📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀯𑀺𑀦𑀬𑀸𑀮𑀗𑁆𑀓𑀸𑀭-𑀝𑀻𑀓𑀸 (𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀫𑀼𑀢𑁆𑀢𑀳𑀸𑀭𑀸𑀤𑀺𑀦𑀬𑀕𑀸𑀣𑀸

𑀬𑁄 ¶ ¶ 𑀮𑁄𑀓𑁂 𑀮𑁄𑀓𑀮𑁄𑀓𑁄 𑀯𑀭𑀢𑀭𑀧𑀭𑀤𑁄 𑀭𑀸𑀚𑀭𑀸𑀚𑀕𑁆𑀕𑀚𑀜𑁆𑀜𑁄;

𑀆𑀓𑀸𑀲𑀸𑀓𑀸𑀭𑀓𑀸𑀭𑁄 𑀧𑀭𑀫𑀭𑀢𑀺𑀭𑀢𑁄 𑀤𑁂𑀯𑀤𑁂𑀯𑀦𑁆𑀢𑀯𑀚𑁆𑀚𑁄.

𑀲𑀁𑀲𑀸𑀭𑀸𑀲𑀸𑀭𑀲𑀸𑀭𑁄 𑀲𑀼𑀦𑀭𑀦𑀫𑀦𑀢𑁄 𑀫𑀸𑀭𑀳𑀸𑀭𑀦𑁆𑀢𑀭𑀝𑁆𑀞𑁄;

𑀮𑁄𑀓𑀸𑀮𑀗𑁆𑀓𑀸𑀭𑀓𑀸𑀭𑁄 𑀅𑀢𑀺𑀲𑀢𑀺𑀕𑀢𑀺𑀫𑀸 𑀥𑀻𑀭𑀯𑀻𑀭𑀢𑁆𑀢𑀭𑀫𑁆𑀫𑁄.

𑀲𑀻𑀳𑀦𑀺𑀯𑀢𑁆𑀢𑀦𑀦𑀬𑀕𑀸𑀣𑀸

𑀲𑀁𑀲𑀸𑀭𑀘𑀓𑁆𑀓𑀯𑀺𑀤𑁆𑀥𑀁𑀲𑀁, ¶ 𑀲𑀫𑁆𑀩𑀼𑀤𑁆𑀥𑀁 𑀢𑀁 𑀲𑀼𑀫𑀸𑀦𑀲𑀁;

𑀲𑀁𑀦𑀫𑀸𑀫𑀺 𑀲𑀼𑀕𑀼𑀡𑁂𑀲𑀁, 𑀲𑀁𑀤𑁂𑀲𑀺𑀢𑀲𑀼𑀤𑀼𑀤𑁆𑀤𑀲𑀁.

𑀅𑀦𑁄𑀢𑀢𑁆𑀢𑁄𑀤𑀓𑀸𑀯𑀢𑁆𑀢𑀦𑀬𑀕𑀸𑀣𑀸

𑀬𑁂𑀦 ¶ 𑀯𑀺𑀤𑁆𑀥𑀁𑀲𑀺𑀢𑀸 𑀧𑀸𑀧𑀸, 𑀬𑁂𑀦 𑀦𑀺𑀩𑁆𑀩𑀸𑀧𑀺𑀢𑀸 𑀤𑀭𑀸;

𑀬𑁂𑀦 𑀮𑁄𑀓𑀸 𑀦𑀺𑀲𑁆𑀲𑀭𑀺𑀲𑀼𑀁, 𑀬𑁂𑀦 𑀘𑀸𑀳𑀁 𑀦𑀫𑀸𑀫𑀺 𑀢𑀁.

𑀘𑀢𑀼𑀤𑀻𑀧𑀘𑀓𑁆𑀓𑀯𑀢𑁆𑀢𑀦𑀦𑀬𑀕𑀸𑀣𑀸

𑀲𑀗𑁆𑀖𑀁 𑀲𑀲𑀗𑁆𑀖𑀁 𑀦𑀫𑀸𑀫𑀺, 𑀯𑀦𑁆𑀢𑀦𑁆𑀢𑀯𑀭𑀥𑀫𑁆𑀫𑀚𑀁;

𑀫𑀕𑁆𑀕𑀕𑁆𑀕𑀫𑀦𑀨𑀮𑀝𑁆𑀞𑀁, 𑀲𑀼𑀲𑀁𑀲𑀁 𑀲𑀼𑀪𑀫𑀸𑀦𑀲𑀁.

𑀅𑀩𑁆𑀬𑀧𑁂𑀢𑀘𑀢𑀼𑀧𑀸𑀤𑀆𑀤𑀺𑀬𑀫𑀓𑀕𑀸𑀣𑀸

𑀯𑀺𑀦𑀬𑀁 𑀯𑀺𑀦𑀬𑀁 𑀲𑀸𑀭𑀁, 𑀲𑀗𑁆𑀕𑀳𑀁 𑀲𑀗𑁆𑀕𑀳𑀁 𑀓𑀭𑀁;

𑀘𑀭𑀺𑀬𑀁 𑀘𑀭𑀺𑀬𑀁 𑀯𑀦𑁆𑀤𑁂, 𑀧𑀭𑀫𑀁 𑀧𑀭𑀫𑀁 𑀲𑀼𑀢𑀁.

𑀩𑁆𑀬𑀧𑁂𑀢𑀘𑀢𑀼𑀧𑀸𑀤𑀆𑀤𑀺𑀅𑀦𑁆𑀢𑀬𑀫𑀓𑀕𑀸𑀣𑀸

𑀧𑀓𑀸𑀭𑁂 𑀩𑀳𑀼𑀧𑀓𑀸𑀭𑁂, 𑀲𑀸𑀕𑀭𑁂 𑀕𑀼𑀡𑀲𑀸𑀕𑀭𑁂;

𑀕𑀭𑀯𑁄 𑀫𑀫 𑀕𑀭𑀯𑁄, 𑀯𑀦𑁆𑀤𑀸𑀫𑀺 𑀅𑀪𑀺𑀯𑀦𑁆𑀤𑀸𑀫𑀺.

𑀯𑀢𑁆𑀣𑀼𑀢𑁆𑀢𑀬𑁂 𑀕𑀦𑁆𑀣𑀓𑀸𑀭𑁂, 𑀕𑀭𑀽𑀲𑀼 𑀲𑀸𑀤𑀭𑀁 𑀫𑀬𑀸;

𑀓𑀢𑁂𑀦 𑀦𑀫𑀓𑁆𑀓𑀸𑀭𑁂𑀦, 𑀳𑀺𑀢𑁆𑀯𑀸 𑀲𑀩𑁆𑀩𑁂 𑀉𑀧𑀤𑁆𑀤𑀯𑁂.

𑀲𑀺𑀓𑁆𑀔𑀸𑀓𑀸𑀫𑁂𑀳𑀺 ¶ 𑀥𑀻𑀭𑁂𑀳𑀺, 𑀚𑀺𑀦𑀲𑀸𑀲𑀦𑀓𑀸𑀭𑀺𑀪𑀺;

𑀪𑀺𑀓𑁆𑀔𑀽𑀳𑀺 𑀯𑀺𑀦𑀬𑀜𑁆𑀜𑀽𑀳𑀺, 𑀲𑀸𑀤𑀭𑀁 𑀅𑀪𑀺𑀬𑀸𑀘𑀺𑀢𑁄.

𑀯𑀡𑁆𑀡𑀬𑀺𑀲𑁆𑀲𑀸𑀫𑀺 𑀯𑀺𑀦𑀬-𑀲𑀗𑁆𑀕𑀳𑀁 𑀧𑀻𑀢𑀺𑀯𑀟𑁆𑀠𑀦𑀁;

𑀪𑀺𑀓𑁆𑀔𑀽𑀦𑀁 𑀯𑁂𑀦𑀬𑀺𑀓𑀸𑀦𑀁, 𑀬𑀣𑀸𑀲𑀢𑁆𑀢𑀺𑀩𑀮𑀁 𑀅𑀳𑀁.

𑀧𑁄𑀭𑀸𑀡𑁂𑀳𑀺 𑀓𑀢𑀸 𑀝𑀻𑀓𑀸, 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺 𑀲𑀸 𑀧𑀦;

𑀅𑀢𑀺𑀲𑀗𑁆𑀔𑁂𑀧𑀪𑀸𑀯𑁂𑀦, 𑀦 𑀲𑀸𑀥𑁂𑀢𑀺 𑀬𑀣𑀺𑀘𑁆𑀙𑀺𑀢𑀁.

𑀢𑀲𑁆𑀫𑀸 𑀳𑀺 𑀦𑀸𑀦𑀸𑀲𑀢𑁆𑀣𑁂𑀳𑀺, 𑀲𑀸𑀭𑀫𑀸𑀤𑀸𑀬 𑀲𑀸𑀥𑀼𑀓𑀁;

𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀁, 𑀓𑀭𑀺𑀲𑁆𑀲𑀁 𑀅𑀢𑁆𑀣𑀯𑀡𑁆𑀡𑀦𑀁.

𑀯𑀺𑀦𑀬𑀸𑀮𑀗𑁆𑀓𑀸𑀭𑀁 𑀦𑀸𑀫, 𑀧𑁂𑀲𑀮𑀸𑀦𑀁 𑀧𑀫𑁄𑀤𑀦𑀁;

𑀇𑀫𑀁 𑀧𑀓𑀭𑀡𑀁 𑀲𑀩𑁆𑀩𑁂, 𑀲𑀫𑁆𑀫𑀸 𑀥𑀸𑀭𑁂𑀦𑁆𑀢𑀼 𑀲𑀸𑀥𑀯𑁄𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀲𑀫𑀦𑁆𑀦𑀸𑀕𑀢𑀁 ¶ 𑀓𑀸𑀬𑀯𑀸𑀘𑀸𑀯𑀺𑀦𑀬𑀦𑀓𑀭𑀡𑀲𑀫𑀢𑁆𑀣𑀁 𑀮𑀚𑁆𑀚𑀺𑀧𑁂𑀲𑀮𑀪𑀺𑀓𑁆𑀔𑀽𑀦𑀁 𑀲𑀁𑀲𑀬𑀯𑀺𑀦𑁄𑀤𑀦𑀓𑀸𑀭𑀓𑀁 𑀬𑁄𑀕𑀸𑀯𑀘𑀭𑀧𑀼𑀕𑁆𑀕𑀮𑀸𑀦𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀓𑀁 𑀚𑀺𑀦𑀲𑀸𑀲𑀦𑀯𑀼𑀟𑁆𑀠𑀺𑀳𑁂𑀢𑀼𑀪𑀽𑀢𑀁 𑀧𑀓𑀭𑀡𑀫𑀺𑀤𑀫𑀸𑀭𑀪𑀺𑀢𑀼𑀓𑀸𑀫𑁄 𑀅𑀬𑀫𑀸𑀘𑀭𑀺𑀬𑀸𑀲𑀪𑁄 𑀧𑀞𑀫𑀁 𑀢𑀸𑀯 𑀭𑀢𑀦𑀢𑁆𑀢𑀬𑀧𑀡𑀸𑀫𑀧𑀡𑀸𑀫𑀸𑀭𑀳𑀪𑀸𑀯𑀅𑀪𑀺𑀥𑁂𑀬𑁆𑀬𑀓𑀭𑀡𑀳𑁂𑀢𑀼 𑀓𑀭𑀡𑀧𑁆𑀧𑀓𑀸𑀭𑀧𑀓𑀭𑀡𑀸𑀪𑀺𑀥𑀸𑀦𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀯𑀢𑁆𑀣𑀼𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑁄 𑀯𑀼𑀢𑁆𑀢𑁄 𑀧𑀡𑀸𑀫𑁂𑀢𑀩𑁆𑀩𑀧𑀡𑀸𑀫𑀅𑀢𑁆𑀣𑀤𑀲𑁆𑀲𑀦𑀢𑁄. 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦𑀦𑁆𑀢𑀺 𑀇𑀫𑀺𑀦𑀸 𑀧𑀡𑀸𑀫𑀸𑀭𑀳𑀪𑀸𑀯𑁄 𑀧𑀡𑀸𑀫𑀳𑁂𑀢𑀼𑀤𑀲𑁆𑀲𑀦𑀢𑁄. 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀅𑀪𑀺𑀥𑁂𑀬𑁆𑀬𑁄 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀅𑀢𑁆𑀣𑀪𑀸𑀯𑀢𑁄. 𑀯𑀺𑀧𑁆𑀧𑀓𑀺𑀡𑁆𑀡𑀫𑀦𑁂𑀓𑀢𑁆𑀣𑀸𑀢𑀺 𑀓𑀭𑀡𑀳𑁂𑀢𑀼 𑀢𑁂𑀦𑁂𑀯𑀓𑀸𑀭𑀡𑁂𑀦 𑀧𑀓𑀭𑀡𑀲𑁆𑀲 𑀓𑀢𑀢𑁆𑀢𑀸. 𑀲𑀫𑀸𑀳𑀭𑀺𑀢𑁆𑀯𑀸 𑀏𑀓𑀢𑁆𑀣, 𑀤𑀲𑁆𑀲𑀬𑀺𑀲𑁆𑀲𑀫𑀦𑀸𑀓𑀼𑀮𑀦𑁆𑀢𑀺 𑀓𑀭𑀡𑀧𑁆𑀧𑀓𑀸𑀭𑁄 𑀢𑁂𑀦𑀸𑀓𑀸𑀭𑁂𑀦 𑀧𑀓𑀭𑀡𑀲𑁆𑀲 𑀓𑀭𑀡𑀢𑁄. 𑀧𑀓𑀭𑀡𑀸𑀪𑀺𑀥𑀸𑀦𑀁 𑀧𑀦 𑀲𑀫𑀸𑀳𑀭𑀺𑀢𑀲𑀤𑁆𑀤𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀁 𑀲𑀫𑀸𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑁂𑀦𑁂𑀯 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀯𑀺𑀦𑀬𑀲𑀗𑁆𑀕𑀳𑀇𑀢𑀺 𑀦𑀸𑀫𑀲𑁆𑀲 𑀮𑀪𑀦𑀢𑁄.

𑀦𑀺𑀫𑀺𑀢𑁆𑀢𑀁 ¶ 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀁 𑀦𑀸𑀫 𑀓𑀭𑀼𑀡𑀸, 𑀢𑀁 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀁 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀅𑀪𑀸𑀯𑀢𑁄. 𑀩𑀸𑀳𑀺𑀭𑀁 𑀦𑀸𑀫 𑀲𑁄𑀢𑀼𑀚𑀦𑀲𑀫𑀽𑀳𑁄, 𑀢𑀁 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀦𑁆𑀢𑀺 𑀢𑀲𑁆𑀲 𑀓𑀭𑀼𑀡𑀸𑀭𑀫𑁆𑀫𑀡𑀪𑀸𑀯𑀢𑁄. 𑀧𑀬𑁄𑀚𑀦𑀁 𑀧𑀦 𑀤𑀼𑀯𑀺𑀥𑀁 𑀧𑀡𑀸𑀫𑀧𑀬𑁄𑀚𑀦𑀧𑀓𑀭𑀡𑀧𑀬𑁄𑀚𑀦𑀯𑀲𑁂𑀦. 𑀢𑀢𑁆𑀣 𑀧𑀡𑀸𑀫𑀧𑀬𑁄𑀚𑀦𑀁 𑀦𑀸𑀫 𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀧𑀲𑀸𑀤𑀚𑀦𑀦𑀸𑀤𑀺𑀓𑀁, 𑀢𑀁 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦𑀦𑁆𑀢𑀺 𑀇𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀁 𑀳𑁂𑀢𑀼𑀫𑁆𑀳𑀺 𑀲𑀢𑀺 𑀨𑀮𑀲𑁆𑀲 𑀅𑀯𑀺𑀦𑀸𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀘𑀭𑀺𑀬𑁂𑀦 ‘‘𑀕𑀼𑀡𑀯𑀺𑀲𑁂𑀲𑀯𑀸 𑀳𑀺 𑀧𑀡𑀸𑀫𑀸𑀭𑀳𑁄 ¶ 𑀳𑁄𑀢𑀺, 𑀧𑀡𑀸𑀫𑀸𑀭𑀳𑁂 𑀘 𑀓𑀢𑁄 𑀧𑀡𑀸𑀫𑁄 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀓𑀭𑁄𑀯 𑀳𑁄𑀢𑀻’’𑀢𑀺 (𑀥. 𑀲. 𑀫𑀽𑀮𑀝𑀻. 𑁧). 𑀧𑀓𑀭𑀡𑀧𑀬𑁄𑀚𑀦𑀫𑁆𑀧𑀺 𑀤𑀼𑀯𑀺𑀥𑀁 𑀫𑀼𑀔𑁆𑀬𑀸𑀦𑀼𑀲𑀗𑁆𑀕𑀺𑀓𑀯𑀲𑁂𑀦. 𑀢𑁂𑀲𑀼 𑀫𑀼𑀔𑁆𑀬𑀧𑀬𑁄𑀚𑀦𑀁 𑀦𑀸𑀫 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀁 𑀅𑀢𑁆𑀣𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀁 𑀧𑀓𑀸𑀲𑀦𑀜𑁆𑀘 𑀅𑀢𑁆𑀣𑀸𑀦𑀼𑀭𑀽𑀧𑀁 𑀩𑁆𑀬𑀜𑁆𑀚𑀦𑀲𑁆𑀲 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑀸𑀧𑀦𑀜𑁆𑀘, 𑀢𑀁 𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀁. 𑀅𑀦𑀼𑀲𑀗𑁆𑀕𑀺𑀓𑀧𑀬𑁄𑀚𑀦𑀁 𑀦𑀸𑀫 𑀲𑀻𑀮𑀸𑀤𑀺𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑁄 𑀅𑀢𑁆𑀣𑁄, 𑀢𑀁 𑀲𑀫𑀸𑀳𑀭𑀺𑀢𑁆𑀯𑀸 𑀏𑀓𑀢𑁆𑀣 𑀤𑀲𑁆𑀲𑀬𑀺𑀲𑁆𑀲𑀦𑁆𑀢𑀺 𑀇𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑁂𑀦 𑀤𑀲𑁆𑀲𑀺𑀢𑀁 𑀏𑀓𑀢𑁆𑀣 𑀲𑀫𑀸𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑁂 𑀲𑀢𑀺 𑀢𑀤𑀼𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀦𑀸 𑀓𑀢𑀧𑀬𑁄𑀕𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀢𑀤𑀢𑁆𑀣𑀲𑀺𑀚𑁆𑀛𑀦𑀢𑁄𑀢𑀺.

𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀬𑁄 𑀆𑀘𑀭𑀺𑀬𑁂𑀦 𑀓𑀢𑀸, 𑀦𑀦𑀼 𑀅𑀥𑀺𑀧𑁆𑀧𑁂𑀢𑀕𑀦𑁆𑀣𑀸𑀭𑀫𑁆𑀪𑁄𑀯 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀢𑁆𑀣 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀢𑀩𑁆𑀩𑀺𑀳𑀢𑀦𑁆𑀢𑀭𑀸𑀬𑁄 𑀳𑀼𑀢𑁆𑀯𑀸 𑀅𑀦𑀸𑀬𑀸𑀲𑁂𑀦 𑀕𑀦𑁆𑀣𑀧𑀭𑀺𑀲𑀫𑀸𑀧𑀦𑀢𑁆𑀣𑀁. 𑀧𑀡𑀸𑀫𑀸𑀭𑀳𑀪𑀸𑀯𑀯𑀘𑀦𑀁 𑀅𑀢𑁆𑀢𑀦𑁄 𑀬𑀼𑀢𑁆𑀢𑀧𑀢𑁆𑀢𑀓𑀸𑀭𑀺𑀢𑀸𑀤𑀲𑁆𑀲𑀦𑀢𑁆𑀣𑀁, 𑀢𑀁 𑀯𑀺𑀜𑁆𑀜𑀽𑀦𑀁 𑀢𑁄𑀲𑀸𑀧𑀦𑀢𑁆𑀣𑀁, 𑀢𑀁 𑀧𑀓𑀭𑀡𑀲𑁆𑀲 𑀉𑀕𑁆𑀕𑀳𑀡𑀢𑁆𑀣𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀪𑀺𑀥𑁂𑀬𑁆𑀬𑀓𑀣𑀦𑀁 𑀯𑀺𑀤𑀺𑀢𑀸𑀪𑀺𑀥𑁂𑀬𑁆𑀬𑀲𑁆𑀲 𑀕𑀦𑁆𑀣𑀲𑁆𑀲 𑀯𑀺𑀜𑁆𑀜𑀽𑀦𑀁 𑀉𑀕𑁆𑀕𑀳𑀥𑀸𑀭𑀡𑀸𑀤𑀺𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑀢𑁆𑀣𑀁. 𑀓𑀭𑀡𑀳𑁂𑀢𑀼𑀓𑀣𑀦𑀁 𑀅𑀓𑀸𑀭𑀡𑁂 𑀓𑀢𑀲𑁆𑀲 𑀯𑀸𑀬𑀸𑀫𑀲𑁆𑀲 𑀦𑀺𑀧𑁆𑀨𑀮𑀪𑀸𑀯𑀢𑁄 𑀢𑀧𑁆𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁. 𑀓𑀭𑀡𑀧𑁆𑀧𑀓𑀸𑀭𑀓𑀣𑀦𑀁 𑀯𑀺𑀤𑀺𑀢𑀧𑁆𑀧𑀓𑀸𑀭𑀲𑁆𑀲 𑀕𑀦𑁆𑀣𑀲𑁆𑀲 𑀲𑁄𑀢𑀽𑀦𑀁 𑀉𑀕𑁆𑀕𑀳𑀡𑀸𑀤𑀻𑀲𑀼 𑀭𑀼𑀘𑀺𑀚𑀦𑀦𑀢𑁆𑀣𑀁. 𑀅𑀪𑀺𑀥𑀸𑀦𑀤𑀲𑁆𑀲𑀦𑀁 𑀯𑁄𑀳𑀸𑀭𑀲𑀼𑀔𑀢𑁆𑀣𑀁. 𑀦𑀺𑀫𑀺𑀢𑁆𑀢𑀓𑀣𑀦𑀁 𑀆𑀲𑀦𑁆𑀦𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁. 𑀧𑀬𑁄𑀚𑀦𑀤𑀲𑁆𑀲𑀦𑀁 𑀤𑀼𑀯𑀺𑀥𑀧𑀬𑁄𑀚𑀦𑀓𑀸𑀫𑀻𑀦𑀁 𑀲𑁄𑀢𑀽𑀦𑀁 𑀲𑀫𑀼𑀲𑁆𑀲𑀸𑀳𑀚𑀦𑀦𑀢𑁆𑀣𑀦𑁆𑀢𑀺.

𑀭𑀢𑀦𑀢𑁆𑀢𑀬𑀧𑀡𑀸𑀫𑀧𑀬𑁄𑀚𑀦𑀁 𑀧𑀦 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀬𑀦𑁆𑀢𑀺 𑀆𑀘𑀭𑀺𑀬𑀸, 𑀢𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀕𑀦𑁆𑀣𑀕𑀭𑀼𑀪𑀸𑀯𑀫𑁄𑀘𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀥𑀺𑀧𑁆𑀧𑁂𑀢𑀧𑀬𑁄𑀚𑀦𑀫𑁂𑀯 𑀓𑀣𑀬𑀺𑀫𑁆𑀳. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑁋

‘‘𑀦𑀺𑀧𑀘𑁆𑀘𑀓𑀸𑀭𑀲𑁆𑀲𑁂𑀢𑀲𑁆𑀲 ¶ ¶ ;

𑀓𑀢𑀲𑁆𑀲 𑀭𑀢𑀦𑀢𑁆𑀢𑀬𑁂;

𑀆𑀦𑀼𑀪𑀸𑀯𑁂𑀦 𑀲𑁄𑀲𑁂𑀢𑁆𑀯𑀸;

𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸 𑁭);

𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄, 𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀅𑀳𑀁 𑀲𑀩𑁆𑀩𑀧𑀸𑀡𑀻𑀦𑀁 𑀲𑀭𑀡𑀁 𑀲𑀭𑀡𑀻𑀪𑀽𑀢𑀁 𑀯𑀢𑁆𑀣𑀼𑀢𑁆𑀢𑀬𑀁 𑀦𑀫𑀲𑁆𑀲𑀸𑀫𑀺, 𑀦𑀫𑀲𑁆𑀲𑀺𑀢𑁆𑀯𑀸 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀸𑀬 𑀅𑀦𑁂𑀓𑀢𑁆𑀣𑀯𑀺𑀧𑁆𑀧𑀓𑀺𑀡𑁆𑀡𑀁 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀏𑀓𑀢𑁆𑀣 𑀲𑀫𑀸𑀳𑀭𑀺𑀢𑁆𑀯𑀸 𑀅𑀦𑀸𑀓𑀼𑀮𑀁 𑀓𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼. 𑀓𑀺𑀁 𑀢𑀁? 𑀩𑀼𑀤𑁆𑀥𑀸𑀤𑀺𑀭𑀢𑀦𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀲𑀭𑀡𑀕𑀢𑀸 𑀲𑀧𑁆𑀧𑀼𑀭𑀺𑀲𑀸 𑀲𑀭𑀡𑀕𑀫𑀦𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀸𑀤𑀺𑀭𑀢𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀦𑀺𑀯𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑀜𑁆𑀳𑀺 𑀆𑀥𑀸𑀭𑁄, 𑀆𑀭𑀫𑁆𑀫𑀡𑀺𑀓𑀁 𑀆𑀥𑁂𑀬𑁆𑀬𑁄𑀢𑀺. 𑀇𑀢𑁄 𑀧𑀭𑀸𑀦𑀺𑀧𑀺 𑀯𑀢𑁆𑀣𑀼𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑀸𑀤𑀻𑀦𑀺 𑀆𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀥 𑀧𑀦 𑀕𑀦𑁆𑀣𑀯𑀺𑀢𑁆𑀣𑀸𑀭𑀧𑀭𑀺𑀳𑀭𑀡𑀢𑁆𑀣𑀁 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀢𑀺𑀡𑁆𑀡𑀁 𑀲𑀫𑀽𑀳𑁄𑀢𑀺 𑀢𑀬𑀁, 𑀢𑀬𑁄 𑀅𑀁𑀲𑀸 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀯𑀸 𑀢𑀬𑀁. 𑀓𑀺𑀁 𑀢𑀁? 𑀲𑀫𑀼𑀤𑀸𑀬𑁄. 𑀯𑀢𑁆𑀣𑀽𑀦𑀁 𑀢𑀬𑀦𑁆𑀢𑀺 𑀯𑀢𑁆𑀣𑀼𑀢𑁆𑀢𑀬𑀁. 𑀓𑀺𑀁 𑀢𑀁? 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀁. 𑀦𑀫𑀲𑁆𑀲𑀸𑀫𑀻𑀢𑀺 𑀦𑀫𑀲𑁆𑀲𑀺𑀢𑁆𑀯𑀸, 𑀅𑀦𑀫𑀺𑀦𑁆𑀢𑀺 𑀦𑀫𑀲𑁆𑀲𑀺𑀢𑁆𑀯𑀸. 𑀩𑀼𑀤𑁆𑀥𑀸𑀤𑀺𑀭𑀢𑀦𑀜𑁆𑀳𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀢𑁆𑀯𑀸-𑀧𑀘𑁆𑀘𑀬𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀞𑀫𑁄 𑀯𑀺𑀕𑁆𑀕𑀳𑁄 𑀓𑀢𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀏𑀓𑀢𑁆𑀣 𑀤𑀲𑁆𑀲𑀦𑀓𑀸𑀮𑁂 𑀅𑀢𑀻𑀢𑀓𑀸𑀮𑀺𑀓𑁄, 𑀢𑀲𑁆𑀫𑀸 𑀤𑀼𑀢𑀺𑀬𑁄 𑀯𑀺𑀕𑁆𑀕𑀳𑁄. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀅𑀢𑁆𑀣𑀬𑁄𑀚𑀦𑀸𑀬𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀅𑀢𑀻𑀢𑀓𑀸𑀮𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸.

𑀲𑀭𑀢𑀺 𑀳𑀺𑀁𑀲𑀢𑀻𑀢𑀺 𑀲𑀭𑀡𑀁. 𑀓𑀺𑀁 𑀢𑀁? 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀁. 𑀢𑀜𑁆𑀳𑀺 𑀲𑀭𑀡𑀕𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀁 ¶ 𑀲𑀁𑀓𑀺𑀮𑁂𑀲𑀁 𑀲𑀭𑀢𑀺 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 ‘‘𑀲𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧),

‘‘𑀏𑀯𑀁 ¶ 𑀩𑀼𑀤𑁆𑀥𑀁 𑀲𑀭𑀦𑁆𑀢𑀸𑀦𑀁;

𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀪𑀺𑀓𑁆𑀔𑀯𑁄;

𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸;

𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺 𑀘. (𑀲𑀁. 𑀦𑀺. 𑁧.𑁨𑁪𑁯);

𑀬𑀲𑁆𑀫𑀸 𑀧𑀦 ‘‘𑀲𑀭𑀡’’𑀦𑁆𑀢𑀺 𑀇𑀤𑀁 𑀧𑀤𑀁 ‘‘𑀦𑀸𑀣’’𑀦𑁆𑀢𑀺 𑀧𑀤𑀲𑁆𑀲 𑀯𑁂𑀯𑀘𑀦𑀪𑀽𑀢𑀁 𑀓𑀺𑀢𑀲𑀼𑀤𑁆𑀥𑀦𑀸𑀫𑀧𑀤𑀁 𑀳𑁄𑀢𑀺, 𑀦 𑀓𑀺𑀢𑀫𑀢𑁆𑀢𑀧𑀤𑀁, 𑀢𑀲𑁆𑀫𑀸 𑀥𑀸𑀢𑁆𑀯𑀢𑁆𑀣𑁄 𑀅𑀦𑁆𑀢𑁄𑀦𑀻𑀢𑁄. ‘‘𑀲𑀭 𑀳𑀺𑀁𑀲𑀸𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁 𑀳𑀺𑀁𑀲𑀢𑁆𑀣𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀸𑀡𑀻𑀦𑀁 𑀲𑀭𑀡𑀁 𑀳𑀺𑀁𑀲𑀓𑀁 𑀯𑀢𑁆𑀣𑀼𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑁆𑀯𑀸 𑀯𑀺𑀜𑁆𑀜𑀸𑀬𑀫𑀸𑀦𑁂 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 𑀲𑀩𑁆𑀩𑀧𑀸𑀡𑀻𑀦𑀁 𑀲𑀭𑀡𑀁 𑀲𑀭𑀡𑀻𑀪𑀽𑀢𑀁 𑀦𑀸𑀣𑀪𑀽𑀢𑀁 𑀯𑀢𑁆𑀣𑀼𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑁆𑀯𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁂𑀬𑁂𑀯 𑀬𑀼𑀚𑁆𑀚𑀢𑀺, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀅𑀢𑁆𑀣𑀬𑁄𑀚𑀦𑀸𑀬𑀫𑁆𑀧𑀺 𑀢𑀣𑀸 𑀬𑁄𑀚𑀦𑀸 𑀓𑀢𑀸. 𑀲𑀩𑁆𑀩-𑀲𑀤𑁆𑀤𑁄 𑀦𑀺𑀭𑀯𑀲𑁂𑀲𑀢𑁆𑀣𑀯𑀸𑀘𑀓𑀁 𑀲𑀩𑁆𑀩𑀦𑀸𑀫𑀧𑀤𑀁. 𑀲𑀳 𑀅𑀯𑁂𑀦 𑀬𑁄 𑀯𑀢𑁆𑀢𑀢𑀻𑀢𑀺 𑀲𑀩𑁆𑀩𑁄𑀢𑀺 𑀓𑀢𑁂 𑀧𑀦 𑀲𑀓𑀮-𑀲𑀤𑁆𑀤𑁄 𑀯𑀺𑀬 𑀲𑀫𑀼𑀤𑀸𑀬𑀯𑀸𑀘𑀓𑀁 𑀲𑀫𑀸𑀲𑀦𑀸𑀫𑀧𑀤𑀁 𑀳𑁄𑀢𑀺. 𑀧𑀸𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀸𑀡𑀺𑀦𑁄, 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀩𑁆𑀩𑁂 𑀧𑀸𑀡𑀺𑀦𑁄 𑀲𑀩𑁆𑀩𑀧𑀸𑀡𑀺𑀦𑁄, 𑀢𑁂𑀲𑀁 𑀲𑀩𑁆𑀩𑀧𑀸𑀡𑀻𑀦𑀁. 𑀏𑀢𑁆𑀢𑀸𑀯𑀢𑀸 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀲𑀩𑁆𑀩𑀮𑁄𑀓𑀲𑀭𑀡𑀪𑀸𑀯𑀁, 𑀢𑀢𑁄𑀬𑁂𑀯 𑀘 𑀦𑀫𑀲𑁆𑀲𑀦𑀸𑀭𑀳𑀪𑀸𑀯𑀁, 𑀦𑀫𑀲𑁆𑀲𑀦𑀸𑀭𑀳𑁂 𑀘 𑀓𑀢𑀸𑀬𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀓𑀭𑀪𑀸𑀯𑀁, 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀘 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀯𑀁 𑀲𑀳𑁂𑀢𑀼𑀓𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀭𑀡𑀸𑀭𑀫𑁆𑀪𑀲𑁆𑀲 𑀲𑀦𑀺𑀫𑀺𑀢𑁆𑀢𑀁 𑀫𑀼𑀔𑁆𑀬𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀦𑀬𑁂 ¶ 𑀧𑀸𑀝𑀯𑀢𑁆𑀣𑀸𑀬, 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦’’𑀦𑁆𑀢𑀺. 𑀏𑀢𑁆𑀣 𑀘 𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀸𑀬𑀸𑀢𑀺 𑀫𑀼𑀔𑁆𑀬𑀧𑀬𑁄𑀚𑀦𑀤𑀲𑁆𑀲𑀦𑀁, 𑀢𑀁𑀤𑀲𑁆𑀲𑀦𑁂𑀦 𑀘 𑀅𑀦𑀼𑀲𑀗𑁆𑀕𑀺𑀓𑀧𑀬𑁄𑀚𑀦𑀫𑁆𑀧𑀺 𑀯𑀺𑀪𑀸𑀯𑀺𑀢𑀫𑁂𑀯 𑀳𑁄𑀢𑀺 𑀓𑀸𑀭𑀡𑁂 𑀲𑀺𑀤𑁆𑀥𑁂 𑀓𑀸𑀭𑀺𑀬𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀦𑁆𑀢𑀺 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀁, 𑀢𑀲𑁆𑀫𑀺𑀁 𑀤𑀲𑁆𑀲𑀺𑀢𑁂 𑀅𑀚𑁆𑀛𑀢𑁆𑀢𑀺𑀓𑀦𑀺𑀫𑀺𑀢𑁆𑀢𑀫𑁆𑀧𑀺 𑀤𑀻𑀧𑀺𑀢𑀫𑁂𑀯 𑀳𑁄𑀢𑀺 𑀆𑀭𑀫𑁆𑀫𑀡𑁂 𑀜𑀸𑀢𑁂 𑀆𑀭𑀫𑁆𑀫𑀡𑀺𑀓𑀲𑁆𑀲 𑀜𑀸𑀢𑀩𑁆𑀩𑀢𑁄. 𑀢𑀢𑁆𑀣 𑀯𑀺𑀯𑀺𑀥𑀸 𑀦𑀬𑀸 𑀏𑀢𑁆𑀣𑀸𑀢𑀺 𑀯𑀺𑀦𑀬𑁄, 𑀤𑀼𑀯𑀺𑀥𑀧𑀸𑀢𑀺𑀫𑁄𑀓𑁆𑀔𑀤𑀼𑀯𑀺𑀥𑀯𑀺𑀪𑀗𑁆𑀕𑀧𑀜𑁆𑀘𑀯𑀺𑀥𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀜𑁆𑀘𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀢𑁆𑀢𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀯𑀺𑀥𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀦𑀬𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀺𑀲𑁂𑀲𑀸 𑀦𑀬𑀸 𑀏𑀢𑁆𑀣𑀸𑀢𑀺 𑀯𑀺𑀦𑀬𑁄, 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑀬𑁄𑀚𑀦𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀦𑀬𑀸𑀤𑀬𑁄 𑀯𑀺𑀲𑁂𑀲𑀸 𑀦𑀬𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀺𑀦𑁂𑀢𑀻𑀢𑀺 𑀯𑀺𑀦𑀬𑁄. 𑀓𑀸𑀬𑁄 𑀯𑀺𑀦𑁂𑀢𑀺 𑀓𑀸𑀬𑀯𑀸𑀘𑀸𑀬𑁄, 𑀇𑀢𑀺 𑀓𑀸𑀬𑀯𑀸𑀘𑀸𑀦𑀁 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸 ¶ ;

𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁;

𑀯𑀺𑀦𑀬𑁄 ‘𑀯𑀺𑀦𑀬𑁄’𑀢𑀺 𑀅𑀓𑁆𑀔𑀸𑀢𑁄’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸);

𑀓𑁄 𑀲𑁄? 𑀯𑀺𑀦𑀬𑀧𑀺𑀝𑀓𑀁. 𑀢𑀲𑁆𑀫𑀺𑀁 𑀯𑀺𑀦𑀬𑁂. 𑀧𑀝𑀢𑀺 𑀯𑀺𑀬𑀢𑁆𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀝𑀼. 𑀓𑁄 𑀲𑁄? 𑀧𑀡𑁆𑀟𑀺𑀢𑁄. 𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁. 𑀓𑀺𑀁 𑀢𑀁? 𑀜𑀸𑀡𑀁. 𑀅𑀲𑀢𑀺 𑀓𑀸𑀭𑀡𑀸𑀦𑀼𑀭𑀽𑀧𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀲𑁄? 𑀧𑀬𑁄𑀚𑀦𑀁. 𑀧𑀸𑀝𑀯𑀫𑁂𑀯 𑀅𑀢𑁆𑀣𑁄 𑀧𑀸𑀝𑀯𑀢𑁆𑀣𑁄, 𑀢𑀲𑁆𑀲 𑀧𑀸𑀝𑀯𑀢𑁆𑀣𑀸𑀬, 𑀯𑀺𑀦𑀬𑀧𑀺𑀝𑀓𑁂 𑀓𑁄𑀲𑀮𑁆𑀮𑀜𑀸𑀡𑀧𑀬𑁄𑀚𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀼𑀜𑁆𑀚𑀦𑀁 𑀬𑁄𑀕𑁄, 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄. 𑀅𑀯𑀘𑀭𑀦𑁆𑀢𑀻𑀢𑀺 𑀅𑀯𑀘𑀭𑀸, 𑀬𑁄𑀕𑁂 𑀅𑀯𑀘𑀭𑀸 𑀬𑁄𑀕𑀸𑀯𑀘𑀭𑀸, 𑀓𑀫𑁆𑀫𑀝𑁆𑀞𑀸𑀦𑀺𑀓𑀸 𑀪𑀺𑀓𑁆𑀔𑀽. 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑁆𑀢𑀻𑀢𑀺 𑀪𑀺𑀓𑁆𑀔𑀽, 𑀬𑁄𑀕𑀸𑀯𑀘𑀭𑀸 𑀘 𑀢𑁂 𑀪𑀺𑀓𑁆𑀔𑀽 𑀘𑀸𑀢𑀺 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽, 𑀢𑁂𑀲𑀁 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀽𑀦𑀁. 𑀏𑀢𑁂𑀦 ¶ 𑀯𑀺𑀦𑀬𑁂 𑀧𑀝𑀼𑀪𑀸𑀯𑁄 𑀦𑀸𑀫 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑁄 𑀳𑁄𑀢𑀺, 𑀦 𑀕𑀳𑀝𑁆𑀞𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀁. 𑀪𑀺𑀓𑁆𑀔𑀽𑀲𑀼 𑀘 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑀼𑀢𑁆𑀢𑀸𑀦𑀁 𑀮𑀚𑁆𑀚𑀺𑀧𑁂𑀲𑀮𑀪𑀺𑀓𑁆𑀔𑀽𑀦𑀁𑀬𑁂𑀯, 𑀦 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀅𑀮𑀚𑁆𑀚𑀺𑀪𑀺𑀓𑁆𑀔𑀽𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀏𑀯𑀁 𑀧𑀓𑀭𑀡𑀸𑀭𑀫𑁆𑀪𑀲𑁆𑀲 𑀲𑀦𑀺𑀫𑀺𑀢𑁆𑀢𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳𑁂𑀢𑀼𑀓𑀁 𑀅𑀪𑀺𑀥𑁂𑀬𑁆𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑁆𑀧𑀓𑀺𑀡𑁆𑀡𑀫𑀦𑁂𑀓𑀢𑁆𑀣, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀆𑀳. 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑀁 𑀅𑀦𑁂𑀓𑀢𑁆𑀣𑀸𑀢𑀺 𑀇𑀫𑀺𑀦𑀸 𑀧𑀓𑀭𑀡𑀸𑀭𑀫𑁆𑀪𑀲𑁆𑀲 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺 𑀳𑁂𑀢𑀼𑀫𑀦𑁆𑀢𑀯𑀺𑀲𑁂𑀲𑀦𑀢𑁆𑀢𑀸, 𑀇𑀫𑀲𑁆𑀲 𑀅𑀦𑁂𑀓𑀢𑁆𑀣𑀯𑀺𑀧𑁆𑀧𑀓𑀺𑀡𑁆𑀡𑀢𑁆𑀢𑀸𑀬𑁂𑀯 𑀆𑀘𑀭𑀺𑀬𑀲𑁆𑀲 𑀆𑀭𑀫𑁆𑀪𑁄 𑀳𑁄𑀢𑀺, 𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑁂 𑀲𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀫𑀸𑀳𑀭𑀺𑀢𑁆𑀯𑀸 𑀏𑀓𑀢𑁆𑀣 𑀤𑀲𑁆𑀲𑀬𑀺𑀲𑁆𑀲’’𑀦𑁆𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸). 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀇𑀫𑀺𑀦𑀸 𑀧𑀓𑀭𑀡𑀸𑀪𑀺𑀥𑁂𑀬𑁆𑀬𑀁. 𑀢𑀢𑁆𑀣 𑀓𑀺𑀭𑀢𑀺 𑀯𑀺𑀓𑁆𑀔𑀺𑀧𑀢𑀻𑀢𑀺 𑀓𑀺𑀡𑁆𑀡𑁄, 𑀧𑀓𑀸𑀭𑁂𑀦 𑀓𑀺𑀡𑁆𑀡𑁄 𑀧𑀓𑀺𑀡𑁆𑀡𑁄, 𑀯𑀺𑀯𑀺𑀥𑁂𑀦 𑀧𑀓𑀺𑀡𑁆𑀡𑁄 𑀯𑀺𑀧𑁆𑀧𑀓𑀺𑀡𑁆𑀡𑁄. 𑀓𑁄 𑀲𑁄? 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀯𑀺𑀧𑁆𑀧𑀓𑀺𑀡𑁆𑀡𑀁.

𑀅𑀦𑁂𑀓𑀢𑁆𑀣𑀸𑀢𑀺 𑀏𑀢𑁆𑀣 𑀲𑀗𑁆𑀔𑁆𑀬𑀸𑀯𑀸𑀘𑀓𑁄 𑀲𑀩𑁆𑀩𑀦𑀸𑀫𑀺𑀓𑁄 𑀏𑀓-𑀲𑀤𑁆𑀤𑁄, 𑀦 𑀏𑀓𑁄 𑀅𑀦𑁂𑀓𑁂. 𑀩𑀳𑁆𑀯𑀢𑁆𑀣𑀯𑀸𑀘𑀓𑁄 𑀅𑀦𑁂𑀓𑀲𑀤𑁆𑀤𑁄. 𑀏𑀓𑀦𑁆𑀢𑀏𑀓𑀯𑀘𑀦𑀦𑁆𑀢𑁄𑀧𑀺 𑀏𑀓-𑀲𑀤𑁆𑀤𑁄 𑀦-𑀇𑀢𑀺𑀦𑀺𑀧𑀸𑀢𑁂𑀦 𑀬𑀼𑀢𑁆𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑁆𑀢𑁄 𑀚𑀸𑀢𑁄𑀢𑀺. 𑀢𑀢𑁆𑀣 𑀅𑀦𑁂𑀓𑀢𑁆𑀣 𑀩𑀳𑀽𑀲𑀽𑀢𑀺 𑀅𑀢𑁆𑀣𑁄, 𑀧𑀸𑀭𑀸𑀚𑀺𑀓𑀓𑀡𑁆𑀟𑀝𑁆𑀞𑀓𑀣𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀧𑀓𑀭𑀡𑁂𑀲𑀽𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑁄𑀭𑀸𑀡𑀝𑀻𑀓𑀸𑀬𑀁 𑀧𑀦 𑀅𑀦𑁂𑀓𑀢𑁆𑀣𑀸𑀢𑀺 𑀅𑀦𑁂𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑀧𑀤𑁂𑀲𑁂𑀲𑀽𑀢𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀏𑀯𑀜𑁆𑀘 𑀲𑀢𑀺 𑀉𑀧𑀭𑀺 ‘‘𑀲𑀫𑀸𑀳𑀭𑀺𑀢𑁆𑀯𑀸 𑀏𑀓𑀢𑁆𑀣𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀅𑀦𑁂𑀓𑀢𑁆𑀣𑀯𑀺𑀧𑁆𑀧𑀓𑀺𑀡𑁆𑀡𑀁 𑀏𑀓𑀢𑁆𑀣 𑀲𑀫𑀸𑀳𑀭𑀺𑀢𑁆𑀯𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀲𑀳𑀬𑁄𑀕𑀻𑀪𑀽𑀢𑀢𑁆𑀢𑀸 𑀅𑀦𑁂𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑀧𑀤𑁂𑀲𑁂𑀲𑀼 𑀯𑀺𑀧𑁆𑀧𑀓𑀺𑀡𑁆𑀡𑀁 𑀏𑀓𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀧𑀤𑁂𑀲𑁂 𑀲𑀫𑀸𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀲𑁄 𑀘 𑀅𑀢𑁆𑀣𑁄 𑀅𑀬𑀼𑀢𑁆𑀢𑁄. 𑀓𑀲𑁆𑀫𑀸? 𑀅𑀦𑁂𑀓𑁂𑀲𑀼 𑀧𑀓𑀭𑀡𑁂𑀲𑀼 𑀯𑀺𑀧𑁆𑀧𑀓𑀺𑀡𑁆𑀡𑀁 𑀏𑀓𑀲𑁆𑀫𑀺𑀁 𑀧𑀓𑀭𑀡𑁂 𑀲𑀫𑀸𑀳𑀭𑀺𑀢𑁆𑀯𑀸𑀢𑀺 ¶ 𑀅𑀢𑁆𑀣𑁄 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑁄. 𑀅𑀣 𑀧𑀦 ‘‘𑀏𑀓𑀢𑁆𑀣𑀸’’𑀢𑀺 𑀇𑀫𑀲𑁆𑀲 ‘‘𑀏𑀓𑀢𑁄’’𑀢𑀺 𑀅𑀢𑁆𑀣𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀦𑁂𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑀧𑀤𑁂𑀲𑁂𑀲𑀼 𑀯𑀺𑀧𑁆𑀧𑀓𑀺𑀡𑁆𑀡𑀁 𑀏𑀓𑀢𑁄 𑀲𑀫𑀸𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑀁 𑀕𑀡𑁆𑀳𑁂𑀬𑁆𑀬, 𑀲𑁄 𑀅𑀢𑁆𑀣𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬.

𑀧𑀓𑀝𑁆𑀞𑀸𑀦𑀁 𑀆𑀴𑀻𑀢𑀺 𑀧𑀸𑀴𑀺, 𑀉𑀢𑁆𑀢𑀫𑀸𑀦𑀁 𑀯𑀘𑀦𑀸𑀦𑀁 𑀅𑀦𑀼𑀓𑁆𑀓𑀫𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑀁 𑀅𑀢𑁆𑀣𑀁 𑀧𑀸𑀮𑁂𑀢𑀺 𑀭𑀓𑁆𑀔𑀢𑀻𑀢𑀺 𑀧𑀸𑀴𑀺, 𑀮𑀴𑀸𑀦𑀫𑀯𑀺𑀲𑁂𑀲𑁄. 𑀓𑀸 𑀲𑀸? 𑀯𑀺𑀦𑀬𑀢𑀦𑁆𑀢𑀺. 𑀫𑀼𑀘𑁆𑀘𑀢𑀻𑀢𑀺 𑀫𑀼𑀢𑁆𑀢𑁄, 𑀧𑀸𑀴𑀺𑀢𑁄 𑀫𑀼𑀢𑁆𑀢𑁄 𑀧𑀸𑀴𑀺𑀫𑀼𑀢𑁆𑀢𑁄. 𑀙𑀺𑀦𑁆𑀤𑀺𑀬𑀢𑁂 𑀅𑀦𑁂𑀦𑀸𑀢𑀺 𑀙𑀬𑁄, 𑀦𑀻𑀳𑀭𑀺𑀢𑁆𑀯𑀸 𑀙𑀬𑁄 𑀦𑀺𑀘𑁆𑀙𑀬𑁄, 𑀯𑀺𑀲𑁂𑀲𑁂𑀦 𑀦𑀺𑀘𑁆𑀙𑀬𑁄 𑀯𑀺𑀦𑀺𑀘𑁆𑀙𑀬𑁄, 𑀔𑀺𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑀦𑀬𑁄 𑀅𑀢𑁆𑀣𑀦𑀬𑁄 𑀘. 𑀧𑀸𑀴𑀺𑀫𑀼𑀢𑁆𑀢𑁄 𑀘 𑀲𑁄 𑀯𑀺𑀦𑀺𑀘𑁆𑀙𑀬𑁄 𑀘𑀸𑀢𑀺 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁. 𑀇𑀤𑀜𑁆𑀘 ‘‘𑀆𑀦𑀕𑀭𑀸 𑀔𑀤𑀺𑀭𑀯𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀬𑁂𑀪𑀼𑀬𑁆𑀬𑀦𑀬𑀯𑀲𑁂𑀦 𑀯𑀼𑀢𑁆𑀢𑀁 𑀓𑀢𑁆𑀣𑀘𑀺 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑀲𑁆𑀲𑀧𑀺 𑀤𑀺𑀲𑁆𑀲𑀦𑀢𑁄. 𑀧𑁄𑀭𑀸𑀡𑀝𑀻𑀓𑀸𑀬𑀁 𑀧𑀦 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄 𑀘 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀘 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄𑀢𑀺 𑀏𑀯𑀁 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀼𑀢𑀺𑀬𑀦𑀬𑁄𑀧𑀺 𑀯𑀼𑀢𑁆𑀢𑁄, 𑀏𑀯𑀜𑁆𑀘 𑀲𑀢𑀺 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀳𑀺 𑀅𑀜𑁆𑀜𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀪𑀸𑀯𑀸 𑀓𑀺𑀫𑁂𑀢𑁂𑀦 𑀕𑀦𑁆𑀣𑀕𑀭𑀼𑀓𑀭𑁂𑀦 𑀧𑀸𑀴𑀺𑀫𑀼𑀢𑁆𑀢𑀕𑁆𑀕𑀳𑀡𑁂𑀦. 𑀯𑀺𑀲𑁂𑀲𑀦𑀜𑁆𑀳𑀺 𑀲𑀫𑁆𑀪𑀯𑀩𑁆𑀬𑀪𑀺𑀘𑀸𑀭𑁂 𑀘 𑀲𑀢𑀺 𑀲𑀸𑀢𑁆𑀣𑀓𑀁 𑀲𑀺𑀬𑀸𑀢𑀺 𑀧𑀞𑀫𑀦𑀬𑁄𑀯 𑀆𑀭𑀸𑀥𑀦𑀻𑀬𑁄 𑀳𑁄𑀢𑀺.

𑀏𑀯𑀁 𑀲𑀳𑁂𑀢𑀼𑀓𑀁 𑀅𑀪𑀺𑀥𑁂𑀬𑁆𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀲𑀫𑀸𑀳𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀤𑀼𑀯𑀺𑀥𑁄 𑀳𑁂𑀢𑁆𑀣 𑀓𑀭𑀡𑀧𑁆𑀧𑀓𑀸𑀭𑁄 𑀏𑀓𑀢𑁆𑀣𑀲𑀫𑀸𑀳𑀭𑀡𑀅𑀦𑀸𑀓𑀼𑀮𑀓𑀭𑀡𑀯𑀲𑁂𑀦. 𑀲𑁄 𑀤𑀼𑀯𑀺𑀥𑁄𑀧𑀺 𑀢𑁂𑀦 𑀧𑀓𑀸𑀭𑁂𑀦 𑀧𑀓𑀭𑀡𑀲𑁆𑀲 𑀓𑀢𑀢𑁆𑀢𑀸 ‘‘𑀓𑀭𑀡𑀧𑁆𑀧𑀓𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀲𑀫𑀸𑀳𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑀸𑀳𑀭𑀺𑀢𑁆𑀯𑀸, 𑀲𑀁-𑀲𑀤𑁆𑀤𑁄 𑀲𑀗𑁆𑀔𑁂𑀧𑀢𑁆𑀣𑁄, 𑀢𑀲𑁆𑀫𑀸 𑀲𑀗𑁆𑀔𑀺𑀧𑀺𑀬 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀢𑀓𑀸𑀮𑀺𑀓𑀯𑀲𑁂𑀦 𑀧𑀘𑁆𑀘𑀫𑀸𑀦𑁂𑀦 ‘‘𑀤𑀲𑁆𑀲𑀬𑀺𑀲𑁆𑀲’’𑀦𑁆𑀢𑀺 ¶ 𑀧𑀤𑁂𑀦 𑀲𑀫𑀸𑀦𑀓𑀸𑀮𑀢𑁆𑀢𑀸 𑀅𑀦𑀸𑀕𑀢𑀓𑀸𑀮𑀺𑀓𑁄 𑀇𑀥 𑀢𑁆𑀯𑀸-𑀧𑀘𑁆𑀘𑀬𑁄 𑀯𑀼𑀢𑁆𑀢𑁄. 𑀏𑀓𑀢𑁆𑀣𑀸𑀢𑀺 𑀏𑀓𑀲𑁆𑀫𑀺𑀁 𑀇𑀥 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑁂. 𑀏𑀓𑀢𑁆𑀣𑀸𑀢𑀺 𑀯𑀸 𑀏𑀓𑀢𑁄. 𑀤𑀲𑁆𑀲𑀬𑀺𑀲𑁆𑀲𑀦𑁆𑀢𑀺 𑀤𑀲𑁆𑀲𑀬𑀺𑀲𑁆𑀲𑀸𑀫𑀺, 𑀜𑀸𑀧𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀆𑀓𑀼𑀮𑀢𑀺 𑀩𑁆𑀬𑀸𑀓𑀼𑀮𑀢𑀻𑀢𑀺 𑀆𑀓𑀼𑀮𑁄, 𑀦 𑀆𑀓𑀼𑀮𑁄 ¶ 𑀅𑀦𑀸𑀓𑀼𑀮𑁄, 𑀧𑀼𑀩𑁆𑀩𑀸𑀧𑀭𑀩𑁆𑀬𑀸𑀓𑀺𑀡𑁆𑀡𑀯𑀺𑀭𑀳𑀺𑀢𑁄 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄. 𑀅𑀦𑀸𑀓𑀼𑀮𑀦𑁆𑀢𑀺 𑀧𑀦 𑀪𑀸𑀯𑀦𑀧𑀼𑀁𑀲𑀓𑀁, 𑀢𑀲𑁆𑀫𑀸 𑀓𑀭𑀥𑀸𑀢𑀼𑀫𑀬𑁂𑀦 𑀓𑀢𑁆𑀯𑀸𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀏𑀯𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀺𑀓𑀁 𑀧𑀼𑀩𑁆𑀩𑀓𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑁂𑀲𑀁 𑀅𑀦𑀼𑀓𑁆𑀓𑀫𑀓𑀭𑀡𑀢𑁆𑀣𑀁 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁄 ‘‘𑀢𑀢𑁆𑀭𑀸𑀬𑀁 𑀫𑀸𑀢𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀫𑀸𑀢𑀺𑀓𑀸𑀬 𑀳𑀺 𑀅𑀲𑀢𑀺 𑀤𑀲𑁆𑀲𑀺𑀢𑀯𑀺𑀦𑀺𑀘𑁆𑀙𑀬𑀸 𑀯𑀺𑀓𑀺𑀭𑀦𑁆𑀢𑀺 𑀯𑀺𑀥𑀁𑀲𑁂𑀦𑁆𑀢𑀺 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺. 𑀲𑀦𑁆𑀢𑀺𑀬𑀸 𑀧𑀦 𑀫𑀸𑀢𑀺𑀓𑀸𑀬 𑀤𑀲𑁆𑀲𑀺𑀢𑀯𑀺𑀦𑀺𑀘𑁆𑀙𑀬𑀸 𑀦 𑀯𑀺𑀓𑀺𑀭𑀦𑁆𑀢𑀺 𑀦 𑀯𑀺𑀥𑀁𑀲𑁂𑀦𑁆𑀢𑀺 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺. 𑀢𑀁 𑀢𑀁 𑀅𑀢𑁆𑀣𑀁 𑀚𑀸𑀦𑀺𑀢𑀼𑀓𑀸𑀫𑁂𑀳𑀺 𑀫𑀸𑀢𑀺𑀓𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀯𑀺𑀦𑀺𑀘𑁆𑀙𑀬𑀁 𑀧𑀢𑁆𑀯𑀸 𑀲𑁄 𑀲𑁄 𑀅𑀢𑁆𑀣𑁄 𑀚𑀸𑀦𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀫𑀸𑀢𑀺𑀓𑀸 𑀞𑀧𑀺𑀢𑀸. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂. 𑀅𑀬𑀦𑁆𑀢𑀺 𑀅𑀬𑀁 𑀫𑀬𑀸 𑀯𑀓𑁆𑀔𑀫𑀸𑀦𑀸. 𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸. 𑀬𑀣𑀸 𑀳𑀺 𑀧𑀼𑀢𑁆𑀢𑀸 𑀫𑀸𑀢𑀺𑀢𑁄 𑀧𑀪𑀯𑀦𑁆𑀢𑀺, 𑀏𑀯𑀁 𑀦𑀺𑀤𑁆𑀤𑁂𑀲𑀧𑀤𑀸𑀦𑀺 𑀉𑀤𑁆𑀤𑁂𑀲𑀢𑁄 𑀧𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀉𑀤𑁆𑀤𑁂𑀲𑁄 𑀫𑀸𑀢𑀺𑀓𑀸 𑀯𑀺𑀬𑀸𑀢𑀺 ‘‘𑀫𑀸𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺.

𑀤𑀺𑀯𑀸𑀲𑁂𑀬𑁆𑀬𑀸𑀢𑀺𑀆𑀤𑀻𑀲𑀼 𑀤𑀺𑀯𑀸𑀲𑁂𑀬𑁆𑀬𑀸 𑀤𑀺𑀯𑀸𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸. 𑀧𑀭𑀺𑀓𑁆𑀔𑀸𑀭𑁄 𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸…𑀧𑁂… 𑀧𑀓𑀺𑀡𑁆𑀡𑀓𑀁 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 𑀬𑁄𑀚𑀦𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀤𑀺𑀯𑀸𑀲𑀬𑀦𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸’’𑀢𑀺𑀆𑀤𑀺. 𑀇𑀢𑀺-𑀲𑀤𑁆𑀤𑁄 𑀇𑀤𑀫𑀢𑁆𑀣𑁄 𑀯𑀸 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀸 𑀧𑀭𑀺𑀲𑀫𑀸𑀧𑀦𑀢𑁆𑀣𑁄 𑀯𑀸. 𑀢𑁂𑀲𑀼 𑀇𑀤𑀫𑀢𑁆𑀣𑁂 𑀓𑀸 𑀲𑀸? 𑀤𑀺𑀯𑀸𑀲𑁂𑀬𑁆𑀬𑀸…𑀧𑁂… 𑀧𑀓𑀺𑀡𑁆𑀡𑀓𑀁 𑀇𑀢𑀺 𑀅𑀬𑀦𑁆𑀢𑀺. 𑀦𑀺𑀤𑀲𑁆𑀲𑀦𑀢𑁆𑀣𑁂 ¶ 𑀓𑀣𑀁 𑀲𑀸? 𑀤𑀺𑀯𑀸𑀲𑁂𑀬𑁆𑀬𑀸…𑀧𑁂… 𑀧𑀓𑀺𑀡𑁆𑀡𑀓𑀁 𑀇𑀢𑀺 𑀤𑀝𑁆𑀞𑀩𑁆𑀩𑀸𑀢𑀺. 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀲𑀸 𑀓𑀺𑀢𑁆𑀢𑀓𑁂𑀦 𑀧𑀭𑀺𑀲𑀫𑀢𑁆𑀢𑀸? 𑀤𑀺𑀯𑀸𑀲𑁂𑀬𑁆𑀬𑀸…𑀧𑁂… 𑀧𑀓𑀺𑀡𑁆𑀡𑀓𑀁 𑀇𑀢𑀺 𑀏𑀢𑁆𑀢𑀓𑁂𑀦 𑀧𑀭𑀺𑀲𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀁 𑀧𑀦 𑀤𑀺𑀯𑀸𑀲𑁂𑀬𑁆𑀬𑀸𑀤𑀺𑀧𑀤𑀸𑀦𑀁 𑀯𑀸𑀓𑁆𑀬𑀯𑀺𑀕𑁆𑀕𑀳𑀁 𑀓𑀢𑁆𑀯𑀸 𑀅𑀢𑁆𑀣𑁂 𑀇𑀥 𑀯𑀼𑀘𑁆𑀘𑀫𑀸𑀦𑁂 𑀅𑀢𑀺𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀲𑁄𑀢𑀽𑀦𑀜𑁆𑀘 𑀤𑀼𑀲𑁆𑀲𑀮𑁆𑀮𑀓𑁆𑀔𑀡𑀻𑀬𑁄, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑁆𑀲 𑀦𑀺𑀤𑁆𑀤𑁂𑀲𑀲𑁆𑀲 𑀆𑀤𑀺𑀫𑁆𑀳𑀺𑀬𑁂𑀯 𑀬𑀣𑀸𑀦𑀼𑀭𑀽𑀧𑀁 𑀯𑀓𑁆𑀔𑀸𑀫.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀤𑀺𑀯𑀸𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁧. 𑀏𑀯𑀁 ¶ 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀣𑀸𑀦𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀞𑀧𑀺𑀢𑀫𑀸𑀢𑀺𑀓𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀢𑀢𑁆𑀣 𑀤𑀺𑀯𑀸𑀲𑁂𑀬𑁆𑀬𑀸𑀢𑀺 𑀤𑀺𑀯𑀸𑀦𑀺𑀧𑀚𑁆𑀚𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀫𑀸𑀢𑀺𑀓𑀸𑀧𑀤𑁂𑀲𑀼 𑀲𑀫𑀪𑀺𑀦𑀺𑀯𑀺𑀝𑁆𑀞𑀲𑁆𑀲 ‘‘𑀤𑀺𑀯𑀸𑀲𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 ‘‘𑀤𑀺𑀯𑀸𑀦𑀺𑀧𑀚𑁆𑀚𑀦’’𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀤𑀺𑀯𑀸-𑀲𑀤𑁆𑀤𑁄 𑀅𑀳𑀯𑀸𑀘𑀓𑁄 𑀆𑀓𑀸𑀭𑀦𑁆𑀢𑁄 𑀦𑀺𑀧𑀸𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀆𑀦𑀼𑀓𑀽𑀮𑁆𑀬𑁂𑀢𑀼 𑀲𑀤𑁆𑀥𑀜𑁆𑀘, 𑀦𑀢𑁆𑀢𑀁 𑀤𑁄𑀲𑁄 𑀤𑀺𑀯𑀸 𑀢𑁆𑀯𑀳𑁂’’𑀢𑀺. 𑀲𑀬𑀦𑀁 𑀲𑁂𑀬𑁆𑀬𑀸, 𑀓𑀭𑀚𑀓𑀸𑀬𑀕𑀢𑀭𑀽𑀧𑀸𑀦𑀁 𑀉𑀤𑁆𑀥𑀁 𑀅𑀦𑀼𑀕𑁆𑀕𑀦𑁆𑀢𑁆𑀯𑀸 𑀤𑀻𑀖𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁄 𑀇𑀭𑀺𑀬𑀸𑀧𑀣𑀯𑀺𑀲𑁂𑀲𑁄. 𑀤𑀺𑀯𑀸𑀓𑀸𑀮𑀲𑁆𑀫𑀺𑀁 𑀲𑁂𑀬𑁆𑀬𑀸 𑀤𑀺𑀯𑀸𑀲𑁂𑀬𑁆𑀬𑀸. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸, 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀲𑀬𑀦𑀇𑀭𑀺𑀬𑀸𑀧𑀣𑀓𑀭𑀡𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀺𑀯𑀸𑀦𑀺𑀧𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀤𑀺𑀯𑀸𑀲𑀬𑀦𑁂 𑀅𑀬𑀁 𑀯𑀓𑁆𑀔𑀫𑀸𑀦𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀯𑀘𑀦𑀢𑁄’’𑀢𑀺 (𑀧𑀸𑀭𑀸. 𑁭𑁭) 𑀅𑀬𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀆𑀕𑀢𑁄 𑀪𑀕𑀯𑀢𑀸 ¶ 𑀆𑀳𑀘𑁆𑀘𑀪𑀸𑀲𑀺𑀢𑁄 𑀜𑀸𑀧𑀓𑀧𑀸𑀞𑁄. 𑀢𑀢𑁆𑀣 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦𑀸𑀢𑀺 𑀤𑀺𑀯𑀸 𑀦𑀺𑀧𑀚𑁆𑀚𑀦𑁆𑀢𑁂𑀦. 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁. ‘‘𑀤𑀺𑀯𑀸…𑀧𑁂… 𑀦𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀜𑀸𑀧𑁆𑀬𑀁. 𑀦𑀦𑀼 𑀧𑀸𑀴𑀺𑀬𑀁 ‘‘𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀦 𑀯𑀼𑀢𑁆𑀢𑀸, 𑀅𑀣 𑀓𑀣𑀫𑁂𑀢𑁆𑀣 𑀆𑀧𑀢𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀺𑀯𑀸𑀦𑀺𑀧𑀚𑁆𑀚𑀦𑁂. 𑀘-𑀲𑀤𑁆𑀤𑁄 𑀯𑀸𑀓𑁆𑀬𑀸𑀭𑀫𑁆𑀪𑀚𑁄𑀢𑀓𑁄, 𑀓𑀺𑀜𑁆𑀘𑀸𑀧𑀺-𑀲𑀤𑁆𑀤𑁄 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀬𑀤𑀺𑀧𑀻𑀢𑁆𑀬𑀢𑁆𑀣𑁄. 𑀧𑀸𑀴𑀺𑀬𑀁 𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻𑀢𑀺 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀸, 𑀧𑀦 𑀢𑀣𑀸𑀧𑀺 𑀅𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁭𑁭) 𑀤𑀼𑀓𑁆𑀓𑀝𑀁 𑀬𑀲𑁆𑀫𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀢𑁆𑀣 𑀆𑀧𑀢𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀲𑀢𑀺 𑀪𑀕𑀯𑀢𑁄 𑀯𑀘𑀦𑁂 𑀓𑀣𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀆𑀳 ‘‘𑀯𑀺𑀯𑀭𑀺𑀢𑁆𑀯𑀸…𑀧𑁂… 𑀅𑀦𑀼𑀜𑁆𑀜𑀸𑀢𑀢𑁆𑀢𑀸’’𑀢𑀺. 𑀏𑀢𑁂𑀦 𑀪𑀕𑀯𑀢𑁄 𑀅𑀦𑀼𑀚𑀸𑀦𑀦𑀫𑁆𑀧𑀺 𑀢𑀁 𑀅𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀓𑀸𑀭𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 ‘‘𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀻𑀢𑀺 𑀇𑀢𑁆𑀣𑀺𑀬𑀸 𑀓𑀢𑀅𑀚𑁆𑀛𑀸𑀘𑀸𑀭𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁭𑁭) 𑀯𑀼𑀢𑁆𑀢𑀁, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁭𑁭) 𑀧𑀦 ‘‘𑀫𑁂𑀣𑀼𑀦𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂’’𑀢𑀺 𑀯𑀼𑀢𑁆𑀢𑀁, 𑀧𑁄𑀭𑀸𑀡𑀝𑀻𑀓𑀸𑀬𑀫𑁆𑀧𑀺 𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀉𑀧𑁆𑀧𑀦𑁆𑀦𑁂 𑀫𑁂𑀣𑀼𑀦𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀫𑁂𑀣𑀼𑀦𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀸. 𑀦𑀦𑀼 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀦𑀸𑀫 𑀩𑀼𑀤𑁆𑀥𑀯𑀺𑀲𑀬𑁄, 𑀅𑀣 𑀓𑀲𑁆𑀫𑀸 ¶ 𑀅𑀝𑁆𑀞𑀓𑀣𑀸𑀬𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀢𑁄’’𑀢𑀺𑀆𑀤𑀺. 𑀦 𑀓𑁂𑀯𑀮𑀁 𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀻𑀳𑀺 𑀏𑀯 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸, 𑀅𑀣 𑀔𑁄 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑀢𑀦𑁆𑀢𑀺𑀧𑀤𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄, 𑀢𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀓𑁆𑀓𑀫𑁄𑀧𑀺 𑀪𑀸𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀳𑀺 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀸 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀬𑁂𑀯 𑀅𑀝𑁆𑀞𑀓𑀣𑀸𑀢𑀺.

𑀓𑀺𑀁 ¶ 𑀧𑀦𑁂𑀢𑁆𑀣 𑀏𑀢𑀁 𑀤𑀺𑀯𑀸 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀲𑀺𑀤𑁆𑀥𑀁, 𑀉𑀤𑀸𑀳𑀼 𑀅𑀜𑁆𑀜𑁂𑀦𑀧𑀻𑀢𑀺 𑀆𑀳 ‘‘𑀅𑀢𑁆𑀣𑀸𑀧𑀢𑁆𑀢𑀻’’𑀢𑀺𑀆𑀤𑀺. 𑀏𑀢𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀁 𑀦 𑀓𑁂𑀯𑀮𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀲𑀺𑀤𑁆𑀥𑀁, 𑀅𑀣 𑀔𑁄 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺’’𑀦𑁆𑀢𑀺 (𑀧𑀭𑀺. 𑁩𑁨𑁩) 𑀇𑀫𑀺𑀦𑀸 𑀧𑀭𑀺𑀯𑀸𑀭𑀧𑀸𑀞𑁂𑀦𑀧𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑀢𑀭𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀦𑁆𑀢𑀺? ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀤𑀺𑀯𑀸 𑀯𑀺𑀳𑀸𑀭𑀕𑀢𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀗𑁆𑀕𑀫𑀗𑁆𑀕𑀸𑀦𑀺 𑀯𑀸𑀢𑀼𑀧𑀢𑁆𑀣𑀤𑁆𑀥𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘 𑀆𑀤𑀸𑀬 𑀯𑀺𑀳𑀸𑀭𑀁 𑀆𑀕𑀫𑀺𑀁𑀲𑀼 𑀯𑀺𑀳𑀸𑀭𑀧𑁂𑀓𑁆𑀔𑀺𑀓𑀸𑀬𑁄. 𑀅𑀣 𑀔𑁄 𑀢𑀸 𑀇𑀢𑁆𑀣𑀺𑀬𑁄 𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸 ‘𑀧𑀼𑀭𑀺𑀲𑀼𑀲𑀪𑁄 𑀯𑀢𑀸𑀬’𑀦𑁆𑀢𑀺 𑀯𑀢𑁆𑀯𑀸 𑀕𑀦𑁆𑀥𑀜𑁆𑀘 𑀫𑀸𑀮𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀪𑀺𑀓𑁆𑀔𑀽 𑀓𑀺𑀮𑀺𑀦𑁆𑀦𑀁 𑀧𑀲𑁆𑀲𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀆𑀓𑀸𑀭𑁂𑀳𑀺 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺 𑀭𑀸𑀕𑁂𑀦, 𑀯𑀘𑁆𑀘𑁂𑀦, 𑀧𑀲𑁆𑀲𑀸𑀯𑁂𑀦, 𑀯𑀸𑀢𑁂𑀦, 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑁂𑀦. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀸𑀕𑁂𑀦 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀅𑀲𑁆𑀲, 𑀅𑀭𑀳𑀁 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼, 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀯𑁂 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁭𑁭) 𑀏𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨. 𑀇𑀤𑀸𑀦𑀺 𑀤𑁆𑀯𑀸𑀭𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀻𑀤𑀺𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀫𑁂𑀯𑀸𑀢𑀺 𑀲𑀁𑀯𑀭𑀡𑀯𑀺𑀯𑀭𑀡𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀬𑁄𑀕𑁆𑀕𑀤𑁆𑀯𑀸𑀭𑀫𑁂𑀯. 𑀭𑀼𑀓𑁆𑀔𑀲𑀽𑀘𑀺𑀓𑀡𑁆𑀝𑀓𑀤𑁆𑀯𑀸𑀭𑀦𑁆𑀢𑀺 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀓𑀡𑁆𑀝𑀓𑀤𑁆𑀯𑀸𑀭𑀜𑁆𑀘. ‘‘𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀓𑀡𑁆𑀝𑀓𑀤𑁆𑀯𑀸𑀭’’𑀫𑀺𑀘𑁆𑀘𑁂𑀯 𑀯𑀸 ¶ 𑀧𑀸𑀞𑁄. 𑀬𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀼𑀓𑁆𑀔𑀢𑁆𑀣𑀫𑁆𑀪𑁂 𑀦𑀺𑀔𑀦𑀺𑀢𑁆𑀯𑀸 𑀢𑀢𑁆𑀣 𑀯𑀺𑀚𑁆𑀛𑀺𑀢𑁆𑀯𑀸 𑀫𑀚𑁆𑀛𑁂 𑀤𑁆𑀯𑁂 𑀢𑀺𑀲𑁆𑀲𑁄 𑀭𑀼𑀓𑁆𑀔𑀲𑀽𑀘𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀦𑀸𑀫. 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀓𑀸𑀮𑁂 𑀅𑀧𑀦𑁂𑀢𑁆𑀯𑀸 𑀣𑀓𑀦𑀬𑁄𑀕𑁆𑀕𑀁 𑀏𑀓𑀸𑀬, 𑀩𑀳𑀽𑀳𑀺 ¶ 𑀯𑀸 𑀓𑀡𑁆𑀝𑀓𑀲𑀸𑀔𑀸𑀳𑀺 𑀓𑀢𑀁 𑀓𑀡𑁆𑀝𑀓𑀤𑁆𑀯𑀸𑀭𑀁 𑀦𑀸𑀫. 𑀕𑀸𑀫𑀤𑁆𑀯𑀸𑀭𑀲𑁆𑀲 𑀧𑀺𑀥𑀸𑀦𑀢𑁆𑀣𑀁 𑀧𑀤𑀭𑁂𑀦 𑀯𑀸 𑀓𑀡𑁆𑀝𑀓𑀲𑀸𑀔𑀸𑀤𑀻𑀳𑀺 𑀯𑀸 𑀓𑀢𑀲𑁆𑀲 𑀓𑀯𑀸𑀝𑀲𑁆𑀲 𑀉𑀤𑀼𑀓𑁆𑀔𑀮𑀧𑀸𑀲𑀓𑀭𑀳𑀺𑀢𑀢𑀸𑀬 𑀏𑀓𑁂𑀦 𑀲𑀁𑀯𑀭𑀺𑀢𑀼𑀁 𑀯𑀺𑀯𑀭𑀺𑀢𑀼𑀜𑁆𑀘 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀳𑁂𑀝𑁆𑀞𑀸 𑀏𑀓𑀁 𑀘𑀓𑁆𑀓𑀁 𑀬𑁄𑀚𑁂𑀦𑁆𑀢𑀺, 𑀬𑁂𑀦 𑀧𑀭𑀺𑀯𑀢𑁆𑀢𑀫𑀸𑀦𑀓𑀓𑀯𑀸𑀝𑀁 𑀲𑀼𑀔𑀣𑀓𑀦𑀓𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀓𑁆𑀓𑀮𑀓𑀬𑀼𑀢𑁆𑀢𑀤𑁆𑀯𑀸𑀭’’𑀦𑁆𑀢𑀺. 𑀘𑀓𑁆𑀓𑀫𑁂𑀯 𑀳𑀺 𑀮𑀸𑀢𑀩𑁆𑀩𑀢𑁆𑀣𑁂𑀦 𑀲𑀁𑀯𑀭𑀡𑀯𑀺𑀯𑀭𑀡𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀢𑁆𑀣𑁂𑀦 𑀘𑀓𑁆𑀓𑀮𑀓𑀁, 𑀢𑁂𑀦 𑀬𑀼𑀢𑁆𑀢𑀓𑀯𑀸𑀝𑀫𑁆𑀧𑀺 𑀘𑀓𑁆𑀓𑀮𑀓𑀁 𑀦𑀸𑀫, 𑀢𑁂𑀦 𑀬𑀼𑀢𑁆𑀢𑀤𑁆𑀯𑀸𑀭𑀁 𑀘𑀓𑁆𑀓𑀮𑀓𑀬𑀼𑀢𑁆𑀢𑀤𑁆𑀯𑀸𑀭𑀁.

𑀫𑀳𑀸𑀤𑁆𑀯𑀸𑀭𑁂𑀲𑀼 𑀧𑀦 𑀤𑁆𑀯𑁂 𑀢𑀻𑀡𑀺 𑀘𑀓𑁆𑀓𑀮𑀓𑀸𑀦𑀺 𑀬𑁄𑀚𑁂𑀢𑀻𑀢𑀺 𑀆𑀳 ‘‘𑀨𑀮𑀓𑁂𑀲𑀽’’𑀢𑀺𑀆𑀤𑀺. 𑀓𑀺𑀝𑀺𑀓𑀸𑀲𑀽𑀢𑀺 𑀯𑁂𑀴𑀼𑀧𑁂𑀲𑀺𑀓𑀸𑀤𑀻𑀳𑀺 𑀓𑀡𑁆𑀝𑀓𑀲𑀸𑀔𑀸𑀤𑀻𑀳𑀺 𑀘 𑀓𑀢𑀣𑀓𑀦𑀓𑁂𑀲𑀼. 𑀲𑀁𑀲𑀭𑀡𑀓𑀺𑀝𑀺𑀓𑀤𑁆𑀯𑀸𑀭𑀦𑁆𑀢𑀺 𑀘𑀓𑁆𑀓𑀮𑀓𑀬𑀦𑁆𑀢𑁂𑀦 𑀲𑀁𑀲𑀭𑀡𑀓𑀺𑀝𑀺𑀓𑀸𑀬𑀼𑀢𑁆𑀢𑀫𑀳𑀸𑀤𑁆𑀯𑀸𑀭𑀁. 𑀕𑁄𑀧𑁆𑀨𑁂𑀢𑁆𑀯𑀸𑀢𑀺 𑀆𑀯𑀼𑀡𑀺𑀢𑁆𑀯𑀸, 𑀭𑀚𑁆𑀚𑀽𑀳𑀺 𑀕𑀦𑁆𑀣𑁂𑀢𑁆𑀯𑀸 𑀯𑀸. 𑀏𑀓𑀁 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀫𑁂𑀯𑀸𑀢𑀺 𑀏𑀢𑁆𑀣 𑀓𑀺𑀮𑀜𑁆𑀚𑀲𑀸𑀡𑀺𑀤𑁆𑀯𑀸𑀭𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁭𑁬-𑁭𑁭) 𑀧𑀦 ‘‘𑀤𑀼𑀲𑁆𑀲𑀤𑁆𑀯𑀸𑀭𑀁 𑀲𑀸𑀡𑀺𑀤𑁆𑀯𑀸𑀭𑀜𑁆𑀘 𑀤𑀼𑀲𑁆𑀲𑀲𑀸𑀡𑀺𑀤𑁆𑀯𑀸𑀭𑀁. 𑀤𑀼𑀲𑁆𑀲𑀲𑀸𑀡𑀺 𑀓𑀺𑀮𑀜𑁆𑀚𑀲𑀸𑀡𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀲𑀸𑀡𑀺𑀬𑀫𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀓𑀲𑀤𑀺𑀲𑀢𑁆𑀢𑀸 𑀏𑀓𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁩. 𑀏𑀯𑀁 𑀤𑁆𑀯𑀸𑀭𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀢𑁆𑀢𑀓𑁂𑀦 𑀤𑁆𑀯𑀸𑀭𑀁 𑀲𑀁𑀯𑀼𑀢𑀁 𑀳𑁄𑀢𑀺, 𑀢𑀁 𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀢𑁆𑀢𑀓𑁂𑀦’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀲𑀽𑀘𑀻𑀢𑀺 𑀫𑀚𑁆𑀛𑁂 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀧𑀯𑁂𑀲𑀺𑀢𑀸. 𑀖𑀝𑀺𑀓𑀸𑀢𑀺 𑀉𑀧𑀭𑀺 𑀬𑁄𑀚𑀺𑀢𑀸. 𑀇𑀤𑀸𑀦𑀺 𑀬𑀢𑁆𑀣 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 ¶ 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀢𑁆𑀣 𑀓𑀸𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀩𑀳𑀽𑀦𑀁 𑀯𑀴𑀜𑁆𑀚𑀦𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀽𑀦𑀁 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑁂𑀧𑀺 𑀏𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀅𑀣 𑀪𑀺𑀓𑁆𑀔𑀽…𑀧𑁂… 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀢𑀢𑁆𑀣 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀲𑁂𑀲𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀁, 𑀢𑀲𑁆𑀫𑀸 𑀦𑀺𑀧𑀦𑁆𑀦𑁂𑀧𑀺 𑀆𑀪𑁄𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂 𑀧𑀦 𑀆𑀪𑁄𑀕𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀲𑀦𑁆𑀢𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀭𑀳𑁄 𑀦𑀺𑀲𑀚𑁆𑀚𑀸𑀬 𑀯𑀺𑀬 𑀤𑁆𑀯𑀸𑀭𑀲𑀁𑀯𑀭𑀡𑀁 𑀦𑀸𑀫 𑀫𑀸𑀢𑀼𑀕𑀸𑀫𑀸𑀦𑀁 𑀧𑀯𑁂𑀲𑀦𑀺𑀯𑀸𑀭𑀡𑀢𑁆𑀣𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀓𑁂𑀯𑀮𑀁 𑀪𑀺𑀓𑁆𑀔𑀼𑀦𑀺𑀁 𑀯𑀸’’𑀢𑀺𑀆𑀤𑀺.

𑀏𑀢𑁆𑀣 𑀘 𑀢𑀁 𑀬𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣𑀧𑀺 𑀬𑁄 𑀬𑁄 𑀣𑁂𑀭𑀯𑀸𑀤𑁄 𑀯𑀸 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺, 𑀲𑁄 𑀲𑁄𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀅𑀢𑀺𑀭𑁂𑀓𑀁 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁. 𑀇𑀢𑁄 𑀧𑀼𑀩𑁆𑀩𑀸𑀧𑀭𑀯𑀘𑀦𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯. 𑀢𑀢𑁆𑀣 𑀢𑀁 𑀬𑀼𑀢𑁆𑀢𑀦𑁆𑀢𑀺 ‘‘𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦…𑀧𑁂… 𑀦 𑀯𑀢𑁆𑀢𑀢𑀻’’𑀢𑀺 ¶ 𑀬𑀁 𑀯𑀘𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁, 𑀢𑀁 𑀯𑀘𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁…𑀧𑁂… 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀘𑁂𑀢𑁆𑀣 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀯𑀘𑀦𑀁 𑀬𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣𑀧𑀺 𑀯𑀺𑀦𑀺𑀘𑁆𑀙𑀬𑁂 𑀬𑁄 𑀬𑁄 𑀣𑁂𑀭𑀯𑀸𑀤𑁄 𑀯𑀸 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺, 𑀲𑁄 𑀲𑁄𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀧𑀼𑀭𑁂 𑀯𑀼𑀢𑁆𑀢𑁄 𑀣𑁂𑀭𑀯𑀸𑀤𑁄 𑀯𑀸 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀧𑀫𑀸𑀡𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀯𑀘𑀦𑀁 𑀅𑀝𑁆𑀞𑀸𑀦𑁂 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀣𑀁? 𑀬𑀁 𑀢𑀸𑀯 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀦𑁆𑀢𑀺. 𑀢𑀁 𑀇𑀫𑀲𑁆𑀫𑀺𑀁 𑀆𑀧𑀼𑀘𑁆𑀙𑀦𑀆𑀪𑁄𑀕𑀓𑀭𑀡𑀯𑀺𑀦𑀺𑀘𑁆𑀙𑀬𑁂 𑀅𑀜𑁆𑀜𑀲𑁆𑀲 𑀅𑀬𑀼𑀢𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀯𑀸 𑀣𑁂𑀭𑀯𑀸𑀤𑀲𑁆𑀲 𑀯𑀸 𑀅𑀪𑀸𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀦 𑀳𑀺 𑀧𑀼𑀩𑁆𑀩𑀯𑀸𑀓𑁆𑀬𑁂 ‘‘𑀪𑀺𑀓𑁆𑀔𑀽 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀓𑀢𑀁, 𑀅𑀣 𑀔𑁄 𑀆𑀲𑀦𑁆𑀦𑀯𑀲𑁂𑀦 𑀯𑀸 𑀧𑀝𑁆𑀞𑀸𑀦𑀯𑀲𑁂𑀦 𑀯𑀸 ‘‘𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁’’𑀇𑀘𑁆𑀘𑀸𑀤𑀺𑀓𑀁𑀬𑁂𑀯 𑀯𑀼𑀢𑁆𑀢𑀁. 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀩𑁆𑀩𑀢𑁆𑀣𑀧𑀻’’𑀢𑁆𑀬𑀸𑀤𑀺, 𑀢𑀫𑁆𑀧𑀺 𑀅𑀦𑁄𑀓𑀸𑀲𑀁. 𑀇𑀫𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁂 ¶ 𑀅𑀜𑁆𑀜𑀲𑁆𑀲 𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀯𑀸 𑀆𑀘𑀭𑀺𑀬𑀯𑀸𑀤𑀲𑁆𑀲 𑀯𑀸 𑀅𑀯𑀘𑀦𑀢𑁄 𑀧𑀼𑀭𑁂 𑀧𑀘𑁆𑀙𑀸𑀪𑀸𑀯𑁄 𑀘 𑀦 𑀤𑀺𑀲𑁆𑀲𑀢𑀺, 𑀅𑀬𑀁 ‘‘𑀧𑀫𑀸𑀡’’𑀦𑁆𑀢𑀺 𑀕𑀳𑁂𑀢𑀩𑁆𑀩𑁄, 𑀅𑀬𑀁 ‘‘𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑁄 𑀘.

𑀉𑀧𑀭𑀺 𑀧𑀦 ‘‘𑀓𑁄 𑀫𑀼𑀘𑁆𑀘𑀢𑀺, 𑀓𑁄 𑀦 𑀫𑀼𑀘𑁆𑀘𑀢𑀻’’𑀢𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁄 𑀘 𑀓𑀼𑀭𑀼𑀦𑁆𑀤𑀺𑀯𑀸𑀤𑁄 𑀘 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄 𑀘𑀸𑀢𑀺 𑀢𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑀸 𑀆𑀕𑀢𑀸, 𑀏𑀓𑁄 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀯𑀸𑀤𑁄, 𑀢𑀲𑁆𑀫𑀸 𑀢𑀢𑁆𑀣𑁂𑀯 𑀬𑀼𑀢𑁆𑀢𑀸𑀬𑀼𑀢𑁆𑀢𑀪𑀸𑀯𑁄 𑀘 𑀧𑀫𑀸𑀡𑀸𑀧𑀫𑀸𑀡𑀪𑀸𑀯𑁄 𑀘 𑀕𑀳𑁂𑀢𑀩𑁆𑀩𑀸𑀕𑀳𑁂𑀢𑀩𑁆𑀩𑀪𑀸𑀯𑁄 𑀘 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀧𑀦 𑀆𑀘𑀭𑀺𑀬𑀸𑀲𑀪𑁂𑀦 𑀅𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑁂 𑀯𑀼𑀢𑁆𑀢𑀁 𑀦 𑀲𑀺𑀬𑀸, 𑀢𑀲𑁆𑀫𑀸 𑀉𑀧𑀭𑀺 𑀅𑀝𑁆𑀞𑀓𑀣𑀸𑀯𑀸𑀤𑀲𑀁𑀲𑀦𑁆𑀤𑀦𑀸𑀯𑀲𑀸𑀦𑁂 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀧𑀘𑁆𑀙𑀢𑁄 𑀯𑀼𑀢𑁆𑀢𑀁 𑀲𑀺𑀬𑀸, 𑀢𑀁 𑀧𑀘𑁆𑀙𑀸 𑀮𑁂𑀔𑀓𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀺𑀔𑀺𑀢𑀁 𑀪𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑀓𑀡𑁆𑀟𑀝𑁆𑀞𑀓𑀣𑀸𑀬𑀜𑁆𑀘 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀁. 𑀝𑀻𑀓𑀸𑀬𑀜𑁆𑀘 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀯𑀼𑀢𑁆𑀢𑀁, 𑀉𑀧𑀭𑀺𑀬𑁂𑀯 𑀯𑀼𑀢𑁆𑀢𑀁, ‘‘𑀬𑁄 𑀘 𑀬𑀓𑁆𑀔𑀕𑀳𑀺𑀢𑀓𑁄, 𑀬𑁄 𑀘 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄’’𑀢𑀺 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀘𑁆𑀙𑀺𑀫𑀢𑁆𑀢𑀸 𑀲𑁄𑀬𑁂𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀢𑁆𑀣 𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺, 𑀲𑁄 𑀲𑁄𑀬𑁂𑀯 𑀧𑀫𑀸𑀡𑀢𑁄 𑀤𑀝𑁆𑀞𑀩𑁆𑀩𑁄’’𑀢𑀺, 𑀢𑀲𑁆𑀫𑀸 𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑁪. 𑀇𑀤𑀸𑀦𑀺 𑀤𑁆𑀯𑀸𑀭𑀁 𑀲𑀁𑀯𑀭𑀡𑀲𑁆𑀲 𑀅𑀦𑁆𑀢𑀭𑀸𑀬𑁂 𑀲𑀢𑀺 𑀅𑀲𑀁𑀯𑀭𑀺𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀤𑁆𑀯𑀸𑀭𑀲𑁆𑀲’’𑀢𑁆𑀬𑀸𑀤𑀺𑀫𑀸𑀳. 𑀦𑀺𑀲𑁆𑀲𑁂𑀡𑀺𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀉𑀧𑀭𑀺𑀫𑀢𑀮𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸, 𑀙𑀟𑁆𑀟𑁂𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀏𑀓𑀸𑀩𑀤𑁆𑀥𑀢𑀸𑀬 𑀯𑀼𑀢𑁆𑀢𑀁. 𑀤𑁆𑀯𑁂𑀧𑀺 𑀤𑁆𑀯𑀸𑀭𑀸𑀦𑀺 𑀚𑀕𑁆𑀕𑀺𑀢𑀩𑁆𑀩𑀸𑀦𑀻𑀢𑀺 𑀏𑀢𑁆𑀣 𑀲𑀘𑁂 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀓𑀯𑀸𑀝𑀁 𑀯𑀸 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀁𑀯𑀭𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸 ¶ , 𑀇𑀢𑀭𑀁 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 ¶ 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀤𑁆𑀯𑀸𑀭𑀧𑀸𑀮𑀲𑁆𑀲𑀸𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀳𑀸𑀤𑁆𑀯𑀸𑀭𑁂, 𑀦𑀺𑀲𑁆𑀲𑁂𑀡𑀺𑀫𑀽𑀮𑁂 𑀯𑀸 𑀞𑀢𑁆𑀯𑀸 𑀤𑁆𑀯𑀸𑀭𑀚𑀕𑁆𑀕𑀦𑀓𑀲𑁆𑀲. 𑀧𑀘𑁆𑀙𑀺𑀫𑀸𑀦𑀁 𑀪𑀸𑀭𑁄𑀢𑀺 𑀏𑀓𑀸𑀩𑀤𑁆𑀥𑀯𑀲𑁂𑀦 𑀆𑀕𑀘𑁆𑀙𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑀁𑀯𑀼𑀢𑀤𑁆𑀯𑀸𑀭𑁂 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑀳𑀺 𑀯𑀸𑀢𑀺 𑀕𑀩𑁆𑀪𑀢𑁄 𑀩𑀳𑀺. 𑀦𑀺𑀧𑀚𑁆𑀚𑀦𑀓𑀸𑀮𑁂𑀧𑀺…𑀧𑁂… 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀏𑀢𑁆𑀣 𑀤𑁆𑀯𑀸𑀭𑀚𑀕𑁆𑀕𑀦𑀓𑀲𑁆𑀲 𑀢𑀤𑀥𑀻𑀦𑀢𑁆𑀢𑀸 𑀢𑀤𑀸 𑀢𑀲𑁆𑀲 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀧𑀺 𑀆𑀪𑁄𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂𑀢𑀺 𑀏𑀢𑁆𑀣 𑀧𑀭𑀺𑀓𑁆𑀔𑁂𑀧𑀲𑁆𑀲 𑀉𑀩𑁆𑀩𑁂𑀥𑀢𑁄 𑀧𑀫𑀸𑀡𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁫𑁧) ‘‘𑀬𑀜𑁆𑀳𑀺 𑀲𑁂𑀦𑀸𑀲𑀦𑀁 𑀉𑀧𑀭𑀺 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀲𑀩𑁆𑀩𑀫𑁂𑀯 𑀧𑀝𑀺𑀘𑁆𑀙𑀦𑁆𑀦𑀁, 𑀅𑀬𑀁 𑀲𑀩𑁆𑀩𑀘𑁆𑀙𑀦𑁆𑀦𑀸 𑀦𑀸𑀫 𑀲𑁂𑀬𑁆𑀬𑀸…𑀧𑁂… 𑀬𑀁 𑀧𑀦 𑀲𑁂𑀦𑀸𑀲𑀦𑀁 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀙𑀤𑀦𑀁 𑀆𑀳𑀘𑁆𑀘 𑀧𑀸𑀓𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸 𑀦𑀸𑀫 𑀲𑁂𑀬𑁆𑀬𑀸. 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸𑀬𑁂𑀯𑀸𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺. ‘‘𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁧) 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁫𑁦-𑁫𑁧) 𑀯𑀼𑀢𑁆𑀢𑀁. 𑀫𑀳𑀸𑀧𑀭𑀺𑀯𑁂𑀡𑀦𑁆𑀢𑀺 𑀫𑀳𑀦𑁆𑀢𑀁 𑀅𑀗𑁆𑀕𑀡𑀁. 𑀢𑁂𑀦 𑀩𑀳𑀼𑀚𑀦𑀲𑀜𑁆𑀘𑀭𑀡𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀫𑀳𑀸𑀩𑁄𑀥𑀻’’𑀢𑀺𑀆𑀤𑀺.

𑀅𑀭𑀼𑀡𑁂 𑀉𑀕𑁆𑀕𑀢𑁂 𑀯𑀼𑀝𑁆𑀞𑀸𑀢𑀺, 𑀅𑀦𑀸𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀺𑀔𑁂𑀢𑁆𑀢𑀪𑀽𑀢𑀸𑀬 𑀭𑀢𑁆𑀢𑀺𑀬𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀧𑀦𑁆𑀦𑀢𑁆𑀢𑀸. 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦 𑀲𑀼𑀧𑀢𑀺, 𑀆𑀧𑀢𑁆𑀢𑀻𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀁 𑀜𑀢𑁆𑀯𑀸 𑀯𑀸 𑀅𑀜𑀢𑁆𑀯𑀸 𑀯𑀸 𑀅𑀦𑀼𑀝𑁆𑀞𑀳𑀺𑀢𑁆𑀯𑀸 𑀲𑀬𑀺𑀢𑀲𑀦𑁆𑀢𑀸𑀦𑁂𑀦 𑀲𑀼𑀧𑀢𑀺, 𑀉𑀝𑁆𑀞𑀳𑀺𑀢𑁆𑀯𑀸 ¶ 𑀓𑀢𑁆𑀢𑀩𑁆𑀩𑀲𑁆𑀲 𑀤𑁆𑀯𑀸𑀭𑀲𑀁𑀯𑀭𑀡𑀸𑀤𑀺𑀦𑁄 𑀅𑀓𑀢𑀢𑁆𑀢𑀸 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀳𑁄𑀢𑀺 𑀅𑀦𑀸𑀧𑀢𑁆𑀢𑀺𑀔𑁂𑀢𑁆𑀢𑁂 𑀓𑀢𑀦𑀺𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀅𑀦𑀗𑁆𑀕𑀢𑁆𑀢𑀸. 𑀅𑀬𑀜𑁆𑀳𑀺 𑀆𑀧𑀢𑁆𑀢𑀺 𑀈𑀤𑀺𑀲𑁂 𑀞𑀸𑀦𑁂 𑀅𑀓𑀺𑀭𑀺𑀬𑀸, 𑀤𑀺𑀯𑀸 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑀓𑁆𑀔𑀡𑁂 𑀓𑀺𑀭𑀺𑀬𑀸𑀓𑀺𑀭𑀺𑀬𑀸 𑀘 𑀅𑀘𑀺𑀢𑁆𑀢𑀓𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀸𑀭𑀼𑀡𑀸 𑀧𑀩𑀼𑀚𑁆𑀛𑀺𑀢𑁆𑀯𑀸𑀧𑀺 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀦𑁆𑀢𑀲𑁆𑀲𑀧𑀺 𑀧𑀼𑀭𑀺𑀫𑀦𑀬𑁂𑀦 𑀆𑀧𑀢𑁆𑀢𑀺𑀬𑁂𑀯.

𑀅𑀭𑀼𑀡𑁂 𑀉𑀕𑁆𑀕𑀢𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺…𑀧𑁂… 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀏𑀢𑁆𑀣 𑀓𑀤𑀸 𑀅𑀲𑁆𑀲 𑀆𑀧𑀢𑁆𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀸𑀯 𑀭𑀢𑁆𑀢𑀺𑀬𑀁, ‘‘𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺’’𑀦𑁆𑀢𑀺 (𑀧𑀭𑀺. 𑁩𑁨𑁩) 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀧𑀦 𑀤𑀺𑀯𑀸𑀲𑀬𑀦𑀤𑀼𑀓𑁆𑀓𑀝𑀫𑁂𑀯 𑀦 𑀳𑁄𑀢𑀺 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀢𑁆𑀢𑀸 ¶ 𑀏𑀯. ‘‘𑀅𑀭𑀼𑀡𑀼𑀕𑁆𑀕𑀫𑀦𑁂 𑀧𑀦 𑀅𑀘𑀺𑀢𑁆𑀢𑀓𑀁 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁭𑁭) 𑀯𑀼𑀢𑁆𑀢𑀁, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀭𑀸𑀚𑀺𑀓 𑁨.𑁭𑁭) ‘‘𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀯𑀼𑀝𑁆𑀞𑀸𑀢𑀻𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀉𑀝𑁆𑀞𑀳𑀢𑀺. 𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀦𑀺𑀧𑀦𑁆𑀦𑀢𑁆𑀢𑀸 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀤𑀺𑀯𑀸𑀧𑀝𑀺𑀲𑀮𑁆𑀮𑀸𑀦𑀫𑀽𑀮𑀺𑀓𑀸 𑀆𑀧𑀢𑁆𑀢𑀺. ‘𑀏𑀯𑀁 𑀦𑀺𑀧𑀚𑁆𑀚𑀦𑁆𑀢𑁄 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸𑀧𑀺 𑀦 𑀫𑀼𑀘𑁆𑀘𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀦𑀺𑀧𑀚𑁆𑀚𑀦𑁆𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀼𑀭𑁂𑀢𑀭𑀁 𑀉𑀝𑁆𑀞𑀳𑀦𑁆𑀢𑁄𑀧𑀺 𑀅𑀦𑀼𑀝𑁆𑀞𑀳𑀦𑁆𑀢𑁄𑀧𑀺 𑀦𑀺𑀧𑀚𑁆𑀚𑀦𑀓𑀸𑀮𑁂𑀬𑁂𑀯 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀤𑀺𑀯𑀸𑀧𑀝𑀺𑀲𑀮𑁆𑀮𑀸𑀦𑀫𑀽𑀮𑀺𑀓𑀁 𑀧𑀦 𑀤𑀼𑀓𑁆𑀓𑀝𑀁 𑀅𑀭𑀼𑀡𑁂𑀬𑁂𑀯 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀘𑁂 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀉𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀦𑀺𑀧𑀚𑁆𑀚𑀢𑀺, 𑀤𑁆𑀯𑀸𑀭𑁂 𑀘 𑀅𑀜𑁆𑀜𑁂𑀳𑀺 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀯𑀺𑀯𑀝𑁂𑀧𑀺 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯 𑀤𑁆𑀯𑀸𑀭𑀧𑀺𑀤𑀳𑀦𑀲𑁆𑀲 𑀭𑀢𑁆𑀢𑀺𑀤𑀺𑀯𑀸𑀪𑀸𑀕𑁂𑀲𑀼 𑀯𑀺𑀲𑁂𑀲𑀸𑀪𑀸𑀯𑀸. 𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀲𑁆𑀲𑁂𑀯 𑀓𑀸𑀮𑀯𑀺𑀲𑁂𑀲𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀢𑀧𑁆𑀧𑀭𑀺𑀳𑀸𑀭𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀭𑀢𑁆𑀢𑀺𑀁 ¶ 𑀦𑀺𑀧𑀚𑁆𑀚𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁭𑁭) 𑀳𑀺 𑀯𑀼𑀢𑁆𑀢𑀁. 𑀤𑀺𑀯𑀸 𑀲𑀁𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲 𑀓𑁂𑀦𑀘𑀺 𑀯𑀺𑀯𑀝𑁂𑀧𑀺 𑀤𑁆𑀯𑀸𑀭𑁂 𑀅𑀦𑀸𑀧𑀢𑁆𑀢𑀺𑀬𑁂𑀯, 𑀅𑀢𑁆𑀢𑀦𑀸𑀧𑀺 𑀅𑀦𑀼𑀝𑁆𑀞𑀳𑀺𑀢𑁆𑀯𑀸𑀯 𑀲𑀢𑀺 𑀧𑀘𑁆𑀘𑀬𑁂 𑀯𑀺𑀯𑀝𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑀺, 𑀇𑀤𑀫𑁆𑀧𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁂𑀯 (𑀯𑀺. 𑀯𑀺. 𑀝𑀻. 𑁧.𑁭𑁭) 𑀯𑀼𑀢𑁆𑀢𑀁.

𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀯𑀼𑀝𑁆𑀞𑀸𑀢𑀻𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀯𑀼𑀝𑁆𑀞𑀸𑀢𑀺, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀫𑀽𑀮𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀸𑀤𑀭𑀺𑀬𑀆𑀧𑀢𑁆𑀢𑀺 𑀧𑀦 𑀧𑀼𑀭𑀸𑀭𑀼𑀡𑀸 𑀉𑀝𑁆𑀞𑀺𑀢𑀲𑁆𑀲𑀧𑀺 𑀢𑀲𑁆𑀲 𑀳𑁄𑀢𑁂𑀯 ‘‘𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀘 𑀧𑀼𑀭𑀸𑀭𑀼𑀡𑀸 𑀉𑀝𑁆𑀞𑀳𑀺𑀢𑁆𑀯𑀸 𑀫𑀽𑀮𑀸𑀧𑀢𑁆𑀢𑀺𑀬𑀸 𑀫𑀼𑀢𑁆𑀢𑁄𑀧𑀺 𑀅𑀦𑀸𑀤𑀭𑀺𑀬𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫. 𑀦𑀺𑀤𑁆𑀤𑀸𑀯𑀲𑁂𑀦 𑀦𑀺𑀧𑀚𑁆𑀚𑀢𑀻𑀢𑀺 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑀸𑀬 𑀏𑀓𑀧𑀲𑁆𑀲𑁂𑀦 𑀦𑀺𑀧𑀚𑁆𑀚𑀢𑀺. ‘‘𑀦𑀺𑀤𑁆𑀤𑀸𑀯𑀲𑁂𑀦 𑀦𑀺𑀧𑀚𑁆𑀚𑀢𑀻’’𑀢𑀺 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀸𑀤𑀸𑀦𑀁 𑀧𑀦 𑀪𑀽𑀫𑀺𑀢𑁄 𑀅𑀫𑁄𑀘𑀺𑀢𑀢𑁆𑀢𑀸 𑀅𑀬𑀁 𑀦𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀅𑀧𑀲𑁆𑀲𑀸𑀬 𑀲𑀼𑀧𑀦𑁆𑀢𑀲𑁆𑀲𑀸𑀢𑀺 𑀓𑀝𑀺𑀝𑁆𑀞𑀺𑀢𑁄 𑀉𑀤𑁆𑀥𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀅𑀧𑁆𑀧𑀫𑀢𑁆𑀢𑀓𑀁 𑀧𑀤𑁂𑀲𑀁 𑀪𑀽𑀫𑀺𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀲𑀼𑀧𑀦𑁆𑀢𑀲𑁆𑀲. 𑀓𑀝𑀺𑀝𑁆𑀞𑀺𑀁 𑀧𑀦 𑀪𑀽𑀫𑀺𑀁 𑀨𑀼𑀲𑀸𑀧𑁂𑀦𑁆𑀢𑀲𑁆𑀲 𑀲𑀬𑀦𑀁 𑀦𑀸𑀫 𑀦 𑀳𑁄𑀢𑀺. 𑀧𑀺𑀝𑁆𑀞𑀺𑀧𑀲𑀸𑀭𑀡𑀮𑀓𑁆𑀔𑀡𑀸 𑀳𑀺 𑀲𑁂𑀬𑁆𑀬𑀸 𑀤𑀻𑀖𑀸, 𑀯𑀦𑁆𑀤𑀦𑀸𑀤𑀻𑀲𑀼𑀧𑀺 𑀢𑀺𑀭𑀺𑀬𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀸𑀦𑀁 ¶ 𑀧𑀲𑀸𑀭𑀺𑀢𑀢𑁆𑀢𑀸 𑀦𑀺𑀧𑀚𑁆𑀚𑀦𑀫𑁂𑀯𑀸𑀢𑀺 𑀆𑀧𑀢𑁆𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀯. 𑀯𑀦𑁆𑀤𑀦𑀸𑀧𑀺 𑀳𑀺 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀢𑀻𑀢𑀺𑀆𑀤𑀻𑀲𑀼 𑀦𑀺𑀧𑀚𑁆𑀚𑀦𑀫𑁂𑀯 𑀯𑀼𑀢𑁆𑀢𑀸. 𑀲𑀳𑀲𑀸 𑀯𑀼𑀝𑁆𑀞𑀸𑀢𑀻𑀢𑀺 𑀧𑀓𑁆𑀔𑀮𑀺𑀢𑀸 𑀧𑀢𑀺𑀢𑁄 𑀯𑀺𑀬 𑀲𑀳𑀲𑀸 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺 𑀧𑀢𑀦𑀓𑁆𑀔𑀡𑁂 𑀅𑀯𑀺𑀲𑀬𑀢𑁆𑀢𑀸, 𑀯𑀺𑀲𑀬𑁂 𑀚𑀸𑀢𑁂 𑀲𑀳𑀲𑀸 𑀯𑀼𑀝𑁆𑀞𑀺𑀢𑀢𑁆𑀢𑀸 𑀘. 𑀬𑀲𑁆𑀲 𑀧𑀦 𑀯𑀺𑀲𑀜𑁆𑀜𑀺𑀢𑀸𑀬 𑀧𑀘𑁆𑀙𑀸𑀧𑀺 𑀅𑀯𑀺𑀲𑀬𑁄 𑀏𑀯, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯 𑀧𑀢𑀦𑀓𑁆𑀔𑀡𑁂 𑀯𑀺𑀬. 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀯𑀼𑀝𑁆𑀞𑀸𑀢𑀻𑀢𑀺 𑀇𑀫𑀺𑀦𑀸 𑀯𑀺𑀲𑀬𑁂𑀧𑀺 𑀅𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 ¶ 𑀅𑀝𑁆𑀞𑀓𑀣𑀸𑀯𑀸𑀤𑀲𑀁𑀲𑀦𑁆𑀤𑀦𑀁 𑀓𑀸𑀢𑀼𑀁 ‘‘𑀓𑁄 𑀫𑀼𑀘𑁆𑀘𑀢𑀺, 𑀓𑁄 𑀦 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀸𑀧𑀘𑁆𑀘𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀧𑀘𑁆𑀘𑀭𑀻𑀢𑀺 𑀉𑀴𑀼𑀫𑁆𑀧𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀢𑁆𑀢𑀸 𑀢𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀓𑀼𑀭𑀼𑀦𑁆𑀤𑀺𑀯𑀮𑁆𑀮𑀺𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀓𑀢𑀢𑁆𑀢𑀸 𑀓𑀼𑀭𑀼𑀦𑁆𑀤𑀻𑀢𑀺 𑀦𑀸𑀫𑀁 𑀚𑀸𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸 𑀦𑀸𑀫 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀸 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀝𑁆𑀞𑀓𑀣𑀸. 𑀬𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀪𑀢𑀸, 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀣𑁂𑀭𑁂𑀳𑀺 𑀧𑀘𑁆𑀙𑀸 𑀲𑀻𑀳𑀴𑀪𑀸𑀲𑀸𑀬 𑀅𑀪𑀺𑀲𑀗𑁆𑀔𑀢𑀸 𑀘 𑀳𑁄𑀢𑀺. 𑀏𑀓𑀪𑀗𑁆𑀕𑁂𑀦𑀸𑀢𑀺 𑀏𑀓𑀧𑀲𑁆𑀲𑀪𑀜𑁆𑀚𑀦𑁂𑀦 𑀧𑀸𑀤𑁂 𑀪𑀽𑀫𑀺𑀢𑁄 𑀅𑀫𑁄𑀘𑁂𑀢𑁆𑀯𑀸 𑀏𑀓𑀧𑀲𑁆𑀲𑁂𑀦 𑀲𑀭𑀻𑀭𑀁 𑀪𑀜𑁆𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀬 𑀮𑀺𑀔𑀺𑀢𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀯𑀸𑀤𑁂 ‘‘𑀅𑀬’’𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀼𑀘𑁆𑀙𑀺𑀢𑁆𑀯𑀸 𑀧𑀢𑀺𑀢𑀢𑁆𑀢𑀸 𑀅𑀯𑀺𑀲𑀬𑀢𑁆𑀢𑀸 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻’’𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀸 𑀧𑀦 𑀬𑀣𑀸 𑀬𑀓𑁆𑀔𑀕𑀳𑀺𑀢𑀓𑁄 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄 𑀘 𑀧𑀭𑀯𑀲𑁄 𑀳𑁄𑀢𑀺, 𑀏𑀯𑀁 𑀅𑀧𑀭𑀯𑀲𑀢𑁆𑀢𑀸 𑀫𑀼𑀘𑁆𑀙𑀺𑀢𑁆𑀯𑀸 𑀧𑀢𑀺𑀢𑁄 𑀓𑀜𑁆𑀘𑀺𑀓𑀸𑀮𑀁 𑀚𑀸𑀦𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺, 𑀯𑀺𑀲𑀜𑁆𑀜𑀺𑀢𑁂 𑀧𑀦 𑀲𑀢𑀺 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀤𑁆𑀯𑁂 𑀚𑀦𑀸𑀢𑀺𑀆𑀤𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀘𑀦𑀁, 𑀢𑀤𑁂𑀯 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀧𑀫𑀸𑀡𑀁. 𑀬𑀓𑁆𑀔𑀕𑀳𑀺𑀢𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀯𑀺𑀲𑀜𑁆𑀜𑀺𑀪𑀽𑀢𑁄𑀧𑀺 𑀲𑀗𑁆𑀕𑀳𑀺𑀢𑁄, 𑀏𑀓𑀪𑀗𑁆𑀕𑁂𑀦 𑀦𑀺𑀧𑀦𑁆𑀦𑁄 𑀧𑀦 𑀅𑀦𑀺𑀧𑀦𑁆𑀦𑀢𑁆𑀢𑀸 𑀆𑀧𑀢𑁆𑀢𑀺𑀢𑁄 𑀫𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 (𑀲𑀸𑀭𑀢𑁆𑀣. 𑀝𑀻. 𑁨.𑁭𑁭) ‘‘𑀬𑁄 𑀘 𑀬𑀓𑁆𑀔𑀕𑀳𑀺𑀢𑀓𑁄, 𑀬𑁄 𑀘 𑀩𑀦𑁆𑀥𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑀺𑀢𑁄’’𑀢𑀺 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀘𑁆𑀙𑀺𑀫𑀢𑁆𑀢𑀸 𑀲𑁄𑀬𑁂𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄, 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀢𑁆𑀣 𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺, 𑀲𑁄 𑀲𑁄𑀬𑁂𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄’’𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀧𑀸𑀞𑀲𑁆𑀲 𑀆𑀦𑀻𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑁂𑀧𑀺 ¶ 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑁄 𑀧𑀸𑀞𑁄 𑀯𑀢𑁆𑀢𑀩𑁆𑀩𑁄𑀢𑀺 𑀦𑁄 𑀔𑀦𑁆𑀢𑀺. 𑀏𑀢𑁆𑀣 𑀘 ‘‘𑀭𑀢𑁆𑀢𑀺𑀁 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀉𑀝𑁆𑀞𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑁂 𑀲𑀁𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀅𑀭𑀼𑀡𑀓𑀣𑀸 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀓𑁄 ¶ 𑀏𑀲 𑀅𑀭𑀼𑀡𑁄 𑀦𑀸𑀫;

𑀓𑁂𑀦 𑀲𑁄 𑀅𑀭𑀼𑀡𑁄 𑀪𑀯𑁂;

𑀓𑀻𑀤𑀺𑀲𑁄 𑀢𑀲𑁆𑀲 𑀯𑀡𑁆𑀡𑀸 𑀢𑀼;

𑀲𑀡𑁆𑀞𑀸𑀦𑀁 𑀓𑀻𑀤𑀺𑀲𑀁 𑀪𑀯𑁂.

‘‘𑀓𑀺𑀲𑁆𑀫𑀺𑀁 𑀓𑀸𑀮𑁂 𑀘 𑀤𑁂𑀲𑁂 𑀘, 𑀅𑀭𑀼𑀡𑁄 𑀲𑀫𑀼𑀕𑀘𑁆𑀙𑀢𑀺;

𑀓𑀺𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄 𑀏𑀲𑁄, 𑀉𑀤𑀸𑀳𑀼 𑀅𑀦𑀼𑀫𑀸𑀦𑀢𑁄’’𑀢𑀺.

𑀢𑀢𑁆𑀣 𑀓𑁄 𑀏𑀲 𑀅𑀭𑀼𑀡𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀏𑀲 𑀅𑀭𑀼𑀡𑁄 𑀦𑀸𑀫 𑀲𑀽𑀭𑀺𑀬𑀲𑁆𑀲 𑀧𑀪𑀸𑀯𑀺𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁋

‘‘𑀲𑀽𑀭𑀲𑁆𑀲𑁄𑀤𑀬𑀢𑁄 𑀧𑀼𑀩𑁆𑀩𑀼𑀝𑁆𑀞𑀺𑀢𑀭𑀁𑀲𑀺 𑀲𑀺𑀬𑀸𑀭𑀼𑀡𑁄’’𑀢𑀺;

𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀲𑀽𑀭𑀲𑁆𑀲 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀭𑀁𑀲𑀺 𑀅𑀭𑀼𑀡𑁄 𑀦𑀸𑀫 𑀲𑀺𑀬𑀸’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀦𑀸𑀫𑀺𑀓𑀸𑀬𑀁 𑀯𑀺𑀦𑀬𑀝𑀻𑀓𑀸𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑁧.𑁪𑁬𑁩) ‘‘𑀅𑀭𑀼𑀡𑁄𑀢𑀺 𑀘𑁂𑀢𑁆𑀣 𑀲𑀽𑀭𑀺𑀬𑀼𑀕𑁆𑀕𑀫𑀦𑀲𑁆𑀲 𑀧𑀼𑀭𑁂𑀘𑀭𑁄 𑀯𑀟𑁆𑀠𑀦𑀖𑀦𑀭𑀢𑁆𑀢𑁄 𑀧𑀪𑀸𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀽𑀭𑀺𑀬𑀧𑁆𑀧𑀪𑀸𑀬𑁂𑀯 𑀅𑀭𑀼𑀡𑁄 𑀦𑀸𑀫, 𑀦 𑀅𑀜𑁆𑀜𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀦 𑀲𑁄 𑀅𑀭𑀼𑀡𑁄 𑀪𑀯𑁂𑀢𑀺 𑀏𑀢𑁆𑀣 𑀅𑀭𑀼𑀡𑁄 𑀯𑀡𑁆𑀡𑁄 𑀅𑀲𑁆𑀲𑀸𑀢𑀺 𑀅𑀭𑀼𑀡𑁄, 𑀓𑀺𑀜𑁆𑀘𑀺𑀭𑀢𑁆𑀢𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀭𑀢𑀺 𑀕𑀘𑁆𑀙𑀢𑀺 𑀭𑀢𑁆𑀢𑀯𑀡𑁆𑀡𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀭𑀼𑀡𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 ‘‘𑀅𑀭𑀼𑀡𑀯𑀡𑁆𑀡𑀢𑀸𑀬 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄’’𑀢𑀺. 𑀓𑀻𑀤𑀺𑀲𑁄 𑀢𑀲𑁆𑀲 𑀯𑀡𑁆𑀡𑁄𑀢𑀺 𑀏𑀢𑁆𑀣 𑀅𑀩𑁆𑀬𑀢𑁆𑀢𑀭𑀢𑁆𑀢𑀯𑀡𑁆𑀡𑁄 𑀢𑀲𑁆𑀲 𑀯𑀡𑁆𑀡𑁄 𑀪𑀯𑁂. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 ‘‘𑀅𑀭𑀼𑀡𑁄 𑀓𑀺𑀜𑁆𑀘𑀺𑀭𑀢𑁆𑀢𑁄𑀣𑀸’’𑀢𑀺. 𑀢𑀝𑁆𑀝𑀻𑀓𑀸𑀬𑀜𑁆𑀘 ¶ ‘‘𑀓𑀺𑀜𑁆𑀘𑀺𑀭𑀢𑁆𑀢𑁄 𑀅𑀩𑁆𑀬𑀢𑁆𑀢𑀭𑀢𑁆𑀢𑀯𑀡𑁆𑀡𑁄 𑀅𑀭𑀼𑀡𑁄 𑀦𑀸𑀫 𑀬𑀣𑀸 𑀫𑀘𑁆𑀙𑀲𑁆𑀲 𑀅𑀓𑁆𑀔𑀻’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑁧.𑁪𑁬𑁩) ‘‘𑀯𑀟𑁆𑀠𑀦𑀖𑀦𑀭𑀢𑁆𑀢𑁄 𑀧𑀪𑀸𑀯𑀺𑀲𑁂𑀲𑁄’’𑀢𑀺, 𑀢𑀲𑁆𑀫𑀸 𑀲𑀽𑀭𑀺𑀬𑀲𑁆𑀲 𑀭𑀢𑁆𑀢𑀧𑁆𑀧𑀪𑀸𑀬𑁂𑀯 𑀅𑀭𑀼𑀡𑁄 𑀦𑀸𑀫, 𑀦 𑀲𑁂𑀢𑀧𑁆𑀧𑀪𑀸𑀤𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁮𑁩) ‘‘𑀧𑀸𑀴𑀺𑀬𑀁 𑀧𑀦 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀑𑀤𑀸𑀢𑀤𑀺𑀲𑀸𑀫𑀼𑀔𑀢𑀸𑀬 𑀢𑀼𑀝𑁆𑀞𑀫𑀼𑀔𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺, 𑀦𑁄 𑀦 𑀬𑀼𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀳𑀺 𑀅𑀭𑀼𑀡𑀼𑀕𑁆𑀕𑀢𑀓𑀸𑀮𑁂 𑀅𑀭𑀼𑀡𑁄𑀪𑀸𑀲𑁂𑀦 𑀑𑀤𑀸𑀢𑀤𑀺𑀲𑀸𑀫𑀼𑀔𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀅𑀭𑀼𑀡𑁄𑀪𑀸𑀲𑀲𑁆𑀲 𑀑𑀤𑀸𑀢𑀪𑀸𑀯𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑁨𑁩) ‘‘𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀅𑀭𑀼𑀡𑀲𑁆𑀲 𑀉𑀕𑁆𑀕𑀢𑀢𑁆𑀢𑀸 ¶ 𑀏𑀯 𑀅𑀭𑀼𑀡𑁄𑀪𑀸𑀬 𑀲𑀽𑀭𑀺𑀬𑀸𑀮𑁄𑀓𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑁂 𑀦𑀦𑁆𑀤𑀸𑀧𑀦𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀚𑀸𑀢𑀸𑀬 𑀯𑀺𑀪𑀸𑀬𑀫𑀸𑀦𑀸𑀬𑀸𑀢𑀺 𑀅𑀢𑁆𑀣𑁄’’𑀢𑀺.

𑀚𑀸𑀢𑀓𑀝𑁆𑀞𑀓𑀣𑀸𑀬𑀜𑁆𑀘 𑁋

‘‘𑀚𑀺𑀖𑀜𑁆𑀜𑀭𑀢𑁆𑀢𑀺𑀁 𑀅𑀭𑀼𑀡𑀲𑁆𑀫𑀺𑀫𑀼𑀳𑀢𑁂;

𑀬𑀸 𑀤𑀺𑀲𑁆𑀲𑀢𑀺 𑀉𑀢𑁆𑀢𑀫𑀭𑀽𑀧𑀯𑀡𑁆𑀡𑀺𑀦𑀻;

𑀢𑀣𑀽𑀧𑀫𑀸 𑀫𑀁 𑀧𑀝𑀺𑀪𑀸𑀲𑀺 𑀤𑁂𑀯𑀢𑁂;

𑀆𑀘𑀺𑀓𑁆𑀔 𑀫𑁂 𑀢𑀁 𑀓𑀢𑀫𑀸𑀲𑀺 𑀅𑀘𑁆𑀙𑀭𑀸’’𑀢𑀺. (𑀚𑀸. 𑀅𑀝𑁆𑀞. 𑁫.𑁨𑁧.𑁨𑁫𑁪);

𑀇𑀫𑀲𑁆𑀲 𑀕𑀸𑀣𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀢𑀢𑁆𑀣 𑀚𑀺𑀖𑀜𑁆𑀜𑀭𑀢𑁆𑀢𑀺𑀦𑁆𑀢𑀺 𑀧𑀘𑁆𑀙𑀺𑀫𑀭𑀢𑁆𑀢𑀺𑀁, 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄. 𑀉𑀳𑀢𑁂𑀢𑀺 𑀅𑀭𑀼𑀡𑁂 𑀉𑀕𑁆𑀕𑀢𑁂. 𑀬𑀸𑀢𑀺 𑀬𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀭𑀢𑁆𑀢𑀯𑀡𑁆𑀡𑀢𑀸𑀬 𑀉𑀢𑁆𑀢𑀫𑀭𑀽𑀧𑀥𑀭𑀸 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀅𑀭𑀼𑀡𑀼𑀕𑁆𑀕𑀢𑀲𑀫𑀬𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀭𑀢𑁆𑀢𑀯𑀡𑁆𑀡𑀢𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀭𑀼𑀡𑀲𑁆𑀲 𑀉𑀝𑁆𑀞𑀺𑀢𑀢𑁆𑀢𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀭𑀢𑁆𑀢𑀪𑀸𑀕𑁄 𑀲𑀽𑀭𑀺𑀬𑀸𑀮𑁄𑀓𑀲𑁆𑀲 𑀧𑀢𑁆𑀣𑀝𑀢𑁆𑀢𑀸 𑀲𑁂𑀲𑀤𑀺𑀲𑀸𑀦𑀁 𑀑𑀤𑀸𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺.

𑀲𑀡𑁆𑀞𑀸𑀦𑀁 ¶ 𑀓𑀻𑀤𑀺𑀲𑀁 𑀪𑀯𑁂𑀢𑀺 𑀏𑀢𑁆𑀣 𑀅𑀭𑀼𑀡𑀲𑁆𑀲 𑀧𑀸𑀝𑁂𑀓𑁆𑀓𑀁 𑀲𑀡𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺 𑀭𑀲𑁆𑀫𑀺𑀫𑀢𑁆𑀢𑀢𑁆𑀢𑀸. 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀨𑀭𑀢𑀺, 𑀢𑀢𑁆𑀢𑀓𑀁 𑀢𑀲𑁆𑀲 𑀲𑀡𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀲𑀡𑁆𑀞𑀸𑀦𑀁. 𑀯𑀼𑀢𑁆𑀢𑀜𑁆𑀳𑀺 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁫.𑁨𑁧.𑁨𑁫𑁫) ‘‘𑀧𑀼𑀭𑀢𑁆𑀣𑀺𑀫𑀤𑀺𑀲𑀸 𑀭𑀢𑁆𑀢𑀯𑀡𑁆𑀡𑀢𑀸𑀬 𑀉𑀢𑁆𑀢𑀫𑀭𑀽𑀧𑀥𑀭𑀸 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀻’’𑀢𑀺.

𑀓𑀺𑀲𑁆𑀫𑀺𑀁 𑀓𑀸𑀮𑁂 𑀘 𑀤𑁂𑀲𑁂 𑀘, 𑀅𑀭𑀼𑀡𑁄 𑀲𑀫𑀼𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀏𑀲 𑀅𑀭𑀼𑀡𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀲𑁆𑀲 𑀧𑀼𑀭𑁂 𑀓𑀸𑀮𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀉𑀕𑁆𑀕𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑁨𑁩) ‘‘𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑁂, 𑀅𑀭𑀼𑀡𑁄 𑀦𑀸𑀫 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀲𑀽𑀭𑀺𑀬𑁄𑀤𑀬𑀢𑁄 𑀧𑀼𑀭𑁂𑀢𑀭𑀫𑁂𑀯 𑀉𑀝𑁆𑀞𑀺𑀢𑁄𑀪𑀸𑀲𑁄’’𑀢𑀺. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀜𑁆𑀘 ‘‘𑀲𑀽𑀭𑀲𑁆𑀲𑁄𑀤𑀬𑀢𑁄 𑀧𑀼𑀩𑁆𑀩𑀼𑀝𑁆𑀞𑀺𑀢𑀭𑀁𑀲𑀻’’𑀢𑀺.

𑀓𑀺𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄 𑀏𑀲𑁄, 𑀉𑀤𑀸𑀳𑀼 𑀅𑀦𑀼𑀫𑀸𑀦𑀢𑁄𑀢𑀺 𑀏𑀢𑁆𑀣 𑀅𑀬𑀁 𑀅𑀭𑀼𑀡𑁄 𑀦𑀸𑀫 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄 𑀏𑀯 ¶ , 𑀦 𑀅𑀦𑀼𑀫𑀸𑀦𑀲𑀺𑀤𑁆𑀥𑁄. 𑀓𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀯𑀡𑁆𑀡𑀸𑀬𑀢𑀦𑀪𑀸𑀯𑀢𑁄. 𑀅𑀓𑁆𑀔𑀲𑁆𑀲 𑀧𑀢𑀻𑀢𑀺 𑀧𑀘𑁆𑀘𑀓𑁆𑀔𑀁, 𑀘𑀓𑁆𑀔𑀼𑀭𑀽𑀧𑀸𑀦𑀁 𑀅𑀪𑀺𑀫𑀼𑀔𑀪𑀸𑀯𑁂𑀦 𑀆𑀧𑀸𑀣𑀕𑀢𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩, 𑁪𑁪, 𑁪𑁫, 𑀲𑀁. 𑀦𑀺. 𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭), 𑀢𑀲𑁆𑀫𑀸 𑀅𑀬𑀁 𑀅𑀭𑀼𑀡𑀯𑀡𑁆𑀡𑁄 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀚𑀸𑀦𑀺𑀢𑀩𑁆𑀩𑀢𑁄 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺, 𑀦 𑀏𑀯𑀁 𑀲𑀢𑀺 𑀏𑀯𑀁 𑀪𑀯𑁂𑀬𑁆𑀬𑀸𑀢𑀺 𑀅𑀦𑀼𑀫𑀸𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑀦𑁂𑀦 𑀲𑀺𑀤𑁆𑀥𑁄𑀢𑀺. 𑀇𑀫𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀡𑁆𑀟𑀺𑀢𑁂𑀳𑀺 𑀭𑀢𑁆𑀢𑁄𑀪𑀸𑀲𑁄𑀬𑁂𑀯 𑀅𑀭𑀼𑀡𑁄𑀢𑀺 𑀧𑀘𑁆𑀘𑁂𑀢𑀩𑁆𑀩𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄𑀢𑀺.

𑀓𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀭𑀼𑀡𑀓𑀣𑀸 𑀯𑀼𑀢𑁆𑀢𑀸𑀢𑀺? 𑀇𑀫𑀺𑀲𑁆𑀲𑀸 𑀅𑀭𑀼𑀡𑀓𑀣𑀸𑀬 𑀫𑀳𑀸𑀯𑀺𑀲𑀬𑀪𑀸𑀯𑀢𑁄. 𑀓𑀣𑀁? 𑀉𑀧𑁄𑀲𑀣𑀺𑀓𑀸 𑀉𑀧𑀸𑀲𑀓𑀸 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀅𑀭𑀼𑀡𑀼𑀕𑁆𑀕𑀫𑀦𑀁 𑀢𑀣𑀢𑁄 ¶ 𑀅𑀚𑀸𑀦𑀦𑁆𑀢𑀸 𑀅𑀦𑀼𑀕𑁆𑀕𑀢𑁂𑀬𑁂𑀯 𑀅𑀭𑀼𑀡𑁂 𑀉𑀕𑁆𑀕𑀢𑀲𑀜𑁆𑀜𑀸𑀬 𑀔𑀸𑀤𑀦𑀻𑀬𑀁 𑀯𑀸 𑀔𑀸𑀤𑀦𑁆𑀢𑀺, 𑀪𑁄𑀚𑀦𑀻𑀬𑀁 𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀯𑀸 𑀥𑀸𑀭𑁂𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀲𑀻𑀮𑀁 𑀪𑀺𑀚𑁆𑀚𑀢𑀺. 𑀲𑀸𑀫𑀡𑁂𑀭𑀸 𑀢𑀣𑁂𑀯 𑀯𑀺𑀓𑀸𑀮𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀺. 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀓𑀸 𑀪𑀺𑀓𑁆𑀔𑀽 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀯𑀺𑀦𑀸 𑀩𑀳𑀺𑀲𑀻𑀫𑁂 𑀘𑀭𑀦𑁆𑀢𑀸 𑀦𑀺𑀲𑁆𑀲𑀬𑀧𑁆𑀧𑀲𑁆𑀲𑀫𑁆𑀪𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺𑀕𑀘𑁆𑀙𑀦𑁆𑀢𑀸 𑀯𑀲𑁆𑀲𑀘𑁆𑀙𑁂𑀤𑀁, 𑀢𑁂𑀘𑀻𑀯𑀭𑀺𑀓𑀸 𑀪𑀺𑀓𑁆𑀔𑀽 𑀅𑀩𑀤𑁆𑀥𑀲𑀻𑀫𑀸𑀬𑀁 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀦𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁, 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀫𑀸𑀢𑀼𑀕𑀸𑀫𑁂𑀳𑀺 𑀲𑀳 𑀲𑀬𑀦𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀬𑀸𑀯𑀓𑀸𑀮𑀺𑀓𑀁 𑀪𑀼𑀜𑁆𑀚𑀦𑁆𑀢𑀸 𑀪𑀺𑀓𑁆𑀔𑀽, 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑀸 𑀭𑀢𑁆𑀢𑀺𑀘𑁆𑀙𑁂𑀤𑀁. 𑀏𑀯𑀫𑀸𑀤𑀺𑀅𑀦𑁂𑀓𑀸𑀤𑀻𑀦𑀯𑀲𑀫𑁆𑀪𑀯𑀢𑁄 𑀮𑀚𑁆𑀚𑀺𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀣𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀲𑁆𑀲 𑀚𑀸𑀦𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑁂𑀘𑀺 𑀧𑀦 𑀪𑀺𑀓𑁆𑀔𑀽 𑀅𑀟𑁆𑀠𑀭𑀢𑁆𑀢𑀺𑀲𑀫𑀬𑁂 𑀖𑀝𑀺𑀲𑀼𑀜𑁆𑀜𑀢𑁆𑀢𑀸 𑀅𑀟𑁆𑀠𑀭𑀢𑁆𑀢𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀤𑀺𑀯𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀭𑀼𑀡𑀁 𑀉𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀅𑀟𑁆𑀠𑀭𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀧𑀦 𑀩𑀼𑀤𑁆𑀥𑀲𑀫𑀬𑀁 𑀅𑀚𑀸𑀦𑀦𑁆𑀢𑀸 𑀯𑁂𑀤𑀲𑀫𑀬𑀫𑁂𑀯 𑀫𑀦𑀲𑀺 𑀓𑀭𑁄𑀦𑁆𑀢𑀸 𑀏𑀯𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀢𑀁𑀓𑀭𑀡𑀁 𑀧𑀫𑀸𑀡𑀁 𑀦 𑀳𑁄𑀢𑀺. 𑀩𑀳𑀯𑁄 𑀧𑀦 𑀪𑀺𑀓𑁆𑀔𑀽 𑀅𑀭𑀼𑀡𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀅𑀦𑀼𑀫𑀸𑀦𑀯𑀲𑁂𑀦 𑀘𑀺𑀦𑁆𑀢𑀺𑀢𑀼𑀜𑁆𑀘 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑀼𑀲𑁆𑀲𑀯𑀯𑀲𑁂𑀦𑁂𑀯 𑀧𑀭𑀯𑀘𑀦𑀁 𑀲𑀤𑁆𑀤𑀳𑀦𑁆𑀢𑀸 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀤𑁆𑀯𑀺𑀲𑀳𑀲𑁆𑀲𑀤𑀡𑁆𑀟𑀧𑁆𑀧𑀫𑀸𑀡𑀁 𑀞𑀸𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀺𑀲𑀳𑀲𑁆𑀲𑀤𑀡𑁆𑀟𑀧𑁆𑀧𑀫𑀸𑀡𑀁 𑀞𑀸𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 ¶ 𑀘 𑀯𑀤𑀦𑁆𑀢𑀺. 𑀇𑀫𑀫𑁆𑀳𑀸 𑀯𑀺𑀳𑀸𑀭𑀸 𑀅𑀲𑀼𑀓𑀁 𑀦𑀸𑀫 𑀯𑀺𑀳𑀸𑀭𑀁 𑀅𑀲𑀼𑀓𑀁 𑀦𑀸𑀫 𑀘𑁂𑀢𑀺𑀬𑀁 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀧𑀸𑀧𑀼𑀡𑀦𑁆𑀢𑀻𑀢𑀺𑀆𑀤𑀻𑀦𑀺 𑀘 𑀯𑀤𑀦𑁆𑀢𑀻𑀢𑀺 𑀏𑀯𑀁 𑀅𑀦𑀼𑀲𑁆𑀲𑀯𑀯𑀘𑀦𑀁 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀅𑀧𑁆𑀧𑀫𑀸𑀡𑀁. 𑀓𑀲𑁆𑀫𑀸? 𑀅𑀤𑁆𑀥𑀸𑀦𑀁 𑀦𑀸𑀫 𑀩𑀮𑀯𑀦𑁆𑀢𑀲𑁆𑀲 𑀚𑀯𑀲𑀫𑁆𑀧𑀦𑁆𑀦𑀲𑁆𑀲 𑀘 𑀭𑀲𑁆𑀲𑀁 𑀳𑁄𑀢𑀺, 𑀤𑀼𑀩𑁆𑀩𑀮𑀲𑁆𑀲 𑀲𑀦𑁆𑀢𑀲𑁆𑀲 𑀘 𑀤𑀻𑀖𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 𑁋

‘‘𑀤𑀻𑀖𑀸 ¶ 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁬𑁦);

𑀢𑀲𑁆𑀫𑀸 𑀅𑀤𑁆𑀥𑀸𑀦𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀏𑀓𑀲𑀤𑀺𑀲𑀁 𑀦 𑀳𑁄𑀢𑀻𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀲𑁆𑀲 𑀮𑀓𑁆𑀔𑀡𑀁 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀦 𑀘 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀧𑀺𑀝𑀓𑀢𑁆𑀢𑀬𑀢𑁄 𑀓𑀺𑀜𑁆𑀘𑀺 𑀲𑀸𑀥𑀓𑀪𑀽𑀢𑀁 𑀯𑀘𑀦𑀁 𑀆𑀳𑀭𑀦𑁆𑀢𑀺, 𑀅𑀲𑀓𑁆𑀔𑀺𑀓𑀁 𑀅𑀟𑁆𑀟𑀁 𑀓𑀭𑁄𑀦𑁆𑀢𑀺 𑀯𑀺𑀬 𑀬𑀣𑀸𑀚𑁆𑀛𑀸𑀲𑀬𑀫𑁂𑀯 𑀯𑀤𑀦𑁆𑀢𑀻𑀢𑀺 𑀧𑀫𑀸𑀡𑀁 𑀦 𑀳𑁄𑀢𑀺.

