📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀘𑀽𑀴𑀯𑀕𑁆𑀕𑀧𑀸𑀴𑀺

𑁧. 𑀓𑀫𑁆𑀫𑀓𑁆𑀔𑀦𑁆𑀥𑀓𑀁

𑁧. 𑀢𑀚𑁆𑀚𑀦𑀻𑀬𑀓𑀫𑁆𑀫𑀁

𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘 [𑀅𑀮𑀫𑀢𑁆𑀣𑀢𑀭𑀸 𑀘 (𑀲𑁆𑀬𑀸. 𑀓.)]. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁨. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺? 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬. 𑀅𑀣 𑀔𑁆𑀯𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑁂 [𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑁂 (𑀲𑁆𑀬𑀸.)] 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬 𑀫𑀳𑀺𑀘𑁆𑀙𑀢𑀸𑀬 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀬 [𑀅𑀲𑀦𑁆𑀢𑀼𑀝𑁆𑀞𑀢𑀸𑀬 (𑀲𑁆𑀬𑀸.), 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 (𑀲𑀻.)] 𑀲𑀗𑁆𑀕𑀡𑀺𑀓𑀸𑀬 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀼𑀪𑀭𑀢𑀸𑀬 𑀲𑀼𑀧𑁄𑀲𑀢𑀸𑀬 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 [𑀯𑀺𑀭𑀺𑀬𑀸𑀭𑀫𑁆𑀪𑀲𑁆𑀲 (𑀲𑀻.), 𑀯𑀻𑀭𑀺𑀬𑀸𑀭𑀩𑁆𑀪𑀲𑁆𑀲 (𑀓.)] 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁. 𑀧𑀞𑀫𑀁 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀘𑁄𑀤𑁂𑀢𑀩𑁆𑀩𑀸, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑀸, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 [𑀆𑀧𑀢𑁆𑀢𑀺 (𑀲𑀻. 𑀲𑁆𑀬𑀸.)] 𑀆𑀭𑁄𑀧𑁂𑀢𑀩𑁆𑀩𑀸, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸, 𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀫𑀸 𑀔𑁄 𑀢𑀼𑀫𑁆𑀳𑁂, 𑀆𑀬𑀲𑁆𑀫𑀦𑁆𑀢𑁄, 𑀏𑀲𑁄 𑀅𑀚𑁂𑀲𑀺. 𑀩𑀮𑀯𑀸𑀩𑀮𑀯𑀁 𑀧𑀝𑀺𑀫𑀦𑁆𑀢𑁂𑀣. 𑀢𑀼𑀫𑁆𑀳𑁂 𑀢𑁂𑀦 𑀧𑀡𑁆𑀟𑀺𑀢𑀢𑀭𑀸 𑀘 𑀩𑁆𑀬𑀢𑁆𑀢𑀢𑀭𑀸 𑀘 𑀩𑀳𑀼𑀲𑁆𑀲𑀼𑀢𑀢𑀭𑀸 𑀘 𑀅𑀮𑀫𑀢𑁆𑀢𑀢𑀭𑀸 𑀘. 𑀫𑀸 𑀘𑀲𑁆𑀲 𑀪𑀸𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’𑀢𑀺. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁪. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 [𑀅𑀥𑀫𑁆𑀫𑀓𑀫𑁆𑀫𑀜𑁆𑀘𑁂𑀯 (𑀲𑁆𑀬𑀸.)] 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁫. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁬. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁭. ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸.)] 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 [𑀦 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 (𑀲𑁆𑀬𑀸.)] 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀢𑀚𑁆𑀚𑀦𑀻𑀬𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁮. 𑀅𑀣 𑀔𑁄 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺. 𑀢𑁂 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀫𑀬𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀸𑀫, 𑀮𑁄𑀫𑀁 𑀧𑀸𑀢𑁂𑀫, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫, 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 [𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 (𑀲𑁆𑀬𑀸.)] 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁧𑁦. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀬𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀸𑀫, 𑀮𑁄𑀫𑀁 𑀧𑀸𑀢𑁂𑀫, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀦𑁆𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺, 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀦𑁆𑀢𑀺. 𑀲𑀗𑁆𑀖𑁄 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲,

𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀦𑀺𑀬𑀲𑁆𑀲𑀓𑀫𑁆𑀫𑀁

𑁧𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑁂𑀬𑁆𑀬𑀲𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 [𑀧𑀓𑀢𑀢𑁆𑀢𑀸 (𑀲𑀻. 𑀲𑁆𑀬𑀸.)] 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀲𑁂𑀬𑁆𑀬𑀲𑀓𑁄 𑀩𑀸𑀮𑁄 𑀪𑀯𑀺𑀲𑁆𑀲𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀺𑀲𑁆𑀲𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀩𑀸𑀮𑁄 𑀪𑀯𑀺𑀲𑁆𑀲𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀺𑀲𑁆𑀲𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 [𑀦𑀺𑀬𑀲𑀓𑀫𑁆𑀫𑀁 (𑀓.)] 𑀓𑀭𑁄𑀢𑀼 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁. 𑀧𑀞𑀫𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄 [𑀆𑀧𑀢𑁆𑀢𑀺 𑀆𑀭𑁄𑀧𑁂𑀢𑀩𑁆𑀩𑀸 (𑀲𑀻. 𑀲𑁆𑀬𑀸.)], 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸. 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺; 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁆𑀢𑀸 𑀫𑀸𑀦𑀢𑁆𑀢𑀁 𑀤𑁂𑀦𑁆𑀢𑀸 𑀅𑀩𑁆𑀪𑁂𑀦𑁆𑀢𑀸. 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁧𑁩. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁧𑁪. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂….

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀦𑀺𑀬𑀲𑁆𑀲𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁧𑁫. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺, 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁧𑁬. ‘‘𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑀸𑀧𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀦𑀺𑀬𑀲𑁆𑀲𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁧𑁭. 𑀅𑀣 𑀔𑁄 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀲𑁄 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀫𑀸𑀦𑁄 𑀪𑀚𑀫𑀸𑀦𑁄 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁄 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁧𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁧𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁦. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀲𑁂𑀬𑁆𑀬𑀲𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑁂𑀬𑁆𑀬𑀲𑀓𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀦𑀺𑀬𑀲𑁆𑀲𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀲𑁂𑀬𑁆𑀬𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑀲𑁆𑀲𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀦𑀺𑀬𑀲𑁆𑀲𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁

𑁨𑁧. [𑀇𑀤𑀁 𑀯𑀢𑁆𑀣𑀼 𑀧𑀸𑀭𑀸. 𑁪𑁩𑁧 𑀆𑀤𑀬𑁄] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 [𑀦𑀸𑀫 𑀪𑀺𑀓𑁆𑀔𑀽 (𑀓.)] 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀳𑁄𑀦𑁆𑀢𑀺 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 [𑀘𑀽𑀴𑀯. 𑁨𑁯𑁨 𑀆𑀤𑀬𑁄] 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀺, 𑀑𑀘𑀺𑀦𑀦𑁆𑀢𑀺𑀧𑀺 𑀑𑀘𑀺𑀦𑀸𑀧𑁂𑀦𑁆𑀢𑀺𑀧𑀺, 𑀕𑀦𑁆𑀣𑁂𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 [𑀯𑀺𑀥𑀼𑀢𑀺𑀓𑀁 (𑀲𑁆𑀬𑀸.)] 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀧𑀺, 𑀕𑀸𑀬𑀦𑁆𑀢𑀺𑀧𑀺, 𑀯𑀸𑀤𑁂𑀦𑁆𑀢𑀺𑀧𑀺, 𑀮𑀸𑀲𑁂𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀕𑀸𑀬𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 [𑀧𑀼𑀭𑀢𑁄 𑀥𑀸𑀯𑀦𑁆𑀢𑀺 (𑀲𑁆𑀬𑀸.)] 𑀥𑀸𑀯𑀦𑁆𑀢𑀺𑀧𑀺 𑀆𑀥𑀸𑀯𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 [𑀦𑀘𑁆𑀘𑀦𑁆𑀢𑀺𑀁 (𑀲𑀻. 𑀲𑁆𑀬𑀸.)] 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑁂𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺.

𑁨𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑁄 [𑀯𑀲𑁆𑀲𑀁𑀯𑀼𑀢𑁆𑀣𑁄 (𑀲𑀻. 𑀲𑁆𑀬𑀸.)] 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑀤𑀯𑀲𑀭𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀻𑀝𑀸𑀕𑀺𑀭𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 [𑀲𑀫𑁆𑀫𑀺𑀜𑁆𑀚𑀺𑀢𑁂𑀦 (𑀲𑀻. 𑀲𑁆𑀬𑀸. 𑀓𑀁.)] 𑀧𑀲𑀸𑀭𑀺𑀢𑁂𑀦, 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑁆𑀯𑀸𑀬𑀁 𑀅𑀩𑀮𑀩𑀮𑁄 𑀯𑀺𑀬 𑀫𑀦𑁆𑀤𑀫𑀦𑁆𑀤𑁄 𑀯𑀺𑀬 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀯𑀺𑀬? 𑀓𑁄 𑀇𑀫𑀲𑁆𑀲 𑀉𑀧𑀕𑀢𑀲𑁆𑀲 𑀧𑀺𑀡𑁆𑀟𑀓𑀫𑁆𑀧𑀺 𑀤𑀲𑁆𑀲𑀢𑀺? 𑀅𑀫𑁆𑀳𑀸𑀓𑀁 𑀧𑀦 𑀅𑀬𑁆𑀬𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀲𑀡𑁆𑀳𑀸 𑀲𑀔𑀺𑀮𑀸 𑀲𑀼𑀔𑀲𑀫𑁆𑀪𑀸𑀲𑀸 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑀸 𑀏𑀳𑀺𑀲𑁆𑀯𑀸𑀕𑀢𑀯𑀸𑀤𑀺𑀦𑁄 𑀅𑀩𑁆𑀪𑀸𑀓𑀼𑀝𑀺𑀓𑀸 𑀉𑀢𑁆𑀢𑀸𑀦𑀫𑀼𑀔𑀸 𑀧𑀼𑀩𑁆𑀩𑀪𑀸𑀲𑀺𑀦𑁄. 𑀢𑁂𑀲𑀁 𑀔𑁄 𑀦𑀸𑀫 𑀧𑀺𑀡𑁆𑀟𑁄 𑀤𑀸𑀢𑀩𑁆𑀩𑁄’’𑀢𑀺.

𑀅𑀤𑁆𑀤𑀲𑀸 𑀔𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀢𑀁 𑀪𑀺𑀓𑁆𑀔𑀼𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’’𑀢𑀺? ‘‘𑀦 𑀔𑁄, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀢𑀁 𑀪𑀺𑀓𑁆𑀔𑀼𑀁 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤, 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀤𑀼𑀝𑁆𑀞𑁄, 𑀪𑀦𑁆𑀢𑁂, 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀺, 𑀑𑀘𑀺𑀦𑀦𑁆𑀢𑀺𑀧𑀺, 𑀑𑀘𑀺𑀦𑀸𑀧𑁂𑀦𑁆𑀢𑀺𑀧𑀺, 𑀕𑀦𑁆𑀣𑁂𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀧𑀺, 𑀕𑀸𑀬𑀦𑁆𑀢𑀺𑀧𑀺, 𑀯𑀸𑀤𑁂𑀦𑁆𑀢𑀺𑀧𑀺, 𑀮𑀸𑀲𑁂𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺…𑀧𑁂… (𑀘𑀓𑁆𑀓𑀁 𑀓𑀸𑀢𑀩𑁆𑀩𑀁). 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺𑀧𑀺 𑀆𑀥𑀸𑀯𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑁂𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺. 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽, 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀻𑀝𑀸𑀕𑀺𑀭𑀺𑀁 𑀪𑀺𑀓𑁆𑀔𑀽 𑀧𑀳𑀺𑀡𑁂𑀬𑁆𑀬, 𑀬𑀣𑀸𑀬𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄 𑀲𑀡𑁆𑀞𑀳𑁂𑀬𑁆𑀬𑀸’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘 𑀅𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄. 𑀇𑀥𑀸𑀳𑀁, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑁄 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑀤𑀯𑀲𑀭𑀺𑀁. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀻𑀝𑀸𑀕𑀺𑀭𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’𑀢𑀺. ‘𑀦 𑀔𑁄, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’𑀢𑀺. ‘𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑁄 𑀉𑀧𑀸𑀲𑀓𑁄 𑀫𑀁 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’𑀢𑀺? ‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’𑀢𑀺. ‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤, 𑀏𑀯𑀜𑁆𑀘 𑀯𑀤𑁂𑀳𑀺 𑁋 𑀤𑀼𑀝𑁆𑀞𑁄, 𑀪𑀦𑁆𑀢𑁂, 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺. 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽, 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀻𑀝𑀸𑀕𑀺𑀭𑀺𑀁 𑀪𑀺𑀓𑁆𑀔𑀽 𑀧𑀳𑀺𑀡𑁂𑀬𑁆𑀬, 𑀬𑀣𑀸𑀬𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄 𑀲𑀡𑁆𑀞𑀳𑁂𑀬𑁆𑀬𑀸’𑀢𑀺. 𑀢𑀢𑁄 𑀅𑀳𑀁 𑀪𑀕𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺.

