𑀢𑀻𑀓𑀸 > 𑀯𑀺𑀦𑀬𑀧𑀺𑀝𑀓 (𑀝𑀻𑀓𑀸) > 𑀯𑀺𑀦𑀬𑀯𑀺𑀦𑀺𑀘𑁆𑀙𑀬-𑀉𑀢𑁆𑀢𑀭𑀯𑀺𑀦𑀺𑀘𑁆𑀙𑀬

MMR Vol 0
VRI Vol 0

Misc. Paragraph

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀓𑀣𑀸

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀓𑀣𑀸

𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀺𑀥𑀸𑀦𑀓𑀣𑀸

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀦𑁆𑀤𑀺𑀢𑁆𑀯𑀸 ¶ ¶ 𑀲𑀺𑀭𑀲𑀸 𑀲𑁂𑀝𑁆𑀞𑀁, 𑀩𑀼𑀤𑁆𑀥𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀪𑀯𑀸𑀪𑀸𑀯𑀓𑀭𑀁 𑀥𑀫𑁆𑀫𑀁, 𑀕𑀡𑀜𑁆𑀘𑁂𑀯 𑀦𑀺𑀭𑀗𑁆𑀕𑀡𑀁.

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀳𑀺𑀢𑀢𑁆𑀣𑀸𑀬 𑀲𑀫𑀸𑀳𑀺𑀢𑁄;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁.

𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀁, 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫𑀁;

𑀧𑀝𑀼𑀪𑀸𑀯𑀓𑀭𑀁 𑀏𑀢𑀁, 𑀧𑀭𑀫𑀁 𑀯𑀺𑀦𑀬𑀓𑁆𑀓𑀫𑁂.

𑀅𑀧𑀸𑀭𑀁 𑀑𑀢𑀭𑀦𑁆𑀢𑀸𑀦𑀁, 𑀲𑀸𑀭𑀁 𑀯𑀺𑀦𑀬𑀲𑀸𑀕𑀭𑀁;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀦𑀸𑀯𑀸𑀪𑀽𑀢𑀁 𑀫𑀦𑁄𑀭𑀫𑀁.

𑀢𑀲𑁆𑀫𑀸 𑀯𑀺𑀦𑀬𑀦𑀽𑀧𑀸𑀬𑀁, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁;

𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀯𑀤𑀢𑁄 𑀫𑁂 𑀦𑀺𑀩𑁄𑀥𑀣.

𑀢𑀺𑀯𑀺𑀥𑁂 ¶ ¶ 𑀢𑀺𑀮𑀫𑀢𑁆𑀢𑀫𑁆𑀧𑀺, 𑀫𑀕𑁆𑀕𑁂 𑀲𑁂𑀯𑀦𑀘𑁂𑀢𑀦𑁄;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑁄, 𑀅𑀮𑁆𑀮𑁄𑀓𑀸𑀲𑁂 𑀧𑀭𑀸𑀚𑀺𑀢𑁄.

𑀧𑀯𑁂𑀲𑀦𑀁 𑀧𑀯𑀺𑀝𑁆𑀞𑀁 𑀯𑀸, 𑀞𑀺𑀢𑀫𑀼𑀤𑁆𑀥𑀭𑀡𑀫𑁆𑀧𑀺 𑀯𑀸;

𑀲𑀲𑀺𑀓𑁆𑀔𑁄 𑀲𑀸𑀤𑀺𑀬𑀦𑁆𑀢𑁄 𑀲𑁄, 𑀞𑀧𑁂𑀢𑁆𑀯𑀸 𑀓𑀺𑀭𑀺𑀬𑀁 𑀘𑀼𑀢𑁄.

𑀲𑀦𑁆𑀣𑀢𑁂𑀦𑀗𑁆𑀕𑀚𑀸𑀢𑁂𑀦, 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁;

𑀫𑀕𑁆𑀕𑀁 𑀧𑀦 𑀧𑀯𑁂𑀲𑁂𑀦𑁆𑀢𑁄, 𑀢𑀣𑁂𑀯𑀸𑀲𑀦𑁆𑀣𑀢𑁂𑀦 𑀘.