𑀅𑀜𑁆𑀜𑁂 𑀧𑀦 𑁋

‘‘𑀅𑀢𑀻𑀢𑀭𑀢𑁆𑀢𑀺𑀬𑀸 𑀬𑀸𑀫𑁄;

𑀧𑀘𑁆𑀙𑀺𑀫𑁄𑀟𑁆𑀠𑀫𑀫𑀼𑀲𑁆𑀲 𑀯𑀸;

𑀪𑀸𑀯𑀺𑀦𑀺𑀬𑀸𑀤𑀺𑀧𑁆𑀧𑀳𑀸𑀭𑁄;

𑀢𑀤𑀟𑁆𑀠𑀁 𑀯𑀸𑀚𑁆𑀚𑀢𑁂𑀳𑁆𑀬 𑀳𑁄𑀢𑀺 𑁋

𑀓𑀘𑁆𑀘𑀸𑀬𑀦𑀲𑀸𑀭𑀧𑁆𑀧𑀓𑀭𑀡𑀸𑀕𑀢𑀁 𑀕𑀸𑀣𑀁 𑀯𑀢𑁆𑀯𑀸 𑀅𑀢𑀻𑀢𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁄 𑀬𑀸𑀫𑁄 𑀅𑀚𑁆𑀚 𑀧𑀭𑀺𑀬𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀧𑀘𑁆𑀙𑀺𑀫𑀬𑀸𑀫𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀯𑀸𑀤𑁄 𑀲𑀓𑀸𑀭𑀡𑀲𑀜𑁆𑀜𑀸𑀧𑀓𑀢𑁆𑀢𑀸 𑀧𑀼𑀭𑀺𑀫𑁂𑀳𑀺 𑀩𑀮𑀯𑀸 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀬𑀼𑀢𑁆𑀢𑁄𑀬𑁂𑀯. 𑀓𑀲𑁆𑀫𑀸? 𑀅𑀬𑀜𑁆𑀳𑀺 𑀕𑀸𑀣𑀸 𑀩𑀸𑀳𑀺𑀭𑀲𑀤𑁆𑀤𑀲𑀢𑁆𑀣𑁂 𑀚𑀗𑁆𑀕𑀤𑀸𑀲𑀧𑁆𑀧𑀓𑀭𑀡𑁂 𑀯𑀼𑀢𑁆𑀢𑀦𑀬𑁂𑀦 𑀅𑀚𑁆𑀚 𑀪𑀯𑀸 𑀅𑀚𑁆𑀚𑀢𑀦𑀻𑀢𑀺 𑀯𑀼𑀢𑁆𑀢𑀅𑀚𑁆𑀚𑀯𑁄𑀳𑀸𑀭𑀲𑁆𑀲 𑀧𑀯𑀢𑁆𑀢𑀦𑀓𑀸𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸, 𑀦 𑀧𑀺𑀝𑀓𑀢𑁆𑀢𑀬𑁂 𑀯𑀼𑀢𑁆𑀢𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀲𑁆𑀲 𑀓𑀸𑀮𑀁 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀫𑀸 𑀅𑀜𑁆𑀜𑀲𑀸𑀥𑁆𑀬𑀲𑁆𑀲 𑀅𑀜𑁆𑀜𑀲𑀸𑀥𑀓𑁂𑀦 𑀲𑀸𑀥𑀺𑀢𑀢𑁆𑀢𑀸 𑀅𑀬𑀼𑀢𑁆𑀢𑁄𑀬𑁂𑀯.

𑀅𑀧𑀭𑁂 𑀧𑀦 ‘‘𑀧𑀳𑀸𑀭𑁄 𑀬𑀸𑀫𑀲𑀜𑁆𑀜𑀺𑀢𑁄’’𑀢𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀳𑀸𑀭𑀬𑀸𑀫𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀢𑁆𑀢𑀸 𑀢𑀢𑁆𑀣𑁂𑀯 ‘‘𑀢𑀺𑀬𑀸𑀫𑀸 𑀲𑀁𑀯𑀭𑀻 𑀪𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀢𑁆𑀢𑀺𑀬𑀸 𑀘 𑀢𑀺𑀬𑀸𑀫𑀪𑀸𑀯𑀢𑁄 𑀧𑀸𑀴𑀺𑀬𑀜𑁆𑀘 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁩) ‘‘𑀅𑀪𑀺𑀓𑁆𑀓𑀦𑁆𑀢𑀸 ¶ , 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀉𑀤𑁆𑀥𑀲𑁆𑀢𑁄 𑀅𑀭𑀼𑀡𑁄’’𑀢𑀺 𑀆𑀕𑀢𑀢𑁆𑀢𑀸 𑀇𑀤𑀸𑀦𑀺 ¶ 𑀭𑀢𑁆𑀢𑀺𑀬𑀸 𑀘𑀢𑀽𑀲𑀼 𑀧𑀳𑀸𑀭𑁂𑀲𑀼 𑀢𑀢𑀺𑀬𑀧𑁆𑀧𑀳𑀸𑀭𑀲𑁆𑀲 𑀅𑀯𑀲𑀸𑀦𑁂 𑀅𑀭𑀼𑀡𑁄 𑀉𑀕𑁆𑀕𑀢𑁄, 𑀢𑀲𑁆𑀫𑀸 𑀅𑀯𑀲𑁂𑀲𑀏𑀓𑀧𑁆𑀧𑀳𑀸𑀭𑀫𑀢𑁆𑀢𑁄 𑀓𑀸𑀮𑁄 𑀤𑀺𑀯𑀲𑀪𑀸𑀕𑀁 𑀪𑀚𑀢𑀻𑀢𑀺 𑀯𑀤𑁂𑀬𑁆𑀬𑀼𑀁, 𑀅𑀬𑀁 𑀯𑀸𑀤𑁄 𑀢𑀢𑀺𑀬𑀯𑀸𑀤𑀢𑁄𑀧𑀺 𑀩𑀮𑀯𑀢𑀭𑁄. 𑀓𑀲𑁆𑀫𑀸? 𑀜𑀸𑀧𑀓𑀜𑀸𑀧𑁆𑀬𑀸𑀦𑀁 𑀅𑀦𑀼𑀭𑀽𑀧𑀪𑀸𑀯𑀢𑁄. 𑀢𑀣𑀸 𑀳𑀺 ‘‘𑀧𑀳𑀸𑀭𑁄 𑀬𑀸𑀫𑀲𑀜𑁆𑀜𑀺𑀢𑁄’’𑀢𑀺 𑀅𑀬𑀁 𑀜𑀸𑀧𑀓𑁄 𑀧𑀳𑀸𑀭𑀬𑀸𑀫𑀸𑀦𑀁 𑀏𑀓𑀢𑁆𑀣𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑁄, ‘‘𑀢𑀺𑀬𑀸𑀫𑀸 𑀲𑀁𑀯𑀭𑀻𑀪𑀯𑁂’’𑀢𑀺 𑀅𑀬𑀁 𑀭𑀢𑁆𑀢𑀺𑀬𑀸 𑀢𑀺𑀬𑀸𑀫𑀪𑀸𑀯𑀲𑁆𑀲, ‘‘𑀧𑀸𑀴𑀺𑀬𑀜𑁆𑀘𑀸’’𑀢𑀺𑀆𑀤𑀺 𑀢𑀢𑀺𑀬𑀧𑁆𑀧𑀳𑀸𑀭𑀲𑁆𑀲 𑀅𑀯𑀲𑀸𑀦𑁂 𑀅𑀭𑀼𑀡𑀼𑀕𑁆𑀕𑀫𑀦𑀲𑁆𑀲, 𑀢𑀣𑀸𑀧𑀺 𑀅𑀬𑀼𑀢𑁆𑀢𑁄𑀬𑁂𑀯 𑀳𑁄𑀢𑀺. 𑀓𑀲𑁆𑀫𑀸? ‘‘𑀅𑀯𑀲𑁂𑀲𑀏𑀓𑀧𑁆𑀧𑀳𑀸𑀭𑀫𑀢𑁆𑀢𑁄 𑀓𑀸𑀮𑁄 𑀤𑀺𑀯𑀲𑀪𑀸𑀕𑀁 𑀪𑀚𑀢𑀻’’𑀢𑀺 𑀯𑀘𑀦𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀫𑀚𑁆𑀛𑀺𑀫𑀤𑁂𑀲𑁂 𑀳𑀺 𑀤𑀲𑀖𑀝𑀺𑀓𑀸𑀧𑀫𑀸𑀡𑀲𑁆𑀲 𑀓𑀸𑀮𑀲𑁆𑀲 𑀏𑀓𑀧𑁆𑀧𑀳𑀸𑀭𑀢𑁆𑀢𑀸 𑀲𑀩𑁆𑀩𑀸 𑀭𑀢𑁆𑀢𑀺 𑀢𑀺𑀬𑀸𑀫𑀸𑀯 𑀳𑁄𑀢𑀺, 𑀦 𑀘𑀢𑀼𑀬𑀸𑀫𑀸, 𑀇𑀤𑀸𑀦𑀺 𑀧𑀦 𑀧𑀘𑁆𑀘𑀦𑁆𑀢𑀯𑀺𑀲𑀬𑁂𑀲𑀼 𑀲𑀢𑁆𑀢𑀝𑁆𑀞𑀖𑀝𑀺𑀓𑀸𑀫𑀢𑁆𑀢𑀲𑁆𑀲 𑀓𑀸𑀮𑀲𑁆𑀲 𑀏𑀓𑀧𑁆𑀧𑀳𑀸𑀭𑀓𑀢𑀢𑁆𑀢𑀸 𑀘𑀢𑀼𑀧𑁆𑀧𑀳𑀸𑀭𑀸 𑀪𑀯𑀢𑀺, 𑀢𑀲𑁆𑀫𑀸 𑀫𑀚𑁆𑀛𑀺𑀫𑀤𑁂𑀲𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀜𑁆𑀘 ‘‘𑀢𑀺𑀬𑀸𑀫𑀸 𑀲𑀁𑀯𑀭𑀻 𑀪𑀯𑁂’’𑀢𑀺 𑀯𑀼𑀢𑁆𑀢𑀁, 𑀧𑀸𑀴𑀺𑀬𑀜𑁆𑀘 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁩) ‘‘𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀉𑀤𑁆𑀥𑀲𑁆𑀢𑁄 𑀅𑀭𑀼𑀡𑁄’’𑀢𑀺, 𑀢𑀲𑁆𑀫𑀸 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁦𑁧) ‘‘𑀢𑀣𑀸 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀫𑁆𑀧𑀺 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑀸𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀉𑀕𑁆𑀕𑀢𑁂 𑀅𑀭𑀼𑀡𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺.

𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂𑀧𑀺 (𑀧𑀸𑀘𑀺. 𑁫𑁨-𑁫𑁪) ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀳 𑀦𑀺𑀯𑀼𑀢𑁆𑀣𑀪𑀸𑀯𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀲𑀼 𑀘 𑀲𑀩𑁆𑀩𑀢𑁆𑀣 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀆𑀕𑀫𑀦𑀯𑀲𑁂𑀦 𑀅𑀭𑀼𑀡𑀼𑀕𑁆𑀕𑀫𑀦𑀁 𑀤𑀲𑁆𑀲𑀺𑀢𑀁, 𑀦 𑀅𑀢𑀻𑀢𑀸𑀭𑀼𑀡𑀯𑀲𑁂𑀦𑀸𑀢𑀺. 𑀚𑀸𑀢𑀓𑀝𑁆𑀞𑀓𑀣𑀸𑀬𑀫𑁆𑀧𑀺 (𑀚𑀸. 𑀅𑀝𑁆𑀞. 𑁫.𑁨𑁧.𑁨𑁫𑁫) ‘‘𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄’’𑀢𑀺. 𑀦 𑀓𑁂𑀯𑀮𑀁 𑀫𑀚𑁆𑀛𑀺𑀫𑀤𑁂𑀲𑁂𑀲𑀼 𑀭𑀢𑁆𑀢𑀺𑀬𑀸𑀬𑁂𑀯 𑀢𑀺𑀧𑁆𑀧𑀳𑀸𑀭𑀪𑀸𑀯𑁄 𑀳𑁄𑀢𑀺 ¶ , 𑀅𑀣 𑀔𑁄 𑀤𑀺𑀯𑀲𑀲𑁆𑀲𑀧𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑀜𑁆𑀘 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀢𑁆𑀢𑀧𑁆𑀧𑀓𑀭𑀡𑀉𑀕𑁆𑀕𑀳𑀡𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀻’’𑀢𑀺, 𑀫𑀽𑀮𑀝𑀻𑀓𑀸𑀬𑀜𑁆𑀘 (𑀥. 𑀲. 𑀫𑀽𑀮𑀝𑀻. 𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸) ‘‘𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀧𑀳𑀸𑀭𑁄𑀢𑀺 𑀤𑀺𑀯𑀲𑀲𑁆𑀲 𑀢𑀢𑀺𑀬𑀪𑀸𑀕𑁄 𑀯𑀼𑀘𑁆𑀘𑀢𑀻’’𑀢𑀺, 𑀢𑀲𑁆𑀫𑀸 𑀏𑀓𑁄 𑀭𑀢𑁆𑀢𑀺𑀤𑀺𑀯𑁄 𑀙𑀧𑁆𑀧𑀳𑀸𑀭𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀫𑀚𑁆𑀛𑀺𑀫𑀤𑁂𑀲𑀯𑁄𑀳𑀸𑀭𑁂𑀦 𑀢𑀺𑀬𑀸𑀫𑀲𑀗𑁆𑀔𑀸𑀢𑀲𑁆𑀲 𑀢𑀺𑀧𑁆𑀧𑀳𑀸𑀭𑀲𑁆𑀲 𑀅𑀯𑀲𑀸𑀦𑁂 𑀲𑀩𑁆𑀩𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀉𑀝𑁆𑀞𑀺𑀢𑀁 𑀅𑀭𑀼𑀡𑀁 𑀧𑀘𑁆𑀘𑀦𑁆𑀢𑀤𑁂𑀲𑀯𑁄𑀳𑀸𑀭𑁂𑀦 𑀢𑀺𑀧𑁆𑀧𑀳𑀸𑀭𑀲𑁆𑀲 𑀅𑀯𑀲𑀸𑀦𑁂𑀢𑀺 𑀕𑀳𑁂𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑀸𑀯𑀲𑁂𑀲𑀓𑀸𑀮𑁂 𑀅𑀭𑀼𑀡𑁄 𑀉𑀕𑁆𑀕𑀢𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀬𑀫𑁆𑀧𑀺 𑀯𑀸𑀤𑁄 𑀅𑀬𑀼𑀢𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀩𑀳𑀯𑁄 ¶ 𑀧𑀦 𑀧𑀡𑁆𑀟𑀺𑀢𑀸 ‘‘𑀔𑀼𑀤𑁆𑀤𑀲𑀺𑀓𑁆𑀔𑀸𑀦𑀺𑀲𑁆𑀲𑀬𑁂 𑀯𑀼𑀢𑁆𑀢𑀁 𑁋

‘𑀲𑁂𑀢𑀭𑀼𑀡𑀜𑁆𑀘 𑀧𑀞𑀫𑀁, 𑀤𑀼𑀢𑀺𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀁;

𑀢𑀢𑀺𑀬𑀁 𑀢𑀫𑁆𑀩𑀯𑀡𑁆𑀡𑀜𑁆𑀘, 𑀘𑀢𑀼𑀢𑁆𑀣𑀁 𑀕𑀤𑁆𑀭𑀪𑀁 𑀫𑀼𑀔’𑀦𑁆𑀢𑀺. 𑁋

𑀇𑀫𑀁 𑀕𑀸𑀣𑀁 𑀦𑀺𑀲𑁆𑀲𑀸𑀬 𑀏𑀓𑀭𑀢𑁆𑀢𑀺𑀬𑀁 𑀅𑀭𑀼𑀡𑁄 𑀘𑀢𑀼𑀓𑁆𑀔𑀢𑁆𑀢𑀼𑀁 𑀉𑀝𑁆𑀞𑀳𑀢𑀺, 𑀢𑀢𑁆𑀣 𑀧𑀞𑀫𑀁 𑀲𑁂𑀢𑀯𑀡𑁆𑀡𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀧𑀼𑀧𑁆𑀨𑀯𑀡𑁆𑀡𑀁 𑀳𑁄𑀢𑀺, 𑀢𑀢𑀺𑀬𑀁 𑀢𑀫𑁆𑀩𑀯𑀡𑁆𑀡𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀕𑀤𑁆𑀭𑀪𑀫𑀼𑀔𑀯𑀡𑁆𑀡𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀭𑀢𑁆𑀢𑁄𑀪𑀸𑀲𑀢𑁄 𑀧𑀼𑀭𑁂𑀢𑀭𑀁 𑀅𑀢𑀻𑀢𑀭𑀢𑁆𑀢𑀺𑀓𑀸𑀮𑁂𑀬𑁂𑀯 𑀯𑀢𑁆𑀢𑀦𑀺𑀓𑁆𑀔𑀺𑀧𑀦𑀸𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀢𑀁 𑀓𑀭𑀡𑀁 𑀅𑀦𑀺𑀲𑀫𑁆𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀢𑀺. 𑀅𑀬𑀜𑁆𑀳𑀺 𑀕𑀸𑀣𑀸 𑀦𑁂𑀯 𑀧𑀸𑀴𑀺𑀬𑀁 𑀤𑀺𑀲𑁆𑀲𑀢𑀺, 𑀦 𑀅𑀝𑁆𑀞𑀓𑀣𑀸𑀬𑀁, 𑀦 𑀝𑀻𑀓𑀸𑀲𑀼, 𑀓𑁂𑀯𑀮𑀁 𑀦𑀺𑀲𑁆𑀲𑀬𑁂 𑀏𑀯, 𑀦𑀺𑀲𑁆𑀲𑀬𑁂𑀲𑀼 𑀘 𑀏𑀓𑀲𑁆𑀫𑀺𑀁𑀬𑁂𑀯 𑀔𑀼𑀤𑁆𑀤𑀲𑀺𑀓𑁆𑀔𑀸𑀦𑀺𑀲𑁆𑀲𑀬𑁂 𑀤𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀦𑀺𑀲𑁆𑀲𑀬𑁂𑀲𑀼, 𑀢𑀢𑁆𑀣𑀸𑀧𑀺 𑀦𑁂𑀯 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀤𑀺𑀲𑁆𑀲𑀢𑀺, 𑀦 𑀳𑁂𑀢𑀼𑀨𑀮𑀸𑀤𑀺𑀪𑀸𑀯𑁄, 𑀦 𑀘 𑀮𑀺𑀗𑁆𑀕𑀦𑀺𑀬𑀫𑁄𑀢𑀺 𑀦 𑀦𑀺𑀲𑁆𑀲𑀬𑀓𑀸𑀭𑀸𑀘𑀭𑀺𑀬𑁂𑀦 𑀞𑀧𑀺𑀢𑀸 𑀪𑀯𑁂𑀬𑁆𑀬, 𑀅𑀣 𑀔𑁄 𑀧𑀘𑁆𑀙𑀸 𑀅𑀜𑁆𑀜𑁂𑀳𑀺 𑀮𑁂𑀔𑀓𑁂𑀳𑀺 𑀯𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀦𑀼𑀭𑀽𑀧𑀁 𑀮𑀺𑀔𑀺𑀢𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀬𑀁 𑀕𑀸𑀣𑀸 𑀓𑀼𑀢𑁄 𑀆𑀪𑀢𑀸 𑀧𑀸𑀴𑀺𑀢𑁄 𑀯𑀸 𑀅𑀝𑁆𑀞𑀓𑀣𑀸𑀢𑁄 ¶ 𑀯𑀸 𑀝𑀻𑀓𑀸𑀢𑁄 𑀯𑀸 𑀯𑀺𑀦𑀬𑀢𑁄 𑀯𑀸 𑀲𑀼𑀢𑁆𑀢𑀦𑁆𑀢𑀢𑁄 𑀯𑀸 𑀅𑀪𑀺𑀥𑀫𑁆𑀫𑀢𑁄 𑀯𑀸𑀢𑀺 𑀧𑀪𑀯𑀁 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑀺𑀲𑁆𑀲𑀬𑁂 𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀯𑀼𑀢𑁆𑀢𑀯𑀘𑀦𑀁 𑀅𑀦𑀺𑀲𑀸𑀫𑁂𑀢𑁆𑀯𑀸 𑀓𑀢𑀢𑁆𑀢𑀸 𑀅𑀦𑀺𑀲𑀫𑁆𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀢𑀺.

𑀢𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀻𑀢𑀸𑀲𑀼 𑀳𑁂𑀫𑀦𑁆𑀢𑀺𑀓𑀸𑀲𑀼 𑀭𑀢𑁆𑀢𑀻𑀲𑀼 𑀅𑀦𑁆𑀢𑀭𑀝𑁆𑀞𑀓𑀸𑀲𑀼 𑀳𑀺𑀫𑀧𑀸𑀢𑀲𑀫𑀬𑁂 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀏𑀓𑀘𑀻𑀯𑀭𑁄 𑀦𑀺𑀲𑀻𑀤𑀺, 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺, 𑀤𑀼𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺, 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺, 𑀢𑀢𑀺𑀬𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺, 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀺. 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀅𑀳𑁄𑀲𑀺, 𑀘𑀢𑀼𑀢𑁆𑀣𑀁 𑀪𑀕𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺, 𑀦 𑀪𑀕𑀯𑀦𑁆𑀢𑀁 𑀲𑀻𑀢𑀁 𑀅𑀳𑁄𑀲𑀻’’𑀢𑀺. 𑀅𑀬𑀁 𑀫𑀳𑀸𑀯𑀕𑁆𑀕𑁂 (𑀫𑀳𑀸𑀯. 𑁩𑁪𑁬) 𑀘𑀻𑀯𑀭𑀓𑁆𑀔𑀦𑁆𑀥𑀓𑀸𑀕𑀢𑀸 𑀯𑀺𑀦𑀬𑀧𑀸𑀴𑀺. 𑀧𑀸𑀴𑀺𑀬𑀁 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀢𑀼𑀝𑁆𑀞𑀺𑀫𑀼𑀔𑀺𑀬𑀸, 𑀧𑀲𑀦𑁆𑀦𑀤𑀺𑀲𑀸𑀫𑀼𑀔𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀧𑀸𑀞𑁄 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁪𑁬).

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 ¶ . 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 ¶ 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀫𑀚𑁆𑀛𑀺𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀉𑀤𑁆𑀥𑀲𑁆𑀢𑀁 𑀅𑀭𑀼𑀡𑀁, 𑀦𑀦𑁆𑀤𑀺𑀫𑀼𑀔𑀻 𑀭𑀢𑁆𑀢𑀺, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺 (𑀘𑀽𑀴𑀯. 𑁩𑁮𑁩). 𑀅𑀬𑀁 𑀘𑀽𑀴𑀯𑀕𑁆𑀕𑁂 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀸𑀕𑀢𑀸 𑀅𑀧𑀭𑀸𑀧𑀺 𑀯𑀺𑀦𑀬𑀧𑀸𑀴𑀺.

𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸𑀢𑀺 𑀅𑀭𑀼𑀡𑀼𑀝𑁆𑀞𑀺𑀢𑀓𑀸𑀮𑁂 𑀧𑀻𑀢𑀺𑀫𑀼𑀔𑀸 𑀯𑀺𑀬 𑀭𑀢𑁆𑀢𑀺 𑀔𑀸𑀬𑀢𑀺. 𑀢𑁂𑀦𑀸𑀳 ‘‘𑀦𑀦𑁆𑀤𑀺𑀫𑀼𑀔𑀺𑀬𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁮𑁩) 𑀅𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀪𑀽𑀢𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀝𑁆𑀞𑀓𑀣𑀸𑀧𑀸𑀞𑁄. 𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀧𑀭𑀺𑀓𑁆𑀔𑀻𑀡𑀸. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑀲𑀻𑀲𑁂. 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀢𑀼𑀝𑁆𑀞𑀺𑀫𑀼𑀔𑀺𑀬𑀸. 𑀅𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀪𑀽𑀢𑀲𑀸𑀭𑀢𑁆𑀣𑀤𑀻𑀧𑀦𑀻𑀧𑀸𑀞𑁄 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁮𑁩). 𑀧𑀸𑀴𑀺𑀬𑀁 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀑𑀤𑀸𑀢𑀤𑀺𑀲𑀸𑀫𑀼𑀔𑀺𑀢𑀸𑀬 𑀢𑀼𑀝𑁆𑀞𑀫𑀼𑀔𑀺𑀬𑀸. 𑀅𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀬 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁮𑁩) 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀧𑀸𑀞𑁄.

‘‘𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀉𑀤𑁆𑀥𑀲𑁆𑀢𑁄 𑀅𑀭𑀼𑀡𑁄, 𑀦𑀦𑁆𑀤𑀺𑀫𑀼𑀔𑀻 𑀭𑀢𑁆𑀢𑀺, 𑀘𑀺𑀭𑀦𑀺𑀲𑀺𑀦𑁆𑀦𑀸 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽, 𑀧𑀝𑀺𑀲𑀫𑁆𑀫𑁄𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸 ¶ 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽’’𑀢𑀺. 𑀅𑀬𑀁 𑀉𑀤𑀸𑀦𑀸𑀕𑀢𑀸 𑀲𑀼𑀢𑁆𑀢𑀦𑁆𑀢𑀧𑀸𑀴𑀺 (𑀉𑀤𑀸. 𑁪𑁫). 𑀉𑀤𑁆𑀥𑀲𑁆𑀢𑁂 ¶ 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑁂. 𑀅𑀭𑀼𑀡𑁄 𑀦𑀸𑀫 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀲𑀽𑀭𑀺𑀬𑁄𑀤𑀬𑀢𑁄 𑀧𑀼𑀭𑁂𑀢𑀭𑀫𑁂𑀯 𑀉𑀝𑁆𑀞𑀺𑀢𑁄𑀪𑀸𑀲𑁄. 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸𑀢𑀺 𑀅𑀭𑀼𑀡𑀲𑁆𑀲 𑀉𑀕𑁆𑀕𑀢𑀢𑁆𑀢𑀸 𑀏𑀯 𑀅𑀭𑀼𑀡𑁄𑀪𑀸𑀬 𑀲𑀽𑀭𑀺𑀬𑀸𑀮𑁄𑀓𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑁂 𑀦𑀦𑁆𑀤𑀸𑀧𑀦𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀚𑀸𑀢𑀸𑀬, 𑀯𑀺𑀪𑀸𑀬𑀫𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀪𑀽𑀢𑀸 𑀉𑀤𑀸𑀦𑀝𑁆𑀞𑀓𑀣𑀸 (𑀉𑀤𑀸. 𑀅𑀝𑁆𑀞. 𑁨𑁩).

𑀇𑀢𑀺 𑀏𑀢𑁆𑀢𑀓𑀸𑀲𑀼 𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀸𑀕𑀢𑀸𑀲𑀼 𑀧𑀸𑀴𑀺𑀬𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀏𑀓𑀲𑁆𑀫𑀺𑀫𑁆𑀧𑀺𑀞𑀸𑀦𑁂 𑀅𑀭𑀼𑀡𑁄 𑀘𑀢𑀼𑀓𑁆𑀔𑀢𑁆𑀢𑀼𑀁 𑀉𑀕𑁆𑀕𑀢𑁄𑀢𑀺 𑀦𑀢𑁆𑀣𑀺, 𑀏𑀓𑀯𑀸𑀭𑀫𑁂𑀯 𑀯𑀼𑀢𑁆𑀢𑁄. 𑀘𑀢𑀼𑀩𑁆𑀩𑀺𑀥𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑁄𑀢𑀺𑀧𑀺 𑀦𑀢𑁆𑀣𑀺, 𑀏𑀓𑀯𑀡𑁆𑀡𑁄 𑀏𑀯 𑀯𑀼𑀢𑁆𑀢𑁄. 𑀚𑀸𑀢𑀓𑀝𑁆𑀞𑀓𑀣𑀸𑀬𑀫𑁆𑀧𑀺 (𑀚𑀸. 𑀅𑀝𑁆𑀞. 𑁫.𑁨𑁧.𑁨𑁫𑁫) 𑀭𑀢𑁆𑀢𑀯𑀡𑁆𑀡𑁄 𑀏𑀯 𑀯𑀼𑀢𑁆𑀢𑁄, 𑀦 𑀲𑁂𑀢𑀯𑀡𑁆𑀡𑀸𑀤𑀺𑀓𑁄. 𑀦𑀦𑁆𑀤𑀺𑀫𑀼𑀔𑀻𑀢𑀺 𑀘 𑀲𑀢𑁆𑀢𑁂 𑀦𑀦𑁆𑀤𑀸𑀧𑀦𑀤𑀺𑀲𑀸𑀫𑀼𑀔𑀻 𑀭𑀢𑁆𑀢𑀺 𑀏𑀯 𑀯𑀼𑀢𑁆𑀢𑀸, 𑀦 𑀅𑀭𑀼𑀡𑀲𑁆𑀲 𑀦𑀦𑁆𑀤𑀺𑀬𑀸𑀯𑀝𑁆𑀝𑀧𑀼𑀧𑁆𑀨𑀲𑀤𑀺𑀲𑀯𑀡𑁆𑀡𑀢𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑁂 𑀦𑀦𑁆𑀤𑀸𑀧𑀦𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸’’𑀢𑀺. 𑀏𑀯𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀧𑀓𑀭𑀡𑀯𑀘𑀦𑁂𑀦 𑀯𑀺𑀭𑀼𑀤𑁆𑀥𑀢𑁆𑀢𑀸 𑀧𑀸𑀴𑀺𑀬𑀝𑁆𑀞𑀓𑀣𑀸𑀤𑀻𑀳𑀺 𑀅𑀲𑀁𑀲𑀦𑁆𑀤𑀦𑀢𑁄 𑀤𑀼𑀩𑁆𑀩𑀮𑀲𑀸𑀥𑀓𑀢𑁆𑀢𑀸 𑀘 𑀅𑀬𑀫𑁆𑀧𑀺 𑀯𑀸𑀤𑁄 𑀅𑀬𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀆𑀡𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀦 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑀸 𑀬𑀤𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀯𑀺𑀯𑀝𑁄𑀓𑀸𑀲𑁂 𑀳𑁄𑀢𑀺, 𑀫𑀘𑁆𑀙𑀓𑁆𑀔𑀺𑀲𑀫𑀸𑀦𑀅𑀩𑁆𑀬𑀢𑁆𑀢𑀭𑀢𑁆𑀢𑁄𑀪𑀸𑀲𑀲𑁆𑀲 𑀧𑀜𑁆𑀜𑀸𑀬𑀫𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑀦𑀺𑀓𑁆𑀔𑀺𑀧𑀦𑀸𑀤𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀬𑀤𑀺 𑀧𑀦 𑀧𑀩𑁆𑀩𑀢𑀸𑀤𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀬𑀢𑁆𑀢𑀓𑁂𑀦 𑀓𑀸𑀮𑁂𑀦 𑀯𑀺𑀯𑀝𑀝𑁆𑀞𑀸𑀦𑁂 𑀭𑀢𑁆𑀢𑁄𑀪𑀸𑀲𑁄 𑀧𑀜𑁆𑀜𑀸𑀬𑀢𑀺, 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 𑀤𑀺𑀲𑁆𑀲𑀦𑀓𑀸𑀮𑀢𑁄 𑀏𑀓𑀖𑀝𑀺𑀓𑀸𑀫𑀢𑁆𑀢𑁂𑀦 𑀯𑀸 𑀤𑁆𑀯𑀺𑀖𑀝𑀺𑀓𑀸𑀫𑀢𑁆𑀢𑁂𑀦 𑀯𑀸 𑀢𑀢𑁆𑀢𑀓𑀁 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀅𑀭𑀼𑀡𑁄 𑀉𑀕𑁆𑀕𑀢𑁄 𑀪𑀯𑁂𑀬𑁆𑀬𑀸𑀢𑀺 𑀢𑀓𑁆𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀁, 𑀲𑀁𑀲𑀬𑀁 𑀅𑀦𑀺𑀘𑁆𑀙𑀦𑁆𑀢𑁂𑀦 𑀢𑀢𑁄𑀧𑀺 𑀓𑀜𑁆𑀘𑀺𑀓𑀸𑀮𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀦𑀺𑀲𑁆𑀲𑀁𑀲𑀬𑀓𑀸𑀮𑁂 𑀓𑀢𑁆𑀢𑀩𑁆𑀩𑀁, 𑀅𑀬𑀁 𑀢𑀢𑁆𑀣 ¶ 𑀲𑀸𑀫𑀻𑀘𑀺. 𑀅𑀬𑀁 𑀧𑀦 𑀯𑀸𑀤𑁄 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀭𑀡𑀯𑀘𑀦𑁂𑀳𑀺 𑀲𑀼𑀝𑁆𑀞𑀼 𑀲𑀁𑀲𑀦𑁆𑀤𑀢𑀺 𑀬𑀣𑀸 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀧𑀼𑀩𑁆𑀩𑀸𑀧𑀭𑀁 𑀆𑀮𑁄𑀴𑁂𑀦𑁆𑀢𑁂𑀦 𑀫𑀦𑀲𑀺 𑀓𑀸𑀢𑀩𑁆𑀩𑁄. 𑀏𑀯𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀅𑀭𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀲𑀁𑀲𑀬𑁄 𑀙𑀺𑀦𑁆𑀤𑀺𑀢𑀩𑁆𑀩𑁄, 𑀲𑀁𑀲𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀲𑀸𑀭𑀤𑁂𑀦 𑀳𑀼𑀢𑁆𑀯𑀸 𑀢𑀁 𑀢𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀲𑀻𑀮𑀲𑁆𑀲, 𑀪𑀺𑀓𑁆𑀔𑀽𑀦𑀁 𑀧𑀺𑀬𑀲𑀻𑀮𑀺𑀦𑀁;

𑀓𑀢𑀸𑀭𑀼𑀡𑀓𑀣𑀸 𑀏𑀲𑀸, 𑀦 𑀲𑀸𑀭𑀫𑁆𑀪𑀸𑀤𑀺𑀓𑀸𑀭𑀡𑀸.

𑀢𑀲𑁆𑀫𑀸 ¶ 𑀲𑀼𑀝𑁆𑀞𑀽𑀧𑀥𑀸𑀭𑁂𑀢𑁆𑀯𑀸, 𑀬𑀼𑀢𑁆𑀢𑀁 𑀕𑀡𑁆𑀳𑀦𑁆𑀢𑀼 𑀲𑀸𑀥𑀯𑁄;

𑀅𑀬𑀼𑀢𑁆𑀢𑀜𑁆𑀘𑁂 𑀙𑀟𑁆𑀟𑀬𑀦𑁆𑀢𑀼, 𑀫𑀸 𑀳𑁄𑀦𑁆𑀢𑀼 𑀤𑀼𑀫𑁆𑀫𑀦𑀸𑀤𑀬𑁄𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀤𑀺𑀯𑀸𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸

𑁬. 𑀏𑀯𑀁 𑀤𑀺𑀯𑀸𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀯𑀸𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀣𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀢𑁂𑀲𑀼 𑀫𑀸𑀢𑀺𑀓𑀸𑀧𑀤𑁂𑀲𑀼 𑀲𑀫𑀪𑀺𑀦𑀺𑀯𑀺𑀝𑁆𑀞𑀲𑁆𑀲 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀧𑀤𑀲𑁆𑀲 ‘‘𑀲𑀫𑀡𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸, 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀧𑀺. 𑀲𑀫𑀡𑀧𑀭𑀺𑀓𑁆𑀔𑀸𑀭𑁄 𑀯𑀼𑀢𑁆𑀢𑁄, 𑀦 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀲𑀫𑀦𑁆𑀢𑀢𑁄 𑀓𑀭𑀺𑀬𑀢𑁂𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀙𑀢𑁆𑀢𑀸𑀤𑀺𑀓𑁄. 𑀢𑀢𑁆𑀭𑀸𑀢𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑁂. 𑀓𑀧𑁆𑀧𑀢𑀻𑀢𑀺 𑀓𑀧𑁆𑀧𑀺𑀬𑁄, 𑀦 𑀓𑀧𑁆𑀧𑀺𑀬𑁄 𑀅𑀓𑀧𑁆𑀧𑀺𑀬𑁄, 𑀓𑀧𑁆𑀧𑀺𑀬𑁄 𑀘 𑀅𑀓𑀧𑁆𑀧𑀺𑀬𑁄 𑀘 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁄, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀧𑀼𑀮𑁆𑀮𑀺𑀗𑁆𑀕𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁄 ¶ 𑀘 𑀲𑁄 𑀧𑀭𑀺𑀓𑁆𑀔𑀸𑀭𑁄 𑀘𑁂𑀢𑀺 𑀢𑀣𑀸, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑁄.

𑀓𑁂𑀘𑀺 𑀢𑀸𑀮𑀧𑀡𑁆𑀡𑀘𑁆𑀙𑀢𑁆𑀢𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀲𑀩𑁆𑀩𑀫𑁆𑀧𑀺 𑀳𑀺 𑀙𑀢𑁆𑀢𑀁 𑀢𑀣𑀸𑀓𑀭𑀺𑀬𑀫𑀸𑀦𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑁂𑀯𑀸𑀳 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁮𑁫) ‘‘𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂𑀲𑀼 𑀯𑀡𑁆𑀡𑀫𑀝𑁆𑀞𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀦𑁆𑀢𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀣𑀺𑀭𑀓𑀭𑀡𑀢𑁆𑀣𑀁 𑀏𑀓𑀯𑀡𑁆𑀡𑀲𑀼𑀢𑁆𑀢𑁂𑀦 𑀯𑀺𑀦𑀦𑁆𑀥𑀺𑀬𑀫𑀸𑀦𑀁 𑀬𑀤𑀺 𑀯𑀡𑁆𑀡𑀫𑀝𑁆𑀞𑀁 𑀳𑁄𑀢𑀺, 𑀢𑀢𑁆𑀣 𑀦 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀕𑁆𑀕𑁂𑀦𑀸𑀢𑀺 𑀦𑀺𑀔𑀸𑀤𑀦𑀫𑀼𑀔𑁂𑀦. 𑀬𑀤𑀺 𑀦 𑀯𑀝𑁆𑀝𑀢𑀺, 𑀢𑀸𑀤𑀺𑀲𑀁 𑀙𑀢𑁆𑀢𑀤𑀡𑁆𑀟𑀁 𑀮𑀪𑀺𑀢𑁆𑀯𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀖𑀝𑀓𑀁 𑀯𑀸’’𑀢𑀺𑀆𑀤𑀺. 𑀲𑀼𑀢𑁆𑀢𑀓𑁂𑀦 𑀯𑀸 𑀤𑀡𑁆𑀟𑁄 𑀯𑁂𑀞𑁂𑀢𑀩𑁆𑀩𑁄𑀢𑀺 𑀬𑀣𑀸 𑀮𑁂𑀔𑀸 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀯𑁂𑀞𑁂𑀢𑀩𑁆𑀩𑁄. 𑀤𑀡𑁆𑀟𑀩𑀼𑀦𑁆𑀤𑁂𑀢𑀺 𑀤𑀡𑁆𑀟𑀫𑀽𑀮𑁂, 𑀙𑀢𑁆𑀢𑀤𑀡𑁆𑀟𑀲𑁆𑀲 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀙𑀢𑁆𑀢𑀫𑀡𑁆𑀟𑀮𑀺𑀓𑀦𑁆𑀢𑀺 𑀙𑀢𑁆𑀢𑀲𑁆𑀲 𑀅𑀦𑁆𑀢𑁄 𑀔𑀼𑀤𑁆𑀤𑀓𑀫𑀡𑁆𑀟𑀮𑀁, 𑀙𑀢𑁆𑀢𑀧𑀜𑁆𑀚𑀭𑁂 𑀫𑀡𑁆𑀟𑀮𑀸𑀓𑀸𑀭𑁂𑀦 𑀩𑀤𑁆𑀥𑀤𑀡𑁆𑀟𑀯𑀮𑀬𑀁 ¶ 𑀯𑀸. 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀦𑀺𑀦𑁆𑀦𑀁, 𑀉𑀦𑁆𑀦𑀢𑀁 𑀯𑀸 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀲𑀸 𑀯𑀝𑁆𑀝𑀢𑀻𑀢𑀺 𑀲𑀸 𑀮𑁂𑀔𑀸 𑀭𑀚𑁆𑀚𑀼𑀓𑁂𑀳𑀺 𑀩𑀦𑁆𑀥𑀦𑁆𑀢𑀼 𑀯𑀸 𑀫𑀸 𑀯𑀸, 𑀩𑀦𑁆𑀥𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀢𑁆𑀢𑀸 𑀯𑀝𑁆𑀝𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀫𑀳𑀸𑀣𑁂𑀭𑁂𑀦 𑁋

‘‘𑀙𑀢𑁆𑀢𑀁 𑀧𑀡𑁆𑀡𑀫𑀬𑀁 𑀓𑀺𑀜𑁆𑀘𑀺, 𑀩𑀳𑀺 𑀅𑀦𑁆𑀢𑁄 𑀘 𑀲𑀩𑁆𑀩𑀲𑁄;

𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦, 𑀲𑀺𑀩𑁆𑀩𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺.

‘‘𑀙𑀺𑀦𑁆𑀤𑀺𑀢𑀼𑀁 𑀅𑀟𑁆𑀠𑀘𑀦𑁆𑀤𑀁 𑀯𑀸, 𑀧𑀡𑁆𑀡𑁂 𑀫𑀓𑀭𑀤𑀦𑁆𑀢𑀓𑀁;

𑀖𑀝𑀓𑀁 𑀯𑀸𑀴𑀭𑀽𑀧𑀁 𑀯𑀸, 𑀮𑁂𑀔𑀸 𑀤𑀡𑁆𑀟𑁂 𑀦 𑀯𑀝𑁆𑀝𑀢𑀺.

‘‘𑀲𑀺𑀩𑁆𑀩𑀺𑀢𑀼𑀁 𑀏𑀓𑀯𑀡𑁆𑀡𑁂𑀦, 𑀙𑀢𑁆𑀢𑀁 𑀲𑀼𑀢𑁆𑀢𑁂𑀦 𑀯𑀝𑁆𑀝𑀢𑀺;

𑀣𑀺𑀭𑀢𑁆𑀣𑀁 𑀧𑀜𑁆𑀘𑀯𑀡𑁆𑀡𑁂𑀦, 𑀧𑀜𑁆𑀚𑀭𑀁 𑀯𑀸 𑀯𑀺𑀦𑀦𑁆𑀥𑀺𑀢𑀼𑀁.

‘‘𑀖𑀝𑀓𑀁 𑀯𑀸𑀴𑀭𑀽𑀧𑀁 𑀯𑀸, 𑀮𑁂𑀔𑀸 𑀯𑀸 𑀧𑀦 𑀓𑁂𑀯𑀮𑀸;

𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀧𑀺 𑀖𑀁𑀲𑀺𑀢𑁆𑀯𑀸, 𑀥𑀸𑀭𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

‘‘𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑀁 ¶ , 𑀤𑀡𑁆𑀟𑀩𑀼𑀦𑁆𑀤𑀫𑁆𑀳𑀺 𑀯𑀝𑁆𑀝𑀢𑀺;

𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀸 𑀮𑁂𑀔𑀸, 𑀩𑀦𑁆𑀥𑀦𑀢𑁆𑀣𑀸𑀬 𑀯𑀝𑁆𑀝𑀢𑀻’’𑀢𑀺.

𑀢𑀲𑁆𑀲 𑀯𑀡𑁆𑀡𑀦𑀸𑀬𑀫𑁆𑀧𑀺 𑀙𑀢𑁆𑀢𑀁 𑀧𑀡𑁆𑀡𑀫𑀬𑀁 𑀓𑀺𑀜𑁆𑀘𑀻𑀢𑀺 𑀢𑀸𑀮𑀧𑀡𑁆𑀡𑀸𑀤𑀺𑀧𑀡𑁆𑀡𑀘𑁆𑀙𑀤𑀦𑀁 𑀬𑀁 𑀓𑀺𑀜𑁆𑀘𑀺 𑀙𑀢𑁆𑀢𑀁. 𑀩𑀳𑀻𑀢𑀺 𑀉𑀧𑀭𑀺. 𑀅𑀦𑁆𑀢𑁄𑀢𑀺 𑀳𑁂𑀝𑁆𑀞𑀸. 𑀲𑀺𑀩𑁆𑀩𑀺𑀢𑀼𑀦𑁆𑀢𑀺 𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀁 𑀓𑀸𑀢𑀼𑀁. 𑀧𑀡𑁆𑀡𑁂𑀢𑀺 𑀙𑀤𑀦𑀧𑀡𑁆𑀡𑁂. 𑀅𑀟𑁆𑀠𑀘𑀦𑁆𑀤𑀦𑁆𑀢𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀁. 𑀫𑀓𑀭𑀤𑀦𑁆𑀢𑀓𑀦𑁆𑀢𑀺 𑀫𑀓𑀭𑀤𑀦𑁆𑀢𑀸𑀓𑀸𑀭𑀁, 𑀬𑀁 ‘‘𑀕𑀺𑀭𑀺𑀓𑀽𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀼𑀔𑀯𑀝𑁆𑀝𑀺𑀬𑀸 𑀦𑀸𑀫𑁂𑀢𑁆𑀯𑀸 𑀩𑀤𑁆𑀥𑀧𑀡𑁆𑀡𑀓𑁄𑀝𑀺𑀬𑀸 𑀯𑀸 𑀫𑀢𑁆𑀣𑀓𑀫𑀡𑁆𑀟𑀮𑀓𑁄𑀝𑀺𑀬𑀸 𑀯𑀸 𑀕𑀺𑀭𑀺𑀓𑀽𑀝𑀸𑀤𑀺𑀁 𑀓𑀭𑁄𑀦𑁆𑀢𑀺, 𑀇𑀫𑀺𑀦𑀸 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀤𑀡𑁆𑀟𑁂𑀢𑀺 𑀙𑀢𑁆𑀢𑀤𑀡𑁆𑀟𑁂. 𑀖𑀝𑀓𑀦𑁆𑀢𑀺 𑀖𑀝𑀸𑀓𑀸𑀭𑁄. 𑀯𑀸𑀴𑀭𑀽𑀧𑀁 𑀯𑀸𑀢𑀺 𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀸𑀦𑀁 𑀭𑀽𑀧𑀓𑀁 𑀯𑀸. 𑀮𑁂𑀔𑀸𑀢𑀺 𑀉𑀓𑁆𑀓𑀺𑀭𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦 𑀯𑀸 𑀓𑀢𑀭𑀸𑀚𑀺. 𑀧𑀜𑁆𑀘𑀯𑀡𑁆𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀦𑀻𑀮𑀸𑀤𑀺𑀏𑀓𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀣𑀺𑀭𑀢𑁆𑀣𑀁 𑀙𑀢𑁆𑀢𑀁 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀺𑀩𑁆𑀩𑀺𑀢𑀼𑀁 𑀯𑀸 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀲𑀮𑀸𑀓𑀧𑀜𑁆𑀚𑀭𑀁 𑀣𑀺𑀭𑀢𑁆𑀣𑀁 𑀯𑀺𑀦𑀦𑁆𑀥𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀯𑀡𑁆𑀡𑀸𑀦𑀁 𑀏𑀓𑀯𑀡𑁆𑀡𑁂𑀦 𑀣𑀺𑀭𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀅𑀦𑁂𑀓𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 ¶ 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬 𑀲𑀺𑀩𑁆𑀩𑀺𑀢𑀼𑀜𑁆𑀘 𑀯𑀺𑀦𑀦𑁆𑀥𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀧𑀜𑁆𑀘𑀯𑀡𑁆𑀡𑁂𑀦𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀏𑀓𑀯𑀡𑁆𑀡𑁂𑀦 𑀧𑀜𑁆𑀘𑀯𑀡𑁆𑀡𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀣𑀺𑀭𑀢𑁆𑀣𑀁 𑀲𑀺𑀩𑁆𑀩𑀺𑀢𑀼𑀁 𑀯𑀺𑀦𑀦𑁆𑀥𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀺.

𑀏𑀢𑁆𑀣 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 ‘‘𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁂𑀦 𑀘 ‘‘𑀓𑁂𑀘𑀺 𑀢𑀸𑀮𑀧𑀡𑁆𑀡𑀘𑁆𑀙𑀢𑁆𑀢𑀁 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑁂𑀢𑁆𑀯𑀸 𑀯𑀡𑁆𑀡𑀫𑀝𑁆𑀞𑀁 𑀓𑀭𑁄𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺, 𑀏𑀓𑀯𑀡𑁆𑀡𑁂 𑀧𑀦 𑀦𑀻𑀮𑁂𑀦 𑀯𑀸 𑀧𑀻𑀢𑀓𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑁂𑀦 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀲𑀺𑀩𑁆𑀩𑀺𑀢𑀼𑀁, 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀁 𑀲𑀮𑀸𑀓𑀧𑀜𑁆𑀚𑀭𑀁 𑀯𑀸 𑀯𑀺𑀦𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀣𑀺𑀭𑀓𑀭𑀡𑀢𑁆𑀣𑀁, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀧𑀸𑀞𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑁄 𑀦 𑀕𑀳𑁂𑀢𑀩𑁆𑀩𑁄.

𑀮𑁂𑀔𑀸 ¶ 𑀯𑀸 𑀧𑀦 𑀓𑁂𑀯𑀮𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀓𑀮𑀸 𑀮𑁂𑀔𑀸 𑀯𑀸. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀖𑀁𑀲𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀓𑀢𑀁 𑀖𑀁𑀲𑀺𑀢𑁆𑀯𑀸. 𑀤𑀡𑁆𑀟𑀩𑀼𑀦𑁆𑀤𑀫𑁆𑀳𑀻𑀢𑀺 𑀙𑀢𑁆𑀢𑀤𑀡𑁆𑀟𑀲𑁆𑀲 𑀧𑀜𑁆𑀚𑀭𑁂 𑀕𑀸𑀳𑀡𑀢𑁆𑀣𑀸𑀬 𑀨𑀸𑀮𑀺𑀢𑀩𑀼𑀦𑁆𑀤𑀫𑁆𑀳𑀺, 𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀦𑀬𑁄. 𑀔𑀼𑀤𑁆𑀤𑀲𑀺𑀓𑁆𑀔𑀸𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀙𑀢𑁆𑀢𑀧𑀺𑀡𑁆𑀟𑀺𑀬𑀸 𑀫𑀽𑀮𑁂’’𑀢𑀺 𑀯𑀼𑀢𑁆𑀢𑀁. 𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑀦𑁆𑀢𑀺 𑀨𑀼𑀮𑁆𑀮𑀅𑀳𑀺𑀘𑁆𑀙𑀢𑁆𑀢𑀓𑀸𑀓𑀸𑀭𑀁. 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀯𑀮𑀬𑀁 𑀯𑀺𑀬 𑀉𑀧𑀝𑁆𑀞𑀸𑀧𑁂𑀢𑁆𑀯𑀸. 𑀩𑀦𑁆𑀥𑀦𑀢𑁆𑀣𑀸𑀬𑀸𑀢𑀺 𑀯𑀸𑀢𑁂𑀦 𑀬𑀣𑀸 𑀦 𑀘𑀮𑀢𑀺, 𑀏𑀯𑀁 𑀭𑀚𑁆𑀚𑀽𑀳𑀺 𑀤𑀡𑁆𑀟𑁂 𑀧𑀜𑁆𑀚𑀭𑀲𑁆𑀲 𑀩𑀦𑁆𑀥𑀦𑀢𑁆𑀣𑀸𑀬. 𑀉𑀓𑁆𑀓𑀺𑀭𑀺𑀢𑁆𑀯𑀸 𑀓𑀢𑀸 𑀮𑁂𑀔𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸 𑀯𑀸𑀢𑀧𑁆𑀧𑀳𑀸𑀭𑁂𑀦 𑀅𑀘𑀮𑀦𑀢𑁆𑀣𑀁 𑀙𑀢𑁆𑀢𑀫𑀡𑁆𑀟𑀮𑀺𑀓𑀁 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀮𑁂𑀔𑀁 𑀞𑀧𑁂𑀦𑁆𑀢𑀺, 𑀲𑀸 𑀯𑀝𑁆𑀝𑀢𑀻𑀢𑀺. 𑀲𑀘𑁂𑀧𑀺 𑀦 𑀩𑀦𑁆𑀥𑀢𑀺, 𑀩𑀦𑁆𑀥𑀦𑀸𑀭𑀳𑀝𑁆𑀞𑀸𑀦𑀢𑁆𑀢𑀸 𑀯𑀮𑀬𑀁 𑀉𑀓𑁆𑀓𑀺𑀭𑀺𑀢𑁆𑀯𑀸 𑀯𑀝𑁆𑀝𑀢𑀻𑀢𑀺 𑀕𑀡𑁆𑀞𑀺𑀧𑀤𑁂 𑀯𑀢𑁆𑀢𑀦𑁆𑀢𑀻𑀢𑀺 𑀆𑀕𑀢𑀁, 𑀢𑀲𑁆𑀫𑀸 𑀧𑀓𑁆𑀔𑀭𑀡𑁂𑀲𑀼 𑀆𑀕𑀢𑀦𑀬𑁂𑀦𑁂𑀯 𑀙𑀢𑁆𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺.

𑁭. 𑀘𑀻𑀯𑀭𑁂 𑀧𑀦 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁫; 𑀯𑀺. 𑀯𑀺. 𑀝𑀻. 𑁧.𑁮𑁫) 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺. 𑀇𑀤𑀜𑁆𑀘 𑀢𑀣𑀸 𑀓𑀭𑁄𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀓𑀯𑀡𑁆𑀡𑀲𑀼𑀢𑁆𑀢𑀓𑁂𑀦𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯. ‘‘𑀧𑀓𑀢𑀺𑀲𑀽𑀘𑀺𑀓𑀫𑁆𑀫𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀝𑁆𑀝𑀫𑀼𑀔𑁂𑀢𑀺 𑀤𑁆𑀯𑀺𑀦𑁆𑀦𑀁 𑀧𑀝𑁆𑀝𑀸𑀦𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀺𑀬𑀦𑁆𑀢𑁂𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂. 𑀅𑀦𑀼𑀯𑀸𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀯𑁂𑀡𑀻𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀲𑀗𑁆𑀔𑀮𑀺𑀓𑀦𑁆𑀢𑀺 𑀤𑁆𑀯𑀺𑀕𑀼𑀡𑀲𑀗𑁆𑀔𑀮𑀺𑀓𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁, 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁 𑀯𑀸. 𑀯𑁂𑀡𑀺𑀁 𑀯𑀸 𑀲𑀗𑁆𑀔𑀮𑀺𑀓𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀓𑀭𑀡𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑁄. 𑀅𑀕𑁆𑀖𑀺𑀬𑀁 𑀦𑀸𑀫 𑀘𑁂𑀢𑀺𑀬𑀲𑀡𑁆𑀞𑀸𑀦𑀁 ¶ , 𑀬𑀁 ‘‘𑀅𑀕𑁆𑀖𑀺𑀬𑀢𑁆𑀣𑀫𑁆𑀪𑁄’’𑀢𑀺 𑀯𑀤𑀦𑁆𑀢𑀺. 𑀕𑀬𑀸 𑀦𑀸𑀫 𑀫𑀽𑀮𑁂 𑀢𑀦𑀼𑀓𑀁 𑀅𑀕𑁆𑀕𑁂 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀕𑀤𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀫𑀼𑀕𑁆𑀕𑀭𑁄 𑀦𑀸𑀫 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀫𑀼𑀕𑁆𑀕𑀭𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀓𑀓𑁆𑀓𑀝𑀓𑁆𑀔𑀻𑀦𑀺 𑀉𑀓𑁆𑀓𑀺𑀭𑀦𑁆𑀢𑀻𑀢𑀺 ¶ 𑀕𑀡𑁆𑀞𑀺𑀓𑀧𑀝𑁆𑀝𑀧𑀸𑀲𑀓𑀧𑀝𑁆𑀝𑀸𑀦𑀁 𑀅𑀦𑁆𑀢𑁂 𑀧𑀸𑀴𑀺𑀩𑀤𑁆𑀥𑀁 𑀓𑀢𑁆𑀯𑀸 𑀓𑀓𑁆𑀓𑀝𑀓𑀸𑀦𑀁 𑀅𑀓𑁆𑀔𑀺𑀲𑀡𑁆𑀞𑀸𑀦𑀁 𑀧𑀝𑁆𑀞𑀧𑁂𑀦𑁆𑀢𑀺, 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀳𑀺 𑀦𑀻𑀳𑀝𑀲𑀼𑀢𑁆𑀢𑀸𑀦𑀁 𑀓𑁄𑀝𑀺𑀬𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀢𑀸 𑀧𑀺𑀴𑀓𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀓𑀸𑀢𑀩𑁆𑀩𑀸𑀢𑀺? 𑀓𑁄𑀡𑁂𑀳𑀺 𑀦𑀻𑀳𑀝𑀲𑀼𑀢𑁆𑀢𑀸𑀦𑀁 𑀅𑀦𑁆𑀢𑁂𑀲𑀼 𑀏𑀓𑀯𑀸𑀭𑀁 𑀕𑀡𑁆𑀞𑀺𑀓𑀓𑀭𑀡𑁂𑀦 𑀯𑀸 𑀧𑀼𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀺𑀩𑁆𑀩𑀦𑁂𑀦 𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀁 𑀓𑀢𑁆𑀯𑀸 𑀲𑀼𑀢𑁆𑀢𑀓𑁄𑀝𑀺𑀬𑁄 𑀭𑀲𑁆𑀲𑀁 𑀓𑀢𑁆𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑀸. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁂𑀦 𑀧𑀦 ‘‘𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸, 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀓𑀧𑁆𑀧𑀭𑁂’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦𑀧𑀺 ‘‘𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀢𑀢𑁆𑀣, 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀤𑀻𑀧𑀺𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀘 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁮𑁫) 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸𑀢𑀺 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀳𑀺 𑀩𑀳𑀺 𑀦𑀺𑀕𑁆𑀕𑀢𑀲𑀼𑀢𑁆𑀢𑀸𑀦𑀁 𑀧𑀺𑀴𑀓𑀸𑀓𑀸𑀭𑁂𑀦 𑀞𑀧𑀺𑀢𑀓𑁄𑀝𑀺𑀬𑁄𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑁂 𑀧𑀺𑀴𑀓𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀓𑀸𑀢𑀩𑁆𑀩𑀸𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀓𑁄𑀡𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀘𑀸𑀢𑀺 𑀤𑁆𑀯𑁂𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑀢𑁄 𑀓𑁄𑀡𑀁 𑀦𑀻𑀳𑀝𑀲𑀼𑀢𑁆𑀢𑀸 𑀓𑁄𑀡𑀲𑀼𑀢𑁆𑀢𑀸 𑀦𑀸𑀫. 𑀲𑀫𑀦𑁆𑀢𑀢𑁄 𑀧𑀦 𑀧𑀭𑀺𑀬𑀦𑁆𑀢𑁂𑀦 𑀕𑀢𑀸 𑀘𑀢𑀼𑀭𑀲𑁆𑀲𑀲𑀼𑀢𑁆𑀢𑀸 𑀧𑀺𑀴𑀓𑀸 𑀦𑀸𑀫. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀓𑁂𑀘𑀺 𑀘𑀻𑀯𑀭𑀢𑁄 𑀯𑀺𑀲𑀼𑀁 𑀧𑀜𑁆𑀜𑀸𑀦𑀢𑁆𑀣𑀸𑀬 𑀯𑀺𑀓𑀸𑀭𑀬𑀼𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀦𑀺𑀲𑁂𑀥𑀸𑀬 ‘‘𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑀣𑀸 𑀅𑀘𑀓𑁆𑀔𑀼𑀕𑁄𑀘𑀭𑀪𑀸𑀯𑁂𑀦 𑀲𑀺𑀩𑁆𑀩𑀦𑀢𑁆𑀣𑀸𑀬 𑀢𑀣𑀸𑀲𑀺𑀩𑁆𑀩𑀦𑀲𑁆𑀲 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀬𑀣𑀸 𑀧𑀓𑀢𑀺𑀘𑀻𑀯𑀭𑀢𑁄 𑀯𑀺𑀓𑀸𑀭𑁄 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀺𑀩𑁆𑀩𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀚𑀦𑀓𑀫𑁆𑀫𑀢𑁄 𑀧𑀼𑀩𑁆𑀩𑁂 𑀧𑀜𑁆𑀜𑀸𑀬𑀫𑀸𑀦𑁄𑀧𑀺 𑀯𑀺𑀲𑁂𑀲𑁄 𑀘𑀻𑀯𑀭𑁂 𑀭𑀢𑁆𑀢𑁂 𑀏𑀓𑀯𑀡𑁆𑀡𑀢𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀘𑀻𑀯𑀭𑁂 𑀭𑀢𑁆𑀢𑁂’’𑀢𑀺.

𑁮. 𑀫𑀡𑀺𑀦𑀸𑀢𑀺 ¶ 𑀦𑀻𑀮𑀫𑀡𑀺𑀆𑀤𑀺𑀧𑀸𑀲𑀸𑀡𑁂𑀦, 𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀺𑀓𑀁 𑀅𑀘𑀻𑀯𑀭𑀢𑁆𑀢𑀸 𑀲𑀗𑁆𑀔𑀸𑀤𑀻𑀳𑀺 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀡𑁆𑀡𑀲𑀼𑀢𑁆𑀢𑀓𑀦𑁆𑀢𑀺 𑀘𑀻𑀯𑀭𑀲𑁆𑀲 𑀤𑀻𑀖𑀢𑁄 𑀢𑀺𑀭𑀺𑀬𑀜𑁆𑀘 𑀲𑀺𑀩𑁆𑀩𑀺𑀢𑀸𑀦𑀁 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀓𑁄𑀡𑁂𑀲𑀼 𑀘 𑀦𑀺𑀓𑁆𑀔𑀦𑁆𑀢𑀸𑀦𑀁 𑀲𑀼𑀢𑁆𑀢𑀲𑀻𑀲𑀸𑀦𑀫𑁂𑀢𑀁 𑀦𑀸𑀫𑀁, 𑀢𑀁 𑀙𑀺𑀦𑁆𑀤𑀺𑀢𑁆𑀯𑀸𑀯 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀏𑀓𑀁 𑀓𑀡𑁆𑀡𑀲𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀢𑀁 𑀧𑀦 𑀦𑀸𑀫𑁂𑀦 𑀲𑀤𑀺𑀲𑀫𑁆𑀧𑀺 𑀇𑀢𑁄 𑀅𑀜𑁆𑀜𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑀕𑁆𑀕𑀦𑀢𑁆𑀣𑀸𑀬𑀸𑀢𑀺 𑀘𑀻𑀯𑀭𑀭𑀚𑁆𑀚𑀼𑀬𑀁 ¶ 𑀘𑀻𑀯𑀭𑀩𑀦𑁆𑀥𑀦𑀢𑁆𑀣𑀸𑀬. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁮𑁫) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁫) 𑀧𑀦 ‘‘𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀭𑀚𑀦𑀓𑀸𑀮𑁂 𑀩𑀦𑁆𑀥𑀺𑀢𑀩𑁆𑀩𑀁, 𑀲𑁂𑀲𑀓𑀸𑀮𑁂 𑀫𑁄𑀘𑁂𑀢𑁆𑀯𑀸 𑀞𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑀲𑁆𑀲 𑀧𑁄𑀭𑀸𑀡𑀝𑀻𑀓𑀸𑀬𑀫𑁆𑀧𑀺 𑀇𑀤𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀁 𑀧𑀦 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁪𑁪) ‘‘𑀫𑀚𑁆𑀛𑁂𑀦 𑀮𑀕𑁆𑀕𑁂𑀦𑁆𑀢𑀺, 𑀉𑀪𑀢𑁄 𑀕𑀮𑀢𑀺, 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑁂 𑀩𑀦𑁆𑀥𑀺𑀢𑀼𑀦𑁆𑀢𑀺. 𑀓𑀡𑁆𑀡𑁄 𑀚𑀻𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓’’𑀦𑁆𑀢𑀺 𑀏𑀯𑀁 𑀅𑀦𑀼𑀜𑁆𑀜𑀸𑀢𑀘𑀻𑀯𑀭𑀭𑀚𑁆𑀚𑀼𑀬𑀁 𑀭𑀚𑀺𑀢𑁆𑀯𑀸 𑀧𑀲𑀸𑀭𑀺𑀢𑀘𑀻𑀯𑀭𑀲𑁆𑀲 𑀑𑀮𑀫𑁆𑀩𑀓𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀡𑁆𑀞𑀺𑀓𑁂𑀢𑀺 𑀘𑀻𑀯𑀭𑀧𑀸𑀭𑀼𑀧𑀦𑀓𑀸𑀮𑁂 𑀧𑀸𑀲𑀓𑁂 𑀮𑀕𑁆𑀕𑀸𑀧𑀦𑀢𑁆𑀣𑀁 𑀓𑀢𑁂 𑀤𑀦𑁆𑀢𑀸𑀤𑀺𑀫𑀬𑁂 𑀕𑀡𑁆𑀞𑀺𑀓𑁂. 𑀧𑀺𑀴𑀓𑀸𑀢𑀺 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼𑀁 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀩𑁆𑀩𑀧𑀺𑀴𑀓𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂 𑁋

‘‘𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺, 𑀫𑀡𑁆𑀟𑀦𑀢𑁆𑀣𑀸𑀬 𑀘𑀻𑀯𑀭𑀁;

𑀲𑀫𑀁 𑀲𑀢𑀧𑀤𑀸𑀤𑀻𑀦𑀁, 𑀲𑀺𑀩𑁆𑀩𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺.

‘‘𑀧𑀢𑁆𑀢𑀲𑁆𑀲 𑀧𑀭𑀺𑀬𑀦𑁆𑀢𑁂 𑀯𑀸, 𑀢𑀣𑀸 𑀧𑀢𑁆𑀢𑀫𑀼𑀔𑁂𑀧𑀺 𑀘;

𑀯𑁂𑀡𑀺𑀁 𑀲𑀗𑁆𑀔𑀮𑀺𑀓𑀁 𑀯𑀸𑀧𑀺, 𑀓𑀭𑁄𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

‘‘𑀧𑀝𑁆𑀝𑀫𑁆𑀧𑀺 ¶ 𑀕𑀡𑁆𑀞𑀺𑀧𑀸𑀲𑀸𑀦𑀁, 𑀅𑀝𑁆𑀞𑀓𑁄𑀡𑀸𑀤𑀺𑀓𑀁 𑀯𑀺𑀥𑀺𑀁;

𑀢𑀢𑁆𑀣𑀕𑁆𑀖𑀺𑀬𑀕𑀤𑀸𑀭𑀽𑀧𑀁, 𑀫𑀼𑀕𑁆𑀕𑀭𑀸𑀤𑀺𑀁 𑀓𑀭𑁄𑀦𑁆𑀢𑀺 𑀘.

‘‘𑀢𑀢𑁆𑀣 𑀓𑀓𑁆𑀓𑀝𑀓𑀓𑁆𑀔𑀻𑀦𑀺, 𑀉𑀝𑁆𑀞𑀸𑀧𑁂𑀦𑁆𑀢𑀺 𑀦 𑀯𑀝𑁆𑀝𑀢𑀺;

𑀲𑀼𑀢𑁆𑀢𑀸 𑀘 𑀧𑀺𑀴𑀓𑀸 𑀢𑀢𑁆𑀣, 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀤𑀻𑀧𑀺𑀢𑀸.

‘‘𑀘𑀢𑀼𑀓𑁄𑀡𑀸𑀯 𑀯𑀝𑁆𑀝𑀦𑁆𑀢𑀺, 𑀕𑀡𑁆𑀞𑀺𑀧𑀸𑀲𑀓𑀧𑀝𑁆𑀝𑀓𑀸;

𑀓𑀡𑁆𑀡𑀓𑁄𑀡𑁂𑀲𑀼 𑀲𑀼𑀢𑁆𑀢𑀸𑀦𑀺, 𑀭𑀢𑁆𑀢𑁂 𑀙𑀺𑀦𑁆𑀤𑁂𑀬𑁆𑀬 𑀘𑀻𑀯𑀭𑁂.

‘‘𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 ¶ 𑀯𑀸, 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺𑀧𑀺;

𑀘𑀻𑀯𑀭𑁂 𑀪𑀺𑀓𑁆𑀔𑀼𑀦𑀸 𑀓𑀸𑀢𑀼𑀁, 𑀓𑀸𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀬𑁄 𑀘 𑀧𑀓𑁆𑀔𑀺𑀧𑀢𑀺 𑀪𑀺𑀓𑁆𑀔𑀼 𑀘𑀻𑀯𑀭𑀁,

𑀓𑀜𑁆𑀚𑀺𑀧𑀺𑀝𑁆𑀞𑀔𑀮𑀺𑀅𑀮𑁆𑀮𑀺𑀓𑀸𑀤𑀺𑀲𑀼;

𑀯𑀡𑁆𑀡𑀫𑀝𑁆𑀞𑀫𑀪𑀺𑀧𑀢𑁆𑀣𑀬𑀁 𑀧𑀭𑀁;

𑀢𑀲𑁆𑀲 𑀦𑀢𑁆𑀣𑀺 𑀧𑀦 𑀫𑀼𑀢𑁆𑀢𑀺 𑀤𑀼𑀓𑁆𑀓𑀝𑀸.

‘‘𑀲𑀽𑀘𑀺𑀳𑀢𑁆𑀣𑀫𑀮𑀸𑀤𑀻𑀦𑀁, 𑀓𑀭𑀡𑁂 𑀘𑀻𑀯𑀭𑀲𑁆𑀲 𑀘;

𑀢𑀣𑀸 𑀓𑀺𑀮𑀺𑀝𑁆𑀞𑀓𑀸𑀮𑁂 𑀘, 𑀥𑁄𑀯𑀦𑀢𑁆𑀣𑀁 𑀢𑀼 𑀯𑀝𑁆𑀝𑀢𑀺.

‘‘𑀭𑀚𑀦𑁂 𑀧𑀦 𑀕𑀦𑁆𑀥𑀁 𑀯𑀸, 𑀢𑁂𑀮𑀁 𑀯𑀸 𑀮𑀸𑀔𑀫𑁂𑀯 𑀯𑀸;

𑀓𑀺𑀜𑁆𑀘𑀺 𑀧𑀓𑁆𑀔𑀺𑀧𑀺𑀢𑀼𑀁 𑀢𑀢𑁆𑀣, 𑀪𑀺𑀓𑁆𑀔𑀼𑀦𑁄 𑀦 𑀘 𑀯𑀝𑁆𑀝𑀢𑀺.

‘‘𑀲𑀗𑁆𑀔𑁂𑀦 𑀫𑀡𑀺𑀦𑀸 𑀯𑀸𑀧𑀺, 𑀅𑀜𑁆𑀜𑁂𑀦𑀧𑀺 𑀘 𑀓𑁂𑀦𑀘𑀺;

𑀘𑀻𑀯𑀭𑀁 𑀦 𑀘 𑀖𑀝𑁆𑀝𑁂𑀬𑁆𑀬, 𑀖𑀁𑀲𑀺𑀢𑀩𑁆𑀩𑀁 𑀦 𑀤𑁄𑀡𑀺𑀬𑀸.

‘‘𑀘𑀻𑀯𑀭𑀁 𑀤𑁄𑀡𑀺𑀬𑀁 𑀓𑀢𑁆𑀯𑀸, 𑀦𑀸𑀢𑀺𑀖𑀝𑁆𑀝𑁂𑀬𑁆𑀬 𑀫𑀼𑀝𑁆𑀞𑀺𑀦𑀸;

𑀭𑀢𑁆𑀢𑀁 𑀧𑀳𑀭𑀺𑀢𑀼𑀁 𑀓𑀺𑀜𑁆𑀘𑀺, 𑀳𑀢𑁆𑀣𑁂𑀳𑁂𑀯 𑀘 𑀯𑀝𑁆𑀝𑀢𑀺.

‘‘𑀕𑀡𑁆𑀞𑀺𑀓𑁂 𑀧𑀦 𑀮𑁂𑀔𑀸 𑀯𑀸, 𑀧𑀺𑀴𑀓𑀸 𑀯𑀸 𑀦 𑀯𑀝𑁆𑀝𑀢𑀺;

𑀓𑀧𑁆𑀧𑀩𑀺𑀦𑁆𑀤𑀼𑀯𑀺𑀓𑀸𑀭𑁄 𑀯𑀸, 𑀧𑀸𑀴𑀺𑀓𑀡𑁆𑀡𑀺𑀓𑀪𑁂𑀤𑀢𑁄’’𑀢𑀺.

𑀯𑀺𑀦𑀬𑀲𑀸𑀭𑀢𑁆𑀣𑀲𑀦𑁆𑀤𑀻𑀧𑀦𑀺𑀬𑀫𑁆𑀧𑀺 𑀲𑀫𑀁 𑀲𑀢𑀧𑀤𑀸𑀤𑀻𑀦𑀦𑁆𑀢𑀺 𑀲𑀢𑀧𑀤𑀸𑀤𑀻𑀳𑀺 𑀲𑀤𑀺𑀲𑀁. 𑀢𑀼𑀮𑁆𑀬𑀢𑁆𑀣𑁂 𑀓𑀭𑀡𑀯𑀘𑀦𑀧𑁆𑀧𑀲𑀗𑁆𑀕𑁂 𑀲𑀸𑀫𑀺𑀯𑀘𑀦𑀁. 𑀧𑀝𑁆𑀝𑀲𑁆𑀲 𑀧𑀭𑀺𑀬𑀦𑁆𑀢𑁂 𑀯𑀸𑀢𑀺 𑀅𑀦𑀼𑀯𑀸𑀢𑀲𑁆𑀲 𑀉𑀪𑀬𑀧𑀭𑀺𑀬𑀦𑁆𑀢𑁂 𑀯𑀸. 𑀧𑀝𑁆𑀝𑀫𑀼𑀔𑁂𑀧𑀺 𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀆𑀬𑀸𑀫𑀯𑀺𑀢𑁆𑀣𑀸𑀭𑀧𑀝𑁆𑀝𑀸𑀦𑀁 𑀲𑀗𑁆𑀖𑀝𑀺𑀢𑀝𑁆𑀞𑀸𑀦𑁂, 𑀓𑀡𑁆𑀡𑁂𑀧𑀺 𑀯𑀸 𑀏𑀓𑀲𑁆𑀲𑁂𑀯 𑀯𑀸 𑀧𑀝𑁆𑀝𑀲𑁆𑀲 𑀊𑀦𑀧𑀽𑀭𑀡𑀢𑁆𑀣𑀁 𑀖𑀝𑀺𑀢𑀝𑁆𑀞𑀸𑀦𑁂𑀧𑀺 𑀯𑀸 ¶ . 𑀯𑁂𑀡𑀻𑀢𑀺 𑀓𑀼𑀤𑁆𑀭𑀽𑀲𑀲𑀻𑀲𑀸𑀓𑀸𑀭𑁂𑀦 𑀲𑀺𑀩𑁆𑀩𑀦𑀁. 𑀓𑁂𑀘𑀺 ‘‘𑀯𑀭𑀓𑀲𑀻𑀲𑀸𑀓𑀸𑀭𑁂𑀦𑀸’’𑀢𑀺 ¶ 𑀯𑀤𑀦𑁆𑀢𑀺. 𑀲𑀗𑁆𑀔𑀮𑀺𑀓𑀦𑁆𑀢𑀺 𑀩𑀺𑀴𑀸𑀮𑀤𑀸𑀫𑀲𑀤𑀺𑀲𑀲𑀺𑀩𑁆𑀩𑀦𑀁. 𑀓𑁂𑀘𑀺 ‘‘𑀲𑀢𑀧𑀤𑀺𑀲𑀤𑀺𑀲’’𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀝𑁆𑀝𑀫𑁆𑀧𑀻𑀢𑀺 𑀧𑀢𑁆𑀢𑀫𑁆𑀧𑀺. 𑀅𑀝𑁆𑀞𑀓𑁄𑀡𑀸𑀤𑀺𑀓𑁄 𑀯𑀺𑀥𑀺 𑀧𑀓𑀸𑀭𑁄 𑀏𑀢𑀲𑁆𑀲𑀸𑀢𑀺 𑀅𑀝𑁆𑀞𑀓𑁄𑀡𑀸𑀤𑀺𑀓𑀯𑀺𑀥𑀺, 𑀢𑀁. 𑀅𑀝𑁆𑀞𑀓𑁄𑀡𑀸𑀤𑀺𑀓𑀦𑁆𑀢𑀺 𑀯𑀸 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑀸𑀕𑀫𑁄. ‘‘𑀅𑀝𑁆𑀞𑀓𑁄𑀡𑀸𑀤𑀺𑀓𑀁 𑀯𑀺𑀥𑀺’’𑀦𑁆𑀢𑀺 𑀏𑀢𑀁 ‘‘𑀧𑀝𑁆𑀝’’𑀦𑁆𑀢𑀺 𑀏𑀢𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑁂𑀲𑀦𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀯𑀸. ‘‘𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀧𑀝𑁆𑀝𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀝𑁆𑀝𑁂𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀝𑁆𑀞𑀓𑁄𑀡𑀸𑀤𑀺𑀓𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. 𑀯𑀺𑀥𑀺𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀇𑀥 𑀯𑀓𑁆𑀔𑀫𑀸𑀦𑀘𑀢𑀼𑀓𑁄𑀡𑀲𑀡𑁆𑀞𑀸𑀦𑀢𑁄 𑀅𑀜𑁆𑀜𑀁 𑀅𑀝𑁆𑀞𑀓𑁄𑀡𑀸𑀤𑀺𑀓𑀁 𑀦𑀸𑀫. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀝𑁆𑀝𑀤𑁆𑀯𑀬𑁂. 𑀅𑀕𑁆𑀖𑀺𑀬𑀕𑀤𑀸𑀭𑀽𑀧𑀦𑁆𑀢𑀺 𑀅𑀕𑁆𑀖𑀺𑀬𑀲𑀡𑁆𑀞𑀸𑀦𑀜𑁆𑀘𑁂𑀯 𑀕𑀤𑀸𑀲𑀡𑁆𑀞𑀸𑀦𑀜𑁆𑀘 𑀲𑀺𑀩𑁆𑀩𑀦𑀁. 𑀫𑀼𑀕𑁆𑀕𑀭𑀦𑁆𑀢𑀺 𑀮𑀕𑀼𑀴𑀲𑀡𑁆𑀞𑀸𑀦𑀲𑀺𑀩𑁆𑀩𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀸𑀤𑀺𑀲𑀡𑁆𑀞𑀸𑀦𑀸𑀦𑀁 𑀕𑀳𑀡𑀁.

𑀢𑀢𑁆𑀣𑀸𑀢𑀺 𑀧𑀝𑁆𑀝𑀤𑁆𑀯𑀬𑁂 𑀢𑀲𑁆𑀫𑀺𑀁 𑀞𑀸𑀦𑁂. 𑀓𑀓𑁆𑀓𑀝𑀓𑀓𑁆𑀔𑀻𑀦𑀻𑀢𑀺 𑀓𑀼𑀴𑀻𑀭𑀓𑀘𑁆𑀙𑀺𑀲𑀤𑀺𑀲𑀸𑀦𑀺 𑀲𑀺𑀩𑁆𑀩𑀦𑀯𑀺𑀓𑀸𑀭𑀸𑀦𑀺. 𑀉𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀓𑀭𑁄𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀡𑁆𑀞𑀺𑀓𑀧𑀸𑀲𑀓𑀧𑀝𑁆𑀝𑀓𑁂. 𑀲𑀼𑀢𑁆𑀢𑀸𑀢𑀺 𑀓𑁄𑀡𑀢𑁄 𑀓𑁄𑀡𑀁 𑀲𑀺𑀩𑁆𑀩𑀺𑀢𑀲𑀼𑀢𑁆𑀢𑀸 𑀘𑁂𑀯 𑀘𑀢𑀼𑀭𑀲𑁆𑀲𑁂 𑀲𑀺𑀩𑁆𑀩𑀺𑀢𑀲𑀼𑀢𑁆𑀢𑀸 𑀘. 𑀧𑀺𑀴𑀓𑀸𑀢𑀺 𑀢𑁂𑀲𑀫𑁂𑀯 𑀲𑀼𑀢𑁆𑀢𑀸𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑀓𑁄𑀝𑀺𑀬𑁄 𑀘. 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀭𑀚𑀦𑀓𑀸𑀮𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀅𑀦𑁄𑀴𑀸𑀭𑀺𑀓𑀸 𑀤𑀻𑀧𑀺𑀢𑀸 𑀯𑀝𑁆𑀝𑀦𑁆𑀢𑀻𑀢𑀺. 𑀬𑀣𑀸𑀳 ‘‘𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸 𑀘 𑀘𑀻𑀯𑀭𑁂 𑀭𑀢𑁆𑀢𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫).

𑀕𑀡𑁆𑀞𑀺𑀓𑀧𑀝𑁆𑀝𑀺𑀓𑀸 𑀧𑀸𑀲𑀧𑀝𑁆𑀝𑀺𑀓𑀸𑀢𑀺 𑀬𑁄𑀚𑀦𑀸. 𑀓𑀡𑁆𑀡𑀓𑁄𑀡𑁂𑀲𑀼 𑀲𑀼𑀢𑁆𑀢𑀸𑀦𑀻𑀢𑀺 𑀘𑀻𑀯𑀭𑀓𑀡𑁆𑀡𑁂 𑀲𑀼𑀢𑁆𑀢𑀸 𑀘𑁂𑀯 𑀧𑀸𑀲𑀓𑀧𑀝𑁆𑀝𑀸𑀦𑀁 𑀓𑁄𑀡𑁂𑀲𑀼 𑀲𑀼𑀢𑁆𑀢𑀸𑀦𑀺 𑀘 𑀅𑀘𑁆𑀙𑀺𑀦𑁆𑀤𑀢𑀺. 𑀏𑀢𑁆𑀣 𑀘 𑀘𑀻𑀯𑀭𑁂 𑀆𑀬𑀸𑀫𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀺𑀩𑁆𑀩𑀺𑀢𑁆𑀯𑀸 𑀅𑀦𑀼𑀯𑀸𑀢𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀲𑀼𑀢𑁆𑀢𑀁 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑀦𑀓𑀸𑀮𑁂 𑀭𑀚𑁆𑀚𑀼𑀬𑀸 𑀯𑀸 𑀘𑀻𑀯𑀭𑀯𑀁𑀲𑁂 𑀯𑀸 ¶ 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀅𑀦𑀼𑀯𑀸𑀢𑁂 𑀩𑀦𑁆𑀥𑀲𑀼𑀢𑁆𑀢𑀸𑀦𑀺 𑀘 𑀓𑀡𑁆𑀡𑀲𑀼𑀢𑁆𑀢𑀸𑀦𑀺 𑀦𑀸𑀫. 𑀬𑀣𑀸𑀳 ‘‘𑀘𑀻𑀯𑀭𑀲𑁆𑀲 𑀓𑀡𑁆𑀡𑀲𑀼𑀢𑁆𑀢𑀓𑀁 𑀦 𑀘 𑀯𑀝𑁆𑀝𑀢𑀺, 𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩𑀁, 𑀬𑀁 𑀧𑀦 ‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀓𑀡𑁆𑀡𑀲𑀼𑀢𑁆𑀢𑀓’𑀦𑁆𑀢𑀺 𑀏𑀯𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀅𑀦𑀼𑀯𑀸𑀢𑁂 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀁 𑀭𑀚𑀦𑀓𑀸𑀮𑁂 𑀮𑀕𑁆𑀕𑀦𑀢𑁆𑀣𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫).

𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀯𑀸𑀢𑀺 𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀺 𑀲𑀢𑀧𑀤𑀺𑀲𑀤𑀺𑀲𑀁 𑀲𑀺𑀩𑁆𑀩𑀦𑁆𑀢𑀸 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 ¶ 𑀞𑀧𑁂𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀯𑀸. 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺𑀧𑀻𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀫𑀸𑀮𑀸𑀓𑀫𑁆𑀫𑀫𑀺𑀕𑀧𑀓𑁆𑀔𑀺𑀧𑀤𑀸𑀤𑀺𑀓𑀁 𑀲𑀺𑀩𑁆𑀩𑀦𑀯𑀺𑀓𑀸𑀭𑀁. 𑀓𑀸𑀢𑀼𑀦𑁆𑀢𑀺 𑀲𑀬𑀁 𑀓𑀸𑀢𑀼𑀁. 𑀓𑀸𑀭𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑁂𑀦 𑀯𑀸 𑀓𑀸𑀭𑀸𑀧𑁂𑀢𑀼𑀁.

𑀬𑁄 𑀪𑀺𑀓𑁆𑀔𑀼 𑀧𑀭𑀁 𑀉𑀢𑁆𑀢𑀫𑀁 𑀯𑀡𑁆𑀡𑀫𑀝𑁆𑀞𑀫𑀪𑀺𑀧𑀢𑁆𑀣𑀬𑀦𑁆𑀢𑁄 𑀓𑀜𑁆𑀚𑀺𑀓𑀧𑀺𑀝𑁆𑀞𑀔𑀮𑀺𑀅𑀮𑁆𑀮𑀺𑀓𑀸𑀤𑀻𑀲𑀼 𑀘𑀻𑀯𑀭𑀁 𑀧𑀓𑁆𑀔𑀺𑀧𑀢𑀺, 𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀸 𑀫𑁄𑀓𑁆𑀔𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀓𑀜𑁆𑀚𑀺𑀓𑀦𑁆𑀢𑀺 𑀯𑀸𑀬𑀦𑀢𑀦𑁆𑀢𑀫𑀓𑁆𑀔𑀦𑀁 𑀓𑀜𑁆𑀚𑀺𑀓𑀲𑀤𑀺𑀲𑀸 𑀲𑀼𑀮𑀸𑀓𑀜𑁆𑀚𑀺𑀓𑀁. 𑀧𑀺𑀝𑁆𑀞𑀦𑁆𑀢𑀺 𑀢𑀡𑁆𑀟𑀼𑀮𑀧𑀺𑀝𑁆𑀞𑀁. 𑀢𑀡𑁆𑀟𑀼𑀮𑀧𑀺𑀝𑁆𑀞𑁂𑀳𑀺 𑀧𑀓𑁆𑀓𑀸 𑀔𑀮𑀺. 𑀅𑀮𑁆𑀮𑀺𑀓𑀸𑀢𑀺 𑀦𑀺𑀬𑁆𑀬𑀸𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀮𑀸𑀔𑀸𑀤𑀻𑀦𑀁 𑀕𑀳𑀡𑀁. 𑀘𑀻𑀯𑀭𑀲𑁆𑀲 𑀓𑀭𑀡𑁂 𑀓𑀭𑀡𑀓𑀸𑀮𑁂 𑀲𑀫𑀼𑀝𑁆𑀞𑀺𑀢𑀸𑀦𑀁 𑀲𑀽𑀘𑀺𑀳𑀢𑁆𑀣𑀫𑀮𑀸𑀤𑀻𑀦𑀁 𑀓𑀺𑀮𑀺𑀝𑁆𑀞𑀓𑀸𑀮𑁂 𑀥𑁄𑀯𑀦𑀢𑁆𑀣𑀜𑁆𑀘 𑀓𑀜𑁆𑀚𑀺𑀓𑀧𑀺𑀝𑁆𑀞𑀔𑀮𑀺𑀅𑀮𑁆𑀮𑀺𑀓𑀸𑀤𑀻𑀲𑀼 𑀧𑀓𑁆𑀔𑀺𑀧𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣𑀸𑀢𑀺 𑀬𑁂𑀦 𑀓𑀲𑀸𑀯𑁂𑀦 𑀘𑀻𑀯𑀭𑀁 𑀭𑀚𑀢𑀺, 𑀢𑀲𑁆𑀫𑀺𑀁 𑀭𑀚𑀦𑁂 𑀘𑀻𑀯𑀭𑀲𑁆𑀲 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀸𑀬 𑀕𑀦𑁆𑀥𑀁 𑀯𑀸 𑀉𑀚𑁆𑀚𑀮𑀪𑀸𑀯𑀢𑁆𑀣𑀸𑀬 𑀢𑁂𑀮𑀁 𑀯𑀸 𑀯𑀡𑁆𑀡𑀢𑁆𑀣𑀸𑀬 𑀮𑀸𑀔𑀁 𑀯𑀸. 𑀓𑀺𑀜𑁆𑀘𑀻𑀢𑀺 𑀏𑀯𑀭𑀽𑀧𑀁 𑀬𑀁 𑀓𑀺𑀜𑁆𑀘𑀺. 𑀫𑀡𑀺𑀦𑀸𑀢𑀺 𑀧𑀸𑀲𑀸𑀡𑁂𑀦. 𑀅𑀜𑁆𑀜𑁂𑀦𑀧𑀺 𑀘 𑀓𑁂𑀦𑀘𑀻𑀢𑀺 𑀬𑁂𑀦 𑀉𑀚𑁆𑀚𑀮𑀁 𑀳𑁄𑀢𑀺, 𑀏𑀯𑀭𑀽𑀧𑁂𑀦 𑀫𑀼𑀕𑁆𑀕𑀭𑀸𑀤𑀺𑀦𑀸 𑀅𑀜𑁆𑀜𑁂𑀦𑀧𑀺 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸. 𑀤𑁄𑀡𑀺𑀬𑀸𑀢𑀺 𑀭𑀚𑀦𑀫𑁆𑀩𑀡𑁂 𑀦 𑀖𑀁𑀲𑀺𑀢𑀩𑁆𑀩𑀁 𑀳𑀢𑁆𑀣𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀦 𑀕𑀳𑁂𑀢𑀩𑁆𑀩𑀁. 𑀭𑀢𑁆𑀢𑀁 𑀘𑀻𑀯𑀭𑀁 𑀳𑀢𑁆𑀣𑁂𑀳𑀺 𑀓𑀺𑀜𑁆𑀘𑀺 𑀣𑁄𑀓𑀁 𑀧𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ¶ 𑀬𑁄𑀚𑀦𑀸. 𑀬𑀢𑁆𑀣 𑀧𑀓𑁆𑀓𑀭𑀚𑀦𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀲𑀸 𑀭𑀚𑀦𑀤𑁄𑀡𑀻. 𑀢𑀢𑁆𑀣 𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀺𑀁 𑀖𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀕𑀡𑁆𑀞𑀺𑀓𑁂𑀢𑀺 𑀯𑁂𑀴𑀼𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑀕𑀡𑁆𑀞𑀺𑀓𑁂. 𑀮𑁂𑀔𑀸 𑀯𑀸𑀢𑀺 𑀯𑀝𑁆𑀝𑀸𑀤𑀺𑀪𑁂𑀤𑀸 𑀮𑁂𑀔𑀸 𑀯𑀸. 𑀧𑀺𑀴𑀓𑀸𑀢𑀺 𑀲𑀸𑀲𑀧𑀩𑀻𑀚𑀲𑀤𑀺𑀲𑀸 𑀔𑀼𑀤𑁆𑀤𑀓𑀩𑀼𑀩𑁆𑀩𑀼𑀴𑀸. 𑀧𑀸𑀴𑀺𑀓𑀡𑁆𑀡𑀺𑀓𑀪𑁂𑀤𑀢𑁄𑀢𑀺 𑀫𑀡𑀺𑀓𑀸𑀯𑀴𑀺𑀭𑀽𑀧𑀧𑀼𑀧𑁆𑀨𑀓𑀡𑁆𑀡𑀺𑀓𑀭𑀽𑀧𑀪𑁂𑀤𑀢𑁄. ‘‘𑀓𑀧𑁆𑀧𑀩𑀺𑀦𑁆𑀤𑀼𑀯𑀺𑀓𑀸𑀭𑁄 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀣𑁂𑀯 𑀘𑀻𑀯𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁯. 𑀧𑀢𑁆𑀢𑁂 𑀯𑀸 𑀣𑀸𑀮𑀓𑁂 𑀯𑀸𑀢𑀺𑀆𑀤𑀻𑀲𑀼 𑀣𑀸𑀮𑀓𑁂𑀢𑀺 𑀢𑀫𑁆𑀩𑀸𑀤𑀺𑀫𑀬𑁂 𑀧𑀼𑀕𑁆𑀕𑀮𑀺𑀓𑁂 𑀢𑀺𑀯𑀺𑀥𑁂𑀧𑀺 𑀓𑀧𑁆𑀧𑀺𑀬𑀣𑀸𑀮𑀓𑁂. 𑀦 𑀯𑀝𑁆𑀝𑀢𑀻𑀢𑀺 𑀫𑀡𑀺𑀯𑀡𑁆𑀡𑀓𑀭𑀡𑀧𑀬𑁄𑀕𑁄 𑀦 𑀯𑀝𑁆𑀝𑀢𑀺, 𑀢𑁂𑀮𑀯𑀡𑁆𑀡𑀧𑀬𑁄𑀕𑁄 𑀧𑀦 𑀯𑀝𑁆𑀝𑀢𑀺. 𑀢𑁂𑀮𑀯𑀡𑁆𑀡𑁄𑀢𑀺 𑀲𑀫𑀡𑀲𑀸𑀭𑀼𑀧𑁆𑀧𑀯𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀡𑀺𑀯𑀡𑁆𑀡𑀁 𑀧𑀦 𑀧𑀢𑁆𑀢𑀁 𑀅𑀜𑁆𑀜𑁂𑀦 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀢𑁆𑀢𑀫𑀡𑁆𑀟𑀮𑁂𑀢𑀺 𑀢𑀺𑀧𑀼𑀲𑀻𑀲𑀸𑀤𑀺𑀫𑀬𑁂 𑀧𑀢𑁆𑀢𑀝𑁆𑀞𑀧𑀦𑀓𑀫𑀡𑁆𑀟𑀮𑁂. ‘‘𑀦 𑀪𑀺𑀓𑁆𑀔𑀯𑁂 𑀯𑀺𑀘𑀺𑀢𑁆𑀭𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀺 𑀪𑀺𑀢𑁆𑀢𑀺𑀓𑀫𑁆𑀫𑀓𑀢𑀸𑀦𑀻’’𑀢𑀺 (𑀘𑀽𑀴𑀯. 𑁨𑁫𑁩) 𑀯𑀼𑀢𑁆𑀢𑀢𑁆𑀢𑀸 ¶ ‘‘𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀓𑀭𑀤𑀦𑁆𑀢𑀓𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁫𑁩) 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀓𑀭𑀤𑀦𑁆𑀢𑀓𑀁 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀣𑀸𑀮𑀓𑀲𑁆𑀲 𑀘 𑀧𑀢𑁆𑀢𑀲𑁆𑀲, 𑀩𑀳𑀺 𑀅𑀦𑁆𑀢𑁄𑀧𑀺 𑀯𑀸 𑀧𑀦;

𑀆𑀭𑀕𑁆𑀕𑁂𑀦 𑀓𑀢𑀸 𑀮𑁂𑀔𑀸, 𑀦 𑀘 𑀯𑀝𑁆𑀝𑀢𑀺 𑀓𑀸𑀘𑀺𑀧𑀺.

‘‘𑀆𑀭𑁄𑀧𑁂𑀢𑁆𑀯𑀸 𑀪𑀫𑀁 𑀧𑀢𑁆𑀢𑀁, 𑀫𑀚𑁆𑀚𑀺𑀢𑁆𑀯𑀸 𑀘𑁂 𑀧𑀘𑀦𑁆𑀢𑀺 𑀘;

‘𑀫𑀡𑀺𑀯𑀡𑁆𑀡𑀁 𑀓𑀭𑀺𑀲𑁆𑀲𑀸𑀫’, 𑀇𑀢𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀧𑀢𑁆𑀢𑀫𑀡𑁆𑀟𑀮𑀓𑁂 𑀓𑀺𑀜𑁆𑀘𑀺;

𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺;

𑀦 𑀤𑁄𑀲𑁄 𑀓𑁄𑀘𑀺 𑀢𑀢𑁆𑀣𑀲𑁆𑀲;

𑀓𑀸𑀢𑀼𑀁 𑀫𑀓𑀭𑀤𑀦𑁆𑀢𑀓’’𑀦𑁆𑀢𑀺.

𑀯𑀺𑀦𑀬𑀲𑀸𑀭𑀢𑁆𑀣𑀲𑀦𑁆𑀤𑀻𑀧𑀦𑀺𑀬𑀫𑁆𑀧𑀺 ¶ 𑀆𑀭𑀕𑁆𑀕𑁂𑀦𑀸𑀢𑀺 𑀆𑀭𑀓𑀡𑁆𑀝𑀓𑀕𑁆𑀕𑁂𑀦, 𑀲𑀽𑀘𑀺𑀫𑀼𑀔𑁂𑀦 𑀯𑀸. 𑀓𑀸𑀘𑀺𑀧𑀺 𑀮𑁂𑀔𑀸𑀢𑀺 𑀯𑀝𑁆𑀝𑀓𑀕𑁄𑀫𑀼𑀢𑁆𑀢𑀸𑀤𑀺𑀲𑀡𑁆𑀞𑀸𑀦𑀸 𑀬𑀸 𑀓𑀸𑀘𑀺𑀧𑀺 𑀭𑀸𑀚𑀺. 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀪𑀫𑁂 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸. 𑀧𑀢𑁆𑀢𑀫𑀡𑁆𑀟𑀮𑀓𑁂𑀢𑀺 𑀧𑀢𑁆𑀢𑁂 𑀙𑀯𑀺𑀭𑀓𑁆𑀔𑀡𑀢𑁆𑀣𑀸𑀬 𑀢𑀺𑀧𑀼𑀲𑀻𑀲𑀸𑀤𑀻𑀳𑀺 𑀓𑀢𑁂 𑀧𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀆𑀥𑀸𑀭𑀸𑀤𑀻𑀦𑀁 𑀉𑀧𑀭𑀺 𑀓𑀸𑀢𑀩𑁆𑀩𑁂 𑀧𑀢𑁆𑀢𑀫𑀡𑁆𑀟𑀮𑀓𑁂. 𑀪𑀺𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀦𑀸𑀦𑀸𑀓𑀸𑀭𑀭𑀽𑀧𑀓𑀓𑀫𑁆𑀫𑀯𑀺𑀘𑀺𑀢𑁆𑀢𑀁. 𑀬𑀣𑀸𑀳 ‘‘𑀦, 𑀪𑀺𑀓𑁆𑀔𑀯𑁂, 𑀯𑀺𑀘𑀺𑀢𑁆𑀭𑀸𑀦𑀺 𑀧𑀢𑁆𑀢𑀫𑀡𑁆𑀟𑀮𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀺 𑀪𑀺𑀢𑁆𑀢𑀺𑀓𑀫𑁆𑀫𑀓𑀢𑀸𑀦𑀻’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀢𑁆𑀢𑀫𑀡𑁆𑀟𑀮𑁂. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀫𑀓𑀭𑀤𑀦𑁆𑀢𑀓𑀦𑁆𑀢𑀺 𑀕𑀺𑀭𑀺𑀓𑀽𑀝𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀧𑀢𑁆𑀢𑀣𑀸𑀮𑀓𑀸𑀤𑀻𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀥𑀫𑀓𑀭𑀡…𑀧𑁂… 𑀮𑁂𑀔𑀸 𑀦 𑀯𑀝𑁆𑀝𑀢𑀻𑀢𑀺 𑀆𑀭𑀕𑁆𑀕𑁂𑀦 𑀤𑀺𑀦𑁆𑀦𑀮𑁂𑀔𑀸 𑀦 𑀯𑀝𑁆𑀝𑀢𑀺, 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀸𑀤𑀺𑀯𑀡𑁆𑀡𑁂𑀳𑀺 𑀓𑀢𑀮𑁂𑀔𑀸 𑀧𑀦 𑀯𑀝𑁆𑀝𑀢𑀺. 𑀙𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀦𑁆𑀢𑀺 𑀥𑀫𑀓𑀭𑀡𑀲𑁆𑀲 𑀳𑀢𑁆𑀣𑁂𑀦 𑀕𑀳𑀡𑀢𑁆𑀣𑀁 𑀓𑀢𑀲𑁆𑀲 𑀙𑀢𑁆𑀢𑀸𑀓𑀸𑀭𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀁. ‘‘𑀧𑀭𑀺𑀲𑁆𑀲𑀸𑀯𑀦𑀩𑀦𑁆𑀥𑀝𑁆𑀞𑀸𑀦𑁂’’𑀢𑀺 𑀓𑁂𑀘𑀺. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂𑀧𑀺 𑁋

‘‘𑀦 ¶ 𑀥𑀫𑁆𑀫𑀓𑀭𑀡𑀘𑁆𑀙𑀢𑁆𑀢𑁂, 𑀮𑁂𑀔𑀸 𑀓𑀸𑀘𑀺𑀧𑀺 𑀯𑀝𑁆𑀝𑀢𑀺;

𑀓𑀼𑀘𑁆𑀙𑀺𑀬𑀁 𑀯𑀸 𑀞𑀧𑁂𑀢𑁆𑀯𑀸 𑀢𑀁, 𑀮𑁂𑀔𑀁 𑀢𑀼 𑀫𑀼𑀔𑀯𑀝𑁆𑀝𑀺𑀬’’𑀦𑁆𑀢𑀺. 𑁋

𑀯𑀼𑀢𑁆𑀢𑀁. 𑀢𑀝𑁆𑀝𑀻𑀓𑀸𑀬𑀁 𑀧𑀦 ‘‘𑀫𑀼𑀔𑀯𑀝𑁆𑀝𑀺𑀬𑀸 𑀬𑀸 𑀮𑁂𑀔𑀸 𑀧𑀭𑀺𑀲𑁆𑀲𑀸𑀯𑀦𑀩𑀦𑁆𑀥𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀸, 𑀢𑀁 𑀮𑁂𑀔𑀁 𑀞𑀧𑁂𑀢𑁆𑀯𑀸 𑀥𑀫𑀓𑀭𑀡𑀘𑁆𑀙𑀢𑁆𑀢𑁂 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀓𑀸𑀘𑀺 𑀮𑁂𑀔𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀥𑀫𑀓𑀭𑀡𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁧𑁦. 𑀓𑀸𑀬𑀩𑀦𑁆𑀥𑀦𑁂 𑀧𑀦 𑀓𑀓𑁆𑀓𑀝𑀓𑁆𑀔𑀻𑀦𑀻𑀢𑀺 𑀓𑀓𑁆𑀓𑀝𑀓𑀲𑁆𑀲 𑀅𑀓𑁆𑀔𑀺𑀲𑀤𑀺𑀲𑀸𑀦𑀺. 𑀫𑀓𑀭𑀫𑀼𑀔𑀦𑁆𑀢𑀺 𑀫𑀓𑀭𑀫𑀼𑀔𑀲𑀡𑁆𑀞𑀸𑀦𑀁. 𑀤𑁂𑀟𑁆𑀟𑀼𑀪𑀲𑀻𑀲𑀦𑁆𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀲𑀤𑀺𑀲𑀲𑀡𑁆𑀞𑀸𑀦𑀸𑀦𑀺. 𑀅𑀘𑁆𑀙𑀻𑀦𑀻𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀲𑀡𑁆𑀞𑀸𑀦𑀸𑀦𑀺. 𑀏𑀓𑀫𑁂𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀏𑀓𑀭𑀚𑁆𑀚𑀼𑀓𑀁 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀓𑀫𑁂𑀯 𑀧𑀦 𑀲𑀢𑀯𑀸𑀭𑀫𑁆𑀧𑀺 𑀲𑀭𑀻𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 ¶ 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀫𑀼𑀭𑀚𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀼𑀭𑀚𑀜𑁆𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀇𑀤𑀁 𑀧𑀦 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀲𑀗𑁆𑀔𑀸𑀢𑀁 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀜𑁆𑀘 𑀤𑀲𑀸𑀲𑀼 𑀯𑀝𑁆𑀝𑀢𑀺 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸 𑀚𑀻𑀭𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀼𑀭𑀚𑀁 𑀫𑀤𑁆𑀤𑀯𑀻𑀡’’𑀦𑁆𑀢𑀺 (𑀘𑀽𑀴𑀯. 𑁨𑁭𑁮) 𑀯𑀼𑀢𑁆𑀢𑀢𑁆𑀢𑀸.

𑀯𑀺𑀥𑁂𑀢𑀺 𑀤𑀲𑀸𑀧𑀭𑀺𑀬𑁄𑀲𑀸𑀦𑁂 𑀣𑀺𑀭𑀪𑀸𑀯𑀸𑀬 𑀤𑀦𑁆𑀢𑀯𑀺𑀲𑀸𑀡𑀲𑀼𑀢𑁆𑀢𑀸𑀤𑀻𑀳𑀺 𑀓𑀢𑁂 𑀯𑀺𑀥𑁂. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁫) 𑀧𑀦 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀧𑀸𑀲𑀦𑁆𑀢𑁂 𑀤𑀲𑀸𑀫𑀽𑀮𑁂 𑀢𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑁆𑀢𑀩𑁆𑀩𑁂 𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑁂 𑀯𑀺𑀥𑁂’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑀗𑁆𑀕𑀮𑀸𑀦𑀺 𑀦𑀸𑀫 𑀲𑀗𑁆𑀔𑁄, 𑀘𑀓𑁆𑀓𑀁, 𑀧𑀼𑀡𑁆𑀡𑀓𑀼𑀫𑁆𑀪𑁄, 𑀕𑀬𑀸, 𑀲𑀺𑀭𑀻𑀯𑀘𑁆𑀙𑁄, 𑀅𑀗𑁆𑀓𑀼𑀲𑁄, 𑀥𑀚𑀁, 𑀲𑁄𑀯𑀢𑁆𑀣𑀺𑀓𑀦𑁆𑀢𑀺. 𑀫𑀘𑁆𑀙𑀬𑀼𑀕𑀴𑀙𑀢𑁆𑀢𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀯𑀲𑁂𑀦𑀧𑀺 𑀯𑀤𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀦𑁆𑀢𑀺 𑀤𑀦𑁆𑀢𑀸𑀤𑀻𑀳𑀺 𑀓𑀢𑀲𑁆𑀲 𑀯𑀺𑀥𑀲𑁆𑀲 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀓𑀸𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀭𑀸𑀚𑀺𑀫𑀢𑁆𑀢𑀁. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂𑀧𑀺 𑁋

‘‘𑀲𑀼𑀢𑁆𑀢𑀁 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸, 𑀓𑁄𑀝𑁆𑀝𑁂𑀦𑁆𑀢𑀺 𑀘 𑀢𑀳𑀺𑀁 𑀢𑀳𑀺𑀁;

𑀓𑀸𑀬𑀩𑀦𑁆𑀥𑀦𑀲𑁄𑀪𑀢𑁆𑀣𑀁, 𑀢𑀁 𑀦 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄.

‘‘𑀤𑀲𑀸𑀫𑀼𑀔𑁂 𑀤𑀴𑁆𑀳𑀢𑁆𑀣𑀸𑀬, 𑀤𑁆𑀯𑀻𑀲𑀼 𑀅𑀦𑁆𑀢𑁂𑀲𑀼 𑀯𑀝𑁆𑀝𑀢𑀺;

𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫-𑀘𑀺𑀢𑁆𑀢𑀺𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺.

‘‘𑀅𑀓𑁆𑀔𑀻𑀦𑀺 ¶ 𑀢𑀢𑁆𑀣 𑀤𑀲𑁆𑀲𑁂𑀢𑁆𑀯𑀸;

𑀓𑁄𑀝𑁆𑀝𑀺𑀢𑁂 𑀧𑀦 𑀓𑀸 𑀓𑀣𑀸.

𑀓𑀓𑁆𑀓𑀝𑀓𑁆𑀔𑀻𑀦𑀺 𑀯𑀸 𑀢𑀢𑁆𑀣;

𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀖𑀝𑀁 𑀤𑁂𑀟𑁆𑀟𑀼𑀪𑀲𑀻𑀲𑀁 𑀯𑀸, 𑀫𑀓𑀭𑀲𑁆𑀲 𑀫𑀼𑀔𑀫𑁆𑀧𑀺 𑀯𑀸;

𑀯𑀺𑀓𑀸𑀭𑀭𑀽𑀧𑀁 𑀬𑀁 𑀓𑀺𑀜𑁆𑀘𑀺, 𑀦 𑀯𑀝𑁆𑀝𑀢𑀺 𑀤𑀲𑀸𑀫𑀼𑀔𑁂.

‘‘𑀉𑀚𑀼𑀓𑀁 ¶ 𑀫𑀘𑁆𑀙𑀓𑀡𑁆𑀝𑀁 𑀯𑀸, 𑀫𑀝𑁆𑀞𑀁 𑀯𑀸 𑀧𑀦 𑀧𑀝𑁆𑀝𑀺𑀓𑀁;

𑀔𑀚𑁆𑀚𑀽𑀭𑀺𑀧𑀢𑁆𑀢𑀓𑀸𑀓𑀸𑀭𑀁, 𑀓𑀢𑁆𑀯𑀸 𑀯𑀝𑁆𑀝𑀢𑀺 𑀓𑁄𑀝𑁆𑀝𑀺𑀢𑀁.

‘‘𑀧𑀝𑁆𑀝𑀺𑀓𑀸 𑀲𑀽𑀓𑀭𑀦𑁆𑀢𑀦𑁆𑀢𑀺, 𑀤𑀼𑀯𑀺𑀥𑀁 𑀓𑀸𑀬𑀩𑀦𑁆𑀥𑀦𑀁;

𑀭𑀚𑁆𑀚𑀼𑀓𑀸 𑀤𑀼𑀲𑁆𑀲𑀧𑀝𑁆𑀝𑀸𑀤𑀺, 𑀲𑀩𑁆𑀩𑀁 𑀢𑀲𑁆𑀲𑀸𑀦𑀼𑀮𑁄𑀫𑀺𑀓𑀁.

‘‘𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀜𑁆𑀘, 𑀤𑁂𑀟𑁆𑀟𑀼𑀪𑀜𑁆𑀘 𑀓𑀮𑀸𑀩𑀼𑀓𑀁;

𑀭𑀚𑁆𑀚𑀼𑀬𑁄 𑀘 𑀦 𑀯𑀝𑁆𑀝𑀦𑁆𑀢𑀺, 𑀧𑀼𑀭𑀺𑀫𑀸 𑀤𑁆𑀯𑁂𑀤𑀲𑀸 𑀲𑀺𑀬𑀼𑀁.

‘‘𑀤𑀲𑀸 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀸, 𑀦𑀺𑀤𑁆𑀤𑀺𑀝𑁆𑀞𑀸 𑀓𑀸𑀬𑀩𑀦𑁆𑀥𑀦𑁂;

𑀏𑀓𑀸 𑀤𑁆𑀯𑀺𑀢𑀺𑀘𑀢𑀲𑁆𑀲𑁄 𑀯𑀸, 𑀯𑀝𑁆𑀝𑀦𑁆𑀢𑀺 𑀦 𑀢𑀢𑁄 𑀧𑀭𑀁.

‘‘𑀏𑀓𑀭𑀚𑁆𑀚𑀼𑀫𑀬𑀁 𑀯𑀼𑀢𑁆𑀢𑀁, 𑀫𑀼𑀦𑀺𑀦𑀸 𑀓𑀸𑀬𑀩𑀦𑁆𑀥𑀦𑀁;

𑀢𑀜𑁆𑀘 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁, 𑀏𑀓𑀫𑁆𑀧𑀺 𑀘 𑀦 𑀯𑀝𑁆𑀝𑀢𑀺.

‘‘𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸, 𑀩𑀳𑀽 𑀏𑀓𑀸𑀬 𑀭𑀚𑁆𑀚𑀼𑀬𑀸;

𑀦𑀺𑀭𑀦𑁆𑀢𑀭𑀜𑁆𑀳𑀺 𑀯𑁂𑀞𑁂𑀢𑁆𑀯𑀸, 𑀓𑀢𑀁 𑀯𑀝𑁆𑀝𑀢𑀺 𑀩𑀦𑁆𑀥𑀺𑀢𑀼𑀁.

‘‘𑀤𑀦𑁆𑀢𑀓𑀝𑁆𑀞𑀯𑀺𑀲𑀸𑀡𑀝𑁆𑀞𑀺-𑀮𑁄𑀳𑀯𑁂𑀴𑀼𑀦𑀴𑀩𑁆𑀪𑀯𑀸;

𑀚𑀢𑀼𑀲𑀗𑁆𑀔𑀫𑀬𑀸 𑀲𑀼𑀢𑁆𑀢-𑀨𑀮𑀚𑀸 𑀯𑀺𑀥𑀓𑀸 𑀫𑀢𑀸.

‘‘𑀓𑀸𑀬𑀩𑀦𑁆𑀥𑀦𑀯𑀺𑀥𑁂𑀧𑀺 ¶ , 𑀯𑀺𑀓𑀸𑀭𑁄 𑀦 𑀘 𑀯𑀝𑁆𑀝𑀢𑀺;

𑀢𑀢𑁆𑀣 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤-𑀮𑁂𑀔𑀸𑀫𑀢𑁆𑀢𑀁 𑀢𑀼 𑀯𑀝𑁆𑀝𑀢𑀻’’𑀢𑀺. 𑁋

𑀯𑀼𑀢𑁆𑀢𑀁.

𑀯𑀺𑀦𑀬𑀲𑀸𑀭𑀢𑁆𑀣𑀲𑀦𑁆𑀤𑀻𑀧𑀦𑀺𑀬𑀫𑁆𑀧𑀺 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀧𑀝𑁆𑀝𑀺𑀓𑀸𑀬 𑀢𑀢𑁆𑀣 𑀢𑀢𑁆𑀣. 𑀢𑀦𑁆𑀢𑀺 𑀢𑀣𑀸𑀓𑁄𑀝𑁆𑀝𑀺𑀢𑀤𑀺𑀕𑀼𑀡𑀲𑀼𑀢𑁆𑀢𑀓𑀸𑀬𑀩𑀦𑁆𑀥𑀦𑀁. 𑀅𑀦𑁆𑀢𑁂𑀲𑀼 𑀤𑀴𑁆𑀳𑀢𑁆𑀣𑀸𑀬 𑀤𑀲𑀸𑀫𑀼𑀔𑁂 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀓𑁄𑀝𑁆𑀝𑁂𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀘𑀺𑀢𑁆𑀢𑀓𑀫𑁆𑀧𑀻𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀘𑀺𑀢𑁆𑀢𑀬𑀼𑀢𑁆𑀢𑀫𑁆𑀧𑀺 𑀓𑀸𑀬𑀩𑀦𑁆𑀥𑀦𑀁. 𑀅𑀓𑁆𑀔𑀻𑀦𑀻𑀢𑀺 𑀓𑀼𑀜𑁆𑀚𑀭𑀓𑁆𑀔𑀻𑀦𑀺. 𑀢𑀢𑁆𑀣𑀸𑀢𑀺 𑀓𑀸𑀬𑀩𑀦𑁆𑀥𑀦𑁂 𑀦 𑀯𑀝𑁆𑀝𑀢𑀻𑀢𑀺 𑀓𑀸 𑀓𑀣𑀸. 𑀉𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀉𑀓𑁆𑀓𑀺𑀭𑀺𑀢𑀼𑀁.

𑀖𑀝𑀦𑁆𑀢𑀺 𑀖𑀝𑀲𑀡𑁆𑀞𑀸𑀦𑀁. 𑀤𑁂𑀟𑁆𑀟𑀼𑀪𑀲𑀻𑀲𑀁 𑀯𑀸𑀢𑀺 𑀉𑀤𑀓𑀲𑀧𑁆𑀧𑀲𑀻𑀲𑀁 𑀫𑀼𑀔𑀲𑀡𑁆𑀞𑀸𑀦𑀁 𑀯𑀸. 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀤𑀲𑀸𑀫𑀼𑀔𑁂 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀉𑀪𑀬𑀧𑀲𑁆𑀲𑁂𑀲𑀼 𑀫𑀘𑁆𑀙𑀓𑀡𑁆𑀝𑀓𑀬𑀼𑀢𑁆𑀢𑀁 𑀫𑀘𑁆𑀙𑀲𑁆𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀯𑀺𑀬 𑀬𑀲𑁆𑀲𑀸 𑀧𑀝𑁆𑀝𑀺𑀓𑀸𑀬 𑀯𑀸𑀬𑀦𑀁 𑀳𑁄𑀢𑀺, 𑀇𑀤𑀁 𑀓𑀸𑀬𑀩𑀦𑁆𑀥𑀦𑀁 ¶ 𑀫𑀘𑁆𑀙𑀓𑀡𑁆𑀝𑀓𑀁 𑀦𑀸𑀫. 𑀬𑀲𑁆𑀲 𑀔𑀚𑁆𑀚𑀽𑀭𑀺𑀧𑀢𑁆𑀢𑀲𑀡𑁆𑀞𑀸𑀦𑀫𑀺𑀯 𑀯𑀸𑀬𑀦𑀁 𑀳𑁄𑀢𑀺, 𑀢𑀁 𑀔𑀚𑁆𑀚𑀽𑀭𑀺𑀧𑀢𑁆𑀢𑀓𑀸𑀓𑀸𑀭𑀁 𑀦𑀸𑀫.

𑀧𑀓𑀢𑀺𑀯𑀺𑀓𑀸𑀭𑀸 𑀧𑀝𑁆𑀝𑀺𑀓𑀸 𑀲𑀽𑀓𑀭𑀦𑁆𑀢𑀁 𑀦𑀸𑀫 𑀓𑀼𑀜𑁆𑀘𑀺𑀓𑀸𑀓𑁄𑀲𑀲𑀡𑁆𑀞𑀸𑀦𑀁. 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀓𑀸𑀬𑀩𑀦𑁆𑀥𑀦𑀲𑁆𑀲. 𑀢𑀢𑁆𑀣 𑀭𑀚𑁆𑀚𑀼𑀓𑀸 𑀲𑀽𑀓𑀭𑀦𑁆𑀢𑀸𑀦𑀼𑀮𑁄𑀫𑀺𑀓𑀸, 𑀤𑀼𑀲𑁆𑀲𑀧𑀝𑁆𑀝𑀁 𑀧𑀝𑁆𑀝𑀺𑀓𑀸𑀦𑀼𑀮𑁄𑀫𑀺𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀕𑀳𑀺𑀢𑀁, 𑀢𑀜𑁆𑀘 𑀲𑀽𑀓𑀭𑀦𑁆𑀢𑀸𑀦𑀼𑀮𑁄𑀫𑀺𑀓𑀁. 𑀬𑀣𑀸𑀳 ‘‘𑀏𑀓𑀭𑀚𑁆𑀚𑀼𑀓𑀁 𑀧𑀦 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀜𑁆𑀘 𑀲𑀽𑀓𑀭𑀦𑁆𑀢𑀁 𑀅𑀦𑀼𑀮𑁄𑀫𑁂𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁭𑁮). 𑀢𑀢𑁆𑀣 𑀭𑀚𑁆𑀚𑀼𑀓𑀸 𑀦𑀸𑀫 𑀏𑀓𑀸𑀯𑀝𑁆𑀝𑀸, 𑀩𑀳𑀼𑀭𑀚𑁆𑀚𑀼𑀓𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀁 𑀯𑀓𑁆𑀔𑀢𑀺. 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 𑀲𑀚𑁆𑀚𑀺𑀢𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀫𑀼𑀭𑀚𑀁 𑀦𑀸𑀫 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁. 𑀯𑁂𑀞𑁂𑀢𑁆𑀯𑀸𑀢𑀺 𑀦𑀸𑀦𑀸𑀲𑀼𑀢𑁆𑀢𑁂𑀳𑀺 𑀯𑁂𑀞𑁂𑀢𑁆𑀯𑀸. 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀧𑀦 ‘‘𑀩𑀳𑀼𑀓𑀸 𑀭𑀚𑁆𑀚𑀼𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀯𑁂𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀤𑁆𑀤𑀯𑀻𑀡𑀁 𑀦𑀸𑀫 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁. 𑀤𑁂𑀟𑁆𑀟𑀼𑀪𑀓𑀁 𑀦𑀸𑀫 𑀉𑀤𑀓𑀲𑀧𑁆𑀧𑀲𑀤𑀺𑀲𑀁. 𑀓𑀮𑀸𑀩𑀼𑀓𑀁 𑀦𑀸𑀫 𑀩𑀳𑀼𑀭𑀚𑁆𑀚𑀼𑀓𑀁. 𑀭𑀚𑁆𑀚𑀼𑀬𑁄𑀢𑀺 𑀉𑀪𑀬𑀓𑁄𑀝𑀺𑀬𑀁 𑀏𑀓𑀢𑁄 𑀅𑀩𑀦𑁆𑀥𑀸 𑀩𑀳𑀼𑀭𑀚𑁆𑀚𑀼𑀬𑁄, 𑀢𑀣𑀸𑀩𑀦𑁆𑀥𑀸 𑀓𑀮𑀸𑀩𑀼𑀓𑀁 𑀦𑀸𑀫 𑀳𑁄𑀢𑀺. 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀫𑀼𑀭𑀚𑀸𑀤𑀻𑀦𑀺 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀓𑀸𑀬𑀩𑀦𑁆𑀥𑀦𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀫𑀼𑀭𑀚𑀁 ¶ 𑀫𑀤𑁆𑀤𑀯𑀻𑀡𑀦𑀸𑀫𑀜𑁆𑀘𑀸𑀢𑀺 𑀤𑁆𑀯𑁂. ‘‘𑀤𑀲𑀸𑀲𑀼 𑀲𑀺𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀡𑁆𑀡𑀮𑁄𑀧𑁂𑀦 ‘‘𑀤𑀲𑀸 𑀲𑀺𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀫𑀼𑀭𑀚𑀁 𑀫𑀤𑁆𑀤𑀯𑀻𑀡𑀦𑁆𑀢𑀺 𑀇𑀤𑀁 𑀤𑀲𑀸𑀲𑀼𑀬𑁂𑀯 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺.

𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀸𑀢𑀺 𑀧𑀸𑀫𑀗𑁆𑀕𑀤𑀸𑀫𑀁 𑀯𑀺𑀬 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑀸. 𑀏𑀓𑀭𑀚𑁆𑀚𑀼𑀫𑀬𑀦𑁆𑀢𑀺 𑀦𑀸𑀦𑀸𑀯𑀝𑁆𑀝𑁂 𑀏𑀓𑀢𑁄 𑀯𑀝𑁆𑀝𑁂𑀢𑁆𑀯𑀸 𑀓𑀢𑀁 𑀭𑀚𑁆𑀚𑀼𑀫𑀬𑀁 𑀓𑀸𑀬𑀩𑀦𑁆𑀥𑀦𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀭𑀚𑁆𑀚𑀼𑀓𑀸 𑀤𑀼𑀲𑁆𑀲𑀧𑀝𑁆𑀝𑀸𑀤𑀻’’𑀢𑀺 𑀏𑀢𑁆𑀣 𑀏𑀓𑀯𑀝𑁆𑀝𑀭𑀚𑁆𑀚𑀼𑀓𑀸 𑀕𑀳𑀺𑀢𑀸. 𑀇𑀥 𑀧𑀦 𑀦𑀸𑀦𑀸𑀯𑀝𑁆𑀝𑁂 𑀏𑀓𑀢𑁄 𑀯𑀝𑁆𑀝𑁂𑀢𑁆𑀯𑀸 𑀓𑀢𑀸 𑀏𑀓𑀸𑀯 𑀭𑀚𑁆𑀚𑀼 𑀕𑀳𑀺𑀢𑀸. 𑀢𑀜𑁆𑀘𑀸𑀢𑀺 𑀢𑀁 𑀯𑀸 𑀦𑀬𑀫𑁆𑀧𑀺 𑀏𑀓𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀁 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑁂𑀦 𑀕𑀦𑁆𑀣𑀺𑀢𑀁. 𑀏𑀓𑀫𑁆𑀧𑀺 𑀘 𑀦 𑀯𑀝𑁆𑀝𑀢𑀻𑀢𑀺 𑀓𑁂𑀯𑀮𑀫𑁆𑀧𑀺 𑀦 𑀯𑀝𑁆𑀝𑀢𑀺.

𑀩𑀳𑀽 ¶ 𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀝𑁆𑀝𑀢𑀺 𑀩𑀦𑁆𑀥𑀺𑀢𑀼𑀦𑁆𑀢𑀺 𑀫𑀼𑀭𑀚𑀁 𑀓𑀮𑀸𑀩𑀼𑀓𑀜𑁆𑀘 𑀦 𑀳𑁄𑀢𑀺, 𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀧𑀦 𑀯𑀺𑀦𑀺𑀘𑁆𑀙𑀬𑁄 ‘‘𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀕𑀢𑁄 𑀇𑀥 𑀯𑀼𑀢𑁆𑀢𑁄. 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 ‘‘𑀩𑀳𑀼𑀭𑀚𑁆𑀚𑀼𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀏𑀓𑀸𑀬 𑀯𑁂𑀞𑀺𑀢𑀁 𑀫𑀼𑀭𑀚𑀁 𑀦𑀸𑀫𑀸’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁.

𑀤𑀦𑁆𑀢-𑀲𑀤𑁆𑀤𑁂𑀦 𑀳𑀢𑁆𑀣𑀺𑀤𑀦𑁆𑀢𑀸 𑀯𑀼𑀢𑁆𑀢𑀸. 𑀚𑀢𑀽𑀢𑀺 𑀮𑀸𑀔𑀸. 𑀲𑀗𑁆𑀔𑀫𑀬𑀦𑁆𑀢𑀺 𑀲𑀗𑁆𑀔𑀦𑀸𑀪𑀺𑀫𑀬𑀁. 𑀯𑀺𑀥𑀓𑀸 𑀫𑀢𑀸𑀢𑀺 𑀏𑀢𑁆𑀣 𑀯𑁂𑀥𑀺𑀓𑀸𑀢𑀺𑀧𑀺 𑀧𑀸𑀞𑁄, 𑀯𑀺𑀥𑀧𑀭𑀺𑀬𑀸𑀬𑁄. 𑀓𑀸𑀬𑀩𑀦𑁆𑀥𑀦𑀯𑀺𑀥𑁂𑀢𑀺 𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸𑀬 𑀣𑀺𑀭𑀪𑀸𑀯𑀢𑁆𑀣𑀁 𑀓𑀝𑁆𑀞𑀤𑀦𑁆𑀢𑀸𑀤𑀻𑀳𑀺 𑀓𑀢𑁂 𑀯𑀺𑀥𑁂. 𑀯𑀺𑀓𑀸𑀭𑁄 𑀅𑀝𑁆𑀞𑀫𑀗𑁆𑀕𑀮𑀸𑀤𑀺𑀓𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀢𑀼-𑀲𑀤𑁆𑀤𑁂𑀦 𑀖𑀝𑀸𑀓𑀸𑀭𑁄𑀧𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀻𑀢𑀺 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀢𑀲𑁆𑀫𑀸 𑀢𑁂𑀦 𑀦𑀬𑁂𑀦 𑀓𑀸𑀬𑀩𑀦𑁆𑀥𑀦𑀯𑀺𑀘𑀸𑀭𑁄 𑀓𑀸𑀢𑀩𑁆𑀩𑁄𑀢𑀺.

𑁧𑁧. 𑀅𑀜𑁆𑀚𑀦𑀺𑀬𑀁 ‘‘𑀉𑀚𑀼𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀸𑀧𑀺 𑀯𑀗𑁆𑀓𑀕𑀢𑀺𑀓𑀸 𑀦 𑀯𑀝𑁆𑀝𑀢𑀺. 𑀲𑀺𑀧𑀸𑀝𑀺𑀓𑀸𑀬𑀸𑀢𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀧𑀓𑁆𑀔𑀺𑀧𑀦𑁂. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂 𑀧𑀦 𑁋

‘‘𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫-𑀦𑀸𑀦𑀸𑀭𑀽𑀧𑀯𑀺𑀘𑀺𑀢𑁆𑀢𑀺𑀢𑀸;

𑀦 𑀘 𑀯𑀝𑁆𑀝𑀢𑀺 𑀪𑀺𑀓𑁆𑀔𑀽𑀦𑀁, 𑀅𑀜𑁆𑀚𑀦𑀻 𑀚𑀦𑀭𑀜𑁆𑀚𑀦𑀻.

‘‘𑀢𑀸𑀤𑀺𑀲𑀁 ¶ 𑀧𑀦 𑀖𑀁𑀲𑀺𑀢𑁆𑀯𑀸, 𑀯𑁂𑀞𑁂𑀢𑁆𑀯𑀸 𑀲𑀼𑀢𑁆𑀢𑀓𑁂𑀦 𑀯𑀸;

𑀯𑀴𑀜𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

‘‘𑀯𑀝𑁆𑀝𑀸 𑀯𑀸 𑀘𑀢𑀼𑀭𑀲𑁆𑀲𑀸 𑀯𑀸, 𑀅𑀝𑁆𑀞𑀁𑀲𑀸 𑀯𑀸𑀧𑀺 𑀅𑀜𑁆𑀚𑀦𑀻;

𑀯𑀝𑁆𑀝𑀢𑁂𑀯𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀯𑀡𑁆𑀡𑀫𑀝𑁆𑀞𑀸 𑀦 𑀯𑀝𑁆𑀝𑀢𑀺.

‘‘𑀢𑀣𑀸𑀜𑁆𑀚𑀦𑀺𑀲𑀮𑀸𑀓𑀸𑀧𑀺, 𑀅𑀜𑁆𑀚𑀦𑀺𑀣𑀯𑀺𑀓𑀸𑀬 𑀘;

𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺, 𑀘𑀺𑀢𑁆𑀢𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺.

‘‘𑀏𑀓𑀯𑀡𑁆𑀡𑁂𑀦 ¶ 𑀲𑀼𑀢𑁆𑀢𑁂𑀦, 𑀲𑀺𑀧𑀸𑀝𑀺𑀁 𑀬𑁂𑀦 𑀓𑁂𑀦𑀘𑀺;

𑀬𑀁 𑀓𑀺𑀜𑁆𑀘𑀺 𑀧𑀦 𑀲𑀺𑀩𑁆𑀩𑁂𑀢𑁆𑀯𑀸, 𑀯𑀴𑀜𑁆𑀚𑀦𑁆𑀢𑀲𑁆𑀲 𑀯𑀝𑁆𑀝𑀢𑀻’’𑀢𑀺. 𑁋

𑀆𑀕𑀢𑀁.

