑀲𑀸𑀭𑀡𑀁, 𑀢𑁂 𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀤𑁄𑀲𑀸𑀭𑀺𑀢𑀸.

𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀲𑁄𑀲𑀸𑀭𑀺𑀢𑁄? 𑀳𑀢𑁆𑀣𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀲𑁄𑀲𑀸𑀭𑀺𑀢𑁄. 𑀧𑀸𑀤𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂…𑀧𑁂… 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀓𑀡𑁆𑀡𑀘𑁆𑀙𑀺𑀦𑁆𑀦𑁄 ¶ , 𑀪𑀺𑀓𑁆𑀔𑀯𑁂… 𑀦𑀸𑀲𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀅𑀴𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂… 𑀨𑀡𑀳𑀢𑁆𑀣𑀓𑁄, 𑀪𑀺𑀓𑁆𑀔𑀯𑁂… 𑀔𑀼𑀚𑁆𑀚𑁄, 𑀪𑀺𑀓𑁆𑀔𑀯𑁂… 𑀯𑀸𑀫𑀦𑁄, 𑀪𑀺𑀓𑁆𑀔𑀯𑁂… 𑀕𑀮𑀕𑀡𑁆𑀟𑀻, 𑀪𑀺𑀓𑁆𑀔𑀯𑁂… 𑀮𑀓𑁆𑀔𑀡𑀸𑀳𑀢𑁄, 𑀪𑀺𑀓𑁆𑀔𑀯𑁂… 𑀓𑀲𑀸𑀳𑀢𑁄, 𑀪𑀺𑀓𑁆𑀔𑀯𑁂… 𑀮𑀺𑀔𑀺𑀢𑀓𑁄, 𑀪𑀺𑀓𑁆𑀔𑀯𑁂… 𑀲𑀻𑀧𑀤𑀺𑀓𑁄, 𑀪𑀺𑀓𑁆𑀔𑀯𑁂… 𑀧𑀸𑀧𑀭𑁄𑀕𑀻, 𑀪𑀺𑀓𑁆𑀔𑀯𑁂… 𑀧𑀭𑀺𑀲𑀤𑀽𑀲𑀓𑁄, 𑀪𑀺𑀓𑁆𑀔𑀯𑁂… 𑀓𑀸𑀡𑁄, 𑀪𑀺𑀓𑁆𑀔𑀯𑁂… 𑀓𑀼𑀡𑀻, 𑀪𑀺𑀓𑁆𑀔𑀯𑁂… 𑀔𑀜𑁆𑀚𑁄, 𑀪𑀺𑀓𑁆𑀔𑀯𑁂… 𑀧𑀓𑁆𑀔𑀳𑀢𑁄, 𑀪𑀺𑀓𑁆𑀔𑀯𑁂… 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄, 𑀪𑀺𑀓𑁆𑀔𑀯𑁂… 𑀚𑀭𑀸𑀤𑀼𑀩𑁆𑀩𑀮𑁄, 𑀪𑀺𑀓𑁆𑀔𑀯𑁂… 𑀅𑀦𑁆𑀥𑁄, 𑀪𑀺𑀓𑁆𑀔𑀯𑁂… 𑀫𑀽𑀕𑁄, 𑀪𑀺𑀓𑁆𑀔𑀯𑁂… 𑀩𑀥𑀺𑀭𑁄, 𑀪𑀺𑀓𑁆𑀔𑀯𑁂… 𑀅𑀦𑁆𑀥𑀫𑀽𑀕𑁄, 𑀪𑀺𑀓𑁆𑀔𑀯𑁂… 𑀅𑀦𑁆𑀥𑀩𑀥𑀺𑀭𑁄, 𑀪𑀺𑀓𑁆𑀔𑀯𑁂… 𑀫𑀽𑀕𑀩𑀥𑀺𑀭𑁄, 𑀪𑀺𑀓𑁆𑀔𑀯𑁂… 𑀅𑀦𑁆𑀥𑀫𑀽𑀕𑀩𑀥𑀺𑀭𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀲𑁄𑀲𑀸𑀭𑀺𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀲𑁄𑀲𑀸𑀭𑀺𑀢𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀅𑀧𑁆𑀧𑀢𑁆𑀢𑀸 𑀑𑀲𑀸𑀭𑀡𑀁, 𑀢𑁂 𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑁋 𑀲𑁄𑀲𑀸𑀭𑀺𑀢𑀸.

𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀸𑀲𑀪𑀕𑀸𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁨𑁪𑁦. 𑀅𑀥𑀫𑁆𑀫𑀓𑀫𑁆𑀫𑀸𑀤𑀺𑀓𑀣𑀸

𑁩𑁯𑁭. 𑀇𑀥 ¶ ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀢𑀁 ¶ 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀝𑀺𑀓𑀭𑁄𑀳𑀺 ¶ 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀬𑀁 𑀧𑀝𑀺𑀓𑀭𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀧𑀸𑀧𑀺𑀓𑀸 𑀢𑁂, 𑀆𑀯𑀼𑀲𑁄, 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺? 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀝𑀺𑀓𑀭𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀦 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺𑀁? 𑀧𑀸𑀧𑀺𑀓𑀸 𑀢𑁂 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬𑀁; 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 ¶ 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 ¶ ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀦 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺𑀁; 𑀧𑀸𑀧𑀺𑀓𑀸 𑀢𑁂 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀝𑀺𑀓𑀭𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀦 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 ¶ 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺𑀁? 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺𑀁; 𑀧𑀸𑀧𑀺𑀓𑀸 𑀢𑁂 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀝𑀺𑀓𑀭𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑁩𑁯𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺. 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁 ¶ , 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀆𑀫𑀸𑀯𑀼𑀲𑁄, 𑀧𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀆𑀫𑀸𑀯𑀼𑀲𑁄, 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀧𑀸𑀧𑀺𑀓𑀸 𑀢𑁂, 𑀆𑀯𑀼𑀲𑁄, 𑀤𑀺𑀝𑁆𑀞𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀆𑀫𑀸𑀯𑀼𑀲𑁄 ¶ , 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀗𑁆𑀖𑁄 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸…𑀧𑁂… 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸…𑀧𑁂… 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸…𑀧𑁂… 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺𑀁? 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺𑀁; 𑀧𑀸𑀧𑀺𑀓𑀸 𑀢𑁂 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀆𑀫𑀸𑀯𑀼𑀲𑁄, 𑀧𑀲𑁆𑀲𑀸𑀫𑀺, 𑀆𑀫 𑀧𑀝𑀺𑀓𑀭𑀺𑀲𑁆𑀲𑀸𑀫𑀺, 𑀆𑀫 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 ¶ . 𑀢𑀁 𑀲𑀗𑁆𑀖𑁄 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀅𑀥𑀫𑁆𑀫𑀓𑀫𑁆𑀫𑀁.

𑁩𑁯𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀢𑀁 ¶ 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀢𑀺 𑁋 𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀝𑀺𑀓𑀭𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀧𑀢𑀺 𑁋 𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀧𑀸𑀧𑀺𑀓𑀸 𑀢𑁂, 𑀆𑀯𑀼𑀲𑁄, 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀧𑀢𑀺 𑁋 𑀥𑀫𑁆𑀫𑀓𑀫𑁆𑀫𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸…𑀧𑁂…

𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸…𑀧𑁂… 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸 ¶ …𑀧𑁂… 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸, 𑀳𑁄𑀢𑀺 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 ¶ 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀸. 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 ¶ 𑀆𑀧𑀢𑁆𑀢𑀺𑀁? 𑀧𑀝𑀺𑀓𑀭𑁄𑀳𑀺 𑀢𑀁 𑀆𑀧𑀢𑁆𑀢𑀺𑀁. 𑀧𑀸𑀧𑀺𑀓𑀸 𑀢𑁂 𑀤𑀺𑀝𑁆𑀞𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀝𑀺𑀓𑀭𑁂𑀬𑁆𑀬𑀁. 𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺, 𑀬𑀫𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀁 𑀲𑀗𑁆𑀖𑁄 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀉𑀓𑁆𑀔𑀺𑀧𑀢𑀺 𑁋 𑀥𑀫𑁆𑀫𑀓𑀫𑁆𑀫𑀦𑁆𑀢𑀺.

𑀅𑀥𑀫𑁆𑀫𑀓𑀫𑁆𑀫𑀸𑀤𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁧. 𑀉𑀧𑀸𑀮𑀺𑀧𑀼𑀘𑁆𑀙𑀸𑀓𑀣𑀸

𑁪𑁦𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀅𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀅𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺. ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺 ¶ … 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 ¶ 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀧𑀭𑀺𑀯𑀸𑀲𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀫𑀸𑀦𑀢𑁆𑀢𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀅𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀅𑀯𑀺𑀦𑀬𑀓𑀫𑁆𑀫𑀁’’.

‘‘𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁, 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬𑀓𑀭𑀡𑀻𑀬𑀁 𑀓𑀫𑁆𑀫𑀁 ¶ 𑀅𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 ¶ 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀧𑀭𑀺𑀯𑀸𑀲𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀫𑀸𑀦𑀢𑁆𑀢𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑁪𑁦𑁧. ‘‘𑀬𑁄 ¶ 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺. ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬𑀓𑀭𑀡𑀻𑀬𑀁 𑀓𑀫𑁆𑀫𑀁 𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀯𑀺𑀦𑀬𑀓𑀫𑁆𑀫𑀁.

‘‘𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀺… 𑀧𑀝𑀺𑀜𑁆𑀜𑀸𑀬𑀓𑀭𑀡𑀻𑀬𑀁 𑀓𑀫𑁆𑀫𑀁 𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 ¶ 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 ¶ … 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑁪𑁦𑁨. ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 ¶ 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀅𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀅𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺. ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 ¶ 𑀓𑀭𑁄𑀢𑀺, 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺, 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 ¶ 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀭𑀺𑀯𑀸𑀲𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀫𑀸𑀦𑀢𑁆𑀢𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀫𑀸𑀦𑀢𑁆𑀢𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀅𑀩𑁆𑀪𑀸𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀤𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀅𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀅𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺.

‘‘𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺 ¶ , 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀧𑀭𑀺𑀯𑀸𑀲𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 ¶ 𑀤𑁂𑀢𑀺… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀫𑀸𑀦𑀢𑁆𑀢𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺 𑁋 𑀫𑀸𑀦𑀢𑁆𑀢𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀅𑀩𑁆𑀪𑀸𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀅𑀩𑁆𑀪𑀸𑀦𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀤𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑁪𑁦𑁩. ‘‘𑀬𑁄 ¶ 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺. ‘‘𑀬𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺…𑀧𑁂… 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺…𑀧𑁂… 𑀅𑀩𑁆𑀪𑀸𑀦𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀉𑀧𑀲𑀫𑁆𑀧𑀤𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀥𑀫𑁆𑀫𑀓𑀫𑁆𑀫𑀁 𑀦𑀼 𑀔𑁄 𑀢𑀁, 𑀪𑀦𑁆𑀢𑁂, 𑀯𑀺𑀦𑀬𑀓𑀫𑁆𑀫’’𑀦𑁆𑀢𑀺? ‘‘𑀥𑀫𑁆𑀫𑀓𑀫𑁆𑀫𑀁 𑀢𑀁, 𑀉𑀧𑀸𑀮𑀺, 𑀯𑀺𑀦𑀬𑀓𑀫𑁆𑀫𑀁’’.

‘‘𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺 ¶ . 𑀬𑁄 𑀔𑁄, 𑀉𑀧𑀸𑀮𑀺, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺 ¶ …𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 ¶ 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀧𑀭𑀺𑀯𑀸𑀲𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺…𑀧𑁂… 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺…𑀧𑁂… 𑀫𑀸𑀦𑀢𑁆𑀢𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺…𑀧𑁂… 𑀅𑀩𑁆𑀪𑀸𑀦𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀉𑀧𑀲𑀫𑁆𑀧𑀤𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺.

𑁪𑁦𑁪. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 ¶ … 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀲𑀢𑀺𑀯𑀺𑀦𑀬𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀔𑁄 ¶ , 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺.

𑁪𑁦𑁫. 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀁 𑀅𑀩𑁆𑀪𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺… 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺.

𑁪𑁦𑁬. 𑀬𑁄 ¶ 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲… 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲… 𑀧𑀭𑀺𑀯𑀸𑀲𑀸𑀭𑀳𑀁… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲… 𑀫𑀸𑀦𑀢𑁆𑀢𑀸𑀭𑀳𑀁… 𑀅𑀩𑁆𑀪𑀸𑀦𑀸𑀭𑀳𑀁… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺. 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺…𑀧𑁂… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺… 𑀉𑀧𑀲𑀫𑁆𑀧𑀤𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺 𑀅𑀯𑀺𑀦𑀬𑀓𑀫𑁆𑀫𑀁. 𑀏𑀯𑀜𑁆𑀘 𑀧𑀦 𑀲𑀗𑁆𑀖𑁄 ¶ 𑀲𑀸𑀢𑀺𑀲𑀸𑀭𑁄 𑀳𑁄𑀢𑀻𑀢𑀺.

𑀉𑀧𑀸𑀮𑀺𑀧𑀼𑀘𑁆𑀙𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀧𑀼𑀘𑁆𑀙𑀸𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.

𑁨𑁪𑁨. 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸

𑁪𑁦𑁭. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺 ¶ . 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 ¶ 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 ¶ 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸.

𑁪𑁦𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 ¶ 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 ¶ 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸.

𑁪𑁦𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 ¶ 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 ¶ 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸.

𑁪𑁧𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀓𑀮𑀳𑀓𑀸𑀭𑀓𑁄 ¶ 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 ¶ 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 ¶ 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸.

𑁪𑁧𑁧. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 ¶ 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 ¶ 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸.

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁩. 𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸

𑁪𑁧𑁨. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 ¶ 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 ¶ . 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀬𑀣𑀸 𑀳𑁂𑀝𑁆𑀞𑀸, 𑀢𑀣𑀸 𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁪. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀣𑀸

𑁪𑁧𑁩. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀼𑀮𑀤𑀽𑀲𑀓𑁄 𑀳𑁄𑀢𑀺 𑀧𑀸𑀧𑀲𑀫𑀸𑀘𑀸𑀭𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀼𑀮𑀤𑀽𑀲𑀓𑁄 𑀧𑀸𑀧𑀲𑀫𑀸𑀘𑀸𑀭𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁 ¶ .

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁫. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀣𑀸

𑁪𑁧𑁪. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 ¶ 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁬. 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸

𑁪𑁧𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 ¶ 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁭. 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸

𑁪𑁧𑁬. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 ¶ . 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁮. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸

𑁪𑁧𑁭. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀇𑀘𑁆𑀙𑀢𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀇𑀘𑁆𑀙𑀢𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁯. 𑀢𑀚𑁆𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁧𑁮. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 ¶ 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 ¶ 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸.

𑁪𑁧𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ¶ 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸.

𑁪𑁨𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺 ¶ . 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸.

𑁪𑁨𑁧. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 ¶ 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 ¶ 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸.

𑁪𑁨𑁨. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 ¶ 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 ¶ 𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸.

𑀢𑀚𑁆𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁦. 𑀦𑀺𑀬𑀲𑁆𑀲𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁩. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀦𑀺𑀬𑀲𑁆𑀲𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁧. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁪. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺 ¶ , 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁨. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁫. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁩. 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁬. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 ¶ 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁪. 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁭. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 ¶ 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁫. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁨𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 ¶ ¶ 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 ¶ 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀲𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸…𑀧𑁂… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸…𑀧𑁂….

𑀘𑀓𑁆𑀓𑀁 𑀓𑀸𑀢𑀩𑁆𑀩𑀁.

𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁬. 𑀢𑀚𑁆𑀚𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁨𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 ¶ . 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀥𑀫𑁆𑀫𑁂𑀦 ¶ 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁩𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁩𑁧. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 ¶ 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁩𑁨. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 ¶ 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁩𑁩. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… ¶ 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑀢𑀚𑁆𑀚𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁭. 𑀦𑀺𑀬𑀲𑁆𑀲𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁪. 𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁 ¶ , 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 ¶ 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀦𑀺𑀬𑀲𑁆𑀲𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁮. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀼𑀮𑀤𑀽𑀲𑀓𑁄 𑀳𑁄𑀢𑀺 𑀧𑀸𑀧𑀲𑀫𑀸𑀘𑀸𑀭𑁄. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀼𑀮𑀤𑀽𑀲𑀓𑁄 𑀧𑀸𑀧𑀲𑀫𑀸𑀘𑀸𑀭𑁄. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁫𑁯. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁬. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 ¶ 𑀧𑀭𑀺𑀪𑀸𑀲𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 ¶ 𑀓𑀭𑁄𑀫𑀸’’𑀢𑀺. 𑀢𑁂 ¶ 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 ¶ 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁦. 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁭. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 ¶ 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁧. 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 ¶ 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 ¶ 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺; 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁨. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸

𑁪𑁩𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀇𑀘𑁆𑀙𑀢𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀇𑀘𑁆𑀙𑀢𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 ¶ 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁩. 𑀢𑀚𑁆𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 ¶ 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 ¶ 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 ¶ 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁪𑁧. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁪𑁨. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄 ¶ , 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁪𑁩. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 ¶ ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭 ¶ , 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑁪𑁪𑁪. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑀢𑀚𑁆𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁪. 𑀦𑀺𑀬𑀲𑁆𑀲𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁫. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺 ¶ , 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 ¶ 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂 ¶ , 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 [𑀇𑀫𑁂 (𑀲𑀻. 𑀲𑁆𑀬𑀸. 𑀏𑀯𑀫𑀼𑀧𑀭𑀺𑀧𑀺)] 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀦𑀺𑀬𑀲𑁆𑀲𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁫. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁬. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 ¶ 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁬. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁭. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 ¶ 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 ¶ , 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀇𑀫𑁂 ¶ 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁭. 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁮. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁮. 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁪𑁯. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 ¶ 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 ¶ 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁬𑁯. 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑁪𑁫𑁦. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀬𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 ¶ 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀫𑀸’’𑀢𑀺. 𑀢𑁂 𑀢𑀲𑁆𑀲 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸…𑀧𑁂… 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸… 𑀥𑀫𑁆𑀫𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸… 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀸. 𑀢𑀢𑁆𑀭𑀝𑁆𑀞𑁄 𑀲𑀗𑁆𑀖𑁄 𑀯𑀺𑀯𑀤𑀢𑀺 𑁋 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀥𑀫𑁆𑀫𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺, 𑀬𑁂 ¶ 𑀘 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺, 𑀇𑀫𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄. 𑀇𑀫𑁂𑀧𑀺 𑀧𑀜𑁆𑀘 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸.

𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁄 𑀦𑀯𑀫𑁄.

𑁨𑁭𑁦. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀘𑀫𑁆𑀧𑀸𑀬𑀁 ¶ 𑀪𑀕𑀯𑀸 𑀆𑀲𑀺, 𑀯𑀢𑁆𑀣𑀼 𑀯𑀸𑀲𑀪𑀕𑀸𑀫𑀓𑁂;

𑀆𑀕𑀦𑁆𑀢𑀼𑀓𑀸𑀦𑀫𑀼𑀲𑁆𑀲𑀼𑀓𑁆𑀓𑀁, 𑀅𑀓𑀸𑀲𑀺 𑀇𑀘𑁆𑀙𑀺𑀢𑀩𑁆𑀩𑀓𑁂 [𑀇𑀘𑁆𑀙𑀺𑀢𑀩𑁆𑀩𑀓𑁄 (𑀓.)].

𑀧𑀓𑀢𑀜𑁆𑀜𑀼𑀦𑁄𑀢𑀺 𑀜𑀢𑁆𑀯𑀸, 𑀉𑀲𑁆𑀲𑀼𑀓𑁆𑀓𑀁 𑀦 𑀓𑀭𑀻 𑀢𑀤𑀸;

𑀉𑀓𑁆𑀔𑀺𑀢𑁆𑀢𑁄 ¶ 𑀦 𑀓𑀭𑁄𑀢𑀻𑀢𑀺, 𑀲𑀸𑀕𑀫𑀸 𑀚𑀺𑀦𑀲𑀦𑁆𑀢𑀺𑀓𑁂.

𑀅𑀥𑀫𑁆𑀫𑁂𑀦 ¶ 𑀯𑀕𑁆𑀕𑀓𑀫𑁆𑀫𑀁, 𑀲𑀫𑀕𑁆𑀕𑀁 𑀅𑀥𑀫𑁆𑀫𑁂𑀦 𑀘;

𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀜𑁆𑀘, 𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀺𑀓𑀁.

𑀧𑀢𑀺𑀭𑀽𑀧𑀓𑁂𑀦 𑀲𑀫𑀕𑁆𑀕𑀁, 𑀏𑀓𑁄 𑀉𑀓𑁆𑀔𑀺𑀧𑀢𑁂𑀓𑀓𑀁;

𑀏𑀓𑁄 𑀘 𑀤𑁆𑀯𑁂 𑀲𑀫𑁆𑀩𑀳𑀼𑀮𑁂, 𑀲𑀗𑁆𑀖𑀁 𑀉𑀓𑁆𑀔𑀺𑀧𑀢𑁂𑀓𑀓𑁄.

𑀤𑀼𑀯𑁂𑀧𑀺 𑀲𑀫𑁆𑀩𑀳𑀼𑀮𑀸𑀧𑀺, 𑀲𑀗𑁆𑀖𑁄 𑀲𑀗𑁆𑀖𑀜𑁆𑀘 𑀉𑀓𑁆𑀔𑀺𑀧𑀺;

𑀲𑀩𑁆𑀩𑀜𑁆𑀜𑀼𑀧𑀯𑀭𑁄 𑀲𑀼𑀢𑁆𑀯𑀸, 𑀅𑀥𑀫𑁆𑀫𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺.

𑀜𑀢𑁆𑀢𑀺𑀯𑀺𑀧𑀦𑁆𑀦𑀁 𑀬𑀁 𑀓𑀫𑁆𑀫𑀁, 𑀲𑀫𑁆𑀧𑀦𑁆𑀦𑀁 𑀅𑀦𑀼𑀲𑀸𑀯𑀦𑀁;

𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀁, 𑀲𑀫𑁆𑀧𑀦𑁆𑀦𑀁 𑀜𑀢𑁆𑀢𑀺𑀬𑀸 𑀘 𑀬𑀁.

𑀉𑀪𑀬𑁂𑀦 𑀯𑀺𑀧𑀦𑁆𑀦𑀜𑁆𑀘, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀫𑁂𑀯 𑀘;

𑀯𑀺𑀦𑀬𑀸 𑀲𑀢𑁆𑀣𑀼 𑀧𑀝𑀺𑀓𑀼𑀝𑁆𑀞𑀁, 𑀓𑀼𑀧𑁆𑀧𑀁 𑀅𑀝𑁆𑀞𑀸𑀦𑀸𑀭𑀳𑀺𑀓𑀁.

𑀅𑀥𑀫𑁆𑀫𑀯𑀕𑁆𑀕𑀁 ¶ 𑀲𑀫𑀕𑁆𑀕𑀁, 𑀥𑀫𑁆𑀫 𑀧𑀢𑀺𑀭𑀽𑀧𑀸𑀦𑀺 𑀬𑁂 𑀤𑀼𑀯𑁂;

𑀥𑀫𑁆𑀫𑁂𑀦𑁂𑀯 𑀘 𑀲𑀸𑀫𑀕𑁆𑀕𑀺𑀁, 𑀅𑀦𑀼𑀜𑁆𑀜𑀸𑀲𑀺 𑀢𑀣𑀸𑀕𑀢𑁄.

𑀘𑀢𑀼𑀯𑀕𑁆𑀕𑁄 𑀧𑀜𑁆𑀘𑀯𑀕𑁆𑀕𑁄, 𑀤𑀲𑀯𑀕𑁆𑀕𑁄 𑀘 𑀯𑀻𑀲𑀢𑀺;

𑀧𑀭𑁄𑀯𑀻𑀲𑀢𑀺𑀯𑀕𑁆𑀕𑁄 𑀘 [𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄 (𑀲𑁆𑀬𑀸.)], 𑀲𑀗𑁆𑀖𑁄 𑀧𑀜𑁆𑀘𑀯𑀺𑀥𑁄 𑀢𑀣𑀸.

𑀞𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀁, 𑀬𑀜𑁆𑀘 𑀓𑀫𑁆𑀫𑀁 𑀧𑀯𑀸𑀭𑀡𑀁;

𑀅𑀩𑁆𑀪𑀸𑀦𑀓𑀫𑁆𑀫𑁂𑀦 𑀲𑀳, 𑀘𑀢𑀼𑀯𑀕𑁆𑀕𑁂𑀳𑀺 𑀓𑀫𑁆𑀫𑀺𑀓𑁄.

𑀤𑀼𑀯𑁂 𑀓𑀫𑁆𑀫𑁂 𑀞𑀧𑁂𑀢𑁆𑀯𑀸𑀦, 𑀫𑀚𑁆𑀛𑀤𑁂𑀲𑀽𑀧𑀲𑀫𑁆𑀧𑀤𑀁;

𑀅𑀩𑁆𑀪𑀸𑀦𑀁 𑀧𑀜𑁆𑀘𑀯𑀕𑁆𑀕𑀺𑀓𑁄, 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀺𑀓𑁄.

𑀅𑀩𑁆𑀪𑀸𑀦𑁂𑀓𑀁 𑀞𑀧𑁂𑀢𑁆𑀯𑀸𑀦, 𑀬𑁂 𑀪𑀺𑀓𑁆𑀔𑀽 𑀤𑀲𑀯𑀕𑁆𑀕𑀺𑀓𑀸;

𑀲𑀩𑁆𑀩𑀓𑀫𑁆𑀫𑀓𑀭𑁄 ¶ 𑀲𑀗𑁆𑀖𑁄, 𑀯𑀻𑀲𑁄 𑀲𑀩𑁆𑀩𑀢𑁆𑀣 𑀓𑀫𑁆𑀫𑀺𑀓𑁄.

𑀪𑀺𑀓𑁆𑀔𑀼𑀦𑀻 ¶ 𑀲𑀺𑀓𑁆𑀔𑀫𑀸𑀦𑀸, 𑀘 𑀲𑀸𑀫𑀡𑁂𑀭𑁄 𑀲𑀸𑀫𑀡𑁂𑀭𑀻;

𑀧𑀘𑁆𑀘𑀓𑁆𑀔𑀸𑀢𑀦𑁆𑀢𑀺𑀫𑀯𑀢𑁆𑀣𑀽, 𑀉𑀓𑁆𑀔𑀺𑀢𑁆𑀢𑀸𑀧𑀢𑁆𑀢𑀺𑀤𑀲𑁆𑀲𑀦𑁂.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀤𑀺𑀝𑁆𑀞𑀺𑀬𑀸, 𑀧𑀡𑁆𑀟𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀁;

𑀢𑀺𑀢𑁆𑀣𑀺𑀬𑀸 𑀢𑀺𑀭𑀘𑁆𑀙𑀸𑀦𑀕𑀢𑀁, 𑀫𑀸𑀢𑀼 𑀧𑀺𑀢𑀼 𑀘 𑀖𑀸𑀢𑀓𑀁.

𑀅𑀭𑀳𑀁 𑀪𑀺𑀓𑁆𑀔𑀼𑀦𑀻𑀤𑀽𑀲𑀺, 𑀪𑁂𑀤𑀓𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀁;

𑀩𑁆𑀬𑀜𑁆𑀚𑀦𑀁 𑀦𑀸𑀦𑀸𑀲𑀁𑀯𑀸𑀲𑀁, 𑀦𑀸𑀦𑀸𑀲𑀻𑀫𑀸𑀬 𑀇𑀤𑁆𑀥𑀺𑀬𑀸.

𑀬𑀲𑁆𑀲 𑀲𑀗𑁆𑀖𑁄 𑀓𑀭𑁂 𑀓𑀫𑁆𑀫𑀁, 𑀳𑁄𑀦𑁆𑀢𑁂𑀢𑁂 𑀘𑀢𑀼𑀯𑀻𑀲𑀢𑀺;

𑀲𑀫𑁆𑀩𑀼𑀤𑁆𑀥𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀦 𑀳𑁂𑀢𑁂 𑀕𑀡𑀧𑀽𑀭𑀓𑀸.

𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑁄, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬 𑀯𑀸;

𑀫𑀽𑀮𑀸 𑀫𑀸𑀦𑀢𑁆𑀢𑀫𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀁.

𑀫𑀽𑀮𑀸 ¶ 𑀅𑀭𑀳𑀫𑀸𑀦𑀢𑁆𑀢𑀸, 𑀅𑀩𑁆𑀪𑀸𑀦𑀸𑀭𑀳𑀫𑁂𑀯 𑀘;

𑀦 𑀓𑀫𑁆𑀫𑀓𑀸𑀭𑀓𑀸 𑀧𑀜𑁆𑀘, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸.

𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀸 𑀘, 𑀲𑀸𑀫𑀡𑁂𑀭𑁄 𑀲𑀸𑀫𑀡𑁂𑀭𑀺𑀓𑀸;

𑀧𑀘𑁆𑀘𑀓𑁆𑀔𑀦𑁆𑀢𑀺𑀫𑀉𑀫𑁆𑀫𑀢𑁆𑀢𑀸, 𑀔𑀺𑀢𑁆𑀢𑀸𑀯𑁂𑀤𑀦𑀤𑀲𑁆𑀲𑀦𑁂.

𑀅𑀧𑁆𑀧𑀝𑀺𑀓𑀫𑁆𑀫𑁂 𑀤𑀺𑀝𑁆𑀞𑀺𑀬𑀸, 𑀧𑀡𑁆𑀟𑀓𑀸𑀧𑀺 𑀘 𑀩𑁆𑀬𑀜𑁆𑀚𑀦𑀸 [𑀇𑀢𑁄 𑀧𑀭𑀁 𑀲𑁆𑀬𑀸𑀫𑀫𑀽𑀮𑁂 𑀤𑀺𑀬𑀟𑁆𑀠𑀕𑀸𑀣𑀸𑀳𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀲𑀫𑀢𑁆𑀢𑀁 𑀤𑀲𑁆𑀲𑀺𑀢𑀸];

𑀦𑀸𑀦𑀸𑀲𑀁𑀯𑀸𑀲𑀓𑀸 𑀲𑀻𑀫𑀸, 𑀯𑁂𑀳𑀸𑀲𑀁 𑀬𑀲𑁆𑀲 𑀓𑀫𑁆𑀫 𑀘.

𑀅𑀝𑁆𑀞𑀸𑀭𑀲𑀦𑁆𑀦𑀫𑁂𑀢𑁂𑀲𑀁, ¶ ¶ 𑀧𑀝𑀺𑀓𑁆𑀓𑁄𑀲𑀁 𑀦 𑀭𑀼𑀳𑀢𑀺;

𑀪𑀺𑀓𑁆𑀔𑀼𑀲𑁆𑀲 𑀧𑀓𑀢𑀢𑁆𑀢𑀲𑁆𑀲, 𑀭𑀼𑀳𑀢𑀺 𑀧𑀝𑀺𑀓𑁆𑀓𑁄𑀲𑀦𑀸.

𑀲𑀼𑀤𑁆𑀥𑀲𑁆𑀲 𑀤𑀼𑀦𑁆𑀦𑀺𑀲𑀸𑀭𑀺𑀢𑁄, 𑀩𑀸𑀮𑁄 𑀳𑀺 𑀲𑀼𑀦𑀺𑀲𑁆𑀲𑀸𑀭𑀺𑀢𑁄;

𑀧𑀡𑁆𑀟𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑁄, 𑀧𑀓𑁆𑀓𑀦𑁆𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑁄.

𑀫𑀸𑀢𑀼 𑀧𑀺𑀢𑀼 𑀅𑀭𑀳𑀦𑁆𑀢, 𑀤𑀽𑀲𑀓𑁄 𑀲𑀗𑁆𑀖𑀪𑁂𑀤𑀓𑁄;

𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀘𑁂𑀯, 𑀉𑀪𑀢𑁄𑀩𑁆𑀬𑀜𑁆𑀚𑀦𑁄 𑀘 𑀬𑁄.

𑀏𑀓𑀸𑀤𑀲𑀦𑁆𑀦𑀁 𑀏𑀢𑁂𑀲𑀁, 𑀑𑀲𑀸𑀭𑀡𑀁 𑀦 𑀬𑀼𑀚𑁆𑀚𑀢𑀺;

𑀳𑀢𑁆𑀣𑀧𑀸𑀤𑀁 𑀢𑀤𑀼𑀪𑀬𑀁, 𑀓𑀡𑁆𑀡𑀦𑀸𑀲𑀁 𑀢𑀤𑀽𑀪𑀬𑀁.

𑀅𑀗𑁆𑀕𑀼𑀮𑀺 𑀅𑀴𑀓𑀡𑁆𑀟𑀭𑀁, 𑀨𑀡𑀁 𑀔𑀼𑀚𑁆𑀚𑁄 𑀘 𑀯𑀸𑀫𑀦𑁄;

𑀕𑀡𑁆𑀟𑀻 𑀮𑀓𑁆𑀔𑀡𑀓𑀲𑀸, 𑀘 𑀮𑀺𑀔𑀺𑀢𑀓𑁄 𑀘 𑀲𑀻𑀧𑀤𑀻.

𑀧𑀸𑀧𑀸 ¶ 𑀧𑀭𑀺𑀲𑀓𑀸𑀡𑁄 𑀘, 𑀓𑀼𑀡𑀻 𑀔𑀜𑁆𑀚𑁄 𑀳𑀢𑁄𑀧𑀺 𑀘;

𑀇𑀭𑀺𑀬𑀸𑀧𑀣𑀤𑀼𑀩𑁆𑀩𑀮𑁄, 𑀅𑀦𑁆𑀥𑁄 𑀫𑀽𑀕𑁄 𑀘 𑀩𑀥𑀺𑀭𑁄.

𑀅𑀦𑁆𑀥𑀫𑀽𑀕𑀦𑁆𑀥𑀩𑀥𑀺𑀭𑁄 𑀫𑀽𑀕𑀩𑀥𑀺𑀭𑀫𑁂𑀯 𑀘;

𑀅𑀦𑁆𑀥𑀫𑀽𑀕𑀩𑀥𑀺𑀭𑁄 𑀘, 𑀤𑁆𑀯𑀢𑁆𑀢𑀺𑀁𑀲𑁂𑀢𑁂 𑀅𑀦𑀽𑀦𑀓𑀸.

𑀢𑁂𑀲𑀁 ¶ 𑀑𑀲𑀸𑀭𑀡𑀁 𑀳𑁄𑀢𑀺, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀁;

𑀤𑀝𑁆𑀞𑀩𑁆𑀩𑀸 𑀧𑀝𑀺𑀓𑀸𑀢𑀩𑁆𑀩𑀸, 𑀦𑀺𑀲𑁆𑀲𑀚𑁆𑀚𑁂𑀢𑀸 𑀦 𑀯𑀺𑀚𑁆𑀚𑀢𑀺.

𑀢𑀲𑁆𑀲 𑀉𑀓𑁆𑀔𑁂𑀧𑀦𑀸 𑀓𑀫𑁆𑀫𑀸, 𑀲𑀢𑁆𑀢 𑀳𑁄𑀦𑁆𑀢𑀺 𑀅𑀥𑀫𑁆𑀫𑀺𑀓𑀸;

𑀆𑀧𑀦𑁆𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀁, 𑀲𑀢𑁆𑀢 𑀢𑁂𑀧𑀺 𑀅𑀥𑀫𑁆𑀫𑀺𑀓𑀸.

𑀆𑀧𑀦𑁆𑀦𑀁 𑀦𑀸𑀦𑀼𑀯𑀢𑁆𑀢𑀦𑁆𑀢𑀁, 𑀲𑀢𑁆𑀢 𑀓𑀫𑁆𑀫𑀸 𑀲𑀼𑀥𑀫𑁆𑀫𑀺𑀓𑀸;

𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀸 𑀘, 𑀧𑀝𑀺𑀜𑁆𑀜𑀸𑀬 𑀘 𑀓𑀸𑀭𑀡𑀸.

𑀲𑀢𑀺 ¶ 𑀅𑀫𑀽𑀴𑁆𑀳𑀧𑀸𑀧𑀺𑀓𑀸, 𑀢𑀚𑁆𑀚𑀦𑀻𑀦𑀺𑀬𑀲𑁆𑀲𑁂𑀦 𑀘;

𑀧𑀩𑁆𑀩𑀸𑀚𑀦𑀻𑀬 𑀧𑀝𑀺𑀲𑀸𑀭𑁄, 𑀉𑀓𑁆𑀔𑁂𑀧𑀧𑀭𑀺𑀯𑀸𑀲 𑀘.

𑀫𑀽𑀮𑀸 𑀫𑀸𑀦𑀢𑁆𑀢𑀅𑀩𑁆𑀪𑀸𑀦𑀸, 𑀢𑀣𑁂𑀯 𑀉𑀧𑀲𑀫𑁆𑀧𑀤𑀸;

𑀅𑀜𑁆𑀜𑀁 𑀓𑀭𑁂𑀬𑁆𑀬 𑀅𑀜𑁆𑀜𑀲𑁆𑀲, 𑀲𑁄𑀴𑀲𑁂𑀢𑁂 𑀅𑀥𑀫𑁆𑀫𑀺𑀓𑀸.

𑀢𑀁 𑀢𑀁 𑀓𑀭𑁂𑀬𑁆𑀬 𑀢𑀁 𑀢𑀲𑁆𑀲, 𑀲𑁄𑀴𑀲𑁂𑀢𑁂 𑀲𑀼𑀥𑀫𑁆𑀫𑀺𑀓𑀸;

𑀧𑀘𑁆𑀘𑀸𑀭𑁄𑀧𑁂𑀬𑁆𑀬 𑀅𑀜𑁆𑀜𑀜𑁆𑀜𑀁, 𑀲𑁄𑀴𑀲𑁂𑀢𑁂 𑀅𑀥𑀫𑁆𑀫𑀺𑀓𑀸.

𑀤𑁆𑀯𑁂 𑀤𑁆𑀯𑁂 𑀢𑀫𑁆𑀫𑀽𑀮𑀓𑀁 𑀢𑀲𑁆𑀲 [𑀤𑁆𑀯𑁂 𑀤𑁆𑀯𑁂 𑀫𑀽𑀮𑀸 𑀓𑀢𑀸 𑀓𑀲𑁆𑀲 (𑀲𑁆𑀬𑀸.), 𑀤𑁄𑀤𑁄𑀢𑀫𑀽𑀮𑀓𑀦𑁆𑀢𑀲𑁆𑀲 (𑀓.)], 𑀢𑁂𑀧𑀺 𑀲𑁄𑀴𑀲 𑀥𑀫𑁆𑀫𑀺𑀓𑀸;

𑀏𑀓𑁂𑀓𑀫𑀽𑀮𑀓𑀁 𑀘𑀓𑁆𑀓𑀁, ‘‘𑀅𑀥𑀫𑁆𑀫’’𑀦𑁆𑀢𑀺 𑀚𑀺𑀦𑁄𑀩𑁆𑀭𑀯𑀺.

𑀅𑀓𑀸𑀲𑀺 𑀢𑀚𑁆𑀚𑀦𑀻𑀬𑀁 𑀓𑀫𑁆𑀫𑀁, 𑀲𑀗𑁆𑀖𑁄 𑀪𑀡𑁆𑀟𑀦𑀓𑀸𑀭𑀓𑁄;

𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀜𑁆𑀜𑀁 𑀆𑀯𑀸𑀲𑀁 𑀕𑀘𑁆𑀙𑀺 𑀲𑁄.

𑀢𑀢𑁆𑀣𑀸𑀥𑀫𑁆𑀫𑁂𑀦 𑀲𑀫𑀕𑁆𑀕𑀸, 𑀢𑀲𑁆𑀲 𑀢𑀚𑁆𑀚𑀦𑀻𑀬𑀁 𑀓𑀭𑀼𑀁;

𑀅𑀜𑁆𑀜𑀢𑁆𑀣 𑀯𑀕𑁆𑀕𑀸𑀥𑀫𑁆𑀫𑁂𑀦, 𑀢𑀲𑁆𑀲 𑀢𑀚𑁆𑀚𑀦𑀻𑀬𑀁 𑀓𑀭𑀼𑀁.

𑀧𑀢𑀺𑀭𑀽𑀧𑁂𑀦 𑀯𑀕𑁆𑀕𑀸𑀧𑀺, 𑀲𑀫𑀕𑁆𑀕𑀸𑀧𑀺 𑀢𑀣𑀸 𑀓𑀭𑀼𑀁;

𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀸 𑀘, 𑀥𑀫𑁆𑀫𑁂𑀦 𑀯𑀕𑁆𑀕𑀫𑁂𑀯 𑀘.

𑀧𑀢𑀺𑀭𑀽𑀧𑀓𑁂𑀦 𑀯𑀕𑁆𑀕𑀸 𑀘, 𑀲𑀫𑀕𑁆𑀕𑀸 𑀘 𑀇𑀫𑁂 𑀧𑀤𑀸;

𑀏𑀓𑁂𑀓𑀫𑀽𑀮𑀓𑀁 𑀓𑀢𑁆𑀯𑀸, 𑀘𑀓𑁆𑀓𑀁 𑀩𑀦𑁆𑀥𑁂 𑀯𑀺𑀘𑀓𑁆𑀔𑀡𑁄.

𑀩𑀸𑀮𑀸 ¶ ¶ 𑀩𑁆𑀬𑀢𑁆𑀢𑀲𑁆𑀲 𑀦𑀺𑀬𑀲𑁆𑀲𑀁, 𑀧𑀩𑁆𑀩𑀸𑀚𑁂 𑀓𑀼𑀮𑀤𑀽𑀲𑀓𑀁;

𑀧𑀝𑀺𑀲𑀸𑀭𑀡𑀻𑀬𑀁 𑀓𑀫𑁆𑀫𑀁, 𑀓𑀭𑁂 𑀅𑀓𑁆𑀓𑁄𑀲𑀓𑀲𑁆𑀲 𑀘.

