📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀯𑀺𑀫𑀢𑀺𑀯𑀺𑀦𑁄𑀤𑀦𑀻-𑀝𑀻𑀓𑀸 (𑀤𑀼𑀢𑀺𑀬𑁄 𑀪𑀸𑀕𑁄)

𑁫. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀫𑀼𑀲𑀸𑀯𑀸𑀤𑀯𑀕𑁆𑀕𑁄

𑁧. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧. 𑀫𑀼𑀲𑀸𑀯𑀸𑀤𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀔𑀼𑀤𑁆𑀤𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀔𑀼𑀤𑁆𑀤𑀓-𑀲𑀤𑁆𑀤𑁄 𑀩𑀳𑀼-𑀲𑀤𑁆𑀤𑀧𑀭𑀺𑀬𑀸𑀬𑁄’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀕𑁆𑀕𑁂𑀲𑀼, 𑀔𑀼𑀤𑁆𑀤𑀓𑁂𑀲𑀼 𑀯𑀸. ‘‘𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀳𑁂𑀢𑀼𑀦𑁄 𑀯𑀺𑀧𑀓𑁆𑀔𑁂𑀧𑀺 𑀦𑀺𑀩𑁆𑀩𑀸𑀦𑁂 𑀯𑀢𑁆𑀢𑀦𑀢𑁄 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑁂 𑀧𑀭𑁂𑀳𑀺 𑀯𑀼𑀢𑁆𑀢𑁂 ‘‘𑀦 𑀫𑀬𑀸 𑀅𑀬𑀁 𑀳𑁂𑀢𑀼 𑀯𑀼𑀢𑁆𑀢𑁄’’𑀢𑀺 ¶ 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀧𑀼𑀦 ‘‘𑀚𑀸𑀢𑀺𑀥𑀫𑁆𑀫𑀢𑁄𑀢𑀺 𑀫𑀬𑀸 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺. ‘‘𑀲𑀫𑁆𑀧𑀚𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀚𑀸𑀦𑀦𑁆𑀢𑁄’’𑀢𑀺.

𑁨. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀅𑀢𑁆𑀢𑀦𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀢𑀣𑀪𑀸𑀯𑀁 𑀧𑀼𑀩𑁆𑀩𑁂𑀧𑀺 𑀚𑀸𑀦𑀺𑀢𑁆𑀯𑀸, 𑀯𑀘𑀦𑀓𑁆𑀔𑀡𑁂 𑀘 𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀪𑀡𑀦𑁂. 𑀢𑁂𑀦𑀸𑀳 ‘‘𑀚𑀸𑀦𑀺𑀢𑁆𑀯𑀸’’𑀢𑀺𑀆𑀤𑀺. 𑀫𑀼𑀲𑀸𑀯𑀸𑀤𑁂𑀢𑀺 𑀘 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀢𑀲𑁆𑀫𑀸 𑀫𑀼𑀲𑀸𑀪𑀡𑀦𑀦𑀺𑀫𑀺𑀢𑁆𑀢𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀫𑁂𑀢𑁆𑀣, 𑀇𑀢𑁄 𑀧𑀭𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩. 𑀯𑀤𑀦𑁆𑀢𑀺 ¶ 𑀏𑀢𑀸𑀬𑀸𑀢𑀺 𑀯𑀸𑀘𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸’’𑀢𑀺𑀆𑀤𑀺. ‘‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀘𑀓𑁆𑀔𑀼𑀦𑀸 𑀤𑀺𑀝𑁆𑀞’’𑀦𑁆𑀢𑀺 𑀧𑀸𑀓𑀝𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀴𑀸𑀭𑀺𑀓𑁂𑀦𑀸’’𑀢𑀺.

𑁧𑁧. 𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣𑀸𑀧𑀺 𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀯𑀼𑀢𑁆𑀢𑀢𑁆𑀢𑀸 𑀫𑀼𑀲𑀸𑀯𑀸𑀤𑁄 𑀚𑀸𑀢𑁄. 𑀆𑀧𑀢𑁆𑀢𑀺𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁, 𑀦 𑀤𑀼𑀩𑁆𑀪𑀸𑀲𑀺𑀢𑀁. 𑀚𑀸𑀢𑀺𑀆𑀤𑀻𑀳𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀧𑀭𑀁 𑀤𑀯𑀸 𑀯𑀤𑀦𑁆𑀢𑀲𑁆𑀲 𑀳𑀺 𑀢𑀁 𑀳𑁄𑀢𑀺. 𑀘𑀸𑀭𑁂𑀲𑀼𑀦𑁆𑀢𑀺 𑀉𑀧𑀦𑁂𑀲𑀼𑀁. 𑀯𑀢𑁆𑀣𑀼𑀯𑀺𑀧𑀭𑀻𑀢𑀢𑀸, 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀢𑀸, 𑀬𑀫𑀢𑁆𑀣𑀁 𑀯𑀢𑁆𑀣𑀼𑀓𑀸𑀫𑁄, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀜𑁆𑀜𑀸𑀧𑀦𑀧𑀬𑁄𑀕𑁄 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀯𑀢𑁆𑀣𑀼𑀯𑀺𑀧𑀭𑀻𑀢𑀢𑀸𑀬 𑀳𑀺 𑀅𑀲𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀯𑀺𑀜𑁆𑀜𑀸𑀧𑀺𑀢𑁂𑀧𑀺 𑀫𑀼𑀲𑀸𑀯𑀸𑀤𑁄 𑀦 𑀳𑁄𑀢𑀺, 𑀤𑀼𑀓𑁆𑀓𑀝𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑀸𑀧𑀺 𑀅𑀗𑁆𑀕𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀢𑁆𑀣𑀁 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁, 𑀧𑀭𑀺𑀬𑀸𑀬𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀦𑀢𑁆𑀣𑀁 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑀗𑁆𑀖𑀸𑀤𑀺𑀲𑁂𑀲𑁂𑀦𑀸𑀦𑀼𑀤𑁆𑀥𑀁𑀲𑀦𑀑𑀫𑀲𑀯𑀸𑀤𑀸𑀤𑀻𑀲𑀼 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀲𑀼 𑀤𑀼𑀓𑁆𑀓𑀝𑀁, 𑀉𑀓𑁆𑀓𑀝𑁆𑀞𑀳𑀻𑀦𑀚𑀸𑀢𑀺𑀆𑀤𑀻𑀳𑀺 𑀤𑀯𑀸 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀁, 𑀓𑁂𑀯𑀮𑀁 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀇𑀥 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁.

𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁩. 𑀤𑀼𑀢𑀺𑀬𑁂 𑀧𑀼𑀩𑁆𑀩𑁂 𑀧𑀢𑀺𑀝𑁆𑀞𑀺𑀢𑀸𑀭𑀧𑁆𑀧𑀤𑁂𑀲𑀁 𑀧𑀼𑀦 𑀅𑀭𑁂 𑀧𑀢𑁆𑀢𑁂𑀢𑀺 𑀧𑀞𑀫𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀦𑁂𑀫𑀺𑀧𑁆𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀦 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁂𑀢𑀺 𑀅𑀢𑁆𑀣𑁄.

𑁧𑁫. 𑀧𑀼𑀩𑁆𑀩𑁂𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁. 𑀧𑀼𑀧𑁆𑀨𑀙𑀟𑁆𑀟𑀓𑀸 𑀦𑀸𑀫 𑀕𑀩𑁆𑀪𑀫𑀮𑀸𑀤𑀺𑀳𑀸𑀭𑀓𑀸. 𑀢𑀘𑁆𑀙𑀓𑀓𑀫𑁆𑀫𑀦𑁆𑀢𑀺 𑀧𑀸𑀲𑀸𑀡𑀓𑁄𑀝𑁆𑀝𑀦𑀸𑀤𑀺𑀯𑀟𑁆𑀠𑀓𑀻𑀓𑀫𑁆𑀫𑀁 ¶ . 𑀳𑀢𑁆𑀣𑀫𑀼𑀤𑁆𑀤𑀸𑀕𑀡𑀦𑀸𑀢𑀺 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑁂𑀦𑁂𑀯 𑀕𑀡𑀦𑀸. 𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀸 𑀦𑀸𑀫 𑀏𑀓𑀝𑁆𑀞𑀸𑀦𑀤𑀲𑀝𑁆𑀞𑀸𑀦𑀸𑀤𑀻𑀲𑀼 𑀲𑀸𑀭𑀺𑀬𑁄 𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀕𑀡𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀓𑀮𑀦𑀧𑀝𑀉𑀧𑁆𑀧𑀸𑀤𑀦𑀯𑁄𑀓𑁆𑀮𑀦𑀪𑀸𑀕𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀧𑀺𑀡𑁆𑀟𑀕𑀡𑀦𑀸 𑀕𑀳𑀺𑀢𑀸. 𑀬𑀲𑁆𑀲 𑀲𑀸 𑀧𑀕𑀼𑀡𑀸, 𑀲𑁄 𑀭𑀼𑀓𑁆𑀔𑀫𑁆𑀧𑀺 𑀤𑀺𑀲𑁆𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀏𑀢𑁆𑀣 𑀧𑀡𑁆𑀡𑀸𑀦𑀻’’𑀢𑀺 ¶ 𑀚𑀸𑀦𑀸𑀢𑀺. 𑀬𑀪-𑀫𑁂𑀣𑀼𑀦𑁂𑀢𑀺 𑀯𑀘𑀦𑀢𑁄 𑀆𑀳 ‘‘𑀬-𑀓𑀸𑀭-𑀪-𑀓𑀸𑀭𑁂’’𑀢𑀺𑀆𑀤𑀺.

𑁧𑁬. 𑀦 𑀧𑀼𑀭𑀺𑀫𑁂𑀦𑀸𑀢𑀺 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑁂𑀦. 𑀲𑁄𑀧𑀺 𑀆𑀧𑀢𑁆𑀢𑀺𑀬𑀸𑀢𑀺 𑀉𑀧𑀲𑀕𑁆𑀕𑀸𑀤𑀺𑀯𑀺𑀲𑀺𑀝𑁆𑀞𑁂𑀳𑀺𑀧𑀺 𑀯𑀤𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸𑀯 𑀓𑀸𑀭𑁂𑀢𑀩𑁆𑀩𑁄.

𑁨𑁬. 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑁂𑀳𑀺𑀧𑀺 𑀧𑀭𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲𑀧𑀺 𑀤𑀼𑀩𑁆𑀪𑀸𑀲𑀺𑀢𑀫𑁂𑀯𑀸𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺 𑀢𑀢𑁄 𑀮𑀸𑀫𑀓𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀸, 𑀅𑀦𑀸𑀧𑀢𑁆𑀢𑀺𑀬𑀸𑀧𑁂𑀢𑁆𑀣 𑀪𑀯𑀺𑀢𑀼𑀁 𑀅𑀬𑀼𑀢𑁆𑀢𑀢𑁆𑀢𑀸. 𑀲𑀩𑁆𑀩𑀲𑀢𑁆𑀢𑀸𑀢𑀺 𑀏𑀢𑁆𑀣 𑀯𑀘𑀦𑀢𑁆𑀣𑀯𑀺𑀤𑀽𑀳𑀺 𑀢𑀺𑀭𑀘𑁆𑀙𑀸𑀦𑀸𑀤𑀬𑁄𑀧𑀺 𑀕𑀳𑀺𑀢𑀸.

𑁩𑁫. 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀯𑀸 𑀧𑀸𑀧𑀕𑀭𑀳𑀺𑀢𑀸𑀬 𑀯𑀸 𑀯𑀤𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀓𑁄𑀧𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀓𑀸𑀬𑀯𑀺𑀓𑀸𑀭𑀫𑀢𑁆𑀢𑁂𑀦𑀧𑀺 𑀑𑀫𑀲𑀦𑀲𑀫𑁆𑀪𑀯𑀢𑁄 ‘‘𑀢𑀺𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 𑀧𑀦 ‘‘𑀘𑀢𑀼𑀢𑁆𑀣𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦…𑀧𑁂… 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑁨𑁭𑁬) 𑀇𑀢𑀭𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀘𑀫𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑀧𑀦𑁂𑀢𑁆𑀣 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀻’’𑀢𑀺. 𑀤𑀯𑀓𑀫𑁆𑀬𑀢𑀸𑀬 𑀳𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀑𑀫𑀲𑀦𑁆𑀢𑀲𑁆𑀲𑀧𑀺 𑀯𑀸𑀘𑀸𑀘𑀺𑀢𑁆𑀢𑀫𑁂𑀯 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀺, 𑀦 𑀧𑀦 𑀓𑀸𑀬𑁄 𑀯𑀺𑀚𑁆𑀚𑀫𑀸𑀦𑁄𑀧𑀺 𑀥𑀫𑁆𑀫𑀤𑁂𑀲𑀦𑀸𑀧𑀢𑁆𑀢𑀺 𑀯𑀺𑀬 𑀓𑁂𑀯𑀮𑀁 𑀓𑀸𑀬𑀯𑀺𑀓𑀸𑀭𑁂𑀦𑁂𑀯. 𑀑𑀫𑀲𑀦𑁆𑀢𑀲𑁆𑀲 𑀧𑀦 𑀓𑀺𑀜𑁆𑀘𑀸𑀧𑀺 𑀇𑀥 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀅𑀣 𑀔𑁄 𑀓𑀸𑀬𑀓𑀻𑀴𑀸𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑁂𑀦 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀲𑀫𑁆𑀧𑀦𑁆𑀦𑀁 𑀚𑀸𑀢𑀺𑀆𑀤𑀻𑀳𑀺 𑀅𑀦𑀜𑁆𑀜𑀸𑀧𑀤𑁂𑀲𑁂𑀦 𑀅𑀓𑁆𑀓𑁄𑀲𑀦𑀁, 𑀢𑀲𑁆𑀲 𑀚𑀸𑀦𑀦𑀁, 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀢𑀸𑀤𑀻𑀦𑀁 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬. 𑀢𑀢𑀺𑀬𑁂 𑀪𑀡𑁆𑀟𑀦𑀁 𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀪𑀡𑁆𑀟𑀦𑀚𑀸𑀢𑀸. 𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑀸, 𑀯𑀸𑀘𑀸, 𑀲𑀫𑀕𑁆𑀕𑁂 𑀪𑀺𑀦𑁆𑀦𑁂 ¶ 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀺𑀲𑀼𑀡𑁄, 𑀢𑀲𑁆𑀲 𑀓𑀫𑁆𑀫𑀁 𑀧𑁂𑀲𑀼𑀜𑁆𑀜𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀥𑀸𑀧𑀺 ¶ 𑀚𑀸𑀢𑀺𑀆𑀤𑀻𑀳𑀺 𑀤𑀲𑀳𑀺 𑀯𑀢𑁆𑀣𑀽𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑁂𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀤𑀼𑀓𑁆𑀓𑀝𑀁. 𑀅𑀦𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀧𑀦 𑀉𑀧𑀲𑀁𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀚𑀸𑀢𑀺𑀆𑀤𑀻𑀳𑀺 𑀅𑀦𑀜𑁆𑀜𑀸𑀧𑀤𑁂𑀲𑁂𑀦 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀉𑀧𑀲𑀁𑀳𑀭𑀡𑀁, 𑀧𑀺𑀬𑀓𑀫𑁆𑀬𑀢𑀸𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀲𑀼 𑀅𑀜𑁆𑀜𑀢𑀭𑀢𑀸, 𑀢𑀲𑁆𑀲 𑀯𑀺𑀚𑀸𑀦𑀦𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫. 𑀘𑀢𑀼𑀢𑁆𑀣𑁂 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑁂𑀦 𑀲𑀤𑀺𑀲𑀦𑁆𑀢𑀺 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘-𑀲𑀤𑁆𑀤𑁂𑀦 𑀲𑀤𑀺𑀲𑀁 ‘‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘-𑀲𑀤𑁆𑀤𑀁 𑀯𑀤𑀢𑀺. 𑀅𑀓𑁆𑀔𑀭𑀲𑀫𑀽𑀳𑁄𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀯𑀼𑀢𑁆𑀢𑁄. 𑀧𑀤𑀦𑁆𑀢𑀺 𑀯𑀺𑀪𑀢𑁆𑀢𑀺𑀅𑀦𑁆𑀢𑀁 𑀯𑀼𑀢𑁆𑀢𑀁.

𑀏𑀓𑀁 𑀧𑀤𑀦𑁆𑀢𑀺 𑀕𑀸𑀣𑀸𑀧𑀤𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀤𑀕𑀡𑀦𑀸𑀬𑀸𑀢𑀺 𑀕𑀸𑀣𑀸𑀧𑀤𑀕𑀡𑀦𑀸𑀬. 𑀅𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀲𑀤𑁆𑀥𑀺𑀁 𑀅𑀓𑀣𑁂𑀢𑁆𑀯𑀸. 𑀏𑀢𑁂𑀦 𑀕𑀸𑀣𑀸𑀬 𑀧𑀘𑁆𑀙𑀺𑀫𑀧𑀸𑀤𑁂 𑀯𑀼𑀘𑁆𑀘𑀫𑀸𑀦𑁂 𑀲𑀸𑀫𑀡𑁂𑀭𑁄 𑀧𑀞𑀫𑀧𑀸𑀤𑀸𑀤𑀺𑀁 𑀯𑀤𑀢𑀺, 𑀆𑀧𑀢𑁆𑀢𑀺𑀬𑁂𑀯, 𑀢𑀲𑁆𑀫𑀺𑀁 𑀦𑀺𑀲𑁆𑀲𑀤𑁆𑀤𑁂 𑀏𑀯 𑀇𑀢𑀭𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑁄𑀢𑀺 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑀁 𑀧𑁄𑀭𑀸𑀡𑀝𑁆𑀞𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀤𑀸𑀦𑀺𑀧𑀺 ‘‘𑀬𑀣𑀸𑀧𑀺 𑀤𑀻𑀧𑀺𑀓𑁄 𑀦𑀸𑀫, 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀢𑁂 𑀫𑀺𑀕𑁂’’𑀢𑀺 (𑀫𑀺. 𑀧. 𑁬.𑁧.𑁫; 𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁪; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁭; 𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁫; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁬𑁩) 𑀏𑀯𑀫𑀸𑀤𑀺𑀓𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀅𑀢𑁆𑀣𑁂𑀯, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀸𑀤𑀻𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁂𑀦 𑀯𑀼𑀢𑁆𑀢𑀫𑁆𑀧𑀺 𑀇𑀥 𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀸𑀴𑀺𑀦𑀺𑀲𑁆𑀲𑀺𑀢𑁄𑀢𑀺 𑀉𑀤𑀸𑀦𑀯𑀕𑁆𑀕𑀲𑀗𑁆𑀕𑀳𑀸𑀤𑀺𑀓𑁄. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀁. 𑀣𑁂𑀭𑀲𑁆𑀲𑀸𑀢𑀺 𑀦𑀸𑀕𑀲𑁂𑀦𑀢𑁆𑀣𑁂𑀭𑀲𑁆𑀲. 𑀫𑀕𑁆𑀕𑀓𑀣𑀸𑀤𑀻𑀦𑀺 𑀧𑀓𑀭𑀡𑀸𑀦𑀺.

𑁪𑁬. 𑀧𑀸𑀴𑀺𑀬𑀁 𑀅𑀓𑁆𑀔𑀭𑀸𑀬𑀸𑀢𑀺𑀆𑀤𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀅𑀓𑁆𑀔𑀭𑁂𑀦𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁪𑁮. 𑀉𑀧𑀘𑀸𑀭𑀁 ¶ 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀧𑀭𑀺𑀲𑀸𑀬 𑀤𑁆𑀯𑀸𑀤𑀲𑀳𑀢𑁆𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀢𑁄 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑀣𑁂𑀢𑁆𑀯𑀸 𑀅𑀜𑁆𑀜𑁂 𑀉𑀤𑁆𑀤𑀺𑀲𑁆𑀲 𑀪𑀡𑀦𑁆𑀢𑀲𑁆𑀲𑀸𑀧𑀺 ¶ 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀤𑀽𑀭𑁂 𑀦𑀺𑀲𑀺𑀦𑁆𑀦𑀫𑁆𑀧𑀺 𑀉𑀤𑁆𑀤𑀺𑀲𑁆𑀲 𑀪𑀡𑀢𑀺, 𑀆𑀧𑀢𑁆𑀢𑀺 𑀏𑀯. 𑀑𑀧𑀸𑀢𑁂𑀢𑀻𑀢𑀺 𑀲𑀤𑁆𑀥𑀺𑀁 𑀓𑀣𑁂𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀢𑀸, 𑀯𑀼𑀢𑁆𑀢𑀮𑀓𑁆𑀔𑀡𑀥𑀫𑁆𑀫𑀁 𑀧𑀤𑀲𑁄 𑀯𑀸𑀘𑀦𑀢𑀸, 𑀏𑀓𑀢𑁄 𑀪𑀡𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦-𑁫𑁧. 𑀧𑀜𑁆𑀘𑀫𑁂 𑀢𑀢𑁆𑀭𑀺𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀲𑁂𑀲𑁄. 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀘𑀦𑀸𑀮𑀗𑁆𑀓𑀸𑀭𑀢𑁆𑀣𑀁, 𑀦𑀺𑀭𑀦𑁆𑀢𑀭𑀁 𑀢𑀺𑀲𑁆𑀲𑁄𑀯 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑀸𑀤𑀻𑀲𑀼 𑀲𑀬𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀦 𑀏𑀓𑀦𑁆𑀢𑀭𑀺𑀓𑀸𑀤𑀺𑀯𑀲𑁂𑀦 𑀲𑀬𑀦𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀭𑀢𑁆𑀢𑀯𑀺𑀲𑀺𑀝𑁆𑀞𑀜𑁆𑀳𑀺 𑀢𑀺𑀭𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁, 𑀢𑁂𑀦 𑀅𑀦𑀦𑁆𑀢𑀭𑀺𑀓𑀫𑁂𑀯 𑀢𑀺𑀭𑀢𑁆𑀢𑀁 𑀤𑀻𑀧𑁂𑀢𑀻𑀢𑀺. 𑀧𑀜𑁆𑀘𑀳𑀺 𑀙𑀤𑀦𑁂𑀳𑀻𑀢𑀺 𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀢𑀺𑀡𑀧𑀡𑁆𑀡𑁂𑀳𑀺. 𑀯𑀸𑀘𑀼𑀕𑁆𑀕𑀢𑀯𑀲𑁂𑀦𑀸𑀢𑀺 𑀧𑀕𑀼𑀡𑀯𑀲𑁂𑀦. 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁄 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑁄. 𑀏𑀓𑀽𑀧𑀘𑀸𑀭𑁄 𑀏𑀓𑁂𑀦 𑀫𑀕𑁆𑀕𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀼𑀧𑀭𑀺𑀕𑀫𑀦𑀬𑁄𑀕𑁆𑀕𑁄, 𑀏𑀢𑀁 𑀩𑀳𑀼𑀤𑁆𑀯𑀸𑀭𑀫𑁆𑀧𑀺 𑀏𑀓𑀽𑀧𑀘𑀸𑀭𑁄𑀯. 𑀢𑀢𑁆𑀣 𑀧𑀦 𑀓𑀼𑀝𑁆𑀝𑀸𑀤𑀻𑀳𑀺 𑀭𑀼𑀦𑁆𑀥𑀺𑀢𑁆𑀯𑀸 𑀯𑀺𑀲𑀼𑀁 𑀤𑁆𑀯𑀸𑀭𑀁 𑀬𑁄𑀚𑁂𑀦𑁆𑀢𑀺, 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀲𑀘𑁂 𑀧𑀦 𑀭𑀼𑀦𑁆𑀥𑀢𑀺 𑀏𑀯, 𑀯𑀺𑀲𑀼𑀁 𑀤𑁆𑀯𑀸𑀭𑀁 𑀦 𑀬𑁄𑀚𑁂𑀦𑁆𑀢𑀺, ‘‘𑀏𑀢𑀫𑁆𑀧𑀺 𑀏𑀓𑀽𑀧𑀘𑀸𑀭𑀫𑁂𑀯 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀺𑀳𑀺𑀢𑀤𑁆𑀯𑀸𑀭𑁄 𑀯𑀺𑀬 𑀕𑀩𑁆𑀪𑁄’’𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀕𑀩𑁆𑀪𑁂 𑀧𑀯𑀺𑀲𑀺𑀢𑁆𑀯𑀸 𑀧𑀫𑀼𑀔𑀸𑀤𑀻𑀲𑀼 𑀦𑀺𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀳𑀲𑁂𑀬𑁆𑀬𑀸𑀧𑀭𑀺𑀫𑀼𑀢𑁆𑀢𑀺𑀬𑀸 𑀕𑀩𑁆𑀪𑀤𑁆𑀯𑀸𑀭𑀁 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀺𑀤𑀳𑀸𑀧𑁂𑀢𑁆𑀯𑀸 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀯𑀺𑀯𑀭𑀸𑀧𑁂𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺 𑀪𑀯𑁂𑀬𑁆𑀬𑀸𑀢𑀺.

𑀢𑁂𑀲𑀁 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀓𑁂𑀘𑀺 ‘‘𑀅𑀦𑀼𑀝𑁆𑀞𑀳𑀦𑁂𑀦 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀲𑀬𑀦𑁆𑀢𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀸. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀲𑀺𑀬𑀸 𑀓𑀺𑀭𑀺𑀬𑀸𑀬 𑀲𑀫𑀼𑀝𑁆𑀞𑀸𑀢𑀺, 𑀲𑀺𑀬𑀸 𑀅𑀓𑀺𑀭𑀺𑀬𑀸𑀬 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀢𑀸 𑀘𑀲𑁆𑀲 𑀢𑀩𑁆𑀩𑀳𑀼𑀮𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑀤𑀢𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀤𑀺𑀯𑀸𑀲𑀬𑀦𑀫𑁆𑀧𑀺. 𑀅𑀦𑀼𑀝𑁆𑀞𑀳𑀦𑁂𑀦, 𑀳𑀺 𑀤𑁆𑀯𑀸𑀭𑀸𑀲𑀁𑀯𑀭𑀡𑁂𑀦 𑀘𑁂𑀢𑀁 𑀅𑀓𑀺𑀭𑀺𑀬𑀲𑀫𑀉𑀝𑁆𑀞𑀸𑀦𑀫𑁆𑀧𑀺 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀉𑀧𑀭𑀺𑀫𑀢𑀮𑁂𑀦 ¶ 𑀲𑀤𑁆𑀥𑀺𑀁 𑀅𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑀲𑁆𑀲𑀸’’𑀢𑀺 𑀇𑀤𑀁 𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀧𑀭𑀺𑀫𑀢𑀮𑁂 𑀲𑀬𑀺𑀢𑀲𑁆𑀲 𑀲𑀗𑁆𑀓𑀸 𑀏𑀯 𑀦𑀢𑁆𑀣𑀻𑀢𑀺 ‘‘𑀳𑁂𑀝𑁆𑀞𑀸𑀧𑀸𑀲𑀸𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀦𑀽𑀧𑀘𑀸𑀭𑁂𑀢𑀺 𑀩𑀳𑀺 𑀦𑀺𑀲𑁆𑀲𑁂𑀡𑀺𑀬𑀸 𑀆𑀭𑁄𑀳𑀡𑀻𑀬𑁂.

𑀲𑀪𑀸𑀲𑀗𑁆𑀔𑁂𑀧𑁂𑀦𑀸𑀢𑀺 ¶ 𑀲𑀪𑀸𑀓𑀸𑀭𑁂𑀦. ‘‘𑀅𑀟𑁆𑀠𑀓𑀼𑀝𑁆𑀝𑀓𑁂’’𑀢𑀺 𑀇𑀫𑀺𑀦𑀸 𑀲𑀡𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀣 𑀢𑀻𑀲𑀼 𑀤𑁆𑀯𑀻𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀪𑀺𑀢𑁆𑀢𑀺𑀬𑁄 𑀩𑀤𑁆𑀥𑀸, 𑀙𑀤𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀸 𑀅𑀟𑁆𑀠𑀪𑀺𑀢𑁆𑀢𑀺, 𑀇𑀤𑀁 𑀅𑀟𑁆𑀠𑀓𑀼𑀝𑁆𑀝𑀓𑀁 𑀦𑀸𑀫. 𑀯𑀸𑀴𑀲𑀗𑁆𑀖𑀸𑀝𑁄 𑀦𑀸𑀫 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀣𑀫𑁆𑀪𑀸𑀤𑀻𑀦𑀁 𑀉𑀧𑀭𑀺 𑀯𑀸𑀴𑀭𑀽𑀧𑁂𑀳𑀺 𑀓𑀢𑀲𑀗𑁆𑀖𑀸𑀝𑁄. 𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺𑀕𑀢𑁂𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀧𑀲𑁆𑀲𑁂 𑀧𑀭𑀺𑀓𑁆𑀔𑁂𑀧𑁄 𑀦𑀢𑁆𑀣𑀺, 𑀢𑀢𑁆𑀣 𑀲𑀘𑁂 𑀪𑀽𑀫𑀺𑀢𑁄 𑀯𑀢𑁆𑀣𑀼 𑀉𑀘𑁆𑀘𑀁 𑀳𑁄𑀢𑀺, 𑀉𑀪𑀢𑁄 𑀉𑀘𑁆𑀘𑀯𑀢𑁆𑀣𑀼𑀢𑁄 𑀳𑁂𑀝𑁆𑀞𑀸 𑀪𑀽𑀫𑀺𑀬𑀁 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯 𑀢𑀢𑁆𑀣 𑀲𑁂𑀦𑀸𑀲𑀦𑀯𑁄𑀳𑀸𑀭𑀸𑀪𑀸𑀯𑀢𑁄. 𑀅𑀣 𑀯𑀢𑁆𑀣𑀼 𑀦𑀻𑀘𑀁 𑀪𑀽𑀫𑀺𑀲𑀫𑀫𑁂𑀯 𑀲𑁂𑀦𑀸𑀲𑀦𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀧𑀭𑀺𑀓𑁆𑀔𑁂𑀧𑀭𑀳𑀺𑀢𑀤𑀺𑀲𑀸𑀬 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀢𑁆𑀣 𑀆𑀧𑀢𑁆𑀢𑀺 𑀳𑁄𑀢𑀺, 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺 𑀏𑀯 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀫𑀡𑁆𑀟𑀮𑀁 𑀯𑀸𑀢𑀺𑀆𑀤𑀺 𑀫𑀚𑁆𑀛𑁂 𑀉𑀤𑀓𑀧𑀢𑀦𑀢𑁆𑀣𑀸𑀬 𑀆𑀓𑀸𑀲𑀗𑁆𑀕𑀡𑀯𑀦𑁆𑀢𑀁 𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑁂𑀢𑀺 𑀏𑀓𑁂𑀓𑀕𑀩𑁆𑀪𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀧𑀫𑀼𑀔𑁂𑀦 𑀕𑀫𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑀢𑁄 𑀅𑀦𑀽𑀦𑀁 𑀓𑀼𑀝𑁆𑀝𑀁 𑀓𑀢𑁆𑀯𑀸 𑀆𑀓𑀸𑀲𑀗𑁆𑀕𑀡𑁂𑀦 𑀧𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀅𑀓𑀢𑁄𑀢𑀺 𑀅𑀢𑁆𑀣𑁄. 𑀕𑀩𑁆𑀪𑀧𑀭𑀺𑀓𑁆𑀔𑁂𑀧𑁄𑀢𑀺 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑀸𑀤𑀻𑀲𑀼 𑀲𑀫𑀦𑁆𑀢𑀸 𑀞𑀺𑀢𑀕𑀩𑁆𑀪𑀪𑀺𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀸𑀝𑁂𑀓𑁆𑀓𑀲𑀦𑁆𑀦𑀺𑀯𑁂𑀲𑀸𑀢𑀺 𑀏𑀓𑁂𑀓𑀤𑀺𑀲𑀸𑀬 𑀕𑀩𑁆𑀪𑀧𑀸𑀴𑀺𑀬𑁄 𑀇𑀢𑀭𑀤𑀺𑀲𑀸𑀲𑀼 𑀕𑀩𑁆𑀪𑀧𑀸𑀴𑀻𑀦𑀁 𑀅𑀪𑀸𑀯𑁂𑀦, 𑀪𑀸𑀯𑁂𑀧𑀺 𑀯𑀸 𑀅𑀜𑁆𑀜𑀫𑀜𑁆𑀜𑀪𑀺𑀢𑁆𑀢𑀺𑀘𑁆𑀙𑀤𑀦𑁂𑀳𑀺 𑀅𑀲𑀫𑁆𑀩𑀦𑁆𑀥𑀢𑀸𑀬 𑀧𑀸𑀝𑁂𑀓𑁆𑀓𑀲𑀦𑁆𑀦𑀺𑀯𑁂𑀲𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀢𑀁…𑀧𑁂… 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀦 𑀤𑀼𑀓𑁆𑀓𑀝𑁂𑀦. 𑀢𑀸𑀤𑀺𑀲𑀸𑀬 𑀳𑀺 𑀕𑀩𑁆𑀪𑀧𑀸𑀴𑀺𑀬𑀸 𑀧𑀫𑀼𑀔𑀁 𑀢𑀻𑀲𑀼 𑀤𑀺𑀲𑀸𑀲𑀼 𑀪𑀺𑀢𑁆𑀢𑀻𑀦𑀁 𑀅𑀪𑀸𑀯𑁂𑀦 𑀏𑀓𑀤𑀺𑀲𑀸𑀬 𑀕𑀩𑁆𑀪𑀪𑀺𑀢𑁆𑀢𑀺𑀫𑀢𑁆𑀢𑁂𑀦 𑀲𑀩𑁆𑀩𑀘𑁆𑀙𑀦𑁆𑀦𑀁 𑀘𑀽𑀴𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀤𑀼𑀓𑁆𑀓𑀝𑀫𑁂𑀯. 𑀬𑀤𑀺 𑀧𑀦 𑀢𑀲𑁆𑀲 𑀧𑀫𑀼𑀔𑀲𑁆𑀲 𑀇𑀢𑀭𑀤𑀺𑀲𑀸𑀲𑀼𑀧𑀺 𑀏𑀓𑀺𑀲𑁆𑀲𑀁, 𑀲𑀩𑁆𑀩𑀸𑀲𑀼 𑀯𑀸 𑀪𑀺𑀢𑁆𑀢𑀺𑀁 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀩𑁆𑀩𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀪𑀸𑀯𑀢𑁄 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀽𑀫𑀺𑀬𑀁 𑀯𑀺𑀦𑀸 𑀚𑀕𑀢𑀺𑀬𑀸 𑀧𑀫𑀼𑀔𑀁 𑀲𑀦𑁆𑀥𑀸𑀬𑀸𑀢𑀺 𑀏𑀢𑁆𑀣 𑀉𑀘𑁆𑀘𑀯𑀢𑁆𑀣𑀼𑀁 𑀅𑀓𑀢𑁆𑀯𑀸 𑀪𑀽𑀫𑀺𑀬𑀁 𑀓𑀢𑀕𑁂𑀳𑀲𑁆𑀲 𑀧𑀫𑀼𑀔𑀁 𑀲𑀦𑁆𑀥𑀸𑀬 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 𑀓𑀣𑀺𑀢𑀁 ¶ . 𑀉𑀘𑁆𑀘𑀯𑀢𑁆𑀣𑀼𑀓𑀁 𑀘𑁂 𑀧𑀫𑀼𑀔𑀁 𑀳𑁄𑀢𑀺, 𑀢𑁂𑀦 𑀯𑀢𑁆𑀣𑀼𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑀗𑁆𑀔𑁆𑀬𑀫𑁂𑀯 𑀧𑀫𑀼𑀔𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀸𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁. 𑀚𑀕𑀢𑀺𑀬𑀸 𑀧𑀫𑀸𑀡𑀁 𑀯𑀢𑁆𑀯𑀸𑀢𑀺 𑀧𑀓𑀢𑀺𑀪𑀽𑀫𑀺𑀬𑀸 𑀦𑀺𑀧𑀦𑁆𑀦𑁄 𑀬𑀣𑀸 𑀚𑀕𑀢𑀺𑀬𑀸 𑀉𑀧𑀭𑀺 𑀲𑀬𑀺𑀢𑀁 𑀦 𑀧𑀲𑁆𑀲𑀢𑀺, 𑀏𑀯𑀁 𑀉𑀘𑁆𑀘𑀸𑀢𑀺𑀉𑀘𑁆𑀘𑀯𑀢𑁆𑀣𑀼𑀲𑁆𑀲 𑀉𑀩𑁆𑀩𑁂𑀥𑀧𑁆𑀧𑀫𑀸𑀡𑀁 𑀯𑀢𑁆𑀯𑀸. 𑀏𑀓𑀤𑀺𑀲𑀸𑀬 𑀉𑀚𑀼𑀓𑀫𑁂𑀯 𑀤𑀻𑀖𑀁 𑀓𑀢𑁆𑀯𑀸 𑀲𑀦𑁆𑀦𑀺𑀯𑁂𑀲𑀺𑀢𑁄 𑀧𑀸𑀲𑀸𑀤𑁄 𑀏𑀓𑀲𑀸𑀮𑀲𑀦𑁆𑀦𑀺𑀯𑁂𑀲𑁄. 𑀤𑁆𑀯𑀻𑀲𑀼, 𑀢𑀻𑀲𑀼 𑀯𑀸 𑀘𑀢𑀽𑀲𑀼𑀧𑀺 𑀯𑀸 𑀤𑀺𑀲𑀸𑀲𑀼 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀓𑀢𑀸 𑀤𑁆𑀯𑀺𑀲𑀸𑀮𑀸𑀤𑀺𑀲𑀦𑁆𑀦𑀺𑀯𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀮𑀧𑁆𑀧𑀪𑁂𑀤𑀤𑀻𑀧𑀦𑀫𑁂𑀯 𑀘𑁂𑀢𑁆𑀣 𑀧𑀼𑀭𑀺𑀫𑀢𑁄 𑀯𑀺𑀲𑁂𑀲𑁄𑀢𑀺. 𑀧𑀭𑀺𑀓𑁆𑀔𑁂𑀧𑁄 𑀯𑀺𑀤𑁆𑀥𑀲𑁆𑀢𑁄𑀢𑀺 𑀧𑀫𑀼𑀔𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁫𑁩. 𑀉𑀧𑀟𑁆𑀠𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀁 𑀲𑁂𑀦𑀸𑀲𑀦𑀁 𑀤𑀼𑀓𑁆𑀓𑀝𑀲𑁆𑀲 𑀆𑀤𑀺𑀁 𑀯𑀢𑁆𑀯𑀸 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀢𑁆𑀢𑀸 𑀢𑀢𑁄 ¶ 𑀅𑀥𑀺𑀓𑀁 𑀲𑀩𑁆𑀩𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀓𑀫𑁆𑀧𑀺 𑀲𑀩𑁆𑀩𑀁 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀢𑁆𑀣𑀼𑀪𑀸𑀯𑁂𑀦 𑀤𑀲𑁆𑀲𑀺𑀢𑀁 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑁆𑀢𑀸, 𑀕𑀭𑀼𑀓𑁂 𑀞𑀸𑀢𑀩𑁆𑀩𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁫𑁪. 𑀧𑀸𑀴𑀺𑀬𑀁 ‘‘𑀢𑀢𑀺𑀬𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀯𑀲𑀢𑀻’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀧𑀼𑀭𑀸𑀭𑀼𑀡𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑁆𑀢𑁄𑀙𑀤𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀧𑀼𑀦𑀤𑀺𑀯𑀲𑁂 𑀲𑀳𑀲𑁂𑀬𑁆𑀬𑁂𑀦 𑀅𑀦𑀸𑀧𑀢𑁆𑀢𑀺 𑀏𑀯. 𑀲𑁂𑀦𑀫𑁆𑀩𑀫𑀡𑁆𑀟𑀧𑀯𑀡𑁆𑀡𑀁 𑀳𑁄𑀢𑀻𑀢𑀺 𑀲𑀻𑀳𑀴𑀤𑀻𑀧𑁂 𑀓𑀺𑀭 𑀉𑀘𑁆𑀘𑀯𑀢𑁆𑀣𑀼𑀓𑁄 𑀲𑀩𑁆𑀩𑀘𑁆𑀙𑀦𑁆𑀦𑁄 𑀲𑀩𑁆𑀩𑀅𑀧𑀭𑀺𑀘𑁆𑀙𑀦𑁆𑀦𑁄 𑀏𑀯𑀁𑀦𑀸𑀫𑀓𑁄 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀧𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘𑀢𑀼𑀢𑁆𑀣𑀪𑀸𑀕𑁄 𑀘𑀽𑀴𑀓𑀁, 𑀤𑁆𑀯𑁂 𑀪𑀸𑀕𑀸 𑀉𑀧𑀟𑁆𑀠𑀁, 𑀢𑀻𑀲𑀼 𑀪𑀸𑀕𑁂𑀲𑀼 𑀤𑁆𑀯𑁂 𑀪𑀸𑀕𑀸 𑀬𑁂𑀪𑀼𑀬𑁆𑀬𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀘𑀽𑀴𑀓𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀢𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀲𑁂𑀦𑀸𑀲𑀦𑀁, 𑀢𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳 𑀦𑀺𑀧𑀚𑁆𑀚𑀦𑀁, 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫. 𑀙𑀝𑁆𑀞𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀬𑀦𑁆𑀢𑀲𑁆𑀲𑀸𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀏𑀓𑀸𑀯 𑀆𑀧𑀢𑁆𑀢𑀺. 𑀓𑁂𑀘𑀺 𑀧𑀦 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦𑀸𑀧𑀻𑀢𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺 𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑀧𑀼𑀁𑀲𑀓𑁂𑀦 ¶ 𑀧𑀦 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀬𑀦𑁆𑀢𑀲𑁆𑀲 𑀲𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀧𑀸𑀴𑀺𑀬𑀁 𑀧𑀡𑁆𑀟𑀓𑀯𑀲𑁂𑀦𑁂𑀯 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀤𑀦𑀼𑀮𑁄𑀫𑀺𑀓𑀸 𑀧𑀦 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂𑀦 𑀲𑀳 𑀲𑀬𑀦𑁆𑀢𑀲𑁆𑀲 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁, 𑀧𑀼𑀭𑀺𑀫𑁂𑀦 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀇𑀢𑁆𑀣𑀺𑀕𑀢𑀺𑀓𑁄𑀯𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀫𑀢𑀺𑀢𑁆𑀣𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀲𑁂𑀦𑀸𑀲𑀦𑀁, 𑀢𑀢𑁆𑀣 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀦𑀁, 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁦. 𑀲𑀢𑁆𑀢𑀫𑁂 𑀦 𑀬𑀓𑁆𑀔𑁂𑀦𑀸𑀢𑀺𑀆𑀤𑀻𑀦𑀁 ‘‘𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀼𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀼𑀦𑀸 ¶ 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦, 𑀦 𑀬𑀓𑁆𑀔𑀸𑀤𑀺𑀦𑀸𑀧𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀤𑀺𑀲𑁂𑀦𑀧𑀺 𑀳𑀺 𑀲𑀳 𑀞𑀺𑀢𑀸𑀬 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀁𑀢𑀁𑀤𑁂𑀲𑀪𑀸𑀲𑀸𑀬 𑀅𑀢𑁆𑀣𑀁 𑀬𑀣𑀸𑀭𑀼𑀘𑀺 𑀯𑀝𑁆𑀝𑀢𑀺 𑀏𑀯.

𑀇𑀭𑀺𑀬𑀸𑀧𑀣𑀸𑀧𑀭𑀺𑀯𑀢𑁆𑀢𑀦𑀁, 𑀧𑀼𑀭𑀺𑀲𑀁 𑀯𑀸 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑁂 𑀅𑀧𑀓𑁆𑀓𑁄𑀲𑀸𑀧𑀦𑀁 𑀏𑀢𑁆𑀣 𑀅𑀓𑀺𑀭𑀺𑀬𑀸. 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲 𑀥𑀫𑁆𑀫𑀲𑁆𑀲 𑀙𑀦𑁆𑀦𑀁 𑀯𑀸𑀘𑀸𑀦𑀁 𑀉𑀧𑀭𑀺 𑀤𑁂𑀲𑀦𑀸, 𑀯𑀼𑀢𑁆𑀢𑀮𑀓𑁆𑀔𑀡𑁄 𑀫𑀸𑀢𑀼𑀕𑀸𑀫𑁄, 𑀇𑀭𑀺𑀬𑀸𑀧𑀣𑀧𑀅𑀯𑀢𑁆𑀢𑀦𑀸𑀪𑀸𑀯𑁄, 𑀯𑀺𑀜𑁆𑀜𑀽𑀧𑀼𑀭𑀺𑀲𑀸𑀪𑀸𑀯𑁄, 𑀅𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭. 𑀅𑀝𑁆𑀞𑀫𑁂 𑀅𑀦𑁆𑀢𑀭𑀸𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄 𑀧𑀼𑀩𑁆𑀩𑁂𑀧𑀺. 𑀅𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦𑀸𑀢𑀺 ‘‘𑀯𑀤𑀣, 𑀪𑀦𑁆𑀢𑁂, 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀅𑀥𑀺𑀕𑀢’’𑀦𑁆𑀢𑀺 𑀏𑀯𑀁 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁂𑀦 𑀅𑀢𑀺𑀩𑀤𑁆𑀥𑀺𑀬𑀫𑀸𑀦𑁂𑀦. 𑀢𑀣𑀸𑀭𑀽𑀧𑁂 𑀧𑀘𑁆𑀘𑀬𑁂 𑀲𑀢𑀺 𑀯𑀢𑁆𑀢𑀩𑁆𑀩𑀫𑁂𑀯. 𑀲𑀼𑀢𑀧𑀭𑀺𑀬𑀢𑁆𑀢𑀺𑀲𑀻𑀮𑀕𑀼𑀡𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀓𑀼𑀲𑀮𑀢𑀸 𑀲𑀼𑀢𑀕𑀼𑀡𑁄, 𑀧𑀸𑀴𑀺𑀧𑀸𑀞𑀓𑀼𑀲𑀮𑀢𑀸 𑀧𑀭𑀺𑀬𑀢𑁆𑀢𑀺𑀕𑀼𑀡𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀘𑀺𑀢𑁆𑀢𑀓𑁆𑀔𑁂𑀧𑀲𑁆𑀲 𑀯𑀸 𑀅𑀪𑀸𑀯𑀸’’𑀢𑀺 𑀇𑀫𑀺𑀦𑀸 𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀢𑀸𑀧𑀺 𑀅𑀭𑀺𑀬𑀸𑀦𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑁂 ¶ 𑀅𑀯𑀼𑀢𑁆𑀢𑁂𑀳𑀻𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀅𑀯𑀼𑀢𑁆𑀢𑁂𑀳𑀺. 𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀧𑀡𑁆𑀡𑀢𑁆𑀢𑀺𑀅𑀚𑀆𑀦𑀦𑀯𑀲𑁂𑀦 𑀏𑀓𑀦𑁆𑀢𑀢𑁄 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀫𑁂𑀯 𑀳𑁄𑀢𑀺 𑀅𑀭𑀺𑀬𑀸𑀦𑀁 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸. 𑀛𑀸𑀦𑀮𑀸𑀪𑀻𑀦𑀜𑁆𑀘 𑀲𑀢𑁆𑀣𑀼 𑀆𑀡𑀸𑀯𑀻𑀢𑀺𑀓𑁆𑀓𑀫𑀧𑀝𑀺𑀖𑀘𑀺𑀢𑁆𑀢𑀲𑁆𑀲 𑀛𑀸𑀦𑀧𑀭𑀺𑀳𑀸𑀦𑀢𑁄 𑀪𑀽𑀢𑀸𑀭𑁄𑀘𑀦𑀁 𑀦 𑀲𑀫𑁆𑀪𑀯𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀪𑀽𑀢𑀢𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀸, 𑀅𑀦𑀜𑁆𑀜𑀸𑀧𑀤𑁂𑀲𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮. 𑀦𑀯𑀫𑁂 𑀢𑀢𑁆𑀣 𑀪𑀯𑁂𑀬𑁆𑀬𑀸𑀢𑀺 𑀢𑀢𑁆𑀣 𑀓𑀲𑁆𑀲𑀘𑀺 𑀫𑀢𑀺 𑀏𑀯𑀁 𑀪𑀯𑁂𑀬𑁆𑀬. 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀉𑀧𑀧𑀢𑁆𑀢𑀺𑀢𑁄 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 ‘‘𑀇𑀫𑀺𑀦𑀸𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑁮𑁨. 𑀆𑀤𑀺𑀢𑁄 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀜𑁆𑀘. 𑀲𑁂𑀲𑀸𑀦𑀻𑀢𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀻𑀦𑀺 ¶ . 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺 𑀅𑀚𑁆𑀛𑀸𑀘𑀸𑀭𑁄𑀯. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀦𑀚𑁆𑀛𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀢𑁆𑀣𑀼𑀓𑁄 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑀦𑀁, 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬. 𑀤𑀲𑀫𑁂 𑀅𑀧𑁆𑀧𑀧𑀁𑀲𑀼𑀫𑀢𑁆𑀢𑀺𑀓𑀸𑀬 𑀧𑀣𑀯𑀺𑀬𑀸 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀉𑀧𑀟𑁆𑀠𑀧𑀁𑀲𑀼𑀫𑀢𑁆𑀢𑀺𑀓𑀸𑀬𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑁂𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀚𑀸𑀢𑀸𑀚𑀸𑀢𑀯𑀺𑀦𑀺𑀫𑀼𑀢𑁆𑀢𑀸𑀬 𑀢𑀢𑀺𑀬𑀧𑀣𑀯𑀺𑀬𑀸 𑀅𑀪𑀸𑀯𑀢𑁄.

𑀯𑀝𑁆𑀝𑀢𑀻𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀢𑀺 𑀑𑀓𑀸𑀲𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀇𑀫𑀁 𑀯𑀮𑁆𑀮𑀺𑀁 𑀔𑀡𑀸𑀢𑀺 𑀧𑀣𑀯𑀻𑀔𑀡𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀫𑀺𑀦𑀸𑀯 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺, 𑀦 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑁂𑀦. 𑀉𑀪𑀬𑀫𑁆𑀧𑀺 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑁂 𑀧𑀦 𑀤𑁆𑀯𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑀸 𑀳𑁄𑀦𑁆𑀢𑀺. 𑀉𑀤𑀓𑀧𑀧𑁆𑀧𑀝𑀓𑁄𑀢𑀺 𑀉𑀤𑀓𑁂 𑀅𑀦𑁆𑀢𑁄𑀪𑀽𑀫𑀺𑀬𑀁 𑀧𑀯𑀺𑀝𑁆𑀞𑁂 𑀢𑀲𑁆𑀲 𑀉𑀧𑀭𑀺𑀪𑀸𑀕𑀁 𑀙𑀸𑀤𑁂𑀢𑁆𑀯𑀸 𑀢𑀦𑀼𑀓𑀧𑀁𑀲𑀼 𑀯𑀸 𑀫𑀢𑁆𑀢𑀺𑀓𑀸 𑀯𑀸 𑀧𑀝𑀮𑀁 𑀳𑀼𑀢𑁆𑀯𑀸 𑀧𑀢𑀫𑀸𑀦𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀺𑀁 𑀉𑀤𑀓𑁂 𑀲𑀼𑀓𑁆𑀔𑁂𑀧𑀺 𑀢𑀁 𑀧𑀝𑀮𑀁 𑀯𑀸𑀢𑁂𑀦 𑀘𑀮𑀫𑀸𑀦𑀸 𑀢𑀺𑀝𑁆𑀞𑀢𑀺, 𑀢𑀁 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫.

𑀅𑀓𑀢𑀧𑀩𑁆𑀪𑀸𑀭𑁂𑀢𑀺 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀸𑀤𑀺𑀲𑁂 𑀏𑀯 𑀳𑀺 𑀯𑀫𑁆𑀫𑀺𑀓𑀲𑁆𑀲 𑀲𑀫𑁆𑀪𑀯𑁄𑀢𑀺. 𑀫𑀽𑀲𑀺𑀓𑀼𑀓𑁆𑀓𑀭𑀁 𑀦𑀸𑀫 𑀫𑀽𑀲𑀺𑀓𑀸𑀳𑀺 𑀔𑀦𑀺𑀢𑁆𑀯𑀸 𑀩𑀳𑀺 𑀓𑀢𑀧𑀁𑀲𑀼𑀭𑀸𑀲𑀺. 𑀅𑀘𑁆𑀙𑀤𑀦𑀦𑁆𑀢𑀺𑀆𑀤𑀺𑀯𑀼𑀢𑁆𑀢𑀢𑁆𑀢𑀸 𑀉𑀚𑀼𑀓𑀁 𑀆𑀓𑀸𑀲𑀢𑁄 𑀧𑀢𑀺𑀢𑀯𑀲𑁆𑀲𑁄𑀤𑀓𑁂𑀦 𑀑𑀯𑀝𑁆𑀞𑀫𑁂𑀯 𑀚𑀸𑀢𑀧𑀣𑀯𑀻 𑀳𑁄𑀢𑀺, 𑀦 𑀙𑀤𑀦𑀸𑀤𑀻𑀲𑀼 𑀧𑀢𑀺𑀢𑁆𑀯𑀸 𑀢𑀢𑁄 𑀧𑀯𑀢𑁆𑀢𑀉𑀤𑀓𑁂𑀦 𑀢𑀺𑀦𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀡𑁆𑀟𑀧𑀢𑁆𑀣𑀫𑁆𑀪𑀦𑁆𑀢𑀺 𑀲𑀸𑀔𑀸𑀫𑀡𑁆𑀟𑀧𑀢𑁆𑀣𑀫𑁆𑀪𑀁. 𑀉𑀘𑁆𑀘𑀸𑀮𑁂𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀢𑀢𑁄𑀢𑀺 𑀧𑀼𑀭𑀸𑀡𑀲𑁂𑀦𑀸𑀲𑀦𑀢𑁄.

𑁮𑁮. 𑀫𑀳𑀸𑀫𑀢𑁆𑀢𑀺𑀓𑀦𑁆𑀢𑀺 𑀪𑀺𑀢𑁆𑀢𑀺𑀮𑁂𑀧𑀦𑀁. 𑀚𑀸𑀢𑀧𑀣𑀯𑀺𑀢𑀸, 𑀢𑀣𑀸𑀲𑀜𑁆𑀜𑀺𑀢𑀸, 𑀔𑀡𑀦𑀔𑀡𑀸𑀧𑀦𑀸𑀦𑀁 𑀅𑀜𑁆𑀜𑀢𑀭𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀲𑀸𑀔𑀝𑁆𑀞𑀓𑀯𑀺𑀫𑀸𑀦𑁂 𑀲𑀸𑀔𑀸𑀬 𑀙𑀺𑀚𑁆𑀚𑀫𑀸𑀦𑀸𑀬 𑀙𑀺𑀚𑁆𑀚𑀦𑁆𑀢𑁂 𑀢𑀢𑁆𑀣 𑀅𑀙𑁂𑀤𑀦𑀢𑁆𑀣𑀸𑀬 𑀤𑁂𑀯𑀢𑀸𑀬 𑀉𑀧𑀦𑀻𑀢𑀁 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸𑀧𑀺 𑀓𑀼𑀞𑀸𑀭𑀺𑀦𑀺𑀓𑁆𑀔𑁂𑀧𑀯𑁂𑀕𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑀥𑀫𑁆𑀫𑁂𑀢𑀺 𑀭𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀬𑀁. 𑀭𑀼𑀓𑁆𑀔𑀸𑀦𑀁 𑀯𑀺𑀬 𑀙𑁂𑀤𑀦𑀸𑀤𑀻𑀲𑀼 𑀅𑀓𑀼𑀧𑁆𑀧𑀦𑀜𑁆𑀳𑀺 𑀭𑀼𑀓𑁆𑀔𑀥𑀫𑁆𑀫𑁄 𑀦𑀸𑀫.

𑀉𑀧𑁆𑀧𑀢𑀺𑀢𑀦𑁆𑀢𑀺 𑀉𑀧𑁆𑀧𑀦𑁆𑀦𑀁. 𑀪𑀦𑁆𑀢𑀦𑁆𑀢𑀺 𑀥𑀸𑀯𑀦𑁆𑀢𑀁. 𑀯𑀸𑀭𑀬𑁂𑀢𑀺 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀇𑀢𑀭𑁄𑀢𑀺 𑀉𑀧𑁆𑀧𑀦𑁆𑀦𑀁 𑀓𑁄𑀥𑀁 𑀅𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀭𑀸𑀚𑀉𑀧𑀭𑀸𑀚𑀸𑀤𑀻𑀦𑀁 𑀭𑀲𑁆𑀫𑀺𑀫𑀢𑁆𑀢𑀕𑁆𑀕𑀸𑀳𑀓𑀚𑀦𑁄 𑀯𑀺𑀬 𑀦 𑀉𑀢𑁆𑀢𑀫𑀲𑀸𑀭𑀣𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀦𑁆𑀢𑀺 𑀲𑀭𑀻𑀭𑁂 𑀤𑀸𑀞𑀸𑀯𑀡𑀸𑀦𑀼𑀲𑀸𑀭𑁂𑀦 𑀯𑀺𑀢𑁆𑀣𑀺𑀡𑁆𑀡𑀁 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁 𑀓𑀡𑁆𑀳𑀲𑀧𑁆𑀧𑀯𑀺𑀲𑀁 𑀯𑀺𑀬. 𑀚𑀳𑀸𑀢𑀺 𑀑𑀭𑀧𑀸𑀭𑀦𑁆𑀢𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀜𑁆𑀜𑁄𑀚𑀦𑀸𑀦𑀺 𑀢𑀢𑀺𑀬𑀫𑀕𑁆𑀕𑁂𑀦 𑀚𑀳𑀸𑀢𑀺. ‘‘𑀑𑀭𑀧𑀸𑀭’’𑀦𑁆𑀢𑀺 𑀳𑀺 𑀑𑀭𑀺𑀫𑀢𑀻𑀭𑀁 𑀯𑀼𑀘𑁆𑀘𑀢𑀺 ¶ . 𑀅𑀣 𑀯𑀸 𑀲𑁄𑀢𑀺 𑀢𑀢𑀺𑀬𑀫𑀕𑁆𑀕𑁂𑀦 𑀓𑁄𑀥𑀁 𑀯𑀺𑀦𑁂𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀭𑀧𑀸𑀭𑀁 𑀚𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀑𑀭𑀁 𑀦𑀸𑀫 𑀲𑀓𑀢𑁆𑀢𑀪𑀸𑀯𑁄, 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀯𑀸 𑀆𑀬𑀢𑀦𑀸𑀦𑀺. 𑀧𑀸𑀭𑀁 𑀦𑀸𑀫 𑀧𑀭𑀅𑀢𑁆𑀢𑀪𑀸𑀯𑁄, 𑀩𑀸𑀳𑀺𑀭𑀸𑀦𑀺 𑀯𑀸 𑀆𑀬𑀢𑀦𑀸𑀦𑀺. 𑀢𑀤𑀼𑀪𑀬𑁂 𑀧𑀦 𑀙𑀦𑁆𑀤𑀭𑀸𑀕𑀁 𑀚𑀳𑀦𑁆𑀢𑁄 ‘‘𑀚𑀳𑀸𑀢𑀺 𑀑𑀭𑀺𑀫𑀧𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁦. 𑀪𑀯𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺. 𑀅𑀳𑀼𑀯𑀼𑀦𑁆𑀢𑀻𑀢𑀺 𑀩𑀪𑀽𑀯𑀼. 𑀢𑁂𑀦𑀸𑀳 ‘‘𑀚𑀸𑀢𑀸 𑀯𑀟𑁆𑀠𑀺𑀢𑀸’’𑀢𑀺. 𑀪𑀽𑀢𑀸𑀦𑀁 𑀕𑀸𑀫𑁄𑀢𑀺 𑀫𑀳𑀸𑀪𑀽𑀢𑀸𑀦𑀁 𑀳𑀭𑀺𑀢𑀢𑀺𑀡𑀸𑀤𑀺𑀪𑀸𑀯𑁂𑀦 𑀲𑀫𑀕𑁆𑀕𑀸𑀦𑀁 𑀲𑀫𑀽𑀳𑁄. 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀧𑀸𑀢𑀩𑁆𑀬-𑀲𑀤𑁆𑀤𑀲𑁆𑀲 𑀧𑀸 𑀧𑀸𑀦𑁂𑀢𑀺 𑀥𑀸𑀢𑁆𑀯𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸’’𑀢𑀺. 𑀲𑀸 𑀘 𑀧𑀸𑀢𑀩𑁆𑀬𑀢𑀸 𑀙𑁂𑀤𑀦𑀸𑀤𑀺 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀲𑀸…𑀧𑁂… 𑀪𑀽𑀢𑀕𑀸𑀫𑀲𑁆𑀲 𑀚𑀸𑀢𑀸 𑀙𑁂𑀤𑀦𑀸𑀤𑀺𑀧𑀘𑁆𑀘𑀬𑀸’’𑀢𑀺.

𑁯𑁧. 𑀚𑀸𑀢-𑀲𑀤𑁆𑀤𑁄 𑀏𑀢𑁆𑀣 𑀯𑀺𑀚𑀸𑀢𑀧𑀭𑀺𑀬𑀸𑀬𑁄𑀢𑀺 ‘‘𑀧𑀼𑀢𑁆𑀢𑀁 𑀯𑀺𑀚𑀸𑀢𑀸 𑀇𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀲𑀽𑀢𑀯𑀘𑀦𑁄𑀢𑀺 𑀆𑀳 ‘‘𑀧𑀲𑀽𑀢𑀸𑀦𑀻’’𑀢𑀺, 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀸𑀦𑀻𑀢𑀺 𑀅𑀢𑁆𑀣𑁄.

𑀢𑀸𑀦𑀺 ¶ 𑀤𑀲𑁆𑀲𑁂𑀦𑁆𑀢𑁄𑀢𑀺 𑀢𑀸𑀦𑀺 𑀩𑀻𑀚𑀸𑀦𑀺 𑀤𑀲𑁆𑀲𑁂𑀦𑁆𑀢𑁄. 𑀓𑀸𑀭𑀺𑀬𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀓𑀸𑀭𑀡𑀜𑁆𑀘 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑁂𑀦 𑀩𑀻𑀚𑀁 𑀤𑀲𑁆𑀲𑀺𑀢’’𑀦𑁆𑀢𑀺.

𑁯𑁨. ‘‘𑀩𑀻𑀚𑀢𑁄 𑀲𑀫𑁆𑀪𑀽𑀢𑁄 𑀪𑀽𑀢𑀕𑀸𑀫𑁄 𑀩𑀻𑀚’’𑀦𑁆𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀧𑀤𑀼𑀫𑀕𑀘𑁆𑀙𑀢𑁄 𑀦𑀺𑀩𑁆𑀩𑀢𑁆𑀢𑀁 𑀧𑀼𑀧𑁆𑀨𑀁 𑀧𑀤𑀼𑀫’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀬𑀁 𑀯𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀩𑀻𑀚𑀁 𑀪𑀽𑀢𑀕𑀸𑀫𑁄 𑀦𑀸𑀫 𑀳𑁄𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀣𑀸𑀭𑀼𑀢𑀦𑁆𑀢𑀺 𑀬𑀣𑀸𑀧𑀸𑀞𑀁.

‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀭𑀻𑀭𑁂 𑀮𑀕𑁆𑀕𑀪𑀸𑀯𑀁 𑀜𑀢𑁆𑀯𑀸𑀧𑀺 𑀉𑀝𑁆𑀞𑀳𑀢𑀺, ‘‘𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀻’’𑀢𑀺𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀯𑀝𑁆𑀝𑀢𑀺. 𑀅𑀦𑀦𑁆𑀢𑀓-𑀕𑁆𑀕𑀳𑀡𑁂𑀦 𑀲𑀸𑀲𑀧𑀫𑀢𑁆𑀢𑀺𑀓𑀸 𑀕𑀳𑀺𑀢𑀸, 𑀦𑀸𑀫𑀜𑁆𑀳𑁂𑀢𑀁 𑀢𑀲𑁆𑀲𑀸 𑀲𑁂𑀯𑀸𑀮𑀚𑀸𑀢𑀺𑀬𑀸. 𑀫𑀽𑀮𑀧𑀡𑁆𑀡𑀸𑀦𑀁 𑀅𑀪𑀸𑀯𑁂𑀦 ‘‘𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄𑀢𑀺. 𑀅𑀯𑀟𑁆𑀠𑀫𑀸𑀦𑁂𑀧𑀺 𑀪𑀽𑀢𑀕𑀸𑀫𑀫𑀽𑀮𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺. 𑀦𑀸𑀴𑀺𑀓𑁂𑀭𑀲𑁆𑀲 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀯𑀤𑀢𑀺.

𑀲𑁂𑀮𑁂𑀬𑁆𑀬𑀓𑀁 ¶ 𑀦𑀸𑀫 𑀲𑀺𑀮𑀸𑀬 𑀲𑀫𑁆𑀪𑀽𑀢𑀸 𑀏𑀓𑀸 𑀕𑀦𑁆𑀥𑀚𑀸𑀢𑀺. 𑀧𑀼𑀧𑁆𑀨𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀺𑀓𑀲𑀺𑀢𑀓𑀸𑀮𑀢𑁄 𑀧𑀪𑀼𑀢𑀺. 𑀙𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑁄𑀢𑀺 𑀯𑀺𑀓𑀲𑀺𑀢𑀁 𑀕𑀡𑁆𑀳𑀦𑁆𑀢𑁄. 𑀫𑀓𑀼𑀴𑀁 𑀧𑀦 𑀭𑀼𑀓𑁆𑀔𑀢𑁆𑀢𑀘𑀁 𑀅𑀓𑁄𑀧𑁂𑀦𑁆𑀢𑁂𑀦𑀧𑀺 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀨𑀼𑀮𑁆𑀮𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 𑀳𑀢𑁆𑀣𑀘𑀸𑀧𑀮𑁆𑀮𑁂𑀦.

‘‘𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀧𑀺𑀯𑀦𑀧𑀸𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀔𑀸𑀤𑀺𑀢𑀼𑀓𑀸𑀫𑁂𑀦𑀸’’𑀢𑀺. 𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀻𑀢𑀺 𑀫𑀽𑀮𑀁 𑀅𑀦𑁄𑀢𑀸𑀭𑁂𑀢𑁆𑀯𑀸 𑀧𑀡𑁆𑀡𑀫𑀢𑁆𑀢𑀦𑀺𑀕𑁆𑀕𑀫𑀦𑀫𑀢𑁆𑀢𑁂𑀦𑀧𑀺 𑀯𑀟𑁆𑀠𑀢𑀺. 𑀢𑀢𑁆𑀣 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀭𑁄𑀦𑁆𑀢𑁄 𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀯𑁂𑀴𑀼𑀤𑀡𑁆𑀟𑀸𑀤𑀬𑁄 𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀯𑀮𑀁 𑀘𑀗𑁆𑀓𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀫𑀕𑁆𑀕𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀅𑀓𑁆𑀓𑀫𑀦𑁆𑀢𑀲𑁆𑀲, 𑀢𑀺𑀡𑀸𑀦𑀁 𑀉𑀧𑀭𑀺 𑀦𑀺𑀲𑀻𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀦𑀺𑀲𑀻𑀤𑀦𑁆𑀢𑀲𑁆𑀲 𑀘 𑀤𑁄𑀲𑁄 𑀦𑀢𑁆𑀣𑀺.

𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀲𑀫𑀡𑀸𑀦𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀳𑀺, 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺𑀧𑀺 𑀓𑀧𑁆𑀧𑀺𑀬𑀪𑀸𑀯𑀢𑁄 ‘‘𑀲𑀫𑀡𑀓𑀧𑁆𑀧𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀩𑀻𑀚𑀁 𑀦𑀸𑀫 𑀢𑀭𑀼𑀡𑀅𑀫𑁆𑀩𑀨𑀮𑀸𑀤𑀻𑀦𑀺. 𑀦𑀺𑀩𑁆𑀩𑀝𑁆𑀝𑁂𑀢𑀩𑁆𑀩𑀁 𑀯𑀺𑀬𑁄𑀚𑁂𑀢𑀩𑁆𑀩𑀁 𑀩𑀻𑀚𑀁 𑀬𑀲𑁆𑀫𑀺𑀁, 𑀢𑀁 𑀧𑀦𑀲𑀸𑀤𑀺 𑀦𑀺𑀩𑁆𑀩𑀝𑁆𑀝𑀩𑀻𑀚𑀁 𑀦𑀸𑀫. 𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀯𑀼𑀢𑁆𑀢𑁂𑀧𑀺 𑀯𑀘𑀦𑀓𑁆𑀔𑀡𑁂𑀯 𑀅𑀕𑁆𑀕𑀺𑀲𑀢𑁆𑀣𑀸𑀤𑀺𑀦𑀸 𑀩𑀻𑀚𑀕𑀸𑀫𑁂 𑀯𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀘𑀦𑀢𑁄 𑀧𑀦 𑀧𑀼𑀩𑁆𑀩𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀜𑁆𑀘 𑀤𑁆𑀯𑀺𑀥𑀸 𑀅𑀓𑀢𑁆𑀯𑀸 𑀙𑁂𑀤𑀦𑀪𑁂𑀤𑀦𑀫𑁂𑀯 𑀤𑀲𑁆𑀲𑁂𑀢𑀩𑁆𑀩𑀁. 𑀓𑀭𑁄𑀦𑁆𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 ¶ 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀼𑀢𑁆𑀢𑁂𑀬𑁂𑀯 𑀓𑀸𑀢𑀩𑁆𑀩𑀁. 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀓𑀸𑀭𑀸𑀧𑀦𑀲𑁆𑀲 𑀧𑀞𑀫𑀫𑁂𑀯 𑀅𑀥𑀺𑀓𑀢𑀢𑁆𑀢𑀸. ‘‘𑀓𑀝𑀸𑀳𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀝𑀸𑀳𑀢𑁄 𑀦𑀻𑀳𑀢𑀸𑀬 𑀫𑀺𑀜𑁆𑀚𑀸𑀬 𑀯𑀸 𑀩𑀻𑀚𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀚𑁆𑀛𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀪𑀽𑀢𑀕𑀸𑀫𑁄, 𑀪𑀽𑀢𑀕𑀸𑀫𑀲𑀜𑁆𑀜𑀺𑀢𑀸, 𑀯𑀺𑀓𑁄𑀧𑀦𑀁 𑀯𑀸 𑀯𑀺𑀓𑁄𑀧𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑁂 𑀅𑀜𑁆𑀜𑀁 𑀯𑀘𑀦𑀦𑁆𑀢𑀺 𑀬𑀁 𑀤𑁄𑀲𑀯𑀺𑀪𑀸𑀯𑀦𑀢𑁆𑀣𑀁 𑀧𑀭𑁂𑀳𑀺 𑀯𑀼𑀢𑁆𑀢𑀯𑀘𑀦𑀁 𑀢𑀁 𑀢𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑁂𑀦 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀧𑀝𑀺𑀘𑀭𑀢𑀺.

𑁯𑁮. 𑀬𑀤𑁂𑀢𑀁 ¶ 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀯𑀲𑁂𑀦 𑀧𑀯𑀢𑁆𑀢𑀯𑀘𑀦𑀁, 𑀢𑀤𑁂𑀯 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀤𑀢𑀺 𑀧𑀓𑀸𑀲𑁂𑀢𑀻𑀢𑀺 𑀅𑀜𑁆𑀜𑀯𑀸𑀤𑀓𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀢𑀼𑀡𑁆𑀳𑀻𑀪𑀽𑀢𑀲𑁆𑀲𑁂𑀢𑀁 𑀦𑀸𑀫𑀦𑁆𑀢𑀺 𑀢𑀼𑀡𑁆𑀳𑀻𑀪𑀸𑀯𑀲𑁆𑀲𑁂𑀢𑀁 𑀦𑀸𑀫𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀜𑁆𑀜𑀯𑀸𑀤𑀓𑀁 𑀆𑀭𑁄𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑀯𑀸𑀤𑁂 𑀆𑀭𑁄𑀧𑁂𑀢𑀼𑀁. 𑀯𑀺𑀳𑁂𑀲𑀓𑀦𑁆𑀢𑀺 𑀯𑀺𑀳𑁂𑀲𑀓𑀢𑁆𑀢𑀁.

𑁯𑁯. 𑀧𑀸𑀴𑀺𑀬𑀁 𑀦 𑀉𑀕𑁆𑀖𑀸𑀝𑁂𑀢𑀼𑀓𑀸𑀫𑁄𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑁄.

𑁧𑁦𑁦. 𑀅𑀦𑀸𑀭𑁄𑀧𑀺𑀢𑁂 𑀅𑀜𑁆𑀜𑀯𑀸𑀤𑀓𑁂𑀢𑀺 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀧𑀸𑀴𑀺𑀬𑀁 𑀆𑀕𑀢𑀅𑀜𑁆𑀜𑁂𑀦𑀜𑁆𑀜𑀧𑀝𑀺𑀘𑀭𑀡𑀯𑀲𑁂𑀦 𑀬𑀼𑀚𑁆𑀚𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀧𑀦 𑀫𑀼𑀲𑀸𑀯𑀸𑀤𑁂𑀦 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀁, 𑀆𑀭𑁄𑀧𑀺𑀢𑁂 𑀇𑀫𑀺𑀦𑀸𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀓𑁂𑀘𑀺 𑀧𑀦 ‘‘𑀫𑀼𑀲𑀸𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀧𑀺 𑀫𑀼𑀲𑀸𑀯𑀸𑀤𑁂 𑀇𑀫𑀺𑀦𑀸𑀯 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀓𑀫𑁆𑀫𑁂𑀦 𑀆𑀭𑁄𑀧𑀺𑀢𑀢𑀸, 𑀆𑀧𑀢𑁆𑀢𑀺𑀬𑀸 𑀯𑀸 𑀯𑀢𑁆𑀣𑀼𑀦𑀸 𑀯𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀢𑀸, 𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀁, 𑀢𑀼𑀡𑁆𑀳𑀻𑀪𑀸𑀯𑁄 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑁂 ¶ 𑀘𑀺𑀦𑁆𑀢𑀸𑀬𑀦𑀢𑁆𑀣𑀲𑁆𑀲 𑀛𑁂-𑀥𑀸𑀢𑀼𑀲𑁆𑀲 𑀅𑀦𑁂𑀓𑀢𑁆𑀣𑀢𑀸𑀬 𑀑𑀮𑁄𑀓𑀦𑀢𑁆𑀣𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁 ‘‘𑀑𑀮𑁄𑀓𑀸𑀧𑁂𑀦𑁆𑀢𑀻’’𑀢𑀺. 𑀙𑀦𑁆𑀤𑀸𑀬𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄𑀢𑀺 𑀆𑀳 ‘‘𑀙𑀦𑁆𑀤𑁂𑀦𑀸’’𑀢𑀺.

𑁧𑁦𑁫. 𑀪𑀺𑀓𑁆𑀔𑀼𑀁 𑀮𑀸𑀫𑀓𑀢𑁄 𑀘𑀺𑀦𑁆𑀢𑀸𑀧𑀦𑀢𑁆𑀣𑀁 𑀅𑀜𑁆𑀜𑁂𑀲𑀁 𑀢𑀁 𑀅𑀯𑀡𑁆𑀡𑀓𑀣𑀦𑀁 𑀉𑀚𑁆𑀛𑀸𑀧𑀦𑀁 𑀦𑀸𑀫. 𑀅𑀜𑁆𑀜𑁂𑀲𑀁 𑀧𑀦 𑀅𑀯𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀼𑀮𑁆𑀮𑀧𑀦𑀯𑀲𑁂𑀦 𑀪𑀺𑀓𑁆𑀔𑀼𑀦𑁄 𑀤𑁄𑀲𑀧𑁆𑀧𑀓𑀸𑀲𑀦𑀁 𑀔𑀺𑀬𑁆𑀬𑀦𑀁 𑀦𑀸𑀫𑀸𑀢𑀺 𑀅𑀬𑀫𑁂𑀢𑁂𑀲𑀁 𑀪𑁂𑀤𑁄.

𑁧𑁦𑁬. 𑀅𑀜𑁆𑀜𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀻𑀢𑀺 𑀅𑀜𑁆𑀜𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀚𑁆𑀛𑀸𑀧𑁂𑀢𑀺. 𑀢𑀲𑁆𑀲 𑀯𑀸 𑀢𑀁 𑀲𑀦𑁆𑀢𑀺𑀓𑁂𑀢𑀺 𑀢𑀲𑁆𑀲 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀉𑀧𑀲𑀫𑁆𑀧𑀦𑁆𑀦𑀁 𑀔𑀺𑀬𑁆𑀬𑀢𑀺. 𑀇𑀥𑀸𑀧𑀺 𑀫𑀼𑀲𑀸𑀯𑀸𑀤𑁂𑀦 𑀉𑀚𑁆𑀛𑀸𑀧𑀦𑀸𑀤𑀻𑀦𑀁 𑀲𑀫𑁆𑀪𑀯𑀢𑁄 𑀤𑀼𑀓𑁆𑀓𑀝𑀝𑁆𑀞𑀸𑀦𑀸𑀦𑀺 𑀘 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀘 𑀇𑀫𑀺𑀦𑀸 𑀏𑀯 𑀲𑀺𑀓𑁆𑀔𑀸𑀧𑀤𑁂𑀦 𑀯𑀼𑀢𑁆𑀢𑀸𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁 𑀲𑀩𑁆𑀩𑀢𑁆𑀣 𑀫𑀼𑀲𑀸𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀅𑀦𑀺𑀯𑀢𑁆𑀢𑀺𑀢𑁄. 𑀥𑀫𑁆𑀫𑀓𑀫𑁆𑀫𑁂𑀦 𑀲𑀫𑁆𑀫𑀢𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀅𑀕𑀢𑀺𑀕𑀫𑀦𑀸𑀪𑀸𑀯𑁄, 𑀢𑀲𑁆𑀲 𑀅𑀯𑀡𑁆𑀡𑀓𑀸𑀫𑀢𑀸, 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀤𑀢𑀺. 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀉𑀚𑁆𑀛𑀸𑀧𑀦𑀁 𑀯𑀸 𑀔𑀺𑀬𑁆𑀬𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀙 𑀅𑀗𑁆𑀕𑀸𑀦𑀺.

𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁦. 𑀘𑀢𑀼𑀢𑁆𑀣𑁂 𑀅𑀧𑀜𑁆𑀜𑀸𑀢𑁂𑀢𑀺 𑀅𑀧𑁆𑀧𑀲𑀺𑀤𑁆𑀥𑁂. 𑀇𑀫𑀁 𑀧𑀦 𑀅𑀝𑁆𑀞 𑀫𑀸𑀲𑁂 𑀫𑀡𑁆𑀟𑀧𑀸𑀤𑀻𑀲𑀼 𑀞𑀧𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑀸 𑀧𑀞𑀫𑀫𑁂𑀯 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀫𑀸𑀲𑁂’’𑀢𑀺𑀆𑀤𑀺𑀯𑀘𑀦𑁂𑀦 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑁂𑀦 𑀧𑀓𑀸𑀲𑁂𑀢𑁆𑀯𑀸 𑀯𑀺𑀲𑀼𑀁 𑀅𑀦𑀼𑀧𑀜𑁆𑀜𑀢𑁆𑀢𑀺 𑀦 𑀯𑀼𑀢𑁆𑀢𑀸. 𑀧𑀭𑀺𑀯𑀸𑀭𑁂 𑀧𑀦𑁂𑀢𑀁 𑀅𑀦𑀼𑀚𑀸𑀦𑀦𑀯𑀘𑀦𑀁 𑀅𑀦𑀼𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 ‘‘𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 (𑀧𑀭𑀺. 𑁬𑁫-𑁬𑁭) 𑀯𑀼𑀢𑁆𑀢𑀁.

𑀦𑀯𑀯𑀸𑀬𑀺𑀫𑁄𑀢𑀺 𑀅𑀥𑀼𑀦𑀸 𑀲𑀼𑀢𑁆𑀢𑁂𑀦 𑀯𑀻𑀢𑀓𑀘𑁆𑀙𑁂𑀦 𑀧𑀮𑀺𑀯𑁂𑀞𑀺𑀢𑀫𑀜𑁆𑀘𑁄. 𑀑𑀦𑀤𑁆𑀥𑁄𑀢𑀺 𑀓𑀧𑁆𑀧𑀺𑀬𑀘𑀫𑁆𑀫𑁂𑀦 𑀑𑀦𑀤𑁆𑀥𑁄. 𑀢𑁂 𑀳𑀺 𑀯𑀲𑁆𑀲𑁂𑀦 𑀲𑀻𑀖𑀁 𑀦 𑀦𑀲𑁆𑀲𑀦𑁆𑀢𑀺. ‘‘𑀉𑀓𑁆𑀓𑀝𑁆𑀞𑀅𑀩𑁆𑀪𑁄𑀓𑀸𑀲𑀺𑀓𑁄’’𑀢𑀺 𑀇𑀤𑀁 𑀢𑀲𑁆𑀲 𑀲𑀼𑀔𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀢𑁆𑀢𑀁, 𑀉𑀓𑁆𑀓𑀝𑁆𑀞𑀲𑁆𑀲𑀸𑀧𑀺 𑀧𑀦 𑀘𑀻𑀯𑀭𑀓𑀼𑀝𑀺 𑀯𑀝𑁆𑀝𑀢𑁂𑀯. 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸𑀢𑀺 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀪𑀸𑀯𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀯𑀲𑁆𑀲𑀪𑀬𑁂𑀦 𑀲𑀬𑀁 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 ¶ . 𑀅𑀩𑁆𑀪𑁄𑀓𑀸𑀲𑀺𑀓𑀸𑀦𑀁 𑀢𑁂𑀫𑀦𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀫𑁆𑀧𑀺 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁂𑀦 𑀭𑀓𑁆𑀔𑀺𑀢𑀩𑁆𑀩𑀫𑁂𑀯.

‘‘𑀯𑀮𑀸𑀳𑀓𑀸𑀦𑀁 𑀅𑀦𑀼𑀝𑁆𑀞𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀕𑀺𑀫𑁆𑀳𑀸𑀦𑁂𑀧𑀺 𑀫𑁂𑀖𑁂 𑀉𑀝𑁆𑀞𑀺𑀢𑁂 𑀅𑀩𑁆𑀪𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀓𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀬𑀫𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸. 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸𑀢𑀺 𑀬𑀢𑁆𑀣 𑀲𑀫𑀦𑁆𑀢𑀢𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀡𑀫𑀚𑁆𑀛𑁂 𑀲𑀩𑁆𑀩𑀤𑀸 𑀓𑀘𑀯𑀭𑀲𑁆𑀲 𑀲𑀗𑁆𑀓𑀟𑁆𑀠𑀦𑁂𑀦 𑀫𑀚𑁆𑀛𑁂 𑀯𑀸𑀮𑀺𑀓𑀸 𑀲𑀜𑁆𑀘𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀘𑁆𑀘𑀯𑀢𑁆𑀣𑀼𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀯𑀸 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸. 𑀬𑀢𑁆𑀣 𑀯𑀸 𑀧𑀦 𑀓𑁄𑀡𑁂𑀲𑀼 𑀯𑀸𑀮𑀺𑀓𑀸 𑀲𑀜𑁆𑀘𑀺𑀢𑀸, 𑀢𑀢𑁆𑀣 𑀢𑀢𑁄 𑀧𑀝𑁆𑀞𑀸𑀬 𑀅𑀧𑀭𑀤𑀺𑀲𑀸𑀪𑀺𑀫𑀼𑀔𑀸 𑀳𑀭𑀺𑀢𑀩𑁆𑀩𑀸𑀢𑀺 𑀓𑁂𑀘𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀲𑁆𑀲 ¶ 𑀧𑀤𑀯𑀴𑀜𑁆𑀚𑁂𑀦 𑀅𑀯𑀺𑀓𑁄𑀧𑀦𑀢𑁆𑀣𑀸𑀬 𑀲𑀬𑀁 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀸𑀪𑀺𑀫𑀼𑀔𑀁 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 ‘‘𑀫𑀚𑁆𑀛𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀘𑀦𑀲𑁆𑀲 𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀺.

𑁧𑁧𑁧. 𑀯𑀗𑁆𑀓𑀧𑀸𑀤𑀢𑀸𑀫𑀢𑁆𑀢𑁂𑀦 𑀓𑀼𑀴𑀻𑀭𑀧𑀸𑀤𑀓𑀲𑁆𑀲 𑀲𑁂𑀲𑁂𑀳𑀺 𑀯𑀺𑀲𑁂𑀲𑁄, 𑀦 𑀅𑀝𑀦𑀻𑀲𑀼 𑀧𑀸𑀤𑀧𑁆𑀧𑀯𑁂𑀲𑀦𑀯𑀺𑀲𑁂𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀯𑀸 𑀧𑀦 𑀓𑁄𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑁂𑀯.

𑀦𑀺𑀲𑀻𑀤𑀺𑀢𑁆𑀯𑀸…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀫𑁂𑀖𑀼𑀝𑁆𑀞𑀸𑀦𑀸𑀪𑀸𑀯𑀁 𑀜𑀢𑁆𑀯𑀸 ‘‘𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑁂𑀦 𑀧𑀼𑀦𑀸𑀕𑀦𑁆𑀢𑀩𑁆𑀩𑀫𑁂𑀯. 𑀓𑀧𑁆𑀧𑀁 𑀮𑀪𑀺𑀢𑁆𑀯𑀸𑀢𑀺 ‘‘𑀕𑀘𑁆𑀙, 𑀫𑀸 𑀇𑀥 𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀮𑀪𑀺𑀢𑁆𑀯𑀸.

𑀆𑀯𑀸𑀲𑀺𑀓𑀸𑀦𑀁𑀬𑁂𑀯 𑀧𑀮𑀺𑀩𑁄𑀥𑁄𑀢𑀺 𑀆𑀕𑀦𑁆𑀢𑀼𑀓𑁂𑀲𑀼 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀸𑀲𑀺𑀓𑀸 𑀏𑀯 𑀉𑀤𑁆𑀥𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀢𑁂𑀲𑀼𑀧𑀺 𑀆𑀯𑀸𑀲𑀺𑀓𑀸𑀦𑀫𑁂𑀯 𑀧𑀮𑀺𑀩𑁄𑀥𑁄. 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁂 𑀧𑀦 ‘‘𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀅𑀯𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀢𑀢𑁆𑀢𑀸𑀧𑀺 𑀤𑀼𑀓𑁆𑀓𑀝𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀉𑀲𑁆𑀲𑀸𑀭𑀓𑁄𑀢𑀺 𑀲𑀭𑀪𑀸𑀡𑀓𑁄. 𑀲𑁄 𑀳𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀧𑀸𑀴𑀺𑀧𑀸𑀞𑀁 𑀲𑀸𑀭𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀉𑀲𑁆𑀲𑀸𑀭𑀓𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁨. 𑀯𑀡𑁆𑀡𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀢𑀸𑀢𑀺 𑀧𑀝𑀔𑀡𑁆𑀟𑀸𑀤𑀻𑀳𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀸. 𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀸𑀢𑀺 𑀘𑀺𑀫𑀺𑀮𑀺𑀓𑀸𑀬 𑀲𑀢𑀺 𑀢𑀲𑁆𑀲𑀸 𑀉𑀧𑀭𑀺, 𑀅𑀲𑀢𑀺 𑀲𑀼𑀤𑁆𑀥𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀸. ‘‘𑀲𑀻𑀳𑀘𑀫𑁆𑀫𑀸𑀤𑀻𑀦𑀁 𑀧𑀭𑀺𑀳𑀭𑀡𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄’’𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀼𑀦 𑀲𑀁𑀳𑀭𑀺𑀢𑁆𑀯𑀸 𑀞𑀧𑀦𑀸𑀤𑀺𑀯𑀲𑁂𑀦 ¶ 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑀺𑀳𑀭𑀡𑀫𑁂𑀯 𑀦 𑀯𑀝𑁆𑀝𑀢𑀺, 𑀪𑀽𑀫𑀢𑁆𑀣𑀭𑀡𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀧𑀦 𑀅𑀢𑁆𑀢𑀦𑁄 𑀧𑀭𑀺𑀳𑀭𑀡𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀓𑁂 𑀳𑀺 ‘‘𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀫𑀜𑁆𑀘𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀧𑀭𑀺𑀳𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑁋

‘‘𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁫) 𑁋

𑀧𑀝𑀺𑀓𑁆𑀔𑁂𑀧𑁄 ¶ 𑀓𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀤𑀸𑀭𑀼𑀫𑀬𑀧𑀻𑀞𑀦𑁆𑀢𑀺 𑀨𑀮𑀓𑀫𑀬𑀧𑀻𑀞𑀫𑁂𑀯. 𑀧𑀸𑀤𑀓𑀣𑀮𑀺𑀓𑀦𑁆𑀢𑀺 𑀅𑀥𑁄𑀢𑀧𑀸𑀤𑀁 𑀬𑀲𑁆𑀫𑀺𑀁 𑀖𑀁𑀲𑀦𑁆𑀢𑀸 𑀥𑁄𑀯𑀦𑁆𑀢𑀺, 𑀢𑀁 𑀤𑀸𑀭𑀼𑀨𑀮𑀓𑀸𑀤𑀺.

𑁧𑁧𑁩. ‘‘𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦 𑀅𑀦𑁄𑀢𑀸𑀧𑁂𑀦𑁆𑀢𑀲𑁆𑀲𑀧𑀺 𑀆𑀕𑀫𑀦𑁂 𑀲𑀸𑀧𑁂𑀓𑁆𑀔𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀫𑀜𑁆𑀘𑀸𑀤𑀻𑀦𑀁 𑀲𑀗𑁆𑀖𑀺𑀓𑀢𑀸, 𑀯𑀼𑀢𑁆𑀢𑀮𑀓𑁆𑀔𑀡𑁂 𑀤𑁂𑀲𑁂 𑀲𑀦𑁆𑀣𑀭𑀡𑀁 𑀯𑀸 𑀲𑀦𑁆𑀣𑀭𑀸𑀧𑀦𑀁 𑀯𑀸, 𑀅𑀧𑀮𑀺𑀩𑀼𑀤𑁆𑀥𑀢𑀸, 𑀆𑀧𑀤𑀸𑀬 𑀅𑀪𑀸𑀯𑁄, 𑀦𑀺𑀭𑀧𑁂𑀓𑁆𑀔𑀢𑀸, 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁄’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀯𑀫𑁂𑀢𑁆𑀣 𑀦𑀺𑀭𑀧𑁂𑀓𑁆𑀔𑀢𑀸𑀬 𑀲𑀤𑁆𑀥𑀺𑀁 𑀙 𑀅𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬. 𑀧𑀜𑁆𑀘𑀫𑁂 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀸𑀬𑁂𑀯 𑀞𑀧𑀺𑀢𑀸 𑀉𑀕𑁆𑀕𑀢𑀮𑁄𑀫𑀸 𑀅𑀢𑁆𑀣𑀭𑀡𑀯𑀺𑀲𑁂𑀲𑀸. 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀲𑁂𑀦𑀸𑀲𑀦𑀢𑁄𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁂𑀦𑀸𑀲𑀦𑀢𑁄.

𑁧𑁧𑁭. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀯𑀺𑀲𑁂𑀲𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀭𑀼𑀓𑁆𑀔𑀫𑀽𑀮𑀲𑁆𑀲 𑀧𑀸𑀓𑀝𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀮𑀼𑀚𑁆𑀚𑀢𑀻𑀢𑀺 𑀯𑀺𑀦𑀲𑁆𑀲𑀢𑀺.

𑁧𑁧𑁮. 𑀬𑁂𑀦 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀯𑀻𑀦𑀦𑁆𑀢𑀺, 𑀢𑀁 𑀫𑀜𑁆𑀘𑀧𑀻𑀞𑀓𑀯𑀸𑀦𑀁. 𑀲𑀺𑀮𑀼𑀘𑁆𑀘𑀬𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀕𑀼𑀳𑀸. ‘‘𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀮𑀓𑁆𑀔𑀡𑀲𑁂𑀬𑁆𑀬𑀸, 𑀢𑀲𑁆𑀲𑀸 ¶ 𑀲𑀗𑁆𑀖𑀺𑀓𑀢𑀸, 𑀯𑀼𑀢𑁆𑀢𑀮𑀓𑁆𑀔𑀡𑁂 𑀯𑀺𑀳𑀸𑀭𑁂 𑀲𑀦𑁆𑀣𑀭𑀡𑀁 𑀯𑀸 𑀲𑀦𑁆𑀣𑀭𑀸𑀧𑀦𑀁 𑀯𑀸, 𑀅𑀧𑀮𑀺𑀩𑀼𑀤𑁆𑀥𑀢𑀸, 𑀆𑀧𑀤𑀸𑀬 𑀅𑀪𑀸𑀯𑁄, 𑀅𑀦𑀧𑁂𑀓𑁆𑀔𑀲𑁆𑀲 𑀤𑀺𑀲𑀸𑀧𑀓𑁆𑀓𑀫𑀦𑀁, 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀲𑀢𑁆𑀢 𑀅𑀗𑁆𑀕𑀸𑀦𑀺.

𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁯. 𑀙𑀝𑁆𑀞𑁂 ¶ 𑀅𑀦𑀼𑀧𑀯𑀺𑀲𑀺𑀢𑁆𑀯𑀸𑀢𑀺 𑀲𑀫𑀻𑀧𑀁 𑀧𑀯𑀺𑀲𑀺𑀢𑁆𑀯𑀸.

𑁧𑁨𑁨. 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀤𑀺𑀬𑀟𑁆𑀠𑀳𑀢𑁆𑀣𑀽𑀧𑀘𑀸𑀭𑀁 𑀞𑀧𑁂𑀢𑁆𑀯𑀸. 𑀲𑀗𑁆𑀖𑀺𑀓𑀯𑀺𑀳𑀸𑀭𑀢𑀸, 𑀅𑀦𑀼𑀝𑁆𑀞𑀸𑀧𑀦𑀻𑀬𑀪𑀸𑀯𑀚𑀸𑀦𑀦𑀁, 𑀲𑀫𑁆𑀩𑀸𑀥𑁂𑀢𑀼𑀓𑀸𑀫𑀢𑀸, 𑀉𑀧𑀘𑀸𑀭𑁂 𑀦𑀺𑀲𑀻𑀤𑀦𑀁 𑀯𑀸 𑀦𑀺𑀧𑀚𑁆𑀚𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁬. 𑀲𑀢𑁆𑀢𑀫𑁂 𑀓𑁄𑀝𑁆𑀞𑀓𑀸𑀦𑀻𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀦𑀺.

𑁧𑁨𑁮. ‘‘𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀅𑀦𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀧𑀸𑀧𑀕𑀭𑀳𑀺𑀢𑀸𑀬 𑀳𑀺 𑀅𑀓𑀼𑀧𑀺𑀢𑀘𑀺𑀢𑁆𑀢𑁂𑀦 𑀦𑀺𑀓𑁆𑀓𑀟𑁆𑀠𑀸𑀧𑁂𑀦𑁆𑀢𑀲𑁆𑀲 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀦𑀢𑁆𑀣𑀺 ‘‘𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀜𑁆𑀜𑀸𑀧𑁂𑀓𑁆𑀔𑀸 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀁 ‘‘𑀅𑀮𑀚𑁆𑀚𑀺𑀁 𑀦𑀺𑀓𑁆𑀓𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀅𑀦𑁆𑀢𑀭𑀦𑁆𑀢𑀭𑀸 𑀓𑁄𑀧𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀸𑀧𑀢𑁆𑀢𑀺 𑀅𑀮𑀚𑁆𑀚𑀺𑀢𑀸𑀤𑀺𑀧𑀘𑁆𑀘𑀬𑁂𑀦𑁂𑀯 𑀦𑀺𑀓𑁆𑀓𑀟𑁆𑀠𑀦𑀲𑁆𑀲 𑀆𑀭𑀤𑁆𑀥𑀢𑁆𑀢𑀸. 𑀲𑀗𑁆𑀖𑀺𑀓𑀯𑀺𑀳𑀸𑀭𑁄, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀡𑁆𑀟𑀦𑀓𑀸𑀭𑀓𑀪𑀸𑀯𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀢𑀸, 𑀓𑁄𑀧𑁂𑀦 𑀦𑀺𑀓𑁆𑀓𑀟𑁆𑀠𑀦𑀁 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁯. 𑀅𑀝𑁆𑀞𑀫𑀁 ¶ 𑀉𑀢𑁆𑀢𑀸𑀦𑀫𑁂𑀯. 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄, 𑀅𑀲𑀻𑀲𑀖𑀝𑁆𑀝𑀯𑁂𑀳𑀸𑀲𑀓𑀼𑀝𑀺, 𑀳𑁂𑀝𑁆𑀞𑀸𑀧𑀭𑀺𑀪𑁄𑀕𑀢𑀸, 𑀅𑀧𑀝𑀸𑀡𑀺𑀤𑀺𑀦𑁆𑀦𑁂 𑀆𑀳𑀘𑁆𑀘𑀧𑀸𑀤𑀓𑁂 𑀦𑀺𑀲𑀻𑀤𑀦𑀁 𑀯𑀸 𑀦𑀺𑀧𑀚𑁆𑀚𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁩𑁫. 𑀦𑀯𑀫𑁂 ¶ ‘‘𑀫𑀳𑀮𑁆𑀮𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀲𑁆𑀲𑀸𑀫𑀺𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑁆𑀲. 𑀲𑀸 𑀅𑀧𑀭𑀺𑀧𑀽𑀭𑀽𑀧𑀘𑀸𑀭𑀸𑀧𑀺 𑀳𑁄𑀢𑀻𑀢𑀺 𑀯𑀺𑀯𑀭𑀺𑀬𑀫𑀸𑀦𑀁 𑀓𑀯𑀸𑀝𑀁 𑀬𑀁 𑀪𑀺𑀢𑁆𑀢𑀺𑀁 𑀆𑀳𑀦𑀢𑀺, 𑀲𑀸 𑀲𑀸𑀫𑀦𑁆𑀢𑀸 𑀓𑀯𑀸𑀝𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀸 𑀉𑀧𑀘𑀸𑀭𑀭𑀳𑀺𑀢𑀸𑀧𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀁 𑀯𑀸𑀢𑀧𑀸𑀦𑀁 𑀲𑀦𑁆𑀥𑁂𑀢𑀺 𑀖𑀝𑀬𑀢𑀻𑀢𑀺 𑀆𑀮𑁄𑀓𑀲𑀦𑁆𑀥𑀻𑀢𑀺 𑀓𑀯𑀸𑀝𑀁 𑀯𑀼𑀘𑁆𑀘𑀢𑀺. 𑀤𑁆𑀯𑀸𑀭𑀯𑀸𑀢𑀧𑀸𑀦𑀽𑀧𑀘𑀸𑀭𑀢𑁄 𑀅𑀜𑁆𑀜𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀮𑀺𑀫𑁆𑀧𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀧𑀺𑀡𑁆𑀟𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.

𑀓𑁂𑀘𑀺 𑀧𑀦 ‘‘𑀧𑀸𑀴𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀲𑀁𑀯𑀺𑀥𑀸𑀢𑀩𑁆𑀩𑀁. 𑀳𑀭𑀺𑀢𑁂 𑀞𑀺𑀢𑁄 𑀅𑀥𑀺𑀝𑁆𑀞𑀸𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀳𑀭𑀺𑀢𑀬𑀼𑀢𑁆𑀢𑁂 𑀔𑁂𑀢𑁆𑀢𑁂 𑀞𑀢𑁆𑀯𑀸 𑀙𑀸𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀢𑀸𑀤𑀺𑀲𑁂 𑀔𑁂𑀢𑁆𑀢𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺.

𑁧𑁩𑁬. 𑀉𑀚𑀼𑀓𑀫𑁂𑀯 𑀙𑀸𑀤𑀦𑀦𑁆𑀢𑀺 𑀙𑀸𑀤𑀦𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀺𑀝𑁆𑀞𑀺𑀯𑀁𑀲𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀸𑀤𑀺, 𑀢𑀸𑀯 𑀇𑀝𑁆𑀞𑀓𑀸𑀤𑀻𑀳𑀺 𑀉𑀚𑀼𑀓𑀁 𑀙𑀸𑀤𑀦𑀁. 𑀇𑀫𑀺𑀦𑀸 𑀧𑀦 𑀬𑁂𑀦 𑀲𑀩𑁆𑀩𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑀯𑀸𑀭𑀁 𑀙𑀸𑀤𑀺𑀢𑁂 𑀢𑀁 𑀙𑀸𑀤𑀦𑀁 𑀏𑀓𑀫𑀕𑁆𑀕𑀦𑁆𑀢𑀺 𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀤𑁆𑀯𑁂 𑀫𑀕𑁆𑀕𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀬𑁂𑀦 𑀙𑀸𑀤𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀙𑀸𑀤𑀸𑀧𑁂𑀲𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀘 ‘‘𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀙𑀤𑀦𑀁 𑀙𑀤𑀦𑀽𑀧𑀭𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀘 𑀲𑀫𑁂𑀢𑀺.

𑀧𑀸𑀴𑀺𑀬𑀁 ‘‘𑀫𑀕𑁆𑀕𑁂𑀦 𑀙𑀸𑀤𑁂𑀦𑁆𑀢𑀲𑁆𑀲 𑀧𑀭𑀺𑀬𑀸𑀬𑁂𑀦 𑀙𑀸𑀤𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀜𑁆𑀘 𑀇𑀝𑁆𑀞𑀓𑀸𑀤𑀻𑀳𑀺, 𑀢𑀺𑀡𑀧𑀡𑁆𑀡𑁂𑀳𑀺 𑀘 𑀙𑀸𑀤𑀦𑀧𑁆𑀧𑀓𑀸𑀭𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀦𑁆𑀢𑀺𑀬𑀸 𑀙𑀸𑀤𑀺𑀢𑀲𑁆𑀲 𑀙𑀤𑀦𑀲𑁆𑀲 𑀉𑀧𑀭𑀺 𑀙𑀤𑀦𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀉𑀚𑀼𑀓𑀫𑁂𑀯 𑀏𑀓𑀯𑀸𑀭𑀁 𑀙𑀸𑀤𑀦𑀁 𑀏𑀓𑀫𑀕𑁆𑀕𑀦𑁆𑀢𑀺 𑀕𑀳𑁂𑀢𑁆𑀯𑀸 ‘𑀤𑁆𑀯𑁂 𑀫𑀕𑁆𑀕𑁂’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁, 𑀦 𑀧𑀦 𑀲𑀓𑀮𑀯𑀺𑀳𑀸𑀭𑀙𑀸𑀤𑀦𑀁. 𑀏𑀲 𑀦𑀬𑁄 𑀧𑀭𑀺𑀬𑀸𑀬𑁂𑀦 𑀙𑀸𑀤𑀦𑁂𑀧𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀦 𑀲𑀫𑁂𑀢𑀺.

𑀢𑀢𑀺𑀬𑀸𑀬 𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀢𑀢𑀺𑀬𑀸𑀬𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀢𑀢𑀺𑀬𑀁 𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀺𑀡𑀧𑀡𑁆𑀡𑁂𑀳𑀺 𑀮𑀩𑁆𑀪𑀢𑀻𑀢𑀺 𑀢𑀺𑀡𑀧𑀡𑁆𑀡𑁂𑀳𑀺 𑀙𑀸𑀤𑁂𑀢𑁆𑀯𑀸 𑀉𑀧𑀭𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀯𑀮𑀁 ¶ 𑀢𑀺𑀡𑀓𑀼𑀝𑀺𑀬𑀸 𑀳𑀺 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀦𑁆𑀢𑀺 𑀫𑀕𑁆𑀕𑀯𑀲𑁂𑀦 𑀙𑀸𑀤𑀺𑀢𑀸𑀦𑀁 𑀢𑀺𑀡𑁆𑀡𑀁 𑀙𑀤𑀦𑀸𑀦𑀁. 𑀢𑀺𑀡𑁆𑀡𑀁 𑀧𑀭𑀺𑀬𑀸𑀬𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀫𑀳𑀮𑁆𑀮𑀓𑀯𑀺𑀳𑀸𑀭𑀢𑀸, 𑀅𑀢𑁆𑀢𑀦𑁄 𑀯𑀸𑀲𑀸𑀕𑀸𑀭𑀢𑀸, 𑀉𑀢𑁆𑀢𑀭𑀺 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁦. 𑀤𑀲𑀫𑁂 𑀫𑀸𑀢𑀺𑀓𑀸𑀬𑀁 𑀲𑀧𑁆𑀧𑀸𑀡𑀓𑀉𑀤𑀓𑀁 𑀢𑀺𑀡𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀲𑀺𑀜𑁆𑀘𑁂𑀬𑁆𑀬, 𑀙𑀟𑁆𑀟𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀩𑀳𑀺 𑀲𑀺𑀜𑁆𑀘𑁂𑀬𑁆𑀬, 𑀢𑀲𑁆𑀫𑀺𑀜𑁆𑀘 𑀉𑀤𑀓𑁂 𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀓𑀝𑀪𑀸𑀭𑀫𑀢𑁆𑀢𑀜𑁆𑀘𑁂𑀧𑀻’’𑀢𑀺𑀆𑀤𑀺. 𑀇𑀤𑀦𑁆𑀢𑀺 𑀢𑀺𑀡𑀫𑀢𑁆𑀢𑀺𑀓𑀧𑀓𑁆𑀔𑀺𑀧𑀦𑀯𑀺𑀥𑀸𑀦𑀁. 𑀯𑀼𑀢𑁆𑀢𑀦𑁆𑀢𑀺 𑀫𑀸𑀢𑀺𑀓𑀸𑀬𑀁 ‘‘𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀲𑀼 𑀯𑀸 𑀯𑀼𑀢𑁆𑀢𑀁.

𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀩𑀸𑀳𑀺𑀭𑀧𑀭𑀺𑀪𑁄𑀕𑀁 𑀲𑀦𑁆𑀥𑀸𑀬 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀁 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑀲𑁆𑀲 𑀯𑀺𑀲𑀼𑀁 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀢𑀤𑀼𑀪𑀬𑀫𑁆𑀧𑀺 ‘‘𑀲𑀧𑁆𑀧𑀸𑀡𑀓’’𑀦𑁆𑀢𑀺 𑀓𑀢𑁆𑀯𑀸 𑀯𑀥𑀓𑀘𑀺𑀢𑁆𑀢𑀁 𑀯𑀺𑀦𑀸𑀯 𑀲𑀺𑀜𑁆𑀘𑀦𑁂 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀥𑀓𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀁, 𑀦 𑀇𑀫𑀺𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀤𑀓𑀲𑁆𑀲 𑀲𑀧𑁆𑀧𑀸𑀡𑀓𑀢𑀸, ‘‘𑀲𑀺𑀜𑁆𑀘𑀦𑁂𑀦 𑀧𑀸𑀡𑀓𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑀁, 𑀢𑀸𑀤𑀺𑀲𑀫𑁂𑀯 𑀘 𑀉𑀤𑀓𑀁 𑀯𑀺𑀦𑀸 𑀯𑀥𑀓𑀘𑁂𑀢𑀦𑀸𑀬 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀺𑀡𑀸𑀤𑀻𑀦𑀁 𑀲𑀺𑀜𑁆𑀘𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑁂𑀦𑀸𑀲𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

‘‘𑀪𑀽𑀢𑀕𑀸𑀫𑀯𑀕𑁆𑀕𑁄’’𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑁩. 𑀑𑀯𑀸𑀤𑀯𑀕𑁆𑀕𑁄

𑁧. 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁪. 𑀢𑀢𑀺𑀬𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑁂 𑀢𑀺𑀭𑀘𑁆𑀙𑀸𑀦𑀪𑀽𑀢𑀦𑁆𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀁, 𑀩𑀸𑀳𑀺𑀭𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀺𑀤𑁆𑀥𑁄𑀢𑀺 𑀧𑀭𑀺𑀧𑀼𑀡𑁆𑀡𑁄. 𑀲𑀳𑀺𑀢𑀢𑁆𑀣𑁄 𑀅𑀢𑁆𑀣𑀬𑀼𑀢𑁆𑀢𑁄. 𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀤𑀺𑀦𑀸 𑀕𑀫𑁆𑀪𑀻𑀭𑁄.

𑁧𑁪𑁫-𑁧𑁪𑁭. 𑀧𑀭𑀢𑁄𑀢𑀺 𑀉𑀢𑁆𑀢𑀭𑀺. 𑀓𑀭𑁄𑀦𑁆𑀢𑁄𑀯𑀸𑀢𑀺 𑀧𑀭𑀺𑀩𑀸𑀳𑀺𑀭𑁂 𑀓𑀭𑁄𑀦𑁆𑀢𑁄. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂. 𑀘𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀫𑀦𑀸𑀬 𑀧𑀸𑀤𑀁.

𑀬𑀤𑀲𑁆𑀲𑀸𑀢𑀺 𑀬𑀁 𑀅𑀲𑁆𑀲. 𑀥𑀸𑀭𑁂𑀢𑀻𑀢𑀺 𑀅𑀯𑀺𑀦𑀲𑁆𑀲𑀫𑀸𑀦𑀁 𑀥𑀸𑀭𑁂𑀢𑀺. 𑀧𑀭𑀺𑀓𑀣𑀦𑀢𑁆𑀣𑀦𑁆𑀢𑀺 𑀧𑀓𑀺𑀡𑁆𑀡𑀓𑀓𑀣𑀸𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀓𑀣𑀦𑀢𑁆𑀣𑀁. 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸𑀢𑀺 𑀲𑀗𑁆𑀖𑀪𑀢𑁆𑀢𑀸𑀤𑀻𑀲𑀼 𑀤𑀸𑀦𑀸𑀦𑀺𑀲𑀁𑀲𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀦𑀺𑀥𑀺𑀓𑀼𑀡𑁆𑀟𑀲𑀼𑀢𑁆𑀢𑀸𑀤𑀺 (𑀔𑀼. 𑀧𑀸. 𑁮.𑁧 𑀆𑀤𑀬𑁄) -𑀅𑀦𑀼𑀫𑁄𑀤𑀦𑀸, 𑀕𑁂𑀳𑀧𑁆𑀧𑀯𑁂𑀲𑀫𑀗𑁆𑀕𑀮𑀸𑀤𑀻𑀲𑀼 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀺 (𑀔𑀼. 𑀧𑀸. 𑁫.𑁧 𑀆𑀤𑀬𑁄; 𑀲𑀼. 𑀦𑀺. 𑀫𑀗𑁆𑀕𑀮𑀲𑀼𑀢𑁆𑀢) -𑀅𑀦𑀼𑀫𑁄𑀤𑀦𑀸, 𑀫𑀢𑀓𑀪𑀢𑁆𑀢𑀸𑀤𑀺𑀅𑀫𑀗𑁆𑀕𑀮𑁂𑀲𑀼 𑀢𑀺𑀭𑁄𑀓𑀼𑀝𑁆𑀝𑀸𑀤𑀺 (𑀔𑀼. 𑀧𑀸. 𑁭.𑁧 𑀆𑀤𑀬𑁄; 𑀧𑁂. 𑀯. 𑁧𑁪 𑀆𑀤𑀬𑁄) -𑀅𑀦𑀼𑀫𑁄𑀤𑀦𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸. 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄𑀢𑀺 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀕𑁆𑀕𑁂 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄. 𑀲𑀫𑀸𑀥𑀺𑀯𑀲𑁂𑀦𑀸𑀢𑀺 𑀲𑀫𑀣𑀧𑀼𑀩𑁆𑀩𑀓𑀯𑀲𑁂𑀦. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸𑀢𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑀸𑀬 𑀲𑀼𑀓𑁆𑀔𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦. 𑀅𑀢𑁆𑀢𑀦𑁄 𑀲𑀻𑀮𑀭𑀓𑁆𑀔𑀡𑀢𑁆𑀣𑀁 𑀅𑀧𑀭𑀸𑀦𑀧𑁂𑀓𑁆𑀔𑀢𑀸𑀬 𑀬𑁂𑀦 𑀓𑀸𑀫𑀁 𑀕𑀦𑁆𑀢𑀼𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀭𑀳𑀢𑀺, 𑀅𑀲𑁆𑀲 𑀯𑀸 𑀲𑀦𑁆𑀢𑀺, 𑀢𑀸𑀲𑀼 𑀯𑀸 𑀲𑀸𑀥𑀽𑀢𑀺 𑀘𑀸𑀢𑀼𑀤𑁆𑀤𑀺𑀲𑁄.

𑀅𑀪𑀺𑀯𑀺𑀦𑀬𑁂𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀗𑁆𑀔𑀸𑀢𑁂 𑀲𑀁𑀯𑀭𑀯𑀺𑀦𑀬𑁂, 𑀢𑀧𑁆𑀧𑀓𑀸𑀲𑀓𑁂 𑀯𑀸 𑀯𑀺𑀦𑀬𑀧𑀺𑀝𑀓𑁂. 𑀯𑀺𑀦𑁂𑀢𑀼𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀢𑀼𑀁 𑀧𑀓𑀸𑀲𑁂𑀢𑀼𑀁. 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸𑀢𑀺 𑀧𑀸𑀞𑀢𑁄 𑀘 𑀅𑀢𑁆𑀣𑀢𑁄 𑀘 𑀧𑀕𑀼𑀡𑀸 𑀫𑀼𑀔𑁂 𑀲𑀦𑁆𑀦𑀺𑀥𑀸𑀧𑀦𑀯𑀲𑁂𑀦 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸. 𑀅𑀢𑁆𑀣𑀫𑀢𑁆𑀢𑀯𑀲𑁂𑀦𑀧𑁂𑀢𑁆𑀣 𑀬𑁄𑀚𑀦𑀁 𑀓𑀭𑁄𑀦𑁆𑀢𑀺. 𑀅𑀪𑀺𑀥𑀫𑁆𑀫𑁂𑀢𑀺 𑀮𑀓𑁆𑀔𑀡𑀭𑀲𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁂 𑀦𑀸𑀫𑀭𑀽𑀧𑀥𑀫𑁆𑀫𑁂. 𑀧𑀼𑀩𑁆𑀩𑁂 𑀓𑀺𑀭 𑀫𑀳𑀸𑀣𑁂𑀭𑀸 𑀧𑀭𑀺𑀬𑀢𑁆𑀢𑀺𑀅𑀦𑀦𑁆𑀢𑀭𑀥𑀸𑀦𑀸𑀬 𑀏𑀓𑁂𑀓𑀲𑁆𑀲 𑀕𑀡𑀲𑁆𑀲 𑀤𑀻𑀖𑀦𑀺𑀓𑀸𑀬𑀸𑀤𑀺𑀏𑀓𑁂𑀓𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑀸 ‘‘𑀢𑀼𑀫𑁆𑀳𑁂 𑀏𑀢𑀁 𑀧𑀸𑀴𑀺𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀧𑀭𑀺𑀳𑀭𑀣, 𑀲𑀓𑁆𑀓𑁄𑀦𑁆𑀢𑀸 𑀉𑀢𑁆𑀢𑀭𑀺𑀧𑀺 𑀉𑀕𑁆𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀲𑀓𑀮𑀥𑀫𑁆𑀫𑀁 𑀕𑀦𑁆𑀣𑀯𑀲𑁂𑀦 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀢𑀢𑁆𑀣 𑀢𑁂 𑀘 𑀪𑀺𑀓𑁆𑀔𑀽 𑀕𑀦𑁆𑀣𑀦𑀸𑀫𑁂𑀦 𑀤𑀻𑀖𑀪𑀸𑀡𑀓𑀸 𑀫𑀚𑁆𑀛𑀺𑀫𑀪𑀸𑀡𑀓𑀸𑀢𑀺 𑀯𑁄𑀳𑀭𑀻𑀬𑀦𑁆𑀢𑀺, 𑀢𑁂 𑀘 ¶ 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀁 𑀓𑁄𑀝𑁆𑀞𑀸𑀲𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀜𑁆𑀜𑀁 ¶ 𑀉𑀕𑁆𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀘𑁂 𑀫𑀚𑁆𑀛𑀺𑀫𑀪𑀸𑀡𑀓𑁄 𑀳𑁄𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀳𑁂𑀝𑁆𑀞𑀺𑀫𑀸 𑀯𑀸 𑀢𑀬𑁄 𑀯𑀕𑁆𑀕𑀸𑀢𑀺 𑀫𑀳𑀸𑀯𑀕𑁆𑀕𑀢𑁄 𑀳𑁂𑀝𑁆𑀞𑀺𑀫𑀸 𑀲𑀕𑀸𑀣𑀓𑀯𑀕𑁆𑀕𑁄 (𑀲𑀁. 𑀦𑀺. 𑁧.𑁧 𑀆𑀤𑀬𑁄), 𑀦𑀺𑀤𑀸𑀦𑀯𑀕𑁆𑀕𑁄 (𑀲𑀁. 𑀦𑀺. 𑁨.𑁧 𑀆𑀤𑀬𑁄), 𑀔𑀦𑁆𑀥𑀯𑀕𑁆𑀕𑁄𑀢𑀺 (𑀲𑀁. 𑀦𑀺. 𑁩.𑁧 𑀆𑀤𑀺𑀬𑁄) 𑀇𑀫𑁂 𑀢𑀬𑁄 𑀯𑀕𑁆𑀕𑀸. 𑀢𑀺𑀓𑀦𑀺𑀧𑀸𑀢𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸𑀢𑀺 𑀏𑀓𑀓𑀦𑀺𑀧𑀸𑀢𑀤𑀼𑀓𑀦𑀺𑀧𑀸𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀥𑀫𑁆𑀫𑀧𑀤𑀫𑁆𑀧𑀺 𑀲𑀳 𑀯𑀢𑁆𑀣𑀼𑀦𑀸 𑀚𑀸𑀢𑀓𑀪𑀸𑀡𑀓𑁂𑀦 𑀅𑀢𑁆𑀢𑀦𑁄 𑀚𑀸𑀢𑀓𑁂𑀦 𑀲𑀤𑁆𑀥𑀺𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀢𑀢𑁄𑀢𑀺 𑀤𑀻𑀖𑀦𑀺𑀓𑀸𑀬𑀸𑀤𑀺𑀢𑁄. 𑀉𑀘𑁆𑀘𑀺𑀦𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀁 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸, 𑀪𑀺𑀓𑁆𑀔𑀼𑀦𑁄𑀧𑀺 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀆𑀤𑀺𑀓𑀼𑀲𑀮𑀢𑀸𑀬 𑀘 𑀦 𑀳𑁄𑀢𑀻𑀢𑀺 ‘‘𑀢𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀅𑀪𑀺𑀥𑀫𑁆𑀫𑁂 𑀓𑀺𑀜𑁆𑀘𑀺 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀯𑀺𑀦𑀬𑁂 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀯𑀺𑀪𑀸𑀕𑁄, 𑀲𑀼𑀢𑁆𑀢𑀦𑁆𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄 𑀘 𑀅𑀪𑀺𑀥𑀫𑁆𑀫𑀧𑀸𑀞𑀁 𑀯𑀺𑀦𑀸 𑀦 𑀯𑀺𑀜𑁆𑀜𑀸𑀬𑀢𑀺, 𑀅𑀦𑁆𑀥𑀓𑀸𑀭𑁂 𑀧𑀯𑀺𑀝𑁆𑀞𑀓𑀸𑀮𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀯𑀺𑀦𑀬𑀸𑀦𑀁 𑀕𑀳𑀡𑀯𑀲𑁂𑀦 𑀅𑀪𑀺𑀥𑀫𑁆𑀫𑀕𑁆𑀕𑀳𑀡𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 ‘‘𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀩𑁆𑀬𑀜𑁆𑀚𑀦𑀁 𑀔𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬𑀸𑀢𑀺 𑀧𑀭𑀺𑀫𑀡𑁆𑀟𑀮𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀤𑁂𑀲𑀼 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀩𑁆𑀬𑀜𑁆𑀚𑀦𑀸𑀦𑀺 𑀬𑀲𑁆𑀲𑀁, 𑀢𑀸𑀬. 𑀧𑀼𑀭𑀲𑁆𑀲 𑀏𑀲𑀸𑀢𑀺 𑀧𑁄𑀭𑀻, 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀮𑀕𑀴𑀸𑀬𑀸𑀢𑀺 𑀏𑀢𑁆𑀣 𑀏𑀮𑀸𑀢𑀺 𑀔𑁂𑀴𑀁 𑀢𑀕𑁆𑀕𑀴𑀦𑀯𑀺𑀭𑀳𑀺𑀢𑀸𑀬. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄𑀢𑀺 𑀏𑀢𑁆𑀣 𑀯𑀸𑀘𑀸 𑀏𑀯 𑀯𑀸𑀓𑁆𑀓𑀭𑀡𑀁, 𑀉𑀤𑀸𑀳𑀭𑀡𑀖𑁄𑀲𑁄. 𑀓𑀮𑁆𑀬𑀸𑀡𑀁 𑀫𑀥𑀼𑀭𑀁 𑀯𑀸𑀓𑁆𑀓𑀭𑀡𑀫𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄. 𑀉𑀧𑀲𑀫𑁆𑀧𑀦𑁆𑀦𑀸𑀬 𑀫𑁂𑀣𑀼𑀦𑁂𑀦𑁂𑀯 𑀅𑀪𑀩𑁆𑀩𑁄 𑀳𑁄𑀢𑀺, 𑀦 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀻𑀲𑀽𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀯𑀸’’𑀢𑀺𑀆𑀤𑀺.

𑁧𑁪𑁮. 𑀕𑀭𑀼𑀓𑁂𑀳𑀻𑀢𑀺 𑀕𑀭𑀼𑀓𑀪𑀡𑁆𑀟𑁂𑀳𑀺. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀸 𑀯𑀸 𑀧𑀜𑁆𑀘𑀲𑀢𑀲𑀸𑀓𑀺𑀬𑀸𑀦𑀺𑀬𑁄 𑀯𑀸. 𑀏𑀢𑀸 𑀧𑀦 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀑𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑁧𑁪𑁯. 𑀦 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸𑀢𑀺 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀕𑀦𑁆𑀢𑀼𑀓𑀸𑀫𑀸 𑀦 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯 𑀯𑀲𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 ¶ 𑀅𑀢𑁆𑀣𑁄. 𑀬𑀢𑁄𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑁄. 𑀬𑀸𑀘𑀺𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂𑀳𑀺 𑀆𑀦𑀻𑀢𑀑𑀯𑀸𑀤𑁂𑀦𑁂𑀯 𑀫𑀬𑀫𑁆𑀧𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀬𑀸𑀘𑀺𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂. 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂 𑀯𑀲𑁆𑀲𑀁 𑀯𑀲𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀧𑀕𑀘𑁆𑀙𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁.

𑀇𑀫𑀸𑀲𑀼 ¶ 𑀓𑀢𑀭𑀸𑀧𑀢𑁆𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 𑀆𑀳 ‘‘𑀲𑀸 𑀭𑀓𑁆𑀔𑀺𑀢𑀩𑁆𑀩𑀸’’𑀢𑀺. 𑀲𑀸 𑀯𑀲𑁆𑀲𑀸𑀦𑀼𑀕𑀫𑀦𑀫𑀽𑀮𑀺𑀓𑀸 𑀆𑀧𑀢𑁆𑀢𑀺 𑀭𑀓𑁆𑀔𑀺𑀢𑀩𑁆𑀩𑀸, 𑀇𑀢𑀭𑀸𑀬 𑀅𑀦𑀸𑀧𑀢𑁆𑀢𑀺𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀆𑀧𑀤𑀸𑀲𑀼 𑀳𑀻’’𑀢𑀺𑀆𑀤𑀺.

𑀑𑀯𑀸𑀤𑀢𑁆𑀣𑀸𑀬𑀸𑀢𑀺 𑀑𑀯𑀸𑀤𑁂 𑀬𑀸𑀘𑀦𑀢𑁆𑀣𑀸𑀬. 𑀤𑁆𑀯𑁂 𑀢𑀺𑀲𑁆𑀲𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀚𑀦𑀓𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀦𑀸. 𑀲𑀫𑁆𑀧𑀸𑀤𑁂𑀢𑀽𑀢𑀺 𑀢𑀺𑀯𑀺𑀥𑀁 𑀲𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑀼. 𑀅𑀲𑀫𑁆𑀫𑀢𑀢𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀢𑀸, 𑀑𑀯𑀸𑀤𑀯𑀲𑁂𑀦 𑀅𑀝𑁆𑀞𑀕𑀭𑀼𑀥𑀫𑁆𑀫𑀤𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁫𑁩. 𑀤𑀼𑀢𑀺𑀬𑁂 𑀓𑁄𑀓𑀦𑀤𑀦𑁆𑀢𑀺 𑀧𑀤𑀼𑀫𑀯𑀺𑀲𑁂𑀲𑀁, 𑀢𑀁 𑀓𑀺𑀭 𑀩𑀳𑀼𑀧𑀢𑁆𑀢𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁, 𑀏𑀯𑀁 𑀨𑀼𑀮𑁆𑀮𑀫𑀼𑀔𑀧𑀤𑀼𑀫𑀁 𑀅𑀯𑀻𑀢𑀕𑀼𑀡𑀕𑀦𑁆𑀥𑀁 𑀦𑀺𑀫𑁆𑀫𑀮𑁂 𑀅𑀦𑁆𑀢𑀮𑀺𑀓𑁆𑀔𑁂 𑀆𑀤𑀺𑀘𑁆𑀘𑀁 𑀯𑀺𑀬 𑀘 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀢𑀧𑀦𑁆𑀢𑀁 𑀢𑀢𑁄 𑀏𑀯 𑀯𑀺𑀭𑁄𑀘𑀫𑀸𑀦𑀁 𑀅𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀚𑀼𑀢𑀺𑀬𑀸 𑀅𑀗𑁆𑀕𑀻𑀭𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀸𑀢𑀺. 𑀭𑀚𑁄𑀳𑀭𑀡𑀦𑁆𑀢𑀺 𑀲𑀭𑀻𑀭𑁂 𑀭𑀚𑀁 𑀧𑀼𑀜𑁆𑀙𑀢𑀻𑀢𑀺 𑀭𑀚𑁄𑀳𑀭𑀡𑀦𑁆𑀢𑀺 𑀧𑀼𑀜𑁆𑀙𑀦𑀘𑁄𑀴𑀲𑁆𑀲 𑀦𑀸𑀫𑀁. 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀓𑀸 𑀪𑀸𑀲𑀺𑀢𑀕𑀸𑀣𑀸 𑀑𑀪𑀸𑀲𑀕𑀸𑀣𑀸 𑀦𑀸𑀫. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁩𑁮𑁬) 𑀧𑀦 ‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀑𑀪𑀸𑀲𑀕𑀸𑀣𑀸 𑀯𑀼𑀢𑁆𑀢𑀸, 𑀦 𑀧𑀦𑁂𑀲𑀸 ‘‘𑀅𑀥𑀺𑀘𑁂𑀢𑀲𑁄’’𑀢𑀺 𑀕𑀸𑀣𑀸. 𑀅𑀬𑀜𑁆𑀘 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲 𑀉𑀤𑀸𑀦𑀕𑀸𑀣𑀸𑀢𑀺 𑀉𑀤𑀸𑀦𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀏𑀓𑀼𑀤𑀸𑀦𑀺𑀬𑀢𑁆𑀣𑁂𑀭𑀲𑁆𑀲 (𑀣𑁂𑀭𑀕𑀸. 𑁧.𑁬𑁭 𑀏𑀓𑀼𑀤𑀸𑀦𑀺𑀬𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀦𑀸𑀬𑀁 𑀉𑀤𑀸𑀦𑀕𑀸𑀣𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀸𑀴𑀺𑀬𑀸 𑀏𑀯 𑀯𑀼𑀢𑁆𑀢𑀢𑁆𑀢𑀸 𑀣𑁂𑀭𑀲𑁆𑀲𑀸𑀧𑀺 𑀉𑀤𑀸𑀦𑀕𑀸𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀥 𑀘 𑀅𑀕𑀭𑀼𑀥𑀫𑁆𑀫𑁂𑀦𑀸𑀧𑀺 𑀑𑀯𑀤𑀢𑁄 ¶ 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀅𑀢𑁆𑀣𑀗𑁆𑀕𑀢𑀲𑀽𑀭𑀺𑀬𑀢𑀸, 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀢𑀸, 𑀑𑀯𑀤𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁨. 𑀢𑀢𑀺𑀬𑀁 ¶ 𑀉𑀢𑁆𑀢𑀸𑀦𑀫𑁂𑀯. 𑀉𑀧𑀲𑁆𑀲𑀬𑀽𑀧𑀕𑀫𑀦𑀁, 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀢𑀸, 𑀲𑀫𑀬𑀸𑀪𑀸𑀯𑁄, 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁪. 𑀘𑀢𑀼𑀢𑁆𑀣𑁂 𑀆𑀫𑀺𑀲𑀦𑀺𑀭𑀧𑁂𑀓𑁆𑀔𑀫𑁆𑀧𑀺 𑀆𑀫𑀺𑀲𑀳𑁂𑀢𑀼 𑀑𑀯𑀤𑀢𑀻𑀢𑀺𑀲𑀜𑁆𑀜𑀸𑀬 𑀪𑀡𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺 𑀲𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀥𑀫𑁆𑀫𑁂𑀦 𑀮𑀤𑁆𑀥𑀲𑀫𑁆𑀫𑀼𑀢𑀺𑀢𑀸, 𑀅𑀦𑀸𑀫𑀺𑀲𑀦𑁆𑀢𑀭𑀢𑀸, 𑀅𑀯𑀡𑁆𑀡𑀓𑀸𑀫𑀢𑀸𑀬 𑀏𑀯𑀁 𑀪𑀡𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬𑁯. 𑀧𑀜𑁆𑀘𑀫𑀁 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁭𑁬. 𑀙𑀝𑁆𑀞𑁂 𑀓𑀣𑀺𑀦𑀯𑀢𑁆𑀢𑀦𑁆𑀢𑀺 𑀓𑀣𑀺𑀦𑀫𑀸𑀲𑁂 𑀘𑀻𑀯𑀭𑀁 𑀓𑀭𑁄𑀦𑁆𑀢𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀜𑁆𑀘𑁂𑀢𑁆𑀯𑀸𑀢𑀺 ‘‘𑀢𑀯 𑀜𑀸𑀢𑀺𑀓𑀸𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 ‘‘𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀲𑀼𑀢𑁆𑀯𑀸 𑀢𑁂 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀦𑁄 𑀅𑀳𑁂𑀲𑀼𑀦𑁆𑀢𑀺 𑀆𑀳 ‘‘𑀅𑀓𑀧𑁆𑀧𑀺𑀬𑁂 𑀦𑀺𑀬𑁄𑀚𑀺𑀢𑀢𑁆𑀢𑀸’’𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀢𑀸, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀽𑀧𑀕𑀢𑀸, 𑀯𑀼𑀢𑁆𑀢𑀦𑀬𑁂𑀦 𑀲𑀺𑀩𑁆𑀩𑀦𑀁 𑀯𑀸 𑀲𑀺𑀩𑁆𑀩𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁩. 𑀲𑀢𑁆𑀢𑀫𑁂 ¶ 𑀧𑀸𑀴𑀺𑀬𑀁 𑀕𑀘𑁆𑀙𑀸𑀫 𑀪𑀕𑀺𑀦𑀺 𑀕𑀘𑁆𑀙𑀸𑀫𑀸𑀬𑁆𑀬𑀸𑀢𑀺 𑀪𑀺𑀓𑁆𑀔𑀼𑀧𑀼𑀩𑁆𑀩𑀓𑀁 𑀲𑀁𑀯𑀺𑀥𑀸𑀦𑀁, 𑀇𑀢𑀭𑀁 𑀪𑀺𑀓𑁆𑀔𑀼𑀦𑀺𑀧𑀼𑀩𑁆𑀩𑀓𑀁 ¶ . 𑀏𑀓𑀤𑁆𑀥𑀸𑀦𑀫𑀕𑁆𑀕𑀦𑁆𑀢𑀺 𑀏𑀓𑀢𑁄 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀫𑀕𑁆𑀕𑀁. 𑀳𑀺𑀬𑁆𑀬𑁄𑀢𑀺 𑀲𑀼𑀯𑁂. 𑀧𑀭𑁂𑀢𑀺 𑀢𑀢𑀺𑀬𑁂 𑀤𑀺𑀯𑀲𑁂.

𑀤𑁆𑀯𑀺𑀥𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀢𑀺 𑀧𑀸𑀤𑀕𑀫𑀦𑁂 𑀧𑀓𑁆𑀔𑀕𑀫𑀦𑁂𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄. 𑀉𑀧𑀘𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 𑀬𑁄 𑀧𑀭𑀺𑀓𑁆𑀔𑀺𑀢𑁆𑀢𑀸𑀤𑀺𑀕𑀸𑀫𑀲𑁆𑀲 𑀏𑀓𑀮𑁂𑀟𑁆𑀟𑀼𑀧𑀸𑀢𑀸𑀤𑀺𑀉𑀧𑀘𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀇𑀥 𑀦 𑀮𑀩𑁆𑀪𑀢𑀺 𑀆𑀲𑀦𑁆𑀦𑀢𑁆𑀢𑀸. 𑀏𑀢𑁂𑀦 𑀘 𑀅𑀦𑁆𑀢𑀭𑀖𑀭𑁂𑀬𑁂𑀯𑁂𑀢𑁆𑀣 𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀲𑀓𑀮𑀁 𑀕𑀸𑀫𑀔𑁂𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀬𑀢𑁆𑀣 𑀉𑀧𑀘𑀸𑀭𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀉𑀧𑀘𑀸𑀭𑁄𑀓𑁆𑀓𑀫𑀦𑁂 𑀏𑀯 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀭𑀢𑀦𑀫𑀢𑁆𑀢𑀦𑁆𑀢𑀭𑁄’’𑀢𑀺𑀆𑀤𑀺. 𑀉𑀧𑀘𑀸𑀭𑁄𑀓𑁆𑀓𑀫𑀦𑀜𑁆𑀘𑁂𑀢𑁆𑀣 𑀉𑀧𑀘𑀸𑀭𑀩𑁆𑀪𑀦𑁆𑀢𑀭𑁂 𑀧𑀯𑀺𑀲𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀅𑀧𑁆𑀧𑀯𑀺𑀲𑀺𑀢𑁆𑀯𑀸𑀧𑀺 𑀉𑀧𑀘𑀸𑀭𑀢𑁄 𑀩𑀳𑀺 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑀕𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄𑀧𑀺 𑀫𑀕𑁆𑀕𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑀕𑀢𑀁 𑀕𑀸𑀫𑀽𑀧𑀘𑀸𑀭𑀁 𑀲𑀩𑁆𑀩𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀅𑀤𑁆𑀥𑀬𑁄𑀚𑀦𑀢𑁄 𑀩𑀳𑀺 𑀕𑀢𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀦 𑀕𑀸𑀫𑀽𑀧𑀘𑀸𑀭𑀕𑀡𑀦𑀸𑀬 𑀓𑀸𑀭𑁂𑀢𑀩𑁆𑀩𑁄, 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬𑁂𑀯 𑀓𑀸𑀭𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀲𑀢𑀺 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀦𑀸𑀯𑀸𑀬𑁂𑀯 𑀕𑀸𑀫𑀢𑀻𑀭𑀧𑀲𑁆𑀲𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀕𑀸𑀫𑀽𑀧𑀘𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺 𑀲𑀫𑀢𑁆𑀣𑀺𑀢𑀸 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀦𑀸𑀯𑀸𑀬 𑀕𑀸𑀫𑀽𑀧𑀘𑀸𑀭𑀩𑁆𑀪𑀦𑁆𑀢𑀭𑁂 𑀧𑀯𑀺𑀲𑀺𑀢𑀼𑀁. 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀲𑀺𑀗𑁆𑀖𑀸𑀝𑀓𑀁. 𑀏𑀢𑁆𑀣𑀦𑁆𑀢𑀭𑁂 𑀲𑀁𑀯𑀺𑀤𑀳𑀺𑀢𑁂𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀭𑀣𑀺𑀓𑀸𑀤𑀻𑀲𑀼 𑀏𑀯 𑀲𑀁𑀯𑀺𑀤𑀳𑀦𑁂 𑀤𑀼𑀓𑁆𑀓𑀝𑀁, 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀤𑁆𑀥𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀅𑀲𑀢𑀺 𑀕𑀸𑀫𑁂 𑀅𑀤𑁆𑀥𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲. 𑀬𑀲𑁆𑀫𑀺𑀜𑁆𑀳𑀺 𑀕𑀸𑀫𑀔𑁂𑀢𑁆𑀢𑀪𑀽𑀢𑁂𑀧𑀺 𑀅𑀭𑀜𑁆𑀜𑁂 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀫𑁄 𑀦 𑀳𑁄𑀢𑀺, 𑀢𑀫𑁆𑀧𑀺 𑀇𑀥 𑀅𑀕𑀸𑀫𑀓𑀁 𑀅𑀭𑀜𑁆𑀜𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀯𑀺𑀜𑁆𑀛𑀸𑀝𑀯𑀸𑀤𑀬𑁄.

𑁧𑁮𑁫. 𑀭𑀝𑁆𑀞𑀪𑁂𑀤𑁂𑀢𑀺 𑀭𑀝𑁆𑀞𑀯𑀺𑀮𑁄𑀧𑁂. 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸𑀢𑀺 𑀇𑀭𑀺𑀬𑀸𑀧𑀣𑀘𑀓𑁆𑀓𑀁, 𑀲𑀓𑀝𑀘𑀓𑁆𑀓𑀁 𑀯𑀸 𑀲𑀫𑀸𑀭𑀼𑀴𑁆𑀳𑀸. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺, 𑀅𑀯𑀺𑀲𑀗𑁆𑀓𑁂𑀢𑀁, 𑀲𑀫𑀬𑀸𑀪𑀸𑀯𑁄, 𑀅𑀦𑀸𑀧𑀤𑀸, 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑀁 𑀯𑀸 𑀅𑀤𑁆𑀥𑀬𑁄𑀚𑀦𑀸𑀢𑀺𑀓𑁆𑀓𑀫𑁄 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 𑀫𑀸𑀢𑀼𑀕𑀸𑀫𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁯. 𑀅𑀝𑁆𑀞𑀫𑁂 ¶ 𑀏𑀓𑀁 𑀢𑀻𑀭𑀁…𑀧𑁂… 𑀦𑀺𑀭𑀦𑁆𑀢𑀭𑀦𑁆𑀢𑀺 𑀦𑀤𑀺𑀢𑁄 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀧𑀤𑁂𑀲𑁂 𑀦𑀺𑀯𑀺𑀝𑁆𑀞𑀕𑀸𑀫𑁂𑀳𑀺 ¶ 𑀦𑀺𑀭𑀦𑁆𑀢𑀭𑀢𑀸 𑀯𑀼𑀢𑁆𑀢𑀸. 𑀏𑀓𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜𑀦𑁆𑀢𑀺 𑀢𑀣𑀸 𑀦𑀺𑀯𑀺𑀝𑁆𑀞𑀕𑀸𑀫𑀸𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦𑀸𑀢𑀺𑀆𑀤𑀺 𑀧𑀦 𑀅𑀢𑀺𑀭𑁂𑀓𑀅𑀤𑁆𑀥𑀬𑁄𑀚𑀦𑀯𑀺𑀢𑁆𑀣𑀢𑀁 𑀦𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁄 𑀊𑀦𑀯𑀺𑀢𑁆𑀣𑀸𑀭𑀸𑀬 𑀳𑀺 𑀦𑀤𑀺𑀬𑀸 𑀫𑀚𑁆𑀛𑁂𑀦𑀸𑀧𑀺 𑀕𑀫𑀦𑁂 𑀢𑀻𑀭𑀤𑁆𑀯𑀬𑀲𑁆𑀲𑀸𑀧𑀺 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀢𑀢𑁆𑀢𑀸 𑀕𑀸𑀫𑀦𑁆𑀢𑀭𑀕𑀡𑀦𑀸𑀬, 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬 𑀘 𑀆𑀧𑀢𑁆𑀢𑀺𑀬𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯 ‘‘𑀬𑁄𑀚𑀦𑀯𑀺𑀢𑁆𑀣𑀢𑀸…𑀧𑁂… 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀬𑁄𑀚𑀦𑀢𑁄 𑀊𑀦𑀸𑀬 𑀦𑀤𑀺𑀬𑀸 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑀕𑀢𑀢𑀻𑀭𑀯𑀲𑁂𑀦𑁂𑀯 𑀆𑀧𑀢𑁆𑀢𑀺𑀕𑀡𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀫𑀼𑀤𑁆𑀤𑀢𑀴𑀸𑀓𑀸𑀤𑀻𑀲𑀼 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀢𑀢𑁆𑀣 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀧𑀞𑀫𑀁 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸𑀧𑀺 𑀧𑀘𑁆𑀙𑀸 𑀦𑀸𑀯𑀸𑀬 𑀦𑀺𑀤𑁆𑀤𑀼𑀧𑀕𑀢𑀲𑁆𑀲, 𑀬𑁄𑀦𑀺𑀲𑁄 𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑀸𑀤𑀻𑀲𑀼𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑀸, 𑀢𑀺𑀘𑀺𑀢𑁆𑀢𑀢𑀸 𑀘𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭. 𑀦𑀯𑀫𑁂 𑀧𑀸𑀴𑀺𑀬𑀁 ‘‘𑀲𑀺𑀓𑁆𑀔𑀫𑀸𑀦𑀸…𑀧𑁂… 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀓𑀢𑀯𑀺𑀜𑁆𑀜𑀢𑁆𑀢𑀺𑀧𑀭𑀺𑀓𑀣𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀧𑀸𑀘𑀺𑀢𑀢𑀸, 𑀢𑀣𑀸 𑀚𑀸𑀦𑀦𑀁, 𑀕𑀺𑀳𑀺𑀲𑀫𑀸𑀭𑀫𑁆𑀪𑀸𑀪𑀸𑀯𑁄, 𑀪𑁄𑀚𑀦𑀢𑀸, 𑀢𑀲𑁆𑀲 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁮. 𑀤𑀲𑀫𑁂 ¶ 𑀉𑀧𑀦𑀦𑁆𑀤𑀲𑁆𑀲 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀦𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀧𑀦 𑀅𑀘𑁂𑀮𑀓𑀯𑀕𑁆𑀕𑁂 𑀧𑀜𑁆𑀘𑀫𑀫𑁆𑀧𑀺 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑁂𑀲𑀼 𑀘𑀢𑀼𑀢𑁆𑀣𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀑𑀯𑀸𑀤𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀪𑁄𑀚𑀦𑀯𑀕𑁆𑀕𑁄

𑁧. 𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁦𑁬. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀇𑀫𑁂𑀲𑀁𑀬𑁂𑀯𑀸𑀢𑀺 𑀇𑀫𑁂𑀲𑀁 𑀧𑀸𑀲𑀡𑁆𑀟𑀸𑀦𑀁𑀬𑁂𑀯. 𑀏𑀢𑁆𑀢𑀓𑀸𑀦𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀲𑀡𑁆𑀟𑁂 𑀏𑀢𑁆𑀢𑀓𑀸𑀦𑀁.

𑁨𑁦𑁮. ‘‘𑀕𑀘𑁆𑀙𑀦𑁆𑀢𑁄 𑀯𑀸 𑀆𑀕𑀘𑁆𑀙𑀦𑁆𑀢𑁄 𑀯𑀸’’𑀢𑀺 𑀇𑀤𑀁 𑀅𑀤𑁆𑀥𑀬𑁄𑀚𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑁂 𑀉𑀤𑁆𑀤𑀺𑀲𑁆𑀲 𑀧𑀜𑁆𑀜𑀢𑁆𑀢𑀜𑁆𑀘 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀦𑁆𑀦𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀲𑀸𑀫𑀜𑁆𑀜𑀢𑁄𑀧𑀺 𑀧𑀜𑁆𑀜𑀢𑁆𑀢𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺 𑀏𑀯. 𑀆𑀯𑀲𑀣𑀧𑀺𑀡𑁆𑀟𑀢𑀸, 𑀅𑀕𑀺𑀮𑀸𑀦𑀢𑀸, 𑀅𑀦𑀼𑀯𑀲𑀺𑀢𑁆𑀯𑀸 𑀪𑁄𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁦𑁯. 𑀤𑀼𑀢𑀺𑀬𑁂 𑀅𑀪𑀺𑀫𑀸𑀭𑁂𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀫𑀸𑀭𑀡𑀢𑁆𑀣𑀸𑀬 𑀧𑀬𑁄𑀚𑀺𑀢𑁂 𑀥𑀦𑀼𑀥𑀭𑁂. 𑀦𑀦𑀼 ‘‘𑀭𑀸𑀚𑀸𑀦𑀫𑁆𑀧𑀺 𑀫𑀸𑀭𑀸𑀧𑁂𑀲𑀻’’𑀢𑀺 𑀯𑀘𑀦𑀢𑁄 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀚𑀸𑀢𑀲𑀢𑁆𑀢𑀼𑀦𑁄 𑀓𑀸𑀮𑁂 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀁, 𑀏𑀯𑀜𑁆𑀘 𑀲𑀢𑀺 𑀧𑀸𑀴𑀺𑀬𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲…𑀧𑁂… 𑀜𑀸𑀢𑀺𑀲𑀸𑀮𑁄𑀳𑀺𑀢𑁄 𑀆𑀚𑀻𑀯𑀓𑁂𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺…𑀧𑁂… 𑀩𑀺𑀫𑁆𑀩𑀺𑀲𑀸𑀭𑀁 𑀏𑀢𑀤𑀯𑁄𑀘𑀸’’𑀢𑀺𑀆𑀤𑀺 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺. 𑀲𑁄 𑀓𑀺𑀭 𑀆𑀚𑀻𑀯𑀓𑁄 𑀩𑀺𑀫𑁆𑀩𑀺𑀲𑀸𑀭𑀓𑀸𑀮𑀢𑁄 𑀧𑀪𑀼𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀓𑀸𑀮𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀢𑁆𑀢𑁂𑀧𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺, 𑀪𑀺𑀓𑁆𑀔𑀽 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀺𑀯𑀸𑀭𑁂𑀲𑀼𑀁. 𑀢𑀲𑁆𑀫𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀯𑀢𑁆𑀣𑀼 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁧𑁫. 𑀅𑀜𑁆𑀜𑀫𑀜𑁆𑀜𑀁 ¶ 𑀯𑀺𑀲𑀤𑀺𑀲𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀯𑀺𑀭𑀚𑁆𑀚𑀢𑁄 𑀆𑀕𑀢𑀸 𑀯𑁂𑀭𑀚𑁆𑀚𑀓𑀸. 𑀢𑁂 𑀘 𑀬𑀲𑁆𑀫𑀸 𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀢𑁄 𑀦𑀸𑀦𑀸𑀯𑀺𑀥𑀸, 𑀢𑀲𑁆𑀫𑀸 𑀦𑀸𑀦𑀸𑀯𑁂𑀭𑀚𑁆𑀚𑀓𑁂𑀢𑀺𑀧𑀺 𑀅𑀢𑁆𑀣𑁄.

𑁨𑁧𑁭-𑁮. 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺𑀢𑁄 𑀕𑀡𑀪𑁄𑀚𑀦𑀢𑁆𑀣𑀢𑀸 𑀲𑀺𑀤𑁆𑀥𑀸𑀢𑀺 𑀢𑀁 𑀅𑀯𑀢𑁆𑀯𑀸 𑀧𑀤𑀪𑀸𑀚𑀦𑁂 𑀅𑀲𑀺𑀤𑁆𑀥𑀫𑁂𑀯 𑀦𑀺𑀫𑀦𑁆𑀢𑀦𑀢𑁄 𑀕𑀡𑀪𑁄𑀚𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺. ¶ ‘‘𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑁄𑀚𑀦𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀲𑀸𑀫𑀜𑁆𑀜𑀦𑀸𑀫𑁂𑀦𑀸𑀧𑀺 𑀕𑀡𑀪𑁄𑀚𑀦𑀁 𑀳𑁄𑀢𑀺. 𑀬𑀁 𑀧𑀦 𑀧𑀸𑀴𑀺𑀬𑀁 𑀅𑀤𑁆𑀥𑀸𑀦𑀕𑀫𑀦𑀸𑀤𑀺𑀯𑀢𑁆𑀣𑀽𑀲𑀼 ‘‘𑀇𑀥𑁂𑀯 𑀪𑀼𑀜𑁆𑀚𑀣𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀁, 𑀢𑀫𑁆𑀧𑀺 𑀑𑀤𑀦𑀸𑀤𑀺𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀢𑁄 𑀕𑀡𑁆𑀳𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑁆𑀯𑀸𑀤𑀲𑀳𑀢𑁆𑀣𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀢𑁄 𑀞𑀢𑁆𑀯𑀸 𑀕𑀡𑁆𑀳𑀦𑁆𑀢𑀺.

‘‘𑀅𑀫𑁆𑀳𑀸𑀓𑀁 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀴𑀺 (𑀯𑀡𑁆𑀡𑀦𑀸) 𑀬𑀁 ‘‘𑀢𑁆𑀯𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑀁 𑀤𑁂𑀳𑀻’’𑀢𑀺𑀆𑀤𑀺𑀦𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀪𑁄𑀚𑀦𑀦𑀸𑀫𑁂𑀦 𑀯𑀺𑀜𑁆𑀜𑀢𑁆𑀢𑀫𑁂𑀯 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀢𑀜𑁆𑀘 𑀅𑀜𑁆𑀜𑁂𑀦 𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀏𑀓𑀢𑁄 𑀕𑀡𑁆𑀳𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀲𑀼𑀁 𑀕𑀳𑀺𑀢𑀁 𑀧𑀦 𑀯𑀺𑀜𑁆𑀜𑀢𑁆𑀢𑀁 𑀪𑀼𑀜𑁆𑀚𑀢𑁄 𑀧𑀡𑀻𑀢𑀪𑁄𑀚𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑁂𑀳𑀺 𑀆𑀧𑀢𑁆𑀢𑀺 𑀏𑀯.

𑀆𑀕𑀦𑁆𑀢𑀼𑀓𑀧𑀝𑁆𑀝𑀦𑁆𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀯𑀸𑀥𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀭𑀡𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀞𑀧𑁂𑀢𑀻𑀢𑀺 𑀏𑀓𑀁 𑀅𑀦𑁆𑀢𑀁 𑀘𑀻𑀯𑀭𑁂 𑀩𑀦𑁆𑀥𑀦𑀯𑀲𑁂𑀦 𑀞𑀧𑁂𑀢𑀺. 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑀢𑀻𑀢𑀺 𑀢𑀲𑁆𑀲𑁂𑀯 𑀤𑀼𑀢𑀺𑀬𑀅𑀦𑁆𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀆𑀳𑀢𑀁 𑀲𑀺𑀩𑁆𑀩𑀢𑀺. 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀩𑀦𑁆𑀥𑀢𑀻𑀢𑀺 𑀘𑀻𑀯𑀭𑁂𑀦 𑀮𑀕𑁆𑀕𑀁 𑀓𑀭𑁄𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂𑀦 𑀩𑀦𑁆𑀥𑀢𑀺. 𑀖𑀝𑁆𑀝𑁂𑀢𑀻𑀢𑀺 𑀧𑀫𑀸𑀡𑁂𑀦 𑀕𑀳𑁂𑀢𑁆𑀯𑀸 𑀤𑀡𑁆𑀟𑀸𑀤𑀻𑀳𑀺 𑀖𑀝𑁆𑀝𑁂𑀢𑀺. 𑀲𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀕𑀼𑀡𑀸𑀤𑀺𑀪𑀸𑀯𑁂𑀦 𑀯𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀅𑀦𑁂𑀓𑀕𑀼𑀡𑀲𑀼𑀢𑁆𑀢𑀁 𑀳𑀢𑁆𑀣𑁂𑀦 𑀯𑀸 𑀘𑀓𑁆𑀓𑀤𑀡𑁆𑀟𑁂𑀦 𑀯𑀸 𑀯𑀝𑁆𑀝𑁂𑀢𑀺 𑀏𑀓𑀢𑁆𑀢𑀁 𑀓𑀭𑁄𑀢𑀺. 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀻𑀢𑀺 𑀧𑀭𑀺𑀯𑀢𑁆𑀢𑀦𑀤𑀡𑁆𑀟𑀬𑀦𑁆𑀢𑀓𑀁 𑀓𑀭𑁄𑀢𑀺, 𑀬𑀲𑁆𑀫𑀺𑀁 𑀲𑀼𑀢𑁆𑀢𑀕𑀼𑀴𑀁 𑀧𑀯𑁂𑀲𑁂𑀢𑁆𑀯𑀸 𑀯𑁂𑀴𑀼𑀦𑀸𑀴𑀺𑀓𑀸𑀤𑀻𑀲𑀼 𑀞𑀧𑁂𑀢𑁆𑀯𑀸 𑀧𑀭𑀺𑀩𑁆𑀪𑀫𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀆𑀓𑀟𑁆𑀠𑀦𑁆𑀢𑀺.

𑁨𑁨𑁦. 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀦𑁆𑀢𑀺 𑀅𑀦𑀺𑀫𑀦𑁆𑀢𑀺𑀢𑁄 𑀘𑀢𑀼𑀢𑁆𑀣𑁄 𑀬𑀲𑁆𑀲 𑀪𑀺𑀓𑁆𑀔𑀼𑀘𑀢𑀼𑀓𑁆𑀓𑀲𑁆𑀲, 𑀢𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀧𑀜𑁆𑀘𑀦𑁆𑀦𑀁 𑀘𑀢𑀼𑀓𑁆𑀓𑀸𑀦’’𑀦𑁆𑀢𑀺. 𑀲𑀫𑁆𑀧𑀯𑁂𑀲𑁂𑀢𑁆𑀯𑀸𑀢𑀺 𑀢𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀕𑀡𑁄 𑀪𑀺𑀚𑁆𑀚𑀢𑀻𑀢𑀺 𑀦𑀺𑀫𑀦𑁆𑀢𑀺𑀢𑀲𑀗𑁆𑀖𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀥𑀺𑀯𑀸𑀲𑁂𑀢𑁆𑀯𑀸 ¶ 𑀕𑀢𑁂𑀲𑀽𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀸𑀥𑀺𑀯𑀸𑀲𑀦𑀓𑁆𑀔𑀡𑁂 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀫𑁆𑀧𑀺 𑀦𑀢𑁆𑀣𑀺, 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀦𑁂 𑀧𑀦 𑀯𑀺𑀜𑁆𑀜𑀢𑁆𑀢𑀺𑀓𑁆𑀔𑀡𑁂 𑀇𑀢𑀭𑀲𑀺𑀓𑁆𑀔𑀸𑀧𑀤𑁂𑀳𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀣𑀸𑀢𑀺 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀧𑀝𑀺𑀕𑁆𑀕𑀡𑁆𑀳𑀣. 𑀢𑀸𑀦𑀺 𑀘𑀸𑀢𑀺 𑀓𑀼𑀫𑁆𑀫𑀸𑀲𑀸𑀤𑀻𑀦𑀺 𑀘 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑁂𑀦 𑀧𑀘𑁆𑀙𑀸 𑀕𑀳𑀺𑀢𑀢𑁆𑀢𑀸 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀺.

‘‘𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁…𑀧𑁂… 𑀫𑁄𑀘𑁂𑀢𑀩𑁆𑀩𑀸’’𑀢𑀺 𑀏𑀢𑁂𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂 𑀲𑀸𑀤𑀺𑀢𑁂 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀤𑀺𑀢𑀁 𑀳𑁄𑀢𑀺. 𑀏𑀓𑀢𑁄 𑀕𑀡𑁆𑀳𑀦𑁆𑀢𑀸𑀦𑀁 𑀕𑀡𑀪𑁄𑀚𑀦𑀸𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺 ¶ 𑀤𑀲𑁆𑀲𑁂𑀢𑀺. 𑀤𑀽𑀢𑀲𑁆𑀲 𑀤𑁆𑀯𑀸𑀭𑁂 𑀆𑀕𑀦𑁆𑀢𑁆𑀯𑀸 𑀧𑀼𑀦 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀘𑀦𑀪𑀬𑁂𑀦 ‘‘𑀕𑀸𑀫𑀤𑁆𑀯𑀸𑀭𑁂 𑀅𑀝𑁆𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀕𑀡𑀪𑁄𑀚𑀦𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁨𑁧. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀪𑀢𑁆𑀢𑀧𑀝𑀺𑀧𑀸𑀝𑀺 𑀅𑀝𑁆𑀞𑀺𑀢𑀸𑀢𑀺 𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀤𑀸𑀢𑀩𑁆𑀩𑀸 𑀪𑀢𑁆𑀢𑀧𑀝𑀺𑀧𑀸𑀝𑀺 𑀅𑀝𑁆𑀞𑀺𑀢𑀸 𑀦 𑀞𑀺𑀢𑀸, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀸 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀩𑀤𑀭𑀨𑀮𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀬𑀸𑀕𑀼𑀆𑀤𑀺𑀓𑀁 ‘‘𑀩𑀤𑀭𑀲𑀸𑀴𑀯’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀸𑀴𑀺𑀬𑀁 𑀧𑀭𑀫𑁆𑀧𑀭𑀪𑁄𑀚𑀦𑁂𑀢𑀺 𑀬𑁂𑀦 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲 𑀪𑁄𑀚𑀦𑀢𑁄 𑀧𑀭𑀲𑁆𑀲 𑀪𑁄𑀚𑀦𑀲𑁆𑀲 𑀪𑀼𑀜𑁆𑀚𑀦𑁂. 𑀯𑀺𑀓𑀧𑁆𑀧𑀦𑀸𑀯 𑀇𑀥 𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀫𑀸𑀢𑀺𑀓𑀸𑀬𑀁 𑀅𑀦𑀸𑀭𑁄𑀧𑀺𑀢𑀸𑀧𑀺 𑀧𑀭𑀺𑀯𑀸𑀭𑁂 ‘‘𑀘𑀢𑀲𑁆𑀲𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 (𑀧𑀭𑀺. 𑁮𑁬) 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀕𑀡𑀺𑀢𑀸. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀲𑁆𑀲 𑀧𑀘𑁆𑀙𑀸 𑀓𑀣𑀦𑁂𑀦 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀧𑀢𑀺𑀝𑁆𑀞𑀧𑀺𑀢𑀸, 𑀢𑀣𑀸𑀧𑀺 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀧𑀺 𑀕𑀳𑁂𑀢𑀩𑁆𑀩𑀸𑀯. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁.

𑁨𑁨𑁯. 𑀔𑀻𑀭𑀁 𑀯𑀸 𑀭𑀲𑀁 𑀯𑀸𑀢𑀺 𑀧𑀜𑁆𑀘𑀪𑁄𑀚𑀦𑀸𑀫𑀺𑀲𑀁 𑀪𑀢𑁆𑀢𑀢𑁄 𑀉𑀧𑀭𑀺 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀅𑀪𑁄𑀚𑀦𑀢𑁆𑀢𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀺𑀯𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀪𑀼𑀜𑁆𑀚𑀦𑁆𑀢𑁂𑀦𑀸’’𑀢𑀺𑀆𑀤𑀺.

𑀯𑀺𑀓𑀧𑁆𑀧𑀦𑀸𑀬 ¶ 𑀅𑀓𑀭𑀡𑀢𑁄 𑀅𑀓𑀺𑀭𑀺𑀬𑀸𑀯𑀲𑁂𑀦 𑀇𑀤𑀁 𑀯𑀸𑀘𑀸𑀬𑀧𑀺 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀆𑀳 ‘‘𑀯𑀘𑀻𑀓𑀫𑁆𑀫’’𑀦𑁆𑀢𑀺. 𑀧𑀭𑀫𑁆𑀧𑀭𑀪𑁄𑀚𑀦𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁩𑁧. 𑀘𑀢𑀼𑀢𑁆𑀣𑁂 𑀧𑀸𑀴𑀺𑀬𑀁 𑀧𑀝𑀺𑀬𑀸𑀮𑁄𑀓𑀦𑁆𑀢𑀺 𑀧𑀘𑁆𑀙𑀺𑀫𑀤𑀺𑀲𑀁, 𑀧𑀘𑁆𑀙𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀸𑀣𑁂𑀬𑁆𑀬𑀸𑀤𑀺𑀅𑀢𑁆𑀣𑀸𑀬 ¶ 𑀧𑀝𑀺𑀬𑀸𑀤𑀺𑀢𑀦𑁆𑀢𑀺𑀲𑀜𑁆𑀜𑀸𑀬 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀏𑀯 𑀅𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 ‘‘𑀇𑀫𑀲𑁆𑀲 𑀳𑀢𑁆𑀣𑁂 𑀤𑁂𑀳𑀻’’𑀢𑀺 𑀯𑀘𑀦𑁂𑀦𑀸𑀧𑀺 𑀆𑀧𑀚𑁆𑀚𑀦𑀢𑁄 ‘‘𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀮𑀓𑁆𑀔𑀡𑀧𑀽𑀯𑀫𑀦𑁆𑀣𑀢𑀸, 𑀅𑀲𑁂𑀲𑀓𑀢𑀸, 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀕𑀫𑀦𑀢𑀸, 𑀅𑀜𑁆𑀜𑀸𑀢𑀓𑀸𑀤𑀺𑀢𑀸, 𑀅𑀢𑀺𑀭𑁂𑀓𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁩𑁭. 𑀧𑀜𑁆𑀘𑀫𑁂 ‘‘𑀢𑀺-𑀓𑀸𑀭𑀁 𑀅𑀯𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀢𑀩𑁆𑀩𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀸 𑀮𑀤𑁆𑀥𑀁 𑀇𑀢𑀺-𑀧𑀤𑀁 𑀓𑀢𑀓𑀸𑀮𑁂 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀅𑀚𑀸𑀦𑀦𑁆𑀢𑁂𑀳𑀺 𑀇𑀢𑀺-𑀲𑀤𑁆𑀤𑁂 𑀧𑀬𑀼𑀢𑁆𑀢𑁂𑀧𑀺 𑀅𑀢𑀺𑀭𑀺𑀢𑁆𑀢𑀁 𑀓𑀢𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁩𑁮-𑁯. ‘‘𑀧𑀯𑀸𑀭𑀺𑀢𑁄’’𑀢𑀺 𑀇𑀤𑀜𑁆𑀘 𑀓𑀢𑁆𑀢𑀼𑀅𑀢𑁆𑀣𑁂 𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀧𑀯𑀸𑀭𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀼𑀢𑁆𑀢𑀸𑀯𑀻-𑀧𑀤𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀫𑁂𑀯 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀳𑀻𑀢𑀺 𑀧𑀼𑀣𑀼𑀓𑀸𑀳𑀺. 𑀲𑀢𑁆𑀢𑀼𑀫𑁄𑀤𑀓𑁄𑀢𑀺 𑀲𑀢𑁆𑀢𑀼𑀁 𑀢𑁂𑀫𑁂𑀢𑁆𑀯𑀸 𑀓𑀢𑁄 𑀅𑀧𑀓𑁆𑀓𑁄. 𑀲𑀢𑁆𑀢𑀼𑀁 𑀧𑀦 𑀧𑀺𑀲𑀺𑀢𑁆𑀯𑀸 𑀧𑀺𑀝𑁆𑀞𑀁 𑀓𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀧𑀽𑀯𑀁 𑀓𑀢𑁆𑀯𑀸 𑀧𑀘𑀦𑁆𑀢𑀺, 𑀢𑀁 𑀦 𑀧𑀯𑀸𑀭𑁂𑀢𑀺. ‘‘𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀁 𑀬𑀁 𑀅𑀮𑀚𑁆𑀚𑀺𑀲𑀦𑁆𑀢𑀓𑀁 𑀯𑀸 𑀅𑀢𑁆𑀢𑀦𑁄 𑀅𑀧𑀸𑀧𑀼𑀡𑀓𑀲𑀗𑁆𑀖𑀺𑀓𑀸𑀤𑀺𑀁 𑀯𑀸 𑀧𑀝𑀺𑀓𑁆𑀔𑁂𑀧𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀲𑀦𑁆𑀦𑀢𑀭𑀁 𑀅𑀗𑁆𑀕𑀦𑁆𑀢𑀺 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀢𑁆𑀯𑀸 𑀑𑀦𑀫𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀆𑀲𑀦𑁆𑀦𑀢𑀭𑀁 𑀳𑁄𑀢𑀺, 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁.

𑀅𑀧𑀦𑀸𑀫𑁂𑀢𑁆𑀯𑀸𑀢𑀺 ¶ 𑀅𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸. ‘‘𑀇𑀫𑀁 𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀻𑀢𑀺 𑀓𑀺𑀜𑁆𑀘𑀺 𑀅𑀦𑀸𑀫𑁂𑀢𑁆𑀯𑀸 𑀯𑀤𑀢𑀺. 𑀓𑁂𑀯𑀮𑀁 𑀯𑀸𑀘𑀸𑀪𑀺𑀳𑀸𑀭𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀡𑁆𑀳𑀣𑀸𑀢𑀺 𑀕𑀳𑁂𑀢𑀼𑀁 𑀆𑀭𑀤𑁆𑀥𑀁 𑀓𑀝𑀘𑁆𑀙𑀼𑀦𑀸 𑀅𑀦𑀼𑀓𑁆𑀔𑀺𑀢𑁆𑀢𑀫𑁆𑀧𑀺 𑀧𑀼𑀩𑁆𑀩𑁂𑀧𑀺 𑀏𑀯𑀁 𑀅𑀪𑀺𑀳𑀝𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 ‘‘𑀅𑀪𑀺𑀳𑀝𑀸𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀝𑀫𑀢𑁆𑀢𑁂𑀢𑀺 𑀪𑀸𑀚𑀦𑀢𑁄 𑀯𑀺𑀬𑁄𑀚𑀺𑀢𑀫𑀢𑁆𑀢𑁂. 𑀤𑁆𑀯𑀺𑀦𑁆𑀦𑀁 𑀲𑀫𑀪𑀸𑀭𑁂𑀧𑀻𑀢𑀺 𑀧𑀭𑀺𑀯𑁂𑀲𑀓𑀲𑁆𑀲 𑀘 𑀅𑀜𑁆𑀜𑀲𑁆𑀲 𑀘 𑀪𑀢𑁆𑀢𑀧𑀘𑁆𑀙𑀺𑀪𑀸𑀚𑀦𑀯𑀳𑀦𑁂 𑀲𑀫𑀓𑁂𑀧𑀻𑀢𑀺 𑀅𑀢𑁆𑀣𑁄.

𑀭𑀲𑀁 𑀕𑀡𑁆𑀳𑀣𑀸𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀫𑀁𑀲𑀭𑀲𑀲𑁆𑀲 𑀅𑀧𑀯𑀸𑀭𑀡𑀸𑀚𑀦𑀓𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑁄 ¶ 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀫𑀘𑁆𑀙𑀭𑀲𑀦𑁆𑀢𑀺𑀆𑀤𑀻𑀲𑀼 𑀫𑀘𑁆𑀙𑁄 𑀘 𑀭𑀲𑀜𑁆𑀘𑀸𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 𑀯𑀢𑁆𑀣𑀼𑀦𑁄𑀧𑀺 𑀢𑀸𑀤𑀺𑀲𑀢𑁆𑀢𑀸 𑀧𑀯𑀸𑀭𑀡𑀸 𑀳𑁄𑀢𑀺, ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺𑀧𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑁄𑀧𑀺 𑀳𑁄𑀢𑀺 𑀏𑀯. 𑀓𑀭𑀫𑁆𑀩𑀓𑁄𑀢𑀺 𑀫𑀺𑀲𑁆𑀲𑀓𑀸𑀥𑀺𑀯𑀘𑀦𑀫𑁂𑀢𑀁. 𑀬𑀜𑁆𑀳𑀺 𑀩𑀳𑀽𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀲𑁄 ‘‘𑀓𑀭𑀫𑁆𑀩𑀓𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄𑀢𑀺 𑀏𑀢𑁆𑀣 𑀯𑀢𑁆𑀣𑀼𑀦𑁄 𑀓𑀧𑁆𑀧𑀺𑀬𑀢𑁆𑀢𑀸 ‘‘𑀧𑀯𑀸𑀭𑀺𑀢𑁄𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘𑁂 𑀉𑀤𑁆𑀤𑀺𑀲𑁆𑀲 𑀓𑀢𑀫𑁂𑀯 𑀳𑁄𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀬𑁂𑀦𑀸𑀧𑀼𑀘𑁆𑀙𑀺𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀤𑀼𑀤𑁆𑀤𑀲𑀦𑁆𑀢𑀺 𑀪𑀢𑁆𑀢𑀲𑁆𑀲 𑀩𑀳𑀼𑀢𑀭𑀪𑀸𑀯𑁂𑀦 𑀧𑀯𑀸𑀭𑀡𑀸𑀲𑀫𑁆𑀪𑀯𑀓𑀸𑀭𑀡𑀁 𑀤𑀼𑀤𑁆𑀤𑀲𑀁, 𑀅𑀜𑁆𑀜𑀣𑀸 𑀓𑀭𑀫𑁆𑀩𑀓𑁂𑀧𑀺 𑀫𑀘𑁆𑀙𑀸𑀤𑀺𑀩𑀳𑀼𑀪𑀸𑀯𑁂 𑀧𑀯𑀸𑀭𑀡𑀸 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘𑁂𑀢𑁆𑀣 𑀓𑀸𑀭𑀡𑀁 𑀤𑀼𑀤𑁆𑀤𑀲𑀁, 𑀏𑀯𑀁 𑀧𑀭𑀢𑁄 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀏𑀢𑁆𑀣𑀸𑀧𑀺 𑀓𑀸𑀭𑀡𑀁 𑀤𑀼𑀤𑁆𑀤𑀲𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀜𑁆𑀘 ‘‘𑀇𑀤𑀁 𑀧𑀦 𑀪𑀢𑁆𑀢𑀫𑀺𑀲𑁆𑀲𑀓𑀫𑁂𑀯𑀸’’𑀢𑀺𑀆𑀤𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 ‘‘𑀅𑀧𑁆𑀧𑀢𑀭𑀁 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀘𑀦𑁂𑀦 𑀦 𑀲𑀫𑁂𑀢𑀺. 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 ‘‘𑀭𑀲𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀯𑀸𑀘𑀸𑀬 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦 𑀧𑀦 𑀓𑀸𑀬𑁂𑀦 𑀭𑀲𑀸𑀤𑀺𑀁 𑀯𑀺𑀬𑁄𑀚𑁂𑀢𑁆𑀯𑀸𑀢𑀺. 𑀢𑀣𑀸 𑀅𑀯𑀺𑀬𑁄𑀚𑀺𑀢𑁂𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸𑀬 𑀅𑀲𑀫𑁆𑀪𑀯𑀢𑁄 𑀅𑀧𑁆𑀧𑀯𑀸𑀭𑀡𑀸𑀧𑀳𑁄𑀡𑀓𑀲𑁆𑀲 𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀪𑀢𑁆𑀢𑀫𑀺𑀲𑁆𑀲𑀓𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀸𑀤𑀻𑀲𑀼 𑀯𑀺𑀬, 𑀅𑀜𑁆𑀜𑀣𑀸 𑀯𑀸 𑀏𑀢𑁆𑀣 𑀬𑀣𑀸 𑀧𑀼𑀩𑁆𑀩𑀸𑀧𑀭𑀁 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄.

𑀦𑀸𑀯𑀸 𑀯𑀸 𑀲𑁂𑀢𑀼 𑀯𑀸𑀢𑀺𑀆𑀤𑀺𑀫𑁆𑀳𑀺 𑀦𑀸𑀯𑀸𑀤𑀺𑀅𑀪𑀺𑀭𑀼𑀳𑀦𑀸𑀤𑀺𑀓𑁆𑀔𑀡𑁂 𑀓𑀺𑀜𑁆𑀘𑀺 𑀞𑀢𑁆𑀯𑀸𑀧𑀺 𑀅𑀪𑀺𑀭𑀼𑀳𑀦𑀸𑀤𑀺𑀓𑀸𑀢𑀩𑁆𑀩𑀢𑁆𑀢𑁂𑀧𑀺 𑀕𑀫𑀦𑀢𑀧𑁆𑀧𑀭𑀢𑀸𑀬 𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀚𑀦𑀲𑀫𑁆𑀫𑀤𑁆𑀤𑁂𑀦 𑀧𑀦 𑀅𑀦𑁄𑀓𑀸𑀲𑀸𑀤𑀺𑀪𑀸𑀯𑁂𑀦 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀘𑀸𑀮𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀢𑁄 ¶ 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀧𑀤𑁂𑀲𑁂 𑀯𑀸 𑀉𑀤𑁆𑀥𑀁 𑀯𑀸 𑀅𑀧𑁂𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀏𑀯 𑀧𑀦 𑀞𑀸𑀦𑁂 𑀧𑀭𑀺𑀯𑀢𑁆𑀢𑁂𑀢𑀼𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀬𑁂𑀦 𑀧𑀲𑁆𑀲𑁂𑀦𑀸’’𑀢𑀺𑀆𑀤𑀺.

𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸𑀢𑀺 𑀓𑀼𑀮𑀤𑀽𑀲𑀦𑀸𑀤𑀺𑀦𑀸 𑀉𑀧𑁆𑀧𑀦𑁆𑀦𑀁, 𑀢𑀁 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀦 𑀫𑀺𑀲𑁆𑀲𑀁 𑀑𑀤𑀦𑀸𑀤𑀺 𑀅𑀢𑀺𑀭𑀺𑀢𑁆𑀢𑀁 𑀳𑁄𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀬𑀁 𑀢𑀢𑁆𑀣 𑀅𑀓𑀧𑁆𑀧𑀓𑀢𑀁 𑀓𑀦𑁆𑀤𑀨𑀮𑀸𑀤𑀺, 𑀢𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀫𑁂𑀯.

𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀪𑀸𑀚𑀦𑁂 𑀓𑀭𑀺𑀬𑀫𑀸𑀦𑀁 𑀧𑀞𑀫𑀓𑀢𑁂𑀦 𑀲𑀤𑁆𑀥𑀺𑀁 𑀓𑀢𑀁 𑀳𑁄𑀢𑀻𑀢𑀺 𑀧𑀼𑀦 𑀲𑁄 𑀏𑀯 𑀓𑀸𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁄 𑀮𑀪𑀢𑀺. 𑀅𑀜𑁆𑀜𑁂𑀦 𑀳𑀺 𑀓𑀢𑀢𑁄 𑀅𑀜𑁆𑀜𑁄 𑀧𑀼𑀦 𑀓𑀸𑀢𑀼𑀁 ¶ 𑀮𑀪𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀪𑀸𑀚𑀦𑁂 𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀬𑁂𑀦 𑀅𑀓𑀢𑀁, 𑀢𑁂𑀦 𑀓𑀸𑀢𑀩𑁆𑀩𑀁, 𑀬𑀜𑁆𑀘 𑀅𑀓𑀢𑀁, 𑀢𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀓𑀢𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀓𑀢𑀁. 𑀲𑀘𑁂 𑀧𑀦 𑀆𑀫𑀺𑀲𑀲𑀁𑀲𑀝𑁆𑀞𑀸𑀦𑀻𑀢𑀺 𑀏𑀢𑁆𑀣 𑀫𑀼𑀔𑀸𑀤𑀻𑀲𑀼 𑀮𑀕𑁆𑀕𑀫𑁆𑀧𑀺 𑀆𑀫𑀺𑀲𑀁 𑀲𑁄𑀥𑁂𑀢𑁆𑀯𑀸𑀯 𑀅𑀢𑀺𑀭𑀺𑀢𑁆𑀢𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁪𑁧. 𑀯𑀸𑀘𑀸𑀬 𑀆𑀡𑀸𑀧𑁂𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀅𑀓𑀸𑀭𑀸𑀧𑀦𑀢𑁄 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀯𑀸𑀭𑀺𑀢𑀪𑀸𑀯𑁄, 𑀆𑀫𑀺𑀲𑀲𑁆𑀲 𑀅𑀦𑀢𑀺𑀭𑀺𑀢𑁆𑀢𑀢𑀸, 𑀓𑀸𑀮𑁂 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁪𑁩. 𑀙𑀝𑁆𑀞𑁂 ‘‘𑀪𑀼𑀢𑁆𑀢𑀲𑁆𑀫𑀺’’𑀦𑁆𑀢𑀺 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀯𑀸𑀭𑀺𑀢𑀢𑀸, 𑀢𑀣𑀸𑀲𑀜𑁆𑀜𑀺𑀢𑀸, 𑀆𑀲𑀸𑀤𑀦𑀸𑀧𑁂𑀓𑁆𑀔𑀢𑀸, 𑀅𑀦𑀢𑀺𑀭𑀺𑀢𑁆𑀢𑁂𑀦 𑀅𑀪𑀺𑀳𑀝𑀧𑀯𑀸𑀭𑀡𑀸, 𑀪𑁄𑀚𑀦𑀧𑀅𑀬𑁄𑀲𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁪𑁭. 𑀲𑀢𑁆𑀢𑀫𑁂 𑀦𑀝𑀸𑀦𑀁 𑀦𑀸𑀝𑀓𑀸𑀢𑀺 𑀦𑀝𑀦𑀸𑀝𑀓𑀸, 𑀲𑀻𑀢𑀸𑀳𑀭𑀡𑀸𑀤𑀻𑀦𑀺.

𑁨𑁪𑁮-𑁯. 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀦𑁆𑀢𑀺 𑀧𑀽𑀯𑀸𑀤𑀺𑀔𑀸𑀤𑀦𑀻𑀬𑁂 𑀯𑀺𑀚𑁆𑀚𑀫𑀸𑀦𑀔𑀸𑀤𑀦𑀻𑀬𑀓𑀺𑀘𑁆𑀘𑀁 𑀔𑀸𑀤𑀦𑀻𑀬𑁂𑀳𑀺 𑀓𑀸𑀢𑀩𑁆𑀩𑀁 𑀚𑀺𑀖𑀘𑁆𑀙𑀸𑀳𑀭𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀦𑁂𑀯 𑀨𑀭𑀦𑁆𑀢𑀺 ¶ 𑀦 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀤𑁂𑀲𑁂 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑁂𑀲𑁂 𑀉𑀝𑁆𑀞𑀺𑀢𑀪𑀽𑀫𑀺𑀭𑀲𑀸𑀤𑀺𑀪𑁂𑀤𑁂𑀦 𑀆𑀳𑀸𑀭𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑀫𑁆𑀧𑀺 𑀯𑀸 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀽’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀏𑀓𑀲𑁆𑀫𑀺𑀁 𑀚𑀦𑀧𑀤𑁂 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀲𑁂𑀲𑀚𑀦𑀧𑀤𑁂𑀲𑀼𑀧𑀺 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟 𑁩.𑁨𑁪𑁮-𑁨𑁪𑁯) 𑀯𑀤𑀦𑁆𑀢𑀺. 𑀧𑀓𑀢𑀺𑀆𑀳𑀸𑀭𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀬𑀸𑀯𑀓𑀸𑀮𑀺𑀓𑁂𑀳𑀺 𑀅𑀬𑁄𑀚𑀺𑀢𑀁 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸𑀯 𑀆𑀳𑀸𑀭𑀓𑀺𑀘𑁆𑀘𑀓𑀭𑀡𑀯𑀲𑁂𑀦. 𑀲𑀫𑁆𑀫𑁄𑀳𑁄𑀬𑁂𑀯 𑀳𑁄𑀢𑀻𑀢𑀺 ¶ 𑀅𑀦𑁂𑀓𑀢𑁆𑀣𑀸𑀦𑀁 𑀦𑀸𑀫𑀸𑀦𑀁, 𑀅𑀧𑁆𑀧𑀲𑀺𑀤𑁆𑀥𑀸𑀦𑀜𑁆𑀘 𑀲𑀫𑁆𑀪𑀯𑀢𑁄 𑀲𑀫𑁆𑀫𑁄𑀳𑁄 𑀏𑀯 𑀲𑀺𑀬𑀸. 𑀢𑁂𑀦𑁂𑀯𑁂𑀢𑁆𑀣 𑀫𑀬𑀫𑁆𑀧𑀺 𑀫𑀽𑀮𑀓𑀫𑀽𑀮𑀸𑀤𑀻𑀦𑀁 𑀧𑀭𑀺𑀬𑀸𑀬𑀦𑁆𑀢𑀭𑀤𑀲𑁆𑀲𑀦𑁂𑀦 𑀅𑀤𑀲𑁆𑀲𑀦𑀁 𑀓𑀭𑀺𑀫𑁆𑀳 𑀉𑀧𑀤𑁂𑀲𑀢𑁄𑀯 𑀕𑀳𑁂𑀢𑀩𑁆𑀩𑀢𑁄.

𑀬𑀦𑁆𑀢𑀺 𑀯𑀝𑁆𑀝𑀓𑀦𑁆𑀤𑀁. 𑀫𑀼𑀴𑀸𑀮𑀦𑁆𑀢𑀺 𑀣𑀽𑀮𑀢𑀭𑀼𑀡𑀫𑀽𑀮𑀫𑁂𑀯, 𑀭𑀼𑀓𑁆𑀔𑀯𑀮𑁆𑀮𑀺𑀆𑀤𑀻𑀦𑀁 𑀫𑀢𑁆𑀣𑀓𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀘𑁆𑀙𑀺𑀯𑀸𑀤𑀻𑀦𑀁 𑀅𑀧𑀭𑀺𑀧𑀓𑁆𑀓𑀸𑀦𑁂𑀯 𑀨𑀮𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀧𑀓𑁆𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀳𑀭𑀻𑀢𑀓𑀸𑀤𑀻𑀦𑀁 𑀅𑀝𑁆𑀞𑀻𑀦𑀻𑀢𑀺 𑀏𑀢𑁆𑀣 𑀫𑀺𑀜𑁆𑀚𑀁 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀢𑁆𑀢𑀸.

𑀳𑀺𑀗𑁆𑀕𑀼𑀭𑀼𑀓𑁆𑀔𑀢𑁄 𑀧𑀕𑁆𑀖𑀭𑀺𑀢𑀦𑀺𑀬𑁆𑀬𑀸𑀲𑁄 𑀳𑀺𑀗𑁆𑀕𑀼 𑀦𑀸𑀫. 𑀳𑀺𑀗𑁆𑀕𑀼𑀚𑀢𑀼𑀆𑀤𑀬𑁄 𑀘 𑀳𑀺𑀗𑁆𑀕𑀼𑀯𑀺𑀓𑀢𑀺𑀬𑁄𑀯. 𑀢𑀢𑁆𑀣 𑀳𑀺𑀗𑁆𑀕𑀼𑀚𑀢𑀼 𑀦𑀸𑀫 𑀳𑀺𑀗𑁆𑀕𑀼𑀭𑀼𑀓𑁆𑀔𑀲𑁆𑀲 𑀤𑀡𑁆𑀟𑀧𑀢𑁆𑀢𑀸𑀦𑀺 𑀧𑀘𑀺𑀢𑁆𑀯𑀸 𑀓𑀢𑀦𑀺𑀬𑁆𑀬𑀸𑀲𑁄. 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀸 𑀦𑀸𑀫 𑀳𑀺𑀗𑁆𑀕𑀼𑀧𑀢𑁆𑀢𑀸𑀦𑀺 𑀧𑀘𑀺𑀢𑁆𑀯𑀸 𑀓𑀢𑀦𑀺𑀬𑁆𑀬𑀸𑀲𑁄. 𑀅𑀜𑁆𑀜𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀓𑀦𑁆𑀢𑀺 𑀅𑀕𑁆𑀕𑀓𑁄𑀝𑀺𑀬𑀸 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄. 𑀢𑀓𑀧𑀢𑁆𑀢𑀺𑀦𑁆𑀢𑀺 𑀧𑀢𑁆𑀢𑀢𑁄 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄. 𑀢𑀓𑀧𑀡𑁆𑀡𑀺𑀦𑁆𑀢𑀺 𑀧𑀮𑀸𑀲𑁂 𑀪𑀚𑁆𑀚𑀺𑀢𑁆𑀯𑀸 𑀓𑀢𑀲𑀺𑀮𑁂𑀲𑁄. 𑀤𑀡𑁆𑀟𑀢𑁄 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀺𑀓𑀸𑀮𑀢𑀸, 𑀬𑀸𑀯𑀓𑀸𑀮𑀺𑀓𑀢𑀸, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁫𑁨-𑁩. 𑀅𑀝𑁆𑀞𑀫𑁂 𑀢𑀸𑀤𑀺𑀲𑀦𑁆𑀢𑀺 𑀅𑀲𑀽𑀧𑀩𑁆𑀬𑀜𑁆𑀚𑀦𑀁. 𑀬𑀸𑀯𑀓𑀸𑀮𑀺𑀓𑀁 𑀯𑀸 𑀬𑀸𑀫𑀓𑀸𑀮𑀺𑀓𑀁 𑀯𑀸…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀧𑀤𑁂𑀳𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀗𑁆𑀕𑀳𑀺𑀢𑀁, 𑀦 𑀬𑀸𑀫𑀓𑀸𑀮𑀺𑀓𑀁. 𑀢𑀣𑀸𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀇𑀥 𑀘𑁂𑀯 𑁋

‘‘𑀬𑀸𑀫𑀓𑀸𑀮𑀺𑀓𑁂𑀦 ¶ , 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁…𑀧𑁂… 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫) 𑁋

𑀅𑀜𑁆𑀜𑀢𑁆𑀣 𑀘 𑀯𑀼𑀢𑁆𑀢𑀢𑁆𑀢𑀸, ‘‘𑀬𑀸𑀫𑀓𑀸𑀮𑀺𑀓’’𑀦𑁆𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀢𑁄 𑀘 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀬𑀸𑀫𑀓𑀸𑀮𑀺𑀓𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀓𑀢𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀦𑁆𑀢𑀺 𑀧𑀢𑁆𑀢𑀁, 𑀖𑀁𑀲𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀸𑀬 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀻𑀢𑀺 𑀲𑀺𑀦𑁂𑀳𑀸𑀪𑀸𑀯𑁂𑀧𑀺 𑀧𑀢𑁆𑀢𑀲𑁆𑀲 𑀲𑀼𑀘𑁆𑀙𑀯𑀺𑀢𑀸𑀬 𑀧𑀜𑁆𑀜𑀸𑀬𑀢𑀺. 𑀬𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀁, 𑀬𑀸𑀫𑀓𑀸𑀮𑀺𑀓𑀜𑁆𑀘. 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯𑀸𑀢𑀺 𑀦𑀺𑀭𑀧𑁂𑀓𑁆𑀔𑀢𑀸𑀬 ¶ 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀤𑀺𑀦𑁆𑀦𑀁, 𑀅𑀧𑀭𑀺𑀘𑁆𑀘𑀢𑁆𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀸𑀤𑀺𑀯𑀢𑁆𑀣𑀼𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀦 𑀧𑀦 𑀢𑀕𑁆𑀕𑀢𑀧𑀝𑀺𑀕𑁆𑀕𑀳𑀡𑀁. 𑀦 𑀳𑀺 𑀯𑀢𑁆𑀣𑀼𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀢𑁆𑀣𑀕𑀢𑀧𑀝𑀺𑀕𑁆𑀕𑀳𑀡𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀲𑀓𑁆𑀓𑀸, 𑀦 𑀘 𑀢𑀸𑀤𑀺𑀲𑀁 𑀯𑀘𑀦𑀫𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, ‘‘𑀲𑀘𑁂 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺…𑀧𑁂… 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀦 𑀳𑀺 𑀥𑁄𑀯𑀦𑁂𑀦 𑀆𑀫𑀺𑀲𑀁 𑀅𑀧𑀦𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀅𑀧𑁂𑀓𑁆𑀔𑀸 𑀯𑀢𑁆𑀢𑀢𑀺. 𑀬𑁂𑀦 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀬𑁆𑀬, 𑀧𑀢𑁆𑀢𑁂 𑀧𑀦 𑀯𑀢𑁆𑀢𑀫𑀸𑀦𑀸 𑀅𑀧𑁂𑀓𑁆𑀔𑀸 𑀢𑀕𑁆𑀕𑀢𑀺𑀓𑁂 𑀆𑀫𑀺𑀲𑁂𑀧𑀺 𑀯𑀢𑁆𑀢𑀢𑀺 𑀏𑀯𑀦𑀸𑀫𑀸𑀢𑀺 𑀆𑀫𑀺𑀲𑁂 𑀅𑀦𑀧𑁂𑀓𑁆𑀔𑀢𑀸 𑀏𑀢𑁆𑀣 𑀦 𑀮𑀩𑁆𑀪𑀢𑀺, 𑀢𑀢𑁄 𑀆𑀫𑀺𑀲𑁂 𑀅𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀧𑀼𑀦𑀤𑀺𑀯𑀲𑁂 𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀅𑀣 𑀫𑀢𑀁 ‘‘𑀬𑀤𑀕𑁆𑀕𑁂𑀦𑁂𑀢𑁆𑀣 𑀆𑀫𑀺𑀲𑀸𑀦𑀧𑁂𑀓𑁆𑀔𑀢𑀸 𑀦 𑀮𑀩𑁆𑀪𑀢𑀺. 𑀢𑀤𑀕𑁆𑀕𑁂𑀦 𑀧𑀝𑀺𑀕𑁆𑀕𑀳𑀡𑀸𑀦𑀧𑁂𑀓𑁆𑀔𑀸𑀧𑀺 𑀦 𑀮𑀩𑁆𑀪𑀢𑀻’’𑀢𑀺. 𑀢𑀣𑀸 𑀲𑀢𑀺 𑀬𑀢𑁆𑀣 𑀆𑀫𑀺𑀲𑀸𑀧𑁂𑀓𑁆𑀔𑀸 𑀅𑀢𑁆𑀣𑀺, 𑀢𑀢𑁆𑀣 𑀧𑀝𑀺𑀕𑁆𑀕𑀳𑀡𑀸𑀧𑁂𑀓𑁆𑀔𑀸𑀧𑀺 𑀦 𑀯𑀺𑀕𑀘𑁆𑀙𑀢𑀻𑀢𑀺 𑀆𑀧𑀦𑁆𑀦𑀁, 𑀏𑀯𑀜𑁆𑀘 𑀧𑀝𑀺𑀕𑁆𑀕𑀳𑀡𑁂 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀝𑁆𑀞𑀓𑀣𑀸𑀬𑀜𑁆𑀘𑁂𑀢𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀓𑀸𑀭𑀡𑀢𑁆𑀢𑁂𑀦 𑀅𑀪𑀺𑀫𑀢𑀁 𑀲𑀺𑀬𑀸, 𑀇𑀤𑀁 𑀲𑀼𑀝𑁆𑀞𑀼𑀢𑀭𑀁 𑀓𑀢𑁆𑀯𑀸 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀁 𑀘𑀻𑀯𑀭𑀸𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬𑀧𑀺 𑀧𑀘𑁆𑀘𑀼𑀤𑁆𑀥𑀸𑀭𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀬. 𑀏𑀢𑀲𑁆𑀫𑀺𑀜𑁆𑀘 𑀉𑀧𑀸𑀬𑁂 𑀲𑀢𑀺 𑀕𑀡𑁆𑀞𑀺𑀓𑀸𑀳𑀢𑀧𑀢𑁆𑀢𑁂𑀲𑀼 𑀅𑀯𑀝𑁆𑀝𑀦𑀢𑀸 𑀦𑀸𑀫 𑀦 𑀲𑀺𑀬𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀬𑀁 𑀧𑀭𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀫𑁆𑀧𑀺 𑀲𑀘𑁂 𑀧𑀝𑀺𑀕𑁆𑀕𑀳𑀡𑁂 𑀦𑀺𑀭𑀧𑁂𑀓𑁆𑀔𑀦𑀺𑀲𑁆𑀲𑀚𑁆𑀚𑀦𑁂𑀦 𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀫𑁆𑀧𑀺 𑀤𑀼𑀢𑀺𑀬𑀤𑀺𑀯𑀲𑁂 𑀯𑀝𑁆𑀝𑀢𑀻’’𑀢𑀺𑀆𑀤𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟 𑁩.𑁨𑁫𑁨-𑁨𑁫𑁩), 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑀧𑀓𑀢𑀺𑀆𑀫𑀺𑀲𑁂𑀢𑀺 𑀑𑀤𑀦𑀸𑀤𑀺𑀓𑀧𑁆𑀧𑀺𑀬𑀬𑀸𑀯𑀓𑀸𑀮𑀺𑀓𑁂. 𑀤𑁆𑀯𑁂𑀢𑀺 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑀓𑀸𑀮𑀺𑀓𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀪𑀼𑀜𑁆𑀚𑀢𑁄 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀏𑀓𑀁, 𑀬𑀸𑀫𑀓𑀸𑀮𑀺𑀓𑀲𑀁𑀲𑀝𑁆𑀞𑀢𑀸𑀬 𑀬𑀸𑀯𑀓𑀸𑀮𑀺𑀓𑀢𑁆𑀢𑀪𑀚𑀦𑁂𑀦 𑀅𑀦𑀢𑀺𑀭𑀺𑀢𑁆𑀢𑀧𑀘𑁆𑀘𑀬𑀸 ¶ 𑀏𑀓𑀦𑁆𑀢𑀺 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀯𑀺𑀓𑀧𑁆𑀧𑀤𑁆𑀯𑀬𑁂𑀢𑀺 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀧𑀓𑁆𑀔𑀤𑁆𑀯𑀬𑁂. 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀁. 𑀬𑀸𑀯𑀓𑀸𑀮𑀺𑀓𑀬𑀸𑀫𑀓𑀸𑀮𑀺𑀓𑀢𑀸, 𑀲𑀦𑁆𑀦𑀺𑀥𑀺𑀪𑀸𑀯𑁄, 𑀢𑀲𑁆𑀲 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁫𑁯. 𑀦𑀯𑀫𑁂 𑀧𑀡𑀻𑀢𑀲𑀁𑀲𑀝𑁆𑀞𑀸𑀦𑀺 𑀪𑁄𑀚𑀦𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀧𑀸𑀴𑀺𑀬𑀁 𑀧𑀦 𑀪𑁄𑀚𑀦𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀧𑀸𑀓𑀝𑀸𑀦𑀻𑀢𑀺 𑀅𑀤𑀲𑁆𑀲𑀺𑀢𑀸𑀦𑀺, 𑀢𑀸𑀤𑀺𑀲𑁂𑀳𑀺 𑀧𑀡𑀻𑀢𑁂𑀳𑀺 𑀫𑀺𑀲𑁆𑀲𑀢𑁆𑀢𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀲𑀁 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀲𑁂𑀬𑁆𑀬𑀣𑀺𑀤𑀁 𑀲𑀧𑁆𑀧𑀺 𑀦𑀯𑀦𑀻𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀪𑀢𑁆𑀢𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ¶ 𑀲𑀧𑁆𑀧𑀺𑀦𑀸 𑀲𑀁𑀲𑀝𑁆𑀞𑀁 𑀪𑀢𑁆𑀢𑀁, 𑀲𑀧𑁆𑀧𑀺 𑀘 𑀪𑀢𑁆𑀢𑀜𑁆𑀘𑀸𑀢𑀺𑀧𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀸𑀮𑀺𑀪𑀢𑁆𑀢𑀁 𑀯𑀺𑀬 𑀲𑀧𑁆𑀧𑀺𑀪𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀯𑀢𑁆𑀣𑀼𑀁. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀏𑀯 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀫𑀸𑀡𑀁.

𑀫𑀽𑀮𑀦𑁆𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀯𑀺𑀲𑀗𑁆𑀓𑁂𑀢𑁂𑀦 𑀧𑀸𑀘𑀺𑀢𑁆𑀢𑀺𑀬𑀸𑀪𑀸𑀯𑁂𑀧𑀺 𑀲𑀽𑀧𑁄𑀤𑀦𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸, 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸’’𑀢𑀺 𑀘 𑀇𑀤𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀲𑀢𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁.

𑁨𑁬𑁧. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 𑀉𑀧𑀭𑀺 𑀘𑀸𑀢𑀼𑀫𑀸𑀲𑀧𑀘𑁆𑀘𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁩𑁦𑁩 𑀆𑀤𑀬𑁄). 𑀅𑀕𑀺𑀮𑀸𑀦𑁄 𑀳𑀺 𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑁄𑀧𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁, 𑀪𑁂𑀲𑀚𑁆𑀚𑀧𑀭𑀺𑀘𑁆𑀙𑁂𑀤𑀁 𑀯𑀸 𑀓𑀢𑁆𑀯𑀸 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀢𑀤𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦, 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂𑀧𑀺 𑀦 𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀭𑁄𑀕𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦 𑀘 𑀲𑀫𑁄 𑀳𑁄𑀢𑀻𑀢𑀺 ‘‘𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑀡𑀻𑀢𑀪𑁄𑀚𑀦𑀢𑀸, 𑀅𑀕𑀺𑀮𑀸𑀦𑀢𑀸, 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑁄, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁬𑁩. 𑀤𑀲𑀫𑁂 ¶ 𑀖𑀦𑀩𑀤𑁆𑀥𑁄𑀢𑀺 𑀖𑀦𑀫𑀁𑀲𑁂𑀦 𑀲𑀫𑁆𑀩𑀤𑁆𑀥𑁄, 𑀓𑀣𑀺𑀦𑀲𑀁𑀳𑀢𑀲𑀭𑀻𑀭𑁄𑀢𑀺 𑀅𑀢𑁆𑀣𑁄.

𑁨𑁬𑁪. 𑀫𑀼𑀔𑀤𑁆𑀯𑀸𑀭𑀦𑁆𑀢𑀺 𑀫𑀼𑀔𑀢𑁄 𑀳𑁂𑀝𑁆𑀞𑀸 𑀤𑁆𑀯𑀸𑀭𑀁 𑀫𑀼𑀔𑀤𑁆𑀯𑀸𑀭𑀁, 𑀕𑀮𑀦𑀸𑀴𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀦𑀸𑀲𑀺𑀓𑀸𑀬 𑀧𑀯𑀺𑀝𑁆𑀞𑀫𑁆𑀧𑀺 𑀫𑀼𑀔𑀤𑁆𑀯𑀸𑀭𑀁 𑀧𑀯𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑀜𑁆𑀘 𑀅𑀧𑁆𑀧𑀯𑀺𑀝𑁆𑀞𑀁. 𑀆𑀳𑀸𑀭𑀦𑁆𑀢𑀺 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁 𑀓𑀸𑀮𑀺𑀓𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀉𑀤𑀓𑀁. 𑀢𑀜𑁆𑀳𑀺 𑀪𑁂𑀲𑀚𑁆𑀚𑀲𑀗𑁆𑀕𑀳𑀺𑀢𑀫𑁆𑀧𑀺 𑀅𑀓𑀸𑀮𑀺𑀓𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀲𑁆𑀲𑁂𑀯 𑀓𑀸𑀮𑀺𑀓𑀢𑁆𑀢𑀸. 𑀉𑀤𑀓𑁂 𑀳𑀺 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀺. 𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀢𑀸𑀧𑀺𑀢𑁂𑀦 𑀉𑀤𑀓𑁂𑀦 𑀘𑀺𑀭𑀧𑀝𑀺𑀕𑁆𑀕𑀳𑀺𑀢𑁂𑀦 𑀘 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑁂𑀦 𑀘 𑀲𑀳 𑀆𑀫𑀺𑀲𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺 𑀲𑀸𑀫𑀧𑀸𑀓𑀸𑀤𑀺𑀤𑁄𑀲𑁄 𑀦 𑀳𑁄𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀪𑀺𑀓𑁆𑀔𑀼 𑀬𑀸𑀕𑀼𑀅𑀢𑁆𑀣𑀸𑀬…𑀧𑁂… 𑀉𑀤𑀓𑀁 𑀢𑀸𑀧𑁂𑀢𑀺, 𑀯𑀝𑁆𑀝𑀢𑀻’’𑀢𑀺𑀆𑀤𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬𑁫). 𑀪𑀺𑀓𑁆𑀔𑀽 𑀧𑀦 𑀏𑀢𑀁 𑀅𑀥𑀺𑀧𑁆𑀧𑀸𑀬𑀁 𑀢𑀤𑀸 𑀦 𑀚𑀸𑀦𑀺𑀁𑀲𑀼. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺𑀆𑀤𑀺.

𑁨𑁬𑁫. 𑀭𑀣𑀭𑁂𑀡𑀼𑀫𑁆𑀧𑀻𑀢𑀺 ¶ 𑀭𑀣𑁂 𑀕𑀘𑁆𑀙𑀦𑁆𑀢𑁂 𑀉𑀝𑁆𑀞𑀳𑀦𑀭𑁂𑀡𑀼𑀲𑀤𑀺𑀲𑀭𑁂𑀡𑀼𑀁. 𑀢𑁂𑀦 𑀢𑀢𑁄 𑀲𑀼𑀔𑀼𑀫𑀁 𑀆𑀓𑀸𑀲𑁂 𑀧𑀭𑀺𑀩𑁆𑀪𑀫𑀦𑀓𑀁 𑀤𑀺𑀲𑁆𑀲𑀫𑀸𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄.