𑀢𑀝𑁆𑀝𑀻𑀓𑀸𑀬𑀫𑁆𑀧𑀺 𑀫𑀸𑀮𑀸…𑀧𑁂… 𑀘𑀺𑀢𑁆𑀢𑀺𑀢𑀸𑀢𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑁂𑀳𑀺 𑀘 𑀫𑀺𑀕𑀧𑀓𑁆𑀔𑀺𑀭𑀽𑀧𑀸𑀤𑀺𑀦𑀸𑀦𑀸𑀭𑀽𑀧𑁂𑀳𑀺 𑀘 𑀯𑀺𑀘𑀺𑀢𑁆𑀢𑀺𑀢𑀸. 𑀚𑀦𑀭𑀜𑁆𑀚𑀦𑀻𑀢𑀺 𑀩𑀸𑀮𑀚𑀦𑀧𑀮𑁄𑀪𑀺𑀦𑀻. 𑀅𑀝𑁆𑀞𑀁𑀲𑀸 𑀯𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁂𑀦 𑀲𑁄𑀴𑀲𑀁𑀲𑀸𑀤𑀻𑀦𑀁 𑀕𑀳𑀡𑀁. 𑀯𑀡𑁆𑀡𑀫𑀝𑁆𑀞𑀸𑀢𑀺 𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀡𑁆𑀡𑀫𑀝𑁆𑀞𑀸. 𑀅𑀜𑁆𑀚𑀦𑀻𑀲𑀮𑀸𑀓𑀸𑀧𑀺 𑀢𑀣𑀸 𑀯𑀡𑁆𑀡𑀫𑀝𑁆𑀞𑀸 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀚𑀦𑀻𑀣𑀯𑀺𑀓𑀸𑀬 𑀘 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀘𑀺𑀢𑁆𑀢𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺, ‘‘𑀣𑀯𑀺𑀓𑀸𑀧𑀺 𑀯𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀕𑀳𑁂𑀢𑀩𑁆𑀩𑁄. ‘‘𑀧𑀻𑀢𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀏𑀓𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀧𑀺𑀮𑁄𑀢𑀺𑀓𑀸𑀤𑀺𑀫𑀬𑀁 𑀓𑀺𑀜𑁆𑀘𑀺𑀧𑀺 𑀲𑀺𑀧𑀸𑀝𑀺𑀓𑀁 𑀲𑀺𑀩𑁆𑀩𑁂𑀢𑁆𑀯𑀸 𑀯𑀴𑀜𑁆𑀚𑀦𑁆𑀢𑀲𑁆𑀲 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸’’𑀢𑀺 𑀆𑀕𑀢𑀁.

𑁧𑁨. 𑀆𑀭𑀓𑀡𑁆𑀝𑀓𑀸𑀤𑀻𑀲𑀼 𑀆𑀭𑀓𑀡𑁆𑀝𑀓𑁂𑀢𑀺 𑀧𑁄𑀢𑁆𑀣𑀓𑀸𑀤𑀺𑀅𑀪𑀺𑀲𑀗𑁆𑀔𑀭𑀡𑀢𑁆𑀣𑀁 𑀓𑀢𑁂 𑀤𑀻𑀖𑀫𑀼𑀔𑀲𑀢𑁆𑀣𑀓𑁂. 𑀪𑀫𑀓𑀸𑀭𑀸𑀦𑀁 𑀤𑀸𑀭𑀼𑀆𑀤𑀺𑀮𑀺𑀔𑀦𑀲𑀢𑁆𑀣𑀓𑀦𑁆𑀢𑀺 𑀓𑁂𑀘𑀺. 𑀯𑀝𑁆𑀝𑀫𑀡𑀺𑀓𑀦𑁆𑀢𑀺 𑀯𑀝𑁆𑀝𑀁 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀩𑁆𑀩𑀩𑀼𑀩𑁆𑀩𑀼𑀴𑀓𑀁. 𑀅𑀜𑁆𑀜𑀦𑁆𑀢𑀺 𑀇𑀫𑀺𑀦𑀸 𑀧𑀺𑀴𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀧𑁆𑀨𑀮𑀺𑀓𑁂𑀢𑀺 𑀬𑀁 𑀓𑀺𑀜𑁆𑀘𑀺 𑀙𑁂𑀤𑀦𑀓𑁂 𑀔𑀼𑀤𑁆𑀤𑀓𑀲𑀢𑁆𑀣𑁂. 𑀫𑀡𑀺𑀓𑀦𑁆𑀢𑀺 𑀏𑀓𑀯𑀝𑁆𑀝𑀫𑀡𑀺. 𑀧𑀺𑀴𑀓𑀦𑁆𑀢𑀺 𑀲𑀸𑀲𑀧𑀫𑀢𑁆𑀢𑀺𑀓𑀸𑀫𑀼𑀢𑁆𑀢𑀭𑀸𑀚𑀺𑀲𑀤𑀺𑀲𑀸 𑀩𑀳𑀼𑀯𑀝𑁆𑀝𑀮𑁂𑀔𑀸. 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀅𑀯𑀼𑀢𑁆𑀢𑀢𑁆𑀢𑀸 𑀮𑁂𑀔𑀦𑀺𑀬𑀁 𑀬𑀁 𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 𑀧𑀦 ‘‘𑀓𑀼𑀜𑁆𑀘𑀺𑀓𑀸𑀬 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀲𑀼𑀯𑀡𑁆𑀡𑀭𑀽𑀧𑀺𑀬𑀫𑀬𑀸𑀧𑀺 𑀯𑀝𑁆𑀝𑀢𑀻𑀢𑀺 𑀙𑀸𑀬𑀸 𑀤𑀺𑀲𑁆𑀲𑀢𑀺. ‘𑀓𑀼𑀜𑁆𑀘𑀺𑀓𑀸𑀬 ¶ 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀻’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫) 𑀯𑀘𑀦𑀢𑁄 𑀅𑀜𑁆𑀜𑁂 𑀓𑀧𑁆𑀧𑀺𑀬𑀮𑁄𑀳𑀸𑀤𑀺𑀫𑀬𑀸𑀯 𑀓𑀼𑀜𑁆𑀘𑀺𑀓𑀸 𑀓𑀧𑁆𑀧𑀦𑁆𑀢𑀺 𑀧𑀭𑀺𑀳𑀭𑀡𑀻𑀬𑀧𑀭𑀺𑀓𑁆𑀔𑀸𑀭𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀆𑀭𑀓𑀡𑁆𑀝𑀓𑁄 𑀧𑁄𑀢𑁆𑀣𑀓𑀸𑀤𑀺𑀓𑀭𑀡𑀲𑀢𑁆𑀣𑀓𑀚𑀸𑀢𑀺, 𑀆𑀫𑀡𑁆𑀟𑀲𑀸𑀭𑀓𑁄 𑀆𑀫𑀮𑀓𑀨𑀮𑀫𑀬𑁄𑀢𑀺 𑀯𑀤𑀦𑁆𑀢𑀺.

𑀯𑀮𑀺𑀢𑀓𑀦𑁆𑀢𑀺 ¶ 𑀦𑀔𑀘𑁆𑀙𑁂𑀤𑀦𑀓𑀸𑀮𑁂 𑀤𑀴𑁆𑀳𑀕𑁆𑀕𑀳𑀡𑀢𑁆𑀣𑀁 𑀯𑀮𑀺𑀬𑀼𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀅𑀜𑁆𑀜𑀫𑁆𑀧𑀺 𑀯𑀺𑀓𑀸𑀭𑀁 𑀤𑀴𑁆𑀳𑀻𑀓𑀫𑁆𑀫𑀸𑀤𑀺𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑀺, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬, 𑀢𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁, 𑀢𑁂𑀦 𑀘 𑀓𑀢𑁆𑀢𑀭𑀤𑀡𑁆𑀟𑀓𑁄𑀝𑀺𑀬𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑁂𑀦 𑀲𑀤𑁆𑀤𑀦𑀺𑀘𑁆𑀙𑀭𑀡𑀢𑁆𑀣𑀸𑀬 𑀓𑀢𑀯𑀮𑀬𑀸𑀤𑀺𑀓𑀁 𑀅𑀯𑀼𑀢𑁆𑀢𑀫𑁆𑀧𑀺 𑀬𑀢𑁄 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀏𑀢𑁆𑀣 𑀘 𑀤𑀴𑁆𑀳𑀻𑀓𑀫𑁆𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑁂𑀦 𑀓𑀢𑁆𑀢𑀭𑀬𑀝𑁆𑀞𑀺𑀓𑁄𑀝𑀺𑀬𑀁 𑀓𑀢𑀯𑀮𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑁂𑀦 𑀲𑀤𑁆𑀤𑀦𑀺𑀘𑁆𑀙𑀭𑀡𑀁 𑀤𑀻𑀖𑀚𑀸𑀢𑀺𑀓𑀸𑀤𑀺𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 𑀆𑀘𑀭𑀺𑀬𑀯𑀭𑁄 𑁋

‘‘𑀫𑀡𑀺𑀓𑀁 𑀧𑀺𑀴𑀓𑀁 𑀯𑀸𑀧𑀺, 𑀧𑀺𑀧𑁆𑀨𑀮𑁂 𑀆𑀭𑀓𑀡𑁆𑀝𑀓𑁂;

𑀞𑀧𑁂𑀢𑀼𑀁 𑀧𑀦 𑀬𑀁 𑀓𑀺𑀜𑁆𑀘𑀺, 𑀦 𑀘 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄.

‘‘𑀤𑀡𑁆𑀟𑀓𑁂𑀧𑀺 𑀧𑀭𑀺𑀘𑁆𑀙𑁂𑀤-𑀮𑁂𑀔𑀸𑀫𑀢𑁆𑀢𑀁 𑀢𑀼 𑀯𑀝𑁆𑀝𑀢𑀺;

𑀯𑀮𑀺𑀢𑁆𑀯𑀸 𑀘 𑀦𑀔𑀘𑁆𑀙𑁂𑀤𑀁, 𑀓𑀭𑁄𑀦𑁆𑀢𑀻𑀢𑀺 𑀳𑀺 𑀯𑀝𑁆𑀝𑀢𑀻’’𑀢𑀺.

𑀢𑀲𑁆𑀲 𑀯𑀡𑁆𑀡𑀦𑀸𑀬𑀫𑁆𑀧𑀺 𑀫𑀡𑀺𑀓𑀦𑁆𑀢𑀺 𑀣𑀽𑀮𑀩𑀼𑀩𑁆𑀩𑀼𑀴𑀁. 𑀧𑀻𑀴𑀓𑀦𑁆𑀢𑀺 𑀲𑀼𑀔𑀼𑀫𑀩𑀼𑀩𑁆𑀩𑀼𑀴𑀁. 𑀧𑀺𑀧𑁆𑀨𑀮𑁂𑀢𑀺 𑀯𑀢𑁆𑀣𑀘𑁆𑀙𑁂𑀤𑀦𑀲𑀢𑁆𑀣𑁂. 𑀆𑀭𑀓𑀡𑁆𑀝𑀓𑁂𑀢𑀺 𑀧𑀢𑁆𑀢𑀥𑀸𑀭𑀯𑀮𑀬𑀸𑀦𑀁 𑀯𑀺𑀚𑁆𑀛𑀦𑀓𑀡𑁆𑀝𑀓𑁂. 𑀞𑀧𑁂𑀢𑀼𑀦𑁆𑀢𑀺 𑀉𑀝𑁆𑀞𑀸𑀧𑁂𑀢𑀼𑀁. 𑀬𑀁 𑀓𑀺𑀜𑁆𑀘𑀻𑀢𑀺 𑀲𑁂𑀲𑀯𑀡𑁆𑀡𑀫𑀝𑁆𑀞𑀫𑁆𑀧𑀺 𑀘. 𑀤𑀡𑁆𑀟𑀓𑁂𑀢𑀺 𑀧𑀺𑀧𑁆𑀨𑀮𑀺𑀤𑀡𑁆𑀟𑀓𑁂. 𑀬𑀣𑀸𑀳 ‘‘𑀧𑀺𑀧𑁆𑀨𑀮𑀺𑀓𑁂𑀧𑀺 𑀫𑀡𑀺𑀓𑀁 𑀯𑀸 𑀧𑀺𑀴𑀓𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀡𑁆𑀟𑀓𑁂 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀻’’𑀢𑀺. 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀦𑁆𑀢𑀺 𑀆𑀡𑀺𑀩𑀦𑁆𑀥𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀏𑀓𑀸𑀯 𑀮𑁂𑀔𑀸 𑀯𑀝𑁆𑀝𑀢𑀻𑀢𑀺. 𑀯𑀮𑀺𑀢𑁆𑀯𑀸𑀢𑀺 𑀉𑀪𑀬𑀓𑁄𑀝𑀺𑀫𑀼𑀔𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀯𑀮𑀺𑀬𑁄 𑀕𑀸𑀳𑁂𑀢𑁆𑀯𑀸 𑀦𑀔𑀘𑁆𑀙𑁂𑀤𑀁 𑀬𑀲𑁆𑀫𑀸 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸𑀢𑀺 𑀆𑀕𑀢𑀸.

𑀉𑀢𑁆𑀢𑀭𑀸𑀭𑀡𑀺𑀬𑀁 𑀫𑀡𑁆𑀟𑀮𑀦𑁆𑀢𑀺 𑀉𑀢𑁆𑀢𑀭𑀸𑀭𑀡𑀺𑀬𑀸 𑀧𑀯𑁂𑀲𑀦𑀢𑁆𑀣𑀁 𑀆𑀯𑀸𑀝𑀫𑀡𑁆𑀟𑀮𑀁 𑀳𑁄𑀢𑀺. 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺𑀬𑀁 𑀉𑀚𑀼𑀓𑀫𑁂𑀯 𑀩𑀦𑁆𑀥𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀉𑀚𑀼𑀓𑀫𑁂𑀯𑀸𑀢𑀺 𑀇𑀫𑀺𑀦𑀸 𑀯𑀗𑁆𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 ¶ 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀅𑀜𑁆𑀚𑀦𑀺𑀬𑀫𑁆𑀧𑀺 𑀢𑀣𑀸 𑀤𑀲𑁆𑀲𑀺𑀢𑀁. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀓𑀧𑀲𑁆𑀲𑁂 ¶ 𑀯𑀸𑀢𑀺 𑀯𑀘𑀦𑀲𑁂𑀲𑁄, 𑀯𑀸𑀲𑀺𑀤𑀡𑁆𑀟𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑀡𑁆𑀟𑀓𑁄𑀝𑀻𑀦𑀁 𑀅𑀘𑀮𑀦𑀢𑁆𑀣𑀁 𑀩𑀦𑁆𑀥𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀺𑀬𑀮𑁄𑀳𑁂𑀦 𑀘𑀢𑀼𑀭𑀲𑁆𑀲𑀁 𑀯𑀸 𑀅𑀝𑁆𑀞𑀁𑀲𑀁 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁩. 𑀆𑀫𑀡𑁆𑀟𑀲𑀸𑀭𑀓𑁂𑀢𑀺 𑀆𑀫𑀮𑀓𑀨𑀮𑀸𑀦𑀺 𑀧𑀺𑀲𑀺𑀢𑁆𑀯𑀸 𑀢𑁂𑀦 𑀓𑀓𑁆𑀓𑁂𑀦 𑀓𑀢𑀢𑁂𑀮𑀪𑀸𑀚𑀦𑁂. 𑀢𑀢𑁆𑀣 𑀓𑀺𑀭 𑀧𑀓𑁆𑀔𑀺𑀢𑁆𑀢𑀁 𑀢𑁂𑀮𑀁 𑀲𑀻𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 𑁋

‘‘𑀉𑀢𑁆𑀢𑀭𑀸𑀭𑀡𑀺𑀬𑀁 𑀯𑀸𑀧𑀺, 𑀥𑀦𑀼𑀓𑁂 𑀧𑁂𑀮𑁆𑀮𑀤𑀡𑁆𑀟𑀓𑁂;

𑀫𑀸𑀮𑀸𑀓𑀫𑁆𑀫𑀸𑀤𑀺 𑀬𑀁 𑀓𑀺𑀜𑁆𑀘𑀺, 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺.

‘‘𑀲𑀡𑁆𑀟𑀸𑀲𑁂 𑀤𑀦𑁆𑀢𑀓𑀝𑁆𑀞𑀸𑀦𑀁, 𑀢𑀣𑀸 𑀙𑁂𑀤𑀦𑀯𑀸𑀲𑀺𑀬𑀸;

𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀮𑁄𑀳𑁂𑀦, 𑀩𑀦𑁆𑀥𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺.

‘‘𑀢𑀣𑀸 𑀓𑀢𑁆𑀢𑀭𑀤𑀡𑁆𑀟𑁂𑀧𑀺, 𑀘𑀺𑀢𑁆𑀢𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺;

𑀯𑀝𑁆𑀝𑀮𑁂𑀔𑀸𑀯 𑀯𑀝𑁆𑀝𑀦𑁆𑀢𑀺, 𑀏𑀓𑀸 𑀯𑀸 𑀤𑁆𑀯𑁂𑀧𑀺 𑀳𑁂𑀝𑁆𑀞𑀢𑁄.

‘‘𑀯𑀺𑀲𑀸𑀡𑁂 𑀦𑀸𑀴𑀺𑀬𑀁 𑀯𑀸𑀧𑀺, 𑀢𑀣𑁂𑀯𑀸𑀫𑀡𑁆𑀟𑀲𑀸𑀭𑀓𑁂;

𑀢𑁂𑀮𑀪𑀸𑀚𑀦𑀓𑁂 𑀲𑀩𑁆𑀩𑀁, 𑀯𑀡𑁆𑀡𑀫𑀝𑁆𑀞𑀁 𑀢𑀼 𑀯𑀝𑁆𑀝𑀢𑀻’’𑀢𑀺.

𑀝𑀻𑀓𑀸𑀬𑀫𑁆𑀧𑀺 𑀅𑀭𑀡𑀺𑀲𑀳𑀺𑀢𑁂 𑀪𑀦𑁆𑀢𑀓𑀺𑀘𑁆𑀘𑀓𑀭𑁄 𑀤𑀡𑁆𑀟𑁄 𑀉𑀢𑁆𑀢𑀭𑀸𑀭𑀡𑀻 𑀦𑀸𑀫. 𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀥𑀭𑀸𑀭𑀡𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑀼𑀓𑁆𑀔𑀮𑀤𑀡𑁆𑀟𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀙𑀦𑀓𑀬𑀦𑁆𑀢𑀥𑀦𑀼 𑀥𑀦𑀼𑀓𑀁 𑀦𑀸𑀫. 𑀫𑀼𑀲𑀮𑀫𑀢𑁆𑀣𑀓𑀧𑀻𑀴𑀦𑀤𑀡𑁆𑀟𑀓𑁄 𑀧𑁂𑀮𑁆𑀮𑀤𑀡𑁆𑀟𑀓𑁄 𑀦𑀸𑀫. 𑀲𑀡𑁆𑀟𑀸𑀲𑁂𑀢𑀺 𑀅𑀕𑁆𑀕𑀺𑀲𑀡𑁆𑀟𑀸𑀲𑁂. 𑀤𑀦𑁆𑀢𑀓𑀝𑁆𑀞𑀸𑀦𑀁 𑀙𑁂𑀤𑀦𑀯𑀸𑀲𑀺𑀬𑀸 𑀢𑀣𑀸 𑀬𑀁 𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀽𑀢𑀺 𑀯𑀸𑀲𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼. 𑀮𑁄𑀳𑁂𑀦𑀸𑀢𑀺 𑀓𑀧𑁆𑀧𑀺𑀬𑀮𑁄𑀳𑁂𑀦. 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀉𑀚𑀼𑀓𑀫𑁂𑀯 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀅𑀝𑁆𑀞𑀁𑀲𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀡𑁆𑀟𑀸𑀲𑁂𑀢𑀺 𑀅𑀕𑁆𑀕𑀺𑀲𑀡𑁆𑀟𑀸𑀲𑁂𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑁆𑀣 𑀲𑀽𑀘𑀺𑀲𑀡𑁆𑀟𑀸𑀲𑁄 𑀤𑀲𑁆𑀲𑀺𑀢𑁄 ¶ . 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀸 𑀅𑀬𑁄𑀧𑀝𑁆𑀝𑀯𑀮𑀬𑁂. ‘‘𑀉𑀧𑀭𑀺 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀫𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀺𑀲𑀸𑀡𑁂𑀢𑀺 𑀢𑁂𑀮𑀸𑀲𑀺𑀜𑁆𑀘𑀦𑀓𑀕𑀯𑀬𑀫𑀳𑀺𑀁𑀲𑀸𑀤𑀺𑀲𑀺𑀗𑁆𑀕𑁂. 𑀦𑀸𑀴𑀺𑀬𑀁 𑀯𑀸𑀧𑀻𑀢𑀺 𑀯𑁂𑀴𑀼𑀦𑀸𑀴𑀺𑀓𑀸𑀤𑀺𑀦𑀸𑀴𑀺𑀬𑀁. 𑀅𑀧𑀺-𑀲𑀤𑁆𑀤𑁂𑀦 𑀅𑀮𑀸𑀩𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀫𑀡𑁆𑀟𑀲𑀸𑀭𑀓𑁂𑀢𑀺 𑀆𑀫𑀮𑀓𑀘𑀼𑀡𑁆𑀡𑀫𑀬𑀢𑁂𑀮𑀖𑀝𑁂 ¶ . 𑀢𑁂𑀮𑀪𑀸𑀚𑀦𑀓𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀬𑁂𑀯 𑀢𑁂𑀮𑀪𑀸𑀚𑀦𑁂. 𑀲𑀩𑁆𑀩𑀁 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀻𑀢𑀺 𑀧𑀼𑀫𑀺𑀢𑁆𑀣𑀺𑀭𑀽𑀧𑀭𑀳𑀺𑀢𑀁 𑀫𑀸𑀮𑀸𑀓𑀫𑁆𑀫𑀸𑀤𑀺 𑀲𑀩𑁆𑀩𑀁 𑀯𑀡𑁆𑀡𑀫𑀝𑁆𑀞𑀁 𑀯𑀝𑁆𑀝𑀢𑀻𑀢𑀺 𑀆𑀕𑀢𑀁.

𑀪𑀽𑀫𑀢𑁆𑀣𑀭𑀡𑁂𑀢𑀺 𑀓𑀝𑀲𑀸𑀭𑀸𑀤𑀺𑀫𑀬𑁂 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀅𑀢𑁆𑀣𑀭𑀺𑀢𑀩𑁆𑀩𑀅𑀢𑁆𑀣𑀭𑀡𑁂. 𑀧𑀸𑀦𑀻𑀬𑀖𑀝𑁂𑀢𑀺 𑀇𑀫𑀺𑀦𑀸 𑀲𑀩𑁆𑀩𑀪𑀸𑀚𑀦𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀁…𑀧𑁂… 𑀯𑀝𑁆𑀝𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀜𑁆𑀘𑀸𑀤𑀻𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑁆𑀧𑀺 𑀯𑀝𑁆𑀝𑀢𑀺. 𑀢𑁂𑀮𑀪𑀸𑀚𑀦𑁂𑀲𑀼𑀬𑁂𑀯 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸 𑀢𑁂𑀮𑀪𑀸𑀚𑀦𑁂𑀦 𑀲𑀳 𑀅𑀕𑀡𑁂𑀢𑁆𑀯𑀸 𑀯𑀺𑀲𑀼𑀁 𑀫𑀜𑁆𑀘𑀸𑀤𑀻𑀦𑀁 𑀕𑀳𑀺𑀢𑀢𑁆𑀢𑀸 𑀘𑀸𑀢𑀺 𑀯𑀤𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀤𑀦𑁆𑀢𑀺, 𑀏𑀢𑁂𑀲𑀁 𑀧𑀦 𑀫𑀜𑁆𑀘𑀸𑀤𑀻𑀦𑀁 𑀳𑀢𑁆𑀣𑁂𑀦 𑀆𑀫𑀲𑀺𑀢𑀩𑁆𑀩𑀪𑀡𑁆𑀟𑀢𑁆𑀢𑀸 𑀇𑀢𑁆𑀣𑀺𑀭𑀽𑀧𑀫𑁂𑀢𑁆𑀣 𑀦 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁮𑁫) 𑀧𑀦 ‘‘𑀢𑀸𑀮𑀯𑀡𑁆𑀝𑀩𑀻𑀚𑀦𑀺𑀆𑀤𑀻𑀲𑀼 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀢𑀸𑀦𑀺 𑀓𑀼𑀜𑁆𑀘𑀺𑀓𑀸 𑀯𑀺𑀬 𑀧𑀭𑀺𑀳𑀭𑀡𑀻𑀬𑀸𑀦𑀺, 𑀅𑀣 𑀔𑁄 𑀉𑀘𑁆𑀘𑀸𑀯𑀘𑀸𑀦𑀺 𑀦 𑀥𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀓𑁂𑀯𑀮𑀜𑁆𑀳𑀺 𑀢𑀸𑀦𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀯𑀺𑀥𑀽𑀧𑀦𑀜𑁆𑀘 𑀢𑀸𑀮𑀯𑀡𑁆𑀝𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑁂𑀮𑀪𑀸𑀚𑀦𑁂𑀲𑀼 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺, 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀯𑀼𑀢𑁆𑀢𑀫𑁂𑀯 𑁋

‘‘𑀧𑀸𑀦𑀻𑀬𑀲𑁆𑀲 𑀉𑀴𑀼𑀗𑁆𑀓𑁂𑀧𑀺, 𑀤𑁄𑀡𑀺𑀬𑀁 𑀭𑀚𑀦𑀲𑁆𑀲𑀧𑀺;

𑀖𑀝𑁂 𑀨𑀮𑀓𑀧𑀻𑀞𑁂𑀧𑀺, 𑀯𑀮𑀬𑀸𑀥𑀸𑀭𑀓𑀸𑀤𑀺𑀓𑁂.

‘‘𑀢𑀣𑀸 𑀧𑀢𑁆𑀢𑀧𑀺𑀥𑀸𑀦𑁂 𑀘, 𑀢𑀸𑀮𑀯𑀡𑁆𑀝𑁂 𑀘 𑀩𑀻𑀚𑀦𑁂;

𑀧𑀸𑀤𑀧𑀼𑀜𑁆𑀙𑀦𑀺𑀬𑀁 𑀯𑀸𑀧𑀺, 𑀲𑀫𑁆𑀫𑀼𑀜𑁆𑀚𑀦𑀺𑀬𑀫𑁂𑀯 𑀘.

‘‘𑀫𑀜𑁆𑀘𑁂 ¶ 𑀪𑀽𑀫𑀢𑁆𑀣𑀭𑁂 𑀧𑀻𑀞𑁂, 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂𑀲𑀼 𑀘;

𑀫𑀸𑀮𑀸𑀓𑀫𑁆𑀫𑀸𑀤𑀺𑀓𑀁 𑀘𑀺𑀢𑁆𑀢𑀁, 𑀲𑀩𑁆𑀩𑀫𑁂𑀯 𑀘 𑀯𑀝𑁆𑀝𑀢𑀻’’𑀢𑀺.

𑁧𑁪. 𑀏𑀯𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑁂𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑁂𑀦𑀸𑀲𑀦𑁂 𑀓𑀣𑁂𑀢𑀼𑀁 ‘‘𑀲𑁂𑀦𑀸𑀲𑀦𑁂 𑀧𑀦𑀸’’𑀢𑁆𑀬𑀸𑀤𑀺𑀫𑀸𑀳. 𑀏𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀚𑁄𑀢𑀓𑁄. 𑀢𑁂𑀦 𑀲𑀩𑁆𑀩𑀭𑀢𑀦𑀫𑀬𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀚𑁄𑀢𑁂𑀢𑀺. 𑀬𑀤𑀺 𑀏𑀯𑀁 𑀓𑀺𑀲𑁆𑀫𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑁂 𑀲𑀦𑁆𑀢𑁂𑀧𑀺 𑀢𑀣𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀆𑀳 ‘‘𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑁋

‘‘𑀦𑀸𑀦𑀸𑀫𑀡𑀺𑀫𑀬𑀢𑁆𑀣𑀫𑁆𑀪-𑀓𑀯𑀸𑀝𑀤𑁆𑀯𑀸𑀭𑀪𑀺𑀢𑁆𑀢𑀺𑀓𑀁 ¶ ;

𑀲𑁂𑀦𑀸𑀲𑀦𑀫𑀦𑀼𑀜𑁆𑀜𑀸𑀢𑀁, 𑀓𑀸 𑀓𑀣𑀸 𑀯𑀡𑁆𑀡𑀫𑀝𑁆𑀞𑀓𑁂.

‘‘𑀲𑁄𑀯𑀡𑁆𑀡𑀺𑀬𑀁 𑀤𑁆𑀯𑀸𑀭𑀓𑀯𑀸𑀝𑀩𑀤𑁆𑀥𑀁;

𑀲𑀼𑀯𑀡𑁆𑀡𑀦𑀸𑀦𑀸𑀫𑀡𑀺𑀪𑀺𑀢𑁆𑀢𑀺𑀪𑀽𑀫𑀺𑀁;

𑀦 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀦𑀺𑀲𑁂𑀥𑀦𑀻𑀬𑀁;

𑀲𑁂𑀦𑀸𑀲𑀦𑀁 𑀯𑀝𑁆𑀝𑀢𑀺 𑀲𑀩𑁆𑀩𑀫𑁂𑀯𑀸’’𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀫𑁆𑀧𑀺 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) ‘‘𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑁄, 𑀢𑀲𑁆𑀫𑀸 𑀚𑀸𑀢𑀭𑀽𑀧𑀭𑀚𑀢𑀫𑀬𑀸 𑀲𑀩𑁆𑀩𑁂𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀆𑀫𑀸𑀲𑀸. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂 𑀭𑀢𑀦𑀫𑀡𑁆𑀟𑀧𑁂 𑀓𑀭𑁄𑀦𑁆𑀢𑀺 𑀨𑀮𑀺𑀓𑀢𑁆𑀣𑀫𑁆𑀪𑁂 𑀭𑀢𑀦𑀤𑀸𑀫𑀧𑀝𑀺𑀫𑀡𑁆𑀟𑀺𑀢𑁂. 𑀢𑀢𑁆𑀣 𑀲𑀩𑁆𑀩𑀼𑀧𑀓𑀭𑀡𑀸𑀦𑀺 𑀪𑀺𑀓𑁆𑀔𑀽𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺 𑀆𑀕𑀢𑀁. 𑀢𑀲𑁆𑀲𑀸 𑀯𑀡𑁆𑀡𑀦𑀸𑀬𑀁 𑀧𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁨𑁮𑁧) ‘‘𑀲𑀩𑁆𑀩𑀓𑀧𑁆𑀧𑀺𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀦𑀁 𑀆𑀫𑀲𑀦𑀕𑁄𑀧𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘𑀢𑀲𑁆𑀫𑀸’𑀢𑀺𑀆𑀤𑀺. ‘𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀫𑁂𑀯 ¶ 𑀲𑀼𑀯𑀡𑁆𑀡𑀫𑀬𑀁 𑀲𑁂𑀦𑀸𑀲𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀘 𑀯𑀝𑁆𑀝𑀦𑁆𑀢𑀺, 𑀦 𑀧𑀼𑀕𑁆𑀕𑀮𑀺𑀓𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀡𑁆𑀡𑀺𑀢𑀁.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀫𑁆𑀧𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦) ‘𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕𑀦𑁆𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀺 𑀓𑀯𑀸𑀝𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀢𑀸𑀮𑀯𑀡𑁆𑀝𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀫𑀬𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀭𑀸𑀯𑀸𑀦𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀁, 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀧𑀸𑀲𑀸𑀤𑀲𑁆𑀲 𑀤𑀸𑀲𑀺𑀤𑀸𑀲𑀁 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀕𑁄𑀫𑀳𑀺𑀁𑀲𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀲𑀸𑀤𑁂 𑀧𑀝𑀺𑀕𑁆𑀕𑀳𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀕𑁄𑀦𑀓𑀸𑀤𑀻𑀦𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸 𑀫𑀜𑁆𑀘𑀧𑀻𑀞𑁂𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀥𑀫𑁆𑀫𑀸𑀲𑀦𑁂 𑀧𑀦 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀕𑀢𑀁. 𑀢𑀲𑁆𑀲𑀸 𑀯𑀡𑁆𑀡𑀦𑀸𑀬𑀁 𑀧𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁦) ‘‘𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀻𑀢𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀺𑀓𑀁 𑀧𑀦 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀭𑀁 𑀪𑀺𑀓𑁆𑀔𑀼𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺 ‘𑀦 𑀢𑁆𑀯𑁂𑀯𑀸𑀳𑀁 𑀪𑀺𑀓𑁆𑀔𑀯𑁂 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩’𑀦𑁆𑀢𑀺 (𑀫𑀳𑀸𑀯. 𑁨𑁯𑁯) 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ¶ ‘𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸’𑀢𑀺 𑀦 𑀯𑀼𑀢𑁆𑀢𑀁, 𑀕𑁄𑀦𑀓𑀸𑀤𑀺𑀅𑀓𑀧𑁆𑀧𑀺𑀬𑀪𑀡𑁆𑀟𑀯𑀺𑀲𑀬𑁂𑀯 𑀏𑀯𑀁 𑀯𑀼𑀢𑁆𑀢𑀁, 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀢𑁂𑀲𑀁 𑀕𑀳𑀡𑁂 𑀤𑁄𑀲𑀸𑀪𑀸𑀯𑀸’’𑀢𑀺 𑀯𑀡𑁆𑀡𑀺𑀢𑀁.

𑀢𑀲𑁆𑀫𑀺𑀁𑀬𑁂𑀯 𑀔𑀦𑁆𑀥𑀓𑁂 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) ‘‘𑀲𑀘𑁂𑀧𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀜𑁆𑀘𑀲𑀢𑀁 𑀯𑀸 𑀫𑀜𑁆𑀘𑀲𑀳𑀲𑁆𑀲𑀁 𑀯𑀸 𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸𑀢𑀺 𑀤𑀸𑀢𑀩𑁆𑀩𑀸, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀦 𑀤𑀸𑀢𑀩𑁆𑀩𑀸’’𑀢𑀺 𑀆𑀕𑀢𑀁. 𑀢𑀲𑁆𑀲𑀸 𑀯𑀡𑁆𑀡𑀦𑀸𑀬𑀁𑀬𑁂𑀯 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀅𑀓𑀧𑁆𑀧𑀺𑀬𑀫𑀜𑁆𑀘𑀁 ‘𑀲𑀗𑁆𑀖𑀲𑁆𑀲𑀸’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺, ‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀲𑁆𑀲𑁂𑀯 ¶ 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀔𑁂𑀢𑁆𑀢𑀸𑀤𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀪𑀕𑀯𑀢𑁄 𑀆𑀡𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀳𑀺 𑀮𑀚𑁆𑀚𑀺𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀽𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀼𑀝𑁆𑀞𑀼 𑀫𑀦𑀲𑀺𑀓𑀸𑀢𑀩𑁆𑀩𑀫𑀺𑀤𑀁 𑀞𑀸𑀦𑀁.

𑀦𑀦𑀼 𑀘 𑀲𑁂𑀦𑀸𑀲𑀦𑁂 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀦𑀸𑀫 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀅𑀣 𑀓𑀲𑁆𑀫𑀸 ‘‘𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀅𑀜𑁆𑀜𑀢𑁆𑀭 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀸𑀤𑀺𑀓𑀫𑁆𑀫𑀁 𑀲𑀦𑁆𑀥𑀸𑀬 𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁, 𑀦 𑀢𑀤𑀪𑀸𑀯𑁄𑀢𑀺. 𑀬𑀤𑀺 𑀏𑀯𑀁 𑀢𑀁 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀆𑀘𑀭𑀺𑀬𑁂𑀦 𑀯𑀢𑁆𑀢𑀩𑁆𑀩𑀁, 𑀓𑀢𑀫𑀁 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀦𑀸𑀫𑀸𑀢𑀺 𑀧𑀼𑀘𑁆𑀙𑀸𑀬𑀫𑀸𑀳 ‘‘𑀯𑀺𑀭𑀼𑀤𑁆𑀥…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀅𑀜𑁆𑀜𑁂𑀲𑀦𑁆𑀢𑀺 𑀲𑀻𑀫𑀲𑁆𑀲𑀸𑀫𑀺𑀓𑀸𑀦𑀁. 𑀭𑀸𑀚𑀯𑀮𑁆𑀮𑀪𑁂𑀳𑀻𑀢𑀺 𑀮𑀚𑁆𑀚𑀺𑀧𑁂𑀲𑀮𑀸𑀦𑀁 𑀉𑀧𑁄𑀲𑀣𑀸𑀤𑀺𑀅𑀦𑁆𑀢𑀭𑀸𑀬𑀓𑀭𑀸 𑀅𑀮𑀚𑁆𑀚𑀺𑀦𑁄 𑀪𑀺𑀦𑁆𑀦𑀮𑀤𑁆𑀥𑀺𑀓𑀸 𑀘 𑀪𑀺𑀓𑁆𑀔𑀽 𑀅𑀥𑀺𑀧𑁆𑀧𑁂𑀢𑀸 𑀢𑁂𑀳𑀺 𑀲𑀳 𑀉𑀧𑁄𑀲𑀣𑀸𑀤𑀺𑀓𑀭𑀡𑀸𑀬𑁄𑀕𑀢𑁄. 𑀢𑁂𑀦 𑀘 ‘‘𑀲𑀻𑀫𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀮𑀚𑁆𑀚𑀺𑀧𑀭𑀺𑀲𑀸𑀢𑀺 𑀢𑁂𑀲𑀁 𑀲𑀻𑀫𑀲𑁆𑀲𑀸𑀫𑀺𑀓𑀸𑀦𑀁 𑀅𑀦𑀼𑀩𑀮𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸 𑀮𑀚𑁆𑀚𑀺𑀧𑀭𑀺𑀲𑀸. 𑀪𑀺𑀓𑁆𑀔𑀽𑀳𑀺 𑀓𑀢𑀦𑁆𑀢𑀺 𑀬𑀁 𑀅𑀮𑀚𑁆𑀚𑀻𑀦𑀁 𑀲𑁂𑀦𑀸𑀲𑀦𑀪𑁂𑀤𑀦𑀸𑀤𑀺𑀓𑀁 𑀮𑀚𑁆𑀚𑀺𑀪𑀺𑀓𑁆𑀔𑀽𑀳𑀺 𑀓𑀢𑀁, 𑀢𑀁 𑀲𑀩𑁆𑀩𑀁 𑀲𑀼𑀓𑀢𑀫𑁂𑀯 𑀅𑀮𑀚𑁆𑀚𑀺𑀦𑀺𑀕𑁆𑀕𑀳𑀢𑁆𑀣𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀢𑁄.

𑀏𑀢𑁆𑀣 𑀘 𑀲𑀺𑀬𑀸 𑁋 ‘‘𑀅𑀜𑁆𑀜𑁂𑀲𑀁 𑀲𑀻𑀫𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀲𑀻𑀫𑀸 𑀦𑀸𑀫 𑀩𑀳𑀼𑀯𑀺𑀥𑀸, 𑀓𑀢𑀭𑀲𑀻𑀫𑀁 𑀲𑀦𑁆𑀥𑀸𑀬𑀸𑀢𑀺? 𑀩𑀤𑁆𑀥𑀲𑀻𑀫𑀁 𑀲𑀦𑁆𑀥𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀫𑀸 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑀸𑀬𑀫𑀓𑀢𑁆𑀣𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣.𑀝𑀻. 𑁨.𑁮𑁫) ‘‘𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀸 𑀅𑀮𑀚𑁆𑀚𑀺𑀦𑁄 𑀭𑀸𑀚𑀓𑀼𑀮𑀽𑀧𑀓𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺 ¶ 𑀯𑀼𑀢𑁆𑀢𑀢𑁆𑀢𑀸, 𑀉𑀧𑁄𑀲𑀣𑀸𑀤𑀺𑀯𑀺𑀦𑀬𑀓𑀫𑁆𑀫𑀔𑁂𑀢𑁆𑀢𑀪𑀽𑀢𑀸𑀬 𑀏𑀯 𑀲𑀻𑀫𑀸𑀬 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ¶ . 𑀬𑀤𑀺 𑀏𑀯𑀁 𑀕𑀸𑀫𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑁄𑀧𑀺 𑀢𑀁𑀔𑁂𑀢𑁆𑀢𑀪𑀽𑀢𑀸 𑀏𑀯, 𑀢𑀲𑁆𑀫𑀸 𑀢𑀸𑀧𑀺 𑀲𑀦𑁆𑀥𑀸𑀬𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁 𑀢𑀸𑀲𑀁 𑀅𑀩𑀤𑁆𑀥𑀲𑀻𑀫𑀢𑁆𑀢𑀸, 𑀦 𑀢𑁂 𑀢𑀸𑀲𑀁 𑀲𑀸𑀫𑀺𑀓𑀸, 𑀩𑀤𑁆𑀥𑀲𑀻𑀫𑀸𑀬𑁂𑀯 𑀪𑀺𑀓𑁆𑀔𑀽𑀦𑀁 𑀓𑀺𑀭𑀺𑀬𑀸𑀬 𑀲𑀺𑀤𑁆𑀥𑀢𑁆𑀢𑀸 𑀢𑀸𑀲𑀁𑀬𑁂𑀯 𑀢𑁂 𑀲𑀸𑀫𑀺𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀧𑀦 𑀲𑀻𑀫𑀲𑁆𑀲𑀸𑀫𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀉𑀧𑀘𑀸𑀭𑀲𑀻𑀫𑀸𑀧𑀺 𑀢𑀁𑀔𑁂𑀢𑁆𑀢𑀪𑀽𑀢𑀸’’𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀢𑀲𑁆𑀲𑀸 𑀢𑀤𑀓𑁆𑀔𑁂𑀢𑁆𑀢𑀪𑀸𑀯𑀁 𑀉𑀧𑀭𑀺 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀤𑀻𑀲𑀼 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁫𑁬 𑀆𑀤𑀬𑁄) 𑀓𑀣𑀬𑀺𑀲𑁆𑀲𑀸𑀫. 𑀅𑀧𑀺𑀘 𑀕𑀸𑀫𑀲𑀻𑀫𑀸𑀬 𑀅𑀜𑁆𑀜𑁂𑀲𑀁 𑀲𑁂𑀦𑀸𑀲𑀦𑀓𑀭𑀡𑀲𑁆𑀲 𑀧𑀝𑀺𑀲𑁂𑀥𑀺𑀢𑀼𑀫𑀬𑀼𑀢𑁆𑀢𑀢𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀜𑁆𑀘 𑀲𑀩𑁆𑀩𑀤𑀸 𑀅𑀢𑀺𑀝𑁆𑀞𑀦𑀢𑁄 𑀩𑀤𑁆𑀥𑀲𑀻𑀫𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀪𑀺𑀦𑁆𑀤𑀸𑀧𑁂𑀬𑁆𑀬 𑀯𑀸, 𑀅𑀦𑀼𑀧𑀯𑀚𑁆𑀚𑁄𑀢𑀺 𑀇𑀤𑀁 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀻 𑀯𑀺𑀬 𑀲𑀩𑁆𑀩𑀣𑀸 𑀅𑀦𑀼𑀧𑀬𑁄𑀕𑀸𑀭𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀧𑀜𑁆𑀘𑀯𑀡𑁆𑀡𑀲𑀼𑀢𑁆𑀢𑁂𑀳𑀺 𑀯𑀺𑀦𑀤𑁆𑀥𑀙𑀢𑁆𑀢𑀸𑀤𑀺𑀓𑀁, 𑀢𑀢𑁆𑀣 𑀅𑀓𑀧𑁆𑀧𑀺𑀬𑀪𑀸𑀕𑁄𑀯 𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀢𑀤𑀯𑀲𑁂𑀲𑁄, 𑀢𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸𑀢𑀺 𑀙𑀺𑀦𑁆𑀤𑀦𑁆𑀢𑁄 𑀉𑀧𑀯𑀚𑁆𑀚𑁄𑀯 𑀳𑁄𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀪𑁂𑀲𑀚𑁆𑀚𑀸𑀤𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁫. 𑀏𑀯𑀁 𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀪𑁂𑀲𑀚𑁆𑀚𑀓𑀭𑀡𑀧𑀭𑀺𑀢𑁆𑀢𑀧𑀝𑀺𑀲𑀦𑁆𑀣𑀸𑀭𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀪𑁂𑀲𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀲𑀓𑁆𑀓𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀪𑁂𑀲𑀚𑁆𑀚𑀁. 𑀓𑀺𑀁 𑀢𑀁? 𑀢𑀺𑀓𑀺𑀘𑁆𑀙𑀦𑀁 ¶ . 𑀓𑀭𑀺𑀬𑀢𑁂 𑀓𑀭𑀡𑀁, 𑀪𑁂𑀲𑀚𑁆𑀚𑀲𑁆𑀲 𑀓𑀭𑀡𑀁 𑀪𑁂𑀲𑀚𑁆𑀚𑀓𑀭𑀡𑀁, 𑀯𑁂𑀚𑁆𑀚𑀓𑀫𑁆𑀫𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀲𑀫𑀦𑁆𑀢𑀢𑁄 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀧𑀭𑀺𑀢𑁆𑀢𑀁, 𑀆𑀭𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀣𑀭𑀡𑀁 𑀧𑀝𑀺𑀲𑀦𑁆𑀣𑀸𑀭𑁄, 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀜𑁆𑀜𑁂𑀲𑀁 𑀲𑀫𑁆𑀩𑀦𑁆𑀥𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀫𑀸𑀢𑀺𑀓𑀸𑀬𑀁 ‘‘𑀪𑁂𑀲𑀚𑁆𑀚𑀓𑀭𑀡𑀫𑁆𑀧𑀺 𑀘 𑀧𑀭𑀺𑀢𑁆𑀢𑀁, 𑀧𑀝𑀺𑀲𑀦𑁆𑀣𑀸𑀭𑁄’’𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀫𑀬𑀸 𑀯𑀼𑀢𑁆𑀢𑁄 ¶ , 𑀢𑀲𑁆𑀫𑀺𑀁 𑀲𑀫𑀪𑀺𑀦𑀺𑀯𑀺𑀝𑁆𑀞𑁂 𑀪𑁂𑀲𑀚𑁆𑀚𑀓𑀭𑀡𑀯𑀺𑀦𑀺𑀘𑁆𑀙𑀬𑁂. 𑀲𑀳𑀥𑀫𑁆𑀫𑁄 𑀏𑀢𑁂𑀲𑀦𑁆𑀢𑀺 𑀲𑀳𑀥𑀫𑁆𑀫𑀺𑀓𑀸, 𑀢𑁂𑀲𑀁, 𑀏𑀓𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀲𑀦𑁂 𑀲𑀳𑀲𑀺𑀓𑁆𑀔𑀫𑀸𑀦𑀥𑀫𑁆𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀳𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑀸 𑀲𑀳𑀥𑀫𑁆𑀫𑀺𑀓𑀸, 𑀢𑁂𑀲𑀁, 𑀲𑀳𑀥𑀫𑁆𑀫𑀲𑀗𑁆𑀔𑀸𑀢𑁂 𑀲𑀺𑀓𑁆𑀔𑀸𑀧𑀤𑁂 𑀲𑀺𑀓𑁆𑀔𑀫𑀸𑀦𑀪𑀸𑀯𑁂𑀦 𑀦𑀺𑀬𑀼𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀲𑀻𑀮𑀸𑀤𑀺𑀬𑀼𑀢𑁆𑀢𑀪𑀸𑀯𑁂𑀦 𑀲𑀫𑀢𑁆𑀢𑀸 𑀲𑀫𑀲𑀻𑀮𑀲𑀤𑁆𑀥𑀸𑀧𑀜𑁆𑀜𑀸𑀦𑀁. 𑀏𑀢𑁂𑀦 𑀤𑀼𑀲𑁆𑀲𑀻𑀮𑀸𑀦𑀁 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀜𑁆𑀘 𑀅𑀓𑀸𑀢𑀼𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀢𑁂𑀲𑀁 𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄. 𑀦 𑀓𑀭𑀺𑀬𑀺𑀢𑁆𑀣𑀸𑀢𑀺 𑀅𑀓𑀢𑀸, 𑀅𑀬𑀼𑀢𑁆𑀢𑀯𑀲𑁂𑀦 𑀅𑀓𑀢𑀧𑀼𑀩𑁆𑀩𑀸 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁬) 𑀧𑀦 ‘‘𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀦 𑀯𑀺𑀜𑁆𑀜𑀢𑁆𑀢𑀺𑀬𑀸. 𑀲𑀸 𑀳𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀓𑀢𑀸𑀧𑀺 𑀅𑀓𑀢𑀸 𑀯𑀺𑀬𑀸𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺, ‘𑀯𑀤𑁂𑀬𑁆𑀬𑀸𑀣 𑀪𑀦𑁆𑀢𑁂 𑀬𑁂𑀦𑀢𑁆𑀣𑁄’𑀢𑀺 𑀏𑀯𑀁 𑀅𑀓𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀻𑀢𑀺 𑀮𑀺𑀔𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁮𑁫) ‘‘𑀕𑀺𑀮𑀸𑀦𑀲𑁆𑀲 𑀅𑀢𑁆𑀣𑀸𑀬 𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀓𑀢𑀸𑀧𑀺 𑀅𑀓𑀢𑀸 𑀯𑀺𑀬𑀸𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺, ‘𑀯𑀤 𑀪𑀦𑁆𑀢𑁂 𑀧𑀘𑁆𑀘𑀬𑁂𑀦𑀸’𑀢𑀺 𑀏𑀯𑀁 𑀅𑀓𑀢𑀧𑀯𑀸𑀭𑀡𑀝𑁆𑀞𑀸𑀦𑁂 𑀘 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀻’’𑀢𑀺.

𑁧𑁬. 𑀧𑀝𑀺𑀬𑀸𑀤𑀺𑀬𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑀺. 𑀅𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀬𑀼𑀢𑁆𑀢𑀢𑀸𑀯𑀲𑁂𑀦 𑀧𑀦𑁂𑀢𑁆𑀣 𑀅𑀓𑀭𑀡𑀧𑁆𑀧𑀝𑀺𑀓𑁆𑀔𑁂𑀧𑁄 𑀯𑀼𑀢𑁆𑀢𑁄, 𑀦 𑀆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀁 ¶ 𑀧𑀭𑀺𑀓𑀫𑁆𑀫𑀁 𑀅𑀦𑀸𑀫𑀲𑀦𑁆𑀢𑁂𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑀭𑀻𑀭𑀸𑀤𑀻𑀦𑀁 𑀅𑀦𑀸𑀫𑀸𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀸𑀯 𑀜𑀸𑀢𑀓𑀸 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀬𑀸𑀯 𑀢𑀲𑁆𑀲 𑀜𑀸𑀢𑀓𑀸 𑀦 𑀧𑀲𑁆𑀲𑀦𑁆𑀢𑀺. ‘‘𑀢𑀺𑀢𑁆𑀣𑀺𑀬𑀪𑀽𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀲𑀳𑀢𑁆𑀣𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁬) 𑀯𑀼𑀢𑁆𑀢𑀁.

𑁧𑁭. 𑀧𑀺𑀢𑀼 𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸. 𑀫𑀸𑀢𑀼 𑀪𑀸𑀢𑀸 𑀫𑀸𑀢𑀼𑀮𑁄. 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀝𑀻𑀓𑀸𑀲𑀼 𑀯𑀼𑀢𑁆𑀢𑀁. ‘‘𑀢𑁂𑀲𑀁𑀬𑁂𑀯 𑀲𑀦𑁆𑀢𑀓𑀁 𑀪𑁂𑀲𑀚𑁆𑀚𑀁 𑀕𑀳𑁂𑀢𑁆𑀯𑀸 𑀓𑁂𑀯𑀮𑀁 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀘𑁂 𑀧𑀦 𑀦𑀧𑁆𑀧𑀳𑁄𑀦𑁆𑀢𑀺 𑀬𑀸𑀘𑀦𑁆𑀢𑀺 𑀘, 𑀤𑁂𑀣 𑀦𑁄 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀝𑀺𑀤𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀢𑁂𑀲𑀁 𑀪𑁂𑀲𑀚𑁆𑀚𑀲𑁆𑀲 𑀅𑀧𑁆𑀧𑀳𑁄𑀦𑀓𑀢𑁆𑀢𑀸 𑀪𑁂𑀲𑀚𑁆𑀚𑀫𑁂𑀯 𑀬𑀸𑀘𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁄 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀦 𑀬𑀸𑀘𑀦𑁆𑀢𑀻𑀢𑀺 𑀮𑀚𑁆𑀚𑀸𑀬 𑀦 𑀬𑀸𑀘𑀦𑁆𑀢𑀺, 𑀕𑀸𑀭𑀯𑁂𑀦 𑀯𑀸. ‘‘𑀆𑀪𑁄𑀕𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀣𑀸 𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁮) 𑀧𑀦 ‘‘𑀆𑀪𑁄𑀕𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀓𑀢𑁆𑀢𑀩𑁆𑀩𑀓𑀭𑀡𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀆𑀪𑁄𑀕𑀁 𑀧𑀦 𑀅𑀓𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 ¶ 𑀢𑀻𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀮𑀺𑀔𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀝𑀻𑀓𑀸𑀬𑀫𑁆𑀧𑀺 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀮𑀺𑀔𑀺𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) 𑀧𑀦 𑀢𑀁 𑀯𑀘𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀓𑁂𑀘𑀺 𑀧𑀦 ‘‘𑀆𑀪𑁄𑀕𑀁 𑀅𑀓𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀪𑁂𑀲𑀚𑁆𑀚𑀓𑀭𑀡𑀲𑁆𑀲, 𑀧𑀸𑀴𑀺𑀬𑀁 ‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀏𑀯𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲 𑀲𑀼𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺𑀲𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘𑀢𑁂𑀲𑀜𑁆𑀜𑁂𑀯 𑀲𑀦𑁆𑀢𑀓’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺.

𑀏𑀢𑁂 𑀤𑀲 𑀜𑀸𑀢𑀓𑁂 𑀞𑀧𑁂𑀢𑁆𑀯𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀜𑀸𑀢𑀓𑀸 𑀏𑀯𑀸𑀢𑀺 𑀢𑁂𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸. 𑀢𑁂𑀦 𑀅𑀜𑁆𑀜𑁂𑀲𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀸𑀢𑀓𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁 ¶ . 𑀢𑁂𑀦𑁂𑀯𑀸𑀳 ‘‘𑀏𑀢𑁂𑀲𑀁 𑀧𑀼𑀢𑁆𑀢𑀧𑀭𑀫𑁆𑀧𑀭𑀸𑀬𑀸’’𑀢𑀺𑀆𑀤𑀺. 𑀓𑀼𑀮𑀧𑀭𑀺𑀯𑀝𑁆𑀝𑀸𑀢𑀺 𑀓𑀼𑀮𑀸𑀦𑀁 𑀧𑀝𑀺𑀧𑀸𑀝𑀺, 𑀓𑀼𑀮𑀧𑀭𑀫𑁆𑀧𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀦𑀸 𑀓𑀭𑁄𑀦𑁆𑀢𑀲𑁆𑀲, ‘‘𑀢𑀸𑀯𑀓𑀸𑀮𑀺𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀤𑁂𑀦𑁆𑀢𑀲𑁆𑀲𑀧𑀺 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀺𑀤𑀼𑀓𑁆𑀓𑀝𑀁 𑀯𑀺𑀦𑀸 𑀫𑀺𑀘𑁆𑀙𑀸𑀚𑀻𑀯𑀦𑀁 𑀯𑀸 𑀓𑀼𑀮𑀤𑀽𑀲𑀦𑀁 𑀯𑀸 𑀦 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻’’𑀢𑀺. 𑀜𑀸𑀢𑀓𑀸𑀦𑀜𑁆𑀳𑀺 𑀲𑀦𑁆𑀢𑀓𑀁 𑀬𑀸𑀘𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀼𑀮𑀤𑀽𑀲𑀦𑀸𑀤𑀺 𑀦 𑀲𑀺𑀬𑀸. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁮𑁫) ‘‘𑀫𑀬𑁆𑀳𑀁 𑀤𑀲𑁆𑀲𑀦𑁆𑀢𑀺 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀧𑀘𑁆𑀘𑀸𑀲𑀸𑀬 𑀓𑀭𑁄𑀦𑁆𑀢𑀲𑁆𑀲𑀧𑀺 𑀬𑀸𑀘𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀜𑀸𑀢𑀓𑁂𑀲𑀼 𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁬) 𑀧𑀦 ‘‘𑀯𑁂𑀚𑁆𑀚𑀓𑀫𑁆𑀫𑀁 𑀯𑀸 𑀓𑀼𑀮𑀤𑀽𑀲𑀓𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀯𑀘𑀦𑀢𑁄 𑀬𑀸𑀯 𑀲𑀢𑁆𑀢𑀫𑁄 𑀓𑀼𑀮𑀧𑀭𑀺𑀯𑀝𑁆𑀝𑁄, 𑀢𑀸𑀯 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 ‘‘𑀘𑀽𑀴𑀫𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 𑀘𑀽𑀴𑀫𑀸𑀢𑀼𑀬𑀸 𑀲𑀸𑀫𑀺𑀓𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀚𑁆𑀛𑀸𑀬𑀲𑁆𑀲 𑀆𑀳𑀭𑀸𑀫𑀸𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑁂𑀦 𑀫𑀫 𑀜𑀸𑀢𑀓𑀸𑀦𑀁 𑀪𑁂𑀲𑀚𑁆𑀚𑀁 𑀆𑀳𑀭𑀣𑀸𑀢𑀺 𑀆𑀡𑀢𑁆𑀢𑁂𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀲𑀸𑀫𑀡𑁂𑀭𑀸𑀤𑀻𑀦𑀁 𑀅𑀧𑀘𑁆𑀘𑀸𑀲𑀸𑀬𑀧𑀺 𑀧𑀭𑀚𑀦𑀲𑁆𑀲 𑀪𑁂𑀲𑀚𑁆𑀚𑀓𑀭𑀡𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀬𑁂𑀲𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸’’𑀢𑀺𑀆𑀤𑀺𑀦𑀸, ‘‘𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑀺 𑀯𑀸’’𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) 𑀆𑀕𑀦𑁆𑀢𑀼𑀓𑀘𑁄𑀭𑀸𑀤𑀻𑀦𑀁 𑀓𑀭𑁄𑀦𑁆𑀢𑁂𑀦𑀧𑀺 𑀫𑀦𑀼𑀲𑁆𑀲𑀸 𑀦𑀸𑀫 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀢𑁂𑀳𑀺 𑀮𑀸𑀪𑀁 𑀅𑀧𑀢𑁆𑀣𑀬𑀦𑁆𑀢𑁂𑀦, 𑀧𑀘𑁆𑀘𑀸𑀲𑀸𑀬 𑀓𑀭𑁄𑀦𑁆𑀢𑀲𑁆𑀲 ¶ 𑀧𑀦 𑀯𑁂𑀚𑁆𑀚𑀓𑀫𑁆𑀫𑀓𑀼𑀮𑀤𑀽𑀲𑀦𑀸𑀤𑀺𑀦𑀸 ¶ 𑀤𑁄𑀲𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀉𑀧𑀓𑀸𑀭𑁂 𑀓𑀢𑁂 𑀲𑀸𑀲𑀦𑀲𑁆𑀲 𑀕𑀼𑀡𑀁 𑀜𑀢𑁆𑀯𑀸 𑀧𑀲𑀻𑀤𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀻𑀢𑀺 𑀓𑀭𑀡𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀝𑁆𑀞𑀸𑀦𑀯𑀺𑀪𑀸𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑁆𑀢𑀧𑁆𑀧𑀲𑀗𑁆𑀕𑀢𑁄 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀤𑀸𑀢𑀼𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀲𑁆𑀲𑁂𑀯 𑀯𑀢𑁆𑀢𑀩𑁆𑀩𑀢𑁄. 𑀅𑀧𑀘𑁆𑀘𑀸𑀲𑀻𑀲𑀦𑀜𑁆𑀘 𑀫𑀺𑀘𑁆𑀙𑀸𑀚𑀻𑀯𑀓𑀼𑀮𑀤𑀽𑀲𑀦𑀸𑀤𑀺𑀤𑁄𑀲𑀦𑀺𑀲𑁂𑀥𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁 𑀦 𑀪𑁂𑀲𑀚𑁆𑀚𑀓𑀭𑀡𑀲𑀗𑁆𑀔𑀸𑀢𑀸𑀬 𑀇𑀫𑀺𑀲𑁆𑀲𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀦𑀢𑁆𑀣𑀁 𑀆𑀕𑀦𑁆𑀢𑀼𑀓𑀘𑁄𑀭𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀁 𑀤𑀸𑀦𑁂𑀦𑁂𑀯 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀦𑀢𑁄𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁮. 𑀢𑁂𑀦𑁂𑀯 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀧𑀺 𑀅𑀓𑀸𑀢𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀁 𑀓𑀼𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀪𑁂𑀲𑀚𑁆𑀚𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀅𑀜𑁆𑀜𑀫𑀜𑁆𑀜𑀁 𑀧𑀦 𑀓𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀇𑀤𑀁 𑀧𑀭𑀺𑀬𑀸𑀬𑀢𑁆𑀢𑀸 𑀯𑀝𑁆𑀝𑀢𑀺. 𑀏𑀯𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀇𑀤𑀜𑁆𑀘𑀺𑀤𑀜𑁆𑀘 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀣𑁂𑀦𑁆𑀢𑀲𑁆𑀲𑀧𑀺 𑀦𑁂𑀯𑀢𑁆𑀣𑀺 𑀤𑁄𑀲𑁄𑀢𑀺 𑀆𑀘𑀭𑀺𑀬𑀸. 𑀧𑀼𑀘𑁆𑀙𑀦𑁆𑀢𑀻𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑀭𑁄𑀕𑀻𑀦𑀁 𑀧𑀭𑀺𑀬𑀸𑀬𑁂𑀦𑀧𑀺 𑀯𑀢𑁆𑀯𑀸 𑀯𑀺𑀘𑀭𑀡𑀁 𑀅𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀘𑁆𑀙𑀺𑀢𑀲𑁆𑀲𑀧𑀺 𑀧𑀦 𑀧𑀘𑁆𑀘𑀸𑀲𑀻𑀲𑀦𑁆𑀢𑀲𑁆𑀲 𑀧𑀭𑀺𑀬𑀸𑀬𑀓𑀣𑀸𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀫𑀼𑀮𑁆𑀮𑀧𑁂𑀲𑀻𑀢𑀺 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀏𑀯 𑀅𑀜𑁆𑀜𑀫𑀜𑁆𑀜𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀆𑀘𑀭𑀺𑀬𑀪𑀸𑀕𑁄𑀢𑀺 𑀯𑀺𑀦𑀬𑀸𑀘𑀸𑀭𑀁 𑀅𑀓𑁄𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀸𑀘𑀺𑀓𑁆𑀔𑀡𑁂𑀦 𑀯𑁂𑀚𑁆𑀚𑀸𑀘𑀭𑀺𑀬𑀪𑀸𑀕𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁮𑁫) 𑀧𑀦 ‘‘𑀯𑀺𑀦𑀬𑀮𑀓𑁆𑀔𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀘𑀭𑀺𑀬𑀲𑁆𑀲 𑀢𑀤𑀦𑀼𑀭𑀽𑀧𑀯𑁄𑀳𑀸𑀭𑀸𑀲𑀫𑁆𑀪𑀯𑀢𑁄 𑀈𑀤𑀺𑀲𑀲𑁆𑀲 𑀮𑀸𑀪𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 ‘𑀆𑀘𑀭𑀺𑀬𑀪𑀸𑀕𑁄 𑀦𑀸𑀫 𑀅𑀬’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑁂 ¶ 𑀧𑀓𑀢𑀜𑁆𑀜𑀼𑀦𑀸 𑀆𑀘𑀭𑀺𑀬𑁂𑀦 𑀮𑀪𑀺𑀢𑀩𑁆𑀩𑀪𑀸𑀕𑁄 𑀅𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬 𑀤𑀺𑀦𑁆𑀦𑁂𑀧𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀺𑀥𑀸𑀦𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸 ‘𑀓𑀧𑁆𑀧𑀺𑀬𑀯𑀲𑁂𑀦𑀸’𑀢𑀺 𑀯𑀼𑀢𑁆𑀢𑀁, ‘𑀧𑀼𑀧𑁆𑀨𑀁 𑀆𑀳𑀭𑀣𑀸’𑀢𑀺𑀆𑀤𑀺𑀦𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁮𑁫) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) 𑀧𑀦 ‘‘𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀬𑀫𑀸𑀦𑀁 𑀭𑀽𑀧𑀺𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀪𑀚𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯𑀸𑀢𑀺 𑀆𑀳 ‘𑀓𑀧𑁆𑀧𑀺𑀬𑀯𑀲𑁂𑀦 𑀕𑀸𑀳𑀸𑀧𑁂𑀢𑁆𑀯𑀸’𑀢𑀺. ‘𑀅𑀫𑁆𑀳𑀸𑀓𑀁 𑀭𑀽𑀧𑀺𑀬𑀁 𑀦 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀁 𑀧𑀼𑀧𑁆𑀨𑀁 𑀯𑀝𑁆𑀝𑀢𑀻’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀧𑁆𑀧𑀺𑀬𑁂𑀦 𑀓𑀫𑁆𑀫𑁂𑀦 𑀕𑀸𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁬) 𑀧𑀦 ‘‘𑀓𑀧𑁆𑀧𑀺𑀬𑀯𑀲𑁂𑀦𑀸𑀢𑀺 𑀅𑀫𑁆𑀳𑀸𑀓𑀁 𑀧𑀼𑀧𑁆𑀨𑀁 ¶ 𑀆𑀦𑁂𑀣𑀸𑀢𑀺𑀆𑀤𑀺𑀦𑀸. ‘𑀧𑀽𑀚𑀁 𑀅𑀓𑀸𑀲𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀬𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀪𑁂𑀲𑀚𑁆𑀚𑀓𑀭𑀡𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄.

𑁧𑁯. 𑀏𑀯𑀁 𑀪𑁂𑀲𑀚𑁆𑀚𑀓𑀭𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀢𑁆𑀢𑀓𑀭𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀫𑀸𑀳 ‘‘𑀧𑀭𑀺𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀤𑀺 ‘‘𑀧𑀭𑀺𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀭𑁄𑀦𑁆𑀢𑀺, 𑀪𑁂𑀲𑀚𑁆𑀚𑀓𑀭𑀡𑀁 𑀯𑀺𑀬 𑀕𑀺𑀳𑀺𑀓𑀫𑁆𑀫𑀁 𑀯𑀺𑀬 𑀘 𑀳𑁄𑀢𑀻𑀢𑀺 ‘‘𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀥𑀫𑁆𑀫𑀚𑁆𑀛𑁂𑀲𑀦𑀢𑁆𑀢𑀸 𑀅𑀦𑀚𑁆𑀛𑀺𑀝𑁆𑀞𑁂𑀦𑀧𑀺 𑀪𑀡𑀺𑀢𑀩𑁆𑀩𑁄 𑀥𑀫𑁆𑀫𑁄, 𑀧𑀕𑁂𑀯 𑀅𑀚𑁆𑀛𑀺𑀝𑁆𑀞𑁂𑀦𑀸𑀢𑀺 ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀓𑀸𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀁 𑀧𑀭𑀺𑀫𑀚𑁆𑀚𑀺𑀢𑁆𑀯𑀸𑀢𑀺 𑀇𑀤𑀁 𑀯𑀸 ‘‘𑀧𑀭𑀺𑀢𑁆𑀢𑀸𑀡𑀁 𑀏𑀢𑁆𑀣 𑀧𑀯𑁂𑀲𑁂𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀏𑀯𑀁 𑀓𑀢𑁂 𑀧𑀭𑀺𑀢𑁆𑀢𑀸𑀡𑀸 𑀏𑀢𑁆𑀣 𑀧𑀯𑁂𑀲𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀢𑁄…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 𑀅𑀜𑁆𑀜𑀸𑀢𑀓𑁂 𑀕𑀳𑀝𑁆𑀞𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀸𑀤𑁂𑀲𑀼 𑀉𑀤𑀓𑀁 𑀆𑀓𑀺𑀭𑀺𑀢𑁆𑀯𑀸𑀢𑀺 𑀇𑀤𑀁 𑀢𑀲𑁆𑀫𑀺𑀁 𑀤𑁂𑀲𑁂 𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀧𑀸𑀴𑀺𑀬𑀸 𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂𑀲𑀼 𑀭𑁄𑀕𑀯𑀽𑀧𑀲𑀫𑀦𑀸𑀤𑀺𑀅𑀢𑁆𑀣𑀸𑀬 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀲𑀼𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 ‘‘𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀜𑁆𑀳𑀺 𑀓𑀭𑀺𑀬𑀫𑀸𑀦𑁂 𑀬𑀤𑀺 𑀧𑀸𑀤𑁂 ¶ 𑀅𑀧𑀦𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀢𑀁 ‘‘𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀫𑀜𑁆𑀜𑀦𑁆𑀢𑀺 ‘‘𑀭𑁄𑀕𑁄 𑀦 𑀯𑀽𑀧𑀲𑀫𑁂𑀲𑁆𑀲𑀢𑀻’’𑀢𑀺. 𑀢𑁂𑀦𑀸𑀳 ‘‘𑀦 𑀧𑀸𑀤𑀸 𑀅𑀧𑀦𑁂𑀢𑀩𑁆𑀩𑀸’’𑀢𑀺.

𑀫𑀢𑀲𑀭𑀻𑀭𑀤𑀲𑁆𑀲𑀦𑁂 𑀯𑀺𑀬 𑀓𑁂𑀯𑀮𑁂 𑀲𑀼𑀲𑀸𑀦𑀤𑀲𑁆𑀲𑀦𑁂𑀧𑀺 𑀇𑀤𑀁 𑀚𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀬𑀕𑀫𑀦𑀝𑁆𑀞𑀸𑀦𑀦𑁆𑀢𑀺 𑀫𑀭𑀡𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀲𑀻𑀯𑀣𑀺𑀓𑀤𑀲𑁆𑀲𑀦𑁂…𑀧𑁂… 𑀫𑀭𑀡𑀲𑁆𑀲𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀸𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀮𑁂𑀲𑀓𑀧𑁆𑀧𑀁 𑀅𑀓𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀲𑀼𑀤𑁆𑀥𑀘𑀺𑀢𑁆𑀢𑁂𑀦 ‘‘𑀧𑀭𑀺𑀯𑀸𑀭𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) 𑀯𑀼𑀢𑁆𑀢𑀁. 𑀏𑀢𑁂𑀦 𑀅𑀲𑀼𑀪𑀤𑀲𑁆𑀲𑀦𑀦𑁆𑀢𑀺 𑀯𑀘𑀦𑀫𑀢𑁆𑀢𑁂𑀦 𑀮𑁂𑀲𑀓𑀧𑁆𑀧𑀁 𑀓𑀢𑁆𑀯𑀸 𑀏𑀯𑀁 𑀕𑀢𑁂 𑀫𑀢𑀲𑁆𑀲 𑀜𑀸𑀢𑀓𑀸 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀫𑀬𑀁 𑀮𑀸𑀪𑀁 𑀮𑀪𑀺𑀲𑁆𑀲𑀸𑀫, 𑀉𑀧𑀝𑁆𑀞𑀸𑀓𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀧𑀦 ‘‘𑀫𑀭𑀡𑀲𑁆𑀲𑀢𑀺𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀓𑁆𑀓𑁄𑀲𑀺𑀢𑁂𑀧𑀺 𑀅𑀧𑀓𑁆𑀓𑁄𑀲𑀺𑀢𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀸𑀮𑀧𑀡𑁆𑀡𑀲𑁆𑀲 𑀧𑀭𑀺𑀢𑁆𑀢𑀮𑁂𑀔𑀦𑀝𑁆𑀞𑀸𑀦𑀢𑁆𑀢𑀸 𑀧𑀭𑀺𑀢𑁆𑀢𑀲𑀼𑀢𑁆𑀢𑀲𑁆𑀲 𑀧𑀭𑀺𑀢𑁆𑀢𑀓𑀭𑀡𑀲𑀜𑁆𑀜𑀸𑀡𑀢𑁆𑀢𑀸 𑀢𑀸𑀦𑀺 𑀤𑀺𑀲𑁆𑀯𑀸 𑀅𑀫𑀦𑀼𑀲𑁆𑀲𑀸 𑀧𑀭𑀺𑀢𑁆𑀢𑀲𑀜𑁆𑀜𑀸𑀬 𑀅𑀧𑀓𑁆𑀓𑀫𑀦𑁆𑀢𑀻𑀢𑀺 𑀆𑀳 ‘‘𑀢𑀸𑀮𑀧𑀡𑁆𑀡𑀁 𑀧𑀦 𑀧𑀭𑀺𑀢𑁆𑀢𑀲𑀼𑀢𑁆𑀢𑀁 𑀯𑀸 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀩𑀦𑁆𑀥𑀺𑀢𑀩𑁆𑀩’’𑀦𑁆𑀢𑀺.

𑀏𑀢𑁆𑀣 𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀯𑀸 ¶ 𑀪𑀡𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑁄𑀬𑁂𑀯 𑀯𑀺𑀦𑀬𑀝𑁆𑀞𑀓𑀣𑀸𑀪𑀢𑁄 𑀧𑀸𑀴𑀺𑀫𑀼𑀢𑁆𑀢𑀧𑀭𑀺𑀢𑁆𑀢𑀓𑀭𑀡𑀯𑀺𑀦𑀺𑀘𑁆𑀙𑀬𑁄, 𑀦 𑀧𑀦 𑀢𑀢𑁄 𑀧𑀭𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀓𑁄 𑀓𑀣𑀸𑀫𑀕𑁆𑀕𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀦𑀢𑁆𑀣𑀺, 𑀢𑀻𑀲𑀼 𑀝𑀻𑀓𑀸𑀲𑀼𑀧𑀺 𑀢𑀁𑀲𑀁𑀯𑀡𑁆𑀡𑀦𑀸𑀦𑀬𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀲𑁄 𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀆𑀕𑀢𑁄𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀧𑀦 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑀸𑀢𑀺 ‘‘𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 𑀯𑀸 𑀪𑀡𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂. 𑀧𑀦𑀸𑀢𑀺 𑀯𑀺𑀲𑁂𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀻𑀖𑀦𑀺𑀓𑀸𑀬𑁂 𑀧𑀸𑀣𑀺𑀓𑀯𑀕𑁆𑀕𑁂 𑀆𑀕𑀢𑀲𑁆𑀲 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀺 𑀧𑀞𑀫𑀫𑁂𑀯 𑀦 𑀯𑀢𑁆𑀢𑀩𑁆𑀩𑀁, 𑀅𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 ¶ 𑀆𑀳 ‘‘𑀫𑁂𑀢𑁆𑀢𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀏𑀯𑀜𑁆𑀳𑀺 𑀮𑀤𑁆𑀥𑀸𑀲𑁂𑀯𑀦𑀁 𑀳𑀼𑀢𑁆𑀯𑀸 𑀅𑀢𑀺𑀑𑀚𑀯𑀦𑁆𑀢𑀁 𑀳𑁄𑀢𑀺.

𑀧𑀺𑀝𑁆𑀞𑀁 𑀯𑀸 𑀫𑀁𑀲𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀫𑀘𑁆𑀙𑀔𑀡𑁆𑀟𑀧𑀽𑀯𑀔𑀚𑁆𑀚𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀢𑀸𑀭𑀁 𑀮𑀪𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀧𑀺𑀬𑀸𑀬𑀺𑀢𑀔𑀸𑀤𑀦𑀻𑀬𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀮𑀸𑀪𑀢𑀸𑀬 𑀅𑀯𑀢𑀸𑀭𑀡𑀁 𑀮𑀪𑀦𑁆𑀢𑀺. 𑀳𑀭𑀺𑀢𑀽𑀧𑀮𑀺𑀢𑁆𑀢𑀦𑁆𑀢𑀺 𑀅𑀮𑁆𑀮𑀕𑁄𑀫𑀬𑀮𑀺𑀢𑁆𑀢𑀁. 𑀇𑀤𑀜𑁆𑀳𑀺 𑀧𑁄𑀭𑀸𑀡𑀓𑀘𑀸𑀭𑀺𑀢𑁆𑀢𑀁 𑀪𑀽𑀫𑀺𑀯𑀺𑀲𑀼𑀤𑁆𑀥𑀓𑀭𑀡𑀁. 𑀧𑀭𑀺𑀲𑀼𑀤𑁆𑀥𑀁…𑀧𑁂… 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀢𑁆𑀢𑀓𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀸𑀓𑀭𑀼𑀡𑀸𑀯𑀲𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑀭𑀺 𑀯𑀓𑁆𑀔𑀫𑀸𑀦𑀉𑀪𑀬𑀢𑁄 𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑁂𑀦 𑀲𑀫𑁂𑀢𑀺. 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁩.𑁨𑁮𑁨) 𑀧𑀦 ‘‘𑀲𑀭𑀻𑀭𑀲𑀼𑀤𑁆𑀥𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 ‘‘𑀓𑀸𑀬𑀲𑀼𑀤𑁆𑀥𑀺𑀫𑀢𑁆𑀢𑁂𑀦 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀫𑁂𑀢𑁆𑀢𑀸𑀯𑀲𑁂𑀦𑁂𑀯 𑀧𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸…𑀧𑁂… 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀏𑀓𑀸𑀤𑀲? 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁧.𑁧𑁫; 𑀧𑀭𑀺. 𑁩𑁩𑁧; 𑀫𑀺. 𑀧. 𑁪.𑁪.𑁬).

𑀧𑀭𑀺𑀢𑁆𑀢𑀓𑀸𑀭𑀓𑁄…𑀧𑁂… 𑀲𑀫𑁆𑀧𑀭𑀺𑀯𑀸𑀭𑀺𑀢𑁂𑀦𑀸𑀢𑀺 𑀇𑀤𑀁 𑀧𑀭𑀺𑀢𑁆𑀢𑀓𑀭𑀡𑁄 𑀩𑀸𑀳𑀺𑀭𑀢𑁄 𑀆𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀁, ‘‘𑀫𑁂𑀢𑁆𑀢…𑀧𑁂… 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀆𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀁, 𑀏𑀯𑀁 𑀉𑀪𑀬𑀢𑁄 𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀁 𑀳𑁄𑀢𑀺. 𑀏𑀯𑀜𑁆𑀳𑀺 𑀅𑀫𑀦𑀼𑀲𑁆𑀲𑀸 𑀧𑀭𑀺𑀢𑁆𑀢𑀓𑀸𑀭𑀓𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺. 𑀫𑀗𑁆𑀕𑀮𑀓𑀣𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀫𑀦𑀼𑀲𑁆𑀲𑀸𑀦𑀁 𑀢𑁄𑀲𑀦𑀢𑁆𑀣𑀸𑀬 𑀧𑀡𑁆𑀡𑀸𑀓𑀸𑀭𑀁 𑀓𑀢𑁆𑀯𑀸 𑀫𑀳𑀸𑀫𑀗𑁆𑀕𑀮𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀏𑀯𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑁂𑀦 ‘‘𑀢𑀼𑀬𑁆𑀳𑀁 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀫𑀳𑀸𑀫𑀗𑁆𑀕𑀮𑀓𑀣𑀸 𑀯𑀼𑀢𑁆𑀢𑀸’’𑀢𑀺 𑀯𑀘𑀦𑁂𑀦 𑀲𑀫𑁂𑀢𑀺. 𑀝𑀻𑀓𑀸𑀬𑀁 𑀧𑀦 ‘‘𑀧𑀼𑀩𑁆𑀩𑀼𑀧𑀘𑀸𑀭𑀯𑀲𑁂𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑁄𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀲𑀦𑁆𑀦𑀺𑀧𑀸𑀢𑁄 𑀖𑁄𑀲𑁂𑀢𑀩𑁆𑀩𑁄 ‘‘𑀘𑁂𑀢𑀺𑀬𑀗𑁆𑀕𑀡𑁂 𑀲𑀩𑁆𑀩𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺. 𑀅𑀦𑀸𑀕𑀦𑁆𑀢𑀼𑀁𑀦𑀸𑀫 ¶ 𑀦 𑀮𑀪𑀢𑀻𑀢𑀺 𑀅𑀫𑀦𑀼𑀲𑁆𑀲𑁄 𑀩𑀼𑀤𑁆𑀥𑀸𑀡𑀸𑀪𑀬𑁂𑀦 𑀭𑀸𑀚𑀸𑀡𑀸𑀪𑀬𑁂𑀦 𑀅𑀦𑀸𑀕𑀦𑁆𑀢𑀼𑀁 𑀦 𑀮𑀪𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀆𑀡𑀸𑀝𑁆𑀞𑀸𑀦𑀺𑀬𑀢𑁆𑀢𑀸. 𑀕𑀳𑀺𑀢𑀓𑀸𑀧𑀤𑁂𑀲𑁂𑀦 𑀅𑀫𑀦𑀼𑀲𑁆𑀲𑁄𑀯 𑀧𑀼𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 ‘‘𑀅𑀫𑀦𑀼𑀲𑁆𑀲𑀕𑀳𑀺𑀢𑀓𑁄 ‘𑀢𑁆𑀯𑀁 𑀓𑁄 𑀦𑀸𑀫𑁄’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀽𑀢𑀺 𑀫𑀸𑀮𑀸𑀕𑀦𑁆𑀥𑀸𑀤𑀺𑀧𑀽𑀚𑀸𑀲𑀼. 𑀆𑀲𑀦𑀧𑀽𑀚𑀸𑀬𑀸𑀢𑀺 𑀘𑁂𑀢𑀺𑀬𑁂 𑀩𑀼𑀤𑁆𑀥𑀸𑀲𑀦𑀧𑀽𑀚𑀸𑀬. 𑀧𑀺𑀡𑁆𑀟𑀧𑀸𑀢𑁂𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀺𑀡𑁆𑀟𑀧𑀸𑀢𑀤𑀸𑀦𑁂. 𑀏𑀯𑀁 𑀯𑀢𑁆𑀣𑀼𑀧𑁆𑀧𑀤𑁂𑀲𑁂𑀦 𑀘𑁂𑀢𑀦𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀧𑀢𑁆𑀢𑀺𑀤𑀸𑀦𑀁 𑀲𑀫𑁆𑀪𑀯𑀢𑀺.

𑀤𑁂𑀯𑀢𑀸𑀦𑀦𑁆𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁. 𑀯𑀼𑀢𑁆𑀢𑀜𑁆𑀳𑀺 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁨𑁮𑁩, 𑁨𑁯𑁩) ‘‘𑀇𑀫𑁂𑀲𑀁 𑀬𑀓𑁆𑀔𑀸𑀦𑀁 𑀫𑀳𑀸𑀬𑀓𑁆𑀔𑀸𑀦𑀁 𑀲𑁂𑀦𑀸𑀧𑀢𑀻𑀦𑀁 𑀫𑀳𑀸𑀲𑁂𑀦𑀸𑀧𑀢𑀻𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀆𑀝𑀸𑀢𑀺 𑀤𑀩𑁆𑀩𑀺𑀫𑀼𑀔𑀲𑀓𑀼𑀡𑀸. 𑀢𑁂 𑀆𑀝𑀸 𑀦𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀝𑀸𑀦𑀸𑀤𑀁, 𑀤𑁂𑀯𑀦𑀕𑀭𑀁, 𑀆𑀝𑀸𑀦𑀸𑀤𑁂 𑀓𑀢𑀁 𑀆𑀝𑀸𑀦𑀸𑀤𑀺𑀬𑀁, 𑀲𑀼𑀢𑁆𑀢𑀁. 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁩.𑁨𑁮𑁨) ‘‘𑀧𑀭𑀺𑀢𑁆𑀢𑀁 𑀪𑀡𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 ‘𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸’𑀢𑀺 𑀘 ‘𑀫𑀗𑁆𑀕𑀮𑀓𑀣𑀸 𑀯𑀢𑁆𑀢𑀩𑁆𑀩𑀸’𑀢𑀺 𑀘 ‘𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂’𑀢𑀺 𑀘 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀕𑀺𑀳𑀻𑀦𑀁 𑀧𑀭𑀺𑀢𑁆𑀢𑀓𑀭𑀡𑁂 𑀯𑀼𑀢𑁆𑀢𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁮𑁨) ‘‘𑀏𑀢𑀁 𑀢𑀸𑀯 𑀕𑀺𑀳𑀻𑀦𑀁 𑀧𑀭𑀺𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀘𑁂 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁂𑀦 𑀧𑀦-𑀲𑀤𑁆𑀤𑁂𑀦 𑀲𑀳 𑀯𑀼𑀘𑁆𑀘𑀫𑀸𑀦𑀁 ‘‘𑀇𑀤𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀓𑀫𑁆𑀫’’𑀦𑁆𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀯𑀺𑀬 𑀳𑁄𑀢𑀺. 𑀅𑀯𑀺𑀲𑁂𑀲𑁂 𑀳𑀺 𑀲𑀢𑀺 𑀪𑁂𑀤𑁄 𑀓𑀸𑀢𑀩𑁆𑀩𑁄 𑀦 𑀲𑀺𑀬𑀸. 𑀪𑀺𑀓𑁆𑀔𑀽𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀸𑀯 𑀩𑀸𑀳𑀺𑀭𑀸𑀭𑀓𑁆𑀔𑀸 𑀤𑀼𑀓𑁆𑀓𑀭𑀸 𑀳𑁄𑀢𑀺, 𑀢𑀲𑁆𑀫𑀸 𑀕𑀺𑀳𑀻𑀦𑀁 𑀧𑀭𑀺𑀢𑁆𑀢𑀓𑀭𑀡𑁂 𑀯𑀼𑀢𑁆𑀢𑀧𑀭𑀺𑀓𑀫𑁆𑀫𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑁄 𑀫𑀢𑀺.

𑀇𑀤𑀁 𑀧𑀦 𑀇𑀥 𑀆𑀕𑀢𑀁 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀧𑀭𑀺𑀓𑀫𑁆𑀫𑀁 𑀲𑀼𑀢𑁆𑀯𑀸 ‘‘𑀇𑀤𑀁 𑀲𑀼𑀢𑁆𑀢𑀁 𑀅𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀁, 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 ¶ 𑀅𑀫𑀦𑀼𑀲𑁆𑀲𑀸 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀧𑁄𑀭𑀸𑀡𑀸 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀆𑀭𑁄𑀘𑀺𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁 𑀫𑀽𑀮𑀪𑀽𑀢𑀁 𑀤𑀻𑀖𑀦𑀺𑀓𑀸𑀬𑁂 𑀆𑀕𑀢𑀁 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀧𑀳𑀸𑀬 𑀫𑀽𑀮𑀲𑀼𑀢𑁆𑀢𑀢𑁄 𑀕𑀸𑀣𑀸𑀙𑀓𑁆𑀓𑀫𑁂𑀯 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀕𑀸𑀣𑀸𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢’’𑀦𑁆𑀢𑀺 𑀞𑀧𑁂𑀲𑀼𑀁, 𑀢𑀫𑁆𑀧𑀺 𑀧𑀭𑀺𑀢𑁆𑀢𑀁 𑀅𑀫𑀽𑀮𑀪𑀽𑀢𑀢𑁆𑀢𑀸 𑀏𑀓𑁂𑀦𑀸𑀓𑀸𑀭𑁂𑀦 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑁂𑀘𑀺 𑀲𑀁𑀔𑀺𑀢𑁆𑀢𑁂𑀦 𑀥𑀸𑀭𑁂𑀦𑁆𑀢𑀺, 𑀓𑁂𑀘𑀺 𑀯𑀺𑀢𑁆𑀣𑀸𑀭𑁂𑀦, 𑀓𑁂𑀘𑀺 𑀏𑀓𑀘𑁆𑀘𑀸 𑀕𑀸𑀣𑀸𑀬𑁄 𑀧𑀓𑁆𑀔𑀺𑀧𑀦𑁆𑀢𑀺, 𑀓𑁂𑀘𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀓𑁂𑀘𑀺 𑀪𑀺𑀓𑁆𑀔𑀽 𑀢𑀁𑀫𑀺𑀲𑁆𑀲𑀓𑀧𑀭𑀺𑀢𑁆𑀢𑀫𑁆𑀧𑀺 𑀫𑀗𑁆𑀕𑀮𑀓𑀭𑀡𑀓𑀸𑀮𑀸𑀤𑀻𑀲𑀼 𑀯𑀢𑁆𑀢𑀼𑀫𑀯𑀺𑀲𑀳𑀦𑁆𑀢𑀸 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑀼𑀢𑁆𑀢𑀸𑀦𑀺𑀬𑁂𑀯 𑀪𑀡𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀇𑀫𑀁 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀲𑀁𑀯𑀺𑀤𑀳𑀫𑀸𑀦𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀸𑀬, 𑀘𑀢𑀲𑁆𑀲𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀯𑀺𑀳𑁂𑀞𑀦𑀸𑀬 𑀏𑀯 𑀲𑀁𑀯𑀺𑀤𑀳𑀺𑀁𑀲𑀼 ¶ , 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀢𑀢𑁆𑀣 𑀲𑀦𑁆𑀢𑀺 𑀉𑀴𑀸𑀭𑀸 𑀬𑀓𑁆𑀔𑀸𑀦𑀺𑀯𑀸𑀲𑀺𑀦𑁄, 𑀬𑁂 𑀇𑀫𑀲𑁆𑀫𑀺𑀁 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀅𑀧𑁆𑀧𑀲𑀦𑁆𑀦𑀸, 𑀢𑁂𑀲𑀁 𑀧𑀲𑀸𑀤𑀸𑀬 𑀉𑀕𑁆𑀕𑀡𑁆𑀳𑀸𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺 (𑀤𑀻. 𑀦𑀺. 𑁩.𑁨𑁭𑁬).

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀧𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀕𑀫𑀦𑁂 ‘‘𑀉𑀕𑁆𑀕𑀡𑁆𑀳𑀸𑀣 𑀪𑀺𑀓𑁆𑀔𑀯𑁂 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁, 𑀧𑀭𑀺𑀬𑀸𑀧𑀼𑀡𑀸𑀣 𑀪𑀺𑀓𑁆𑀔𑀯𑁂 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁, 𑀥𑀸𑀭𑁂𑀣 𑀪𑀺𑀓𑁆𑀔𑀯𑁂 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁, 𑀅𑀢𑁆𑀣𑀲𑀁𑀳𑀺𑀢𑀸 𑀪𑀺𑀓𑁆𑀔𑀯𑁂 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺 (𑀤𑀻. 𑀦𑀺. 𑁩.𑁨𑁯𑁫) 𑀪𑀺𑀓𑁆𑀔𑀽𑀦𑀁 𑀥𑀸𑀭𑀡𑀁 𑀉𑀬𑁆𑀬𑁄𑀚𑀺𑀢𑀁 𑀆𑀦𑀺𑀲𑀁𑀲𑀜𑁆𑀘 𑀧𑀓𑀸𑀲𑀺𑀢𑀁. 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀘 ‘‘𑀩𑀼𑀤𑁆𑀥𑀪𑀸𑀲𑀺𑀢𑁂 𑀏𑀓𑀓𑁆𑀔𑀭𑀫𑁆𑀧𑀺 𑀏𑀓𑀧𑀤𑀫𑁆𑀧𑀺 𑀅𑀧𑀦𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁 ¶ , 𑀢𑀲𑁆𑀫𑀸 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀲𑀁𑀯𑀺𑀤𑀳𑀺𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀆𑀳𑀘𑁆𑀘𑀪𑀸𑀲𑀺𑀢𑀁 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀁 𑀧𑀓𑀢𑀺𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀫𑁂𑀯 𑀥𑀸𑀭𑁂𑀢𑀼𑀁 𑀲𑀚𑁆𑀛𑀸𑀬𑀺𑀢𑀼𑀜𑁆𑀘 𑀬𑀼𑀢𑁆𑀢𑀁, 𑀦 𑀪𑀕𑀯𑀢𑀸 𑀅𑀪𑀸𑀲𑀺𑀢𑀁 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀅𑀦𑀸𑀭𑀼𑀴𑁆𑀳𑀁 𑀫𑀺𑀲𑁆𑀲𑀓𑀲𑀼𑀢𑁆𑀢𑀦𑁆𑀢𑀺. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁮𑁨) 𑀆𑀕𑀢𑀁 𑀇𑀤𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀧𑀭𑀺𑀓𑀫𑁆𑀫𑀁 𑀧𑀦 𑀧𑀓𑀢𑀺𑀲𑀚𑁆𑀛𑀸𑀬𑀦𑀯𑀸𑀘𑀦𑀸𑀤𑀺𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀅𑀫𑀦𑀼𑀲𑁆𑀲𑁂𑀳𑀺 𑀕𑀳𑀺𑀢𑀓𑀸𑀮𑁂 𑀫𑁄𑀘𑀸𑀧𑀦𑀢𑁆𑀣𑀸𑀬 𑀮𑁄𑀓𑀺𑀬𑁂𑀳𑀺 𑀫𑀦𑁆𑀢𑀁 𑀯𑀺𑀬 𑀪𑀡𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀅𑀫𑀦𑀼𑀲𑁆𑀲𑀕𑀳𑀺𑀢𑀓𑁄 𑀢𑁆𑀯𑀁 𑀓𑁄 𑀦𑀸𑀫𑁄𑀲𑀻𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁮𑁨).

𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸 𑀘 𑀦𑀸𑀫 𑀦 𑀲𑀓𑀮𑀲𑀼𑀢𑁆𑀢𑀁, 𑀅𑀣 𑀔𑁄 ‘‘𑀯𑀺𑀧𑀲𑁆𑀲𑀺𑀲𑁆𑀲 𑀘 𑀦𑀫𑀢𑁆𑀣𑀽’’𑀢𑀺 𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀯𑀲𑁂𑀦 𑀘𑀢𑀼𑀓𑁆𑀔𑀢𑁆𑀢𑀼𑀁 𑀆𑀕𑀢𑀁 ‘‘𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫’’𑀦𑁆𑀢𑀺 𑀧𑀤𑀁 𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀲𑀼𑀢𑁆𑀢𑁂𑀓𑀤𑁂𑀲𑁄𑀬𑁂𑀯. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀣 𑀔𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀇𑀫𑀁 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀅𑀪𑀸𑀲𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑁂𑀓𑀤𑁂𑀲𑀲𑁆𑀲 𑀅𑀯𑀲𑀸𑀦𑁂 ‘‘𑀅𑀬𑀁 𑀔𑁄 𑀫𑀸𑀭𑀺𑀲𑀸 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸’’𑀢𑀺 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀩𑁆𑀬𑀕𑁆𑀖𑀸𑀤𑀬𑁄 𑀅𑀢𑁆𑀢𑀦𑁄 𑀪𑀓𑁆𑀔𑀁 𑀯𑀺𑀮𑀼𑀫𑁆𑀧𑀦𑁆𑀢𑀸𑀦𑀁 𑀩𑀮𑀯𑀤𑀼𑀝𑁆𑀞𑀘𑀺𑀢𑁆𑀢𑀸 𑀪𑀯𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀦𑀸 𑀕𑀳𑀺𑀢𑀫𑀦𑀼𑀲𑁆𑀲𑀁 𑀫𑁄𑀘𑀸𑀧𑁂𑀦𑁆𑀢𑀸𑀦𑀁 𑀅𑀫𑀦𑀼𑀲𑁆𑀲𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀢𑀣𑀸 𑀫𑁄𑀘𑀸𑀧𑁂𑀢𑀼𑀁 𑀆𑀭𑀤𑁆𑀥𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀇𑀫𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀧𑀭𑀺𑀓𑀫𑁆𑀫𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀧𑀭𑀺𑀢𑁆𑀢𑀓𑀭𑀡𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄.

𑁨𑁦. 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑁄𑀢𑀺 (𑀯𑀺. 𑀯𑀺. 𑀝𑀻. 𑁧.𑁧𑁮𑁫) ¶ 𑀏𑀢𑁆𑀣 𑀅𑀫𑀲𑀺𑀬𑀺𑀢𑁆𑀣𑀸𑀢𑀺 𑀆𑀫𑀝𑁆𑀞𑁄, 𑀦 𑀆𑀫𑀝𑁆𑀞𑁄 𑀅𑀦𑀸𑀫𑀝𑁆𑀞𑁄. 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀳𑀼𑀢𑁆𑀯𑀸 𑀧𑀢𑀢𑀻𑀢𑀺 ¶ 𑀧𑀺𑀡𑁆𑀟𑀧𑀸𑀢𑁄. 𑀅𑀦𑀸𑀫𑀝𑁆𑀞𑁄 𑀘 𑀲𑁄 𑀧𑀺𑀡𑁆𑀟𑀧𑀸𑀢𑁄 𑀘𑀸𑀢𑀺 𑀢𑀣𑀸, 𑀅𑀕𑁆𑀕𑀳𑀺𑀢𑀅𑀕𑁆𑀕𑁄, 𑀅𑀧𑀭𑀺𑀪𑀼𑀢𑁆𑀢𑁄 𑀧𑀺𑀡𑁆𑀟𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀲𑀘𑁂𑀧𑀺 𑀓𑀳𑀸𑀧𑀡𑀕𑁆𑀖𑀦𑀓𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀤𑀸𑀬𑀓𑁂𑀳𑀺 𑀩𑀳𑀼𑀩𑁆𑀬𑀜𑁆𑀚𑀦𑁂𑀦 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀤𑀺𑀦𑁆𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦𑀢𑁆𑀣𑀻’’𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀲𑀤𑁆𑀥𑀸𑀬 𑀤𑀺𑀦𑁆𑀦𑀁 𑀫𑀳𑀕𑁆𑀖𑀪𑁄𑀚𑀦𑀫𑁆𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑀢𑁆𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦𑀸𑀫 𑀦 𑀳𑁄𑀢𑀺, 𑀧𑀕𑁂𑀯 𑀅𑀧𑁆𑀧𑀕𑁆𑀖𑀪𑁄𑀚𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀢𑀸𑀤𑀺𑀧𑀜𑁆𑀘𑀓𑀁𑀬𑁂𑀯 𑀯𑀢𑁆𑀯𑀸 𑀪𑁂𑀲𑀚𑁆𑀚𑀓𑀭𑀡𑁂 𑀯𑀺𑀬 𑀅𑀧𑀭𑁂𑀲𑀫𑁆𑀧𑀺 𑀤𑀲𑀦𑁆𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀜𑀸𑀢𑀓𑀸𑀦𑀫𑁆𑀧𑀺 𑀧𑁂𑀲𑁂𑀢𑁆𑀯𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁, ‘‘𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲 𑀧𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀕𑀦𑁆𑀢𑀼𑀓𑀲𑁆𑀲 𑀯𑀸’’𑀇𑀘𑁆𑀘𑀸𑀤𑀺𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀺𑀳𑀸𑀭𑀁 𑀲𑀫𑁆𑀧𑀢𑁆𑀢𑀸𑀦𑀁 𑀜𑀸𑀢𑀓𑀸𑀦𑀫𑁆𑀧𑀺 𑀆𑀕𑀦𑁆𑀢𑀼𑀓𑀲𑀸𑀫𑀜𑁆𑀜𑁂𑀦 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘. 𑀣𑀸𑀮𑀓𑁂𑀢𑀺 𑀲𑀗𑁆𑀖𑀺𑀓𑁂 𑀓𑀁𑀲𑀸𑀤𑀺𑀫𑀬𑁂 𑀣𑀸𑀮𑀓𑁂. 𑀧𑀢𑁆𑀢𑁄𑀧𑀺 𑀏𑀢𑁆𑀣 𑀲𑀗𑁆𑀕𑀬𑁆𑀳𑀢𑀺. 𑀦 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀫𑀭𑀺𑀓𑀘𑁄𑀭𑀲𑁆𑀲𑀸𑀢𑀺 𑀭𑀚𑁆𑀚𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀸𑀓𑀝𑀘𑁄𑀭𑀲𑁆𑀲. 𑀅𑀤𑀻𑀬𑀫𑀸𑀦𑁂𑀧𑀺 ‘‘𑀦 𑀤𑁂𑀦𑁆𑀢𑀻’’𑀢𑀺 𑀓𑀼𑀚𑁆𑀛𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀆𑀫𑀺𑀲𑀲𑁆𑀲 𑀥𑀫𑁆𑀫𑀲𑁆𑀲 𑀘 𑀅𑀮𑀸𑀪𑁂𑀦 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀫𑁆𑀪𑀯𑀦𑁆𑀢𑀲𑁆𑀲 𑀙𑀺𑀤𑁆𑀤𑀲𑁆𑀲 𑀯𑀺𑀯𑀭𑀲𑁆𑀲 𑀧𑀝𑀺𑀲𑀦𑁆𑀣𑀭𑀡𑀁 𑀧𑀺𑀤𑀳𑀦𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀲𑁄 𑀧𑀦 𑀥𑀫𑁆𑀫𑀸𑀫𑀺𑀲𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑀁 𑀲𑀦𑁆𑀥𑀸𑀬 ‘‘𑀓𑀲𑁆𑀲 𑀓𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀆𑀕𑀦𑁆𑀢𑀼𑀓𑀲𑁆𑀲 𑀯𑀸…𑀧𑁂… 𑀓𑀸𑀢𑀩𑁆𑀩𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀆𑀕𑀦𑁆𑀢𑀼𑀓𑀁 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀔𑀻𑀡𑀧𑀭𑀺𑀩𑁆𑀩𑀬𑀦𑁆𑀢𑀺 𑀇𑀫𑀺𑀦𑀸 𑀅𑀕𑀢𑀺𑀪𑀸𑀯𑀁 𑀓𑀭𑀼𑀡𑀸𑀝𑁆𑀞𑀸𑀦𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑁂𑀦 𑀘 𑀢𑀩𑁆𑀩𑀺𑀥𑀼𑀭𑀸𑀦𑀁 𑀲𑀫𑀺𑀤𑁆𑀥𑀸𑀦𑀁 𑀆𑀕𑀦𑁆𑀢𑀼𑀓𑀢𑁆𑀢𑁂𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. ‘‘𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑀸𑀲𑀻𑀲𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀦𑀼𑀜𑁆𑀜𑀸𑀢𑀸𑀦𑀁 𑀧𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀢𑁆𑀢𑀸, 𑀧𑀘𑁆𑀘𑀸𑀲𑀸𑀬 ¶ 𑀧𑀦 𑀲𑀢𑀺 𑀓𑀼𑀮𑀤𑀽𑀲𑀦𑀫𑁆𑀧𑀺 𑀳𑁄𑀢𑀺. 𑀉𑀩𑁆𑀩𑀸𑀲𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀢𑀺𑀬𑁄𑀚𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑁂 𑀫𑀦𑀼𑀲𑁆𑀲𑁂 𑀧𑀮𑀸𑀧𑁂𑀢𑁆𑀯𑀸. 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀦𑁆𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀉𑀢𑁆𑀢𑀫𑀭𑀽𑀧𑀯𑀺𑀘𑀺𑀢𑁆𑀢𑀁 𑀅𑀢𑁆𑀣𑀭𑀡𑀁. 𑀅𑀬𑀁 𑀧𑀝𑀺𑀲𑀦𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀪𑁂𑀲𑀚𑁆𑀚𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. 𑀯𑀺𑀜𑁆𑀜𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁧. 𑀏𑀯𑀁 ¶ 𑀪𑁂𑀲𑀚𑁆𑀚𑀸𑀤𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀯𑀺𑀜𑁆𑀜𑀢𑁆𑀢𑀻𑀢𑀺 𑀬𑀸𑀘𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀢𑁆𑀢𑀺, ‘‘𑀇𑀫𑀺𑀦𑀸 𑀦𑁄 𑀅𑀢𑁆𑀣𑁄’’𑀢𑀺 𑀯𑀺𑀜𑁆𑀜𑀸𑀧𑀦𑀸, 𑀬𑀸𑀘𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀺𑀜𑁆𑀜𑀢𑁆𑀢𑀻𑀢𑀺 𑀬𑀸𑀘𑀦𑀸’’𑀢𑀺. 𑀢𑀢𑁆𑀭 𑀯𑀺𑀜𑁆𑀜𑀢𑁆𑀢𑀺𑀬𑀁 𑀅𑀬𑀁 𑀫𑀬𑀸 𑀯𑀓𑁆𑀔𑀫𑀸𑀦𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀫𑀽𑀮𑀘𑁆𑀙𑁂𑀚𑁆𑀚𑀸𑀬𑀸𑀢𑀺 (𑀯𑀺. 𑀯𑀺. 𑀝𑀻. 𑁧.𑁩𑁪𑁨) 𑀧𑀭𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀏𑀯 𑀲𑀦𑁆𑀢𑀓𑀓𑀭𑀡𑀯𑀲𑁂𑀦. 𑀏𑀯𑀁 𑀬𑀸𑀘𑀢𑁄 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀜𑁆𑀘𑁂𑀯 𑀤𑀸𑀲𑀧𑀝𑀺𑀕𑁆𑀕𑀳𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺 ‘‘𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀳𑁄𑀢𑀻’’𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀧𑀦 𑀤𑀸𑀲𑀁 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀦𑁆𑀢𑀲𑁆𑀲 𑀲𑀸𑀤𑀺𑀬𑀦𑀯𑀲𑁂𑀦𑁂𑀯 𑀤𑀼𑀓𑁆𑀓𑀝𑀁. 𑀲𑀓𑀓𑀫𑁆𑀫𑀦𑁆𑀢𑀺 𑀧𑀸𑀡𑀯𑀥𑀓𑀫𑁆𑀫𑀁. 𑀇𑀤𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀤𑁄𑀲𑀧𑀭𑀺𑀳𑀸𑀭𑀸𑀬 𑀯𑀼𑀢𑁆𑀢𑀁, 𑀦 𑀯𑀺𑀜𑁆𑀜𑀢𑁆𑀢𑀺𑀧𑀭𑀺𑀳𑀸𑀭𑀸𑀬. 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀲𑀸𑀫𑀻𑀘𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀬𑀤𑀺𑀘𑁆𑀙𑀓𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀸𑀫𑀺, 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀅𑀬𑀸𑀘𑀺𑀢𑁆𑀯𑀸𑀧𑀺 ¶ 𑀯𑀝𑁆𑀝𑀢𑀺, 𑀲𑀓𑀺𑀘𑁆𑀘𑀧𑀲𑀼𑀢𑀫𑁆𑀧𑀺 𑀏𑀯𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺 𑀦𑀢𑁆𑀣𑀺 𑀏𑀯, 𑀲𑀸𑀫𑀻𑀘𑀺𑀤𑀲𑁆𑀲𑀦𑀢𑁆𑀣𑀁 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀲𑀩𑁆𑀩𑀲𑁄 𑀓𑀧𑁆𑀧𑀺𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀫𑀽𑀮𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀯𑀸 ‘‘𑀫𑀽𑀮’’𑀦𑁆𑀢𑀺 𑀯𑀘𑀦𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀫𑀜𑁆𑀜𑀯𑀘𑀦𑀢𑁆𑀢𑀸 𑀅𑀓𑀧𑁆𑀧𑀺𑀬𑀯𑀘𑀦𑀁 𑀯𑀸 𑀦𑀺𑀝𑁆𑀞𑀺𑀢𑀪𑀢𑀺𑀓𑀺𑀘𑁆𑀘𑀸𑀦𑀁 𑀤𑀸𑀧𑀦𑀢𑁄 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀤𑀺𑀬𑀦𑀁 𑀯𑀸 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸𑀢𑀺 𑀇𑀤𑀁 𑀇𑀥 𑀣𑀫𑁆𑀪𑀸𑀤𑀻𑀦𑀁 𑀤𑀸𑀲𑀺𑀤𑀸𑀲𑀸𑀤𑀺𑀪𑀸𑀯𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀁, 𑀅𑀲𑁆𑀲𑀸𑀫𑀺𑀓𑀦𑁆𑀢𑀺 𑀅𑀢𑁆𑀣𑁄.

𑁨𑁨. 𑀦 𑀓𑁂𑀯𑀮𑀜𑁆𑀘…𑀧𑁂… 𑀘𑀻𑀯𑀭𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸𑀢𑀺𑀆𑀤𑀻𑀲𑀼 𑀘𑀻𑀯𑀭𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀢𑀦𑁆𑀢𑀯𑀸𑀬𑁂𑀳𑀺 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀯𑀸𑀬𑀸𑀧𑀦𑁂 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀪𑀸𑀯𑁂𑀧𑀺 𑀘𑀻𑀯𑀭𑀯𑀸𑀬𑀸𑀧𑀦𑀲𑀺𑀓𑁆𑀔𑀸𑀧𑀤𑁂𑀦 𑀬𑀣𑀸𑀭𑀳𑀁 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀓𑀧𑁆𑀧𑀺𑀬𑀫𑀼𑀔𑁂𑀦 𑀮𑀤𑁆𑀥𑀫𑁆𑀧𑀺 𑀢𑀢𑁆𑀣 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀇𑀫𑀲𑁆𑀲 𑀓𑀳𑀸𑀧𑀡𑀁 𑀤𑁂𑀳𑀻𑀢𑀺 𑀯𑀢𑁆𑀯𑀸 ‘‘𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀤𑀸𑀧𑀦𑁂 𑀓𑀺𑀜𑁆𑀘𑀸𑀧𑀺 𑀤𑁄𑀲𑁄 𑀦 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀅𑀲𑀸𑀭𑀼𑀧𑁆𑀧𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀓𑀢𑀓𑀫𑁆𑀫𑀢𑁆𑀣𑀸𑀬𑀧𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 ¶ 𑀧𑀭𑀺𑀬𑀸𑀬𑀢𑁄 𑀪𑀢𑀺𑀁 𑀤𑀸𑀧𑁂𑀦𑁆𑀢𑀲𑁆𑀲 𑀦𑀢𑁆𑀣𑀺 𑀤𑁄𑀲𑁄, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁩𑁪𑁨) 𑀧𑀦 ‘‘𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺𑀁 𑀅𑀲𑀸𑀤𑀺𑀬𑀦𑁆𑀢𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀢𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸𑀧𑀺 𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀘 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀅𑀢𑁆𑀣𑀻𑀢𑀺 𑀯𑀺𑀳𑁂𑀞𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀅𑀓𑀧𑁆𑀧𑀺𑀬𑀓𑀳𑀸𑀧𑀡𑀸𑀤𑀺𑀤𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑁂𑀯 𑀧𑀸𑀘𑁂𑀢𑁆𑀯𑀸𑀢𑀺 𑀳𑀢𑁆𑀣𑀓𑀫𑁆𑀫𑀯𑀲𑁂𑀦𑁂𑀯 𑀧𑀸𑀘𑁂𑀢𑁆𑀯𑀸. ‘‘𑀓𑀺𑀁 𑀪𑀦𑁆𑀢𑁂’’𑀢𑀺 𑀏𑀢𑁆𑀢𑀓𑁂𑀧𑀺 𑀧𑀼𑀘𑁆𑀙𑀺𑀢𑁂 𑀬𑀤𑀢𑁆𑀣𑀸𑀬 𑀧𑀯𑀺𑀝𑁆𑀞𑁄, 𑀢𑀁 𑀓𑀣𑁂𑀢𑀼𑀁 𑀮𑀪𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀢𑁆𑀢𑀸.

𑁨𑁩. 𑀯𑀢𑁆𑀢𑀦𑁆𑀢𑀺 ¶ 𑀘𑀸𑀭𑀺𑀢𑁆𑀢𑀁, 𑀆𑀧𑀢𑁆𑀢𑀺 𑀧𑀦 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀸𑀔𑀸𑀬 𑀫𑀓𑁆𑀔𑀺𑀓𑀩𑀻𑀚𑀦𑁂𑀦 𑀧𑀡𑁆𑀡𑀸𑀤𑀺𑀙𑁂𑀤𑁂 𑀩𑀻𑀚𑀕𑀸𑀫𑀓𑁄𑀧𑀦𑀲𑁆𑀲 𑀘𑁂𑀯 𑀢𑀢𑁆𑀣 𑀮𑀕𑁆𑀕𑀭𑀚𑀸𑀤𑀺𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀲𑁆𑀲 𑀘 𑀧𑀭𑀺𑀳𑀸𑀭𑀢𑁆𑀣𑀸𑀬 𑀯𑀼𑀢𑁆𑀢𑀁, 𑀢𑀤𑀼𑀪𑀬𑀸𑀲𑀗𑁆𑀓𑀸𑀬 𑀅𑀲𑀢𑀺 𑀢𑀣𑀸 𑀅𑀓𑀭𑀡𑁂 𑀤𑁄𑀲𑁄 𑀦𑀢𑁆𑀣𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁩𑁪𑁨) 𑀧𑀦 ‘‘𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀸𑀔𑀸𑀬 𑀮𑀕𑁆𑀕𑀭𑀚𑀲𑁆𑀫𑀺𑀁 𑀧𑀢𑁆𑀢𑁂 𑀧𑀢𑀺𑀢𑁂𑀧𑀺 𑀲𑀸𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀢𑀸𑀬𑀧𑀺 𑀲𑀢𑀺 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀤𑀺𑀬𑀸𑀤𑀻𑀲𑀼 𑀉𑀤𑀓𑀲𑁆𑀲 𑀅𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀆𑀳𑀭𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑁂𑀳𑀢𑁄…𑀧𑁂… 𑀦𑁂𑀯 𑀯𑀝𑁆𑀝𑀢𑀻𑀢𑀺 𑀧𑀭𑀺𑀕𑁆𑀕𑀳𑀺𑀢𑀼𑀤𑀓𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀆𑀳𑀝𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀢𑁆𑀢𑀺𑀬𑀸 𑀆𑀧𑀦𑁆𑀦𑀁 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸𑀧𑀺 𑀢𑀁 𑀯𑀢𑁆𑀣𑀼𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂 𑀤𑀼𑀓𑁆𑀓𑀝𑀫𑁂𑀯, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺.

‘‘𑀅𑀮𑀚𑁆𑀚𑀻𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀳𑀢𑁆𑀣𑀓𑀫𑁆𑀫𑀁 𑀦 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀅𑀮𑀚𑁆𑀚𑀻 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀩𑀻𑀚𑀦𑀸𑀤𑀺𑀁 𑀓𑀭𑁄𑀢𑀺, 𑀢𑀢𑁆𑀣 𑀤𑁄𑀲𑁄 𑀦𑀢𑁆𑀣𑀺, 𑀘𑁂𑀢𑀺𑀬𑀓𑀫𑁆𑀫𑀸𑀤𑀻𑀦𑀺 𑀧𑀦 𑀢𑁂𑀳𑀺 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁩𑁪𑁨) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁪𑁨) 𑀧𑀦 ‘‘𑀅𑀮𑀚𑁆𑀚𑀻𑀳𑀺…𑀧𑁂… 𑀦 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀉𑀢𑁆𑀢𑀭𑀺𑀪𑀗𑁆𑀕𑀸𑀥𑀺𑀓𑀸𑀭𑀢𑁆𑀢𑀸 𑀅𑀚𑁆𑀛𑁄𑀳𑀭𑀡𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀩𑀸𑀳𑀺𑀭𑀧𑀭𑀺𑀪𑁄𑀕𑁂𑀲𑀼 𑀧𑀦 𑀅𑀮𑀚𑁆𑀚𑀻𑀳𑀺𑀧𑀺 𑀳𑀢𑁆𑀣𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀅𑀮𑀚𑁆𑀚𑀻𑀳𑀺 𑀲𑀸𑀫𑀡𑁂𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁩𑁫𑁯) 𑀅𑀮𑀚𑁆𑀚𑀺𑀮𑀓𑁆𑀔𑀡𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀉𑀧𑀲𑀫𑁆𑀧𑀦𑁆𑀦𑁂 𑀧𑀝𑀺𑀘𑁆𑀘 𑀉𑀧𑀮𑀓𑁆𑀔𑀡𑀢𑁄 𑀯𑀼𑀢𑁆𑀢𑀦𑁆𑀢𑀺 𑀢𑀁𑀮𑀓𑁆𑀔𑀡𑀯𑀺𑀭𑀳𑀺𑀢𑀸𑀦𑀁 𑀲𑀸𑀫𑀡𑁂𑀭𑀸𑀤𑀻𑀦𑀁 𑀮𑀺𑀗𑁆𑀕𑀢𑁆𑀣𑁂𑀦𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀸𑀦𑀁 ¶ 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀦𑀁 𑀤𑀼𑀲𑁆𑀲𑀻𑀮𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀲𑁂𑀦 𑀅𑀮𑀚𑁆𑀚𑀺𑀮𑀓𑁆𑀔𑀡𑀁 𑀬𑀣𑀸𑀞𑀧𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑀺𑀝𑁆𑀞𑀦𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑁨𑁪. 𑀕𑁄𑀡𑀁 ¶ 𑀧𑀦…𑀧𑁂… 𑀆𑀳𑀭𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀓𑁆𑀔𑀡𑁂 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸, 𑀧𑀝𑀺𑀮𑀸𑀪𑀓𑁆𑀔𑀡𑁂 𑀕𑁄𑀡𑀸𑀦𑀁 𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀘 𑀤𑀼𑀓𑁆𑀓𑀝𑀁. 𑀕𑁄𑀡𑀜𑁆𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀫𑁆𑀧𑀺 𑀲𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀏𑀢𑁆𑀣 𑀘 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀸𑀪𑀸𑀯𑁂𑀧𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀬𑀸𑀘𑀦𑁂𑀧𑀺 𑀧𑀝𑀺𑀕𑁆𑀕𑀳𑀡𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀭𑀓𑁆𑀔𑀺𑀢𑁆𑀯𑀸𑀢𑀺 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀢𑁄 𑀭𑀓𑁆𑀔𑀺𑀢𑁆𑀯𑀸. 𑀚𑀕𑁆𑀕𑀺𑀢𑁆𑀯𑀸𑀢𑀺 𑀢𑀺𑀡𑀅𑀦𑁆𑀦𑀸𑀤𑀻𑀳𑀺 𑀧𑁄𑀲𑁂𑀢𑁆𑀯𑀸. 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑁄𑀲𑀸𑀤𑀺𑀬𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁨𑁫. 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀦 𑀯𑀝𑁆𑀝𑀢𑀻𑀢𑀺 𑀲𑀓𑀝𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀻𑀢𑀺 𑀉𑀪𑀬𑀢𑁆𑀣𑀸𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁩𑁪𑁨) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁪𑁨) 𑀧𑀦 ‘‘𑀲𑀓𑀝𑀁 𑀤𑁂𑀣𑀸𑀢𑀺…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀲𑀓𑀝𑀁 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀯𑀝𑁆𑀝𑀢𑀻𑀢𑀺 𑀢𑀸𑀯𑀓𑀸𑀮𑀺𑀓𑀁 𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀲𑀺𑀆𑀤𑀻𑀦𑀺 𑀧𑀼𑀕𑁆𑀕𑀮𑀺𑀓𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀆𑀳 ‘‘𑀏𑀲 𑀦𑀬𑁄 𑀯𑀸𑀲𑀻’’𑀢𑀺𑀆𑀤𑀺. 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀏𑀲 𑀦𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀼𑀬𑁂𑀯𑀸𑀢𑀺 𑀇𑀤𑀁 𑀯𑀺𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀦 𑀢𑀺𑀡𑀲𑀮𑀸𑀓𑀁 𑀉𑀧𑀸𑀤𑀸𑀬 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀏𑀯, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀯𑀮𑁆𑀮𑀺𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀴𑀺𑀆𑀕𑀢𑀸𑀦𑀁 𑀯𑁂𑀴𑀼𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀫𑀢𑁆𑀢𑀺𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀘 𑀬𑀲𑁆𑀫𑀺𑀁 𑀧𑀤𑁂𑀲𑁂 ¶ 𑀳𑀭𑀺𑀢𑀸𑀮𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀸𑀤𑀺 𑀅𑀧𑁆𑀧𑀓𑀫𑁆𑀧𑀺 𑀫𑀳𑀕𑁆𑀖𑀁 𑀳𑁄𑀢𑀺, 𑀢𑀢𑁆𑀣 𑀢𑀁 𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑀢𑁄 𑀊𑀦𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯, 𑀯𑀺𑀜𑁆𑀜𑀸𑀧𑁂𑀢𑀼𑀜𑁆𑀘 𑀦 𑀯𑀝𑁆𑀝𑀢𑀺.

𑁨𑁬. 𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀧𑀭𑀺𑀓𑀣𑀸𑀤𑀻𑀲𑀼 ‘‘𑀲𑁂𑀦𑀸𑀲𑀦𑀁 𑀲𑀫𑁆𑀩𑀸𑀥’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀣𑀦𑀁 𑀧𑀭𑀺𑀓𑀣𑀸 𑀦𑀸𑀫. 𑀉𑀚𑀼𑀓𑀫𑁂𑀯 𑀅𑀓𑀣𑁂𑀢𑁆𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀓𑀺𑀁 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀧𑁆𑀧𑀸𑀬𑁄 𑀬𑀣𑀸 𑀯𑀺𑀪𑀽𑀢𑁄 𑀳𑁄𑀢𑀺, 𑀏𑀯𑀁 𑀓𑀣𑀦𑀁 𑀑𑀪𑀸𑀲𑁄 𑀦𑀸𑀫. 𑀲𑁂𑀦𑀸𑀲𑀦𑀸𑀤𑀺𑀅𑀢𑁆𑀣𑀁 𑀪𑀽𑀫𑀺𑀧𑀭𑀺𑀓𑀫𑁆𑀫𑀸𑀤𑀺𑀓𑀭𑀡𑀯𑀲𑁂𑀦 𑀧𑀘𑁆𑀘𑀬𑀼𑀧𑁆𑀧𑀸𑀤𑀸𑀬 𑀦𑀺𑀫𑀺𑀢𑁆𑀢𑀓𑀭𑀡𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫. 𑀢𑀻𑀲𑀼 𑀧𑀘𑁆𑀘𑀬𑁂𑀲𑀼 𑀯𑀺𑀜𑁆𑀜𑀢𑁆𑀢𑀺𑀆𑀤𑀬𑁄 𑀤𑀲𑁆𑀲𑀺𑀢𑀸, 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀉𑀧𑁆𑀧𑀦𑁆𑀦𑀁 𑀧𑀦 𑀪𑁂𑀲𑀚𑁆𑀚𑀁 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀢𑀢𑁆𑀣 𑀯𑀺𑀦𑀬𑀥𑀭𑀸 ‘‘𑀪𑀕𑀯𑀢𑀸 𑀭𑁄𑀕𑀲𑀻𑀲𑁂𑀦 𑀧𑀭𑀺𑀪𑁄𑀕𑀲𑁆𑀲 𑀤𑁆𑀯𑀸𑀭𑀁 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀅𑀭𑁄𑀕𑀓𑀸𑀮𑁂𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀦 ¶ 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀲𑀼𑀢𑁆𑀢𑀦𑁆𑀢𑀺𑀓𑀸 𑀧𑀦 ‘‘𑀓𑀺𑀜𑁆𑀘𑀸𑀧𑀺 𑀆𑀧𑀢𑁆𑀢𑀺 𑀦 𑀳𑁄𑀢𑀺, 𑀆𑀚𑀻𑀯𑀁 𑀧𑀦 𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀦 𑀯𑀝𑁆𑀝𑀢𑀺, 𑀲𑀮𑁆𑀮𑁂𑀔𑀁 𑀓𑁄𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀻𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀯𑀺𑀜𑁆𑀜𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑁫. 𑀓𑀼𑀮𑀲𑀗𑁆𑀕𑀳𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁭. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀮𑀲𑀗𑁆𑀕𑀳𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀓𑀼𑀮𑀲𑀗𑁆𑀕𑀳𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀕𑀡𑁆𑀳𑀦𑀁 𑀲𑀗𑁆𑀕𑀳𑁄, 𑀓𑀼𑀮𑀸𑀦𑀁 𑀲𑀗𑁆𑀕𑀳𑁄 𑀓𑀼𑀮𑀲𑀗𑁆𑀕𑀳𑁄, 𑀧𑀘𑁆𑀘𑀬𑀤𑀸𑀬𑀓𑀸𑀤𑀻𑀦𑀁 ¶ 𑀕𑀺𑀳𑀻𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁. 𑀅𑀦𑀼𑀕𑁆𑀕𑀳𑀢𑁆𑀣𑁄 𑀳𑁂𑀢𑁆𑀣 𑀲𑀗𑁆𑀕𑀳-𑀲𑀤𑁆𑀤𑁄 𑀬𑀣𑀸 ‘‘𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄’’𑀢𑀺 (𑀔𑀼. 𑀧𑀸. 𑁫.𑁬; 𑀲𑀼. 𑀦𑀺. 𑁨𑁬𑁫).

𑁨𑁮. 𑀢𑀢𑁆𑀣 𑀓𑁄𑀝𑁆𑀝𑀦𑀦𑁆𑀢𑀺 𑀲𑀬𑀁 𑀙𑀺𑀦𑁆𑀤𑀦𑀁. 𑀓𑁄𑀝𑁆𑀝𑀸𑀧𑀦𑀦𑁆𑀢𑀺 ‘‘𑀇𑀫𑀁 𑀙𑀺𑀦𑁆𑀤𑀸’’𑀢𑀺 𑀅𑀜𑁆𑀜𑁂𑀲𑀁 𑀙𑁂𑀤𑀸𑀧𑀦𑀁. 𑀆𑀴𑀺𑀬𑀸 𑀩𑀦𑁆𑀥𑀦𑀦𑁆𑀢𑀺 𑀬𑀣𑀸 𑀕𑀘𑁆𑀙𑀫𑀽𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀣𑀸 𑀲𑀫𑀦𑁆𑀢𑀢𑁄 𑀩𑀦𑁆𑀥𑀦𑀁. 𑀉𑀤𑀓𑀲𑁆𑀲𑀸𑀢𑀺 𑀅𑀓𑀧𑁆𑀧𑀺𑀬𑀉𑀤𑀓𑀲𑁆𑀲 ‘‘𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦’’𑀦𑁆𑀢𑀺 𑀯𑀺𑀲𑀼𑀁 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀢𑀜𑁆𑀘 𑀆𑀭𑀸𑀫𑀸𑀤𑀺𑀅𑀢𑁆𑀣𑀁 𑀭𑁄𑀧𑀦𑁂 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀲𑀼𑀧𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀲𑀼𑀧𑀺 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀝𑁆𑀝𑀢𑀻𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥𑀸𑀧𑀺 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀸𑀤𑀺 𑀯𑀺𑀲𑀼𑀁 𑀤𑀲𑁆𑀲𑀺𑀢𑀁. 𑀏𑀢𑁆𑀣 𑀘 𑀓𑀢𑀫𑀁 𑀅𑀓𑀧𑁆𑀧𑀺𑀬𑀉𑀤𑀓𑀁, 𑀓𑀢𑀫𑀁 𑀧𑀦 𑀓𑀧𑁆𑀧𑀺𑀬𑀉𑀤𑀓𑀦𑁆𑀢𑀺? 𑀲𑀧𑁆𑀧𑀸𑀡𑀓𑀁 𑀅𑀓𑀧𑁆𑀧𑀺𑀬𑀉𑀤𑀓𑀁, 𑀅𑀧𑁆𑀧𑀸𑀡𑀓𑀁 𑀓𑀧𑁆𑀧𑀺𑀬𑀉𑀤𑀓𑀦𑁆𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂, ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀉𑀤𑀓𑀁 𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀲𑀺𑀜𑁆𑀘𑁂𑀬𑁆𑀬 𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬 𑀯𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀘𑀦𑀢𑁄. 𑀬𑀣𑀸 𑀓𑁄𑀝𑁆𑀝𑀦𑀔𑀡𑀦𑀸𑀤𑀺𑀓𑀸𑀬𑀺𑀓𑀓𑀺𑀭𑀺𑀬𑀸𑀧𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑀸𑀤𑀺𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀻𑀢𑀺 𑀆𑀳 ‘‘𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡’’𑀦𑁆𑀢𑀺. 𑀳𑀢𑁆𑀣𑀧𑀸𑀤𑀫𑀼𑀔𑀥𑁄𑀯𑀦𑀦𑀳𑀆𑀦𑁄𑀤𑀓𑀲𑀺𑀜𑁆𑀘𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀧𑀓𑀸𑀭𑀦𑁆𑀢𑀭𑁂𑀦 𑀓𑀧𑁆𑀧𑀺𑀬𑀉𑀤𑀓𑀲𑀺𑀜𑁆𑀘𑀦𑀫𑁂𑀯 𑀤𑀲𑁆𑀲𑁂𑀢𑀺. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂 𑀓𑁄𑀝𑁆𑀝𑀦𑀔𑀡𑀦𑀸𑀤𑀺𑀯𑀲𑁂𑀦 𑀲𑀬𑀁 𑀓𑀭𑀡𑀲𑁆𑀲𑀧𑀺 𑀓𑀣𑀁 𑀲𑀗𑁆𑀕𑀳𑁄𑀢𑀺? 𑀅𑀓𑀧𑁆𑀧𑀺𑀬𑀦𑁆𑀢𑀺 𑀯𑁄𑀳𑀭𑀺𑀬𑀢𑀻𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁄𑀢𑀺 ¶ 𑀅𑀓𑀧𑁆𑀧𑀺𑀬𑀪𑀽𑀢𑀁 𑀓𑀭𑀡𑀓𑀸𑀭𑀸𑀧𑀦𑀸𑀤𑀺 𑀲𑀩𑁆𑀩𑀫𑁂𑀯 𑀲𑀗𑁆𑀕𑀳𑀺𑀢𑀁, 𑀦 𑀧𑀦 𑀅𑀓𑀧𑁆𑀧𑀺𑀬𑀯𑀘𑀦𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀸𑀡𑀧𑀡𑁆𑀡𑀸𑀤𑀻𑀦𑀁 𑀳𑀭𑀡𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀤𑀸𑀮𑀸𑀤𑀻𑀦𑀺 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀞𑀸𑀦𑀢𑁄 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀞𑀸𑀦𑀫𑁂𑀯 𑀧𑀸𑀓𑀝𑀢𑀭𑀦𑁆𑀢𑀺 ‘‘𑀑𑀪𑀸𑀲𑁄’’𑀢𑀺 𑀯𑀼𑀢𑁆𑀢𑀁.

𑁨𑁯. 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀧𑀘𑁆𑀙𑀸 𑀯𑀤𑀢𑀺. 𑀯𑀦𑀢𑁆𑀣𑀸𑀬𑀸𑀢𑀺 𑀇𑀤𑀁 𑀓𑁂𑀘𑀺 ‘‘𑀯𑀢𑀢𑁆𑀣𑀸𑀬𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀯𑀢𑀺𑀅𑀢𑁆𑀣𑀸𑀬𑀸𑀢𑀺 ¶ 𑀅𑀢𑁆𑀣𑁄. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀫𑁆𑀧𑀺 𑀢𑀣𑁂𑀯 𑀯𑀼𑀢𑁆𑀢𑀁, ‘‘𑀆𑀭𑀸𑀫𑀭𑁄𑀧𑀸 𑀯𑀦𑀭𑁄𑀧𑀸, 𑀬𑁂 𑀦𑀭𑀸 𑀲𑁂𑀢𑀼𑀓𑀸𑀭𑀓𑀸’’𑀢𑀺 (𑀲𑀁. 𑀦𑀺. 𑁧.𑁪𑁭) 𑀯𑀘𑀦𑀢𑁄 𑀧𑀦 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀏𑀓𑀘𑁆𑀘𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮𑀜𑁆𑀘 𑀲𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀁 𑀓𑀺𑀜𑁆𑀘𑀺 𑀫𑀸𑀢𑀺𑀓𑀦𑁆𑀢𑀺 𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸 𑀅𑀲𑀼𑀓𑁆𑀔𑀫𑀸𑀢𑀺𑀓𑀁 𑀯𑀸. 𑀓𑀧𑁆𑀧𑀺𑀬𑀉𑀤𑀓𑀁 𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀧𑁆𑀧𑀺𑀬𑀉𑀤𑀓𑀁 𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀬𑀁 𑀭𑁄𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 ‘‘𑀭𑁄𑀧𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺𑀧𑀺 𑀲𑀺𑀤𑁆𑀥𑀁.

𑁩𑁦. 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀧𑀣𑀯𑀻𑀔𑀡𑀦𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀸𑀢𑀺 ‘‘𑀇𑀤𑀁 𑀔𑀡, 𑀇𑀤𑀁 𑀭𑁄𑀧𑁂𑀳𑀻’’𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦. 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀭𑀸𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀣𑀯𑀺𑀬𑀁.

𑀲𑀩𑁆𑀩𑀢𑁆𑀣𑀸𑀢𑀺 𑀓𑀼𑀮𑀲𑀗𑁆𑀕𑀳𑀧𑀭𑀺𑀪𑁄𑀕𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀭𑁄𑀧𑀺𑀢𑁂. 𑀤𑀼𑀓𑁆𑀓𑀝𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀓𑀧𑁆𑀧𑀺𑀬𑁂𑀦𑀸𑀢𑀺 𑀓𑀧𑁆𑀧𑀺𑀬𑀉𑀤𑀓𑁂𑀦. 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀧𑀭𑀺𑀪𑁄𑀕𑀸𑀦𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀲𑀬𑀁 𑀲𑀺𑀜𑁆𑀘𑀦𑁂, 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀸 𑀲𑀺𑀜𑁆𑀘𑀸𑀧𑀦𑁂 𑀤𑀼𑀓𑁆𑀓𑀝𑀁, 𑀧𑀭𑀺𑀪𑁄𑀕𑀢𑁆𑀣𑀸𑀬 𑀲𑀬𑀁 𑀲𑀺𑀜𑁆𑀘𑀦𑁂, 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀲𑀺𑀜𑁆𑀘𑀸𑀧𑀦𑁂 𑀘 𑀤𑀼𑀓𑁆𑀓𑀝𑀁. 𑀧𑀬𑁄𑀕𑀩𑀳𑀼𑀮𑀢𑀸𑀬𑀸𑀢𑀺 𑀲𑀬𑀁 𑀓𑀭𑀡𑁂, 𑀓𑀸𑀬𑀧𑀬𑁄𑀕𑀲𑁆𑀲 𑀓𑀸𑀭𑀸𑀧𑀦𑁂 𑀯𑀘𑀻𑀧𑀬𑁄𑀕𑀲𑁆𑀲 𑀩𑀳𑀼𑀢𑁆𑀢𑁂𑀦. 𑀆𑀧𑀢𑁆𑀢𑀺𑀩𑀳𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀲𑀬𑀁 𑀲𑀺𑀜𑁆𑀘𑀦𑁂 𑀥𑀸𑀭𑀸𑀧𑀘𑁆𑀙𑁂𑀤𑀕𑀡𑀦𑀸𑀬 𑀆𑀧𑀢𑁆𑀢𑀺𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀺𑀜𑁆𑀘𑀸𑀧𑀦𑁂 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀆𑀧𑀢𑁆𑀢𑀺, 𑀲𑀓𑀺𑀁 𑀆𑀡𑀢𑁆𑀢𑀲𑁆𑀲 𑀩𑀳𑀼𑀲𑀺𑀜𑁆𑀘𑀦𑁂 𑀏𑀓𑀸𑀯.