𑁨𑁩. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽? 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺? 𑀬𑁂𑀧𑀺 𑀢𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸? 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺? 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀲𑁆𑀲𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀲𑀺𑀜𑁆𑀘𑀺𑀲𑁆𑀲𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀑𑀘𑀺𑀦𑀺𑀲𑁆𑀲𑀦𑁆𑀢𑀺𑀧𑀺 𑀑𑀘𑀺𑀦𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀕𑀦𑁆𑀣𑁂𑀲𑁆𑀲𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀺𑀲𑁆𑀲𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀺𑀲𑁆𑀲𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀲𑁆𑀲𑀦𑁆𑀢𑀺, 𑀦𑀘𑁆𑀘𑀺𑀲𑁆𑀲𑀦𑁆𑀢𑀺𑀧𑀺, 𑀕𑀸𑀬𑀺𑀲𑁆𑀲𑀦𑁆𑀢𑀺𑀧𑀺, 𑀯𑀸𑀤𑁂𑀲𑁆𑀲𑀦𑁆𑀢𑀺𑀧𑀺, 𑀮𑀸𑀲𑁂𑀲𑁆𑀲𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀕𑀸𑀬𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 [𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸.)] 𑀥𑀸𑀯𑀺𑀲𑁆𑀲𑀦𑁆𑀢𑀺𑀧𑀺 𑀆𑀥𑀸𑀯𑀺𑀲𑁆𑀲𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀲𑁆𑀲𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀲𑁆𑀲𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀺𑀲𑁆𑀲𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 𑀏𑀯𑀁 𑀯𑀓𑁆𑀔𑀦𑁆𑀢𑀺 [𑀯𑀤𑀺𑀲𑁆𑀲𑀦𑁆𑀢𑀺 (𑀓.)] 𑁋 ‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑀲𑁆𑀲𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀲𑀸𑀭𑀺𑀧𑀼𑀢𑁆𑀢𑀸, 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀣, 𑀢𑀼𑀫𑁆𑀳𑀸𑀓𑀁 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄’’𑀢𑀺.

‘‘𑀓𑀣𑀁 𑀫𑀬𑀁, 𑀪𑀦𑁆𑀢𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫, 𑀘𑀡𑁆𑀟𑀸 𑀢𑁂 𑀪𑀺𑀓𑁆𑀔𑀽 𑀨𑀭𑀼𑀲𑀸’’𑀢𑀺? ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂, 𑀲𑀸𑀭𑀺𑀧𑀼𑀢𑁆𑀢𑀸, 𑀩𑀳𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀘𑁄𑀤𑁂𑀢𑀩𑁆𑀩𑀸, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑀸, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑀸, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁨𑁪. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁫. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 …𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁬. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀘𑀼𑀤𑁆𑀤𑀲𑀓𑀁

𑁨𑁭. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀘𑀼𑀤𑁆𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁨𑁮. ‘‘𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁨𑁯. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀢𑁂 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀺, 𑀧𑀭𑀺𑀪𑀸𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀺; 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀲𑁆𑀲𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀲𑁆𑀲𑀦𑁆𑀢𑀺, 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺, 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀲𑁆𑀲𑀦𑁆𑀢𑀺; 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺𑀧𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀺, 𑀧𑀭𑀺𑀪𑀸𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀺; 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 …𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀲𑁆𑀲𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀲𑁆𑀲𑀦𑁆𑀢𑀺, 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺, 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀲𑁆𑀲𑀦𑁆𑀢𑀺; 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺𑀧𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁩𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁩𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩𑁨. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸

𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁

𑁩𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀆𑀯𑀸𑀲𑀺𑀓𑁄 𑀳𑁄𑀢𑀺, 𑀦𑀯𑀓𑀫𑁆𑀫𑀺𑀓𑁄 𑀥𑀼𑀯𑀪𑀢𑁆𑀢𑀺𑀓𑁄. 𑀬𑀤𑀸 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀼𑀓𑀸𑀫𑁄 𑀳𑁄𑀢𑀺 𑀢𑀤𑀸 𑀦 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽, 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀘𑁆𑀘𑀸𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀧𑁆𑀧𑀺𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀘𑀼𑀦𑁆𑀤𑁄, 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄, 𑀆𑀬𑀲𑁆𑀫𑀸 𑀘 𑀭𑁂𑀯𑀢𑁄, 𑀆𑀬𑀲𑁆𑀫𑀸 𑀘 𑀉𑀧𑀸𑀮𑀺, 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄, 𑀆𑀬𑀲𑁆𑀫𑀸 𑀘 𑀭𑀸𑀳𑀼𑀮𑁄, 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀫𑀘𑁆𑀙𑀺𑀓𑀸𑀲𑀡𑁆𑀟𑁄 𑀢𑀤𑀯𑀲𑀭𑀼𑀁.

𑀅𑀲𑁆𑀲𑁄𑀲𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸 𑀓𑀺𑀭 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀫𑁂, 𑀪𑀦𑁆𑀢𑁂, 𑀣𑁂𑀭𑀸 𑀲𑁆𑀯𑀸𑀢𑀦𑀸𑀬 𑀆𑀕𑀦𑁆𑀢𑀼𑀓𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 [𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀢𑁂 𑀣𑁂𑀭𑀸 𑀪𑀺𑀓𑁆𑀔𑀽 (𑀲𑁆𑀬𑀸.)] 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀣𑁂𑀭𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 ‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑀤𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀼𑀓𑀸𑀫𑁄 𑀦 𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀺; 𑀲𑁄𑀤𑀸𑀦𑀺 𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀲𑀺; 𑀤𑀼𑀝𑁆𑀞𑁄𑀤𑀸𑀦𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀅𑀦𑀧𑁂𑀓𑁆𑀔𑁄 𑀯𑀺𑀭𑀢𑁆𑀢𑀭𑀽𑀧𑁄 𑀫𑀬𑀻’𑀢𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀕𑀳𑀧𑀢𑀺, 𑀦𑀸𑀥𑀺𑀯𑀸𑀲𑁂𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀣𑁂𑀭𑁂𑀳𑀻’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀦𑀸𑀥𑀺𑀯𑀸𑀲𑁂𑀫𑀻’’𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘𑀓𑀺𑀁 𑀫𑁂 𑀓𑀭𑀺𑀲𑁆𑀲𑀢𑀺 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀅𑀥𑀺𑀯𑀸𑀲𑁂𑀦𑁆𑀢𑁄 𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀯𑀸’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁩𑁪. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 ‘𑀬𑀁𑀦𑀽𑀦𑀸𑀳𑀁 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀬𑀢𑁆𑀢𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀏𑀢𑀤𑀯𑁄𑀘 𑁋 ‘‘𑀧𑀳𑀽𑀢𑀁 𑀔𑁄 𑀢𑁂 𑀇𑀤𑀁, 𑀕𑀳𑀧𑀢𑀺, 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁; 𑀏𑀓𑀸 𑀘 𑀔𑁄 𑀇𑀥 𑀦𑀢𑁆𑀣𑀺 𑀬𑀤𑀺𑀤𑀁 𑀢𑀺𑀮𑀲𑀗𑁆𑀕𑀼𑀴𑀺𑀓𑀸’’𑀢𑀺. ‘‘𑀩𑀳𑀼𑀫𑁆𑀳𑀺 𑀯𑀢, 𑀪𑀦𑁆𑀢𑁂, 𑀭𑀢𑀦𑁂 𑀩𑀼𑀤𑁆𑀥𑀯𑀘𑀦𑁂 [𑀪𑀦𑁆𑀢𑁂 𑀩𑀼𑀤𑁆𑀥𑀯𑀘𑀦𑁂 (𑀲𑁆𑀬𑀸.)] 𑀯𑀺𑀚𑁆𑀚𑀫𑀸𑀦𑁂 𑀅𑀬𑁆𑀬𑁂𑀦 𑀲𑀼𑀥𑀫𑁆𑀫𑁂𑀦 𑀬𑀤𑁂𑀯 𑀓𑀺𑀜𑁆𑀘𑀺 𑀪𑀸𑀲𑀺𑀢𑀁 𑀬𑀤𑀺𑀤𑀁 𑀢𑀺𑀮𑀲𑀗𑁆𑀕𑀼𑀴𑀺𑀓𑀸𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀦𑁆𑀢𑁂, 𑀤𑀓𑁆𑀔𑀺𑀡𑀸𑀧𑀣𑀓𑀸 𑀯𑀸𑀡𑀺𑀚𑀸 𑀧𑀼𑀭𑀢𑁆𑀣𑀺𑀫𑀁 𑀚𑀦𑀧𑀤𑀁 𑀅𑀕𑀫𑀁𑀲𑀼 𑀯𑀸𑀡𑀺𑀚𑁆𑀚𑀸𑀬. 𑀢𑁂 𑀢𑀢𑁄 𑀓𑀼𑀓𑁆𑀓𑀼𑀝𑀺𑀁 𑀆𑀦𑁂𑀲𑀼𑀁. 𑀅𑀣 𑀔𑁄 𑀲𑀸, 𑀪𑀦𑁆𑀢𑁂, 𑀓𑀼𑀓𑁆𑀓𑀼𑀝𑀻 𑀓𑀸𑀓𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑁄𑀢𑀓𑀁 𑀚𑀦𑁂𑀲𑀺. 𑀬𑀤𑀸 𑀔𑁄 𑀲𑁄, 𑀪𑀦𑁆𑀢𑁂, 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀓𑀸𑀓𑀯𑀲𑁆𑀲𑀁 𑀯𑀲𑁆𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀓𑀓𑀼𑀓𑁆𑀓𑀼𑀝𑀻𑀢𑀺 𑀯𑀲𑁆𑀲𑀢𑀺; 𑀬𑀤𑀸 𑀓𑀼𑀓𑁆𑀓𑀼𑀝𑀺𑀯𑀲𑁆𑀲𑀁 𑀯𑀲𑁆𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀼𑀓𑁆𑀓𑀼𑀝𑀺𑀓𑀸𑀓𑀸𑀢𑀺 𑀯𑀲𑁆𑀲𑀢𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑀳𑀼𑀫𑁆𑀳𑀺 𑀭𑀢𑀦𑁂 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀫𑀸𑀦𑁂 𑀅𑀬𑁆𑀬𑁂𑀦 𑀲𑀼𑀥𑀫𑁆𑀫𑁂𑀦 𑀬𑀤𑁂𑀯 𑀓𑀺𑀜𑁆𑀘𑀺 𑀪𑀸𑀲𑀺𑀢𑀁 𑀬𑀤𑀺𑀤𑀁 𑀢𑀺𑀮𑀲𑀁𑀕𑀼𑀴𑀺𑀓𑀸’’𑀢𑀺. ‘‘𑀅𑀓𑁆𑀓𑁄𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺, 𑀧𑀭𑀺𑀪𑀸𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺. 𑀏𑀲𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀲𑁄, 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀁 𑀲𑀼𑀥𑀫𑁆𑀫𑀁 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺 [𑀦 𑀧𑀭𑀺𑀪𑀸𑀲𑀸𑀫𑀺 (𑀲𑀻. 𑀲𑁆𑀬𑀸.)]. 𑀯𑀲𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂. 𑀭𑀫𑀡𑀻𑀬𑀁 𑀅𑀫𑁆𑀩𑀸𑀝𑀓𑀯𑀦𑀁. 𑀅𑀳𑀁 𑀅𑀬𑁆𑀬𑀲𑁆𑀲 𑀲𑀼𑀥𑀫𑁆𑀫𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺, 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀓𑁆𑀓𑁄𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺, 𑀧𑀭𑀺𑀪𑀸𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺. 𑀏𑀲𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀲𑁄, 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀕𑀳𑀧𑀢𑀺, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑀜𑁆𑀘 𑀅𑀢𑁆𑀢𑀦𑀸 𑀪𑀡𑀺𑀢𑀁, 𑀬𑀜𑁆𑀘 𑀫𑀬𑀸 𑀪𑀡𑀺𑀢𑀁 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀳𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀧𑀼𑀦𑀤𑁂𑀯 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺.