𑀉𑀧𑀸𑀤𑀺𑀦𑁆𑀦𑁂𑀦𑀼𑀧𑀸𑀤𑀺𑀦𑁆𑀦𑁂, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸;

𑀖𑀝𑁆𑀝𑀺𑀢𑁂 𑀅𑀦𑀼𑀧𑀸𑀤𑀺𑀦𑁆𑀦𑁂, 𑀲𑀘𑁂 𑀲𑀸𑀤𑀺𑀬𑀢𑁂𑀢𑁆𑀣 𑀲𑁄.

𑀳𑁄𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂, 𑀧𑀯𑀺𑀝𑁆𑀞𑁂 𑀢𑀼 𑀧𑀭𑀸𑀚𑀺𑀢𑁄;

𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲, 𑀤𑀼𑀓𑁆𑀓𑀝𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂.

𑀫𑀢𑁂 𑀅𑀓𑁆𑀔𑀸𑀬𑀺𑀢𑁂 𑀘𑀸𑀧𑀺, 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀧𑀺 𑀘;

𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀳𑁄𑀢𑀺 𑀧𑀸𑀭𑀸𑀚𑀺𑀓𑁄 𑀦𑀭𑁄.

𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀘𑀸𑀧𑀺, 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂𑀧𑀺 𑀘;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀲𑁂𑀲𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸, 𑀔𑀸𑀬𑀺𑀢𑁂𑀧𑀺 𑀲𑀭𑀻𑀭𑀓𑁂;

𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀁 𑀢𑀲𑁆𑀫𑀺𑀁, 𑀲𑁂𑀯𑀢𑁄𑀧𑀺 𑀧𑀭𑀸𑀚𑀬𑁄.

𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂, 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀁;

𑀔𑀸𑀬𑀺𑀢𑀸𑀓𑁆𑀔𑀸𑀬𑀺𑀢𑀁 𑀦𑀸𑀫, 𑀲𑀩𑁆𑀩𑀁 𑀫𑀢𑀲𑀭𑀻𑀭𑀓𑁂.

𑀙𑀺𑀦𑁆𑀤𑀺𑀢𑁆𑀯𑀸 𑀧𑀦 𑀢𑀘𑁆𑀙𑁂𑀢𑁆𑀯𑀸, 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀝𑀺𑀢𑁂 𑀧𑀦;

𑀯𑀡𑀲𑀗𑁆𑀔𑁂𑀧𑀢𑁄 𑀢𑀲𑁆𑀫𑀺𑀁, 𑀲𑁂𑀯𑀁 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑀢𑀢𑁄 ¶ ¶ 𑀫𑁂𑀣𑀼𑀦𑀭𑀸𑀕𑁂𑀦, 𑀧𑀢𑀺𑀢𑀸𑀬 𑀦𑀺𑀫𑀺𑀢𑁆𑀢𑀢𑁄;

𑀢𑀸𑀬𑀁 𑀉𑀧𑀓𑁆𑀓𑀫𑀦𑁆𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀫𑀁𑀲𑀧𑁂𑀲𑀺𑀬𑀁.

𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀺, 𑀫𑀁𑀲𑁂 𑀦𑁆𑀳𑀸𑀭𑀼𑀫𑁆𑀳𑀺 𑀯𑀸 𑀲𑀢𑀺;

𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀚𑀻𑀯𑀫𑀸𑀦𑁂 𑀧𑀭𑀸𑀚𑀺𑀢𑁄.

𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀲𑀼, 𑀯𑀢𑁆𑀣𑀺𑀓𑁄𑀲𑁂 𑀯𑀡𑁂𑀲𑀼 𑀯𑀸;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑁄, 𑀭𑀸𑀕𑀸 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑀅𑀯𑀲𑁂𑀲𑀲𑀭𑀻𑀭𑀲𑁆𑀫𑀺𑀁, 𑀉𑀧𑀓𑀘𑁆𑀙𑀽𑀭𑀼𑀓𑀸𑀤𑀺𑀲𑀼;

𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦𑀁, 𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀺𑀦𑀁;

𑀦𑀸𑀲𑀸𑀲𑀼 𑀯𑀢𑁆𑀣𑀺𑀓𑁄𑀲𑁂𑀲𑀼, 𑀲𑁂𑀯𑀁 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑀢𑀣𑀸 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀁, 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼𑀧𑀺;

𑀅𑀯𑀲𑁂𑀲𑀲𑀭𑀻𑀭𑁂𑀲𑀼, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀢𑁂𑀲𑀁 𑀅𑀮𑁆𑀮𑀲𑀭𑀻𑀭𑁂𑀲𑀼, 𑀫𑀢𑀸𑀦𑀁 𑀲𑁂𑀯𑀢𑁄 𑀧𑀦;

𑀢𑀺𑀯𑀺𑀥𑀸𑀧𑀺 𑀲𑀺𑀬𑀸𑀧𑀢𑁆𑀢𑀺, 𑀔𑁂𑀢𑁆𑀢𑀲𑁆𑀫𑀺𑀁 𑀢𑀺𑀯𑀺𑀥𑁂 𑀲𑀢𑀺.

𑀩𑀳𑀺 𑀫𑁂𑀣𑀼𑀦𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸 𑀧𑀦;

𑀦𑀺𑀫𑀺𑀢𑁆𑀢𑁂𑀦 𑀙𑀼𑀧𑀦𑁆𑀢𑀲𑁆𑀲, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑁂𑀦 𑀫𑀼𑀔𑁂𑀦 𑀯𑀸;

𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸 𑀢𑀲𑁆𑀲, 𑀙𑀼𑀧𑀢𑁄 𑀕𑀭𑀼𑀓𑀁 𑀲𑀺𑀬𑀸.

𑀢𑀣𑁂𑀯𑁄𑀪𑀬𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲𑀧𑀺;

𑀦𑀺𑀫𑀺𑀢𑁆𑀢𑁂𑀦 𑀙𑀼𑀧𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀢𑀼, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸;

𑀣𑀼𑀮𑁆𑀮𑀘𑁆𑀘𑀬𑀁 𑀙𑀼𑀧𑀦𑁆𑀢𑀲𑁆𑀲, 𑀳𑁄𑀢𑀺 𑀫𑁂𑀣𑀼𑀦𑀭𑀸𑀕𑀢𑁄.

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸;

𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀲𑁆𑀲, 𑀙𑀼𑀧𑀦𑁂 𑀤𑀼𑀓𑁆𑀓𑀝𑀁 𑀫𑀢𑀁.

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸, 𑀢𑀫𑀸𑀯𑀝𑁆𑀝𑀓𑀢𑁂 𑀫𑀼𑀔𑁂;

𑀢𑀢𑁆𑀣𑀸𑀓𑀸𑀲𑀕𑀢𑀁 𑀓𑀢𑁆𑀯𑀸, 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀣𑀸 ¶ 𑀘𑀢𑀽𑀳𑀺 𑀧𑀲𑁆𑀲𑁂𑀳𑀺, 𑀇𑀢𑁆𑀣𑀺𑀬𑀸 𑀳𑁂𑀝𑁆𑀞𑀺𑀫𑀢𑁆𑀢𑀮𑀁;

𑀅𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸, 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀉𑀧𑁆𑀧𑀸𑀝𑀺𑀢𑁄𑀝𑁆𑀞𑀫𑀁𑀲𑁂𑀲𑀼 ¶ , 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑁂𑀲𑀼 𑀯𑀸;