‘‘𑀕𑀳𑁂𑀢𑀼𑀁 𑀯𑀸…𑀧𑁂… 𑀢𑀲𑁆𑀲 𑀑𑀭𑀺𑀫𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀆𑀓𑀸𑀲𑁂 𑀉𑀚𑀼𑀁 𑀞𑀢𑁆𑀯𑀸 𑀧𑀭𑁂𑀦 𑀉𑀓𑁆𑀔𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀆𑀲𑀦𑁆𑀦𑀗𑁆𑀕𑀪𑀽𑀢𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀧𑀸𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀧𑀦 𑀲𑀻𑀲𑀦𑁆𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀑𑀭𑀺𑀫𑀦𑁆𑀢𑁂𑀦𑀸’’𑀢𑀺 𑀇𑀫𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀆𑀲𑀦𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀆𑀲𑀦𑁆𑀦𑀗𑁆𑀕𑀲𑁆𑀲 𑀧𑀸𑀭𑀺𑀫𑀦𑁆𑀢𑀢𑁄 𑀧𑀝𑁆𑀞𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀇𑀥𑀸𑀧𑀺 𑀆𑀓𑀸𑀲𑁂 𑀞𑀺𑀢𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀆𑀲𑀦𑁆𑀦𑀗𑁆𑀕𑀪𑀽𑀢𑀧𑀸𑀤𑀗𑁆𑀕𑀼𑀮𑀲𑁆𑀲 𑀧𑀸𑀭𑀺𑀫𑀦𑁆𑀢𑀪𑀽𑀢𑀢𑁄 𑀧𑀡𑁆𑀳𑀺𑀧𑀭𑀺𑀬𑀦𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀝𑁆𑀞𑀸𑀬, 𑀤𑀸𑀬𑀓𑀲𑁆𑀲 𑀧𑀦 𑀑𑀭𑀺𑀫𑀦𑁆𑀢𑀪𑀽𑀢𑀢𑁄 𑀧𑀸𑀤𑀗𑁆𑀕𑀼𑀮𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑀧𑀸𑀲𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀲𑁆𑀲𑀻𑀲𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀆𑀲𑀦𑁆𑀦𑀲𑀻𑀲𑀗𑁆𑀕𑀲𑁆𑀲 𑀧𑀸𑀭𑀺𑀫𑀦𑁆𑀢𑀪𑀽𑀢𑀢𑁄 𑀕𑀻𑀯𑀦𑁆𑀢𑀢𑁄 𑀧𑀝𑁆𑀞𑀸𑀬𑁂𑀯 ¶ 𑀳𑀢𑁆𑀣𑀧𑀸𑀲𑁄 𑀫𑀺𑀦𑀺𑀢𑀩𑁆𑀩𑁄, 𑀦 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬. 𑀏𑀯𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀸𑀦𑁂𑀧𑀺 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀁 𑀆𑀲𑀦𑁆𑀦𑀢𑀭𑀁 𑀅𑀗𑁆𑀕’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁.

𑀧𑀝𑀺𑀕𑁆𑀕𑀳𑀡𑀲𑀜𑁆𑀜𑀸𑀬𑀸𑀢𑀺 ‘‘𑀫𑀜𑁆𑀘𑀸𑀤𑀺𑀦𑀸 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀸𑀤𑀺𑀢𑀲𑀜𑁆𑀜𑀸𑀬. 𑀇𑀫𑀺𑀦𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺 𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀢𑁆𑀣𑀘𑀺 𑀅𑀝𑁆𑀞𑀓𑀣𑀸𑀲𑀼, 𑀧𑀤𑁂𑀲𑁂𑀲𑀼 𑀯𑀸. 𑀅𑀲𑀁𑀳𑀸𑀭𑀺𑀫𑁂 𑀨𑀮𑀓𑁂𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀅𑀲𑀁𑀳𑀸𑀭𑀺𑀬𑁂. 𑀧𑀼𑀜𑁆𑀙𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀼𑀜𑁆𑀙𑀺𑀢𑁂𑀧𑀺 𑀭𑀚𑀦𑀘𑀼𑀡𑁆𑀡𑀲𑀗𑁆𑀓𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀦𑀸𑀲𑀢𑀺. 𑀢𑀁 𑀧𑀦𑀸𑀢𑀺 𑀧𑀢𑀺𑀢𑀭𑀚𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀧𑀭𑀺 𑀕𑀳𑀺𑀢𑀧𑀺𑀡𑁆𑀟𑀧𑀸𑀢𑀁. 𑀅𑀦𑀸𑀧𑀢𑁆𑀢𑀻𑀢𑀺 𑀤𑀼𑀭𑀼𑀧𑀘𑀺𑀡𑁆𑀡𑀸𑀤𑀺𑀤𑁄𑀲𑁄 𑀦𑀢𑁆𑀣𑀺. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀧𑀺 𑀯𑀺𑀦𑀬𑀤𑀼𑀓𑁆𑀓𑀝𑀧𑀭𑀺𑀳𑀸𑀭𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀅𑀓𑀢𑁆𑀯𑀸 𑀕𑀳𑀺𑀢𑁂𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸’’𑀢𑀺 𑀇𑀤𑀫𑁆𑀧𑀺 𑀧𑀼𑀭𑀺𑀫𑀸𑀪𑁄𑀕𑀸𑀦𑀼𑀕𑀼𑀡𑀢𑀸𑀬 𑀯𑀼𑀢𑁆𑀢𑀁.

𑀘𑀭𑀼𑀓𑁂𑀦𑀸𑀢𑀺 𑀔𑀼𑀤𑁆𑀤𑀓𑀪𑀸𑀚𑀦𑁂𑀦. 𑀅𑀪𑀺𑀳𑀝𑀢𑁆𑀢𑀸𑀢𑀺 𑀤𑀺𑀬𑁆𑀬𑀫𑀸𑀦𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀢𑁆𑀯𑀸 𑀅𑀧𑀦𑀬𑀦𑀓𑀸𑀮𑁂 𑀧𑀦 𑀙𑀸𑀭𑀺𑀓𑀸 𑀯𑀸 𑀩𑀺𑀦𑁆𑀤𑀽𑀦𑀺 𑀯𑀸 𑀧𑀢𑀦𑁆𑀢𑀺, 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀅𑀪𑀺𑀳𑀸𑀭𑀲𑁆𑀲 𑀯𑀺𑀕𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀁 𑀬𑀣𑀸 𑀦 𑀧𑀢𑀢𑀺, 𑀢𑀣𑀸 𑀅𑀧𑀦𑁂𑀲𑁆𑀲𑀸𑀫𑀻𑀢𑀺 𑀧𑀭𑀺𑀳𑀭𑀦𑁆𑀢𑁂 𑀬𑀼𑀚𑁆𑀚𑀢𑀺. 𑀧𑀓𑀢𑀺𑀲𑀜𑁆𑀜𑀸𑀬 𑀅𑀧𑀦𑁂𑀦𑁆𑀢𑁂 𑀅𑀪𑀺𑀳𑀸𑀭𑁄 𑀦 𑀙𑀺𑀚𑁆𑀚𑀢𑀺, 𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀫𑀼𑀔𑀯𑀝𑁆𑀝𑀺𑀬𑀸𑀧𑀺 𑀕𑀳𑁂𑀢𑀼𑀁 ¶ 𑀯𑀝𑁆𑀝𑀢𑀻𑀢𑀺 𑀅𑀪𑀺𑀳𑀭𑀺𑀬𑀫𑀸𑀦𑀲𑁆𑀲 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀉𑀧𑀭𑀺𑀪𑀸𑀕𑁂 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀨𑀼𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀸𑀤𑁂𑀦 𑀧𑁂𑀮𑁆𑀮𑁂𑀢𑁆𑀯𑀸𑀢𑀺 ‘‘𑀧𑀸𑀤𑁂𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺𑀲𑀜𑁆𑀜𑀸𑀬 𑀅𑀓𑁆𑀓𑀫𑀺𑀢𑁆𑀯𑀸. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀯𑀘𑀦𑀫𑀢𑁆𑀢𑀫𑁂𑀯𑀸𑀢𑀺 𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑀦𑁆𑀢𑀺 𑀲𑀤𑁆𑀤𑀫𑀢𑁆𑀢𑀫𑁂𑀯 𑀦𑀸𑀦𑀁, 𑀓𑀸𑀬𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀦 𑀆𑀳𑀭𑀸𑀧𑁂𑀢𑀼𑀦𑁆𑀢𑀺 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀢𑀁, 𑀢𑀁 𑀇𑀥 𑀆𑀦𑁂𑀳𑀻𑀢𑀺 𑀆𑀡𑀸𑀧𑁂𑀢𑁆𑀯𑀸 𑀢𑁂𑀦 𑀆𑀳𑀭𑀸𑀧𑁂𑀢𑀼𑀁 𑀇𑀢𑀭𑀲𑁆𑀲 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀦 𑀢𑀢𑁄 𑀧𑀭𑀦𑁆𑀢𑀺 𑀢𑀤𑀳𑁂𑀯 𑀲𑀸𑀫𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀳𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀧𑀼𑀦𑀤𑀺𑀯𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀔𑀺𑀬𑁆𑀬𑀦𑁆𑀢𑀻𑀢𑀺 𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀘𑀼𑀡𑁆𑀡𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀅𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀯𑀲𑀫𑀼𑀝𑁆𑀞𑀺𑀢’’𑀦𑁆𑀢𑀺 𑀏𑀢𑁂𑀦𑁂𑀯 𑀉𑀘𑁆𑀙𑀼𑀆𑀤𑀻𑀲𑀼 ¶ 𑀅𑀪𑀺𑀦𑀯𑀮𑀕𑁆𑀕𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀲𑀦𑁆𑀦𑀺𑀥𑀺𑀤𑁄𑀲𑀸𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑁂𑀦 𑀘 𑀧𑀝𑀺𑀕𑁆𑀕𑀳𑀡𑀗𑁆𑀕𑁂𑀲𑀼 𑀧𑀜𑁆𑀘𑀲𑀼𑀧𑀺 𑀲𑀫𑀺𑀤𑁆𑀥𑁂𑀲𑀼 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀳𑀺𑀢𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑁂𑀲𑀼 𑀏𑀯 𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀞𑀧𑀺𑀢𑀢𑁂𑀮𑀸𑀤𑀺𑀁 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀓𑁂𑀲𑀜𑁆𑀘𑀻𑀢𑀺𑀆𑀤𑀻𑀲𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀢𑁆𑀣𑀸𑀬 𑀓𑀢𑁆𑀣𑀘𑀺 𑀞𑀧𑀺𑀬𑀫𑀸𑀦𑀫𑁆𑀧𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀏𑀯 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀺, 𑀅𑀣 𑀔𑁄 𑀪𑀸𑀚𑀦𑁂 𑀧𑀢𑀺𑀢𑀫𑁂𑀯 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺. 𑀪𑀸𑀚𑀦𑀜𑁆𑀘 𑀪𑀺𑀓𑁆𑀔𑀼𑀦𑀸 𑀧𑀼𑀦𑀤𑀺𑀯𑀲𑀢𑁆𑀣𑀸𑀬 𑀅𑀧𑁂𑀓𑁆𑀔𑀺𑀢𑀫𑁂𑀯𑀸𑀢𑀺 𑀢𑀕𑁆𑀕𑀢𑀫𑁆𑀧𑀺 𑀆𑀫𑀺𑀲𑀁 𑀤𑀼𑀤𑁆𑀥𑁄𑀢𑀧𑀢𑁆𑀢𑀕𑀢𑀁 𑀯𑀺𑀬 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀺𑀚𑀳𑀢𑀻𑀢𑀺 𑀆𑀲𑀗𑁆𑀓𑀸𑀬 ‘‘𑀲𑀸𑀫𑀡𑁂𑀭𑀲𑁆𑀲 𑀳𑀢𑁆𑀣𑁂 𑀧𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀈𑀤𑀺𑀲𑁂𑀲𑀼 𑀳𑀺 𑀬𑀼𑀢𑁆𑀢𑀺 𑀦 𑀕𑀯𑁂𑀲𑀺𑀢𑀩𑁆𑀩𑀸, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. ‘‘𑀧𑀢𑁆𑀢𑀕𑀢𑀸 𑀬𑀸𑀕𑀽’’𑀢𑀺 𑀇𑀫𑀺𑀦𑀸 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀸 𑀨𑀼𑀝𑁆𑀞𑁂𑀧𑀺 𑀓𑀽𑀝𑁂 𑀬𑀸𑀕𑀼 𑀧𑀝𑀺𑀕𑁆𑀕𑀳𑀺𑀢𑀸, 𑀉𑀕𑁆𑀕𑀳𑀺𑀢𑀸 𑀯𑀸 𑀦 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀙𑀸𑀬 𑀨𑀼𑀝𑁆𑀞𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀭𑁄𑀧𑁂𑀢𑀻𑀢𑀺 𑀳𑀢𑁆𑀣𑀁 𑀨𑀼𑀲𑀸𑀧𑁂𑀢𑀺. 𑀧𑀝𑀺𑀕𑁆𑀕𑀳𑀡𑀽𑀧𑀕𑀁 𑀪𑀸𑀭𑀁 𑀦𑀸𑀫 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀓𑁆𑀔𑁂𑀧𑀸𑀭𑀳𑀁. 𑀦 𑀧𑀺𑀤𑀳𑀺𑀢𑀩𑁆𑀩𑀦𑁆𑀢𑀺 𑀳𑀢𑁆𑀣𑀢𑁄 𑀫𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀳𑀢𑁆𑀣𑀕𑀢𑀁 𑀧𑀦 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀧𑀺𑀤𑀳𑀢𑁄, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑁆𑀧𑀺 𑀯𑀸 𑀅𑀨𑀼𑀲𑀺𑀢𑁆𑀯𑀸 𑀉𑀧𑀭𑀺𑀧𑀺𑀥𑀸𑀦𑀁 𑀧𑀸𑀢𑁂𑀦𑁆𑀢𑀲𑁆𑀲 𑀦 𑀤𑁄𑀲𑁄.

𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ¶ 𑀙𑀸𑀬𑀢𑁆𑀣𑀸𑀬 𑀉𑀧𑀭𑀺 𑀥𑀸𑀭𑀬𑀫𑀸𑀦𑀸 𑀫𑀳𑀸𑀲𑀸𑀔𑀸 𑀬𑁂𑀦 𑀓𑁂𑀦𑀘𑀺 𑀙𑀺𑀚𑁆𑀚𑁂𑀬𑁆𑀬, 𑀢𑀢𑁆𑀣 𑀮𑀕𑁆𑀕𑀭𑀚𑀁 𑀫𑀼𑀔𑁂 𑀧𑀸𑀢𑁂𑀬𑁆𑀬 𑀘𑀸𑀢𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀓𑀼𑀡𑁆𑀟𑀓𑁂𑀢𑀺 𑀫𑀳𑀸𑀖𑀝𑁂. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀘𑀸𑀝𑀺𑀖𑀝𑁂𑀧𑀺. 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑀺𑀓𑀁 𑀕𑀸𑀳𑀸𑀧𑁂𑀢𑁆𑀯𑀸.

𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀢𑀺 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺 𑀢𑁂𑀦 𑀅𑀢𑁆𑀢𑀦𑁄 𑀧𑀭𑀺𑀘𑁆𑀘𑀚𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲 𑀤𑁂𑀢𑀺. 𑀏𑀢𑁆𑀣 𑀧𑀦𑀸𑀢𑀺 𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑁂. 𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀬𑀣𑀸 ‘‘𑀲𑀸𑀫𑀡𑁂𑀭𑀸 𑀇𑀢𑁄 𑀅𑀫𑁆𑀳𑀸𑀓𑀫𑁆𑀧𑀺 𑀤𑁂𑀦𑁆𑀢𑀻’’𑀢𑀺 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀣𑀸𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺, 𑀢𑀜𑁆𑀘 𑀬𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀢𑀸𑀤𑀺𑀲𑁄 𑀯𑀺𑀢𑀓𑁆𑀓𑁄 𑀦𑀢𑁆𑀣𑀺, 𑀢𑁂𑀦 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀦𑀺𑀘𑁆𑀘𑀸𑀮𑁂𑀢𑀼𑀦𑁆𑀢𑀺 ¶ 𑀘𑀸𑀮𑁂𑀢𑁆𑀯𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀤𑀺𑀅𑀧𑀦𑀬𑀁 𑀓𑀸𑀢𑀼𑀁. 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑀩𑁆𑀩𑀦𑁆𑀢𑀺 𑀅𑀦𑀕𑁆𑀕𑀺𑀓𑀁 𑀉𑀤𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀤𑁆𑀥𑀦𑁂 𑀧𑀘𑁆𑀘𑀫𑀸𑀦𑀲𑁆𑀲 𑀆𑀮𑀼𑀴𑀦𑁂 𑀉𑀧𑀭𑀺 𑀅𑀧𑀓𑁆𑀓𑀢𑀡𑁆𑀟𑀼𑀮𑀸 𑀳𑁂𑀝𑁆𑀞𑀸 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀸𑀫𑀁𑀧𑀸𑀓𑀜𑁆𑀘𑁂𑀯 𑀳𑁄𑀢𑀻’’𑀢𑀺.

𑀆𑀥𑀸𑀭𑀓𑁂 𑀧𑀢𑁆𑀢𑁄 𑀞𑀧𑀺𑀢𑁄𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀫𑀺𑀲𑁄 𑀧𑀢𑁆𑀢𑁄 𑀧𑀼𑀦 𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬 𑀞𑀧𑀺𑀢𑁄. 𑀏𑀓𑀕𑁆𑀕𑀳𑀡𑁂𑀦𑁂𑀯𑀸𑀢𑀺 𑀲𑀸𑀫𑀡𑁂𑀭𑀸𑀦𑀁 𑀕𑀳𑀺𑀢𑀲𑁆𑀲 𑀧𑀼𑀦 𑀅𑀘𑁆𑀙𑀟𑁆𑀟𑀦𑀯𑀲𑁂𑀦 𑀕𑀳𑀡𑁂𑀦. 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀥𑀽𑀫𑀯𑀝𑁆𑀝𑀺𑀬𑀸 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀢𑁆𑀢𑀼𑀕𑁆𑀕𑀸𑀭𑁄𑀢𑀺𑀆𑀤𑀺 𑀅𑀩𑁆𑀩𑁄𑀳𑀸𑀭𑀺𑀓𑀧𑁆𑀧𑀲𑀗𑁆𑀕𑁂𑀦 𑀯𑀺𑀓𑀸𑀮𑀪𑁄𑀚𑀦𑀯𑀺𑀦𑀺𑀘𑁆𑀙𑀬𑀤𑀲𑁆𑀲𑀦𑀁. 𑀲𑀫𑀼𑀤𑁆𑀤𑁄𑀤𑀓𑁂𑀦𑀸𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀦. 𑀳𑀺𑀫𑀓𑀭𑀓𑀸 𑀦𑀸𑀫 𑀓𑀤𑀸𑀘𑀺 𑀯𑀲𑁆𑀲𑁄𑀤𑀓𑁂𑀦 𑀲𑀳 𑀧𑀢𑀦𑀓𑀸 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀖𑀦𑀻𑀪𑀽𑀢𑀉𑀤𑀓𑀯𑀺𑀲𑁂𑀲𑀸, 𑀢𑁂𑀲𑀼 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀉𑀤𑀓𑀕𑀢𑀺𑀓𑀸 𑀏𑀯𑀸’’𑀢𑀺. 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀻𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀸𑀧𑀢𑁆𑀢𑀻𑀳𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁆𑀧𑀺 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀻𑀳𑀺 𑀲𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀮𑀕𑁆𑀕𑀢𑀻𑀢𑀺 𑀫𑀼𑀔𑁂 𑀘 𑀳𑀢𑁆𑀣𑁂 𑀘 𑀫𑀢𑁆𑀢𑀺𑀓𑀸𑀯𑀡𑁆𑀡𑀁 𑀤𑀲𑁆𑀲𑁂𑀢𑀺. 𑀩𑀳𑀮𑀦𑁆𑀢𑀺 𑀳𑀢𑁆𑀣𑀫𑀼𑀔𑁂𑀲𑀼 𑀅𑀮𑀕𑁆𑀕𑀦𑀓𑀫𑁆𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀯𑀸𑀲𑀫𑀢𑁆𑀢𑀦𑁆𑀢𑀺 𑀭𑁂𑀡𑀼𑀔𑀻𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀆𑀓𑀺𑀭𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀭𑀲𑀲𑁆𑀲 𑀧𑀜𑁆𑀜𑀸𑀬𑀦𑀢𑁄 𑀯𑀼𑀢𑁆𑀢𑀁.

𑀫𑀳𑀸𑀪𑀽𑀢𑁂𑀲𑀽𑀢𑀺 𑀧𑀸𑀡𑀲𑀭𑀻𑀭𑀲𑀦𑁆𑀦𑀺𑀲𑁆𑀲𑀺𑀢𑁂𑀲𑀼 𑀧𑀣𑀯𑀻𑀆𑀤𑀺𑀫𑀳𑀸𑀪𑀽𑀢𑁂𑀲𑀼. 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀲𑀭𑀻𑀭𑀦𑀺𑀲𑁆𑀲𑀺𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀼𑀮𑁄𑀫𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀁 𑀦 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀢𑀢𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀢𑁄 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀢𑀢𑀺. ‘‘𑀭𑀼𑀓𑁆𑀔𑀢𑁄 𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀢𑁆𑀢𑀺𑀓𑀢𑁆𑀣𑀸𑀬 𑀧𑀣𑀯𑀺𑀁 𑀔𑀡𑀺𑀢𑀼𑀁, 𑀅𑀜𑁆𑀜𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀫𑀽𑀮𑀧𑀡𑁆𑀡𑀸𑀤𑀺𑀯𑀺𑀲𑀪𑁂𑀲𑀚𑁆𑀚𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙𑀸𑀭𑀺𑀓𑀁 ¶ 𑀅𑀓𑀢𑁆𑀯𑀸𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑀸, 𑀅𑀦𑀦𑀼𑀜𑁆𑀜𑀸𑀢𑀢𑀸, 𑀥𑀽𑀫𑀸𑀤𑀺𑀅𑀩𑁆𑀩𑁄𑀳𑀸𑀭𑀺𑀓𑀢𑀸𑀪𑀸𑀯𑁄, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀪𑁄𑀚𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀅𑀘𑁂𑀮𑀓𑀯𑀕𑁆𑀕𑁄

𑁧. 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁭𑁩. 𑀧𑀜𑁆𑀘𑀫𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀫𑀬𑁆𑀳𑀁 𑀦𑀸𑀫𑀸𑀢𑀺 𑀪𑀺𑀓𑁆𑀔𑀼𑀦𑀸 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀜𑁆𑀜𑀢𑀺𑀢𑁆𑀣𑀺𑀬𑀢𑀸, 𑀅𑀦𑀦𑀼𑀜𑁆𑀜𑀸𑀢𑀢𑀸, 𑀅𑀚𑁆𑀛𑁄𑀳𑀭𑀡𑀻𑀬𑀢𑀸, 𑀅𑀚𑁆𑀛𑁄𑀳𑀭𑀡𑀢𑁆𑀣𑀸𑀬 𑀲𑀳𑀢𑁆𑀣𑀸 𑀅𑀦𑀺𑀓𑁆𑀔𑀺𑀢𑁆𑀢𑀪𑀸𑀚𑀦𑁂 𑀤𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁭𑁪. 𑀤𑀼𑀢𑀺𑀬𑁂 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑀼𑀓𑀸𑀫𑀢𑀸, 𑀢𑀤𑀢𑁆𑀣𑀫𑁂𑀯 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀬𑁆𑀬𑁄𑀚𑀦𑀸, 𑀢𑀲𑁆𑀲 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁧. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀔𑀼𑀤𑁆𑀤𑀓𑁂 𑀖𑀭𑁂𑀢𑀺 𑀏𑀢𑁆𑀣 𑀔𑀼𑀤𑁆𑀤𑀓𑀁 𑀖𑀭𑀁 𑀦𑀸𑀫 𑀧𑀜𑁆𑀘𑀳𑀢𑁆𑀣𑀢𑁄 𑀊𑀦𑀓𑀯𑀺𑀢𑁆𑀣𑀸𑀭𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀘 𑀧𑀺𑀝𑁆𑀞𑀲𑀗𑁆𑀖𑀸𑀝𑀢𑁄 𑀳𑀢𑁆𑀣𑀧𑀸𑀲𑁂 𑀅𑀯𑀺𑀚𑀳𑀺𑀢𑁂𑀧𑀺 𑀧𑀺𑀝𑁆𑀞𑀺𑀯𑀁𑀲𑀸𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲𑀸𑀢𑀺 𑀧𑀺𑀝𑁆𑀞𑀺𑀯𑀁𑀲𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸 𑀅𑀦𑀸𑀭𑁄𑀧𑁂𑀢𑁆𑀯𑀸 𑀯𑀸 𑀓𑀢𑀲𑁆𑀲.

𑁨𑁮𑁩. 𑀧𑀸𑀴𑀺𑀬𑀁 ¶ 𑀯𑀻𑀢𑀭𑀸𑀕𑀸𑀢𑀺 𑀅𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀸𑀦𑀁, 𑀅𑀦𑀸𑀕𑀸𑀫𑀻𑀦𑀜𑁆𑀘 𑀲𑀗𑁆𑀕𑀳𑁄. 𑀲𑀘𑀺𑀢𑁆𑀢𑀓𑀦𑁆𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁. 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀲𑀦𑁆𑀦𑀺𑀳𑀺𑀢𑀢𑀸, 𑀲𑀬𑀦𑀺𑀖𑀭𑀢𑀸, 𑀤𑀼𑀢𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀸𑀯𑁄, 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮𑁪-𑁨𑁮𑁯. 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑀺.

𑁬. 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁮. 𑀙𑀝𑁆𑀞𑁂 ¶ ‘‘𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀅𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀺𑀲𑁆𑀲𑀢𑀺, 𑀲𑁄 𑀲𑀘𑁂𑀧𑀺 𑀧𑀓𑀢𑀺𑀯𑀘𑀦𑀲𑁆𑀲 𑀲𑀯𑀦𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄 𑀉𑀧𑀕𑀦𑁆𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀅𑀧𑀺 𑀘…𑀧𑁂… 𑀬𑀁 𑀧𑀲𑁆𑀲𑀢𑀺, 𑀲𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺.

𑁩𑁦𑁨. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀘𑁂𑀢𑁆𑀣 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀦𑀜𑁆𑀜𑁂𑀯 𑀯𑀼𑀢𑁆𑀢𑀢𑁆𑀢𑀸 𑀯𑀺𑀳𑀸𑀭𑀢𑁄 𑀕𑀸𑀫𑀯𑀻𑀣𑀺𑀁 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀁 𑀯𑀺𑀦𑀸 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀳𑁄𑀢𑀺, 𑀦 𑀧𑀦 𑀖𑀭𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯.

𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀅𑀜𑁆𑀜𑀲𑁆𑀲 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲…𑀧𑁂… 𑀧𑀞𑀫𑀁 𑀧𑀸𑀤𑀁 𑀉𑀫𑁆𑀫𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀕𑀸𑀫𑁂 𑀧𑀯𑀺𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀜𑁆𑀜𑀲𑁆𑀲 𑀖𑀭𑀽𑀧𑀘𑀸𑀭𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀯𑀻𑀣𑀺𑀫𑀚𑁆𑀛𑁂𑀦𑁂𑀯 𑀕𑀦𑁆𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀖𑀭𑀤𑁆𑀯𑀸𑀭𑀸𑀪𑀺𑀫𑀼𑀔𑁂 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀑𑀮𑁄𑀓𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑀢𑁆𑀣 𑀓𑁂𑀘𑀺 ‘‘𑀯𑀻𑀣𑀺𑀬𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀖𑀭𑀽𑀧𑀘𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀬𑀸𑀦𑀺 𑀓𑀼𑀮𑀸𑀦𑀺 𑀉𑀤𑁆𑀤𑀺𑀲𑁆𑀲 𑀕𑀢𑁄, 𑀢𑁂𑀲𑀁 𑀕𑀡𑀦𑀸𑀬𑀸’’𑀢𑀺. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀫𑀦𑁆𑀢𑀦𑀲𑀸𑀤𑀺𑀬𑀦𑀁, 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀦𑀸, 𑀪𑀢𑁆𑀢𑀺𑀬𑀖𑀭𑀢𑁄 𑀅𑀜𑁆𑀜𑀖𑀭𑀽𑀧𑀲𑀗𑁆𑀓𑀫𑀦𑀁, 𑀫𑀚𑁆𑀛𑀦𑁆𑀳𑀺𑀓𑀸𑀦𑀢𑀺𑀓𑁆𑀓𑀫𑁄, 𑀲𑀫𑀬𑀸𑀧𑀤𑀸𑀦𑀁 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁦𑁩. 𑀲𑀢𑁆𑀢𑀫𑁂 ¶ 𑀫𑀳𑀸𑀦𑀸𑀫𑁄𑀢𑀺 𑀲𑀼𑀓𑁆𑀓𑁄𑀤𑀦𑀲𑁆𑀲 𑀧𑀼𑀢𑁆𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲, 𑀲𑀢𑁆𑀣𑀼 𑀘 𑀚𑁂𑀝𑁆𑀞𑀪𑀸𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀫𑀺𑀢𑁄𑀤𑀦𑀲𑁆𑀲 𑀧𑀼𑀢𑁆𑀢𑁄, 𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀲𑀼𑀤𑁆𑀥𑁄𑀤𑀦𑀲𑁆𑀲𑁂𑀯.

𑁩𑁦𑁫. 𑀧𑀸𑀴𑀺𑀬𑀁 𑀓𑀸𑀮𑀁 𑀆𑀳𑀭𑀺𑀲𑁆𑀲𑀣𑀸𑀢𑀺 𑀅𑀚𑁆𑀚𑀢𑀦𑀁 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑁆𑀲𑀣, 𑀲𑁆𑀯𑁂 𑀪𑁂𑀲𑀚𑁆𑀚𑀁 𑀳𑀭𑀺𑀲𑁆𑀲𑀣𑀸𑀢𑀺 𑀯𑀸 𑀅𑀢𑁆𑀣𑁄. ‘‘𑀅𑀢𑁆𑀣𑀺 𑀧𑀯𑀸𑀭𑀡𑀸 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀘 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀘𑀸’’𑀢𑀺 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀦𑀺𑀬𑀫𑀺𑀢𑀫𑁂𑀯 𑀪𑁂𑀲𑀚𑁆𑀚𑀁 𑀦𑀺𑀬𑀫𑀺𑀢𑀓𑀸𑀮𑀦𑁆𑀢𑀭𑁂𑀬𑁂𑀯 𑀕𑀳𑁂𑀢𑀩𑁆𑀩𑀁, 𑀦 𑀢𑀢𑁄 𑀩𑀳𑀺. 𑀇𑀢𑀭𑀣𑀸 ¶ 𑀯𑀺𑀲𑀼𑀁 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀧𑀭𑀺𑀬𑀦𑁆𑀢𑀸 𑀲𑀗𑁆𑀖𑀧𑀯𑀸𑀭𑀡𑀸, 𑀢𑀤𑀼𑀢𑁆𑀢𑀭𑀺 𑀪𑁂𑀲𑀚𑁆𑀚𑀯𑀺𑀜𑁆𑀜𑀢𑁆𑀢𑀺, 𑀅𑀕𑀺𑀮𑀸𑀦𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁧𑁫. 𑀅𑀝𑁆𑀞𑀫𑁂 𑀏𑀓𑀫𑁂𑀓𑀦𑁆𑀢𑀺 𑀏𑀢𑁆𑀣 𑀤𑀼𑀯𑀗𑁆𑀕𑀺𑀦𑀻𑀧𑀺 𑀢𑀺𑀯𑀗𑁆𑀕𑀺𑀦𑀻𑀧𑀺 𑀲𑁂𑀦𑀸 𑀲𑀗𑁆𑀕𑀬𑁆𑀳𑀢𑀺. 𑀉𑀬𑁆𑀬𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑁂𑀦𑀸𑀤𑀲𑁆𑀲𑀦𑀸𑀬 𑀢𑀣𑀸𑀭𑀽𑀧𑀧𑀘𑁆𑀘𑀬𑀸𑀤𑀺𑀁 𑀯𑀺𑀦𑀸 𑀕𑀫𑀦𑀁, 𑀅𑀦𑀦𑀼𑀜𑁆𑀜𑀸𑀢𑁄𑀓𑀸𑀲𑁂 𑀤𑀲𑁆𑀲𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁧𑁯. 𑀦𑀯𑀫𑁂 𑀲𑁂𑀦𑀸𑀬 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑁄, 𑀅𑀕𑀺𑀮𑀸𑀦𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁨𑁨. 𑀤𑀲𑀫𑁂 𑀧𑀸𑀴𑀺𑀬𑀁 𑀓𑀢𑀺 𑀢𑁂 𑀮𑀓𑁆𑀔𑀸𑀦𑀺 𑀮𑀤𑁆𑀥𑀸𑀦𑀻𑀢𑀺 𑀓𑀺𑀢𑁆𑀢𑀓𑀸 𑀢𑀬𑀸 𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀥𑀺𑀓𑀸𑀤𑀺𑀤𑀲𑁆𑀲𑀦𑀸𑀬 ¶ 𑀢𑀣𑀸𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀕𑀫𑀦𑀁, 𑀅𑀦𑀦𑀼𑀜𑁆𑀜𑀸𑀢𑁄𑀓𑀸𑀲𑁂 𑀤𑀲𑁆𑀲𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀅𑀘𑁂𑀮𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁨𑁮. 𑀙𑀝𑁆𑀞𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀧𑀸𑀴𑀺𑀬𑀁 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸𑀢𑀺 𑀧𑀺𑀝𑁆𑀞𑀧𑀽𑀯𑀸𑀤𑀺𑀁 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀺𑀡𑁆𑀡𑀲𑀗𑁆𑀔𑀸𑀢𑀁 𑀥𑀜𑁆𑀜𑀗𑁆𑀓𑀼𑀭𑀸𑀤𑀺𑀲𑀼𑀭𑀸𑀩𑀻𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸. 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀲𑀸𑀲𑀧𑀸𑀤𑀺𑀅𑀦𑁂𑀓𑀲𑀫𑁆𑀪𑀸𑀭𑁂𑀳𑀺 𑀲𑀜𑁆𑀜𑀼𑀢𑁆𑀢𑀸.

𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀧𑀼𑀧𑁆𑀨𑀸𑀤𑀺𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀧𑀼𑀧𑁆𑀨𑀸𑀲𑀯𑁄 𑀦𑀸𑀫. 𑀢𑀣𑀸 𑀧𑀦𑀲𑀸𑀤𑀺 𑀨𑀮𑀸𑀲𑀯𑁄. 𑀫𑀼𑀤𑁆𑀤𑀺𑀓𑀭𑀲𑁄 𑀫𑀥𑁆𑀯𑀸𑀲𑀯𑁄. 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀲𑀯𑁄. 𑀢𑀺𑀨𑀮𑀢𑀺𑀓𑀝𑀼𑀓𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀁 𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄. 𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀺𑀝𑁆𑀞𑀸𑀤𑀻𑀦𑀁 𑀫𑀚𑁆𑀚𑀢𑁆𑀣𑀸𑀬 𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬.

𑁩𑁨𑁯. 𑀮𑁄𑀡𑀲𑁄𑀯𑀻𑀭𑀓𑀁 𑀲𑀼𑀢𑁆𑀢𑀜𑁆𑀘 𑀅𑀦𑁂𑀓𑁂𑀳𑀺 𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀅𑀪𑀺𑀲𑀗𑁆𑀔𑀢𑁄 𑀪𑁂𑀲𑀚𑁆𑀚𑀯𑀺𑀲𑁂𑀲𑁄. 𑀉𑀬𑁆𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀘𑀺𑀢𑁆𑀢𑀓𑀮𑁄𑀓𑀯𑀚𑁆𑀚𑁂𑀲𑀼 𑀮𑁄𑀓𑀯𑀚𑁆𑀚𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀯𑀸𑀢𑀺 𑀢𑀢𑁆𑀣 𑀓𑀺𑀜𑁆𑀘𑀺𑀧𑀺 𑀅𑀯𑀢𑁆𑀯𑀸 𑀇𑀥 𑀢𑁂𑀳𑀺 𑀅𑀲𑀸𑀥𑀸𑀭𑀡𑀯𑀢𑁆𑀣𑀼𑀯𑀺𑀲𑁂𑀲𑀲𑀺𑀤𑁆𑀥𑀸𑀬 𑀅𑀘𑀺𑀢𑁆𑀢𑀓𑀧𑀓𑁆𑀔𑁂𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀢𑀸𑀬 𑀢𑀁 𑀮𑁄𑀓𑀯𑀚𑁆𑀚𑀢𑀸𑀤𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑁂𑀯 ‘‘𑀯𑀢𑁆𑀣𑀼𑀅𑀚𑀸𑀦𑀦𑀢𑀸𑀬 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀭𑀤𑁆𑀥𑀝𑁆𑀞𑀸𑀦𑀯𑀺𑀲𑁄𑀥𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀁. 𑀫𑀚𑁆𑀚𑀪𑀸𑀯𑁄, 𑀢𑀲𑁆𑀲 𑀧𑀸𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁦. 𑀤𑀼𑀢𑀺𑀬𑁂 ¶ 𑀳𑀲𑀸𑀥𑀺𑀧𑁆𑀧𑀸𑀬𑀢𑀸, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀓𑀸𑀬𑁂𑀦 𑀓𑀸𑀬𑀸𑀫𑀲𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁮. 𑀢𑀢𑀺𑀬𑁂 ¶ 𑀧𑀸𑀴𑀺𑀬𑀁 𑀳𑀲𑀥𑀫𑁆𑀫𑁂 𑀳𑀲𑀥𑀫𑁆𑀫𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀉𑀧𑁆𑀮𑀯𑀸𑀤𑀺𑀫𑀢𑁆𑀢𑀁 𑀓𑀺𑀁 𑀳𑀲𑀥𑀫𑁆𑀫𑁄 𑀳𑁄𑀢𑀻𑀢𑀺 𑀕𑀳𑀡𑀯𑀲𑁂𑀦 𑀲𑀢𑀺 𑀓𑀭𑀡𑀻𑀬𑁂 𑀓𑀭𑀺𑀬𑀫𑀸𑀦𑀁 𑀳𑀲𑀥𑀫𑁆𑀫𑀁 𑀳𑀲𑀥𑀫𑁆𑀫𑁄𑀢𑀺 𑀕𑀳𑀡𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀲𑁆𑀲𑀸𑀭𑁂𑀦𑁆𑀢𑁄𑀢𑀺 𑀉𑀤𑀓𑁂 𑀞𑀺𑀢𑀁 𑀦𑀸𑀯𑀁 𑀢𑀻𑀭𑁂 𑀆𑀭𑁄𑀧𑁂𑀦𑁆𑀢𑁄.

𑀧𑀢𑀦𑀼𑀧𑁆𑀧𑀢𑀦𑀯𑀸𑀭𑁂𑀲𑀽𑀢𑀺 𑀉𑀤𑀓𑀲𑁆𑀲 𑀉𑀧𑀭𑀺𑀢𑀮𑁂 𑀫𑀡𑁆𑀟𑀽𑀓𑀕𑀢𑀺𑀬𑀸 𑀧𑀢𑀦𑀼𑀧𑁆𑀧𑀢𑀦𑀯𑀲𑁂𑀦 𑀕𑀫𑀦𑀢𑁆𑀣𑀁 𑀔𑀺𑀢𑁆𑀢𑀸𑀬 𑀏𑀓𑀺𑀲𑁆𑀲𑀸 𑀓𑀣𑀮𑀸𑀬 𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀤𑀓𑀲𑁆𑀲 𑀉𑀧𑀭𑀺𑀕𑁄𑀧𑁆𑀨𑀓𑀢𑀸, 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀓𑀻𑀴𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁪. 𑀘𑀢𑀼𑀢𑁆𑀣𑁂 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑁆𑀢𑀺 𑀫𑀳𑀸𑀧𑀤𑁂𑀲𑀸. 𑀅𑀝𑁆𑀞𑀓𑀣𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀜𑁆𑀜𑀢𑁆𑀢𑁂𑀦 𑀯𑀘𑀦𑀁, 𑀅𑀦𑀸𑀤𑀭𑀺𑀬𑀓𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁫. 𑀧𑀜𑁆𑀘𑀫𑁂 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀢𑀲𑁆𑀲 𑀤𑀲𑁆𑀲𑀦𑀲𑀯𑀦𑀯𑀺𑀲𑀬𑁂 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑀢𑀸𑀬 𑀯𑀸𑀬𑀫𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁫𑁪. 𑀙𑀝𑁆𑀞𑁂 ¶ 𑀅𑀮𑀸𑀢𑀁 𑀧𑀢𑀺𑀢𑀦𑁆𑀢𑀺 𑀅𑀕𑁆𑀕𑀺𑀓𑀧𑀸𑀮𑀢𑁄 𑀩𑀳𑀺 𑀧𑀢𑀺𑀢𑀁. 𑀯𑀺𑀚𑁆𑀛𑀸𑀢𑀦𑁆𑀢𑀺 𑀯𑀺𑀚𑁆𑀛𑀸𑀢𑀁 𑀅𑀮𑀸𑀢𑀁 𑀓𑀧𑀸𑀮𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀚𑀸𑀮𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀓𑁂𑀯𑀮𑀁 𑀇𑀦𑁆𑀥𑀦𑀁 𑀧𑀸𑀢𑁂𑀦𑁆𑀢𑀲𑁆𑀲𑀧𑀺 𑀯𑀺𑀚𑁆𑀛𑀸𑀢𑀁 𑀓𑀧𑀸𑀮𑀕𑁆𑀕𑀺𑀁 𑀫𑀼𑀔𑀯𑀸𑀢𑀸𑀤𑀺𑀦𑀸 𑀉𑀚𑁆𑀚𑀸𑀮𑁂𑀦𑁆𑀢𑀲𑁆𑀲𑀧𑀺. 𑀕𑀺𑀮𑀸𑀦𑀢𑀸𑀤𑀺𑀓𑀸𑀭𑀡𑀸𑀪𑀸𑀯𑁄, 𑀯𑀺𑀲𑀺𑀩𑁆𑀩𑁂𑀢𑀼𑀓𑀸𑀫𑀢𑀸, 𑀲𑀫𑀸𑀤𑀳𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁫𑁭. 𑀲𑀢𑁆𑀢𑀫𑁂 ¶ 𑀧𑀸𑀴𑀺𑀬𑀁 𑀦𑀕𑀭𑁂 𑀣𑀓𑀺𑀢𑁂𑀢𑀺 𑀏𑀢𑁆𑀣 𑀭𑀜𑁆𑀜𑀸 𑀘𑀺𑀭𑀁 𑀦𑀳𑀸𑀬𑀺𑀢𑀼𑀓𑀸𑀫𑁂𑀦 ‘‘𑀅𑀳𑀁 𑀩𑀳𑀺 𑀉𑀬𑁆𑀬𑀸𑀦𑁂 𑀓𑀢𑀸𑀭𑀓𑁆𑀔𑁄 𑀯𑀲𑀺𑀲𑁆𑀲𑀸𑀫𑀺, 𑀦𑀕𑀭𑀁 𑀣𑀓𑁂𑀢𑁆𑀯𑀸 𑀕𑁄𑀧𑁂𑀣𑀸’’𑀢𑀺 𑀅𑀦𑀼𑀜𑁆𑀜𑀸𑀢𑀸, 𑀢𑁂 𑀣𑀓𑀺𑀁𑀲𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑀫𑁆𑀪𑀺𑀦𑁆𑀦𑁂𑀦𑀸𑀢𑀺 𑀅𑀦𑀝𑁆𑀞𑁂𑀦, 𑀢𑀁 𑀤𑀺𑀯𑀲𑀁 𑀧𑀼𑀦 𑀅𑀕𑁆𑀕𑀳𑀺𑀢𑀸𑀮𑀗𑁆𑀓𑀸𑀭𑁂𑀦 𑀧𑀩𑀼𑀤𑁆𑀥𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀚𑁆𑀛𑀺𑀫𑀤𑁂𑀲𑁂 𑀊𑀦𑀓𑀤𑁆𑀥𑀫𑀸𑀲𑀦𑀳𑀸𑀦𑀁, 𑀲𑀫𑀬𑀸𑀤𑀻𑀦𑀁 𑀅𑀪𑀸𑀯𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁮. 𑀅𑀝𑁆𑀞𑀫𑁂 𑀧𑀝𑀺𑀮𑀤𑁆𑀥𑀦𑀯𑀘𑀻𑀯𑀭𑁂𑀦𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀅𑀓𑀢𑀓𑀧𑁆𑀧𑀁 𑀓𑀢𑀺𑀧𑀸𑀳𑀁 𑀦𑀺𑀯𑀸𑀲𑀦𑀢𑁆𑀣𑀸𑀬 𑀢𑀸𑀯𑀓𑀸𑀮𑀺𑀓𑀯𑀲𑁂𑀦 𑀮𑀤𑁆𑀥𑀫𑁆𑀧𑀺 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑀤𑀦𑁆𑀢𑀺.

𑁩𑁬𑁯. ‘‘𑀦𑀯𑀁 𑀦𑀸𑀫 𑀅𑀓𑀢𑀓𑀧𑁆𑀧’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀁 𑀘𑀻𑀯𑀭𑀁, 𑀢𑁂𑀦 𑀯𑀸, 𑀢𑀢𑁄 𑀮𑀪𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀤𑀺𑀦𑁆𑀦𑀫𑁆𑀧𑀺 𑀓𑀢𑀓𑀧𑁆𑀧𑀫𑁂𑀯 𑀦𑀯𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀁𑀲𑀩𑀤𑁆𑀥𑀓𑀸𑀲𑀸𑀯𑀫𑁆𑀧𑀺 𑀧𑀸𑀭𑀼𑀧𑀺𑀢𑀩𑁆𑀩𑀢𑁄 𑀓𑀧𑁆𑀧𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀘𑀫𑁆𑀫𑀓𑀸𑀭𑀦𑀻𑀮𑀁 𑀦𑀸𑀫 𑀘𑀫𑁆𑀫𑀁 𑀦𑀻𑀮𑀯𑀡𑁆𑀡𑀁 𑀓𑀸𑀢𑀼𑀁 𑀬𑁄𑀚𑀺𑀬𑀫𑀸𑀦𑀁 𑀦𑀻𑀮𑀁. 𑀧𑀓𑀢𑀺𑀦𑀻𑀮𑀫𑁂𑀯𑀸𑀢𑀺 𑀓𑁂𑀘𑀺. 𑀬𑀣𑀸𑀯𑀼𑀢𑁆𑀢𑀘𑀻𑀯𑀭𑀲𑁆𑀲 𑀅𑀓𑀢𑀓𑀧𑁆𑀧𑀢𑀸, 𑀅𑀦𑀝𑁆𑀞𑀘𑀻𑀯𑀭𑀸𑀤𑀺𑀢𑀸, 𑀦𑀺𑀯𑀸𑀲𑀦𑀸𑀤𑀺𑀢𑀸𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁪. 𑀦𑀯𑀫𑁂 ¶ 𑀬𑁂𑀦𑀸𑀢𑀺 𑀬𑁂𑀦 𑀲𑀤𑁆𑀥𑀺𑀁, 𑀬𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀲𑀸𑀫𑀁 𑀯𑀺𑀓𑀧𑁆𑀧𑀺𑀢𑀲𑁆𑀲 𑀅𑀧𑀘𑁆𑀘𑀼𑀤𑁆𑀥𑀸𑀭𑁄, 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀅𑀯𑀺𑀲𑁆𑀲𑀸𑀲𑁂𑀦 𑀧𑀭𑀺𑀪𑁄𑀕𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀻𑀯𑀭𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁭𑁮. 𑀤𑀲𑀫𑁂 ¶ 𑀧𑀸𑀴𑀺𑀬𑀁 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀅𑀣𑁂𑀬𑁆𑀬𑀘𑀺𑀢𑁆𑀢𑀁 𑀓𑁄𑀥𑁂𑀦 𑀤𑀼𑀓𑁆𑀔𑀸𑀧𑁂𑀢𑀼𑀓𑀸𑀫𑀁, 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑀼𑀓𑀸𑀫𑀜𑁆𑀘 𑀲𑀗𑁆𑀕𑀬𑁆𑀳𑀢𑀺. 𑀢𑁂𑀦𑁂𑀯 ‘‘𑀢𑀺𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀢𑁆𑀢𑀸𑀤𑀻𑀦𑀁 𑀅𑀧𑀦𑀺𑀥𑀸𑀦𑀁, 𑀯𑀺𑀳𑁂𑀲𑁂𑀢𑀼𑀓𑀸𑀫𑀢𑀸𑀤𑀻𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀘𑀻𑀯𑀭𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁨. 𑀲𑀢𑁆𑀢𑀫𑀲𑁆𑀲 𑀧𑀞𑀫𑁂 𑀉𑀲𑀼𑀁 𑀲𑀭𑀁 𑀅𑀲𑀢𑀺 𑀔𑀺𑀧𑀢𑀻𑀢𑀺 𑀇𑀲𑁆𑀲𑀸𑀲𑁄. 𑀦 𑀳𑁂𑀢𑁆𑀣 𑀓𑀺𑀜𑁆𑀘𑀺 𑀚𑀻𑀯𑀺𑀢𑀁 𑀦𑀸𑀫 𑀯𑀺𑀲𑀼𑀁 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀸𑀡𑁂𑀢𑀺 𑀲𑀢𑁆𑀢𑁂. 𑀅𑀧𑁆𑀧𑀫𑀢𑁆𑀢𑁂𑀦 𑀯𑀢𑁆𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑀣𑀸 𑀧𑀸𑀡𑀓𑀸𑀦𑀁 𑀯𑀺𑀳𑁂𑀲𑀸𑀧𑀺 𑀦 𑀳𑁄𑀢𑀺, 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀑𑀢𑀸𑀧𑀦𑀲𑀫𑁆𑀫𑀚𑁆𑀚𑀦𑀸𑀤𑀺𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁭. 𑀤𑀼𑀢𑀺𑀬𑁂 ¶ 𑀉𑀤𑀓𑀲𑀡𑁆𑀞𑀸𑀦𑀓𑀧𑁆𑀧𑀤𑁂𑀲𑁂𑀢𑀺 𑀓𑀤𑁆𑀤𑀫𑀧𑀸𑀲𑀸𑀡𑀸𑀤𑀺𑀪𑀽𑀫𑀺𑀬𑀁. 𑀢𑀢𑁆𑀣𑀸𑀢𑀺 𑀆𑀲𑀺𑀢𑁆𑀢𑁂 𑀓𑀧𑁆𑀧𑀺𑀬𑀉𑀤𑀓𑁂. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁨. 𑀢𑀢𑀺𑀬𑁂 ‘‘𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀅𑀥𑀺𑀓𑀭𑀡𑀁 𑀲𑀗𑁆𑀖𑀓𑀫𑁆𑀫𑁂𑀦 𑀦𑀺𑀳𑀢𑀁, 𑀢𑀲𑁆𑀲 𑀲𑀫𑁆𑀫𑀼𑀔𑁂 𑀏𑀯 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑀫𑁆𑀫𑀼𑀔𑁂 𑀧𑀦 𑀤𑀼𑀓𑁆𑀓𑀝𑀫𑁂𑀯.

𑁩𑁯𑁫. ‘‘𑀥𑀫𑁆𑀫𑀓𑀫𑁆𑀫𑁂 ¶ 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀉𑀓𑁆𑀓𑁄𑀝𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀤𑀭𑀺𑀬𑀢𑀸𑀤𑀺 𑀯𑀺𑀬 𑀉𑀓𑁆𑀓𑁄𑀝𑀦𑀁 𑀲𑀬𑀁 𑀅𑀓𑀼𑀲𑀮𑀁 𑀦 𑀳𑁄𑀢𑀺, 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸𑀬, 𑀧𑀦 𑀯𑀺𑀫𑀢𑀺𑀬𑀸 𑀘 𑀉𑀓𑁆𑀓𑁄𑀝𑀦𑁂𑀦𑁂𑀯 𑀅𑀓𑀼𑀲𑀮𑀁 𑀳𑁄𑀢𑀺. 𑀬𑀣𑀸𑀥𑀫𑁆𑀫𑀁 𑀦𑀺𑀳𑀢𑀢𑀸, 𑀚𑀸𑀦𑀦𑀸, 𑀉𑀓𑁆𑀓𑁄𑀝𑀦𑀸𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁯. 𑀘𑀢𑀼𑀢𑁆𑀣𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀧𑀓𑁆𑀔𑁂 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀧𑀼𑀕𑁆𑀕𑀮𑁄𑀢𑀺 𑀆𑀧𑀦𑁆𑀦𑀧𑀼𑀕𑁆𑀕𑀮𑁄. 𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀳𑀺 𑀲𑀢𑀺 𑀏𑀯 𑀅𑀯𑀲𑁆𑀲𑀁 𑀅𑀜𑁆𑀜𑀲𑁆𑀲 𑀆𑀭𑁄𑀘𑀦𑀁 𑀯𑀼𑀢𑁆𑀢𑀁, 𑀯𑀢𑁆𑀣𑀼𑀧𑀼𑀕𑁆𑀕𑀮𑀲𑁆𑀲 𑀘 𑀆𑀭𑁄𑀘𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀻𑀢𑀺 𑀙𑀸𑀤𑁂𑀲𑁆𑀲𑀸𑀫𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀲𑀢𑀺𑀧𑀺 𑀧𑀼𑀕𑁆𑀕𑀮𑀧𑀭𑀫𑁆𑀧𑀭𑀸𑀬 𑀕𑀘𑁆𑀙𑀦𑁆𑀢𑀻 𑀆𑀧𑀢𑁆𑀢𑀺𑀓𑁄𑀝𑀺 𑀙𑀺𑀚𑁆𑀚𑀢𑀺.

𑁪𑁦𑁦. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀘 𑀓𑀸𑀬𑀲𑀁𑀲𑀕𑁆𑀕𑁄 𑀘𑀸𑀢𑀺 𑀅𑀬𑀁 𑀤𑀼𑀝𑁆𑀞𑀼𑀮𑁆𑀮𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸’’𑀢𑀺 𑀇𑀤𑀁 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲…𑀧𑁂… 𑀆𑀤𑀺𑀢𑁄 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑁄 𑀦𑀸𑀫 𑀅𑀚𑁆𑀛𑀸𑀘𑀸𑀭𑁄, 𑀲𑁂𑀲𑀸𑀦𑀺 𑀅𑀤𑀼𑀝𑁆𑀞𑀼𑀮𑁆𑀮𑁄. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀅𑀢𑁆𑀢𑀓𑀸𑀫𑀸 𑀧𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁨) 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀧𑀼𑀕𑁆𑀕𑀮𑀧𑁂𑀫𑁂𑀦 𑀙𑀸𑀤𑀬𑀢𑁄 𑀘𑁂𑀢𑁆𑀣 ‘‘𑀅𑀜𑁆𑀜𑁂 𑀕𑀭𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀬𑀯𑀲𑁂𑀦 𑀙𑀸𑀤𑀦𑀓𑁆𑀔𑀡𑁂 ¶ 𑀧𑀝𑀺𑀖𑁄𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀚𑀸𑀦𑀦𑀁, 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁨. 𑀧𑀜𑁆𑀘𑀫𑁂 𑀭𑀽𑀧𑀲𑀺𑀧𑁆𑀧𑀦𑁆𑀢𑀺 𑀳𑁂𑀭𑀜𑁆𑀜𑀺𑀓𑀲𑀺𑀧𑁆𑀧𑀁. 𑀕𑀩𑁆𑀪𑁂 𑀲𑀬𑀺𑀢𑀓𑀸𑀮𑁂𑀦 𑀲𑀤𑁆𑀥𑀺𑀁 𑀯𑀻𑀲𑀢𑀺𑀫𑀁 𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀕𑀩𑁆𑀪𑀯𑀻𑀲𑁄.

𑁪𑁦𑁪. 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀻𑀢𑀺 ¶ 𑀲𑀸𑀯𑀡𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀺𑀬𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑀧𑀼𑀡𑁆𑀡𑀫𑀻. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬. 𑀤𑁆𑀯𑀸𑀤𑀲 𑀫𑀸𑀲𑁂 𑀫𑀸𑀢𑀼 𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀚𑀸𑀢𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀺𑀁𑀲 𑀭𑀢𑁆𑀢𑀺𑀦𑁆𑀤𑀺𑀯𑁄 𑀫𑀸𑀲𑁄, 𑀤𑁆𑀯𑀸𑀤𑀲𑀫𑀸𑀲𑀺𑀓𑁄 𑀲𑀁𑀯𑀘𑁆𑀙𑀭𑁄’’𑀢𑀺 (𑀅. 𑀦𑀺. 𑁩.𑁭𑁧; 𑁮.𑁪𑁩; 𑀯𑀺𑀪. 𑁧𑁦𑁨𑁩) 𑀯𑀘𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀯𑀲𑁆𑀲𑀁 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀺, ‘‘𑀏𑀓𑀫𑀸𑀲𑀁 𑀅𑀥𑀺𑀓𑀫𑀸𑀲𑁄’’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀢𑀺𑀬𑁄 𑀢𑀢𑀺𑀬𑁄 𑀲𑀁𑀯𑀘𑁆𑀙𑀭𑁄 𑀢𑁂𑀭𑀲𑀫𑀸𑀲𑀺𑀓𑁄 𑀳𑁄𑀢𑀺. 𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸𑀢𑀺 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀢𑁄 𑀬𑀸𑀯 𑀚𑀸𑀢𑀤𑀺𑀯𑀲𑀪𑀽𑀢𑀸 𑀫𑀳𑀸𑀧𑀯𑀸𑀭𑀡𑀸. 𑀢𑀸𑀯 𑀬𑁂 𑀤𑁆𑀯𑁂 𑀫𑀸𑀲𑀸 𑀅𑀦𑀸𑀕𑀢𑀸, 𑀢𑁂𑀲𑀁 𑀅𑀢𑁆𑀣𑀸𑀬 𑀅𑀥𑀺𑀓𑀫𑀸𑀲𑀢𑁄 𑀮𑀤𑁆𑀥𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑁄 𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺. ‘‘𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸’’𑀢𑀺 𑀇𑀤𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀏𑀓𑀅𑀥𑀺𑀓𑀫𑀸𑀲𑁂 𑀕𑀳𑁂𑀢𑁆𑀯𑀸 𑀢𑀢𑁄 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼𑀧𑀺 𑀘𑀸𑀢𑀼𑀤𑁆𑀤𑀲𑀻𑀅𑀢𑁆𑀣𑀸𑀬 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀭𑀺𑀳𑀸𑀧𑀦𑁂𑀦 𑀲𑀩𑁆𑀩𑀤𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀕𑀩𑁆𑀪𑀯𑀲𑁆𑀲𑁂𑀦 𑀲𑀳 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀩𑁆𑀪𑀫𑀸𑀲𑀸𑀧𑀺 𑀕𑀡𑀦𑀽𑀧𑀕𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸. 𑀏𑀓𑀯𑀻𑀲𑀢𑀺𑀯𑀲𑁆𑀲𑁄𑀢𑀺 𑀚𑀸𑀢𑀺𑀬𑀸 𑀯𑀻𑀲𑀢𑀺𑀯𑀲𑁆𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁦𑁬. 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀆𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀲𑁄𑀧𑀻𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄. 𑀊𑀦𑀯𑀻𑀲𑀢𑀺𑀯𑀲𑁆𑀲𑀢𑀸, 𑀢𑀁 𑀜𑀢𑁆𑀯𑀸 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀙𑀝𑁆𑀞𑁂 ¶ 𑀣𑁂𑀬𑁆𑀬𑀲𑀢𑁆𑀣𑀪𑀸𑀯𑁄, 𑀜𑀢𑁆𑀯𑀸 𑀲𑀁𑀯𑀺𑀥𑀸𑀦𑀁, 𑀅𑀯𑀺𑀲𑀗𑁆𑀓𑁂𑀢𑁂𑀦 𑀕𑀫𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁧𑁨. 𑀲𑀢𑁆𑀢𑀫𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀅𑀝𑁆𑀞𑀫𑁂 ¶ 𑀅𑀦𑁆𑀢𑀭𑀸𑀬𑀦𑁆𑀢𑀺 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀆𑀦𑀦𑁆𑀢𑀭𑀺𑀬𑀥𑀫𑁆𑀫𑀸𑀢𑀺 𑀅𑀦𑀦𑁆𑀢𑀭𑁂 𑀪𑀯𑁂 𑀨𑀮𑀦𑀺𑀩𑁆𑀩𑀢𑁆𑀢𑀦𑁂 𑀦𑀺𑀬𑀼𑀢𑁆𑀢𑀸 𑀘𑁂𑀢𑀦𑀸𑀤𑀺𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. ‘‘𑀦 𑀲𑀕𑁆𑀕𑀲𑁆𑀲𑀸’’𑀢𑀺 𑀇𑀤𑀁 𑀪𑀺𑀓𑁆𑀔𑀼𑀦𑀺𑀤𑀽𑀲𑀦𑀓𑀫𑁆𑀫𑀲𑁆𑀲 𑀆𑀦𑀦𑁆𑀢𑀭𑀺𑀬𑀢𑁆𑀢𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀅𑀭𑀺𑀬𑀲𑀸𑀯𑀺𑀓𑀸𑀲𑀼, 𑀧𑀦 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀪𑀽𑀢𑀸𑀬 𑀘 𑀩𑀮𑀓𑁆𑀓𑀸𑀭𑁂𑀦 𑀤𑀽𑀲𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀲𑀅𑀲𑀫𑁂𑀯. 𑀫𑁄𑀓𑁆𑀔𑀦𑁆𑀢𑀭𑀸𑀬𑀺𑀓𑀢𑀸 𑀧𑀦 𑀮𑁄𑀮𑀸𑀬𑀧𑀺 𑀧𑀓𑀢𑀢𑁆𑀢𑀪𑀺𑀓𑁆𑀔𑀼𑀦𑀺𑀬𑀸 𑀤𑀽𑀲𑀓𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀯𑀼𑀢𑁆𑀢𑀸.

𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀺𑀯𑀢𑁆𑀢𑀦𑀓𑀸 𑀅𑀳𑁂𑀢𑀼𑀓𑀅𑀓𑀺𑀭𑀺𑀬𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀬𑁄𑀯 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸. 𑀧𑀡𑁆𑀟𑀓𑀸𑀤𑀻𑀦𑀁 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑀩𑁆𑀩𑀸𑀧𑀺 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑁄 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀸𑀯 𑀤𑀼𑀳𑁂𑀢𑀼𑀓𑀸𑀦𑀫𑁆𑀧𑀺 𑀫𑀕𑁆𑀕𑀸𑀦𑀼𑀧𑁆𑀧𑀢𑁆𑀢𑀺𑀢𑁄.

𑀅𑀬𑀦𑁆𑀢𑀺 𑀅𑀭𑀺𑀝𑁆𑀞𑁄. 𑀭𑀲𑁂𑀦 𑀭𑀲𑀦𑁆𑀢𑀺 𑀅𑀦𑀯𑀚𑁆𑀚𑁂𑀦 𑀧𑀘𑁆𑀘𑀬𑀧𑀭𑀺𑀪𑀼𑀜𑁆𑀚𑀦𑀭𑀲𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀧𑀅𑀪𑁄𑀕𑀭𑀲𑀁 𑀲𑀫𑀸𑀦𑁂𑀢𑁆𑀯𑀸. 𑀉𑀧𑀦𑁂𑀦𑁆𑀢𑁄 𑀯𑀺𑀬𑀸𑀢𑀺 𑀖𑀝𑁂𑀦𑁆𑀢𑁄 𑀯𑀺𑀬, 𑀲𑁄 𑀏𑀯 𑀯𑀸 𑀧𑀸𑀞𑁄.

𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸𑀢𑀺 𑀏𑀢𑁆𑀣 𑀅𑀝𑁆𑀞𑀺 𑀏𑀯 𑀦𑀺𑀫𑁆𑀫𑀁𑀲𑀢𑀸𑀬 𑀓𑀗𑁆𑀓𑀮𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀯𑀲𑁆𑀲𑀁 𑀧𑀢𑀦𑀝𑁆𑀞𑁂𑀦. 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦𑀸𑀢𑀺 𑀅𑀢𑀺 𑀯𑀺𑀬 𑀓𑀼𑀝𑁆𑀝𑀦𑀝𑁆𑀞𑁂𑀦. 𑀧𑀸𑀴𑀺𑀬𑀁 ‘‘𑀢𑀣𑀸𑀳𑀁 𑀪𑀕𑀯𑀢𑀸…𑀧𑁂… 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 𑀇𑀤𑀁 𑀯𑀢𑁆𑀣𑀼𑀅𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀏𑀯𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦𑀧𑀺 𑀆𑀓𑀸𑀭𑁂𑀦 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀯𑀺𑀧𑀭𑀻𑀢𑀢𑁄 𑀕𑀳𑁂𑀢𑁆𑀯𑀸 𑀧𑀭𑁂𑀳𑀺 𑀯𑀼𑀢𑁆𑀢𑁂𑀧𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑁄𑀳𑀭𑀦𑁆𑀢𑀲𑁆𑀲𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀢𑀤𑀦𑀼𑀕𑀼𑀡𑀁 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀯𑀸𑀘𑀁 𑀬𑁄𑀚𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀆𑀭𑁄𑀧𑁂𑀢𑀼𑀁, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀢𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀪𑀺𑀭𑀼𑀘𑀺𑀢𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 ¶ 𑀓𑀸𑀢𑀼𑀜𑁆𑀘 𑀮𑀩𑁆𑀪𑀢𑀺. 𑀲𑀫𑀦𑀼𑀪𑀸𑀲𑀦𑀁 𑀅𑀓𑀢𑁆𑀯𑀸𑀧𑀺 ‘‘𑀫𑀸𑀬𑀲𑁆𑀫𑀸 𑀏𑀯𑀁 𑀅𑀯𑀘𑀸’’𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑀫𑀢𑁆𑀢𑁂 𑀮𑀤𑁆𑀥𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸𑀬 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸𑀧𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀓𑀫𑁆𑀫𑀢𑀸, 𑀲𑀫𑀦𑀼𑀪𑀸𑀲𑀦𑀸𑀬 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪. 𑀦𑀯𑀫𑁂 ¶ ‘‘𑀉𑀓𑁆𑀔𑀺𑀢𑁆𑀢𑁄 𑀅𑀦𑁄𑀲𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀭𑀺𑀝𑁆𑀞𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨𑁫. 𑀧𑀸𑀴𑀺𑀬𑀁 ‘‘𑀏𑀓𑀘𑁆𑀙𑀦𑁆𑀦𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀦𑀸𑀦𑀽𑀧𑀘𑀸𑀭𑁂𑀧𑀺 𑀏𑀓𑀘𑁆𑀙𑀦𑁆𑀦𑁂 𑀦𑀺𑀧𑀚𑁆𑀚𑀦𑁂 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀭𑀳𑀢𑁄𑀧𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀅𑀓𑀢𑀸𑀦𑀼𑀥𑀫𑁆𑀫𑀢𑀸, 𑀜𑀢𑁆𑀯𑀸 𑀲𑀫𑁆𑀪𑁄𑀕𑀸𑀤𑀺𑀓𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁮. 𑀤𑀲𑀫𑁂 𑀧𑀺𑀭𑁂𑀢𑀺 𑀲𑀫𑁆𑀩𑁄𑀥𑀦𑀢𑁆𑀣𑁂 𑀦𑀺𑀧𑀸𑀢𑀧𑀤𑀁. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁪. 𑀅𑀝𑁆𑀞𑀫𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀜𑁆𑀜𑀢𑁆𑀢𑁂𑀦 𑀯𑀘𑀦𑀁, 𑀅𑀲𑀺𑀓𑁆𑀔𑀺𑀢𑀼𑀓𑀸𑀫𑀲𑁆𑀲 𑀮𑁂𑀲𑁂𑀦 𑀏𑀯𑀁 𑀯𑀘𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁮. 𑀤𑀼𑀢𑀺𑀬𑁂 𑀅𑀮𑀚𑁆𑀚𑀺𑀢𑀸𑀢𑀺 𑀅𑀮𑀚𑁆𑀚𑀺𑀢𑀸𑀬. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺𑀆𑀤𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀜𑁆𑀜𑁂𑀯 𑀯𑀼𑀢𑁆𑀢𑀁 𑀅𑀮𑀚𑁆𑀚𑀺𑀮𑀓𑁆𑀔𑀡𑀁, 𑀲𑀸𑀫𑀡𑁂𑀭𑀸𑀤𑀻𑀦𑀁, 𑀧𑀦 𑀕𑀳𑀝𑁆𑀞𑀸𑀦𑀜𑁆𑀘 𑀲𑀸𑀥𑀸𑀭𑀡𑀯𑀲𑁂𑀦 𑀬𑀣𑀸𑀲𑀓𑀁 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀦𑀧𑀝𑀺𑀕𑀽𑀳𑀦𑀸𑀤𑀺𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀮𑀚𑁆𑀚𑀺𑀮𑀓𑁆𑀔𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀜𑁆𑀘𑀸𑀧𑀺 ¶ 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂𑀧𑀺 𑀫𑀤𑁆𑀤𑀺𑀢𑁆𑀯𑀸 𑀓𑀭𑁄𑀦𑁆𑀢𑁄, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀓𑀭𑁄𑀦𑁆𑀢𑁄𑀧𑀺 𑀢𑀗𑁆𑀔𑀡𑀺𑀓𑀸𑀬 𑀅𑀮𑀚𑁆𑀚𑀺𑀢𑀸𑀬 𑀏𑀯𑀁 𑀓𑀭𑁄𑀦𑁆𑀢𑀺. 𑀢𑀣𑀸𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀪𑁂𑀤𑁂 𑀯𑀺𑀲𑀼𑀁 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀤𑀲𑀯𑀢𑁆𑀣𑀼𑀤𑀻𑀧𑀓𑀸. 𑀧𑀭𑀽𑀧𑀳𑀸𑀭𑀅𑀜𑁆𑀜𑀸𑀡𑀓𑀗𑁆𑀔𑀸𑀧𑀭𑀯𑀺𑀢𑀸𑀭𑀡𑀸𑀤𑀺𑀯𑀸𑀤𑀸𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑀸𑀦𑀁 𑀓𑀼𑀳𑀓𑀸𑀦𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀅𑀲𑀼𑀘𑀺𑀁 𑀉𑀧𑀲𑀁𑀳𑀭𑀦𑁆𑀢𑀻’’𑀢𑀺𑀕𑀸𑀳𑀺𑀦𑁄 𑀧𑀭𑀽𑀧𑀳𑀸𑀭𑀯𑀸𑀤𑀸 𑀦𑀸𑀫. 𑀅𑀭𑀳𑀢𑁄 𑀲𑀩𑁆𑀩𑁂𑀲𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀦𑀁 𑀦𑀸𑀫𑀸𑀤𑀺𑀅𑀚𑀸𑀦𑀦𑁂 𑀅𑀜𑁆𑀜𑀸𑀡𑀁, 𑀢𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀪𑀸𑀯𑁂𑀦 𑀓𑀗𑁆𑀔𑀸, 𑀧𑀭𑀢𑁄 𑀲𑀼𑀢𑁆𑀯𑀸 𑀦𑀸𑀫𑀸𑀤𑀺𑀚𑀸𑀦𑀦𑁂𑀦 𑀧𑀭𑀯𑀺𑀢𑀸𑀭𑀡𑁄 𑀅𑀢𑁆𑀣𑀻𑀢𑀺𑀯𑀸𑀤𑀺𑀦𑁄 𑀅𑀜𑁆𑀜𑀸𑀡𑀯𑀸𑀤𑀸, 𑀓𑀗𑁆𑀔𑀸𑀯𑀸𑀤𑀸, 𑀧𑀭𑀯𑀺𑀢𑀸𑀭𑀡𑀯𑀸𑀤𑀸 𑀘 𑀢𑁂𑀲𑀁, 𑀫𑀳𑀸𑀲𑀗𑁆𑀖𑀺𑀓𑀸𑀤𑀻𑀦𑀜𑁆𑀘 𑀯𑀺𑀪𑀸𑀕𑁄 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂 𑀯𑀼𑀢𑁆𑀢𑁄.

𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘 𑀨𑀮𑀸𑀦𑀺 𑀘𑀸𑀢𑀺 𑀏𑀢𑁆𑀣 𑀘-𑀓𑀸𑀭𑁂𑀦 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀻𑀢𑀺 𑀧𑀭𑀺𑀬𑀢𑁆𑀢𑀺𑀥𑀭𑀸 𑀥𑀫𑁆𑀫𑀓𑀣𑀺𑀓𑀸. 𑀧𑀼𑀦 𑀓𑁂𑀘𑀻𑀢𑀺 𑀧𑀝𑀺𑀧𑀢𑁆𑀢𑀺𑀥𑀭𑀸 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑀸. 𑀇𑀢𑀭𑁂 𑀧𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀸 𑀧𑀦 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁂𑀳𑀺 𑀆𑀪𑀢𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑁋

‘‘𑀬𑀸𑀯 ¶ 𑀢𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀸, 𑀯𑀺𑀦𑀬𑁄 𑀬𑀸𑀯 𑀤𑀺𑀧𑁆𑀧𑀢𑀺;

𑀢𑀸𑀯 𑀤𑀓𑁆𑀔𑀦𑁆𑀢𑀺 𑀆𑀮𑁄𑀓𑀁, 𑀲𑀽𑀭𑀺𑀬𑁂 𑀅𑀩𑁆𑀪𑀼𑀝𑁆𑀞𑀺𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀲𑀦𑁆𑀢𑁂𑀲𑀼, 𑀧𑀫𑀼𑀝𑁆𑀞𑁂 𑀯𑀺𑀦𑀬𑀫𑁆𑀳𑀺 𑀘;

𑀢𑀫𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂, 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂 𑀭𑀓𑁆𑀔𑀺𑀢𑁂 𑀲𑀦𑁆𑀢𑁂, 𑀧𑀝𑀺𑀧𑀢𑁆𑀢𑀺 𑀳𑁄𑀢𑀺 𑀭𑀓𑁆𑀔𑀺𑀢𑀸;

𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀥𑀻𑀭𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺. (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦) 𑁋

𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄𑀯 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀸 𑀧𑀸𑀭𑀸𑀚𑀺𑀓𑀸𑀦𑀸𑀧𑀚𑁆𑀚𑀦𑀯𑀲𑁂𑀦 𑀞𑀺𑀢𑀸 𑀧𑀝𑀺𑀧𑀢𑁆𑀢𑀺𑀲𑀗𑁆𑀕𑀳𑀺𑀢𑀸 𑀧𑀭𑀺𑀬𑀢𑁆𑀢𑀺𑀬𑁂𑀯 𑀫𑀽𑀮𑀦𑁆𑀢𑀺 𑀆𑀳𑀁𑀲𑀽𑀢𑀺. 𑀢𑁂𑀦𑀸𑀳 ‘‘𑀲𑀘𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀭𑀓𑁆𑀔𑀡𑀓𑀸…𑀧𑁂… 𑀲𑀸𑀲𑀦𑀁 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀕𑀫𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀏𑀢𑁂𑀦 𑀘 𑀧𑀭𑀺𑀓𑁆𑀔𑀻𑀡𑁂 𑀓𑀸𑀮𑁂 𑀮𑀚𑁆𑀚𑀺𑀕𑀡𑀁 𑀅𑀮𑀪𑀦𑁆𑀢𑁂𑀦 𑀯𑀺𑀦𑀬𑀥𑀭𑁂𑀦 𑀅𑀮𑀚𑁆𑀚𑀺𑀦𑁄𑀧𑀺 𑀧𑀓𑀢𑀢𑁆𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀢𑁂𑀳𑀺 𑀲𑀳 𑀥𑀫𑁆𑀫𑀸𑀫𑀺𑀲𑀲𑀫𑁆𑀪𑁄𑀕𑀁 𑀲𑀁𑀯𑀸𑀲𑀁 𑀓𑀭𑁄𑀦𑁆𑀢𑁂𑀦 𑀩𑀳𑀽 𑀓𑀼𑀮𑀧𑀼𑀢𑁆𑀢𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀸𑀲𑀦𑀁 ¶ 𑀧𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀲𑀺𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀕𑀭𑀳𑀺𑀢𑀼𑀓𑀸𑀫𑀢𑀸, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀯𑀺𑀯𑀡𑁆𑀡𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪𑁪. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀓𑁄 𑀧𑀦 𑀯𑀸𑀤𑁄 𑀪𑀺𑀬𑁆𑀬𑁄𑀢𑀺 𑀢𑁂𑀳𑀺 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑀺𑀝𑁆𑀞𑀤𑁆𑀯𑀢𑁆𑀢𑀺𑀯𑀸𑀭𑀢𑁄 𑀪𑀺𑀬𑁆𑀬𑁄 𑀧𑀦 𑀯𑀺𑀢𑁆𑀣𑀸𑀭𑁂𑀦 𑀉𑀤𑁆𑀤𑀺𑀲𑀺𑀬𑀫𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑁂 𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀢𑀸 𑀅𑀢𑁆𑀣𑀺 𑀘𑁂, 𑀢𑀢𑁆𑀣 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄𑀢𑀺 𑀢𑀦𑁆𑀢𑀺 𑀓𑀸𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀞𑀺𑀢𑁄, 𑀢𑀣𑀸 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁄𑀳𑀸𑀭𑁄𑀧𑀦𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀼𑀢𑀪𑀸𑀯𑁄, 𑀫𑁄𑀳𑁂𑀢𑀼𑀓𑀸𑀫𑀲𑁆𑀲 𑀫𑁄𑀳𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁧. 𑀘𑀢𑀼𑀢𑁆𑀣𑁂 ¶ 𑀧𑀸𑀴𑀺𑀬𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸𑀢𑀺 𑀏𑀢𑁆𑀣 𑀧𑀸𑀲𑀸𑀡𑀸𑀤𑀺𑀦𑀺𑀲𑁆𑀲𑀕𑁆𑀕𑀺𑀬𑀧𑀳𑀸𑀭𑁄𑀧𑀺 𑀲𑀗𑁆𑀕𑀳𑀺𑀢𑁄.

𑁪𑁫𑁨. 𑀭𑀢𑁆𑀢𑀘𑀺𑀢𑁆𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀼𑀢𑁆𑀢𑀁. 𑀫𑁂𑀣𑀼𑀦𑀭𑀸𑀕𑁂𑀦 𑀧𑀦 𑀧𑀳𑀸𑀭𑀢𑁄 𑀧𑀼𑀭𑀺𑀲𑀸𑀤𑀻𑀲𑀼 𑀤𑀼𑀓𑁆𑀓𑀝𑀫𑁂𑀯. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 𑀤𑀡𑁆𑀟𑀓𑁄𑀝𑀺𑀬𑀸 𑀲𑀧𑁆𑀧𑀸𑀤𑀺𑀁 𑀖𑀝𑁆𑀝𑁂𑀢𑁆𑀯𑀸 𑀫𑀡𑁆𑀟𑀽𑀓𑀸𑀤𑀺𑀁 𑀫𑁄𑀘𑁂𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯. 𑀓𑀼𑀧𑀺𑀢𑀢𑀸, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀦 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 𑀧𑀳𑀸𑀭𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁭. 𑀧𑀜𑁆𑀘𑀫𑁂 ¶ 𑀦 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀓𑀺𑀫𑀺𑀤𑀁 𑀤𑀼𑀓𑁆𑀓𑀝𑀁, 𑀧𑀳𑀸𑀭𑀧𑀘𑁆𑀘𑀬𑀸, 𑀉𑀤𑀸𑀳𑀼 𑀉𑀕𑁆𑀕𑀺𑀭𑀡𑀧𑀘𑁆𑀘𑀬𑀸𑀢𑀺? 𑀉𑀕𑁆𑀕𑀺𑀭𑀡𑀧𑀘𑁆𑀘𑀬𑀸𑀯, 𑀦 𑀧𑀳𑀸𑀭𑀧𑀘𑁆𑀘𑀬𑀸. 𑀦 𑀳𑀺 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀅𑀲𑀢𑀺 𑀢𑀧𑁆𑀧𑀘𑁆𑀘𑀬𑀸 𑀓𑀸𑀘𑀺 𑀆𑀧𑀢𑁆𑀢𑀺 𑀬𑀼𑀢𑁆𑀢𑀸, 𑀉𑀕𑁆𑀕𑀺𑀭𑀡𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀲𑀡𑁆𑀞𑀺𑀢𑀢𑁆𑀢𑀸 𑀢𑀧𑁆𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀚𑀸𑀢𑀁, 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀓𑀢𑀧𑀬𑁄𑀕𑀢𑁆𑀢𑀸 𑀘 𑀏𑀢𑁆𑀣 𑀅𑀦𑀸𑀧𑀢𑁆𑀢𑀺 𑀦 𑀬𑀼𑀢𑁆𑀢𑀸𑀢𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁫𑁮. 𑀧𑀼𑀩𑁆𑀩𑁂𑀢𑀺 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯.

𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁯. 𑀙𑀝𑁆𑀞𑁂 ‘‘𑀅𑀢𑁆𑀢𑀧𑀭𑀺𑀢𑁆𑀢𑀸𑀡𑀁 𑀓𑀭𑁄𑀦𑁆𑀢𑀸’’𑀢𑀺 𑀇𑀤𑀁 𑀦 𑀘 𑀯𑁂𑀭𑀫𑀽𑀮𑀺𑀓𑀸 𑀅𑀦𑀼𑀤𑁆𑀥𑀁𑀲𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀦𑀼𑀤𑁆𑀥𑀁𑀲𑀦𑀓𑁆𑀔𑀡𑁂 𑀧𑀦 𑀓𑁄𑀧𑀘𑀺𑀢𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑁂𑀯 ‘‘𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁬𑁪. 𑀲𑀢𑁆𑀢𑀫𑁂 ¶ 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀨𑀸𑀲𑀼𑀓𑀸𑀫𑀢𑀸, 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁧. 𑀅𑀝𑁆𑀞𑀫𑁂 𑀲𑀼𑀬𑁆𑀬𑀢𑀻𑀢𑀺 𑀲𑀼𑀢𑀺, 𑀯𑀘𑀦𑀁. 𑀢𑀲𑁆𑀲𑀸 𑀲𑀫𑀻𑀧𑀁 𑀉𑀧𑀲𑁆𑀲𑀼𑀢𑀺. 𑀲𑀼𑀬𑁆𑀬𑀢𑀺 𑀏𑀢𑁆𑀣𑀸𑀢𑀺 𑀲𑀼𑀢𑀻𑀢𑀺 𑀏𑀯𑀜𑁆𑀳𑀺 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀲𑀯𑀦𑀝𑁆𑀞𑀸𑀦𑀲𑀫𑀻𑀧𑁂 𑀅𑀜𑁆𑀜𑀲𑁆𑀫𑀺𑀁 𑀅𑀲𑁆𑀲𑀯𑀦𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀉𑀧𑀲𑁆𑀲𑀼𑀢𑀺-𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁆𑀣 𑀞𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀲𑀼𑀢𑀺-𑀲𑀤𑁆𑀤𑀫𑀢𑁆𑀢𑀲𑁆𑀲.

𑁪𑁭𑁩. 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀻𑀢𑀺 ¶ 𑀓𑀤𑀸𑀘𑀺 𑀅𑀓𑀺𑀭𑀺𑀬𑀢𑁄, 𑀓𑀤𑀸𑀘𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀦𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. 𑀉𑀧𑀲𑀫𑁆𑀧𑀦𑁆𑀦𑁂𑀦 𑀘𑁄𑀤𑀦𑀸𑀥𑀺𑀧𑁆𑀧𑀸𑀬𑁄, 𑀲𑀯𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀔𑀺𑀬𑁆𑀬𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁪. 𑀦𑀯𑀫𑁂 𑀥𑀫𑁆𑀫𑀓𑀫𑁆𑀫𑀢𑀸, 𑀚𑀸𑀦𑀦𑀁, 𑀙𑀦𑁆𑀤𑀁 𑀤𑀢𑁆𑀯𑀸 𑀔𑀺𑀬𑁆𑀬𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀔𑀺𑀬𑁆𑀬𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁮𑁧. 𑀤𑀲𑀫𑁂 𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀥𑀫𑁆𑀫𑀺𑀓𑀢𑀸, 𑀢𑀁 𑀜𑀢𑁆𑀯𑀸 𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀏𑀓𑀲𑀻𑀫𑀝𑁆𑀞𑀲𑁆𑀲 𑀲𑀫𑀸𑀦𑀲𑀁𑀯𑀸𑀲𑀺𑀓𑀲𑁆𑀲 𑀳𑀢𑁆𑀣𑀧𑀸𑀲𑀯𑀺𑀚𑀳𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁮𑁪. 𑀏𑀓𑀸𑀤𑀲𑀫𑁂 ¶ 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑁂𑀦 𑀮𑀤𑁆𑀥𑀲𑀫𑁆𑀫𑀼𑀢𑀺𑀢𑀸, 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀤𑀢𑁆𑀯𑀸 𑀔𑀺𑀬𑁆𑀬𑀺𑀢𑀼𑀓𑀸𑀫𑀢𑀸𑀬 𑀔𑀺𑀬𑁆𑀬𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁮𑁯. 𑀤𑁆𑀯𑀸𑀤𑀲𑀫𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀺𑀝𑁆𑀞𑀺𑀢𑁄 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀭𑀸𑀚𑀯𑀕𑁆𑀕𑁄

𑁧. 𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁯. 𑀦𑀯𑀫𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀧𑀸𑀴𑀺𑀬𑀁 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀏𑀢𑁆𑀣 𑀕𑀳𑀡𑀻𑀢𑀺 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼 𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄, 𑀧𑀼𑀭𑀺𑀲𑀦𑁆𑀢𑀭𑀲𑀼𑀓𑁆𑀓𑀸𑀲𑀫𑁆𑀨𑀼𑀝𑁆𑀞𑀢𑀸𑀬 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄. 𑀅𑀪𑀺𑀲𑀺𑀢𑁆𑀢𑀔𑀢𑁆𑀢𑀺𑀬𑀢𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀲𑀬𑀦𑀺𑀖𑀭𑀢𑁄 𑀅𑀦𑀺𑀓𑁆𑀔𑀦𑁆𑀢𑀢𑀸, 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀲𑁆𑀲 𑀇𑀦𑁆𑀤𑀔𑀻𑀮𑀸𑀢𑀺𑀓𑁆𑀓𑀫𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁬. 𑀤𑀼𑀢𑀺𑀬𑁂 𑀆𑀯𑀲𑀣𑀲𑁆𑀲𑀸𑀢𑀺 𑀏𑀢𑁆𑀣 𑀅𑀦𑁆𑀢𑁄𑀆𑀭𑀸𑀫𑁂 𑀯𑀸 𑀳𑁄𑀢𑀼 𑀅𑀜𑁆𑀜𑀢𑁆𑀣 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀯𑀲𑀣𑁄 𑀦𑀸𑀫. 𑀙𑀦𑁆𑀤𑁂𑀦𑀧𑀺 𑀪𑀬𑁂𑀦𑀧𑀻𑀢𑀺 𑀯𑀟𑁆𑀠𑀓𑀺𑀆𑀤𑀻𑀲𑀼 𑀙𑀦𑁆𑀤𑁂𑀦, 𑀭𑀸𑀚𑀯𑀮𑁆𑀮𑀪𑁂𑀲𑀼 𑀪𑀬𑁂𑀦. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑁂𑀧𑀺 𑀚𑀸𑀢𑁂…𑀧𑁂… 𑀆𑀲𑀗𑁆𑀓𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀦𑀺𑀫𑁆𑀫𑀦𑀼𑀲𑁆𑀲𑀝𑁆𑀞𑀸𑀦𑁂 𑀧𑀘𑁆𑀙𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑁂 𑀚𑀸𑀢𑁂𑀧𑀺 𑀯𑀺𑀲𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀅𑀜𑁆𑀜𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀢𑀫𑁂𑀯 𑀪𑀺𑀓𑁆𑀔𑀼𑀁 𑀆𑀲𑀗𑁆𑀓𑀦𑁆𑀢𑀺. 𑀧𑀢𑀺𑀭𑀽𑀧𑀁 𑀦𑀸𑀫 𑀓𑀧𑁆𑀧𑀺𑀬𑀪𑀡𑁆𑀟𑁂 𑀲𑀬𑀁 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑁆𑀯𑀸 𑀅𑀓𑀧𑁆𑀧𑀺𑀬𑀪𑀡𑁆𑀟𑁂 𑀧𑀢𑀺𑀭𑀽𑀧𑀸𑀦𑀁 𑀉𑀧𑀸𑀲𑀓𑀸𑀤𑀻𑀦𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀘𑁂𑀢𑀺𑀬𑀸𑀤𑀺𑀧𑀼𑀜𑁆𑀜𑁂 𑀦𑀺𑀬𑁄𑀚𑀦𑀁 𑀯𑀸 𑀤𑀸𑀧𑁂𑀢𑁆𑀯𑀸 𑀦𑀺𑀭𑀧𑁂𑀓𑁆𑀔𑀕𑀫𑀦𑀁 𑀯𑀸. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀬𑀸𑀘𑀺𑀢𑁆𑀯𑀸. 𑀧𑀭𑀲𑀦𑁆𑀢𑀓𑀢𑀸, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀦𑀁 𑀅𑀪𑀸𑀯𑁄, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀉𑀕𑁆𑀕𑀳𑀡𑀸𑀤𑀺 𑀘𑀸𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁮. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀪𑀬𑀓𑀣𑀦𑁆𑀢𑀺 𑀭𑀸𑀚𑀘𑁄𑀭𑀸𑀤𑀺𑀪𑀬𑀁 𑀯𑀸 𑀭𑁄𑀕𑀸𑀫𑀦𑀼𑀲𑁆𑀲𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀸𑀤𑀺𑀪𑀬𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀁. 𑀯𑀺𑀲𑀺𑀔𑀸𑀓𑀣𑀦𑁆𑀢𑀺 𑀲𑀼𑀦𑀺𑀯𑀺𑀝𑁆𑀞𑀸𑀤𑀺𑀯𑀻𑀣𑀺𑀓𑀣𑀁. 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀦𑁆𑀢𑀺 𑀉𑀤𑀓𑀢𑀺𑀢𑁆𑀣𑀓𑀣𑀁, 𑀓𑀼𑀫𑁆𑀪𑀤𑀸𑀲𑀻𑀓𑀣𑀁 𑀯𑀸. 𑀧𑀼𑀩𑁆𑀩𑀧𑁂𑀢𑀓𑀣𑀦𑁆𑀢𑀺 𑀅𑀢𑀻𑀢𑀜𑀸𑀢𑀺𑀓𑀣𑀁. 𑀦𑀸𑀦𑀢𑁆𑀢𑀓𑀣𑀦𑁆𑀢𑀺 𑀯𑀼𑀢𑁆𑀢𑀸𑀳𑀺, 𑀯𑀓𑁆𑀔𑀫𑀸𑀦𑀸𑀳𑀺 𑀘 𑀯𑀺𑀫𑀼𑀢𑁆𑀢𑀁 𑀦𑀸𑀦𑀸𑀲𑀪𑀸𑀯𑀁 ¶ 𑀦𑀺𑀭𑀢𑁆𑀣𑀓𑀓𑀣𑀁. 𑀮𑁄𑀓𑀓𑁆𑀔𑀸𑀬𑀺𑀓𑀦𑁆𑀢𑀺 ‘‘𑀅𑀬𑀁 𑀮𑁄𑀓𑁄 𑀓𑁂𑀦 𑀦𑀺𑀫𑁆𑀫𑀺𑀢𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀲𑀪𑀸𑀯𑀓𑁆𑀔𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀓𑀣𑀸. 𑀏𑀯𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀪𑀯𑁄 𑀇𑀢𑀺 𑀅𑀪𑀯𑁄𑀢𑀺 𑀬𑀁 𑀯𑀸 𑀢𑀁 𑀯𑀸 𑀦𑀺𑀭𑀢𑁆𑀣𑀓𑀓𑀸𑀭𑀡𑀁 𑀯𑀢𑁆𑀯𑀸 𑀧𑀯𑀢𑁆𑀢𑀺𑀢𑀓𑀣𑀸 𑀇𑀢𑀺𑀪𑀯𑀸𑀪𑀯𑀓𑀣𑀸. 𑀏𑀢𑁆𑀣 𑀘 𑀪𑀯𑁄 𑀲𑀲𑁆𑀲𑀢𑀁, 𑀯𑀼𑀟𑁆𑀠𑀺, 𑀓𑀸𑀫𑀲𑀼𑀔𑀜𑁆𑀘𑀸𑀢𑀺 𑀢𑀺𑀯𑀺𑀥𑁄, 𑀅𑀪𑀯𑁄 𑀢𑀩𑁆𑀩𑀺𑀧𑀭𑀻𑀢𑀯𑀲𑁂𑀦. 𑀇𑀢𑀺 𑀇𑀫𑀸𑀬 𑀙𑀩𑁆𑀩𑀺𑀥𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀸𑀧𑀺 𑀅𑀭𑀜𑁆𑀜𑀧𑀩𑁆𑀩𑀢𑀦𑀤𑀻𑀤𑀻𑀧𑀓𑀣𑀸 𑀇𑀢𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀢𑀺 𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁂. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁂. 𑀢𑀲𑁆𑀫𑀸 𑀏𑀯𑀁 𑀧𑀓𑀸𑀭𑀁 𑀇𑀢𑁄 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁫𑁧𑁨. 𑀉𑀲𑁆𑀲𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸𑀢𑀺 𑀏𑀢𑁆𑀣 𑀕𑀸𑀫𑀽𑀧𑀘𑀸𑀭𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀦𑀫𑀼𑀧𑀘𑀸𑀭𑀁 𑀧𑀯𑀺𑀝𑁆𑀞𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀕𑀸𑀫𑀽𑀧𑀘𑀸𑀭𑀩𑁆𑀪𑀦𑁆𑀢𑀭𑁂 𑀧𑀦 𑀧𑀝𑀺𑀧𑀲𑁆𑀲𑀤𑁆𑀥𑀼𑀲𑁆𑀲𑀸𑀳𑀸𑀦𑀫𑁆𑀧𑀺 𑀧𑀼𑀦 𑀢𑀫𑁂𑀯 𑀯𑀸 𑀅𑀜𑁆𑀜𑀁 𑀯𑀸 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. ‘‘𑀓𑀼𑀮𑀖𑀭𑁂 𑀯𑀸…𑀧𑁂… 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀯𑀺𑀝𑁆𑀞𑀸𑀦𑀁 𑀯𑀺𑀓𑀸𑀮𑁂 𑀲𑀜𑁆𑀚𑀸𑀢𑁂 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀲𑁆𑀲 𑀆𑀧𑀼𑀘𑁆𑀙𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁫𑁧𑁫. 𑀅𑀦𑁆𑀢𑀭𑀸𑀭𑀸𑀫𑀦𑁆𑀢𑀺𑀆𑀤𑀻𑀲𑀽𑀢𑀺 𑀏𑀢𑁆𑀣 𑀉𑀲𑁆𑀲𑀯𑀤𑀺𑀯𑀲𑀸𑀤𑀻𑀲𑀼 𑀫𑀦𑀼𑀲𑁆𑀲𑁂𑀳𑀺 𑀕𑀸𑀫𑁂 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀦𑁆𑀢𑀁 𑀚𑀺𑀦𑀩𑀺𑀫𑁆𑀩𑀸𑀤𑀺𑀁 𑀧𑀽𑀚𑁂𑀢𑀼𑀓𑀸𑀫𑁂𑀳𑀺 𑀯𑀸 𑀭𑁄𑀕𑀯𑀽𑀧𑀲𑀫𑀸𑀤𑀺𑀬𑀢𑁆𑀣𑀁 𑀫𑀦𑀼𑀲𑁆𑀲𑁂𑀳𑀺 𑀬𑀸𑀘𑀺𑀢𑁂𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀤𑀺𑀯𑀺𑀥𑀺𑀁 𑀅𑀓𑀢𑁆𑀯𑀸𑀧𑀺 𑀯𑀻𑀣𑀺𑀫𑀚𑁆𑀛𑁂𑀦𑁂𑀯 𑀕𑀸𑀫𑀁 𑀧𑀤𑀓𑁆𑀔𑀺𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 ¶ 𑀕𑀳𑁂𑀢𑀩𑁆𑀩𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀯𑀼𑀢𑁆𑀢𑀢𑁆𑀢𑀸, ‘‘𑀫𑀕𑁆𑀕𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸…𑀧𑁂… 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘. 𑀯𑁂𑀲𑀸𑀮𑀺𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑀸𑀤𑀺𑀁 𑀅𑀓𑁄𑀧𑁂𑀦𑁆𑀢𑁂𑀦𑁂𑀯, 𑀅𑀧𑀜𑁆𑀜𑀢𑁆𑀢𑁂 𑀯𑀸 𑀲𑀺𑀓𑁆𑀔𑀸𑀧𑀤𑁂 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀅𑀦𑁆𑀢𑀭𑀸𑀭𑀸𑀫𑀸𑀤𑀺𑀕𑀸𑀫𑀦𑁆𑀢𑀭𑁂 𑀞𑀺𑀢𑁂𑀳𑀺 𑀕𑀭𑀼𑀝𑁆𑀞𑀸𑀦𑀻𑀬𑀸𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑁆𑀕𑀫𑀦𑀸𑀤𑀺𑀯𑀲𑁂𑀦 𑀕𑀸𑀫𑀯𑀻𑀣𑀺𑀁 𑀑𑀢𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑀁 𑀧𑀢𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀯. 𑀅𑀦𑁆𑀢𑀭𑀸𑀭𑀸𑀫𑀸𑀤𑀺𑀓𑀧𑁆𑀧𑀺𑀬𑀪𑀽𑀫𑀺𑀁 𑀧𑀦 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑀁 𑀧𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀔𑀸𑀬𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀦𑀸 ¶ , 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁦. 𑀘𑀢𑀼𑀢𑁆𑀣𑁂 𑀧𑀸𑀴𑀺𑀬𑀁 𑀯𑀸𑀲𑀺𑀚𑀝𑁂𑀢𑀺 𑀯𑀸𑀲𑀺𑀤𑀡𑁆𑀟𑀓𑁂. 𑀅𑀝𑁆𑀞𑀺𑀫𑀬𑀸𑀤𑀺𑀲𑀽𑀘𑀺𑀖𑀭𑀢𑀸, 𑀓𑀭𑀡𑀓𑀸𑀭𑀸𑀧𑀦𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀧𑀝𑀺𑀮𑀸𑀪𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀜𑁆𑀘𑀧𑀻𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁧. 𑀧𑀜𑁆𑀘𑀫𑁂 𑀧𑀸𑀴𑀺𑀬𑀁 𑀆𑀲𑀬𑀢𑁄, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀳𑀻𑀦𑀚𑁆𑀛𑀸𑀲𑀬𑀯𑀲𑁂𑀦 𑀅𑀬𑀁 𑀢𑀼𑀘𑁆𑀙𑀧𑀼𑀭𑀺𑀲𑁄𑀢𑀺 𑀜𑀸𑀢𑀩𑁆𑀩𑁄, 𑀳𑀻𑀦𑀸𑀬 𑀧𑀘𑁆𑀘𑀬𑁂 𑀮𑁄𑀮𑀢𑀸𑀬 𑀧𑀼𑀕𑁆𑀕𑀮𑀲𑁆𑀲 𑀢𑀼𑀘𑁆𑀙𑀢𑀸 𑀜𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂, 𑀇𑀢𑁄 𑀧𑀭𑁂𑀲𑀼 𑀘 𑀧𑀜𑁆𑀘𑀲𑀼 𑀅𑀢𑁆𑀢𑀦𑀸 𑀓𑀸𑀭𑀸𑀧𑀺𑀢𑀲𑁆𑀲 𑀧𑀝𑀺𑀮𑀸𑀪𑁂 𑀏𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑀺𑀪𑁄𑀕𑁂 𑀧𑀦𑀲𑁆𑀲, 𑀅𑀜𑁆𑀜𑁂𑀲𑀜𑁆𑀘 𑀤𑀼𑀓𑁆𑀓𑀝𑀫𑁂𑀯. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀫𑀜𑁆𑀘𑀧𑀻𑀞𑀢𑀸, 𑀅𑀢𑁆𑀢𑀦𑁄 𑀓𑀭𑀡𑀓𑀸𑀭𑀸𑀧𑀦𑀯𑀲𑁂𑀦 𑀧𑀝𑀺𑀮𑀸𑀪𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀫𑀜𑁆𑀘𑀧𑀻𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁬. 𑀙𑀝𑁆𑀞𑁂 ¶ 𑀧𑁄𑀝𑀓𑀺𑀢𑀽𑀮𑀦𑁆𑀢𑀺 𑀢𑀺𑀡𑀕𑀘𑁆𑀙𑀚𑀸𑀢𑀺𑀓𑀸𑀦𑀁 𑀢𑀽𑀮𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁧-𑁫𑁩𑁬. 𑀲𑀢𑁆𑀢𑀫𑁂 ¶ 𑀦𑀺𑀲𑀻𑀤𑀦𑀲𑁆𑀲 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸, 𑀅𑀢𑁆𑀢𑀦𑁄 𑀓𑀭𑀡𑀸𑀤𑀺𑀦𑀸 𑀧𑀝𑀺𑀮𑀸𑀪𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁩𑁭-𑁫𑁪𑁭. 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑀫𑀦𑀯𑀫𑀤𑀲𑀫𑁂𑀲𑀼𑀧𑀺 𑀅𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀦𑀺𑀝𑁆𑀞𑀺𑀢𑁄 𑀭𑀸𑀚𑀯𑀕𑁆𑀕𑁄 𑀦𑀯𑀫𑁄.

𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁬. 𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁩. 𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼 ¶ ¶ 𑀧𑀞𑀫𑁂 𑀧𑀝𑀺𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀁 𑀦𑀯𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀁. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑁆𑀩𑀳𑀼𑀮𑀸𑀦𑀁 𑀆𑀧𑀢𑁆𑀢𑀻𑀦𑀫𑁆𑀧𑀺 𑀯𑀼𑀟𑁆𑀠𑀲𑁆𑀲 𑀲𑀦𑁆𑀢𑀺𑀓𑁂 𑀘 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋 ‘‘𑀕𑀸𑀭𑀬𑁆𑀳𑁂, 𑀆𑀯𑀼𑀲𑁄, 𑀥𑀫𑁆𑀫𑁂 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑁂 𑀧𑀸𑀝𑀺𑀤𑁂𑀲𑀦𑀻𑀬𑁂’’𑀢𑀺 𑀏𑀯𑀁 𑀲𑀫𑁆𑀩𑀳𑀼𑀮𑀸𑀲𑀼. 𑀯𑀼𑀟𑁆𑀠𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 ‘‘𑀕𑀸𑀭𑀬𑁆𑀳𑀁, 𑀪𑀦𑁆𑀢𑁂, 𑀥𑀫𑁆𑀫𑀁…𑀧𑁂… 𑀕𑀸𑀭𑀬𑁆𑀳𑁂, 𑀪𑀦𑁆𑀢𑁂, 𑀥𑀫𑁆𑀫𑁂’’𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀲𑀧𑁆𑀧𑀸𑀬𑀦𑁆𑀢𑀺 𑀲𑀕𑁆𑀕𑀫𑁄𑀓𑁆𑀔𑀦𑁆𑀢𑀭𑀸𑀬𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑁂 𑀞𑀺𑀢𑀸𑀬 𑀳𑀢𑁆𑀣𑀢𑁄 𑀲𑀳𑀢𑁆𑀣𑀸 𑀬𑀸𑀯𑀓𑀸𑀮𑀺𑀓𑀕𑁆𑀕𑀳𑀡𑀁, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁫𑁮. 𑀤𑀼𑀢𑀺𑀬𑁂 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀸𑀬 𑀅𑀦𑀦𑀼𑀜𑁆𑀜𑀸𑀢𑀸𑀓𑀸𑀭𑁂𑀦 𑀯𑁄𑀲𑀸𑀲𑀦𑀸, 𑀅𑀦𑀺𑀯𑀸𑀭𑁂𑀢𑁆𑀯𑀸 𑀪𑁄𑀚𑀦𑀚𑁆𑀛𑁄𑀳𑀸𑀭𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁫𑁬𑁩. 𑀢𑀢𑀺𑀬𑁂 𑀲𑁂𑀓𑁆𑀔𑀲𑀫𑁆𑀫𑀢𑀢𑀸, 𑀖𑀭𑀽𑀧𑀘𑀸𑀭𑁂 𑀅𑀦𑀺𑀫𑀦𑁆𑀢𑀺𑀢𑀢𑀸, 𑀕𑀺𑀮𑀸𑀦𑀲𑁆𑀲 𑀅𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑁫𑁭𑁦. 𑀘𑀢𑀼𑀢𑁆𑀣𑁂 𑀲𑀸𑀲𑀗𑁆𑀓𑀸𑀭𑀜𑁆𑀜𑀲𑁂𑀦𑀸𑀲𑀦𑀢𑀸, 𑀅𑀦𑀦𑀼𑀜𑁆𑀜𑀸𑀢𑀁 𑀬𑀸𑀯𑀓𑀸𑀮𑀺𑀓𑀁 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀅𑀚𑁆𑀛𑀸𑀭𑀸𑀫𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀕𑀺𑀮𑀸𑀦𑀲𑁆𑀲 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁭. 𑀲𑁂𑀔𑀺𑀬𑀓𑀡𑁆𑀟𑀁

𑁧. 𑀧𑀭𑀺𑀫𑀡𑁆𑀟𑀮𑀯𑀕𑁆𑀕𑀯𑀡𑁆𑀡𑀦𑀸

𑁫𑁭𑁬. 𑀲𑁂𑀔𑀺𑀬𑁂𑀲𑀼 ¶ ¶ 𑀬𑀲𑁆𑀫𑀸 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁫𑁬 𑀆𑀤𑀬𑁄) 𑀯𑀼𑀢𑁆𑀢𑀯𑀢𑁆𑀢𑀸𑀦𑀺𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀲𑁂𑀔𑀺𑀬𑀸𑀦𑁂𑀯, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬𑁂𑀢𑁆𑀣 𑀧𑀸𑀴𑀺𑀬𑀁 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄. 𑀘𑀸𑀭𑀺𑀢𑁆𑀢𑀦𑀬𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀑𑀮𑀫𑁆𑀩𑁂𑀦𑁆𑀢𑁄 𑀦𑀺𑀯𑀸𑀲𑁂𑀬𑁆𑀬, 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺 𑀲𑀩𑁆𑀩𑀢𑁆𑀣 𑀧𑀸𑀴𑀺 𑀆𑀭𑁄𑀧𑀺𑀢𑀸. 𑀧𑀤𑀪𑀸𑀚𑀦𑁂 𑀧𑀦 ‘‘𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀦𑀸𑀤𑀭𑀺𑀬𑀓𑀭𑀡𑁂 𑀤𑀼𑀓𑁆𑀓𑀝𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀦𑁆𑀢𑀺 𑀫𑀢𑁆𑀢-𑀲𑀤𑁆𑀤𑁂𑀦 𑀢𑀢𑁄 𑀓𑀺𑀜𑁆𑀘𑀺 𑀅𑀥𑀺𑀓𑀁, 𑀊𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯 𑀦𑀺𑀲𑀺𑀦𑁆𑀦𑀲𑁆𑀲 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀁. 𑀦 𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁, 𑀞𑀺𑀢𑀲𑁆𑀲 𑀅𑀝𑁆𑀞𑀗𑁆𑀕𑀼𑀮𑀫𑁂𑀯𑀸𑀢𑀺 𑀲𑀓𑁆𑀓𑀸 𑀦𑀺𑀬𑀫𑁂𑀢𑀼𑀁 𑀊𑀦𑀸𑀥𑀺𑀓𑀢𑁆𑀢𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀬𑀣𑀸 𑀲𑀸𑀭𑀼𑀧𑁆𑀧𑀁 𑀳𑁄𑀢𑀺 𑀏𑀯𑀁 𑀅𑀝𑁆𑀞𑀗𑁆𑀕𑀼𑀮𑀸𑀦𑀼𑀲𑀸𑀭𑁂𑀦 𑀦𑀺𑀯𑀸𑀲𑀦𑀜𑁆𑀜𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀼𑀓𑁆𑀔𑀚𑀗𑁆𑀖𑁄 𑀯𑀸’’𑀢𑀺𑀆𑀤𑀺. 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀤𑀭𑀁 𑀓𑀢𑁆𑀯𑀸 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀧𑀺 𑀦𑀺𑀭𑀦𑁆𑀢𑀭𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀢𑁆𑀢𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀅𑀲𑀺𑀓𑁆𑀔𑀺𑀢𑁄 𑀅𑀦𑀸𑀤𑀭𑀺𑀬𑀫𑁂𑀯. 𑀧𑀭𑀺𑀫𑀡𑁆𑀟𑀮𑀕𑁆𑀕𑀳𑀡𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀯𑀸𑀲𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀯𑀸’’𑀢𑀺.

𑀲𑀘𑀺𑀢𑁆𑀢𑀓𑀦𑁆𑀢𑀺 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑀦𑀬𑁂𑀦 𑀮𑁄𑀓𑀯𑀚𑁆𑀚𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦, 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀘 𑀲𑀘𑀺𑀢𑁆𑀢𑀓’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀲𑁂𑀔𑀺𑀬𑀓𑀡𑁆𑀟 𑁩.𑁫𑁭𑁬) 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀯𑀢𑁆𑀣𑀼𑀯𑀺𑀚𑀸𑀦𑀦𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁. 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑁂𑀦 𑀢𑀲𑁆𑀲𑀸𑀧𑀺 𑀅𑀦𑁆𑀢𑁄𑀕𑀥𑀪𑀸𑀯𑀢𑁄 𑀇𑀤𑀁 𑀯𑀢𑁆𑀣𑀼𑀁 𑀏𑀯𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀺𑀚𑀸𑀦𑀦𑁆𑀢𑁄 𑀳𑀺 𑀧𑀡𑁆𑀡𑀢𑁆𑀢𑀺𑀁 𑀯𑀺𑀚𑀸𑀦𑀸𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁂 𑀘𑁂𑀢𑁆𑀣 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀅𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀸𑀤𑀺𑀯𑀢𑁆𑀣𑀼𑀫𑁂𑀯 ¶ 𑀚𑀸𑀦𑀦𑁆𑀢𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀸𑀦𑀸𑀤𑀭𑀺𑀬𑀸𑀪𑀸𑀯𑀸 𑀲𑀩𑁆𑀩𑀲𑁂𑀔𑀺𑀬𑁂𑀲𑀼 𑀅𑀦𑀸𑀧𑀢𑁆𑀢𑀺 𑀏𑀯 𑀅𑀪𑀺𑀫𑀢𑀸, 𑀢𑀜𑁆𑀘 𑀦 𑀬𑀼𑀢𑁆𑀢𑀁 𑀓𑁄𑀲𑀫𑁆𑀩𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁫𑁧 𑀆𑀤𑀬𑁄) 𑀯𑀘𑁆𑀘𑀓𑀼𑀝𑀺𑀬𑀁 𑀉𑀤𑀓𑀸𑀯𑀲𑁂𑀲𑀁 𑀞𑀧𑁂𑀦𑁆𑀢𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀸𑀪𑀸𑀯𑁂𑀧𑀺 𑀆𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 ¶ …𑀧𑁂… 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺𑀆𑀤𑀺 (𑀫𑀳𑀸𑀯. 𑁪𑁫𑁧). 𑀅𑀝𑁆𑀞𑀓𑀣𑀸𑀬𑀜𑁆𑀘𑀲𑁆𑀲 ‘‘𑀢𑁆𑀯𑀁 𑀏𑀢𑁆𑀣 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀲𑀻𑀢𑀺, 𑀆𑀫 𑀦 𑀚𑀸𑀦𑀸𑀫𑀻𑀢𑀺. 𑀳𑁄𑀢𑀼 𑀆𑀯𑀼𑀲𑁄, 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺, 𑀲𑀘𑁂 𑀳𑁄𑀢𑀺, 𑀤𑁂𑀲𑁂𑀲𑁆𑀲𑀸𑀫𑀻𑀢𑀺. 𑀲𑀘𑁂 𑀧𑀦 𑀢𑁂, 𑀆𑀯𑀼𑀲𑁄, 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀻𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁪𑁫𑁧) 𑀯𑀼𑀢𑁆𑀢𑀁, 𑀢𑀣𑀸 ‘‘𑀅𑀥𑀫𑁆𑀫𑀯𑀸𑀤𑀻𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂𑀲𑀼 𑀅𑀜𑁆𑀜𑀢𑀭𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁪𑁫𑁭-𑁪𑁫𑁮) 𑀘 𑀯𑀼𑀢𑁆𑀢𑀁. 𑀔𑀦𑁆𑀥𑀓𑀯𑀢𑁆𑀢𑀸𑀦𑀜𑁆𑀳𑀺 𑀲𑁂𑀔𑀺𑀬𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑁄 𑀦𑀬𑁄 𑀇𑀫𑁂𑀲𑀁, 𑀇𑀥 𑀯𑀼𑀢𑁆𑀢𑁄 𑀘 𑀢𑁂𑀲𑀁 𑀲𑀸𑀥𑀸𑀭𑀡𑁄𑀯 𑀳𑁄𑀢𑀻𑀢𑀺. 𑀢𑁂𑀦𑁂𑀯 ‘‘𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀇𑀥 𑀯𑀼𑀢𑁆𑀢𑁄 𑀆𑀧𑀢𑁆𑀢𑀺𑀦𑀬𑁄 𑀢𑀢𑁆𑀣𑀸𑀧𑀺 𑀤𑀲𑁆𑀲𑀺𑀢𑁄. 𑀢𑀲𑁆𑀫𑀸 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀯𑀸𑀤𑁂 𑀏𑀯 𑀞𑀢𑁆𑀯𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯 𑀲𑀩𑁆𑀩𑀲𑁂𑀔𑀺𑀬𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺, 𑀦 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦. 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀬𑀲𑀽𑀧𑀩𑁆𑀬𑀜𑁆𑀚𑀦𑀧𑀝𑀺𑀘𑁆𑀙𑀸𑀤𑀦𑀉𑀚𑁆𑀛𑀸𑀦𑀲𑀜𑁆𑀜𑀻𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀲𑁂𑀲𑀸𑀦𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑀺, 𑀢𑀺𑀘𑀺𑀢𑁆𑀢𑀸𑀦𑀺, 𑀢𑀺𑀯𑁂𑀤𑀦𑀸𑀦𑀺 𑀘𑀸𑀢𑀺 𑀕𑀳𑀡𑀫𑁂𑀯 𑀬𑀼𑀢𑁆𑀢𑀢𑀭𑀁 𑀤𑀺𑀲𑁆𑀲𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀅𑀚𑀸𑀦𑀦𑀯𑀲𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀯𑀡𑁆𑀡𑀦𑀸 𑀓𑀢𑀸, 𑀦 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑀯𑀲𑁂𑀦.

𑀅𑀧𑀺𑀘 ‘‘𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀇𑀫𑀺𑀦𑀸 𑀮𑀓𑁆𑀔𑀡𑀯𑀘𑀦𑁂𑀦𑀸𑀧𑀺 𑀘𑁂𑀢𑀁 𑀲𑀺𑀚𑁆𑀛𑀢𑀺. 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑀯𑀲𑁂𑀦𑁂𑀯 𑀳𑁂𑀢𑁆𑀣 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑀯𑀲𑁂𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀫𑁆𑀧𑀺 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀲𑁆𑀲 𑀅𑀓𑀼𑀲𑀮𑀢𑁆𑀢𑀦𑀺𑀬𑀫𑁂𑀦 𑀮𑁄𑀓𑀯𑀚𑁆𑀚𑀢𑁆𑀢𑀧𑁆𑀧𑀲𑀗𑁆𑀕𑀢𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀫𑁂𑀯 𑀦 𑀲𑀺𑀬𑀸, 𑀇𑀤𑀜𑁆𑀘 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 𑀇𑀫𑀺𑀦𑀸 𑀯𑀘𑀦𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀪𑀸𑀯𑀸. 𑀦 𑀘 𑀲𑁂𑀔𑀺𑀬𑁂𑀲𑀼 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀯𑀺𑀬 𑀅𑀓𑀼𑀲𑀮𑀫𑁂𑀯𑀸𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺, 𑀬𑁂𑀦𑁂𑀢𑁆𑀣 𑀮𑁄𑀓𑀯𑀚𑁆𑀚𑀢𑀸 𑀧𑀲𑀚𑁆𑀚𑁂𑀬𑁆𑀬, ‘‘𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘𑀸’’𑀢𑀺 𑀘𑁂𑀢𑀁 𑀧𑀸𑀴𑀺𑀯𑀘𑀦𑀁 𑀯𑀢𑁆𑀣𑀼𑀁 𑀚𑀸𑀦𑀺𑀢𑁆𑀯𑀸 𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀯𑀻𑀢𑀺𑀓𑁆𑀓𑀫𑀫𑁂𑀯 𑀅𑀦𑀸𑀤𑀭𑀺𑀬𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀯𑀻𑀢𑀺𑀓𑁆𑀓𑀫𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀔𑀦𑁆𑀥𑀓𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀧𑀼𑀩𑁆𑀩𑀸𑀧𑀭𑀜𑁆𑀘 𑀯𑀺𑀭𑀼𑀚𑁆𑀛𑀦𑀢𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀬𑀣𑀸 𑀯𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀕𑀯𑁂𑀲𑀺𑀢𑀩𑁆𑀩𑁄. 𑀅𑀦𑀸𑀤𑀭𑀺𑀬𑀁, 𑀅𑀦𑀸𑀧𑀢𑁆𑀢𑀺𑀓𑀸𑀭𑀡𑀸𑀪𑀸𑀯𑁄 ¶ , 𑀅𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀦𑁆𑀢𑀺 ¶ 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣. 𑀓𑁂𑀯𑀮𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀓𑀭𑀡𑀯𑀲𑁂𑀦 𑀢𑀢𑀺𑀬𑀗𑁆𑀕𑀬𑁄𑀚𑀦𑀫𑁂𑀯 𑀯𑀺𑀲𑁂𑀲𑁄.

𑁫𑁭𑁭. 𑀤𑀼𑀢𑀺𑀬𑀸𑀤𑀻𑀲𑀼 𑀕𑀺𑀳𑀺𑀧𑀸𑀭𑀼𑀢𑀦𑁆𑀢𑀺 𑀲𑁂𑀢𑀧𑀝𑀧𑀸𑀭𑀼𑀢𑀸𑀤𑀺. 𑀯𑀺𑀳𑀸𑀭𑁂𑀧𑀻𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁫𑁭𑁮. 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺𑀆𑀤𑀺 𑀧𑀝𑀺𑀘𑁆𑀙𑀸𑀤𑀦𑀯𑀺𑀥𑀺𑀤𑀲𑁆𑀲𑀦𑀁. 𑀕𑀻𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀲𑀜𑁆𑀘𑀺𑀘𑁆𑀘 𑀕𑀻𑀯𑀁, 𑀫𑀡𑀺𑀩𑀦𑁆𑀥𑀦𑀜𑁆𑀘 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀏𑀢𑁆𑀣𑀸𑀧𑀺 𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀸𑀥𑀸𑀭𑀡𑀢𑁆𑀢𑀸 𑀚𑀸𑀡𑀼𑀫𑀡𑁆𑀟𑀮𑀢𑁄 𑀳𑁂𑀝𑁆𑀞𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑁄𑀮𑀫𑁆𑀩𑁂𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀫𑁂𑀯 𑀧𑀸𑀭𑀼𑀧𑀺𑀢𑀩𑁆𑀩𑀁.

𑁫𑁭𑁯. 𑀯𑀺𑀯𑀭𑀺𑀢𑁆𑀯𑀸 𑀦𑀺𑀲𑀻𑀤𑀢𑁄𑀢𑀺 𑀯𑀺𑀳𑀸𑀭𑁂 𑀯𑀺𑀬 𑀏𑀓𑀁𑀲𑀧𑀸𑀭𑀼𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀸𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀥𑀫𑁆𑀫𑀤𑁂𑀲𑀦𑀧𑀭𑀺𑀢𑁆𑀢𑀪𑀡𑀦𑀸𑀤𑀺𑀅𑀢𑁆𑀣𑀸𑀬 𑀲𑀼𑀘𑀺𑀭𑀫𑁆𑀧𑀺 𑀦𑀺𑀲𑀻𑀤𑀦𑁆𑀢𑁂𑀦 𑀲𑀩𑁆𑀩𑀁 𑀅𑀦𑁆𑀢𑀭𑀖𑀭𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀦𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀏𑀯 𑀘 𑀲𑀺𑀓𑁆𑀔𑀸𑀧𑀤𑁂𑀲𑀼 ‘‘𑀯𑀸𑀲𑀽𑀧𑀕𑀢𑀲𑁆𑀲𑀸’’𑀢𑀺 𑀅𑀦𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀖𑀭𑀁 𑀉𑀧𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑀸𑀤𑀺𑀲𑀩𑁆𑀩𑀁 𑀅𑀓𑁄𑀧𑁂𑀦𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩𑀁. ‘‘𑀯𑀸𑀲𑀽𑀧𑀕𑀢𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀦 𑀧𑀦 𑀉𑀧𑀕𑀘𑁆𑀙𑀫𑀸𑀦𑀲𑁆𑀲𑀸𑀢𑀺. 𑀓𑁂𑀘𑀺 𑀧𑀦 ‘‘𑀏𑀓𑁂𑀓𑀲𑁆𑀫𑀺𑀁 𑀧𑀞𑀫𑀁 𑀕𑀦𑁆𑀢𑁆𑀯𑀸 𑀯𑀸𑀲𑀧𑀭𑀺𑀕𑁆𑀕𑀳𑁂 𑀓𑀢𑁂 𑀢𑀢𑁄 𑀅𑀜𑁆𑀜𑁂𑀳𑀺 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀕𑁂𑀳𑀲𑁆𑀲𑀸𑀫𑀺𑀓𑁂𑀳𑀺 ‘𑀬𑀸𑀯 𑀢𑀼𑀫𑁆𑀳𑁂 𑀦𑀺𑀯𑀲𑀺𑀲𑁆𑀲𑀣, 𑀢𑀸𑀯 𑀢𑀼𑀫𑁆𑀳𑀸𑀓𑀁 𑀇𑀫𑀁 𑀕𑁂𑀳𑀁 𑀤𑁂𑀫𑀻’𑀢𑀺 𑀤𑀺𑀦𑁆𑀦𑁂 𑀅𑀜𑁆𑀜𑁂𑀳𑀺 𑀅𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀳𑀺 𑀅𑀦𑁆𑀢𑀭𑀸𑀭𑀸𑀫𑁂 𑀯𑀺𑀬 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁, 𑀦𑀺𑀲𑀻𑀤𑀺𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀦 𑀕𑀳𑁂𑀢𑀩𑁆𑀩𑀁 𑀢𑀣𑀸𑀯𑀘𑀦𑀸𑀪𑀸𑀯𑀸, 𑀤𑀸𑀦𑀮𑀓𑁆𑀔𑀡𑀸𑀪𑀸𑀯𑀸, 𑀢𑀸𑀯𑀢𑁆𑀢𑀓𑁂𑀦 𑀯𑀺𑀳𑀸𑀭𑀲𑀗𑁆𑀔𑁆𑀬𑀸𑀦𑀼𑀧𑀕𑀫𑀦𑀢𑁄 𑀘. ‘‘𑀬𑀸𑀯 𑀦𑀺𑀲𑀻𑀤𑀺𑀲𑁆𑀲𑀣, 𑀢𑀸𑀯 𑀢𑀼𑀫𑁆𑀳𑀸𑀓𑀁 𑀇𑀫𑀁 𑀕𑁂𑀳𑀁 𑀤𑁂𑀫𑀻’’𑀢𑀺 𑀤𑁂𑀦𑁆𑀢𑁄𑀧𑀺 𑀳𑀺 𑀢𑀸𑀯𑀓𑀸𑀮𑀺𑀓𑀫𑁂𑀯 𑀤𑁂𑀢𑀺 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲.

𑁫𑁮𑁨. 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀯𑀟𑁆𑀠𑀓𑀻𑀳𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑁫𑁮𑁪. 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄 ¶ 𑀳𑀼𑀢𑁆𑀯𑀸𑀢𑀺 𑀓𑀝𑀺𑀢𑁄 𑀉𑀤𑁆𑀥𑀁 𑀓𑀸𑀬𑀩𑀦𑁆𑀥𑀦𑀸𑀤𑀺𑀤𑀲𑁆𑀲𑀦𑀯𑀲𑁂𑀦𑁂𑀯𑀼𑀓𑁆𑀔𑀺𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀧𑀢𑁆𑀢𑀕𑁆𑀕𑀳𑀡𑀸𑀤𑀺𑀫𑀢𑁆𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑁂𑀯 ‘‘𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀦 𑀥𑀫𑀓𑀭𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀲𑀺𑀦𑁆𑀦𑀓𑀸𑀮𑁂 𑀳𑀺 𑀔𑀦𑁆𑀥𑁂 𑀮𑀕𑁆𑀕𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀢𑁄 𑀥𑀫𑀓𑀭𑀡𑀁 𑀦𑀻𑀳𑀭𑀦𑁆𑀢𑀲𑁆𑀲 𑀓𑀝𑀺𑀢𑁄 𑀉𑀤𑁆𑀥𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀢𑀣𑀸 𑀅𑀤𑀲𑁆𑀲𑁂𑀢𑁆𑀯𑀸 𑀦𑀻𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀲𑀦𑁂 𑀦𑀺𑀲𑀻𑀤𑀦𑁆𑀢𑀲𑁆𑀲𑀸𑀧𑀺 ¶ 𑀘 𑀧𑀸𑀭𑀼𑀧𑀺𑀢𑀘𑀻𑀯𑀭𑀁 𑀓𑀺𑀜𑁆𑀘𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀚𑀗𑁆𑀖𑀧𑀺𑀡𑁆𑀟𑁂𑀳𑀺 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀧𑀦 𑀲𑀺𑀓𑁆𑀔𑀸𑀧𑀤𑁂 ‘‘𑀯𑀸𑀲𑀽𑀧𑀕𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀲𑀻𑀤𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀙𑀝𑁆𑀞𑀅𑀝𑁆𑀞𑀫𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸 𑀯𑀸𑀲𑀽𑀧𑀕𑀢𑁂𑀦𑀸𑀧𑀺 𑀲𑀼𑀲𑀁𑀯𑀼𑀢𑁂𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑁂𑀲𑀁 𑀯𑀺𑀲𑁂𑀲𑀁 𑀅𑀯𑀢𑁆𑀯𑀸 𑀇𑀥𑁂𑀯 ‘‘𑀯𑀸𑀲𑀽𑀧𑀕𑀢𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀉𑀓𑁆𑀔𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀸.

𑀧𑀭𑀺𑀫𑀡𑁆𑀟𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁫𑁮𑁬. 𑀤𑀼𑀢𑀺𑀬𑀯𑀕𑁆𑀕𑀸𑀤𑀺𑀉𑀚𑁆𑀚𑀕𑁆𑀖𑀺𑀓𑀅𑀧𑁆𑀧𑀲𑀤𑁆𑀤𑁂𑀲𑀼 𑀦𑀺𑀲𑀻𑀤𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼𑀧𑀺 𑀯𑀸𑀲𑀽𑀧𑀕𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸, 𑀓𑀸𑀬𑀧𑁆𑀧𑀘𑀸𑀮𑀓𑀸𑀤𑀻𑀲𑀼 𑀏𑀯 𑀧𑀦 𑀯𑀼𑀢𑁆𑀢𑀸. 𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼 𑀧𑀦𑁂𑀢𑀁 𑀓𑁂𑀲𑀼𑀘𑀺 𑀧𑁂𑀬𑁆𑀬𑀸𑀮𑁂𑀦 𑀩𑁆𑀬𑀸𑀫𑁄𑀳𑀺𑀢𑀢𑁆𑀢𑀸 𑀦 𑀲𑀼𑀝𑁆𑀞𑀼 𑀯𑀺𑀜𑁆𑀜𑀸𑀬𑀢𑀺. 𑀬𑀢𑁆𑀣 𑀘 𑀅𑀦𑁆𑀢𑀭𑀖𑀭𑁂 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀦𑁆𑀢𑀲𑁆𑀲, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀫𑀳𑀸𑀲𑀤𑁆𑀤𑁂𑀦 𑀬𑀸𑀯𑀧𑀭𑀺𑀲𑀲𑀸𑀯𑀦𑁂𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀢𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀫𑀳𑀺𑀦𑁆𑀤𑀢𑁆𑀣𑁂𑀭𑀸𑀤𑀻𑀳𑀺 𑀆𑀘𑀭𑀺𑀢𑀢𑁆𑀢𑀸.

𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀔𑀫𑁆𑀪𑀓𑀢𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁩. 𑀧𑀢𑁆𑀢𑁂 𑀕𑀳𑀡𑀲𑀜𑁆𑀜𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀢𑁆𑀢𑀲𑀜𑁆𑀜𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀢𑁆𑀢𑁂 𑀲𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑁬𑁦𑁪. 𑀑𑀮𑁄𑀡𑀻𑀢𑀺 𑀏𑀓𑀸 𑀩𑁆𑀬𑀜𑁆𑀚𑀦𑀯𑀺𑀓𑀢𑀺. 𑀓𑀜𑁆𑀚𑀺𑀓𑀢𑀓𑁆𑀓𑀸𑀤𑀺𑀭𑀲𑁄𑀢𑀺 𑀓𑁂𑀘𑀺. 𑀫𑀁𑀲𑀭𑀲𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀲𑀗𑁆𑀕𑀳𑀺𑀢𑀸.

𑁬𑁦𑁫. 𑀲𑀫𑀪𑀭𑀺𑀢𑀦𑁆𑀢𑀺 ¶ 𑀭𑀘𑀺𑀢𑀁. 𑀳𑁂𑀝𑁆𑀞𑀸 𑀑𑀭𑁄𑀳𑀢𑀻𑀢𑀺 𑀲𑀫𑀦𑁆𑀢𑀸 𑀑𑀓𑀸𑀲𑀲𑀫𑁆𑀪𑀯𑀢𑁄 𑀳𑀢𑁆𑀣𑁂𑀦 𑀲𑀫𑀁 𑀓𑀭𑀺𑀬𑀫𑀸𑀦𑀁 𑀳𑁂𑀝𑁆𑀞𑀸 𑀪𑀲𑁆𑀲𑀢𑀺. 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑀺𑀢𑀸𑀦𑀺 𑀧𑀽𑀯𑀸𑀦𑀺 𑀏𑀯 𑀯𑀝𑀁𑀲𑀓𑀸𑀓𑀸𑀭𑁂𑀦 𑀞𑀧𑀺𑀢𑀢𑁆𑀢𑀸 ‘‘𑀧𑀽𑀯𑀯𑀝𑀁𑀲𑀓’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀓𑁂𑀘𑀺 𑀧𑀦 ‘‘𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀭𑀘𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀫𑁂𑀯 𑀕𑀡𑁆𑀳𑀢𑁄 𑀆𑀧𑀢𑁆𑀢𑀺, 𑀳𑀢𑁆𑀣𑀕𑀢𑁂 𑀏𑀯 𑀧𑀦 𑀧𑀢𑁆𑀢𑁂 𑀤𑀺𑀬𑁆𑀬𑀫𑀸𑀦𑁂 𑀣𑀽𑀧𑀻𑀓𑀢𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 ¶ 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯 ‘‘𑀲𑀫𑀢𑀺𑀢𑁆𑀢𑀺𑀓’’𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸.

𑀔𑀫𑁆𑀪𑀓𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀓𑁆𑀓𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁮. 𑀘𑀢𑀼𑀢𑁆𑀣𑀯𑀕𑁆𑀕𑀸𑀤𑀻𑀲𑀼 𑀲𑀧𑀤𑀸𑀦𑀦𑁆𑀢𑀺 𑀏𑀢𑁆𑀣 𑀤𑀸𑀦𑀁 𑀯𑀼𑀘𑁆𑀘𑀢𑀺 𑀅𑀯𑀔𑀡𑁆𑀟𑀦𑀁, 𑀅𑀧𑁂𑀢𑀁 𑀤𑀸𑀦𑀢𑁄 𑀅𑀧𑀤𑀸𑀦𑀁, 𑀲𑀳 𑀅𑀧𑀤𑀸𑀦𑁂𑀦 𑀲𑀧𑀤𑀸𑀦𑀁, 𑀅𑀯𑀔𑀡𑁆𑀟𑀦𑀯𑀺𑀭𑀳𑀺𑀢𑀁 𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣 𑀢𑀢𑁆𑀣 𑀑𑀥𑀺𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺.

𑁬𑁧𑁧. 𑀯𑀺𑀜𑁆𑀜𑀢𑁆𑀢𑀺𑀬𑀦𑁆𑀢𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀸𑀯 𑀲𑀩𑁆𑀩𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀸𑀴𑀺𑀬𑀁 𑀅𑀲𑀜𑁆𑀘𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀫𑀢𑁆𑀢𑀁 𑀜𑀢𑁆𑀯𑀸 𑀪𑀼𑀜𑁆𑀚𑀦𑁂𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀲𑁆𑀲𑁂𑀯 𑀧𑀼𑀦 𑀧𑀡𑁆𑀡𑀢𑁆𑀢𑀺𑀁 𑀜𑀢𑁆𑀯𑀸 𑀫𑀼𑀔𑀕𑀢𑀁 𑀙𑀟𑁆𑀟𑁂𑀢𑀼𑀓𑀸𑀫𑀲𑁆𑀲 𑀬𑀁 𑀅𑀭𑀼𑀘𑀺𑀬𑀸 𑀧𑀯𑀺𑀝𑁆𑀞𑀁, 𑀢𑀁 𑀅𑀲𑀜𑁆𑀘𑀺𑀘𑁆𑀘 𑀧𑀯𑀺𑀝𑁆𑀞𑀁 𑀦𑀸𑀫, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀢𑀤𑁂𑀯 𑀧𑀼𑀦 𑀅𑀜𑁆𑀜𑀯𑀺𑀳𑀺𑀢𑀢𑀸𑀬 𑀯𑀸 𑀅𑀯𑀺𑀜𑁆𑀜𑀢𑁆𑀢𑀫𑀺𑀤𑀦𑁆𑀢𑀺𑀲𑀜𑁆𑀜𑀸𑀬 𑀯𑀸 𑀪𑀼𑀜𑁆𑀚𑀦𑁂 ‘‘𑀅𑀲𑀢𑀺𑀬𑀸’’𑀢𑀺 𑀯𑀼𑀘𑁆𑀘𑀢𑀺.

𑁬𑁧𑁩. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀬𑀁 𑀪𑀼𑀜𑁆𑀚𑀦𑁂 𑀏𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑀸𑀦𑀁 𑀧𑀦 𑀅𑀢𑁆𑀣𑀸𑀬 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀯𑀺𑀜𑁆𑀜𑀢𑁆𑀢𑀺𑀓𑁆𑀔𑀡𑁂 𑀅𑀝𑁆𑀞𑀓𑀣𑀸𑀲𑀼 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀯𑀼𑀢𑁆𑀢𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀢𑁄 𑀦 𑀫𑀼𑀘𑁆𑀘𑀢𑀺. 𑀲𑀜𑁆𑀘𑀺𑀘𑁆𑀘 𑀪𑀼𑀜𑁆𑀚𑀦𑀓𑁆𑀔𑀡𑁂 𑀲𑀬𑀜𑁆𑀘 𑀅𑀜𑁆𑀜𑁂 𑀘 𑀫𑀺𑀘𑁆𑀙𑀸𑀚𑀻𑀯𑀢𑁄 𑀦 𑀫𑀼𑀘𑁆𑀘𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁬𑁧𑁫. ‘‘𑀓𑀼𑀓𑁆𑀓𑀼𑀝𑀡𑁆𑀟𑀁 𑀅𑀢𑀺𑀔𑀼𑀤𑁆𑀤𑀓’’𑀦𑁆𑀢𑀺 𑀇𑀤𑀁 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀢𑀺𑀫𑀳𑀦𑁆𑀢𑁂 𑀏𑀯 𑀆𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀘𑁄𑀭𑀸𑀤𑀺𑀪𑀬𑀁 𑀧𑀝𑀺𑀘𑁆𑀘 𑀫𑀳𑀦𑁆𑀢𑀫𑁆𑀧𑀺 𑀅𑀧𑀭𑀺𑀫𑀡𑁆𑀟𑀮𑀫𑁆𑀧𑀺 ¶ 𑀓𑀢𑁆𑀯𑀸 𑀲𑀻𑀖𑀁 𑀪𑀼𑀜𑁆𑀚𑀦𑀯𑀲𑁂𑀦𑁂𑀢𑁆𑀣 𑀆𑀧𑀤𑀸. 𑀏𑀯𑀫𑀜𑁆𑀜𑁂𑀲𑀼𑀧𑀺 𑀬𑀣𑀸𑀦𑀼𑀭𑀽𑀧𑀁 𑀤𑀝𑁆𑀞𑀩𑁆𑀩𑀁.

𑀲𑀓𑁆𑀓𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀩𑀴𑀯𑀕𑁆𑀕𑀯𑀡𑁆𑀡𑀦𑀸

𑁬𑁧𑁭. 𑀅𑀦𑀸𑀳𑀝𑁂 ¶ 𑀓𑀩𑀴𑁂 𑀫𑀼𑀔𑀤𑁆𑀯𑀸𑀭𑀯𑀺𑀯𑀭𑀡𑁂 𑀧𑀦 𑀧𑀬𑁄𑀚𑀦𑀸𑀪𑀸𑀯𑀸 ‘‘𑀆𑀧𑀤𑀸𑀲𑀽’’𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀫𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼.

𑁬𑁧𑁮. 𑀲𑀩𑁆𑀩𑀁 𑀳𑀢𑁆𑀣𑀦𑁆𑀢𑀺 𑀳𑀢𑁆𑀣𑁂𑀓𑀤𑁂𑀲𑀸 𑀅𑀗𑁆𑀕𑀼𑀮𑀺𑀬𑁄 𑀯𑀼𑀢𑁆𑀢𑀸 ‘‘𑀳𑀢𑁆𑀣𑀫𑀼𑀤𑁆𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀏𑀓𑀗𑁆𑀕𑀼𑀮𑀺𑀫𑁆𑀧𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀓𑀩𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑀯𑀡𑁆𑀡𑀦𑀸

𑁬𑁨𑁭. 𑀧𑀸𑀴𑀺𑀬𑀁 𑀲𑀻𑀢𑀻𑀓𑀢𑁄𑀢𑀺 𑀲𑀻𑀢𑀧𑀻𑀴𑀺𑀢𑁄. 𑀲𑀺𑀮𑀓𑀩𑀼𑀤𑁆𑀥𑁄𑀢𑀺 𑀧𑀭𑀺𑀳𑀸𑀲𑀯𑀘𑀦𑀫𑁂𑀢𑀁. 𑀲𑀺𑀮𑀓𑀜𑁆𑀳𑀺 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 ‘‘𑀩𑀼𑀤𑁆𑀥𑁄 𑀅𑀬’’𑀦𑁆𑀢𑀺 𑀯𑁄𑀳𑀭𑀦𑁆𑀢𑀺.

𑁬𑁨𑁮. ‘‘𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀧𑀯𑁂𑀲𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀁 𑀳𑀢𑁆𑀣𑀁 𑀅𑀦𑁆𑀢𑁄𑀫𑀼𑀔𑁂 𑀧𑀓𑁆𑀔𑀺𑀧𑀦𑀲𑀺𑀓𑁆𑀔𑀸𑀧𑀤𑀲𑁆𑀲𑀧𑀺 𑀧𑀯𑀺𑀝𑁆𑀞𑀗𑁆𑀕𑀼𑀮𑀺𑀦𑀺𑀮𑁆𑀮𑁂𑀳𑀦𑁂𑀦 𑀇𑀫𑀲𑁆𑀲𑀧𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀖𑀦𑀬𑀸𑀕𑀼𑀆𑀤𑀻𑀲𑀼 𑀧𑀢𑁆𑀢𑀁 𑀳𑀢𑁆𑀣𑁂𑀦, 𑀑𑀝𑁆𑀞𑀜𑁆𑀘 𑀚𑀺𑀯𑁆𑀳𑀸𑀬 𑀦𑀺𑀮𑁆𑀮𑁂𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑀺𑀤𑀺𑀲𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀖𑀦𑀬𑀸𑀕𑀼𑀆𑀤𑀺𑀯𑀺𑀭𑀳𑀺𑀢𑀁 𑀦𑀺𑀮𑁆𑀮𑁂𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁩𑁪. 𑀯𑀺𑀮𑀻𑀯𑀘𑁆𑀙𑀢𑁆𑀢𑀦𑁆𑀢𑀺 𑀯𑁂𑀡𑀼𑀧𑁂𑀲𑀺𑀓𑀸𑀳𑀺 𑀓𑀢𑀁. 𑀫𑀡𑁆𑀟𑀮𑀩𑀤𑁆𑀥𑀸𑀦𑀻𑀢𑀺 𑀤𑀻𑀖𑀲𑀮𑀸𑀓𑀸𑀲𑀼 𑀢𑀺𑀭𑀺𑀬𑀁 𑀯𑀮𑀬𑀸𑀓𑀸𑀭𑁂𑀦 𑀲𑀮𑀸𑀓𑀁 𑀞𑀧𑁂𑀢𑁆𑀯𑀸 𑀲𑀼𑀢𑁆𑀢𑁂𑀳𑀺 𑀩𑀤𑁆𑀥𑀸𑀦𑀺 𑀤𑀻𑀖𑀜𑁆𑀘 𑀢𑀺𑀭𑀺𑀬𑀜𑁆𑀘 𑀉𑀚𑀼𑀓𑀫𑁂𑀯 𑀲𑀮𑀸𑀓𑀸𑀬𑁄 𑀞𑀧𑁂𑀢𑁆𑀯𑀸 𑀤𑀴𑁆𑀳𑀩𑀤𑁆𑀥𑀸𑀦𑀺 𑀘𑁂𑀯 𑀢𑀺𑀭𑀺𑀬𑀁 𑀞𑀧𑁂𑀢𑁆𑀯𑀸 𑀤𑀻𑀖𑀤𑀡𑁆𑀟𑀓𑁂𑀳𑁂𑀯 𑀲𑀗𑁆𑀓𑁄𑀘𑀸𑀭𑀳𑀁 𑀓𑀢𑁆𑀯𑀸 𑀲𑀼𑀢𑁆𑀢𑁂𑀳𑁂𑀯 𑀢𑀺𑀭𑀺𑀬𑀁 𑀩𑀤𑁆𑀥𑀸𑀦𑀺. 𑀢𑀢𑁆𑀣𑀚𑀸𑀢𑀓𑀤𑀡𑁆𑀟𑀓𑁂𑀦 𑀓𑀢𑀦𑁆𑀢𑀺 𑀲𑀳 𑀤𑀡𑁆𑀟𑀓𑁂𑀦 𑀙𑀺𑀦𑁆𑀦𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀁. 𑀙𑀢𑁆𑀢𑀧𑀸𑀤𑀼𑀓𑀸𑀬𑀸𑀢𑀺 𑀬𑀲𑁆𑀫𑀺𑀁 𑀙𑀢𑁆𑀢𑀤𑀡𑁆𑀟𑀓𑁄𑀝𑀺𑀁 𑀧𑀯𑁂𑀲𑁂𑀢𑁆𑀯𑀸 𑀙𑀢𑁆𑀢𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀙𑀸𑀬𑀸𑀬 𑀦𑀺𑀲𑀻𑀤𑀦𑁆𑀢𑀺, 𑀢𑀺𑀝𑁆𑀞𑀦𑁆𑀢𑀺 𑀯𑀸, 𑀢𑀸𑀤𑀺𑀲𑁂 𑀙𑀢𑁆𑀢𑀸𑀥𑀸𑀭𑁂.

𑁬𑁩𑁭. 𑀘𑀸𑀧𑁄𑀢𑀺 ¶ 𑀫𑀚𑁆𑀛𑁂 𑀯𑀗𑁆𑀓𑀓𑀸𑀚𑀤𑀡𑁆𑀟𑀲𑀤𑀺𑀲𑀸 𑀥𑀦𑀼𑀯𑀺𑀓𑀢𑀺. 𑀓𑁄𑀤𑀡𑁆𑀟𑁄𑀢𑀺 𑀯𑀺𑀤𑁆𑀥𑀤𑀡𑁆𑀟𑀸 𑀥𑀦𑀼𑀯𑀺𑀓𑀢𑀺.

𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀸𑀤𑀼𑀓𑀯𑀕𑁆𑀕𑀯𑀡𑁆𑀡𑀦𑀸

𑁬𑁪𑁭. 𑀲𑀢𑁆𑀢𑀫𑀯𑀕𑁆𑀕𑁂 ¶ 𑀭𑀼𑀓𑁆𑀔𑀢𑁄 𑀧𑀢𑀺𑀢𑁄𑀢𑀺 𑀏𑀓𑀁 𑀑𑀮𑀫𑁆𑀩𑀦𑀲𑀸𑀔𑀁 𑀕𑀳𑁂𑀢𑁆𑀯𑀸 𑀧𑀢𑀺𑀢𑁄. 𑀧𑀸𑀴𑀺𑀬𑀸𑀢𑀺 𑀅𑀢𑁆𑀢𑀦𑁄 𑀆𑀘𑀸𑀭𑀧𑁆𑀧𑀓𑀸𑀲𑀓𑀕𑀦𑁆𑀣𑀲𑁆𑀲. 𑀥𑀻𑀭𑀢𑁆𑀣𑀽𑀢𑀺 𑀥𑀻 𑀅𑀢𑁆𑀣𑀼, 𑀦𑀺𑀦𑁆𑀤𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀯𑀺𑀦𑀺𑀧𑀸𑀢𑀦𑀳𑁂𑀢𑀼𑀦𑀸𑀢𑀺 𑀯𑀺𑀦𑀺𑀧𑀸𑀢𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦. 𑀢𑁆𑀯𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀁 𑀇𑀘𑁆𑀘𑁂𑀯 𑀯𑀸 𑀧𑀸𑀞𑁄. 𑀅𑀲𑁆𑀫𑀸𑀢𑀺 𑀧𑀸𑀲𑀸𑀡𑁄.

𑁬𑁪𑁯. 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀓𑀗𑁆𑀔𑀸𑀝𑁆𑀞𑀸𑀦𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀤𑀳𑀭𑀲𑁆𑀲 𑀅𑀢𑁆𑀣𑀓𑁄𑀲𑀮𑁆𑀮𑀁 𑀜𑀸𑀢𑀼𑀁 𑀧𑀼𑀘𑁆𑀙𑀺𑀢𑁂𑀦 𑀉𑀘𑁆𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀆𑀘𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑀤𑀸𑀦𑀦𑀬𑁂𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁬𑁫𑁨. 𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀏𑀢𑁆𑀣 𑀉𑀤𑀓𑀕𑀡𑁆𑀟𑀼𑀲𑀓𑀁 𑀓𑀢𑁆𑀯𑀸 𑀉𑀘𑁆𑀙𑀼𑀓𑀘𑀯𑀭𑀸𑀤𑀺𑀜𑁆𑀘 𑀫𑀼𑀔𑁂𑀦𑁂𑀯 𑀳𑀭𑀺𑀢𑀼𑀁 𑀉𑀤𑀓𑁂𑀲𑀼 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀸𑀤𑀼𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀔𑀺𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁬𑁫𑁫. 𑀅𑀥𑀺𑀓𑀭𑀡𑀲𑀫𑀣𑁂𑀲𑀼 𑀘 𑀇𑀥 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁬. 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 ¶ ¶ 𑀫𑀺𑀕𑀸𑀭𑀫𑀸𑀢𑀼𑀬𑀸𑀢𑀺 𑀫𑀺𑀕𑀸𑀭𑀫𑀸𑀢𑀼, 𑀯𑀺𑀲𑀸𑀔𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 ‘‘𑀏𑀳𑀺 𑀪𑀺𑀓𑁆𑀔𑀼𑀦𑀻𑀢𑀺 𑀪𑀺𑀓𑁆𑀔𑀼𑀦𑀻, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀪𑀺𑀓𑁆𑀔𑀼𑀦𑀻’’𑀢𑀺 𑀇𑀤𑀁 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀲𑀫𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀮𑀤𑁆𑀥𑀽𑀧𑀲𑀫𑁆𑀧𑀤𑀁 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀜𑁆𑀘𑁂𑀯 𑀢𑀸𑀬 𑀲𑀳 𑀦𑀺𑀓𑁆𑀔𑀦𑁆𑀢𑀸 𑀪𑀕𑀯𑀢𑁄 𑀆𑀡𑀸𑀬 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀧𑀜𑁆𑀘𑀲𑀢𑀲𑀸𑀓𑀺𑀬𑀸𑀦𑀺𑀬𑁄 𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸 𑀳𑀺 𑀪𑀕𑀯𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀬𑀸𑀘𑀦𑀸𑀬 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 ‘‘𑀏𑀣 𑀪𑀺𑀓𑁆𑀔𑀼𑀦𑀺𑀬𑁄, 𑀫𑀫 𑀲𑀸𑀲𑀦𑁂 𑀢𑀼𑀫𑁆𑀳𑁂𑀧𑀺 𑀧𑀯𑀺𑀲𑀣𑀸’’𑀢𑀺 𑀯𑀼𑀢𑁆𑀢𑀸 𑀯𑀺𑀬 𑀚𑀸𑀢𑀸. 𑀲𑀸𑀓𑀺𑀬𑀸𑀦𑀺𑀬𑁄 𑀏𑀯 𑀲𑀭𑀡𑀲𑀻𑀮𑀸𑀦𑀺 𑀤𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀸𑀤𑀺𑀢𑀢𑁆𑀢𑀸 ‘‘𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀸. 𑀦 𑀳𑀺 𑀏𑀢𑀸𑀳𑀺 𑀅𑀜𑁆𑀜𑀸 𑀏𑀳𑀺𑀪𑀺𑀓𑁆𑀔𑀼𑀦𑀺𑀪𑀸𑀯𑀸𑀤𑀺𑀦𑀸 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀲𑀦𑁆𑀢𑀺. 𑀬𑀁 𑀧𑀦 𑀣𑁂𑀭𑀻𑀕𑀸𑀣𑀸𑀲𑀼 𑀪𑀤𑁆𑀤𑀸𑀬 𑀓𑀼𑀡𑁆𑀟𑀮𑀓𑁂𑀲𑀺𑀬𑀸 𑁋

‘‘𑀦𑀺𑀳𑀘𑁆𑀘 ¶ 𑀚𑀸𑀡𑀼𑀁 𑀯𑀦𑁆𑀤𑀺𑀢𑁆𑀯𑀸, 𑀲𑀫𑁆𑀫𑀼𑀔𑀸 𑀅𑀜𑁆𑀚𑀮𑀺𑀁 𑀅𑀓𑀁;

‘𑀏𑀳𑀺 𑀪𑀤𑁆𑀤𑁂’𑀢𑀺 𑀫𑀁 𑀅𑀯𑁄𑀘, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸’’𑀢𑀺. (𑀣𑁂𑀭𑀻𑀕𑀸. 𑁧𑁦𑁯) 𑁋

𑀯𑀼𑀢𑁆𑀢𑀁. 𑀬𑀜𑁆𑀘 𑀅𑀧𑀤𑀸𑀦𑁂𑀧𑀺 𑁋

‘‘𑀆𑀬𑀸𑀘𑀺𑀢𑁄 𑀢𑀤𑀸 𑀆𑀳, ‘𑀏𑀳𑀺 𑀪𑀤𑁆𑀤𑁂’𑀢𑀺 𑀦𑀸𑀬𑀓𑁄;

𑀢𑀤𑀸𑀳𑀁 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀭𑀺𑀢𑁆𑀢𑀁 𑀢𑁄𑀬𑀫𑀤𑁆𑀤𑀲’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁪𑁪) 𑁋

𑀯𑀼𑀢𑁆𑀢𑀁. 𑀢𑀫𑁆𑀧𑀺 ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀉𑀧𑀲𑀫𑁆𑀧𑀤𑀜𑁆𑀘 𑀕𑀡𑁆𑀳𑀸𑀳𑀻’’𑀢𑀺 𑀪𑀕𑀯𑀢𑁄 𑀆𑀡𑀸 𑀉𑀧𑀲𑀫𑁆𑀧𑀤𑀸𑀬 𑀓𑀸𑀭𑀡𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀣𑁂𑀭𑀻𑀕𑀸𑀣𑀸𑀝𑁆𑀞𑀓𑀣𑀸𑀬𑀁 ‘‘𑀏𑀳𑀺 𑀪𑀤𑁆𑀤𑁂, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 ¶ 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚 𑀉𑀧𑀲𑀫𑁆𑀧𑀚𑁆𑀚𑀲𑁆𑀲𑀽𑀢𑀺 𑀫𑀁 𑀅𑀯𑀘 𑀆𑀡𑀸𑀧𑁂𑀲𑀺, 𑀲𑀸 𑀲𑀢𑁆𑀣𑀼 𑀆𑀡𑀸 𑀫𑀬𑁆𑀳𑀁 𑀉𑀧𑀲𑀫𑁆𑀧𑀤𑀸𑀬 𑀓𑀸𑀭𑀡𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀆𑀲𑀺 𑀅𑀳𑁄𑀲𑀻’’𑀢𑀺 (𑀣𑁂𑀭𑀻𑀕𑀸. 𑀅𑀝𑁆𑀞. 𑁧𑁧𑁧).

𑁬𑁫𑁭. 𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑁂𑀳𑀻𑀢𑀺 𑀫𑁂𑀣𑀼𑀦𑀸𑀤𑀻𑀳𑀺 𑀘𑀢𑀽𑀳𑀺. 𑀢𑀸𑀦𑀺, 𑀧𑀦 𑀅𑀜𑁆𑀜𑀸𑀦𑀺 𑀘 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀺 𑀬𑀲𑁆𑀫𑀸 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀺𑀤𑀸𑀦𑀯𑀢𑁆𑀣𑀸𑀤𑀻𑀲𑀼 𑀏𑀯 𑀲𑀸𑀥𑀸𑀭𑀡𑀯𑀲𑁂𑀦 𑀧𑀜𑁆𑀜𑀢𑁆𑀢𑀸𑀦𑀺, 𑀧𑀘𑁆𑀙𑀸 𑀧𑀦 𑀢𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 𑀢𑀸𑀲𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀸𑀪𑀸𑀯𑁂𑀦 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀢𑀤𑀦𑀼𑀭𑀽𑀧𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀯𑀲𑁂𑀦 𑀏𑀓𑀢𑁄 𑀲𑀗𑁆𑀕𑀳𑀺𑀢𑀸𑀦𑀺. 𑀬𑀲𑁆𑀫𑀸 𑀘 𑀦𑁂𑀲𑀁 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 (𑀧𑀸𑀭𑀸. 𑁪𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀲𑀓𑁆𑀓𑀸 𑀜𑀸𑀢𑀼𑀁, 𑀢𑀲𑁆𑀫𑀸 𑀢𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀅𑀲𑀸𑀥𑀸𑀭𑀡𑀸𑀦𑀁 𑀏𑀯 𑀇𑀥 𑀯𑀺𑀪𑀗𑁆𑀕𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁫𑁯. 𑀪𑀺𑀓𑁆𑀔𑀽𑀦𑀁 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑀩𑁆𑀩𑀳𑀼𑀮𑀦𑀬𑁂𑀦𑀸𑀢𑀺 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀩𑀳𑀼𑀮𑀪𑀸𑀯𑀢𑁄, 𑀏𑀢𑁂𑀦 𑀅𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀸𑀧𑀺 𑀅𑀬𑀁 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀤𑀲𑁆𑀲𑁂𑀢𑀺, 𑀫𑀬𑀁 𑀧𑀦𑁂𑀢𑁆𑀣 𑀏𑀯𑀁 𑀢𑀓𑁆𑀓𑀬𑀸𑀫 ‘‘𑀓𑀸𑀬𑀲𑀁𑀲𑀕𑁆𑀕𑀓𑁆𑀔𑀡𑁂 𑀲𑀸𑀤𑀺𑀬𑀦𑁆𑀢𑀺𑀬𑀸 𑀓𑀺𑀭𑀺𑀬𑀸𑀬 𑀅𑀪𑀸𑀯𑁂𑀧𑀺 𑀢𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀺𑀢𑀸𑀦𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀕𑀫𑀦𑀇𑀗𑁆𑀕𑀺𑀢𑀸𑀓𑀸𑀭𑀤𑀲𑁆𑀲𑀦𑀸𑀤𑀺𑀓𑀺𑀭𑀺𑀬𑀸𑀦𑀁 𑀯𑀲𑁂𑀦𑁂𑀯 𑀓𑀺𑀭𑀺𑀬𑀸𑀲𑀫𑀉𑀝𑁆𑀞𑀸𑀦𑀫𑁂𑀯, 𑀧𑀭𑁂𑀳𑀺 𑀫𑀕𑁆𑀕𑁂 𑀓𑀭𑀺𑀬𑀫𑀸𑀦𑀼𑀧𑀓𑁆𑀓𑀫𑁂𑀦 𑀦𑀺𑀘𑁆𑀘𑀮𑀲𑁆𑀲 𑀲𑀸𑀤𑀺𑀬𑀢𑁄 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀯𑀺𑀬 𑀧𑀼𑀩𑁆𑀩𑀧𑀬𑁄𑀕𑀸𑀪𑀸𑀯𑁂𑀧𑀺 ¶ 𑀯𑀸 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑁂 𑀧𑀭𑀽𑀧𑀓𑁆𑀓𑀫𑁂𑀦 𑀚𑀦𑀺𑀬𑀫𑀸𑀦𑀸𑀬 𑀅𑀢𑁆𑀢𑀦𑁄 𑀓𑀸𑀬𑀘𑀮𑀦𑀸𑀤𑀺𑀲𑀗𑁆𑀔𑀸𑀢𑀸𑀬 𑀓𑀺𑀭𑀺𑀬𑀸𑀬, 𑀲𑀸 𑀳𑀺 𑀲𑀸𑀤𑀺𑀬𑀫𑀸𑀦𑁂𑀦 𑀢𑀲𑁆𑀲𑀸 𑀘𑀺𑀢𑁆𑀢𑁂𑀦𑀸𑀧𑀺 𑀲𑀫𑀼𑀝𑁆𑀞𑀺𑀢𑀸 𑀓𑀺𑀭𑀺𑀬𑀸 𑀦𑀸𑀫 𑀳𑁄𑀢𑀺 𑀅𑀯𑀸𑀬𑀫𑀺𑀢𑁆𑀯𑀸 𑀧𑀭𑀽𑀧𑀓𑁆𑀓𑀫𑁂𑀦 𑀫𑁂𑀣𑀼𑀦𑀲𑀸𑀤𑀺𑀬𑀦𑁂 𑀯𑀺𑀬, 𑀪𑀺𑀓𑁆𑀔𑀽𑀦𑀁 𑀧𑀦 𑀧𑀭𑀽𑀧𑀓𑁆𑀓𑀫𑀚𑀦𑀺𑀢𑀁 𑀓𑀺𑀭𑀺𑀬𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀓𑀭𑀺𑀬𑀫𑀸𑀦𑀧𑀬𑁄𑀕𑀯𑀲𑁂𑀦𑁂𑀯 ‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’𑀢𑀺 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸𑀯 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑀸𑀤𑀺𑀬𑀫𑀸𑀦𑁂𑀧𑀺 𑀦 𑀤𑁄𑀲𑁄. 𑀇𑀢𑀭𑀣𑀸 𑀳𑀺 𑀢𑀩𑁆𑀩𑀳𑀼𑀮𑀦𑀬𑁂𑀦𑁂𑀢𑁆𑀣 𑀓𑀺𑀭𑀺𑀬𑀢𑁆𑀢𑁂 𑀕𑀬𑁆𑀳𑀫𑀸𑀦𑁂 𑀅𑀜𑁆𑀜𑁂𑀲𑀫𑁆𑀧𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑀺𑀭𑀺𑀬𑀢𑁆𑀢𑀕𑁆𑀕𑀳𑀡𑀧𑁆𑀧𑀲𑀗𑁆𑀕𑁄 𑀲𑀺𑀬𑀸’’𑀢𑀺. 𑀢𑀲𑁆𑀫𑀸 ¶ 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀸𑀢𑀺 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀢𑀸. 𑀢𑀣𑁂𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀻 𑀏𑀯.

𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬𑁬. 𑀤𑀼𑀢𑀺𑀬𑁂 𑀧𑀼𑀭𑀺𑀫𑁂𑀦𑀸𑀢𑀺𑀆𑀤𑀺 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀬 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑁂 𑀧𑀜𑁆𑀜𑀢𑁆𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀲𑁆𑀲𑀸𑀧𑀺 𑀧𑀝𑀺𑀘𑁆𑀙𑀸𑀤𑀦𑁂 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀺𑀬𑀸𑀧𑀺 ‘‘𑀇𑀤𑀁 𑀯𑀚𑁆𑀚𑀁 𑀦 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀙𑀦𑁆𑀤𑁂𑀦 𑀥𑀼𑀭𑀁 𑀦𑀺𑀓𑁆𑀔𑁂𑀧𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀧𑀝𑀺𑀘𑁆𑀙𑀸𑀤𑀦𑀁 𑀬𑀲𑁆𑀫𑀸 ‘‘𑀧𑁂𑀲𑀮𑀸 𑀜𑀢𑁆𑀯𑀸 𑀕𑀭𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀬𑁂𑀦𑁂𑀯 𑀳𑁄𑀢𑀺, 𑀪𑀬𑀜𑁆𑀘 𑀓𑁄𑀥𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀤𑀁 ‘‘𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀭𑀸𑀚𑀺𑀓𑀓𑀡𑁆𑀟 𑁩.𑁬𑁬𑁬) ‘‘𑀓𑀺𑀜𑁆𑀘𑀸𑀧𑀺 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀁 𑀧𑁂𑀫𑀯𑀲𑁂𑀦 𑀳𑁄𑀢𑀺, 𑀢𑀣𑀸𑀧𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑀁 𑀤𑁄𑀫𑀦𑀲𑁆𑀲𑀺𑀢𑀫𑁂𑀯 𑀳𑁄𑀢𑀻’’𑀢𑀺 𑀏𑀯𑀁 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑁂𑀦𑁂𑀯 𑀙𑀸𑀤𑀦𑀁 𑀤𑁄𑀫𑀦𑀲𑁆𑀲𑀢𑁆𑀢𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀅𑀓𑀸𑀭𑀡𑀁 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀁 𑀯𑀺𑀦𑀸𑀧𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄𑀯.

𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁬𑁯. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁪. 𑀅𑀝𑁆𑀞𑀯𑀢𑁆𑀣𑀼𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭𑁫. 𑀘𑀢𑀼𑀢𑁆𑀣𑁂 ¶ 𑀮𑁄𑀓𑀲𑁆𑀲𑀸𑀤𑀲𑀗𑁆𑀔𑀸𑀢𑀁 𑀫𑀺𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀢𑀩𑁆𑀩𑀁 𑀲𑀦𑁆𑀣𑀯𑀁. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀺𑀲𑁆𑀲𑀺𑀢𑁆𑀣𑀺𑀬𑁄 𑀫𑁂𑀣𑀼𑀦𑀁 𑀢𑀁 𑀦 𑀲𑁂𑀯𑁂𑀢𑀺 𑀬𑀸 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀸𑀲𑀼 𑀯𑀼𑀢𑁆𑀢𑀁 𑀢𑀁 𑀫𑁂𑀣𑀼𑀦𑀁 𑀦 𑀲𑁂𑀯𑁂𑀬𑁆𑀬. 𑀅𑀦𑀭𑀺𑀬𑀧𑀡𑁆𑀟𑀓𑁂𑀢𑀺 𑀢𑀬𑁄 𑀅𑀦𑀭𑀺𑀬𑁂, 𑀢𑀬𑁄 𑀧𑀡𑁆𑀟𑀓𑁂 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑁂𑀣𑀼𑀦𑀁 𑀦 𑀲𑁂𑀯𑁂𑀢𑀺 𑀅𑀢𑁆𑀣𑁄. 𑀅𑀦𑀭𑀺𑀬𑀸𑀢𑀺 ¶ 𑀘𑁂𑀢𑁆𑀣 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀅𑀥𑀺𑀧𑁆𑀧𑁂𑀢𑀸. 𑀩𑁆𑀬𑀜𑁆𑀚𑀦𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀯𑀘𑁆𑀘𑀫𑀼𑀔𑀫𑀕𑁆𑀕𑁂𑀧𑀺. 𑀙𑁂𑀤𑁄 𑀏𑀯 𑀙𑁂𑀚𑁆𑀚𑀁, 𑀧𑀸𑀭𑀸𑀚𑀺𑀓𑀁.

𑀯𑀡𑁆𑀡𑀸𑀯𑀡𑁆𑀡𑁄𑀢𑀺 𑀤𑁆𑀯𑀻𑀳𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀯𑀼𑀢𑁆𑀢𑀸. 𑀕𑀫𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀁. ‘‘𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀺𑀬𑁄𑀧𑀘𑀸𑀭𑁂𑀦 𑀓𑀸𑀬𑀲𑀁𑀲𑀕𑁆𑀕𑁄 𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀸𑀤𑀺𑀧𑀤𑁂𑀲𑀼. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀲𑀉𑀲𑁆𑀲𑀸𑀳𑀢𑀸, 𑀅𑀝𑁆𑀞𑀫𑀯𑀢𑁆𑀣𑀼𑀲𑁆𑀲 𑀧𑀽𑀭𑀡𑀦𑁆𑀢𑀺 𑀢𑀻𑀡𑁂𑀢𑁆𑀣 𑀅𑀗𑁆𑀕𑀸𑀦𑀺.

𑀅𑀝𑁆𑀞𑀯𑀢𑁆𑀣𑀼𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭𑁯. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑁂 ¶ ¶ ‘‘𑀤𑀼𑀢𑀺𑀬𑀲𑁆𑀲 𑀆𑀭𑁄𑀘𑁂𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀤𑁆𑀯𑀻𑀲𑀼𑀧𑀺 𑀅𑀟𑁆𑀟𑀓𑀸𑀭𑀓𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀼𑀢𑀺𑀬𑀲𑁆𑀲 𑀓𑀣𑀁 𑀬𑁄 𑀓𑁄𑀘𑀺 𑀆𑀭𑁄𑀘𑁂𑀢𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀲𑁂𑀯 𑀦𑀬𑁄’’𑀢𑀺.

𑀕𑀢𑀺𑀕𑀢𑀦𑁆𑀢𑀺 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀁. 𑀆𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀦𑀁. ‘‘𑀦𑀺𑀲𑁆𑀲𑀸𑀭𑀡𑀻𑀬’’𑀦𑁆𑀢𑀺 𑀇𑀤𑀁 𑀓𑀢𑁆𑀢𑀼𑀅𑀢𑁆𑀣𑁂 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀦𑀺𑀲𑁆𑀲𑀸𑀭𑁂𑀢𑀻’’𑀢𑀺. 𑀆𑀧𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁 𑀲𑀗𑁆𑀖𑀢𑁄 𑀯𑀺𑀬𑁄𑀚𑁂𑀢𑀺, 𑀯𑀺𑀬𑁄𑀚𑀦𑀳𑁂𑀢𑀼 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀕𑀻𑀯𑀸𑀬𑁂𑀯𑀸𑀢𑀺 𑀆𑀡𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀲𑀁 𑀅𑀦𑀢𑁆𑀣𑀓𑀸𑀫𑀢𑀸𑀬𑀸𑀢𑀺 ‘‘𑀘𑁄𑀭𑁄’’𑀢𑀺 𑀯𑀼𑀢𑁆𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁂𑀘𑀺 𑀤𑀡𑁆𑀟𑀺𑀲𑁆𑀲𑀦𑁆𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀲𑀜𑁆𑀜𑀸𑀬. 𑀏𑀢𑁂𑀦 𑀓𑁂𑀯𑀮𑀁 𑀪𑀬𑁂𑀦 𑀯𑀸 𑀧𑀭𑀺𑀓𑁆𑀔𑀸𑀭𑀕𑁆𑀕𑀳𑀡𑀢𑁆𑀣𑀁 𑀯𑀸 𑀲𑀳𑀲𑀸 ‘‘𑀘𑁄𑀭𑁄’’𑀢𑀺 𑀯𑀼𑀢𑁆𑀢𑁂 𑀤𑀡𑁆𑀟𑀺𑀢𑁂𑀧𑀺 𑀦 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀧𑀼𑀭𑀺𑀲𑀸𑀦𑀜𑁆𑀳𑀺 ‘‘𑀘𑁄𑀭𑁄 𑀅𑀬’’𑀦𑁆𑀢𑀺 𑀉𑀤𑁆𑀤𑀺𑀲𑁆𑀲 𑀓𑀣𑀦𑁂 𑀏𑀯 𑀕𑀻𑀯𑀸, 𑀪𑀺𑀓𑁆𑀔𑀽𑀦𑀁, 𑀧𑀦 𑀆𑀭𑀸𑀫𑀺𑀓𑀸𑀤𑀻𑀦𑀁 𑀯𑀸 𑀲𑀫𑁆𑀫𑀼𑀔𑀸 ‘‘𑀅𑀲𑀼𑀓𑁄 𑀘𑁄𑀭𑁄 𑀏𑀯𑀫𑀓𑀸𑀲𑀻’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑀯𑀘𑀦𑀁 𑀦𑀺𑀲𑁆𑀲𑀸𑀬 𑀆𑀭𑀸𑀫𑀺𑀓𑀸𑀤𑀻𑀲𑀼 𑀭𑀸𑀚𑀧𑀼𑀭𑀺𑀲𑀸𑀦𑀁 𑀯𑀢𑁆𑀯𑀸 𑀤𑀡𑁆𑀟𑀸𑀧𑁂𑀦𑁆𑀢𑁂𑀲𑀼𑀧𑀺 𑀪𑀺𑀓𑁆𑀔𑀼𑀲𑁆𑀲 𑀦 𑀕𑀻𑀯𑀸 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀯𑀼𑀢𑁆𑀢𑀢𑁆𑀢𑀸. 𑀬𑁂𑀲𑀜𑁆𑀘 𑀯𑀼𑀢𑁆𑀢𑀁, 𑀢𑁂𑀳𑀺 𑀲𑀬𑀁 𑀘𑁄𑀭𑀲𑁆𑀲 𑀅𑀤𑀡𑁆𑀟𑀺𑀢𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀢𑁆𑀯𑀁 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀅𑀘𑁆𑀙𑀺𑀦𑁆𑀤𑀸’’𑀢𑀺 𑀆𑀡𑀢𑁆𑀢𑁄𑀧𑀺 𑀳𑀺 𑀲𑀘𑁂 𑀅𑀜𑁆𑀜𑁂𑀦 𑀅𑀘𑁆𑀙𑀺𑀦𑁆𑀤𑀸𑀧𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀺𑀲𑀗𑁆𑀓𑁂𑀢𑀢𑁆𑀢𑀸. ‘‘𑀅𑀢𑁆𑀢𑀦𑁄 𑀯𑀘𑀦𑀓𑀭’’𑀦𑁆𑀢𑀺 𑀇𑀤𑀁 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀘𑀦𑀁 𑀅𑀓𑀭𑁄𑀦𑁆𑀢𑀸𑀦𑀁 𑀭𑀸𑀚𑀧𑀼𑀭𑀺𑀲𑀸𑀦𑀫𑁆𑀧𑀺 ‘‘𑀇𑀫𑀺𑀦𑀸 𑀕𑀳𑀺𑀢𑀧𑀭𑀺𑀓𑁆𑀔𑀸𑀭𑀁 𑀆𑀳𑀭𑀸𑀧𑁂𑀳𑀺, 𑀫𑀸 𑀘𑀲𑁆𑀲 𑀤𑀡𑁆𑀟𑀁 𑀓𑀭𑁄𑀳𑀻’’𑀢𑀺 𑀉𑀤𑁆𑀤𑀺𑀲𑁆𑀲 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀡𑁆𑀟𑁂 𑀕𑀳𑀺𑀢𑁂𑀧𑀺 𑀦 𑀕𑀻𑀯𑀸 𑀏𑀯 𑀤𑀡𑁆𑀟𑀕𑁆𑀕𑀳𑀡𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, ‘‘𑀅𑀲𑀼𑀓𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀧𑀝𑀺𑀓𑁆𑀔𑀺𑀧𑀦𑁂 (𑀧𑀸𑀭𑀸. 𑁧𑁨𑁧) 𑀯𑀺𑀬.

𑀤𑀸𑀲𑀸𑀤𑀻𑀦𑀁 ¶ 𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀺𑀬 𑀢𑀤𑀢𑁆𑀣𑀸𑀬 𑀅𑀟𑁆𑀟𑀓𑀭𑀡𑁂 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘‘𑀅𑀓𑀧𑁆𑀧𑀺𑀬𑀅𑀟𑁆𑀟𑁄 𑀦𑀸𑀫 𑀦 𑀯𑀝𑁆𑀝𑀢𑀻’’𑀢𑀺. 𑀓𑁂𑀦𑀘𑀺 𑀧𑀦 𑀪𑀺𑀓𑁆𑀔𑀼𑀦𑀸 𑀔𑁂𑀢𑁆𑀢𑀸𑀤𑀺𑀅𑀢𑁆𑀣𑀸𑀬 𑀯𑁄𑀳𑀸𑀭𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀟𑁆𑀟𑁂 𑀓𑀢𑁂𑀧𑀺 𑀢𑀁 𑀔𑁂𑀢𑁆𑀢𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀺𑀬 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁 𑀦 𑀳𑁄𑀢𑀺 𑀧𑀼𑀩𑁆𑀩𑁂 𑀏𑀯 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀢𑁆𑀢𑀸 ¶ , 𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀦 𑀧𑀬𑁄𑀕𑀯𑀲𑁂𑀦 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀤𑀸𑀲𑀸𑀤𑀻𑀦𑀫𑁆𑀧𑀺 𑀧𑀦 𑀅𑀢𑁆𑀣𑀸𑀬 𑀭𑀓𑁆𑀔𑀁 𑀬𑀸𑀘𑀺𑀢𑀼𑀁 𑀯𑁄𑀳𑀸𑀭𑀺𑀓𑁂𑀦 𑀧𑀼𑀝𑁆𑀞𑁂𑀦 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀁 𑀓𑀧𑁆𑀧𑀺𑀬𑀓𑁆𑀓𑀫𑀁 𑀯𑀢𑁆𑀢𑀼𑀁, 𑀆𑀭𑀸𑀫𑀺𑀓𑀸𑀤𑀻𑀳𑀺 𑀘 𑀅𑀟𑁆𑀟𑀁 𑀓𑀸𑀭𑀸𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀺 𑀏𑀯. 𑀯𑀺𑀳𑀸𑀭𑀯𑀢𑁆𑀣𑀸𑀤𑀺𑀓𑀧𑁆𑀧𑀺𑀬𑀅𑀟𑁆𑀟𑀁 𑀧𑀦 𑀪𑀺𑀓𑁆𑀔𑀼𑀦𑁄 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑁄𑀢𑀺 𑀭𑀓𑁆𑀔𑀁 𑀬𑀸𑀘𑀦𑁆𑀢𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑁄 𑀉𑀤𑁆𑀤𑀺𑀲𑁆𑀲𑀅𑀦𑀼𑀤𑁆𑀤𑀺𑀲𑁆𑀲𑀯𑀲𑁂𑀦 𑀭𑀓𑁆𑀔𑀸𑀬𑀸𑀘𑀦𑀯𑀺𑀦𑀺𑀘𑁆𑀙𑀬𑁄, 𑀦 𑀲𑀩𑁆𑀩𑁄 𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑁄 𑀅𑀲𑀸𑀥𑀸𑀭𑀡𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀢𑁂𑀦𑀸𑀳 ‘‘𑀪𑀺𑀓𑁆𑀔𑀼𑀦𑁄𑀧𑀻’’𑀢𑀺𑀆𑀤𑀺. 𑀅𑀦𑀸𑀓𑀟𑁆𑀠𑀺𑀢𑀸𑀬 𑀅𑀟𑁆𑀟𑀓𑀭𑀡𑀁, 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁮𑁩. 𑀧𑀸𑀴𑀺𑀬𑀁 𑀤𑀼𑀢𑀺𑀬𑁂 𑀫𑀮𑁆𑀮𑀕𑀡𑀪𑀝𑀺𑀧𑀼𑀢𑁆𑀢𑀕𑀡𑀸𑀤𑀺𑀓𑀦𑁆𑀢𑀺𑀆𑀤𑀻𑀲𑀼 𑀫𑀮𑁆𑀮𑀭𑀸𑀚𑀽𑀦𑀁 𑀕𑀡𑁄 𑀫𑀮𑁆𑀮𑀕𑀡𑁄. 𑀪𑀝𑀺𑀧𑀼𑀢𑁆𑀢𑀸 𑀦𑀸𑀫 𑀓𑁂𑀘𑀺 𑀕𑀡𑀭𑀸𑀚𑀸𑀦𑁄, 𑀢𑁂𑀲𑀁 𑀕𑀡𑁄. 𑀓𑁂𑀘𑀺 𑀧𑀦 ‘‘𑀦𑀸𑀭𑀸𑀬𑀦𑀪𑀢𑁆𑀢𑀺𑀓𑁄 𑀧𑀼𑀜𑁆𑀜𑀓𑀸𑀭𑀕𑀡𑁄 𑀫𑀮𑁆𑀮𑀕𑀡𑁄. 𑀢𑀣𑀸 𑀓𑀼𑀫𑀸𑀭𑀪𑀢𑁆𑀢𑀺𑀓𑁄 𑀘 𑀕𑀡𑁄 𑀪𑀝𑀺𑀧𑀼𑀢𑁆𑀢𑀕𑀡𑁄’’𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑀲𑀁𑀖𑀸𑀤𑀺𑀲𑁂𑀲𑀓𑀡𑁆𑀟 𑁩.𑁬𑁮𑁩) 𑀯𑀤𑀦𑁆𑀢𑀺. 𑀥𑀫𑁆𑀫𑀕𑀡𑁄𑀢𑀺 𑀲𑀸𑀲𑀦𑁂, 𑀮𑁄𑀓𑁂 𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀧𑀼𑀜𑁆𑀜𑀓𑀸𑀭𑀓𑁄 𑀕𑀡𑁄. 𑀕𑀦𑁆𑀥𑀯𑀺𑀓𑀢𑀺𑀓𑀸𑀭𑀓𑁄 𑀕𑀡𑁄 𑀕𑀦𑁆𑀥𑀺𑀓𑀲𑁂𑀡𑀻. 𑀧𑁂𑀲𑀓𑀸𑀭𑀸𑀤𑀺𑀕𑀡𑁄 𑀤𑀼𑀲𑁆𑀲𑀺𑀓𑀲𑁂𑀡𑀻. 𑀓𑀧𑁆𑀧𑀕𑀢𑀺𑀓𑀦𑁆𑀢𑀺 𑀓𑀧𑁆𑀧𑀺𑀬𑀪𑀸𑀯𑀕𑀢𑀁, 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁬𑁮𑁫. 𑀧𑀸𑀴𑀺𑀬𑀁 𑀯𑀼𑀝𑁆𑀞𑀸𑀧𑁂𑀢𑀻𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀅𑀓𑀧𑁆𑀧𑀕𑀢𑀫𑁆𑀧𑀺 𑀧𑀩𑁆𑀩𑀸𑀚𑁂𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀯𑀤𑀦𑁆𑀢𑀺. 𑀔𑀻𑀡𑀸𑀲𑀯𑀸𑀬𑀧𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 ‘‘𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑁄𑀭𑀺𑀢𑀸, 𑀢𑀁 𑀜𑀢𑁆𑀯𑀸 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁯𑁨. 𑀢𑀢𑀺𑀬𑁂 ¶ ¶ 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺 𑀕𑀸𑀫𑀦𑁆𑀢𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸. ‘‘𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀺𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺𑀬𑀸 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀉𑀧𑀘𑀸𑀭𑀲𑁆𑀲 𑀅𑀢𑀺𑀓𑁆𑀓𑀫𑁄 𑀦𑀸𑀫 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀝𑁆𑀞𑀸𑀦𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑁆𑀲 𑀅𑀢𑀺𑀓𑁆𑀓𑀫𑁄 𑀏𑀯𑀸𑀢𑀺 𑀆𑀳 ‘‘𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀏𑀓𑁂𑀦 𑀧𑀸𑀤𑁂𑀦 𑀅𑀢𑀺𑀓𑁆𑀓𑀫𑀢𑀻’’𑀢𑀺.

𑀫𑀚𑁆𑀛𑁂𑀢𑀺 𑀕𑀸𑀫𑀫𑀚𑁆𑀛𑁂. 𑀧𑀘𑁆𑀙𑀸𑀢𑀺 𑀅𑀧𑀭𑀓𑀸𑀮𑁂. ‘‘𑀘𑀢𑀼𑀕𑀸𑀫𑀲𑀸𑀥𑀸𑀭𑀡𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑀺𑀳𑀸𑀭𑀢𑁄 𑀘𑀢𑀽𑀲𑀼 𑀕𑀸𑀫𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀫𑀸𑀳.

𑀧𑀭𑀢𑀻𑀭𑀫𑁂𑀯 𑀅𑀓𑁆𑀓𑀫𑀦𑁆𑀢𑀺𑀬𑀸𑀢𑀺 𑀦𑀤𑀺𑀁 𑀅𑀦𑁄𑀢𑀭𑀺𑀢𑁆𑀯𑀸 𑀑𑀭𑀺𑀫𑀢𑀻𑀭𑀢𑁄 𑀮𑀗𑁆𑀖𑀺𑀢𑁆𑀯𑀸 𑀯𑀸 𑀆𑀓𑀸𑀲𑀸𑀤𑀺𑀦𑀸 𑀯𑀸 𑀧𑀭𑀢𑀻𑀭𑀫𑁂𑀯 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸. 𑀑𑀭𑀺𑀫𑀢𑀻𑀭𑀫𑁂𑀯 𑀆𑀕𑀘𑁆𑀙𑀢𑀺, 𑀆𑀧𑀢𑁆𑀢𑀻𑀢𑀺 𑀧𑀸𑀭𑀕𑀫𑀦𑀸𑀬 𑀑𑀢𑀺𑀡𑁆𑀡𑀢𑁆𑀢𑀸 𑀯𑀼𑀢𑁆𑀢𑀁.

𑀢𑀸𑀤𑀺𑀲𑁂 𑀅𑀭𑀜𑁆𑀜𑁂𑀢𑀺 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺𑀪𑀸𑀯𑀮𑀓𑁆𑀔𑀡𑁂 𑀅𑀭𑀜𑁆𑀜𑁂. ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀦𑀽𑀧𑀘𑀸𑀭𑁂 𑀯𑀺𑀭𑀳𑀺𑀢𑁂 𑀲𑀯𑀦𑀽𑀧𑀘𑀸𑀭𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀧𑀺 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀡𑁆𑀳𑀸𑀢𑀻𑀢𑀺 𑀫𑀕𑁆𑀕𑀫𑀽𑀴𑁆𑀳𑀢𑁆𑀢𑀸 𑀕𑀡𑁆𑀳𑀸𑀢𑀺, 𑀦 𑀤𑀼𑀢𑀺𑀬𑀺𑀓𑀁 𑀑𑀳𑀺𑀬𑀺𑀢𑀼𑀁. 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺. 𑀅𑀦𑀦𑁆𑀢𑀭𑀸𑀬𑁂𑀦 𑀏𑀓𑀪𑀸𑀯𑁄, 𑀅𑀦𑀸𑀧𑀤𑀸𑀬 𑀕𑀸𑀫𑀦𑁆𑀢𑀭𑀕𑀫𑀦𑀸𑀤𑀻𑀲𑀼 𑀏𑀓𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁯𑁪. 𑀘𑀢𑀼𑀢𑁆𑀣𑁂 𑀓𑀸𑀭𑀓𑀕𑀡𑀲𑁆𑀲𑀸𑀢𑀺 𑀇𑀫𑀲𑁆𑀲 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑁂𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀸𑀘𑀓𑁆𑀔𑀡𑁂 𑀲𑀳𑀞𑀺𑀢𑁂𑀢𑀺 𑀓𑁂𑀘𑀺. 𑀦𑁂𑀢𑁆𑀣𑀸𑀭𑀯𑀢𑁆𑀢𑁂𑀢𑀺 𑀦𑀺𑀢𑁆𑀣𑀭𑀡𑀳𑁂𑀢𑀼𑀫𑁆𑀳𑀺 𑀯𑀢𑁆𑀢𑁂.

𑁬𑁯𑁮. 𑀧𑀸𑀴𑀺𑀬𑀁 ¶ 𑀅𑀲𑀦𑁆𑀢𑁂 𑀓𑀸𑀭𑀓𑀲𑀗𑁆𑀖𑁂𑀢𑀺 𑀏𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀲𑀼𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 ¶ . 𑀅𑀦𑁆𑀢𑀭𑀸𑀬𑁂 𑀧𑀦 𑀲𑀢𑀺 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀁 𑀑𑀲𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀥𑀫𑁆𑀫𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑀢𑀸, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀑𑀲𑀸𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁧. 𑀧𑀜𑁆𑀘𑀫𑁂 𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀯𑀘𑀦𑀁 ‘‘𑀅𑀦𑀯𑀲𑁆𑀲𑀼𑀢𑁄𑀢𑀺 𑀚𑀸𑀦𑀦𑁆𑀢𑀻 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀉𑀪𑀢𑁄 𑀅𑀯𑀲𑁆𑀲𑀼𑀢𑀪𑀸𑀯𑁄, 𑀉𑀤𑀓𑀤𑀦𑁆𑀢𑀧𑁄𑀦𑀢𑁄 𑀅𑀜𑁆𑀜𑀁 𑀲𑀳𑀢𑁆𑀣𑀸 𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁫. 𑀙𑀝𑁆𑀞𑁂 𑀧𑀝𑀺𑀕𑁆𑀕𑀳𑁄 𑀢𑁂𑀦 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀦𑁂𑀯 ‘‘𑀦 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀉𑀬𑁆𑀬𑁄𑀚𑀺𑀢𑀸𑀬 𑀳𑀢𑁆𑀣𑀢𑁄 𑀇𑀢𑀭𑀸𑀬 𑀧𑀝𑀺𑀕𑁆𑀕𑀳𑁄𑀧𑀺 𑀦𑀢𑁆𑀣𑀺. 𑀧𑀭𑀺𑀪𑁄𑀕𑀧𑀘𑁆𑀘𑀬𑀸𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀅𑀯𑀲𑁆𑀲𑀼𑀢𑀢𑀸, 𑀢𑀁 𑀜𑀢𑁆𑀯𑀸 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀉𑀬𑁆𑀬𑁄𑀚𑀦𑀸, 𑀢𑁂𑀦 𑀇𑀢𑀭𑀺𑀲𑁆𑀲𑀸 𑀕𑀳𑁂𑀢𑁆𑀯𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭𑁦𑁯-𑁭𑁨𑁭. 𑀲𑀢𑁆𑀢𑀫𑀢𑁄 𑀬𑀸𑀯𑀤𑀲𑀫𑀧𑀭𑀺𑀬𑁄𑀲𑀸𑀦𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁩. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁

𑁨. 𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀸𑀤𑀺𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁩𑁩. 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼𑀧𑀺 ¶ ¶ 𑀧𑀞𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁭𑁪𑁦. 𑀤𑀼𑀢𑀺𑀬𑁂 𑀅𑀬𑁆𑀬𑀸𑀬 𑀤𑀫𑁆𑀫𑀻𑀢𑀺 𑀏𑀯𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀁, 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸𑀧𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀁, 𑀢𑀢𑁆𑀣𑁂𑀯 𑀤𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀣𑀸𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩’’𑀦𑁆𑀢𑀺. 𑀅𑀓𑀸𑀮𑀘𑀻𑀯𑀭𑀢𑀸, 𑀢𑀁 𑀜𑀢𑁆𑀯𑀸 𑀓𑀸𑀮𑀘𑀻𑀯𑀭𑀦𑁆𑀢𑀺 𑀮𑁂𑀲𑁂𑀦 𑀪𑀸𑀚𑀸𑀧𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑁭𑁪𑁩. 𑀢𑀢𑀺𑀬𑁂 𑀫𑁂𑀢𑀦𑁆𑀢𑀺 𑀫𑀫𑁂𑀯𑁂𑀢𑀁 𑀘𑀻𑀯𑀭𑀁. 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀧𑀭𑀺𑀯𑀢𑁆𑀢𑀺𑀢𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀲𑁆𑀲 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀤𑀦𑀸𑀤𑀻𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁭𑁪𑁮-𑁭𑁫𑁨. 𑀘𑀢𑀼𑀢𑁆𑀣𑁂 𑀆𑀳𑀝𑀲𑀧𑁆𑀧𑀺𑀁 𑀤𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀤𑀢𑁆𑀯𑀸. 𑀬𑀫𑀓𑀁 𑀧𑀘𑀺𑀢𑀩𑁆𑀩𑀦𑁆𑀢𑀺 𑀲𑀧𑁆𑀧𑀺𑀜𑁆𑀘 𑀢𑁂𑀮𑀜𑁆𑀘 𑀏𑀓𑀢𑁄 𑀧𑀘𑀺𑀢𑀩𑁆𑀩𑀁. 𑀮𑁂𑀲𑁂𑀦 𑀕𑀳𑁂𑀢𑀼𑀓𑀸𑀫𑀢𑀸, 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀢𑁆𑀢𑀺, 𑀧𑀝𑀺𑀮𑀸𑀪𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑁭𑁫𑁩. 𑀧𑀜𑁆𑀘𑀫𑁂 𑀲𑀸𑀢𑀺 𑀣𑀼𑀮𑁆𑀮𑀦𑀦𑁆𑀤𑀸. 𑀅𑀬𑀦𑁆𑀢𑀺 𑀲𑀺𑀓𑁆𑀔𑀫𑀸𑀦𑀸. 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀁, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 ‘𑀇𑀤𑀁 𑀦𑀸𑀫 𑀆𑀳𑀭𑀸’𑀢𑀺 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀅𑀜𑁆𑀜𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁.

𑁭𑁫𑁮. 𑀙𑀝𑁆𑀞𑁂 𑀧𑀸𑀯𑀸𑀭𑀺𑀓𑀲𑁆𑀲𑀸𑀢𑀺 𑀤𑀼𑀲𑁆𑀲𑀯𑀸𑀡𑀺𑀚𑀓𑀲𑁆𑀲.

𑁭𑁬𑁪. 𑀲𑀢𑁆𑀢𑀫𑁂 ¶ 𑀲𑀜𑁆𑀜𑀸𑀘𑀺𑀢𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦𑀧𑀻𑀢𑀺 𑀅𑀢𑁆𑀣𑁄.

𑁭𑁬𑁯-𑁭𑁮𑁯. 𑀅𑀝𑁆𑀞𑀫𑀢𑁄 𑀬𑀸𑀯𑀤𑁆𑀯𑀸𑀤𑀲𑀫𑀸 𑀉𑀢𑁆𑀢𑀸𑀦𑀫𑁂𑀯.

𑀦𑀺𑀲𑁆𑀲𑀕𑁆𑀕𑀺𑀬𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁪. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀧𑀞𑀫𑀮𑀲𑀼𑀡𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁯𑁭. 𑀧𑀸𑀘𑀺𑀢𑁆𑀢𑀺𑀬𑁂𑀲𑀼 ¶ ¶ 𑀮𑀲𑀼𑀡𑀯𑀕𑁆𑀕𑀲𑁆𑀲 𑀧𑀞𑀫𑁂 𑀩𑀤𑀭𑀲𑀸𑀴𑀯𑀁 𑀦𑀸𑀫 𑀩𑀤𑀭𑀨𑀮𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑁂𑀳𑀺 𑀓𑀢𑁆𑀢𑀩𑁆𑀩𑀩𑁆𑀬𑀜𑁆𑀚𑀦𑀯𑀺𑀓𑀢𑀺. 𑀆𑀫𑀓𑀫𑀸𑀕𑀥𑀮𑀲𑀼𑀡𑀜𑁆𑀘𑁂𑀯, 𑀅𑀚𑁆𑀛𑁄𑀳𑀭𑀡𑀜𑁆𑀘𑀸𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁭𑁯𑁯-𑁮𑁧𑁨. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺.

𑁮𑁧𑁫. 𑀙𑀝𑁆𑀞𑁂 𑀧𑀸𑀴𑀺𑀬𑀁 𑀆𑀲𑀼𑀫𑁆𑀪𑀺𑀢𑁆𑀯𑀸𑀢𑀺 𑀧𑀸𑀢𑁂𑀢𑁆𑀯𑀸.

𑁮𑁧𑁭. 𑀤𑀥𑀺𑀫𑀢𑁆𑀣𑀽𑀢𑀺 𑀤𑀥𑀺𑀫𑁆𑀳𑀺 𑀧𑀲𑀦𑁆𑀦𑁄𑀤𑀓𑀁. 𑀭𑀲𑀔𑀻𑀭𑀸𑀤𑀻𑀦𑀦𑁆𑀢𑀺 𑀫𑀁𑀲𑀭𑀲𑀔𑀻𑀭𑀸𑀤𑀻𑀦𑀁. 𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑀧𑀸𑀲𑁂 𑀞𑀸𑀦𑀁, 𑀧𑀸𑀦𑀻𑀬𑀲𑁆𑀲 𑀯𑀸 𑀯𑀺𑀥𑀽𑀧𑀦𑀲𑁆𑀲 𑀯𑀸 𑀕𑀳𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁮𑁨𑁨. 𑀲𑀢𑁆𑀢𑀫𑁂 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀦𑀸 𑀮𑀤𑁆𑀥𑀁. 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀦𑁆𑀢𑀺 𑀲𑀬𑀁 𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀇𑀤𑀁 𑀓𑀸𑀭𑀸𑀧𑀦𑁂 𑀤𑀼𑀓𑁆𑀓𑀝𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺, ‘‘𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥’’𑀦𑁆𑀢𑀺𑀆𑀤𑀺𑀯𑀘𑀦𑁂𑀦 𑀯𑀸 𑀯𑀺𑀭𑀼𑀚𑁆𑀛𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀬 𑀯𑀺𑀜𑁆𑀜𑀢𑁆𑀢𑀺𑀧𑀺 𑀳𑀺 𑀇𑀫𑀺𑀲𑁆𑀲𑀸 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀫𑁂𑀯𑀸𑀢𑀺. 𑀆𑀫𑀓𑀥𑀜𑁆𑀜𑀯𑀺𑀜𑁆𑀜𑀸𑀧𑀦𑀸𑀤𑀺, 𑀢𑀁 𑀪𑀚𑁆𑀚𑀦𑀸𑀤𑀺𑀦𑀸 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁮𑁨𑁪. 𑀅𑀝𑁆𑀞𑀫𑁂 𑀦𑀺𑀩𑁆𑀩𑀺𑀝𑁆𑀞𑁄𑀢𑀺 𑀮𑀤𑁆𑀥𑁄. 𑀓𑁂𑀡𑀻𑀢𑀺 𑀭𑀜𑁆𑀜𑁄 𑀤𑀸𑀢𑀩𑁆𑀩𑁄 𑀆𑀬𑁄, 𑀆𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄 ¶ . 𑀢𑁂𑀦𑀸𑀳 ‘‘𑀏𑀓𑀁 𑀞𑀸𑀦𑀦𑁆𑀢𑀭’’𑀦𑁆𑀢𑀺𑀆𑀤𑀺. 𑀞𑀸𑀦𑀦𑁆𑀢𑀭𑀦𑁆𑀢𑀺 𑀘 𑀕𑀸𑀫𑀚𑀦𑀧𑀤𑀸𑀡𑀸𑀬𑀢𑁆𑀢𑀁. 𑀯𑀴𑀜𑁆𑀚𑀺𑀬𑀫𑀸𑀦𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀢𑀸, 𑀅𑀦𑀧𑀮𑁄𑀓𑁂𑀢𑁆𑀯𑀸 𑀉𑀘𑁆𑀘𑀸𑀭𑀸𑀤𑀻𑀦𑀁 𑀙𑀟𑁆𑀟𑀦𑀸𑀤𑀻𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁮𑁩𑁦. 𑀦𑀯𑀫𑁂 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑀭𑀺𑀢𑀽𑀧𑀭𑀺 𑀙𑀟𑁆𑀟𑀦𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂𑀲𑀽’’𑀢𑀺𑀆𑀤𑀺. 𑀬𑀢𑁆𑀣 𑀘 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣 𑀳𑀭𑀺𑀢𑁂 𑀯𑀘𑁆𑀘𑀸𑀤𑀺𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯. 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁.

𑁮𑁩𑁬-𑁭. 𑀤𑀲𑀫𑁂 ¶ 𑀢𑁂𑀲𑀁𑀬𑁂𑀯𑀸𑀢𑀺 𑀬𑁂𑀲𑀁 𑀦𑀺𑀘𑁆𑀘𑀁 𑀧𑀲𑁆𑀲𑀢𑀺. 𑀆𑀭𑀸𑀫𑁂 𑀞𑀢𑁆𑀯𑀸𑀢𑀺 𑀞𑀺𑀢𑀦𑀺𑀲𑀦𑁆𑀦𑀝𑁆𑀞𑀸𑀦𑁂 𑀏𑀯 𑀞𑀢𑁆𑀯𑀸 𑀲𑀫𑀦𑁆𑀢𑀢𑁄 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀞𑀺𑀢𑀝𑁆𑀞𑀸𑀦𑀢𑁄 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 ‘‘𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀕𑀫𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀦𑀸𑀧𑀢𑁆𑀢𑀺𑀬𑀫𑁆𑀧𑀺 𑀕𑀫𑀦𑀸𑀬 𑀅𑀯𑀼𑀢𑁆𑀢𑀢𑁆𑀢𑀸 𑀘 𑀦 𑀕𑀳𑁂𑀢𑀩𑁆𑀩𑀁. 𑀦𑀘𑁆𑀘𑀸𑀤𑀺𑀢𑀸, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀕𑀫𑀦𑀁, 𑀤𑀲𑁆𑀲𑀦𑀸𑀤𑀺 𑀘𑀸𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀦𑀺𑀝𑁆𑀞𑀺𑀢𑁄 𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀦𑁆𑀥𑀓𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁪𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀤𑀸𑀦𑁂 𑀯𑀸𑀢𑀺 𑀤𑀸𑀦𑀦𑀺𑀫𑀺𑀢𑁆𑀢𑀁. 𑀭𑀢𑁆𑀢𑀦𑁆𑀥𑀓𑀸𑀭𑁂 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀸𑀦𑀸𑀤𑀺, 𑀭𑀳𑁄𑀧𑁂𑀓𑁆𑀔𑀸, 𑀲𑀳𑀸𑀬𑀸𑀪𑀸𑀯𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑁮𑁪𑁨-𑁮𑁫𑁦. 𑀤𑀼𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀸𑀦𑀺.

𑁮𑁫𑁪. 𑀧𑀜𑁆𑀘𑀫𑁂 𑀧𑀮𑁆𑀮𑀗𑁆𑀓𑀲𑁆𑀲 𑀅𑀦𑁄𑀓𑀸𑀲𑁂𑀢𑀺 𑀊𑀭𑀼𑀩𑀤𑁆𑀥𑀸𑀲𑀦𑀲𑁆𑀲 𑀅𑀧𑁆𑀧𑀳𑁄𑀦𑀓𑁂. 𑀧𑀼𑀭𑁂𑀪𑀢𑁆𑀢𑀁 𑀅𑀦𑁆𑀢𑀭𑀖𑀭𑁂 𑀧𑀮𑁆𑀮𑀗𑁆𑀓𑀧𑁆𑀧𑀳𑁄𑀦𑀓𑀸𑀲𑀦𑁂 𑀦𑀺𑀲𑀚𑁆𑀚𑀸, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀅𑀦𑀸𑀧𑀼𑀘𑁆𑀙𑀸 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁮𑁬𑁦-𑁮𑁭𑁯. 𑀙𑀝𑁆𑀞𑀸𑀤𑀻𑀦𑀺 ¶ 𑀉𑀢𑁆𑀢𑀸𑀦𑀸𑀦𑀺.

𑀦𑀺𑀝𑁆𑀞𑀺𑀢𑁄 𑀅𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀦𑀕𑁆𑀕𑀯𑀕𑁆𑀕𑁄

𑁧. 𑀧𑀞𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁮𑁩-𑁮𑁮𑁭. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑀤𑀼𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀸𑀦𑀺.

𑁮𑁯𑁩. 𑀢𑀢𑀺𑀬𑁂 𑀯𑀺𑀲𑀺𑀩𑁆𑀩𑁂𑀢𑁆𑀯𑀸𑀢𑀺 𑀯𑀺𑀚𑀝𑁂𑀢𑁆𑀯𑀸. 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀯𑀺𑀲𑀺𑀩𑁆𑀩𑀦𑀤𑀺𑀯𑀲𑀢𑁄 𑀧𑀜𑁆𑀘 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂. 𑀅𑀦𑁆𑀢𑁄𑀧𑀜𑁆𑀘𑀸𑀳𑁂 𑀧𑀦 𑀥𑀼𑀭𑀦𑀺𑀓𑁆𑀔𑁂𑀧𑁂𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯 ‘‘𑀅𑀜𑁆𑀜𑀢𑁆𑀭 𑀘𑀢𑀽𑀳𑀧𑀜𑁆𑀘𑀸𑀳𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ¶ . 𑀉𑀧𑀲𑀫𑁆𑀧𑀦𑁆𑀦𑀸𑀬 𑀘𑀻𑀯𑀭𑀁 𑀲𑀺𑀩𑁆𑀩𑀦𑀢𑁆𑀣𑀸𑀬 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀧𑀜𑁆𑀘𑀳𑀸𑀢𑀺𑀓𑁆𑀓𑀫𑁄, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁯𑁦𑁦. 𑀘𑀢𑀼𑀢𑁆𑀣𑁂 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀧𑀭𑀺𑀯𑀢𑁆𑀢𑀦𑀁, 𑀅𑀦𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀧𑀜𑁆𑀘𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁯𑁦𑁩. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁯𑁦𑁯. 𑀙𑀝𑁆𑀞𑁂 𑀯𑀺𑀓𑀧𑁆𑀧𑀦𑀼𑀧𑀕𑀲𑁆𑀲 𑀲𑀗𑁆𑀖𑁂 𑀧𑀭𑀺𑀡𑀢𑀢𑀸, 𑀯𑀺𑀦𑀸 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀅𑀦𑁆𑀢𑀭𑀸𑀬𑀓𑀭𑀡𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁯𑁧𑁧. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁯𑁧𑁬. 𑀅𑀝𑁆𑀞𑀫𑁂 𑀓𑀼𑀫𑁆𑀪𑀣𑀽𑀡𑀁 𑀦𑀸𑀫 𑀓𑀼𑀫𑁆𑀪𑀲𑀤𑁆𑀤𑁄, 𑀢𑁂𑀦 𑀓𑀻𑀴𑀦𑁆𑀢𑀻𑀢𑀺 𑀓𑀼𑀫𑁆𑀪𑀣𑀽𑀡𑀺𑀓𑀸. 𑀢𑁂𑀦𑀸𑀳 ‘‘𑀖𑀝𑀓𑁂𑀦 𑀓𑀻𑀴𑀦𑀓𑀸’’𑀢𑀺. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀢𑀸𑀴’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀭𑀼𑀓𑁆𑀔𑀲𑀸𑀭𑀸𑀤𑀺𑀫𑀬𑀁 𑀅𑀦𑁆𑀢𑁄𑀙𑀺𑀤𑁆𑀤𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀘𑀫𑁆𑀫𑁄𑀦𑀤𑁆𑀥𑀁 𑀯𑀸𑀤𑀺𑀢𑀪𑀡𑁆𑀟𑀁, 𑀬𑀁 ‘‘𑀩𑀺𑀫𑁆𑀩𑀺𑀲𑀓’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀸𑀤𑁂𑀦𑁆𑀢𑀸𑀧𑀺 𑀓𑀼𑀫𑁆𑀪𑀣𑀽𑀡𑀺𑀓𑀸. 𑀢𑁂𑀦𑀸𑀳 ‘‘𑀩𑀺𑀫𑁆𑀩𑀺𑀲𑀓𑀯𑀸𑀤𑀺𑀢𑀓𑀸𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺.