𑁩𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀬𑀜𑁆𑀘 𑀅𑀢𑁆𑀢𑀦𑀸 𑀪𑀡𑀺𑀢𑀁 𑀬𑀜𑁆𑀘 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀡𑀺𑀢𑀁 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀲𑁆𑀲𑀲𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀲𑁆𑀲𑀲𑀺? 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀼 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁩𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁩𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀘𑀢𑀼𑀓𑁆𑀓𑀁

𑁩𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀸𑀯𑀸𑀲𑀸𑀬 [𑀅𑀯𑀸𑀲𑀸𑀬 (𑀲𑀻.)] 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀕𑀺𑀳𑀻𑀦𑀁 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻𑀦𑀁 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻𑀦𑀁 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺, 𑀕𑀺𑀳𑀻𑀦𑀁 𑀥𑀫𑁆𑀫𑀺𑀓𑀁 𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀧𑀜𑁆𑀘𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀅𑀦𑀸𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀕𑀺𑀳𑀻𑀦𑀁 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀥𑀫𑁆𑀫𑀺𑀓𑀁 𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁪𑁦. ‘‘𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁪𑁧. 𑀅𑀣 𑀔𑁄 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 ‘‘𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄’’𑀢𑀺. 𑀲𑁄 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁄 𑀦𑀸𑀲𑀓𑁆𑀔𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀔𑀫𑀸𑀧𑀺𑀢𑁄 𑀢𑀬𑀸, 𑀆𑀯𑀼𑀲𑁄 𑀲𑀼𑀥𑀫𑁆𑀫, 𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺? ‘‘𑀇𑀥𑀸𑀳𑀁, 𑀆𑀯𑀼𑀲𑁄, 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁄 𑀦𑀸𑀲𑀓𑁆𑀔𑀺𑀁 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑁂𑀢𑀼 𑁋 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀤𑀸𑀢𑀩𑁆𑀩𑁄 𑁋 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑀤𑁂𑀬𑁆𑀬 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑁂𑀢𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀲𑁆𑀲 𑀤𑀸𑀦𑀁 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁪𑁨. ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀲𑀼𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀧𑀲𑀸𑀤𑁂𑀫𑀺 𑀢’𑀦𑁆𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀲𑀸𑀤𑁂𑀢𑀺 𑀢’𑀦𑁆𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀳𑀁 𑀢𑀁 𑀧𑀲𑀸𑀤𑁂𑀫𑀻’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦𑀸’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 [𑀲𑀼𑀥𑀫𑁆𑀫𑀁 𑀪𑀺𑀓𑁆𑀔𑀼𑀁… 𑀲𑀸 𑀆𑀧𑀢𑁆𑀢𑀺 𑀤𑁂𑀲𑀸𑀧𑁂𑀢𑀩𑁆𑀩𑀸𑀢𑀺 (𑀲𑀻. 𑀲𑁆𑀬𑀸.)] 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀤𑀲𑁆𑀲𑀦𑀽𑀧𑀘𑀸𑀭𑀁 𑀅𑀯𑀺𑀚𑀳𑀸𑀧𑁂𑀢𑁆𑀯𑀸 𑀲𑀯𑀦𑀽𑀧𑀘𑀸𑀭𑀁 𑀅𑀯𑀺𑀚𑀳𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑀩𑁆𑀩𑁄’’𑀢𑀺 [𑀲𑀼𑀥𑀫𑁆𑀫𑀁 𑀪𑀺𑀓𑁆𑀔𑀼𑀁… 𑀲𑀸 𑀆𑀧𑀢𑁆𑀢𑀺 𑀤𑁂𑀲𑀸𑀧𑁂𑀢𑀩𑁆𑀩𑀸𑀢𑀺 (𑀲𑀻. 𑀲𑁆𑀬𑀸.)].

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀲𑀺. 𑀲𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁪𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁’’.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁪𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁫. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦 [𑀢𑁂𑀦 𑀳𑀺 (𑀲𑁆𑀬𑀸. 𑀓.)], 𑀪𑀺𑀓𑁆𑀔𑀯𑁂, 𑀲𑀼𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁

𑁪𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁? 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀼 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁪𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

‘‘𑀆𑀯𑀸𑀲𑀧𑀭𑀫𑁆𑀧𑀭𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀲𑀣 𑁋 ‘𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 [𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 (𑀲𑀻. 𑀓.)] 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦𑀸’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁪𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁪𑁯. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁…𑀧𑁂…. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁫𑁦. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁

𑁫𑁧. ‘‘𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑁄, 𑀲𑁂𑀬𑁆𑀬𑀸𑀪𑀺𑀳𑀸𑀭𑁄, 𑀧𑀸𑀤𑁄𑀤𑀓𑀁, 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀩𑁆𑀩𑁄 [𑀦 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀩𑁆𑀩𑀸 (𑀲𑁆𑀬𑀸.)], 𑀦 𑀕𑀺𑀳𑀺𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀸 𑀲𑁂𑀯𑀺𑀢𑀩𑁆𑀩𑀸; 𑀪𑀺𑀓𑁆𑀔𑀽 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀁 [𑀪𑀺𑀓𑁆𑀔𑀼𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑀩𑁆𑀩𑀸 (𑀲𑁆𑀬𑀸.)]. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀸𑀤𑁂𑀢𑀩𑁆𑀩𑁄 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁫𑁨. 𑀅𑀣 𑀔𑁄 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀲𑁄 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼 𑀓𑀭𑀺𑀁𑀲𑀼 [𑀦 𑀕𑀭𑀼𑀓𑀭𑀺𑀁𑀲𑀼 (𑀓.)], 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀧𑀼𑀦𑀤𑁂𑀯 𑀓𑁄𑀲𑀫𑁆𑀩𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀲𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩-𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁫𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁 𑀲𑀸𑀤𑀺𑀬𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀬𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀪𑀺𑀓𑁆𑀔𑀼𑀁 [𑀪𑀺𑀓𑁆𑀔𑀽 (𑀲𑀻. 𑀲𑁆𑀬𑀸.)] 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀕𑀺𑀳𑀺𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀢𑀺𑀢𑁆𑀣𑀺𑀬𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀢𑀺𑀢𑁆𑀣𑀺𑀬𑁂 𑀲𑁂𑀯𑀢𑀺; 𑀪𑀺𑀓𑁆𑀔𑀽 𑀦 𑀲𑁂𑀯𑀢𑀺, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀦 𑀲𑀺𑀓𑁆𑀔𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀲𑀢𑀺, 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀲𑀢𑀺, 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀲𑀢𑀺; 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀦 𑀯𑀼𑀝𑁆𑀞𑀸𑀢𑀺; 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀲𑀸𑀤𑁂𑀢𑀺 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩-𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩-𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁫𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁 𑀲𑀸𑀤𑀺𑀬𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀬𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀕𑀺𑀳𑀺𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀦 𑀢𑀺𑀢𑁆𑀣𑀺𑀬𑁂 𑀲𑁂𑀯𑀢𑀺, 𑀪𑀺𑀓𑁆𑀔𑀽 𑀲𑁂𑀯𑀢𑀺, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀲𑀢𑀺, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀲𑀢𑀺, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀲𑀢𑀺, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀺, 𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀲𑀸𑀤𑁂𑀢𑀺 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁫𑁫. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁

𑁫𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼’’𑀦𑁆𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀼 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

‘‘𑀆𑀯𑀸𑀲𑀧𑀭𑀫𑁆𑀧𑀭𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀲𑀣 𑁋 ‘𑀙𑀦𑁆𑀦𑁄 𑀪𑀺𑀓𑁆𑀔𑀼, 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 [𑀙𑀦𑁆𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 (𑀲𑀻. 𑀓.)] 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦𑀸’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁫𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁫𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁫𑁯. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁

𑁬𑁦. ‘‘𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑁄, 𑀲𑁂𑀬𑁆𑀬𑀸𑀪𑀺𑀳𑀸𑀭𑁄, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀩𑁆𑀩𑁄. 𑀦 𑀕𑀺𑀳𑀺𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀸 𑀲𑁂𑀯𑀺𑀢𑀩𑁆𑀩𑀸; 𑀪𑀺𑀓𑁆𑀔𑀽 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀸𑀤𑁂𑀢𑀩𑁆𑀩𑁄 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁬𑁧. 𑀅𑀣 𑀔𑁄 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀲𑁄 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀧𑀽𑀚𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑁄 𑀅𑀕𑀭𑀼𑀓𑀭𑀺𑀬𑀫𑀸𑀦𑁄 𑀅𑀫𑀸𑀦𑀺𑀬𑀫𑀸𑀦𑁄 𑀅𑀧𑀽𑀚𑀺𑀬𑀫𑀸𑀦𑁄 𑀅𑀲𑀓𑁆𑀓𑀸𑀭𑀧𑀓𑀢𑁄 𑀧𑀼𑀦𑀤𑁂𑀯 𑀓𑁄𑀲𑀫𑁆𑀩𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀲𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁬𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺…𑀧𑁂… 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁 𑀲𑀸𑀤𑀺𑀬𑀢𑀺…𑀧𑁂… 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀬𑀢𑀺…𑀧𑁂… 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺…𑀧𑁂… 𑀕𑀺𑀳𑀺𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀢𑀺𑀢𑁆𑀣𑀺𑀬𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀢𑀺𑀢𑁆𑀣𑀺𑀬𑁂 𑀲𑁂𑀯𑀢𑀺, 𑀪𑀺𑀓𑁆𑀔𑀽 𑀦 𑀲𑁂𑀯𑀢𑀺, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀦 𑀲𑀺𑀓𑁆𑀔𑀢𑀺…𑀧𑁂… 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀲𑀢𑀺, 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀲𑀢𑀺, 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀲𑀢𑀺, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀦 𑀯𑀼𑀝𑁆𑀞𑀸𑀢𑀺, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀲𑀸𑀤𑁂𑀢𑀺 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁬𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺…𑀧𑁂… 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁 𑀲𑀸𑀤𑀺𑀬𑀢𑀺…𑀧𑁂… 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀬𑀢𑀺…𑀧𑁂… 𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀦 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀺…𑀧𑁂… 𑀦 𑀕𑀺𑀳𑀺𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑀁 𑀥𑀸𑀭𑁂𑀢𑀺, 𑀦 𑀢𑀺𑀢𑁆𑀣𑀺𑀬𑁂 𑀲𑁂𑀯𑀢𑀺, 𑀪𑀺𑀓𑁆𑀔𑀽 𑀲𑁂𑀯𑀢𑀺, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀢𑀺…𑀧𑁂… 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀲𑀢𑀺, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀲𑀢𑀺, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀲𑀢𑀺, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀺, 𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀲𑀸𑀤𑁂𑀢𑀺 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁬𑁪. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.

𑁭. 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁

𑁬𑁫. [𑀇𑀤𑀁 𑀯𑀢𑁆𑀣𑀼 𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁨𑁩𑁪 𑀆𑀤𑀬𑁄] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀭𑀺𑀝𑁆𑀞𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 [𑀕𑀦𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 (𑀓.)] 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀅𑀭𑀺𑀝𑁆𑀞𑀲𑁆𑀲 𑀦𑀸𑀫 𑀓𑀺𑀭 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀆𑀯𑀼𑀲𑁄 𑀅𑀭𑀺𑀝𑁆𑀞, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺? ‘‘𑀏𑀯𑀁𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺.

‘‘𑀫𑀸𑀯𑀼𑀲𑁄 𑀅𑀭𑀺𑀝𑁆𑀞, 𑀏𑀯𑀁 𑀅𑀯𑀘. 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁 [𑀅𑀩𑁆𑀪𑀸𑀘𑀺𑀓𑁆𑀔𑀦𑀁 (𑀓.)]. 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀯𑀼𑀲𑁄 𑀅𑀭𑀺𑀝𑁆𑀞, 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸 [𑀩𑀳𑀽𑀧𑀸𑀬𑀸𑀲𑀸 (𑀲𑀻. 𑀲𑁆𑀬𑀸.)], 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀽𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸…𑀧𑁂… 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀽𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺.

𑀏𑀯𑀫𑁆𑀧𑀺 𑀔𑁄 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑁄 𑀢𑀣𑁂𑀯 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺 𑁋 ‘‘𑀏𑀯𑀁𑀩𑁆𑀬𑀸 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺. 𑀬𑀢𑁄 𑀘 𑀔𑁄 𑀢𑁂 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀼𑀁, 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀅𑀭𑀺𑀝𑁆𑀞, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺? ‘‘𑀏𑀯𑀁𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺.

‘‘𑀓𑀲𑁆𑀲 𑀦𑀼 𑀔𑁄 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀬𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀲𑀺? 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀯𑀼𑀢𑁆𑀢𑀸? 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬. 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸…𑀧𑁂… 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸…𑀧𑁂… 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸… 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸, 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀅𑀣 𑀘 𑀧𑀦 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 [𑀤𑀼𑀕𑁆𑀕𑀳𑀺𑀢𑁂𑀦 𑀤𑀺𑀝𑁆𑀞𑀺𑀕𑀢𑁂𑀦 (𑀲𑁆𑀬𑀸.)] 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀲𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀡𑀲𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀲𑀺. 𑀢𑀜𑁆𑀳𑀺 𑀢𑁂, 𑀫𑁄𑀖𑀧𑀼𑀭𑀺𑀲, 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀼 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁬𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺. 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺. 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑀗𑁆𑀖𑁄 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑀬𑀣𑀸 𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺. 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑀗𑁆𑀖𑁄 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

‘‘𑀆𑀯𑀸𑀲𑀧𑀭𑀫𑁆𑀧𑀭𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀲𑀣 𑁋 ‘𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄, 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 [𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀧𑀸𑀧𑀺𑀓𑀸𑀬 (𑀲𑀻. 𑀓.)] 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦𑀸’’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁬𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁬𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁

𑁬𑁯. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀓𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀆𑀓𑀗𑁆𑀔𑀫𑀸𑀦𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁

𑁭𑁦. ‘‘𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸…𑀧𑁂… 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁭𑁧. 𑀅𑀣 𑀔𑁄 𑀲𑀗𑁆𑀖𑁄 𑀅𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦. 𑀲𑁄 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀯𑀺𑀩𑁆𑀪𑀫𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀯𑀺𑀩𑁆𑀪𑀫𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀯𑀺𑀩𑁆𑀪𑀫𑀢𑀻’’𑀢𑀺 [𑀯𑀺𑀩𑁆𑀪𑀫𑀻𑀢𑀺 (𑀲𑀻. 𑀓.)]? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀯𑀺𑀩𑁆𑀪𑀫𑀺𑀲𑁆𑀲𑀢𑀺? 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁭𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁…𑀧𑁂….

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁

𑁭𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁…𑀧𑁂….

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁’’.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀢𑁂𑀘𑀢𑁆𑀢𑀸𑀮𑀻𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁭𑁪. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.

𑀓𑀫𑁆𑀫𑀓𑁆𑀔𑀦𑁆𑀥𑀓𑁄 𑀧𑀞𑀫𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀲𑀢𑁆𑀢.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀡𑁆𑀟𑀼𑀮𑁄𑀳𑀺𑀢𑀓𑀸 𑀪𑀺𑀓𑁆𑀔𑀽, 𑀲𑀬𑀁 𑀪𑀡𑁆𑀟𑀦𑀓𑀸𑀭𑀓𑀸;

𑀢𑀸𑀤𑀺𑀲𑁂 𑀉𑀧𑀲𑀗𑁆𑀓𑀫𑁆𑀫, 𑀉𑀲𑁆𑀲𑀳𑀺𑀁𑀲𑀼 𑀘 𑀪𑀡𑁆𑀟𑀦𑁂.