𑀤𑀦𑁆𑀢𑁂𑀲𑀼 𑀯𑀸𑀬𑀫𑀦𑁆𑀢𑀲𑁆𑀲, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑀅𑀝𑁆𑀞𑀺𑀲𑀗𑁆𑀖𑀝𑁆𑀝𑀦𑀁 𑀓𑀢𑁆𑀯𑀸, 𑀫𑀕𑁆𑀕𑁂 𑀤𑀼𑀯𑀺𑀥𑀭𑀸𑀕𑀢𑁄;

𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 𑀯𑀸𑀫𑀼𑀢𑁆𑀢𑁂, 𑀯𑀸𑀬𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀇𑀢𑁆𑀣𑀺𑀁 𑀫𑁂𑀣𑀼𑀦𑀭𑀸𑀕𑁂𑀦, 𑀆𑀮𑀺𑀗𑁆𑀕𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀳𑀢𑁆𑀣𑀕𑁆𑀕𑀸𑀳𑀧𑀭𑀸𑀫𑀸𑀲-𑀘𑀼𑀫𑁆𑀩𑀦𑀸𑀤𑀻𑀲𑁆𑀯𑀬𑀁 𑀦𑀬𑁄.

𑀅𑀧𑀤𑁂 𑀅𑀳𑀬𑁄 𑀫𑀘𑁆𑀙𑀸, 𑀓𑀧𑁄𑀢𑀸 𑀤𑁆𑀯𑀺𑀧𑀤𑁂𑀧𑀺 𑀘;

𑀕𑁄𑀥𑀸 𑀘𑀢𑀼𑀧𑁆𑀧𑀤𑁂 𑀳𑁂𑀝𑁆𑀞𑀸, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑁂.

𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀁;

𑀇𑀤𑀫𑀗𑁆𑀕𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑁄.

𑀤𑀼𑀓𑁆𑀓𑀝𑀁 𑀧𑀞𑀫𑀲𑁆𑀲𑁂𑀯, 𑀲𑀸𑀫𑀦𑁆𑀢𑀫𑀺𑀢𑀺 𑀯𑀡𑁆𑀡𑀺𑀢𑀁;

𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀜𑀸𑀢𑀩𑁆𑀩𑀁, 𑀅𑀚𑀸𑀦𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀢𑀣𑁂𑀯𑀸𑀲𑀸𑀤𑀺𑀬𑀦𑁆𑀢𑀲𑁆𑀲, 𑀚𑀸𑀦𑀦𑁆𑀢𑀲𑁆𑀲𑀸𑀤𑀺𑀓𑀫𑁆𑀫𑀺𑀦𑁄.

𑀅𑀯𑁂𑀤𑀺 𑀲𑀼𑀭𑀲𑀫𑁆𑀪𑀯𑀁 𑀲𑀫𑁆𑀪𑀯𑀁;

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀤𑀺𑀬𑀦𑁆𑀢𑁄 ¶ 𑀳𑀭𑀦𑁆𑀢𑁄𑀯-𑀳𑀭𑀦𑁆𑀢𑁄 𑀇𑀭𑀺𑀬𑀸𑀧𑀣𑀁;

𑀯𑀺𑀓𑁄𑀧𑁂𑀦𑁆𑀢𑁄 𑀢𑀣𑀸 𑀞𑀸𑀦𑀸, 𑀘𑀸𑀯𑁂𑀦𑁆𑀢𑁄𑀧𑀺 𑀧𑀭𑀸𑀚𑀺𑀢𑁄.