𑁯𑁧𑁮. 𑀧𑀸𑀴𑀺𑀬𑀁 ¶ 𑀓𑀧𑁆𑀧𑀓𑀢𑀦𑁆𑀢𑀺 𑀓𑀧𑁆𑀧𑀓𑀢𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀽𑀧𑀕𑀁. 𑀲𑀫𑀡𑀘𑀻𑀯𑀭𑀢𑀸, 𑀅𑀦𑀦𑀼𑀜𑁆𑀜𑀸𑀢𑀸𑀦𑀁 𑀤𑀸𑀦𑀦𑁆𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑁯𑁨𑁧-𑁯𑁩𑁧. 𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑀦𑀺𑀝𑁆𑀞𑀺𑀢𑁄 𑀦𑀕𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀢𑀼𑀯𑀝𑁆𑀝𑀯𑀕𑁆𑀕𑁄

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁭𑁬. 𑀢𑀼𑀯𑀝𑁆𑀝𑀯𑀕𑁆𑀕𑀲𑁆𑀲 𑀤𑀲𑀫𑁂 𑀘𑀸𑀭𑀺𑀓𑀸𑀬 𑀅𑀧𑀓𑁆𑀓𑀫𑀦𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀫𑁂𑀯. 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀢𑀁 𑀲𑀦𑁆𑀥𑀸𑀬 𑀧𑀦𑁂𑀢𑁆𑀣 ‘‘𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀦𑀺𑀝𑁆𑀞𑀺𑀢𑁄 𑀢𑀼𑀯𑀝𑁆𑀝𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁭𑁮. 𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀧𑀸𑀝𑁂𑀓𑁆𑀓𑀸 𑀆𑀧𑀢𑁆𑀢𑀺𑀬𑁄𑀢𑀺 𑀕𑀻𑀯𑀸𑀬 𑀧𑀭𑀺𑀯𑀢𑁆𑀢𑀦𑀧𑁆𑀧𑀬𑁄𑀕𑀕𑀡𑀦𑀸𑀬.

𑁧𑁦𑁧𑁫. 𑀦𑀯𑀫𑁂 𑀳𑀢𑁆𑀣𑀺𑀆𑀤𑀻𑀲𑀼 𑀲𑀺𑀧𑁆𑀧-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄, 𑀢𑀣𑀸 𑀆𑀣𑀩𑁆𑀩𑀡𑀸𑀤𑀻𑀲𑀼 𑀫𑀦𑁆𑀢-𑀲𑀤𑁆𑀤𑁄. 𑀢𑀢𑁆𑀣 𑀆𑀣𑀩𑁆𑀩𑀡𑀫𑀦𑁆𑀢𑁄 𑀦𑀸𑀫 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑁄 𑀧𑀭𑀽𑀧𑀖𑀸𑀢𑀓𑀭𑁄 𑀫𑀦𑁆𑀢𑁄. 𑀔𑀻𑀮𑀦𑀫𑀦𑁆𑀢𑁄 𑀦𑀸𑀫 𑀯𑁂𑀭𑀺𑀫𑀸𑀭𑀡𑀢𑁆𑀣𑀸𑀬 𑀲𑀸𑀭𑀤𑀸𑀭𑀼𑀫𑀬𑀁 𑀔𑀻𑀮𑀁 𑀫𑀦𑁆𑀢𑁂𑀢𑁆𑀯𑀸 𑀧𑀣𑀯𑀺𑀬𑀁 𑀆𑀓𑁄𑀝𑀦𑀫𑀦𑁆𑀢𑁄. 𑀅𑀕𑀤𑀧𑁆𑀧𑀬𑁄𑀕𑁄 𑀯𑀺𑀲𑀧𑁆𑀧𑀬𑁄𑀚𑀦𑀁. 𑀦𑀸𑀕𑀫𑀡𑁆𑀟𑀮𑀦𑁆𑀢𑀺 𑀲𑀧𑁆𑀧𑀸𑀦𑀁 𑀧𑀯𑁂𑀲𑀦𑀺𑀯𑀸𑀭𑀡𑀢𑁆𑀣𑀁 𑀫𑀡𑁆𑀟𑀮𑀩𑀦𑁆𑀥𑀫𑀦𑁆𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀦𑀺𑀝𑁆𑀞𑀺𑀢𑁄 𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁧𑁦𑁨𑁫-𑁧𑁧𑁧𑁬. 𑀆𑀭𑀸𑀫𑀯𑀕𑁆𑀕𑁂 ¶ , 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 𑀘 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄

𑁧. 𑀧𑀞𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁧𑁯. 𑀅𑀝𑁆𑀞𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀩𑁆𑀩𑀧𑀞𑀫𑀸 𑀤𑁆𑀯𑁂 𑀫𑀳𑀸𑀲𑀺𑀓𑁆𑀔𑀫𑀸𑀦𑀸𑀢𑀺 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 (𑀧𑀸𑀘𑀺. 𑁧𑁦𑁬𑁭 𑀆𑀤𑀬𑁄) 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀸 𑀤𑁆𑀯𑁂. 𑀲𑀺𑀓𑁆𑀔𑀫𑀸𑀦𑀸 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀤𑀻𑀲𑀼 𑀅𑀜𑁆𑀜𑀣𑀸 𑀯𑀼𑀢𑁆𑀢𑁂 𑀓𑀫𑁆𑀫𑀁 𑀓𑀼𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁬𑁭. 𑀏𑀓𑀸𑀤𑀲𑀫𑁂 𑀧𑀸𑀭𑀺𑀯𑀸𑀲𑀺𑀬𑁂𑀦 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀧𑀭𑀺𑀯𑀼𑀢𑁆𑀣𑁂𑀦 𑀦𑀯𑀺𑀓𑀧𑁆𑀧𑀯𑀼𑀢𑁆𑀣𑁂𑀦 𑀯𑀺𑀕𑀢𑁂𑀦 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀙𑀦𑁆𑀤𑀯𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑁂𑀦 𑀯𑀸.

𑁧𑁧𑁬𑁮. ‘‘𑀯𑀼𑀝𑁆𑀞𑀺𑀢𑀸𑀬𑀸’’𑀢𑀺 𑀏𑀢𑁂𑀦 ‘‘𑀇𑀤𑀸𑀦𑀺 𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀬𑁂𑀦 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬𑀧𑀺 𑀧𑀭𑀺𑀲𑀸𑀬 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑀸𑀬𑀸’’𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀺 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 ¶ , 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀘 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸’’𑀢𑀺 (𑀫𑀳𑀸𑀯. 𑁧𑁮𑁩) 𑀯𑀼𑀢𑁆𑀢𑀢𑁆𑀢𑀸, 𑀢𑀤𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀧𑀸𑀭𑀺𑀯𑀸𑀲𑀺𑀬𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀁 𑀦𑀸𑀫 𑀧𑀭𑀺𑀲𑀸𑀬 𑀯𑀼𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀺, 𑀅𑀯𑀼𑀝𑁆𑀞𑀺𑀢𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁩) 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬𑀧𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀦𑀺𑀝𑁆𑀞𑀺𑀢𑁄 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁧𑁧𑁮𑁧. 𑀙𑀢𑁆𑀢𑀯𑀕𑁆𑀕𑁄 𑀉𑀢𑁆𑀢𑀸𑀦𑁄 𑀏𑀯.

𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁫. 𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀁

𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁨𑁮. 𑀧𑀸𑀝𑀺𑀤𑁂𑀲𑀦𑀻𑀬𑀸𑀤𑀻𑀲𑀼 ¶ ¶ 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀓𑁂𑀲𑀽𑀢𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑁂𑀲𑀼 𑀲𑀧𑁆𑀧𑀺𑀆𑀤𑀻𑀲𑀼.

𑀲𑀢𑁆𑀢𑀸𑀥𑀺𑀓𑀭𑀡𑀯𑁆𑀳𑀬𑀸𑀢𑀺 𑀲𑀢𑁆𑀢𑀸𑀥𑀺𑀓𑀭𑀡𑀲𑀫𑀣𑀦𑀸𑀫𑀓𑀸. 𑀢𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀢𑀸𑀤𑀺𑀲𑀁𑀬𑁂𑀯 𑀬𑀲𑁆𑀫𑀸 𑀯𑀺𑀤𑀽 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀦𑀺𑀝𑁆𑀞𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀸𑀲𑀯𑀧𑀳𑀦𑁆𑀢𑀺 𑀲𑀩𑁆𑀩𑀸𑀲𑀯𑀯𑀺𑀖𑀸𑀢𑀓𑀁 𑀅𑀭𑀳𑀢𑁆𑀢𑀫𑀕𑁆𑀕𑀁. 𑀧𑀲𑁆𑀲𑀦𑁆𑀢𑀼 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀫𑀕𑁆𑀕𑀜𑀸𑀡𑁂𑀦 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀼, 𑀧𑀧𑁆𑀧𑁄𑀦𑁆𑀢𑀽𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀦𑀺𑀩𑁆𑀩𑀼𑀢𑀺𑀦𑁆𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀕𑀳𑁂𑀢𑀩𑁆𑀩𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀉𑀪𑀢𑁄𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸

𑁧. 𑀫𑀳𑀸𑀔𑀦𑁆𑀥𑀓𑁄

𑀩𑁄𑀥𑀺𑀓𑀣𑀸𑀯𑀡𑁆𑀡𑀦𑀸

𑀫𑀳𑀸𑀯𑀕𑁆𑀕𑁂 ¶ ¶ 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀯𑀺𑀪𑀗𑁆𑀕𑀸𑀦𑀁. 𑀬𑀁 𑀔𑀦𑁆𑀥𑀓𑀁 𑀲𑀗𑁆𑀕𑀸𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄, 𑀔𑀦𑁆𑀥𑀸𑀦𑀁 𑀯𑀸 𑀧𑀓𑀸𑀲𑀦𑀢𑁄 𑀔𑀦𑁆𑀥𑀓𑁄. 𑀔𑀦𑁆𑀥𑀸𑀢𑀺 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀸𑀤𑀺𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀽𑀳𑁄 𑀅𑀥𑀺𑀧𑁆𑀧𑁂𑀢𑁄. 𑀧𑀤𑀪𑀸𑀚𑀦𑀻𑀬𑁂 𑀬𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑀸 𑀬𑁂𑀳𑀺 𑀅𑀝𑁆𑀞𑀓𑀣𑀸𑀦𑀬𑁂𑀳𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀬𑁂 𑀅𑀢𑁆𑀣𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀳𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀤𑀧𑀽𑀭𑀡𑁂 𑀤𑀝𑁆𑀞𑀩𑁆𑀩𑁄.

𑁧. 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 ‘‘𑀬𑁂𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 ¶ 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀓𑀸𑀭𑀡𑀁 𑀯𑀺𑀬 𑀯𑀺𑀲𑁂𑀲𑀓𑀸𑀭𑀡𑀁 𑀪𑀼𑀫𑁆𑀫𑀯𑀘𑀦𑀦𑀺𑀯𑀢𑁆𑀢𑀦𑀓𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲𑀸𑀢𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀼 𑀘𑀭𑀺𑀬𑀸𑀯𑀺𑀪𑀸𑀯𑀦𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀓𑀺𑀁 𑀧𑀬𑁄𑀚𑀦𑀁? 𑀬𑀤𑀺 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀤𑀸𑀦𑀤𑀲𑁆𑀲𑀦𑀁 𑀧𑀬𑁄𑀚𑀦𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀤𑀸𑀦𑀦𑁆𑀢𑀺𑀘𑁂𑀢𑁆𑀣 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀯𑀢𑁆𑀣𑀼𑀧𑀼𑀕𑁆𑀕𑀮𑀸𑀤𑀺𑀓𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀬𑀸 𑀳𑀻’’𑀢𑀺𑀆𑀤𑀺.

𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀏𑀢𑁆𑀣 𑀉𑀭𑀼-𑀲𑀤𑁆𑀤𑁄 𑀫𑀳𑀦𑁆𑀢𑀯𑀸𑀘𑀻. 𑀯𑁂𑀮𑀸-𑀲𑀤𑁆𑀤𑁄 𑀢𑀻𑀭𑀧𑀭𑀺𑀬𑀸𑀬𑁄. 𑀉𑀦𑁆𑀦𑀢𑀢𑁆𑀢𑀸𑀤𑀺𑀦𑀸 𑀯𑁂𑀮𑀸 𑀯𑀺𑀬 𑀯𑁂𑀮𑀸. 𑀉𑀭𑀼 𑀫𑀳𑀦𑁆𑀢𑀻 𑀯𑁂𑀮𑀸 𑀉𑀭𑀼𑀯𑁂𑀮𑀸, 𑀢𑀲𑁆𑀲𑀁. 𑀢𑁂𑀦𑀸𑀳 ‘‘𑀫𑀳𑀸𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺. 𑀫𑀭𑀺𑀬𑀸𑀤𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀻𑀫𑀸. 𑀧𑀢𑁆𑀢𑀧𑀼𑀝𑁂𑀦𑀸𑀢𑀺 𑀢𑀸𑀮𑀸𑀤𑀻𑀦𑀁 𑀧𑀡𑁆𑀡𑀧𑀼𑀝𑁂𑀦.

‘‘𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀞𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀧𑀞𑀫𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀢𑀲𑁆𑀫𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 ¶ 𑀳𑀼𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀭𑀢𑀻𑀢𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀧𑀸𑀴𑀺𑀬𑀁 𑀅𑀣 𑀔𑁄𑀢𑀺 𑀏𑀢𑁆𑀣 𑀅𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁. 𑀲𑀢𑁆𑀢𑀸𑀳𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀣 𑀔𑁄𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀁 𑀧𑀳𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑁂 𑀅𑀥𑀺𑀓𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀘𑁆𑀘𑀸𑀢𑀺 𑀧𑀝𑀺𑀫𑀼𑀔𑀁 𑀕𑀦𑁆𑀢𑁆𑀯𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀓𑀸𑀭𑀡𑀩𑀳𑀼𑀢𑀸 𑀤𑀲𑁆𑀲𑀺𑀢𑀸. 𑀲𑀳𑀺𑀢𑁂𑀢𑀺 𑀓𑀸𑀭𑀺𑀬𑀩𑀳𑀼𑀢𑀸. 𑀅𑀦𑀼𑀮𑁄𑀫𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑁆𑀯𑁂𑀯𑀸𑀢𑀺 𑀲𑁄 𑀏𑀯 𑀧𑀘𑁆𑀘𑀬𑀸𑀓𑀸𑀭𑁄. 𑀧𑀼𑀭𑀺𑀫𑀦𑀬𑁂𑀦 𑀯𑀸 𑀯𑀼𑀢𑁆𑀢𑁄𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀧𑀘𑁆𑀘𑀬𑀸𑀓𑀸𑀭𑁄. 𑀧𑀯𑀢𑁆𑀢𑀺𑀬𑀸𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸.

𑀧𑀸𑀴𑀺𑀬𑀁 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸. 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀲𑀗𑁆𑀔𑀸𑀭𑀸. 𑀮𑁄𑀓𑀺𑀬𑀯𑀺𑀧𑀸𑀓𑀫𑁂𑀯 𑀯𑀺𑀜𑁆𑀜𑀸𑀡𑀁. 𑀮𑁄𑀓𑀺𑀬𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁 𑀦𑀸𑀫𑀁, 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀁 𑀭𑀽𑀧𑀁. 𑀧𑀲𑀸𑀤𑀯𑀺𑀜𑁆𑀜𑀸𑀡𑀪𑁂𑀤𑀁 𑀲𑀴𑀸𑀬𑀢𑀦𑀁. 𑀯𑀺𑀧𑀸𑀓𑀪𑀽𑀢𑁄 𑀲𑀩𑁆𑀩𑁄 𑀨𑀲𑁆𑀲𑁄, 𑀯𑁂𑀤𑀦𑀸 𑀘. 𑀭𑀸𑀕𑁄 𑀢𑀡𑁆𑀳𑀸. 𑀩𑀮𑀯𑀭𑀸𑀕𑁄, 𑀢𑀺𑀯𑀺𑀥𑀸 𑀘 𑀤𑀺𑀝𑁆𑀞𑀺 𑀉𑀧𑀸𑀤𑀸𑀦𑀁. 𑀪𑀯𑁄 𑀧𑀦 𑀤𑀼𑀯𑀺𑀥𑁄 𑀓𑀫𑁆𑀫𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑁄 𑀘. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯, 𑀉𑀧𑀧𑀢𑁆𑀢𑀺𑀪𑀯𑁄 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸. 𑀢𑁂𑀲𑀁 𑀉𑀧𑀧𑀢𑁆𑀢𑀺 𑀚𑀸𑀢𑀺. 𑀧𑀸𑀓𑁄 𑀚𑀭𑀸. 𑀪𑁂𑀤𑁄 𑀫𑀭𑀡𑀁. 𑀢𑁂 𑀏𑀯 𑀦𑀺𑀲𑁆𑀲𑀸𑀬 𑀲𑁄𑀘𑀦𑀁 𑀲𑁄𑀓𑁄. 𑀓𑀦𑁆𑀤𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀁 𑀓𑀸𑀬𑀺𑀓𑀁. 𑀤𑁄𑀫𑀦𑀲𑁆𑀲𑀁 𑀘𑁂𑀢𑀲𑀺𑀓𑀁. 𑀅𑀢𑀺𑀯𑀺𑀬 𑀲𑁄𑀓𑁄 𑀉𑀧𑀸𑀬𑀸𑀲𑁄.

𑀧𑀘𑁆𑀘𑁂𑀓𑀜𑁆𑀘 ¶ 𑀲𑀫𑁆𑀪𑀯𑀢𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺𑀆𑀤𑀺. ‘‘𑀤𑀼𑀓𑁆𑀔𑀭𑀸𑀲𑀺𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦 𑀲𑀢𑁆𑀢𑀲𑁆𑀲. 𑀦𑀸𑀧𑀺 𑀲𑀼𑀪𑀲𑀼𑀔𑀸𑀤𑀻𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀳𑀯𑁂𑀢𑀺 𑀩𑁆𑀬𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. ‘‘𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀲𑀸𑀥𑀓𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸’’𑀢𑀺 𑀇𑀤𑀁 𑀧𑀞𑀫𑀯𑀸𑀭𑁂 𑀓𑀺𑀜𑁆𑀘𑀸𑀧𑀺 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑁄𑀧𑀺 𑀆𑀕𑀢𑁄, 𑀢𑀣𑀸𑀧𑀺 ‘‘𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀲𑁆𑀲𑁂𑀯 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀤𑀼𑀢𑀺𑀬𑀯𑀸𑀭𑁂𑀧𑀺 ‘‘𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻’’𑀢𑀺 𑀕𑀸𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀘𑁆𑀘𑀬𑀸𑀦𑀁 𑀔𑀬𑀲𑀗𑁆𑀔𑀸𑀢’’𑀦𑁆𑀢𑀺𑀆𑀤𑀺 ¶ 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀅𑀬𑀼𑀢𑁆𑀢𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄, 𑀅𑀯𑀺𑀚𑁆𑀚𑀫𑀸𑀦𑀁 𑀅𑀢𑁆𑀢𑀸𑀦𑀁 𑀲𑀺𑀤𑁆𑀥𑀁 𑀓𑀢𑁆𑀯𑀸 ‘‘𑀓𑁄 𑀨𑀼𑀲𑀢𑀻’’𑀢𑀺 𑀢𑀲𑁆𑀲 𑀓𑀺𑀭𑀺𑀬𑀸𑀬 𑀧𑀼𑀝𑁆𑀞𑀢𑁆𑀢𑀸 ‘‘𑀓𑁄 𑀯𑀜𑁆𑀛𑀸𑀧𑀼𑀢𑁆𑀢𑁄 𑀨𑀼𑀲𑀢𑀻’’𑀢𑀺𑀆𑀤𑀺 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀴𑀲 𑀓𑀗𑁆𑀔𑀸𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀅𑀳𑁄𑀲𑀺𑀁, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁, 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀏𑀯𑀁 𑀆𑀕𑀢𑀸 𑀅𑀢𑀻𑀢𑁂 𑀧𑀜𑁆𑀘, 𑀅𑀦𑀸𑀕𑀢𑁂 𑀧𑀜𑁆𑀘, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀸𑀢𑀺 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸.

𑀢𑀢𑁆𑀣 𑀓𑀺𑀁 𑀦𑀼 𑀔𑁄𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀤𑀻𑀲𑀼, 𑀔𑀢𑁆𑀢𑀺𑀬𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀦𑀺𑀲𑁆𑀲𑀸𑀬 𑀓𑀗𑁆𑀔𑀢𑀺. 𑀓𑀣𑀁 𑀦𑀼 𑀔𑁄𑀢𑀺 𑀧𑀦 𑀲𑀡𑁆𑀞𑀸𑀦𑀸𑀓𑀸𑀭𑀸𑀤𑀻𑀲𑀼 𑀇𑀲𑁆𑀲𑀭𑀸𑀤𑀺𑀚𑀦𑀓𑀁, 𑀓𑀸𑀭𑀡𑀁 𑀯𑀸 𑀦𑀺𑀲𑁆𑀲𑀸𑀬. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀦𑁆𑀢𑀺 𑀘 𑀫𑀦𑀼𑀲𑁆𑀲𑀸𑀤𑀻𑀲𑀼 𑀧𑀞𑀫𑀁 𑀓𑀺𑀁 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀓𑀺𑀁 𑀅𑀳𑁄𑀲𑀺𑀦𑁆𑀢𑀺 𑀓𑀗𑁆𑀔𑀢𑀺. 𑀅𑀳𑀁 𑀦𑀼 𑀔𑁄𑀲𑁆𑀫𑀻𑀢𑀺𑀆𑀤𑀺 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀢𑀁, 𑀲𑀭𑀽𑀧𑀧𑀓𑀸𑀭𑀸𑀤𑀺𑀓𑀜𑁆𑀘 𑀓𑀗𑁆𑀔𑀢𑀺. 𑀯𑀧𑀬𑀦𑁆𑀢𑀻𑀢𑀺 𑀯𑀺𑀅𑀧𑀬𑀦𑁆𑀢𑀺 𑀩𑁆𑀬𑀧𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀧𑀕𑀘𑁆𑀙𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺.

𑁩. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀧𑀚𑀸𑀦𑀦𑀲𑁆𑀲, 𑀧𑀘𑁆𑀘𑀬𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀘 𑀯𑀲𑁂𑀦. 𑀏𑀓𑁂𑀓𑀫𑁂𑀯 𑀓𑁄𑀝𑁆𑀞𑀸𑀲𑀦𑁆𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀏𑀓𑁂𑀓𑀫𑁂𑀯 𑀓𑁄𑀝𑁆𑀞𑀸𑀲𑀁. 𑀧𑀸𑀝𑀺𑀧𑀤𑀭𑀢𑁆𑀢𑀺𑀬𑀸 𑀏𑀯𑀁 𑀫𑀦𑀲𑀸𑀓𑀸𑀲𑀻𑀢𑀺 𑀭𑀢𑁆𑀢𑀺𑀬𑀸 𑀢𑀻𑀲𑀼𑀧𑀺 𑀬𑀸𑀫𑁂𑀲𑀼 𑀏𑀯𑀁 𑀇𑀥 𑀔𑀦𑁆𑀥𑀓𑀧𑀸𑀴𑀺𑀬𑀸 𑀆𑀕𑀢𑀦𑀬𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁𑀬𑁂𑀯 𑀫𑀦𑀲𑀸𑀓𑀸𑀲𑀺.

𑀅𑀚𑀧𑀸𑀮𑀓𑀣𑀸𑀯𑀡𑁆𑀡𑀦𑀸

𑁪. 𑀢𑀲𑁆𑀲 ¶ 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦𑀸𑀢𑀺 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀲𑁆𑀲 𑀅𑀧𑀕𑀫𑀦𑁂𑀦. 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀫𑁆𑀳𑀸. 𑀅𑀦𑁆𑀢𑀭𑀦𑁆𑀢𑀭𑀸 𑀏𑀯 𑀳𑀺 𑀧𑀘𑁆𑀘𑀬𑀸𑀓𑀸𑀭𑀫𑀦𑀲𑀺𑀓𑀸𑀭𑁄. 𑀅𑀯𑀲𑁂𑀲𑀓𑀸𑀮𑀁 𑀧𑀦 𑀲𑀩𑁆𑀩𑀁 𑀪𑀕𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀁 𑀲𑀦𑁆𑀥𑀸𑀬 ‘‘𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀭𑀢𑀦𑀘𑀗𑁆𑀓𑀫𑁂𑀢𑀺 ¶ 𑀪𑀕𑀯𑀢𑁄 𑀘𑀺𑀭𑀁 𑀞𑀺𑀢𑀲𑁆𑀲 𑀘𑀗𑁆𑀓𑀫𑀦𑀸𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀤𑁂𑀯𑀢𑀸𑀳𑀺 𑀫𑀸𑀧𑀺𑀢𑁂 𑀭𑀢𑀦𑀘𑀗𑁆𑀓𑀫𑁂. 𑀭𑀢𑀦𑀖𑀭𑀦𑁆𑀢𑀺 𑀪𑀕𑀯𑀢𑁄 𑀦𑀺𑀲𑀻𑀤𑀦𑀸𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀤𑁂𑀯𑀢𑀸𑀳𑀺 𑀫𑀸𑀧𑀺𑀢𑀁 𑀭𑀢𑀦𑀫𑀬𑀁 𑀕𑁂𑀳𑀁.

𑀢𑀢𑁆𑀭𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀭𑀢𑀦𑀖𑀭𑁂𑀬𑁂𑀯. 𑀢𑀢𑁆𑀭𑀸𑀧𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂𑀧𑀺 𑀅𑀪𑀺𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀏𑀯 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀧𑀺 𑀳𑀺 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀲𑀫𑁆𑀫𑀲𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀻𑀢𑀺𑀲𑀫𑀼𑀝𑁆𑀞𑀺𑀢𑀸 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀭𑀢𑀦𑀖𑀭𑁂 𑀯𑀺𑀬 𑀦𑀺𑀘𑁆𑀙𑀭𑀺𑀁𑀲𑀼 𑀏𑀯. ‘‘𑀳𑀼𑀁𑀳𑀼’’𑀦𑁆𑀢𑀺 𑀓𑀭𑁄𑀦𑁆𑀢𑁄𑀢𑀺 ‘‘𑀲𑀩𑁆𑀩𑁂 𑀳𑀻𑀦𑀚𑀸𑀢𑀺𑀓𑀸 𑀫𑀁 𑀫𑀸 𑀉𑀧𑀕𑀘𑁆𑀙𑀦𑁆𑀢𑀽’’𑀢𑀺 𑀫𑀸𑀦𑀯𑀲𑁂𑀦, 𑀲𑀫𑀻𑀧𑀁 𑀉𑀧𑀕𑀢𑁂𑀲𑀼 𑀓𑁄𑀥𑀯𑀲𑁂𑀦 𑀘 ‘‘𑀅𑀧𑁂𑀣𑀸’’𑀢𑀺 𑀅𑀥𑀺𑀧𑁆𑀧𑀸𑀬𑀦𑀺𑀘𑁆𑀙𑀸𑀭𑀺𑀢𑀁 𑀳𑀼𑀁𑀳𑀼𑀁𑀓𑀸𑀭𑀁 𑀓𑀭𑁄𑀦𑁆𑀢𑁄.

𑀩𑁆𑀭𑀳𑁆𑀫𑀜𑁆𑀜𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀢𑁆𑀢𑀁. 𑀅𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀤𑁂𑀯𑀸𑀦𑀁 𑀯𑀸 𑀅𑀦𑁆𑀢𑀦𑁆𑀢𑀺 𑀫𑀕𑁆𑀕𑀜𑀸𑀡𑀸𑀦𑀁 𑀯𑀸 𑀅𑀦𑁆𑀢𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁.

𑀫𑀼𑀘𑀮𑀺𑀦𑁆𑀤𑀓𑀣𑀸𑀯𑀡𑁆𑀡𑀦𑀸

𑁫. 𑀫𑀼𑀘𑀮𑀺𑀦𑁆𑀤𑀫𑀽𑀮𑁂𑀢𑀺 𑀏𑀢𑁆𑀣 𑀘 𑀫𑀼𑀘𑀮𑀺𑀦𑁆𑀤𑁄 𑀯𑀼𑀘𑁆𑀘𑀢𑀺 𑀦𑀻𑀧𑀭𑀼𑀓𑁆𑀔𑁄, 𑀬𑁄 ‘‘𑀦𑀺𑀘𑀼𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀉𑀧𑁆𑀧𑀦𑁆𑀦𑀫𑁂𑀖𑁄𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀫𑀳𑀸𑀫𑁂𑀖𑁄. 𑀯𑀤𑁆𑀤𑀮𑀺𑀓𑀸𑀢𑀺 𑀯𑀼𑀝𑁆𑀞𑀺𑀬𑀸 𑀏𑀯 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀸𑀫𑀁. 𑀬𑀸 𑀘 𑀲𑀢𑁆𑀢𑀸𑀳𑀁 𑀧𑀯𑀢𑁆𑀢𑀢𑁆𑀢𑀸 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀢𑁆𑀢𑀸𑀳𑀁 𑀅𑀯𑀺𑀘𑁆𑀙𑀺𑀦𑁆𑀦𑀯𑀼𑀝𑁆𑀞𑀺𑀓𑀸 𑀅𑀳𑁄𑀲𑀻’’𑀢𑀺. 𑀲𑀻𑀢𑀯𑀸𑀢𑁂𑀦 𑀤𑀽𑀲𑀺𑀢𑀁 𑀤𑀺𑀦𑀫𑁂𑀢𑀺𑀲𑁆𑀲𑀸 𑀯𑀤𑁆𑀤𑀮𑀺𑀓𑀸𑀬𑀸𑀢𑀺 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀆𑀳 ‘‘𑀉𑀤𑀓𑀨𑀼𑀲𑀺𑀢𑀲𑀫𑁆𑀫𑀺𑀲𑁆𑀲𑁂𑀦𑀸’’𑀢𑀺𑀆𑀤𑀺. 𑀉𑀩𑁆𑀩𑀺𑀤𑁆𑀥𑀢𑀸 𑀦𑀸𑀫 𑀤𑀽𑀭𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢’’𑀦𑁆𑀢𑀺. 𑀇𑀦𑁆𑀤𑀦𑀻𑀮𑀫𑀡𑀺 𑀯𑀺𑀬 𑀤𑀺𑀩𑁆𑀩𑀢𑀺 𑀚𑁄𑀢𑁂𑀢𑀻𑀢𑀺 𑀤𑁂𑀯𑁄, 𑀆𑀓𑀸𑀲𑁄.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀯𑀺𑀯𑁂𑀓𑀲𑁆𑀲 𑀲𑀼𑀔𑀪𑀸𑀯𑀁 𑀯𑀺𑀤𑀺𑀢𑁆𑀯𑀸. 𑀲𑀩𑁆𑀩𑀲𑁄 𑀅𑀲𑀦𑁆𑀢𑀼𑀝𑁆𑀞𑀺𑀲𑀫𑀼𑀘𑁆𑀙𑁂𑀤𑀓𑀢𑁆𑀢𑀸 𑀫𑀕𑁆𑀕𑀜𑀸𑀡𑀸𑀦𑀁 ‘‘𑀘𑀢𑀼𑀫𑀕𑁆𑀕𑀜𑀸𑀡𑀲𑀦𑁆𑀢𑁄𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀓𑀼𑀧𑁆𑀧𑀦𑀪𑀸𑀯𑁄𑀢𑀺 𑀅𑀓𑀼𑀚𑁆𑀛𑀦𑀲𑀪𑀸𑀯𑁄.

𑀭𑀸𑀚𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁬. 𑀧𑀘𑁆𑀘𑀕𑁆𑀖𑁂𑀢𑀺 ¶ 𑀅𑀪𑀺𑀦𑀯𑁂. 𑀅𑀬𑀫𑁂𑀯 𑀅𑀢𑁆𑀣𑁄 𑀧𑀲𑀢𑁆𑀣𑁄, 𑀦 𑀧𑀼𑀭𑀺𑀫𑁄. 𑀦 𑀳𑀺 𑀩𑀼𑀤𑁆𑀥𑀸 𑀫𑀳𑀕𑁆𑀖𑀁 𑀧𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺.

𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁭. 𑀆𑀮𑀻𑀬𑀦𑁆𑀢𑀺 ¶ 𑀲𑁂𑀯𑀻𑀬𑀦𑁆𑀢𑀻𑀢𑀺 𑀆𑀮𑀬𑀸. 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀆𑀳 ‘‘𑀲𑀢𑁆𑀢𑀸…𑀧𑁂… 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀲𑀼𑀝𑁆𑀞𑀼 𑀫𑀼𑀤𑀺𑀢𑀸𑀢𑀺 𑀅𑀢𑀺𑀯𑀺𑀬 𑀧𑀫𑀼𑀤𑀺𑀢𑀸. 𑀞𑀸𑀦𑀁 𑀲𑀦𑁆𑀥𑀸𑀬𑀸𑀢𑀺 𑀞𑀸𑀦-𑀲𑀤𑁆𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸. 𑀇𑀫𑁂𑀲𑀦𑁆𑀢𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀨𑀮𑀸𑀦𑀁. 𑀧𑀸𑀴𑀺𑀬𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀻𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺. 𑀅𑀧𑀺𑀲𑁆𑀲𑀽𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀦 𑀓𑁂𑀯𑀮𑀁 𑀏𑀢𑀤𑀳𑁄𑀲𑀺, 𑀇𑀫𑀸𑀧𑀺 𑀕𑀸𑀣𑀸 𑀧𑀝𑀺𑀪𑀁𑀲𑀽𑀢𑀺 𑀅𑀢𑁆𑀣𑁄.

𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀦𑁆𑀢𑀺 𑀧𑀸𑀭𑀫𑀺𑀧𑀽𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀤𑀼𑀓𑁆𑀔𑀸𑀧𑀝𑀺𑀧𑀤𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀲𑀼𑀔𑀸𑀧𑀝𑀺𑀧𑀤𑀸𑀯 𑀳𑁄𑀦𑁆𑀢𑀺. 𑀳-𑀇𑀢𑀺 𑀩𑁆𑀬𑀢𑁆𑀢𑀁, 𑀏𑀓𑀁𑀲𑀦𑁆𑀢𑀺 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀦𑀺𑀧𑀸𑀢𑁄, 𑀩𑁆𑀬𑀢𑁆𑀢𑀁, 𑀏𑀓𑀁𑀲𑁂𑀦 𑀯𑀸 𑀅𑀮𑀦𑁆𑀢𑀺 𑀯𑀺𑀬𑁄𑀚𑁂𑀦𑁆𑀢𑀺. 𑀳𑀮𑀦𑁆𑀢𑀺 𑀯𑀸 𑀏𑀓𑁄 𑀦𑀺𑀧𑀸𑀢𑁄.

𑁮. 𑀧𑀸𑀴𑀺𑀬𑀁 𑀲𑀳𑀫𑁆𑀧𑀢𑀺𑀲𑁆𑀲𑀸𑀢𑀺 𑀲𑁄 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀣𑁂𑀭𑁄 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀩𑁆𑀭𑀳𑁆𑀫𑀧𑀢𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑁂𑀦 𑀦𑀁 ‘‘𑀲𑀳𑀫𑁆𑀧𑀢𑀻’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬, 𑀅𑀲𑁆𑀲𑀯𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀯𑀦𑀫𑁂𑀯 𑀳𑀺 𑀲𑀯𑀦𑀢𑀸 𑀬𑀣𑀸 𑀤𑁂𑀯𑀢𑀸𑀢𑀺.

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑁄. 𑀲𑀫𑀮𑁂𑀳𑀻𑀢𑀺 𑀧𑀽𑀭𑀡𑀓𑀲𑁆𑀲𑀧𑀸𑀤𑀻𑀳𑀺 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺. 𑀅𑀧𑀸𑀧𑀼𑀭𑀸𑀢𑀺 𑀤𑁂𑀲𑀦𑀸𑀳𑀢𑁆𑀣𑁂𑀦 𑀯𑀺𑀯𑀭. 𑀤𑁆𑀯𑀸𑀭𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀲𑁂𑀮𑁂𑀢𑀺 𑀖𑀦𑀲𑀺𑀮𑀸𑀫𑀬𑁂. 𑀢𑀣𑀽𑀧𑀫𑀦𑁆𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁄 𑀢𑀁-𑀲𑀤𑁆𑀤𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑁄 𑀲𑁂𑀮𑀧𑀩𑁆𑀩𑀢𑁄 𑀉𑀧𑀫𑀸 𑀬𑀲𑁆𑀲. 𑀢𑀁 𑀢𑀣𑀽𑀧𑀫𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀸 𑀧𑀩𑁆𑀩𑀢𑀸𑀤𑀺𑀦𑀸 𑀧𑀓𑀸𑀭𑁂𑀦 𑀉𑀧𑀫𑀸 𑀅𑀲𑁆𑀲𑀸𑀢𑀺𑀧𑀺 𑀅𑀢𑁆𑀣𑁄. 𑀥𑀫𑁆𑀫𑀫𑀬𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀪𑀽𑀢𑀁. 𑀉𑀝𑁆𑀞𑀸𑀳𑀻𑀢𑀺 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀘𑀸𑀭𑀺𑀓𑀘𑀭𑀡𑀢𑁆𑀣𑀁 𑀇𑀫𑀫𑁆𑀳𑀸 𑀆𑀲𑀦𑀸 𑀓𑀸𑀬𑁂𑀦, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀢𑁄 𑀯𑀸 𑀘𑀺𑀢𑁆𑀢𑁂𑀦 𑀉𑀝𑁆𑀞𑁂𑀳𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑁂𑀦𑁂𑀯 ‘‘𑀯𑀺𑀘𑀭, 𑀤𑁂𑀲𑀲𑁆𑀲𑀽’’𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀬𑀘𑀺𑀢𑁆𑀢𑀧𑀬𑁄𑀕𑁂 𑀦𑀺𑀬𑁄𑀚𑁂𑀲𑀺. 𑀯𑀻𑀭𑀸𑀢𑀺𑀆𑀤𑀺 𑀘𑀢𑁆𑀢𑀸𑀭𑀺 𑀣𑀼𑀢𑀺𑀯𑀲𑁂𑀦 𑀲𑀫𑁆𑀩𑁄𑀥𑀦𑀸𑀦𑀺.

𑁯. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 ¶ 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦, 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀦𑀸𑀫𑀁. 𑀲𑁆𑀯𑀸𑀓𑀸𑀭𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄𑀯 𑀆𑀓𑀸𑀭𑀸 ¶ 𑀲𑀼𑀦𑁆𑀤𑀭𑀸 𑀬𑁂𑀲𑀁, 𑀢𑁂 𑀲𑁆𑀯𑀸𑀓𑀸𑀭𑀸, 𑀲𑀼𑀯𑀺𑀜𑁆𑀜𑀸𑀧𑀬𑀸, 𑀧𑀭𑀮𑁄𑀓𑀜𑁆𑀘 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑀸 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻𑀢𑀺 𑀕𑀘𑁆𑀙𑀮𑀢𑀸𑀧𑀺 𑀧𑁄𑀓𑁆𑀔𑀭𑀡𑀻𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀧𑁄𑀓𑁆𑀔𑀭𑀡𑀻. 𑀏𑀯𑀫𑀺𑀢𑀭𑁂𑀲𑀼𑀧𑀺. 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀻𑀢𑀺 𑀉𑀤𑀓𑀢𑁄 𑀅𑀦𑀼𑀕𑁆𑀕𑀢𑀸𑀦𑀺. 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀳𑀼𑀢𑁆𑀯𑀸 𑀧𑀼𑀲𑀦𑁆𑀢𑀺 𑀯𑀟𑁆𑀠𑀦𑁆𑀢𑀺, 𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺. 𑀅𑀘𑁆𑀘𑀼𑀕𑁆𑀕𑀫𑁆𑀫𑀸𑀢𑀺 𑀉𑀤𑀓𑀁 𑀅𑀢𑀺𑀓𑁆𑀓𑀫𑀦𑀯𑀲𑁂𑀦 𑀉𑀕𑁆𑀕𑀦𑁆𑀢𑁆𑀯𑀸.

𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀢𑁂𑀲𑀦𑁆𑀢𑀺 𑀲𑀉𑀧𑀦𑀺𑀲𑁆𑀲𑀬𑀸𑀦𑀁 𑀲𑀢𑁆𑀢𑀸𑀦𑀁. 𑀤𑁆𑀯𑀸𑀭𑀸𑀢𑀺 𑀅𑀭𑀺𑀬𑀫𑀕𑁆𑀕𑀤𑁆𑀯𑀸𑀭𑀸𑀦𑀺. 𑀇𑀤𑀜𑁆𑀘 𑀅𑀢𑁆𑀢𑀦𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀉𑀧𑀦𑀺𑀲𑁆𑀲𑀬𑀸𑀦𑀁 𑀢𑁂𑀲𑀁 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀤𑀺𑀝𑁆𑀞𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀳𑀺𑀁𑀲𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 ‘‘𑀅𑀳𑀜𑁆𑀳𑀺 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀲𑀼𑀧𑁆𑀧𑀯𑀢𑁆𑀢𑀺𑀢𑀫𑁆𑀧𑀺 𑀇𑀫𑀁 𑀧𑀡𑀻𑀢𑀁 𑀥𑀫𑁆𑀫𑀁 𑀅𑀚𑀸𑀦𑀦𑁆𑀢𑁂𑀲𑀼 𑀫𑀦𑀼𑀚𑁂𑀲𑀼 𑀤𑁂𑀲𑀦𑀸𑀬 𑀯𑀺𑀳𑀺𑀁𑀲𑀸 𑀓𑀸𑀬𑀯𑀸𑀘𑀸𑀓𑀺𑀮𑀫𑀣𑁄 𑀳𑁄𑀢𑀻’’𑀢𑀺 𑀏𑀯𑀁 𑀯𑀺𑀳𑀺𑀁𑀲𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦 𑀪𑀸𑀲𑀺𑀁 𑀪𑀸𑀲𑀺𑀢𑀼𑀁 𑀦 𑀇𑀘𑁆𑀙𑀺𑀁. 𑀇𑀤𑀸𑀦𑀺 𑀧𑀦 𑀳𑁂𑀢𑀼𑀲𑀫𑁆𑀧𑀦𑁆𑀦𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀪𑀸𑀚𑀦𑀁 𑀯𑀺𑀯𑀭𑀦𑁆𑀢𑀼, 𑀧𑀽𑀭𑁂𑀲𑁆𑀲𑀸𑀫𑀺 𑀦𑁂𑀲𑀁 𑀲𑀗𑁆𑀓𑀧𑁆𑀧𑀦𑁆𑀢𑀺.

𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸

𑁧𑁦. 𑀆𑀴𑀸𑀭𑁄𑀢𑀺 𑀦𑀸𑀫𑀁. 𑀓𑀸𑀮𑀸𑀫𑁄𑀢𑀺 𑀕𑁄𑀢𑁆𑀢𑀁. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑀓𑀺𑀁 𑀇𑀤𑀸𑀦𑁂𑀯 𑀉𑀤𑀧𑀸𑀤𑀺, 𑀦𑀦𑀼 𑀩𑁄𑀥𑀺𑀫𑀽𑀮𑁂 𑀢𑁂𑀓𑀸𑀮𑀺𑀓𑀸, 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑀢𑁄 𑀤𑀺𑀝𑁆𑀞𑀸𑀢𑀺? 𑀲𑀘𑁆𑀘𑀁 𑀤𑀺𑀝𑁆𑀞𑀸, 𑀢𑀣𑀸𑀧𑀺 𑀦𑀸𑀫𑀸𑀤𑀺𑀯𑀲𑁂𑀦 𑀅𑀯𑀺𑀓𑀧𑁆𑀧𑀺𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲. 𑀦 𑀳𑀺 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀦𑀸𑀫𑀚𑀸𑀢𑀺𑀆𑀤𑀺𑀓𑀁 𑀧𑀘𑁆𑀘𑁂𑀓𑀁 𑀅𑀦𑀦𑁆𑀢𑀁 𑀯𑀺𑀪𑀸𑀕𑀁 𑀯𑀺𑀓𑀧𑁆𑀧𑁂𑀢𑀼𑀁 𑀲𑀓𑁆𑀓𑀸 𑀯𑀺𑀓𑀧𑁆𑀧𑀸𑀦𑀁 𑀯𑀺𑀭𑀼𑀤𑁆𑀥𑀸𑀦𑀁 𑀲𑀳𑀸𑀦𑀼𑀧𑁆𑀧𑀢𑁆𑀢𑀺𑀢𑁄, 𑀲𑀩𑁆𑀩𑀯𑀺𑀓𑀧𑁆𑀧𑀸𑀭𑀳𑀥𑀫𑁆𑀫𑀤𑀲𑁆𑀲𑀦𑀫𑁂𑀯 𑀧𑀦𑀸𑀦𑁂𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀬𑀣𑀸 𑀤𑀺𑀝𑁆𑀞𑁂𑀲𑀼 𑀧𑀦 𑀬𑀣𑀺𑀘𑁆𑀙𑀺𑀢𑀸𑀓𑀸𑀭𑀁 𑀆𑀭𑀩𑁆𑀪 𑀯𑀺𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀘𑀺𑀢𑁆𑀢𑀧𑀝𑁂 𑀯𑀺𑀬. 𑀇𑀥𑀸𑀧𑀺 𑀆𑀴𑀸𑀭𑀁 𑀦𑀺𑀲𑁆𑀲𑀸𑀬 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀫𑁂𑀯 𑀲𑀩𑁆𑀩𑀸𑀓𑀸𑀭𑀜𑀸𑀡𑀁 𑀉𑀤𑀧𑀸𑀤𑀺. 𑀦 𑀓𑁂𑀯𑀮𑀜𑁆𑀘 𑀢𑀁, 𑀅𑀣 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀏𑀯 𑀧𑀞𑀫𑀁 𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀢𑀧𑁆𑀧𑀫𑀼𑀔𑀸 𑀘 𑀤𑁂𑀯𑀢𑀸, 𑀆𑀴𑀸𑀭𑁄 𑀓𑀸𑀮𑀁 𑀓𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂, 𑀉𑀤𑀓𑁄 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀏𑀯𑀫𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀦𑀺𑀲𑁆𑀲𑀸𑀬 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀏𑀯. 𑀢𑀁 𑀧𑀦 𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀓𑀫𑁂𑀦 𑀑𑀮𑁄𑀓𑁂𑀢𑁆𑀯𑀸 𑀤𑁂𑀯𑀢𑀸𑀬 𑀯𑀼𑀢𑁆𑀢𑁂 𑀜𑀸𑀡𑀁 𑀯𑀺𑀬 𑀓𑀢𑁆𑀯𑀸 ¶ 𑀯𑀼𑀢𑁆𑀢𑀁. 𑀲𑀤𑁆𑀤𑀕𑀢𑀺𑀬𑀸 𑀳𑀺 𑀩𑀦𑁆𑀥𑀢𑁆𑀢𑀸 𑀏𑀓𑁂𑀦 𑀜𑀸𑀡𑁂𑀦 𑀜𑀸𑀢𑀫𑁆𑀧𑀺 𑀯𑀼𑀘𑁆𑀘𑀫𑀸𑀦𑀁 𑀓𑀫𑁂𑀦 𑀜𑀸𑀢𑀁 𑀯𑀺𑀬 𑀧𑀝𑀺𑀪𑀸𑀢𑀺, 𑀤𑁂𑀯𑀢𑀸𑀧𑀺 𑀘 𑀪𑀕𑀯𑀢𑀸 𑀜𑀸𑀢𑀫𑁂𑀯𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦𑁂𑀯 ‘‘𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀈𑀤𑀺𑀲𑁂𑀲𑀼 ‘‘𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀲𑀼𑀓𑀁 𑀅𑀤𑁆𑀤𑀲, 𑀢𑀢𑁆𑀣 ¶ 𑀫𑀬𑀺 𑀕𑀢𑁂 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀢𑁆𑀣𑀼 𑀳𑀺𑀢𑁂𑀲𑀺𑀢𑀸𑀲𑀦𑁆𑀤𑀲𑁆𑀲𑀦𑀯𑀲𑀧𑁆𑀧𑀯𑀢𑁆𑀢𑁂𑀲𑀼. 𑀲𑀩𑁆𑀩𑀢𑁆𑀣 𑀯𑀘𑀦𑀕𑀢𑀺𑀬𑀁 𑀓𑀫𑀯𑀼𑀢𑁆𑀢𑀺𑀢𑁂 𑀧𑀜𑁆𑀜𑀸𑀬𑀫𑀸𑀦𑁂𑀧𑀺 𑀏𑀓𑁂𑀦𑁂𑀯 𑀜𑀸𑀡𑁂𑀦 𑀲𑀓𑀮𑀸𑀯𑀩𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀳𑀼𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀢𑀺 𑀉𑀧𑀓𑀸𑀭𑀲𑁆𑀲𑀸𑀧𑀺 𑀯𑀺𑀚𑁆𑀚𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀥𑀫𑁆𑀫𑀤𑁂𑀲𑀦𑀸𑀬 𑀓𑀸𑀭𑀡𑀢𑁆𑀢𑁂𑀦 𑀅𑀦𑀼𑀧𑀓𑀸𑀭𑀸𑀦𑀫𑁆𑀧𑀺 𑀤𑁂𑀲𑀦𑀢𑁄.

𑁧𑁧. 𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀦𑁆𑀢𑀺 𑀕𑀬𑀸𑀬, 𑀩𑁄𑀥𑀺𑀲𑁆𑀲 𑀘 𑀅𑀦𑁆𑀢𑀭𑁂 𑀢𑀺𑀕𑀸𑀯𑀼𑀢𑁂 𑀞𑀸𑀦𑁂.

𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀮𑁂𑀧𑁂𑀦 𑀅𑀮𑀺𑀢𑁆𑀢𑁄. 𑀢𑀢𑁄 𑀏𑀯 𑀲𑀩𑁆𑀩𑀜𑁆𑀚𑀳𑁄. 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀢𑀡𑁆𑀳𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑀏𑀦 𑀯𑀺𑀫𑀼𑀢𑁆𑀢𑁄. 𑀏𑀯𑀁 𑀲𑀬𑀁 𑀲𑀩𑁆𑀩𑀥𑀫𑁆𑀫𑁂 𑀅𑀢𑁆𑀢𑀦𑀸𑀯 𑀚𑀸𑀦𑀺𑀢𑁆𑀯𑀸. 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀦𑁆𑀢𑀺 𑀓𑀁 𑀅𑀜𑁆𑀜𑀁 ‘‘𑀅𑀬𑀁 𑀫𑁂 𑀆𑀘𑀭𑀺𑀬𑁄’’𑀢𑀺 𑀉𑀤𑁆𑀤𑀺𑀲𑁂𑀬𑁆𑀬𑀁.

𑀓𑀸𑀲𑀺𑀦𑀁 𑀧𑀼𑀭𑀦𑁆𑀢𑀺 𑀩𑀸𑀭𑀸𑀡𑀲𑀺𑀁. 𑀆𑀳𑀜𑁆𑀙𑀦𑁆𑀢𑀺 𑀆𑀳𑀦𑀺𑀲𑁆𑀲𑀸𑀫𑀺. 𑀅𑀫𑀢𑀸𑀥𑀺𑀕𑀫𑀸𑀬 𑀉𑀕𑁆𑀖𑁄𑀲𑀦𑀢𑁄 𑀅𑀫𑀢𑀤𑀼𑀦𑁆𑀤𑀼𑀪𑀺𑀦𑁆𑀢𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸 𑀯𑀼𑀢𑁆𑀢𑀸, ‘‘𑀅𑀫𑀢𑀪𑁂𑀭𑀺𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄𑀢𑀺 𑀅𑀦𑀦𑁆𑀢𑀚𑀺𑀦𑁄𑀧𑀺 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀜𑀸𑀡𑀢𑀸𑀬 𑀅𑀦𑀦𑁆𑀢𑁄 𑀚𑀺𑀦𑁄 𑀘, 𑀅𑀦𑀦𑁆𑀢𑁂𑀦 𑀯𑀸 𑀜𑀸𑀡𑁂𑀦, 𑀅𑀦𑀦𑁆𑀢𑀁 𑀯𑀸 𑀤𑁄𑀲𑀁 𑀚𑀺𑀢𑀯𑀸, 𑀉𑀧𑁆𑀧𑀸𑀤𑀯𑀬𑀦𑁆𑀢𑀭𑀳𑀺𑀢𑀢𑀸𑀬 𑀯𑀸 𑀅𑀦𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀅𑀚𑀺𑀦𑀺 𑀓𑀺𑀮𑁂𑀲𑀸𑀭𑀬𑁄 𑀫𑀤𑁆𑀤𑀺𑀢𑁆𑀯𑀸 𑀕𑀡𑁆𑀳𑀻𑀢𑀺𑀧𑀺 𑀅𑀦𑀦𑁆𑀢𑀚𑀺𑀦𑁄.

𑀳𑀼𑀧𑁂𑀬𑁆𑀬𑀸𑀧𑀻𑀢𑀺 𑀏𑀯𑀫𑁆𑀧𑀺 𑀪𑀯𑁂𑀬𑁆𑀬, 𑀏𑀯𑀁𑀯𑀺𑀥𑁂 𑀭𑀽𑀧𑀓𑀸𑀬𑀭𑀢𑀦𑁂 𑀈𑀤𑀺𑀲𑁂𑀦 𑀜𑀸𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀦𑀸𑀫 𑀓𑀣𑀦𑀜𑁆𑀳𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀅𑀧𑀭𑀓𑀸𑀮𑁂 𑀤𑀼𑀓𑁆𑀔𑀧𑁆𑀧𑀢𑁆𑀢𑀲𑁆𑀲 𑀪𑀕𑀯𑀦𑁆𑀢𑀁 𑀉𑀧𑀕𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀸𑀬 𑀧𑀘𑁆𑀘𑀬𑁄 𑀚𑀸𑀢𑁄. 𑀢𑀣𑀸𑀳𑁂𑀲 𑀪𑀕𑀯𑀸 𑀢𑁂𑀦 𑀲𑀫𑀸𑀕𑀫𑀢𑁆𑀣𑀁 𑀧𑀤𑀲𑀸𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑁧𑁨. 𑀩𑀸𑀳𑀼𑀮𑁆𑀮𑀺𑀓𑁄𑀢𑀺 ¶ 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑁄. 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄𑀢𑀺 𑀧𑀥𑀸𑀦𑀢𑁄 𑀤𑀼𑀓𑁆𑀓𑀭𑀘𑀭𑀡𑀢𑁄 𑀧𑀭𑀺𑀳𑀻𑀦𑁄. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑀸𑀭𑀺𑀬𑀁, 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀦𑁆𑀢𑀺 𑀅𑀦𑀕𑀸𑀭𑀺𑀬𑀸, 𑀧𑀩𑁆𑀩𑀚𑁆𑀚𑀸, 𑀢𑀁 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂. 𑀲𑀬𑀦𑁆𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑀸 ¶ . 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄𑀯 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀸𑀧𑀼𑀡𑀺𑀢𑁆𑀯𑀸.

𑀇𑀭𑀺𑀬𑀸𑀬𑀸𑀢𑀺 𑀤𑀼𑀓𑁆𑀓𑀭𑀇𑀭𑀺𑀬𑀸𑀬. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀮𑁄𑀓𑀺𑀬𑀜𑀸𑀡𑀢𑁄 𑀉𑀧𑀭𑀺 𑀅𑀭𑀺𑀬𑀁 𑀓𑀸𑀢𑀼𑀁 𑀅𑀮𑀁 𑀲𑀫𑀢𑁆𑀣𑁄 𑀅𑀮𑀫𑀭𑀺𑀬𑁄. 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀅𑀥𑀺𑀧𑁆𑀧𑁂𑀢𑀁. 𑀦𑁄𑀢𑀺 𑀦𑀼. 𑀪𑀸𑀲𑀺𑀢𑀫𑁂𑀢𑀦𑁆𑀢𑀺 𑀏𑀯𑀭𑀽𑀧𑀫𑁂𑀢𑀁 𑀯𑀸𑀓𑁆𑀬𑀪𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀢𑁂 𑀘 ‘‘𑀬𑀤𑀺 𑀏𑀲 𑀧𑀥𑀸𑀦𑀓𑀸𑀮𑁂 ‘𑀅𑀳𑀁 𑀅𑀭𑀳𑀸’𑀢𑀺 𑀯𑀤𑁂𑀬𑁆𑀬, 𑀫𑀬𑀜𑁆𑀘 𑀲𑀤𑁆𑀤𑀳𑀸𑀫, 𑀦 𑀘𑀸𑀦𑁂𑀦 𑀢𑀤𑀸 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀧𑀦 𑀯𑀺𑀚𑁆𑀚𑀫𑀸𑀦𑀫𑁂𑀯 𑀕𑀼𑀡𑀁 𑀯𑀤𑀢𑀻’’𑀢𑀺 𑀏𑀓𑀧𑀤𑁂𑀦 𑀲𑀢𑀺𑀁 𑀮𑀪𑀺𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀚𑀸𑀢𑁄’’𑀢𑀺 𑀉𑀧𑁆𑀧𑀦𑁆𑀦𑀕𑀸𑀭𑀯𑀸 𑀆𑀯𑀼𑀲𑁄𑀯𑀸𑀤𑀁 𑀧𑀳𑀸𑀬 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. 𑀅𑀜𑁆𑀜𑀸 𑀘𑀺𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁.

𑁧𑁩. 𑀅𑀦𑁆𑀢𑀸𑀢𑀺 𑀓𑁄𑀝𑁆𑀞𑀸𑀲𑀸 𑀤𑁆𑀯𑁂 𑀪𑀸𑀕𑀸. 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀲𑀼𑀔𑀲𑁆𑀲 𑀅𑀦𑀼𑀪𑀯𑁄. 𑀓𑀺𑀮𑁂𑀲𑀓𑀸𑀫𑀸 𑀏𑀯 𑀯𑀸 𑀆𑀫𑀺𑀲𑀲𑀼𑀔𑁂𑀦 𑀅𑀮𑁆𑀮𑀻𑀬𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀕𑀫𑁆𑀫𑁄𑀢𑀺 𑀕𑀸𑀫𑀯𑀸𑀲𑀻𑀦𑀁 𑀲𑀦𑁆𑀢𑀓𑁄. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀢𑀦𑁄 𑀓𑀺𑀮𑀫𑀣𑀲𑁆𑀲 𑀓𑀡𑁆𑀝𑀓𑀲𑁂𑀬𑁆𑀬𑀸𑀤𑀺𑀤𑀼𑀓𑁆𑀔𑀲𑁆𑀲 𑀅𑀦𑀼𑀬𑁄𑀕𑁄. 𑀉𑀪𑁄 𑀅𑀦𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀮𑁄𑀪𑁄 𑀯𑀸 𑀲𑀲𑁆𑀲𑀢𑁄 𑀯𑀸 𑀏𑀓𑁄 𑀅𑀦𑁆𑀢𑁄, 𑀤𑁄𑀲𑁄 𑀯𑀸 𑀉𑀘𑁆𑀙𑁂𑀤𑁄 𑀯𑀸 𑀏𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀓𑁆𑀔𑀼𑀓𑀭𑀡𑀻𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀘𑀓𑁆𑀔𑀼𑀁 𑀓𑀭𑁄𑀢𑀻𑀢𑀺 𑀘𑀓𑁆𑀔𑀼𑀓𑀭𑀡𑀻. 𑀤𑀼𑀢𑀺𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀧𑀲𑀫𑁄𑀢𑀺 𑀓𑀺𑀮𑁂𑀲𑀼𑀧𑀲𑀫𑁄. 𑀅𑀪𑀺𑀜𑁆𑀜𑀸, 𑀲𑀫𑁆𑀩𑁄𑀥𑁄 𑀘 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁄𑀯. 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀥𑀸𑀢𑀼. 𑀏𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀧𑀝𑀺𑀧𑀤𑀁 𑀣𑁄𑀫𑁂𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀜𑀸𑀡𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺 𑀯𑀺𑀢𑀓𑁆𑀓𑁄. 𑀲𑁂𑀲𑀁 𑀥𑀫𑁆𑀫𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁪. 𑀏𑀯𑀁 ¶ 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑁂 𑀏𑀓𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀳𑀺 𑀫𑀕𑁆𑀕𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺𑀆𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀲𑀩𑁆𑀩𑀧𑀞𑀫𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀇𑀥 𑀚𑀸𑀢𑀺 𑀦𑀸𑀫, 𑀲𑀸 𑀘 𑀢𑀢𑁆𑀣 𑀢𑀢𑁆𑀣 𑀪𑀯𑁂𑀲𑀼 𑀉𑀧𑀮𑀩𑁆𑀪𑀫𑀸𑀦𑀸𑀦𑀁 𑀤𑀼𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑀸, 𑀏𑀯𑀁 𑀚𑀭𑀸𑀤𑀻𑀲𑀼 𑀤𑀼𑀓𑁆𑀔𑀯𑀢𑁆𑀣𑀼𑀓𑀢𑀸𑀬 𑀤𑀼𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀲𑁂𑀦 𑀤𑀼𑀓𑁆𑀔𑀸 𑀏𑀯. 𑀧𑁄𑀦𑁄𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑀩𑁆𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀧𑀼𑀦𑀩𑁆𑀪𑀯𑁄 𑀲𑀻𑀮𑀫𑁂𑀢𑀺𑀲𑁆𑀲𑀸𑀢𑀺 𑀧𑁄𑀦𑁄𑀪𑀯𑀺𑀓𑀸. 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 𑀏𑀢𑁆𑀣 𑀭𑀽𑀧𑀸𑀤𑀻𑀲𑀼 𑀦𑀦𑁆𑀤𑀢𑀺 𑀧𑀺𑀬𑀸𑀬𑀢𑀻𑀢𑀺 𑀦𑀦𑁆𑀤𑀻, 𑀲𑀸 𑀏𑀯 𑀭𑀸𑀕𑁄𑀢𑀺 𑀦𑀦𑁆𑀤𑀺𑀭𑀸𑀕𑁄𑀢𑀺 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄, 𑀦𑀦𑁆𑀤𑀺𑀭𑀸𑀕𑀢𑁆𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑁂𑀦 𑀲𑀳𑀕𑀢𑀸𑀦𑀺 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂. 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀸𑀫𑀲𑁆𑀲𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀢𑀡𑁆𑀳𑀸 𑀦𑀸𑀫. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀳 𑀧𑀯𑀢𑁆𑀢𑀸 𑀪𑀯𑀢𑀡𑁆𑀳𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀳 𑀧𑀯𑀢𑁆𑀢𑀸 𑀯𑀺𑀪𑀯𑀢𑀡𑁆𑀳𑀸. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀸𑀦𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀯𑀺𑀭𑀚𑁆𑀚𑀦𑀁 𑀯𑀺𑀕𑀫𑀦𑀁 𑀯𑀺𑀭𑀸𑀕𑁄. 𑀦𑀺𑀭𑀼𑀚𑁆𑀛𑀦𑀁 𑀦𑀺𑀭𑁄𑀥𑁄. 𑀉𑀪𑀬𑁂𑀦𑀸𑀧𑀺 𑀲𑀼𑀝𑁆𑀞𑀼 𑀯𑀺𑀕𑀫𑁄𑀯 𑀯𑀼𑀘𑁆𑀘𑀢𑀺. 𑀅𑀲𑁂𑀲𑀸𑀬𑀧𑀺 𑀢𑀡𑁆𑀳𑀸𑀬 𑀯𑀺𑀭𑀸𑀕𑁄, 𑀦𑀺𑀭𑁄𑀥𑁄 𑀘 𑀬𑁂𑀦 𑀳𑁄𑀢𑀺, 𑀲𑁄 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀫𑁂𑀯. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀢𑀡𑁆𑀳𑀁, 𑀯𑀝𑁆𑀝𑀜𑁆𑀘 𑀘𑀚𑀦𑁆𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺 𑀦 𑀅𑀮𑁆𑀮𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁫. 𑀘𑀓𑁆𑀔𑀼𑀦𑁆𑀢𑀺𑀆𑀤𑀻𑀦𑀺 𑀜𑀸𑀡𑀯𑁂𑀯𑀘𑀦𑀸𑀦𑁂𑀯.

𑁧𑁬. 𑀬𑀸𑀯𑀓𑀻𑀯𑀜𑁆𑀘𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀢𑀺𑀧𑀭𑀺𑀯𑀝𑁆𑀝𑀦𑁆𑀢𑀺 𑀲𑀘𑁆𑀘𑀜𑀸𑀡, 𑀓𑀺𑀘𑁆𑀘𑀜𑀸𑀡, 𑀓𑀢𑀜𑀸𑀡𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀧𑀭𑀺𑀯𑀝𑁆𑀝𑀸𑀦𑀁 𑀯𑀲𑁂𑀦 𑀢𑀺𑀧𑀭𑀺𑀯𑀝𑁆𑀝𑀁 𑀜𑀸𑀡𑀤𑀲𑁆𑀲𑀦𑀁. 𑀏𑀢𑁆𑀣 𑀘 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀇𑀤𑀁 𑀤𑀼𑀓𑁆𑀔𑀲𑀫𑀼𑀤𑀬’’𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀜𑀸𑀡𑀁 𑀲𑀘𑁆𑀘𑀜𑀸𑀡𑀁 𑀦𑀸𑀫. 𑀢𑁂𑀲𑀼 𑀏𑀯 ‘‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀳𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀪𑀸𑀯𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀚𑀸𑀦𑀦𑀜𑀸𑀡𑀁 𑀓𑀺𑀘𑁆𑀘𑀜𑀸𑀡𑀁 𑀦𑀸𑀫. ‘‘𑀧𑀭𑀺𑀜𑁆𑀜𑀸𑀢𑀁 𑀧𑀳𑀻𑀦𑀁 𑀲𑀘𑁆𑀙𑀺𑀓𑀢𑀁 𑀪𑀸𑀯𑀺𑀢’’𑀦𑁆𑀢𑀺 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀪𑀸𑀯𑀚𑀸𑀦𑀦𑀜𑀸𑀡𑀁 𑀓𑀢𑀜𑀸𑀡𑀁 𑀦𑀸𑀫. 𑀤𑁆𑀯𑀸𑀤𑀲𑀸𑀓𑀸𑀭𑀦𑁆𑀢𑀺 𑀢𑁂𑀲𑀫𑁂𑀯 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲𑀸𑀓𑀸𑀭𑀁.

𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀦𑁆𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀏𑀯𑀁 𑀦 𑀧𑀝𑀺𑀚𑀸𑀦𑀺𑀁. 𑀬𑀢𑁄 𑀘 𑀔𑁄𑀢𑀺 𑀬𑀢𑁄 𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 ¶ . 𑀅𑀣𑀸𑀳𑀦𑁆𑀢𑀺 𑀢𑀢𑁄 𑀧𑀭𑀁 𑀅𑀳𑀁. 𑀜𑀸𑀡𑀜𑁆𑀘 𑀧𑀦 𑀫𑁂𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀓𑀼𑀧𑁆𑀧𑀸 𑀫𑁂𑀢𑀺𑀆𑀤𑀺 𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁 𑀢𑀲𑁆𑀲 𑀫𑀕𑁆𑀕𑀲𑀗𑁆𑀔𑀸𑀢𑀓𑀸𑀭𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀅𑀓𑀼𑀧𑁆𑀧𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀲𑁆𑀫𑀺𑀁 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀦𑁆𑀢𑀺 𑀦𑀺𑀕𑁆𑀕𑀸𑀣𑀲𑀼𑀢𑁆𑀢𑁂. 𑀪𑀜𑁆𑀜𑀫𑀸𑀦𑁂𑀢𑀺 𑀪𑀡𑀺𑀬𑀫𑀸𑀦𑁂. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀇𑀥 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀬𑀁 𑀓𑀺𑀜𑁆𑀘𑀻𑀢𑀺𑀆𑀤𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀓𑀺𑀘𑁆𑀘𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁧𑁭. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀧𑀝𑀺𑀯𑁂𑀥𑀜𑀸𑀡𑀥𑀫𑁆𑀫𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁 ¶ . 𑀑𑀪𑀸𑀲𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑁄 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀞𑀺𑀢𑁄 𑀑𑀪𑀸𑀲𑁄.

𑁧𑁮. 𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀢𑁄 𑀅𑀥𑀺𑀕𑀢𑀢𑁆𑀢𑀸 𑀦 𑀧𑀭𑀁 𑀧𑀘𑁆𑀘𑁂𑀢𑀺, 𑀧𑀭𑀲𑁆𑀲 𑀲𑀤𑁆𑀥𑀸𑀬 𑀏𑀢𑁆𑀣 𑀦 𑀧𑀯𑀢𑁆𑀢𑀢𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄. 𑀏𑀳𑀺 𑀪𑀺𑀓𑁆𑀔𑀽𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑀫𑀢𑁆𑀢𑁂 𑀧𑀩𑁆𑀩𑀚𑁆𑀚𑀸, 𑀉𑀧𑀲𑀫𑁆𑀧𑀤𑀸 𑀘 𑀲𑀺𑀚𑁆𑀛𑀢𑀺, 𑀢𑁂𑀦𑁂𑀯 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀯𑀘𑀦𑀧𑀭𑀺𑀬𑁄𑀲𑀸𑀦𑁂 𑀏𑀯 𑀉𑀧𑀲𑀫𑁆𑀧𑀤𑀸 𑀲𑀺𑀚𑁆𑀛𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘𑀏𑀳𑀺 𑀪𑀺𑀓𑁆𑀔𑀽𑀢𑀺 𑀪𑀕𑀯𑀢𑁄 𑀯𑀘𑀦𑁂𑀦𑀸’𑀢𑀺 𑀇𑀤𑀁 𑀏𑀳𑀺𑀪𑀺𑀓𑁆𑀔𑀼𑀲𑀤𑁆𑀤𑁄𑀧𑀮𑀓𑁆𑀔𑀺𑀢𑀯𑀘𑀦𑀁 𑀏𑀳𑀺𑀪𑀺𑀓𑁆𑀔𑀼𑀯𑀘𑀦𑀦𑁆𑀢𑀺𑀆𑀤𑀺𑀧𑀤𑀯𑀲𑁂𑀦 𑀯𑀼𑀢𑁆𑀢𑀁 𑀫𑀼𑀲𑀸𑀯𑀸𑀤𑀯𑀕𑁆𑀕𑁄𑀢𑀺𑀆𑀤𑀻𑀲𑀼 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀧𑀞𑀫𑀧𑀸𑀭𑀸𑀚𑀺𑀓𑀝𑁆𑀞𑀓𑀣𑀸𑀬𑀁 ‘‘𑀪𑀕𑀯𑀸 𑀳𑀺…𑀧𑁂… 𑀏𑀳𑀺 𑀪𑀺𑀓𑁆𑀔𑀼, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀪𑀺𑀓𑁆𑀔𑀽𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸) 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀫𑁂𑀢𑀺. 𑀬𑀢𑁆𑀢𑀓𑀜𑁆𑀳𑀺 𑀪𑀕𑀯𑀢𑀸 𑀦𑀺𑀬𑀫𑁂𑀦 𑀯𑀼𑀘𑁆𑀘𑀢𑀺, 𑀢𑀢𑁆𑀢𑀓𑀁 𑀲𑀩𑁆𑀩𑀫𑁆𑀧𑀺 𑀅𑀗𑁆𑀕𑀫𑁂𑀯. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀳𑀺 𑀏𑀢𑀁 𑀧𑀭𑀺𑀧𑀼𑀡𑁆𑀡𑀁 𑀯𑀼𑀘𑁆𑀘𑀢𑀺, 𑀅𑀲𑁂𑀓𑁆𑀔𑀸𑀦𑀁 𑀧𑀦 ‘‘𑀘𑀭 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀲𑀺𑀓𑁆𑀔𑀢𑁆𑀢𑀬𑀲𑀫𑀺𑀤𑁆𑀥𑀺𑀢𑁄. 𑀮𑁄𑀓𑀺𑀬𑀲𑀫𑁆𑀧𑀤𑀸𑀳𑀺 𑀉𑀧𑀭𑀺𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀲𑀫𑁆𑀧𑀤𑀸𑀢𑀺 𑀉𑀧𑀲𑀫𑁆𑀧𑀤𑀸.

𑁧𑁯-𑁨𑁧. 𑀦𑀻𑀳𑀸𑀭𑀪𑀢𑁆𑀢𑁄𑀢𑀺 𑀪𑀺𑀓𑁆𑀔𑀽𑀳𑀺 𑀕𑀸𑀫𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀪𑀢𑁆𑀢𑁄. 𑀓𑀮𑁆𑀮𑀁 𑀦𑀽𑀢𑀺 𑀬𑀼𑀢𑁆𑀢𑀁 𑀦𑀼. 𑀏𑀢𑀁 𑀫𑀫𑀸𑀢𑀺𑀆𑀤𑀺 𑀬𑀣𑀸𑀓𑁆𑀓𑀫𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀸𑀦𑀁 𑀤𑀲𑁆𑀲𑀦𑀁.

𑁨𑁨-𑁨𑁩. 𑀢𑀲𑁆𑀫𑀸 ¶ 𑀢𑀺𑀳𑀸𑀢𑀺 𑀏𑀢𑁆𑀣 𑀢𑀺𑀳𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀓𑁆𑀓𑀡𑁆𑀞𑀢𑀺. 𑀯𑀺𑀭𑀚𑁆𑀚𑀢𑀻𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀦 𑀭𑀚𑁆𑀚𑀢𑀺. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀨𑀮𑀯𑀲𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀦𑁆𑀢𑀺𑀆𑀤𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀤𑀲𑁆𑀲𑀦𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀭𑀡𑀻𑀬𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀘𑁆𑀘𑁂𑀓𑀁 𑀓𑀢𑁆𑀢𑀩𑁆𑀩𑀁 𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀲𑁄𑀴𑀲𑀯𑀺𑀥𑀁 𑀓𑀺𑀘𑁆𑀘𑀁. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀸𑀬 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬, 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀅𑀧𑀭𑀁 𑀧𑀼𑀦 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀢𑁄 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀬𑁆𑀳𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁧𑁫. 𑀆𑀴𑀫𑁆𑀩𑀭𑀦𑁆𑀢𑀺 𑀧𑀡𑀯𑀁. 𑀯𑀺𑀓𑁂𑀲𑀺𑀓𑀦𑁆𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀓𑁂𑀲𑀁. 𑀯𑀺𑀓𑁆𑀔𑁂𑀴𑀺𑀓𑀦𑁆𑀢𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀮𑀸𑀮𑀁 ¶ . 𑀲𑀼𑀲𑀸𑀦𑀁 𑀫𑀜𑁆𑀜𑁂𑀢𑀺 𑀲𑀼𑀲𑀸𑀦𑀁 𑀯𑀺𑀬 𑀅𑀤𑁆𑀤𑀲 𑀲𑀓𑀁 𑀧𑀭𑀺𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀲𑀁𑀯𑁂𑀕𑀯𑀲𑀧𑁆𑀧𑀯𑀢𑁆𑀢𑀁 𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀉𑀧𑀲𑁆𑀲𑀝𑁆𑀞𑀦𑁆𑀢𑀺 𑀤𑀼𑀓𑁆𑀔𑁂𑀦 𑀲𑀫𑁆𑀫𑀺𑀲𑁆𑀲𑀁, 𑀤𑀼𑀓𑁆𑀔𑁄𑀢𑀺𑀡𑁆𑀡𑀁 𑀲𑀩𑁆𑀩𑀲𑀢𑁆𑀢𑀓𑀸𑀬𑀚𑀸𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁬. 𑀇𑀤𑀁 𑀔𑁄 𑀬𑀲𑀸𑀢𑀺 𑀪𑀕𑀯𑀸 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀁. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀑𑀓𑀸𑀭𑀦𑁆𑀢𑀺 𑀦𑀺𑀳𑀻𑀦𑀢𑀸 𑀦𑀺𑀳𑀻𑀦𑀚𑀦𑀲𑁂𑀯𑀺𑀢𑀢𑁆𑀢𑀸. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀢𑁂𑀳𑀺 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀦𑀁, 𑀲𑀁𑀓𑀺𑀮𑁂𑀲𑀯𑀺𑀲𑀬𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀅𑀭𑁄𑀕𑀘𑀺𑀢𑁆𑀢𑀁. 𑀲𑀸𑀫𑀁 𑀅𑀢𑁆𑀢𑀦𑀸𑀯 𑀉𑀓𑁆𑀓𑀁𑀲𑁄 𑀉𑀓𑁆𑀔𑀺𑀧𑀦𑀁 𑀏𑀢𑀺𑀲𑁆𑀲𑀦𑁆𑀢𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀸, 𑀲𑀘𑁆𑀘𑀤𑁂𑀲𑀦𑀸. 𑀢𑀲𑁆𑀲𑀸 𑀲𑀭𑀽𑀧𑀤𑀲𑁆𑀲𑀦𑀁 ‘‘𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺.

𑁨𑁭. 𑀅𑀲𑁆𑀲𑀤𑀽𑀢𑁂𑀢𑀺 𑀅𑀲𑁆𑀲𑀆𑀭𑀼𑀴𑁆𑀳𑁂 𑀤𑀽𑀢𑁂. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺 𑀇𑀤𑁆𑀥𑀺𑀓𑀺𑀭𑀺𑀬𑀁. 𑀅𑀪𑀺𑀲𑀗𑁆𑀔𑀭𑁂𑀲𑀺 𑀅𑀓𑀸𑀲𑀺.

𑁨𑁮. 𑀬𑀣𑀸𑀤𑀺𑀝𑁆𑀞𑀦𑁆𑀢𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀁 𑀘𑀢𑀼𑀲𑁆𑀲𑀘𑁆𑀘𑀪𑀽𑀫𑀺𑀁 𑀲𑁂𑀲𑀫𑀕𑁆𑀕𑀢𑁆𑀢𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀼 𑀦𑁄 𑀚𑀻𑀯𑀺𑀢𑀦𑁆𑀢𑀺 𑀏𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀸𑀢𑀼 𑀚𑀻𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀲𑀲𑁆𑀲 𑀔𑀻𑀡𑀸𑀲𑀯𑀢𑁆𑀢𑀸 ‘‘𑀏𑀳𑀺 𑀪𑀺𑀓𑁆𑀔𑀼, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀢𑁆𑀢𑀓𑁂𑀦𑁂𑀯 𑀪𑀕𑀯𑀸 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀔𑀻𑀡𑀸𑀲𑀯𑀸𑀦𑀜𑁆𑀳𑀺 𑀏𑀢𑁆𑀢𑀓𑁂𑀦𑁂𑀯 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸 𑀧𑀼𑀩𑁆𑀩𑁂𑀯 𑀤𑀼𑀓𑁆𑀔𑀲𑁆𑀲 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑀁 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁.

𑁩𑁦. 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀦𑁆𑀢𑀺 ¶ 𑀲𑁂𑀝𑁆𑀞𑀺𑀦𑁄 𑀘 𑀅𑀦𑀼𑀲𑁂𑀝𑁆𑀞𑀺𑀦𑁄 𑀘 𑀧𑀯𑁂𑀡𑀻𑀯𑀲𑁂𑀦 𑀆𑀕𑀢𑀸 𑀬𑁂𑀲𑀁 𑀓𑀼𑀮𑀸𑀦𑀁 𑀲𑀦𑁆𑀢𑀺, 𑀢𑁂𑀲𑀁 𑀲𑁂𑀝𑁆𑀞𑀸𑀦𑀼𑀲𑁂𑀝𑁆𑀞𑀻𑀦𑀁 𑀓𑀼𑀮𑀸𑀦𑀁. 𑀑𑀭𑀓𑁄𑀢𑀺 𑀮𑀸𑀫𑀓𑁄.

𑁩𑁨-𑁩𑁩. 𑀫𑀸 𑀏𑀓𑁂𑀦 𑀤𑁆𑀯𑁂𑀢𑀺 𑀏𑀓𑁂𑀦 𑀫𑀕𑁆𑀕𑁂𑀦 𑀤𑁆𑀯𑁂 𑀪𑀺𑀓𑁆𑀔𑀽 𑀫𑀸 𑀅𑀕𑀫𑀺𑀢𑁆𑀣. 𑀯𑀺𑀲𑀼𑀤𑁆𑀥𑁂 𑀲𑀢𑁆𑀢𑁂, 𑀕𑀼𑀡𑁂 𑀯𑀸 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑁂 𑀦𑀺𑀬𑀼𑀢𑁆𑀢𑁄 𑀧𑀸𑀧𑀺𑀫𑀸.

𑀲𑀩𑁆𑀩𑀧𑀸𑀲𑁂𑀳𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑀧𑀸𑀲𑁂𑀳𑀺. 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸𑀢𑀺 𑀬𑁂 𑀤𑀺𑀩𑁆𑀩𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸, 𑀫𑀸𑀦𑀼𑀲𑀓𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸 𑀘 𑀓𑀺𑀮𑁂𑀲𑀧𑀸𑀲𑀸 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀳𑀺 𑀢𑁂𑀳𑀺. ‘‘𑀢𑁆𑀯𑀁 𑀩𑀼𑀤𑁆𑀥𑁄’’𑀢𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀓𑀭𑀺𑀬𑀫𑀸𑀦𑀲𑀓𑁆𑀓𑀸𑀭𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀦𑁆𑀢𑀮𑀺𑀓𑁆𑀔𑁂 ¶ 𑀘𑀭𑀦𑁆𑀢𑁂 𑀧𑀜𑁆𑀘𑀸𑀪𑀺𑀜𑁆𑀜𑁂𑀧𑀺 𑀩𑀦𑁆𑀥𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑁄, 𑀭𑀸𑀕𑀧𑀸𑀲𑁄. 𑀫𑀸𑀭𑁄 𑀧𑀦 𑀧𑀸𑀲𑀫𑁆𑀧𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑀁 𑀫𑀜𑁆𑀜𑀢𑀺. 𑀫𑀸𑀦𑀲𑁄𑀢𑀺 𑀫𑀦𑁄𑀲𑀫𑁆𑀧𑀬𑀼𑀢𑁆𑀢𑁄.

𑀚𑀸𑀦𑀸𑀢𑀺 𑀫𑀦𑁆𑀢𑀺 𑀲𑁄 𑀓𑀺𑀭 ‘‘𑀫𑀳𑀸𑀦𑀼𑀪𑀸𑀯𑁄 𑀅𑀜𑁆𑀜𑁄 𑀤𑁂𑀯𑀧𑀼𑀢𑁆𑀢𑁄 𑀦𑀺𑀯𑀸𑀭𑁂𑀢𑀻𑀢𑀺 𑀪𑀻𑀢𑁄 𑀦𑀺𑀯𑀢𑁆𑀢𑀺𑀲𑁆𑀲𑀢𑀺 𑀦𑀼 𑀔𑁄’’𑀢𑀺𑀲𑀜𑁆𑀜𑀸𑀬 𑀯𑀢𑁆𑀯𑀸 ‘‘𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀚𑀸𑀦𑀸𑀢𑀺 𑀫’’𑀦𑁆𑀢𑀺 𑀤𑀼𑀫𑁆𑀫𑀦𑁄 𑀧𑀮𑀸𑀬𑀺.

𑁩𑁪. 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀬𑀲𑁆𑀫𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑀸𑀦𑀫𑁆𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀘 𑀢𑁂 𑀦 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀧𑀩𑁆𑀩𑀚𑁆𑀚𑀸𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀧𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦𑁂𑀯 𑀧𑀩𑁆𑀩𑀚𑀦𑁆𑀢𑀺. 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀬𑀁 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀓𑁂𑀲𑀘𑁆𑀙𑁂𑀤𑀦𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑀭𑀡𑀤𑀸𑀦𑀸𑀦𑀺 𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀢𑁂𑀲𑀼 𑀧𑀘𑁆𑀙𑀺𑀫𑀤𑁆𑀯𑀬𑀁 𑀪𑀺𑀓𑁆𑀔𑀽𑀳𑀺 𑀏𑀯 𑀓𑀸𑀢𑀩𑁆𑀩𑀁, 𑀓𑀸𑀭𑁂𑀢𑀩𑁆𑀩𑀁 𑀯𑀸. ‘‘𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀇𑀤𑀁 𑀢𑀺𑀯𑀺𑀥𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀭𑀺𑀳𑀭𑀡𑀢𑁆𑀣𑀁. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀓𑀲𑀻𑀫𑀸𑀬 ‘‘𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀸𑀤𑀺𑀘𑁆𑀙𑁂𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀲𑀭𑀡𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀆𑀡𑀢𑁆𑀢𑀺𑀬𑀸 𑀤𑀺𑀦𑁆𑀦𑀫𑁆𑀧𑀺 𑀲𑀭𑀡𑀁 𑀦 𑀭𑀼𑀳𑀢𑀺.

𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄. 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀦𑁆𑀢𑀺 ‘‘𑀓𑁂𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 ¶ 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀬𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧𑁧) 𑀆𑀕𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂𑀢𑀺 𑀧𑀼𑀩𑁆𑀩𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼. 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀸𑀯𑀺𑀢𑀪𑀸𑀯𑀦𑁄𑀢𑀺 𑀲𑀫𑀣𑀯𑀲𑁂𑀦𑀸𑀧𑀺.

𑀓𑀸𑀲𑀸𑀬𑀸𑀦𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸…𑀧𑁂… 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀲𑀩𑁆𑀩𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀇𑀫𑀁 𑀓𑀸𑀲𑀸𑀯𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀸 ‘‘𑀢𑀁 𑀓𑀸𑀲𑀸𑀯𑀁 𑀤𑀢𑁆𑀯𑀸’’𑀢𑀺 𑀯𑀸 𑀯𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂, 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀁 𑀬𑀸𑀘𑀦𑀧𑀼𑀩𑁆𑀩𑀓𑀁 𑀘𑀻𑀯𑀭𑀁 𑀧𑀝𑀺𑀘𑁆𑀙𑀸𑀧𑁂𑀢𑀺. 𑀅𑀣𑀸𑀧𑀻𑀢𑀺𑀆𑀤𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀕𑁆𑀕𑀸𑀳𑀸𑀧𑀦𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀁. 𑀅𑀣𑀸𑀧𑀻𑀢𑀺 𑀢𑀢𑁄 𑀧𑀭𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀘𑀻𑀯𑀭𑀁 𑀅𑀧𑁆𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀦𑀧𑁆𑀧𑀓𑀸𑀭𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀣𑀸𑀧𑀻’’𑀢𑀺 𑀯𑀼𑀢𑁆𑀢𑀁, 𑀅𑀣𑀸𑀧𑀻𑀢𑀺 𑀘 𑀅𑀣 𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. ‘‘𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀸𑀤𑁂 ¶ 𑀯𑀦𑁆𑀤𑀸𑀧𑁂𑀢𑁆𑀯𑀸𑀢𑀺 𑀧𑀸𑀤𑀸𑀪𑀺𑀫𑀼𑀔𑀁 𑀦𑀫𑀸𑀧𑁂𑀢𑁆𑀯𑀸. 𑀤𑀽𑀭𑁂 𑀯𑀦𑁆𑀤𑀦𑁆𑀢𑁄𑀧𑀺 𑀳𑀺 𑀧𑀸𑀤𑁂 𑀯𑀦𑁆𑀤𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀚𑁆𑀛𑀸𑀬𑁂𑀦 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀸𑀢𑀺, 𑀅𑀬𑀁 𑀉𑀧𑀚𑁆𑀛𑀸𑀬𑁄. 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑀬𑀦𑀢𑁆𑀣𑀁 𑀬𑀁 𑀆𑀘𑀭𑀺𑀬𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀅𑀬𑀁 𑀆𑀘𑀭𑀺𑀬𑁄. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀲𑀬𑀫𑁂𑀯 𑀲𑀩𑁆𑀩𑀁 𑀲𑀺𑀓𑁆𑀔𑀸𑀧𑁂𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀦 𑀦𑀺𑀬𑁆𑀬𑀸𑀢𑁂𑀢𑀺, 𑀉𑀧𑀚𑁆𑀛𑀸𑀬𑁄𑀯𑀲𑁆𑀲 𑀆𑀘𑀭𑀺𑀬𑁄𑀧𑀺 𑀳𑁄𑀢𑀺, 𑀬𑀣𑀸 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀲𑀬𑀫𑁂𑀯 𑀓𑀫𑁆𑀫𑀯𑀸𑀘𑀁 𑀯𑀸𑀘𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄𑀯 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄𑀧𑀺 𑀳𑁄𑀢𑀺.

𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸 𑀯𑀺𑀘𑁆𑀙𑁂𑀤𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀲𑀫𑁆𑀩𑀦𑁆𑀥𑀸𑀦𑀻’’𑀢𑀺.

‘‘𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑁂𑀔𑀺𑀬𑀯𑀢𑁆𑀢𑀔𑀦𑁆𑀥𑀓𑀯𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀼

𑀘 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀮𑁄𑀓𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀸𑀫𑀡𑁂𑀭𑁂𑀳𑀺 𑀯𑀢𑁆𑀢𑀺𑀢𑀩𑁆𑀩𑀁, 𑀢𑀢𑁆𑀣 𑀅𑀯𑀢𑁆𑀢𑀫𑀸𑀦𑁄 𑀅𑀮𑀚𑁆𑀚𑀻, 𑀤𑀡𑁆𑀟𑀓𑀫𑁆𑀫𑀸𑀭𑀳𑁄 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀫𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁫. 𑀧𑀸𑀴𑀺𑀬𑀁 ¶ 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀅𑀦𑀼𑀧𑀸𑀧𑀼𑀡𑀸𑀣𑀸𑀢𑀺 ‘‘𑀔𑀻𑀡𑀸𑀲𑀯𑀸 𑀫𑀬𑀁, 𑀓𑀺𑀁 𑀅𑀫𑁆𑀳𑀸𑀓𑀁 𑀧𑀥𑀸𑀦𑁂𑀦𑀸’’𑀢𑀺 𑀯𑀸𑀲𑀦𑀸𑀤𑁄𑀲𑁂𑀦 𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀯 𑀯𑀻𑀢𑀺𑀦𑀸𑀫𑀦𑀢𑁆𑀣𑀁, 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑁂𑀲𑀫𑁆𑀧𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀲𑀫𑀸𑀧𑀚𑁆𑀚𑀦𑀢𑁆𑀣𑀜𑁆𑀘 𑀑𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀫𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀤𑁆𑀤𑀯𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁬. 𑀇𑀤𑀁 𑀦𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺 𑀢𑁂𑀲𑀁 𑀢𑀺𑀁𑀲𑀚𑀦𑀸𑀦𑀁 𑀏𑀓𑀢𑁄 𑀅𑀪𑀺𑀲𑀫𑀬𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁. 𑀅𑀜𑁆𑀜𑀫𑁆𑀧𑀺 𑀢𑁂𑀲𑀁 𑀧𑀘𑁆𑀘𑁂𑀓𑀁 𑀧𑀼𑀩𑁆𑀩𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀭𑀡𑀕𑀫𑀦𑀤𑀸𑀦𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀲𑀫𑀸𑀬𑁄𑀕𑀯𑀲𑁂𑀦 𑀩𑀳𑀼𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀅𑀢𑁆𑀣𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀳𑀺 𑀢𑀤𑀳𑁂𑀯 𑀧𑀝𑀺𑀯𑁂𑀥𑁄, 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀤𑀺𑀯𑀺𑀲𑁂𑀲𑁄 𑀘 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬.

𑀪𑀤𑁆𑀤𑀯𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁭-𑁩𑁮. 𑀧𑀸𑀴𑀺𑀬𑀁 ¶ 𑀅𑀕𑀭𑀽𑀢𑀺 𑀪𑀸𑀭𑀺𑀬𑀁 𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀪𑀺𑀦𑁆𑀦𑀁 𑀲𑀚𑁄𑀢𑀺𑀪𑀽𑀢𑀸𑀦𑀦𑁆𑀢𑀺 𑀉𑀪𑁄𑀲𑀼 𑀲𑀚𑁄𑀢𑀺𑀪𑀽𑀢𑁂𑀲𑀼. 𑀧𑀢𑁆𑀢𑁂 𑀧𑀓𑁆𑀔𑀺𑀧𑀻𑀢𑀺 𑀢𑀁 𑀦𑀸𑀕𑀁 𑀦𑀺𑀳𑀢𑀢𑁂𑀚𑀁 𑀥𑀫𑁆𑀫𑀤𑁂𑀲𑀦𑀸𑀬 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀭𑀡𑀲𑀻𑀮𑀸𑀦𑀺 𑀤𑀢𑁆𑀯𑀸 𑀲𑀓𑀮𑀭𑀢𑁆𑀢𑀺𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀞𑀺𑀢𑀁 𑀚𑀝𑀺𑀮𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺, 𑀦 𑀅𑀳𑀺𑀢𑀼𑀡𑁆𑀟𑀺𑀓𑁄 𑀯𑀺𑀬 𑀩𑀮𑀓𑁆𑀓𑀸𑀭𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫.

𑁩𑁯. 𑀅𑀚𑁆𑀚𑀡𑁆𑀳𑁄𑀢𑀺 𑀅𑀚𑁆𑀚 𑀏𑀓𑀤𑀺𑀯𑀲𑀁. 𑀅𑀕𑁆𑀕𑀺𑀲𑀸𑀮𑀫𑁆𑀳𑀻𑀢𑀺 𑀅𑀕𑁆𑀬𑀸𑀕𑀸𑀭𑁂. 𑀲𑀼𑀫𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀫𑀦𑀲𑀸 𑀲𑀤𑀺𑀲𑁄 𑀫𑀦𑁄 𑀅𑀲𑁆𑀲𑀸𑀢𑀺 𑀲𑀼𑀫𑀦𑀫𑀦𑀲𑁄. 𑀅𑀥𑀺𑀘𑀺𑀢𑁆𑀢𑁄𑀢𑀺 𑀫𑀳𑀸𑀓𑀭𑀼𑀡𑀸𑀤𑀻𑀳𑀺 𑀅𑀥𑀺𑀘𑀺𑀢𑁆𑀢𑁄. 𑀉𑀤𑀺𑀘𑁆𑀙𑀭𑁂𑀢𑀺 𑀉𑀮𑁆𑀮𑁄𑀓𑁂𑀲𑀼𑀁, 𑀧𑀭𑀺𑀯𑀸𑀭𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀯𑀡𑁆𑀡𑀸 𑀅𑀘𑁆𑀘𑀺𑀬𑁄𑀢𑀺 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀼𑀢𑁆𑀢𑀸. 𑀅𑀳𑀁 𑀢𑁂 𑀥𑀼𑀯𑀪𑀢𑁆𑀢𑁂𑀦 𑀧𑀝𑀺𑀫𑀸𑀦𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑁂𑀲𑁄.

𑁪𑁦. 𑀅𑀪𑀺𑀓𑁆𑀓𑀦𑁆𑀢𑀸𑀬 ¶ 𑀭𑀢𑁆𑀢𑀺𑀬𑀸𑀢𑀺 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸, 𑀫𑀚𑁆𑀛𑀭𑀢𑁆𑀢𑀺𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀘𑁆𑀙𑀯𑀺𑀯𑀡𑁆𑀡𑀸. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮-𑀲𑀤𑁆𑀤𑀲𑁆𑀲 𑀅𑀦𑀯𑀲𑁂𑀲𑀢𑁆𑀣𑁄, 𑀓𑀧𑁆𑀧-𑀲𑀤𑁆𑀤𑀲𑁆𑀲 𑀲𑀫𑀦𑁆𑀢𑀪𑀸𑀯𑁄, 𑀢𑀲𑁆𑀫𑀸 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀯𑀦𑀲𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀤𑁆𑀤𑀺𑀲𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀁 𑀦𑀸𑀫.

𑁪𑁩. 𑀅𑀗𑁆𑀕𑀫𑀕𑀥𑀸𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀯𑀸𑀲𑀺𑀦𑁄. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀪𑀺𑀜𑁆𑀜𑀺𑀤𑁆𑀥𑀺𑀬𑁂𑀯 𑀧𑀝𑀺𑀧𑀓𑁆𑀔𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁, 𑀯𑁂𑀦𑁂𑀬𑁆𑀬𑀲𑀢𑁆𑀢𑀕𑀢𑀤𑁄𑀲𑀸𑀦𑀜𑁆𑀘 𑀳𑀭𑀡𑀢𑁄 𑀅𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬𑀁, 𑀢𑀁 𑀢𑀁 𑀯𑀸 𑀲𑀢𑁆𑀢𑀳𑀺𑀢𑀁 𑀧𑀝𑀺𑀘𑁆𑀘 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀢𑀤𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀇𑀤𑁆𑀥𑀺 𑀏𑀯 𑀧𑀸𑀝𑀺𑀳𑀸𑀭𑀺𑀬𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁.

𑁪𑁪. 𑀧𑀁𑀲𑀼𑀓𑀽𑀮𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀧𑀼𑀡𑁆𑀡𑀸𑀬 𑀤𑀸𑀲𑀺𑀬𑀸 𑀲𑀭𑀻𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀙𑀟𑁆𑀟𑀺𑀢𑀁 𑀲𑀸𑀡𑀫𑀬𑀁 𑀓𑀺𑀫𑀺𑀓𑀼𑀮𑀸𑀓𑀼𑀮𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀬𑀁 𑀪𑀕𑀯𑀸 𑀪𑀽𑀫𑀺𑀁 𑀓𑀫𑁆𑀧𑁂𑀦𑁆𑀢𑁄 𑀧𑀸𑀭𑀼𑀧𑀺𑀢𑁆𑀯𑀸 𑀧𑀘𑁆𑀙𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀢𑁆𑀣 𑀦𑀼 𑀔𑁄𑀢𑀺𑀆𑀤𑀺𑀧𑀭𑀺𑀯𑀺𑀢𑀓𑁆𑀓𑁄 𑀚𑀝𑀺𑀮𑀸𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑀢𑁆𑀣𑀁 𑀓𑀢𑁄. 𑀧𑀸𑀡𑀺𑀦𑀸 𑀔𑀡𑀦𑁆𑀢𑁄 𑀯𑀺𑀬 𑀇𑀤𑁆𑀥𑀺𑀬𑀸 𑀫𑀢𑁆𑀢𑀺𑀓𑀁 𑀅𑀧𑀦𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀸𑀡𑀺𑀦𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀢𑁆𑀯𑀸’’𑀢𑀺.

𑁪𑁬. 𑀨𑀸𑀮𑀺𑀬𑀦𑁆𑀢𑀼, 𑀓𑀲𑁆𑀲𑀧, 𑀓𑀝𑁆𑀞𑀸𑀦𑀻𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑁂𑀦 𑀦𑀺𑀯𑁂𑀤𑀺𑀢𑁂 𑀏𑀯𑀫𑀯𑁄𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁪𑁯. 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 ¶ 𑀳𑀺𑀫𑀧𑀸𑀢𑀲𑀫𑀬𑁂𑀢𑀺 𑀏𑀢𑁆𑀣 𑀫𑀸𑀖𑀫𑀸𑀲𑀲𑁆𑀲 𑀅𑀯𑀲𑀸𑀦𑁂 𑀘𑀢𑀲𑁆𑀲𑁄, 𑀨𑀕𑁆𑀕𑀼𑀡𑀫𑀸𑀲𑀲𑁆𑀲 𑀆𑀤𑀺𑀫𑁆𑀳𑀺 𑀘𑀢𑀲𑁆𑀲𑁄𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀫𑀸𑀲𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞𑀭𑀢𑁆𑀢𑀺𑀬𑁄 𑀅𑀦𑁆𑀢𑀭𑀝𑁆𑀞𑀓𑀸 𑀦𑀸𑀫. 𑀢𑀸𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀭𑀢𑁆𑀢𑀻𑀲𑀼 𑀳𑀺𑀫𑀧𑀸𑀢𑀓𑀸𑀮𑁂. 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀫𑁆𑀧𑀺 𑀲𑀳𑀲𑀸 𑀢𑀤𑀼𑀪𑀬𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁.

𑁫𑁦. 𑀉𑀤𑀓𑀯𑀸𑀳𑀓𑁄𑀢𑀺 𑀉𑀤𑀓𑁄𑀖𑁄. 𑀭𑁂𑀡𑀼𑀳𑀢𑀸𑀬𑀸𑀢𑀺 𑀭𑀚𑁄𑀓𑀺𑀡𑁆𑀡𑀸𑀬, 𑀅𑀢𑀺𑀦𑁆𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀯𑀸𑀬𑀸𑀢𑀺 𑀓𑀼𑀮𑁆𑀮𑁂𑀦. 𑀇𑀤𑀁 𑀦𑀼 𑀢𑁆𑀯𑀁 𑀫𑀳𑀸𑀲𑀫𑀡𑀸𑀢𑀺 𑀇𑀥 𑀦𑀼 𑀢𑁆𑀯𑀁. 𑀥-𑀓𑀸𑀭𑀲𑁆𑀲 𑀤-𑀓𑀸𑀭𑀁, 𑀅𑀦𑀼𑀲𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀇𑀤𑀁 𑀦𑀽’’𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀫𑀺𑀤𑀸𑀳’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁬𑁫, 𑁨𑁬𑁫) 𑀯𑀺𑀬. ‘‘𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀢𑁆𑀯𑀁 𑀦𑀼 𑀔𑁄 𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀅𑀬𑀫𑀳𑀁 𑀇𑀥 𑀞𑀺𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄.

𑁫𑁧. 𑀘𑀺𑀭𑀧𑀝𑀺𑀓𑀸𑀢𑀺 ¶ 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀓𑁂𑀲𑀫𑀺𑀲𑁆𑀲𑀁 𑀲𑀩𑁆𑀩𑀁 𑀧𑀭𑀺𑀓𑁆𑀔𑀸𑀭𑀁 𑀉𑀤𑀓𑁂 𑀧𑀯𑀸𑀳𑁂𑀢𑁆𑀯𑀸𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀭𑀡𑀺𑀓𑀫𑀡𑁆𑀟𑀮𑀼𑀆𑀤𑀺𑀓𑀸 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀸 𑀔𑀸𑀭𑀻 𑀦𑀸𑀫, 𑀢𑀁𑀳𑀭𑀡𑀓𑀓𑀸𑀚𑀁 𑀔𑀸𑀭𑀺𑀓𑀸𑀚𑀁 𑀦𑀸𑀫. 𑀅𑀕𑁆𑀕𑀺𑀳𑀼𑀢𑀫𑀺𑀲𑁆𑀲𑀦𑁆𑀢𑀺 𑀅𑀕𑁆𑀕𑀺𑀧𑀽𑀚𑁄𑀧𑀓𑀭𑀡𑀲𑀳𑀺𑀢𑀁.

𑁫𑁨-𑁩. 𑀉𑀧𑀲𑀕𑁆𑀕𑁄𑀢𑀺 𑀉𑀧𑀤𑁆𑀤𑀯𑁄. ‘‘𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀤𑀁 𑀦𑀸𑀕𑀤𑀫𑀦𑀸𑀤𑀻𑀦𑀺 𑀧𑀦𑁆𑀦𑀭𑀲 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀁 𑀅𑀧𑁆𑀧𑀓𑀫𑀥𑀺𑀓𑀁 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺.

𑁫𑁪. 𑀕𑀬𑀸𑀬𑀦𑁆𑀢𑀺 𑀕𑀬𑀸𑀦𑀸𑀫𑀺𑀓𑀸𑀬 𑀦𑀤𑀺𑀬𑀸 𑀅𑀤𑀽𑀭𑀪𑀯𑀢𑁆𑀢𑀸 𑀕𑀸𑀫𑁄 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀕𑀬𑀸 𑀦𑀸𑀫 𑀚𑀸𑀢𑁄, 𑀢𑀲𑁆𑀲𑀁. 𑀕𑀬𑀸𑀲𑀻𑀲𑁂𑀢𑀺 𑀏𑀯𑀁𑀦𑀸𑀫𑀓𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂.

‘‘𑀬𑀫𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸…𑀧𑁂… 𑀲𑀼𑀔𑀁 𑀯𑀸’’𑀢𑀺𑀆𑀤𑀺𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀫𑀼𑀔𑁂𑀦 𑀲𑁂𑀲𑀸𑀭𑀽𑀧𑀓𑁆𑀔𑀦𑁆𑀥𑀸𑀦𑀫𑁆𑀧𑀺 𑀆𑀤𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀧𑀅𑀬𑀸𑀧𑀦𑁆𑀦𑀫𑁂𑀯 𑀕𑀳𑀺𑀢𑀁.

𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸𑀯𑀡𑁆𑀡𑀦𑀸

𑁫𑁫. 𑀬𑀜𑁆𑀜𑀸 ¶ 𑀅𑀪𑀺𑀯𑀤𑀦𑁆𑀢𑀻𑀢𑀺 𑀬𑀸𑀕𑀳𑁂𑀢𑀼 𑀇𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀧𑀥𑀻𑀲𑀽𑀢𑀺 𑀏𑀢𑁆𑀣 𑀤𑀼𑀓𑁆𑀔𑀲𑀼𑀔𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀘𑀢𑁆𑀢𑀸𑀭𑁄 𑀉𑀧𑀥𑀻 𑀓𑀸𑀫𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀦𑀁 𑀯𑀲𑁂𑀦. 𑀢𑁂𑀲𑀼 𑀔𑀦𑁆𑀥𑀽𑀧𑀥𑀺 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀦𑁆𑀥𑀽𑀧𑀥𑀻𑀲𑀼 𑀫𑀮𑀦𑁆𑀢𑀺 𑀜𑀢𑁆𑀯𑀸’’𑀢𑀺. 𑀬𑀜𑁆𑀜𑀸𑀢𑀺 𑀬𑀜𑁆𑀜𑀳𑁂𑀢𑀼. 𑀬𑀺𑀝𑁆𑀞𑁂𑀢𑀺 𑀫𑀳𑀸𑀬𑀸𑀕𑁂. 𑀳𑀼𑀢𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀓𑀢𑁆𑀢𑀩𑁆𑀩𑁂 𑀅𑀕𑁆𑀕𑀺𑀧𑀭𑀺𑀘𑀭𑀡𑁂. 𑀓𑀺𑀁 𑀯𑀓𑁆𑀔𑀸𑀫𑀻𑀢𑀺 𑀓𑀣𑀁 𑀯𑀓𑁆𑀔𑀸𑀫𑀺.

𑁫𑁭-𑁮. 𑀆𑀲𑀻𑀲𑀦𑀸𑀢𑀺 𑀫𑀦𑁄𑀭𑀣𑀸. 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀦𑀺𑀓𑁆𑀔𑁂𑀦𑀸𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀲𑁆𑀲 𑀭𑀸𑀲𑀺𑀦𑀸. 𑀲𑀼𑀯𑀡𑁆𑀡𑁂𑀲𑀼 𑀳𑀺 𑀬𑀼𑀢𑁆𑀢𑀺𑀓𑀢𑀁 𑀳𑀻𑀦𑀁. 𑀢𑀢𑁄 𑀭𑀲𑀯𑀺𑀤𑁆𑀥𑀁 𑀲𑁂𑀝𑁆𑀞𑀁, 𑀢𑀢𑁄 𑀆𑀓𑀭𑀼𑀧𑁆𑀧𑀦𑁆𑀦𑀁 𑀲𑁂𑀝𑁆𑀞𑀁, 𑀢𑀢𑁄 𑀬𑀁𑀓𑀺𑀜𑁆𑀘𑀺 𑀤𑀺𑀩𑁆𑀩𑀲𑀼𑀯𑀡𑁆𑀡𑀁 𑀲𑁂𑀝𑁆𑀞𑀁 ¶ , 𑀢𑀢𑁆𑀭𑀸𑀧𑀺 𑀘𑀸𑀫𑀻𑀓𑀭𑀁, 𑀢𑀢𑁄 𑀲𑀸𑀢𑀓𑀼𑀫𑁆𑀪𑀁, 𑀢𑀢𑁄 𑀚𑀫𑁆𑀩𑀼𑀦𑀤𑀁, 𑀢𑀢𑁄𑀧𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀁 𑀲𑁂𑀝𑁆𑀞𑀁. 𑀢𑀲𑁆𑀲 𑀦𑀺𑀓𑁆𑀔𑀁 𑀦𑀸𑀫 𑀧𑀜𑁆𑀘𑀲𑀼𑀯𑀡𑁆𑀡𑀧𑀭𑀺𑀫𑀸𑀡𑀁. 𑀅𑀝𑁆𑀞𑀲𑀼𑀯𑀡𑁆𑀡𑀸𑀤𑀺𑀪𑁂𑀤𑀁 𑀅𑀦𑁂𑀓𑀯𑀺𑀥𑀫𑁆𑀧𑀺 𑀯𑀤𑀦𑁆𑀢𑀺. 𑀤𑀲𑀲𑀼 𑀅𑀭𑀺𑀬𑀯𑀸𑀲𑁂𑀲𑀽𑀢𑀺 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄’’𑀢𑀺 (𑀤𑀻. 𑀦𑀺. 𑁩.𑁩𑁪𑁮, 𑁩𑁬𑁦; 𑀅. 𑀦𑀺. 𑁧𑁦.𑁧𑁯) 𑁋

𑀏𑀯𑀫𑀸𑀕𑀢𑁂𑀲𑀼 𑀤𑀲𑀲𑀼 𑀅𑀭𑀺𑀬𑀯𑀸𑀲𑁂𑀲𑀼. 𑀢𑀢𑁆𑀣 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄𑀢𑀺 𑀧𑀜𑁆𑀘𑀦𑀻𑀯𑀭𑀡𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀝𑁆𑀞𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁄𑀫𑀦𑀲𑁆𑀲𑀺𑀢𑀸𑀤𑀺𑀧𑀝𑀺𑀧𑀓𑁆𑀔𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀏𑀓𑀸𑀭𑀓𑁆𑀔𑁄𑀢𑀺 𑀉𑀧𑀝𑁆𑀞𑀺𑀢𑀲𑀢𑀺𑀢𑀸. 𑀲𑀗𑁆𑀔𑀸𑀬𑀲𑁂𑀯𑀦𑀸 𑀅𑀥𑀺𑀯𑀸𑀲𑀦𑀸 𑀧𑀭𑀺𑀯𑀚𑁆𑀚𑀦𑀸 𑀯𑀺𑀦𑁄𑀤𑀦𑀸𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀧𑀲𑁆𑀲𑁂𑀦𑀸 𑀦𑀺𑀲𑁆𑀲𑀬𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀭𑀸𑀧𑀲𑁆𑀲𑁂𑀦𑁄, 𑀏𑀢𑁂𑀦 𑀘 𑀢𑁂 𑀦𑀺𑀲𑁆𑀲𑀬𑀸 𑀤𑀲𑁆𑀲𑀺𑀢𑀸. 𑀧𑀡𑀼𑀦𑁆𑀦𑀸𑀦𑀺 𑀅𑀧𑀦𑀻𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀧𑀘𑁆𑀘𑁂𑀓𑀁 𑀕𑀳𑀺𑀢𑀸𑀦𑀺 𑀤𑀺𑀝𑁆𑀞𑀺𑀲𑀘𑁆𑀘𑀸𑀦𑀺 𑀬𑀲𑁆𑀲, 𑀲𑁄 𑀧𑀡𑀼𑀦𑁆𑀦𑀧𑀘𑁆𑀘𑁂𑀓𑀲𑀘𑁆𑀘𑁄, 𑀢𑁂𑀦 𑀮𑁄𑀓𑀺𑀬𑀜𑀸𑀡𑁂𑀦 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀓𑀸𑀫𑁂𑀲𑀦𑀸 𑀪𑀯𑁂𑀲𑀦𑀸𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀲𑀗𑁆𑀔𑀸𑀢𑀸 𑀏𑀲𑀦𑀸 𑀲𑀫𑁆𑀫𑀤𑁂𑀯 𑀅𑀯𑀬𑀸 𑀅𑀦𑀽𑀦𑀸 𑀲𑀝𑁆𑀞𑀸 𑀦𑀺𑀲𑀝𑁆𑀞𑀸 𑀅𑀦𑁂𑀦𑀸𑀢𑀺 𑀲𑀫𑀯𑀬𑀲𑀝𑁆𑀞𑁂𑀲𑀦𑁄. 𑀏𑀢𑁂𑀦 𑀢𑀺𑀡𑁆𑀡𑀁 𑀏𑀲𑀦𑀸𑀦𑀁 𑀅𑀪𑀸𑀯𑁄 𑀯𑀼𑀢𑁆𑀢𑁄. ‘‘𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄’’𑀢𑀺 𑀇𑀫𑀺𑀦𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀅𑀦𑀸𑀯𑀺𑀮𑀘𑀺𑀢𑁆𑀢𑀢𑀸. ‘‘𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀬𑁄𑀕𑁂𑀦 𑀯𑀺𑀕𑀢𑀤𑀭𑀣𑀢𑀸 𑀯𑀼𑀢𑁆𑀢𑀸. ‘‘𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀕𑁆𑀕𑁄. ‘‘𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄’’𑀢𑀺 𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑀼𑀔𑁂𑀦 𑀨𑀮𑀜𑀸𑀡𑀁 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀅𑀭𑀺𑀬𑀸 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀭𑀺𑀬𑀯𑀸𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 ¶ . 𑀢𑁂 𑀧𑀦 𑀯𑀸𑀲𑀸 𑀯𑀼𑀢𑁆𑀣𑀸 𑀯𑀲𑀺𑀢𑀸 𑀲𑀫𑁆𑀧𑀸𑀤𑀺𑀢𑀸 𑀬𑁂𑀦, 𑀲𑁄 𑀯𑀼𑀢𑁆𑀣𑀯𑀸𑀲𑁄, 𑀪𑀕𑀯𑀸. 𑀤𑀲𑀩𑀮𑁄𑀢𑀺 𑀤𑀲𑀳𑀺 𑀓𑀸𑀬𑀩𑀮𑁂𑀳𑀺, 𑀜𑀸𑀡𑀩𑀮𑁂𑀳𑀺 𑀘 𑀉𑀧𑁂𑀢𑁄. 𑀬𑀸𑀦𑀺 𑀳𑁂𑀢𑀸𑀦𑀺 𑁋

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁨𑁨; 𑀅. 𑀦𑀺. 𑀅𑀝𑁆𑀞. 𑁩.𑁧𑁦.𑁨𑁧; 𑀯𑀺𑀪. 𑀅𑀝𑁆𑀞. 𑁭𑁬𑁦; 𑀉𑀤𑀸. 𑀅𑀝𑁆𑀞. 𑁭𑁫; 𑀩𑀼. 𑀯. 𑀅𑀝𑁆𑀞. 𑁧.𑁩𑁯; 𑀘𑀽𑀴𑀦𑀺. 𑀅𑀝𑁆𑀞. 𑁮𑁧; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁪) 𑁋

𑀏𑀯𑀁 ¶ 𑀯𑀼𑀢𑁆𑀢𑀸𑀦𑀺 𑀤𑀲𑀳𑀢𑁆𑀣𑀺𑀓𑀼𑀮𑀸𑀦𑀺 𑀧𑀼𑀭𑀺𑀫𑀧𑀼𑀭𑀺𑀫𑀢𑁄 𑀤𑀲𑀩𑀮𑀕𑀼𑀡𑁄𑀧𑁂𑀢𑀸𑀦𑀺, 𑀢𑁂𑀲𑀼 𑀲𑀩𑁆𑀩𑀚𑁂𑀝𑁆𑀞𑀸𑀦𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀸𑀦𑀺 𑀪𑀕𑀯𑀢𑁄 𑀓𑀸𑀬𑀲𑁆𑀲 𑀤𑀲𑀩𑀮𑀸𑀦𑀺 𑀦𑀸𑀫. 𑀢𑀜𑁆𑀘 𑀓𑀸𑀴𑀸𑀯𑀓𑀲𑀗𑁆𑀔𑀸𑀢𑀸𑀦𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀲𑁆𑀲, 𑀫𑀚𑁆𑀛𑀺𑀫𑀧𑀼𑀭𑀺𑀲𑀸𑀦𑀁 𑀧𑀦 𑀤𑀲𑀦𑁆𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀜𑁆𑀘 𑀩𑀮𑀁 𑀳𑁄𑀢𑀺, 𑀢𑀁 ‘‘𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀬𑀸𑀦𑀺 𑀧𑀦𑁂𑀢𑀸𑀦𑀺 𑀧𑀸𑀴𑀺𑀬𑀁 ‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁪𑁮; 𑀅. 𑀦𑀺. 𑁧𑁦.𑁨𑁧; 𑀯𑀺𑀪. 𑁭𑁬𑁦; 𑀧𑀝𑀺. 𑀫. 𑁨.𑁪𑁪) 𑀯𑀼𑀢𑁆𑀢𑀸𑀦𑀺 𑀞𑀸𑀦𑀸𑀞𑀸𑀦𑀜𑀸𑀡𑀩𑀮𑀁, 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀩𑀮𑀁, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀩𑀮𑀁, 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀜𑀸𑀡𑀩𑀮𑀁, 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀩𑀮𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀩𑀮𑀁, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀩𑀮𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀩𑀮𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀩𑀮𑀁, 𑀆𑀲𑀯𑀓𑁆𑀔𑀬𑀜𑀸𑀡𑀩𑀮𑀦𑁆𑀢𑀺 𑀤𑀲𑀩𑀮𑀜𑀸𑀡𑀸𑀦𑀺, 𑀇𑀫𑀸𑀦𑀺 𑀪𑀕𑀯𑀢𑁄 𑀤𑀲𑀩𑀮𑀸𑀦𑀺 𑀦𑀸𑀫. 𑀤𑀲𑀳𑀺 𑀅𑀲𑁂𑀓𑁆𑀔𑁂𑀳𑀺 𑀅𑀗𑁆𑀕𑁂𑀳𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀧𑀸𑀴𑀺𑀬𑀁 ‘‘𑀅𑀲𑁂𑀓𑁆𑀔𑀸 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀲𑁂𑀓𑁆𑀔𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀲𑁂𑀓𑁆𑀔𑀁 𑀲𑀫𑁆𑀫𑀸𑀜𑀸𑀡𑀁, 𑀅𑀲𑁂𑀓𑁆𑀔𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁪𑁮, 𑁩𑁬𑁦) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀤𑀲𑀳𑀺 𑀅𑀲𑁂𑀓𑁆𑀔𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀏𑀢𑁆𑀣 𑀘 𑀤𑀲𑁆𑀲𑀦𑀝𑁆𑀞𑁂𑀦 𑀯𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀯 𑀚𑀸𑀦𑀦𑀝𑁆𑀞𑁂𑀦 𑀲𑀫𑁆𑀫𑀸𑀜𑀸𑀡𑀦𑁆𑀢𑀺𑀧𑀺 𑀯𑀼𑀢𑁆𑀢𑀸, 𑀯𑀼𑀢𑁆𑀢𑀸𑀯𑀲𑁂𑀲𑀸 𑀧𑀦 𑀨𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀲𑀩𑁆𑀩𑁂 𑀨𑀲𑁆𑀲𑀸𑀤𑀺𑀥𑀫𑁆𑀫𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁬𑁦. 𑀲𑀸𑀭𑀻𑀩𑁆𑀭𑀸𑀳𑁆𑀫𑀡𑀺𑀬𑀸 ¶ 𑀧𑀼𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄. 𑀫𑁄𑀕𑁆𑀕𑀮𑀻𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀢𑀺 𑀲𑁂𑀢𑀯𑀢𑁆𑀣𑁂𑀦 𑀳𑀺𑀭𑀺𑀓𑁄𑀧𑀻𑀦𑀁 𑀙𑀸𑀤𑁂𑀢𑁆𑀯𑀸 𑀯𑀺𑀘𑀭𑀡𑀓𑀧𑀭𑀺𑀩𑁆𑀩𑀸𑀚𑀓𑀲𑁆𑀲, 𑀢𑁂𑀦 ‘‘𑀦𑀸𑀬𑀁 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺 𑀤𑀲𑁆𑀲𑁂𑀢𑀺. ‘‘𑀉𑀧𑀜𑁆𑀜𑀸𑀢’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 𑀜𑀸𑀢𑁄 𑀘𑁂𑀯𑀸𑀢𑀺. ‘‘𑀫𑀕𑁆𑀕’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 𑀉𑀧𑀕𑀢𑁄 𑀘 𑀫𑀕𑁆𑀕𑁄𑀢𑀺. 𑀢𑁂𑀦 𑀘 𑀉𑀧𑀜𑁆𑀜𑀸𑀢𑀦𑁆𑀢𑀺 𑀏𑀢𑁆𑀣 𑀜𑀸𑀢-𑀲𑀤𑁆𑀤𑁄 𑀜𑀸𑀡𑀧𑀭𑀺𑀬𑀸𑀬𑁄. 𑀫𑀕𑁆𑀕𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀫𑀕𑁆𑀕𑁄𑀯 𑀯𑀼𑀢𑁆𑀢𑁄. 𑀉𑀧𑀲𑀤𑁆𑀤𑁄 𑀘 𑀉𑀧𑀕𑀫𑀦𑀢𑁆𑀣𑁄 𑀫𑀕𑁆𑀕𑀲𑀤𑁆𑀤𑁂𑀦𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 ¶ 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑀁 𑀦𑀸𑀫 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀉𑀧𑀕𑀢𑀜𑀸𑀡𑀜𑁆𑀘𑁂𑀯 𑀳𑁄𑀢𑀺, 𑀢𑁂𑀳𑀺 𑀉𑀧𑀕𑀢𑁄 𑀧𑀝𑀺𑀧𑀦𑁆𑀦𑁄 𑀫𑀕𑁆𑀕𑁄 𑀘, 𑀢𑀲𑁆𑀫𑀸 𑀬𑀁𑀦𑀽𑀦𑀸𑀳𑀁 𑀅𑀦𑀼𑀩𑀦𑁆𑀥𑁂𑀬𑁆𑀬𑀦𑁆𑀢𑀺. 𑀉𑀧𑀜𑁆𑀜𑀸𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀉𑀧𑀧𑀢𑁆𑀢𑀺𑀬𑀸 𑀅𑀦𑀼𑀫𑀸𑀦𑁂𑀦 𑀜𑀸𑀢𑀁 𑀦𑀺𑀩𑁆𑀩𑀸𑀦𑀁. ‘‘𑀫𑀕𑁆𑀕’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 𑀫𑀕𑁆𑀕𑀦𑁆𑀢𑁄𑀢𑀺, 𑀅𑀦𑀼𑀫𑀸𑀦𑁂𑀦 𑀜𑀸𑀢𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀢𑁆𑀣𑀸𑀬 𑀕𑀯𑁂𑀲𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀦𑀺𑀭𑁄𑀥𑁄 𑀘 𑀦𑀺𑀭𑁄𑀥𑀽𑀧𑀸𑀬𑁄 𑀘 𑀏𑀓𑀲𑁂𑀲𑁂𑀦 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄.

𑀇𑀢𑁄 𑀉𑀢𑁆𑀢𑀭𑀻𑀢𑀺 𑀇𑀢𑁄 𑀫𑀬𑀸 𑀮𑀤𑁆𑀥𑀲𑁄𑀢𑀸𑀧𑀢𑁆𑀢𑀺𑀢𑁄 𑀉𑀢𑁆𑀢𑀭𑀺 𑀇𑀢𑀭𑀫𑀕𑁆𑀕𑀢𑁆𑀢𑀬𑀁 𑀬𑀤𑀺𑀧𑀺 𑀦𑀢𑁆𑀣𑀺, 𑀢𑀣𑀸𑀧𑀺 𑀏𑀲𑁄 𑀏𑀯 𑀫𑀬𑀸 𑀕𑀯𑁂𑀲𑀺𑀢𑁄 𑀦𑀺𑀩𑁆𑀩𑀸𑀦𑀥𑀫𑁆𑀫𑁄𑀢𑀺 𑀅𑀢𑁆𑀣𑁄.

𑁬𑁨-𑁩. 𑀢𑀤𑀸𑀭𑀫𑁆𑀫𑀡𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀯𑀺𑀫𑀼𑀢𑁆𑀢𑀺𑀬𑀸. 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀦𑁆𑀢𑀺 𑀲𑀧𑀭𑀺𑀲𑀸𑀦𑀁 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀲𑀸𑀦𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀅𑀕𑁆𑀕𑀲𑀸𑀯𑀓𑀸 𑀧𑀦 𑀅𑀢𑁆𑀢𑀦𑁄 𑀜𑀸𑀡𑀓𑀺𑀘𑁆𑀘𑀲𑁆𑀲 𑀫𑀳𑀦𑁆𑀢𑀢𑀸𑀬 𑀓𑀢𑀺𑀧𑀸𑀳𑀘𑁆𑀘𑀬𑁂𑀦. 𑀢𑁂𑀦𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀉𑀲𑀽𑀬𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀉𑀧𑀬𑁄𑀕𑀢𑁆𑀣𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁬𑁪. 𑀯𑀚𑁆𑀚𑀸𑀯𑀚𑁆𑀚𑀦𑁆𑀢𑀺 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀜𑁆𑀘 𑀯𑀚𑁆𑀚𑀁. 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀺𑀝𑁆𑀞𑀁 𑀦𑀸𑀫 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀯𑀼𑀘𑁆𑀘𑀢𑀺 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁬𑁮) 𑀯𑀺𑀬. 𑀉𑀢𑁆𑀢𑀺𑀝𑁆𑀞𑀢𑁆𑀣𑀸𑀬 ¶ 𑀕𑀳𑀺𑀢𑀁 𑀧𑀢𑁆𑀢𑀁 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁, 𑀢𑁂𑀦𑀸𑀳 ‘‘𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀉𑀧𑀦𑀸𑀫𑁂 𑀓𑁄 𑀤𑁄𑀲𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀦𑀼𑀲𑁆𑀲𑀸 𑀏𑀢𑀲𑁆𑀫𑀺𑀁𑀬𑁂𑀯 𑀏𑀢𑁂 𑀪𑀼𑀜𑁆𑀚𑀦𑁆𑀢𑀻𑀢𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑁂 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄, 𑀢𑀲𑁆𑀫𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀉𑀢𑁆𑀢𑀺𑀝𑁆𑀞-𑀲𑀤𑁆𑀤𑁂𑀦𑁂𑀯 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀜𑀸𑀬 𑀉𑀘𑁆𑀙𑀺𑀝𑁆𑀞𑀢𑀸𑀧𑀺 𑀕𑀫𑁆𑀫𑀢𑀻𑀢𑀺. 𑀓𑁂𑀘𑀺 𑀧𑀦 ‘‘𑀉𑀘𑁆𑀙𑀺𑀝𑁆𑀞𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀉𑀢𑁆𑀢𑀺𑀝𑁆𑀞𑀲𑀤𑁆𑀤𑁄’’𑀢𑀺 𑀯𑀤𑀦𑁆𑀢𑀺. ‘‘𑀉𑀢𑁆𑀢𑀺𑀝𑁆𑀞𑀸’’𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀉𑀝𑁆𑀞𑀳𑀺𑀢𑁆𑀯𑀸’’𑀢𑀺. 𑀉𑀧𑀚𑁆𑀛𑀸𑀬𑀁 𑀕𑀳𑁂𑀢𑀼𑀦𑁆𑀢𑀺 𑀉𑀧𑀚𑁆𑀛𑀸𑀬𑀢𑁆𑀢𑀁 ¶ 𑀫𑀦𑀲𑀸 𑀕𑀳𑁂𑀢𑀼𑀁, 𑀬𑀸𑀘𑀦𑀯𑀘𑀦𑁂𑀦 𑀢𑀲𑁆𑀲 𑀅𑀦𑀼𑀫𑀢𑀺𑀁 𑀕𑀳𑁂𑀢𑀼𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑁬𑁫. 𑀧𑀢𑀺𑀲𑁆𑀲𑀬𑀦𑀁 𑀧𑀢𑀺𑀲𑁆𑀲𑁄, 𑀕𑀭𑀼𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀦𑀪𑀸𑀯𑁄, 𑀬𑀁𑀓𑀺𑀜𑁆𑀘𑀺 𑀕𑀸𑀭𑀯𑀦𑁆𑀢𑀺 𑀅𑀢𑁆𑀣𑁄. 𑀲𑀳 𑀧𑀢𑀺𑀲𑁆𑀲𑁂𑀦 𑀲𑀧𑁆𑀧𑀢𑀺𑀲𑁆𑀲𑁄, 𑀧𑀭𑀁 𑀚𑁂𑀝𑁆𑀞𑀁 𑀓𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑁂 𑀯𑀢𑁆𑀢𑀦𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑁂𑀝𑁆𑀞𑀓𑀪𑀸𑀯𑀜𑁆𑀘 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀲𑀸𑀳𑀽𑀢𑀺 𑀲𑀸𑀥𑀼 𑀲𑀼𑀦𑁆𑀤𑀭𑀁. 𑀮𑀳𑀽𑀢𑀺 𑀅𑀕𑀭𑀼, 𑀲𑀼𑀪𑀭𑀢𑀸𑀢𑀺 𑀅𑀢𑁆𑀣𑁄. 𑀑𑀧𑀸𑀬𑀺𑀓𑀦𑁆𑀢𑀺 𑀉𑀧𑀸𑀬𑀧𑀝𑀺𑀲𑀁𑀬𑀼𑀢𑁆𑀢𑀁, 𑀏𑀯𑀁 𑀧𑀝𑀺𑀧𑀚𑁆𑀚𑀦𑀁 𑀦𑀺𑀢𑁆𑀣𑀭𑀡𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀲𑀫𑁆𑀧𑀸𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦𑀸𑀢𑀺 𑀏𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀓𑀁 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺. 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀥𑀸𑀬𑀸𑀢𑀺 𑀉𑀧𑀚𑁆𑀛𑀸𑀬𑁂𑀦 ‘‘𑀲𑀸𑀳𑀽’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑁂𑀲𑀼 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀬𑀸𑀘𑀦𑀤𑀸𑀦𑀫𑀢𑁆𑀢𑁂𑀦𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀞𑀫𑀁 𑀆𑀬𑀸𑀘𑀦𑀫𑀢𑁆𑀢𑁂𑀦, 𑀢𑀢𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘 ‘‘𑀲𑀸𑀳𑀽’’𑀢𑀺𑀆𑀤𑀺𑀦𑀸 𑀯𑀘𑀦𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄.

𑁬𑁬. 𑀅𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲. 𑀤𑁆𑀯𑁂 𑀘𑀻𑀯𑀭𑀸𑀦𑀻𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀲𑀗𑁆𑀖𑀸𑀝𑀺𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀦-𑀓𑀸𑀭𑀢𑁄 𑀧𑀝𑁆𑀞𑀸𑀬, 𑀢𑁂𑀦 ‘‘𑀦𑀸𑀢𑀺𑀤𑀽𑀭𑁂’’𑀢𑀺𑀆𑀤𑀻𑀲𑀼 𑀦-𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀸𑀧𑀢𑁆𑀢𑀻𑀢𑀺 𑀆𑀧𑀤𑀸𑀉𑀫𑁆𑀫𑀢𑁆𑀢𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀢𑀸𑀤𑀻𑀳𑀺 𑀯𑀺𑀦𑀸 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 𑀯𑀤𑀦𑁆𑀢𑀲𑁆𑀲 𑀕𑀺𑀮𑀸𑀦𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀆𑀧𑀤𑀸𑀲𑀼 𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑀜𑁆𑀜𑁂𑀲𑀼𑀧𑀺 𑀦-𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀈𑀤𑀺𑀲𑁂𑀲𑀼, 𑀇𑀢𑀭𑁂𑀲𑀼 𑀧𑀦 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀧𑀸𑀴𑀺𑀬𑀁 ‘‘𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀢𑀢𑁆𑀣 𑀞𑀧𑀺𑀢𑀧𑀢𑁆𑀢𑀸𑀤𑀺𑀦𑀸 𑀅𑀲𑀗𑁆𑀖𑀝𑁆𑀝𑀦𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀧𑀺 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀜𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀦𑁆𑀢𑀺 𑀆𑀧𑀢𑁆𑀢𑀺𑀓𑀭𑀡𑀫𑁂𑀯.

𑀕𑀸𑀫𑁂𑀢𑀺 𑀅𑀦𑁆𑀢𑁄𑀕𑀸𑀫𑁂 𑀢𑀸𑀤𑀺𑀲𑁂 𑀫𑀡𑁆𑀟𑀧𑀸𑀤𑀺𑀫𑁆𑀳𑀺. 𑀅𑀦𑁆𑀢𑀭𑀖𑀭𑁂𑀢𑀺 𑀅𑀦𑁆𑀢𑁄𑀕𑁂𑀳𑁂. 𑀧𑀝𑀺𑀓𑁆𑀓𑀫𑀦𑁂𑀢𑀺 𑀆𑀲𑀦𑀲𑀸𑀮𑀸𑀬𑀁. 𑀥𑁄𑀢𑀯𑀸𑀮𑀺𑀓𑀸𑀬𑀸𑀢𑀺 𑀉𑀤𑀓𑁂𑀦 𑀕𑀢𑀝𑁆𑀞𑀸𑀦𑁂 𑀦𑀺𑀭𑀚𑀸𑀬 𑀧𑀭𑀺𑀲𑀼𑀤𑁆𑀥𑀯𑀸𑀮𑀺𑀓𑀸𑀬. 𑀦𑀺𑀤𑁆𑀥𑀽𑀫𑁂𑀢𑀺 𑀚𑀦𑁆𑀢𑀸𑀖𑀭𑁂 𑀚𑀮𑀺𑀬𑀫𑀸𑀦𑀅𑀕𑁆𑀕𑀺𑀥𑀽𑀫𑀭𑀳𑀺𑀢𑁂. 𑀚𑀦𑁆𑀢𑀸𑀖𑀭𑀜𑁆𑀳𑀺 𑀦𑀸𑀫 𑀳𑀺𑀫𑀧𑀸𑀢𑀩𑀳𑀼𑀮𑁂𑀲𑀼 𑀤𑁂𑀲𑁂𑀲𑀼 𑀢𑀧𑁆𑀧𑀘𑁆𑀘𑀬𑀭𑁄𑀕𑀧𑀻𑀴𑀸𑀤𑀺𑀦𑀺𑀯𑀸𑀭𑀡𑀢𑁆𑀣𑀁 ¶ ¶ 𑀲𑀭𑀻𑀭𑀲𑁂𑀤𑀸𑀧𑀦𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀺𑀭 𑀅𑀦𑁆𑀥𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀢𑀸𑀬 𑀩𑀳𑀽𑀧𑀺 𑀏𑀓𑀢𑁄 𑀧𑀯𑀺𑀲𑀺𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀢𑀸𑀧𑀧𑀭𑀺𑀳𑀸𑀭𑀸𑀬 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀮𑀺𑀫𑁆𑀧𑀺𑀢𑁆𑀯𑀸 𑀲𑀭𑀻𑀭𑀁 𑀬𑀸𑀯𑀤𑀢𑁆𑀣𑀁 𑀲𑁂𑀤𑁂𑀢𑁆𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀦𑀳𑀸𑀬𑀦𑁆𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀮𑁆𑀮𑁄𑀓𑀦𑁆𑀢𑀺 𑀉𑀤𑁆𑀥𑀁 𑀑𑀮𑁄𑀓𑀦𑀝𑁆𑀞𑀸𑀦𑀁. 𑀉𑀧𑀭𑀺𑀪𑀸𑀕𑀦𑁆𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀢𑁆𑀣 𑀦𑁂𑀢𑀩𑁆𑀩𑁄𑀢𑀺 𑀬𑀢𑁆𑀣 𑀯𑀺𑀳𑀭𑀢𑁄 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑁂𑀢𑀩𑁆𑀩𑁄. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀮𑀚𑁆𑀚𑀺𑀦𑁄 𑀯𑀸 𑀅𑀮𑀚𑁆𑀚𑀺𑀦𑁄 𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀅𑀯𑀟𑁆𑀠𑀺𑀓𑀸𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀅𑀮𑀚𑁆𑀚𑀻 𑀑𑀯𑀸𑀤𑀫𑁆𑀧𑀺 𑀦 𑀕𑀡𑁆𑀳𑀸𑀢𑀺, 𑀮𑀚𑁆𑀚𑀺𑀦𑁄 𑀘 𑀏𑀢𑀲𑁆𑀲 𑀯𑀺𑀲𑀪𑀸𑀕𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀉𑀧𑀚𑁆𑀛𑀸𑀬𑀁 𑀯𑀺𑀳𑀸𑀬 𑀮𑀚𑁆𑀚𑀻𑀳𑁂𑀯 𑀲𑀤𑁆𑀥𑀺𑀁 𑀆𑀫𑀺𑀲𑀸𑀤𑀺𑀧𑀭𑀺𑀪𑁄𑀕𑁄 𑀓𑀸𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑀸𑀤𑀺𑀪𑀸𑀯𑁄 𑀳𑁂𑀢𑁆𑀣 𑀦 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸. ‘‘𑀦 𑀲𑀼𑀲𑀸𑀦’’𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁, 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀕𑀦𑁆𑀢𑀼𑀓𑀸𑀫𑁂𑀦 𑀅𑀦𑀸𑀧𑀼𑀘𑁆𑀙𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁬𑁭. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸𑀬𑀁 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄𑀢𑀺𑀆𑀤𑀻𑀲𑀼 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀥𑀫𑁆𑀫𑀸𑀫𑀺𑀲𑁂𑀳𑀺 𑀅𑀲𑀗𑁆𑀕𑀡𑁆𑀳𑀦𑁆𑀢𑀸𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀼𑀓𑁆𑀓𑀝𑀁 𑀯𑀢𑁆𑀢𑀪𑁂𑀤𑀢𑁆𑀢𑀸. 𑀢𑁂𑀦𑁂𑀯 𑀧𑀭𑀺𑀯𑀸𑀭𑁂𑀧𑀺 ‘‘𑀦𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁩𑁨𑁨) 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁬𑁮. 𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸𑀬𑀁 𑀯𑀢𑁆𑀢𑀁 𑀦 𑀧𑀽𑀭𑁂𑀬𑁆𑀬𑀸𑀢𑀺 ‘‘𑀯𑀢𑁆𑀢𑀓𑀭𑀡𑀓𑀸𑀮𑁄’’𑀢𑀺 𑀯𑀢𑁆𑀣𑀼𑀯𑀺𑀚𑀸𑀦𑀦𑀯𑀲𑁂𑀦 𑀜𑀢𑁆𑀯𑀸 𑀫𑀸𑀦𑀓𑁄𑀲𑀚𑁆𑀚𑀸𑀤𑀺𑀯𑀲𑁂𑀦 𑀯𑀸 𑀉𑀧𑀚𑁆𑀛𑀸𑀬𑀸𑀤𑀻𑀲𑀼 ¶ 𑀅𑀦𑀸𑀤𑀭𑁂𑀦 𑀯𑀸 ‘‘𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀚𑀸𑀦𑀦𑀢𑀸𑀬 𑀯𑀸 𑀦 𑀓𑀭𑁂𑀬𑁆𑀬, 𑀤𑀼𑀓𑁆𑀓𑀝𑀫𑁂𑀯. 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸𑀢𑀺𑀆𑀤𑀻𑀳𑀺 𑀘 𑀅𑀓𑀭𑁄𑀦𑁆𑀢𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀺. 𑀲𑀩𑁆𑀩𑀸𑀦𑀺 𑀳𑀺 𑀯𑀢𑁆𑀢𑀸𑀦𑀺 𑀲𑁂𑀔𑀺𑀬𑀸𑀦𑁂𑀯, 𑀢𑀲𑁆𑀫𑀸 𑀲𑁂𑀔𑀺𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀕𑁂𑀳𑀲𑁆𑀲𑀺𑀢𑀧𑁂𑀫𑀦𑁆𑀢𑀺 𑀫𑁂𑀢𑁆𑀢𑀸𑀧𑁂𑀫𑀁.

𑀲𑀸𑀤𑀺𑀬𑀦𑀁 ¶ 𑀯𑀸 𑀅𑀲𑀸𑀤𑀺𑀬𑀦𑀁 𑀯𑀸 𑀦 𑀚𑀸𑀦𑀸𑀢𑀻𑀢𑀺 ‘‘𑀫𑀬𑀺 𑀲𑀸𑀤𑀺𑀬𑀦𑁆𑀢𑁂 𑀅𑀓𑀭𑁄𑀦𑁆𑀢𑀸𑀦𑀁 𑀆𑀧𑀢𑁆𑀢𑀺 𑀳𑁄𑀢𑀺, 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑀸𑀤𑀺𑀬𑀦𑁆𑀢𑁂 𑀆𑀧𑀢𑁆𑀢𑀺 𑀦 𑀳𑁄𑀢𑀻’’𑀢𑀺 𑀏𑀯𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀢𑁂𑀲𑀼 𑀏𑀓𑁄 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼…𑀧𑁂… 𑀢𑁂𑀲𑀁 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀲𑀘𑁂 𑀓𑁄𑀘𑀺 ‘‘𑀢𑀼𑀫𑁆𑀳𑀸𑀓𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂, 𑀅𑀦𑁆𑀢𑁂𑀯𑀸𑀲𑀺𑀓𑁂 𑀯𑀸 𑀕𑀺𑀮𑀸𑀦𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀆𑀤𑀺𑀓𑀁 𑀲𑀩𑁆𑀩𑀁 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀢𑁂 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀳𑁄𑀣𑀸’’𑀢𑀺 𑀯𑀤𑀦𑁆𑀢𑀺, 𑀯𑀢𑁆𑀢𑀁 𑀯𑀸 𑀦 𑀲𑀸𑀤𑀺𑀬𑀦𑁆𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁬𑁯. 𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀴𑀺𑀬𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄𑀢𑀺 𑀲𑀓𑀮𑀲𑀭𑀻𑀭𑁂 𑀲𑀜𑁆𑀚𑀸𑀢𑀧𑀡𑁆𑀟𑀼𑀯𑀡𑁆𑀡𑁄. 𑀧𑀡𑁆𑀟𑀼𑀯𑀡𑁆𑀡𑀲𑁆𑀲 𑀲𑀓𑀮𑀲𑀭𑀻𑀭𑁂 𑀩𑁆𑀬𑀸𑀧𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀳𑀺 𑀯𑀺𑀘𑁆𑀙𑀸𑀯𑀘𑀦𑀁 𑀓𑀢𑀁. 𑀅𑀥𑀺𑀓𑀸𑀭𑀦𑁆𑀢𑀺 𑀉𑀧𑀓𑀸𑀭𑀁. 𑀓𑀢𑀯𑁂𑀤𑀺𑀦𑁄𑀢𑀺 𑀅𑀢𑁆𑀢𑀦𑁄 𑀓𑀢𑀁 𑀉𑀧𑀓𑀸𑀭𑀁 𑀧𑀝𑀺𑀓𑀺𑀭𑀺𑀬𑀸𑀬 𑀜𑀸𑀧𑀓𑀸. 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀸𑀘𑀸𑀬 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀺𑀬𑁄𑀲𑀸𑀦𑁂 𑀯𑀓𑁆𑀔𑀸𑀫. 𑀧𑀭𑀺𑀫𑀡𑁆𑀟𑀮𑁂𑀳𑀻𑀢𑀺 𑀧𑀭𑀺𑀧𑀼𑀡𑁆𑀡𑁂𑀳𑀺.

𑁭𑁧-𑁭𑁩. 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀁. 𑀧𑀸𑀴𑀺𑀬𑀁 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀦𑁆𑀢𑀺 𑀚𑀗𑁆𑀖𑀧𑀺𑀡𑁆𑀟𑀺𑀫𑀁𑀲𑀩𑀮𑁂𑀦 𑀘𑀭𑀺𑀢𑁆𑀯𑀸 𑀆𑀮𑁄𑀧𑀸𑀮𑁄𑀧𑀯𑀲𑁂𑀦 𑀧𑀭𑀺𑀬𑀺𑀝𑁆𑀞𑀪𑁄𑀚𑀦𑀁. 𑀅𑀢𑀺𑀭𑁂𑀓𑀮𑀸𑀪𑁄𑀢𑀺 𑀪𑀺𑀓𑁆𑀔𑀸𑀳𑀸𑀭𑀢𑁄 𑀅𑀥𑀺𑀓𑀮𑀸𑀪𑁄. 𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀁 𑀯𑀺𑀪𑀸𑀕𑁄 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀯𑀺𑀳𑀸𑀭𑁄𑀢𑀺 𑀢𑀺𑀡𑀓𑀼𑀝𑀺𑀓𑀸𑀤𑀺𑀲𑀳𑀺𑀢𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀲𑀗𑁆𑀖𑀸𑀭𑀸𑀫𑁄. 𑀅𑀟𑁆𑀠𑀬𑁄𑀕𑁄𑀢𑀺 𑀏𑀓𑀲𑀸𑀮𑁄 𑀤𑀻𑀖𑀧𑀸𑀲𑀸𑀤𑁄. 𑀳𑀢𑁆𑀣𑀺𑀧𑀺𑀝𑁆𑀞𑀺𑀕𑀭𑀼𑀴𑀲𑀡𑁆𑀞𑀸𑀦𑁄 𑀤𑀻𑀖𑀧𑀸𑀲𑀸𑀤𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀲𑀸𑀤𑁄𑀢𑀺 𑀘𑀢𑀼𑀭𑀲𑁆𑀲𑁄 𑀉𑀘𑁆𑀘𑁄 ¶ 𑀅𑀦𑁂𑀓𑀪𑀽𑀫𑀓𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑁄 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑁄 𑀦𑀸𑀢𑀺𑀉𑀘𑁆𑀘𑁄 𑀧𑀸𑀲𑀸𑀤𑁄. 𑀕𑀼𑀳𑀸𑀢𑀺 𑀧𑀩𑁆𑀩𑀢𑀕𑀼𑀳𑀸. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀕𑁄𑀫𑀼𑀢𑁆𑀢𑀁.

𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁭𑁬. 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄𑀢𑀺 ‘‘𑀏𑀯𑀁 𑀦𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀑𑀯𑀤𑀺𑀬𑀫𑀸𑀦𑁄. 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀑𑀮𑀫𑁆𑀩𑀺𑀢𑁆𑀯𑀸 𑀦𑀺𑀯𑀸𑀲𑀦𑀸𑀤𑀻𑀲𑀼 𑀓𑁄 𑀤𑁄𑀲𑁄? 𑀬𑀤𑀺 𑀤𑁄𑀲𑁄 𑀪𑀯𑁂𑀬𑁆𑀬 ¶ , 𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀸𑀤𑀻𑀲𑀼𑀧𑀺 𑀤𑁄𑀲𑁄 𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀺𑀕𑁆𑀕𑀳𑀁 𑀆𑀭𑁄𑀧𑁂𑀢𑁆𑀯𑀸. 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀦𑁆𑀢𑀺 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀢𑀺𑀢𑁆𑀣𑀫𑁂𑀯 𑀆𑀬𑀢𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀢𑀺𑀢𑁆𑀣𑀸𑀬𑀢𑀦𑀁. 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻𑀢𑀺 𑀆𑀬𑀲𑁆𑀫𑀦𑁆𑀢𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑀸𑀫𑀦𑀸𑀔𑀫𑀸𑀧𑀦𑀸𑀓𑀣𑀸𑀯𑀡𑁆𑀡𑀦𑀸

𑁮𑁦. 𑀬𑀁 𑀧𑀼𑀩𑁆𑀩𑁂 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀮𑀓𑁆𑀔𑀡𑁂𑀦 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀦 𑀢𑁂𑀦𑁂𑀯 𑀮𑀓𑁆𑀔𑀡𑁂𑀦𑀸’’𑀢𑀺 𑀏𑀢𑁆𑀣 𑀦-𑀓𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 ‘‘𑀢𑁂𑀦𑁂𑀯 𑀮𑀓𑁆𑀔𑀡𑁂𑀦 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁. 𑀢𑀣𑀸 𑀳𑀺 𑀢𑁂𑀦𑁂𑀯 𑀮𑀓𑁆𑀔𑀡𑁂𑀦 𑀆𑀧𑀢𑁆𑀢𑀺𑀪𑀸𑀯𑁂 𑀕𑀬𑁆𑀳𑀫𑀸𑀦𑁂 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑀲𑁆𑀲𑀸𑀧𑀺 𑀅𑀫𑀼𑀢𑁆𑀢𑀓𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀏𑀯𑀸𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀣𑀸 𑀘 ‘‘𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁂𑀦 𑀳𑀺 𑀬𑀸𑀯 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺, 𑀢𑀸𑀯 𑀲𑀩𑁆𑀩𑀁 𑀆𑀘𑀭𑀺𑀬𑀯𑀢𑁆𑀢𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀦𑁆𑀢𑀭𑀯𑀘𑀦𑁂𑀦 𑀯𑀺𑀭𑁄𑀥𑁄 𑀲𑀺𑀬𑀸. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀧𑀺 𑀘 𑁋

‘‘𑀦𑀺𑀲𑁆𑀲𑀬𑀸𑀘𑀭𑀺𑀬, 𑀉𑀤𑁆𑀤𑁂𑀲𑀸𑀘𑀭𑀺𑀬, 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓, 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓, 𑀲𑀫𑀸𑀦𑀸𑀘𑀭𑀺𑀬𑀓𑀸 𑀧𑀦 𑀬𑀸𑀯 𑀦𑀺𑀲𑁆𑀲𑀬𑀉𑀤𑁆𑀤𑁂𑀲𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸. 𑀢𑀸𑀯 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁧) 𑁋

𑀯𑀼𑀢𑁆𑀢𑀁 ¶ . 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀇𑀥 𑀧𑀭𑀺𑀕𑀴𑀺𑀢𑀁 𑀦-𑀓𑀸𑀭𑀁 𑀆𑀦𑁂𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀼𑀢𑁆𑀢𑁂𑀦𑁂𑀯 𑀮𑀓𑁆𑀔𑀡𑁂𑀦 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀧𑀡𑀸𑀫𑀦𑀸𑀔𑀫𑀸𑀧𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸

𑁮𑁩. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀬𑀁 ‘‘𑀬𑁄 𑀯𑀸 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀮𑀚𑁆𑀚𑀻𑀲𑀼 𑀏𑀯 𑀦𑀺𑀲𑁆𑀲𑀬𑀕𑁆𑀕𑀳𑀡𑀁 𑀦𑀺𑀬𑁄𑀚𑁂𑀢𑀺 𑀅𑀮𑀚𑁆𑀚𑀻𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀘 𑀧𑀭𑀺𑀪𑁄𑀕𑀲𑀤𑁆𑀤𑁂𑀦 𑀏𑀓𑀓𑀫𑁆𑀫𑀸𑀤𑀺𑀓𑁄 𑀲𑀁𑀯𑀸𑀲𑁄 𑀕𑀳𑀺𑀢𑁄 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑁆𑀲 𑀲𑀫𑁆𑀪𑁄𑀕-𑀲𑀤𑁆𑀤𑁂𑀦 𑀕𑀳𑀺𑀢𑀢𑁆𑀢𑀸, 𑀏𑀢𑁂𑀦 ¶ 𑀘 𑀲𑀫𑁆𑀪𑁄𑀕𑀲𑀁𑀯𑀸𑀲𑀸𑀦𑀁 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀦 𑀓𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀢𑀸𑀤𑀺𑀲𑁄𑀢𑀺 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀕𑀳𑀺𑀢𑀧𑀼𑀩𑁆𑀩𑁄, 𑀬𑁄 𑀘 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄, 𑀢𑀸𑀤𑀺𑀲𑁄. 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 ‘‘𑀮𑀳𑀼𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀜𑁆𑀘𑁂𑀢𑀺 𑀅𑀢𑁆𑀣𑁄. ‘‘𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀺𑀯𑀲𑀸𑀦𑀻’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀬𑀤𑀺 𑀏𑀓𑀸𑀳𑀤𑁆𑀯𑀻𑀳𑁂𑀦 𑀲𑀪𑀸𑀕𑀢𑀸 𑀧𑀜𑁆𑀜𑀸𑀬𑀢𑀺, 𑀜𑀸𑀢𑀤𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑁄𑀯. 𑀅𑀣𑀸𑀧𑀺 𑀘𑀢𑀼𑀧𑀜𑁆𑀘𑀸𑀳𑁂𑀦𑀸𑀧𑀺 𑀦 𑀧𑀜𑁆𑀜𑀸𑀬𑀢𑀺, 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀢𑀓𑀸𑀦𑀺 𑀅𑀢𑀺𑀓𑁆𑀓𑀫𑁂𑀢𑀩𑁆𑀩𑀸𑀦𑀺. 𑀲𑀪𑀸𑀕𑀢𑀁 𑀑𑀮𑁄𑀓𑁂𑀫𑀻𑀢𑀺 𑀧𑀦 𑀮𑁂𑀲𑁄 𑀦 𑀓𑀸𑀢𑀩𑁆𑀩𑁄.

𑀤𑀳𑀭𑀸 𑀲𑀼𑀡𑀦𑁆𑀢𑀻𑀢𑀺 𑀏𑀢𑁆𑀣 𑀅𑀲𑀼𑀢𑁆𑀯𑀸𑀧𑀺 𑀆𑀕𑀫𑀺𑀲𑁆𑀲𑀢𑀺, 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀘𑀺𑀭𑀸𑀬𑀢𑀻𑀢𑀺 𑀲𑀜𑁆𑀜𑀸𑀬 𑀲𑀢𑀺 𑀮𑀩𑁆𑀪𑀢𑁂𑀯 𑀧𑀭𑀺𑀳𑀸𑀭𑁄. 𑀢𑁂𑀦𑀸𑀳 ‘‘𑀇𑀥𑁂𑀯𑀸𑀳𑀁 𑀯𑀲𑀺𑀲𑁆𑀲𑀸𑀫𑀻𑀢𑀺 𑀧𑀳𑀺𑀡𑀢𑀺, 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻’’𑀢𑀺.

𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀕𑀫𑀦𑁂 𑀦𑀺𑀭𑀼𑀲𑁆𑀲𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀉𑀲𑁆𑀲𑀸𑀳𑀲𑁆𑀲 𑀧𑀦 𑀲𑁂𑀦𑀸𑀲𑀦𑀧𑀝𑀺𑀲𑀸𑀫𑀦𑀸𑀤𑀺𑀯𑀲𑁂𑀦 𑀓𑀢𑀺𑀧𑀸𑀳𑁂 𑀕𑀢𑁂𑀧𑀺 𑀦 𑀤𑁄𑀲𑁄.

𑀢𑀢𑁆𑀭𑁂𑀯 𑀯𑀲𑀺𑀢𑀩𑁆𑀩𑀦𑁆𑀢𑀺 𑀢𑀢𑁆𑀭 𑀲𑀪𑀸𑀕𑀝𑁆𑀞𑀸𑀦𑁂 𑀏𑀯 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. ‘‘𑀢𑀁𑀬𑁂𑀯 𑀯𑀺𑀳𑀸𑀭𑀁…𑀧𑁂… 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀚𑁆𑀛𑀸𑀬𑁂 𑀲𑀗𑁆𑀕𑀡𑁆𑀳𑀦𑁆𑀢𑁂𑀬𑁂𑀯 𑀢𑀁𑀲𑀫𑁄𑀥𑀸𑀦𑁂 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀺𑀁 𑀧𑀦 𑀓𑁄𑀥𑁂𑀦 ¶ 𑀯𑀸 𑀕𑀡𑀦𑀺𑀭𑀧𑁂𑀓𑁆𑀔𑀢𑀸𑀬 𑀯𑀸 𑀅𑀲𑀗𑁆𑀕𑀡𑁆𑀳𑀦𑁆𑀢𑁂 𑀅𑀜𑁆𑀜𑁂𑀲𑀼 𑀕𑀳𑀺𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀆𑀘𑀭𑀺𑀬𑀫𑁆𑀳𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀁 𑀯𑀼𑀢𑁆𑀢𑁄 ‘‘𑀓𑁄𑀘𑀺 𑀆𑀘𑀭𑀺𑀬𑁄’’𑀢𑀺𑀆𑀤𑀺𑀓𑁄 𑀦𑀬𑁄 𑀉𑀧𑀚𑁆𑀛𑀸𑀬𑀧𑀓𑁆𑀓𑀫𑀦𑀸𑀤𑀻𑀲𑀼𑀧𑀺 𑀦𑁂𑀢𑁆𑀯𑀸 𑀢𑀢𑁆𑀣 𑀘 𑀯𑀼𑀢𑁆𑀢𑁄 𑀇𑀥𑀸𑀧𑀺 𑀦𑁂𑀢𑁆𑀯𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑁄.

𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀻𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀯𑀲𑀦𑁆𑀢𑀺. 𑀢𑁂𑀦 𑀩𑀳𑀺𑀉𑀧𑀘𑀸𑀭𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑀭𑁂 𑀆𑀲𑀦𑁆𑀦𑀧𑀤𑁂𑀲𑁂 𑀯𑀲𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀧𑀦 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑁂𑀯.

𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀓𑀣𑀸𑀯𑀡𑁆𑀡𑀦𑀸

𑁮𑁪. 𑀉𑀧𑀚𑁆𑀛𑀸𑀘𑀭𑀺𑀬𑀮𑀓𑁆𑀔𑀡𑀓𑀣𑀸𑀬𑀁 ¶ 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀅𑀲𑁂𑀓𑁆𑀔𑁄, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀲𑀻𑀮𑀓𑁆𑀔𑀦𑁆𑀥𑁄.

𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑀺𑀓𑀸𑀬. 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂𑀢𑀺 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀻𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀻𑀢𑀺 𑀦 𑀧𑀝𑀺𑀩𑀮𑁄 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁, 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺. 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀳𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀬𑀲𑀗𑁆𑀔𑀸𑀢𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁 𑀅𑀧𑀝𑀺𑀩𑀮𑀢𑀸 𑀦𑀸𑀫 𑀅𑀩𑁆𑀬𑀢𑁆𑀢𑀢𑀸 𑀏𑀯 𑀳𑁄𑀢𑀻𑀢𑀺 𑀲𑀸𑀧𑀺 𑀆𑀧𑀢𑁆𑀢𑀺𑀅𑀗𑁆𑀕𑀫𑁂𑀯 𑀯𑀼𑀢𑁆𑀢𑀸.

𑀅𑀪𑀺𑀯𑀺𑀲𑀺𑀝𑁆𑀞𑁄 𑀉𑀢𑁆𑀢𑀫𑁄 𑀲𑀫𑀸𑀘𑀸𑀭𑁄 𑀆𑀪𑀺𑀲𑀫𑀸𑀘𑀸𑀭𑁄, 𑀯𑀢𑁆𑀢𑀧𑀝𑀺𑀯𑀢𑁆𑀢𑀲𑀻𑀮𑀁. 𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀔𑀦𑁆𑀥𑀓𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀸. 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀳𑀺 𑀢𑀁 𑀢𑀢𑁆𑀣 𑀧𑀝𑀺𑀧𑀽𑀭𑀡𑀢𑁆𑀣𑀺𑀓𑁂𑀳𑀺 𑀉𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 ‘‘𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸 𑀓𑀸𑀭𑀡𑀪𑀽𑀢𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸 𑀲𑀺𑀓𑁆𑀔𑀸, 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀧𑀤𑀁. 𑀢𑁂𑀦𑁂𑀯 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀧𑀺 ‘‘𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀧𑀤𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀔𑀦𑁆𑀥𑀓𑀯𑀢𑁆𑀢𑀧𑀅𑀬𑀸𑀧𑀦𑁆𑀦𑀁 𑀆𑀪𑀺𑀲𑀫𑀸𑀘𑀸𑀭𑀺𑀓’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁧) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬’’𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑁂𑀓𑁆𑀔𑀸, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀡𑁆𑀡𑀢𑁆𑀢𑀺. 𑀲𑀩𑁆𑀩𑀸𑀧𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀓𑁆𑀔𑀸𑀧𑀤𑀧𑀡𑁆𑀡𑀢𑁆𑀢𑀺 ‘‘𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀢𑀺 𑀏𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀳𑀺 𑀯𑀼𑀢𑁆𑀢𑀁 𑀚𑀸𑀢𑀺𑀪𑀽𑀫𑀺𑀧𑀼𑀕𑁆𑀕𑀮𑀲𑀫𑁆𑀧𑀬𑁄𑀕𑀯𑀢𑁆𑀣𑀸𑀭𑀫𑁆𑀫𑀡𑀓𑀫𑁆𑀫𑀤𑁆𑀯𑀸𑀭𑀮𑀓𑁆𑀔𑀡𑀭𑀲𑀸𑀤𑀺𑀪𑁂𑀤𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀲𑀦𑀺𑀩𑁆𑀩𑀸𑀦𑀁 𑀦𑀸𑀫𑀁, 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀁 𑀭𑀽𑀧𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀦𑀧𑀜𑁆𑀜𑀸, 𑀢𑀧𑁆𑀧𑀓𑀸𑀲𑀓𑁄 𑀘 𑀕𑀦𑁆𑀣𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀦𑀸𑀫. 𑀇𑀫𑀺𑀦𑀸 𑀅𑀪𑀺𑀥𑀫𑁆𑀫𑀢𑁆𑀣𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀓𑁆𑀔𑀸𑀧𑁂𑀢𑀼𑀦𑁆𑀢𑀺 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀁.

𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀜𑁆𑀘𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁮𑁬. 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀓𑀣𑀸𑀬𑀁 𑀆𑀚𑀻𑀯𑀓𑀲𑁆𑀲 𑀯𑀸𑀢𑀺𑀆𑀤𑀻𑀲𑀼 𑀅𑀓𑀺𑀭𑀺𑀬𑀯𑀸𑀤𑀻 𑀆𑀚𑀻𑀯𑀓𑁄 𑀦𑀸𑀫, 𑀓𑀺𑀭𑀺𑀬𑀯𑀸𑀤𑀺𑀦𑁄 𑀧𑀦 𑀦𑀺𑀕𑀡𑁆𑀞𑀸𑀧𑀺 𑀅𑀜𑁆𑀜𑁂𑀧𑀺 𑀦𑀕𑁆𑀕𑀢𑀺𑀢𑁆𑀣𑀺𑀓𑀸 𑀅𑀘𑁂𑀮𑀓𑀧𑀤𑁂 𑀲𑀗𑁆𑀕𑀳𑀺𑀢𑀸. 𑀲𑀩𑁆𑀩𑀣𑀸 𑀦𑀕𑁆𑀕𑀲𑁆𑀲𑁂𑀯 ¶ 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀯𑀺𑀳𑀺𑀢𑁄. 𑀲𑁄 𑀘 𑀢𑁂𑀦𑁂𑀯 𑀦𑀕𑁆𑀕𑀯𑁂𑀲𑁂𑀦 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀆𑀕𑀢𑀲𑁆𑀲, 𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀢𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀲𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄𑀧𑀻𑀢𑀺 𑀆𑀚𑀻𑀯𑀓𑁄.

𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀲𑀫𑁆𑀧𑀤𑀸𑀦𑀁 𑀦𑀸𑀫 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀤𑀸𑀦𑀁. 𑀭𑀽𑀧𑀽𑀧𑀚𑀻𑀯𑀺𑀓𑀸𑀢𑀺 𑀅𑀢𑁆𑀢𑀦𑁄 𑀭𑀽𑀧𑀫𑁂𑀯 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺𑀬𑁄. 𑀯𑁂𑀲𑀺𑀬𑀸 𑀕𑁄𑀘𑀭𑁄 𑀩𑀳𑀼𑀮𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀅𑀲𑁆𑀲𑀸𑀢𑀺 𑀯𑁂𑀲𑀺𑀬𑀸𑀕𑁄𑀘𑀭𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑁄𑀩𑁆𑀩𑀦𑁆𑀦𑀸𑀢𑀻𑀢𑀸𑀢𑀺 𑀅𑀦𑀺𑀯𑀺𑀤𑁆𑀥𑀸 𑀏𑀯 𑀫𑀳𑀮𑁆𑀮𑀺𑀓𑀪𑀸𑀯𑀁 𑀧𑀢𑁆𑀢𑀸 𑀣𑀼𑀮𑁆𑀮𑀓𑀼𑀫𑀸𑀭𑀻 𑀏𑀯𑀸𑀢𑀺 𑀯𑀼𑀢𑁆𑀢𑀁. 𑀆𑀤𑀸𑀬𑀲𑁆𑀲𑀸𑀢𑀺 𑀆𑀤𑀸𑀦𑀲𑁆𑀲 𑀕𑀳𑀡𑀲𑁆𑀲.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀸𑀩𑀸𑀥𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁮𑁮-𑁯. 𑀧𑀜𑁆𑀘𑀸𑀩𑀸𑀥𑀸𑀤𑀺𑀯𑀢𑁆𑀣𑀽𑀲𑀼 ¶ 𑀧𑀸𑀴𑀺𑀬𑀁 𑀲𑁄𑀫𑁆𑀳𑀺 𑀅𑀭𑁄𑀕𑁄, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻𑀢𑀺 𑀲𑁄 𑀅𑀳𑀁 𑀅𑀭𑁄𑀕𑁄, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀦𑁆𑀢𑀺 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸. ‘‘𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀢𑀸𑀤𑀺𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂𑀧𑀺 𑀘 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁄𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀧𑀸𑀓𑀝𑀝𑁆𑀞𑀸𑀦𑁂𑀧𑀺 𑀧𑀦 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀊𑀦𑀢𑀭𑀁 𑀅𑀯𑀟𑁆𑀠𑀦𑀓𑀁 𑀯𑀝𑁆𑀝𑀢𑀻𑀢𑀺 𑀬𑁂 𑀕𑀡𑁆𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀕𑀳𑀡𑀁 𑀧𑀝𑀺𑀲𑁂𑀥𑁂𑀢𑀼𑀁 ‘‘𑀫𑀼𑀔𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑁄𑀮𑀝𑁆𑀞𑀺𑀫𑀢𑁆𑀢𑀓𑁄𑀧𑀻𑀢𑀺 𑀩𑀤𑀭𑀝𑁆𑀞𑀺𑀧𑁆𑀧𑀫𑀸𑀡𑁄𑀧𑀺. 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁄𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀓𑁄𑀮𑀝𑁆𑀞𑀺𑀫𑀢𑁆𑀢𑀢𑁄 𑀔𑀼𑀤𑁆𑀤𑀓𑀢𑀭𑁄𑀧𑀺 𑀕𑀡𑁆𑀟𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀘𑁆𑀙𑀯𑀺𑀁 𑀓𑀸𑀭𑁂𑀢𑁆𑀯𑀸’’𑀢𑀺, 𑀯𑀺𑀚𑁆𑀚𑀫𑀸𑀦𑀘𑁆𑀙𑀯𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀲𑀜𑁆𑀙𑀯𑀺’’𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑀜𑁆𑀚𑀸𑀢𑀘𑁆𑀙𑀯𑀺𑀦𑁆𑀢𑀺 𑀅𑀢𑁆𑀣𑁄. 𑀕𑀡𑁆𑀟𑀸𑀤𑀻𑀲𑀼 𑀯𑀽𑀧𑀲𑀦𑁆𑀢𑁂𑀲𑀼𑀧𑀺 𑀕𑀡𑁆𑀟𑀸𑀦𑀁 𑀯𑀺𑀯𑀡𑁆𑀡𑀫𑁆𑀧𑀺 𑀳𑁄𑀢𑀺, 𑀢𑀁 𑀯𑀝𑁆𑀝𑀢𑀺.

𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀧𑀢𑁆𑀢𑀯𑀡𑁆𑀡𑀦𑁆𑀢𑀺 𑀭𑀢𑁆𑀢𑀧𑀤𑀼𑀫𑀲𑁂𑀢𑀧𑀤𑀼𑀫𑀧𑀼𑀧𑁆𑀨𑀤𑀮𑀯𑀡𑁆𑀡𑀁. 𑀓𑀼𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀯𑀟𑁆𑀠𑀦𑀓𑀁 𑀯𑀝𑁆𑀝𑀢𑀺, 𑀅𑀜𑁆𑀜𑀢𑁆𑀣 𑀦 𑀓𑀺𑀜𑁆𑀘𑀺𑀧𑀺 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀺. 𑀲𑁄𑀲𑀩𑁆𑀬𑀸𑀥𑀻𑀢𑀺 𑀔𑀬𑀭𑁄𑀕𑁄. 𑀬𑀓𑁆𑀔𑀼𑀫𑁆𑀫𑀸𑀭𑁄𑀢𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑀫𑀼𑀔𑀸𑀤𑀺𑀓𑀁 𑀅𑀯𑀬𑀯𑀁 𑀪𑀽𑀫𑀺𑀬𑀁 𑀖𑀁𑀲𑀦𑀓𑁄 𑀬𑀓𑁆𑀔𑁄𑀯 𑀭𑁄𑀕𑁄.

𑀧𑀜𑁆𑀘𑀸𑀩𑀸𑀥𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀚𑀪𑀝𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁯𑁦. 𑀦 ¶ 𑀤𑀸𑀦𑀸𑀳𑀁 𑀤𑁂𑀯𑀲𑁆𑀲 𑀪𑀝𑁄𑀢𑀺 𑀆𑀧𑀼𑀘𑁆𑀙𑀢𑀻𑀢𑀺 𑀭𑀜𑁆𑀜𑀸 𑀏𑀯 𑀤𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁄 𑀧𑀦 𑀭𑀸𑀚𑀓𑀫𑁆𑀫𑀺𑀓𑁂𑀳𑀺 𑀅𑀫𑀘𑁆𑀘𑀸𑀤𑀻𑀳𑀺 𑀞𑀧𑀺𑀢𑁄, 𑀅𑀫𑀘𑁆𑀘𑀸𑀤𑀻𑀦𑀁 𑀏𑀯 𑀯𑀸 𑀪𑀝𑁄 𑀳𑁄𑀢𑀺, 𑀢𑁂𑀦 𑀢𑀁 𑀢𑀁 𑀅𑀫𑀘𑁆𑀘𑀸𑀤𑀺𑀫𑁆𑀧𑀺 𑀆𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺.

𑀭𑀸𑀚𑀪𑀝𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑁄𑀭𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁯𑁧. 𑀢𑀲𑁆𑀫𑀸𑀢𑀺 ¶ 𑀪𑀕𑀯𑀸 𑀲𑀬𑀁 𑀬𑀲𑁆𑀫𑀸 𑀥𑀫𑁆𑀫𑀲𑁆𑀲𑀸𑀫𑀻, 𑀢𑀲𑁆𑀫𑀸 𑀅𑀗𑁆𑀕𑀼𑀮𑀺𑀫𑀸𑀮𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀲𑀺, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀚𑀸𑀦𑀦𑁆𑀢𑀻𑀢𑀺 𑀲𑀻𑀮𑀯𑀸 𑀚𑀸𑀢𑁄𑀢𑀺 𑀚𑀸𑀦𑀦𑁆𑀢𑀺.

𑁯𑁨. 𑀉𑀧𑀭𑀫𑀦𑁆𑀢𑀺 𑀯𑀺𑀭𑀫𑀦𑁆𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀦𑁆𑀤𑀼𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀗𑁆𑀔𑀮𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁 𑀫𑀼𑀜𑁆𑀘𑀺𑀢𑁆𑀯𑀸. 𑀯𑀺𑀯𑀭𑀺𑀢𑁆𑀯𑀸𑀢𑀺 𑀕𑀸𑀫𑀩𑀦𑁆𑀥𑀦𑀸𑀤𑀻𑀲𑀼 𑀕𑀸𑀫𑀤𑁆𑀯𑀸𑀭𑀸𑀤𑀻𑀦𑀁 𑀯𑀺𑀯𑀭𑀺𑀢𑁆𑀯𑀸. 𑀅𑀧𑀲𑁆𑀲𑀫𑀸𑀦𑀸𑀦𑀦𑁆𑀢𑀺 𑀧𑀼𑀭𑀺𑀲𑀕𑀼𑀢𑁆𑀢𑀺𑀬𑀁 𑀕𑁄𑀧𑀓𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁.

𑁯𑁫. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀘𑁄𑀭𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀡𑀸𑀬𑀺𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁯𑁬. 𑀧𑀮𑀸𑀢𑁄𑀧𑀻𑀢𑀺 𑀇𑀡𑀲𑀸𑀫𑀺𑀓𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 𑀪𑀬𑁂𑀦 𑀧𑀮𑀸𑀢𑁄. 𑀕𑀻𑀯𑀸 𑀳𑁄𑀢𑀻𑀢𑀺 𑀇𑀡𑀸𑀬𑀺𑀓𑀪𑀸𑀯𑀁 𑀜𑀢𑁆𑀯𑀸 𑀅𑀦𑀸𑀤𑀭𑁂𑀦 𑀇𑀡𑀫𑀼𑀢𑁆𑀢𑀓𑁂 𑀪𑀺𑀓𑁆𑀔𑀼𑀪𑀸𑀯𑁂 𑀧𑀯𑁂𑀲𑀺𑀢𑀢𑁆𑀢𑀸. 𑀉𑀧𑀟𑁆𑀠𑀼𑀧𑀟𑁆𑀠𑀦𑁆𑀢𑀺 𑀣𑁄𑀓𑀣𑁄𑀓𑀁. 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀇𑀡𑀸𑀬𑀺𑀓𑁂𑀦 𑀥𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸 𑀫𑀸 𑀯𑀸, 𑀤𑀸𑀦𑁂 𑀲𑀉𑀲𑁆𑀲𑀸𑀳𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀅𑀜𑁆𑀜𑁂𑀳𑀺 𑀘 𑀪𑀺𑀓𑁆𑀔𑀽𑀳𑀺 ‘‘𑀫𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀳𑀸𑀬𑀓𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀳𑀺𑀲𑁆𑀲 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑀢𑀸 𑀲𑀺𑀬𑀸𑀢𑀺.

𑀇𑀡𑀸𑀬𑀺𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀸𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁯𑁭. ‘‘𑀤𑀸𑀲𑀘𑀸𑀭𑀺𑀢𑁆𑀢𑀁 ¶ 𑀆𑀭𑁄𑀧𑁂𑀢𑁆𑀯𑀸 𑀓𑀻𑀢𑁄’’𑀢𑀺 𑀇𑀫𑀺𑀦𑀸 𑀤𑀸𑀲𑀪𑀸𑀯𑀧𑀭𑀺𑀫𑁄𑀘𑀦𑀢𑁆𑀣𑀸𑀬 𑀓𑀻𑀢𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀸𑀤𑀺𑀲𑁄 𑀳𑀺 𑀥𑀦𑀓𑁆𑀓𑀻𑀢𑁄𑀧𑀺 𑀅𑀤𑀸𑀲𑁄 𑀏𑀯. 𑀢𑀢𑁆𑀣 𑀢𑀢𑁆𑀣 𑀘𑀸𑀭𑀺𑀢𑁆𑀢𑀯𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀤𑀸𑀲𑀧𑀡𑁆𑀡𑀚𑁆𑀛𑀸𑀧𑀦𑀸𑀤𑀺𑀦𑀸 ¶ 𑀅𑀤𑀸𑀲𑀓𑀭𑀡𑀦𑀺𑀬𑀸𑀫𑁂𑀦. 𑀅𑀪𑀺𑀲𑁂𑀓𑀸𑀤𑀻𑀲𑀼 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀫𑁄𑀘𑀸𑀧𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀲𑀸𑀥𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀲𑀬𑀫𑁂𑀯 𑀧𑀡𑁆𑀡𑀁 𑀆𑀭𑁄𑀧𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀢𑀸 𑀪𑀼𑀚𑀺𑀲𑁆𑀲𑀺𑀢𑁆𑀣𑀺𑀬𑁄 ‘‘𑀫𑀬𑀫𑁆𑀧𑀺 𑀯𑀡𑁆𑀡𑀤𑀸𑀲𑀺𑀬𑁄 𑀳𑁄𑀫𑀸’’𑀢𑀺 𑀅𑀢𑁆𑀢𑀦𑁄 𑀭𑀓𑁆𑀔𑀡𑀢𑁆𑀣𑀸𑀬 𑀲𑀬𑀫𑁂𑀯 𑀭𑀸𑀚𑀽𑀦𑀁 𑀤𑀸𑀲𑀺𑀧𑀡𑁆𑀡𑁂 𑀅𑀢𑁆𑀢𑀦𑁄 𑀦𑀸𑀫𑀁 𑀮𑀺𑀔𑀸𑀧𑁂𑀦𑁆𑀢𑀺, 𑀢𑀸𑀲𑀁 𑀧𑀼𑀢𑁆𑀢𑀸𑀧𑀺 𑀭𑀸𑀚𑀤𑀸𑀲𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀳𑀺 𑀅𑀤𑀺𑀦𑁆𑀦𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸𑀢𑀺 𑀬𑀢𑁆𑀢𑀓𑀸 𑀢𑁂𑀲𑀁 𑀲𑀸𑀫𑀺𑀦𑁄, 𑀢𑁂𑀲𑀼 𑀏𑀓𑁂𑀦 𑀅𑀤𑀺𑀦𑁆𑀦𑁂𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸.

𑀪𑀼𑀚𑀺𑀲𑁆𑀲𑁂 𑀧𑀦 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑀲𑁆𑀲 𑀯𑀺𑀳𑀸𑀭𑀲𑁆𑀲 𑀢𑁂 𑀆𑀭𑀸𑀫𑀺𑀓𑀸 𑀤𑀺𑀦𑁆𑀦𑀸, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀁 𑀜𑀸𑀧𑁂𑀢𑁆𑀯𑀸 𑀨𑀸𑀢𑀺𑀓𑀫𑁆𑀫𑁂𑀦 𑀥𑀦𑀸𑀦𑀺 𑀤𑀢𑁆𑀯𑀸 𑀪𑀼𑀚𑀺𑀲𑁆𑀲𑁂 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀢𑁆𑀢𑀓𑀲𑀤𑀺𑀲𑀸𑀯 𑀳𑁄𑀦𑁆𑀢𑀻𑀢𑀺 𑀓𑁂𑀲𑀼𑀘𑀺 𑀚𑀦𑀧𑀤𑁂𑀲𑀼 𑀅𑀤𑀸𑀲𑁂 𑀓𑀭𑁄𑀦𑁆𑀢𑀸 𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀜𑁆𑀘𑀦𑁆𑀢𑀺, 𑀢𑁂𑀦 𑀓𑀺𑀭 𑀢𑁂 𑀅𑀤𑀸𑀲𑀸 𑀳𑁄𑀦𑁆𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀆𑀭𑀸𑀫𑀺𑀓𑀯𑀘𑀦𑁂𑀦 𑀤𑀸𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀲𑁆𑀲 𑀆𑀭𑀸𑀫𑀺𑀓𑀤𑀸𑀲𑁄 𑀏𑀯𑀸𑀢𑀺 ‘‘𑀦𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. ‘‘𑀢𑀸𑀯𑀓𑀸𑀮𑀺𑀓𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸 𑀧𑀘𑁆𑀙𑀸𑀧𑀺 𑀕𑀳𑁂𑀢𑀼𑀓𑀸𑀫𑀢𑀸𑀬 𑀯𑀸 𑀤𑀺𑀦𑁆𑀦𑀁 𑀲𑀩𑁆𑀩𑀁 𑀢𑀸𑀯𑀓𑀸𑀮𑀺𑀓𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀲𑁆𑀲𑀸𑀫𑀺𑀓𑀤𑀸𑀲𑁄 𑀦𑀸𑀫 𑀬𑀲𑁆𑀲 𑀲𑀸𑀫𑀺𑀓𑀼𑀮𑀁 𑀅𑀜𑁆𑀜𑀸𑀢𑀺𑀓𑀁 𑀫𑀭𑀡𑁂𑀦 𑀧𑀭𑀺𑀓𑁆𑀔𑀻𑀡𑀁, 𑀦 𑀓𑁄𑀘𑀺 𑀢𑀲𑁆𑀲 𑀤𑀸𑀬𑀸𑀤𑁄, 𑀲𑁄 𑀧𑀦 𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀯𑀸 𑀦𑀺𑀯𑀸𑀲𑀕𑀸𑀫𑀯𑀸𑀲𑀻𑀳𑀺 𑀯𑀸 𑀇𑀲𑁆𑀲𑀭𑁂𑀳𑀺 𑀯𑀸 𑀪𑀼𑀚𑀺𑀲𑁆𑀲𑁄 𑀓𑀢𑁄𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀤𑁂𑀯𑀤𑀸𑀲𑀸𑀧𑀺 𑀤𑀸𑀲𑀸 𑀏𑀯. 𑀢𑁂 𑀳𑀺 𑀓𑀢𑁆𑀣𑀘𑀺 𑀤𑁂𑀲𑁂 𑀭𑀸𑀚𑀤𑀸𑀲𑀸 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀯𑀺𑀳𑀸𑀭𑀤𑀸𑀲𑀸, 𑀢𑀲𑁆𑀫𑀸 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀸𑀲𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀧𑀦𑁂𑀦𑁆𑀢𑁄 𑀧𑀤𑀯𑀸𑀭𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀤𑀸𑀲𑀲𑁆𑀲 𑀧𑀦 𑀧𑀮𑀸𑀬𑀢𑁄 𑀅𑀦𑀸𑀧𑀢𑁆𑀢𑀺.

𑀤𑀸𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀸𑀭𑀪𑀡𑁆𑀟𑀼𑀯𑀢𑁆𑀣𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁯𑁮. 𑀪𑀡𑁆𑀟𑀼𑀓𑀫𑁆𑀫𑀸𑀧𑀼𑀘𑁆𑀙𑀸𑀦𑀸𑀤𑀺𑀓𑀣𑀸𑀬𑀁 𑀓𑀫𑁆𑀫𑀸𑀭𑀪𑀡𑁆𑀟𑀽𑀢𑀺 𑀤𑀳𑀭𑀢𑀸𑀬 𑀅𑀫𑁄𑀴𑀺𑀩𑀦𑁆𑀥𑁄 𑀫𑀼𑀡𑁆𑀟𑀺𑀓𑀲𑀻𑀲𑁄 𑀓𑀫𑁆𑀫𑀸𑀭𑀤𑀸𑀭𑀓𑁄 ¶ 𑀏𑀯 𑀯𑀼𑀢𑁆𑀢𑁄. 𑀢𑀼𑀮𑀸𑀥𑀸𑀭𑀫𑀼𑀡𑁆𑀟𑀓𑁄𑀢𑀺 𑀏𑀢𑁆𑀣 𑀢𑀼𑀮𑀸𑀥𑀸𑀭𑀸𑀢𑀺 𑀢𑀫𑁆𑀩𑀲𑀼𑀯𑀡𑁆𑀡𑀸𑀤𑀻𑀦𑀁 𑀢𑀼𑀮𑀁 𑀳𑀢𑁆𑀣𑁂𑀦 𑀥𑀸𑀭𑁂𑀢𑀻𑀢𑀺 ¶ 𑀓𑀫𑁆𑀫𑀸𑀭𑀸 ‘‘𑀢𑀼𑀮𑀸𑀥𑀸𑀭𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀼 𑀏𑀓𑁄 𑀫𑀼𑀡𑁆𑀟𑀺𑀓𑀲𑀻𑀲𑁄 𑀤𑀳𑀭𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀜𑁆𑀘𑀲𑀺𑀔𑁄 𑀢𑀭𑀼𑀡𑀤𑀸𑀭𑀓𑁄’’𑀢𑀺. 𑀏𑀓𑀸𑀯 𑀲𑀺𑀔𑀸 𑀧𑀜𑁆𑀘 𑀯𑁂𑀡𑀺𑀬𑁄 𑀓𑀢𑁆𑀯𑀸 𑀩𑀦𑁆𑀥𑀦𑁂𑀦 𑀧𑀜𑁆𑀘𑀲𑀺𑀔𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀜𑁆𑀘𑀲𑀺𑀔𑁄, 𑀢𑀲𑁆𑀲 𑀲𑀺𑀔𑀁 𑀙𑀺𑀦𑁆𑀤𑀦𑁆𑀢𑀸 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀲𑀼𑀁. 𑀢𑁂𑀦 𑀪𑀡𑁆𑀟𑀼𑀓𑀫𑁆𑀫𑀸𑀧𑀮𑁄𑀓𑀦𑀁 𑀅𑀦𑀼𑀜𑁆𑀜𑀸𑀢𑀁. 𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑁂𑀢𑀺 𑀩𑀤𑁆𑀥𑀲𑀻𑀫𑀸𑀬 𑀲𑀢𑀺 𑀢𑀤𑀦𑁆𑀢𑁄𑀕𑀥𑁂, 𑀅𑀲𑀢𑀺 𑀉𑀧𑀘𑀸𑀭𑀲𑀻𑀫𑀦𑁆𑀢𑁄𑀕𑀥𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑀼𑀁 𑀪𑀡𑁆𑀟𑀼𑀓𑀫𑁆𑀫𑀸𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀅𑀦𑀧𑀮𑁄𑀓𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂 𑀆𑀧𑀼𑀘𑁆𑀙𑀺𑀢𑀸 𑀅𑀫𑁆𑀳𑁂𑀳𑀻𑀢𑀺𑀲𑀜𑁆𑀜𑀺𑀦𑁄…𑀧𑁂… 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀜𑁆𑀘𑀺𑀘𑁆𑀘 𑀅𑀦𑀸𑀧𑀼𑀘𑁆𑀙𑀸 𑀓𑁂𑀲𑁂 𑀑𑀳𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀲𑁄𑀭𑁄𑀧𑀦𑀫𑁆𑀧𑀺 𑀲𑀫𑀡𑀧𑀩𑁆𑀩𑀚𑀦𑀯𑁄𑀳𑀸𑀭𑀁 𑀮𑀪𑀢𑀻𑀢𑀺 𑀆𑀳 ‘‘𑀇𑀫𑀲𑁆𑀲 𑀲𑀫𑀡𑀓𑀭𑀡’’𑀦𑁆𑀢𑀺𑀆𑀤𑀺. 𑀏𑀓𑀲𑀺𑀔𑀸𑀫𑀢𑁆𑀢𑀥𑀭𑁄𑀢𑀺 𑀏𑀢𑁆𑀣 𑀏𑀓𑁂𑀦 𑀓𑁂𑀲𑁂𑀦 𑀲𑀺𑀔𑀸 𑀏𑀓𑀲𑀺𑀔𑀸𑀢𑀺 𑀯𑀤𑀦𑁆𑀢𑀺, 𑀅𑀧𑁆𑀧𑀓𑁂𑀲𑀸𑀯 𑀲𑀺𑀔𑀸 𑀏𑀯𑀁 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀏𑀓𑀓𑁂𑀲𑀫𑁆𑀧𑀺 𑀧𑀦 𑀅𑀦𑀸𑀧𑀼𑀘𑁆𑀙𑀸 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯.

𑁧𑁦𑁦. 𑀯𑀸𑀫𑀳𑀢𑁆𑀣𑁂𑀦𑀸𑀢𑀺 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀪𑀼𑀜𑁆𑀚𑀦𑀢𑁄 𑀯𑀼𑀢𑁆𑀢𑀁.

𑁧𑁦𑁩-𑁪. 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑀲𑁆𑀲 𑀯𑀢𑁆𑀢𑁂𑀲𑀼 𑀧𑀜𑁆𑀘𑀓𑀙𑀓𑁆𑀓𑁂𑀲𑀼 𑀧𑀦 ‘‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺…𑀧𑁂… 𑀅𑀦𑀼𑀩𑁆𑀬𑀜𑁆𑀚𑀦𑀲𑁄’’𑀢𑀺 𑀏𑀢𑁆𑀣 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀧𑀪𑁂𑀤𑁄 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀜𑀸𑀢𑀸𑀬𑀁 𑀜𑀸𑀢𑁄 𑀳𑁄𑀢𑀺. ‘‘𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀻’’𑀢𑀺 𑀇𑀤𑀜𑁆𑀘 𑀅𑀢𑁆𑀢𑀦𑀸 𑀜𑀸𑀢𑀝𑁆𑀞𑀸𑀦𑁂𑀲𑀼 𑀆𑀧𑀢𑁆𑀢𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀁.

𑀓𑀫𑁆𑀫𑀸𑀭𑀪𑀡𑁆𑀟𑀼𑀯𑀢𑁆𑀣𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀸𑀳𑀼𑀮𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁦𑁫. 𑀧𑁄𑀓𑁆𑀔𑀭𑀯𑀲𑁆𑀲𑀦𑁆𑀢𑀺 𑀧𑁄𑀓𑁆𑀔𑀭𑁂 𑀧𑀤𑀼𑀫𑀕𑀘𑁆𑀙𑁂 𑀯𑀺𑀬 𑀅𑀢𑁂𑀫𑀺𑀢𑀼𑀓𑀸𑀫𑀸𑀦𑀁 𑀲𑀭𑀻𑀭𑀢𑁄 𑀧𑀯𑀝𑁆𑀝𑀦𑀓𑀯𑀲𑁆𑀲𑀁. 𑀢𑀲𑁆𑀫𑀺𑀁 𑀓𑀺𑀭 𑀯𑀲𑁆𑀲𑀦𑁆𑀢𑁂 𑀢𑁂𑀫𑀺𑀢𑀼𑀓𑀸𑀫𑀸𑀯 𑀢𑁂𑀫𑁂𑀦𑁆𑀢𑀺, 𑀦 𑀇𑀢𑀭𑁂. ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀭𑀚𑁆𑀚𑁂 𑀲𑀩𑁆𑀩𑀫𑁆𑀧𑀺 𑀲𑀸𑀧𑀢𑁂𑀬𑁆𑀬𑀁 𑀲𑀬𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀕𑀸𑀭𑀯𑁂𑀦 ¶ 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀧𑀺 𑀦 𑀦𑀺𑀫𑀦𑁆𑀢𑁂𑀲𑀺, 𑀕𑀦𑁆𑀢𑁆𑀯𑀸 𑀧𑀦 𑀕𑁂𑀳𑁂 𑀲𑀓𑀮𑀭𑀢𑁆𑀢𑀺𑀁 𑀫𑀳𑀸𑀤𑀸𑀦𑀜𑁆𑀘𑁂𑀯 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀆𑀲𑀦𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀸𑀮𑀗𑁆𑀓𑀸𑀭𑀜𑁆𑀘 𑀲𑀁𑀯𑀺𑀤𑀳𑀦𑁆𑀢𑁄𑀯 𑀯𑀻𑀢𑀺𑀦𑀸𑀫𑁂𑀲𑀺.

𑀦 ¶ 𑀓𑁄𑀘𑀺…𑀧𑁂… 𑀧𑀢𑁆𑀢𑀁 𑀯𑀸 𑀅𑀕𑁆𑀕𑀳𑁂𑀲𑀻𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀺𑀢𑀼 𑀦𑀺𑀯𑁂𑀲𑀦𑀫𑁂𑀯 𑀕𑀫𑀺𑀲𑁆𑀲𑀢𑀻𑀢𑀺𑀲𑀜𑁆𑀜𑀸𑀬 𑀦𑀕𑁆𑀕𑀳𑁂𑀲𑀺. 𑀓𑀼𑀮𑀦𑀕𑀭𑁂𑀢𑀺 𑀜𑀸𑀢𑀺𑀓𑀼𑀮𑀦𑁆𑀢𑀓𑁂 𑀦𑀕𑀭𑁂. 𑀧𑀺𑀡𑁆𑀟𑀘𑀸𑀭𑀺𑀬𑀯𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀜𑀸𑀢𑀺𑀕𑀸𑀫𑁂𑀲𑀼𑀧𑀺 𑀲𑀧𑀤𑀸𑀦𑀘𑀸𑀭𑀺𑀓𑀯𑀢𑁆𑀢𑀁. 𑀪𑀺𑀓𑁆𑀔𑀸𑀬 𑀘𑀸𑀭𑁄 𑀘𑀭𑀡𑀁 𑀏𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑁄, 𑀔𑀢𑁆𑀢𑀺𑀬𑁄.

𑀉𑀢𑁆𑀢𑀺𑀝𑁆𑀞𑁂𑀢𑀺 𑀉𑀢𑁆𑀢𑀺𑀝𑁆𑀞𑀺𑀢𑁆𑀯𑀸 𑀧𑀭𑁂𑀲𑀁 𑀖𑀭𑀤𑁆𑀯𑀸𑀭𑁂 𑀉𑀤𑁆𑀤𑀺𑀲𑁆𑀲 𑀞𑀢𑁆𑀯𑀸 𑀕𑀳𑁂𑀢𑀩𑁆𑀩𑀧𑀺𑀡𑁆𑀟𑁂. 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀦𑀺𑀫𑀦𑁆𑀢𑀦𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀧𑀡𑀻𑀢𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀡𑀯𑀲𑁂𑀦 𑀢𑀢𑁆𑀣 𑀦𑀧𑁆𑀧𑀫𑀚𑁆𑀚𑁂𑀬𑁆𑀬. 𑀥𑀫𑁆𑀫𑀦𑁆𑀢𑀺 𑀅𑀦𑁂𑀲𑀦𑀁 𑀧𑀳𑀸𑀬 𑀲𑀧𑀤𑀸𑀦𑀁 𑀘𑀭𑀦𑁆𑀢𑁄 𑀢𑀫𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀥𑀫𑁆𑀫𑀁 𑀲𑀼𑀘𑀭𑀺𑀢𑀁 𑀘𑀭𑁂𑀬𑁆𑀬. 𑀲𑀼𑀔𑀁 𑀲𑁂𑀢𑀻𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀕𑀸𑀣𑀸𑀬𑀁 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀯𑁂𑀲𑀺𑀬𑀸𑀤𑀺𑀪𑁂𑀤𑁂 𑀅𑀕𑁄𑀘𑀭𑁂 𑀘𑀭𑀡𑀯𑀲𑁂𑀦 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀥𑀫𑁆𑀫𑀁 𑀤𑀼𑀘𑁆𑀘𑀭𑀺𑀢𑀁 𑀦 𑀘 𑀘𑀭𑁂. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀁 𑀧𑀦 𑀕𑀸𑀣𑀁 𑀲𑀼𑀢𑁆𑀯𑀸𑀢𑀺 𑀦𑀺𑀯𑁂𑀲𑀦𑁂 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀜𑀸𑀢𑀺𑀲𑀫𑀸𑀕𑀫𑁂 𑀅𑀢𑁆𑀢𑀦𑁄 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑀁 𑀇𑀫𑀁 𑀤𑀼𑀢𑀺𑀬𑀕𑀸𑀣𑀁 𑀲𑀼𑀢𑁆𑀯𑀸.

𑀥𑀫𑁆𑀫𑀧𑀸𑀮𑀚𑀸𑀢𑀓𑀦𑁆𑀢𑀺𑀆𑀤𑀻𑀲𑀼 𑀧𑀦 𑀢𑀢𑁄 𑀧𑀭𑀓𑀸𑀮𑁂𑀲𑀼𑀧𑀺 𑀭𑀜𑁆𑀜𑁄 𑀧𑀯𑀢𑁆𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑁆𑀯𑀸 𑀬𑀣𑀸𑀧𑀲𑀗𑁆𑀕𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺𑀆𑀤𑀺. 𑀲𑀺𑀭𑀺𑀕𑀩𑁆𑀪𑀁 𑀕𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀬𑀤𑀺 𑀳𑀺 𑀪𑀕𑀯𑀸 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦 𑀧𑀲𑁆𑀲𑁂𑀬𑁆𑀬, 𑀲𑀸 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀫𑀭𑁂𑀬𑁆𑀬𑀸𑀢𑀺 𑀅𑀕𑀫𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀁 𑀤𑀺𑀯𑀲𑀫𑁂𑀯𑀸𑀢𑀺 𑀢𑀲𑁆𑀫𑀺𑀁 𑀭𑀸𑀳𑀼𑀮𑀫𑀸𑀢𑀼𑀤𑀲𑁆𑀲𑀦𑀤𑀺𑀯𑀲𑁂𑀬𑁂𑀯. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀢𑁆𑀣𑀸 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀻’’𑀢𑀺 (𑀥. 𑀧. 𑀅𑀝𑁆𑀞. 𑁧.𑁧𑁨 𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼) 𑀯𑀼𑀢𑁆𑀢𑀁. 𑀓𑁂𑀲𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀭𑀸𑀚𑀫𑁄𑀴𑀺𑀩𑀦𑁆𑀥𑀦𑀢𑁆𑀣𑀁 𑀓𑀼𑀫𑀸𑀭𑀓𑀸𑀮𑁂 𑀩𑀦𑁆𑀥𑀺𑀢𑀲𑀺𑀔𑀸𑀯𑁂𑀡𑀺𑀫𑁄𑀘𑀦𑀁, 𑀢𑀁 𑀓𑀺𑀭 𑀓𑀭𑁄𑀦𑁆𑀢𑀸 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 ‘‘𑀓𑁂𑀲𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀓𑀼𑀮𑀫𑀭𑀺𑀬𑀸𑀤𑀯𑀲𑁂𑀦 𑀓𑁂𑀲𑁄𑀭𑁄𑀧𑀦’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁦𑁫) 𑀯𑀼𑀢𑁆𑀢𑀁. 𑀧𑀝𑁆𑀝𑀩𑀦𑁆𑀥𑁄𑀢𑀺 ‘‘𑀅𑀲𑀼𑀓𑀭𑀸𑀚𑀸’’𑀢𑀺 𑀦𑀴𑀸𑀝𑁂 𑀲𑀼𑀯𑀡𑁆𑀡𑀧𑀝𑁆𑀝𑀩𑀦𑁆𑀥𑀦𑀁. 𑀅𑀪𑀺𑀦𑀯𑀧𑀸𑀲𑀸𑀤𑀧𑁆𑀧𑀯𑁂𑀲𑀫𑀗𑁆𑀕𑀮𑀁 𑀖𑀭𑀫𑀗𑁆𑀕𑀮𑀁. 𑀙𑀢𑁆𑀢𑀼𑀲𑁆𑀲𑀸𑀧𑀦𑁂 𑀫𑀗𑁆𑀕𑀮𑀁 𑀙𑀢𑁆𑀢𑀫𑀗𑁆𑀕𑀮𑀁. 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 ¶ 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀻 𑀧𑀭𑁂𑀳𑀺 𑀅𑀲𑀸𑀥𑀸𑀭𑀡𑁂𑀳𑀺 𑀧𑀜𑁆𑀘𑀓𑀮𑁆𑀬𑀸𑀡𑀸𑀤𑀻𑀳𑀺 𑀲𑀳𑀺𑀢𑀢𑁆𑀢𑀸 𑀲𑀸 𑀏𑀯𑀁 𑀯𑀼𑀢𑁆𑀢𑀸. 𑀢𑀼𑀯𑀝𑀦𑁆𑀢𑀺 𑀲𑀻𑀖𑀁. 𑀅𑀦𑀺𑀘𑁆𑀙𑀫𑀸𑀦𑀦𑁆𑀢𑀺 𑀫𑀦𑀲𑀸 𑀅𑀭𑁄𑀘𑁂𑀦𑁆𑀢𑀁, 𑀯𑀸𑀘𑀸𑀬 𑀧𑀦 𑀪𑀕𑀯𑀢𑀸 ‘‘𑀧𑀩𑁆𑀩𑀚𑀺𑀲𑁆𑀲𑀲𑀺 𑀦𑀦𑁆𑀤𑀸’’𑀢𑀺 𑀯𑀼𑀢𑁆𑀢𑁂 𑀕𑀸𑀭𑀯𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 ‘‘𑀆𑀫𑀸’’𑀢𑀺 𑀅𑀯𑁄𑀘. 𑀪𑀕𑀯𑀸 𑀘 𑀏𑀢𑁂𑀦 𑀮𑁂𑀲𑁂𑀦 𑀧𑀩𑁆𑀩𑀸𑀚𑁂𑀲𑀺.