𑀅𑀦𑀼𑀧𑁆𑀧𑀦𑁆𑀦𑀸𑀧𑀺 𑀚𑀸𑀬𑀦𑁆𑀢𑀺 [𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀚𑀸𑀬𑀦𑁆𑀢𑀺 (𑀲𑀻. 𑀲𑁆𑀬𑀸.)], 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀯𑀟𑁆𑀠𑀭𑁂 [𑀉𑀧𑁆𑀧𑀦𑁆𑀦𑀸𑀦𑀺 𑀧𑀯𑀟𑁆𑀠𑀭𑁂 (𑀲𑀻.), 𑀉𑀧𑁆𑀧𑀦𑁆𑀦𑀸𑀧𑀺 𑀧𑀯𑀟𑁆𑀠𑀦𑁆𑀢𑀺 (𑀓.)];

𑀅𑀧𑁆𑀧𑀺𑀘𑁆𑀙𑀸 𑀧𑁂𑀲𑀮𑀸 𑀪𑀺𑀓𑁆𑀔𑀽, 𑀉𑀚𑁆𑀛𑀸𑀬𑀦𑁆𑀢𑀺 𑀧𑀤𑀲𑁆𑀲𑀢𑁄 [𑀧𑀭𑀻𑀲𑀢𑁄 (𑀲𑁆𑀬𑀸.), 𑀧𑀭𑀲𑁆𑀲𑀢𑁄 (𑀲𑀻.)].

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑁄 𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀆𑀡𑀸𑀧𑁂𑀲𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀲𑀸𑀯𑀢𑁆𑀣𑀺𑀬𑀁 𑀚𑀺𑀦𑁄.

𑀅𑀲𑀫𑁆𑀫𑀼𑀔𑀸𑀧𑁆𑀧𑀝𑀺𑀧𑀼𑀘𑁆𑀙𑀸𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀜𑁆𑀘 𑀬𑀁;

𑀅𑀦𑀸𑀧𑀢𑁆𑀢𑀺 𑀅𑀤𑁂𑀲𑀦𑁂, 𑀤𑁂𑀲𑀺𑀢𑀸𑀬 𑀓𑀢𑀜𑁆𑀘 𑀬𑀁.

𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸, 𑀅𑀦𑀸𑀭𑁄𑀧𑁂𑀢𑁆𑀯𑀸 𑀘 𑀬𑀁 𑀓𑀢𑀁;

𑀅𑀲𑀫𑁆𑀫𑀼𑀔𑀸 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦 𑀘𑀸𑀧𑀺 [𑀯𑀕𑁆𑀕𑁂𑀦𑀸𑀧𑀺 𑀘 (𑀲𑀻. 𑀲𑁆𑀬𑀸.)] 𑀬𑀁 𑀓𑀢𑀁.

𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀅𑀥𑀫𑁆𑀫𑁂𑀦, 𑀧𑀼𑀦 𑀯𑀕𑁆𑀕𑁂𑀦 [𑀯𑀕𑁆𑀕𑁂𑀦𑀸𑀧𑀺 𑀘 (𑀲𑀻. 𑀲𑁆𑀬𑀸.)] 𑀬𑀁 𑀓𑀢𑀁;

𑀅𑀧𑁆𑀧𑀝𑀺𑀜𑁆𑀜𑀸𑀬 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦 𑀘𑀸𑀧𑀺 [𑀯𑀕𑁆𑀕𑁂𑀦𑀸𑀧𑀺 𑀘 (𑀲𑀻. 𑀲𑁆𑀬𑀸.)] 𑀬𑀁 𑀓𑀢𑀁.

𑀅𑀦𑀸𑀧𑀢𑁆𑀢𑀺 [𑀅𑀦𑀸𑀧𑀢𑁆𑀢𑀺𑀬𑀸 (𑀲𑀻. 𑀲𑁆𑀬𑀸.)] 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦

𑀘𑀸𑀧𑀺 [𑀯𑀕𑁆𑀕𑁂𑀦𑀸𑀧𑀺 𑀘 (𑀲𑀻. 𑀲𑁆𑀬𑀸.)] 𑀬𑀁 𑀓𑀢𑀁.

𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸, 𑀅𑀥𑀫𑁆𑀫𑀯𑀕𑁆𑀕𑀫𑁂𑀯 𑀘.

𑀤𑁂𑀲𑀺𑀢𑀸𑀬 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦𑀸𑀧𑀺 𑀢𑀣𑁂𑀯 𑀘;

𑀅𑀘𑁄𑀤𑁂𑀢𑁆𑀯𑀸 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦𑀸𑀧𑀺 𑀢𑀣𑁂𑀯 𑀘.

𑀅𑀲𑀸𑀭𑁂𑀢𑁆𑀯𑀸 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦𑀸𑀧𑀺 𑀢𑀣𑁂𑀯 𑀘;

𑀅𑀦𑀸𑀭𑁄𑀧𑁂𑀢𑁆𑀯𑀸 𑀅𑀥𑀫𑁆𑀫𑁂𑀦, 𑀯𑀕𑁆𑀕𑁂𑀦𑀸𑀧𑀺 𑀢𑀣𑁂𑀯 𑀘.

𑀓𑀡𑁆𑀳𑀯𑀸𑀭𑀦𑀬𑁂𑀦𑁂𑀯, 𑀲𑀼𑀓𑁆𑀓𑀯𑀸𑀭𑀁 𑀯𑀺𑀚𑀸𑀦𑀺𑀬𑀸;

𑀲𑀗𑁆𑀖𑁄 𑀆𑀓𑀗𑁆𑀔𑀫𑀸𑀦𑁄 𑀘 𑀬𑀲𑁆𑀲 𑀢𑀚𑁆𑀚𑀦𑀺𑀬𑀁 𑀓𑀭𑁂.

𑀪𑀡𑁆𑀟𑀦𑀁 𑀩𑀸𑀮𑁄 𑀲𑀁𑀲𑀝𑁆𑀞𑁄, 𑀅𑀥𑀺𑀲𑀻𑀮𑁂 𑀅𑀚𑁆𑀛𑀸𑀘𑀸𑀭𑁂;

𑀅𑀢𑀺𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀲𑁆𑀲, 𑀲𑀗𑁆𑀖𑁄 𑀢𑀚𑁆𑀚𑀦𑀺𑀬𑀁 𑀓𑀭𑁂.

𑀩𑀼𑀤𑁆𑀥𑀥𑀫𑁆𑀫𑀲𑁆𑀲 𑀲𑀗𑁆𑀖𑀲𑁆𑀲, 𑀅𑀯𑀡𑁆𑀡𑀁 𑀬𑁄 𑀘 𑀪𑀸𑀲𑀢𑀺;

𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀘 𑀪𑀺𑀓𑁆𑀔𑀽𑀦𑀁, 𑀲𑀗𑁆𑀖𑁄 𑀢𑀚𑁆𑀚𑀦𑀺𑀬𑀁 𑀓𑀭𑁂.

𑀪𑀡𑁆𑀟𑀦𑀁 𑀓𑀸𑀭𑀓𑁄 𑀏𑀓𑁄, 𑀩𑀸𑀮𑁄 𑀲𑀁𑀲𑀕𑁆𑀕𑀦𑀺𑀲𑁆𑀲𑀺𑀢𑁄;

𑀅𑀥𑀺𑀲𑀻𑀮𑁂 𑀅𑀚𑁆𑀛𑀸𑀘𑀸𑀭𑁂, 𑀢𑀣𑁂𑀯 𑀅𑀢𑀺𑀤𑀺𑀝𑁆𑀞𑀺𑀬𑀸.

𑀩𑀼𑀤𑁆𑀥𑀥𑀫𑁆𑀫𑀲𑁆𑀲 𑀲𑀗𑁆𑀖𑀲𑁆𑀲, 𑀅𑀯𑀡𑁆𑀡𑀁 𑀬𑁄 𑀘 𑀪𑀸𑀲𑀢𑀺;

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑁄, 𑀏𑀯𑀁 𑀲𑀫𑁆𑀫𑀸𑀦𑀼𑀯𑀢𑁆𑀢𑀦𑀸.

𑀉𑀧𑀲𑀫𑁆𑀧𑀤𑀦𑀺𑀲𑁆𑀲𑀬𑀸, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀦𑀸;

𑀑𑀯𑀸𑀤𑀲𑀫𑁆𑀫𑀢𑁂𑀦𑀸𑀧𑀺, 𑀦 𑀓𑀭𑁂 𑀢𑀚𑁆𑀚𑀦𑀻𑀓𑀢𑁄.

𑀦𑀸𑀧𑀚𑁆𑀚𑁂 𑀢𑀜𑁆𑀘 𑀆𑀧𑀢𑁆𑀢𑀺𑀁, 𑀢𑀸𑀤𑀺𑀲𑀜𑁆𑀘 𑀢𑀢𑁄 𑀧𑀭𑀁;

𑀓𑀫𑁆𑀫𑀜𑁆𑀘 𑀓𑀫𑁆𑀫𑀺𑀓𑁂 𑀘𑀸𑀧𑀺, 𑀦 𑀕𑀭𑀳𑁂 𑀢𑀣𑀸𑀯𑀺𑀥𑁄.

𑀉𑀧𑁄𑀲𑀣𑀁 𑀧𑀯𑀸𑀭𑀡𑀁, 𑀧𑀓𑀢𑀢𑁆𑀢𑀲𑁆𑀲 𑀦𑀝𑁆𑀞𑀧𑁂;

𑀲𑀯𑀘𑀦𑀺𑀁 [𑀦 𑀲𑀯𑀘𑀦𑀺𑀬𑀁 (𑀲𑀻. 𑀲𑁆𑀬𑀸.)] 𑀅𑀦𑀼𑀯𑀸𑀤𑁄, 𑀑𑀓𑀸𑀲𑁄 𑀘𑁄𑀤𑀦𑁂𑀦 𑀘.

𑀲𑀸𑀭𑀡𑀁 𑀲𑀫𑁆𑀧𑀬𑁄𑀕𑀜𑁆𑀘, 𑀦 𑀓𑀭𑁂𑀬𑁆𑀬 𑀢𑀣𑀸𑀯𑀺𑀥𑁄;

𑀉𑀧𑀲𑀫𑁆𑀧𑀤𑀦𑀺𑀲𑁆𑀲𑀬𑀸, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀦𑀸.

𑀑𑀯𑀸𑀤𑀲𑀫𑁆𑀫𑀢𑁂𑀦𑀸𑀧𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 [𑀧𑀜𑁆𑀘𑀅𑀗𑁆𑀕𑁄 (𑀓.)] 𑀦 𑀲𑀫𑁆𑀫𑀢𑀺;

𑀢𑀜𑁆𑀘𑀸𑀧𑀚𑁆𑀚𑀢𑀺 𑀆𑀧𑀢𑁆𑀢𑀺𑀁, 𑀢𑀸𑀤𑀺𑀲𑀜𑁆𑀘 𑀢𑀢𑁄 𑀧𑀭𑀁.

𑀓𑀫𑁆𑀫𑀜𑁆𑀘 𑀓𑀫𑁆𑀫𑀺𑀓𑁂 𑀘𑀸𑀧𑀺, 𑀕𑀭𑀳𑀦𑁆𑀢𑁄 𑀦 𑀲𑀫𑁆𑀫𑀢𑀺;

𑀉𑀧𑁄𑀲𑀣𑀁 𑀧𑀯𑀸𑀭𑀡𑀁, 𑀲𑀯𑀘𑀦𑀻𑀬𑀸 𑀘 𑀦𑁄𑀯𑀸𑀤𑁄.

𑀑𑀓𑀸𑀲𑁄 𑀘𑁄𑀤𑀦𑀜𑁆𑀘𑁂𑀯, 𑀲𑀸𑀭𑀡𑀸 𑀲𑀫𑁆𑀧𑀬𑁄𑀚𑀦𑀸;

𑀇𑀫𑁂𑀳𑀝𑁆𑀞𑀗𑁆𑀕𑁂𑀳𑀺 𑀬𑁄 𑀬𑀼𑀢𑁆𑀢𑁄, 𑀢𑀚𑁆𑀚𑀦𑀸𑀦𑀼𑀧𑀲𑀫𑁆𑀫𑀢𑀺.

𑀓𑀡𑁆𑀳𑀯𑀸𑀭𑀦𑀬𑁂𑀦𑁂𑀯, 𑀲𑀼𑀓𑁆𑀓𑀯𑀸𑀭𑀁 𑀯𑀺𑀚𑀸𑀦𑀺𑀬𑀸;

𑀩𑀸𑀮𑁄 𑀆𑀧𑀢𑁆𑀢𑀺𑀩𑀳𑀼𑀮𑁄, 𑀲𑀁𑀲𑀝𑁆𑀞𑁄𑀧𑀺 𑀘 𑀲𑁂𑀬𑁆𑀬𑀲𑁄.