𑀢𑀢𑁆𑀣 ¶ 𑀦𑀸𑀦𑁂𑀓𑀪𑀡𑁆𑀟𑀸𑀦𑀁, 𑀧𑀜𑁆𑀘𑀓𑀸𑀦𑀁 𑀯𑀲𑀸 𑀧𑀦;

𑀅𑀯𑀳𑀸𑀭𑀸 𑀤𑀲𑁂𑀯𑁂𑀢𑁂, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀲𑀸𑀳𑀢𑁆𑀣𑀸𑀡𑀢𑁆𑀢𑀺𑀓𑁄 𑀘𑁂𑀯, 𑀦𑀺𑀲𑁆𑀲𑀕𑁆𑀕𑁄 𑀅𑀢𑁆𑀣𑀲𑀸𑀥𑀓𑁄;

𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘𑀸𑀢𑀺, 𑀇𑀤𑀁 𑀲𑀸𑀳𑀢𑁆𑀣𑀧𑀜𑁆𑀘𑀓𑀁.

𑀧𑀼𑀩𑁆𑀩𑀲𑀳𑀧𑀬𑁄𑀕𑁄 𑀘, 𑀲𑀁𑀯𑀺𑀤𑀸𑀳𑀭𑀡𑀫𑁆𑀧𑀺 𑀘;

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑁂𑀫𑀺𑀢𑁆𑀢𑀁, 𑀧𑀼𑀩𑁆𑀩𑀬𑁄𑀕𑀸𑀤𑀺𑀧𑀜𑁆𑀘𑀓𑀁.

𑀣𑁂𑀬𑁆𑀬𑀧𑀲𑀬𑁆𑀳𑀧𑀭𑀺𑀓𑀧𑁆𑀧-𑀧𑀝𑀺𑀘𑁆𑀙𑀦𑁆𑀦𑀓𑀼𑀲𑀸𑀤𑀺𑀓𑀸;

𑀅𑀯𑀳𑀸𑀭𑀸 𑀇𑀫𑁂 𑀧𑀜𑁆𑀘, 𑀯𑁂𑀤𑀺𑀢𑀩𑁆𑀩𑀸𑀯 𑀯𑀺𑀜𑁆𑀜𑀼𑀦𑀸.

𑀯𑀢𑁆𑀣𑀼𑀓𑀸𑀮𑀕𑁆𑀖𑀤𑁂𑀲𑁂 𑀘, 𑀧𑀭𑀺𑀪𑁄𑀕𑀜𑁆𑀘 𑀧𑀜𑁆𑀘𑀧𑀺;

𑀜𑀢𑁆𑀯𑀸 𑀏𑀢𑀸𑀦𑀺 𑀓𑀸𑀢𑀩𑁆𑀩𑁄, 𑀧𑀡𑁆𑀟𑀺𑀢𑁂𑀦 𑀯𑀺𑀦𑀺𑀘𑁆𑀙𑀬𑁄.

𑀤𑀼𑀢𑀺𑀬𑀁 𑀯𑀸𑀧𑀺 𑀓𑀼𑀤𑁆𑀤𑀸𑀮𑀁, 𑀧𑀺𑀝𑀓𑀁 𑀧𑀭𑀺𑀬𑁂𑀲𑀢𑁄;

𑀕𑀘𑁆𑀙𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑀬𑁄𑀕𑀢𑁄.

𑀢𑀢𑁆𑀣𑀚𑀸𑀢𑀓𑀓𑀝𑁆𑀞𑀁 𑀯𑀸, 𑀮𑀢𑀁 𑀯𑀸 𑀙𑀺𑀦𑁆𑀤𑀢𑁄 𑀧𑀦;

𑀤𑀼𑀓𑁆𑀓𑀝𑀁 𑀉𑀪𑀬𑀢𑁆𑀣𑀸𑀧𑀺, 𑀯𑀼𑀢𑁆𑀢𑀁 𑀲𑀳𑀧𑀬𑁄𑀕𑀢𑁄.