𑀩𑁆𑀭𑀳𑁆𑀫𑀭𑀽𑀧𑀯𑀡𑁆𑀡𑀦𑁆𑀢𑀺 ¶ 𑀩𑁆𑀭𑀳𑁆𑀫𑀭𑀽𑀧𑀲𑀫𑀸𑀦𑀭𑀽𑀧𑀁. 𑀢𑁆𑀬𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀯𑀺𑀲𑀳𑀻𑀢𑀺 ‘‘𑀫𑀸 𑀦𑀁 𑀦𑀺𑀯𑀢𑁆𑀢𑀬𑀺𑀢𑁆𑀣𑀸’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀦𑀸𑀲𑀓𑁆𑀔𑀺. 𑀲𑀢𑁆𑀢𑀯𑀺𑀥𑀁 𑀅𑀭𑀺𑀬𑀥𑀦𑀦𑁆𑀢𑀺 𑁋

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀺𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦’’𑀦𑁆𑀢𑀺. (𑀅. 𑀦𑀺. 𑁭.𑁫, 𑁬) 𑁋

𑀏𑀯𑀁 𑀯𑀼𑀢𑁆𑀢𑀁 𑀲𑀢𑁆𑀢𑀯𑀺𑀥𑀁 𑀅𑀭𑀺𑀬𑀥𑀦𑀁. 𑀅𑀥𑀺𑀫𑀢𑁆𑀢𑀁 𑀭𑀸𑀳𑀼𑀮𑁂𑀢𑀺 𑀭𑀸𑀳𑀼𑀮𑁂 𑀧𑀩𑁆𑀩𑀚𑀺𑀢𑁂 𑀦𑀦𑁆𑀤𑀧𑀩𑁆𑀩𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀢𑁄𑀧𑀺 𑀅𑀥𑀺𑀓𑀢𑀭𑀁 𑀤𑀼𑀓𑁆𑀔𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀘𑁆𑀙𑀸𑀢𑀺 𑀇𑀢𑁄 𑀯𑀼𑀢𑁆𑀢𑀲𑁄𑀓𑀼𑀧𑁆𑀧𑀢𑁆𑀢𑀺𑀢𑁄 𑀅𑀧𑀭𑀤𑀺𑀯𑀲𑁂𑀲𑀼 𑀅𑀦𑀸𑀕𑀸𑀫𑀻𑀦𑀁 𑀜𑀸𑀢𑀺𑀲𑀺𑀦𑁂𑀳𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀪𑀸𑀯𑀸. 𑀧𑀸𑀴𑀺𑀬𑀁 𑀧𑀼𑀢𑁆𑀢𑀧𑁂𑀫𑀦𑁆𑀢𑀺𑀆𑀤𑀺 𑀭𑀜𑁆𑀜𑀸 𑀧𑀼𑀢𑁆𑀢𑀲𑀺𑀦𑁂𑀳𑀲𑁆𑀲 𑀢𑀺𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀧𑀼𑀢𑁆𑀢𑀲𑀺𑀦𑁂𑀳𑁄 𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 ‘‘𑀙𑀯𑀺𑀁…𑀧𑁂… 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀢𑀦𑁄 𑀧𑀺𑀬𑀢𑀭𑀸𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀼𑀢𑁆𑀢𑁂𑀢𑀺 𑀭𑀸𑀳𑀼𑀮𑀁. 𑀲𑀤𑁆𑀤𑀳𑀦𑁆𑀢𑁂𑀦𑀸𑀢𑀺 𑀢𑀲𑁆𑀲 𑀯𑀘𑀦𑁂𑀦 𑀅𑀯𑁂𑀫𑀢𑀺𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺𑀬𑀸 𑀲𑀢𑀺 𑀆𑀧𑀢𑁆𑀢𑀺 𑀏𑀯.

𑀭𑀸𑀳𑀼𑀮𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀧𑀤𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁦𑁬. 𑀲𑀸𑀫𑀡𑁂𑀭𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀧𑀸𑀴𑀺𑀬𑀁 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀦𑀁 𑀯𑀸 𑀅𑀥𑀺𑀕𑀫𑀽𑀧𑀸𑀬𑀸. 𑀧𑀸𑀡𑁄𑀢𑀺 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀲 𑀅𑀢𑀺𑀧𑀸𑀢𑀦𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀧𑀸𑀡𑀸𑀢𑀺𑀧𑀸𑀢𑁄. 𑀧𑀸𑀡𑀯𑀥𑁄𑀢𑀺 𑀅𑀢𑁆𑀣𑁄. 𑀲𑁄 ¶ 𑀧𑀦 𑀅𑀢𑁆𑀣𑀢𑁄 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸𑀯. 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀲𑀗𑁆𑀔𑀸𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑀁 𑀫𑀡𑀢𑀺 𑀦𑀻𑀳𑀭𑀢𑀻𑀢𑀺 𑀯𑀺𑀭𑀢𑀺 ‘‘𑀯𑁂𑀭𑀫𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 𑀯𑀸 ‘‘𑀯𑀺𑀭𑀫𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀯𑁂𑀭𑀫𑀡𑀻’’𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀣𑁂𑀬𑁆𑀬𑀘𑁂𑀢𑀦𑀸𑀯. 𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀁, 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀫𑁂𑀣𑀼𑀦𑀘𑁂𑀢𑀦𑀸. 𑀫𑀼𑀲𑀸𑀢𑀺 𑀅𑀪𑀽𑀢𑀯𑀢𑁆𑀣𑀼, 𑀢𑀲𑁆𑀲 𑀯𑀸𑀤𑁄 𑀅𑀪𑀽𑀢𑀢𑀁 𑀜𑀢𑁆𑀯𑀸𑀯 𑀪𑀽𑀢𑀢𑁄 ¶ 𑀯𑀺𑀜𑁆𑀜𑀸𑀧𑀦𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀧𑀺𑀝𑁆𑀞𑀧𑀽𑀯𑀸𑀤𑀺𑀦𑀺𑀩𑁆𑀩𑀢𑁆𑀢𑀲𑀼𑀭𑀸 𑀘𑁂𑀯 𑀧𑀼𑀧𑁆𑀨𑀸𑀲𑀯𑀸𑀤𑀺𑀪𑁂𑀤𑀁 𑀫𑁂𑀭𑀬𑀜𑁆𑀘 𑀲𑀼𑀭𑀸𑀫𑁂𑀭𑀬𑀁. 𑀢𑀤𑁂𑀯 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀜𑁆𑀘𑁂𑀯 𑀧𑀫𑀸𑀤𑀓𑀸𑀭𑀡𑀝𑁆𑀞𑁂𑀦 𑀧𑀫𑀸𑀤𑀝𑁆𑀞𑀸𑀦𑀜𑁆𑀘, 𑀢𑀁 𑀬𑀸𑀬 𑀘𑁂𑀢𑀦𑀸𑀬 𑀧𑀺𑀯𑀢𑀺, 𑀢𑀲𑁆𑀲 𑀏𑀢𑀁 𑀅𑀥𑀺𑀯𑀘𑀦𑀁.

𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀅𑀬𑀁 𑀅𑀭𑀺𑀬𑀸𑀦𑀁 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀪𑁄𑀚𑀦𑀦𑁆𑀢𑀺 𑀇𑀥 𑀲𑀩𑁆𑀩𑀁 𑀬𑀸𑀯𑀓𑀸𑀮𑀺𑀓𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀚𑁆𑀛𑁄𑀳𑀭𑀡𑀁 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀪𑁄𑀚𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀅𑀚𑁆𑀛𑁄𑀳𑀭𑀡𑀁 𑀯𑀺𑀓𑀸𑀮𑀪𑁄𑀚𑀦𑀁, 𑀯𑀺𑀓𑀸𑀮𑁂 𑀯𑀸 𑀬𑀸𑀯𑀓𑀸𑀮𑀺𑀓𑀲𑁆𑀲 𑀪𑁄𑀚𑀦𑀁 𑀅𑀚𑁆𑀛𑁄𑀳𑀭𑀡𑀁 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀅𑀢𑁆𑀣𑀢𑁄 𑀯𑀺𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀅𑀚𑁆𑀛𑁄𑀳𑀭𑀡𑀘𑁂𑀢𑀦𑀸𑀯.

𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀻𑀪𑀽𑀢𑀁 𑀤𑀲𑁆𑀲𑀦𑀁 𑀯𑀺𑀲𑀽𑀓𑀤𑀲𑁆𑀲𑀦𑀁, 𑀦𑀘𑁆𑀘𑀕𑀻𑀢𑀸𑀤𑀺𑀤𑀲𑁆𑀲𑀦𑀲𑀯𑀦𑀸𑀦𑀜𑁆𑀘𑁂𑀯 𑀯𑀝𑁆𑀝𑀓𑀬𑀼𑀤𑁆𑀥𑀚𑀽𑀢𑀓𑀻𑀴𑀸𑀤𑀺𑀲𑀩𑁆𑀩𑀓𑀻𑀴𑀸𑀦𑀜𑁆𑀘 𑀦𑀸𑀫𑀁. 𑀤𑀲𑁆𑀲𑀦𑀦𑁆𑀢𑀺 𑀘𑁂𑀢𑁆𑀣 𑀧𑀜𑁆𑀘𑀦𑁆𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀸𑀦𑀁 𑀬𑀣𑀸𑀲𑀓𑀁 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀤𑀲𑁆𑀲𑀦-𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢-𑀲𑀤𑁆𑀤𑁂𑀳𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀦𑀘𑁆𑀘𑀦𑀕𑀸𑀬𑀦𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀸𑀮𑀸𑀢𑀺 𑀩𑀤𑁆𑀥𑀫𑀩𑀤𑁆𑀥𑀁 𑀯𑀸 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀸𑀤𑀺𑀫𑀬𑀫𑁆𑀧𑀺 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀧𑀺𑀴𑀦𑁆𑀥𑀺𑀬𑀫𑀸𑀦𑀁 ‘‘𑀫𑀸𑀮𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀕𑀦𑁆𑀥𑀦𑁆𑀢𑀺 𑀯𑀸𑀲𑀘𑀼𑀡𑁆𑀡𑀸𑀤𑀺𑀯𑀺𑀮𑁂𑀧𑀦𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀧𑀺𑀲𑀺𑀢𑁆𑀯𑀸 𑀕𑀳𑀺𑀢𑀁 𑀙𑀯𑀺𑀭𑀸𑀕𑀓𑀭𑀡𑀜𑁆𑀘𑁂𑀯 𑀕𑀦𑁆𑀥𑀚𑀸𑀢𑀜𑁆𑀘. 𑀥𑀸𑀭𑀡𑀁 𑀦𑀸𑀫 𑀧𑀺𑀴𑀦𑁆𑀥𑀦𑀁. 𑀫𑀡𑁆𑀟𑀦𑀁 𑀦𑀸𑀫 𑀊𑀦𑀝𑁆𑀞𑀸𑀦𑀧𑀽𑀭𑀡𑀁. 𑀕𑀦𑁆𑀥𑀯𑀲𑁂𑀦, 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑀁 𑀯𑀺𑀪𑀽𑀲𑀦𑀁 𑀦𑀸𑀫. 𑀫𑀸𑀮𑀸𑀤𑀻𑀲𑀼 𑀯𑀸 𑀥𑀸𑀭𑀡𑀸𑀤𑀻𑀦𑀺 𑀬𑀣𑀸𑀓𑁆𑀓𑀫𑀁 ¶ 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀥𑀸𑀭𑀡𑀸𑀤𑀻𑀦𑀁 𑀞𑀸𑀦𑀁 𑀓𑀸𑀭𑀡𑀁 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸.

𑀉𑀘𑁆𑀘𑀸𑀢𑀺 𑀉𑀘𑁆𑀘-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄, 𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀆𑀲𑀦𑁆𑀤𑀸𑀤𑀺. 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀢𑀁, 𑀲𑀮𑁄𑀳𑀺𑀢𑀯𑀺𑀢𑀸𑀦𑀜𑁆𑀘. 𑀏𑀢𑁂𑀲𑀼 𑀳𑀺 𑀆𑀲𑀦𑀁, 𑀲𑀬𑀦𑀜𑁆𑀘 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦-𑀲𑀤𑁆𑀤𑁂𑀳𑀺 𑀕𑀳𑀺𑀢𑀸𑀦𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀭𑀚𑀢-𑀲𑀤𑁆𑀤𑁂𑀦 𑀤𑀸𑀭𑀼𑀫𑀸𑀲𑀓𑀸𑀤𑀺 𑀲𑀩𑁆𑀩𑀁 𑀭𑀽𑀧𑀺𑀬𑀁 𑀲𑀗𑁆𑀕𑀳𑀺𑀢𑀁, 𑀫𑀼𑀢𑁆𑀢𑀸𑀫𑀡𑀺𑀆𑀤𑀬𑁄𑀧𑁂𑀢𑁆𑀣 𑀥𑀜𑁆𑀜𑀔𑁂𑀢𑁆𑀢𑀯𑀢𑁆𑀣𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀕𑁆𑀕𑀳𑀡-𑀲𑀤𑁆𑀤𑁂𑀦 𑀧𑀝𑀺𑀕𑁆𑀕𑀸𑀳𑀸𑀧𑀦𑀲𑀸𑀤𑀺𑀬𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀦𑀸𑀲𑀦𑀯𑀢𑁆𑀣𑀽𑀢𑀺 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑀢𑀸𑀬 𑀮𑀺𑀗𑁆𑀕𑀦𑀸𑀲𑀦𑀸𑀬 𑀓𑀸𑀭𑀡𑀁.

𑁧𑁦𑁭. 𑀧𑀸𑀴𑀺𑀬𑀁 𑀲𑀩𑁆𑀩𑀁 𑀲𑀗𑁆𑀖𑀸𑀭𑀸𑀫𑀁 𑀆𑀯𑀭𑀡𑀁 𑀓𑀭𑁄𑀦𑁆𑀢𑀻𑀢𑀺 𑀲𑀩𑁆𑀩𑀲𑀗𑁆𑀖𑀸𑀭𑀸𑀫𑁂 𑀧𑀯𑁂𑀲𑀦𑀺𑀯𑀸𑀭𑀡𑀁 𑀓𑀭𑁄𑀦𑁆𑀢𑀺. 𑀲𑀗𑁆𑀖𑀸𑀭𑀸𑀫𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄𑀢𑀺 𑀲𑀗𑁆𑀖𑀸𑀭𑀸𑀫𑁄 𑀆𑀯𑀭𑀡𑁄 𑀓𑀸𑀢𑀩𑁆𑀩𑁄, 𑀲𑀗𑁆𑀖𑀸𑀭𑀸𑀫𑁂 𑀯𑀸 𑀆𑀯𑀭𑀡𑀁 ¶ 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 ‘‘𑀢𑀢𑁆𑀣 𑀆𑀯𑀭𑀡𑀁 𑀓𑀸𑀢𑀼’’𑀦𑁆𑀢𑀺 𑀪𑀼𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀳𑀸𑀭𑀁 𑀆𑀯𑀭𑀡𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀬𑀢𑁆𑀣 𑀯𑀸 𑀯𑀲𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀫𑀡𑁂𑀭𑀲𑁆𑀲 𑀯𑀲𑁆𑀲𑀕𑁆𑀕𑁂𑀦 𑀮𑀤𑁆𑀥𑀁 𑀯𑀸 𑀲𑀓𑀲𑀦𑁆𑀢𑀓𑀫𑁂𑀯 𑀯𑀸 𑀦𑀺𑀩𑀤𑁆𑀥𑀯𑀲𑀦𑀓𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁. 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺. 𑀅𑀢𑁆𑀢𑀦𑁄𑀢𑀺 𑀳𑀺 𑀲𑀬𑀁, 𑀆𑀘𑀭𑀺𑀬𑀲𑁆𑀲, 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀤𑀡𑁆𑀟𑁂𑀦𑁆𑀢𑀺 𑀯𑀺𑀦𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀡𑁆𑀟𑁄, 𑀲𑁄 𑀏𑀯 𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀦𑁆𑀢𑀺 𑀤𑀡𑁆𑀟𑀓𑀫𑁆𑀫𑀁, 𑀆𑀯𑀭𑀡𑀸𑀤𑀺. 𑀉𑀤𑀓𑀁 𑀯𑀸 𑀧𑀯𑁂𑀲𑁂𑀢𑀼𑀦𑁆𑀢𑀺 𑀧𑁄𑀓𑁆𑀔𑀭𑀡𑀻𑀆𑀤𑀺𑀉𑀤𑀓𑁂 𑀧𑀯𑁂𑀲𑁂𑀢𑀼𑀁.

𑀲𑀺𑀓𑁆𑀔𑀸𑀧𑀤𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀸𑀧𑀼𑀘𑁆𑀙𑀸𑀯𑀭𑀡𑀯𑀢𑁆𑀣𑀼𑀆𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁦𑁮. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀫𑁆𑀧𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀼𑀧𑀺 𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀬𑀣𑀸 𑀑𑀭𑀫𑀦𑁆𑀢𑀺, 𑀢𑀣𑀸 𑀢𑁂𑀲𑀁 𑀦𑀺𑀕𑁆𑀕𑀳𑀁 𑀅𑀓𑀭𑁄𑀦𑁆𑀢𑁂𑀲𑀼 𑀅𑀜𑁆𑀜𑁂𑀳𑀺 𑀆𑀯𑀭𑀡𑀸𑀤𑀺𑀦𑀺𑀕𑁆𑀕𑀳𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯. 𑀲𑀗𑁆𑀕𑀡𑁆𑀳𑀦𑁆𑀢𑀻𑀢𑀺 ‘‘𑀧𑀭𑀧𑀭𑀺𑀲𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀤𑀸𑀦𑀸𑀤𑀺𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 (𑀤𑀻. 𑀦𑀺. 𑁩.𑁨𑁧𑁦; 𑀅. 𑀦𑀺. 𑁪.𑁩𑁨, 𑁨𑁫𑁬) 𑀉𑀧𑀮𑀸𑀴𑀦𑀯𑀲𑁂𑀦 ¶ 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀲𑁄 𑀪𑀺𑀚𑁆𑀚𑀢𑀼 𑀯𑀸 𑀫𑀸 𑀯𑀸, 𑀲𑀗𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀬𑁄𑀕𑁂 𑀆𑀧𑀢𑁆𑀢𑀺 𑀏𑀯. 𑀪𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀪𑀺𑀦𑁆𑀤𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀕𑀡𑁆𑀳𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀻𑀦𑀯𑀁 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀲𑀦𑀕𑀸𑀭𑀯𑁂𑀦 𑀯𑀸 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀭𑀺𑀲𑀮𑁄𑀮𑀢𑀸𑀬.

‘‘𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀯𑀲𑁆𑀲𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀉𑀧𑀲𑀫𑁆𑀧𑀦𑁆𑀦𑀸𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀲𑀫𑀸𑀧𑀢𑁆𑀢𑀺𑀬𑀸 𑀲𑀭𑀡𑀕𑀫𑀦𑀸𑀤𑀺𑀲𑀸𑀫𑀡𑁂𑀭𑀪𑀸𑀯𑀲𑁆𑀲𑀸𑀧𑀺 𑀯𑀺𑀦𑀲𑁆𑀲𑀦𑀢𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑀗𑁆𑀖𑀮𑀸𑀪𑀫𑁆𑀧𑀺 𑀢𑁂 𑀦 𑀮𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀺𑀓𑀸𑀬 𑀧𑀼𑀦 𑀲𑀭𑀡𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀲𑀭𑀡𑀕𑁆𑀕𑀳𑀡𑁂𑀦 𑀲𑀳 𑀢𑀤𑀳𑁂𑀯𑀲𑁆𑀲 𑀯𑀲𑁆𑀲𑀽𑀧𑀕𑀫𑀦𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀕𑁆𑀕𑀳𑀡𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑁂𑀢𑀁, 𑀢𑀢𑁄 𑀧𑀼𑀭𑁂𑀧𑀺, 𑀧𑀘𑁆𑀙𑀸𑀧𑀺 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀘𑀻𑀯𑀭𑀫𑀸𑀲𑁂𑀲𑀼 𑀲𑀗𑁆𑀖𑁂 𑀉𑀧𑁆𑀧𑀦𑁆𑀦𑀁 𑀓𑀸𑀮𑀘𑀻𑀯𑀭𑀜𑁆𑀘 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀅𑀯𑀺𑀧𑀦𑁆𑀦𑀲𑀻𑀮𑁄 𑀲𑀸𑀫𑀡𑁂𑀭𑁄 𑀮𑀪𑀢𑀺 𑀏𑀯. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀕𑀳𑀺𑀢𑀸𑀦𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀫𑀦𑀜𑁆𑀘 𑀙𑀺𑀦𑁆𑀦𑀯𑀲𑁆𑀲𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀓𑀸𑀮𑀘𑀻𑀯𑀭𑁂 𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 ‘‘𑀅𑀧𑀮𑁄𑀓𑁂𑀢𑁆𑀯𑀸 𑀮𑀸𑀪𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑁄 ¶ 𑀧𑀦 𑀬𑀤𑀺 𑀲𑁂𑀦𑀸𑀲𑀦𑀲𑀸𑀫𑀺𑀓𑀸 𑀤𑀸𑀬𑀓𑀸 𑀲𑁂𑀦𑀸𑀲𑀦𑀕𑀼𑀢𑁆𑀢𑀢𑁆𑀣𑀸𑀬 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀲𑁆𑀲𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀦𑀧𑀮𑁄𑀓𑁂𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑁄𑀯. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀘𑁆𑀙𑀢𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀧𑀼𑀦 𑀯𑀲𑁆𑀲𑀁 𑀉𑀧𑀕𑀢𑀢𑁆𑀢𑀸 𑀮𑀘𑁆𑀙𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁦𑁮) 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑁂 𑀤𑀸𑀬𑀓𑀸𑀦𑀁 𑀇𑀫𑀁 𑀅𑀥𑀺𑀧𑁆𑀧𑀸𑀬𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀜𑁆𑀘𑁂, 𑀲𑀼𑀦𑁆𑀤𑀭𑀁. 𑀲𑀗𑁆𑀖𑀺𑀓𑀁, 𑀓𑀸𑀮𑀘𑀻𑀯𑀭𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀜𑁆𑀘𑁂, 𑀦 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦 𑀅𑀚𑀸𑀦𑀺𑀢𑁆𑀯𑀸𑀢𑀺 ‘‘𑀲𑀼𑀭𑀸’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀧𑀺𑀯𑀢𑁄 𑀧𑀸𑀡𑀸𑀢𑀺𑀧𑀸𑀢𑀯𑁂𑀭𑀫𑀡𑀺𑀆𑀤𑀺𑀲𑀩𑁆𑀩𑀲𑀻𑀮𑀪𑁂𑀤𑀁, 𑀲𑀭𑀡𑀪𑁂𑀤𑀜𑁆𑀘 𑀦 𑀆𑀧𑀚𑁆𑀚𑀢𑀺, 𑀅𑀓𑀼𑀲𑀮𑀁 𑀧𑀦 𑀲𑀼𑀭𑀸𑀧𑀸𑀦𑀯𑁂𑀭𑀫𑀡𑀺𑀲𑀻𑀮𑀪𑁂𑀤𑁄 𑀘 𑀳𑁄𑀢𑀺 𑀫𑀸𑀮𑀸𑀤𑀺𑀥𑀸𑀭𑀡𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀸𑀦𑀻𑀢𑀺 𑀯𑀺𑀓𑀸𑀮𑀪𑁄𑀚𑀦𑀯𑁂𑀭𑀫𑀡𑀺𑀆𑀤𑀻𑀦𑀺. 𑀢𑀸𑀦𑀺𑀧𑀺 𑀳𑀺 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀢𑀁 𑀢𑀁 𑀪𑀺𑀚𑁆𑀚𑀢𑀺 𑀏𑀯, 𑀇𑀢𑀭𑀻𑀢𑀭𑁂𑀲𑀁 𑀧𑀦 𑀅𑀪𑀺𑀚𑁆𑀚𑀫𑀸𑀦𑁂𑀦 𑀦𑀸𑀲𑀦𑀗𑁆𑀕𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑁂𑀦𑁂𑀯 ‘‘𑀢𑁂𑀲𑀼 𑀪𑀺𑀦𑁆𑀦𑁂𑀲𑀽’’𑀢𑀺 𑀪𑁂𑀤𑀯𑀘𑀦𑀁 𑀯𑀼𑀢𑁆𑀢𑀁.

𑀅𑀘𑁆𑀘𑀬𑀁 ¶ 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀫𑀚𑁆𑀛𑁂 𑀤𑁂𑀲𑀸𑀧𑁂𑀢𑁆𑀯𑀸 𑀲𑀭𑀡𑀲𑀻𑀮𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀧𑀸𑀭𑀸𑀚𑀺𑀓𑀢𑁆𑀢𑀸 𑀢𑁂𑀲𑀁. 𑀢𑁂𑀦𑀸𑀳 ‘‘𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺. 𑀅𑀬𑀫𑁂𑀯 𑀳𑀺 𑀦𑀸𑀲𑀦𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀮𑀺𑀗𑁆𑀕𑀦𑀸𑀲𑀦𑀸𑀓𑀸𑀭𑀡𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀅𑀯𑀡𑁆𑀡𑀪𑀸𑀲𑀦𑀸𑀤𑀻𑀦𑀁 𑀲𑀳 𑀧𑀢𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀦𑀦𑀼 𑀘 𑀓𑀡𑁆𑀝𑀓𑀲𑀸𑀫𑀡𑁂𑀭𑁄𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀏𑀯, 𑀢𑀲𑁆𑀲 𑀘 𑀳𑁂𑀝𑁆𑀞𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀯 𑀯𑀼𑀢𑁆𑀢𑀸. 𑀇𑀥 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀮𑀺𑀗𑁆𑀕𑀦𑀸𑀲𑀦𑀸 𑀯𑀼𑀘𑁆𑀘𑀢𑀺, 𑀓𑁄 𑀇𑀫𑁂𑀲𑀁 𑀪𑁂𑀤𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀓𑁄’’𑀢𑀺. 𑀏𑀢𑁆𑀣 𑀘𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑁄 𑀳𑀺 ‘‘𑀅𑀢𑁆𑀢𑀸 𑀇𑀲𑁆𑀲𑀭𑁄 𑀯𑀸 𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺𑀆𑀤𑀺𑀦𑀸 𑀯𑀸 ‘‘𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀸 𑀢𑀺𑀢𑁆𑀣𑀺𑀬𑀧𑀭𑀺𑀓𑀧𑁆𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀢𑀲𑁆𑀲 𑀲𑀸 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑀁 𑀳𑁄𑀢𑀺. 𑀲𑁄 𑀘 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄. 𑀬𑁄 𑀧𑀦 𑀈𑀤𑀺𑀲𑀁 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀲𑀦𑀺𑀓𑁄𑀯 𑀳𑀼𑀢𑁆𑀯𑀸 𑀓𑁂𑀯𑀮𑀁 𑀩𑀼𑀤𑁆𑀥𑀯𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀻𑀢𑀢𑁄 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀑𑀯𑀤𑀺𑀬𑀫𑀸𑀦𑁄𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑁄𑀳𑀭𑀢𑀺, 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀲𑁄 𑀧𑀦 𑀓𑀡𑁆𑀝𑀓𑀦𑀸𑀲𑀦𑀸𑀬 𑀏𑀯 𑀦𑀸𑀲𑁂𑀢𑀩𑁆𑀩𑁄𑀢𑀺.

𑀅𑀦𑀸𑀧𑀼𑀘𑁆𑀙𑀸𑀯𑀭𑀡𑀯𑀢𑁆𑀣𑀼𑀆𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁦𑁯. 𑀧𑀡𑁆𑀟𑀓𑀯𑀢𑁆𑀣𑀼𑀲𑁆𑀫𑀺𑀁 ¶ 𑀆𑀲𑀺𑀢𑁆𑀢𑀉𑀲𑀽𑀬𑀧𑀓𑁆𑀔𑀧𑀡𑁆𑀟𑀓𑀸 𑀢𑀬𑁄𑀧𑀺 𑀧𑀼𑀭𑀺𑀲𑀪𑀸𑀯𑀮𑀺𑀗𑁆𑀕𑀸𑀤𑀺𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂 𑀘 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀩𑀮𑀯𑀢𑀸𑀬 𑀦𑀧𑀼𑀁𑀲𑀓𑀧𑀡𑁆𑀟𑀓𑀲𑀤𑀺𑀲𑀢𑁆𑀢𑀸 ‘‘𑀧𑀡𑁆𑀟𑀓𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀼 𑀆𑀲𑀺𑀢𑁆𑀢𑀉𑀲𑀽𑀬𑀧𑀡𑁆𑀟𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀻𑀳𑀺 𑀯𑀻𑀢𑀺𑀓𑁆𑀓𑀫𑀢𑁄 𑀦𑀺𑀯𑀸𑀭𑁂𑀢𑀼𑀫𑁆𑀧𑀺 𑀲𑀓𑁆𑀓𑀸, 𑀢𑁂𑀦 𑀢𑁂 𑀧𑀩𑁆𑀩𑀸𑀚𑁂𑀢𑀩𑁆𑀩𑀸 𑀯𑀼𑀢𑁆𑀢𑀸. 𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀧𑀦 𑀓𑀸𑀴𑀧𑀓𑁆𑀔𑁂𑀲𑀼 𑀉𑀫𑁆𑀫𑀸𑀤𑁄 𑀯𑀺𑀬 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀅𑀯𑀢𑁆𑀣𑀭𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀧𑀢𑁆𑀯𑀸 𑀏𑀯 𑀘 𑀦𑀺𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀲𑁄 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄. 𑀢𑀤𑁂𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀧𑀭𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀲𑀺𑀢𑁆𑀢𑀲𑁆𑀲𑀸𑀢𑀺 𑀫𑀼𑀔𑁂 𑀆𑀲𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑁄𑀧𑀺 𑀅𑀲𑀼𑀘𑀺𑀫𑀼𑀘𑁆𑀘𑀦𑁂𑀦 ¶ 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺. 𑀉𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬𑀸𑀢𑀺 𑀉𑀲𑀽𑀬𑀸𑀬 𑀯𑀲𑁂𑀦 𑀅𑀢𑁆𑀢𑀦𑁄 𑀲𑁂𑀯𑁂𑀢𑀼𑀓𑀸𑀫𑀢𑀸𑀭𑀸𑀕𑁂 𑀉𑀧𑁆𑀧𑀦𑁆𑀦𑁂 𑀅𑀲𑀼𑀘𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺.

‘‘𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀻𑀚𑁂𑀲𑀼 𑀞𑀺𑀢𑁂𑀲𑀼 𑀦𑀺𑀫𑀺𑀢𑁆𑀢𑀫𑀢𑁆𑀢𑁂 𑀅𑀧𑀦𑀻𑀢𑁂 𑀧𑀡𑁆𑀟𑀓𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀼𑀦𑁄𑀧𑀺 𑀅𑀦𑀸𑀩𑀸𑀥𑀧𑀘𑁆𑀘𑀬𑀸 𑀢𑀤𑀧𑀦𑀬𑀦𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯, 𑀦 𑀧𑀦 𑀧𑀡𑁆𑀟𑀓𑀢𑁆𑀢𑀁, 𑀩𑀻𑀚𑁂𑀲𑀼 𑀧𑀦 𑀅𑀧𑀦𑀻𑀢𑁂𑀲𑀼 𑀅𑀗𑁆𑀕𑀚𑀸𑀢𑀫𑁆𑀧𑀺 𑀭𑀸𑀕𑁂𑀦 𑀓𑀫𑁆𑀫𑀦𑀺𑀬𑀁 𑀦 𑀳𑁄𑀢𑀺, 𑀧𑀼𑀫𑀪𑀸𑀯𑁄 𑀯𑀺𑀕𑀘𑁆𑀙𑀢𑀺, 𑀫𑀲𑁆𑀲𑀼𑀆𑀤𑀺𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀉𑀧𑀲𑀫𑁆𑀧𑀤𑀸𑀧𑀺 𑀯𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀧𑀭𑀺𑀴𑀸𑀳𑁄𑀧𑀺 𑀤𑀼𑀦𑁆𑀦𑀺𑀯𑀸𑀭𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺 𑀦𑀧𑀼𑀁𑀲𑀓𑀧𑀡𑁆𑀟𑀓𑀲𑁆𑀲 𑀯𑀺𑀬. 𑀢𑀲𑁆𑀫𑀸 𑀈𑀤𑀺𑀲𑁄 𑀉𑀧𑀲𑀫𑁆𑀧𑀦𑁆𑀦𑁄𑀧𑀺 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀩𑀻𑀚𑀼𑀤𑁆𑀥𑀭𑀡𑁂 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀢𑁆𑀢𑀦𑁆𑀢𑀺? 𑀏𑀢𑁆𑀣 𑀢𑀸𑀯 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀧𑀜𑁆𑀜𑀢𑁆𑀢𑀫𑁂𑀯𑁂𑀢𑀁 𑀪𑀕𑀯𑀢𑀸 ‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀩𑀻𑀚𑀼𑀤𑁆𑀥𑀭𑀡𑀓𑁆𑀔𑀡𑁂 𑀧𑀡𑁆𑀟𑀓𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑁂 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑁄 𑀉𑀤𑁆𑀥𑀝𑀩𑀻𑀚𑁄 𑀪𑀺𑀓𑁆𑀔𑀼 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀼𑀢𑁆𑀢𑀦𑀬𑁂𑀦 𑀧𑀡𑁆𑀟𑀓𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀪𑀸𑀯𑀓𑁄 𑀳𑁄𑀢𑀺, 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼, 𑀢𑀢𑁄 𑀏𑀯 𑀘𑀲𑁆𑀲 𑀉𑀧𑀲𑀫𑁆𑀧𑀤𑀸 𑀯𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀏𑀲 𑀧𑀡𑁆𑀟𑀓𑀢𑁆𑀢𑀼𑀧𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀺𑀬𑀸 𑀦𑀧𑀼𑀁𑀲𑀓𑀧𑀡𑁆𑀟𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 ‘𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀅𑀪𑀩𑁆𑀩𑁄𑀢𑀺 𑀯𑀼𑀢𑁆𑀢𑁄, 𑀦 𑀢𑀢𑁄 𑀧𑀼𑀩𑁆𑀩𑁂. 𑀅𑀬𑀜𑁆𑀘 𑀓𑀺𑀜𑁆𑀘𑀸𑀧𑀺 𑀲𑀳𑁂𑀢𑀼𑀓𑁄, 𑀪𑀸𑀯𑀓𑁆𑀔𑀬𑁂𑀦 𑀧𑀦𑀲𑁆𑀲 𑀅𑀳𑁂𑀢𑀼𑀓𑀲𑀤𑀺𑀲𑀢𑀸𑀬 𑀫𑀕𑁆𑀕𑁄𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀉𑀧𑀓𑁆𑀓𑀫𑁂𑀦 𑀧𑀡𑁆𑀟𑀓𑀪𑀸𑀯𑀫𑀸𑀧𑀦𑁆𑀦𑀁 𑀲𑀦𑁆𑀥𑀸𑀬 ‘𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀦 𑀧𑀘𑁆𑀙𑀸 𑀉𑀧𑀓𑁆𑀓𑀫𑁂𑀦 𑀉𑀧𑀲𑀫𑁆𑀧𑀤𑀸𑀧𑀺 𑀦 𑀯𑀺𑀕𑀘𑁆𑀙𑀢𑀻’’𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀬𑀤𑀕𑁆𑀕𑁂𑀦 𑀳𑀺 𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀉𑀧𑀓𑁆𑀓𑀫𑁂𑀦 𑀅𑀪𑀩𑁆𑀩𑁄 𑀳𑁄𑀢𑀺, 𑀢𑀤𑀕𑁆𑀕𑁂𑀦 𑀧𑀘𑁆𑀙𑀸𑀧𑀺 𑀳𑁄𑀢𑀻𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀇𑀢𑁆𑀣𑀢𑁆𑀢𑀸𑀤𑀺 ¶ 𑀪𑀸𑀯𑁄 𑀦𑀢𑁆𑀣𑀺 𑀏𑀢𑀲𑁆𑀲𑀸𑀢𑀺 𑀅𑀪𑀸𑀯𑀓𑁄. 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸𑀕𑀳𑀡𑁂𑀦𑁂𑀯 𑀉𑀧𑀲𑀫𑁆𑀧𑀤𑀸𑀧𑀺 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀬𑀲𑁆𑀲 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸’’𑀢𑀺𑀆𑀤𑀺. 𑀢𑀲𑁆𑀫𑀺𑀁𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀧𑀦 𑀅𑀧𑀡𑁆𑀟𑀓𑀧𑀓𑁆𑀔𑁂𑀧𑀺 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀫𑁂𑀯 𑀮𑀪𑀢𑀺, 𑀉𑀧𑀲𑀫𑁆𑀧𑀤𑀸 𑀧𑀦 𑀢𑀤𑀸𑀧𑀺 𑀦 𑀯𑀝𑁆𑀝𑀢𑀺, 𑀧𑀡𑁆𑀟𑀓𑀧𑀓𑁆𑀔𑁂 𑀧𑀦 𑀆𑀕𑀢𑁂 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀡𑁆𑀟𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁦. 𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀢𑁆𑀣𑀼𑀫𑁆𑀳𑀺 ¶ 𑀓𑁄𑀮𑀜𑁆𑀜𑀸𑀢𑀺 𑀓𑀼𑀮𑁂 𑀚𑀸𑀢𑀸, 𑀢𑀢𑁆𑀣 𑀯𑀸 𑀯𑀺𑀤𑀺𑀢𑀸 𑀜𑀸𑀢𑀸 𑀧𑀲𑀺𑀤𑁆𑀥𑀸, 𑀢𑀁 𑀯𑀸 𑀚𑀸𑀦𑀦𑁆𑀢𑀺 𑀓𑁄𑀮𑀜𑁆𑀜𑀸𑀢𑀺 𑀜𑀸𑀢𑀓𑀸𑀦𑀁 𑀦𑀸𑀫𑀁. 𑀣𑁂𑀬𑁆𑀬𑀸𑀬 𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑀫𑁆𑀧𑀺 𑀇𑀥 𑀲𑀁𑀯𑀸𑀲𑁄 𑀏𑀯𑀸𑀢𑀺 𑀆𑀳 ‘‘𑀢𑀬𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀸’’𑀢𑀺. 𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁, 𑀲𑀸𑀫𑀡𑁂𑀭𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀦 𑀲𑀸𑀤𑀺𑀬𑀢𑀺.

𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀦𑁆𑀢𑀺 𑀅𑀢𑁆𑀢𑀦𑀸 𑀫𑀼𑀲𑀸𑀯𑀸𑀤𑁂𑀦 𑀤𑀲𑁆𑀲𑀺𑀢𑀯𑀲𑁆𑀲𑀓𑁆𑀓𑀫𑁂𑀦 𑀪𑀺𑀓𑁆𑀔𑀽𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀤𑀳𑀭𑀲𑀸𑀫𑀡𑁂𑀭𑁄 𑀧𑀦 𑀯𑀼𑀟𑁆𑀠𑀲𑀸𑀫𑀡𑁂𑀭𑀸𑀦𑀁, 𑀤𑀳𑀭𑀪𑀺𑀓𑁆𑀔𑀼 𑀘 𑀯𑀼𑀟𑁆𑀠𑀸𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑀢𑁆𑀣𑁂.

‘‘𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀻’’𑀢𑀺 𑀇𑀤𑀁 𑀲𑀁𑀯𑀸𑀲𑀢𑁆𑀣𑁂𑀦𑀓𑁂 𑀯𑀼𑀢𑁆𑀢𑀧𑀸𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀬𑀫𑁂𑀯 𑀧𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑀯𑀲𑁆𑀲𑀸𑀦𑀺 𑀕𑀡𑁂𑀦𑁆𑀢𑁄𑀧𑀺 𑀉𑀪𑀬𑀢𑁆𑀣𑁂𑀦𑀓𑁄 𑀏𑀯. 𑀦 𑀓𑁂𑀯𑀮𑀜𑁆𑀘 𑀧𑀼𑀭𑀺𑀲𑁄𑀯, 𑀇𑀢𑁆𑀣𑀻𑀧𑀺 𑀪𑀺𑀓𑁆𑀔𑀼𑀦𑀻𑀲𑀼 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀺𑀓𑀸𑀯. 𑀆𑀤𑀺𑀓𑀫𑁆𑀫𑀺𑀓𑀸𑀧𑀺 𑀘𑁂𑀢𑁆𑀣 𑀦 𑀫𑀼𑀘𑁆𑀘𑀦𑁆𑀢𑀺, 𑀉𑀧𑀲𑀫𑁆𑀧𑀦𑁆𑀦𑁂𑀲𑀼 𑀏𑀯 𑀧𑀜𑁆𑀜𑀢𑁆𑀢𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀘 𑀆𑀤𑀺𑀓𑀫𑁆𑀫𑀺𑀓𑀸 𑀯𑀼𑀢𑁆𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑁄𑀧𑀺 𑀦 𑀫𑀼𑀢𑁆𑀢𑁄.

𑀭𑀸𑀚…𑀧𑁂… 𑀪𑀬𑁂𑀦𑀸𑀢𑀺 𑀏𑀢𑁆𑀣 𑀪𑀬-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 ‘‘𑀇𑀫𑀺𑀦𑀸 𑀮𑀺𑀗𑁆𑀕𑁂𑀦 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑁆𑀯𑀸 𑀢𑁂𑀳𑀺 𑀲𑀁𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀸𑀪𑀸𑀯𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑁂𑀦 𑀳𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀺𑀗𑁆𑀕𑁂 𑀕𑀳𑀺𑀢𑀫𑀢𑁆𑀢𑁂 𑀧𑀘𑁆𑀙𑀸 𑀪𑀺𑀓𑁆𑀔𑀽𑀳𑀺 𑀲𑀳 𑀲𑀁𑀯𑀲𑀢𑀼 𑀯𑀸 𑀫𑀸 𑀯𑀸, 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺. 𑀧𑀘𑁆𑀙𑀸 𑀲𑀁𑀯𑀲𑀦𑁆𑀢𑁄𑀧𑀺 𑀅𑀪𑀩𑁆𑀩𑁄 𑀳𑀼𑀢𑁆𑀯𑀸 𑀲𑀁𑀯𑀲𑀢𑀺. 𑀢𑀲𑁆𑀫𑀸 𑀉𑀪𑀬𑀢𑁆𑀣𑁂𑀦𑀓𑁄𑀧𑀺 𑀮𑀺𑀗𑁆𑀕𑀢𑁆𑀣𑁂𑀦𑀓𑁂 𑀏𑀯 𑀧𑀯𑀺𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀧𑀦 𑀭𑀸𑀚𑀸𑀤𑀺𑀪𑀬𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀧𑀘𑁆𑀙𑀸 ‘‘𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀧𑀺 𑀦 𑀳𑁄𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀮𑀺𑀗𑁆𑀕𑀢𑁆𑀢𑀸. 𑀲𑀘𑁂 𑀧𑀦 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 ¶ 𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑀯𑀲𑁆𑀲𑀕𑀡𑀦𑀸𑀤𑀺𑀁 𑀓𑀭𑁄𑀢𑀺, 𑀢𑀤𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄, 𑀉𑀪𑀬𑀢𑁆𑀣𑁂𑀦𑀓𑁄 𑀯𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦 𑀧𑀭𑀢𑁄 𑀲𑀳 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 ‘‘𑀅𑀬𑀫𑁆𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀪𑀺𑀓𑁆𑀔𑀽𑀳𑀺 𑀲𑀗𑁆𑀕𑀫𑁆𑀫 𑀲𑀁𑀯𑀸𑀲𑀸𑀥𑀺𑀯𑀸𑀲𑀦𑀯𑀲𑁂𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺 𑀬𑀸𑀯𑀸’’𑀢𑀺. 𑀢𑀲𑁆𑀲 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀘𑁄𑀭𑀸𑀤𑀺𑀪𑀬𑀁 ¶ 𑀯𑀺𑀦𑀸𑀧𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀯𑀦𑁆𑀤𑀦𑀸𑀤𑀺𑀁 𑀅𑀲𑀸𑀤𑀺𑀬𑀦𑁆𑀢𑁄𑀧𑀺 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀧𑀩𑁆𑀩𑀚𑀺𑀢𑀮𑀺𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀲𑀸𑀫𑀬𑀺𑀓𑀸𑀦𑀁 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀪𑀢𑁆𑀢𑀸𑀦𑀺, 𑀇𑀤𑀜𑁆𑀘 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀦𑀺𑀬𑀫𑀺𑀢𑀪𑀢𑁆𑀢𑀕𑀳𑀡𑁂 𑀲𑀁𑀯𑀸𑀲𑁄𑀧𑀺 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀪𑀢𑁆𑀢𑀁 𑀯𑀼𑀢𑁆𑀢𑀁. 𑀲𑀁𑀯𑀸𑀲𑀁 𑀧𑀦 𑀅𑀲𑀸𑀤𑀺𑀬𑀺𑀢𑁆𑀯𑀸 𑀅𑀪𑀺𑀓𑁆𑀔𑀼𑀓𑀯𑀺𑀳𑀸𑀭𑀸𑀤𑀻𑀲𑀼 𑀯𑀺𑀳𑀸𑀭𑀪𑀢𑁆𑀢𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀏𑀯. 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦𑁂𑀦𑀸𑀢𑀺 𑀓𑀲𑀺𑀆𑀤𑀺𑀓𑀫𑁆𑀫𑀓𑀭𑀡𑁂𑀦. 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬𑀸𑀢𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑀯𑁂𑀲𑁂𑀦 𑀲𑀭𑀻𑀭𑁂𑀦 𑀥𑀸𑀭𑁂𑀢𑁆𑀯𑀸.

‘‘𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, ‘‘𑀣𑁂𑀬𑁆𑀬𑀲𑀁𑀯𑀸𑀲𑀓𑁄’’𑀢𑀺 𑀧𑀦 𑀦𑀸𑀫𑀁 𑀅𑀚𑀸𑀦𑀦𑁆𑀢𑁄𑀧𑀺 ‘‘𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀏𑀯𑀁 𑀓𑀭𑁄𑀦𑁆𑀢𑁄 𑀲𑀫𑀡𑁄 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀸 ‘‘𑀬𑀤𑀺 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀙𑀟𑁆𑀟𑁂𑀲𑁆𑀲𑀦𑁆𑀢𑀺 𑀫’’𑀦𑁆𑀢𑀺 𑀯𑀸 ‘‘𑀬𑁂𑀦 𑀓𑁂𑀦𑀘𑀺 𑀧𑀩𑁆𑀩𑀚𑁆𑀚𑀸 𑀫𑁂 𑀦 𑀭𑀼𑀳𑀢𑀻’’𑀢𑀺 𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀬𑁄 𑀧𑀦 𑀧𑀞𑀫𑀁 ‘‘𑀧𑀩𑁆𑀩𑀚𑁆𑀚𑀸 𑀏𑀯𑀁 𑀫𑁂 𑀕𑀳𑀺𑀢𑀸’’𑀢𑀺𑀲𑀜𑁆𑀜𑀻 𑀓𑁂𑀯𑀮𑀁 𑀅𑀦𑁆𑀢𑀭𑀸 𑀅𑀢𑁆𑀢𑀦𑁄 𑀲𑁂𑀢𑀯𑀢𑁆𑀣𑀦𑀺𑀯𑀸𑀲𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀓𑀸𑀲𑁂𑀢𑀼𑀁 𑀮𑀚𑁆𑀚𑀦𑁆𑀢𑁄 𑀦 𑀓𑀣𑁂𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯𑀸𑀢𑀺 𑀏𑀢𑁆𑀣 𑀅𑀯𑀥𑀸𑀭𑀡𑁂𑀦 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀣𑁂𑀬𑁆𑀬𑀲𑀁𑀯𑀸𑀲𑀓𑀮𑀓𑁆𑀔𑀡𑀁 𑀜𑀢𑁆𑀯𑀸 𑀯𑀜𑁆𑀘𑀦𑀸𑀬𑀧𑀺 𑀦𑀸𑀭𑁄𑀘𑁂𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀲𑁄 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀮𑀺𑀗𑁆𑀕𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺, 𑀮𑀤𑁆𑀥𑀽𑀧𑀲𑀫𑁆𑀧𑀤𑀢𑁆𑀢𑀸 𑀢𑀤𑀦𑀼𑀕𑀼𑀡𑀲𑁆𑀲𑁂𑀯 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄𑀧𑀺 𑀦 𑀳𑁄𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀧𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺, 𑀲𑀁𑀯𑀸𑀲𑀸𑀭𑀳𑀲𑁆𑀲 𑀮𑀺𑀗𑁆𑀕𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀁𑀯𑀸𑀲𑀲𑀸𑀤𑀺𑀬𑀦𑀫𑀢𑁆𑀢𑁂𑀦 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀳𑁄𑀢𑀺.

𑀲𑀮𑀺𑀗𑁆𑀕𑁂 𑀞𑀺𑀢𑁄𑀢𑀺 𑀲𑀮𑀺𑀗𑁆𑀕𑀪𑀸𑀯𑁂 𑀞𑀺𑀢𑁄. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺, 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦 𑀳𑁄𑀢𑀻𑀢𑀺. 𑀬𑀁 𑀧𑀦 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀦 𑀲𑀁𑀯𑀸𑀲𑀢𑁆𑀣𑁂𑀦𑀓𑁄’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀢𑀭𑀣𑀸 ¶ ¶ 𑀲𑀸𑀫𑀡𑁂𑀭𑀲𑁆𑀲𑀧𑀺 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀻𑀲𑀼 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑀁𑀯𑀸𑀲𑁄 𑀏𑀯 𑀲𑀸𑀤𑀺𑀢𑁄𑀢𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑀢𑀸 𑀦 𑀲𑀺𑀬𑀸 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀪𑀺𑀓𑁆𑀔𑀼, 𑀏𑀯𑀁 𑀲𑀸𑀫𑀡𑁂𑀭𑁄𑀧𑀺 𑀧𑀸𑀭𑀸𑀚𑀺𑀓𑀁 𑀲𑀫𑀸𑀧𑀦𑁆𑀦𑁄 𑀲𑀸𑀫𑀡𑁂𑀭𑀧𑀝𑀺𑀜𑁆𑀜𑀸𑀬 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄𑀪𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀓𑀸𑀲𑀸𑀯𑀥𑀸𑀭𑀡𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸.

𑀬𑁄 𑀓𑁄𑀘𑀺 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 𑀲𑀸𑀫𑀡𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀳𑀸𑀧𑁂𑀴𑀸𑀤𑀻𑀲𑀽𑀢𑀺 𑀯𑀺𑀮𑀻𑀯𑀸𑀤𑀺𑀫𑀬𑁂𑀲𑀼 𑀖𑀭𑀤𑁆𑀯𑀸𑀭𑁂𑀲𑀼 𑀞𑀧𑀺𑀢𑀪𑀢𑁆𑀢𑀪𑀸𑀚𑀦𑀯𑀺𑀲𑁂𑀲𑁂𑀲𑀼, 𑀏𑀢𑁂𑀦 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑁆𑀲𑀕𑀡𑀦𑀸𑀤𑀻𑀦𑀁 𑀅𑀓𑀭𑀡𑀁 𑀤𑀲𑁆𑀲𑁂𑀢𑀺.

𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸𑀯𑀡𑁆𑀡𑀦𑀸

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀤𑀺𑀓𑀣𑀸𑀲𑀼 𑀢𑁂𑀲𑀁 𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂𑀢𑀺 𑀯𑀻𑀫𑀁𑀲𑀸𑀤𑀺𑀅𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑁂 𑀓𑀸𑀬𑁂𑀦 𑀥𑀸𑀭𑀺𑀢𑀫𑀢𑁆𑀢𑁂. 𑀲𑀬𑀫𑁂𑀯𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀲𑀗𑁆𑀖𑀸𑀭𑀸𑀫𑁂𑀧𑀺 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑀺. 𑀆𑀚𑀻𑀯𑀓𑁄 𑀪𑀯𑀺𑀲𑁆𑀲𑀸𑀫𑀺…𑀧𑁂… 𑀕𑀘𑁆𑀙𑀢𑀻𑀢𑀺 𑀆𑀚𑀻𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀢𑁂𑀲𑀁 𑀧𑀩𑁆𑀩𑀚𑀦𑀯𑀺𑀥𑀺𑀦𑀸 ‘‘𑀆𑀚𑀻𑀯𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑀺. 𑀢𑀲𑁆𑀲 𑀳𑀺 𑀢𑀺𑀢𑁆𑀣𑀺𑀬𑀪𑀸𑀯𑀽𑀧𑀕𑀫𑀦𑀁 𑀧𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 ‘‘𑀕𑀦𑁆𑀢𑁆𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀧𑀸𑀴𑀺𑀬𑀸 𑀅𑀯𑀼𑀢𑁆𑀢𑁂𑀧𑀺 𑀫𑁂𑀣𑀼𑀦𑀸𑀤𑀻𑀲𑀼 𑀯𑀼𑀢𑁆𑀢𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀸𑀦𑀼𑀮𑁄𑀫𑀢𑁄 𑀯𑀼𑀢𑁆𑀢𑀁. 𑀏𑀢𑁂𑀦 𑀘 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀢𑀢𑁄 𑀧𑀼𑀭𑀺𑀫𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀯𑀢𑁆𑀢𑀩𑁆𑀩𑀫𑁂𑀯, 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑀡𑁂 𑀦𑀺𑀯𑀢𑁆𑀢𑀦𑁆𑀢𑁄𑀧𑀺 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀗𑁆𑀖𑀪𑁂𑀤𑁂𑀧𑀺 𑀮𑁄𑀳𑀺𑀢𑀼𑀧𑁆𑀧𑀸𑀤𑁂𑀧𑀺 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑀧𑀬𑁄𑀕𑀸𑀤𑀻𑀲𑀼 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀳𑀺 𑀫𑀼𑀘𑁆𑀘𑀦𑀲𑀻𑀫𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀲𑀦𑀯𑀺𑀭𑀼𑀤𑁆𑀥𑀢𑀸𑀬𑁂𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑀸𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸. 𑀧𑀩𑁆𑀩𑀚𑁆𑀚𑀸𑀬𑀧𑀺 𑀅𑀪𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀦𑁂𑀢𑁂, 𑀅𑀜𑁆𑀜𑁂 𑀘 𑀧𑀸𑀭𑀸𑀚𑀺𑀓𑀓𑀡𑁆𑀟𑁂 𑀯𑀺𑀲𑀼𑀁 𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀭𑀸𑀚𑀺𑀓𑀸𑀤𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀇𑀥 𑀅𑀪𑀩𑁆𑀩𑁂𑀲𑀼 𑀏𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀁 ¶ 𑀮𑀤𑁆𑀥𑀺𑀦𑁆𑀢𑀺 𑀢𑀺𑀢𑁆𑀣𑀺𑀬𑀯𑁂𑀲𑁂 𑀲𑁂𑀝𑁆𑀞𑀪𑀸𑀯𑀕𑁆𑀕𑀳𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀲𑁆𑀲𑀢𑀸𑀤𑀺𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑁄𑀧𑀺 𑀮𑀺𑀗𑁆𑀕𑁂 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦 𑀳𑁄𑀢𑀺, 𑀢𑀁 𑀮𑀤𑁆𑀥𑀺𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 ‘‘𑀏𑀢𑁂𑀲𑀁 𑀯𑀢𑀘𑀭𑀺𑀬𑀸 𑀲𑀼𑀦𑁆𑀤𑀭𑀸’’𑀢𑀺 𑀮𑀺𑀗𑁆𑀕𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺 𑀏𑀯 ¶ . 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦𑀸𑀢𑀺 𑀪𑀺𑀓𑁆𑀔𑀼𑀪𑀸𑀯𑁂 𑀲𑀸𑀮𑀬𑀢𑀸𑀬 𑀢𑀺𑀢𑁆𑀣𑀺𑀬𑀪𑀸𑀯𑀽𑀧𑀕𑀫𑀦𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦, 𑀏𑀢𑁂𑀦 𑀘 𑀆𑀧𑀤𑀸𑀲𑀼 𑀓𑀼𑀲𑀘𑀻𑀭𑀸𑀤𑀺𑀁 𑀧𑀸𑀭𑀼𑀧𑀦𑁆𑀢𑀲𑁆𑀲𑀸𑀧𑀺 𑀦𑀕𑁆𑀕𑀲𑁆𑀲 𑀯𑀺𑀬 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸 𑀓𑀣𑀺𑀢𑁄𑀢𑀺 𑀏𑀢𑁆𑀣 𑀲𑀗𑁆𑀖𑀪𑁂𑀤𑀓𑁄𑀧𑀺 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸𑀯 𑀓𑀣𑀺𑀢𑁄, 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀭𑀘𑁆𑀙𑀸𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁧. 𑀉𑀤𑀓𑀲𑀜𑁆𑀘𑀸𑀭𑀺𑀓𑀁 𑀫𑀡𑁆𑀟𑀽𑀓𑀪𑀓𑁆𑀔𑀁 𑀦𑀸𑀕𑀲𑀭𑀻𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀺𑀲𑁆𑀲𑀭𑀪𑀬𑁂𑀦𑀸𑀢𑀺 𑀦𑀸𑀕𑀲𑁆𑀲 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑁄 𑀯𑀺𑀭𑀯𑀦𑀪𑀬𑁂𑀦. 𑀓𑀧𑀺𑀫𑀺𑀤𑁆𑀥𑀸𑀤𑀻𑀲𑀼 𑀦𑀸𑀕𑀲𑀭𑀻𑀭𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀼𑀧𑁆𑀧𑀢𑁆𑀢𑀺𑀲𑀻𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑁆𑀲𑀝𑁆𑀞𑁄’’𑀢𑀺𑀆𑀤𑀺.

𑀢𑀺𑀭𑀘𑁆𑀙𑀸𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁧𑁨. 𑀅𑀧𑀯𑀸𑀳𑀦𑀦𑁆𑀢𑀺 𑀲𑁄𑀥𑀦𑀁. 𑀢𑀺𑀭𑀘𑁆𑀙𑀸𑀦𑀸𑀤𑀺𑀅𑀫𑀦𑀼𑀲𑁆𑀲𑀚𑀸𑀢𑀺𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀜𑁆𑀜𑁂𑀯 𑀧𑀼𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀤𑀬𑁄𑀧𑀺 𑀢𑀺𑀓𑁆𑀔𑀯𑀺𑀲𑀤𑀸 𑀳𑁄𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀸 𑀯𑀺𑀬𑀸𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀚𑀦𑀺𑀓𑀸 𑀫𑀸𑀢𑀸’’𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸𑀦𑀜𑁆𑀜𑁂𑀯 𑀓𑀼𑀲𑀮𑀧𑁆𑀧𑀯𑀢𑁆𑀢𑀺 𑀢𑀺𑀓𑁆𑀔𑀯𑀺𑀲𑀤𑀸, 𑀏𑀯𑀁 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀧𑀻𑀢𑀺 𑀆𑀳 ‘‘𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯𑀸’’𑀢𑀺𑀆𑀤𑀺. 𑀆𑀦𑀦𑁆𑀢𑀭𑀺𑀬𑁂𑀦𑀸𑀢𑀺 𑀏𑀢𑁆𑀣 𑀘𑀼𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀚𑀦𑀓𑀢𑁆𑀢𑁂𑀦 𑀦𑀺𑀬𑀼𑀢𑁆𑀢𑀁 𑀆𑀦𑀦𑁆𑀢𑀭𑀺𑀬𑀁, 𑀢𑁂𑀦. 𑀯𑁂𑀲𑀺𑀬𑀸 𑀧𑀼𑀢𑁆𑀢𑁄𑀢𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀓𑀼𑀮𑀺𑀢𑁆𑀣𑀺𑀬𑀸 𑀅𑀢𑀺𑀘𑀸𑀭𑀺𑀦𑀺𑀬𑀸 𑀧𑀼𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀅𑀚𑀸𑀦𑀺𑀢𑁆𑀯𑀸 𑀖𑀸𑀢𑁂𑀦𑁆𑀢𑁄 𑀧𑀺𑀢𑀼𑀖𑀸𑀢𑀓𑁄𑀯 𑀳𑁄𑀢𑀺.

𑁧𑁧𑁪. 𑀅𑀯𑀲𑁂𑀲𑀦𑁆𑀢𑀺 ¶ 𑀅𑀦𑀸𑀕𑀸𑀫𑀺𑀆𑀤𑀺𑀓𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑁂 𑀯𑀼𑀢𑁆𑀢𑀫𑁂𑀯.

𑁧𑁧𑁫. 𑀅𑀬𑀁 𑀲𑀗𑁆𑀖𑀪𑁂𑀤𑀓𑁄𑀢𑀺 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀏𑀯 𑀧𑀸𑀭𑀸𑀚𑀺𑀓𑀁 𑀲𑀫𑀸𑀧𑀦𑁆𑀦𑁄 ¶ 𑀯𑀸 𑀯𑀢𑁆𑀣𑀸𑀤𑀺𑀤𑁄𑀲𑁂𑀦 𑀯𑀺𑀧𑀦𑁆𑀦𑁄𑀧𑀲𑀫𑁆𑀧𑀤𑁄 𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀦𑁆𑀢𑁄𑀧𑀺 𑀅𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺, 𑀲𑀗𑁆𑀖𑁄 𑀧𑀦 𑀪𑀺𑀦𑁆𑀦𑁄𑀯 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸 𑀘𑀲𑁆𑀲 𑀦 𑀯𑀸𑀭𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀤𑀼𑀝𑁆𑀞𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀯𑀥𑀓𑀘𑀺𑀢𑁆𑀢𑁂𑀦𑀸’’𑀢𑀺. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀢𑀣𑀸𑀕𑀢𑀲𑁆𑀲 𑀯𑁂𑀭𑀻𑀳𑀺 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀓𑁂𑀦𑀘𑀺 𑀩𑀮𑀓𑁆𑀓𑀸𑀭𑁂𑀦 𑀘𑀫𑁆𑀫𑀸𑀤𑀺𑀙𑁂𑀤𑀁 𑀓𑀢𑁆𑀯𑀸 𑀩𑀳𑀺 𑀮𑁄𑀳𑀺𑀢𑀁 𑀧𑀕𑁆𑀖𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀆𑀯𑀼𑀥𑀸𑀤𑀺𑀧𑀳𑀸𑀭𑁂𑀦 𑀧𑀦 𑀮𑁄𑀳𑀺𑀢𑀁 𑀞𑀸𑀦𑀢𑁄 𑀘𑀮𑀺𑀢𑁆𑀯𑀸 𑀓𑀼𑀧𑁆𑀧𑀫𑀸𑀦𑀁 𑀏𑀓𑀢𑁆𑀣 𑀲𑀜𑁆𑀘𑀺𑀢𑀁 𑀳𑁄𑀢𑀺, 𑀏𑀢𑁆𑀢𑀓𑁂𑀦 𑀧𑀦 𑀧𑀳𑀸𑀭𑀤𑀸𑀬𑀓𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦𑀸𑀫 𑀳𑁄𑀢𑀺 𑀤𑁂𑀯𑀤𑀢𑁆𑀢𑁄 𑀯𑀺𑀬. 𑀘𑁂𑀢𑀺𑀬𑀁 𑀧𑀦 𑀩𑁄𑀥𑀺𑀁 𑀯𑀸 𑀧𑀝𑀺𑀫𑀸𑀤𑀺𑀁 𑀯𑀸 𑀪𑀺𑀦𑁆𑀤𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀫𑀳𑀸𑀲𑀸𑀯𑀚𑁆𑀚𑀁 𑀳𑁄𑀢𑀺. 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀧𑀦 𑀑𑀚𑁄𑀳𑀭𑀡𑀲𑀸𑀔𑀸 𑀘𑁂𑀯 𑀲𑀥𑀸𑀢𑀼𑀓𑀁 𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀘 𑀙𑀺𑀦𑁆𑀤𑀺𑀢𑀩𑁆𑀩𑀸, 𑀧𑀼𑀜𑁆𑀜𑀫𑁂𑀯𑁂𑀢𑁆𑀣 𑀳𑁄𑀢𑀺.

𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁬. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑁄, 𑀇𑀢𑀭𑁄 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑁄. 𑀏𑀓𑀲𑁆𑀲 𑀳𑀺 𑀪𑀸𑀯𑀤𑁆𑀯𑀬𑀁 𑀲𑀳 𑀦𑀼𑀧𑁆𑀧𑀚𑁆𑀚𑀢𑀺 𑀬𑀫𑀓𑁂 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀁 𑀧𑀦 𑀓𑀫𑁆𑀫𑀲𑀳𑀸𑀬𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀪𑀸𑀯𑀯𑀺𑀭𑀳𑀺𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀓𑀢𑀺𑀢𑁆𑀣𑀺𑀧𑀼𑀭𑀺𑀲𑀸𑀦𑀫𑁆𑀧𑀺 𑀓𑀫𑁆𑀫𑀫𑁂𑀯 𑀩𑁆𑀬𑀜𑁆𑀚𑀦𑀮𑀺𑀗𑁆𑀕𑀸𑀦𑀁 𑀓𑀸𑀭𑀡𑀁, 𑀦 𑀪𑀸𑀯𑁄 𑀢𑀲𑁆𑀲 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀢𑁆𑀢𑀲𑁆𑀲 𑀧𑀝𑁆𑀞𑀸𑀦𑁂 𑀅𑀯𑀼𑀢𑁆𑀢𑀢𑁆𑀢𑀸. 𑀓𑁂𑀯𑀮𑀁 𑀪𑀸𑀯𑀲𑀳𑀺𑀢𑀸𑀦𑀁𑀬𑁂𑀯 𑀩𑁆𑀬𑀜𑁆𑀚𑀦𑀮𑀺𑀗𑁆𑀕𑀸𑀦𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑁬𑁩𑁨) 𑀇𑀦𑁆𑀤𑁆𑀭𑀺𑀬𑀁 𑀩𑁆𑀬𑀜𑁆𑀚𑀦𑀓𑀆𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀅𑀓𑀼𑀲𑀮𑀩𑀮𑁂𑀦 𑀇𑀦𑁆𑀤𑁆𑀭𑀺𑀬𑀁 𑀯𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀘𑁂𑀲𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑀭𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀬𑀤𑀸 𑀧𑀼𑀭𑀺𑀲𑁂 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 ¶ 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑀭𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀢𑁆𑀣 𑀯𑀺𑀘𑀸𑀭𑀡𑀓𑁆𑀓𑀫𑁄𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀏𑀯 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀦𑀫𑁆𑀧𑀺 𑀧𑀸𑀢𑀼𑀪𑀸𑀯𑀧𑁆𑀧𑀓𑀸𑀲𑀓𑁂 𑀓𑀼𑀭𑀼𑀦𑁆𑀤𑀺𑀯𑀘𑀦𑁂 𑀅𑀬𑀼𑀢𑁆𑀢𑀢𑀸𑀧𑀓𑀸𑀲𑀦𑀢𑁆𑀣𑀁 𑀅𑀢𑁆𑀣𑀯𑀺𑀘𑀸𑀭𑀡𑀓𑁆𑀓𑀫𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀜𑁆𑀳𑀺 ‘‘𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀧𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀺𑀢𑀸𑀦𑀻’’𑀢𑀺𑀆𑀤𑀺 (𑀥. 𑀲. 𑀅𑀝𑁆𑀞. 𑁬𑁩𑁨) 𑀯𑀼𑀢𑁆𑀢𑀁. 𑀦𑁂𑀯𑀲𑁆𑀲 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀬𑁄 𑀘 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀪𑀩𑁆𑀩𑁂, 𑀪𑀩𑁆𑀩𑁂 𑀘 𑀧𑀼𑀕𑁆𑀕𑀮𑁂 𑀜𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀺 𑀯𑀸, 𑀤𑀼𑀓𑁆𑀓𑀝𑀁. 𑀅𑀚𑀸𑀦𑀦𑁆𑀢𑀲𑁆𑀲 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁭. 𑀅𑀦𑀼𑀧𑀚𑁆𑀛𑀸𑀬𑀸𑀤𑀺𑀯𑀢𑁆𑀣𑀽𑀲𑀼 ¶ 𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢𑀦𑁆𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀚𑁆𑀛𑀸𑀬𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀇𑀥𑁂𑀯 𑀧𑀜𑁆𑀜𑀸𑀧𑀺𑀬𑀫𑀸𑀦𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀻’’𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑀸𑀪𑀸𑀯𑁂𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀫𑀢𑀲𑁆𑀲 𑀯𑀸 𑀯𑀺𑀩𑁆𑀪𑀫𑀦𑁆𑀢𑀲𑁆𑀲 𑀯𑀸 𑀧𑀼𑀭𑀸𑀡𑀉𑀧𑀚𑁆𑀛𑀸𑀬𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀦𑀸𑀫𑁂𑀦 𑀲𑀩𑁆𑀩𑀢𑁆𑀣 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀁 𑀦 𑀓𑀭𑁂𑀬𑁆𑀬, ‘‘𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀓𑀫𑁆𑀫𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀅𑀦𑀼𑀧𑀚𑁆𑀛𑀸𑀬𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺𑀲𑁆𑀲 ‘‘𑀉𑀧𑀚𑁆𑀛𑀸𑀬𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑀁 𑀅𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀺𑀭𑀳𑀺𑀢𑀁’’𑀇𑀘𑁆𑀘𑁂𑀯 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄. 𑀧𑀸𑀴𑀺𑀬𑀁 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀯𑀁 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑀫𑁂𑀯 𑀉𑀧𑀚𑁆𑀛𑀸𑀬𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀕𑀡𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺 𑀏𑀯 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀅𑀜𑁆𑀜𑀣𑀸 ‘‘𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀤𑁂𑀬𑁆𑀬. 𑀢𑁂𑀦𑀸𑀳 ‘‘𑀲𑀗𑁆𑀖𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀡𑁆𑀟𑀓𑀸𑀤𑀻𑀳𑀺 𑀉𑀧𑀚𑁆𑀛𑀸𑀬𑁂𑀳𑀺 𑀓𑀭𑀺𑀬𑀫𑀸𑀦𑁂𑀲𑀼 𑀓𑀫𑁆𑀫𑁂𑀲𑀼 𑀧𑀡𑁆𑀟𑀓𑀸𑀤𑀺𑀓𑁂 𑀯𑀺𑀦𑀸𑀯 𑀬𑀤𑀺 𑀧𑀜𑁆𑀘𑀯𑀕𑁆𑀕𑀸𑀤𑀺𑀕𑀡𑁄 𑀧𑀽𑀭𑀢𑀺, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺, 𑀇𑀢𑀭𑀣𑀸 𑀓𑀼𑀧𑁆𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀢𑁆𑀢𑀓𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁮. 𑀅𑀧𑀢𑁆𑀢𑀘𑀻𑀯𑀭𑀯𑀢𑁆𑀣𑀽𑀲𑀼𑀧𑀺 ¶ 𑀧𑀢𑁆𑀢𑀘𑀻𑀯𑀭𑀸𑀦𑀁 𑀅𑀪𑀸𑀯𑁂𑀧𑀺 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑀁 𑀅𑀯𑀢𑁆𑀯𑀸 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀲𑀸𑀯𑀦𑀸𑀬 𑀳𑀸𑀧𑀦𑀢𑁄 𑀓𑀫𑁆𑀫𑀓𑁄𑀧𑁄 𑀏𑀯 𑀲𑀺𑀬𑀸. 𑀓𑁂𑀘𑀺 𑀧𑀦 ‘‘𑀧𑀞𑀫𑀁 𑀅𑀦𑀼𑀜𑁆𑀜𑀸𑀢𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀦𑁆𑀦𑀸 𑀯𑀺𑀬 𑀇𑀤𑀸𑀦𑀺𑀧𑀺 ‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’𑀦𑁆𑀢𑀺 𑀅𑀯𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀦𑁆𑀦𑀸𑀧𑀺 𑀲𑀽𑀧𑀲𑀫𑁆𑀧𑀦𑁆𑀦𑀸𑀏𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀧𑀭𑀸𑀫𑀲𑀦𑀁 𑀲𑀸𑀯𑀦𑀸𑀬 𑀳𑀸𑀧𑀦𑀯𑀺𑀧𑀢𑁆𑀢𑀺 𑀏𑀯 𑀳𑁄𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀧𑀤𑀲𑁆𑀲 𑀳𑀸𑀧𑀦𑁂 𑀯𑀺𑀬. 𑀢𑀫𑁆𑀧𑀺 𑀳𑀺 𑀧𑀘𑁆𑀙𑀸 𑀅𑀦𑀼𑀜𑁆𑀜𑀸𑀢𑀁, ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀯𑀸𑀓𑁆𑀬𑁂𑀦 𑀅𑀬𑀸𑀘𑁂𑀢𑁆𑀯𑀸 𑀢𑀫𑁆𑀧𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀯𑀢𑁆𑀯𑀸𑀯 𑀬𑀤𑀺 𑀓𑀫𑁆𑀫𑀯𑀸𑀘𑀁 𑀓𑀭𑁄𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺 ¶ , 𑀦𑁄 𑀘𑁂 𑀯𑀺𑀧𑀦𑁆𑀦𑀁. 𑀲𑀩𑁆𑀩𑀧𑀘𑁆𑀙𑀸 𑀳𑀺 𑀅𑀦𑀼𑀜𑁆𑀜𑀸𑀢𑀓𑀫𑁆𑀫𑀯𑀸𑀘𑀢𑁄 𑀓𑀺𑀜𑁆𑀘𑀺𑀧𑀺 𑀧𑀭𑀺𑀳𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀯𑀦𑀸𑀬 𑀳𑀸𑀧𑀦𑀫𑁂𑀯 𑀳𑁄𑀢𑀺. 𑀅𑀜𑁆𑀜𑁂 𑀯𑀸 𑀪𑀺𑀓𑁆𑀔𑀽 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀮𑀤𑁆𑀥𑀪𑀺𑀓𑁆𑀔𑀢𑁄 𑀅𑀕𑁆𑀕𑀳𑀺𑀢𑀕𑁆𑀕𑀁 𑀧𑀺𑀡𑁆𑀟𑀧𑀸𑀢𑀁. 𑀲𑀸𑀫𑀡𑁂𑀭𑀪𑀸𑀕𑀲𑀫𑀓𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀆𑀫𑀺𑀲𑀪𑀸𑀕𑀲𑁆𑀲 𑀲𑀫𑀓𑀫𑁂𑀯 𑀤𑀺𑀬𑁆𑀬𑀫𑀸𑀦𑀢𑁆𑀢𑀸 𑀯𑀺𑀲𑀼𑀁 𑀲𑀸𑀫𑀡𑁂𑀭𑀪𑀸𑀕𑁄 𑀦𑀸𑀫 𑀦𑀢𑁆𑀣𑀺, 𑀧𑀢𑁆𑀢𑀘𑀻𑀯𑀭𑀧𑀭𑀺𑀓𑀫𑁆𑀫𑀫𑀢𑁆𑀢𑀧𑀝𑀺𑀩𑀤𑁆𑀥𑀧𑀩𑁆𑀩𑀚𑁆𑀚𑀢𑀸𑀬 𑀧𑀦 𑀲𑀸𑀫𑀡𑁂𑀭𑀲𑀤𑀺𑀲𑀸 𑀏𑀢𑁂 𑀧𑀡𑁆𑀟𑀼𑀧𑀮𑀸𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀬𑀢𑀸𑀲𑀦𑁆𑀦𑀧𑀩𑁆𑀩𑀚𑁆𑀚𑀲𑁆𑀲𑁂𑀯 𑀘𑀸𑀬𑀁 𑀪𑀸𑀕𑁄 𑀤𑀻𑀬𑀢𑀺. 𑀢𑁂𑀦𑁂𑀯 ‘‘𑀬𑀸𑀯 𑀧𑀢𑁆𑀢𑁄 𑀧𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀫𑀺𑀲𑀪𑀸𑀕𑁄𑀢𑀺 𑀯𑀺𑀳𑀸𑀭𑁂 𑀤𑀺𑀦𑁆𑀦𑀁 𑀲𑀗𑁆𑀖𑀪𑀢𑁆𑀢𑀁, 𑀢𑀢𑁆𑀭𑀼𑀧𑁆𑀧𑀸𑀤𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀤𑀸𑀬𑀓𑀸𑀦𑀁 𑀕𑁂𑀳𑁂𑀲𑀼 𑀢𑁂𑀳𑀺 𑀤𑀺𑀬𑁆𑀬𑀫𑀸𑀦𑀁. 𑀢𑁂𑀦𑁂𑀯 𑀲𑀮𑀸𑀓𑀪𑀢𑁆𑀢𑀸𑀤𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀤𑀸𑀬𑀓𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺. 𑀪𑁂𑀲𑀚𑁆𑀚𑀦𑁆𑀢𑀺𑀆𑀤𑀺𑀦𑀸 𑀧𑀦 𑀕𑀺𑀳𑀻𑀦𑀁 𑀪𑁂𑀲𑀚𑁆𑀚𑀓𑀭𑀡𑀸𑀤𑀺𑀤𑁄𑀲𑁄 𑀏𑀢𑁆𑀣 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀧𑀢𑁆𑀢𑀓𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁧𑁯. 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀯𑀢𑁆𑀣𑀽𑀲𑀼 ¶ 𑀓𑀡𑁆𑀡𑀫𑀽𑀮𑁂𑀢𑀺 𑀲𑀓𑀮𑀲𑁆𑀲 𑀓𑀡𑁆𑀡𑀲𑁆𑀲 𑀙𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀡𑁆𑀡𑀲𑀓𑁆𑀔𑀮𑀺𑀓𑀸𑀬𑀸𑀢𑀺 𑀓𑀡𑁆𑀡𑀘𑀽𑀴𑀺𑀓𑀸𑀬. 𑀬𑀲𑁆𑀲 𑀧𑀦 𑀓𑀡𑁆𑀡𑀸𑀯𑀺𑀤𑁆𑀥𑁂𑀢𑀺 𑀳𑁂𑀝𑁆𑀞𑀸 𑀓𑀼𑀡𑁆𑀟𑀮𑀸𑀤𑀺𑀞𑀧𑀦𑀘𑁆𑀙𑀺𑀤𑁆𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀲𑀗𑁆𑀖𑀝𑀦𑀓𑁆𑀔𑀫𑀁. 𑀅𑀚𑀧𑀤𑀓𑁂𑀢𑀺 𑀅𑀚𑀧𑀤𑀦𑀸𑀲𑀺𑀓𑀝𑁆𑀞𑀺𑀓𑁄𑀝𑀺𑀬𑀁. 𑀢𑀢𑁄 𑀳𑀺 𑀉𑀤𑁆𑀥𑀁 𑀦 𑀯𑀺𑀘𑁆𑀙𑀺𑀦𑁆𑀤𑀢𑀺. 𑀲𑀓𑁆𑀓𑀸 𑀳𑁄𑀢𑀺 𑀲𑀦𑁆𑀥𑁂𑀢𑀼𑀦𑁆𑀢𑀺 𑀅𑀯𑀺𑀭𑀽𑀧𑀲𑀡𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀭𑀽𑀧𑀁 𑀧𑀦 𑀧𑀭𑀺𑀲𑀤𑀽𑀲𑀓𑀢𑀁 𑀆𑀧𑀸𑀤𑁂𑀢𑀺.

𑀔𑀼𑀚𑁆𑀚𑀲𑀭𑀻𑀭𑁄𑀢𑀺 𑀯𑀗𑁆𑀓𑀲𑀭𑀻𑀭𑁄. 𑀩𑁆𑀭𑀳𑁆𑀫𑀼𑀦𑁄 𑀯𑀺𑀬 𑀉𑀚𑀼𑀓𑀁 𑀕𑀢𑁆𑀢𑀁 𑀲𑀭𑀻𑀭𑀁 𑀬𑀲𑁆𑀲, 𑀲𑁄 𑀩𑁆𑀭𑀳𑁆𑀫𑀼𑀚𑁆𑀚𑀼𑀕𑀢𑁆𑀢𑁄, 𑀪𑀕𑀯𑀸.

𑀧𑀭𑀺𑀯𑀝𑀼𑀫𑁄𑀢𑀺 𑀲𑀫𑀦𑁆𑀢𑀢𑁄 𑀯𑀝𑁆𑀝𑀓𑀸𑀬𑁄, 𑀏𑀢𑁂𑀦 𑀏𑀯𑀭𑀽𑀧𑀸 𑀏𑀯 𑀯𑀸𑀫𑀦𑀓𑀸 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀽𑀝𑀓𑀽𑀝𑀲𑀻𑀲𑁄𑀢𑀺 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀧𑀺𑀡𑁆𑀟𑀺𑀓𑀫𑀁𑀲𑀢𑀁 𑀤𑀲𑁆𑀲𑁂𑀢𑀼𑀁 𑀆𑀫𑁂𑀟𑀺𑀢𑀁 𑀓𑀢𑀁. 𑀢𑁂𑀦𑀸𑀳 ‘‘𑀢𑀸𑀮𑀨𑀮𑀧𑀺𑀡𑁆𑀟𑀺𑀲𑀤𑀺𑀲𑁂𑀦𑀸’’𑀢𑀺, 𑀢𑀸𑀮𑀨𑀮𑀸𑀦𑀁 𑀫𑀜𑁆𑀚𑀭𑀻 𑀧𑀺𑀡𑁆𑀟𑀺 𑀦𑀸𑀫. 𑀅𑀦𑀼𑀧𑀼𑀩𑁆𑀩𑀢𑀦𑀼𑀓𑁂𑀦 𑀲𑀻𑀲𑁂𑀦𑀸𑀢𑀺 𑀘𑁂𑀢𑀺𑀬𑀣𑀽𑀧𑀺𑀓𑀸 ¶ 𑀯𑀺𑀬 𑀓𑀫𑁂𑀦 𑀓𑀺𑀲𑁂𑀦 𑀲𑀻𑀲𑁂𑀦, 𑀣𑀽𑀮𑀯𑁂𑀴𑀼𑀧𑀩𑁆𑀩𑀁 𑀯𑀺𑀬 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯𑀧𑀭𑀺𑀬𑁄𑀲𑀸𑀦𑀁 𑀲𑀫𑀣𑀽𑀮𑁂𑀦 𑀉𑀘𑁆𑀘𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀴𑀺𑀲𑀻𑀲𑁄 𑀦𑀸𑀫. 𑀓𑀧𑁆𑀧𑀲𑀻𑀲𑁄𑀢𑀺 𑀕𑀚𑀫𑀢𑁆𑀣𑀓𑀁 𑀯𑀺𑀬 𑀤𑁆𑀯𑀺𑀥𑀸 𑀪𑀺𑀦𑁆𑀦𑀲𑀻𑀲𑁄. ‘‘𑀓𑀡𑁆𑀡𑀺𑀓𑀓𑁂𑀲𑁄 𑀯𑀸’’𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀧𑀸𑀡𑀓𑁂𑀳𑀻’’𑀢𑀺𑀆𑀤𑀺. 𑀫𑀓𑁆𑀓𑀝𑀲𑁆𑀲𑁂𑀯 𑀦𑀴𑀸𑀝𑁂𑀧𑀺 𑀓𑁂𑀲𑀸𑀦𑀁 𑀉𑀝𑁆𑀞𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀻𑀲𑀮𑁄𑀫𑁂𑀳𑀻’’𑀢𑀺𑀆𑀤𑀺.

𑀫𑀓𑁆𑀓𑀝𑀪𑀫𑀼𑀓𑁄𑀢𑀺 𑀦𑀴𑀸𑀝𑀮𑁄𑀫𑁂𑀳𑀺 𑀅𑀯𑀺𑀪𑀢𑁆𑀢𑀮𑁄𑀫𑀪𑀫𑀼𑀓𑁄. 𑀅𑀓𑁆𑀔𑀺𑀘𑀓𑁆𑀓𑀮𑁂𑀳𑀻𑀢𑀺 𑀓𑀡𑁆𑀳𑀫𑀡𑁆𑀟𑀮𑁂𑀳𑀺. 𑀓𑁂𑀓𑀭𑁄𑀢𑀺 𑀢𑀺𑀭𑀺𑀬𑀁 𑀧𑀲𑁆𑀲𑀦𑀓𑁄. 𑀉𑀤𑀓𑀢𑀸𑀭𑀓𑀸𑀢𑀺 𑀑𑀮𑁄𑀓𑁂𑀦𑁆𑀢𑀸𑀦𑀁 𑀉𑀤𑀓𑁂 𑀧𑀝𑀺𑀩𑀺𑀫𑁆𑀩𑀺𑀓𑀘𑁆𑀙𑀸𑀬𑀸, 𑀉𑀤𑀓𑀧𑀼𑀩𑁆𑀩𑀼𑀴𑀦𑁆𑀢𑀺 𑀓𑁂𑀘𑀺. 𑀅𑀓𑁆𑀔𑀺𑀢𑀸𑀭𑀓𑀸𑀢𑀺 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀙𑀸𑀬𑀸, 𑀅𑀓𑁆𑀔𑀺𑀕𑀡𑁆𑀟𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀢𑀺𑀧𑀺𑀗𑁆𑀕𑀮𑀓𑁆𑀔𑀻𑀢𑀺 𑀫𑀚𑁆𑀚𑀸𑀭𑀓𑁆𑀔𑀺. 𑀫𑀥𑀼𑀧𑀺𑀗𑁆𑀕𑀮𑀦𑁆𑀢𑀺 𑀫𑀥𑀼𑀯𑀡𑁆𑀡𑀧𑀺𑀗𑁆𑀕𑀮𑀁. 𑀦𑀺𑀧𑁆𑀧𑀔𑀼𑀫𑀓𑁆𑀔𑀻𑀢𑀺 𑀏𑀢𑁆𑀣 𑀧𑀔𑀼𑀫-𑀲𑀤𑁆𑀤𑁄 𑀅𑀓𑁆𑀔𑀺𑀤𑀮𑀮𑁄𑀫𑁂𑀲𑀼 𑀦𑀺𑀭𑀽𑀴𑁆𑀳𑁄, 𑀢𑀤𑀪𑀸𑀯𑀸 𑀦𑀺𑀧𑁆𑀧𑀔𑀼𑀫𑀓𑁆𑀔𑀺. 𑀅𑀓𑁆𑀔𑀺𑀧𑀸𑀓𑁂𑀦𑀸𑀢𑀺 𑀅𑀓𑁆𑀔𑀺𑀤𑀮 𑀧𑀭𑀺𑀬𑀦𑁆𑀢𑁂𑀲𑀼 𑀧𑀽𑀢𑀺𑀪𑀸𑀯𑀸𑀧𑀚𑁆𑀚𑀦𑀭𑁄𑀕𑁂𑀦.

𑀘𑀺𑀧𑀺𑀝𑀦𑀸𑀲𑀺𑀓𑁄𑀢𑀺 ¶ 𑀅𑀦𑀼𑀦𑁆𑀦𑀢𑀦𑀸𑀲𑀺𑀓𑁄. 𑀧𑀝𑀗𑁆𑀕𑀫𑀡𑁆𑀟𑀽𑀓𑁄 𑀦𑀸𑀫 𑀫𑀳𑀸𑀫𑀼𑀔𑀫𑀡𑁆𑀟𑀽𑀓𑁄. 𑀪𑀺𑀦𑁆𑀦𑀫𑀼𑀔𑁄𑀢𑀺 𑀉𑀧𑀓𑁆𑀓𑀫𑀼𑀔𑀧𑀭𑀺𑀬𑁄𑀲𑀸𑀦𑁄, 𑀲𑀩𑁆𑀩𑀤𑀸 𑀯𑀺𑀯𑀝𑀫𑀼𑀔𑁄 𑀯𑀸. 𑀯𑀗𑁆𑀓𑀫𑀼𑀔𑁄𑀢𑀺 𑀏𑀓𑀧𑀲𑁆𑀲𑁂 𑀅𑀧𑀓𑁆𑀓𑀫𑁆𑀫 𑀞𑀺𑀢𑀳𑁂𑀝𑁆𑀞𑀺𑀫𑀳𑀦𑀼𑀓𑀝𑁆𑀞𑀺𑀓𑁄. 𑀑𑀝𑁆𑀞𑀘𑁆𑀙𑀺𑀦𑁆𑀦𑀓𑁄𑀢𑀺 𑀉𑀪𑁄𑀲𑀼 𑀑𑀝𑁆𑀞𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀸𑀢𑀺𑀬𑀸 𑀯𑀸 𑀧𑀘𑁆𑀙𑀸 𑀯𑀸 𑀲𑀢𑁆𑀣𑀸𑀤𑀺𑀦𑀸 𑀅𑀧𑀦𑀻𑀢𑀫𑀁𑀲𑁂𑀦 𑀑𑀝𑁆𑀞𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀴𑀫𑀼𑀔𑁄𑀢𑀺 𑀦𑀺𑀘𑁆𑀘𑀧𑀕𑁆𑀖𑀭𑀺𑀢𑀮𑀸𑀮𑀸𑀫𑀼𑀔𑁄.

𑀪𑀺𑀦𑁆𑀦𑀕𑀮𑁄𑀢𑀺 𑀅𑀯𑀦𑀢𑀕𑀢𑁄. 𑀪𑀺𑀦𑁆𑀦𑀉𑀭𑁄𑀢𑀺 𑀅𑀢𑀺𑀦𑀺𑀦𑁆𑀦𑀉𑀭𑀫𑀚𑁆𑀛𑁄. 𑀏𑀯𑀁 𑀪𑀺𑀦𑁆𑀦𑀧𑀺𑀝𑁆𑀞𑀺𑀧𑀺. 𑀲𑀩𑁆𑀩𑀜𑁆𑀘𑁂𑀢𑀦𑁆𑀢𑀺 ‘‘𑀓𑀘𑁆𑀙𑀼𑀕𑀢𑁆𑀢𑁄’’𑀢𑀺𑀆𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀯𑀺𑀦𑀺𑀘𑁆𑀙𑀬𑁄 𑀓𑀼𑀝𑁆𑀞𑀸𑀤𑀻𑀲𑀼 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀆𑀳 ‘‘𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺.

𑀯𑀸𑀢𑀡𑁆𑀟𑀺𑀓𑁄𑀢𑀺 𑀅𑀡𑁆𑀟𑀯𑀸𑀢𑀭𑁄𑀕𑁂𑀦 𑀉𑀤𑁆𑀥𑀼𑀢𑀩𑀻𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀬𑀲𑁆𑀲 𑀦𑀺𑀯𑀸𑀲𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀉𑀦𑁆𑀦𑀢𑀁 𑀧𑀓𑀸𑀲𑀢𑀺, 𑀲𑁄𑀯 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀯𑀺𑀓𑀝𑁄𑀢𑀺 𑀢𑀺𑀭𑀺𑀬𑀁𑀕𑀫𑀦𑀧𑀸𑀤𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀩𑀳𑀺 𑀦𑀺𑀕𑀘𑁆𑀙𑀦𑁆𑀢𑀺. 𑀧𑀡𑁆𑀳𑁄𑀢𑀺 𑀧𑀘𑁆𑀙𑀢𑁄 𑀧𑀭𑀺𑀯𑀢𑁆𑀢𑀦𑀓𑀧𑀸𑀤𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀺. 𑀫𑀳𑀸𑀚𑀗𑁆𑀖𑁄𑀢𑀺 𑀣𑀽𑀮𑀚𑀗𑁆𑀖𑁄. 𑀫𑀳𑀸𑀧𑀸𑀤𑁄𑀢𑀺 𑀫𑀳𑀦𑁆𑀢𑁂𑀦 𑀧𑀸𑀤𑀢𑀮𑁂𑀦 𑀬𑀼𑀢𑁆𑀢𑁄. 𑀧𑀸𑀤𑀯𑁂𑀫𑀚𑁆𑀛𑁂𑀢𑀺 𑀧𑀺𑀝𑁆𑀞𑀺𑀧𑀸𑀤𑀯𑁂𑀫𑀚𑁆𑀛𑁂, 𑀏𑀢𑁂𑀦 𑀅𑀕𑁆𑀕𑀧𑀸𑀤𑁄 𑀘 𑀧𑀡𑁆𑀳𑀺 𑀘 𑀲𑀤𑀺𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀫𑀚𑁆𑀛𑁂 𑀲𑀗𑁆𑀓𑀼𑀝𑀺𑀢𑀧𑀸𑀤𑀢𑁆𑀢𑀸𑀢𑀺 𑀓𑀼𑀡𑁆𑀟𑀧𑀸𑀤𑀢𑀸𑀬 𑀓𑀸𑀭𑀡𑀯𑀺𑀪𑀸𑀯𑀦𑀁. 𑀅𑀕𑁆𑀕𑁂 𑀲𑀗𑁆𑀓𑀼𑀝𑀺𑀢𑀧𑀸𑀤𑀢𑁆𑀢𑀸𑀢𑀺 𑀓𑀼𑀡𑁆𑀟𑀧𑀸𑀤𑀢𑀸𑀬 𑀲𑀓𑀼𑀡𑀧𑀸𑀤𑀲𑁆𑀲𑁂𑀯 𑀕𑀫𑀦𑀯𑀺𑀪𑀸𑀯𑀦𑀁. 𑀧𑀺𑀝𑁆𑀞𑀺𑀧𑀸𑀤𑀕𑁆𑀕𑁂𑀦 𑀘𑀗𑁆𑀓𑀫𑀦𑁆𑀢𑁄𑀢𑀺 ‘‘𑀧𑀸𑀤𑀲𑁆𑀲 𑀩𑀸𑀳𑀺𑀭𑀦𑁆𑀢𑁂𑀦𑀸𑀢𑀺 ¶ 𑀘 𑀅𑀩𑁆𑀪𑀦𑁆𑀢𑀭𑀦𑁆𑀢𑁂𑀦𑀸’’𑀢𑀺 𑀘 𑀇𑀤𑀁 𑀧𑀸𑀤𑀢𑀮𑀲𑁆𑀲 𑀉𑀪𑁄𑀳𑀺 𑀧𑀭𑀺𑀬𑀦𑁆𑀢𑁂𑀳𑀺 𑀘𑀗𑁆𑀓𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀫𑀫𑁆𑀫𑀦𑀦𑁆𑀢𑀺 𑀞𑀸𑀦𑀓𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀅𑀬𑀼𑀢𑁆𑀢𑀓𑁆𑀔𑀭𑀯𑀘𑀦𑀁. 𑀯𑀘𑀦𑀸𑀦𑀼𑀓𑀭𑀡𑁂𑀦 𑀳𑀺 𑀲𑁄 𑀫𑀫𑁆𑀫𑀦𑁄 𑀯𑀼𑀢𑁆𑀢𑁄. 𑀬𑁄 𑀘 𑀓𑀭𑀡𑀲𑀫𑁆𑀧𑀦𑁆𑀦𑁄𑀧𑀺 𑀏𑀓𑀫𑁂𑀯𑀓𑁆𑀔𑀭𑀁 𑀳𑀺𑀓𑁆𑀓𑀸𑀭𑀩𑀳𑀼𑀲𑁄 𑀯𑀤𑀢𑀺, 𑀲𑁄𑀧𑀺 𑀇𑀥𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀬𑁄 𑀯𑀸 𑀧𑀦 𑀳𑀺𑀓𑁆𑀓𑀁 𑀦𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀅𑀦𑀸𑀫𑁂𑀟𑀺𑀢𑀓𑁆𑀔𑀭𑀫𑁂𑀯 𑀲𑀺𑀮𑀺𑀝𑁆𑀞𑀯𑀘𑀦𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀆𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀜𑀢𑁆𑀯𑀸 𑀓𑀭𑁄𑀦𑁆𑀢𑁄𑀯 𑀦 𑀫𑀼𑀘𑁆𑀘𑀢𑀺. 𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀤𑀺𑀆𑀧𑀤𑀸𑀲𑀼 𑀅𑀭𑀼𑀘𑀺𑀬𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀦𑁆𑀢𑀺 𑀑𑀲𑀸𑀭𑀡𑀸𑀬 𑀅𑀦𑀭𑀳𑁄𑀢𑀺 𑀅𑀢𑁆𑀣𑁄.

𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀮𑀚𑁆𑀚𑀺𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁨𑁦. 𑀦𑀺𑀲𑁆𑀲𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀢𑁆𑀣𑀽𑀲𑀼 ¶ 𑀪𑀺𑀓𑁆𑀔𑀽𑀳𑀺 𑀲𑀫𑀸𑀦𑁄 𑀪𑀸𑀕𑁄 𑀤𑀺𑀝𑁆𑀞𑀺𑀲𑀻𑀮𑀸𑀤𑀺𑀕𑀼𑀡𑀓𑁄𑀝𑁆𑀞𑀸𑀲𑁄 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑀪𑀸𑀕𑁄, 𑀢𑀲𑁆𑀲 𑀪𑀸𑀯𑁄 𑀪𑀺𑀓𑁆𑀔𑀼𑀲𑀪𑀸𑀕𑀢𑀸.

𑀅𑀮𑀚𑁆𑀚𑀺𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀫𑀺𑀓𑀸𑀤𑀺𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁨𑁧. 𑀦𑀺𑀲𑁆𑀲𑀬𑀓𑀭𑀡𑀻𑀬𑁄𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀕𑁆𑀕𑀳𑀡𑀁 𑀦𑀺𑀲𑁆𑀲𑀬𑁄, 𑀲𑁄 𑀓𑀭𑀡𑀻𑀬𑁄 𑀬𑀲𑁆𑀲𑀸𑀢𑀺 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀲𑁆𑀲𑀫𑁂𑀦𑁆𑀢𑁄 𑀯𑀸…𑀧𑁂… 𑀅𑀦𑀸𑀧𑀢𑁆𑀢𑀻𑀢𑀺 𑀕𑀫𑀦𑀲𑀉𑀲𑁆𑀲𑀸𑀳𑀢𑀸𑀬 𑀢𑀣𑀸 𑀯𑀲𑀦𑁆𑀢𑁄𑀧𑀺 𑀅𑀤𑁆𑀥𑀺𑀓𑁄 𑀏𑀯, 𑀢𑀢𑁆𑀣 𑀦𑀺𑀲𑁆𑀲𑀬𑀤𑀸𑀬𑀓𑁂 𑀅𑀲𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀘 𑀧𑀭𑀺𑀲𑁆𑀲𑀫𑀸𑀤𑀺𑀅𑀪𑀸𑀯𑁂 𑀲𑁂𑀦𑀸𑀲𑀦𑀸𑀤𑀺𑀲𑀫𑁆𑀧𑀤𑀁 𑀧𑀝𑀺𑀘𑁆𑀘 𑀯𑀲𑀢𑁄 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀜𑁆𑀘 𑀅𑀕𑀫𑀦𑀧𑀘𑁆𑀘𑀬𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀧𑀚𑁆𑀚𑀢𑀻𑀢𑀺 𑀯𑀤𑀦𑁆𑀢𑀺. 𑀘𑀻𑀯𑀭𑀭𑀚𑀦𑀸𑀤𑀺𑀓𑀺𑀘𑁆𑀘𑀢𑁆𑀣𑀸𑀬 𑀕𑀭𑀽𑀳𑀺 𑀧𑁂𑀲𑀺𑀢𑀲𑁆𑀲𑀸𑀧𑀺 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀫𑁂𑀯 𑀯𑀲𑀺𑀢𑀩𑁆𑀩𑀁, 𑀦 𑀢𑀢𑁄 𑀧𑀭𑀁. 𑀕𑀭𑀽𑀳𑀺𑀧𑀺 𑀢𑀸𑀯𑀓𑀸𑀮𑀺𑀓𑀓𑀺𑀘𑁆𑀘𑀢𑁆𑀣𑀫𑁂𑀯 𑀧𑁂𑀲𑀮𑀤𑀳𑀭𑀸 𑀧𑁂𑀲𑀺𑀢𑀩𑁆𑀩𑀸, 𑀦 𑀦𑀺𑀘𑁆𑀘𑀓𑀸𑀮𑀓𑀺𑀘𑁆𑀘𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀲𑁆𑀲…𑀧𑁂… 𑀅𑀦𑀸𑀧𑀢𑁆𑀢𑀻’’𑀢𑀺 ¶ 𑀯𑀼𑀢𑁆𑀢𑀢𑁆𑀢𑀸 𑀏𑀯𑀭𑀽𑀧𑀁 𑀅𑀯𑀺𑀥𑁂𑀬𑁆𑀬𑀢𑀁 𑀯𑀺𑀦𑀸 𑀦𑀺𑀲𑁆𑀲𑀬𑀤𑀸𑀬𑀓𑀭𑀳𑀺𑀢𑀝𑁆𑀞𑀸𑀦𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀦𑀺𑀲𑁆𑀲𑀸𑀬. 𑀆𑀲𑀸𑀴𑁆𑀳𑀻𑀫𑀸𑀲𑁂…𑀧𑁂… 𑀢𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀦 𑀲𑀘𑁂𑀧𑀺 ‘‘𑀅𑀲𑀼𑀓𑁄 𑀣𑁂𑀭𑁄 𑀏𑀢𑁆𑀣 𑀆𑀕𑀫𑀺𑀲𑁆𑀲𑀢𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀕𑀫𑁂𑀦𑁆𑀢𑀲𑁆𑀲𑁂𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁄 𑀳𑁄𑀢𑀺. 𑀳𑁄𑀢𑀼, 𑀯𑀲𑀺𑀢𑀝𑁆𑀞𑀸𑀦𑁂 𑀯𑀲𑁆𑀲𑀁 𑀅𑀦𑀼𑀧𑀕𑀫𑁆𑀫 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀤𑀽𑀭𑁂𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑀩𑁆𑀩𑀁.

𑁧𑁨𑁨. 𑀕𑁄𑀢𑁆𑀢𑁂𑀦𑀧𑀻𑀢𑀺 ‘‘𑀆𑀬𑀲𑁆𑀫𑀢𑁄 𑀧𑀺𑀧𑁆𑀧𑀮𑀺𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀁 𑀦𑀸𑀫𑀁 𑀅𑀯𑀢𑁆𑀯𑀸 𑀕𑁄𑀢𑁆𑀢𑀦𑀸𑀫𑁂𑀦𑀧𑀻𑀢𑀺 𑀅𑀢𑁆𑀣𑁄, 𑀢𑁂𑀦 ‘‘𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺 𑀧𑀼𑀝𑁆𑀞𑁂𑀦 𑀕𑁄𑀢𑁆𑀢𑀦𑀸𑀫𑁂𑀦 ‘‘𑀆𑀬𑀲𑁆𑀫𑀸 𑀓𑀲𑁆𑀲𑀧𑁄’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀢𑀲𑁆𑀲 𑀦𑀸𑀫𑀁 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀯𑀸 𑀔𑀡𑁂 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀦𑀸𑀫𑀁 𑀧𑀜𑁆𑀜𑀸𑀧𑀺𑀢𑀁, 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸𑀧𑀺 𑀅𑀦𑀼𑀲𑁆𑀲𑀸𑀯𑀦𑀸 𑀓𑀸𑀢𑀩𑁆𑀩𑀸. 𑀬𑀣𑀸 ¶ 𑀉𑀧𑀚𑁆𑀛𑀸𑀬𑀲𑁆𑀲, 𑀏𑀯𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲𑀧𑀺 𑀕𑁄𑀢𑁆𑀢𑀸𑀤𑀺𑀦𑀸𑀫𑁂𑀦, 𑀢𑀗𑁆𑀔𑀡𑀺𑀓𑀦𑀸𑀫𑁂𑀦 𑀘 𑀅𑀦𑀼𑀲𑁆𑀲𑀸𑀯𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀔𑀡𑁂 ‘‘𑀅𑀬𑀁 𑀢𑀺𑀲𑁆𑀲𑁄’’𑀢𑀺 𑀯𑀸 ‘‘𑀦𑀸𑀕𑁄’’𑀢𑀺 𑀯𑀸 𑀦𑀸𑀫𑀁 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀢𑁄 𑀧𑀞𑀫𑀫𑁂𑀯 𑀓𑀸𑀢𑀩𑁆𑀩𑀁, 𑀏𑀯𑀁 𑀓𑀢𑁆𑀯𑀸𑀧𑀺 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀸𑀦𑀼𑀲𑀸𑀲𑀦𑀧𑀼𑀘𑁆𑀙𑀦𑀓𑀸𑀮𑁂𑀲𑀼 ‘‘𑀓𑀺𑀦𑁆𑀦𑀸𑀫𑁄𑀲𑀺, 𑀅𑀳𑀁 𑀪𑀦𑁆𑀢𑁂 𑀦𑀸𑀕𑁄 𑀦𑀸𑀫, 𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄, 𑀉𑀧𑀚𑁆𑀛𑀸𑀬𑁄 𑀫𑁂 𑀪𑀦𑁆𑀢𑁂 𑀢𑀺𑀲𑁆𑀲𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦 𑀉𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑁂 ‘‘𑀫𑀫𑁂𑀤𑀁 𑀦𑀸𑀫’’𑀦𑁆𑀢𑀺 𑀬𑀣𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀧𑀓𑀢𑀺𑀦𑀸𑀫𑁂𑀦 𑀯𑀢𑁆𑀯𑀸 𑀧𑀘𑁆𑀙𑀸 𑀢𑀺𑀲𑁆𑀲-𑀦𑀸𑀫𑀸𑀤𑀺𑀅𑀧𑀼𑀩𑁆𑀩𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀦 𑀯𑀝𑁆𑀝𑀢𑀺.

𑀢𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 ‘‘𑀢𑀺𑀲𑁆𑀲𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸𑀧𑀺 𑀧𑀼𑀕𑁆𑀕𑀮𑁂 𑀧𑀭𑀸𑀫𑀝𑁆𑀞𑁂 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺 𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀯𑀺𑀬 𑀉𑀧𑀚𑁆𑀛𑀸𑀬𑀲𑁆𑀲 𑀅𑀪𑀸𑀯𑁂𑀧𑀺 𑀅𑀪𑀩𑁆𑀩𑀢𑁆𑀢𑁂𑀧𑀺 𑀓𑀫𑁆𑀫𑀯𑀸𑀘𑀸𑀬 𑀧𑀼𑀕𑁆𑀕𑀮𑁂 𑀧𑀭𑀸𑀫𑀝𑁆𑀞𑁂 𑀓𑀫𑁆𑀫𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀦 𑀬𑀣𑀸𑀲𑀓𑀁 𑀦𑀸𑀫𑀁 𑀯𑀺𑀦𑀸 𑀅𑀜𑁆𑀜𑁂𑀦 𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑀺𑀢𑁂 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀢𑀢𑁆𑀣 𑀞𑀺𑀢𑁄 𑀅𑀜𑁆𑀜𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀯𑀺𑀬 𑀕𑀳𑀺𑀢𑀦𑀸𑀫𑀲𑁆𑀲 𑀯𑀢𑁆𑀣𑀼𑀧𑀼𑀕𑁆𑀕𑀮𑀲𑁆𑀲 𑀢𑀢𑁆𑀣 𑀅𑀪𑀸𑀯𑀸, 𑀏𑀢𑀲𑁆𑀲 𑀘 𑀦𑀸𑀫𑀲𑁆𑀲 𑀅𑀦𑀼𑀲𑁆𑀲𑀸𑀯𑀦𑀸𑀬 𑀅𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀓𑀢𑀺𑀦𑀸𑀫𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀦𑀸𑀕𑀸𑀤𑀺𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑁂𑀢𑀼𑀓𑀸𑀫𑁂𑀦 𑀧𑀝𑀺𑀓𑀘𑁆𑀘𑁂𑀯 ‘‘𑀢𑁆𑀯𑀁 𑀦𑀸𑀕𑁄’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀦𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀧𑀼𑀘𑁆𑀙𑀦𑀓𑁆𑀔𑀡𑁂𑀲𑀼𑀧𑀺 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀘 𑀬𑀣𑀸 𑀧𑀸𑀓𑀝𑀁 𑀳𑁄𑀢𑀺, 𑀢𑀣𑀸 𑀧𑀓𑀸𑀲𑁂𑀢𑁆𑀯𑀸𑀯 𑀦𑀸𑀕𑀸𑀤𑀺𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑁂𑀢𑀩𑁆𑀩𑀁. 𑀏𑀓𑀲𑁆𑀲 𑀩𑀳𑀽𑀦𑀺 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀏𑀓𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀬𑀁 ¶ 𑀧𑀦 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀉𑀧𑀚𑁆𑀛𑀸𑀬𑀸𑀦𑀁 𑀏𑀓𑀢𑁆𑀣 𑀕𑀳𑀺𑀢𑀁 𑀦𑀸𑀫𑀁, 𑀢𑀤𑁂𑀯 𑀜𑀢𑁆𑀢𑀺𑀬𑀸, 𑀲𑀩𑁆𑀩𑀢𑁆𑀣 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 𑀘 𑀕𑀳𑁂𑀢𑀩𑁆𑀩𑀁. 𑀕𑀳𑀺𑀢𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀕𑀳𑀺𑀢𑁂 𑀩𑁆𑀬𑀜𑁆𑀚𑀦𑀁 𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺. 𑀅𑀢𑁆𑀣𑀢𑁄, 𑀳𑀺 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀪𑀺𑀦𑁆𑀦𑀸 𑀏𑀯 𑀜𑀢𑁆𑀢𑀺, 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀯𑀝𑁆𑀝𑀦𑁆𑀢𑀺, 𑀉𑀧𑀚𑁆𑀛𑀸𑀬𑀦𑀸𑀫𑀲𑁆𑀲 𑀧𑀦 𑀧𑀼𑀭𑀢𑁄 ‘‘𑀆𑀬𑀲𑁆𑀫𑀢𑁄 𑀢𑀺𑀲𑁆𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀆𑀬𑀲𑁆𑀫𑀦𑁆𑀢-𑀧𑀤𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑁆𑀯𑀸𑀧𑀺 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀢𑀣𑀸 𑀅𑀬𑁄𑀚𑀺𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺.

𑀧𑀸𑀴𑀺𑀬𑀁 𑀧𑀦 𑀓𑀺𑀜𑁆𑀘𑀸𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀧𑀘𑁆𑀙𑀢𑁄 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀓𑀼𑀲𑀮𑁄’’𑀢𑀺𑀆𑀤𑀺𑀦𑀸 ¶ 𑀦𑀸𑀫𑀲𑁆𑀲 𑀧𑀼𑀭𑀢𑁄 𑀆𑀬𑀲𑁆𑀫𑀦𑁆𑀢-𑀧𑀤𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄 𑀧𑀼𑀭𑀢𑁄𑀯 𑀧𑀬𑁄𑀕𑁄 𑀬𑀼𑀢𑁆𑀢𑀢𑀭𑁄. 𑀢𑀜𑁆𑀘 𑀏𑀓𑀢𑁆𑀣 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀬𑁄𑀚𑀺𑀢𑁂𑀧𑀺 𑀏𑀓𑀢𑁆𑀣 𑀧𑀼𑀭𑀢𑁄 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀘𑁆𑀙𑀢𑁄 𑀬𑁄𑀚𑀦𑁂𑀧𑀺 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀦𑀸𑀫 𑀦 𑀳𑁄𑀢𑀺 𑀦𑀸𑀫𑀲𑁆𑀲 𑀅𑀳𑀸𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀫𑁆𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀏𑀓𑀢𑁆𑀣 𑀬𑁄𑀚𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 ‘‘𑀆𑀬𑀲𑁆𑀫𑀢𑁄’’𑀢𑀺 𑀦 𑀬𑁄𑀚𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀜𑁆𑀘 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀢𑀣𑀸𑀧𑀺 𑀲𑀩𑁆𑀩𑀝𑁆𑀞𑀸𑀦𑁂𑀧𑀺 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀏𑀯 𑀯𑀸 𑀅𑀬𑁄𑀚𑁂𑀢𑁆𑀯𑀸 𑀯𑀸 𑀅𑀦𑀼𑀲𑁆𑀲𑀸𑀯𑀦𑀁 𑀧𑀲𑀢𑁆𑀣𑀢𑀭𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀕𑀫𑀺𑀓𑀸𑀤𑀺𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁧𑁨𑁩. 𑀏𑀓𑀢𑁄 𑀲𑀳𑁂𑀯 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀁 𑀏𑀢𑁂𑀲𑀦𑁆𑀢𑀺 𑀏𑀓𑀸𑀦𑀼𑀲𑁆𑀲𑀸𑀯𑀦𑀸, 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸, 𑀏𑀢𑁂 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁. 𑀢𑁂𑀦𑀸𑀳 ‘‘𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼’’𑀦𑁆𑀢𑀺, 𑀇𑀤𑀜𑁆𑀘 𑀏𑀓𑀁 𑀧𑀤𑀁 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀤𑀝𑁆𑀞𑀩𑁆𑀩𑀁. 𑀏𑀓𑁂𑀦 𑀯𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀸𑀬 𑀏𑀯 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑁂 𑀏𑀓𑁂𑀦𑀸𑀘𑀭𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀘 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀆𑀬𑀲𑁆𑀫𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀤𑁆𑀯𑀺𑀦𑁆𑀦𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀦𑀬𑁄 𑀤𑀝𑁆𑀞𑀩𑁆𑀩𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀢𑀺𑀡𑁆𑀡𑀫𑁆𑀧𑀺 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀏𑀓𑀓𑁆𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀁 𑀤𑀝𑁆𑀞𑀩𑁆𑀩𑀁.

𑀧𑀼𑀭𑀺𑀫𑀦𑀬𑁂𑀦𑁂𑀯 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 ‘‘𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀇𑀢𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀺𑀦𑁆𑀦𑀁 𑀤𑁆𑀯𑀻𑀳𑀺 𑀯𑀸, 𑀢𑀺𑀡𑁆𑀡𑀁 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺, 𑀏𑀓𑀓𑁂𑀦 𑀯𑀸 𑀆𑀘𑀭𑀺𑀬𑁂𑀦 𑀢𑀬𑁄𑀧𑀺 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄, 𑀢𑀜𑁆𑀘 𑀔𑁄 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦. ‘‘𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀇𑀤𑀁 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀉𑀧𑀚𑁆𑀛𑀸𑀬𑁂𑀳𑀺 ¶ 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀏𑀓𑀓𑁆𑀔𑀡𑁂 𑀏𑀓𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑀧𑀤𑀁. 𑀦 𑀧𑀦 𑀦𑀸𑀦𑀸𑀘𑀭𑀺𑀬𑁂𑀳𑀺 𑀦𑀸𑀦𑀼𑀧𑀚𑁆𑀛𑀸𑀬𑁂𑀳𑀺 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀲𑀘𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀦𑀸𑀦𑀼𑀧𑀚𑁆𑀛𑀸𑀬𑀸…𑀧𑁂… 𑀯𑀝𑁆𑀝𑀢𑀻’’𑀢𑀺. 𑀬𑀜𑁆𑀘𑁂𑀢𑁆𑀣 ¶ ‘‘𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓’’𑀦𑁆𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀢𑀲𑁆𑀫𑀸 𑀲𑀘𑁂 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀺 𑀏𑀯. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀅𑀦𑀼𑀧𑀚𑁆𑀛𑀸𑀬𑀓𑀲𑁆𑀲𑀧𑀺 𑀬𑁂𑀦 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀯𑀺𑀢𑁂 𑀉𑀧𑀲𑀫𑁆𑀧𑀤𑀸 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀉𑀧𑀚𑁆𑀛𑀸𑀬𑀓𑀲𑁆𑀲 𑀉𑀧𑀚𑁆𑀛𑀸𑀬𑁂𑀦𑁂𑀯 𑀅𑀦𑀼𑀲𑁆𑀲𑀸𑀯𑀦𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀦𑀯𑀝𑁆𑀝𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀤𑁆𑀯𑁂𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀲𑀫𑁆𑀧𑀤𑀸𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸

𑁧𑁨𑁬. 𑀉𑀧𑀚𑁆𑀛𑀸𑀢𑀺 𑀉𑀧𑀚𑁆𑀛𑀸𑀬-𑀲𑀤𑁆𑀤𑀲𑀫𑀸𑀦𑀢𑁆𑀣𑁄 𑀆𑀓𑀸𑀭𑀦𑁆𑀢𑁄 𑀉𑀧𑀚𑁆𑀛𑀸𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬-𑀲𑀤𑁆𑀤𑁄 𑀏𑀯 𑀯𑀸 𑀉𑀧𑀚𑁆𑀛𑀸 𑀉𑀧𑀬𑁄𑀕𑀧𑀘𑁆𑀘𑀢𑁆𑀢𑀯𑀘𑀦𑁂𑀲𑀼 𑀬-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑁄 𑀓𑀭𑀡𑀯𑀘𑀦𑀸𑀤𑀻𑀲𑀼 𑀉𑀧𑀚𑁆𑀛𑀸-𑀲𑀤𑁆𑀤𑀲𑁆𑀲 𑀧𑀬𑁄𑀕𑀸𑀪𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑀸𑀯 𑀓𑀢𑁆𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀅𑀢𑁆𑀢𑀸𑀦𑀫𑁂𑀯 𑀓𑀫𑁆𑀫𑀪𑀽𑀢𑀁 𑀧𑀢𑀺 𑀲𑀫𑁆𑀫𑀦𑀦𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀅𑀢𑁆𑀢𑀸𑀦𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀣𑁂𑀯, 𑀅𑀜𑁆𑀜𑀢𑁆𑀭𑀸𑀧𑀺 𑀢𑁂𑀭𑀲𑀲𑀫𑁆𑀫𑀼𑀢𑀺𑀆𑀤𑀻𑀲𑀼 𑀇𑀫𑀺𑀦𑀸𑀯 𑀮𑀓𑁆𑀔𑀡𑁂𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀯. 𑀅𑀧𑀺𑀘 𑀲𑀬𑀁 𑀓𑀫𑁆𑀫𑀸𑀭𑀳𑀢𑁆𑀢𑀸 𑀅𑀢𑁆𑀢𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀢𑀼𑀯𑀕𑁆𑀕𑀸𑀤𑀺𑀓𑁄 𑀕𑀡𑁄 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄.

𑀲𑀘𑁆𑀘𑀓𑀸𑀮𑁄𑀢𑀺 ‘‘𑀦𑀺𑀕𑀽𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀜𑁆𑀘𑀦𑀁 𑀧𑀳𑀸𑀬 𑀲𑀘𑁆𑀘𑀲𑁆𑀲𑁂𑀯 𑀢𑁂 𑀇𑀘𑁆𑀙𑀺𑀢𑀩𑁆𑀩𑀓𑀸𑀮𑁄. 𑀪𑀽𑀢𑀓𑀸𑀮𑁄𑀢𑀺 𑀯𑀜𑁆𑀘𑀦𑀸𑀬 𑀅𑀪𑀸𑀯𑁂𑀧𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀯𑀢𑁆𑀣𑀼𑀦𑁄 𑀪𑀽𑀢𑀢𑀸𑀬 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀓𑀸𑀮𑁄, 𑀇𑀢𑀭𑀣𑀸 𑀓𑀫𑁆𑀫𑀓𑁄𑀧𑀸𑀤𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀗𑁆𑀓𑀽𑀢𑀺 𑀅𑀥𑁄𑀫𑀼𑀔𑁄. 𑀉𑀤𑁆𑀥𑀭𑀢𑀽𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀉𑀧𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀧𑁂𑀢𑀽𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀓𑀫𑁆𑀫𑀯𑀸𑀘𑀸𑀲𑀼 ¶ 𑀅𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀸𑀘𑀸𑀬 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀲𑀼𑀡𑀸𑀢𑀽𑀢𑀺 𑀲𑀯𑀦𑀸𑀡𑀢𑁆𑀢𑀺𑀬𑀁 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁. 𑀢𑀜𑁆𑀘 ¶ 𑀓𑀺𑀜𑁆𑀘𑀸𑀧𑀺 𑀬𑁄 𑀲𑀗𑁆𑀖𑁄 𑀲𑀯𑀦𑀓𑀺𑀭𑀺𑀬𑀸𑀬 𑀦𑀺𑀬𑁄𑀚𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀢𑁆𑀢𑀸 ‘‘𑀲𑀼𑀡𑀸𑀳𑀻’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀣𑀸𑀧𑀺 𑀬𑀲𑁆𑀫𑀸 𑀲𑀗𑁆𑀖-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑁄𑀯 𑀲𑀤𑁆𑀤𑀯𑀺𑀥𑀽𑀳𑀺 𑀲𑀫𑀸𑀘𑀺𑀡𑁆𑀡𑁄 𑀪𑀕𑀯𑀦𑁆𑀢𑀆𑀬𑀲𑁆𑀫𑀦𑁆𑀢𑀸𑀤𑀺𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀲𑀼 𑀯𑀺𑀬 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 (𑀧𑀸𑀭𑀸. 𑁨𑁨). 𑀏𑀢𑀲𑁆𑀲 𑀲𑀼𑀕𑀢 𑀓𑀸𑀮𑁄, 𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬 (𑀧𑀸𑀭𑀸. 𑁨𑁧). 𑀧𑀓𑁆𑀓𑀫𑀢𑀸𑀬𑀲𑁆𑀫𑀸 (𑀧𑀸𑀭𑀸. 𑁪𑁩𑁬). 𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀸 𑀇𑀥 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑁄 𑀓𑀢𑁄. 𑀅𑀣 𑀯𑀸 𑀕𑀸𑀭𑀯𑀯𑀲𑁂𑀦𑁂𑀯𑁂𑀢𑀁 𑀯𑀼𑀢𑁆𑀢𑀁. 𑀕𑀭𑀼𑀝𑁆𑀞𑀸𑀦𑀻𑀬𑁂𑀲𑀼 𑀳𑀺 𑀕𑀸𑀭𑀯𑀯𑀲𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑀬𑁄𑀕𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑀁 𑀧𑀬𑀼𑀚𑁆𑀚𑀦𑁆𑀢𑀺 ‘‘𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁬; 𑀫. 𑀦𑀺. 𑁨.𑁩𑁩𑁮; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁮) 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀪𑀦𑁆𑀢𑁂, 𑀆𑀯𑀼𑀲𑁄𑀢𑀺 𑀲𑀤𑁆𑀤𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀥 𑀧𑀞𑀫𑀧𑀼𑀭𑀺𑀲𑀧𑀬𑁄𑀕𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 ‘‘𑀆𑀘𑀭𑀺𑀬𑁄 𑀫𑁂 𑀪𑀦𑁆𑀢𑁂 𑀳𑁄𑀳𑀺, (𑀫𑀳𑀸𑀯. 𑁭𑁭) 𑀇𑀗𑁆𑀖𑀸𑀯𑀼𑀲𑁄 𑀉𑀧𑀸𑀮𑀺, 𑀇𑀫𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁫𑁧𑁭) 𑀢𑀧𑁆𑀧𑀬𑁄𑀕𑁂𑀧𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑀬𑁄𑀕𑀲𑁆𑀲𑁂𑀯 𑀤𑀲𑁆𑀲𑀦𑀢𑁄.

𑀫𑁂𑀢𑀺 𑀬𑁄 𑀲𑀸𑀯𑁂𑀢𑀺, 𑀢𑀲𑁆𑀲 𑀅𑀢𑁆𑀢𑀦𑀺𑀤𑁆𑀤𑁂𑀲𑁂 𑀲𑀸𑀫𑀺𑀯𑀘𑀦𑀁. 𑀪𑀦𑁆𑀢𑁂𑀢𑀺 𑀆𑀮𑀧𑀦𑀢𑁆𑀣𑁂 𑀯𑀼𑀟𑁆𑀠𑁂𑀲𑀼 𑀲𑀕𑀸𑀭𑀯𑀯𑀘𑀦𑀁. ‘‘𑀆𑀯𑀼𑀲𑁄’’𑀢𑀺 𑀧𑀤𑀁 𑀧𑀦 𑀦𑀯𑀓𑁂𑀲𑀼. 𑀢𑀤𑀼𑀪𑀬𑀫𑁆𑀧𑀺 𑀦𑀺𑀧𑀸𑀢𑁄 ‘‘𑀢𑀼𑀫𑁆𑀳𑁂 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀆𑀯𑀼𑀲𑁄’’𑀢𑀺 𑀩𑀳𑀽𑀲𑀼𑀧𑀺 𑀲𑀫𑀸𑀦𑀭𑀽𑀧𑀢𑁆𑀢𑀸. 𑀲𑀗𑁆𑀖𑁄𑀢𑀺 𑀅𑀯𑀺𑀲𑁂𑀲𑀢𑁄 𑀘𑀢𑀼𑀯𑀕𑁆𑀕𑀸𑀤𑀺𑀓𑁂 𑀧𑀓𑀢𑀢𑁆𑀢𑀧𑀼𑀕𑁆𑀕𑀮𑀲𑀫𑀽𑀳𑁂 𑀯𑀢𑁆𑀢𑀢𑀺. 𑀇𑀥 𑀧𑀦 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀜𑁆𑀘𑀯𑀕𑁆𑀕𑀢𑁄 𑀧𑀝𑁆𑀞𑀸𑀬, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀤𑀲𑀯𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀦𑁆𑀢𑁂, 𑀲𑀗𑁆𑀖𑁄 𑀫𑀫 𑀯𑀘𑀦𑀁 𑀲𑀼𑀡𑀸𑀢𑀽𑀢𑀺. 𑀇𑀤𑀜𑁆𑀘 𑀦𑀯𑀓𑀢𑀭𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁. 𑀲𑀘𑁂 𑀧𑀦 𑀅𑀦𑀼𑀲𑁆𑀲𑀸𑀯𑀓𑁄 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, ‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁄𑀧𑀺 𑀘𑁂 ‘‘𑀪𑀦𑁆𑀢𑁂’’𑀢𑀺 𑀯𑀤𑁂𑀬𑁆𑀬, 𑀦𑀯𑀓𑀢𑀭𑁄 𑀯𑀸 ‘‘𑀆𑀯𑀼𑀲𑁄’’𑀢𑀺, 𑀓𑀫𑁆𑀫𑀓𑁄𑀧𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀏𑀓𑀢𑁆𑀣 ‘𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑁆𑀣 ‘𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂𑀧𑀺 𑀦𑀢𑁆𑀣𑀺 𑀤𑁄𑀲𑁄 𑀉𑀪𑀬𑁂𑀦𑀸𑀧𑀺 𑀆𑀮𑀧𑀦𑀲𑁆𑀲 𑀲𑀺𑀚𑁆𑀛𑀦𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑁄 ‘‘𑀲𑀼𑀡𑀸𑀢𑀽’’𑀢𑀺 𑀲𑀗𑁆𑀖𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀢𑀁 𑀜𑀸𑀧𑁂𑀦𑁆𑀢𑁄 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀬𑀦𑁆𑀢𑀺 ¶ 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀦𑁆𑀦𑀺𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦 𑀘 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀻𑀢𑀺 𑀲𑀺𑀚𑁆𑀛𑀢𑀺 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀲𑁆𑀲 ‘‘𑀅𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀢𑁄. 𑀢𑁂𑀦𑁂𑀯 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀬𑀁 𑀲𑁄 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀢𑁆𑀢𑀸 ‘‘𑀅𑀬’’𑀦𑁆𑀢𑀺 𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀳𑀢𑁆𑀣𑀧𑀸𑀲𑁂 𑀞𑀧𑁂𑀢𑀩𑁆𑀩𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄𑀢𑀺 𑀅𑀬𑀁-𑀲𑀤𑁆𑀤𑁄 𑀘 𑀅𑀯𑀲𑁆𑀲𑀁 𑀧𑀬𑀼𑀚𑁆𑀚𑀺𑀢𑀩𑁆𑀩𑁄. 𑀲𑁄 𑀘 𑀇𑀫𑀲𑁆𑀫𑀺𑀁 𑀧𑀞𑀫𑀦𑀸𑀫𑀧𑀬𑁄𑀕𑁂 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁 ¶ . ‘‘𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀇𑀤𑀁 𑀅𑀦𑀺𑀬𑀫𑀢𑁄 𑀢𑀲𑁆𑀲 𑀦𑀸𑀫𑀤𑀲𑁆𑀲𑀦𑀁. 𑀉𑀪𑀬𑁂𑀦𑀧𑀺 𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄𑀢𑀺𑀆𑀤𑀺𑀦𑀸𑀫𑀁 𑀤𑀲𑁆𑀲𑁂𑀢𑀺. ‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀯𑀺𑀲𑀬𑁂 𑀩𑀳𑀼𑀩𑁆𑀩𑀻𑀳𑀺𑀲𑀫𑀆𑀲𑁄, 𑀉𑀧𑀲𑀫𑁆𑀧𑀤𑀁 𑀫𑁂 𑀲𑀗𑁆𑀖𑁄 𑀅𑀧𑁂𑀓𑁆𑀔𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀘 𑀉𑀧𑀚𑁆𑀛𑀸𑀬𑀢𑀁 𑀲𑀫𑀗𑁆𑀕𑀺𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀇𑀢𑁆𑀣𑀦𑁆𑀦𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀪𑀽𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀦𑀸𑀫𑀬𑁄𑀚𑀦𑀸𑀬 𑀲𑀳 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺. 𑀏𑀢𑁆𑀣 𑀘 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀅𑀯𑀢𑁆𑀯𑀸𑀧𑀺 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀢𑁆𑀣 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀦 𑀯𑀼𑀢𑁆𑀢𑀁. 𑀬𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀦𑀦𑀼 𑀘𑁂𑀢𑁆𑀣 𑀉𑀧𑀚𑁆𑀛𑀸𑀬𑁄𑀧𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀯𑀺𑀬 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀏𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀣 𑀓𑀲𑁆𑀫𑀸 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀫𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑀧𑀭𑀸𑀫𑀲𑀦𑁂𑀧𑀺 𑀇𑀫-𑀲𑀤𑁆𑀤𑀲𑁆𑀲 𑀧𑀬𑁄𑀕𑁄 𑀦 𑀓𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄 𑀉𑀧𑀚𑁆𑀛𑀸𑀬𑀲𑁆𑀲 𑀅𑀪𑀸𑀯𑁂𑀧𑀺 𑀓𑀫𑁆𑀫𑀓𑁄𑀧𑀸𑀪𑀸𑀯𑀢𑁄. 𑀓𑁂𑀯𑀮𑀜𑁆𑀳𑀺 𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀦𑁆𑀢𑀧𑀤𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀦𑀸𑀫𑀓𑀺𑀢𑁆𑀢𑀦𑀁 𑀅𑀦𑀼𑀧𑀚𑁆𑀛𑀸𑀬𑀲𑁆𑀲 𑀉𑀧𑀲𑀫𑁆𑀧𑀤𑀸𑀤𑀻𑀲𑀼𑀧𑀺 𑀓𑀭𑀻𑀬𑀢𑀺. 𑀢𑀲𑁆𑀫𑀸 𑀉𑀧𑀚𑁆𑀛𑀸𑀬𑀲𑁆𑀲 𑀅𑀲𑀦𑁆𑀦𑀺𑀳𑀺𑀢𑀢𑀸𑀬𑀧𑀺 𑀢𑀧𑁆𑀧𑀭𑀸𑀫𑀲𑀦𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀲𑀺𑀤𑁆𑀥𑀺𑀢𑁄 ‘‘𑀇𑀫𑀲𑁆𑀲𑀸’’𑀢𑀺 𑀦𑀺𑀤𑁆𑀤𑀺𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀅𑀪𑀩𑁆𑀩𑀢𑀸𑀤𑀺𑀓𑁂𑀳𑀺 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀓𑀭𑁂𑀳𑀺 𑀘𑁂𑀯 𑀧𑀜𑁆𑀘𑀸𑀩𑀸𑀥𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀻𑀳𑀺 𑀘 𑀆𑀧𑀢𑁆𑀢𑀺𑀫𑀢𑁆𑀢𑀓𑀭𑁂𑀳𑀺 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀲𑀪𑀸𑀯𑁂𑀳𑀺 𑀧𑀭𑀺𑀫𑀼𑀢𑁆𑀢𑁄. 𑀏𑀯𑀁 𑀯𑀼𑀢𑁆𑀢𑁄 𑀏𑀯 𑀘 𑀆𑀧𑀢𑁆𑀢𑀺𑀫𑀢𑁆𑀢𑀓𑀭𑁂𑀳𑀺 𑀧𑀜𑁆𑀘𑀸𑀩𑀸𑀥𑀸𑀤𑀻𑀳𑀺 𑀅𑀧𑀭𑀺𑀫𑀼𑀢𑁆𑀢𑀲𑁆𑀲𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀦𑀸𑀜𑁆𑀜𑀣𑀸. 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀏𑀯𑀁 𑀯𑀼𑀢𑁆𑀢𑁂 𑀏𑀯 𑀅𑀧𑀢𑁆𑀢𑀘𑀻𑀯𑀭𑀲𑁆𑀲𑀸𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀦𑀸𑀜𑁆𑀜𑀣𑀸. 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻𑀢𑀺 ¶ ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁭𑁧, 𑁧𑁨𑁬) 𑀬𑀸𑀘𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀢𑁂𑀦 𑀲𑀗𑁆𑀖𑁂 𑀅𑀬𑀸𑀘𑀺𑀢𑁂𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀯 𑀓𑀫𑁆𑀫𑀁 𑀅𑀯𑀺𑀧𑀦𑁆𑀦𑀁 𑀳𑁄𑀢𑀺, 𑀦𑀸𑀜𑁆𑀜𑀣𑀸. 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀉𑀧𑀚𑁆𑀛𑀸𑀬𑁂𑀦 𑀓𑀭𑀡𑀪𑀽𑀢𑁂𑀦 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀚𑁆𑀛𑀸𑀬𑀁 𑀓𑀢𑁆𑀯𑀸 𑀓𑀫𑁆𑀫𑀪𑀽𑀢𑀁 𑀉𑀧𑀲𑀫𑁆𑀧𑀤𑀁 𑀤𑀸𑀢𑀼𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀓𑀢𑁆𑀢𑀼𑀪𑀽𑀢𑀁 𑀲𑀗𑁆𑀖𑀁 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀘𑀥𑀸𑀢𑀼𑀦𑁄 𑀧𑀦 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 ‘‘𑀲𑀗𑁆𑀖𑀁, 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀤𑁆𑀯𑁂 𑀓𑀫𑁆𑀫𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀏𑀢𑁆𑀣 𑀧𑀢𑁆𑀢𑁄 𑀓𑀸𑀮𑁄 𑀇𑀫𑀲𑁆𑀲𑀸𑀢𑀺 𑀧𑀢𑁆𑀢𑀓𑀸𑀮𑀁, 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀲𑀗𑁆𑀖𑀓𑀫𑁆𑀫𑀁, 𑀢𑀤𑁂𑀯 𑀲𑀓𑀢𑁆𑀣𑁂 𑀬-𑀧𑀘𑁆𑀘𑀬𑁂𑀦 ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀚𑀸𑀢𑀁. 𑀬𑀤𑀻𑀢𑀺 𑀅𑀦𑀼𑀫𑀢𑀺𑀕𑀳𑀡𑀯𑀲𑁂𑀦 𑀓𑀫𑁆𑀫𑀲𑁆𑀲 ¶ 𑀧𑀢𑁆𑀢𑀓𑀮𑁆𑀮𑀢𑀁 𑀜𑀸𑀧𑁂𑀢𑀺. 𑀬𑁄 𑀳𑀺 𑀓𑁄𑀘𑀺 𑀢𑀢𑁆𑀣 𑀅𑀧𑀢𑁆𑀢𑀓𑀮𑁆𑀮𑀢𑀁 𑀫𑀜𑁆𑀜𑀺𑀲𑁆𑀲𑀢𑀺, 𑀲𑁄 𑀯𑀓𑁆𑀔𑀢𑀺. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 ‘‘𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺…𑀧𑁂… 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁧𑁨𑁭) 𑀯𑀼𑀢𑁆𑀢𑀁. 𑀢𑀁 𑀧𑀦𑁂𑀢𑀁 𑀧𑀢𑁆𑀢𑀓𑀮𑁆𑀮𑀁 𑀯𑀢𑁆𑀣𑀼𑀲𑀫𑁆𑀧𑀤𑀸, 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀘𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀸, 𑀲𑀻𑀫𑀸𑀲𑀫𑁆𑀧𑀤𑀸, 𑀧𑀭𑀺𑀲𑀲𑀫𑁆𑀧𑀤𑀸, 𑀧𑀼𑀩𑁆𑀩𑀓𑀺𑀘𑁆𑀘𑀦𑀺𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀁.

𑀢𑀢𑁆𑀣 𑀯𑀢𑁆𑀣𑀼𑀲𑀫𑁆𑀧𑀤𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀓𑀸𑀤𑀲𑀳𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀳𑀺 𑀘𑁂𑀯 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑁂𑀳𑀺 𑀘 𑀅𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀽𑀢𑁄 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀢𑀺 𑀏𑀯 𑀇𑀤𑀁 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀓𑀢𑀜𑁆𑀘 𑀓𑀼𑀧𑁆𑀧𑀫𑁂𑀯 𑀳𑁄𑀢𑀺.

𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀘𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀤𑀸𑀯𑀢𑁆𑀣𑀼𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁂 𑀇𑀫𑁂 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀜𑁆𑀘𑀸𑀩𑀸𑀥𑀨𑀼𑀝𑁆𑀞𑀢𑀸𑀤𑀬𑁄 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀢𑀸𑀧𑀭𑀺𑀬𑁄𑀲𑀸𑀦𑀸 𑀘𑁂𑀯 𑀳𑀢𑁆𑀣𑀘𑁆𑀙𑀺𑀦𑁆𑀦𑀢𑀸𑀤𑀬𑁄 𑀘 𑀤𑁄𑀲𑀥𑀫𑁆𑀫𑀸 𑀓𑀸𑀭𑀓𑀲𑀗𑁆𑀖𑀲𑁆𑀲 𑀆𑀧𑀢𑁆𑀢𑀸𑀤𑀺𑀅𑀦𑁆𑀢𑀭𑀸𑀬𑀳𑁂𑀢𑀼𑀢𑀸𑀬 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀢𑁂𑀳𑀺 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀤𑁄𑀲𑀥𑀫𑁆𑀫𑁂𑀳𑀺 𑀧𑀭𑀺𑀫𑀼𑀢𑁆𑀢𑀢𑁆𑀢𑀸, 𑀇𑀫𑀺𑀲𑁆𑀲𑀸 𑀘 𑀲𑀢𑀺 𑀏𑀯 𑀇𑀤𑀁 𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀓𑀢𑀁 𑀧𑀦 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺 𑀞𑀧𑁂𑀢𑁆𑀯𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀧𑀼𑀕𑁆𑀕𑀮𑀁.

𑀲𑀻𑀫𑀸𑀲𑀫𑁆𑀧𑀤𑀸 ¶ 𑀧𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁪𑁭-𑁧𑁪𑁮) 𑀯𑀓𑁆𑀔𑀫𑀸𑀦𑀦𑀬𑁂𑀦 𑀲𑀩𑁆𑀩𑀤𑁄𑀲𑀯𑀺𑀭𑀳𑀺𑀢𑀸𑀬 𑀩𑀤𑁆𑀥𑀸𑀩𑀤𑁆𑀥𑀯𑀲𑁂𑀦 𑀤𑀼𑀯𑀺𑀥𑀸𑀬 𑀲𑀻𑀫𑀸𑀬 𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀤𑀺𑀲𑀸𑀬 𑀳𑀺 𑀲𑀻𑀫𑀸𑀬 𑀲𑀢𑀺 𑀏𑀯 𑀇𑀤𑀁 𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀓𑀢𑀜𑁆𑀘 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺.

𑀧𑀭𑀺𑀲𑀲𑀫𑁆𑀧𑀤𑀸 𑀧𑀦 𑀬𑁂 𑀇𑀫𑁂 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀓𑀫𑁆𑀫𑀧𑁆𑀧𑀢𑁆𑀢𑀸 𑀤𑀲𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀅𑀦𑀽𑀦𑀸 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸, 𑀅𑀦𑀼𑀓𑁆𑀔𑀺𑀢𑁆𑀢𑀸 𑀘 𑀲𑀫𑀸𑀦𑀲𑀁𑀯𑀸𑀲𑀓𑀸 𑀪𑀺𑀓𑁆𑀔𑀽, 𑀢𑁂𑀲𑀁 𑀏𑀓𑀲𑀻𑀫𑀸𑀬𑀁 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀸𑀦𑀁, 𑀙𑀦𑁆𑀤𑀸𑀭𑀳𑀸𑀦𑀜𑁆𑀘 𑀙𑀦𑁆𑀤𑀲𑁆𑀲 𑀆𑀦𑀬𑀦𑀁, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀁, 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀭𑀳𑀺𑀢𑀸𑀦𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀁 𑀕𑀳𑀝𑁆𑀞𑀸𑀤𑀺𑀅𑀦𑀉𑀧𑀲𑀫𑁆𑀧𑀦𑁆𑀦𑀸𑀦𑀜𑁆𑀘𑁂𑀯 𑀧𑀸𑀭𑀸𑀚𑀺𑀓𑀼𑀓𑁆𑀔𑀺𑀢𑁆𑀢𑀓𑀦𑀸𑀦𑀸𑀲𑀁𑀯𑀸𑀲𑀓𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑁂 𑀅𑀪𑀸𑀯𑁄 𑀘𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀸. 𑀏𑀯𑀭𑀽𑀧𑀸𑀬 𑀘 𑀧𑀭𑀺𑀲𑀲𑀫𑁆𑀧𑀤𑀸𑀬 𑀲𑀢𑀺 𑀏𑀯 𑀇𑀤𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀲𑀧𑀺 𑀅𑀪𑀸𑀯𑁂 𑀓𑀢𑀁 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀦 𑀧𑀘𑁆𑀙𑀺𑀫𑀲𑁆𑀲.

𑀧𑀼𑀩𑁆𑀩𑀓𑀺𑀘𑁆𑀘𑀦𑀺𑀝𑁆𑀞𑀸𑀧𑀦𑀁 ¶ 𑀦𑀸𑀫 𑀬𑀸𑀦𑀺𑀫𑀸𑀦𑀺 ‘‘𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀺 ‘‘𑀉𑀧𑀚𑁆𑀛𑀁 𑀕𑀸𑀳𑀸𑀧𑀦𑀁, 𑀧𑀢𑁆𑀢𑀘𑀻𑀯𑀭𑀸𑀘𑀺𑀓𑁆𑀔𑀦𑀁, 𑀢𑀢𑁄 𑀢𑀁 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀓𑀫𑁆𑀫𑀓𑀭𑀡𑀁, 𑀲𑀫𑁆𑀫𑀢𑁂𑀦 𑀘 𑀕𑀦𑁆𑀢𑁆𑀯𑀸 𑀅𑀦𑀼𑀲𑀸𑀲𑀦𑀁, 𑀢𑁂𑀦 𑀘 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀜𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀁 ‘𑀆𑀕𑀘𑁆𑀙𑀸𑀳𑀻’𑀢𑀺 𑀳𑀢𑁆𑀣𑀧𑀸𑀲𑁂 𑀏𑀯 𑀅𑀩𑁆𑀪𑀸𑀦𑀁, 𑀢𑁂𑀦 𑀘 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬𑀸𑀘𑀸𑀧𑀦𑀁, 𑀢𑀢𑁄 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀧𑀼𑀘𑁆𑀙𑀓𑀲𑀫𑁆𑀫𑀼𑀢𑀺𑀓𑀭𑀡𑀁, 𑀲𑀫𑁆𑀫𑀢𑁂𑀦 𑀘 𑀧𑀼𑀘𑁆𑀙𑀦’’𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀬𑀸𑀣𑀸𑀯𑀢𑁄 𑀓𑀭𑀡𑁂𑀦 𑀦𑀺𑀝𑁆𑀞𑀸𑀧𑀦𑀁. 𑀏𑀢𑀲𑁆𑀫𑀺𑀜𑁆𑀘 𑀧𑀼𑀩𑁆𑀩𑀓𑀫𑁆𑀫𑀦𑀺𑀝𑁆𑀞𑀸𑀧𑀦𑁂 𑀲𑀢𑀺 𑀏𑀯 𑀇𑀤𑀁 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀏𑀢𑁂𑀲𑀼 𑀧𑀦 𑀧𑀼𑀩𑁆𑀩𑀓𑀫𑁆𑀫𑁂𑀲𑀼 𑀅𑀓𑀢𑁂𑀲𑀼𑀧𑀺 𑀓𑀢𑀁 𑀓𑀫𑁆𑀫𑀁 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀓𑀼𑀧𑁆𑀧𑀫𑁂𑀯 𑀳𑁄𑀢𑀺. 𑀢𑀤𑁂𑀯𑀫𑁂𑀢𑁆𑀣 𑀧𑀢𑁆𑀢𑀓𑀮𑁆𑀮𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼, 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼 𑀓𑀫𑁆𑀫𑁂𑀲𑀼 𑀧𑀢𑁆𑀢𑀓𑀮𑁆𑀮𑀢𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑀸.

𑀇𑀢𑁆𑀣𑀦𑁆𑀦𑀸𑀫𑀁 ¶ 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀤𑀸𑀦𑀺𑀧𑁆𑀨𑀸𑀤𑀦𑁂𑀦 𑀢𑀁𑀲𑀫𑀗𑁆𑀕𑀺𑀁 𑀓𑀭𑁂𑀬𑁆𑀬 𑀓𑀭𑁄𑀢𑀽𑀢𑀺 𑀧𑀢𑁆𑀣𑀦𑀸𑀬𑀁, 𑀯𑀺𑀥𑀺𑀫𑁆𑀳𑀺 𑀯𑀸 𑀇𑀤𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 ‘‘𑀤𑁂𑀯𑀤𑀢𑁆𑀢𑀁 𑀲𑀼𑀔𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀼𑀔𑀫𑀲𑁆𑀲 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀁 𑀲𑀼𑀔𑀲𑀫𑀗𑁆𑀕𑀺𑀦𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀉𑀧𑀲𑀫𑁆𑀧𑀤𑀫𑀲𑁆𑀲 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀁 𑀉𑀧𑀲𑀫𑁆𑀧𑀤𑀸𑀲𑀫𑀗𑁆𑀕𑀺𑀦𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀘𑁂𑀢𑀁 𑀬𑀣𑀸 𑀲𑀼𑀔𑀬𑀦𑁆𑀢𑀁 𑀓𑀜𑁆𑀘𑀺 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀓𑁄𑀘𑀺 𑀳𑁂𑀢𑀼𑀓𑀢𑁆𑀢𑀸 𑀲𑀼𑀔𑀳𑁂𑀢𑀼𑀦𑀺𑀧𑁆𑀨𑀸𑀤𑀦𑁂𑀦 𑀲𑀼𑀔𑀸𑀧𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀁 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀧𑀼𑀕𑁆𑀕𑀮𑀁 𑀳𑁂𑀢𑀼𑀓𑀢𑁆𑀢𑀼𑀪𑀽𑀢𑁄 𑀲𑀗𑁆𑀖𑁄 𑀉𑀧𑀲𑀫𑁆𑀧𑀤𑀸𑀳𑁂𑀢𑀼𑀦𑀺𑀧𑁆𑀨𑀸𑀤𑀦𑁂𑀦 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁄. 𑀏𑀢𑁂𑀦 𑀘 𑀲𑀼𑀔𑀁 𑀯𑀺𑀬 𑀲𑀼𑀔𑀤𑀸𑀬𑀓𑁂𑀦 𑀲𑀗𑁆𑀖𑁂𑀦 𑀧𑀼𑀕𑁆𑀕𑀮𑀲𑁆𑀲 𑀤𑀺𑀬𑁆𑀬𑀫𑀸𑀦𑀸 𑀢𑀣𑀸𑀧𑀯𑀢𑁆𑀢𑀧𑀭𑀫𑀢𑁆𑀣𑀥𑀫𑁆𑀫𑁂 𑀉𑀧𑀸𑀤𑀸𑀬 𑀅𑀭𑀺𑀬𑀚𑀦𑀧𑀜𑁆𑀜𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀲𑀫𑁆𑀫𑀼𑀢𑀺𑀲𑀘𑁆𑀘𑀢𑀸 𑀅𑀢𑁆𑀣𑀻𑀢𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀯𑀸𑀲𑀸𑀤𑀻𑀲𑀼 𑀯𑀺𑀬 𑀬𑀸𑀘𑀦𑀸𑀦𑀼𑀕𑀼𑀡𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀁 𑀤𑀤𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀤𑀸𑀦𑁂 𑀅𑀲𑀗𑁆𑀕𑀳𑁂𑀢𑁆𑀯𑀸 𑀓𑀫𑁆𑀫𑀮𑀓𑁆𑀔𑀡𑁂 𑀏𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀯𑀢𑁆𑀢𑀫𑀸𑀦𑀓𑀸𑀮𑀅𑀢𑀻𑀢𑀓𑀸𑀮𑀯𑀲𑁂𑀦, 𑀇𑀥 𑀧𑀦 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄.

𑀏𑀲𑀸 𑀜𑀢𑁆𑀢𑀻𑀢𑀺 ‘‘𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀜𑀸𑀧𑀦𑀸 𑀏𑀲𑀸. 𑀇𑀤𑀜𑁆𑀘 𑀅𑀦𑀼𑀲𑁆𑀲𑀸𑀯𑀦𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀲𑀽𑀘𑀦𑀢𑁆𑀣𑀁 𑀯𑀼𑀘𑁆𑀘𑀢𑀺. 𑀅𑀯𑀲𑁆𑀲𑀜𑁆𑀘𑁂𑀢𑀁 𑀯𑀢𑁆𑀢𑀩𑁆𑀩𑀫𑁂𑀯, 𑀜𑀢𑁆𑀢𑀺𑀓𑀫𑁆𑀫𑁂 𑀏𑀯 𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀧𑀦 𑀬𑁆𑀬-𑀓𑀸𑀭𑁂 𑀯𑀼𑀢𑁆𑀢𑀫𑀢𑁆𑀢𑁂 𑀏𑀯 𑀜𑀢𑁆𑀢𑀺𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀺. 𑀉𑀧𑀲𑀫𑁆𑀧𑀤𑀸𑀢𑀺 𑀲𑀗𑁆𑀖𑁂𑀦 𑀤𑀺𑀬𑁆𑀬𑀫𑀸𑀦𑀸 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀸 𑀉𑀧𑀲𑀫𑁆𑀧𑀤𑀸 𑀬𑀲𑁆𑀲 𑀔𑀫𑀢𑀺. 𑀲𑁄 𑀢𑀼𑀡𑁆𑀳𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀼𑀡𑁆𑀳𑀻𑀢𑀺 ¶ 𑀘 𑀅𑀓𑀣𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀓𑀣𑀦𑀓𑁄 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀲𑁆𑀫𑀸 𑀢𑀼𑀡𑁆𑀳𑀻’’𑀢𑀺. 𑀢𑀢𑁆𑀣 ‘‘𑀆𑀲𑀻’’𑀢𑀺 𑀲𑁂𑀲𑁄. 𑀬𑀲𑁆𑀫𑀸 ‘‘𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀲𑀗𑁆𑀖𑁄 𑀢𑀼𑀡𑁆𑀳𑀻 𑀦𑀺𑀭𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀔𑀫𑀢𑀺 𑀲𑀗𑁆𑀖𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦. 𑀢𑀼𑀡𑁆𑀳𑀻𑀪𑀸𑀯𑁂𑀦𑁂𑀯𑁂𑀢𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀦𑀪𑀸𑀯𑀁 𑀥𑀸𑀭𑀬𑀸𑀫𑀺 𑀩𑀼𑀚𑁆𑀛𑀸𑀫𑀺 𑀧𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀓𑀢𑁄, 𑀲𑁄 𑀘 𑀓𑀫𑁆𑀫𑀯𑀸𑀘𑀸𑀬 𑀅𑀦𑀗𑁆𑀕𑀁. 𑀢𑀲𑁆𑀫𑀸 𑀅𑀦𑀼𑀲𑁆𑀲𑀸𑀯𑀓𑁂𑀦 ‘‘𑀥𑀸𑀭𑀬𑀸𑀫𑀻’’𑀢𑀺 𑀏𑀢𑁆𑀣 𑀫𑀺-𑀓𑀸𑀭𑀧𑀭𑀺𑀬𑁄𑀲𑀸𑀦𑀫𑁂𑀯 ¶ 𑀯𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀁, 𑀇𑀢𑀺-𑀲𑀤𑁆𑀤𑁄 𑀦 𑀧𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀓𑀫𑁆𑀫𑀯𑀸𑀘𑀸𑀦𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀲𑀫𑁆𑀧𑀤𑀸𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑁆𑀢𑀸𑀭𑁄𑀦𑀺𑀲𑁆𑀲𑀬𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁨𑁮. 𑀏𑀓𑀧𑁄𑀭𑀺𑀲𑀸 𑀯𑀸𑀢𑀺𑀆𑀤𑀺 𑀲𑀢𑁆𑀢𑀸𑀦𑀁 𑀲𑀭𑀻𑀭𑀘𑁆𑀙𑀸𑀬𑀁 𑀧𑀸𑀤𑁂𑀳𑀺 𑀫𑀺𑀦𑀺𑀢𑁆𑀯𑀸 𑀚𑀸𑀦𑀦𑀧𑁆𑀧𑀓𑀸𑀭𑀤𑀲𑁆𑀲𑀦𑀁. 𑀙𑀲𑀢𑁆𑀢𑀧𑀤𑀧𑀭𑀫𑀢𑀸 𑀳𑀺 𑀙𑀸𑀬𑀸 ‘‘𑀧𑁄𑀭𑀺𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀉𑀢𑀼𑀧𑁆𑀧𑀫𑀸𑀡𑀸𑀘𑀺𑀓𑁆𑀔𑀦𑀸𑀤𑀺 𑀘 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑀼𑀟𑁆𑀠𑀦𑀯𑀪𑀸𑀯𑀁 𑀜𑀢𑁆𑀯𑀸 𑀯𑀦𑁆𑀤𑀦𑀯𑀦𑁆𑀤𑀸𑀧𑀦𑀸𑀤𑀺𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑀺 𑀆𑀕𑀘𑁆𑀙𑀢𑀺, 𑀕𑀘𑁆𑀙𑀢𑀺 𑀘𑀸𑀢𑀺 𑀉𑀢𑀼, 𑀲𑁄𑀯 𑀧𑀫𑀺𑀬𑀢𑁂 𑀅𑀦𑁂𑀦 𑀲𑀁𑀯𑀘𑁆𑀙𑀭𑀦𑁆𑀢𑀺 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀉𑀢𑀼𑀬𑁂𑀯 𑀉𑀢𑀼𑀧𑁆𑀧𑀫𑀸𑀡’’𑀦𑁆𑀢𑀺. 𑀅𑀧𑀭𑀺𑀧𑀼𑀡𑁆𑀡𑀸𑀢𑀺 𑀉𑀧𑀲𑀫𑁆𑀧𑀤𑀸𑀤𑀺𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀸. 𑀬𑀤𑀺 𑀉𑀢𑀼𑀯𑁂𑀫𑀚𑁆𑀛𑁂 𑀉𑀧𑀲𑀫𑁆𑀧𑀸𑀤𑀺𑀢𑁄, 𑀢𑀤𑀸 𑀢𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀅𑀯𑀲𑀺𑀝𑁆𑀞𑀤𑀺𑀯𑀲𑀸𑀘𑀺𑀓𑁆𑀔𑀦𑀁 ‘‘𑀤𑀺𑀯𑀲𑀪𑀸𑀕𑀸𑀘𑀺𑀓𑁆𑀔𑀦’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀬𑀲𑁆𑀲 𑀬𑁄 𑀉𑀢𑀼 𑀅𑀧𑀭𑀺𑀧𑀼𑀡𑁆𑀡𑁄, 𑀢𑁂 𑀤𑀺𑀯𑀲𑁂’’𑀢𑀺. 𑀢𑀢𑁆𑀣 𑀬𑀲𑁆𑀲 𑀢𑀁 𑀔𑀡𑀁 𑀮𑀤𑁆𑀥𑀽𑀧𑀲𑀫𑁆𑀧𑀤𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀩𑀦𑁆𑀥𑀻 𑀬𑁄 𑀉𑀢𑀼 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀅𑀧𑀭𑀺𑀧𑀼𑀡𑁆𑀡𑁄, 𑀢𑁂 𑀤𑀺𑀯𑀲𑁂𑀢𑀺 𑀬𑁄𑀚𑀦𑀸.

𑀙𑀸𑀬𑀸𑀤𑀺𑀓𑀫𑁂𑀯 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀺𑀢𑀩𑁆𑀩𑀢𑁄 𑀓𑀣𑁂𑀢𑀩𑁆𑀩𑀢𑁄 𑀲𑀗𑁆𑀕𑀻𑀢𑀻𑀢𑀺 𑀆𑀳 ‘‘𑀇𑀤𑀫𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀢𑁄 𑀓𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑁆𑀯𑀁 𑀓𑀺𑀁 𑀮𑀪𑀲𑀻𑀢𑀺 𑀢𑁆𑀯𑀁 𑀉𑀧𑀲𑀫𑁆𑀧𑀸𑀤𑀦𑀓𑀸𑀮𑁂 𑀓𑀢𑀭𑀯𑀲𑁆𑀲𑀁, 𑀓𑀢𑀭𑀉𑀢𑀼𑀜𑁆𑀘 𑀮𑀪𑀲𑀺, 𑀓𑀢𑀭𑀲𑁆𑀫𑀺𑀁 𑀢𑁂 𑀉𑀧𑀲𑀫𑁆𑀧𑀤𑀸 𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀦𑁆𑀢𑀺 𑀯𑀲𑁆𑀲𑀸𑀦𑀉𑀢𑀼. 𑀇𑀤𑀜𑁆𑀘 𑀲𑀁𑀯𑀘𑁆𑀙𑀭𑀸𑀘𑀺𑀓𑁆𑀔𑀦𑀁 𑀯𑀺𑀦𑀸 𑀯𑀼𑀢𑁆𑀢𑀫𑁆𑀧𑀺 𑀦 𑀜𑀸𑀬𑀢𑀻𑀢𑀺 𑀇𑀫𑀺𑀦𑀸 𑀉𑀢𑀼𑀆𑀘𑀺𑀓𑁆𑀔𑀦𑁂𑀦𑁂𑀯 𑀲𑀸𑀲𑀦𑀯𑀲𑁆𑀲𑁂𑀲𑀼 𑀯𑀸 𑀓𑀮𑀺𑀬𑀼𑀕𑀯𑀲𑁆𑀲𑀸𑀤𑀻𑀲𑀼 𑀯𑀸 𑀲𑀳𑀲𑁆𑀲𑀺𑀫𑁂 𑀯𑀸 𑀲𑀢𑀺𑀫𑁂 𑀯𑀸 𑀅𑀲𑀼𑀓𑀁 𑀉𑀢𑀼𑀁 𑀮𑀪𑀸𑀫𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀙𑀸𑀬𑀸’’𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀆𑀕𑀢𑀧𑀝𑀺𑀧𑀸𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀢𑁆𑀢𑀩𑁆𑀩𑀓𑀫𑀢𑁄 𑀧𑀦 𑀓𑀮𑀺𑀬𑀼𑀕𑀯𑀲𑁆𑀲𑀸𑀤𑀻𑀲𑀼 𑀲𑀩𑁆𑀩𑀤𑁂𑀲𑀧𑀲𑀺𑀤𑁆𑀥𑁂𑀲𑀼 𑀅𑀲𑀼𑀓𑀯𑀲𑁆𑀲𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 ¶ 𑀅𑀲𑀼𑀓𑁂 𑀓𑀡𑁆𑀳𑁂 𑀯𑀸 𑀲𑀼𑀓𑁆𑀓𑁂 𑀯𑀸 𑀧𑀓𑁆𑀔𑁂 𑀅𑀲𑀼𑀓𑀢𑀺𑀣𑀺𑀯𑀸𑀭𑀯𑀺𑀲𑁂𑀲𑀬𑀼𑀢𑁆𑀢𑁂 𑀦𑀓𑁆𑀔𑀢𑁆𑀢𑁂 𑀧𑀼𑀩𑁆𑀩𑀡𑁆𑀳𑀸𑀤𑀺𑀤𑀺𑀯𑀲𑀪𑀸𑀕𑁂 𑀏𑀢𑁆𑀢𑀓𑁂 𑀙𑀸𑀬𑀸𑀧𑀫𑀸𑀡𑁂, 𑀦𑀸𑀟𑀺𑀓𑀸𑀧𑀫𑀸𑀡𑁂 𑀯𑀸 𑀫𑀬𑀸 𑀉𑀧𑀲𑀫𑁆𑀧𑀤𑀸 𑀮𑀤𑁆𑀥𑀸𑀢𑀺 𑀯𑀤𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. ‘‘𑀇𑀤𑀁 𑀲𑀼𑀝𑁆𑀞𑀼 𑀉𑀕𑁆𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑁂𑀳𑀺 ¶ 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀁 𑀜𑀢𑁆𑀯𑀸 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀓𑀺𑀲𑁆𑀲 𑀢𑁆𑀯𑀦𑁆𑀢𑀺 𑀓𑀺𑀁 𑀢𑁆𑀯𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁧𑁩𑁦. 𑀉𑀧𑀲𑀫𑁆𑀧𑀤𑀁 𑀬𑀸𑀘𑀻𑀢𑀺 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀬𑀸𑀘𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀯𑀤𑀢𑀻𑀢𑀺 𑀲𑁂𑀲𑁄, 𑀏𑀯𑀁 𑀉𑀧𑀭𑀺𑀧𑀺. ‘‘𑀑𑀲𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑁄 𑀉𑀓𑁆𑀔𑀺𑀢𑁆𑀢𑀪𑀸𑀯𑁄 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀮𑀤𑁆𑀥𑀽𑀧𑀲𑀫𑁆𑀧𑀤𑀫𑁆𑀧𑀺 𑀦 𑀫𑀼𑀜𑁆𑀘𑀢𑀺. 𑀢𑁂𑀦 𑀘 𑀲𑀫𑁆𑀪𑀼𑀜𑁆𑀚𑀦𑀸𑀤𑀻𑀲𑀼𑀧𑀺 𑀪𑀺𑀓𑁆𑀔𑀽𑀦𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂𑀢𑀺 𑀏𑀢𑁆𑀣 𑀲𑀳𑀲𑁂𑀬𑁆𑀬𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀅𑀬𑀁 𑀑𑀲𑀸𑀭𑀺𑀢𑀢𑁆𑀢𑀸 𑀧𑀓𑀢𑀢𑁆𑀢𑁄, 𑀢𑀲𑁆𑀫𑀸 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀸𑀤𑀺𑀧𑀘𑁆𑀘𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺. 𑀬𑁄 𑀧𑀦 𑀆𑀧𑀢𑁆𑀢𑀺𑀝𑁆𑀞𑀸𑀦𑁂 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀢𑀸𑀬 𑀆𑀧𑀢𑁆𑀢𑀺𑀁 𑀦 𑀧𑀲𑁆𑀲𑀢𑀺, 𑀢𑁂𑀦𑁂𑀯 𑀧𑀝𑀺𑀓𑀫𑁆𑀫𑀫𑁆𑀧𑀺 𑀦 𑀓𑀭𑁄𑀢𑀺, 𑀲𑁄 𑀬𑀲𑁆𑀫𑀸 𑀏𑀢𑁆𑀢𑀸𑀯𑀢𑀸 𑀅𑀮𑀚𑁆𑀚𑀻 𑀦𑀸𑀫 𑀦 𑀳𑁄𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀜𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀏𑀯 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀳𑁄𑀢𑀺. ‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀧𑀭𑀺. 𑁩𑁫𑁯) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀢𑁆𑀣 𑀅𑀮𑀚𑁆𑀚𑀺𑀲𑀫𑁆𑀪𑁄𑀕𑀸𑀤𑀺𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀦𑀺𑀬𑀫𑁄 𑀦𑀢𑁆𑀣𑀺. 𑀢𑁂𑀦 𑀲𑀸𑀧𑁂𑀢𑁆𑀣 𑀆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁄 𑀧𑀦𑁂𑀢𑁆𑀣 𑀇𑀫𑀁 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀓𑁂𑀦𑀘𑀺 ‘‘𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂’’𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀅𑀮𑀚𑁆𑀚𑀺𑀲𑀫𑁆𑀪𑁄𑀕𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀧𑀦 𑀆𑀧𑀚𑁆𑀚𑀢𑀺 𑀏𑀯𑀸𑀢𑀺 𑀆𑀧𑀢𑁆𑀢𑀺𑀦𑀺𑀬𑀫𑁄 𑀯𑀼𑀢𑁆𑀢𑁄, 𑀲𑁄 𑀅𑀮𑀚𑁆𑀚𑀺𑀢𑁆𑀢𑁂 𑀲𑀢𑀺 𑀏𑀯 𑀯𑀼𑀢𑁆𑀢𑁄, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁧. 𑀯𑀺𑀦𑀬𑀫𑁆𑀳𑀻𑀢𑀺𑀆𑀤𑀺𑀕𑀸𑀣𑀸𑀲𑀼 𑀦𑀺𑀕𑁆𑀕𑀳𑀸𑀦𑀦𑁆𑀢𑀺 𑀦𑀺𑀕𑁆𑀕𑀳𑀓𑀭𑀡𑁂𑀲𑀼. 𑀧𑀸𑀧𑀺𑀘𑁆𑀙𑁂𑀢𑀺 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀓𑀭𑀡𑁂𑀲𑀼, 𑀮𑀚𑁆𑀚𑀻𑀦𑀁 𑀧𑀕𑁆𑀕𑀳𑁂𑀲𑀼 𑀘 𑀧𑁂𑀲𑀮𑀸𑀦𑀁 𑀲𑀼𑀔𑀸𑀯𑀳𑁂 𑀫𑀳𑀦𑁆𑀢𑁂 𑀯𑀺𑀦𑀬𑀫𑁆𑀳𑀺 𑀬𑀣𑀸 𑀅𑀢𑁆𑀣𑀓𑀸𑀭𑀻 𑀅𑀢𑁆𑀣𑀸𑀦𑀼𑀕𑀼𑀡𑀁 𑀓𑀭𑁄𑀦𑁆𑀢𑁄𑀯 𑀬𑀲𑁆𑀫𑀸 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀉𑀤𑁆𑀤𑀸𑀦𑀁 𑀧𑀯𑀓𑁆𑀔𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀢𑁆𑀢𑀸𑀭𑁄𑀦𑀺𑀲𑁆𑀲𑀬𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀫𑀳𑀸𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁄

𑀲𑀦𑁆𑀦𑀺𑀧𑀸𑀢𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁩𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 ¶ ¶ 𑀢𑀭𑀦𑁆𑀢𑀺 𑀑𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀮𑀤𑁆𑀥𑀺. 𑀇𑀢𑁄𑀢𑀺 𑀲𑀸𑀲𑀦𑀮𑀤𑁆𑀥𑀺𑀢𑁄.

𑁧𑁩𑁫. 𑀆𑀧𑀚𑁆𑀚𑀺𑀢𑁆𑀯𑀸 𑀯𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀢𑁆𑀣 𑀤𑁂𑀲𑀦𑀸𑀭𑁄𑀘𑀦𑀸𑀦𑀫𑁆𑀧𑀺 𑀲𑀗𑁆𑀕𑀳𑁄. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀯𑀼𑀝𑁆𑀞𑀺𑀢𑀸 𑀯𑀸 𑀤𑁂𑀲𑀺𑀢𑀸 𑀯𑀸 𑀆𑀭𑁄𑀘𑀺𑀢𑀸 𑀯𑀸 𑀆𑀧𑀢𑁆𑀢𑀺…𑀧𑁂… 𑀅𑀲𑀦𑁆𑀢𑀻 𑀦𑀸𑀫 𑀳𑁄𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁.

𑀫𑀦𑀼𑀚𑁂𑀦𑀸𑀢𑀺 𑀆𑀲𑀦𑁆𑀦𑁂𑀦 𑀲𑀳. 𑀧𑀭𑁂𑀢𑀺 𑀤𑀽𑀭𑀝𑁆𑀞𑁂𑀧𑀺 𑀧𑀭𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀕𑀺𑀭𑀁 𑀦𑁄 𑀘 𑀪𑀡𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

‘‘𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀯𑀼𑀢𑁆𑀢𑀢𑁆𑀢𑀸 𑀕𑀭𑀼𑀓𑀸𑀧𑀢𑁆𑀢𑀺𑀧𑀺 𑀆𑀯𑀺𑀓𑀭𑀡𑀫𑀢𑁆𑀢𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀭𑀺𑀯𑀸𑀲𑀸𑀤𑀺𑀯𑀺𑀥𑀸𑀦𑀲𑀼𑀢𑁆𑀢𑁂𑀳𑀺 𑀯𑀺𑀭𑀼𑀚𑁆𑀛𑀦𑀢𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸𑀪𑀽𑀢𑀜𑁆𑀳𑀺 𑀅𑀢𑁆𑀢𑀸𑀦𑀫𑀸𑀯𑀺𑀓𑀭𑁄𑀦𑁆𑀢𑀁 𑀧𑁂𑀲𑀮𑀸 𑀪𑀺𑀓𑁆𑀔𑀽 ‘‘𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀦𑀺𑀲𑁆𑀲𑀸𑀬 𑀅𑀦𑀺𑀘𑁆𑀙𑀫𑀸𑀦𑀫𑁆𑀧𑀺 𑀦𑀁 𑀉𑀧𑀸𑀬𑁂𑀦 𑀧𑀭𑀺𑀯𑀸𑀲𑀸𑀤𑀻𑀦𑀺 𑀤𑀢𑁆𑀯𑀸 𑀅𑀯𑀲𑁆𑀲𑀁 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺, 𑀢𑀢𑁄 𑀢𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀦𑀁 𑀯𑀲𑁂𑀦 𑀨𑀸𑀲𑀼 𑀳𑁄𑀢𑀺. 𑀧𑀞𑀫𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀦𑁆𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀁 𑀤𑀲𑁆𑀲𑁂𑀢𑀺. 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀁 𑀧𑀜𑁆𑀜𑀸𑀧𑁂𑀲𑀻𑀢𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑀁, 𑀧𑀼𑀩𑁆𑀩𑁂 𑀧𑀜𑁆𑀜𑀢𑁆𑀢𑀫𑁆𑀧𑀺 𑀧𑀦 𑀧𑀸𑀭𑀸𑀚𑀺𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑀁 𑀪𑀕𑀯𑀸 ‘‘𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀯𑀺𑀦𑀬𑀫𑀸𑀢𑀺𑀓𑀁 𑀓𑀢𑁆𑀯𑀸 𑀦𑀺𑀤𑀸𑀦𑀼𑀤𑁆𑀤𑁂𑀲𑁂𑀦 𑀲𑀳 𑀲𑀬𑀫𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀧𑀜𑁆𑀜𑀸𑀧𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁩𑁩) 𑀯𑀼𑀢𑁆𑀢𑀁.

𑁧𑁩𑁬. 𑀏𑀢𑀁 𑁩𑁪 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀺𑀁 𑀢𑀲𑁆𑀫𑀺𑀁 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸𑀢𑀺 𑀏𑀯𑀁 𑀅𑀢𑁆𑀣𑀚𑀸𑀢𑀁.

𑀲𑀦𑁆𑀦𑀺𑀧𑀸𑀢𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁩𑁮. ‘‘𑀧𑀼𑀭𑀢𑁆𑀣𑀺𑀫𑀸𑀬 ¶ 𑀤𑀺𑀲𑀸𑀬𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑀲𑁆𑀲𑀁 𑀧𑀦 𑀤𑀺𑀲𑀸𑀬𑀁 𑀦𑀺𑀫𑀺𑀢𑁆𑀢𑁂 𑀅𑀲𑀢𑀺 𑀬𑀢𑁆𑀣 𑀅𑀢𑁆𑀣𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀞𑀫𑀁 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀫𑀦𑁆𑀢𑀸 𑀯𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬𑀸’’𑀢𑀺 𑀧𑀞𑀫𑀓𑀺𑀢𑁆𑀢𑀺𑀢𑀁 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀬𑀧𑀺 𑀲𑀻𑀫𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀢𑁄. 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀫𑀸𑀫𑀡𑁆𑀟𑀮𑀁 𑀲𑀫𑁆𑀩𑀦𑁆𑀥𑀦𑁆𑀢𑁂𑀦𑀸𑀢𑀺 𑀯𑀺𑀦𑀬𑀥𑀭𑁂𑀦 𑀲𑀬𑀁 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀢𑁆𑀯𑀸 𑀓𑁂𑀯𑀮𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀯𑀘𑀦𑁂𑀦𑁂𑀯 𑀲𑀻𑀫𑀸𑀫𑀡𑁆𑀟𑀮𑀁 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀩𑀦𑁆𑀥𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀁 𑀅𑀕𑀦𑁆𑀢𑁆𑀯𑀸𑀧𑀺 𑀳𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀺𑀬𑁄𑀚𑀦𑀧𑀭𑀫𑀸𑀬 𑀲𑀻𑀫𑀸𑀬 𑀲𑀫𑀦𑁆𑀢𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀕𑀫𑀦𑀲𑁆𑀲 𑀏𑀓𑀤𑀺𑀯𑀲𑁂𑀦 𑀤𑀼𑀓𑁆𑀓𑀭𑀢𑁆𑀢𑀸 𑀯𑀺𑀦𑀬𑀥𑀭𑁂𑀦 𑀲𑀬𑀁 𑀅𑀤𑀺𑀝𑁆𑀞𑀫𑁆𑀧𑀺 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽𑀳𑀺 𑀬𑀣𑀸𑀯𑀯𑀢𑁆𑀣𑀺𑀢𑀁 𑀦𑀺𑀫𑀺𑀢𑁆𑀢𑀁 ‘‘𑀧𑀸𑀲𑀸𑀡𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀓𑁂𑀦𑀘𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯.

𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑁄𑀢𑀺 𑀦 𑀓𑁂𑀦𑀘𑀺 𑀓𑀢𑁄 𑀲𑀬𑀁𑀚𑀸𑀢𑁄𑀯 𑀯𑀼𑀢𑁆𑀢𑁄. 𑀢𑀣𑀸 𑀲𑁂𑀲𑀸𑀧𑀺. 𑀇𑀢𑀭𑁄𑀧𑀻𑀢𑀺 𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑀸𑀤𑀺𑀓𑁄𑀧𑀺 𑀧𑀩𑁆𑀩𑀢𑁄. 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄𑀢𑀺 𑀏𑀢𑁆𑀣 𑀪𑀽𑀫𑀺𑀢𑁄 𑀉𑀕𑁆𑀕𑀢𑀧𑁆𑀧𑀤𑁂𑀲𑁂𑀦 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀕𑀳𑁂𑀢𑀩𑁆𑀩𑀁. 𑀘𑀢𑀽𑀳𑀺 𑀯𑀸 𑀢𑀻𑀳𑀺 𑀯𑀸𑀢𑀺 𑀲𑀻𑀫𑀸𑀪𑀽𑀫𑀺𑀬𑀁 𑀘𑀢𑀽𑀲𑀼, 𑀢𑀻𑀲𑀼 𑀯𑀸 𑀤𑀺𑀲𑀸𑀲𑀼 𑀞𑀺𑀢𑁂𑀳𑀺. 𑀏𑀓𑀺𑀲𑁆𑀲𑀸 𑀏𑀯 𑀧𑀦 𑀤𑀺𑀲𑀸𑀬 𑀞𑀺𑀢𑁂𑀳𑀺 𑀢𑀢𑁄 𑀩𑀳𑀽𑀳𑀺𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑁆𑀯𑀻𑀳𑀺 𑀧𑀦 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀞𑀺𑀢𑁂𑀳𑀺𑀧𑀺 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑁂𑀦 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸. 𑀢𑀁 𑀩𑀳𑀺𑀤𑁆𑀥𑀸 𑀓𑀢𑁆𑀯𑀸𑀢𑀺 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀅𑀲𑀻𑀫𑀢𑁆𑀢𑀸 𑀅𑀦𑁆𑀢𑁄𑀲𑀻𑀫𑀸𑀬 𑀓𑀭𑀡𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀘𑁂’’𑀢𑀺𑀆𑀤𑀺.

𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑀢𑀸 𑀲𑀡𑁆𑀞𑀸𑀦𑀢𑁄 𑀕𑀳𑁂𑀢𑀩𑁆𑀩𑀸, 𑀦 𑀢𑀼𑀮𑀕𑀡𑀦𑀸𑀯𑀲𑁂𑀦, 𑀪𑀸𑀭𑀢𑁄 𑀧𑀮𑀧𑀭𑀺𑀫𑀸𑀡𑀜𑁆𑀘 𑀫𑀕𑀥𑀢𑀼𑀮𑀸𑀬 𑀕𑀳𑁂𑀢𑀩𑁆𑀩𑀁. 𑀲𑀸 𑀘 𑀮𑁄𑀓𑀺𑀬𑀢𑀼𑀮𑀸𑀬 𑀤𑁆𑀯𑀺𑀕𑀼𑀡𑀸𑀢𑀺 𑀯𑀤𑀦𑁆𑀢𑀺. 𑀅𑀢𑀺𑀫𑀳𑀦𑁆𑀢𑁄𑀧𑀻𑀢𑀺 𑀪𑀽𑀫𑀺𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀅𑀦𑀼𑀕𑁆𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀑𑀢𑀺𑀡𑁆𑀡𑀖𑀦𑀢𑁄 𑀅𑀦𑁂𑀓𑀬𑁄𑀚𑀦𑀧𑁆𑀧𑀫𑀸𑀡𑁄𑀧𑀺. 𑀲𑀘𑁂 𑀳𑀺 𑀢𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀓𑀽𑀝𑀁 𑀉𑀕𑁆𑀕𑀘𑁆𑀙𑀢𑀺, 𑀧𑀩𑁆𑀩𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.

𑀅𑀦𑁆𑀢𑁄𑀲𑀸𑀭𑀸𑀦𑀦𑁆𑀢𑀺 ¶ 𑀢𑀲𑁆𑀫𑀺𑀁 𑀔𑀡𑁂 𑀢𑀭𑀼𑀡𑀢𑀸𑀬 𑀲𑀸𑀭𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑀺𑀡𑀸𑀫𑁂𑀦 𑀪𑀯𑀺𑀲𑁆𑀲𑀫𑀸𑀦𑀲𑀸𑀭𑁂𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑀧𑀭𑀺𑀡𑀸𑀳𑀸𑀦𑀁 𑀘𑀢𑀼𑀧𑀜𑁆𑀘𑀫𑀢𑁆𑀢𑀫𑁆𑀧𑀺 𑀯𑀦𑀁 𑀯𑀝𑁆𑀝𑀢𑀺. 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑀸𑀦𑀦𑁆𑀢𑀺 𑀅𑀦𑁆𑀢𑁄𑀲𑀸𑀭𑁂𑀳𑀺 ¶ 𑀭𑀼𑀓𑁆𑀔𑁂𑀳𑀺 𑀲𑀫𑁆𑀫𑀺𑀲𑁆𑀲𑀸𑀦𑀁. 𑀏𑀢𑁂𑀦 𑀘 𑀲𑀸𑀭𑀭𑀼𑀓𑁆𑀔𑀫𑀺𑀲𑁆𑀲𑀫𑁆𑀧𑀺 𑀯𑀦𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀫𑁆𑀧𑀻𑀢𑀺 𑀲𑀸𑀭𑀭𑀼𑀓𑁆𑀔𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀭𑀼𑀓𑁆𑀔𑀖𑀝𑀸𑀬 𑀅𑀦𑁆𑀢𑀭𑁂 𑀭𑀼𑀓𑁆𑀔𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑀺𑀆𑀤𑀻𑀳𑀺 𑀯𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀯 𑀅𑀦𑁆𑀢𑁄𑀭𑀼𑀓𑁆𑀔𑀦𑁆𑀢𑀭𑁂𑀲𑀼 𑀏𑀯 𑀧𑀭𑀺𑀯𑁂𑀡𑀧𑀡𑁆𑀡𑀲𑀸𑀮𑀸𑀤𑀻𑀦𑀁 𑀓𑀭𑀡𑀯𑀲𑁂𑀦 𑀬𑀣𑀸 𑀅𑀦𑁆𑀢𑁄𑀯𑀺𑀳𑀸𑀭𑀫𑁆𑀧𑀺 𑀯𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀲𑀩𑁆𑀩𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀁, 𑀯𑀺𑀳𑀸𑀭𑀲𑁆𑀲 𑀅𑀯𑀦𑀢𑁆𑀢𑀸 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁 𑀯𑀦𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑀩𑁆𑀩𑀁 𑀲𑀺𑀬𑀸. 𑀇𑀥 𑀧𑀦 𑀅𑀦𑁆𑀢𑁄𑀧𑀺 𑀯𑀦𑀢𑁆𑀢𑀸 ‘‘𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀳𑀺 𑀢𑀁 𑀓𑀺𑀢𑁆𑀢𑁂𑀦𑁆𑀢𑀺, ‘‘𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀤𑁄𑀲𑀁 𑀆𑀧𑀚𑁆𑀚𑀢𑀺. 𑀏𑀓𑀤𑁂𑀲𑀦𑁆𑀢𑀺 𑀯𑀦𑁂𑀓𑀤𑁂𑀲𑀁, 𑀭𑀼𑀓𑁆𑀔𑀯𑀺𑀭𑀳𑀺𑀢𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑀲𑁆𑀲 𑀏𑀓𑀧𑀲𑁆𑀲𑁂 𑀞𑀺𑀢𑀯𑀦𑀲𑁆𑀲 𑀏𑀓𑀤𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄𑀢𑀺 𑀯𑀁𑀲𑀤𑀡𑁆𑀟𑀧𑁆𑀧𑀫𑀸𑀡𑁄. 𑀮𑁂𑀔𑀦𑀺𑀤𑀡𑁆𑀟𑀧𑁆𑀧𑀫𑀸𑀡𑁄𑀢𑀺 𑀓𑁂𑀘𑀺. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀦 𑀅𑀯𑁂𑀪𑀗𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑁂 ‘‘𑀬𑁄 𑀓𑁄𑀘𑀺 𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀓𑀫𑀢𑁆𑀢𑁄𑀧𑀺 𑀯𑁂𑀴𑀼…𑀧𑁂… 𑀕𑀭𑀼𑀪𑀡𑁆𑀟’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀩𑁆𑀩𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀢𑀦𑀼𑀢𑀭𑁄 𑀯𑁂𑀴𑀼𑀤𑀡𑁆𑀟𑁄𑀢𑀺 𑀘 𑀲𑀽𑀘𑀺𑀤𑀡𑁆𑀟𑁄𑀢𑀺 𑀘 𑀕𑀳𑁂𑀢𑀩𑁆𑀩𑀁. 𑀯𑀁𑀲𑀦𑀴𑀓𑀲𑀭𑀸𑀯𑀸𑀤𑀻𑀲𑀽𑀢𑀺 𑀯𑁂𑀴𑀼𑀧𑀩𑁆𑀩𑁂 𑀯𑀸 𑀦𑀴𑀧𑀩𑁆𑀩𑁂 𑀯𑀸 𑀓𑀧𑀮𑁆𑀮𑀓𑀸𑀤𑀺𑀫𑀢𑁆𑀢𑀺𑀓𑀪𑀸𑀚𑀦𑁂𑀲𑀼 𑀯𑀸𑀢𑀺 𑀅𑀢𑁆𑀣𑁄. 𑀢𑀗𑁆𑀔𑀡𑀫𑁆𑀧𑀻𑀢𑀺 𑀢𑀭𑀼𑀡𑀧𑁄𑀢𑀓𑁂 𑀅𑀫𑀺𑀮𑀸𑀬𑀺𑀢𑁆𑀯𑀸 𑀯𑀺𑀭𑀼𑀳𑀦𑀚𑀸𑀢𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀧𑀦 𑀧𑀭𑀺𑀡𑀢𑀸 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑁄𑀧𑀺𑀢𑀸𑀧𑀺 𑀙𑀺𑀦𑁆𑀦𑀲𑀸𑀔𑀸 𑀯𑀺𑀬 𑀫𑀺𑀮𑀸𑀬𑀺𑀢𑁆𑀯𑀸 𑀘𑀺𑀭𑁂𑀦 𑀦𑀯𑀫𑀽𑀮𑀗𑁆𑀓𑀼𑀭𑀼𑀧𑁆𑀧𑀢𑁆𑀢𑀺𑀬𑀸 𑀚𑀻𑀯𑀦𑁆𑀢𑀺, 𑀫𑀻𑀬𑀦𑁆𑀢𑀺𑀬𑁂𑀯 𑀯𑀸, 𑀢𑀸𑀤𑀺𑀲𑁂 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀢𑀦𑁆𑀢𑀺 𑀦𑀯𑀫𑀽𑀮𑀲𑀸𑀔𑀸𑀦𑀺𑀕𑁆𑀕𑀫𑀦𑀁.

𑀫𑀚𑁆𑀛𑁂𑀢𑀺 𑀲𑀻𑀫𑀸𑀬 𑀫𑀳𑀸𑀤𑀺𑀲𑀸𑀦𑀁 𑀅𑀦𑁆𑀢𑁄. 𑀓𑁄𑀡𑀦𑁆𑀢𑀺 𑀲𑀻𑀫𑀸𑀬 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁. 𑀧𑀭𑀪𑀸𑀕𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀓𑁄𑀡𑀸𑀦𑀁 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁂𑀲𑀼 𑀫𑀕𑁆𑀕𑁂𑀲𑀼 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀏𑀓𑀁, 𑀅𑀜𑁆𑀜𑀺𑀲𑁆𑀲𑀸 𑀤𑀺𑀲𑀸𑀬 𑀘𑀸𑀧𑀭𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀓𑀺𑀢𑁆𑀢𑀺𑀢𑀫𑀢𑁆𑀢𑁂𑀦 𑀓𑀣𑀁 𑀏𑀓𑀸𑀩𑀤𑁆𑀥𑀢𑀸 𑀯𑀺𑀕𑀘𑁆𑀙𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀧𑀭𑀢𑁄 𑀕𑀢𑀝𑁆𑀞𑀸𑀦𑁂𑀧𑀺 𑀏𑀢𑁂 𑀏𑀯 𑀢𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸. ‘‘𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀢𑁆𑀣 𑀓𑀸𑀭𑀡𑀁 𑀯𑀺𑀘𑀺𑀦𑀺𑀢𑀩𑁆𑀩𑀁.

‘‘𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀇𑀤𑀜𑁆𑀘 𑀧𑀸𑀴𑀺𑀬𑀁 (𑀧𑀸𑀘𑀺. 𑁬𑁯𑁨) 𑀪𑀺𑀓𑁆𑀔𑀼𑀦𑀻𑀦𑀁 𑀦𑀤𑀻𑀧𑀸𑀭𑀕𑀫𑀦𑁂 𑀦𑀤𑀺𑀮𑀓𑁆𑀔𑀡𑀲𑁆𑀲 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀯𑀸𑀲𑀓𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯 ¶ . ‘‘𑀦𑀤𑀺𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀭𑀢𑁄 𑀕𑀢𑀝𑁆𑀞𑀸𑀦𑁂𑀧𑀺 𑀓𑀺𑀢𑁆𑀢𑁂𑀢𑀼𑀁 ¶ 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀘 ‘‘𑀅𑀲𑁆𑀲𑀫𑁆𑀫𑀺𑀲𑁆𑀲𑀦𑀤𑀺𑀬𑁄 𑀘𑀢𑀲𑁆𑀲𑁄𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀲𑀫𑁆𑀫𑀺𑀲𑁆𑀲-𑀕𑁆𑀕𑀳𑀡𑀁 𑀓𑀢𑀁. 𑀫𑀽𑀮𑁂𑀢𑀺 𑀆𑀤𑀺𑀓𑀸𑀮𑁂. 𑀦𑀤𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀸 𑀉𑀤𑀓𑀁 𑀅𑀦𑀺𑀘𑁆𑀙𑀦𑁆𑀢𑁂𑀳𑀺 𑀓𑀲𑁆𑀲𑀓𑁂𑀳𑀺 𑀫𑀳𑁄𑀖𑁂 𑀦𑀺𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀦𑀤𑀺𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸.

𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀤𑀻𑀖𑀭𑀚𑁆𑀚𑀼𑀦𑀸 𑀓𑀼𑀝𑁂𑀦 𑀉𑀲𑁆𑀲𑀺𑀜𑁆𑀘𑀦𑀻𑀬𑀁.

𑀅𑀲𑀫𑁆𑀫𑀺𑀲𑁆𑀲𑁂𑀳𑀻𑀢𑀺 𑀲𑀩𑁆𑀩𑀤𑀺𑀲𑀸𑀲𑀼 𑀞𑀺𑀢𑀧𑀩𑁆𑀩𑀢𑁂𑀳𑀺 𑀏𑀯, 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀳𑀺 𑀯𑀸 𑀦𑀺𑀫𑀺𑀢𑁆𑀢𑀦𑁆𑀢𑀭𑀸𑀩𑁆𑀬𑀯𑀳𑀺𑀢𑁂𑀳𑀺. 𑀲𑀫𑁆𑀫𑀺𑀲𑁆𑀲𑁂𑀳𑀻𑀢𑀺 𑀏𑀓𑀢𑁆𑀣 𑀧𑀩𑁆𑀩𑀢𑁄, 𑀅𑀜𑁆𑀜𑀢𑁆𑀣 𑀧𑀸𑀲𑀸𑀡𑁄𑀢𑀺 𑀏𑀯𑀁 𑀞𑀺𑀢𑁂𑀳𑀺 𑀅𑀝𑁆𑀞𑀳𑀺𑀧𑀺. ‘‘𑀦𑀺𑀫𑀺𑀢𑁆𑀢𑀸𑀦𑀁 𑀲𑀢𑁂𑀦𑀸𑀧𑀻’’𑀢𑀺 𑀇𑀫𑀺𑀦𑀸 𑀏𑀓𑀺𑀲𑁆𑀲𑀸𑀬 𑀏𑀯 𑀤𑀺𑀲𑀸𑀬 𑀩𑀳𑀼𑀦𑀺𑀫𑀺𑀢𑁆𑀢𑀸𑀦𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀩𑁆𑀩𑀢𑁄 𑀪𑀦𑁆𑀢𑁂. 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀢𑀺 𑀢𑀺𑀓𑁄𑀡𑀸. 𑀘𑀢𑀼𑀭𑀲𑁆𑀲𑀸𑀢𑀺 𑀲𑀫𑀘𑀢𑀼𑀭𑀲𑁆𑀲𑀸, 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀸 𑀧𑀦 𑀆𑀬𑀢𑀘𑀢𑀼𑀭𑀲𑁆𑀲𑀸. 𑀏𑀓𑀓𑁄𑀝𑀺𑀬𑀁 𑀲𑀗𑁆𑀓𑁄𑀘𑀺𑀢𑀸, 𑀢𑀤𑀜𑁆𑀜𑀸𑀬 𑀯𑀺𑀢𑁆𑀣𑀺𑀡𑁆𑀡𑀸 𑀯𑀸 𑀳𑁄𑀢𑀻𑀢𑀺. 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀆𑀬𑀢𑀺𑀁 𑀩𑀦𑁆𑀥𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀦𑁂𑀲𑀁 𑀯𑀺𑀳𑀸𑀭𑀸𑀦𑀁 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑁆𑀧𑀳𑁄𑀦𑀓𑀁 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸. 𑀩𑀤𑁆𑀥𑀸 𑀲𑀻𑀫𑀸 𑀬𑁂𑀲𑀼 𑀯𑀺𑀳𑀸𑀭𑁂𑀲𑀼, 𑀢𑁂 𑀩𑀤𑁆𑀥𑀲𑀻𑀫𑀸. 𑀧𑀸𑀝𑁂𑀓𑁆𑀓𑀦𑁆𑀢𑀺 𑀧𑀘𑁆𑀘𑁂𑀓𑀁. 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀦𑀻𑀢𑀺 𑀬𑀣𑀸 𑀩𑀤𑁆𑀥𑀲𑀻𑀫𑀸𑀲𑀼 𑀞𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀙𑀦𑁆𑀤𑀸𑀤𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀮𑀪𑀦𑁆𑀢𑀺, 𑀏𑀯𑀁 𑀕𑀸𑀫𑀲𑀻𑀫𑀸𑀲𑀼 𑀞𑀺𑀢𑀸𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀸𑀫𑀻𑀘𑀺𑀫𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀕𑀫𑀦𑀫𑁆𑀧𑀻’’𑀢𑀺𑀆𑀤𑀺.

𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀪𑀡𑁆𑀟𑀼𑀓𑀫𑁆𑀫𑀸𑀧𑀼𑀘𑁆𑀙𑀦𑀁 𑀲𑀦𑁆𑀥𑀸𑀬 𑀧𑀩𑁆𑀩𑀚𑁆𑀚𑀸𑀕𑀳𑀡𑀁. 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽𑀢𑀺 𑀦𑀺𑀲𑀺𑀦𑁆𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀓𑀫𑁆𑀫𑀸𑀭𑀳𑁂𑀦 𑀲𑀳 𑀅𑀩𑁆𑀪𑀸𑀦𑀓𑀸𑀭𑀓𑀸𑀦𑀫𑁆𑀧𑀺 𑀧𑀳𑁄𑀦𑀓𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀦𑀺𑀫𑀺𑀢𑁆𑀢𑀼𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸’’𑀢𑀺 𑀇𑀤𑀁 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀤𑀼𑀮𑁆𑀮𑀪𑀢𑀸𑀬 𑀯𑀟𑁆𑀠𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀗𑁆𑀓𑀭𑀓𑀭𑀡𑀢𑁄 𑀘 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀦𑁂𑀢𑁆𑀯𑀸 𑀞𑀧𑁂𑀢𑀼𑀁 𑀲𑀼𑀓𑀭𑀢𑀸𑀬 𑀘 𑀯𑀼𑀢𑁆𑀢𑀁. 𑀢𑀣𑀸 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸𑀢𑀺 𑀏𑀢𑁆𑀣𑀸𑀧𑀺. 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀧𑀻𑀢𑀺 𑀬𑀣𑀸 𑀔𑀦𑁆𑀥𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸𑀦𑀁 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀝𑁆𑀞𑀸𑀦𑀁 𑀲𑀫𑀦𑁆𑀢𑀸 𑀦𑀺𑀕𑀘𑁆𑀙𑀢𑀺, 𑀅𑀯𑀲𑁂𑀲𑀁 𑀞𑀸𑀦𑀁 𑀅𑀦𑁆𑀢𑁄𑀔𑀦𑁆𑀥𑀲𑀻𑀫𑀸𑀬 𑀳𑁄𑀢𑀺𑀬𑁂𑀯, 𑀏𑀯𑀁 𑀢𑁂𑀲𑀼𑀧𑀺 𑀞𑀧𑀺𑀢𑁂𑀲𑀼 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸 𑀲𑀻𑀫𑀦𑁆𑀢𑀭𑀺𑀓𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸𑀢𑀺 ¶ 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀧𑀺𑀢𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸. 𑀢𑁂 𑀧𑀦 𑀓𑀺𑀢𑁆𑀢𑁂𑀦𑁆𑀢𑁂𑀦 𑀧𑀤𑀓𑁆𑀔𑀺𑀡𑀢𑁄 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦𑁂𑀯 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀓𑀣𑀁? 𑀔𑀡𑁆𑀟𑀲𑀻𑀫𑀢𑁄 𑀳𑀺 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 ¶ 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 𑀧𑀼𑀭𑀺𑀫𑀓𑀺𑀢𑁆𑀢𑀺𑀢𑀁 𑀯𑀼𑀢𑁆𑀢𑀦𑀬𑁂𑀦 𑀧𑀼𑀦 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀯𑀁 𑀩𑀳𑀽𑀦𑀫𑁆𑀧𑀺 𑀔𑀡𑁆𑀟𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀧𑀘𑁆𑀘𑁂𑀓𑀁 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀢𑀢𑁄𑀢𑀺 𑀧𑀘𑁆𑀙𑀸. 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀫𑀳𑀸𑀲𑀻𑀫𑀸𑀬 𑀩𑀸𑀳𑀺𑀭𑀦𑁆𑀢𑀭𑁂𑀲𑀼 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑁂𑀦𑁆𑀢𑀻𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺.

𑀓𑀼𑀝𑀺𑀕𑁂𑀳𑁂𑀢𑀺 𑀪𑀽𑀫𑀺𑀬𑀁 𑀓𑀢𑀢𑀺𑀡𑀓𑀼𑀝𑀺𑀬𑀁. 𑀉𑀤𑀼𑀓𑁆𑀔𑀮𑀦𑁆𑀢𑀺 𑀉𑀤𑀼𑀓𑁆𑀔𑀮𑀸𑀯𑀸𑀝𑀲𑀤𑀺𑀲𑀔𑀼𑀤𑁆𑀤𑀓𑀸𑀯𑀸𑀝𑀁. 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀢𑀁 𑀭𑀸𑀚𑀺𑀁 𑀯𑀸 𑀉𑀤𑀼𑀓𑁆𑀔𑀮𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀅𑀦𑀸𑀕𑀢𑀢𑁆𑀢𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀫𑁆𑀧𑀺 𑀅𑀯𑀺𑀦𑀲𑁆𑀲𑀓𑀲𑀜𑁆𑀜𑀸𑀬 𑀓𑁄𑀘𑀺 𑀫𑁄𑀳𑁂𑀦 𑀦𑀺𑀫𑀺𑀢𑁆𑀢𑀁 𑀓𑀭𑁂𑀬𑁆𑀬𑀸𑀢𑀺 𑀤𑀽𑀭𑀢𑁄𑀧𑀺 𑀯𑀺𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀁 𑀉𑀧𑀭𑀺 ‘‘𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑀦𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀫𑀸𑀯𑀺𑀧𑀢𑁆𑀢𑀺 𑀳𑀺 𑀉𑀧𑀲𑀫𑁆𑀧𑀤𑀸𑀤𑀺𑀲𑀩𑁆𑀩𑀓𑀫𑁆𑀫𑀯𑀺𑀧𑀢𑁆𑀢𑀺𑀫𑀽𑀮𑀦𑁆𑀢𑀺 𑀢𑀲𑁆𑀲𑀸 𑀲𑀩𑁆𑀩𑀁 𑀤𑁆𑀯𑀸𑀭𑀁 𑀲𑀩𑁆𑀩𑀣𑀸 𑀧𑀺𑀤𑀳𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀁 𑀯𑀢𑁆𑀯𑀸𑀯 𑀇𑀥 𑀆𑀘𑀭𑀺𑀬𑀸 𑀯𑀺𑀦𑀺𑀘𑁆𑀙𑀬𑀁 𑀞𑀧𑁂𑀲𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀺𑀢𑁆𑀢𑀺𑀦𑁆𑀢𑀺 𑀇𑀝𑁆𑀞𑀓𑀤𑀸𑀭𑀼𑀫𑀢𑁆𑀢𑀺𑀓𑀸𑀫𑀬𑀁. 𑀲𑀺𑀮𑀸𑀫𑀬𑀸𑀬 𑀧𑀦 𑀪𑀺𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀼𑀧𑀕𑀁 𑀏𑀓𑀁 𑀧𑀸𑀲𑀸𑀡𑀁 𑀢𑀁𑀢𑀁𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁂𑀓𑀲𑀺𑀮𑀸𑀳𑀺 𑀘𑀺𑀦𑀺𑀢𑀁 𑀲𑀓𑀮𑀪𑀺𑀢𑁆𑀢𑀺𑀁 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀓𑀯𑀘𑀦𑁂𑀦 𑀯𑀢𑁆𑀢𑀩𑁆𑀩𑀢𑁄. 𑀅𑀦𑁆𑀢𑁄𑀓𑀼𑀝𑁆𑀝𑀫𑁂𑀯𑀸𑀢𑀺 𑀏𑀢𑁆𑀣 𑀅𑀦𑁆𑀢𑁄𑀓𑀼𑀝𑁆𑀝𑁂𑀧𑀺 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑁄𑀓𑀸𑀲𑀢𑁄 𑀅𑀦𑁆𑀢𑁄 𑀏𑀯 𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀫𑀼𑀔𑁂 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸𑀢𑀺 𑀕𑀩𑁆𑀪𑀸𑀪𑀺𑀫𑀼𑀔𑁂𑀧𑀺 𑀩𑀳𑀺𑀧𑀫𑀼𑀔𑁂 𑀕𑀩𑁆𑀪𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑁂 𑀞𑀸𑀦𑁂 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀕𑀩𑁆𑀪𑀧𑀫𑀼𑀔𑀸𑀦𑀁 𑀅𑀦𑁆𑀢𑀭𑁂 𑀞𑀺𑀢𑀓𑀼𑀝𑁆𑀝𑀫𑁆𑀧𑀺 𑀉𑀧𑀸𑀤𑀸𑀬 𑀅𑀦𑁆𑀢𑁄 𑀘 𑀩𑀳𑀺 𑀘 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑀸𑀯 𑀲𑀻𑀫𑀸 𑀳𑁄𑀢𑀺. 𑀩𑀳𑀻𑀢𑀺 𑀲𑀓𑀮𑀲𑁆𑀲 𑀓𑀼𑀝𑀺𑀕𑁂𑀳𑀲𑁆𑀲 𑀲𑀫𑀦𑁆𑀢𑀢𑁄 𑀩𑀳𑀺.

𑀅𑀦𑁆𑀢𑁄 ¶ 𑀘 𑀩𑀳𑀺 𑀘 𑀲𑀻𑀫𑀸 𑀳𑁄𑀢𑀻𑀢𑀺 𑀫𑀚𑁆𑀛𑁂 𑀞𑀺𑀢𑀪𑀺𑀢𑁆𑀢𑀺𑀬𑀸 𑀲𑀳 𑀘𑀢𑀼𑀭𑀲𑁆𑀲𑀲𑀻𑀫𑀸 𑀳𑁄𑀢𑀺.