𑀦𑀺𑀬𑀲𑁆𑀲𑀓𑀫𑁆𑀫𑀁 𑀲𑀫𑁆𑀩𑀼𑀤𑁆𑀥𑁄, 𑀆𑀡𑀸𑀧𑁂𑀲𑀺 𑀫𑀳𑀸𑀫𑀼𑀦𑀺;

𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀤𑁆𑀯𑁂 𑀪𑀺𑀓𑁆𑀔𑀽, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸.

𑀅𑀦𑀸𑀘𑀸𑀭𑀜𑁆𑀘 𑀯𑀺𑀯𑀺𑀥𑀁, 𑀆𑀘𑀭𑀺𑀁𑀲𑀼 𑀅𑀲𑀜𑁆𑀜𑀢𑀸;

𑀧𑀩𑁆𑀩𑀸𑀚𑀦𑀻𑀬𑀁 𑀲𑀫𑁆𑀩𑀼𑀤𑁆𑀥𑁄, 𑀓𑀫𑁆𑀫𑀁 𑀲𑀸𑀯𑀢𑁆𑀣𑀺𑀬𑀁 𑀚𑀺𑀦𑁄;

𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀲𑀼𑀥𑀫𑁆𑀫𑁄, 𑀘𑀺𑀢𑁆𑀢𑀲𑁆𑀲𑀸𑀯𑀸𑀲𑀺𑀓𑁄 𑀅𑀳𑀼.

𑀚𑀸𑀢𑀺𑀯𑀸𑀤𑁂𑀦 𑀔𑀼𑀁𑀲𑁂𑀢𑀺, 𑀲𑀼𑀥𑀫𑁆𑀫𑁄 𑀘𑀺𑀢𑁆𑀢𑀼𑀧𑀸𑀲𑀓𑀁;

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁, 𑀆𑀡𑀸𑀧𑁂𑀲𑀺 𑀢𑀣𑀸𑀕𑀢𑁄.

𑀓𑁄𑀲𑀫𑁆𑀩𑀺𑀬𑀁 𑀙𑀦𑁆𑀦𑀁 𑀪𑀺𑀓𑁆𑀔𑀼𑀁, 𑀦𑀺𑀘𑁆𑀙𑀦𑁆𑀢𑀸𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁;

𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀼𑀁, 𑀆𑀡𑀸𑀧𑁂𑀲𑀺 𑀚𑀺𑀦𑀼𑀢𑁆𑀢𑀫𑁄.

𑀙𑀦𑁆𑀦𑁄 𑀢𑀁𑀬𑁂𑀯 𑀆𑀧𑀢𑁆𑀢𑀺𑀁, 𑀧𑀝𑀺𑀓𑀸𑀢𑀼𑀁 𑀦 𑀇𑀘𑁆𑀙𑀢𑀺;

𑀉𑀓𑁆𑀔𑁂𑀧𑀦𑀸𑀧𑁆𑀧𑀝𑀺𑀓𑀫𑁆𑀫𑁂, 𑀆𑀡𑀸𑀧𑁂𑀲𑀺 𑀯𑀺𑀦𑀸𑀬𑀓𑁄.

𑀧𑀸𑀧𑀤𑀺𑀝𑁆𑀞𑀺 𑀅𑀭𑀺𑀝𑁆𑀞𑀲𑁆𑀲, 𑀆𑀲𑀺 𑀅𑀜𑁆𑀜𑀸𑀡𑀦𑀺𑀲𑁆𑀲𑀺𑀢𑀸;

𑀤𑀺𑀝𑁆𑀞𑀺𑀬𑀸𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 [𑀤𑀺𑀝𑁆𑀞𑀺𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 (𑀓.)], 𑀉𑀓𑁆𑀔𑁂𑀧𑀁 𑀚𑀺𑀦𑀪𑀸𑀲𑀺𑀢𑀁.

𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀩𑁆𑀩𑀚𑁆𑀚𑀁 [𑀧𑀩𑁆𑀩𑀸𑀚𑀁 (𑀓.)], 𑀢𑀣𑁂𑀯 𑀧𑀝𑀺𑀲𑀸𑀭𑀡𑀻;

𑀅𑀤𑀲𑁆𑀲𑀦𑀸𑀧𑁆𑀧𑀝𑀺𑀓𑀫𑁆𑀫𑁂, 𑀅𑀦𑀺𑀲𑁆𑀲𑀕𑁆𑀕𑁂 𑀘 𑀤𑀺𑀝𑁆𑀞𑀺𑀬𑀸.

𑀤𑀯𑀸𑀦𑀸𑀘𑀸𑀭𑀽𑀧𑀖𑀸𑀢𑀺, 𑀫𑀺𑀘𑁆𑀙𑀸𑀆𑀚𑀻𑀯𑀫𑁂𑀯 𑀘;

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀫𑁆𑀳𑀺, 𑀅𑀢𑀺𑀭𑁂𑀓𑀧𑀤𑀸 𑀇𑀫𑁂.

𑀅𑀮𑀸𑀪𑀸𑀯𑀡𑁆𑀡𑀸 𑀤𑁆𑀯𑁂 𑀧𑀜𑁆𑀘, 𑀤𑁆𑀯𑁂 𑀧𑀜𑁆𑀘𑀓𑀸𑀢𑀺 𑀦𑀸𑀫𑀓𑀸 [𑀤𑁆𑀯𑁂 𑀧𑀜𑁆𑀘𑀓𑁄𑀢𑀺 𑀦𑀸𑀫𑀓𑁄 (𑀓.)];

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀫𑁆𑀳𑀺, 𑀅𑀢𑀺𑀭𑁂𑀓𑀧𑀤𑀸 𑀇𑀫𑁂.

𑀢𑀚𑁆𑀚𑀦𑀻𑀬𑀁 𑀦𑀺𑀬𑀲𑁆𑀲𑀜𑁆𑀘, 𑀤𑀼𑀯𑁂 𑀓𑀫𑁆𑀫𑀸𑀧𑀺 𑀲𑀸𑀤𑀺𑀲𑀸 [𑀓𑀫𑁆𑀫𑁂𑀲𑀼 𑀲𑀤𑀺𑀲𑀁 (𑀓.)];

𑀧𑀩𑁆𑀩𑀚𑁆𑀚𑀸 [𑀧𑀩𑁆𑀩𑀸𑀚𑀸 (𑀓.)] 𑀧𑀝𑀺𑀲𑀸𑀭𑀻 𑀘, 𑀅𑀢𑁆𑀣𑀺 𑀧𑀤𑀸𑀢𑀺𑀭𑀺𑀢𑁆𑀢𑀢𑀸.

𑀢𑀬𑁄 𑀉𑀓𑁆𑀔𑁂𑀧𑀦𑀸 𑀓𑀫𑁆𑀫𑀸, 𑀲𑀤𑀺𑀲𑀸 𑀢𑁂 𑀯𑀺𑀪𑀢𑁆𑀢𑀺𑀢𑁄;

𑀢𑀚𑁆𑀚𑀦𑀻𑀬𑀦𑀬𑁂𑀦𑀸𑀧𑀺, 𑀲𑁂𑀲𑀓𑀫𑁆𑀫𑀁 𑀯𑀺𑀚𑀸𑀦𑀺𑀬𑀸𑀢𑀺.

𑀓𑀫𑁆𑀫𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀁

𑁧. 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀁

𑁭𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑁄, 𑀲𑁂𑀬𑁆𑀬𑀸𑀪𑀺𑀳𑀸𑀭𑁄, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑁋 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀑𑀡𑁄𑀚𑀦𑀁, 𑀪𑀢𑁆𑀢𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀧𑀸𑀭𑀺𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀁.

𑁭𑁬. ‘‘𑀧𑀸𑀭𑀺𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄. 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁 [𑀲𑀫𑀸𑀤𑀺𑀢𑀩𑁆𑀩𑀁 (𑀓.)], 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 𑁋 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺.

‘‘𑀧𑀸𑀭𑀺𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀉𑀧𑁄𑀲𑀣𑁂 𑀆𑀭𑁄𑀘𑁂𑀢𑀩𑁆𑀩𑀁, 𑀧𑀯𑀸𑀭𑀡𑀸𑀬 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀕𑀺𑀮𑀸𑀦𑁄 𑀳𑁄𑀢𑀺, 𑀤𑀽𑀢𑁂𑀦𑀧𑀺 𑀆𑀭𑁄𑀘𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

𑁮𑁦. ‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

𑁮𑁧. ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁. 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁. 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 [𑀘𑀗𑁆𑀓𑀫𑀦𑁆𑀢𑀁 (𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀸𑀞𑁄)] 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

𑁮𑁨. ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

[𑀫𑀳𑀸𑀯. 𑁩𑁯𑁩] ‘‘𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁 [𑀅𑀓𑀫𑁆𑀫𑀁 𑀢𑀁 (𑀲𑁆𑀬𑀸.)], 𑀦 𑀘 𑀓𑀭𑀡𑀻𑀬’’𑀦𑁆𑀢𑀺.

𑀘𑀢𑀼𑀦𑁆𑀦𑀯𑀼𑀢𑀺𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁮𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸’’𑀢𑀺? ‘‘𑀢𑀬𑁄 𑀔𑁄, 𑀉𑀧𑀸𑀮𑀺, 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸. 𑀲𑀳𑀯𑀸𑀲𑁄, 𑀯𑀺𑀧𑁆𑀧𑀯𑀸𑀲𑁄, 𑀅𑀦𑀸𑀭𑁄𑀘𑀦𑀸 𑁋 𑀇𑀫𑁂 𑀔𑁄, 𑀉𑀧𑀸𑀮𑀺, 𑀢𑀬𑁄 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸’’𑀢𑀺.

𑁮𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺. 𑀦 𑀲𑀓𑁆𑀓𑁄𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀭𑀺𑀯𑀸𑀲𑀁 𑀲𑁄𑀥𑁂𑀢𑀼𑀁. 𑀪𑀕𑀯𑀢𑁄 [𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 (𑀲𑁆𑀬𑀸., 𑀏𑀯𑀫𑀼𑀧𑀭𑀺𑀧𑀺)] 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀦𑀺𑀓𑁆𑀔𑀺𑀧𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀢𑁂𑀦 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀧𑀭𑀺𑀯𑀸𑀲𑀁 𑀦𑀺𑀓𑁆𑀔𑀺𑀧𑀸𑀫𑀻’𑀢𑀺. 𑀦𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀧𑀭𑀺𑀯𑀸𑀲𑁄. ‘𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’𑀢𑀺. 𑀦𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀧𑀭𑀺𑀯𑀸𑀲𑁄.

𑁮𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀸 𑀪𑀺𑀓𑁆𑀔𑀽 𑀢𑀳𑀁 𑀢𑀳𑀁 𑀧𑀓𑁆𑀓𑀫𑀺𑀁𑀲𑀼. 𑀲𑀓𑁆𑀓𑁄𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀭𑀺𑀯𑀸𑀲𑀁 𑀲𑁄𑀥𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀺𑀢𑀼𑀁 [𑀲𑀫𑀸𑀤𑀸𑀢𑀼𑀁 (𑀲𑁆𑀬𑀸. 𑀓𑀁.)]. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀸𑀤𑀺𑀬𑀺𑀢𑀩𑁆𑀩𑁄 [𑀲𑀫𑀸𑀤𑀺𑀢𑀩𑁆𑀩𑁄 (𑀲𑀻. 𑀲𑁆𑀬𑀸. 𑀓𑀁.)]. 𑀢𑁂𑀦 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺. 𑀲𑀫𑀸𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑁄. ‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺. 𑀲𑀫𑀸𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑁄’’.

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁨. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀁

𑁮𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁! 𑀦𑁂𑀢𑀁 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑁄, 𑀲𑁂𑀬𑁆𑀬𑀸𑀪𑀺𑀳𑀸𑀭𑁄, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑁋 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀑𑀡𑁄𑀚𑀦𑀁, 𑀪𑀢𑁆𑀢𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀬𑀣𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀁.

𑁮𑁭. ‘‘𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀓𑀢𑁄 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄. 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 𑁋 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄; 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

[𑀫𑀳𑀸𑀯. 𑁩𑁯𑁩] ‘‘𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁩. 𑀫𑀸𑀦𑀢𑁆𑀢𑀸𑀭𑀳𑀯𑀢𑁆𑀢𑀁

𑁮𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀸𑀦𑀢𑁆𑀢𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 …𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀦𑀢𑁆𑀢𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑁋 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀑𑀡𑁄𑀚𑀦𑀁, 𑀪𑀢𑁆𑀢𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀬𑀣𑀸 𑀫𑀸𑀦𑀢𑁆𑀢𑀸𑀭𑀳𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀁.

𑁮𑁯. ‘‘𑀫𑀸𑀦𑀢𑁆𑀢𑀸𑀭𑀳𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… (𑀬𑀣𑀸 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸, 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.) 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄. 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 𑁋 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 …𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁. 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁. 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

[𑀫𑀳𑀸𑀯. 𑁩𑁯𑁩] ‘‘𑀫𑀸𑀦𑀢𑁆𑀢𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺.

𑀫𑀸𑀦𑀢𑁆𑀢𑀸𑀭𑀳𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁪. 𑀫𑀸𑀦𑀢𑁆𑀢𑀘𑀸𑀭𑀺𑀓𑀯𑀢𑁆𑀢𑀁

𑁯𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑀁, 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀆𑀲𑀦𑀸𑀪𑀺𑀳𑀸𑀭𑁄, 𑀲𑁂𑀬𑁆𑀬𑀸𑀪𑀺𑀳𑀸𑀭𑁄, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑁋 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀑𑀡𑁄𑀚𑀦𑀁, 𑀪𑀢𑁆𑀢𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀁.