𑀧𑀣𑀯𑀺𑀁 𑀔𑀡𑀢𑁄 𑀯𑀸𑀧𑀺, 𑀩𑁆𑀬𑀽𑀳𑀢𑁄 𑀧𑀁𑀲𑀼𑀫𑁂𑀯 𑀯𑀸;

𑀆𑀫𑀲𑀦𑁆𑀢𑀲𑁆𑀲 𑀯𑀸 𑀓𑀼𑀫𑁆𑀪𑀺𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀫𑀼𑀔𑁂 𑀧𑀸𑀲𑀁 𑀧𑀯𑁂𑀲𑁂𑀢𑁆𑀯𑀸, 𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸;

𑀩𑀦𑁆𑀥𑀦𑀸𑀦𑀁 𑀯𑀲𑀸 𑀜𑁂𑀬𑁆𑀬𑁄, 𑀞𑀸𑀦𑀪𑁂𑀤𑁄 𑀯𑀺𑀚𑀸𑀦𑀢𑀸.

𑀤𑁆𑀯𑁂 𑀞𑀸𑀦𑀸𑀦𑀺 𑀧𑀦𑁂𑀓𑀲𑁆𑀫𑀺𑀁, 𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸;

𑀯𑀮𑀬𑀁 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀧𑀯𑁂𑀲𑁂𑀢𑁆𑀯𑀸 𑀓𑀢𑀸𑀬 𑀯𑀸.

𑀉𑀤𑁆𑀥𑀭𑀦𑁆𑀢𑀲𑁆𑀲 𑀔𑀸𑀡𑀼𑀁 𑀯𑀸, 𑀙𑀺𑀦𑁆𑀤𑀢𑁄 𑀲𑀗𑁆𑀔𑀮𑀺𑀫𑁆𑀧𑀺 𑀯𑀸;

𑀣𑀼𑀮𑁆𑀮𑀘𑁆𑀘𑀬𑀁 𑀢𑀢𑁄 𑀓𑀼𑀫𑁆𑀪𑀺𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀧𑀞𑀫𑀁 ¶ 𑀧𑀦 𑀓𑀼𑀫𑁆𑀪𑀺𑀁 𑀯𑀸, 𑀉𑀤𑁆𑀥𑀭𑀺𑀢𑁆𑀯𑀸 𑀢𑀣𑀸 𑀧𑀼𑀦;

𑀞𑀸𑀦𑀸 𑀘𑀸𑀯𑁂𑀢𑀺 𑀔𑀸𑀡𑀼𑀁 𑀯𑀸, 𑀲𑀗𑁆𑀔𑀮𑀺𑀁 𑀯𑀸𑀧𑀺 𑀲𑁄 𑀦𑀬𑁄.

𑀇𑀢𑁄 𑀘𑀺𑀢𑁄 𑀘 𑀖𑀁𑀲𑀦𑁆𑀢𑁄, 𑀫𑀽𑀮𑁂 𑀲𑀸𑀭𑁂𑀢𑀺 𑀭𑀓𑁆𑀔𑀢𑀺;

𑀯𑀮𑀬𑀁 𑀔𑁂𑀕𑀢𑀁 𑀢𑀢𑁆𑀣, 𑀓𑀭𑁄𑀦𑁆𑀢𑁄𑀯 𑀧𑀭𑀸𑀚𑀺𑀢𑁄.

𑀚𑀸𑀢𑀁 𑀙𑀺𑀦𑁆𑀤𑀢𑀺 𑀘𑁂 𑀭𑀼𑀓𑁆𑀔𑀁, 𑀤𑀼𑀓𑁆𑀓𑀝𑀁 𑀓𑀼𑀫𑁆𑀪𑀺𑀫𑀢𑁆𑀣𑀓𑁂;

𑀲𑀫𑀻𑀧𑁂 𑀙𑀺𑀦𑁆𑀤𑀢𑁄 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬𑀫𑀢𑀢𑁆𑀣𑀚𑀁.