‘‘𑀉𑀧𑀭𑀺𑀧𑀸𑀲𑀸𑀤𑁂𑀬𑁂𑀯 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀕𑀩𑁆𑀪𑀲𑁆𑀲 𑀘 𑀧𑀫𑀼𑀔𑀲𑁆𑀲 𑀘 𑀅𑀦𑁆𑀢𑀭𑀸 𑀞𑀺𑀢𑀪𑀺𑀢𑁆𑀢𑀺𑀬𑀸 𑀏𑀓𑀢𑁆𑀢𑀸 𑀢𑀢𑁆𑀣 𑀘 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀸𑀪𑀸𑀯𑁂𑀦 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺, 𑀉𑀧𑀭𑀺𑀪𑀺𑀢𑁆𑀢𑀺 𑀧𑀦 𑀲𑀻𑀫𑀝𑁆𑀞𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀺𑀫𑀢𑀮𑁂 𑀓𑀼𑀝𑁆𑀝𑁄𑀢𑀺 𑀳𑁂𑀝𑁆𑀞𑀺𑀫𑀢𑀮𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀺𑀢𑀓𑀼𑀝𑁆𑀝𑁄. 𑀲𑀘𑁂 𑀳𑀺 ¶ 𑀤𑁆𑀯𑀻𑀲𑀼, 𑀢𑀻𑀲𑀼 𑀯𑀸 𑀤𑀺𑀲𑀸𑀲𑀼 𑀏𑀯 𑀓𑀼𑀝𑁆𑀝𑁄 𑀢𑀺𑀝𑁆𑀞𑁂𑀬𑁆𑀬, 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀳𑁂𑀝𑁆𑀞𑀸𑀧𑀺 𑀑𑀢𑀭𑀢𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀪𑀺𑀢𑁆𑀢𑀻𑀦𑀁 𑀅𑀦𑁆𑀢𑁄 𑀪𑀺𑀢𑁆𑀢𑀻𑀳𑀺 𑀲𑀳 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀧𑀳𑁄𑀦𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀑𑀢𑀭𑀫𑀸𑀦𑀸 𑀘 𑀉𑀧𑀭𑀺𑀲𑀻𑀫𑀧𑁆𑀧𑀫𑀸𑀡𑁂𑀦 𑀑𑀢𑀭𑀢𑀺, 𑀘𑀢𑀼𑀦𑁆𑀦𑀁 𑀧𑀦 𑀪𑀺𑀢𑁆𑀢𑀻𑀦𑀁 𑀩𑀸𑀳𑀺𑀭𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂 𑀳𑁂𑀝𑁆𑀞𑀸𑀪𑀽𑀫𑀺𑀪𑀸𑀕𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀑𑀢𑀭𑀢𑀺. 𑀦 𑀧𑀦 𑀪𑀺𑀢𑁆𑀢𑀻𑀦𑀁 𑀩𑀳𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁. 𑀧𑀸𑀲𑀸𑀤𑀪𑀺𑀢𑁆𑀢𑀺𑀢𑁄𑀢𑀺 𑀉𑀧𑀭𑀺𑀢𑀮𑁂 𑀪𑀺𑀢𑁆𑀢𑀺𑀢𑁄. 𑀑𑀢𑀭𑀡𑀸𑀦𑁄𑀢𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀉𑀧𑀭𑀺𑀲𑀻𑀫𑀧𑁆𑀧𑀫𑀸𑀡𑀲𑁆𑀲 𑀅𑀦𑁆𑀢𑁄𑀕𑀥𑀸𑀦𑀁 𑀳𑁂𑀝𑁆𑀞𑀺𑀫𑀢𑀮𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀼𑀝𑁆𑀝𑀸𑀦𑀁 𑀢𑀼𑀮𑀸𑀭𑀼𑀓𑁆𑀔𑁂𑀳𑀺 𑀏𑀓𑀲𑀫𑁆𑀩𑀦𑁆𑀥𑀢𑀁 𑀢𑀤𑀦𑁆𑀢𑁄 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑀢𑀸𑀤𑀺𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀬𑁆𑀬𑀽𑀳𑀓𑀸𑀤𑀬𑁄 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑁄𑀓𑀸𑀲𑀢𑀸𑀬 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀲𑀻𑀫𑀸 𑀦 𑀳𑁄𑀦𑁆𑀢𑀺, 𑀩𑀤𑁆𑀥𑀸𑀬 𑀧𑀦 𑀲𑀻𑀫𑀸𑀬 𑀲𑀻𑀫𑀝𑁆𑀞𑀸𑀯 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀭𑀺𑀬𑀦𑁆𑀢𑀣𑀫𑁆𑀪𑀸𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀕𑀢𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀉𑀧𑀭𑀺𑀫𑀢𑀮𑁂𑀦 𑀲𑀫𑁆𑀩𑀤𑁆𑀥𑁄 𑀳𑁄𑀢𑀻’’𑀢𑀺 𑀇𑀤𑀁 𑀓𑀼𑀝𑁆𑀝𑀸𑀦𑀁 𑀅𑀦𑁆𑀢𑀭𑀸 𑀲𑀻𑀫𑀝𑁆𑀞𑀸𑀦𑀁 𑀣𑀫𑁆𑀪𑀸𑀦𑀁 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀪𑀯𑁂𑀬𑁆𑀬𑀼𑀁, 𑀓𑀼𑀝𑁆𑀝𑁂 𑀉𑀧𑀭𑀺𑀫𑀢𑀮𑁂𑀦 𑀅𑀲𑀫𑁆𑀩𑀦𑁆𑀥𑁂𑀧𑀺 𑀲𑀻𑀫𑀝𑁆𑀞𑀢𑁆𑀣𑀫𑁆𑀪𑀸𑀦𑀁 𑀉𑀧𑀭𑀺 𑀞𑀺𑀢𑁄 𑀧𑀸𑀲𑀸𑀤𑁄 𑀲𑀻𑀫𑀝𑁆𑀞𑁄𑀯 𑀳𑁄𑀢𑀺.

𑀲𑀘𑁂 𑀧𑀦 𑀩𑀳𑀽𑀦𑀁 𑀣𑀫𑁆𑀪𑀧𑀦𑁆𑀢𑀻𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀧𑀣𑀯𑀺𑀬𑀁 𑀲𑀩𑁆𑀩𑀩𑀸𑀳𑀺𑀭𑀸𑀬 𑀣𑀫𑁆𑀪𑀧𑀦𑁆𑀢𑀺𑀬𑀸 𑀅𑀦𑁆𑀢𑁄 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀻𑀫𑀸 𑀩𑀤𑁆𑀥𑀸 𑀳𑁄𑀢𑀺, 𑀏𑀢𑁆𑀣 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀬𑀁 𑀢𑀸𑀯 𑀲𑀻𑀫𑀝𑁆𑀞𑀢𑁆𑀣𑀫𑁆𑀪𑁂𑀳𑁂𑀯 𑀥𑀸𑀭𑀺𑀬𑀫𑀸𑀦𑀸𑀦𑀁 𑀢𑀼𑀮𑀸𑀦𑀁 𑀉𑀧𑀭𑀺𑀫𑀢𑀮𑀁, 𑀲𑀩𑁆𑀩𑀁 𑀢𑀁 𑀲𑀻𑀫𑀝𑁆𑀞𑀫𑁂𑀯, 𑀏𑀢𑁆𑀣 𑀯𑀺𑀯𑀸𑀤𑁄 𑀦𑀢𑁆𑀣𑀺. 𑀬𑀁 𑀧𑀦 𑀲𑀻𑀫𑀝𑁆𑀞𑀢𑁆𑀣𑀫𑁆𑀪𑀧𑀦𑁆𑀢𑀺𑀬𑀸, 𑀅𑀲𑀻𑀫𑀝𑁆𑀞𑀸𑀬 𑀩𑀸𑀳𑀺𑀭𑀢𑁆𑀣𑀫𑁆𑀪𑀧𑀦𑁆𑀢𑀺𑀬𑀸 𑀘 𑀲𑀫𑀥𑀼𑀭𑀁 𑀥𑀸𑀭𑀺𑀬𑀫𑀸𑀦𑀸𑀦𑀁 𑀢𑀼𑀮𑀸𑀦𑀁 𑀉𑀧𑀭𑀺𑀫𑀢𑀮𑀁, 𑀢𑀢𑁆𑀣 𑀉𑀧𑀟𑁆𑀠𑀁 𑀲𑀻𑀫𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀓𑀮𑀫𑁆𑀧𑀺 𑀕𑀸𑀫𑀲𑀻𑀫𑀸𑀢𑀺 𑀅𑀧𑀭𑁂. 𑀩𑀤𑁆𑀥𑀲𑀻𑀫𑀸 𑀏𑀯𑀸𑀢𑀺 𑀅𑀜𑁆𑀜𑁂. 𑀢𑀲𑁆𑀫𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀕𑀭𑀼𑀓𑁂 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀆𑀲𑀗𑁆𑀓𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀭𑀡𑀁 𑀯𑀸 𑀕𑀯𑁂𑀲𑀺𑀢𑁆𑀯𑀸 𑀢𑀤𑀦𑀼𑀕𑀼𑀡𑀁 𑀓𑀸𑀢𑀩𑁆𑀩𑀁.

𑀢𑀸𑀮𑀫𑀽𑀮𑀓𑀧𑀩𑁆𑀩𑀢𑁂𑀢𑀺 ¶ 𑀢𑀸𑀮𑀓𑁆𑀔𑀦𑁆𑀥𑀫𑀽𑀮𑀲𑀤𑀺𑀲𑁂 𑀳𑁂𑀝𑁆𑀞𑀸 𑀣𑀽𑀮𑁄 𑀳𑀼𑀢𑁆𑀯𑀸 𑀓𑀫𑁂𑀦 𑀓𑀺𑀲𑁄 𑀳𑀼𑀢𑁆𑀯𑀸 𑀉𑀕𑁆𑀕𑀢𑁄 𑀳𑀺 𑀢𑀸𑀮𑀲𑀤𑀺𑀲𑁄 𑀦𑀸𑀫 𑀳𑁄𑀢𑀺. 𑀯𑀺𑀢𑀸𑀦𑀲𑀡𑁆𑀞𑀸𑀦𑁄𑀢𑀺 𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑁄. 𑀧𑀡𑀯𑀲𑀡𑁆𑀞𑀸𑀦𑁄𑀢𑀺 𑀫𑀚𑁆𑀛𑁂 𑀢𑀦𑀼𑀓𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀯𑀺𑀢𑁆𑀣𑀺𑀡𑁆𑀡𑁄. 𑀳𑁂𑀝𑁆𑀞𑀸 𑀯𑀸 𑀫𑀚𑁆𑀛𑁂 𑀯𑀸𑀢𑀺 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀲𑁆𑀲 𑀳𑁂𑀝𑁆𑀞𑀸, 𑀧𑀡𑀯𑀲𑀡𑁆𑀞𑀸𑀦𑀲𑁆𑀲 𑀫𑀚𑁆𑀛𑁂.

𑀲𑀧𑁆𑀧𑀨𑀡𑀲𑀤𑀺𑀲𑁄 𑀧𑀩𑁆𑀩𑀢𑁄𑀢𑀺 𑀲𑀧𑁆𑀧𑀨𑀡𑁄 𑀯𑀺𑀬 𑀔𑀼𑀚𑁆𑀚𑁄, 𑀫𑀽𑀮𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀅𑀯𑀦𑀢𑀲𑀻𑀲𑁄𑀢𑀺 𑀅𑀢𑁆𑀣𑁄. 𑀆𑀓𑀸𑀲𑀧𑀩𑁆𑀪𑀸𑀭𑀦𑁆𑀢𑀺 𑀪𑀺𑀢𑁆𑀢𑀺𑀬𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀧𑀩𑁆𑀪𑀸𑀭𑀁. 𑀲𑀻𑀫𑀧𑁆𑀧𑀫𑀸𑀡𑁄𑀢𑀺 𑀅𑀦𑁆𑀢𑁄𑀆𑀓𑀸𑀲𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑁄. ‘‘𑀲𑁄 𑀘 𑀧𑀸𑀲𑀸𑀡𑁄 𑀲𑀻𑀫𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀈𑀤𑀺𑀲𑁂𑀳𑀺 𑀲𑀼𑀲𑀺𑀭𑀧𑀸𑀲𑀸𑀡𑀮𑁂𑀡𑀓𑀼𑀝𑁆𑀝𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂 𑀪𑀽𑀫𑀺𑀪𑀸𑀕𑁂 𑀏𑀯 𑀲𑀻𑀫𑀸 𑀧𑀢𑀺𑀝𑁆𑀞𑀸𑀢𑀺, 𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑁂. 𑀢𑁂 𑀧𑀦 𑀲𑀻𑀫𑀝𑁆𑀞𑀢𑁆𑀢𑀸 𑀲𑀻𑀫𑀸 𑀳𑁄𑀦𑁆𑀢𑀺, 𑀦 𑀲𑀭𑀽𑀧𑁂𑀦 𑀲𑀻𑀫𑀝𑁆𑀞𑀫𑀜𑁆𑀘𑀸𑀤𑀺 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀘𑁂 𑀧𑀦 𑀲𑁄 𑀲𑀼𑀲𑀺𑀭𑀧𑀸𑀲𑀸𑀡𑁄 ¶ 𑀪𑀽𑀫𑀺𑀁 𑀅𑀦𑀸𑀳𑀘𑁆𑀘 𑀆𑀓𑀸𑀲𑀕𑀢𑁄𑀯 𑀑𑀮𑀫𑁆𑀩𑀢𑀺, 𑀲𑀻𑀫𑀸 𑀦 𑀑𑀢𑀭𑀢𑀺. 𑀲𑀼𑀲𑀺𑀭𑀧𑀸𑀲𑀸𑀡𑀸 𑀧𑀦 𑀲𑀬𑀁 𑀲𑀻𑀫𑀸𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀻𑀫𑀸 𑀳𑁄𑀦𑁆𑀢𑀺. 𑀓𑀣𑀁 𑀧𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀭𑀳𑀺𑀢𑁂𑀳𑀺 𑀏𑀢𑁂𑀳𑀺 𑀲𑀼𑀲𑀺𑀭𑀧𑀸𑀲𑀸𑀡𑀸𑀤𑀻𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀇𑀤𑀁 𑀲𑀤𑁆𑀥𑀸𑀢𑀩𑁆𑀩𑀦𑁆𑀢𑀺? 𑀅𑀝𑁆𑀞𑀓𑀣𑀸𑀧𑀫𑀸𑀡𑀢𑁄.

𑀅𑀧𑀺𑀘𑁂𑀢𑁆𑀣 𑀲𑀼𑀲𑀺𑀭𑀧𑀸𑀲𑀸𑀡𑀪𑀺𑀢𑁆𑀢𑀺𑀅𑀦𑀼𑀲𑀸𑀭𑁂𑀦 𑀫𑀽𑀲𑀺𑀓𑀸𑀤𑀻𑀦𑀁 𑀯𑀺𑀬 𑀲𑀻𑀫𑀸𑀬 𑀳𑁂𑀝𑁆𑀞𑀺𑀫𑀢𑀮𑁂 𑀑𑀢𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀳𑁂𑀝𑁆𑀞𑀸 𑀧𑀦 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀩𑀳𑀮𑁂𑀳𑀺 𑀧𑀸𑀲𑀸𑀡𑀪𑀺𑀢𑁆𑀢𑀺𑀆𑀤𑀻𑀳𑀺𑀧𑀺 𑀉𑀧𑀭𑀺𑀫𑀢𑀮𑀁 𑀆𑀳𑀘𑁆𑀘 𑀞𑀺𑀢𑁂𑀳𑀺 𑀲𑀩𑁆𑀩𑀲𑁄, 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀲𑀢𑀺 𑀉𑀧𑀭𑀺 𑀩𑀚𑁆𑀛𑀫𑀸𑀦𑀸 𑀲𑀻𑀫𑀸 𑀢𑁂𑀳𑀺 𑀧𑀸𑀲𑀸𑀡𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑀸𑀬 𑀢𑀧𑁆𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀳𑁂𑀝𑁆𑀞𑀸𑀪𑀽𑀫𑀺𑀬𑀸𑀧𑀺 𑀉𑀧𑀭𑀺𑀫𑀢𑀮𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀧𑀢𑀺𑀝𑁆𑀞𑀸𑀢𑀺 𑀦𑀤𑀺𑀧𑀸𑀭𑀲𑀻𑀫𑀸 𑀯𑀺𑀬 𑀦𑀤𑀺𑀅𑀦𑁆𑀢𑀭𑀺𑀢𑁂𑀲𑀼 𑀉𑀪𑁄𑀲𑀼 𑀢𑀻𑀭𑁂𑀲𑀼, 𑀮𑁂𑀡𑀸𑀤𑀻𑀲𑀼 𑀅𑀧𑀦𑀻𑀢𑁂𑀲𑀼𑀧𑀺 𑀳𑁂𑀝𑁆𑀞𑀸 𑀑𑀢𑀺𑀡𑁆𑀡𑀸 𑀲𑀻𑀫𑀸 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀦 𑀯𑀺𑀕𑀘𑁆𑀙𑀢𑀺. 𑀧𑀞𑀫𑀁 𑀧𑀦 𑀉𑀧𑀭𑀺 𑀲𑀻𑀫𑀸𑀬 𑀩𑀤𑁆𑀥𑀸𑀬 𑀧𑀘𑁆𑀙𑀸 𑀮𑁂𑀡𑀸𑀤𑀻𑀲𑀼 𑀓𑀢𑁂𑀲𑀼𑀧𑀺 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀲𑀻𑀫𑀸 𑀑𑀢𑀭𑀢𑀺 𑀏𑀯. 𑀓𑁂𑀘𑀺 𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀏𑀯𑀁 𑀉𑀪𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀸 𑀘 𑀲𑀸 𑀲𑀻𑀫𑀸 𑀏𑀓𑀸𑀯 𑀳𑁄𑀢𑀺 𑀕𑁄𑀢𑁆𑀢𑀸𑀤𑀺𑀚𑀸𑀢𑀺 𑀯𑀺𑀬 𑀩𑁆𑀬𑀢𑁆𑀢𑀺𑀪𑁂𑀤𑁂𑀲𑀽𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀸 𑀏𑀯 𑀳𑀺 𑀩𑀤𑁆𑀥𑀲𑀻𑀫𑀸, 𑀅𑀩𑀤𑁆𑀥𑀲𑀻𑀫𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀓𑀢𑀺𑀦𑀺𑀲𑁆𑀲𑀬𑀪𑀽𑀢𑁂 𑀕𑀸𑀫𑀸𑀭𑀜𑁆𑀜𑀦𑀤𑀺𑀆𑀤𑀺𑀓𑁂 𑀔𑁂𑀢𑁆𑀢𑁂 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀲𑀩𑁆𑀩𑀢𑁆𑀣 𑀲𑀸𑀓𑀮𑁆𑀬𑁂𑀦 𑀏𑀓𑀲𑁆𑀫𑀺𑀁 𑀔𑀡𑁂 𑀩𑁆𑀬𑀸𑀧𑀺𑀦𑀻 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀢𑁂 𑀢𑁂 𑀦𑀺𑀲𑁆𑀲𑀬𑀪𑀽𑀢𑁂 𑀧𑀭𑀫𑀢𑁆𑀣𑀥𑀫𑁆𑀫𑁂, 𑀢𑀁 𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀫𑁆𑀧𑀺 𑀯𑀸 𑀉𑀧𑀸𑀤𑀸𑀬 𑀮𑁄𑀓𑀺𑀬𑁂𑀳𑀺, 𑀲𑀸𑀲𑀦𑀺𑀓𑁂𑀳𑀺 ¶ 𑀘 𑀬𑀣𑀸𑀭𑀳𑀁 𑀏𑀓𑀢𑁆𑀢𑁂𑀦 𑀧𑀜𑁆𑀜𑀢𑁆𑀢𑀢𑀸𑀬 𑀦𑀺𑀲𑁆𑀲𑀬𑁂𑀓𑀭𑀽𑀧𑀸 𑀏𑀯. 𑀢𑀣𑀸 𑀳𑀺 𑀏𑀓𑁄 𑀕𑀸𑀫𑁄 𑀅𑀭𑀜𑁆𑀜𑀁 𑀦𑀤𑀻 𑀚𑀸𑀢𑀲𑁆𑀲𑀭𑁄 𑀲𑀫𑀼𑀤𑁆𑀤𑁄𑀢𑀺 𑀏𑀯𑀁 𑀮𑁄𑀓𑁂,

‘‘𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 (𑀫𑀳𑀸𑀯. 𑁧𑁪𑁩). 𑀅𑀕𑀸𑀫𑀓𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸. 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 (𑀫𑀳𑀸𑀯. 𑁧𑁪𑁭) 𑁋

𑀆𑀤𑀺𑀦𑀸 𑀲𑀸𑀲𑀦𑁂 𑀘 𑀏𑀓𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀏𑀓𑀲𑁆𑀲 𑀅𑀦𑁂𑀓𑀥𑀫𑁆𑀫𑁂𑀲𑀼 𑀩𑁆𑀬𑀸𑀧𑀦𑀫𑀢𑁆𑀣𑀺. 𑀓𑀲𑀺𑀡𑁂𑀓𑀤𑁂𑀲𑀸𑀤𑀺𑀯𑀺𑀓𑀧𑁆𑀧𑀸𑀲𑀫𑀸𑀦𑀢𑀸𑀬 𑀏𑀓𑀢𑁆𑀢𑀳𑀸𑀦𑀺𑀢𑁄𑀢𑀺 𑀅𑀬𑀁 𑀦𑁄 𑀫𑀢𑀺.

𑀅𑀲𑁆𑀲 𑀳𑁂𑀝𑁆𑀞𑀸𑀢𑀺 𑀲𑀧𑁆𑀧𑀨𑀡𑀧𑀩𑁆𑀩𑀢𑀲𑁆𑀲 𑀳𑁂𑀝𑁆𑀞𑀸 𑀆𑀓𑀸𑀲𑀧𑀩𑁆𑀪𑀸𑀭𑁂. 𑀮𑁂𑀡𑀲𑁆𑀲𑀸𑀢𑀺 𑀮𑁂𑀡𑀜𑁆𑀘𑁂 𑀓𑀢𑀁, 𑀢𑀲𑁆𑀲 𑀮𑁂𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀧𑀼𑀦 𑀮𑁂𑀡𑀁 𑀧𑀜𑁆𑀘𑀳𑀺 𑀧𑀓𑀸𑀭𑁂𑀳𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀑𑀢𑀭𑀡𑀸𑀦𑁄𑀢𑀭𑀡𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀘𑁂 𑀧𑀦 𑀳𑁂𑀝𑁆𑀞𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀳𑁂𑀝𑁆𑀞𑀸’’𑀢𑀺 𑀇𑀫𑀲𑁆𑀲 ‘‘𑀮𑁂𑀡𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀳𑁂𑀝𑁆𑀞𑀸 𑀮𑁂𑀡𑀜𑁆𑀘 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀆𑀳 ‘‘𑀅𑀦𑁆𑀢𑁄’’𑀢𑀺, 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄, 𑀧𑀩𑁆𑀩𑀢𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀅𑀦𑁆𑀢𑁄-𑀲𑀤𑁆𑀤𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀲𑁂𑀲𑁂𑀢𑀼𑀁 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁 ¶ . 𑀧𑀩𑁆𑀩𑀢𑀧𑀸𑀤𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀑𑀭𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀲𑀻𑀫𑀸𑀦𑀺𑀲𑁆𑀲𑀬𑀁 𑀧𑀩𑁆𑀩𑀢𑀕𑁆𑀕𑀁 𑀲𑀦𑁆𑀥𑀸𑀬 ‘‘𑀧𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀩𑀳𑀺𑀮𑁂𑀡’’𑀦𑁆𑀢𑀺 𑀏𑀢𑁆𑀣 𑀩𑀳𑀺-𑀲𑀤𑁆𑀤𑀁 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀢𑁄’’𑀢𑀺 𑀆𑀳. 𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀏𑀢𑁆𑀣 𑀩𑀳𑀻𑀢𑀺 𑀧𑀩𑁆𑀩𑀢𑀧𑀸𑀤𑁂 𑀮𑁂𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀮𑁂𑀡𑀲𑁆𑀲 𑀩𑀳𑀺𑀪𑀽𑀢𑁂 𑀉𑀧𑀭𑀺𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄 𑀲𑀻𑀫𑀸𑀢𑀺 𑀮𑁂𑀡𑀲𑁆𑀲 𑀘 𑀧𑀩𑁆𑀩𑀢𑀧𑀸𑀤𑀲𑁆𑀲 𑀘 𑀅𑀦𑁆𑀢𑁄 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. ‘‘𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺, 𑀅𑀦𑁆𑀢𑁄 𑀲𑀻𑀫𑀸 𑀦 𑀑𑀢𑀭𑀢𑀻’’𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀮𑁂𑀡𑀸𑀪𑀸𑀯𑁂𑀦 𑀲𑀻𑀫𑀸𑀬 𑀲𑀩𑁆𑀩𑀣𑀸 𑀅𑀦𑁄𑀢𑀭𑀡𑀫𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣𑀸𑀧𑀺 𑀅𑀦𑁄𑀢𑀭𑀦𑁆𑀢𑀻 𑀉𑀧𑀭𑀺 𑀏𑀯 𑀳𑁄𑀢𑀻𑀢𑀺. ‘‘𑀩𑀳𑀺 𑀧𑀢𑀺𑀢𑀁 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 𑀉𑀧𑀭𑀺𑀧𑀸𑀲𑀸𑀤𑀸𑀤𑀻𑀲𑀼 𑀅𑀣𑀺𑀭𑀦𑀺𑀲𑁆𑀲𑀬𑁂𑀲𑀼 𑀞𑀺𑀢𑀸 𑀲𑀻𑀫𑀸𑀧𑀺 𑀢𑁂𑀲𑀁 𑀯𑀺𑀦𑀸𑀲𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑁄𑀓𑁆𑀔𑀭𑀡𑀺𑀁 ¶ 𑀔𑀡𑀦𑁆𑀢𑀺, 𑀲𑀻𑀫𑀸𑀬𑁂𑀯𑀸𑀢𑀺 𑀏𑀢𑁆𑀣 𑀲𑀘𑁂 𑀳𑁂𑀝𑁆𑀞𑀸 𑀉𑀫𑀗𑁆𑀕𑀦𑀤𑀺𑀲𑀻𑀫𑀧𑁆𑀧𑀫𑀸𑀡𑀢𑁄 𑀅𑀦𑀽𑀦𑀸 𑀧𑀞𑀫𑀫𑁂𑀯 𑀘 𑀧𑀯𑀢𑁆𑀢𑀸 𑀳𑁄𑀢𑀺. 𑀲𑀻𑀫𑀸 𑀘 𑀧𑀘𑁆𑀙𑀸 𑀩𑀤𑁆𑀥𑀸 𑀦𑀤𑀺𑀢𑁄 𑀉𑀧𑀭𑀺 𑀏𑀯 𑀳𑁄𑀢𑀺, 𑀦𑀤𑀺𑀁 𑀆𑀳𑀘𑁆𑀘 𑀧𑁄𑀓𑁆𑀔𑀭𑀡𑀺𑀬𑀸 𑀘 𑀔𑀢𑀸𑀬 𑀲𑀻𑀫𑀸 𑀯𑀺𑀦𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀸𑀧𑀣𑀯𑀺𑀢𑀮𑁂𑀢𑀺 𑀅𑀦𑁆𑀢𑀭𑀸 𑀪𑀽𑀫𑀺𑀯𑀺𑀯𑀭𑁂.

𑀲𑀻𑀫𑀸𑀫𑀸𑀴𑀓𑁂𑀢𑀺 𑀔𑀡𑁆𑀟𑀲𑀻𑀫𑀗𑁆𑀕𑀡𑁂. ‘‘𑀯𑀝𑀭𑀼𑀓𑁆𑀔𑁄’’𑀢𑀺 𑀇𑀤𑀁 𑀧𑀸𑀭𑁄𑀳𑁄𑀧𑀢𑁆𑀣𑀫𑁆𑀪𑁂𑀦 𑀅𑀢𑀺𑀤𑀽𑀭𑀫𑁆𑀧𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑀲𑀸𑀔𑀸𑀲𑀫𑀗𑁆𑀕𑀺𑀢𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀭𑀼𑀓𑁆𑀔𑀮𑀢𑀸𑀤𑀻𑀦𑀫𑁆𑀧𑀺 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺 𑀏𑀯. 𑀢𑁂𑀦𑁂𑀯 𑀦𑀸𑀯𑀸𑀭𑀚𑁆𑀚𑀼𑀲𑁂𑀢𑀼𑀲𑀫𑁆𑀩𑀦𑁆𑀥𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀢𑁄𑀢𑀺 𑀲𑀸𑀔𑀢𑁄. 𑀫𑀳𑀸𑀲𑀻𑀫𑀸𑀬 𑀧𑀣𑀯𑀺𑀢𑀮𑀦𑁆𑀢𑀺 𑀏𑀢𑁆𑀣 𑀆𑀲𑀦𑁆𑀦𑀢𑀭𑀫𑁆𑀧𑀺 𑀕𑀸𑀫𑀲𑀻𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀩𑀤𑁆𑀥𑀲𑀻𑀫𑀸𑀬 𑀏𑀯 𑀕𑀳𑀺𑀢𑀢𑁆𑀢𑀸 𑀕𑀸𑀫𑀲𑀻𑀫𑀸𑀩𑀤𑁆𑀥𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀢𑀸𑀲𑀫𑁆𑀧𑀺 𑀲𑀫𑁆𑀩𑀦𑁆𑀥𑀤𑁄𑀲𑁄 𑀪𑀯𑁂𑀬𑁆𑀬, 𑀓𑀣𑀁 𑀕𑀸𑀫𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸 𑀲𑀺𑀬𑀸? 𑀬𑀲𑁆𑀲𑀸 𑀳𑀺 𑀲𑀻𑀫𑀸𑀬 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁂 𑀤𑁄𑀲𑁄 𑀪𑀯𑁂𑀬𑁆𑀬, 𑀲𑀸 𑀢𑀢𑁆𑀣 𑀩𑀦𑁆𑀥𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺, 𑀩𑀤𑁆𑀥𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀩𑀤𑁆𑀥𑀲𑀻𑀫𑀸 𑀯𑀺𑀬, 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀲𑀻𑀫𑀸𑀤𑀻𑀲𑀼 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀯𑀺𑀬 𑀘. 𑀢𑁂𑀦𑁂𑀯 ‘‘𑀲𑀘𑁂 𑀧𑀦 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑀧𑀸𑀭𑁄𑀳𑁄 𑀯𑀸 𑀩𑀳𑀺𑀦𑀤𑀺𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀢𑁆𑀢𑀦𑁄 𑀅𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀲𑀻𑀫𑀸𑀤𑀻𑀳𑀺 𑀏𑀯 𑀲𑀫𑁆𑀩𑀦𑁆𑀥𑀤𑁄𑀲𑁄 𑀤𑀲𑁆𑀲𑀺𑀢𑁄, 𑀦 𑀦𑀤𑀺𑀲𑀻𑀫𑀸𑀬𑀁. 𑀏𑀯𑀫𑀺𑀥𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘𑀢𑁆𑀣𑁄 𑀉𑀧𑀭𑀺 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀆𑀳𑀘𑁆𑀘𑀸𑀢𑀺 𑀨𑀼𑀲𑀺𑀢𑁆𑀯𑀸.

𑀫𑀳𑀸𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀫𑀳𑀸𑀲𑀻𑀫𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀓𑀭𑀡𑀸𑀤𑀺𑀯𑀲𑁂𑀦 ¶ 𑀲𑀓𑀮𑀁 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸. 𑀏𑀢𑁂𑀦 𑀲𑀩𑁆𑀩𑀯𑀺𑀧𑀢𑁆𑀢𑀺𑀬𑁄 𑀫𑁄𑀘𑁂𑀢𑁆𑀯𑀸 𑀧𑀼𑀩𑁆𑀩𑁂 𑀲𑀼𑀝𑁆𑀞𑀼 𑀩𑀤𑁆𑀥𑀸𑀦𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀧𑀘𑁆𑀙𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀦 𑀉𑀧𑁆𑀧𑀚𑁆𑀚𑀦𑀓𑁄 𑀈𑀤𑀺𑀲𑁄 𑀧𑀸𑀴𑀺𑀫𑀼𑀢𑁆𑀢𑀓𑁄 𑀲𑀫𑁆𑀪𑁂𑀤𑀤𑁄𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘 ‘‘𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀲𑀻𑀫𑀸 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀩𑀤𑁆𑀥𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀉𑀪𑀺𑀦𑁆𑀦𑀁 (𑀫𑀳𑀸𑀯. 𑁧𑁪𑁮) 𑀩𑀤𑁆𑀥𑀲𑀻𑀫𑀸𑀦𑀫𑀦𑁆𑀢𑀭𑀸 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸𑀯 𑀩𑀦𑁆𑀥𑀺𑀢𑀼𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀦𑀯𑀲𑁂𑀦 𑀩𑀦𑁆𑀥𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 𑀩𑀤𑁆𑀥𑀸𑀦𑀫𑁆𑀧𑀺 𑀢𑀸𑀲𑀁 𑀧𑀘𑁆𑀙𑀸 𑀅𑀜𑁆𑀜𑀫𑀜𑁆𑀜𑀁 𑀏𑀓𑀭𑀼𑀓𑁆𑀔𑀸𑀤𑀻𑀳𑀺 ¶ 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀦𑀺𑀤𑁆𑀥𑀸𑀭𑀺𑀢𑁄. 𑀩𑀦𑁆𑀥𑀦𑀓𑀸𑀮𑁂 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀫𑁆𑀩𑀦𑁆𑀥𑀤𑁄𑀲𑀲𑁆𑀲 𑀅𑀦𑀼𑀮𑁄𑀫𑁂𑀦 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸.

𑀅𑀬𑀁 𑀧𑀦 𑀲𑀫𑁆𑀩𑀦𑁆𑀥𑀤𑁄𑀲𑁄 𑁋 𑀧𑀼𑀩𑁆𑀩𑁂 𑀲𑀼𑀝𑁆𑀞𑀼 𑀩𑀤𑁆𑀥𑀸𑀦𑀁 𑀧𑀘𑁆𑀙𑀸 𑀲𑀜𑁆𑀚𑀸𑀢𑀢𑁆𑀢𑀸 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀯𑀺𑀬 𑀅𑀲𑀻𑀫𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀅𑀧𑀦𑀻𑀢𑀫𑀢𑁆𑀢𑁂 𑀢𑀸 𑀲𑀻𑀫𑀸 𑀧𑀸𑀓𑀢𑀺𑀓𑀸 𑀳𑁄𑀦𑁆𑀢𑀺. 𑀬𑀣𑀸 𑀘𑀸𑀬𑀁 𑀧𑀘𑁆𑀙𑀸 𑀦 𑀯𑀝𑁆𑀝𑀢𑀺, 𑀏𑀯𑀁 𑀩𑀚𑁆𑀛𑀫𑀸𑀦𑀓𑁆𑀔𑀡𑁂𑀧𑀺 𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀢𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀫𑀳𑀸𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀏𑀢𑁆𑀣 𑀫𑀳𑀸𑀲𑀻𑀫𑀸𑀕𑀢𑀸 𑀪𑀺𑀓𑁆𑀔𑀽 𑀬𑀣𑀸 𑀢𑀁 𑀲𑀸𑀔𑀁 𑀯𑀸 𑀧𑀸𑀭𑁄𑀳𑀁 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀳𑀺 𑀦 𑀨𑀼𑀲𑀦𑁆𑀢𑀺, 𑀏𑀯𑀁 𑀲𑁄𑀥𑀦𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀲𑀓𑀮𑀲𑀻𑀫𑀸𑀲𑁄𑀥𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀦𑀢𑁄. 𑀢𑀣𑀸 𑀳𑀺 ‘‘𑀫𑀳𑀸𑀲𑀻𑀫𑀸𑀬 𑀧𑀣𑀯𑀺𑀢𑀮𑀁 𑀯𑀸 𑀢𑀢𑁆𑀣𑀚𑀸𑀢𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀁 𑀲𑀸𑀔𑀸𑀧𑀸𑀭𑁄𑀳𑀸𑀦𑀁 𑀫𑀳𑀸𑀲𑀻𑀫𑀁 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁂𑀯 𑀲𑀫𑁆𑀩𑀦𑁆𑀥𑀤𑁄𑀲𑁂 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀢𑀢𑁆𑀣 𑀞𑀺𑀢𑀪𑀺𑀓𑁆𑀔𑀽𑀳𑀺 𑀲𑀸𑀔𑀸𑀤𑀻𑀦𑀁 𑀨𑀼𑀲𑀦𑀁. 𑀬𑀤𑀺 𑀳𑀺 𑀪𑀺𑀓𑁆𑀔𑀽𑀦𑀁 𑀲𑀸𑀔𑀸𑀤𑀺 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁂𑀯 𑀓𑀸𑀭𑀡𑀁 𑀲𑀺𑀬𑀸, 𑀢𑀲𑁆𑀲 𑀲𑀸𑀔𑀁 𑀯𑀸 𑀢𑀢𑁄 𑀦𑀺𑀕𑁆𑀕𑀢𑀧𑀸𑀭𑁄𑀳𑀁 𑀯𑀸 𑀫𑀳𑀸𑀲𑀻𑀫𑀸𑀬 𑀧𑀯𑀺𑀝𑁆𑀞𑀁 𑀢𑀢𑁆𑀭𑀝𑁆𑀞𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀪𑀺𑀓𑁆𑀔𑀼𑀨𑀼𑀲𑀦𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀜𑁆𑀳𑀺 𑀢𑀢𑁆𑀣 𑀫𑀳𑀸𑀲𑀻𑀫𑀸𑀲𑁄𑀥𑀦𑁂 𑀓𑀸𑀭𑀡𑀁, 𑀢𑀤𑁂𑀯 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀧𑀥𑀸𑀦𑀢𑁄 𑀤𑀲𑁆𑀲𑁂𑀢𑀩𑁆𑀩𑀁. 𑀦 𑀳𑀺 𑀆𑀳𑀘𑁆𑀘 𑀞𑀺𑀢𑀫𑁂𑀯 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀥𑁂𑀢𑀩𑁆𑀩𑁄 𑀆𑀓𑀸𑀲𑀝𑁆𑀞𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲𑀸𑀧𑀺 𑀲𑁄𑀥𑁂𑀢𑀩𑁆𑀩𑀢𑁄, 𑀓𑀺𑀁 𑀦𑀺𑀭𑀢𑁆𑀣𑀓𑁂𑀦 𑀆𑀳𑀘𑁆𑀘𑀝𑁆𑀞𑀸𑀦𑀯𑀘𑀦𑁂𑀦. 𑀆𑀓𑀸𑀲𑀝𑁆𑀞𑀲𑀸𑀔𑀸𑀲𑀼 𑀘 𑀪𑀺𑀓𑁆𑀔𑀼𑀦𑁄 𑀨𑀼𑀲𑀦𑀫𑁂𑀯 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀲𑁄𑀥𑀦𑀜𑁆𑀘 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑀧𑀸𑀲𑀸𑀦𑀬𑀦𑀸𑀤𑀺𑀯𑀲𑁂𑀦 𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀇𑀥 𑀧𑀦 ‘‘𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸’’𑀢𑀺 𑀲𑀓𑀮𑀲𑀻𑀫𑀸𑀲𑀸𑀥𑀸𑀭𑀡𑀯𑀘𑀦𑁂𑀦 𑀲𑁄𑀥𑀦𑀁 𑀯𑀼𑀢𑁆𑀢𑀁.

𑀅𑀧𑀺𑀘 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀼𑀫𑀢𑁆𑀢𑀲𑁄𑀥𑀦𑁂 𑀅𑀪𑀺𑀫𑀢𑁂 ‘‘𑀫𑀳𑀸𑀲𑀻𑀫𑀸𑀬 𑀧𑀣𑀯𑀺𑀢𑀮’’𑀦𑁆𑀢𑀺 𑀯𑀺𑀲𑁂𑀲𑀲𑀻𑀫𑁄𑀧𑀸𑀤𑀸𑀦𑀁 ¶ 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀆𑀓𑀸𑀲𑁂𑀧𑀺 𑀞𑀢𑁆𑀯𑀸 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀯𑀺𑀲𑁄𑀥𑁂𑀢𑀩𑁆𑀩𑀢𑁄. 𑀙𑀺𑀦𑁆𑀤𑀺𑀢𑁆𑀯𑀸 ¶ 𑀩𑀳𑀺𑀝𑁆𑀞𑀓𑀸 𑀓𑀸𑀢𑀩𑁆𑀩𑀸𑀢𑀺 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀯𑀺𑀬𑁄𑀚𑀦𑀯𑀘𑀦𑀢𑁄 𑀘 𑀯𑀺𑀲𑀪𑀸𑀕𑀲𑀻𑀫𑀸𑀦𑀁 𑀨𑀼𑀲𑀦𑁂𑀦𑁂𑀯 𑀲𑀓𑀮𑀲𑀻𑀫𑀸𑀲𑁄𑀥𑀦𑀳𑁂𑀢𑀼𑀓𑁄 𑀅𑀝𑁆𑀞𑀓𑀣𑀸𑀲𑀺𑀤𑁆𑀥𑁄𑀬𑀁 𑀏𑀓𑁄 𑀲𑀫𑁆𑀩𑀦𑁆𑀥𑀤𑁄𑀲𑁄 𑀅𑀢𑁆𑀣𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀣𑀸𑀬𑀫𑁆𑀧𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) ‘‘𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀘 ‘‘𑀦𑀤𑀺𑀢𑀻𑀭𑁂 𑀧𑀦 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀩𑀤𑁆𑀥𑀦𑀸𑀯𑀸𑀬 𑀦 𑀯𑀝𑁆𑀝𑀢𑀻’’𑀢𑀺 𑀘 ‘‘𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸, 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀘 𑀏𑀯𑀁 𑀯𑀺𑀲𑀪𑀸𑀕𑀸𑀲𑀼 𑀕𑀸𑀫𑀲𑀻𑀫𑀸𑀲𑀼 𑀲𑀸𑀔𑀸𑀤𑀻𑀦𑀁 𑀨𑀼𑀲𑀦𑀫𑁂𑀯 𑀲𑀗𑁆𑀓𑀭𑀤𑁄𑀲𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀪𑀺𑀓𑁆𑀔𑀼𑀨𑀼𑀲𑀦𑀁. 𑀢𑀣𑀸 𑀳𑀺 ‘‘𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀦𑀤𑀺𑀬𑀁 𑀦𑀸𑀯𑀸𑀩𑀦𑁆𑀥𑀦𑀁 𑀅𑀦𑀼𑀜𑁆𑀜𑀸𑀢𑀁 𑀉𑀤𑀓𑀼𑀓𑁆𑀔𑁂𑀧𑀦𑀺𑀲𑁆𑀲𑀬𑀢𑁆𑀢𑁂𑀦 𑀦𑀤𑀺𑀲𑀻𑀫𑀸𑀬 𑀲𑀪𑀸𑀕𑀢𑁆𑀢𑀸. 𑀬𑀤𑀺 𑀳𑀺 𑀪𑀺𑀓𑁆𑀔𑀽𑀦𑀁 𑀨𑀼𑀲𑀦𑀫𑁂𑀯 𑀧𑀝𑀺𑀘𑁆𑀘 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀤𑁄𑀲𑁄 𑀯𑀼𑀢𑁆𑀢𑁄 𑀲𑀺𑀬𑀸, 𑀦𑀤𑀺𑀬𑀫𑁆𑀧𑀺 𑀩𑀦𑁆𑀥𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀢𑀢𑁆𑀣𑀸𑀧𑀺 𑀳𑀺 𑀪𑀺𑀓𑁆𑀔𑀼𑀨𑀼𑀲𑀦𑀁 𑀓𑀫𑁆𑀫𑀓𑁄𑀧𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀪𑀸𑀕𑀲𑀻𑀫𑀸𑀲𑀼 𑀧𑀯𑀺𑀲𑀺𑀢𑁆𑀯𑀸 𑀪𑀽𑀫𑀺𑀆𑀤𑀺𑀁 𑀨𑀼𑀲𑀺𑀢𑁆𑀯𑀸 𑀯𑀸 𑀅𑀨𑀼𑀲𑀺𑀢𑁆𑀯𑀸 𑀯𑀸 𑀲𑀸𑀔𑀸𑀤𑀺𑀫𑁆𑀳𑀺 𑀞𑀺𑀢𑁂 𑀢𑀁 𑀲𑀸𑀔𑀸𑀤𑀺𑀁 𑀨𑀼𑀲𑀦𑁆𑀢𑁄𑀯 𑀪𑀺𑀓𑁆𑀔𑀼 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀲𑀪𑀸𑀕𑀲𑀻𑀫𑀸𑀲𑀼 𑀧𑀦 𑀲𑀸𑀔𑀸𑀤𑀺𑀫𑁆𑀳𑀺 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂 𑀢𑀁 𑀲𑀸𑀔𑀸𑀤𑀺𑀁 𑀅𑀨𑀼𑀲𑀦𑁆𑀢𑀸𑀧𑀺 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑁄𑀥𑁂𑀢𑀩𑁆𑀩𑀸. 𑀅𑀨𑀼𑀲𑀺𑀢𑁆𑀯𑀸 𑀞𑀺𑀢𑁂 𑀧𑀦 𑀢𑀁 𑀲𑀸𑀔𑀸𑀤𑀺𑀁 𑀨𑀼𑀲𑀦𑁆𑀢𑁄𑀯 𑀪𑀺𑀓𑁆𑀔𑀼 𑀲𑁄𑀥𑁂𑀢𑀩𑁆𑀩𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀬𑀁 𑀧𑀦𑁂𑀢𑁆𑀣 𑀓𑁂𑀘𑀺 ‘‘𑀩𑀤𑁆𑀥𑀲𑀻𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀬 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀦𑀫𑁆𑀧𑀺 𑀢𑀤𑀜𑁆𑀜𑀸𑀲𑀫𑁆𑀧𑀺 𑀲𑀩𑁆𑀩𑀸𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀢𑀤𑀼𑀪𑀬𑀫𑁆𑀧𑀺 𑀏𑀓𑀲𑀻𑀫𑀁 𑀯𑀺𑀬 𑀲𑁄𑀥𑁂𑀢𑁆𑀯𑀸 𑀏𑀓𑀢𑁆𑀣𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀢𑁆𑀣 𑀓𑀢𑀁 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀦𑀢𑁆𑀣𑁂𑀢𑁆𑀣 𑀲𑀪𑀸𑀕𑀯𑀺𑀲𑀪𑀸𑀕𑀪𑁂𑀤𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀲𑀪𑀸𑀕𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀤𑁄𑀲𑀸𑀪𑀸𑀯𑀲𑁆𑀲 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀢𑀩𑁆𑀪𑀸𑀯𑀲𑁆𑀲 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀸𑀤𑀺𑀯𑀺𑀦𑀬𑀦𑀬𑁂𑀳𑀺 𑀲𑀺𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀕𑀸𑀫𑀲𑀻𑀫𑀸𑀬𑀫𑁂𑀯 𑀩𑀤𑁆𑀥𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀸𑀲𑀁 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀸𑀤𑀺𑀤𑁄𑀲𑀸𑀪𑀸𑀯𑁄 𑀘 𑀲𑀼𑀢𑁆𑀢𑀢𑁄𑀯 𑀲𑀺𑀤𑁆𑀥𑁄. 𑀩𑀦𑁆𑀥𑀦𑀓𑀸𑀮𑁂 𑀧𑀦 𑀅𑀦𑀼𑀜𑁆𑀜𑀸𑀢𑀲𑁆𑀲 𑀲𑀫𑁆𑀩𑀦𑁆𑀥𑀲𑁆𑀲 𑀅𑀦𑀼𑀮𑁄𑀫𑀢𑁄 𑀧𑀘𑁆𑀙𑀸 𑀲𑀜𑁆𑀚𑀸𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀢𑀸𑀲𑀁 𑀯𑀝𑁆𑀝𑀢𑀺 𑀏𑀯. ‘‘𑀬𑀁, 𑀪𑀺𑀓𑁆𑀔𑀯𑁂…𑀧𑁂… 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺. 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀁 𑀢𑀸𑀯 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀸𑀪𑀸𑀯𑁄 𑀘 ¶ 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑁄. 𑀇𑀫𑀺𑀦𑀸 𑀏𑀯 𑀦𑀬𑁂𑀦 𑀅𑀭𑀜𑁆𑀜𑀲𑀻𑀫𑀸𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀁, 𑀦𑀤𑀺𑀆𑀤𑀺𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀜𑁆𑀘 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀸𑀪𑀸𑀯𑁄 𑀘 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀩𑀤𑁆𑀥𑀲𑀻𑀫𑀸𑀬 ¶ 𑀧𑀦 𑀅𑀜𑁆𑀜𑀸𑀬 𑀩𑀤𑁆𑀥𑀲𑀻𑀫𑀸𑀬, 𑀦𑀤𑀺𑀆𑀤𑀺𑀲𑀻𑀫𑀸𑀲𑀼 𑀘 𑀩𑀦𑁆𑀥𑀺𑀢𑀼𑀁 𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑀺𑀢𑁄 𑀘𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀁 𑀦𑀤𑀺𑀆𑀤𑀻𑀲𑀼 𑀏𑀯 𑀓𑀸𑀢𑀼𑀁 𑀦𑀺𑀬𑀫𑀦𑀲𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑁂𑀦 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀤𑀻𑀲𑀼 𑀓𑀭𑀡𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑀺𑀢𑁄 𑀘 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀢𑀸, 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂, 𑀧𑀘𑁆𑀙𑀸 𑀘 𑀭𑀼𑀓𑁆𑀔𑀸𑀤𑀻𑀳𑀺 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀲𑀫𑁆𑀪𑀯𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀘 𑀲𑀺𑀚𑁆𑀛𑀦𑁆𑀢𑀺. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁮) 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀯𑀝𑀭𑀼𑀓𑁆𑀔𑀸𑀤𑀺𑀯𑀘𑀦𑁂𑀳𑀺 𑀲𑀫𑁆𑀩𑀦𑁆𑀥𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀪𑀸𑀕𑀸𑀦𑀁 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀤𑀻𑀦𑀁 𑀲𑀫𑁆𑀩𑀦𑁆𑀥𑀤𑁄𑀲𑁄 𑀦 𑀤𑀲𑁆𑀲𑀺𑀢𑁄, 𑀦 𑀓𑁂𑀯𑀮𑀜𑁆𑀘 𑀦 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀢𑀸𑀲𑀁 𑀲𑀪𑀸𑀕𑀲𑀻𑀫𑀸𑀦𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀤𑁄𑀲𑀸𑀪𑀸𑀯𑁄 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀜𑀸𑀧𑀺𑀢𑁄 𑀏𑀯. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁 𑀯𑀦𑀦𑀺𑀫𑀺𑀢𑁆𑀢𑀁 𑀭𑀼𑀓𑁆𑀔𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀟𑁆𑀠𑀦𑀓𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺. 𑀢𑁂𑀦 𑀦𑁂𑀲𑀁 𑀭𑀼𑀓𑁆𑀔𑀸𑀤𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀯𑀟𑁆𑀠𑀦𑁂𑀧𑀺 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀦𑀁 𑀲𑀗𑁆𑀓𑀭𑀤𑁄𑀲𑀸𑀪𑀸𑀯𑁄 𑀜𑀸𑀧𑀺𑀢𑁄𑀯 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀩𑀤𑁆𑀥𑀲𑀻𑀫𑀸𑀦𑀁 𑀈𑀤𑀺𑀲𑁄 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀏𑀓𑀭𑀼𑀓𑁆𑀔𑁄𑀧𑀺 𑀘 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺, 𑀲𑁄 𑀧𑀦 𑀯𑀟𑁆𑀠𑀦𑁆𑀢𑁄 𑀲𑀻𑀫𑀸𑀲𑀗𑁆𑀓𑀭𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑁄’’𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄𑀧𑀺 𑀘𑀸𑀬𑀁 𑀜𑀸𑀧𑀺𑀢𑁄. 𑀢𑀺𑀬𑁄𑀚𑀦𑀧𑀭𑀫𑀸𑀬 𑀳𑀺 𑀲𑀻𑀫𑀸𑀬 𑀲𑀫𑀦𑁆𑀢𑀸 𑀧𑀭𑀺𑀬𑀦𑁆𑀢𑁂𑀲𑀼 𑀭𑀼𑀓𑁆𑀔𑀮𑀢𑀸𑀕𑀼𑀫𑁆𑀩𑀸𑀤𑀻𑀳𑀺 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀦𑀁 𑀦𑀺𑀬𑀫𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀈𑀤𑀺𑀲𑀁 𑀲𑀫𑁆𑀩𑀦𑁆𑀥𑀦𑀁 𑀯𑀺𑀦𑀸𑀲𑁂𑀢𑁆𑀯𑀸𑀯 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁.

𑀬𑀤𑀺 𑀘𑁂𑀢𑁆𑀣 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀦 𑀓𑀫𑁆𑀫𑀯𑀺𑀧𑀢𑁆𑀢𑀺 𑀪𑀯𑁂𑀬𑁆𑀬, 𑀅𑀯𑀲𑁆𑀲𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀯𑀺𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀜𑁆𑀳𑀺 𑀆𑀘𑀭𑀺𑀬𑀸 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼𑀧𑀺 ‘‘𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀅𑀯𑁄𑀘𑀼𑀁. 𑀇𑀥 𑀧𑀦 ‘‘𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀭𑀼𑀓𑁆𑀔𑀮𑀢𑀸𑀤𑀻𑀳𑀺 𑀦𑀺𑀭𑀦𑁆𑀢𑀭𑁂 𑀯𑀦𑀫𑀚𑁆𑀛𑁂𑀧𑀺 𑀲𑀻𑀫𑀸𑀩𑀦𑁆𑀥𑀦𑀫𑁂𑀯 𑀅𑀯𑁄𑀘𑀼𑀁. 𑀢𑀣𑀸 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀸𑀤𑀻𑀲𑀼 𑀳𑁂𑀝𑁆𑀞𑀸 𑀣𑀫𑁆𑀪𑀸𑀤𑀻𑀳𑀺 𑀏𑀓𑀸𑀩𑀤𑁆𑀥𑁂𑀲𑀼 𑀉𑀧𑀭𑀺𑀫𑀢𑀮𑀸𑀤𑀻𑀲𑀼 𑀲𑀻𑀫𑀸𑀩𑀦𑁆𑀥𑀦𑀁 𑀩𑀳𑀼𑀥𑀸 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀦𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀢𑁂𑀳𑀺 𑀫𑀼𑀔𑀢𑁄𑀯 𑀯𑀺𑀳𑀺𑀢𑁄. 𑀅𑀧𑀺𑀘 𑀕𑀸𑀫𑀲𑀻𑀫𑀸𑀦𑀫𑁆𑀧𑀺 𑀧𑀸𑀝𑁂𑀓𑁆𑀓𑀁 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀢𑀸𑀬 𑀏𑀓𑀺𑀲𑁆𑀲𑀸 𑀕𑀸𑀫𑀲𑀻𑀫𑀸𑀬 𑀓𑀫𑁆𑀫𑀁 ¶ 𑀓𑀭𑁄𑀦𑁆𑀢𑁂𑀳𑀺 𑀤𑀩𑁆𑀩𑀢𑀺𑀡𑀫𑀢𑁆𑀢𑁂𑀦𑀸𑀧𑀺 𑀲𑀫𑁆𑀩𑀦𑁆𑀥𑀸 𑀕𑀸𑀫𑀦𑁆𑀢𑀭𑀧𑀭𑀫𑁆𑀧𑀭𑀸 𑀅𑀭𑀜𑁆𑀜𑀦𑀤𑀺𑀲𑀫𑀼𑀤𑁆𑀤𑀸 𑀘 𑀲𑁄𑀥𑁂𑀢𑀩𑁆𑀩𑀸𑀢𑀺 𑀲𑀓𑀮𑀤𑀻𑀧𑀁 𑀲𑁄𑀥𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀁 𑀧𑀦 𑀅𑀲𑁄𑀥𑁂𑀢𑁆𑀯𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀧𑀪𑀼𑀢𑀺 𑀓𑀢𑀸𑀦𑀁 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀸𑀦𑀁, 𑀲𑀻𑀫𑀸𑀲𑀫𑁆𑀫𑀼𑀢𑀻𑀦𑀜𑁆𑀘 𑀯𑀺𑀧𑀚𑁆𑀚𑀦𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀗𑁆𑀓𑀸𑀧𑀲𑀗𑁆𑀕𑁄 𑀘 𑀤𑀼𑀦𑁆𑀦𑀺𑀯𑀸𑀭𑁄 𑀳𑁄𑀢𑀺. 𑀦 𑀘𑁂𑀢𑀁 𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀭𑀼𑀓𑁆𑀔𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑀤𑁄𑀲𑁄, 𑀦 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀤𑀻𑀦𑀁 𑀲𑀪𑀸𑀕𑀲𑀻𑀫𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀫𑀳𑀸𑀲𑀻𑀫𑀸𑀲𑁄𑀥𑀦𑀲𑁆𑀲 𑀤𑀼𑀓𑁆𑀓𑀭𑀢𑀸𑀬 𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀖𑀓𑀫𑁆𑀫𑀓𑀭𑀡𑀦𑁆𑀢𑀺 𑀆𑀳 ‘‘𑀲𑀻𑀫𑀸𑀫𑀸𑀴𑀓𑁂’’𑀢𑀺𑀆𑀤𑀺 ¶ . 𑀫𑀳𑀸𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀅𑀧𑁆𑀧𑀳𑁄𑀦𑀓𑀢𑀸𑀬 𑀫𑀳𑀸𑀲𑀻𑀫𑀸𑀬 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂𑀧𑀺 𑀅𑀬𑀁 𑀦𑀬𑁄 𑀕𑀳𑁂𑀢𑀩𑁆𑀩𑁄𑀯.

‘‘𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦𑀧𑀺 𑀲𑀻𑀫𑀁 𑀨𑀼𑀲𑀦𑁆𑀢𑁄 𑀲𑀻𑀫𑀝𑁆𑀞𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀧𑀻𑀢𑀺 𑀔𑀡𑁆𑀟𑀲𑀻𑀫𑀢𑁄 𑀫𑀳𑀸𑀲𑀻𑀫𑀁 𑀧𑀯𑀺𑀝𑁆𑀞𑀲𑀸𑀔𑀸𑀦𑀬𑁂𑀧𑀺. 𑀲𑀻𑀫𑀝𑁆𑀞𑀭𑀼𑀓𑁆𑀔𑀲𑀸𑀔𑀸𑀬 𑀦𑀺𑀲𑀺𑀦𑁆𑀦𑁄 𑀲𑀻𑀫𑀝𑁆𑀞𑁄𑀯 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀧𑀸𑀲𑀫𑁂𑀯 𑀆𑀦𑁂𑀢𑀩𑁆𑀩𑁄’’𑀢𑀺. 𑀏𑀢𑁆𑀣 𑀘 𑀭𑀼𑀓𑁆𑀔𑀲𑀸𑀔𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀸𑀲𑀼 𑀏𑀢𑀸𑀲𑀼 𑀔𑀦𑁆𑀥𑀲𑀻𑀫𑀸𑀬𑀁 𑀢𑀬𑁄 𑀪𑀺𑀓𑁆𑀔𑀽, 𑀫𑀳𑀸𑀲𑀻𑀫𑀸𑀬𑀁 𑀤𑁆𑀯𑁂𑀢𑀺 𑀏𑀯𑀁 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼 𑀲𑀻𑀫𑀦𑁆𑀢𑀭𑀺𑀓𑀁 𑀅𑀨𑀼𑀲𑀺𑀢𑁆𑀯𑀸, 𑀳𑀢𑁆𑀣𑀧𑀸𑀲𑀜𑁆𑀘 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀳𑀺 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀢𑁆𑀢𑀁 ‘‘𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁩𑁮𑁯) 𑀯𑀘𑀦𑀢𑁄. 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀫𑀸𑀴𑀓𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀓𑀭𑀡𑀁 𑀯𑀺𑀳𑀺𑀢𑀁. 𑀅𑀜𑁆𑀜𑀣𑀸 𑀪𑀺𑀦𑁆𑀦𑀲𑀻𑀫𑀝𑁆𑀞𑀢𑀸𑀬 𑀢𑀢𑁆𑀭𑀝𑁆𑀞𑀲𑁆𑀲 𑀕𑀡𑀧𑀽𑀭𑀓𑀢𑁆𑀢𑀸𑀪𑀸𑀯𑀸 𑀓𑀫𑁆𑀫𑀓𑁄𑀧𑁄𑀯 𑀳𑁄𑀢𑀻𑀢𑀺.

𑀬𑀤𑀺 𑀏𑀯𑀁 𑀓𑀣𑀁 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀆𑀳𑀭𑀡𑀯𑀲𑁂𑀦 𑀫𑀳𑀸𑀲𑀻𑀫𑀸𑀲𑁄𑀥𑀦𑀦𑁆𑀢𑀺? 𑀢𑀫𑁆𑀧𑀺 𑀯𑀺𑀦𑀬𑀜𑁆𑀜𑀽 𑀦 𑀇𑀘𑁆𑀙𑀦𑁆𑀢𑀺, 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀲𑀻𑀫𑀸𑀓𑀭𑀡𑀯𑀲𑁂𑀦𑁂𑀯 𑀧𑀦𑁂𑀢𑁆𑀣 𑀲𑁄𑀥𑀦𑀁 𑀇𑀘𑁆𑀙𑀦𑁆𑀢𑀺, 𑀤𑀺𑀦𑁆𑀦𑀲𑁆𑀲𑀸𑀧𑀺 𑀙𑀦𑁆𑀤𑀲𑁆𑀲 𑀅𑀦𑀸𑀕𑀫𑀦𑁂𑀦 𑀫𑀳𑀸𑀲𑀻𑀫𑀝𑁆𑀞𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺. 𑀬𑀤𑀺 𑀘𑀲𑁆𑀲 𑀙𑀦𑁆𑀤𑀸𑀤𑀺 𑀦𑀸𑀕𑀘𑁆𑀙𑀢𑀺, 𑀓𑀣𑀁 𑀲𑁄 𑀓𑀫𑁆𑀫𑀁 𑀓𑁄𑀧𑁂𑀲𑁆𑀲𑀢𑀻𑀢𑀺? 𑀤𑁆𑀯𑀺𑀦𑁆𑀦𑀁 𑀯𑀺𑀲𑀪𑀸𑀕𑀲𑀻𑀫𑀸𑀦𑀁 𑀲𑀫𑁆𑀩𑀦𑁆𑀥𑀤𑁄𑀲𑀢𑁄. 𑀲𑁄 𑀘 𑀲𑀫𑁆𑀩𑀦𑁆𑀥𑀤𑁄𑀲𑁄 𑀅𑀝𑁆𑀞𑀓𑀣𑀸𑀯𑀘𑀦𑀧𑁆𑀧𑀫𑀸𑀡𑀢𑁄. 𑀦 𑀳𑀺 𑀯𑀺𑀦𑀬𑁂 𑀲𑀩𑁆𑀩𑀢𑁆𑀣 𑀬𑀼𑀢𑁆𑀢𑀺 𑀲𑀓𑁆𑀓𑀸 𑀜𑀸𑀢𑀼𑀁 𑀩𑀼𑀤𑁆𑀥𑀕𑁄𑀘𑀭𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀲𑀘𑁂 𑀤𑁆𑀯𑁂𑀧𑀺 𑀲𑀻𑀫𑀸𑀬𑁄 𑀧𑀽𑀭𑁂𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 ¶ 𑀞𑀺𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑀺𑀲𑁆𑀲𑀸 𑀏𑀯 𑀲𑀻𑀫𑀸𑀬 𑀕𑀡𑁄 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀘 𑀅𑀦𑀼𑀲𑁆𑀲𑀸𑀯𑀓𑁄 𑀘 𑀏𑀓𑀢𑁄 𑀢𑀺𑀝𑁆𑀞𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀓𑀫𑁆𑀫𑀸𑀭𑀳𑁄 𑀯𑀸 𑀅𑀦𑀼𑀲𑁆𑀲𑀸𑀯𑀓𑁄 𑀯𑀸 𑀲𑀻𑀫𑀦𑁆𑀢𑀭𑀝𑁆𑀞𑁄 𑀳𑁄𑀢𑀺, 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀜𑁆𑀘 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀤𑀺𑀲𑀪𑀸𑀕𑀲𑀻𑀫𑀸𑀲𑀼 𑀏𑀯 𑀬𑀼𑀚𑁆𑀚𑀢𑀺, 𑀬𑀸𑀲𑀼 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀲𑀼𑀧𑀺 𑀤𑁄𑀲𑁄 𑀦𑀢𑁆𑀣𑀺. 𑀬𑀸𑀲𑀼 𑀧𑀦 𑀅𑀢𑁆𑀣𑀺, 𑀦 𑀢𑀸𑀲𑀼 𑀯𑀺𑀲𑀪𑀸𑀕𑀲𑀻𑀫𑀸𑀲𑀼 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀏𑀓𑀢𑁆𑀣 𑀞𑀺𑀢𑁄 𑀇𑀢𑀭𑀝𑁆𑀞𑀸𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺 𑀏𑀯 𑀅𑀝𑁆𑀞𑀓𑀣𑀸𑀬𑀁 𑀲𑀸𑀫𑀜𑁆𑀜𑀢𑁄 𑀲𑁄𑀥𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀦 𑀑𑀢𑀭𑀢𑀻𑀢𑀺 𑀧𑀡𑀯𑀲𑀡𑁆𑀞𑀸𑀦𑀧𑀩𑁆𑀩𑀢𑀸𑀤𑀻𑀲𑀼 𑀳𑁂𑀝𑁆𑀞𑀸 𑀧𑀫𑀸𑀡𑀭𑀳𑀺𑀢𑀝𑁆𑀞𑀸𑀦𑀁 𑀦 𑀑𑀢𑀭𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀦𑁂𑀢𑁆𑀣 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀉𑀤𑁆𑀥𑀫𑁆𑀧𑀺 𑀧𑀫𑀸𑀡𑀭𑀳𑀺𑀢𑀁 𑀧𑀩𑁆𑀩𑀢𑀸𑀤𑀻𑀦𑀺 𑀦𑀸𑀭𑁄𑀳𑀢𑀺, 𑀢𑀣𑀸𑀧𑀺 𑀢𑀁 𑀧𑀘𑁆𑀙𑀸 𑀲𑀻𑀫𑀝𑁆𑀞𑀢𑀸𑀬 𑀲𑀻𑀫𑀸 𑀳𑁄𑀢𑀺. 𑀳𑁂𑀝𑁆𑀞𑀸 𑀧𑀡𑀯𑀲𑀡𑁆𑀞𑀸𑀦𑀸𑀤𑀺 𑀧𑀦 𑀉𑀧𑀭𑀺 𑀩𑀤𑁆𑀥𑀸𑀬𑀧𑀺 𑀲𑀻𑀫𑀸𑀬 𑀲𑀻𑀫𑀸𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀲 𑀯𑀲𑁂𑀦 𑀦 𑀑𑀢𑀭𑀢𑀻𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀣𑀸 𑀑𑀭𑁄𑀳𑀡𑀸𑀭𑁄𑀳𑀡𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 ‘‘𑀦 𑀑𑀢𑀭𑀢𑀻’’𑀢𑀺𑀆𑀤𑀺𑀦𑀸 ¶ 𑀯𑀢𑁆𑀢𑀩𑁆𑀩𑀢𑁄. 𑀬𑀁 𑀓𑀺𑀜𑁆𑀘𑀻𑀢𑀺 𑀦𑀺𑀝𑁆𑀞𑀺𑀢𑀲𑀻𑀫𑀸𑀬 𑀉𑀧𑀭𑀺 𑀚𑀸𑀢𑀁 𑀯𑀺𑀚𑁆𑀚𑀫𑀸𑀦𑀁 𑀧𑀼𑀩𑁆𑀩𑁂 𑀞𑀺𑀢𑀁, 𑀧𑀘𑁆𑀙𑀸 𑀲𑀜𑁆𑀚𑀸𑀢𑀁, 𑀧𑀯𑀺𑀝𑁆𑀞𑀜𑁆𑀘 𑀬𑀁𑀓𑀺𑀜𑁆𑀘𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀁 𑀲𑀩𑁆𑀩𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀻𑀫𑀸𑀬 𑀳𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀸𑀤𑀺𑀲𑀯𑀺𑀜𑁆𑀜𑀸𑀡𑀓𑁂𑀲𑀼 𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀲𑀻𑀫𑀝𑁆𑀞𑁄𑀯 𑀳𑁄𑀢𑀺. ‘‘𑀩𑀤𑁆𑀥𑀲𑀻𑀫𑀸𑀬𑀸’’𑀢𑀺 𑀇𑀤𑀜𑁆𑀘 𑀧𑀓𑀭𑀡𑀯𑀲𑁂𑀦 𑀉𑀧𑀮𑀓𑁆𑀔𑀡𑀢𑁄 𑀯𑀼𑀢𑁆𑀢𑀁. 𑀅𑀩𑀤𑁆𑀥𑀲𑀻𑀫𑀸𑀲𑀼𑀧𑀺 𑀲𑀩𑁆𑀩𑀸𑀲𑀼 𑀞𑀺𑀢𑀁 𑀢𑀁 𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.

𑀏𑀓𑀲𑀫𑁆𑀩𑀤𑁆𑀥𑁂𑀦 𑀕𑀢𑀦𑁆𑀢𑀺 𑀭𑀼𑀓𑁆𑀔𑀮𑀢𑀸𑀤𑀺𑀢𑀢𑁆𑀭𑀚𑀸𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀫𑁆𑀧𑀺 ‘‘𑀇𑀢𑁄 𑀕𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀬𑀁 𑀧𑀦 ‘‘𑀇𑀢𑁄 𑀕𑀢’’𑀦𑁆𑀢𑀺 𑀯𑀸 ‘‘𑀢𑀢𑁄 𑀆𑀕𑀢’’𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀉𑀪𑁄𑀲𑀼 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀲𑀼, 𑀉𑀤𑀓𑀼𑀓𑁆𑀔𑁂𑀧𑀦𑀤𑀺𑀆𑀤𑀻𑀲𑀼 𑀘 𑀢𑀺𑀭𑀺𑀬𑀁 𑀧𑀢𑀺𑀢𑀭𑀚𑁆𑀚𑀼𑀤𑀡𑁆𑀟𑀸𑀤𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀏𑀢𑁆𑀣 𑀧𑀦 𑀩𑀤𑁆𑀥𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀕𑁄 𑀩𑀤𑁆𑀥𑀲𑀻𑀫𑀸, 𑀅𑀩𑀤𑁆𑀥𑀕𑀸𑀫𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀕𑁄 𑀕𑀸𑀫𑀲𑀻𑀫𑀸 𑀢𑀤𑀼𑀪𑀬𑀲𑀻𑀫𑀝𑁆𑀞𑀧𑀩𑁆𑀩𑀢𑀸𑀤𑀺 𑀯𑀺𑀬. 𑀩𑀤𑁆𑀥𑀲𑀻𑀫𑀢𑁄 𑀉𑀝𑁆𑀞𑀺𑀢𑀯𑀝𑀭𑀼𑀓𑁆𑀔𑀲𑁆𑀲 𑀧𑀸𑀭𑁄𑀳𑁂, 𑀕𑀸𑀫𑀲𑀻𑀫𑀸𑀬 𑀕𑀸𑀫𑀲𑀻𑀫𑀢𑁄 𑀉𑀝𑁆𑀞𑀺𑀢𑀯𑀝𑀭𑀼𑀓𑁆𑀔𑀲𑁆𑀲 𑀧𑀸𑀭𑁄𑀳𑁂 𑀘 𑀩𑀤𑁆𑀥𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀫𑀽𑀮𑀧𑀢𑀺𑀝𑁆𑀞𑀺𑀢𑀓𑀸𑀮𑀢𑁄 𑀳𑀺 𑀧𑀝𑁆𑀞𑀸𑀬 ‘‘𑀇𑀢𑁄 𑀕𑀢𑀁, 𑀢𑀢𑁄 𑀆𑀕𑀢’’𑀦𑁆𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀲𑁄 𑀪𑀸𑀕𑁄 𑀬𑀣𑀸𑀧𑀯𑀺𑀝𑁆𑀞𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑁂𑀲𑀁 𑀭𑀼𑀓𑁆𑀔𑀧𑀸𑀭𑁄𑀳𑀸𑀦𑀁 𑀅𑀦𑁆𑀢𑀭𑀸 𑀧𑀦 𑀆𑀓𑀸𑀲𑀝𑁆𑀞𑀲𑀸𑀔𑀸 𑀪𑀽𑀫𑀺𑀬𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀧𑁆𑀧𑀫𑀸𑀡𑁂𑀦 ¶ 𑀢𑀤𑀼𑀪𑀬𑀲𑀻𑀫𑀸 𑀳𑁄𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀲𑀸𑀔𑀸𑀬 𑀧𑀸𑀭𑁄𑀳𑁄 𑀧𑀯𑀺𑀝𑁆𑀞𑀲𑀻𑀫𑀸𑀬 𑀧𑀣𑀯𑀺𑀬𑀁 𑀫𑀽𑀮𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀬𑀸𑀯 𑀲𑀸𑀔𑀁 𑀯𑀺𑀦𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀯 𑀫𑀽𑀮𑀲𑀻𑀫𑀝𑁆𑀞𑀢𑀁 𑀦 𑀯𑀺𑀚𑀳𑀢𑀺. 𑀬𑀤𑀸 𑀧𑀦 𑀯𑀺𑀦𑀸 𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀤𑀸𑀧𑀺 𑀧𑀸𑀭𑁄𑀳𑀫𑀢𑁆𑀢𑀫𑁂𑀯 𑀧𑀯𑀺𑀝𑁆𑀞𑀲𑀻𑀫𑀝𑁆𑀞𑀢𑀁 𑀲𑀫𑀼𑀧𑁂𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁄𑀧𑀺 𑀆𑀓𑀸𑀲𑀝𑁆𑀞𑀲𑀸𑀔𑀸𑀪𑀸𑀕𑁄 𑀧𑀼𑀭𑀺𑀫𑀲𑀻𑀫𑀝𑁆𑀞𑀢𑀁 𑀦 𑀯𑀺𑀚𑀳𑀢𑀺, 𑀢𑀢𑁄 𑀆𑀕𑀢𑀪𑀸𑀕𑀲𑁆𑀲 𑀅𑀯𑀺𑀚𑀳𑀺𑀢𑀢𑁆𑀢𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀉𑀤𑀓𑀼𑀓𑁆𑀔𑁂𑀧𑀦𑀤𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀘 𑀯𑀺𑀲𑀪𑀸𑀕𑀲𑀻𑀫𑀸𑀬 𑀏𑀯𑀁 𑀧𑀯𑀺𑀝𑁆𑀞𑁂 𑀲𑀓𑀮𑀲𑀻𑀫𑀸𑀲𑁄𑀥𑀦𑀁, 𑀲𑀪𑀸𑀕𑀸𑀬 𑀧𑀯𑀺𑀝𑁆𑀞𑁂 𑀨𑀼𑀲𑀺𑀢𑁆𑀯𑀸 𑀞𑀺𑀢𑀫𑀢𑁆𑀢𑀪𑀺𑀓𑁆𑀔𑀼𑀲𑁄𑀥𑀦𑀜𑁆𑀘 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁪𑁦. 𑀧𑀸𑀭𑀬𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀦𑀤𑀺𑀬𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀧𑀢𑀺𑀝𑁆𑀞𑀫𑀸𑀦𑀸 𑀲𑀻𑀫𑀸 𑀦𑀤𑀺𑀅𑀚𑁆𑀛𑁄𑀢𑁆𑀣𑀭𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀤𑀺𑀁𑀅𑀚𑁆𑀛𑁄𑀢𑁆𑀣𑀭𑀫𑀸𑀦’’𑀦𑁆𑀢𑀺. 𑀅𑀦𑁆𑀢𑁄𑀦𑀤𑀺𑀬𑀜𑁆𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺. 𑀦𑀤𑀺𑀮𑀓𑁆𑀔𑀡𑁂 𑀧𑀦 𑀅𑀲𑀢𑀺 𑀑𑀢𑀭𑀢𑀺, 𑀲𑀸 𑀘 𑀢𑀤𑀸 𑀦𑀤𑀺𑀧𑀸𑀭𑀲𑀻𑀫𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀤𑀺𑀬𑀸 𑀮𑀓𑁆𑀔𑀡𑀁 𑀦𑀤𑀺𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀅𑀯𑀲𑁆𑀲𑀁 𑀮𑀩𑁆𑀪𑀦𑁂𑀬𑁆𑀬𑀸 𑀧𑀦 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀦𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀦𑀸𑀯𑀁 𑀯𑀺𑀦𑀸𑀧𑀺 𑀲𑀻𑀫𑀸 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸 𑀏𑀯 𑀳𑁄𑀢𑀺, 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀸 𑀦𑀸𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀭𑀼𑀓𑁆𑀔𑀲𑀗𑁆𑀖𑀸𑀝𑀫𑀬𑁄𑀢𑀺 ¶ 𑀅𑀦𑁂𑀓𑀭𑀼𑀓𑁆𑀔𑁂 𑀏𑀓𑀢𑁄 𑀖𑀝𑁂𑀢𑁆𑀯𑀸 𑀓𑀢𑀲𑁂𑀢𑀼. 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁄𑀢𑀺 𑀧𑀸𑀞𑀲𑁂𑀲𑁄. ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸’’𑀢𑀺 𑀇𑀤𑀁 𑀉𑀪𑀺𑀦𑁆𑀦𑀁 𑀢𑀻𑀭𑀸𑀦𑀁 𑀏𑀓𑀕𑀸𑀫𑀔𑁂𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀩𑁆𑀩𑀢𑀲𑀡𑁆𑀞𑀸𑀦𑀸𑀢𑀺 𑀏𑀓𑀢𑁄 𑀉𑀕𑁆𑀕𑀢𑀤𑀻𑀧𑀲𑀺𑀔𑀭𑀢𑁆𑀢𑀸 𑀯𑀼𑀢𑁆𑀢𑀁.

𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁧. 𑀲𑀫𑀽𑀳𑀦𑀺𑀢𑁆𑀯𑀸𑀢𑀺 𑀯𑀺𑀦𑀸𑀲𑁂𑀢𑁆𑀯𑀸, 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁.

𑁧𑁪𑁨. 𑀬𑀸𑀦𑀺 𑀓𑀸𑀦𑀺𑀘𑀻𑀢𑀺 𑀇𑀥 𑀦𑀺𑀫𑀺𑀢𑁆𑀢𑀸𑀦𑀁 𑀲𑀻𑀫𑀸𑀬 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁪𑁩. 𑀅𑀝𑁆𑀞𑀸𑀭𑀲𑀸𑀢𑀺 ¶ 𑀅𑀦𑁆𑀥𑀓𑀯𑀺𑀦𑁆𑀤𑀯𑀺𑀳𑀸𑀭𑀫𑁆𑀧𑀺 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀦𑁂𑀲𑀁 𑀲𑀻𑀫𑀸𑀢𑀺 𑀢𑁂𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼. ‘‘𑀫𑀦’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 𑀈𑀲𑀓𑀦𑁆𑀢𑀺, 𑀈𑀲𑀓𑀁 𑀯𑀼𑀴𑁆𑀳𑁄𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀢𑁆𑀢𑀯𑀼𑀴𑁆𑀳𑀪𑀸𑀯𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁. 𑀅𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀇𑀤𑁆𑀥𑀺𑀬𑀸 𑀅𑀦𑀢𑀺𑀓𑁆𑀓𑀫𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑁧𑁪𑁪. 𑀲𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄. 𑀤𑁆𑀯𑁂𑀧𑀻𑀢𑀺 𑀤𑁆𑀯𑁂 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀸𑀬𑁄. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀫𑀳𑀸𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣𑁂𑀯 𑀬𑁂𑀪𑀼𑀬𑁆𑀬𑁂𑀦 𑀅𑀯𑀺𑀧𑁆𑀧𑀯𑀸𑀲𑀸𑀢𑀺.

‘‘𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀻’’𑀢𑀺 𑀇𑀤𑀁 𑀫𑀳𑀸𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀢𑀲𑁆𑀲𑀸 𑀩𑀸𑀳𑀺𑀭𑀧𑀭𑀺𑀘𑁆𑀙𑁂𑀤𑀜𑁆𑀘 𑀅𑀚𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀅𑀚𑀸𑀦𑀦𑁆𑀢𑁂𑀳𑀺𑀧𑀺 𑀅𑀦𑁆𑀢𑁄𑀲𑀻𑀫𑀸𑀬 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬 𑀲𑀸 𑀲𑀻𑀫𑀸 𑀲𑀫𑀽𑀳𑀢𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀢𑀺 𑀔𑀡𑁆𑀟𑀲𑀻𑀫𑀸𑀭𑀳𑀺𑀢𑀝𑁆𑀞𑀸𑀦𑁂. 𑀇𑀤𑀜𑁆𑀘 𑀫𑀳𑀸𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀓𑀫𑁆𑀫𑀓𑀭𑀡𑀲𑀼𑀔𑀢𑁆𑀣𑀁 𑀔𑀡𑁆𑀟𑀲𑀻𑀫𑀸 𑀇𑀘𑁆𑀙𑀺𑀢𑀸𑀢𑀺 𑀢𑀁 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀩𑀳𑀼𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀦 𑀩𑀦𑁆𑀥𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 ¶ 𑀲𑀸 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸 𑀏𑀯 𑀫𑀳𑀸𑀲𑀻𑀫𑀸 𑀯𑀺𑀬. ‘‘𑀧𑀝𑀺𑀩𑀦𑁆𑀥𑀺𑀢𑀼𑀁 𑀧𑀦 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯𑀸’’𑀢𑀺 𑀇𑀤𑀁 𑀔𑀡𑁆𑀟𑀲𑀻𑀫𑀸𑀬 𑀅𑀲𑀫𑀽𑀳𑀢𑀢𑁆𑀢𑀸, 𑀢𑀲𑁆𑀲𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀲𑁆𑀲 𑀅𑀚𑀸𑀦𑀦𑀢𑁄 𑀘 𑀫𑀳𑀸𑀲𑀻𑀫𑀸𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀁 𑀧𑀦 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯. 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸𑀢𑀺 𑀔𑀡𑁆𑀟𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑁂 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀡𑀲𑀫𑁆𑀪𑁂𑀤𑀁 𑀓𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑁂𑀧𑀺 𑀲𑀫𑁆𑀪𑁂𑀤𑀲𑀗𑁆𑀓𑀸𑀬 𑀅𑀦𑀺𑀯𑀢𑁆𑀢𑀦𑁂𑀦 𑀲𑀫𑁆𑀪𑁂𑀤𑀲𑀗𑁆𑀓𑀁 𑀓𑀢𑁆𑀯𑀸. 𑀅𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀲𑀗𑁆𑀖𑀓𑀫𑁆𑀫𑀸𑀦𑀸𑀭𑀳𑀁 𑀓𑀭𑁂𑀬𑁆𑀬𑀼𑀁. 𑀧𑀼𑀩𑁆𑀩𑁂 𑀳𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸, 𑀇𑀤𑀸𑀦𑀺 𑀢𑀫𑁆𑀧𑀺 𑀯𑀺𑀦𑀸𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺 𑀔𑀡𑁆𑀟𑀲𑀻𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀉𑀪𑁄𑀧𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀉𑀪𑀺𑀦𑁆𑀦𑀁 𑀧𑀤𑁂𑀲𑀦𑀺𑀬𑀫𑀁 𑀯𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀅𑀜𑁆𑀜𑀢𑀭𑀸𑀬 𑀯𑀸 𑀯𑀺𑀚𑁆𑀚𑀫𑀸𑀦𑀢𑀁 𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑀁 𑀯𑀸 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀲𑀗𑁆𑀓𑀸 𑀏𑀯 𑀳𑁄𑀢𑀺. ‘‘𑀦𑁂𑀯 𑀲𑀫𑀽𑀳𑀦𑀺𑀢𑀼𑀁, 𑀦 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀤𑀁 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀧𑀺 𑀫𑀳𑀸𑀲𑀻𑀫𑀁 𑀧𑀝𑀺𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀦 𑀘 𑀲𑀓𑁆𑀓𑀸…𑀧𑁂… 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼’’𑀦𑁆𑀢𑀺 𑀇𑀤𑀁 𑀲𑀻𑀫𑀸𑀩𑀦𑁆𑀥𑀦𑀓𑀫𑁆𑀫𑀯𑀸𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀓𑁂𑀘𑀺 ¶ 𑀧𑀦 ‘‘𑀈𑀤𑀺𑀲𑁂𑀲𑀼 𑀯𑀺𑀳𑀸𑀭𑁂𑀲𑀼 𑀙𑀧𑀜𑁆𑀘𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁂 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀦𑀺𑀭𑀦𑁆𑀢𑀭𑀁 𑀞𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀜𑁆𑀘 𑀲𑀫𑀽𑀳𑀦𑀦𑀯𑀲𑁂𑀦 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀓𑀢𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀔𑀡𑁆𑀟𑀲𑀻𑀫𑀸𑀬, 𑀫𑀳𑀸𑀲𑀻𑀫𑀸𑀬𑀧𑀺 𑀯𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺 𑀅𑀯𑀲𑁆𑀲𑀁 𑀏𑀓𑀲𑁆𑀫𑀺𑀁 𑀫𑀜𑁆𑀘𑀝𑁆𑀞𑀸𑀦𑁂 𑀢𑀸𑀲𑀁 𑀫𑀚𑁆𑀛𑀕𑀢𑀸 𑀢𑁂 𑀪𑀺𑀓𑁆𑀔𑀽 𑀢𑀸 𑀲𑀫𑀽𑀳𑀦𑁂𑀬𑁆𑀬𑀼𑀁, 𑀢𑀢𑁄 𑀕𑀸𑀫𑀲𑀻𑀫𑀸 𑀏𑀯 𑀅𑀯𑀲𑀺𑀲𑁆𑀲𑁂𑀬𑁆𑀬. 𑀦 𑀳𑁂𑀢𑁆𑀣 𑀲𑀻𑀫𑀸𑀬, 𑀢𑀧𑁆𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀸 𑀚𑀸𑀦𑀦𑀁 𑀅𑀗𑁆𑀕𑀁. 𑀲𑀻𑀫𑀸𑀬 𑀧𑀦 𑀅𑀦𑁆𑀢𑁄𑀞𑀸𑀦𑀁, ‘‘𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀓𑀫𑁆𑀫𑀯𑀸𑀘𑀸𑀬 𑀓𑀭𑀡𑀜𑁆𑀘𑁂𑀢𑁆𑀣 𑀅𑀗𑁆𑀕𑀁. 𑀅𑀝𑁆𑀞𑀓𑀣𑀸𑀬𑀁 ‘𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’𑀢𑀺 𑀏𑀯𑀁 𑀫𑀳𑀸𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀚𑀸𑀦𑀦𑁂𑀧𑀺 𑀲𑀫𑀽𑀳𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀕𑀸𑀫𑀲𑀻𑀫𑀸𑀬 𑀏𑀯 𑀘 𑀅𑀯𑀲𑀺𑀝𑁆𑀞𑀸𑀬 𑀢𑀢𑁆𑀣 𑀬𑀣𑀸𑀭𑀼𑀘𑀺 𑀤𑀼𑀯𑀺𑀥𑀫𑁆𑀧𑀺 𑀲𑀻𑀫𑀁 𑀩𑀦𑁆𑀥𑀺𑀢𑀼𑀜𑁆𑀘𑁂𑀯 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀸𑀫𑀲𑀻𑀫𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁭. 𑀧𑀸𑀴𑀺𑀬𑀁 ¶ ‘‘𑀅𑀲𑀫𑁆𑀫𑀢𑀸𑀬, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬𑀸’’𑀢𑀺𑀆𑀤𑀺𑀦𑀸 𑀕𑀸𑀫𑀲𑀻𑀫𑀸 𑀏𑀯 𑀩𑀤𑁆𑀥𑀲𑀻𑀫𑀸𑀬 𑀔𑁂𑀢𑁆𑀢𑀁, 𑀅𑀭𑀜𑁆𑀜𑀦𑀤𑀺𑀆𑀤𑀬𑁄 𑀯𑀺𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀸𑀤𑀻𑀦𑀁. 𑀲𑀸 𑀘 𑀕𑀸𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀯𑀺𑀭𑀳𑀺𑀢𑀝𑁆𑀞𑀸𑀦𑁂 𑀲𑀬𑀫𑁂𑀯 𑀲𑀫𑀸𑀦𑀲𑀁𑀯𑀸𑀲𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀸 𑀢𑀲𑁆𑀲 𑀯𑀸 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸𑀢𑀺 𑀏𑀢𑁆𑀣 𑀕𑀸𑀫𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀔𑁂𑀢𑁆𑀢𑀯𑀢𑁆𑀣𑀼𑀅𑀭𑀜𑁆𑀜𑀧𑀩𑁆𑀩𑀢𑀸𑀤𑀺𑀓𑀁 𑀲𑀩𑁆𑀩𑀁 𑀕𑀸𑀫𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀕𑀸𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀦𑁆𑀢𑀭𑀖𑀭𑀫𑁂𑀯. 𑀢𑀲𑁆𑀫𑀸 𑀢𑀲𑁆𑀲 𑀲𑀓𑀮𑀲𑁆𑀲 𑀕𑀸𑀫𑀔𑁂𑀢𑁆𑀢𑀲𑁆𑀲 𑀲𑀫𑁆𑀩𑀦𑁆𑀥𑀦𑀻𑀬𑀸 𑀕𑀸𑀫𑀲𑀻𑀫𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀳𑀺 𑀲𑁄 𑀅𑀦𑁆𑀢𑀭𑀖𑀭𑀔𑁂𑀢𑁆𑀢𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀪𑀽𑀫𑀺𑀪𑀸𑀕𑁂𑀲𑀼 ‘‘𑀕𑀸𑀫𑁄’’𑀢𑀺 𑀏𑀓𑀢𑁆𑀢𑁂𑀦 𑀮𑁄𑀓𑀚𑀦𑁂𑀳𑀺 𑀧𑀜𑁆𑀜𑀢𑁆𑀢𑁄 𑀕𑀸𑀫𑀯𑁄𑀳𑀸𑀭𑁄, 𑀲𑁄𑀯 𑀇𑀥 ‘‘𑀕𑀸𑀫𑀲𑀻𑀫𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀕𑀸𑀫𑁄 𑀏𑀯 𑀳𑀺 𑀕𑀸𑀫𑀲𑀻𑀫𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀉𑀧𑀭𑀺 𑀅𑀭𑀜𑁆𑀜𑀁 𑀦𑀤𑀻 𑀲𑀫𑀼𑀤𑁆𑀤𑁄 𑀚𑀸𑀢𑀲𑁆𑀲𑀭𑁄𑀢𑀺 𑀏𑀯𑀁 𑀢𑁂𑀲𑀼 𑀪𑀽𑀫𑀺𑀧𑁆𑀧𑀤𑁂𑀲𑁂𑀲𑀼 𑀏𑀓𑀢𑁆𑀢𑁂𑀦 𑀮𑁄𑀓𑀚𑀦𑀧𑀜𑁆𑀜𑀢𑁆𑀢𑀸𑀦𑀫𑁂𑀯 𑀅𑀭𑀜𑁆𑀜𑀸𑀤𑀻𑀦𑀁 𑀅𑀭𑀜𑁆𑀜𑀲𑀻𑀫𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑁂 𑀧𑀦 𑀕𑀸𑀫𑀲𑀻𑀫𑀸𑀤𑀺𑀯𑁄𑀳𑀸𑀭𑁄 𑀕𑀸𑀫𑀸𑀤𑀻𑀦𑀁 ¶ 𑀫𑀭𑀺𑀬𑀸𑀤𑀸𑀬𑀫𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀕𑀸𑀫𑀔𑁂𑀢𑁆𑀢𑀸𑀤𑀻𑀲𑀼 𑀲𑀩𑁆𑀩𑀢𑁆𑀣. 𑀲𑀸𑀲𑀦𑁂 𑀧𑀦 𑀢𑁂 𑀕𑀸𑀫𑀸𑀤𑀬𑁄 𑀇𑀢𑀭𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀫𑀭𑀺𑀬𑀸𑀤𑀸𑀢𑀺 𑀓𑀢𑁆𑀯𑀸 𑀕𑀸𑀫𑁄 𑀏𑀯 𑀕𑀸𑀫𑀲𑀻𑀫𑀸, 𑀅𑀭𑀜𑁆𑀜𑀫𑁂𑀯 𑀅𑀭𑀜𑁆𑀜𑀲𑀻𑀫𑀸…𑀧𑁂… 𑀲𑀫𑀼𑀤𑁆𑀤𑁄 𑀏𑀯 𑀲𑀫𑀼𑀤𑁆𑀤𑀲𑀻𑀫𑀸𑀢𑀺 𑀲𑀻𑀫𑀸𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀦𑀺𑀕𑀫𑀲𑁆𑀲 𑀯𑀸’’𑀢𑀺 𑀇𑀤𑀁 𑀕𑀸𑀫𑀲𑀻𑀫𑀧𑁆𑀧𑀪𑁂𑀤𑀁 𑀲𑀩𑁆𑀩𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑀕𑀭𑀫𑁆𑀧𑀺 𑀕𑀳𑀺𑀢𑀫𑁂𑀯𑀸’’𑀢𑀺. ‘‘𑀩𑀮𑀺𑀁 𑀮𑀪𑀦𑁆𑀢𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀅𑀬𑀁 𑀕𑀸𑀫𑁄 𑀏𑀢𑁆𑀢𑀓𑁄 𑀓𑀭𑀻𑀲𑀪𑀸𑀕𑁄’’𑀢𑀺𑀆𑀤𑀺𑀦𑀸 𑀧𑀦 𑀭𑀸𑀚𑀧𑀡𑁆𑀡𑁂𑀲𑀼 𑀆𑀭𑁄𑀧𑀺𑀢𑁂𑀲𑀼 𑀪𑀽𑀫𑀺𑀪𑀸𑀕𑁂𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀢𑀴𑀸𑀓𑀫𑀸𑀢𑀺𑀓𑀸𑀲𑀼𑀲𑀸𑀦𑀧𑀩𑁆𑀩𑀢𑀸𑀤𑀺𑀓𑁂 𑀧𑀤𑁂𑀲𑁂 𑀩𑀮𑀺𑀁 𑀦 𑀕𑀡𑁆𑀳𑀦𑁆𑀢𑀺, 𑀲𑁄𑀧𑀺 𑀕𑀸𑀫𑀲𑀻𑀫𑀸 𑀏𑀯. 𑀭𑀸𑀚𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀪𑀽𑀫𑀺𑀪𑀸𑀕𑁄 𑀳𑀺 𑀲𑀩𑁆𑀩𑁄𑀯 𑀞𑀧𑁂𑀢𑁆𑀯𑀸 𑀦𑀤𑀺𑀮𑁄𑀡𑀺𑀚𑀸𑀢𑀲𑁆𑀲𑀭𑁂 𑀕𑀸𑀫𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀻’’𑀢𑀺. 𑀲𑀘𑁂 𑀧𑀦 𑀢𑀢𑁆𑀣 𑀭𑀸𑀚𑀸 𑀓𑀜𑁆𑀘𑀺 𑀧𑀤𑁂𑀲𑀁 𑀕𑀸𑀫𑀦𑁆𑀢𑀭𑁂𑀦 𑀬𑁄𑀚𑁂𑀢𑀺, 𑀲𑁄 𑀧𑀯𑀺𑀝𑁆𑀞𑀕𑀸𑀫𑀲𑀻𑀫𑀢𑀁 𑀏𑀯 𑀪𑀚𑀢𑀺, 𑀦𑀤𑀺𑀚𑀸𑀢𑀲𑁆𑀲𑀭𑁂𑀲𑀼 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀸𑀤𑀺𑀪𑀸𑀯𑀁 𑀯𑀸 𑀧𑀽𑀭𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀪𑀸𑀯𑀁 𑀯𑀸 𑀧𑀸𑀧𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑁂 𑀧𑀦 𑀕𑀸𑀫𑀸 𑀭𑀸𑀚𑀘𑁄𑀭𑀸𑀤𑀺𑀪𑀬𑀧𑀻𑀴𑀺𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀸 𑀘𑀺𑀭𑀫𑁆𑀧𑀺 𑀦𑀺𑀫𑁆𑀫𑀦𑀼𑀲𑁆𑀲𑀸 𑀢𑀺𑀝𑁆𑀞𑀦𑁆𑀢𑀺, 𑀲𑀫𑀦𑁆𑀢𑀸 𑀧𑀦 𑀕𑀸𑀫𑀸 𑀲𑀦𑁆𑀢𑀺, 𑀢𑁂𑀧𑀺 𑀧𑀸𑀝𑁂𑀓𑁆𑀓𑀁 𑀕𑀸𑀫𑀲𑀻𑀫𑀸𑀯. 𑀢𑁂𑀲𑀼 𑀳𑀺 𑀭𑀸𑀚𑀸𑀦𑁄 𑀲𑀫𑀦𑁆𑀢𑀕𑀸𑀫𑀯𑀸𑀲𑀻𑀳𑀺 𑀓𑀲𑀸𑀧𑁂𑀢𑁆𑀯𑀸 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀲𑀺𑀢𑀝𑁆𑀞𑀸𑀦𑀁 𑀮𑀺𑀔𑀺𑀢𑁆𑀯𑀸 𑀯𑀸 𑀩𑀮𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑁂𑀦 𑀯𑀸 𑀕𑀸𑀫𑁂𑀦 𑀏𑀓𑀻𑀪𑀸𑀯𑀁 𑀯𑀸 𑀉𑀧𑀦𑁂𑀦𑁆𑀢𑀺. 𑀬𑁂 𑀧𑀦 𑀕𑀸𑀫𑀸 𑀭𑀸𑀚𑀽𑀳𑀺𑀧𑀺 𑀧𑀭𑀺𑀘𑁆𑀘𑀢𑁆𑀢𑀸 𑀕𑀸𑀫𑀔𑁂𑀢𑁆𑀢𑀸𑀦𑀦𑁆𑀢𑀭𑀺𑀓𑀸 𑀫𑀳𑀸𑀭𑀜𑁆𑀜𑁂𑀦 𑀏𑀓𑀻𑀪𑀽𑀢𑀸, 𑀢𑁂 𑀅𑀕𑀸𑀫𑀓𑀸𑀭𑀜𑁆𑀜𑀲𑀻𑀫𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀼𑀭𑀺𑀫𑀸 𑀕𑀸𑀫𑀲𑀻𑀫𑀸 ¶ 𑀯𑀺𑀦𑀲𑁆𑀲𑀢𑀺. 𑀭𑀸𑀚𑀸𑀦𑁄 𑀧𑀦 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀤𑀺𑀧𑁆𑀧𑀤𑁂𑀲𑁂 𑀫𑀳𑀦𑁆𑀢𑀁 𑀕𑀸𑀫𑀁 𑀓𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀓𑀼𑀮𑀸𑀦𑀺 𑀯𑀸𑀲𑀸𑀧𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑀻𑀦𑀁 𑀪𑁄𑀕𑀕𑀸𑀫𑀸𑀢𑀺 𑀲𑀫𑀦𑁆𑀢𑀸 𑀪𑀽𑀢𑀕𑀸𑀫𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀧𑀼𑀭𑀸𑀡𑀦𑀸𑀫𑀁, 𑀧𑀦 𑀧𑀭𑀺𑀘𑁆𑀙𑁂𑀤𑀜𑁆𑀘 𑀦 𑀯𑀺𑀦𑀸𑀲𑁂𑀦𑁆𑀢𑀺, 𑀢𑁂𑀧𑀺 𑀧𑀘𑁆𑀘𑁂𑀓𑀁 𑀕𑀸𑀫𑀲𑀻𑀫𑀸 𑀏𑀯. 𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀫𑀕𑀸𑀫𑀲𑀻𑀫𑀢𑁆𑀢𑀁 𑀦 𑀯𑀺𑀚𑀳𑀦𑁆𑀢𑀺. 𑀲𑀸 𑀘 𑀇𑀢𑀭𑀸 𑀘𑀸𑀢𑀺𑀆𑀤𑀺 ‘‘𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀢𑀢𑁆𑀣 𑀳𑀺 𑀲𑀸 𑀘 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀸 𑀅𑀪𑀺𑀦𑀯𑀸, 𑀇𑀢𑀭𑀸 𑀘 𑀅𑀧𑀭𑀺𑀯𑀢𑁆𑀢𑀸 𑀧𑀓𑀢𑀺𑀕𑀸𑀫𑀲𑀻𑀫𑀸, 𑀬𑀣𑀸 𑀩𑀤𑁆𑀥𑀲𑀻𑀫𑀸𑀬 𑀲𑀩𑁆𑀩𑀁 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑁂𑀢𑀸𑀧𑀺 𑀲𑀩𑁆𑀩𑀓𑀫𑁆𑀫𑀸𑀭𑀳𑀢𑀸𑀲𑀤𑀺𑀲𑁂𑀦 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸, 𑀲𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀫𑀜𑁆𑀜𑀢𑁄 ‘‘𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑁂 𑀢𑀺𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑀲𑀻𑀫𑀁 𑀩𑀤𑁆𑀥𑀲𑀻𑀫𑀁 𑀏𑀯 𑀫𑀜𑁆𑀜𑀦𑁆𑀢𑀻𑀢𑀺 𑀢𑀁𑀲𑀤𑀺𑀲𑀢𑀸𑀦𑀺𑀯𑀢𑁆𑀢𑀦𑀫𑀼𑀔𑁂𑀦 𑀉𑀧𑀭𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀢𑀁𑀲𑀤𑀺𑀲𑀢𑀸𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀦𑀬𑀲𑁆𑀲 𑀇𑀥𑁂𑀯 𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂𑀢𑀺 𑀬𑀢𑁆𑀣 ‘‘𑀅𑀲𑀼𑀓𑀕𑀸𑀫𑀲𑁆𑀲 𑀇𑀤𑀁 𑀔𑁂𑀢𑁆𑀢’’𑀦𑁆𑀢𑀺 𑀕𑀸𑀫𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀬𑀢𑁆𑀣 𑀘 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺, 𑀢𑀸𑀤𑀺𑀲𑁂 𑀅𑀭𑀜𑁆𑀜𑁂. 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑀸 𑀦𑀺𑀫𑁆𑀫𑀦𑀼𑀲𑁆𑀲𑀸𑀯𑀸𑀲𑀸 𑀲𑀫𑀼𑀤𑁆𑀤𑀦𑁆𑀢𑀭𑀤𑀻𑀧𑀓𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀁 𑀬𑀜𑁆𑀳𑀺 𑀅𑀕𑀸𑀫𑀔𑁂𑀢𑁆𑀢𑀪𑀽𑀢𑀁 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀯𑀺𑀭𑀳𑀺𑀢𑀁 𑀧𑀤𑁂𑀲𑀁, 𑀢𑀁 𑀲𑀩𑁆𑀩𑀁 𑀅𑀭𑀜𑁆𑀜𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀘 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀯𑀺𑀦𑀸𑀯 𑀲𑀬𑀫𑁂𑀯 𑀲𑀫𑀸𑀦𑀲𑀁𑀯𑀸𑀲𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸. 𑀦𑀤𑀺𑀆𑀤𑀺𑀲𑀻𑀫𑀸𑀲𑀼 𑀯𑀺𑀬 𑀲𑀩𑁆𑀩𑀫𑁂𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀲𑀻𑀫𑀢𑀸 𑀲𑀺𑀤𑁆𑀥𑀸. 𑀅𑀭𑀜𑁆𑀜𑀲𑁆𑀲 𑀧𑀦 𑀲𑀻𑀫𑀢𑀸 𑀓𑀣𑀦𑁆𑀢𑀺? 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀼𑀚𑀸𑀦𑀦𑀲𑀼𑀢𑁆𑀢𑀸𑀤𑀺𑀲𑀸𑀫𑀢𑁆𑀣𑀺𑀬𑀢𑁄. 𑀬𑀣𑀸 𑀳𑀺 𑀕𑀸𑀫𑀲𑀻𑀫𑀸𑀬 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀩𑀳𑀽 𑀩𑀤𑁆𑀥𑀲𑀻𑀫𑀸𑀬𑁄 𑀅𑀦𑀼𑀜𑁆𑀜𑀸𑀢𑀸, 𑀢𑀸𑀲𑀜𑁆𑀘 𑀤𑁆𑀯𑀺𑀦𑁆𑀦𑀫𑀦𑁆𑀢𑀭𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀪𑁂𑀤𑀢𑁆𑀣𑀁 𑀲𑀻𑀫𑀦𑁆𑀢𑀭𑀺𑀓𑀸 𑀅𑀦𑀼𑀜𑁆𑀜𑀸𑀢𑀸, 𑀏𑀯𑀫𑀺𑀥𑀸𑀭𑀜𑁆𑀜𑁂𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸. 𑀢𑀸𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼𑀧𑀺 𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀢𑁄 𑀅𑀭𑀜𑁆𑀜𑀲𑁆𑀲𑀧𑀺 𑀲𑀪𑀸𑀯𑁂𑀦𑁂𑀯 𑀦𑀤𑀺𑀆𑀤𑀻𑀦𑀁 𑀯𑀺𑀬 𑀲𑀻𑀫𑀸𑀪𑀸𑀯𑁄 𑀢𑀢𑁆𑀣 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀫𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀯 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀻𑀫𑀸𑀬𑀫𑁂𑀯 𑀳𑀺 𑀞𑀺𑀢𑀸 𑀲𑀻𑀫𑀝𑁆𑀞𑀸𑀦𑀁 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀦 𑀅𑀲𑀻𑀫𑀸𑀬𑀁 𑀆𑀓𑀸𑀲𑁂 𑀞𑀺𑀢𑀸 𑀯𑀺𑀬 𑀆𑀓𑀸𑀲𑀝𑁆𑀞𑀸𑀦𑀁. 𑀏𑀯𑀫𑁂𑀯 𑀳𑀺 𑀲𑀸𑀫𑀢𑁆𑀣𑀺𑀬𑀁 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀩𑀤𑁆𑀥𑀲𑀻𑀫𑀸𑀦𑀫𑁆𑀧𑀺 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀻𑀫𑀸𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀅𑀣𑀲𑁆𑀲 𑀞𑀺𑀢𑁄𑀓𑀸𑀲𑀢𑁄𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑁄𑀓𑀸𑀲𑀢𑁄. 𑀲𑀘𑁂𑀧𑀺 𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀞𑀺𑀢𑁄𑀓𑀸𑀲𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 ¶ 𑀢𑀸𑀬 𑀲𑀳 𑀲𑀬𑀫𑁂𑀯 𑀲𑀜𑁆𑀚𑀸𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁆𑀣 𑀧𑀦 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂 𑀫𑀳𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀸𑀭𑀜𑁆𑀜𑀲𑀻𑀫𑀸𑀬𑀫𑁂𑀯, 𑀢𑀢𑁆𑀣 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀤𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀓𑁆𑀔𑀢𑀺 𑀳𑀺 ‘‘𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺𑀆𑀤𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭). 𑀇𑀫𑀺𑀦𑀸 𑀏𑀯 𑀘 𑀯𑀘𑀦𑁂𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀲𑀫𑀦𑁆𑀢𑀸 𑀅𑀩𑁆𑀪𑀦𑁆𑀢𑀭𑀁 𑀫𑀺𑀦𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀭𑀡𑁂𑀦𑁂𑀯 𑀲𑀻𑀫𑀸 𑀲𑀜𑁆𑀚𑀸𑀬𑀢𑀺, 𑀦 𑀲𑀬𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀓𑀭𑀡𑀧𑁆𑀧𑀓𑀸𑀭𑁂𑀦 𑀲𑀻𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀩𑀤𑁆𑀥𑀲𑀻𑀫𑀸 𑀘 𑀦 𑀲𑀺𑀬𑀸 𑀪𑀺𑀓𑁆𑀔𑀽𑀦𑀁 𑀓𑀺𑀭𑀺𑀬𑀸𑀧𑀓𑀸𑀭𑀲𑀺𑀤𑁆𑀥𑀺𑀢𑁄. 𑀅𑀧𑀺𑀘 𑀯𑀟𑁆𑀠𑀓𑀻𑀳𑀢𑁆𑀣𑀸𑀦𑀁, 𑀧𑀓𑀢𑀺𑀳𑀢𑁆𑀣𑀸𑀦𑀜𑁆𑀘 𑀮𑁄𑀓𑁂 𑀅𑀦𑁂𑀓𑀯𑀺𑀥𑀢𑁆𑀢𑀸, 𑀯𑀺𑀦𑀬𑁂 𑀈𑀤𑀺𑀲𑀁 𑀳𑀢𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀘 𑀬𑁂𑀦 𑀓𑁂𑀦𑀘𑀺 𑀫𑀺𑀦𑀺𑀢𑁂 𑀘 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁂𑀦 𑀦𑀼 𑀔𑁄 𑀳𑀢𑁆𑀣𑁂𑀦 𑀫𑀺𑀦𑀺𑀢𑀁, 𑀦 𑀦𑀼 𑀔𑁄𑀢𑀺 𑀲𑀻𑀫𑀸𑀬 𑀯𑀺𑀧𑀢𑁆𑀢𑀺𑀲𑀗𑁆𑀓𑀸 𑀪𑀯𑁂𑀬𑁆𑀬. 𑀫𑀺𑀦𑀦𑁆𑀢𑁂𑀳𑀺 𑀘 𑀅𑀡𑀼𑀫𑀢𑁆𑀢𑀫𑁆𑀧𑀺 𑀊𑀦𑀫𑀥𑀺𑀓𑀁 𑀅𑀓𑀢𑁆𑀯𑀸 𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸. 𑀧𑀭𑀺𑀲𑀯𑀲𑁂𑀦 𑀘𑀸𑀬𑀁 𑀯𑀟𑁆𑀠𑀫𑀸𑀦𑀸 𑀢𑁂𑀲𑀁 𑀫𑀺𑀦𑀦𑁂𑀦 𑀯𑀟𑁆𑀠𑀢𑀺 𑀯𑀸 𑀳𑀸𑀬𑀢𑀺 𑀯𑀸. 𑀲𑀗𑁆𑀖𑁂 𑀘 𑀓𑀫𑁆𑀫𑀁 𑀓𑀢𑁆𑀯𑀸 𑀕𑀢𑁂 𑀅𑀬𑀁 𑀪𑀺𑀓𑁆𑀔𑀽𑀦𑀁 𑀧𑀬𑁄𑀕𑁂𑀦 𑀲𑀫𑀼𑀧𑁆𑀧𑀦𑁆𑀦𑀲𑀻𑀫𑀸 𑀢𑁂𑀲𑀁 𑀧𑀬𑁄𑀕𑁂𑀦 𑀯𑀺𑀕𑀘𑁆𑀙𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀘. 𑀓𑀣𑀁 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀦 𑀢𑀺𑀝𑁆𑀞𑁂𑀬𑁆𑀬, 𑀞𑀺𑀢𑀺𑀬𑀸 𑀘 𑀧𑀼𑀭𑀸𑀡𑀯𑀺𑀳𑀸𑀭𑁂𑀲𑀼 𑀯𑀺𑀬 𑀲𑀓𑀮𑁂𑀧𑀺 𑀅𑀭𑀜𑁆𑀜𑁂 𑀓𑀣𑀁 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀸 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀲𑀻𑀫𑀸𑀧𑁂𑀓𑁆𑀔𑀸𑀬 𑀏𑀯 𑀲𑀫𑀼𑀧𑁆𑀧𑀚𑁆𑀚𑀢𑀺, 𑀢𑀩𑁆𑀩𑀺𑀕𑀫𑁂𑀦 𑀯𑀺𑀕𑀘𑁆𑀙𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁆𑀧𑀺 𑀦𑀤𑀺𑀆𑀤𑀻𑀲𑀼𑀧𑀺.

𑀢𑀢𑁆𑀣𑀸𑀧𑀺 𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦 𑀜𑀸𑀬𑀢𑀺. 𑀢𑀣𑀸 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀦𑀁 𑀉𑀪𑀬𑀢𑁆𑀣𑀸𑀧𑀺 𑀘 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑁆𑀲, 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀯𑀸 𑀑𑀓𑀸𑀲𑁄 𑀦 𑀧𑀳𑁄𑀢𑀺, 𑀢𑀢𑁆𑀣 𑀓𑀣𑀁 𑀫𑀺𑀦𑀦𑀁, 𑀔𑀺𑀧𑀦𑀁 𑀯𑀸 𑀪𑀯𑁂𑀬𑁆𑀬? 𑀕𑀸𑀫𑀔𑁂𑀢𑁆𑀢𑀸𑀤𑀻𑀲𑀼 𑀧𑀯𑀺𑀲𑀦𑀢𑁄 𑀅𑀔𑁂𑀢𑁆𑀢𑁂 𑀲𑀻𑀫𑀸 𑀧𑀯𑀺𑀝𑁆𑀞𑀸 𑀦𑀸𑀫𑀸𑀢𑀺 𑀲𑀻𑀫𑀸 𑀯𑀺𑀧𑀚𑁆𑀚𑁂𑀬𑁆𑀬. 𑀅𑀧𑁂𑀓𑁆𑀔𑀸𑀬 𑀲𑀻𑀫𑀼𑀧𑁆𑀧𑀢𑁆𑀢𑀺𑀬𑀁 𑀧𑀦 𑀬𑀢𑁄 𑀧𑀳𑁄𑀢𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀭𑀺𑀧𑀼𑀡𑁆𑀡𑀸 𑀚𑀸𑀬𑀦𑁆𑀢𑀺. 𑀬𑀢𑁄 𑀧𑀦 𑀦 𑀧𑀳𑁄𑀢𑀺, 𑀢𑀢𑁆𑀣 𑀅𑀢𑁆𑀢𑀦𑁄 𑀔𑁂𑀢𑁆𑀢𑀧𑁆𑀧𑀫𑀸𑀡𑁂𑀦𑁂𑀯 𑀚𑀸𑀬𑀦𑁆𑀢𑀺, 𑀦 𑀩𑀳𑀺. 𑀬𑀁 𑀧𑀦𑁂𑀢𑁆𑀣 𑀅𑀩𑁆𑀪𑀦𑁆𑀢𑀭𑀫𑀺𑀦𑀦𑀧𑀫𑀸𑀡𑀲𑁆𑀲, 𑀯𑀸𑀮𑀼𑀓𑀸𑀤𑀺𑀔𑀺𑀧𑀦𑀓𑀫𑁆𑀫𑀲𑁆𑀲 𑀘 𑀤𑀲𑁆𑀲𑀦𑀁, 𑀢𑀁 𑀲𑀜𑁆𑀚𑀸𑀢𑀲𑀻𑀫𑀸𑀦𑀁 𑀞𑀺𑀢𑀝𑁆𑀞𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀁 𑀓𑀢𑀁 𑀕𑀸𑀫𑀽𑀧𑀘𑀸𑀭𑀖𑀭𑀽𑀧𑀘𑀸𑀭𑀚𑀸𑀦𑀦𑀢𑁆𑀣𑀁 𑀮𑁂𑀟𑁆𑀟𑀼𑀲𑀼𑀧𑁆𑀧𑀸𑀤𑀺𑀔𑀺𑀧𑀦𑀯𑀺𑀥𑀸𑀦𑀤𑀲𑁆𑀲𑀦𑀁 𑀯𑀺𑀬. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁 (𑀓𑀗𑁆𑀔𑀸. 𑀅𑀝𑁆𑀞. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). 𑀏𑀯𑀁 𑀓𑀢𑁂𑀧𑀺 𑀢𑀲𑁆𑀲 ¶ 𑀧𑀭𑀺𑀘𑁆𑀙𑁂𑀤𑀲𑁆𑀲 𑀬𑀸𑀣𑀸𑀯𑀢𑁄 𑀜𑀸𑀢𑀼𑀁 ¶ 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑁂𑀦 𑀧𑀼𑀣𑀼𑀮𑀢𑁄 𑀜𑀢𑁆𑀯𑀸 𑀅𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑁂𑀳𑀺 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀩𑀳𑀺 𑀓𑀭𑁄𑀦𑁆𑀢𑁂𑀳𑀺 𑀅𑀢𑀺𑀤𑀽𑀭𑁂 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀧𑁂𑀲𑁂𑀢𑀩𑁆𑀩𑀁.

𑀅𑀧𑀭𑁂 𑀧𑀦 ‘‘𑀲𑀻𑀫𑀸𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀕𑁆𑀕𑀕𑀫𑀦𑀦𑀳𑀸𑀦𑀸𑀤𑀺𑀅𑀢𑁆𑀣𑁂𑀳𑀺 𑀏𑀓𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀅𑀭𑀜𑁆𑀜𑁂 𑀯𑀸 𑀦𑀤𑀺𑀆𑀤𑀻𑀲𑀼 𑀯𑀸 𑀧𑀯𑀺𑀝𑁆𑀞𑁂 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀪𑀸 𑀯𑀺𑀬 𑀧𑀤𑀻𑀧𑀲𑁆𑀲 𑀲𑀫𑀼𑀧𑁆𑀧𑀚𑁆𑀚𑀢𑀺, 𑀕𑀸𑀫𑀔𑁂𑀢𑁆𑀢𑀸𑀤𑀻𑀲𑀼 𑀢𑀲𑁆𑀫𑀺𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀯𑀺𑀕𑀘𑁆𑀙𑀢𑀺. 𑀢𑁂𑀦𑁂𑀯 𑀘𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑀻𑀫𑀸𑀤𑁆𑀯𑀬𑀲𑁆𑀲 𑀅𑀦𑁆𑀢𑀭𑀸 𑀲𑀻𑀫𑀦𑁆𑀢𑀭𑀺𑀓𑀸 𑀅𑀜𑁆𑀜𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁, 𑀉𑀤𑀓𑀼𑀓𑁆𑀔𑁂𑀧𑀜𑁆𑀘 𑀞𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀁, 𑀲𑀻𑀫𑀸𑀧𑀭𑀺𑀬𑀦𑁆𑀢𑁂 𑀳𑀺 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀧𑁂𑀲𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑀦𑁆𑀢𑀸 𑀲𑀜𑁆𑀚𑀸𑀢𑀲𑀻𑀫𑀸 𑀇𑀢𑀭𑁂𑀲𑀁 𑀲𑀻𑀫𑀸𑀬 𑀨𑀼𑀲𑀺𑀢𑁆𑀯𑀸 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀭𑁂𑀬𑁆𑀬, 𑀲𑁄 𑀫𑀸 𑀳𑁄𑀢𑀽𑀢𑀺, 𑀇𑀢𑀭𑀣𑀸 𑀳𑀢𑁆𑀣𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸𑀬𑀧𑁂𑀢𑁆𑀣 𑀲𑀻𑀫𑀦𑁆𑀢𑀭𑀺𑀓𑀸𑀬 𑀅𑀦𑀼𑀚𑀸𑀦𑀺𑀢𑀩𑁆𑀩𑀢𑁄. 𑀅𑀧𑀺𑀘 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀲𑁆𑀲𑀸𑀧𑀺 𑀉𑀪𑀬𑀢𑁆𑀣 𑀓𑀫𑁆𑀫𑀓𑁄𑀧𑀯𑀘𑀦𑀢𑁄𑀧𑀺 𑀘𑁂𑀢𑀁 𑀲𑀺𑀚𑁆𑀛𑀢𑀺. 𑀢𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀲𑀜𑁆𑀚𑀸𑀢𑀸𑀬 𑀲𑀻𑀫𑀸𑀬 𑀉𑀪𑀺𑀦𑁆𑀦𑀫𑁆𑀧𑀺 𑀲𑀻𑀫𑀸𑀦𑀁, 𑀏𑀓𑀸𑀬 𑀏𑀯 𑀯𑀸 𑀲𑀗𑁆𑀓𑀭𑀢𑁄. 𑀇𑀢𑀭𑀣𑀸 𑀢𑀲𑁆𑀲 𑀓𑀫𑁆𑀫𑀓𑁄𑀧𑀯𑀘𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀻’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸). 𑀓𑀺𑀜𑁆𑀘 𑀅𑀕𑀸𑀫𑀓𑀸𑀭𑀜𑁆𑀜𑁂 𑀞𑀺𑀢𑀲𑁆𑀲 𑀓𑀫𑁆𑀫𑀓𑀭𑀡𑀺𑀘𑁆𑀙𑀸𑀯𑀺𑀭𑀳𑀺𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀚𑁆𑀛𑁄𑀓𑀸𑀲𑁂 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄, 𑀲𑁄 𑀘 𑀧𑀭𑀺𑀘𑁆𑀙𑁂𑀤𑁄 𑀲𑀻𑀫𑀸. 𑀏𑀯𑀁 𑀅𑀧𑁂𑀓𑁆𑀔𑀁 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑀸. 𑀢𑁂𑀦𑁂𑀯𑁂𑀢𑁆𑀣 ‘𑀅𑀬𑀁 𑀲𑀻𑀫𑀸 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀫𑁆𑀧𑀺 𑀮𑀪𑀢𑀻’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀓𑀫𑁆𑀫𑀓𑀭𑀡𑀺𑀘𑁆𑀙𑀁 𑀯𑀺𑀦𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑀼𑀧𑁆𑀧𑀢𑁆𑀢𑀺 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀧𑀤𑀻𑀧𑀲𑁆𑀲 𑀧𑀪𑀸 𑀯𑀺𑀬 𑀲𑀩𑁆𑀩𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀁 𑀲𑀻𑀫𑀸𑀲𑀫𑁆𑀪𑀯𑁂𑀦 𑀲𑀗𑁆𑀖𑁂, 𑀕𑀡𑁂 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀢𑀢𑁆𑀭𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑀦𑁆𑀢𑀸 𑀧𑀘𑁆𑀘𑁂𑀓𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑁂𑀓𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑀤𑁄𑀲𑀧𑁆𑀧𑀲𑀗𑁆𑀕𑀢𑁄. 𑀧𑀭𑀺𑀲𑀯𑀲𑁂𑀦 𑀘𑀲𑁆𑀲𑀸 𑀯𑀟𑁆𑀠𑀺, 𑀳𑀸𑀦𑀺 𑀘 𑀲𑀫𑁆𑀪𑀯𑀢𑀺. 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀅𑀪𑀺𑀦𑀯𑀲𑀻𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀏𑀯, 𑀕𑀢𑀸𑀦𑀁 𑀲𑀫𑀦𑁆𑀢𑀸 𑀞𑀺𑀢𑀲𑀻𑀫𑀸𑀧𑀺 𑀯𑀺𑀦𑀸𑀲𑁄 𑀘 𑀪𑀯𑁂𑀬𑁆𑀬.

𑀧𑀸𑀴𑀺𑀬𑀁 𑀧𑀦 ‘‘𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪𑁭) 𑀏𑀓𑀸 𑀏𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀉𑀤𑀓𑀼𑀓𑁆𑀔𑁂𑀧𑀸 𑀘 𑀅𑀦𑀼𑀜𑁆𑀜𑀸𑀢𑀸, 𑀦 𑀘𑁂𑀲𑀸 𑀲𑀻𑀫𑀸 𑀲𑀪𑀸𑀯𑁂𑀦, 𑀓𑀸𑀭𑀡𑀲𑀸𑀫𑀢𑁆𑀣𑀺𑀬𑁂𑀦 𑀯𑀸 𑀧𑀪𑀸 𑀯𑀺𑀬 𑀧𑀤𑀻𑀧𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀦𑁆𑀢𑀼 ¶ 𑀪𑀕𑀯𑀢𑁄 𑀅𑀦𑀼𑀚𑀸𑀦𑀦𑁂𑀦𑁂𑀯, 𑀪𑀕𑀯𑀸 𑀘 𑀇𑀫𑀸𑀬𑁄 𑀅𑀦𑀼𑀚𑀸𑀦𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑁂𑀦 𑀓𑀫𑁆𑀫𑀓𑀭𑀡𑀲𑀼𑀔𑀢𑁆𑀣𑀫𑁂𑀯 𑀅𑀦𑀼𑀜𑁆𑀜𑀸𑀲𑀻𑀢𑀺 𑀓𑀣𑀁 𑀦𑀳𑀸𑀦𑀸𑀤𑀺𑀓𑀺𑀘𑁆𑀘𑁂𑀦 𑀧𑀯𑀺𑀝𑁆𑀞𑀸𑀦𑀫𑁆𑀧𑀺 𑀲𑀫𑀦𑁆𑀢𑀸 𑀢𑀸𑀲𑀁 𑀲𑀻𑀫𑀸𑀦𑀁 𑀲𑀫𑀼𑀧𑁆𑀧𑀢𑁆𑀢𑀺 𑀧𑀬𑁄𑀚𑀦𑀸𑀪𑀸𑀯𑀸? 𑀧𑀬𑁄𑀚𑀦𑁂 𑀘 𑀏𑀓𑀁 𑀏𑀯 𑀧𑀬𑁄𑀚𑀦𑀦𑁆𑀢𑀺 𑀓𑀣𑀁 𑀧𑀘𑁆𑀘𑁂𑀓𑀁 𑀪𑀺𑀓𑁆𑀔𑀼𑀕𑀡𑀦𑀸𑀬 𑀅𑀦𑁂𑀓𑀲𑀻𑀫𑀸𑀲𑀫𑀼𑀧𑁆𑀧𑀢𑁆𑀢𑀺 ¶ ? ‘‘𑀏𑀓𑀲𑀻𑀫𑀸𑀬𑀁 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀬𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀅𑀦𑁆𑀢𑀭𑀸 𑀢𑀢𑁆𑀢𑀓𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀲𑀻𑀫𑀦𑁆𑀢𑀭𑀺𑀓𑀝𑁆𑀞𑀧𑀦𑀯𑀘𑀦𑀁, 𑀢𑀢𑁆𑀣 𑀞𑀺𑀢𑀸𑀦𑀁 𑀓𑀫𑁆𑀫𑀓𑁄𑀧𑀯𑀘𑀦𑀜𑁆𑀘, 𑀢𑀫𑁆𑀧𑀺 𑀇𑀫𑀸𑀲𑀁 𑀲𑀻𑀫𑀸𑀦𑀁 𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑁄𑀥𑀢𑀸𑀬 𑀲𑀻𑀫𑀸𑀬 𑀲𑀫𑁆𑀪𑁂𑀤𑀲𑀗𑁆𑀓𑀁, 𑀓𑀫𑁆𑀫𑀓𑁄𑀧𑀲𑀗𑁆𑀓𑀜𑁆𑀘 𑀤𑀽𑀭𑀢𑁄 𑀧𑀭𑀺𑀳𑀭𑀺𑀢𑀼𑀁 𑀯𑀼𑀢𑁆𑀢𑀁.

𑀬𑁄 𑀘 𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑀢𑁆𑀣𑀁 𑀪𑀕𑀯𑀢𑀸 𑀅𑀩𑁆𑀪𑁄𑀓𑀸𑀲𑁂 𑀤𑀲𑁆𑀲𑀺𑀢𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄, 𑀲𑁄 𑀲𑀻𑀫𑀸 𑀏𑀯 𑀦 𑀳𑁄𑀢𑀺, 𑀔𑁂𑀢𑁆𑀢𑀢𑀴𑀸𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀯𑀺𑀬 𑀅𑀬𑀫𑁂𑀢𑁆𑀣 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄𑀯. 𑀢𑀢𑁆𑀣 𑀘 𑀩𑀳𑀽𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀢𑁄 𑀞𑀺𑀢𑁂𑀲𑀼 𑀢𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀏𑀯 𑀘𑀻𑀯𑀭𑀁 𑀞𑀧𑁂𑀢𑀩𑁆𑀩𑀁. 𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬. 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀕𑀬𑁆𑀳𑀫𑀸𑀦𑁂 𑀅𑀩𑁆𑀪𑀦𑁆𑀢𑀭𑀧𑀭𑀺𑀬𑁄𑀲𑀸𑀦𑁂 𑀞𑀧𑀺𑀢𑀘𑀻𑀯𑀭𑀁 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀢𑁄 𑀩𑀳𑀺 𑀳𑁄𑀢𑀻𑀢𑀺 𑀢𑀁 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸. 𑀲𑀻𑀫𑀸 𑀧𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄𑀯 𑀕𑀳𑁂𑀢𑀩𑁆𑀩𑀸. 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑁄𑀧𑁂𑀢𑁆𑀣 𑀅𑀩𑁆𑀪𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑁄, 𑀦 𑀧𑀦 𑀬𑀸𑀯 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀫𑀳𑀸𑀲𑀻𑀫𑀸𑀬 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀯𑁄𑀳𑀸𑀭𑁄 𑀯𑀺𑀬. 𑀫𑀳𑀸𑀲𑀻𑀫𑀸𑀬𑀫𑁆𑀧𑀺 𑀳𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀇𑀥𑀸𑀧𑀺 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀻𑀫𑀸𑀧𑀭𑀺𑀬𑀦𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑀻𑀫𑀸𑀧𑁂𑀓𑁆𑀔𑀯𑀲𑁂𑀦𑁂𑀯𑁂𑀢𑀸𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀢𑀩𑁆𑀩𑀺𑀕𑀫𑁂𑀦 𑀯𑀺𑀦𑀸𑀲𑁄 𑀘 𑀕𑀳𑁂𑀢𑀩𑁆𑀩𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑁄 𑀯𑀸 𑀧𑀓𑀸𑀭𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀕𑀯𑁂𑀲𑀺𑀢𑀩𑁆𑀩𑁄.

𑀇𑀥 𑀧𑀦 ‘‘𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀅𑀝𑁆𑀞𑀓𑀣𑀸𑀬𑀜𑁆𑀘 𑀭𑀼𑀓𑁆𑀔𑀸𑀤𑀺𑀦𑀺𑀭𑀦𑁆𑀢𑀭𑁂𑀧𑀺 𑀅𑀭𑀜𑁆𑀜𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀯𑀺𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀬 𑀅𑀭𑀜𑁆𑀜𑀲𑀻𑀫𑀸𑀬 𑀲𑀳 𑀏𑀢𑀲𑁆𑀲𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀤𑁄𑀲𑀸𑀪𑀸𑀯𑁄 𑀧𑀕𑁂𑀯 𑀅𑀕𑀸𑀫𑀓𑁂 𑀭𑀼𑀓𑁆𑀔𑁂𑀢𑀺 𑀦𑀺𑀲𑁆𑀲𑀺𑀢𑁂𑀧𑀺 𑀧𑀤𑁂𑀲𑁂 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑁆𑀲 𑀭𑀼𑀓𑁆𑀔𑀧𑀭𑀺𑀳𑀸𑀭𑀁 𑀯𑀺𑀦𑀸𑀯 𑀅𑀩𑁆𑀪𑁄𑀓𑀸𑀲𑀧𑀭𑀺𑀳𑀸𑀭𑁄𑀯 𑀅𑀦𑀼𑀫𑀢𑁄𑀢𑀺 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀘𑀸𑀭𑀢𑁆𑀣𑀸𑀬𑀸𑀢𑀺 ¶ 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺. 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀺 𑀏𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁆𑀢𑀸. 𑀢𑀲𑁆𑀫𑀸 𑀲𑀗𑁆𑀖𑀁 𑀯𑀺𑀦𑀸 𑀏𑀓𑁂𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀩𑀳𑀺 𑀢𑀺𑀝𑁆𑀞𑀦𑁆𑀢𑁂𑀦 𑀅𑀜𑁆𑀜𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀤𑀽𑀭𑁂 𑀏𑀯 𑀞𑀸𑀢𑀩𑁆𑀩𑀁, 𑀇𑀢𑀭𑀣𑀸 𑀓𑀫𑁆𑀫𑀓𑁄𑀧𑀲𑀗𑁆𑀓𑀢𑁄. 𑀉𑀤𑀓𑀼𑀓𑁆𑀔𑁂𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭). 𑀇𑀤𑀜𑁆𑀘𑁂𑀢𑁆𑀣 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸𑀦𑀼𑀚𑀸𑀦𑀦𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀪𑀕𑀯𑀢𑀸 𑀦𑀺𑀤𑀸𑀦𑀯𑀲𑁂𑀦 𑀏𑀓𑀕𑀸𑀫𑀲𑀻𑀫𑀸𑀦𑀺𑀲𑁆𑀲𑀺𑀢𑀸𑀦𑀁 ¶ , 𑀏𑀓𑀲𑀪𑀸𑀕𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀤𑁄𑀲𑀧𑀭𑀺𑀳𑀸𑀭𑀸𑀬 𑀲𑀻𑀫𑀦𑁆𑀢𑀭𑀺𑀓𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀣𑀸𑀧𑀺 𑀢𑀤𑀦𑀼𑀮𑁄𑀫𑀢𑁄 𑀏𑀓𑀅𑀭𑀜𑁆𑀜𑀲𑀻𑀫𑀸𑀦𑀤𑀺𑀆𑀤𑀺𑀲𑀻𑀫𑀜𑁆𑀘 𑀦𑀺𑀲𑁆𑀲𑀺𑀢𑀸𑀦𑀁 𑀏𑀓𑀲𑀪𑀸𑀕𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀫𑁆𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁, 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀅𑀩𑁆𑀬𑀯𑀥𑀸𑀦𑁂𑀦 𑀞𑀸𑀦𑀜𑁆𑀘 𑀪𑀕𑀯𑀢𑀸 𑀅𑀦𑀪𑀺𑀫𑀢𑀫𑁂𑀯𑀸𑀢𑀺 𑀜𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀇𑀥𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀫𑀓𑀁𑀲𑀼. 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁆𑀧𑀺 𑀳𑀺 𑀏𑀓𑀲𑀻𑀫𑀸𑀦𑀺𑀲𑁆𑀲𑀺𑀢𑀢𑁆𑀢𑀁, 𑀏𑀓𑀲𑀪𑀸𑀕𑀢𑁆𑀢𑀜𑁆𑀘𑀸𑀢𑀺 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀲𑀢𑀺 𑀏𑀓𑀁 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀞𑀸𑀦𑀁 𑀲𑀫𑁆𑀪𑁂𑀤𑀸𑀬 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀘𑁂𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀩𑀤𑁆𑀥𑀲𑀻𑀫𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀬𑀫𑁆𑀧𑀺 𑀦𑀬𑀢𑁄 𑀤𑀲𑁆𑀲𑀺𑀢𑁄 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

‘‘𑀲𑀪𑀸𑀯𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 𑀕𑀸𑀫𑀲𑀻𑀫𑀸 𑀯𑀺𑀬 𑀅𑀩𑀤𑁆𑀥𑀲𑀻𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀫𑁂𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦 𑀓𑁂𑀦𑀘𑀻𑀢𑀺 𑀅𑀦𑁆𑀢𑀫𑀲𑁄 𑀲𑀽𑀓𑀭𑀸𑀤𑀺𑀦𑀸 𑀲𑀢𑁆𑀢𑁂𑀦. 𑀫𑀳𑁄𑀖𑁂𑀦 𑀧𑀦 𑀉𑀦𑁆𑀦𑀢𑀝𑁆𑀞𑀸𑀦𑀢𑁄 𑀦𑀺𑀦𑁆𑀦𑀝𑁆𑀞𑀸𑀦𑁂 𑀧𑀢𑀦𑁆𑀢𑁂𑀦 𑀔𑀢𑁄 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀮𑀓𑁆𑀔𑀡𑀬𑀼𑀢𑁆𑀢𑁄 𑀚𑀸𑀢𑀲𑁆𑀲𑀭𑁄𑀯. 𑀏𑀢𑁆𑀣𑀸𑀧𑀺 𑀔𑀼𑀤𑁆𑀤𑀓𑁂 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸.

𑀧𑀼𑀦 𑀢𑀢𑁆𑀣𑀸𑀢𑀺 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸𑀲𑀼 𑀏𑀢𑀸𑀲𑀼 𑀦𑀤𑀺𑀆𑀤𑀻𑀲𑀼 𑀢𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀼 𑀧𑀼𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑀸𑀬 𑀅𑀩𑀤𑁆𑀥𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺𑀆𑀤𑀻𑀲𑀼 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀻𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁄, 𑀉𑀤𑀓𑀲𑁆𑀲 𑀧𑀢𑀦𑁄𑀓𑀸𑀲𑁄, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀸. 𑀅𑀬𑀜𑁆𑀳𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀢𑁆𑀣𑁄 𑁋 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀬𑀸𑀯 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 ¶ 𑀉𑀤𑀓𑀼𑀓𑁆𑀔𑁂𑀧𑁄 𑀉𑀤𑀓𑀧𑀢𑀦𑀝𑁆𑀞𑀸𑀦𑀁, 𑀢𑀸𑀯 𑀬𑀁 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁, 𑀅𑀬𑀁 𑀢𑀢𑁆𑀣 𑀦𑀤𑀺𑀆𑀤𑀻𑀲𑀼 𑀅𑀧𑀭𑀸 𑀲𑀫𑀸𑀦𑀲𑀁𑀯𑀸𑀲𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺.

𑀢𑀲𑁆𑀲 𑀅𑀦𑁆𑀢𑁄𑀢𑀺 𑀢𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀞𑀸𑀦𑀲𑁆𑀲 𑀅𑀦𑁆𑀢𑁄. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯 𑀅𑀦𑁆𑀢𑁄, 𑀢𑀢𑁄 𑀩𑀳𑀺𑀧𑀺, 𑀏𑀓𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀞𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀘𑀦𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁄 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺 𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀢𑀲𑁆𑀲 𑀅𑀦𑁆𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 ¶ 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀩𑀳𑀺𑀧𑀭𑀺𑀘𑁆𑀙𑁂𑀤𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁭) 𑀯𑀢𑁆𑀯𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀩𑀳𑀼 𑀧𑀧𑀜𑁆𑀘𑀺𑀢𑀁, 𑀢𑀁 𑀦 𑀲𑀼𑀦𑁆𑀤𑀭𑀁 𑀇𑀥 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀦𑀬𑀢𑁄 𑀲𑀁𑀲𑀦𑁆𑀤𑀦𑀢𑁄 𑀲𑀗𑁆𑀖𑀝𑀦𑀢𑁄. 𑀢𑀣𑀸 𑀳𑀺 𑀤𑁆𑀯𑀺𑀦𑁆𑀦𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀦𑀫𑀦𑁆𑀢𑀭𑀸 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀲𑀻𑀫𑀦𑁆𑀢𑀭𑀺𑀓𑀁 𑀅𑀝𑁆𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀧𑁂𑀢𑀩𑁆𑀩𑁄, 𑀢𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺 𑀏𑀯, 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀇𑀥𑁂𑀯 𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀻𑀫𑀦𑁆𑀢𑀭𑀺𑀓𑁄𑀧𑀘𑀸𑀭𑁂𑀦 𑀉𑀤𑀓𑀼𑀓𑁆𑀔𑁂𑀧𑀢𑁄 𑀊𑀦𑀓𑁂 𑀞𑀧𑀺𑀢𑁂 𑀲𑀻𑀫𑀸𑀬 𑀲𑀻𑀫𑀸𑀲𑀫𑁆𑀪𑁂𑀤𑀢𑁄 𑀓𑀫𑁆𑀫𑀓𑁄𑀧𑁄𑀧𑀺 𑀯𑀼𑀢𑁆𑀢𑁄 𑀏𑀯. 𑀬𑀤𑀕𑁆𑀕𑁂𑀦 𑀘 𑀏𑀯𑀁 𑀯𑀼𑀢𑁆𑀢𑁄, 𑀢𑀤𑀕𑁆𑀕𑁂𑀦 𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀦𑁄 𑀧𑀯𑁂𑀲𑁂𑀧𑀺 𑀲𑀢𑀺 𑀢𑀲𑁆𑀲 𑀲𑀻𑀫𑀝𑁆𑀞𑀪𑀸𑀯𑀢𑁄 𑀓𑀫𑁆𑀫𑀓𑁄𑀧𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 ‘‘𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀓𑀣𑀦𑀜𑁆𑀘𑁂𑀢𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀦𑁆𑀢𑁂𑀦𑀧𑀺 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀆𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀫𑀦𑁆𑀢𑀭𑀸 𑀢𑀢𑁆𑀢𑀓𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀯𑀘𑀦𑀢𑁄𑀧𑀺 𑀏𑀢𑀸𑀲𑀁 𑀤𑀼𑀩𑁆𑀩𑀺𑀚𑀸𑀦𑀧𑀭𑀺𑀘𑁆𑀙𑁂𑀤𑀢𑀸, 𑀢𑀢𑁆𑀣 𑀘 𑀞𑀺𑀢𑀸𑀦𑀁 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀲𑀺𑀚𑁆𑀛𑀢𑀺. 𑀓𑀫𑁆𑀫𑀓𑁄𑀧𑀲𑀗𑁆𑀓𑀝𑁆𑀞𑀸𑀦𑀫𑁆𑀧𑀺 𑀆𑀘𑀭𑀺𑀬𑀸 𑀤𑀽𑀭𑀢𑁄 𑀧𑀭𑀺𑀳𑀸𑀭𑀢𑁆𑀣𑀁 𑀓𑀫𑁆𑀫𑀓𑁄𑀧𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀯𑀸𑀯 𑀞𑀧𑁂𑀲𑀼𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀦𑁆𑀢𑀺 𑀲𑀻𑀫𑀁. ‘‘𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀇𑀫𑀺𑀦𑀸 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑁄 𑀏𑀯 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀯𑀸𑀮𑀼𑀓𑀸𑀤𑀻𑀳𑀺 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀤𑀦𑀁, 𑀇𑀢𑀭𑀣𑀸 𑀩𑀳𑀺 𑀧𑀭𑀺𑀯𑀢𑁆𑀢𑀸 𑀦𑀼 𑀔𑁄, 𑀦𑁄 𑀯𑀸𑀢𑀺 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺. 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑁆𑀲𑀸𑀯𑀦𑀸𑀢𑀺 𑀓𑁂𑀯𑀮𑀸𑀬 𑀦𑀤𑀺𑀲𑀻𑀫𑀸𑀬 𑀅𑀦𑀼𑀲𑁆𑀲𑀸𑀯𑀦𑀸 ¶ . 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀯𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀩𑀳𑀺 𑀞𑀺𑀢𑁂 𑀭𑀼𑀓𑁆𑀔𑁂𑀧𑀺 𑀯𑀸. 𑀩𑀳𑀺𑀦𑀤𑀺𑀢𑀻𑀭𑀫𑁂𑀯 𑀳𑀺 𑀯𑀺𑀲𑀪𑀸𑀕𑀲𑀻𑀫𑀢𑁆𑀢𑀸 𑀅𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑀸𑀦𑀁, 𑀦 𑀅𑀦𑁆𑀢𑁄𑀦𑀤𑀻 𑀦𑀺𑀲𑁆𑀲𑀬𑀢𑁆𑀢𑁂𑀦 𑀲𑀪𑀸𑀕𑀢𑁆𑀢𑀸. 𑀢𑁂𑀦𑁂𑀯 ‘‘𑀩𑀳𑀺𑀦𑀤𑀺𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸’’𑀢𑀺𑀆𑀤𑀺𑀦𑀸 𑀢𑀻𑀭𑀫𑁂𑀯 𑀅𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑀸𑀦𑀢𑁆𑀢𑁂𑀦 𑀤𑀲𑁆𑀲𑀺𑀢𑀁, 𑀦 𑀧𑀦 𑀦𑀤𑀻. ‘‘𑀭𑀼𑀓𑁆𑀔𑁂𑀧𑀺 𑀞𑀺𑀢𑁂𑀳𑀻’’𑀢𑀺 𑀇𑀤𑀁 𑀅𑀦𑁆𑀢𑁄𑀉𑀤𑀓𑀼𑀓𑁆𑀔𑁂𑀧𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀩𑀳𑀺𑀉𑀤𑀓𑀼𑀓𑁆𑀔𑁂𑀧𑁂 𑀪𑀺𑀓𑁆𑀔𑀽𑀦𑀁 𑀞𑀸𑀢𑀼𑀁 𑀯𑀝𑁆𑀝𑀢𑀺.

𑀭𑀼𑀓𑁆𑀔𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀅𑀦𑁆𑀢𑁄𑀉𑀤𑀓𑀼𑀓𑁆𑀔𑁂𑀧𑀝𑁆𑀞𑀲𑁆𑀲 𑀭𑀼𑀓𑁆𑀔𑀲𑁆𑀲. 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀳𑀸𑀭𑁂 𑀩𑀤𑁆𑀥𑀲𑀻𑀫𑀁, 𑀕𑀸𑀫𑀲𑀻𑀫𑀜𑁆𑀘 𑀢𑀢𑁆𑀣 𑀞𑀺𑀢𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀲𑀻𑀫𑀸𑀓𑀭𑀡𑀯𑀲𑁂𑀦𑁂𑀯 𑀲𑁄𑀥𑁂𑀢𑁆𑀯𑀸. 𑀬𑀣𑀸 𑀘 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺, 𑀏𑀯𑀁 𑀩𑀤𑁆𑀥𑀲𑀻𑀫𑀸𑀬𑀁, 𑀕𑀸𑀫𑀲𑀻𑀫𑀸𑀬𑀁 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀝𑁆𑀞𑁂 𑀲𑁄𑀥𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀅𑀭𑀜𑁆𑀜𑀲𑀻𑀫𑀸𑀳𑀺𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬, 𑀇𑀫𑀸𑀬 𑀘 𑀲𑀤𑁆𑀥𑀺𑀁 𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀤𑁄𑀲𑁄𑀧𑀺 𑀦𑀬𑀢𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀸𑀕𑀸𑀫𑀲𑀻𑀫𑀸𑀳𑀺𑀧𑀺 𑀲𑀤𑁆𑀥𑀺𑀁, 𑀏𑀢𑀸𑀲𑀜𑁆𑀘 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 ¶ 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀤𑁄𑀲𑁄 𑀜𑀸𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀢𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑀫𑀸𑀲𑀦𑁆𑀦𑀸𑀦𑀫𑁂𑀯𑁂𑀢𑁆𑀣 𑀤𑀲𑁆𑀲𑀺𑀢𑀁.

𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀦𑀬𑀕𑁆𑀕𑀳𑀡𑀫𑀼𑀔𑀁 𑁋 𑀬𑀣𑀸 𑀳𑀺 𑀩𑀤𑁆𑀥𑀲𑀻𑀫𑀸𑀬𑀁 𑀲𑀫𑁆𑀫𑀢𑀸 𑀯𑀺𑀧𑀢𑁆𑀢𑀺𑀲𑀻𑀫𑀸 𑀳𑁄𑀢𑀻𑀢𑀺 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺, 𑀏𑀯𑀁 𑀦𑀤𑀺𑀆𑀤𑀻𑀲𑀼 𑀲𑀫𑁆𑀫𑀢𑀸𑀧𑀺 𑀩𑀤𑁆𑀥𑀲𑀻𑀫𑀸 𑀯𑀺𑀧𑀢𑁆𑀢𑀺𑀲𑀻𑀫𑀸𑀯 𑀳𑁄𑀢𑀻𑀢𑀺 𑀢𑀸𑀳𑀺𑀧𑀺 𑀲𑀤𑁆𑀥𑀺𑀁 𑀢𑀲𑁆𑀲𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀚𑁆𑀛𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀕𑀸𑀫𑀦𑀤𑀺𑀆𑀤𑀻𑀳𑀺 𑀲𑀤𑁆𑀥𑀺𑀁, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀘 𑀅𑀭𑀜𑁆𑀜𑀸𑀤𑀻𑀳𑀺 𑀲𑀤𑁆𑀥𑀺𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀲𑁆𑀲 𑀦 𑀯𑀝𑁆𑀝𑀦𑀓𑀪𑀸𑀯𑁄 𑀜𑀸𑀢𑀩𑁆𑀩𑁄, 𑀏𑀯𑀫𑁂𑀢𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸 𑀩𑀤𑁆𑀥𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀅𑀜𑁆𑀜𑀫𑀜𑁆𑀜𑀜𑁆𑀘𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀸𑀳𑀺 𑀇𑀢𑀭𑀻𑀢𑀭𑀸𑀲𑀁 𑀦𑀺𑀲𑁆𑀲𑀬𑀲𑀻𑀫𑀸𑀳𑀺 𑀘 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀲𑀫𑁆𑀪𑁂𑀤𑀤𑁄𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑀬𑁄 𑀜𑀸𑀢𑀩𑁆𑀩𑁄𑀯.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀦 𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀸𑀤𑀻𑀳𑀺 𑀲𑀤𑁆𑀥𑀺𑀁 𑀩𑀤𑁆𑀥𑀲𑀻𑀫𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀲𑁆𑀲 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀲𑁆𑀲 𑀅𑀦𑀼𑀮𑁄𑀫𑀢𑁄 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀅𑀦𑀼𑀜𑁆𑀜𑀸𑀢𑁄𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 𑀉𑀤𑀓𑀼𑀓𑁆𑀔𑁂𑀧𑀩𑀤𑁆𑀥𑀲𑀻𑀫𑀸𑀤𑀻𑀦𑀁 𑀅𑀦𑁆𑀢𑀭𑀸 𑀓𑀲𑁆𑀫𑀸 𑀲𑀻𑀫𑀦𑁆𑀢𑀭𑀺𑀓𑀸 𑀦 𑀯𑀺𑀳𑀺𑀢𑀸𑀢𑀺? 𑀦𑀺𑀲𑁆𑀲𑀬𑀪𑁂𑀤𑀲𑀪𑀸𑀯𑀪𑁂𑀤𑁂𑀳𑀺 ¶ 𑀲𑀬𑀫𑁂𑀯 𑀪𑀺𑀦𑁆𑀦𑀢𑁆𑀢𑀸. 𑀏𑀓𑀦𑀺𑀲𑁆𑀲𑀬𑀏𑀓𑀲𑀪𑀸𑀯𑀸𑀦𑀫𑁂𑀯 𑀳𑀺 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀺𑀦𑀸𑀲𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀏𑀢𑁂𑀦𑁂𑀯 𑀦𑀤𑀺𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀩𑀤𑁆𑀥𑀸𑀬 𑀲𑀻𑀫𑀸𑀬 𑀲𑀗𑁆𑀖𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀦𑀤𑀺𑀬𑀫𑁆𑀧𑀺 𑀬𑀸𑀯 𑀕𑀸𑀫𑀔𑁂𑀢𑁆𑀢𑀁 𑀆𑀳𑀘𑁆𑀘 𑀞𑀺𑀢𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀜𑁆𑀜𑁂𑀲𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀬𑀸 𑀧𑀦𑁂𑀢𑀸 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸 𑀕𑀸𑀫𑀸𑀭𑀜𑁆𑀜𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀲𑀻𑀫𑀸 𑀧𑀜𑁆𑀘, 𑀢𑀸 𑀅𑀜𑁆𑀜𑀫𑀜𑁆𑀜𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀲𑀫𑁆𑀪𑁂𑀤𑀤𑁄𑀲𑀁 𑀦𑀸𑀧𑀚𑁆𑀚𑀢𑀺, 𑀢𑀣𑀸 𑀮𑁄𑀓𑀯𑁄𑀳𑀸𑀭𑀸𑀪𑀸𑀯𑀢𑁄. 𑀦 𑀳𑀺 𑀕𑀸𑀫𑀸𑀤𑀬𑁄 𑀕𑀸𑀫𑀦𑁆𑀢𑀭𑀸𑀤𑀻𑀳𑀺, 𑀦𑀤𑀺𑀆𑀤𑀻𑀳𑀺 𑀘 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀫𑀢𑁆𑀢𑁂𑀦 𑀲𑀫𑁆𑀪𑀺𑀦𑁆𑀦𑀸𑀢𑀺 𑀮𑁄𑀓𑁂 𑀯𑁄𑀳𑀭𑀦𑁆𑀢𑀺. 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸𑀦𑀜𑁆𑀘 𑀮𑁄𑀓𑀯𑁄𑀳𑀸𑀭𑀢𑁄𑀯 𑀲𑀫𑁆𑀪𑁂𑀤𑁄 𑀯𑀸 𑀅𑀲𑀫𑁆𑀪𑁂𑀤𑁄 𑀯𑀸 𑀕𑀳𑁂𑀢𑀩𑁆𑀩𑁄, 𑀦𑀸𑀜𑁆𑀜𑀢𑁄. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀓𑀢𑁆𑀣𑀘𑀺𑀧𑀺 𑀲𑀫𑁆𑀪𑁂𑀤𑀦𑀬𑁄 𑀦 𑀤𑀲𑁆𑀲𑀺𑀢𑁄, 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑁄𑀬𑁂𑀯 𑀤𑀲𑁆𑀲𑀺𑀢𑁄𑀢𑀺.

𑀏𑀢𑁆𑀣 𑀧𑀦 𑀩𑀤𑁆𑀥𑀲𑀻𑀫𑀸𑀬 𑀢𑀸𑀯 ‘‘𑀳𑁂𑀝𑁆𑀞𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀻𑀫𑀸𑀕𑀢𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀅𑀥𑁄𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 𑀲𑀩𑁆𑀩𑀣𑀸 𑀤𑀲𑁆𑀲𑀺𑀢𑁄. 𑀕𑀸𑀫𑀲𑀻𑀫𑀸𑀤𑀻𑀦𑀁 𑀧𑀦 𑀦 𑀤𑀲𑁆𑀲𑀺𑀢𑁄. 𑀓𑀣𑀫𑀬𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀓𑁂𑀘𑀺 𑀢𑀸𑀯𑁂𑀢𑁆𑀣 ‘‘𑀕𑀸𑀫𑀲𑀻𑀫𑀸𑀤𑀬𑁄𑀧𑀺 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀯𑀤𑀦𑁆𑀢𑀺.

𑀓𑁂𑀘𑀺 ¶ 𑀧𑀦 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀲𑀻𑀫𑀸, 𑀢𑀸𑀯 𑀢𑀦𑁆𑀦𑀺𑀲𑁆𑀲𑀺𑀢𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀘 𑀧𑀣𑀯𑀺𑀬𑀸 𑀉𑀧𑀭𑀺𑀢𑀮𑁂, 𑀳𑁂𑀝𑁆𑀞𑀸 𑀘 𑀉𑀤𑀓𑀚𑁆𑀛𑁄𑀢𑁆𑀣𑀭𑀡𑀧𑁆𑀧𑀤𑁂𑀲𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀢𑀢𑁄 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀚𑁆𑀛𑁄𑀢𑁆𑀣𑀭𑀡𑀸𑀪𑀸𑀯𑀸. 𑀲𑀘𑁂 𑀧𑀦 𑀉𑀤𑀓𑁄𑀖𑀸𑀤𑀺𑀦𑀸 𑀬𑁄𑀚𑀦𑀧𑁆𑀧𑀫𑀸𑀡𑀫𑁆𑀧𑀺 𑀦𑀺𑀦𑁆𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀦𑀤𑀺𑀲𑀻𑀫𑀸𑀤𑀬𑁄𑀯 𑀳𑁄𑀦𑁆𑀢𑀺, 𑀦 𑀢𑀢𑁄 𑀳𑁂𑀝𑁆𑀞𑀸. 𑀢𑀲𑁆𑀫𑀸 𑀦𑀤𑀺𑀆𑀤𑀻𑀦𑀁 𑀳𑁂𑀝𑁆𑀞𑀸 𑀩𑀳𑀺𑀢𑀻𑀭𑀫𑀼𑀔𑁂𑀦 𑀉𑀫𑀗𑁆𑀕𑁂𑀦, 𑀇𑀤𑁆𑀥𑀺𑀬𑀸 𑀯𑀸 𑀧𑀯𑀺𑀝𑁆𑀞𑁄 𑀪𑀺𑀓𑁆𑀔𑀼 𑀦𑀤𑀺𑀬𑀁 𑀞𑀺𑀢𑀸𑀦𑀁 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺. 𑀲𑁄 𑀧𑀦 𑀆𑀲𑀦𑁆𑀦𑀕𑀸𑀫𑁂 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀧𑀦 𑀲𑁄 𑀉𑀪𑀺𑀦𑁆𑀦𑀁 𑀢𑀻𑀭𑀕𑀸𑀫𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀉𑀪𑀬𑀕𑀸𑀫𑀝𑁆𑀞𑀸𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀧𑀦 𑀢𑀻𑀭𑀁 𑀕𑀸𑀫𑀔𑁂𑀢𑁆𑀢𑀁 𑀦 𑀳𑁄𑀢𑀺, 𑀅𑀕𑀸𑀫𑀓𑀸𑀭𑀜𑁆𑀜𑀫𑁂𑀯. 𑀢𑀢𑁆𑀣 𑀧𑀦 𑀢𑀻𑀭𑀤𑁆𑀯𑀬𑁂𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀯𑀺𑀦𑀸 𑀓𑁂𑀯𑀮𑀸𑀬 𑀔𑀼𑀤𑁆𑀤𑀓𑀸𑀭𑀜𑁆𑀜𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁 𑀓𑀭𑁄𑀦𑁆𑀢𑀺, 𑀢𑀤𑀸 𑀬𑀤𑀺 𑀢𑁂𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑁄 𑀏𑀢𑀲𑁆𑀲 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀧𑀭𑀢𑁄 𑀏𑀓𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀦 𑀓𑀫𑁆𑀫𑀓𑁄𑀧𑁄 ¶ . 𑀦𑁄 𑀘𑁂, 𑀓𑀫𑁆𑀫𑀓𑁄𑀧𑁄. 𑀕𑀸𑀫𑀲𑀻𑀫𑀸𑀬𑀁 𑀧𑀦 𑀅𑀦𑁆𑀢𑁄𑀉𑀫𑀗𑁆𑀕𑁂 𑀯𑀸 𑀩𑀺𑀮𑁂 𑀯𑀸 𑀬𑀢𑁆𑀣 𑀧𑀯𑀺𑀲𑀺𑀢𑀼𑀁 𑀲𑀓𑁆𑀓𑀸, 𑀬𑀢𑁆𑀣 𑀯𑀸 𑀲𑀼𑀯𑀡𑁆𑀡𑀫𑀡𑀺𑀆𑀤𑀺𑀁 𑀔𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀯𑀸 𑀲𑀫𑁆𑀪𑀸𑀯𑀦𑀸 𑀳𑁄𑀢𑀺, 𑀢𑀢𑁆𑀢𑀓𑀁 𑀳𑁂𑀝𑁆𑀞𑀸𑀧𑀺 𑀕𑀸𑀫𑀲𑀻𑀫𑀸, 𑀢𑀢𑁆𑀣 𑀇𑀤𑁆𑀥𑀺𑀬𑀸 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀬𑀢𑁆𑀣 𑀧𑀦 𑀧𑀓𑀢𑀺𑀫𑀦𑀼𑀲𑁆𑀲𑀸𑀦𑀁 𑀧𑀯𑁂𑀲𑀲𑀫𑁆𑀪𑀸𑀯𑀦𑀸𑀧𑀺 𑀦𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀬𑀸𑀯 𑀧𑀣𑀯𑀺𑀲𑀦𑁆𑀥𑀸𑀭𑀓𑀉𑀤𑀓𑀸 𑀅𑀭𑀜𑁆𑀜𑀲𑀻𑀫𑀸𑀯, 𑀦 𑀕𑀸𑀫𑀲𑀻𑀫𑀸. 𑀅𑀭𑀜𑁆𑀜𑀲𑀻𑀫𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀧𑀺 𑀳𑀺 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀧𑀯𑁂𑀲𑀲𑀫𑁆𑀪𑀸𑀯𑀦𑀸, 𑀢𑀢𑁆𑀢𑀓𑀫𑁂𑀯 𑀉𑀧𑀭𑀺𑀢𑀮𑁂 𑀅𑀭𑀜𑁆𑀜𑀲𑀻𑀫𑀸 𑀧𑀯𑀢𑁆𑀢𑀢𑀺. 𑀢𑀢𑁄 𑀧𑀦 𑀳𑁂𑀝𑁆𑀞𑀸 𑀦 𑀅𑀭𑀜𑁆𑀜𑀲𑀻𑀫𑀸, 𑀢𑀢𑁆𑀣 𑀉𑀧𑀭𑀺𑀢𑀮𑁂𑀦 𑀲𑀳 𑀏𑀓𑀸𑀭𑀜𑁆𑀜𑀯𑁄𑀳𑀸𑀭𑀸𑀪𑀸𑀯𑀢𑁄. 𑀦 𑀳𑀺 𑀢𑀢𑁆𑀣 𑀧𑀯𑀺𑀝𑁆𑀞𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀢𑀺 𑀯𑁄𑀳𑀭𑀦𑁆𑀢𑀺. 𑀢𑀲𑁆𑀫𑀸 𑀢𑀢𑁆𑀭𑀝𑁆𑀞𑁄 𑀉𑀧𑀭𑀺 𑀅𑀭𑀜𑁆𑀜𑀝𑁆𑀞𑀸𑀦𑀁 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺 𑀉𑀫𑀗𑁆𑀕𑀦𑀤𑀺𑀬𑀁 𑀞𑀺𑀢𑁄 𑀯𑀺𑀬 𑀉𑀧𑀭𑀺𑀦𑀤𑀺𑀬𑀁 𑀞𑀺𑀢𑀸𑀦𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀘𑀓𑁆𑀓𑀯𑀸𑀴𑁂 𑀕𑀸𑀫𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀫𑀼𑀜𑁆𑀘𑀺𑀢𑁆𑀯𑀸 𑀢𑀤𑀯𑀲𑁂𑀲𑀁 𑀅𑀫𑀦𑀼𑀲𑁆𑀲𑀸𑀯𑀸𑀲𑀁 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀅𑀭𑀜𑁆𑀜𑀫𑁂𑀯. ‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑀺 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀤𑀺𑀧𑀺 𑀅𑀭𑀜𑁆𑀜𑀫𑁂𑀯. 𑀇𑀥 𑀧𑀦 𑀦𑀤𑀺𑀆𑀤𑀻𑀦𑀁 𑀯𑀺𑀲𑀼𑀁 𑀲𑀻𑀫𑀸𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀢𑀤𑀯𑀲𑁂𑀲𑀫𑁂𑀯 𑀅𑀭𑀜𑁆𑀜𑀁 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀘 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀏𑀓𑀁 ‘𑀅𑀭𑀜𑁆𑀜’𑀦𑁆𑀢𑀺 𑀯𑁄𑀳𑀭𑀦𑁆𑀢𑀺, 𑀅𑀬𑀫𑁂𑀓𑀸𑀭𑀜𑁆𑀜𑀲𑀻𑀫𑀸. 𑀇𑀦𑁆𑀤𑀧𑀼𑀭𑀜𑁆𑀳𑀺 𑀲𑀩𑁆𑀩𑀁 𑀏𑀓𑀸𑀭𑀜𑁆𑀜𑀲𑀻𑀫𑀸. 𑀢𑀣𑀸 𑀅𑀲𑀼𑀭𑀬𑀓𑁆𑀔𑀧𑀼𑀭𑀸𑀤𑀺. 𑀆𑀓𑀸𑀲𑀝𑁆𑀞𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀸𑀦𑀺 𑀧𑀦 𑀲𑀫𑀦𑁆𑀢𑀸 𑀆𑀓𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀧𑀘𑁆𑀘𑁂𑀓𑀁 𑀅𑀭𑀜𑁆𑀜𑀲𑀻𑀫𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀧𑀩𑁆𑀩𑀢𑀤𑀻𑀧𑀓𑀸 𑀯𑀺𑀬. 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁, 𑀅𑀭𑀜𑁆𑀜𑀲𑀻𑀫𑀸𑀬𑀫𑁂𑀯 𑀯𑀸𑀢𑀺 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀢𑀲𑁆𑀫𑀸 𑀇𑀥𑀸𑀧𑀺 𑀉𑀧𑀭𑀺𑀅𑀭𑀜𑁆𑀜𑀢𑀮𑁂𑀦 𑀲𑀤𑁆𑀥𑀺𑀁 𑀳𑁂𑀝𑁆𑀞𑀸𑀧𑀣𑀯𑀺𑀬𑀸 𑀅𑀭𑀜𑁆𑀜𑀯𑁄𑀳𑀸𑀭𑀸𑀪𑀸𑀯𑀸 𑀯𑀺𑀲𑀼𑀁 𑀅𑀭𑀜𑁆𑀜𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯𑁂𑀢𑁆𑀣 𑀕𑀸𑀫𑀦𑀤𑀺𑀆𑀤𑀺𑀲𑀻𑀫𑀸𑀓𑀣𑀸𑀬 𑀅𑀝𑁆𑀞𑀓𑀣𑀸𑀬𑀁 ‘𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸𑀧𑀣𑀯𑀺𑀢𑀮𑁂 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀩𑀤𑁆𑀥𑀲𑀻𑀫𑀸𑀬𑀁 𑀤𑀲𑁆𑀲𑀺𑀢𑀦𑀬𑁄 𑀦 𑀤𑀲𑁆𑀲𑀺𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀜𑁆𑀘𑁂𑀢𑀸𑀲𑀁 ¶ 𑀕𑀸𑀫𑀲𑀻𑀫𑀸𑀤𑀻𑀦𑀁 𑀳𑁂𑀝𑁆𑀞𑀸𑀧𑀫𑀸𑀡𑀤𑀲𑁆𑀲𑀦𑀁 𑀲𑀼𑀢𑁆𑀢𑀸𑀤𑀺𑀯𑀺𑀭𑁄𑀥𑀸𑀪𑀸𑀯𑀸 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀕𑀳𑀡𑁂 𑀘 𑀕𑀸𑀫𑀲𑀻𑀫𑀸𑀬𑀁 𑀲𑀫𑁆𑀫𑀢𑀸 𑀩𑀤𑁆𑀥𑀲𑀻𑀫𑀸 𑀉𑀧𑀭𑀺 𑀕𑀸𑀫𑀲𑀻𑀫𑀁, 𑀳𑁂𑀝𑁆𑀞𑀸 𑀉𑀤𑀓𑀧𑀭𑀺𑀬𑀦𑁆𑀢𑀁 𑀅𑀭𑀜𑁆𑀜𑀲𑀻𑀫𑀜𑁆𑀘 𑀅𑀯𑀢𑁆𑀣𑀭𑀢𑀻𑀢𑀺 𑀢𑀲𑁆𑀲𑀸 𑀅𑀭𑀜𑁆𑀜𑀲𑀻𑀫𑀸𑀧𑀺 𑀔𑁂𑀢𑁆𑀢𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀪𑀕𑀯𑀢𑀸 𑀘 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸 𑀩𑀤𑁆𑀥𑀲𑀻𑀫𑀸𑀬 𑀅𑀔𑁂𑀢𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦 𑀅𑀭𑀜𑁆𑀜𑀁. 𑀢𑀲𑁆𑀫𑀸 𑀅𑀭𑀜𑁆𑀜𑀫𑁆𑀧𑀺 ¶ 𑀩𑀤𑁆𑀥𑀲𑀻𑀫𑀸𑀬 𑀔𑁂𑀢𑁆𑀢𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀢𑁆𑀣 𑀲𑀸 𑀦 𑀩𑀚𑁆𑀛𑀢𑀻𑀢𑀺? 𑀧𑀬𑁄𑀚𑀦𑀸𑀪𑀸𑀯𑀸. 𑀲𑀻𑀫𑀸𑀧𑁂𑀓𑁆𑀔𑀸𑀦𑀦𑁆𑀢𑀭𑀫𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀲𑀫𑁆𑀪𑀯𑀢𑁄. 𑀢𑀲𑁆𑀲𑀸 𑀘 𑀉𑀧𑀭𑀺 𑀲𑀫𑁆𑀫𑀢𑀸𑀬 𑀩𑀤𑁆𑀥𑀲𑀻𑀫𑀸𑀬 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀸𑀦𑀼𑀮𑁄𑀫𑀢𑁄 𑀯𑀺𑀧𑀢𑁆𑀢𑀺𑀲𑀻𑀫𑀸 𑀏𑀯 𑀲𑀺𑀬𑀸. 𑀕𑀸𑀫𑀔𑁂𑀢𑁆𑀢𑁂 𑀧𑀦 𑀞𑀢𑁆𑀯𑀸 𑀅𑀕𑀸𑀫𑀓𑀸𑀭𑀜𑁆𑀜𑁂𑀓𑀤𑁂𑀲𑀫𑁆𑀧𑀺 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀲𑀫𑁆𑀫𑀢𑀸 𑀓𑀺𑀜𑁆𑀘𑀸𑀧𑀺 𑀲𑀼𑀲𑀫𑁆𑀫𑀢𑀸, 𑀅𑀕𑀸𑀫𑀓𑀸𑀭𑀜𑁆𑀜𑁂 𑀪𑀕𑀯𑀢𑀸 𑀯𑀺𑀳𑀺𑀢𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀧𑀺 𑀅𑀦𑀺𑀯𑀢𑁆𑀢𑀺𑀢𑁄. 𑀢𑀢𑁆𑀣 𑀧𑀦 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀯𑀺𑀝𑁆𑀞𑀸𑀦𑀫𑁆𑀧𑀺 𑀢𑀢𑁄 𑀩𑀳𑀺 𑀓𑁂𑀯𑀮𑀸𑀭𑀜𑁆𑀜𑁂 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀅𑀦𑁆𑀢𑀭𑀸 𑀢𑀻𑀡𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺, 𑀅𑀜𑁆𑀜𑀣𑀸 𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸𑀢𑀺 𑀲𑀩𑁆𑀩𑀣𑀸 𑀦𑀺𑀭𑀢𑁆𑀣𑀓𑀫𑁂𑀯 𑀅𑀕𑀸𑀫𑀓𑀸𑀭𑀜𑁆𑀜𑁂 𑀩𑀤𑁆𑀥𑀲𑀻𑀫𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑁆𑀢𑁄𑀦𑀤𑀺𑀬𑀁 𑀧𑀯𑀺𑀝𑁆𑀞𑀲𑀸𑀔𑀸𑀬𑀸𑀢𑀺 𑀦𑀤𑀺𑀬𑀸 𑀧𑀣𑀯𑀺𑀢𑀮𑀁 𑀆𑀳𑀘𑁆𑀘 𑀞𑀺𑀢𑀸𑀬 𑀲𑀸𑀔𑀸𑀬𑀧𑀺, 𑀧𑀕𑁂𑀯 𑀅𑀦𑀸𑀳𑀘𑁆𑀘 𑀞𑀺𑀢𑀸𑀬. 𑀧𑀸𑀭𑁄𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦 𑀲𑀪𑀸𑀕𑀁 𑀦𑀤𑀺𑀲𑀻𑀫𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦𑀧𑀺 𑀯𑀺𑀲𑀪𑀸𑀕𑀲𑀻𑀫𑀸𑀲𑀫𑁆𑀩𑀦𑁆𑀥𑀲𑀸𑀔𑀸𑀤𑀺𑀦𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦𑁂𑀯 𑀫𑀳𑀸𑀲𑀻𑀫𑀁, 𑀕𑀸𑀫𑀲𑀻𑀫𑀜𑁆𑀘 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦 𑀲𑀸𑀔𑀸𑀤𑀺𑀦𑀸 𑀫𑀸𑀴𑀓𑀲𑀻𑀫𑀸𑀬 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀜𑀸𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯𑀸𑀢𑀺 𑀲𑁂𑀢𑀼𑀧𑀸𑀤𑀸𑀦𑀁 𑀢𑀻𑀭𑀝𑁆𑀞𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀦𑀤𑀺𑀬𑀁 𑀧𑀢𑀺𑀝𑁆𑀞𑀺𑀢𑀢𑁆𑀢𑁂𑀧𑀺 𑀲𑀫𑁆𑀪𑁂𑀤𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺𑀆𑀤𑀺. 𑀬𑀤𑀺 𑀳𑀺 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀅𑀦𑁆𑀢𑁄𑀦𑀤𑀺𑀬𑀫𑁆𑀧𑀺 𑀧𑀢𑀺𑀝𑁆𑀞𑀺𑀢𑀢𑁆𑀢𑁂 𑀲𑀫𑁆𑀪𑁂𑀤𑁄 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀪𑀯𑁂𑀬𑁆𑀬 𑀓𑀫𑁆𑀫𑀓𑁄𑀧𑀲𑁆𑀲 𑀲𑀫𑀸𑀦𑀢𑁆𑀢𑀸, 𑀦 𑀘 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑀻𑀫𑀸𑀬 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀆𑀯𑀭𑀡𑁂𑀦 𑀯𑀸𑀢𑀺 𑀤𑀸𑀭𑀼𑀆𑀤𑀺𑀁 𑀦𑀺𑀔𑀡𑀺𑀢𑁆𑀯𑀸 𑀉𑀤𑀓𑀦𑀺𑀯𑀸𑀭𑀡𑁂𑀦. 𑀓𑁄𑀝𑁆𑀝𑀓𑀩𑀦𑁆𑀥𑀦𑁂𑀦 𑀯𑀸𑀢𑀺 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀓𑀢𑀲𑁂𑀢𑀼𑀩𑀦𑁆𑀥𑁂𑀦. 𑀉𑀪𑀬𑁂𑀦𑀸𑀧𑀺 𑀆𑀯𑀭𑀡𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀦𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀳𑁂𑀝𑁆𑀞𑀸 𑀧𑀸𑀴𑀺 𑀩𑀤𑁆𑀥𑀸’’𑀢𑀺, 𑀳𑁂𑀝𑁆𑀞𑀸 𑀦𑀤𑀺𑀁 𑀆𑀯𑀭𑀺𑀢𑁆𑀯𑀸 𑀧𑀸𑀴𑀺 𑀩𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀙𑀟𑁆𑀟𑀺𑀢𑀫𑁄𑀤𑀓𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑁄𑀤𑀓𑀁. ‘‘𑀦𑀤𑀺𑀁 𑀑𑀢𑁆𑀣𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄’’𑀢𑀺 𑀇𑀫𑀺𑀦𑀸 𑀢𑀴𑀸𑀓𑀦𑀤𑀻𑀦𑀁 𑀅𑀦𑁆𑀢𑀭𑀸 ¶ 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀢𑀻𑀭𑀸𑀤𑀺𑀪𑀺𑀦𑁆𑀤𑀦𑀯𑀲𑁂𑀦 𑀯𑀺𑀧𑀼𑀮𑀸 𑀳𑀼𑀢𑁆𑀯𑀸. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀩𑀤𑁆𑀥𑀲𑀻𑀫𑀁.

𑀅𑀕𑀫𑀦𑀧𑀣𑁂𑀢𑀺 ¶ 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂. 𑀅𑀭𑀜𑁆𑀜𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀁 𑀅𑀕𑀸𑀫𑀓𑀸𑀭𑀜𑁆𑀜𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣𑀸𑀢𑀺 𑀧𑀓𑀢𑀺𑀬𑀸 𑀫𑀘𑁆𑀙𑀩𑀦𑁆𑀥𑀸𑀦𑀁 𑀕𑀫𑀦𑀧𑀣𑁂𑀲𑀼 𑀤𑀻𑀧𑀓𑁂𑀲𑀼.

𑀢𑀁 𑀞𑀸𑀦𑀦𑁆𑀢𑀺 𑀆𑀯𑀸𑀝𑀸𑀤𑀻𑀦𑀁 𑀓𑀢𑀝𑁆𑀞𑀸𑀦𑀫𑁂𑀯, 𑀦 𑀅𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀡𑀻𑀢𑀺 𑀲𑀫𑀼𑀤𑁆𑀤𑁄𑀤𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑁂𑀕𑀦𑀺𑀦𑁆𑀦𑁄 𑀫𑀸𑀢𑀺𑀓𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀓𑁄.

𑁧𑁪𑁮. 𑀲𑀫𑁆𑀪𑀺𑀦𑁆𑀤𑀦𑁆𑀢𑀻𑀢𑀺 𑀬𑀢𑁆𑀣 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀢𑁆𑀢𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀦𑁆𑀢𑁄𑀲𑀻𑀫𑀸𑀬 𑀓𑀭𑁄𑀦𑁆𑀢𑁄 𑀲𑀫𑁆𑀪𑀺𑀦𑁆𑀤𑀢𑀺. 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀳𑁄𑀦𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀓𑀮𑀫𑁆𑀧𑀺 𑀅𑀦𑁆𑀢𑁄 𑀓𑀭𑁄𑀦𑁆𑀢𑁄 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀫𑀳𑀸𑀲𑀸𑀔𑀫𑀽𑀮𑀸, 𑀏𑀢𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀲𑀸𑀔𑀸𑀬 𑀲𑀸𑀔𑀁 𑀨𑀼𑀲𑀦𑁆𑀢𑀸 𑀳𑀺 𑀤𑀽𑀭𑀝𑁆𑀞𑀸𑀧𑀺 𑀲𑀺𑀬𑁆𑀬𑀼𑀁, 𑀢𑀢𑁄 𑀏𑀓𑀁𑀲𑀢𑁄 𑀲𑀫𑁆𑀪𑁂𑀤𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁 𑀦 𑀲𑀺𑀬𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀺𑀝𑀧𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀺𑀢𑀼𑀁 𑀅𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄𑀲𑀻𑀫𑀝𑁆𑀞𑀁 𑀓𑀭𑀺𑀢𑁆𑀯𑀸 𑀧𑀼𑀭𑀸𑀡𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑁄 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀺 𑀦𑀸𑀫, 𑀦 𑀢𑀢𑁄 𑀧𑀭𑀦𑁆𑀢𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. 𑀩𑀤𑁆𑀥𑀸 𑀳𑁄𑀢𑀻𑀢𑀺 𑀧𑁄𑀭𑀸𑀡𑀓𑀯𑀺𑀳𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀫𑁆𑀩𑀦𑁆𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀼𑀭𑀸𑀡𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀸𑀤𑀻𑀦𑀁 𑀯𑀺𑀦𑀝𑁆𑀞𑀢𑁆𑀢𑀸 𑀅𑀚𑀸𑀦𑀦𑁆𑀢𑀸𑀦𑀁 𑀢𑀁 𑀧𑀼𑀭𑀸𑀡𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀫𑁆𑀩𑀁. 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄𑀲𑀻𑀫𑀝𑁆𑀞𑀁 𑀓𑀭𑀺𑀢𑁆𑀯𑀸 𑀧𑀼𑀭𑀸𑀡𑀯𑀺𑀳𑀸𑀭𑀲𑀻𑀫𑀝𑁆𑀞𑀁 𑀚𑀫𑁆𑀩𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀫𑁆𑀩𑀚𑀫𑁆𑀩𑀽𑀦𑀁 𑀅𑀦𑁆𑀢𑀭𑁂 𑀬𑀁 𑀞𑀸𑀦𑀁, 𑀢𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀯𑁂𑀲𑁂𑀢𑁆𑀯𑀸 𑀩𑀦𑁆𑀥𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀸𑀡𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲 𑀕𑀸𑀫𑀝𑁆𑀞𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀅𑀦𑁆𑀢𑁄𑀲𑀻𑀫𑀝𑁆𑀞𑀸𑀬 𑀚𑀫𑁆𑀩𑀼𑀬𑀸 𑀲𑀳 𑀲𑀁𑀲𑀝𑁆𑀞𑀯𑀺𑀝𑀧𑀢𑁆𑀢𑁂𑀧𑀺 𑀲𑀻𑀫𑀸𑀬 𑀩𑀦𑁆𑀥𑀦𑀓𑀸𑀮𑁂 𑀯𑀺𑀧𑀢𑁆𑀢𑀺 𑀯𑀸 𑀧𑀘𑁆𑀙𑀸 𑀕𑀸𑀫𑀲𑀻𑀫𑀸𑀬 𑀲𑀳 𑀲𑀫𑁆𑀪𑁂𑀤𑁄 𑀯𑀸 𑀓𑀫𑁆𑀫𑀯𑀺𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀫𑀼𑀔𑀢𑁄𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀤𑁂𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀧𑁆𑀧𑀳𑁄𑀦𑀓𑀧𑁆𑀧𑀤𑁂𑀲𑀁. ‘‘𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀅𑀓𑀢𑁆𑀯𑀸 𑀩𑀤𑁆𑀥𑀲𑀻𑀫𑀸𑀳𑀺 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀸𑀧𑁂𑀢𑁆𑀯𑀸 𑀅𑀩𑁆𑀬𑀯𑀥𑀸𑀦𑁂𑀦 𑀩𑀤𑁆𑀥𑀸𑀧𑀺 𑀲𑀻𑀫𑀸 𑀅𑀲𑀻𑀫𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸 𑀯𑀝𑁆𑀝𑀢𑀺 𑀏𑀯. 𑀲𑀸 𑀧𑀦 𑀤𑀼𑀩𑁆𑀩𑁄𑀥𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀘𑀢𑀼𑀭𑀗𑁆𑀕𑀼𑀮𑀸𑀤𑀺𑀓𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁. 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀲𑀻𑀫𑀢𑁄 𑀩𑀸𑀳𑀺𑀭𑀢𑁆𑀢𑀸 𑀩𑀦𑁆𑀥𑀦𑀓𑀸𑀮𑁂 𑀢𑀸𑀯 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀦 𑀓𑁂𑀯𑀮𑀜𑁆𑀘 𑀦𑀺𑀫𑀺𑀢𑁆𑀢𑀓𑀢𑁆𑀢𑀸 𑀏𑀯 𑀲𑀗𑁆𑀓𑀭𑀁 𑀓𑀭𑁄𑀢𑀺 ¶ , 𑀅𑀣 𑀔𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑁄 𑀅𑀜𑁆𑀜𑁄𑀧𑀺 𑀭𑀼𑀓𑁆𑀔𑁄 𑀓𑀭𑁄𑀢𑀺 𑀏𑀯. 𑀢𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀟𑁆𑀠𑀦𑀓𑀸 𑀭𑀼𑀓𑁆𑀔𑀸𑀤𑀬𑁄 𑀦 𑀯𑀝𑁆𑀝𑀦𑁆𑀢𑀺 𑀏𑀯. 𑀏𑀢𑁆𑀣 𑀘 𑀉𑀧𑀭𑀺 𑀤𑀺𑀲𑁆𑀲𑀫𑀸𑀦𑀔𑀦𑁆𑀥𑀲𑀸𑀔𑀸𑀤𑀺𑀧𑀯𑁂𑀲𑁂 𑀏𑀯 𑀲𑀗𑁆𑀓𑀭𑀤𑁄𑀲𑀲𑁆𑀲 𑀲𑀩𑁆𑀩𑀢𑁆𑀣 𑀤𑀲𑁆𑀲𑀺𑀢𑀢𑁆𑀢𑀸 𑀅𑀤𑀺𑀲𑁆𑀲𑀫𑀸𑀦𑀸𑀦𑀁 𑀫𑀽𑀮𑀸𑀦𑀁 𑀧𑀯𑁂𑀲𑁂𑀧𑀺 𑀪𑀽𑀫𑀺𑀕𑀢𑀺𑀓𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀲𑀺𑀚𑁆𑀛𑀢𑀺. 𑀲𑀘𑁂 𑀧𑀦 𑀫𑀽𑀮𑀸𑀦𑀺𑀧𑀺 𑀤𑀺𑀲𑁆𑀲𑀫𑀸𑀦𑀸𑀦𑁂𑀯 𑀧𑀯𑀺𑀲𑀦𑁆𑀢𑀺, 𑀲𑀗𑁆𑀓𑀭𑁄𑀯. 𑀧𑀩𑁆𑀩𑀢𑀧𑀸𑀲𑀸𑀡𑀸 𑀧𑀦 𑀤𑀺𑀲𑁆𑀲𑀫𑀸𑀦𑀸𑀧𑀺 𑀪𑀽𑀫𑀺𑀕𑀢𑀺𑀓𑀸 𑀏𑀯. 𑀬𑀤𑀺 𑀧𑀦 𑀩𑀦𑁆𑀥𑀦𑀓𑀸𑀮𑁂 𑀏𑀯 𑀏𑀓𑁄 𑀣𑀽𑀮𑀭𑀼𑀓𑁆𑀔𑁄 𑀉𑀪𑀬𑀫𑁆𑀧𑀺 𑀲𑀻𑀫𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀧𑀘𑁆𑀙𑀸 𑀩𑀤𑁆𑀥𑀸 𑀅𑀲𑀻𑀫𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀫𑀸𑀲𑀗𑁆𑀓𑀭𑀦𑁆𑀢𑀺 𑀲𑀻𑀫𑀸𑀲𑀫𑁆𑀪𑁂𑀤𑀁. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁 ‘‘𑀲𑀻𑀫𑀸𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀟𑁆𑀠𑀺𑀢𑁆𑀯𑀸 𑀲𑀻𑀫𑀧𑁆𑀧𑀤𑁂𑀲𑀁 𑀧𑀯𑀺𑀝𑁆𑀞𑁂 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁮), 𑀢𑀁 𑀦 𑀬𑀼𑀢𑁆𑀢𑀁 𑀕𑀸𑀫𑀲𑀻𑀫𑀸𑀬𑀧𑀺 𑀲𑀳 𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀢𑀢𑁆𑀣𑀸𑀧𑀺 𑀳𑀺 𑀦𑀺𑀫𑀺𑀢𑁆𑀢𑁂 𑀯𑀟𑁆𑀠𑀺𑀢𑁂 𑀕𑀸𑀫𑀲𑀻𑀫𑀸𑀩𑀤𑁆𑀥𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀫𑁂𑀯 𑀳𑁄𑀢𑀺, 𑀢𑀢𑁆𑀣 𑀧𑀦 𑀅𑀯𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑁂𑀯 𑀲𑀗𑁆𑀓𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑀫𑁆𑀩𑀤𑁆𑀥𑀤𑁄𑀲𑁄𑀯 𑀲𑀗𑁆𑀓𑀭-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 𑀦𑀺𑀤𑀸𑀦𑀯𑀲𑁂𑀦 ‘‘𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀘𑁆𑀙𑀸 𑀲𑀫𑁆𑀫𑀢𑀸, 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀅𑀥𑀫𑁆𑀫𑀺𑀓’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪𑁮) 𑀧𑀘𑁆𑀙𑀸 𑀲𑀫𑁆𑀫𑀢𑀸𑀬 𑀅𑀲𑀻𑀫𑀢𑁆𑀢𑁂 𑀯𑀼𑀢𑁆𑀢𑁂𑀧𑀺 𑀤𑁆𑀯𑀻𑀲𑀼 𑀕𑀸𑀫𑀲𑀻𑀫𑀸𑀲𑀼 𑀞𑀢𑁆𑀯𑀸 𑀤𑁆𑀯𑀻𑀳𑀺 𑀲𑀗𑁆𑀖𑁂𑀳𑀺 𑀲𑀫𑁆𑀪𑁂𑀤𑀁 𑀯𑀸 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀸 𑀓𑀢𑁆𑀯𑀸 𑀲𑀻𑀫𑀦𑁆𑀢𑀭𑀺𑀓𑀁 𑀅𑀝𑁆𑀞𑀧𑁂𑀢𑁆𑀯𑀸 𑀯𑀸 𑀭𑀼𑀓𑁆𑀔𑀧𑀸𑀭𑁄𑀳𑀸𑀤𑀺𑀲𑀫𑁆𑀩𑀦𑁆𑀥𑀁 𑀅𑀯𑀺𑀬𑁄𑀚𑁂𑀢𑁆𑀯𑀸 𑀯𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀓𑀫𑁆𑀫𑀯𑀸𑀘𑀸𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀏𑀓𑀢𑁄 𑀲𑀫𑁆𑀫𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀫𑁆𑀧𑀺 𑀅𑀲𑀻𑀫𑀢𑀸 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀸𑀫𑀲𑀻𑀫𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁄𑀲𑀣𑀪𑁂𑀤𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁪𑁯. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀏𑀓𑀲𑀻𑀫𑀸𑀬 𑀘𑀢𑀽𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀯 𑀅𑀦𑀼𑀜𑁆𑀜𑀸𑀢𑁄, 𑀢𑀻𑀲𑀼, 𑀤𑁆𑀯𑀻𑀲𑀼 𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄𑀯. 𑀇𑀥 𑀧𑀦 𑀢𑀣𑀸 𑀅𑀓𑀢𑀢𑁆𑀢𑀸 ‘‘𑀅𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀲𑀗𑁆𑀖𑁂 𑀏𑀯 𑀆𑀕𑀘𑁆𑀙𑀢𑀺, 𑀦 𑀕𑀡𑁂, 𑀦 𑀧𑀼𑀕𑁆𑀕𑀮𑁂, 𑀢𑀲𑁆𑀫𑀸 ‘‘𑀯𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀲𑀘𑁂 ¶ 𑀧𑀦 𑀤𑁆𑀯𑁂 𑀲𑀗𑁆𑀖𑀸 𑀏𑀓𑀲𑀻𑀫𑀸𑀬 𑀅𑀜𑁆𑀜𑀫𑀜𑁆𑀜𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁆𑀣 𑀓𑀣𑀦𑁆𑀢𑀺? 𑀓𑁂𑀘𑀺 𑀧𑀦𑁂𑀢𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀯𑀕𑁆𑀕𑀓𑀫𑁆𑀫𑀢𑁆𑀢𑀸 ¶ . 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀜𑁆𑀳𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺 𑀢𑀣𑀸 𑀯𑀘𑀦𑀸𑀪𑀸𑀯𑀸, 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀫𑁆𑀫𑀓𑀭𑀡𑀢𑁆𑀣𑀫𑁂𑀯 𑀲𑀻𑀫𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀺𑀳𑀸𑀭𑀲𑀻𑀫𑀸𑀬𑀁 𑀧𑀦 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀔𑀦𑁆𑀥𑀲𑀻𑀫𑀸𑀬𑀁 𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁂𑀲𑀼 𑀓𑀫𑁆𑀫𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀫𑁂𑀯 𑀪𑀺𑀦𑁆𑀦𑀲𑀻𑀫𑀝𑁆𑀞𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀧𑁄𑀲𑀣𑀪𑁂𑀤𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺. 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀻𑀢𑀺 𑀏𑀢𑁆𑀣 ‘‘𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀁, 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀺 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀲𑀼𑀢𑁂𑀦𑀸𑀢𑀺 𑀲𑀼𑀢𑀧𑀤𑁂𑀦.

𑀲𑀯𑀭𑀪𑀬𑀦𑁆𑀢𑀺 𑀯𑀦𑀘𑀭𑀓𑀪𑀬𑀁. 𑀢𑁂𑀦𑀸𑀳 ‘‘𑀅𑀝𑀯𑀺𑀫𑀦𑀼𑀲𑁆𑀲𑀪𑀬’’𑀦𑁆𑀢𑀺. 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀅𑀦𑀺𑀝𑁆𑀞𑀺𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀦𑀺𑀤𑁆𑀤𑀺𑀝𑁆𑀞𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀢𑀺𑀬𑀸𑀤𑀻𑀲𑀼 𑀉𑀤𑁆𑀤𑁂𑀲𑁂𑀲𑀽’’𑀢𑀺𑀆𑀤𑀺. 𑀢𑀻𑀳𑀺𑀧𑀺 𑀯𑀺𑀥𑀻𑀳𑀻𑀢𑀺 𑀑𑀲𑀸𑀭𑀡𑀓𑀣𑀦𑀲𑀭𑀪𑀜𑁆𑀜𑁂𑀳𑀺. 𑀏𑀢𑁆𑀣 𑀘 𑀅𑀢𑁆𑀣𑀁 𑀪𑀡𑀺𑀢𑀼𑀓𑀸𑀫𑀢𑀸𑀬 𑀯𑀸 𑀪𑀡𑀸𑀧𑁂𑀢𑀼𑀓𑀸𑀫𑀢𑀸𑀬 𑀯𑀸 𑀲𑀼𑀢𑁆𑀢𑀲𑁆𑀲 𑀑𑀲𑀸𑀭𑀡𑀁 𑀑𑀲𑀸𑀭𑀡𑀁 𑀦𑀸𑀫. 𑀢𑀲𑁆𑀲𑁂𑀯 𑀅𑀢𑁆𑀣𑀧𑁆𑀧𑀓𑀸𑀲𑀦𑀸 𑀓𑀣𑀦𑀁 𑀦𑀸𑀫. 𑀓𑁂𑀯𑀮𑀁 𑀧𑀸𑀞𑀲𑁆𑀲𑁂𑀯 𑀲𑀭𑁂𑀦 𑀪𑀡𑀦𑀁 𑀲𑀭𑀪𑀜𑁆𑀜𑀁 𑀦𑀸𑀫. 𑀲𑀚𑁆𑀛𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀲𑀚𑁆𑀛𑀸𑀬𑀁 𑀓𑀭𑁄𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀑𑀲𑀸𑀭𑁂𑀢𑁆𑀯𑀸 𑀧𑀦 𑀓𑀣𑁂𑀦𑁆𑀢𑁂𑀦𑀸𑀢𑀺 𑀲𑀬𑀫𑁂𑀯 𑀧𑀸𑀞𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑁂𑀦.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀫𑁆𑀫𑀓𑀫𑁆𑀫𑀧𑀝𑀺𑀓𑁆𑀓𑁄𑀲𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁫𑁫. 𑀦𑀯𑀯𑀺𑀥𑀦𑁆𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂𑀲𑀼 𑀢𑀬𑁄, 𑀲𑀼𑀢𑁆𑀢𑀼𑀤𑁆𑀤𑁂𑀲𑀧𑀸𑀭𑀺𑀲𑀼𑀤𑁆𑀥𑀺𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀬𑁄, 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀲𑀸𑀫𑀕𑁆𑀕𑀻𑀯𑀲𑁂𑀦 𑀢𑀬𑁄𑀢𑀺 𑀦𑀯𑀯𑀺𑀥𑀁. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 ¶ 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀺 𑀘𑀢𑀼𑀩𑁆𑀩𑀺𑀥𑀁. 𑀤𑀼𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦 𑀤𑀼𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀁. 𑀦𑀯𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄𑀢𑀺 𑀦𑀯𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁.

𑀅𑀥𑀫𑁆𑀫𑀓𑀫𑁆𑀫𑀧𑀝𑀺𑀓𑁆𑀓𑁄𑀲𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑁆𑀔𑀕𑀡𑀦𑀸𑀤𑀺𑀉𑀕𑁆𑀕𑀳𑀡𑀸𑀦𑀼𑀚𑀸𑀦𑀦𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁫𑁬. 𑀓𑀢𑀺𑀫𑀻𑀢𑀺 ¶ 𑀢𑀺𑀣𑀺-𑀲𑀤𑁆𑀤𑀸𑀧𑁂𑀓𑁆𑀔𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀝𑁆𑀞𑀩𑁆𑀩𑀁.

𑁧𑁬𑁩. 𑀉𑀢𑀼𑀯𑀲𑁆𑀲𑁂𑀬𑁂𑀯𑀸𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼𑀬𑁂𑀯.

𑁧𑁬𑁪. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀓𑀭𑀡𑀫𑁂𑀯 𑀯𑀺𑀜𑁆𑀜𑀸𑀧𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀬𑀓𑁂𑀦 𑀧𑀼𑀦 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀤𑀸𑀢𑀩𑁆𑀩𑀸. ‘‘𑀪𑀽𑀢𑀁𑀬𑁂𑀯 𑀯𑀸 𑀲𑀸𑀫𑀡𑁂𑀭𑀪𑀸𑀯𑀁 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲, 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀸𑀤𑀻𑀦𑀁 𑀯𑀸 𑀬𑀸𑀯 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸 𑀯𑀢𑁆𑀢𑀢𑀺, 𑀢𑀸𑀯 𑀢𑁂𑀳𑀺 𑀆𑀳𑀝𑀸𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀕𑀘𑁆𑀙𑀢𑀺. 𑀬𑀤𑀸 𑀧𑀦 𑀢𑁂 𑀅𑀢𑁆𑀢𑀦𑁄 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬𑁂𑀯 𑀦𑀸𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀺…𑀧𑁂… 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀟𑀓𑀸𑀤𑀻𑀦𑀫𑁆𑀧𑀺 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀓𑀸𑀮𑁂𑀲𑀼 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀆𑀕𑀫𑀦𑀁 𑀲𑀺𑀤𑁆𑀥𑀫𑁂𑀯. 𑀢𑁂𑀦𑀸𑀳 ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺. 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀁 𑀧𑀦 𑀧𑀓𑀢𑀢𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀫𑁆𑀫𑀢𑁆𑀢𑀓𑀸𑀤𑀺𑀪𑀸𑀯𑁂 𑀧𑀝𑀺𑀜𑁆𑀜𑀸𑀢𑁂𑀧𑀺 𑀢𑁂𑀲𑀁 𑀲𑀗𑁆𑀖𑀧𑁆𑀧𑀢𑁆𑀢𑀫𑀢𑁆𑀢𑁂𑀦𑁂𑀯 𑀙𑀦𑁆𑀤𑀸𑀤𑀺 𑀆𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲’’𑀦𑁆𑀢𑀺 𑀇𑀫𑀺𑀦𑀸 𑀕𑀡𑀧𑀼𑀕𑁆𑀕𑀮𑁂𑀲𑀼 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑀸𑀕𑀫𑀦𑀁 𑀤𑀲𑁆𑀲𑁂𑀢𑀺. ‘‘𑀲𑀗𑁆𑀖𑀧𑁆𑀧𑀢𑁆𑀢𑁄’’𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀩𑀺𑀴𑀸𑀮𑀕𑀻𑀯𑀸𑀬 𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀲𑀤𑀺𑀲𑀸 𑀧𑀸𑀭𑀺𑀲𑀼𑀤𑁆𑀥𑀺 𑀦𑀸𑀫, 𑀬𑀣𑀸 𑀲𑀗𑁆𑀔𑀮𑀺𑀓𑀸 𑀩𑀺𑀴𑀸𑀮𑁂 𑀆𑀕𑀘𑁆𑀙𑀦𑁆𑀢𑁂 𑀏𑀯 𑀆𑀕𑀘𑁆𑀙𑀢𑀺, 𑀦 𑀅𑀦𑀸𑀕𑀘𑁆𑀙𑀦𑁆𑀢𑁂 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸, 𑀏𑀯𑀫𑀬𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀣𑀸 𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀯𑀮𑀬𑀁 𑀤𑀼𑀢𑀺𑀬𑀯𑀮𑀬𑀁 ¶ 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀯𑀮𑀬𑀁, 𑀏𑀯𑀫𑀬𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀮𑀓𑁆𑀔𑀡𑀫𑀢𑁆𑀢𑀜𑁆𑀘𑁂𑀢𑁆𑀣 𑀩𑀺𑀴𑀸𑀮-𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀧𑀓𑁆𑀔𑀕𑀡𑀦𑀸𑀤𑀺𑀉𑀕𑁆𑀕𑀳𑀡𑀸𑀦𑀼𑀚𑀸𑀦𑀦𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀦𑁆𑀤𑀤𑀸𑀦𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁬𑁫. 𑀧𑀸𑀴𑀺𑀬𑀁 ¶ ‘‘𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 ‘‘𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁬𑁭. ‘‘𑀢𑀲𑁆𑀲 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀏𑀓𑀤𑀸 𑀲𑀭𑀦𑁆𑀢𑀲𑁆𑀲𑁂𑀯 𑀲𑀫𑁆𑀫𑀼𑀢𑀺𑀤𑀸𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀏𑀓𑀤𑀸 𑀅𑀲𑀭𑀦𑁆𑀢𑀲𑁆𑀲 𑀲𑀫𑁆𑀫𑀼𑀢𑀺𑀅𑀪𑀸𑀯𑁂𑀧𑀺 𑀢𑀲𑁆𑀲 𑀅𑀦𑀸𑀕𑀫𑀦𑀁 𑀯𑀕𑁆𑀕𑀓𑀫𑁆𑀫𑀸𑀬 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀲𑁄𑀧𑀺 𑀳𑀢𑁆𑀣𑀧𑀸𑀲𑁂𑀯 𑀆𑀦𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑁧𑁬𑁮. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀢𑁄 𑀧𑀞𑀫𑀁 𑀓𑀸𑀢𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀁. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀓𑀸𑀢𑀩𑁆𑀩𑀁 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀦𑁄 𑀘𑁂 𑀅𑀥𑀺𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺𑀧𑀺. 𑀬𑀢𑁆𑀣 𑀧𑀦 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀢𑁆𑀣 𑀯𑀓𑁆𑀔𑀸𑀫.

𑁧𑁬𑁯. ‘‘𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀺𑀲𑀼𑀁 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑀢𑁄 𑀧𑀜𑁆𑀜𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀏𑀯 𑀦𑀬𑁂𑀦 𑁋

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁮𑁬; 𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫) 𑁋

𑀆𑀤𑀺𑀲𑀼𑀢𑁆𑀢𑀦𑀬𑀢𑁄 𑀘 𑀅𑀮𑀚𑁆𑀚𑀻𑀳𑀺𑀧𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀓𑀭𑀡𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀅𑀮𑀚𑁆𑀚𑀺𑀦𑀺𑀕𑁆𑀕𑀳𑀢𑁆𑀣𑀢𑁆𑀢𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀧𑀜𑁆𑀜𑀸𑀧𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀧𑀺 𑀦 𑀤𑀸𑀢𑀩𑁆𑀩𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀉𑀪𑁄𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀲𑀪𑀸𑀕𑀸𑀧𑀢𑁆𑀢𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 𑀆𑀧𑀢𑁆𑀢𑀺𑀦𑀸𑀫𑁂𑀦𑁂𑀯 𑀤𑁂𑀲𑁂𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀘𑀺𑀢𑁆𑀢𑀓𑀫𑁂𑀯 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺 ¶ . 𑀬𑀣𑀸 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀺, 𑀏𑀯𑀁 𑀢𑀬𑁄𑀧𑀺 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸, 𑀇𑀫𑁂 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀆𑀭𑁄𑀘𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁂𑀦 𑀧𑀦 𑀲𑀸𑀧𑀢𑁆𑀢𑀺𑀓𑁂𑀦 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺 𑀧𑀝𑀺𑀓𑀸𑀢𑀼𑀫𑁂𑀯 𑀯𑀝𑁆𑀝𑀢𑀺, 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁂𑀦 ‘‘𑀪𑀺𑀓𑁆𑀔𑀼𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀝𑀺𑀓𑀭𑀺𑀢𑁆𑀯𑀸 𑀘 𑀧𑀼𑀦 𑀉𑀧𑁄𑀲𑀣𑁄 𑀓𑀢𑁆𑀢𑀩𑁆𑀩𑁄.