𑀅𑀤𑀲𑁆𑀲𑀦𑀸𑀧𑁆𑀧𑀝𑀺𑀓𑀫𑁆𑀫𑁂 ¶ , 𑀬𑁄 𑀘 𑀤𑀺𑀝𑁆𑀞𑀺𑀁 𑀦 𑀦𑀺𑀲𑁆𑀲𑀚𑁆𑀚𑁂;

𑀢𑁂𑀲𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁, 𑀲𑀢𑁆𑀣𑀯𑀸𑀳𑁂𑀦 𑀪𑀸𑀲𑀺𑀢𑀁.

𑀉𑀧𑀭𑀺 ¶ 𑀦𑀬𑀓𑀫𑁆𑀫𑀸𑀦𑀁 [𑀉𑀧𑀯𑀺𑀦𑀬𑀓𑀫𑁆𑀫𑀸𑀦𑀁 (𑀲𑁆𑀬𑀸.), 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀦𑀁 (𑀓.)] 𑀧𑀜𑁆𑀜𑁄 𑀢𑀚𑁆𑀚𑀦𑀻𑀬𑀁 𑀦𑀬𑁂;

𑀢𑁂𑀲𑀁𑀬𑁂𑀯 𑀅𑀦𑀼𑀮𑁄𑀫𑀁, 𑀲𑀫𑁆𑀫𑀸 𑀯𑀢𑁆𑀢𑀢𑀺 𑀬𑀸𑀘𑀺𑀢𑁂 [𑀬𑀸𑀘𑀢𑀺 (𑀲𑁆𑀬𑀸.), 𑀬𑀸𑀘𑀺𑀢𑁄 (𑀲𑀻.)].

𑀧𑀲𑁆𑀲𑀤𑁆𑀥𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁, 𑀳𑁂𑀝𑁆𑀞𑀸 𑀓𑀫𑁆𑀫𑀦𑀬𑁂𑀦 𑀘;

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀢𑀼 𑀓𑀫𑁆𑀫𑁂𑀲𑀼, 𑀢𑀢𑁆𑀭𑀝𑁆𑀞𑁄 𑀘 𑀯𑀺𑀯𑀤𑀢𑀺.

𑀅𑀓𑀢𑀁 𑀤𑀼𑀓𑁆𑀓𑀝𑀜𑁆𑀘𑁂𑀯, 𑀧𑀼𑀦𑀓𑀸𑀢𑀩𑁆𑀩𑀓𑀦𑁆𑀢𑀺 𑀘;

𑀓𑀫𑁆𑀫𑁂 𑀧𑀲𑁆𑀲𑀤𑁆𑀥𑀺𑀬𑀸 𑀘𑀸𑀧𑀺, 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄.

𑀯𑀺𑀧𑀢𑁆𑀢𑀺𑀩𑁆𑀬𑀸𑀥𑀺𑀢𑁂 𑀤𑀺𑀲𑁆𑀯𑀸, 𑀓𑀫𑁆𑀫𑀧𑁆𑀧𑀢𑁆𑀢𑁂 𑀫𑀳𑀸𑀫𑀼𑀦𑀺;

𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑀓𑁆𑀔𑀸𑀲𑀺, 𑀲𑀮𑁆𑀮𑀓𑀢𑁆𑀢𑁄𑀯 𑀑𑀲𑀥𑀦𑁆𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀙𑀢𑁆𑀢𑀺𑀁𑀲𑀸𑀢𑀺.

𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄

𑁨𑁭𑁧. 𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸

𑁪𑁫𑁧. 𑀢𑁂𑀦 ¶ ¶ ¶ ¶ 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 [𑀆𑀧𑀢𑁆𑀢𑀺𑀤𑀺𑀝𑁆𑀞𑀻 (𑀲𑀻.)] 𑀳𑁄𑀢𑀺; 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸 𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺; 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀘 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀣 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’’𑀢𑀺. 𑀅𑀮𑀪𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀚𑀸𑀦𑀧𑀤𑀸𑀦𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀸𑀦𑀁 𑀲𑀫𑁆𑀪𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 ¶ 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’’𑀢𑀺. 𑀅𑀮𑀪𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀚𑀸𑀦𑀧𑀤𑁂𑀧𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄 ¶ . 𑀅𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 ¶ 𑀅𑀝𑁆𑀞𑀸𑀦𑀸𑀭𑀳𑁂𑀦𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 ¶ 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀧𑀢𑁆𑀢𑀺 𑀏𑀲𑀸 𑀆𑀯𑀼𑀲𑁄, 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀫𑀸 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀢𑁆𑀣 𑀅𑀦𑀼𑀧𑀭𑀺𑀯𑀸𑀭𑁂𑀣𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑁂𑀧𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀁𑀲𑀼 𑀅𑀦𑀼𑀧𑀭𑀺𑀯𑀸𑀭𑁂𑀲𑀼𑀁.

𑁪𑁫𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 ¶ 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀘, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀅𑀣 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀣 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’𑀢𑀺. 𑀅𑀮𑀪𑀺 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀚𑀸𑀦𑀧𑀤𑀸𑀦𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀸𑀦𑀁 𑀲𑀫𑁆𑀪𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’𑀢𑀺. 𑀅𑀮𑀪𑀺 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀚𑀸𑀦𑀧𑀤𑁂𑀧𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 ¶ ¶ 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘𑀆𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 ¶ 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀫𑀸 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀢𑁆𑀣 𑀅𑀦𑀼𑀧𑀭𑀺𑀯𑀸𑀭𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑁂𑀧𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀦𑁆𑀢𑀺 𑀅𑀦𑀼𑀧𑀭𑀺𑀯𑀸𑀭𑁂𑀦𑁆𑀢𑀻’’𑀢𑀺.

𑁪𑁫𑁩. 𑀅𑀣 𑀔𑁄 𑀪𑀕𑀯𑀸 ‘𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, ‘𑀧𑀝𑀺𑀪𑀸𑀢𑀺 𑀦𑁄, 𑀧𑀝𑀺𑀪𑀸𑀢𑀺 𑀦𑁄’𑀢𑀺 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺 ¶ . 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 ¶ 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 ¶ 𑀳𑁄𑀦𑁆𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀧𑀯𑀸𑀭𑁂𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫 ¶ . 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 ¶ 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺.

𑁪𑁫𑁪. 𑀅𑀣 𑀔𑁄 𑀪𑀕𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀪𑀸𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘𑀦𑀸𑀫𑁆𑀳 𑀆𑀧𑀦𑁆𑀦𑀸, 𑀦𑀸𑀫𑁆𑀳 𑀆𑀧𑀦𑁆𑀦𑀸’𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀓𑀸𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀔𑁄 𑀆𑀬𑀲𑁆𑀫𑀦𑁆𑀢𑁄 [𑀆𑀬𑀲𑁆𑀫𑀦𑁆𑀢𑀸 (𑀓.)] 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀦𑀸𑀮𑀁 𑀫𑀫𑀁 𑀯𑀸 𑀓𑀸𑀭𑀡𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀸𑀭𑀡𑀸 𑀙𑀦𑁆𑀤𑀸 𑀤𑁄𑀲𑀸 ¶ 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁. 𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺 ¶ , 𑀦 𑀫𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺 ¶ 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀦𑀸𑀮𑀁 𑀫𑀫𑀁 𑀯𑀸 𑀓𑀸𑀭𑀡𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀸𑀭𑀡𑀸 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁. 𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀫𑀬𑀸 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑁆𑀲𑀦𑁆𑀢𑀺 ¶ , 𑀯𑀺𑀦𑀸 𑀫𑀬𑀸 𑀧𑀯𑀸𑀭𑁂𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀫𑀬𑀸 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺 ¶ , 𑀪𑁂𑀤𑀕𑀭𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀪𑀸𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁪𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀉𑀓𑁆𑀔𑁂𑀧𑀓𑀸 𑀧𑀦 𑀪𑀺𑀓𑁆𑀔𑀽 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀉𑀓𑁆𑀔𑁂𑀧𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 ¶ 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀫𑀬𑀁 𑀧𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀫, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. ‘‘𑀢𑁂 𑀘𑁂, 𑀪𑀺𑀓𑁆𑀔𑀼, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀬𑀣𑀸 𑀫𑀬𑀸 𑀜𑀢𑁆𑀢𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀧𑀜𑁆𑀜𑀢𑁆𑀢𑀸, 𑀢𑁂𑀲𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀥𑀫𑁆𑀫𑀺𑀓𑀸𑀦𑀺 𑀓𑀫𑁆𑀫𑀸𑀦𑀺 𑀪𑀯𑀺𑀲𑁆𑀲’’𑀦𑁆𑀢𑀺 𑀅𑀓𑀼𑀧𑁆𑀧𑀸𑀦𑀺 𑀞𑀸𑀦𑀸𑀭𑀳𑀸𑀦𑀺. 𑀢𑀼𑀫𑁆𑀳𑁂 𑀘𑁂, 𑀪𑀺𑀓𑁆𑀔𑀼, 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀣, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀬𑀣𑀸 𑀫𑀬𑀸 𑀜𑀢𑁆𑀢𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀧𑀜𑁆𑀜𑀢𑁆𑀢𑀸, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀥𑀫𑁆𑀫𑀺𑀓𑀸𑀦𑀺 𑀓𑀫𑁆𑀫𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀓𑀼𑀧𑁆𑀧𑀸𑀦𑀺 𑀞𑀸𑀦𑀸𑀭𑀳𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀸𑀦𑀸𑀲𑀁𑀯𑀸𑀲𑀓𑀸 𑀏𑀢𑁂 [𑀢𑁂 (𑀲𑁆𑀬𑀸.)] 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀼 (𑀲𑀻. 𑀲𑁆𑀬𑀸.)] 𑀢𑀼𑀫𑁆𑀳𑁂𑀳𑀺, 𑀢𑀼𑀫𑁆𑀳𑁂 𑀘 𑀢𑁂𑀳𑀺 𑀦𑀸𑀦𑀸𑀲𑀁𑀯𑀸𑀲𑀓𑀸.

‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀼, 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 ¶ 𑀯𑀸 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀧𑀢𑀺 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀼, 𑀤𑁆𑀯𑁂 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑁄. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀼, 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀸𑀦𑀲𑀁𑀯𑀸𑀲𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀢𑁆𑀢𑀁 𑀑𑀲𑀸𑀭𑁂𑀢𑀺 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀼, 𑀤𑁆𑀯𑁂 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑁄’’𑀢𑀺.

𑁪𑁫𑁬. 𑀢𑁂𑀦 ¶ ¶ 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀦𑁆𑀢𑀺, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀦𑁆𑀢𑀺, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀦𑁆𑀢𑀺 ¶ , 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸…𑀧𑁂… 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 ¶ 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂 𑀅𑀥𑀫𑁆𑀫𑀺𑀬𑀸𑀬𑀫𑀸𑀦𑁂 [𑀅𑀥𑀫𑁆𑀫𑀺𑀬𑀫𑀸𑀦𑁂 (𑀲𑀻. 𑀲𑁆𑀬𑀸. 𑀓𑀢𑁆𑀣𑀘𑀺) 𑀅𑀥𑀫𑁆𑀫𑀻𑀬𑀫𑀸𑀦𑁂 (𑀓.)] 𑀅𑀲𑀫𑁆𑀫𑁄𑀤𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 [-‘‘𑀅𑀲𑀫𑁆𑀫𑁄𑀤𑀺𑀓𑀸𑀯𑀢𑁆𑀢𑀫𑀸𑀦𑀸𑀬’’ 𑀇𑀢𑀺 𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀸𑀞𑁄] ‘𑀏𑀢𑁆𑀢𑀸𑀯𑀢𑀸 𑀦 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀸𑀫, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀪𑀺𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂 𑀥𑀫𑁆𑀫𑀺𑀬𑀸𑀬𑀫𑀸𑀦𑁂 𑀲𑀫𑁆𑀫𑁄𑀤𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 𑀆𑀲𑀦𑀦𑁆𑀢𑀭𑀺𑀓𑀸𑀬 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺.

𑁪𑁫𑁭. [𑀫. 𑀦𑀺. 𑁩.𑁨𑁩𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 ¶ 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼 ¶ , 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂 ¶ , 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 ¶ 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺.