𑀅𑀦𑁆𑀢𑁄𑀓𑀼𑀫𑁆𑀪𑀺𑀕𑀢𑀁 ¶ 𑀪𑀡𑁆𑀟𑀁, 𑀨𑀦𑁆𑀤𑀸𑀧𑁂𑀢𑀺 𑀲𑀘𑁂 𑀧𑀦;

𑀅𑀧𑀩𑁆𑀬𑀽𑀳𑁂𑀢𑀺 𑀢𑀢𑁆𑀣𑁂𑀯, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑀳𑀭𑀦𑁆𑀢𑁄 𑀓𑀼𑀫𑁆𑀪𑀺𑀬𑀸 𑀪𑀡𑁆𑀟𑀁, 𑀫𑀼𑀝𑁆𑀞𑀺𑀁 𑀙𑀺𑀦𑁆𑀤𑀢𑀺 𑀅𑀢𑁆𑀢𑀦𑁄;

𑀪𑀸𑀚𑀦𑁂 𑀯𑀸 𑀕𑀢𑀁 𑀓𑀢𑁆𑀯𑀸, 𑀳𑁄𑀢𑀺 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄.

𑀳𑀸𑀭𑀁 𑀯𑀸 𑀧𑀦 𑀧𑀸𑀫𑀗𑁆𑀕𑀁, 𑀲𑀼𑀢𑁆𑀢𑀸𑀭𑀼𑀴𑁆𑀳𑀁 𑀢𑀼 𑀓𑀼𑀫𑁆𑀪𑀺𑀬𑀸;

𑀨𑀦𑁆𑀤𑀸𑀧𑁂𑀢𑀺 𑀬𑀣𑀸𑀯𑀢𑁆𑀣𑀼𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀲𑀧𑁆𑀧𑀺𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺, 𑀧𑀺𑀯𑀢𑁄 𑀧𑀸𑀤𑀧𑀽𑀭𑀡𑀁;

𑀏𑀓𑁂𑀦𑁂𑀯 𑀧𑀬𑁄𑀕𑁂𑀦, 𑀧𑀻𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑀓𑀢𑁆𑀯𑀸𑀯 𑀥𑀼𑀭𑀦𑀺𑀓𑁆𑀔𑁂𑀧𑀁, 𑀧𑀺𑀯𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁;

𑀲𑀓𑀮𑀫𑁆𑀧𑀺 𑀘 𑀢𑀁 𑀓𑀼𑀫𑁆𑀪𑀺𑀁, 𑀧𑀺𑀯𑀢𑁄 𑀦 𑀧𑀭𑀸𑀚𑀬𑁄.

𑀲𑀘𑁂 𑀔𑀺𑀧𑀢𑀺 𑀬𑀁 𑀓𑀺𑀜𑁆𑀘𑀺, 𑀪𑀡𑁆𑀟𑀓𑀁 𑀢𑁂𑀮𑀓𑀼𑀫𑁆𑀪𑀺𑀬𑀁;

𑀢𑀁 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁, 𑀥𑀼𑀯𑀁 𑀧𑀺𑀯𑀢𑀺 𑀢𑀸𑀯𑀤𑁂.

𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀯, 𑀣𑁂𑀬𑁆𑀬𑀘𑀺𑀢𑁆𑀢𑁄 𑀯𑀺𑀦𑀲𑁆𑀲𑀢𑀺;

𑀆𑀯𑀺𑀜𑁆𑀚𑁂𑀢𑁆𑀯𑀸𑀧𑀺 𑀯𑀸 𑀓𑀼𑀫𑁆𑀪𑀺𑀁, 𑀢𑁂𑀮𑀁 𑀕𑀸𑀴𑁂𑀢𑀺 𑀘𑁂 𑀢𑀣𑀸.

𑀢𑁂𑀮𑀲𑁆𑀲𑀸𑀓𑀺𑀭𑀡𑀁 𑀜𑀢𑁆𑀯𑀸, 𑀔𑀺𑀢𑁆𑀢𑀁 𑀭𑀺𑀢𑁆𑀢𑀸𑀬 𑀓𑀼𑀫𑁆𑀪𑀺𑀬𑀸;

𑀧𑀻𑀢𑀁 𑀢𑁂𑀮𑀜𑁆𑀘 𑀢𑀁 𑀪𑀡𑁆𑀟𑀁, 𑀉𑀤𑁆𑀥𑀭𑀦𑁆𑀢𑁄𑀯 𑀥𑀁𑀲𑀺𑀢𑁄.