𑀙𑀦𑁆𑀤𑀤𑀸𑀦𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁭𑁨. 𑀓𑁂𑀦𑀘𑀺 𑁬𑁩 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸𑀢𑀺 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺𑀪𑀽𑀢𑀁 𑀕𑀸𑀫𑀁 𑀯𑀸 𑀅𑀭𑀜𑁆𑀜𑀁 𑀯𑀸 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦𑁂𑀯 𑀉𑀧𑁄𑀲𑀣𑀜𑀢𑁆𑀢𑀺𑀬𑀸 𑀞𑀧𑀦𑀓𑀸𑀮𑁂 𑀲𑀫𑀕𑁆𑀕𑀸 𑀏𑀯 𑀢𑁂 𑀜𑀢𑁆𑀢𑀺𑀁 𑀞𑀧𑁂𑀲𑀼𑀦𑁆𑀢𑀺 𑀲𑀺𑀤𑁆𑀥𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀲𑀩𑁆𑀩𑀧𑀦𑁆𑀦𑀭𑀲𑀓𑁂𑀲𑀼𑀧𑀺 𑀯𑀼𑀢𑁆𑀢𑀁. 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄𑀢𑀺𑀆𑀤𑀺 𑀧𑀦 𑀜𑀢𑁆𑀢𑀺𑀬𑀸 𑀦𑀺𑀝𑁆𑀞𑀺𑀢𑀸𑀬 ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺𑀆𑀤𑀻𑀦𑀁 (𑀫𑀳𑀸𑀯. 𑁧𑁩𑁪) 𑀯𑀘𑀦𑀓𑁆𑀔𑀡𑁂 𑀩𑀳𑀺𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀻𑀫𑀸𑀬 𑀧𑀯𑀺𑀝𑁆𑀞𑀢𑁆𑀢𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀔𑀡𑁂 𑀯𑀕𑁆𑀕𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑁂𑀲𑀁 𑀲𑀻𑀫𑀁 𑀑𑀓𑁆𑀓𑀦𑁆𑀢𑀢𑁆𑀢𑀸 𑀯𑀕𑁆𑀕𑀸’’𑀢𑀺𑀆𑀤𑀺, 𑀏𑀢𑁂𑀦 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀺𑀓𑁆𑀔𑀡𑁂𑀧𑀺 𑀯𑀕𑁆𑀕𑀲𑀜𑁆𑀜𑀻𑀦𑀁 𑀉𑀤𑁆𑀤𑀺𑀲𑀦𑁆𑀢𑀸𑀦𑀁 𑀆𑀧𑀢𑁆𑀢𑀺 𑀏𑀯, 𑀜𑀢𑁆𑀢𑀺𑀬𑀸 𑀧𑀦 𑀧𑀼𑀩𑁆𑀩𑁂 𑀦𑀺𑀝𑁆𑀞𑀺𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀲𑀩𑁆𑀩𑀸𑀬 𑀯𑀼𑀝𑁆𑀞𑀺𑀢𑀸𑀬…𑀧𑁂… 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺 𑀆𑀭𑁄𑀘𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁧𑁭𑁪) 𑀯𑀼𑀢𑁆𑀢𑀢𑁆𑀢𑀸 𑀩𑀳𑀺𑀲𑀻𑀫𑀸𑀕𑀢𑀸𑀬 𑀧𑀭𑀺𑀲𑀸𑀬 𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀅𑀦𑀥𑀺𑀝𑁆𑀞𑀺𑀢𑁂𑀳𑀺 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁭𑁯. 𑀅𑀜𑁆𑀜𑀸𑀢𑀓𑀁 ¶ 𑀦𑀸𑀫 𑀅𑀤𑀺𑀝𑁆𑀞𑀧𑀼𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀲𑀁 𑀲𑀦𑁆𑀢𑀓’’𑀦𑁆𑀢𑀺. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑁆𑀢𑀦𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀁. 𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑀦𑁆𑀢𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑀁.

𑁧𑁮𑁦. 𑀧𑀸𑀴𑀺𑀬𑀁 𑀅𑀪𑀺𑀯𑀺𑀢𑀭𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀸𑀪𑀸𑀯𑀁 𑀦𑀺𑀘𑁆𑀙𑀺𑀦𑀦𑁆𑀢𑀺.

𑁧𑁮𑁧. 𑀉𑀧𑁄𑀲𑀣𑀓𑀸𑀭𑀓𑀸𑀢𑀺 𑀲𑀗𑁆𑀖𑀼𑀧𑁄𑀲𑀣𑀓𑀸𑀭𑀓𑀸. 𑀢𑁂𑀦𑁂𑀯 ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀼𑀧𑁄𑀲𑀣𑀝𑁆𑀞𑀸𑀦𑀢𑁄 𑀳𑀺 𑀕𑀘𑁆𑀙𑀦𑁆𑀢𑁂𑀦 𑀅𑀢𑁆𑀢𑀘𑀢𑀼𑀢𑁆𑀣𑁂𑀦𑁂𑀯 𑀕𑀦𑁆𑀢𑀩𑁆𑀩𑀁, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀧𑀦 𑀕𑀘𑁆𑀙𑀦𑁆𑀢𑁂𑀦 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸𑀧𑀺 𑀲𑀳 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀁 ‘‘𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀲𑀗𑁆𑀖𑀼𑀧𑁄𑀲𑀣𑀝𑁆𑀞𑀸𑀦𑀢𑁄 𑀕𑀡𑀧𑀼𑀕𑁆𑀕𑀮𑁂𑀳𑀺 𑀲𑀪𑀺𑀓𑁆𑀔𑀼𑀓𑁄𑀧𑀺 𑀆𑀯𑀸𑀲𑁄 𑀦 𑀕𑀦𑁆𑀢𑀩𑁆𑀩𑁄 ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀻𑀢𑀺 𑀲𑀗𑁆𑀖𑀼𑀧𑁄𑀲𑀣𑀁 𑀯𑀸 𑀕𑀡𑀼𑀧𑁄𑀲𑀣𑀁 𑀯𑀸. ‘‘𑀢𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀇𑀤𑀁 𑀕𑀡𑀼𑀧𑁄𑀲𑀣𑀝𑁆𑀞𑀸𑀦𑀢𑁄 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀢𑀘𑀢𑀼𑀢𑁆𑀣𑁂𑀦 ¶ 𑀯𑀸’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀦𑀢𑁄. 𑀆𑀭𑀜𑁆𑀜𑀓𑁂𑀦𑀸𑀢𑀺 𑀏𑀓𑀘𑀸𑀭𑀺𑀦𑀸. 𑀉𑀧𑁄𑀲𑀣𑀦𑁆𑀢𑀭𑀸𑀬𑁄𑀢𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀦𑁆𑀢𑀭𑀸𑀬𑁄.

𑁧𑁮𑁩. 𑀧𑀸𑀴𑀺𑀬𑀁 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬𑀸𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀼𑀦𑀺𑀬𑀸𑀢𑀺𑀆𑀤𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁.

𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁩. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁄

𑀯𑀲𑁆𑀲𑀽𑀧𑀦𑀸𑀬𑀺𑀓𑀅𑀦𑀼𑀚𑀸𑀦𑀦𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁮𑁪. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 ¶ ¶ 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀤𑀼𑀢𑀺𑀬𑁂 𑀧𑀸𑀝𑀺𑀧𑀤𑀤𑀺𑀯𑀲𑁂.

𑁧𑁮𑁫. 𑀅𑀜𑁆𑀜𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑀦𑁂𑀦 𑀯𑀸𑀢𑀺 𑀲𑀸𑀧𑁂𑀓𑁆𑀔𑀲𑁆𑀲 𑀅𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑀦𑁂𑀦 𑀯𑀸. 𑀧𑀭𑀺𑀳𑀸𑀦𑀻𑀢𑀺 𑀕𑀼𑀡𑀧𑀭𑀺𑀳𑀸𑀦𑀺.

𑁧𑁮𑁭. 𑀧𑀸𑀴𑀺𑀬𑀁 𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄𑀢𑀺 𑀲𑀓𑀮𑀁 𑀲𑀢𑁆𑀢𑀸𑀳𑀁 𑀩𑀳𑀺 𑀏𑀯 𑀅𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀼𑀡𑀼𑀝𑁆𑀞𑀸𑀦𑀓𑀸𑀮𑀁 𑀧𑀼𑀦 𑀯𑀺𑀳𑀸𑀭𑁂𑀯 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀢𑁆𑀢𑀸𑀳𑀁 𑀯𑀺𑀳𑀸𑀭𑁂 𑀲𑀦𑁆𑀦𑀺𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀲𑀢𑁆𑀢𑀸𑀳𑀧𑀭𑀺𑀬𑁄𑀲𑀸𑀦𑀓𑀸𑀮𑁄 𑀳𑀺 𑀇𑀥 𑀲𑀢𑁆𑀢𑀸𑀳-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀢𑀤𑀧𑁂𑀓𑁆𑀔𑀸𑀬 𑀘 ‘‘𑀲𑀦𑁆𑀦𑀺𑀯𑀢𑁆𑀢𑁄’’𑀢𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀁. 𑀢𑀻𑀡𑀺 𑀧𑀭𑀺𑀳𑀻𑀦𑀸𑀦𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀘𑁆𑀘𑀓𑀼𑀝𑀺𑀆𑀤𑀻𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀭𑀺𑀳𑀻𑀦𑀸𑀦𑀺.

𑁧𑁮𑁯. 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀅𑀜𑁆𑀜𑁂𑀲𑀁 𑀅𑀧𑁆𑀧𑀕𑀼𑀡𑀢𑁆𑀢𑀸, 𑀫𑀫 𑀘 𑀫𑀭𑀡𑁂𑀦 𑀦 𑀯𑀺𑀦𑀲𑁆𑀲𑀢𑀺.

𑀯𑀲𑁆𑀲𑀽𑀧𑀦𑀸𑀬𑀺𑀓𑀅𑀦𑀼𑀚𑀸𑀦𑀦𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀳𑀺𑀢𑁂𑀬𑁂𑀯𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁧𑁯𑁯. 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀦𑀓𑀧𑀼𑀭𑀺𑀲𑁄𑀢𑀺 𑀅𑀦𑀜𑁆𑀜𑀕𑀢𑀺𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀗𑁆𑀖𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀦𑀼𑀧𑀸𑀲𑀓𑁂𑀳𑀺𑀧𑀺 𑀲𑀸𑀲𑀦𑀪𑀸𑀯𑀁 𑀜𑀸𑀢𑀼𑀓𑀸𑀫𑁂𑀳𑀺 𑀧𑀳𑀺𑀢𑁂 𑀢𑁂𑀲𑀁 𑀧𑀲𑀸𑀤𑀯𑀟𑁆𑀠𑀺𑀁 𑀲𑀫𑁆𑀧𑀲𑁆𑀲𑀦𑁆𑀢𑁂𑀳𑀺𑀧𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁄𑀢𑀺 ¶ 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺𑀤𑁆𑀥𑀸 𑀅𑀭𑀼𑀡𑀼𑀝𑁆𑀞𑀸𑀧𑀦𑀲𑀗𑁆𑀔𑀸𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑁄. 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀕𑀦𑁆𑀢𑁆𑀯𑀸 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀫𑀓𑁆𑀔𑀡𑁂 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀫𑀦𑀓𑁆𑀔𑀡𑁂 𑀯𑀺𑀲𑁆𑀲𑀭𑀺𑀢𑁆𑀯𑀸 𑀕𑀢𑁂𑀧𑀺 𑀤𑁄𑀲𑁄 ¶ 𑀦𑀢𑁆𑀣𑀺 ‘‘𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀢𑁆𑀢𑀸. 𑀲𑀩𑁆𑀩𑀣𑀸 𑀧𑀦 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀕𑀢𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀯𑀤𑀦𑁆𑀢𑀺. 𑀬𑁄 𑀧𑀦 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀸𑀪𑀸𑀯𑁂𑀧𑀺 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯, 𑀯𑀲𑁆𑀲𑀘𑁆𑀙𑁂𑀤𑁄 𑀦𑀢𑁆𑀣𑀺 𑀲𑀢𑁆𑀢𑀸𑀳𑀲𑁆𑀲 𑀲𑀦𑁆𑀦𑀺𑀯𑀢𑁆𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀪𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀪𑀡𑁆𑀟𑀁. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀝𑁆𑀝𑀢𑀻𑀢𑀺 𑀢𑀤𑀳𑁂𑀯 𑀆𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀆𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑀦𑁆𑀢𑀺 𑀅𑀕𑀺𑀮𑀸𑀦𑀫𑁆𑀧𑀺 𑀦𑀺𑀲𑁆𑀲𑀬𑀸𑀘𑀭𑀺𑀬𑀜𑁆𑀘 𑀥𑀫𑁆𑀫𑀸𑀘𑀭𑀺𑀬𑀜𑁆𑀘, 𑀧𑀕𑁂𑀯 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀉𑀧𑀚𑁆𑀛𑀸𑀬𑁂𑀲𑀼. 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀲𑁆𑀲𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺 𑀏𑀯.

𑀧𑀳𑀺𑀢𑁂𑀬𑁂𑀯𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀢𑀭𑀸𑀬𑁂𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀓𑀣𑀸𑀯𑀡𑁆𑀡𑀦𑀸

𑁨𑁦𑁦. 𑀧𑀸𑀴𑀺𑀬𑀁 𑀕𑀡𑁆𑀳𑀺𑀁𑀲𑀽𑀢𑀺 𑀕𑀳𑁂𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀧𑀭𑀺𑀧𑀸𑀢𑀺𑀁𑀲𑀽𑀢𑀺 𑀧𑀮𑀸𑀧𑁂𑀲𑀼𑀁, 𑀅𑀦𑀼𑀩𑀦𑁆𑀥𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁨𑁦𑁧. 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀙𑀤𑀺𑀯𑀲𑀸𑀦𑀺 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀭𑀸𑀭𑀼𑀡𑀸 𑀏𑀯 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀧𑀯𑀺𑀲𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀢𑀸𑀳𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀤𑀺𑀯𑀲𑀪𑀸𑀕𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀸𑀴𑀺𑀬𑀫𑁆𑀧𑀺 ‘‘𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑁄 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀯𑀲𑁆𑀲𑁄 𑀏𑀯 𑀪𑀯𑀺𑀲𑁆𑀲𑀢𑀺 𑀅𑀭𑀼𑀡𑀲𑁆𑀲 𑀩𑀳𑀺 𑀏𑀯 𑀉𑀝𑁆𑀞𑀸𑀧𑀺𑀢𑀢𑁆𑀢𑀸. 𑀇𑀢𑀭𑀣𑀸 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀦𑁆𑀢𑁄𑀯𑀺𑀳𑀸𑀭𑁂 𑀧𑀯𑀺𑀲𑀺𑀢𑁆𑀯𑀸 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀧𑀺 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀅𑀜𑁆𑀜𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁂𑀯 ¶ 𑀯𑀼𑀘𑁆𑀘𑀢𑀺. 𑀯𑀓𑁆𑀔𑀢𑀺 𑀳𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 ‘‘𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀇𑀢𑀭𑀲𑁆𑀫𑀺𑀁 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁪).

𑀅𑀣𑀸𑀧𑀺 ¶ 𑀬𑀁 𑀢𑁂 𑀯𑀤𑁂𑀬𑁆𑀬𑀼𑀁 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀤𑀸 𑀓𑀤𑀸𑀘𑀺 𑀧𑀯𑀺𑀝𑁆𑀞𑁂𑀦 𑀢𑀁𑀤𑀺𑀯𑀲𑀦𑀺𑀲𑁆𑀲𑀺𑀢𑁄 𑀅𑀢𑀻𑀢𑀅𑀭𑀼𑀡𑁄 𑀉𑀝𑁆𑀞𑀸𑀧𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀲𑀤𑁆𑀤𑀕𑀢𑀺𑀬𑀸𑀧𑀺 𑀦 𑀲𑀫𑁂𑀢𑀺. 𑀦 𑀳𑀺 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀧𑀘𑁆𑀙𑀸 𑀧𑀯𑀺𑀝𑁆𑀞𑁄 𑀢𑀲𑁆𑀲 𑀧𑀬𑁄𑀚𑀓𑁄 𑀉𑀝𑁆𑀞𑀸𑀧𑀓𑁄 𑀪𑀯𑀺𑀢𑀼𑀫𑀭𑀳𑀢𑀺. 𑀬𑀤𑀺 𑀪𑀯𑁂𑀬𑁆𑀬, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦𑀲𑁆𑀲 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀦𑁆𑀢𑀲𑁆𑀲𑀸𑀧𑀻𑀢𑀺 𑀏𑀢𑁆𑀣 ‘‘𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬, 𑀢𑁂𑀦𑀧𑀺 𑀢𑀁𑀤𑀺𑀯𑀲𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀅𑀭𑀼𑀡𑀲𑁆𑀲 𑀉𑀝𑁆𑀞𑀸𑀧𑀺𑀢𑀢𑁆𑀢𑀸. 𑀆𑀭𑀜𑁆𑀜𑀓𑀲𑁆𑀲𑀸𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀲𑀸𑀬𑀦𑁆𑀳𑀲𑀫𑀬𑁂 𑀅𑀗𑁆𑀕𑀬𑀼𑀢𑁆𑀢𑀁 𑀅𑀭𑀜𑁆𑀜𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀤𑀸 𑀏𑀯 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀅𑀭𑀼𑀡𑁄 𑀉𑀝𑁆𑀞𑀸𑀧𑀺𑀢𑁄 𑀥𑀼𑀢𑀗𑁆𑀕𑀜𑁆𑀘 𑀯𑀺𑀲𑁄𑀥𑀺𑀢𑀁 𑀲𑀺𑀬𑀸, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀏𑀯 𑀅𑀭𑀼𑀡𑀼𑀝𑁆𑀞𑀸𑀧𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀸𑀮𑀲𑁆𑀲𑁂𑀯 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀗𑁆𑀕𑀬𑀼𑀢𑁆𑀢𑁂 𑀞𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀅𑀭𑀼𑀡𑀼𑀝𑁆𑀞𑀸𑀦𑀯𑁂𑀮𑀸𑀬𑀁 𑀢𑁂𑀲𑀁 𑀆𑀩𑀸𑀥𑁄 𑀯𑀟𑁆𑀠𑀢𑀺, 𑀢𑁂𑀲𑀁 𑀏𑀯 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁, 𑀦 𑀥𑀼𑀢𑀗𑁆𑀕𑀯𑀺𑀲𑀼𑀤𑁆𑀥𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁧). 𑀢𑀣𑀸 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀫𑁆𑀧𑀺 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑀸𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. ‘‘𑀉𑀕𑁆𑀕𑀢𑁂 𑀅𑀭𑀼𑀡𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁯𑁭) 𑀳𑀺 𑀯𑀼𑀢𑁆𑀢𑀁. 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀳 𑀦𑀺𑀯𑀼𑀢𑁆𑀣𑀪𑀸𑀯𑀧𑀭𑀺𑀫𑁄𑀘𑀦𑀢𑁆𑀣𑀁 ‘‘𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀲𑀼 𑀘 𑀲𑀩𑁆𑀩𑀢𑁆𑀣 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀆𑀕𑀸𑀫𑀺𑀅𑀭𑀼𑀡𑀯𑀲𑁂𑀦𑁂𑀯 𑀅𑀭𑀼𑀡𑀼𑀝𑁆𑀞𑀸𑀧𑀦𑀁 𑀤𑀲𑁆𑀲𑀺𑀢𑀁, 𑀦 𑀅𑀢𑀻𑀢𑀸𑀭𑀼𑀡𑀯𑀲𑁂𑀦. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁 𑀅𑀜𑁆𑀜𑀣𑀸 𑀯𑀲𑁆𑀲𑀘𑁆𑀙𑁂𑀤𑀢𑁆𑀢𑀸.

𑀬𑀁 𑀧𑀦 𑀯𑀲𑁆𑀲𑀁 𑀉𑀧𑀕𑀢𑀲𑁆𑀲 𑀢𑀤𑀳𑁂𑀯 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑀭𑀡𑀻𑀬𑀲𑁆𑀲 𑀧𑀓𑁆𑀓𑀫𑀦𑀯𑀘𑀦𑀁, 𑀢𑀁 𑀯𑀲𑁆𑀲𑀁 𑀉𑀧𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀤𑀸 𑀓𑀤𑀸𑀘𑀺 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀕𑀫𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀬𑀼𑀢𑁆𑀢𑀁, 𑀦 𑀧𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀕𑀢𑀲𑁆𑀲 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀕𑀫𑀦𑀁 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀬𑀣𑀸 𑀯𑀸 ‘‘𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁, 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁭) 𑀧𑀘𑁆𑀙𑀺𑀫𑀲𑀢𑁆𑀢𑀸𑀳𑁂 𑀅𑀦𑀸𑀕𑀫𑀦𑁂 𑀅𑀦𑀼𑀜𑁆𑀜𑀸𑀢𑁂𑀧𑀺 𑀅𑀜𑁆𑀜𑀲𑀢𑁆𑀢𑀸𑀳𑁂𑀲𑀼 𑀦 𑀯𑀝𑁆𑀝𑀢𑀺. 𑀏𑀯𑀁 𑀧𑀞𑀫𑀲𑀢𑁆𑀢𑀸𑀳𑁂 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀫𑀦𑁂 𑀅𑀦𑀼𑀜𑁆𑀜𑀸𑀢𑁂𑀧𑀺 𑀢𑀢𑁄 𑀧𑀭𑁂𑀲𑀼 𑀲𑀢𑁆𑀢𑀸𑀳𑁂𑀲𑀼 𑀆𑀕𑀢𑀲𑁆𑀲 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 ¶ 𑀕𑀫𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀇𑀥 𑀆𑀳𑀝𑀦𑁆𑀢𑀺 𑀯𑀺𑀳𑀸𑀭𑀢𑁄 𑀩𑀳𑀺 𑀆𑀕𑀢𑀝𑁆𑀞𑀸𑀦𑁂 𑀆𑀦𑀻𑀢𑀁.

𑀅𑀦𑁆𑀢𑀭𑀸𑀬𑁂𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀚𑀸𑀤𑀻𑀲𑀼 𑀯𑀲𑁆𑀲𑀽𑀧𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁨𑁦𑁩. 𑀉𑀧𑀕𑀦𑁆𑀢𑀼𑀁 𑁬𑁮 𑀦 𑀯𑀝𑁆𑀝𑀢𑀻𑀢𑀺 𑀓𑀼𑀝𑀺𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀏𑀯𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑁨𑁦𑁪. 𑀧𑀸𑀴𑀺𑀬𑀁 𑀧𑀺𑀲𑀸𑀘𑀺𑀮𑁆𑀮𑀺𑀓𑀸𑀢𑀺 𑀧𑀺𑀲𑀸𑀘𑀤𑀸𑀭𑀓𑀸. 𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸𑀢𑀺 𑀲𑀓𑀯𑀸𑀝𑀤𑁆𑀯𑀸𑀭𑀁 𑀓𑀢𑁆𑀯𑀸. 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀼𑀲𑀺𑀭𑀝𑁆𑀞𑀸𑀦𑀲𑁆𑀲 𑀉𑀧𑀭𑀺𑀪𑀸𑀕𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀔𑀸𑀡𑀼𑀫𑀢𑁆𑀣𑀓𑁂𑀢𑀺 𑀲𑀼𑀲𑀺𑀭𑀔𑀸𑀡𑀼𑀫𑀢𑁆𑀣𑀓𑁂. 𑀝𑀗𑁆𑀓𑀺𑀢𑀫𑀜𑁆𑀘𑁄 𑀦𑀸𑀫 𑀤𑀻𑀖𑁂 𑀫𑀜𑁆𑀘𑀧𑀸𑀤𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀢𑁄, 𑀲𑁄 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀜𑁆𑀜𑀢𑁆𑀢𑁄𑀧𑀺 𑀧𑀼𑀭𑀺𑀫𑀲𑀤𑀺𑀲𑁄𑀯 𑀳𑁄𑀢𑀺, 𑀢𑀁 𑀲𑀼𑀲𑀸𑀦𑁂, 𑀤𑁂𑀯𑀢𑀸𑀞𑀸𑀦𑁂 𑀘 𑀞𑀧𑁂𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀧𑀸𑀲𑀸𑀡𑀨𑀮𑀓𑁂 𑀅𑀢𑁆𑀣𑀭𑀺𑀢𑁆𑀯𑀸 𑀓𑀢𑀕𑁂𑀳𑀫𑁆𑀧𑀺 ‘‘𑀝𑀗𑁆𑀓𑀺𑀢𑀫𑀜𑁆𑀘𑁄’’𑀢𑀺 𑀯𑀼𑀘𑁆𑀘𑀢𑀺.

𑀯𑀚𑀸𑀤𑀻𑀲𑀼𑀯𑀲𑁆𑀲𑀽𑀧𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁦𑁫. 𑀫𑀳𑀸𑀯𑀺𑀪𑀗𑁆𑀕𑁂𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁. 𑀧𑀭𑀢𑁄 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂𑀧𑀺 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺 𑀏𑀯.

𑁨𑁦𑁭. 𑀬𑀲𑁆𑀫𑀸 𑀦𑀸𑀦𑀸𑀲𑀻𑀫𑀸𑀬𑀁 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 ‘‘𑀤𑀼𑀢𑀺𑀬𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀘𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀞𑀫𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀞𑀫𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀢𑀺𑀬𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀧𑀦 𑀧𑀼𑀭𑀺𑀫𑀺𑀓𑀸 𑀧𑀜𑁆𑀜𑀸𑀬𑀢𑁂𑀯, 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀯𑀲𑀦𑁆𑀢𑁄 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑁄 ¶ 𑀏𑀯 𑀳𑁄𑀢𑀺, 𑀢𑀢𑁄 𑀯𑀸 𑀧𑀦 𑀤𑀼𑀢𑀺𑀬𑀤𑀺𑀯𑀲𑀸𑀤𑀻𑀲𑀼 ‘‘𑀧𑀞𑀫𑀲𑁂𑀦𑀸𑀲𑀦𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀼𑀭𑀺𑀫𑀺𑀓𑀸𑀧𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁦𑁮. 𑀧𑀸𑀴𑀺𑀬𑀁 ‘‘𑀲𑁄 𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀸𑀤𑀺𑀯𑀲𑁂𑀧𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀁 𑀯𑀺𑀦𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸𑀢𑀺 ¶ 𑀧𑀘𑁆𑀙𑀺𑀫-𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬. 𑀲𑀸 𑀳𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀼𑀫𑀼𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑁄𑀫𑀼𑀤𑀻, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀫𑀸𑀲𑀸𑀦𑀁 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀘 𑀯𑀼𑀘𑁆𑀘𑀢𑀺.

𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁪. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁄

𑀅𑀨𑀸𑀲𑀼𑀯𑀺𑀳𑀸𑀭𑀓𑀣𑀸𑀤𑀺𑀯𑀡𑁆𑀡𑀦𑀸

𑁨𑁦𑁯. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁂 ¶ ¶ 𑀧𑀸𑀴𑀺𑀬𑀁 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑁂𑀬𑁆𑀬𑀸𑀢𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑁂𑀬𑁆𑀬. 𑀅𑀯𑀓𑁆𑀓𑀸𑀭𑀧𑀸𑀢𑀺𑀦𑁆𑀢𑀺 𑀅𑀢𑀺𑀭𑁂𑀓𑀧𑀺𑀡𑁆𑀟𑀧𑀸𑀢𑀞𑀧𑀦𑀓𑀁 𑀏𑀓𑀁 𑀪𑀸𑀚𑀦𑀁. 𑀅𑀯𑀺𑀲𑀬𑁆𑀳𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁. 𑀯𑀺𑀮𑀗𑁆𑀖𑀦𑀁 𑀉𑀓𑁆𑀔𑀺𑀧𑀦𑀁 𑀯𑀺𑀮𑀗𑁆𑀖𑁄, 𑀲𑁄 𑀏𑀯 𑀯𑀺𑀮𑀗𑁆𑀖𑀓𑁄, 𑀳𑀢𑁆𑀣𑁂𑀳𑀺 𑀯𑀺𑀮𑀗𑁆𑀖𑀓𑁄 𑀳𑀢𑁆𑀣𑀯𑀺𑀮𑀗𑁆𑀖𑀓𑁄𑀢𑀺 𑀆𑀳 ‘‘𑀳𑀢𑁆𑀣𑀼𑀓𑁆𑀔𑁂𑀧𑀓𑁂𑀦𑀸’’𑀢𑀺. 𑀅𑀣 𑀯𑀸 𑀯𑀺𑀮𑀗𑁆𑀖𑀓𑁂𑀦 𑀉𑀓𑁆𑀔𑁂𑀧𑀓𑁂𑀦 𑀳𑀢𑁆𑀣𑁂𑀦𑀸𑀢𑀺𑀧𑀺 𑀅𑀢𑁆𑀣𑁄, 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑀳𑀢𑁆𑀣𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁧𑁩. 𑀲𑀘𑁂 𑀧𑀦 𑀯𑀼𑀟𑁆𑀠𑀢𑀭𑁄 𑀳𑁄𑀢𑀻𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺. 𑀏𑀯𑀜𑁆𑀳𑀺 𑀢𑁂𑀦 𑀢𑀲𑁆𑀲𑀢𑁆𑀣𑀸𑀬 𑀧𑀯𑀸𑀭𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀏𑀯𑀁 𑀢𑁂𑀦 𑀅𑀧𑁆𑀧𑀯𑀸𑀭𑀺𑀢𑁄𑀧𑀺 𑀢𑀲𑁆𑀲 𑀲𑀗𑁆𑀖𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦 𑀲𑀗𑁆𑀖𑀧𑀯𑀸𑀭𑀡𑀸𑀓𑀫𑁆𑀫𑀁 𑀲𑀫𑀕𑁆𑀕𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑁂𑀦 𑀪𑀺𑀓𑁆𑀔𑀼𑀦𑀸.

𑁨𑁩𑁪. 𑀩𑀳𑀽𑀧𑀺 𑀲𑀫𑀸𑀦𑀯𑀲𑁆𑀲𑀸 𑀏𑀓𑀢𑁄 𑀧𑀯𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀮𑀤𑁆𑀥𑀽𑀧𑀲𑀫𑁆𑀧𑀤𑀢𑀸𑀬 𑀲𑀫𑀸𑀦𑀼𑀧𑀲𑀫𑁆𑀧𑀦𑁆𑀦𑀯𑀲𑁆𑀲𑀸 𑀲𑀩𑁆𑀩𑁂 𑀏𑀓𑀢𑁄 𑀧𑀯𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁩𑁭. 𑀧𑀸𑀴𑀺𑀬𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑁨.𑁯𑁪, 𑁯𑁫, 𑁨𑁨𑁫; 𑁩.𑁯𑁧, 𑁧𑁧𑁬, 𑁧𑁩𑁬; 𑀲𑀁. 𑀦𑀺. 𑁩.𑁨𑁧𑁦; 𑀥. 𑀲. 𑁧𑁨𑁨𑁧) 𑀦𑀬𑀧𑁆𑀧𑀯𑀢𑁆𑀢𑀸. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀲𑁆𑀲 𑀅𑀦𑁆𑀢𑀲𑁆𑀲 𑀕𑀸𑀳𑀺𑀓𑀸. 𑀬𑀁 𑀔𑁄 𑀢𑁆𑀯𑀦𑁆𑀢𑀺𑀆𑀤𑀻𑀲𑀼 𑀬𑀁 𑀧𑀯𑀸𑀭𑀡𑀁 𑀞𑀧𑁂𑀲𑀺, 𑀢𑀁 𑀤𑀺𑀝𑁆𑀞𑁂𑀦 𑀞𑀧𑁂𑀲𑀻𑀢𑀺 𑀢𑀁-𑀲𑀤𑁆𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁨𑁩𑁯. 𑀯𑀢𑁆𑀣𑀼𑀁 𑀧𑀓𑀸𑀲𑁂𑀦𑁆𑀢𑁄𑀢𑀺 𑀧𑀼𑀕𑁆𑀕𑀮𑁂 𑀧𑀭𑀺𑀲𑀗𑁆𑀓𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀽𑀢𑀁 𑀯𑀢𑁆𑀣𑀼𑀫𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ¶ . 𑀬𑀁 𑀧𑀦 𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 ‘‘𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀢𑁆𑀣𑀽’’𑀢𑀺 𑀆𑀳, 𑀦 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑀦𑀝𑁆𑀞𑀸𑀦𑁂 𑀧𑁄𑀓𑁆𑀔𑀭𑀡𑀺𑀢𑁄 𑀫𑀘𑁆𑀙𑀕𑁆𑀕𑀳𑀡𑀸𑀤𑀺 𑀤𑀺𑀲𑁆𑀲𑁂𑀬𑁆𑀬, 𑀢𑀤𑀸 ‘‘𑀯𑀢𑁆𑀣𑀼 𑀘 𑀧𑀼𑀕𑁆𑀕𑀮𑁄 𑀘 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑁄𑀭𑁂𑀳𑀻’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑁂 𑀫𑀸𑀮𑀸𑀕𑀦𑁆𑀥𑀜𑁆𑀘 𑀅𑀭𑀺𑀝𑁆𑀞𑀕𑀦𑁆𑀥𑀜𑁆𑀘 𑀤𑀺𑀲𑁆𑀯𑀸 𑀏𑀯𑀁 ‘‘𑀯𑀢𑁆𑀣𑀼 𑀘 𑀧𑀼𑀕𑁆𑀕𑀮𑁄 𑀘 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀨𑀸𑀲𑀼𑀯𑀺𑀳𑀸𑀭𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀡𑁆𑀟𑀦𑀓𑀸𑀭𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁪𑁦. 𑀤𑁆𑀯𑁂 ¶ 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀻𑀢𑀺 𑀢𑀢𑀺𑀬𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀺𑀬𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀺. ‘‘𑀪𑀡𑁆𑀟𑀦𑀓𑀸𑀭𑀓𑀸𑀦𑀁 𑀢𑁂𑀭𑀲𑁂 𑀯𑀸 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀇𑀫𑁂 𑀧𑀦𑁆𑀦𑀭𑀲𑀻𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀬𑀣𑀸𑀲𑀓𑀁 𑀉𑀧𑁄𑀲𑀣𑀓𑀭𑀡𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀯𑁄𑀳𑀸𑀭𑁄, 𑀦 𑀘𑀦𑁆𑀤𑀕𑀢𑀺𑀲𑀺𑀤𑁆𑀥𑀺𑀬𑀸 𑀢𑀺𑀣𑀺𑀬𑀸 𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁮𑁬) 𑀯𑀘𑀦𑀢𑁄 𑀧𑀦𑁂𑀢𑁆𑀣 𑀮𑁄𑀓𑀺𑀬𑀸𑀦𑀁 𑀢𑀺𑀣𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺𑀧𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑁆𑀓𑀫𑁂𑀦 𑀘𑀸𑀢𑀼𑀤𑁆𑀤𑀲𑀺𑀁 𑀧𑀦𑁆𑀦𑀭𑀲𑀺𑀁 𑀯𑀸, 𑀧𑀦𑁆𑀦𑀭𑀲𑀺𑀁 𑀘𑀸𑀢𑀼𑀤𑁆𑀤𑀲𑀺𑀁 𑀯𑀸 𑀓𑀭𑁄𑀦𑁆𑀢𑁂𑀳𑁂𑀯 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀦 𑀲𑁄𑀴𑀲𑀫𑀤𑀺𑀯𑀲𑀁 𑀯𑀸 𑀢𑁂𑀭𑀲𑀫𑀤𑀺𑀯𑀲𑀁 𑀯𑀸 𑀉𑀧𑁄𑀲𑀣𑀤𑀺𑀯𑀲𑀁 𑀓𑀭𑁄𑀦𑁆𑀢𑁂𑀳𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀫𑁆𑀧𑀺 ‘‘𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀤𑁆𑀯𑀸𑀤𑀲𑀺𑀬𑀁, 𑀢𑁂𑀭𑀲𑀺𑀬𑀁 𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀯𑀢𑁆𑀢𑀩𑁆𑀩𑀢𑁄. ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂, 𑀧𑀦𑁆𑀦𑀭𑀲𑁂 𑀯𑀸’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀉𑀧𑀯𑀼𑀢𑁆𑀣𑀓𑁆𑀓𑀫𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀢𑀺𑀣𑀺𑀓𑁆𑀓𑀫𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀪𑀡𑁆𑀟𑀦𑀓𑀸𑀭𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀯𑀸𑀭𑀡𑀸𑀲𑀗𑁆𑀕𑀳𑀓𑀣𑀸𑀯𑀡𑁆𑀡𑀦𑀸

𑁨𑁪𑁧. ‘‘𑀧𑀯𑀸𑀭𑁂𑀢𑁆𑀯𑀸 𑀧𑀦 𑀅𑀦𑁆𑀢𑀭𑀸𑀧𑀺 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁 𑀮𑀪𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀯𑀸𑀭𑀡𑀸𑀲𑀗𑁆𑀕𑀳𑁂 𑀓𑀢𑁂 𑀅𑀦𑁆𑀢𑀭𑀸 𑀧𑀓𑁆𑀓𑀫𑀺𑀢𑀼𑀓𑀸𑀫𑀸 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀯𑀸𑀭𑀡𑀸𑀲𑀗𑁆𑀕𑀳𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓𑁄

𑀲𑁄𑀡𑀓𑁄𑀴𑀺𑀯𑀺𑀲𑀓𑀣𑀸𑀤𑀺𑀯𑀡𑁆𑀡𑀦𑀸

𑁨𑁪𑁨. 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 ¶ ¶ 𑀉𑀡𑁆𑀡𑀧𑀸𑀯𑀸𑀭𑀡𑀦𑁆𑀢𑀺 𑀉𑀪𑀢𑁄 𑀮𑁄𑀫𑀸𑀦𑀺 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀁 𑀉𑀡𑁆𑀡𑀫𑀬𑀁 𑀧𑀸𑀯𑀸𑀭𑀡𑀁, 𑀉𑀪𑀢𑁄 𑀓𑀧𑁆𑀧𑀸𑀲𑀧𑀺𑀘𑀼𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀻𑀢𑀧𑀸𑀯𑀸𑀭𑁄𑀧𑀺 𑀅𑀢𑁆𑀣𑀺, 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀉𑀡𑁆𑀡𑀧𑀸𑀯𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀟𑁆𑀠𑀘𑀦𑁆𑀤𑀧𑀸𑀲𑀸𑀡𑁂𑀢𑀺 𑀲𑁄𑀧𑀸𑀦𑀫𑀽𑀮𑁂 𑀉𑀧𑀟𑁆𑀠𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀞𑀧𑀺𑀢𑁂 𑀅𑀟𑁆𑀠𑀧𑀸𑀲𑀸𑀡𑁂. 𑀧𑀸𑀴𑀺𑀬𑀁 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀦𑁆𑀢𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀙𑀸𑀬𑀸𑀬, 𑀯𑀺𑀳𑀸𑀭𑀲𑁆𑀲 𑀯𑀟𑁆𑀠𑀫𑀸𑀦𑀘𑁆𑀙𑀸𑀬𑀸𑀬𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑁨𑁪𑁩. 𑀪𑁄𑀕𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀘𑁆𑀘𑀸𑀬𑀢𑀸𑀢𑀺 𑀅𑀢𑀺𑀆𑀬𑀢𑀸 𑀔𑀭𑀫𑀼𑀘𑁆𑀙𑀦𑀸. 𑀲𑀭𑀯𑀢𑀻𑀢𑀺 𑀫𑀥𑀼𑀭𑀲𑀭𑀲𑀁𑀬𑀼𑀢𑁆𑀢𑀸. 𑀅𑀢𑀺𑀲𑀺𑀣𑀺𑀮𑀸 𑀫𑀦𑁆𑀤𑀫𑀼𑀘𑁆𑀙𑀦𑀸. 𑀯𑀻𑀭𑀺𑀬𑀲𑀫𑀣𑀦𑁆𑀢𑀺 𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀲𑀫𑀣𑀁. 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀢𑀲𑁆𑀫𑀺𑀜𑁆𑀘 𑀲𑀫𑀪𑀸𑀯𑁂 𑀲𑀢𑀺 𑀬𑀁 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁, 𑀫𑀕𑁆𑀕𑀦𑀺𑀫𑀺𑀢𑁆𑀢𑀁, 𑀨𑀮𑀦𑀺𑀫𑀺𑀢𑁆𑀢𑀜𑁆𑀘 𑀕𑀡𑁆𑀳𑀸𑀳𑀺 𑀦𑀺𑀩𑁆𑀩𑀢𑁆𑀢𑁂𑀳𑀻𑀢𑀺, 𑀏𑀯𑀫𑀲𑁆𑀲 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁.

𑁨𑁪𑁪. 𑀙𑀞𑀸𑀦𑀸𑀦𑀻𑀢𑀺 𑀙 𑀓𑀸𑀭𑀡𑀸𑀦𑀺. 𑀅𑀥𑀺𑀫𑀼𑀢𑁆𑀢𑁄𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄𑀢𑀺𑀆𑀤𑀺 𑀲𑀩𑁆𑀩𑀁 𑀅𑀭𑀳𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀜𑁆𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁, 𑀢𑁂𑀳𑁂𑀯 𑀘 𑀧𑀯𑀺𑀯𑀺𑀢𑁆𑀢𑀢𑁆𑀢𑀸 𑀧𑀯𑀺𑀯𑁂𑀓𑁄, 𑀩𑁆𑀬𑀸𑀧𑀚𑁆𑀚𑀸𑀪𑀸𑀯𑀢𑁄 𑀅𑀩𑁆𑀬𑀸𑀧𑀚𑁆𑀚𑀁, 𑀉𑀧𑀸𑀤𑀸𑀦𑀲𑁆𑀲 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑁄, 𑀢𑀡𑁆𑀳𑀓𑁆𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑁄, 𑀲𑀫𑁆𑀫𑁄𑀳𑀸𑀪𑀸𑀯𑀢𑁄 𑀅𑀲𑀫𑁆𑀫𑁄𑀳𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀦𑁆𑀢𑀺 𑀓𑁂𑀯𑀮𑀁 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀅𑀲𑀫𑁆𑀫𑀺𑀲𑁆𑀲𑀁 𑀲𑀤𑁆𑀥𑀸𑀫𑀢𑁆𑀢𑀓𑀁. 𑀧𑀝𑀺𑀘𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 ¶ 𑀓𑀭𑀡𑁂𑀦 𑀯𑀟𑁆𑀠𑀺𑀁. 𑀯𑀻𑀢𑀭𑀸𑀕𑀢𑁆𑀢𑀸𑀢𑀺 𑀫𑀕𑁆𑀕𑀧𑀝𑀺𑀯𑁂𑀥𑁂𑀦 𑀭𑀸𑀕𑀲𑁆𑀲 𑀯𑀺𑀕𑀢𑀢𑁆𑀢𑀸 𑀏𑀯 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄𑀢𑀺 ‘‘𑀧𑀯𑀺𑀯𑁂𑀓𑁂 𑀅𑀥𑀺𑀫𑀼𑀢𑁆𑀢𑁄 𑀅𑀳’’𑀦𑁆𑀢𑀺 𑀏𑀯𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀦𑁆𑀢𑀺 𑀲𑀻𑀮𑀜𑁆𑀘 𑀯𑀢𑀜𑁆𑀘 𑀧𑀭𑀸𑀫𑀲𑀺𑀢𑁆𑀯𑀸 𑀕𑀳𑀺𑀢𑀕𑁆𑀕𑀳𑀡𑀫𑀢𑁆𑀢𑀁. 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀢𑀺 𑀲𑀸𑀭𑀪𑀸𑀯𑁂𑀦 𑀚𑀸𑀦𑀦𑁆𑀢𑁄. 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄𑀢𑀺 𑀅𑀩𑁆𑀬𑀸𑀧𑀚𑁆𑀚𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀢𑀺.

𑀅𑀫𑀺𑀲𑁆𑀲𑀻𑀓𑀢𑀦𑁆𑀢𑀺 ¶ 𑀅𑀫𑀺𑀲𑁆𑀲𑀓𑀢𑀁. 𑀓𑀺𑀮𑁂𑀲𑀸 𑀳𑀺 𑀆𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀅𑀪𑀸𑀯𑀸 𑀅𑀫𑀺𑀲𑁆𑀲𑀻𑀓𑀢𑀁. 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀻𑀢𑀺 𑀩𑀮𑀯𑀯𑀸𑀢𑀓𑁆𑀔𑀦𑁆𑀥𑁄.

𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀦𑁆𑀢𑀺 𑀘𑀓𑁆𑀔𑀸𑀤𑀺𑀆𑀬𑀢𑀦𑀸𑀦𑀁 𑀉𑀧𑁆𑀧𑀸𑀤𑀜𑁆𑀘 𑀯𑀬𑀜𑁆𑀘 𑀤𑀺𑀲𑁆𑀯𑀸. 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀫𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀬𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

𑀲𑁄𑀡𑀓𑁄𑀴𑀺𑀯𑀺𑀲𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁨𑁪𑁫. 𑀲𑀓𑀝𑀯𑀸𑀳𑁂𑀢𑀺 𑀤𑁆𑀯𑀻𑀳𑀺 𑀲𑀓𑀝𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀸𑀳𑁂. ‘‘𑀯𑀸𑀳𑁂’’𑀢𑀺 𑀩𑀳𑀼𑀯𑀘𑀦𑀲𑁆𑀲 𑀳𑀺𑀭𑀜𑁆𑀜𑀯𑀺𑀲𑁂𑀲𑀦𑀢𑁆𑀢𑁂𑀧𑀺 𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬 ‘‘𑀳𑀺𑀭𑀜𑁆𑀜’’𑀦𑁆𑀢𑀺 𑀏𑀓𑀯𑀘𑀦𑀁 𑀓𑀢𑀁.

𑁨𑁪𑁬. 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸𑀢𑀺 𑀅𑀮𑁆𑀮𑀸𑀭𑀺𑀝𑁆𑀞𑀨𑀮𑀯𑀡𑁆𑀡𑀸, 𑀢𑀺𑀦𑁆𑀢𑀓𑀸𑀓𑀧𑀓𑁆𑀔𑀯𑀡𑁆𑀡𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀭𑀚𑀦𑀦𑁆𑀢𑀺 𑀉𑀧𑀮𑀺𑀢𑁆𑀢𑀁 𑀦𑀻𑀮𑀸𑀤𑀺𑀯𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑁆𑀯𑀸’’𑀢𑀺. 𑀢𑀜𑁆𑀳𑀺 𑀢𑀣𑀸 𑀧𑀼𑀜𑁆𑀙𑀺𑀢𑁂 𑀯𑀺𑀕𑀘𑁆𑀙𑀢𑀺. 𑀬𑀁 𑀧𑀦 𑀘𑀫𑁆𑀫𑀲𑁆𑀲 𑀤𑀼𑀕𑁆𑀕𑀦𑁆𑀥𑀸𑀧𑀦𑀬𑀦𑀢𑁆𑀣𑀁 𑀓𑀸𑀴𑀭𑀢𑁆𑀢𑀸𑀤𑀺𑀭𑀚𑀦𑁂𑀳𑀺 𑀭𑀜𑁆𑀚𑀺𑀢𑀢𑁆𑀢𑀸 𑀓𑀸𑀴𑀭𑀢𑁆𑀢𑀸𑀤𑀺𑀯𑀡𑁆𑀡𑀁 𑀳𑁄𑀢𑀺, 𑀢𑀁 𑀘𑁄𑀴𑀸𑀤𑀻𑀳𑀺 𑀅𑀧𑀦𑁂𑀢𑀼𑀁 𑀦 𑀲𑀓𑁆𑀓𑀸 𑀘𑀫𑁆𑀫𑀕𑀢𑀺𑀓𑀫𑁂𑀯, 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀔𑀮𑁆𑀮𑀓𑀦𑁆𑀢𑀺 𑀲𑀩𑁆𑀩𑀧𑀡𑁆𑀳𑀺𑀧𑀺𑀥𑀸𑀦𑀘𑀫𑁆𑀫𑀁, 𑀅𑀧𑀭𑀺𑀕𑀴𑀦𑀢𑁆𑀣𑀁 𑀧𑀡𑁆𑀳𑀺𑀉𑀧𑀭𑀺𑀪𑀸𑀕𑁂 𑀅𑀧𑀺𑀥𑀸𑀬 𑀆𑀭𑁄𑀧𑀦𑀩𑀦𑁆𑀥𑀦𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀺𑀘𑀺𑀢𑁆𑀭𑀸𑀢𑀺 𑀲𑀡𑁆𑀞𑀸𑀦𑀢𑁄 𑀯𑀺𑀘𑀺𑀢𑁆𑀭𑀧𑀝𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀯𑀡𑁆𑀡𑀢𑁄 𑀲𑀩𑁆𑀩𑀲𑁄 𑀅𑀧𑀦𑁂𑀢𑀩𑁆𑀩𑁂𑀲𑀼 ¶ 𑀔𑀮𑁆𑀮𑀓𑀸𑀤𑀻𑀲𑀼 𑀧𑀯𑀺𑀝𑁆𑀞𑀢𑁆𑀢𑀸. 𑀩𑀺𑀴𑀸𑀮𑀲𑀤𑀺𑀲𑀫𑀼𑀔𑀢𑁆𑀢𑀸 𑀫𑀳𑀸𑀉𑀮𑀽𑀓𑀸 ‘‘𑀧𑀓𑁆𑀔𑀺𑀩𑀺𑀴𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀁 𑀘𑀫𑁆𑀫𑀁 𑀦𑀸𑀫 𑀧𑀓𑁆𑀔𑀮𑁄𑀫𑀫𑁂𑀯.

𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀚𑁆𑀛𑀸𑀭𑀸𑀫𑁂𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸𑀤𑀺𑀯𑀡𑁆𑀡𑀦𑀸

𑁨𑁫𑁧. 𑀉𑀡𑁆𑀡𑀸𑀳𑀺 ¶ 𑀓𑀢𑀧𑀸𑀤𑀼𑀓𑀸𑀢𑀺 𑀏𑀢𑁆𑀣 𑀉𑀡𑁆𑀡𑀸𑀫𑀬𑀓𑀫𑁆𑀩𑀮𑁂𑀳𑀺 𑀓𑀢𑀸 𑀧𑀸𑀤𑀼𑀓𑀸 𑀲𑀗𑁆𑀕𑀬𑁆𑀳𑀦𑁆𑀢𑀺.

𑁨𑁫𑁩. 𑀕𑀗𑁆𑀕𑀸𑀫𑀳𑀓𑀻𑀴𑀺𑀓𑀸𑀬𑀸𑀢𑀺 𑀕𑀗𑁆𑀕𑀸𑀫𑀳𑁂 𑀓𑀻𑀴𑀺𑀓𑀸𑀬. 𑀢𑀢𑁆𑀣 𑀳𑀺 𑀇𑀢𑁆𑀣𑀺𑀧𑀼𑀭𑀺𑀲𑀸 𑀬𑀸𑀦𑁂𑀳𑀺 𑀉𑀤𑀓𑀓𑀻𑀴𑀁 𑀕𑀘𑁆𑀙𑀦𑁆𑀢𑀺. 𑀧𑀻𑀞𑀓𑀲𑀺𑀯𑀺𑀓𑀦𑁆𑀢𑀺 𑀨𑀮𑀓𑀸𑀤𑀺𑀦𑀸 𑀓𑀢𑀁 𑀧𑀻𑀞𑀓𑀬𑀸𑀦𑀁. 𑀧𑀝𑀧𑁄𑀢𑀮𑀺𑀓𑀁 𑀅𑀦𑁆𑀤𑁄𑀮𑀺𑀓𑀸. 𑀲𑀩𑁆𑀩𑀫𑁆𑀧𑀺 𑀬𑀸𑀦𑀁 𑀉𑀧𑀸𑀳𑀦𑁂𑀦𑀧𑀺 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀕𑀺𑀮𑀸𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀁.

𑁨𑁫𑁪. 𑀯𑀸𑀴𑀭𑀽𑀧𑀸𑀦𑀻𑀢𑀺 𑀆𑀳𑀭𑀺𑀫𑀸𑀦𑀺 𑀯𑀸𑀴𑀭𑀽𑀧𑀸𑀦𑀺. 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀻𑀢𑀺 𑀉𑀤𑁆𑀤𑀮𑁄𑀫𑀻𑀏𑀓𑀦𑁆𑀢𑀮𑁄𑀫𑀻𑀳𑀺 𑀯𑀺𑀲𑁂𑀲𑀤𑀲𑁆𑀲𑀦𑀁. 𑀘𑀢𑀼𑀭𑀗𑁆𑀕𑀼𑀮𑀢𑁄 𑀳𑀺 𑀊𑀦𑀸𑀦𑀺 𑀓𑀺𑀭 𑀉𑀤𑁆𑀤𑀮𑁄𑀫𑀻𑀆𑀤𑀻𑀲𑀼 𑀧𑀯𑀺𑀲𑀦𑁆𑀢𑀺. 𑀯𑀸𑀦𑀘𑀺𑀢𑁆𑀭𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀉𑀡𑁆𑀡𑀸𑀫𑀬𑀲𑀼𑀢𑁆𑀢𑁂𑀳𑀺 𑀪𑀺𑀢𑁆𑀢𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀯𑀸𑀬𑀺𑀢𑁆𑀯𑀸 𑀓𑀢𑀘𑀺𑀢𑁆𑀢𑀢𑁆𑀣𑀭𑀡𑁄. 𑀖𑀦𑀧𑀼𑀧𑁆𑀨𑀓𑁄𑀢𑀺 𑀩𑀳𑀮𑀭𑀸𑀕𑁄. 𑀧𑀓𑀢𑀺𑀢𑀽𑀮𑀺𑀓𑀸𑀢𑀺 𑀢𑀽𑀮𑀧𑀼𑀡𑁆𑀡𑀸 𑀪𑀺𑀲𑀺. 𑀯𑀺𑀓𑀢𑀺𑀓𑀸𑀢𑀺 𑀲𑀻𑀳𑀭𑀽𑀧𑀸𑀤𑀺𑀯𑀲𑁂𑀦 𑀯𑀸𑀦𑀘𑀺𑀢𑁆𑀭𑀸𑀯 𑀕𑀬𑁆𑀳𑀢𑀺. 𑀉𑀤𑁆𑀤𑀮𑁄𑀫𑀻𑀢𑀺 ‘‘𑀉𑀪𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀦𑁆𑀢𑀺 𑀓𑁄𑀲𑀺𑀬𑀲𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑀸 𑀲𑀼𑀯𑀡𑁆𑀡𑀫𑀬𑀲𑀼𑀢𑁆𑀢𑀸𑀦𑀺 𑀧𑀯𑁂𑀲𑁂𑀢𑁆𑀯𑀸 𑀯𑀻𑀢𑀁. 𑀲𑀼𑀯𑀡𑁆𑀡𑀲𑀼𑀢𑁆𑀢𑀁 𑀓𑀺𑀭 ‘‘𑀓𑀝𑁆𑀝𑀺𑀲𑁆𑀲𑀁, 𑀓𑀲𑀝’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 ‘‘𑀓𑁄𑀲𑁂𑀬𑁆𑀬𑀓𑀲𑀝𑀫𑀬’’𑀦𑁆𑀢𑀺 𑀆𑀘𑀭𑀺𑀬-𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀦𑁆𑀢𑀺 𑀲𑀼𑀯𑀡𑁆𑀡𑀮𑀺𑀢𑁆𑀢𑀁. 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀁.

𑀅𑀚𑀺𑀦𑀫𑀺𑀕𑀘𑀫𑁆𑀫𑀸𑀦𑀁 𑀅𑀢𑀺𑀲𑀼𑀔𑀼𑀫𑀢𑁆𑀢𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀦𑀺 𑀓𑀢𑁆𑀯𑀸 𑀲𑀺𑀩𑁆𑀩𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑁆𑀧𑀯𑁂𑀡𑀻’’𑀢𑀺. 𑀭𑀢𑁆𑀢𑀯𑀺𑀢𑀸𑀦𑁂𑀦𑀸𑀢𑀺 𑀲𑀩𑁆𑀩𑀭𑀢𑁆𑀢𑁂𑀦 𑀯𑀺𑀢𑀸𑀦𑁂𑀦. 𑀬𑀁 𑀧𑀦 𑀦𑀸𑀦𑀸𑀯𑀡𑁆𑀡𑀁 𑀯𑀸𑀦𑀘𑀺𑀢𑁆𑀢𑀁 𑀯𑀸 𑀮𑁂𑀧𑀘𑀺𑀢𑁆𑀢𑀁 𑀯𑀸, 𑀢𑀁 𑀯𑀝𑁆𑀝𑀢𑀺. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀘𑀺𑀢𑁆𑀭𑀁 𑀯𑀸’’𑀢𑀺 𑀇𑀤𑀁 𑀧𑀦 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦 𑀉𑀪𑀢𑁄𑀉𑀧𑀥𑀸𑀦𑁂𑀲𑀼 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀦 𑀳𑀺 𑀮𑁄𑀳𑀺𑀢𑀓-𑀲𑀤𑁆𑀤𑁄 𑀘𑀺𑀢𑁆𑀢𑁂 𑀯𑀢𑁆𑀢𑀢𑀺, 𑀧𑀝𑀮𑀺𑀕𑁆𑀕𑀳𑀡𑁂𑀦𑁂𑀯 𑀘𑀺𑀢𑁆𑀢𑀓𑀲𑁆𑀲𑀧𑀺 𑀅𑀢𑁆𑀣𑀭𑀡𑀲𑁆𑀲 𑀲𑀗𑁆𑀕𑀳𑁂𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄, 𑀓𑀸𑀲𑀸𑀯𑀁 𑀧𑀦 𑀮𑁄𑀳𑀺𑀢𑀓𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀯𑀺𑀢𑀸𑀦𑁂𑀧𑀺 𑀉𑀪𑀢𑁄𑀉𑀧𑀥𑀸𑀦𑁂𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀦𑁆𑀢𑀺𑀆𑀤𑀺 𑀅𑀜𑁆𑀜𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀩𑀺𑀩𑁆𑀩𑁄𑀳𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 ¶ 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀢𑀁 𑀧𑀦 𑀉𑀧𑀥𑀸𑀦𑀁 𑀉𑀧𑁄𑀲𑀣𑀺𑀓𑀸𑀦𑀁 ¶ 𑀕𑀳𑀝𑁆𑀞𑀸𑀦𑀁 𑀯𑀝𑁆𑀝𑀢𑀺. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀫𑁂𑀯 𑀳𑀺 𑀢𑀤𑀸 𑀢𑁂𑀲𑀁 𑀦 𑀯𑀝𑁆𑀝𑀢𑀺. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁 𑀲𑀩𑁆𑀩𑀸𑀦𑁂𑀯 𑀕𑁄𑀦𑀓𑀸𑀤𑀻𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀯𑀝𑁆𑀝𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀯𑀺𑀦𑀬𑀝𑁆𑀞𑀓𑀣𑀸𑀬𑁂𑀯 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀅𑀚𑁆𑀛𑀸𑀭𑀸𑀫𑁂𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁫𑁬. 𑀅𑀪𑀺𑀦𑀺𑀲𑁆𑀲𑀸𑀬𑀸𑀢𑀺 𑀅𑀧𑀲𑁆𑀲𑀸𑀬. 𑀯𑀺𑀲𑀼𑀓𑀸𑀬𑀺𑀓𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀘𑀺𑀢𑁆𑀢𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁨𑁫𑁭. 𑀬𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀜𑁆𑀜𑀢𑀺𑀦𑁆𑀤𑁆𑀭𑀺𑀬𑀁.

𑁨𑁫𑁮. 𑀧𑀸𑀴𑀺𑀬𑀁 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀻𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 (𑀲𑀼. 𑀦𑀺. 𑁭𑁭𑁨 𑀆𑀤𑀬𑁄) 𑀅𑀝𑁆𑀞𑀓𑀯𑀕𑁆𑀕𑀪𑀽𑀢𑀸𑀦𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺. 𑀏𑀯𑀁 𑀘𑀺𑀭𑀁 𑀅𑀓𑀸𑀲𑀻𑀢𑀺 𑀏𑀯𑀁 𑀘𑀺𑀭𑀓𑀸𑀮𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀓𑁂𑀦 𑀓𑀸𑀭𑀡𑁂𑀦 𑀯𑀸𑀲𑀫𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀫𑀚𑁆𑀛𑀺𑀫𑀯𑀬𑁂 𑀧𑀩𑁆𑀩𑀚𑀺𑀢𑁄, 𑀢𑁂𑀦 𑀪𑀕𑀯𑀸 𑀏𑀯𑀫𑀸𑀳. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑀸𑀫𑁂𑀲𑀼 𑀤𑀺𑀝𑁆𑀞𑀸𑀤𑀻𑀦𑀯𑀸 𑀘𑀺𑀭𑀸𑀬𑀺𑀢𑁆𑀯𑀸𑀧𑀺 𑀖𑀭𑀸𑀯𑀸𑀲𑁂𑀦 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸.

𑀆𑀤𑀻𑀦𑀯𑀁 𑀮𑁄𑀓𑁂𑀢𑀺 𑀲𑀗𑁆𑀔𑀸𑀭𑀮𑁄𑀓𑁂 𑀅𑀦𑀺𑀘𑁆𑀘𑀢𑀸𑀤𑀺𑀆𑀤𑀻𑀦𑀯𑀁. 𑀦𑀺𑀭𑀼𑀧𑀥𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. ‘‘𑀅𑀭𑀺𑀬𑁄 𑀦 𑀭𑀫𑀢𑀻 𑀧𑀸𑀧𑁂’’𑀢𑀺 𑀇𑀫𑀲𑁆𑀲 𑀳𑁂𑀢𑀼𑀫𑀸𑀳 ‘‘𑀧𑀸𑀧𑁂 𑀦 𑀭𑀫𑀢𑀻 𑀲𑀼𑀘𑀻’’𑀢𑀺. 𑀢𑀢𑁆𑀣 𑀲𑀼𑀘𑀻𑀢𑀺 𑀯𑀺𑀲𑀼𑀤𑁆𑀥𑀧𑀼𑀕𑁆𑀕𑀮𑁄.

𑁨𑁫𑁯. 𑀓𑀸𑀴𑀲𑀻𑀳𑁄𑀢𑀺 𑀓𑀸𑀴𑀫𑀼𑀔𑀯𑀸𑀦𑀭𑀚𑀸𑀢𑀺. 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀦𑀺𑀲𑀻𑀤𑀦𑀢𑁆𑀣𑀭𑀡𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀪𑀽𑀫𑀢𑁆𑀣𑀭𑀡𑀸𑀤𑀺𑀯𑀲𑁂𑀦 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑁂𑀯.

𑀕𑀺𑀳𑀺𑀯𑀺𑀓𑀢𑀸𑀦𑀼𑀜𑁆𑀜𑀸𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁬. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁄

𑀧𑀜𑁆𑀘𑀪𑁂𑀲𑀚𑁆𑀚𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁬𑁦. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 ¶ ¶ 𑀧𑀺𑀢𑁆𑀢𑀁 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀁 𑀳𑁄𑀢𑀻𑀢𑀺 𑀩𑀳𑀺𑀲𑀭𑀻𑀭𑁂 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀁 𑀅𑀩𑀤𑁆𑀥𑀧𑀺𑀢𑁆𑀢𑀁 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀁 𑀳𑁄𑀢𑀺, 𑀢𑁂𑀦 𑀧𑀺𑀢𑁆𑀢𑀁 𑀓𑀼𑀧𑀺𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁬𑁧-𑁨. 𑀧𑀸𑀴𑀺𑀬𑀁 𑀦𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀭𑀼𑀘𑀺𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀲𑀼𑀲𑀼𑀓𑀸𑀢𑀺 𑀲𑀫𑀼𑀤𑁆𑀤𑁂 𑀏𑀓𑀸 𑀫𑀘𑁆𑀙𑀚𑀸𑀢𑀺, 𑀓𑀼𑀫𑁆𑀪𑀺𑀮𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀁𑀲𑀝𑁆𑀞𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀺𑀢𑀁.

𑁨𑁬𑁩. 𑀧𑀺𑀝𑁆𑀞𑁂𑀳𑀻𑀢𑀺 𑀧𑀺𑀲𑀺𑀢𑁂𑀳𑀺. 𑀓𑀲𑀸𑀯𑁂𑀳𑀻𑀢𑀺 𑀢𑀘𑀸𑀤𑀻𑀦𑀺 𑀉𑀤𑀓𑁂 𑀢𑀸𑀧𑁂𑀢𑁆𑀯𑀸 𑀕𑀳𑀺𑀢𑀊𑀲𑀭𑁂𑀳𑀺. 𑀉𑀩𑁆𑀪𑀺𑀤𑀦𑁆𑀢𑀺 𑀊𑀲𑀭𑀧𑀁𑀲𑀼𑀫𑀬𑀁. 𑀮𑁄𑀡𑀩𑀺𑀮𑀦𑁆𑀢𑀺 𑀮𑁄𑀡𑀯𑀺𑀲𑁂𑀲𑁄.

𑁨𑁬𑁪-𑁫. 𑀙𑀓𑀡𑀦𑁆𑀢𑀺 𑀕𑁄𑀫𑀬𑀁. 𑀧𑀸𑀓𑀢𑀺𑀓𑀘𑀼𑀡𑁆𑀡𑀦𑁆𑀢𑀺 𑀅𑀧𑀓𑁆𑀓𑀓𑀲𑀸𑀯𑀘𑀼𑀡𑁆𑀡𑀁, 𑀕𑀦𑁆𑀥𑀘𑀼𑀡𑁆𑀡𑀁 𑀧𑀦 𑀦 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀁 𑀘𑀼𑀡𑁆𑀡𑀘𑀸𑀮𑀺𑀦𑀺𑀦𑁆𑀢𑀺 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑀺𑀢𑀘𑀼𑀡𑁆𑀡𑀧𑀭𑀺𑀲𑁆𑀲𑀸𑀯𑀦𑀺𑀁. 𑀲𑀼𑀯𑀡𑁆𑀡𑀕𑁂𑀭𑀼𑀓𑁄𑀢𑀺 𑀲𑀼𑀯𑀡𑁆𑀡𑀢𑀼𑀢𑁆𑀣𑀸𑀤𑀺. 𑀧𑀸𑀴𑀺𑀬𑀁 𑀅𑀜𑁆𑀚𑀦𑀽𑀧𑀧𑀺𑀲𑀦𑀦𑁆𑀢𑀺 𑀅𑀜𑁆𑀚𑀦𑁂 𑀉𑀧𑀦𑁂𑀢𑀼𑀁 𑀧𑀺𑀲𑀺𑀢𑀩𑁆𑀩𑀪𑁂𑀲𑀚𑁆𑀚𑀁.

𑁨𑁬𑁭-𑁯. 𑀓𑀩𑀴𑀺𑀓𑀸𑀢𑀺 𑀉𑀧𑀦𑀸𑀳𑀪𑁂𑀲𑀚𑁆𑀚𑀁. 𑀖𑀭𑀤𑀺𑀦𑁆𑀦𑀓𑀸𑀩𑀸𑀥𑁄 𑀦𑀸𑀫 𑀖𑀭𑀡𑀺𑀬𑀸 𑀤𑀺𑀦𑁆𑀦𑀯𑀲𑀻𑀓𑀭𑀡𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑀆𑀩𑀸𑀥𑁄. 𑀢𑀸𑀬 𑀙𑀸𑀭𑀺𑀓𑀸𑀬 𑀧𑀕𑁆𑀖𑀭𑀺𑀢𑀁 𑀔𑀸𑀭𑁄𑀤𑀓𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀦𑁂 𑀢𑀘𑁆𑀙𑀸𑀭𑀺𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑁂 𑀅𑀪𑀺𑀲𑀺𑀜𑁆𑀘𑀺𑀢𑁂 𑀢𑀢𑁄 𑀙𑀸𑀭𑀺𑀓𑀢𑁄 𑀳𑁂𑀝𑁆𑀞𑀸 𑀧𑀕𑁆𑀖𑀭𑀺𑀢𑀁 𑀔𑀸𑀭𑁄𑀤𑀓𑀁. 𑀧𑀸𑀴𑀺𑀬𑀁 𑀅𑀓𑀝𑀬𑀽𑀲𑁂𑀦𑀸𑀢𑀺 𑀅𑀦𑀪𑀺𑀲𑀗𑁆𑀔𑀢𑁂𑀦 𑀫𑀼𑀕𑁆𑀕𑀬𑀽𑀲𑁂𑀦. 𑀓𑀝𑀸𑀓𑀝𑁂𑀦𑀸𑀢𑀺 𑀫𑀼𑀕𑁆𑀕𑁂 𑀧𑀘𑀺𑀢𑁆𑀯𑀸 𑀅𑀘𑀸𑀮𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀫𑀼𑀕𑁆𑀕𑀬𑀽𑀲𑁂𑀦𑀸𑀢𑀺 𑀯𑀤𑀦𑁆𑀢𑀺.

𑀧𑀜𑁆𑀘𑀪𑁂𑀲𑀚𑁆𑀚𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁭𑁨-𑁪. 𑀕𑀼𑀴𑀓𑀭𑀡𑀦𑁆𑀢𑀺 ¶ ¶ 𑀉𑀘𑁆𑀙𑀼𑀲𑀸𑀮𑀁. 𑀅𑀯𑀺𑀲𑁆𑀲𑀢𑁆𑀣𑀸𑀢𑀺 𑀲𑀸𑀲𑀗𑁆𑀓𑀸.

𑁨𑁭𑁬. 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀯𑀸𑀭𑁂𑀦𑁆𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑁂 𑀤𑀺𑀦𑁆𑀦𑁂 𑀤𑀸𑀬𑀓𑀸𑀦𑀁 𑀧𑀻𑀴𑀸𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀧𑀝𑀺𑀲𑀗𑁆𑀔𑀸𑀧𑀻𑀢𑀺 𑀏𑀢𑁆𑀢𑀓𑁂𑀦𑀧𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸, ‘‘𑀅𑀯𑀲𑁂𑀲𑀁 𑀅𑀜𑁆𑀜𑁂𑀲𑀁 𑀳𑁄𑀢𑀽’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺.

𑁨𑁭𑁯. 𑀯𑀢𑁆𑀣𑀺𑀧𑀻𑀴𑀦𑀦𑁆𑀢𑀺 𑀬𑀣𑀸 𑀯𑀢𑁆𑀣𑀺𑀕𑀢𑀢𑁂𑀮𑀸𑀤𑀺 𑀅𑀦𑁆𑀢𑁄𑀲𑀭𑀻𑀭𑁂 𑀆𑀭𑁄𑀳𑀦𑁆𑀢𑀺, 𑀏𑀯𑀁 𑀳𑀢𑁆𑀣𑁂𑀦 𑀯𑀢𑁆𑀣𑀺𑀫𑀤𑁆𑀤𑀦𑀁. 𑀲𑀫𑁆𑀩𑀸𑀥𑁂 𑀲𑀢𑁆𑀣𑀓𑀫𑁆𑀫𑀯𑀢𑁆𑀣𑀺𑀓𑀫𑁆𑀫𑀸𑀦𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀤𑀳𑀦𑀓𑀫𑁆𑀫𑀁 𑀯𑀝𑁆𑀝𑀢𑀺 𑀏𑀯.

𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁮𑁨-𑁩. 𑀧𑀸𑀴𑀺𑀬𑀁 𑀤𑀲𑀲𑁆𑀲 𑀞𑀸𑀦𑀸𑀦𑀻𑀢𑀺 𑀅𑀲𑁆𑀲 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀤𑀲 𑀞𑀸𑀦𑀸𑀦𑀺 𑀓𑀸𑀭𑀡𑀸𑀦𑀺 𑀥𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀻𑀢𑀺 𑀤𑁂𑀢𑀺. 𑀯𑀸𑀢𑀜𑁆𑀘 𑀩𑁆𑀬𑀧𑀦𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀸𑀢𑀜𑁆𑀘 𑀅𑀦𑀼𑀮𑁄𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀕𑁆𑀕𑀸 𑀢𑁂 𑀆𑀭𑀤𑁆𑀥𑀸𑀢𑀺 𑀢𑀬𑀸 𑀤𑁂𑀯𑀮𑁄𑀓𑀸 𑀆𑀭𑀸𑀥𑀺𑀢𑀸.

𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀝𑀮𑀺𑀕𑀸𑀫𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁮𑁬. 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻𑀢𑀺 𑀧𑀸𑀝𑀮𑀺𑀕𑀸𑀫𑀲𑁆𑀲 𑀲𑀫𑀻𑀧𑁂 𑀢𑀲𑁆𑀲𑁂𑀯 𑀕𑀸𑀫𑀔𑁂𑀢𑁆𑀢𑀪𑀽𑀢𑁂 𑀫𑀳𑀦𑁆𑀢𑁂 𑀅𑀭𑀜𑁆𑀜𑀧𑁆𑀧𑀤𑁂𑀲𑁂 𑀧𑀸𑀝𑀮𑀺𑀧𑀼𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺. 𑀬𑀸𑀯𑀢𑀸 𑀅𑀭𑀺𑀬𑀁 𑀆𑀬𑀢𑀦𑀦𑁆𑀢𑀺 𑀬𑀢𑁆𑀢𑀓𑀁 𑀅𑀭𑀺𑀬𑀫𑀦𑀼𑀲𑁆𑀲𑀸𑀦𑀁 𑀑𑀲𑀭𑀡𑀝𑁆𑀞𑀸𑀦𑀁. 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄𑀢𑀺 𑀬𑀢𑁆𑀢𑀓𑀁 𑀯𑀸𑀡𑀺𑀚𑀸𑀦𑀁 𑀪𑀡𑁆𑀟𑀯𑀺𑀓𑁆𑀓𑀻𑀡𑀦𑀝𑁆𑀞𑀸𑀦𑀁, 𑀯𑀲𑀦𑀝𑁆𑀞𑀸𑀦𑀁 𑀯𑀸, 𑀇𑀤𑀁 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀝𑀪𑁂𑀤𑀦𑀦𑁆𑀢𑀺 𑀲𑀓𑀝𑀸𑀤𑀻𑀳𑀺 𑀦𑀸𑀦𑀸𑀤𑁂𑀲𑀢𑁄 𑀆𑀳𑀝𑀸𑀦𑀁 𑀪𑀡𑁆𑀟𑀧𑀼𑀝𑀸𑀦𑀁 𑀯𑀺𑀓𑁆𑀓𑀻𑀡𑀦𑀢𑁆𑀣𑀸𑀬 𑀫𑁄𑀘𑀦𑀝𑁆𑀞𑀸𑀦𑀁. 𑀲𑀭𑀦𑁆𑀢𑀺 𑀢𑀴𑀸𑀓𑀸𑀤𑀻𑀲𑀼𑀧𑀺 𑀯𑀢𑁆𑀢𑀢𑀺 ¶ , 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ¶ ‘‘𑀲𑀭𑀦𑁆𑀢𑀺 𑀇𑀥 𑀦𑀤𑀻 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀁 𑀲𑀭𑀢𑀺 𑀲𑀦𑁆𑀤𑀢𑀻𑀢𑀺 𑀓𑀢𑁆𑀯𑀸. 𑀯𑀺𑀦𑀸 𑀏𑀯 𑀓𑀼𑀮𑁆𑀮𑁂𑀦 𑀢𑀺𑀡𑁆𑀡𑀸𑀢𑀺 𑀇𑀤𑀁 𑀅𑀧𑁆𑀧𑀫𑀢𑁆𑀢𑀓𑀉𑀤𑀓𑀫𑁆𑀧𑀺 𑀅𑀨𑀼𑀲𑀺𑀢𑁆𑀯𑀸 𑀯𑀺𑀦𑀸 𑀓𑀼𑀮𑁆𑀮𑁂𑀦 𑀧𑀸𑀭𑀧𑁆𑀧𑀢𑁆𑀢𑀸.

𑀧𑀸𑀝𑀮𑀺𑀕𑀸𑀫𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀝𑀺𑀕𑀸𑀫𑁂𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁨𑁮𑁭. 𑀧𑀸𑀴𑀺𑀬𑀁 𑀲𑀦𑁆𑀥𑀸𑀯𑀺𑀢𑀦𑁆𑀢𑀺 𑀪𑀯𑀢𑁄 𑀪𑀯𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀲𑀦𑁆𑀥𑀸𑀯𑀦𑀁 𑀓𑀢𑀁. 𑀲𑀁𑀲𑀭𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸𑀢𑀺 𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘, 𑀲𑀸𑀫𑀺𑀯𑀲𑁂𑀦𑁂𑀯 𑀯𑀸 𑀫𑀫 𑀘 𑀢𑀼𑀫𑁆𑀳𑀸𑀓𑀜𑁆𑀘 𑀲𑀦𑁆𑀥𑀸𑀯𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀁𑀲𑀭𑀺𑀢𑀦𑁆𑀢𑀺 𑀲𑀁𑀲𑀭𑀺. 𑀪𑀯𑀢𑀡𑁆𑀳𑀸 𑀏𑀯 𑀪𑀯𑀢𑁄 𑀪𑀯𑀁 𑀦𑁂𑀢𑀻𑀢𑀺 𑀪𑀯𑀦𑁂𑀢𑁆𑀢𑀻𑀢𑀺 𑀯𑀼𑀢𑁆𑀢𑀸.

𑁨𑁮𑁯. ‘‘𑀦𑀻𑀮𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀦𑀻𑀮𑀯𑀡𑁆𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀢𑀺 𑀦𑀻𑀮𑀯𑀺𑀮𑁂𑀧𑀦𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀝𑀺𑀯𑀝𑁆𑀝𑁂𑀲𑀻𑀢𑀺 𑀧𑀳𑀭𑀺. 𑀅𑀫𑁆𑀩𑀓𑀸𑀬𑀸𑀢𑀺 𑀅𑀫𑁆𑀩𑀸𑀬. 𑀉𑀧𑀘𑀸𑀭𑀯𑀘𑀦𑀜𑁆𑀳𑁂𑀢𑀁, 𑀫𑀸𑀢𑀼𑀕𑀸𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀁𑀳𑀭𑀣𑀸𑀢𑀺 𑀉𑀧𑀦𑁂𑀣, ‘‘𑀈𑀤𑀺𑀲𑀸 𑀢𑀸𑀯𑀢𑀺𑀁𑀲𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀪𑀺𑀓𑁆𑀔𑀽𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀢𑁆𑀣𑀁. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀳𑀺 𑀲𑀩𑁆𑀩𑁂 𑀦 𑀘𑀺𑀭𑀲𑁆𑀲𑁂𑀯 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺.

𑀓𑁄𑀝𑀺𑀕𑀸𑀫𑁂𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀻𑀳𑀲𑁂𑀦𑀸𑀧𑀢𑀺𑀯𑀢𑁆𑀣𑀼𑀆𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀲𑀦𑁆𑀥𑀸𑀕𑀸𑀭𑁂𑀢𑀺 𑀭𑀸𑀚𑀓𑀺𑀘𑁆𑀘𑀲𑁆𑀲 𑀲𑀦𑁆𑀥𑀸𑀭𑀡𑀢𑁆𑀣𑀸𑀬 𑀦𑀺𑀘𑁆𑀙𑀺𑀤𑁆𑀤𑀁 𑀓𑀢𑁆𑀯𑀸 𑀯𑀺𑀘𑀸𑀭𑀡𑀢𑁆𑀣𑀸𑀬 𑀓𑀢𑀫𑀳𑀸𑀲𑀪𑀸𑀬. 𑀕𑀫𑀺𑀓𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀕𑀫𑀦𑁂 𑀯𑀸𑀬𑀸𑀫𑁄. 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀦𑁆𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀲𑁆𑀲 𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡𑀁, 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀼𑀭𑀽𑀧𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 ¶ 𑀇𑀢𑁄 𑀧𑀭𑀁 𑀢𑀲𑁆𑀲 𑀅𑀦𑀼𑀯𑀸𑀤𑁄 𑀯𑀸. 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀦 𑀆𑀕𑀘𑁆𑀙𑀢𑀻𑀢𑀺 𑀓𑀺𑀁 𑀢𑀯 𑀯𑀸𑀤𑁂 𑀕𑀸𑀭𑀬𑁆𑀳𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁩. 𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀅𑀦𑀼𑀯𑀺𑀤𑀺𑀢𑀸𑀓𑀸𑀭𑀁. 𑀭𑀢𑀦𑀢𑁆𑀢𑀬𑀲𑁆𑀲 𑀲𑀭𑀡𑀕𑀫𑀦𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀲𑀳𑀲𑀸 ¶ 𑀓𑀢𑁆𑀯𑀸 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼𑀦𑁆𑀢𑀺 𑀥𑀚𑀧𑀝𑀸𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀈𑀤𑀺𑀲𑁄 𑀅𑀫𑁆𑀳𑀸𑀓𑀁 𑀲𑀭𑀡𑀁 𑀕𑀢𑁄 𑀲𑀸𑀯𑀓𑁄 𑀚𑀸𑀢𑁄’’𑀢𑀺 𑀦𑀕𑀭𑁂 𑀖𑁄𑀲𑁂𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺.

𑁨𑁯𑁪. 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑀸𑀢𑀺 𑀫𑀁𑀲𑀔𑀸𑀤𑀦𑀦𑀺𑀫𑀺𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲.

𑀲𑀻𑀳𑀲𑁂𑀦𑀸𑀧𑀢𑀺𑀯𑀢𑁆𑀣𑀼𑀆𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀅𑀦𑀼𑀧𑁆𑀧𑀕𑁂 𑀏𑀯𑀸𑀢𑀺 𑀧𑀸𑀢𑁄𑀯. 𑀑𑀭𑀯𑀲𑀤𑁆𑀤𑀦𑁆𑀢𑀺 𑀫𑀳𑀸𑀲𑀤𑁆𑀤𑀁. 𑀢𑀁 𑀧𑀦 𑀅𑀯𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀢𑀣𑀸𑀯𑀘𑀦𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀺. 𑀅𑀝𑁆𑀞𑀓𑀣𑀸𑀲𑀽𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀯𑀺𑀭𑀳𑀺𑀢𑀸𑀲𑀼 𑀲𑁂𑀲𑀝𑁆𑀞𑀓𑀣𑀸𑀲𑀼. 𑀲𑀸𑀥𑀸𑀭𑀡𑀮𑀓𑁆𑀔𑀡𑀦𑁆𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬 𑀲𑀳 𑀲𑀩𑁆𑀩𑀝𑁆𑀞𑀓𑀣𑀸𑀦𑀁 𑀲𑀫𑀸𑀦𑀁.

𑀘𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀉𑀘𑁆𑀘𑀯𑀢𑁆𑀣𑀼𑀁. 𑀬𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀢𑁄 𑀇𑀝𑁆𑀞𑀓𑀸𑀤𑀺𑀢𑁄 𑀧𑀝𑁆𑀞𑀸𑀬, 𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑀼𑀓𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀣𑀫𑁆𑀪𑀸 𑀧𑀦 𑀉𑀧𑀭𑀺 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀏𑀢𑁂𑀦 𑀇𑀝𑁆𑀞𑀓𑀧𑀸𑀲𑀸𑀡𑀸 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀸𑀧𑀺𑀢𑀸𑀧𑀺 𑀬𑀤𑀺 𑀘𑀬𑀢𑁄, 𑀪𑀽𑀫𑀺𑀢𑁄 𑀯𑀸 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀉𑀕𑁆𑀕𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀯𑀝𑁆𑀝𑀦𑁆𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀆𑀭𑀸𑀫𑁄𑀢𑀺 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀯𑀺𑀳𑀸𑀭𑁄. 𑀲𑁂𑀦𑀸𑀲𑀦𑀸𑀦𑀻𑀢𑀺 𑀯𑀺𑀳𑀸𑀭𑀲𑁆𑀲 𑀅𑀦𑁆𑀢𑁄 𑀢𑀺𑀡𑀓𑀼𑀝𑀺𑀆𑀤𑀺𑀓𑀸𑀦𑀺 𑀲𑀗𑁆𑀖𑀲𑁆𑀲 𑀦𑀺𑀯𑀸𑀲𑀕𑁂𑀳𑀸𑀦𑀺. 𑀯𑀺𑀳𑀸𑀭𑀕𑁄𑀦𑀺𑀲𑀸𑀤𑀺𑀓𑀸 𑀦𑀸𑀫𑀸𑀢𑀺 𑀲𑁂𑀦𑀸𑀲𑀦𑀕𑁄𑀦𑀺𑀲𑀸𑀤𑀺𑀓𑀸. 𑀲𑁂𑀦𑀸𑀲𑀦𑀸𑀦𑀺 𑀳𑀺 𑀲𑀬𑀁 𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺𑀧𑀺 𑀆𑀭𑀸𑀫𑀧𑀭𑀺𑀓𑁆𑀔𑁂𑀧𑀸𑀪𑀸𑀯𑁂𑀦 ‘‘𑀕𑁄𑀦𑀺𑀲𑀸𑀤𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. ‘‘𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀻’’𑀢𑀺 𑀇𑀫𑀺𑀦𑀸 𑀢𑀢𑁄 𑀊𑀦𑀧𑀭𑀺𑀓𑁆𑀔𑀺𑀢𑁆𑀢𑁄 𑀬𑁂𑀪𑀼𑀬𑁆𑀬𑁂𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀦𑀸𑀫, 𑀢𑀲𑁆𑀫𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀉𑀧𑀟𑁆𑀠𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑁂. 𑀓𑀧𑁆𑀧𑀺𑀬𑀓𑀼𑀝𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀦𑀺𑀲𑀸𑀤𑀺𑀬𑀸 ¶ 𑀅𑀪𑀸𑀯𑁂𑀦 𑀲𑁂𑀲𑀓𑀧𑁆𑀧𑀺𑀬𑀓𑀼𑀝𑀻𑀲𑀼 𑀢𑀻𑀲𑀼 𑀬𑀸 𑀓𑀸𑀘𑀺 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑁂𑀲𑀁 𑀕𑁂𑀳𑀸𑀦𑀻𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀦𑀁 𑀯𑀸𑀲𑀢𑁆𑀣𑀸𑀬 𑀓𑀢𑀫𑁆𑀧𑀺 𑀬𑀸𑀯 𑀦 𑀤𑁂𑀦𑁆𑀢𑀺, 𑀢𑀸𑀯 𑀢𑁂𑀲𑀁 𑀲𑀦𑁆𑀢𑀓𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀳𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀯𑀸𑀲𑀢𑁆𑀣𑀸𑀬 𑀓𑀢𑀕𑁂𑀳𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑁂𑀳𑀦𑁆𑀢𑀺 𑀦𑀺𑀯𑀸𑀲𑀕𑁂𑀳𑀁, 𑀢𑀤𑀜𑁆𑀜𑀁 𑀧𑀦 𑀉𑀧𑁄𑀲𑀣𑀸𑀕𑀸𑀭𑀸𑀤𑀺 𑀲𑀩𑁆𑀩𑀁 𑀅𑀦𑀺𑀯𑀸𑀲𑀕𑁂𑀳𑀁 𑀘𑀢𑀼𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀫𑀼𑀢𑁆𑀢𑀸 𑀧𑀜𑁆𑀘𑀫𑀻 𑀓𑀧𑁆𑀧𑀺𑀬𑀪𑀽𑀫𑀺. 𑀲𑀗𑁆𑀖𑀲𑀦𑁆𑀢𑀓𑁂𑀧𑀺 𑀳𑀺 𑀏𑀢𑀸𑀤𑀺𑀲𑁂 𑀕𑁂𑀳𑁂 𑀲𑀼𑀝𑁆𑀞𑀼 𑀧𑀭𑀺𑀓𑁆𑀔𑀺𑀢𑁆𑀢𑀸𑀭𑀸𑀫𑀢𑁆𑀢𑁂𑀧𑀺 ¶ 𑀅𑀩𑁆𑀪𑁄𑀓𑀸𑀲𑁂 𑀯𑀺𑀬 𑀅𑀦𑁆𑀢𑁄𑀯𑀼𑀢𑁆𑀣𑀸𑀤𑀺𑀤𑁄𑀲𑁄 𑀦𑀢𑁆𑀣𑀺. 𑀬𑁂𑀦 𑀓𑁂𑀦𑀘𑀺 𑀙𑀦𑁆𑀦𑁂, 𑀧𑀭𑀺𑀘𑁆𑀙𑀦𑁆𑀦𑁂 𑀘 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀯𑀸𑀲𑀕𑁂𑀳𑁂 𑀅𑀦𑁆𑀢𑁄𑀯𑀼𑀢𑁆𑀣𑀸𑀤𑀺𑀤𑁄𑀲𑁄, 𑀦 𑀅𑀜𑁆𑀜𑀢𑁆𑀣. 𑀢𑁂𑀦𑀸𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸’’𑀢𑀺 𑀇𑀤𑀁 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀁, 𑀢𑀸𑀲𑀁 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀜𑁆𑀘 𑀪𑀺𑀓𑁆𑀔𑀽𑀦𑀁 𑀕𑀺𑀳𑀺𑀲𑀦𑁆𑀢𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀼𑀔𑀲𑀦𑁆𑀦𑀺𑀥𑀻𑀢𑀺 𑀅𑀦𑁆𑀢𑁄𑀲𑀦𑁆𑀦𑀺𑀳𑀺𑀢𑀤𑁄𑀲𑁄 𑀳𑀺 𑀫𑀼𑀔𑀧𑁆𑀧𑀯𑁂𑀲𑀦𑀦𑀺𑀫𑀺𑀢𑁆𑀢𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀦𑀸𑀜𑁆𑀜𑀣𑀸. 𑀢𑀲𑁆𑀫𑀸 ‘‘𑀫𑀼𑀔𑀲𑀦𑁆𑀦𑀺𑀥𑀻’’𑀢𑀺 𑀯𑀼𑀢𑁆𑀢𑁄.

𑀢𑀢𑁆𑀣 𑀢𑀢𑁆𑀣 𑀔𑀡𑁆𑀟𑀸 𑀳𑁄𑀦𑁆𑀢𑀻𑀢𑀺 𑀉𑀧𑀟𑁆𑀠𑀢𑁄 𑀅𑀥𑀺𑀓𑀁 𑀔𑀡𑁆𑀟𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀲𑁆𑀫𑀺𑀁 𑀙𑀤𑀦𑁂 𑀯𑀺𑀦𑀝𑁆𑀞𑁂𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀯𑀲𑁆𑀲𑀧𑀭𑀺𑀢𑁆𑀢𑀸𑀬𑀓𑁂 𑀙𑀤𑀦𑁂 𑀯𑀺𑀦𑀝𑁆𑀞𑁂. 𑀕𑁄𑀧𑀸𑀦𑀲𑀻𑀦𑀁 𑀧𑀦 𑀉𑀧𑀭𑀺 𑀯𑀮𑁆𑀮𑀻𑀳𑀺 𑀩𑀤𑁆𑀥𑀤𑀡𑁆𑀟𑁂𑀲𑀼 𑀞𑀺𑀢𑁂𑀲𑀼𑀧𑀺 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀺 𑀏𑀯. 𑀧𑀓𑁆𑀔𑀧𑀸𑀲𑀓𑀫𑀡𑁆𑀟𑀮𑀦𑁆𑀢𑀺 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀢𑀺𑀡𑁆𑀡𑀁 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀞𑀺𑀢𑀢𑀺𑀡𑀧𑀡𑁆𑀡𑀸𑀤𑀺𑀘𑁆𑀙𑀤𑀦𑀁 𑀯𑀼𑀘𑁆𑀘𑀢𑀺.

𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀢𑀩𑁆𑀩𑁄 𑀅𑀲𑁆𑀲𑀸𑀢𑀺𑀆𑀤𑀺𑀦𑀸 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑀫𑁆𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀲𑀸𑀧𑁂𑀓𑁆𑀔𑀤𑀸𑀦𑀜𑁆𑀘𑁂𑀢𑁆𑀣 𑀯𑀝𑁆𑀝𑀢𑀺, 𑀧𑀝𑀺𑀕𑁆𑀕𑀳𑀡𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁯𑁯. 𑀧𑀸𑀴𑀺𑀬𑀁 𑀓𑀦𑁆𑀢𑀸𑀭𑁂 𑀲𑀫𑁆𑀪𑀸𑀯𑁂𑀲𑀻𑀢𑀺 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑁂 𑀲𑀫𑁆𑀧𑀸𑀧𑀼𑀡𑀺.

𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀚𑀝𑀺𑀮𑁄𑀢𑀺 ¶ 𑀆𑀳𑀭𑀺𑀫𑀚𑀝𑀸𑀥𑀭𑁄 𑀢𑀸𑀧𑀲𑀯𑁂𑀲𑀥𑀸𑀭𑀓𑁄 𑀬𑀜𑁆𑀜𑀬𑀼𑀢𑁆𑀢𑁄 𑀮𑁄𑀓𑀧𑀽𑀚𑀺𑀢𑁄 𑀩𑁆𑀭𑀸𑀳𑁆𑀫𑀡𑁄. 𑀧𑀯𑀢𑁆𑀢𑀸𑀭𑁄 𑀧𑀸𑀯𑀘𑀦𑀯𑀲𑁂𑀦 𑀯𑀢𑁆𑀢𑀸𑀭𑁄. 𑀬𑁂𑀲𑀁 𑀲𑀦𑁆𑀢𑀓𑀫𑀺𑀤𑀁, 𑀬𑁂𑀳𑀺 𑀯𑀸 𑀇𑀤𑀁 𑀕𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀕𑀸𑀬𑀦𑁆𑀢𑀻𑀢𑀺 𑀢𑀁 𑀢𑁂𑀳𑀺 𑀧𑀼𑀩𑁆𑀩𑁂 𑀕𑀻𑀢𑀁 𑀅𑀦𑀼𑀕𑀸𑀬𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼 𑀘.

𑀬𑀸𑀯𑀓𑀸𑀮𑀺𑀓𑀧𑀓𑁆𑀓𑀸𑀦𑀦𑁆𑀢𑀺 𑀧𑀓𑁆𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀆𑀫𑀸𑀦𑀺 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀻𑀢𑀼𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀤𑀺𑀦𑁆𑀦𑀧𑀸𑀦𑀁 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀓𑀧𑁆𑀧𑀢𑀺 𑀏𑀯. 𑀅𑀬𑀜𑁆𑀘 𑀅𑀢𑁆𑀣𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀲𑀭𑀽𑀧𑀢𑁄 ¶ 𑀅𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀓𑀼𑀭𑀼𑀦𑁆𑀤𑀺𑀬𑀁 𑀧𑀦𑀸’’𑀢𑀺𑀆𑀤𑀺. ‘‘𑀉𑀘𑁆𑀙𑀼𑀭𑀲𑁄 𑀦𑀺𑀓𑀲𑀝𑁄’’𑀢𑀺 𑀇𑀤𑀁 𑀧𑀸𑀢𑀩𑁆𑀩𑀲𑀸𑀫𑀜𑁆𑀜𑁂𑀦 𑀬𑀸𑀫𑀓𑀸𑀮𑀺𑀓𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀫𑁂 𑀘𑀢𑁆𑀢𑀸𑀭𑁄 𑀭𑀲𑀸𑀢𑀺 𑀨𑀮𑀧𑀢𑁆𑀢𑀧𑀼𑀧𑁆𑀨𑀉𑀘𑁆𑀙𑀼𑀭𑀲𑀸 𑀘𑀢𑁆𑀢𑀸𑀭𑁄.

𑀧𑀸𑀴𑀺𑀬𑀁 𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸𑀢𑀺 𑀅𑀕𑁆𑀕𑀺𑀚𑀼𑀳𑀦𑀧𑀼𑀩𑁆𑀩𑀓𑀸. 𑀙𑀦𑁆𑀤𑀲𑁄𑀢𑀺 𑀯𑁂𑀤𑀲𑁆𑀲. 𑀲𑀸𑀯𑀺𑀢𑁆𑀢𑀻 𑀫𑀼𑀔𑀁 𑀧𑀞𑀫𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀧𑀢𑀦𑁆𑀢𑀺 𑀯𑀺𑀚𑁄𑀢𑀦𑁆𑀢𑀸𑀦𑀁.

𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑁄𑀚𑀫𑀮𑁆𑀮𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁦𑁧. 𑀩𑀳𑀼𑀓𑀢𑁄 𑀩𑀼𑀤𑁆𑀥𑁂 𑀯𑀸𑀢𑀺 𑀩𑀼𑀤𑁆𑀥𑁂 𑀓𑀢𑀩𑀳𑀼𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀜𑀸𑀢𑀻𑀦𑀁 𑀤𑀡𑁆𑀟𑀪𑀬𑀢𑀚𑁆𑀚𑀺𑀢𑁄 𑀅𑀳𑁄𑀲𑀺𑀦𑁆𑀢𑀺 𑀲𑁂𑀲𑁄. 𑀏𑀯𑀜𑁆𑀳𑀺 𑀲𑀢𑀺 ‘‘𑀏𑀯𑀸𑀳’’𑀦𑁆𑀢𑀺 𑀧𑀼𑀦 𑀅𑀳𑀁-𑀕𑀳𑀡𑀁 𑀬𑀼𑀚𑁆𑀚𑀢𑀺. 𑀯𑀺𑀯𑀭𑀻𑀢𑀺 ‘‘𑀯𑀺𑀯𑀭𑀢𑀽’’𑀢𑀺 𑀘𑀺𑀦𑁆𑀢𑀸𑀫𑀢𑁆𑀢𑁂𑀦 𑀯𑀺𑀯𑀭𑀺, 𑀦 𑀉𑀝𑁆𑀞𑀸𑀬 𑀳𑀢𑁆𑀣𑁂𑀦.

𑁩𑁦𑁩. 𑀅𑀜𑁆𑀜𑀢𑀭𑁄𑀢𑀺 𑀲𑀼𑀪𑀤𑁆𑀤𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄. 𑀤𑁆𑀯𑁂 𑀤𑀸𑀭𑀓𑀸𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀸 𑀤𑁆𑀯𑁂 𑀧𑀼𑀢𑁆𑀢𑀸. 𑀦𑀸𑀴𑀺𑀬𑀸𑀯𑀸𑀧𑀓𑁂𑀦𑀸𑀢𑀺 𑀦𑀸𑀴𑀺𑀬𑀸 𑀘𑁂𑀯 𑀣𑀯𑀺𑀓𑀸𑀬 𑀘. 𑀲𑀁𑀳𑀭𑀣 𑀇𑀫𑁂𑀳𑀺 𑀪𑀸𑀚𑀦𑁂𑀳𑀺 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀗𑁆𑀓𑀟𑁆𑀠𑀣𑀸𑀢𑀺 𑀅𑀢𑁆𑀣𑁄. 𑀪𑀼𑀲𑀸𑀕𑀸𑀭𑁂𑀢𑀺 𑀧𑀮𑀸𑀮𑀫𑀬𑁂 𑀅𑀕𑀸𑀭𑁂, 𑀧𑀮𑀸𑀮𑀧𑀼𑀜𑁆𑀚𑀁 𑀅𑀩𑁆𑀪𑀦𑁆𑀢𑀭𑀢𑁄 𑀧𑀮𑀸𑀮𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀅𑀕𑀸𑀭𑀁 𑀓𑀢𑀁 𑀳𑁄𑀢𑀺, 𑀢𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀭𑁄𑀚𑀫𑀮𑁆𑀮𑀸𑀤𑀺𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸𑀯𑀡𑁆𑀡𑀦𑀸

𑁩𑁦𑁫. 𑀧𑀭𑀺𑀫𑀤𑁆𑀤𑀦𑁆𑀢𑀸𑀢𑀺 ¶ 𑀉𑀧𑀧𑀭𑀺𑀓𑁆𑀔𑀦𑁆𑀢𑀸. 𑀤𑁆𑀯𑁂 𑀧𑀝𑀸 𑀤𑁂𑀲𑀦𑀸𑀫𑁂𑀦𑁂𑀯 𑀯𑀼𑀢𑁆𑀢𑀸𑀢𑀺 𑀢𑁂𑀲𑀁 𑀲𑀭𑀽𑀧𑀤𑀲𑁆𑀲𑀦𑀧𑀤𑀫𑁂𑀢𑀁. 𑀦𑀸𑀜𑁆𑀜𑀦𑀺𑀯𑀢𑁆𑀢𑀦𑀧𑀤𑀁 𑀧𑀢𑁆𑀢𑀼𑀡𑁆𑀡𑀧𑀝𑀲𑁆𑀲𑀸𑀧𑀺 𑀤𑁂𑀲𑀦𑀸𑀫𑁂𑀦 𑀯𑀼𑀢𑁆𑀢𑀢𑁆𑀢𑀸.

𑀢𑀼𑀫𑁆𑀩𑀸𑀢𑀺 𑀪𑀸𑀚𑀦𑀸𑀦𑀺. 𑀨𑀮𑀢𑀼𑀫𑁆𑀩𑁄 𑀦𑀸𑀫 𑀮𑀸𑀩𑀼𑀆𑀤𑀺. 𑀉𑀤𑀓𑀢𑀼𑀫𑁆𑀩𑁄 𑀉𑀤𑀓𑀖𑀝𑁄. 𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀦𑁆𑀢𑀺 𑀯𑁂𑀴𑀼𑀯𑀺𑀮𑀻𑀯𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀙𑀢𑁆𑀢𑀁. 𑀲𑀫𑁆𑀪𑀺𑀦𑁆𑀦𑀭𑀲𑀦𑁆𑀢𑀺 𑀫𑀺𑀲𑁆𑀲𑀻𑀪𑀽𑀢𑀭𑀲𑀁.

𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁭. 𑀓𑀣𑀺𑀦𑀓𑁆𑀔𑀦𑁆𑀥𑀓𑁄

𑀓𑀣𑀺𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁬. 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 ¶ ¶ 𑀲𑀻𑀲𑀯𑀲𑁂𑀦𑀸𑀢𑀺 𑀧𑀥𑀸𑀦𑀯𑀲𑁂𑀦. 𑀓𑀣𑀺𑀦𑀦𑁆𑀢𑀺 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀬𑀼𑀚𑁆𑀚𑀢𑀻𑀢𑀺 ‘‘𑀲𑁄 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀦𑁂𑀲’’𑀦𑁆𑀢𑀺 𑀯𑀘𑀦𑀁 𑀬𑀼𑀚𑁆𑀚𑀢𑀺. 𑀬𑁂 𑀅𑀢𑁆𑀣𑀢𑀓𑀣𑀺𑀦𑀸𑀢𑀺 𑀦 𑀓𑁂𑀯𑀮𑀁 𑀢𑀼𑀫𑁆𑀳𑀸𑀓𑀫𑁂𑀯, 𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀢𑀓𑀣𑀺𑀦𑀸, 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑁄𑀢𑀺 𑀢𑀤𑀸 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀫𑀼𑀔𑀻𑀪𑀽𑀢𑁂 𑀘 𑀅𑀦𑀸𑀕𑀢𑁂 𑀘 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀼𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀦𑁂𑀲𑀦𑁆𑀢𑀺 𑀏𑀢𑁆𑀣 𑀲𑁄 𑀢𑁂𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀇𑀫𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺. 𑀫𑀢𑀓𑀘𑀻𑀯𑀭𑀦𑁆𑀢𑀺 𑀫𑀢𑀲𑁆𑀲 𑀘𑀻𑀯𑀭𑀁. ‘‘𑀯𑀼𑀢𑁆𑀣𑀯𑀲𑁆𑀲𑀯𑀲𑁂𑀦𑀸’’𑀢𑀺 𑀇𑀤𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀮𑀪𑀦𑁆𑀢𑀻’’𑀢𑀺. 𑀉𑀧𑀕𑀢𑀸 𑀯𑀸 𑀦 𑀮𑀪𑀦𑁆𑀢𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀼𑀢𑁆𑀣𑀯𑀲𑁆𑀲𑁂𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀔𑀮𑀺𑀫𑀓𑁆𑀔𑀺𑀢𑀲𑀸𑀝𑀓𑁄𑀢𑀺 𑀅𑀳𑀢𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀸𑀤𑀭𑀺𑀬𑁂 𑀲𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀺.

‘‘𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺 𑀇𑀤𑀁 𑀅𑀜𑁆𑀜𑁂𑀲𑀁 𑀯𑀲𑁆𑀲𑀁𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀁 𑀅𑀤𑀢𑁆𑀯𑀸 𑀤𑀸𑀢𑀼𑀓𑀸𑀫𑁂𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀁. 𑀬𑀤𑀺 𑀏𑀯𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀤𑀸𑀦𑀁 𑀅𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀯𑀸𑀘𑀸 𑀧𑀦𑀸’’𑀢𑀺𑀆𑀤𑀺. 𑀓𑀣𑀺𑀦𑀘𑀻𑀯𑀭𑀁 𑀯𑀺𑀬 𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀧𑀮𑁄𑀓𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁦𑁮. 𑀫𑀳𑀸𑀪𑀽𑀫𑀺𑀓𑀦𑁆𑀢𑀺 𑀫𑀳𑀸𑀯𑀺𑀲𑀬𑀁, 𑀘𑀢𑀼𑀯𑀻𑀲𑀢𑀺𑀆𑀓𑀸𑀭𑀯𑀦𑁆𑀢𑀢𑀸𑀬 𑀫𑀳𑀸𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀘𑀓𑀦𑁆𑀢𑀺 𑀧𑀜𑁆𑀘𑀔𑀡𑁆𑀟𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀞𑀫𑀘𑀺𑀫𑀺𑀮𑀺𑀓𑀸𑀢𑀺 𑀓𑀣𑀺𑀦𑀯𑀢𑁆𑀣𑀢𑁄 𑀅𑀜𑁆𑀜𑀸 ¶ 𑀅𑀢𑁆𑀢𑀦𑁄 𑀧𑀓𑀢𑀺𑀘𑀺𑀫𑀺𑀮𑀺𑀓𑀸. 𑀓𑀼𑀘𑁆𑀙𑀺𑀘𑀺𑀫𑀺𑀮𑀺𑀓𑀁 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀫𑀢𑁆𑀢𑁂𑀦𑀸𑀢𑀺 𑀣𑀺𑀭𑀚𑀺𑀡𑁆𑀡𑀸𑀦𑀁 𑀘𑀺𑀫𑀺𑀮𑀺𑀓𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀺𑀩𑁆𑀩𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑀦𑀁, 𑀩𑁆𑀬𑀜𑁆𑀚𑀦𑀢𑁄 𑀏𑀯 𑀪𑁂𑀤𑁄, 𑀦 𑀅𑀢𑁆𑀣𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀺𑀝𑁆𑀞𑀺𑀅𑀦𑀼𑀯𑀸𑀢𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀤𑀻𑀖𑀢𑁄 𑀅𑀦𑀼𑀯𑀸𑀢𑀲𑁆𑀲 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀓𑀼𑀘𑁆𑀙𑀺𑀅𑀦𑀼𑀯𑀸𑀢𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀧𑀼𑀣𑀼𑀮𑀢𑁄 𑀅𑀦𑀼𑀯𑀸𑀢𑀲𑁆𑀲 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀭𑀢𑁆𑀢𑀺𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀭𑀢𑁆𑀢𑀺𑀅𑀢𑀺𑀓𑁆𑀓𑀦𑁆𑀢𑁂𑀦.

𑁩𑁦𑁯. 𑀳𑀢𑀯𑀢𑁆𑀣𑀓𑀲𑀸𑀝𑀓𑁂𑀦𑀸𑀢𑀺 ¶ 𑀅𑀢𑀺𑀚𑀺𑀡𑁆𑀡𑀲𑀸𑀝𑀓𑁄. 𑀦 𑀳𑀺 𑀢𑁂𑀦𑀸𑀢𑀺𑀆𑀤𑀻𑀲𑀼 𑀢𑁂𑀦 𑀧𑀭𑀺𑀯𑀸𑀭𑀸𑀕𑀢𑀧𑀸𑀞𑁂𑀦 𑀇𑀥 𑀆𑀦𑁂𑀢𑁆𑀯𑀸 𑀅𑀯𑀼𑀘𑁆𑀘𑀫𑀸𑀦𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀚𑀸𑀦𑀺𑀢𑀩𑁆𑀩𑁂𑀲𑀼 𑀦 𑀓𑀺𑀜𑁆𑀘𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀥𑁂𑀯 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁦. 𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸, 𑀇𑀯𑀢𑁆𑀣𑁂 𑀓-𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑀺𑀤𑁆𑀥𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀢𑀺𑀓𑀸𑀢𑀺 𑀫𑀸𑀢𑀭𑁄’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀏𑀢𑀺𑀲𑁆𑀲𑀸 𑀫𑀸𑀢𑀺𑀓𑀸𑀬. 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀏𑀯 𑀳𑀺 𑀲𑀬𑀁 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑀪𑁂𑀤𑀽𑀧𑀘𑀸𑀭𑁂𑀦 ‘‘𑀫𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁄 𑀉𑀩𑁆𑀪𑀸𑀭𑀲𑁆𑀲𑁂𑀯 𑀧𑀓𑁆𑀓𑀫𑀦𑀦𑁆𑀢𑁂 𑀲𑀫𑀼𑀧𑁆𑀧𑀢𑁆𑀢𑀺𑀢𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀸𑀬 𑀘 𑀫𑀸𑀢𑀺𑀓𑀸𑀬 𑀅𑀪𑀸𑀯𑀸, 𑀢𑀧𑁆𑀧𑀓𑀸𑀲𑀺𑀓𑀸𑀧𑀺 𑀘𑁂𑀢𑁆𑀣 𑀧𑀸𑀴𑀺 ‘‘𑀫𑀸𑀢𑀺𑀓𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀲𑀸𑀧𑀺 𑀳𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀼𑀩𑁆𑀪𑀸𑀭𑀧𑁆𑀧𑀓𑀸𑀲𑀦𑁂𑀦 ‘‘𑀧𑀓𑁆𑀓𑀫𑀦𑀦𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑀼𑀩𑁆𑀪𑀸𑀭𑁂𑀲𑀼𑀧𑀺. 𑀧𑀓𑁆𑀓𑀫𑀦𑀦𑁆𑀢𑀺 𑀘𑁂𑀢𑁆𑀣 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑀦𑀁 𑀤𑀝𑁆𑀞𑀩𑁆𑀩𑀁.

𑀓𑀣𑀺𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀤𑀸𑀬𑀲𑀢𑁆𑀢𑀓𑀓𑀣𑀸𑀯𑀡𑁆𑀡𑀦𑀸

𑁩𑁧𑁧. ‘‘𑀦 𑀧𑀼𑀦 𑀆𑀕𑀫𑀺𑀲𑁆𑀲’’𑀦𑁆𑀢𑀺 𑀇𑀤𑀁 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀓𑀸𑀭𑀡𑀤𑀲𑁆𑀲𑀦𑀁. 𑀧𑀜𑁆𑀘𑀲𑀼 𑀳𑀺 𑀘𑀻𑀯𑀭𑀫𑀸𑀲𑁂𑀲𑀼 𑀬𑀤𑀸 𑀓𑀤𑀸𑀘𑀺 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀘𑀺𑀢𑁆𑀢𑁂𑀦 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀦 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺. 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀩𑀳𑀺𑀉𑀧𑀘𑀸𑀭𑀕𑀢𑀲𑁆𑀲 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀙𑀺𑀚𑁆𑀚𑀢𑀺. 𑀧𑀞𑀫𑀁 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀻𑀢𑀺 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀧𑀓𑁆𑀓𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀘𑀻𑀯𑀭𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀓𑀢𑀘𑀻𑀯𑀭𑀫𑀸𑀤𑀸𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀬𑀸𑀯 ‘‘𑀲𑀗𑁆𑀖𑀢𑁄 𑀯𑀸 𑀤𑀸𑀬𑀓𑀓𑀼𑀮𑀸𑀤𑀺𑀢𑁄 𑀯𑀸 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀻𑀯𑀭𑀸𑀲𑀸 𑀯𑀸 𑀮𑀤𑁆𑀥𑀯𑀢𑁆𑀣𑀸𑀦𑀁 𑀲𑀳𑀸𑀬𑀲𑀫𑁆𑀧𑀤𑀸𑀤𑀺𑀬𑁄𑀕𑀁 𑀮𑀪𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀆𑀤𑀺𑀪𑀸𑀯𑁂𑀦 ‘‘𑀙𑀺𑀦𑁆𑀤𑀺𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀭𑀡𑀺𑀘𑁆𑀙𑀸 𑀯𑀸 𑀧𑀯𑀢𑁆𑀢𑀢𑀺, 𑀢𑀸𑀯 𑀘𑀻𑀯𑀭𑀧𑀮𑀺𑀩𑁄𑀥𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑁄 𑀏𑀯. 𑀬𑀤𑀸 𑀧𑀦 𑀬𑀣𑀸𑀧𑀢𑁆𑀣𑀺𑀢𑀝𑁆𑀞𑀸𑀦𑀢𑁄 𑀘𑀻𑀯𑀭𑀸𑀤𑀻𑀦𑀁 𑀲𑀩𑁆𑀩𑀣𑀸 ¶ 𑀅𑀮𑀸𑀪𑁂𑀦 𑀯𑀸 𑀘𑀻𑀯𑀭𑀸𑀲𑀸 𑀘𑁂𑀯 𑀮𑀤𑁆𑀥𑀸𑀦𑀁 𑀓𑀢𑁆𑀯𑀸 𑀦𑀺𑀝𑁆𑀞𑀸𑀦𑁂𑀦 𑀯𑀸 𑀦𑀝𑁆𑀞𑀯𑀺𑀦𑀝𑁆𑀞𑀸𑀤𑀺𑀪𑀸𑀯𑁂𑀦 𑀯𑀸 𑀘𑀻𑀯𑀭𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀯𑀸 𑀓𑀭𑀡𑀺𑀘𑁆𑀙𑀸 𑀘 𑀯𑀺𑀕𑀘𑁆𑀙𑀢𑀺, 𑀢𑀤𑀸 𑀘𑀻𑀯𑀭𑀧𑀮𑀺𑀩𑁄𑀥𑁄 𑀉𑀧𑀘𑁆𑀙𑀺𑀦𑁆𑀦𑁄 𑀳𑁄𑀢𑀺.

𑀲𑁄 ¶ 𑀘 𑀇𑀥 ‘‘𑀓𑀢𑀘𑀻𑀯𑀭𑀁 𑀆𑀤𑀸𑀬𑀸’’𑀢𑀺 𑀯𑀘𑀦𑁂𑀦 𑀧𑀓𑀸𑀲𑀺𑀢𑁄. 𑀏𑀯𑀁 𑀉𑀧𑀭𑀺 𑀲𑀩𑁆𑀩𑀢𑁆𑀣 𑀧𑀸𑀴𑀺𑀯𑀘𑀦𑀓𑁆𑀓𑀫𑀁 𑀦𑀺𑀲𑁆𑀲𑀸𑀬 𑀦𑁂𑀲𑀁 𑀧𑀞𑀫𑀁, 𑀧𑀘𑁆𑀙𑀸 𑀘 𑀉𑀧𑀘𑁆𑀙𑀺𑀚𑁆𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀣𑀸𑀧𑀺 𑀘 𑀇𑀫𑁂𑀲𑀁 𑀉𑀪𑀺𑀦𑁆𑀦𑀁 𑀧𑀮𑀺𑀩𑁄𑀥𑀸𑀦𑀁 𑀉𑀧𑀘𑁆𑀙𑁂𑀤𑁂𑀦𑁂𑀯 𑀓𑀣𑀺𑀦𑀼𑀩𑁆𑀪𑀸𑀭𑁄, 𑀦 𑀏𑀓𑀲𑁆𑀲. 𑀢𑁂𑀲𑀜𑁆𑀘 𑀧𑀼𑀩𑁆𑀩𑀸𑀧𑀭𑀺𑀬𑁂𑀦, 𑀏𑀓𑀓𑁆𑀔𑀡𑁂 𑀘 𑀉𑀧𑀘𑁆𑀙𑀺𑀚𑁆𑀚𑀦𑀁 𑀤𑀲𑁆𑀲𑁂𑀢𑀼𑀁 𑀇𑀫𑀸 𑀅𑀝𑁆𑀞 𑀫𑀸𑀢𑀺𑀓𑀸 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁆𑀢𑁄𑀲𑀻𑀫𑀸𑀬𑀦𑁆𑀢𑀺 𑀘𑀻𑀯𑀭𑀦𑀺𑀝𑁆𑀞𑀸𑀦𑀓𑁆𑀔𑀡𑁂𑀬𑁂𑀯 𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀦𑁆𑀢𑀺 𑀘𑀻𑀯𑀭𑁂 𑀅𑀧𑁂𑀓𑁆𑀔𑀸𑀬 𑀯𑀺𑀕𑀢𑀢𑁆𑀢𑀸 𑀓𑀭𑀡𑀧𑀮𑀺𑀩𑁄𑀥𑀲𑁆𑀲𑀸𑀧𑀺 𑀉𑀧𑀘𑁆𑀙𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀬𑁄 𑀧𑀦 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀲𑀩𑁆𑀩𑀣𑀸 𑀘𑀻𑀯𑀭𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑀸𑀕𑀢𑀲𑁆𑀲 𑀲𑀩𑁆𑀩𑀣𑀸𑀧𑀺 𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀦 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀦𑀸𑀢𑀺 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄. 𑀅𑀬𑀁 𑀧𑀦𑀸𑀢𑀺 𑀆𑀲𑀸𑀯𑀘𑁆𑀙𑁂𑀤𑀓𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀯𑀺𑀲𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀇𑀥 𑀦 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀦𑀸𑀲𑀸𑀬 𑀮𑀪𑀢𑀻𑀢𑀺 ‘‘𑀬𑀲𑁆𑀫𑀺𑀁 𑀓𑀼𑀮𑁂 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀆𑀲𑀸 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀢𑀢𑁆𑀣 𑀘𑀻𑀯𑀭𑀸𑀲𑀸𑀬 𑀅𑀦𑀼𑀧𑁆𑀧𑀦𑁆𑀦𑀝𑁆𑀞𑀸𑀦𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀸𑀬 𑀦 𑀮𑀪𑀢𑀻𑀢𑀺 𑀆𑀲𑀻𑀲𑀺𑀢𑀝𑁆𑀞𑀸𑀦𑁂 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀦 𑀯𑀼𑀢𑁆𑀢𑁄𑀢𑀺 𑀇𑀥 𑀲𑀯𑀦𑀦𑁆𑀢𑀺𑀓𑀸𑀦𑀦𑁆𑀢𑀭𑁂 𑀦 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁂. 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀦𑀸𑀫 𑀘𑀻𑀯𑀭𑀫𑀸𑀲𑀸𑀦𑀁 𑀧𑀭𑀺𑀬𑀦𑁆𑀢𑀤𑀺𑀯𑀲𑀲𑀗𑁆𑀔𑀸𑀢𑀸𑀬 𑀲𑀻𑀫𑀸𑀬 𑀅𑀢𑀺𑀓𑁆𑀓𑀫𑀦𑀢𑁄 𑀲𑀜𑁆𑀚𑀸𑀢𑁄. 𑀓𑁂𑀘𑀺 ‘‘𑀩𑀳𑀺𑀲𑀻𑀫𑀸𑀬 𑀓𑀸𑀮𑀸𑀢𑀺𑀓𑁆𑀓𑀫𑁄 𑀲𑀻𑀫𑀸𑀢𑀺𑀓𑁆𑀓𑀫𑁄’’𑀢𑀺 𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀢𑁄𑀉𑀧𑀘𑀸𑀭𑁂 𑀘𑀻𑀯𑀭𑀓𑀸𑀮𑀸𑀢𑀺𑀓𑁆𑀓𑀫𑁂𑀧𑀺 𑀓𑀣𑀺𑀦𑀼𑀩𑁆𑀪𑀸𑀭𑁄 𑀅𑀲𑀫𑁆𑀫𑀢𑁄 𑀦𑀸𑀫 𑀲𑀺𑀬𑀸𑀢𑀺 𑀦 𑀘𑁂𑀢𑀁 𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀸𑀮𑀸𑀢𑀺𑀓𑁆𑀓𑀫𑁄 𑀲𑀻𑀫𑀸𑀢𑀺𑀓𑁆𑀓𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀓𑀢𑀘𑀻𑀯𑀭𑁄’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀅𑀓𑀢𑀘𑀻𑀯𑀭𑀲𑁆𑀲𑀧𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀳𑁄𑀢𑀺, 𑀤𑁆𑀯𑁂 𑀘 𑀧𑀮𑀺𑀩𑁄𑀥𑀸 𑀏𑀓𑀢𑁄 𑀙𑀺𑀚𑁆𑀚𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀢𑀁𑀢𑀁 𑀯𑀺𑀲𑁂𑀲𑀦𑀸𑀪𑀸𑀯𑁂𑀧𑀺 𑀓𑀣𑀺𑀦𑀼𑀩𑁆𑀪𑀸𑀭𑀢𑀸, 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀧𑁆𑀧𑀓𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀳𑀼𑀩𑁆𑀪𑀸𑀭𑁂 𑀤𑁆𑀯𑁂𑀧𑀺 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀇𑀤𑀁 𑀅𑀓𑀢𑀘𑀻𑀯𑀭𑀲𑁆𑀲 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀲𑀫𑁆𑀪𑀯𑀧𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀲𑀼 𑀅𑀜𑁆𑀜𑀢𑀭𑀸𑀪𑀸𑀯𑁂𑀧𑀺 𑀲𑀳𑀼𑀩𑁆𑀪𑀸𑀭𑁄𑀯 𑀳𑁄𑀢𑀺.

𑁩𑁧𑁨-𑁩𑁨𑁫. 𑀲𑀫𑀸𑀤𑀸𑀬𑀯𑀸𑀭𑁄 𑀆𑀤𑀸𑀬𑀯𑀸𑀭𑀲𑀤𑀺𑀲𑁄𑀯. 𑀉𑀧𑀲𑀕𑁆𑀕𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀧𑀼𑀦 𑀲𑀫𑀸𑀤𑀸𑀬𑀯𑀸𑀭𑁂𑀧𑀺…𑀧𑁂… 𑀢𑁂𑀬𑁂𑀯 𑀤𑀲𑁆𑀲𑀺𑀢𑀸’’𑀢𑀺 ¶ . 𑀯𑀺𑀧𑁆𑀧𑀓𑀢𑀘𑀻𑀯𑀭𑁂 𑀧𑀓𑁆𑀓𑀫𑀦𑀦𑁆𑀢𑀺𑀓𑀲𑁆𑀲 𑀅𑀪𑀸𑀯𑀢𑁄 ‘‘𑀬𑀣𑀸𑀲𑀫𑁆𑀪𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀺𑀧𑁆𑀧𑀓𑀢𑀘𑀻𑀯𑀭𑀯𑀸𑀭𑁂 𑀙𑀴𑁂𑀯 𑀉𑀩𑁆𑀪𑀸𑀭𑀸 𑀯𑀼𑀢𑁆𑀢𑀸, 𑀘𑀻𑀯𑀭𑁂 𑀳𑀢𑁆𑀣𑀕𑀢𑁂 ¶ 𑀘 𑀆𑀲𑀸𑀯𑀘𑁆𑀙𑁂𑀤𑀺𑀓𑀲𑁆𑀲 𑀅𑀲𑀫𑁆𑀪𑀯𑀸, 𑀲𑁄 𑀏𑀢𑁂𑀲𑀼 𑀯𑀸𑀭𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦 𑀯𑀼𑀢𑁆𑀢𑁄, 𑀯𑀺𑀲𑀼𑀜𑁆𑀜𑁂𑀯 𑀯𑀼𑀢𑁆𑀢𑁄. 𑀯𑀺𑀧𑁆𑀧𑀓𑀢𑀯𑀸𑀭𑁂 𑀘𑁂𑀢𑁆𑀣 𑀆𑀤𑀸𑀬𑀯𑀸𑀭𑀲𑀫𑀸𑀤𑀸𑀬𑀯𑀸𑀭𑀯𑀲𑁂𑀦 𑀤𑁆𑀯𑁂 𑀙𑀓𑁆𑀓𑀯𑀸𑀭𑀸 𑀯𑀼𑀢𑁆𑀢𑀸.

𑀢𑀢𑁄 𑀧𑀭𑀁 𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦𑀦𑁆𑀢𑀺𑀓𑀸𑀦𑀁 𑀯𑀲𑁂𑀦 𑀢𑀻𑀡𑀺 𑀢𑀺𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀢𑀢𑀺𑀬𑀢𑁆𑀢𑀺𑀓𑁂 𑀅𑀦𑀥𑀺𑀝𑁆𑀞𑀺𑀢𑁂𑀦𑀸𑀢𑀺 ‘‘𑀧𑀘𑁆𑀘𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀏𑀯𑀁 𑀅𑀦𑀥𑀺𑀝𑁆𑀞𑀺𑀢𑁂𑀦, 𑀦 𑀏𑀯𑀁 𑀫𑀦𑀲𑀺𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀢𑁆𑀢𑀺𑀓𑀢𑁄 𑀧𑀦 𑀧𑀭𑀁 𑀏𑀓𑀁 𑀙𑀓𑁆𑀓𑀁 𑀤𑀲𑁆𑀲𑀺𑀢𑀁. 𑀏𑀯𑀁 𑀢𑀻𑀡𑀺 𑀢𑀺𑀓𑀸𑀦𑀺, 𑀏𑀓𑀁 𑀙𑀓𑁆𑀓𑀜𑁆𑀘𑀸𑀢𑀺 𑀧𑀞𑀫𑀁 𑀧𑀦𑁆𑀦𑀭𑀲𑀓𑀁 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀦𑀬𑁂𑀦 𑀤𑀼𑀢𑀺𑀬𑀧𑀦𑁆𑀦𑀭𑀲𑀓𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀸𑀴𑀺𑀬𑀁 𑀆𑀲𑀸𑀤𑁆𑀯𑀸𑀤𑀲𑀓𑁂 𑀩𑀳𑀺𑀲𑀻𑀫𑀸𑀕𑀢𑀲𑁆𑀲 𑀓𑀣𑀺𑀦𑀼𑀤𑁆𑀥𑀸𑀭𑁂𑀲𑀼 𑀢𑁂𑀲𑀫𑁆𑀧𑀺 𑀘𑀻𑀯𑀭𑀸𑀲𑀸𑀤𑀺𑀯𑀲𑁂𑀦 𑀘𑀻𑀯𑀭𑀧𑀮𑀺𑀩𑁄𑀥𑁄 𑀬𑀸𑀯 𑀘𑀻𑀯𑀭𑀦𑀺𑀝𑁆𑀞𑀸𑀦𑀸 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀲𑁄 𑀩𑀳𑀺𑀲𑀻𑀫𑀸𑀕𑀢𑁄 𑀲𑀼𑀡𑀸𑀢𑀺 ‘𑀉𑀩𑁆𑀪𑀢𑀁 𑀓𑀺𑀭 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀣𑀺𑀦𑀦𑁆𑀢𑀺…𑀧𑁂… 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄’’’𑀢𑀺. 𑀏𑀢𑁆𑀣 𑀘 𑀲𑀯𑀦𑀓𑁆𑀔𑀡𑁂 𑀆𑀯𑀸𑀲𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺, 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀧𑀮𑀺𑀩𑁄𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀲𑀁𑀕𑀫𑀺𑀓𑀦𑀯𑀓𑁂 𑀤𑀺𑀲𑀁𑀕𑀫𑀺𑀓𑁄 𑀧𑀓𑁆𑀓𑀫𑀢𑀻𑀢𑀺 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀧𑀓𑁆𑀓𑀫𑀢𑀺, 𑀇𑀫𑀺𑀦𑀸 𑀆𑀯𑀸𑀲𑀧𑀮𑀺𑀩𑁄𑀥𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀦𑁂𑀯 𑀯𑀲𑁆𑀲𑀁𑀯𑀼𑀢𑁆𑀣𑀸𑀯𑀸𑀲𑁂 𑀧𑀼𑀦 𑀕𑀦𑁆𑀢𑁆𑀯𑀸 𑀘𑀻𑀯𑀭𑀦𑀺𑀝𑁆𑀞𑀸𑀧𑀺𑀢𑀫𑀢𑁆𑀢𑁂 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀯𑀼𑀢𑁆𑀢𑁄. ‘‘𑀘𑀻𑀯𑀭𑀧𑀝𑀺𑀯𑀺𑀲𑀁 𑀅𑀧𑀯𑀺𑀮𑀸𑀬𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀲𑀫𑀗𑁆𑀕𑀺𑀓𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀅𑀧𑀯𑀺𑀮𑀸𑀬𑀫𑀸𑀦𑁄𑀢𑀺 𑀆𑀓𑀗𑁆𑀔𑀫𑀸𑀦𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀆𑀤𑀸𑀬𑀲𑀢𑁆𑀢𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓𑁄

𑀚𑀻𑀯𑀓𑀯𑀢𑁆𑀣𑀼𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁨𑁯. 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 ¶ ¶ 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀺𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀬𑀭𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀓𑀫𑁆𑀫𑀚𑀲𑁆𑀲 𑀭𑁄𑀕𑀲𑁆𑀲 𑀅𑀪𑀸𑀯𑀸.

𑁩𑁩𑁦. 𑀧𑀸𑀴𑀺𑀬𑀁 𑀲𑀁𑀬𑀫𑀲𑁆𑀲𑀸𑀢𑀺 𑀲𑀗𑁆𑀕𑀳𑀡𑀲𑁆𑀲. 𑀅𑀯𑀺𑀲𑀚𑁆𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄 ‘‘𑀬𑁄 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄’’𑀢𑀺𑀆𑀤𑀻𑀲𑀼 (𑀧𑁂. 𑀯. 𑁨𑁩𑁭) 𑀯𑀺𑀬. 𑀏𑀢𑀲𑁆𑀲 𑀲𑀁𑀬𑀫𑀲𑁆𑀲 𑀨𑀮𑀁 𑀉𑀧𑀚𑀸𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀫𑁂𑀯 𑀨𑀮𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 ‘‘𑀯𑀭𑀫𑁂𑀢𑀁…𑀧𑁂… 𑀆𑀲𑀺𑀢𑁆𑀢’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀁𑀬𑀫𑀲𑁆𑀲𑀸𑀢𑀺 𑀆𑀦𑀺𑀲𑀁𑀲𑀲𑁆𑀲, 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁨𑁯-𑁩𑁩𑁦) 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑁩𑁩𑁬. 𑀉𑀲𑁆𑀲𑀦𑁆𑀦𑀤𑁄𑀲𑁄𑀢𑀺 𑀲𑀜𑁆𑀚𑀸𑀢𑀧𑀺𑀢𑁆𑀢𑀸𑀤𑀺𑀤𑁄𑀲𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀓𑀮𑀲𑀭𑀻𑀭𑁂.

𑁩𑁩𑁭. 𑀫𑀳𑀸𑀧𑀺𑀝𑁆𑀞𑀺𑀬𑀓𑁄𑀚𑀯𑀦𑁆𑀢𑀺 𑀳𑀢𑁆𑀣𑀺𑀧𑀺𑀝𑁆𑀞𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀢𑀸𑀬 ‘‘𑀫𑀳𑀸𑀧𑀺𑀝𑁆𑀞𑀺𑀬’’𑀦𑁆𑀢𑀺 𑀮𑀤𑁆𑀥𑀲𑀫𑀜𑁆𑀜𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁.

𑁩𑁩𑁮-𑁯. 𑀉𑀧𑀟𑁆𑀠𑀓𑀸𑀲𑀺𑀦𑀁 𑀔𑀫𑀫𑀸𑀦𑀦𑁆𑀢𑀺 𑀅𑀟𑁆𑀠𑀓𑀸𑀲𑀺𑀅𑀕𑁆𑀖𑀦𑀓𑀁. 𑀧𑀸𑀴𑀺𑀬𑀁 𑀓𑀺𑀁 𑀦𑀼 𑀔𑁄𑀢𑀺 𑀓𑀢𑀫𑀁 𑀦𑀼 𑀔𑁄.

𑁩𑁪𑁦-𑁩𑁪𑁨. 𑀉𑀧𑀘𑀸𑀭𑁂𑀢𑀺 𑀲𑀼𑀲𑀸𑀦𑀲𑁆𑀲 𑀆𑀲𑀦𑁆𑀦𑁂 𑀧𑀤𑁂𑀲𑁂. 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸𑀢𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀏𑀯 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸, 𑀏𑀢𑁂𑀦 ‘‘𑀪𑀺𑀓𑁆𑀔𑀽 𑀕𑀡𑁆𑀳𑀦𑁆𑀢𑀽’’𑀢𑀺 𑀙𑀟𑁆𑀟𑀺𑀢𑁂 𑀏𑀯 𑀅𑀓𑀸𑀫𑀸 𑀪𑀸𑀕𑀤𑀸𑀦𑀁 𑀯𑀺𑀳𑀺𑀢𑀁, 𑀓𑁂𑀯𑀮𑀁 𑀙𑀟𑁆𑀟𑀺𑀢𑁂 𑀧𑀦 𑀓𑀢𑀺𑀓𑀸𑀬 𑀅𑀲𑀢𑀺 𑀏𑀓𑀢𑁄 𑀩𑀳𑀽𑀲𑀼 𑀧𑀯𑀺𑀝𑁆𑀞𑁂𑀲𑀼 𑀬𑁂𑀦 𑀕𑀳𑀺𑀢𑀁, 𑀢𑁂𑀦 𑀅𑀓𑀸𑀫𑀪𑀸𑀕𑁄 𑀦 ¶ 𑀤𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀦𑀸 𑀤𑀺𑀲𑀸 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀏𑀢𑁂𑀲𑀦𑁆𑀢𑀺 𑀲𑀤𑀺𑀲𑀸𑀢𑀺 𑀆𑀳 ‘‘𑀏𑀓𑀤𑀺𑀲𑀸𑀬 𑀯𑀸 𑀑𑀓𑁆𑀓𑀫𑀺𑀁𑀲𑀽’’𑀢𑀺. 𑀥𑀼𑀭𑀯𑀺𑀳𑀸𑀭𑀝𑁆𑀞𑀸𑀦𑁂𑀢𑀺 𑀯𑀺𑀳𑀸𑀭𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂.

𑀚𑀻𑀯𑀓𑀯𑀢𑁆𑀣𑀼𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁪𑁩. 𑀯𑀺𑀳𑀸𑀭𑀫𑀚𑁆𑀛𑁂𑀢𑀺 ¶ 𑀲𑀩𑁆𑀩𑁂𑀲𑀁 𑀚𑀸𑀦𑀦𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸𑀢𑀺 𑀧𑀝𑀺𑀯𑀻𑀲𑀧𑁆𑀧𑀳𑁄𑀦𑀓𑀢𑀸𑀚𑀸𑀦𑀦𑀢𑁆𑀣𑀁 𑀳𑀮𑀺𑀤𑁆𑀤𑀺𑀬𑀸𑀤𑀻𑀳𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀯𑀡𑁆𑀡𑁂𑀳𑀺 𑀬𑀼𑀢𑁆𑀢𑁂 𑀲𑀫𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑀫𑁂 𑀧𑀝𑀺𑀯𑀻𑀲𑁂 𑀞𑀧𑁂𑀢𑁆𑀯𑀸’’𑀢𑀺. 𑀇𑀤𑀦𑁆𑀢𑀺 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀤𑀸𑀦𑀁. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀧𑀳𑁄𑀦𑀓𑀓𑀫𑁆𑀫𑀁. 𑀬𑀢𑁆𑀢𑀓𑁂𑀦 𑀯𑀺𑀦𑀬𑀸𑀕𑀢𑁂𑀦 𑀲𑀫𑁆𑀫𑀼𑀜𑁆𑀚𑀦𑀻𑀩𑀦𑁆𑀥𑀦𑀸𑀤𑀺𑀳𑀢𑁆𑀣𑀓𑀫𑁆𑀫𑁂𑀦 𑀯𑀺𑀳𑀸𑀭𑀲𑁆𑀲 𑀊𑀦𑀓𑀢𑀸 𑀦 𑀳𑁄𑀢𑀺, 𑀢𑀢𑁆𑀢𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀲𑀸𑀫𑀡𑁂𑀭𑀸𑀦𑀜𑁆𑀘. 𑀪𑀡𑁆𑀟𑀸𑀕𑀸𑀭𑀺𑀓𑀘𑀻𑀯𑀭𑁂𑀧𑀻𑀢𑀺 𑀅𑀓𑀸𑀮𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀢𑀸𑀬 𑀲𑀫𑀪𑀸𑀕𑀤𑀸𑀦𑀁. 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀓𑀢𑁆𑀢𑀩𑁆𑀩𑀓𑀸𑀮𑁂𑀲𑀼 𑀅𑀓𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀓𑁆𑀔𑀡𑁂 𑀓𑀭𑁄𑀦𑁆𑀢𑀺.

𑀏𑀢𑁆𑀢𑀓𑁂𑀦 𑀫𑀫 𑀘𑀻𑀯𑀭𑀁 𑀧𑀳𑁄𑀢𑀻𑀢𑀺 𑀤𑁆𑀯𑀸𑀤𑀲𑀕𑁆𑀖𑀦𑀓𑁂𑀦𑁂𑀯 𑀫𑀫 𑀘𑀻𑀯𑀭𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀢𑀢𑁄 𑀊𑀦𑁂𑀦𑀸𑀢𑀺 𑀲𑀩𑁆𑀩𑀁 𑀕𑀳𑁂𑀢𑀼𑀓𑀸𑀫𑁄𑀢𑀺 𑀅𑀢𑁆𑀣𑁄.

𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀭𑀚𑀦𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁪𑁪. 𑀏𑀯𑀜𑁆𑀳𑀺 𑀓𑀢𑁂𑀢𑀺 𑀯𑀝𑁆𑀝𑀸𑀥𑀸𑀭𑀲𑁆𑀲 𑀅𑀦𑁆𑀢𑁄 𑀭𑀚𑀦𑁄𑀤𑀓𑀁, 𑀩𑀳𑀺 𑀙𑀮𑁆𑀮𑀺𑀓𑀜𑁆𑀘 𑀓𑀢𑁆𑀯𑀸 𑀯𑀺𑀬𑁄𑀚𑀦𑁂 𑀓𑀢𑁂. 𑀦 𑀉𑀢𑁆𑀢𑀭𑀢𑀻𑀢𑀺 𑀓𑁂𑀯𑀮𑀁 𑀉𑀤𑀓𑀢𑁄 𑀨𑁂𑀡𑀼𑀝𑁆𑀞𑀸𑀦𑀸𑀪𑀸𑀯𑀸 𑀦 𑀉𑀢𑁆𑀢𑀭𑀢𑀺. 𑀭𑀚𑀦𑀓𑀼𑀡𑁆𑀟𑀦𑁆𑀢𑀺 𑀧𑀓𑁆𑀓𑀭𑀚𑀦𑀝𑁆𑀞𑀧𑀦𑀓𑀁 𑀫𑀳𑀸𑀖𑀝𑀁.

𑁩𑁪𑁫. 𑀅𑀦𑀼𑀯𑀸𑀢𑀸𑀤𑀻𑀦𑀁 𑀤𑀻𑀖𑀧𑀢𑁆𑀢𑀸𑀦𑀦𑁆𑀢𑀺 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀼𑀯𑀸𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀤𑁆𑀯𑀺𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀸 𑀫𑀸𑀢𑀺𑀓𑀸𑀓𑀸𑀭𑁂𑀦 𑀞𑀧𑀺𑀢𑀧𑀢𑁆𑀢𑀜𑁆𑀘 ‘‘𑀤𑀻𑀖𑀧𑀢𑁆𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀕𑀦𑁆𑀢𑀼𑀓𑀧𑀢𑁆𑀢𑀦𑁆𑀢𑀺 𑀤𑀺𑀕𑀼𑀡𑀘𑀻𑀯𑀭𑀲𑁆𑀲 𑀉𑀧𑀭𑀺 𑀅𑀜𑁆𑀜𑀁 𑀧𑀝𑁆𑀝𑀁 𑀅𑀧𑁆𑀧𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁 𑀓𑀺𑀭 𑀇𑀤𑀸𑀦𑀺 𑀦 𑀓𑀭𑁄𑀦𑁆𑀢𑀺.

𑁩𑁪𑁬. 𑀧𑀸𑀴𑀺𑀬𑀁 ¶ 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀢𑀼𑀝𑁆𑀞𑀺𑀫𑀼𑀔𑀺𑀬𑀸, 𑀧𑀲𑀦𑁆𑀦𑀤𑀺𑀲𑀸𑀫𑀼𑀔𑀸𑀬𑀸𑀢𑀺 𑀅𑀢𑁆𑀣𑁄.

𑁩𑁪𑁮. 𑀅𑀘𑁆𑀙𑀼𑀧𑁂𑀬𑁆𑀬𑀦𑁆𑀢𑀺 𑀧𑀢𑀺𑀝𑁆𑀞𑀧𑁂𑀬𑁆𑀬𑀁. 𑀳𑀢𑀯𑀢𑁆𑀣𑀓𑀸𑀦𑀦𑁆𑀢𑀺 𑀧𑀼𑀭𑀸𑀡𑀯𑀢𑁆𑀣𑀸𑀦𑀁. 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯𑀸𑀢𑀺 𑀅𑀕𑁆𑀕𑀴𑁂 𑀯𑀺𑀬 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀅𑀦𑀧𑀦𑁂𑀢𑁆𑀯𑀸𑀯.

𑁩𑁪𑁯-𑁩𑁫𑁧. 𑀯𑀺𑀲𑀸𑀔𑀯𑀢𑁆𑀣𑀼𑀫𑁆𑀳𑀺 ¶ 𑀓𑀮𑁆𑀮𑀓𑀸𑀬𑀸𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸. 𑀕𑀢𑀻𑀢𑀺 𑀜𑀸𑀡𑀕𑀢𑀺 𑀅𑀥𑀺𑀕𑀫𑁄. 𑀅𑀪𑀺𑀲𑀫𑁆𑀧𑀭𑀸𑀬𑁄𑀢𑀺 ‘‘𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁪𑁮) 𑀯𑀼𑀢𑁆𑀢𑁄 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑁄, 𑀫𑀕𑁆𑀕𑀜𑀸𑀡𑀬𑀼𑀢𑁆𑀢𑁂𑀳𑀺 𑀕𑀦𑁆𑀢𑀩𑁆𑀩𑀕𑀢𑀺𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀢𑀁 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. ‘‘𑀤𑀤𑀸𑀢𑀺 𑀤𑀸𑀦’’𑀦𑁆𑀢𑀺 𑀇𑀤𑀁 𑀅𑀦𑁆𑀦𑀧𑀸𑀦𑀯𑀺𑀭𑀳𑀺𑀢𑀸𑀦𑀁 𑀲𑁂𑀲𑀧𑀘𑁆𑀘𑀬𑀸𑀦𑀁 𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄𑀯𑀕𑁆𑀕𑀺𑀓𑀦𑁆𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁.

𑁩𑁫𑁯. 𑀅𑀝𑁆𑀞𑀧𑀤𑀓𑀘𑁆𑀙𑀦𑁆𑀦𑁂𑀦𑀸𑀢𑀺 𑀅𑀝𑁆𑀞𑀧𑀤𑀓𑀲𑀗𑁆𑀔𑀸𑀢𑀚𑀽𑀢𑀨𑀮𑀓𑀮𑁂𑀔𑀸𑀲𑀡𑁆𑀞𑀸𑀦𑁂𑀦.

𑁩𑁬𑁨. 𑀧𑀸𑀴𑀺𑀬𑀁 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀦𑀤𑀻𑀧𑀸𑀭𑀕𑀫𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀴𑀕𑀼𑀢𑁆𑀢𑀺𑀬𑁂𑀯 𑀧𑀫𑀸𑀡𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀦𑀺𑀓𑁆𑀔𑁂𑀧𑀓𑀸𑀭𑀡𑁂𑀳𑀺 𑀞𑀧𑁂𑀦𑁆𑀢𑁂𑀦𑀧𑀺 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁂 𑀏𑀯 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀲𑁆𑀲𑀻𑀫𑀸𑀕𑀢𑀦𑁆𑀢𑀺 𑀯𑀲𑁆𑀲𑀸𑀦𑀲𑀗𑁆𑀔𑀸𑀢𑀁 𑀓𑀸𑀮𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑀁, 𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀘𑀻𑀯𑀭𑀭𑀚𑀦𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸

𑁩𑁬𑁩. 𑀧𑀜𑁆𑀘 𑀫𑀸𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲𑀢𑁆𑀣𑀸𑀬 𑀤𑀸𑀬𑀓𑁂𑀳𑀺 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄. ‘‘𑀇𑀥 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀇𑀤𑀁 𑀅𑀪𑀺𑀮𑀸𑀧𑀫𑀢𑁆𑀢𑀁. 𑀇𑀥-𑀲𑀤𑁆𑀤𑀁 𑀧𑀦 𑀯𑀺𑀦𑀸 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑁄 𑀏𑀯 𑀦𑀬𑁄. 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀺 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀻𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀺 𑀯𑀼𑀢𑁆𑀣𑀯𑀲𑁆𑀲𑀲𑁆𑀲 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄, 𑀢𑀸𑀯 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀯𑀸 𑀳𑁄𑀢𑀼 𑀅𑀦𑀢𑁆𑀣𑀢𑀁 𑀯𑀸, 𑀅𑀢𑀻𑀢𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯). 𑀢𑀢𑁄 𑀧𑀭𑀦𑁆𑀢𑀺 𑀧𑀜𑁆𑀘𑀫𑀸𑀲𑀢𑁄 𑀧𑀭𑀁, 𑀕𑀺𑀫𑁆𑀳𑀸𑀦𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 ¶ 𑀅𑀢𑁆𑀣𑁄. ‘‘𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀇𑀤𑀁 ‘‘𑀉𑀤𑀸𑀳𑀼 𑀅𑀦𑀸𑀕𑀢𑀯𑀲𑁆𑀲𑁂’’𑀢𑀺 ¶ 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀺 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀻’’𑀢𑀺 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 ‘‘𑀓𑀲𑁆𑀫𑀸 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀇𑀤𑀁 𑀮𑀺𑀔𑀦𑁆𑀢𑀺, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 ‘‘𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀯𑀼𑀢𑁆𑀣𑀯𑀲𑁆𑀲𑁂 𑀳𑀺 𑀲𑀦𑁆𑀥𑀸𑀬 ‘‘𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀁, 𑀦 𑀘 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀁 𑀯𑀼𑀢𑁆𑀣𑀯𑀲𑁆𑀲𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀼𑀡𑀦𑀢𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀘𑁂 𑀧𑀦 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀤𑀢𑀺, 𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁭𑁯).

𑀤𑀼𑀕𑁆𑀕𑀳𑀺𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀸𑀦𑀺. 𑀲𑀗𑁆𑀖𑀺𑀓𑀸𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀢𑁄𑀯𑀸𑀢𑀺 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀢𑁄𑀯, 𑀇𑀤𑀸𑀦𑁂𑀯𑀸𑀢𑀺 𑀯𑀸 𑀅𑀢𑁆𑀣𑁄.

𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁬𑁪. ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀻’’𑀢𑀺 𑀇𑀤𑀁 𑀦𑀸𑀦𑀸𑀲𑀻𑀫𑀸𑀯𑀺𑀳𑀸𑀭𑁂𑀲𑀼 𑀓𑀢𑁆𑀢𑀩𑁆𑀩𑀦𑀬𑁂𑀦 𑀏𑀓𑀲𑁆𑀫𑀺𑀫𑁆𑀧𑀺 𑀯𑀺𑀳𑀸𑀭𑁂 𑀤𑁆𑀯𑀻𑀲𑀼 𑀲𑁂𑀦𑀸𑀲𑀦𑁂𑀲𑀼 𑀦𑀺𑀯𑀼𑀢𑁆𑀣𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀭𑀼𑀡𑀼𑀝𑁆𑀞𑀸𑀧𑀦𑁂𑀦𑁂𑀯 𑀢𑀢𑁆𑀣 𑀯𑀼𑀢𑁆𑀣𑁄 𑀳𑁄𑀢𑀺, 𑀦 𑀧𑀦 𑀯𑀲𑁆𑀲𑀘𑁆𑀙𑁂𑀤𑀧𑀭𑀺𑀳𑀸𑀭𑀸𑀬. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀲𑁂𑀦𑀸𑀲𑀦𑀁 𑀅𑀧𑁆𑀧𑀯𑀺𑀝𑁆𑀞𑁄𑀧𑀺 𑀯𑀼𑀢𑁆𑀣𑀯𑀲𑁆𑀲𑁄 𑀏𑀯 𑀳𑁄𑀢𑀺, 𑀕𑀳𑀺𑀢𑀲𑁂𑀦𑀸𑀲𑀦𑁂 𑀧𑀦 𑀦𑀺𑀯𑀼𑀢𑁆𑀣𑁄 𑀦𑀸𑀫 𑀦 𑀳𑁄𑀢𑀺, 𑀢𑀢𑁆𑀣 𑀘 𑀅𑀭𑀼𑀡𑀼𑀝𑁆𑀞𑀸𑀧𑀦𑁂 𑀧𑀦 𑀲𑀢𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑁆𑀫𑀺𑀁 𑀩𑀳𑀼𑀢𑀭𑀁 𑀦𑀺𑀯𑀲𑀢𑀺 𑀦𑀸𑀫𑀸’’𑀢𑀺, 𑀏𑀢𑁂𑀦 𑀘 𑀇𑀢𑀭𑀲𑁆𑀫𑀺𑀁 𑀲𑀢𑁆𑀢𑀸𑀳𑀯𑀸𑀭𑁂𑀦𑀸𑀧𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑁂 𑀲𑀢𑀺 𑀏𑀯 𑀅𑀧𑁆𑀧𑀓𑀢𑀭𑀁 𑀦𑀺𑀯𑀲𑀢𑀺 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀦𑀸𑀦𑀸𑀮𑀸𑀪𑁂𑀳𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀩𑀤𑁆𑀥𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑁂𑀳𑀺. 𑀦𑀸𑀦𑀽𑀧𑀘𑀸𑀭𑁂𑀳𑀻𑀢𑀺 𑀦𑀸𑀦𑀸𑀧𑀭𑀺𑀓𑁆𑀔𑁂𑀧𑀦𑀸𑀦𑀸𑀤𑁆𑀯𑀸𑀭𑁂𑀳𑀺. 𑀏𑀓𑀲𑀻𑀫𑀸𑀯𑀺𑀳𑀸𑀭𑁂𑀳𑀻𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀳𑀸𑀭𑀸𑀦𑀁 𑀏𑀓𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀏𑀓𑀸𑀬 𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑁆𑀢𑁄𑀕𑀢𑁂𑀳𑀺 𑀤𑁆𑀯𑀻𑀳𑀺 𑀯𑀺𑀳𑀸𑀭𑁂𑀳𑀺. 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀧𑀞𑀫𑀁 𑀕𑀳𑀺𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀢𑀢𑁆𑀣.

𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁬𑁫-𑁬. 𑀪𑀽𑀫𑀺𑀬𑀁 ¶ ¶ 𑀧𑀭𑀺𑀪𑀡𑁆𑀟𑀁 𑀅𑀓𑀸𑀲𑀻𑀢𑀺 𑀕𑀺𑀮𑀸𑀦𑁂𑀦 𑀦𑀺𑀧𑀦𑁆𑀦𑀪𑀽𑀫𑀺𑀬𑀁 𑀓𑀺𑀮𑀺𑀝𑁆𑀞𑀝𑁆𑀞𑀸𑀦𑀁 𑀥𑁄𑀯𑀺𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀁 𑀓𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀯𑀺𑀥𑀺𑀫𑁆𑀧𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄. 𑀧𑀸𑀴𑀺𑀬𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀘𑀻𑀯𑀭𑀤𑀸𑀦𑁂 𑀲𑀸𑀫𑀡𑁂𑀭𑀸𑀦𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀸𑀪𑀸𑀯𑀸 ‘‘𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀁. 𑀲𑀘𑁂𑀧𑀺 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀜𑁆𑀜𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀢𑀲𑀦𑁆𑀢𑀓𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁬𑁯. 𑀅𑀜𑁆𑀜𑀦𑁆𑀢𑀺 𑀘𑀻𑀯𑀭𑀧𑀢𑁆𑀢𑀢𑁄 𑀅𑀜𑁆𑀜𑀁. 𑀅𑀧𑁆𑀧𑀕𑁆𑀖𑀦𑁆𑀢𑀺 𑀅𑀢𑀺𑀚𑀺𑀡𑁆𑀡𑀸𑀤𑀺𑀪𑀸𑀯𑁂𑀦 𑀦𑀺𑀳𑀻𑀦𑀁. 𑀢𑀢𑁄𑀢𑀺 𑀅𑀯𑀲𑁂𑀲𑀧𑀭𑀺𑀓𑁆𑀔𑀸𑀭𑀢𑁄. 𑀲𑀩𑁆𑀩𑀦𑁆𑀢𑀺 𑀧𑀢𑁆𑀢𑀁, 𑀢𑀺𑀘𑀻𑀯𑀭𑀜𑁆𑀘.

𑀢𑀢𑁆𑀣 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲𑁂𑀯. 𑀧𑀸𑀴𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓𑀦𑁆𑀢𑀺 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑀼𑀢𑁆𑀯𑀸 𑀓𑀲𑁆𑀲𑀘𑀺 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓𑀁 𑀪𑀯𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑁩𑁭𑁧-𑁨. 𑀅𑀓𑁆𑀓𑀦𑀸𑀴𑀫𑀬𑀦𑁆𑀢𑀺 𑀅𑀓𑁆𑀓𑀤𑀡𑁆𑀟𑀫𑀬𑀁. 𑀅𑀓𑁆𑀓𑀤𑀼𑀲𑁆𑀲𑀸𑀦𑀻𑀢𑀺 𑀅𑀓𑁆𑀓𑀯𑀸𑀓𑁂𑀦 𑀓𑀢𑀤𑀼𑀲𑁆𑀲𑀸𑀦𑀺, 𑀧𑁄𑀢𑁆𑀣𑀓𑀕𑀢𑀺𑀓𑀸𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀯𑀸 𑀫𑀚𑁆𑀛𑁂𑀢𑀺 𑀬𑀁 𑀦𑀺𑀝𑁆𑀞𑀺𑀢𑁂 𑀢𑀺𑀧𑀝𑁆𑀝𑀘𑀻𑀯𑀭𑀁 𑀳𑁄𑀢𑀺, 𑀢𑀲𑁆𑀲 𑀫𑀚𑁆𑀛𑁂 𑀧𑀝𑀮𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

𑁩𑁭𑁪. ‘‘𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀸𑀳𑀓𑁂 𑀅𑀲𑀢𑀺 𑀅𑀤𑀢𑁆𑀯𑀸 𑀪𑀸𑀚𑀺𑀢𑁂𑀧𑀺 𑀲𑀼𑀪𑀸𑀚𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁭𑁬. 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀤𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀧𑀘𑁆𑀙𑀸 𑀤𑁂𑀦𑁆𑀢𑀺. 𑀢𑀁 𑀬𑁂𑀳𑀺 𑀕𑀳𑀺𑀢𑀁, 𑀢𑁂 𑀪𑀸𑀕𑀺𑀦𑁄𑀯 𑀳𑁄𑀦𑁆𑀢𑀻𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀲𑀫𑀼𑀤𑁆𑀤𑁂𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀜𑁆𑀳𑀺 𑀉𑀧𑀸𑀤𑀸𑀬𑁂𑀲 𑀏𑀯𑀁 𑀯𑀼𑀢𑁆𑀢𑁄.

𑀫𑀢𑀲𑀦𑁆𑀢𑀓𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀦𑀬𑁂𑀦 ¶ 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀻𑀫𑀸𑀬 𑀤𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁂 ‘‘𑀲𑀻𑀫𑀸𑀬 𑀤𑁂𑀢𑀻’’𑀢𑀺𑀆𑀤𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑀁. ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀪𑀽𑀢𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀩𑀳𑀺 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑁄𑀧𑀺 𑀉𑀧𑀘𑀸𑀭𑀲𑀻𑀫𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀸𑀤𑀺𑀓𑀫𑁆𑀧𑀺 𑀧𑀭𑀺𑀬𑀦𑁆𑀢𑁂 𑀞𑀺𑀢𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀮𑁄𑀓𑁂 𑀕𑀸𑀫𑀲𑀻𑀫𑀸𑀤𑀬𑁄 𑀯𑀺𑀬 𑀮𑀸𑀪𑀲𑀻𑀫𑀸 𑀦𑀸𑀫 𑀯𑀺𑀲𑀼𑀁 𑀧𑀲𑀺𑀤𑁆𑀥𑀸 𑀦𑀸𑀫 𑀦𑀢𑁆𑀣𑀺, 𑀓𑁂𑀦𑀸𑀬𑀁 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀳 ‘‘𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀏𑀢𑁂𑀦 𑀦𑀸𑀬𑀁 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑀸, 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀚𑀦𑀧𑀤𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀇𑀤𑀁 𑀮𑁄𑀓𑀧𑀲𑀺𑀤𑁆𑀥𑀲𑀻𑀫𑀸𑀲𑀤𑁆𑀤𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑀁 𑀧𑀦 𑀲𑀩𑁆𑀩𑀁 𑀚𑀦𑀧𑀤𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀚𑀦𑀧𑀤𑁄 𑀏𑀯 𑀚𑀦𑀧𑀤𑀲𑀻𑀫𑀸. 𑀏𑀯𑀁 𑀭𑀝𑁆𑀞𑀲𑀻𑀫𑀸𑀤𑀻𑀲𑀼𑀧𑀺. 𑀢𑁂𑀦𑀸𑀳 ‘‘𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺.

𑀧𑀣𑀯𑀻𑀯𑁂𑀫𑀚𑁆𑀛𑁂 𑀕𑀢𑀲𑁆𑀲𑀸𑀢𑀺 𑀬𑀸𑀯 𑀉𑀤𑀓𑀧𑀭𑀺𑀬𑀦𑁆𑀢𑀸 𑀔𑀡𑁆𑀟𑀲𑀻𑀫𑀢𑁆𑀢𑀸 𑀯𑀼𑀢𑁆𑀢𑀁, 𑀉𑀧𑀘𑀸𑀭𑀲𑀻𑀫𑀸𑀤𑀻𑀲𑀼 𑀧𑀦 𑀅𑀩𑀤𑁆𑀥𑀲𑀻𑀫𑀸𑀲𑀼 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀲𑀩𑁆𑀩𑀢𑁆𑀣 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀓𑀽𑀧𑀸𑀤𑀺𑀧𑀯𑁂𑀲𑀸𑀭𑀳𑀝𑁆𑀞𑀸𑀦𑁂 𑀞𑀺𑀢𑀸𑀦𑀜𑁆𑀜𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀳𑁂𑀝𑁆𑀞𑀸 𑀲𑀻𑀫𑀸𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀢𑀁𑀢𑀁𑀲𑀻𑀫𑀝𑁆𑀞𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀓𑀯𑀸𑀴𑀲𑀻𑀫𑀸𑀬 𑀧𑀦 𑀤𑀺𑀦𑁆𑀦𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀝𑁆𑀞𑀸𑀦𑁂𑀧𑀺 𑀞𑀺𑀢𑀸𑀦𑀁 𑀧𑀸𑀧𑀼𑀡𑀸𑀢𑀺 𑀲𑀩𑁆𑀩𑀢𑁆𑀣 𑀘𑀓𑁆𑀓𑀯𑀸𑀴𑀯𑁄𑀳𑀸𑀭𑀢𑁆𑀢𑀸.

𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄𑀢𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀦𑀺𑀯𑀼𑀢𑁆𑀣𑁄. 𑀧𑀸𑀓𑀯𑀝𑁆𑀝𑀦𑁆𑀢𑀺 𑀦𑀺𑀩𑀤𑁆𑀥𑀤𑀸𑀦𑀁. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀢𑁂𑀳𑀻𑀢𑀺 𑀬𑁂𑀲𑀁 𑀲𑀫𑁆𑀫𑀼𑀔𑁂 𑀏𑀲 𑀤𑁂𑀢𑀺, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂𑀢𑀺 𑀬𑀸𑀯 𑀲𑀗𑁆𑀖𑀦𑀯𑀓𑀸 𑀏𑀓𑀯𑀸𑀭𑀁 𑀲𑀩𑁆𑀩𑁂𑀲𑀁 𑀪𑀸𑀕𑀁 𑀤𑀢𑁆𑀯𑀸 𑀘𑀻𑀯𑀭𑁂 𑀅𑀧𑀭𑀺𑀓𑁆𑀔𑀻𑀡𑁂 𑀧𑀼𑀦 𑀲𑀩𑁆𑀩𑁂𑀲𑀁 𑀤𑀸𑀢𑀼𑀁 𑀤𑀼𑀢𑀺𑀬𑀪𑀸𑀕𑁂 𑀣𑁂𑀭𑀲𑁆𑀲 𑀤𑀺𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀢𑀼𑀬𑁆𑀳𑀁 𑀤𑁂𑀫𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 ¶ 𑀯𑀝𑁆𑀝𑁂𑀬𑁆𑀬, ‘‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫, 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀘𑀦𑀢𑁄 𑀪𑁂𑀤𑁄 𑀦 𑀤𑀺𑀲𑁆𑀲𑀢𑀺. 𑀯𑀻𑀫𑀁𑀲𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑀁.

𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀧𑀓𑁆𑀔𑁂 𑀲𑀗𑁆𑀖𑀲𑁆𑀲 𑀧𑀘𑁆𑀘𑁂𑀓𑀁 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀕𑀡𑀦𑀸𑀬 𑀪𑀸𑀕𑁄 𑀤𑀸𑀢𑀩𑁆𑀩𑁄𑀢𑀺 𑀤𑀸𑀬𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄𑀢𑀺 𑀲𑀺𑀚𑁆𑀛𑀢𑀺, 𑀢𑀣𑀸 𑀤𑀸𑀦𑀜𑁆𑀘 𑀪𑀺𑀓𑁆𑀔𑀽𑀧𑀺 𑀕𑀡𑁂𑀢𑁆𑀯𑀸 𑀤𑀺𑀦𑁆𑀦𑁂 𑀏𑀯 𑀬𑀼𑀚𑁆𑀚𑀢𑀺. 𑀇𑀢𑀭𑀣𑀸 𑀳𑀺 𑀓𑀺𑀢𑁆𑀢𑀓𑀁 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀁, 𑀓𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀦𑀻𑀦𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀫𑁆𑀧𑀺 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑀤𑀺𑀲𑀫𑁂𑀯𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀕𑁆𑀕𑀮𑁄 ¶ …𑀧𑁂… 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖-𑀲𑀤𑁆𑀤𑁂𑀦 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀕𑀳𑀺𑀢𑀢𑁆𑀢𑀸, 𑀧𑀼𑀕𑁆𑀕𑀮𑀲𑁆𑀲 𑀧𑀦 ‘‘𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀘 𑀢𑀢𑁆𑀣𑀲𑁆𑀲 𑀅𑀕𑁆𑀕𑀳𑀺𑀢𑀢𑀸 𑀤𑀝𑁆𑀞𑀩𑁆𑀩𑀸, ‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀲𑀤𑀺𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑀧𑁆𑀧𑀥𑀸𑀦𑁄 𑀳𑁂𑀢𑁆𑀣 𑀲𑀗𑁆𑀖-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁭𑁯) 𑀧𑀸𑀞𑀁 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀢𑀲𑁆𑀲 𑀯𑀺𑀲𑀼𑀁 𑀮𑀸𑀪𑀕𑁆𑀕𑀳𑀡𑁂 𑀓𑀸𑀭𑀡𑀯𑀘𑀦𑀢𑁆𑀢𑀸. 𑀢𑀣𑀸 𑀳𑀺 𑀯𑀺𑀲𑀼𑀁 𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸𑀢𑀺 𑀯𑀺𑀲𑀼𑀁 𑀧𑀼𑀕𑁆𑀕𑀮𑀲𑁆𑀲𑀧𑀺 𑀪𑀸𑀕𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀅𑀕𑁆𑀕𑀳𑀡𑀁, 𑀏𑀯𑀁 𑀉𑀧𑀭𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀗𑁆𑀖𑀸𑀤𑀺-𑀲𑀤𑁆𑀤𑁂𑀳𑀺 𑀧𑀼𑀕𑁆𑀕𑀮𑀲𑁆𑀲 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀕𑀳𑀡𑀁 𑀲𑀺𑀬𑀸, 𑀲𑀗𑁆𑀖𑀢𑁄𑀧𑀺, 𑀯𑀺𑀲𑀼𑀫𑁆𑀧𑀻𑀢𑀺 𑀪𑀸𑀕𑀤𑁆𑀯𑀬𑀁 𑀮𑀪𑁂𑀬𑁆𑀬 𑀉𑀪𑀬𑀢𑁆𑀣 𑀕𑀳𑀺𑀢𑀢𑁆𑀢𑀸.

𑀧𑀽𑀚𑁂𑀢𑀩𑁆𑀩𑀦𑁆𑀢𑀺𑀆𑀤𑀺 𑀕𑀺𑀳𑀺𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀇𑀤𑀁 𑀧𑀺𑀡𑁆𑀟𑀧𑀸𑀢𑀳𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀅𑀦𑁆𑀢𑁄𑀳𑁂𑀫𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀤𑀺𑀦𑁆𑀦𑀁 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀜𑁆𑀜𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀧𑀭𑀁 𑀳𑁂𑀫𑀦𑁆𑀢𑁂 𑀤𑀺𑀦𑁆𑀦𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀢𑁆𑀢𑀸 𑀧𑀸𑀧𑀼𑀡𑀸𑀢𑀺. 𑀳𑁂𑀫𑀦𑁆𑀢𑀢𑁄 𑀧𑀦 𑀧𑀭𑀁 𑀧𑀺𑀝𑁆𑀞𑀺𑀲𑀫𑀬𑁂 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀅𑀦𑀦𑁆𑀢𑀭𑁂 𑀯𑀲𑁆𑀲𑁂 𑀯𑀸 𑀢𑀢𑁄 𑀧𑀭𑁂𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀲𑁆𑀫𑀺𑀁 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂 𑀧𑀦 𑀲𑀩𑁆𑀩𑀣𑀸 𑀅𑀯𑀼𑀢𑁆𑀣𑀯𑀲𑁆𑀲𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀳𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀪𑀸𑀯𑁂 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀅𑀢𑁆𑀣𑁄 ¶ 𑀤𑀝𑁆𑀞𑀩𑁆𑀩𑁄. ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑀻𑀢𑀯𑀲𑁆𑀲𑀦𑁆𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀯𑀲𑁆𑀲𑀁.

𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄𑀢𑀺 𑀉𑀤𑁆𑀤𑁂𑀲𑁂 𑀅𑀕𑁆𑀕𑀳𑀺𑀢𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑁄𑀯𑀸𑀢𑀺 𑀯𑀼𑀢𑁆𑀢𑀁. 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀉𑀤𑁆𑀤𑁂𑀲𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄. ‘‘𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦’’𑀦𑁆𑀢𑀺 𑀇𑀤𑀁 ‘‘𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦’’𑀦𑁆𑀢𑀺 𑀇𑀫𑀲𑁆𑀲𑁂𑀯 𑀯𑀺𑀲𑁂𑀲𑀦𑀁, 𑀢𑁂𑀦 𑀉𑀤𑁆𑀤𑁂𑀲𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦𑀺𑀯𑀲𑀦𑁆𑀢𑁂 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑁂 𑀦𑀺𑀯𑀢𑁆𑀢𑁂𑀢𑀺.

𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁯. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁄

𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁮𑁦. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 ¶ ¶ 𑀢𑀦𑁆𑀢𑀺𑀩𑀤𑁆𑀥𑁄𑀢𑀺 𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀭𑁄, 𑀢𑀢𑁆𑀣 𑀩𑀤𑁆𑀥𑁄, 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀆𑀯𑀸𑀲𑁂’’𑀢𑀺𑀆𑀤𑀺.

𑁩𑁮𑁭-𑁮. 𑀳𑀸𑀧𑀦𑀁 𑀯𑀸 𑀅𑀜𑁆𑀜𑀣𑀸 𑀓𑀭𑀡𑀁 𑀯𑀸 𑀦𑀢𑁆𑀣𑀻𑀢𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀜𑀢𑁆𑀢𑀺𑀬𑀸 𑀏𑀓𑀢𑁆𑀢𑀸 𑀳𑀸𑀧𑀦𑀁 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀲𑀸 𑀏𑀓𑀢𑁆𑀢𑀸 𑀏𑀯 𑀧𑀘𑁆𑀙𑀸 𑀜𑀢𑁆𑀢𑀺𑀞𑀧𑀦𑀯𑀲𑁂𑀦, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀞𑀧𑀦𑀯𑀲𑁂𑀦 𑀘 𑀅𑀜𑁆𑀜𑀣𑀸 𑀓𑀭𑀡𑀁 𑀦𑀢𑁆𑀣𑀺. 𑀧𑀭𑀢𑁄𑀢𑀺 𑀧𑀭𑀺𑀯𑀸𑀭𑁂. 𑀢𑀦𑁆𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁, 𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀦𑀺𑀲𑁆𑀲𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁯𑁫. 𑀏𑀲𑀸𑀢𑀺 ‘‘𑀩𑀸𑀮𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀧𑀼𑀕𑁆𑀕𑀮𑁄, 𑀅𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀆𑀯𑁂𑀡𑀺𑀓𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀲𑀸𑀥𑀸𑀭𑀡𑀪𑀽𑀢𑁂𑀦 𑀓𑀼𑀮𑀤𑀽𑀲𑀓𑀪𑀸𑀯𑁂𑀦. 𑀬𑀤𑀺 𑀳𑁂𑀲 𑀢𑀁 𑀓𑀫𑁆𑀫𑀁 𑀅𑀧𑁆𑀧𑀢𑁆𑀢𑁄, 𑀓𑀣𑀁 𑀧𑀦 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀲𑁆𑀲 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀼𑀦𑀺𑀲𑁆𑀲𑀸𑀭𑀺𑀢𑁄’’𑀢𑀺. 𑀢𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁭) 𑀯𑀼𑀢𑁆𑀢𑀁.

𑀏𑀢𑁆𑀣 𑀧𑀦 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀢𑁂𑀭𑀲𑀓𑀓𑀡𑁆𑀟𑀓𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀬𑀲𑁆𑀫𑀺𑀁 𑀕𑀸𑀫𑁂 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦 𑀯𑀲𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁩) 𑀬𑀸 𑀲𑀫𑁆𑀫𑀸𑀯𑀢𑁆𑀢𑀦𑀸 𑀯𑀼𑀢𑁆𑀢𑀸, 𑀲𑀸 𑀇𑀢𑀭𑁂𑀦𑀸𑀧𑀺 ¶ 𑀧𑀽𑀭𑁂𑀢𑀩𑁆𑀩𑀸. 𑀬𑀁 𑀧𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀫𑁆𑀫𑀲𑁆𑀲 𑀓𑀼𑀮𑀤𑀽𑀲𑀓𑀲𑁆𑀲 𑀢𑀢𑁆𑀣𑁂𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁂𑀲𑀼 𑀓𑀼𑀮𑁂𑀲𑀼 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀢𑀢𑁄 𑀧𑀘𑁆𑀘𑀬𑀸 𑀦 𑀕𑀳𑁂𑀢𑀩𑁆𑀩𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀦 𑀧𑀽𑀭𑁂𑀢𑀩𑁆𑀩𑀁 𑀓𑀼𑀮𑀲𑀗𑁆𑀕𑀳𑀲𑁆𑀲 𑀅𑀓𑀢𑀢𑁆𑀢𑀸. 𑀏𑀯𑀁 𑀲𑁂𑀲𑀓𑀫𑁆𑀫𑁂𑀲𑀼𑀧𑀺. 𑀬𑀤𑀺 𑀏𑀯𑀁 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 ¶ 𑀦𑀺𑀬𑀲𑀓𑀫𑁆𑀫𑀁 𑀓𑀭𑁄𑀢𑀺…𑀧𑁂… 𑀏𑀯𑀁 𑀔𑁄, 𑀉𑀧𑀸𑀮𑀺, 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁 (𑀫𑀳𑀸𑀯. 𑁪𑁦𑁨) 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀗𑁆𑀖𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀸𑀭𑀳𑀢𑁆𑀢𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀬𑀲𑁆𑀲 𑀳𑀺 𑀲𑀗𑁆𑀖𑁄 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀦𑁆𑀢𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺. 𑀲𑀘𑁂 𑀧𑀦 ‘‘𑀢𑀲𑁆𑀲𑁂𑀯 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀫𑁂𑀯 𑀓𑀭𑁄𑀫𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀤𑁂𑀯 𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀫𑀺𑀥 ‘‘𑀦𑀺𑀲𑁆𑀲𑀸𑀭𑀡’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀜𑁆𑀜𑁂𑀲𑀁 𑀢𑀚𑁆𑀚𑀦𑀻𑀬𑀸𑀤𑀻𑀦𑀁 𑀯𑀲𑁂𑀦 𑀦𑀺𑀲𑁆𑀲𑀸𑀭𑀡𑁂 𑀅𑀥𑀺𑀧𑁆𑀧𑁂𑀢𑁂 ‘‘𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡’’𑀦𑁆𑀢𑀺 𑀇𑀫𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀫𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁, ‘‘𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺. 𑀲𑀼𑀦𑀺𑀲𑁆𑀲𑀸𑀭𑀺𑀢𑁄’’𑀢𑀺 𑀅𑀢𑁆𑀣𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀻𑀢𑀺 𑀲𑀘𑁂 𑀲𑀗𑁆𑀖𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀯𑀺𑀲𑀬𑁂, 𑀏𑀓𑁂𑀦𑀸𑀧𑀺 𑀅𑀗𑁆𑀕𑁂𑀦 𑀦𑀺𑀲𑁆𑀲𑀸𑀭𑀡𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀦𑁆𑀢𑀺 𑀏𑀢𑁆𑀣 𑀆𑀧𑀦𑁆𑀦𑁄 𑀆𑀯𑁂𑀡𑀺𑀓𑀯𑀲𑁂𑀦 𑀢𑀚𑁆𑀚𑀦𑀻𑀬𑀸𑀤𑀺𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀸𑀭𑀡𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀤𑁆𑀯𑁂𑀦𑀺𑀲𑁆𑀲𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 ¶ ¶ 𑀲𑀘𑁂 𑀳𑁄𑀢𑀺, 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀯𑀺𑀦𑀬𑀥𑀭𑀲𑁆𑀲 𑀯𑀘𑀦𑁂𑀦 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀏𑀯𑀫𑀸𑀳. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀆𑀧𑀢𑁆𑀢𑀻𑀢𑀺 𑀉𑀤𑀓𑀲𑁆𑀲 𑀞𑀧𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀞𑀧𑀺𑀢𑀁 𑀙𑀟𑁆𑀟𑁂𑀢𑁆𑀯𑀸 𑀯𑀺𑀲𑁆𑀲𑀭𑀺𑀢𑁆𑀯𑀸 𑀯𑀸 𑀕𑀫𑀦𑁂 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀧𑀓𑁆𑀔𑁄𑀧𑀺 𑀲𑀫𑁆𑀪𑀯𑀢𑀻𑀢𑀺 𑀯𑀺𑀦𑀬𑀥𑀭𑁄 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀏𑀯𑀫𑀸𑀳. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀲𑀸𑀬𑀧𑀺𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀅𑀜𑁆𑀜𑁂’’𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁. 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀢𑀸𑀬 𑀯𑀺𑀦𑀬𑀥𑀭𑀲𑁆𑀲 𑀯𑀘𑀦𑀫𑀢𑁆𑀢𑁂𑀦 𑀲𑁄 𑀏𑀯𑀫𑀳𑁄𑀲𑀺, 𑀲𑀸 𑀧𑀦𑀲𑁆𑀲 𑀆𑀧𑀢𑁆𑀢𑀺 𑀏𑀯 𑀉𑀤𑀓𑀸𑀯𑀲𑁂𑀲𑀲𑁆𑀲 𑀞𑀧𑀦𑀪𑀸𑀯𑀁 𑀜𑀢𑁆𑀯𑀸 𑀞𑀧𑀺𑀢𑀢𑁆𑀢𑀸. 𑀯𑀢𑁆𑀣𑀼𑀫𑀢𑁆𑀢𑀚𑀸𑀦𑀦𑁂 𑀏𑀯 𑀳𑀺 𑀲𑁂𑀔𑀺𑀬𑀸 𑀲𑀘𑀺𑀢𑁆𑀢𑀓𑀸, 𑀦 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑁂. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀲𑀩𑁆𑀩𑀢𑁆𑀣 𑀆𑀧𑀢𑁆𑀢𑀺 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄’’𑀢𑀺 𑀇𑀤𑀁 𑀯𑀺𑀦𑀬𑀥𑀭𑀢𑁆𑀣𑁂𑀭𑁄 ‘‘𑀢𑀬𑀸 𑀇𑀤𑀁 𑀉𑀤𑀓𑀁 𑀞𑀧𑀺𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀧𑀼𑀝𑁆𑀞𑁂𑀦 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑁂𑀦 ‘‘𑀆𑀫𑀸𑀯𑀼𑀲𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀲𑀭𑀺𑀢𑁆𑀯𑀸 𑀧𑀡𑁆𑀡𑀢𑁆𑀢𑀺𑀅𑀓𑁄𑀯𑀺𑀤𑀢𑀸𑀬 𑀲𑀜𑁆𑀘𑀺𑀘𑁆𑀘𑁂𑀯 𑀅𑀓𑀸𑀲𑀻𑀢𑀺 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑀼𑀢𑁆𑀯𑀸𑀯 𑀅𑀯𑁄𑀘. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁪𑁫𑁩. ‘‘𑀦 𑀢𑀸𑀯 𑀪𑀺𑀦𑁆𑀦𑁄’’𑀢𑀺 𑀇𑀤𑀁 𑀉𑀓𑁆𑀔𑀺𑀧𑀦𑀢𑀤𑀦𑀼𑀯𑀢𑁆𑀢𑀦𑀫𑀢𑁆𑀢𑁂𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀦 𑀳𑁄𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀧𑀦 𑀉𑀪𑀬𑀧𑀓𑁆𑀔𑀺𑀓𑀸𑀦𑀁 𑀧𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀓𑁄𑀥𑀯𑀲𑁂𑀦 𑀓𑀸𑀬𑀯𑀘𑀻𑀓𑀮𑀳𑀯𑀟𑁆𑀠𑀦𑁂𑀦𑁂𑀯 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑁄 𑀘 𑀔𑁄 𑀓𑀮𑀳𑀯𑀲𑁂𑀦𑀸’’𑀢𑀺. 𑀲𑀫𑁆𑀪𑀫𑀅𑀢𑁆𑀣𑀯𑀲𑁂𑀦𑀸𑀢𑀺 𑀢𑀼𑀭𑀺𑀢𑀢𑁆𑀣𑀯𑀲𑁂𑀦.

𑁪𑁫𑁪. 𑀅𑀓𑀸𑀭𑀡𑁂𑀢𑀺𑀆𑀤𑀺 ¶ 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀉𑀧𑀸𑀬𑁂𑀦 𑀲𑀜𑁆𑀜𑀸𑀧𑁂𑀢𑁆𑀯𑀸 𑀳𑀺𑀢𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀢𑁄 𑀫𑁄𑀘𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀓𑁄𑀥𑀘𑀺𑀢𑁆𑀢𑀯𑀲𑁂𑀦 𑀯𑀺𑀳𑁂𑀞𑀦𑀢𑁆𑀣𑀸𑀬 𑀓𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀓𑀫𑁆𑀫𑀗𑁆𑀕𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬. 𑀢𑁂𑀦𑁂𑀯 ¶ 𑀧𑀸𑀴𑀺𑀬𑀁 ‘‘𑀆𑀧𑀢𑁆𑀢𑀺 𑀏𑀲𑀸, 𑀪𑀺𑀓𑁆𑀔𑀯𑁂, 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺…𑀧𑁂… 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁫𑁫. ‘‘𑀅𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑀻𑀦𑀁 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀥𑀫𑁆𑀫𑀯𑀸𑀤𑀻𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀺 𑀏𑀯. 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀢𑀁 𑀯𑀺𑀦𑀸 𑀕𑀡𑀲𑁆𑀲 𑀅𑀧𑀽𑀭𑀡𑀧𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸𑀢𑀺 𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀯𑀸 𑀅𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑁂 𑀥𑀫𑁆𑀫𑀯𑀸𑀤𑀺𑀦𑁄𑀢𑀺 𑀕𑀡𑁆𑀳𑀸𑀢𑀻𑀢𑀺 𑀢𑀁𑀢𑀁𑀧𑀓𑁆𑀔𑀕𑀢𑁂 𑀪𑀺𑀓𑁆𑀔𑀽 𑀬𑀸𑀣𑀸𑀯𑀢𑁄 𑀯𑀸 𑀅𑀬𑀸𑀣𑀸𑀯𑀢𑁄 𑀯𑀸 ‘‘𑀇𑀫𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀕𑀡𑁆𑀳𑀸𑀢𑀺, 𑀅𑀬𑀁 𑀢𑀁𑀢𑀁𑀧𑀓𑁆𑀔𑀕𑀢𑀸𑀦𑀁 𑀅𑀢𑁆𑀢𑀸𑀦𑀁 𑀲𑀫𑀸𑀦𑀲𑀁𑀯𑀸𑀲𑀓𑀁 𑀓𑀭𑁄𑀢𑀺.

𑁪𑁫𑁬. 𑀉𑀧𑀤𑀁𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀧𑀸𑀴𑀺𑀬𑀁 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀏𑀢𑁆𑀢𑀓𑀧𑀤𑁂𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀫𑀬𑀁 𑀓𑁄𑀥𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀸𑀤𑀺𑀁 𑀧𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀲𑀮𑁆𑀮𑁂𑀓𑁆𑀔𑁂𑀢𑁆𑀯𑀸 𑀤𑀽𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺.

𑁪𑁫𑁭. 𑀧𑀸𑀴𑀺𑀬𑀁 𑀪𑀡𑁆𑀟𑀦𑀚𑀸𑀢𑀸𑀢𑀺𑀆𑀤𑀻𑀲𑀼 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀪𑀡𑁆𑀟𑀦𑀁 𑀦𑀸𑀫. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺 𑀓𑀮𑀳𑁄 𑀦𑀸𑀫. 𑀯𑀺𑀭𑀼𑀤𑁆𑀥𑀯𑀸𑀤𑁄 𑀯𑀺𑀯𑀸𑀤𑁄 𑀦𑀸𑀫.

𑁪𑁫𑁮. 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀏𑀢𑁆𑀣 𑀓𑁄𑀲𑁄 𑀦𑀸𑀫 𑀲𑀼𑀯𑀡𑁆𑀡𑀫𑀡𑀺𑀆𑀤𑀺𑀪𑀡𑁆𑀟𑀸𑀕𑀸𑀭𑀲𑀸𑀭𑀕𑀩𑁆𑀪𑁄. 𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀲𑁆𑀲 𑀆𑀯𑀲𑀦𑀝𑁆𑀞𑀸𑀦𑀁, 𑀓𑁄𑀝𑁆𑀞𑀪𑀽𑀢𑀁 𑀅𑀕𑀸𑀭𑀁 𑀓𑁄𑀝𑁆𑀞𑀸𑀕𑀸𑀭𑀁, 𑀥𑀜𑁆𑀜𑀲𑀗𑁆𑀕𑀳𑀝𑁆𑀞𑀸𑀦𑀁. 𑀅𑀩𑁆𑀪𑀼𑀬𑁆𑀬𑀸𑀲𑀻𑀢𑀺 𑀬𑀼𑀤𑁆𑀥𑀸𑀬 𑀅𑀪𑀺𑀫𑀼𑀔𑁄 𑀦𑀺𑀓𑁆𑀔𑀫𑀻𑀢𑀺 𑀅𑀢𑁆𑀣𑁄. 𑀏𑀓𑀲𑀗𑁆𑀖𑀸𑀢𑀫𑁆𑀧𑀻𑀢𑀺 𑀏𑀓𑀬𑀼𑀤𑁆𑀥𑀫𑁆𑀧𑀺. 𑀥𑁄𑀯𑀦𑀦𑁆𑀢𑀺 𑀥𑁄𑀯𑀦𑀼𑀤𑀓𑀁.

𑁪𑁬𑁩. 𑀧𑀭𑀺𑀬𑀸𑀤𑀺𑀦𑁆𑀦𑀭𑀽𑀧𑀸𑀢𑀺 𑀓𑁄𑀥𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀲𑀪𑀸𑀯𑀸.

𑁪𑁬𑁪. 𑀢𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀢𑀁 𑀓𑀮𑀳𑀁 𑀦 𑀚𑀸𑀦𑀦𑁆𑀢𑀺. 𑀬𑁂 𑀉𑀧𑀦𑀬𑁆𑀳𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀓𑁄𑀥𑀸𑀓𑀸𑀭𑀁 𑀘𑀺𑀢𑁆𑀢𑁂 𑀩𑀦𑁆𑀥𑀦𑁆𑀢𑀺. 𑀧𑀸𑀓𑀝𑀧𑀭𑀺𑀲𑁆𑀲𑀬𑁂𑀢𑀺 𑀲𑀻𑀳𑀸𑀤𑀺𑀓𑁂. 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂𑀢𑀺 𑀭𑀸𑀕𑀸𑀤𑀺𑀓𑁂. 𑀧𑀸𑀴𑀺𑀬𑀁 𑀦𑀢𑁆𑀣𑀺 𑀩𑀸𑀮𑁂 𑁯𑁭 𑀲𑀳𑀸𑀬𑀢𑀸𑀢𑀺 𑀩𑀸𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑀸𑀤𑀺𑀕𑀼𑀡𑀲𑀗𑁆𑀔𑀸𑀢𑀸 𑀲𑀳𑀸𑀬𑀢𑀸 𑀦𑀢𑁆𑀣𑀺, 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁬𑁬. 𑀅𑀢𑁆𑀢𑀓𑀸𑀫𑀭𑀽𑀧𑀸𑀢𑀺 ¶ 𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑀬𑀫𑀸𑀦𑀲𑀪𑀸𑀯𑀸. 𑀅𑀦𑀼𑀭𑀼𑀤𑁆𑀥𑀸𑀢𑀺 𑀏𑀓𑀲𑁂𑀲𑀦𑀬𑁂𑀦 𑀢𑀺𑀡𑁆𑀡𑀫𑁆𑀧𑀺 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀮𑀧𑀦𑀁, 𑀢𑁂𑀦𑁂𑀯 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀔𑀫𑀦𑀻𑀬𑀁 𑀲𑀭𑀻𑀭𑀁 𑀬𑀸𑀧𑀦𑀻𑀬𑀁 𑀚𑀻𑀯𑀺𑀢𑀁 ‘‘𑀓𑀘𑁆𑀘𑀺 𑀯𑁄 𑀲𑀭𑀻𑀭𑀜𑁆𑀘 𑀥𑀸𑀭𑁂𑀢𑀼𑀁, 𑀚𑀻𑀯𑀺𑀢𑀜𑁆𑀘 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸’’𑀢𑀺 𑀧𑀼𑀘𑁆𑀙𑀢𑀺. 𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀓𑀁𑀲𑁂𑀦 𑀫𑀬𑀁 𑀪𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀣𑀦𑁆𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸𑀓𑀣𑀦𑁆𑀢𑀺 𑀯𑀸 𑀏𑀓𑁄 𑀦𑀺𑀧𑀸𑀢𑁄 𑀓𑀸𑀭𑀡𑀧𑀼𑀘𑁆𑀙𑀦𑀢𑁆𑀣𑁄, 𑀓𑁂𑀦 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺 𑀏𑀓𑀲𑁆𑀲 𑀘𑀺𑀢𑁆𑀢𑀯𑀲𑁂𑀦 𑀇𑀢𑀭𑁂𑀲𑀫𑁆𑀧𑀺 𑀧𑀯𑀢𑁆𑀢𑀦𑀢𑁄 𑀲𑀩𑁆𑀩𑁂𑀲𑀁 𑀦𑁄 𑀏𑀓𑀁 𑀯𑀺𑀬 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀸, 𑀓𑀘𑁆𑀘𑀺 𑀢𑀼𑀫𑁆𑀳𑁂𑀢𑀺 𑀅𑀢𑁆𑀣𑁄. 𑀅𑀫𑁆𑀳𑀸𑀓𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀅𑀫𑁆𑀳𑁂𑀲𑀼 𑀢𑀻𑀲𑀼 𑀬𑁄 𑀧𑀞𑀫𑀁 𑀧𑀝𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄.

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁬𑁭. 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀬𑀢𑁆𑀣 𑀧𑀸𑀮𑀺𑀮𑁂𑀬𑁆𑀬𑀓𑁄 𑀕𑀸𑀫𑁄, 𑀢𑀢𑁆𑀣 𑀅𑀯𑀲𑀭𑀻𑀢𑀺 𑀅𑀢𑁆𑀣𑁄. 𑀤𑀳𑀭𑀧𑁄𑀢𑀓𑁂𑀳𑀻𑀢𑀺 𑀪𑀺𑀗𑁆𑀓𑀘𑁆𑀙𑀸𑀧𑁂𑀳𑀺. ‘‘𑀑𑀕𑀸𑀳𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀦𑀳𑀸𑀦𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀅𑀢𑁆𑀣𑁄.

𑀉𑀤𑀸𑀦𑀕𑀸𑀣𑀸𑀬𑀁 𑀧𑀦 𑁋 𑀭𑀣𑀈𑀲𑀲𑀤𑀺𑀲𑀤𑀦𑁆𑀢𑀲𑁆𑀲 𑀦𑀸𑀕𑀲𑁆𑀲 𑀳𑀢𑁆𑀣𑀺𑀦𑁄 𑀏𑀢𑀁 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀦𑀸𑀕𑁂𑀦 𑀩𑀼𑀤𑁆𑀥𑀦𑀸𑀕𑀲𑁆𑀲 𑀯𑀺𑀯𑁂𑀓𑀦𑀺𑀦𑁆𑀦𑀘𑀺𑀢𑁆𑀢𑁂𑀦 𑀲𑀫𑁂𑀢𑀺. 𑀓𑀲𑁆𑀫𑀸? 𑀬𑀁 𑀬𑀲𑁆𑀫𑀸 𑀏𑀓𑁄𑀯 𑀭𑀫𑀢𑀺 𑀯𑀦𑁂, 𑀢𑀲𑁆𑀫𑀸 𑀏𑀯𑀁 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁬𑁮. 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻𑀢𑀺 𑀬𑀣𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀞𑀺𑀢𑁄, 𑀢𑀣𑀸 𑀢𑀺𑀝𑁆𑀞, 𑀥𑀫𑁆𑀫𑀯𑀸𑀤𑀻𑀧𑀓𑁆𑀔𑁂 𑀢𑀺𑀝𑁆𑀞𑀸𑀢𑀺 𑀅𑀢𑁆𑀣𑁄.

𑁪𑁭𑁩. ‘‘𑀬𑁄 ¶ 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀲𑀸𑀫𑀕𑁆𑀕𑀻𑀪𑁂𑀤𑀲𑁆𑀲 𑀅𑀓𑀸𑀭𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀧𑀦 𑀪𑁂𑀤𑀓𑀸𑀭𑀓𑀸 𑀯𑀺𑀭𑀼𑀤𑁆𑀥𑀸 𑀅𑀮𑀚𑁆𑀚𑀺𑀦𑁄 ¶ , 𑀢𑁂𑀲𑀁 𑀧𑀝𑀺𑀩𑀸𑀳𑀺𑀢𑀼𑀁 𑀯𑀝𑁆𑀝𑀢𑀺 𑀢𑁂𑀲𑀁 𑀲𑀦𑁆𑀢𑀓𑀲𑁆𑀲𑀧𑀺 𑀲𑁂𑀦𑀸𑀲𑀦𑀲𑁆𑀲 𑀯𑀺𑀦𑀸𑀲𑀦𑀯𑀘𑀦𑀢𑁄. ‘‘𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀬𑀣𑀸𑀯𑀼𑀟𑁆𑀠𑀁 𑀯𑀭𑀲𑁂𑀦𑀸𑀲𑀦𑀁 𑀅𑀤𑀢𑁆𑀯𑀸 𑀯𑀼𑀟𑁆𑀠𑀸𑀦𑀫𑁆𑀧𑀺 𑀅𑀲𑀜𑁆𑀜𑀢𑀸𑀦𑀁 𑀲𑀜𑁆𑀜𑀢𑁂𑀳𑀺 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁭𑁫. 𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀉𑀓𑁆𑀔𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀬𑀸𑀧𑀦𑁆𑀦𑀪𑀸𑀯𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀲𑀫𑁆𑀫𑀸𑀯𑀢𑁆𑀢𑀦𑁂𑀦 𑀉𑀓𑁆𑀔𑁂𑀧𑀓𑀸𑀦𑀁 𑀲𑀫𑀼𑀧𑁆𑀧𑀦𑁆𑀦𑀑𑀲𑀸𑀭𑀡𑀘𑁆𑀙𑀦𑁆𑀤𑀲𑁆𑀲 𑀧𑀕𑁂𑀯 𑀜𑀸𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀓𑀫𑁆𑀫𑀯𑀸𑀘𑀸𑀬 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀲𑀬𑀫𑁂𑀯 𑀦𑀁 𑀑𑀲𑀸𑀭𑁂𑀲𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁭𑁬. 𑀅𑀢𑁆𑀣𑀢𑁄 𑀅𑀧𑀕𑀢𑀸𑀢𑀺 𑀲𑀸𑀫𑀕𑁆𑀕𑀻𑀅𑀢𑁆𑀣𑀯𑀺𑀭𑀳𑀺𑀢𑀸, 𑀢𑀼𑀘𑁆𑀙𑀩𑁆𑀬𑀜𑁆𑀚𑀦𑀸𑀢𑀺 𑀅𑀢𑁆𑀣𑁄.

𑁪𑁭𑁭. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀘𑀸𑀭𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀲𑀼𑀦𑁆𑀤𑀭𑀸𑀘𑀸𑀭𑁄. 𑀅𑀦𑀧𑀕𑀢𑀦𑁆𑀢𑀺 𑀓𑀸𑀭𑀡𑀢𑁄 𑀅𑀦𑀧𑁂𑀢𑀁. 𑀆𑀤𑀸𑀢𑀩𑁆𑀩𑀢𑁄 𑀕𑀳𑁂𑀢𑀩𑁆𑀩𑀢𑁄 𑀆𑀤𑀸𑀬𑀦𑁆𑀢𑀺 𑀆𑀘𑀭𑀺𑀬𑀯𑀸𑀤𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀆𑀤𑀸𑀬𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤’’𑀦𑁆𑀢𑀺.

𑀅𑀝𑁆𑀞𑀳𑀺 𑀤𑀽𑀢𑀗𑁆𑀕𑁂𑀳𑀻𑀢𑀺 ‘‘𑀲𑁄𑀢𑀸 𑀘 𑀳𑁄𑀢𑀺 𑀲𑀸𑀯𑁂𑀢𑀸 𑀘 𑀉𑀕𑁆𑀕𑀳𑁂𑀢𑀸 𑀘 𑀥𑀸𑀭𑁂𑀢𑀸 𑀘 𑀯𑀺𑀜𑁆𑀜𑀸𑀢𑀸 𑀘 𑀯𑀺𑀜𑁆𑀜𑀸𑀧𑁂𑀢𑀸 𑀘 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲 𑀦𑁄 𑀘 𑀓𑀮𑀳𑀓𑀸𑀭𑀓𑁄’’𑀢𑀺 (𑀅. 𑀦𑀺. 𑁮.𑁧𑁬) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀤𑀽𑀢𑀗𑁆𑀕𑁂𑀳𑀺. 𑀲𑁂𑀲𑀫𑁂𑀢𑁆𑀣, 𑀳𑁂𑀝𑁆𑀞𑀸 𑀘 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸

𑁧. 𑀓𑀫𑁆𑀫𑀓𑁆𑀔𑀦𑁆𑀥𑀓𑁄

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁧. 𑀘𑀽𑀴𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑁂 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀢𑀸𑀯 ‘‘𑀩𑀮𑀯𑀸𑀩𑀮𑀯’’𑀦𑁆𑀢𑀺 𑀇𑀤𑀁 𑀏𑀓𑀧𑀤𑀁. ‘‘𑀩𑀮𑀯𑀩𑀮𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀆𑀓𑀸𑀭𑀁 𑀓𑀢𑁆𑀯𑀸 ‘‘𑀩𑀮𑀯𑀸𑀩𑀮𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘 ‘‘𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀢𑀺𑀲𑀬𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀩𑀮𑀯𑀁 𑀧𑀝𑀺𑀯𑀤𑀣𑀸’’𑀢𑀺, 𑀅𑀢𑀺 𑀯𑀺𑀬 𑀩𑀮𑀯𑀁 𑀓𑀢𑁆𑀯𑀸 𑀧𑀝𑀺𑀯𑀘𑀦𑀁 𑀤𑁂𑀣𑀸𑀢𑀺 𑀅𑀢𑁆𑀣𑁄.

𑁨. 𑀧𑀸𑀴𑀺𑀬𑀁 𑀆𑀧𑀢𑁆𑀢𑀺 𑀆𑀭𑁄𑀧𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀫𑀸 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀲𑁄 𑀅𑀚𑁂𑀲𑀻’’𑀢𑀺𑀆𑀤𑀺𑀓𑁂 𑀪𑀡𑁆𑀟𑀦𑀸𑀤𑀺𑀚𑀦𑀓𑁂 𑀯𑀘𑀦𑁂 𑀧𑀜𑁆𑀜𑀢𑁆𑀢𑀸 𑀓𑀸𑀘𑀺 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺 𑀫𑀼𑀲𑀸𑀧𑁂𑀲𑀼𑀜𑁆𑀜𑀸𑀤𑀻𑀲𑀼 𑀏𑀢𑀲𑁆𑀲 𑀅𑀧𑁆𑀧𑀯𑀺𑀝𑁆𑀞𑀢𑁆𑀢𑀸, 𑀢𑀣𑀸𑀧𑀺 𑀪𑀺𑀓𑁆𑀔𑀽𑀳𑀺 𑀯𑀺𑀲𑀼𑀁, 𑀲𑀗𑁆𑀖𑀫𑀚𑁆𑀛𑁂 𑀘 ‘‘𑀫𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀽 ¶ 𑀅𑀜𑁆𑀜𑀫𑀜𑁆𑀜𑀁 𑀧𑀬𑁄𑀚𑁂𑀢𑁆𑀯𑀸 𑀪𑀡𑁆𑀟𑀦𑀸𑀤𑀺𑀁 𑀅𑀓𑀸𑀲𑀺, 𑀦𑁂𑀤𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀅𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀸𑀤𑀭𑀺𑀬𑁂𑀦 𑀅𑀦𑁄𑀭𑀫𑀦𑀧𑀘𑁆𑀘𑀬𑀸 𑀯𑀸 𑀅𑀜𑁆𑀜𑀯𑀸𑀤𑀯𑀺𑀳𑁂𑀲𑀸𑀤𑀺𑀓𑀭𑀡𑀧𑀘𑁆𑀘𑀬𑀸 𑀯𑀸 𑀬𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀲𑀸 𑀆𑀧𑀢𑁆𑀢𑀺 𑀆𑀭𑁄𑀧𑁂𑀢𑀩𑁆𑀩𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀲𑁆𑀲 𑀯𑀺𑀬𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀲𑁆𑀲 𑀧𑀦 𑀇𑀤𑀁 𑀯𑀘𑀦𑀁 𑀯𑀺𑀦𑀸𑀯 𑀓𑀸𑀬𑀯𑀸𑀘𑀸𑀳𑀺 𑀆𑀧𑀦𑁆𑀦𑀸 𑀮𑀳𑀼𑀓𑀸𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀲𑁆𑀲𑀧𑀺 𑀆𑀭𑁄𑀧𑁂𑀢𑀩𑁆𑀩𑀸𑀯. 𑀬𑀁 𑀧𑀦 𑀓𑀫𑁆𑀫𑀯𑀸𑀘𑀸𑀬 ‘‘𑀅𑀢𑁆𑀢𑀦𑀸 𑀪𑀡𑁆𑀟𑀦𑀓𑀸𑀭𑀓𑀸’’𑀢𑀺 𑀅𑀢𑁆𑀢𑀦𑀸-𑀲𑀤𑁆𑀤𑀕𑁆𑀕𑀳𑀡𑀁, ‘‘𑀬𑁂𑀧𑀺 𑀘𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸…𑀧𑁂… 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘, 𑀢𑀁 𑀯𑀢𑁆𑀣𑀼𑀯𑀲𑁂𑀦 𑀕𑀳𑀺𑀢𑀁. 𑀬𑁄 𑀧𑀦 𑀲𑀬𑀫𑁂𑀯 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺, 𑀅𑀜𑁆𑀜𑁂 𑀧𑀦 𑀪𑀡𑁆𑀟𑀦𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀸 𑀔𑁄 𑀢𑀼𑀫𑁆𑀳𑁂’’𑀢𑀺𑀆𑀤𑀺𑀯𑀘𑀦𑀁 𑀦 𑀯𑀤𑀢𑀺, 𑀢𑀲𑁆𑀲𑀸𑀧𑁂𑀢𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯. 𑀓𑀭𑁄𑀦𑁆𑀢𑁂𑀳𑀺 𑀘 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 ¶ 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺𑀆𑀤𑀺𑀦𑀸𑀯 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀬𑁄 𑀘 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀓𑀮𑀳𑀸𑀬 𑀲𑀫𑀸𑀤𑀧𑁂𑀢𑀺, 𑀢𑀲𑁆𑀲𑀸𑀧𑀺 𑀏𑀯𑀫𑁂𑀯 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀅𑀜𑁆𑀜𑁂𑀲𑀁 𑀲𑀫𑀸𑀤𑀸𑀧𑀦𑀲𑁆𑀲𑀧𑀺 𑀪𑀡𑁆𑀟𑀦𑀓𑀸𑀭𑀓𑀢𑁆𑀢𑁂 𑀏𑀯 𑀧𑀯𑀺𑀲𑀦𑀢𑁄. 𑀅𑀜𑁆𑀜𑁂𑀲𑀁 𑀲𑀫𑀸𑀤𑀸𑀧𑀦𑀸𑀓𑀸𑀭𑀫𑁆𑀧𑀺 𑀯𑀢𑁆𑀯𑀸𑀯, 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀓𑀸𑀫𑁂𑀦𑀧𑀺 𑀘 𑀢𑁂𑀳𑀺 𑀯𑀼𑀢𑁆𑀢𑀯𑀘𑀦𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 𑀢𑀤𑀦𑀼𑀕𑀼𑀡𑀁 𑀬𑁄𑀚𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀦 𑀇𑀥𑀸𑀕𑀢𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀫𑁆𑀧𑀺 𑀇𑀥𑀸𑀕𑀢𑀯𑀲𑁂𑀦𑁂𑀯 𑀯𑀘𑀦𑀸𑀲𑀫𑁆𑀪𑀯𑀸. 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀓𑀢𑀫𑁂𑀯 𑀳𑀺 𑀅𑀯𑀺𑀧𑀦𑁆𑀦𑀁 𑀳𑁄𑀢𑀺, 𑀦𑀸𑀜𑁆𑀜𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀦𑀺𑀬𑀲𑁆𑀲𑀓𑀫𑁆𑀫𑀸𑀤𑀻𑀲𑀼𑀧𑀺.

𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸𑀤𑀺𑀯𑀡𑁆𑀡𑀦𑀸

𑁪. 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀦𑁆𑀢𑀺 𑀯𑀢𑁆𑀣𑀼𑀁 𑀯𑀸 𑀆𑀧𑀢𑁆𑀢𑀺𑀁 𑀯𑀸 𑀅𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀓𑀢𑀁. 𑀬𑁄 𑀧𑀦 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁 𑀏𑀯 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀫𑁆𑀫𑀓𑀭𑀡𑀪𑀬𑁂𑀦 ‘‘𑀦 𑀓𑀭𑁄𑀫𑀻’’𑀢𑀺 𑀫𑀼𑀲𑀸 𑀯𑀤𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑁂 𑀯𑀻𑀢𑀺𑀓𑁆𑀓𑀫𑀓𑀭𑀡𑀫𑁂𑀯 𑀧𑀝𑀺𑀜𑁆𑀜𑀸. 𑀢𑀣𑀢𑁄 𑀚𑀸𑀦𑀦𑀢𑁆𑀣𑀫𑁂𑀯 𑀧𑀝𑀺𑀜𑁆𑀜𑀸𑀬 𑀓𑀭𑀡𑀁 𑀅𑀦𑀼𑀜𑁆𑀜𑀸𑀢𑀁. 𑀬𑀢𑁆𑀣 𑀧𑀦 𑀲𑀦𑁆𑀤𑁂𑀳𑁄 𑀳𑁄𑀢𑀺, 𑀢𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸𑀯 𑀓𑀢𑁆𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀇𑀤𑀁 𑀮𑀺𑀗𑁆𑀕𑀦𑀸𑀲𑀦𑀦𑀺𑀫𑀺𑀢𑁆𑀢𑀢𑀸𑀬 𑀧𑀸𑀭𑀸𑀚𑀺𑀓𑀲𑁆𑀲 𑀓𑀫𑁆𑀫𑁂𑀦 𑀅𑀢𑀺𑀓𑀺𑀘𑁆𑀙𑀦𑀻𑀬𑀢𑁄 𑀯𑀼𑀢𑁆𑀢𑀁. ‘‘𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀇𑀤𑀁 𑀧𑀦 𑀧𑀭𑀺𑀯𑀸𑀲𑀸𑀤𑀺𑀦𑀺𑀲𑁆𑀲𑀸𑀭𑀡𑀓𑀫𑁆𑀫𑀲𑁆𑀲 𑀆𑀯𑁂𑀡𑀺𑀓𑀲𑁆𑀲 ¶ 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀁 𑀧𑀦 𑀧𑀭𑀢𑁄 ‘‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁬) 𑀯𑀼𑀢𑁆𑀢𑀁, 𑀢𑀁 ‘‘𑀆𑀬𑀢𑀺𑀁 𑀲𑀁𑀯𑀭𑁂 𑀞𑀢𑁆𑀯𑀸 𑀯𑀼𑀝𑁆𑀞𑀸𑀦𑀁 𑀓𑀭𑁄𑀳𑀻’’𑀢𑀺 𑀑𑀯𑀤𑀺𑀬𑀫𑀸𑀦𑀲𑁆𑀲 𑀅𑀦𑀸𑀤𑀭𑀺𑀬𑀸𑀤𑀺𑀧𑀘𑁆𑀘𑀬𑀮𑀳𑀼𑀓𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀻𑀮𑀯𑀺𑀧𑀢𑁆𑀢𑀺𑀫𑀽𑀮𑀓𑀜𑁆𑀳𑀺 𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀇𑀥 𑀅𑀪𑁂𑀤𑀽𑀧𑀘𑀸𑀭𑁂𑀦 ‘‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄 ‘‘𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀯𑀺𑀬.

𑀬𑀣𑀸 𑀘 𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀦𑁆𑀢𑀲𑁆𑀲 ‘‘𑀇𑀢𑁄 𑀤𑀺𑀝𑁆𑀞𑀺𑀢𑁄 𑀑𑀭𑀫𑀸𑀳𑀻’’𑀢𑀺 𑀅𑀯𑀢𑁆𑀯𑀸 𑀓𑀢𑀓𑀫𑁆𑀫𑀁 𑀓𑁂𑀯𑀮𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀓𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀦𑀸𑀫 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀏𑀯𑀁 𑀲𑀻𑀮𑀯𑀺𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀮𑀚𑁆𑀚𑀺𑀥𑀫𑁆𑀫𑁂 ¶ 𑀑𑀓𑁆𑀓𑀦𑁆𑀢𑁂 𑀬𑀣𑀸𑀥𑀫𑁆𑀫𑀁 𑀯𑀼𑀝𑁆𑀞𑀸𑀬 𑀲𑀁𑀯𑀭𑁂 𑀞𑀸𑀢𑀼𑀓𑀸𑀫𑀲𑁆𑀲 𑀓𑀢𑀁 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀁 𑀓𑁂𑀯𑀮𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀓𑀢𑀢𑁆𑀢𑀸 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀓𑀢𑀁 𑀦𑀸𑀫 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺. 𑀢𑁂𑀦𑁂𑀯 𑀦𑀺𑀬𑀲𑁆𑀲𑀓𑀫𑁆𑀫𑁂𑀧𑀺 ‘‘𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀲𑀁𑀯𑀭𑁂 𑀅𑀝𑁆𑀞𑀸𑀦𑀫𑁂𑀯 𑀓𑀫𑁆𑀫𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀅𑀤𑀦𑁆𑀢𑀁 𑀤𑀫𑀦𑀢𑁆𑀣𑀫𑁂𑀯 𑀳𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀻𑀢𑀺. 𑀓𑁂𑀘𑀺 𑀧𑀦 ‘‘𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀢𑀺 𑀇𑀤𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁪) 𑀯𑀤𑀦𑁆𑀢𑀺, 𑀢𑀁 𑀲𑀼𑀓𑁆𑀓𑀧𑀓𑁆𑀔𑁂 ‘‘𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀧𑀺 𑀘 𑀧𑀭𑀺𑀬𑀸𑀬𑀢𑁄 𑀤𑁂𑀲𑀦𑀸𑀕𑀸𑀫𑀺𑀦𑀺𑀯𑁄𑀳𑀸𑀭𑁂 𑀕𑀬𑁆𑀳𑀫𑀸𑀦𑁂 ‘‘𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀯𑀸𑀭𑀢𑁄 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀯𑀺𑀲𑁂𑀲𑁄 𑀦 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀫𑁆𑀧𑁂𑀢𑁆𑀣 𑀯𑀺𑀲𑁂𑀲𑀪𑀸𑀯𑁄 𑀦 𑀤𑀲𑁆𑀲𑀺𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄.

𑁬. 𑀲𑀩𑁆𑀩𑀸𑀦𑀺𑀧𑀻𑀢𑀺 𑀢𑀚𑁆𑀚𑀦𑀻𑀬𑀦𑀺𑀬𑀲𑁆𑀲𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀦𑀺 𑀢𑀻𑀡𑀺𑀧𑀺. 𑀅𑀜𑁆𑀜𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀦𑀸𑀢𑀺 𑀢𑀚𑁆𑀚𑀦𑀻𑀬𑀢𑁄 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀦𑀸 𑀅𑀜𑁆𑀜𑀓𑀫𑁆𑀫𑀓𑀭𑀡𑀁 𑀦𑀸𑀫 𑀓𑁄𑀘𑀺 𑀤𑁄𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀭𑀡𑀫𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀦𑀸.

𑁮. 𑀧𑀦𑁆𑀦𑀮𑁄𑀫𑀸𑀢𑀺 𑀧𑀢𑀺𑀢𑀫𑀸𑀦𑀮𑁄𑀫𑀸.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁧. 𑀦𑀺𑀬𑀲𑁆𑀲𑀓𑀫𑁆𑀫𑁂 𑀧𑀸𑀴𑀺𑀬𑀁 𑀅𑀧𑀺𑀲𑁆𑀲𑀽𑀢𑀺 𑀅𑀧𑀺𑀘𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑀲𑀫𑀼𑀤𑀸𑀬𑁄. 𑀦𑀺𑀲𑁆𑀲𑀸𑀬 ¶ 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑁂𑀘𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 𑀦𑀺𑀲𑁆𑀲𑀬𑀕𑁆𑀕𑀳𑀡𑀫𑁂𑀯𑀸𑀢𑀺, 𑀉𑀪𑀬𑁂𑀦𑀧𑀺𑀲𑁆𑀲 𑀲𑁂𑀭𑀺𑀯𑀺𑀳𑀸𑀭𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁧. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 ‘‘𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀽’’𑀢𑀺 𑀇𑀤𑀁 𑀧𑀓𑁆𑀓𑀫𑀦𑀸𑀤𑀺𑀁 𑀅𑀓𑀢𑁆𑀯𑀸 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁.

𑁩𑁩. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 ¶ 𑀦𑁂𑀯 𑀪𑀺𑀓𑁆𑀔𑀼𑀯𑀘𑀦𑀁, 𑀦 𑀕𑀺𑀳𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬𑀢𑁄𑀧𑀺 𑀪𑀺𑀓𑁆𑀔𑀽 𑀧𑀭𑀔𑀼𑀁𑀲𑀦𑀁 𑀦 𑀯𑀤𑀦𑁆𑀢𑀺, 𑀕𑀳𑀝𑁆𑀞𑀸 𑀧𑀦 𑀲𑀭𑀽𑀧𑁂𑀦𑁂𑀯 𑀅𑀓𑁆𑀓𑁄𑀲𑀺𑀢𑀼𑀁 𑀲𑀫𑀢𑁆𑀣𑀸𑀧𑀺 𑀉𑀧𑀓𑀸𑀭𑀻𑀲𑀼 𑀅𑀓𑀸𑀭𑀡𑀁 𑀏𑀯𑀭𑀽𑀧𑀁 𑀦 𑀯𑀤𑀦𑁆𑀢𑀺, 𑀢𑁆𑀯𑀁 𑀕𑀺𑀳𑀺𑀕𑀼𑀡𑀢𑁄𑀧𑀺 𑀧𑀭𑀺𑀳𑀻𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁯. ‘‘𑀅𑀗𑁆𑀕𑀲𑀫𑀦𑁆𑀦𑀸𑀕𑀫𑁄 𑀧𑀼𑀭𑀺𑀫𑁂𑀳𑀺 𑀅𑀲𑀤𑀺𑀲𑁄’’𑀢𑀺 𑀇𑀫𑀺𑀦𑀸 𑀢𑀚𑁆𑀚𑀦𑀻𑀬𑀸𑀤𑀻𑀦𑀁 𑀯𑀼𑀢𑁆𑀢𑀓𑀸𑀭𑀡𑀫𑀢𑁆𑀢𑁂𑀦 𑀇𑀤𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀥 𑀯𑀼𑀢𑁆𑀢𑁂𑀦 𑀧𑀦 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀦𑀸𑀤𑀺𑀦𑀸 𑀅𑀗𑁆𑀕𑁂𑀦 𑀢𑀸𑀦𑀺𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀘 ‘‘𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀸𑀤𑀺𑀲𑁂𑀲𑀼 𑀕𑀺𑀳𑀻𑀲𑀼 𑀔𑀼𑀁𑀲𑀦𑀸𑀤𑀻𑀳𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑁂𑀳𑀺 𑀏𑀯 𑀅𑀗𑁆𑀕𑁂𑀳𑀺 𑀓𑀫𑁆𑀫𑀸𑀭𑀳𑀢𑀸, 𑀦 𑀆𑀭𑀸𑀫𑀺𑀓𑀘𑁂𑀝𑀓𑀸𑀤𑀻𑀲𑀼 𑀔𑀼𑀁𑀲𑀦𑀸𑀤𑀻𑀳𑀺. 𑀢𑀢𑁆𑀣𑀸𑀧𑀺 𑀤𑀸𑀬𑀓𑀸𑀤𑀻𑀲𑀼 𑀔𑀫𑀸𑀧𑀺𑀢𑁂𑀲𑀼 𑀓𑀫𑁆𑀫𑀸𑀭𑀳𑀢𑀸 𑀦𑀢𑁆𑀣𑀺, 𑀆𑀧𑀢𑁆𑀢𑀺 𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀘𑁂 𑀢𑀺𑀓𑁆𑀔𑀢𑁆𑀢𑀼𑀁 𑀔𑀫𑀸𑀧𑀺𑀬𑀫𑀸𑀦𑁄𑀧𑀺 𑀦 𑀔𑀫𑀢𑀺, 𑀅𑀓𑀢𑀓𑀫𑁆𑀫𑁂𑀦𑀧𑀺 𑀤𑀲𑁆𑀲𑀦𑀽𑀧𑀘𑀸𑀭𑁂 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀲𑁄 𑀘𑁂 𑀓𑀸𑀮𑀓𑀢𑁄 𑀳𑁄𑀢𑀺, 𑀤𑁂𑀲𑀦𑁆𑀢𑀭𑀁 𑀯𑀸 𑀕𑀢𑁄, 𑀕𑀢𑀤𑀺𑀲𑀸 𑀦 𑀜𑀸𑀬𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀓𑀢𑀓𑀫𑁆𑀫𑁂𑀦𑀧𑀺 𑀅𑀓𑀢𑀓𑀫𑁆𑀫𑁂𑀦𑀧𑀺 𑀲𑀗𑁆𑀖𑀫𑀚𑁆𑀛𑁂 𑀬𑀣𑀸𑀪𑀽𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂 𑀧𑀦 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀬𑀸 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑁆𑀲𑀯𑀁 𑀓𑀢𑁆𑀯𑀸 𑀲𑁄 𑀦 𑀲𑀘𑁆𑀘𑀸𑀧𑀺𑀢𑁄, 𑀢𑀁 𑀫𑁂 𑀔𑀫𑀣𑀸’’𑀢𑀺𑀆𑀤𑀺𑀦𑀸 𑀔𑀫𑀸𑀧𑀦𑁂 𑀯𑀘𑀦𑀓𑁆𑀓𑀫𑁄 𑀜𑀸𑀧𑁂𑀢𑀩𑁆𑀩𑁄.

𑁪𑁧. 𑀧𑀸𑀴𑀺𑀬𑀁 𑀫𑀗𑁆𑀓𑀼𑀪𑀽𑀢𑁄 𑀦𑀸𑀲𑀓𑁆𑀔𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀦𑁆𑀢𑀺 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀧𑀼𑀦 𑀕𑀦𑁆𑀢𑁆𑀯𑀸𑀧𑀺 𑀫𑀸𑀦𑀣𑀤𑁆𑀥𑀢𑀸𑀬 𑀬𑀣𑀸𑀪𑀽𑀢𑀁 𑀤𑁄𑀲𑀁 𑀆𑀯𑀺𑀓𑀢𑁆𑀯𑀸 𑀅𑀔𑀫𑀸𑀧𑀦𑁂𑀦 ‘‘𑀦𑀸𑀳𑀁 𑀔𑀫𑀸𑀫𑀻’’𑀢𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 𑀫𑀗𑁆𑀓𑀼𑀪𑀽𑀢𑁄 𑀔𑀫𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺, 𑀲𑁄 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸𑀧𑀺 𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀸𑀬𑁂𑀯 𑀧𑀼𑀦𑀧𑀺 𑀲𑀢𑁆𑀣𑀸𑀭𑀸 𑀧𑁂𑀲𑀺𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀔𑀫𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦𑀸𑀕𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 ‘‘𑀅𑀲𑀦𑁆𑀢𑀁 𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸𑀯 (𑀥. 𑀧. 𑁭𑁩) 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀸𑀦𑀦𑀺𑀫𑁆𑀫𑀣𑀦𑀁 𑀓𑀢𑁆𑀯𑀸 𑀅𑀦𑀼𑀤𑀽𑀢𑀤𑀸𑀦𑀁 𑀅𑀦𑀼𑀜𑁆𑀜𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁨. ‘‘𑀦𑁄 ¶ 𑀘𑁂 𑀔𑀫𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀕𑁂𑀯 𑀕𑀳𑀝𑁆𑀞𑁄 𑀔𑀫𑀢𑀺 𑀘𑁂, 𑀤𑀲𑁆𑀲𑀦𑀽𑀧𑀘𑀸𑀭𑁂 𑀆𑀧𑀢𑁆𑀢𑀺𑀤𑁂𑀲𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁬. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀲𑀼 ¶ 𑀢𑀻𑀲𑀼 𑀅𑀭𑀺𑀝𑁆𑀞𑀯𑀢𑁆𑀣𑀼𑀲𑁆𑀫𑀺𑀁 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀯𑀺𑀲𑀼𑀁 𑀲𑀗𑁆𑀖𑀫𑀚𑁆𑀛𑁂𑀯 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀲𑀫𑀦𑀼𑀪𑀸𑀲𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸. 𑀏𑀢𑁆𑀣𑀸𑀧𑀺 𑀓𑀫𑁆𑀫𑀯𑀸𑀘𑀸𑀬 ‘‘𑀢𑀣𑀸𑀳𑀁 𑀪𑀕𑀯𑀢𑀸’’𑀢𑀺𑀆𑀤𑀺 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀸 𑀯𑁄𑀳𑀭𑀺𑀁𑀲𑀼, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀕𑀳𑀡𑀸𑀓𑀸𑀭𑀁 𑀧𑀦 𑀯𑀺𑀦𑀸𑀧𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁, 𑀲𑁄 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀏𑀯𑀁 𑀲𑀸𑀫𑀜𑁆𑀜𑀢𑁄𑀧𑀺 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁬𑁫. ‘‘𑀬𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀪𑀡𑁆𑀟𑀦𑀸𑀤𑀻𑀦𑀺 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸𑀦𑀺 𑀏𑀯 𑀪𑀡𑁆𑀟𑀦𑀸𑀤𑀻𑀦𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀦 𑀓𑁂𑀯𑀮𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀬𑁄 𑀧𑀦 ‘‘𑀪𑀡𑁆𑀟𑀦𑀸𑀤𑀻𑀦𑀁 𑀓𑀭𑀡𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸 𑀪𑀡𑁆𑀟𑀦𑀸𑀤𑀺𑀁 𑀓𑀭𑁄𑀢𑀺, 𑀲𑀸𑀧𑀺𑀲𑁆𑀲 𑀤𑀺𑀝𑁆𑀞𑀺 𑀏𑀯 𑀳𑁄𑀢𑀺, 𑀢𑀲𑁆𑀲𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁄

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁭𑁫. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 ¶ ¶ 𑀅𑀦𑁆𑀢𑀫𑀲𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀻𑀦𑀫𑁆𑀧𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂 𑀳𑀺 𑀧𑀸𑀭𑀺𑀯𑀸𑀲𑀺𑀓𑀸𑀦𑀁, 𑀧𑀸𑀭𑀺𑀯𑀸𑀲𑀺𑀓𑀸 𑀘 𑀢𑁂𑀲𑀁 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺. 𑀅𑀥𑁄𑀢𑀧𑀸𑀤𑀝𑁆𑀞𑀧𑀦𑀓𑀦𑁆𑀢𑀺 𑀬𑀢𑁆𑀣 𑀞𑀢𑁆𑀯𑀸 𑀧𑀸𑀤𑁂 𑀥𑁄𑀯𑀦𑁆𑀢𑀺, 𑀢𑀸𑀤𑀺𑀲𑀁 𑀤𑀸𑀭𑀼𑀨𑀮𑀓𑀔𑀡𑁆𑀟𑀸𑀤𑀺𑀁. 𑀧𑀸𑀤𑀖𑀁𑀲𑀦𑀦𑁆𑀢𑀺 𑀲𑀓𑁆𑀔𑀭𑀓𑀣𑀮𑀸𑀤𑀺𑀁. ‘‘𑀯𑀢𑁆𑀢𑀁 𑀓𑀭𑁄𑀦𑁆𑀢𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀳𑀺𑀧𑀺 𑀅𑀪𑀺𑀯𑀸𑀤𑀦𑀸𑀤𑀺𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 𑀓𑀭𑀺𑀬𑀫𑀸𑀦𑁂’’𑀢𑀺 𑀇𑀤𑀁 𑀧𑀯𑀸𑀭𑀡𑀸𑀤𑀺𑀯𑀲𑁂𑀲𑀼 𑀲𑀗𑁆𑀖𑁂 𑀧𑀯𑀸𑀭𑁂𑀦𑁆𑀢𑁂 𑀅𑀦𑀼𑀧𑀕𑀢𑀙𑀺𑀦𑁆𑀦𑀯𑀲𑁆𑀲𑀸𑀤𑀻𑀳𑀺 𑀓𑀭𑀺𑀬𑀫𑀸𑀦𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸𑀢𑀺 𑀦𑀯𑀓𑀸𑀦𑀁 𑀧𑀼𑀭𑀢𑁄.

‘‘𑀧𑀸𑀭𑀺𑀯𑀸𑀲𑀺𑀓𑀲𑁆𑀲𑁂𑀯𑀸’’𑀢𑀺 𑀇𑀤𑀁 𑀅𑀩𑁆𑀪𑀸𑀦𑀸𑀭𑀳𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂 𑀕𑀭𑀼𑀓𑀝𑁆𑀞𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀁 𑀑𑀡𑁄𑀚𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀤𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀏𑀯 𑀢𑀁 𑀦 𑀮𑀪𑀦𑁆𑀢𑀺.

𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀬 𑀧𑀝𑀺𑀧𑀸𑀝𑀺𑀬𑀸 𑀤𑀺𑀬𑁆𑀬𑀫𑀸𑀦𑀪𑀢𑁆𑀢𑀁. 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦𑀸𑀢𑀺 𑀤𑀸𑀬𑀓𑀲𑁆𑀲 𑀳𑀢𑁆𑀣𑀧𑀸𑀲𑁂 𑀧𑀝𑀺𑀕𑁆𑀕𑀳𑀡𑀭𑀼𑀳𑀦𑀝𑁆𑀞𑀸𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀧𑁂𑀴𑀪𑀢𑁆𑀢𑁂𑀧𑀻𑀢𑀺 𑀫𑀳𑀦𑁆𑀢𑁂𑀲𑀼 𑀪𑀢𑁆𑀢𑀧𑀘𑁆𑀙𑀺𑀆𑀤𑀺𑀪𑀸𑀚𑀦𑁂𑀲𑀼 𑀞𑀧𑁂𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀪𑀢𑁆𑀢𑁂𑀲𑀼𑀧𑀺.

𑁭𑁬. 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀢𑀺 𑀉𑀓𑁆𑀓𑀁𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑁄 𑀧𑀦 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀸𑀤𑀺𑀓𑀸 𑀮𑁄𑀓𑀯𑀚𑁆𑀚𑀸𑀯, 𑀢𑀢𑁆𑀣𑀸𑀧𑀺 𑀲𑀗𑁆𑀖𑀪𑁂𑀤𑀸𑀤𑀺𑀓𑀸 𑀧𑀸𑀧𑀺𑀝𑁆𑀞𑀢𑀭𑀸 𑀏𑀯.

‘‘𑀓𑀫𑁆𑀫𑀦𑁆𑀢𑀺 ¶ 𑀧𑀸𑀭𑀺𑀯𑀸𑀲𑀺𑀓𑀓𑀫𑁆𑀫𑀯𑀸𑀘𑀸’’𑀢𑀺 𑀏𑀢𑁂𑀦 𑀓𑀫𑁆𑀫𑀪𑀽𑀢𑀸 𑀯𑀸𑀘𑀸𑀢𑀺 𑀓𑀫𑁆𑀫𑀯𑀸𑀘𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄𑀧𑀺 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀯𑀘𑀦𑀻𑀬𑀦𑁆𑀢𑀺 𑀏𑀢𑁆𑀣 ‘‘𑀲𑀤𑁄𑀲’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕. 𑁩.𑁭𑁬) 𑀅𑀢𑁆𑀣𑀁 𑀯𑀤𑀢𑀺. 𑀅𑀢𑁆𑀢𑀦𑁄 𑀯𑀘𑀦𑁂 𑀧𑀯𑀢𑁆𑀢𑀦𑀓𑀫𑁆𑀫𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, ‘‘𑀫𑀸 𑀧𑀓𑁆𑀓𑀫𑀸𑀳𑀻’’𑀢𑀺 𑀯𑀸 ‘‘𑀏𑀳𑀺 𑀯𑀺𑀦𑀬𑀥𑀭𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯’’𑀦𑁆𑀢𑀺 𑀯𑀸 ¶ 𑀏𑀯𑀁 𑀅𑀢𑁆𑀢𑀦𑁄 𑀆𑀡𑀸𑀬 𑀧𑀯𑀢𑁆𑀢𑀦𑀓𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀓𑁂𑀦𑀘𑀺 𑀲𑀯𑀘𑀦𑀻𑀬𑁂 𑀓𑀢𑁂 𑀅𑀦𑀸𑀤𑀭𑁂𑀦 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀩𑀼𑀤𑁆𑀥𑀲𑁆𑀲 𑀲𑀗𑁆𑀖𑀲𑁆𑀲 𑀆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺.

𑀭𑀚𑁄𑀳𑀢𑀪𑀽𑀫𑀻𑀢𑀺 𑀧𑀡𑁆𑀡𑀲𑀸𑀮𑀸𑀯𑀺𑀲𑁂𑀲𑀦𑀁. 𑀧𑀘𑁆𑀘𑀬𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁. 𑀲𑁂𑀦𑀸𑀲𑀦𑀁 𑀦 𑀮𑀪𑀢𑀻𑀢𑀺 𑀯𑀲𑁆𑀲𑀕𑁆𑀕𑁂𑀦 𑀦 𑀮𑀪𑀢𑀺.

𑀅𑀧𑀡𑁆𑀡𑀓𑀧𑀝𑀺𑀧𑀤𑀸𑀢𑀺 𑀅𑀯𑀺𑀭𑀤𑁆𑀥𑀧𑀝𑀺𑀧𑀤𑀸. 𑀲𑀘𑁂 𑀯𑀸𑀬𑀫𑀦𑁆𑀢𑁄𑀧𑀻𑀢𑀺 𑀏𑀢𑁆𑀣 𑀅𑀯𑀺𑀲𑀬𑀪𑀸𑀯𑀁 𑀜𑀢𑁆𑀯𑀸 𑀅𑀯𑀸𑀬𑀫𑀦𑁆𑀢𑁄𑀧𑀺 𑀲𑀗𑁆𑀕𑀬𑁆𑀳𑀢𑀺.

𑁮𑁧. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀼𑀓𑁆𑀔𑀺𑀢𑁆𑀢𑀓𑀸𑀦𑀁 𑀲𑀸𑀫𑀜𑁆𑀜𑁂𑀦. 𑀧𑀜𑁆𑀘𑀯𑀡𑁆𑀡𑀘𑁆𑀙𑀤𑀦𑀩𑀤𑁆𑀥𑀝𑁆𑀞𑀸𑀦𑁂𑀲𑀽𑀢𑀺 𑀧𑀜𑁆𑀘𑀧𑁆𑀧𑀓𑀸𑀭𑀘𑁆𑀙𑀤𑀦𑁂𑀳𑀺 𑀙𑀦𑁆𑀦𑀝𑁆𑀞𑀸𑀦𑁂𑀲𑀼.

𑀑𑀩𑀤𑁆𑀥𑀦𑁆𑀢𑀺 𑀉𑀝𑁆𑀞𑀸𑀦𑀸𑀤𑀺𑀩𑁆𑀬𑀸𑀧𑀸𑀭𑀧𑀝𑀺𑀩𑀤𑁆𑀥𑀁. 𑀧𑀻𑀴𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀢𑀝𑁆𑀝𑀺𑀓𑀸𑀘𑀫𑁆𑀫𑀔𑀡𑁆𑀟𑀸𑀤𑀻𑀲𑀼 𑀤𑀻𑀖𑀸𑀲𑀦𑁂𑀲𑀼𑀧𑀺 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀟𑁆𑀠𑀢𑀭𑀲𑁆𑀲 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸’’𑀢𑀺 𑀇𑀤𑀁 𑀧𑀸𑀭𑀺𑀯𑀸𑀲𑀸𑀤𑀺𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁩. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁄

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸𑀯𑀡𑁆𑀡𑀦𑀸

𑁯𑁭. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 ¶ ¶ 𑀯𑁂𑀤𑀬𑀸𑀫𑀳𑀦𑁆𑀢𑀺 𑀚𑀸𑀦𑀸𑀧𑁂𑀫𑀺 𑀅𑀳𑀁, 𑀆𑀭𑁄𑀘𑁂𑀫𑀻𑀢𑀺𑀅𑀢𑁆𑀣𑁄. 𑀅𑀦𑀼𑀪𑀯𑀸𑀫𑀻𑀢𑀺𑀧𑀺𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀦 𑀧𑀲𑀁𑀲𑀦𑁆𑀢𑀺 𑀆𑀭𑁄𑀧𑀦𑀯𑀘𑀦𑀢𑁆𑀢𑀸. 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀤𑀼𑀓𑁆𑀓𑀝𑀧𑀭𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀢𑀤𑀳𑁂𑀯 𑀧𑀼𑀦 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀓𑀸𑀫𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀧𑀭𑀺𑀳𑀸𑀭𑀢𑁆𑀣𑀫𑁆𑀧𑀻’’𑀢𑀺 𑀯𑀤𑀦𑁆𑀢𑀺.

‘‘𑀲𑀪𑀸𑀕𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀪𑀸𑀕𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀯𑀢𑁆𑀢𑀁 𑀅𑀲𑀫𑀸𑀤𑀺𑀬𑀺𑀢𑁆𑀯𑀸 𑀩𑀳𑀺 𑀏𑀯 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀇𑀤𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀲𑀚𑁆𑀛𑀸𑀬𑀸𑀤𑀺𑀲𑀤𑁆𑀤𑀲𑀯𑀦𑀽𑀧𑀘𑀸𑀭𑀯𑀺𑀚𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫𑀸’’𑀢𑀺 𑀇𑀤𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀕𑀼𑀫𑁆𑀩𑁂𑀦 𑀯𑀸𑀢𑀺𑀆𑀤𑀺 𑀤𑀲𑁆𑀲𑀦𑀽𑀧𑀘𑀸𑀭𑀯𑀺𑀚𑀳𑀦𑀢𑁆𑀣𑀁.

‘‘𑀲𑁄𑀧𑀺 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀧𑀼𑀭𑁂 𑀅𑀭𑀼𑀡𑁂 𑀏𑀯 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀆𑀭𑁄𑀘𑀦𑀸𑀬 𑀓𑀢𑀸𑀬 𑀲𑀩𑁆𑀩𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀯𑀺𑀳𑀸𑀭𑀕𑀢𑁂𑀲𑀼 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀯𑀸 𑀯𑀺𑀧𑁆𑀧𑀯𑀸𑀲𑀤𑁄𑀲𑁄 𑀯𑀸 𑀦 𑀳𑁄𑀢𑀺 𑀆𑀭𑁄𑀘𑀺𑀢𑀢𑁆𑀢𑀸 𑀲𑀳𑀯𑀸𑀲𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀬𑀜𑁆𑀘𑀸’’ 𑀢𑀺𑀆𑀤𑀺. 𑀅𑀩𑁆𑀪𑀸𑀦𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀢𑀫𑁆𑀧𑀺 𑀅𑀓𑀢𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁦𑁨. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀦𑀸𑀧𑀦𑁆𑀦𑀲𑁆𑀲, 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀯𑀸. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀯𑀲𑁂𑀦 ¶ 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂. 𑀧𑀸𑀴𑀺𑀬𑀁 ‘‘𑀧𑀝𑀺𑀓𑀲𑁆𑀲𑀺𑀢𑁄 𑀲𑀗𑁆𑀖𑁂𑀦 𑀉𑀤𑀸𑀬𑀺 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸’’𑀢𑀺 𑀇𑀤𑀁 𑀓𑀭𑀡𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀬 𑀧𑀝𑀺𑀓𑀲𑁆𑀲𑀺𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀣 𑀯𑀸 ‘‘𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸 𑀔𑀫𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀉𑀢𑁆𑀢𑀭𑀧𑀤𑁂𑀦 𑀲𑀳 𑀧𑀘𑁆𑀘𑀢𑁆𑀢𑀯𑀲𑁂𑀦𑁂𑀯 𑀬𑁄𑀚𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

‘‘𑀉𑀤𑀸𑀬𑀺𑀁 ¶ 𑀪𑀺𑀓𑁆𑀔𑀼𑀁 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸…𑀧𑁂… 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀸𑀬 𑀉𑀤𑀸𑀬𑀺𑀁 𑀪𑀺𑀓𑁆𑀔𑀼𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀫𑀽𑀮𑀤𑀺𑀯𑀲𑁂 𑀆𑀓𑀟𑁆𑀠𑀺𑀢𑁆𑀯𑀸 𑀢𑀲𑁆𑀲𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀤𑁂𑀢𑀽𑀢𑀺 𑀬𑁄𑀚𑀦𑀸. 𑀆𑀯𑀺𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀢𑀲𑁆𑀲 𑀅𑀢𑁂𑀓𑀺𑀘𑁆𑀙𑀪𑀸𑀯𑀁 𑀢𑁂𑀦𑁂𑀯 𑀲𑀗𑁆𑀖𑀲𑁆𑀲 𑀧𑀸𑀓𑀝𑀁 𑀓𑀸𑀭𑁂𑀢𑁆𑀯𑀸 𑀮𑀚𑁆𑀚𑀺𑀕𑀡𑀢𑁄 𑀯𑀺𑀬𑁄𑀚𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄.

𑀲𑀢𑀁 𑀆𑀧𑀢𑁆𑀢𑀺𑀬𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀯𑀲𑁂𑀦 𑀏𑀓𑀤𑀺𑀯𑀲𑁂 𑀆𑀧𑀦𑁆𑀦𑀸 𑀲𑀢𑀁 𑀆𑀧𑀢𑁆𑀢𑀺𑀬𑁄. 𑀤𑀲𑀲𑀢𑀦𑁆𑀢𑀺 𑀲𑀳𑀲𑁆𑀲𑀸 𑀆𑀧𑀢𑁆𑀢𑀺𑀬𑁄. 𑀭𑀢𑁆𑀢𑀺𑀲𑀢𑀁 𑀙𑀸𑀤𑀬𑀺𑀢𑁆𑀯𑀸𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀯𑀲𑀸𑀦𑁂𑀢𑀺 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀸𑀦𑀁, 𑀢𑀺𑀡𑁆𑀡𑀁 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀸𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀲𑀩𑁆𑀩𑁂𑀲𑀁 𑀧𑀭𑀺𑀯𑀸𑀲𑀸𑀦𑀁 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀦𑀬𑁂𑀦.

𑀯𑀺𑀳𑀸𑀭𑀽𑀧𑀘𑀸𑀭𑀢𑁄𑀧𑀻𑀢𑀺 𑀩𑀳𑀺𑀕𑀸𑀫𑁂 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑀽𑀧𑀘𑀸𑀭𑀢𑁄𑀧𑀺. ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀪𑀺𑀓𑁆𑀔𑀽𑀦𑀁 𑀲𑀯𑀦𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑀦𑀁 𑀯𑀼𑀢𑁆𑀢𑀁. 𑀕𑀸𑀫𑀲𑁆𑀲𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦 𑀯𑀼𑀢𑁆𑀢𑀁. 𑀢𑁂𑀦 𑀕𑀸𑀫𑀽𑀧𑀘𑀸𑀭𑁂 𑀞𑀺𑀢𑀸𑀧𑀺 𑀢𑀢𑁆𑀣 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀢𑀲𑁆𑀲𑀸 𑀭𑀢𑁆𑀢𑀺𑀘𑁆𑀙𑁂𑀤𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀪𑀺𑀓𑁆𑀔𑀽𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬 𑀧𑀯𑀺𑀝𑁆𑀞𑀸𑀦𑀁 𑀯𑀲𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀕𑀸𑀫𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀯𑀸𑀲𑀦𑀕𑀸𑀫𑁂. 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀬𑀣𑀸 𑀆𑀭𑁄𑀘𑁂𑀢𑀼𑀁 𑀲𑀓𑁆𑀓𑀸, 𑀢𑀣𑀸 𑀤𑀲𑁆𑀲𑁂𑀢𑁆𑀯𑀸. ‘‘𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑀸𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀫𑀢𑀸𑀬 𑀲𑀳𑀯𑀸𑀲𑁂𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀲𑁆𑀲𑀸𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀲𑁆𑀲 𑀧𑀼𑀦 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀺𑀲𑁆𑀲𑀦𑁆𑀦𑀦𑁆𑀢𑀺 𑀫𑀽𑀮𑀸𑀧𑀢𑁆𑀢𑀺𑀬𑀸 𑀲𑀳 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀻𑀦𑀜𑁆𑀘.

𑁧𑁦𑁮. 𑀲𑀘𑁂 ¶ 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦𑀸𑀧𑀦𑁆𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀯𑀸𑀭𑁂 𑀅𑀦𑁆𑀢𑀭𑀸𑀧𑀢𑁆𑀢𑀺𑀓𑀣𑀸𑀬𑀁 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀓𑀫𑁆𑀫𑀯𑀸𑀘𑀸𑀦𑀦𑁆𑀢𑀭𑀫𑁂𑀯 𑀤𑀸𑀢𑀼𑀁 𑀯𑀼𑀢𑁆𑀢𑀁 𑀦 𑀳𑁄𑀢𑀺. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀲𑁆𑀲 𑀧𑀦 𑀧𑀜𑁆𑀘𑀤𑀺𑀯𑀲𑀸𑀦𑀺 𑀧𑀭𑀺𑀯𑀲𑀺𑀢𑁆𑀯𑀸 𑀬𑀸𑀘𑀺𑀢𑀲𑁆𑀲 ¶ 𑀫𑀸𑀦𑀢𑁆𑀢𑀘𑀭𑀡𑀓𑀸𑀮𑁂 𑀆𑀧𑀦𑁆𑀦𑀸𑀬 𑀢𑀢𑀺𑀬𑀸𑀬 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀫𑀸𑀦𑀢𑁆𑀢𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀤𑀺𑀦𑁆𑀦𑀫𑀸𑀦𑀢𑁆𑀢𑀲𑁆𑀲 𑀏𑀓𑁂𑀦 𑀙𑀸𑀭𑀢𑁆𑀢𑁂𑀦 𑀧𑀼𑀩𑁆𑀩𑁂 𑀤𑀺𑀦𑁆𑀦𑀫𑀸𑀦𑀢𑁆𑀢𑀸𑀳𑀺 𑀢𑀻𑀳𑀺 𑀆𑀧𑀢𑁆𑀢𑀻𑀳𑀺 𑀲𑀳 𑀘𑀢𑀲𑁆𑀲𑀦𑁆𑀦𑀫𑁆𑀧𑀺 𑀆𑀧𑀢𑁆𑀢𑀻𑀦𑀁 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀫𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀅𑀩𑁆𑀪𑀸𑀦𑀸𑀭𑀳𑀓𑀸𑀮𑁂 𑀆𑀧𑀦𑁆𑀦𑀸𑀬 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸, 𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀯𑀸𑀭𑁂 𑀅𑀦𑁆𑀢𑀭𑀸𑀧𑀢𑁆𑀢𑀻𑀲𑀼 𑀘 𑀧𑀝𑀺𑀧𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀤𑀺𑀯𑀲𑁂𑀦 𑀧𑀜𑁆𑀘𑀸’’𑀢𑀺 𑀇𑀤𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑁂𑀓𑀧𑀭𑀺𑀯𑀸𑀲𑀤𑀸𑀦𑀫𑀸𑀦𑀢𑁆𑀢𑀤𑀸𑀦𑀅𑀩𑁆𑀪𑀸𑀦𑀸𑀦𑀺 𑀏𑀓𑁂𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀅𑀦𑁆𑀢𑀭𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑀲𑁆𑀲𑁄’’𑀢𑀺 𑀇𑀤𑀫𑁆𑀧𑀺 𑀫𑀸𑀦𑀢𑁆𑀢𑀤𑀸𑀦𑀅𑀩𑁆𑀪𑀸𑀦𑀸𑀦𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂 𑀏𑀓𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁨𑁫. ‘‘𑀬𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀸 𑀅𑀦𑁆𑀢𑀭𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀤𑀸𑀦𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀦 𑀧𑀦 𑀘𑀺𑀡𑁆𑀡𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸𑀦𑀁 𑀫𑀓𑁆𑀔𑀺𑀢𑀪𑀸𑀯𑀲𑁆𑀲, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂 𑀓𑀢𑁂𑀧𑀺 𑀢𑁂𑀲𑀁 𑀫𑀓𑁆𑀔𑀺𑀢𑀪𑀸𑀯𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 ‘‘𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑀸𑀧𑀺 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸𑀧𑀺 𑀲𑀩𑁆𑀩𑁂 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀻’’𑀢𑀺 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 ‘‘𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀘𑀲𑁆𑀲 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁩𑁪. ‘‘𑀏𑀓𑀸𑀧𑀢𑁆𑀢𑀺𑀫𑀽𑀮𑀓𑀜𑁆𑀘𑀸’’𑀢𑀺 𑀇𑀫𑀺𑀦𑀸 ‘‘𑀏𑀓𑀸 𑀆𑀧𑀢𑁆𑀢𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀏𑀓𑀸 𑀆𑀧𑀢𑁆𑀢𑀺 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸’’𑀢𑀺𑀆𑀤𑀺𑀦𑀬𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀚𑀸𑀦𑀦𑀸𑀤𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀫𑀸𑀦𑀢𑁆𑀢𑀸𑀭𑀳𑀢𑀸𑀯𑀘𑀦𑁂𑀦 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁. ‘‘𑀏𑀓𑀲𑁆𑀲, 𑀆𑀯𑀼𑀲𑁄, 𑀫𑀸𑀲𑀲𑁆𑀲 𑀪𑀺𑀓𑁆𑀔𑀼 𑀫𑀸𑀦𑀢𑁆𑀢𑀸𑀭𑀳𑁄’’𑀢𑀺 ¶ (𑀘𑀽𑀴𑀯. 𑁧𑁫𑁩) 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀓𑀲𑁆𑀲 𑀅𑀚𑀸𑀦𑀦𑀧𑀝𑀺𑀘𑁆𑀙𑀦𑁆𑀦𑀫𑀸𑀲𑀲𑁆𑀲 ¶ 𑀧𑀭𑀺𑀯𑀸𑀲𑀸𑀭𑀳𑁄 𑀦 𑀳𑁄𑀢𑀺, 𑀓𑁂𑀯𑀮𑀁 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 𑀫𑀓𑁆𑀔𑀥𑀫𑁆𑀫𑁄𑀢𑀺 𑀫𑀤𑁆𑀤𑀺𑀢𑀼𑀓𑀸𑀫𑀢𑀸. 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀧𑀭𑀺𑀯𑀸𑀲𑀤𑀸𑀦𑀸𑀤𑀺𑀲𑀩𑁆𑀩𑀯𑀺𑀦𑀺𑀘𑁆𑀙𑀬𑀲𑁆𑀲 𑀲𑀫𑀼𑀘𑁆𑀘𑀬𑀢𑁆𑀢𑀸 𑀧𑀦𑁂𑀲 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁪. 𑀲𑀫𑀣𑀓𑁆𑀔𑀦𑁆𑀥𑀓𑁄

𑀲𑀢𑀺𑀯𑀺𑀦𑀬𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁯𑁫. 𑀲𑀫𑀣𑀓𑁆𑀔𑀦𑁆𑀥𑀓𑁂 ¶ ¶ 𑀔𑀻𑀡𑀸𑀲𑀯𑀲𑁆𑀲 𑀯𑀺𑀧𑀼𑀮𑀲𑀢𑀺𑀁 𑀦𑀺𑀲𑁆𑀲𑀸𑀬 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀘𑁄𑀤𑀦𑀸𑀤𑀺𑀅𑀲𑀸𑀭𑀼𑀧𑁆𑀧𑀸𑀦𑀁 𑀯𑀺𑀦𑀬𑀦𑀼𑀧𑀸𑀬𑁄 𑀲𑀢𑀺𑀯𑀺𑀦𑀬𑁄.

𑁧𑁯𑁬. 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁄𑀢𑀺 𑀓𑀢𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁄. 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁…𑀧𑁂… 𑀘𑁄𑀤𑁂𑀦𑁆𑀢𑀻𑀢𑀺 𑀏𑀢𑁆𑀣 𑀧𑀦 𑀉𑀫𑁆𑀫𑀢𑁆𑀢𑀓𑀲𑁆𑀲 𑀇𑀤𑀁 𑀉𑀫𑁆𑀫𑀢𑁆𑀢𑀓𑀁, 𑀅𑀚𑁆𑀛𑀸𑀘𑀺𑀡𑁆𑀡𑀁. 𑀢𑀤𑁂𑀯 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁂𑀦 𑀓𑀢𑀦𑁆𑀢𑀺 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑀁. 𑀢𑁂𑀦 𑀉𑀫𑁆𑀫𑀢𑁆𑀢𑀓𑁂𑀦 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑀓𑀢𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑁂𑀦 𑀅𑀦𑀸𑀘𑀸𑀭𑁂𑀦 𑀆𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀕𑀕𑁆𑀕𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀞𑀫𑀁 𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀅𑀫𑀽𑀴𑁆𑀳𑀪𑀸𑀯𑀁 𑀉𑀧𑀕𑀢𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄.

𑁨𑁦𑁨. 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀺𑀓𑀸 𑀓𑀺𑀭𑀺𑀬𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲-𑀓𑀸𑀭𑀸𑀕𑀫𑀲𑀳𑀺𑀢𑁄 𑀇𑀓-𑀧𑀘𑁆𑀘𑀬𑀦𑁆𑀢𑁄𑀬𑀁 𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬𑀸𑀢𑀺 𑀕𑀽𑀴𑁆𑀳𑀓𑀯𑀺𑀯𑀝𑁆𑀝𑀓𑀸𑀤𑀺𑀦𑀸 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀓𑀺𑀭𑀺𑀬𑀸𑀬. 𑀬𑁂𑀪𑀼𑀬𑁆𑀬𑀪𑀸𑀯𑀁 𑀦𑀺𑀲𑁆𑀲𑀺𑀢𑀲𑀫𑀣𑀓𑀺𑀭𑀺𑀬𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀏𑀯𑀁 𑀬𑁂𑀪𑀼𑀬𑁆𑀬𑀲𑀺𑀓𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀬𑀁 𑀅𑀥𑀺𑀓𑀭𑀡𑀲𑀫𑀣𑁄 𑀦𑀸𑀫 𑀳𑁄𑀢𑀺. 𑀬𑀣𑀸𑀯𑀼𑀢𑁆𑀢𑀲𑀮𑀸𑀓𑀕𑁆𑀕𑀸𑀳𑁂𑀦 𑀳𑀺 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀪𑀸𑀯𑁂 𑀲𑀺𑀤𑁆𑀥𑁂 𑀧𑀘𑁆𑀙𑀸 𑀢𑀁 𑀬𑁂𑀪𑀼𑀬𑁆𑀬𑀪𑀸𑀯𑀁 𑀦𑀺𑀲𑁆𑀲𑀸𑀬𑁂𑀯 𑀅𑀥𑀺𑀓𑀭𑀡𑀯𑀽𑀧𑀲𑀫𑁄 𑀳𑁄𑀢𑀺, 𑀦 𑀥𑀫𑁆𑀫𑀯𑀸𑀤𑀻𑀦𑀁 𑀩𑀳𑀼𑀢𑀭𑀪𑀸𑀯𑀲𑀸𑀥𑀓𑀓𑀺𑀭𑀺𑀬𑀸𑀫𑀢𑁆𑀢𑁂𑀦.

𑁨𑁦𑁭. ‘‘𑀲𑁂𑀲𑀫𑁂𑀢𑁆𑀣 𑀢𑀚𑁆𑀚𑀦𑀻𑀬𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺 𑀏𑀢𑁂𑀦 𑀢𑀚𑁆𑀚𑀦𑀻𑀬𑀸𑀤𑀺𑀲𑀢𑁆𑀢𑀓𑀫𑁆𑀫𑀸𑀦𑀺 𑀯𑀺𑀬 𑀇𑀤𑀫𑁆𑀧𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀅𑀲𑀼𑀘𑀺𑀪𑀸𑀯𑀸𑀤𑀺𑀤𑁄𑀲𑀬𑀼𑀢𑁆𑀢𑀲𑁆𑀲, 𑀲𑀗𑁆𑀖𑀲𑁆𑀲 𑀘 𑀯𑀺𑀦𑀺𑀘𑁆𑀙𑀬𑁂 𑀅𑀢𑀺𑀝𑁆𑀞𑀫𑀸𑀦𑀲𑁆𑀲 𑀓𑀢𑁆𑀢𑀩𑁆𑀩𑀁 𑀯𑀺𑀲𑀼𑀁 𑀏𑀓𑀁 𑀦𑀺𑀕𑁆𑀕𑀳𑀓𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀦𑀺𑀕𑁆𑀕𑀳𑀓𑀫𑁆𑀫𑁂 𑀓𑀢𑁂 𑀲𑁄 𑀧𑀼𑀕𑁆𑀕𑀮𑁄 ‘‘𑀅𑀳𑀁 ¶ 𑀲𑀼𑀤𑁆𑀥𑁄’’𑀢𑀺 𑀅𑀢𑁆𑀢𑀦𑁄 𑀲𑀼𑀤𑁆𑀥𑀺𑀬𑀸 𑀲𑀸𑀥𑀦𑀢𑁆𑀣𑀁 𑀲𑀗𑁆𑀖𑀫𑀚𑁆𑀛𑀁 𑀑𑀢𑀭𑀺𑀢𑀼𑀁, 𑀲𑀗𑁆𑀖𑁄 𑀘𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀸𑀢𑀼𑀁 𑀦 𑀮𑀪𑀢𑀺, 𑀢𑀁 𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦𑁂𑀯 𑀘 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺.

𑀓𑀣𑀁 𑀧𑀦𑁂𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺? 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀲𑁄 𑀢𑀣𑀸 𑀦𑀺𑀕𑁆𑀕𑀳𑀺𑀢𑁄 𑀦𑀺𑀕𑁆𑀕𑀳𑀺𑀢𑁄𑀯 𑀳𑁄𑀢𑀺, 𑀑𑀲𑀸𑀭𑀡𑀁 𑀦 𑀮𑀪𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ¶ 𑀑𑀲𑀸𑀭𑀡𑀸 𑀦 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀧𑀸𑀴𑀺𑀬𑀁 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀯𑀢𑁆𑀢𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀫𑀸𑀯𑀢𑁆𑀢𑀺𑀢𑁆𑀯𑀸 𑀮𑀚𑁆𑀚𑀺𑀥𑀫𑁆𑀫𑁂 𑀑𑀓𑁆𑀓𑀦𑁆𑀢𑀲𑁆𑀲 𑀑𑀲𑀸𑀭𑀡𑀸 𑀅𑀯𑀼𑀢𑁆𑀢𑀸𑀧𑀺 𑀢𑀚𑁆𑀚𑀦𑀻𑀬𑀸𑀤𑀻𑀲𑀼 𑀯𑀺𑀬 𑀦𑀬𑀢𑁄 𑀓𑀫𑁆𑀫𑀯𑀸𑀘𑀁 𑀬𑁄𑀚𑁂𑀢𑁆𑀯𑀸 𑀑𑀲𑀸𑀭𑀡𑀸 𑀓𑀸𑀢𑀩𑁆𑀩𑀸 𑀏𑀯𑀸’’𑀢𑀺 𑀯𑀤𑀦𑁆𑀢𑀺, 𑀇𑀤𑀁 𑀬𑀼𑀢𑁆𑀢𑀁. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀢𑀺 ‘‘𑀲𑀘𑁂 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺, 𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀮𑀪𑀺𑀲𑁆𑀲𑀢𑀺. 𑀦𑁄 𑀘𑁂, 𑀢𑀣𑀸𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁩𑁮). 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀦𑁆𑀢𑀺 𑀘 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑁂𑀯. 𑀢𑁂𑀦𑀸𑀳 ‘‘𑀇𑀤𑀁 𑀳𑀻’’𑀢𑀺 𑀆𑀤𑀺.

𑀲𑀢𑀺𑀯𑀺𑀦𑀬𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀯𑀺𑀭𑀽𑀧𑀢𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀘𑀺𑀢𑁆𑀢𑀁 𑀤𑀼𑀓𑁆𑀔𑀁 𑀯𑀺𑀧𑀘𑁆𑀘𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀤𑀼𑀓𑁆𑀔𑀢𑁆𑀣𑀁 𑀯𑁄𑀳𑀸𑀭𑁄’’𑀢𑀺𑀆𑀤𑀺. 𑀉𑀧𑀯𑀤𑀦𑀸𑀢𑀺 𑀘𑁄𑀤𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀅𑀦𑀼𑀯𑀤𑀦𑁂.

𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀜𑁆𑀜𑀸𑀢𑀢𑁆𑀢𑀸𑀢𑀺 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀓𑀫𑁆𑀫𑀯𑀕𑁆𑀕𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀡𑁆𑀡𑀦𑀸𑀫𑀼𑀔𑁂𑀦 𑀯𑀺𑀜𑁆𑀜𑀸𑀢𑀢𑁆𑀢𑀸 𑀯𑀺𑀦𑀺𑀘𑁆𑀙𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑁨𑁧𑁬. 𑀧𑀸𑀴𑀺𑀬𑀁 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀅𑀢𑁆𑀢𑀦𑀺 𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀯𑀸. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑀲𑁆𑀫𑀺𑀁 𑀯𑀸 𑀧𑀭𑀲𑁆𑀲 𑀧𑀭𑀺𑀲𑀸𑀬 𑀯𑀸. 𑀅𑀦𑀯𑀲𑁆𑀲𑀯𑀸𑀬𑀸𑀢𑀺 𑀅𑀦𑀼𑀧𑁆𑀧𑀸𑀤𑀸𑀬.

𑁨𑁨𑁦. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀇𑀤𑀁 𑀧𑀼𑀘𑁆𑀙𑀸𑀯𑀘𑀦𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀦𑁆𑀢𑀺𑀆𑀤𑀺 𑀯𑀺𑀲𑀚𑁆𑀚𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑁨𑁨𑁨. 𑀲𑀫𑁆𑀫𑀼𑀢𑀺𑀲𑀪𑀸𑀯𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁂 𑀓𑀼𑀲𑀮𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀢𑀤𑀼𑀧𑀘𑀸𑀭𑁂𑀦 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬 ¶ , 𑀢𑀣𑀸 ¶ 𑀅𑀯𑀢𑁆𑀯𑀸 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀏𑀯𑀁𑀯𑀘𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀳𑀺 𑀆𑀧𑀢𑁆𑀢𑀺 𑀦𑀸𑀫 𑀧𑀭𑀫𑀢𑁆𑀣𑀥𑀫𑁆𑀫𑀲𑀪𑀸𑀯𑀸 𑀪𑀯𑁂𑀬𑁆𑀬, 𑀢𑀤𑀸 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬. 𑀬𑀲𑁆𑀫𑀸 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀤𑀻𑀲𑀼 𑀤𑀲𑁆𑀲𑀺𑀢𑀤𑁄𑀲𑀧𑁆𑀧𑀲𑀗𑁆𑀕𑀢𑁄 𑀧𑀭𑀫𑀢𑁆𑀣𑀲𑀪𑀆𑀯𑀢𑀸 𑀦 𑀬𑀼𑀢𑁆𑀢𑀸, 𑀏𑀓𑀦𑁆𑀢𑀲𑀫𑁆𑀫𑀼𑀢𑀺𑀲𑀪𑀸𑀯𑀸 𑀏𑀯 𑀲𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦 𑀯𑀢𑁆𑀢𑀩𑁆𑀩𑀸. 𑀬𑀤𑀺 𑀧𑀦 𑀅𑀓𑀼𑀲𑀮𑀅𑀩𑁆𑀬𑀸𑀓𑀢𑀥𑀫𑁆𑀫𑀲𑀫𑀼𑀝𑁆𑀞𑀺𑀢𑀢𑁆𑀢𑀫𑁂𑀯 𑀉𑀧𑀸𑀤𑀸𑀬 𑀧𑀭𑀺𑀬𑀸𑀬𑀢𑁄 ‘‘𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀤𑀸 𑀓𑀼𑀲𑀮𑀥𑀫𑁆𑀫𑀲𑀫𑀉𑀝𑁆𑀞𑀺𑀢𑀢𑁆𑀢𑀫𑁆𑀧𑀺 𑀉𑀧𑀸𑀤𑀸𑀬 𑀧𑀭𑀺𑀬𑀸𑀬𑀢𑁄 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀬𑀢𑁄 𑀘𑁂𑀢𑀁 𑀯𑀘𑀦𑀁 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀽𑀧𑀘𑀸𑀭𑀸𑀭𑀳𑀢𑁆𑀢𑀲𑁆𑀲 𑀓𑀼𑀲𑀮𑀽𑀧𑀘𑀸𑀭𑀸𑀦𑀸𑀭𑀳𑀢𑁆𑀢𑀲𑁆𑀲 𑀯𑀺𑀲𑀼𑀁 𑀓𑀸𑀭𑀡𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁, 𑀢𑀲𑁆𑀫𑀸 𑀬𑀁 𑀢𑀁 𑀓𑀸𑀭𑀡𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀇𑀤𑀁 𑀪𑀸𑀲𑀺𑀢𑀁, 𑀢𑀲𑁆𑀲 𑀯𑀲𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀧𑀦 𑀬𑁄 𑀅𑀗𑁆𑀕𑀧𑁆𑀧𑀳𑁄𑀦𑀓𑀘𑀺𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀦𑀸𑀜𑁆𑀜𑀁 𑀯𑀺𑀲𑁂𑀲𑀓𑀸𑀭𑀡𑀁 𑀲𑀦𑁆𑀥𑀸𑀬𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀲 𑀕𑀸𑀳𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀣𑀯𑀻𑀔𑀡𑀦𑀸𑀤𑀺𑀓𑁂𑀢𑀺 𑀧𑀣𑀯𑀻𑀔𑀡𑀦𑀸𑀤𑀺𑀦𑀺𑀫𑀺𑀢𑁆𑀢𑁂 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂. 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀪𑀽𑀫𑀺𑀲𑁄𑀥𑀦𑀸𑀤𑀺𑀯𑀲𑁂𑀦 𑀧𑀣𑀯𑀻𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀸𑀤𑀺𑀓𑀸𑀮𑁂 𑀓𑀼𑀲𑀮𑀘𑀺𑀢𑁆𑀢𑀁 𑀓𑀸𑀭𑀡𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀯𑀺𑀚𑁆𑀚𑀫𑀸𑀦𑁂 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀢𑁆𑀢𑁂𑀦 𑀓𑀼𑀲𑀮𑀯𑁄𑀳𑀸𑀭𑀸𑀭𑀳𑀸𑀬 𑀆𑀧𑀢𑁆𑀢𑀺𑀬𑀸 𑀯𑀺𑀚𑁆𑀚𑀫𑀸𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁨𑁨) 𑀧𑀦 ‘‘𑀢𑀲𑁆𑀫𑀺𑀁 𑀲𑀢𑀻’’𑀢𑀺 𑀇𑀫𑀲𑁆𑀲 ‘‘𑀢𑀲𑁆𑀫𑀺𑀁 𑀓𑀼𑀲𑀮𑀘𑀺𑀢𑁆𑀢𑁂 𑀆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑁂’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀦 𑀬𑀼𑀚𑁆𑀚𑀢𑀺 ‘‘𑀬𑀲𑁆𑀫𑀺’’𑀦𑁆𑀢𑀺 𑀬-𑀲𑀤𑁆𑀤𑁂𑀦 𑀧𑀭𑀸𑀫𑀝𑁆𑀞𑀲𑁆𑀲𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 ‘‘𑀢𑀲𑁆𑀫𑀺’’𑀦𑁆𑀢𑀺 𑀧𑀭𑀸𑀫𑀲𑀺𑀢𑀩𑁆𑀩𑀢𑁄.

𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑀤𑀺 𑀲𑀫𑁆𑀫𑀼𑀢𑀺𑀲𑀪𑀸𑀯𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀤𑀺𑀲𑀫𑀼𑀝𑁆𑀞𑀺𑀢𑀢𑁆𑀢𑁂𑀦 𑀅𑀓𑀼𑀲𑀮𑀸𑀤𑀺𑀯𑁄𑀳𑀸𑀭𑁄 𑀓𑀭𑀻𑀬𑀢𑀺, 𑀢𑀤𑀸 𑀓𑀼𑀲𑀮𑀯𑁄𑀳𑀸𑀭𑁄𑀧𑀺 𑀓𑀢𑁆𑀢𑀩𑁆𑀩𑁄𑀢𑀺 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀜𑁆𑀜𑀣𑀸 𑀅𑀓𑀼𑀲𑀮𑀸𑀤𑀺𑀪𑀸𑀯𑁄𑀧𑀺𑀲𑁆𑀲 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀦𑁂𑀧𑀺 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀧𑁆𑀧𑀳𑁄𑀦𑀓𑀢𑁆𑀢𑁂 𑀓𑀼𑀲𑀮𑀯𑁄𑀳𑀸𑀭𑁄𑀯 𑀆𑀧𑀢𑁆𑀢𑀺𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀦 𑀅𑀓𑀼𑀲𑀮𑀸𑀤𑀺𑀯𑁄𑀳𑀸𑀭𑁄, 𑀢𑀲𑁆𑀫𑀸 𑀦𑀬𑀺𑀤𑀁 𑀅𑀗𑁆𑀕𑀧𑁆𑀧𑀳𑁄𑀦𑀓𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀇𑀤𑀁 𑀆𑀧𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑁂𑀦 𑀅𑀗𑁆𑀕𑀧𑁆𑀧𑀳𑁄𑀦𑀓𑀁 𑀓𑀸𑀭𑀡𑀪𑀽𑀢𑀁 𑀘𑀺𑀢𑁆𑀢𑀫𑀢𑁆𑀢𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀁 ¶ , 𑀅𑀜𑁆𑀜𑀣𑀸 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀤𑀺𑀪𑀸𑀯𑁄𑀧𑀺 𑀓𑁂𑀦𑀘𑀺 𑀦𑀺𑀫𑀺𑀢𑁆𑀢𑁂𑀦 𑀧𑀭𑀺𑀬𑀸𑀬𑀢𑁄𑀯 𑀯𑀼𑀢𑁆𑀢𑁄, 𑀦 𑀧𑀭𑀫𑀢𑁆𑀣𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀳 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺, 𑀢𑀁 𑀓𑀼𑀲𑀮𑀁, 𑀇𑀢𑀭𑁂𑀳𑀺 𑀇𑀢𑀭’’𑀦𑁆𑀢𑀺.

𑀇𑀤𑀁 𑀧𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀇𑀤𑀜𑁆𑀳𑀺 𑀬𑀁 𑀓𑀺𑀜𑁆𑀘𑀺 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀓𑀸𑀭𑀡𑀁 𑀪𑀯𑀦𑁆𑀢𑀁 𑀅𑀦𑀺𑀬𑀢𑀓𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦 𑀳𑁄𑀢𑀺. 𑀬𑀁 𑀧𑀦 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀇𑀤𑀫𑁂𑀯 𑀓𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀜𑁆𑀳𑀺 𑀧𑀡𑁆𑀡𑀢𑁆𑀢𑀺𑀁 𑀜𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀲𑀩𑁆𑀩𑀸𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺, 𑀮𑁄𑀓𑀯𑀚𑁆𑀚𑀸𑀧𑀢𑁆𑀢𑀺𑀬𑀸 𑀧𑀦 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀓𑀸𑀭𑀡𑀁 𑀳𑁄𑀢𑀺. 𑀓𑁂𑀯𑀮𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀧𑀢𑁆𑀢𑀻𑀲𑀼 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀧𑀯𑀢𑁆𑀢𑀺𑀓𑁆𑀔𑀡𑁂 𑀏𑀯 𑀅𑀓𑀼𑀲𑀮𑀁 𑀦 𑀯𑀢𑁆𑀢𑀢𑀺, 𑀢𑀤𑀜𑁆𑀜𑀢𑁆𑀣 𑀲𑀬𑀫𑁂𑀯 𑀧𑀯𑀢𑁆𑀢𑀢𑀺. 𑀅𑀩𑁆𑀬𑀸𑀓𑀢𑀁 𑀧𑀦 𑀓𑀸𑀬𑀯𑀘𑀻𑀪𑀽𑀢𑀁 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑀦𑁆𑀢𑀺 𑀲𑀩𑁆𑀩𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀫𑁂𑀯 𑀳𑁄𑀢𑀺 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀸𑀬𑀯𑀸𑀘𑀗𑁆𑀕𑀯𑀺𑀭𑀳𑀺𑀢𑀢𑁆𑀢𑀸𑀪𑀸𑀯𑀸. 𑀢𑀲𑁆𑀫𑀸 𑀇𑀫𑁂𑀲𑀁 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀲𑀩𑁆𑀩𑀸𑀧𑀢𑁆𑀢𑀺𑀫𑀽𑀮𑀓𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀇𑀤𑀁 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀢𑁆𑀢𑀁, 𑀅𑀩𑁆𑀬𑀸𑀓𑀢𑀢𑁆𑀢𑀜𑁆𑀘 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀓𑀼𑀲𑀮𑀫𑁆𑀧𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀆𑀧𑀢𑁆𑀢𑀺𑀬𑀸 𑀢𑀤𑀼𑀧𑀘𑀸𑀭𑁂𑀦 𑀓𑀼𑀲𑀮𑀢𑁆𑀢𑀯𑁄𑀳𑀸𑀭𑁄 𑀅𑀬𑀼𑀢𑁆𑀢𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸𑀦𑀁 𑀏𑀓𑀢𑁆𑀢𑀯𑁄𑀳𑀸𑀭𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀬𑀤𑀕𑁆𑀕𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀸, 𑀢𑀤𑀕𑁆𑀕𑁂𑀦 𑀓𑀸𑀭𑀡𑀓𑀸𑀭𑀺𑀬𑀯𑁄𑀳𑀸𑀭𑁄𑀧𑀺 𑀦𑁂𑀲𑀁 𑀅𑀬𑀼𑀢𑁆𑀢𑁄. 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀓𑀸𑀬𑀯𑀘𑀻𑀤𑁆𑀯𑀸𑀭𑀫𑁂𑀯 𑀆𑀯𑁂𑀡𑀺𑀓𑀁 𑀓𑀸𑀭𑀡𑀦𑁆𑀢𑀺.

𑀢𑀢𑁆𑀣 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀫𑁂𑀯𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀳𑀦𑀢𑁄 𑀓𑀸𑀭𑀡𑀽𑀧𑀘𑀸𑀭𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀮𑁄𑀓𑀯𑀚𑁆𑀚𑁂. 𑀯𑀺𑀓𑀧𑁆𑀧𑁄 𑀦𑀢𑁆𑀣𑀻𑀢𑀺 𑀲𑀺𑀬𑀸-𑀲𑀤𑁆𑀤𑀲𑁆𑀲 𑀯𑀺𑀓𑀧𑁆𑀧𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀅𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀓𑀼𑀲𑀮𑀲𑀫𑀼𑀝𑁆𑀞𑀺𑀢𑀸𑀬 𑀓𑀸𑀭𑀡𑀽𑀧𑀘𑀸𑀭𑁂𑀦 𑀅𑀓𑀼𑀲𑀮𑀁 𑀳𑁄𑀢𑀺. 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀦𑀢𑁄 ¶ 𑀅𑀩𑁆𑀬𑀸𑀓𑀢𑀁 𑀳𑁄𑀢𑀻𑀢𑀺 𑀇𑀢𑁆𑀣𑀺𑀬𑀸𑀤𑀻𑀳𑀺 𑀲𑀳 𑀧𑀺𑀝𑁆𑀞𑀺𑀧𑀲𑀸𑀭𑀡𑀯𑀲𑀧𑁆𑀧𑀯𑀢𑁆𑀢𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀭𑀽𑀧𑀸𑀩𑁆𑀬𑀸𑀓𑀢𑀯𑀲𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑀸𑀭𑀡𑀽𑀧𑀘𑀸𑀭𑁂𑀦𑁂𑀯 𑀆𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀧𑀢𑁆𑀢𑀸𑀥𑀺𑀓𑀭𑀡𑁂. 𑀲𑀜𑁆𑀘𑀺𑀘𑁆𑀘𑀸𑀲𑀜𑁆𑀘𑀺𑀘𑁆𑀘𑀯𑀲𑁂𑀦𑀸𑀢𑀺 𑀧𑀡𑁆𑀡𑀢𑁆𑀢𑀺𑀁 𑀜𑀢𑁆𑀯𑀸, 𑀅𑀜𑁆𑀜𑀢𑁆𑀯𑀸 𑀘 𑀆𑀧𑀚𑁆𑀚𑀦𑀯𑀲𑁂𑀦 𑀇𑀫𑀁 𑀯𑀺𑀓𑀧𑁆𑀧𑀪𑀸𑀯𑀁 𑀲𑀦𑁆𑀥𑀸𑀬 𑀅𑀓𑀼𑀲𑀮𑀢𑁆𑀢𑀅𑀩𑁆𑀬𑀸𑀓𑀢𑀢𑁆𑀢𑀲𑀗𑁆𑀔𑀸𑀢𑀁 𑀬𑀣𑀸𑀯𑀼𑀢𑁆𑀢𑀁 𑀇𑀫𑀁 𑀯𑀺𑀓𑀧𑁆𑀧𑀲𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀁.

𑀬𑀤𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘𑀸𑀧𑀚𑁆𑀚𑀦𑀧𑀓𑁆𑀔𑁂 𑀓𑀼𑀲𑀮𑁂𑀦𑀸𑀧𑀺 𑀆𑀧𑀚𑁆𑀚𑀦𑀢𑁄 𑀢𑀫𑁆𑀧𑀺 𑀯𑀺𑀓𑀧𑁆𑀧𑀁 𑀲𑀦𑁆𑀥𑀸𑀬 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀧𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. ‘‘𑀅𑀘𑀺𑀢𑁆𑀢𑀓𑀸𑀦’’𑀦𑁆𑀢𑀺 ¶ 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀁 ‘‘𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀢𑁂𑀦 𑀲𑀸𑀯𑀚𑁆𑀚𑀪𑀽𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀧𑀺 𑀅𑀦𑀯𑀚𑁆𑀚𑀪𑀽𑀢𑀓𑀼𑀲𑀮𑀯𑁄𑀳𑀸𑀭𑁄 𑀅𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀦 𑀘 𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀲𑁆𑀲 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀢𑁆𑀢𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑀣𑀸 𑀯𑁄𑀳𑀭𑀺𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀬𑀯𑀸𑀘𑀸𑀲𑀗𑁆𑀔𑀸𑀢𑀁 𑀅𑀩𑁆𑀬𑀸𑀓𑀢𑀲𑁆𑀲𑁂𑀯 𑀓𑀸𑀭𑀡𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀦𑁆𑀢𑀺 𑀘𑀮𑀺𑀢𑀸𑀦𑀁, 𑀧𑀯𑀢𑁆𑀢𑀸𑀦𑀜𑁆𑀘. 𑀘𑀮𑀺𑀢𑁄 𑀳𑀺 𑀓𑀸𑀬𑁄, 𑀧𑀯𑀢𑁆𑀢𑀸 𑀯𑀸𑀘𑀸. 𑀏𑀢𑁆𑀣 𑀘 𑀓𑀸𑀬𑀯𑀸𑀘𑀸𑀦𑀫𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀁. 𑀢𑀜𑁆𑀘…𑀧𑁂… 𑀅𑀩𑁆𑀬𑀸𑀓𑀢𑀦𑁆𑀢𑀺 𑀏𑀯𑀁 𑀅𑀩𑁆𑀬𑀸𑀓𑀢𑀲𑁆𑀲 𑀆𑀧𑀢𑁆𑀢𑀺𑀓𑀸𑀭𑀡𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀇𑀤𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀢𑀺 𑀲𑀺𑀚𑁆𑀛𑀢𑀺.

𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯. 𑁩.𑁨𑁨𑁨) 𑀆𑀧𑀢𑁆𑀢𑀺𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀅𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑀁 𑀲𑀫𑀢𑁆𑀣𑁂𑀢𑀼𑀁 𑀩𑀳𑀼𑀁 𑀧𑀧𑀜𑁆𑀘𑀺𑀢𑀁, 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 ‘‘𑀬𑀁 𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀢𑁆𑀢𑁂𑀦 𑀪𑀺𑀦𑁆𑀦𑀢𑀸𑀯 𑀤𑀲𑁆𑀲𑀺𑀢𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀇𑀥 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀏𑀯𑀁 𑀯𑀻𑀢𑀺𑀓𑁆𑀓𑀫𑀢𑁄 𑀬𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀏𑀢𑁆𑀣 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀜𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀓𑀸𑀬𑀯𑀘𑀻𑀯𑀻𑀢𑀺𑀓𑁆𑀓𑀫𑀲𑀫𑀼𑀝𑁆𑀞𑀺𑀢𑀸 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀅𑀩𑁆𑀬𑀸𑀓𑀢𑀯𑀸𑀭𑁂𑀧𑀺.

𑀅𑀥𑀺𑀓𑀭𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸𑀤𑀺𑀯𑀡𑁆𑀡𑀦𑀸

𑁨𑁨𑁮. 𑀧𑀸𑀴𑀺𑀬𑀁 ¶ 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀏𑀓𑀁 𑀲𑀫𑀣𑀁 𑀅𑀦𑀸𑀕𑀫𑁆𑀫𑀸𑀢𑀺𑀆𑀤𑀺 𑀧𑀼𑀘𑁆𑀙𑀸. 𑀲𑀺𑀬𑀸𑀢𑀺𑀆𑀤𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀲𑀺𑀬𑀸𑀢𑀺𑀲𑁆𑀲 𑀯𑀘𑀦𑀻𑀬𑀦𑁆𑀢𑀺 𑀏𑀢𑁂𑀦𑁂𑀯 𑀯𑀽𑀧𑀲𑀫𑀁 𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀢𑁆𑀢𑀲𑁆𑀫𑀺𑀦𑁆𑀢𑀺 𑀪𑀸𑀯𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼. ‘‘𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀻’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀉𑀩𑁆𑀩𑀸𑀳𑀺𑀓𑀸𑀬 𑀔𑀻𑀬𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀯𑀼𑀢𑁆𑀢𑀁 𑀢𑀢𑁆𑀣 𑀙𑀦𑁆𑀤𑀤𑀸𑀦𑀲𑁆𑀲 𑀦𑀢𑁆𑀣𑀺𑀢𑀸𑀬.

𑁨𑁩𑁫. 𑀯𑀡𑁆𑀡𑀸𑀯𑀡𑁆𑀡𑀸𑀬𑁄 𑀓𑀢𑁆𑀯𑀸𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑁂𑀳𑀺 𑀲𑀜𑁆𑀜𑀸𑀡𑁂𑀳𑀺 𑀬𑀼𑀢𑁆𑀢𑀸𑀬𑁄 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺.

𑁨𑁪𑁨. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 ¶ …𑀧𑁂… 𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀅𑀧𑀮𑁄𑀓𑀦𑀸𑀤𑀺𑀓𑀫𑁆𑀫𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁫. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁄

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁪𑁩. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 ¶ ¶ 𑀅𑀝𑁆𑀞𑀧𑀤𑀸𑀓𑀸𑀭𑁂𑀦𑀸𑀢𑀺 𑀚𑀽𑀢𑀨𑀮𑀓𑁂 𑀅𑀝𑁆𑀞𑀕𑀩𑁆𑀪𑀭𑀸𑀚𑀺𑀆𑀓𑀸𑀭𑁂𑀦. 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦𑀸𑀢𑀺 𑀔𑁂𑀴𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦. 𑀇𑀤𑀜𑁆𑀘 𑀯𑀝𑁆𑀝𑀸𑀥𑀸𑀭𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀓𑀡𑁆𑀝𑀓𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀯𑀝𑁆𑀝𑀓𑀧𑀸𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑁨𑁪𑁪. 𑀧𑀼𑀣𑀼𑀧𑀸𑀡𑀺𑀓𑀦𑁆𑀢𑀺 𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀯𑀺𑀓𑀲𑀺𑀢𑀳𑀢𑁆𑀣𑀢𑀮𑁂𑀳𑀺 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀏𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀳𑀢𑁆𑀣𑀧𑀭𑀺𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁪𑁫. 𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀡𑁆𑀟𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑀫𑁆𑀩𑀓𑀲𑀼𑀢𑁆𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀜𑁆𑀜𑁄𑀧𑀘𑀺𑀢𑀲𑀼𑀢𑁆𑀢𑀸𑀤𑀺𑀆𑀓𑀸𑀭𑀁 𑀯𑀼𑀘𑁆𑀘𑀢𑀺. 𑀯𑀮𑀬𑀦𑁆𑀢𑀺 𑀳𑀢𑁆𑀣𑀧𑀸𑀤𑀯𑀮𑀬𑀁.

𑁨𑁪𑁬. 𑀤𑁆𑀯𑀗𑁆𑀕𑀼𑀮𑁂𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀤𑁆𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀤𑀼𑀫𑀸𑀲𑀲𑁆𑀲 𑀯𑀸 𑀤𑁆𑀯𑀗𑁆𑀕𑀼𑀮𑀲𑁆𑀲 𑀯𑀸 𑀅𑀢𑀺𑀓𑁆𑀓𑀦𑁆𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀓𑁂𑀲𑀫𑀲𑁆𑀲𑀼𑀕𑀡𑀦𑀸𑀬 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑀓𑁄𑀘𑁆𑀙𑁂𑀦𑀸𑀢𑀺 𑀉𑀲𑀻𑀭𑀢𑀺𑀡𑀸𑀤𑀻𑀦𑀺 𑀩𑀦𑁆𑀥𑀺𑀢𑁆𑀯𑀸 𑀲𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀓𑁄𑀘𑁆𑀙𑁂𑀦. 𑀘𑀺𑀓𑁆𑀓𑀮𑁂𑀦𑀸𑀢𑀺 𑀲𑀺𑀮𑁂𑀲𑀬𑀼𑀢𑁆𑀢𑀢𑁂𑀮𑁂𑀦. 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑀲𑀺𑀭𑀸𑀦𑀫𑁆𑀧𑀻𑀢𑀺 𑀉𑀡𑁆𑀳𑀸𑀪𑀺𑀢𑀢𑁆𑀢𑀸𑀦𑀁 𑀭𑀚𑁄𑀓𑀺𑀡𑁆𑀡𑀲𑀺𑀭𑀸𑀦𑀁. 𑀅𑀤𑁆𑀤𑀳𑀢𑁆𑀣𑁂𑀦𑀸𑀢𑀺 𑀅𑀮𑁆𑀮𑀳𑀢𑁆𑀣𑁂𑀦.

𑁨𑁪𑁮-𑁯. 𑀲𑀸𑀥𑀼𑀕𑀻𑀢𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀕𑀻𑀢𑀁. 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑁂𑀦 𑀉𑀘𑁆𑀘𑀸𑀭𑀡𑀯𑀢𑁆𑀢𑁂𑀦. 𑀢𑀭𑀗𑁆𑀕𑀯𑀢𑁆𑀢𑀸𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂𑀲𑀁…𑀧𑁂… 𑀮𑀓𑁆𑀔𑀡’’𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀬𑀢𑁆𑀢𑀓𑀸𑀳𑀺 𑀫𑀢𑁆𑀢𑀸𑀳𑀺 𑀅𑀓𑁆𑀔𑀭𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀢𑁄𑀧𑀺 𑀅𑀥𑀺𑀓𑀫𑀢𑁆𑀢𑀸𑀬𑀼𑀢𑁆𑀢𑀁 𑀓𑀢𑁆𑀯𑀸 𑀓𑀣𑀦𑀁 𑀯𑀺𑀓𑀸𑀭𑀓𑀣𑀦𑀁 𑀦𑀸𑀫, 𑀢𑀣𑀸 𑀅𑀓𑀢𑁆𑀯𑀸 𑀓𑀣𑀦𑀫𑁂𑀯 𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀮𑁄𑀫𑀺𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀬𑀣𑀸 𑀩𑀳𑀺𑀤𑁆𑀥𑀸 𑀮𑁄𑀫𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑁨𑁫𑁦. 𑀧𑀸𑀴𑀺𑀬𑀁 ¶ 𑀢𑀭𑀼𑀡𑀜𑁆𑀜𑁂𑀯 𑀅𑀫𑁆𑀩𑀦𑁆𑀢𑀺 𑀢𑀭𑀼𑀡𑀁 𑀅𑀲𑀜𑁆𑀚𑀸𑀢𑀩𑀻𑀚𑀁 𑀏𑀯 𑀅𑀫𑁆𑀩𑀨𑀮𑀁. 𑀧𑀸𑀢𑀸𑀧𑁂𑀢𑁆𑀯𑀸𑀢𑀺 𑀙𑀺𑀦𑁆𑀤𑀸𑀧𑁂𑀢𑁆𑀯𑀸𑀯. ‘‘𑀫𑀢𑁆𑀢𑀸𑀯𑀡𑁆𑀡𑀺𑀢𑀸’’𑀢𑀺 𑀇𑀤𑀁 ‘‘𑀧𑀭𑁂 𑀦𑀺𑀦𑁆𑀤𑀦𑁆𑀢𑀻’’𑀢𑀺 𑀲𑀸𑀲𑀦𑀳𑀺𑀢𑁂𑀲𑀺𑀢𑀸𑀬 𑀯𑀼𑀢𑁆𑀢𑀁. 𑀦 𑀧𑀭𑀺𑀬𑀸𑀧𑀼𑀡𑀺𑀁𑀲𑀽𑀢𑀺 𑀦𑀸𑀲𑀺𑀓𑁆𑀔𑀺𑀁𑀲𑀼.

𑁨𑁫𑁧. 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀻𑀢𑀺 𑀲𑀩𑁆𑀩𑁂𑀲𑀁 𑀅𑀳𑀺𑀪𑁂𑀤𑀸𑀦𑀁 𑀘𑀢𑀽𑀲𑀼 𑀏𑀯 𑀲𑀗𑁆𑀕𑀳𑀢𑁄 𑀯𑀼𑀢𑁆𑀢𑀁. 𑀅𑀢𑁆𑀢𑀧𑀭𑀺𑀢𑁆𑀢𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼𑀁.

𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀦𑁆𑀢𑀺 𑀯𑀺𑀭𑀽𑀧𑀓𑁆𑀔𑀚𑀸𑀢𑀺𑀓𑁂𑀳𑀺 𑀦𑀸𑀕𑁂𑀳𑀺 𑀲𑀳 𑀫𑀬𑁆𑀳𑀁 𑀫𑀺𑀢𑁆𑀢𑀪𑀸𑀯𑁄 𑀳𑁄𑀢𑀼, 𑀫𑁂𑀢𑁆𑀢𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄, 𑀢𑁂 𑀲𑀼𑀔𑀺𑀢𑀸 𑀦𑀺𑀤𑁆𑀤𑀼𑀓𑁆𑀔𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀫𑁂𑀢𑁆𑀢𑀸𑀨𑀭𑀡𑀁 𑀳𑁄𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀸𑀤𑀓𑁂𑀳𑀻𑀢𑀺 𑀅𑀳𑀺𑀓𑀼𑀮𑁂𑀳𑀺 𑀲𑀳 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀤𑀲𑁆𑀲𑀦𑀁. 𑀫𑀸 𑀫𑀁 𑀅𑀧𑀸𑀤𑀓𑁄 𑀳𑀺𑀁𑀲𑀻𑀢𑀺 𑀢𑀸𑀬 𑀫𑁂𑀢𑁆𑀢𑀸𑀬 𑀅𑀢𑁆𑀢𑀭𑀓𑁆𑀔𑀸𑀯𑀺𑀥𑀸𑀦𑀤𑀲𑁆𑀲𑀦𑀁.

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺𑀆𑀤𑀺 𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀫𑁂𑀢𑁆𑀢𑀸𑀨𑀭𑀡𑀤𑀲𑁆𑀲𑀦𑀁. 𑀢𑀢𑁆𑀣 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀮𑀸𑀫𑀓𑀁 𑀤𑀼𑀓𑁆𑀔𑀳𑁂𑀢𑀼, 𑀤𑀼𑀓𑁆𑀔𑀜𑁆𑀘 𑀫𑀸 𑀆𑀕𑀘𑁆𑀙𑀢𑀼.

𑀏𑀯𑀁 𑀫𑁂𑀢𑁆𑀢𑀸𑀬 𑀅𑀢𑁆𑀢𑀕𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀢𑀦𑀢𑁆𑀢𑀬𑀸𑀦𑀼𑀲𑁆𑀲𑀭𑀡𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀸𑀡𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀫𑀸𑀡𑀓𑀭𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀢𑀩𑁆𑀩𑀺𑀧𑀸𑀓𑀸 𑀘 𑀧𑀫𑀸𑀡𑀸, 𑀢𑀧𑁆𑀧𑀝𑀺𑀧𑀓𑁆𑀔𑀸 𑀲𑀻𑀮𑀸𑀤𑀬𑁄 𑀕𑀼𑀡𑀸, 𑀢𑀩𑁆𑀩𑀺𑀧𑀸𑀓𑀸 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀨𑀮𑀸𑀦𑀺 𑀅𑀧𑁆𑀧𑀫𑀸𑀡𑀸, 𑀢𑁂 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀧𑁆𑀧𑀫𑀸𑀡𑁄, 𑀅𑀧𑁆𑀧𑀫𑀸𑀡𑀸 𑀯𑀸 𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀸 𑀅𑀲𑁆𑀲𑀸𑀢𑀺𑀧𑀺 𑀅𑀧𑁆𑀧𑀫𑀸𑀡𑁄. 𑀧𑀫𑀸𑀡𑀯𑀦𑁆𑀢𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀫𑀸𑀡𑀓𑀭𑀥𑀫𑁆𑀫𑀬𑀼𑀢𑁆𑀢𑀸𑀦𑀺. 𑀅𑀳𑀺𑀯𑀺𑀘𑁆𑀙𑀺𑀓𑀸𑀢𑀺 𑀲𑀭𑀻𑀲𑀧𑀸𑀦𑀜𑁆𑀜𑁂𑀯 𑀧𑀪𑁂𑀤𑀤𑀲𑁆𑀲𑀦𑀁. 𑀉𑀡𑁆𑀡𑀦𑀸𑀪𑀻𑀢𑀺 𑀮𑁄𑀫𑀲𑀦𑀸𑀪𑀺𑀓𑁄 𑀫𑀓𑁆𑀓𑀝𑁄. 𑀲𑀭𑀩𑀽𑀢𑀺 𑀖𑀭𑀕𑁄𑀴𑀺𑀓𑀸.

𑀧𑀝𑀺𑀓𑁆𑀓𑀫𑀦𑁆𑀢𑀽𑀢𑀺 𑀅𑀧𑀕𑀘𑁆𑀙𑀦𑁆𑀢𑀼, 𑀫𑀸 𑀫𑀁 𑀯𑀺𑀳𑁂𑀲𑀬𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀲𑁄𑀳𑀁 𑀦𑀫𑁄𑀢𑀺 𑀏𑀢𑁆𑀣 ‘‘𑀓𑀭𑁄𑀫𑀻’’𑀢𑀺 𑀧𑀸𑀞𑀲𑁂𑀲𑁄. 𑀬𑀲𑁆𑀫𑀸 𑀫𑀬𑀸 𑀫𑁂𑀢𑁆𑀢𑀸𑀤𑀻𑀳𑀺 𑀢𑀼𑀫𑁆𑀳𑀸𑀓𑀜𑁆𑀘 𑀫𑀬𑁆𑀳𑀜𑁆𑀘 𑀭𑀓𑁆𑀔𑀸 𑀓𑀢𑀸, 𑀬𑀲𑁆𑀫𑀸 𑀘 𑀲𑁄𑀳𑀁 𑀪𑀕𑀯𑀢𑁄 𑀦𑀫𑁄 𑀓𑀭𑁄𑀫𑀺, 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀦𑀫𑁄 𑀓𑀭𑁄𑀫𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀬𑁄𑀚𑀦𑀸.

𑀅𑀜𑁆𑀜𑀫𑁆𑀳𑀻𑀢𑀺 ¶ 𑀓𑀸𑀫𑀭𑀸𑀕𑁂 𑀅𑀲𑀼𑀪𑀫𑀦𑀲𑀺𑀓𑀸𑀭𑀸𑀤𑀺𑀦𑀸 𑀙𑁂𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀚𑀸𑀢𑀦𑁆𑀢𑀺 𑀩𑀻𑀚𑀯𑀺𑀭𑀳𑀺𑀢𑀁 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁. 𑀩𑀻𑀚𑁂 𑀳𑀺 𑀙𑀺𑀦𑁆𑀦𑁂 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄 𑀦𑀸𑀫 𑀅𑀪𑀩𑁆𑀩𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀏𑀓𑁂 𑀧𑀦 ‘‘𑀩𑀻𑀚𑀲𑁆𑀲𑀸𑀧𑀺 𑀙𑁂𑀤𑀦𑀓𑁆𑀔𑀡𑁂 ¶ 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀏𑀯 𑀓𑀫𑁂𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑁂 𑀅𑀦𑁆𑀢𑀭𑀳𑀺𑀢𑁂 𑀧𑀡𑁆𑀟𑀓𑁄 𑀦𑀸𑀫 𑀅𑀪𑀩𑁆𑀩𑁄 𑀳𑁄𑀢𑀺, 𑀢𑀤𑀸 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀢𑀸𑀤𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀸𑀤𑀻𑀳𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲.

𑁨𑁫𑁨. 𑀧𑀸𑀴𑀺𑀬𑀁 𑀢𑀼𑀬𑁆𑀳𑁂𑀲𑁄 𑀧𑀢𑁆𑀢𑁄𑀢𑀺 ‘‘𑀬𑁄 𑀘 𑀅𑀭𑀳𑀸 𑀘𑁂𑀯 𑀇𑀤𑁆𑀥𑀺𑀫𑀸 𑀘, 𑀢𑀲𑁆𑀲 𑀤𑀺𑀦𑁆𑀦𑀫𑁂𑀯𑀸’’𑀢𑀺 𑀲𑁂𑀝𑁆𑀞𑀺𑀦𑀸 𑀯𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀕𑀳𑀁 𑀅𑀦𑀼𑀧𑀭𑀺𑀬𑀸𑀬𑀻𑀢𑀺 𑀏𑀢𑁆𑀣 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀩𑀤𑁆𑀥𑀧𑀢𑁆𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀆𑀓𑀸𑀲𑁂 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀞𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀧𑀢𑁆𑀢𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀣𑁂𑀭𑁄 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀲𑀬𑀫𑁂𑀯 𑀅𑀕𑁆𑀕𑀳𑁂𑀲𑀺. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀇𑀤𑁆𑀥𑀺𑀩𑀮𑁂𑀦 𑀢𑀁 𑀧𑀢𑁆𑀢𑀁 𑀯𑁂𑀴𑀼𑀧𑀭𑀫𑁆𑀧𑀭𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀣𑁂𑀭𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀅𑀝𑁆𑀞𑀸𑀲𑀺, 𑀲𑁄 𑀘 𑀅𑀦𑁂𑀦 𑀳𑀢𑁆𑀣𑁂𑀦 𑀕𑀳𑀺𑀢𑁄 𑀯𑀺𑀬 𑀅𑀳𑁄𑀲𑀻’’𑀢𑀺. 𑀢𑀣𑀸 𑀞𑀺𑀢𑀫𑁂𑀯 𑀧𑀦 𑀲𑀦𑁆𑀥𑀸𑀬 ‘‘𑀪𑀸𑀭𑀤𑁆𑀯𑀸𑀚𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂 𑀘 𑀫𑀦𑀼𑀲𑁆𑀲𑀸…𑀧𑁂… 𑀅𑀦𑀼𑀩𑀦𑁆𑀥𑀺𑀁𑀲𑀽𑀢𑀺 𑀬𑁂 𑀘 𑀫𑀦𑀼𑀲𑁆𑀲𑀸 𑀧𑀞𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀤𑁆𑀤𑀲𑀁𑀲𑀼, 𑀢𑁂 𑀅𑀫𑁆𑀳𑀸𑀓𑀫𑁆𑀧𑀺 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀳𑀻𑀢𑀺 𑀣𑁂𑀭𑀫𑀦𑀼𑀩𑀦𑁆𑀥𑀺𑀁𑀲𑀼. 𑀣𑁂𑀭𑁄 𑀘 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑀁 𑀕𑀳𑁂𑀢𑁆𑀯𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀢𑁂 𑀘 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑀸 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁. 𑀢𑁂𑀦𑀸𑀳 ‘‘𑀓𑀺𑀁 𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑁄 𑀫𑀳𑀸𑀲𑀤𑁆𑀤𑁄’’𑀢𑀺. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀬𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀦𑀸𑀕𑀯𑀡𑁆𑀡𑀁 𑀯𑀸…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀫𑀸𑀕𑀢𑀸 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀯𑀺𑀓𑀸𑀭𑀸𑀧𑀸𑀤𑀦𑀯𑀲𑀧𑁆𑀧𑀯𑀢𑁆𑀢𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸’’𑀢𑀺. 𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺, 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 ‘‘𑀩𑀳𑀼𑀓𑁄 𑀳𑁄𑀫𑀻’’𑀢𑀺 (𑀧𑀝𑀺. 𑀫. 𑁩.𑁧𑁦) 𑀏𑀯𑀁 𑀤𑀲𑁆𑀲𑀺𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀸 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀦𑀸𑀫. 𑀕𑀺𑀳𑀺𑀯𑀺𑀓𑀝𑀸𑀦𑀻𑀢𑀺 𑀕𑀺𑀳𑀺𑀲𑀦𑁆𑀢𑀓𑀸𑀦𑀺.

𑁨𑁫𑁩. 𑀧𑀸𑀴𑀺𑀬𑀁 𑀦 𑀅𑀘𑁆𑀙𑀼𑀧𑀺𑀬𑀦𑁆𑀢𑀻𑀢𑀺 𑀦 𑀨𑀼𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀻𑀢𑀺 𑀇𑀢𑁆𑀣𑀺𑀭𑀽𑀧𑀸𑀤𑀻𑀳𑀺 𑀆𑀓𑀺𑀡𑁆𑀡𑀸𑀦𑀺.

𑁨𑁫𑁪. 𑀪𑀽𑀫𑀺𑀆𑀥𑀸𑀭𑀓𑁂𑀢𑀺 𑀤𑀦𑁆𑀢𑀸𑀤𑀻𑀳𑀺 𑀓𑀢𑁂 𑀯𑀮𑀬𑀸𑀥𑀸𑀭𑀓𑁂. 𑀏𑀢𑀲𑁆𑀲 𑀯𑀮𑀬𑀸𑀥𑀸𑀭𑀓𑀲𑁆𑀲 𑀅𑀦𑀼𑀘𑁆𑀘𑀢𑀸𑀬 𑀞𑀧𑀺𑀢𑀸 𑀧𑀢𑁆𑀢𑀸 𑀦 𑀧𑀭𑀺𑀧𑀢𑀦𑁆𑀢𑀻𑀢𑀺 ‘‘𑀢𑀬𑁄 𑀧𑀢𑁆𑀢𑁂 ¶ 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀘𑁆𑀘𑀢𑀜𑁆𑀳𑀺 𑀲𑀦𑁆𑀥𑀸𑀬 𑀅𑀬𑀁 ‘‘𑀪𑀽𑀫𑀺𑀆𑀥𑀸𑀭𑀓𑁄’’𑀢𑀺 𑀯𑀼𑀢𑁆𑀢𑁄. 𑀤𑀸𑀭𑀼𑀆𑀥𑀸𑀭𑀓𑀤𑀡𑁆𑀟𑀸𑀥𑀸𑀭𑀓𑁂𑀲𑀽𑀢𑀺 𑀏𑀓𑀤𑀸𑀭𑀼𑀦𑀸 ¶ 𑀓𑀢𑀆𑀥𑀸𑀭𑀓𑁂, 𑀩𑀳𑀽𑀳𑀺 𑀤𑀡𑁆𑀟𑁂𑀳𑀺 𑀓𑀢𑀆𑀥𑀸𑀭𑀓𑁂 𑀘. 𑀏𑀢𑁂 𑀘 𑀉𑀘𑁆𑀘𑀢𑀭𑀸 𑀳𑁄𑀦𑁆𑀢𑀺 𑀧𑀢𑁆𑀢𑁂𑀳𑀺 𑀲𑀳 𑀧𑀢𑀦𑀲𑀪𑀸𑀯𑀸. 𑀢𑁂𑀦 ‘‘𑀲𑀼𑀲𑀚𑁆𑀚𑀺𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀪𑀫𑀓𑁄𑀝𑀺𑀲𑀤𑀺𑀲𑁄𑀢𑀺 𑀬𑀢𑁆𑀣 𑀥𑀫𑀓𑀭𑀡𑀸𑀤𑀺𑀁 𑀧𑀯𑁂𑀲𑁂𑀢𑁆𑀯𑀸 𑀮𑀺𑀔𑀦𑁆𑀢𑀺, 𑀢𑀲𑁆𑀲 𑀪𑀫𑀓𑀲𑁆𑀲 𑀓𑁄𑀝𑀺𑀬𑀸 𑀲𑀤𑀺𑀲𑁄. 𑀢𑀸𑀤𑀺𑀲𑀲𑁆𑀲 𑀤𑀸𑀭𑀼𑀆𑀥𑀸𑀭𑀓𑀲𑁆𑀲 𑀅𑀯𑀺𑀢𑁆𑀣𑀺𑀡𑁆𑀡𑀢𑀸𑀬 𑀞𑀧𑀺𑀢𑁄𑀧𑀺 𑀧𑀢𑁆𑀢𑁄 𑀧𑀢𑀢𑀻𑀢𑀺 ‘‘𑀅𑀦𑁄𑀓𑀸𑀲𑁄’’𑀢𑀺 𑀯𑀼𑀢𑁆𑀢𑁄.

𑀆𑀮𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀦𑁆𑀢𑀺 𑀧𑀫𑀼𑀔𑀫𑀺𑀟𑁆𑀠𑀺𑀓𑀸𑀤𑀻𑀦𑀁, 𑀉𑀘𑁆𑀘𑀯𑀢𑁆𑀣𑀼𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀧𑀲𑁆𑀲𑁂𑀢𑀺 𑀧𑀸𑀲𑀸𑀤𑀸𑀤𑀻𑀦𑀁 𑀩𑀳𑀺𑀓𑀼𑀝𑁆𑀝𑁂. 𑀢𑀦𑀼𑀓𑀫𑀺𑀟𑁆𑀠𑀺𑀓𑀸𑀬𑀸𑀢𑀺 𑀯𑁂𑀤𑀺𑀓𑀸𑀬. 𑀲𑀩𑁆𑀩𑀢𑁆𑀣 𑀧𑀦 𑀳𑀢𑁆𑀣𑀧𑁆𑀧𑀫𑀸𑀡𑀢𑁄 𑀅𑀩𑁆𑀪𑀦𑁆𑀢𑀭𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀥𑀸𑀭𑁂 𑀧𑀦 𑀢𑀢𑁄 𑀩𑀳𑀺𑀧𑀺 𑀯𑀝𑁆𑀝𑀢𑀺.

𑀧𑀸𑀴𑀺𑀬𑀁 𑀑𑀝𑁆𑀞𑁄𑀢𑀺 𑀫𑀼𑀔𑀯𑀝𑁆𑀝𑀺. 𑀧𑀢𑁆𑀢𑀫𑀸𑀴𑀓𑀦𑁆𑀢𑀺 𑀉𑀧𑀘𑀺𑀓𑀸𑀦𑀁 𑀅𑀦𑀼𑀝𑁆𑀞𑀳𑀦𑀢𑁆𑀣𑀸𑀬 𑀪𑀽𑀫𑀺𑀢𑁄 𑀉𑀘𑁆𑀘𑀢𑀭𑀁 𑀓𑀢𑀁 𑀯𑁂𑀤𑀺𑀓𑀸𑀓𑀸𑀭𑀫𑀸𑀴𑀓𑀁. 𑀫𑀳𑀸𑀫𑀼𑀔𑀓𑀼𑀡𑁆𑀟𑀲𑀡𑁆𑀞𑀸𑀦𑀸𑀢𑀺 𑀫𑀳𑀸𑀫𑀼𑀔𑀘𑀸𑀝𑀺𑀲𑀡𑁆𑀞𑀸𑀦𑀸. 𑀮𑀕𑁆𑀕𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀓𑁂𑀯𑀮𑀁 𑀧𑀢𑁆𑀢𑀁 𑀮𑀕𑁆𑀕𑁂𑀦𑁆𑀢𑀲𑁆𑀲, 𑀦 𑀣𑀯𑀺𑀓𑀸𑀬 𑀮𑀕𑁆𑀕𑁂𑀦𑁆𑀢𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀅𑀜𑁆𑀜𑁂𑀦 𑀧𑀦 𑀪𑀡𑁆𑀟𑀓𑁂𑀦𑀸𑀢𑀺 𑀅𑀜𑁆𑀜𑁂𑀦 𑀪𑀸𑀭𑀩𑀦𑁆𑀥𑀦𑁂𑀦 𑀪𑀡𑁆𑀟𑀓𑁂𑀦. ‘‘𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀢𑁆𑀢𑀢𑁆𑀣𑀯𑀺𑀓𑀸𑀬 𑀅𑀁𑀲𑀩𑀤𑁆𑀥𑀓𑁄 𑀬𑀣𑀸 𑀮𑀕𑁆𑀕𑀺𑀢𑀝𑁆𑀞𑀸𑀦𑀢𑁄 𑀦 𑀧𑀭𑀺𑀕𑀴𑀢𑀺, 𑀢𑀣𑀸 𑀲𑀩𑁆𑀩𑀣𑀸𑀧𑀺 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀩𑀦𑁆𑀥𑀺𑀢𑁆𑀯𑀸𑀧𑀺 𑀉𑀧𑀭𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀉𑀧𑀭𑀺 𑀦𑀺𑀲𑀻𑀤𑀦𑁆𑀢𑀸 𑀑𑀢𑁆𑀣𑀭𑀺𑀢𑁆𑀯𑀸 𑀪𑀺𑀦𑁆𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀲𑀻𑀤𑀦𑀲𑀗𑁆𑀓𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀩𑀦𑁆𑀥𑀺𑀢𑁆𑀯𑀸 𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀙𑀢𑁆𑀢𑁂 𑀯𑀸. 𑀬𑁄 𑀓𑁄𑀘𑀻𑀢𑀺 𑀪𑀢𑁆𑀢𑀧𑀽𑀭𑁄𑀧𑀺 𑀢𑀼𑀘𑁆𑀙𑀧𑀢𑁆𑀢𑁄𑀧𑀺.

𑁨𑁫𑁫. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀡𑀢𑁆𑀣𑀸𑀬 𑀞𑀧𑁂𑀢𑀼𑀁. 𑀧𑀢𑁆𑀢𑀁 𑀅𑀮𑀪𑀦𑁆𑀢𑁂𑀦 𑀧𑀦 𑀏𑀓𑀤𑀺𑀯𑀲𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀧𑀡𑁆𑀡𑀧𑀼𑀝𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀼𑀁 𑀫𑁂𑀢𑀺 𑀅𑀪𑀽𑀢𑀺 𑀫𑀬𑁆𑀳𑀁, 𑀯𑀺𑀦𑀸𑀲𑁄 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀧𑀺𑀲𑀸𑀘𑁄 𑀯𑀢𑀫𑀦𑁆𑀢𑀺 𑀧𑀺𑀲𑀸𑀘𑁄 𑀯𑀢𑀸𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀺𑀲𑀸𑀘𑀺𑀮𑁆𑀮𑀺𑀓𑀸𑀢𑀺 𑀧𑀺𑀲𑀸𑀘𑀤𑀸𑀭𑀓𑀸. 𑀙𑀯𑀲𑀻𑀲𑀲𑁆𑀲 𑀧𑀢𑁆𑀢𑁄𑀢𑀺 𑀙𑀯𑀲𑀻𑀲𑀫𑀬𑁄 𑀧𑀢𑁆𑀢𑁄. 𑀧𑀓𑀢𑀺𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁.

𑀘𑀩𑁆𑀩𑁂𑀢𑁆𑀯𑀸𑀢𑀺 ¶ 𑀦𑀺𑀝𑁆𑀞𑀼𑀪𑀺𑀢𑁆𑀯𑀸. ‘‘𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀁 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀥𑁄𑀯𑀦𑀖𑀁𑀲𑀦𑀯𑀲𑁂𑀦 𑀳𑀢𑁆𑀣𑀁 𑀥𑁄𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀢𑁆𑀢𑀓𑁂𑀦 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸 𑀳𑀢𑁆𑀣𑁄 𑀥𑁄𑀯𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀏𑀓𑀁 𑀉𑀤𑀓𑀕𑀡𑁆𑀟𑀼𑀲𑀁 𑀕𑀳𑁂𑀢𑁆𑀯𑀸𑀢𑀺 𑀧𑀢𑁆𑀢𑀁 𑀅𑀨𑀼𑀲𑀺𑀢𑁆𑀯𑀸 𑀢𑀢𑁆𑀣 𑀉𑀤𑀓𑀫𑁂𑀯 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀟𑀼𑀲𑀁 𑀓𑀢𑁆𑀯𑀸, 𑀯𑀸𑀫𑀳𑀢𑁆𑀣𑁂𑀦𑁂𑀯 𑀯𑀸 𑀧𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑁂𑀦 𑀕𑀡𑁆𑀟𑀼𑀲𑀁 𑀕𑀳𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀩𑀳𑀺 𑀉𑀤𑀓𑁂𑀦 𑀯𑀺𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀤𑁆𑀯𑀻𑀲𑀼 𑀅𑀗𑁆𑀕𑀼𑀮𑀻𑀲𑀼 𑀆𑀫𑀺𑀲𑀫𑀢𑁆𑀢𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀩𑀳𑀺 𑀕𑀳𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀝𑀺𑀔𑀸𑀤𑀺𑀢𑀼𑀓𑀸𑀫𑁄𑀢𑀺 𑀏𑀢𑁆𑀣 𑀦 𑀲𑀬𑀁 𑀔𑀸𑀤𑀺𑀢𑀼𑀓𑀸𑀫𑁄𑀧𑀺 𑀅𑀜𑁆𑀜𑁂𑀲𑀁 𑀔𑀸𑀤𑀦𑀸𑀭𑀳𑀁 𑀞𑀧𑁂𑀢𑀼𑀁 𑀮𑀪𑀢𑀺 ¶ . 𑀢𑀢𑁆𑀣𑁂𑀯 𑀓𑀢𑁆𑀯𑀸𑀢𑀺 𑀧𑀢𑁆𑀢𑁂𑀬𑁂𑀯 𑀬𑀣𑀸𑀞𑀧𑀺𑀢𑀝𑁆𑀞𑀸𑀦𑀢𑁄 𑀅𑀦𑀼𑀤𑁆𑀥𑀭𑀺𑀢𑁆𑀯𑀸. 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀢𑀢𑁄 𑀫𑀁𑀲𑀫𑁂𑀯 𑀦𑀺𑀭𑀯𑀲𑁂𑀲𑀁 𑀉𑀧𑁆𑀧𑀝𑁆𑀝𑁂𑀢𑁆𑀯𑀸.

𑁨𑁫𑁬. 𑀓𑀺𑀡𑁆𑀡𑀘𑀼𑀡𑁆𑀡𑁂𑀦𑀸𑀢𑀺 𑀲𑀼𑀭𑀸𑀓𑀺𑀡𑁆𑀡𑀘𑀼𑀡𑁆𑀡𑁂𑀦. 𑀫𑀓𑁆𑀔𑁂𑀢𑀼𑀦𑁆𑀢𑀺 𑀲𑀽𑀘𑀺𑀁 𑀫𑀓𑁆𑀔𑁂𑀢𑀼𑀁. 𑀦𑀺𑀲𑁆𑀲𑁂𑀡𑀺𑀫𑁆𑀧𑀻𑀢𑀺 𑀘𑀢𑀽𑀳𑀺 𑀤𑀡𑁆𑀟𑁂𑀳𑀺 𑀘𑀻𑀯𑀭𑀧𑁆𑀧𑀫𑀸𑀡𑁂𑀦 𑀆𑀬𑀢𑀘𑀢𑀼𑀭𑀲𑁆𑀲𑀁 𑀓𑀢𑁆𑀯𑀸 𑀩𑀤𑁆𑀥𑀧𑀝𑀮𑀫𑁆𑀧𑀺. 𑀏𑀢𑁆𑀣 𑀳𑀺 𑀘𑀻𑀯𑀭𑀓𑁄𑀝𑀺𑀬𑁄 𑀲𑀫𑀓𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀬𑀣𑀸𑀲𑀼𑀔𑀁 𑀲𑀺𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲𑀸 𑀦𑀺𑀲𑁆𑀲𑁂𑀡𑀺𑀬𑀸 𑀉𑀧𑀭𑀺 𑀘𑀻𑀯𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑀸𑀬 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀓𑀣𑀺𑀦𑀲𑀗𑁆𑀔𑀸𑀢𑀸𑀬 𑀦𑀺𑀲𑁆𑀲𑁂𑀡𑀺𑀬𑀸 𑀘𑀻𑀯𑀭𑀲𑁆𑀲 𑀩𑀦𑁆𑀥𑀦𑀓𑀭𑀚𑁆𑀚𑀼 𑀓𑀣𑀺𑀦𑀭𑀚𑁆𑀚𑀽𑀢𑀺 𑀫𑀚𑁆𑀛𑀺𑀫𑀧𑀤𑀮𑁄𑀧𑀻𑀲𑀫𑀸𑀲𑁄𑀢𑀺 𑀆𑀳 ‘‘𑀬𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀧𑀝𑀮𑀸𑀦𑀁 𑀏𑀓𑀲𑁆𑀫𑀺𑀁 𑀅𑀥𑀺𑀓𑁂 𑀚𑀸𑀢𑁂 𑀢𑀢𑁆𑀣 𑀯𑀮𑀺𑀬𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀧𑀝𑀮𑀤𑁆𑀯𑀬𑀫𑁆𑀧𑀺 𑀲𑀫𑀓𑀁 𑀓𑀢𑁆𑀯𑀸 𑀩𑀦𑁆𑀥𑀦𑀓𑀭𑀚𑁆𑀚𑀼 𑀓𑀣𑀺𑀦𑀭𑀚𑁆𑀚𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀸𑀴𑀺𑀬𑀁 𑀓𑀣𑀺𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀻𑀢𑀺 𑀓𑀣𑀺𑀦𑁂 𑀩𑀤𑁆𑀥𑀲𑁆𑀲 𑀘𑀻𑀯𑀭𑀲𑁆𑀲 𑀧𑀭𑀺𑀬𑀦𑁆𑀢𑁄 𑀚𑀻𑀭𑀢𑀺. 𑀓𑀣𑀺𑀦𑀦𑀺𑀲𑁆𑀲𑀺𑀢𑀜𑁆𑀳𑀺 𑀘𑀻𑀯𑀭𑀁 𑀇𑀥 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 ‘‘𑀓𑀣𑀺𑀦’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀦𑀼𑀯𑀸𑀢𑀁 𑀧𑀭𑀺𑀪𑀡𑁆𑀟𑀦𑁆𑀢𑀺 𑀓𑀣𑀺𑀦𑁂 𑀩𑀦𑁆𑀥𑀦𑀭𑀚𑁆𑀚𑀽𑀳𑀺 𑀘𑀻𑀯𑀭𑀲𑁆𑀲 𑀲𑀫𑀦𑁆𑀢𑀸 𑀧𑀭𑀺𑀬𑀦𑁆𑀢𑀲𑁆𑀲 𑀅𑀚𑀻𑀭𑀡𑀢𑁆𑀣𑀁 𑀬𑁂𑀳𑀺 𑀓𑁂𑀳𑀺𑀘𑀺 𑀘𑁄𑀴𑀓𑁂𑀳𑀺 𑀤𑀻𑀖𑀢𑁄 𑀅𑀦𑀼𑀯𑀸𑀢𑀁, 𑀢𑀺𑀭𑀺𑀬𑀢𑁄 𑀧𑀭𑀺𑀪𑀡𑁆𑀟𑀜𑁆𑀘 𑀲𑀺𑀩𑁆𑀩𑀺𑀢𑁆𑀯𑀸 𑀓𑀸𑀢𑀼𑀁 𑀬𑀢𑁆𑀣 𑀭𑀚𑁆𑀚𑀼𑀓𑁂 𑀧𑀯𑁂𑀲𑁂𑀢𑁆𑀯𑀸 𑀤𑀡𑁆𑀟𑁂𑀲𑀼 𑀧𑀮𑀺𑀯𑁂𑀞𑁂𑀢𑁆𑀯𑀸 𑀘𑀻𑀯𑀭𑀲𑀫𑀓𑀁 𑀆𑀓𑀟𑁆𑀠𑀺𑀢𑀼𑀁 𑀲𑀓𑁆𑀓𑀸, 𑀢𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀓𑀣𑀺𑀦𑀲𑀗𑁆𑀔𑀸𑀢𑁂𑀲𑀼 𑀓𑀺𑀮𑀜𑁆𑀚𑀸𑀤𑀻𑀲𑀼 𑀏𑀯 𑀅𑀚𑀻𑀭𑀡𑀢𑁆𑀣𑀸𑀬 𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀓𑀭𑀡𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀫𑀚𑁆𑀛𑁂𑀢𑀺 𑀧𑀼𑀭𑀸𑀡𑀓𑀣𑀺𑀦𑀲𑁆𑀲𑁂𑀯 𑀅𑀦𑁆𑀢𑁄. 𑀪𑀺𑀓𑁆𑀔𑀼𑀦𑁄 𑀧𑀫𑀸𑀡𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀲𑁆𑀲 𑀧𑀫𑀸𑀡𑁂𑀦. 𑀅𑀜𑁆𑀜𑀁 𑀦𑀺𑀲𑁆𑀲𑁂𑀡𑀺𑀦𑁆𑀢𑀺 𑀤𑀻𑀖𑀢𑁄 𑀘 𑀢𑀺𑀭𑀺𑀬𑀢𑁄 𑀘 𑀅𑀜𑁆𑀜𑀁 𑀤𑀡𑁆𑀟𑀁 𑀞𑀧𑁂𑀢𑁆𑀯𑀸 𑀩𑀦𑁆𑀥𑀺𑀢𑀼𑀁.

𑀩𑀺𑀤𑀮𑀓𑀦𑁆𑀢𑀺 ¶ 𑀤𑀺𑀕𑀼𑀡𑀓𑀭𑀡𑀲𑀗𑁆𑀔𑀸𑀢𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀤𑀼𑀕𑀼𑀡𑀓𑀭𑀡’’𑀦𑁆𑀢𑀺. 𑀧𑀯𑁂𑀲𑀦𑀲𑀮𑀸𑀓𑀦𑁆𑀢𑀺 𑀯𑀮𑀻𑀦𑀁 𑀅𑀕𑁆𑀕𑀳𑀡𑀢𑁆𑀣𑀸𑀬 𑀧𑀯𑁂𑀲𑀦𑀓𑀯𑁂𑀴𑀼𑀲𑀮𑀸𑀓𑀸𑀤𑀺. 𑀧𑀸𑀴𑀺𑀬𑀁 𑀧𑀝𑀺𑀕𑁆𑀕𑀳𑀦𑁆𑀢𑀺 𑀅𑀗𑁆𑀕𑀼𑀮𑀺𑀓𑀜𑁆𑀘𑀼𑀓𑀁.

𑁨𑁫𑁭. 𑀧𑀸𑀢𑀺 𑀦𑀸𑀫 𑀪𑀡𑁆𑀟𑀝𑁆𑀞𑀧𑀦𑀓𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀧𑀸𑀴𑀺𑀬𑀁 𑀧𑀝𑀺𑀕𑁆𑀕𑀳𑀣𑀯𑀺𑀓𑀦𑁆𑀢𑀺 𑀧𑀸𑀢𑀺𑀆𑀤𑀺𑀪𑀸𑀚𑀦𑀢𑁆𑀣𑀯𑀺𑀓𑀁. 𑀘𑀺𑀦𑀺𑀢𑀼𑀦𑁆𑀢𑀺 𑀉𑀘𑁆𑀘𑀯𑀢𑁆𑀣𑀼𑀧𑀭𑀺𑀬𑀦𑁆𑀢𑀲𑁆𑀲 𑀅𑀧𑀢𑀦𑀢𑁆𑀣𑀸𑀬 𑀇𑀝𑁆𑀞𑀓𑀸𑀤𑀻𑀳𑀺 𑀘𑀺𑀦𑀺𑀢𑀼𑀁. 𑀆𑀮𑀫𑁆𑀩𑀦𑀩𑀸𑀳𑀦𑁆𑀢𑀺 𑀆𑀮𑀫𑁆𑀩𑀦𑀭𑀚𑁆𑀚𑀼𑀤𑀡𑁆𑀟𑀸𑀤𑀺. 𑀧𑀭𑀺𑀪𑀺𑀚𑁆𑀚𑀢𑀻𑀢𑀺 𑀓𑀝𑀲𑀸𑀭𑀸𑀤𑀺𑀓𑀁 𑀓𑀣𑀺𑀦𑀫𑀚𑁆𑀛𑁂 𑀪𑀗𑁆𑀕𑀁 𑀳𑁄𑀢𑀺. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀤𑀡𑁆𑀟𑀓𑀣𑀺𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁫𑁮-𑁯. 𑀉𑀤𑀓𑀁 ¶ 𑀅𑀓𑀧𑁆𑀧𑀺𑀬𑀦𑁆𑀢𑀺 𑀲𑀧𑁆𑀧𑀸𑀡𑀓𑀁. 𑀉𑀧𑀦𑀦𑁆𑀥𑀻𑀢𑀺 𑀯𑁂𑀭𑀁 𑀩𑀦𑁆𑀥𑀺. 𑀅𑀤𑁆𑀥𑀸𑀦𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀅𑀤𑁆𑀥𑀬𑁄𑀚𑀦𑀁 𑀅𑀤𑁆𑀥𑀸𑀦𑀫𑀕𑁆𑀕𑁄 𑀦𑀸𑀫, 𑀢𑀁 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀲𑀜𑁆𑀘𑀺𑀘𑁆𑀘 𑀯𑀺𑀳𑀸𑀭𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑀦𑁂 𑀆𑀧𑀢𑁆𑀢𑀺. 𑀅𑀲𑀜𑁆𑀘𑀺𑀘𑁆𑀘 𑀕𑀢𑀲𑁆𑀲 𑀧𑀦 𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣 𑀞𑀢𑁆𑀯𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑀸𑀤𑀺𑀁 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀫𑀦𑁂 𑀧𑀤𑀯𑀸𑀭𑁂𑀦 𑀆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀲𑀫𑁆𑀫𑀢𑀻𑀢𑀺 𑀦 𑀧𑀳𑁄𑀢𑀺.

𑁨𑁬𑁦. 𑀅𑀪𑀺𑀲𑀦𑁆𑀦𑀓𑀸𑀬𑀸𑀢𑀺 𑀲𑁂𑀫𑁆𑀳𑀸𑀤𑀺𑀤𑁄𑀲𑀲𑀦𑁆𑀦𑀺𑀘𑀺𑀢𑀓𑀸𑀬𑀸. 𑀢𑀢𑁆𑀣 𑀫𑀚𑁆𑀛𑁂𑀢𑀺 𑀅𑀕𑁆𑀕𑀴𑀧𑀸𑀲𑀓𑀲𑁆𑀲 𑀫𑀚𑁆𑀛𑁂. 𑀉𑀧𑀭𑀻𑀢𑀺 𑀅𑀕𑁆𑀕𑀴𑀧𑀸𑀲𑀓𑀲𑁆𑀲 𑀉𑀧𑀭𑀺𑀪𑀸𑀕𑁂. 𑀉𑀤𑀓𑀝𑁆𑀞𑀧𑀦𑀝𑁆𑀞𑀸𑀦𑀦𑁆𑀢𑀺 𑀉𑀤𑀓𑀝𑁆𑀞𑀧𑀦𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀝𑁆𑀞𑀸𑀦𑀁.

𑁨𑁬𑁧. 𑀧𑀸𑀴𑀺𑀬𑀁 𑀉𑀤𑀧𑀸𑀦𑀦𑁆𑀢𑀺 𑀓𑀽𑀧𑀁. 𑀦𑀻𑀘𑀯𑀢𑁆𑀣𑀼𑀓𑁄𑀢𑀺 𑀓𑀽𑀧𑀲𑁆𑀲 𑀲𑀫𑀦𑁆𑀢𑀸 𑀓𑀽𑀮𑀝𑁆𑀞𑀸𑀦𑀁, 𑀪𑀽𑀫𑀺𑀲𑀫𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀢𑀻𑀢𑀺 𑀲𑀫𑀦𑁆𑀢𑀸 𑀯𑀲𑁆𑀲𑁄𑀤𑀓𑀁 𑀆𑀕𑀦𑁆𑀢𑁆𑀯𑀸 𑀓𑀽𑀧𑁂 𑀧𑀢𑀢𑀻𑀢𑀺 𑀅𑀢𑁆𑀣𑁄.

𑁨𑁬𑁨. 𑀯𑀸𑀳𑁂𑀦𑁆𑀢𑀻𑀢𑀺 𑀉𑀲𑁆𑀲𑀺𑀜𑁆𑀘𑀦𑁆𑀢𑀺. 𑀅𑀭𑀳𑀝𑀖𑀝𑀺𑀬𑀦𑁆𑀢𑀁 𑀦𑀸𑀫 𑀘𑀓𑁆𑀓𑀲𑀡𑁆𑀞𑀸𑀦𑀁 𑀅𑀦𑁂𑀓𑀸𑀭𑀁 𑀅𑀭𑁂 𑀅𑀭𑁂 𑀖𑀝𑀺𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀏𑀓𑁂𑀦, 𑀤𑁆𑀯𑀻𑀳𑀺 𑀯𑀸 𑀧𑀭𑀺𑀩𑁆𑀪𑀫𑀺𑀬𑀫𑀸𑀦𑀬𑀦𑁆𑀢𑀁.

𑁨𑁬𑁩. 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀓𑀦𑁆𑀢𑀺 𑀓𑀡𑁆𑀡𑀺𑀓𑀫𑀡𑁆𑀟𑀮𑀲𑁆𑀲 𑀲𑀫𑀦𑁆𑀢𑀸 𑀞𑀧𑀺𑀢𑀧𑀓𑁆𑀔𑀧𑀸𑀲𑀓𑀁. 𑀫𑀡𑁆𑀟𑀮𑁂𑀢𑀺 𑀓𑀡𑁆𑀡𑀺𑀓𑀫𑀡𑁆𑀟𑀮𑁂. 𑀧𑀓𑁆𑀔𑀧𑀸𑀲𑀓𑁂 𑀞𑀧𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀸 𑀘𑀢𑀼𑀭𑀲𑁆𑀲𑀸𑀓𑀸𑀭𑁂𑀦 𑀨𑀮𑀓𑀸𑀤𑀻𑀦𑀺 𑀞𑀧𑁂𑀢𑁆𑀯𑀸.

𑁨𑁬𑁪. 𑀦𑀫𑀢𑀓𑀁 ¶ 𑀦𑀸𑀫 𑀲𑀦𑁆𑀣𑀢𑀲𑀤𑀺𑀲𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀭𑀼𑀓𑁆𑀔𑀢𑀘𑀫𑀬’’𑀦𑁆𑀢𑀺. 𑀘𑀫𑁆𑀫𑀔𑀡𑁆𑀟𑀧𑀭𑀺𑀳𑀸𑀭𑁂𑀦𑀸𑀢𑀺 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀬𑀦𑀸𑀲𑀦𑀯𑀺𑀥𑀺𑀦𑀸𑀢𑀺 𑀅𑀢𑁆𑀣𑁄. 𑀧𑁂𑀴𑀸𑀬𑀸𑀢𑀺 𑀅𑀝𑁆𑀞𑀁𑀲𑀲𑁄𑀴𑀲𑀁𑀲𑀸𑀤𑀺𑀆𑀓𑀸𑀭𑁂𑀦 𑀓𑀢𑀸𑀬 𑀪𑀸𑀚𑀦𑀸𑀓𑀸𑀭𑀸𑀬 𑀧𑁂𑀴𑀸𑀬. 𑀬𑀢𑁆𑀣 𑀉𑀡𑁆𑀳𑀧𑀸𑀬𑀸𑀲𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀪𑁄𑀚𑀦𑀧𑀸𑀢𑀺𑀁 𑀞𑀧𑁂𑀦𑁆𑀢𑀺 𑀪𑀢𑁆𑀢𑀲𑁆𑀲 𑀉𑀡𑁆𑀳𑀪𑀸𑀯𑀸𑀯𑀺𑀕𑀫𑀦𑀢𑁆𑀣𑀁, 𑀢𑀸𑀤𑀺𑀲𑀲𑁆𑀲 𑀪𑀸𑀚𑀦𑀸𑀓𑀸𑀭𑀲𑁆𑀲 𑀆𑀥𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀆𑀲𑀺𑀢𑁆𑀢𑀓𑀽𑀧𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀘 𑀧𑀸𑀬𑀸𑀲𑀸𑀤𑀻𑀳𑀺 𑀆𑀲𑀺𑀢𑁆𑀢𑀓𑀸𑀥𑀸𑀭𑁄𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀁 𑀧𑀘𑁆𑀘𑀦𑁆𑀢𑁂𑀲𑀼 𑀦 𑀚𑀸𑀦𑀦𑁆𑀢𑀺 𑀓𑀸𑀢𑀼𑀁, 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀓𑀭𑁄𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀕𑀺𑀳𑀺𑀧𑀭𑀺𑀪𑁄𑀕𑁄 𑀅𑀬𑁄𑀫𑀬𑀸𑀤𑀺 𑀲𑀩𑁆𑀩𑁄𑀧𑀺 𑀆𑀥𑀸𑀭𑁄 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀫𑁂𑀯 𑀅𑀦𑀼𑀮𑁄𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀓𑁂 𑀧𑀦 ‘‘𑀓𑀧𑁆𑀧𑀺𑀬𑀮𑁄𑀳𑀫𑀬𑁄 𑀆𑀥𑀸𑀭𑁄 𑀫𑀴𑁄𑀭𑀺𑀓𑀫𑁂𑀯 𑀅𑀦𑀼𑀮𑁄𑀫𑁂𑀢𑀻’’𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀧𑀢𑁆𑀢𑀕𑀼𑀢𑁆𑀢𑀺𑀬𑀸 𑀆𑀥𑀸𑀭𑁄 𑀅𑀦𑀼𑀜𑁆𑀜𑀸𑀢𑁄. 𑀇𑀤𑀸𑀦𑀺 𑀪𑀼𑀜𑁆𑀚𑀺𑀢𑀼𑀁 𑀫𑀴𑁄𑀭𑀺𑀓𑀸 𑀅𑀦𑀼𑀜𑁆𑀜𑀸𑀢𑀸. 𑀙𑀺𑀤𑁆𑀤𑀦𑁆𑀢𑀺 𑀙𑀺𑀤𑁆𑀤𑀬𑀼𑀢𑁆𑀢𑀁. 𑀯𑀺𑀤𑁆𑀥𑀦𑁆𑀢𑀺 𑀅𑀦𑁆𑀢𑁄𑀯𑀺𑀦𑀺𑀯𑀺𑀤𑁆𑀥𑀙𑀺𑀤𑁆𑀤𑀁. 𑀆𑀯𑀺𑀤𑁆𑀥𑀦𑁆𑀢𑀺 𑀲𑀫𑀦𑁆𑀢𑀢𑁄 𑀙𑀺𑀤𑁆𑀤𑀁.

𑁨𑁬𑁫. 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑁆𑀪𑁄𑀕𑀓𑀭𑀡𑀯𑀲𑁂𑀦𑁂𑀯 𑀦𑀺𑀓𑁆𑀓𑀼𑀚𑁆𑀚𑀦𑀁, 𑀦 𑀧𑀢𑁆𑀢𑀸𑀦𑀁 ¶ 𑀅𑀥𑁄𑀫𑀼𑀔𑀝𑁆𑀞𑀧𑀦𑁂𑀦. 𑀢𑁂𑀦𑀸𑀳 ‘‘𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦 𑀓𑀭𑁄𑀢𑀽’’𑀢𑀺𑀆𑀤𑀺, 𑀢𑀁 𑀯𑀟𑁆𑀠𑀁 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁄 𑀓𑀭𑁄𑀢𑀽𑀢𑀺 𑀅𑀢𑁆𑀣𑁄.

𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀯𑀟𑁆𑀠𑀲𑁆𑀲 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀤𑀡𑁆𑀟𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦 𑀓𑀭𑀡𑀦𑁆𑀢𑀺 𑀲𑀗𑁆𑀖𑁂𑀦 𑀯𑀟𑁆𑀠𑀲𑁆𑀲 𑀅𑀲𑀫𑁆𑀪𑁄𑀕𑀓𑀭𑀡𑀁. 𑀬𑀣𑀸 𑀅𑀲𑀫𑁆𑀪𑁄𑀕𑁄 𑀳𑁄𑀢𑀺, 𑀢𑀣𑀸 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀓𑀼𑀚𑁆𑀚𑀺𑀢𑁄…𑀧𑁂… 𑀅𑀲𑀫𑁆𑀪𑁄𑀕𑀁 𑀲𑀗𑁆𑀖𑁂𑀦𑀸𑀢𑀺 𑀏𑀢𑁆𑀣 𑀲𑀗𑁆𑀖𑁂𑀦 𑀅𑀲𑀫𑁆𑀪𑁄𑀕𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀪𑀕𑀯𑀢𑀸 𑀅𑀲𑀫𑁆𑀪𑁄𑀕𑀓𑀭𑀡𑀲𑁆𑀲 𑀆𑀡𑀢𑁆𑀢𑀢𑁆𑀢𑀸, 𑀓𑀫𑁆𑀫𑀯𑀸𑀘𑀸𑀬 𑀘 𑀲𑀸𑀯𑀺𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀓𑁄𑀘𑀺 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀢𑁆𑀢𑁂 𑀦𑀺𑀓𑁆𑀓𑀼𑀚𑁆𑀚𑀺𑀢𑁂 𑀢𑀲𑁆𑀲 𑀲𑀦𑁆𑀢𑀓𑀁 𑀜𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀅𑀘𑁆𑀘𑀬𑁄𑀢𑀺 𑀜𑀸𑀬𑀧𑁆𑀧𑀝𑀺𑀧𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀺, 𑀅𑀧𑀭𑀸𑀥𑁄𑀢𑀺 𑀅𑀢𑁆𑀣𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑁄. 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀢𑀁 𑀢𑁂 𑀅𑀧𑀭𑀸𑀥𑀁 𑀫𑀬𑀁 𑀔𑀫𑀸𑀫. 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀻𑀢𑀺𑀆𑀤𑀻𑀲𑀼 𑀅𑀮𑀸𑀪𑀸𑀬 ¶ 𑀧𑀭𑀺𑀲𑀓𑁆𑀓𑀦𑀸𑀤𑀺𑀢𑁄 𑀯𑀺𑀭𑀢𑁄𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀲𑀫𑁆𑀪𑁄𑀕𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀢𑀺 𑀏𑀢𑁆𑀣 ‘‘𑀓𑀢𑁄’’𑀢𑀺 𑀧𑀸𑀞𑀲𑁂𑀲𑁄.

𑁨𑁬𑁮. 𑀬𑀸𑀯 𑀧𑀘𑁆𑀙𑀺𑀫𑀸 𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀧𑀞𑀫𑀲𑁄𑀧𑀸𑀦𑀨𑀮𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀘𑁆𑀙𑀸 𑀤𑀼𑀲𑁆𑀲𑁂𑀦 𑀲𑀦𑁆𑀣𑀢𑀢𑁆𑀢𑀸 𑀏𑀯 𑀯𑀼𑀢𑁆𑀢𑀁. ‘‘𑀧𑀘𑁆𑀙𑀺𑀫𑀁 𑀚𑀦𑀢𑀁 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀢𑀻’’𑀢𑀺 𑀇𑀤𑀁 𑀣𑁂𑀭𑁄 𑀅𑀦𑀸𑀕𑀢𑁂 𑀪𑀺𑀓𑁆𑀔𑀽𑀦𑀁 𑀘𑁂𑀮𑀧𑀝𑀺𑀓𑀲𑁆𑀲 𑀅𑀓𑁆𑀓𑀫𑀦𑀧𑀘𑁆𑀘𑀬𑀸 𑀅𑀧𑀯𑀸𑀤𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀦𑀺𑀯𑀸𑀭𑀡𑁂𑀦 𑀪𑀕𑀯𑀢𑁄 𑀅𑀦𑀼𑀓𑀫𑁆𑀧𑀁 𑀲𑀦𑁆𑀥𑀸𑀬𑀸𑀳. 𑀅𑀧𑀕𑀢𑀕𑀩𑁆𑀪𑀸𑀢𑀺 𑀯𑀺𑀚𑀸𑀢𑀧𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀗𑁆𑀕𑀮𑀢𑁆𑀣𑀸𑀬𑀸’’𑀢𑀺.

𑁨𑁬𑁯-𑁨𑁭𑁦. 𑀩𑀻𑀚𑀦𑀺𑀦𑁆𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀺𑀁. 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀦𑁆𑀢𑀺 𑀢𑀸𑀮𑀧𑀡𑁆𑀡𑀸𑀤𑀺𑀦𑀸 𑀏𑀓𑁂𑀦 𑀧𑀢𑁆𑀢𑁂𑀦 𑀓𑀢𑀙𑀢𑁆𑀢𑀁.

𑁨𑁭𑁪-𑁫. 𑀅𑀦𑀼𑀭𑀓𑁆𑀔𑀡𑀢𑁆𑀣𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀕𑁄𑀧𑀦𑀢𑁆𑀣𑀁. 𑀤𑀻𑀖𑀁 𑀓𑀸𑀭𑁂𑀦𑁆𑀢𑀻𑀢𑀺 𑀓𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀸𑀧𑁂𑀦𑁆𑀢𑀺. 𑀘𑀢𑀼𑀓𑁄𑀡𑀦𑁆𑀢𑀺 𑀬𑀣𑀸 𑀉𑀧𑀭𑀺 𑀦𑀮𑀸𑀝𑀦𑁆𑀢𑁂𑀲𑀼 𑀤𑁆𑀯𑁂, 𑀳𑁂𑀝𑁆𑀞𑀸 𑀳𑀦𑀼𑀓𑀧𑀲𑁆𑀲𑁂 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑁄 𑀓𑁄𑀡𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀘𑀢𑀼𑀭𑀲𑁆𑀲𑀁 𑀓𑀢𑁆𑀯𑀸 𑀓𑀧𑁆𑀧𑀸𑀧𑀦𑀁. 𑀧𑀸𑀴𑀺𑀬𑀁 𑀤𑀸𑀞𑀺𑀓𑀁 𑀞𑀧𑀸𑀧𑁂𑀦𑁆𑀢𑀻𑀢𑀺 𑀉𑀢𑁆𑀢𑀭𑁄𑀝𑁆𑀞𑁂 𑀫𑀲𑁆𑀲𑀼𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀸𑀧𑁂𑀦𑁆𑀢𑀺. 𑀭𑀼𑀥𑀻𑀢𑀺 𑀔𑀼𑀤𑁆𑀤𑀓𑀯𑀡𑀁.

𑁨𑁭𑁭. 𑀧𑀸𑀴𑀺𑀬𑀁 𑀮𑁄𑀳𑀪𑀡𑁆𑀟𑀓𑀁𑀲𑀪𑀡𑁆𑀟𑀲𑀦𑁆𑀦𑀺𑀘𑀬𑁄𑀢𑀺 𑀮𑁄𑀳𑀪𑀡𑁆𑀟𑀲𑁆𑀲, 𑀓𑀁𑀲𑀪𑀡𑁆𑀟𑀲𑁆𑀲 𑀘 𑀲𑀦𑁆𑀦𑀺𑀘𑀬𑁄𑀢𑀺 ¶ 𑀅𑀢𑁆𑀣𑁄. 𑀩𑀦𑁆𑀥𑀦𑀫𑀢𑁆𑀢𑀦𑁆𑀢𑀺 𑀯𑀸𑀲𑀺𑀤𑀡𑁆𑀟𑀸𑀤𑀻𑀦𑀁 𑀓𑁄𑀝𑀻𑀲𑀼 𑀅𑀧𑀸𑀢𑀦𑀢𑁆𑀣𑀁 𑀮𑁄𑀳𑁂𑀳𑀺 𑀩𑀦𑁆𑀥𑀦𑀁. 𑀢𑀦𑁆𑀢𑀓𑀦𑁆𑀢𑀺 𑀆𑀬𑁄𑀕𑀯𑀸𑀬𑀦𑀢𑁆𑀣𑀁 𑀢𑀤𑀸𑀓𑀸𑀭𑁂𑀦 𑀧𑀲𑀸𑀭𑀺𑀢𑀢𑀦𑁆𑀢𑀁.

𑁨𑁭𑁮. ‘‘𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣 𑀩𑀦𑁆𑀥𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁂𑀦 𑀅𑀲𑀜𑁆𑀘𑀺𑀘𑁆𑀘 𑀓𑀸𑀬𑀩𑀦𑁆𑀥𑀦𑀁 𑀅𑀩𑀦𑁆𑀥𑀺𑀢𑁆𑀯𑀸 𑀧𑀯𑀺𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀦𑁆𑀢𑀺 𑀏𑀯𑀁 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀓𑀢𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀏𑀓𑀯𑀡𑁆𑀡𑀲𑀼𑀢𑁆𑀢𑁂𑀦𑀸𑀧𑀺 𑀯𑀮𑀬𑀖𑀝𑀓𑀸𑀤𑀺𑀯𑀺𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀯𑁂𑀞𑀺𑀢𑀫𑁆𑀧𑀺 𑀫𑀼𑀭𑀚𑀫𑁂𑀯. 𑀯𑀺𑀓𑀸𑀭𑀁 𑀧𑀦 𑀅𑀤𑀲𑁆𑀲𑁂𑀢𑁆𑀯𑀸 𑀫𑀝𑁆𑀞𑀁 𑀓𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀯𑁂𑀞𑀺𑀢𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 ‘‘𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 ‘𑀩𑀳𑀼𑀭𑀚𑁆𑀚𑀼𑀓’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀯𑀝𑁆𑀝𑀢𑀻’’𑀢𑀺. 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 ¶ 𑀲𑀚𑁆𑀚𑀺𑀢𑀁. 𑀧𑀸𑀫𑀗𑁆𑀕𑀤𑀲𑀸 𑀘𑀢𑀼𑀭𑀲𑁆𑀲𑀸. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁂𑀦𑀸𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦. 𑀧𑀸𑀲𑀦𑁆𑀢𑁄𑀢𑀺 𑀤𑀲𑀸𑀧𑀭𑀺𑀬𑁄𑀲𑀸𑀦𑀁.

𑁨𑁭𑁯. 𑀧𑀸𑀴𑀺𑀬𑀁 𑀕𑀡𑁆𑀞𑀺𑀓𑀨𑀮𑀓𑀁 𑀧𑀸𑀲𑀓𑀨𑀮𑀓𑀦𑁆𑀢𑀺 𑀏𑀢𑁆𑀣 𑀤𑀸𑀭𑀼𑀤𑀦𑁆𑀢𑀸𑀤𑀺𑀫𑀬𑁂𑀲𑀼 𑀨𑀮𑀓𑁂𑀲𑀼 𑀕𑀡𑁆𑀞𑀺𑀓𑀧𑀸𑀲𑀓𑀸𑀦𑀺 𑀅𑀧𑁆𑀧𑁂𑀢𑁆𑀯𑀸 𑀘𑀻𑀯𑀭𑁂 𑀞𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀁. 𑀓𑁄𑀝𑁆𑀝𑁄 𑀯𑀺𑀯𑀭𑀺𑀬𑀢𑀻𑀢𑀺 𑀅𑀦𑀼𑀯𑀸𑀢𑁄 𑀯𑀺𑀯𑀭𑀺𑀬𑀢𑀺.

𑁨𑁮𑁦-𑁧. 𑀧𑀸𑀴𑀺𑀓𑀸𑀭𑀓𑁄𑀢𑀺 𑀪𑀺𑀓𑁆𑀔𑀽𑀦𑀁 𑀬𑀣𑀸𑀯𑀼𑀟𑁆𑀠𑀁 𑀧𑀸𑀴𑀺𑀬𑀸 𑀧𑀢𑀺𑀝𑁆𑀞𑀸𑀧𑀓𑁄. 𑀢𑀲𑁆𑀲𑀸𑀧𑀺 𑀢𑀣𑀸 𑀧𑀸𑀭𑀼𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀁 𑀫𑀼𑀡𑁆𑀟𑀯𑀝𑁆𑀝𑀻𑀢𑀺 𑀫𑀮𑁆𑀮𑀸𑀤𑀬𑁄.

𑁨𑁮𑁨. 𑀧𑀫𑀸𑀡𑀗𑁆𑀕𑀼𑀮𑁂𑀦𑀸𑀢𑀺 𑀯𑀟𑁆𑀠𑀓𑀻𑀅𑀗𑁆𑀕𑀼𑀮𑁂𑀦. 𑀓𑁂𑀘𑀺 𑀧𑀦 ‘‘𑀧𑀓𑀢𑀺𑀅𑀗𑁆𑀕𑀼𑀮𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀘𑀢𑀼𑀭𑀗𑁆𑀕𑀼𑀮𑀧𑀘𑁆𑀙𑀺𑀫𑀓𑀯𑀘𑀦𑁂𑀦 𑀦 𑀲𑀫𑁂𑀢𑀺. 𑀦 𑀳𑀺 𑀧𑀓𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀤𑀦𑁆𑀢𑀓𑀝𑁆𑀞𑀁 𑀓𑀡𑁆𑀞𑁂 𑀅𑀯𑀺𑀮𑀕𑁆𑀕𑀁 𑀔𑀸𑀤𑀺𑀢𑀼𑀁 𑀲𑀓𑀸𑀢𑀺.

𑁨𑁮𑁫. 𑀧𑀸𑀴𑀺𑀬𑀁 𑀲𑀓𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀩𑀼𑀤𑁆𑀥𑀯𑀘𑀦𑀁 𑀤𑀽𑀲𑁂𑀦𑁆𑀢𑀻𑀢𑀺 𑀫𑀸𑀕𑀥𑀪𑀸𑀲𑀸𑀬 𑀲𑀩𑁆𑀩𑁂𑀲𑀁 𑀯𑀢𑁆𑀢𑀼𑀁 𑀲𑀼𑀓𑀭𑀢𑀸𑀬 𑀳𑀻𑀦𑀚𑀘𑁆𑀘𑀸𑀧𑀺 𑀉𑀕𑁆𑀕𑀡𑁆𑀳𑀦𑁆𑀢𑀸 𑀤𑀽𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁮𑁯. 𑀫𑀸 𑀪𑀺𑀓𑁆𑀔𑀽 𑀩𑁆𑀬𑀸𑀩𑀸𑀥𑀬𑀺𑀁𑀲𑀽𑀢𑀺 𑀮𑀲𑀼𑀡𑀕𑀦𑁆𑀥𑁂𑀦 𑀪𑀺𑀓𑁆𑀔𑀽 𑀫𑀸 𑀩𑀸𑀥𑀬𑀺𑀁𑀲𑀼.

𑁨𑁯𑁧. 𑀅𑀯𑀮𑁂𑀔𑀦𑀧𑀻𑀞𑀭𑁄𑀢𑀺 ¶ 𑀅𑀯𑀮𑁂𑀔𑀦𑀓𑀝𑁆𑀞𑀸𑀦𑀁 𑀞𑀧𑀦𑀪𑀸𑀚𑀦𑀯𑀺𑀲𑁂𑀲𑁄. 𑀅𑀧𑀺𑀥𑀸𑀦𑀦𑁆𑀢𑀺 𑀧𑀺𑀥𑀸𑀦𑀨𑀮𑀓𑀸𑀤𑀺.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁄

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁫. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 ¶ ¶ 𑀲𑀺𑀲𑀺𑀭𑁂𑀢𑀺 𑀲𑀺𑀲𑀺𑀭𑀓𑀸𑀮𑁂 𑀳𑀺𑀫𑀧𑀸𑀢𑀯𑀲𑁂𑀦 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁆𑀲𑀧𑀸𑀢𑀯𑀲𑁆𑀲𑁂𑀦 𑀘 𑀉𑀧𑁆𑀧𑀦𑁆𑀦𑁄 𑀔𑀭𑁄 𑀲𑀻𑀢𑀲𑀫𑁆𑀨𑀲𑁆𑀲𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀫𑁆𑀨𑀼𑀲𑀺𑀢𑀓𑁄’’𑀢𑀺. ‘‘𑀢𑀢𑁄’’𑀢𑀺 𑀇𑀤𑀁 𑀓𑀢𑁆𑀢𑀼𑀅𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀢𑁂𑀦 𑀘 𑀯𑀺𑀳𑀸𑀭𑁂𑀦 𑀯𑀸𑀢𑀸𑀢𑀧𑁄 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀯𑀺𑀳𑀸𑀭𑁂𑀦 𑀧𑀝𑀺𑀳𑀜𑁆𑀜𑀢𑀻’’𑀢𑀺.

𑁨𑁯𑁬. 𑀆𑀯𑀺𑀜𑁆𑀙𑀦𑀙𑀺𑀤𑁆𑀤𑀦𑁆𑀢𑀺 𑀬𑀢𑁆𑀣 𑀅𑀗𑁆𑀕𑀼𑀮𑀺𑀁 𑀯𑀸 𑀭𑀚𑁆𑀚𑀼𑀲𑀗𑁆𑀔𑀮𑀺𑀓𑀸𑀤𑀺𑀁 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀓𑀯𑀸𑀝𑀁 𑀆𑀓𑀟𑁆𑀠𑀦𑁆𑀢𑀸 𑀤𑁆𑀯𑀸𑀭𑀩𑀸𑀳𑀁 𑀨𑀼𑀲𑀸𑀧𑁂𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀘𑁂𑀧𑀺 𑀤𑀻𑀧𑀺𑀦𑀗𑁆𑀕𑀼𑀝𑁆𑀞𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑁂𑀢𑀺𑀬𑁂 𑀯𑁂𑀤𑀺𑀓𑀸𑀲𑀤𑀺𑀲𑀦𑁆𑀢𑀺 𑀯𑀸𑀢𑀧𑀸𑀦𑀤𑀸𑀭𑀼𑀁 𑀯𑀸 𑀚𑀸𑀮𑀁 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸 𑀤𑀸𑀭𑀼𑀝𑁆𑀞𑀸𑀦𑁂 𑀘𑁂𑀢𑀺𑀬𑁂 𑀯𑁂𑀤𑀺𑀓𑀸𑀬 𑀧𑀝𑁆𑀝𑀸𑀤𑀻𑀦𑀺 𑀯𑀺𑀬 𑀇𑀝𑁆𑀞𑀓𑀸𑀤𑀻𑀳𑀺 𑀉𑀤𑁆𑀥𑀁, 𑀢𑀺𑀭𑀺𑀬𑀜𑁆𑀘 𑀧𑀝𑁆𑀝𑀺𑀓𑀸𑀤𑀬𑁄 𑀤𑀲𑁆𑀲𑁂𑀢𑁆𑀯𑀸 𑀘𑀢𑀼𑀙𑀺𑀤𑁆𑀤𑀬𑀼𑀢𑁆𑀢𑀁 𑀓𑀢𑀁. 𑀣𑀫𑁆𑀪𑀓𑀯𑀸𑀢𑀧𑀸𑀦𑀁 𑀦𑀸𑀫 𑀢𑀺𑀭𑀺𑀬𑀁 𑀤𑀸𑀭𑀽𑀦𑀺 𑀅𑀤𑀢𑁆𑀯𑀸 𑀉𑀤𑁆𑀥𑀁 𑀞𑀧𑀺𑀢𑀤𑀸𑀭𑀽𑀳𑀺 𑀏𑀯 𑀓𑀢𑀁. 𑀘𑁄𑀴𑀓𑀧𑀸𑀤𑀧𑀼𑀜𑁆𑀙𑀦𑀁 𑀩𑀦𑁆𑀥𑀺𑀢𑀼𑀦𑁆𑀢𑀺 𑀯𑀸𑀢𑀧𑀸𑀦𑀧𑁆𑀧𑀫𑀸𑀡𑁂𑀦 𑀧𑀸𑀤𑀧𑀼𑀜𑁆𑀙𑀦𑀲𑀤𑀺𑀲𑀁 𑀘𑁄𑀴𑀓𑀸𑀤𑀺𑀦𑀸 𑀩𑀦𑁆𑀥𑀺𑀢𑁆𑀯𑀸 𑀯𑀕𑁆𑀕𑀼𑀮𑀺𑀆𑀤𑀺𑀧𑁆𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀁, 𑀓𑀣𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀺𑀟𑁆𑀠𑀓𑀦𑁆𑀢𑀺 𑀫𑀜𑁆𑀘𑀸𑀓𑀸𑀭𑁂𑀦 𑀓𑀝𑁆𑀞𑀫𑀢𑁆𑀢𑀺𑀓𑀸𑀤𑀻𑀳𑀺 𑀓𑀢𑀯𑁂𑀤𑀺𑀓𑀸𑀓𑀸𑀭𑀁.

𑁨𑁯𑁭. 𑀘𑀢𑀼𑀭𑀲𑁆𑀲𑀧𑀻𑀞𑀦𑁆𑀢𑀺 𑀲𑀫𑀘𑀢𑀼𑀭𑀲𑁆𑀲𑀁. 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀫𑁂𑀯 𑀯𑀝𑁆𑀝𑀢𑀺. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑀘𑀢𑀼𑀭𑀲𑁆𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀬𑀢𑀘𑀢𑀼𑀭𑀲𑁆𑀲𑀸 𑀧𑀦 𑀲𑀢𑁆𑀢𑀗𑁆𑀕𑀧𑀜𑁆𑀘𑀗𑁆𑀕𑀸𑀧𑀺 𑀉𑀘𑁆𑀘𑀧𑀸𑀤𑀸 𑀦 𑀯𑀝𑁆𑀝𑀦𑁆𑀢𑀺. 𑀯𑁂𑀢𑁆𑀢𑁂𑀳𑁂𑀯 𑀘𑀢𑀼𑀭𑀲𑁆𑀲𑀸𑀤𑀺𑀆𑀓𑀸𑀭𑁂𑀦 𑀓𑀢𑀁 𑀪𑀤𑁆𑀤𑀧𑀻𑀞𑀦𑁆𑀢𑀺 𑀆𑀳 ‘‘𑀯𑁂𑀢𑁆𑀢𑀫𑀬𑀁 𑀧𑀻𑀞’’𑀦𑁆𑀢𑀺. 𑀤𑀸𑀭𑀼𑀧𑀝𑁆𑀝𑀺𑀓𑀸𑀬 𑀉𑀧𑀭𑀻𑀢𑀺 𑀅𑀝𑀦𑀺𑀆𑀓𑀸𑀭𑁂𑀦 𑀞𑀺𑀢𑀤𑀸𑀭𑀼𑀧𑀝𑀮𑀲𑁆𑀲 𑀳𑁂𑀝𑁆𑀞𑀸 𑀉𑀤𑁆𑀥𑀁 𑀧𑀸𑀤𑀁 𑀓𑀢𑁆𑀯𑀸. 𑀧𑀯𑁂𑀲𑀦𑀓𑀸𑀮𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀉𑀧𑀭𑀻’’𑀢𑀺 𑀯𑀼𑀢𑁆𑀢𑀁. 𑀏𑀴𑀓𑀲𑁆𑀲 𑀧𑀘𑁆𑀙𑀺𑀫𑀧𑀸𑀤𑀤𑁆𑀯𑀬𑀁 𑀯𑀺𑀬 𑀯𑀗𑁆𑀓𑀸𑀓𑀸𑀭𑁂𑀦 𑀞𑀺𑀢𑀢𑁆𑀢𑀸 𑀧𑀦𑁂𑀢𑀁 ‘‘𑀏𑀴𑀓𑀧𑀸𑀤𑀧𑀻𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀮𑁄𑀞𑁂𑀦𑁆𑀢𑀻𑀢𑀺 𑀲𑀳 𑀫𑀜𑁆𑀘𑁂𑀳𑀺 𑀧𑀯𑀝𑁆𑀝𑁂𑀦𑁆𑀢𑀺. 𑀭𑀼𑀓𑁆𑀔𑁂 ¶ , 𑀮𑀢𑀸 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀅𑀯𑀲𑁂𑀲𑀁 𑀕𑀘𑁆𑀙𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀢𑀺𑀡𑀚𑀸𑀢𑀺 𑀏𑀯𑀸𑀢𑀺 𑀆𑀳 ‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦’’𑀦𑁆𑀢𑀺𑀆𑀤𑀺.

𑀉𑀧𑀤𑀳𑀦𑁆𑀢𑀻𑀢𑀺 ¶ 𑀞𑀧𑁂𑀦𑁆𑀢𑀺. 𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀢𑁆𑀣 𑀕𑀻𑀯𑀸𑀬 𑀲𑀳 𑀲𑀓𑀮𑀁 𑀲𑀻𑀲𑀁 𑀞𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀘 𑀫𑀼𑀝𑁆𑀞𑀺𑀭𑀢𑀦𑀁 𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀢𑁆𑀣𑀸𑀭𑀢𑁄’’𑀢𑀺𑀆𑀤𑀺𑀫𑀸𑀳. 𑀇𑀤𑀜𑁆𑀘 𑀩𑀺𑀫𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑁂𑀢𑀩𑁆𑀩𑀘𑁄𑀴𑀧𑁆𑀧𑀫𑀸𑀡𑀤𑀲𑁆𑀲𑀦𑀁. 𑀢𑀲𑁆𑀲 𑀯𑀲𑁂𑀦 𑀩𑀺𑀫𑁆𑀩𑁄𑀳𑀦𑀲𑁆𑀲 𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀬𑀣𑀸 𑀓𑁄𑀝𑀺𑀢𑁄 𑀓𑁄𑀝𑀺 𑀯𑀺𑀢𑁆𑀣𑀸𑀭𑀢𑁄 𑀧𑀼𑀣𑀼𑀮𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀏𑀯𑀁 𑀲𑀺𑀩𑁆𑀩𑀺𑀢𑀩𑁆𑀩𑀁. 𑀇𑀢𑁄 𑀅𑀥𑀺𑀓𑀁 𑀦 𑀯𑀝𑁆𑀝𑀢𑀺, 𑀢𑀁 𑀧𑀦 𑀅𑀦𑁆𑀢𑁂𑀲𑀼 𑀞𑀧𑀺𑀢𑀘𑁄𑀴𑀁 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀤𑀺𑀕𑀼𑀡𑀁 𑀓𑀢𑀁 𑀢𑀺𑀓𑀡𑁆𑀡𑀁 𑀳𑁄𑀢𑀺. 𑀢𑁂𑀲𑀼 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀫𑀦𑁆𑀢𑀭𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀓𑁄𑀝𑀺𑀢𑁄 𑀓𑁄𑀝𑀺𑀁 𑀆𑀳𑀘𑁆𑀘 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀇𑀤𑀫𑀲𑁆𑀲 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀢𑀻𑀲𑀼 𑀓𑀡𑁆𑀡𑁂𑀲𑀽’’𑀢𑀺𑀆𑀤𑀺.

‘‘𑀓𑀫𑁆𑀩𑀮𑀫𑁂𑀯…𑀧𑁂… 𑀉𑀡𑁆𑀡𑀪𑀺𑀲𑀺𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀕𑁄𑀦𑀓𑀸𑀤𑀺𑀅𑀓𑀧𑁆𑀧𑀺𑀬𑀫𑁆𑀧𑀺 𑀉𑀡𑁆𑀡𑀫𑀬𑀢𑁆𑀣𑀭𑀡𑀁 𑀪𑀺𑀲𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀲𑀽𑀭𑀓𑁂𑀢𑀺 𑀘𑀫𑁆𑀫𑀫𑀬𑀪𑀺𑀲𑀺𑀬𑀁. 𑀘𑀫𑁆𑀫𑀫𑀬𑀁 𑀧𑀦 𑀩𑀺𑀫𑁆𑀩𑁄𑀳𑀦𑀁 𑀢𑀽𑀮𑀧𑀼𑀡𑁆𑀡𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀤𑀼𑀲𑁆𑀲𑀦𑁆𑀢𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀓𑀭𑀡𑀢𑁆𑀣𑀸𑀬 𑀤𑀼𑀲𑁆𑀲𑀁. 𑀪𑀺𑀲𑀺𑀁 𑀑𑀦𑀦𑁆𑀥𑀺𑀢𑀼𑀦𑁆𑀢𑀺 𑀪𑀺𑀲𑀺𑀢𑁆𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑀼𑀁. 𑀧𑀭𑀺𑀪𑀺𑀚𑁆𑀚𑀢𑀻𑀢𑀺 𑀫𑀜𑁆𑀘𑀸𑀤𑀺𑀢𑁄 𑀲𑀸𑀭𑀺𑀬𑀫𑀸𑀦𑀸 𑀧𑀻𑀞𑀓𑁄𑀝𑀺𑀆𑀤𑀻𑀲𑀼 𑀦𑀺𑀲𑀻𑀤𑀦𑁆𑀢𑁂𑀳𑀺 𑀖𑀁𑀲𑀺𑀬𑀫𑀸𑀦𑀸 𑀪𑀺𑀲𑀺 𑀧𑀭𑀺𑀪𑀺𑀚𑁆𑀚𑀢𑀺. 𑀑𑀦𑀤𑁆𑀥𑀫𑀜𑁆𑀘𑀦𑁆𑀢𑀺 𑀪𑀺𑀲𑀺𑀁 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀩𑀤𑁆𑀥𑀫𑀜𑁆𑀘𑀁. 𑀧𑀸𑀴𑀺𑀬𑀁 𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀭𑀦𑁆𑀢𑀻𑀢𑀺 𑀪𑀺𑀲𑀺𑀘𑁆𑀙𑀯𑀺𑀁 𑀘𑁄𑀭𑀸 𑀳𑀭𑀦𑁆𑀢𑀺. 𑀨𑁄𑀲𑀺𑀢𑀼𑀦𑁆𑀢𑀺 𑀘𑁄𑀭𑁂𑀳𑀺 𑀳𑀭𑀺𑀢𑀲𑁆𑀲 𑀧𑀘𑁆𑀙𑀸 𑀳𑀭𑀺𑀢𑀲𑀜𑁆𑀜𑀸𑀡𑀨𑀼𑀲𑀺𑀢𑀩𑀺𑀦𑁆𑀤𑀽𑀦𑀺 𑀤𑀸𑀢𑀼𑀁. 𑀪𑀺𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀺𑀪𑀺𑀢𑁆𑀢𑀺𑀭𑀸𑀚𑀺𑀓𑀭𑀡𑀁. 𑀳𑀢𑁆𑀣𑀓𑀫𑁆𑀫𑀦𑁆𑀢𑀺 𑀳𑀢𑁆𑀣𑁂𑀦 𑀬𑀁 𑀓𑀺𑀜𑁆𑀘𑀺 𑀲𑀜𑁆𑀜𑀸𑀓𑀭𑀡𑀁.

𑁨𑁯𑁮. 𑀧𑀸𑀴𑀺𑀬𑀁 𑀦 𑀦𑀺𑀧𑀢𑀢𑀻𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀧𑀝𑀺𑀩𑀸𑀳𑁂𑀢𑁆𑀯𑀸𑀢𑀺 𑀖𑀁𑀲𑀺𑀢𑁆𑀯𑀸. 𑀦 𑀦𑀺𑀩𑀦𑁆𑀥𑀢𑀻𑀢𑀺 𑀅𑀦𑀺𑀩𑀦𑁆𑀥𑀦𑀻𑀬𑁄, 𑀦 𑀮𑀕𑁆𑀕𑀦𑀓𑁄𑀢𑀺 𑀅𑀢𑁆𑀣𑁄.

𑁨𑁯𑁯. ‘‘𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀮𑀩𑁆𑀪𑀢𑀻𑀢𑀺 𑀆𑀡𑀢𑁆𑀢𑀺𑀬𑀸 𑀏𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀤𑁆𑀯𑀸𑀭𑀧𑀸𑀮𑀁 ‘‘𑀓𑀺𑀁 𑀦 𑀓𑀭𑁄𑀲𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀚𑀸𑀢𑀓𑀧𑀓𑀭𑀡𑀦𑁆𑀢𑀺 𑀚𑀸𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀭𑀽𑀧𑀫𑁆𑀧𑀺 𑀲𑀬𑀁 𑀓𑀸𑀢𑀼𑀁 𑀦 𑀮𑀪𑀢𑀺. 𑀧𑀸𑀴𑀺𑀬𑀁 𑀧𑀜𑁆𑀘𑀧𑀝𑀺𑀓𑀦𑁆𑀢𑀺 𑀚𑀸𑀢𑀺𑀆𑀤𑀺𑀧𑀜𑁆𑀘𑀧𑁆𑀧𑀓𑀸𑀭𑀯𑀡𑁆𑀡𑀫𑀝𑁆𑀞𑀁.

𑁩𑁦𑁦. 𑀉𑀧𑀘𑀸𑀭𑁄 ¶ ¶ 𑀦 𑀳𑁄𑀢𑀻𑀢𑀺 𑀕𑀩𑁆𑀪𑀲𑁆𑀲 𑀩𑀳𑀺 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀕𑀫𑀦𑀲𑁆𑀲 𑀑𑀓𑀸𑀲𑁄 𑀦𑀧𑁆𑀧𑀳𑁄𑀢𑀺. 𑀭𑀼𑀓𑁆𑀔𑀁 𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀘𑁆𑀙𑀺𑀢𑀲𑀸𑀭𑀤𑀸𑀭𑀼𑀁 𑀅𑀕𑁆𑀕𑀲𑀫𑀻𑀧𑁂 𑀯𑀺𑀚𑁆𑀛𑀺𑀢𑁆𑀯𑀸. 𑀓𑀢𑁆𑀯𑀸𑀢𑀺 𑀙𑀺𑀤𑁆𑀤𑁂 𑀓𑀢𑁆𑀯𑀸. 𑀓𑀧𑁆𑀧𑀓𑀢𑀁 𑀯𑀺𑀬 𑀲𑀸𑀭𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 𑀏𑀯𑀁 𑀓𑀢𑀫𑁂𑀯 ‘‘𑀆𑀳𑀭𑀺𑀫𑀁 𑀪𑀺𑀢𑁆𑀢𑀺𑀧𑀸𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀚𑀺𑀡𑁆𑀡𑀪𑀺𑀢𑁆𑀢𑀺𑀧𑀸𑀤𑁂𑀦 𑀩𑀳𑀺 𑀲𑀫𑀸𑀦𑀪𑀸𑀭𑀁 𑀔𑀸𑀡𑀼𑀓𑀧𑁆𑀧𑀲𑀻𑀲𑁂𑀦 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀽𑀮𑁂𑀦 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁. 𑀧𑀭𑀺𑀢𑁆𑀢𑀸𑀡𑀢𑁆𑀣𑀦𑁆𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀓𑀼𑀝𑀺𑀬𑀸 𑀑𑀯𑀲𑁆𑀲𑀦𑀝𑁆𑀞𑀸𑀦𑀲𑁆𑀲 𑀧𑀭𑀺𑀢𑁆𑀢𑀸𑀡𑀢𑁆𑀣𑀁. 𑀓𑀺𑀝𑀺𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀧𑀤𑀮𑀁. 𑀫𑀤𑁆𑀤𑀺𑀢𑀫𑀢𑁆𑀢𑀺𑀓𑀦𑁆𑀢𑀺 𑀑𑀯𑀲𑁆𑀲𑀦𑀙𑀺𑀤𑁆𑀤𑀲𑁆𑀲 𑀧𑀺𑀤𑀳𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀉𑀪𑀢𑁄𑀓𑀼𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀓𑀢𑀧𑀤𑁂𑀲𑀲𑁆𑀲𑀸𑀢𑀺 𑀬𑀣𑀸 𑀩𑀳𑀺 𑀞𑀺𑀢𑀸 𑀉𑀚𑀼𑀓𑀁 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑁂 𑀦 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀤𑁆𑀯𑀸𑀭𑀸𑀪𑀺𑀫𑀼𑀔𑀁 𑀧𑀺𑀤𑀳𑀦𑀯𑀲𑁂𑀦 𑀪𑀺𑀢𑁆𑀢𑀺𑀜𑁆𑀘 𑀅𑀜𑁆𑀜𑀢𑁄 𑀤𑁆𑀯𑀸𑀭𑀜𑁆𑀘 𑀬𑁄𑀚𑁂𑀢𑁆𑀯𑀸 𑀓𑀢𑀝𑁆𑀞𑀸𑀦𑀁 𑀯𑀤𑀢𑀺. 𑀲𑀫𑀦𑁆𑀢𑀸 𑀧𑀭𑀺𑀬𑀸𑀕𑀸𑀭𑁄𑀢𑀺 𑀲𑀫𑀦𑁆𑀢𑀢𑁄 𑀆𑀯𑀺𑀤𑁆𑀥𑀧𑀫𑀼𑀔𑀁. 𑀯𑀁𑀲𑀁 𑀤𑀢𑁆𑀯𑀸𑀢𑀺 𑀧𑀼𑀭𑀺𑀲𑀧𑁆𑀧𑀫𑀸𑀡𑁂 𑀧𑀸𑀤𑁂 𑀦𑀺𑀔𑀡𑀺𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀧𑀺𑀝𑁆𑀞𑀺𑀯𑀁𑀲𑀲𑀤𑀺𑀲𑀁 𑀧𑀲𑁆𑀲𑀯𑀁𑀲𑀁 𑀞𑀧𑁂𑀢𑁆𑀯𑀸 𑀑𑀲𑀸𑀭𑁂𑀢𑁆𑀯𑀸. 𑀏𑀓𑀁 𑀤𑀡𑁆𑀟𑀓𑁄𑀝𑀺𑀁 𑀅𑀢𑀺𑀉𑀘𑁆𑀘𑀸𑀬 𑀯𑀺𑀳𑀸𑀭𑀪𑀺𑀢𑁆𑀢𑀺𑀓𑁄𑀝𑀺𑀬𑀸 𑀏𑀓𑀁 𑀓𑁄𑀝𑀺𑀁 𑀦𑀻𑀘𑁂 𑀯𑀁𑀲𑀧𑀺𑀝𑁆𑀞𑀺𑀬𑀁 𑀞𑀧𑀦𑀯𑀲𑁂𑀦 𑀤𑀡𑁆𑀟𑀓𑁂 𑀧𑀲𑀸𑀭𑁂𑀢𑁆𑀯𑀸. 𑀘𑀓𑁆𑀓𑀮𑀬𑀼𑀢𑁆𑀢𑁄 𑀓𑀺𑀝𑀺𑀓𑁄𑀢𑀺 𑀓𑀯𑀸𑀝𑀁 𑀯𑀺𑀬 𑀯𑀺𑀯𑀭𑀡𑀣𑀓𑀦𑀲𑀼𑀔𑀢𑁆𑀣𑀁 𑀘𑀓𑁆𑀓𑀮𑀩𑀦𑁆𑀥𑀓𑀺𑀝𑀺𑀓𑀁. 𑀧𑀸𑀴𑀺𑀬𑀁 𑀉𑀕𑁆𑀖𑀸𑀝𑀦𑀓𑀺𑀝𑀺𑀓𑀦𑁆𑀢𑀺 𑀆𑀧𑀡𑀸𑀤𑀻𑀲𑀼 𑀅𑀦𑀢𑁆𑀣𑀺𑀓𑀓𑀸𑀮𑁂 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀉𑀧𑀭𑀺 𑀘 𑀩𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀸 𑀑𑀢𑀭𑀡𑀓𑀺𑀝𑀺𑀓𑀁, 𑀓𑀧𑁆𑀧𑀲𑀻𑀲𑁂𑀳𑀺 𑀯𑀸 𑀉𑀧𑀢𑁆𑀣𑀫𑁆𑀪𑀦𑀻𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀑𑀢𑀭𑀡𑀓𑀺𑀝𑀺𑀓𑀫𑁆𑀧𑀺.

𑁩𑁦𑁧. 𑀧𑀸𑀦𑀻𑀬𑀁 𑀑𑀢𑀧𑁆𑀧𑀢𑀻𑀢𑀺 𑀧𑀸𑀦𑀻𑀬𑀪𑀸𑀚𑀦𑁂𑀲𑀼 𑀞𑀧𑀺𑀢𑀧𑀸𑀦𑀻𑀬𑀁 𑀆𑀢𑀧𑁂𑀦 𑀲𑀦𑁆𑀢𑀧𑁆𑀧𑀢𑀺.

𑁩𑁦𑁩. 𑀢𑀬𑁄 𑀯𑀸𑀝𑁂𑀢𑀺 𑀢𑀬𑁄 𑀧𑀭𑀺𑀓𑁆𑀔𑁂𑀧𑁂. 𑀯𑁂𑀴𑀼𑀯𑀸𑀝𑀦𑁆𑀢𑀺 𑀲𑀩𑁆𑀩𑀁 𑀤𑀸𑀭𑀼𑀧𑀭𑀺𑀓𑁆𑀔𑁂𑀧𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀡𑁆𑀝𑀓𑀯𑀸𑀝𑀦𑁆𑀢𑀺 𑀲𑀩𑁆𑀩𑀲𑀸𑀔𑀸𑀧𑀭𑀺𑀓𑁆𑀔𑁂𑀧𑀁.

𑁩𑁦𑁫. 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀻𑀢𑀺 𑀬𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀆𑀦𑀼𑀪𑀸𑀯𑁂𑀦 𑀫𑀳𑀦𑁆𑀢𑁄 𑀑𑀪𑀸𑀲𑁄 𑀅𑀳𑁄𑀲𑀺, 𑀬𑁂𑀦 𑀘𑀲𑁆𑀲 𑀧𑀤𑀻𑀧𑀲𑀳𑀲𑁆𑀲𑁂𑀦 𑀯𑀺𑀬 𑀯𑀺𑀕𑀢𑀦𑁆𑀥𑀓𑀸𑀭𑁄 𑀫𑀕𑁆𑀕𑁄 𑀅𑀳𑁄𑀲𑀺, 𑀲𑁄 𑀩𑀳𑀺𑀦𑀕𑀭𑁂 𑀙𑀯𑀲𑀭𑀻𑀭𑀲𑀫𑀸𑀓𑀼𑀮𑀁 𑀤𑀼𑀕𑁆𑀕𑀦𑁆𑀥𑀁 𑀩𑀻𑀪𑀘𑁆𑀙𑀁 𑀆𑀫𑀓𑀲𑀼𑀲𑀸𑀦𑀁 𑀧𑀢𑁆𑀢𑀲𑁆𑀲 𑀪𑀬𑁂𑀦 𑀧𑀻𑀢𑀺𑀯𑁂𑀕𑁂 𑀫𑀦𑁆𑀤𑀻𑀪𑀽𑀢𑁂 𑀅𑀦𑁆𑀢𑀭𑀥𑀸𑀬𑀺.

𑀲𑀢𑀁 ¶ 𑀳𑀢𑁆𑀣𑀻𑀢𑀺 𑀕𑀸𑀣𑀸𑀬 𑀳𑀢𑁆𑀣𑀺𑀦𑁄 𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀲𑀳𑀲𑁆𑀲-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀜𑀸𑀢𑀩𑁆𑀩𑁄. 𑀧𑀤𑀯𑀻𑀢𑀺𑀳𑀸𑀭𑀲𑁆𑀲𑀸𑀢𑀺 ‘‘𑀩𑀼𑀤𑁆𑀥𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀭𑀢𑀦𑀢𑁆𑀢𑀬𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑁄 𑀏𑀓𑀧𑀤𑀯𑀻𑀢𑀺𑀳𑀸𑀭𑀲𑁆𑀲 ¶ , 𑀢𑀧𑁆𑀧𑀘𑁆𑀘𑀬𑀓𑀼𑀲𑀮𑀨𑀮𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀲𑁄𑀴𑀲𑀫𑁄 𑀪𑀸𑀕𑁄 𑀓𑀮𑀁 𑀦𑀸𑀫, 𑀢𑀁 𑀲𑁄𑀴𑀲𑀺𑀁 𑀓𑀮𑀁 𑀬𑀣𑀸𑀯𑀼𑀢𑁆𑀢𑀸 𑀳𑀢𑁆𑀣𑀺𑀆𑀤𑀬𑁄 𑀲𑀩𑁆𑀩𑁂 𑀦𑀸𑀕𑁆𑀖𑀦𑁆𑀢𑀺 𑀦𑀸𑀭𑀳𑀦𑁆𑀢𑀺, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑀸𑀕𑀫𑁆𑀧𑀺 𑀦𑀸𑀕𑁆𑀖𑀦𑁆𑀢𑀺.

𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀻𑀢𑀺 𑀧𑀼𑀦 𑀩𑀮𑀯𑀧𑀻𑀢𑀺𑀬𑀸 𑀆𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁂 𑀅𑀦𑁆𑀢𑀭𑀥𑀸𑀬𑀺. 𑀆𑀲𑀢𑁆𑀢𑀺𑀬𑁄𑀢𑀺 𑀢𑀡𑁆𑀳𑀸𑀬𑁄. 𑀯𑀬𑀓𑀭𑀡𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀫𑀽𑀮𑀁 𑀦𑀯𑀓𑀫𑁆𑀫𑀁.

𑁩𑁦𑁯. 𑀤𑀤𑁂𑀬𑁆𑀬𑀸𑀢𑀺 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀺𑀳𑀸𑀭𑁂 𑀇𑀲𑁆𑀲𑀭𑀺𑀬𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑀺𑀦𑁆𑀦𑁄𑀢𑀺 𑀦𑀯𑀓𑀫𑁆𑀫𑀁 𑀓𑀸𑀢𑀼𑀁 𑀯𑀺𑀳𑀸𑀭𑁄 𑀤𑀺𑀦𑁆𑀦𑁄, 𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀁 𑀤𑀺𑀦𑁆𑀦𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑁩𑁧𑁩-𑁪. 𑀲𑀦𑁆𑀣𑀸𑀕𑀸𑀭𑁂𑀢𑀺 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀧𑁂. 𑀑𑀓𑀸𑀲𑁂𑀢𑀺 𑀦𑀺𑀯𑀸𑀲𑁄𑀓𑀸𑀲𑁂. 𑀉𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁. 𑀕𑀺𑀳𑀺𑀯𑀺𑀓𑀝𑀦𑁆𑀢𑀺 𑀕𑀺𑀳𑀻𑀳𑀺 𑀓𑀢𑀁 𑀧𑀜𑁆𑀜𑀢𑁆𑀢𑀁, 𑀕𑀺𑀳𑀺𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸𑀯𑀡𑁆𑀡𑀦𑀸

𑁩𑁧𑁮. ‘‘𑀙𑀫𑀸𑀲𑀘𑁆𑀘𑀬𑁂𑀦 𑀙𑀫𑀸𑀲𑀘𑁆𑀘𑀬𑁂𑀦𑀸’’𑀢𑀺 𑀇𑀤𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀬𑀤𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁, 𑀏𑀯𑀁 𑀉𑀧𑀭𑀺𑀧𑀺. ‘‘𑀢𑀁 𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀲𑁆𑀲 𑀓𑀸𑀭𑀡𑀫𑀸𑀳 ‘‘𑀧𑀘𑁆𑀘𑀬𑁂𑀦𑁂𑀯 𑀳𑀺 𑀢’’𑀦𑁆𑀢𑀺𑀆𑀤𑀺𑀦𑀸, 𑀧𑀘𑁆𑀘𑀬𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀩𑁆𑀪𑀡𑁆𑀟𑀺𑀓𑀸𑀢𑀺 𑀉𑀓𑁆𑀔𑀺𑀢𑁆𑀢𑀪𑀡𑁆𑀟𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀤𑀻𑀖𑀲𑀸𑀮𑀸𑀢𑀺 𑀘𑀗𑁆𑀓𑀫𑀦𑀲𑀸𑀮𑀸. 𑀫𑀡𑁆𑀟𑀮𑀫𑀸𑀴𑁄𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀸. 𑀅𑀦𑀼𑀤𑀳𑀢𑀻𑀢𑀺 𑀧𑀻𑀴𑁂𑀢𑀺. ‘‘𑀅𑀤𑀸𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀲𑀜𑁆𑀘𑀺𑀘𑁆𑀘 𑀅𑀤𑀤𑀦𑁆𑀢𑀲𑁆𑀲 𑀧𑀝𑀺𑀩𑀸𑀳𑀦𑁂 𑀧𑀯𑀺𑀲𑀦𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀺.

‘‘𑀦 ¶ 𑀕𑁄𑀘𑀭𑀕𑀸𑀫𑁄 𑀖𑀝𑁆𑀝𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑁂𑀢𑁆𑀯𑀸 𑀧𑀘𑁆𑀘𑀬𑁂 𑀤𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀪𑀡𑁆𑀟𑀧𑁆𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀪𑀡𑁆𑀟𑀁. 𑀲𑀭𑀻𑀭𑀧𑁆𑀧𑀝𑀺𑀘𑁆𑀙𑀸𑀤𑀦𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸𑀯 𑀅𑀦𑀯𑀚𑁆𑀚’’𑀦𑁆𑀢𑀺 𑀇𑀤𑀁 𑀧𑀼𑀘𑁆𑀙𑀺𑀢𑀓𑁆𑀔𑀡𑁂 𑀓𑀸𑀭𑀡𑀸𑀘𑀺𑀓𑁆𑀔𑀦𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦 𑀳𑁄𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲𑀧𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀯𑀺𑀲𑀚𑁆𑀚𑀦𑁂 𑀤𑁄𑀲𑀸𑀪𑀸𑀯𑀸. 𑀏𑀯𑀁 𑀧𑀦 𑀕𑀢𑁂 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺𑀲𑀜𑁆𑀜𑀸𑀬 𑀅𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀻𑀢𑀺 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀲𑀫𑁆𑀫𑀚𑁆𑀚𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀺. 𑀫𑀼𑀤𑁆𑀤𑀯𑁂𑀤𑀺𑀓𑀸𑀬𑀸𑀢𑀺 𑀘𑁂𑀢𑀺𑀬𑀲𑁆𑀲 𑀳𑀫𑁆𑀫𑀺𑀬𑀯𑁂𑀤𑀺𑀓𑀸𑀬 𑀖𑀝𑀸𑀓𑀸𑀭𑀲𑁆𑀲 𑀉𑀧𑀭𑀺 𑀘𑀢𑀼𑀭𑀲𑁆𑀲𑀯𑁂𑀤𑀺𑀓𑀸𑀬. 𑀓𑀲𑁆𑀫𑀸 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺𑀆𑀤𑀺 𑀬𑀢𑁄 𑀧𑀓𑀢𑀺𑀬𑀸 𑀮𑀪𑀢𑀺. 𑀢𑀢𑁆𑀣𑀸𑀧𑀺 𑀧𑀼𑀘𑁆𑀙𑀦𑀲𑁆𑀲 𑀓𑀸𑀭𑀡𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀯𑀺𑀳𑀸𑀭𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀦𑁆𑀢𑀭𑁂 𑀳𑁄𑀢𑀻’’𑀢𑀺 𑀆𑀳. 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸𑀢𑀺 𑀯𑀟𑁆𑀠𑀺𑀬𑀸 𑀓𑀳𑀸𑀧𑀡𑀸𑀤𑀺𑀁 𑀞𑀧𑁂𑀢𑁆𑀯𑀸, 𑀔𑁂𑀢𑁆𑀢𑀸𑀤𑀻𑀦𑀺 𑀯𑀸 𑀦𑀺𑀬𑀫𑁂𑀢𑁆𑀯𑀸. 𑀇𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑁂𑀢𑀺 𑀏𑀯𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀤𑁆𑀥𑀸𑀬 𑀤𑀸𑀢𑀩𑁆𑀩𑁂 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀺𑀲𑀬𑁂𑀢𑀺 𑀅𑀢𑁆𑀣𑁄.

𑀯𑀢𑁆𑀣𑀼 𑀧𑀦𑀸𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑁂 𑀉𑀧𑁆𑀧𑀦𑁆𑀦𑀭𑀽𑀧𑀺𑀬𑀁, 𑀢𑀜𑁆𑀘 ‘‘𑀢𑀢𑁄 𑀘𑀢𑀼𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀺𑀦𑁆𑀦𑀔𑁂𑀢𑁆𑀢𑀸𑀤𑀺𑀢𑁄 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀻’’𑀢𑀺𑀆𑀤𑀺.

𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀳𑀺𑀢𑀸𑀬. 𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 ‘‘𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀻’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑀧𑀭𑀸𑀫𑀸𑀲𑀯𑀲𑁂𑀦, 𑀦 ‘‘𑀲𑀗𑁆𑀖𑁄 𑀓𑀺𑀮𑀫𑀢𑀻’’𑀢𑀺 𑀏𑀯𑀁 𑀲𑀗𑁆𑀖𑀧𑀭𑀸𑀫𑀸𑀲𑀯𑀲𑁂𑀦.

‘‘𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀘𑀻𑀯𑀭𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦𑁂𑀯 𑀘𑀸’’𑀢𑀺 𑀯𑀼𑀢𑁆𑀢𑀁. 𑀘-𑀓𑀸𑀭𑁄 𑀘𑁂𑀢𑁆𑀣 𑀧𑀦-𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀢𑀺, 𑀦 𑀲𑀫𑀼𑀘𑁆𑀘𑀬𑀢𑁆𑀣𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀕𑁆𑀕𑀮𑀯𑀲𑁂𑀦𑁂𑀯, 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦 𑀘 𑀅𑀧𑀮𑁄𑀓𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦 𑀏𑀯𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀘𑀻𑀯𑀭𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀢𑀢𑁆𑀭𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀢𑀲𑁆𑀫𑀺𑀁 𑀯𑀲𑁆𑀲𑀸𑀯𑀸𑀲𑁂 𑀮𑀩𑁆𑀪𑀫𑀸𑀦𑀁 𑀘𑀻𑀯𑀭𑀲𑀗𑁆𑀔𑀸𑀢𑀁 𑀧𑀘𑁆𑀘𑀬𑀁 ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀲𑁂𑀦𑀸𑀲𑀦𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀦𑀲𑁆𑀲. ‘‘𑀦𑀯𑀓𑁄 𑀯𑀼𑀟𑁆𑀠𑀢𑀭𑀲𑁆𑀲, 𑀯𑀼𑀟𑁆𑀠𑁄 𑀘 ¶ 𑀦𑀯𑀓𑀲𑁆𑀲𑀸’’𑀢𑀺 𑀇𑀤𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀕𑀳𑀡𑀁 𑀅𑀲𑀸𑀭𑀼𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁, 𑀤𑁆𑀯𑁂 𑀅𑀜𑁆𑀜𑀫𑀜𑁆𑀜𑀁 𑀕𑀸𑀳𑁂𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑀓𑀫𑁆𑀫𑀯𑀸𑀘𑀸𑀬 𑀲𑀩𑁆𑀩𑁂𑀧𑀺 𑀏𑀓𑀢𑁄 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀦 𑀓𑀭𑁄𑀢𑀺. 𑀢𑁂𑀦𑁂𑀯 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 ‘‘𑀉𑀩𑁆𑀩𑀸𑀳𑀺𑀓𑀓𑀫𑁆𑀫𑀲𑀫𑁆𑀫𑀼𑀢𑀺𑀬𑀁 𑀅𑀝𑁆𑀞𑀧𑀺 𑀚𑀦𑀸 𑀏𑀓𑀢𑁄𑀯 𑀲𑀫𑁆𑀫𑀢𑀸𑀢𑀺.

𑀆𑀲𑀦𑀖𑀭𑀦𑁆𑀢𑀺 ¶ 𑀧𑀝𑀺𑀫𑀸𑀖𑀭𑀁. 𑀫𑀕𑁆𑀕𑁄𑀢𑀺 𑀉𑀧𑀘𑀸𑀭𑀲𑀻𑀫𑀩𑁆𑀪𑀦𑁆𑀢𑀭𑀕𑀢𑁂 𑀕𑀸𑀫𑀸𑀪𑀺𑀫𑀼𑀔𑀫𑀕𑁆𑀕𑁂 𑀓𑀢𑀲𑀸𑀮𑀸 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑁄𑀓𑁆𑀔𑀭𑀡𑀻𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼𑀧𑀺.

𑀮𑀪𑀦𑁆𑀢𑀻𑀢𑀺 𑀢𑀢𑁆𑀭𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺. 𑀯𑀺𑀚𑀝𑁂𑀢𑁆𑀯𑀸𑀢𑀺 ‘‘𑀏𑀓𑁂𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑁂𑀦 𑀯𑀺𑀬𑁄𑀚𑁂𑀢𑁆𑀯𑀸. 𑀆𑀯𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀇𑀢𑁄 𑀉𑀧𑁆𑀧𑀦𑁆𑀦𑀁 𑀅𑀲𑀼𑀓𑀲𑁆𑀫𑀺𑀁 𑀅𑀲𑀼𑀓𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀸 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀸𑀘𑀸𑀬 𑀉𑀧𑀲𑀁𑀳𑀭𑀺𑀢𑁆𑀯𑀸. 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀫𑀳𑀸𑀮𑀸𑀪𑁂 𑀧𑀭𑀺𑀯𑁂𑀡𑁂 𑀯𑀲𑀺𑀢𑁆𑀯𑀸𑀯 𑀮𑀸𑀪𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀬𑀫𑁆𑀧𑀻𑀢𑀺 𑀏𑀢𑁆𑀣 𑀬𑁄 𑀧𑀁𑀲𑀼𑀓𑀽𑀮𑀺𑀓𑁄 𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂𑀦𑁂𑀯 𑀯𑀺𑀲𑁆𑀲𑀝𑁆𑀞𑁄 𑀅𑀬𑀁 𑀘𑀻𑀯𑀭𑀧𑀘𑁆𑀘𑀬𑁄𑀧𑀻𑀢𑀺 𑀬𑁄𑀚𑀦𑀸. 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀸𑀝𑀓𑀁 𑀤𑁂𑀦𑁆𑀢𑀻𑀢𑀺 𑀧𑀘𑁆𑀘𑀬𑀤𑀸𑀬𑀓𑀸 𑀤𑁂𑀦𑁆𑀢𑀺. 𑀏𑀢𑁂𑀦 𑀕𑀳𑀝𑁆𑀞𑁂𑀳𑀺 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀲𑁆𑀲𑀁𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀦𑁆𑀢𑀺 𑀧𑀁𑀲𑀼𑀓𑀽𑀮𑀺𑀓𑀢𑁄 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁.

𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀇𑀥 𑀭𑀼𑀓𑁆𑀔𑀸𑀤𑀻𑀲𑀼 𑀯𑀲𑀺𑀢𑁆𑀯𑀸 𑀘𑀻𑀯𑀭𑀁 𑀕𑀡𑁆𑀳𑀣𑀸𑀢𑀺 𑀧𑀝𑀺𑀩𑀦𑁆𑀥𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁.

𑀧𑀸𑀝𑀺𑀧𑀤𑀅𑀭𑀼𑀡𑀢𑁄𑀢𑀺𑀆𑀤𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀧𑀦 𑀧𑀸𑀝𑀺𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀩𑀤𑁆𑀥𑀯𑀢𑁆𑀢𑀁 𑀞𑀧𑁂𑀢𑁆𑀯𑀸𑀢𑀺 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀦𑀺𑀭𑀦𑁆𑀢𑀭𑀓𑀭𑀡𑀻𑀬𑁂𑀲𑀼 𑀓𑀢𑁆𑀢𑀩𑁆𑀩𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸. 𑀓𑀲𑀸𑀯𑀧𑀭𑀺𑀪𑀡𑁆𑀟𑀦𑁆𑀢𑀺 𑀓𑀲𑀸𑀯𑀭𑀲𑁂𑀳𑀺 𑀪𑀽𑀫𑀺𑀧𑀭𑀺𑀓𑀫𑁆𑀫𑀁.

𑀢𑀺𑀯𑀺𑀥𑀫𑁆𑀧𑀻𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺. 𑀲𑁄𑀥𑁂𑀢𑁆𑀯𑀸𑀢𑀺 𑀆𑀘𑀸𑀭𑀸𑀤𑀻𑀲𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀏𑀓𑀘𑀸𑀭𑀺𑀓𑀯𑀢𑁆𑀢𑀦𑁆𑀢𑀺 𑀪𑀸𑀯𑀦𑀸𑀓𑀫𑁆𑀫𑀁. 𑀢𑀜𑁆𑀳𑀺 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀏𑀓𑀘𑀸𑀭𑀺𑀓𑁂𑀦𑁂𑀯 𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀤𑀲𑀯𑀢𑁆𑀣𑀼𑀓𑀓𑀣𑀸 ¶ 𑀦𑀸𑀫 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀲𑀦𑁆𑀢𑀼𑀝𑁆𑀞𑀺, 𑀧𑀯𑀺𑀯𑁂𑀓, 𑀅𑀲𑀁𑀲𑀕𑁆𑀕, 𑀯𑀻𑀭𑀺𑀬𑀸𑀭𑀫𑁆𑀪, 𑀲𑀻𑀮, 𑀲𑀫𑀸𑀥𑀺, 𑀧𑀜𑁆𑀜𑀸, 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸𑀢𑀺 𑀇𑀫𑀸 𑀤𑀲.

𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀦𑁆𑀢𑀺 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀦𑀺𑀓𑁆𑀔𑀺𑀢𑁆𑀢𑁂𑀲𑀼 𑀤𑀦𑁆𑀢𑀓𑀝𑁆𑀞𑁂𑀲𑀼 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀫𑁂𑀯 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁯) 𑀅𑀤𑀺𑀦𑁆𑀦𑀸𑀤𑀸𑀦𑁂 𑀤𑀦𑁆𑀢𑀧𑁄𑀦𑀓𑀣𑀸𑀬𑀁 𑀯𑀼𑀢𑁆𑀢𑀁 𑀯𑀢𑁆𑀢𑀁. 𑀧𑀢𑁆𑀢𑀁 𑀯𑀸…𑀧𑁂… 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀧𑀢𑁆𑀢𑀕𑀼𑀢𑁆𑀢𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀯𑀺𑀲𑀪𑀸𑀕𑀓𑀣𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀔𑀦𑁆𑀥𑀓𑀯𑀢𑁆𑀢𑀦𑁆𑀢𑀺 ¶ 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁬𑁫) 𑀆𑀕𑀢𑀁 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀢𑁄 𑀅𑀯𑀲𑀺𑀝𑁆𑀞𑀯𑀢𑁆𑀢𑀁 𑀢𑀲𑁆𑀲 ‘‘𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢’’𑀦𑁆𑀢𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸.

𑀇𑀤𑀸𑀦𑀺 𑀬𑀁 𑀤𑀸𑀬𑀓𑀸 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀦𑁆𑀢𑀺, 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦𑀸’’𑀢𑀺 𑀆𑀭𑀤𑁆𑀥𑀁. 𑀆𑀕𑀦𑁆𑀢𑀼𑀓𑁄 𑀲𑀘𑁂 𑀪𑀺𑀓𑁆𑀔𑀽𑀢𑀺 𑀘𑀻𑀯𑀭𑁂 𑀕𑀸𑀳𑀺𑀢𑁂 𑀧𑀘𑁆𑀙𑀸 𑀆𑀕𑀢𑁄 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀧𑀢𑁆𑀢𑀝𑁆𑀞𑀸𑀦𑁂𑀢𑀺 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂. 𑀧𑀞𑀫𑀯𑀲𑁆𑀲𑀽𑀧𑀕𑀢𑀸𑀢𑀺 𑀆𑀕𑀦𑁆𑀢𑀼𑀓𑀲𑁆𑀲 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸. 𑀮𑀤𑁆𑀥𑀁 𑀮𑀤𑁆𑀥𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀤𑀸𑀬𑀓𑀸𑀦𑀁 𑀲𑀦𑁆𑀢𑀺𑀓𑀸 𑀆𑀕𑀢𑀸𑀕𑀢𑀲𑀸𑀝𑀓𑀁.

𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄𑀢𑀺 𑀙𑀺𑀦𑁆𑀦𑀯𑀲𑁆𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀞𑀫𑀫𑁂𑀯 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 ‘‘𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀤𑀸𑀢𑀩𑁆𑀩𑀁 𑀯𑀸𑀭𑁂𑀦𑁆𑀢𑀸𑀦𑀁 𑀕𑀻𑀯𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀯𑀲𑁆𑀲𑀽𑀧𑀕𑀢𑁂𑀲𑀼 𑀅𑀮𑀤𑁆𑀥𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀁 𑀏𑀓𑀘𑁆𑀘𑀸𑀦𑀫𑁂𑀯 𑀤𑀸𑀢𑀩𑁆𑀩𑀁.

𑀪𑀢𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀧𑀸𑀦𑀻𑀬𑀼𑀧𑀝𑁆𑀞𑀸𑀦𑀸𑀤𑀺𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀁. 𑀲𑀗𑁆𑀖𑀺𑀓𑀁 𑀧𑀦𑀸𑀢𑀺𑀆𑀤𑀺 𑀓𑁂𑀲𑀜𑁆𑀘𑀺 𑀯𑀸𑀤𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀦𑁆𑀢𑀺 ‘‘𑀙𑀺𑀦𑁆𑀦𑀯𑀲𑁆𑀲𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀫𑁂𑀲𑀁 𑀤𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀧𑀮𑁄𑀓𑀦𑀁 𑀓𑀢𑁆𑀯𑀸 𑀕𑀸𑀳𑀺𑀢𑀁 𑀲𑀗𑁆𑀖𑁂𑀦 𑀤𑀺𑀦𑁆𑀦𑀢𑁆𑀢𑀸 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑀺. 𑀧𑀕𑁂𑀯 𑀙𑀺𑀦𑁆𑀦𑀯𑀲𑁆𑀲𑁄. 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀢𑁆𑀢𑀦𑀸, 𑀤𑀸𑀬𑀓𑁂𑀳𑀺 𑀘 𑀅𑀦𑀼𑀫𑀢𑀢𑁆𑀢𑀸 𑀪𑀢𑀺𑀦𑀺𑀯𑀺𑀝𑁆𑀞𑀫𑁆𑀧𑀺 𑀙𑀺𑀦𑁆𑀦𑀯𑀲𑁆𑀲𑁄𑀧𑀺 𑀯𑀺𑀩𑁆𑀪𑀦𑁆𑀢𑁄𑀧𑀺 𑀦 𑀮𑀪𑀢𑀻𑀢𑀺 𑀓𑁂𑀘𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀧𑀫𑀸𑀡𑀁. 𑀢𑁂𑀦𑁂𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀯 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀳𑀺𑀢𑀪𑀺𑀓𑁆𑀔𑀼𑀦𑁄 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀸𑀲𑁄𑀯 𑀳𑁂𑀝𑁆𑀞𑀸 𑀯𑀺𑀳𑀺𑀢𑁄, 𑀦 𑀧𑀸𑀦𑀻𑀬𑀼𑀧𑀝𑁆𑀞𑀸𑀦𑀸𑀤𑀺𑀪𑀢𑀺𑀓𑀭𑀡𑀯𑀢𑁆𑀢𑀁. 𑀬𑀤𑀺 𑀳𑀺 𑀢𑀁 ¶ 𑀦𑀺𑀯𑀺𑀝𑁆𑀞𑀫𑁂𑀯 𑀲𑀺𑀬𑀸, 𑀪𑀢𑀺𑀓𑀭𑀡𑀫𑁂𑀯 𑀯𑀺𑀥𑀸𑀢𑀩𑁆𑀩𑀁. 𑀢𑀲𑁆𑀫𑀸 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑀺𑀢𑀁 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀦 𑀮𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺 𑀏𑀢𑁂𑀦 𑀯𑀼𑀢𑁆𑀣𑀯𑀲𑁆𑀲𑀸𑀦𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀕𑁄 𑀲𑀗𑁆𑀖𑀺𑀓𑀢𑁄 𑀅𑀫𑁄𑀘𑀺𑀢𑁄 𑀢𑁂𑀲𑀁 𑀯𑀺𑀩𑁆𑀪𑀫𑁂𑀦 𑀲𑀗𑁆𑀖𑀺𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀮𑀪𑀢𑀻𑀢𑀺 ‘‘𑀫𑀫 𑀧𑀢𑁆𑀢𑀪𑀸𑀕𑀁 𑀏𑀢𑀲𑁆𑀲 𑀤𑁂𑀣𑀸’’𑀢𑀺 𑀤𑀸𑀬𑀓𑁂 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑁂𑀦𑁂𑀯 𑀲𑀗𑁆𑀖𑀺𑀓𑀢𑁄 𑀯𑀺𑀬𑁄𑀚𑀺𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀢𑀲𑁆𑀲 𑀧𑀞𑀫𑀕𑀸𑀳𑀢𑁆𑀢𑀸, 𑀣𑁂𑀭𑁂𑀦 𑀧𑀼𑀩𑁆𑀩𑁂 𑀧𑀞𑀫𑀪𑀸𑀕𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀇𑀤𑀸𑀦𑀺 𑀕𑀬𑁆𑀳𑀫𑀸𑀦𑀲𑁆𑀲 𑀤𑀼𑀢𑀺𑀬𑀪𑀸𑀕𑀢𑁆𑀢𑀸 𑀘 𑀯𑀼𑀢𑁆𑀢𑀁.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁧𑁯. 𑀧𑀸𑀴𑀺𑀬𑀁 ¶ 𑀉𑀪𑀬𑀢𑁆𑀣 𑀧𑀭𑀺𑀩𑀸𑀳𑀺𑀭𑁄𑀢𑀺 𑀓𑀫𑁂𑀦 𑀉𑀪𑀬𑀲𑁆𑀲𑀧𑀺 𑀫𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀉𑀪𑀬𑀢𑁄 𑀧𑀭𑀺𑀩𑀸𑀳𑀺𑀭𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀘𑁆𑀙𑀺𑀫𑁂…𑀧𑁂… 𑀢𑀺𑀝𑁆𑀞𑀢𑀻’’𑀢𑀺.

𑁩𑁨𑁦. 𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀻𑀢𑀺 𑀫𑀜𑁆𑀘𑀧𑀻𑀞𑀯𑀺𑀦𑀺𑀫𑀼𑀢𑁆𑀢𑀁 𑀬𑀁 𑀆𑀲𑀦𑀁 𑀢𑀺𑀡𑁆𑀡𑀁 𑀲𑀼𑀔𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀺, 𑀇𑀤𑀁 𑀧𑀘𑁆𑀙𑀺𑀫𑀤𑀻𑀖𑀸𑀲𑀦𑀁. 𑀏𑀢𑁆𑀣 𑀫𑀜𑁆𑀘𑀧𑀻𑀞𑀭𑀳𑀺𑀢𑁂𑀲𑀼 𑀅𑀲𑀫𑀸𑀦𑀸𑀲𑀦𑀺𑀓𑀸𑀧𑀺 𑀢𑀬𑁄 𑀦𑀺𑀲𑀻𑀤𑀺𑀢𑀼𑀁 𑀮𑀪𑀦𑁆𑀢𑀺. 𑀫𑀜𑁆𑀘𑀧𑀻𑀞𑁂𑀲𑀼 𑀧𑀦 𑀤𑁆𑀯𑁂. 𑀅𑀤𑀻𑀖𑀸𑀲𑀦𑁂𑀲𑀼 𑀫𑀜𑁆𑀘𑀧𑀻𑀞𑁂𑀲𑀼 𑀲𑀫𑀸𑀦𑀸𑀲𑀦𑀺𑀓𑀸 𑀏𑀯 𑀤𑁆𑀯𑁂 𑀦𑀺𑀲𑀻𑀤𑀺𑀢𑀼𑀁 𑀮𑀪𑀦𑁆𑀢𑀺 𑀤𑀼𑀯𑀕𑁆𑀕𑀲𑁆𑀲𑁂𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸.