𑀑𑀘𑀺𑀦𑀦𑁂 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀓𑀼𑀮𑀲𑀗𑁆𑀕𑀳𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 ¶ 𑀑𑀘𑀺𑀦𑀦𑁂. 𑀲𑀓𑀺𑀁 𑀆𑀡𑀢𑁆𑀢𑁄𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀡𑀢𑁆𑀢𑁄 ¶ . 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀡𑀢𑁆𑀢𑀢𑁆𑀢𑀸 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑁂𑀦 (𑀧𑀸𑀘𑀺. 𑁯𑁦-𑁯𑁧) 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀧𑁆𑀧𑀺𑀬𑀯𑀘𑀦𑁂𑀦 𑀧𑀦 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀑𑀘𑀺𑀦𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯.

𑁩𑁧. 𑀕𑀦𑁆𑀣𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑀸𑀫𑀁 𑀕𑀦𑁆𑀣𑀺𑀫𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦 𑀯𑀝𑁆𑀝𑀢𑀻𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬, 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀓𑀭𑁄𑀦𑁆𑀢𑀲𑁆𑀲 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀢𑀻𑀢𑀺 𑀯𑀢𑁆𑀣𑀼𑀧𑀽𑀚𑀸𑀤𑀺𑀅𑀢𑁆𑀣𑀸𑀬 𑀯𑀝𑁆𑀝𑀢𑀺, 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀪𑀺𑀓𑁆𑀔𑀼𑀲𑁆𑀲 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀥𑀫𑁆𑀫𑀸𑀲𑀦𑀯𑀺𑀢𑀸𑀦𑁂 𑀩𑀤𑁆𑀥𑀓𑀡𑁆𑀝𑀓𑁂𑀲𑀼 𑀧𑀼𑀧𑁆𑀨𑀸𑀦𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀭𑀽𑀧𑀭𑀺 𑀯𑀺𑀚𑁆𑀛𑀺𑀢𑁆𑀯𑀸 𑀙𑀢𑁆𑀢𑀲𑀤𑀺𑀲𑀁 𑀓𑀢𑁆𑀯𑀸 𑀆𑀯𑀼𑀡𑀦𑀢𑁄 ‘‘𑀙𑀢𑁆𑀢𑀸𑀥𑀺𑀙𑀢𑁆𑀢𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀓𑀤𑀮𑀺𑀓𑁆𑀔𑀦𑁆𑀥𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁂𑀯 𑀲𑀦𑁆𑀥𑀸𑀬 ‘‘𑀢𑀁 𑀅𑀢𑀺𑀑𑀴𑀸𑀭𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀢𑁆𑀣 𑀓𑀭𑀡𑁂, 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑀸𑀧𑀦𑁂 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀁 𑀓𑀡𑁆𑀝𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀇𑀫𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀢𑀸 𑀧𑀼𑀧𑁆𑀨𑀤𑀸𑀫𑁄𑀮𑀫𑁆𑀩𑀓𑀸𑀤𑀺𑀅𑀢𑁆𑀣𑀸𑀬 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀺𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀧𑀼𑀧𑁆𑀨𑀯𑀺𑀚𑁆𑀛𑀦𑀢𑁆𑀣𑀁 𑀓𑀡𑁆𑀝𑀓𑀦𑁆𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀢𑀤𑀢𑁆𑀣𑀁 𑀓𑀡𑁆𑀝𑀓𑀫𑁂𑀯 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀜𑁆𑀘 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀁 𑀦𑀸𑀫 𑀤𑀦𑁆𑀢𑀸𑀤𑀻𑀳𑀺 𑀓𑀢𑀁 𑀧𑀼𑀧𑁆𑀨𑀸𑀥𑀸𑀦𑀁. 𑀏𑀢𑀫𑁆𑀧𑀺 𑀦𑀸𑀕𑀤𑀦𑁆𑀢𑀓𑀫𑁆𑀧𑀺 𑀲𑀙𑀺𑀤𑁆𑀤𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀲𑁄𑀓𑀧𑀺𑀡𑁆𑀟𑀺𑀬𑀸𑀢𑀺 𑀅𑀲𑁄𑀓𑀲𑀸𑀔𑀸𑀦𑀁, 𑀧𑀼𑀧𑁆𑀨𑀸𑀦𑀁 𑀯𑀸 𑀲𑀫𑀽𑀳𑁂. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁩𑁧) 𑀧𑀦 ‘‘𑀅𑀲𑁄𑀓𑀧𑀺𑀡𑁆𑀟𑀺𑀬𑀸𑀢𑀺 𑀅𑀲𑁄𑀓𑀧𑀼𑀧𑁆𑀨𑀫𑀜𑁆𑀚𑀭𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀭𑀚𑁆𑀚𑀼 𑀦𑀸𑀫 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀩𑀦𑁆𑀥𑀭𑀚𑁆𑀚𑀼. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁩𑁧) 𑀧𑀦 ‘‘𑀥𑀫𑁆𑀫𑀭𑀚𑁆𑀚𑀼 𑀦𑀸𑀫 𑀘𑁂𑀢𑀺𑀬𑀸𑀤𑀻𑀦𑀺 ¶ 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀜𑁆𑀘 𑀭𑀚𑁆𑀚𑀼𑀬𑀸 𑀘 𑀅𑀦𑁆𑀢𑀭𑀸 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀩𑀦𑁆𑀥𑀭𑀚𑁆𑀚𑀼. 𑀲𑀺𑀣𑀺𑀮𑀯𑀝𑁆𑀝𑀺𑀢𑀸𑀬 𑀯𑀸 𑀯𑀝𑁆𑀝𑀺𑀬𑀸 𑀅𑀩𑁆𑀪𑀦𑁆𑀢𑀭𑁂 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀏𑀯𑀁 𑀩𑀦𑁆𑀥𑀸𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀫𑀢𑁆𑀣𑀓𑀤𑀸𑀫𑀦𑁆𑀢𑀺 𑀥𑀫𑁆𑀫𑀸𑀲𑀦𑀸𑀤𑀺𑀫𑀢𑁆𑀣𑀓𑁂 𑀧𑀮𑀫𑁆𑀩𑀓𑀤𑀸𑀫𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀉𑀧𑁆𑀧𑀮𑀸𑀤𑀻𑀦𑀁 𑀏𑀯. 𑀯𑀸𑀓𑁂𑀦 𑀯𑀸𑀢𑀺 𑀧𑀼𑀧𑁆𑀨𑀦𑀸𑀴𑀁 𑀨𑀸𑀮𑁂𑀢𑁆𑀯𑀸 𑀧𑀼𑀧𑁆𑀨𑁂𑀦 𑀏𑀓𑀸𑀩𑀤𑁆𑀥𑀝𑁆𑀞𑀺𑀢𑀯𑀸𑀓𑁂𑀦 𑀤𑀡𑁆𑀟𑁂𑀦 𑀘 𑀏𑀓𑀸𑀩𑀤𑁆𑀥𑁂𑀦𑁂𑀯. 𑀏𑀢𑁂𑀦 𑀧𑀼𑀧𑁆𑀨𑀁 𑀩𑀻𑀚𑀕𑀸𑀫𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺 𑀧𑀜𑁆𑀘𑀲𑀼 𑀩𑀻𑀚𑁂𑀲𑀼 𑀅𑀧𑀯𑀺𑀝𑁆𑀞𑀢𑁆𑀢𑀸 𑀧𑀡𑁆𑀡𑀁 𑀯𑀺𑀬, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀯𑀺𑀓𑁄𑀧𑀦𑁂 𑀤𑁄𑀲𑁄 𑀦𑀢𑁆𑀣𑀺. 𑀬𑀜𑁆𑀘 𑀙𑀺𑀦𑁆𑀦𑀲𑁆𑀲𑀧𑀺 𑀫𑀓𑀼𑀴𑀲𑁆𑀲 𑀯𑀺𑀓𑀲𑀦𑀁, 𑀢𑀫𑁆𑀧𑀺 𑀅𑀢𑀺𑀢𑀭𑀼𑀡𑀲𑁆𑀲 𑀅𑀪𑀸𑀯𑀸 𑀯𑀼𑀟𑁆𑀠𑀺𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀧𑀭𑀺𑀡𑀢𑀲𑁆𑀲 𑀧𑀦 𑀫𑀓𑀼𑀴𑀲𑁆𑀲 𑀧𑀢𑁆𑀢𑀸𑀦𑀁 𑀲𑀺𑀦𑁂𑀳𑁂 𑀧𑀭𑀺𑀬𑀸𑀤𑀸𑀦𑀁 𑀕𑀢𑁂 𑀯𑀺𑀲𑀼𑀁𑀪𑀸𑀯𑁄 𑀏𑀯 𑀯𑀺𑀓𑀸𑀲𑁄, 𑀢𑁂𑀦𑁂𑀯 𑀙𑀺𑀦𑁆𑀦𑀫𑀓𑀼𑀴𑀯𑀺𑀓𑀸𑀲𑁄 𑀅𑀙𑀺𑀦𑁆𑀦𑀫𑀓𑀼𑀴𑀯𑀺𑀓𑀸𑀲𑀢𑁄 𑀧𑀭𑀺𑀳𑀻𑀦𑁄, 𑀫𑀺𑀮𑀸𑀢𑀦𑀺𑀬𑀼𑀢𑁆𑀢𑁄 ¶ 𑀯𑀸 𑀤𑀺𑀲𑁆𑀲𑀢𑀺. 𑀬𑀜𑁆𑀘 𑀫𑀺𑀮𑀸𑀢𑀲𑁆𑀲 𑀉𑀤𑀓𑀲𑀜𑁆𑀜𑁄𑀕𑁂 𑀅𑀫𑀺𑀮𑀸𑀦𑀢𑀸𑀧𑀚𑁆𑀚𑀦𑀁, 𑀢𑀫𑁆𑀧𑀺 𑀢𑀫𑁆𑀩𑀼𑀮𑀧𑀡𑁆𑀡𑀸𑀤𑀻𑀲𑀼 𑀲𑀫𑀸𑀦𑀁 𑀯𑀼𑀟𑁆𑀠𑀺𑀮𑀓𑁆𑀔𑀡𑀁 𑀦 𑀳𑁄𑀢𑀺. 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀘 𑀦 𑀓𑀢𑁆𑀣𑀘𑀺 𑀧𑀼𑀧𑁆𑀨𑀸𑀦𑀁 𑀓𑀧𑁆𑀧𑀺𑀬𑀓𑀭𑀡𑀁 𑀆𑀕𑀢𑀁, 𑀢𑀲𑁆𑀫𑀸 𑀧𑀼𑀧𑁆𑀨𑀁 𑀲𑀩𑁆𑀩𑀣𑀸 𑀅𑀩𑀻𑀚𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀧𑀲𑀺𑀩𑁆𑀩𑀓𑁂 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀁 𑀧𑀲𑀺𑀩𑁆𑀩𑀓𑁂 𑀯𑀸 𑀧𑀲𑀺𑀩𑁆𑀩𑀓𑀲𑀤𑀺𑀲𑀁 𑀩𑀦𑁆𑀥𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑁂 𑀯𑀸 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁩𑁧) 𑀧𑀦 ‘‘𑀔𑀦𑁆𑀥𑁂 𑀞𑀧𑀺𑀢𑀓𑀸𑀲𑀸𑀯𑀲𑁆𑀲𑀸𑀢𑀺 𑀔𑀦𑁆𑀥𑁂 𑀞𑀧𑀺𑀢𑀲𑀗𑁆𑀖𑀸𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀢𑀣𑀸𑀩𑀦𑁆𑀥𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬. 𑀇𑀫𑀺𑀦𑀸 𑀘 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀓𑀸𑀲𑀸𑀯𑀁 𑀯𑀸 𑀯𑀢𑁆𑀣𑀁 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀅𑀁𑀲𑀪𑀡𑁆𑀟𑀺𑀓𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀢𑁆𑀢𑀲𑀤𑀺𑀲𑀢𑁆𑀢𑀸 𑀯𑁂𑀞𑀺𑀫𑀁 𑀦𑀸𑀫 𑀦 𑀚𑀸𑀢𑀁, 𑀢𑀲𑁆𑀫𑀸 𑀲𑀺𑀣𑀺𑀮𑀩𑀦𑁆𑀥𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑁆𑀔𑀺𑀧𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀤𑀡𑁆𑀟𑀓𑀁 𑀧𑀦 𑀩𑀦𑁆𑀥𑀺𑀢𑀼𑀁 𑀦 ¶ 𑀯𑀝𑁆𑀝𑀢𑀻𑀢𑀺 𑀭𑀚𑁆𑀚𑀼𑀆𑀤𑀻𑀳𑀺 𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀧𑁆𑀨𑀲𑁆𑀲𑁂𑀯 𑀧𑀦 𑀅𑀘𑁆𑀙𑀺𑀦𑁆𑀦𑀤𑀡𑁆𑀟𑀓𑁂𑀳𑀺 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯.

𑀧𑀼𑀧𑁆𑀨𑀧𑀝𑁂 𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑀢𑁄 𑀧𑀼𑀧𑁆𑀨𑀤𑀸𑀫𑀲𑁆𑀲 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀺𑀭𑀺𑀬𑀢𑁄 𑀳𑀭𑀡𑀁 𑀧𑀦 𑀯𑀸𑀬𑀺𑀫𑀁 𑀦𑀸𑀫 𑀳𑁄𑀢𑀺, 𑀦 𑀧𑀼𑀭𑀺𑀫𑀁. ‘‘𑀧𑀼𑀭𑀺𑀫𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀺𑀫𑀁 𑀧𑀼𑀧𑁆𑀨𑀓𑁄𑀝𑀺𑀁 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀧𑀭𑀺𑀓𑁆𑀔𑀺𑀧𑀦𑀯𑀲𑁂𑀦 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀧𑁆𑀨𑀭𑀳𑀺𑀢𑀸𑀬 𑀲𑀼𑀢𑁆𑀢𑀯𑀸𑀓𑀓𑁄𑀝𑀺𑀬𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀯𑀸𑀭𑀁 𑀳𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁂𑀢𑀺𑀬𑀸𑀤𑀺𑀧𑀭𑀺𑀓𑁆𑀔𑁂𑀧𑀁 𑀧𑀼𑀧𑁆𑀨𑀧𑀝𑀓𑀭𑀡𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁, 𑀢𑁂𑀦𑀧𑀺 𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀧𑀼𑀧𑁆𑀨𑀧𑀝𑀁 𑀓𑀭𑁄𑀦𑁆𑀢𑁂𑀦 𑀘 𑀳𑀭𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁, 𑀢𑁂𑀦𑀧𑀺 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀤𑁆𑀯𑁂𑀬𑁂𑀯 𑀪𑀺𑀓𑁆𑀔𑀽 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀳𑀭𑀦𑁆𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀧𑀭𑁂𑀳𑀺 𑀧𑀽𑀭𑀺𑀢𑀦𑁆𑀢𑀺 𑀤𑀻𑀖𑀢𑁄 𑀧𑀲𑀸𑀭𑀺𑀢𑀁. 𑀯𑀸𑀬𑀺𑀢𑀼𑀦𑁆𑀢𑀺 𑀢𑀺𑀭𑀺𑀬𑀢𑁄 𑀳𑀭𑀺𑀢𑀼𑀁, 𑀢𑀁 𑀧𑀦 𑀏𑀓𑀯𑀸𑀭𑀫𑁆𑀧𑀺 𑀦 𑀮𑀪𑀢𑀺. 𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦𑀸𑀢𑀺 𑀅𑀕𑀦𑁆𑀣𑀺𑀢𑀸𑀦𑀺 𑀧𑀸𑀓𑀢𑀺𑀓𑀧𑀼𑀧𑁆𑀨𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀸𑀧𑁂𑀢𑁆𑀯𑀸𑀧𑀺 𑀞𑀧𑁂𑀦𑁆𑀢𑁂𑀦. 𑀧𑀼𑀧𑁆𑀨𑀤𑀸𑀫𑀁 𑀧𑀦 𑀧𑀽𑀚𑀦𑀢𑁆𑀣𑀸𑀬 𑀪𑀽𑀫𑀺𑀬𑀁 𑀞𑀧𑁂𑀦𑁆𑀢𑁂𑀦 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑁩𑁨. 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 ¶ 𑀳𑁂𑀝𑁆𑀞𑀸𑀪𑀸𑀕𑁂 𑀖𑀝𑀺𑀓𑀸𑀓𑀸𑀭𑀬𑀼𑀢𑁆𑀢𑁄, 𑀤𑀸𑀭𑀼𑀖𑀝𑀺𑀓𑀸𑀓𑀸𑀭𑁄 𑀯𑀸 𑀑𑀮𑀫𑁆𑀩𑀓𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁩𑁧) 𑀧𑀦 ‘‘𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 𑀅𑀦𑁆𑀢𑁂 𑀖𑀝𑀺𑀓𑀸𑀓𑀸𑀭𑀬𑀼𑀢𑁆𑀢𑁄 𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 ¶ (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁩𑁧) 𑀧𑀦 ‘‘𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 𑀮𑀺𑀔𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀓𑁂𑀓𑀁 𑀧𑀦 𑀤𑀸𑀫𑀁 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸𑀯 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀧𑁆𑀨𑀤𑀸𑀫𑀤𑁆𑀯𑀬𑀁 𑀲𑀗𑁆𑀖𑀝𑀺𑀢𑀼𑀓𑀸𑀫𑁂𑀦𑀧𑀺 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸𑀯 𑀲𑀼𑀢𑁆𑀢𑀓𑁄𑀝𑀺𑀁 𑀲𑀗𑁆𑀖𑀝𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑁂𑀧𑁄𑀢𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀦𑀁, 𑀢𑁂𑀦𑁂𑀯 𑀢𑀁 𑀧𑀼𑀭𑀺𑀫𑁂 𑀧𑀯𑀺𑀝𑁆𑀞𑀁, 𑀢𑀲𑁆𑀫𑀸 𑀏𑀢𑀫𑁆𑀧𑀺 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀓𑀯𑀸𑀭𑀁 𑀧𑀦 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀓𑀭𑀡𑁂 𑀫𑀸𑀮𑀸𑀕𑀼𑀡𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀼𑀧𑁆𑀨𑀤𑀸𑀫𑀓𑀭𑀡𑀦𑁆𑀢𑀺 𑀏𑀢𑁆𑀣 𑀲𑀼𑀢𑁆𑀢𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸𑀧𑀺 𑀏𑀓𑀢𑁄 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀼𑀢𑁆𑀢𑀫𑀬𑀁 𑀕𑁂𑀡𑁆𑀟𑀼𑀓𑀁 𑀦𑀸𑀫, 𑀕𑁂𑀡𑁆𑀟𑀼𑀓𑀔𑀭𑀧𑀢𑁆𑀢𑀤𑀸𑀫𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑁂𑀮𑀸𑀤𑀻𑀳𑀺 𑀓𑀢𑀤𑀸𑀫𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀧𑀭𑀲𑀦𑁆𑀢𑀓𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀧𑀭𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀤𑁂𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀏𑀢𑁆𑀣 𑀪𑀡𑁆𑀟𑀤𑁂𑀬𑁆𑀬𑀫𑁆𑀧𑀺 𑀳𑁄𑀢𑀺.

𑁩𑁩. 𑀢𑀜𑁆𑀘 𑀔𑁄 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀧𑀼𑀧𑁆𑀨𑀁 𑀤𑁂𑀦𑁆𑀢𑁂𑀦 𑀯𑀢𑁆𑀣𑀼𑀧𑀽𑀚𑀦𑀢𑁆𑀣𑀸𑀬𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀡𑁆𑀟𑀦𑀢𑁆𑀣𑀸𑀬 𑀧𑀦 𑀲𑀺𑀯𑀮𑀺𑀗𑁆𑀕𑀸𑀤𑀺𑀧𑀽𑀚𑀦𑀢𑁆𑀣𑀸𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀫𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀓𑀸𑀦𑀁 𑀢𑀸𑀯𑀓𑀸𑀮𑀺𑀓𑀫𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀲𑀘𑀺𑀧𑀻𑀢𑀺 𑀜𑀸𑀢𑀓𑀲𑁆𑀲 𑀯𑀸 𑀅𑀜𑁆𑀜𑀸𑀢𑀓𑀲𑁆𑀲 𑀯𑀸 𑀓𑀲𑁆𑀲𑀘𑀺𑀧𑀺. 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯𑀸𑀢𑀺 𑀢𑁂𑀲𑀁 𑀕𑀺𑀳𑀺𑀧𑀭𑀺𑀓𑀫𑁆𑀫𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑁂𑀢𑀺 𑀅𑀜𑁆𑀜𑀸𑀢𑀓𑀸. 𑀢𑁂𑀳𑀺𑀧𑀺 𑀲𑀸𑀫𑀡𑁂𑀭𑁂𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀢𑁆𑀢𑀲𑀻𑀲𑁂𑀦 𑀳𑀭𑀺𑀢𑀩𑁆𑀩𑀁. 𑀲𑀫𑁆𑀧𑀢𑁆𑀢𑀸𑀦𑀁 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀪𑀸𑀕𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀗𑁆𑀖𑀺𑀓𑀲𑁆𑀲 𑀮𑀸𑀪𑀲𑁆𑀲 𑀉𑀧𑀘𑀸𑀭𑀲𑀻𑀫𑀝𑁆𑀞𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀲𑀦𑁆𑀢𑀓𑀢𑁆𑀢𑀸 𑀢𑁂𑀲𑀫𑁆𑀧𑀺 𑀉𑀧𑀟𑁆𑀠𑀪𑀸𑀕𑁄 𑀮𑀩𑁆𑀪𑀢𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀽𑀴𑀓𑀦𑁆𑀢𑀺 𑀉𑀧𑀟𑁆𑀠𑀪𑀸𑀕𑀢𑁄𑀧𑀺 𑀉𑀧𑀟𑁆𑀠𑀁. 𑀘𑀢𑀼𑀢𑁆𑀣𑀪𑀸𑀕𑀲𑁆𑀲𑁂𑀢𑀁 ¶ 𑀅𑀥𑀺𑀯𑀘𑀦𑀁. 𑀲𑀸𑀫𑀡𑁂𑀭𑀸…𑀧𑁂… 𑀞𑀧𑁂𑀦𑁆𑀢𑀻𑀢𑀺 𑀇𑀤𑀁 𑀅𑀭𑀓𑁆𑀔𑀺𑀢𑀅𑀕𑁄𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 ‘‘𑀯𑀲𑁆𑀲𑀕𑁆𑀕𑁂𑀦 𑀅𑀪𑀸𑀚𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀫𑀕𑁆𑀕𑁂 𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀯𑀸.

𑁩𑁪. 𑀲𑀸𑀫𑀡𑁂𑀭𑁂𑀳𑀺 𑀤𑀸𑀧𑁂𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀇𑀤𑀁 𑀲𑀸𑀫𑀡𑁂𑀭𑁂𑀳𑀺 𑀕𑀺𑀳𑀺𑀓𑀫𑁆𑀫𑀁 𑀓𑀸𑀭𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀧𑀼𑀧𑁆𑀨𑀤𑀸𑀦𑀁 𑀳𑁄𑀢𑀻𑀢𑀺 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀦 𑀯𑀝𑁆𑀝𑀦𑀢𑁄. 𑀯𑀼𑀢𑁆𑀢𑀜𑁆𑀘 ‘‘𑀲𑀬𑀫𑁂𑀯𑀸’’𑀢𑀺𑀆𑀤𑀺. 𑀦 𑀳𑀺 𑀢𑀁 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀲𑀺𑀬𑀸. 𑀬𑀤𑀺 𑀳𑀺 𑀢𑀣𑀸 𑀆𑀕𑀢𑀸𑀦𑀁 𑀢𑁂𑀲𑀁 𑀤𑀸𑀦𑀁 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀪𑀯𑁂𑀬𑁆𑀬 ¶ , 𑀲𑀸𑀫𑀡𑁂𑀭𑁂𑀳𑀺𑀧𑀺 𑀤𑀸𑀢𑀼𑀁 𑀦 𑀮𑀩𑁆𑀪𑁂𑀬𑁆𑀬. 𑀲𑀬𑀫𑁂𑀯𑀸𑀢𑀺 𑀲𑀸𑀫𑀡𑁂𑀭𑀸 𑀲𑀬𑀫𑁂𑀯. 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀆𑀤𑀸𑀬𑀸𑀢𑀺 𑀇𑀤𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀬𑀸𑀕𑀼𑀪𑀢𑁆𑀢𑀸𑀤𑀺𑀲𑀫𑁆𑀧𑀸𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁫. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀢𑀸𑀯 𑀳𑀭𑀺𑀢𑁆𑀯𑀸𑀧𑀺 𑀳𑀭𑀸𑀧𑁂𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀺𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀓𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀯. 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀳𑀭𑀸𑀧𑁂𑀦𑁆𑀢𑁂𑀦 𑀜𑀸𑀢𑀺𑀲𑀸𑀫𑀡𑁂𑀭𑁂𑀳𑁂𑀯 𑀳𑀭𑀸𑀧𑁂𑀢𑀩𑁆𑀩𑀁. 𑀇𑀢𑀭𑁂 𑀧𑀦 𑀬𑀤𑀺 𑀲𑀬𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀻’’𑀢𑀺 𑀇𑀫𑀁 𑀧𑀼𑀧𑁆𑀨𑀤𑀸𑀦𑁂 𑀯𑀼𑀢𑁆𑀢𑀦𑀬𑀁 𑀨𑀮𑀤𑀸𑀦𑁂𑀧𑀺 𑀅𑀢𑀺𑀤𑀺𑀲𑀢𑀺, 𑀢𑀲𑁆𑀫𑀸 𑀨𑀮𑀫𑁆𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀳𑀭𑀡𑀳𑀭𑀸𑀧𑀦𑀸𑀤𑀺𑀦𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀲𑀜𑀸𑀢𑀻𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀯. 𑀇𑀤𑀸𑀦𑀺 ‘‘𑀬𑁄 𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸 𑀯𑀸…𑀧𑁂… 𑀇𑀲𑁆𑀲𑀭𑀯𑀢𑀸𑀬 𑀤𑀤𑀢𑁄 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀇𑀫𑀁 𑀧𑀼𑀧𑁆𑀨𑀤𑀸𑀦𑁂 𑀯𑀼𑀢𑁆𑀢𑀦𑀬𑀁 𑀨𑀮𑀤𑀸𑀦𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀔𑀻𑀡𑀧𑀭𑀺𑀩𑁆𑀩𑀬𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀨𑀮𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀨𑀮𑀧𑀭𑀺𑀘𑁆𑀙𑁂𑀤𑁂𑀦 𑀯𑀸. 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸𑀢𑀺 ‘‘𑀇𑀫𑁂𑀳𑀺 𑀭𑀼𑀓𑁆𑀔𑁂𑀳𑀺 ¶ 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀯𑀸. 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼𑀧𑀺 𑀧𑀦 𑀭𑀼𑀓𑁆𑀔𑁂𑀲𑀼 ‘‘𑀇𑀥 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀺, 𑀇𑀢𑁄 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑁂𑀦 𑀓𑀼𑀮𑀲𑀗𑁆𑀕𑀳𑁄 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀭𑀼𑀓𑁆𑀔𑀘𑁆𑀙𑀮𑁆𑀮𑀻𑀢𑀺 𑀭𑀼𑀓𑁆𑀔𑀢𑁆𑀢𑀘𑁄, 𑀲𑀸 ‘‘𑀪𑀸𑀚𑀦𑀻𑀬𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀓𑀼𑀮𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁬. 𑀢𑁂𑀲𑀁 𑀢𑁂𑀲𑀁 𑀕𑀺𑀳𑀻𑀦𑀁 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀲𑀸𑀲𑀦𑀧𑀝𑀺𑀲𑀸𑀲𑀦𑀳𑀭𑀡𑀁 𑀚𑀗𑁆𑀖𑀧𑁂𑀲𑀦𑀺𑀬𑀁. 𑀢𑁂𑀦𑀸𑀳 ‘‘𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀁 𑀲𑀸𑀲𑀦𑀳𑀭𑀡𑀓𑀫𑁆𑀫’’𑀦𑁆𑀢𑀺. 𑀤𑀽𑀢𑀲𑁆𑀲 𑀓𑀫𑁆𑀫𑀁 𑀤𑀽𑀢𑁂𑀬𑁆𑀬𑀁. 𑀧𑀞𑀫𑀁 𑀲𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺…𑀧𑁂… 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀇𑀤𑀁 ‘‘𑀢𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀦 𑀲𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀓𑀸𑀭𑀼𑀜𑁆𑀜𑁂 𑀞𑀺𑀢𑁄 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀕𑀺𑀳𑀻𑀦𑀜𑁆𑀘 𑀓𑀧𑁆𑀧𑀺𑀬𑀲𑀸𑀲𑀦𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀳𑀺 𑀧𑀦 𑀅𑀝𑁆𑀞𑀳𑀺 𑀓𑀼𑀮𑀤𑀽𑀲𑀓𑀓𑀫𑁆𑀫𑁂𑀳𑀻𑀢𑀺 𑀧𑀼𑀧𑁆𑀨𑀤𑀸𑀦𑀁 𑀨𑀮𑀤𑀸𑀦𑀁 𑀘𑀼𑀡𑁆𑀡𑀤𑀸𑀦𑀁 𑀫𑀢𑁆𑀢𑀺𑀓𑀤𑀸𑀦𑀁 𑀤𑀦𑁆𑀢𑀓𑀝𑁆𑀞𑀤𑀸𑀦𑀁 𑀯𑁂𑀴𑀼𑀤𑀸𑀦𑀁 𑀧𑀡𑁆𑀡𑀤𑀸𑀦𑀁 𑀚𑀗𑁆𑀖𑀧𑁂𑀲𑀦𑀺𑀓𑀦𑁆𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄𑀢𑀺 𑀓𑀼𑀮𑀤𑀽𑀲𑀦𑀧𑀘𑁆𑀘𑀬𑀸 𑀓𑀢𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁄.

𑁩𑁭. 𑀲𑁂𑀓𑁆𑀔𑀪𑀽𑀫𑀺𑀬𑀁 𑀯𑀸𑀢𑀺 𑀇𑀫𑀺𑀦𑀸 𑀛𑀸𑀦𑀪𑀽𑀫𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀪𑀽𑀢𑀸𑀦𑀁 ¶ 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁. 𑀧𑀺𑀡𑁆𑀟𑀸𑀬 𑀘𑀭𑀡𑀲𑁆𑀲 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀪𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲𑀧𑀺 𑀧𑀼𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑀺𑀥𑀸𑀬 𑀘𑀻𑀯𑀭𑀲𑀡𑁆𑀞𑀸𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀓𑀼𑀮𑀲𑀗𑁆𑀕𑀳𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁬. 𑀫𑀘𑁆𑀙𑀫𑀁𑀲𑀯𑀺𑀦𑀺𑀘𑁆𑀙𑀬𑀓𑀣𑀸

𑁩𑁮. 𑀏𑀯𑀁 ¶ 𑀓𑀼𑀮𑀲𑀗𑁆𑀕𑀳𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀫𑀘𑁆𑀙𑀫𑀁𑀲𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀫𑀘𑁆𑀙𑀫𑀁𑀲𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀣𑀮𑁂 𑀞𑀧𑀺𑀢𑀫𑀢𑁆𑀢𑁂 𑀫𑀭𑀢𑀺, 𑀓𑁂𑀯𑀝𑁆𑀝𑀸𑀤𑀻𑀳𑀺 𑀯𑀸 𑀫𑀸𑀭𑀺𑀬𑀢𑀻𑀢𑀺 𑀫𑀘𑁆𑀙𑁄. 𑀫𑀘𑁆𑀙𑀲𑁆𑀲 𑀇𑀤𑀦𑁆𑀢𑀺 𑀫𑀘𑁆𑀙𑀁, 𑀫𑀲𑀺𑀬𑀢𑁂 𑀆𑀫𑀲𑀺𑀬𑀢𑁂𑀢𑀺 𑀫𑀁𑀲𑀁, 𑀫𑀘𑁆𑀙𑀜𑁆𑀘 𑀫𑀁𑀲𑀜𑁆𑀘 𑀫𑀘𑁆𑀙𑀫𑀁𑀲𑀸𑀦𑀺, 𑀢𑁂𑀲𑀼. 𑀫𑀘𑁆𑀙𑀫𑀁𑀲𑁂𑀲𑀼 𑀧𑀦 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀫𑀘𑁆𑀙𑀕𑁆𑀕𑀳𑀡𑁂𑀦𑀸𑀢𑀺 𑀏𑀢𑁆𑀣 𑀦𑀺𑀤𑁆𑀥𑀸𑀭𑀡𑀁 𑀦 𑀓𑀸𑀢𑀩𑁆𑀩𑀁. 𑀧𑀦-𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑁄, 𑀤𑀺𑀯𑀸𑀲𑁂𑀬𑁆𑀬𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑀢𑁄 𑀅𑀧𑀭𑁄 𑀫𑀘𑁆𑀙𑀫𑀁𑀲𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀕𑀬𑁆𑀳𑀢𑁂 𑀅𑀦𑁂𑀦𑀸𑀢𑀺 𑀕𑀳𑀡𑀁. 𑀓𑀺𑀁 𑀢𑀁? 𑀲𑀤𑁆𑀤𑁄, 𑀫𑀘𑁆𑀙𑀇𑀢𑀺 𑀕𑀳𑀡𑀁 𑀫𑀘𑁆𑀙𑀕𑁆𑀕𑀳𑀡𑀁, 𑀢𑁂𑀦 𑀫𑀘𑁆𑀙𑀕𑁆𑀕𑀳𑀡𑁂𑀦, 𑀫𑀘𑁆𑀙𑀲𑀤𑁆𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀁𑀲𑁂𑀲𑀼 𑀧𑀦…𑀧𑁂… 𑀅𑀓𑀧𑁆𑀧𑀺𑀬𑀸𑀦𑀻𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀫𑀁𑀲𑀁 𑀲𑀫𑀸𑀦𑀚𑀸𑀢𑀺𑀫𑀁𑀲𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀳𑀢𑁆𑀣𑀺𑀅𑀲𑁆𑀲𑀸𑀦𑀁 𑀫𑀁𑀲𑀸𑀦𑀺 𑀭𑀸𑀚𑀗𑁆𑀕𑀢𑁄, 𑀲𑀼𑀦𑀔𑀅𑀳𑀻𑀦𑀁 𑀚𑁂𑀕𑀼𑀘𑁆𑀙𑀪𑀸𑀯𑀢𑁄, 𑀲𑁂𑀲𑀸𑀦𑀁 𑀯𑀸𑀴𑀫𑀺𑀕𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀧𑀭𑀺𑀩𑀦𑁆𑀥𑀯𑀺𑀫𑁄𑀘𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀓𑁄𑀝𑀻𑀳𑀺 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀧𑀭𑀺𑀲𑀼𑀤𑁆𑀥𑀁, 𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀤𑀺𑀝𑁆𑀞𑀅𑀲𑀼𑀢𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀸𑀭𑀫𑁆𑀫𑀡𑀪𑀸𑀯𑀢𑁄 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀅𑀧𑀭𑀺𑀲𑀗𑁆𑀓𑀺𑀢𑀁 𑀧𑀦 𑀓𑀣𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀧𑀭𑀺𑀲𑀗𑁆𑀓𑀺𑀢𑀁 𑀧𑀦𑀸’’𑀢𑀺𑀆𑀤𑀺, 𑀢𑀻𑀡𑀺 𑀧𑀭𑀺𑀲𑀗𑁆𑀓𑀺𑀢𑀸𑀦𑀺 𑀜𑀢𑁆𑀯𑀸 𑀢𑁂𑀲𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀧𑀭𑀺𑀲𑀗𑁆𑀓𑀺𑀢𑀸𑀦𑀺 𑀘 𑀏𑀯𑀁 𑀧𑀭𑀺𑀲𑀗𑁆𑀓𑀺𑀢𑁂 𑀲𑀢𑀺 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀺𑀜𑁆𑀘 𑀢𑁂𑀦 𑀯𑀺𑀥𑀺𑀦𑀸 𑀅𑀧𑀭𑀺𑀲𑀗𑁆𑀓𑀺𑀢𑁂 𑀲𑀢𑀺 𑀓𑀢𑁆𑀢𑀩𑁆𑀩𑀪𑀸𑀯𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀤𑀺𑀲𑁆𑀯𑀸 𑀧𑀭𑀺𑀲𑀗𑁆𑀓𑀺𑀢𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀺𑀢𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀅𑀤𑀺𑀲𑁆𑀯𑀸 𑀅𑀲𑀼𑀢𑁆𑀯𑀸 𑀢𑀓𑁆𑀓𑁂𑀦 𑀅𑀦𑀼𑀫𑀸𑀦𑁂𑀦 𑀧𑀭𑀺𑀲𑀗𑁆𑀓𑀺𑀢𑀁 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀧𑀭𑀺𑀲𑀗𑁆𑀓𑀺𑀢𑀲𑀸𑀫𑀜𑁆𑀜𑁂𑀦 𑀏𑀓𑀸 𑀓𑁄𑀝𑀺 ¶ 𑀳𑁄𑀢𑀺, 𑀢𑀢𑁄 𑀯𑀺𑀫𑀼𑀢𑁆𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀁 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀫𑀘𑁆𑀙𑀫𑀁𑀲𑀁 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺.

𑀚𑀸𑀮𑀁 𑀫𑀘𑁆𑀙𑀩𑀦𑁆𑀥𑀦𑀁. 𑀯𑀸𑀕𑀼𑀭𑀸 𑀫𑀺𑀕𑀩𑀦𑁆𑀥𑀺𑀦𑀻. 𑀓𑀧𑁆𑀧𑀢𑀻𑀢𑀺 𑀬𑀤𑀺 𑀢𑁂𑀲𑀁 𑀯𑀘𑀦𑁂𑀦 𑀲𑀗𑁆𑀓𑀸 𑀦𑀺𑀯𑀢𑁆𑀢𑀢𑀺, 𑀯𑀝𑁆𑀝𑀢𑀺, 𑀦 𑀢𑀁 𑀯𑀘𑀦𑀁 𑀮𑁂𑀲𑀓𑀧𑁆𑀧𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀓𑀧𑁆𑀧𑀢𑀻’’𑀢𑀺. 𑀧𑀯𑀢𑁆𑀢𑀫𑀁𑀲𑀦𑁆𑀢𑀺 𑀆𑀧𑀡𑀸𑀤𑀻𑀲𑀼 𑀧𑀯𑀢𑁆𑀢𑀁 𑀯𑀺𑀓𑁆𑀓𑀸𑀬𑀺𑀓𑀁 𑀯𑀸 𑀫𑀢𑀫𑀁𑀲𑀁 𑀯𑀸. 𑀫𑀗𑁆𑀕𑀮𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀳𑀼𑀦𑀧𑀸𑀳𑀼𑀦𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀅𑀓𑀢𑀦𑁆𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀅𑀓𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀜𑁆𑀘 𑀫𑀗𑁆𑀕𑀮𑀸𑀤𑀻𑀦𑀜𑁆𑀘𑀸𑀢𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀫𑁆𑀧𑀺 𑀦 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀬𑀣𑀸𑀞𑀺𑀢𑀯𑀲𑁂𑀦 𑀅𑀯𑀥𑀸𑀭𑀡𑀁 𑀕𑀳𑁂𑀢𑁆𑀯𑀸 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑁂𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀲𑀗𑁆𑀓𑀺𑀢𑀸𑀪𑀸𑀯𑀫𑀸𑀳.

𑁩𑁯. 𑀢𑀫𑁂𑀯𑀢𑁆𑀣𑀁 𑀆𑀯𑀺𑀓𑀸𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀁 𑀯𑀝𑁆𑀝𑀢𑀻𑀢𑀺 𑀅𑀚𑀸𑀦𑀦𑁆𑀢𑀸𑀦𑀁 𑀯𑀝𑁆𑀝𑀢𑀺, 𑀚𑀸𑀦𑀢𑁄𑀯𑁂𑀢𑁆𑀣 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀢𑁂𑀬𑁂𑀯𑀸𑀢𑀺 𑀬𑁂 𑀉𑀤𑁆𑀤𑀺𑀲𑁆𑀲 𑀓𑀢𑀁, 𑀢𑁂𑀬𑁂𑀯. 𑀉𑀤𑁆𑀤𑀺𑀲𑁆𑀲 𑀓𑀢𑀫𑀁𑀲𑀧𑀭𑀺𑀪𑁄𑀕𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀧𑀭𑀺𑀪𑁄𑀕𑁂 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑀺𑀢𑁆𑀢𑀓𑀸𑀧𑀢𑁆𑀢𑀺, 𑀇𑀢𑀭𑀲𑁆𑀫𑀺𑀁 𑀅𑀘𑀺𑀢𑁆𑀢𑀓𑀸. 𑀢𑁂𑀦𑀸𑀳 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺. ‘‘𑀧𑀭𑀺𑀪𑁄𑀕𑀓𑀸𑀮𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁩𑁯) 𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀅𑀦𑀸𑀧𑀢𑁆𑀢𑀺 𑀲𑀺𑀤𑁆𑀥𑀸. 𑀅𑀚𑀸𑀦𑀺𑀢𑁆𑀯𑀸 ¶ 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀳𑀺 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀯𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀫𑀘𑁆𑀙𑀫𑀁𑀲𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.

𑁭. 𑀅𑀦𑀸𑀫𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸

𑁪𑁦. 𑀏𑀯𑀁 ¶ 𑀫𑀘𑁆𑀙𑀫𑀁𑀲𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀫𑀸𑀲𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀅𑀦𑀸𑀫𑀸𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀫𑀲𑀺𑀬𑀢𑁂𑀢𑀺 𑀆𑀫𑀸𑀲𑀁, 𑀦 𑀆𑀫𑀸𑀲𑀁 𑀅𑀦𑀸𑀫𑀸𑀲𑀁, 𑀅𑀧𑀭𑀸𑀫𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀭𑀺𑀧𑀦𑁆𑀣𑀺𑀓𑀸𑀢𑀺 𑀯𑀺𑀓𑀼𑀧𑁆𑀧𑀦𑀺𑀓𑀸, 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀫𑀸𑀢𑀭𑀦𑁆𑀢𑀺 𑀏𑀢𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀲𑀼 𑀧𑀦 𑀇𑀢𑁆𑀣𑀻𑀲𑀼 𑀓𑀸𑀭𑀼𑀜𑁆𑀜𑀸𑀥𑀺𑀧𑁆𑀧𑀸𑀬𑁂𑀦 𑀫𑀸𑀢𑀭𑀺 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀦𑁂𑀯𑀢𑁆𑀣𑀺 𑀤𑁄𑀲𑁄𑀢𑀺 𑀯𑀤𑀦𑁆𑀢𑀺. ‘‘𑀫𑀸𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀸𑀲𑀼 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀸𑀧𑀺 𑀅𑀢𑁆𑀣𑀺. 𑀏𑀢𑁆𑀣 𑀕𑀡𑁆𑀳𑀸𑀳𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀨𑀼𑀲𑀦𑁂 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀸𑀭𑀼𑀜𑁆𑀜𑁂𑀦 𑀧𑀦 𑀯𑀢𑁆𑀣𑀸𑀤𑀺𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀁 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲𑀧𑀺 𑀅𑀯𑀲𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀉𑀤𑀓𑁂 𑀦𑀺𑀫𑀼𑀚𑁆𑀚𑀦𑁆𑀢𑀺𑀁 𑀓𑀸𑀭𑀼𑀜𑁆𑀜𑁂𑀦 𑀲𑀳𑀲𑀸 𑀅𑀦𑀸𑀫𑀸𑀲𑀦𑁆𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑁂𑀲𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 𑀆𑀓𑀟𑁆𑀠𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀫𑀻𑀬𑀫𑀸𑀦𑀁 𑀫𑀸𑀢𑀭𑀁 𑀉𑀧𑁂𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀇𑀢𑁆𑀣𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀓𑁆𑀓𑀝𑁆𑀞𑀸𑀬 𑀫𑀸𑀢𑀼𑀬𑀸𑀧𑀺 𑀆𑀫𑀸𑀲𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀸𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀓𑀸𑀢𑀩𑁆𑀩𑀁 𑀧𑀦 𑀅𑀜𑁆𑀜𑀸𑀲𑀫𑁆𑀧𑀺 𑀇𑀢𑁆𑀣𑀻𑀦𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀅𑀦𑀸𑀫𑀸𑀲𑀢𑁆𑀢𑁂 𑀯𑀺𑀲𑁂𑀲𑀸𑀪𑀸𑀯𑀸.

𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 ¶ 𑀳𑀺𑀭𑀺𑀯𑁂𑀭𑀸𑀤𑀺𑀫𑀽𑀮𑁂𑀳𑀺 𑀓𑁂𑀲𑀸𑀮𑀗𑁆𑀓𑀸𑀭𑀢𑁆𑀣𑀸𑀬 𑀓𑀢𑀘𑀼𑀫𑁆𑀩𑀝𑀓𑀁. 𑀢𑀸𑀮𑀧𑀡𑁆𑀡𑀫𑀼𑀤𑁆𑀤𑀺𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑁂𑀳𑀺 𑀓𑀢𑀁 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁. 𑀢𑁂𑀦 𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀁 𑀓𑀝𑀺𑀲𑀼𑀢𑁆𑀢𑀓𑀡𑁆𑀡𑀧𑀺𑀴𑀦𑁆𑀥𑀦𑀸𑀤𑀺 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸, 𑀘𑀻𑀯𑀭𑀢𑁆𑀣𑀸𑀬 𑀧𑀭𑀺𑀡𑀸𑀫𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀻𑀯𑀭𑀢𑁆𑀣𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀧𑀘𑁆𑀘𑀢𑁆𑀣𑀭𑀡𑀯𑀺𑀢𑀸𑀦𑀸𑀤𑀺𑀅𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯, 𑀧𑀽𑀚𑀸𑀤𑀺𑀅𑀢𑁆𑀣𑀁 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀲𑀧𑀲𑀸𑀥𑀦𑀤𑀦𑁆𑀢𑀲𑀽𑀘𑀻𑀢𑀺 𑀇𑀤𑀁 𑀲𑀻𑀲𑀸𑀮𑀗𑁆𑀓𑀸𑀭𑀢𑁆𑀣𑀸𑀬 𑀧𑀝𑀧𑀺𑀮𑁄𑀢𑀺𑀓𑀸𑀳𑀺 𑀓𑀢𑀲𑀻𑀲𑀧𑀲𑀸𑀥𑀦𑀓𑀜𑁆𑀘𑁂𑀯 𑀤𑀦𑁆𑀢𑀲𑀽𑀘𑀺𑀆𑀤𑀺 𑀘𑀸𑀢𑀺 𑀤𑁆𑀯𑁂 𑀢𑀬𑁄. 𑀲𑀻𑀲𑀧𑀲𑀸𑀥𑀦𑀁 𑀲𑀺𑀧𑀸𑀝𑀺𑀓𑁄𑀧𑀓𑀭𑀡𑀢𑁆𑀣𑀸𑀬 𑀘𑁂𑀯 𑀤𑀦𑁆𑀢𑀲𑀽𑀘𑀺𑀁 𑀲𑀽𑀘𑀺𑀉𑀧𑀓𑀭𑀡𑀢𑁆𑀣𑀸𑀬 𑀘 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑁂𑀲𑀓𑀮𑀸𑀧𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀢𑀺𑀭𑀺𑀬𑀁 𑀧𑀯𑁂𑀲𑀦𑀢𑁆𑀣𑀸𑀬 𑀓𑀢𑀸 𑀲𑀽𑀘𑀺 𑀏𑀯 𑀲𑀻𑀲𑀧𑀲𑀸𑀥𑀦𑀓𑀤𑀦𑁆𑀢𑀲𑀽𑀘𑀻𑀢𑀺 𑀏𑀓𑀫𑁂𑀯 𑀓𑀢𑁆𑀯𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀩𑁆𑀩𑀲𑀽𑀘𑀺𑀬𑁂𑀯 𑀢𑀲𑁆𑀲 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀉𑀧𑀓𑀭𑀡𑀦𑁆𑀢𑀺 𑀲𑀺𑀧𑀸𑀝𑀺𑀓𑀲𑀽𑀘𑀺𑀉𑀧𑀓𑀭𑀡𑀁, 𑀏𑀯𑀁 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀧𑁄𑀢𑁆𑀣𑀓𑀭𑀽𑀧𑀦𑁆𑀢𑀺 𑀲𑀼𑀥𑀸𑀤𑀻𑀳𑀺 𑀓𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀲𑀡𑁆𑀞𑀸𑀦𑁂𑀦 𑀓𑀢𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯 ¶ . 𑀇𑀢𑁆𑀣𑀺𑀭𑀽𑀧𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀢𑁆𑀣𑀼𑀪𑀺𑀢𑁆𑀢𑀺𑀆𑀤𑀺𑀜𑁆𑀘 𑀇𑀢𑁆𑀣𑀺𑀭𑀽𑀧𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀭𑀽𑀧𑁂 𑀳𑀺 𑀅𑀦𑀸𑀫𑀸𑀲𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂 𑀅𑀲𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀆𑀫𑀲𑀢𑁄 𑀤𑁄𑀲𑁄 𑀦𑀢𑁆𑀣𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀳𑀢𑁆𑀣𑁂𑀦 𑀅𑀕𑁆𑀕𑀳𑁂𑀢𑁆𑀯𑀸𑀯 𑀓𑁂𑀦𑀘𑀺 𑀤𑀡𑁆𑀟𑀸𑀤𑀺𑀦𑀸 𑀪𑀺𑀦𑁆𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀦𑀸𑀫𑀸𑀲𑀫𑁆𑀧𑀺 𑀤𑀡𑁆𑀟𑀧𑀸𑀲𑀸𑀡𑀸𑀤𑀻𑀳𑀺 𑀪𑁂𑀤𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸, 𑀧𑀸𑀴𑀺𑀬𑀫𑁆𑀧𑀺 𑀆𑀧𑀤𑀸𑀲𑀼 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲 𑀆𑀫𑀲𑀦𑁂𑀧𑀺 𑀅𑀦𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀧𑁆𑀧𑀺𑀦𑀺𑀆𑀤𑀺𑀯𑀸𑀴𑀫𑀺𑀕𑀻𑀳𑀺 𑀕𑀳𑀺𑀢𑀧𑀸𑀡𑀓𑀸𑀦𑀁 𑀫𑁄𑀘𑀦𑀢𑁆𑀣𑀸𑀬 𑀢𑀁 𑀢𑀁 𑀲𑀧𑁆𑀧𑀺𑀦𑀺𑀆𑀤𑀺𑀯𑀢𑁆𑀣𑀼𑀁 𑀤𑀡𑁆𑀟𑀸𑀤𑀻𑀳𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀼𑀁, 𑀫𑀸𑀢𑀼𑀆𑀤𑀺𑀁 𑀉𑀤𑀓𑁂 𑀫𑀻𑀬𑀫𑀸𑀦𑀁 𑀯𑀢𑁆𑀣𑀸𑀤𑀻𑀳𑀺 𑀕𑀳𑁂𑀢𑀼𑀁, 𑀅𑀲𑀓𑁆𑀓𑁄𑀦𑁆𑀢𑀺𑀁 ¶ 𑀓𑁂𑀲𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀉𑀓𑁆𑀔𑀺𑀧𑀺𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀯. ‘‘𑀅𑀝𑁆𑀞𑀓𑀣𑀸𑀬𑀁 ‘𑀦 𑀢𑁆𑀯𑁂𑀯 𑀆𑀫𑀲𑀺𑀢𑀩𑁆𑀩𑀸’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀅𑀫𑀻𑀬𑀫𑀸𑀦𑀁 𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁨𑁮𑁧) 𑀯𑀼𑀢𑁆𑀢𑀁.

𑁪𑁧. 𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 ‘‘𑀫𑀕𑁆𑀕𑁄 𑀅𑀬’’𑀦𑁆𑀢𑀺 𑀫𑀕𑁆𑀕𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀇𑀤𑀁 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀳𑀺 𑀧𑀦 ‘‘𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑀬𑀫𑁂𑀯 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀚𑀸𑀢𑀓𑀸𑀦𑀻𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀢𑀕𑀸𑀫𑀪𑀸𑀯𑁂𑀦𑁂𑀯 𑀞𑀺𑀢𑀸𑀦𑀺. ‘‘𑀓𑀻𑀴𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺 𑀧𑀘𑁆𑀘𑀬𑁂 𑀆𑀫𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀇𑀤𑀜𑁆𑀘 𑀕𑀺𑀳𑀺𑀲𑀦𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀧𑀦 𑀧𑀭𑀺𑀪𑁄𑀕𑀸𑀭𑀳𑀁 𑀲𑀩𑁆𑀩𑀣𑀸 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀤𑀼𑀭𑀽𑀧𑀘𑀺𑀡𑁆𑀡𑀢𑁆𑀢𑀸. 𑀢𑀸𑀮𑀧𑀦𑀲𑀸𑀤𑀻𑀦𑀻𑀢𑀺 𑀘𑁂𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀴𑀺𑀓𑁂𑀭𑀮𑀩𑀼𑀚𑀢𑀺𑀧𑀼𑀲𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀏𑀴𑀸𑀮𑀼𑀓𑀨𑀮𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀣𑀸𑀯𑀼𑀢𑁆𑀢𑀨𑀮𑀸𑀦𑀁𑀬𑁂𑀯 𑀘𑁂𑀢𑁆𑀣 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀆𑀫𑀲𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀲𑀸𑀡𑀲𑀓𑁆𑀔𑀭𑀸𑀤𑀻𑀦𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀆𑀫𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀇𑀤𑀁 𑀅𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄𑀧𑀺 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺 𑀅𑀦𑀸𑀫𑀸𑀲𑀢𑁆𑀢𑀸𑀪𑀸𑀯𑀸.

𑁪𑁨. 𑀫𑀼𑀢𑁆𑀢𑀸𑀢𑀺 (𑀫. 𑀦𑀺. 𑀝𑀻. 𑁧.𑁨 𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀳𑀢𑁆𑀣𑀺𑀓𑀼𑀫𑁆𑀪𑀚𑀸𑀢𑀺𑀓𑀸 𑀅𑀝𑁆𑀞𑀯𑀺𑀥𑀸 𑀫𑀼𑀢𑁆𑀢𑀸. 𑀢𑀣𑀸 𑀳𑀺 𑀳𑀢𑁆𑀣𑀺𑀓𑀼𑀫𑁆𑀪𑀁, 𑀯𑀭𑀸𑀳𑀤𑀸𑀞𑀁, 𑀪𑀼𑀚𑀕𑀲𑀻𑀲𑀁, 𑀯𑀮𑀸𑀳𑀓𑀁, 𑀯𑁂𑀴𑀼, 𑀫𑀘𑁆𑀙𑀲𑀺𑀭𑁄, 𑀲𑀗𑁆𑀔𑁄, 𑀲𑀺𑀧𑁆𑀧𑀻𑀢𑀺 𑀅𑀝𑁆𑀞 𑀫𑀼𑀢𑁆𑀢𑀸𑀬𑁄𑀦𑀺𑀬𑁄. 𑀢𑀢𑁆𑀣 𑀳𑀢𑁆𑀣𑀺𑀓𑀼𑀫𑁆𑀪𑀚𑀸 𑀧𑀻𑀢𑀯𑀡𑁆𑀡𑀸 𑀧𑀪𑀸𑀳𑀻𑀦𑀸. 𑀯𑀭𑀸𑀳𑀤𑀸𑀞𑀸 𑀯𑀭𑀸𑀳𑀤𑀸𑀞𑀸𑀯𑀡𑁆𑀡𑀸𑀯. 𑀪𑀼𑀚𑀕𑀲𑀻𑀲𑀚𑀸 𑀦𑀻𑀮𑀸𑀤𑀺𑀯𑀡𑁆𑀡𑀸 𑀲𑀼𑀯𑀺𑀲𑀼𑀤𑁆𑀥𑀸 𑀯𑀝𑁆𑀝𑀮𑀸 𑀘. 𑀯𑀮𑀸𑀳𑀓𑀚𑀸 𑀪𑀸𑀲𑀼𑀭𑀸 𑀤𑀼𑀩𑁆𑀩𑀺𑀪𑀸𑀕𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑀺𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀤𑁂𑀯𑀽𑀧𑀪𑁄𑀕𑀸 𑀏𑀯 𑀘 𑀳𑁄𑀦𑁆𑀢𑀺. 𑀯𑁂𑀴𑀼𑀚𑀸 𑀓𑀭𑀓𑀨𑀮𑀲𑀫𑀸𑀦𑀯𑀡𑁆𑀡𑀸 𑀦 𑀪𑀸𑀲𑀼𑀭𑀸, 𑀢𑁂 ¶ 𑀘 𑀯𑁂𑀴𑀽 𑀅𑀫𑀦𑀼𑀲𑁆𑀲𑀕𑁄𑀘𑀭𑁂𑀬𑁂𑀯 𑀧𑀤𑁂𑀲𑁂 𑀚𑀸𑀬𑀦𑁆𑀢𑀺 ¶ . 𑀫𑀘𑁆𑀙𑀲𑀺𑀭𑀚𑀸 𑀧𑀸𑀞𑀻𑀦𑀧𑀺𑀝𑁆𑀞𑀺𑀲𑀫𑀸𑀦𑀯𑀡𑁆𑀡𑀸 𑀯𑀝𑁆𑀝𑀮𑀸 𑀮𑀖𑀯𑁄 𑀘 𑀢𑁂𑀚𑀯𑀦𑁆𑀢𑀸 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸 𑀘, 𑀢𑁂 𑀘 𑀫𑀘𑁆𑀙𑀸 𑀲𑀫𑀼𑀤𑁆𑀤𑀫𑀚𑁆𑀛𑁂𑀬𑁂𑀯 𑀚𑀸𑀬𑀦𑁆𑀢𑀺. 𑀲𑀗𑁆𑀔𑀚𑀸 𑀲𑀗𑁆𑀔𑀉𑀤𑀭𑀘𑁆𑀙𑀯𑀺𑀯𑀡𑁆𑀡𑀸 𑀓𑁄𑀮𑀨𑀮𑀧𑁆𑀧𑀫𑀸𑀡𑀸𑀧𑀺 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸𑀯. 𑀲𑀺𑀧𑁆𑀧𑀺𑀚𑀸 𑀧𑀪𑀸𑀯𑀺𑀲𑁂𑀲𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀯𑀁 𑀚𑀸𑀢𑀺𑀢𑁄 𑀅𑀝𑁆𑀞𑀯𑀺𑀥𑀸𑀲𑀼 𑀫𑀼𑀢𑁆𑀢𑀸𑀲𑀼 𑀬𑀸 𑀫𑀘𑁆𑀙𑀲𑀗𑁆𑀔𑀲𑀺𑀧𑁆𑀧𑀺𑀚𑀸, 𑀢𑀸 𑀲𑀸𑀫𑀼𑀤𑁆𑀤𑀺𑀓𑀸. 𑀪𑀼𑀚𑀕𑀚𑀸𑀧𑀺 𑀓𑀸𑀘𑀺 𑀲𑀸𑀫𑀼𑀤𑁆𑀤𑀺𑀓𑀸 𑀳𑁄𑀦𑁆𑀢𑀺, 𑀇𑀢𑀭𑀸 𑀅𑀲𑀸𑀫𑀼𑀤𑁆𑀤𑀺𑀓𑀸. 𑀬𑀲𑁆𑀫𑀸 𑀩𑀳𑀼𑀮𑀁 𑀲𑀸𑀫𑀼𑀤𑁆𑀤𑀺𑀓𑀸𑀯 𑀫𑀼𑀢𑁆𑀢𑀸 𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀲𑀺𑀧𑁆𑀧𑀺𑀚𑀸𑀯, 𑀇𑀢𑀭𑀸 𑀓𑀤𑀸𑀘𑀺 𑀓𑀸𑀘𑀺, 𑀢𑀲𑁆𑀫𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁧𑁭𑁩) ‘‘𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀸 𑀫𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀫𑀡𑀻𑀢𑀺 𑀯𑁂𑀴𑀼𑀭𑀺𑀬𑀸𑀤𑀺𑀢𑁄 𑀅𑀜𑁆𑀜𑁄 𑀚𑁄𑀢𑀺𑀭𑀲𑀸𑀤𑀺𑀪𑁂𑀤𑁄 𑀲𑀩𑁆𑀩𑁄 𑀫𑀡𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀅𑀮𑁆𑀮𑀯𑁂𑀴𑀼𑀯𑀡𑁆𑀡𑁄 𑀫𑀡𑀺, ‘‘𑀫𑀚𑁆𑀚𑀸𑀭𑀓𑁆𑀔𑀺𑀫𑀡𑁆𑀟𑀮𑀯𑀡𑁆𑀡𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀫𑀼𑀕𑁆𑀕𑀯𑀡𑁆𑀡𑀸 𑀅𑀢𑀺𑀲𑀺𑀦𑀺𑀤𑁆𑀥𑀸 𑀓𑀸𑀴𑀲𑀺𑀮𑀸. 𑀫𑀡𑀺𑀯𑁄𑀳𑀸𑀭𑀁 𑀅𑀕𑀢𑀸 𑀭𑀢𑁆𑀢𑀲𑁂𑀢𑀸𑀤𑀺𑀯𑀡𑁆𑀡𑀸 𑀲𑀼𑀫𑀝𑁆𑀞𑀸𑀧𑀺 𑀲𑀺𑀮𑀸 𑀅𑀦𑀸𑀫𑀸𑀲𑀸 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀧𑀦 ‘‘𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸𑀧𑀡𑁆𑀟𑀼𑀲𑀺𑀮𑀸𑀲𑁂𑀢𑀲𑀺𑀮𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀲𑀺𑀮𑀸’’𑀢𑀺 𑀯𑀼𑀢𑁆𑀢𑀁. 𑀧𑀯𑀸𑀴𑀁 𑀲𑀫𑀼𑀤𑁆𑀤𑀢𑁄 𑀚𑀸𑀢𑀦𑀸𑀢𑀺𑀭𑀢𑁆𑀢𑀫𑀡𑀺. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑀫𑀸𑀲𑀸𑀤𑀺𑀪𑁂𑀤𑀁 𑀚𑀢𑀼𑀫𑀸𑀲𑀸𑀤𑀺𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀯𑀼𑀢𑁆𑀢𑀸𑀯𑀲𑁂𑀲𑀭𑀽𑀧𑀺𑀬𑀁 𑀕𑀳𑀺𑀢𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀮𑁄𑀳𑀺𑀢𑀗𑁆𑀓𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀯𑀡𑁆𑀡𑁄 𑀫𑀡𑀺. ‘‘𑀫𑀭𑀓𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀪𑀡𑁆𑀟𑀫𑀽𑀮𑀢𑁆𑀣𑀸𑀬𑀸𑀢𑀺 𑀧𑀢𑁆𑀢𑀘𑀻𑀯𑀭𑀸𑀤𑀺𑀫𑀽𑀮𑀢𑁆𑀣𑀸𑀬. 𑀓𑀼𑀝𑁆𑀞𑀭𑁄𑀕𑀲𑁆𑀲𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑀸𑀬 𑀯𑀽𑀧𑀲𑀫𑁂𑀢𑀩𑁆𑀩𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀭𑁄𑀕𑀲𑁆𑀲 𑀅𑀢𑁆𑀣𑀸𑀬 𑀯𑀝𑁆𑀝𑀢𑀺𑀬𑁂𑀯. ‘‘𑀪𑁂𑀲𑀚𑁆𑀚𑀢𑁆𑀣𑀜𑁆𑀘 𑀅𑀯𑀺𑀤𑁆𑀥𑀸𑀬𑁂𑀯 𑀫𑀼𑀢𑁆𑀢𑀸 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀸. 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀺𑀲𑀺𑀢𑁆𑀯𑀸 𑀬𑁄𑀚𑀺𑀢𑀸𑀦𑀁 𑀫𑀼𑀢𑁆𑀢𑀸𑀦𑀁 𑀭𑀢𑀦𑀪𑀸𑀯𑀯𑀺𑀚𑀳𑀦𑀢𑁄 𑀕𑀳𑀡𑀓𑁆𑀔𑀡𑁂𑀧𑀺 ¶ 𑀭𑀢𑀦𑀸𑀓𑀸𑀭𑁂𑀦 𑀅𑀧𑁂𑀓𑁆𑀔𑀸𑀪𑀸𑀯𑀸 ‘‘𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀸𑀯 𑀧𑀦 𑀢𑀸 𑀫𑀼𑀢𑁆𑀢𑀸 𑀭𑀢𑀦𑀭𑀽𑀧𑁂𑀦 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀭𑀢𑀦𑀧𑀸𑀲𑀸𑀡𑀁 𑀧𑀺𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑁂 𑀬𑁄𑀚𑀦𑀢𑁆𑀣𑀸𑀬 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀚𑀸𑀢𑀭𑀽𑀧𑀭𑀚𑀢𑀁 𑀧𑀦 𑀫𑀺𑀲𑁆𑀲𑁂𑀢𑁆𑀯𑀸 𑀬𑁄𑀚𑀦𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀳𑀝𑁆𑀞𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀬𑀤𑀺 𑀪𑁂𑀲𑀚𑁆𑀚𑁂 𑀲𑀼𑀯𑀡𑁆𑀡𑀸𑀤𑀺𑀭𑀽𑀧𑁂𑀦 𑀢𑀺𑀝𑁆𑀞𑀢𑀺, 𑀯𑀺𑀬𑁄𑀚𑁂𑀢𑀼𑀜𑁆𑀘 𑀲𑀓𑁆𑀓𑀸, 𑀢𑀸𑀤𑀺𑀲𑀁 𑀪𑁂𑀲𑀚𑁆𑀚𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀕𑀢𑀜𑁆𑀘𑁂 𑀯𑀝𑁆𑀝𑀢𑀺. ‘‘𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀽𑀭𑀺𑀬𑀓𑀦𑁆𑀢𑀘𑀦𑁆𑀤𑀓𑀦𑁆𑀢𑀸𑀤𑀺𑀓𑀁 𑀚𑀸𑀢𑀺𑀧𑀸𑀲𑀸𑀡𑀁 𑀫𑀡𑀺𑀫𑁆𑀳𑀺 𑀏𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀓𑀭𑀫𑀼𑀢𑁆𑀢𑁄𑀢𑀺 𑀆𑀓𑀭𑀢𑁄 𑀫𑀼𑀢𑁆𑀢𑀫𑀢𑁆𑀢𑁄. 𑀪𑀡𑁆𑀟𑀫𑀽𑀮𑀢𑁆𑀣𑀁 ¶ 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸𑀯 𑀆𑀫𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑀺𑀢𑁆𑀯𑀸 𑀓𑀢𑁄𑀢𑀺 𑀓𑀸𑀘𑀓𑀸𑀭𑁂𑀳𑀺 𑀧𑀘𑀺𑀢𑁆𑀯𑀸 𑀓𑀢𑁄.

𑀥𑀫𑀦𑀲𑀗𑁆𑀔𑁄 𑀘 𑀥𑁄𑀢𑀯𑀺𑀤𑁆𑀥𑁄 𑀘 𑀭𑀢𑀦𑀫𑀺𑀲𑁆𑀲𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀤𑁆𑀥𑁄𑀢𑀺𑀆𑀤𑀺𑀪𑀸𑀯𑁂𑀦 𑀓𑀢𑀙𑀺𑀤𑁆𑀤𑁄. 𑀭𑀢𑀦𑀫𑀺𑀲𑁆𑀲𑁄𑀢𑀺 𑀓𑀜𑁆𑀘𑀦𑀮𑀢𑀸𑀤𑀺𑀯𑀺𑀘𑀺𑀢𑁆𑀢𑁄 𑀫𑀼𑀢𑁆𑀢𑀸𑀤𑀺𑀭𑀢𑀦𑀔𑀘𑀺𑀢𑁄 𑀘. 𑀏𑀢𑁂𑀦 𑀥𑀫𑀦𑀲𑀗𑁆𑀔𑀢𑁄 𑀅𑀜𑁆𑀜𑁄 𑀭𑀢𑀦𑀲𑀫𑁆𑀫𑀺𑀲𑁆𑀲𑁄 𑀅𑀦𑀸𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀮𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀦𑀻𑀬𑀲𑀗𑁆𑀔𑁄𑀢𑀺 𑀇𑀫𑀺𑀦𑀸 𑀣𑀸𑀮𑀓𑀸𑀤𑀺𑀆𑀓𑀸𑀭𑁂𑀦 𑀓𑀢𑀲𑀗𑁆𑀔𑀫𑀬𑀪𑀸𑀚𑀦𑀸𑀦𑀺 𑀪𑀺𑀓𑁆𑀔𑀽𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀲𑁂𑀲𑀦𑁆𑀢𑀺 𑀭𑀢𑀦𑀫𑀺𑀲𑁆𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁. 𑀫𑀼𑀕𑁆𑀕𑀯𑀡𑁆𑀡𑀁𑀬𑁂𑀯 𑀭𑀢𑀦𑀲𑀫𑁆𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀫𑀼𑀕𑁆𑀕𑀯𑀡𑁆𑀡𑀸𑀯𑀸’’𑀢𑀺, 𑀫𑀼𑀕𑁆𑀕𑀯𑀡𑁆𑀡𑀸 𑀭𑀢𑀦𑀲𑀫𑁆𑀫𑀺𑀲𑁆𑀲𑀸𑀯 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀸𑀢𑀺 𑀭𑀢𑀦𑀲𑀫𑁆𑀫𑀺𑀲𑁆𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀺𑀮𑀸.

𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀥𑀸𑀢𑀼𑀧𑀸𑀲𑀸𑀡𑀢𑁄 𑀧𑀝𑁆𑀞𑀸𑀬. 𑀲𑀼𑀯𑀡𑁆𑀡𑀘𑁂𑀢𑀺𑀬𑀦𑁆𑀢𑀺 𑀥𑀸𑀢𑀼𑀓𑀭𑀡𑁆𑀟𑀓𑀁. 𑀧𑀝𑀺𑀓𑁆𑀔𑀺𑀧𑀻𑀢𑀺 ‘‘𑀥𑀸𑀢𑀼𑀝𑁆𑀞𑀧𑀦𑀢𑁆𑀣𑀸𑀬 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀕𑀡𑁆𑀳𑀣𑀸’’𑀢𑀺 𑀧𑁂𑀲𑀺𑀢𑀢𑁆𑀢𑀸 ¶ 𑀧𑀝𑀺𑀓𑁆𑀔𑀺𑀧𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁨𑁮𑁧) 𑀧𑀦 ‘‘𑀧𑀝𑀺𑀓𑁆𑀔𑀺𑀧𑀻𑀢𑀺 𑀲𑀼𑀯𑀡𑁆𑀡𑀫𑀬𑀲𑁆𑀲 𑀥𑀸𑀢𑀼𑀓𑀭𑀡𑁆𑀟𑀓𑀲𑁆𑀲 𑀩𑀼𑀤𑁆𑀥𑀸𑀤𑀺𑀭𑀽𑀧𑀲𑁆𑀲 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂 𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀯𑀡𑁆𑀡𑀩𑀼𑀩𑁆𑀩𑀼𑀴𑀓𑀦𑁆𑀢𑀺 𑀲𑀼𑀯𑀡𑁆𑀡𑀢𑀸𑀭𑀓𑀁. ‘‘𑀭𑀽𑀧𑀺𑀬𑀙𑀟𑁆𑀟𑀓𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀺𑀬𑀙𑀟𑁆𑀟𑀓𑀲𑁆𑀲 𑀚𑀸𑀢𑀭𑀽𑀧𑀭𑀚𑀢𑀁 𑀆𑀫𑀲𑀺𑀢𑁆𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀓𑁂𑀴𑀸𑀧𑀬𑀺𑀢𑀼𑀦𑁆𑀢𑀺 𑀆𑀫𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀢𑀼𑀁. 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀧𑀓𑀸 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸, 𑀳𑀢𑁆𑀣𑁂𑀦𑀧𑀺 𑀧𑀼𑀜𑁆𑀙𑀺𑀢𑁆𑀯𑀸 𑀓𑀘𑀯𑀭𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, ‘‘𑀫𑀮𑀫𑁆𑀧𑀺 𑀧𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁨𑁮𑁧) 𑀧𑀦 ‘‘𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀧𑀓𑀸 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸, 𑀳𑀢𑁆𑀣𑁂𑀦𑀧𑀺 𑀧𑀼𑀜𑁆𑀙𑀺𑀢𑁆𑀯𑀸 𑀓𑀘𑀯𑀭𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀫𑀮𑀫𑁆𑀧𑀺 𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺 𑀓𑁂𑀴𑀸𑀬𑀦𑀲𑀤𑀺𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀦 𑀲𑀫𑁂𑀢𑀺? 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀘𑁂𑀢𑀺𑀬𑀖𑀭𑀕𑁄𑀧𑀓𑀸 𑀭𑀽𑀧𑀺𑀬𑀙𑀟𑁆𑀟𑀓𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀢𑁂𑀲𑀁𑀬𑁂𑀯 𑀓𑁂𑀴𑀸𑀬𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀅𑀜𑁆𑀜𑁂𑀲𑀁, 𑀢𑀲𑁆𑀫𑀸 ‘‘𑀕𑁄𑀧𑀓𑀸 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑁂 𑀯𑀸’’𑀢𑀺 𑀯𑀘𑀦𑀁 𑀫𑀳𑀸𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺.

𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀓𑀘𑀯𑀭𑀫𑁂𑀯 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀲𑀸𑀯𑀥𑀸𑀭𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀳𑀢𑁆𑀣𑁂𑀦𑀧𑀺 𑀧𑀼𑀜𑁆𑀙𑀺𑀢𑁆𑀯𑀸’’𑀢𑀺 𑀘 ‘‘𑀫𑀮𑀫𑁆𑀧𑀺 𑀧𑀫𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 ¶ 𑀏𑀯𑀸’’𑀢𑀺 𑀘 𑀯𑀘𑀦𑀁 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀦𑁆𑀢𑀺. 𑀆𑀭𑀓𑀽𑀝𑀮𑁄𑀳𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀺𑀢𑁆𑀢𑀺𑀫𑀮𑁄𑀳𑀯𑀺𑀲𑁂𑀲𑁄. 𑀢𑀺𑀯𑀺𑀥𑀜𑁆𑀳𑀺 𑀓𑀺𑀢𑁆𑀢𑀺𑀫𑀮𑁄𑀳𑀁 𑁋 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀆𑀭𑀓𑀽𑀝𑀮𑁄𑀳𑀦𑁆𑀢𑀺. 𑀢𑀢𑁆𑀣 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁 𑀦𑀸𑀫, 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁, 𑀭𑀲𑀢𑀼𑀢𑁆𑀣𑁂𑀳𑀺 𑀭𑀜𑁆𑀚𑀺𑀢𑀁 𑀢𑀫𑁆𑀩𑀁 𑀆𑀭𑀓𑀽𑀝𑀮𑁄𑀳𑀁 𑀦𑀸𑀫. ‘‘𑀧𑀓𑀢𑀺𑀭𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 ¶ 𑀆𑀭𑀓𑀽𑀝’’𑀦𑁆𑀢𑀺 𑀘 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀯𑀼𑀢𑁆𑀢𑀁. 𑀢𑀁 𑀧𑀦 ‘‘𑀚𑀸𑀢𑀭𑀽𑀧𑀕𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀕𑁆𑀕𑀡𑁆𑀳𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀫𑁆𑀧𑀺 𑀳𑁄𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀭𑀽𑀧𑀺𑀬𑁂𑀲𑀼 𑀧𑀦 𑀅𑀕𑀡𑀺𑀢𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺, 𑀆𑀫𑀲𑀦𑁂 𑀲𑀫𑁆𑀧𑀝𑀺𑀘𑁆𑀙𑀦𑁂 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁄𑀧𑀺 𑀓𑀧𑁆𑀧𑀺𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀦𑀁 𑀆𑀫𑀲𑀦𑀕𑁄𑀧𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. ‘‘𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀫𑁂𑀯 𑀲𑀼𑀯𑀡𑁆𑀡𑀸𑀤𑀺𑀫𑀬𑀁 𑀲𑁂𑀦𑀸𑀲𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀘 𑀯𑀝𑁆𑀝𑀦𑁆𑀢𑀺, 𑀦 𑀧𑀼𑀕𑁆𑀕𑀮𑀺𑀓𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀲𑁂𑀦𑀸𑀲𑀦𑀧𑀝𑀺𑀩𑀦𑁆𑀥𑀢𑁄 𑀯𑀼𑀢𑁆𑀢𑀁.

𑁪𑁩. 𑀲𑀸𑀫𑀺𑀓𑀸𑀦𑀁 𑀧𑁂𑀲𑁂𑀢𑀩𑁆𑀩𑀦𑁆𑀢𑀺 𑀲𑀸𑀫𑀺𑀓𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀢𑀩𑁆𑀩𑀁. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀞𑀫𑀫𑁂𑀯 𑀅𑀦𑀸𑀫𑀲𑀺𑀢𑁆𑀯𑀸 𑀧𑀸𑀲𑀸𑀡𑀸𑀤𑀺𑀦𑀸 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑁂𑀤𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀧𑁆𑀧𑀺𑀬𑀪𑀡𑁆𑀟𑀢𑁆𑀣𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀏𑀢𑁆𑀣𑀸𑀧𑀺 𑀢𑀜𑁆𑀘 𑀯𑀺𑀬𑁄𑀚𑁂𑀢𑁆𑀯𑀸 𑀆𑀫𑀲𑀺𑀢𑀩𑁆𑀩𑀁. 𑀨𑀮𑀓𑀚𑀸𑀮𑀺𑀓𑀸𑀤𑀻𑀦𑀻𑀢𑀺 𑀏𑀢𑁆𑀣 𑀲𑀭𑀧𑀭𑀺𑀢𑁆𑀢𑀸𑀡𑀸𑀬 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀁. 𑀓𑀺𑀝𑀺𑀓𑀸𑀨𑀮𑀓𑀁 𑀅𑀓𑁆𑀔𑀺𑀭𑀓𑁆𑀔𑀡𑀢𑁆𑀣𑀸𑀬 𑀅𑀬𑀮𑁄𑀳𑀸𑀤𑀻𑀳𑀺 𑀚𑀸𑀮𑀸𑀓𑀸𑀭𑁂𑀦 𑀓𑀢𑁆𑀯𑀸 𑀲𑀻𑀲𑀸𑀤𑀻𑀲𑀼 𑀧𑀝𑀺𑀫𑀼𑀜𑁆𑀘𑀺𑀢𑀩𑁆𑀩𑀁 𑀚𑀸𑀮𑀺𑀓𑀁 𑀦𑀸𑀫. 𑀆𑀤𑀺-𑀲𑀤𑁆𑀤𑁂𑀦 𑀓𑀯𑀘𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀫𑀸𑀲𑀸𑀦𑀻𑀢𑀺 𑀫𑀘𑁆𑀙𑀚𑀸𑀮𑀸𑀤𑀺𑀧𑀭𑀽𑀧𑀭𑁄𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀭𑀧𑀭𑀺𑀢𑁆𑀢𑀸𑀡𑀁 𑀢𑀲𑁆𑀲 𑀆𑀯𑀼𑀥𑀪𑀡𑁆𑀟𑀢𑁆𑀢𑀸𑀪𑀸𑀯𑀸. 𑀢𑁂𑀦 𑀯𑀓𑁆𑀔𑀢𑀺 ‘‘𑀧𑀭𑀽𑀧𑀭𑁄𑀥𑀦𑀺𑀯𑀸𑀭𑀡𑀜𑁆𑀳𑀻’’𑀢𑀺𑀆𑀤𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁪𑁩). 𑀆𑀲𑀦𑀲𑁆𑀲𑀸𑀢𑀺 𑀘𑁂𑀢𑀺𑀬𑀲𑁆𑀲𑀲𑀫𑀦𑁆𑀢𑀸 𑀓𑀢𑀧𑀭𑀺𑀪𑀡𑁆𑀟𑀲𑁆𑀲. 𑀩𑀦𑁆𑀥𑀺𑀲𑁆𑀲𑀸𑀫𑀻𑀢𑀺 𑀓𑀸𑀓𑀸𑀤𑀻𑀦𑀁 𑀅𑀤𑀽𑀲𑀦𑀢𑁆𑀣𑀸𑀬 𑀩𑀦𑁆𑀥𑀺𑀲𑁆𑀲𑀸𑀫𑀺.

‘‘𑀪𑁂𑀭𑀺𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀪𑁂𑀭𑀻. 𑀯𑀻𑀡𑀸𑀲𑀗𑁆𑀖𑀸𑀝𑁄𑀢𑀺 𑀲𑀗𑁆𑀖𑀝𑀺𑀢𑀘𑀫𑁆𑀫𑀯𑀻𑀡𑀸’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁮𑁧) 𑀯𑀼𑀢𑁆𑀢𑀁. ‘‘𑀘𑀫𑁆𑀫𑀯𑀺𑀦𑀤𑁆𑀥𑀸 𑀯𑀻𑀡𑀸𑀪𑁂𑀭𑀺𑀆𑀤𑀻𑀦𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀢𑁄 𑀯𑀺𑀲𑁂𑀲𑀸𑀪𑀸𑀯𑀸 ¶ ‘‘𑀓𑀼𑀭𑀼𑀦𑁆𑀤𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑀢𑁄 𑀯𑀺𑀲𑁂𑀲𑀲𑁆𑀲 𑀯𑀢𑁆𑀢𑀼𑀫𑀸𑀭𑀤𑁆𑀥𑀢𑁆𑀢𑀸 𑀘 𑀪𑁂𑀭𑀺𑀆𑀤𑀻𑀦𑀁 𑀯𑀺𑀦𑀤𑁆𑀥𑁄𑀧𑀓𑀭𑀡𑀲𑀫𑀽𑀳𑁄 𑀪𑁂𑀭𑀺𑀯𑀻𑀡𑀸𑀲𑀗𑁆𑀖𑀸𑀝𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀗𑁆𑀖𑀝𑀺𑀢𑀩𑁆𑀩𑁄𑀢𑀺 𑀲𑀗𑁆𑀖𑀸𑀝𑁄’’𑀢𑀺 𑀓𑀢𑁆𑀯𑀸. 𑀢𑀼𑀘𑁆𑀙𑀧𑁄𑀓𑁆𑀔𑀭𑀦𑁆𑀢𑀺 𑀅𑀯𑀺𑀦𑀤𑁆𑀥𑀘𑀫𑁆𑀫𑀪𑁂𑀭𑀺𑀯𑀻𑀡𑀸𑀦𑀁 𑀧𑁄𑀓𑁆𑀔𑀭𑀁. 𑀆𑀭𑁄𑀧𑀺𑀢𑀘𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂 𑀆𑀭𑁄𑀧𑀺𑀢𑀁 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀢𑀢𑁄 𑀅𑀧𑀦𑁂𑀢𑁆𑀯𑀸 𑀯𑀺𑀲𑀼𑀁 𑀞𑀧𑀺𑀢𑀫𑀼𑀔𑀘𑀫𑁆𑀫𑀫𑀢𑁆𑀢𑀁, 𑀦 𑀲𑁂𑀲𑁄𑀧𑀓𑀭𑀡𑀲𑀳𑀺𑀢𑀁, 𑀢𑀁 𑀧𑀦 𑀲𑀗𑁆𑀖𑀸𑀢𑁄𑀢𑀺 ¶ 𑀅𑀬𑀁 𑀯𑀺𑀲𑁂𑀲𑁄. 𑀑𑀦𑀳𑀺𑀢𑀼𑀦𑁆𑀢𑀺 𑀪𑁂𑀭𑀺𑀧𑁄𑀓𑁆𑀔𑀭𑀸𑀤𑀻𑀦𑀺 𑀘𑀫𑁆𑀫𑀁 𑀆𑀭𑁄𑀧𑁂𑀢𑁆𑀯𑀸 𑀘𑀫𑁆𑀫𑀯𑀤𑁆𑀥𑀺𑀆𑀤𑀻𑀳𑀺 𑀲𑀩𑁆𑀩𑁂𑀳𑀺 𑀉𑀧𑀓𑀭𑀡𑁂𑀳𑀺 𑀯𑀺𑀦𑀦𑁆𑀥𑀺𑀢𑀼𑀁. 𑀑𑀦𑀳𑀸𑀧𑁂𑀢𑀼𑀦𑁆𑀢𑀺 𑀢𑀣𑁂𑀯 𑀅𑀜𑁆𑀜𑁂𑀳𑀺 𑀯𑀺𑀦𑀦𑁆𑀥𑀸𑀧𑁂𑀢𑀼𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀅𑀦𑀸𑀫𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁮. 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁪𑁪. 𑀏𑀯𑀁 𑀅𑀦𑀸𑀫𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀝𑁆𑀞𑀺𑀬𑀢𑁂 𑀅𑀥𑀺𑀝𑁆𑀞𑀸𑀦𑀁, 𑀕𑀳𑀡𑀁 𑀲𑀮𑁆𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀓𑀧𑁆𑀧𑀺𑀬𑀢𑁂 𑀯𑀺𑀓𑀧𑁆𑀧𑀦𑀸, 𑀲𑀗𑁆𑀓𑀧𑁆𑀧𑀦𑀁 𑀘𑀺𑀦𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁. 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀦𑀸𑀫𑀁 𑀯𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀢𑀼𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀲𑁆𑀫𑀸 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 ‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’𑀢𑀺𑀆𑀤𑀺𑀦𑀸 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘𑀇𑀫𑀁 𑀲𑀗𑁆𑀖𑀸𑀝𑀺’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 ‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀢𑀺𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀬𑀤𑀺 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺 ¶ , 𑀅𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) 𑀧𑀦 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁. 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑁂𑀦 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀏𑀢𑁂𑀦 𑀯𑀺𑀓𑀧𑁆𑀧𑀺𑀢𑀢𑀺𑀘𑀻𑀯𑀭𑁄 𑀢𑁂𑀘𑀻𑀯𑀭𑀺𑀓𑁄 𑀦 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀫𑀺𑀁 𑀅𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑁂 𑀯𑀺𑀬 𑀅𑀯𑀺𑀧𑁆𑀧𑀯𑀸𑀲𑀸𑀤𑀺𑀦𑀸 𑀓𑀸𑀢𑀩𑁆𑀩𑀯𑀺𑀥𑀺 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺, 𑀦 𑀧𑀦 𑀯𑀺𑀓𑀧𑁆𑀧𑀦𑁂 𑀤𑁄𑀲𑁄’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁬𑁯) 𑀧𑀦 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀏𑀢𑁆𑀣 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀬𑀼𑀢𑁆𑀢𑀓𑀁, 𑀬𑀁 𑀯𑀸 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀲𑀩𑁆𑀩𑀓𑀸𑀮𑀁 𑀇𑀘𑁆𑀙𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀢𑀼𑀁𑀬𑁂𑀯 ¶ 𑀅𑀦𑀼𑀚𑀸𑀦𑀸𑀫𑀺, 𑀢𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀦𑀸𑀦𑀼𑀚𑀸𑀦𑀸𑀫𑀺, 𑀲𑀢𑀺 𑀧𑀦 𑀧𑀘𑁆𑀘𑀬𑁂 𑀬𑀤𑀸 𑀢𑀤𑀸 𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’𑀢𑀺 𑀯𑀘𑀦𑀢𑁄 𑀲𑀺𑀤𑁆𑀥𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀝𑀻𑀓𑀸𑀯𑀸𑀤𑁂𑀲𑀼 𑀢𑀢𑀺𑀬𑀯𑀸𑀤𑁄 𑀬𑀼𑀢𑁆𑀢𑀢𑀭𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀲𑀁𑀲𑀦𑁆𑀤𑀦𑀢𑁄. 𑀓𑀣𑀁? 𑀧𑀸𑀴𑀺𑀬𑀜𑁆𑀳𑀺 𑀓𑀢𑀧𑀭𑀺𑀘𑁆𑀙𑁂𑀤𑀸𑀲𑀼𑀬𑁂𑀯 𑀤𑁆𑀯𑀻𑀲𑀼 𑀯𑀲𑁆𑀲𑀺𑀓𑀲𑀸𑀝𑀺𑀓𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀻𑀲𑀼 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀅𑀜𑁆𑀜𑁂𑀲𑀼 𑀦 𑀯𑀺𑀓𑀧𑁆𑀧𑁂𑀢𑀼𑀁 𑀇𑀘𑁆𑀘𑁂𑀯, 𑀢𑀲𑁆𑀫𑀸 𑀢𑁂𑀲𑀼 𑀅𑀲𑀢𑀺 𑀧𑀘𑁆𑀘𑀬𑁂 𑀦𑀺𑀘𑁆𑀘𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯 𑀳𑁄𑀢𑀺, 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀸𑀴𑀺𑀬𑀸 𑀅𑀥𑀺𑀧𑁆𑀧𑀸𑀬𑁄 𑀤𑀺𑀲𑁆𑀲𑀢𑀺, 𑀇𑀢𑀭𑀸𑀲𑀼 𑀧𑀦 𑀤𑁆𑀯𑀻𑀲𑀼 𑀅𑀦𑀼𑀜𑁆𑀜𑀸𑀢𑀓𑀸𑀮𑁂𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀏𑀯𑀁 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦 𑀧𑀭𑀺𑀳𑀭𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁂𑀯 𑀅𑀦𑀼𑀚𑀸𑀦𑀸𑀫𑀺, 𑀦 𑀯𑀺𑀓𑀧𑁆𑀧𑁂𑀢𑀼𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀦 𑀘𑀸𑀢𑀼𑀫𑀸𑀲𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀫𑁂𑀯, 𑀦 𑀅𑀥𑀺𑀝𑁆𑀞𑀸𑀢𑀼𑀁, 𑀏𑀯𑀜𑁆𑀘 ¶ 𑀲𑀢𑀺 𑀬𑁄 𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀻𑀢𑀺.

𑀧𑀞𑀫𑀯𑀸𑀤𑁂 ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀦𑀸𑀫𑀁 𑀯𑀢𑁆𑀯𑀸 ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑀦𑁆𑀢𑁂 ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀏𑀢𑁆𑀣 𑀢𑀢𑁄 𑀧𑀭𑀁 𑀦𑀸𑀫𑀁 𑀯𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀲𑁄 𑀘 𑀅𑀢𑁆𑀣𑁄 𑀯𑀺𑀓𑀧𑁆𑀧𑀦𑀸𑀥𑀺𑀓𑀸𑀭𑁂𑀦 𑀯𑀼𑀢𑁆𑀢𑁄, ‘‘𑀦𑀸𑀫𑀁 𑀯𑀢𑁆𑀯𑀸’’𑀢𑀺 𑀘 𑀯𑀺𑀲𑁂𑀲𑀦𑁂 𑀓𑀢𑁆𑀢𑀩𑁆𑀩𑁂 𑀲𑀢𑀺 ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀘 ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀘 𑀪𑁂𑀤𑀯𑀘𑀦𑀁 𑀦 𑀲𑀺𑀬𑀸, 𑀲𑀩𑁆𑀩𑁂𑀲𑀼𑀧𑀺 𑀘𑀻𑀯𑀭𑁂𑀲𑀼 𑀦𑀸𑀫𑀁 𑀅𑀯𑀢𑁆𑀯𑀸𑀯 𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑁄, 𑀤𑀼𑀢𑀺𑀬𑀯𑀸𑀤𑁂 𑀘 ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫𑁂𑀦 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀅𑀦𑀼𑀚𑀸𑀦𑀸𑀫𑀻𑀢𑀺 𑀧𑀸𑀞𑀲𑁂𑀲𑁄. 𑀧𑀞𑀫𑁂 𑀘 ‘‘𑀢𑀺𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀬𑀤𑀺 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺, 𑀅𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺. 𑀤𑀼𑀢𑀺𑀬𑁂 𑀘 ‘‘𑀦 𑀧𑀦 𑀯𑀺𑀓𑀧𑁆𑀧𑀦𑁂 𑀤𑁄𑀲𑁄’’𑀢𑀺, 𑀢𑀜𑁆𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁.

𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀘𑀸𑀢𑀼𑀫𑀸𑀲𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀢𑀻𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀯 𑀆𑀕𑀸𑀫𑀺𑀲𑀁𑀯𑀘𑁆𑀙𑀭𑁂 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁, 𑀢𑀸𑀯 𑀞𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀏𑀢𑁆𑀢𑀸𑀯𑀢𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 ¶ 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀜𑁆𑀘 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀤𑀺𑀦𑀸𑀫𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀓𑀲𑁆𑀫𑀸 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀦𑁆𑀢𑁂𑀦𑀧𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑁄𑀕𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀣𑀸𑀯𑀺𑀓𑀧𑁆𑀧𑀺𑀢𑀁 𑀅𑀜𑁆𑀜𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) ‘‘𑀢𑀢𑁄 𑀧𑀭𑀦𑁆𑀢𑀺 𑀘𑀸𑀢𑀼𑀫𑀸𑀲𑀢𑁄 ¶ 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀯 𑀆𑀕𑀸𑀫𑀺𑀯𑀲𑁆𑀲𑀸𑀦𑀁 𑀢𑀸𑀯 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘𑀯𑀺𑀓𑀧𑁆𑀧𑀦𑁂 𑀦 𑀤𑁄𑀲𑁄, 𑀢𑀣𑀸 𑀯𑀺𑀓𑀧𑁆𑀧𑀺𑀢𑀁 𑀧𑀭𑀺𑀓𑁆𑀔𑀸𑀭𑀸𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’𑀦𑁆𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁬𑁯) 𑀧𑀦 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁𑀬𑁂𑀯, 𑀦𑀸𑀥𑀺𑀝𑁆𑀞𑀸𑀢𑀼𑀁. 𑀯𑀢𑁆𑀣𑀜𑁆𑀳𑀺 𑀓𑀢𑀧𑀭𑀺𑀬𑁄𑀲𑀺𑀢𑀁 𑀅𑀦𑁆𑀢𑁄𑀘𑀸𑀢𑀼𑀫𑀸𑀲𑁂 𑀯𑀲𑁆𑀲𑀸𑀦𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀘𑀸𑀢𑀼𑀫𑀸𑀲𑀢𑁄 𑀉𑀤𑁆𑀥𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀞𑀧𑁂𑀢𑀼𑀓𑀸𑀫𑁂𑀦 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀧𑀘𑁆𑀙𑀺𑀫𑀯𑀸𑀤𑁄 𑀧𑀲𑀢𑁆𑀣𑀢𑀭𑁄𑀢𑀺 𑀤𑀺𑀲𑁆𑀲𑀢𑀺, 𑀓𑀲𑁆𑀫𑀸? 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀧𑀼𑀭𑀺𑀫𑁂𑀲𑀼 𑀧𑀦 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄𑀬𑁂𑀯 𑀤𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺 𑀦𑀸𑀦𑀸𑀯𑀸𑀤𑀲𑁆𑀲𑁂𑀯 𑀓𑀣𑀺𑀢𑀢𑁆𑀢𑀸. 𑀫𑀼𑀝𑁆𑀞𑀺𑀧𑀜𑁆𑀘𑀓𑀦𑁆𑀢𑀺 𑀫𑀼𑀝𑁆𑀞𑀺𑀬𑀸 𑀉𑀧𑀮𑀓𑁆𑀔𑀺𑀢𑀁 𑀧𑀜𑁆𑀘𑀓𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀁, 𑀘𑀢𑀼𑀳𑀢𑁆𑀣𑁂 𑀫𑀺𑀦𑀺𑀢𑁆𑀯𑀸 𑀧𑀜𑁆𑀘𑀫𑀁 𑀳𑀢𑁆𑀣𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀫𑀼𑀝𑁆𑀞𑀺𑀳𑀢𑁆𑀣𑀸𑀦𑀁 𑀧𑀜𑁆𑀘𑀓𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀁. 𑀧𑀜𑁆𑀘𑀧𑀺 𑀳𑀢𑁆𑀣𑀸 𑀫𑀼𑀝𑁆𑀞𑀻 𑀓𑀢𑁆𑀯𑀸𑀯 𑀫𑀺𑀦𑀺𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺. 𑀫𑀼𑀝𑁆𑀞𑀺𑀢𑁆𑀢𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀺𑀳𑀢𑁆𑀣𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀧𑀸𑀭𑀼𑀧𑀦𑁂𑀦𑀧𑀻’’𑀢𑀺𑀆𑀤𑀺. 𑀅𑀢𑀺𑀭𑁂𑀓𑀦𑁆𑀢𑀺 𑀲𑀼𑀕𑀢𑀘𑀻𑀯𑀭𑀢𑁄 𑀅𑀢𑀺𑀭𑁂𑀓𑀁. 𑀊𑀦𑀓𑀦𑁆𑀢𑀺 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀢𑁄 𑀊𑀦𑀓𑀁. 𑀢𑁂𑀦 𑀘 𑀢𑁂𑀲𑀼 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻𑀢𑀺 𑀇𑀫𑀁 𑀲𑀗𑁆𑀖𑀸𑀝𑀺𑀅𑀥𑀺𑀝𑁆𑀞𑀸𑀦𑀁 𑀉𑀓𑁆𑀔𑀺𑀧𑀸𑀫𑀺, 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀧𑀦 ‘‘𑀧𑀘𑁆𑀘𑀼𑀤𑁆𑀥𑀭𑀸𑀫𑀻𑀢𑀺 𑀞𑀧𑁂𑀫𑀺, 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀯𑀸 𑀅𑀢𑁆𑀣𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀧𑀭𑀸𑀫𑀲𑀦𑁆𑀢𑁂𑀦, 𑀘𑀸𑀮𑁂𑀦𑁆𑀢𑁂𑀦 𑀯𑀸. 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀓𑀸𑀬𑁂𑀦𑀧𑀺 𑀘𑀸𑀮𑁂𑀢𑁆𑀯𑀸 ¶ 𑀯𑀸𑀘𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, ‘‘𑀓𑀸𑀬𑁂𑀦 𑀅𑀨𑀼𑀲𑀺𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀳𑀢𑁆𑀣𑀧𑀸𑀲𑀳𑀢𑁆𑀣𑀧𑀸𑀲𑀯𑀲𑁂𑀦 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁. 𑀢𑀢𑁆𑀣 ‘‘𑀳𑀢𑁆𑀣𑀧𑀸𑀲𑁄 𑀦𑀸𑀫 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀯𑀼𑀘𑁆𑀘𑀢𑀺. ‘𑀤𑁆𑀯𑀸𑀤𑀲𑀳𑀢𑁆𑀣’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀇𑀥 ¶ 𑀦 𑀲𑀫𑁂𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) 𑀯𑀼𑀢𑁆𑀢𑀁. ‘‘𑀇𑀤𑀸𑀦𑀺 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀪𑁂𑀤𑁂𑀦 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀳𑀢𑁆𑀣𑀧𑀸𑀲𑁂𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀧𑀦 ‘‘𑀳𑀢𑁆𑀣𑀧𑀸𑀲𑁂𑀢𑀺 𑀘 𑀇𑀤𑀁 𑀤𑁆𑀯𑀸𑀤𑀲𑀳𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀺𑀢𑀁 ‘𑀇𑀫’𑀦𑁆𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀢𑀢𑁄 𑀧𑀭𑀁 ‘𑀏𑀢’𑀦𑁆𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦𑁂𑀢𑁆𑀣 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁, 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀲𑀩𑁆𑀩𑀢𑁆𑀣 ‘𑀳𑀢𑁆𑀣𑀧𑀸𑀲𑁄’𑀢𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀇𑀥 𑀯𑀺𑀲𑁂𑀲𑀯𑀺𑀓𑀧𑁆𑀧𑀦𑀸𑀬 𑀓𑀸𑀭𑀡𑀁 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀴𑀺𑀬𑀝𑁆𑀞𑀓𑀣𑀸𑀲𑀼𑀧𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀫𑁂𑀯 𑀳𑀢𑁆𑀣𑀧𑀸𑀲𑁄 𑀯𑀼𑀢𑁆𑀢𑁄, 𑀝𑀻𑀓𑀸𑀘𑀭𑀺𑀬𑁂𑀳𑀺 𑀘 𑀢𑀤𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀺𑀢𑀁 𑀘𑀻𑀯𑀭𑀁 ‘‘𑀇𑀫’’𑀦𑁆𑀢𑀺, 𑀢𑀢𑁄 𑀩𑀳𑀺𑀪𑀽𑀢𑀁 ‘‘𑀏𑀢’’𑀦𑁆𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

‘‘𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀇𑀤𑀁 𑀞𑀧𑀺𑀢𑀝𑁆𑀞𑀸𑀦𑀲𑀮𑁆𑀮𑀓𑁆𑀔𑀡𑀬𑁄𑀕𑁆𑀕𑁂 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀢𑁄 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀢𑀢𑁆𑀣𑀸𑀧𑀺 𑀘𑀻𑀯𑀭𑀲𑁆𑀲 𑀞𑀧𑀺𑀢𑀪𑀸𑀯𑀲𑀮𑁆𑀮𑀓𑁆𑀔𑀡𑀫𑁂𑀯 𑀧𑀫𑀸𑀡𑀁. 𑀦 𑀳𑀺 𑀲𑀓𑁆𑀓𑀸 𑀦𑀺𑀘𑁆𑀘𑀲𑁆𑀲 𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁, 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀧𑀺𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘𑀢𑀣𑀸𑀧𑀺 𑀅𑀥𑀺𑀝𑁆𑀞𑀺𑀢𑁂 𑀦 𑀤𑁄𑀲𑁄’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀧𑀦 ‘‘𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀦𑀸𑀫 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀇𑀤𑀁 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀢𑀲𑁆𑀫𑀸 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀘 𑀇𑀤𑀁 𑀞𑀧𑀺𑀢𑀝𑁆𑀞𑀸𑀦𑀲𑀮𑁆𑀮𑀓𑁆𑀔𑀡𑀁 ¶ 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀘𑀻𑀯𑀭𑀲𑀮𑁆𑀮𑀓𑁆𑀔𑀡𑀫𑁂𑀯𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀜𑁆𑀘 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁬𑁯) ‘‘𑀲𑀗𑁆𑀖𑀸𑀝𑀺 𑀉𑀢𑁆𑀢𑀭𑀸𑀲𑀗𑁆𑀕𑁄 𑀅𑀦𑁆𑀢𑀭𑀯𑀸𑀲𑀓𑀦𑁆𑀢𑀺 𑀅𑀥𑀺𑀝𑁆𑀞𑀺𑀢𑀸𑀦𑀥𑀺𑀝𑁆𑀞𑀺𑀢𑀸𑀦𑀁 𑀲𑀫𑀸𑀦𑀫𑁂𑀯 𑀦𑀸𑀫𑀁. ‘𑀅𑀬𑀁 𑀲𑀗𑁆𑀖𑀸𑀝𑀻’𑀢𑀺𑀆𑀤𑀻𑀲𑀼 𑀅𑀦𑀥𑀺𑀝𑁆𑀞𑀺𑀢𑀸 𑀯𑀼𑀢𑁆𑀢𑀸. ‘𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀺𑀢𑀸 𑀯𑀼𑀢𑁆𑀢𑀸. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀕𑁄𑀘𑀭𑀕𑀸𑀫𑀢𑁄 𑀯𑀺𑀳𑀸𑀭𑁂𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀤𑀽𑀭𑀢𑀭𑁂𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀆𑀘𑀭𑀺𑀬𑀸. 𑀅𑀦𑀼𑀕𑀡𑁆𑀞𑀺𑀧𑀤𑁂𑀧𑀺 ‘𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀢𑀲𑁆𑀫𑀸 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀦𑀸𑀫 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑀸. 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀁 𑀭𑀓𑁆𑀔𑀦𑁆𑀢𑁂𑀦 𑀢𑀢𑁄 𑀤𑀽𑀭𑁂 𑀞𑀺𑀢𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀓𑁂𑀘𑀺 ‘𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀁 𑀅𑀜𑁆𑀜𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀕𑀤𑀦𑁆𑀢𑁂 𑀞𑀧𑁂𑀢𑀺, 𑀢𑀁 𑀅𑀚𑀸𑀦𑀺𑀢𑁆𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑀧𑀺 𑀭𑀼𑀳𑀢𑀺 𑀘𑀻𑀯𑀭𑀲𑁆𑀲 𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸’𑀢𑀺 𑀯𑀤𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀆𑀘𑀭𑀺𑀬𑀸𑀦𑀁 𑀫𑀢𑀪𑁂𑀤𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ¶ 𑀞𑀧𑀺𑀢𑀯𑀢𑁆𑀣𑁂𑀳𑀻𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺. 𑀢𑁂𑀦𑁂𑀯 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲 𑀧𑀘𑁆𑀘𑀼𑀤𑁆𑀥𑀸𑀭𑀁 𑀤𑀲𑁆𑀲𑁂𑀢𑀺, 𑀏𑀢𑁂𑀦 𑀘 𑀢𑁂𑀘𑀻𑀯𑀭𑀺𑀓𑀥𑀼𑀢𑀗𑁆𑀕𑀁 𑀧𑀭𑀺𑀳𑀭𑀦𑁆𑀢𑁂𑀦 𑀧𑀁𑀲𑀼𑀓𑀽𑀮𑀸𑀤𑀺𑀯𑀲𑁂𑀦 𑀮𑀤𑁆𑀥𑀁 𑀯𑀢𑁆𑀣𑀁 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀓𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁂𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀯 𑀤𑀲𑀸𑀳𑀫𑀢𑀺𑀓𑁆𑀓𑀫𑀸𑀧𑁂𑀢𑀩𑁆𑀩𑀁, 𑀇𑀢𑀭𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 ‘‘𑀭𑀚𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀥𑀼𑀢𑀗𑁆𑀕𑀘𑁄𑀭𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁫) 𑀯𑀼𑀢𑁆𑀢𑀁. 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻𑀢𑀺 𑀇𑀤𑀜𑁆𑀘 𑀲𑀗𑁆𑀖𑀸𑀝𑀺𑀆𑀤𑀺𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀦 𑀧𑀼𑀭𑀺𑀫𑀸𑀥𑀺𑀝𑁆𑀞𑀸𑀦𑀫𑁂𑀯 𑀅𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀓𑀧𑁆𑀧𑀩𑀺𑀦𑁆𑀤𑀼𑀧𑀺 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 ¶ 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀓𑀧𑁆𑀧𑀩𑀺𑀦𑁆𑀤𑀼𑀤𑀸𑀦𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺, 𑀫𑀳𑀦𑁆𑀢𑀢𑀭𑀫𑁂𑀯𑀸𑀢𑀺𑀆𑀤𑀺 𑀲𑀩𑁆𑀩𑀸𑀥𑀺𑀝𑁆𑀞𑀸𑀦𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀢𑀢𑁆𑀣 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀦𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀏𑀓𑀤𑁂𑀲𑀪𑀽𑀢𑀢𑁆𑀢𑀸 𑀅𑀦𑀥𑀺𑀝𑁆𑀞𑀺𑀢𑀜𑁆𑀘𑁂, 𑀅𑀥𑀺𑀝𑁆𑀞𑀺𑀢𑀲𑁆𑀲 𑀅𑀧𑁆𑀧𑀪𑀸𑀯𑁂𑀦 𑀏𑀓𑀤𑁂𑀲𑀪𑀽𑀢𑀁 𑀅𑀥𑀺𑀝𑁆𑀞𑀺𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀺𑀢𑀜𑁆𑀘𑁂, 𑀅𑀦𑀥𑀺𑀝𑁆𑀞𑀺𑀢𑀲𑁆𑀲 𑀏𑀓𑀤𑁂𑀲𑀪𑀽𑀢𑀁 𑀅𑀦𑀥𑀺𑀝𑁆𑀞𑀺𑀢𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀮𑀓𑁆𑀔𑀡𑀁. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀤𑀼𑀢𑀺𑀬𑀧𑀝𑁆𑀝𑀫𑁂𑀯, 𑀅𑀣 𑀔𑁄 𑀢𑀢𑀺𑀬𑀧𑀝𑁆𑀝𑀸𑀤𑀺𑀓𑀫𑁆𑀧𑀺. 𑀬𑀣𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂…𑀧𑁂… 𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁…𑀧𑁂… 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮).

𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀢𑀺𑀘𑀻𑀯𑀭𑀧𑁆𑀧𑀫𑀸𑀡𑀬𑀼𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀢𑀺𑀘𑀻𑀯𑀭𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁. 𑀅𑀯𑀲𑁂𑀲𑀸 𑀪𑀺𑀓𑁆𑀔𑀽𑀢𑀺 𑀯𑀓𑁆𑀔𑀫𑀸𑀦𑀓𑀸𑀮𑁂 𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽. 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀬𑀣𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀁, 𑀏𑀯𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑁆𑀧𑀺 𑀯𑀼𑀢𑁆𑀢𑀁, 𑀦 𑀘𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀦 𑀘 𑀲𑀗𑁆𑀔𑀸𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀫𑀸 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀥𑀸𑀦𑀫𑀼𑀔𑀫𑁂𑀢𑀦𑁆𑀢𑀺 𑀏𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁 𑀦𑀺𑀥𑀸𑀦𑀫𑀼𑀔𑀁 𑀞𑀧𑀦𑀫𑀼𑀔𑀁, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀧𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀜𑀸𑀬𑀢𑀻𑀢𑀺 𑀘𑁂, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁, 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀺. 𑀏𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀜𑁆𑀘 𑀏𑀓𑀫𑁂𑀯 𑀧𑀭𑀺𑀲𑁆𑀲𑀸𑀯𑀦𑀁, 𑀣𑀯𑀺𑀓𑀸 𑀯𑀸 𑀯𑀝𑁆𑀝𑀢𑀺, 𑀦 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀸𑀦𑀺, 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀸𑀦𑀺 𑀯𑀸 𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀺 𑀧𑀭𑀺𑀓𑁆𑀔𑀸𑀭𑀸𑀦𑀺 𑀓𑀧𑁆𑀧𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀧𑀞𑀫𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀧𑀼𑀦 ¶ 𑀧𑀭𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 ¶ , 𑀦 𑀢𑁆𑀯𑁂𑀯 𑀆𑀤𑀺𑀢𑁄𑀯 𑀇𑀤𑀁 𑀯𑀼𑀢𑁆𑀢𑀁. 𑀩𑀤𑁆𑀥𑀲𑀻𑀫𑀸𑀬 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀲𑀫𑁆𑀪𑀯𑀢𑁄 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂 𑀦𑁂𑀯𑀢𑁆𑀣𑀺 𑀤𑁄𑀲𑁄𑀢𑀺 𑀦 𑀢𑀢𑁆𑀣 𑀤𑀼𑀧𑁆𑀧𑀭𑀺𑀳𑀸𑀭𑁄𑀢𑀺 𑀆𑀳 ‘‘𑀅𑀩𑀤𑁆𑀥𑀲𑀻𑀫𑀸𑀬 𑀤𑀼𑀧𑁆𑀧𑀭𑀺𑀳𑀸𑀭’’𑀦𑁆𑀢𑀺.

𑁪𑁫. 𑀅𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸𑀬 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀳 ‘‘𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸’’𑀢𑀺. 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀲𑁆𑀲𑀺𑀓𑀫𑀸𑀲𑀢𑁄 𑀧𑀭𑀁 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀇𑀫𑀺𑀦𑀸 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀫𑀸𑀲𑀸𑀦𑀁 𑀉𑀧𑀭𑀺 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀲𑀢𑁄 𑀧𑀘𑁆𑀘𑀼𑀤𑁆𑀥𑀭𑀸𑀬𑁄𑀕𑀸, 𑀬𑀜𑁆𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀦𑀢𑁆𑀣𑀺, 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀫𑁆𑀳𑁂’’𑀢𑀺 𑀏𑀢𑁆𑀣 𑀦 𑀢𑀁 𑀯𑀼𑀢𑁆𑀢𑀁, 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑁄 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦𑀺𑀯𑀸𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸, 𑀢𑀲𑁆𑀫𑀸 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀸𑀢𑀺𑀓𑁆𑀓𑀫𑁂𑀧𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺 𑀧𑀜𑁆𑀜𑀸𑀬𑀢𑀺. 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑁂𑀲𑀼 𑀘 𑀯𑀲𑁆𑀲𑀸𑀦𑀫𑀸𑀲𑀆𑀩𑀸𑀥𑀸𑀦𑀁 𑀯𑀺𑀕𑀫𑁂 𑀯𑀺𑀚𑀳𑀦𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀉𑀤𑁆𑀥𑀝𑀁, 𑀢𑀲𑁆𑀫𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀆𑀕𑀢𑀦𑀬𑁂𑀦 𑀬𑀸𑀯 𑀧𑀘𑁆𑀘𑀼𑀤𑁆𑀥𑀸𑀭𑀸 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀦𑀳𑀸𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀢𑁆𑀢𑀸𑀧𑀺 𑀘𑁂𑀲𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀝𑀺𑀆𑀤𑀻𑀲𑀼𑀧𑀺 𑀤𑀼𑀢𑀺𑀬𑀅𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀺, 𑀢𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀳𑁄𑀢𑀻𑀢𑀺 ¶ 𑀤𑀲𑁆𑀲𑁂𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀘𑀻𑀯𑀭𑀯𑀲𑁂𑀦 𑀧𑀭𑀺𑀪𑁄𑀕𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂 𑀯𑀺𑀬. 𑀬𑀁 𑀧𑀦 ‘‘𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑁂𑀦𑀸𑀲𑀦𑀢𑁆𑀣𑀸𑀬𑁂𑀯𑀸𑀢𑀺 𑀦𑀺𑀬𑀫𑀺𑀢𑀁 𑀦 𑀳𑁄𑀢𑀺 𑀦𑀯𑀲𑀼 𑀘𑀻𑀯𑀭𑁂𑀲𑀼 𑀕𑀳𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀯𑀺𑀬 𑀬𑀣𑀸 𑀢𑀣𑀸 𑀯𑀺𑀦𑀺𑀬𑀼𑀚𑁆𑀚𑀺𑀢𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀧𑀸𑀯𑀸𑀭𑁄𑀓𑁄𑀚𑀯𑁄𑀢𑀺 𑀇𑀫𑁂𑀲𑀫𑁆𑀧𑀺 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀦𑀸 𑀮𑁄𑀓𑁂𑀧𑀺 𑀯𑁄𑀳𑀭𑀡𑀢𑁄 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑀢𑁄 ¶ 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁. 𑀲𑀘𑁂 𑀅𑀯𑀲𑀸𑀦𑁂 𑀅𑀧𑀭𑀸𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀧𑀼𑀭𑀺𑀫𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀯𑀤𑀦𑁆𑀢𑀺.

𑀦𑀺𑀲𑀻𑀤𑀦𑀫𑁆𑀳𑀺 𑀧𑀫𑀸𑀡𑀬𑀼𑀢𑁆𑀢𑀦𑁆𑀢𑀺 ‘‘𑀤𑀻𑀖𑀢𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄, 𑀯𑀺𑀢𑁆𑀣𑀸𑀭𑀢𑁄 𑀤𑀺𑀬𑀟𑁆𑀠𑀁, 𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺𑀇𑀫𑀺𑀦𑀸 𑀧𑀫𑀸𑀡𑁂𑀦 𑀬𑀼𑀢𑁆𑀢𑀁, 𑀢𑀁 𑀧𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀳𑀢𑁆𑀣𑀲𑀗𑁆𑀔𑀸𑀢𑁂𑀦 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀻𑀖𑀢𑁄 𑀢𑀺𑀳𑀢𑁆𑀣𑀁 𑀳𑁄𑀢𑀺, 𑀯𑀺𑀢𑁆𑀣𑀸𑀭𑀢𑁄 𑀙𑀴𑀗𑁆𑀕𑀼𑀮𑀸𑀥𑀺𑀓𑀤𑁆𑀯𑀺𑀳𑀢𑁆𑀣𑀁, 𑀤𑀲𑀸 𑀯𑀺𑀤𑀢𑁆𑀣𑀸𑀥𑀺𑀓𑀳𑀢𑁆𑀣𑀁, 𑀇𑀤𑀸𑀦𑀺 𑀫𑀦𑀼𑀲𑁆𑀲𑀸𑀦𑀁 𑀧𑀓𑀢𑀺𑀳𑀢𑁆𑀣𑁂𑀦 𑀤𑀻𑀖𑀢𑁄 𑀯𑀺𑀤𑀢𑁆𑀣𑀸𑀥𑀺𑀓𑀘𑀢𑀼𑀳𑀢𑁆𑀣𑀁 𑀳𑁄𑀢𑀺, 𑀯𑀺𑀢𑁆𑀣𑀸𑀭𑀢𑁄 𑀦𑀯𑀗𑁆𑀕𑀼𑀮𑀸𑀥𑀺𑀓𑀢𑀺𑀳𑀢𑁆𑀣𑀁, 𑀤𑀲𑀸 𑀙𑀴𑀗𑁆𑀕𑀼𑀮𑀸𑀥𑀺𑀓𑀤𑁆𑀯𑀺𑀳𑀢𑁆𑀣𑀸, 𑀢𑀢𑁄 𑀊𑀦𑀁 𑀯𑀝𑁆𑀝𑀢𑀺, 𑀦 𑀅𑀥𑀺𑀓𑀁 ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁫𑁩𑁩) 𑀯𑀼𑀢𑁆𑀢𑀢𑁆𑀢𑀸. 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀬𑀸 𑀧𑀫𑀸𑀡𑀺𑀓𑀸𑀢𑀺 ‘‘𑀤𑀻𑀖𑀢𑁄 𑀘𑀢𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺 (𑀧𑀸𑀘𑀺. 𑁫𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀬𑀼𑀢𑁆𑀢𑀸, 𑀲𑀸 𑀧𑀦 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀻𑀖𑀢𑁄 𑀙𑀳𑀢𑁆𑀣𑀸 𑀳𑁄𑀢𑀺, 𑀯𑀺𑀢𑁆𑀣𑀸𑀭𑀢𑁄 𑀢𑀺𑀳𑀢𑁆𑀣𑀸, 𑀇𑀤𑀸𑀦𑀺 𑀧𑀓𑀢𑀺𑀳𑀢𑁆𑀣𑁂𑀦 𑀧𑀦 𑀤𑀻𑀖𑀢𑁄 𑀦𑀯𑀳𑀢𑁆𑀣𑀸 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀯𑀺𑀤𑀢𑁆𑀣𑀸𑀥𑀺𑀓𑀘𑀢𑀼𑀳𑀢𑁆𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 ¶ 𑀦𑀸𑀫 𑀲𑀼𑀕𑀢𑀗𑁆𑀕𑀼𑀮𑁂𑀦 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀁 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀘𑀢𑀼𑀭𑀗𑁆𑀕𑀼𑀮𑀁, 𑀯𑀟𑁆𑀠𑀓𑀻𑀳𑀢𑁆𑀣𑁂𑀦 𑀤𑀻𑀖𑀢𑁄 𑀏𑀓𑀳𑀢𑁆𑀣𑀁 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁, 𑀇𑀤𑀸𑀦𑀺 𑀧𑀓𑀢𑀺𑀳𑀢𑁆𑀣𑁂𑀦 𑀧𑀦 𑀤𑀻𑀖𑀢𑁄 𑀯𑀺𑀤𑀢𑁆𑀣𑀸𑀥𑀺𑀓𑀳𑀢𑁆𑀣𑀁 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀙𑀴𑀗𑁆𑀕𑀼𑀮𑀸𑀥𑀺𑀓𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀢𑀲𑁆𑀲 𑀧𑀫𑀸𑀡’’𑀦𑁆𑀢𑀺𑀆𑀤𑀺.

𑀪𑁂𑀲𑀚𑁆𑀚𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀞𑀧𑀺𑀢𑀁 𑀲𑀦𑁆𑀥𑀸𑀬 ‘‘𑀅𑀦𑀥𑀺𑀝𑁆𑀞𑀺𑀢𑁂𑀧𑀺 𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀇𑀤𑀁 𑀪𑁂𑀲𑀚𑁆𑀚𑀢𑁆𑀣𑀸𑀬, 𑀇𑀤𑀁 𑀫𑀸𑀢𑀼𑀬𑀸’’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀲𑀓𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀞𑀧𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑀺𑀦𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀲𑁆𑀲𑀸𑀫𑀺, 𑀇𑀤𑀁 𑀫𑀸𑀢𑀼𑀬𑀸 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀦𑁆𑀢𑁂𑀦 𑀧𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂𑀢𑀺 𑀏𑀢𑁆𑀣 𑀅𑀦𑀺𑀯𑀸𑀲𑁂𑀢𑁆𑀯𑀸 𑀅𑀧𑀸𑀭𑀼𑀧𑀺𑀢𑁆𑀯𑀸 𑀓𑁂𑀯𑀮𑀁 𑀫𑀜𑁆𑀘𑀧𑀻𑀞𑁂𑀲𑀼𑀬𑁂𑀯 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀅𑀦𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀳𑁂𑀝𑁆𑀞𑀸 𑀧𑀦 𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀦𑁆𑀢𑁂 𑀞𑀺𑀢𑀁𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀘𑁆𑀙𑀸 𑀯𑀻𑀢𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀯𑀻𑀢𑀁 𑀳𑁄𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀯𑀺𑀓𑀧𑁆𑀧𑀦𑀽𑀧𑀕𑀧𑁆𑀧𑀫𑀸𑀡𑀫𑀢𑁆𑀢𑁂 𑀯𑀻𑀢𑁂 𑀢𑀦𑁆𑀢𑁂 𑀞𑀺𑀢𑀁𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁪𑁬. ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 ¶ ‘𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑀸’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁 𑀅𑀜𑁆𑀜𑀲𑁆𑀲 𑀤𑀸𑀦𑁂 𑀯𑀺𑀬 𑀘𑀻𑀯𑀭𑁂 𑀦𑀺𑀭𑀸𑀮𑀬𑀪𑀸𑀯𑁂𑀦𑁂𑀯 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸. 𑀓𑁂𑀘𑀺 𑀧𑀦 ‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑁂𑀯𑀸𑀢𑀺 𑀏𑀢𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼 𑀧𑀦 𑀯𑀺𑀩𑁆𑀪𑀫𑀦𑁆𑀢𑁄𑀧𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻’𑀢𑀺 ¶ 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘𑀪𑀺𑀓𑁆𑀔𑀼𑀦𑀺𑀬𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀪𑀺𑀓𑁆𑀔𑀼𑀦𑀺𑀬𑀸 𑀳𑀺 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀢𑀲𑁆𑀲𑀸 𑀯𑀺𑀩𑁆𑀪𑀫𑀦𑁂𑀦𑁂𑀯 𑀅𑀲𑁆𑀲𑀫𑀡𑀻𑀪𑀸𑀯𑀢𑁄. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸𑀢𑀺 𑀧𑀦 𑀇𑀤𑀁 𑀲𑀘𑁂 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄𑀯 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀲𑁆𑀲 𑀓𑀸𑀬𑀮𑀕𑁆𑀕𑀫𑁆𑀧𑀺 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) 𑀧𑀦 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀇𑀤𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀞𑀺𑀢𑀲𑁆𑀲 𑀘𑁂𑀯 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀪𑀺𑀓𑁆𑀔𑀼𑀦𑀺𑀪𑀸𑀯𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀕𑀺𑀳𑀺𑀮𑀺𑀗𑁆𑀕𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀢𑀤𑀸𑀧𑀺 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀢𑁆𑀢𑀸 𑀘𑀻𑀯𑀭𑀲𑁆𑀲 𑀘 𑀢𑀲𑁆𑀲 𑀲𑀦𑁆𑀢𑀓𑀢𑁆𑀢𑀸 𑀯𑀺𑀚𑀳𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀯𑀘𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑁂 𑀲𑀢𑀺 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀦𑁆𑀢𑁂𑀧𑀺 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑁂 𑀲𑀢𑀺 𑀳𑀻𑀦𑀸𑀬 𑀅𑀦𑀸𑀯𑀢𑁆𑀢𑀦𑁆𑀢𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀓𑁂𑀯𑀮𑀁 𑀕𑀺𑀳𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀪𑀸𑀯𑁄 𑀅𑀢𑁆𑀣𑀺, 𑀘𑀻𑀯𑀭𑀲𑁆𑀲 𑀘 𑀢𑀲𑁆𑀲 𑀲𑀦𑁆𑀢𑀓𑀢𑁆𑀢𑀸 𑀯𑀺𑀚𑀳𑀦𑀁, 𑀢𑀣𑀸𑀧𑀺 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑁂𑀯 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀲𑀺𑀬𑀸 𑀬𑀣𑀸 𑀢𑀁 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦. 𑀕𑀺𑀳𑀺𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀘 𑀓𑁂𑀯𑀮𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀓𑀭𑁄𑀦𑁆𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑀁 𑀅𑀢𑁆𑀣𑀺, 𑀘𑀻𑀯𑀭𑀲𑁆𑀲 𑀘 𑀢𑀲𑁆𑀲 𑀲𑀦𑁆𑀢𑀓𑀢𑁆𑀢𑀸 𑀯𑀺𑀚𑀳𑀦𑀁, 𑀢𑀣𑀸𑀧𑀺 ‘‘𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑁂𑀯 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀲𑀺𑀬𑀸 𑀬𑀣𑀸 𑀢𑀁 𑀧𑀘𑁆𑀘𑀼𑀤𑁆𑀥𑀭𑀡𑁂, 𑀢𑀲𑁆𑀫𑀸 𑀪𑀺𑀓𑁆𑀔𑀼 𑀯𑀸 𑀳𑁄𑀢𑀼 𑀪𑀺𑀓𑁆𑀔𑀼𑀦𑀻 𑀯𑀸, 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 ¶ 𑀘𑀺𑀢𑁆𑀢𑁂𑀦 𑀕𑀺𑀳𑀺𑀮𑀺𑀗𑁆𑀕𑀕𑁆𑀕𑀳𑀡𑁂𑀦 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀧𑀦 𑀪𑀺𑀓𑁆𑀔𑀼𑀲𑁆𑀲𑁂𑀯 𑀘𑀻𑀯𑀭𑀁 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀸𑀪𑀸𑀯𑀸𑀢𑀺 𑀅𑀬𑀫𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀦𑀁 𑀧𑀦 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀅𑀝𑁆𑀞𑀓𑀣𑀸𑀬𑀁 𑀅𑀦𑀸𑀕𑀢𑀢𑁆𑀢𑀸 𑀢𑁂𑀲𑀜𑁆𑀘 𑀳𑀻𑀦𑀸𑀬𑀸𑀯𑀢𑁆𑀢𑀸𑀦𑀯𑁄𑀳𑀸𑀭𑀸𑀪𑀸𑀯𑀸 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀯𑀲𑁂𑀦𑀸𑀢𑀺 ¶ 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀑𑀭𑀢𑁄 𑀧𑀭𑀢𑁄𑀢𑀺 𑀏𑀢𑁆𑀣 𑀘 ‘‘𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀧𑀭𑀢𑁄 𑀦 𑀪𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀑𑀭𑀧𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺? 𑀬𑀣𑀸 𑀦𑀤𑀻𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀤𑁂𑀲𑁂 𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀤𑀺𑀲𑀸𑀪𑀸𑀕𑁂 𑀢𑀻𑀭𑀁 𑀑𑀭𑀺𑀫𑀁 𑀦𑀸𑀫 𑀳𑁄𑀢𑀺, 𑀇𑀢𑀭𑀤𑀺𑀲𑀸𑀪𑀸𑀕𑁂 𑀢𑀻𑀭𑀁 𑀧𑀸𑀭𑀺𑀫𑀁 𑀦𑀸𑀫, 𑀢𑀣𑀸 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀝𑁆𑀞𑀸𑀦𑀪𑀽𑀢𑀁 𑀘𑀻𑀯𑀭𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀁 𑀬𑀣𑀸𑀯𑀼𑀢𑁆𑀢𑀯𑀺𑀤𑀢𑁆𑀣𑀺𑀆𑀤𑀺𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀁 𑀦𑀸𑀫, 𑀘𑀻𑀯𑀭𑀧𑀭𑀺𑀬𑀦𑁆𑀢𑀝𑁆𑀞𑀸𑀦𑀁 𑀧𑀭𑀁 𑀦𑀸𑀫, 𑀇𑀢𑀺 𑀮𑁄𑀓𑀢𑁄 𑀯𑀸 𑀬𑀣𑀸 𑀘 𑀑𑀭𑀢𑁄 𑀪𑁄𑀕𑀁 𑀧𑀭𑀢𑁄 𑀅𑀦𑁆𑀢𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀦𑁄 𑀅𑀪𑀺𑀫𑀼𑀔𑀝𑁆𑀞𑀸𑀦𑀁 𑀑𑀭𑀁 𑀦𑀸𑀫, 𑀇𑀢𑀭𑀝𑁆𑀞𑀸𑀦𑀁 𑀧𑀭𑀁 𑀦𑀸𑀫, 𑀏𑀯𑀁 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀝𑁆𑀞𑀸𑀦𑀁 𑀑𑀭𑀁 𑀦𑀸𑀫, 𑀇𑀢𑀭𑀁 𑀧𑀭𑀁 𑀦𑀸𑀫. 𑀏𑀯𑀁 𑀲𑀸𑀲𑀦𑀢𑁄 𑀯𑀸 𑀑𑀭𑀧𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯 𑀬𑁄 𑀧𑀦 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀧𑀞𑀫𑀁 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀫𑀡𑁆𑀟𑀮𑀧𑀭𑀺𑀯𑀢𑁆𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀲𑀓𑀮𑀲𑁆𑀫𑀺𑀁 𑀘𑀻𑀯𑀭𑁂 𑀅𑀥𑀺𑀝𑁆𑀞𑀸𑀦𑀪𑀺𑀚𑁆𑀚𑀦𑀸𑀪𑀺𑀚𑁆𑀚𑀦𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁬𑁯) ‘‘𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀧𑀫𑀸𑀡𑀬𑀼𑀢𑁆𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑁂 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺𑀆𑀤𑀺𑀅𑀢𑁆𑀣𑀁 𑀲𑀗𑁆𑀕𑀡𑁆𑀳𑀸𑀢𑀻’’𑀢𑀺.

𑀔𑀼𑀤𑁆𑀤𑀓𑀁 𑀘𑀻𑀯𑀭𑀦𑁆𑀢𑀺 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀪𑁂𑀤𑀧𑁆𑀧𑀫𑀸𑀡𑀢𑁄 𑀅𑀦𑀽𑀦𑀫𑁂𑀯 𑀔𑀼𑀤𑁆𑀤𑀓𑀘𑀻𑀯𑀭𑀁. 𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺, 𑀢𑀲𑁆𑀫𑀺𑀁 ¶ 𑀧𑀤𑁂𑀲𑁂 𑀲𑀫𑀦𑁆𑀢𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀯𑀸 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀅𑀢𑀺𑀫𑀳𑀦𑁆𑀢𑀁 𑀘𑀻𑀯𑀭𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀙𑀺𑀦𑁆𑀤𑀦𑁂𑀦𑀧𑀺 𑀯𑀺𑀘𑁆𑀙𑀺𑀦𑁆𑀤𑀦𑀓𑀸𑀮𑁂 𑀙𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑀁 𑀙𑀺𑀤𑁆𑀤𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺 𑀏𑀯𑀸𑀢𑀺 𑀲𑀺𑀚𑁆𑀛𑀢𑀺, ‘𑀖𑀝𑁂𑀢𑁆𑀯𑀸 𑀙𑀺𑀦𑁆𑀤𑀢𑀺 𑀦 𑀪𑀺𑀚𑁆𑀚𑀢𑀻’𑀢𑀺 𑀯𑀘𑀦𑁂𑀦 𑀘 𑀲𑀫𑁂𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀧𑀦 𑀯𑀺𑀓𑀧𑁆𑀧𑀦𑀽𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀢𑁄 𑀊𑀦𑀁 𑀓𑀢𑁆𑀯𑀸 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀦𑀺𑀲𑁆𑀲𑀬𑀢𑁆𑀢𑀸, 𑀢𑀸𑀦𑀺 𑀧𑀼𑀦 𑀩𑀤𑁆𑀥𑀸𑀦𑀺 𑀖𑀝𑀺𑀢𑀸𑀦𑀺 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑁂 𑀤𑁆𑀯𑀺𑀥𑀸 𑀙𑀺𑀦𑁆𑀦𑁂 𑀬𑀤𑀺𑀧𑀺 𑀏𑀓𑁂𑀓𑀁 𑀔𑀡𑁆𑀟𑀁 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁆𑀟𑁂 𑀅𑀥𑀺𑀝𑁆𑀞𑀸𑀦𑀁 𑀢𑀺𑀝𑁆𑀞𑀢𑀺, 𑀦 𑀇𑀢𑀭𑀲𑁆𑀫𑀺𑀁, 𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀲𑀻𑀤𑀦𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀯𑀤𑀦𑁆𑀢𑀻’’𑀢𑀺.