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁨. 𑀤𑀻𑀖𑀸𑀯𑀼𑀯𑀢𑁆𑀣𑀼

𑁪𑁫𑁮. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 [𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀓𑀸𑀲𑀺𑀭𑀸𑀚𑀸 𑀅𑀳𑁄𑀲𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀫𑀳𑀩𑁆𑀩𑀮𑁄 𑀫𑀳𑀸𑀯𑀸𑀳𑀦𑁄 𑀫𑀳𑀸𑀯𑀺𑀚𑀺𑀢𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀤𑀻𑀖𑀻𑀢𑀺 𑀦𑀸𑀫 𑀓𑁄𑀲𑀮𑀭𑀸𑀚𑀸 𑀅𑀳𑁄𑀲𑀺 𑀤𑀮𑀺𑀤𑁆𑀤𑁄 𑀅𑀧𑁆𑀧𑀥𑀦𑁄 𑀅𑀧𑁆𑀧𑀪𑁄𑀕𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀯𑀸𑀳𑀦𑁄 𑀅𑀧𑁆𑀧𑀯𑀺𑀚𑀺𑀢𑁄 𑀅𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀅𑀩𑁆𑀪𑀼𑀬𑁆𑀬𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑁋 ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀺𑀭 𑀓𑀸𑀲𑀺𑀭𑀸𑀚𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀔𑁄 𑀓𑀸𑀲𑀺𑀭𑀸𑀚𑀸 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀫𑀳𑀩𑁆𑀩𑀮𑁄 𑀫𑀳𑀸𑀯𑀸𑀳𑀦𑁄 𑀫𑀳𑀸𑀯𑀺𑀚𑀺𑀢𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄, 𑀅𑀳𑀁 𑀧𑀦𑀫𑁆𑀳𑀺 𑀤𑀮𑀺𑀤𑁆𑀤𑁄 𑀅𑀧𑁆𑀧𑀥𑀦𑁄 𑀅𑀧𑁆𑀧𑀪𑁄𑀕𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀯𑀸𑀳𑀦𑁄 𑀅𑀧𑁆𑀧𑀯𑀺𑀚𑀺𑀢𑁄 𑀅𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄, 𑀦𑀸𑀳𑀁 ¶ 𑀧𑀝𑀺𑀩𑀮𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀓𑀸𑀲𑀺𑀭𑀜𑁆𑀜𑀸 𑀏𑀓𑀲𑀗𑁆𑀖𑀸𑀢𑀫𑁆𑀧𑀺 𑀲𑀳𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀫𑀳𑁂𑀲𑀺𑀁 𑀆𑀤𑀸𑀬 𑀧𑀝𑀺𑀓𑀘𑁆𑀘𑁂𑀯 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑀜𑁆𑀘 𑀓𑁄𑀲𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀬𑁂𑀦 𑀯𑀸𑀭𑀸𑀡𑀲𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀢𑀲𑁆𑀲𑀸 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑁋 ‘‘𑀇𑀘𑁆𑀙𑀢𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁 ¶ , 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀁’’. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀕𑀩𑁆𑀪𑀺𑀦𑀻𑀫𑁆𑀳𑀺, 𑀤𑁂𑀯. 𑀢𑀲𑁆𑀲𑀸 𑀫𑁂 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑁋 𑀇𑀘𑁆𑀙𑀸𑀫𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 ¶ 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 [𑀯𑀫𑁆𑀫𑀺𑀢𑀁 (𑀲𑀻.)] 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀓𑀼𑀢𑁄, 𑀤𑁂𑀯𑀺, 𑀅𑀫𑁆𑀳𑀸𑀓𑀁 𑀤𑀼𑀕𑁆𑀕𑀢𑀸𑀦𑀁 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀲𑀦𑁆𑀦𑀤𑁆𑀥𑀸 𑀯𑀫𑁆𑀫𑀺𑀓𑀸 𑀲𑀼𑀪𑀽𑀫𑁂 𑀞𑀺𑀢𑀸, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺 [𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀦𑁆𑀢𑀺 (𑀲𑀻. 𑀲𑁆𑀬𑀸.)] ‘‘𑀲𑀘𑀸𑀳𑀁, 𑀤𑁂𑀯, 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺.

𑁪𑁫𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 ¶ 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀲𑀳𑀸𑀬𑁄 𑀳𑁄𑀢𑀺 ¶ . 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀲𑀔𑀻 𑀢𑁂, 𑀲𑀫𑁆𑀫, 𑀕𑀩𑁆𑀪𑀺𑀦𑀻. 𑀢𑀲𑁆𑀲𑀸 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑁋 𑀇𑀘𑁆𑀙𑀢𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀫𑀬𑀫𑁆𑀧𑀺 𑀤𑁂𑀯𑀺𑀁 𑀧𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀺𑀁, 𑀤𑀺𑀲𑁆𑀯𑀸𑀦 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀓𑁄𑀲𑀮𑀭𑀸𑀚𑀸 𑀯𑀢 𑀪𑁄 𑀓𑀼𑀘𑁆𑀙𑀺𑀕𑀢𑁄, 𑀓𑁄𑀲𑀮𑀭𑀸𑀚𑀸 𑀯𑀢 𑀪𑁄 𑀓𑀼𑀘𑁆𑀙𑀺𑀕𑀢𑁄’’𑀢𑀺. 𑀅𑀢𑁆𑀢𑀫𑀦𑀸 [𑀅𑀯𑀺𑀫𑀦𑀸 (𑀲𑀻. 𑀲𑁆𑀬𑀸. 𑀓𑀢𑁆𑀣𑀘𑀺], 𑀤𑁂𑀯𑀺, 𑀳𑁄𑀳𑀺. 𑀮𑀘𑁆𑀙𑀲𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀢𑀣𑀸, 𑀤𑁂𑀯, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁂 ¶ 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀲𑀦𑁆𑀦𑀤𑁆𑀥𑀸 𑀯𑀫𑁆𑀫𑀺𑀓𑀸 𑀲𑀼𑀪𑀽𑀫𑁂 𑀢𑀺𑀝𑁆𑀞𑀢𑀼, 𑀔𑀕𑁆𑀕𑀸 𑀘 𑀥𑁄𑀯𑀺𑀬𑀦𑁆𑀢𑀽’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 ¶ 𑁋 ‘‘𑀬𑀣𑀸, 𑀪𑀡𑁂, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑀢𑀣𑀸 𑀓𑀭𑁄𑀣𑀸’’𑀢𑀺. 𑀅𑀮𑀪𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀤𑀻𑀖𑀸𑀯𑀽𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄, 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁, 𑀲𑀘𑀸𑀬𑀁 𑀅𑀫𑁆𑀳𑁂 𑀚𑀸𑀦𑀺𑀲𑁆𑀲𑀢𑀺, 𑀲𑀩𑁆𑀩𑁂𑀯 𑀢𑀬𑁄 𑀖𑀸𑀢𑀸𑀧𑁂𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀤𑀻𑀖𑀸𑀯𑀼𑀁 ¶ 𑀓𑀼𑀫𑀸𑀭𑀁 𑀩𑀳𑀺𑀦𑀕𑀭𑁂 𑀯𑀸𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀯𑁂 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀩𑀳𑀺𑀦𑀕𑀭𑁂 𑀯𑀸𑀲𑁂𑀲𑀺. 𑀅𑀣 𑀔𑁄 𑀪𑀺𑀓𑁆𑀔𑀯𑁂 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 ¶ 𑀩𑀳𑀺𑀦𑀕𑀭𑁂 𑀧𑀝𑀺𑀯𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀺.

𑁪𑁬𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀓𑀧𑁆𑀧𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑁂 𑀓𑀸𑀲𑀺𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀓𑀧𑁆𑀧𑀓𑁄 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 ¶ 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀤𑀻𑀖𑀻𑀢𑀺, 𑀤𑁂𑀯, 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀆𑀦𑁂𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀆𑀦𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 ¶ 𑀦𑀕𑀭𑀲𑁆𑀲 𑀘𑀢𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀩𑀺𑀮𑀸𑀦𑀺 𑀦𑀺𑀓𑁆𑀔𑀺𑀧𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀘𑀺𑀭𑀁𑀤𑀺𑀝𑁆𑀞𑀸 𑀔𑁄 𑀫𑁂 𑀫𑀸𑀢𑀸𑀧𑀺𑀢𑀭𑁄. 𑀬𑀁𑀦𑀽𑀦𑀸𑀳𑀁 ¶ 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀤𑁆𑀤𑀲 𑀫𑀸𑀢𑀸𑀧𑀺𑀢𑀭𑁄 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀫𑀸𑀢𑀸𑀧𑀺𑀢𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 ¶ 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 ¶ 𑁋 ‘‘𑀉𑀫𑁆𑀫𑀢𑁆𑀢𑀓𑁄 𑀅𑀬𑀁 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀯𑀺𑀧𑁆𑀧𑀮𑀧𑀢𑀺. 𑀓𑁄 𑀇𑀫𑀲𑁆𑀲 𑀤𑀻𑀖𑀸𑀯𑀼? 𑀓𑀁 𑀅𑀬𑀁 𑀏𑀯𑀫𑀸𑀳 𑁋 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. ‘‘𑀦𑀸𑀳𑀁, 𑀪𑀡𑁂, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀧𑁆𑀧𑀮𑀧𑀸𑀫𑀺, 𑀅𑀧𑀺 𑀘 𑀬𑁄 𑀯𑀺𑀜𑁆𑀜𑀽 𑀲𑁄 𑀯𑀺𑀪𑀸𑀯𑁂𑀲𑁆𑀲𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀫𑁆𑀫𑀢𑁆𑀢𑀓𑁄 𑀅𑀬𑀁 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀯𑀺𑀧𑁆𑀧𑀮𑀧𑀢𑀺. 𑀓𑁄 𑀇𑀫𑀲𑁆𑀲 𑀤𑀻𑀖𑀸𑀯𑀼 ¶ ? 𑀓𑀁 𑀅𑀬𑀁 𑀏𑀯𑀫𑀸𑀳 𑁋 𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. ‘‘𑀦𑀸𑀳𑀁, 𑀪𑀡𑁂, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀧𑁆𑀧𑀮𑀧𑀸𑀫𑀺, 𑀅𑀧𑀺 𑀘 𑀬𑁄 𑀯𑀺𑀜𑁆𑀜𑀽 𑀲𑁄 𑀯𑀺𑀪𑀸𑀯𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 ¶ 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀘𑀢𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀩𑀺𑀮𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀭𑀁 𑀦𑀻𑀳𑀭𑀺𑀢𑁆𑀯𑀸 𑀕𑀼𑀫𑁆𑀩𑀺𑀬𑁂 𑀧𑀸𑀬𑁂𑀲𑀺. 𑀬𑀤𑀸 𑀢𑁂 𑀫𑀢𑁆𑀢𑀸 𑀅𑀳𑁂𑀲𑀼𑀁 𑀧𑀢𑀺𑀢𑀸, 𑀅𑀣 𑀓𑀝𑁆𑀞𑀸𑀦𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺.

𑁪𑁬𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀧𑀜𑁆𑀚𑀮𑀺𑀓𑀁 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀁, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀫𑀦𑀼𑀲𑁆𑀲𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀜𑀸𑀢𑀺 𑀯𑀸 𑀲𑀸𑀮𑁄𑀳𑀺𑀢𑁄 𑀯𑀸, 𑀅𑀳𑁄 𑀫𑁂 𑀅𑀦𑀢𑁆𑀣𑀢𑁄, 𑀦 𑀳𑀺 𑀦𑀸𑀫 𑀫𑁂 𑀓𑁄𑀘𑀺 𑀆𑀭𑁄𑀘𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀔𑀧𑁆𑀧𑀁 [𑀩𑀧𑁆𑀧𑀁 (𑀲𑀻. 𑀲𑁆𑀬𑀸.)] 𑀧𑀼𑀜𑁆𑀙𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀲𑁆𑀲 𑀲𑀸𑀫𑀦𑁆𑀢𑀸 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀘𑀭𑀺𑀬, 𑀲𑀺𑀧𑁆𑀧𑀁 ¶ 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀲𑀺𑀓𑁆𑀔𑀲𑁆𑀲𑀽’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀻𑀢𑀁 𑀯𑀻𑀡𑀜𑁆𑀘 𑀯𑀸𑀤𑀺𑀢𑀁, 𑀲𑀼𑀢𑁆𑀯𑀸𑀦 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑁄, 𑀪𑀡𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 ¶ 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 ¶ 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺? ‘‘𑀅𑀫𑀼𑀓𑀲𑁆𑀲, 𑀤𑁂𑀯, 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀫𑀸𑀡𑀯𑀓𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀁 𑀫𑀸𑀡𑀯𑀓𑀁 𑀆𑀦𑁂𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀆𑀦𑁂𑀲𑀼𑀁. ‘‘𑀢𑁆𑀯𑀁 𑀪𑀡𑁂 𑀫𑀸𑀡𑀯𑀓, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺? ‘‘𑀏𑀯𑀁, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀡𑁂 𑀫𑀸𑀡𑀯𑀓, 𑀕𑀸𑀬𑀲𑁆𑀲𑀼, 𑀯𑀻𑀡𑀜𑁆𑀘 𑀯𑀸𑀤𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀭𑀸𑀥𑀸𑀧𑁂𑀓𑁆𑀔𑁄 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺 ¶ , 𑀯𑀻𑀡𑀜𑁆𑀘 𑀯𑀸𑀤𑁂𑀲𑀺. ‘‘𑀢𑁆𑀯𑀁, 𑀪𑀡𑁂 𑀫𑀸𑀡𑀯𑀓, 𑀫𑀁 𑀉𑀧𑀝𑁆𑀞𑀳𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 ¶ 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀅𑀳𑁄𑀲𑀺 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀦𑀘𑀺𑀭𑀲𑁆𑀲𑁂𑀯 𑀅𑀩𑁆𑀪𑀦𑁆𑀢𑀭𑀺𑀫𑁂 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁬𑁨. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀭𑀣𑀁 𑀬𑁄𑀚𑁂𑀳𑀺, 𑀫𑀺𑀕𑀯𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀼𑀢𑁆𑀢𑁄 𑀔𑁄 𑀢𑁂, 𑀤𑁂𑀯, 𑀭𑀣𑁄, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺. 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀣𑀁 𑀧𑁂𑀲𑁂𑀲𑀺. 𑀢𑀣𑀸 𑀢𑀣𑀸 𑀭𑀣𑀁 𑀧𑁂𑀲𑁂𑀲𑀺 𑀬𑀣𑀸 𑀬𑀣𑀸 𑀅𑀜𑁆𑀜𑁂𑀦𑁂𑀯 𑀲𑁂𑀦𑀸 𑀅𑀕𑀫𑀸𑀲𑀺 𑀅𑀜𑁆𑀜𑁂𑀦𑁂𑀯 𑀭𑀣𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀭𑀣𑀁 𑀫𑀼𑀜𑁆𑀘𑀲𑁆𑀲𑀼, 𑀓𑀺𑀮𑀦𑁆𑀢𑁄𑀫𑁆𑀳𑀺, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀘𑁆𑀙𑀗𑁆𑀕𑁂 𑀲𑀻𑀲𑀁 𑀓𑀢𑁆𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀓𑀺𑀮𑀦𑁆𑀢𑀲𑁆𑀲 𑀫𑀼𑀳𑀼𑀢𑁆𑀢𑀓𑁂𑀦𑁂𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 ¶ 𑀓𑀸𑀭𑀓𑁄. 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 ¶ 𑀅𑀘𑁆𑀙𑀺𑀦𑁆𑀦𑀁. 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 ¶ , 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄, 𑀇𑀫𑀺𑀦𑁄 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 ¶ 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁, 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸, 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁, 𑀦 𑀳𑀺 𑀢𑀸𑀢 𑀤𑀻𑀖𑀸𑀯𑀼 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀧𑀼𑀦𑀤𑁂𑀯 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁. 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’’𑀦𑁆𑀢𑀺 𑀧𑀼𑀦𑀤𑁂𑀯 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁 ¶ , 𑀤𑁂𑀯, 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀻’’𑀢𑀺? 𑀇𑀥 𑀫𑀁, 𑀪𑀡𑁂 𑀫𑀸𑀡𑀯𑀓, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀲𑀼𑀧𑀺𑀦𑀦𑁆𑀢𑁂𑀦 𑀔𑀕𑁆𑀕𑁂𑀦 𑀧𑀭𑀺𑀧𑀸𑀢𑁂𑀲𑀺. 𑀢𑁂𑀦𑀸𑀳𑀁 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀲𑀻𑀲𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄 𑀲𑁄, 𑀤𑁂𑀯, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄. 𑀩𑀳𑀼𑀦𑁄 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀢𑀬𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁. 𑀢𑀬𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁆𑀯𑀸𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀚𑀻𑀯𑀺𑀢𑀁 𑀫𑁂, 𑀢𑀸𑀢 𑀤𑀻𑀖𑀸𑀯𑀼, 𑀤𑁂𑀳𑀺. 𑀚𑀻𑀯𑀺𑀢𑀁 𑀫𑁂, 𑀢𑀸𑀢 𑀤𑀻𑀖𑀸𑀯𑀼, 𑀤𑁂𑀳𑀻’’𑀢𑀺. ‘‘𑀓𑁆𑀬𑀸𑀳𑀁 𑀉𑀲𑁆𑀲𑀳𑀸𑀫𑀺 𑀤𑁂𑀯𑀲𑁆𑀲 𑀚𑀻𑀯𑀺𑀢𑀁 𑀤𑀸𑀢𑀼𑀁 ¶ ? 𑀤𑁂𑀯𑁄 𑀔𑁄 𑀫𑁂 𑀚𑀻𑀯𑀺𑀢𑀁 𑀤𑀤𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀢𑁆𑀯𑀜𑁆𑀘𑁂𑀯 𑀫𑁂 𑀚𑀻𑀯𑀺𑀢𑀁 𑀤𑁂𑀳𑀺, 𑀅𑀳𑀜𑁆𑀘 𑀢𑁂 𑀚𑀻𑀯𑀺𑀢𑀁 ¶ 𑀤𑀫𑁆𑀫𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼 𑀘 𑀓𑀼𑀫𑀸𑀭𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀚𑀻𑀯𑀺𑀢𑀁 𑀅𑀤𑀁𑀲𑀼, 𑀧𑀸𑀡𑀺𑀜𑁆𑀘 𑀅𑀕𑁆𑀕𑀳𑁂𑀲𑀼𑀁, 𑀲𑀧𑀣𑀜𑁆𑀘 𑀅𑀓𑀁𑀲𑀼 𑀅𑀤𑁆𑀤𑀽𑀪𑀸𑀬 [𑀅𑀤𑁆𑀭𑀽𑀪𑀸𑀬, 𑀅𑀤𑀼𑀩𑁆𑀪𑀸𑀬 (𑀓.)].