𑀳𑀢𑁆𑀣𑀺𑀦𑀔𑁄 𑀳𑁂𑀝𑁆𑀞𑀸𑀪𑀸𑀕𑁂 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀳𑀢𑁆𑀣𑀺𑀦𑀔𑁄, 𑀧𑀸𑀲𑀸𑀤𑁄. 𑀧𑀸𑀲𑀸𑀤𑀲𑁆𑀲 𑀦𑀔𑁄 𑀦𑀸𑀫 𑀳𑁂𑀝𑁆𑀞𑀺𑀫𑀪𑀸𑀕𑁄 𑀧𑀸𑀤𑀦𑀔𑀲𑀤𑀺𑀲𑀢𑁆𑀢𑀸, 𑀲𑁄 𑀲𑀩𑁆𑀩𑀤𑀺𑀲𑀸𑀲𑀼 𑀅𑀦𑁂𑀓𑁂𑀳𑀺 𑀳𑀢𑁆𑀣𑀺𑀭𑀽𑀧𑁂𑀳𑀺 𑀲𑀫𑀮𑀗𑁆𑀓𑀢𑁄 𑀞𑀺𑀢𑁄. 𑀢𑀲𑁆𑀲𑀽𑀧𑀭𑀺 𑀓𑀢𑁄 𑀧𑀸𑀲𑀸𑀤𑁄 𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺. 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀻𑀢𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑀺𑀓𑀁 𑀧𑀦 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀭𑀁 𑀪𑀺𑀓𑁆𑀔𑀼𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺 ‘‘𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁯𑁯) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸’’𑀢𑀺 𑀦 ¶ 𑀯𑀼𑀢𑁆𑀢𑀁, 𑀕𑁄𑀦𑀓𑀸𑀤𑀺𑀅𑀓𑀧𑁆𑀧𑀺𑀬𑀪𑀡𑁆𑀟𑀯𑀺𑀲𑀬𑁂 𑀏𑀯 𑀯𑀼𑀢𑁆𑀢𑀁 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀢𑁂𑀲𑀁 𑀕𑀳𑀡𑁂 𑀤𑁄𑀲𑀸𑀪𑀸𑀯𑀸. 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦𑀸𑀢𑀺 𑀕𑀺𑀳𑀻𑀳𑀺 𑀓𑀢𑀦𑀻𑀳𑀸𑀭𑁂𑀦, 𑀕𑀺𑀳𑀻𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀤𑀺𑀦𑁆𑀦𑀦𑀺𑀬𑀸𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀩𑁆𑀪𑀦𑁆𑀢𑀻𑀢𑀺 𑀦𑀺𑀲𑀻𑀤𑀺𑀢𑀼𑀁 𑀮𑀩𑁆𑀪𑀦𑁆𑀢𑀺.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁨𑁧. 𑀅𑀭𑀜𑁆𑀚𑀭𑁄𑀢𑀺 𑀩𑀳𑀼𑀉𑀤𑀓𑀕𑀡𑁆𑀳𑀦𑀺𑀓𑀸 𑀫𑀳𑀸𑀘𑀸𑀝𑀺, 𑀚𑀮𑀁 𑀕𑀡𑁆𑀳𑀺𑀢𑀼𑀫𑀮𑀦𑁆𑀢𑀺 𑀅𑀭𑀜𑁆𑀚𑀭𑁄.

𑀣𑀸𑀯𑀭𑁂𑀦 𑀘 𑀣𑀸𑀯𑀭𑀦𑁆𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀼𑀭𑀺𑀫𑀤𑁆𑀯𑀬𑀁 𑀣𑀸𑀯𑀭𑀁, 𑀧𑀘𑁆𑀙𑀺𑀫𑀢𑁆𑀢𑀬𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀓𑀫𑁂𑀯 𑀤𑁂𑀢𑀻𑀢𑀺 𑀏𑀢𑁆𑀣 𑀊𑀦𑀓𑀁 𑀤𑁂𑀦𑁆𑀢𑀫𑁆𑀧𑀺 𑀯𑀺𑀳𑀸𑀭𑀯𑀢𑁆𑀣𑀼𑀲𑀸𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 𑀤𑀽𑀭𑀢𑀭𑀁 𑀤𑀼𑀓𑁆𑀔𑀕𑁄𑀧𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 ‘‘𑀪𑀺𑀓𑁆𑀔𑀽𑀦𑀁 𑀘𑁂 𑀫𑀳𑀕𑁆𑀖𑀢𑀭𑀁…𑀧𑁂… 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧). 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀚𑀸𑀦𑀸𑀧𑁂𑀢𑁆𑀯𑀸, 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀲𑀸𑀫𑀺𑀓𑁂𑀲𑀼 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀫𑀳𑀕𑁆𑀖𑀢𑀁 𑀅𑀚𑀸𑀦𑀺𑀢𑁆𑀯𑀸 𑀤𑁂𑀦𑁆𑀢𑁂𑀲𑀼 𑀢𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀲𑀯𑀢𑁆𑀣𑀼𑀓𑁂𑀦 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀓𑀢𑀧𑀸𑀲𑀸𑀤𑀸𑀤𑀺𑀦𑀸, 𑀅𑀯𑀢𑁆𑀣𑀼𑀓𑁂𑀦 𑀯𑀸 𑀲𑀯𑀢𑁆𑀣𑀼𑀓𑀁 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀅𑀯𑀢𑁆𑀣𑀼𑀓𑀁 𑀧𑀦 𑀅𑀯𑀢𑁆𑀣𑀼𑀓𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀓𑁂𑀯𑀮𑀁 𑀧𑀸𑀲𑀸𑀤𑀲𑁆𑀲 𑀪𑀽𑀫𑀺𑀢𑁄 𑀅𑀣𑀸𑀯𑀭𑀢𑁆𑀢𑀸. 𑀏𑀯𑀁 𑀣𑀸𑀯𑀭𑁂𑀲𑀼𑀧𑀺 𑀣𑀸𑀯𑀭𑀯𑀺𑀪𑀸𑀕𑀁 𑀜𑀢𑁆𑀯𑀸𑀯 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

‘‘𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀅𑀓𑀧𑁆𑀧𑀺𑀬𑀫𑀜𑁆𑀘𑀁 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀔𑁂𑀢𑁆𑀢𑀸𑀤𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀲𑀽𑀢𑀺 𑀫𑀜𑁆𑀘𑀸𑀤𑀻𑀲𑀼. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀆𑀲𑀦𑁆𑀤𑀻𑀢𑀽𑀮𑀺𑀓𑀸𑀤𑀺𑀯𑀺𑀦𑀺𑀘𑁆𑀙𑀬𑁂𑀲𑀼 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀓𑀧𑁆𑀧𑀺𑀬𑀁 𑀯𑀸𑀢𑀺 𑀆𑀲𑀦𑁆𑀤𑀻𑀆𑀤𑀺, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 ¶ 𑀩𑀺𑀫𑁆𑀩𑁄𑀳𑀦𑀸𑀤𑀺 𑀘. 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸𑀢𑀺 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑀺𑀦𑁆𑀦𑀁.

‘‘𑀓𑀸𑀴𑀮𑁄𑀳…𑀧𑁂… 𑀪𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀓𑀁𑀲𑀮𑁄𑀳𑀫𑀬𑀫𑁆𑀧𑀺 𑀪𑀸𑀚𑀦𑀁 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀧𑀭𑀺𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀧𑀼𑀕𑁆𑀕𑀮𑀧𑀭𑀺𑀳𑀭𑀺𑀢𑀩𑁆𑀩𑀲𑁆𑀲𑁂𑀯 𑀪𑀸𑀚𑁂𑀢𑀩𑁆𑀩𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀁 𑀉𑀧𑀭𑀺 ‘‘𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀪𑀸𑀚𑀦𑀯𑀺𑀓𑀢𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸 𑀯𑀸 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀓𑁂𑀦 𑀫𑀳𑀸𑀧𑀘𑁆𑀘𑀭𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀇𑀫𑀲𑁆𑀲 𑀳𑀺 ‘‘𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀓𑀢𑁄 𑀲𑀻𑀳𑀴𑀤𑀻𑀧𑁂 𑀧𑀸𑀤𑀕𑁆𑀕𑀡𑁆𑀳𑀦𑀓𑁄 𑀪𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀸𑀬 𑀢𑀁 𑀫𑀳𑀸𑀧𑀘𑁆𑀘𑀭𑀺𑀯𑀘𑀦𑀁 𑀧𑀘𑁆𑀙𑀸 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀸 𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀫𑀬𑀁 𑀬𑀁 𑀓𑀺𑀜𑁆𑀘𑀺 𑀧𑀸𑀤𑀕𑁆𑀕𑀡𑁆𑀳𑀦𑀓𑀯𑀸𑀭𑀓𑀫𑁆𑀧𑀺 𑀉𑀧𑀸𑀤𑀸𑀬 𑀅𑀪𑀸𑀚𑀦𑀻𑀬𑀫𑁂𑀯. 𑀕𑀺𑀳𑀻𑀳𑀺 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀢𑁆𑀢𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀯𑀺𑀬 𑀲𑀬𑀫𑁂𑀯 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀺𑀳𑀺𑀲𑀦𑁆𑀢𑀓𑀁 𑀯𑀺𑀬 𑀆𑀭𑀸𑀫𑀺𑀓𑀸𑀤𑀬𑁄 𑀘𑁂 𑀲𑀬𑀫𑁂𑀯 𑀕𑁄𑀧𑁂𑀢𑁆𑀯𑀸 𑀯𑀺𑀦𑀺𑀬𑁄𑀕𑀓𑀸𑀮𑁂 𑀆𑀦𑁂𑀢𑁆𑀯𑀸 𑀧𑀝𑀺𑀦𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀧𑀝𑀺𑀲𑀸𑀫𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀧𑀡𑁆𑀡𑀲𑀽𑀘𑀺 𑀦𑀸𑀫 𑀮𑁂𑀔𑀦𑀻𑀢𑀺 𑀯𑀤𑀦𑁆𑀢𑀺. ‘‘𑀅𑀢𑁆𑀢𑀦𑀸 𑀮𑀤𑁆𑀥𑀸𑀦𑀺𑀧𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺, 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑁄𑀕𑁄𑀯 𑀆𑀧𑀢𑁆𑀢𑀺𑀓𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺 𑀅𑀪𑀸𑀚𑀦𑀻𑀬𑀯𑀸𑀲𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼𑀧𑀺.

𑀅𑀦𑀸𑀫𑀸𑀲𑀫𑁆𑀧𑀻𑀢𑀺 ¶ 𑀲𑀼𑀯𑀡𑁆𑀡𑀸𑀤𑀺𑀫𑀬𑀫𑁆𑀧𑀺 𑀲𑀩𑁆𑀩𑀁 𑀢𑀁 𑀆𑀫𑀲𑀺𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀧𑀓𑁆𑀔𑀭𑁂𑀢𑀺 𑀉𑀧𑀓𑀭𑀡𑁂. 𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀦𑀸𑀫 𑀅𑀟𑁆𑀠𑀩𑀸𑀳𑀼𑀫𑀢𑁆𑀢𑀸. 𑀅𑀟𑁆𑀠𑀩𑁆𑀬𑀸𑀫𑀫𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀬𑁄𑀢𑁆𑀢𑀸𑀦𑀻𑀢𑀺 𑀘𑀫𑁆𑀫𑀭𑀚𑁆𑀚𑀼𑀓𑀸.

𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀧𑀻𑀢𑀺 𑀢𑀲𑀭𑀤𑀡𑁆𑀟𑀸𑀤𑀺𑀲𑀽𑀘𑀺𑀆𑀓𑀸𑀭𑀢𑀦𑀼𑀤𑀡𑁆𑀟𑀓𑀫𑀢𑁆𑀢𑁄𑀧𑀺. 𑀭𑀺𑀢𑁆𑀢𑀧𑁄𑀢𑁆𑀣𑀓𑁄𑀧𑀻𑀢𑀺 𑀅𑀮𑀺𑀔𑀺𑀢𑀧𑁄𑀢𑁆𑀣𑀓𑁄. 𑀇𑀤𑀜𑁆𑀘 𑀧𑀡𑁆𑀡𑀧𑁆𑀧𑀲𑀗𑁆𑀕𑁂𑀦 𑀯𑀼𑀢𑁆𑀢𑀁.

‘‘𑀖𑀝𑁆𑀝𑀦𑀨𑀮𑀓𑀁 𑀖𑀝𑁆𑀝𑀦𑀫𑀼𑀕𑁆𑀕𑀭𑁄’’𑀢𑀺 𑀇𑀤𑀁 𑀭𑀚𑀺𑀢𑀘𑀻𑀯𑀭𑀁 𑀏𑀓𑀲𑁆𑀫𑀺𑀁 𑀫𑀝𑁆𑀞𑁂 𑀤𑀡𑁆𑀟𑀫𑀼𑀕𑁆𑀕𑀭𑁂 𑀯𑁂𑀞𑁂𑀢𑁆𑀯𑀸 𑀏𑀓𑀲𑁆𑀲 𑀫𑀝𑁆𑀞𑀨𑀮𑀓𑀲𑁆𑀲 𑀉𑀧𑀭𑀺 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀧𑀭𑁂𑀦 𑀫𑀝𑁆𑀞𑀨𑀮𑀓𑁂𑀦 𑀦𑀺𑀓𑀼𑀚𑁆𑀚𑀺𑀢𑁆𑀯𑀸 𑀏𑀓𑁄 𑀉𑀧𑀭𑀺 𑀅𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀤𑁆𑀯𑁂 𑀚𑀦𑀸 𑀉𑀧𑀭𑀺 𑀨𑀮𑀓𑀁 𑀤𑁆𑀯𑀻𑀲𑀼 𑀓𑁄𑀝𑀻𑀲𑀼 𑀕𑀳𑁂𑀢𑁆𑀯𑀸 𑀅𑀧𑀭𑀸𑀧𑀭𑀁 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀁 𑀓𑀭𑁄𑀦𑁆𑀢𑀺, 𑀏𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑁂 𑀞𑀧𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀦 𑀧𑀳𑀭𑀡𑀁 𑀧𑀦 ¶ 𑀦𑀺𑀝𑁆𑀞𑀺𑀢𑀭𑀚𑀦𑀲𑁆𑀲 𑀘𑀻𑀯𑀭𑀲𑁆𑀲 𑀅𑀮𑁆𑀮𑀓𑀸𑀮𑁂 𑀓𑀸𑀢𑀩𑁆𑀩𑀁. 𑀇𑀤𑀁 𑀧𑀦 𑀨𑀮𑀓𑀫𑀼𑀕𑁆𑀕𑀭𑁂𑀳𑀺 𑀖𑀝𑁆𑀝𑀦𑀁 𑀲𑀼𑀓𑁆𑀔𑀓𑀸𑀮𑁂 𑀣𑀤𑁆𑀥𑀪𑀸𑀯𑀯𑀺𑀫𑁄𑀘𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀫𑁆𑀩𑀡𑀦𑁆𑀢𑀺 𑀏𑀓𑀤𑁄𑀡𑀺𑀓𑀦𑀸𑀯𑀸𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀻𑀲𑀤𑀺𑀲𑀁 𑀓𑀢𑀁. 𑀧𑀸𑀦𑀻𑀬𑀪𑀸𑀚𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀭𑀚𑀦𑀤𑁄𑀡𑀻𑀢𑀺 𑀏𑀓𑀤𑀸𑀭𑀼𑀦𑀸𑀯 𑀓𑀢𑀁 𑀭𑀚𑀦𑀪𑀸𑀚𑀦𑀁. 𑀉𑀤𑀓𑀤𑁄𑀡𑀻𑀧𑀺 𑀏𑀓𑀤𑀸𑀭𑀼𑀦𑀸𑀯 𑀓𑀢𑀁 𑀉𑀤𑀓𑀪𑀸𑀚𑀦𑀁.

𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦 𑀲𑀬𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. ‘‘𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀫𑀜𑁆𑀘𑀸𑀤𑀻𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀁 𑀫𑀳𑀸𑀘𑀫𑁆𑀫𑀁 𑀏𑀴𑀓𑀘𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀙𑀢𑁆𑀢𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀢𑀸𑀮𑀧𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀢𑁆𑀢𑀓𑀝𑀸𑀳𑀦𑁆𑀢𑀺 𑀧𑀢𑁆𑀢𑀧𑀘𑀦𑀓𑀝𑀸𑀳𑀁.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁨𑁩. 𑀧𑀸𑀴𑀺𑀬𑀁 𑀧𑀺𑀡𑁆𑀟𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑁂𑀦𑀸𑀢𑀺𑀆𑀤𑀻𑀲𑀼 𑀔𑀡𑁆𑀟𑀨𑀼𑀮𑁆𑀮𑀝𑁆𑀞𑀸𑀦𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀝𑁆𑀞𑀧𑀦𑀁 𑀧𑀺𑀡𑁆𑀟𑀦𑀺𑀓𑁆𑀔𑁂𑀧𑀦𑀁 𑀦𑀸𑀫. 𑀦𑀯𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀲𑀫𑁆𑀫𑀼𑀢𑀺. 𑀅𑀕𑁆𑀕𑀴𑀯𑀝𑁆𑀝𑀺 𑀦𑀸𑀫 𑀓𑀯𑀸𑀝𑀩𑀦𑁆𑀥𑁄. 𑀙𑀸𑀤𑀦𑀁 𑀦𑀸𑀫 𑀢𑀺𑀡𑀸𑀤𑀻𑀳𑀺 𑀕𑁂𑀳𑀘𑁆𑀙𑀸𑀤𑀦𑀁. 𑀩𑀦𑁆𑀥𑀦𑀁 𑀦𑀸𑀫 𑀤𑀡𑁆𑀟𑀯𑀮𑁆𑀮𑀺𑀆𑀤𑀻𑀳𑀺 𑀙𑀤𑀦𑀩𑀦𑁆𑀥𑀦𑀫𑁂𑀯. 𑀘𑀢𑀼𑀳𑀢𑁆𑀣𑀯𑀺𑀳𑀸𑀭𑁂𑀢𑀺 𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀢𑁄 𑀯𑀼𑀢𑁆𑀢𑀁. 𑀉𑀩𑁆𑀩𑁂𑀥𑀢𑁄 𑀧𑀦 𑀅𑀦𑁂𑀓𑀪𑀽𑀫𑀓𑀢𑁆𑀢𑀸 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀯𑀻𑀲𑀢𑀺𑀳𑀢𑁆𑀣𑁄𑀧𑀺 ¶ 𑀦𑀸𑀦𑀸𑀲𑀡𑁆𑀞𑀸𑀦𑀯𑀺𑀘𑀺𑀢𑁆𑀢𑁄𑀧𑀺 𑀳𑁄𑀢𑀺. 𑀢𑁂𑀦𑀲𑁆𑀲 𑀘𑀢𑀼𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀧𑀸𑀴𑀺𑀬𑀁 𑀲𑀩𑁆𑀩𑁂 𑀯𑀺𑀳𑀸𑀭𑁂𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀏𑀓𑀲𑁆𑀲 𑀲𑀩𑁆𑀩𑁂𑀲𑀼 𑀯𑀺𑀳𑀸𑀭𑁂𑀲𑀼 𑀦𑀯𑀓𑀫𑁆𑀫𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀓𑀸𑀮𑀁 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀦𑀯𑀓𑀫𑁆𑀫𑀺𑀓𑀸 𑀅𑀢𑁆𑀢𑀦𑁄 𑀕𑀸𑀳𑀺𑀢𑀁 𑀯𑀭𑀲𑁂𑀬𑁆𑀬𑀁 𑀲𑀫𑁆𑀧𑀢𑁆𑀢𑀸𑀦𑀁 𑀬𑀣𑀸𑀯𑀼𑀟𑁆𑀠𑀁 𑀅𑀓𑀢𑁆𑀯𑀸 𑀉𑀢𑀼𑀓𑀸𑀮𑁂𑀧𑀺 𑀧𑀝𑀺𑀩𑀸𑀳𑀦𑁆𑀢𑀺.

‘‘𑀲𑀘𑁂 𑀲𑁄 𑀆𑀯𑀸𑀲𑁄 𑀚𑀻𑀭𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄. 𑀫𑀜𑁆𑀘𑀝𑁆𑀞𑀸𑀦𑀁 𑀤𑀢𑁆𑀯𑀸𑀢𑀺 𑀫𑀜𑁆𑀘𑀝𑁆𑀞𑀸𑀦𑀁 𑀧𑀼𑀕𑁆𑀕𑀮𑀺𑀓𑀁 𑀤𑀢𑁆𑀯𑀸. 𑀢𑀺𑀪𑀸𑀕𑀦𑁆𑀢𑀺 𑀢𑀢𑀺𑀬𑀪𑀸𑀕𑀁. 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀣𑀸𑀯𑀭𑁂𑀦 𑀣𑀸𑀯𑀭𑀧𑀭𑀺𑀯𑀢𑁆𑀢𑀦𑀝𑁆𑀞𑀸𑀦𑁂 𑀏𑀯 𑀧𑀯𑀺𑀲𑀢𑀺, 𑀦 𑀇𑀢𑀭𑀣𑀸 𑀲𑀩𑁆𑀩𑀲𑁂𑀦𑀸𑀲𑀦𑀸𑀦𑀁 ¶ 𑀯𑀺𑀦𑀲𑁆𑀲𑀦𑀢𑁄. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀘𑁂 𑀲𑁄 𑀲𑀗𑁆𑀖𑀲𑁆𑀲 𑀪𑀡𑁆𑀟𑀓𑀝𑁆𑀞𑀧𑀦𑀝𑁆𑀞𑀸𑀦𑀁 𑀯𑀸 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀤𑀸𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀜𑁆𑀜𑁂𑀯 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀤𑀺𑀲𑀲𑁆𑀲 𑀢𑀼𑀬𑁆𑀳𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀓𑀢𑁆𑀯𑀸 𑀚𑀕𑁆𑀕𑀸𑀢𑀺 𑀦 𑀲𑀩𑁆𑀩𑀁 𑀢𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀧𑀦 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀏𑀯𑀜𑁆𑀳𑀻𑀢𑀺𑀆𑀤𑀺𑀫𑁆𑀳𑀺 𑀯𑀬𑀸𑀦𑀼𑀭𑀽𑀧𑀁 𑀢𑀢𑀺𑀬𑀪𑀸𑀕𑁂 𑀯𑀸 𑀉𑀧𑀟𑁆𑀠𑀪𑀸𑀕𑁂 𑀯𑀸 𑀕𑀳𑀺𑀢𑁂 𑀢𑀁 𑀪𑀸𑀕𑀁 𑀤𑀸𑀢𑀼𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀬𑁂𑀦𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀬𑁂𑀦. 𑀲𑁄 𑀲𑀸𑀫𑀻𑀢𑀺 𑀢𑀲𑁆𑀲𑀸 𑀪𑀽𑀫𑀺𑀬𑀸 𑀯𑀺𑀳𑀸𑀭𑀓𑀭𑀡𑁂 𑀲𑁄𑀯 𑀲𑀸𑀫𑀻, 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀇𑀢𑀭𑁂𑀦 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀳𑀺 𑀧𑀞𑀫𑀁 𑀕𑀳𑀺𑀢𑁄. 𑀅𑀓𑀢𑀝𑁆𑀞𑀸𑀦𑁂𑀢𑀺 𑀘𑀬𑀸𑀤𑀻𑀦𑀁 𑀅𑀓𑀢𑀧𑀼𑀩𑁆𑀩𑀝𑁆𑀞𑀸𑀦𑁂. 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸𑀢𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀩𑀳𑀺 𑀘𑀬𑀁 𑀩𑀦𑁆𑀥𑀺𑀢𑁆𑀯𑀸, 𑀏𑀓𑀁 𑀲𑁂𑀦𑀸𑀲𑀦𑀁 𑀯𑀸. 𑀩𑀳𑀺𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀢𑁄 𑀩𑀳𑀺, 𑀅𑀢𑁆𑀢𑀦𑁄 𑀓𑀢𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁨𑁪. 𑀯𑀟𑁆𑀠𑀺𑀓𑀫𑁆𑀫𑀢𑁆𑀣𑀸𑀬𑀸𑀢𑀺 𑀬𑀣𑀸 𑀢𑀫𑁆𑀫𑀽𑀮𑀕𑁆𑀖𑀢𑁄 𑀦 𑀧𑀭𑀺𑀳𑀸𑀬𑀢𑀺, 𑀏𑀯𑀁 𑀓𑀢𑁆𑀢𑀩𑁆𑀩𑀲𑁆𑀲 𑀏𑀯𑀁 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑁆𑀲 𑀫𑀜𑁆𑀘𑀧𑀻𑀞𑀸𑀤𑀺𑀦𑁄 𑀅𑀢𑁆𑀣𑀸𑀬.

𑀘𑀓𑁆𑀓𑀮𑀺𑀓𑀦𑁆𑀢𑀺 𑀧𑀸𑀤𑀧𑀼𑀜𑁆𑀙𑀦𑀢𑁆𑀣𑀁 𑀘𑀓𑁆𑀓𑀸𑀓𑀸𑀭𑁂𑀦 𑀓𑀢𑀁. 𑀧𑀭𑀺𑀪𑀡𑁆𑀟𑀓𑀢𑀪𑀽𑀫𑀺 𑀯𑀸𑀢𑀺 𑀓𑀸𑀴𑀯𑀡𑁆𑀡𑀸𑀤𑀺𑀓𑀢𑀲𑀡𑁆𑀳𑀪𑀽𑀫𑀺 𑀯𑀸. 𑀲𑁂𑀦𑀸𑀲𑀦𑀁 𑀯𑀸𑀢𑀺 𑀫𑀜𑁆𑀘𑀧𑀻𑀞𑀸𑀤𑀺 𑀯𑀸.

‘‘𑀢𑀣𑁂𑀯 ¶ 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀦𑁂𑀯𑀸𑀲𑀺𑀓𑁂𑀳𑀺 𑀥𑁄𑀢𑀧𑀸𑀤𑀸𑀤𑀻𑀳𑀺 𑀯𑀴𑀜𑁆𑀚𑀦𑀝𑁆𑀞𑀸𑀦𑁂 𑀲𑀜𑁆𑀘𑀺𑀘𑁆𑀘 𑀅𑀥𑁄𑀢𑀧𑀸𑀤𑀸𑀤𑀻𑀳𑀺 𑀯𑀴𑀜𑁆𑀚𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀤𑁆𑀯𑀸𑀭𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀬𑁄 𑀅𑀧𑀭𑀺𑀓𑀫𑁆𑀫𑀓𑀢𑀸𑀧𑀺 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸. 𑀅𑀚𑀸𑀦𑀺𑀢𑁆𑀯𑀸 𑀅𑀧𑀲𑁆𑀲𑀬𑀦𑁆𑀢𑀲𑁆𑀲𑀧𑀺 𑀇𑀥 𑀮𑁄𑀫𑀕𑀡𑀦𑀸𑀬 𑀆𑀧𑀢𑁆𑀢𑀺.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁨𑁫. 𑀉𑀤𑁆𑀤𑁂𑀲𑀪𑀢𑁆𑀢𑀁 ¶ 𑀦𑀺𑀫𑀦𑁆𑀢𑀦𑀦𑁆𑀢𑀺 𑀇𑀫𑀁 𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀦𑁆𑀢𑀺𑀆𑀤𑀺𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀻𑀢𑀺 𑀲𑀗𑁆𑀖𑀪𑀢𑁆𑀢𑀫𑁆𑀧𑀺.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀪𑁄𑀚𑀦𑀲𑀸𑀮𑀸𑀬𑀸𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀯𑀴𑀜𑁆𑀚𑀦𑁆𑀢𑀺 𑀏𑀓𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀁. 𑀦𑀸𑀦𑀸𑀦𑀺𑀯𑁂𑀲𑀦𑁂𑀲𑀽𑀢𑀺 𑀦𑀸𑀦𑀸𑀓𑀼𑀮𑀲𑁆𑀲 𑀦𑀸𑀦𑀽𑀧𑀘𑀸𑀭𑁂𑀲𑀼 𑀦𑀺𑀯𑁂𑀲𑀦𑁂𑀲𑀼.

𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀻𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀯𑀼𑀟𑁆𑀠𑀢𑀭𑁂 𑀦𑀺𑀤𑁆𑀤𑀸𑀬𑀦𑁆𑀢𑁂 𑀦𑀯𑀓𑀲𑁆𑀲 𑀕𑀸𑀳𑀺𑀢𑀁 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀲𑁆𑀲𑀝𑁆𑀞𑀤𑀽𑀢𑁄𑀢𑀺 𑀬𑀣𑀸𑀭𑀼𑀘𑀺 𑀯𑀢𑁆𑀢𑀼𑀁 𑀮𑀪𑀦𑀢𑁄 𑀦𑀺𑀭𑀸𑀲𑀗𑁆𑀓𑀤𑀽𑀢𑁄. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑀸𑀢𑀺 𑀧𑀼𑀘𑁆𑀙𑀸𑀯𑀘𑀦𑀧𑀝𑀺𑀪𑀸𑀕𑁂𑀦. ‘‘𑀏𑀓𑀸 𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀭𑀜𑁆𑀜𑁄 𑀯𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀁 𑀧𑀢𑁆𑀢𑀲𑁆𑀲𑀸𑀫𑀺𑀓𑀲𑁆𑀲 𑀳𑁄𑀢𑀻𑀢𑀺 𑀘𑀻𑀯𑀭𑀸𑀤𑀺𑀓𑀫𑁆𑀧𑀺 𑀲𑀩𑁆𑀩𑀁 𑀧𑀢𑁆𑀢𑀲𑁆𑀲𑀸𑀫𑀺𑀓𑀲𑁆𑀲𑁂𑀯 𑀳𑁄𑀢𑀺, 𑀫𑀬𑀸 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀘𑀻𑀯𑀭𑀸𑀤𑀺𑀦𑁆𑀢𑀺 𑀯𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑀅𑀓𑀢𑀪𑀸𑀕𑁄𑀦𑀸𑀫𑀸𑀢𑀺 ¶ 𑀆𑀕𑀦𑁆𑀢𑀼𑀓𑀪𑀸𑀕𑁄 𑀦𑀸𑀫, 𑀅𑀤𑀺𑀦𑁆𑀦𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀢𑁆𑀣𑁄.

𑀓𑀺𑀁 𑀆𑀳𑀭𑀻𑀬𑀢𑀻𑀢𑀺 𑀅𑀯𑀢𑁆𑀯𑀸𑀢𑀺 ‘‘𑀓𑀢𑀭𑀪𑀢𑁆𑀢𑀁 𑀯𑀸 𑀢𑀬𑀸 𑀆𑀳𑀭𑀻𑀬𑀢𑀻’’𑀢𑀺 𑀤𑀸𑀬𑀓𑀁 𑀅𑀧𑀼𑀘𑁆𑀙𑀺𑀢𑁆𑀯𑀸. 𑀧𑀓𑀢𑀺𑀝𑁆𑀞𑀺𑀢𑀺𑀓𑀸𑀬𑀸𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ¶ ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀤𑀁 𑀅𑀯𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀪𑀢𑁆𑀢𑀦𑁆𑀢𑀺 𑀅𑀯𑀤𑀦𑁆𑀢𑁂𑀦𑀸’’𑀢𑀺.

𑀆𑀮𑁄𑀧𑀲𑀗𑁆𑀔𑁂𑀧𑁂𑀦𑀸𑀢𑀺 𑀏𑀓𑁂𑀓𑀧𑀺𑀡𑁆𑀟𑀯𑀲𑁂𑀦, 𑀏𑀯𑀜𑁆𑀘 𑀪𑀸𑀚𑀦𑀁 𑀉𑀤𑁆𑀤𑁂𑀲𑀪𑀢𑁆𑀢𑁂 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀳𑀺 𑀏𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑁂𑀦𑁂𑀯 𑀪𑀸𑀚𑁂𑀢𑀩𑁆𑀩𑀁.

𑀆𑀭𑀼𑀴𑁆𑀳𑀸𑀬𑁂𑀯 𑀫𑀸𑀢𑀺𑀓𑀁, 𑀲𑀗𑁆𑀖𑀢𑁄 𑀅𑀝𑁆𑀞 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀬𑁂 𑀫𑀸𑀢𑀺𑀓𑀁 𑀆𑀭𑀼𑀴𑁆𑀳𑀸, 𑀢𑁂 𑀅𑀝𑁆𑀞 𑀪𑀺𑀓𑁆𑀔𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀤𑁆𑀤𑁂𑀲𑀪𑀢𑁆𑀢𑀦𑀺𑀫𑀦𑁆𑀢𑀦𑀪𑀢𑁆𑀢𑀸𑀤𑀺𑀲𑀗𑁆𑀖𑀺𑀓𑀪𑀢𑁆𑀢𑀫𑀸𑀢𑀺𑀓𑀸𑀲𑀼 𑀦𑀺𑀫𑀦𑁆𑀢𑀦𑀪𑀢𑁆𑀢𑀫𑀸𑀢𑀺𑀓𑀸𑀬 𑀞𑀺𑀢𑀺𑀯𑀲𑁂𑀦 𑀆𑀭𑀼𑀴𑁆𑀳𑁂 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀯𑀸 𑀲𑀬𑀁 𑀯𑀸 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀢𑁂 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀸𑀢𑀺𑀓𑀸𑀪𑁂𑀤𑀁 𑀤𑀸𑀬𑀓𑀲𑁆𑀲 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀝𑀺𑀩𑀤𑁆𑀥𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬𑀸𑀢𑀺 𑀢𑀢𑁆𑀣𑁂𑀯 𑀯𑀸𑀲𑀲𑁆𑀲 𑀦𑀺𑀩𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀮𑀺𑀔𑀺𑀢𑁆𑀯𑀸. 𑀕𑀸𑀫𑀯𑀲𑁂𑀦𑀧𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀲𑀫𑀮𑀸𑀪𑀕𑀸𑀫𑀯𑀲𑁂𑀦𑀧𑀺. 𑀩𑀳𑀽𑀦𑀺 𑀲𑀮𑀸𑀓𑀪𑀢𑁆𑀢𑀸𑀦𑀻𑀢𑀺 𑀢𑀺𑀁𑀲𑀁 𑀯𑀸 𑀘𑀢𑁆𑀢𑀸𑀭𑀻𑀲𑀁 𑀯𑀸 𑀪𑀢𑁆𑀢𑀸𑀦𑀺. ‘‘𑀲𑀘𑁂 𑀳𑁄𑀦𑁆𑀢𑀻’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 ¶ 𑀢𑀸𑀦𑀺 𑀪𑀢𑁆𑀢𑀸𑀦𑀺 𑀧𑀫𑀸𑀡𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀦𑀺𑀕𑁆𑀕𑀳𑁂𑀦 𑀤𑀢𑁆𑀯𑀸𑀢𑀺 𑀤𑀽𑀭𑀁 𑀕𑀦𑁆𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀦𑀺𑀕𑁆𑀕𑀳𑁂𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀤𑀢𑁆𑀯𑀸. 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀯𑀺𑀳𑀸𑀭𑀁 𑀅𑀦𑀸𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀯𑀺𑀳𑀸𑀭𑁂 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀏𑀓𑀕𑁂𑀳𑀯𑀲𑁂𑀦𑀸𑀢𑀺 𑀯𑀻𑀣𑀺𑀬𑀫𑁆𑀧𑀺 𑀏𑀓𑀧𑀲𑁆𑀲𑁂 𑀖𑀭𑀧𑀸𑀴𑀺𑀬𑀸 𑀯𑀲𑁂𑀦. 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀻𑀢𑀺 𑀅𑀲𑀼𑀓𑀓𑀼𑀮𑁂 𑀲𑀮𑀸𑀓𑀪𑀢𑁆𑀢𑀸𑀦𑀺 𑀢𑀼𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀯𑀢𑁆𑀯𑀸.

𑀯𑀸𑀭𑀕𑀸𑀫𑁂𑀢𑀺 ¶ 𑀅𑀢𑀺𑀤𑀽𑀭𑀢𑁆𑀢𑀸 𑀯𑀸𑀭𑁂𑀦 𑀕𑀦𑁆𑀢𑀩𑁆𑀩𑀕𑀸𑀫𑁂. 𑀲𑀝𑁆𑀞𑀺𑀢𑁄 𑀯𑀸 𑀧𑀡𑁆𑀡𑀸𑀲𑀢𑁄 𑀯𑀸𑀢𑀺 𑀤𑀡𑁆𑀟𑀓𑀫𑁆𑀫𑀢𑁆𑀣𑀸𑀬 𑀉𑀤𑀓𑀖𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀯𑀸𑀭𑁄𑀢𑀺 𑀲𑀩𑁆𑀩𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀢𑁆𑀣𑀸𑀬 𑀕𑀢𑁂𑀲𑀼 𑀯𑀺𑀳𑀸𑀭𑀭𑀓𑁆𑀔𑀡𑀯𑀸𑀭𑁄.

𑀢𑁂𑀲𑀦𑁆𑀢𑀺 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁. 𑀨𑀸𑀢𑀺𑀓𑀫𑁆𑀫𑀫𑁂𑀯𑀸𑀢𑀺 𑀯𑀺𑀳𑀸𑀭𑀭𑀓𑁆𑀔𑀡𑀓𑀺𑀘𑁆𑀘𑀲𑁆𑀲 𑀧𑀳𑁄𑀦𑀓𑀧𑀝𑀺𑀧𑀸𑀤𑀦𑀫𑁂𑀯. 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀻𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑁂𑀓𑀲𑁆𑀲𑁂𑀯 𑀧𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀭𑀲𑀲𑀮𑀸𑀓𑀦𑁆𑀢𑀺 𑀉𑀘𑁆𑀙𑀼𑀭𑀲𑀲𑀮𑀸𑀓𑀁. ‘‘𑀲𑀮𑀸𑀓𑀯𑀲𑁂𑀦 𑀕𑀸𑀳𑀺𑀢𑀢𑁆𑀢𑀸 𑀧𑀦 𑀦 𑀲𑀸𑀤𑀺𑀢𑀩𑁆𑀩𑀸’’𑀢𑀺 𑀇𑀤𑀁 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀥𑀼𑀢𑀗𑁆𑀕𑀪𑁂𑀤𑀯𑀲𑁂𑀦. ‘‘𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸…𑀧𑁂… 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁬) 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀅𑀕𑁆𑀕𑀪𑀺𑀓𑁆𑀔𑀸𑀫𑀢𑁆𑀢𑀦𑁆𑀢𑀺 𑀏𑀓𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀁. 𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀲𑁆𑀯𑁂𑀧𑀺 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀮𑀤𑁆𑀥𑁂𑀧𑀺 𑀅𑀧𑁆𑀧𑀫𑀢𑁆𑀢𑀢𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀸𑀯𑀤𑀢𑁆𑀣𑀁 𑀮𑀪𑀢𑀺…𑀧𑁂… 𑀅𑀮𑀪𑀺𑀢𑁆𑀯𑀸 ‘𑀲𑁆𑀯𑁂 𑀕𑀡𑁆𑀳𑁂𑀬𑁆𑀬𑀸𑀲𑀻’𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀢𑀁 𑀯𑀸𑀭𑀕𑀸𑀫𑁂 𑀲𑀮𑀸𑀓𑀁 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀢𑀺 𑀤𑀺𑀲𑀁𑀕𑀫𑀺𑀓𑀢𑁄 𑀅𑀜𑁆𑀜𑁂𑀦 𑀢𑀲𑁆𑀫𑀺𑀁 𑀤𑀺𑀲𑀁𑀕𑀫𑀺𑀓𑁂. 𑀤𑁂𑀯𑀲𑀺𑀓𑀁 𑀧𑀸𑀧𑁂𑀢𑀩𑁆𑀩𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑁂𑀢𑀩𑁆𑀩𑀸. 𑀏𑀯𑀁 𑀏𑀢𑁂𑀲𑀼 𑀅𑀕𑀢𑁂𑀲𑀼 𑀆𑀲𑀦𑁆𑀦𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀇𑀢𑀭𑀣𑀸 𑀲𑀗𑁆𑀖𑀺𑀓𑀢𑁄.

𑀅𑀫𑁆𑀳𑀸𑀓𑀁 𑀕𑁄𑀘𑀭𑀕𑀸𑀫𑁂𑀯𑀸𑀢𑀺 𑀲𑀮𑀸𑀓𑀪𑀢𑁆𑀢𑀤𑀸𑀬𑀓𑀸𑀦𑀁 𑀕𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀧𑀢𑁆𑀢𑀲𑀮𑀸𑀓𑀪𑀢𑁆𑀢𑀦𑁆𑀢𑀺 𑀯𑀺𑀳𑀸𑀭𑁂 𑀏𑀓𑁂𑀓𑀲𑁆𑀲𑁂𑀯 𑀑𑀳𑀻𑀦𑀢𑁆𑀣𑁂𑀭𑀲𑁆𑀲 𑀲𑀩𑁆𑀩𑀲𑀮𑀸𑀓𑀸𑀦𑀁 𑀅𑀢𑁆𑀢𑀦𑁄 𑀧𑀸𑀧𑀦𑀯𑀲𑁂𑀦 𑀧𑀢𑁆𑀢𑀲𑀮𑀸𑀓𑀪𑀢𑁆𑀢𑀁.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

‘‘𑀲𑁆𑀯𑁂 ¶ 𑀧𑀓𑁆𑀔𑁄’’𑀢𑀺 𑀅𑀚𑁆𑀚 𑀧𑀓𑁆𑀔𑀺𑀓𑀁 𑀦 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀫𑀺𑀬𑀸 𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀢𑁆𑀢𑀫𑀺𑀬𑀸 𑀪𑀼𑀜𑁆𑀚𑀦𑀢𑁆𑀣𑀸𑀬 𑀦 𑀕𑀸𑀳𑁂𑀢𑀩𑁆𑀩𑀁, 𑀤𑀸𑀬𑀓𑁂𑀳𑀺 𑀦𑀺𑀬𑀫𑀺𑀢𑀤𑀺𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀲𑁆𑀯𑁂 𑀮𑀽𑀔𑀦𑁆𑀢𑀺 𑀅𑀚𑁆𑀚 𑀆𑀯𑀸𑀳𑀫𑀗𑁆𑀕𑀮𑀸𑀤𑀺𑀓𑀭𑀡𑀢𑁄 𑀅𑀢𑀺𑀧𑀡𑀻𑀢𑀪𑁄𑀚𑀦𑀁 𑀓𑀭𑀻𑀬𑀢𑀺, 𑀲𑁆𑀯𑁂 𑀢𑀣𑀸 𑀦 𑀪𑀯𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀪𑀺𑀓𑁆𑀔𑀽 𑀪𑁄𑀚𑁂𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀓𑁆𑀔𑀺𑀓𑀪𑀢𑁆𑀢𑀢𑁄 ¶ 𑀉𑀧𑁄𑀲𑀣𑀺𑀓𑀲𑁆𑀲 𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸’’𑀢𑀺𑀆𑀤𑀺. 𑀦𑀺𑀩𑀦𑁆𑀥𑀸𑀧𑀺𑀢𑀦𑁆𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀆𑀕𑀦𑁆𑀢𑀼𑀓𑀸 𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀦𑀺𑀬𑀫𑀺𑀢𑀁.

𑀕𑀫𑀺𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁆𑀧𑀻𑀢𑀺 𑀕𑀸𑀫𑀦𑁆𑀢𑀭𑀢𑁄 𑀆𑀕𑀦𑁆𑀢𑁆𑀯𑀸 𑀅𑀯𑀽𑀧𑀲𑀦𑁆𑀢𑁂𑀦 𑀕𑀫𑀺𑀓𑀘𑀺𑀢𑁆𑀢𑁂𑀦 𑀯𑀲𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀯𑀸𑀲𑀺𑀓𑀲𑁆𑀲 𑀧𑀦 𑀕𑀦𑁆𑀢𑀼𑀓𑀸𑀫𑀲𑁆𑀲 𑀕𑀫𑀺𑀓𑀪𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. ‘‘𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑁂𑀲𑀸𑀪𑀸𑀯𑁂 𑀬𑀸𑀯 𑀕𑀫𑀦𑀧𑀭𑀺𑀩𑀦𑁆𑀥𑁄 𑀯𑀺𑀕𑀘𑁆𑀙𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀜𑀸𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑁂𑀲𑁂𑀦𑁆𑀢𑀺…𑀧𑁂… 𑀯𑀝𑁆𑀝𑀢𑀻𑀢𑀺 𑀅𑀪𑀺𑀳𑀝𑀪𑀺𑀓𑁆𑀔𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀪𑀺𑀓𑁆𑀔𑀸𑀦𑀸𑀫𑁂𑀦 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸.

𑀅𑀯𑀺𑀪𑀢𑁆𑀢𑀁 𑀲𑀗𑁆𑀖𑀺𑀓𑀁 𑀪𑀡𑁆𑀟𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁭. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁄

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁩𑁦. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 ¶ ¶ 𑀧𑀸𑀴𑀺𑀬𑀁 𑀅𑀦𑀼𑀧𑀺𑀬𑀁 𑀦𑀸𑀫𑀸𑀢𑀺 𑀅𑀦𑀼𑀧𑀺𑀬𑀸 𑀦𑀸𑀫. 𑀳𑁂𑀝𑁆𑀞𑀸 𑀧𑀸𑀲𑀸𑀤𑀸𑀢𑀺 𑀧𑀸𑀲𑀸𑀤𑀢𑁄 𑀳𑁂𑀝𑁆𑀞𑀸 𑀳𑁂𑀝𑁆𑀞𑀺𑀫𑀢𑀮𑀁, ‘‘𑀳𑁂𑀝𑁆𑀞𑀸𑀧𑀸𑀲𑀸𑀤’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀪𑀺𑀦𑁂𑀢𑀩𑁆𑀩𑀦𑁆𑀢𑀺 𑀯𑀧𑀺𑀢𑀔𑁂𑀢𑁆𑀢𑁂𑀲𑀼 𑀧𑀯𑁂𑀲𑁂𑀢𑀩𑁆𑀩𑀁. 𑀦𑀺𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀢𑀢𑁄 𑀦𑀻𑀳𑀭𑀺𑀢𑀩𑁆𑀩𑀁. 𑀦𑀺𑀤𑁆𑀥𑀸𑀧𑁂𑀢𑀩𑁆𑀩𑀦𑁆𑀢𑀺 𑀲𑀲𑁆𑀲𑀤𑀽𑀲𑀓𑀢𑀺𑀡𑀸𑀤𑀻𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀉𑀚𑀼𑀁 𑀓𑀸𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑀩𑁆𑀩𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑁩𑁩𑁨. 𑀧𑀭𑀤𑀢𑁆𑀢𑁄𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑁄. 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸𑀢𑀺 𑀓𑀢𑁆𑀣𑀘𑀺 𑀅𑀮𑀕𑁆𑀕𑀢𑀸𑀬 𑀫𑀺𑀕𑀲𑁆𑀲 𑀯𑀺𑀬 𑀚𑀸𑀢𑁂𑀦 𑀘𑀺𑀢𑁆𑀢𑁂𑀦.

𑁩𑁩𑁩. 𑀫𑀦𑁄𑀫𑀬𑀁 𑀓𑀸𑀬𑀦𑁆𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀩𑁆𑀭𑀳𑁆𑀫𑀓𑀸𑀬𑀁, ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀧𑀲𑀸𑀤𑁂𑀬𑁆𑀬𑀁, 𑀬𑀲𑁆𑀫𑀺𑀁 𑀫𑁂 𑀧𑀲𑀦𑁆𑀦𑁂 𑀩𑀳𑀼𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀞𑀫𑀁 𑀉𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑀲𑁆𑀲 𑀫𑀦𑁆𑀤𑀧𑀭𑀺𑀬𑀼𑀝𑁆𑀞𑀸𑀦𑀢𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀛𑀸𑀦𑀧𑀭𑀺𑀳𑀸𑀦𑀺 𑀦𑀸𑀳𑁄𑀲𑀺, 𑀧𑀘𑁆𑀙𑀸 𑀏𑀯 𑀅𑀳𑁄𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀔𑁂𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀫𑀕𑀥𑀭𑀝𑁆𑀞𑁂 𑀔𑀼𑀤𑁆𑀤𑀓𑀁 𑀕𑀸𑀫𑀔𑁂𑀢𑁆𑀢𑀁 𑀕𑀸𑀯𑀼𑀢𑀫𑀢𑁆𑀢𑀁, 𑀫𑀚𑁆𑀛𑀺𑀫𑀁 𑀧𑀦 𑀤𑀺𑀬𑀟𑁆𑀠𑀕𑀸𑀯𑀼𑀢𑀫𑀢𑁆𑀢𑀁, 𑀫𑀳𑀦𑁆𑀢𑀁 𑀅𑀦𑁂𑀓𑀬𑁄𑀚𑀦𑀫𑁆𑀧𑀺 𑀳𑁄𑀢𑀺. 𑀢𑁂𑀲𑀼 𑀫𑀚𑁆𑀛𑀺𑀫𑁂𑀦 𑀕𑀸𑀫𑀔𑁂𑀢𑁆𑀢𑁂𑀦 𑀤𑁆𑀯𑁂 𑀯𑀸 𑀔𑀼𑀤𑁆𑀤𑀓𑁂𑀦 𑀢𑀻𑀡𑀺 𑀯𑀸 𑀕𑀸𑀫𑀔𑁂𑀢𑁆𑀢𑀸𑀦𑀺, 𑀢𑀲𑁆𑀲 𑀲𑀭𑀻𑀭𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀅𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁪. 𑀲𑀢𑁆𑀣𑀸𑀭𑁄𑀢𑀺 𑀕𑀡𑀲𑀢𑁆𑀣𑀸𑀭𑁄. 𑀦𑀸𑀲𑁆𑀲𑀲𑁆𑀲𑀸𑀢𑀺 𑀦 𑀏𑀢𑀲𑁆𑀲 𑀪𑀯𑁂𑀬𑁆𑀬. 𑀢𑀦𑁆𑀢𑀺 𑀲𑀢𑁆𑀣𑀸𑀭𑀁. 𑀢𑁂𑀦𑀸𑀢𑀺 𑀅𑀫𑀦𑀸𑀧𑁂𑀦. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀘𑀻𑀯𑀭𑀸𑀤𑀺𑀦𑀸 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺, 𑀧𑀭𑁂𑀳𑀺 𑀯𑀸 𑀅𑀬𑀁 𑀲𑀢𑁆𑀣𑀸 𑀲𑀫𑁆𑀫𑀸𑀦𑀻𑀬𑀢𑀻𑀢𑀺 𑀅𑀢𑁆𑀣𑁄.

𑁩𑁩𑁫. 𑀦𑀸𑀲𑀸𑀬 ¶ 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀼𑀦𑁆𑀢𑀺 𑀅𑀘𑁆𑀙𑀧𑀺𑀢𑁆𑀢𑀁 𑀯𑀸 𑀫𑀘𑁆𑀙𑀧𑀺𑀢𑁆𑀢𑀁 𑀯𑀸 𑀦𑀸𑀲𑀸𑀧𑀼𑀝𑁂 𑀧𑀓𑁆𑀔𑀺𑀧𑁂𑀬𑁆𑀬𑀼𑀁. 𑀅𑀲𑁆𑀲𑀢𑀭𑀻𑀢𑀺 𑀯𑀴𑀯𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀤𑁆𑀭𑀪𑀲𑁆𑀲 𑀚𑀸𑀢𑀸. 𑀢𑀲𑁆𑀲𑀸 𑀳𑀺 𑀕𑀳𑀺𑀢𑀕𑀩𑁆𑀪𑀸𑀬 𑀯𑀺𑀚𑀸𑀬𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀺𑀬𑀸 𑀉𑀤𑀭𑀁 𑀨𑀸𑀮𑁂𑀢𑁆𑀯𑀸 𑀧𑁄𑀢𑀓𑀁 𑀦𑀻𑀳𑀭𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀻’’𑀢𑀺.

𑁩𑁩𑁯. 𑀧𑁄𑀢𑁆𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, ‘‘𑀔𑀭’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑁩𑁪𑁨. 𑀫𑀸 ¶ 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄𑀢𑀺 𑀳𑁂 𑀓𑀼𑀜𑁆𑀚𑀭 𑀩𑀼𑀤𑁆𑀥𑀦𑀸𑀕𑀁 𑀯𑀥𑀓𑀘𑀺𑀢𑁆𑀢𑁂𑀦 𑀫𑀸 𑀉𑀧𑀕𑀘𑁆𑀙. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀁. 𑀇𑀢𑁄𑀢𑀺 𑀇𑀢𑁄 𑀚𑀸𑀢𑀺𑀢𑁄. 𑀬𑀢𑁄𑀢𑀺 𑀬𑀲𑁆𑀫𑀸, 𑀬𑀦𑁆𑀢𑀲𑁆𑀲 𑀯𑀸, 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀸 𑀘 𑀫𑀤𑁄𑀢𑀺 𑀫𑀤𑁄 𑀢𑀬𑀸 𑀦 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁩𑁪𑁩. 𑀢𑀺𑀓𑀪𑁄𑀚𑀦𑀦𑁆𑀢𑀺 𑀢𑀻𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑁄𑀚𑀦𑀁, 𑀢𑀢𑁄 𑀅𑀥𑀺𑀓𑁂𑀳𑀺 𑀏𑀓𑀢𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑀓𑀁 𑀕𑀡𑀪𑁄𑀚𑀦𑀧𑀝𑀺𑀧𑀓𑁆𑀔𑀁 𑀪𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀓𑀸𑀮𑀺𑀓𑁄𑀢𑀺𑀆𑀤𑀻𑀦𑀺 𑀤𑁂𑀯𑀤𑀢𑁆𑀢𑀧𑀭𑀺𑀲𑀸𑀬 𑀕𑀡𑀧𑀸𑀫𑁄𑀓𑁆𑀔𑀸𑀦𑀁 𑀦𑀸𑀫𑀸𑀦𑀺. 𑀓𑀧𑁆𑀧𑀦𑁆𑀢𑀺 𑀫𑀳𑀸𑀦𑀺𑀭𑀬𑁂 𑀆𑀬𑀼𑀓𑀧𑁆𑀧𑀁, 𑀢𑀁 𑀅𑀦𑁆𑀢𑀭𑀓𑀧𑁆𑀧𑀦𑁆𑀢𑀺 𑀓𑁂𑀘𑀺. 𑀓𑁂𑀘𑀺 𑀧𑀦 ‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧’’𑀦𑁆𑀢𑀺.

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑁂𑀤𑀓𑀓𑀣𑀸𑀯𑀡𑁆𑀡𑀦𑀸

𑁩𑁪𑁫. 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀓𑀣𑀦𑀁 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. 𑀓𑁂𑀯𑀮𑀁 𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁. 𑀢𑀤𑀼𑀪𑀬𑀫𑁆𑀧𑀺 𑀥𑀫𑁆𑀫𑀻 𑀓𑀣𑀸 𑀦𑀸𑀫. 𑀢𑀸𑀬 𑀣𑁂𑀭𑁄 𑀑𑀯𑀤𑀺. 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀫. 𑀢𑁂𑀦 𑀲𑀳𑀺𑀢𑀸 𑀅𑀦𑀼𑀲𑀸𑀲𑀦𑀻 𑀏𑀯 𑀥𑀫𑁆𑀫𑀻 𑀓𑀣𑀸. 𑀢𑀸𑀬 𑀣𑁂𑀭𑁄 𑀑𑀯𑀤𑀺.

‘‘𑀣𑀼𑀮𑁆𑀮𑀘𑁆𑀘𑀬𑀁 𑀤𑁂𑀲𑀸𑀧𑁂𑀳𑀻’’𑀢𑀺 𑀇𑀤𑀁 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀉𑀧𑁄𑀲𑀣𑀸𑀤𑀺𑀓𑀭𑀡𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀸𑀤𑀻𑀲𑀼 𑀧𑀞𑀫𑀫𑁂𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀇𑀢𑀭𑀣𑀸 𑀏𑀢𑁂𑀲𑀁 𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀬𑁂𑀯 𑀲𑀺𑀬𑀸.

𑁩𑁪𑁬. 𑀲𑀭𑀲𑀻𑀢𑀺 𑀲𑀭𑁄. 𑀫𑀳𑀺𑀁 𑀯𑀺𑀓𑁆𑀭𑀼𑀩𑁆𑀩𑀢𑁄𑀢𑀺 𑀫𑀳𑀺𑀁 𑀤𑀦𑁆𑀢𑁂𑀳𑀺 𑀯𑀺𑀮𑀺𑀔𑀦𑁆𑀢𑀲𑁆𑀲. 𑀇𑀤𑀜𑁆𑀘 𑀳𑀢𑁆𑀣𑀻𑀦𑀁 𑀲𑀪𑀸𑀯𑀤𑀲𑁆𑀲𑀦𑀁. 𑀦𑀤𑀻𑀲𑀽𑀢𑀺 𑀲𑀭𑁂𑀲𑀼. 𑀪𑀺𑀲𑀁 𑀖𑀲𑀫𑀸𑀦𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀚𑀕𑁆𑀕𑀢𑁄𑀢𑀺 𑀬𑀽𑀣𑀁 𑀧𑀸𑀮𑁂𑀦𑁆𑀢𑀲𑁆𑀲.

𑁩𑁪𑁭. 𑀤𑀽𑀢𑁂𑀬𑁆𑀬𑀁 ¶ 𑀕𑀦𑁆𑀢𑀼𑀦𑁆𑀢𑀺 𑀤𑀽𑀢𑀓𑀫𑁆𑀫𑀁 𑀧𑀢𑁆𑀢𑀼𑀁, 𑀤𑀽𑀢𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀲𑁆𑀲, 𑀬𑀁 𑀯𑀢𑁆𑀢𑀼𑀁, 𑀓𑀸𑀢𑀼𑀜𑁆𑀘 𑀬𑀼𑀢𑁆𑀢𑀁, 𑀢𑀢𑁆𑀣 𑀓𑀼𑀲𑀮𑁄. 𑀅𑀣 𑀯𑀸 𑀅𑀥𑀺𑀧𑁆𑀧𑁂𑀢𑀸𑀦𑀸𑀥𑀺𑀧𑁆𑀧𑁂𑀢𑀲𑁆𑀲 𑀯𑀘𑀦𑀲𑁆𑀲 𑀓𑀼𑀲𑀮𑁄, 𑀩𑁆𑀬𑀜𑁆𑀚𑀦𑀫𑀢𑁆𑀢𑁂 𑀦 𑀢𑀺𑀝𑁆𑀞𑀢𑀺, 𑀅𑀥𑀺𑀧𑁆𑀧𑁂𑀢𑀢𑁆𑀣𑀫𑁂𑀯 𑀆𑀭𑁄𑀘𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁫𑁦. 𑀕𑀸𑀣𑀸𑀲𑀼 ¶ 𑀚𑀸𑀢𑀽𑀢𑀺 𑀏𑀓𑀁𑀲𑁂𑀦. 𑀫𑀸 𑀉𑀤𑀧𑀚𑁆𑀚𑀣 𑀫𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀧𑀸𑀧𑀺𑀘𑁆𑀙𑀸𑀦𑀁 𑀬𑀣𑀸𑀕𑀢𑀻𑀢𑀺 𑀧𑀸𑀧𑀺𑀘𑁆𑀙𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑀸𑀤𑀺𑀲𑀻 𑀕𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑁄. 𑀢𑀁 𑀅𑀢𑁆𑀣𑀚𑀸𑀢𑀁. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀸𑀣𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 ‘‘𑀧𑀡𑁆𑀟𑀺𑀢𑁄’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺.

𑀧𑀫𑀸𑀤𑀁 𑀅𑀦𑀼𑀘𑀺𑀡𑁆𑀡𑁄𑀢𑀺 𑀧𑀫𑀸𑀤𑀁 𑀆𑀧𑀦𑁆𑀦𑁄. 𑀆𑀲𑀻𑀲𑀸𑀬𑀦𑁆𑀢𑀺 𑀅𑀯𑀲𑁆𑀲𑀁𑀪𑀸𑀯𑀻𑀅𑀢𑁆𑀣𑀲𑀺𑀤𑁆𑀥𑀺𑀬𑀁. 𑀲𑀸 𑀳𑀺 𑀇𑀥 𑀆𑀲𑀻𑀲𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀢𑁆𑀣𑀦𑀸. 𑀈𑀤𑀺𑀲𑁂 𑀅𑀦𑀸𑀕𑀢𑀢𑁆𑀣𑁂 𑀅𑀢𑀻𑀢𑀯𑀘𑀦𑀁 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺.

𑀤𑀼𑀩𑁆𑀪𑁂𑀢𑀺 𑀤𑀼𑀩𑁆𑀪𑁂𑀬𑁆𑀬. 𑀯𑀺𑀲𑀓𑀼𑀫𑁆𑀪𑁂𑀦𑀸𑀢𑀺 𑀏𑀓𑁂𑀦 𑀯𑀺𑀲𑀧𑀼𑀡𑁆𑀡𑀓𑀼𑀫𑁆𑀪𑁂𑀦. 𑀲𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄. 𑀦 𑀧𑀤𑀽𑀲𑁂𑀬𑁆𑀬 𑀯𑀺𑀲𑀫𑀺𑀲𑁆𑀲𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀪𑀬𑀸𑀦𑀓𑁄𑀢𑀺 𑀯𑀺𑀧𑀼𑀮𑀕𑀫𑁆𑀪𑀻𑀭𑀪𑀸𑀯𑁂𑀦 𑀪𑀬𑀸𑀦𑀓𑁄. 𑀢𑁂𑀦𑀸𑀧𑀺 𑀤𑀽𑀲𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑀺. 𑀯𑀸𑀤𑁂𑀦𑀸𑀢𑀺 𑀤𑁄𑀲𑀓𑀣𑀦𑁂𑀦. 𑀉𑀧𑀳𑀺𑀁𑀲𑀢𑀻𑀢𑀺 𑀩𑀸𑀥𑀢𑀺.

𑀲𑀗𑁆𑀖𑀪𑁂𑀤𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀧𑀜𑁆𑀳𑀸𑀓𑀣𑀸𑀯𑀡𑁆𑀡𑀦𑀸

𑁩𑁫𑁧. 𑀦 𑀧𑀦 𑀏𑀢𑁆𑀢𑀸𑀯𑀢𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀮𑀸𑀓𑀕𑁆𑀕𑀸𑀳𑀸𑀧𑀦𑀫𑀢𑁆𑀢𑁂𑀦 𑀲𑀗𑁆𑀖𑀪𑁂𑀤𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀯𑀼𑀢𑁆𑀢𑀁. 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑁂 𑀓𑀢𑁂 𑀏𑀯 𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀢𑀢𑁆𑀣 𑀘 𑀉𑀧𑁄𑀲𑀣𑀧𑀯𑀸𑀭𑀡𑀸𑀲𑀼 𑀜𑀢𑁆𑀢𑀺𑀦𑀺𑀝𑁆𑀞𑀸𑀦𑁂𑀦, 𑀲𑁂𑀲𑀓𑀫𑁆𑀫𑁂𑀲𑀼 𑀅𑀧𑀮𑁄𑀓𑀦𑀸𑀤𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀦 𑀲𑀗𑁆𑀖𑀪𑁂𑀤𑁄 𑀲𑀫𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄.

‘‘𑀅𑀪𑀩𑁆𑀩𑀢𑀸 𑀦 𑀯𑀼𑀢𑁆𑀢𑀸’’𑀢𑀺 𑀇𑀤𑀁 ‘‘𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁂𑀦 𑀧𑀞𑀫𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀉𑀧𑀘𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀆𑀦𑀦𑁆𑀢𑀭𑀺𑀬𑀢𑁆𑀢𑀁 𑀯𑀤𑀢𑀸 𑀪𑀕𑀯𑀢𑀸 𑀢𑀲𑁆𑀲 𑀅𑀪𑀩𑁆𑀩𑀢𑀸𑀲𑀗𑁆𑀔𑀸𑀢𑀸 𑀧𑀸𑀭𑀸𑀚𑀺𑀓𑀢𑀸 𑀦 𑀧𑀜𑁆𑀜𑀢𑁆𑀢𑀸. 𑀏𑀢𑁂𑀦 𑀆𑀧𑀢𑁆𑀢𑀺 𑀯𑀺𑀬 𑀅𑀪𑀩𑁆𑀩𑀢𑀸𑀧𑀺 𑀧𑀜𑁆𑀜𑀢𑁆𑀢𑀺𑀅𑀦𑀦𑁆𑀢𑀭𑀫𑁂𑀯 𑀳𑁄𑀢𑀺, 𑀦 𑀢𑀢𑁄 𑀧𑀼𑀭𑁂𑀢𑀺 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺𑀬𑀸 𑀅𑀯𑀼𑀢𑁆𑀢𑀢𑁆𑀢𑀸 𑀤𑁂𑀯𑀤𑀢𑁆𑀢𑀸𑀤𑀬𑁄𑀧𑀺 𑀦 𑀫𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀻𑀲𑀼 𑀢𑀬𑁄 𑀏𑀯 𑀲𑀢𑀺𑀧𑀝𑁆𑀞𑀸𑀦𑀸, 𑀦 𑀢𑀢𑁄 𑀧𑀭𑀦𑁆𑀢𑀺 𑀏𑀓𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 ¶ 𑀧𑀝𑀺𑀓𑁆𑀔𑁂𑀧𑁄𑀯 𑀇𑀥 𑀅𑀥𑀫𑁆𑀫𑁄, 𑀦 𑀧𑀦 𑀢𑀺𑀡𑁆𑀡𑀁 𑀲𑀢𑀺𑀧𑀝𑁆𑀞𑀸𑀦𑀢𑁆𑀢𑀯𑀺𑀥𑀸𑀦𑀁 ¶ 𑀢𑀲𑁆𑀲 𑀥𑀫𑁆𑀫𑀢𑁆𑀢𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀳𑀸𑀧𑀦𑀓𑁄𑀝𑁆𑀞𑀸𑀲𑁂𑀲𑀼. 𑀯𑀟𑁆𑀠𑀦𑁂𑀲𑀼 𑀧𑀦 𑀙 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀲𑁆𑀲𑀧𑀺 𑀏𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀢𑁆𑀢𑀯𑀺𑀥𑀸𑀦𑀫𑁂𑀯 𑀅𑀥𑀫𑁆𑀫𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀯, ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀢𑁂𑀭𑀲𑀸𑀬𑀢𑀦𑀸𑀦𑀻’’𑀢𑀺𑀆𑀤𑀺𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀧𑀭𑀻𑀢𑀢𑁄 𑀧𑀓𑀸𑀲𑀦𑀁 𑀲𑀩𑁆𑀩𑀁 𑀅𑀥𑀫𑁆𑀫𑁄. 𑀬𑀸𑀣𑀸𑀯𑀢𑁄 𑀧𑀓𑀸𑀲𑀦𑀜𑁆𑀘 𑀲𑀩𑁆𑀩𑀁 𑀥𑀫𑁆𑀫𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀓𑀸𑀲𑀦𑀦𑁆𑀢𑀺 𑀘𑁂𑀢𑁆𑀣 𑀢𑀣𑀸 𑀢𑀣𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀏𑀯𑀫𑁂𑀢𑁆𑀣 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸𑀤𑀻𑀲𑀼 𑀅𑀦𑀯𑀚𑁆𑀚𑀝𑁆𑀞𑁂𑀦 𑀲𑀭𑀽𑀧𑀢𑁄 𑀥𑀫𑁆𑀫𑁂𑀲𑀼, 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀤𑀻𑀲𑀼 𑀲𑀸𑀯𑀚𑁆𑀚𑀝𑁆𑀞𑁂𑀦 𑀲𑀭𑀽𑀧𑀢𑁄 𑀅𑀥𑀫𑁆𑀫𑁂𑀲𑀼 𑀘 𑀢𑀤𑀜𑁆𑀜𑁂𑀲𑀼 𑀘 𑀅𑀩𑁆𑀬𑀸𑀓𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀓𑁄𑀝𑁆𑀞𑀸𑀲𑀲𑁆𑀲 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀓𑁆𑀓𑀫𑁂𑀦𑁂𑀯 𑀧𑀓𑀸𑀲𑀦𑀁 ‘‘𑀥𑀫𑁆𑀫𑁄’’𑀢𑀺 𑀘 𑀯𑀺𑀧𑀭𑀻𑀢𑀢𑁄 𑀧𑀓𑀸𑀲𑀦𑀁 ‘‘𑀅𑀥𑀫𑁆𑀫𑁄’’𑀢𑀺 𑀘 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀯𑀺𑀦𑀬𑀸𑀤𑀬𑁄𑀧𑀺 𑀬𑀣𑀸𑀪𑀽𑀢𑀢𑁄, 𑀅𑀬𑀣𑀸𑀪𑀽𑀢𑀢𑁄 𑀘 𑀧𑀓𑀸𑀲𑀦𑀯𑀲𑁂𑀦 𑀥𑀫𑁆𑀫𑀸𑀥𑀫𑁆𑀫𑁂𑀲𑀼 𑀏𑀯 𑀧𑀯𑀺𑀲𑀦𑁆𑀢𑀺, 𑀯𑀺𑀦𑀬𑀸𑀤𑀺𑀦𑀸𑀫𑁂𑀦 𑀧𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀢𑀤𑀯𑀲𑁂𑀲𑀫𑁂𑀯 𑀥𑀫𑁆𑀫𑀸𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀧𑀯𑀺𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀓𑀭𑀺𑀲𑁆𑀲𑀸𑀫𑀸𑀢𑀺𑀆𑀤𑀺 𑀥𑀫𑁆𑀫𑀜𑁆𑀘 𑀅𑀥𑀫𑁆𑀫𑀜𑁆𑀘 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸𑀯 𑀧𑀸𑀧𑀺𑀘𑁆𑀙𑀁 𑀦𑀺𑀲𑁆𑀲𑀸𑀬 𑀯𑀺𑀧𑀭𑀻𑀢𑀢𑁄 𑀧𑀓𑀸𑀲𑁂𑀦𑁆𑀢𑀲𑁆𑀲𑁂𑀯 𑀲𑀗𑁆𑀖𑀪𑁂𑀤𑁄 𑀳𑁄𑀢𑀺, 𑀦 𑀧𑀦 𑀢𑀣𑀸𑀲𑀜𑁆𑀜𑀸𑀬 𑀧𑀓𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀲 𑀦𑀬𑁄 ‘‘𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼𑀧𑀺. 𑀢𑀢𑁆𑀣 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀓𑀼𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀆𑀓𑀟𑁆𑀠𑀢𑀺.

𑀲𑀁𑀯𑀭𑁄 𑀧𑀳𑀸𑀦𑀁 𑀧𑀝𑀺𑀲𑀗𑁆𑀔𑀸𑀢𑀺 𑀲𑀁𑀯𑀭𑀯𑀺𑀦𑀬𑁄, 𑀧𑀳𑀸𑀦𑀯𑀺𑀦𑀬𑁄, 𑀧𑀝𑀺𑀲𑀗𑁆𑀔𑀸𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀬𑀁 𑀯𑀺𑀦𑀬𑁄’’𑀢𑀺. ‘‘𑀧𑀜𑁆𑀜𑀢𑁆𑀢𑀁 𑀅𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀤𑀼𑀓𑀁 ‘‘𑀪𑀸𑀲𑀺𑀢𑀁 𑀅𑀪𑀸𑀲𑀺𑀢’’𑀦𑁆𑀢𑀺 𑀤𑀼𑀓𑁂𑀦 𑀅𑀢𑁆𑀣𑀢𑁄 𑀲𑀫𑀸𑀦𑀫𑁂𑀯, 𑀢𑀣𑀸 𑀤𑀼𑀝𑁆𑀞𑀼𑀮𑁆𑀮𑀤𑀼𑀓𑀁 𑀕𑀭𑀼𑀓𑀤𑀼𑀓𑁂𑀦. 𑀢𑁂𑀦𑁂𑀯 𑀢𑁂𑀲𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀇𑀤𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀲𑀤𑀺𑀲𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀲𑀸𑀯𑀲𑁂𑀲𑀸𑀧𑀢𑁆𑀢𑀺𑀦𑁆𑀢𑀺 𑀅𑀯𑀲𑁂𑀲𑀲𑀻𑀮𑁂𑀳𑀺 𑀲𑀳𑀺𑀢𑀸𑀧𑀢𑁆𑀢𑀺𑀁. 𑀦𑀢𑁆𑀣𑀺 𑀏𑀢𑀺𑀲𑁆𑀲𑀁 𑀆𑀧𑀦𑁆𑀦𑀸𑀬𑀁 𑀲𑀻𑀮𑀸𑀯𑀲𑁂𑀲𑀸𑀢𑀺 𑀅𑀦𑀯𑀲𑁂𑀲𑀸𑀧𑀢𑁆𑀢𑀺.

𑁩𑁫𑁪. 𑀧𑀸𑀴𑀺𑀬𑀁 𑀲𑀫𑀕𑁆𑀕𑀸𑀦𑀜𑁆𑀘 𑀅𑀦𑀼𑀕𑁆𑀕𑀳𑁄𑀢𑀺 𑀬𑀣𑀸 𑀲𑀫𑀕𑁆𑀕𑀸𑀦𑀁 𑀲𑀸𑀫𑀕𑁆𑀕𑀻 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀅𑀦𑀼𑀕𑁆𑀕𑀳𑀡𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁.

𑁩𑁫𑁫. 𑀲𑀺𑀬𑀸 ¶ 𑀦𑀼 𑀔𑁄𑀢𑀺 𑀲𑀫𑁆𑀪𑀯𑁂𑀬𑁆𑀬 𑀦𑀼 𑀔𑁄. 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀻𑀢𑀺 𑀅𑀢𑁆𑀢𑀦𑁄 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀏𑀢𑀲𑁆𑀫𑀺𑀁 𑀤𑀻𑀧𑀦𑁂 𑀅𑀬𑀼𑀢𑁆𑀢𑀤𑀺𑀝𑁆𑀞𑀺. 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀻𑀢𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸𑀧𑀦𑀸𑀤𑀺𑀦𑀸 𑀅𑀢𑁆𑀢𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀢𑀼𑀯𑀕𑁆𑀕𑀸𑀤𑀺𑀓𑀁 𑀲𑀗𑁆𑀖𑀁 𑀏𑀓𑀲𑀻𑀫𑀸𑀬𑀫𑁂𑀯 𑀞𑀺𑀢𑀢𑁄 ¶ 𑀘𑀢𑀼𑀯𑀕𑁆𑀕𑀸𑀤𑀺𑀲𑀗𑁆𑀖𑀢𑁄 𑀯𑀺𑀬𑁄𑀚𑁂𑀢𑁆𑀯𑀸 𑀏𑀓𑀓𑀫𑁆𑀫𑀸𑀤𑀺𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀲𑀗𑁆𑀖𑀪𑁂𑀤𑀓𑀭𑀡𑁂 𑀅𑀥𑀫𑁆𑀫𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀦𑁆𑀢𑀺 𑀬𑀸 𑀢𑀲𑁆𑀫𑀺𑀁 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀤𑀻𑀧𑀦𑁂 𑀅𑀢𑁆𑀢𑀦𑁄 𑀅𑀥𑀫𑁆𑀫𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀺𑀦𑀺𑀥𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 ‘‘𑀥𑀫𑁆𑀫𑁄 𑀏𑀯𑀸𑀬’’𑀦𑁆𑀢𑀺 𑀯𑀺𑀧𑀭𑀻𑀢𑀢𑁄 𑀧𑀓𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀻𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀪𑁂𑀤𑀦𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺𑀓𑁄. 𑀅𑀬𑀁 𑀧𑀦 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀤𑀻𑀧𑀦𑁂 𑀅𑀥𑀫𑁆𑀫𑀤𑀺𑀝𑁆𑀞𑀺𑀓𑁄 𑀳𑀼𑀢𑁆𑀯𑀸𑀧𑀺 𑀢𑀁 𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬 𑀓𑀭𑀡𑁂𑀦 𑀲𑀗𑁆𑀖𑀪𑁂𑀤𑀓𑁄 𑀅𑀢𑁂𑀓𑀺𑀘𑁆𑀙𑁄 𑀚𑀸𑀢𑁄. 𑀏𑀯𑀁 𑀪𑁂𑀤𑁂 𑀯𑁂𑀫𑀢𑀺𑀓𑁄𑀢𑀺 𑀇𑀫𑀲𑁆𑀲 𑀧𑀦 𑀪𑁂𑀤𑁂 𑀯𑁂𑀫𑀢𑀺𑀓𑀤𑀺𑀝𑁆𑀞𑀺𑀬𑀸 𑀯𑀺𑀦𑀺𑀥𑀸𑀦𑀫𑁆𑀧𑀺 𑀅𑀢𑁆𑀣𑀺. 𑀲𑁂𑀲𑀁 𑀲𑀫𑀫𑁂𑀯. 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀻𑀢𑀺 𑀅𑀬𑀁 𑀧𑀦 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬 𑀓𑀢𑀢𑁆𑀢𑀸 𑀲𑀗𑁆𑀖𑀪𑁂𑀤𑀓𑁄 𑀅𑀢𑁂𑀓𑀺𑀘𑁆𑀙𑁄 𑀚𑀸𑀢𑁄. 𑀲𑀼𑀓𑁆𑀓𑀧𑀓𑁆𑀔𑁂 𑀧𑀦 𑀲𑀩𑁆𑀩𑀢𑁆𑀣 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀤𑀻𑀧𑀦𑁂 𑀯𑀸 𑀪𑁂𑀤𑁂 𑀯𑀸 𑀥𑀫𑁆𑀫𑀤𑀺𑀝𑁆𑀞𑀺𑀢𑀸𑀬 𑀤𑀺𑀝𑁆𑀞𑀺𑀁 𑀅𑀯𑀺𑀦𑀺𑀥𑀸𑀬𑁂𑀯 𑀓𑀢𑀢𑁆𑀢𑀸 𑀲𑀗𑁆𑀖𑀪𑁂𑀤𑀓𑁄𑀧𑀺 𑀲𑀢𑁂𑀓𑀺𑀘𑁆𑀙𑁄 𑀚𑀸𑀢𑁄. 𑀢𑀲𑁆𑀫𑀸 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀤𑀻𑀧𑀦𑁂 𑀯𑀸 𑀲𑀗𑁆𑀖𑀪𑁂𑀤𑁂 𑀯𑀸 𑀉𑀪𑁄𑀲𑀼𑀧𑀺 𑀯𑀸 𑀅𑀥𑀫𑁆𑀫𑀤𑀺𑀝𑁆𑀞𑀺 𑀯𑀸 𑀯𑁂𑀫𑀢𑀺𑀓𑁄 𑀯𑀸 𑀳𑀼𑀢𑁆𑀯𑀸 𑀢𑀁 𑀤𑀺𑀝𑁆𑀞𑀺𑀁, 𑀯𑀺𑀫𑀢𑀺𑀜𑁆𑀘 𑀯𑀺𑀦𑀺𑀥𑀸𑀬 ‘‘𑀥𑀫𑁆𑀫𑁄’’𑀢𑀺 𑀧𑀓𑀸𑀲𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀸𑀮𑀺𑀧𑀜𑁆𑀳𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑁄

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 ¶ ¶ 𑀧𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀆𑀢𑀧𑁂 𑀧𑀢𑁆𑀣𑀭𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄𑀢𑀺 𑀯𑀦𑁆𑀤𑀦𑀢𑁆𑀣𑀸𑀬 𑀯𑀲𑁆𑀲𑀁 𑀧𑀼𑀘𑁆𑀙𑀦𑁂𑀦 𑀦𑀯𑀓𑁄 𑀲𑀬𑀫𑁂𑀯 𑀯𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀁. 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄𑀢𑀺 𑀑𑀮𑁄𑀓𑁂𑀢𑀩𑁆𑀩𑁄.

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁫𑁯. ‘‘𑀬𑀣𑀸𑀪𑀸𑀕’’𑀦𑁆𑀢𑀺 𑀞𑀧𑀺𑀢𑀝𑁆𑀞𑀸𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀤𑀺𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀤𑀸𑀦𑀫𑁆𑀧𑀺 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀧𑁆𑀨𑁄𑀝𑁂𑀢𑁆𑀯𑀸 𑀳𑀺 𑀧𑀢𑁆𑀣𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁨. 𑀧𑀜𑁆𑀘𑀫𑁂 𑀦𑀺𑀲𑀺𑀦𑁆𑀦𑁂𑀢𑀺 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂. 𑀦 𑀫𑀳𑀸𑀣𑁂𑀭𑀲𑁆𑀲 𑀪𑀸𑀭𑁄 𑀳𑁄𑀢𑀻𑀢𑀺 𑀅𑀦𑀼𑀫𑁄𑀤𑀓𑀁 𑀆𑀕𑀫𑁂𑀢𑀼𑀁 𑀦 𑀪𑀸𑀭𑁄. 𑀅𑀚𑁆𑀛𑀺𑀝𑁆𑀞𑁄𑀯 𑀆𑀕𑀫𑁂𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸 𑀅𑀚𑁆𑀛𑀺𑀝𑁆𑀞𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀦𑀼𑀫𑁄𑀤𑀦𑁆𑀢𑁂𑀬𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁪. 𑀫𑀦𑀼𑀲𑁆𑀲𑀸𑀦𑀁 ¶ 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀫𑀦𑀼𑀲𑁆𑀲𑀸 𑀲𑀧𑀼𑀢𑁆𑀢𑀤𑀸𑀭𑀸 𑀆𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺. 𑀆𑀲𑀦𑁂𑀲𑀼 𑀲𑀢𑀻𑀢𑀺 𑀦𑀺𑀲𑀻𑀤𑀦𑀝𑁆𑀞𑀸𑀦𑁂𑀲𑀼 ¶ 𑀲𑀦𑁆𑀢𑁂𑀲𑀼. 𑀇𑀤𑀁, 𑀪𑀦𑁆𑀢𑁂, 𑀆𑀲𑀦𑀁 𑀉𑀘𑁆𑀘𑀦𑁆𑀢𑀺 𑀆𑀲𑀦𑁆𑀦𑁂 𑀲𑀫𑀪𑀽𑀫𑀺𑀪𑀸𑀕𑁂 𑀧𑀜𑁆𑀜𑀢𑁆𑀢𑀁 𑀣𑁂𑀭𑀸𑀲𑀦𑁂𑀦 𑀲𑀫𑀓𑀁 𑀆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀣𑁂𑀭𑀸𑀲𑀦𑀢𑁄 𑀧𑀦 𑀉𑀘𑁆𑀘𑀢𑀭𑁂 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀤𑀺 𑀢𑀁 𑀆𑀲𑀦𑁆𑀦𑀫𑁆𑀧𑀺 𑀦𑀻𑀘𑀢𑀭𑀁 𑀳𑁄𑀢𑀺, 𑀅𑀦𑀸𑀧𑀼𑀘𑁆𑀙𑀸𑀧𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀣𑁂𑀭𑀲𑁆𑀲𑁂𑀯 𑀆𑀧𑀢𑁆𑀢𑀻𑀢𑀺 𑀆𑀲𑀦𑁂𑀦 𑀧𑀝𑀺𑀩𑀸𑀳𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺. 𑀅𑀯𑀢𑁆𑀣𑀭𑀺𑀢𑁆𑀯𑀸𑀢𑀺 𑀧𑀸𑀭𑀼𑀢𑀲𑀗𑁆𑀖𑀸𑀝𑀺𑀁 𑀅𑀯𑀢𑁆𑀣𑀭𑀺𑀢𑁆𑀯𑀸, 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 ‘‘𑀉𑀪𑁄𑀳𑀺 𑀳𑀢𑁆𑀣𑁂𑀳𑀺…𑀧𑁂… 𑀑𑀤𑀦𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀇𑀤𑀁 𑀳𑀢𑁆𑀣𑀢𑀮𑁂 𑀯𑀸 𑀧𑀘𑁆𑀙𑀺𑀧𑀺𑀝𑁆𑀞𑀺𑀆𑀤𑀺𑀤𑀼𑀲𑁆𑀲𑀡𑁆𑀞𑀺𑀢𑀸𑀥𑀸𑀭𑁂 𑀯𑀸 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀑𑀤𑀦𑀲𑁆𑀲 𑀕𑀳𑀡𑀓𑀸𑀮𑁂 𑀧𑀢𑁆𑀢𑀲𑁆𑀲 𑀅𑀧𑀢𑀦𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀲𑀼𑀲𑀚𑁆𑀚𑀺𑀢𑁂 𑀧𑀦 𑀆𑀥𑀸𑀭𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀢𑀁 𑀧𑀭𑀸𑀫𑀲𑀺𑀢𑁆𑀯𑀸𑀧𑀺 𑀑𑀤𑀦𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺…𑀧𑁂… 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀳𑀢𑁆𑀣𑀥𑁄𑀯𑀦𑀉𑀤𑀓𑀦𑁆𑀢𑀺 𑀪𑁄𑀚𑀦𑀸𑀯𑀲𑀸𑀦𑁂 𑀉𑀤𑀓𑀁. 𑀢𑁂𑀦𑀸𑀳 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀸 𑀥𑁄𑀯𑀺𑀢𑀩𑁆𑀩𑀸’’𑀢𑀺. 𑀢𑁂𑀦 𑀧𑀭𑀺𑀬𑁄𑀲𑀸𑀦𑁂 𑀥𑁄𑀯𑀦𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀪𑁄𑀚𑀦𑀦𑁆𑀢𑀭𑁂 𑀧𑀦 𑀧𑀸𑀦𑀻𑀬𑀧𑀺𑀯𑀦𑀸𑀤𑀺𑀦𑀸 𑀦𑀬𑁂𑀦 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀸 𑀦 𑀥𑁄𑀯𑀺𑀢𑀩𑁆𑀩𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 𑀧𑀼𑀭𑀺𑀫𑀯𑀘𑀦𑁂𑀦 𑀦 𑀲𑀫𑁂𑀢𑀺 𑀧𑀭𑀺𑀬𑁄𑀲𑀸𑀦𑁂 𑀉𑀤𑀓𑀲𑁆𑀲𑁂𑀯 ‘‘𑀳𑀢𑁆𑀣𑀥𑁄𑀯𑀦𑀉𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀘𑁂 𑀫𑀦𑀼𑀲𑁆𑀲𑀸 𑀥𑁄𑀯𑀣, 𑀪𑀦𑁆𑀢𑁂𑀢𑀺𑀆𑀤𑀺 𑀦𑀺𑀝𑁆𑀞𑀺𑀢𑀪𑀢𑁆𑀢𑀁 𑀦𑀺𑀲𑀺𑀦𑁆𑀦𑀁 𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀥𑀼𑀭𑁂 𑀤𑁆𑀯𑀸𑀭𑀲𑀫𑀻𑀧𑁂.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁬𑁬. 𑀧𑀸𑀴𑀺𑀬𑀁 𑀞𑀸𑀧𑁂𑀢𑀺 𑀯𑀸𑀢𑀺 𑀢𑀺𑀝𑁆𑀞 𑀪𑀦𑁆𑀢𑁂𑀢𑀺 𑀯𑀤𑀦𑁆𑀢𑀺.

𑁩𑁬𑁭. 𑀅𑀢𑁆𑀣𑀺, 𑀪𑀦𑁆𑀢𑁂, 𑀦𑀓𑁆𑀔𑀢𑁆𑀢𑀧𑀤𑀸𑀦𑀻𑀢𑀺 𑀦𑀓𑁆𑀔𑀢𑁆𑀢𑀧𑀤𑀯𑀺𑀲𑀬𑀸𑀦𑀺 𑀜𑀸𑀢𑀸𑀦𑀺 𑀅𑀢𑁆𑀣𑀺, 𑀅𑀲𑁆𑀲𑀬𑀼𑀚𑀸𑀤𑀺𑀦𑀓𑁆𑀔𑀢𑁆𑀢𑀁 𑀚𑀸𑀦𑀸𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦 𑀚𑀸𑀦𑀸𑀫, 𑀆𑀯𑀼𑀲𑁄’’𑀢𑀺. 𑀅𑀢𑁆𑀣𑀺, 𑀪𑀦𑁆𑀢𑁂 ¶ , 𑀤𑀺𑀲𑀸𑀪𑀸𑀕𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀦𑀚𑁆𑀚, 𑀪𑀦𑁆𑀢𑁂, 𑀬𑀼𑀢𑁆𑀢𑀦𑁆𑀢𑀺 𑀓𑁂𑀦 𑀦𑀓𑁆𑀔𑀢𑁆𑀢𑁂𑀦 𑀘𑀦𑁆𑀤𑁄 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁩𑁬𑁯. 𑀅𑀗𑁆𑀕𑀡𑁂𑀢𑀺 ¶ 𑀅𑀩𑁆𑀪𑁄𑀓𑀸𑀲𑁂. 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀉𑀤𑁆𑀤𑁂𑀲𑀤𑀸𑀦𑀸𑀤𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩𑁭𑁪. 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄𑀯 𑀦𑀺𑀭𑀦𑁆𑀢𑀭𑀕𑀫𑀦𑀢𑁆𑀣𑀸𑀬. 𑀊𑀳𑀤𑀺𑀢𑀸𑀢𑀺 𑀏𑀢𑁆𑀣 𑀳𑀤-𑀥𑀸𑀢𑀼𑀲𑁆𑀲 𑀯𑀘𑁆𑀘𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀢𑀸𑀬𑀸𑀳 ‘‘𑀩𑀳𑀺 𑀯𑀘𑁆𑀘𑀫𑀓𑁆𑀔𑀺𑀢𑀸’’𑀢𑀺.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁄

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁩. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 ¶ ¶ 𑀧𑀸𑀴𑀺𑀬𑀁 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀑𑀤𑀸𑀢𑀤𑀺𑀲𑀸𑀫𑀼𑀔𑀢𑀸𑀬 𑀢𑀼𑀝𑁆𑀞𑀫𑀼𑀔𑀺𑀬𑀸. ‘‘𑀉𑀤𑁆𑀥𑀲𑁆𑀢𑀁 𑀅𑀭𑀼𑀡’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀁 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀓𑀭𑀡𑀧𑀝𑀺𑀓𑁆𑀔𑁂𑀧𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀧𑀜𑁆𑀜𑀢𑁆𑀢𑀢𑁆𑀢𑀸 𑀣𑁂𑀭𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀁 𑀢𑀼𑀡𑁆𑀳𑀻𑀪𑀽𑀢𑁄𑀯 𑀢𑀺𑀬𑀸𑀫𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀻𑀢𑀺? 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀸𑀤𑀺𑀲𑀁𑀯𑀸𑀲𑀓𑀭𑀡𑀲𑁆𑀲 𑀲𑀸𑀯𑀚𑁆𑀚𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀁 𑀓𑀸𑀢𑀼𑀁, 𑀢𑀜𑁆𑀘 𑀆𑀬𑀢𑀺𑀁 𑀪𑀺𑀓𑁆𑀔𑀽𑀦𑀁 𑀢𑀣𑀸𑀧𑀝𑀺𑀧𑀚𑁆𑀚𑀦𑀢𑁆𑀣𑀁 𑀲𑀺𑀓𑁆𑀔𑀸𑀧𑀤𑀁 𑀜𑀸𑀧𑁂𑀢𑀼𑀁. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀅𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀧𑀼𑀕𑁆𑀕𑀮𑀁 𑀢𑀲𑁆𑀲 𑀲𑀫𑁆𑀫𑀼𑀔𑀸 ‘𑀅𑀧𑀭𑀺𑀲𑀼𑀤𑁆𑀥𑁄’𑀢𑀺 𑀯𑀢𑁆𑀢𑀼𑀁 𑀫𑀳𑀸𑀓𑀭𑀼𑀡𑀸𑀬 𑀅𑀯𑀺𑀲𑀳𑀦𑁆𑀢𑁄 𑀪𑀕𑀯𑀸 𑀢𑀣𑀸 𑀦𑀺𑀲𑀻𑀤𑀻’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁 𑀧𑀘𑁆𑀙𑀸𑀧𑀺 𑀅𑀯𑀢𑁆𑀢𑀩𑁆𑀩𑀢𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦𑀸𑀧𑀺 𑀢𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀩𑀳𑀺 𑀦𑀻𑀳𑀭𑀡𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯𑁂𑀢𑁆𑀣 𑀓𑀸𑀭𑀡𑀦𑁆𑀢𑀺. 𑀢𑁂𑀦𑁂𑀯 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁮.𑁨𑁦; 𑀘𑀽𑀴𑀯. 𑁩𑁮𑁬; 𑀉𑀤𑀸. 𑁪𑁫) 𑀯𑀢𑁆𑀯𑀸 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁮𑁬) 𑀲𑀸𑀧𑀢𑁆𑀢𑀺𑀓𑀧𑀭𑀺𑀲𑀸𑀬 𑀓𑀢𑁆𑀢𑀩𑁆𑀩𑀯𑀺𑀥𑀺 𑀤𑀲𑁆𑀲𑀺𑀢𑁄.

𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀦𑁆𑀢𑀺 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀳𑀺 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀁, 𑀅𑀢𑁆𑀢𑀦𑀸 𑀯𑀸 ‘‘𑀫𑀫 𑀅𑀦𑀸𑀘𑀸𑀭𑀁 𑀏𑀢𑁂 𑀚𑀸𑀦𑀦𑁆𑀢𑀻’’𑀢𑀺 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀁. 𑀲𑀫𑀡𑀯𑁂𑀲𑀥𑀸𑀭𑀡𑁂𑀦, 𑀲𑀗𑁆𑀖𑀺𑀓𑀧𑀘𑁆𑀘𑀬𑀪𑀸𑀕𑀕𑀳𑀡𑀸𑀤𑀺𑀦𑀸 𑀘 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 ‘‘𑀅𑀳𑀁 𑀲𑀫𑀡𑁄’’𑀢𑀺 𑀧𑀝𑀺𑀜𑁆𑀜𑀁 𑀅𑀤𑁂𑀦𑁆𑀢𑁄𑀧𑀺 𑀅𑀢𑁆𑀣𑀢𑁄 𑀤𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀫𑀡𑀧𑀝𑀺𑀜𑁆𑀜𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀼𑀢𑀦𑁆𑀢𑀺 𑀓𑀺𑀮𑁂𑀲𑀸𑀯𑀲𑁆𑀲𑀦𑁂𑀦 𑀢𑀺𑀦𑁆𑀢𑀁. 𑀲𑀜𑁆𑀚𑀸𑀢𑀤𑀼𑀲𑁆𑀲𑀺𑀮𑁆𑀬𑀓𑀘𑀯𑀭𑀢𑁆𑀢𑀸 𑀓𑀲𑀫𑁆𑀩𑀼𑀚𑀸𑀢𑀁 ¶ , 𑀅𑀲𑀸𑀭𑀢𑀸𑀬 𑀯𑀸 𑀓𑀲𑀫𑁆𑀩𑀼 𑀯𑀺𑀬 𑀚𑀸𑀢𑀁. 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸𑀢𑀺 𑀤𑁆𑀯𑀸𑀭𑀲𑀸𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀸𑀧𑁂𑀢𑁆𑀯𑀸.

𑁩𑁮𑁪. 𑀫𑀳𑀸𑀲𑀫𑀼𑀤𑁆𑀤𑁂 ¶ 𑀅𑀪𑀺𑀭𑀫𑀦𑁆𑀢𑀻𑀢𑀺 𑀩𑀳𑀼𑀲𑁄 𑀤𑀲𑁆𑀲𑀦𑀧𑀯𑀺𑀲𑀦𑀸𑀤𑀺𑀦𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺. 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄𑀢𑀺 𑀙𑀺𑀦𑁆𑀦𑀢𑀝𑀫𑀳𑀸𑀲𑁄𑀩𑁆𑀪𑁄 𑀯𑀺𑀬 𑀦 𑀆𑀤𑀺𑀢𑁄𑀯 𑀦𑀺𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀞𑀺𑀢𑀥𑀫𑁆𑀫𑁄𑀢𑀺 𑀅𑀯𑀝𑁆𑀞𑀺𑀢𑀲𑀪𑀸𑀯𑁄. 𑀧𑀽𑀭𑀢𑁆𑀢𑀦𑁆𑀢𑀺 𑀧𑀼𑀡𑁆𑀡𑀢𑁆𑀢𑀁. 𑀦𑀸𑀕𑀸𑀢𑀺 𑀲𑀧𑁆𑀧𑀚𑀸𑀢𑀺𑀓𑀸.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁮𑁬. 𑀉𑀤𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀧𑀸𑀴𑀺𑀬𑀸 𑀅𑀯𑀢𑁆𑀯𑀸 𑀢𑀫𑀢𑁆𑀣𑀁 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀉𑀤𑀸𑀳𑀝𑀫𑁆𑀧𑀺 𑀉𑀤𑀸𑀳𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀜𑀢𑁆𑀢𑀺𑀆𑀭𑀫𑁆𑀪𑀢𑁄 𑀧𑀼𑀩𑁆𑀩𑁂 𑀯𑀸 𑀜𑀢𑁆𑀢𑀺𑀦𑀺𑀝𑁆𑀞𑀸𑀦𑀢𑁄 𑀧𑀘𑁆𑀙𑀸 𑀯𑀸.

𑁩𑁮𑁭. 𑀓𑀢𑀜𑁆𑀘 𑀅𑀓𑀢𑀜𑁆𑀘 𑀉𑀪𑀬𑀁 𑀕𑀳𑁂𑀢𑁆𑀯𑀸𑀢𑀺 𑀬𑀲𑁆𑀲 𑀓𑀢𑀸𑀧𑀺 𑀅𑀢𑁆𑀣𑀺 𑀅𑀓𑀢𑀸𑀧𑀺. 𑀢𑀲𑁆𑀲 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸. 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀦𑁆𑀢𑀺 𑀥𑀫𑁆𑀫𑀺𑀓𑀁 𑀲𑀫𑀕𑁆𑀕𑀓𑀫𑁆𑀫𑀁. 𑀧𑀘𑁆𑀘𑀸𑀤𑀺𑀬𑀢𑀻𑀢𑀺 𑀉𑀓𑁆𑀓𑁄𑀝𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀼𑀦 𑀓𑀸𑀢𑀼𑀁 𑀆𑀤𑀺𑀬𑀢𑀺.

𑁩𑁮𑁮. 𑀆𑀓𑀸𑀭𑀸𑀤𑀺𑀲𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀓𑀸𑀭𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀦𑀸𑀫𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸𑀤𑀺𑀯𑀡𑁆𑀡𑀦𑀸

𑁩𑁯𑁮. 𑀧𑀼𑀦 𑀘𑁄𑀤𑁂𑀢𑀼𑀁 𑀅𑀢𑁆𑀢𑀦𑀸 𑀆𑀤𑀸𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀁 𑀅𑀥𑀺𑀓𑀭𑀡𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀲𑀸𑀲𑀦𑀁 𑀲𑁄𑀥𑁂𑀢𑀼𑀓𑀸𑀫𑁄’’𑀢𑀺𑀆𑀤𑀺. 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀯𑀲𑁆𑀲𑀓𑀸𑀮𑁄. 𑀲𑁄𑀧𑀺 𑀳𑀺 𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀓𑀸𑀮𑁄 𑀯𑀺𑀬 𑀅𑀥𑀺𑀓𑀭𑀡𑀯𑀽𑀧𑀲𑀫𑀢𑁆𑀣𑀁 𑀮𑀚𑁆𑀚𑀺𑀧𑀭𑀺𑀲𑀸𑀬 𑀤𑀽𑀭𑀢𑁄 𑀆𑀦𑀬𑀦𑀲𑁆𑀲, 𑀆𑀕𑀢𑀸𑀦𑀜𑁆𑀘 𑀧𑀺𑀡𑁆𑀟𑀸𑀬 𑀘𑀭𑀡𑀸𑀤𑀺𑀲𑀫𑀸𑀘𑀸𑀭𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀅𑀓𑀸𑀮𑁄 𑀏𑀯.

𑀲𑀫𑀦𑀼𑀲𑁆𑀲𑀭𑀡𑀓𑀭𑀡𑀦𑁆𑀢𑀺 ¶ 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀧𑀻𑀢𑀺𑀧𑀸𑀫𑁄𑀚𑁆𑀚𑀚𑀦𑀦𑀢𑁄 𑀅𑀦𑀼𑀲𑁆𑀲𑀭𑀡𑀼𑀧𑁆𑀧𑀸𑀤𑀓𑀁. 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲…𑀧𑁂… 𑀲𑀁𑀯𑀢𑁆𑀢𑀢𑀻𑀢𑀺 𑀏𑀢𑁆𑀣 𑀬𑀣𑀸 ¶ 𑀅𑀩𑁆𑀪𑀳𑀺𑀫𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀸𑀦𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀲𑁆𑀲𑀺𑀭𑀻𑀓𑀢𑀸 𑀳𑁄𑀢𑀺, 𑀏𑀯𑀫𑀲𑁆𑀲𑀸𑀧𑀺 𑀘𑁄𑀤𑀓𑀲𑁆𑀲 𑀧𑀸𑀧𑀧𑀼𑀕𑁆𑀕𑀮𑀽𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦 𑀲𑀲𑁆𑀲𑀺𑀭𑀻𑀓𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁯𑁯. 𑀅𑀥𑀺𑀕𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀛𑀸𑀦𑀁.

𑁪𑁦𑁦-𑁧. ‘‘𑀤𑁄𑀲𑀦𑁆𑀢𑀭𑁄’’𑀢𑀺 𑀏𑀢𑁆𑀣 𑀅𑀦𑁆𑀢𑀭-𑀲𑀤𑁆𑀤𑁄 𑀘𑀺𑀢𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸’’𑀢𑀺.

𑀓𑀸𑀭𑀼𑀜𑁆𑀜𑀁 𑀦𑀸𑀫 𑀓𑀭𑀼𑀡𑀸 𑀏𑀯𑀸𑀢𑀺 𑀆𑀳 ‘‘𑀓𑀸𑀭𑀼𑀜𑁆𑀜𑀢𑀸𑀢𑀺 𑀓𑀭𑀼𑀡𑀸𑀪𑀸𑀯𑁄’’𑀢𑀺. 𑀓𑀭𑀼𑀡𑀦𑁆𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀤𑀢𑀺. 𑀢𑀣𑀸 𑀫𑁂𑀢𑁆𑀢𑀦𑁆𑀢𑀺.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁄

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦𑁩. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 ¶ ¶ ‘‘𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸’’𑀢𑀺 𑀇𑀤𑀁 𑀧𑀜𑁆𑀘𑀯𑀲𑁆𑀲𑀲𑀢𑀢𑁄 𑀉𑀤𑁆𑀥𑀁 𑀲𑀤𑁆𑀥𑀫𑁆𑀫𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀓𑀸𑀭𑀡𑀤𑀲𑁆𑀲𑀦𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺𑀆𑀤𑀺 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀫𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀢𑁂𑀯𑀺𑀚𑁆𑀚𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀧𑀸𑀢𑀺𑀫𑁄𑀓𑁆𑀔𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁧) 𑀯𑀼𑀢𑁆𑀢𑀁. 𑀅𑀗𑁆𑀕𑀼𑀢𑁆𑀢𑀭 (𑀅. 𑀦𑀺. 𑀅𑀝𑁆𑀞. 𑁩.𑁮.𑁫𑁧) -𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀲𑀼𑀧𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧𑁫𑁬) 𑀅𑀜𑁆𑀜𑀣𑀸𑀯 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀫𑁆𑀧𑀺 𑀢𑀁𑀢𑀁𑀪𑀸𑀡𑀓𑀸𑀦𑀁 𑀫𑀢𑁂𑀦 𑀮𑀺𑀔𑀺𑀢𑀲𑀻𑀳𑀴𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑀫𑁂𑀯 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑁂𑀦 𑀮𑀺𑀔𑀺𑀢𑀁 𑀈𑀤𑀺𑀲𑁂 𑀓𑀣𑀸𑀯𑀺𑀭𑁄𑀥𑁂 𑀲𑀸𑀲𑀦𑀧𑀭𑀺𑀳𑀸𑀦𑀺𑀬𑀸 𑀅𑀪𑀸𑀯𑀢𑁄, 𑀲𑁄𑀥𑀦𑀼𑀧𑀸𑀬𑀸𑀪𑀸𑀯𑀸 𑀘. 𑀧𑀭𑀫𑀢𑁆𑀣𑀯𑀺𑀭𑁄𑀥𑁄 𑀏𑀯 𑀳𑀺 𑀲𑀼𑀢𑁆𑀢𑀸𑀤𑀺𑀦𑀬𑁂𑀦 𑀲𑁄𑀥𑀦𑀻𑀬𑁄, 𑀦 𑀓𑀣𑀸𑀫𑀕𑁆𑀕𑀯𑀺𑀭𑁄𑀥𑁄𑀢𑀺.

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁪𑁦𑁪-𑁮. 𑀧𑀸𑀴𑀺𑀬𑀁 𑀬𑀤𑀕𑁆𑀕𑁂𑀦𑀸𑀢𑀺 𑀬𑀲𑁆𑀫𑀺𑀁 𑀤𑀺𑀯𑀲𑁂. 𑀢𑀤𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂. 𑀯𑀺𑀫𑀸𑀦𑁂𑀢𑁆𑀯𑀸𑀢𑀺 𑀅𑀯𑀫𑀸𑀦𑀁 𑀓𑀢𑁆𑀯𑀸.

𑁪𑁧𑁦-𑁧. 𑀆𑀧𑀢𑁆𑀢𑀺𑀕𑀸𑀫𑀺𑀦𑀺𑀬𑁄𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸𑀬𑁄. 𑀓𑀫𑁆𑀫𑀯𑀺𑀪𑀗𑁆𑀕𑁂𑀢𑀺 𑀧𑀭𑀺𑀯𑀸𑀭𑁂 𑀓𑀫𑁆𑀫𑀯𑀺𑀪𑀗𑁆𑀕𑁂 (𑀧𑀭𑀺. 𑁪𑁮𑁨 𑀆𑀤𑀬𑁄).

𑁪𑁧𑁩-𑁫. 𑀧𑀸𑀴𑀺𑀬𑀁 ¶ 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀪𑀺𑀓𑁆𑀔𑀼𑀦𑀻𑀳𑀺. 𑀦 𑀆𑀭𑁄𑀘𑁂𑀦𑁆𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀦 𑀆𑀭𑁄𑀘𑁂𑀦𑁆𑀢𑀺.

𑁪𑁧𑁬. 𑀤𑀼𑀲𑁆𑀲𑀯𑁂𑀡𑀺𑀬𑀸𑀢𑀺 𑀅𑀦𑁂𑀓𑀤𑀼𑀲𑁆𑀲𑀧𑀝𑁆𑀝𑁂 𑀏𑀓𑀢𑁄 𑀓𑀢𑁆𑀯𑀸 𑀓𑀢𑀯𑁂𑀡𑀺𑀬𑀸.

𑁪𑁧𑁭. 𑀯𑀺𑀲𑁂𑀲𑀓𑀦𑁆𑀢𑀺 ¶ 𑀧𑀢𑁆𑀢𑀮𑁂𑀔𑀸𑀤𑀺𑀯𑀡𑁆𑀡𑀯𑀺𑀲𑁂𑀲𑀁. 𑀧𑀓𑀺𑀡𑀦𑁆𑀢𑀻𑀢𑀺 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀦𑀫𑀦𑀓𑀦𑁆𑀢𑀺 𑀧𑀸𑀲𑀼𑀓𑀝𑁆𑀞𑀺𑀦𑀫𑀦𑀓𑀩𑀦𑁆𑀥𑀦𑀁.

𑁪𑁨𑁨-𑁫. 𑀲𑀁𑀯𑁂𑀮𑁆𑀮𑀺𑀬𑀦𑁆𑀢𑀺 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀸𑀲𑀦𑀁. 𑀢𑀬𑁄 𑀦𑀺𑀲𑁆𑀲𑀬𑁂𑀢𑀺 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀲𑁆𑀲 𑀢𑀸𑀲𑀁 𑀅𑀮𑀩𑁆𑀪𑀦𑀢𑁄 𑀯𑀼𑀢𑁆𑀢𑀁.

𑁪𑁨𑁬-𑁮. 𑀅𑀝𑁆𑀞𑁂𑀯 𑀪𑀺𑀓𑁆𑀔𑀼𑀦𑀺𑀬𑁄 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑀦𑁆𑀢𑀻𑀢𑀺 𑀅𑀝𑁆𑀞 𑀪𑀺𑀓𑁆𑀔𑀼𑀦𑀺𑀬𑁄 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸𑀯 𑀕𑀡𑁆𑀳𑀦𑁆𑀢𑀺𑀬𑁄 𑀆𑀕𑀢𑀧𑀝𑀺𑀧𑀸𑀝𑀺𑀁 𑀧𑀝𑀺𑀩𑀸𑀳𑀦𑁆𑀢𑀺, 𑀦𑀸𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑁪𑁩𑁦. 𑀪𑀺𑀓𑁆𑀔𑀼𑀤𑀽𑀢𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸 𑀤𑀽𑀢𑀪𑀽𑀢𑁂𑀦. 𑀲𑀺𑀓𑁆𑀔𑀫𑀸𑀦𑀤𑀽𑀢𑁂𑀦𑀸𑀢𑀺 𑀲𑀺𑀓𑁆𑀔𑀫𑀸𑀦𑀸𑀬 𑀤𑀽𑀢𑀸𑀬.

𑁪𑁩𑁧. 𑀦 𑀲𑀫𑁆𑀫𑀢𑀻𑀢𑀺 𑀦𑀧𑁆𑀧𑀳𑁄𑀢𑀺. 𑀦𑀯𑀓𑀫𑁆𑀫𑀦𑁆𑀢𑀺 ‘‘𑀦𑀯𑀓𑀫𑁆𑀫𑀁 𑀓𑀢𑁆𑀯𑀸 𑀯𑀲𑀢𑀽’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀺𑀓𑀪𑀽𑀫𑀺𑀬𑀸 𑀑𑀓𑀸𑀲𑀤𑀸𑀦𑀁.

𑁪𑁩𑁨-𑁬. 𑀲𑀦𑁆𑀦𑀺𑀲𑀺𑀦𑁆𑀦𑀕𑀩𑁆𑀪𑀸𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀕𑀩𑁆𑀪𑀸. 𑀫𑀳𑀺𑀮𑀸𑀢𑀺𑀢𑁆𑀣𑁂𑀢𑀺 𑀇𑀢𑁆𑀣𑀻𑀦𑀁 𑀲𑀸𑀥𑀸𑀭𑀡𑀢𑀺𑀢𑁆𑀣𑁂.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁄

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸

𑁪𑁩𑁭. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 ¶ ¶ 𑀧𑀸𑀴𑀺𑀬𑀁 ‘‘𑀅𑀧𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’’𑀢𑀺 𑀇𑀤𑀁 𑀣𑁂𑀭𑁄 𑀲𑀬𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀅𑀢𑁆𑀢𑀦𑀸 𑀲𑀳𑀕𑀢𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀜𑀸𑀧𑀦𑀢𑁆𑀣𑀫𑁂𑀯, 𑀲𑀼𑀪𑀤𑁆𑀤𑀲𑁆𑀲 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀯𑀘𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀜𑁆𑀜𑀸𑀧𑀦𑀢𑁆𑀣𑀜𑁆𑀘 𑀏𑀯𑀁 𑀧𑀼𑀘𑁆𑀙𑀺. 𑀲𑀼𑀪𑀤𑁆𑀤𑁄 𑀳𑀺 𑀓𑀼𑀲𑀺𑀦𑀸𑀭𑀸𑀬𑀁 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑀸𑀬 𑀔𑀢𑁆𑀢𑀺𑀬𑀸𑀤𑀺𑀕𑀳𑀝𑁆𑀞𑀧𑀭𑀺𑀲𑀸𑀬 𑀫𑀚𑁆𑀛𑁂 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄𑀧𑀺 𑀪𑀬𑁂𑀦 𑀧𑀳𑀝𑁆𑀞𑀸𑀓𑀸𑀭𑀁 𑀯𑀸𑀘𑀸𑀬 𑀧𑀓𑀸𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀇𑀥𑁂𑀯 𑀧𑀦 𑀯𑀺𑀚𑀦𑀧𑀤𑁂𑀲𑁂 𑀲𑀼𑀢𑁆𑀯𑀸 𑀬𑀣𑀸𑀚𑁆𑀛𑀸𑀲𑀬𑀁 𑀅𑀢𑁆𑀢𑀦𑁄 𑀧𑀸𑀧𑀮𑀤𑁆𑀥𑀺𑀁 𑀧𑀓𑀸𑀲𑁂𑀲𑁆𑀲𑀢𑀺, 𑀢𑀢𑁄 𑀢𑀫𑁂𑀯 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽 𑀲𑀫𑀼𑀲𑁆𑀲𑀸𑀳𑁂𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀸𑀭𑁂𑀢𑁆𑀯𑀸 𑀏𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀲𑁆𑀲, 𑀅𑀜𑁆𑀜𑁂𑀲𑀜𑁆𑀘 𑀈𑀤𑀺𑀲𑀸𑀦𑀁 𑀫𑀦𑁄𑀭𑀣𑀯𑀺𑀖𑀸𑀢𑀁, 𑀲𑀸𑀲𑀦𑀝𑁆𑀞𑀺𑀢𑀺𑀜𑁆𑀘 𑀓𑀭𑀺𑀲𑁆𑀲𑀸𑀫𑀻𑀢𑀺 𑀚𑀸𑀦𑀦𑁆𑀢𑁄𑀯 𑀢𑀁 𑀧𑀼𑀘𑁆𑀙𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀣𑁂𑀭𑁄 ‘‘𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀪𑀤𑁆𑀤𑀯𑀘𑀦𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀸𑀧𑁂𑀲𑀺. 𑀦𑀸𑀦𑀸𑀪𑀸𑀯𑁄𑀢𑀺 𑀲𑀭𑀻𑀭𑁂𑀦 𑀦𑀸𑀦𑀸𑀤𑁂𑀲𑀪𑀸𑀯𑁄, 𑀯𑀺𑀧𑁆𑀧𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀯𑀺𑀦𑀸𑀪𑀸𑀯𑁄𑀢𑀺 𑀫𑀭𑀡𑁂𑀦 𑀯𑀺𑀬𑀼𑀚𑁆𑀚𑀦𑀁. 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀪𑀯𑀦𑁆𑀢𑀭𑀽𑀧𑀕𑀫𑀦𑁂𑀦 𑀅𑀜𑁆𑀜𑀸𑀓𑀸𑀭𑀧𑁆𑀧𑀢𑁆𑀢𑀺.

𑁪𑁪𑁧. ‘‘𑀆𑀓𑀗𑁆𑀔𑀫𑀸𑀦𑁄…𑀧𑁂… 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 𑀇𑀤𑀁 𑀪𑀕𑀯𑀸 𑀫𑀬𑀸 ‘‘𑀆𑀓𑀗𑁆𑀔𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀲𑀫𑀽𑀳𑀦𑀺𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑀸, 𑀲𑀫𑀽𑀳𑀦𑁂 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀥𑀫𑁆𑀫𑀲𑀗𑁆𑀕𑀳𑀓𑀸 𑀪𑀺𑀓𑁆𑀔𑀽 ‘‘𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀲𑁆𑀲𑀸𑀫, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀧𑀼𑀦 ‘‘𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀸𑀬 𑀅𑀓𑀼𑀧𑁆𑀧𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑁂𑀢𑁆𑀯𑀸 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀅𑀧𑁆𑀧𑀝𑀺𑀩𑀸𑀳𑀺𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑁄𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀫𑀳𑀸𑀣𑁂𑀭𑀸𑀧𑀺 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀁𑀲𑀼.

𑀕𑀺𑀳𑀺𑀕𑀢𑀸𑀦𑀻𑀢𑀺 ¶ 𑀕𑀺𑀳𑀻𑀲𑀼 𑀕𑀢𑀸𑀦𑀺. 𑀔𑀢𑁆𑀢𑀺𑀬𑀫𑀳𑀸𑀲𑀸𑀭𑀸𑀤𑀺𑀕𑀺𑀳𑀻𑀳𑀺 𑀜𑀸𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀺𑀢𑀓𑀥𑀽𑀫𑀓𑀸𑀮𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀪𑀽𑀢𑁄 𑀏𑀢𑀲𑁆𑀲𑀸𑀢𑀺 𑀥𑀽𑀫𑀓𑀸𑀮𑀺𑀓𑀁.

𑁪𑁪𑁩. 𑀑𑀴𑀸𑀭𑀺𑀓𑁂 ¶ 𑀦𑀺𑀫𑀺𑀢𑁆𑀢𑁂 𑀓𑀭𑀺𑀬𑀫𑀸𑀦𑁂𑀧𑀻𑀢𑀺 ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺 𑀏𑀯𑀁 𑀣𑀽𑀮𑀢𑀭𑁂 ‘‘𑀢𑀺𑀝𑁆𑀞𑀢𑀼, 𑀪𑀕𑀯𑀸, 𑀓𑀧𑁆𑀧’’𑀦𑁆𑀢𑀺 𑀬𑀸𑀘𑀦𑀳𑁂𑀢𑀼𑀪𑀽𑀢𑁂 𑀑𑀓𑀸𑀲𑀦𑀺𑀫𑀺𑀢𑁆𑀢𑁂 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂. 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀫𑀸𑀭𑁂𑀦 𑀆𑀯𑀺𑀝𑁆𑀞𑀘𑀺𑀢𑁆𑀢𑁄.

𑁪𑁪𑁫. 𑀉𑀚𑁆𑀚𑀯𑀦𑀺𑀓𑀸𑀬𑀸𑀢𑀺 𑀧𑀝𑀺𑀲𑁄𑀢𑀕𑀸𑀫𑀺𑀦𑀺𑀬𑀸. 𑀓𑀼𑀘𑁆𑀙𑀺𑀢𑁄 𑀮𑀯𑁄 𑀙𑁂𑀤𑁄 𑀯𑀺𑀦𑀸𑀲𑁄 𑀓𑀼𑀮𑀯𑁄, 𑀦𑀺𑀭𑀢𑁆𑀣𑀓𑀯𑀺𑀦𑀺𑀬𑁄𑀕𑁄. 𑀢𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦 𑀓𑀼𑀮𑀯𑀁 𑀕𑀫𑁂𑀦𑁆𑀢𑀺.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁄

𑀤𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁪𑁬. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 ¶ ¶ 𑀪𑀺𑀓𑁆𑀔𑀕𑁆𑀕𑁂𑀦𑀸𑀢𑀺 𑀪𑀺𑀓𑁆𑀔𑀼𑀕𑀡𑀦𑀸𑀬. 𑀫𑀳𑀻𑀢𑀺 𑀳𑀺𑀫𑀁.

𑁪𑁪𑁭. 𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀸𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑀸 𑀧𑀝𑀺𑀘𑁆𑀙𑀦𑁆𑀦𑀸. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀜𑁆𑀜𑀸𑀡𑀺𑀦𑁄. 𑀉𑀧𑀓𑁆𑀓𑀺𑀮𑁂𑀲𑀸 𑀯𑀼𑀢𑁆𑀢𑀸𑀢𑀺 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀢𑁂 𑀲𑀼𑀭𑀸𑀧𑀸𑀦𑀸𑀤𑀬𑁄 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸. 𑀦𑁂𑀢𑁆𑀢𑀺𑀬𑀸 𑀢𑀡𑁆𑀳𑀸𑀬 𑀲𑀳𑀺𑀢𑀸 𑀲𑀦𑁂𑀢𑁆𑀢𑀺𑀓𑀸.

𑁪𑁫𑁦-𑁧. 𑀅𑀳𑁄𑀕𑀗𑁆𑀕𑁄𑀢𑀺 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀦𑀸𑀫𑀁. 𑀧𑀝𑀺𑀓𑀘𑁆𑀘𑁂𑀯 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑀬𑀢𑁆𑀣 𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀺𑀢𑀼𑀁 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣𑀸𑀳𑀁 𑀧𑀞𑀫𑀫𑁂𑀯 𑀕𑀘𑁆𑀙𑁂𑀬𑁆𑀬𑀁. 𑀲𑀫𑁆𑀪𑀸𑀯𑁂𑀲𑀼𑀦𑁆𑀢𑀺 𑀲𑀫𑁆𑀧𑀸𑀧𑀼𑀡𑀺𑀁𑀲𑀼.

𑁪𑁫𑁨. 𑀅𑀮𑁄𑀡𑀺𑀓𑀦𑁆𑀢𑀺 𑀮𑁄𑀡𑀭𑀳𑀺𑀢𑀁 𑀪𑀢𑁆𑀢𑀁, 𑀩𑁆𑀬𑀜𑁆𑀚𑀦𑀁 𑀯𑀸. 𑀆𑀲𑀼𑀢𑀸𑀢𑀺 𑀲𑀩𑁆𑀩𑀲𑀫𑁆𑀪𑀸𑀭𑀲𑀚𑁆𑀚𑀺𑀢𑀸, ‘‘𑀅𑀲𑀼𑀢𑁆𑀢𑀸’’𑀢𑀺 𑀯𑀸 𑀧𑀸𑀞𑁄.

𑁪𑁫𑁩. 𑀉𑀚𑁆𑀚𑀯𑀺𑀁𑀲𑀽𑀢𑀺 𑀦𑀸𑀯𑀸𑀬 𑀧𑀝𑀺𑀲𑁄𑀢𑀁 𑀕𑀘𑁆𑀙𑀺𑀁𑀲𑀼. 𑀧𑀸𑀘𑀻𑀦𑀓𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀚𑀸𑀢𑀢𑁆𑀢𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀸𑀯𑁂𑀬𑁆𑀬𑀓𑀸𑀢𑀺 𑀧𑀸𑀯𑁂𑀬𑁆𑀬𑀤𑁂𑀲𑀯𑀸𑀲𑀺𑀦𑁄.

𑁪𑁫𑁪. 𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄, 𑀯𑀼𑀟𑁆𑀠𑁄𑀢𑀺 𑀦𑀦𑀼 𑀢𑁆𑀯𑀁 𑀣𑁂𑀭𑁄 𑀦𑀺𑀲𑁆𑀲𑀬𑀫𑀼𑀢𑁆𑀢𑁄, 𑀓𑀲𑁆𑀫𑀸 𑀢𑀁 𑀣𑁂𑀭𑁄 𑀧𑀡𑀸𑀫𑁂𑀲𑀻𑀢𑀺 𑀪𑁂𑀤𑀯𑀘𑀦𑀁 𑀯𑀤𑀦𑁆𑀢𑀺. 𑀕𑀭𑀼𑀦𑀺𑀲𑁆𑀲𑀬𑀁 𑀕𑀡𑁆𑀳𑀸𑀫𑀸𑀢𑀺 𑀦𑀺𑀲𑁆𑀲𑀬𑀫𑀼𑀢𑁆𑀢𑀸𑀧𑀺 𑀫𑀬𑀁 𑀏𑀓𑀁 𑀲𑀫𑁆𑀪𑀸𑀯𑀦𑀻𑀬𑀕𑀭𑀼𑀁 𑀦𑀺𑀲𑁆𑀲𑀬𑀪𑀽𑀢𑀁 𑀕𑀳𑁂𑀢𑁆𑀯𑀸𑀯 𑀯𑀲𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁫𑁫. 𑀫𑀽𑀮𑀸𑀤𑀸𑀬𑀓𑀸𑀢𑀺 𑀧𑀞𑀫𑀁 𑀤𑀲𑀯𑀢𑁆𑀣𑀽𑀦𑀁 𑀤𑀸𑀬𑀓𑀸, 𑀆𑀯𑀸𑀲𑀺𑀓𑀸𑀢𑀺 𑀅𑀢𑁆𑀣𑁄. 𑀧𑀣𑀩𑁆𑀬𑀸 𑀲𑀗𑁆𑀖𑀢𑁆𑀣𑁂𑀭𑁄𑀢𑀺 ¶ 𑀮𑁄𑀓𑁂 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀢𑀤𑀸 𑀉𑀧𑀲𑀫𑁆𑀧𑀤𑀸𑀬 𑀯𑀼𑀟𑁆𑀠𑁄. 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦𑀸𑀢𑀺 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀅𑀥𑀺𑀕𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁪𑁫𑁭. 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀧𑀤𑀪𑀸𑀚𑀦𑀻𑀬𑁂. 𑀇𑀤𑀜𑁆𑀘 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 (𑀧𑀸𑀘𑀺. 𑁨𑁫𑁩) 𑀲𑀼𑀢𑁆𑀢𑁂 𑀬𑀸𑀯𑀓𑀸𑀮𑀺𑀓𑀲𑁆𑀲𑁂𑀯 𑀧𑀭𑀸𑀫𑀝𑁆𑀞𑀢𑁆𑀢𑀸 ¶ 𑀲𑀺𑀗𑁆𑀕𑀻𑀮𑁄𑀡𑀲𑁆𑀲 𑀬𑀸𑀯𑀚𑀻𑀯𑀺𑀓𑀲𑁆𑀲 𑀲𑀦𑁆𑀦𑀺𑀥𑀺𑀓𑀢𑀲𑁆𑀲 𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀺𑀪𑀗𑁆𑀕𑀦𑀬𑁂𑀦𑁂𑀯 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑀸𑀘𑀺𑀢𑁆𑀢𑀺𑀬𑀁 𑀯𑀺𑀪𑀗𑁆𑀕𑁂 𑀆𑀕𑀢𑀪𑀸𑀯𑀁 𑀲𑀸𑀥𑁂𑀢𑀼𑀁 ‘‘𑀓𑀣𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀮𑁄𑀡𑀫𑁂𑀢𑁆𑀣 𑀲𑀦𑁆𑀦𑀺𑀥𑀺𑀓𑀢𑀁, 𑀦 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀦𑁆𑀢𑀺 𑀮𑁄𑀡𑀫𑀺𑀲𑁆𑀲𑀪𑁄𑀚𑀦𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀅𑀦𑀯𑀚𑁆𑀚𑀲𑀜𑁆𑀜𑀺𑀦𑁄 𑀅𑀳𑁂𑀲𑀼𑀁. 𑀢𑀣𑀸𑀲𑀜𑁆𑀜𑀻𑀦𑀫𑁆𑀧𑀺 𑀦𑁂𑀲𑀁 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀲𑀦𑁆𑀦𑀺𑀥𑀺𑀓𑀸𑀭𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀲𑀜𑁆𑀜𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑀁 𑀉𑀤𑁆𑀥𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀮𑁄𑀡𑁂𑀦 𑀲𑀤𑁆𑀥𑀺𑀁. 𑀤𑀼𑀓𑁆𑀓𑀝𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀢𑁄 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀺𑀓𑀁 𑀬𑀸𑀯𑀓𑀸𑀮𑀺𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀪𑀺𑀦𑁆𑀦𑀭𑀲𑀁 𑀓𑀸𑀮𑁂𑀧𑀺 𑀦 𑀓𑀧𑁆𑀧𑀢𑀻𑀢𑀺 𑀲𑀺𑀚𑁆𑀛𑀢𑀺, 𑀢𑀢𑁆𑀣 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀓𑀝𑁂𑀦𑀧𑀺 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑀤𑀺 𑀳𑀺 𑀲𑀦𑁆𑀦𑀺𑀥𑀺𑀓𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀫𑀜𑁆𑀜𑀣, 𑀬𑀸𑀯𑀚𑀻𑀯𑀺𑀓𑀲𑁆𑀲 𑀮𑁄𑀡𑀲𑁆𑀲 𑀲𑀦𑁆𑀦𑀺𑀥𑀺𑀤𑁄𑀲𑀸𑀪𑀸𑀯𑀸 𑀤𑀼𑀓𑁆𑀓𑀝𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀅𑀣 𑀆𑀫𑀺𑀲𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀲𑁆𑀲 𑀢𑀲𑁆𑀲 𑀆𑀫𑀺𑀲𑀕𑀢𑀺𑀓𑀢𑁆𑀢𑀸 𑀤𑀼𑀓𑁆𑀓𑀝𑀁 𑀫𑀸 𑀫𑀜𑁆𑀜𑀣. 𑀢𑀤𑀸 𑀘 𑀳𑀺 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀆𑀫𑀺𑀲𑀢𑁆𑀢𑀼𑀧𑀕𑀫𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀏𑀢𑁆𑀣 𑀬𑀸𑀯𑀚𑀻𑀯𑀺𑀓𑀦𑁆𑀢𑀺𑀆𑀤𑀺𑀦𑀸𑀧𑀺 𑀤𑀼𑀓𑁆𑀓𑀝𑀸𑀪𑀸𑀯𑀁 𑀲𑀫𑀢𑁆𑀣𑁂𑀢𑀺.

𑀧𑀸𑀴𑀺𑀬𑀁 𑀭𑀸𑀚𑀕𑀳𑁂 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺𑀆𑀤𑀻𑀲𑀼 𑀲𑀩𑁆𑀩𑀢𑁆𑀣 𑀲𑀼𑀢𑁆𑀢𑁂 𑀘 𑀯𑀺𑀪𑀗𑁆𑀕𑁂 𑀘𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀲 𑀢𑀲𑁆𑀲 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀦𑁄 𑀲𑀼𑀢𑁆𑀢𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀺𑀦𑀬𑀲𑁆𑀲 𑀅𑀢𑀺𑀲𑀭𑀡𑀁 𑀅𑀢𑀺𑀓𑁆𑀓𑀫𑁄 𑀯𑀺𑀦𑀬𑀸𑀢𑀺𑀲𑀸𑀭𑁄. ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻𑀢𑀺 𑀆𑀕𑀢’’𑀦𑁆𑀢𑀺 𑀇𑀤𑀁 𑀯𑀺𑀪𑀗𑁆𑀕𑁂 𑀘 𑀆𑀕𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀯𑀺𑀤𑀢𑁆𑀣𑀺𑀢𑁆𑀢𑀬𑀧𑁆𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲, 𑀤𑀲𑀸𑀬 𑀧𑀦 𑀯𑀺𑀤𑀢𑁆𑀣𑀺𑀤𑁆𑀯𑀬𑀧𑁆𑀧𑀫𑀸𑀡𑀁 𑀓𑀢𑀁. 𑀅𑀤𑀲𑀓𑀫𑁆𑀧𑀺 𑀦𑀺𑀲𑀻𑀤𑀦𑀁 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀫𑀺𑀥 𑀳𑁂𑀝𑁆𑀞𑀸 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁

𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀭𑀺𑀯𑀸𑀭𑀯𑀡𑁆𑀡𑀦𑀸

𑀫𑀳𑀸𑀯𑀕𑁆𑀕𑁄

𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧. 𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲 ¶ ¶ 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲 𑀪𑀕𑀯𑀢𑁄 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂 𑀔𑀦𑁆𑀥𑀓𑀸𑀦𑀁 𑀅𑀦𑀦𑁆𑀢𑀭𑀁 𑀧𑀭𑀺𑀯𑀸𑀭𑁄𑀢𑀺 𑀬𑁄 𑀯𑀺𑀦𑀬𑁄 𑀲𑀗𑁆𑀕𑀳𑀁 𑀲𑀫𑀸𑀭𑀼𑀴𑁆𑀳𑁄, 𑀢𑀲𑁆𑀲 𑀤𑀸𑀦𑀺 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦. 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀫𑀁𑀲𑀘𑀓𑁆𑀔𑀼𑀦𑀸𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀅𑀢𑀺𑀲𑀼𑀔𑀼𑀫𑀸𑀦𑀺𑀧𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑀢𑁄 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁂𑀦 𑀧𑀲𑀸𑀤𑀘𑀓𑁆𑀔𑀼𑀦𑀸. ‘‘𑀅𑀢𑁆𑀣𑀺 𑀢𑀢𑁆𑀣 𑀧𑀜𑁆𑀜𑀢𑁆𑀢𑀻’’𑀢𑀺𑀆𑀤𑀻𑀲𑀼 𑀅𑀢𑁆𑀣𑀺 𑀦𑀼 𑀔𑁄 𑀢𑀢𑁆𑀣 𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀢𑀢𑁆𑀣 𑀧𑀜𑁆𑀜𑀢𑁆𑀢𑀺…𑀧𑁂… 𑀓𑁂𑀦𑀸𑀪𑀢𑀦𑁆𑀢𑀺 𑀧𑀼𑀘𑁆𑀙𑀸’’𑀢𑀺.

𑁨. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀢𑀺 ¶ 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂. 𑀯𑀺𑀦𑀻𑀢𑀓𑀣𑀸𑀢𑀺 𑀯𑀺𑀦𑀻𑀢𑀯𑀢𑁆𑀣𑀼𑀓𑀣𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀤𑁆𑀯𑀗𑁆𑀕𑀺𑀓𑁂𑀦 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀅𑀗𑁆𑀕𑀤𑁆𑀯𑀬𑀲𑀫𑀼𑀤𑀸𑀬𑀪𑀽𑀢𑁂𑀦 𑀏𑀓𑁂𑀦. 𑀅𑀗𑁆𑀕𑀤𑁆𑀯𑀬𑀯𑀺𑀫𑀼𑀢𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑁂𑀧𑀺 𑀢𑁂𑀲𑀼 𑀏𑀓𑁂𑀦𑀗𑁆𑀕𑁂𑀦 𑀯𑀺𑀦𑀸 𑀅𑀬𑀁 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀫𑁂𑀯 ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀅𑀗𑁆𑀕𑁂𑀲𑀼 𑀧𑀥𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀢𑁆𑀣 𑀳𑀺 𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑁂𑀯𑀦𑀘𑀺𑀢𑁆𑀢𑁂𑀦𑁂𑀯 𑀲𑀫𑁆𑀪𑀯𑁂 𑀲𑀢𑀺 𑀅𑀬𑀁 𑀢𑀁 𑀅𑀗𑁆𑀕𑀤𑁆𑀯𑀬𑀁 𑀉𑀧𑀸𑀤𑀸𑀬 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸 𑀆𑀧𑀢𑁆𑀢𑀺𑀲𑀫𑁆𑀫𑀼𑀢𑀺 𑀳𑁄𑀢𑀺, 𑀦𑀸𑀲𑀢𑀺. 𑀢𑀲𑁆𑀫𑀸 𑀢𑀁 𑀘𑀺𑀢𑁆𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲 𑀅𑀗𑁆𑀕𑀁 𑀓𑀸𑀭𑀡𑀁 𑀳𑁄𑀢𑀺, 𑀦 𑀆𑀧𑀢𑁆𑀢𑀺𑀬𑀸. 𑀢𑀲𑁆𑀲 𑀧𑀦 𑀢𑀁𑀲𑀫𑀼𑀝𑁆𑀞𑀺𑀢𑀓𑀸𑀬𑁄 𑀏𑀯 𑀅𑀗𑁆𑀕𑀁 𑀅𑀩𑁆𑀬𑀯𑀳𑀺𑀢𑀓𑀸𑀭𑀡𑀁, 𑀘𑀺𑀢𑁆𑀢𑀁 𑀧𑀦 𑀓𑀸𑀭𑀡𑀓𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀉𑀧𑀭𑀺𑀧𑀺 𑀲𑀩𑁆𑀩𑀢𑁆𑀣 𑀘𑀺𑀢𑁆𑀢𑀗𑁆𑀕𑀬𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀲𑀼 𑀅𑀥𑀺𑀧𑁆𑀧𑀸𑀬𑁄 ¶ 𑀯𑁂𑀤𑀺𑀢𑀩𑁆𑀩𑁄. ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺𑀧𑀭𑀺𑀯𑀸𑀭𑀯𑀘𑀦𑁂𑀦𑁂𑀯 𑀆𑀧𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀤𑀺𑀧𑀭𑀫𑀢𑁆𑀣𑀲𑀪𑀸𑀯𑀢𑀸 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀧𑀭𑀺𑀬𑀸𑀬𑀢𑁄𑀯 𑀯𑀼𑀢𑁆𑀢𑀸, 𑀲𑀫𑁆𑀫𑀼𑀢𑀺𑀲𑀪𑀸𑀯𑀸 𑀏𑀯 𑀆𑀧𑀢𑁆𑀢𑀻𑀢𑀺 𑀲𑀺𑀚𑁆𑀛𑀢𑀺 𑀲𑀫𑀼𑀝𑁆𑀞𑀸𑀦𑀲𑀫𑀼𑀝𑁆𑀞𑀺𑀢𑀸𑀦𑀁 𑀪𑁂𑀤𑀲𑀺𑀤𑁆𑀥𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀆𑀧𑀦𑁆𑀦𑀸𑀬 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀓𑁂𑀳𑀺𑀘𑀺𑀧𑀺 𑀲𑀫𑀣𑁂𑀳𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑀸𑀧𑀸𑀤𑀦𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀲𑀗𑁆𑀔𑀸𑀢𑀫𑀢𑁆𑀣𑀁 𑀲𑀦𑁆𑀥𑀸𑀬.

𑁩. 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀻𑀢𑀺 𑀲𑀗𑁆𑀕𑀻𑀢𑀺𑀢𑁆𑀢𑀬𑀢𑁄 𑀧𑀘𑁆𑀙𑀸 𑀧𑁄𑀢𑁆𑀣𑀓𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀙𑀴𑀪𑀺𑀜𑁆𑀜𑀸𑀧𑀅𑀲𑀫𑁆𑀪𑀺𑀤𑀸𑀤𑀺𑀕𑀼𑀡𑀲𑀫𑀼𑀚𑁆𑀚𑀮𑁂𑀳𑀺 𑀫𑀳𑀸𑀣𑁂𑀭𑁂𑀳𑀺. 𑀘𑀢𑀼𑀢𑁆𑀣𑀲𑀗𑁆𑀕𑀻𑀢𑀺𑀲𑀤𑀺𑀲𑀸 𑀳𑀺 𑀧𑁄𑀢𑁆𑀣𑀓𑀸𑀭𑁄𑀳𑀲𑀗𑁆𑀕𑀻𑀢𑀺.

𑁧𑁮𑁮. 𑀫𑀳𑀸𑀯𑀺𑀪𑀗𑁆𑀕𑁂𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂. 𑀲𑁄𑀴𑀲 𑀯𑀸𑀭𑀸 𑀤𑀲𑁆𑀲𑀺𑀢𑀸𑀢𑀺 𑀬𑁂𑀳𑀺 𑀯𑀸𑀭𑁂𑀳𑀺 𑀆𑀤𑀺𑀪𑀽𑀢𑁂𑀳𑀺 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀅𑀬𑀁 𑀲𑀓𑀮𑁄𑀧𑀺 𑀧𑀭𑀺𑀯𑀸𑀭𑁄 𑀲𑁄𑀴𑀲𑀧𑀭𑀺𑀯𑀸𑀭𑁄𑀢𑀺 𑀯𑁄𑀳𑀭𑀻𑀬𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺.

𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸

𑁨𑁫𑁭. 𑀧𑀸𑀴𑀺𑀬𑀁 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀲𑀗𑁆𑀔𑀢𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑀸 𑀧𑀼𑀕𑁆𑀕𑀮𑀸𑀤𑀺𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀯𑀺𑀦𑀸𑀲𑀬𑀼𑀢𑁆𑀢𑀯𑀢𑁆𑀣𑀼𑀥𑀫𑁆𑀫𑀦𑀺𑀬𑀢𑁂𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀤𑁆𑀯𑀬𑁂𑀦 𑀬𑀼𑀢𑁆𑀢𑀸𑀢𑀺 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀸, 𑀓𑀸𑀭𑀓𑀯𑁂𑀤𑀓𑀸𑀤𑀺𑀭𑀽𑀧𑁂𑀦 𑀧𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀲𑀪𑀸𑀯𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 ‘‘𑀅𑀦𑀢𑁆𑀢𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸. 𑀢𑀲𑁆𑀫𑀸 𑀅𑀬𑀁 𑀧𑀜𑁆𑀜𑀢𑁆𑀢𑀺𑀧𑀺 𑀅𑀲𑀗𑁆𑀔𑀢𑀢𑁆𑀢𑀲𑀸𑀫𑀜𑁆𑀜𑀢𑁄 ¶ 𑀯𑀢𑁆𑀣𑀼𑀪𑀽𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀲𑀳 ‘‘𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀳𑀺 𑀲𑀫𑁆𑀫𑀼𑀢𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀅𑀓𑀢𑀢𑁆𑀢𑀸 𑀅𑀲𑀗𑁆𑀔𑀢𑀸 𑀏𑀯𑀸𑀢𑀺.

𑀓𑀭𑀼𑀡𑀸𑀲𑀻𑀢𑀮𑀢𑁆𑀢𑀁, 𑀧𑀜𑁆𑀜𑀸𑀧𑀪𑀸𑀲𑀺𑀢𑀢𑁆𑀢𑀜𑁆𑀘 𑀪𑀕𑀯𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀘𑀦𑁆𑀤𑁂, 𑀩𑀼𑀤𑁆𑀥𑀸𑀤𑀺𑀘𑁆𑀘𑁂’’𑀢𑀺 𑀏𑀢𑀁 𑀉𑀪𑀬𑀁 𑀯𑀼𑀢𑁆𑀢𑀁. 𑀳𑀸𑀬𑀢𑀺 𑀏𑀢𑁂𑀦𑀸𑀢𑀺 𑀳𑀸𑀦𑀺, 𑀤𑀼𑀓𑁆𑀔𑀲𑁆𑀲 𑀳𑀸𑀦𑀺 𑀤𑀼𑀓𑁆𑀔𑀳𑀸𑀦𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀝𑀓𑁂 𑀢𑀻𑀡𑀺 𑀤𑁂𑀲𑀬𑀻𑀢𑀺 𑀬𑀲𑁆𑀫𑀸 𑀅𑀜𑁆𑀜𑁂𑀧𑀺 𑀫𑀳𑀸𑀯𑀻𑀭𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀤𑁆𑀥𑀫𑁆𑀫𑀁 𑀤𑁂𑀲𑀬𑀦𑁆𑀢𑀺, 𑀢𑀲𑁆𑀫𑀸 ¶ 𑀅𑀗𑁆𑀕𑀻𑀭𑀲𑁄 𑀧𑀺𑀝𑀓𑀸𑀦𑀺 𑀢𑀻𑀡𑀺 𑀤𑁂𑀲𑀬𑀻𑀢𑀺 𑀬𑁄𑀚𑀦𑀸. 𑀫𑀳𑀸𑀕𑀼𑀡𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀏𑀯𑀁 𑀦𑀻𑀬𑀢𑀺 𑀲𑀤𑁆𑀥𑀫𑁆𑀫𑁄𑀢𑀺 𑀬𑀤𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺 𑀅𑀧𑀭𑀺𑀳𑀻𑀦𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀲𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄𑀧𑀺 𑀦𑀻𑀬𑀢𑀺 𑀧𑀯𑀢𑁆𑀢𑀻𑀬𑀢𑀺, 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀦𑀬𑀧𑀭𑀺𑀬𑀢𑁆𑀢𑀺 𑀧𑀦 𑀓𑀣𑀁 𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀉𑀪𑀢𑁄 𑀘𑀸’’𑀢𑀺𑀆𑀤𑀺. 𑀧𑀭𑀺𑀯𑀸𑀭𑁂𑀦 𑀕𑀦𑁆𑀣𑀺𑀢𑀸 𑀢𑀺𑀝𑁆𑀞𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀏𑀯 𑀧𑀭𑀺𑀯𑀸𑀭𑁂. 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄 𑀓𑀢𑀦𑁆𑀢𑀺 𑀏𑀓𑀘𑁆𑀘𑀁 𑀲𑀫𑀼𑀝𑁆𑀞𑀸𑀦𑁂𑀦 𑀦𑀺𑀬𑀢𑀁 𑀓𑀢𑀁. 𑀢𑀲𑁆𑀫𑀺𑀁 𑀧𑀭𑀺𑀯𑀸𑀭𑁂 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑀁 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀫𑁆𑀪𑁂𑀤𑀁 𑀦𑀺𑀤𑀸𑀦𑀜𑁆𑀘𑀜𑁆𑀜𑀦𑁆𑀢𑀺 𑀲𑀫𑁆𑀪𑁂𑀤𑁄 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑀼𑀝𑁆𑀞𑀸𑀦𑁂𑀦 𑀲𑀁𑀓𑀺𑀡𑁆𑀡𑀢𑀸, 𑀦𑀺𑀤𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀁, 𑀅𑀜𑁆𑀜𑀁 𑀧𑀼𑀕𑁆𑀕𑀮𑀸𑀤𑀺𑀯𑀢𑁆𑀣𑀸𑀤𑀺 𑀘. 𑀲𑀼𑀢𑁆𑀢𑁂 𑀤𑀺𑀲𑁆𑀲𑀦𑁆𑀢𑀺 𑀉𑀧𑀭𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂, 𑀉𑀧𑀭𑀺 𑀯𑀓𑁆𑀔𑀫𑀸𑀦𑁂 𑀘 𑀧𑀭𑀺𑀯𑀸𑀭𑀲𑀼𑀢𑁆𑀢𑁂 𑀏𑀯 𑀤𑀺𑀲𑁆𑀲𑀦𑁆𑀢𑀺. 𑀬𑀲𑁆𑀫𑀸 𑀘 𑀏𑀯𑀁, 𑀢𑀲𑁆𑀫𑀸 𑀲𑀓𑀮𑀲𑀸𑀲𑀦𑀸𑀥𑀸𑀭𑀲𑁆𑀲 𑀯𑀺𑀦𑀬𑀲𑁆𑀲 𑀞𑀺𑀢𑀺𑀳𑁂𑀢𑀼𑀪𑀽𑀢𑀁 𑀧𑀭𑀺𑀯𑀸𑀭𑀁 𑀲𑀺𑀓𑁆𑀔𑁂𑀢𑀺, 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀲𑀸𑀥𑀸𑀭𑀡𑀲𑀫𑀼𑀝𑁆𑀞𑀸𑀦𑀸𑀦𑀺. 𑀆𑀤𑀺𑀫𑁆𑀳𑀺 𑀢𑀸𑀯 𑀧𑀼𑀭𑀺𑀫𑀦𑀬𑁂𑀢𑀺 𑀲𑀩𑁆𑀩𑀧𑀞𑀫𑁂 𑀧𑀜𑁆𑀜𑀢𑁆𑀢𑀺𑀯𑀸𑀭𑁂 𑀆𑀕𑀢𑀦𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀢𑀢𑁆𑀣 𑀧𑀦 𑀧𑀜𑁆𑀜𑀢𑁆𑀢𑀺𑀯𑀸𑀭𑁂 ‘‘𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀦𑁆𑀢𑀺, 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑁧) 𑀦𑀺𑀤𑀸𑀦𑀫𑁆𑀧𑀺 𑀤𑀺𑀲𑁆𑀲𑀢𑀺 𑀏𑀯. 𑀧𑀭𑀢𑁄𑀢𑀺 𑀆𑀕𑀢𑀪𑀸𑀯𑀁 𑀧𑀦 𑀲𑀦𑁆𑀥𑀸𑀬 𑀧𑀭𑀢𑁄 𑀆𑀕𑀢𑁂 𑀲𑀼𑀢𑁆𑀢𑁂 𑀤𑀺𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲.

𑁨𑁫𑁮. 𑀅𑀦𑀺𑀬𑀢𑀸 𑀧𑀞𑀫𑀺𑀓𑀸𑀢𑀺 𑀆𑀧𑀢𑁆𑀢𑀺𑀁 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀇𑀢𑁆𑀣𑀺𑀮𑀺𑀗𑁆𑀕𑀁 𑀓𑀢𑀁, 𑀧𑀞𑀫𑀸𑀦𑀺𑀬𑀢𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀦𑁆𑀢𑀺 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀅𑀦𑀦𑀼𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀁.

𑁨𑁬𑁦. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀢𑁆𑀣𑀼𑀲𑁆𑀫𑀺𑀁 ¶ ‘‘𑀪𑀺𑀓𑁆𑀔𑀼𑀦𑀺𑀬𑁄 𑀏𑀴𑀓𑀮𑁄𑀫𑀸𑀦𑀺 𑀥𑁄𑀯𑀦𑁆𑀢𑀺𑀬𑁄 𑀭𑀚𑀦𑁆𑀢𑀺𑀬𑁄 𑀯𑀺𑀚𑀝𑁂𑀦𑁆𑀢𑀺𑀬𑁄 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙’’𑀦𑁆𑀢𑀺 (𑀧𑀸𑀭𑀸. 𑁫𑁭𑁬) 𑀆𑀕𑀢𑀢𑁆𑀢𑀸 𑀇𑀫𑀁 𑀭𑀺𑀜𑁆𑀘𑀦𑁆𑀢𑀺-𑀧𑀤𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀉𑀧𑀮𑀓𑁆𑀔𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀪𑀗𑁆𑀕𑁂 ‘𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲’𑀦𑁆𑀢𑀺 𑀆𑀕𑀢𑀁 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀆𑀳.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀦𑁆𑀢𑀺 ¶ 𑀅𑀲𑀫𑀬𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀧𑀭𑀺𑀬𑁂𑀲𑀦𑀲𑀺𑀓𑁆𑀔𑀸𑀧𑀤𑀁 (𑀧𑀸𑀭𑀸. 𑁬𑁨𑁬 𑀆𑀤𑀬𑁄). 𑀭𑀢𑀦𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀭𑀢𑀦𑀁 𑀯𑀸 𑀭𑀢𑀦𑀲𑀫𑁆𑀫𑀢𑀁 𑀯𑀸 𑀧𑀝𑀺𑀲𑀸𑀫𑀦𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁫𑁦𑁨 𑀆𑀤𑀬𑁄).

𑁨𑁬𑁫. 𑀧𑀸𑀴𑀺𑀬𑀁 𑀩𑀼𑀤𑁆𑀥𑀜𑀸𑀡𑁂𑀦𑀸𑀢𑀺 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦.

𑁨𑁬𑁭. ‘‘𑀦 𑀤𑁂𑀲𑁂𑀦𑁆𑀢𑀺 𑀢𑀣𑀸𑀕𑀢𑀸’’𑀢𑀺 𑀏𑀢𑁂𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑀺.

𑁨𑁬𑁯. 𑀅𑀓𑀢𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀁, 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀢𑀦𑁆𑀢𑀺 𑀯𑀸 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁, 𑀅𑀪𑀺𑀦𑀯𑀦𑁆𑀢𑀺 𑀅𑀢𑁆𑀣𑁄.

𑁨𑁭𑁦. 𑀲𑀫𑀼𑀝𑁆𑀞𑀸𑀦𑀜𑁆𑀳𑀺 𑀲𑀗𑁆𑀔𑁂𑀧𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀺𑀧𑀦𑁆𑀢𑀺 𑀲𑀗𑁆𑀕𑀬𑁆𑀳𑀦𑁆𑀢𑀺 𑀲𑀤𑀺𑀲𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑁆𑀣𑀸𑀢𑀺 𑀲𑀗𑁆𑀔𑁂𑀧𑁄, 𑀲𑀫𑀼𑀝𑁆𑀞𑀸𑀦𑀲𑀻𑀲𑀁. 𑀦𑁂𑀢𑀺 𑀯𑀺𑀦𑁂𑀢𑀺 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀦𑁂𑀢𑁆𑀢𑀺, 𑀯𑀺𑀦𑀬𑀧𑀸𑀴𑀺, 𑀲𑀸 𑀏𑀯 𑀥𑀫𑁆𑀫𑁄𑀢𑀺 𑀦𑁂𑀢𑁆𑀢𑀺𑀥𑀫𑁆𑀫𑁄𑀢𑀺 𑀆𑀳 ‘‘𑀯𑀺𑀦𑀬𑀧𑀸𑀴𑀺𑀥𑀫𑁆𑀫𑀲𑁆𑀲𑀸’’𑀢𑀺.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸

𑁨𑁭𑁧. 𑀓𑀢𑀺 ¶ 𑀆𑀧𑀢𑁆𑀢𑀺𑀬𑁄𑀢𑀺 𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀆𑀧𑀢𑁆𑀢𑀻𑀲𑀼 𑀫𑁂𑀣𑀼𑀦𑀸𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀅𑀦𑁆𑀢𑁄𑀕𑀥𑀪𑁂𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀚𑀸𑀢𑀺𑀯𑀲𑁂𑀦 𑀏𑀓𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀧𑀼𑀘𑁆𑀙𑀸 𑀓𑀢𑀸. 𑀓𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀅𑀦𑁆𑀢𑁄𑀕𑀥𑀪𑁂𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀭𑀸𑀲𑀝𑁆𑀞𑁂𑀦𑀸𑀢𑀺 𑀏𑀢𑁆𑀢𑀓𑀫𑁂𑀯𑁂𑀢𑁆𑀣 𑀪𑁂𑀤𑁄. 𑀯𑀺𑀦𑀻𑀢𑀸𑀦𑀺𑀬𑁂𑀯 ¶ 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀆𑀧𑀢𑁆𑀢𑀺𑀢𑁄 𑀯𑀺𑀭𑀫𑀡𑀸𑀦𑀺 𑀏𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑀸𑀫𑁄𑀚𑁆𑀚𑀸𑀤𑀺𑀥𑀫𑁆𑀫𑀸𑀦𑀁 𑀓𑀸𑀭𑀡𑀢𑁆𑀢𑀸 𑀯𑀢𑁆𑀣𑀽𑀦𑀻𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀦𑀺, 𑀢𑀸𑀦𑀺 𑀏𑀢𑁆𑀣 𑀅𑀢𑁆𑀣𑀢𑁄 𑀯𑀺𑀭𑀢𑀺𑀆𑀤𑀺𑀅𑀦𑀯𑀚𑁆𑀚𑀥𑀫𑁆𑀫𑀸 𑀏𑀯. 𑀯𑁂𑀭𑀁 𑀫𑀡𑀢𑀻𑀢𑀺 𑀯𑁂𑀭𑀳𑁂𑀢𑀼𑀢𑁆𑀢𑀸 ‘‘𑀯𑁂𑀭’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀭𑀸𑀕𑀸𑀤𑀺𑀅𑀓𑀼𑀲𑀮𑀧𑀓𑁆𑀔𑀁 𑀯𑀺𑀦𑀸𑀲𑁂𑀢𑀺.

𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀩𑀳𑀽𑀲𑀼 𑀏𑀓𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁂𑀲𑀼 𑀢𑀁 𑀥𑀫𑁆𑀫𑀲𑁆𑀲𑀯𑀦𑀲𑀫𑀸𑀕𑀫𑀁 𑀓𑁄𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺. 𑀅𑀦𑀸𑀤𑀭𑁄𑀯𑀸𑀢𑀺 𑀢𑀼𑀲𑁆𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀢𑀼𑀝𑁆𑀞𑀺𑀁, 𑀲𑀁𑀯𑀺𑀚𑀺𑀢𑀩𑁆𑀩𑀝𑁆𑀞𑀸𑀦𑁂 𑀲𑀁𑀯𑁂𑀕𑀜𑁆𑀘 𑀅𑀧𑀯𑁂𑀤𑁂𑀦𑁆𑀢𑁄 𑀏𑀯. 𑀓𑀸𑀬𑀧𑀸𑀕𑀩𑁆𑀪𑀺𑀬𑀦𑁆𑀢𑀺 𑀉𑀦𑁆𑀦𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀓𑀸𑀬𑀸𑀦𑀸𑀘𑀸𑀭𑀁.

𑁨𑁭𑁪. 𑀫𑁂𑀢𑁆𑀢𑀸𑀬 𑀲𑀫𑁆𑀪𑀽𑀢𑀁 𑀫𑁂𑀢𑁆𑀢𑀁, 𑀓𑀸𑀬𑀓𑀫𑁆𑀫𑀁. 𑀉𑀪𑀬𑁂𑀳𑀺𑀧𑀻𑀢𑀺 𑀦𑀯𑀓𑁂𑀳𑀺, 𑀣𑁂𑀭𑁂𑀳𑀺 𑀘. 𑀧𑀺𑀬𑀁 𑀓𑀭𑁄𑀢𑀻𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀧𑁂𑀫𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀓𑁂𑀲𑀦𑁆𑀢𑀺 𑀆𑀳 ‘‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦’’𑀦𑁆𑀢𑀺.

𑀧𑀼𑀕𑁆𑀕𑀮𑀁 𑀧𑀝𑀺𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀫𑁂𑀯 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄𑀢𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀲𑁂𑀭𑀺𑀯𑀺𑀳𑀸𑀭𑀺𑀢𑀸𑀓𑀭𑀡𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁨𑁭𑁬. 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀓𑁂𑀯𑀮𑀁 𑀓𑀸𑀬𑁂𑀦. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀢𑁆𑀢𑀸 ‘‘𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀦𑀁 ¶ 𑀤𑀼𑀓𑁆𑀓𑀝𑀧𑀭𑀺𑀬𑁄𑀲𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀅𑀘𑀺𑀢𑁆𑀢𑀓𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑁄 ‘‘𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀆𑀧𑀚𑁆𑀚𑀦𑀁 𑀲𑀺𑀬𑀸 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀳𑀻𑀦𑀼𑀓𑁆𑀓𑀝𑁆𑀞𑁂𑀳𑀺 𑀚𑀸𑀢𑀺𑀆𑀤𑀻𑀳𑀺 𑀑𑀫𑀲𑀦𑁂 𑀏𑀯 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑀸 𑀏𑀓𑀦𑁆𑀢𑀯𑀸𑀘𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀏𑀯𑀸𑀢𑀺.

𑀤𑀼𑀢𑀺𑀬𑀲𑀫𑀼𑀝𑁆𑀞𑀸𑀦𑀦𑀬𑁂 𑀯𑀸𑀘𑀸𑀬 𑀏𑀯 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲 𑀅𑀪𑀸𑀯𑀸 ‘‘𑀦 𑀳𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑀺𑀬𑁂 ¶ 𑀧𑀦 𑀯𑁄𑀲𑀸𑀲𑀫𑀸𑀦𑀭𑀽𑀧𑀁 𑀪𑀺𑀓𑁆𑀔𑀼𑀦𑀺𑀁 𑀓𑀸𑀬𑀯𑀸𑀘𑀸𑀳𑀺 𑀅𑀦𑀧𑀲𑀸𑀤𑀦𑀧𑀘𑁆𑀘𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀲𑀫𑁆𑀪𑀯𑀢𑁄 ‘‘𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁.

𑀑𑀫𑀲𑀦𑁂 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀢𑁆𑀢𑁂𑀧𑀺 𑀢𑀧𑁆𑀧𑀘𑁆𑀘𑀬𑀸 𑀧𑀜𑁆𑀜𑀢𑁆𑀢𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀧𑀜𑁆𑀘𑀫𑁂𑀦𑁂𑀯 𑀲𑀫𑀼𑀧𑁆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀘𑀢𑀼𑀢𑁆𑀣𑀯𑀸𑀭𑁂 ‘‘𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀜𑁆𑀘𑀫𑀯𑀸𑀭𑁂 ‘‘𑀲𑀺𑀬𑀸𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀯𑀺𑀓𑀸𑀭𑁂𑀦𑁂𑀯 𑀑𑀫𑀲𑀦𑁆𑀢𑀲𑁆𑀲 𑀧𑀦𑁂𑀢𑁆𑀣 𑀤𑀼𑀩𑁆𑀪𑀸𑀲𑀺𑀢𑀪𑀸𑀯𑁂𑀧𑀺 𑀓𑀸𑀬𑀓𑀻𑀴𑀸𑀪𑀸𑀯𑀸𑀪𑀸𑀯𑀢𑁄 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀙𑀝𑁆𑀞𑀯𑀸𑀭𑁂 𑀧𑀦 𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀸𑀬𑁄 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺, 𑀧𑀜𑁆𑀘𑀫𑀲𑀫𑀼𑀝𑁆𑀞𑀸𑀦𑁂 𑀏𑀯 𑀙𑀝𑁆𑀞𑀫𑁆𑀧𑀺 𑀧𑀯𑀺𑀲𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀦 𑀧𑀦 𑀢𑀢𑁆𑀣 𑀲𑀩𑁆𑀩𑀣𑀸 𑀤𑀼𑀩𑁆𑀪𑀸𑀲𑀺𑀢𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁. 𑀦 𑀳𑀺 𑀤𑀯𑀓𑀫𑁆𑀬𑀢𑀸𑀬 𑀓𑀸𑀬𑀯𑀸𑀘𑀸𑀳𑀺 𑀑𑀫𑀲𑀦𑁆𑀢𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺 𑀦 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀧𑀜𑁆𑀘𑀫𑁂𑀦𑁂𑀯 𑀲𑀫𑀸𑀧𑀚𑁆𑀚𑀢𑀺, 𑀢𑀁 𑀙𑀝𑁆𑀞𑁂𑀦𑀧𑀺 𑀲𑀫𑀸𑀧𑀚𑁆𑀚𑀢𑀺 𑀏𑀯 𑀥𑀫𑁆𑀫𑀤𑁂𑀲𑀦𑀸𑀧𑀢𑁆𑀢𑀺 𑀯𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀁 𑀲𑀫𑀼𑀝𑁆𑀞𑀸𑀦𑀯𑀸𑀭𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀢𑀸𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁨𑁭𑁭. 𑀤𑀼𑀢𑀺𑀬𑁂 𑀧𑀦 𑀓𑀢𑀺𑀯𑀸𑀭𑁂 𑀧𑀞𑀫𑀲𑀫𑀼𑀝𑁆𑀞𑀸𑀦𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀦𑀁 𑀆𑀧𑀢𑁆𑀢𑀻𑀦𑀁 𑀮𑀳𑀼𑀤𑀲𑁆𑀲𑀦𑀲𑀼𑀔𑀢𑁆𑀣𑀁 𑀓𑀼𑀝𑀺𑀓𑀸𑀭𑀸𑀤𑀻𑀦𑀺 𑀏𑀯 𑀲𑀫𑀼𑀤𑁆𑀥𑀝𑀸𑀦𑀺, 𑀦 𑀅𑀜𑁆𑀜𑁂𑀲𑀁 𑀅𑀪𑀸𑀯𑀸, 𑀲𑀜𑁆𑀘𑀭𑀺𑀢𑁆𑀢𑀸𑀤𑀻𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀏𑀯𑀁 𑀤𑀼𑀢𑀺𑀬𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀺. ‘‘𑀓𑀧𑁆𑀧𑀺𑀬𑀲𑀜𑁆𑀜𑀻’’𑀢𑀺 𑀇𑀫𑀺𑀦𑀸 𑀅𑀘𑀺𑀢𑁆𑀢𑀓𑀢𑁆𑀢𑀁 𑀤𑀲𑁆𑀲𑁂𑀢𑀺. ‘‘𑀓𑀼𑀝𑀺𑀁 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀻𑀧𑀬𑁄𑀕𑀸𑀪𑀸𑀯𑀁. 𑀉𑀪𑀬𑁂𑀦𑀸𑀧𑀺 𑀓𑁂𑀯𑀮𑀁 𑀓𑀸𑀬𑁂𑀦𑁂𑀯 𑀤𑀼𑀓𑁆𑀓𑀝𑀸𑀤𑀻𑀦𑀁 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀉𑀧𑀭𑀺𑀧𑀺 𑀬𑀣𑀸𑀦𑀼𑀭𑀽𑀧𑀁 𑀓𑀸𑀢𑀩𑁆𑀩𑀁.

‘‘𑀏𑀓𑁂𑀦 ¶ 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀇𑀤𑀁 𑀇𑀥 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀁 𑀓𑀸𑀬𑀢𑁄𑀯 𑀲𑀫𑀼𑀝𑁆𑀞𑀺𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀯𑀺𑀲𑁂𑀲𑀢𑁄 𑀧𑀦 𑀢𑀸 𑀆𑀧𑀢𑁆𑀢𑀺𑀬𑁄 𑀇𑀢𑀭𑀲𑀫𑀼𑀝𑁆𑀞𑀸𑀦𑁂𑀳𑀺𑀧𑀺 𑀬𑀣𑀸𑀭𑀳𑀁 𑀲𑀫𑀼𑀝𑁆𑀞𑀳𑀦𑁆𑀢𑀺 𑀏𑀯. 𑀏𑀯𑀁 𑀉𑀧𑀭𑀺𑀧𑀺.

‘‘𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘𑀸’’𑀢𑀺 𑀇𑀤𑀁 𑀲𑀗𑁆𑀖𑀸𑀤𑀺𑀲𑁂𑀲𑀯𑀚𑁆𑀚𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁.

𑁨𑁭𑁯. 𑀲𑀁𑀯𑀺𑀤𑀳𑀺𑀢𑁆𑀯𑀸 ¶ 𑀓𑀼𑀝𑀺𑀁 𑀓𑀭𑁄𑀢𑀻𑀢𑀺 𑀯𑀸𑀘𑀸𑀬 𑀲𑀁𑀯𑀺𑀤𑀳𑀢𑀺, 𑀲𑀬𑀜𑁆𑀘 𑀓𑀸𑀬𑁂𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀓𑀢𑀸𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸

𑁨𑁮𑁩. 𑀢𑀢𑀺𑀬𑁄 𑀧𑀦 𑀕𑀸𑀣𑀸𑀯𑀸𑀭𑁄 𑀤𑀼𑀢𑀺𑀬𑀯𑀸𑀭𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄. 𑀢𑀢𑁆𑀣 𑀓𑀸𑀬𑁄𑀯 𑀓𑀸𑀬𑀺𑀓𑁄𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 ‘‘𑀓𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑁂𑀦 𑀲𑀫𑀼𑀝𑁆𑀞𑀺𑀢𑀸’’𑀢𑀺, 𑀓𑀸𑀬𑁄 𑀲𑀫𑀼𑀝𑁆𑀞𑀸𑀦𑀁 𑀅𑀓𑁆𑀔𑀸𑀢𑁄𑀢𑀺 𑀅𑀢𑁆𑀣𑁄.

𑀯𑀺𑀯𑁂𑀓𑀤𑀲𑁆𑀲𑀺𑀦𑀸𑀢𑀺 𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑁆𑀢𑀸, 𑀢𑀢𑁄 𑀯𑀺𑀯𑀺𑀢𑁆𑀢𑀳𑁂𑀢𑀼𑀢𑁆𑀢𑀸 𑀘 𑀦𑀻𑀯𑀭𑀡𑀯𑀺𑀯𑁂𑀓𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀤𑀲𑁆𑀲𑀦𑀲𑀻𑀮𑁂𑀦. 𑀯𑀺𑀪𑀗𑁆𑀕𑀓𑁄𑀯𑀺𑀤𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀓𑀼𑀲𑀮𑀸𑀢𑀺 𑀆𑀮𑀧𑀦𑀁. 𑀇𑀥 𑀧𑀦𑁂𑀯𑀁 𑀅𑀜𑁆𑀜𑁄 𑀧𑀼𑀘𑁆𑀙𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀬𑀫𑁂𑀯 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀜𑁆𑀘 𑀅𑀓𑀸𑀲𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁮𑁪. 𑀘𑀢𑀼𑀢𑁆𑀣𑁂 𑀧𑀦 𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀯𑀸𑀭𑁂 𑀲𑀻𑀮𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀧𑀅𑀘𑁆𑀙𑀸𑀤𑀦𑀧𑀘𑁆𑀘𑀬𑀸.

𑁨𑁮𑁬. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸.

𑁨𑁮𑁭. 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸𑀢𑀺 ¶ 𑀏𑀢𑁆𑀣 𑀆𑀕𑀫𑁆𑀫 𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀚𑀻𑀯𑁄, 𑀘𑀢𑀼𑀧𑀘𑁆𑀘𑀬𑁄, 𑀲𑁄𑀯 𑀫𑀺𑀘𑁆𑀙𑀸𑀧𑀢𑁆𑀢𑀺𑀬𑀸 𑀯𑀺𑀧𑀦𑁆𑀦𑀢𑁆𑀢𑀸 𑀯𑀺𑀧𑀢𑁆𑀢𑀻𑀢𑀺 𑀆𑀚𑀻𑀯𑀯𑀺𑀧𑀢𑁆𑀢𑀺, 𑀢𑀲𑁆𑀲𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀳𑁂𑀢𑀼, 𑀢𑀤𑀼𑀧𑁆𑀧𑀸𑀤𑀦𑀢𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁯𑁧. 𑀧𑀜𑁆𑀘𑀫𑁂 ¶ 𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑁂 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸𑀢𑀺 𑀅𑀧𑀮𑁄𑀓𑀦𑀯𑀘𑀦𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀲𑀗𑁆𑀔𑀢𑀓𑀫𑁆𑀫𑀯𑀸𑀘𑀸𑀧𑀘𑁆𑀘𑀬𑀸. 𑀧𑀜𑁆𑀘𑀸𑀢𑀺 𑀏𑀢𑁆𑀣 𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀤𑀺𑀁 𑀅𑀧𑀮𑁄𑀓𑁂𑀢𑁆𑀯𑀸 𑀓𑀭𑁄𑀦𑁆𑀢𑀸𑀦𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑁂 𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑁂 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀅𑀧𑀮𑁄𑀓𑀦𑀸𑀯𑀲𑀸𑀦𑁂 𑀤𑀼𑀓𑁆𑀓𑀝𑀁, 𑀅𑀥𑀺𑀧𑁆𑀧𑀸𑀬𑀸𑀤𑀺𑀦𑀸 𑀜𑀢𑁆𑀢𑀺𑀓𑀫𑁆𑀫𑀸𑀤𑀺𑀁 𑀓𑀭𑁄𑀦𑁆𑀢𑀸𑀦𑀁 𑀣𑀼𑀮𑁆𑀮𑀘𑁆𑀘𑀬𑀸𑀤𑀺 𑀘 𑀲𑀗𑁆𑀕𑀬𑁆𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀲𑁂𑀲𑀸 𑀆𑀧𑀢𑁆𑀢𑀺𑀬𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀆𑀤𑀬𑁄. ‘‘𑀦𑀢𑁆𑀣𑀜𑁆𑀜𑀸 𑀆𑀧𑀢𑁆𑀢𑀺𑀬𑁄’’𑀢𑀺 𑀇𑀤𑀁 𑀯𑀺𑀧𑀢𑁆𑀢𑀺𑀆𑀤𑀺𑀪𑀸𑀕𑀺𑀦𑀺𑀬𑁄 𑀲𑀸𑀯𑀚𑁆𑀚𑀸𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀥𑀺𑀓𑀭𑀡𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀪𑁂𑀤𑀁

𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑀯𑀸𑀭𑀯𑀡𑁆𑀡𑀦𑀸

𑁨𑁯𑁩. 𑀙𑀝𑁆𑀞𑁂 ¶ 𑀧𑀭𑀺𑀬𑀸𑀬𑀯𑀸𑀭𑁂 𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄𑀢𑀺𑀆𑀤𑀺 𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀅𑀯𑀺𑀧𑀭𑀻𑀢𑀢𑁄 𑀥𑀫𑁆𑀫𑀯𑀸𑀤𑀺𑀲𑁆𑀲 𑀯𑀺𑀯𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀞𑀸𑀦𑀸𑀦𑀻𑀢𑀺 𑀥𑀫𑁆𑀫𑀸𑀤𑀻𑀲𑀼 𑀅𑀥𑀫𑁆𑀫𑁄𑀢𑀺𑀆𑀤𑀺𑀦𑀸 𑀕𑀳𑁂𑀢𑁆𑀯𑀸 𑀤𑀻𑀧𑀦𑀸𑀦𑀺 𑀇𑀥𑁂𑀯 𑀪𑁂𑀤𑀓𑀭𑀯𑀢𑁆𑀣𑀽𑀦𑀺, 𑀢𑀸𑀦𑀺 𑀏𑀯 𑀓𑀸𑀬𑀓𑀮𑀳𑀸𑀤𑀺𑀯𑀺𑀯𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 𑀞𑀸𑀦𑀸𑀦𑀺, 𑀑𑀓𑀸𑀲𑀢𑁆𑀢𑀸 𑀯𑀢𑁆𑀣𑀽𑀦𑀺, 𑀆𑀥𑀸𑀭𑀢𑁆𑀢𑀸 𑀪𑀽𑀫𑀺𑀬𑁄𑀢𑀺 𑀘 𑀯𑀼𑀢𑁆𑀢𑀸𑀦𑀺. 𑀅𑀩𑁆𑀬𑀸𑀓𑀢𑀳𑁂𑀢𑀽𑀢𑀺 𑀅𑀲𑁂𑀓𑁆𑀔𑀸𑀦𑀁 𑀯𑀺𑀯𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁆𑀯𑀸𑀤𑀲 𑀫𑀽𑀮𑀸𑀦𑀻𑀢𑀺 𑀓𑁄𑀥𑁄 𑀉𑀧𑀦𑀸𑀳𑁄, 𑀫𑀓𑁆𑀔𑁄 𑀧𑀮𑀸𑀲𑁄, 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁, 𑀧𑀸𑀧𑀺𑀘𑁆𑀙𑀢𑀸 𑀫𑀳𑀺𑀘𑁆𑀙𑀢𑀸, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸 𑀆𑀥𑀸𑀦𑀕𑁆𑀕𑀸𑀳𑀻𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀸𑀦𑀻𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀬𑀼𑀕𑀴𑀸𑀦𑀁 𑀯𑀲𑁂𑀦 𑀙 𑀥𑀫𑁆𑀫𑀸 𑀘𑁂𑀯 𑀮𑁄𑀪𑀸𑀤𑀬𑁄 𑀙 𑀳𑁂𑀢𑀽 𑀘𑀸𑀢𑀺 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀸𑀦𑀺.

𑁨𑁯𑁪. 𑀘𑀼𑀤𑁆𑀤𑀲 𑀫𑀽𑀮𑀸𑀦𑀻𑀢𑀺 𑀢𑀸𑀦𑁂𑀯 𑀤𑁆𑀯𑀸𑀤𑀲 𑀓𑀸𑀬𑀯𑀸𑀘𑀸𑀳𑀺 𑀲𑀤𑁆𑀥𑀺𑀁 𑀘𑀼𑀤𑁆𑀤𑀲 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀸𑀦𑀺.

𑁨𑁯𑁫. 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀫𑀽𑀮𑀺𑀓𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀞𑀸𑀦𑀸𑀦𑀻𑀢𑀺𑀆𑀤𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 ¶ 𑀧𑀝𑀺𑀘𑁆𑀙𑀸𑀤𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁨𑁯𑁦) 𑀳𑀺 𑀯𑀼𑀢𑁆𑀢𑀁. ‘‘𑀙 𑀳𑁂𑀢𑀽’’𑀢𑀺 𑀇𑀤𑀁 𑀓𑀼𑀲𑀮𑀸𑀦𑀁 𑀆𑀧𑀢𑁆𑀢𑀺𑀳𑁂𑀢𑀼𑀯𑁄𑀳𑀸𑀭𑀲𑁆𑀲 𑀅𑀬𑀼𑀢𑁆𑀢𑀢𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀓𑀼𑀲𑀮𑀳𑁂𑀢𑀽𑀦𑀁 𑀅𑀪𑀸𑀯𑀢𑁄. ‘‘𑀅𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀳𑀺 𑀆𑀤𑀺 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀳𑁂𑀢𑀯𑁄 𑀏𑀯 𑀳𑀺 𑀧𑀼𑀩𑁆𑀩𑀗𑁆𑀕𑀫𑀦𑀸𑀫𑁂𑀦 𑀯𑀼𑀢𑁆𑀢𑀸.

𑁨𑁯𑁬. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀞𑀸𑀦𑀸𑀦𑀻𑀢𑀺𑀆𑀤𑀻𑀲𑀼 𑀅𑀧𑀮𑁄𑀓𑀦𑀯𑀸𑀘𑀸, 𑀜𑀢𑁆𑀢𑀺𑀆𑀤𑀺𑀯𑀸𑀘𑀸𑀬𑁄 𑀘 𑀓𑀫𑁆𑀫𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀸 𑀏𑀯 𑀳𑀺 𑀏𑀓𑀲𑀻𑀫𑀸𑀬𑀁 𑀲𑀸𑀫𑀕𑁆𑀕𑀺𑀫𑀼𑀧𑀕𑀢𑀸𑀦𑀁 𑀓𑀫𑁆𑀫𑀧𑁆𑀧𑀢𑁆𑀢𑀸𑀦𑀁 𑀅𑀦𑀼𑀫𑀢𑀺𑀬𑀸 𑀲𑀸𑀯𑀦𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀗𑁆𑀖𑀕𑀡𑀓𑀺𑀘𑁆𑀘𑀲𑀪𑀸𑀯𑀲𑁆𑀲 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀸𑀪𑀸𑀯𑁂𑀦 ‘‘𑀞𑀸𑀦𑀯𑀢𑁆𑀣𑀼𑀪𑀽𑀫𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀕𑀡𑀜𑀢𑁆𑀢𑀺𑀅𑀧𑀮𑁄𑀓𑀦𑀸𑀦𑀜𑁆𑀳𑀺 ¶ 𑀕𑀡𑁄𑀧𑀺 𑀫𑀽𑀮𑀦𑁆𑀢𑀺. 𑀜𑀢𑁆𑀢𑀺𑀢𑁄 𑀯𑀸𑀢𑀺 𑀜𑀢𑁆𑀢𑀺𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸𑀦𑀁 𑀜𑀢𑁆𑀢𑀺𑀭𑀽𑀧𑀢𑁆𑀢𑀸, 𑀜𑀢𑁆𑀢𑀺𑀧𑀼𑀩𑁆𑀩𑀓𑀢𑁆𑀢𑀸 𑀘 𑀯𑀼𑀢𑁆𑀢𑀁. 𑀓𑀫𑁆𑀫𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀜𑀢𑁆𑀢𑀺𑀯𑀲𑁂𑀦 𑀳𑀺 𑀤𑀼𑀯𑀺𑀥𑀸𑀲𑀼 𑀜𑀢𑁆𑀢𑀻𑀲𑀼 𑀅𑀦𑀼𑀲𑁆𑀲𑀸𑀯𑀦𑀸𑀧𑀺 𑀓𑀫𑁆𑀫𑀫𑀽𑀮𑀓𑀦𑁆𑀢𑁆𑀯𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀜𑀢𑁆𑀢𑀺𑀯𑀺𑀪𑀸𑀕𑁄 𑀘𑀸𑀬𑀁 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

‘‘𑀇𑀫𑁂 𑀲𑀢𑁆𑀢 𑀲𑀫𑀣𑀸…𑀧𑁂… 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀇𑀤𑀁 𑀧𑀼𑀘𑁆𑀙𑀸𑀯𑀘𑀦𑀁. ‘‘𑀲𑀺𑀬𑀸’’𑀢𑀺 𑀇𑀤𑀁 𑀯𑀺𑀲𑀚𑁆𑀚𑀦𑀁. ‘‘𑀓𑀣𑀜𑁆𑀘 𑀲𑀺𑀬𑀸’’𑀢𑀺 𑀇𑀤𑀁 𑀧𑀼𑀦 𑀧𑀼𑀘𑁆𑀙𑀸. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑁂 𑀲𑀫𑀣𑀸𑀢𑀺𑀆𑀤𑀺 𑀧𑀼𑀦 𑀯𑀺𑀲𑀚𑁆𑀚𑀦𑀁. 𑀢𑀢𑁆𑀣 ‘‘𑀯𑀢𑁆𑀣𑀼𑀯𑀲𑁂𑀦𑀸’’𑀢𑀺 𑀇𑀤𑀁 ‘‘𑀲𑀢𑁆𑀢 𑀲𑀫𑀣𑀸 𑀤𑀲 𑀲𑀫𑀣𑀸 𑀳𑁄𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀯𑀘𑀦𑀁. ‘‘𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀇𑀤𑀁 ‘‘𑀤𑀲 𑀲𑀫𑀣𑀸 𑀲𑀢𑁆𑀢 𑀲𑀫𑀣𑀸 𑀳𑁄𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀘𑀢𑀼𑀩𑁆𑀩𑀺𑀥𑀸𑀥𑀺𑀓𑀭𑀡𑀲𑀗𑁆𑀔𑀸𑀢𑀯𑀢𑁆𑀣𑀼𑀯𑀲𑁂𑀦 𑀘 𑀤𑁂𑀲𑀦𑀸𑀓𑁆𑀓𑀫𑀲𑀗𑁆𑀔𑀸𑀢𑀧𑀭𑀺𑀬𑀸𑀬𑀯𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄.

𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀥𑀸𑀭𑀡𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁨𑁯𑁭. 𑀲𑀢𑁆𑀢𑀫𑁂 𑀲𑀸𑀥𑀸𑀭𑀡𑀯𑀸𑀭𑁂 𑀲𑀸𑀥𑀸𑀭𑀡𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀦𑀓𑀺𑀘𑁆𑀘𑀲𑀸𑀥𑀸𑀭𑀡𑀸. 𑀏𑀯𑀁 𑀲𑀩𑁆𑀩𑀢𑁆𑀣.

𑁨𑁯𑁮. 𑀅𑀝𑁆𑀞𑀫𑁂 𑀢𑀩𑁆𑀪𑀸𑀕𑀺𑀬𑀯𑀸𑀭𑁂 𑀢𑀩𑁆𑀪𑀸𑀕𑀺𑀬𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀦𑀢𑁄 𑀢𑀧𑁆𑀧𑀓𑁆𑀔𑀺𑀓𑀸.

𑀲𑀸𑀥𑀸𑀭𑀡𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀸𑀲𑀫𑀣𑀲𑁆𑀲𑀲𑀸𑀥𑀸𑀭𑀡𑀯𑀸𑀭𑀯𑀡𑁆𑀡𑀦𑀸

𑁨𑁯𑁯. 𑀦𑀯𑀫𑁂 ¶ 𑀲𑀫𑀣𑀸𑀲𑀫𑀣𑀲𑀸𑀥𑀸𑀭𑀡𑀯𑀸𑀭𑁂 ‘‘𑀲𑀩𑁆𑀩𑁂 𑀲𑀫𑀣𑀸 𑀏𑀓𑀢𑁄𑀯 𑀅𑀥𑀺𑀓𑀭𑀡𑀁 𑀲𑀫𑁂𑀦𑁆𑀢𑀺 𑀉𑀤𑀸𑀳𑀼 𑀦𑀸𑀦𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁂𑀦 ‘‘𑀲𑀫𑀣𑀸 𑀲𑀫𑀣𑀲𑁆𑀲 𑀲𑀸𑀥𑀸𑀭𑀡𑀸, 𑀲𑀫𑀣𑀸 𑀲𑀫𑀣𑀲𑁆𑀲 𑀅𑀲𑀸𑀥𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀯𑀸𑀤𑀸𑀤𑀺𑀅𑀥𑀺𑀓𑀭𑀡𑀓𑁆𑀓𑀫𑁂𑀦 𑀢𑀩𑁆𑀩𑀽𑀧𑀲𑀫𑀳𑁂𑀢𑀼𑀪𑀽𑀢𑁂 𑀲𑀫𑀣𑁂 𑀉𑀤𑁆𑀥𑀭𑀦𑁆𑀢𑁄 ‘‘𑀬𑁂𑀪𑀼𑀬𑁆𑀬𑀲𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀯𑀺𑀦𑀸 𑀓𑀲𑁆𑀲𑀘𑀺 𑀲𑀫𑀣𑀲𑁆𑀲 𑀅𑀲𑀫𑁆𑀪𑀯𑀸 𑀲𑁂𑀲𑀸 𑀙𑀧𑀺 𑀲𑀫𑀣𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸, 𑀢𑁂𑀲𑀁 ¶ 𑀧𑀦 𑀙𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀪𑀸𑀯𑀢𑁄 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸. 𑀢𑀩𑁆𑀪𑀸𑀕𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑀣𑀸𑀲𑀫𑀣𑀲𑁆𑀲𑀲𑀸𑀥𑀸𑀭𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀣𑀲𑀫𑁆𑀫𑀼𑀔𑀸𑀯𑀺𑀦𑀬𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁦𑁧-𑁩. 𑀏𑀓𑀸𑀤𑀲𑀫𑀯𑀸𑀭𑁂𑀧𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺𑀆𑀤𑀺 𑀧𑀼𑀘𑁆𑀙𑀸. 𑀬𑁂𑀪𑀼𑀬𑁆𑀬𑀲𑀺𑀓𑀸 𑀲𑀢𑀺𑀯𑀺𑀦𑀬𑁄𑀢𑀺𑀆𑀤𑀺 𑀯𑀺𑀲𑀚𑁆𑀚𑀦𑀁. 𑀏𑀯𑀁 𑀯𑀺𑀦𑀬𑀯𑀸𑀭𑁂 𑀓𑀼𑀲𑀮-𑀯𑀸𑀭𑁂 𑀢𑀢𑁄 𑀧𑀭𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀲𑀺𑀬𑀸 𑀓𑀼𑀲𑀮𑁄𑀢𑀺𑀆𑀤𑀻𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀦𑀬𑀓𑀫𑁆𑀫𑁂, 𑀯𑀺𑀯𑀸𑀤𑀸𑀤𑀺𑀫𑁆𑀳𑀺 𑀘 𑀦𑀺𑀬𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀲𑀫𑀼𑀧𑁆𑀧𑀚𑁆𑀚𑀦𑀓𑀓𑀼𑀲𑀮𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀻𑀦𑀁, 𑀯𑀺𑀯𑀸𑀤𑀸𑀤𑀻𑀦𑀜𑁆𑀘 𑀓𑀼𑀲𑀮𑀸𑀤𑀺𑀪𑀸𑀯𑁄 𑀢𑁂𑀦 𑀢𑁂𑀦 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦𑁂𑀢𑀲𑁆𑀲 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦𑀸𑀫 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀬𑁄 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀅𑀦𑀯𑀚𑁆𑀚𑀲𑀪𑀸𑀯𑀢𑁆𑀢𑀸 𑀅𑀓𑀼𑀲𑀮𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀓𑀼𑀲𑀮𑀢𑁆𑀢𑀽𑀧𑀘𑀸𑀭𑁄 𑀦 𑀬𑀼𑀢𑁆𑀢𑁄 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀓𑀼𑀲𑀮𑀢𑁆𑀢𑀽𑀧𑀘𑀸𑀭𑁄 𑀯𑀺𑀬, 𑀢𑀲𑁆𑀫𑀸 𑀦𑀢𑁆𑀣𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀅𑀓𑀼𑀲𑀮𑁄𑀢𑀺 𑀅𑀢𑁆𑀣𑁄.

𑁩𑁦𑁪. 𑀢𑀢𑁄 𑀧𑀭𑁂𑀲𑀼 𑀬𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺𑀆𑀤𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀇𑀢𑀭𑁂𑀳𑀺 𑀲𑀫𑀣𑁂𑀳𑀺 𑀦𑀺𑀬𑀫𑁂𑀦 𑀲𑀁𑀲𑀝𑁆𑀞𑀢𑀁, 𑀇𑀢𑀭𑁂𑀲𑀁 𑀧𑀦 𑀙𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑀲𑀫𑀣𑀲𑀫𑁆𑀫𑀼𑀔𑀸𑀯𑀺𑀦𑀬𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀲𑀝𑁆𑀞𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁦𑁬. 𑀅𑀥𑀺𑀓𑀭𑀡𑀦𑁆𑀢𑀺 ¶ 𑀯𑀸 𑀲𑀫𑀣𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸𑀢𑀺𑀆𑀤𑀺 𑀲𑀫𑀣𑀸𑀦𑀁 𑀅𑀥𑀺𑀓𑀭𑀡𑁂𑀲𑀼 𑀏𑀯 𑀬𑀣𑀸𑀭𑀳𑀁 𑀧𑀯𑀢𑁆𑀢𑀺𑀁, 𑀅𑀥𑀺𑀓𑀭𑀡𑀸𑀦𑀺 𑀯𑀺𑀦𑀸 𑀢𑁂𑀲𑀁 𑀯𑀺𑀲𑀼𑀁 𑀅𑀝𑁆𑀞𑀸𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀅𑀥𑀺𑀓𑀭𑀡𑀢𑁄 𑀲𑀫𑀣𑁂𑀳𑀺 𑀯𑀺𑀬𑁄𑀚𑁂𑀢𑁆𑀯𑀸 𑀅𑀲𑀁𑀲𑀝𑁆𑀞𑁂 𑀓𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀲𑀝𑁆𑀞𑀢𑀸𑀬 𑀞𑀺𑀢𑀪𑀸𑀯𑀲𑀗𑁆𑀔𑀸𑀢𑀁 𑀦𑀸𑀦𑀢𑁆𑀢𑀁 𑀧𑀜𑁆𑀜𑀸𑀧𑁂𑀢𑀼𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀓𑁆𑀔𑀡𑁂 𑀏𑀯 𑀢𑁂𑀲𑀁 𑀅𑀲𑀁𑀲𑀕𑁆𑀕𑀁 𑀧𑀜𑁆𑀜𑀸𑀧𑁂𑀢𑀼𑀁 𑀓𑀺𑀁 𑀲𑀓𑁆𑀓𑀸𑀢𑀺 𑀧𑀼𑀘𑁆𑀙𑀢𑀺.

𑀅𑀥𑀺𑀓𑀭𑀡𑀦𑁆𑀢𑀺𑀆𑀤𑀺 ¶ 𑀕𑀸𑀭𑀬𑁆𑀳𑀯𑀸𑀤𑀤𑀲𑁆𑀲𑀦𑀁. 𑀲𑁄 𑀫𑀸 𑀳𑁂𑀯𑀦𑁆𑀢𑀺 𑀬𑁄 𑀏𑀯𑀁 𑀯𑀤𑀢𑀺, 𑀲𑁄 ‘‘𑀫𑀸 𑀏𑀯𑀁 𑀯𑀤𑀸’’𑀢𑀺 𑀯𑀘𑀦𑀻𑀬𑁄 𑀅𑀲𑁆𑀲, 𑀦 𑀘 𑀮𑀩𑁆𑀪𑀢𑀺 𑀲𑀫𑀣𑀸𑀦𑀁 𑀅𑀜𑁆𑀜𑀢𑁆𑀭 𑀅𑀥𑀺𑀓𑀭𑀡𑀸 𑀯𑀽𑀧𑀲𑀫𑀮𑀓𑁆𑀔𑀡𑀦𑁆𑀢𑀺 𑀧𑀳𑀸𑀦𑀸𑀯𑀢𑁆𑀣𑀸𑀦𑀲𑀗𑁆𑀔𑀸𑀢𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀮𑀓𑁆𑀔𑀡𑀢𑁄 𑀧𑀦 𑀅𑀥𑀺𑀓𑀭𑀡𑁂𑀳𑀺 𑀲𑀫𑀣𑀸𑀦𑀁 𑀦𑀸𑀦𑀸𑀓𑀭𑀡𑀁 𑀅𑀢𑁆𑀣𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀣𑀸 𑀅𑀥𑀺𑀓𑀭𑀡𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺 𑀅𑀧𑀮𑁄𑀓𑀦𑀸𑀤𑀻𑀳𑀺 𑀘𑀢𑀽𑀳𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀳𑀺 𑀲𑀩𑁆𑀩𑁂𑀧𑀺 𑀲𑀫𑀣𑀸 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀦𑀸𑀜𑁆𑀜𑁂𑀳𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑁂𑀦 𑀦 𑀲𑀫𑁆𑀫𑀢𑀺. 𑀅𑀦𑀼𑀯𑀸𑀤…𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑁂𑀦 𑀦 𑀲𑀫𑁆𑀫𑀢𑀺, 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻’’𑀢𑀺𑀆𑀤𑀺 (𑀧𑀭𑀺. 𑁩𑁧𑁧).

𑁩𑁦𑁭-𑁩𑁧𑁩. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺𑀆𑀤𑀺𑀓𑁄 𑀲𑀫𑁆𑀫𑀢𑀺𑀯𑀸𑀭𑁄. 𑀢𑀤𑀦𑀦𑁆𑀢𑀭𑁄 𑀲𑀫𑁆𑀫𑀢𑀺𑀦𑀲𑀫𑁆𑀫𑀢𑀺𑀯𑀸𑀭𑁄 𑀘 𑀅𑀥𑀺𑀓𑀭𑀡𑁂𑀳𑀺 𑀲𑀫𑀣𑀸𑀦𑀁 𑀲𑀁𑀲𑀝𑁆𑀞𑀢𑀁, 𑀯𑀺𑀲𑀁𑀲𑀝𑁆𑀞𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄. 𑀲𑀫𑀣𑀸 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺𑀆𑀤𑀺𑀓𑁄 𑀲𑀫𑀣𑀸𑀥𑀺𑀓𑀭𑀡𑀯𑀸𑀭𑁄 𑀲𑀫𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀁, 𑀅𑀥𑀺𑀓𑀭𑀡𑁂𑀳𑀺 𑀘 𑀅𑀥𑀺𑀓𑀭𑀡𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁, 𑀲𑀫𑀣𑁂𑀳𑀺 𑀘 𑀯𑀽𑀧𑀲𑀫𑀸𑀯𑀽𑀧𑀲𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄.

𑁩𑁧𑁪. 𑀲𑀫𑀼𑀝𑁆𑀞𑀸𑀧𑁂𑀢𑀺𑀯𑀸𑀭𑁄 𑀧𑀦 𑀅𑀥𑀺𑀓𑀭𑀡𑁂𑀳𑀺 𑀅𑀥𑀺𑀓𑀭𑀡𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀦 𑀓𑀢𑀫𑀁 𑀅𑀥𑀺𑀓𑀭𑀡𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑁆𑀪𑀯𑀫𑀢𑁆𑀢𑁂𑀦 𑀏𑀓𑀫𑁆𑀧𑀺 𑀅𑀥𑀺𑀓𑀭𑀡𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀜𑁆𑀘𑀭𑀳𑀺 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀆𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀚𑀸𑀬𑀦𑁆𑀢𑀻𑀢𑀺 𑀅𑀦𑀦𑁆𑀢𑀭𑀫𑁂𑀯 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀫𑁆𑀧𑀭𑀧𑀘𑁆𑀘𑀬𑀸 𑀚𑀸𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀥𑀫𑁆𑀫𑁄 𑀅𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀉𑀪𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀯𑀸𑀤𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀔𑁂𑀫𑀪𑀗𑁆𑀕𑀸 𑀳𑁄𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀢𑁂𑀲𑀁 𑀧𑀓𑁆𑀔𑀁 𑀧𑀭𑀺𑀬𑁂𑀲𑀦𑁂𑀦 𑀓𑀮𑀳𑀁 𑀯𑀟𑁆𑀠𑀦𑁆𑀢𑀸𑀦𑀁 𑀯𑀺𑀯𑀸𑀤𑁄 𑀓𑀜𑁆𑀘𑀺 𑀫𑀳𑀸𑀧𑀭𑀺𑀲𑀁 𑀲𑀗𑁆𑀖𑀧𑀭𑀺𑀡𑀸𑀬𑀓𑀁 𑀮𑀚𑁆𑀚𑀺𑀁 𑀆𑀕𑀫𑁆𑀫 𑀯𑀽𑀧𑀲𑀫𑀁 𑀕𑀘𑁆𑀙𑀢𑀺. 𑀢𑀣𑀸 𑀅𑀯𑀽𑀧𑀲𑀫𑀦𑁆𑀢𑁂 𑀧𑀦 𑀯𑀺𑀯𑀸𑀤𑁄 𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀲𑀓𑀮𑁂𑀧𑀺 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀢𑁄 𑀅𑀦𑀼𑀯𑀸𑀤𑀸𑀤𑀻𑀦𑀻𑀢𑀺 𑀏𑀯𑀁 𑀧𑀭𑀫𑁆𑀧𑀭𑀓𑁆𑀓𑀫𑁂𑀦 𑀯𑀽𑀧𑀲𑀫𑀓𑀸𑀭𑀡𑀸𑀪𑀸𑀯𑁂 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀚𑀸𑀬𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ¶ ‘‘𑀲𑀗𑁆𑀖𑁄 𑀯𑀺𑀯𑀤𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡’’𑀦𑁆𑀢𑀺. 𑀲𑀗𑁆𑀖𑀲𑁆𑀲 𑀯𑀺𑀯𑀤𑀢𑁄 𑀬𑁄 𑀯𑀺𑀯𑀸𑀤𑁄, 𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑀁𑀲𑀝𑁆𑀞𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀚𑀢𑀺𑀯𑀸𑀭𑀯𑀡𑁆𑀡𑀦𑀸

𑁩𑁧𑁮. 𑀢𑀤𑀦𑀦𑁆𑀢𑀭𑀯𑀸𑀭𑁂 ¶ 𑀧𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀦𑁆𑀢𑀺𑀆𑀤𑀺 𑀅𑀥𑀺𑀓𑀭𑀡𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑁆𑀢𑁂𑀧𑀺 𑀲𑀁𑀲𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀪𑀚𑀢𑀻𑀢𑀺𑀆𑀤𑀻𑀲𑀼 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀲𑀼 𑀅𑀥𑀺𑀓𑀭𑀡𑁂𑀲𑀼 𑀯𑀺𑀯𑀸𑀤𑀸𑀥𑀺𑀓𑀭𑀡𑀪𑀸𑀯𑀫𑁂𑀯 𑀪𑀚𑀢𑀺, 𑀦𑀸𑀜𑁆𑀜𑀸𑀥𑀺𑀓𑀭𑀡𑀪𑀸𑀯𑀁, 𑀘𑀢𑀽𑀲𑀼 𑀅𑀥𑀺𑀓𑀭𑀡𑁂𑀲𑀼 𑀯𑀺𑀯𑀸𑀤𑀸𑀥𑀺𑀓𑀭𑀡𑀢𑁆𑀢𑀫𑁂𑀯 𑀦𑀺𑀲𑁆𑀲𑀺𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀪𑀸𑀯𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁩𑁧𑁯. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺 𑀲𑀫𑀣𑁂 𑀪𑀚𑀢𑀻𑀢𑀺𑀆𑀤𑀺 𑀧𑀦 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀯𑀽𑀧𑀲𑀫𑀦𑁂 𑀲𑀢𑀺 𑀦𑀺𑀬𑀢𑀲𑀫𑀣𑁂 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀺 𑀲𑀫𑀣𑁂 𑀪𑀚𑀢𑀻𑀢𑀺 𑀅𑀢𑁆𑀢𑀦𑁄 𑀉𑀧𑀲𑀫𑀢𑁆𑀣𑀸𑀬 𑀓𑀺𑀢𑁆𑀢𑀓𑁂 𑀲𑀫𑀣𑁂 𑀉𑀧𑀕𑀘𑁆𑀙𑀢𑀺, 𑀓𑀺𑀢𑁆𑀢𑀓𑁂 𑀲𑀫𑀣𑁂 𑀆𑀕𑀫𑁆𑀫 𑀯𑀽𑀧𑀲𑀫𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀺 𑀲𑀫𑀣𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀢𑀸𑀦𑀁 𑀯𑀽𑀧𑀲𑀫𑁂𑀢𑀼𑀁 𑀓𑀢𑀺𑀲𑀼 𑀲𑀫𑀣𑁂𑀲𑀼 𑀢𑁂𑀳𑀺 𑀲𑀫𑀸𑀦𑀯𑀲𑁂𑀦 𑀧𑀯𑀺𑀝𑁆𑀞𑀁. 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀽𑀧𑀲𑀫𑀁 𑀓𑀭𑁄𑀦𑁆𑀢𑁂𑀳𑀺 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀯𑀽𑀧𑀲𑀫𑀓𑀭𑀡𑀢𑁆𑀣𑀁 𑀲𑀗𑁆𑀕𑀳𑀺𑀢𑀁.

𑀪𑀚𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀓𑀧𑀼𑀘𑁆𑀙𑀸𑀯𑀸𑀭𑁄

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁨𑁦. 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑀦𑁆𑀢𑀺 ¶ 𑀧𑀩𑁆𑀩𑀚𑁆𑀚𑀸𑀔𑀦𑁆𑀥𑀓𑀁 (𑀫𑀳𑀸𑀯. 𑁮𑁪). 𑀲𑀳 𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀲𑀦𑀺𑀤𑁆𑀤𑁂𑀲𑀁. ‘‘𑀲𑀦𑁆𑀦𑀺𑀤𑁆𑀤𑁂𑀲’’𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀦𑀺𑀤𑀸𑀦𑁂𑀦 𑀘 𑀦𑀺𑀤𑁆𑀤𑁂𑀲𑁂𑀦 𑀘 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀧𑀼𑀕𑁆𑀕𑀮𑀸𑀤𑀺𑀧𑁆𑀧𑀓𑀸𑀲𑀓𑀁 𑀦𑀺𑀤𑀸𑀦𑀯𑀘𑀦𑀁 𑀦𑀺𑀤𑀸𑀦𑀁 𑀦𑀸𑀫, 𑀢𑀦𑁆𑀦𑀺𑀤𑀸𑀦𑀁 𑀧𑀝𑀺𑀘𑁆𑀘 𑀦𑀺𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀦𑀺𑀤𑁆𑀤𑁂𑀲𑁄 𑀦𑀸𑀫, 𑀢𑁂𑀳𑀺 𑀅𑀯𑀬𑀯𑀪𑀽𑀢𑁂𑀳𑀺 𑀲𑀳𑀺𑀢𑀁 𑀢𑀁𑀲𑀫𑀼𑀤𑀸𑀬𑀪𑀽𑀢𑀁 𑀔𑀦𑁆𑀥𑀓𑀁 𑀧𑀼𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀸𑀦𑀺 𑀧𑀤𑀸𑀦𑀻𑀢𑀺 𑀆𑀧𑀢𑁆𑀢𑀺𑀧𑀜𑁆𑀜𑀸𑀧𑀓𑀸𑀦𑀺 𑀯𑀘𑀦𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑁂𑀲𑀁…𑀧𑁂… 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀯𑀘𑀦𑁂𑀳𑀺 𑀧𑀜𑁆𑀜𑀢𑁆𑀢𑀸 𑀓𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀆𑀧𑀢𑁆𑀢𑀺𑀬𑁄 𑀦𑀸𑀫 𑀧𑀼𑀕𑁆𑀕𑀮𑀸𑀦𑀜𑁆𑀜𑁂𑀯 𑀳𑁄𑀦𑁆𑀢𑀺, 𑀦 𑀧𑀤𑀸𑀦𑀁, 𑀓𑀲𑁆𑀫𑀸 𑀧𑀦 ‘‘𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺 𑀲𑀸𑀫𑀺𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀆𑀳 ‘‘𑀬𑁂𑀦 𑀬𑁂𑀦 𑀳𑀺 𑀧𑀤𑁂𑀦𑀸’’𑀢𑀺𑀆𑀤𑀺. 𑀧𑀸𑀴𑀺𑀬𑀁 𑀉𑀧𑁄𑀲𑀣𑀦𑁆𑀢𑀺𑀆𑀤𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀸𑀤𑀻𑀦𑀜𑁆𑀜𑁂𑀯 (𑀫𑀳𑀸𑀯. 𑁧𑁩𑁨 𑀆𑀤𑀬𑁄) 𑀕𑀳𑀡𑀁.