𑁪𑁭. 𑀲𑀫𑁆𑀫𑀼𑀔𑁂 𑀧𑀯𑀢𑁆𑀢𑀸 𑀲𑀫𑁆𑀫𑀼𑀔𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀜𑁆𑀘 𑀯𑀺𑀓𑀧𑁆𑀧𑀦𑀸𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘‘𑀲𑀫𑁆𑀫𑀼𑀔𑁂’’𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑁆𑀯𑀸𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀅𑀪𑀺𑀫𑀼𑀔𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀫𑀼𑀔𑁂𑀦 𑀅𑀢𑁆𑀢𑀦𑁄 𑀯𑀸𑀘𑀸𑀬 𑀏𑀯 𑀯𑀺𑀓𑀧𑁆𑀧𑀦𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀧𑀭𑀫𑁆𑀫𑀼𑀔𑁂𑀦 𑀯𑀺𑀓𑀧𑁆𑀧𑀦𑀸 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀢𑀺 ¶ 𑀓𑀭𑀡𑀢𑁆𑀣𑁂𑀦𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀫𑁂𑀯 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀦𑁆𑀢𑀺 𑀆𑀲𑀦𑁆𑀦𑀤𑀽𑀭𑀪𑀸𑀯𑀁. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑁂𑀦𑁂𑀯 𑀯𑀺𑀓𑀧𑁆𑀧𑀦𑀸𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦 𑀳𑁄𑀢𑀻𑀢𑀺 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑀼𑀜𑁆𑀚𑀺𑀢𑀼𑀁…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀲𑀬𑀁 𑀅𑀧𑀘𑁆𑀘𑀼𑀤𑁆𑀥𑀸𑀭𑀡𑀧𑀭𑀺𑀪𑀼𑀜𑁆𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀥𑀺𑀝𑁆𑀞𑀳𑀦𑁂 𑀧𑀭𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂 𑀘 𑀤𑀼𑀓𑁆𑀓𑀝𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀧𑀭𑀺𑀪𑁄𑀕𑀯𑀺𑀲𑁆𑀲𑀚𑁆𑀚𑀦𑀅𑀥𑀺𑀝𑁆𑀞𑀸𑀦𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀅𑀧𑀺-𑀲𑀤𑁆𑀤𑁂𑀦 𑀦𑀺𑀥𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀘𑁆𑀘𑀼𑀤𑁆𑀥𑀸𑀭𑁂𑀧𑀺 𑀓𑀢𑁂 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁂𑀦 ¶ 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀫𑁂𑀯 𑀳𑁄𑀢𑀺, 𑀦 𑀅𑀢𑀺𑀭𑁂𑀓𑀘𑀻𑀯𑀭𑀁, 𑀢𑀁 𑀧𑀦 𑀢𑀺𑀘𑀻𑀯𑀭𑀸𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀓𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑀩𑁆𑀩𑀁, 𑀇𑀢𑀭𑁂𑀦 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀫𑁂𑀯 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀓𑁂𑀘𑀺 𑀧𑀦 ‘‘𑀬𑀁 𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀁, 𑀢𑀁 𑀬𑀸𑀯 𑀧𑀭𑀺𑀪𑁄𑀕𑀓𑀸𑀮𑀸 𑀅𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀦𑀺𑀤𑀳𑁂𑀢𑀩𑁆𑀩𑀁, 𑀧𑀭𑀺𑀪𑁄𑀕𑀓𑀸𑀮𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀤𑀺 𑀳𑀺 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀬𑁆𑀬, 𑀧𑀘𑁆𑀘𑀼𑀤𑁆𑀥𑀸𑀭𑁂𑀦𑁂𑀯 𑀯𑀺𑀓𑀧𑁆𑀧𑀦𑀸𑀬 𑀯𑀺𑀕𑀢𑀢𑁆𑀢𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺, 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀧𑀢𑁆𑀢𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀲𑁆𑀫𑀸 𑀬𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀢𑀤𑁂𑀯 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀧𑀘𑁆𑀘𑀼𑀤𑁆𑀥𑀸𑀭𑁂 𑀘 𑀓𑀢𑁂 𑀅𑀦𑁆𑀢𑁄𑀤𑀲𑀸𑀳𑁂𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀬𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) ‘𑀢𑀢𑁄 𑀧𑀭𑀁 𑀧𑀭𑀺𑀪𑁄𑀕𑀸𑀤𑀺 𑀯𑀝𑁆𑀝𑀢𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀧𑀸𑀴𑀺𑀬𑀜𑁆𑀳𑀺 ‘‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺 (𑀧𑀸𑀭𑀸. 𑁪𑁬𑁯) 𑀘 ‘‘𑀲𑀸𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀘𑁆𑀘𑀼𑀤𑁆𑀥𑀸𑀭𑀡𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁩𑁭𑁩) 𑀘 ‘‘𑀅𑀦𑀸𑀧𑀢𑁆𑀢𑀺 𑀲𑁄 𑀯𑀸 𑀤𑁂𑀢𑀺, 𑀢𑀲𑁆𑀲 𑀯𑀸 𑀯𑀺𑀲𑁆𑀲𑀸𑀲𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀘𑀺. 𑁩𑁭𑁬) 𑀘 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) ‘‘𑀇𑀫𑀁 𑀘𑀻𑀯𑀭𑀁 𑀯𑀸 𑀯𑀺𑀓𑀧𑁆𑀧𑀦𑀁 𑀯𑀸 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀼𑀤𑁆𑀥𑀸𑀭𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀁 𑀅𑀫𑁄𑀘𑁂𑀢𑁆𑀯𑀸𑀯 𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, ‘‘𑀢𑀢𑁄 𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀦𑀸𑀧𑀺 𑀯𑀺𑀲𑀼𑀁 𑀧𑀭𑀺𑀪𑁄𑀕𑀲𑁆𑀲 𑀦𑀺𑀥𑀸𑀦𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀯𑀺𑀓𑀧𑁆𑀧𑀦𑀸𑀦𑀦𑁆𑀢𑀭𑀫𑁂𑀯 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀏𑀯 𑀘 𑀢𑀺𑀘𑀻𑀯𑀭𑀭𑀳𑀺𑀢𑀁 𑀯𑀺𑀓𑀧𑁆𑀧𑀦𑀸𑀭𑀳𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀜𑁆𑀘 𑀦𑀺𑀤𑀳𑀺𑀢𑀼𑀜𑁆𑀘 𑀇𑀤𑀁 𑀧𑀸𑀝𑁂𑀓𑁆𑀓𑀁 𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀔𑀸𑀬𑀢𑀺. 𑀅𑀧𑀺𑀘 𑀩𑀳𑀽𑀦𑀁 𑀧𑀢𑁆𑀢𑀸𑀦𑀁 𑀯𑀺𑀓𑀧𑁆𑀧𑁂𑀢𑀼𑀁 𑀧𑀘𑁆𑀘𑀼𑀤𑁆𑀥𑀭𑁂𑀢𑀼𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀤𑁆𑀥𑀸𑀭𑁂 𑀢𑁂𑀲𑀁 ¶ 𑀅𑀢𑀺𑀭𑁂𑀓𑀧𑀢𑁆𑀢𑀢𑀸 𑀤𑀲𑁆𑀲𑀺𑀢𑀸𑀢𑀺 𑀲𑀺𑀚𑁆𑀛𑀢𑀺 𑀢𑁂𑀲𑀼 𑀏𑀓𑀲𑁆𑀲𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀫𑀺𑀢𑁆𑀢𑁄𑀢𑀺 ¶ 𑀤𑀴𑁆𑀳𑀫𑀺𑀢𑁆𑀢𑁄. 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑁄, 𑀦 𑀤𑀴𑁆𑀳𑀫𑀺𑀢𑁆𑀢𑁄. 𑀧𑀜𑁆𑀜𑀢𑁆𑀢𑀺𑀓𑁄𑀯𑀺𑀤𑁄 𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀺𑀓𑀧𑁆𑀧𑀺𑀢𑁂 𑀅𑀦𑀦𑁆𑀢𑀭𑀫𑁂𑀯 𑀏𑀯𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀦𑁆𑀢𑀺 𑀯𑀺𑀦𑀬𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀦 𑀚𑀸𑀦𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀼’’𑀦𑁆𑀢𑀺. 𑀇𑀫𑀺𑀦𑀸𑀧𑀺 𑀘𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀯𑀺𑀓𑀧𑁆𑀧𑀦𑀸𑀲𑀫𑀦𑀦𑁆𑀢𑀭𑀫𑁂𑀯 𑀧𑀘𑁆𑀘𑀼𑀤𑁆𑀥𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺. 𑀯𑀺𑀓𑀧𑁆𑀧𑀺𑀢𑀯𑀺𑀓𑀧𑁆𑀧𑀦𑀸 𑀦𑀸𑀫𑁂𑀲𑀸 𑀯𑀝𑁆𑀝𑀢𑀻𑀢𑀺 𑀅𑀥𑀺𑀝𑁆𑀞𑀺𑀢𑀅𑀥𑀺𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁮. 𑀏𑀯𑀁 𑀘𑀻𑀯𑀭𑁂 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀢𑀢𑀺 𑀧𑀺𑀡𑁆𑀟𑀧𑀸𑀢𑁄 𑀏𑀢𑁆𑀣𑀸𑀢𑀺 𑀧𑀢𑁆𑀢𑁄, 𑀚𑀺𑀦𑀲𑀸𑀲𑀦𑀪𑀸𑀯𑁄 𑀪𑀺𑀓𑁆𑀔𑀸𑀪𑀸𑀚𑀦𑀯𑀺𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀢𑁆𑀢𑀁 𑀧𑀓𑁆𑀔𑁂 𑀤𑀮𑁂 𑀧𑀢𑁆𑀢𑁄, 𑀪𑀸𑀚𑀦𑁂 𑀲𑁄 𑀕𑀢𑁂 𑀢𑀺𑀲𑀽’’𑀢𑀺, 𑀢𑀲𑁆𑀫𑀺𑀁 𑀧𑀢𑁆𑀢𑁂. 𑀧𑀦𑀸𑀢𑀺 𑀧𑀓𑁆𑀔𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀦𑀬𑁄𑀢𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀬𑁄. 𑀘𑀻𑀯𑀭𑁂 𑀯𑀼𑀢𑁆𑀢𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀬𑀢𑁄 𑀅𑀜𑁆𑀜𑀪𑀽𑀢𑁄 𑀅𑀬𑀁 𑀯𑀓𑁆𑀔𑀫𑀸𑀦𑁄 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀧𑀫𑀸𑀡𑀬𑀼𑀢𑁆𑀢𑁄𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, 𑀦 𑀅𑀧𑁆𑀧𑀫𑀸𑀡𑀬𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀧𑀫𑀸𑀡𑀢𑁄 𑀊𑀦𑀸𑀥𑀺𑀓𑁂 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀧𑀢𑁆𑀢𑀁 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀏𑀢𑁂 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀦 𑀅𑀥𑀺𑀝𑁆𑀞𑀸𑀦𑀽𑀧𑀕𑀸 𑀦 𑀯𑀺𑀓𑀧𑁆𑀧𑀦𑀽𑀧𑀕𑀸’’𑀢𑀺.

𑀤𑁆𑀯𑁂 𑀫𑀕𑀥𑀦𑀸𑀴𑀺𑀬𑁄𑀢𑀺 𑀏𑀢𑁆𑀣 𑀫𑀕𑀥𑀦𑀸𑀴𑀺 𑀦𑀸𑀫 𑀬𑀸 𑀫𑀸𑀕𑀥𑀺𑀓𑀸𑀬 𑀢𑀼𑀮𑀸𑀬 𑀅𑀟𑁆𑀠𑀢𑁂𑀭𑀲𑀧𑀮𑀧𑀭𑀺𑀫𑀺𑀢𑀁 𑀉𑀤𑀓𑀁 𑀕𑀡𑁆𑀳𑀸𑀢𑀺. 𑀲𑀻𑀳𑀴𑀤𑀻𑀧𑁂 𑀧𑀓𑀢𑀺𑀦𑀸𑀴𑀺𑀢𑁄 𑀔𑀼𑀤𑁆𑀤𑀓𑀸 𑀳𑁄𑀢𑀺, 𑀤𑀫𑀺𑀴𑀦𑀸𑀴𑀺𑀢𑁄 𑀧𑀦 ¶ 𑀫𑀳𑀦𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨) ‘‘𑀫𑀕𑀥𑀦𑀸𑀴𑀺 𑀦𑀸𑀫 𑀅𑀟𑁆𑀠𑀢𑁂𑀭𑀲𑀧𑀮𑀸 𑀳𑁄𑀢𑀻𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀻𑀳𑀴𑀤𑀻𑀧𑁂 𑀧𑀓𑀢𑀺𑀦𑀸𑀴𑀺 𑀫𑀳𑀦𑁆𑀢𑀸, 𑀤𑀫𑀺𑀴𑀦𑀸𑀴𑀺 𑀔𑀼𑀤𑁆𑀤𑀓𑀸, 𑀫𑀕𑀥𑀦𑀸𑀴𑀺𑀧𑀫𑀸𑀡𑀬𑀼𑀢𑁆𑀢𑀸, 𑀢𑀸𑀬 𑀫𑀕𑀥𑀦𑀸𑀴𑀺𑀬𑀸 𑀤𑀺𑀬𑀟𑁆𑀠𑀦𑀸𑀴𑀺 𑀏𑀓𑀸 𑀲𑀻𑀳𑀴𑀦𑀸𑀴𑀺 𑀳𑁄𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺. 𑀅𑀣 𑀯𑀸 𑀫𑀕𑀥𑀦𑀸𑀴𑀺 𑀦𑀸𑀫 𑀬𑀸 𑀧𑀜𑁆𑀘 𑀓𑀼𑀟𑀼𑀯𑀸𑀦𑀺 𑀏𑀓𑀜𑁆𑀘 𑀫𑀼𑀝𑁆𑀞𑀺𑀁 𑀏𑀓𑀸𑀬 𑀘 𑀫𑀼𑀝𑁆𑀞𑀺𑀬𑀸 𑀢𑀢𑀺𑀬𑀪𑀸𑀕𑀁 𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁯𑁮-𑁬𑁦𑁨) ‘‘𑀫𑀕𑀥𑀦𑀸𑀴𑀺 𑀦𑀸𑀫 𑀙𑀧𑀲𑀢𑀸 𑀦𑀸𑀴𑀻𑀢𑀺 𑀓𑁂𑀘𑀺. ‘𑀅𑀝𑁆𑀞𑀧𑀲𑀢𑀸’𑀢𑀺 𑀅𑀧𑀭𑁂. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀁 𑀫𑀢𑁂𑀦 𑀢𑀺𑀧𑀲𑀢𑀸𑀬 𑀦𑀸𑀴𑀺𑀬𑀸 𑀤𑁆𑀯𑁂 𑀦𑀸𑀴𑀺𑀬𑁄 𑀏𑀓𑀸 𑀫𑀕𑀥𑀦𑀸𑀴𑀺 𑀳𑁄𑀢𑀺. 𑀧𑀘𑁆𑀙𑀺𑀫𑀸𑀦𑀁 𑀘𑀢𑀼𑀧𑀲𑀢𑀸𑀬 𑀦𑀸𑀴𑀺𑀬𑀸 𑀤𑁆𑀯𑁂 𑀦𑀸𑀴𑀺𑀬𑁄 𑀏𑀓𑀸 𑀫𑀕𑀥𑀦𑀸𑀴𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 𑀧𑀓𑀢𑀺𑀬𑀸 𑀘𑀢𑀼𑀫𑀼𑀝𑁆𑀞𑀺𑀓𑀁 𑀓𑀼𑀟𑀼𑀯𑀁, 𑀘𑀢𑀼𑀓𑀼𑀟𑀼𑀯𑀁 𑀦𑀸𑀴𑀺𑀓𑀁, 𑀢𑀸𑀬 𑀦𑀸𑀴𑀺𑀬𑀸 𑀲𑁄𑀴𑀲 𑀦𑀸𑀴𑀺𑀬𑁄 𑀤𑁄𑀡𑀁, 𑀢𑀁 𑀧𑀦 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲 𑀦𑀸𑀴𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀦 𑀦𑀬𑁂𑀦 𑀫𑀕𑀥𑀦𑀸𑀴𑀺 𑀦𑀸𑀫 𑀧𑀜𑁆𑀘 𑀓𑀼𑀟𑀼𑀯𑀸𑀦𑀺 ¶ 𑀏𑀓𑀜𑁆𑀘 𑀫𑀼𑀝𑁆𑀞𑀺𑀁 𑀏𑀓𑀸𑀬 𑀫𑀼𑀝𑁆𑀞𑀺𑀬𑀸 𑀢𑀢𑀺𑀬𑀪𑀸𑀕𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀓𑀼𑀟𑀼𑀯𑁄𑀢𑀺 𑀧𑀲𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁋

‘‘𑀓𑀼𑀟𑀼𑀯𑁄 𑀧𑀲𑀢𑁄 𑀏𑀓𑁄;

𑀧𑀢𑁆𑀣𑁄 𑀢𑁂 𑀘𑀢𑀼𑀭𑁄 𑀲𑀺𑀬𑀼𑀁;

𑀆𑀴𑁆𑀳𑀓𑁄 𑀘𑀢𑀼𑀭𑁄 𑀧𑀢𑁆𑀣𑀸;

𑀤𑁄𑀡𑀁 𑀯𑀸 𑀘𑀢𑀼𑀭𑀸𑀴𑁆𑀳𑀓’’𑀦𑁆𑀢𑀺.

𑀅𑀣 𑀯𑀸 𑀫𑀕𑀥𑀦𑀸𑀴𑀺 𑀦𑀸𑀫 𑀬𑀸 𑀘𑀢𑀼𑀓𑀼𑀟𑀼𑀯𑀸𑀬 𑀦𑀸𑀴𑀺𑀬𑀸 𑀘𑀢𑀲𑁆𑀲𑁄 𑀦𑀸𑀴𑀺𑀬𑁄 𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁦𑁨) ‘‘𑀤𑀫𑀺𑀴𑀦𑀸𑀴𑀻𑀢𑀺 𑀧𑀼𑀭𑀸𑀡𑀓𑀦𑀸𑀴𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸 𑀘 𑀘𑀢𑀼𑀫𑀼𑀝𑁆𑀞𑀺𑀓𑁂𑀳𑀺 𑀓𑀼𑀟𑀼𑀯𑁂𑀳𑀺 𑀅𑀝𑁆𑀞𑀓𑀼𑀟𑀼𑀯𑀸, 𑀢𑀸𑀬 𑀦𑀸𑀴𑀺𑀬𑀸 𑀤𑁆𑀯𑁂 𑀦𑀸𑀴𑀺𑀬𑁄 𑀫𑀕𑀥𑀦𑀸𑀴𑀺 𑀕𑀡𑁆𑀳𑀸𑀢𑀺, 𑀧𑀼𑀭𑀸𑀡𑀸 𑀧𑀦 𑀲𑀻𑀳𑀴𑀦𑀸𑀴𑀺 𑀢𑀺𑀲𑁆𑀲𑁄 𑀦𑀸𑀴𑀺𑀬𑁄 𑀕𑀡𑁆𑀳𑀸𑀢𑀻𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀫𑀕𑀥𑀦𑀸𑀴𑀺 ¶ 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀸𑀬 𑀘𑀢𑀼𑀓𑀼𑀟𑀼𑀯𑀸𑀬 𑀤𑀫𑀺𑀴𑀦𑀸𑀴𑀺𑀬𑀸 𑀘𑀢𑀼𑀦𑀸𑀴𑀺𑀓𑀸 𑀳𑁄𑀢𑀺, 𑀢𑀢𑁄 𑀫𑀕𑀥𑀦𑀸𑀴𑀺𑀢𑁄 𑀉𑀧𑀟𑁆𑀠𑀜𑁆𑀘 𑀧𑀼𑀭𑀸𑀡𑀤𑀫𑀺𑀴𑀦𑀸𑀴𑀺𑀲𑀗𑁆𑀔𑀸𑀢𑀁 𑀧𑀢𑁆𑀣𑀁 𑀦𑀸𑀫 𑀳𑁄𑀢𑀺, 𑀏𑀢𑁂𑀦 𑀘 𑀑𑀫𑀓𑁄 𑀦𑀸𑀫 𑀧𑀢𑁆𑀢𑁄 𑀧𑀢𑁆𑀣𑁄𑀤𑀦𑀁 𑀕𑀡𑁆𑀳𑀸𑀢𑀻𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑁂𑀢𑀺. 𑀮𑁄𑀓𑀺𑀬𑁂𑀳𑀺𑀧𑀺 𑁋

‘𑀮𑁄𑀓𑀺𑀬𑀁 𑀫𑀕𑀥𑀜𑁆𑀘𑁂𑀢𑀺, 𑀧𑀢𑁆𑀣𑀤𑁆𑀯𑀬𑀫𑀼𑀤𑀸𑀳𑀝𑀁;

𑀮𑁄𑀓𑀺𑀬𑀁 𑀲𑁄𑀴𑀲𑀧𑀮𑀁, 𑀫𑀸𑀕𑀥𑀁 𑀤𑀺𑀕𑀼𑀡𑀁 𑀫𑀢’𑀦𑁆𑀢𑀺. (𑀯𑀺. 𑀯𑀺. 𑀝𑀻. 𑁧.𑁬𑁦𑁨) 𑁋

𑀏𑀯𑀁 𑀮𑁄𑀓𑁂 𑀦𑀸𑀴𑀺𑀬𑀸 𑀫𑀕𑀥𑀦𑀸𑀴𑀺 𑀤𑀺𑀕𑀼𑀡𑀸𑀢𑀺 𑀤𑀲𑁆𑀲𑀺𑀢𑀸. 𑀏𑀯𑀜𑁆𑀘 𑀕𑀬𑁆𑀳𑀫𑀸𑀦𑁂 𑀑𑀫𑀓𑀧𑀢𑁆𑀢𑀲𑁆𑀲 𑀘 𑀬𑀸𑀧𑀦𑀫𑀢𑁆𑀢𑁄𑀤𑀦𑀕𑀸𑀳𑀺𑀓𑀸 𑀘 𑀲𑀺𑀤𑁆𑀥𑀸 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀅𑀝𑁆𑀞𑀓𑀼𑀟𑀼𑀯𑀢𑁄 𑀊𑀦𑁄𑀤𑀦𑀕𑀸𑀳𑀺𑀦𑀸 𑀧𑀢𑁆𑀢𑁂𑀦 𑀅𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀬𑀸𑀧𑁂𑀢𑀼𑀁. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀯𑁂𑀭𑀜𑁆𑀚𑀓𑀡𑁆𑀟𑀝𑁆𑀞𑀓𑀣𑀸𑀬𑀁 ‘𑀧𑀢𑁆𑀣𑁄 𑀦𑀸𑀫 𑀦𑀸𑀴𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀮𑀁 𑀬𑀸𑀧𑀦𑀸𑀬𑀸’𑀢𑀺’’. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 (𑀚𑀸. 𑀅𑀝𑁆𑀞. 𑁫.𑁨𑁧.𑁧𑁯𑁨) ‘‘𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦’’𑀦𑁆𑀢𑀺, ‘‘𑀏𑀓𑀲𑁆𑀲 𑀤𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀧𑀳𑁄𑀢𑀻’’𑀢𑀺 𑀘, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀆𑀮𑁄𑀧𑀲𑁆𑀲 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀑𑀤𑀦𑀲𑁆𑀲 𑀘𑀢𑀼𑀪𑀸𑀕𑀫𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁭) ‘‘𑀩𑁆𑀬𑀜𑁆𑀚𑀦𑀲𑁆𑀲 𑀫𑀢𑁆𑀢𑀸 𑀦𑀸𑀫 𑀑𑀤𑀦𑀘𑀢𑀼𑀢𑁆𑀣𑀪𑀸𑀕𑁄’’𑀢𑀺. 𑀑𑀤𑀦𑀕𑀢𑀺𑀓𑀸𑀦𑀻𑀢𑀺 𑀑𑀤𑀦𑀲𑁆𑀲 𑀕𑀢𑀺 ¶ 𑀕𑀢𑀺 𑀬𑁂𑀲𑀁 𑀢𑀸𑀦𑀺 𑀑𑀤𑀦𑀕𑀢𑀺𑀓𑀸𑀦𑀺. 𑀕𑀢𑀻𑀢𑀺 𑀘 𑀑𑀓𑀸𑀲𑁄 𑀑𑀤𑀦𑀲𑁆𑀲 𑀅𑀦𑁆𑀢𑁄𑀧𑀯𑀺𑀲𑀦𑀲𑀻𑀮𑀢𑁆𑀢𑀸 𑀑𑀤𑀦𑀲𑁆𑀲 𑀑𑀓𑀸𑀲𑁄𑀬𑁂𑀯 𑀢𑁂𑀲𑀁 𑀑𑀓𑀸𑀲𑁄 𑀳𑁄𑀢𑀺, 𑀦 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀚𑀦𑀧𑀭𑀺𑀪𑁄𑀕𑁂𑀦𑀸𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀦𑀸 𑀪𑀸𑀚𑀦𑀧𑀭𑀺𑀪𑁄𑀕𑁂𑀦.

𑀏𑀯𑀁 𑀧𑀫𑀸𑀡𑀢𑁄 𑀅𑀥𑀺𑀝𑁆𑀞𑀸𑀦𑀽𑀧𑀕𑀯𑀺𑀓𑀧𑁆𑀧𑀦𑀽𑀧𑀕𑀧𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀓𑀢𑁄 𑀫𑀽𑀮𑀢𑁄 𑀘 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀫𑀸𑀡𑀬𑀼𑀢𑁆𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺 𑀧𑀢𑁆𑀢𑁄𑀢𑀺 ¶ 𑀓𑀫𑁆𑀫𑀸𑀭𑀧𑀓𑁆𑀓𑀁𑀬𑁂𑀯 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀫𑀡𑀲𑀸𑀭𑀼𑀧𑁆𑀧𑀦𑀻𑀮𑀯𑀡𑁆𑀡𑀓𑀭𑀡𑀢𑁆𑀣𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀧𑀘𑀺𑀢𑀩𑁆𑀩𑁄, 𑀅𑀬𑁄𑀧𑀢𑁆𑀢𑀲𑁆𑀲 𑀅𑀢𑀺𑀓𑀓𑁆𑀔𑀴𑀢𑁆𑀢𑀸 𑀓𑀫𑁆𑀫𑀸𑀭𑀧𑀸𑀓𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀯𑀸𑀭𑀧𑀓𑁆𑀓𑁄𑀬𑁂𑀯 𑀲𑀫𑀡𑀲𑀸𑀭𑀼𑀧𑁆𑀧𑀦𑀻𑀮𑀯𑀡𑁆𑀡𑁄 𑀳𑁄𑀢𑀺. 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲 𑀧𑀦 𑀫𑀼𑀤𑀼𑀓𑀢𑁆𑀢𑀸 𑀓𑀼𑀫𑁆𑀪𑀓𑀸𑀭𑀓𑀧𑀸𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀺𑀯𑀸𑀭𑀧𑀓𑁆𑀓𑁄𑀧𑀺 𑀲𑀫𑀡𑀲𑀸𑀭𑀼𑀧𑁆𑀧𑀦𑀻𑀮𑀯𑀡𑁆𑀡𑁄 𑀳𑁄𑀢𑀺. 𑀏𑀯𑀁 𑀓𑀢𑁄𑀬𑁂𑀯 𑀳𑀺 𑀧𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀽𑀧𑀕𑁄 𑀯𑀺𑀓𑀧𑁆𑀧𑀦𑀽𑀧𑀕𑁄 𑀘 𑀳𑁄𑀢𑀺, 𑀦𑀸𑀓𑀢𑁄. 𑀢𑁂𑀦 𑀯𑀓𑁆𑀔𑀢𑀺 ‘‘𑀧𑀸𑀓𑁂 𑀘 𑀫𑀽𑀮𑁂 𑀘 𑀲𑀼𑀦𑀺𑀝𑁆𑀞𑀺𑀢𑁂𑀬𑁂𑀯 𑀅𑀥𑀺𑀝𑁆𑀞𑀸𑀦𑀽𑀧𑀕𑁄 𑀳𑁄𑀢𑀺. 𑀬𑁄 𑀅𑀥𑀺𑀝𑁆𑀞𑀸𑀦𑀽𑀧𑀕𑁄, 𑀲𑁆𑀯𑁂𑀯 𑀯𑀺𑀓𑀧𑁆𑀧𑀦𑀽𑀧𑀕𑁄’’𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁪𑁮). 𑀲𑁄 𑀳𑀢𑁆𑀣𑀁 𑀆𑀕𑀢𑁄𑀧𑀺 𑀅𑀦𑀸𑀕𑀢𑁄𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄 𑀯𑀺𑀓𑀧𑁆𑀧𑁂𑀢𑀩𑁆𑀩𑁄𑀢𑀺 𑀏𑀢𑁂𑀦 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀺𑀓𑀧𑁆𑀧𑁂𑀢𑀼𑀜𑁆𑀘 𑀮𑀪𑀢𑀺, 𑀞𑀧𑀺𑀢𑀝𑁆𑀞𑀸𑀦𑀲𑀮𑁆𑀮𑀓𑁆𑀔𑀡𑀫𑁂𑀯 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑀼𑀫𑀸𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺. 𑀳𑀺-𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀢𑀢𑁆𑀣 𑀧𑀘𑀺𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀻𑀢𑀺 𑀓𑀸𑀴𑀯𑀡𑁆𑀡𑀧𑀸𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀢𑁆𑀣 𑀤𑁆𑀯𑁂 𑀧𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁄 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀇𑀤𑀫𑁆𑀧𑀺 𑀉𑀧𑀘𑀸𑀭𑀫𑀢𑁆𑀢𑀁, 𑀧𑀢𑁆𑀢𑀲𑀮𑁆𑀮𑀓𑁆𑀔𑀡𑀫𑁂𑀯𑁂𑀢𑁆𑀣 𑀧𑀫𑀸𑀡𑀁.

𑀇𑀤𑀸𑀦𑀺 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀅𑀧𑁆𑀧𑀫𑀢𑁆𑀢𑀲𑁆𑀲’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀧𑀢𑁆𑀢𑁂 𑀯𑀸 𑀙𑀺𑀤𑁆𑀤𑀁 𑀳𑁄𑀢𑀻𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁄𑀓𑀸𑀲𑀢𑁄 𑀧𑀝𑁆𑀞𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀳𑁄𑀢𑀺.

𑀲𑀢𑁆𑀢𑀦𑁆𑀦𑀁 ¶ 𑀥𑀜𑁆𑀜𑀸𑀦𑀦𑁆𑀢𑀺 𑁋

‘‘𑀲𑀸𑀮𑀺 𑀯𑀻𑀳𑀺 𑀘 𑀓𑀼𑀤𑁆𑀭𑀽𑀲𑁄;

𑀕𑁄𑀥𑀽𑀫𑁄 𑀯𑀭𑀓𑁄 𑀬𑀯𑁄;

𑀓𑀗𑁆𑀕𑀽𑀢𑀺 ¶ 𑀲𑀢𑁆𑀢 𑀥𑀜𑁆𑀜𑀸𑀦𑀺;

𑀦𑀻𑀯𑀸𑀭𑀸𑀤𑀻 𑀢𑀼 𑀢𑀩𑁆𑀪𑀺𑀤𑀸’’𑀢𑀺. 𑁋

𑀯𑀼𑀢𑁆𑀢𑀸𑀦𑀁 𑀲𑀢𑁆𑀢𑀯𑀺𑀥𑀸𑀦𑀁 𑀥𑀜𑁆𑀜𑀸𑀦𑀁.

𑁪𑁯. 𑀏𑀯𑀁 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀢𑁆𑀢𑀯𑀺𑀓𑀧𑁆𑀧𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀓𑀧𑁆𑀧𑀦𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀘𑀻𑀯𑀭𑀯𑀺𑀓𑀧𑁆𑀧𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁫𑁦. 𑀏𑀯𑀁 𑀯𑀺𑀓𑀧𑁆𑀧𑀦𑀸𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀢𑁆𑀢𑁂 𑀪𑀺𑀦𑁆𑀦𑁂 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸’’𑀇𑀘𑁆𑀘𑀸𑀤𑀺. 𑀢𑀢𑁆𑀣 𑀅𑀧𑀢𑁆𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀩𑀦𑁆𑀥𑀦𑁂𑀧𑀺 𑀧𑀢𑁆𑀢𑁂 𑀅𑀧𑀭𑀺𑀧𑀼𑀡𑁆𑀡𑀧𑀸𑀓𑁂 𑀧𑀢𑁆𑀢𑁂 𑀯𑀺𑀬 𑀅𑀥𑀺𑀝𑁆𑀞𑀸𑀦𑀁 𑀦 𑀭𑀼𑀳𑀢𑀺. ‘‘𑀢𑀺𑀧𑀼𑀧𑀝𑁆𑀝𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀩𑀮𑁄𑀳𑀸𑀤𑀺𑀓𑀧𑁆𑀧𑀺𑀬𑀮𑁄𑀳𑁂𑀳𑀺 𑀅𑀬𑁄𑀧𑀢𑁆𑀢𑀲𑁆𑀲 𑀙𑀺𑀤𑁆𑀤𑀁 𑀙𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 ‘‘𑀮𑁄𑀳𑀫𑀡𑁆𑀟𑀮𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀤𑁆𑀥𑁂𑀳𑀺…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀉𑀡𑁆𑀳𑀪𑁄𑀚𑀦𑁂 𑀧𑀓𑁆𑀔𑀺𑀢𑁆𑀢𑁂 𑀯𑀺𑀮𑀻𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀨𑀸𑀡𑀺𑀢𑀁 𑀛𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀲𑀤𑁆𑀥𑀺𑀁 𑀨𑀸𑀡𑀺𑀢𑀁 𑀧𑀘𑀺𑀢𑁆𑀯𑀸 𑀢𑀣𑀸𑀧𑀓𑁆𑀓𑁂𑀦 𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀭𑀺𑀪𑁄𑀕𑁂𑀦𑀸𑀢𑀺 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁂𑀦. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀆𑀥𑀸𑀭𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀥𑀸𑀭𑀓𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀧𑀢𑁆𑀢𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 𑀆𑀥𑀸𑀭𑀓𑀝𑁆𑀞𑀧𑀦𑁄𑀓𑀸𑀲𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁯. 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁧. 𑀏𑀯𑀁 ¶ 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀯𑀺𑀦𑀺𑀘𑁆𑀙𑀬𑀓𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀻𑀯𑀭𑁂𑀦 𑀯𑀺𑀦𑀸𑀯𑀸𑀲𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀻𑀯𑀭𑁂𑀦𑀯𑀺𑀦𑀸𑀯𑀸𑀲𑁄’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀘𑀻𑀬𑀢𑀻𑀢𑀺 𑀘𑀻𑀯𑀭𑀁, 𑀘𑀬𑀁 𑀲𑀜𑁆𑀘𑀬𑀁 ¶ 𑀓𑀭𑀻𑀬𑀢𑀻𑀢𑀺 𑀅𑀢𑁆𑀣𑁄, 𑀅𑀭𑀺𑀬𑀤𑁆𑀥𑀚𑁄 𑀯𑀢𑁆𑀣𑀯𑀺𑀲𑁂𑀲𑁄. 𑀇𑀥 𑀧𑀦 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑀺𑀢𑀁 𑀘𑀻𑀯𑀭𑀢𑁆𑀢𑀬𑀫𑁂𑀯. 𑀯𑀺𑀦𑀸𑀢𑀺 𑀯𑀚𑁆𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀲𑀦𑀁 𑀯𑀸𑀲𑁄, 𑀯𑀺𑀦𑀸 𑀯𑀸𑀲𑁄 𑀯𑀺𑀦𑀸𑀯𑀸𑀲𑁄, 𑀘𑀻𑀯𑀭𑁂𑀦 𑀯𑀺𑀦𑀸𑀯𑀸𑀲𑁄 𑀘𑀻𑀯𑀭𑀯𑀺𑀦𑀸𑀯𑀸𑀲𑁄, ‘‘𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦, 𑀕𑀸𑀣𑀸𑀧𑀸𑀤𑀧𑀽𑀭𑀡𑀢𑁆𑀣𑀸𑀬 𑀯𑀸 𑀅𑀮𑀼𑀢𑁆𑀢𑀲𑀫𑀸𑀲𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦…𑀧𑁂… 𑀯𑀺𑀧𑁆𑀧𑀯𑀸𑀲𑁄’’𑀢𑀺, ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀺, 𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀥𑀺𑀝𑁆𑀞𑀸𑀫𑀺, 𑀇𑀫𑀁 𑀅𑀦𑁆𑀢𑀭𑀯𑀸𑀲𑀓𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀏𑀯𑀁 𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀸𑀦𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀏𑀓𑁂𑀓𑁂𑀦 𑀯𑀺𑀧𑁆𑀧𑀯𑀸𑀲𑁄𑀢𑀺 𑀅𑀢𑁆𑀣𑁄, 𑀏𑀓𑁂𑀦𑀧𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀳 𑀅𑀭𑀼𑀡𑀼𑀕𑁆𑀕𑀫𑀦𑀸 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀲𑀦𑀓𑀺𑀭𑀺𑀬𑀸 𑀘𑀢𑀼𑀇𑀭𑀺𑀬𑀸𑀧𑀣𑀲𑀸𑀥𑀸𑀭𑀡𑀸, 𑀢𑀲𑁆𑀫𑀸 𑀓𑀸𑀬𑀮𑀕𑁆𑀕𑀁 𑀯𑀸 𑀳𑁄𑀢𑀼 𑀅𑀮𑀕𑁆𑀕𑀁 𑀯𑀸, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀲𑁆𑀲 𑀧𑀤𑁂𑀲𑀲𑁆𑀲 𑀅𑀦𑁆𑀢𑁄 𑀓𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄𑀧𑀺 𑀘𑀭𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀦𑀺𑀧𑀦𑁆𑀦𑁄𑀧𑀺 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸 𑀯𑀲𑀦𑁆𑀢𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀲𑀸𑀫𑀜𑁆𑀜𑀢𑁄 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀕𑀸𑀫𑀸𑀤𑀺𑀧𑀦𑁆𑀦𑀭𑀲𑁄𑀓𑀸𑀲𑀯𑀲𑁂𑀦 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀸𑀫𑀺’’𑀘𑁆𑀘𑀸𑀤𑀺. 𑀢𑀢𑁆𑀣 𑀕𑀸𑀫𑀦𑀺𑀯𑁂𑀲𑀦𑀸𑀦𑀺 𑀧𑀸𑀓𑀝𑀸𑀦𑁂𑀯. 𑀉𑀤𑁄𑀲𑀺𑀢𑁄 𑀦𑀸𑀫 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸. 𑀅𑀝𑁆𑀝𑁄 𑀦𑀸𑀫 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀦𑀸𑀫 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀧𑀸𑀲𑀸𑀤𑁄 𑀦𑀸𑀫 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀦𑀸𑀫 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄, 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄𑀢𑀺 ¶ 𑀘 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑁄 𑀧𑀸𑀲𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀢𑁆𑀣𑁄 𑀦𑀸𑀫 𑀚𑀗𑁆𑀖𑀲𑀢𑁆𑀣𑁄 𑀯𑀸 𑀲𑀓𑀝𑀲𑀢𑁆𑀣𑁄 𑀯𑀸. 𑀔𑁂𑀢𑁆𑀢𑀁 𑀦𑀸𑀫 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁. 𑀥𑀜𑁆𑀜𑀓𑀭𑀡𑀁 𑀦𑀸𑀫 𑀔𑀮𑀫𑀡𑁆𑀟𑀮𑀁. 𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀨𑀮𑀸𑀭𑀸𑀫𑁄. 𑀯𑀺𑀳𑀸𑀭𑀸𑀤𑀬𑁄 𑀧𑀸𑀓𑀝𑀸 𑀏𑀯. 𑀢𑀢𑁆𑀣 𑀦𑀺𑀯𑁂𑀲𑀦𑀸𑀤𑀻𑀦𑀺 𑀕𑀸𑀫𑀢𑁄 𑀩𑀳𑀺 𑀲𑀦𑁆𑀦𑀺𑀯𑀺𑀝𑁆𑀞𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁆𑀢𑁄𑀕𑀸𑀫𑁂 𑀞𑀺𑀢𑀸𑀦𑀜𑁆𑀳𑀺 𑀕𑀸𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀕𑀸𑀫𑀧𑀭𑀺𑀳𑀸𑀭𑁄𑀬𑁂𑀯𑀸𑀢𑀺. 𑀕𑀸𑀫𑀕𑁆𑀕𑀳𑀡𑁂𑀦 𑀘 𑀦𑀺𑀕𑀫𑀦𑀕𑀭𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺.

𑀧𑀭𑀺𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀇𑀫𑀺𑀦𑀸 𑀲𑀫𑀦𑁆𑀢𑀸 𑀦𑀤𑀻𑀢𑀴𑀸𑀓𑀸𑀤𑀺𑀉𑀤𑀓𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀖𑀭𑀲𑁆𑀲 𑀉𑀧𑀭𑀺 𑀆𑀓𑀸𑀲𑁂 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀲𑀪𑀸𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑁄 𑀲𑀪𑀸𑀬𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀪𑀸𑀲𑀤𑁆𑀤𑁄 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀲𑀪𑀸𑀬𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀢𑀺. 𑀤𑁆𑀯𑀸𑀭𑀫𑀽𑀮𑁂 𑀯𑀸𑀢𑀺 𑀦𑀕𑀭𑀲𑁆𑀲 𑀤𑁆𑀯𑀸𑀭𑀫𑀽𑀮𑁂 𑀯𑀸. 𑀢𑁂𑀲𑀦𑁆𑀢𑀺 𑀲𑀪𑀸𑀬𑀦𑀕𑀭𑀤𑁆𑀯𑀸𑀭𑀫𑀽𑀮𑀸𑀦𑀁. 𑀢𑀲𑁆𑀲𑀸 𑀯𑀻𑀣𑀺𑀬𑀸 ¶ 𑀲𑀪𑀸𑀬𑀤𑁆𑀯𑀸𑀭𑀸𑀦𑀁 𑀕𑀳𑀡𑁂𑀦𑁂𑀯 𑀢𑀢𑁆𑀣 𑀲𑀩𑁆𑀩𑀸𑀦𑀺𑀧𑀺 𑀕𑁂𑀳𑀸𑀦𑀺, 𑀲𑀸 𑀘 𑀅𑀦𑁆𑀢𑀭𑀯𑀻𑀣𑀺 𑀕𑀳𑀺𑀢𑀸𑀬𑁂𑀯 𑀳𑁄𑀢𑀺. 𑀏𑀢𑁆𑀣 𑀘 𑀤𑁆𑀯𑀸𑀭𑀯𑀻𑀣𑀺𑀖𑀭𑁂𑀲𑀼 𑀯𑀲𑀦𑁆𑀢𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀲𑀳𑀲𑁂𑀬𑁆𑀬𑀸𑀤𑀺𑀤𑁄𑀲𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑀸𑀤𑀺𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀲𑀪𑀸 𑀧𑀦 𑀬𑀤𑀺 𑀲𑀩𑁆𑀩𑁂𑀲𑀁 𑀯𑀲𑀦𑀢𑁆𑀣𑀸𑀬 𑀧𑀧𑀸𑀲𑀤𑀺𑀲𑀸 𑀓𑀢𑀸, 𑀅𑀦𑁆𑀢𑀭𑀸𑀭𑀸𑀫𑁂 𑀯𑀺𑀬 𑀬𑀣𑀸𑀲𑀼𑀔𑀁 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀳𑀭𑀺𑀢𑁆𑀯𑀸 𑀖𑀭𑁂 𑀦𑀺𑀓𑁆𑀔𑀺𑀧𑀢𑀻𑀢𑀺 𑀯𑀻𑀣𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁂 𑀅𑀜𑁆𑀜𑀲𑁆𑀫𑀺𑀁 𑀖𑀭𑁂 𑀦𑀺𑀓𑁆𑀔𑀺𑀧𑀢𑀺. 𑀢𑁂𑀦𑀸𑀳 ‘‘𑀯𑀻𑀣𑀺𑀳𑀢𑁆𑀣𑀧𑀸𑀲𑁄 𑀦 𑀭𑀓𑁆𑀔𑀢𑀻’’𑀢𑀺. 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀳𑀢𑁆𑀣𑀧𑀸𑀲𑁂𑀢𑀺 𑀖𑀭𑀲𑁆𑀲 𑀳𑀢𑁆𑀣𑀧𑀸𑀲𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀏𑀯𑀁 𑀕𑀸𑀫𑀯𑀲𑁂𑀦 𑀯𑀺𑀧𑁆𑀧𑀯𑀸𑀲𑀸𑀯𑀺𑀧𑁆𑀧𑀯𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀯𑁂𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀏𑀓𑀓𑀼𑀮𑀲𑁆𑀲 𑀲𑀦𑁆𑀢𑀓𑀁 𑀦𑀺𑀯𑁂𑀲𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀯𑀭𑀓𑁄 𑀦𑀸𑀫 𑀕𑀩𑁆𑀪𑀲𑁆𑀲 ¶ 𑀅𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑁄 𑀕𑀩𑁆𑀪𑁄𑀢𑀺 𑀯𑀤𑀦𑁆𑀢𑀺, 𑀕𑀩𑁆𑀪𑀲𑁆𑀲 𑀯𑀸 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀇𑀤𑀸𑀦𑀺 𑀉𑀤𑁄𑀲𑀺𑀢𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀤𑁄𑀲𑀺𑀢𑀺’’𑀘𑁆𑀘𑀸𑀤𑀺𑀫𑀸𑀳. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀏𑀓𑀓𑀼𑀮𑀲𑁆𑀲 𑀲𑀦𑁆𑀢𑀓𑁄 𑀉𑀤𑁄𑀲𑀺𑀢𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑀸’’𑀢𑀺𑀆𑀤𑀺𑀦𑀸 𑀦𑀺𑀯𑁂𑀲𑀦𑁂 𑀯𑀼𑀢𑁆𑀢𑀦𑀬𑁂𑀦. 𑀏𑀯-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑁂𑀲𑀼 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀏𑀓𑀓𑀼𑀮𑀲𑁆𑀲 𑀦𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀯𑀸. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦𑀸𑀢𑀺 𑀕𑀸𑀫𑀲𑁆𑀲, 𑀦𑀤𑀺𑀬𑀸 𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦. ‘‘𑀲𑀢𑁆𑀣𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀦𑀤𑀻𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 ‘‘𑀯𑀺𑀲𑀼𑀁 𑀦𑀤𑀻𑀧𑀭𑀺𑀳𑀸𑀭𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀸𑀤𑀻𑀳𑀺 𑀅𑀜𑁆𑀜𑀢𑁆𑀣 𑀯𑀺𑀬 𑀘𑀻𑀯𑀭𑀳𑀢𑁆𑀣𑀧𑀸𑀲𑁄𑀬𑁂𑀯 𑀦𑀤𑀻𑀧𑀭𑀺𑀳𑀸𑀭𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦 ‘‘𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀦𑀤𑀻𑀧𑀭𑀺𑀳𑀸𑀭𑁄𑀧𑀺 𑀯𑀺𑀲𑀼𑀁 𑀲𑀺𑀤𑁆𑀥𑁄𑀢𑀺 𑀦𑀤𑀻𑀳𑀢𑁆𑀣𑀧𑀸𑀲𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀧𑀦 𑀅𑀚𑁆𑀛𑁄𑀓𑀸𑀲𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀯𑀲𑁂𑀦 𑀅𑀭𑀜𑁆𑀜𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺, 𑀏𑀯𑀁 𑀦𑀤𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀯𑀲𑁂𑀦 𑀦𑀤𑀻𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀦𑀤𑀻𑀧𑀭𑀺𑀳𑀸𑀭𑁄 𑀯𑀺𑀲𑀼𑀁 𑀅𑀯𑀼𑀢𑁆𑀢𑁄 𑀲𑀺𑀬𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀁 𑀅𑀭𑀜𑁆𑀜𑀦𑀤𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀯𑀲𑁂𑀦 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀏𑀯𑀜𑁆𑀘 𑀲𑀢𑀺 𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺 𑀧𑀭𑀺𑀳𑀸𑀭𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄 𑀳𑁄𑀢𑀺 𑀦𑀤𑀺𑀬𑀸 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸, 𑀦𑀤𑀻𑀳𑀢𑁆𑀣𑀧𑀸𑀲𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄𑀢𑀺 𑀧𑀦 𑀅𑀢𑁆𑀣𑁂 𑀲𑀢𑀺 𑀦𑀤𑀺𑀬𑀸 𑀅𑀢𑀺𑀯𑀺𑀢𑁆𑀣𑀸𑀭𑀢𑁆𑀢𑀸 𑀩𑀳𑀼𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀦𑁆𑀢𑁄𑀦𑀤𑀺𑀬𑀁 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀦𑀤𑀻𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀘𑀻𑀯𑀭𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬. 𑀏𑀲 𑀦𑀬𑁄 𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺. 𑀅𑀦𑁆𑀢𑁄𑀉𑀤𑀓𑀼𑀓𑁆𑀔𑁂𑀧𑁂 𑀯𑀸 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸 𑀞𑀺𑀢𑁂𑀦 𑀧𑀦 𑀲𑀓𑁆𑀓𑀸𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀅𑀢𑁆𑀢𑀦𑁄𑀫𑀢𑀺, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁 ¶ 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀣 𑀘 ¶ 𑀯𑀺𑀳𑀸𑀭𑀲𑁆𑀲 𑀦𑀸𑀦𑀸𑀓𑀼𑀮𑀲𑀦𑁆𑀢𑀓𑀪𑀸𑀯𑁂𑀧𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀢𑁆𑀣 𑀘𑀻𑀯𑀭𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀪𑀯𑀢𑁄 𑀧𑀥𑀸𑀦𑀢𑁆𑀢𑀸 𑀢𑀢𑁆𑀣 𑀲𑀢𑁆𑀣𑀧𑀭𑀺𑀳𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀣𑀲𑀫𑀻𑀧𑁂𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁.

𑀬𑀲𑁆𑀫𑀸 ‘‘𑀦𑀸𑀦𑀸𑀓𑀼𑀮𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑁂 𑀔𑁂𑀢𑁆𑀢𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀔𑁂𑀢𑁆𑀢𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑀸𑀭𑀫𑀽𑀮𑀢𑁄 𑀅𑀜𑁆𑀜𑀢𑁆𑀣 𑀔𑁂𑀢𑁆𑀢𑁂𑀧𑀺 𑀯𑀲𑀦𑁆𑀢𑁂𑀦 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸𑀬𑁂𑀯 𑀯𑀲𑀺𑀢𑀩𑁆𑀩𑀁.

𑀯𑀺𑀳𑀸𑀭𑁄 𑀦𑀸𑀫 𑀲𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀲𑀓𑀮𑁄 𑀆𑀯𑀸𑀲𑁄𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀏𑀢𑁆𑀣 𑀧𑀦 𑀏𑀓𑀕𑁂𑀳𑀫𑁂𑀯 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁪𑁯𑁧-𑁪𑁯𑁪) 𑀧𑀦 ‘‘𑀯𑀺𑀳𑀸𑀭𑁄 𑀦𑀸𑀫 𑀉𑀧𑀘𑀸𑀭𑀲𑀻𑀫𑀸. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀢𑀲𑁆𑀲 𑀅𑀦𑁆𑀢𑁄𑀧𑀭𑀺𑀯𑁂𑀡𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀓𑀼𑀮𑀸𑀤𑀺𑀲𑀦𑁆𑀢𑀓𑀢𑀸 𑀘𑁂𑀢𑁆𑀣 𑀓𑀸𑀭𑀸𑀧𑀓𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀬𑀁 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀻𑀢𑀺 𑀬𑀤𑀸 𑀫𑀳𑀸𑀯𑀻𑀣𑀺𑀬𑀁 𑀉𑀚𑀼𑀓𑀫𑁂𑀯 𑀕𑀘𑁆𑀙𑀦𑁆𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀫𑀚𑁆𑀛𑀦𑁆𑀳𑀺𑀓𑀁 𑀧𑀸𑀧𑀼𑀡𑀸𑀢𑀺, 𑀢𑀤𑀸 𑀬𑀁 𑀑𑀓𑀸𑀲𑀁 𑀙𑀸𑀬𑀸 𑀨𑀭𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀲𑁆𑀲𑀸𑀢𑀺 𑀉𑀚𑀼𑀓𑀁 𑀅𑀯𑀺𑀓𑁆𑀔𑀺𑀢𑁆𑀢𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀲𑀦𑁆𑀥𑀸𑀬 𑀯𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀕𑀫𑀦𑀧𑀣𑁂𑀢𑀺 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀓𑁂 𑀲𑀫𑀼𑀤𑁆𑀤𑀫𑀚𑁆𑀛𑁂 𑀬𑁂 𑀤𑀻𑀧𑀓𑀸, 𑀢𑁂𑀲𑀽𑀢𑀺 𑀬𑁄𑀚𑀦𑀸. 𑀇𑀢𑀭𑀲𑁆𑀫𑀺𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀘𑀻𑀯𑀭𑁂.

𑁫𑁨. 𑀦𑀤𑀺𑀁 𑀑𑀢𑀭𑀢𑀻𑀢𑀺 𑀳𑀢𑁆𑀣𑀧𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀑𑀢𑀭𑀢𑀺. 𑀦𑀸𑀧𑀚𑁆𑀚𑀢𑀻𑀢𑀺 𑀧𑀭𑀺𑀪𑁄𑀕𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀦𑀸𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀅𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀲𑀺𑀤𑁆𑀥𑀁. 𑀏𑀓𑀁 ¶ 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀇𑀤𑀁 𑀩𑀳𑀽𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀏𑀯𑀁 𑀅𑀓𑀢𑁆𑀯𑀸 𑀕𑀫𑀦𑀁 𑀦 𑀲𑀸𑀭𑀼𑀧𑁆𑀧𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀆𑀧𑀢𑁆𑀢𑀺𑀅𑀗𑁆𑀕𑀢𑁆𑀢𑀸. 𑀩𑀳𑀺𑀕𑀸𑀫𑁂 𑀞𑀧𑁂𑀢𑁆𑀯𑀸𑀧𑀺 𑀅𑀧𑀸𑀭𑀼𑀧𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁 ‘‘𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 𑀯𑀺𑀳𑀸𑀭𑁂 𑀲𑀪𑀸𑀕𑀁 𑀪𑀺𑀓𑁆𑀔𑀼𑀁 𑀦 𑀧𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀆𑀲𑀦𑀲𑀸𑀮𑀁 𑀕𑀘𑁆𑀙𑀦𑁆𑀢𑁂𑀦 𑀓𑀺𑀁 𑀢𑀻𑀳𑀺 𑀘𑀻𑀯𑀭𑁂𑀳𑀺 𑀕𑀦𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀦𑁆𑀢𑀭𑀼𑀢𑁆𑀢𑀭𑁂𑀦𑀸’’𑀢𑀺 𑀦𑀝𑁆𑀞𑀘𑀻𑀯𑀭𑀲𑁆𑀲 𑀲𑀦𑁆𑀢𑀭𑀼𑀢𑁆𑀢𑀭𑀲𑀸𑀤𑀺𑀬𑀦𑀢𑁄. 𑀲𑀗𑁆𑀖𑀸𑀝𑀺 𑀧𑀦 𑀓𑀺𑀁 𑀓𑀸𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀗𑁆𑀖𑀸𑀝𑀺𑀁 ¶ 𑀩𑀳𑀺𑀕𑀸𑀫𑁂 𑀞𑀧𑁂𑀢𑁆𑀯𑀸’’𑀢𑀺. 𑀉𑀢𑁆𑀢𑀭𑀸𑀲𑀗𑁆𑀕𑁂 𑀘 𑀩𑀳𑀺𑀕𑀸𑀫𑁂 𑀞𑀧𑀺𑀢𑀲𑀗𑁆𑀖𑀸𑀝𑀺𑀬𑀜𑁆𑀘 𑀧𑀞𑀫𑀁 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑁂 𑀓𑀸𑀢𑀩𑁆𑀩𑀁. 𑀏𑀢𑁆𑀣 𑀘 𑀩𑀳𑀺𑀕𑀸𑀫𑁂 𑀞𑀧𑀺𑀢𑀲𑁆𑀲𑀧𑀺 𑀯𑀺𑀦𑀬𑀓𑀫𑁆𑀫𑀯𑀘𑀦𑀢𑁄 𑀧𑀭𑀫𑁆𑀫𑀼𑀔𑀸𑀧𑀺 𑀞𑀺𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀼𑀁, 𑀦𑀺𑀲𑁆𑀲𑀝𑁆𑀞𑀁 𑀤𑀸𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀳𑀭𑀸𑀦𑀁 𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 ‘‘𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀼𑀳𑀼𑀢𑁆𑀢𑀁…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀲𑀉𑀲𑁆𑀲𑀸𑀳𑀢𑁆𑀢𑁂 𑀕𑀫𑀦𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀢𑁂𑀲𑀁 𑀧𑀦 𑀧𑀼𑀭𑀸𑀭𑀼𑀡𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀉𑀲𑁆𑀲𑀸𑀳𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀅𑀭𑀼𑀡𑁂 𑀅𑀦𑁆𑀢𑀭𑀸 𑀉𑀝𑁆𑀞𑀺𑀢𑁂𑀧𑀺 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 ‘‘𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 ‘‘𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸…𑀧𑁂… 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺𑀆𑀤𑀺𑀫𑁆𑀳𑀺 𑀲𑀉𑀲𑁆𑀲𑀸𑀳𑀢𑁆𑀢𑀸 𑀕𑀫𑀦𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 𑀯𑀼𑀢𑁆𑀢𑀸. 𑀥𑁂𑀦𑀼𑀪𑀬𑁂𑀦𑀸𑀢𑀺 𑀢𑀭𑀼𑀡𑀯𑀘𑁆𑀙𑀕𑀸𑀯𑀻𑀦𑀁 𑀆𑀥𑀸𑀯𑀺𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀳𑀭𑀡𑀪𑀬𑁂𑀦. 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀏𑀢𑁆𑀣 𑀥𑁂𑀦𑀼𑀪𑀬𑀸𑀤𑀻𑀳𑀺 𑀞𑀺𑀢𑀸𑀦𑀁 𑀬𑀸𑀯 𑀪𑀬𑀯𑀽𑀧𑀲𑀫𑀸 𑀞𑀸𑀢𑀩𑁆𑀩𑀢𑁄 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀬𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀏𑀯𑀁 𑀦𑀺𑀬𑀫𑁂𑀢𑀼𑀁 𑀲𑀓𑁆𑀓𑀸, 𑀢𑀢𑁆𑀣 𑀅𑀦𑁆𑀢𑀭𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂𑀧𑀺 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 𑀪𑁂𑀲𑀚𑁆𑀚𑀢𑁆𑀣𑀸𑀬 𑀕𑀸𑀫𑀁 𑀧𑀯𑀺𑀝𑁆𑀞𑀤𑀳𑀭𑀸𑀦𑀁 𑀯𑀺𑀬.

𑀅𑀦𑁆𑀢𑁄𑀲𑀻𑀫𑀸𑀬𑀁 ¶ 𑀕𑀸𑀫𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀢𑁄 𑀧𑀘𑁆𑀙𑀸 𑀧𑀢𑀺𑀝𑁆𑀞𑀸𑀧𑀺𑀢𑀕𑀸𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀢𑁄. 𑀧𑀯𑀺𑀝𑁆𑀞𑀸𑀦𑀦𑁆𑀢𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀢𑀸𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀢𑁆𑀢𑀸 𑀦𑁂𑀯 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀲𑀉𑀲𑁆𑀲𑀸𑀳𑀢𑀸𑀬 𑀦 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁦. 𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁩. 𑀏𑀯𑀁 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀪𑀡𑁆𑀟𑀲𑁆𑀲 ¶ 𑀧𑀝𑀺𑀲𑀸𑀫𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀟𑀺𑀢𑀩𑁆𑀩𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀪𑀡𑁆𑀟𑀁, 𑀪𑀟𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀸 𑀪𑀡𑁆𑀟𑀁, 𑀪𑀡𑁆𑀟𑀦𑁆𑀢𑀺 𑀧𑀭𑀺𑀪𑀡𑁆𑀟𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀯𑀸 𑀪𑀡𑁆𑀟𑀁, 𑀫𑀽𑀮𑀥𑀦𑀁, 𑀧𑀭𑀺𑀓𑁆𑀔𑀸𑀭𑁄 𑀯𑀸. 𑀯𑀼𑀢𑁆𑀢𑀜𑁆𑀳𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁋

‘‘𑀪𑀸𑀚𑀦𑀸𑀤𑀺𑀧𑀭𑀺𑀓𑁆𑀔𑀸𑀭𑁂, 𑀪𑀡𑁆𑀟𑀁 𑀫𑀽𑀮𑀥𑀦𑁂𑀧𑀺 𑀘𑀸’’𑀢𑀺.

𑀢𑀲𑁆𑀲 𑀪𑀡𑁆𑀟𑀲𑁆𑀲, 𑀧𑀝𑀺𑀲𑀸𑀫𑀺𑀬𑀢𑁂 𑀧𑀝𑀺𑀲𑀸𑀫𑀦𑀁, 𑀭𑀓𑁆𑀔𑀡𑀁 𑀕𑁄𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑁂𑀲𑀁 𑀪𑀡𑁆𑀟𑀲𑁆𑀲 𑀕𑁄𑀧𑀦’’𑀦𑁆𑀢𑀺. 𑀫𑀸𑀢𑀼 𑀓𑀡𑁆𑀡𑀧𑀺𑀴𑀦𑁆𑀥𑀦𑀁 𑀢𑀸𑀮𑀧𑀡𑁆𑀡𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀢𑁂𑀦 𑀧𑀕𑁂𑀯 𑀅𑀜𑁆𑀜𑀸𑀢𑀓𑀸𑀦𑀁 𑀲𑀦𑁆𑀢𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀕𑀺𑀳𑀺𑀲𑀦𑁆𑀢𑀓𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀦𑁆𑀢𑀓𑀁 𑀧𑀝𑀺𑀲𑀸𑀫𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦𑀸𑀢𑀺 𑀏𑀢𑁂𑀦 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀸𑀤𑀺𑀦𑀸 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀓𑁆𑀔𑀢𑀺 ‘‘𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩’’𑀦𑁆𑀢𑀺. 𑀙𑀦𑁆𑀤𑁂𑀦𑀧𑀺 𑀪𑀬𑁂𑀦𑀧𑀻𑀢𑀺 𑀯𑀟𑁆𑀠𑀓𑀻𑀆𑀤𑀻𑀲𑀼 𑀙𑀦𑁆𑀤𑁂𑀦 ¶ , 𑀭𑀸𑀚𑀯𑀮𑁆𑀮𑀪𑀸𑀤𑀻𑀲𑀼 𑀪𑀬𑁂𑀦 𑀩𑀮𑀓𑁆𑀓𑀸𑀭𑁂𑀦 𑀧𑀸𑀢𑁂𑀢𑁆𑀯𑀸 𑀕𑀢𑁂𑀲𑀼 𑀘 𑀧𑀝𑀺𑀲𑀸𑀫𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀲𑁆𑀲 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀲𑀸𑀫𑀦𑀧𑀬𑁄𑀕𑀁 𑀯𑀺𑀦𑀸 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀧𑀬𑁄𑀕𑁂 𑀅𑀓𑀢𑁂 𑀭𑀚𑁆𑀚𑀲𑀗𑁆𑀔𑁄𑀪𑀸𑀤𑀺𑀓𑀸𑀮𑁂 ‘‘𑀦 𑀤𑀸𑀦𑀺 𑀢𑀲𑁆𑀲 𑀤𑀲𑁆𑀲𑀸𑀫𑀺, 𑀦 𑀫𑀬𑁆𑀳𑀁 𑀤𑀸𑀦𑀺 𑀤𑀲𑁆𑀲𑀢𑀻’’𑀢𑀺 𑀉𑀪𑁄𑀳𑀺𑀧𑀺 𑀲𑀓𑀲𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀼𑀭𑀦𑀺𑀓𑁆𑀔𑁂𑀧𑁂 𑀓𑀢𑁂𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀸𑀭𑀸𑀚𑀺𑀓𑀫𑁂𑀯 𑀧𑀝𑀺𑀲𑀸𑀫𑀦𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀧𑀝𑀺𑀲𑀸𑀫𑀦𑀓𑀸𑀮𑁂 𑀳𑀺𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑀁 𑀦𑀢𑁆𑀣𑀺, ‘‘𑀦 𑀤𑀸𑀦𑀺 𑀢𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀘 𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄 𑀦𑀢𑁆𑀣𑀺, 𑀬𑁂𑀦 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀅𑀬𑀁 𑀆𑀧𑀢𑁆𑀢𑀻𑀢𑀺. 𑀤𑀸𑀦𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯𑀸𑀢𑀺 𑀅𑀯𑀳𑀸𑀭𑀁 𑀲𑀦𑁆𑀥𑀸𑀬 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀺, 𑀦 𑀤𑀼𑀓𑁆𑀓𑀝𑀁 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑁂𑀦 𑀲𑀳𑀧𑀬𑁄𑀕𑀲𑁆𑀲𑀧𑀺 𑀅𑀪𑀸𑀯𑀢𑁄𑀢𑀺 𑀕𑀳𑁂𑀢𑀩𑁆𑀩𑀁.

𑀬𑀤𑀺𑀧𑀺 𑀫𑀼𑀔𑁂𑀦 𑀤𑀲𑁆𑀲𑀸𑀫𑀻𑀢𑀺 𑀯𑀤𑀢𑀺…𑀧𑁂… 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀢𑁆𑀣 𑀓𑀢𑀭𑀧𑀬𑁄𑀕𑁂𑀦 𑀆𑀧𑀢𑁆𑀢𑀺, 𑀦 𑀢𑀸𑀯 𑀧𑀞𑀫𑁂𑀦 𑀪𑀡𑁆𑀟𑀧𑀝𑀺𑀲𑀸𑀫𑀦𑀧𑀬𑁄𑀕𑁂𑀦 𑀢𑀤𑀸 𑀣𑁂𑀬𑁆𑀬𑀘𑀺𑀢𑁆𑀢𑀪𑀸𑀯𑀸, 𑀦𑀸𑀧𑀺 ‘‘𑀤𑀲𑁆𑀲𑀸𑀫𑀻’’𑀢𑀺 𑀓𑀣𑀦𑀧𑀬𑁄𑀕𑁂𑀦 𑀢𑀤𑀸 𑀣𑁂𑀬𑁆𑀬𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀬𑁄𑀕𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀸𑀫𑀺𑀦𑀸 ‘‘𑀤𑁂𑀳𑀻’’𑀢𑀺 𑀩𑀳𑀼𑀲𑁄 𑀬𑀸𑀘𑀺𑀬𑀫𑀸𑀦𑁄𑀧𑀺 ¶ 𑀅𑀤𑀢𑁆𑀯𑀸 𑀬𑁂𑀦 𑀧𑀬𑁄𑀕𑁂𑀦 𑀅𑀢𑁆𑀢𑀦𑁄 𑀅𑀤𑀸𑀢𑀼𑀓𑀸𑀫𑀢𑀁 𑀲𑀸𑀫𑀺𑀓𑀲𑁆𑀲 𑀜𑀸𑀧𑁂𑀲𑀺, 𑀬𑁂𑀦 𑀘 𑀲𑁄 𑀅𑀤𑀸𑀢𑀼𑀓𑀸𑀫𑁄 𑀅𑀬𑀁 𑀯𑀺𑀓𑁆𑀔𑀺𑀧𑀢𑀻𑀢𑀺 𑀜𑀢𑁆𑀯𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑁂𑀦𑁂𑀯 𑀧𑀬𑁄𑀕𑁂𑀦𑀲𑁆𑀲 𑀆𑀧𑀢𑁆𑀢𑀺. 𑀦 𑀳𑁂𑀢𑁆𑀣 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑁂 𑀧𑀭𑀺𑀬𑀸𑀬𑁂𑀦 𑀫𑀼𑀢𑁆𑀢𑀺 𑀅𑀢𑁆𑀣𑀺. 𑀅𑀤𑀸𑀢𑀼𑀓𑀸𑀫𑀢𑀸𑀬 𑀳𑀺 ‘‘𑀓𑀤𑀸 𑀢𑁂 𑀤𑀺𑀦𑁆𑀦𑀁, 𑀓𑀢𑁆𑀣 𑀢𑁂 ¶ 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀧𑀭𑀺𑀬𑀸𑀬𑀯𑀘𑀦𑁂𑀦𑀧𑀺 𑀲𑀸𑀫𑀺𑀓𑀲𑁆𑀲 𑀥𑀼𑀭𑁂𑀦𑀺𑀓𑁆𑀔𑀺𑀧𑀸𑀧𑀺𑀢𑁂 𑀆𑀧𑀢𑁆𑀢𑀺𑀬𑁂𑀯. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣…𑀧𑁂… 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀧𑀭𑀲𑀦𑁆𑀢𑀓𑀲𑁆𑀲 𑀧𑀭𑁂𑀳𑀺 𑀕𑀡𑁆𑀳𑀸𑀧𑀦𑁂 𑀏𑀯 𑀳𑀺 𑀧𑀭𑀺𑀬𑀸𑀬𑀢𑁄 𑀫𑀼𑀢𑁆𑀢𑀺, 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀲𑀸𑀫𑀺𑀦𑀸 𑀤𑀺𑀦𑁆𑀦𑀢𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀘 𑀞𑀸𑀦𑀸𑀘𑀸𑀯𑀦𑁂𑀧𑀺 𑀦𑀢𑁆𑀣𑀺 𑀅𑀯𑀳𑀸𑀭𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀕𑀳𑀡𑁂 𑀤𑀼𑀓𑁆𑀓𑀝𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀲𑁂𑀯 𑀦𑀬𑁄𑀢𑀺 𑀅𑀯𑀳𑀸𑀭𑁄 𑀦𑀢𑁆𑀣𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁪. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀦𑀁. 𑀏𑀢𑁂𑀦 𑀦 𑀓𑁂𑀯𑀮𑀁 𑀕𑀺𑀳𑀻𑀦𑀁 𑀏𑀯, 𑀅𑀣 𑀔𑁄 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀫𑁆𑀧𑀺 𑀲𑀦𑁆𑀢𑀓𑀁 𑀧𑀝𑀺𑀲𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀝𑁆𑀞𑁂𑀧𑀺 𑀕𑀻𑀯𑀸 𑀦 𑀳𑁄𑀢𑀺, 𑀓𑀲𑁆𑀫𑀸? 𑀅𑀲𑀫𑁆𑀧𑀝𑀺𑀘𑁆𑀙𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂 𑀏𑀲𑁂𑀯 𑀦𑀬𑁄𑀢𑀺 𑀕𑀻𑀯𑀸 𑀦 𑀳𑁄𑀢𑀺, 𑀓𑀲𑁆𑀫𑀸? 𑀅𑀚𑀸𑀦𑀺𑀢𑀢𑁆𑀢𑀸. 𑀢𑀢𑀺𑀬𑁂 𑀘 𑀏𑀲𑁂𑀯 𑀦𑀬𑁄𑀢𑀺 𑀕𑀻𑀯𑀸 𑀦 𑀳𑁄𑀢𑀺, 𑀓𑀲𑁆𑀫𑀸? 𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸. 𑀏𑀢𑁆𑀣 𑀘 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀘𑀺𑀢𑁆𑀢𑁂𑀦 𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺.

𑀢𑀲𑁆𑀲𑁂𑀯 𑀕𑀻𑀯𑀸 𑀳𑁄𑀢𑀺, 𑀦 𑀲𑁂𑀲𑀪𑀺𑀓𑁆𑀔𑀽𑀦𑀁, 𑀓𑀲𑁆𑀫𑀸? 𑀢𑀲𑁆𑀲𑁂𑀯 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀇𑀲𑁆𑀲𑀭𑀪𑀸𑀯𑀢𑁄. 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺 𑀅𑀮𑀲𑀚𑀸𑀢𑀺𑀓𑀲𑁆𑀲𑁂𑀯 𑀧𑀫𑀸𑀤𑁂𑀦 𑀳𑀭𑀺𑀢𑀢𑁆𑀢𑀸. 𑀤𑀼𑀢𑀺𑀬𑁂 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺 𑀢𑀲𑁆𑀲 𑀅𑀦𑀸𑀭𑁄𑀘𑀺𑀢𑀢𑁆𑀢𑀸. 𑀦𑀝𑁆𑀞𑁂 𑀢𑀲𑁆𑀲 𑀕𑀻𑀯𑀸 𑀢𑁂𑀦 𑀞𑀧𑀺𑀢𑀢𑁆𑀢𑀸. 𑀢𑀲𑁆𑀲𑁂𑀯 𑀕𑀻𑀯𑀸, 𑀦 𑀅𑀜𑁆𑀜𑁂𑀲𑀁 𑀢𑁂𑀦 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀞𑀧𑀺𑀢𑀢𑁆𑀢𑀸 𑀘. 𑀦𑀢𑁆𑀣𑀺 𑀕𑀻𑀯𑀸 𑀢𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸. 𑀦𑀝𑁆𑀞𑀁 𑀲𑀼𑀦𑀝𑁆𑀞𑀫𑁂𑀯 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀸𑀧𑀦𑀢𑁄. 𑀦𑀝𑁆𑀞𑁂 𑀕𑀻𑀯𑀸 𑀢𑁂𑀦 𑀞𑀧𑀺𑀢𑀢𑁆𑀢𑀸. 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸 𑀢𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀧𑀫𑀸𑀤𑁂𑀦 𑀳𑀭𑀡𑀢𑁄. 𑀢𑀢𑁆𑀣𑁂𑀯 𑀉𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀫𑀻𑀧𑁂𑀬𑁂𑀯 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀝𑁆𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑁂.

𑁫𑁫. 𑀫𑀬𑀺 ¶ 𑀘 𑀫𑀢𑁂 𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑁂 𑀯𑀺𑀦𑀝𑁆𑀞𑁂𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀁 𑀫𑀸 𑀯𑀺𑀦𑀲𑁆𑀲𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀺𑀯𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. ‘‘𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺 ‘‘𑀕𑀺𑀮𑀸𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀅𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀫𑀭𑀡𑀢𑁄 𑀳𑀺 𑀧𑀭𑀁 ¶ 𑀕𑁂𑀮𑀜𑁆𑀜𑀁 𑀅𑀯𑀺𑀲𑀬𑀢𑁆𑀢𑀜𑁆𑀘 𑀦𑀢𑁆𑀣𑀺. ‘‘𑀤𑁆𑀯𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀳𑀺𑀧𑀺 𑀪𑀺𑀓𑁆𑀔𑀸𑀘𑀸𑀭𑀸𑀤𑀻𑀳𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀲𑀸𑀫𑀻𑀘𑀻𑀢𑀺 𑀪𑀡𑁆𑀟𑀸𑀕𑀸𑀭𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀯𑀢𑁆𑀢𑀁. 𑀮𑁄𑀮𑀫𑀳𑀸𑀣𑁂𑀭𑁄𑀢𑀺 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀆𑀓𑀺𑀡𑁆𑀡𑀯𑀺𑀳𑀸𑀭𑀻 𑀲𑀤𑀸 𑀓𑀻𑀴𑀸𑀧𑀲𑀼𑀢𑁄 𑀯𑀸 𑀫𑀳𑀸𑀣𑁂𑀭𑁄.

𑁫𑁬. 𑀇𑀢𑀭𑁂𑀳𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀕𑀩𑁆𑀪𑁂 𑀯𑀲𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀯𑀺𑀳𑀸𑀭𑀭𑀓𑁆𑀔𑀡𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀳𑀸𑀭𑀯𑀸𑀭𑀺𑀓𑁄, 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀯𑀸𑀭𑁂 𑀯𑀺𑀳𑀸𑀭𑀭𑀓𑁆𑀔𑀡𑀓𑁄. 𑀦𑀺𑀯𑀸𑀧𑀦𑁆𑀢𑀺 𑀪𑀢𑁆𑀢𑀯𑁂𑀢𑀦𑀁. 𑀘𑁄𑀭𑀸𑀦𑀁 𑀧𑀝𑀺𑀧𑀣𑀁 𑀕𑀢𑁂𑀲𑀽𑀢𑀺 𑀘𑁄𑀭𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 ‘‘𑀧𑀞𑀫𑀢𑀭𑀁𑀬𑁂𑀯 𑀕𑀦𑁆𑀢𑁆𑀯𑀸 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑁄𑀭𑀸𑀦𑀁 𑀅𑀪𑀺𑀫𑀼𑀔𑀁 𑀕𑀢𑁂𑀲𑀼. ‘‘𑀘𑁄𑀭𑁂𑀳𑀺 𑀳𑀝𑀪𑀡𑁆𑀟𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀲𑀁 𑀅𑀦𑀼𑀧𑀣𑀁 𑀕𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 ‘‘𑀅𑀲𑀼𑀓𑀓𑀼𑀮𑁂 𑀬𑀸𑀕𑀼𑀪𑀢𑁆𑀢𑀁 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁𑀬𑁂𑀯𑀸’’𑀢𑀺 𑀏𑀯𑀁 𑀦𑀺𑀬𑀫𑀦𑀁 𑀓𑀢𑁆𑀯𑀸. 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸 𑀘 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀦𑀺 𑀘 𑀮𑀪𑀫𑀸𑀦𑁄𑀯𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀢𑁄 𑀊𑀦𑀁 𑀯𑀸 𑀳𑁄𑀢𑀼 𑀅𑀥𑀺𑀓𑀁 𑀯𑀸, 𑀅𑀢𑁆𑀢𑀦𑁄 𑀘 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘 𑀬𑀸𑀧𑀦𑀫𑀢𑁆𑀢𑀁 𑀮𑀪𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀲𑁆𑀲𑀺𑀢𑀓𑁂 𑀚𑀕𑁆𑀕𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑁄𑀲𑁂𑀦𑁆𑀢𑀸 𑀦𑀺𑀲𑁆𑀲𑀺𑀢𑀓𑁂𑀳𑀺 𑀯𑀺𑀳𑀸𑀭𑀁 𑀚𑀕𑁆𑀕𑀸𑀧𑁂𑀦𑁆𑀢𑀺. 𑀅𑀲𑀳𑀸𑀬𑀲𑁆𑀲𑀸𑀢𑀺 𑀲𑀳𑀸𑀬𑀭𑀳𑀺𑀢𑀲𑁆𑀲. ‘‘𑀅𑀲𑀳𑀸𑀬𑀲𑁆𑀲 𑀅𑀤𑀼𑀢𑀺𑀬𑀲𑁆𑀲𑀸’’𑀢𑀺 𑀧𑀸𑀞𑁄 𑀬𑀼𑀢𑁆𑀢𑁄. 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀲𑀳𑀸𑀬𑀲𑁆𑀲 𑀯𑀸 𑀅𑀢𑁆𑀢𑀤𑀼𑀢𑀺𑀬𑀲𑁆𑀲 𑀯𑀸𑀢𑀺 ¶ 𑀇𑀫𑀲𑁆𑀫𑀺𑀁 𑀧𑀦 𑀧𑀸𑀞𑁂 𑀏𑀓𑁂𑀦 𑀆𑀦𑀻𑀢𑀁 𑀤𑁆𑀯𑀺𑀦𑁆𑀦𑀁 𑀦𑀧𑁆𑀧𑀳𑁄𑀢𑀻𑀢𑀺 𑀅𑀢𑁆𑀢𑀤𑀼𑀢𑀺𑀬𑀲𑁆𑀲𑀧𑀺 𑀯𑀸𑀭𑁄 𑀦𑀺𑀯𑀸𑀭𑀺𑀢𑁄𑀢𑀺 𑀯𑀤𑀦𑁆𑀢𑀺, 𑀢𑀁 ‘‘𑀬𑀲𑁆𑀲 𑀲𑀪𑀸𑀕𑁄 𑀪𑀺𑀓𑁆𑀔𑀼 𑀪𑀢𑁆𑀢𑀁 𑀆𑀦𑁂𑀢𑁆𑀯𑀸 𑀤𑀸𑀢𑀸 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁧𑁨) 𑀧𑀦 ‘‘𑀅𑀢𑁆𑀢𑀤𑀼𑀢𑀺𑀬𑀲𑁆𑀲𑀸𑀢𑀺 𑀅𑀧𑁆𑀧𑀺𑀘𑁆𑀙𑀲𑁆𑀲. 𑀅𑀢𑁆𑀢𑀸𑀲𑀭𑀻𑀭𑀫𑁂𑀯 𑀤𑀼𑀢𑀺𑀬𑁄, 𑀦 𑀅𑀜𑁆𑀜𑁄𑀢𑀺 𑀳𑀺 𑀅𑀢𑁆𑀢𑀤𑀼𑀢𑀺𑀬𑁄, 𑀢𑀤𑀼𑀪𑀬𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀁 ‘𑀬𑀲𑁆𑀲𑀸’𑀢𑀺𑀆𑀤𑀺. 𑀏𑀢𑁂𑀦 𑀲𑀩𑁆𑀩𑁂𑀦 𑀏𑀓𑁂𑀓𑀲𑁆𑀲 𑀯𑀸𑀭𑁄 𑀦 𑀧𑀸𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀸𑀓𑀯𑀢𑁆𑀢𑀢𑁆𑀣𑀸𑀬𑀸𑀢𑀺 𑀦𑀺𑀘𑁆𑀘𑀁 𑀧𑀘𑀺𑀢𑀩𑁆𑀩𑀬𑀸𑀕𑀼𑀪𑀢𑁆𑀢𑀲𑀗𑁆𑀔𑀸𑀢𑀯𑀢𑁆𑀢𑀢𑁆𑀣𑀸𑀬. 𑀞𑀧𑁂𑀦𑁆𑀢𑀻𑀢𑀺 𑀤𑀸𑀬𑀓𑀸 𑀞𑀧𑁂𑀦𑁆𑀢𑀺. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀢𑀁 𑀆𑀭𑀸𑀫𑀺𑀓𑀸𑀤𑀻𑀳𑀺 𑀤𑀻𑀬𑀫𑀸𑀦𑀁 𑀪𑀸𑀕𑀁 𑀕𑀳𑁂𑀢𑁆𑀯𑀸. 𑀉𑀧𑀚𑀻𑀯𑀦𑁆𑀢𑁂𑀦 𑀞𑀸𑀢𑀩𑁆𑀩𑀦𑁆𑀢𑀺 𑀅𑀩𑁆𑀪𑁄𑀓𑀸𑀲𑀺𑀓𑀭𑀼𑀓𑁆𑀔𑀫𑀽𑀮𑀺𑀓𑁂𑀦𑀧𑀺 𑀧𑀸𑀓𑀯𑀢𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀭𑀓𑁆𑀔𑀡𑀢𑁆𑀣𑀸𑀬 𑀯𑀺𑀳𑀸𑀭𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀞𑀸𑀢𑀩𑁆𑀩𑀁. 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀬𑀲𑁆𑀲 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲𑀧𑀺 𑀅𑀢𑁆𑀢𑀦𑁄 𑀅𑀥𑀺𑀓𑀧𑀭𑀺𑀓𑁆𑀔𑀸𑀭𑁄 𑀘𑁂 𑀞𑀧𑀺𑀢𑁄 𑀅𑀢𑁆𑀣𑀺, 𑀘𑀻𑀯𑀭𑀸𑀤𑀺𑀲𑀗𑁆𑀖𑀺𑀓𑀪𑀸𑀕𑁂𑀧𑀺 𑀆𑀮𑀬𑁄 𑀅𑀢𑁆𑀣𑀺, 𑀲𑁄𑀧𑀺 𑀕𑀸𑀳𑀸𑀧𑁂𑀢𑀩𑁆𑀩𑁄 ¶ . 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁, 𑀅𑀝𑁆𑀞𑀓𑀣𑀁 𑀯𑀸. 𑀤𑀺𑀕𑀼𑀡𑀦𑁆𑀢𑀺 𑀅𑀜𑁆𑀜𑁂𑀳𑀺 𑀮𑀩𑁆𑀪𑀫𑀸𑀦𑀢𑁄 𑀤𑁆𑀯𑀺𑀕𑀼𑀡𑀁. 𑀧𑀓𑁆𑀔𑀯𑀸𑀭𑁂𑀦𑀸𑀢𑀺 𑀅𑀟𑁆𑀠𑀫𑀸𑀲𑀯𑀸𑀭𑁂𑀦.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁧. 𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁭. 𑀏𑀯𑀁 𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀓𑀬𑀯𑀺𑀓𑁆𑀓𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀦𑁆𑀢𑁄 ‘‘𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀬𑀦𑀁 𑀓𑀬𑁄, 𑀧𑀭𑀪𑀡𑁆𑀟𑀲𑁆𑀲 𑀕𑀳𑀡𑀁, 𑀯𑀺𑀓𑁆𑀓𑀬𑀦𑀁 ¶ 𑀯𑀺𑀓𑁆𑀓𑀬𑁄, 𑀲𑀓𑀪𑀡𑁆𑀟𑀲𑁆𑀲 𑀤𑀸𑀦𑀁, 𑀓𑀬𑁄 𑀘 𑀯𑀺𑀓𑁆𑀓𑀬𑁄 𑀘 𑀓𑀬𑀯𑀺𑀓𑁆𑀓𑀬𑀁. 𑀲𑀫𑀸𑀧𑀚𑁆𑀚𑀦𑀁 𑀲𑀫𑀸𑀧𑀢𑁆𑀢𑀺, 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀓𑀺𑀭𑀺𑀬𑀲𑁆𑀲 𑀓𑀭𑀡𑀁. 𑀢𑀲𑁆𑀲𑀭𑀽𑀧𑀁 𑀤𑀲𑁆𑀲𑁂𑀢𑀺 ‘‘𑀇𑀫𑀺𑀦𑀸’’𑀢𑀺𑀆𑀤𑀺𑀦𑀸.

𑀲𑁂𑀲𑀜𑀸𑀢𑀓𑁂𑀲𑀼 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀲𑀫𑁆𑀪𑀯𑀢𑁄 𑀢𑀤𑀪𑀸𑀯𑀝𑁆𑀞𑀸𑀦𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀭𑀁 𑀯𑀸 𑀧𑀦 𑀧𑀺𑀢𑀭𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀜𑁆𑀘 𑀦 𑀳𑁄𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀓𑀬𑀯𑀺𑀓𑁆𑀓𑀬𑀁 𑀧𑀦 𑀆𑀧𑀚𑁆𑀚𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀘 𑀉𑀧𑀭𑀺 𑀅𑀜𑁆𑀜𑀸𑀢𑀓𑀦𑁆𑀢𑁆𑀬𑀸𑀤𑀺𑀦𑀸 𑀘 𑀲𑁂𑀲𑀜𑀸𑀢𑀓𑀁 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀧𑀦 𑀤𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁, ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀓𑀬𑀯𑀺𑀓𑁆𑀓𑀬𑀁 𑀆𑀧𑀚𑁆𑀚𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺 𑀫𑀺𑀕𑀧𑀤𑀯𑀮𑀜𑁆𑀚𑀦𑀦𑁆𑀬𑀸𑀬𑁂𑀦. 𑀢𑀲𑁆𑀫𑀸𑀇𑀘𑁆𑀘𑀸𑀤𑀺𑀓𑁂𑀧𑀺 ‘‘𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑀁, 𑀲𑁂𑀲𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄, 𑀅𑀜𑁆𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑁂𑀦𑁂𑀯 𑀦𑁆𑀬𑀸𑀬𑁂𑀦 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀩𑁆𑀬𑀸𑀧𑀺𑀢𑀤𑁄𑀲𑁄 𑀲𑀺𑀬𑀸.

‘‘𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀸𑀬 𑀓𑀺𑀭𑀺𑀬𑀸𑀬 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀫𑀺𑀦𑀸 𑀇𑀤𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚, 𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺 𑀯𑀸, ‘‘𑀇𑀤𑀁 ¶ 𑀪𑀢𑁆𑀢𑀁 𑀪𑀼𑀢𑁆𑀢𑁄𑀲𑀺, 𑀇𑀤𑀁 𑀦𑀸𑀫 𑀓𑀭𑁄𑀳𑀺, 𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺 𑀧𑀦 𑀯𑀼𑀢𑁆𑀢𑁂 𑀅𑀲𑀫𑁆𑀩𑀦𑁆𑀥𑀸𑀬 𑀓𑀺𑀭𑀺𑀬𑀸𑀬 𑀯𑀼𑀢𑁆𑀢𑀢𑁆𑀢𑀸 𑀓𑀬𑀯𑀺𑀓𑁆𑀓𑀬𑁄 𑀦 𑀳𑁄𑀢𑀺. 𑀯𑀺𑀖𑀸𑀲𑀸𑀤𑀸𑀦𑀁 𑀪𑀢𑁆𑀢𑀤𑀸𑀦𑁂 𑀘 𑀅𑀦𑀧𑁂𑀓𑁆𑀔𑀢𑁆𑀢𑀸 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦 𑀳𑁄𑀢𑀺, 𑀓𑀸𑀭𑀸𑀧𑀦𑁂 𑀳𑀢𑁆𑀣𑀓𑀫𑁆𑀫𑀫𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀅𑀲𑀢𑀺𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀕𑁆𑀖𑀁 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀢𑁆𑀢𑀸𑀯𑀢𑀸 𑀓𑀬𑀯𑀺𑀓𑁆𑀓𑀬𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀤𑁂𑀳𑀻’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 ¶ 𑀓𑀬𑀯𑀺𑀓𑁆𑀓𑀬𑁄 𑀦 𑀳𑁄𑀢𑀺, 𑀫𑀽𑀮𑀲𑁆𑀲 𑀅𑀢𑁆𑀣𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀧𑀺 𑀦 𑀳𑁄𑀢𑀺. 𑀧𑀢𑁆𑀢𑁄 𑀦 𑀕𑀳𑁂𑀢𑀩𑁆𑀩𑁄 𑀧𑀭𑀪𑀡𑁆𑀟𑀲𑁆𑀲 𑀫𑀳𑀕𑁆𑀖𑀢𑀸𑀬. 𑀏𑀯𑀁 𑀲𑀢𑀺 𑀓𑀣𑀁 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀫𑀫 𑀯𑀢𑁆𑀣𑀼 𑀅𑀧𑁆𑀧𑀕𑁆𑀖𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀣𑁂𑀬𑁆𑀬𑀸𑀯𑀳𑀸𑀭𑀲𑀫𑁆𑀪𑀯𑀢𑁄, 𑀊𑀦𑀫𑀸𑀲𑀓𑀁 𑀘𑁂 𑀅𑀕𑁆𑀖𑀢𑀺, 𑀤𑀼𑀓𑁆𑀓𑀝𑀁. 𑀫𑀸𑀲𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀊𑀦𑀧𑀜𑁆𑀘𑀫𑀸𑀲𑀓𑀁 𑀘𑁂 𑀅𑀕𑁆𑀖𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀜𑁆𑀘𑀫𑀸𑀲𑀓𑀁 𑀘𑁂 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀢𑀺, 𑀯𑀝𑁆𑀝𑀢𑀺 𑀧𑀼𑀜𑁆𑀜𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀅𑀥𑀺𑀓𑀲𑁆𑀲. 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀧𑀦…𑀧𑁂… 𑀯𑀝𑁆𑀝𑀢𑀺 𑀉𑀪𑀢𑁄 𑀓𑀧𑁆𑀧𑀺𑀬𑀪𑀡𑁆𑀟𑀢𑁆𑀢𑀸. 𑀏𑀓𑀢𑁄 𑀉𑀪𑀢𑁄 𑀯𑀸 𑀘𑁂 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀳𑁄𑀢𑀺, 𑀦 𑀯𑀝𑁆𑀝𑀢𑀺. ‘‘𑀫𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀓𑀲𑁆𑀫𑀸? 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀅𑀙𑁂𑀓𑀢𑁆𑀢𑀸.

𑀅𑀜𑁆𑀜𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀢𑁆𑀣𑁄, 𑀓𑀲𑁆𑀫𑀸? 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀸 𑀢𑁂𑀮𑀲𑁆𑀲. 𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑀁 𑀲𑀢𑁆𑀢𑀸𑀳𑀧𑀭𑀫𑀁 𑀏𑀯 𑀞𑀧𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀢𑁄 𑀧𑀭𑀁 𑀞𑀧𑀺𑀢𑀼𑀓𑀸𑀫𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑁂𑀦 𑀅𑀢𑁆𑀣𑁄 𑀳𑁄𑀢𑀺. 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀤𑀽𑀲𑁂𑀬𑁆𑀬, 𑀅𑀦𑀺𑀬𑀫𑀺𑀢𑀓𑀸𑀮𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑀁 𑀦𑀸𑀴𑀺𑀬𑀁 𑀅𑀯𑀲𑀺𑀝𑁆𑀞𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑀁 𑀅𑀢𑁆𑀢𑀦𑁄 𑀓𑀸𑀮𑀁 𑀯𑀢𑁆𑀢𑀸𑀧𑁂𑀬𑁆𑀬.

𑁫𑁮. 𑀇𑀤𑀁 𑀧𑀢𑁆𑀢𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀓𑀧𑁆𑀧𑀺𑀬𑀧𑀢𑁆𑀢𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀁, 𑀧𑀜𑁆𑀘𑀫𑁄 𑀧𑀦 𑀓𑀧𑁆𑀧𑀺𑀬𑁄. 𑀢𑁂𑀦 𑀯𑀓𑁆𑀔𑀢𑀺 ‘‘𑀅𑀬𑀁 𑀧𑀢𑁆𑀢𑁄 𑀲𑀩𑁆𑀩𑀓𑀧𑁆𑀧𑀺𑀬𑁄 𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀭𑀺𑀪𑁄𑀕𑀸𑀭𑀳𑁄’’𑀢𑀺. 𑀅𑀬𑀁 𑀧𑀢𑁆𑀢𑁄 𑀫𑀳𑀸𑀅𑀓𑀧𑁆𑀧𑀺𑀬𑁄 𑀦𑀸𑀫, 𑀓𑀲𑁆𑀫𑀸? 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀬𑀩𑀻𑀚𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦 𑀮𑁄𑀳𑁂𑀦 𑀧𑀢𑁆𑀢𑀲𑁆𑀲 𑀓𑀸𑀭𑀺𑀢𑀢𑁆𑀢𑀸, 𑀏𑀯𑀁 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀤𑀽𑀲𑀺𑀢𑀢𑁆𑀢𑀸. 𑀬𑀣𑀸 𑀘 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀺𑀲𑀬𑁂 𑀣𑀸𑀯𑀭𑀧𑀬𑁄𑀕𑁂𑀲𑀼 𑀧𑀸𑀲𑀲𑀽𑀮𑀸𑀤𑀻𑀲𑀼 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀸𑀭𑀺𑀢𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺 𑀤𑀡𑁆𑀟𑀫𑀢𑁆𑀢𑁂 𑀯𑀸 𑀯𑀸𑀓𑀫𑀢𑁆𑀢𑁂 𑀯𑀸 𑀅𑀯𑀲𑀺𑀝𑁆𑀞𑁂 𑀲𑀢𑀺 𑀦 𑀫𑀼𑀘𑁆𑀘𑀢𑀺, 𑀲𑀩𑁆𑀩𑀲𑁆𑀫𑀺𑀁 𑀦𑀝𑁆𑀞𑁂𑀬𑁂𑀯 𑀫𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀩𑀻𑀚𑀢𑁄 ¶ 𑀧𑀝𑁆𑀞𑀸𑀬 𑀓𑀢𑀢𑁆𑀢𑀸 𑀢𑀲𑁆𑀫𑀺𑀁 𑀧𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀧𑀢𑁆𑀢𑁂 𑀅𑀯𑀲𑀺𑀝𑁆𑀞𑁂𑀧𑀺 𑀓𑀧𑁆𑀧𑀺𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀲𑀘𑁂𑀧𑀺 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 ¶ 𑀣𑀸𑀮𑀓𑀁 𑀓𑀸𑀭𑁂𑀢𑀺, 𑀢𑀫𑁆𑀧𑀺 𑀅𑀓𑀧𑁆𑀧𑀺𑀬’’𑀦𑁆𑀢𑁆𑀬𑀸𑀤𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀤𑀼𑀢𑀺𑀬𑀧𑀢𑁆𑀢𑁂 𑀯𑀺𑀬 𑀫𑀽𑀮𑁂 𑀘 𑀫𑀽𑀮𑀲𑁆𑀲𑀸𑀫𑀺𑀓𑀸𑀦𑀁, 𑀧𑀢𑁆𑀢𑁂 𑀘 𑀧𑀢𑁆𑀢𑀲𑁆𑀲𑀸𑀫𑀺𑀓𑀸𑀦𑀁 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀦𑀼 𑀔𑁄𑀢𑀺 𑀆𑀲𑀗𑁆𑀓𑀸𑀬𑀫𑀸𑀳 ‘‘𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀤𑀼𑀢𑀺𑀬𑀧𑀢𑁆𑀢𑀁 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀕𑀺𑀳𑀻𑀳𑀺 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀫𑁂𑀯 𑀓𑀺𑀡𑀸𑀢𑀺, 𑀦 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀤𑀽𑀲𑁂𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀧𑀢𑁆𑀢𑁄 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁 𑀲𑀓𑁆𑀓𑀸, 𑀇𑀥 𑀧𑀦 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀤𑀽𑀲𑀺𑀢𑀢𑁆𑀢𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀧𑀢𑁆𑀢𑀁 𑀧𑀼𑀦 𑀅𑀬𑀧𑀸𑀲𑀸𑀡𑀩𑀻𑀚𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀧𑀝𑀺𑀕𑁆𑀕𑀳𑀺𑀢𑀭𑀽𑀧𑀺𑀬𑀲𑁆𑀲 𑀘 𑀯𑀴𑀜𑁆𑀚𑀺𑀢𑀢𑁆𑀢𑀸 𑀧𑀼𑀦 𑀲𑀸𑀫𑀺𑀓𑀸𑀦𑀁 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀦𑁆𑀢𑀺.

𑀇𑀤𑀸𑀦𑀺 𑀢𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀁 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀲𑀘𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀓𑀺𑀜𑁆𑀘𑀺𑀧𑀺 𑀅𑀬𑀯𑀢𑁆𑀣𑀼𑀫𑁆𑀳𑀺 𑀅𑀯𑀲𑀺𑀝𑁆𑀞𑁂 𑀲𑀢𑀺 𑀅𑀓𑀧𑁆𑀧𑀺𑀬𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁯𑁧) ‘‘𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀼𑀢𑁆𑀢𑀸𑀤𑀺𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀧𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀸𑀭𑀺𑀢𑀫𑁆𑀧𑀺 𑀧𑀜𑁆𑀘𑀦𑁆𑀦𑀁 𑀦 𑀯𑀝𑁆𑀝𑀢𑀺 𑀏𑀯. 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀬𑀁 𑀕𑀦𑁆𑀢𑁆𑀯𑀸 𑀯𑀸 ‘𑀇𑀫𑀁 𑀓𑀳𑀸𑀧𑀡𑀸𑀤𑀺𑀁 𑀓𑀫𑁆𑀫𑀓𑀸𑀭𑀸𑀦𑀁 𑀤𑀢𑁆𑀯𑀸 𑀩𑀻𑀚𑀁 𑀲𑀫𑀼𑀝𑁆𑀞𑀸𑀧𑁂𑀳𑀻’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑁆𑀯𑀸 𑀯𑀸 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀫𑀳𑀸𑀅𑀓𑀧𑁆𑀧𑀺𑀬𑁄𑀢𑀺 𑀅𑀢𑁆𑀢𑀦𑀸𑀯 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀤𑀽𑀲𑀺𑀢𑀢𑁆𑀢𑀸 𑀅𑀜𑁆𑀜𑀲𑁆𑀲 𑀫𑀽𑀮𑀲𑁆𑀲𑀸𑀫𑀺𑀓𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀲𑁄 𑀳𑀺 𑀘𑁄𑀭𑁂𑀳𑀺 𑀅𑀘𑁆𑀙𑀺𑀦𑁆𑀦𑁄𑀧𑀺 𑀧𑀼𑀦 𑀮𑀤𑁆𑀥𑁄 𑀚𑀸𑀦𑀦𑁆𑀢𑀲𑁆𑀲 𑀓𑀲𑁆𑀲𑀘𑀻𑀧𑀺 𑀦 𑀯𑀝𑁆𑀝𑀢𑀺. 𑀬𑀤𑀺 𑀳𑀺 𑀯𑀝𑁆𑀝𑁂𑀬𑁆𑀬, 𑀢𑀴𑀸𑀓𑀸𑀤𑀻𑀲𑀼 𑀯𑀺𑀬 ‘𑀅𑀘𑁆𑀙𑀺𑀦𑁆𑀦𑁄 𑀯𑀝𑁆𑀝𑀢𑀻’𑀢𑀺 𑀆𑀘𑀭𑀺𑀬𑀸 𑀯𑀤𑁂𑀬𑁆𑀬𑀼𑀁. 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀘𑁄𑀭𑀸𑀤𑀺𑀅𑀘𑁆𑀙𑀺𑀦𑁆𑀤𑀦𑁂𑀦𑀧𑀺 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀜𑁆𑀘 𑀢𑁂𑀦 𑀭𑀽𑀧𑁂𑀦 ¶ 𑀞𑀺𑀢𑀁 𑀢𑀫𑁆𑀫𑀽𑀮𑀓𑁂𑀦 𑀯𑀢𑁆𑀣𑀫𑀼𑀢𑁆𑀢𑀸𑀤𑀺𑀭𑀽𑀧𑁂𑀦 𑀞𑀺𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀧𑀺 𑀳𑀺 𑀢𑀫𑁆𑀫𑀽𑀮𑀓𑀓𑀧𑁆𑀧𑀺𑀬𑀯𑀢𑁆𑀣𑀼 𑀘 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀢𑁂𑀦 𑀭𑀽𑀧𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀼𑀁. 𑀬𑀤𑀺 𑀧𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸, 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀯𑀸 𑀧𑀼𑀦 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀬𑁆𑀬, 𑀢𑀁 𑀭𑀽𑀧𑀺𑀬𑀁 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀧𑁆𑀧𑀺𑀬𑀁 𑀓𑀸𑀢𑀼𑀫𑁆𑀧𑀺 𑀲𑀓𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀧𑀜𑁆𑀘𑀺𑀢𑀁, 𑀬𑀜𑁆𑀘 𑀢𑀫𑁂𑀯 𑀕𑀳𑁂𑀢𑁆𑀯𑀸 𑀧𑁄𑀭𑀸𑀡𑀝𑀻𑀓𑀸𑀬𑀁 𑀧𑀧𑀜𑁆𑀘𑀺𑀢𑀁, 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀁 𑀅𑀢𑀺𑀯𑀺𑀢𑁆𑀣𑀸𑀭𑀺𑀢𑀜𑁆𑀘 𑀪𑀯𑀺𑀲𑁆𑀲𑀢𑀺, 𑀲𑁄𑀢𑀽𑀦𑀜𑁆𑀘 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁, 𑀢𑀲𑁆𑀫𑀸 𑀏𑀢𑁆𑀢𑀓𑀫𑁂𑀯 𑀯𑀤𑀺𑀫𑁆𑀳, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀢𑁂𑀲𑀼 𑀢𑁂𑀲𑀼 𑀧𑀓𑀭𑀡𑁂𑀲𑀼 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀤𑀼𑀢𑀺𑀬𑀧𑀢𑁆𑀢𑁂 𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀓𑀧𑁆𑀧𑀢𑀻𑀢𑀺 𑀭𑀽𑀧𑀺𑀬𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀓𑀬𑀯𑀺𑀓𑁆𑀓𑀬𑀲𑁆𑀲 𑀘 𑀓𑀢𑀢𑁆𑀢𑀸. 𑀲𑀓𑁆𑀓𑀸 𑀧𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀦𑁆𑀢𑀺 𑀕𑀺𑀳𑀻𑀳𑀺 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀧𑀢𑁆𑀢𑀲𑁆𑀲𑁂𑀯 𑀓𑀺𑀡𑀺𑀢𑀢𑁆𑀢𑀸 ¶ , 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀅𑀤𑀽𑀲𑀺𑀢𑀢𑁆𑀢𑀸, 𑀫𑀽𑀮𑀫𑀽𑀮𑀲𑁆𑀲𑀸𑀫𑀺𑀓𑀸𑀦𑀜𑁆𑀘 𑀧𑀢𑁆𑀢𑀧𑀢𑁆𑀢𑀲𑁆𑀲𑀸𑀫𑀺𑀓𑀸𑀦𑀜𑁆𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀣𑀸 𑀧𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑀺𑀬𑀧𑀢𑁆𑀢𑁂 𑀲𑀤𑀺𑀲𑁄𑀬𑁂𑀯𑀸𑀢𑀺 ‘‘𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺, 𑀲𑀓𑁆𑀓𑀸 𑀧𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼’’𑀦𑁆𑀢𑀺 𑀇𑀫𑀁 𑀦𑀬𑀁 𑀦𑀺𑀤𑁆𑀤𑀺𑀲𑀢𑀺. 𑀦𑀦𑀼 𑀢𑀢𑀺𑀬𑀧𑀢𑁆𑀢𑁄 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀕𑀳𑀺𑀢𑁄, 𑀅𑀣 𑀓𑀲𑁆𑀫𑀸 𑀅𑀓𑀧𑁆𑀧𑀺𑀬𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀕𑀳𑀺𑀢𑁄𑀧𑀺 𑀤𑀼𑀢𑀺𑀬𑀧𑀢𑁆𑀢𑀲𑀤𑀺𑀲𑁄𑀬𑁂𑀯, 𑀫𑀽𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀅𑀓𑀧𑁆𑀧𑀺𑀬𑁄’’𑀢𑀺. 𑀤𑀼𑀢𑀺𑀬𑀘𑁄𑀤𑀦𑀁 𑀧𑀦 𑀲𑀬𑀫𑁂𑀯 𑀯𑀤𑀢𑀺. 𑀏𑀢𑁆𑀣 𑀘 ‘‘𑀤𑀼𑀢𑀺𑀬𑀧𑀢𑁆𑀢𑀲𑀤𑀺𑀲𑁄𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀽𑀮𑁂 𑀘 𑀫𑀽𑀮𑀲𑁆𑀲𑀸𑀫𑀺𑀓𑀸𑀦𑀁, 𑀧𑀢𑁆𑀢𑁂 𑀘 𑀧𑀢𑁆𑀢𑀲𑁆𑀲𑀸𑀫𑀺𑀓𑀸𑀦𑀁 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑁄 𑀳𑁄𑀢𑀺, 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀫𑀽𑀮𑀲𑁆𑀲 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺 𑀬𑁂𑀦 𑀉𑀕𑁆𑀕𑀳𑀺𑀢𑀫𑀽𑀮𑁂𑀦 𑀧𑀢𑁆𑀢𑁄 𑀓𑀻𑀢𑁄, 𑀢𑀲𑁆𑀲 𑀫𑀽𑀮𑀲𑁆𑀲 𑀲𑀗𑁆𑀖𑀫𑀚𑁆𑀛𑁂 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸. 𑀏𑀢𑁂𑀦 𑀭𑀽𑀧𑀺𑀬𑀫𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀦 𑀢𑀫𑁆𑀫𑀽𑀮𑀓𑀁 𑀅𑀭𑀽𑀧𑀺𑀬𑀦𑁆𑀢𑀺 ¶ 𑀤𑀲𑁆𑀲𑁂𑀢𑀺. 𑀬𑀤𑀺 𑀳𑀺 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀽𑀮𑀁 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀝𑁆𑀞𑀁 𑀲𑀺𑀬𑀸, 𑀢𑁂𑀦 𑀓𑀧𑁆𑀧𑀺𑀬𑁂𑀦 𑀓𑀫𑁆𑀫𑁂𑀦 𑀆𑀭𑀸𑀫𑀺𑀓𑀸𑀤𑀻𑀳𑀺 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀧𑀢𑁆𑀢𑁄 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀝𑁆𑀝𑁂𑀬𑁆𑀬.

𑀘𑀢𑀼𑀢𑁆𑀣𑀧𑀢𑁆𑀢𑁂 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸𑀢𑀺 ‘‘𑀇𑀫𑁂 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀇𑀤𑀁 𑀤𑁂𑀳𑀻’’𑀢𑀺 𑀕𑀳𑀺𑀢𑀢𑁆𑀢𑀸 𑀕𑀺𑀳𑀺𑀲𑀦𑁆𑀢𑀓𑀸𑀦𑀁 𑀓𑀳𑀸𑀧𑀡𑀸𑀦𑀁 𑀤𑀼𑀝𑁆𑀞𑀼𑀯𑀺𑀘𑀸𑀭𑀺𑀢𑀢𑁆𑀢𑀸 𑀏𑀢𑀲𑁆𑀲 𑀯𑀺𑀘𑀸𑀭𑀡𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸𑀢𑀺 𑀏𑀢𑁂𑀦 𑀫𑀽𑀮𑀲𑁆𑀲 𑀕𑀺𑀳𑀺𑀲𑀦𑁆𑀢𑀓𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀧𑀢𑁆𑀢𑀲𑁆𑀲 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂𑀦 𑀅𑀦𑀼𑀧𑁆𑀧𑀦𑁆𑀦𑀢𑀜𑁆𑀘 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀢𑀲𑁆𑀲 𑀧𑀢𑁆𑀢𑀲𑁆𑀲 𑀦𑀺𑀲𑁆𑀲𑀚𑁆𑀚𑀺𑀬𑀸𑀪𑀸𑀯𑀁, 𑀪𑀺𑀓𑁆𑀔𑀼𑀲𑁆𑀲 𑀘 𑀧𑀸𑀘𑀺𑀢𑁆𑀢𑀺𑀬𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀤𑀼𑀩𑁆𑀩𑀺𑀘𑀸𑀭𑀺𑀢𑀫𑀢𑁆𑀢𑁂𑀦 𑀤𑀼𑀓𑁆𑀓𑀝𑀫𑀢𑁆𑀢𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀦𑀺𑀲𑁆𑀲𑀚𑁆𑀚𑀻𑀢𑀺 𑀇𑀤𑀜𑁆𑀘 𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀦𑀬𑀓𑀫𑁆𑀫𑀯𑀲𑁂𑀦. 𑀢𑁂𑀦𑁂𑀯 𑀘 ‘‘𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀫𑀧𑀢𑁆𑀢𑁂 𑀲𑀩𑁆𑀩𑀓𑀧𑁆𑀧𑀺𑀬𑁄𑀢𑀺 𑀅𑀢𑁆𑀢𑀦𑁄 𑀘 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀜𑁆𑀘 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀓𑀧𑁆𑀧𑀺𑀬𑁄. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀭𑀺𑀪𑁄𑀕𑀸𑀭𑀳𑁄’’𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁨. 𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁯. 𑀏𑀯𑀁 ¶ 𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀦𑁆𑀢𑁄 ‘‘𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀜𑁆𑀜𑀸𑀡𑀢𑁆𑀣𑀸𑀬 𑀓𑀢𑀁 𑀭𑀽𑀧𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 ¶ 𑀭𑀽𑀧𑀺𑀬𑀁, 𑀬𑀁 𑀓𑀺𑀜𑁆𑀘𑀺 𑀯𑁄𑀳𑀸𑀭𑀽𑀧𑀕𑀁 𑀥𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) ‘‘𑀇𑀥 𑀧𑀦 𑀬𑀁 𑀓𑀺𑀜𑁆𑀘𑀺 𑀯𑁄𑀳𑀸𑀭𑀕𑀫𑀦𑀻𑀬𑀁 𑀓𑀳𑀸𑀧𑀡𑀸𑀤𑀺 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀧𑀞𑀫𑀁 𑀆𑀤𑀻𑀬𑀢𑀻𑀢𑀺𑀆𑀤𑀺, 𑀓𑀺𑀁 𑀢𑀁? 𑀭𑀽𑀧𑀺𑀬𑀁, 𑀭𑀽𑀧𑀺𑀬𑀁 𑀆𑀤𑀺 𑀬𑁂𑀲𑀁 𑀢𑁂𑀢𑀺 𑀭𑀽𑀧𑀺𑀬𑀸𑀤𑀬𑁄, 𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀬𑁄, 𑀧𑀝𑀺𑀕𑁆𑀕𑀳𑀡𑀁 𑀧𑀝𑀺𑀕𑁆𑀕𑀳𑁄, 𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀺𑀬𑀸𑀤𑀻𑀦𑀁 𑀧𑀝𑀺𑀕𑁆𑀕𑀳𑁄 𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑁄. 𑀚𑀸𑀢𑀲𑀫𑀬𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀫𑁂𑀯 𑀭𑀽𑀧𑀁 𑀅𑀲𑁆𑀲 𑀪𑀯𑀢𑀺, 𑀦 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀻𑀢𑀺 𑀚𑀸𑀢𑀭𑀽𑀧𑀁, 𑀲𑀼𑀯𑀡𑁆𑀡𑀁. 𑀥𑀯𑀮𑀲𑀪𑀸𑀯𑀢𑀸𑀬 𑀲𑀢𑁆𑀢𑁂𑀳𑀺 𑀭𑀜𑁆𑀚𑀺𑀬𑀢𑁂𑀢𑀺 𑀭𑀚𑀢𑀁, 𑀲𑀚𑁆𑀛𑀼. 𑀚𑀸𑀢𑀭𑀽𑀧𑁂𑀦 𑀓𑀢𑁄 𑀫𑀸𑀲𑀓𑁄 𑀚𑀸𑀢𑀭𑀽𑀧𑀫𑀸𑀲𑀓𑁄. 𑀭𑀚𑀢𑁂𑀦 𑀓𑀢𑁄 𑀫𑀸𑀲𑀓𑁄 𑀭𑀚𑀢𑀫𑀸𑀲𑀓𑁄𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀳𑁄𑀢𑀺, 𑀦 𑀮𑁄𑀳𑀫𑀸𑀲𑀓𑀸𑀤𑀬𑁄𑀢𑀺 𑀆𑀳 ‘‘𑀢𑀫𑁆𑀩𑀮𑁄𑀳𑀸𑀤𑀻𑀳𑀺…𑀧𑁂… 𑀲𑀗𑁆𑀕𑀳𑀺𑀢𑁄’’𑀢𑀺. 𑀢𑀫𑁆𑀩𑀮𑁄𑀳𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀢𑀺𑀧𑀼𑀲𑀻𑀲𑀸𑀤𑀻𑀳𑀺 𑀓𑀢𑁄𑀧𑀺 𑀮𑁄𑀳𑀫𑀸𑀲𑀓𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀇𑀤𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀳𑁄𑀢𑀺, 𑀉𑀤𑀸𑀳𑀼 𑀫𑀼𑀢𑁆𑀢𑀸𑀤𑀬𑁄𑀧𑀻𑀢𑀺 𑀆𑀳 ‘‘𑀫𑀼𑀢𑁆𑀢𑀸…𑀧𑁂… 𑀤𑀼𑀓𑁆𑀓𑀝𑀯𑀢𑁆𑀣𑀽’’𑀢𑀺. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀢𑁆𑀣𑀽𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁…𑀧𑁂… 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑀸𑀦𑀁 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀁, 𑀤𑀼𑀓𑁆𑀓𑀝𑀯𑀢𑁆𑀣𑀼 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀦𑀺𑀘𑁆𑀙𑀬𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀢𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀲𑁆𑀫𑀸? ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑀺𑀦𑁆𑀦𑀢𑁆𑀢𑀸. 𑀤𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀯𑀝𑁆𑀝𑀢𑀺, 𑀓𑀲𑁆𑀫𑀸? 𑀲𑀗𑁆𑀖𑀲𑁆𑀲 𑀳𑀢𑁆𑀣𑁂 𑀅𑀤𑀢𑁆𑀯𑀸 𑀯𑀟𑁆𑀠𑀓𑀻𑀆𑀤𑀻𑀦𑀁 𑀳𑀢𑁆𑀣𑁂 𑀤𑀺𑀦𑁆𑀦𑀢𑁆𑀢𑀸. 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺 𑀕𑀺𑀳𑀻𑀦𑀁 𑀳𑀢𑁆𑀣𑁂 𑀞𑀧𑀺𑀢𑀢𑁆𑀢𑀸. 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀅𑀦𑀸𑀫𑀲𑀺𑀢𑀢𑁆𑀢𑀸. ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 ‘‘𑀢𑀼𑀫𑁆𑀳𑁂 𑀕𑀳𑁂𑀢𑁆𑀯𑀸 ¶ 𑀞𑀧𑁂𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀆𑀧𑀢𑁆𑀢𑀻𑀢𑀺 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀭𑀺𑀪𑁄𑀕𑁂 𑀤𑀼𑀓𑁆𑀓𑀝𑀁. 𑀲𑁆𑀯𑁂𑀯 𑀲𑀸𑀧𑀢𑁆𑀢𑀺𑀓𑁄𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀤𑀢𑀺, 𑀯𑀝𑁆𑀝𑀢𑀺 ‘‘𑀢𑀼𑀫𑁆𑀳𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀘𑀻𑀯𑀭𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁, 𑀓𑀲𑁆𑀫𑀸? 𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸. 𑀲𑁂𑀦𑀸𑀲𑀦𑀧𑀘𑁆𑀘𑀬𑀲𑁆𑀲 𑀇𑀢𑀭𑀧𑀘𑁆𑀘𑀬𑀢𑁆𑀢𑀬𑀢𑁄 𑀯𑀺𑀲𑁂𑀲𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀦𑀸𑀲𑀦𑀢𑁆𑀣𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀅𑀯𑀺𑀲𑁆𑀲𑀚𑁆𑀚𑀺𑀬𑀅𑀯𑁂𑀪𑀗𑁆𑀕𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀆𑀧𑀤𑀸𑀲𑀼 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑁬𑁦. 𑀏𑀯𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀲𑀼 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀓𑁄𑀘𑀺 𑀫𑀬𑁆𑀳’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀏𑀢𑁆𑀣 𑀧𑀦 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀆𑀧𑀢𑁆𑀢𑀻𑀢𑀺 𑀤𑀼𑀓𑁆𑀓𑀝𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀴𑀸𑀓𑀲𑁆𑀲𑀧𑀺 𑀔𑁂𑀢𑁆𑀢𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂𑀧𑀺 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸𑀢𑀺 𑀤𑁂𑀢𑀻𑀢𑀺 𑀏𑀢𑁆𑀣 ‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀢𑀴𑀸𑀓𑀁 𑀤𑀫𑁆𑀫𑀻’𑀢𑀺 𑀯𑀸 ‘𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀁 𑀢𑀴𑀸𑀓𑀁 𑀤𑀫𑁆𑀫𑀻’𑀢𑀺 𑀯𑀸 𑀯𑀤𑀢𑀺, 𑀯𑀝𑁆𑀝𑀢𑀺𑀬𑁂𑀯. ‘𑀇𑀢𑁄 𑀢𑀴𑀸𑀓𑀢𑁄 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁫𑁩𑁮-𑁫𑁩𑁯) 𑀢𑀣𑁂𑀯 𑀯𑀢𑁆𑀯𑀸 ‘‘𑀇𑀤𑀜𑁆𑀘 𑀲𑀗𑁆𑀖𑀲𑁆𑀲 𑀤𑀻𑀬𑀫𑀸𑀦𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀤𑀺𑀦𑁆𑀦𑀁 𑀢𑀴𑀸𑀓𑀔𑁂𑀢𑁆𑀢𑀸𑀤𑀺 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀦 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀁 𑀓𑀽𑀧𑀧𑁄𑀓𑁆𑀔𑀭𑀡𑀺𑀆𑀤𑀬𑁄 𑀯𑀝𑁆𑀝𑀦𑁆𑀢𑀺. ‘𑀲𑀗𑁆𑀖𑀲𑁆𑀲 𑀢𑀴𑀸𑀓𑀁 𑀅𑀢𑁆𑀣𑀺, 𑀢𑀁 𑀓𑀣’𑀦𑁆𑀢𑀺 𑀳𑀺 𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑀯𑀲𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀻𑀢𑀺 𑀯𑀲𑁂 𑀪𑀯𑀺𑀲𑁆𑀲𑀢𑀺.

𑀓𑀧𑁆𑀧𑀺𑀬𑀓𑀸𑀭𑀓𑀁 𑀞𑀧𑁂𑀣𑀸𑀢𑀺 𑀯𑀼𑀢𑁆𑀢𑁂𑀢𑀺 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑁂𑀧𑀺 𑀞𑀧𑁂𑀦𑁆𑀢𑀲𑁆𑀲 𑀦 𑀤𑁄𑀲𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀉𑀤𑀓𑀁 𑀯𑀸𑀭𑁂𑀢𑀼𑀁 ¶ 𑀮𑀩𑁆𑀪𑀢𑀻’’𑀢𑀺. 𑀬𑀲𑁆𑀫𑀸 𑀧𑀭𑀲𑀦𑁆𑀢𑀓𑀁 𑀪𑀺𑀓𑁆𑀔𑀽𑀦𑀁 𑀦𑀸𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀦 𑀲𑀲𑁆𑀲𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀲𑀲𑁆𑀲𑀓𑀸𑀮𑁂𑀧𑀺 𑀢𑀸𑀲𑁂𑀢𑁆𑀯𑀸 𑀫𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀫𑀼𑀜𑁆𑀘𑀢𑁄 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁. 𑀚𑀦𑀧𑀤𑀲𑁆𑀲 𑀲𑀸𑀫𑀺𑀓𑁄𑀢𑀺 𑀇𑀫𑀺𑀦𑀸𑀯 𑀬𑁄 𑀢𑀁 𑀚𑀦𑀧𑀤𑀁 𑀯𑀺𑀘𑀸𑀭𑁂𑀢𑀺, 𑀢𑁂𑀦𑀧𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀧𑀼𑀦 𑀤𑁂𑀢𑀻𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀤𑁂𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀇𑀲𑁆𑀲𑀭𑁂𑀦 ‘‘𑀧𑀭𑀺𑀘𑁆𑀘𑀢𑁆𑀢𑀫𑀺𑀤𑀁 𑀪𑀺𑀓𑁆𑀔𑀽𑀳𑀺 𑀅𑀲𑁆𑀲𑀸𑀫𑀺𑀓’’𑀦𑁆𑀢𑀺 𑀲𑀜𑁆𑀜𑀸𑀬 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀓𑀯𑀸𑀳𑀓𑀦𑁆𑀢𑀺 𑀉𑀤𑀓𑀫𑀸𑀢𑀺𑀓𑀁. 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫𑀻𑀢𑀺 𑀧𑀸𑀞𑀲𑁂𑀲𑁄. 𑀉𑀤𑀓𑀯𑀲𑁂𑀦𑀸𑀢𑀺 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀁. 𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀦𑁆𑀢𑀺 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀫𑁂𑀯. 𑀇𑀤𑀁 𑀲𑀳𑀢𑁆𑀣𑁂𑀦 𑀘 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀘 𑀓𑀭𑁄𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀲𑁆𑀲𑀲𑀫𑁆𑀧𑀸𑀤𑀦𑀢𑁆𑀣’’𑀦𑁆𑀢𑀺 𑀏𑀯𑀁 𑀅𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀫𑁆𑀧𑀺 𑀧𑀦 𑀲𑀬𑀁 𑀅𑀓𑀢𑁆𑀯𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀡𑀸𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀓𑀧𑁆𑀧𑀺𑀬𑀓𑀸𑀭𑀓𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀲𑀳𑀢𑁆𑀣𑀸𑀤𑀺𑀦𑀸 𑀓𑀢𑀢𑀴𑀸𑀓𑀢𑁆𑀢𑀸 𑀅𑀲𑁆𑀲𑀸𑀭𑀼𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀞𑀧𑁂𑀦𑁆𑀢𑀲𑁆𑀲 𑀧𑀦 𑀢𑀁 𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀆𑀧𑀢𑁆𑀢𑀺 𑀦 𑀧𑀜𑁆𑀜𑀸𑀬𑀢𑀺, 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦 𑀯𑀸 𑀏𑀢𑁆𑀣 𑀆𑀧𑀢𑁆𑀢𑀺 ¶ 𑀕𑀳𑁂𑀢𑀩𑁆𑀩𑀸. 𑀅𑀮𑀚𑁆𑀚𑀺𑀦𑀸 𑀓𑀸𑀭𑀸𑀧𑀺𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑀸’’𑀢𑀺, 𑀫𑀢𑁆𑀢𑀺𑀓𑀼𑀤𑁆𑀥𑀭𑀡𑀸𑀤𑀻𑀲𑀼 𑀓𑀸𑀭𑀸𑀧𑀺𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁧. 𑀦𑀯𑀲𑀲𑁆𑀲𑁂𑀢𑀺 𑀅𑀓𑀢𑀧𑀼𑀩𑁆𑀩𑁂 𑀓𑁂𑀤𑀸𑀭𑁂. 𑀓𑀳𑀸𑀧𑀡𑁂𑀢𑀺 𑀇𑀫𑀺𑀦𑀸 𑀥𑀜𑁆𑀜𑀼𑀝𑁆𑀞𑀸𑀧𑀦𑁂 𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂𑀢𑀺 ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀏𑀢𑁆𑀢𑀓𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑁂. 𑀥𑀜𑁆𑀜𑀼𑀝𑁆𑀞𑀸𑀧𑀦𑁂 𑀓𑀲𑀢𑀺, 𑀧𑀬𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯, 𑀦 𑀓𑀳𑀸𑀧𑀡𑀼𑀝𑁆𑀞𑀸𑀧𑀦𑁂 𑀯𑀺𑀬. ‘‘𑀓𑀲𑀣 𑀯𑀧𑀣𑀸’’𑀢𑀺 𑀯𑀘𑀦𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀧𑁆𑀧𑀺𑀬𑀁 𑀲𑀺𑀬𑀸𑀢𑀺 𑀆𑀳 ‘‘𑀅𑀯𑀢𑁆𑀯𑀸’’𑀢𑀺. 𑀏𑀢𑁆𑀢𑀓𑁄 𑀦𑀸𑀫 𑀪𑀸𑀕𑁄𑀢𑀺 𑀏𑀢𑁆𑀣 𑀏𑀢𑁆𑀢𑀓𑁄 𑀓𑀳𑀸𑀧𑀡𑁄𑀢𑀺 𑀇𑀤𑀫𑁆𑀧𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀣𑀸𑀯𑀼𑀢𑁆𑀢𑁂𑀧𑀺 𑀳𑀺 𑀢𑀤𑀸 𑀓𑀳𑀸𑀧𑀡𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀺 ¶ 𑀏𑀯. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀢𑀁 𑀅𑀓𑀧𑁆𑀧𑀺𑀬’’𑀦𑁆𑀢𑀺. 𑀢𑀲𑁆𑀲 𑀧𑀦 𑀲𑀩𑁆𑀩𑀧𑀬𑁄𑀕𑁂𑀲𑀼 𑀧𑀭𑀺𑀪𑁄𑀕𑁂 𑀘 𑀤𑀼𑀓𑁆𑀓𑀝𑀁. 𑀓𑁂𑀘𑀺 𑀧𑀦 𑀥𑀜𑁆𑀜𑀧𑀭𑀺𑀪𑁄𑀕𑁂 𑀏𑀯 𑀆𑀧𑀢𑁆𑀢𑀺, 𑀦 𑀧𑀼𑀩𑁆𑀩𑀪𑀸𑀕𑁂𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀬𑁂𑀦 𑀫𑀺𑀦𑀦𑀭𑀓𑁆𑀔𑀡𑀸𑀤𑀺𑀦𑀸 𑀧𑀬𑁄𑀕𑁂𑀦 𑀧𑀘𑁆𑀙𑀸 𑀥𑀜𑁆𑀜𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺 𑀳𑁄𑀢𑀺 𑀢𑀲𑁆𑀲 𑀧𑀬𑁄𑀕𑀲𑁆𑀲 𑀓𑀭𑀡𑁂 𑀅𑀦𑀸𑀧𑀢𑁆𑀢𑀺𑀬𑀸 𑀅𑀬𑀼𑀢𑁆𑀢𑀢𑁆𑀢𑀸. 𑀧𑀭𑀺𑀬𑀸𑀬𑀓𑀣𑀸𑀬 𑀧𑀦 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀢𑁂𑀦𑁂𑀯 ‘‘𑀏𑀢𑁆𑀢𑀓𑁂𑀳𑀺 𑀯𑀻𑀳𑀻𑀳𑀺 𑀇𑀤𑀜𑁆𑀘𑀺𑀤𑀜𑁆𑀘 𑀆𑀳𑀭𑀣𑀸’’𑀢𑀺 𑀦𑀺𑀬𑀫𑀯𑀘𑀦𑁂 𑀅𑀓𑀧𑁆𑀧𑀺𑀬𑀁 𑀯𑀼𑀢𑁆𑀢𑀁. 𑀓𑀳𑀸𑀧𑀡𑀯𑀺𑀘𑀸𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀯𑀢𑁆𑀣𑀼 𑀘 𑀏𑀯𑀭𑀽𑀧𑀁 𑀦𑀸𑀫 𑀲𑀁𑀯𑀺𑀚𑁆𑀚𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀭𑀚𑁆𑀚𑀼𑀬𑀸 𑀯𑀸 𑀤𑀡𑁆𑀟𑁂𑀦 𑀯𑀸𑀢𑀺 𑀏𑀢𑁆𑀣 ‘‘𑀧𑀸𑀤𑁂𑀳𑀺𑀧𑀺 𑀫𑀺𑀦𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀔𑀮𑁂 𑀯𑀸 𑀞𑀢𑁆𑀯𑀸 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 𑀧𑀦 𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀸 𑀕𑀡𑁆𑀳𑀣𑀸’’𑀢𑀺 𑀦𑀺𑀯𑀸𑀭𑁂𑀦𑁆𑀢𑁄 𑀭𑀓𑁆𑀔𑀢𑀺 𑀦𑀸𑀫, 𑀲𑀘𑁂 𑀧𑀦 𑀅𑀯𑀺𑀘𑀸𑀭𑁂𑀢𑁆𑀯𑀸 𑀓𑁂𑀯𑀮𑀁 𑀢𑀼𑀡𑁆𑀳𑀻𑀪𑀽𑀢𑁄𑀯 𑀭𑀓𑁆𑀔𑀡𑀢𑁆𑀣𑀸𑀬 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀯𑀝𑁆𑀝𑀢𑀺. ‘‘𑀲𑀘𑁂𑀧𑀺 𑀢𑀲𑁆𑀫𑀺𑀁 𑀢𑀼𑀡𑁆𑀳𑀻𑀪𑀽𑀢𑁂 𑀘𑁄𑀭𑀺𑀓𑀸𑀬 𑀳𑀭𑀦𑁆𑀢𑀺, ‘𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀸’𑀢𑀺 𑀏𑀯𑀁 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀦𑀻𑀳𑀭𑀸𑀧𑁂𑀢𑀺 𑀧𑀝𑀺𑀲𑀸𑀫𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀘𑁂 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀼𑀩𑁆𑀩𑀲𑁆𑀲 𑀅𑀦𑀼𑀧𑁆𑀧𑀸𑀤𑀺𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀢𑀲𑁆𑀲𑁂𑀯𑁂𑀢𑀁 𑀅𑀓𑀧𑁆𑀧𑀺𑀬’’𑀦𑁆𑀢𑀺.

𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁, 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀢𑀸 𑁋 𑀦𑀦𑀼 𑀘 𑀤𑀼𑀩𑁆𑀩𑀺𑀘𑀸𑀭𑀺𑀢𑀫𑀢𑁆𑀢𑁂𑀦 𑀢𑀲𑁆𑀲𑁂𑀯𑁂𑀢𑀁 𑀅𑀓𑀧𑁆𑀧𑀺𑀬𑀁, 𑀦 𑀲𑀩𑁆𑀩𑁂𑀲𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂 𑀘𑀢𑀼𑀢𑁆𑀣𑀧𑀢𑁆𑀢𑁄 𑀯𑀺𑀬. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁯) ‘‘𑀬𑁄 𑀧𑀦 𑀭𑀽𑀧𑀺𑀬𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’𑀢𑀺 𑀧𑀳𑀺𑀢𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀻’𑀢𑀺 𑀓𑀳𑀸𑀧𑀡𑁂 𑀤𑀸𑀧𑁂𑀢𑁆𑀯𑀸 𑀕𑀳𑀺𑀢𑁄, 𑀅𑀬𑀁 𑀧𑀢𑁆𑀢𑁄 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺 ¶ 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸 ¶ , 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺 𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸’’𑀢𑀺, 𑀢𑀲𑁆𑀫𑀸 𑀬𑀁 𑀢𑁂 𑀆𑀳𑀭𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀏𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀓𑀳𑀸𑀧𑀡𑁂 𑀲𑀸𑀤𑀺𑀬𑀺𑀢𑁆𑀯𑀸 𑀯𑀺𑀘𑀸𑀭𑀺𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺, 𑀲𑀗𑁆𑀖𑀺𑀓𑀢𑁆𑀢𑀸 𑀘 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀅𑀲𑀸𑀤𑀺𑀬𑀺𑀢𑁆𑀯𑀸𑀧𑀺 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀓𑀢𑁄 𑀳𑁄𑀢𑀺, 𑀲𑀗𑁆𑀖𑀺𑀓𑀢𑁆𑀢𑀸 𑀘 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀻’’𑀢𑀺 𑀯𑀤𑀦𑁆𑀢𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 𑀢𑀻𑀲𑀼𑀧𑀺 𑀇𑀤𑀁 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑀧𑀢𑁆𑀢𑁄 𑀕𑀺𑀳𑀺𑀲𑀦𑁆𑀢𑀓𑀸𑀦𑀁𑀬𑁂𑀯 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀓𑀧𑁆𑀧𑀢𑀺, 𑀇𑀥 𑀧𑀦 𑀲𑀗𑁆𑀖𑀺𑀓𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀻’’𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀤𑁄 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀢𑁆𑀢𑁄𑀬𑁂𑀯𑀸𑀢𑀺.