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 ¶ 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀭𑀣𑀁 𑀬𑁄𑀚𑁂𑀳𑀺 ¶ , 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀼𑀢𑁆𑀢𑁄 𑀔𑁄 𑀢𑁂, 𑀤𑁂𑀯, 𑀭𑀣𑁄, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺. 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀣𑀁 𑀧𑁂𑀲𑁂𑀲𑀺. 𑀢𑀣𑀸 𑀢𑀣𑀸 𑀭𑀣𑀁 𑀧𑁂𑀲𑁂𑀲𑀺 𑀬𑀣𑀸 𑀬𑀣𑀸 𑀦𑀘𑀺𑀭𑀲𑁆𑀲𑁂𑀯 𑀲𑁂𑀦𑀸𑀬 𑀲𑀫𑀸𑀕𑀜𑁆𑀙𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑀘𑁆𑀘𑁂 𑀧𑀸𑀭𑀺𑀲𑀚𑁆𑀚𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁂, 𑀪𑀡𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑀁 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀧𑀲𑁆𑀲𑁂𑀬𑁆𑀬𑀸𑀣, 𑀓𑀺𑀦𑁆𑀢𑀺 𑀦𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺? 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀬𑀁, 𑀤𑁂𑀯, 𑀳𑀢𑁆𑀣𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀧𑀸𑀤𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀳𑀢𑁆𑀣𑀧𑀸𑀤𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀓𑀡𑁆𑀡𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀦𑀸𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀓𑀡𑁆𑀡𑀦𑀸𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫𑀸’’𑀢𑀺. ‘‘𑀅𑀬𑀁 𑀔𑁄, 𑀪𑀡𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄. 𑀦𑀸𑀬𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀇𑀫𑀺𑀦𑀸 𑀘 𑀫𑁂 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀫𑀬𑀸 𑀘 𑀇𑀫𑀲𑁆𑀲 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺.

𑁪𑁬𑁩. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀬𑀁 𑀔𑁄 𑀢𑁂, 𑀢𑀸𑀢 𑀤𑀻𑀖𑀸𑀯𑀼, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺, 𑀓𑀺𑀁 𑀢𑁂 𑀧𑀺𑀢𑀸 𑀲𑀦𑁆𑀥𑀸𑀬 𑀅𑀯𑀘𑀸’’𑀢𑀺? ‘‘𑀬𑀁 𑀔𑁄 𑀫𑁂 ¶ , 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀤𑀻𑀖’𑀦𑁆𑀢𑀺 𑀫𑀸 𑀘𑀺𑀭𑀁 𑀯𑁂𑀭𑀁 𑀅𑀓𑀸𑀲𑀻𑀢𑀺. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 𑀫𑀸 𑀤𑀻𑀖𑀦𑁆𑀢𑀺. 𑀬𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀭𑀲𑁆𑀲’𑀦𑁆𑀢𑀺 𑀫𑀸 𑀔𑀺𑀧𑁆𑀧𑀁 𑀫𑀺𑀢𑁆𑀢𑁂𑀳𑀺 𑀪𑀺𑀚𑁆𑀚𑀺𑀢𑁆𑀣𑀸’’𑀢𑀺. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ¶ 𑀫𑀸 𑀭𑀲𑁆𑀲𑀦𑁆𑀢𑀺. 𑀬𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘‘𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺, 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺 𑀤𑁂𑀯𑁂𑀦 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸𑀢𑀺. 𑀲𑀘𑀸𑀳𑀁 𑀤𑁂𑀯𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀁, 𑀬𑁂 𑀤𑁂𑀯𑀲𑁆𑀲 𑀅𑀢𑁆𑀣𑀓𑀸𑀫𑀸 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀬𑁂 𑀫𑁂 𑀅𑀢𑁆𑀣𑀓𑀸𑀫𑀸 𑀢𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁 𑁋 𑀏𑀯𑀁 𑀢𑀁 𑀯𑁂𑀭𑀁 𑀯𑁂𑀭𑁂𑀦 𑀦 𑀯𑀽𑀧𑀲𑀫𑁂𑀬𑁆𑀬. 𑀇𑀤𑀸𑀦𑀺 𑀘 𑀧𑀦 𑀫𑁂 𑀤𑁂𑀯𑁂𑀦 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀫𑀬𑀸 𑀘 𑀤𑁂𑀯𑀲𑁆𑀲 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁. 𑀏𑀯𑀁 𑀢𑀁 𑀯𑁂𑀭𑀁 𑀅𑀯𑁂𑀭𑁂𑀦 𑀯𑀽𑀧𑀲𑀦𑁆𑀢𑀁. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 𑁋 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺 ¶ , 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑁋 ‘‘𑀅𑀘𑁆𑀙𑀭𑀺𑀬𑀁 ¶ 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀬𑀸𑀯 𑀧𑀡𑁆𑀟𑀺𑀢𑁄 𑀅𑀬𑀁 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄, 𑀬𑀢𑁆𑀭 𑀳𑀺 𑀦𑀸𑀫 𑀧𑀺𑀢𑀼𑀦𑁄 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀧𑁂𑀢𑁆𑀢𑀺𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑀜𑁆𑀘 𑀓𑁄𑀲𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀧𑀝𑀺𑀧𑀸𑀤𑁂𑀲𑀺, 𑀥𑀻𑀢𑀭𑀜𑁆𑀘 𑀅𑀤𑀸𑀲𑀺. 𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀆𑀤𑀺𑀦𑁆𑀦𑀤𑀡𑁆𑀟𑀸𑀦𑀁 𑀆𑀤𑀺𑀦𑁆𑀦𑀲𑀢𑁆𑀣𑀸𑀦𑀁 𑀏𑀯𑀭𑀽𑀧𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑀁 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀧𑀦 𑀢𑀁, 𑀪𑀺𑀓𑁆𑀔𑀯𑁂 ¶ , 𑀲𑁄𑀪𑁂𑀣 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀔𑀫𑀸 𑀘 𑀪𑀯𑁂𑀬𑁆𑀬𑀸𑀣 𑀲𑁄𑀭𑀢𑀸 𑀘𑀸𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑁋 𑀧𑀭𑀺𑀬𑀸𑀤𑀺𑀦𑁆𑀦𑀭𑀽𑀧𑀸 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸, 𑀦𑀬𑀺𑀫𑁂 𑀲𑀼𑀓𑀭𑀸 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀤𑀻𑀖𑀸𑀯𑀼𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁪𑁬𑁪. [𑀫. 𑀦𑀺. 𑁩.𑁨𑁩𑁬] 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀗𑁆𑀖𑀫𑀚𑁆𑀛𑁂 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

[𑀫. 𑀦𑀺. 𑁩.𑁨𑁩𑁭] ‘‘𑀧𑀼𑀣𑀼𑀲𑀤𑁆𑀤𑁄 ¶ 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;

𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀁.

[𑀫. 𑀦𑀺. 𑁩.𑁨𑁩𑁭] ‘‘𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽.

[𑀫. 𑀦𑀺. 𑁩.𑁨𑁩𑁭] ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 ¶ 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

[𑀫. 𑀦𑀺. 𑁩.𑁨𑁩𑁭] ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

[𑀫. 𑀦𑀺. 𑁩.𑁨𑁩𑁭] ‘‘𑀦 ¶ 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

[𑀫. 𑀦𑀺. 𑁩.𑁨𑁩𑁭] ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

[𑀫. 𑀦𑀺. 𑁩.𑁨𑁩𑁭] ‘‘𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸 ¶ 𑀧𑀸𑀡𑀳𑀭𑀸, 𑀕𑀯𑀸𑀲𑁆𑀲𑀥𑀦𑀳𑀸𑀭𑀺𑀦𑁄;

𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁, 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺.

‘‘𑀓𑀲𑁆𑀫𑀸 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸;

[𑀫. 𑀦𑀺. 𑁩.𑁨𑁩𑁭] ‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁;

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺;

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

[𑀫. 𑀦𑀺. 𑁩.𑁨𑁩𑁭] ‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁;

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬;

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

[𑀫. 𑀦𑀺. 𑁩.𑁨𑁩𑁭] ‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄;

𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 ¶ 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑀤𑀻𑀖𑀸𑀯𑀼𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁭𑁩. 𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸

𑁪𑁬𑁫. 𑀅𑀣 ¶ 𑀔𑁄 𑀪𑀕𑀯𑀸 𑀲𑀗𑁆𑀖𑀫𑀚𑁆𑀛𑁂 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸𑀬𑁄 𑀪𑀸𑀲𑀺𑀢𑁆𑀯𑀸 𑀬𑁂𑀦 𑀩𑀸𑀮𑀓𑀮𑁄𑀡𑀓𑀕𑀸𑀫𑁄 ¶ [𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄 (𑀲𑀻. 𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀪𑀕𑀼 𑀩𑀸𑀮𑀓𑀮𑁄𑀡𑀓𑀕𑀸𑀫𑁂 𑀯𑀺𑀳𑀭𑀢𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀪𑀕𑀼 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀪𑀕𑀼 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁; 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀦 𑀘𑀸𑀳𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁪. 𑀧𑀸𑀘𑀻𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸

𑁪𑁬𑁬. [𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄 𑀧𑀲𑁆𑀲𑀺𑀢𑀩𑁆𑀩𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸.)] 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀯𑀺𑀳𑀭𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑀸𑀬𑀧𑀸𑀮𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀲𑀫𑀡, 𑀏𑀢𑀁 𑀤𑀸𑀬𑀁 𑀧𑀸𑀯𑀺𑀲𑀺. 𑀲𑀦𑁆𑀢𑁂𑀢𑁆𑀣 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀓𑀸𑀫𑀭𑀽𑀧𑀸 ¶ 𑀯𑀺𑀳𑀭𑀦𑁆𑀢𑀺. 𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀸𑀬𑀧𑀸𑀮𑀲𑁆𑀲 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲, 𑀲𑀼𑀢𑁆𑀯𑀸𑀦 𑀤𑀸𑀬𑀧𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀯𑀼𑀲𑁄, 𑀤𑀸𑀬𑀧𑀸𑀮, 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺 ¶ . 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 ¶ , 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀢𑁂𑀧𑀺 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁; 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸; 𑀦 𑀘 𑀫𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀸’’𑀢𑀺.

‘‘𑀓𑀘𑁆𑀘𑀺 ¶ 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 ¶ 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘‘‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢’’𑀦𑁆𑀢𑀺.