𑁯𑁧. ‘‘𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀫𑀸𑀦𑀢𑁆𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄. 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 𑁋 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺.

‘‘𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀉𑀧𑁄𑀲𑀣𑁂 𑀆𑀭𑁄𑀘𑁂𑀢𑀩𑁆𑀩𑀁, 𑀧𑀯𑀸𑀭𑀡𑀸𑀬 𑀆𑀭𑁄𑀘𑁂𑀢𑀩𑁆𑀩𑀁, 𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀕𑀺𑀮𑀸𑀦𑁄 𑀳𑁄𑀢𑀺, 𑀤𑀽𑀢𑁂𑀦𑀧𑀺 𑀆𑀭𑁄𑀘𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸, 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁. 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁. 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄. 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

[𑀫𑀳𑀸𑀯. 𑁩𑁯𑁩] ‘‘𑀫𑀸𑀦𑀢𑁆𑀢𑀘𑀸𑀭𑀺𑀓𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺.

𑁯𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸’’𑀢𑀺? ‘‘𑀘𑀢𑁆𑀢𑀸𑀭𑁄 𑀔𑁄, 𑀉𑀧𑀸𑀮𑀺, 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸. 𑀲𑀳𑀯𑀸𑀲𑁄, 𑀯𑀺𑀧𑁆𑀧𑀯𑀸𑀲𑁄, 𑀅𑀦𑀸𑀭𑁄𑀘𑀦𑀸, 𑀊𑀦𑁂 𑀕𑀡𑁂 𑀘𑀭𑀡𑀁 [𑀘𑀭𑀡𑀦𑁆𑀢𑀺 (𑀓.)] 𑁋 𑀇𑀫𑁂 𑀔𑁄, 𑀉𑀧𑀸𑀮𑀺, 𑀘𑀢𑁆𑀢𑀸𑀭𑁄 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸’’𑀢𑀺.

𑁯𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺. 𑀦 𑀲𑀓𑁆𑀓𑁄𑀦𑁆𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀫𑀸𑀦𑀢𑁆𑀢𑀁 𑀲𑁄𑀥𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑁂𑀦 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀦𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’𑀢𑀺. 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺 𑀫𑀸𑀦𑀢𑁆𑀢𑀁. ‘𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’𑀢𑀺. 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺 𑀫𑀸𑀦𑀢𑁆𑀢’’𑀦𑁆𑀢𑀺.

𑁯𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀸 𑀪𑀺𑀓𑁆𑀔𑀽 𑀢𑀳𑀁 𑀢𑀳𑀁 𑀧𑀓𑁆𑀓𑀫𑀺𑀁𑀲𑀼. 𑀲𑀓𑁆𑀓𑁄𑀦𑁆𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀫𑀸𑀦𑀢𑁆𑀢𑀁 𑀲𑁄𑀥𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀸𑀤𑀺𑀬𑀺𑀢𑀩𑁆𑀩𑀁. 𑀢𑁂𑀦 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺. 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺 𑀫𑀸𑀦𑀢𑁆𑀢𑀁. ‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’𑀢𑀺. 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺 𑀫𑀸𑀦𑀢𑁆𑀢’’𑀦𑁆𑀢𑀺.

𑀫𑀸𑀦𑀢𑁆𑀢𑀘𑀸𑀭𑀺𑀓𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁫. 𑀅𑀩𑁆𑀪𑀸𑀦𑀸𑀭𑀳𑀯𑀢𑁆𑀢𑀁

𑁯𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀩𑁆𑀪𑀸𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀩𑁆𑀪𑀸𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀦𑁆𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑀸 𑀪𑀺𑀓𑁆𑀔𑀽 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑁋 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁, 𑀑𑀡𑁄𑀚𑀦𑀁, 𑀪𑀢𑁆𑀢𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀬𑀣𑀸 𑀅𑀩𑁆𑀪𑀸𑀦𑀸𑀭𑀳𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀁.

𑁯𑁬. ‘‘𑀅𑀩𑁆𑀪𑀸𑀦𑀸𑀭𑀳𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… (𑀬𑀣𑀸 𑀳𑁂𑀝𑁆𑀞𑀸, 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁,) 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄. 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺; 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁; 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁; 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 𑁋 𑀫𑀸 𑀫𑀁 𑀚𑀸𑀦𑀺𑀁𑀲𑀽𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦, 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸…𑀧𑁂…. (𑀬𑀣𑀸 𑀳𑁂𑀝𑁆𑀞𑀸, 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.)

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸…𑀧𑁂… 𑀅𑀦𑀸𑀯𑀸𑀲𑀸…𑀧𑁂… 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄…𑀧𑁂… 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸, 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀬𑀁 𑀚𑀜𑁆𑀜𑀸 𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄; 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁; 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

[𑀫𑀳𑀸𑀯. 𑁩𑁯𑁩] ‘‘𑀅𑀩𑁆𑀪𑀸𑀦𑀸𑀭𑀳𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺.

𑀅𑀩𑁆𑀪𑀸𑀦𑀸𑀭𑀳𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁄 𑀤𑀼𑀢𑀺𑀬𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀧𑀜𑁆𑀘.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀸𑀭𑀺𑀯𑀸𑀲𑀺𑀓𑀸 𑀲𑀸𑀤𑁂𑀦𑁆𑀢𑀺, 𑀧𑀓𑀢𑀢𑁆𑀢𑀸𑀦 𑀪𑀺𑀓𑁆𑀔𑀼𑀦𑀁;

𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀜𑁆𑀘 𑀲𑀸𑀫𑀻𑀘𑀺𑀬𑀁.

𑀆𑀲𑀦𑀁 𑀲𑁂𑀬𑁆𑀬𑀸𑀪𑀺𑀳𑀸𑀭𑀁, 𑀧𑀸𑀤𑁄 𑀧𑀻𑀞𑀁 𑀓𑀣𑀮𑀺𑀓𑀁;

𑀧𑀢𑁆𑀢𑀁 𑀦𑀳𑀸𑀦𑁂 𑀧𑀭𑀺𑀓𑀫𑁆𑀫𑀁, 𑀉𑀚𑁆𑀛𑀸𑀬𑀦𑁆𑀢𑀺 𑀘 𑀧𑁂𑀲𑀮𑀸.

𑀤𑀼𑀓𑁆𑀓𑀝𑀁 𑀲𑀸𑀤𑀺𑀬𑀦𑁆𑀢𑀲𑁆𑀲, 𑀫𑀺𑀣𑀼 𑀧𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 [𑀧𑀼𑀦𑀸𑀧𑀭𑁂 (𑀓.)];

𑀉𑀧𑁄𑀲𑀣𑀁 𑀧𑀯𑀸𑀭𑀡𑀁, 𑀯𑀲𑁆𑀲𑀺𑀓𑁄𑀡𑁄𑀚𑀪𑁄𑀚𑀦𑀁.

𑀲𑀫𑁆𑀫𑀸 𑀘 𑀯𑀢𑁆𑀢𑀦𑀸 𑀢𑀢𑁆𑀣, 𑀧𑀓𑀢𑀢𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑀁;

𑀬𑁄 𑀘 𑀳𑁄𑀢𑀺 𑀧𑀭𑀺𑀬𑀦𑁆𑀢𑁄, 𑀧𑀼𑀭𑁂 𑀧𑀘𑁆𑀙𑀸 𑀢𑀣𑁂𑀯 𑀘 [𑀦 𑀧𑀼𑀭𑁂 𑀧𑀘𑁆𑀙𑀸𑀲𑀫𑀡𑁂𑀦 (𑀲𑀻. 𑀲𑁆𑀬𑀸.)].

𑀆𑀭𑀜𑁆𑀜𑀧𑀺𑀡𑁆𑀟𑀦𑀻𑀳𑀸𑀭𑁄, 𑀆𑀕𑀦𑁆𑀢𑀼𑀓𑁂 𑀉𑀧𑁄𑀲𑀣𑁂;

𑀧𑀯𑀸𑀭𑀡𑀸𑀬 𑀤𑀽𑀢𑁂𑀦, 𑀕𑀦𑁆𑀢𑀩𑁆𑀩𑁄 𑀘 𑀲𑀪𑀺𑀓𑁆𑀔𑀼𑀓𑁄.

𑀏𑀓𑀘𑁆𑀙𑀦𑁆𑀦𑁂 𑀘 𑀯𑀼𑀝𑁆𑀞𑀸𑀦𑀁, 𑀢𑀣𑁂𑀯 𑀘 𑀦𑀺𑀫𑀦𑁆𑀢𑀬𑁂;

𑀆𑀲𑀦𑁂 𑀦𑀻𑀘𑁂 𑀘𑀗𑁆𑀓𑀫𑁂, 𑀙𑀫𑀸𑀬𑀁 𑀘𑀗𑁆𑀓𑀫𑁂𑀦 𑀘.

𑀯𑀼𑀟𑁆𑀠𑀢𑀭𑁂𑀦 𑀅𑀓𑀫𑁆𑀫𑀁, 𑀭𑀢𑁆𑀢𑀺𑀘𑁆𑀙𑁂𑀤𑀸 𑀘 𑀲𑁄𑀥𑀦𑀸;

𑀦𑀺𑀓𑁆𑀔𑀺𑀧𑀦𑀁 𑀲𑀫𑀸𑀤𑀸𑀦𑀁, 𑀯𑀢𑁆𑀢𑀁𑀯 𑀧𑀸𑀭𑀺𑀯𑀸𑀲𑀺𑀓𑁂 [𑀭𑀢𑁆𑀢𑀺 𑀯𑀸 𑀧𑀸𑀭𑀺𑀯𑀸𑀲𑀺𑀓𑁂 (𑀓.), 𑀜𑀸𑀢𑀩𑁆𑀩𑀁 𑀧𑀸𑀭𑀺𑀯𑀸𑀲𑀺𑀓𑀸 (𑀲𑀻. 𑀲𑁆𑀬𑀸.)].

𑀫𑀽𑀮𑀸𑀬 𑀫𑀸𑀦𑀢𑁆𑀢𑀸𑀭𑀳𑀸, 𑀢𑀣𑀸 𑀫𑀸𑀦𑀢𑁆𑀢𑀘𑀸𑀭𑀺𑀓𑀸;

𑀅𑀩𑁆𑀪𑀸𑀦𑀸𑀭𑀳𑁂 𑀦𑀬𑁄 𑀘𑀸𑀧𑀺, 𑀲𑀫𑁆𑀪𑁂𑀤𑀁 𑀦𑀬𑀢𑁄 [𑀲𑀫𑁆𑀪𑁂𑀤𑀦𑀬𑀢𑁄 (𑀲𑁆𑀬𑀸.)] 𑀧𑀼𑀦.

𑀧𑀸𑀭𑀺𑀯𑀸𑀲𑀺𑀓𑁂𑀲𑀼 𑀢𑀬𑁄, 𑀘𑀢𑀼 𑀫𑀸𑀦𑀢𑁆𑀢𑀘𑀸𑀭𑀺𑀓𑁂;

𑀦 𑀲𑀫𑁂𑀦𑁆𑀢𑀺 𑀭𑀢𑁆𑀢𑀺𑀘𑁆𑀙𑁂𑀤𑁂𑀲𑀼 [𑀭𑀢𑁆𑀢𑀺𑀘𑁆𑀙𑁂𑀤𑁂 (𑀇𑀢𑀺𑀧𑀺), 𑀭𑀢𑁆𑀢𑀺𑀘𑁆𑀙𑁂𑀤𑀸 (𑀲𑁆𑀬𑀸.)], 𑀫𑀸𑀦𑀢𑁆𑀢𑁂𑀲𑀼 𑀘 𑀤𑁂𑀯𑀲𑀺;

𑀤𑁆𑀯𑁂 𑀓𑀫𑁆𑀫𑀸 𑀲𑀤𑀺𑀲𑀸 𑀲𑁂𑀲𑀸, 𑀢𑀬𑁄 𑀓𑀫𑁆𑀫𑀸 𑀲𑀫𑀸𑀲𑀫𑀸𑀢𑀺 [𑀲𑀫𑀸 𑀫𑀢𑀸𑀢𑀺 (𑀲𑀻.)].

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁.

𑁩. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀁

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺

𑁯𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 [𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 (𑀲𑁆𑀬𑀸.)] 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁 𑁋

𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁

𑁯𑁮. ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀺. 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀤𑀼𑀢𑀺𑀬𑀫𑁆𑀧𑀺, 𑀲𑁄𑀳𑀁 [𑀤𑀼𑀢𑀺𑀬𑀫𑁆𑀧𑀺 (𑀲𑀻. 𑀓.)] 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀺. 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀢𑀢𑀺𑀬𑀫𑁆𑀧𑀺 𑀲𑁄𑀳𑀁 [𑀢𑀢𑀺𑀬𑀫𑁆𑀧𑀺 (𑀲𑀻. 𑀓.)], 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’𑀢𑀺. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁯𑁯. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀅𑀩𑁆𑀪𑀸𑀦𑀁

𑁧𑁦𑁦. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁂𑀢𑀩𑁆𑀩𑁄 𑁋

𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁 𑀪𑀦𑁆𑀢𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀺.

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀤𑀼𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀺.