𑁬𑁨. 𑀘𑀢𑀼𑀲𑀸𑀮𑀤𑁆𑀯𑀸𑀭𑁂𑀢𑀺 𑀪𑁄𑀚𑀦𑀲𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁬𑁩. ‘‘𑀯𑀦𑀁 𑀤𑀫𑁆𑀫𑀺, 𑀅𑀭𑀜𑁆𑀜𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀫𑀁 𑀤𑁂𑀫𑀸𑀢𑀺 𑀯𑀺𑀳𑀸𑀭𑀲𑀻𑀫𑀸𑀤𑀺𑀲𑀸𑀥𑀸𑀭𑀡𑀯𑀘𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀬𑁂𑀦 𑀓𑀣𑀺𑀢𑀢𑁆𑀢𑀸𑀢𑀺 ‘‘𑀕𑀡𑁆𑀳𑀸𑀳𑀻’’𑀢𑀺 𑀅𑀯𑀢𑁆𑀯𑀸 ‘‘𑀲𑀻𑀫𑀸 𑀕𑀢𑀸’’𑀢𑀺 𑀧𑀭𑀺𑀬𑀸𑀬𑁂𑀦 𑀓𑀣𑀺𑀢𑀢𑁆𑀢𑀸. 𑀧𑀓𑀢𑀺𑀪𑀽𑀫𑀺𑀓𑀭𑀡𑀢𑁆𑀣𑀁 ‘‘𑀳𑁂𑀝𑁆𑀞𑀸 𑀕𑀳𑀺𑀢𑀁 𑀧𑀁𑀲𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀲𑀁 𑀤𑀫𑁆𑀫𑀻𑀢𑀺 𑀏𑀢𑁆𑀣 ‘‘𑀫𑀦𑀼𑀲𑁆𑀲𑀁 𑀤𑀫𑁆𑀫𑀻𑀢𑀺 𑀯𑀼𑀢𑁆𑀢𑁂 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑀲𑁆𑀲𑀧𑀺 𑀤𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀆𑀭𑀸𑀫𑀺𑀓’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑀜𑁆𑀘 𑀔𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑁂𑀦 𑀕𑀳𑀺𑀢𑀧𑀭𑀺𑀪𑀼𑀢𑁆𑀢𑀓𑁆𑀓𑀫𑁂𑀦, 𑀦 𑀕𑀳𑀝𑁆𑀞𑀸𑀦𑀁 𑀤𑀸𑀲𑀧𑀭𑀺𑀪𑁄𑀕𑀓𑁆𑀓𑀫𑁂𑀦. 𑀔𑁂𑀢𑁆𑀢𑀸𑀤𑀬𑁄 𑀧𑀦 𑀲𑀩𑁆𑀩𑁂 𑀲𑀗𑁆𑀖𑀲𑁆𑀲𑁂𑀯 𑀯𑀝𑁆𑀝𑀦𑁆𑀢𑀺 𑀧𑀸𑀴𑀺𑀬𑀁 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀕𑀳𑁂𑀢𑀼𑀁 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀓𑁆𑀓𑀼𑀝𑀲𑀽𑀓𑀭𑁂…𑀧𑁂… 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀓𑀼𑀓𑁆𑀓𑀼𑀝𑀲𑀽𑀓𑀭𑁂𑀲𑀼 𑀤𑀻𑀬𑀫𑀸𑀦𑁂𑀲𑀼 ‘‘𑀇𑀫𑁂𑀳𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀲𑀼𑀔𑀁 𑀚𑀻𑀯𑀦𑁆𑀢𑀼, 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 ¶ . 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀲𑀼𑀢𑁆𑀢𑀦𑁆𑀢𑁂𑀲𑀼 𑀆𑀕𑀢𑀧𑀝𑀺𑀓𑁆𑀔𑁂𑀧𑁄 𑀪𑀕𑀯𑀢𑀸 𑀆𑀧𑀢𑁆𑀢𑀺𑀬𑀸𑀧𑀺 𑀳𑁂𑀢𑀼𑀪𑀸𑀯𑁂𑀦 𑀓𑀢𑁄𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀫𑀳𑀸𑀣𑁂𑀭𑁂𑀳𑀺 𑀔𑁂𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀺𑀲𑁆𑀲𑀺𑀢𑁄 𑀅𑀬𑀁 𑀲𑀩𑁆𑀩𑁄𑀧𑀺 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑁬𑁪. 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺 𑀘𑀻𑀯𑀭𑀫𑀽𑀮𑀁. 𑀧𑀳𑀺𑀡𑁂𑀬𑁆𑀬𑀸𑀢𑀺 𑀧𑁂𑀲𑁂𑀬𑁆𑀬. 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀅𑀘𑁆𑀙𑀸𑀤𑁂𑀳𑀻𑀢𑀺 ¶ 𑀯𑁄𑀳𑀸𑀭𑀯𑀘𑀦𑀫𑁂𑀢𑀁, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀆𑀪𑀢𑀦𑁆𑀢𑀺 𑀆𑀦𑀻𑀢𑀁.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁨𑁮-𑁫𑁩𑁧) 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀢𑀸 𑁋 𑀏𑀢𑁆𑀣 𑀘 𑀬𑀁 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻𑀢𑀺 𑀇𑀤𑀁 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀘𑁂 𑀳𑀺 ‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’𑀢𑀺 𑀧𑁂𑀲𑁂𑀬𑁆𑀬, 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀢𑁆𑀢𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸’’𑀢𑀺, 𑀢𑀢𑁆𑀣 𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀺𑀬𑀸 𑀯𑀸 𑀅𑀲𑀼𑀤𑁆𑀥𑀺𑀬𑀸 𑀯𑀸 𑀯𑀺𑀲𑁂𑀲𑀧𑁆𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀺. 𑀲𑀢𑀺𑀧𑀺 𑀳𑀺 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀪𑀸𑀯𑁂 𑀤𑀽𑀢𑁄 𑀅𑀢𑁆𑀢𑀦𑁄 𑀓𑀼𑀲𑀮𑀢𑀸𑀬 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀤𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀇𑀤𑀁 𑀦𑀢𑁆𑀣𑀺, 𑀦 𑀘 𑀤𑀽𑀢𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑁂 𑀤𑀸𑀬𑀓𑁂𑀦 ‘‘𑀇𑀤𑀁 𑀓𑀣𑀁 𑀧𑁂𑀲𑀺𑀢’’𑀦𑁆𑀢𑀺 𑀈𑀤𑀺𑀲𑀻 𑀯𑀺𑀘𑀸𑀭𑀡𑀸 𑀉𑀧𑀮𑀩𑁆𑀪𑀢𑀺, 𑀅𑀯𑀺𑀘𑀸𑀭𑁂𑀢𑁆𑀯𑀸 𑀘 𑀢𑀁 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀬𑀤𑀺 𑀧𑀦 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀢𑁆𑀢𑀸 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬, 𑀘𑀻𑀯𑀭𑀸𑀦𑀁 𑀅𑀢𑁆𑀣𑀸𑀬 𑀤𑀽𑀢𑀲𑁆𑀲 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑁂𑀲𑀺𑀢𑁂 𑀲𑀩𑁆𑀩𑀢𑁆𑀣 𑀤𑀸𑀬𑀓𑁂𑀦 𑀓𑀣𑀁 𑀧𑁂𑀲𑀺𑀢𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀲𑀢𑀺𑀧𑀺 ¶ 𑀆𑀕𑀫𑀦𑀲𑀼𑀤𑁆𑀥𑀺𑀬𑀁 𑀲𑀘𑁂 𑀲𑁄 𑀤𑀽𑀢𑁄 𑀅𑀢𑁆𑀢𑀦𑁄 𑀓𑀼𑀲𑀮𑀢𑀸𑀬 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦 𑀯𑀤𑀢𑀺, 𑀤𑀽𑀢𑀲𑁆𑀲𑁂𑀯 𑀯𑀘𑀦𑀁 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀆𑀕𑀫𑀦𑀲𑀼𑀤𑁆𑀥𑀺𑀬𑁂𑀯𑁂𑀢𑁆𑀣 𑀧𑀫𑀸𑀡𑀁, 𑀫𑀽𑀮𑀲𑁆𑀲𑀸𑀫𑀺𑀓𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦 𑀧𑁂𑀲𑀺𑀢𑀲𑁆𑀲 𑀤𑀽𑀢𑀲𑁆𑀲 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦 𑀯𑀤𑀢𑁄𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀤𑀽𑀢𑀯𑀘𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦𑀸𑀢𑀺𑀆𑀤𑀺𑀦𑀸 𑀧𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀓𑀧𑁆𑀧𑀺𑀬𑀯𑀲𑁂𑀦 𑀆𑀪𑀢𑀫𑁆𑀧𑀺 𑀘𑀻𑀯𑀭𑀫𑀽𑀮𑀁 𑀈𑀤𑀺𑀲𑁂𑀦 𑀤𑀽𑀢𑀯𑀘𑀦𑁂𑀦 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑁄 𑀤𑀽𑀢𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄𑀢𑀺𑀆𑀤𑀻’’𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁩𑁮-𑁫𑁩𑁯) 𑀧𑀦 𑀏𑀯𑀁 𑀯𑀼𑀢𑁆𑀢𑀁 𑁋 𑀬𑀁 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻𑀢𑀺 𑀇𑀤𑀁 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀘𑁂 𑀳𑀺 ‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’𑀢𑀺 𑀧𑁂𑀲𑁂𑀬𑁆𑀬, 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀢𑁆𑀢𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸’’𑀢𑀺, 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀽𑀢𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 ‘‘𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀏𑀯𑀁 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀅𑀲𑀢𑀺, 𑀲𑀺𑀓𑁆𑀔𑀸𑀧𑀤𑁂 ¶ 𑀆𑀕𑀢𑀦𑀬𑁂𑀦 𑀤𑀽𑀢𑀯𑀘𑀦𑁂 𑀘 𑀅𑀲𑀼𑀤𑁆𑀥𑁂 𑀲𑀩𑁆𑀩𑀣𑀸 𑀧𑀝𑀺𑀓𑁆𑀔𑁂𑀧𑁄𑀬𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀦 ‘‘𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺 𑀯𑀢𑁆𑀢𑀼𑀁, 𑀢𑀤𑀦𑀼𑀲𑀸𑀭𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀜𑁆𑀘 𑀦𑀺𑀤𑁆𑀤𑀺𑀲𑀺𑀢𑀼𑀁 𑀆𑀕𑀫𑀦𑀤𑀽𑀢𑀯𑀘𑀦𑀸𑀦𑀁 𑀉𑀪𑀺𑀦𑁆𑀦𑀁 𑀅𑀲𑀼𑀤𑁆𑀥𑀢𑁆𑀢𑀸, 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀧𑀦 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀲𑀢𑀺 𑀤𑀽𑀢𑀯𑀘𑀦𑁂 𑀅𑀲𑀼𑀤𑁆𑀥𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀦𑀬𑁂𑀦 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀘 𑀬𑀣𑀸 𑀤𑀽𑀢𑀯𑀘𑀦𑀸𑀲𑀼𑀤𑁆𑀥𑀺𑀬𑀫𑁆𑀧𑀺 𑀆𑀕𑀫𑀦𑁂 𑀲𑀼𑀤𑁆𑀥𑁂 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀆𑀕𑀫𑀦𑀸𑀲𑀼𑀤𑁆𑀥𑀺𑀬𑀫𑁆𑀧𑀺 𑀤𑀽𑀢𑀯𑀘𑀦𑁂 𑀲𑀼𑀤𑁆𑀥𑁂 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀢𑁄 ¶ 𑀲𑀺𑀤𑁆𑀥𑁄𑀯 𑀳𑁄𑀢𑀺. 𑀉𑀪𑀬𑀲𑀼𑀤𑁆𑀥𑀺𑀬𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀉𑀪𑀬𑀸𑀲𑀼𑀤𑁆𑀥𑀺𑀧𑀓𑁆𑀔𑀫𑁂𑀯 𑀲𑀦𑁆𑀥𑀸𑀬 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀦𑁂𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁩𑁭-𑁫𑁩𑁯) ‘‘𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀺𑀬𑀸 𑀯𑀸 𑀅𑀲𑀼𑀤𑁆𑀥𑀺𑀬𑀸 𑀯𑀸 𑀯𑀺𑀲𑁂𑀲𑀧𑁆𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀼𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀆𑀕𑀫𑀦𑀲𑀼𑀤𑁆𑀥𑀺𑀆𑀤𑀺𑀦𑀸 𑀲𑀧𑁆𑀧𑀬𑁄𑀚𑀦𑀢𑁆𑀢𑀸. 𑀬𑁄 𑀧𑀦𑁂𑀢𑁆𑀣 ‘‘𑀫𑀽𑀮𑀲𑁆𑀲𑀸𑀫𑀺𑀓𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀯𑀲𑁂𑀦, 𑀧𑁂𑀲𑀺𑀢𑀤𑀽𑀢𑀲𑁆𑀲 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀤𑀢𑁄𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬𑀸’’𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀯𑀼𑀢𑁆𑀢𑁄, 𑀲𑁄 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀏𑀯 𑀦 𑀳𑁄𑀢𑀺 𑀅𑀪𑀺𑀫𑀢𑀢𑁆𑀢𑀸. 𑀢𑀣𑀸 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀏𑀯 ‘‘𑀧𑀝𑀺𑀕𑁆𑀕𑀡𑁆𑀳𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀤𑀢𑁄 𑀤𑀽𑀢𑀲𑁆𑀲 𑀓𑀧𑁆𑀧𑀺𑀬𑁂𑀦 𑀓𑀫𑁆𑀫𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀯𑀼𑀢𑁆𑀢𑁄 𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀢𑁆𑀢𑀸, 𑀆𑀕𑀫𑀦𑀲𑁆𑀲𑀧𑀺 𑀅𑀲𑀼𑀤𑁆𑀥𑀺𑀬𑀁 𑀧𑀦 𑀓𑀧𑁆𑀧𑀺𑀬𑁂𑀦𑀧𑀺 𑀓𑀫𑁆𑀫𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀯𑀸𑀢𑀺 𑀅𑀢𑁆𑀣𑁂𑀯 𑀆𑀕𑀫𑀦𑀲𑁆𑀲 𑀲𑀼𑀤𑁆𑀥𑀺𑀅𑀲𑀼𑀤𑁆𑀥𑀺𑀬𑀸 𑀧𑀬𑁄𑀚𑀦𑀁. 𑀓𑀣𑀁 𑀧𑀦 𑀤𑀽𑀢𑀯𑀘𑀦𑁂𑀦 𑀆𑀕𑀫𑀦𑀲𑀼𑀤𑁆𑀥𑀺 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀸𑀬𑀁 𑀪𑀸𑀭𑁄. 𑀤𑀽𑀢𑁂𑀦 𑀳𑀺 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑁂 𑀏𑀯 𑀆𑀕𑀫𑀦𑀲𑀼𑀤𑁆𑀥𑀺 𑀕𑀯𑁂𑀲𑀺𑀢𑀩𑁆𑀩𑀸, 𑀦 𑀇𑀢𑀭𑀢𑁆𑀣. 𑀢𑀢𑁆𑀣 𑀘 𑀢𑀲𑁆𑀲 𑀯𑀘𑀦𑀓𑁆𑀓𑀫𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀬𑀼𑀢𑁆𑀢𑀺𑀆𑀤𑀻𑀳𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀇𑀥𑀸𑀧𑀺 𑀳𑀺 𑀲𑀺𑀓𑁆𑀔𑀸𑀧𑀤𑁂 ‘‘𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢’’𑀦𑁆𑀢𑀺 𑀤𑀽𑀢𑀯𑀘𑀦𑁂𑀦𑁂𑀯 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀤𑀸𑀢𑀼𑀁 𑀧𑁂𑀲𑀺𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀲𑀩𑁆𑀩𑀣𑀸 𑀆𑀕𑀫𑀦𑀲𑀼𑀤𑁆𑀥𑀺 𑀦 𑀯𑀺𑀜𑁆𑀜𑀸𑀬𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀏𑀯 𑀓𑀢𑁆𑀢𑀩𑁆𑀩𑁄𑀢𑀺.

𑀲𑀼𑀯𑀡𑁆𑀡𑀁 𑀭𑀚𑀢𑀁 𑀓𑀳𑀸𑀧𑀡𑁄 𑀫𑀸𑀲𑀓𑁄𑀢𑀺 𑀇𑀫𑀸𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀦𑀺, 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 ¶ 𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀤𑀸𑀲𑀺𑀤𑀸𑀲𑀁 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀇𑀫𑀸𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀺 𑀘 𑀅𑀢𑁆𑀢𑀦𑁄 𑀯𑀸 𑀘𑁂𑀢𑀺𑀬𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦 𑀔𑁄 𑀫𑀬𑀁 𑀆𑀯𑀼𑀲𑁄 ¶ 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺𑀆𑀤𑀺 𑀤𑀽𑀢𑀯𑀘𑀦𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑁂𑀧𑀺 𑀆𑀕𑀫𑀦𑀲𑀼𑀤𑁆𑀥𑀺𑀬𑀸 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀸𑀮𑁂𑀦 𑀓𑀧𑁆𑀧𑀺𑀬𑀦𑁆𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦 𑀬𑀤𑀸 𑀦𑁄 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀓𑀧𑁆𑀧𑀺𑀬𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀅𑀢𑁆𑀣𑁄. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺 𑀓𑀺𑀘𑁆𑀘𑀓𑀭𑁄, 𑀓𑀧𑁆𑀧𑀺𑀬𑀓𑀸𑀭𑀓𑁄𑀢𑀺 𑀅𑀢𑁆𑀣𑁄. ‘‘𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄’’𑀢𑀺 𑀇𑀤𑀁 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀓𑀧𑁆𑀧𑀺𑀬𑀯𑀘𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑀁. 𑀲𑀘𑁂 𑀧𑀦 𑀤𑀽𑀢𑁄 ‘‘𑀓𑁄 𑀇𑀫𑀁 𑀕𑀡𑁆𑀳𑀸𑀢𑀺, 𑀓𑀲𑁆𑀲 𑀯𑀸 𑀤𑁂𑀫𑀻’’𑀢𑀺 𑀯𑀤𑀢𑀺, 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸𑀢𑀺 𑀇𑀤𑀁 𑀲𑀸𑀭𑀼𑀧𑁆𑀧𑀢𑀸𑀬 𑀯𑀼𑀢𑁆𑀢𑀁, 𑀞𑀧𑁂𑀢𑁆𑀯𑀸 𑀧𑀦 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀬𑁄 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀝𑁆𑀝𑀢𑀺. 𑀏𑀲𑁄 𑀔𑁄 𑀆𑀯𑀼𑀲𑁄 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺 𑀇𑀤𑀁 𑀤𑀽𑀢𑁂𑀦 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀧𑀼𑀘𑁆𑀙𑀺𑀢𑀢𑁆𑀢𑀸 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀲𑁆𑀲 𑀓𑀧𑁆𑀧𑀺𑀬𑀯𑀘𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀫𑁂𑀯 𑀳𑀺 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑀁, 𑀦 𑀯𑀢𑁆𑀢𑀩𑁆𑀩𑀁 ‘‘𑀢𑀲𑁆𑀲 𑀤𑁂𑀳𑀻’’𑀢𑀺𑀆𑀤𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀦 𑀯𑀢𑁆𑀢𑀩𑁆𑀩𑁄 𑀢𑀲𑁆𑀲 𑀤𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁩𑁮-𑁫𑁩𑁯) 𑀧𑀦 ‘‘𑀏𑀲𑁄 𑀔𑁄…𑀧𑁂… 𑀦 𑀯𑀢𑁆𑀢𑀩𑁆𑀩𑁄 𑀢𑀲𑁆𑀲 𑀤𑁂𑀳𑀻𑀢𑀺𑀆𑀤𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑀸𑀤𑀺𑀬𑀦𑀧𑀭𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀡𑀢𑁆𑀢𑁄 𑀲𑁄 𑀫𑀬𑀸𑀢𑀺 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀘𑀻𑀯𑀭𑀁 𑀤𑀲𑁆𑀲𑀢𑀺, 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀲𑀜𑁆𑀜𑀢𑁆𑀢𑁄𑀢𑀺𑀆𑀤𑀺 𑀏𑀯𑀁 𑀤𑀽𑀢𑁂𑀦 𑀧𑀼𑀦 𑀯𑀼𑀢𑁆𑀢𑁂 ¶ 𑀏𑀯 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀇𑀢𑀭𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀧𑀸𑀴𑀺𑀬𑀁 ‘‘𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸’’𑀢𑀺 𑀆𑀕𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑁄, 𑀧𑀼𑀭𑀺𑀫𑀯𑀸𑀓𑁆𑀬𑁂 𑀧𑀦 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑁂 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁬𑁪) ‘‘𑀆𑀡𑀢𑁆𑀢𑁄 𑀲𑁄 𑀫𑀬𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑁄, 𑀢𑁂𑀦 𑀘 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀲𑀜𑁆𑀜𑀸𑀧𑀺𑀢𑀪𑀸𑀯𑁂 𑀤𑀽𑀢𑁂𑀦 𑀪𑀺𑀓𑁆𑀔𑀼𑀲𑁆𑀲 𑀧𑀼𑀦 𑀆𑀭𑁄𑀘𑀺𑀢𑁂 𑀏𑀯 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘𑁄𑀤𑁂𑀢𑀩𑁆𑀩𑁄 𑀳𑁄𑀢𑀺, 𑀦 𑀅𑀦𑀸𑀭𑁄𑀘𑀺𑀢𑁂𑀢𑀺 𑀤𑀲𑁆𑀲𑁂𑀢𑀺.

𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸𑀢𑀺 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀫𑁂𑀢𑀁. 𑀇𑀤𑀁 𑀯𑀸 𑀳𑀺 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀢𑁆𑀢𑀩𑁆𑀩𑁄. 𑀤𑁂𑀳𑀺 𑀫𑁂 𑀘𑀻𑀯𑀭𑀦𑁆𑀢𑀺𑀆𑀤𑀻𑀦𑀺 𑀧𑀦 𑀦 𑀯𑀢𑁆𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀏𑀢𑀸𑀦𑀺 𑀳𑀺 𑀯𑀘𑀦𑀸𑀦𑀺, 𑀏𑀢𑁂𑀲𑀁 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀦 𑀯𑀢𑁆𑀢𑀩𑁆𑀩𑁄. ‘‘𑀏𑀯𑀁 𑀯𑀤𑀦𑁆𑀢𑁄 𑀘 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀘𑁄𑀤𑀦𑀸 𑀧𑀦 𑀳𑁄𑀢𑀺𑀬𑁂𑀯𑀸’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁩𑁮-𑁫𑁩𑁯) 𑀧𑀦 ‘‘𑀦 𑀯𑀢𑁆𑀢𑀩𑁆𑀩𑁄 ‘𑀤𑁂𑀳𑀺 𑀫𑁂 𑀘𑀻𑀯𑀭𑀁…𑀧𑁂… 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’𑀦𑁆𑀢𑀺 𑀇𑀤𑀁 𑀤𑀽𑀢𑁂𑀦𑀸𑀪𑀢𑀭𑀽𑀧𑀺𑀬𑀁 ¶ 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀢𑁆𑀢𑀦𑀸 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀢𑁆𑀢𑀸𑀯 ‘𑀤𑁂𑀳𑀺 𑀫𑁂 𑀘𑀻𑀯𑀭𑀁…𑀧𑁂… 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’𑀦𑁆𑀢𑀺 𑀯𑀤𑀦𑁆𑀢𑁄 𑀭𑀽𑀧𑀺𑀬𑀲𑁆𑀲 𑀧𑀓𑀢𑀢𑁆𑀢𑀸 𑀢𑁂𑀦 𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘𑀤𑁂𑀳𑀺 𑀘𑁂𑀢𑀸𑀧𑁂𑀳𑀻’𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀁 𑀤𑁄𑀲𑀁 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀢𑀼𑀁 𑀯𑀼𑀢𑁆𑀢𑀁 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑁂𑀦 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂 𑀯𑀺𑀬. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘𑀦 𑀯𑀢𑁆𑀢𑀩𑁆𑀩𑁄 𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪), 𑀢𑀲𑁆𑀫𑀸 𑀦 𑀇𑀤𑀁 𑀯𑀺𑀜𑁆𑀜𑀢𑁆𑀢𑀺𑀤𑁄𑀲𑁂 𑀧𑀭𑀺𑀯𑀚𑁆𑀚𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ‘𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸’𑀢𑀺𑀧𑀺 𑀅𑀯𑀢𑁆𑀢𑀩𑁆𑀩𑀢𑀸𑀧𑁆𑀧𑀲𑀗𑁆𑀕𑀢𑁄. 𑀢𑁂𑀦𑁂𑀯 𑀤𑀽𑀢𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀗𑁆𑀓𑀸𑀪𑀸𑀯𑀢𑁄 𑀅𑀜𑁆𑀜𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 ¶ 𑀞𑀧𑁂𑀢𑁆𑀯𑀸𑀧𑀺 𑀆𑀳𑀭𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 ‘‘𑀤𑀽𑀢𑁂𑀦 𑀞𑀧𑀺𑀢𑀭𑀽𑀧𑀺𑀬𑁂𑀦 𑀘𑁂𑀢𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀆𑀳𑀭𑀸𑀧𑁂𑀳𑀻’’𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀘𑀻𑀯𑀭𑀁 𑀆𑀳𑀭𑀸𑀧𑁂𑀳𑀻’’𑀢𑀺 𑀏𑀯𑀁 𑀆𑀳𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁.

𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑁄𑀤𑁂𑀦𑁆𑀢𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺 𑀅𑀢𑁆𑀢𑀦𑁄 𑀧𑀝𑀺𑀮𑀸𑀪𑀯𑀲𑁂𑀦, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁 𑀲𑀸𑀥𑀼 𑀲𑀼𑀝𑁆𑀞𑀼 𑀲𑀼𑀦𑁆𑀤𑀭𑀁. 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩𑀦𑁆𑀢𑀺 𑀞𑀸𑀦𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀫𑁂𑀢𑀁. 𑀙𑀓𑁆𑀔𑀢𑁆𑀢𑀼𑀧𑀭𑀫𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀫𑁂𑀢𑀁. 𑀙𑀓𑁆𑀔𑀢𑁆𑀢𑀼𑀧𑀭𑀫𑀦𑁆𑀢𑀺 𑀏𑀢𑁂𑀦 𑀘𑀻𑀯𑀭𑀁 𑀉𑀤𑁆𑀤𑀺𑀲𑁆𑀲 𑀢𑀼𑀡𑁆𑀳𑀻𑀪𑀽𑀢𑁂𑀦𑁂𑀯 𑀞𑀸𑀢𑀩𑁆𑀩𑀁, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀦𑁆𑀢𑀺 𑀇𑀤𑀁 𑀞𑀸𑀦𑀮𑀓𑁆𑀔𑀡𑀁. 𑀢𑁂𑀦𑁂𑀯 ‘‘𑀦 𑀆𑀲𑀦𑁂𑀢𑀺𑀆𑀤𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀤𑁆𑀤𑀲𑀢𑁆𑀣𑁂 𑀧𑀦 𑁋

‘‘𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀲𑀢𑁆𑀣𑁂, 𑀯𑀼𑀢𑁆𑀢𑀁 𑀥𑀸𑀢𑀼𑀯𑀺𑀲𑁂𑀲𑀦𑀁;

𑀪𑀸𑀯𑀦𑀧𑀼𑀁𑀲𑀓𑀦𑁆𑀢𑁆𑀬𑁂𑀯, 𑀲𑀸𑀲𑀦𑁂 𑀲𑀫𑀼𑀤𑀻𑀭𑀺𑀢’’𑀦𑁆𑀢𑀺. 𑁋

𑀯𑀘𑀦𑀢𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀫𑁂𑀯 𑀲𑀸𑀲𑀦𑀯𑁄𑀳𑀸𑀭𑁂𑀦 𑀪𑀸𑀯𑀦𑀧𑀼𑀁𑀲𑀓𑀁 𑀦𑀸𑀫 𑀚𑀸𑀢𑀁;

‘‘𑀫𑀼𑀤𑀼𑀁 𑀧𑀘𑀢𑀺𑀇𑀘𑁆𑀘𑀢𑁆𑀭, 𑀧𑀘𑀦𑀁 𑀪𑀯𑀢𑀻𑀢𑀺 𑀘;

𑀲𑀼𑀔𑀁 𑀲𑀬𑀢𑀺𑀇𑀘𑁆𑀘𑀢𑁆𑀭, 𑀓𑀭𑁄𑀢𑀺 𑀲𑀬𑀦𑀦𑁆𑀢𑀺 𑀘𑀸’’𑀢𑀺. 𑁋

𑀯𑀘𑀦𑀢𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑁆𑀬𑀧𑀤𑀁 𑀅𑀓𑀫𑁆𑀫𑀓𑀫𑁆𑀧𑀺 𑀲𑀓𑀫𑁆𑀫𑀓𑀫𑁆𑀧𑀺 𑀪𑀽𑀥𑀸𑀢𑀼𑀓𑀭𑀥𑀸𑀢𑀽𑀳𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀜𑀸𑀬𑁂𑀦 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀞𑀸𑀦𑀁 𑀪𑀯𑀺𑀢𑀩𑁆𑀩𑀁, 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀞𑀸𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀏𑀯𑀁 𑀞𑀸𑀦𑀁 𑀪𑀯𑀺𑀢𑀩𑁆𑀩𑀁, 𑀦 𑀢𑀢𑁄 𑀅𑀥𑀺𑀓𑀁 ¶ , 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀏𑀯 𑀞𑀸𑀦𑀁 𑀓𑀸𑀢𑀩𑁆𑀩𑀁, 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 ‘‘𑀇𑀥 𑀪𑀦𑁆𑀢𑁂 𑀦𑀺𑀲𑀻𑀤𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 ‘‘𑀬𑀸𑀕𑀼𑀔𑀚𑁆𑀚𑀓𑀸𑀤𑀺𑀪𑁂𑀤𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀕𑀡𑁆𑀳𑀣 𑀪𑀦𑁆𑀢𑁂’’𑀢𑀺 𑀬𑀸𑀘𑀺𑀬𑀫𑀸𑀦𑁂𑀦𑀧𑀺 𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄𑀢𑀺 ‘‘𑀫𑀗𑁆𑀕𑀮𑀁 𑀯𑀸 𑀅𑀦𑀼𑀫𑁄𑀤𑀦𑀁 ¶ 𑀯𑀸 𑀪𑀸𑀲𑀣𑀸’’𑀢𑀺 𑀬𑀸𑀘𑀺𑀬𑀫𑀸𑀦𑁂𑀦𑀧𑀺 𑀓𑀺𑀜𑁆𑀘𑀺 𑀦 𑀪𑀸𑀲𑀺𑀢𑀩𑁆𑀩𑀁, 𑀓𑁂𑀯𑀮𑀁 ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁂𑀦 ‘‘𑀚𑀸𑀦𑀸𑀳𑀺 𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁄.

𑀞𑀸𑀦𑀁 𑀪𑀜𑁆𑀚𑀢𑀻𑀢𑀺 𑀆𑀕𑀢𑀓𑀸𑀭𑀡𑀁 𑀪𑀜𑁆𑀚𑀢𑀺 𑀓𑁄𑀧𑁂𑀢𑀺. 𑀞𑀸𑀦𑀦𑁆𑀢𑀺 𑀞𑀺𑀢𑀺𑀬𑀸 𑀘 𑀓𑀸𑀭𑀡𑀲𑁆𑀲 𑀘 𑀦𑀸𑀫𑀁, 𑀢𑀲𑁆𑀫𑀸 𑀆𑀲𑀦𑁂 𑀦𑀺𑀲𑀻𑀤𑀦𑁂𑀦 𑀞𑀸𑀦𑀁 𑀓𑀼𑀧𑁆𑀧𑀢𑀺, 𑀆𑀕𑀢𑀓𑀸𑀭𑀡𑀫𑁆𑀧𑀺, 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀧𑀦 𑀆𑀕𑀢𑀓𑀸𑀭𑀡𑀫𑁂𑀯 𑀪𑀜𑁆𑀚𑀢𑀺, 𑀦 𑀞𑀸𑀦𑀁. 𑀢𑁂𑀦𑀸𑀳 ‘‘𑀆𑀕𑀢𑀓𑀸𑀭𑀡𑀁 𑀪𑀜𑁆𑀚𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀞𑀸𑀦𑀫𑁆𑀧𑀺 𑀪𑀜𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺, 𑀝𑀻𑀓𑀸𑀬𑀫𑁆𑀧𑀺 𑀦𑀸𑀦𑀸𑀯𑀸𑀤𑁂 𑀤𑀲𑁆𑀲𑁂𑀢𑁆𑀯𑀸 𑀞𑀸𑀦𑀪𑀜𑁆𑀚𑀦𑀁 𑀯𑀼𑀢𑁆𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀅𑀲𑀁𑀲𑀦𑁆𑀤𑀦𑀢𑁄 𑀕𑀦𑁆𑀣𑀕𑀭𑀼𑀪𑀬𑁂𑀦 𑀦 𑀯𑀤𑀺𑀫𑁆𑀳. 𑀇𑀤𑀸𑀦𑀺 𑀬𑀸 𑀢𑀺𑀲𑁆𑀲𑁄 𑀘𑁄𑀤𑀦𑀸, 𑀙 𑀘 𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀘 𑀏𑀓𑀘𑁄𑀤𑀦𑀸𑀯𑀼𑀤𑁆𑀥𑀺𑀬𑀸 𑀤𑁆𑀯𑀺𑀦𑁆𑀦𑀁 𑀞𑀸𑀦𑀸𑀦𑀁 𑀳𑀸𑀦𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀘𑁄𑀤𑀦𑀸 𑀤𑁆𑀯𑀺𑀕𑀼𑀡𑀁 𑀞𑀸𑀦𑀦𑁆𑀢𑀺 𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀙𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀅𑀝𑁆𑀞𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁, 𑀲𑀓𑀺𑀁 𑀘𑁄𑀤𑁂𑀢𑁆𑀯𑀸 𑀤𑀲𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁.

𑀢𑀢𑁆𑀭 𑀢𑀢𑁆𑀭 𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀘𑁄𑀤𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀓𑁆𑀓𑀫𑁆𑀫 𑀢𑀢𑁆𑀭 𑀢𑀢𑁆𑀭 𑀉𑀤𑁆𑀤𑀺𑀲𑁆𑀲 𑀞𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁄 𑀧𑀦 𑀯𑀸𑀤𑁄 𑀦𑀸𑀦𑀸𑀤𑀺𑀯𑀲𑁂𑀲𑀽𑀢𑀺 𑀦𑀸𑀦𑀸𑀤𑀺𑀯𑀲𑁂𑀲𑀼 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀓𑁄 𑀧𑀦 𑀯𑀸𑀤𑁄, 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁, 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄𑀢𑀺 𑀇𑀤𑀁 𑀲𑀪𑀸𑀯𑀢𑁄 𑀘𑁄𑀤𑁂𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁂𑀦𑀧𑀺 𑀓𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀦 𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀦𑀼𑀪𑁄𑀢𑀻𑀢𑀺 𑀢𑀁 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀸𑀤𑁂𑀢𑀺. 𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀦𑁆𑀢𑀺 𑀆𑀬𑀲𑁆𑀫𑀦𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀥𑀦𑀁 𑀧𑀸𑀧𑀼𑀡𑀦𑁆𑀢𑀼. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁩𑁮-𑁫𑁩𑁯) 𑀧𑀦 ‘‘𑀬𑀢𑀲𑁆𑀲 ¶ 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺𑀆𑀤𑀺 𑀬𑁂𑀦 𑀅𑀢𑁆𑀢𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀘𑀻𑀯𑀭𑀜𑁆𑀘 𑀅𑀦𑀺𑀧𑁆𑀨𑀸𑀤𑀺𑀢𑀁, 𑀢𑀲𑁆𑀲 𑀓𑀢𑁆𑀢𑀩𑁆𑀩𑀤𑀲𑁆𑀲𑀦𑀁. 𑀏𑀯𑀁 𑀪𑀺𑀓𑁆𑀔𑀼𑀦𑀸 𑀯𑀢𑁆𑀣𑀼𑀲𑀸𑀫𑀺𑀓𑀸𑀦𑀁 𑀯𑀼𑀢𑁆𑀢𑁂 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺 ‘𑀲𑀸𑀫𑀺𑀓𑀸 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀻’𑀢𑀺 (𑀧𑀸𑀭𑀸. 𑁫𑁪𑁧) 𑀅𑀦𑀸𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 𑀲𑁄 𑀲𑀬𑀁 𑀅𑀘𑁄𑀤𑁂𑀢𑁆𑀯𑀸 𑀉𑀧𑀸𑀲𑀓𑀸𑀤𑀻𑀳𑀺 𑀧𑀭𑀺𑀬𑀸𑀬𑁂𑀦 𑀯𑀢𑁆𑀯𑀸 𑀘𑁄𑀤𑀸𑀧𑁂𑀢𑀺 ¶ , 𑀢𑁂𑀲𑀼 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀘𑁄𑀤𑁂𑀢𑁆𑀯𑀸 𑀘𑀻𑀯𑀭𑀁 𑀤𑀸𑀧𑁂𑀦𑁆𑀢𑁂𑀲𑀼 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀺𑀤𑁆𑀥𑀸 𑀳𑁄𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀡𑀢𑁆𑀢𑀺𑀓𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑁬𑁫. 𑀓𑁂𑀦𑀘𑀺 𑀅𑀦𑀺𑀤𑁆𑀤𑀺𑀝𑁆𑀞𑁄 𑀅𑀢𑁆𑀢𑀦𑁄 𑀫𑀼𑀔𑁂𑀦𑁂𑀯 𑀩𑁆𑀬𑀸𑀯𑀝𑀪𑀸𑀯𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀢𑁆𑀢𑀁 𑀧𑀢𑁆𑀢𑁄 𑀫𑀼𑀔𑀯𑁂𑀯𑀝𑀺𑀓𑁄, 𑀅𑀯𑀺𑀘𑀸𑀭𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀇𑀫𑀺𑀦𑀸 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀸 𑀅𑀭𑀺𑀬𑀸𑀧𑀺 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀯𑁄𑀳𑀸𑀭𑀢𑁄 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) 𑀧𑀦 ‘‘𑀅𑀯𑀺𑀘𑀸𑀭𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘𑀦𑀢𑁆𑀣𑀫𑁆𑀳𑀸𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑁄’𑀢𑀺 𑀇𑀤𑀁 𑀢𑀸𑀤𑀺𑀲𑀁 𑀓𑀭𑁄𑀦𑁆𑀢𑁄 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀯𑀢𑁆𑀣𑀼𑀫𑁆𑀳𑀺 (𑀫𑀳𑀸𑀯. 𑁨𑁯𑁯) 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀫𑁂𑀯 𑀫𑁂𑀡𑁆𑀟𑀓𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀢𑀢𑁆𑀣 𑀳𑀺 𑀫𑁂𑀡𑁆𑀟𑀓𑁂𑀦 𑀦𑀸𑀫 𑀲𑁂𑀝𑁆𑀞𑀺𑀦𑀸 ‘‘𑀲𑀦𑁆𑀢𑀺 𑀳𑀺 𑀪𑀦𑁆𑀢𑁂 𑀫𑀕𑁆𑀕𑀸 𑀓𑀦𑁆𑀢𑀸𑀭𑀸 𑀅𑀧𑁆𑀧𑁄𑀤𑀓𑀸 𑀅𑀧𑁆𑀧𑀪𑀓𑁆𑀔𑀸 𑀦 𑀲𑀼𑀓𑀭𑀸 𑀅𑀧𑀸𑀣𑁂𑀬𑁆𑀬𑁂𑀦 𑀕𑀦𑁆𑀢𑀼𑀁, 𑀲𑀸𑀥𑀼 𑀪𑀦𑁆𑀢𑁂 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀣𑁂𑀬𑁆𑀬𑀁 𑀅𑀦𑀼𑀚𑀸𑀦𑀸𑀢𑀽’’𑀢𑀺 𑀬𑀸𑀘𑀺𑀢𑁂𑀦 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀸𑀣𑁂𑀬𑁆𑀬𑀁 𑀧𑀭𑀺𑀬𑁂𑀲𑀺𑀢𑀼𑀁. 𑀢𑀡𑁆𑀟𑀼𑀮𑁄 𑀢𑀡𑁆𑀟𑀼𑀮𑀢𑁆𑀣𑀺𑀓𑁂𑀦, 𑀫𑀼𑀕𑁆𑀕𑁄 𑀫𑀼𑀕𑁆𑀕𑀢𑁆𑀣𑀺𑀓𑁂𑀦, 𑀫𑀸𑀲𑁄 𑀫𑀸𑀲𑀢𑁆𑀣𑀺𑀓𑁂𑀦, 𑀮𑁄𑀡𑀁 𑀮𑁄𑀡𑀢𑁆𑀣𑀺𑀓𑁂𑀦, 𑀕𑀼𑀴𑁄 𑀕𑀼𑀴𑀢𑁆𑀣𑀺𑀓𑁂𑀦, 𑀢𑁂𑀮𑀁 𑀢𑁂𑀮𑀢𑁆𑀣𑀺𑀓𑁂𑀦, 𑀲𑀧𑁆𑀧𑀺 𑀲𑀧𑁆𑀧𑀺𑀢𑁆𑀣𑀺𑀓𑁂𑀦𑀸’’𑀢𑀺 𑀯𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀳𑀺𑀭𑀜𑁆𑀜𑀁 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀺 ‘𑀇𑀫𑀺𑀦𑀸 𑀬𑀁 𑀅𑀬𑁆𑀬𑀲𑁆𑀲 𑀓𑀧𑁆𑀧𑀺𑀬𑀁, 𑀢𑀁 𑀤𑁂𑀣𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀢𑁄 𑀓𑀧𑁆𑀧𑀺𑀬𑀁, 𑀢𑀁 𑀲𑀸𑀤𑀺𑀢𑀼𑀁, 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 ¶ 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’’𑀢𑀺. ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀳𑀺𑀭𑀜𑁆𑀜𑀁 𑀦𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑀦𑀁 𑀅𑀢𑁆𑀣𑀺𑀬𑁂𑀯, 𑀅𑀜𑁆𑀜𑀣𑀸 𑀅𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀧𑀓𑁆𑀔𑀁 𑀪𑀚𑀢𑀻𑀢𑀺 𑀦 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸, 𑀇𑀤𑀁 𑀧𑀦 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑁂 𑀯𑀸 𑀅𑀦𑀺𑀤𑁆𑀤𑀺𑀝𑁆𑀞𑁂 𑀯𑀸. 𑀢𑁂𑀦𑁂𑀯𑀸𑀳 ‘‘𑀏𑀢𑁆𑀣 𑀘𑁄𑀤𑀦𑀸𑀬 𑀧𑀭𑀺𑀫𑀸𑀡𑀁 𑀦𑀢𑁆𑀣𑀻’’𑀢𑀺𑀆𑀤𑀺. 𑀬𑀤𑀺 𑀫𑀽𑀮𑀁 𑀲𑀦𑁆𑀥𑀸𑀬 𑀘𑁄𑀤𑁂𑀢𑀺, 𑀢𑀁 𑀲𑀸𑀤𑀺𑀢𑀫𑁂𑀯 𑀲𑀺𑀬𑀸𑀢𑀺 𑀆𑀳 ‘‘𑀫𑀽𑀮𑀁 𑀅𑀲𑀸𑀤𑀺𑀬𑀦𑁆𑀢𑁂𑀦𑀸’’𑀢𑀺.

𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑀸 𑀘𑁄𑀤𑀦𑀸𑀝𑁆𑀞𑀸𑀦𑀜𑁆𑀘 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 𑀘𑀻𑀯𑀭𑀢𑁆𑀣𑀸𑀬𑁂𑀯 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀯𑀢𑁆𑀣𑀼𑀲𑀸𑀫𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑁂𑀲𑀼𑀧𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀤𑀺𑀦𑁆𑀦𑁂 𑀘 𑀞𑀸𑀦𑀘𑁄𑀤𑀦𑀸𑀤𑀺𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁬𑁬. 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 ¶ 𑀧𑀦𑀸𑀢𑀺𑀆𑀤𑀻𑀲𑀼 ‘‘𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽’’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀫𑀫 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀅𑀢𑁆𑀣𑀺, 𑀢𑀁 𑀢𑀼𑀬𑁆𑀳𑀁 𑀳𑁄𑀢𑀽’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸 𑀞𑀺𑀢𑀲𑁆𑀲 𑀓𑁂𑀯𑀮𑀁 𑀯𑀸𑀘𑀸𑀬 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 ‘‘𑀢𑀼𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀘𑁆𑀘𑀢𑁆𑀢𑀲𑁆𑀲 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀦𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀁 𑀦𑀸𑀫. 𑀲𑀸𑀤𑀺𑀬𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺.

𑀇𑀤𑀁 𑀕𑀼𑀢𑁆𑀢𑀝𑁆𑀞𑀸𑀦𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀬𑀧𑀭𑀺𑀪𑁄𑀕𑀁𑀬𑁂𑀯 𑀲𑀦𑁆𑀥𑀸𑀬 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. ‘‘𑀇𑀥 𑀦𑀺𑀓𑁆𑀔𑀺𑀧𑀸’’𑀢𑀺 𑀯𑀼𑀢𑁆𑀢𑁂 ‘‘𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬 𑀯𑀸’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻𑀢𑀺 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 ‘‘𑀇𑀤𑀁 𑀕𑀼𑀢𑁆𑀢𑀝𑁆𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀦𑁆𑀢𑁄 𑀞𑀸𑀦𑀲𑁆𑀲 𑀕𑀼𑀢𑁆𑀢𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀯𑀢𑁆𑀣𑀼𑀁 𑀧𑀭𑀸𑀫𑀲𑀢𑀺, 𑀢𑀲𑁆𑀫𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀧𑀦 𑀯𑀤𑀦𑁆𑀢𑁄 ¶ 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀯𑀢𑁆𑀣𑀼𑀁 𑀦𑀺𑀓𑁆𑀔𑀺𑀧𑀸𑀳𑀻𑀢𑀺 𑀯𑀢𑁆𑀣𑀼𑀁 𑀧𑀭𑀸𑀫𑀲𑀢𑀺 𑀦𑀸𑀫, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁. 𑀧𑀭𑀢𑁄 𑀇𑀤𑀁 𑀕𑀡𑁆𑀳𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁, 𑀬𑀲𑁆𑀫𑀸 𑀧𑀦 𑀤𑀼𑀩𑁆𑀩𑀺𑀘𑀸𑀭𑀡𑀸𑀬 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀇𑀤𑀁 𑀥𑀦𑀁 𑀬𑀲𑁆𑀫𑀸 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁, 𑀬𑀲𑁆𑀫𑀸 𑀧𑀦 𑀲𑀩𑁆𑀩𑀲𑁄 𑀅𑀯𑀺𑀲𑁆𑀲𑀚𑁆𑀚𑀺𑀢𑀁, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. 𑀅𑀣 𑀯𑀸 𑀢𑀁 𑀥𑀦𑀁 𑀬𑀲𑁆𑀫𑀸 𑀧𑀘𑁆𑀙𑀸 𑀲𑀼𑀝𑁆𑀞𑀼𑀯𑀺𑀘𑀸𑀭𑀡𑀸𑀬 𑀲𑀢𑀺𑀬𑀸 𑀓𑀧𑁆𑀧𑀺𑀬𑀁 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀩𑀺𑀘𑀸𑀭𑀡𑀸𑀬 𑀲𑀢𑀺𑀬𑀸 𑀅𑀓𑀧𑁆𑀧𑀺𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀳𑁄𑀢𑀻𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀏𑀓𑁄 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸𑀢𑀺𑀆𑀤𑀺 𑀭𑀽𑀧𑀺𑀬𑁂 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢’’𑀦𑁆𑀢𑀺 𑀘 ‘‘𑀦 𑀧𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁, ‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’𑀢𑀺 𑀯𑀼𑀢𑁆𑀢𑁂 𑀉𑀕𑁆𑀕𑀡𑁆𑀳𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’𑀢𑀺 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀘 ‘‘𑀓𑀧𑁆𑀧𑀺𑀬𑀜𑁆𑀘…𑀧𑁂… 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀅𑀲𑀸𑀤𑀺𑀢𑀢𑁆𑀢𑀸 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁, 𑀬𑀲𑁆𑀫𑀸 𑀧𑀦 𑀤𑀼𑀩𑁆𑀩𑀺𑀘𑀸𑀭𑀡𑀸𑀬 𑀲𑀢𑀺 𑀢𑀢𑁄 𑀉𑀧𑁆𑀧𑀦𑁆𑀦𑀁 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁.

𑁬𑁭. 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀸 𑀭𑀽𑀧𑀺𑀬𑀁 𑀦𑀸𑀫 𑀅𑀓𑀧𑁆𑀧𑀺𑀬𑀁, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀢𑁂𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢𑀁, 𑀢𑀲𑁆𑀫𑀸 𑀉𑀧𑀸𑀬𑁂𑀦 𑀧𑀭𑀺𑀪𑁄𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 ¶ (𑀧𑀸𑀭𑀸. 𑁫𑁮𑁪) 𑀯𑀼𑀢𑁆𑀢𑀁. 𑀦 𑀢𑁂𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢𑀦𑁆𑀢𑀺 𑀇𑀫𑀺𑀦𑀸 𑀘𑁂𑀢𑀸𑀧𑀺𑀢𑀜𑁆𑀘𑁂, 𑀦𑀢𑁆𑀣𑀺 𑀧𑀭𑀺𑀪𑁄𑀕𑀽𑀧𑀸𑀬𑁄 𑀉𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂𑀦 𑀘𑁂𑀢𑀸𑀧𑀺𑀢𑀢𑁆𑀢𑀸. 𑀈𑀤𑀺𑀲𑀜𑁆𑀳𑀺 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀦𑀁 𑀓𑀢𑁆𑀯𑀸𑀯 ¶ 𑀙𑀟𑁆𑀟𑁂𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀘𑁂𑀢𑀸𑀧𑀺𑀢𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀲𑀗𑁆𑀖𑁂 𑀦𑀺𑀲𑁆𑀲𑀝𑁆𑀞𑀁 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀦𑀻𑀢𑀓𑀧𑁆𑀧𑀺𑀬𑀪𑀡𑁆𑀟𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀯 𑀉𑀧𑀸𑀬𑀁 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀢𑁆𑀢𑀘𑀢𑀼𑀓𑁆𑀓𑀸𑀤𑀺𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀭𑀽𑀧𑀺𑀬𑁂𑀦 𑀧𑀭𑀺𑀯𑀢𑁆𑀢𑀺𑀢𑀧𑀢𑁆𑀢𑀲𑁆𑀲 𑀅𑀧𑀭𑀺𑀪𑁄𑀕𑁄𑀯 𑀤𑀲𑁆𑀲𑀺𑀢𑁄, 𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀘𑀸𑀭𑁄𑀢𑀺. 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀯𑀝𑁆𑀝𑀢𑀺 𑀉𑀧𑀸𑀲𑀓𑀸𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁.

𑀆𑀭𑀸𑀫𑀺𑀓𑀸𑀦𑀁 𑀯𑀸 𑀧𑀢𑁆𑀢𑀪𑀸𑀕𑀦𑁆𑀢𑀺 𑀇𑀤𑀁 𑀕𑀺𑀳𑀻𑀦𑀁 𑀳𑀢𑁆𑀣𑀕𑀢𑁄𑀧𑀺 𑀲𑁄𑀬𑁂𑀯 𑀪𑀸𑀕𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑁂𑀦 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀭𑀸𑀫𑀺𑀓𑀸 𑀤𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁. 𑀢𑀢𑁄 𑀳𑀭𑀺𑀢𑁆𑀯𑀸𑀢𑀺 𑀅𑀜𑁆𑀜𑁂𑀲𑀁 𑀧𑀢𑁆𑀢𑀪𑀸𑀕𑀢𑁄 𑀳𑀭𑀺𑀢𑁆𑀯𑀸. 𑀓𑀲𑀺𑀡𑀧𑀭𑀺𑀓𑀫𑁆𑀫𑀦𑁆𑀢𑀺 𑀆𑀮𑁄𑀓𑀓𑀲𑀺𑀡𑀧𑀭𑀺𑀓𑀫𑁆𑀫𑀁. 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀯𑀸𑀢𑀺 𑀏𑀢𑁆𑀣 𑀢𑀢𑁄 𑀕𑀳𑀺𑀢𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀘𑁂 𑀕𑀳𑀺𑀢𑀁, 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀙𑀸𑀬𑀸𑀧𑀻𑀢𑀺 𑀪𑁄𑀚𑀦𑀲𑀸𑀮𑀸𑀤𑀻𑀦𑀁 𑀙𑀸𑀬𑀸𑀧𑀺. 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀦𑁆𑀢𑀸𑀢𑀺 𑀕𑁂𑀳𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀸, 𑀙𑀸𑀬𑀸𑀬 𑀕𑀢𑀕𑀢𑀝𑁆𑀞𑀸𑀦𑀁 𑀕𑁂𑀳𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑁂𑀦𑀧𑀻𑀢𑀺 𑀏𑀢𑁆𑀣 𑀲𑀘𑁂 𑀅𑀜𑁆𑀜𑁄 𑀫𑀕𑁆𑀕𑁄 𑀦𑀢𑁆𑀣𑀺, 𑀫𑀕𑁆𑀕𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀻𑀢𑀸𑀬𑀸𑀢𑀺 𑀢𑁂𑀦 𑀯𑀢𑁆𑀣𑀼𑀦𑀸 𑀓𑀻𑀢𑀸𑀬. 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀲𑀘𑁂 𑀉𑀧𑀸𑀲𑀓𑁄 ‘‘𑀅𑀢𑀺𑀩𑀳𑀼 𑀏𑀢𑀁 𑀳𑀺𑀭𑀜𑁆𑀜𑀁, 𑀇𑀤𑀁 𑀪𑀦𑁆𑀢𑁂 𑀅𑀚𑁆𑀚𑁂𑀯 𑀦 𑀯𑀺𑀦𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀲𑀬𑀁 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀞𑀧𑀸𑀧𑁂𑀢𑀺, 𑀏𑀯𑀁 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀗𑁆𑀖𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀢𑁂𑀦 𑀯𑀢𑁆𑀣𑀼𑀦𑀸 𑀕𑀳𑀺𑀢𑀢𑁆𑀢𑀸 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁮𑁩-𑁫𑁮𑁪) 𑀧𑀦 ‘‘𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 ¶ 𑀯𑀟𑁆𑀠𑀺𑀬𑀸 𑀧𑀬𑁄𑀚𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀦𑁆𑀢𑀺 𑀢𑁂𑀦 𑀯𑀢𑁆𑀣𑀼𑀦𑀸 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀲𑁄 𑀙𑀟𑁆𑀟𑁂𑀢𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀔𑀺𑀧𑀢𑀺, 𑀅𑀣𑀸𑀧𑀺 𑀦 𑀙𑀟𑁆𑀟𑁂𑀢𑀺, 𑀲𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀦𑁄 𑀘𑁂 𑀙𑀟𑁆𑀟𑁂𑀢𑀻𑀢𑀺 𑀅𑀣 𑀦𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀙𑀟𑁆𑀟𑁂𑀢𑀺, ‘‘𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦𑀸’’𑀢𑀺 𑀬𑁂𑀦𑀓𑀸𑀫𑀁 𑀧𑀓𑁆𑀓𑀫𑀢𑀺, 𑀢𑀢𑁄 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑁄 𑀭𑀽𑀧𑀺𑀬𑀙𑀟𑁆𑀟𑀓𑁄 𑀲𑀫𑀦𑁆𑀦𑀺𑀢𑀩𑁆𑀩𑁄. 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀦𑁆𑀢𑀺𑀆𑀤𑀻𑀲𑀼 𑀮𑁄𑀪𑀯𑀲𑁂𑀦 𑀢𑀁 𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀯𑀸 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀯𑀸 𑀉𑀓𑁆𑀓𑀁𑀲𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 ¶ 𑀦𑀸𑀫 𑀕𑀘𑁆𑀙𑀢𑀺. 𑀤𑁄𑀲𑀯𑀲𑁂𑀦 ‘‘𑀦𑁂𑀯𑀸𑀬𑀁 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀦 𑀯𑀺𑀦𑀬’’𑀦𑁆𑀢𑀺 𑀧𑀭𑀁 𑀅𑀧𑀲𑀸𑀤𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀫𑁄𑀳𑀯𑀲𑁂𑀦 𑀧𑀫𑀼𑀝𑁆𑀞𑁄 𑀧𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀪𑀬𑁂𑀦 𑀙𑀟𑁆𑀟𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀪𑀬𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁬𑁮. 𑀧𑀢𑀺𑀢𑁄𑀓𑀸𑀲𑀁 𑀅𑀲𑀫𑀦𑁆𑀦𑀸𑀭𑀳𑀦𑁆𑀢𑁂𑀦 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀦𑀺𑀭𑀧𑁂𑀓𑁆𑀔𑀪𑀸𑀯𑀤𑀲𑁆𑀲𑀦𑀧𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀧𑀢𑀺𑀢𑀝𑁆𑀞𑀸𑀦𑁂 𑀜𑀸𑀢𑁂𑀧𑀺 𑀢𑀲𑁆𑀲 𑀕𑀽𑀣𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀺𑀬 𑀦𑀺𑀭𑀧𑁂𑀓𑁆𑀔𑀪𑀸𑀯𑁄𑀬𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬𑀸𑀢𑀺 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫 𑀅𑀦𑀭𑀳𑀲𑁆𑀲 𑀧𑀭𑀺𑀪𑁄𑀕𑁄. 𑀪𑀕𑀯𑀢𑀸 𑀳𑀺 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀲𑀻𑀮𑀯𑀢𑁄 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀦 𑀤𑀼𑀲𑁆𑀲𑀻𑀮𑀲𑁆𑀲. 𑀤𑀸𑀬𑀓𑀸𑀦𑀫𑁆𑀧𑀺 𑀲𑀻𑀮𑀯𑀢𑁄 𑀏𑀯 𑀧𑀭𑀺𑀘𑁆𑀘𑀸𑀕𑁄, 𑀦 𑀤𑀼𑀲𑁆𑀲𑀻𑀮𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀧𑀘𑁆𑀘𑀸𑀲𑀻𑀲𑀦𑀢𑁄. 𑀇𑀢𑀺 𑀲𑀢𑁆𑀣𑀸𑀭𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀤𑀸𑀬𑀓𑁂𑀳𑀺 𑀘 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄. 𑀇𑀡𑀯𑀲𑁂𑀦 𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄, 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 ¶ 𑀅𑀪𑀸𑀯𑀢𑁄 𑀇𑀡𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 ‘‘𑀲𑀻𑀮𑀯𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀘𑀻𑀯𑀭𑀁 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂. 𑀧𑀼𑀭𑁂𑀪𑀢𑁆𑀢…𑀧𑁂… 𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑀯𑀲𑁂𑀦 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀲𑀓𑀺𑀁𑀬𑁂𑀯 𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁.

𑀲𑀘𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀢𑁄𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 𑀳𑀺𑀬𑁆𑀬𑁄 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢𑀁, 𑀢𑀁 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬…𑀧𑁂… 𑀳𑀺𑀭𑀺𑀓𑁄𑀧𑀺𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀳𑀺𑀬𑁆𑀬𑁄 𑀬𑁄 𑀫𑀬𑀸 𑀧𑀺𑀡𑁆𑀟𑀧𑀸𑀢𑁄 𑀧𑀭𑀺𑀪𑀼𑀢𑁆𑀢𑁄, 𑀲𑁄 𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺𑀦𑀸 𑀲𑀘𑁂 𑀅𑀢𑀻𑀢𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀁 𑀦 𑀓𑀭𑁂𑀬𑁆𑀬, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀲𑁂𑀦𑀸𑀲𑀦𑀫𑁆𑀧𑀺 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀧𑀯𑁂𑀲𑁂 𑀧𑀯𑁂𑀲𑁂. 𑀏𑀯𑀁 𑀧𑀦 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀲𑀢𑀺𑀧𑀘𑁆𑀘𑀬𑀢𑀸𑀢𑀺 𑀲𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄. 𑀧𑀝𑀺𑀕𑁆𑀕𑀳𑀡𑀲𑁆𑀲 𑀧𑀭𑀺𑀪𑁄𑀕𑀲𑁆𑀲 𑀘 𑀧𑀘𑁆𑀘𑀯𑁂𑀓𑁆𑀔𑀡𑀲𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀬𑀼𑀚𑁆𑀚𑀢𑀺, 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀢𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀺 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸 𑀬𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 ¶ . 𑀅𑀧𑀭𑁂 𑀧𑀦𑀸𑀳𑀼 ‘‘𑀲𑀢𑀺𑀧𑀘𑁆𑀘𑀬𑀢𑀸𑀢𑀺 𑀲𑀢𑀺 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑁂, 𑀧𑀘𑁆𑀘𑀬𑁂𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀧𑀘𑁆𑀘𑀬𑁂 𑀲𑀢𑀺𑀧𑀻’’𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀢𑀣𑀸 𑀳𑀺 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀺𑀲𑀼𑀚𑁆𑀛𑀢𑀺, 𑀦 𑀧𑀘𑁆𑀘𑀬𑀲𑀩𑁆𑀪𑀸𑀯𑀫𑀢𑁆𑀢𑁂𑀦.

𑀦𑀦𑀼 𑀘 ‘‘𑀧𑀭𑀺𑀪𑁄𑀕𑁂 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 ¶ 𑀘 𑀓𑁄 𑀯𑀺𑀲𑁂𑀲𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀼𑀭𑀺𑀫𑁂𑀲𑀼 𑀢𑀸𑀯 𑀢𑀻𑀲𑀼 𑀧𑀘𑁆𑀘𑀬𑁂𑀲𑀼 𑀯𑀺𑀲𑁂𑀲𑁄 𑀧𑀸𑀓𑀝𑁄𑀬𑁂𑀯, 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀦 𑀬𑀣𑀸 𑀯𑀢𑀺𑀁 𑀓𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀕𑁄𑀧𑀺𑀢𑁂 𑀢𑀲𑁆𑀲 𑀨𑀮𑀸𑀦𑀺𑀧𑀺 𑀭𑀓𑁆𑀔𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑁂 𑀭𑀓𑁆𑀔𑀺𑀢𑁂 𑀢𑀧𑁆𑀧𑀝𑀺𑀩𑀤𑁆𑀥𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀫𑁆𑀧𑀺 𑀦𑀺𑀧𑁆𑀨𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀕𑀺𑀮𑀸𑀦𑀧𑀘𑁆𑀘𑀬𑀁 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀲𑀻𑀮𑀁 𑀪𑀺𑀚𑁆𑀚𑀫𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀫𑁂𑀯 𑀪𑀺𑀚𑁆𑀚𑀢𑀺, 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀧𑀦 𑀧𑀘𑁆𑀙𑀸𑀪𑀢𑁆𑀢𑀧𑀼𑀭𑀺𑀫𑀬𑀸𑀫𑀸𑀤𑀻𑀲𑀼 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑁂𑀯 𑀪𑀺𑀚𑁆𑀚𑀢𑀺. 𑀧𑀼𑀭𑁂𑀪𑀢𑁆𑀢𑀜𑁆𑀳𑀺 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁮𑁫) 𑀆𑀕𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁮𑁫) 𑀧𑀦 ‘‘𑀣𑁂𑀬𑁆𑀬𑀧𑀭𑀺𑀪𑁄𑀕𑁄𑀢𑀺 𑀧𑀘𑁆𑀘𑀬𑀲𑁆𑀲𑀸𑀫𑀺𑀦𑀸 𑀪𑀕𑀯𑀢𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀡𑀧𑀭𑀺𑀪𑁄𑀕𑁄𑀢𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀢𑁄 𑀯𑀼𑀢𑁆𑀢𑀁. 𑀢𑁂𑀦 𑀘 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀯𑀺𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀓𑀸𑀬𑀢𑁄 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀧𑀭𑀺𑀪𑁄𑀕𑁂. 𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 ‘𑀳𑀺𑀬𑁆𑀬𑁄 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢’𑀦𑁆𑀢𑀺𑀆𑀤𑀺𑀦𑀸𑀧𑀺 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀉𑀤𑀓𑀧𑀢𑀦𑀝𑁆𑀞𑀸𑀦𑀢𑁄 𑀅𑀦𑁆𑀢𑁄𑀧𑀯𑁂𑀲𑀦𑁂𑀲𑀼 𑀦𑀺𑀲𑀻𑀤𑀦𑀲𑀬𑀦𑁂𑀲𑀼 𑀘. 𑀲𑀢𑀺𑀧𑀘𑁆𑀘𑀬𑀢𑀸 𑀯𑀝𑁆𑀝𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀢𑀺𑀬𑀸 𑀧𑀘𑁆𑀘𑀬𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀭𑀺𑀪𑁄𑀕𑁂 𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀢𑀺 𑀅𑀯𑀲𑁆𑀲𑀁 𑀮𑀤𑁆𑀥𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘𑀲𑀢𑀺𑀁 𑀓𑀢𑁆𑀯𑀸’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘𑀲𑀢𑀺𑀧𑀘𑁆𑀘𑀬𑀢𑀸 𑀧𑀘𑁆𑀘𑀬𑁂 𑀲𑀢𑀺 𑀪𑁂𑀲𑀚𑁆𑀚𑀧𑀭𑀺𑀪𑁄𑀕𑀲𑁆𑀲 𑀓𑀸𑀭𑀡𑁂 𑀲𑀢𑀻’𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀧𑀘𑁆𑀘𑀬𑁂 𑀲𑀢𑀻𑀢𑀺 𑀧𑀘𑁆𑀘𑀬𑀲𑀩𑁆𑀪𑀸𑀯𑀲𑀮𑁆𑀮𑀓𑁆𑀔𑀡𑁂 𑀲𑀢𑀻𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ¶ 𑀧𑀘𑁆𑀘𑀬𑀲𑀩𑁆𑀪𑀸𑀯𑀫𑀢𑁆𑀢𑁂𑀦 𑀲𑀻𑀮𑀲𑁆𑀲 𑀅𑀲𑀼𑀚𑁆𑀛𑀦𑀢𑁄. 𑀧𑀭𑀺𑀪𑁄𑀕𑁂 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀪𑁂𑀤𑁄 𑀤𑀲𑁆𑀲𑀺𑀢𑁄, 𑀦 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀢𑀲𑁆𑀲 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀺𑀲𑀼𑀚𑁆𑀛𑀦𑀢𑁄. 𑀏𑀢𑀲𑁆𑀫𑀺𑀁 𑀧𑀦 𑀲𑁂𑀲𑀧𑀘𑁆𑀘𑀬𑁂𑀲𑀼 𑀘 𑀇𑀡𑀧𑀭𑀺𑀪𑁄𑀕𑀸𑀤𑀺𑀯𑀘𑀦𑁂𑀦 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲𑁂𑀯 𑀪𑁂𑀤𑁄𑀢𑀺 𑀏𑀯𑀫𑀺𑀫𑁂𑀲𑀁 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀕𑀢𑀁.

𑀏𑀢𑁂𑀲𑀼 ¶ 𑀤𑁆𑀯𑀻𑀲𑀼 𑀧𑀓𑀭𑀡𑁂𑀲𑀼 ‘‘𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺 𑀏𑀢𑁆𑀣 𑀳𑀺𑀬𑁆𑀬𑁄 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢𑀦𑁆𑀢𑀺…𑀧𑁂… 𑀯𑀤𑀦𑁆𑀢𑀻𑀢𑀺 𑀆𑀕𑀢𑀁. 𑀇𑀫𑀁 𑀧𑀦 𑀦𑀬𑀁 𑀦𑀺𑀲𑁆𑀲𑀸𑀬 𑀇𑀤𑀸𑀦𑀺 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀸 ‘‘𑀅𑀚𑁆𑀚𑀧𑀸𑀢𑁄 𑀧𑀭𑀺𑀪𑀼𑀢𑁆𑀢𑀁 𑀲𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀅𑀚𑁆𑀚 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀳𑀺𑀬𑁆𑀬𑁄 𑀧𑀭𑀺𑀪𑀼𑀢𑁆𑀢𑀫𑁂𑀯 𑀅𑀢𑀻𑀢𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸, 𑀦 𑀅𑀚𑁆𑀚 𑀧𑀭𑀺𑀪𑀼𑀢𑁆𑀢𑀁, 𑀢𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀫𑀽𑀮𑀯𑀘𑀦𑁂 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸. 𑀓𑀣𑀁? 𑀇𑀤𑀁 𑀳𑀺𑀬𑁆𑀬𑁄𑀢𑁆𑀬𑀸𑀤𑀺𑀯𑀘𑀦𑀁 𑀲𑀼𑀢𑁆𑀢𑀁 𑀯𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀯𑀸 𑀆𑀘𑀭𑀺𑀬𑀯𑀸𑀤𑁄 𑀯𑀸 𑀅𑀢𑁆𑀢𑀦𑁄𑀫𑀢𑀺 𑀯𑀸𑀢𑀺. 𑀢𑀢𑁆𑀣 𑀦 𑀢𑀸𑀯 𑀲𑀼𑀢𑁆𑀢𑀁 𑀳𑁄𑀢𑀺 ‘‘𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀫𑀲𑁆𑀲 𑀘 𑀯𑀘𑀦𑀲𑁆𑀲 𑀦 𑀧𑀸𑀴𑀺𑀪𑀽𑀢𑀢𑁆𑀢𑀸. 𑀦 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 ‘‘𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀯𑀼𑀢𑁆𑀢𑀢𑁆𑀢𑀸 𑀇𑀫𑀲𑁆𑀲 𑀘 𑀫𑀳𑀸𑀧𑀤𑁂𑀲𑀪𑀸𑀯𑀸𑀪𑀸𑀯𑀢𑁄. 𑀦 𑀘 𑀆𑀘𑀭𑀺𑀬𑀯𑀸𑀤𑁄 ‘‘𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀧𑀜𑁆𑀘𑀳𑀺 𑀅𑀭𑀳𑀦𑁆𑀢𑀲𑀢𑁂𑀳𑀺 𑀞𑀧𑀺𑀢𑀸 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀸 𑀑𑀓𑁆𑀓𑀦𑁆𑀢𑀯𑀺𑀦𑀺𑀘𑁆𑀙𑀬𑀧𑁆𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸𑀢𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀇𑀫𑀲𑁆𑀲 𑀘 𑀅𑀝𑁆𑀞𑀓𑀣𑀸𑀧𑀸𑀞𑀪𑀸𑀯𑀸𑀪𑀸𑀯𑀢𑁄. 𑀦 𑀘 𑀅𑀢𑁆𑀢𑀦𑁄𑀫𑀢𑀺 ‘‘𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀫𑀸𑀦𑁂𑀦 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀸 𑀦𑀬𑀕𑁆𑀕𑀸𑀳𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀓𑀣𑀦𑀁, 𑀅𑀧𑀺𑀘 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀆𑀕𑀢𑁄 𑀲𑀩𑁆𑀩𑁄𑀧𑀺 ¶ 𑀣𑁂𑀭𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀫𑀲𑁆𑀲 𑀘 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀣𑁂𑀭𑀯𑀸𑀤𑀪𑀸𑀯𑀸𑀪𑀸𑀯𑀢𑁄.

𑀇𑀢𑀺 𑁋

‘‘𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀺𑀦𑀬𑀁, 𑀫𑀳𑀸𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀧𑀼𑀭𑀸’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑁋

𑀯𑀼𑀢𑁆𑀢𑁂𑀲𑀼 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑁂𑀲𑀼 𑀅𑀦𑀦𑁆𑀢𑁄𑀕𑀥𑀢𑁆𑀢𑀸 𑀇𑀤𑀁 𑀯𑀘𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁮𑁫) 𑀝𑀻𑀓𑀸𑀘𑀭𑀺𑀬𑁂𑀦 ‘‘𑀢𑀁 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 ‘‘𑀦𑀬𑀕𑁆𑀕𑀸𑀳𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀓𑀣𑀦’’𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀢𑁂𑀲𑀁 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀉𑀧𑀝𑁆𑀞𑀺𑀢𑀸𑀓𑀸𑀭𑀯𑀲𑁂𑀦 𑀓𑀣𑀦𑀁 𑀅𑀢𑁆𑀢𑀦𑁄𑀫𑀢𑀺 𑀲𑀺𑀬𑀸, 𑀏𑀯𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯. ‘‘𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀢𑀢𑁆𑀣 𑀑𑀢𑀭𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀦𑁂𑀯 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀦 𑀕𑀳𑁂𑀢𑀩𑁆𑀩𑀸. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀩𑁆𑀩𑀤𑀼𑀩𑁆𑀩𑀮𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀯𑀘𑀦𑀢𑁄 𑀇𑀫𑀲𑁆𑀲 𑀘 𑀯𑀘𑀦𑀲𑁆𑀲 ¶ 𑀅𑀝𑁆𑀞𑀓𑀣𑀸𑀯𑀘𑀦𑁂 𑀅𑀦𑁄𑀢𑀭𑀡𑀢𑁄 𑀅𑀧𑁆𑀧𑀯𑀺𑀲𑀦𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀢𑁄𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀓𑀺𑀁 𑀇𑀤𑀁 𑀯𑀘𑀦𑀁 𑀧𑀸𑀴𑀺𑀯𑀘𑀦𑀁 𑀯𑀸 𑀅𑀝𑁆𑀞𑀓𑀣𑀸𑀯𑀘𑀦𑀁 𑀯𑀸 𑀝𑀻𑀓𑀸𑀯𑀘𑀦𑀁 𑀯𑀸 𑀕𑀦𑁆𑀣𑀦𑁆𑀢𑀭𑀯𑀘𑀦𑀁 𑀯𑀸𑀢𑀺. 𑀢𑀢𑁆𑀣 𑀦 𑀢𑀸𑀯 𑀧𑀸𑀴𑀺𑀯𑀘𑀦𑀁, 𑀦 𑀅𑀝𑁆𑀞𑀓𑀣𑀸𑀯𑀘𑀦𑀁, 𑀦 𑀕𑀦𑁆𑀣𑀦𑁆𑀢𑀭𑀯𑀘𑀦𑀁, 𑀅𑀣 𑀔𑁄 𑀝𑀻𑀓𑀸𑀯𑀘𑀦𑀦𑁆𑀢𑀺. 𑀳𑁄𑀢𑀼 𑀝𑀻𑀓𑀸𑀯𑀘𑀦𑀁, 𑀲𑀓𑀯𑀘𑀦𑀁 𑀯𑀸 𑀧𑀭𑀯𑀘𑀦𑀁 𑀯𑀸 𑀅𑀥𑀺𑀧𑁆𑀧𑁂𑀢𑀯𑀘𑀦𑀁 𑀯𑀸 𑀅𑀦𑀥𑀺𑀧𑁆𑀧𑁂𑀢𑀯𑀘𑀦𑀁 𑀯𑀸𑀢𑀺. 𑀢𑀢𑁆𑀣 𑀦 𑀲𑀓𑀯𑀘𑀦𑀁 𑀳𑁄𑀢𑀺, 𑀅𑀣 𑀔𑁄 𑀧𑀭𑀯𑀘𑀦𑀁. 𑀢𑁂𑀦𑀸𑀳 ‘‘𑀯𑀤𑀦𑁆𑀢𑀻’’𑀢𑀺. 𑀦 𑀝𑀻𑀓𑀸𑀘𑀭𑀺𑀬𑁂𑀦 𑀅𑀥𑀺𑀧𑁆𑀧𑁂𑀢𑀯𑀘𑀦𑀁 𑀳𑁄𑀢𑀺, 𑀅𑀣 𑀔𑁄 𑀅𑀦𑀥𑀺𑀧𑁆𑀧𑁂𑀢𑀯𑀘𑀦𑀁. 𑀢𑁂𑀦𑀸𑀳 ‘‘𑀢𑀁 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀳𑀺 𑀧𑀦 𑀆𑀘𑀭𑀺𑀬𑁂𑀳𑀺 𑀅𑀢𑀻𑀢𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀇𑀤𑀁 ¶ 𑀅𑀢𑀻𑀢𑀧𑀅𑀪𑁄𑀕𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀢𑀻𑀢𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀢𑀻𑀢𑀯𑀸𑀘𑀓𑁂𑀦 𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀪𑀯𑁂𑀬𑁆𑀬. 𑀅𑀢𑀻𑀢𑁂 𑀧𑀭𑀺𑀪𑁄𑀕𑁄 𑀅𑀢𑀻𑀢𑀧𑀭𑀺𑀪𑁄𑀕𑁄, 𑀅𑀢𑀻𑀢𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀢𑀻𑀢𑀧𑀭𑀺𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀏𑀯𑀁 𑀧𑀦 𑀓𑀢𑁂 𑀅𑀢𑀻𑀢𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀸𑀘𑀓𑁂𑀦 𑀲𑀤𑁆𑀤𑁂𑀦 𑀓𑀣𑀦𑀁 𑀳𑁄𑀢𑀺 𑀬𑀣𑀸 𑀢𑀁 𑀦𑀕𑀭𑀢𑁄 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀧𑀼𑀭𑀺𑀲𑀁 ‘‘𑀓𑀼𑀢𑁄 𑀆𑀕𑀘𑁆𑀙𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀦𑀕𑀭𑀢𑁄 𑀆𑀕𑀘𑁆𑀙𑀸𑀫𑀻’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀸𑀘𑀓𑀲𑀤𑁆𑀤𑁂𑀦 𑀓𑀣𑀦𑀁.

𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁩; 𑀯𑀺𑀲𑀼𑀤𑁆𑀥𑀺. 𑁧.𑁧𑁮) 𑀘 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑁂𑀦𑁂𑀯 𑀧𑀸𑀞𑁄 𑀳𑁄𑀢𑀺, 𑀦 𑀅𑀢𑀻𑀢𑀯𑀘𑀦𑁂𑀦, 𑀅𑀢𑀻𑀢𑀧𑀭𑀺𑀪𑁄𑀕𑁄𑀢𑀺 𑀘 𑀇𑀫𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀧𑀘𑁆𑀙𑀸𑀪𑀢𑁆𑀢𑀸𑀤𑀺𑀓𑀸𑀮𑀁 𑀉𑀧𑀸𑀤𑀸𑀬 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀧𑀭𑀺𑀪𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀳𑀺𑀬𑁆𑀬𑁄 𑀧𑀭𑀺𑀪𑁄𑀕𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁫) ‘‘𑀧𑀺𑀡𑁆𑀟𑀧𑀸𑀢𑁄 𑀆𑀮𑁄𑀧𑁂 𑀆𑀮𑁄𑀧𑁂, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀼𑀭𑀺𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼. 𑀲𑀘𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀢𑁄𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺. 𑀏𑀢𑁂𑀦 𑀧𑀺𑀡𑁆𑀟𑀧𑀸𑀢𑀁 𑀆𑀮𑁄𑀧𑁂 𑀆𑀮𑁄𑀧𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀪𑁄𑀚𑀦𑀓𑀺𑀭𑀺𑀬𑀸𑀬 𑀅𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀫𑀼𑀔𑁆𑀬𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀺, 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀪𑁄𑀚𑀦𑀓𑀺𑀭𑀺𑀬𑀸𑀬 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑀢𑁆𑀢𑀸 𑀯𑀢𑁆𑀢𑀫𑀸𑀦𑀯𑀘𑀦𑁂𑀦 𑀯𑀺𑀥𑀻𑀬𑀢𑀺. 𑀬𑀤𑀺 𑀳𑀺 𑀳𑀺𑀬𑁆𑀬𑁄 𑀧𑀭𑀺𑀪𑀼𑀢𑁆𑀢𑀸𑀦𑀺 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀅𑀢𑀻𑀢𑀤𑀼𑀢𑀺𑀬𑀤𑀺𑀯𑀲𑀢𑀢𑀺𑀬𑀤𑀺𑀯𑀲𑀸𑀤𑀺𑀫𑀸𑀲𑀲𑀁𑀯𑀘𑁆𑀙𑀭𑀸𑀤𑀺𑀧𑀭𑀺𑀪𑀼𑀢𑁆𑀢𑀸𑀦𑀺𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀏𑀯𑀜𑁆𑀘 𑀲𑀢𑀺 𑀬𑀣𑀸𑀯𑀼𑀢𑁆𑀢𑀅𑀝𑁆𑀞𑀓𑀣𑀸𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁂𑀦 ¶ ¶ 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄;

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸;

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

‘‘𑀢𑀲𑁆𑀫𑀸 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁;

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸);

𑀬𑀲𑁆𑀫𑀸 𑀘 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁨𑁩) 𑀪𑀕𑀯𑀢𑀸 𑀤𑁂𑀲𑀺𑀢𑀓𑀸𑀮𑁂 𑀪𑀺𑀓𑁆𑀔𑀼𑀓𑀢𑁆𑀢𑀼𑀓𑀢𑁆𑀢𑀸 𑀦𑀸𑀫𑀬𑁄𑀕𑀢𑁆𑀢𑀸 𑀯𑀢𑁆𑀢𑀫𑀸𑀦𑀧𑀞𑀫𑀧𑀼𑀭𑀺𑀲𑀯𑀲𑁂𑀦 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀻’’𑀢𑀺 𑀤𑁂𑀲𑀺𑀢𑀸, 𑀢𑀤𑀦𑀼𑀓𑀭𑀡𑁂𑀦 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀅𑀢𑁆𑀢𑀓𑀢𑁆𑀢𑀼𑀓𑀢𑁆𑀢𑀸 𑀅𑀫𑁆𑀳𑀬𑁄𑀕𑀢𑁆𑀢𑀸 𑀯𑀢𑁆𑀢𑀫𑀸𑀦𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀸𑀫𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸 𑀳𑁄𑀢𑀺, ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀻𑀦𑀺 𑀢𑀤𑀢𑁆𑀣𑀲𑀫𑁆𑀧𑀤𑀸𑀦𑀧𑀤𑀸𑀦𑀺 𑀘 ‘‘𑀧𑀝𑀺𑀲𑁂𑀯𑀢𑀺, 𑀧𑀝𑀺𑀲𑁂𑀯𑀸𑀫𑀻’’𑀢𑀺 𑀯𑀼𑀢𑁆𑀢𑀧𑀝𑀺𑀲𑁂𑀯𑀦𑀓𑀺𑀭𑀺𑀬𑀸𑀬𑀫𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀓𑀺𑀭𑀺𑀬𑀸𑀧𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑀅𑀢𑀻𑀢𑀯𑀲𑁂𑀦 𑀯𑀸 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀪𑀼𑀢𑁆𑀢𑀸𑀦𑀁 𑀯𑀸 𑀅𑀢𑀻𑀢𑀧𑀭𑀺𑀪𑀼𑀢𑁆𑀢𑀸𑀦𑀁 𑀯𑀸 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 ‘‘𑀧𑀝𑀺𑀲𑁂𑀯𑀸𑀫𑀻’’𑀢𑀺 𑀯𑀘𑀦𑀁 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀦𑀼𑀕𑀢𑀢𑁆𑀢𑀸 𑀉𑀧𑀧𑀦𑁆𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀼𑀯𑀘𑀦𑁂𑀧𑀺 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 ‘‘𑀅𑀚𑁆𑀚 𑀧𑀸𑀢𑁄 𑀧𑀭𑀺𑀪𑀼𑀢𑁆𑀢𑀁 𑀲𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀅𑀚𑁆𑀚 𑀬𑀁 𑀫𑀬𑀸 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸’’𑀢𑀺 𑀬𑁂 𑀯𑀤𑀦𑁆𑀢𑀺, 𑀢𑁂 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀸 𑁋 𑀓𑀺𑀁 𑀪𑀯𑀦𑁆𑀢𑁄 𑀪𑀕𑀯𑀢𑀸 𑀅𑀢𑀻𑀢𑀧𑀭𑀺𑀪𑀼𑀢𑁆𑀢𑁂𑀲𑀼 𑀅𑀢𑀻𑀢𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑁂𑀲𑀺𑀢𑀸𑀢𑀺? 𑀦 𑀤𑁂𑀲𑀺𑀢𑀸. 𑀓𑀣𑀁 𑀤𑁂𑀲𑀺𑀢𑀸𑀢𑀺? ‘‘𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀯 ¶ 𑀤𑁂𑀲𑀺𑀢𑀸𑀢𑀺. 𑀓𑀺𑀁 𑀪𑁄𑀦𑁆𑀢𑁄 𑀪𑀕𑀯𑀢𑁄 𑀓𑀸𑀮𑁂 𑀅𑀢𑀻𑀢𑀧𑀭𑀺𑀪𑀼𑀢𑁆𑀢𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑁂𑀲𑀺𑀢𑀸𑀢𑀺? 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑀯𑀲𑁂𑀦 𑀯𑀸 𑀲𑀸𑀫𑀜𑁆𑀜𑀯𑀲𑁂𑀦 𑀯𑀸 𑀤𑁂𑀲𑀺𑀢𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀪𑀕𑀯𑀢𑁄 𑀅𑀦𑀼𑀓𑀭𑀡𑁂𑀦 𑀇𑀤𑀸𑀦𑀺𑀧𑀺 ¶ 𑀅𑀢𑀻𑀢𑀧𑀭𑀺𑀪𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸𑀢𑀺. 𑀬𑁂 𑀧𑀦 𑀏𑀯𑀁 𑀯𑀤𑀦𑁆𑀢𑀺 ‘‘𑀳𑀺𑀬𑁆𑀬𑁄 𑀧𑀭𑀺𑀪𑀼𑀢𑁆𑀢𑀸𑀦𑀫𑁂𑀯 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸, 𑀦 𑀅𑀚𑁆𑀚 𑀧𑀭𑀺𑀪𑀼𑀢𑁆𑀢𑀸𑀦𑀁, 𑀢𑁂𑀲𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑁂𑀯𑀸’’𑀢𑀺, 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 𑁋 𑀓𑀺𑀁 𑀪𑁄𑀦𑁆𑀢𑁄 𑀬𑀣𑀸 𑀢𑀼𑀫𑁆𑀳𑁂 𑀯𑀤𑀦𑁆𑀢𑀺, 𑀏𑀯𑀁 𑀧𑀸𑀴𑀺𑀬𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂 𑀲𑀸𑀝𑁆𑀞𑀓𑀣𑁂𑀲𑀼 𑀢𑁂𑀧𑀺𑀝𑀓𑁂𑀲𑀼 𑀩𑀼𑀤𑁆𑀥𑀯𑀘𑀦𑁂𑀲𑀼 𑀅𑀲𑀁𑀯𑀺𑀚𑁆𑀚𑀫𑀸𑀦𑀁 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀓𑀣𑀁 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺? 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀯𑀲𑁂𑀦. 𑀳𑁄𑀢𑀼 𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀮𑀤𑁆𑀥𑀺𑀯𑀲𑁂𑀦 𑀓𑀣𑀦𑀁, 𑀓𑀸𑀮𑁄 𑀦𑀸𑀫 𑀢𑀺𑀯𑀺𑀥𑁄 𑀅𑀢𑀻𑀢𑁄 𑀅𑀦𑀸𑀕𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺. 𑀢𑀢𑁆𑀣 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑀸 𑀅𑀢𑀻𑀢𑁄 𑀦𑀸𑀫, 𑀅𑀪𑀺𑀫𑀼𑀔𑀓𑀺𑀭𑀺𑀬𑀸 𑀅𑀦𑀸𑀕𑀢𑁄 𑀦𑀸𑀫, 𑀆𑀭𑀤𑁆𑀥𑀅𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀆𑀭𑀤𑁆𑀥𑀸𑀦𑀺𑀝𑁆𑀞𑀺𑀢𑁄 𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀲𑀼𑀦𑀺𑀝𑁆𑀞𑀺𑀢𑁄;

𑀅𑀢𑀻𑀢𑀸𑀦𑀸𑀕𑀢𑀼𑀧𑁆𑀧𑀸𑀤-𑀫𑀧𑁆𑀧𑀢𑁆𑀢𑀸𑀪𑀺𑀫𑀼𑀔𑀸 𑀓𑀺𑀭𑀺𑀬𑀸’’𑀢𑀺.

𑀢𑀢𑁆𑀣 𑀅𑀚𑁆𑀚 𑀯𑀸 𑀳𑁄𑀢𑀼 𑀳𑀺𑀬𑁆𑀬𑁄 𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀯𑀸, 𑀧𑀭𑀺𑀪𑀼𑀢𑁆𑀢𑀧𑀘𑁆𑀘𑀬𑁄 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀼𑀜𑁆𑀚𑀦𑀓𑀺𑀭𑀺𑀬𑀢𑁆𑀢𑀸 𑀅𑀢𑀻𑀢𑁄 𑀦𑀸𑀫. 𑀢𑀢𑁆𑀣 𑀳𑀺𑀬𑁆𑀬𑁄 𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀭𑀺𑀪𑀼𑀢𑁆𑀢𑀧𑀘𑁆𑀘𑀬𑁄 𑀅𑀢𑀺𑀓𑁆𑀓𑀦𑁆𑀢𑀅𑀭𑀼𑀡𑀼𑀕𑁆𑀕𑀫𑀦𑀢𑁆𑀢𑀸 𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀭𑀳𑁄, 𑀧𑀘𑁆𑀘𑀯𑁂𑀓𑁆𑀔𑀺𑀢𑁄𑀧𑀺 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁄𑀬𑁂𑀯 𑀳𑁄𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀢𑁄𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺. 𑀅𑀚𑁆𑀚𑁂𑀯 𑀧𑀦 𑀘𑀻𑀯𑀭𑀜𑁆𑀘 𑀲𑁂𑀦𑀸𑀲𑀦𑀜𑁆𑀘 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂, 𑀧𑀺𑀡𑁆𑀟𑀧𑀸𑀢𑀁 𑀆𑀮𑁄𑀧𑁂 𑀆𑀮𑁄𑀧𑁂, 𑀪𑁂𑀲𑀚𑁆𑀚𑀁 𑀧𑀝𑀺𑀕𑁆𑀕𑀳𑀡𑁂 𑀧𑀭𑀺𑀪𑁄𑀕𑁂 𑀘 ¶ 𑀧𑀘𑁆𑀘𑀯𑁂𑀓𑁆𑀔𑀢𑁄 𑀅𑀧𑀭𑀺𑀦𑀺𑀝𑁆𑀞𑀺𑀢𑀪𑀼𑀜𑁆𑀚𑀦𑀓𑀺𑀭𑀺𑀬𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀪𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀳𑁄𑀢𑀺. 𑀧𑀼𑀭𑁂 𑀧𑀭𑀺𑀪𑀼𑀢𑁆𑀢𑀁 𑀢𑀢𑁄 𑀧𑀘𑁆𑀙𑀸 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀢𑁄 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀼𑀜𑁆𑀚𑀦𑀓𑀺𑀭𑀺𑀬𑀢𑁆𑀢𑀸 𑀅𑀢𑀻𑀢𑀧𑀭𑀺𑀪𑀼𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀳𑁄𑀢𑀺. 𑀏𑀢𑁆𑀢𑀓𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀔𑁂𑀢𑁆𑀢𑀁, 𑀦 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀯𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀻𑀮𑀯𑀢𑁄 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀦𑀸𑀫. 𑀢𑀲𑁆𑀫𑀸 𑀘𑀻𑀯𑀭𑀁 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂…𑀧𑁂… 𑀪𑁂𑀲𑀚𑁆𑀚𑀲𑁆𑀲 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀲𑀢𑀺𑀧𑀘𑁆𑀘𑀬𑀢𑀸 𑀯𑀝𑁆𑀝𑀢𑀻’’𑀢𑀺, 𑀢𑀲𑁆𑀫𑀸 𑀳𑀺𑀬𑁆𑀬𑁄 𑀧𑀭𑀺𑀪𑀼𑀢𑁆𑀢𑀲𑁆𑀲 𑀇𑀡𑀧𑀭𑀺𑀪𑁄𑀕𑀢𑁆𑀢𑀸 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀚𑁆𑀚 𑀧𑀭𑀺𑀪𑀼𑀢𑁆𑀢𑁂𑀲𑀼 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀦𑀼𑀓𑀭𑀡𑁂𑀦 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑁂𑀦 ‘‘𑀧𑀝𑀺𑀲𑁂𑀯𑀸𑀫𑀻’’𑀢𑀺 𑀓𑀺𑀭𑀺𑀬𑀸𑀧𑀤𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀽𑀧𑀧𑀦𑁆𑀦𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀈𑀤𑀺𑀲𑀧𑀘𑁆𑀘𑀯𑁂𑀓𑁆𑀔𑀡𑀫𑁂𑀯 𑀲𑀦𑁆𑀥𑀸𑀬 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀸𑀤𑀻𑀲𑀼 (𑀯𑀺. 𑀯𑀺. 𑀝𑀻. 𑁧.𑁫𑁮𑁫) ‘‘𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀅𑀢𑀻𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀯𑀺𑀲𑀼𑀚𑁆𑀛𑀦𑀢𑁄’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 ¶ 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲 𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀲𑀩𑁆𑀩𑀸𑀧𑀺 𑀲𑀼𑀤𑁆𑀥𑀺𑀬𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀩𑁆𑀩𑀺𑀥𑀸 𑀳𑀺 𑀲𑀼𑀤𑁆𑀥𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀲𑀼𑀤𑁆𑀥𑀺, 𑀬𑀣𑀸𑀥𑀫𑁆𑀫𑀁 𑀤𑁂𑀲𑀦𑀸𑀯 𑀲𑀼𑀤𑁆𑀥𑀺 𑀤𑁂𑀲𑀦𑀸𑀲𑀼𑀤𑁆𑀥𑀺. 𑀯𑀼𑀝𑁆𑀞𑀸𑀦𑀲𑁆𑀲𑀧𑀺 𑀘𑁂𑀢𑁆𑀣 𑀤𑁂𑀲𑀦𑀸𑀬 𑀏𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀙𑀺𑀦𑁆𑀦𑀫𑀽𑀮𑀸𑀧𑀢𑁆𑀢𑀻𑀦𑀁 𑀧𑀦 𑀅𑀪𑀺𑀓𑁆𑀔𑀼𑀢𑀸𑀧𑀝𑀺𑀜𑁆𑀜𑀸𑀬𑁂𑀯 𑀤𑁂𑀲𑀦𑀸. 𑀅𑀥𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁄 𑀲𑀁𑀯𑀭𑁄𑀯 𑀲𑀼𑀤𑁆𑀥𑀺 𑀲𑀁𑀯𑀭𑀲𑀼𑀤𑁆𑀥𑀺. 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑀸𑀦𑀁 𑀧𑀭𑀺𑀬𑁂𑀝𑁆𑀞𑀺 𑀏𑀯 𑀲𑀼𑀤𑁆𑀥𑀺 𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀺. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀯 𑀲𑀼𑀤𑁆𑀥𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀺. 𑀏𑀲 𑀢𑀸𑀯 𑀲𑀼𑀤𑁆𑀥𑀻𑀲𑀼 𑀲𑀫𑀸𑀲𑀦𑀬𑁄. 𑀲𑀼𑀤𑁆𑀥𑀺𑀫𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀧𑀦 𑀤𑁂𑀲𑀦𑀸 𑀲𑀼𑀤𑁆𑀥𑀺 𑀏𑀢𑀲𑁆𑀲𑀸𑀢𑀺 𑀤𑁂𑀲𑀦𑀸𑀲𑀼𑀤𑁆𑀥𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀏𑀯𑀦𑁆𑀢𑀺 𑀲𑀁𑀯𑀭𑀪𑁂𑀤𑀁 𑀲𑀦𑁆𑀥𑀸𑀬𑀸𑀳. 𑀧𑀳𑀸𑀬𑀸𑀢𑀺 ¶ 𑀯𑀚𑁆𑀚𑁂𑀢𑁆𑀯𑀸, 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀲𑀼𑀚𑁆𑀛𑀢𑀺 𑀤𑁂𑀲𑀦𑀸𑀤𑀻𑀳𑀺, 𑀲𑁄𑀥𑀻𑀬𑀢𑀻𑀢𑀺 𑀯𑀸 𑀲𑀼𑀤𑁆𑀥𑀺, 𑀘𑀢𑀼𑀩𑁆𑀩𑀺𑀥𑀲𑀻𑀮𑀁. 𑀢𑁂𑀦𑀸𑀳 ‘𑀤𑁂𑀲𑀦𑀸𑀬 𑀲𑀼𑀚𑁆𑀛𑀦𑀢𑁄’𑀢𑀺𑀆𑀤𑀺. 𑀏𑀢𑁆𑀣 𑀤𑁂𑀲𑀦𑀸𑀕𑁆𑀕𑀳𑀡𑁂𑀦 𑀯𑀼𑀝𑁆𑀞𑀸𑀦𑀫𑁆𑀧𑀺 𑀙𑀺𑀦𑁆𑀦𑀫𑀽𑀮𑀸𑀦𑀁 𑀅𑀪𑀺𑀓𑁆𑀔𑀼𑀢𑀸𑀧𑀝𑀺𑀜𑁆𑀜𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀙𑀺𑀦𑁆𑀦𑀫𑀽𑀮𑀸𑀧𑀢𑁆𑀢𑀻𑀦𑀫𑁆𑀧𑀺 𑀳𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂𑀦 𑀳𑁂𑀝𑁆𑀞𑀸𑀧𑀭𑀺𑀭𑀓𑁆𑀔𑀺𑀢𑀁 𑀪𑀺𑀓𑁆𑀔𑀼𑀲𑀻𑀮𑀁 𑀯𑀺𑀲𑀼𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀢𑁂𑀲𑀁 𑀫𑀕𑁆𑀕𑀧𑀝𑀺𑀮𑀸𑀪𑁄𑀧𑀺 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀤𑁂𑀲𑀻𑀬𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀤𑁂𑀲𑀦𑀸, 𑀤𑀺𑀲𑀻 𑀉𑀘𑁆𑀘𑀸𑀭𑀡𑁂𑀢𑀺 𑀥𑀸𑀢𑀼, 𑀤𑁂𑀲𑀻𑀬𑀢𑀺 𑀜𑀸𑀧𑀻𑀬𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀤𑁂𑀲𑀦𑀸, 𑀤𑀺𑀲 𑀧𑁂𑀓𑁆𑀔𑀦𑁂𑀢𑀺 𑀥𑀸𑀢𑀼. 𑀉𑀪𑀬𑀣𑀸𑀧𑀺 𑀯𑀺𑀭𑀢𑀺𑀧𑀥𑀸𑀦𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁄 𑀤𑁂𑀲𑀦𑀸𑀯𑀘𑀻𑀪𑁂𑀤𑀲𑀤𑁆𑀤𑁄. 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀲𑀁-𑀧𑀼𑀩𑁆𑀩 𑀯𑀭 𑀲𑀁𑀯𑀭𑀡𑁂𑀢𑀺 𑀥𑀸𑀢𑀼, 𑀲𑀢𑀺𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀧𑀭𑀺𑀬𑁂𑀲𑀦𑀸 𑀧𑀭𑀺𑀬𑁂𑀝𑁆𑀞𑀺, 𑀧𑀭𑀺-𑀧𑀼𑀩𑁆𑀩 𑀇𑀲 𑀧𑀭𑀺𑀬𑁂𑀲𑀦𑁂𑀢𑀺 𑀥𑀸𑀢𑀼, 𑀯𑀻𑀭𑀺𑀬𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀧𑀝𑀺 𑀧𑀼𑀦𑀧𑁆𑀧𑀼𑀦𑀁 𑀑𑀕𑀸𑀳𑁂𑀢𑁆𑀯𑀸 𑀇𑀓𑁆𑀔𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀝𑀺-𑀧𑀼𑀩𑁆𑀩 𑀅𑀯-𑀧𑀼𑀩𑁆𑀩 𑀇𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀽𑀢𑀺 𑀥𑀸𑀢𑀼, 𑀧𑀜𑁆𑀜𑀸𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀢𑁂𑀲𑀼 𑀤𑁂𑀲𑀦𑀸𑀬 𑀯𑀘𑀻𑀪𑁂𑀤𑀲𑀤𑁆𑀤𑀪𑀸𑀯𑀢𑁄 𑀯𑀘𑀻𑀪𑁂𑀤𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀘 𑀤𑀼𑀢𑀺𑀬𑀓𑀁 𑀅𑀮𑀪𑀦𑁆𑀢𑀲𑁆𑀲 𑀘 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑁂𑀲𑀸 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀪𑀸𑀯𑀢𑁄 𑀯𑀘𑀻𑀪𑁂𑀤𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑀧𑀺 𑀤𑀼𑀢𑀺𑀬𑀓𑀁 𑀅𑀮𑀪𑀦𑁆𑀢𑀲𑁆𑀲𑀧𑀺 𑀲𑀫𑁆𑀧𑀚𑁆𑀚𑀦𑁆𑀢𑀺 𑀏𑀯, 𑀢𑀲𑁆𑀫𑀸 𑀕𑀺𑀮𑀸𑀦𑀸𑀤𑀺𑀓𑀸𑀮𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀧𑀸𑀞𑀁 𑀧𑀞𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁂𑀦𑀧𑀺 𑀅𑀢𑁆𑀣𑀁 𑀫𑀦𑀲𑀺 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸𑀢𑀺.

𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀬𑀁, 𑀢𑀁 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸, 𑀅𑀦𑀦𑀼𑀜𑁆𑀜𑀸𑀢𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀪𑁄𑀕𑀸𑀪𑀸𑀯𑀢𑁄 𑀅𑀦𑀼𑀜𑁆𑀜𑀸𑀢𑁂𑀲𑀼𑀬𑁂𑀯 𑀘 𑀧𑀭𑀺𑀪𑁄𑀕𑀲𑀩𑁆𑀪𑀸𑀯𑀪𑀸𑀯𑀢𑁄 𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀧𑀘𑁆𑀘𑀬𑀸 𑀪𑀕𑀯𑀢𑁄 𑀲𑀦𑁆𑀢𑀓𑀸. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀲𑀸𑀥𑀓𑀦𑁆𑀢𑀺 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸 ¶ , 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸, 𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘 ¶ (𑀫. 𑀦𑀺. 𑁧.𑁨𑁯) 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀸𑀥𑀓𑀁. 𑀅𑀯𑀻𑀢𑀭𑀸𑀕𑀸𑀦𑀁 𑀢𑀡𑁆𑀳𑀸𑀯𑀲𑀻𑀓𑀢𑀸𑀬 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺, 𑀢𑀤𑀪𑀸𑀯𑁂𑀦 𑀯𑀻𑀢𑀭𑀸𑀕𑀸𑀦𑀁 𑀢𑀢𑁆𑀣 𑀲𑀸𑀫𑀺𑀪𑀸𑀯𑁄 𑀬𑀣𑀸𑀭𑀼𑀘𑀺 𑀧𑀭𑀺𑀪𑁄𑀕𑀲𑀩𑁆𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀧𑀝𑀺𑀓𑀽𑀮𑀫𑁆𑀧𑀺 𑀅𑀧𑁆𑀧𑀝𑀺𑀓𑀽𑀮𑀸𑀓𑀸𑀭𑁂𑀦 𑀅𑀧𑁆𑀧𑀝𑀺𑀓𑀽𑀮𑀫𑁆𑀧𑀺 𑀧𑀝𑀺𑀓𑀽𑀮𑀸𑀓𑀸𑀭𑁂𑀦 𑀢𑀤𑀼𑀪𑀬𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀡𑀸𑀓𑀸𑀭𑁂𑀦 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀬𑀓𑀸𑀦𑀜𑁆𑀘 𑀫𑀦𑁄𑀭𑀣𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑁂 𑀳𑀺 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀁 𑀅𑀢𑀻𑀢𑀢𑁆𑀢𑀸 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀬𑁄 𑀧𑀦𑀸𑀬𑀁 𑀲𑀻𑀮𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄, 𑀲𑁄 𑀇𑀡𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀦𑀻𑀓𑀢𑁆𑀢𑀸 𑀆𑀦𑀡𑁆𑀬𑀧𑀭𑀺𑀪𑁄𑀕𑁄 𑀦𑀸𑀫 𑀳𑁄𑀢𑀺. 𑀬𑀣𑀸 𑀧𑀦 𑀇𑀡𑀸𑀬𑀺𑀓𑁄 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀇𑀘𑁆𑀙𑀺𑀢𑀁 𑀤𑁂𑀲𑀁 𑀕𑀦𑁆𑀢𑀼𑀁 𑀦 𑀮𑀪𑀢𑀺, 𑀏𑀯𑀁 𑀇𑀡𑀧𑀭𑀺𑀪𑁄𑀕𑀬𑀼𑀢𑁆𑀢𑁄 𑀮𑁄𑀓𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀆𑀦𑀡𑁆𑀬𑀧𑀭𑀺𑀪𑁄𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘𑀢𑀼𑀧𑀭𑀺𑀪𑁄𑀕𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀲𑀼𑀁𑀬𑁂𑀯𑀸𑀬𑀁 𑀧𑀭𑀺𑀪𑁄𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄, 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂𑀬𑁂𑀯 𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺. 𑀲𑀻𑀮𑀯𑀸𑀧𑀺 𑀳𑀺 𑀇𑀫𑀸𑀬 𑀲𑀺𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁂𑀓𑁆𑀔𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑀲𑀩𑁆𑀩𑁂𑀲𑀦𑁆𑀢𑀺 𑀅𑀭𑀺𑀬𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘. 𑀓𑀣𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀇𑀫𑁂 𑀧𑀭𑀺𑀪𑁄𑀕𑀸 𑀲𑀫𑁆𑀪𑀯𑀦𑁆𑀢𑀻𑀢𑀺? 𑀉𑀧𑀘𑀸𑀭𑀯𑀲𑁂𑀦. 𑀬𑁄 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀧𑀘𑁆𑀘𑀬𑀕𑁂𑀥𑀁 𑀧𑀳𑀸𑀬 𑀢𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀪𑁄𑀕𑁄, 𑀲𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺. 𑀲𑀻𑀮𑀯𑀢𑁄 𑀧𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺 𑀤𑀸𑀬𑀓𑀸𑀦𑀁 𑀫𑀦𑁄𑀭𑀣𑀲𑁆𑀲𑀸𑀯𑀺𑀭𑀸𑀥𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂𑀬𑁂𑀯 𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀪𑁄𑀕𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 ¶ 𑀢𑀲𑁆𑀲 𑀲𑁂𑀓𑁆𑀔𑀲𑀗𑁆𑀕𑀳𑀢𑁄. 𑀲𑁂𑀓𑁆𑀔𑀲𑀼𑀢𑁆𑀢 𑀜𑁆𑀳𑁂𑀢𑀲𑁆𑀲 (𑀅. 𑀦𑀺. 𑁩.𑁮𑁬) 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁮𑁫) 𑀧𑀦 ‘‘𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀬𑀁, 𑀢𑀁 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀦𑁆𑀢𑀺 𑀏𑀢𑁆𑀣 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀧𑀺 𑀲𑀗𑁆𑀕𑀳𑀺𑀢𑀸 𑀢𑁂𑀲𑀁 𑀆𑀦𑀡𑁆𑀬𑀧𑀭𑀺𑀪𑁄𑀕𑀲𑁆𑀲 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀦𑁆𑀢𑀺 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁨𑁯). 𑀢𑀢𑁆𑀣 ‘‘𑀫𑀸 𑀫𑁂 𑀆𑀫𑀺𑀲𑀤𑀸𑀬𑀸𑀤𑀸𑀢𑀺 𑀏𑀯𑀁 𑀫𑁂-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀸𑀥𑀓𑀁 ¶ 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑁂 𑀫𑀫 𑀆𑀫𑀺𑀲𑀤𑀸𑀬𑀸𑀤𑀸 𑀘𑀢𑀼𑀧𑀘𑁆𑀘𑀬𑀪𑀼𑀜𑁆𑀚𑀓𑀸𑀢𑀺 𑀪𑀕𑀯𑀢𑁄 𑀲𑀫𑁆𑀩𑀦𑁆𑀥𑀪𑀽𑀢𑀲𑁆𑀲 𑀲𑀫𑁆𑀩𑀦𑁆𑀥𑀻𑀪𑀽𑀢𑀸 𑀧𑀘𑁆𑀘𑀬𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀸𑀧𑀺 𑀧𑀘𑁆𑀘𑀬𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑀕𑀯𑀢𑁄 𑀧𑀘𑁆𑀘𑀬𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀁 𑀲𑀸𑀥𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁.

𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄 𑀦𑀸𑀫 𑀮𑀚𑁆𑀚𑀺𑀲𑁆𑀲 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄. 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑁂𑀲𑀼𑀬𑁂𑀯 𑀆𑀲𑀗𑁆𑀓𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄. 𑀢𑁂𑀧𑀺 𑀦𑀺𑀯𑀸𑀭𑁂𑀢𑀩𑁆𑀩𑀸𑀢𑀺 𑀬𑁄 𑀧𑀲𑁆𑀲𑀢𑀺, 𑀢𑁂𑀦 𑀦𑀺𑀯𑀸𑀭𑁂𑀢𑀩𑁆𑀩𑀸𑀢𑀺 𑀧𑀸𑀞𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁄𑀧𑀺 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑁂𑀦 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀲𑁄𑀧𑀺 𑀦𑀺𑀯𑀸𑀭𑁂𑀢𑀩𑁆𑀩𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀅𑀢𑁆𑀣𑀢𑁄 𑀉𑀪𑀬𑀣𑀸𑀧𑀺 𑀬𑀼𑀚𑁆𑀚𑀢𑀺. 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄𑀧𑀺 𑀅𑀮𑀚𑁆𑀚𑀺𑀪𑀸𑀯𑀢𑁄 𑀦𑀺𑀯𑀸𑀭𑁂𑀢𑀩𑁆𑀩𑀸. 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀳𑀺 𑀏𑀓𑀲𑀫𑁆𑀪𑁄𑀕𑀁 𑀓𑀭𑁄𑀦𑁆𑀢𑀸 𑀅𑀜𑁆𑀜𑁂𑀧𑀺 𑀦𑀺𑀯𑀸𑀭𑁂𑀢𑀩𑁆𑀩𑀸𑀯. 𑀲𑀘𑁂 𑀦 ¶ 𑀑𑀭𑀫𑀢𑀺, 𑀅𑀬𑀫𑁆𑀧𑀺 𑀅𑀮𑀚𑁆𑀚𑀻𑀬𑁂𑀯 𑀳𑁄𑀢𑀻𑀢𑀺 𑀏𑀢𑁆𑀣 𑀏𑀯𑀁 𑀦𑀺𑀯𑀸𑀭𑀺𑀢𑁄 𑀲𑁄 𑀧𑀼𑀕𑁆𑀕𑀮𑁄 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀢𑁄 𑀑𑀭𑀫𑀢𑀺 𑀯𑀺𑀭𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀑𑀭𑀫𑀢𑀺, 𑀅𑀬𑀫𑁆𑀧𑀺 𑀅𑀮𑀚𑁆𑀚𑀻𑀬𑁂𑀯 𑀳𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑁄 𑀲𑁄𑀧𑀺 𑀅𑀮𑀚𑁆𑀚𑀻𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀏𑀓𑁄 𑀅𑀮𑀚𑁆𑀚𑀻 𑀅𑀮𑀚𑁆𑀚𑀺𑀲𑀢𑀫𑁆𑀧𑀺 𑀓𑀭𑁄𑀢𑀻’’𑀢𑀺. 𑀅𑀥𑀫𑁆𑀫𑀺𑀬𑁄𑀢𑀺 𑀅𑀦𑁂𑀲𑀦𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑁄. 𑀥𑀫𑁆𑀫𑀺𑀬𑁄𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑁄. 𑀲𑀗𑁆𑀖𑀲𑁆𑀲𑁂𑀯 𑀤𑁂𑀢𑀻𑀢𑀺 𑀪𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀲𑀮𑀸𑀓𑀁𑀬𑁂𑀯 𑀤𑁂𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄𑀢𑀺 𑀥𑀫𑁆𑀫𑀸𑀫𑀺𑀲𑀯𑀲𑁂𑀦 𑀫𑀺𑀲𑁆𑀲𑀻𑀪𑀸𑀯𑁄. 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀤𑀺𑀝𑁆𑀞𑁂𑀲𑀼 𑀆𑀲𑀗𑁆𑀓𑀸 𑀦𑀸𑀫 𑀦 𑀓𑀸𑀢𑀩𑁆𑀩𑀸, 𑀤𑀺𑀝𑁆𑀞𑀲𑀼𑀢𑀸𑀤𑀺𑀓𑀸𑀭𑀡𑁂 𑀲𑀢𑀺 𑀏𑀯 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄. 𑀲𑀘𑁂 𑀦 𑀑𑀭𑀫𑀢𑀻𑀢𑀺 𑀅𑀕𑀢𑀺𑀕𑀫𑀦𑀯𑀲𑁂𑀦 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑀢𑁄 𑀦 𑀑𑀭𑀫𑀢𑀺. 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀤𑀁 𑀅𑀮𑀚𑁆𑀚𑀻𑀦𑀁 𑀥𑀫𑁆𑀫𑁂𑀦𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀫𑁆𑀧𑀺 𑀳𑀺 𑀓𑀼𑀮𑀤𑀽𑀲𑀦𑀸𑀤𑀺𑀲𑀫𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀯𑀕𑁆𑀕𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀸𑀦𑀜𑁆𑀘 𑀆𑀧𑀢𑁆𑀢𑀺 𑀏𑀯. ‘𑀥𑀫𑁆𑀫𑀺𑀬𑀸𑀥𑀫𑁆𑀫𑀺𑀬𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑁂𑀝𑁆𑀞𑀸 𑀮𑀚𑁆𑀚𑀺𑀧𑀭𑀺𑀪𑁄𑀕𑀸𑀮𑀚𑁆𑀚𑀺𑀧𑀭𑀺𑀪𑁄𑀕𑀸 𑀧𑀘𑁆𑀘𑀬𑀯𑀲𑁂𑀦 𑀏𑀓𑀓𑀫𑁆𑀫𑀸𑀤𑀺𑀯𑀲𑁂𑀦 𑀘 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀘𑁄𑀤𑀓𑀘𑀼𑀤𑀺𑀢𑀓𑀪𑀸𑀯𑁂 𑀞𑀺𑀢𑀸 𑀤𑁆𑀯𑁂 𑀅𑀮𑀚𑁆𑀚𑀺𑀦𑁄 𑀥𑀫𑁆𑀫𑀧𑀭𑀺𑀪𑁄𑀕𑀫𑁆𑀧𑀺 𑀲𑀦𑁆𑀥𑀸𑀬 ‘𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’𑀢𑀺 ¶ 𑀯𑀼𑀢𑁆𑀢𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀥𑀫𑁆𑀫𑀸𑀫𑀺𑀲𑀸𑀧𑀭𑀺𑀪𑁄𑀕𑁂 𑀯𑀺𑀭𑁄𑀥𑀸𑀪𑀸𑀯𑀸. 𑀮𑀚𑁆𑀚𑀻𑀦𑀫𑁂𑀯 𑀳𑀺 𑀅𑀮𑀚𑁆𑀚𑀺𑀦𑀸 𑀲𑀳 𑀢𑀤𑀼𑀪𑀬𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀘𑁂 ¶ 𑀧𑀦 𑀮𑀚𑁆𑀚𑀻 𑀅𑀮𑀚𑁆𑀚𑀺𑀁 𑀧𑀕𑁆𑀕𑀡𑁆𑀳𑀸𑀢𑀺…𑀧𑁂… 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀏𑀢𑁆𑀣 𑀓𑁂𑀯𑀮𑀁 𑀧𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀥𑀫𑁆𑀫𑀲𑁆𑀲 𑀧𑀦 𑀲𑀸𑀲𑀦𑀲𑁆𑀲 𑀲𑁄𑀢𑀽𑀦𑀜𑁆𑀘 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀦𑀬𑁂𑀦 ‘‘𑀲𑁄 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀫𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀉𑀤𑁆𑀤𑁂𑀲𑀕𑁆𑀕𑀳𑀡𑀸𑀤𑀺𑀦𑀸 𑀥𑀫𑁆𑀫𑀲𑁆𑀲 𑀧𑀭𑀺𑀪𑁄𑀕𑁄 𑀥𑀫𑁆𑀫𑀧𑀭𑀺𑀪𑁄𑀕𑁄. 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀣𑁂𑀭𑁄 𑀢𑀲𑁆𑀲 𑀅𑀮𑀚𑁆𑀚𑀺𑀪𑀸𑀯𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀧𑀸𑀧𑁄 𑀓𑀺𑀭𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂𑀢𑀺 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁮𑁫) 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀢𑁆𑀣𑀸𑀭𑀢𑁄 𑀯𑀺𑀦𑀺𑀘𑁆𑀙𑀺𑀢𑀁. 𑀓𑀣𑀁? 𑀥𑀫𑁆𑀫𑀧𑀭𑀺𑀪𑁄𑀕𑁄𑀢𑀺 ‘‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀁𑀯𑀸𑀲𑁄 𑀘𑁂𑀯 𑀦𑀺𑀲𑁆𑀲𑀬𑀕𑁆𑀕𑀳𑀡𑀸𑀤𑀺𑀓𑁄 𑀲𑀩𑁆𑀩𑁄 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁄 𑀘 𑀯𑁂𑀤𑀺𑀢𑀩𑁆𑀩𑁄. ‘‘𑀦 𑀲𑁄 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑀚𑁆𑀚𑀺𑀦𑁄 𑀅𑀮𑀚𑁆𑀚𑀺𑀧𑀕𑁆𑀕𑀳𑁂 𑀆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁄𑀧𑀻𑀢𑀺 𑀮𑀚𑁆𑀚𑀻𑀧𑀺. 𑀢𑀲𑁆𑀲𑀸𑀧𑀺 𑀅𑀢𑁆𑀢𑀸𑀦𑀁 𑀧𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀮𑀚𑁆𑀚𑀺𑀦𑁄, 𑀇𑀫𑀺𑀦𑀸 𑀘 𑀮𑀚𑁆𑀚𑀺𑀦𑁄 𑀯𑀡𑁆𑀡𑀪𑀡𑀦𑀸𑀤𑀺𑀮𑀸𑀪𑀁 𑀧𑀝𑀺𑀘𑁆𑀘 𑀆𑀫𑀺𑀲𑀕𑀭𑀼𑀓𑀢𑀸𑀬 𑀯𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀯𑀸 𑀢𑀁 𑀅𑀮𑀚𑁆𑀚𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀮𑀚𑁆𑀚𑀻 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀕𑀳𑀝𑁆𑀞𑀸𑀤𑀻𑀲𑀼 𑀉𑀧𑀢𑁆𑀣𑀫𑁆𑀪𑀺𑀢𑁄 𑀅𑀮𑀚𑁆𑀚𑀻 𑀩𑀮𑀁 𑀮𑀪𑀺𑀢𑁆𑀯𑀸 𑀧𑁂𑀲𑀮𑁂 𑀅𑀪𑀺𑀪𑀯𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀭𑁄𑀢𑀻𑀢𑀺.

𑀥𑀫𑁆𑀫𑀧𑀭𑀺𑀪𑁄𑀕𑁄𑀧𑀺 𑀢𑀢𑁆𑀣 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀆𑀫𑀺𑀲𑀧𑀭𑀺𑀪𑁄𑀕𑀢𑁄 𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀕𑀭𑀼𑀓𑁄, 𑀢𑀲𑁆𑀫𑀸 𑀅𑀢𑀺𑀯𑀺𑀬 𑀅𑀮𑀚𑁆𑀚𑀻𑀯𑀺𑀯𑁂𑀓𑁂𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀉𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀢𑀸𑀬𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂, 𑀮𑀚𑁆𑀚𑀻𑀲𑀼 𑀘 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀅𑀮𑀚𑁆𑀚𑀺𑀁 𑀧𑀓𑀢𑀢𑁆𑀢𑀁 𑀕𑀡𑀧𑀽𑀭𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀤𑀺𑀓𑀭𑀡𑁂𑀦 𑀘𑁂𑀯 𑀓𑁂𑀘𑀺 𑀅𑀮𑀚𑁆𑀚𑀺𑀦𑁄 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑁂𑀦 ¶ 𑀲𑀗𑁆𑀕𑀳𑁂𑀢𑁆𑀯𑀸 𑀲𑁂𑀲𑀸𑀮𑀚𑁆𑀚𑀺𑀕𑀡𑀲𑁆𑀲 𑀦𑀺𑀕𑁆𑀕𑀳𑁂𑀦 𑀘 𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯.

𑀓𑁂𑀘𑀺 𑀧𑀦 ‘‘𑀓𑁄𑀝𑀺𑀬𑀁 𑀞𑀺𑀢𑁄 𑀕𑀦𑁆𑀣𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀦𑁆𑀣𑀧𑀭𑀺𑀬𑀸𑀧𑀼𑀡𑀦𑀫𑁂𑀯 𑀥𑀫𑁆𑀫𑀧𑀭𑀺𑀪𑁄𑀕𑁄, 𑀦 𑀏𑀓𑀓𑀫𑁆𑀫𑀸𑀤𑀺, 𑀢𑀲𑁆𑀫𑀸 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀓𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀏𑀓𑀓𑀫𑁆𑀫𑀸𑀤𑀻𑀲𑀼 𑀩𑀳𑀽𑀲𑀼 𑀥𑀫𑁆𑀫𑀧𑀭𑀺𑀪𑁄𑀕𑁂𑀲𑀼 𑀅𑀮𑀚𑁆𑀚𑀺𑀦𑀸𑀧𑀺 𑀲𑀤𑁆𑀥𑀺𑀁 𑀓𑀢𑁆𑀢𑀩𑁆𑀩𑀸𑀯𑀢𑁆𑀣𑀸𑀬𑀢𑁆𑀢𑀁 ¶ 𑀥𑀫𑁆𑀫𑀧𑀭𑀺𑀪𑁄𑀕𑀁 𑀤𑀲𑁆𑀲𑁂𑀢𑀼𑀁 𑀇𑀥 𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀦𑁆𑀣𑀲𑁆𑀲𑁂𑀯 𑀲𑀫𑀼𑀤𑁆𑀥𑀝𑀢𑁆𑀢𑀸. 𑀦 𑀳𑀺 𑀏𑀓𑀓𑀫𑁆𑀫𑀸𑀤𑀺𑀓𑁄 𑀯𑀺𑀥𑀺 𑀥𑀫𑁆𑀫𑀧𑀭𑀺𑀪𑁄𑀕𑁄 𑀦 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀦𑀸𑀫𑀺𑀲𑀢𑁆𑀢𑀸 𑀥𑀫𑁆𑀫𑀸𑀫𑀺𑀲𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀘 𑀓𑀲𑁆𑀲𑀘𑀺 𑀅𑀪𑀸𑀯𑀸. 𑀢𑁂𑀦𑁂𑀯 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁩𑁫𑁧) ‘‘𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁, 𑀥𑀫𑁆𑀫𑁄 𑀯𑀸𑀘𑁂𑀢𑀩𑁆𑀩𑁄…𑀧𑁂… 𑀅𑀩𑁆𑀪𑀸𑀦𑀯𑀼𑀝𑁆𑀞𑀸𑀦𑀫𑀸𑀦𑀢𑁆𑀢𑀧𑀭𑀺𑀯𑀸𑀲𑀸 𑀤𑀸𑀢𑀩𑁆𑀩𑀸, 𑀧𑀩𑁆𑀩𑀚𑁆𑀚𑀸𑀭𑀳𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀤𑀸𑀭𑀳𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀅𑀬𑀁 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀲𑀗𑁆𑀖𑀓𑀫𑁆𑀫𑀸𑀤𑀺𑀧𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀤𑀲𑁆𑀲𑀺𑀢𑀁. 𑀢𑁂𑀲𑀼 𑀧𑀦 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀬𑀁 𑀕𑀡𑀧𑀽𑀭𑀓𑀸𑀤𑀺𑀯𑀲𑁂𑀦 𑀅𑀮𑀚𑁆𑀚𑀺𑀦𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀸𑀤𑀺 𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀥𑀫𑁆𑀫𑀼𑀕𑁆𑀕𑀳𑀡𑀦𑀺𑀲𑁆𑀲𑀬𑀕𑁆𑀕𑀳𑀡𑀸𑀤𑀺 𑀯𑀸 𑀓𑀭𑀻𑀬𑀢𑀺, 𑀢𑀁 𑀥𑀫𑁆𑀫𑁄 𑀘𑁂𑀯 𑀧𑀭𑀺𑀪𑁄𑀕𑁄 𑀘𑀸𑀢𑀺 𑀥𑀫𑁆𑀫𑀧𑀭𑀺𑀪𑁄𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀢𑀁 𑀢𑀣𑀸𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀅𑀮𑀚𑁆𑀚𑀺𑀧𑀭𑀺𑀪𑁄𑀕𑁄 𑀘 𑀳𑁄𑀢𑀺 𑀤𑀼𑀓𑁆𑀓𑀝𑀜𑁆𑀘. 𑀬𑀁 𑀧𑀦 𑀅𑀮𑀚𑁆𑀚𑀺𑀲𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀚𑁆𑀚𑀦𑀻𑀬𑀸𑀤𑀺𑀦𑀺𑀕𑁆𑀕𑀳𑀓𑀫𑁆𑀫𑀁 𑀯𑀸 𑀧𑀭𑀺𑀯𑀸𑀲𑀸𑀤𑀺𑀉𑀧𑀓𑀸𑀭𑀓𑀫𑁆𑀫𑀁 𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑀸𑀤𑀺 𑀯𑀸 𑀓𑀭𑀻𑀬𑀢𑀺, 𑀢𑀁 𑀥𑀫𑁆𑀫𑁄 𑀏𑀯, 𑀦𑁄 𑀧𑀭𑀺𑀪𑁄𑀕𑁄, 𑀏𑀢𑀁 𑀅𑀦𑀼𑀭𑀽𑀧𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀫𑀺𑀲𑀤𑀸𑀦𑁂 𑀯𑀺𑀬 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀦𑀺𑀲𑁆𑀲𑀬𑀤𑀸𑀦𑀫𑁆𑀧𑀺 𑀢𑁂𑀭𑀲𑀲𑀫𑁆𑀫𑀼𑀢𑀺𑀤𑀸𑀦𑀸𑀤𑀺 𑀘 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀸𑀤𑀺𑀬𑀦𑀸𑀤𑀺𑀧𑀭𑀺𑀪𑁄𑀕𑀲𑁆𑀲𑀧𑀺 𑀳𑁂𑀢𑀼𑀢𑁆𑀢𑀸 𑀦 𑀯𑀝𑁆𑀝𑀢𑀺.

𑀬𑁄 𑀧𑀦 𑀫𑀳𑀸𑀅𑀮𑀚𑁆𑀚𑀻 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀉𑀧𑀲𑀫𑁆𑀧𑀤𑀸𑀤𑀺 𑀉𑀧𑀓𑀸𑀭𑀓𑀫𑁆𑀫𑀫𑁆𑀧𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑀸𑀤𑀺 ¶ 𑀘 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺 𑀏𑀯 𑀳𑁄𑀢𑀺, 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀓𑀸𑀢𑀩𑁆𑀩𑀁. 𑀢𑁂𑀦𑁂𑀯 𑀅𑀮𑀚𑁆𑀚𑀺𑀧𑀕𑁆𑀕𑀳𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑀯𑀺𑀯𑀚𑁆𑀚𑀦𑁂𑀦𑀧𑀺 𑀳𑀺 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀤𑀺𑀅𑀢𑁆𑀣𑀸𑀬 𑀏𑀢𑀤𑀢𑁆𑀣𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸, 𑀢𑀲𑁆𑀫𑀸 𑀬𑀁 𑀬𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀉𑀧𑀢𑁆𑀣𑀫𑁆𑀪𑀸𑀬, 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀸𑀬, 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀸𑀤𑀺𑀅𑀢𑁆𑀣𑀸𑀬 𑀳𑁄𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀭𑀺𑀪𑁄𑀕𑁄 𑀯𑀸 𑀳𑁄𑀢𑀼 𑀅𑀧𑀭𑀺𑀪𑁄𑀕𑁄 𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀸 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀦𑁆𑀢𑀺, 𑀥𑀫𑁆𑀫𑀸𑀫𑀺𑀲𑀧𑀭𑀺𑀪𑁄𑀕𑁂𑀲𑀼 𑀘𑁂𑀢𑁆𑀣 𑀅𑀮𑀚𑁆𑀚𑀻𑀳𑀺 𑀏𑀓𑀓𑀫𑁆𑀫𑀸𑀤𑀺𑀥𑀫𑁆𑀫𑀧𑀭𑀺𑀪𑁄𑀕𑁄 𑀏𑀯 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀸𑀤𑀺𑀅𑀢𑁆𑀣𑀸𑀬 𑀳𑁄𑀢𑀺, 𑀦 𑀢𑀣𑀸 𑀆𑀫𑀺𑀲𑀧𑀭𑀺𑀪𑁄𑀕𑁄. 𑀦 𑀳𑀺 𑀅𑀮𑀚𑁆𑀚𑀻𑀦𑀁 𑀧𑀘𑁆𑀘𑀬𑀧𑀭𑀺𑀪𑁄𑀕𑀫𑀢𑁆𑀢𑁂𑀦 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀯𑀺𑀳𑀸𑀭𑀸𑀤𑀺 𑀳𑁄𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀪𑁄𑀕𑁂𑀦 𑀧𑀦 𑀳𑁄𑀢𑀺. 𑀢𑀧𑁆𑀧𑀭𑀺𑀯𑀚𑁆𑀚𑀦𑁂𑀦 𑀘 𑀨𑀸𑀲𑀼𑀯𑀺𑀳𑀸𑀭𑀸𑀤𑀬𑁄. 𑀢𑀣𑀸 𑀳𑀺 𑀓𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀸 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑀸 𑀉𑀧𑁄𑀲𑀣𑀸𑀤𑀻𑀲𑀼 𑀧𑀯𑀺𑀝𑁆𑀞𑀸 ‘‘𑀢𑀼𑀫𑁆𑀳𑁂 𑀓𑀸𑀬𑀤𑁆𑀯𑀸𑀭𑁂 𑀘𑁂𑀯 𑀯𑀘𑀻𑀤𑁆𑀯𑀸𑀭𑁂 𑀘 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀬𑀣𑀸 𑀯𑀺𑀦𑀬𑀜𑁆𑀘 𑀅𑀢𑀺𑀝𑁆𑀞𑀦𑁆𑀢𑀸 𑀲𑀗𑁆𑀖𑀢𑁄 𑀩𑀳𑀺𑀓𑀭𑀡𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀢𑀩𑁆𑀩𑀸, 𑀢𑀣𑀸 𑀅𑀓𑀢𑁆𑀯𑀸 𑀢𑁂𑀳𑀺 𑀲𑀳 𑀲𑀁𑀯𑀲𑀦𑁆𑀢𑀸𑀧𑀺 𑀅𑀮𑀚𑁆𑀚𑀺𑀦𑁄𑀯 𑀳𑁄𑀦𑁆𑀢𑀺 ¶ ‘‘𑀏𑀓𑁄𑀧𑀺 𑀅𑀮𑀚𑁆𑀚𑀻 𑀅𑀮𑀚𑁆𑀚𑀺𑀲𑀢𑀫𑁆𑀧𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁫). 𑀬𑀤𑀺 𑀳𑀺 𑀢𑁂 𑀏𑀯𑀁 𑀅𑀦𑀺𑀕𑁆𑀕𑀳𑀺𑀢𑀸 𑀲𑀺𑀬𑀼𑀁, 𑀲𑀗𑁆𑀖𑁂 𑀓𑀮𑀳𑀸𑀤𑀺𑀁 𑀯𑀟𑁆𑀠𑁂𑀢𑁆𑀯𑀸 𑀉𑀧𑁄𑀲𑀣𑀸𑀤𑀺𑀲𑀸𑀫𑀕𑁆𑀕𑀺𑀓𑀫𑁆𑀫𑀧𑀝𑀺𑀩𑀸𑀳𑀦𑀸𑀤𑀺𑀦𑀸 𑀧𑁂𑀲𑀮𑀸𑀦𑀁 𑀅𑀨𑀸𑀲𑀼𑀁 𑀓𑀢𑁆𑀯𑀸 𑀓𑀫𑁂𑀦 𑀢𑁂 𑀤𑁂𑀯𑀤𑀢𑁆𑀢𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀤𑀬𑁄 𑀯𑀺𑀬 𑀧𑀭𑀺𑀲𑀁 𑀯𑀟𑁆𑀠𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀤𑀻𑀧𑁂𑀦𑁆𑀢𑀸 𑀲𑀗𑁆𑀖𑀪𑁂𑀤𑀸𑀤𑀺𑀫𑁆𑀧𑀺 𑀓𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁. 𑀢𑁂𑀲𑀼 𑀧𑀦 𑀲𑀗𑁆𑀖𑀢𑁄 𑀩𑀳𑀺𑀓𑀭𑀡𑀸𑀤𑀺𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 ¶ 𑀦 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺…𑀧𑁂… 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺, 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀏𑀓𑀓𑀫𑁆𑀫𑀸𑀤𑀺𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀆𑀫𑀺𑀲𑀧𑀭𑀺𑀪𑁄𑀕𑀢𑁄𑀧𑀺 𑀅𑀢𑀺𑀯𑀺𑀬 𑀅𑀮𑀚𑁆𑀚𑀻𑀯𑀺𑀯𑁂𑀓𑁂𑀦 𑀓𑀸𑀢𑀩𑁆𑀩𑁄, 𑀆𑀧𑀢𑁆𑀢𑀺𑀓𑀭𑁄 𑀘 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀺𑀳𑁂𑀢𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 ‘‘𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀏𑀯𑀁 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀸𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑀢𑁆𑀢𑀸𑀧𑀺 𑀘𑁂𑀢𑀁 𑀲𑀺𑀚𑁆𑀛𑀢𑀺. 𑀢𑀣𑀸 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀓𑀣𑀸𑀬𑀁 ‘‘𑀆𑀭𑀸𑀥𑀺𑀓𑀸 𑀘 𑀳𑁄𑀦𑁆𑀢𑀺 𑀲𑀗𑁆𑀕𑀸𑀳𑀺𑀓𑀸 𑀮𑀚𑁆𑀚𑀺𑀦𑀺𑀬𑁄, 𑀢𑀸 𑀓𑁄𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀘𑁂, 𑀕𑀸𑀫𑀦𑁆𑀢𑀭𑀦𑀤𑀻𑀧𑀸𑀭𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀫𑁆𑀳𑀸 𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀦 𑀫𑀼𑀘𑁆𑀘𑀢𑀺…𑀧𑁂… 𑀅𑀮𑀚𑁆𑀚𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀲𑀗𑁆𑀕𑀳𑀁 𑀧𑀦 𑀓𑀭𑁄𑀦𑁆𑀢𑀺, 𑀢𑀸𑀧𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀮𑀪𑀢𑀻’’𑀢𑀺 𑀏𑀯𑀁 𑀅𑀮𑀚𑁆𑀚𑀺𑀦𑀻𑀲𑀼 𑀤𑀼𑀢𑀺𑀬𑀺𑀓𑀸𑀕𑀳𑀡𑀸𑀤𑀻𑀲𑀼 𑀲𑀁𑀯𑀸𑀲𑀸𑀧𑀢𑁆𑀢𑀺𑀧𑀭𑀺𑀳𑀸𑀭𑀸𑀬 𑀦𑀤𑀻𑀧𑀸𑀭𑀸𑀕𑀫𑀦𑀸𑀤𑀺𑀕𑀭𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀢𑁄𑀧𑀺 𑀅𑀮𑀚𑁆𑀚𑀺𑀲𑀁𑀯𑀸𑀲𑀸𑀧𑀢𑁆𑀢𑀺 𑀏𑀯 𑀲𑀤𑁆𑀥𑀫𑁆𑀫𑀧𑀭𑀺𑀳𑀸𑀦𑀺𑀬𑀸 𑀳𑁂𑀢𑀼𑀪𑀽𑀢𑁄 𑀕𑀭𑀼𑀓𑀢𑀭𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀮𑀳𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 𑀅𑀦𑀸𑀧𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 𑀧𑀭𑀺𑀳𑀭𑀺𑀢𑀼𑀁 𑀕𑀭𑀼𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀁 𑀆𑀘𑀭𑀺𑀬𑀸 𑀅𑀦𑀼𑀚𑀸𑀦𑀦𑁆𑀢𑀺. 𑀢𑀣𑀸 𑀅𑀲𑀁𑀯𑀸𑀲𑀧𑀤𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀺𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀸𑀢𑀸 𑀦𑀸𑀫. 𑀏𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀮𑀚𑁆𑀚𑀺𑀦𑁄 𑀏𑀢𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀲𑀳 𑀯𑀲𑀦𑁆𑀢𑀺, 𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫𑀸’’𑀢𑀺 𑀏𑀯𑀁 𑀮𑀚𑁆𑀚𑀻𑀳𑁂𑀯 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄 𑀯𑀝𑁆𑀝𑀢𑀻𑀢𑀺 𑀧𑀓𑀸𑀲𑀺𑀢𑁄.