𑀆𑀬𑀲𑁆𑀫𑀸𑀧𑀺 𑀔𑁄 𑀦𑀦𑁆𑀤𑀺𑀬𑁄…𑀧𑁂… 𑀆𑀬𑀲𑁆𑀫𑀸𑀧𑀺 𑀔𑁄 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 ¶ 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

‘‘𑀓𑀘𑁆𑀘𑀺 ¶ 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 ¶ 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺 𑀪𑀼𑀜𑁆𑀚𑀢𑀺, 𑀦𑁄 𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺. 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺. 𑀲𑁄 𑀆𑀲𑀦𑀁 𑀉𑀤𑁆𑀥𑀭𑀢𑀺 ¶ , 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀫, 𑀦 𑀢𑁆𑀯𑁂𑀯 𑀫𑀬𑀁, 𑀪𑀦𑁆𑀢𑁂, 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑀸𑀫. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑀧𑀸𑀘𑀺𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁫. 𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸

𑁪𑁬𑁭. [𑀉𑀤𑀸. 𑁩𑁫 𑀆𑀤𑀬𑁄 𑀣𑁄𑀓𑀁 𑀯𑀺𑀲𑀤𑀺𑀲𑀁] 𑀅𑀣 ¶ 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀅𑀦𑀼𑀭𑀼𑀤𑁆𑀥𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 [𑀧𑀸𑀭𑀺𑀮𑁂𑀬𑁆𑀬𑀓𑀁 (𑀲𑀻. 𑀲𑁆𑀬𑀸.)] 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁 𑀢𑁂𑀳𑀺 𑀓𑁄𑀲𑀫𑁆𑀩𑀓𑁂𑀳𑀺 [𑀓𑁄𑀲𑀩𑁆𑀪𑀺𑀓𑁂𑀳𑀺 (𑀲𑁆𑀬𑀸.)] 𑀪𑀺𑀓𑁆𑀔𑀽𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀲𑁆𑀲𑀓𑀸𑀭𑀓𑁂𑀳𑀺 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁂𑀳𑀺. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀏𑀓𑁄 𑀅𑀤𑀼𑀢𑀺𑀬𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀺 𑀅𑀜𑁆𑀜𑀢𑁆𑀭𑁂𑀯 𑀢𑁂𑀳𑀺 𑀓𑁄𑀲𑀫𑁆𑀩𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀲𑁆𑀲𑀓𑀸𑀭𑀓𑁂𑀳𑀺 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁂𑀳𑀻’’𑀢𑀺.

𑀅𑀜𑁆𑀜𑀢𑀭𑁄𑀧𑀺 ¶ 𑀔𑁄 𑀳𑀢𑁆𑀣𑀺𑀦𑀸𑀕𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀢𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘𑀲𑁆𑀲 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀢𑀺, 𑀑𑀕𑀸𑀳𑀸 𑀘𑀲𑁆𑀲 𑀑𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 ¶ 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 ¶ 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘 𑀫𑁂 𑀑𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀏𑀓𑁄𑀯 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀸 𑀅𑀧𑀓𑁆𑀓𑀫𑁆𑀫 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀪𑀤𑁆𑀤𑀲𑀸𑀮𑀫𑀽𑀮𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 ¶ 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀅𑀧𑁆𑀧𑀳𑀭𑀺𑀢𑀜𑁆𑀘 𑀓𑀭𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀺𑀁, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀺𑀁𑀲𑀼, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀅𑀧𑀸𑀬𑀺𑀁 𑀑𑀕𑀸𑀳𑀸 𑀘 𑀫𑁂 𑀑𑀢𑀺𑀡𑁆𑀡𑀲𑁆𑀲 [𑀑𑀕𑀸𑀳𑀜𑁆𑀘𑀲𑁆𑀲 𑀑𑀢𑀺𑀡𑁆𑀡𑀲𑁆𑀲 (𑀲𑁆𑀬𑀸.), 𑀑𑀕𑀸𑀳𑀸 𑀘𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 (𑀲𑀻.)] 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀅𑀕𑀫𑀁𑀲𑀼. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀏𑀓𑁄 𑀅𑀤𑀼𑀢𑀺𑀬𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀺 𑀅𑀜𑁆𑀜𑀢𑁆𑀭𑁂𑀯 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀯𑀺𑀯𑁂𑀓𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀘 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁩𑁫] ‘‘𑀏𑀢𑀁 [𑀏𑀯𑀁 (𑀓.)] 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄;

𑀲𑀫𑁂𑀢𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦, 𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 ¶ 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀉𑀧𑀸𑀲𑀓𑀸 𑁋 ‘‘𑀇𑀫𑁂 𑀔𑁄 𑀅𑀬𑁆𑀬𑀸 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀸 ¶ . 𑀇𑀫𑁂𑀳𑀺 𑀉𑀩𑁆𑀩𑀸𑀴𑁆𑀳𑁄 𑀪𑀕𑀯𑀸 𑀧𑀓𑁆𑀓𑀦𑁆𑀢𑁄. 𑀳𑀦𑁆𑀤 𑀫𑀬𑀁 𑀅𑀬𑁆𑀬𑁂 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀬𑁆𑀬𑀸𑀫, 𑀦 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀸𑀫, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀫, 𑀦 𑀲𑀓𑁆𑀓𑀭𑁂𑀬𑁆𑀬𑀸𑀫, 𑀦 𑀕𑀭𑀼𑀁 𑀓𑀭𑁂𑀬𑁆𑀬𑀸𑀫, 𑀦 𑀫𑀸𑀦𑁂𑀬𑁆𑀬𑀸𑀫, 𑀦 𑀪𑀚𑁂𑀬𑁆𑀬𑀸𑀫, 𑀦 𑀧𑀽𑀚𑁂𑀬𑁆𑀬𑀸𑀫, 𑀉𑀧𑀕𑀢𑀸𑀦𑀫𑁆𑀧𑀺 𑀧𑀺𑀡𑁆𑀟𑀓𑀁 𑀦 𑀤𑀚𑁆𑀚𑁂𑀬𑁆𑀬𑀸𑀫 𑁋 𑀏𑀯𑀁 𑀇𑀫𑁂 𑀅𑀫𑁆𑀳𑁂𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑀸 𑀅𑀕𑀭𑀼𑀓𑀭𑀺𑀬𑀫𑀸𑀦𑀸 𑀅𑀫𑀸𑀦𑀺𑀬𑀫𑀸𑀦𑀸 𑀅𑀪𑀚𑀺𑀬𑀫𑀸𑀦𑀸 𑀅𑀧𑀽𑀚𑀺𑀬𑀫𑀸𑀦𑀸 𑀅𑀲𑀓𑁆𑀓𑀸𑀭𑀧𑀓𑀢𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺 𑀯𑀸 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺 𑀯𑀸 𑀪𑀕𑀯𑀦𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀉𑀧𑀸𑀲𑀓𑀸 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 ¶ 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀪𑀚𑁂𑀲𑀼𑀁 𑀦 𑀧𑀽𑀚𑁂𑀲𑀼𑀁, 𑀉𑀧𑀕𑀢𑀸𑀦𑀫𑁆𑀧𑀺 𑀧𑀺𑀡𑁆𑀟𑀓𑀁 𑀦 𑀅𑀤𑀁𑀲𑀼. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀓𑁄𑀲𑀫𑁆𑀩𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑀸 𑀅𑀕𑀭𑀼𑀓𑀭𑀺𑀬𑀫𑀸𑀦𑀸 𑀅𑀫𑀸𑀦𑀺𑀬𑀫𑀸𑀦𑀸 𑀅𑀪𑀚𑀺𑀬𑀫𑀸𑀦𑀸 𑀅𑀧𑀽𑀚𑀺𑀬𑀫𑀸𑀦𑀸 𑀅𑀲𑀓𑁆𑀓𑀸𑀭𑀧𑀓𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁬. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸

𑁪𑁬𑁮. 𑀅𑀣 ¶ 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 ¶ 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀁 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸’’𑀢𑀺?

𑀅𑀝𑁆𑀞𑀸𑀭𑀲𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ¶ 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 ¶ 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄.

𑀅𑀝𑁆𑀞𑀸𑀭𑀲𑀳𑀺 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ¶ 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺 ¶ ; 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄𑀢𑀺.

𑁪𑁬𑁯. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄…𑀧𑁂… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 ¶ … 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 ¶ … 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀭𑀸𑀳𑀼𑀮, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀁 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸’’𑀢𑀺?

𑀅𑀝𑁆𑀞𑀸𑀭𑀲𑀳𑀺 𑀔𑁄, 𑀭𑀸𑀳𑀼𑀮, 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀭𑀸𑀳𑀼𑀮, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄.

𑀅𑀝𑁆𑀞𑀸𑀭𑀲𑀳𑀺 ¶ 𑀘 𑀔𑁄, 𑀭𑀸𑀳𑀼𑀮, 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 ¶ 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀭𑀸𑀳𑀼𑀮, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄𑀢𑀺.

𑁪𑁭𑁦. 𑀅𑀲𑁆𑀲𑁄𑀲𑀺 𑀔𑁄 𑀫𑀳𑀸𑀧𑀚𑀸𑀧𑀢𑀺 [𑀫𑀳𑀸𑀧𑀚𑀸𑀧𑀢𑀻 (𑀲𑀻. 𑀲𑁆𑀬𑀸.)] 𑀕𑁄𑀢𑀫𑀻 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 ¶ 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑁄𑀢𑀫𑀺, 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀺. 𑀬𑀜𑁆𑀘 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀁 𑀲𑀩𑁆𑀩𑀁 𑀢𑀁 𑀥𑀫𑁆𑀫𑀯𑀸𑀤𑀺𑀢𑁄𑀯 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩’’𑀦𑁆𑀢𑀺.

𑁪𑁭𑁧. 𑀅𑀲𑁆𑀲𑁄𑀲𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 ¶ 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀉𑀪𑀬𑀢𑁆𑀣 𑀤𑀸𑀦𑀁 𑀤𑁂𑀳𑀺. 𑀉𑀪𑀬𑀢𑁆𑀣 𑀤𑀸𑀦𑀁 ¶ 𑀤𑀢𑁆𑀯𑀸 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 ¶ 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀻’’𑀢𑀺.

𑁪𑁭𑁨. 𑀅𑀲𑁆𑀲𑁄𑀲𑀺 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 ¶ . 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀯𑀺𑀲𑀸𑀔𑁂, 𑀉𑀪𑀬𑀢𑁆𑀣 𑀤𑀸𑀦𑀁 𑀤𑁂𑀳𑀺. 𑀉𑀪𑀬𑀢𑁆𑀣 𑀤𑀸𑀦𑀁 𑀤𑀢𑁆𑀯𑀸 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀻’’𑀢𑀺.

𑁪𑁭𑁩. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀓𑀣𑀁 ¶ 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑁂𑀦𑀸𑀲𑀦𑁂 [𑀲𑁂𑀦𑀸𑀲𑀦𑁂𑀲𑀼 (𑀓.), 𑀲𑁂𑀦𑀸𑀲𑀦𑀁 (𑀲𑁆𑀬𑀸.)] 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺. ‘‘𑀲𑀘𑁂 𑀧𑀦, 𑀪𑀦𑁆𑀢𑁂, 𑀯𑀺𑀯𑀺𑀢𑁆𑀢𑀁 𑀦 𑀳𑁄𑀢𑀺, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

‘‘𑀆𑀫𑀺𑀲𑁂 𑀧𑀦, 𑀪𑀦𑁆𑀢𑁂, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀆𑀫𑀺𑀲𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁭. 𑀑𑀲𑀸𑀭𑀡𑀸𑀦𑀼𑀚𑀸𑀦𑀦𑀸

𑁪𑁭𑁪. 𑀅𑀣 ¶ ¶ 𑀔𑁄 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀆𑀧𑀢𑁆𑀢𑀺 𑀏𑀲𑀸, 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦𑀸’’𑀢𑀺. 𑀅𑀣 𑀔𑁄 𑀲𑁄 𑀉𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀆𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀏𑀣 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀑𑀲𑀸𑀭𑁂𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘𑀆𑀧𑀢𑁆𑀢𑀺 𑀏𑀲𑀸 ¶ , 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀏𑀣 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀑𑀲𑀸𑀭𑁂𑀣𑀸’𑀢𑀺. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀆𑀧𑀢𑁆𑀢𑀺 𑀏𑀲𑀸, 𑀪𑀺𑀓𑁆𑀔𑀯𑁂; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄 ¶ . 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀢𑀺 𑀘, 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀢𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀣𑀸’’𑀢𑀺.

𑀑𑀲𑀸𑀭𑀡𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁮. 𑀲𑀗𑁆𑀖𑀲𑀸𑀫𑀕𑁆𑀕𑀻𑀓𑀣𑀸

𑁪𑁭𑁫. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀢𑁆𑀯𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁 ¶ , 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 [𑀧𑀲𑁆𑀲𑀻 (𑀇𑀢𑀺𑀧𑀺)] 𑀘 𑀑𑀲𑀸𑀭𑀺𑀢𑁄 𑀘. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’’𑀢𑀺.

𑀅𑀣 ¶ ¶ 𑀔𑁄 𑀢𑁂 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’𑀢𑀺. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘, 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀸. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁 𑀕𑀺𑀮𑀸𑀦𑁂𑀳𑀺 𑀘 𑀅𑀕𑀺𑀮𑀸𑀦𑁂𑀳𑀺 𑀘. 𑀦 𑀓𑁂𑀳𑀺𑀘𑀺 𑀙𑀦𑁆𑀤𑁄 𑀤𑀸𑀢𑀩𑁆𑀩𑁄. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲, 𑀬𑀲𑁆𑀲 𑀦𑀓𑁆𑀔𑀫𑀢𑀺 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀸 𑀲𑀗𑁆𑀖𑁂𑀦 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀻. 𑀦𑀺𑀳𑀢𑁄 ¶ 𑀲𑀗𑁆𑀖𑀪𑁂𑀤𑁄, 𑀦𑀺𑀳𑀢𑀸 𑀲𑀗𑁆𑀖𑀭𑀸𑀚𑀺, 𑀦𑀺𑀳𑀢𑀁 𑀲𑀗𑁆𑀖𑀯𑀯𑀢𑁆𑀣𑀸𑀦𑀁, 𑀦𑀺𑀳𑀢𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀸𑀯𑀤𑁂𑀯 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺.

𑀲𑀗𑁆𑀖𑀲𑀸𑀫𑀕𑁆𑀕𑀻𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁯. 𑀉𑀧𑀸𑀮𑀺𑀲𑀗𑁆𑀖𑀲𑀸𑀫𑀕𑁆𑀕𑀻𑀧𑀼𑀘𑁆𑀙𑀸

𑁪𑁭𑁬. 𑀅𑀣 ¶ ¶ ¶ 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀦𑀼 𑀔𑁄 𑀲𑀸, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺? ‘‘𑀬𑀲𑁆𑀫𑀺𑀁 ¶ , 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀥𑀫𑁆𑀫𑀺𑀓𑀸 𑀲𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺.