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀻𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁧. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀅𑀩𑁆𑀪𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀁

𑁧𑁦𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁩. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁

𑁧𑁦𑁪. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁 [𑀬𑀸𑀘𑀺𑀢𑀩𑁆𑀩𑁄 (𑀲𑀻. 𑀏𑀯𑀫𑀼𑀧𑀭𑀺𑀧𑀺)]. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁 [𑀬𑀸𑀘𑀺𑀢𑀩𑁆𑀩𑁄 (𑀲𑀻. 𑀏𑀯𑀫𑀼𑀧𑀭𑀺𑀧𑀺)]. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀅𑀩𑁆𑀪𑀸𑀦𑀁

𑁧𑁦𑁬. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁂𑀢𑀩𑁆𑀩𑁄 𑁋

‘‘𑀢𑁂𑀦 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀅𑀩𑁆𑀪𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄

𑁧𑁦𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀢𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀘𑀢𑀽𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁯. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀸𑀭𑀺𑀯𑀸𑀲𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸

𑁧𑁧𑁦. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸 [𑀬𑀸𑀘𑀺𑀢𑀩𑁆𑀩𑁄 (𑀲𑀻. 𑀏𑀯𑀫𑀼𑀧𑀭𑀺𑀧𑀺)]. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸 [𑀬𑀸𑀘𑀺𑀢𑀩𑁆𑀩𑁄 (𑀲𑀻. 𑀏𑀯𑀫𑀼𑀧𑀭𑀺𑀧𑀺)]. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁧. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀧𑀝𑀺𑀓𑀲𑁆𑀲𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 [𑀫𑀽𑀮𑀸𑀬 (𑀲𑁆𑀬𑀸.)]. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀫𑀸𑀦𑀢𑁆𑀢𑀸𑀭𑀳𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸

𑁧𑁧𑁨. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁩. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀧𑀝𑀺𑀓𑀲𑁆𑀲𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀺𑀓𑀸𑀧𑀢𑁆𑀢𑀺𑀫𑀸𑀦𑀢𑁆𑀢𑀁

𑁧𑁧𑁪. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺…𑀧𑁂… 𑀲𑁄𑀳𑀁, 𑀪𑀦𑁆𑀢𑁂, 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀫𑀸𑀦𑀢𑁆𑀢𑀘𑀸𑀭𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸

𑁧𑁧𑁬. 𑀲𑁄 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄 𑁋 𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺…𑀧𑁂… 𑀧𑀝𑀺𑀓𑀲𑁆𑀲𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁 𑁋 𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼…𑀧𑁂… 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺…𑀧𑁂… 𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀩𑁆𑀪𑀸𑀦𑀸𑀭𑀳𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸

𑁧𑁧𑁮. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀅𑀩𑁆𑀪𑀸𑀦𑀁

𑁧𑁧𑁯. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁂𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀻’’’𑀢𑀺.

‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁦. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀜𑁆𑀘𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀅𑀩𑁆𑀪𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄

𑁧𑁨𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑁄 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁨. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀓𑁆𑀔𑀧𑀸𑀭𑀺𑀯𑀸𑀲𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸

𑁧𑁨𑁩. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺! 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁪. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀧𑀝𑀺𑀓𑀲𑁆𑀲𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄

𑁧𑁨𑁫. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄 𑁋 𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’’𑀢𑀺.

‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀫𑀸𑀦𑀢𑁆𑀢𑀸𑀭𑀳𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀤𑀺

𑁧𑁨𑁭. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄…𑀧𑁂… 𑀤𑁂𑀢𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀺𑀓𑀸𑀧𑀢𑁆𑀢𑀺𑀫𑀸𑀦𑀢𑁆𑀢𑀁

𑁧𑁨𑁮. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁, 𑀪𑀦𑁆𑀢𑁂, 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁨𑁯. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀫𑀸𑀦𑀢𑁆𑀢𑀘𑀸𑀭𑀺𑀓𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀤𑀺

𑁧𑁩𑁦. 𑀲𑁄 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁…𑀧𑁂… 𑀤𑁂𑀢𑀺…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀩𑁆𑀪𑀸𑀦𑀸𑀭𑀳𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀤𑀺

𑁧𑁩𑁧. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄…𑀧𑁂….

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁…𑀧𑁂… 𑀤𑁂𑀢𑀺…𑀧𑁂….

‘‘𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀅𑀩𑁆𑀪𑀸𑀦𑀁

𑁧𑁩𑁨. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑁂𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀉𑀤𑀸𑀬𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸, 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺𑀁. 𑀢𑀁 𑀫𑀁 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄𑀳𑀁 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄𑀳𑀁, 𑀪𑀦𑁆𑀢𑁂, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀸𑀫𑀻’’’𑀢𑀺.

‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁩. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀓𑁆𑀔𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 [𑀲𑁄 𑀲𑀁𑀖𑀁 (𑀓.)] 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺. 𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄 𑀲𑀗𑁆𑀖𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺. 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀉𑀤𑀸𑀬𑀻 𑀪𑀺𑀓𑁆𑀔𑀼 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀲𑁄 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀲𑀗𑁆𑀖𑀁 𑀅𑀩𑁆𑀪𑀸𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀅𑀩𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀉𑀤𑀸𑀬𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀩𑁆𑀪𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀅𑀩𑁆𑀪𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀻 𑀪𑀺𑀓𑁆𑀔𑀼. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀲𑀫𑀢𑁆𑀢𑀸.

𑁨. 𑀧𑀭𑀺𑀯𑀸𑀲𑁄

𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄

𑁧𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀢𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀘𑀢𑀽𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀙𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀲𑀢𑁆𑀢𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀅𑀝𑁆𑀞𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀦𑀯𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀏𑀓𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀏𑀓𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀏𑀓𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀏𑀓𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸; 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀢𑀲𑁆𑀲𑀸 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀅𑀕𑁆𑀖𑀲𑀫𑁄𑀥𑀸𑀦𑀁

𑁧𑁩𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 [𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 (𑀓. 𑀏𑀯𑀁 𑀬𑀸𑀯𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸)], 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀢𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀘𑀢𑀽𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀙 𑀆𑀧𑀢𑁆𑀢𑀺𑀬𑁄 𑀙𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀅𑀝𑁆𑀞 𑀆𑀧𑀢𑁆𑀢𑀺𑀬𑁄 𑀅𑀝𑁆𑀞𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀦𑀯 𑀆𑀧𑀢𑁆𑀢𑀺𑀬𑁄 𑀦𑀯𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀤𑀲 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀤𑀲 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀤𑀲 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁭. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺, 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀤𑀲 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑁋 𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸…𑀧𑁂… 𑀤𑀲 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑁄

𑁧𑁩𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺.

𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸, 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸, 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻𑀢𑀺.

‘‘𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁩𑁯. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀤𑀼𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀯𑀺𑀥𑀺

𑁧𑁪𑁦. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀤𑀼𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁪𑁧. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀏𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀲𑁄 𑀲𑀗𑁆𑀖𑀁 𑀬𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀺𑀁, 𑀏𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀺𑀁. 𑀲𑁄𑀳𑀁 𑀲𑀗𑁆𑀖𑀁 𑀬𑀁 𑀆𑀧𑀢𑁆𑀢𑀺𑀁 𑀚𑀸𑀦𑀺𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀆𑀧𑀢𑁆𑀢𑀺𑀁 𑀚𑀸𑀦𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀤𑀼𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁪𑁨. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀆𑀧𑀢𑁆𑀢𑀺𑀁 𑀲𑀭𑀢𑀺, 𑀏𑀓𑀁 𑀆𑀧𑀢𑁆𑀢𑀺𑀁 𑀦𑀲𑁆𑀲𑀭𑀢𑀺. 𑀲𑁄 𑀲𑀗𑁆𑀖𑀁 𑀬𑀁 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀆𑀧𑀢𑁆𑀢𑀺𑀁 𑀲𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀆𑀧𑀢𑁆𑀢𑀺𑀁 𑀲𑀭𑀺𑀁, 𑀏𑀓𑀁 𑀆𑀧𑀢𑁆𑀢𑀺𑀁 𑀦𑀲𑁆𑀲𑀭𑀺𑀁. 𑀲𑁄𑀳𑀁 𑀲𑀗𑁆𑀖𑀁 𑀬𑀁 𑀆𑀧𑀢𑁆𑀢𑀺𑀁 𑀲𑀭𑀺𑀁, 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀆𑀧𑀢𑁆𑀢𑀺𑀁 𑀲𑀭𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀤𑀼𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁪𑁩. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸𑀬 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄. 𑀲𑁄 𑀲𑀗𑁆𑀖𑀁 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸𑀬 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄. 𑀲𑁄𑀳𑀁 𑀲𑀗𑁆𑀖𑀁 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑁂𑀫𑀢𑀺𑀓𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀇𑀢𑀭𑀺𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀤𑀼𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁪𑁪. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺𑀁 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄, 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑀸 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀺𑀲𑁆𑀲𑀸, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’’’𑀢𑀺.

𑁧𑁪𑁫. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄; 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑀸 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀺𑀲𑁆𑀲𑀸, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’’’𑀢𑀺.

𑁧𑁪𑁬. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺𑀁 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀸 𑀆𑀧𑀢𑁆𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄; 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑀸 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀺𑀲𑁆𑀲𑀸, 𑀆𑀯𑀼𑀲𑁄, 𑀆𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’’𑀢𑀺.

𑁧𑁪𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑁆𑀢𑀭𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 ‘‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 [𑀇𑀢𑀭𑀫𑁆𑀧𑀺 𑀫𑀸𑀲𑀧𑀭𑀺𑀯𑀸𑀲𑀁 (𑀲𑁆𑀬𑀸. 𑀓. 𑀏𑀯𑀫𑀼𑀧𑀭𑀺𑀧𑀺)] 𑀬𑀸𑀘𑁂𑀬𑁆𑀬’’𑀦𑁆𑀢𑀺.

𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁 𑀔𑁄, 𑀆𑀯𑀼𑀲𑁄, 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁪𑁮. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀲𑁆𑀲 [𑀇𑀢𑀭𑀫𑁆𑀧𑀺 𑀫𑀸𑀲𑀧𑀭𑀺𑀯𑀸𑀲𑀲𑁆𑀲 (𑀓.), 𑀇𑀢𑀭𑀲𑁆𑀲𑀧𑀺 𑀫𑀸𑀲𑀧𑀭𑀺𑀯𑀸𑀲𑀲𑁆𑀲 (𑀲𑁆𑀬𑀸.)] 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑁄 [𑀇𑀢𑀭𑀫𑁆𑀧𑀺 𑀫𑀸𑀲𑀧𑀭𑀺𑀯𑀸𑀲𑁄 (𑀓.), 𑀇𑀢𑀭𑁄𑀧𑀺 𑀫𑀸𑀲𑀧𑀭𑀺𑀯𑀸𑀲𑁄 (𑀲𑁆𑀬𑀸.)]. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁪𑁯. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺 𑁋 𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀏𑀓𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀲𑁆𑀲 𑀫𑁂 𑀧𑀭𑀺𑀯𑀲𑀦𑁆𑀢𑀲𑁆𑀲 𑀮𑀚𑁆𑀚𑀻𑀥𑀫𑁆𑀫𑁄 𑀑𑀓𑁆𑀓𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁫𑁦. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀚𑀸𑀦𑀸𑀢𑀺, 𑀏𑀓𑀁 𑀫𑀸𑀲𑀁 𑀦 𑀚𑀸𑀦𑀸𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀚𑀸𑀦𑀸𑀢𑀺 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀚𑀸𑀦𑀸𑀢𑀺 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀚𑀸𑀦𑀺𑀁, 𑀏𑀓𑀁 𑀫𑀸𑀲𑀁 𑀦 𑀚𑀸𑀦𑀺𑀁. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀚𑀸𑀦𑀺𑀁 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀚𑀸𑀦𑀺𑀁 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀚𑀸𑀦𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁫𑁧. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀲𑀭𑀢𑀺, 𑀏𑀓𑀁 𑀫𑀸𑀲𑀁 𑀦𑀲𑁆𑀲𑀭𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀲𑀭𑀢𑀺 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀲𑀭𑀢𑀺 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀲𑀭𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀲𑀭𑀺𑀁, 𑀏𑀓𑀁 𑀫𑀸𑀲𑀁 𑀦𑀲𑁆𑀲𑀭𑀺𑀁. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀲𑀭𑀺𑀁 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀲𑀭𑀺𑀁 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀲𑀭𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁫𑁨. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀁 𑀫𑀸𑀲𑀁 𑀯𑁂𑀫𑀢𑀺𑀓𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀲𑁄 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀁 𑀫𑀸𑀲𑀁 𑀯𑁂𑀫𑀢𑀺𑀓𑁄. 𑀲𑁄𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀺𑀁. 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀸𑀦𑁆𑀦𑀸𑀦𑀁 𑀬𑀁 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀁 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀲𑁄𑀳𑀁 𑀧𑀭𑀺𑀯𑀲𑀦𑁆𑀢𑁄 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀦𑀺𑀩𑁆𑀩𑁂𑀫𑀢𑀺𑀓𑁄. 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑁂𑀬𑁆𑀬’𑀦𑁆𑀢𑀺. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀇𑀢𑀭𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸.

𑁧𑁫𑁩. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑁄 𑀫𑀸𑀲𑁄 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺𑀁 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀏𑀓𑁄 𑀫𑀸𑀲𑁄 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑁄 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀅𑀚𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀲𑁆𑀲, 𑀆𑀯𑀼𑀲𑁄, 𑀫𑀸𑀲𑀲𑁆𑀲 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’𑀢𑀺.

𑁧𑁫𑁪. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑁄 𑀫𑀸𑀲𑁄 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺𑀁 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑁄 𑀫𑀸𑀲𑁄 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑁄 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀅𑀲𑁆𑀲𑀭𑀫𑀸𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀲𑁆𑀲, 𑀆𑀯𑀼𑀲𑁄, 𑀫𑀸𑀲𑀲𑁆𑀲 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’𑀢𑀺.