𑀬𑀤𑀺 ¶ 𑀏𑀯𑀁 𑀓𑀲𑁆𑀫𑀸 𑀅𑀲𑀁𑀯𑀸𑀲𑀺𑀓𑁂𑀲𑀼 𑀅𑀮𑀚𑁆𑀚𑀻 𑀦 𑀕𑀳𑀺𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄, 𑀬𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀢𑁂𑀲𑀁 𑀧𑀸𑀭𑀸𑀚𑀺𑀓𑀸𑀤𑀺𑀅𑀧𑀓𑀢𑀢𑁆𑀢𑀸𑀦𑀜𑁆𑀜𑁂𑀯 𑀅𑀲𑀁𑀯𑀸𑀲𑀺𑀓𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸. 𑀅𑀮𑀚𑁆𑀚𑀺𑀦𑁄 𑀧𑀦 𑀧𑀓𑀢𑀢𑁆𑀢𑀪𑀽𑀢𑀸𑀧𑀺 𑀲𑀦𑁆𑀢𑀺, 𑀢𑁂 𑀘𑁂 𑀕𑀡𑀧𑀽𑀭𑀓𑀸 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀲𑀸𑀥𑁂𑀦𑁆𑀢𑀺, 𑀓𑁂𑀯𑀮𑀁 ¶ 𑀓𑀢𑁆𑀯𑀸 𑀅𑀕𑀢𑀺𑀕𑀫𑀦𑁂𑀦 𑀓𑀭𑁄𑀦𑁆𑀢𑀸𑀦𑀁 𑀆𑀧𑀢𑁆𑀢𑀺𑀓𑀭𑀸 𑀳𑁄𑀦𑁆𑀢𑀺 𑀲𑀪𑀸𑀕𑀸𑀧𑀢𑁆𑀢𑀺𑀆𑀧𑀦𑁆𑀦𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁. 𑀬𑀲𑁆𑀫𑀸 𑀅𑀮𑀚𑁆𑀚𑀺𑀢𑀜𑁆𑀘 𑀮𑀚𑁆𑀚𑀺𑀢𑀜𑁆𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑀺𑀢𑁆𑀢𑀓𑁆𑀔𑀡𑀧𑀝𑀺𑀩𑀤𑁆𑀥𑀁, 𑀦 𑀲𑀩𑁆𑀩𑀓𑀸𑀮𑀺𑀓𑀁. 𑀲𑀜𑁆𑀘𑀺𑀘𑁆𑀘 𑀳𑀺 𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀮𑀚𑁆𑀚𑀺𑀦𑁄 ‘‘𑀦 𑀧𑀼𑀦 𑀈𑀤𑀺𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀮𑀚𑁆𑀚𑀺𑀦𑁄 𑀳𑁄𑀦𑁆𑀢𑀺.

𑀢𑁂𑀲𑀼 𑀘 𑀬𑁂 𑀧𑁂𑀲𑀮𑁂𑀳𑀺 𑀑𑀯𑀤𑀺𑀬𑀫𑀸𑀦𑀸𑀧𑀺 𑀦 𑀑𑀭𑀫𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺, 𑀢𑁂 𑀏𑀯 𑀅𑀲𑀁𑀯𑀲𑀺𑀢𑀩𑁆𑀩𑀸, 𑀦 𑀇𑀢𑀭𑁂 𑀮𑀚𑁆𑀚𑀺𑀥𑀫𑁆𑀫𑁂 𑀑𑀓𑁆𑀓𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸𑀧𑀺 𑀅𑀮𑀚𑁆𑀚𑀺𑀦𑁄 𑀅𑀲𑀁𑀯𑀸𑀲𑀺𑀓𑁂𑀲𑀼 𑀅𑀕𑀡𑁂𑀢𑁆𑀯𑀸 𑀢𑀧𑁆𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀲𑁄𑀥𑁂𑀢𑁆𑀯𑀸𑀯 𑀉𑀧𑁄𑀲𑀣𑀸𑀤𑀺𑀓𑀭𑀡𑀁 𑀅𑀦𑀜𑁆𑀜𑀸𑀢𑀁. 𑀢𑀣𑀸 𑀳𑀺 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁪) 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀓𑀭𑀡𑀲𑁆𑀲 𑀅𑀬𑀼𑀢𑁆𑀢𑀢𑀸 𑀧𑀓𑀸𑀲𑀺𑀢𑀸, ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 𑀆𑀯𑀺𑀓𑀭𑁂𑀬𑁆𑀬…𑀧𑁂… 𑀨𑀸𑀲𑀼 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀏𑀯𑀁 𑀅𑀮𑀚𑁆𑀚𑀺𑀫𑁆𑀧𑀺 𑀮𑀚𑁆𑀚𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑁄𑀲𑀣𑀓𑀭𑀡𑀧𑁆𑀧𑀓𑀸𑀭𑁄 𑀘 𑀯𑀼𑀢𑁆𑀢𑁄, ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸…𑀧𑁂… 𑀧𑀭𑀺𑀲𑀼𑀤𑁆𑀥𑁂𑀢𑁆𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺 (𑀧𑀸𑀭𑀸. 𑁨𑁩𑁩) 𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂, 𑀧𑀭𑀺𑀲𑀼𑀤𑁆𑀥𑁄𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 (𑀫𑀳𑀸𑀯. 𑁧𑁬𑁮) 𑀘 𑀏𑀯𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀸𑀦𑀁 𑀧𑀭𑀺𑀲𑀼𑀤𑁆𑀥𑀢𑀸 𑀘 𑀧𑀓𑀸𑀲𑀺𑀢𑀸, 𑀯𑀘𑀦𑀫𑀢𑁆𑀢𑁂𑀦 𑀅𑀦𑁄𑀭𑀫𑀦𑁆𑀢𑀸𑀦𑀜𑁆𑀘 𑀉𑀧𑁄𑀲𑀣𑀧𑀯𑀸𑀭𑀡𑀝𑁆𑀞𑀧𑀦𑀯𑀺𑀥𑀺 𑀘 𑀯𑀼𑀢𑁆𑀢𑁄, 𑀲𑀩𑁆𑀩𑀣𑀸 𑀮𑀚𑁆𑀚𑀺𑀥𑀫𑁆𑀫𑀁 𑀅𑀦𑁄𑀓𑁆𑀓𑀫𑀦𑁆𑀢𑁂𑀳𑀺 𑀲𑀁𑀯𑀸𑀲𑀲𑁆𑀲 𑀅𑀬𑀼𑀢𑁆𑀢𑀢𑀸𑀬 𑀦𑀺𑀲𑁆𑀲𑀬𑀤𑀸𑀦𑀕𑁆𑀕𑀳𑀡𑀧𑀝𑀺𑀓𑁆𑀔𑁂𑀧𑁄, 𑀢𑀚𑁆𑀚𑀦𑀻𑀬𑀸𑀤𑀺𑀦𑀺𑀕𑁆𑀕𑀳𑀓𑀫𑁆𑀫𑀓𑀭𑀡𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀭𑀡𑁂𑀦 𑀲𑀸𑀦𑀼𑀯𑀢𑁆𑀢𑀓𑀧𑀭𑀺𑀲𑀲𑁆𑀲 𑀅𑀮𑀚𑁆𑀚𑀺𑀲𑁆𑀲 𑀅𑀲𑀁𑀯𑀸𑀲𑀺𑀓𑀢𑁆𑀢𑀧𑀸𑀧𑀦𑀯𑀺𑀥𑀺 ¶ 𑀘 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀳𑀺, 𑀅𑀝𑁆𑀞𑀓𑀣𑀸𑀯𑀘𑀦𑁂𑀳𑀺 𑀘 𑀧𑀓𑀢𑀢𑁆𑀢𑁂𑀳𑀺𑀧𑀺 𑀅𑀧𑀓𑀢𑀢𑁆𑀢𑁂𑀳𑀺𑀧𑀺 𑀲𑀩𑁆𑀩𑁂𑀳𑀺 𑀅𑀮𑀚𑁆𑀚𑀻𑀳𑀺 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑀸𑀦𑀁 𑀆𑀧𑀢𑁆𑀢𑀺 𑀏𑀯 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀢𑁆𑀣𑀸𑀬𑁂𑀯 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀧𑀓𑀢𑀢𑁆𑀢𑀸𑀧𑀺 𑀅𑀮𑀚𑁆𑀚𑀺𑀦𑁄 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀲𑀗𑁆𑀖𑀢𑁄 𑀯𑀺𑀬𑁄𑀚𑀺𑀢𑀸. 𑀦 𑀳𑀺 𑀢𑁂𑀲𑀼 𑀧𑀸𑀭𑀸𑀚𑀺𑀓𑀸𑀤𑀺𑀅𑀲𑀁𑀯𑀸𑀲𑀺𑀓𑀸𑀧𑀢𑁆𑀢𑀺 𑀅𑀢𑁆𑀣𑀺, 𑀢𑁂𑀳𑀺 𑀤𑀻𑀧𑀺𑀢𑀸𑀦𑀁 𑀤𑀲𑀦𑁆𑀦𑀁 𑀯𑀢𑁆𑀣𑀽𑀦𑀁 𑀮𑀳𑀼𑀓𑀸𑀧𑀢𑁆𑀢𑀺𑀯𑀺𑀲𑀬𑀢𑁆𑀢𑀸𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁩. 𑀤𑀸𑀦𑀮𑀓𑁆𑀔𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁬𑁯. 𑀏𑀯𑀁 ¶ 𑀭𑀽𑀧𑀺𑀬𑀸𑀤𑀺𑀧𑀝𑀺𑀕𑁆𑀕𑀳𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀸𑀪𑀧𑀭𑀺𑀡𑀸𑀫𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀻𑀬𑀢𑁂 𑀤𑀸𑀦𑀁, 𑀘𑀻𑀯𑀭𑀸𑀤𑀺𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀅𑀮𑁄𑀪𑀧𑁆𑀧𑀥𑀸𑀦𑁄 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀲𑀦𑀁 𑀲𑀸𑀲𑁄, 𑀲𑀲𑀼 𑀳𑀺𑀁𑀲𑀸𑀬𑀦𑁆𑀢𑀺 𑀥𑀸𑀢𑀼, 𑀳𑀺𑀁𑀲𑀦𑀦𑁆𑀢𑀺 𑀅𑀢𑁆𑀣𑁄, 𑀯𑀺𑀕𑀢𑁄 𑀲𑀸𑀲𑁄 𑀏𑀢𑀲𑁆𑀫𑀸 𑀕𑀸𑀳𑀸𑀢𑀺 𑀯𑀺𑀲𑁆𑀲𑀸𑀲𑁄. 𑀕𑀳𑀡𑀁 𑀕𑀸𑀳𑁄, 𑀯𑀺𑀲𑁆𑀲𑀸𑀲𑁂𑀦 𑀕𑀸𑀳𑁄 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄. 𑀯𑀺𑀲𑁂𑀲𑀦𑁂 𑀘𑁂𑀢𑁆𑀣 𑀓𑀭𑀡𑀯𑀘𑀦𑀁, 𑀯𑀺𑀲𑁆𑀲𑀸𑀲𑀯𑀲𑁂𑀦 𑀕𑀸𑀳𑁄, 𑀦 𑀣𑁂𑀬𑁆𑀬𑀘𑀺𑀢𑁆𑀢𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀘𑁆𑀙𑀢𑁂𑀢𑀺 𑀮𑀸𑀪𑁄, 𑀘𑀻𑀯𑀭𑀸𑀤𑀺𑀯𑀢𑁆𑀣𑀼, 𑀢𑀲𑁆𑀲 𑀮𑀸𑀪𑀲𑁆𑀲. 𑀧𑀭𑀺𑀡𑀫𑀺𑀬𑀢𑁂 𑀧𑀭𑀺𑀡𑀸𑀫𑀦𑀁, 𑀅𑀜𑁆𑀜𑁂𑀲𑀁 𑀅𑀢𑁆𑀣𑀸𑀬 𑀧𑀭𑀺𑀡𑀢𑀲𑁆𑀲 ¶ 𑀅𑀢𑁆𑀢𑀦𑁄, 𑀅𑀜𑁆𑀜𑀲𑁆𑀲 𑀯𑀸 𑀧𑀭𑀺𑀡𑀸𑀫𑀦𑀁, 𑀤𑀸𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀳𑀺 𑀮𑀸𑀪𑀲𑁆𑀲 𑀧𑀭𑀺𑀡𑀸𑀫𑀦𑀦𑁆𑀢𑀺 𑀏𑀢𑁆𑀣 𑀉𑀤𑁆𑀤𑁂𑀲𑁂 𑀲𑀫𑀪𑀺𑀦𑀺𑀯𑀺𑀝𑁆𑀞𑀲𑁆𑀲 ‘‘𑀤𑀸𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀢𑀸𑀯 𑀧𑀞𑀫𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀲𑁆𑀲 𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀲𑀫𑁆𑀧𑀤𑀸𑀦𑀦𑀺𑀤𑁆𑀤𑁂𑀲𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀬𑀤𑀺𑀤𑀁 ‘‘𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀺𑀁 𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀢𑀢𑁆𑀭𑀺𑀤𑀁 𑀤𑀸𑀦𑀮𑀓𑁆𑀔𑀡’’𑀦𑁆𑀢𑀺. ‘‘𑀇𑀤𑀁 𑀢𑀼𑀬𑁆𑀳𑀁 𑀤𑁂𑀫𑀻’’𑀢𑀺 𑀯𑀤𑀢𑀻𑀢𑀺 𑀇𑀤𑀁 𑀢𑀺𑀯𑀗𑁆𑀕𑀲𑀫𑁆𑀧𑀦𑁆𑀦𑀁 𑀤𑀸𑀦𑀮𑀓𑁆𑀔𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀇𑀤𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀼𑀬𑁆𑀳𑀦𑁆𑀢𑀺 𑀧𑀝𑀺𑀕𑁆𑀕𑀸𑀳𑀓𑀦𑀺𑀤𑀲𑁆𑀲𑀦𑀁. 𑀤𑁂𑀫𑀻𑀢𑀺 𑀤𑀸𑀬𑀓𑀦𑀺𑀤𑀲𑁆𑀲𑀦𑀁. 𑀤𑀤𑀸𑀫𑀻𑀢𑀺𑀆𑀤𑀻𑀦𑀺 𑀧𑀦 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀤𑁂𑀬𑁆𑀬𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀸 𑀯𑀺𑀬 𑀤𑀸𑀦𑀲𑁆𑀲𑀸’’𑀢𑀺, ‘‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀓𑀼𑀲𑀮𑀁 𑀳𑁄𑀢𑀻’’𑀢𑀺 𑀘. ‘‘𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲𑀸’’𑀢𑀺 𑀇𑀤𑀁 𑀧𑀦 𑀏𑀓𑀤𑁂𑀲𑀮𑀓𑁆𑀔𑀡𑀓𑀣𑀦𑀫𑁂𑀯, 𑀓𑀺𑀁 𑀏𑀯𑀁 𑀤𑀻𑀬𑀫𑀸𑀦𑀁 𑀲𑀫𑁆𑀫𑀼𑀔𑀸𑀬𑁂𑀯 𑀤𑀺𑀦𑁆𑀦𑀁 𑀳𑁄𑀢𑀺, 𑀉𑀤𑀸𑀳𑀼 𑀧𑀭𑀫𑁆𑀫𑀼𑀔𑀸𑀧𑀻𑀢𑀺 𑀆𑀳 ‘‘𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀻’’𑀢𑀺. 𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄 𑁋 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀫𑀻’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀫𑀼𑀔𑁆𑀬𑀢𑁄 𑀤𑀺𑀦𑁆𑀦𑀢𑁆𑀢𑀸 𑀲𑀼𑀤𑀺𑀦𑁆𑀦𑀁 𑀳𑁄𑀢𑀺, ‘‘𑀕𑀡𑁆𑀳𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 𑀫𑀼𑀔𑁆𑀬𑀢𑁄 𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀫𑀬𑁆𑀳’’𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀧𑀝𑀺𑀕𑁆𑀕𑀸𑀳𑀓𑀧𑀝𑀺𑀩𑀦𑁆𑀥𑀢𑀸𑀓𑀭𑀡𑁂 𑀯𑀘𑀦𑀸𑀦𑀺. 𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻𑀢𑀺𑀆𑀤𑀻𑀦𑀺 𑀧𑀦 𑀧𑀭𑀺𑀬𑀸𑀬𑀢𑁄 𑀤𑀸𑀦𑀕𑁆𑀕𑀳𑀡𑀸𑀦𑀺, 𑀢𑀲𑁆𑀫𑀸 𑀤𑀼𑀤𑀺𑀦𑁆𑀦𑀁 𑀤𑀼𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺. 𑀮𑁄𑀓𑁂 𑀳𑀺 𑀅𑀧𑀭𑀺𑀘𑁆𑀘𑀚𑀺𑀢𑀼𑀓𑀸𑀫𑀸𑀧𑀺 𑀧𑀼𑀦 𑀕𑀡𑁆𑀳𑀺𑀢𑀼𑀓𑀸𑀫𑀸𑀧𑀺 ‘‘𑀢𑀯 𑀲𑀦𑁆𑀢𑀓𑀁 𑀳𑁄𑀢𑀽’’𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑀺 𑀬𑀣𑀸 𑀢𑀁 𑀓𑀼𑀲𑀭𑀜𑁆𑀜𑁄 𑀫𑀸𑀢𑀼 𑀭𑀚𑁆𑀚𑀦𑀺𑀬𑁆𑀬𑀸𑀢𑀦𑀁. 𑀢𑁂𑀦𑀸𑀳 ‘‘𑀦𑁂𑀯 𑀤𑀸𑀢𑀸 𑀤𑀸𑀢𑀼𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑁄 𑀕𑀳𑁂𑀢𑀼’’𑀦𑁆𑀢𑀺. 𑀲𑀘𑁂 𑀧𑀦𑀸𑀢𑀺𑀆𑀤𑀻𑀲𑀼 𑀧𑀦 ¶ 𑀤𑀸𑀬𑀓𑁂𑀦 𑀧𑀜𑁆𑀜𑀢𑁆𑀢𑀺𑀬𑀁 𑀅𑀓𑁄𑀯𑀺𑀤𑀢𑀸𑀬 𑀧𑀭𑀺𑀬𑀸𑀬𑀯𑀘𑀦𑁂 𑀯𑀼𑀢𑁆𑀢𑁂𑀧𑀺 𑀧𑀝𑀺𑀕𑁆𑀕𑀸𑀳𑀓𑁄 ¶ 𑀅𑀢𑁆𑀢𑀦𑁄 𑀧𑀜𑁆𑀜𑀢𑁆𑀢𑀺𑀬𑀁 𑀓𑁄𑀯𑀺𑀤𑀢𑀸𑀬 𑀫𑀼𑀔𑁆𑀬𑀯𑀘𑀦𑁂𑀦 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀲𑀼𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀧𑀦 𑀏𑀓𑁄𑀢𑀺𑀆𑀤𑀻𑀲𑀼 𑀧𑀦 𑀤𑀸𑀬𑀓𑁄 𑀫𑀼𑀔𑁆𑀬𑀯𑀘𑀦𑁂𑀦 𑀤𑁂𑀢𑀺, 𑀧𑀝𑀺𑀕𑁆𑀕𑀸𑀳𑀓𑁄𑀧𑀺 𑀫𑀼𑀔𑁆𑀬𑀯𑀘𑀦𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀲𑁆𑀫𑀸 𑀤𑀸𑀬𑀓𑀲𑁆𑀲 𑀧𑀼𑀩𑁆𑀩𑁂 𑀅𑀥𑀺𑀝𑁆𑀞𑀺𑀢𑀫𑁆𑀧𑀺 𑀘𑀻𑀯𑀭𑀁 𑀤𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀲𑀦𑁆𑀢𑀓𑀢𑁆𑀢𑀸 𑀅𑀢𑀺𑀭𑁂𑀓𑀘𑀻𑀯𑀭𑀫𑁆𑀧𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀆𑀧𑀢𑁆𑀢𑀺 𑀦 𑀳𑁄𑀢𑀺. 𑀧𑀝𑀺𑀕𑁆𑀕𑀸𑀳𑀓𑀲𑁆𑀲𑀧𑀺 𑀦 𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦 𑀳𑁄𑀢𑀻𑀢𑀺 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀬𑀲𑁆𑀲 𑀧𑀦 𑀭𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀧𑀦 𑀇𑀫𑀲𑁆𑀲 𑀘𑀻𑀯𑀭𑀲𑁆𑀲 𑀅𑀲𑁆𑀲𑀸𑀫𑀺𑀓𑀢𑁆𑀢𑀸 𑀧𑀁𑀲𑀼𑀓𑀽𑀮𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀬𑀲𑁆𑀲 𑀭𑀼𑀘𑁆𑀘𑀢𑀺, 𑀢𑁂𑀦 𑀧𑀁𑀲𑀼𑀓𑀽𑀮𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀤𑀸𑀬𑀓𑁂𑀦 𑀧𑀼𑀩𑁆𑀩𑀅𑀥𑀺𑀝𑁆𑀞𑀺𑀢𑀫𑁆𑀧𑀺 𑀤𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀲𑁆𑀲 𑀯𑀺𑀚𑀳𑀺𑀢𑀢𑁆𑀢𑀸 𑀧𑀼𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀇𑀢𑀭𑁂𑀦 𑀧𑀼𑀩𑁆𑀩𑁂 𑀅𑀦𑀥𑀺𑀝𑁆𑀞𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻𑀢𑀺𑀆𑀤𑀻𑀲𑀼 𑀧𑀦 𑀆𑀡𑀢𑁆𑀬𑀢𑁆𑀣𑁂 𑀧𑀯𑀢𑁆𑀢𑀸𑀬 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀆𑀡𑀢𑁆𑀢𑁂𑀦 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀤𑀺𑀦𑁆𑀦𑀓𑀸𑀮𑁂𑀬𑁂𑀯 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀲𑀦𑁆𑀢𑀓𑀁 𑀳𑁄𑀢𑀺, 𑀦 𑀢𑀢𑁄 𑀧𑀼𑀩𑁆𑀩𑁂, 𑀧𑀼𑀩𑁆𑀩𑁂 𑀧𑀦 𑀆𑀡𑀸𑀧𑀓𑀲𑁆𑀲𑁂𑀯, 𑀢𑀲𑁆𑀫𑀸 ‘‘𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲𑁂𑀯 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻𑀢𑀺 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑁂 𑀧𑀯𑀢𑁆𑀢𑀸𑀬 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀝𑀺𑀕𑁆𑀕𑀸𑀳𑀓𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀇𑀫𑀺𑀦𑀸 𑀆𑀬𑀲𑁆𑀫𑀢𑀸 𑀭𑁂𑀯𑀢𑀢𑁆𑀣𑁂𑀭𑁂𑀦 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀘𑀻𑀯𑀭𑀧𑁂𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀪𑀕𑀯𑀢𑀸 𑀤𑁂𑀲𑀺𑀢𑁂𑀲𑀼 𑀅𑀥𑀺𑀝𑁆𑀞𑀸𑀦𑁂𑀲𑀼 𑀇𑀥 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀅𑀲𑀫𑁆𑀫𑁄𑀳𑀢𑁄 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀤𑁆𑀯𑀸𑀥𑀺𑀝𑁆𑀞𑀺𑀢𑀁, 𑀲𑁆𑀯𑀸𑀥𑀺𑀝𑁆𑀞𑀺𑀢𑀦𑁆𑀢𑀺 𑀘 𑀦 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑀸𑀫𑀺𑀓𑁂 𑀚𑀻𑀯𑀦𑁆𑀢𑁂 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀘𑀻𑀯𑀭𑀪𑀸𑀯𑁂𑀦 𑀘 𑀲𑀸𑀫𑀺𑀓𑁂 𑀫𑀢𑁂 𑀫𑀢𑀓𑀘𑀻𑀯𑀭𑀪𑀸𑀯𑁂𑀦 𑀘 𑀕𑀳𑀡𑀁 𑀲𑀦𑁆𑀥𑀸𑀬 ¶ 𑀯𑀼𑀢𑁆𑀢𑀁, 𑀢𑀢𑁄 𑀧𑀦 𑀤𑀲𑀸𑀳𑁂 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁 𑀯𑀸 𑀯𑀺𑀓𑀧𑁆𑀧𑀦𑀁 𑀯𑀸 𑀓𑀸𑀢𑀩𑁆𑀩𑀁. 𑀬𑁄 𑀧𑀳𑀺𑀡𑀢𑀻𑀢𑀺 𑀤𑀸𑀬𑀓𑀁 𑀲𑀦𑁆𑀥𑀸𑀬𑀸𑀳, 𑀬𑀲𑁆𑀲 𑀧𑀳𑀻𑀬𑀢𑀻𑀢𑀺 𑀧𑀝𑀺𑀕𑁆𑀕𑀸𑀳𑀓𑀁.

𑀧𑀭𑀺𑀘𑁆𑀘𑀚𑀺𑀢𑁆𑀯𑀸…𑀧𑁂… 𑀦 𑀮𑀪𑀢𑀺, 𑀆𑀳𑀭𑀸𑀧𑁂𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀸…𑀧𑁂… 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀇𑀫𑀺𑀦𑀸 𑀧𑀭𑀲𑀦𑁆𑀢𑀓𑀪𑀽𑀢𑀢𑁆𑀢𑀁 𑀚𑀸𑀦𑀦𑁆𑀢𑁄 𑀣𑁂𑀬𑁆𑀬𑀧𑀲𑀬𑁆𑀳𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑁄𑀭𑀸𑀡𑀝𑀻𑀓𑀸𑀬𑀁 𑀧𑀦 ‘‘𑀲𑀓𑀲𑀜𑁆𑀜𑀸𑀬 𑀯𑀺𑀦𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 ¶ 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀲𑀓𑀲𑀜𑁆𑀜𑀸𑀬 𑀯𑀺𑀦𑀸𑀧𑀺 𑀢𑀸𑀯𑀓𑀸𑀮𑀺𑀓𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀤𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀲𑀬𑁆𑀳𑀸𑀓𑀸𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀘𑁆𑀙𑀺𑀦𑁆𑀤𑀢𑁄 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺. 𑀲𑀘𑁂 𑀧𑀦…𑀧𑁂… 𑀯𑀝𑁆𑀝𑀢𑀻𑀢𑀺 𑀢𑀼𑀝𑁆𑀞𑀤𑀸𑀦𑀁 𑀆𑀳, 𑀅𑀣 𑀧𑀦𑀸𑀢𑀺𑀆𑀤𑀺𑀦𑀸 𑀓𑀼𑀧𑀺𑀢𑀤𑀸𑀦𑀁. 𑀉𑀪𑀬𑀣𑀸𑀧𑀺 𑀲𑀬𑀁 𑀤𑀺𑀦𑁆𑀦𑀢𑁆𑀢𑀸 𑀯𑀝𑁆𑀝𑀢𑀺, 𑀕𑀳𑀡𑁂 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀫𑀫 𑀲𑀦𑁆𑀢𑀺𑀓𑁂…𑀧𑁂… 𑀏𑀯𑀁 𑀧𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲 𑀏𑀯𑀁 𑀤𑀤𑀦𑁆𑀢𑁄 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀤𑀸𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀝𑁆𑀝𑀢𑀺, 𑀢𑀢𑁄 𑀏𑀯 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀧𑀼𑀩𑁆𑀩𑁂 ‘‘𑀅𑀓𑀭𑁄𑀦𑁆𑀢𑀲𑁆𑀲 𑀦 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁂 𑀆𑀘𑀭𑀺𑀬𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀭𑁄𑀦𑁆𑀢𑁂 𑀧𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑀦𑁆𑀢𑀓𑀁 𑀪𑀯𑁂𑀬𑁆𑀬 𑀲𑀩𑁆𑀩𑀲𑁄 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸. 𑀲𑀓𑀲𑀜𑁆𑀜𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘‘𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀝𑀻𑀓𑀸𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁩𑁫) 𑀧𑀦 ‘‘𑀏𑀯𑀁 𑀤𑀺𑀦𑁆𑀦𑀁 𑀪𑀢𑀺𑀲𑀤𑀺𑀲𑀢𑁆𑀢𑀸 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀪𑀢𑀺𑀲𑀤𑀺𑀲𑁂 𑀲𑀢𑀺𑀧𑀺 𑀓𑀫𑁆𑀫𑁂 𑀓𑀢𑁂 𑀪𑀢𑀺 𑀮𑀤𑁆𑀥𑀩𑁆𑀩𑀸 𑀳𑁄𑀢𑀺, 𑀢𑀲𑁆𑀫𑀸 𑀆𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑁂𑀬𑁆𑀬. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁩𑁫) 𑀧𑀦 ‘‘𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑁂 𑀅𑀓𑀢𑁂 𑀪𑀢𑀺𑀲𑀤𑀺𑀲𑀢𑁆𑀢𑀸 ¶ 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀓𑀫𑁆𑀫𑁂 𑀓𑀢𑁂 𑀆𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀲𑀸𑀫𑀡𑁂𑀭𑀲𑁆𑀲 𑀤𑀸𑀦𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀲𑀸𑀫𑀡𑁂𑀭𑀓𑀸𑀮𑁂 𑀤𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀤𑀻𑀧𑁂𑀢𑀺. 𑀅𑀬𑀁 𑀢𑀸𑀯 𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑁄𑀢𑀺 𑀇𑀫𑀺𑀦𑀸 𑀤𑀸𑀦𑀯𑀺𑀦𑀺𑀘𑁆𑀙𑀬𑀸𑀤𑀻𑀦𑀁 𑀢𑀺𑀡𑁆𑀡𑀁 𑀯𑀺𑀦𑀺𑀘𑁆𑀙𑀬𑀸𑀦𑀁 𑀏𑀓𑀧𑀭𑀺𑀘𑁆𑀙𑁂𑀤𑀓𑀢𑀪𑀸𑀯𑀁 𑀤𑀻𑀧𑁂𑀢𑀺.

𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁦. 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸 𑀦𑀸𑀫 𑀬𑀸𑀬 𑀲𑁂𑀬𑁆𑀬𑀸𑀬 𑀲𑀬𑀺𑀢𑁄 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀯𑀼𑀘𑁆𑀘𑀢𑀺. 𑀤𑀤𑀫𑀸𑀦𑁂𑀦 𑀘 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑁂 𑀕𑀳𑀝𑁆𑀞𑀸 𑀓𑁂 𑀧𑀩𑁆𑀩𑀚𑀺𑀢𑀸 𑀓𑁂𑀦 𑀓𑀸𑀭𑀡𑁂𑀦 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸𑀢𑀺? 𑀕𑀳𑀝𑁆𑀞𑀸 𑀢𑀸𑀯 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀽𑀢𑀸 𑀢𑁂𑀦 𑀓𑀸𑀭𑀡𑁂𑀦 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀸𑀕𑀪𑀽𑀢𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸, 𑀬𑁂𑀲𑀜𑁆𑀘 𑀯𑀸𑀡𑀺𑀚𑀸𑀦𑀁 𑀳𑀢𑁆𑀣𑀢𑁄 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀧𑀢𑁆𑀢𑀸𑀤𑀺𑀧𑀭𑀺𑀓𑁆𑀔𑀸𑀭𑁄 𑀕𑀸𑀳𑀸𑀧𑀺𑀢𑁄, 𑀢𑁂𑀲𑀁 𑀬𑀁 𑀤𑀸𑀢𑀩𑁆𑀩𑀫𑀽𑀮𑀁, 𑀢𑁂 𑀘 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸, 𑀬𑁂𑀲𑀜𑁆𑀘 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀞𑀧𑀺𑀢𑀸𑀦𑀺, 𑀢𑁂𑀧𑀺 𑀢𑀲𑁆𑀲 𑀥𑀦𑀲𑁆𑀲 ¶ 𑀇𑀲𑁆𑀲𑀭𑀸. 𑀏𑀯𑀫𑀸𑀤𑀺𑀦𑀸 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀬𑀁 𑀬𑀁 𑀧𑀭𑀺𑀓𑁆𑀔𑀸𑀭𑀥𑀦𑀁 𑀬𑁂𑀳𑀺 𑀬𑁂𑀳𑀺 𑀕𑀳𑀝𑁆𑀞𑁂𑀳𑀺 𑀮𑀪𑀺𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀢𑁂 𑀢𑁂 𑀕𑀳𑀝𑁆𑀞𑀸 𑀢𑀲𑁆𑀲 𑀢𑀲𑁆𑀲 𑀥𑀦𑀲𑁆𑀲 𑀇𑀲𑁆𑀲𑀭𑀸.

𑀧𑀩𑁆𑀩𑀚𑀺𑀢𑀸 𑀧𑀦 𑀩𑀸𑀳𑀺𑀭𑀓𑀸 𑀢𑀣𑁂𑀯 𑀲𑀢𑀺 𑀓𑀸𑀭𑀡𑁂 𑀇𑀲𑁆𑀲𑀭𑀸. 𑀧𑀜𑁆𑀘𑀲𑀼 𑀧𑀦 𑀲𑀳𑀥𑀫𑁆𑀫𑀺𑀓𑁂𑀲𑀼 𑀪𑀺𑀓𑁆𑀔𑀽 𑀲𑀸𑀫𑀡𑁂𑀭𑀸 𑀘 𑀫𑀢𑀸𑀦𑀁 𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑀸𑀦𑀁 𑀥𑀦𑀁 𑀯𑀺𑀦𑀸𑀧𑀺 𑀓𑀸𑀭𑀡𑁂𑀦 𑀤𑀸𑀬𑀸𑀤𑀪𑀸𑀯𑁂𑀦 𑀮𑀪𑀦𑁆𑀢𑀺, 𑀦 𑀇𑀢𑀭𑀸. 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀫𑁆𑀧𑀺 𑀥𑀦𑀁 𑀢𑀸𑀬𑁂𑀯 𑀮𑀪𑀦𑁆𑀢𑀺, 𑀦 𑀇𑀢𑀭𑁂. 𑀢𑀁 𑀧𑀦 𑀫𑀢𑀓𑀥𑀦𑀪𑀸𑀚𑀦𑀁 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀩𑀳𑀽 𑀧𑀦 𑀯𑀺𑀦𑀬𑀥𑀭𑀢𑁆𑀣𑁂𑀭𑀸 ‘‘𑀬𑁂 𑀢𑀲𑁆𑀲 𑀥𑀦𑀲𑁆𑀲 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸’’𑀢𑀺 ¶ 𑀧𑀸𑀞𑀁 𑀦𑀺𑀲𑁆𑀲𑀸𑀬 ‘‘𑀫𑀢𑀪𑀺𑀓𑁆𑀔𑀼𑀲𑁆𑀲 𑀥𑀦𑀁 𑀕𑀳𑀝𑁆𑀞𑀪𑀽𑀢𑀸 𑀜𑀸𑀢𑀓𑀸 𑀮𑀪𑀦𑁆𑀢𑀻’’𑀢𑀺 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺, 𑀢𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑀁 𑀢𑀲𑁆𑀲 𑀘 𑀬𑀼𑀢𑁆𑀢𑀸𑀬𑀼𑀢𑁆𑀢𑀪𑀸𑀯𑀁 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫.

𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀦𑁆𑀢𑀺 ‘‘𑀤𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀬𑀸 𑀅𑀤𑀺𑀦𑁆𑀦𑀁 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀲𑁆𑀲 𑀲𑀦𑁆𑀢𑀓𑀁. 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄, 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄𑀧𑀺 𑀅𑀤𑀸𑀢𑀼𑀓𑀸𑀫𑁄, 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀏𑀢𑁆𑀣 𑀢𑀼 𑀧𑁄𑀭𑀸𑀡𑀝𑀻𑀓𑀸𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁩𑁧) ‘‘𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘𑀦 𑀓𑀺𑀜𑁆𑀘𑀺 𑀯𑀤𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 ‘‘𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀤𑀁 𑀅𑀥𑀺𑀯𑀸𑀲𑀦𑀓𑀺𑀭𑀺𑀬𑀸𑀬 𑀓𑀭𑀡𑀁 𑀳𑁄𑀢𑀺. 𑀅𑀤𑀸𑀢𑀼𑀓𑀸𑀫𑁄𑀢𑀺 𑀏𑀢𑁆𑀣𑀸𑀧𑀺 𑀢𑀫𑁂𑀯 𑀓𑀭𑀡𑀁 𑀲𑀺𑀬𑀸, 𑀢𑀢𑁄 ‘‘𑀘𑀺𑀢𑁆𑀢𑁂𑀦 𑀅𑀤𑀸𑀢𑀼𑀓𑀸𑀫𑁄, 𑀘𑀺𑀢𑁆𑀢𑁂𑀦 𑀅𑀥𑀺𑀯𑀸𑀲𑁂𑀢𑀻’’𑀢𑀺𑀯𑀘𑀦𑀁 𑀑𑀘𑀺𑀢𑁆𑀬𑀲𑀫𑁆𑀧𑁄𑀲𑀓𑀁 𑀦 𑀪𑀯𑁂𑀬𑁆𑀬. 𑀢𑀁 𑀞𑀧𑁂𑀢𑁆𑀯𑀸 ‘‘𑀅𑀤𑀸𑀢𑀼𑀓𑀸𑀫𑁄’’𑀢𑀺 𑀏𑀢𑁆𑀣 𑀓𑀸𑀬𑁂𑀦𑀸𑀢𑀺 𑀯𑀸 𑀯𑀸𑀘𑀸𑀬𑀸𑀢𑀺 𑀯𑀸 𑀅𑀜𑁆𑀜𑀁 𑀓𑀭𑀡𑀫𑁆𑀧𑀺 𑀦 𑀲𑀫𑁆𑀪𑀯𑀢𑀺, 𑀢𑀤𑀲𑀫𑁆𑀪𑀯𑁂 𑀲𑀢𑀺 𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑁄 𑀧𑀦-𑀲𑀤𑁆𑀤𑁄𑀧𑀺 𑀦𑀺𑀭𑀢𑁆𑀣𑀓𑁄. 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀏𑀢𑁆𑀣 𑀢𑀼 𑀯𑀤𑀦𑀓𑀺𑀭𑀺𑀬𑀸𑀬 𑀓𑀭𑀡𑀁 ‘‘𑀯𑀸𑀘𑀸𑀬𑀸’’𑀢𑀺 𑀧𑀤𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀜𑁆𑀜𑀁 𑀅𑀥𑀺𑀯𑀸𑀲𑀦𑀓𑀺𑀭𑀺𑀬𑀸𑀬 𑀓𑀭𑀡𑀁, 𑀅𑀜𑁆𑀜𑀁 𑀯𑀤𑀦𑀓𑀺𑀭𑀺𑀬𑀸𑀬 𑀓𑀭𑀡𑀁, 𑀅𑀜𑁆𑀜𑀸 𑀅𑀥𑀺𑀯𑀸𑀲𑀦𑀓𑀺𑀭𑀺𑀬𑀸, 𑀅𑀜𑁆𑀜𑀸 𑀯𑀤𑀦𑀓𑀺𑀭𑀺𑀬𑀸, 𑀢𑀲𑁆𑀫𑀸 ‘‘𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀅𑀭𑀳𑀢𑀺, 𑀢𑀲𑁆𑀫𑀸 𑀬𑁄𑀧𑀺 𑀘𑀺𑀢𑁆𑀢𑁂𑀦 𑀅𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀦 𑀢𑀣𑀸𑀧𑀺 𑀯𑀸𑀘𑀸𑀬 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀬𑁄𑀚𑀦𑀁 𑀓𑀢𑁆𑀯𑀸 𑀧𑀦 ‘‘𑀅𑀥𑀺𑀯𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀼𑀫𑀭𑀳𑀢𑀺. 𑀏𑀢𑁆𑀣 𑀢𑀼 𑀧𑀦-𑀲𑀤𑁆𑀤𑁄 𑀅𑀭𑀼𑀘𑀺𑀮𑀓𑁆𑀔𑀡𑀲𑀽𑀘𑀦𑀢𑁆𑀣𑁄. ‘‘𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀤𑀁 𑀅𑀤𑀸𑀢𑀼𑀓𑀸𑀫𑀓𑀺𑀭𑀺𑀬𑀸𑀬 𑀓𑀭𑀡𑀁, ‘‘𑀯𑀸𑀘𑀸𑀬𑀸’’𑀢𑀺 ¶ 𑀅𑀥𑀺𑀯𑀸𑀲𑀦𑀓𑀺𑀭𑀺𑀬𑀸𑀬 𑀅𑀯𑀤𑀦𑀓𑀺𑀭𑀺𑀬𑀸𑀬 𑀘 𑀓𑀭𑀡𑀁. 𑀅𑀥𑀺𑀯𑀸𑀲𑀦𑀓𑀺𑀭𑀺𑀬𑀸 𑀘 𑀅𑀯𑀤𑀦𑀓𑀺𑀭𑀺𑀬𑀸𑀬𑁂𑀯 ¶ . ‘‘𑀅𑀥𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀯𑀤𑀦𑀓𑀺𑀭𑀺𑀬𑀸𑀬 𑀅𑀧𑀸𑀓𑀝𑀪𑀸𑀯𑀢𑁄 𑀢𑀁 𑀧𑀓𑀸𑀲𑁂𑀢𑀼𑀁 ‘‘𑀦 𑀓𑀺𑀜𑁆𑀘𑀺 𑀯𑀤𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀕𑀬𑁆𑀳𑀫𑀸𑀦𑁂 𑀧𑀼𑀩𑁆𑀩𑀸𑀧𑀭𑀯𑀘𑀦𑀢𑁆𑀣𑁄 𑀑𑀘𑀺𑀢𑁆𑀬𑀲𑀫𑁆𑀧𑁄𑀲𑀓𑁄 𑀲𑀺𑀬𑀸, 𑀢𑀲𑁆𑀫𑀸 𑀏𑀢𑁆𑀢𑀓𑀯𑀺𑀯𑀭𑁂𑀳𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.

𑀮𑀸𑀪𑀧𑀭𑀺𑀡𑀸𑀫𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁧. 𑀮𑀸𑀪𑀧𑀭𑀺𑀡𑀸𑀫𑀦𑀯𑀺𑀦𑀺𑀘𑁆𑀙𑀬𑁂 𑀢𑀼𑀫𑁆𑀳𑀸𑀓𑀁 𑀲𑀧𑁆𑀧𑀺𑀆𑀤𑀻𑀦𑀺 𑀆𑀪𑀢𑀸𑀦𑀻𑀢𑀺 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀆𑀪𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺. 𑀧𑀭𑀺𑀡𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸𑀧𑀺 𑀯𑀼𑀢𑁆𑀢𑀯𑀺𑀥𑀺𑀦𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦 𑀢𑁂𑀲𑀁 𑀲𑀦𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀣𑀸𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀻’’𑀢𑀺.

‘‘𑀧𑀼𑀧𑁆𑀨𑀫𑁆𑀧𑀺 𑀆𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀧𑀭𑀺𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀽𑀚𑀺𑀢𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀽𑀚𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁬𑁦) 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁬𑁦) 𑀧𑀦 𑀦𑀺𑀬𑀫𑁂𑀢𑁆𑀯𑀸 ‘‘𑀅𑀜𑁆𑀜𑀲𑁆𑀲 𑀘𑁂𑀢𑀺𑀬𑀲𑁆𑀲 𑀅𑀢𑁆𑀣𑀸𑀬 𑀭𑁄𑀧𑀺𑀢𑀫𑀸𑀮𑀸𑀯𑀘𑁆𑀙𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀓𑁂𑀯𑀮𑀁 𑀧𑀭𑀺𑀡𑀢𑀪𑀸𑀯𑁄𑀬𑁂𑀯 𑀓𑀣𑀺𑀢𑁄, 𑀅𑀣 𑀔𑁄 𑀦𑀺𑀬𑀫𑁂𑀢𑁆𑀯𑀸 𑀭𑁄𑀧𑀺𑀢𑀪𑀸𑀯𑁄𑀧𑀺. 𑀧𑀼𑀧𑁆𑀨𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀓𑀼𑀢𑁄 𑀫𑀸𑀮𑀸𑀯𑀘𑁆𑀙𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁬𑁦) 𑀧𑀦 ‘‘𑀭𑁄𑀧𑀺𑀢𑀫𑀸𑀮𑀸𑀯𑀘𑁆𑀙𑀢𑁄𑀢𑀺 𑀓𑁂𑀦𑀘𑀺 𑀦𑀺𑀬𑀫𑁂𑀢𑁆𑀯𑀸 𑀭𑁄𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀦𑁄𑀘𑀺𑀢𑀁 𑀫𑀺𑀮𑀸𑀬𑀫𑀸𑀦𑀁 𑀑𑀘𑀺𑀦𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀽𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀞𑀺𑀢𑀁 𑀤𑀺𑀲𑁆𑀯𑀸𑀢𑀺 𑀲𑁂𑀲𑀓𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸. 𑀇𑀫𑀲𑁆𑀲 𑀲𑀼𑀦𑀔𑀲𑁆𑀲 𑀫𑀸 𑀤𑁂𑀳𑀺, 𑀏𑀢𑀲𑁆𑀲 𑀤𑁂𑀳𑀻𑀢𑀺 𑀇𑀤𑀁 𑀧𑀭𑀺𑀡𑀢𑁂𑀬𑁂𑀯, 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑁂 𑀧𑀦 𑀢𑀁 𑀧𑀮𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀼𑀜𑁆𑀚𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀓𑀢𑁆𑀣 𑀤𑁂𑀫𑀸𑀢𑀺𑀆𑀤𑀺𑀦𑀸 𑀏𑀓𑁂𑀦𑀸𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀏𑀯𑀁 𑀧𑀦 𑀅𑀧𑀼𑀘𑁆𑀙𑀺𑀢𑁂𑀧𑀺 ¶ ‘𑀅𑀧𑀭𑀺𑀡𑀢𑀁 𑀇𑀤’𑀦𑁆𑀢𑀺 𑀚𑀸𑀦𑀦𑁆𑀢𑁂𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀬𑀢𑁆𑀣 𑀇𑀘𑁆𑀙𑀢𑀺, 𑀢𑀢𑁆𑀣 𑀤𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀤𑁂𑀣𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀢𑁆𑀣 𑀇𑀘𑁆𑀙𑀢𑀺, 𑀢𑀢𑁆𑀣 𑀤𑀸𑀧𑁂𑀢𑀼𑀁 𑀮𑀪𑀢𑀺.

𑀧𑀭𑀺𑀯𑀸𑀭𑁂 (𑀧𑀭𑀺. 𑀅𑀝𑁆𑀞. 𑁩𑁨𑁯) 𑀧𑀦 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺. 𑀦𑀯 𑀧𑀝𑀺𑀕𑁆𑀕𑀳𑀸 𑀧𑀭𑀺𑀪𑁄𑀕𑀸 ¶ 𑀘𑀸𑀢𑀺 𑀏𑀢𑁂𑀲𑀁𑀬𑁂𑀯 𑀤𑀸𑀦𑀸𑀦𑀁 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘. 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀁 𑀲𑀗𑁆𑀖𑀲𑁆𑀲𑁂𑀯 𑀤𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀦𑀺𑀦𑁆𑀦𑀁 𑀘𑁂𑀢𑀺𑀬𑀲𑁆𑀲𑁂𑀯 𑀤𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀦𑀺𑀦𑁆𑀦𑀁 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺. 𑀧𑀝𑀺𑀕𑁆𑀕𑀳𑀧𑀝𑀺𑀪𑁄𑀕𑀸𑀧𑀺 𑀢𑁂𑀲𑀁𑀬𑁂𑀯 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘𑀸𑀢𑀺 𑀆𑀕𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀤𑀸𑀦𑀮𑀓𑁆𑀔𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁪. 𑀧𑀣𑀯𑀻𑀔𑀡𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁨. 𑀏𑀯𑀁 𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀸𑀪𑀧𑀭𑀺𑀡𑀸𑀫𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀣𑀯𑀻𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀧𑀣𑀯𑀻’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀧𑀢𑁆𑀣𑀭𑀢𑀻𑀢𑀺 𑀧𑀣𑀯𑀻, 𑀧-𑀧𑀼𑀩𑁆𑀩 𑀣𑀭 𑀲𑀦𑁆𑀣𑀭𑀡𑁂𑀢𑀺 𑀥𑀸𑀢𑀼, 𑀭-𑀓𑀸𑀭𑀲𑁆𑀲 𑀯-𑀓𑀸𑀭𑁄, 𑀲𑀲𑀫𑁆𑀪𑀸𑀭𑀧𑀣𑀯𑀻. 𑀢𑀧𑁆𑀧𑀪𑁂𑀤𑀫𑀸𑀳 ‘‘𑀤𑁆𑀯𑁂 𑀧𑀣𑀯𑀻, 𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻’’𑀢𑀺. 𑀢𑀸𑀲𑀁 ¶ 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀚𑀸𑀢𑀸 𑀦𑀸𑀫 𑀧𑀣𑀯𑀻’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑁆𑀥𑀧𑀁𑀲𑀼𑀓𑀸…𑀧𑁂… 𑀬𑁂𑀪𑀼𑀬𑁆𑀬𑁂𑀦𑀫𑀢𑁆𑀢𑀺𑀓𑀸𑀧𑀣𑀯𑀻 𑀚𑀸𑀢𑀸 𑀦𑀸𑀫 𑀧𑀣𑀯𑀻 𑀳𑁄𑀢𑀺. 𑀦 𑀓𑁂𑀯𑀮𑀁 𑀲𑀸𑀬𑁂𑀯, 𑀅𑀤𑀟𑁆𑀠𑀸 𑀧𑀣𑀯𑀻𑀧𑀺 ‘‘𑀚𑀸𑀢𑀸 𑀧𑀣𑀯𑀻’’𑀢𑀺 𑀯𑀼𑀘𑁆𑀘𑀢𑀺. 𑀦 𑀓𑁂𑀯𑀮𑀁 𑀇𑀫𑀸 𑀤𑁆𑀯𑁂𑀬𑁂𑀯, 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸…𑀧𑁂… 𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀲𑁄𑀧𑀺 ‘‘𑀚𑀸𑀢𑀸 𑀧𑀣𑀯𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀇𑀢𑀭𑀢𑁆𑀭𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀲𑀼𑀤𑁆𑀥𑀸 𑀧𑀁𑀲𑀼𑀓𑀸𑀬𑁂𑀯 𑀏𑀢𑁆𑀣 𑀧𑀣𑀯𑀺𑀬𑀸 𑀅𑀢𑁆𑀣𑀺, 𑀦 𑀧𑀸𑀲𑀸𑀡𑀸𑀤𑀬𑁄𑀢𑀺 𑀲𑀼𑀤𑁆𑀥𑀧𑀁𑀲𑀼𑀓𑀸. 𑀢𑀣𑀸 𑀲𑀼𑀤𑁆𑀥𑀫𑀢𑁆𑀢𑀺𑀓𑀸. 𑀅𑀧𑁆𑀧𑀸 𑀧𑀸𑀲𑀸𑀡𑀸 𑀏𑀢𑁆𑀣𑀸𑀢𑀺 𑀅𑀧𑁆𑀧𑀧𑀸𑀲𑀸𑀡𑀸. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀪𑀼𑀬𑁆𑀬𑁂𑀦 𑀧𑀁𑀲𑀼𑀓𑀸 𑀏𑀢𑁆𑀣𑀸𑀢𑀺 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁, 𑀢𑀣𑀸 𑀬𑁂𑀪𑀼𑀬𑁆𑀬𑁂𑀦𑀫𑀢𑁆𑀢𑀺𑀓𑀸. 𑀢𑀢𑁆𑀣 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀉𑀧𑀭𑀺 𑀧𑀸𑀲𑀸𑀡𑀸. 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀲𑀓𑁆𑀔𑀭𑀸. 𑀓𑀣𑀮𑀸𑀢𑀺 𑀓𑀧𑀸𑀮𑀔𑀡𑁆𑀟𑀸𑀤𑀺. 𑀫𑀭𑀼𑀫𑁆𑀧𑀸𑀢𑀺 𑀓𑀝𑀲𑀓𑁆𑀔𑀭𑀸. 𑀯𑀸𑀮𑀼𑀓𑀸 𑀯𑀸𑀮𑀼𑀓𑀸𑀬𑁂𑀯. 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸𑀢𑀺 𑀏𑀢𑁆𑀣 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀧𑀁𑀲𑀼, 𑀏𑀓𑁄 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑁄. 𑀅𑀤𑀟𑁆𑀠𑀸𑀧𑀻𑀢𑀺 𑀉𑀤𑁆𑀥𑀦𑀧𑀢𑁆𑀢𑀧𑀘𑀦𑀓𑀼𑀫𑁆𑀪𑀓𑀸𑀭𑀸𑀢𑀧𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀅𑀤𑀟𑁆𑀠𑀸, 𑀲𑀸 𑀧𑀦 𑀯𑀺𑀲𑀼𑀁 𑀦𑀢𑁆𑀣𑀺, 𑀲𑀼𑀤𑁆𑀥𑀧𑀁𑀲𑀼𑀆𑀤𑀻𑀲𑀼 𑀅𑀜𑁆𑀜𑀢𑀭𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀸𑀢𑀺 𑀩𑀳𑀼𑀢𑀭𑀲𑀓𑁆𑀔𑀭𑀸. 𑀳𑀢𑁆𑀣𑀺𑀓𑀼𑀘𑁆𑀙𑀺𑀬𑀁 𑀓𑀺𑀭 𑀏𑀓𑀁 𑀧𑀘𑁆𑀙𑀺𑀧𑀽𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑁄𑀡𑀺𑀬𑀁 𑀥𑁄𑀯𑀺𑀢𑁆𑀯𑀸 𑀧𑀣𑀯𑀺𑀬𑀸 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀪𑀸𑀯𑀁 ¶ 𑀜𑀢𑁆𑀯𑀸 𑀲𑀬𑀁 𑀪𑀺𑀓𑁆𑀔𑀽 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺𑀁𑀲𑀽𑀢𑀺. 𑀬𑀸𑀦𑀺 𑀧𑀦 𑀫𑀚𑁆𑀛𑁂 ‘‘𑀅𑀧𑁆𑀧𑀧𑀁𑀲𑀼𑀅𑀧𑁆𑀧𑀫𑀢𑁆𑀢𑀺𑀓𑀸’’𑀢𑀺 𑀤𑁆𑀯𑁂 𑀧𑀤𑀸𑀦𑀺, 𑀢𑀸𑀦𑀺 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸𑀤𑀺𑀧𑀜𑁆𑀘𑀓𑀫𑁂𑀯 𑀧𑀯𑀺𑀲𑀦𑁆𑀢𑀺. 𑀢𑁂𑀲𑀜𑁆𑀜𑁂𑀯 𑀳𑀺 𑀤𑁆𑀯𑀺𑀦𑁆𑀦𑀁 𑀧𑀪𑁂𑀤𑀯𑀘𑀦𑀫𑁂𑀢𑀁, 𑀬𑀤𑀺𑀤𑀁 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀆𑀤𑀺.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀁 𑀅𑀧𑁆𑀧𑀧𑀁𑀲𑀼𑀜𑁆𑀘 𑀧𑀣𑀯𑀺𑀁 𑀯𑀢𑁆𑀯𑀸 𑀉𑀧𑀟𑁆𑀠𑀧𑀁𑀲𑀼𑀓𑀸𑀧𑀣𑀯𑀻 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀸𑀯𑀲𑁂𑀲𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑁆𑀪𑀯𑀢𑁄 𑀉𑀧𑀟𑁆𑀠𑀧𑀁𑀲𑀼𑀓𑀸𑀬𑀧𑀺 𑀧𑀣𑀯𑀺𑀬𑀸 ¶ 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀻𑀲𑀼 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀜𑁆𑀘 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀜𑁆𑀘 𑀤𑀼𑀯𑀺𑀥𑀁 𑀧𑀣𑀯𑀺𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀬 𑀢𑀢𑀺𑀬𑀸𑀬 𑀧𑀣𑀯𑀺𑀬𑀸 𑀅𑀪𑀸𑀯𑀢𑁄. 𑀤𑁆𑀯𑁂𑀬𑁂𑀯 𑀳𑀺 𑀧𑀣𑀯𑀺𑀬𑁄 𑀯𑀼𑀢𑁆𑀢𑀸 ‘‘𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻’’𑀢𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑀸𑀬 𑀧𑀣𑀯𑀺𑀬𑀸 𑀪𑀯𑀺𑀢𑀩𑁆𑀩𑀁. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀘 𑀲𑀫𑁆𑀧𑀢𑁆𑀢𑁂 𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑁂𑀬𑁂𑀯 𑀞𑀸𑀢𑀩𑁆𑀩𑀢𑁆𑀢𑀸 𑀦 𑀲𑀓𑁆𑀓𑀸 𑀏𑀢𑁆𑀣 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀼𑀁. 𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀻𑀲𑀼 𑀧𑀦 𑀉𑀧𑀟𑁆𑀠𑁂 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁 𑀢𑀢𑁆𑀣 𑀢𑀸𑀤𑀺𑀲𑀲𑁆𑀲 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄 𑀲𑀫𑁆𑀪𑀯𑀢𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁮𑁬) ‘‘𑀅𑀧𑁆𑀧𑀧𑀁𑀲𑀼𑀫𑀢𑁆𑀢𑀺𑀓𑀸𑀬 𑀧𑀣𑀯𑀺𑀬𑀸 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀉𑀧𑀟𑁆𑀠𑀧𑀁𑀲𑀼𑀫𑀢𑁆𑀢𑀺𑀓𑀸𑀬𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑁂𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀚𑀸𑀢𑀸𑀚𑀸𑀢𑀯𑀺𑀦𑀺𑀫𑀼𑀢𑁆𑀢𑀸𑀬 𑀢𑀢𑀺𑀬𑀸𑀬 𑀧𑀣𑀯𑀺𑀬𑀸 𑀅𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁.

𑀔𑀡𑀦𑁆𑀢𑀲𑁆𑀲 𑀔𑀡𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑀧𑀺 𑀲𑀫𑁆𑀫𑀚𑁆𑀚𑀦𑀺𑀲𑀮𑀸𑀓𑀸𑀬𑀧𑀺 𑀲𑀬𑀁 𑀯𑀸 𑀔𑀡𑀦𑁆𑀢𑀲𑁆𑀲 𑀅𑀜𑁆𑀜𑁂𑀦 𑀯𑀸 𑀔𑀡𑀸𑀧𑁂𑀦𑁆𑀢𑀲𑁆𑀲. ‘‘𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺. ‘‘𑀇𑀫𑀁 𑀯𑀮𑁆𑀮𑀺𑀁 𑀔𑀡𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀣𑀯𑀺𑀔𑀡𑀦𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀯𑁄𑀳𑀸𑀭𑀢𑁆𑀢𑀸 𑀇𑀫𑀺𑀦𑀸𑀯 𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀦 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑁂𑀦, 𑀉𑀪𑀬𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑁂 𑀧𑀦 𑀤𑁆𑀯𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀺.

𑁭𑁩. 𑀓𑀼𑀝𑁂𑀳𑀻𑀢𑀺 𑀖𑀝𑁂𑀳𑀺. 𑀢𑀦𑀼𑀓𑀓𑀤𑁆𑀤𑀫𑁄𑀢𑀺 𑀉𑀤𑀓𑀫𑀺𑀲𑁆𑀲𑀓𑀓𑀤𑁆𑀤𑀫𑁄, 𑀲𑁄 𑀘 𑀉𑀤𑀓𑀕𑀢𑀺𑀓𑀢𑁆𑀢𑀸 𑀯𑀝𑁆𑀝𑀢𑀺. 𑀉𑀤𑀓𑀧𑀧𑁆𑀧𑀝𑀓𑁄𑀢𑀺 𑀉𑀤𑀓𑁂 𑀅𑀦𑁆𑀢𑁄𑀪𑀽𑀫𑀺𑀬𑀁 𑀧𑀯𑀺𑀝𑁆𑀞𑁂 𑀢𑀲𑁆𑀲 𑀉𑀧𑀭𑀺𑀪𑀸𑀕𑀁 𑀙𑀸𑀤𑁂𑀢𑁆𑀯𑀸 𑀢𑀦𑀼𑀓𑀧𑀁𑀲𑀼 𑀯𑀸 𑀫𑀢𑁆𑀢𑀺𑀓𑀸 𑀯𑀸 𑀧𑀝𑀮𑀁 𑀳𑀼𑀢𑁆𑀯𑀸 𑀧𑀮𑀯𑀫𑀸𑀦𑀸 𑀉𑀝𑁆𑀞𑀸𑀢𑀺, 𑀢𑀲𑁆𑀫𑀺𑀁 𑀉𑀤𑀓𑁂 𑀲𑀼𑀓𑁆𑀔𑁂𑀧𑀺 𑀢𑀁 𑀧𑀝𑀮𑀁 𑀯𑀸𑀢𑁂𑀦 𑀘𑀮𑀫𑀸𑀦𑀁 𑀢𑀺𑀝𑁆𑀞𑀢𑀺, 𑀢𑀁 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫. 𑀑𑀫𑀓𑀘𑀸𑀢𑀼𑀫𑀸𑀲𑀦𑁆𑀢𑀺 ¶ 𑀊𑀦𑀘𑀸𑀢𑀼𑀫𑀸𑀲𑀁. 𑀑𑀯𑀝𑁆𑀞𑀦𑁆𑀢𑀺 𑀤𑁂𑀯𑁂𑀦 𑀑𑀯𑀝𑁆𑀞𑀁. 𑀅𑀓𑀢𑀧𑀩𑁆𑀪𑀸𑀭𑁂𑀢𑀺 𑀅𑀯𑀮𑀜𑁆𑀚𑀦𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀸𑀤𑀺𑀲𑁂 𑀳𑀺 𑀯𑀫𑁆𑀫𑀺𑀓𑀲𑁆𑀲 𑀲𑀩𑁆𑀪𑀸𑀯𑁄𑀢𑀺. 𑀫𑀽𑀲𑀺𑀓𑀼𑀓𑁆𑀓𑀼𑀭𑀁 𑀦𑀸𑀫 𑀫𑀽𑀲𑀺𑀓𑀸𑀳𑀺 𑀔𑀡𑀺𑀢𑁆𑀯𑀸 𑀩𑀳𑀺 𑀓𑀢𑀧𑀁𑀲𑀼𑀭𑀸𑀲𑀺.

𑀏𑀲𑁂𑀯 ¶ 𑀦𑀬𑁄𑀢𑀺 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄𑀬𑁂𑀯 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀑𑀯𑀝𑁆𑀞𑀘𑀸𑀢𑀼𑀫𑀸𑀲𑀢𑁄 𑀏𑀓𑀤𑀺𑀯𑀲𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀪𑀽𑀫𑀺𑀲𑀫𑁆𑀩𑀦𑁆𑀥𑁂𑀧𑀺 𑀘 𑀕𑁄𑀓𑀡𑁆𑀝𑀓𑁂 𑀪𑀽𑀫𑀺𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀢𑁆𑀢𑀸 𑀅𑀘𑁆𑀘𑀼𑀕𑁆𑀕𑀢𑀁 𑀫𑀢𑁆𑀣𑀓𑀢𑁄 𑀙𑀺𑀦𑁆𑀤𑀺𑀢𑀼𑀁 𑀕𑀳𑁂𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀓𑀝𑁆𑀞𑀸𑀦𑁂 𑀅𑀢𑀺𑀝𑁆𑀞𑀫𑀸𑀦𑀁 𑀓𑀢𑁆𑀯𑀸 𑀧𑀸𑀤𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀆𑀮𑁄𑀴𑀺𑀢𑀓𑀤𑁆𑀤𑀫𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀅𑀘𑁆𑀙𑀤𑀦𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀉𑀚𑀼𑀓𑀁 𑀆𑀓𑀸𑀲𑀢𑁄 𑀧𑀢𑀺𑀢𑀯𑀲𑁆𑀲𑁄𑀤𑀓𑁂𑀦 𑀑𑀯𑀝𑁆𑀞𑀫𑁂𑀯 𑀚𑀸𑀢𑀧𑀣𑀯𑀻 𑀳𑁄𑀢𑀺, 𑀦 𑀙𑀤𑀦𑀸𑀤𑀻𑀲𑀼 𑀧𑀢𑀺𑀢𑁆𑀯𑀸 𑀢𑀢𑁄 𑀧𑀯𑀢𑁆𑀢𑀉𑀤𑀓𑁂𑀦 𑀢𑀺𑀦𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄𑀢𑀺 𑀧𑀼𑀭𑀸𑀡𑀲𑁂𑀦𑀸𑀲𑀦𑀢𑁄. 𑀇𑀝𑁆𑀞𑀓𑀁 𑀕𑀡𑁆𑀳𑀸𑀫𑀻𑀢𑀺𑀆𑀤𑀺 𑀲𑀼𑀤𑁆𑀥𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀉𑀤𑀓𑁂𑀦𑀸𑀢𑀺 𑀉𑀚𑀼𑀓𑀁 𑀆𑀓𑀸𑀲𑀢𑁄𑀬𑁂𑀯 𑀧𑀢𑀺𑀢𑀉𑀤𑀓𑁂𑀦. 𑀲𑀘𑁂 𑀧𑀦 𑀅𑀜𑁆𑀜𑀢𑁆𑀣 𑀧𑀳𑀭𑀺𑀢𑁆𑀯𑀸 𑀧𑀢𑀺𑀢𑁂𑀦 𑀉𑀤𑀓𑁂𑀦 𑀢𑁂𑀫𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀡𑁆𑀟𑀧𑀢𑁆𑀣𑀫𑁆𑀪𑀦𑁆𑀢𑀺 𑀲𑀸𑀔𑀸𑀫𑀡𑁆𑀟𑀧𑀢𑁆𑀣𑀫𑁆𑀪𑀁.

𑁭𑁪. 𑀉𑀘𑁆𑀘𑀸𑀮𑁂𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀢𑁂𑀦 𑀅𑀧𑀤𑁂𑀲𑁂𑀦𑀸𑀢𑀺 𑀢𑁂𑀦 𑀮𑁂𑀲𑁂𑀦. 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀲𑀘𑁂𑀧𑀺 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀧𑀞𑀫𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀤𑀺𑀦𑁆𑀦𑀢𑁆𑀢𑀸 𑀤𑀳𑀢𑀽𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀢𑀺𑀝𑁆𑀞𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑀳𑀸𑀫𑀢𑁆𑀢𑀺𑀓𑀦𑁆𑀢𑀺 𑀪𑀺𑀢𑁆𑀢𑀺𑀮𑁂𑀧𑀦𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀧𑀣𑀯𑀻𑀔𑀡𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁫. 𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁫. 𑀏𑀯𑀁 ¶ 𑀧𑀣𑀯𑀺𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀪𑀽𑀢𑀕𑀸𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀯𑀦𑁆𑀢𑀺 𑀅𑀳𑀼𑀯𑀼𑀜𑁆𑀘𑀸𑀢𑀺 𑀪𑀽𑀢𑀸, 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀕𑀸𑀫𑁄𑀢𑀺 𑀭𑀸𑀲𑀺, 𑀪𑀽𑀢𑀸𑀦𑀁 𑀕𑀸𑀫𑁄𑀢𑀺 𑀪𑀽𑀢𑀕𑀸𑀫𑁄, 𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄 𑀪𑀽𑀢𑀕𑀸𑀫𑁄, 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀣 ‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀻’’𑀢𑀺 ¶ , ‘‘𑀅𑀳𑀼𑀯𑀼’’𑀦𑁆𑀢𑀺 𑀇𑀫𑀲𑁆𑀲 ‘‘𑀚𑀸𑀢𑀸 𑀯𑀟𑁆𑀠𑀺𑀢𑀸’’𑀢𑀺. 𑀏𑀯𑀁 𑀪𑀽𑀢-𑀲𑀤𑁆𑀤𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀺𑀲𑀬𑁄 𑀳𑁄𑀢𑀺. 𑀢𑁂𑀦𑀸𑀳 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁯𑁦) ‘‘𑀪𑀯𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺, 𑀅𑀳𑀼𑀯𑀼𑀦𑁆𑀢𑀺 𑀩𑀪𑀼𑀯𑀽’’𑀢𑀺. 𑀇𑀤𑀸𑀦𑀺 𑀢𑀁 𑀪𑀽𑀢𑀕𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀽𑀢𑀕𑀸𑀫𑁄𑀢𑀺 𑀧𑀜𑁆𑀘𑀳𑀺 𑀩𑀻𑀚𑁂𑀳𑀺 𑀚𑀸𑀢𑀸𑀦𑀁 𑀭𑀼𑀓𑁆𑀔𑀮𑀢𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳. 𑀮𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀢𑀸𑀦𑀺 𑀩𑀻𑀚𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀫𑀸𑀦𑀺 𑀧𑀜𑁆𑀘 𑀩𑀻𑀚𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀣 𑀯𑀸 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺 𑀫𑀽𑀮𑀩𑀻𑀚𑀁, 𑀫𑀽𑀮𑀩𑀻𑀚𑀢𑁄 𑀯𑀸 𑀦𑀺𑀩𑁆𑀩𑀢𑁆𑀢𑀁 𑀫𑀽𑀮𑀩𑀻𑀚𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀧𑀞𑀫𑁂𑀦 𑀯𑀺𑀕𑁆𑀕𑀳𑁂𑀦 𑀩𑀻𑀚𑀕𑀸𑀫𑁄 𑀏𑀯 𑀮𑀩𑁆𑀪𑀢𑀺, 𑀤𑀼𑀢𑀺𑀬𑀢𑀢𑀺𑀬𑁂𑀳𑀺 𑀪𑀽𑀢𑀕𑀸𑀫𑁄. 𑀇𑀤𑀸𑀦𑀺 𑀢𑁂 𑀪𑀽𑀢𑀕𑀸𑀫𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀫𑀽𑀮𑀩𑀻𑀚𑀁 𑀦𑀸𑀫𑀸’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀼 𑀧𑀜𑁆𑀘𑀲𑀼 𑀫𑀽𑀮𑀩𑀻𑀚𑀸𑀤𑀻𑀲𑀼 𑀳𑀮𑀺𑀤𑁆𑀤𑀺…𑀧𑁂… 𑀪𑀤𑁆𑀤𑀫𑀼𑀢𑁆𑀢𑀓𑀁 𑀫𑀽𑀮𑀩𑀻𑀚𑀁 𑀦𑀸𑀫. 𑀦 𑀓𑁂𑀯𑀮𑀁 𑀇𑀫𑀸𑀦𑀺𑀬𑁂𑀯 𑀫𑀽𑀮𑀩𑀻𑀚𑀸𑀦𑀺, 𑀅𑀣 𑀔𑁄 𑀇𑀢𑁄 𑀅𑀜𑁆𑀜𑀸𑀦𑀺𑀧𑀺 𑀬𑀸𑀦𑀺 𑀯𑀸 𑀧𑀦 𑀪𑀽𑀢𑀕𑀸𑀫𑀚𑀸𑀢𑀸𑀦𑀺 𑀅𑀢𑁆𑀣𑀺 𑀲𑀦𑁆𑀢𑀺, 𑀫𑀽𑀮𑁂 𑀚𑀸𑀬𑀦𑁆𑀢𑀺, 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀪𑀽𑀢𑀕𑀸𑀫𑀚𑀸𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁯𑁧) ‘‘𑀇𑀤𑀸𑀦𑀺 𑀢𑀁 𑀪𑀽𑀢𑀕𑀸𑀫𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘𑀪𑀽𑀢𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺. 𑀢𑀢𑁆𑀣 ¶ 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀪𑀽𑀢𑀕𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑀲𑁆𑀫𑀺𑀁 𑀲𑀢𑀺 𑀪𑀽𑀢𑀕𑀸𑀫𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻𑀢𑀺 𑀆𑀳𑀸’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺, 𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀦 𑀲𑀫𑁂𑀦𑁆𑀢𑀺. 𑀦 𑀳𑀺 𑀫𑀽𑀮𑀩𑀻𑀚𑀸𑀤𑀻𑀦𑀺 𑀫𑀽𑀮𑀸𑀤𑀻𑀲𑀼 𑀚𑀸𑀬𑀦𑁆𑀢𑀺. 𑀫𑀽𑀮𑀸𑀤𑀻𑀲𑀼 𑀚𑀸𑀬𑀫𑀸𑀦𑀸𑀦𑀺 𑀧𑀦 𑀢𑀸𑀦𑀺 𑀩𑀻𑀚𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀏𑀯𑀫𑀢𑁆𑀣𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀧𑀤𑀁. 𑀧𑀜𑁆𑀘𑀸𑀢𑀺 𑀢𑀲𑁆𑀲 𑀯𑀺𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀩𑀻𑀚𑀚𑀸𑀢𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁, 𑀬𑀢𑁄 𑀩𑀻𑀚𑁂𑀳𑀺 𑀚𑀸𑀢𑀸𑀦𑀺 𑀩𑀻𑀚𑀚𑀸𑀢𑀸𑀦𑀺, 𑀭𑀼𑀓𑁆𑀔𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀘. 𑀬𑀣𑀸 ‘‘𑀲𑀸𑀮𑀻𑀦𑀁 𑀘𑁂𑀧𑀺 𑀑𑀤𑀦𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁬) 𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀑𑀤𑀦𑁄 𑀲𑀸𑀮𑀺𑀑𑀤𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀻𑀚𑀢𑁄 𑀲𑀫𑁆𑀪𑀽𑀢𑁄 𑀪𑀽𑀢𑀕𑀸𑀫𑁄 ‘‘𑀩𑀻𑀚’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀘.

𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀡𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄 𑀢𑀤𑀢𑁆𑀣𑀲𑀁𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚’’𑀦𑁆𑀢𑀺 ‘‘𑀭𑀽𑀧𑀭𑀽𑀧𑀁, 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 ¶ 𑀘 𑀬𑀣𑀸. 𑀦𑀺𑀤𑁆𑀤𑁂𑀲𑁂 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺, 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀻’’𑀢𑀺 𑀏𑀢𑁆𑀣 𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑁂𑀦 𑀩𑀻𑀚𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺, 𑀆𑀮𑀼𑀯𑀓𑀲𑁂𑀭𑀼𑀓𑀫𑀮𑀦𑀻𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀓𑀼𑀯𑀮𑀬𑀓𑀼𑀦𑁆𑀤𑀧𑀸𑀝𑀮𑀺𑀫𑀽𑀮𑀸𑀤𑀺𑀪𑁂𑀤𑁂 𑀫𑀽𑀮𑁂 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺, 𑀢𑀸𑀦𑀺, 𑀬𑀫𑁆𑀳𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀘𑁂𑀯 𑀲𑀜𑁆𑀚𑀸𑀬𑀦𑁆𑀢𑀺 𑀘, 𑀢𑀜𑁆𑀘 𑀧𑀸𑀴𑀺𑀬𑀁 (𑀧𑀸𑀘𑀺. 𑁯𑁧) 𑀯𑀼𑀢𑁆𑀢𑀳𑀮𑀺𑀤𑁆𑀤𑀸𑀤𑀺 𑀘, 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫, 𑀏𑀢𑁂𑀦 𑀓𑀸𑀭𑀺𑀬𑁄𑀧𑀘𑀸𑀭𑁂𑀦 𑀓𑀸𑀭𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀔𑀦𑁆𑀥𑀩𑀻𑀚𑀸𑀤𑀻𑀲𑀼. 𑀬𑁂𑀯𑀸𑀧𑀦𑀓𑀔𑀦𑁆𑀥𑀩𑀻𑀚𑁂𑀲𑀼 𑀧𑀦𑁂𑀢𑁆𑀣 𑀅𑀫𑁆𑀩𑀸𑀝𑀓𑀇𑀦𑁆𑀤𑀲𑀸𑀮𑀦𑀼𑀳𑀺𑀧𑀸𑀮𑀺𑀪𑀤𑁆𑀤𑀓𑀓𑀡𑀺𑀓𑀸𑀭𑀸𑀤𑀻𑀦𑀺 𑀔𑀦𑁆𑀥𑀩𑀻𑀚𑀸𑀦𑀺 ¶ . 𑀅𑀫𑁆𑀩𑀺𑀮𑀸𑀯𑀮𑁆𑀮𑀺𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀓𑀡𑀯𑁂𑀭𑀸𑀤𑀻𑀦𑀺 𑀨𑀴𑀼𑀩𑀻𑀚𑀸𑀦𑀺. 𑀫𑀓𑀘𑀺𑀫𑀮𑁆𑀮𑀺𑀓𑀸𑀲𑀼𑀫𑀦𑀚𑀬𑀲𑀼𑀫𑀦𑀸𑀤𑀻𑀦𑀺 𑀅𑀕𑁆𑀕𑀩𑀻𑀚𑀸𑀦𑀺. 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀝𑁆𑀞𑀺𑀆𑀤𑀻𑀦𑀺 𑀩𑀻𑀚𑀩𑀻𑀚𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀪𑀽𑀢𑀕𑀸𑀫𑁂 𑀪𑀽𑀢𑀕𑀸𑀫𑀲𑀜𑁆𑀜𑀻 𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸𑀢𑀺 𑀲𑀢𑁆𑀣𑀓𑀸𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺. 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸𑀢𑀺 𑀧𑀸𑀲𑀸𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀪𑁂𑀤𑀸𑀧𑁂𑀢𑀺. 𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸𑀢𑀺 𑀅𑀕𑁆𑀕𑀺𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀲𑀬𑀁 𑀯𑀸 𑀧𑀘𑀢𑀺, 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀽𑀢𑀕𑀸𑀫𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀺𑀢𑀦𑁆𑀢𑀺 𑀪𑀽𑀢𑀕𑀸𑀫𑀢𑁄 𑀯𑀺𑀬𑁄𑀚𑀺𑀢𑀁.

𑁭𑁬. 𑀲𑀜𑁆𑀘𑀺𑀘𑁆𑀘 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀭𑀻𑀭𑁂 𑀮𑀕𑁆𑀕𑀪𑀸𑀯𑀁 𑀜𑀢𑁆𑀯𑀸𑀧𑀺 𑀉𑀝𑁆𑀞𑀳𑀢𑀺, ‘‘𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀯𑀝𑁆𑀝𑀢𑀺. 𑀅𑀦𑀦𑁆𑀢𑀓𑀕𑁆𑀕𑀳𑀡𑁂𑀦 𑀲𑀸𑀲𑀧𑀫𑀢𑁆𑀢𑀺𑀓𑀸 𑀕𑀳𑀺𑀢𑀸. 𑀦𑀸𑀫𑀜𑁆𑀳𑁂𑀢𑀁 𑀢𑀲𑁆𑀲𑀸 𑀲𑁂𑀯𑀸𑀮𑀚𑀸𑀢𑀺𑀬𑀸. 𑀫𑀽𑀮𑀧𑀡𑁆𑀡𑀸𑀦𑀁 𑀅𑀪𑀸𑀯𑁂𑀦 ‘‘𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸𑀢𑀺 𑀏𑀢𑁆𑀣 𑀪𑀽𑀢𑀕𑀸𑀫𑁄 𑀫𑀽𑀮𑀁 𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 𑀪𑀽𑀢𑀕𑀸𑀫𑀫𑀽𑀮𑁄, 𑀪𑀽𑀢𑀕𑀸𑀫𑀲𑁆𑀲 𑀯𑀸 𑀫𑀽𑀮𑀁 𑀓𑀸𑀭𑀡𑀦𑁆𑀢𑀺 𑀪𑀽𑀢𑀕𑀸𑀫𑀫𑀽𑀮𑀁. 𑀩𑀻𑀚𑀕𑀸𑀫𑁄 𑀳𑀺 𑀦𑀸𑀫 𑀪𑀽𑀢𑀕𑀸𑀫𑀢𑁄 𑀲𑀫𑁆𑀪𑀯𑀢𑀺, 𑀪𑀽𑀢𑀕𑀸𑀫𑀲𑁆𑀲 𑀘 𑀓𑀸𑀭𑀡𑀁 𑀳𑁄𑀢𑀺. 𑀅𑀬𑀁 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀻𑀢𑀺 ‘‘𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀺 𑀳𑀺 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀅𑀯𑀟𑁆𑀠𑀦𑀢𑁄 𑀪𑀽𑀢𑀕𑀸𑀫𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀺, 𑀢𑀣𑀸𑀧𑀺 𑀪𑀽𑀢𑀕𑀸𑀫𑀲𑀗𑁆𑀔𑁆𑀬𑀽𑀧𑀕𑀢𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀩𑀻𑀚𑀢𑁄 𑀲𑀫𑁆𑀪𑀽𑀢𑀢𑁆𑀢𑀸 𑀪𑀽𑀢𑀕𑀸𑀫𑀢𑁄 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀅𑀯𑀟𑁆𑀠𑀫𑀸𑀦𑁂𑀧𑀺 𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸 𑀯𑀼𑀢𑁆𑀢𑀁.

‘‘𑀅𑀗𑁆𑀓𑀼𑀭𑁂 𑀳𑀭𑀺𑀢𑁂’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀦𑀻𑀮𑀯𑀡𑁆𑀡𑁂 𑀚𑀸𑀢𑁂’’𑀢𑀺, 𑀦𑀻𑀮𑀧𑀡𑁆𑀡𑀲𑁆𑀲 𑀯𑀡𑁆𑀡𑀲𑀤𑀺𑀲𑁂 ¶ 𑀧𑀡𑁆𑀡𑁂 𑀚𑀸𑀢𑁂𑀢𑀺 ¶ 𑀅𑀢𑁆𑀣𑁄, ‘‘𑀦𑀻𑀮𑀯𑀡𑁆𑀡𑁂 𑀚𑀸𑀢𑁂’’𑀢𑀺 𑀯𑀸 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀇𑀤𑀁 𑀦𑀸𑀴𑀺𑀓𑁂𑀭𑀲𑁆𑀲 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸 𑀯𑀤𑀢𑀺. ‘‘𑀧𑀸𑀦𑀻𑀬𑀖𑀝𑀸𑀤𑀻𑀦𑀁 𑀩𑀳𑀺 𑀲𑁂𑀯𑀸𑀮𑁄 𑀉𑀤𑀓𑁂 𑀅𑀝𑁆𑀞𑀺𑀢𑀢𑁆𑀢𑀸 𑀩𑀻𑀚𑀕𑀸𑀫𑀸𑀦𑀼𑀮𑁄𑀫𑀢𑁆𑀢𑀸 𑀘 𑀤𑀼𑀓𑁆𑀓𑀝𑀯𑀢𑁆𑀣𑀽’’𑀢𑀺 𑀯𑀤𑀦𑁆𑀢𑀺. 𑀓𑀡𑁆𑀡𑀓𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯𑀸𑀢𑀺 𑀦𑀻𑀮𑀯𑀡𑁆𑀡𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯.

𑁭𑁭. 𑀲𑁂𑀮𑁂𑀬𑁆𑀬𑀓𑀁 𑀦𑀸𑀫 𑀲𑀺𑀮𑀸𑀬 𑀲𑀫𑁆𑀪𑀽𑀢𑀸 𑀏𑀓𑀸 𑀕𑀦𑁆𑀥𑀚𑀸𑀢𑀺. 𑀧𑀼𑀧𑁆𑀨𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀺𑀓𑀲𑀺𑀢𑀓𑀸𑀮𑀢𑁄 𑀧𑀪𑀼𑀢𑀺. 𑀅𑀳𑀺𑀘𑁆𑀙𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑁄𑀢𑀺 𑀯𑀺𑀓𑀲𑀺𑀢𑀁 𑀕𑀡𑁆𑀳𑀦𑁆𑀢𑁄. 𑀫𑀓𑀼𑀴𑀁 𑀧𑀦 𑀭𑀼𑀓𑁆𑀔𑀢𑁆𑀢𑀘𑀁 𑀅𑀓𑁄𑀧𑁂𑀦𑁆𑀢𑁂𑀦𑀧𑀺 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀭𑀼𑀓𑁆𑀔𑀢𑁆𑀢𑀘𑀁 𑀯𑀺𑀓𑁄𑀧𑁂𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀼𑀓𑁆𑀔𑁂 𑀚𑀸𑀢𑀁 𑀬𑀁 𑀓𑀺𑀜𑁆𑀘𑀺 𑀅𑀳𑀺𑀘𑁆𑀙𑀢𑁆𑀢𑀓𑀁 𑀭𑀼𑀓𑁆𑀔𑀢𑁆𑀢𑀘𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀫𑀢𑁆𑀣𑀓𑀢𑁄 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 ‘‘𑀅𑀳𑀺𑀘𑁆𑀙𑀢𑁆𑀢𑀓𑀁 𑀬𑀸𑀯 𑀫𑀓𑀼𑀴𑀁 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀬𑀤𑀺𑀧𑀺 𑀓𑀺𑀜𑁆𑀘𑀺𑀫𑀢𑁆𑀢𑀁 𑀭𑀼𑀓𑁆𑀔𑁂 𑀅𑀮𑁆𑀮𑀻𑀦𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀭𑀼𑀓𑁆𑀔𑀢𑁄 𑀕𑀬𑁆𑀳𑀫𑀸𑀦𑀸 𑀧𑀦 𑀭𑀼𑀓𑁆𑀔𑀘𑁆𑀙𑀯𑀺𑀁 𑀦 𑀯𑀺𑀓𑁄𑀧𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀮𑁆𑀮𑀭𑀼𑀓𑁆𑀔𑀢𑁄 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣𑀸𑀧𑀺 𑀭𑀼𑀓𑁆𑀔𑀢𑁆𑀢𑀘𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀫𑀢𑁆𑀣𑀓𑀢𑁄 𑀢𑀘𑁆𑀙𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 𑀳𑀢𑁆𑀣𑀘𑀸𑀧𑀮𑁆𑀮𑁂𑀦. 𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀦𑀸𑀫𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀯𑀮𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀢𑁆𑀣𑀸𑀬 𑀦𑀸𑀫𑀺𑀢𑁂 𑀧𑀦 𑀧𑀘𑁆𑀙𑀸 𑀢𑀢𑁄 𑀮𑀪𑀺𑀢𑁆𑀯𑀸 𑀦 𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁯𑁨) 𑀧𑀦 ‘‘𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀧𑀺𑀯𑀦𑀧𑀸𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸. 𑀢𑁂𑀦𑀸𑀳 𑀅𑀢𑁆𑀢𑀦𑀸 𑀔𑀸𑀤𑀺𑀢𑀼𑀓𑀸𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁂𑀲𑀁 𑀲𑀸𑀔𑀸 𑀦 𑀭𑀼𑀳𑀢𑀺, 𑀢𑀢𑁆𑀣 𑀓𑀧𑁆𑀧𑀺𑀬𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 ‘‘𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 ¶ 𑀭𑀼𑀳𑀢𑀻𑀢𑀺 𑀫𑀽𑀮𑀁 𑀅𑀦𑁄𑀢𑀸𑀭𑁂𑀢𑁆𑀯𑀸 𑀧𑀡𑁆𑀡𑀫𑀢𑁆𑀢𑀦𑀺𑀕𑁆𑀕𑀫𑀦𑀫𑀢𑁆𑀢𑁂𑀦𑀸𑀧𑀺 𑀯𑀟𑁆𑀠𑀢𑀺, 𑀢𑀢𑁆𑀣 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀭𑁄𑀦𑁆𑀢𑁄 𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀯𑁂𑀴𑀼𑀤𑀡𑁆𑀟𑀸𑀤𑀬𑁄 𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀯𑀮𑀁 𑀘𑀗𑁆𑀓𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀫𑀕𑁆𑀕𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀅𑀓𑁆𑀓𑀫𑀦𑁆𑀢𑀲𑁆𑀲, 𑀢𑀺𑀡𑀸𑀦𑀁 𑀉𑀧𑀭𑀺 𑀦𑀺𑀲𑀻𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀦𑀺𑀲𑀻𑀤𑀦𑁆𑀢𑀲𑁆𑀲 𑀘 𑀤𑁄𑀲𑁄 𑀦𑀢𑁆𑀣𑀺.

𑁭𑁮. 𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀲𑀫𑀡𑀸𑀦𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀳𑀺. 𑀓𑀺𑀜𑁆𑀘𑀸𑀧𑀺 𑀩𑀻𑀚𑀸𑀤𑀻𑀦𑀁 𑀅𑀕𑁆𑀕𑀺𑀦𑀸 𑀨𑀼𑀝𑁆𑀞𑀫𑀢𑁆𑀢𑁂𑀦, 𑀦𑀔𑀸𑀤𑀻𑀳𑀺 𑀯𑀺𑀮𑀺𑀔𑀦𑀫𑀢𑁆𑀢𑁂𑀦 𑀘 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀢𑀸 𑀦 𑀳𑁄𑀢𑀺, 𑀢𑀣𑀸𑀧𑀺 𑀏𑀯𑀁 𑀓𑀢𑁂𑀬𑁂𑀯 𑀲𑀫𑀡𑀸𑀦𑀁 𑀓𑀧𑁆𑀧𑀢𑀻𑀢𑀺 𑀅𑀕𑁆𑀕𑀺𑀧𑀭𑀺𑀚𑀺𑀢𑀸𑀤𑀬𑁄 𑀲𑀫𑀡𑀯𑁄𑀳𑀸𑀭𑀸 𑀦𑀸𑀫 𑀚𑀸𑀢𑀸, 𑀢𑀲𑁆𑀫𑀸 𑀢𑁂𑀳𑀺 𑀲𑀫𑀡𑀯𑁄𑀳𑀸𑀭𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺𑀧𑀺 ¶ 𑀲𑀫𑀡𑀸𑀦𑀁 𑀓𑀧𑁆𑀧𑀦𑁆𑀢𑀻𑀢𑀺 𑀧𑀜𑁆𑀜𑀢𑁆𑀢𑀧𑀡𑁆𑀡𑀢𑁆𑀢𑀺𑀪𑀸𑀯𑀢𑁄 𑀲𑀫𑀡𑀯𑁄𑀳𑀸𑀭𑀸𑀇𑀘𑁆𑀘𑁂𑀯 𑀲𑀗𑁆𑀔𑀁 𑀕𑀢𑀸𑀦𑀺. 𑀅𑀣 𑀯𑀸 𑀅𑀕𑁆𑀕𑀺𑀧𑀭𑀺𑀚𑀺𑀢𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀓𑀧𑁆𑀧𑀺𑀬𑀪𑀸𑀯𑀢𑁄𑀬𑁂𑀯 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑀺𑀬𑀪𑀸𑀯𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀕𑁆𑀕𑀺𑀧𑀭𑀺𑀚𑀺𑀢𑀦𑁆𑀢𑀺𑀆𑀤𑀻𑀲𑀼 ‘‘𑀧𑀭𑀺𑀘𑀺𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀩𑀻𑀚𑀁 𑀦𑀸𑀫 𑀢𑀭𑀼𑀡𑀅𑀫𑁆𑀩𑀨𑀮𑀸𑀤𑀺. 𑀦𑀺𑀩𑁆𑀩𑀝𑁆𑀝𑀩𑀻𑀚𑀁 𑀦𑀸𑀫 𑀅𑀫𑁆𑀩𑀧𑀦𑀲𑀸𑀤𑀺, 𑀬𑀁 𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑁂𑀢𑁆𑀯𑀸 𑀯𑀺𑀲𑀼𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀦𑀺𑀩𑁆𑀩𑀝𑁆𑀝𑁂𑀢𑀩𑁆𑀩𑀁 𑀯𑀺𑀬𑁄𑀚𑁂𑀢𑀩𑁆𑀩𑀁 𑀩𑀻𑀚𑀁 𑀬𑀲𑁆𑀫𑀺𑀁, 𑀢𑀁 𑀧𑀦𑀲𑀸𑀤𑀺 𑀦𑀺𑀩𑁆𑀩𑀝𑁆𑀝𑀩𑀻𑀚𑀁 𑀦𑀸𑀫. ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄 𑀓𑀧𑁆𑀧𑀺𑀬𑀁 𑀓𑀭𑁄𑀢𑀺, 𑀢𑁂𑀦 𑀓𑀢𑁆𑀢𑀩𑁆𑀩𑀧𑀓𑀸𑀭𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀸 𑀅𑀯𑀼𑀢𑁆𑀢𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀧𑀼𑀦 ‘‘𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀓𑀸𑀭𑀸𑀧𑀦𑀲𑁆𑀲 𑀧𑀞𑀫𑀫𑁂𑀯 𑀓𑀣𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀸 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀕𑁆𑀕𑀺𑀧𑀭𑀺𑀚𑀺𑀢𑀸𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀘𑀦𑀁 𑀧𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀧𑀞𑀫𑀁 ¶ ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀕𑁆𑀕𑀺𑀆𑀤𑀺𑀦𑀸 𑀨𑀼𑀲𑀦𑀸𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀞𑀫𑀁 𑀅𑀕𑁆𑀕𑀺𑀫𑁆𑀳𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀦𑀔𑀸𑀤𑀺𑀦𑀸 𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁯𑁨) 𑀧𑀦 ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀯𑀼𑀢𑁆𑀢𑁂𑀧𑀺 𑀯𑀘𑀦𑀓𑁆𑀔𑀡𑁂𑀯 𑀅𑀕𑁆𑀕𑀺𑀲𑀢𑁆𑀣𑀸𑀤𑀺𑀦𑀸 𑀩𑀻𑀚𑀕𑀸𑀫𑁂 𑀯𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀘𑀦𑀢𑁄 𑀧𑀦 𑀧𑀼𑀩𑁆𑀩𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀜𑁆𑀘 𑀤𑁆𑀯𑀺𑀥𑀸 𑀅𑀓𑀢𑁆𑀯𑀸 𑀙𑁂𑀤𑀦𑀪𑁂𑀤𑀦𑀫𑁂𑀯 𑀤𑀲𑁆𑀲𑁂𑀢𑀩𑁆𑀩𑀁. 𑀓𑀭𑁄𑀦𑁆𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸 ‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’𑀢𑀺 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀼𑀢𑁆𑀢𑁂𑀬𑁂𑀯 𑀓𑀸𑀢𑀩𑁆𑀩𑀁. 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀓𑀸𑀭𑀸𑀧𑀦𑀲𑁆𑀲 𑀧𑀞𑀫𑀫𑁂𑀯 𑀅𑀥𑀺𑀓𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀓𑀲𑁆𑀫𑀺𑀁 𑀩𑀻𑀚𑁂 𑀯𑀸𑀢𑀺𑀆𑀤𑀻𑀲𑀼 ‘‘𑀏𑀓𑀁𑀬𑁂𑀯 𑀓𑀸𑀭𑁂𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂 𑀲𑀢𑀺𑀧𑀺 𑀏𑀓𑀸𑀩𑀤𑁆𑀥𑀢𑁆𑀢𑀸 𑀲𑀩𑁆𑀩𑀁 𑀓𑀢𑀫𑁂𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀤𑀸𑀭𑀼𑀁 𑀯𑀺𑀚𑁆𑀛𑀢𑀻𑀢𑀺 𑀏𑀢𑁆𑀣 ‘‘𑀚𑀸𑀦𑀺𑀢𑁆𑀯𑀸𑀧𑀺 𑀯𑀺𑀚𑁆𑀛𑀢𑀺 𑀯𑀸 𑀯𑀺𑀚𑁆𑀛𑀸𑀧𑁂𑀢𑀺 𑀯𑀸, 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀪𑀢𑁆𑀢𑀲𑀺𑀢𑁆𑀣𑁂 𑀯𑀺𑀚𑁆𑀛𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀢𑀁 𑀯𑀺𑀚𑁆𑀛𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀭𑀚𑁆𑀚𑀼𑀆𑀤𑀻𑀦𑀁 𑀪𑀸𑀚𑀦𑀕𑀢𑀺𑀓𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀫𑀭𑀻𑀘𑀧𑀓𑁆𑀓𑀸𑀤𑀻𑀳𑀺 𑀘 𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀪𑀢𑁆𑀢𑀲𑀺𑀢𑁆𑀣𑀲𑀫𑁆𑀩𑀦𑁆𑀥𑀯𑀲𑁂𑀦 𑀏𑀓𑀸𑀩𑀤𑁆𑀥𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀨𑀮𑀸𑀦𑀁𑀬𑁂𑀯 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀯𑀲𑁂𑀦. ‘‘𑀓𑀝𑀸𑀳𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀝𑀸𑀳𑀢𑁄 𑀦𑀻𑀳𑀝𑀸𑀬 𑀫𑀺𑀜𑁆𑀚𑀸𑀬 𑀯𑀸 𑀩𑀻𑀚𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀚𑁆𑀛𑀺𑀢𑀼𑀁 ¶ 𑀯𑀝𑁆𑀝𑀢𑀺 𑀏𑀯. 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀩𑀻𑀚𑀢𑁄 𑀫𑀼𑀢𑁆𑀢𑀲𑁆𑀲 𑀓𑀝𑀸𑀳𑀲𑁆𑀲 𑀪𑀸𑀚𑀦𑀕𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁬. 𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁯. 𑀏𑀯𑀁 ¶ 𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀤𑀼𑀯𑀺𑀥𑀁 𑀲𑀳𑀲𑁂𑀬𑁆𑀬𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑁂 𑀯𑀺𑀥𑀸 𑀧𑀓𑀸𑀭𑀸 𑀬𑀲𑁆𑀲 𑀲𑀳𑀲𑁂𑀬𑁆𑀬𑀓𑀲𑁆𑀲 𑀢𑀁 𑀤𑀼𑀯𑀺𑀥𑀁, 𑀲𑀳 𑀲𑀬𑀦𑀁, 𑀲𑀳 𑀯𑀸 𑀲𑀬𑀢𑀺 𑀏𑀢𑁆𑀣𑀸𑀢𑀺 𑀲𑀳𑀲𑁂𑀬𑁆𑀬𑀸, 𑀲𑀳𑀲𑁂𑀬𑁆𑀬𑀸 𑀏𑀯 𑀲𑀳𑀲𑁂𑀬𑁆𑀬𑀓𑀁 𑀲𑀓𑀢𑁆𑀣𑁂 𑀓-𑀧𑀘𑁆𑀘𑀬𑀯𑀲𑁂𑀦. 𑀢𑀁 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀲𑀳𑀲𑁂𑀬𑁆𑀬𑀸𑀫𑀸𑀢𑀼𑀕𑀸𑀫𑁂𑀦𑀲𑀳𑀲𑁂𑀬𑁆𑀬𑀸𑀯𑀲𑁂𑀦 𑀤𑀼𑀯𑀺𑀥𑀁. 𑀢𑁂𑀦𑀸𑀳 ‘‘𑀤𑀼𑀯𑀺𑀥𑀁 𑀲𑀳𑀲𑁂𑀬𑁆𑀬𑀓’’𑀦𑁆𑀢𑀺. 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑁂𑀦 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀭𑀢𑁆𑀢𑀜𑁆𑀳𑀺 𑀲𑀳𑀯𑀸𑀲𑁂 𑀮𑀩𑁆𑀪𑀫𑀸𑀦𑁂 𑀤𑀺𑀭𑀢𑁆𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀺𑀲𑀼𑀁 𑀦 𑀧𑀬𑁄𑀚𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀦𑁆𑀢𑀺 𑀪𑀕𑀯𑀸 𑀲𑀸𑀫𑀡𑁂𑀭𑀸𑀦𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀢𑀺𑀭𑀢𑁆𑀢𑀧𑀭𑀺𑀳𑀸𑀭𑀁 𑀅𑀤𑀸𑀲𑀻’’𑀢𑀺. 𑀦𑀺𑀭𑀦𑁆𑀢𑀭𑀁 𑀢𑀺𑀭𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀯𑀸 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀓𑀢𑀁. 𑀓𑁂𑀯𑀮𑀜𑁆𑀳𑀺 ‘‘𑀢𑀺𑀭𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑀢𑁆𑀣 𑀯𑀸𑀲𑁂𑀦 𑀅𑀦𑁆𑀢𑀭𑀺𑀓𑀫𑁆𑀧𑀺 𑀢𑀺𑀭𑀢𑁆𑀢𑀁 𑀕𑀡𑁆𑀳𑁂𑀬𑁆𑀬. 𑀤𑀺𑀭𑀢𑁆𑀢𑀯𑀺𑀲𑀺𑀝𑁆𑀞𑀁 𑀧𑀦 𑀢𑀺𑀭𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀢𑁂𑀦 𑀅𑀦𑀦𑁆𑀢𑀭𑀺𑀓𑀫𑁂𑀯 𑀢𑀺𑀭𑀢𑁆𑀢𑀁 𑀤𑀻𑀧𑁂𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁫𑁦-𑁫𑁧) ‘‘𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀘𑀦𑀸𑀮𑀗𑁆𑀓𑀸𑀭𑀢𑁆𑀣𑀁. 𑀦𑀺𑀭𑀦𑁆𑀢𑀭𑀁 𑀢𑀺𑀲𑁆𑀲𑁄𑀯 𑀭𑀢𑁆𑀢𑀺𑀬𑁄 𑀲𑀬𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑀸𑀤𑀻𑀲𑀼 𑀲𑀬𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀦 𑀏𑀓𑀦𑁆𑀢𑀭𑀺𑀓𑀸𑀤𑀺𑀯𑀲𑁂𑀦 𑀲𑀬𑀦𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑀲𑁂𑀬𑁆𑀬𑀁 𑀏𑀓𑀢𑁄 𑀲𑁂𑀬𑁆𑀬𑀁. 𑀲𑁂𑀬𑁆𑀬𑀦𑁆𑀢𑀺 𑀘𑁂𑀢𑁆𑀣 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑀬𑀦𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀬𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀲𑀬𑀦𑁆𑀢𑀺, 𑀢𑀫𑁆𑀧𑀺, 𑀢𑀲𑁆𑀫𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀏𑀢𑁆𑀣 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦𑀸𑀢𑀺 𑀏𑀢𑁆𑀣 𑀤𑀺𑀬𑀟𑁆𑀠𑀳𑀢𑁆𑀣𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑁄. 𑀧𑀜𑁆𑀘𑀳𑀺 𑀙𑀤𑀦𑁂𑀳𑀻𑀢𑀺 𑀇𑀝𑁆𑀞𑀓𑀸𑀲𑀺𑀮𑀸𑀲𑀼𑀥𑀸𑀢𑀺𑀡𑀧𑀡𑁆𑀡𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺. 𑀯𑀸𑀘𑀼𑀕𑁆𑀕𑀢𑀯𑀲𑁂𑀦𑀸𑀢𑀺 𑀧𑀕𑀼𑀡𑀯𑀲𑁂𑀦.

𑀏𑀓𑀽𑀧𑀘𑀸𑀭𑁄𑀢𑀺 ¶ ¶ 𑀯𑀴𑀜𑁆𑀚𑀦𑀤𑁆𑀯𑀸𑀭𑀲𑁆𑀲 𑀏𑀓𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁫𑁦-𑁫𑁧) 𑀧𑀦 ‘‘𑀏𑀓𑀽𑀧𑀘𑀸𑀭𑁄 𑀏𑀓𑁂𑀦 𑀫𑀕𑁆𑀕𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀼𑀧𑀭𑀺𑀕𑀫𑀦𑀬𑁄𑀕𑁆𑀕𑁄, 𑀏𑀢𑀁 𑀩𑀳𑀼𑀤𑁆𑀯𑀸𑀭𑀫𑁆𑀧𑀺 𑀏𑀓𑀽𑀧𑀘𑀸𑀭𑁄𑀯. 𑀬𑀢𑁆𑀣 𑀧𑀦 𑀓𑀼𑀝𑁆𑀝𑀸𑀤𑀻𑀳𑀺 𑀭𑀼𑀦𑁆𑀥𑀺𑀢𑁆𑀯𑀸 𑀯𑀺𑀲𑀼𑀁 𑀤𑁆𑀯𑀸𑀭𑀁 𑀬𑁄𑀚𑁂𑀦𑁆𑀢𑀺, 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀲𑀘𑁂 𑀧𑀦 𑀭𑀼𑀦𑁆𑀥𑀢𑀺 𑀏𑀯, 𑀯𑀺𑀲𑀼𑀁 𑀤𑁆𑀯𑀸𑀭𑀁 𑀦 𑀬𑁄𑀚𑁂𑀦𑁆𑀢𑀺, 𑀏𑀢𑀫𑁆𑀧𑀺 𑀏𑀓𑀽𑀧𑀘𑀸𑀭𑀫𑁂𑀯 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀺𑀳𑀺𑀢𑀤𑁆𑀯𑀸𑀭𑁄 𑀯𑀺𑀬 𑀕𑀩𑁆𑀪𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀕𑀩𑁆𑀪𑁂 𑀧𑀯𑀺𑀲𑀺𑀢𑁆𑀯𑀸 𑀧𑀫𑀼𑀔𑀸𑀤𑀻𑀲𑀼 𑀦𑀺𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀳𑀲𑁂𑀬𑁆𑀬𑀸𑀧𑀭𑀺𑀫𑀼𑀢𑁆𑀢𑀺𑀬𑀸 𑀕𑀩𑁆𑀪𑀤𑁆𑀯𑀸𑀭𑀁 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀺𑀤𑀳𑀸𑀧𑁂𑀢𑁆𑀯𑀸 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀯𑀺𑀯𑀭𑀸𑀧𑁂𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀲𑀸𑀮𑀁 𑀏𑀓𑀽𑀧𑀘𑀸𑀭𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀓𑁂𑀘𑀺 ‘‘𑀅𑀦𑀼𑀝𑁆𑀞𑀳𑀦𑁂𑀦 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀸. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀲𑀺𑀬𑀸 𑀓𑀺𑀭𑀺𑀬𑀸𑀬, 𑀲𑀺𑀬𑀸 𑀅𑀓𑀺𑀭𑀺𑀬𑀸𑀬 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀸𑀬 𑀲𑀫𑀼𑀝𑁆𑀞𑀸𑀦𑀢𑀸 𑀘𑀲𑁆𑀲 𑀢𑀩𑁆𑀩𑀳𑀼𑀮𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀬𑀣𑀸 𑀘𑁂𑀢𑀁, 𑀏𑀯𑀁 𑀤𑀺𑀯𑀸𑀲𑀬𑀦𑀫𑁆𑀧𑀺. 𑀅𑀦𑀼𑀝𑁆𑀞𑀳𑀦𑁂𑀦, 𑀳𑀺 𑀤𑁆𑀯𑀸𑀭𑀸𑀲𑀁𑀯𑀭𑀡𑁂𑀦 𑀘𑁂𑀢𑀁 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀇𑀤𑀜𑁆𑀘 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑁮𑁦. 𑀉𑀧𑀭𑀺𑀫𑀢𑀮𑁂𑀦 𑀲𑀤𑁆𑀥𑀺𑀁 𑀅𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑀲𑁆𑀲𑀸𑀢𑀺 𑀇𑀤𑀁 𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀧𑀭𑀺𑀫𑀢𑀮𑁂 𑀲𑀬𑀺𑀢𑀲𑁆𑀲 𑀲𑀗𑁆𑀓𑀸 𑀏𑀯 𑀦𑀢𑁆𑀣𑀻𑀢𑀺 ‘‘𑀳𑁂𑀝𑁆𑀞𑀸𑀧𑀸𑀲𑀸𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀦𑀽𑀧𑀘𑀸𑀭𑁂𑀢𑀺 𑀬𑀢𑁆𑀣 𑀩𑀳𑀺 𑀦𑀺𑀲𑁆𑀲𑁂𑀡𑀺𑀁 𑀓𑀢𑁆𑀯𑀸 𑀉𑀧𑀭𑀺𑀫𑀢𑀮𑀁 𑀆𑀭𑁄𑀳𑀦𑁆𑀢𑀺, 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀧𑀭𑀺𑀫𑀢𑀮𑁂𑀧𑀻’’𑀢𑀺. 𑀆𑀓𑀸𑀲𑀗𑁆𑀕𑀡𑁂 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀅𑀪𑀸𑀯𑀢𑁄 ‘‘𑀙𑀤𑀦𑀩𑁆𑀪𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀲𑀪𑀸𑀓𑀸𑀭𑁂𑀦. 𑀅𑀟𑁆𑀠𑀓𑀼𑀝𑁆𑀝𑀓𑁂 𑀲𑁂𑀦𑀸𑀲𑀦𑁂𑀢𑀺 𑀏𑀢𑁆𑀣 ‘‘𑀅𑀟𑁆𑀠𑀓𑀼𑀝𑁆𑀝𑀓𑀁 𑀦𑀸𑀫 𑀬𑀢𑁆𑀣 𑀉𑀧𑀟𑁆𑀠𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀻𑀲𑀼 𑀧𑀲𑁆𑀲𑁂𑀲𑀼 𑀪𑀺𑀢𑁆𑀢𑀺𑀬𑁄 𑀩𑀤𑁆𑀥𑀸 𑀳𑁄𑀦𑁆𑀢𑀺 ¶ , 𑀬𑀢𑁆𑀣 𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀉𑀧𑀟𑁆𑀠𑀁 𑀉𑀧𑀟𑁆𑀠𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀬𑁄 𑀉𑀝𑁆𑀞𑀸𑀧𑁂𑀦𑁆𑀢𑀺, 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀟𑁆𑀠𑀓𑀼𑀝𑁆𑀝𑀓𑁂𑀢𑀺 𑀙𑀤𑀦𑀁 𑀅𑀟𑁆𑀠𑁂𑀦 𑀅𑀲𑀫𑁆𑀧𑀢𑁆𑀢𑀓𑀼𑀝𑁆𑀝𑀓𑁂’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦𑁄 𑀦 𑀬𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀲𑀪𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀟𑁆𑀠𑀓𑀼𑀝𑁆𑀝𑀓𑁂𑀢𑀺 𑀇𑀫𑀺𑀦𑀸 𑀲𑀡𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀣 𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀪𑀺𑀢𑁆𑀢𑀺𑀬𑁄 𑀩𑀤𑁆𑀥𑀸, 𑀙𑀤𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀸 𑀅𑀟𑁆𑀠𑀪𑀺𑀢𑁆𑀢𑀺, 𑀇𑀤𑀁 𑀅𑀟𑁆𑀠𑀓𑀼𑀝𑁆𑀝𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀯𑀸𑀴𑀲𑀗𑁆𑀖𑀸𑀝𑁄 𑀦𑀸𑀫 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀣𑀫𑁆𑀪𑀸𑀤𑀻𑀦𑀁 𑀉𑀧𑀭𑀺 𑀯𑀸𑀴𑀭𑀽𑀧𑁂𑀳𑀺 𑀓𑀢𑀲𑀗𑁆𑀖𑀸𑀝𑁄.

𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺 𑀕𑀢𑁂𑀢𑀺 𑀏𑀢𑁆𑀣 𑀬𑀢𑁆𑀣 𑀬𑀲𑁆𑀫𑀺𑀁 𑀧𑀲𑁆𑀲𑁂 𑀧𑀭𑀺𑀓𑁆𑀔𑁂𑀧𑁄 𑀦𑀢𑁆𑀣𑀺, 𑀢𑀢𑁆𑀣𑀸𑀧𑀺 𑀧𑀭𑀺𑀓𑁆𑀔𑁂𑀧𑀸𑀭𑀳𑀧𑀤𑁂𑀲𑀢𑁄 ¶ 𑀩𑀳𑀺 𑀕𑀢𑁂 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁫𑁦-𑁫𑁧) 𑀧𑀦 ‘‘𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺 𑀕𑀢𑁂𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀧𑀲𑁆𑀲𑁂 𑀧𑀭𑀺𑀓𑁆𑀔𑁂𑀧𑁄 𑀦𑀢𑁆𑀣𑀺, 𑀢𑀢𑁆𑀣 𑀲𑀘𑁂 𑀪𑀽𑀫𑀺𑀢𑁄 𑀯𑀢𑁆𑀣𑀼 𑀉𑀘𑁆𑀘𑀁 𑀳𑁄𑀢𑀺, 𑀉𑀪𑀢𑁄 𑀉𑀘𑁆𑀘𑀯𑀢𑁆𑀣𑀼𑀢𑁄 𑀳𑁂𑀝𑁆𑀞𑀸 𑀪𑀽𑀫𑀺𑀬𑀁 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂𑀧𑀺 𑀅𑀦𑀸𑀧𑀢𑁆𑀢𑀺 𑀏𑀯 𑀢𑀢𑁆𑀣 𑀲𑁂𑀦𑀸𑀲𑀦𑀯𑁄𑀳𑀸𑀭𑀸𑀪𑀸𑀯𑀢𑁄. 𑀅𑀣 𑀯𑀢𑁆𑀣𑀼 𑀦𑀻𑀘𑀁 𑀪𑀽𑀫𑀺𑀲𑀫𑀫𑁂𑀯 𑀲𑁂𑀦𑀸𑀲𑀦𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀧𑀭𑀺𑀓𑁆𑀔𑁂𑀧𑀭𑀳𑀺𑀢𑀤𑀺𑀲𑀸𑀬 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀢𑁆𑀣 𑀆𑀧𑀢𑁆𑀢𑀺 𑀳𑁄𑀢𑀺, 𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺 𑀏𑀯 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑁂𑀢𑀺 𑀏𑀢𑁆𑀣 𑀫𑀚𑁆𑀛𑁂 𑀯𑀺𑀯𑀝𑀗𑁆𑀕𑀡𑀯𑀦𑁆𑀢𑀸𑀲𑀼 𑀫𑀳𑀸𑀘𑀢𑀼𑀲𑀸𑀮𑀸𑀲𑀼 𑀬𑀣𑀸 𑀆𑀓𑀸𑀲𑀗𑁆𑀕𑀡𑀁 𑀅𑀦𑁄𑀢𑀭𑀺𑀢𑁆𑀯𑀸 𑀧𑀫𑀼𑀔𑁂𑀦𑁂𑀯 𑀕𑀦𑁆𑀢𑁆𑀯𑀸 𑀲𑀩𑁆𑀩𑀕𑀩𑁆𑀪𑁂 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀏𑀓𑁂𑀓𑀕𑀩𑁆𑀪𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀓𑀼𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀓𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑀁 𑀦𑀸𑀫, 𑀇𑀤𑀁 𑀧𑀦 𑀢𑀸𑀤𑀺𑀲𑀁 𑀦 𑀳𑁄𑀢𑀻𑀢𑀺 ‘‘𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑁂’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀕𑀩𑁆𑀪𑁂𑀧𑀺 𑀧𑀯𑀺𑀲𑀦𑁆𑀢𑀻𑀢𑀺 𑀕𑀩𑁆𑀪𑀽𑀧𑀘𑀸𑀭𑀲𑁆𑀲 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀆𑀓𑀸𑀲𑀗𑁆𑀕𑀡𑀁 𑀅𑀦𑁄𑀢𑀭𑀺𑀢𑁆𑀯𑀸𑀧𑀺 ¶ 𑀧𑀫𑀼𑀔𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀢𑀁 𑀕𑀩𑁆𑀪𑀁 𑀧𑀯𑀺𑀲𑀦𑁆𑀢𑀺. 𑀅𑀣 𑀓𑀼𑀢𑁄 𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀲𑀩𑁆𑀩𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀕𑀩𑁆𑀪𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀳𑀺𑀲𑁆𑀲 𑀧𑀭𑀺𑀓𑁆𑀔𑁂𑀧𑁄’’𑀢𑀺, 𑀇𑀤𑀜𑁆𑀘 𑀲𑀫𑀦𑁆𑀢𑀸 𑀕𑀩𑁆𑀪𑀪𑀺𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀲𑀸𑀮𑀯𑀲𑁂𑀦 𑀳𑀺 𑀲𑀦𑁆𑀦𑀺𑀯𑀺𑀝𑁆𑀞𑁂 𑀲𑁂𑀦𑀸𑀲𑀦𑁂 𑀕𑀩𑁆𑀪𑀧𑀫𑀼𑀔𑀁 𑀯𑀺𑀲𑀼𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀲𑀫𑀦𑁆𑀢𑀸 𑀞𑀺𑀢𑀁 𑀕𑀩𑁆𑀪𑀪𑀺𑀢𑁆𑀢𑀻𑀦𑀁 𑀯𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑁮𑁧. 𑀏𑀓𑀤𑀺𑀲𑀸𑀬 𑀉𑀚𑀼𑀓𑀫𑁂𑀯 𑀤𑀻𑀖𑀁 𑀓𑀢𑁆𑀯𑀸 𑀲𑀦𑁆𑀦𑀺𑀯𑁂𑀲𑀺𑀢𑁄 𑀧𑀸𑀲𑀸𑀤𑁄 𑀏𑀓𑀲𑀸𑀮𑀲𑀦𑁆𑀦𑀺𑀯𑁂𑀲𑁄. 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀯𑀸 𑀤𑀺𑀲𑀸𑀲𑀼 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀓𑀢𑀸 𑀤𑁆𑀯𑀺𑀲𑀸𑀮𑀸𑀤𑀺𑀲𑀦𑁆𑀦𑀺𑀯𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀮𑀧𑁆𑀧𑀪𑁂𑀤𑀤𑀻𑀧𑀦𑀫𑁂𑀯 𑀘𑁂𑀢𑁆𑀣 𑀧𑀼𑀭𑀺𑀫𑀢𑁄 𑀯𑀺𑀲𑁂𑀲𑁄𑀢𑀺. 𑀅𑀝𑁆𑀞 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀉𑀧𑀟𑁆𑀠𑀘𑁆𑀙𑀦𑁆𑀦𑀁 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀁 𑀲𑁂𑀦𑀸𑀲𑀦𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀲𑁆𑀲 𑀆𑀤𑀺𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀢𑁆𑀢𑀸 𑀢𑀢𑁄 𑀅𑀥𑀺𑀓𑀁 𑀲𑀩𑁆𑀩𑀘𑁆𑀙𑀦𑁆𑀦𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀓𑀫𑁆𑀧𑀺 𑀲𑀩𑁆𑀩𑀁 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀢𑁆𑀣𑀼𑀪𑀸𑀯𑁂𑀦 𑀤𑀲𑁆𑀲𑀺𑀢𑀁 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑁆𑀢𑀸, 𑀕𑀭𑀼𑀓𑁂 𑀞𑀸𑀢𑀩𑁆𑀩𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 (𑀧𑀸𑀘𑀺. 𑁫𑁪) ‘‘𑀢𑀢𑀺𑀬𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀲𑀬𑀢𑀻’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀸𑀭𑀼𑀡𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑁆𑀢𑁄𑀙𑀤𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀧𑀼𑀦 𑀤𑀺𑀯𑀲𑁂 𑀲𑀳𑀲𑁂𑀬𑁆𑀬𑁂𑀦 𑀅𑀦𑀸𑀧𑀢𑁆𑀢𑀺 𑀏𑀯. 𑀏𑀢𑁆𑀣 𑀘𑀢𑀼𑀪𑀸𑀕𑁄 𑀘𑀽𑀴𑀓𑀁, 𑀤𑁆𑀯𑁂𑀪𑀸𑀕𑀸 𑀉𑀧𑀟𑁆𑀠𑀁, 𑀢𑀻𑀲𑀼 𑀪𑀸𑀕𑁂𑀲𑀼 𑀤𑁆𑀯𑁂 𑀪𑀸𑀕𑀸 𑀬𑁂𑀪𑀼𑀬𑁆𑀬𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀘𑀽𑀴𑀓𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀇𑀤𑀸𑀦𑀺 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑀁 𑀅𑀢𑀺𑀤𑀺𑀲𑀦𑁆𑀢𑁄 ‘‘𑀫𑀸𑀢𑀼𑀕𑀸𑀫𑁂𑀦…𑀧𑁂… 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀆𑀳. ‘‘𑀫𑀢𑀺𑀢𑁆𑀣𑀺𑀬𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀬𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀦 𑀚𑀦𑁂𑀢𑀻’’𑀢𑀺 ¶ 𑀯𑀤𑀦𑁆𑀢𑀺. ‘‘𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀫𑀸𑀢𑀼𑀕𑀸𑀫𑁂 𑀦𑀺𑀧𑀦𑁆𑀦𑁂 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 ¶ 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁭) 𑀯𑀘𑀦𑀢𑁄 𑀤𑀺𑀯𑀸 𑀢𑀲𑁆𑀲 𑀲𑀬𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀦 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁭. 𑀫𑀜𑁆𑀘𑀧𑀻𑀞𑀸𑀤𑀺𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂𑀲𑀼𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀓𑀣𑀸

𑁮𑁨. 𑀏𑀯𑀁 𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 𑀲𑁂𑀬𑁆𑀬𑀸𑀲𑀼 𑀓𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑁂 𑀲𑁂𑀬𑁆𑀬’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀕𑁆𑀕𑀁 𑀓𑀫𑁆𑀫𑀁 𑀲𑀫𑀼𑀧𑀕𑀘𑁆𑀙𑀢𑀻𑀢𑀺 𑀲𑀗𑁆𑀖𑁄, 𑀅𑀬𑀫𑁂𑀯 𑀯𑀘𑀦𑀢𑁆𑀣𑁄 𑀲𑀩𑁆𑀩𑀲𑀗𑁆𑀖𑀲𑀸𑀥𑀸𑀭𑀡𑁄. 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀲𑀗𑁆𑀖𑀺𑀓𑁄, 𑀯𑀺𑀳𑀭𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄, 𑀢𑀲𑁆𑀫𑀺𑀁. 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀢𑀁. 𑀅𑀲𑀦𑁆𑀣𑀭𑀻𑀢𑀺 𑀲𑀦𑁆𑀣𑀭𑀺𑀢𑁆𑀯𑀸𑀦. 𑀧𑀓𑁆𑀓𑀫𑀦𑀁 𑀧𑀓𑁆𑀓𑀫𑁄, 𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑁂 𑀲𑁂𑀬𑁆𑀬𑀁, 𑀲𑀦𑁆𑀣𑀭𑀺𑀢𑁆𑀯𑀸𑀦 𑀧𑀓𑁆𑀓𑀫𑁄’’𑀢𑀺 𑀇𑀫𑀲𑁆𑀲 𑀉𑀤𑁆𑀤𑁂𑀲𑀧𑀸𑀞𑀲𑁆𑀲 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂…𑀧𑁂… 𑀧𑀓𑁆𑀓𑀫𑀦𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀓𑁆𑀓𑀫𑀦𑁂 𑀅𑀬𑀁 𑀈𑀤𑀺𑀲𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀢𑀫𑁄 𑀲𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀆𑀳 ‘‘𑀲𑀗𑁆𑀖𑀺𑀓𑁂…𑀧𑁂… 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄 𑀦𑀸𑀫 𑀲𑁂𑀦𑀸𑀲𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀳 ‘‘𑀬𑁄 𑀧𑀦 𑀪𑀺𑀓𑁆𑀔𑀼…𑀧𑁂… 𑀯𑀘𑀦𑀢𑁄’’𑀢𑀺.

𑀢𑀢𑁆𑀣 ¶ 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄 𑀧𑀸𑀓𑀝𑁄, 𑀲𑁂𑀬𑁆𑀬𑀸 𑀅𑀧𑀸𑀓𑀝𑀸, 𑀲𑀸 𑀓𑀢𑀺𑀯𑀺𑀥𑀸𑀇𑀘𑁆𑀘𑀸𑀳 ‘‘𑀲𑁂𑀬𑁆𑀬𑀸 𑀦𑀸𑀫…𑀧𑁂… 𑀤𑀲𑀯𑀺𑀥𑀸’’𑀢𑀺. 𑀢𑀢𑁆𑀣𑀸𑀧𑀺 𑀓𑀢𑀫𑀸 𑀪𑀺𑀲𑀺, 𑀓𑀢𑀫𑀸 𑀘𑀺𑀫𑀺𑀮𑀺𑀓𑀸𑀤𑀬𑁄𑀢𑀺 𑀆𑀳 ‘‘𑀢𑀢𑁆𑀣 𑀪𑀺𑀲𑀻𑀢𑀺…𑀧𑁂… 𑀏𑀲 𑀦𑀬𑁄 𑀧𑀡𑁆𑀡𑀲𑀦𑁆𑀣𑀸𑀭𑁂’’𑀢𑀺. 𑀢𑀢𑁆𑀣 𑀫𑀜𑁆𑀘𑁂 𑀅𑀢𑁆𑀣𑀭𑀺𑀢𑀩𑁆𑀩𑀸𑀢𑀺 𑀫𑀜𑁆𑀘𑀓𑀪𑀺𑀲𑀺, 𑀏𑀯𑀁 𑀇𑀢𑀭𑀢𑁆𑀭, 𑀯𑀡𑁆𑀡𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀢𑀸𑀢𑀺 𑀧𑀝𑀔𑀡𑁆𑀟𑀸𑀤𑀻𑀳𑀺 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀸. 𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀸𑀢𑀺 𑀘𑀺𑀫𑀺𑀮𑀺𑀓𑀸𑀬 𑀲𑀢𑀺 𑀢𑀲𑁆𑀲𑀸 𑀉𑀧𑀭𑀺, 𑀅𑀲𑀢𑀺 𑀲𑀼𑀤𑁆𑀥𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀸. 𑀲𑀻𑀳𑀥𑀫𑁆𑀫𑀸𑀤𑀻𑀦𑀁 𑀧𑀭𑀺𑀳𑀭𑀡𑁂 𑀏𑀯 ¶ 𑀧𑀝𑀺𑀓𑁆𑀔𑁂𑀧𑁄𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀼𑀦 𑀲𑀁𑀳𑀭𑀺𑀢𑁆𑀯𑀸 𑀞𑀧𑀦𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑀺𑀳𑀭𑀡𑀫𑁂𑀯 𑀦 𑀯𑀝𑁆𑀝𑀢𑀺, 𑀪𑀽𑀫𑀢𑁆𑀣𑀭𑀡𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀧𑀦 𑀅𑀢𑁆𑀢𑀦𑁄 𑀧𑀭𑀺𑀳𑀭𑀡𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀓𑁂 𑀳𑀺 ‘‘𑀅𑀦𑁆𑀢𑁄𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀩𑀳𑀺𑀧𑀺 𑀫𑀜𑁆𑀘𑁂 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀫𑀜𑁆𑀘𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀧𑀭𑀺𑀳𑀭𑀡𑀯𑀢𑁆𑀣𑀼𑀲𑁆𑀫𑀺𑀁 ‘‘𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁫) 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁧𑁨) 𑀧𑀦 ‘‘𑀬𑀤𑀺 𑀏𑀯𑀁 ‘𑀧𑀭𑀺𑀳𑀭𑀡𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀓𑀢𑁆𑀯𑀸 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀯𑀘𑀦𑀢𑁄 𑀧𑀼𑀕𑁆𑀕𑀮𑀺𑀓𑁂𑀧𑀺 𑀲𑁂𑀦𑀸𑀲𑀦𑁂 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀯𑀲𑁂𑀦 𑀦𑀺𑀬𑀫𑀺𑀢𑀁 𑀲𑀼𑀯𑀡𑁆𑀡𑀖𑀝𑀸𑀤𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀫𑀸𑀦𑀫𑁆𑀧𑀺 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀫𑀺𑀤𑀁 𑀪𑀽𑀫𑀢𑁆𑀣𑀭𑀡𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀫𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀢𑀁 𑀢𑀁 𑀯𑀺𑀳𑀸𑀭𑀁 𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀳𑀭𑀡𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀸𑀬𑁂𑀯 𑀞𑀧𑀺𑀢𑀸 𑀉𑀕𑁆𑀕𑀢𑀮𑁄𑀫𑀸 𑀅𑀢𑁆𑀣𑀭𑀡𑀯𑀺𑀲𑁂𑀲𑀸. 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 ¶ (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀯𑀼𑀢𑁆𑀢𑀁. ‘‘𑀇𑀤𑀁 𑀅𑀝𑁆𑀞𑀓𑀣𑀸𑀲𑀼 𑀢𑀣𑀸𑀯𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀫𑀜𑁆𑀘𑀧𑀻𑀞𑁂𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀁 𑀅𑀢𑁆𑀣𑀭𑀡𑀫𑁂𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀦 ‘‘𑀧𑀘𑁆𑀘𑀢𑁆𑀣𑀭𑀡𑀁 𑀦𑀸𑀫 𑀧𑀸𑀯𑀸𑀭𑁄 𑀓𑁄𑀚𑀯𑁄’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 𑀇𑀫𑀺𑀦𑀸 𑀦 𑀲𑀫𑁂𑀢𑀺, ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁧𑁬) 𑀯𑀼𑀢𑁆𑀢𑀁. 𑀯𑀻𑀫𑀁𑀲𑀺𑀢𑁂 𑀧𑀦 𑀏𑀯𑀫𑀥𑀺𑀧𑁆𑀧𑀸𑀬𑁄 𑀧𑀜𑁆𑀜𑀸𑀬𑀢𑀺 𑁋 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀧𑀺 𑀅𑀝𑁆𑀞𑀓𑀣𑀸𑀬𑁂𑀯, 𑀢𑀲𑁆𑀫𑀸 𑀫𑀳𑀸𑀅𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 ‘‘𑀧𑀸𑀯𑀸𑀭𑁄 𑀓𑁄𑀚𑀯𑁄’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀁 𑀦𑀺𑀬𑀫𑀦𑁂 𑀲𑀢𑀺𑀧𑀺 𑀬𑀣𑀸 ‘‘𑀮𑀤𑁆𑀥𑀸𑀢𑀧𑀢𑁆𑀢𑁄 𑀭𑀸𑀚𑀓𑀼𑀫𑀸𑀭𑁄’’𑀢𑀺 𑀆𑀢𑀧𑀢𑁆𑀢𑀲𑁆𑀲 𑀮𑀤𑁆𑀥𑀪𑀸𑀯𑁂𑀬𑁂𑀯 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀦𑀺𑀤𑀲𑁆𑀲𑀦𑀦𑀬𑀯𑀲𑁂𑀦 𑀭𑀸𑀚𑀓𑀓𑀼𑀥𑀪𑀡𑁆𑀟𑀲𑀸𑀫𑀜𑁆𑀜𑁂𑀦 𑀲𑀫𑀸𑀦𑀸 𑀯𑀸𑀮𑀩𑀻𑀚𑀦𑀸𑀤𑀬𑁄𑀧𑀺 𑀯𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀏𑀯𑀁 ‘‘𑀧𑀸𑀯𑀸𑀭𑁄 𑀓𑁄𑀚𑀯𑁄’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀦𑀺𑀤𑀲𑁆𑀲𑀦𑀦𑀬𑀯𑀲𑁂𑀦 𑀢𑁂𑀳𑀺 𑀫𑀜𑁆𑀘𑀧𑀻𑀞𑁂𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀫𑀸𑀦𑀸 𑀅𑀜𑁆𑀜𑁂 𑀅𑀢𑁆𑀣𑀭𑀡𑀸𑀧𑀺 𑀯𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀯𑀘𑀦𑀁 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀧𑀝𑀺𑀮𑁄𑀫𑀁 𑀦 𑀳𑁄𑀢𑀺, 𑀅𑀦𑀼𑀮𑁄𑀫𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀲𑁆𑀫𑀺𑀁 ¶ 𑀧𑀦 𑀞𑀸𑀦𑁂 ‘‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄’’𑀢𑀺 𑀧𑀸𑀞𑀁 𑀦𑀺𑀲𑁆𑀲𑀸𑀬 𑀏𑀓𑀘𑁆𑀘𑁂 𑀯𑀺𑀦𑀬𑀥𑀭𑀸 ‘‘𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀲𑁆𑀲 𑀯𑀸 𑀯𑀺𑀳𑀸𑀭𑀤𑀸𑀬𑀓𑁄𑀬𑁂𑀯 𑀲𑀸𑀫𑀺𑀓𑁄, 𑀲𑁄𑀬𑁂𑀯 𑀇𑀲𑁆𑀲𑀭𑁄, 𑀢𑀲𑁆𑀲 𑀭𑀼𑀘𑀺𑀬𑀸 𑀏𑀯 𑀯𑀲𑀺𑀢𑀼𑀁 𑀮𑀪𑀢𑀺, 𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀭𑀼𑀘𑀺𑀬𑀸’’𑀢𑀺 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑀺, 𑀲𑁄 𑀯𑀻𑀫𑀁𑀲𑀺𑀢𑀩𑁆𑀩𑁄, 𑀓𑀣𑀁 𑀅𑀬𑀁 𑀧𑀸𑀞𑁄 𑀓𑀺𑀫𑀢𑁆𑀣𑀁 𑀲𑀸𑀥𑁂𑀢𑀺 𑀇𑀲𑁆𑀲𑀭𑀢𑁆𑀣𑀁 𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀁 𑀯𑀸𑀢𑀺? 𑀏𑀯𑀁 𑀯𑀻𑀫𑀁𑀲𑀺𑀢𑁂 ‘‘𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀫𑁂𑀯 𑀲𑀸𑀥𑁂𑀢𑀺, 𑀦 𑀇𑀲𑁆𑀲𑀭𑀢𑁆𑀣𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀅𑀣 ¶ 𑀲𑀺𑀬𑀸 ‘‘𑀆𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑁂 𑀲𑀺𑀤𑁆𑀥𑁂 𑀇𑀲𑁆𑀲𑀭𑀢𑁆𑀣𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀇𑀲𑁆𑀲𑀭𑀪𑀸𑀯𑀢𑁄𑀬𑁂𑀯 𑀳𑀺 𑀲𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀢𑀢𑁆𑀣𑁂𑀯𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀧𑀼𑀘𑁆𑀙𑀦𑁆𑀢𑁂𑀦 𑀘 𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀺𑀁 𑀅𑀲𑀢𑀺 𑀲𑀸𑀫𑀡𑁂𑀭𑁄, 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀭𑀸𑀫𑀺𑀓𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀆𑀬𑀲𑁆𑀫𑀦𑁆𑀢𑀸𑀦𑀁 𑀫𑀢𑁂𑀦 𑀪𑀺𑀓𑁆𑀔𑀼𑀧𑀺 𑀲𑀸𑀫𑀡𑁂𑀭𑁄𑀧𑀺 𑀆𑀭𑀸𑀫𑀺𑀓𑁄𑀧𑀺 𑀯𑀺𑀳𑀸𑀭𑀓𑀸𑀭𑀓𑁄𑀧𑀺 𑀢𑀲𑁆𑀲 𑀓𑀼𑀮𑁂 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄𑀧𑀺 𑀇𑀲𑁆𑀲𑀭𑁄𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀯𑀺𑀜𑁆𑀜𑀸𑀬𑀫𑀸𑀦𑁂𑀧𑀺 𑀪𑀺𑀓𑁆𑀔𑀼𑀫𑁆𑀳𑀺 𑀯𑀸 𑀲𑀸𑀫𑀡𑁂𑀭𑁂 𑀯𑀸 𑀆𑀭𑀸𑀫𑀺𑀓𑁂 𑀯𑀸 𑀲𑀢𑀺 𑀢𑁂𑀬𑁂𑀯 𑀇𑀲𑁆𑀲𑀭𑀸, 𑀦 𑀯𑀺𑀳𑀸𑀭𑀓𑀸𑀭𑀓𑁄. 𑀢𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀲𑀢𑀺𑀬𑁂𑀯 𑀯𑀺𑀳𑀸𑀭𑀓𑀸𑀭𑀓𑁄 𑀇𑀲𑁆𑀲𑀭𑁄 𑀲𑀺𑀬𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀥𑀺𑀓𑀸𑀭𑁂 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀭𑀓𑁆𑀔𑀡𑀢𑁆𑀣𑀸𑀬 𑀆𑀧𑀼𑀘𑁆𑀙𑀺𑀢𑀩𑁆𑀩𑀁𑀬𑁂𑀯 𑀯𑀤𑀢𑀺, 𑀦 𑀇𑀲𑁆𑀲𑀭𑀪𑀸𑀯𑀢𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) ‘‘𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺.