‘‘𑀬𑀲𑁆𑀫𑀺𑀁 𑀧𑀦, 𑀪𑀦𑁆𑀢𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀦𑀼 𑀔𑁄 𑀲𑀸, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺? ‘‘𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀲𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺.

‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄’’𑀢𑀺? ‘‘𑀤𑁆𑀯𑁂𑀫𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄 𑁋 𑀅𑀢𑁆𑀣𑀼𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸; 𑀅𑀢𑁆𑀣𑀼𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘. 𑀓𑀢𑀫𑀸 𑀘, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸? 𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸. 𑀓𑀢𑀫𑀸 𑀘, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘? 𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘. 𑀇𑀫𑀸 𑀔𑁄, 𑀉𑀧𑀸𑀮𑀺, 𑀤𑁆𑀯𑁂 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄’’𑀢𑀺.

𑁪𑁭𑁭. 𑀅𑀣 ¶ ¶ 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀗𑁆𑀖𑀲𑁆𑀲 ¶ 𑀓𑀺𑀘𑁆𑀘𑁂𑀲𑀼 𑀘 𑀫𑀦𑁆𑀢𑀦𑀸𑀲𑀼 𑀘;

𑀅𑀢𑁆𑀣𑁂𑀲𑀼 𑀚𑀸𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼 𑀘;

𑀓𑀣𑀁𑀧𑀓𑀸𑀭𑁄𑀥 𑀦𑀭𑁄 𑀫𑀳𑀢𑁆𑀣𑀺𑀓𑁄;

𑀪𑀺𑀓𑁆𑀔𑀼 𑀓𑀣𑀁 𑀳𑁄𑀢𑀺𑀥 𑀧𑀕𑁆𑀕𑀳𑀸𑀭𑀳𑁄𑀢𑀺.

‘‘𑀅𑀦𑀸𑀦𑀼𑀯𑀚𑁆𑀚𑁄 ¶ 𑀧𑀞𑀫𑁂𑀦 𑀲𑀻𑀮𑀢𑁄;

𑀅𑀯𑁂𑀓𑁆𑀔𑀺𑀢𑀸𑀘𑀸𑀭𑁄 𑀲𑀼𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀧𑀘𑁆𑀘𑀢𑁆𑀣𑀺𑀓𑀸 𑀦𑀽𑀧𑀯𑀤𑀦𑁆𑀢𑀺 𑀥𑀫𑁆𑀫𑀢𑁄;

𑀦 𑀳𑀺𑀲𑁆𑀲 𑀢𑀁 𑀳𑁄𑀢𑀺 𑀯𑀤𑁂𑀬𑁆𑀬𑀼 𑀬𑁂𑀦 𑀦𑀁.

‘‘𑀲𑁄 𑀢𑀸𑀤𑀺𑀲𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄;

𑀯𑀺𑀲𑀸𑀭𑀤𑁄 𑀳𑁄𑀢𑀺 𑀯𑀺𑀲𑀬𑁆𑀳 𑀪𑀸𑀲𑀢𑀺;

𑀦𑀘𑁆𑀙𑀫𑁆𑀪𑀢𑀺 𑀧𑀭𑀺𑀲𑀕𑀢𑁄 𑀦 𑀯𑁂𑀥𑀢𑀺;

𑀅𑀢𑁆𑀣𑀁 𑀦 𑀳𑀸𑀧𑁂𑀢𑀺 𑀅𑀦𑀼𑀬𑁆𑀬𑀼𑀢𑀁 𑀪𑀡𑀁.

‘‘𑀢𑀣𑁂𑀯 𑀧𑀜𑁆𑀳𑀁 𑀧𑀭𑀺𑀲𑀸𑀲𑀼 𑀧𑀼𑀘𑁆𑀙𑀺𑀢𑁄;

𑀦 𑀘𑁂𑀯 𑀧𑀚𑁆𑀛𑀸𑀬𑀢𑀺 𑀦 𑀫𑀗𑁆𑀓𑀼 𑀳𑁄𑀢𑀺;

𑀲𑁄 𑀓𑀸𑀮𑀸𑀕𑀢𑀁 𑀩𑁆𑀬𑀸𑀓𑀭𑀡𑀸𑀭𑀳𑀁 𑀯𑀘𑁄;

𑀭𑀜𑁆𑀚𑁂𑀢𑀺 𑀯𑀺𑀜𑁆𑀜𑀽𑀧𑀭𑀺𑀲𑀁 𑀯𑀺𑀘𑀓𑁆𑀔𑀡𑁄.

‘‘𑀲𑀕𑀸𑀭𑀯𑁄 𑀯𑀼𑀟𑁆𑀠𑀢𑀭𑁂𑀲𑀼 𑀪𑀺𑀓𑁆𑀔𑀼𑀲𑀼;

𑀆𑀘𑁂𑀭𑀓𑀫𑁆𑀳𑀺 𑀘 𑀲𑀓𑁂 𑀯𑀺𑀲𑀸𑀭𑀤𑁄;

𑀅𑀮𑀁 𑀧𑀫𑁂𑀢𑀼𑀁 𑀧𑀕𑀼𑀡𑁄 𑀓𑀣𑁂𑀢𑀯𑁂;

𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘 𑀯𑀺𑀭𑀤𑁆𑀥𑀺𑀓𑁄𑀯𑀺𑀤𑁄.

‘‘𑀧𑀘𑁆𑀘𑀢𑁆𑀣𑀺𑀓𑀸 ¶ 𑀬𑁂𑀦 𑀯𑀚𑀦𑁆𑀢𑀺 𑀦𑀺𑀕𑁆𑀕𑀳𑀁;

𑀫𑀳𑀸𑀚𑀦𑁄 𑀲𑀜𑁆𑀜𑀧𑀦𑀜𑁆𑀘 𑀕𑀘𑁆𑀙𑀢𑀺;

𑀲𑀓𑀜𑁆𑀘 ¶ 𑀆𑀤𑀸𑀬𑀫𑀬𑀁 𑀦 𑀭𑀺𑀜𑁆𑀘𑀢𑀺;

𑀯𑀺𑀬𑀸𑀓𑀭𑀁 [𑀲𑁄 𑀩𑁆𑀬𑀸𑀓𑀭𑀁 (𑀲𑀻.), 𑀯𑁂𑀬𑁆𑀬𑀸𑀓𑀭𑀁 (𑀲𑁆𑀬𑀸.)] 𑀧𑀜𑁆𑀳𑀫𑀦𑀽𑀧𑀖𑀸𑀢𑀺𑀓𑀁.

‘‘𑀤𑀽𑀢𑁂𑀬𑁆𑀬𑀓𑀫𑁆𑀫𑁂𑀲𑀼 ¶ 𑀅𑀮𑀁 𑀲𑀫𑀼𑀕𑁆𑀕𑀳𑁄;

𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂𑀲𑀼 𑀘 𑀆𑀳𑀼 𑀦𑀁 𑀬𑀣𑀸;

𑀓𑀭𑀁 𑀯𑀘𑁄 𑀪𑀺𑀓𑁆𑀔𑀼𑀕𑀡𑁂𑀦 𑀧𑁂𑀲𑀺𑀢𑁄;

𑀅𑀳𑀁 𑀓𑀭𑁄𑀫𑀻𑀢𑀺 𑀦 𑀢𑁂𑀦 𑀫𑀜𑁆𑀜𑀢𑀺.

‘‘𑀆𑀧𑀚𑁆𑀚𑀢𑀺 𑀬𑀸𑀯𑀢𑀓𑁂𑀲𑀼 𑀯𑀢𑁆𑀣𑀼𑀲𑀼;

𑀆𑀧𑀢𑁆𑀢𑀺𑀬𑀸 𑀳𑁄𑀢𑀺 𑀬𑀣𑀸 𑀘 𑀯𑀼𑀝𑁆𑀞𑀺𑀢𑀺;

𑀏𑀢𑁂 𑀯𑀺𑀪𑀗𑁆𑀕𑀸 𑀉𑀪𑀬𑀲𑁆𑀲 𑀲𑁆𑀯𑀸𑀕𑀢𑀸;

𑀆𑀧𑀢𑁆𑀢𑀺 𑀯𑀼𑀝𑁆𑀞𑀸𑀦𑀧𑀤𑀲𑁆𑀲 𑀓𑁄𑀯𑀺𑀤𑁄.

‘‘𑀦𑀺𑀲𑁆𑀲𑀸𑀭𑀡𑀁 𑀕𑀘𑁆𑀙𑀢𑀺 𑀬𑀸𑀦𑀺 𑀘𑀸𑀘𑀭𑀁;

𑀦𑀺𑀲𑁆𑀲𑀸𑀭𑀺𑀢𑁄 𑀳𑁄𑀢𑀺 𑀬𑀣𑀸 𑀘 𑀯𑀢𑁆𑀢𑀦𑀸 [𑀯𑀢𑁆𑀣𑀼𑀦𑀸 (𑀲𑀻. 𑀲𑁆𑀬𑀸.)];

𑀑𑀲𑀸𑀭𑀡𑀁 𑀢𑀁𑀯𑀼𑀲𑀺𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀏𑀢𑀫𑁆𑀧𑀺 𑀚𑀸𑀦𑀸𑀢𑀺 𑀯𑀺𑀪𑀗𑁆𑀕𑀓𑁄𑀯𑀺𑀤𑁄.

‘‘𑀲𑀕𑀸𑀭𑀯𑁄 𑀯𑀼𑀟𑁆𑀠𑀢𑀭𑁂𑀲𑀼 𑀪𑀺𑀓𑁆𑀔𑀼𑀲𑀼;

𑀦𑀯𑁂𑀲𑀼 𑀣𑁂𑀭𑁂𑀲𑀼 𑀘 𑀫𑀚𑁆𑀛𑀺𑀫𑁂𑀲𑀼 𑀘;

𑀫𑀳𑀸𑀚𑀦𑀲𑁆𑀲𑀢𑁆𑀣𑀘𑀭𑁄𑀥 𑀧𑀡𑁆𑀟𑀺𑀢𑁄;

𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼 𑀇𑀥 𑀧𑀕𑁆𑀕𑀳𑀸𑀭𑀳𑁄’’𑀢𑀺.

𑀉𑀧𑀸𑀮𑀺𑀲𑀗𑁆𑀖𑀲𑀸𑀫𑀕𑁆𑀕𑀻𑀧𑀼𑀘𑁆𑀙𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄 𑀤𑀲𑀫𑁄.

𑁨𑁮𑁦. 𑀢𑀲𑁆𑀲𑀼𑀤𑁆𑀤𑀸𑀦𑀁 ¶

𑀓𑁄𑀲𑀫𑁆𑀩𑀺𑀬𑀁 ¶ 𑀚𑀺𑀦𑀯𑀭𑁄, 𑀯𑀺𑀯𑀸𑀤𑀸𑀧𑀢𑁆𑀢𑀺𑀤𑀲𑁆𑀲𑀦𑁂;

𑀦𑀼𑀓𑁆𑀔𑀺𑀧𑁂𑀬𑁆𑀬 𑀬𑀲𑁆𑀫𑀺𑀁 𑀢𑀲𑁆𑀫𑀺𑀁, 𑀲𑀤𑁆𑀥𑀸𑀬𑀸𑀧𑀢𑁆𑀢𑀺 𑀤𑁂𑀲𑀬𑁂.

𑀅𑀦𑁆𑀢𑁄𑀲𑀻𑀫𑀸𑀬𑀁 ¶ 𑀢𑀢𑁆𑀣𑁂𑀯, 𑀩𑀸𑀮𑀓𑀜𑁆𑀘𑁂𑀯 𑀯𑀁𑀲𑀤𑀸;

𑀧𑀸𑀮𑀺𑀮𑁂𑀬𑁆𑀬𑀸 𑀘 𑀲𑀸𑀯𑀢𑁆𑀣𑀺, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀓𑁄𑀮𑀺𑀢𑁄.

𑀫𑀳𑀸𑀓𑀲𑁆𑀲𑀧𑀓𑀘𑁆𑀘𑀸𑀦𑀸, 𑀓𑁄𑀝𑁆𑀞𑀺𑀓𑁄 𑀓𑀧𑁆𑀧𑀺𑀦𑁂𑀦 𑀘;

𑀫𑀳𑀸𑀘𑀼𑀦𑁆𑀤𑁄 𑀘 𑀅𑀦𑀼𑀭𑀼𑀤𑁆𑀥𑁄, 𑀭𑁂𑀯𑀢𑁄 𑀉𑀧𑀸𑀮𑀺 𑀘𑀼𑀪𑁄.

𑀆𑀦𑀦𑁆𑀤𑁄 ¶ 𑀭𑀸𑀳𑀼𑀮𑁄 𑀘𑁂𑀯, 𑀕𑁄𑀢𑀫𑀻𑀦𑀸𑀣𑀧𑀺𑀡𑁆𑀟𑀺𑀓𑁄;

𑀲𑁂𑀦𑀸𑀲𑀦𑀁 𑀯𑀺𑀯𑀺𑀢𑁆𑀢𑀜𑁆𑀘, 𑀆𑀫𑀺𑀲𑀁 𑀲𑀫𑀓𑀫𑁆𑀧𑀺 𑀘.

𑀦 𑀓𑁂𑀳𑀺 𑀙𑀦𑁆𑀤𑁄 𑀤𑀸𑀢𑀩𑁆𑀩𑁄, 𑀉𑀧𑀸𑀮𑀺𑀧𑀭𑀺𑀧𑀼𑀘𑁆𑀙𑀺𑀢𑁄;

𑀅𑀦𑀸𑀦𑀼𑀯𑀚𑁆𑀚𑁄 𑀲𑀻𑀮𑁂𑀦, 𑀲𑀸𑀫𑀕𑁆𑀕𑀻 𑀚𑀺𑀦𑀲𑀸𑀲𑀦𑁂𑀢𑀺.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.

𑀫𑀳𑀸𑀯𑀕𑁆𑀕𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.