𑁧𑁫𑁫. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑁄 𑀫𑀸𑀲𑁄 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀢𑀲𑁆𑀲 𑀧𑀭𑀺𑀯𑀲𑀦𑁆𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀓𑀺𑀁 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄? 𑀓𑀺𑀲𑁆𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺? 𑀢𑁂 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄; 𑀏𑀓𑁄 𑀫𑀸𑀲𑁄 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀏𑀓𑁄 𑀫𑀸𑀲𑁄 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄. 𑀲𑁄 𑀲𑀗𑁆𑀖𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀬𑀸𑀘𑀺. 𑀢𑀲𑁆𑀲 𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀤𑁆𑀯𑁂𑀫𑀸𑀲𑀧𑀭𑀺𑀯𑀸𑀲𑀁 𑀅𑀤𑀸𑀲𑀺. 𑀢𑀸𑀬𑁄 𑀅𑀬𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀢𑀸𑀲𑀸𑀬𑀁 𑀪𑀺𑀓𑁆𑀔𑀼 𑀧𑀭𑀺𑀯𑀲𑀢𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀬𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀦𑀺𑀩𑁆𑀩𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀥𑀫𑁆𑀫𑀢𑁆𑀢𑀸 𑀭𑀼𑀳𑀢𑀺. 𑀬𑁄 𑀘 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀫𑀸𑀲𑁄 𑀯𑁂𑀫𑀢𑀺𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀅𑀥𑀫𑁆𑀫𑀺𑀓𑀁 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀭𑀺𑀯𑀸𑀲𑀤𑀸𑀦𑀁; 𑀅𑀥𑀫𑁆𑀫𑀢𑁆𑀢𑀸 𑀦 𑀭𑀼𑀳𑀢𑀺. 𑀏𑀓𑀲𑁆𑀲, 𑀆𑀯𑀼𑀲𑁄, 𑀫𑀸𑀲𑀲𑁆𑀲 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’’𑀢𑀺.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄

𑁧𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄. 𑀲𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀫𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀫𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀸𑀫𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀸𑀫𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀤𑁂𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑁄 𑁋

‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀫𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀫𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀸𑀫𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀸𑀫𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁫𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄. 𑀲𑁄 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁫𑁮. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄; 𑀏𑀯𑀁 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄? 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺; 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺; 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄; 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑁧𑁫𑁯. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄? 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺, 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀚𑀸𑀦𑀸𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀏𑀓𑀘𑁆𑀘𑀁 𑀲𑀭𑀢𑀺, 𑀏𑀓𑀘𑁆𑀘𑀁 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀲𑀭𑀢𑀺; 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀏𑀓𑀘𑁆𑀘𑁂 𑀯𑁂𑀫𑀢𑀺𑀓𑁄, 𑀏𑀓𑀘𑁆𑀘𑁂 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑁋 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑀧𑀭𑀺𑀯𑀸𑀲𑁄 𑀦𑀺𑀝𑁆𑀞𑀺𑀢𑁄.

𑁩. 𑀘𑀢𑁆𑀢𑀸𑀮𑀻𑀲𑀓𑀁

𑁧𑁬𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀯𑀺𑀩𑁆𑀪𑀫𑀺. 𑀲𑁄 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀯𑀺𑀩𑁆𑀪𑀫𑀢𑀺. 𑀯𑀺𑀩𑁆𑀪𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀲𑀸𑀫𑀡𑁂𑀭𑁄 𑀳𑁄𑀢𑀺. 𑀲𑀸𑀫𑀡𑁂𑀭𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺. 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀅𑀦𑀼𑀫𑁆𑀫𑀢𑁆𑀢𑀓𑁄 𑀳𑁄𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀅𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀼𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺. 𑀯𑁂𑀤𑀦𑀸𑀝𑁆𑀝𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀅𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺 [𑀉𑀓𑁆𑀔𑀺𑀧𑀺𑀬𑀢𑀺 (𑀲𑁆𑀬𑀸.), 𑀉𑀓𑁆𑀔𑀺𑀧𑀻𑀬𑀢𑀺 (𑀓.)]. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺 [𑀑𑀲𑀸𑀭𑀺𑀬𑀢𑀺 (𑀲𑁆𑀬𑀸.), 𑀑𑀲𑀸𑀭𑀻𑀬𑀢𑀺 (𑀓.)], 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑁄 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄, 𑀅𑀯𑀲𑁂𑀲𑁄 𑀧𑀭𑀺𑀯𑀲𑀺𑀢𑀩𑁆𑀩𑁄.

𑁧𑁬𑁧. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀯𑀺𑀩𑁆𑀪𑀫𑀢𑀺. 𑀯𑀺𑀩𑁆𑀪𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀲𑀸𑀫𑀡𑁂𑀭𑁄 𑀳𑁄𑀢𑀺…𑀧𑁂… 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺…𑀧𑁂… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄.

𑁧𑁬𑁨. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄 𑀯𑀺𑀩𑁆𑀪𑀫𑀢𑀺. 𑀯𑀺𑀩𑁆𑀪𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀤𑀸𑀦𑀁 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄 𑀲𑀸𑀫𑀡𑁂𑀭𑁄 𑀳𑁄𑀢𑀺…𑀧𑁂… 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺…𑀧𑁂… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀤𑀸𑀦𑀁 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁬𑁩. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀯𑀺𑀩𑁆𑀪𑀫𑀢𑀺. 𑀯𑀺𑀩𑁆𑀪𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀭𑀺𑀬𑀸 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄; 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀁, 𑀬𑀁 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀁 𑀲𑀼𑀘𑀺𑀡𑁆𑀡𑀁, 𑀅𑀯𑀲𑁂𑀲𑀁 𑀘𑀭𑀺𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀲𑀸𑀫𑀡𑁂𑀭𑁄 𑀳𑁄𑀢𑀺…𑀧𑁂… 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺…𑀧𑁂… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀦𑀢𑁆𑀢𑀘𑀭𑀺𑀬𑀸 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀼𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄; 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀁, 𑀬𑀁 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀁 𑀲𑀼𑀘𑀺𑀡𑁆𑀡𑀁, 𑀅𑀯𑀲𑁂𑀲𑀁 𑀘𑀭𑀺𑀢𑀩𑁆𑀩𑀁.

𑁧𑁬𑁪. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀪𑀸𑀦𑀸𑀭𑀳𑁄 𑀯𑀺𑀩𑁆𑀪𑀫𑀢𑀺. 𑀯𑀺𑀩𑁆𑀪𑀦𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀁 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄; 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀁, 𑀬𑀁 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀁 𑀲𑀼𑀘𑀺𑀡𑁆𑀡𑀁. 𑀲𑁄 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀩𑁆𑀪𑀸𑀦𑀸𑀭𑀳𑁄 𑀲𑀸𑀫𑀡𑁂𑀭𑁄 𑀳𑁄𑀢𑀺…𑀧𑁂… 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺…𑀧𑁂…

𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺…𑀧𑁂… 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀉𑀓𑁆𑀔𑀺𑀧𑀺𑀬𑁆𑀬𑀢𑀺. 𑀉𑀓𑁆𑀔𑀺𑀢𑁆𑀢𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀩𑁆𑀪𑀸𑀦𑀁 𑀦 𑀭𑀼𑀳𑀢𑀺. 𑀲𑁄 𑀘𑁂 𑀧𑀼𑀦 𑀑𑀲𑀸𑀭𑀺𑀬𑁆𑀬𑀢𑀺, 𑀢𑀲𑁆𑀲 𑀢𑀤𑁂𑀯 𑀧𑀼𑀭𑀺𑀫𑀁 𑀧𑀭𑀺𑀯𑀸𑀲𑀤𑀸𑀦𑀁. 𑀬𑁄 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀲𑀼𑀤𑀺𑀦𑁆𑀦𑁄, 𑀬𑁄 𑀧𑀭𑀺𑀯𑀼𑀢𑁆𑀣𑁄 𑀲𑀼𑀧𑀭𑀺𑀯𑀼𑀢𑁆𑀣𑁄; 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀁, 𑀬𑀁 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀁 𑀲𑀼𑀘𑀺𑀡𑁆𑀡𑀁. 𑀲𑁄 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄.

𑀘𑀢𑁆𑀢𑀸𑀮𑀻𑀲𑀓𑀁 𑀲𑀫𑀢𑁆𑀢𑀁.

𑁪. 𑀙𑀢𑁆𑀢𑀺𑀁𑀲𑀓𑀁

𑁧𑁬𑁫. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀸 [𑀧𑀭𑀺𑀫𑀸𑀡𑀸𑀬𑁄 (𑀲𑀻. 𑀲𑁆𑀬𑀸.)] 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀅𑀧𑀭𑀺𑀫𑀸𑀡𑀸 [𑀅𑀧𑀭𑀺𑀫𑀸𑀡𑀸𑀬𑁄 (𑀲𑀻. 𑀲𑁆𑀬𑀸.)] 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀅𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀅𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄…𑀧𑁂… 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄…𑀧𑁂… (𑀬𑀣𑀸𑀧𑀭𑀺𑀯𑀸𑀲𑀁 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁) 𑀅𑀩𑁆𑀪𑀸𑀦𑀸𑀭𑀳𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺…𑀧𑁂… 𑀅𑀧𑀭𑀺𑀫𑀸𑀡𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀅𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀅𑀧𑀭𑀺𑀫𑀸𑀡𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀧𑀝𑀺𑀘𑁆𑀙𑀦𑁆𑀦𑀸𑀬𑁄…𑀧𑁂… 𑀧𑀭𑀺𑀫𑀸𑀡𑀸𑀬𑁄𑀧𑀺 𑀅𑀧𑀭𑀺𑀫𑀸𑀡𑀸𑀬𑁄𑀧𑀺 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑀙𑀢𑁆𑀢𑀺𑀁𑀲𑀓𑀁 𑀲𑀫𑀢𑁆𑀢𑀁.

𑁫. 𑀫𑀸𑀦𑀢𑁆𑀢𑀲𑀢𑀓𑀁

𑁧𑁬𑁬. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 [𑀲𑁄 𑀘𑁂 𑀧𑀼𑀦 (𑀓.)] 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁬𑁭. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁬𑁮. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀚𑀸𑀦𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁬𑁯. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀲𑀭𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀲𑁆𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀲𑀭𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀲𑁆𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀲𑀭𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀲𑁆𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺. 𑀬𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀲𑀭𑀺𑀢𑁆𑀯𑀸 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀅𑀲𑁆𑀲𑀭𑀺𑀢𑁆𑀯𑀸 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀲𑀭𑀺𑀢𑁆𑀯𑀸 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁭𑁦. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄. 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄. 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄. 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄. 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑁧𑁭𑁧. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀫𑀡𑁂𑀭𑁄 𑀳𑁄𑀢𑀺…𑀧𑁂… 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺…𑀧𑁂… 𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺…𑀧𑁂… (𑀬𑀣𑀸 𑀳𑁂𑀝𑁆𑀞𑀸 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁) 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺…𑀧𑁂… 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺…𑀧𑁂… 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀚𑀸𑀦𑀸𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦 𑀚𑀸𑀦𑀸𑀢𑀺…𑀧𑁂… 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀲𑀭𑀢𑀺, 𑀏𑀓𑀘𑁆𑀘𑀸 𑀆𑀧𑀢𑁆𑀢𑀺𑀬𑁄 𑀦𑀲𑁆𑀲𑀭𑀢𑀺…𑀧𑁂… 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀏𑀓𑀘𑁆𑀘𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄. 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺; 𑀬𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀯𑁂𑀤𑀦𑀸𑀝𑁆𑀝𑁄 𑀳𑁄𑀢𑀺. 𑀲𑁄 𑀧𑀼𑀦 𑀅𑀯𑁂𑀤𑀦𑀸𑀝𑁆𑀝𑁄 𑀳𑀼𑀢𑁆𑀯𑀸 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺…𑀧𑁂… 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺…𑀧𑁂… 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀢𑀺…𑀧𑁂… 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀯𑁂𑀫𑀢𑀺𑀓𑁄 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀙𑀸𑀤𑁂𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀲𑁆𑀫𑀺𑀜𑁆𑀘 𑀧𑀘𑁆𑀙𑀺𑀫𑀲𑁆𑀫𑀺𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑀫𑀸𑀦𑀢𑁆𑀢𑀲𑀢𑀁 𑀦𑀺𑀝𑁆𑀞𑀺𑀢𑀁.

𑁬. 𑀲𑀫𑀽𑀮𑀸𑀬𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀘𑀢𑀼𑀲𑁆𑀲𑀢𑀁

𑁧𑁭𑁨. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀲𑁄 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑁧𑁭𑁩. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀦𑀘𑁆𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀧𑀺. 𑀲𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺; 𑀬𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂 𑀦𑀘𑁆𑀙𑀸𑀤𑁂𑀲𑀺 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀘𑁆𑀙𑀸 𑀙𑀸𑀤𑁂𑀢𑀺. 𑀲𑁄 𑀪𑀺𑀓𑁆𑀔𑀼 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀜𑁆𑀘𑀲𑁆𑀲 𑀆𑀧𑀢𑁆𑀢𑀻𑀦𑀁 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄.

𑁧𑁭𑁪. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀯𑀲𑀦𑁆𑀢𑁄 𑀅𑀦𑁆𑀢𑀭𑀸 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀏𑀓𑀘𑁆𑀘𑀸 𑀆𑀧𑀢𑁆𑀢