𑀅𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬 ‘‘𑀦 𑀲𑀓𑀮𑀲𑁆𑀲 𑀯𑀸𑀓𑁆𑀬𑀧𑀸𑀞𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀲𑀦𑁆𑀥𑀸𑀬 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀅𑀣 𑀔𑁄 ‘𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄’𑀢𑀺 𑀏𑀢𑀲𑁆𑀲 𑀧𑀤𑀢𑁆𑀣𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀣𑀁? 𑀲𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀸𑀫𑀺𑀓𑁄, 𑀯𑀺𑀳𑀸𑀭𑀲𑁆𑀲 𑀲𑀸𑀫𑀺𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄. ‘𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀦𑀸𑀫𑀸’𑀢𑀺 𑀯𑀼𑀢𑁆𑀢𑁂 ‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀦𑀸𑀫𑀸’𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀯𑀺𑀳𑀸𑀭𑀓𑀸𑀭𑀓𑁄 𑀤𑀸𑀬𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀦𑀸𑀫𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀬𑀫𑀸𑀦𑁂 𑀲𑀢𑀺 𑀲𑀸𑀫𑀺𑀓𑁄 𑀦𑀸𑀫 𑀲𑀲𑁆𑀲 𑀥𑀦𑀲𑁆𑀲 𑀇𑀲𑁆𑀲𑀭𑁄, 𑀢𑀲𑁆𑀲 𑀭𑀼𑀘𑀺𑀬𑀸 𑀏𑀯 𑀅𑀜𑁆𑀜𑁂 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑀪𑀽𑀢𑀲𑁆𑀲 𑀤𑀸𑀬𑀓𑀲𑁆𑀲 𑀭𑀼𑀘𑀺𑀬𑀸 𑀏𑀯 𑀪𑀺𑀓𑁆𑀔𑀽 𑀯𑀲𑀺𑀢𑀼𑀁 𑀮𑀪𑀦𑁆𑀢𑀺, 𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀭𑀼𑀘𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 𑁋 𑀫𑀸 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣, 𑀬𑀣𑀸 ¶ 𑀦𑀸𑀫 ‘‘𑀖𑀝𑀺𑀓𑀸𑀭𑁄 𑀩𑁆𑀭𑀳𑁆𑀫𑀸’’𑀢𑀺 𑀯𑀼𑀢𑁆𑀢𑁄 𑀲𑁄 𑀩𑁆𑀭𑀳𑁆𑀫𑀸 𑀇𑀤𑀸𑀦𑀺 𑀖𑀝𑀁 𑀦 𑀓𑀭𑁄𑀢𑀺, 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀧𑀦 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀖𑀝𑀁 𑀓𑀭𑁄𑀢𑀻’’𑀢𑀺 𑀯𑀘𑀦𑀢𑁆𑀣𑁂𑀦 ‘‘𑀖𑀝𑀺𑀓𑀸𑀭𑁄’’𑀢𑀺 𑀦𑀸𑀫𑀁 𑀮𑀪𑀢𑀺. 𑀇𑀢𑀺 𑀧𑀼𑀩𑁆𑀩𑁂 𑀮𑀤𑁆𑀥𑀦𑀸𑀫𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀩𑁆𑀭𑀳𑁆𑀫𑀪𑀽𑀢𑁄𑀧𑀺 ¶ ‘‘𑀖𑀝𑀺𑀓𑀸𑀭𑁄’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑁄 𑀯𑀺𑀳𑀸𑀭𑀓𑀸𑀭𑀓𑁄 𑀪𑀺𑀓𑁆𑀔𑀽𑀦𑀁 𑀧𑀭𑀺𑀘𑁆𑀘𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀦 𑀳𑁄𑀢𑀺 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲, 𑀧𑀼𑀩𑁆𑀩𑁂 𑀧𑀦 𑀅𑀧𑀭𑀺𑀘𑁆𑀘𑀢𑁆𑀢𑀓𑀸𑀮𑁂 𑀯𑀺𑀳𑀸𑀭𑀲𑁆𑀲 𑀓𑀸𑀭𑀓𑀢𑁆𑀢𑀸 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀦𑀸𑀫 𑀳𑁄𑀢𑀺, 𑀲𑁄 𑀏𑀯𑀁 𑀧𑀼𑀩𑁆𑀩𑁂 𑀮𑀤𑁆𑀥𑀦𑀸𑀫𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 ‘‘𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀦, 𑀧𑀭𑀺𑀘𑁆𑀘𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀪𑀸𑀯𑀢𑁄. 𑀢𑁂𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ‘‘𑀯𑀺𑀳𑀸𑀭𑀤𑀸𑀬𑀓𑀸𑀦𑀁 𑀭𑀼𑀘𑀺𑀬𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀽’’𑀢𑀺 𑀅𑀯𑀢𑁆𑀯𑀸 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁯𑁫) ‘‘𑀢𑁂𑀲𑀁 𑀕𑁂𑀳𑀸𑀦𑀻𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀦𑀁 𑀯𑀸𑀲𑀢𑁆𑀣𑀸𑀬 𑀓𑀢𑀫𑁆𑀧𑀺 𑀬𑀸𑀯 𑀦 𑀤𑁂𑀦𑁆𑀢𑀺, 𑀢𑀸𑀯 𑀢𑁂𑀲𑀁 𑀲𑀦𑁆𑀢𑀓𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺, 𑀢𑁂𑀦 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁 𑀲𑀦𑁆𑀢𑀓𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀧𑀦 𑀓𑀣𑀸 𑀧𑀸𑀞𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀣𑀺𑀢𑀸. 𑀯𑀺𑀳𑀸𑀭𑀯𑀺𑀦𑀺𑀘𑁆𑀙𑀬𑁄 𑀧𑀦 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁯𑁪 𑀆𑀤𑀬𑁄) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑁄 𑀓𑁄𑀘𑀻𑀢𑀺 𑀜𑀸𑀢𑀓𑁄 𑀯𑀸 𑀅𑀜𑁆𑀜𑀸𑀢𑀓𑁄 𑀯𑀸 𑀬𑁄 𑀓𑁄𑀘𑀺. 𑀬𑁂𑀦 𑀫𑀜𑁆𑀘𑀁 𑀧𑀻𑀞𑀁 𑀯𑀸 𑀯𑀺𑀦𑀦𑁆𑀢𑀺, 𑀢𑀁 𑀫𑀜𑁆𑀘𑀧𑀻𑀞𑀓𑀯𑀸𑀦𑀁.

𑁮𑁩. 𑀲𑀺𑀮𑀼𑀘𑁆𑀘𑀬𑀮𑁂𑀡𑀦𑁆𑀢𑀺 𑀲𑀺𑀮𑀼𑀘𑁆𑀘𑀬𑁂 𑀮𑁂𑀡𑀁, 𑀧𑀩𑁆𑀩𑀢𑀕𑀼𑀳𑀸𑀢𑀺 𑀅𑀢𑁆𑀣𑁄. ‘‘𑀲𑁂𑀦𑀸𑀲𑀦𑀁 𑀉𑀧𑀘𑀺𑀓𑀸𑀳𑀺 𑀔𑀸𑀬𑀺𑀢’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀢𑁆𑀣𑀼𑀅𑀦𑀼𑀭𑀽𑀧𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀉𑀧𑀘𑀺𑀓𑀸𑀲𑀗𑁆𑀓𑀸𑀬 𑀅𑀪𑀸𑀯𑁂𑀦 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁬𑁦 𑀆𑀤𑀬𑁄) 𑀕𑀫𑀺𑀓𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑁂𑀦 ‘‘𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀯𑀮𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 ‘‘𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 ¶ , 𑀦 𑀧𑀦 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀢𑁂𑀦𑁂𑀯 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 ‘‘𑀬𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁 𑀬𑀢𑁆𑀣 𑀉𑀧𑀘𑀺𑀓𑀸 𑀦𑀸𑀭𑁄𑀳𑀦𑁆𑀢𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀕𑀡𑁆𑀞𑀺𑀧𑀤𑁂 ‘‘𑀢𑀸𑀤𑀺𑀲𑁂 𑀲𑁂𑀦𑀸𑀲𑀦𑁂 𑀅𑀦𑀸𑀧𑀼𑀘𑁆𑀙𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀦𑀢𑁆𑀣𑀺, 𑀕𑀫𑀺𑀓𑀯𑀢𑁆𑀢𑁂 𑀲𑁂𑀦𑀸𑀲𑀦𑀁 𑀅𑀦𑀸𑀧𑀼𑀘𑁆𑀙𑀸 𑀕𑀘𑁆𑀙𑀦𑁆𑀢𑁄 𑀯𑀢𑁆𑀢𑀪𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻’’𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀧𑀘𑁆𑀙𑀺𑀫𑀲𑁆𑀲 𑀆𑀪𑁄𑀕𑁂𑀦 𑀫𑀼𑀢𑁆𑀢𑀺 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀏𑀓𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀕𑀫𑀦𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑀢𑁄 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀡𑁆𑀟𑀧𑁂 𑀯𑀸𑀢𑀺 𑀲𑀸𑀔𑀸𑀫𑀡𑁆𑀟𑀧𑁂 𑀯𑀸 𑀧𑀤𑀭𑀫𑀡𑁆𑀟𑀧𑁂 𑀯𑀸. 𑀭𑀼𑀓𑁆𑀔𑀫𑀽𑀮𑁂𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀧𑀮𑀼𑀚𑁆𑀚𑀢𑀻𑀢𑀺 𑀯𑀺𑀦𑀲𑁆𑀲𑀢𑀺.

𑁮𑁪. 𑀫𑀚𑁆𑀛𑁂 ¶ 𑀲𑀁𑀔𑀺𑀢𑁆𑀢𑀁 𑀧𑀡𑀯𑀲𑀡𑁆𑀞𑀸𑀦𑀁 𑀓𑀢𑁆𑀯𑀸 𑀩𑀤𑁆𑀥𑀦𑁆𑀢𑀺 𑀏𑀭𑀓𑀧𑀢𑁆𑀢𑀸𑀤𑀻𑀳𑀺 𑀯𑁂𑀡𑀺𑀁 𑀓𑀢𑁆𑀯𑀸 𑀢𑀸𑀬 𑀯𑁂𑀡𑀺𑀬𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀯𑀺𑀢𑁆𑀣𑀢𑀝𑁆𑀞𑀸𑀦𑁂 𑀩𑀳𑀼𑀁 𑀯𑁂𑀞𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀝𑁆𑀞𑀸𑀦𑀁, 𑀢𑀸𑀯 𑀅𑀦𑁆𑀢𑁄𑀆𑀓𑀟𑁆𑀠𑀦𑀯𑀲𑁂𑀦 𑀯𑁂𑀞𑁂𑀢𑁆𑀯𑀸 𑀫𑀚𑁆𑀛𑁂 𑀲𑀁𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀩𑀦𑁆𑀥𑀺𑀢𑁆𑀯𑀸 𑀓𑀢𑀁. 𑀬𑀢𑁆𑀣 𑀓𑀸𑀓𑀸 𑀯𑀸 𑀓𑀼𑀮𑀮𑀸 𑀯𑀸 𑀦 𑀊𑀳𑀤𑀦𑁆𑀢𑀻𑀢𑀺 𑀬𑀢𑁆𑀣 𑀥𑀼𑀯𑀦𑀺𑀯𑀸𑀲𑁂𑀦 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀫𑀸𑀦𑀸 𑀏𑀢𑁂 𑀓𑀸𑀓𑀓𑀼𑀮𑀮𑀸, 𑀅𑀜𑁆𑀜𑁂 𑀯𑀸 𑀲𑀓𑀼𑀡𑀸 𑀢𑀁 𑀲𑁂𑀦𑀸𑀲𑀦𑀁 𑀦 𑀊𑀳𑀤𑀦𑁆𑀢𑀺, 𑀢𑀸𑀤𑀺𑀲𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑁮𑁫. 𑀦𑀯𑀯𑀸𑀬𑀺𑀫𑁄𑀢𑀺 𑀅𑀥𑀼𑀦𑀸 𑀲𑀼𑀢𑁆𑀢𑁂𑀦 𑀯𑀻𑀢𑀓𑀘𑁆𑀙𑁂𑀦 𑀧𑀮𑀺𑀯𑁂𑀞𑀺𑀢𑀫𑀜𑁆𑀘𑁄. 𑀑𑀦𑀤𑁆𑀥𑁄𑀢𑀺 𑀓𑀧𑁆𑀧𑀺𑀬𑀘𑀫𑁆𑀫𑁂𑀦 𑀑𑀦𑀤𑁆𑀥𑁄, 𑀲𑁄𑀯 𑀑𑀦𑀤𑁆𑀥𑀓𑁄 𑀲𑀓𑀢𑁆𑀣𑁂 𑀓-𑀧𑀘𑁆𑀘𑀬𑀯𑀲𑁂𑀦. 𑀢𑁂𑀦 𑀳𑀺 𑀯𑀲𑁆𑀲𑁂𑀦 𑀲𑀻𑀖𑀁 𑀦 𑀦𑀲𑁆𑀲𑀢𑀺. 𑀉𑀓𑁆𑀓𑀝𑁆𑀞𑀅𑀩𑁆𑀪𑁄𑀓𑀸𑀲𑀺𑀓𑁄𑀢𑀺 𑀇𑀤𑀁 𑀢𑀲𑁆𑀲 𑀲𑀼𑀔𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀢𑁆𑀢𑀁 ¶ , 𑀉𑀓𑁆𑀓𑀝𑁆𑀞𑀲𑁆𑀲𑀸𑀧𑀺 𑀧𑀦 𑀘𑀻𑀯𑀭𑀓𑀼𑀝𑀺 𑀯𑀝𑁆𑀝𑀢𑁂𑀯. 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸𑀢𑀺 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀪𑀸𑀯𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀯𑀲𑁆𑀲𑀪𑀬𑁂𑀦 𑀲𑀬𑀁 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀩𑁆𑀪𑁄𑀓𑀸𑀲𑀺𑀓𑀸𑀦𑀁 𑀅𑀢𑁂𑀫𑀦𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀫𑁆𑀧𑀺 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁂𑀦 𑀭𑀓𑁆𑀔𑀺𑀢𑀩𑁆𑀩𑀫𑁂𑀯. ‘‘𑀬𑀲𑁆𑀫𑀸 𑀧𑀦 𑀤𑀸𑀬𑀓𑁂𑀳𑀺 𑀤𑀸𑀦𑀓𑀸𑀮𑁂𑀬𑁂𑀯 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀫𑁆𑀧𑀺 𑀓𑀫𑁆𑀩𑀮𑀁 ‘𑀧𑀸𑀤𑀧𑀼𑀜𑁆𑀙𑀦𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀤𑀺𑀦𑁆𑀦𑀁 𑀢𑀣𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑀁 ‘𑀅𑀚𑁆𑀛𑁄𑀓𑀸𑀲𑁂𑀧𑀺 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀁 𑀘𑁂, 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀅𑀚𑁆𑀛𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁦𑁮-𑁧𑁧𑁦) 𑀯𑀼𑀢𑁆𑀢𑀁. 𑀧𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀲𑀢𑀺, 𑀢𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀢𑀩𑁆𑀩𑀁.

𑀯𑀮𑀸𑀳𑀓𑀸𑀦𑀁 𑀅𑀦𑀼𑀝𑁆𑀞𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀕𑀺𑀫𑁆𑀳𑀸𑀦𑁂𑀧𑀺 𑀫𑁂𑀖𑁂 𑀉𑀝𑁆𑀞𑀺𑀢𑁂 𑀅𑀩𑁆𑀪𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀓𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀬𑀫𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸. 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸𑀢𑀺 𑀬𑀢𑁆𑀣 𑀲𑀫𑀦𑁆𑀢𑀢𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀡𑀫𑀚𑁆𑀛𑁂 𑀲𑀩𑁆𑀩𑀤𑀸 𑀓𑀘𑀯𑀭𑀲𑁆𑀲 𑀲𑀗𑁆𑀓𑀟𑁆𑀠𑀦𑁂𑀦 𑀫𑀚𑁆𑀛𑁂 𑀯𑀸𑀮𑀺𑀓𑀸 𑀲𑀜𑁆𑀘𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀉𑀘𑁆𑀘𑀯𑀢𑁆𑀣𑀼𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀁, 𑀪𑀺𑀢𑁆𑀢𑀺𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀯𑀸 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀬𑀢𑁆𑀣 𑀯𑀸 𑀧𑀦 𑀓𑁄𑀡𑁂𑀲𑀼 𑀯𑀸𑀮𑀺𑀓𑀸 𑀲𑀜𑁆𑀘𑀺𑀢𑀸, 𑀢𑀢𑁆𑀣 𑀢𑀢𑁄 𑀧𑀝𑁆𑀞𑀸𑀬 𑀅𑀧𑀭𑀤𑀺𑀲𑀸𑀪𑀺𑀫𑀼𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺 𑀓𑁂𑀘𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀲𑁆𑀲 𑀧𑀤𑀯𑀮𑀜𑁆𑀚𑁂𑀦 𑀅𑀯𑀺𑀓𑁄𑀧𑀦𑀢𑁆𑀣𑀸𑀬 𑀲𑀬𑀁 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀸𑀪𑀺𑀫𑀼𑀔𑀁 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 ‘‘𑀫𑀚𑁆𑀛𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀘𑀦𑀲𑁆𑀲 𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ¶ 𑀧𑀦 ‘‘𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸𑀢𑀺 𑀦𑀺𑀲𑀻𑀤𑀦𑁆𑀢𑀸𑀦𑀁 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀦𑁆𑀢𑀺 𑀓𑁂𑀘𑀺, 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲 ¶ 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀦𑁆𑀢𑀺 𑀅𑀧𑀭𑁂, 𑀩𑀳𑀺𑀯𑀸𑀮𑀺𑀓𑀸𑀬 𑀅𑀕𑀫𑀦𑀦𑀺𑀫𑀺𑀢𑁆𑀢𑀁 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸 𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂’’𑀢𑀺 𑀯𑀼𑀢𑁆𑀢𑀁. 𑀓𑀘𑀯𑀭𑀁 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀩𑀳𑀺 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀮𑀺𑀓𑀸 𑀦 𑀙𑀟𑁆𑀟𑁂𑀢𑀩𑁆𑀩𑀸𑀢𑀺 𑀤𑀻𑀧𑁂𑀢𑀺.

𑁮𑁬. 𑀓𑀧𑁆𑀧𑀁 𑀮𑀪𑀺𑀢𑁆𑀯𑀸𑀢𑀺 ‘‘𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀯𑀘𑀦𑁂𑀦 𑀓𑀧𑁆𑀧𑀁 𑀮𑀪𑀺𑀢𑁆𑀯𑀸. 𑀣𑁂𑀭𑀲𑁆𑀲 𑀳𑀺 𑀆𑀡𑀢𑁆𑀢𑀺𑀬𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀁 𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀻𑀢𑀺 𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺. 𑀮𑁂𑀟𑁆𑀟𑀼𑀧𑀸𑀢𑀼𑀧𑀘𑀸𑀭𑀢𑁄 𑀩𑀳𑀺 𑀞𑀺𑀢𑀢𑁆𑀢𑀸 ‘‘𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀧𑀞𑀫𑀧𑀸𑀤𑀼𑀤𑁆𑀥𑀸𑀭𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀓𑀢𑀺𑀓𑀁 𑀅𑀓𑀢𑁆𑀯𑀸𑀢𑀺 𑀅𑀧𑀝𑀺𑀲𑀸𑀫𑁂𑀢𑁆𑀯𑀸. 𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁂𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑀦𑁆𑀦𑀺𑀧𑀸𑀢𑁂.

𑁮𑁭. 𑀆𑀯𑀸𑀲𑀺𑀓𑀸𑀦𑀁𑀬𑁂𑀯 𑀧𑀮𑀺𑀩𑁄𑀥𑁄𑀢𑀺 𑀏𑀢𑁆𑀣 𑀆𑀕𑀦𑁆𑀢𑀼𑀓𑁂𑀲𑀼 𑀆𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀸𑀲𑀺𑀓𑀸𑀬𑁂𑀯 𑀉𑀤𑁆𑀥𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀢𑁂𑀲𑀼𑀧𑀺 𑀆𑀯𑀸𑀲𑀺𑀓𑀸𑀦𑀫𑁂𑀯 𑀧𑀮𑀺𑀩𑁄𑀥𑁄. 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁂 𑀧𑀦 ‘‘𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀅𑀯𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂 ‘‘𑀆𑀧𑀢𑁆𑀢𑀻’’𑀢𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀲𑀦𑁆𑀣𑀭𑀸𑀧𑀦𑁂 𑀧𑀸𑀘𑀺𑀢𑁆𑀢𑀺𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀉𑀲𑁆𑀲𑀸𑀭𑀓𑁄𑀢𑀺 𑀲𑀭𑀪𑀸𑀡𑀓𑁄. 𑀲𑁄 𑀳𑀺 𑀉𑀤𑁆𑀥𑀁𑀉𑀤𑁆𑀥𑀁 𑀧𑀸𑀴𑀺𑀧𑀸𑀞𑀁 𑀲𑀸𑀭𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 ‘‘𑀉𑀲𑁆𑀲𑀸𑀭𑀓𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀤𑀁 𑀉𑀲𑁆𑀲𑀸𑀭𑀓𑀲𑁆𑀲, 𑀇𑀤𑀁 𑀥𑀫𑁆𑀫𑀓𑀣𑀺𑀓𑀲𑁆𑀲𑀸’’𑀢𑀺 𑀯𑀺𑀲𑀼𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀧𑀮𑀺𑀩𑁄𑀥𑁄’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑁂𑀧𑀺 𑀥𑀫𑁆𑀫𑀓𑀣𑀺𑀓𑀲𑁆𑀲 𑀅𑀦𑀼𑀝𑁆𑀞𑀸𑀧𑀦𑀻𑀬𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 ¶ 𑀪𑀯𑀺𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀧𑀦 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀯𑀼𑀟𑁆𑀠𑀢𑀭𑁂𑀳𑀺 𑀉𑀝𑁆𑀞𑀸𑀧𑀦𑀻𑀬𑀢𑁆𑀢𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢’’𑀦𑁆𑀢𑀺.

𑁮𑁮. 𑀧𑀸𑀤𑀧𑀼𑀜𑁆𑀙𑀦𑀻 𑀦𑀸𑀫 𑀭𑀚𑁆𑀚𑀼𑀓𑁂𑀳𑀺 𑀯𑀸 𑀧𑀺𑀮𑁄𑀢𑀺𑀓𑀸𑀬 𑀯𑀸 𑀧𑀸𑀤𑀧𑀼𑀜𑁆𑀙𑀦𑀢𑁆𑀣𑀁 𑀓𑀢𑀸. 𑀨𑀮𑀓𑀧𑀻𑀞𑀁 𑀦𑀸𑀫 𑀨𑀮𑀓𑀫𑀬𑀁 𑀧𑀻𑀞𑀁. 𑀅𑀣 𑀯𑀸 𑀨𑀮𑀓𑀜𑁆𑀘𑁂𑀯 𑀤𑀸𑀭𑀼𑀫𑀬𑀧𑀻𑀞𑀜𑁆𑀘. 𑀤𑀸𑀭𑀼𑀫𑀬𑀧𑀻𑀞𑀦𑁆𑀢𑀺 𑀘 𑀨𑀮𑀓𑀫𑀬𑀫𑁂𑀯 𑀧𑀻𑀞𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀤𑀓𑀞𑀮𑀺𑀓𑀦𑁆𑀢𑀺 𑀅𑀥𑁄𑀢𑀧𑀸𑀤𑀝𑁆𑀞𑀸𑀧𑀦𑀓𑀁. 𑀅𑀚𑁆𑀛𑁄𑀓𑀸𑀲𑁂 𑀭𑀚𑀦𑀁 𑀧𑀘𑀺𑀢𑁆𑀯𑀸 ¶ …𑀧𑁂… 𑀧𑀝𑀺𑀲𑀸𑀫𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀣𑁂𑀯𑁂 𑀅𑀲𑀢𑀺 𑀭𑀚𑀦𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀮𑀚𑁆𑀚𑀻 𑀳𑁄𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀮𑀚𑁆𑀚𑀺𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀑𑀢𑀸𑀧𑁂𑀦𑁆𑀢𑁄…𑀧𑁂… 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 ‘‘𑀓𑀺𑀜𑁆𑀘𑀸𑀧𑀺 ‘𑀏𑀢𑁆𑀢𑀓𑀁 𑀤𑀽𑀭𑀁 𑀕𑀦𑁆𑀢𑀩𑁆𑀩’𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑁆𑀫 𑀦𑀸𑀢𑀺𑀤𑀽𑀭𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀫𑀜𑁆𑀘𑀧𑀻𑀞𑀸𑀤𑀺𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂𑀲𑀼𑀧𑀝𑀺𑀧𑀚𑁆𑀚𑀺𑀢𑀩𑁆𑀩-

𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁮. 𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑁮𑁯. 𑀏𑀯𑀁 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂𑀲𑀼 𑀓𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀓𑀸𑀮𑀺𑀓𑀸𑀦𑀺𑀧𑀺 𑀘𑀢𑁆𑀢𑀸𑀭𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀭𑀡𑀁 𑀓𑀸𑀭𑁄, 𑀓𑀺𑀭𑀺𑀬𑀸. 𑀓𑀸𑀭𑁄 𑀏𑀯 𑀓𑀸𑀮𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑁄 𑀬𑀣𑀸 ‘‘𑀫𑀳𑀸𑀲𑀸𑀮𑁄’’𑀢𑀺. 𑀓𑀸𑀮𑁄𑀢𑀺 𑀘𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀺𑀭𑀺𑀬𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀆𑀭𑀤𑁆𑀥𑀸𑀦𑀺𑀝𑁆𑀞𑀺𑀢𑁄 ¶ 𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀲𑀼𑀦𑀺𑀝𑁆𑀞𑀺𑀢𑁄;

𑀅𑀢𑀻𑀢𑀸𑀦𑀸𑀕𑀢𑀼𑀧𑁆𑀧𑀸𑀤-𑀫𑀧𑁆𑀧𑀢𑁆𑀢𑀸𑀪𑀺𑀫𑀼𑀔𑀸 𑀓𑀺𑀭𑀺𑀬𑀸’’𑀢𑀺.

𑀏𑀢𑁆𑀣 𑀧𑀦 𑀢𑀲𑁆𑀲 𑀢𑀲𑁆𑀲 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀲𑁆𑀲 𑀓𑀸𑀮𑀲𑁆𑀲 𑀧𑀪𑁂𑀤𑀪𑀽𑀢𑁄 𑀧𑀼𑀭𑁂𑀪𑀢𑁆𑀢𑀏𑀓𑀅𑀳𑁄𑀭𑀢𑁆𑀢𑀲𑀢𑁆𑀢𑀸𑀳𑀚𑀻𑀯𑀺𑀓𑀧𑀭𑀺𑀬𑀦𑁆𑀢𑀲𑀗𑁆𑀔𑀸𑀢𑁄 𑀓𑀸𑀮𑀯𑀺𑀲𑁂𑀲𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀸𑀮𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑀯𑀺𑀲𑁂𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀓𑀸𑀮𑀺𑀓𑀸𑀦𑀺. 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀓𑀧𑁆𑀧𑀺𑀬𑀸 𑀘𑀢𑀼𑀪𑀽𑀫𑀺𑀬𑁄𑀢𑀺 𑀲𑀫𑀼𑀘𑁆𑀘𑁂𑀢𑀺. 𑀘𑀢𑁆𑀢𑀸𑀭𑀻𑀢𑀺 𑀲𑀗𑁆𑀔𑁆𑀬𑀸𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀓𑀸𑀮𑀺𑀓𑀸𑀦𑀺 𑀦𑀸𑀫 𑀘𑀢𑁆𑀢𑀸𑀭𑀺 𑀏𑀯 𑀳𑁄𑀦𑁆𑀢𑀺, 𑀦 𑀢𑀻𑀡𑀺 𑀦 𑀧𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀺, 𑀇𑀤𑀁 𑀫𑀸𑀢𑀺𑀓𑀸𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁. 𑀢𑀢𑁆𑀣 𑀉𑀤𑁆𑀤𑁂𑀲𑁂 𑀬𑀁 𑀫𑀸𑀢𑀺𑀓𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) ‘‘𑀓𑀸𑀮𑀺𑀓𑀸𑀦𑀺𑀧𑀺 𑀘𑀢𑁆𑀢𑀸𑀭𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀫𑀸𑀢𑀺𑀓𑀸𑀧𑀤𑁂 𑀘𑀢𑁆𑀢𑀸𑀭𑀺 𑀓𑀸𑀮𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀓𑀢𑀫𑀸𑀦𑀺 𑀢𑀸𑀦𑀻𑀢𑀺 𑀆𑀳 ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺𑀆𑀤𑀺 ¶ . 𑀬𑀸𑀯𑀓𑀸𑀮𑀺𑀓𑀁…𑀧𑁂… 𑀬𑀸𑀯𑀚𑀻𑀯𑀺𑀓𑀁 𑀇𑀢𑀺 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀘𑀢𑁆𑀢𑀸𑀭𑀺 𑀓𑀸𑀮𑀺𑀓𑀸𑀦𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑁂𑀲𑀁 𑀯𑀢𑁆𑀣𑀼𑀜𑁆𑀘 𑀯𑀺𑀲𑁂𑀲𑀦𑀜𑁆𑀘 𑀦𑀸𑀫𑀮𑀸𑀪𑀳𑁂𑀢𑀼𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀼 𑀘𑀢𑀽𑀲𑀼 𑀓𑀸𑀮𑀺𑀓𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀬𑀸𑀯𑀓𑀸𑀮𑀺𑀓𑀁, 𑀅𑀝𑁆𑀞𑀯𑀺𑀥𑀧𑀸𑀦𑀁 𑀬𑀸𑀫𑀓𑀸𑀮𑀺𑀓𑀁, 𑀲𑀧𑁆𑀧𑀺𑀆𑀤𑀺𑀧𑀜𑁆𑀘𑀯𑀺𑀥𑀪𑁂𑀲𑀚𑁆𑀚𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀺𑀓𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀦𑁆𑀢𑀺 𑀏𑀢𑁆𑀣 𑀅𑀢𑀺𑀩𑁆𑀬𑀸𑀧𑀺𑀢𑀁 𑀧𑀭𑀺𑀳𑀭𑀺𑀢𑀼𑀁 𑀯𑀺𑀲𑁂𑀲𑀦𑀫𑀸𑀳 ‘‘𑀧𑀼𑀭𑁂𑀪𑀢𑁆𑀢’’𑀦𑁆𑀢𑁆𑀬𑀸𑀤𑀺. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀫𑁂𑀯 𑀬𑀸𑀯𑀓𑀸𑀮𑀺𑀓𑀁, 𑀦 𑀅𑀜𑁆𑀜𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀦𑁆𑀢𑁆𑀬𑀢𑁆𑀣𑁄. 𑀬𑀸𑀯…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄𑀢𑀺 𑀦𑀸𑀫𑀮𑀸𑀪𑀳𑁂𑀢𑀼𑀁, 𑀏𑀢𑁂𑀦 𑀬𑀸𑀯 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀯𑀺𑀥𑀁 𑀧𑀸𑀦𑀦𑁆𑀢𑀺 𑀏𑀢𑁆𑀣 𑀅𑀩𑁆𑀬𑀸𑀧𑀺𑀢𑀁 𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀲𑀤𑁆𑀥𑀺𑀁 𑀅𑀦𑀼𑀮𑁄𑀫𑀧𑀸𑀦𑁂𑀳𑀻’’𑀢𑀺. 𑀬𑀸𑀯…𑀧𑁂… 𑀢𑀩𑁆𑀩𑀢𑁄𑀢𑀺 𑀦𑀸𑀫𑀮𑀸𑀪𑀳𑁂𑀢𑀼𑀁, 𑀏𑀢𑁂𑀦 𑀬𑀸𑀫𑁄 𑀓𑀸𑀮𑁄 ¶ 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀸𑀳𑀁 𑀦𑀺𑀥𑁂𑀢𑀩𑁆𑀩𑀢𑁄𑀢𑀺 𑀦𑀸𑀫𑀮𑀸𑀪𑀳𑁂𑀢𑀼𑀁, 𑀏𑀢𑁂𑀦 𑀲𑀢𑁆𑀢𑀸𑀳𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀏𑀢𑁆𑀣 𑀅𑀢𑀺𑀩𑁆𑀬𑀸𑀧𑀺𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀞𑀧𑁂𑀢𑁆𑀯𑀸 𑀉𑀤𑀓’’𑀦𑁆𑀢𑁆𑀬𑀸𑀳. 𑀬𑀸𑀯…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄𑀢𑀺 𑀦𑀸𑀫𑀮𑀸𑀪𑀳𑁂𑀢𑀼𑀁, 𑀢𑁂𑀦 𑀬𑀸𑀯𑀚𑀻𑀯𑀁 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣𑀸𑀳 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀫𑀼𑀔𑀤𑁆𑀯𑀸𑀭𑀁 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬 𑀅𑀜𑁆𑀜𑀢𑁆𑀭 𑀉𑀤𑀓𑀤𑀦𑁆𑀢𑀧𑁄𑀦𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁬𑁫) 𑀯𑀘𑀦𑀢𑁄 𑀦𑀦𑀼 𑀉𑀤𑀓𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 ‘‘𑀞𑀧𑁂𑀢𑁆𑀯𑀸 𑀉𑀤𑀓𑀁 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀧𑀭𑀺𑀲𑀼𑀤𑁆𑀥𑀉𑀤𑀓𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀁, 𑀓𑀤𑁆𑀤𑀫𑀸𑀤𑀺𑀲𑀳𑀺𑀢𑀁 𑀧𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑀺𑀢𑁂𑀲𑀼 𑀅𑀦𑁆𑀢𑁄𑀕𑀥𑀪𑀸𑀯𑀢𑁄 ‘‘𑀞𑀧𑁂𑀢𑁆𑀯𑀸 𑀉𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀫𑀧𑀺 ‘‘𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀲𑁆𑀲 𑀉𑀤𑀓𑀲𑁆𑀲𑀧𑀺 𑀕𑀳𑀡𑀢𑁄𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀉𑀤𑀓𑀪𑀸𑀯𑁂𑀦 𑀲𑀸𑀫𑀜𑁆𑀜𑀢𑁄 ‘‘𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀏𑀓𑀘𑁆𑀘𑀲𑁆𑀲 𑀉𑀤𑀓𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀉𑀤𑀓𑀫𑁆𑀧𑀺 𑀬𑀸𑀯𑀚𑀻𑀯𑀺𑀓𑀁 𑀦𑀸𑀫𑀸𑀢𑀺 𑀜𑀸𑀬𑁂𑀬𑁆𑀬, 𑀦 𑀧𑀦 𑀉𑀤𑀓𑀁 𑀬𑀸𑀯𑀚𑀻𑀯𑀺𑀓𑀁 𑀲𑀼𑀤𑁆𑀥𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑀘𑁆𑀘𑀲𑁆𑀲 𑀉𑀤𑀓𑀲𑁆𑀲 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑁂 𑀲𑀢𑀺𑀧𑀺 𑀲𑀼𑀤𑁆𑀥𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀢𑁆𑀢𑀸 𑀢𑀁 𑀉𑀤𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁯𑁦. 𑀫𑀽𑀮𑀓𑀫𑀽𑀮𑀸𑀤𑀻𑀦𑀺 ¶ 𑀉𑀧𑀤𑁂𑀲𑀢𑁄𑀬𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀧𑀭𑀺𑀬𑀸𑀬𑀢𑁄 𑀯𑀼𑀘𑁆𑀘𑀫𑀸𑀦𑀸𑀦𑀺𑀧𑀺 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀢𑀁 𑀢𑀁 𑀦𑀸𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀫𑁆𑀫𑁄𑀳𑁄𑀬𑁂𑀯 𑀲𑀺𑀬𑀸, 𑀢𑀲𑁆𑀫𑀸 𑀢𑀢𑁆𑀣 𑀦 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫. 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀦𑁆𑀢𑀺 𑀧𑀽𑀯𑀸𑀤𑀺𑀔𑀸𑀤𑀦𑀻𑀬𑁂 𑀯𑀺𑀚𑁆𑀚𑀫𑀸𑀦𑀁 𑀔𑀸𑀤𑀦𑀻𑀬𑀓𑀺𑀘𑁆𑀘𑀁 𑀔𑀸𑀤𑀦𑀻𑀬𑁂𑀳𑀺 𑀓𑀸𑀢𑀩𑁆𑀩𑀁 𑀚𑀺𑀖𑀘𑁆𑀙𑀸𑀳𑀭𑀡𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 ¶ 𑀦𑁂𑀯 𑀨𑀭𑀦𑁆𑀢𑀺 𑀦 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀤𑁂𑀲𑁂 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀯𑀸 𑀅𑀲𑀸𑀥𑁂𑀦𑁆𑀢𑀁 𑀯𑀸 𑀅𑀧𑀭𑀲𑁆𑀫𑀺𑀁 𑀤𑁂𑀲𑁂 𑀉𑀝𑁆𑀞𑀺𑀢𑀪𑀽𑀫𑀺𑀭𑀲𑀸𑀤𑀺𑀪𑁂𑀤𑁂𑀦 𑀆𑀳𑀸𑀭𑀚𑀺𑀖𑀘𑁆𑀙𑀸𑀳𑀭𑀡𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑀫𑁆𑀧𑀺 𑀯𑀸 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀽’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀏𑀓𑀲𑁆𑀫𑀺𑀁 𑀚𑀦𑀧𑀤𑁂 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀲𑁂𑀲𑀚𑀦𑀧𑀤𑁂𑀲𑀼𑀧𑀺 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀓𑀢𑀺𑀆𑀳𑀸𑀭𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀬𑀸𑀯𑀓𑀸𑀮𑀺𑀓𑁂𑀳𑀺 𑀅𑀬𑁄𑀚𑀺𑀢𑀁 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸𑀯 𑀆𑀳𑀸𑀭𑀓𑀺𑀘𑁆𑀘𑀓𑀭𑀡𑀯𑀲𑁂𑀦. 𑀲𑀫𑁆𑀫𑁄𑀳𑁄𑀬𑁂𑀯 𑀳𑁄𑀢𑀻𑀢𑀺 𑀅𑀦𑁂𑀓𑀢𑁆𑀣𑀸𑀦𑀁 𑀦𑀸𑀫𑀸𑀦𑀁 𑀅𑀧𑁆𑀧𑀲𑀺𑀤𑁆𑀥𑀸𑀦𑀜𑁆𑀘 𑀲𑀫𑁆𑀪𑀯𑀢𑁄 𑀲𑀫𑁆𑀫𑁄𑀳𑁄 𑀏𑀯 𑀲𑀺𑀬𑀸. 𑀢𑁂𑀦𑁂𑀯𑁂𑀢𑁆𑀣 𑀫𑀬𑀫𑁆𑀧𑀺 𑀫𑀽𑀮𑀓𑀫𑀽𑀮𑀸𑀤𑀻𑀦𑀁 𑀧𑀭𑀺𑀬𑀸𑀬𑀦𑁆𑀢𑀭𑀤𑀲𑁆𑀲𑀦𑁂 𑀆𑀤𑀭𑀁 𑀦 𑀓𑀭𑀺𑀫𑁆𑀳 𑀉𑀧𑀤𑁂𑀲𑀢𑁄𑀯 𑀕𑀳𑁂𑀢𑀩𑁆𑀩𑀢𑁄.

𑀬𑀦𑁆𑀢𑀺 𑀯𑀝𑁆𑀝𑀓𑀦𑁆𑀤𑀁.

𑀫𑀼𑀴𑀸𑀮𑀦𑁆𑀢𑀺 𑀣𑀽𑀮𑀢𑀭𑀼𑀡𑀫𑀽𑀮𑀫𑁂𑀯.

𑀭𑀼𑀓𑁆𑀔𑀯𑀮𑁆𑀮𑀺𑀆𑀤𑀻𑀦𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀅𑀦𑁆𑀢𑁄𑀧𑀣𑀯𑀻𑀕𑀢𑁄𑀢𑀺 𑀲𑀸𑀮𑀓𑀮𑁆𑀬𑀸𑀡𑀺𑀓𑁆𑀔𑀦𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀩𑁆𑀩𑀓𑀧𑁆𑀧𑀺𑀬𑀸𑀦𑀻𑀢𑀺 𑀫𑀽𑀮𑀢𑀘𑀧𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑀲𑁄 𑀓𑀧𑁆𑀧𑀺𑀬𑀸𑀦𑀺, 𑀢𑁂𑀲𑀫𑁆𑀧𑀺 𑀦𑀸𑀫𑀯𑀲𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀘𑁆𑀙𑀺𑀯𑀸𑀤𑀻𑀦𑀁 𑀅𑀧𑀭𑀺𑀧𑀓𑁆𑀓𑀸𑀦𑁂𑀯 𑀨𑀮𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀺𑀧𑀓𑁆𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀳𑀭𑀻𑀢𑀓𑀸𑀤𑀻𑀦𑀁 𑀅𑀝𑁆𑀞𑀻𑀦𑀻𑀢𑀺 𑀏𑀢𑁆𑀣 𑀫𑀺𑀜𑁆𑀚𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺 𑀓𑀧𑀸𑀮𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀻𑀢𑀺 𑀆𑀘𑀭𑀺𑀬𑀸. 𑀫𑀺𑀜𑁆𑀚𑀫𑁆𑀧𑀺 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀏𑀓𑁂. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁪𑁮-𑁨𑁪𑁯) 𑀧𑀦 ¶ ‘‘𑀳𑀭𑀻𑀢𑀓𑀸𑀤𑀻𑀦𑀁 𑀅𑀝𑁆𑀞𑀻𑀦𑀻𑀢𑀺 𑀏𑀢𑁆𑀣 ¶ ‘𑀫𑀺𑀜𑁆𑀚𑀁 𑀬𑀸𑀯𑀓𑀸𑀮𑀺𑀓’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀳𑀺𑀗𑁆𑀕𑀽𑀢𑀺 𑀳𑀺𑀗𑁆𑀕𑀼𑀭𑀼𑀓𑁆𑀔𑀢𑁄 𑀧𑀕𑁆𑀖𑀭𑀺𑀢𑀦𑀺𑀬𑁆𑀬𑀸𑀲𑁄. 𑀳𑀺𑀗𑁆𑀕𑀼𑀚𑀢𑀼𑀆𑀤𑀬𑁄𑀧𑀺 𑀳𑀺𑀗𑁆𑀕𑀼𑀯𑀺𑀓𑀢𑀺𑀬𑁄 𑀏𑀯. 𑀢𑀢𑁆𑀣 𑀳𑀺𑀗𑁆𑀕𑀼𑀚𑀢𑀼 𑀦𑀸𑀫 𑀳𑀺𑀗𑁆𑀕𑀼𑀭𑀼𑀓𑁆𑀔𑀲𑁆𑀲 𑀤𑀡𑁆𑀟𑀧𑀢𑁆𑀢𑀸𑀦𑀺 𑀧𑀘𑀺𑀢𑁆𑀯𑀸 𑀓𑀢𑀦𑀺𑀬𑁆𑀬𑀸𑀲𑁄. 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀁 𑀦𑀸𑀫 𑀳𑀺𑀗𑁆𑀕𑀼𑀧𑀢𑁆𑀢𑀸𑀦𑀺 𑀧𑀘𑀺𑀢𑁆𑀯𑀸 𑀓𑀢𑀦𑀺𑀬𑁆𑀬𑀸𑀲𑁄. ‘‘𑀅𑀜𑁆𑀜𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀓𑀦𑁆𑀢𑀺 𑀅𑀕𑁆𑀕𑀓𑁄𑀝𑀺𑀬𑀸 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄. 𑀢𑀓𑀧𑀢𑁆𑀢𑀻𑀢𑀺 𑀧𑀢𑁆𑀢𑀢𑁄 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄. 𑀢𑀓𑀧𑀡𑁆𑀡𑀻𑀢𑀺 𑀧𑀮𑀸𑀲𑁂 𑀪𑀚𑁆𑀚𑀺𑀢𑁆𑀯𑀸 𑀓𑀢𑀲𑀺𑀮𑁂𑀲𑁄. ‘‘𑀤𑀡𑁆𑀟𑀢𑁄 𑀦𑀺𑀓𑁆𑀔𑀦𑁆𑀢𑀲𑀺𑀮𑁂𑀲𑁄’’𑀢𑀺𑀧𑀺 𑀯𑀤𑀦𑁆𑀢𑀺.

𑁯𑁧. 𑀬𑀸𑀫𑀓𑀸𑀮𑀺𑀓𑁂𑀲𑀼 𑀧𑀦𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀧𑀤𑁂𑀳𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀗𑁆𑀕𑀳𑀺𑀢𑀁, 𑀦 𑀬𑀸𑀫𑀓𑀸𑀮𑀺𑀓𑀁, 𑀢𑀣𑀸𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀇𑀥 𑀘𑁂𑀯 ‘‘𑀬𑀸𑀫𑀓𑀸𑀮𑀺𑀓𑁂𑀦 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸𑀳𑀓𑀸𑀮𑀺𑀓𑀁…𑀧𑁂… 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺 𑀅𑀜𑁆𑀜𑀢𑁆𑀣 (𑀫𑀳𑀸𑀯. 𑁩𑁦𑁫) 𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀬𑀸𑀫𑀓𑀸𑀮𑀺𑀓’’𑀦𑁆𑀢𑀺𑀯𑀘𑀦𑀲𑀸𑀫𑀢𑁆𑀣𑀺𑀬𑀢𑁄 𑀘 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀬𑀸𑀫𑀓𑀸𑀮𑀺𑀓𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀞𑀧𑁂𑀢𑁆𑀯𑀸 𑀥𑀜𑁆𑀜𑀨𑀮𑀭𑀲𑀦𑁆𑀢𑀺 𑀏𑀢𑁆𑀣 ‘‘𑀢𑀡𑁆𑀟𑀼𑀮𑀥𑁄𑀯𑀦𑁄𑀤𑀓𑀫𑁆𑀧𑀺 𑀥𑀜𑁆𑀜𑀨𑀮𑀭𑀲𑁄𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑁯𑁨. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀻𑀢𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀏𑀯𑀁𑀮𑀤𑁆𑀥𑀯𑁄𑀳𑀸𑀭𑀸𑀦𑀺 𑀧𑀜𑁆𑀘. ‘‘𑀕𑁄𑀲𑀧𑁆𑀧𑀻’’𑀢𑀺𑀆𑀤𑀺𑀦𑀸 𑀮𑁄𑀓𑁂 𑀧𑀸𑀓𑀝𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀻’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀲𑀫𑁆𑀧𑀺 𑀭𑁄𑀳𑀺𑀢𑀫𑀺𑀕𑀸𑀤𑀻𑀦𑀁 𑀲𑀧𑁆𑀧𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑁂𑀲𑀜𑁆𑀳𑀺 𑀔𑀻𑀭𑀁 𑀅𑀢𑁆𑀣𑀺, 𑀲𑀧𑁆𑀧𑀺𑀫𑁆𑀧𑀺 𑀢𑁂𑀲𑀁 𑀅𑀢𑁆𑀣𑀺𑀬𑁂𑀯, 𑀢𑀁 𑀧𑀦 𑀲𑀼𑀮𑀪𑀁 𑀯𑀸 𑀤𑀼𑀮𑁆𑀮𑀪𑀁 𑀯𑀸 𑀅𑀲𑀫𑁆𑀫𑁄𑀳𑀢𑁆𑀣𑀁 𑀯𑀼𑀢𑁆𑀢𑀁 ¶ . 𑀏𑀯𑀁 𑀦𑀯𑀦𑀻𑀢𑀫𑁆𑀧𑀺. ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀻’’𑀢𑀺 𑀘 𑀇𑀤𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀬𑁂𑀲𑀁 𑀫𑀁𑀲𑀁 𑀦 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺𑀆𑀤𑀺 𑀦 𑀓𑀧𑁆𑀧𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀫𑀦𑀼𑀲𑁆𑀲𑀔𑀻𑀭𑀸𑀤𑀻𑀦𑀺𑀧𑀺 𑀳𑀺 𑀦𑁄 𑀦 𑀓𑀧𑁆𑀧𑀦𑁆𑀢𑀺.

𑁯𑁩. 𑀬𑀸𑀯 𑀓𑀸𑀮𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀓𑀸𑀮𑁄𑀢𑀺 𑀪𑀺𑀓𑁆𑀔𑀽𑀦𑀁 𑀪𑁄𑀚𑀦𑀓𑀸𑀮𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄. 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄𑀧𑀺 𑀳𑀺 ¶ 𑀓𑀸𑀮𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀲𑀳𑀲𑀸 𑀧𑀺𑀯𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀓𑀼𑀓𑁆𑀓𑀼𑀘𑁆𑀘𑀓𑁂𑀦 𑀧𑀦 𑀦 𑀓𑀢𑁆𑀢𑀩𑁆𑀩𑀁. 𑀓𑀸𑀮𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀜𑁆𑀘 𑀓𑀸𑀮𑀢𑁆𑀣𑀫𑁆𑀪𑁄 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀮𑀦𑁆𑀢𑀭𑁂 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀡𑁂𑀢𑀺 𑀕𑀳𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑀺 𑀢𑀁, 𑀲𑀦𑁆𑀦𑀺𑀳𑀺𑀢𑀁 𑀦 𑀓𑀧𑁆𑀧𑀢𑀻𑀢𑀺 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁂𑀦𑁂𑀯 ‘‘𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂’’𑀢𑀺 𑀯𑀼𑀢𑁆𑀢𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀦 ‘‘𑀅𑀚𑁆𑀛𑁄𑀳𑀭𑀺𑀲𑁆𑀲𑀸𑀫𑀻𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀡𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀬𑀦𑁆𑀢𑀺 𑀬𑀁 𑀧𑀢𑁆𑀢𑀁. 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀬𑀸𑀕𑀼𑀬𑀸 𑀉𑀧𑀭𑀺 𑀲𑀦𑁆𑀤𑀺𑀲𑁆𑀲𑀢𑀺. 𑀢𑁂𑀮𑀯𑀡𑁆𑀡𑁂 𑀧𑀢𑁆𑀢𑁂 𑀲𑀢𑀺𑀧𑀺 𑀦𑀺𑀲𑁆𑀦𑁂𑀳𑀪𑀸𑀯𑁂 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀯𑀡𑁆𑀡𑀯𑀲𑁂𑀦𑁂𑀯 𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀲𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑀺 𑀤𑀼𑀢𑀺𑀬𑀤𑀺𑀯𑀲𑁂 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀝𑀺𑀕𑁆𑀕𑀳𑀡𑁂 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀸𑀦𑁂𑀦 𑀯𑀸 𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀅𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀉𑀪𑀬𑀣𑀸𑀧𑀺 𑀅𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀫𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀁 𑀧𑀭𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀫𑁆𑀧𑀺 𑀲𑀘𑁂 𑀧𑀝𑀺𑀕𑁆𑀕𑀳𑀡𑁂 𑀦𑀺𑀭𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀫𑁆𑀧𑀺 𑀤𑀼𑀢𑀺𑀬𑀤𑀺𑀯𑀲𑁂 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀏𑀯𑀁 ‘‘𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀓𑀲𑁆𑀫𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺? ‘‘𑀧𑀝𑀺𑀕𑁆𑀕𑀳𑀡𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 ¶ 𑀲𑀬𑀁 𑀯𑀸 𑀅𑀜𑁆𑀜𑁂𑀦 𑀯𑀸 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀦 𑀲𑀫𑁆𑀫𑀸 𑀥𑁄𑀯𑀺𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑁂 𑀧𑀢𑁆𑀢𑁂 𑀮𑀕𑁆𑀕𑀫𑁆𑀧𑀺 𑀅𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁄𑀢𑀻𑀢𑀺 𑀢𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀲𑀸𑀫𑀡𑁂𑀭𑀸𑀦𑀁 𑀧𑀭𑀺𑀘𑁆𑀘𑀚𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀞𑀢𑁆𑀯𑀸 ‘𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀯𑀝𑁆𑀝𑀢𑀺, 𑀅𑀧𑀭𑀺𑀘𑁆𑀘𑀢𑁆𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀧𑀦𑁆𑀦𑀁, 𑀢𑀲𑁆𑀫𑀸 𑀦𑀺𑀭𑀸𑀮𑀬𑀪𑀸𑀯𑁂𑀦 𑀧𑀝𑀺𑀕𑁆𑀕𑀳𑀡𑁂 𑀯𑀺𑀚𑀳𑀺𑀢𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀬𑀤𑀕𑁆𑀕𑁂𑀦 𑀳𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀺, 𑀢𑀤𑀕𑁆𑀕𑁂𑀦 𑀲𑀦𑁆𑀦𑀺𑀥𑀺𑀫𑁆𑀧𑀺 𑀦 𑀓𑀭𑁄𑀢𑀺 𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑀤𑀺𑀲𑀢𑁆𑀢𑀸. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀤𑀳𑀺𑀢𑁂𑀬𑁂𑀯 𑀘 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁫𑁨-𑁨𑁫𑁩) 𑀧𑀦 ‘‘𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯𑀸𑀢𑀺 𑀦𑀺𑀭𑀧𑁂𑀓𑁆𑀔𑀢𑀸𑀬 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀤𑀺𑀦𑁆𑀦𑀁 𑀅𑀧𑀭𑀺𑀘𑁆𑀘𑀢𑁆𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀸𑀤𑀺𑀯𑀢𑁆𑀣𑀼𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀦 𑀧𑀦 𑀢𑀕𑁆𑀕𑀢𑀧𑀝𑀺𑀕𑁆𑀕𑀳𑀡𑀁. 𑀦 𑀳𑀺 𑀯𑀢𑁆𑀣𑀼𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀢𑁆𑀣𑀕𑀢𑀧𑀝𑀺𑀕𑁆𑀕𑀳𑀡𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀲𑀓𑁆𑀓𑀸, 𑀦 𑀘 𑀢𑀸𑀤𑀺𑀲𑀁 𑀯𑀘𑀦𑀁 𑀅𑀢𑁆𑀣𑀺, 𑀬𑀤𑀺 𑀪𑀯𑁂𑀬𑁆𑀬 ¶ , ‘𑀲𑀘𑁂 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺…𑀧𑁂… 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀦 𑀳𑀺 𑀥𑁄𑀯𑀦𑁂𑀦 𑀆𑀫𑀺𑀲𑀁 𑀅𑀧𑀦𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀅𑀧𑁂𑀓𑁆𑀔𑀸 𑀯𑀢𑁆𑀢𑀢𑀺. 𑀬𑁂𑀦 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀬𑁆𑀬, 𑀧𑀢𑁆𑀢𑁂 𑀧𑀦 𑀯𑀢𑁆𑀢𑀫𑀸𑀦𑀸 𑀅𑀧𑁂𑀓𑁆𑀔𑀸 𑀢𑀕𑁆𑀕𑀢𑀺𑀓𑁂 𑀆𑀫𑀺𑀲𑁂𑀧𑀺 𑀯𑀢𑁆𑀢𑀢𑀺 𑀏𑀯 𑀦𑀸𑀫𑀸𑀢𑀺 𑀆𑀫𑀺𑀲𑁂 𑀅𑀦𑀧𑁂𑀓𑁆𑀔𑀢𑀸 𑀏𑀢𑁆𑀣 𑀦 𑀮𑀩𑁆𑀪𑀢𑀺, 𑀢𑀢𑁄 𑀆𑀫𑀺𑀲𑁂 𑀅𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀧𑀼𑀦𑀤𑀺𑀯𑀲𑁂 𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀢𑀻𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀅𑀣 𑀫𑀢𑀁 ‘𑀬𑀤𑀕𑁆𑀕𑁂𑀦𑁂𑀢𑁆𑀣 𑀆𑀫𑀺𑀲𑀸𑀦𑀧𑁂𑀓𑁆𑀔𑀢𑀸 𑀦 𑀮𑀩𑁆𑀪𑀢𑀺, 𑀢𑀤𑀕𑁆𑀕𑁂𑀦 𑀧𑀝𑀺𑀕𑁆𑀕𑀳𑀡𑀸𑀦𑀧𑁂𑀓𑁆𑀔𑀢𑀸𑀧𑀺 𑀦 𑀮𑀩𑁆𑀪𑀢𑀻’𑀢𑀺. 𑀢𑀣𑀸 𑀲𑀢𑀺 𑀬𑀢𑁆𑀣 𑀆𑀫𑀺𑀲𑀸𑀧𑁂𑀓𑁆𑀔𑀸 𑀅𑀢𑁆𑀣𑀺, 𑀢𑀢𑁆𑀣 𑀧𑀝𑀺𑀕𑁆𑀕𑀳𑀡𑀸𑀧𑁂𑀓𑁆𑀔𑀸𑀧𑀺 𑀦 𑀯𑀺𑀕𑀘𑁆𑀙𑀢𑀻𑀢𑀺 𑀆𑀧𑀦𑁆𑀦𑀁, 𑀏𑀯𑀜𑁆𑀘 𑀧𑀝𑀺𑀕𑁆𑀕𑀳𑀡𑁂 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘𑁂𑀢𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀁 𑀓𑀸𑀭𑀡𑀢𑁆𑀢𑁂𑀦 𑀅𑀪𑀺𑀫𑀢𑀁 𑀲𑀺𑀬𑀸. 𑀇𑀤𑀁 𑀲𑀼𑀝𑁆𑀞𑀼𑀢𑀭𑀁 𑀓𑀢𑁆𑀯𑀸 𑀯𑀺𑀲𑀼𑀁 ¶ 𑀯𑀢𑁆𑀢𑀩𑁆𑀩𑀁 𑀘𑀻𑀯𑀭𑀸𑀧𑁂𑀓𑁆𑀔𑀸𑀬 𑀯𑀢𑁆𑀢𑀫𑀸𑀦𑀸𑀬𑀧𑀺 𑀧𑀘𑁆𑀘𑀼𑀤𑁆𑀥𑀸𑀭𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀬. 𑀏𑀢𑀲𑁆𑀫𑀺𑀜𑁆𑀘 𑀉𑀧𑀸𑀬𑁂 𑀲𑀢𑀺 𑀕𑀡𑁆𑀞𑀺𑀓𑀸𑀳𑀢𑀧𑀢𑁆𑀢𑁂𑀲𑀼 𑀅𑀯𑀝𑁆𑀝𑀦𑀢𑀸 𑀦𑀸𑀫 𑀦 𑀲𑀺𑀬𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁨𑁫𑁨-𑁨𑁫𑁩) ‘𑀬𑀁 𑀧𑀭𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀫𑁆𑀧𑀺 𑀲𑀘𑁂 𑀧𑀝𑀺𑀕𑁆𑀕𑀳𑀡𑁂 𑀦𑀺𑀭𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀯𑀺𑀚𑀳𑀺𑀢𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀫𑁆𑀧𑀺 𑀤𑀼𑀢𑀺𑀬𑀤𑀺𑀯𑀲𑁂 𑀯𑀝𑁆𑀝𑀢𑀻’𑀢𑀺𑀆𑀤𑀺, 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀸𑀴𑀺𑀬𑀁 (𑀧𑀸𑀘𑀺. 𑁨𑁫𑁫) ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀦𑀺𑀳𑀺𑀢𑁂𑀲𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑁂𑀲𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀡𑁂𑀧𑀺 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀬𑀸𑀫𑀓𑀸𑀮𑀺𑀓𑁂𑀧𑀺 𑀅𑀚𑁆𑀛𑁄𑀳𑀸𑀭𑁂 𑀯𑀺𑀲𑀼𑀁 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀧𑀓𑀢𑀺𑀆𑀫𑀺𑀲𑁂𑀢𑀺 𑀑𑀤𑀦𑀸𑀤𑀺𑀓𑀧𑁆𑀧𑀺𑀬𑀸𑀫𑀺𑀲𑁂. 𑀤𑁆𑀯𑁂𑀢𑀺 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑀓𑀸𑀮𑀺𑀓𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀪𑀼𑀜𑁆𑀚𑀢𑁄 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀏𑀓𑀁, 𑀬𑀸𑀯𑀓𑀸𑀮𑀺𑀓𑀲𑀁𑀲𑀝𑁆𑀞𑀢𑀸𑀬 𑀬𑀸𑀯𑀓𑀸𑀮𑀺𑀓𑀢𑁆𑀢𑀪𑀚𑀦𑁂𑀦 𑀅𑀦𑀢𑀺𑀭𑀺𑀢𑁆𑀢𑀧𑀘𑁆𑀘𑀬𑀸 𑀏𑀓𑀦𑁆𑀢𑀺 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀯𑀺𑀓𑀧𑁆𑀧𑀤𑁆𑀯𑀬𑁂𑀢𑀺 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀧𑀓𑁆𑀔𑀤𑁆𑀯𑀬𑁂. 𑀣𑀼𑀮𑁆𑀮𑀘𑁆𑀘𑀬𑀁 𑀤𑀼𑀓𑁆𑀓𑀝𑀜𑁆𑀘 𑀯𑀟𑁆𑀠𑀢𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑀅𑀓𑀧𑁆𑀧𑀺𑀬𑀫𑀁𑀲𑁂 𑀤𑀼𑀓𑁆𑀓𑀝𑀁 𑀯𑀟𑁆𑀠𑀢𑀺.

𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀢𑀸𑀯 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀲𑀦𑁆𑀦𑀺𑀳𑀺𑀢𑀢𑁆𑀢𑀸 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀲𑀢𑀺 𑀧𑀘𑁆𑀘𑀬𑁂 𑀧𑀦 𑀲𑀦𑁆𑀦𑀺𑀳𑀺𑀢𑀫𑁆𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀪𑁂𑀲𑀚𑁆𑀚𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺𑀬𑁂𑀯.

𑁯𑁪. 𑀉𑀕𑁆𑀕𑀳𑀺𑀢𑀓𑀁 ¶ 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀅𑀧𑀝𑀺𑀕𑁆𑀕𑀳𑀺𑀢𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁨𑁨) ‘‘𑀉𑀕𑁆𑀕𑀳𑀺𑀢𑀓𑀦𑁆𑀢𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀲𑀬𑀁 𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀬𑀁 𑀓𑀭𑁄𑀢𑀻𑀢𑀺 ¶ 𑀧𑀘𑀺𑀢𑁆𑀯𑀸 𑀓𑀭𑁄𑀢𑀺. 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀲𑀬𑀁𑀓𑀢𑀦𑁆𑀢𑀺 𑀦𑀯𑀦𑀻𑀢𑀁 𑀧𑀘𑀺𑀢𑁆𑀯𑀸 𑀓𑀢𑀁. 𑀦𑀺𑀭𑀸𑀫𑀺𑀲𑀫𑁂𑀯𑀸𑀢𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁯𑁫. 𑀅𑀚𑁆𑀚 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀪𑀼𑀜𑁆𑀚𑀦𑁆𑀢𑀲𑁆𑀲 𑀓𑀲𑁆𑀫𑀸 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀯𑀦𑀻𑀢𑀁 𑀢𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀓𑁂𑀳𑀻𑀢𑀺 𑀔𑀻𑀭𑀤𑀥𑀻𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀉𑀪𑀬𑁂𑀲𑀫𑁆𑀧𑀻𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀤𑀥𑀻𑀳𑀺 𑀘 𑀧𑀼𑀭𑁂𑀪𑀢𑁆𑀢𑀁 𑀉𑀕𑁆𑀕𑀳𑀺𑀢𑀓𑁂𑀳𑀺 𑀘 𑀓𑀢𑀸𑀦𑀁. 𑀏𑀲 𑀦𑀬𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀫𑁆𑀳𑀻𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀲𑀧𑁆𑀧𑀺𑀫𑁆𑀳𑀺. 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸𑀢𑀺 ‘‘𑀲𑀚𑀸𑀢𑀺𑀓𑀸𑀦𑀁 𑀲𑀧𑁆𑀧𑀺𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸. 𑀲𑀧𑁆𑀧𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀦𑀺𑀭𑀸𑀫𑀺𑀲𑀫𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀦𑀯𑀦𑀻𑀢𑁂. 𑀥𑁄𑀢𑀁 𑀯𑀝𑁆𑀝𑀢𑀻𑀢𑀺 𑀅𑀥𑁄𑀢𑀜𑁆𑀘𑁂, 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀥𑁄𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀣𑁂𑀭𑀸𑀦𑀁 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀧𑀦 𑀯𑀢𑁆𑀣𑀼𑀦𑁄 𑀯𑀺𑀬𑁄𑀚𑀺𑀢𑀢𑁆𑀢𑀸 𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀬𑀼𑀢𑁆𑀢𑀢𑀸𑀫𑀢𑁆𑀢𑁂𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸, 𑀧𑀘𑀺𑀢𑁆𑀯𑀸 𑀯𑀸 𑀦𑀺𑀭𑀸𑀫𑀺𑀲𑀫𑁂𑀯 𑀓𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦 𑀧𑀦 𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀲𑀳 𑀯𑀺𑀓𑀸𑀮𑁂 𑀪𑀼𑀜𑁆𑀚𑀺𑀁𑀲𑀽𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦…𑀧𑁂… 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀁 𑀦𑀸𑀫 𑀦 𑀳𑁄𑀢𑀻’’𑀢𑀺. 𑀢𑀢𑁆𑀣 𑀅𑀥𑁄𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀢𑀁 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀤𑀥𑀺𑀆𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀔𑀸𑀤𑀺𑀁𑀲𑀽’’𑀢𑀺 𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑀸 ‘‘𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀁 𑀅𑀥𑁄𑀢𑀫𑁆𑀧𑀺 𑀤𑀥𑀺𑀕𑀼𑀴𑀺𑀓𑀸𑀤𑀺𑀲𑀳𑀺𑀢𑀁 ¶ 𑀯𑀺𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀤𑀥𑀺𑀕𑀼𑀴𑀺𑀓𑀸𑀤𑀺𑀆𑀫𑀺𑀲𑁂𑀦 𑀲𑀁𑀲𑀝𑁆𑀞𑀭𑀲𑀁 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦𑀸𑀢𑀺 𑀅𑀥𑁄𑀯𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦. 𑀤𑀥𑀺 𑀏𑀯 𑀤𑀥𑀺𑀕𑀢𑀁 𑀬𑀣𑀸 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’’𑀦𑁆𑀢𑀺 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧). ‘‘𑀔𑀬𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀢𑁄 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀲𑀧𑁆𑀧𑀺𑀆𑀤𑀺𑀧𑀺 𑀯𑀺𑀓𑀸𑀮𑁂 𑀓𑀧𑁆𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀬𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑀺𑀭𑀸𑀫𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀓𑀸𑀮𑁂𑀧𑀺 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀦𑀯𑀦𑀻𑀢𑁂 𑀮𑀕𑁆𑀕𑀫𑀢𑁆𑀢𑁂𑀦 𑀯𑀺𑀲𑀼𑀁 𑀤𑀥𑀺𑀆𑀤𑀺𑀯𑁄𑀳𑀸𑀭𑀁 𑀅𑀮𑀤𑁆𑀥𑁂𑀦 𑀅𑀧𑁆𑀧𑀫𑀢𑁆𑀢𑁂𑀦 ¶ 𑀤𑀥𑀺𑀆𑀤𑀺𑀦𑀸𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀯𑀺𑀲𑀼𑀁 𑀧𑀝𑀺𑀕𑁆𑀕𑀳𑀺𑀢𑀤𑀥𑀺𑀆𑀤𑀻𑀳𑀺 𑀲𑀳 𑀧𑀓𑁆𑀓𑀁 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀦𑀺𑀭𑀸𑀫𑀺𑀲𑀪𑀽𑀢𑁂𑀧𑀺. 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀁 𑀧𑀦 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀤𑀥𑀺𑀆𑀤𑀻𑀳𑀺 𑀅𑀲𑀫𑁆𑀪𑀺𑀦𑁆𑀦𑀭𑀲𑀢𑁆𑀢𑀸 𑀪𑀢𑁆𑀢𑁂𑀦 𑀲𑀳𑀺𑀢𑀕𑀼𑀴𑀧𑀺𑀡𑁆𑀟𑀸𑀤𑀺 𑀯𑀺𑀬 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀧𑀦 𑀧𑀘𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸𑀯 𑀧𑀘𑀺𑀢𑀩𑁆𑀩𑀁. 𑀇𑀢𑀭𑀣𑀸 𑀧𑀘𑀦𑀓𑁆𑀔𑀡𑁂 𑀧𑀘𑁆𑀘𑀫𑀸𑀦𑀤𑀥𑀺𑀕𑀼𑀴𑀺𑀓𑀸𑀤𑀻𑀳𑀺 𑀲𑀫𑁆𑀪𑀺𑀦𑁆𑀦𑀭𑀲𑀢𑀸𑀬 𑀲𑀸𑀫𑀁𑀧𑀓𑁆𑀓𑀁 𑀚𑀸𑀢𑀁, 𑀢𑁂𑀲𑀼 𑀔𑀻𑀡𑁂𑀲𑀼𑀧𑀺 𑀲𑀸𑀫𑀁𑀧𑀓𑁆𑀓𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀭𑀸𑀫𑀺𑀲𑀫𑁂𑀯 𑀧𑀘𑀺𑀢𑀩𑁆𑀩𑀦𑁆𑀢𑀺. 𑀢𑁂𑀦𑁂𑀯 ‘‘𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀧𑀓𑁆𑀓𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑀏𑀢𑁆𑀣 𑀘𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂 𑀆𑀫𑀺𑀲𑁂𑀦 𑀲𑀳 𑀪𑀺𑀓𑁆𑀔𑀼𑀦𑀸 𑀧𑀓𑁆𑀓𑀲𑁆𑀲 𑀲𑀬𑀁𑀧𑀸𑀓𑀤𑁄𑀲𑁄 𑀯𑀸 𑀧𑀭𑀺𑀲𑀗𑁆𑀓𑀻𑀬𑀢𑀺, 𑀬𑀸𑀯𑀓𑀸𑀮𑀺𑀓𑀢𑀸 𑀯𑀸. 𑀢𑀢𑁆𑀣 𑀦 𑀢𑀸𑀯 𑀲𑀬𑀁𑀧𑀸𑀓𑀤𑁄𑀲𑁄 𑀏𑀢𑁆𑀣 𑀲𑀫𑁆𑀪𑀯𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀸. 𑀬𑀜𑁆𑀳𑀺 𑀢𑀢𑁆𑀣 𑀤𑀥𑀺𑀆𑀤𑀺 𑀆𑀫𑀺𑀲𑀕𑀢𑀁, 𑀢𑀁 𑀧𑀭𑀺𑀓𑁆𑀔𑀻𑀡𑀦𑁆𑀢𑀺. 𑀅𑀣 𑀧𑀝𑀺𑀕𑁆𑀕𑀳𑀺𑀢𑀤𑀥𑀺𑀕𑀼𑀴𑀺𑀓𑀸𑀤𑀺𑀦𑀸 𑀲𑀳 𑀅𑀢𑁆𑀢𑀦𑀸 𑀧𑀓𑁆𑀓𑀢𑁆𑀢𑀸 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀧𑀭𑀺𑀲𑀗𑁆𑀓𑀻𑀬𑀢𑀺, 𑀢𑀤𑀸 ‘‘𑀆𑀫𑀺𑀲𑁂𑀦 𑀲𑀳 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀦 𑀧𑀦 ‘‘𑀧𑀓𑁆𑀓𑀢𑁆𑀢𑀸’’𑀢𑀺, 𑀢𑀣𑀸 𑀘 𑀉𑀧𑀟𑁆𑀠𑀢𑁆𑀣𑁂𑀭𑀸𑀦𑀁 𑀫𑀢𑀫𑁂𑀯 𑀅𑀗𑁆𑀕𑀻𑀓𑀢𑀁 𑀲𑀺𑀬𑀸. 𑀢𑀢𑁆𑀣 𑀘 𑀲𑀸𑀫𑀡𑁂𑀭𑀸𑀤𑀻𑀳𑀺 ¶ 𑀧𑀓𑁆𑀓𑀫𑁆𑀧𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀺𑀬𑀸 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀸𑀤𑀺𑀁 𑀧𑀘𑀺𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀲𑀧𑁆𑀧𑀺𑀆𑀤𑀺 𑀯𑀺𑀬, 𑀦 𑀘 𑀢𑀁 𑀬𑀼𑀢𑁆𑀢𑀁 𑀪𑀺𑀓𑁆𑀔𑀸𑀘𑀸𑀭𑁂𑀦 𑀮𑀤𑁆𑀥𑀦𑀯𑀦𑀻𑀢𑀸𑀤𑀻𑀦𑀁 𑀢𑀓𑁆𑀓𑀸𑀤𑀺𑀆𑀫𑀺𑀲𑀲𑀁𑀲𑀝𑁆𑀞𑀲𑀫𑁆𑀪𑀯𑁂𑀦 𑀅𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸𑀧𑁆𑀧𑀲𑀗𑁆𑀕𑀢𑁄. 𑀦 𑀳𑀺 𑀕𑀳𑀝𑁆𑀞𑀸 𑀥𑁄𑀯𑀺𑀢𑁆𑀯𑀸, 𑀲𑁄𑀥𑁂𑀢𑁆𑀯𑀸 𑀯𑀸 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑀻𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺.

𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀬𑀣𑀸 𑀢𑀢𑁆𑀣 𑀧𑀢𑀺𑀢𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁…𑀧𑁂… 𑀧𑀼𑀦 𑀧𑀘𑀺𑀢𑁆𑀯𑀸 𑀤𑁂𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦𑀧𑁂𑀢𑀁 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀇𑀥 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀁 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀫𑁂𑀯 𑀦 𑀤𑀺𑀲𑁆𑀲𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀮𑀚𑁆𑀚𑀻 𑀲𑀸𑀫𑀡𑁂𑀭𑁄 𑀬𑀣𑀸 𑀢𑀢𑁆𑀣 𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸…𑀧𑁂… 𑀤𑁂𑀢𑀻’’𑀢𑀺 𑀯𑀘𑀦𑀲𑁆𑀲𑀸𑀧𑀺 𑀦𑀺𑀫𑀺𑀢𑁆𑀢𑀁 𑀦 𑀤𑀺𑀲𑁆𑀲𑀢𑀺. 𑀬𑀤𑀺 𑀳𑀺 𑀏𑀢𑀁 𑀬𑀸𑀯𑀓𑀸𑀮𑀺𑀓𑀲𑀁𑀲𑀕𑁆𑀕𑀧𑀭𑀺𑀳𑀸𑀭𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀢𑁆𑀢𑀦𑀸𑀧𑀺 𑀢𑀣𑀸 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀕𑀳𑀝𑁆𑀞𑁂𑀳𑀺 𑀤𑀺𑀦𑁆𑀦𑀲𑀧𑁆𑀧𑀺𑀆𑀤𑀻𑀲𑀼 𑀘 𑀆𑀫𑀺𑀲𑀲𑀁𑀲𑀕𑁆𑀕𑀲𑀗𑁆𑀓𑀸 𑀦 𑀯𑀺𑀕𑀘𑁆𑀙𑁂𑀬𑁆𑀬. 𑀦 𑀳𑀺 𑀕𑀳𑀝𑁆𑀞𑀸 𑀏𑀯𑀁 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀓𑀡𑀢𑀡𑁆𑀟𑀼𑀮𑀸𑀤𑀺𑀁 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀧𑀘𑀦𑁆𑀢𑀺. 𑀅𑀧𑀺𑀘 𑀪𑁂𑀲𑀚𑁆𑀚𑁂𑀳𑀺 𑀲𑀤𑁆𑀥𑀺𑀁 𑀔𑀻𑀭𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀔𑀻𑀭𑀸𑀤𑀺 𑀔𑀬𑀁 𑀕𑀘𑁆𑀙𑀢𑀺, 𑀏𑀯𑀁 𑀧𑀭𑁂𑀳𑀺 𑀧𑀓𑁆𑀓𑀪𑁂𑀲𑀚𑁆𑀚𑀢𑁂𑀮𑀸𑀤𑀺𑀧𑀺 𑀬𑀸𑀯𑀓𑀸𑀮𑀺𑀓𑀫𑁂𑀯 𑀲𑀺𑀬𑀸, 𑀦 𑀘 𑀢𑀫𑁆𑀧𑀺 𑀬𑀼𑀢𑁆𑀢𑀁 𑀤𑀥𑀺𑀆𑀤𑀺𑀔𑀬𑀓𑀭𑀡𑀢𑁆𑀣𑀁 ‘‘𑀧𑀼𑀦 ¶ 𑀧𑀘𑀺𑀢𑁆𑀯𑀸 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀫𑀳𑀸𑀲𑀻𑀯𑀢𑁆𑀣𑁂𑀭𑀯𑀸𑀤𑁂 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀅𑀥𑁄𑀢𑀫𑁆𑀧𑀺 𑀦𑀯𑀦𑀻𑀢𑀁 𑀢𑀤𑀳𑀼𑀧𑀺 𑀧𑀼𑀦𑀤𑀺𑀯𑀲𑀸𑀤𑀻𑀲𑀼𑀧𑀺 𑀧𑀘𑀺𑀢𑀼𑀁, 𑀢𑀡𑁆𑀟𑀼𑀮𑀸𑀤𑀺𑀫𑀺𑀲𑁆𑀲𑀁 𑀲𑀧𑁆𑀧𑀺𑀆𑀤𑀺𑀁 𑀅𑀢𑁆𑀢𑀦𑀸𑀧𑀺 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀼𑀦 𑀢𑀓𑁆𑀓𑀸𑀤𑀺𑀔𑀬𑀢𑁆𑀣𑀁 𑀧𑀘𑀺𑀢𑀼𑀜𑁆𑀘 𑀯𑀝𑁆𑀝𑀢𑀺.

𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀧𑀘𑁆𑀘𑀫𑀸𑀦𑀓𑁆𑀔𑀡𑁂 𑀲𑀫𑁆𑀪𑀺𑀦𑁆𑀦𑀭𑀲𑀲𑁆𑀲 𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑁂𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀓𑀸𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀢𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀢𑁂𑀦𑁂𑀯 ‘‘𑀏𑀢𑁆𑀢𑀸𑀯𑀢𑀸 𑀳𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 ¶ 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀧𑀦 𑀔𑀻𑀭𑀸𑀤𑀺𑀦𑀸 𑀆𑀫𑀺𑀲𑁂𑀦 𑀦𑀯𑀦𑀻𑀢𑀸𑀤𑀺𑀁 𑀫𑀺𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀸 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀧𑀓𑁆𑀓𑀢𑁂𑀮𑀸𑀤𑀺𑀪𑁂𑀲𑀚𑁆𑀚𑀁 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺 𑀢𑀢𑁆𑀣 𑀧𑀯𑀺𑀝𑁆𑀞𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸𑀪𑀸𑀯𑀸. 𑀬𑀁 𑀧𑀦 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀪𑁂𑀲𑀚𑁆𑀚𑁂𑀳𑀺 𑀲𑀤𑁆𑀥𑀺𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀔𑀻𑀭𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀢𑁂𑀮𑀸𑀤𑀺𑀓𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑁂𑀯 𑀧𑀓𑁆𑀓𑀫𑁆𑀧𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀲𑀦𑁆𑀦𑀺𑀥𑀺𑀧𑀺 𑀦 𑀳𑁄𑀢𑀺 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀔𑀻𑀭𑀸𑀤𑀺𑀫𑀺𑀲𑁆𑀲𑀸𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀲𑀫𑁆𑀪𑀺𑀦𑁆𑀦𑀭𑀲𑀢𑀸𑀬 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀧𑀢𑁆𑀢𑀺𑀢𑁄, 𑀲𑀘𑁂 𑀧𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀳𑁂𑀯, 𑀅𑀜𑁆𑀜𑁂𑀳𑀺 𑀯𑀸 𑀧𑀓𑁆𑀓𑀢𑁂𑀮𑀸𑀤𑀻𑀲𑀼𑀧𑀺 𑀆𑀫𑀺𑀲𑀭𑀲𑁄 𑀧𑀜𑁆𑀜𑀸𑀬𑀢𑀺, 𑀢𑀁 𑀬𑀸𑀯𑀓𑀸𑀮𑀺𑀓𑀁𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀓𑀣𑀸𑀫𑀕𑁆𑀕𑁄 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁨𑁨) 𑀆𑀕𑀢𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁨𑁨) 𑀧𑀦 ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀓𑀸𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄𑀧𑀺 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀲𑀩𑁆𑀪𑀸𑀯𑀫𑁆𑀧𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘𑀦𑀺𑀩𑁆𑀩𑀝𑁆𑀝𑀺𑀢𑀲𑀧𑁆𑀧𑀺 𑀯𑀸 𑀦𑀯𑀦𑀻𑀢𑀁 𑀯𑀸 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀆𑀕𑀢𑁄.

𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸. 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀸𑀦𑀺 𑀔𑀻𑀭𑀤𑀥𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀕𑀳𑀺𑀢𑀦𑁆𑀢𑀺 𑀢𑀡𑁆𑀟𑀼𑀮𑀸𑀤𑀺𑀯𑀺𑀕𑀫𑀢𑁆𑀣𑀁 𑀧𑀼𑀦 𑀧𑀘𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘 𑀞𑀧𑀺𑀢𑀪𑁂𑀲𑀚𑁆𑀚𑁂𑀳𑀻𑀢𑀺 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀬𑀸𑀯𑀚𑀻𑀯𑀺𑀓𑀪𑁂𑀲𑀚𑁆𑀚𑁂𑀳𑀺, 𑀏𑀢𑁂𑀦 𑀢𑁂𑀳𑀺 𑀬𑀼𑀢𑁆𑀢𑀫𑁆𑀧𑀺 𑀲𑀧𑁆𑀧𑀺𑀆𑀤𑀺 𑀅𑀢𑀺𑀭𑁂𑀓𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀤𑁆𑀤𑀮𑀺𑀲𑀫𑀬𑁂𑀢𑀺 𑀯𑀲𑁆𑀲𑀓𑀸𑀮𑀲𑀫𑀬𑁂, 𑀅𑀦𑀸𑀢𑀧𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸 𑀢𑀡𑁆𑀟𑀼𑀮𑀸𑀤𑀻𑀦𑀺 𑀦 𑀧𑀘𑁆𑀘𑀦𑁆𑀢𑀺, 𑀢𑀣𑀸 𑀮𑀚𑁆𑀚𑀻𑀬𑁂𑀯 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑁂𑀢𑀻𑀢𑀺 𑀮𑀚𑁆𑀚𑀺𑀲𑀸𑀫𑀡𑁂𑀭𑀕𑁆𑀕𑀳𑀡𑀁. 𑀅𑀧𑀺𑀘 𑀅𑀮𑀚𑁆𑀚𑀺𑀦𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀅𑀪𑀺𑀲𑀗𑁆𑀔𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸𑀧𑀺 𑀏𑀯𑀫𑀸𑀳.

𑁯𑁬. 𑀢𑀺𑀮𑁂 ¶ 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀦𑁆𑀢𑀺 𑀅𑀢𑁆𑀢𑀦𑀸 𑀪𑀚𑁆𑀚𑀸𑀤𑀻𑀦𑀺 𑀅𑀓𑀢𑁆𑀯𑀸 𑀓𑀢𑀢𑁂𑀮𑀁. 𑀢𑁂𑀦𑁂𑀯 ‘‘𑀲𑀸𑀫𑀺𑀲𑀫𑁆𑀧𑀺 ¶ 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀝𑁆𑀝𑀻𑀢𑀢𑁆𑀢𑀸𑀢𑀺 𑀬𑀸𑀯𑀓𑀸𑀮𑀺𑀓𑀢𑁄 𑀯𑀺𑀯𑁂𑀘𑀺𑀢𑀢𑁆𑀢𑀸, 𑀏𑀢𑁂𑀦 𑀏𑀮𑀸𑀅𑀪𑀸𑀯𑀢𑁄 𑀬𑀸𑀯𑀓𑀸𑀮𑀺𑀓𑀢𑁆𑀢𑀸𑀪𑀸𑀯𑀁, 𑀪𑀺𑀓𑁆𑀔𑀼𑀦𑁄 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀡𑁂𑀦 𑀬𑀸𑀯𑀓𑀸𑀮𑀺𑀓𑀢𑁆𑀢𑀼𑀧𑀕𑀫𑀦𑀜𑁆𑀘 𑀤𑀲𑁆𑀲𑁂𑀢𑀺. 𑀉𑀪𑀬𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁂𑀳𑀺 𑀘 𑀓𑀢𑀁.

𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀢𑀺𑀝𑁆𑀞𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀢𑀢𑁂𑀮𑀁 𑀲𑀘𑁂 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀢𑀺𑀝𑁆𑀞𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁.

𑀅𑀘𑁆𑀙𑀯𑀲𑀦𑁆𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄 𑀯𑀲𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀁𑀲𑀤𑀺𑀲𑀸𑀦𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀁𑀬𑁂𑀯 𑀅𑀓𑀧𑁆𑀧𑀺𑀬𑀫𑀁𑀲𑀲𑀢𑁆𑀢𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸, 𑀦 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀫𑀦𑀼𑀲𑁆𑀲𑀸𑀦𑀁 𑀯𑀲𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲’’𑀦𑁆𑀢𑀺. 𑀲𑀁𑀲𑀝𑁆𑀞𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀺𑀢𑀁. 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀢𑀻𑀡𑀺 𑀤𑀼𑀓𑁆𑀓𑀝𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀪𑁄𑀕𑀢𑁆𑀣𑀸𑀬 𑀯𑀺𑀓𑀸𑀮𑁂 𑀧𑀝𑀺𑀕𑁆𑀕𑀳𑀡𑀧𑀘𑀦𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀆𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀏𑀢𑁆𑀣 𑀆𑀧𑀢𑁆𑀢𑀺𑀬𑀸 𑀏𑀯 𑀪𑀯𑀺𑀢𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀭𑀡𑀢𑁄 𑀆𑀳𑀸𑀭𑀢𑁆𑀣𑀸𑀬 𑀯𑀺𑀓𑀸𑀮𑁂 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀁 𑀧𑀝𑀺𑀕𑁆𑀕𑀳𑀡𑁂 𑀯𑀺𑀬. ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀧𑀺 𑀦𑀺𑀧𑀓𑁆𑀓𑀁 𑀲𑀁𑀲𑀝𑁆𑀞𑀜𑁆𑀘 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑁆𑀯𑁂𑀧𑀺 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑀬𑀲𑁆𑀫𑀸 𑀔𑀻𑀭𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀪𑁂𑀲𑀚𑁆𑀚𑀢𑁂𑀮𑁂 𑀓𑀲𑀝𑀁 𑀆𑀫𑀺𑀲𑀕𑀢𑀺𑀓𑀁, 𑀢𑁂𑀦 𑀲𑀳 𑀢𑁂𑀮𑀁 𑀧𑀝𑀺𑀕𑁆𑀕𑀳𑁂𑀢𑀼𑀁, 𑀧𑀘𑀺𑀢𑀼𑀁 𑀯𑀸 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀓𑁆𑀓𑀢𑁂𑀮𑀓𑀲𑀝𑁂 𑀯𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻’’𑀢𑀺. ‘‘𑀲𑀘𑁂 𑀯𑀲𑀸𑀬 𑀲𑀳 𑀧𑀓𑁆𑀓𑀢𑁆𑀢𑀸 𑀦 𑀯𑀝𑁆𑀝𑀢𑀺, 𑀇𑀤𑀁 𑀓𑀲𑁆𑀫𑀸 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸 ‘‘𑀪𑀦𑁆𑀢𑁂…𑀧𑁂… 𑀯𑀝𑁆𑀝𑀢𑀻’’𑀢𑀺 𑀆𑀳𑀁𑀲𑀼, 𑀣𑁂𑀭𑁄 𑀅𑀢𑀺𑀓𑀼𑀓𑁆𑀓𑀼𑀘𑁆𑀘𑀓𑀢𑀸𑀬 ‘‘𑀏𑀢𑀫𑁆𑀧𑀺 𑀆𑀯𑀼𑀲𑁄 𑀦 𑀯𑀝𑁆𑀝𑀢𑀻’’𑀢𑀺 ¶ 𑀆𑀳, 𑀭𑁄𑀕𑀦𑀺𑀕𑁆𑀕𑀳𑀢𑁆𑀣𑀸𑀬 𑀏𑀯 𑀯𑀲𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑁯𑁭. ‘‘𑀫𑀥𑀼𑀓𑀭𑀻𑀳𑀺 𑀫𑀥𑀼𑀫𑀓𑁆𑀔𑀺𑀓𑀸𑀳𑀻𑀢𑀺 𑀇𑀤𑀁 𑀔𑀼𑀤𑁆𑀤𑀓𑀪𑀫𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀏𑀯 𑀯𑀺𑀲𑁂𑀲𑀦’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀤𑀡𑁆𑀟𑀓𑁂𑀲𑀼 𑀫𑀥𑀼𑀓𑀸𑀭𑀺𑀓𑀸 𑀫𑀥𑀼𑀓𑀭𑀺𑀫𑀓𑁆𑀔𑀺𑀓𑀸 𑀦𑀸𑀫, 𑀢𑀸𑀳𑀺 𑀲𑀳 𑀢𑀺𑀲𑁆𑀲𑁄 𑀫𑀥𑀼𑀫𑀓𑁆𑀔𑀺𑀓𑀚𑀸𑀢𑀺𑀬𑁄’’𑀢𑀺 𑀯𑀤𑀦𑁆𑀢𑀺. 𑀪𑀫𑀭𑀫𑀓𑁆𑀔𑀺𑀓𑀸𑀢𑀺 𑀫𑀳𑀸𑀧𑀝𑀮𑀓𑀸𑀭𑀺𑀓𑀸. 𑀲𑀺𑀮𑁂𑀲𑀲𑀤𑀺𑀲𑀦𑁆𑀢𑀺 𑀲𑀼𑀓𑁆𑀔𑀢𑀸𑀬 𑀯𑀸 𑀧𑀓𑁆𑀓𑀢𑀸𑀬 𑀯𑀸 𑀖𑀦𑀻𑀪𑀽𑀢𑀁. 𑀇𑀢𑀭𑀦𑁆𑀢𑀺 𑀢𑀦𑀼𑀓𑀫𑀥𑀼. 𑀫𑀥𑀼𑀧𑀝𑀮𑀦𑁆𑀢𑀺 𑀫𑀥𑀼𑀭𑀳𑀺𑀢𑀁 𑀓𑁂𑀯𑀮𑀁 𑀫𑀥𑀼𑀧𑀝𑀮𑀁. ‘‘𑀲𑀘𑁂 𑀫𑀥𑀼𑀲𑀳𑀺𑀢𑀁 𑀧𑀝𑀮𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀧𑀝𑀮𑀲𑁆𑀲 𑀪𑀸𑀚𑀦𑀝𑁆𑀞𑀸𑀦𑀺𑀬𑀢𑁆𑀢𑀸 𑀫𑀥𑀼𑀦𑁄 ¶ 𑀯𑀲𑁂𑀦 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, ‘‘𑀫𑀥𑀼𑀫𑀓𑁆𑀔𑀺𑀢𑀁 𑀧𑀦 𑀫𑀥𑀼𑀕𑀢𑀺𑀓𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀁 𑀲𑀫𑁂𑀢𑀺.

𑁯𑁮. ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀧𑀸𑀴𑀺𑀬𑀁 (𑀧𑀸𑀘𑀺. 𑁨𑁬𑁦) 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬…𑀧𑁂… 𑀅𑀯𑀢𑁆𑀣𑀼𑀓𑀸 𑀉𑀘𑁆𑀙𑀼𑀯𑀺𑀓𑀢𑀺 ‘𑀨𑀸𑀡𑀺𑀢’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀘𑀦𑀢𑁄 𑀉𑀘𑁆𑀙𑀼𑀭𑀲𑁄𑀧𑀺 𑀦𑀺𑀓𑁆𑀓𑀲𑀝𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀦𑀘𑀺 𑀧𑀦 ‘‘𑀫𑀥𑀼𑀫𑁆𑀳𑀺 𑀘𑀢𑁆𑀢𑀸𑀭𑁄 𑀓𑀸𑀮𑀺𑀓𑀸 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸, 𑀉𑀘𑁆𑀙𑀼𑀫𑁆𑀳𑀺 𑀘𑀸’’𑀢𑀺 𑀯𑀢𑁆𑀯𑀸 ‘‘𑀲𑀫𑀓𑁆𑀔𑀺𑀓𑀡𑁆𑀟𑀁 𑀲𑁂𑀮𑀓𑀁 𑀫𑀥𑀼 𑀬𑀸𑀯𑀓𑀸𑀮𑀺𑀓𑀁, 𑀅𑀦𑁂𑀮𑀓𑀁 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀬𑀸𑀫𑀓𑀸𑀮𑀺𑀓𑀁, 𑀅𑀲𑀫𑁆𑀪𑀺𑀦𑁆𑀦𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀫𑀥𑀼𑀲𑀺𑀢𑁆𑀣𑀁 𑀧𑀭𑀺𑀲𑀼𑀤𑁆𑀥𑀁 𑀬𑀸𑀯𑀚𑀻𑀯𑀺𑀓𑀁, 𑀢𑀣𑀸 𑀉𑀘𑁆𑀙𑀼𑀭𑀲𑁄 𑀲𑀓𑀲𑀝𑁄 𑀬𑀸𑀯𑀓𑀸𑀮𑀺𑀓𑁄, 𑀦𑀺𑀓𑁆𑀓𑀲𑀝𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀬𑀸𑀫𑀓𑀸𑀮𑀺𑀓𑁄, 𑀅𑀲𑀫𑁆𑀪𑀺𑀦𑁆𑀦𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀲𑀼𑀤𑁆𑀥𑀓𑀲𑀝𑀁 𑀬𑀸𑀯𑀚𑀻𑀯𑀺𑀓’’𑀦𑁆𑀢𑀺 𑀘 𑀯𑀢𑁆𑀯𑀸 𑀉𑀢𑁆𑀢𑀭𑀺𑀧𑀺 𑀩𑀳𑀼𑀥𑀸 𑀧𑀧𑀜𑁆𑀘𑀺𑀢𑀁. 𑀢𑀢𑁆𑀣 ‘‘𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀫𑀥𑀼 𑀯𑀸 𑀉𑀘𑁆𑀙𑀼𑀭𑀲𑁄 𑀯𑀸 𑀲𑀓𑀲𑀝𑁄 𑀬𑀸𑀯𑀓𑀸𑀮𑀺𑀓𑁄, 𑀦𑀺𑀓𑁆𑀓𑀲𑀝𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀬𑀸𑀫𑀓𑀸𑀮𑀺𑀓𑁄’’𑀢𑀺 𑀇𑀤𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀤𑀺𑀲𑁆𑀲𑀢𑀺, ‘‘𑀬𑀸𑀯𑀓𑀸𑀮𑀺𑀓𑀁 𑀲𑀫𑀸𑀦𑀁 𑀕𑀭𑀼𑀢𑀭𑀫𑁆𑀧𑀺 𑀫𑀼𑀤𑁆𑀤𑀺𑀓𑀸𑀚𑀸𑀢𑀺𑀭𑀲𑀁 𑀅𑀢𑁆𑀢𑀦𑀸 ¶ 𑀲𑀁𑀲𑀝𑁆𑀞𑀁 𑀮𑀳𑀼𑀓𑀁 𑀬𑀸𑀫𑀓𑀸𑀮𑀺𑀓𑀪𑀸𑀯𑀁 𑀉𑀧𑀦𑁂𑀦𑁆𑀢𑀁 𑀉𑀤𑀓𑀁 𑀮𑀳𑀼𑀢𑀭𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀅𑀢𑁆𑀢𑀦𑀸 𑀲𑀁𑀲𑀝𑁆𑀞𑀁 𑀕𑀭𑀼𑀢𑀭𑀁 𑀬𑀸𑀫𑀓𑀸𑀮𑀺𑀓𑀪𑀸𑀯𑀁 𑀉𑀧𑀦𑁂𑀢𑀻’’𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀲𑁄𑀬𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀉𑀤𑀓𑀲𑀫𑁆𑀪𑀺𑀦𑁆𑀦𑁂𑀦 𑀕𑀭𑀼𑀢𑀭𑀲𑁆𑀲𑀸𑀧𑀺 𑀮𑀳𑀼𑀪𑀸𑀯𑁄𑀧𑀕𑀫𑀦𑀁𑀬𑁂𑀯 𑀤𑀲𑁆𑀲𑀺𑀢𑀁. 𑀧𑀸𑀴𑀺𑀬𑀫𑁆𑀧𑀺 (𑀫𑀳𑀸𑀯. 𑁨𑁮𑁪) 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀕𑀼𑀴𑀁, 𑀅𑀕𑀺𑀮𑀸𑀦𑀲𑁆𑀲 𑀕𑀼𑀴𑁄𑀤𑀓’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀬𑀼𑀢𑁆𑀢𑁄𑀧𑀺 𑀕𑀼𑀴𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀅𑀕𑀺𑀮𑀸𑀦𑀲𑁆𑀲𑀧𑀺 𑀯𑀝𑁆𑀝𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑁄.

𑀬𑀫𑁆𑀧𑀺 𑀘 ‘‘𑀉𑀘𑁆𑀙𑀼 𑀘𑁂, 𑀬𑀸𑀯𑀓𑀸𑀮𑀺𑀓𑁄, 𑀉𑀘𑁆𑀙𑀼𑀭𑀲𑁄 𑀘𑁂, 𑀬𑀸𑀫𑀓𑀸𑀮𑀺𑀓𑁄, 𑀨𑀸𑀡𑀺𑀢𑀁 𑀘𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀘𑁄 𑀘𑁂, 𑀬𑀸𑀯𑀚𑀻𑀯𑀺𑀓𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀉𑀘𑁆𑀙𑀼𑀭𑀲𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀬𑀸𑀫𑀓𑀸𑀮𑀺𑀓𑁄’’𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑀣𑀸𑀯𑀺𑀥𑀲𑁆𑀲 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀅𑀪𑀸𑀯𑀢𑁄 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁, 𑀢𑀢𑁄𑀬𑁂𑀯 𑀘 ‘‘𑀉𑀘𑁆𑀙𑀼𑀭𑀲𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄𑀧𑀺 𑀅𑀲𑀫𑁆𑀪𑀺𑀦𑁆𑀦𑁄𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀬𑁂𑀯𑀸’’𑀢𑀺 𑀓𑁂𑀘𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀭𑀲’’𑀦𑁆𑀢𑀺 𑀏𑀢𑁆𑀣 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀉𑀘𑁆𑀙𑀼𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄’’𑀢𑀺. 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀧𑀭𑀺𑀲𑁆𑀲𑀸𑀯𑀺𑀢𑀁 ¶ 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀓𑀭𑀡𑀲𑀫𑀬𑁂 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸, 𑀓𑀲𑀝𑀁 𑀅𑀧𑀦𑁂𑀢𑁆𑀯𑀸 𑀘 𑀅𑀢𑁆𑀢𑀦𑀸 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀁 𑀲𑀸𑀭𑀢𑁆𑀣𑀤𑀻𑀧𑀦𑀻𑀧𑀸𑀞𑁄 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁨𑁩).

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁨𑁩) 𑀧𑀦 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸𑀢𑀺 𑀦𑀺𑀓𑁆𑀓𑀲𑀝𑀭𑀲𑀲𑁆𑀲𑀸𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀁 𑀤𑀲𑁆𑀲𑁂𑀢𑀺 ‘‘𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀧𑀸𑀴𑀺𑀬𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 ‘‘𑀉𑀘𑁆𑀙𑀼 𑀘𑁂, 𑀬𑀸𑀯𑀓𑀸𑀮𑀺𑀓𑁄, 𑀉𑀘𑁆𑀙𑀼𑀭𑀲𑁄 𑀘𑁂, 𑀬𑀸𑀫𑀓𑀸𑀮𑀺𑀓𑁄, 𑀨𑀸𑀡𑀺𑀢𑀁 𑀘𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀘𑁄 𑀘𑁂, 𑀬𑀸𑀯𑀚𑀻𑀯𑀺𑀓𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀫𑁆𑀩𑀨𑀮𑀭𑀲𑀸𑀤𑀺𑀫𑀺𑀲𑁆𑀲𑀢𑀸𑀬 𑀬𑀸𑀫𑀓𑀸𑀮𑀺𑀓𑀢𑁆𑀢𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀅𑀯𑀺𑀦𑀬𑀯𑀘𑀦𑀢𑁆𑀢𑀸 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺. 𑀢𑁂𑀦𑁂𑀯 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺 𑀢𑀢𑁆𑀣 𑀧𑀯𑀺𑀝𑁆𑀞𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸𑀢𑀺 𑀇𑀤𑀁 𑀕𑀼𑀴𑁂 𑀓𑀢𑁂 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀲𑀝𑀁 𑀧𑀸𑀓𑁂𑀦 𑀲𑀼𑀓𑁆𑀔𑀢𑀸𑀬 𑀬𑀸𑀯𑀚𑀻𑀯𑀺𑀓𑀢𑁆𑀢𑀁 𑀪𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀬𑀸𑀯𑀓𑀸𑀮𑀺𑀓𑀢𑁆𑀢𑁂 𑀳𑀺 𑀲𑀸𑀫𑀁𑀧𑀸𑀓𑁂𑀦 𑀧𑀼𑀭𑁂𑀪𑀢𑁆𑀢𑁂𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀲𑀺𑀬𑀸𑀢𑀺. ‘‘𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀤𑀁 𑀉𑀘𑁆𑀙𑀼𑀭𑀲𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀞𑀺𑀢𑀓𑀲𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦 𑀘 ‘‘𑀅𑀧𑀭𑀺𑀲𑁆𑀲𑀸𑀯𑀺𑀢𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑀛𑀸𑀫𑀉𑀘𑁆𑀙𑀼𑀨𑀸𑀡𑀺𑀢𑀦𑁆𑀢𑀺 𑀅𑀕𑁆𑀕𑀺𑀫𑁆𑀳𑀺 𑀉𑀘𑁆𑀙𑀼𑀁 𑀢𑀸𑀧𑁂𑀢𑁆𑀯𑀸 𑀓𑀢𑀁. 𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀦𑁆𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀧𑀓𑁆𑀓𑀁. 𑀢𑀁 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀲𑀝𑀁 𑀧𑀓𑁆𑀓𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀢𑁆𑀢𑀁 𑀯𑀺𑀚𑀳𑀢𑀻𑀢𑀺 𑀆𑀳 ‘‘𑀢𑀁 𑀬𑀼𑀢𑁆𑀢’’𑀦𑁆𑀢𑀺. 𑀲𑀻𑀢𑁄𑀤𑀓𑁂𑀦 𑀓𑀢𑀦𑁆𑀢𑀺 𑀫𑀥𑀼𑀓𑀧𑀼𑀧𑁆𑀨𑀸𑀦𑀺 𑀲𑀻𑀢𑁄𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀢𑀁. ‘‘𑀅𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀓𑀢’’𑀦𑁆𑀢𑀺 𑀓𑁂𑀘𑀺, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀫𑀥𑀼𑀓𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀏𑀢𑁆𑀣 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀢𑁂𑀮𑀁 𑀓𑀲𑁆𑀫𑀸 𑀯𑀺𑀓𑀸𑀮𑁂 𑀯𑀝𑁆𑀝𑀢𑀻𑀢𑀺 𑀘𑁂? 𑀢𑁂𑀮𑁂 𑀧𑀓𑁆𑀔𑀺𑀢𑁆𑀢𑀁 𑀔𑀻𑀭𑀁 𑀢𑁂𑀮𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀁 𑀧𑀦 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀔𑀻𑀭𑀪𑀸𑀯𑀁 𑀕𑀡𑁆𑀳𑀸𑀢𑀻𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀁. 𑀬𑀤𑀺 𑀏𑀯𑀁 𑀔𑀡𑁆𑀟𑀲𑀓𑁆𑀔𑀭𑀫𑁆𑀧𑀺 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀓𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀔𑀡𑁆𑀟𑀲𑀓𑁆𑀔𑀭𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀔𑀻𑀭𑀚𑀮𑁆𑀮𑀺𑀓𑀦𑁆𑀢𑀺 𑀔𑀻𑀭𑀨𑁂𑀡𑀁.

𑁯𑁯. ‘‘𑀫𑀥𑀼𑀓𑀧𑀼𑀧𑁆𑀨𑀁 𑀧𑀦𑀸’’𑀢𑀺𑀆𑀤𑀺 𑀬𑀸𑀯𑀓𑀸𑀮𑀺𑀓𑀭𑀽𑀧𑁂𑀦 𑀞𑀺𑀢𑀲𑁆𑀲𑀸𑀧𑀺 𑀅𑀯𑀝𑁆𑀝𑀦𑀓𑀁 𑀫𑁂𑀭𑀬𑀩𑀻𑀚𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀆𑀳𑀸𑀭𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀺 𑀏𑀢𑀸𑀦𑀺 𑀓𑀲𑁆𑀫𑀸 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀘𑁄𑀤𑀦𑀸𑀧𑀭𑀺𑀳𑀸𑀭𑀸𑀬 𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑀧𑁆𑀧𑀲𑀗𑁆𑀕𑁂𑀦 ¶ 𑀲𑀩𑁆𑀩𑀸𑀦𑀺𑀧𑀺 𑀑𑀤𑀺𑀲𑁆𑀲𑀓𑀸𑀦𑀺 ¶ 𑀏𑀓𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀯𑀺𑀥𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩). 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑁂 𑀧𑀦 𑀢𑀁 𑀦 𑀯𑀼𑀢𑁆𑀢𑀁, ‘‘𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀺𑀢𑀪𑁂𑀲𑀚𑁆𑀚𑀸𑀦𑀺 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀲𑀢𑀺 𑀧𑀘𑁆𑀘𑀬𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺, 𑀦 𑀆𑀳𑀸𑀭𑀢𑁆𑀣𑀸𑀬 𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑁂𑀲𑀽𑀢𑀺 𑀫𑀳𑀸𑀤𑁆𑀯𑀸𑀭𑀲𑁆𑀲 𑀯𑀸𑀢𑀧𑀸𑀦𑀸𑀦𑀜𑁆𑀘 𑀓𑀯𑀸𑀝𑀨𑀮𑀓𑁂𑀲𑀼. 𑀓𑀲𑀸𑀯𑁂 𑀧𑀓𑁆𑀔𑀺𑀢𑁆𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀧𑀭𑀺𑀘𑁆𑀘𑀚𑀦𑁆𑀢𑀻𑀢𑀺 ‘‘𑀓𑀲𑀸𑀯𑁂…𑀧𑁂… 𑀫𑀓𑁆𑀔𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀖𑀼𑀡𑀧𑀸𑀡𑀓𑀸𑀤𑀺𑀧𑀭𑀺𑀳𑀸𑀭𑀢𑁆𑀣𑀁 𑀫𑀓𑁆𑀔𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀝𑁆𑀞𑁂𑀢𑀻𑀢𑀺 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀦 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀧𑁆𑀧𑀺𑀜𑁆𑀘 𑀢𑁂𑀮𑀜𑁆𑀘 𑀯𑀲𑀜𑁆𑀘 𑀫𑀼𑀤𑁆𑀥𑀦𑀺 𑀢𑁂𑀮𑀁 𑀯𑀸 𑀅𑀩𑁆𑀪𑀜𑁆𑀚𑀦𑀁 𑀯𑀸’’𑀢𑀺𑀆𑀤𑀺, 𑀏𑀯𑀁 𑀧𑀭𑀺𑀪𑁄𑀕𑁂 𑀅𑀦𑀧𑁂𑀓𑁆𑀔𑀢𑀸𑀬 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀓𑀸𑀮𑀺𑀓𑁂𑀲𑀼 𑀅𑀦𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀬𑀫𑁂𑀧𑀺 𑀧𑀝𑀺𑀕𑁆𑀕𑀳𑀡𑀁 𑀯𑀺𑀚𑀳𑀢𑀻𑀢𑀺 𑀇𑀤𑀫𑁆𑀧𑀺 𑀯𑀺𑀲𑀼𑀁 𑀏𑀓𑀁 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄𑀢𑀺 𑀏𑀢𑁆𑀣 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀤𑀺𑀦𑁆𑀦𑀢𑁆𑀢𑀸 𑀲𑀬𑀫𑁆𑀧𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑀣𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺 𑀧𑀭𑀲𑀦𑁆𑀢𑀓𑀪𑀸𑀯𑀢𑁄, 𑀏𑀯𑀫𑀺𑀤𑀫𑁆𑀧𑀺 𑀅𑀯𑀺𑀪𑀢𑁆𑀢𑀢𑁆𑀢𑀸 𑀉𑀪𑀬𑀲𑀸𑀥𑀸𑀭𑀡𑀫𑁆𑀧𑀺 𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀧𑀝𑀺𑀕𑁆𑀕𑀳𑀺𑀢𑀲𑀧𑁆𑀧𑀺𑀆𑀤𑀻𑀦𑀁 𑀧𑀭𑀺𑀪𑁄𑀕𑀲𑁆𑀲 𑀲𑀢𑁆𑀢𑀸𑀳𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. ‘‘𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑁬𑁨𑁩) 𑀳𑀺 𑀯𑀼𑀢𑁆𑀢𑀁.

‘‘𑀆𑀯𑀼𑀲𑁄 ¶ 𑀇𑀫𑀁 𑀢𑁂𑀮𑀁 𑀲𑀢𑁆𑀢𑀸𑀳𑀫𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯 𑀧𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀲 𑀆𑀧𑀢𑁆𑀢𑀻𑀢𑀺 ‘‘𑀧𑀞𑀫𑀁 𑀢𑀸𑀯 𑀉𑀪𑀺𑀦𑁆𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀤𑀸𑀦𑀺 𑀧𑀦 𑀏𑀓𑁂𑀦 𑀇𑀢𑀭𑀲𑁆𑀲 𑀯𑀺𑀲𑁆𑀲𑀝𑁆𑀞𑀪𑀸𑀯𑀢𑁄 𑀉𑀪𑀬𑀲𑀸𑀥𑀸𑀭𑀡𑀢𑀸 𑀦𑀢𑁆𑀣𑀻𑀢𑀺 𑀯𑀺𑀪𑀢𑁆𑀢𑀲𑀤𑀺𑀲𑀁 𑀳𑀼𑀢𑁆𑀯𑀸 𑀞𑀺𑀢𑀁, 𑀢𑀲𑁆𑀫𑀸 𑀏𑀢𑁆𑀣 𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀏𑀓𑀲𑁆𑀲 𑀆𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀓𑀺𑀁 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀆𑀧𑀢𑁆𑀢𑀺, 𑀉𑀤𑀸𑀳𑀼 𑀬𑀲𑁆𑀲 𑀲𑀦𑁆𑀢𑀓𑀁 𑀚𑀸𑀢𑀁, 𑀢𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀢𑀺. 𑀦𑀺𑀲𑁆𑀲𑀝𑁆𑀞𑀪𑀸𑀯𑀢𑁄𑀬𑁂𑀯 𑀘 𑀇𑀥 ‘‘𑀅𑀯𑀺𑀪𑀢𑁆𑀢𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀁 𑀅𑀯𑀢𑁆𑀯𑀸 ‘‘𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀇𑀤𑀜𑁆𑀘 ¶ 𑀯𑀺𑀲𑁆𑀲𑀝𑁆𑀞𑀸𑀪𑀸𑀯𑀢𑁄 𑀉𑀪𑀬𑀲𑀸𑀥𑀸𑀭𑀡𑀢𑀁 𑀧𑀳𑀸𑀬 𑀏𑀓𑀲𑁆𑀲 𑀲𑀦𑁆𑀢𑀓𑀁 𑀳𑁄𑀦𑁆𑀢𑀫𑁆𑀧𑀺 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀢𑁄 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀚𑀸𑀢𑀁, 𑀢𑀲𑁆𑀫𑀸 𑀧𑀭𑀲𑀦𑁆𑀢𑀓𑀧𑀝𑀺𑀕𑁆𑀕𑀳𑀡𑁂 𑀯𑀺𑀬 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀝𑀺𑀕𑁆𑀕𑀳𑀡𑀧𑀘𑁆𑀘𑀬𑀸 𑀦𑀢𑁆𑀣𑀺 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 ‘‘𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸’’𑀢𑀺 𑀯𑀘𑀦𑀢𑁄 𑀅𑀯𑀺𑀲𑁆𑀲𑀚𑁆𑀚𑀺𑀢𑁂 𑀲𑀢𑀺 𑀅𑀯𑀺𑀪𑀢𑁆𑀢𑁂𑀧𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀯𑀺𑀪𑀢𑁆𑀢𑀪𑀸𑀯𑀢𑁄𑀬𑁂𑀯 𑀅𑀦𑀸𑀧𑀢𑁆𑀢𑀺𑀬𑀸 𑀲𑀺𑀤𑁆𑀥𑀢𑁆𑀢𑀸. 𑀲𑀘𑁂 𑀧𑀦 𑀇𑀢𑀭𑁄 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀢𑁆𑀢𑀦𑁄 𑀪𑀸𑀕𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀺𑀬𑀸 𑀆𑀧𑀢𑁆𑀢𑀺 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀲𑀦𑁆𑀢𑀓𑀪𑀸𑀯𑀫𑀸𑀧𑀦𑁆𑀦𑀢𑁆𑀢𑀸. ‘‘𑀇𑀢𑀭𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀧𑀺 𑀅𑀜𑁆𑀜𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀲𑀓𑀲𑀦𑁆𑀢𑀓𑁂 𑀯𑀺𑀬 𑀢𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀇𑀫𑀁 𑀧𑀦 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀺𑀢𑁆𑀯𑀸 𑀇𑀢𑁄 𑀅𑀜𑁆𑀜𑀣𑀸 𑀕𑀡𑁆𑀞𑀺𑀧𑀤𑀓𑀸𑀭𑀸𑀤𑀻𑀳𑀺 𑀧𑀧𑀜𑁆𑀘𑀺𑀢𑀁, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁, 𑀇𑀤𑀁 𑀲𑀸𑀭𑀢𑁆𑀣𑀤𑀻𑀧𑀦𑀻𑀯𑀘𑀦𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁨𑁫).

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁨𑁫) 𑀧𑀦 𑁋 𑀲𑀘𑁂 𑀤𑁆𑀯𑀺𑀦𑁆𑀦𑀁…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀸𑀞𑁄 𑀕𑀴𑀺𑀢𑁄, 𑀏𑀯𑀁 𑀧𑀦𑁂𑀢𑁆𑀣 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀘𑁂 𑀤𑁆𑀯𑀺𑀦𑁆𑀦𑀁 ¶ 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺. 𑀅𑀜𑁆𑀜𑀣𑀸 𑀧𑀦 𑀲𑀤𑁆𑀤𑀧𑁆𑀧𑀬𑁄𑀕𑁄𑀧𑀺 𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, ‘‘𑀕𑀡𑁆𑀞𑀺𑀧𑀤𑁂𑀧𑀺 𑀘 𑀅𑀬𑀫𑁂𑀯 𑀧𑀸𑀞𑁄 𑀤𑀲𑁆𑀲𑀺𑀢𑁄’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁨𑁫) 𑀯𑀼𑀢𑁆𑀢𑀁. ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀯𑀺𑀪𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 ‘‘𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀯𑀘𑀦𑀢𑁄 𑀯𑀼𑀢𑁆𑀢𑀁. ‘‘𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀦𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀺𑀦𑁆𑀦𑀯𑀢𑁆𑀣𑀼𑀫𑁆𑀳𑀺 𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀯𑀺𑀕𑀢𑀢𑁆𑀢𑁂𑀧𑀺 𑀲𑀓𑀲𑀦𑁆𑀢𑀓𑀢𑀸 𑀯𑀺𑀕𑀢𑀸𑀯 𑀳𑁄𑀢𑀺, 𑀢𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺. ‘‘𑀅𑀢𑁆𑀢𑀦𑀸𑀯 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀁 𑀲𑀓𑀲𑀦𑁆𑀢𑀓𑀢𑁆𑀢𑀜𑁆𑀘𑀸’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦 𑀏𑀓𑁂𑀦. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀸𑀦𑁂 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀯𑀺𑀚𑀳𑀢𑀺, 𑀧𑀭𑀺𑀪𑁄𑀕𑁄𑀧𑁂𑀢𑁆𑀣 𑀯𑀝𑁆𑀝𑀢𑀺, 𑀦 𑀲𑀸𑀧𑁂𑀓𑁆𑀔𑀤𑀸𑀦𑁂 𑀤𑀸𑀦𑀮𑀓𑁆𑀔𑀡𑀸𑀪𑀸𑀯𑀢𑁄. ‘‘𑀯𑀺𑀲𑁆𑀲𑀚𑁆𑀚𑀢𑀻’’𑀢𑀺 𑀏𑀢𑀲𑁆𑀫𑀺𑀜𑁆𑀘 𑀧𑀸𑀴𑀺𑀧𑀤𑁂 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀅𑀦𑀧𑁂𑀓𑁆𑀔𑀢𑀸𑀬 𑀙𑀟𑁆𑀟𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀦𑀧𑁂𑀓𑁆𑀔𑀸 𑀤𑀢𑁆𑀯𑀸’’𑀢𑀺 𑀇𑀤𑀜𑁆𑀘 𑀧𑀝𑀺𑀕𑁆𑀕𑀳𑀡𑀯𑀺𑀚𑀳𑀦𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀧𑀝𑀺𑀕𑁆𑀕𑀳𑀡𑁂 𑀳𑀺 𑀯𑀺𑀚𑀳𑀺𑀢𑁂 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀲𑀬𑀫𑁂𑀯 𑀯𑀝𑁆𑀝𑀺𑀲𑁆𑀲𑀢𑀺, 𑀢𑀩𑁆𑀩𑀺𑀚𑀳𑀦𑀜𑁆𑀘 𑀯𑀢𑁆𑀣𑀼𑀦𑁄 𑀲𑀓𑀲𑀦𑁆𑀢𑀓𑀢𑀸𑀧𑀭𑀺𑀘𑁆𑀘𑀸𑀕𑁂𑀦 𑀳𑁄𑀢𑀻𑀢𑀺. 𑀏𑀢𑁂𑀦 𑀘 𑀯𑀢𑁆𑀣𑀼𑀫𑁆𑀳𑀺 𑀅𑀚𑁆𑀛𑁄𑀳𑀭𑀡𑀸𑀧𑁂𑀓𑁆𑀔𑀸𑀬 𑀲𑀢𑀺 𑀧𑀝𑀺𑀕𑁆𑀕𑀳𑀡𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀲𑀺𑀚𑁆𑀛𑀢𑀺. 𑀇𑀢𑀭𑀣𑀸 𑀳𑀺 ‘‘𑀧𑀝𑀺𑀕𑁆𑀕𑀳𑀡𑁂 𑀅𑀦𑀧𑁂𑀓𑁆𑀔𑁄𑀯 ¶ 𑀧𑀝𑀺𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, ‘‘𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀏𑀓𑀲𑁆𑀲 𑀲𑀦𑁆𑀢𑀓𑀁 𑀅𑀜𑁆𑀜𑁂𑀦 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀦𑁆𑀢𑀺 ‘‘𑀧𑀼𑀦 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀅𑀧𑁂𑀓𑁆𑀔𑀁 𑀅𑀓𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀭𑀺𑀘𑀢𑁆𑀢𑀢𑀁 𑀧𑀭𑀸𑀫𑀲𑀢𑀺. 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 ¶ 𑀦𑀺𑀲𑁆𑀲𑀕𑁆𑀕𑀺𑀬𑀫𑀽𑀮𑀺𑀓𑀸𑀳𑀺 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑁄𑀕𑁂 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀸𑀪𑀲𑁆𑀲 𑀓𑀸𑀬𑀺𑀓𑀧𑀭𑀺𑀪𑁄𑀕𑀸𑀤𑀻𑀲𑀼 𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀸𑀬 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦𑁦. 𑀏𑀯𑀁 𑀘𑀢𑀼𑀓𑀸𑀮𑀺𑀓𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀯𑀺𑀲𑁂𑀲𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀸𑀧𑀳𑁄𑀦𑀓𑁂 𑀕𑁂𑀳𑁂 𑀯𑀼𑀢𑁆𑀢𑀁 𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀦𑁆𑀢𑀓𑀁 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀜𑁆𑀘 𑀏𑀓𑀭𑀢𑁆𑀢𑀫𑁆𑀧𑀺 𑀞𑀧𑀺𑀢𑀁 𑀅𑀦𑁆𑀢𑁄𑀯𑀼𑀢𑁆𑀣𑀁 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀧𑀓𑁆𑀓𑀜𑁆𑀘 𑀅𑀦𑁆𑀢𑁄𑀧𑀓𑁆𑀓𑀁 𑀦𑀸𑀫 𑀳𑁄𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦 𑀬𑀸𑀯𑀚𑀻𑀯𑀺𑀓𑀜𑁆𑀘 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁 𑀯𑀸 𑀬𑀸𑀫𑀓𑀸𑀮𑀺𑀓𑀁 𑀯𑀸 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀡𑁂 𑀢𑀸𑀯 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀭𑀢𑁄 𑀧𑀦 𑀏𑀓𑀫𑁂𑀓𑀲𑁆𑀫𑀺𑀁 𑀅𑀚𑁆𑀛𑁄𑀳𑀸𑀭𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀜𑁆𑀜𑀫𑁆𑀧𑀺 𑀯𑀺𑀲𑁂𑀲𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯𑀓𑀸𑀮𑀺𑀓𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑁆𑀪𑀺𑀦𑁆𑀦𑀭𑀲𑀸𑀦𑀻𑀢𑀺 𑀲𑀁𑀲𑀝𑁆𑀞𑀭𑀲𑀸𑀦𑀺. 𑀤𑀻𑀖𑀓𑀸𑀮𑀸𑀦𑀺 𑀯𑀢𑁆𑀣𑀽𑀦𑀺 𑀭𑀲𑁆𑀲𑀓𑀸𑀮𑁂𑀦 𑀲𑀁𑀲𑀝𑁆𑀞𑀸𑀦𑀺 𑀭𑀲𑁆𑀲𑀓𑀸𑀮𑀫𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀬𑀸𑀯𑀓𑀸𑀮𑀺𑀓𑀁 𑀧𑀦…𑀧𑁂… 𑀢𑀻𑀡𑀺𑀧𑀺 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀻’’𑀢𑀺. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸𑀢𑀺𑀆𑀤𑀻𑀲𑀼 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺, 𑀦 𑀢𑀤𑀳𑀼𑀧𑀘𑁆𑀙𑀸𑀪𑀢𑁆𑀢𑀁, 𑀦 𑀭𑀢𑁆𑀢𑀺𑀬𑀁, 𑀦 𑀤𑀼𑀢𑀺𑀬𑀤𑀺𑀯𑀲𑀸𑀤𑀻𑀲𑀽𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸𑀢𑀺 𑀘𑁂? 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀬𑀸𑀯𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀢𑁆𑀢𑀸𑀢𑀺. 𑀏𑀢𑁆𑀣 𑀘 ‘‘𑀬𑀸𑀯𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀢𑁆𑀢𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦𑀸’’𑀢𑀺 𑀯𑀺𑀲𑁂𑀲𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀬𑀸𑀯𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑁂 𑀲𑀢𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀲𑀫𑁆𑀪𑀺𑀦𑁆𑀦𑀭𑀲’’𑀦𑁆𑀢𑀺 𑀇𑀫𑀺𑀦𑀸 𑀲𑀘𑁂𑀧𑀺 𑀲𑀁𑀲𑀝𑁆𑀞𑀁, 𑀅𑀲𑀫𑁆𑀪𑀺𑀦𑁆𑀦𑀭𑀲𑀁 𑀲𑁂𑀲𑀓𑀸𑀮𑀺𑀓𑀢𑁆𑀢𑀬𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀮𑁂 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺 ¶ . 𑀬𑀸𑀫𑀓𑀸𑀮𑀺𑀓𑁂𑀦𑀸𑀢𑀺 𑀏𑀢𑁆𑀣 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦𑀸’’𑀢𑀺 𑀢𑀢𑀺𑀬𑀦𑁆𑀢𑀯𑀺𑀲𑁂𑀲𑀦𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀧𑀼𑀩𑁆𑀩𑀯𑀸𑀓𑁆𑀬𑀢𑁄 𑀯𑀸 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀁. 𑀢𑀲𑁆𑀲 𑀨𑀮𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑁄𑀢𑁆𑀣𑀓𑁂𑀲𑀼 ¶ 𑀧𑀦 ‘‘𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀧𑀦 𑀇𑀢𑀭𑀤𑁆𑀯𑀬𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀤𑀺𑀲𑁆𑀲𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑀢𑁆𑀣 𑀦𑀢𑁆𑀣𑀺, 𑀢𑀫𑁂𑀯 𑀲𑀼𑀦𑁆𑀤𑀭𑀁, 𑀓𑀲𑁆𑀫𑀸? 𑀤𑀼𑀢𑀺𑀬𑀦𑁆𑀢𑀜𑁆𑀳𑀺 𑀯𑀺𑀲𑁂𑀲𑀦𑀧𑀤𑀁 𑀇𑀢𑀭𑀤𑁆𑀯𑀬𑀁 𑀯𑀺𑀲𑁂𑀲𑁂𑀢𑀺. 𑀢𑀢𑁄 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑁂 𑀲𑀢𑀺 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺, 𑀦 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀸𑀦𑀻𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀲𑁄 𑀦 𑀬𑀼𑀢𑁆𑀢𑁄. 𑀓𑀲𑁆𑀫𑀸? 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀸𑀦𑀁 𑀅𑀲𑀦𑁆𑀦𑀺𑀥𑀺𑀚𑀦𑀓𑀢𑁆𑀢𑀸, ‘‘𑀤𑀻𑀖𑀓𑀸𑀮𑀺𑀓𑀸𑀦𑀺 𑀭𑀲𑁆𑀲𑀓𑀸𑀮𑀺𑀓𑀁 𑀅𑀦𑀼𑀯𑀢𑁆𑀢𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀯𑀺𑀭𑀼𑀤𑁆𑀥𑀢𑁆𑀢𑀸 𑀘, 𑀢𑀲𑁆𑀫𑀸 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀳𑁄𑀢𑀼 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀢𑁆𑀢𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄, 𑀏𑀯𑀜𑁆𑀘 𑀉𑀧𑀭𑀺 𑀯𑀓𑁆𑀔𑀫𑀸𑀦𑁂𑀦 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀧𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑁂𑀦 𑀲𑀫𑀁 𑀪𑀯𑁂𑀬𑁆𑀬.

𑀅𑀧𑀺𑀘 ‘‘𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀧𑀦 𑀇𑀢𑀭𑀤𑁆𑀯𑀬𑀁 𑀢𑀤𑀳𑀼 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀻’’𑀢𑀺 𑀧𑀼𑀩𑁆𑀩𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁 𑀮𑁂𑀔𑀓𑁂𑀳𑀺 𑀅𑀜𑁆𑀜𑁂𑀲𑀼 𑀧𑀸𑀞𑁂𑀲𑀼 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀁 𑀤𑀺𑀲𑁆𑀯𑀸, 𑀇𑀥 𑀢𑀤𑀳𑀼𑀧𑀤𑀢𑁄 𑀧𑀝𑀺𑀕𑁆𑀕𑀳𑀺𑀢𑀧𑀤𑀁 𑀕𑀴𑀺𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀺𑀔𑀺𑀢𑀁 𑀪𑀯𑁂𑀬𑁆𑀬, ‘‘𑀢𑀤𑀳𑀽’’𑀢𑀺 𑀇𑀤𑀁 𑀧𑀦 ‘‘𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸’’𑀢𑀺 𑀧𑀤𑀁 𑀯𑀺𑀲𑁂𑀲𑁂𑀢𑀺, 𑀢𑁂𑀦 𑀬𑀸𑀯 𑀢𑀤𑀳𑀼𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺, 𑀦 𑀤𑀼𑀢𑀺𑀬𑀸𑀳𑀸𑀤𑀺𑀅𑀭𑀼𑀡𑀼𑀕𑁆𑀕𑀫𑀦𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀉𑀧𑀭𑀺𑀧𑀸𑀞𑁂𑀧𑀺 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀧𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦𑀸’’𑀢𑀺 𑀭𑀲𑁆𑀲𑀓𑀸𑀮𑀺𑀓𑀢𑁆𑀣𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀁 𑀯𑀺𑀲𑁂𑀲𑀦𑀧𑀤𑀁 𑀢𑀫𑁂𑀯 𑀯𑀺𑀲𑁂𑀲𑁂𑀢𑀺, 𑀦 𑀤𑀻𑀖𑀓𑀸𑀮𑀺𑀓𑀢𑁆𑀣𑀁 𑀬𑀸𑀯𑀚𑀻𑀯𑀺𑀓𑀧𑀤𑀁 ¶ , 𑀢𑀲𑁆𑀫𑀸 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑁆𑀯𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦𑀸𑀢𑀺𑀆𑀤𑀻𑀲𑀼𑀧𑀺 ‘‘𑀤𑁆𑀯𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀙𑀸𑀳𑀁 𑀯𑀝𑁆𑀝𑀢𑀺, 𑀢𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀧𑀜𑁆𑀘𑀸𑀳𑀁 𑀯𑀝𑁆𑀝𑀢𑀺, 𑀘𑀢𑀽𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀘𑀢𑀼𑀭𑀸𑀳𑀁 𑀯𑀝𑁆𑀝𑀢𑀺, 𑀧𑀜𑁆𑀘𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀢𑀻𑀳𑀁 𑀯𑀝𑁆𑀝𑀢𑀺, 𑀙𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀤𑁆𑀯𑀻𑀳𑀁 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑁂𑀯 𑀯𑀝𑁆𑀝𑀢𑀻’’𑀢𑀺 ¶ 𑀏𑀯𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀲𑁆𑀲𑁂𑀯 𑀅𑀢𑀻𑀢𑀤𑀺𑀯𑀲𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑁂𑀲𑀤𑀺𑀯𑀲𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀸𑀯𑀚𑀻𑀯𑀺𑀓𑀲𑁆𑀲. 𑀦 𑀳𑀺 𑀬𑀸𑀯𑀚𑀻𑀯𑀺𑀓𑀲𑁆𑀲 𑀳𑀸𑀧𑁂𑀢𑀩𑁆𑀩𑁄 𑀅𑀢𑀻𑀢𑀤𑀺𑀯𑀲𑁄 𑀦𑀸𑀫 𑀅𑀢𑁆𑀣𑀺 𑀲𑀢𑀺 𑀧𑀘𑁆𑀘𑀬𑁂 𑀬𑀸𑀯𑀚𑀻𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑁆𑀧𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀁 𑀬𑀸𑀯𑀚𑀻𑀯𑀺𑀓𑀁 𑀅𑀢𑁆𑀢𑀦𑁄 𑀲𑀪𑀸𑀯𑀜𑁆𑀜𑁂𑀯 𑀉𑀧𑀦𑁂𑀢𑀻’’𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀧𑀦 𑀇𑀢𑀭𑀤𑁆𑀯𑀬𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀮𑀺𑀔𑀺𑀢𑀁 𑀧𑀸𑀞𑀁 𑀦𑀺𑀲𑁆𑀲𑀸𑀬 𑀇𑀫𑀲𑁆𑀫𑀺𑀫𑁆𑀧𑀺 𑀧𑀸𑀞𑁂 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀇𑀤𑀫𑁂𑀯 𑀇𑀘𑁆𑀙𑀺𑀢𑀩𑁆𑀩’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀧𑀸𑀞𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀓𑁂𑀲𑀼𑀘𑀺 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀯𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀦𑀬𑀁 𑀅𑀫𑀦𑀲𑀺𑀓𑀭𑁄𑀦𑁆𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑁂𑀲𑀼 ¶ 𑀘𑀢𑀽𑀲𑀼 𑀓𑀸𑀮𑀺𑀓𑁂𑀲𑀼 𑀬𑀸𑀯𑀓𑀸𑀮𑀺𑀓𑀁 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑀸𑀢𑀺𑀓𑁆𑀓𑀫𑁂, 𑀬𑀸𑀫𑀓𑀸𑀮𑀺𑀓𑀁 𑀧𑀘𑁆𑀙𑀺𑀫𑀬𑀸𑀫𑀸𑀢𑀺𑀓𑁆𑀓𑀫𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀓𑀢𑀭𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸𑀬𑀫𑀸𑀳 ‘‘𑀓𑀸𑀮𑀬𑀸𑀫’’𑀇𑀘𑁆𑀘𑀸𑀤𑀺. 𑀢