𑀢𑀢𑁆𑀣𑁂𑀯 𑀪𑀺𑀦𑁆𑀤𑀢𑁄 𑀢𑁂𑀮𑀁, 𑀙𑀟𑁆𑀟𑁂𑀦𑁆𑀢𑀲𑁆𑀲 𑀢𑀣𑁂𑀯 𑀘;

𑀛𑀸𑀧𑁂𑀦𑁆𑀢𑀲𑁆𑀲 𑀅𑀪𑁄𑀕𑀁 𑀯𑀸, 𑀓𑀭𑁄𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀞𑀧𑀺𑀢𑀁 ¶ 𑀧𑀢𑁆𑀣𑀭𑀺𑀢𑁆𑀯𑀸 𑀘, 𑀲𑀸𑀝𑀓𑀢𑁆𑀣𑀭𑀡𑀸𑀤𑀺𑀓𑀁;

𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲, 𑀫𑀼𑀢𑁆𑀢𑁂 𑀞𑀸𑀦𑀸 𑀧𑀭𑀸𑀪𑀯𑁄.

𑀑𑀭𑀺𑀫𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞-𑀫𑁄𑀓𑀸𑀲𑀁 𑀧𑀸𑀭𑀺𑀫𑀦𑁆𑀢𑀢𑁄;

𑀧𑀸𑀭𑀸𑀚𑀺𑀓𑀫𑀢𑀺𑀓𑁆𑀓𑀦𑁆𑀢𑁂, 𑀓𑀟𑁆𑀠𑀢𑁄 𑀉𑀚𑀼𑀓𑀫𑁆𑀧𑀺 𑀯𑀸.

𑀧𑀼𑀭𑀢𑁄 𑀫𑀼𑀔𑀢𑀼𑀡𑁆𑀟𑀜𑁆𑀘, 𑀓𑀮𑀸𑀧𑀕𑁆𑀕𑀜𑁆𑀘 𑀧𑀘𑁆𑀙𑀢𑁄;

𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀧𑀓𑁆𑀔𑀦𑁆𑀢𑁄, 𑀳𑁂𑀝𑁆𑀞𑀸 𑀧𑀸𑀤𑀦𑀔𑀸 𑀢𑀣𑀸.

𑀉𑀤𑁆𑀥𑀜𑁆𑀘𑀸𑀧𑀺 ¶ 𑀲𑀺𑀔𑀕𑁆𑀕𑀦𑁆𑀢𑀺, 𑀕𑀕𑀦𑁂 𑀕𑀘𑁆𑀙𑀢𑁄 𑀧𑀦;

𑀫𑁄𑀭𑀲𑁆𑀲 𑀙 𑀧𑀭𑀺𑀘𑁆𑀙𑁂𑀤𑀸, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀪𑀺𑀓𑁆𑀔𑀼 ‘‘𑀲𑀲𑁆𑀲𑀸𑀫𑀺𑀓𑀁 𑀫𑁄𑀭𑀁, 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀔𑁂𑀕𑀢𑀁;

𑀳𑀢𑁆𑀣𑀁 𑀯𑀸𑀧𑀺 𑀧𑀲𑀸𑀭𑁂𑀢𑀺, 𑀧𑀼𑀭𑀢𑁄 𑀯𑀸𑀲𑁆𑀲 𑀢𑀺𑀝𑁆𑀞𑀢𑀺.

𑀫𑁄𑀭𑁄𑀧𑀺 𑀕𑀕𑀦𑁂 𑀧𑀓𑁆𑀔𑁂, 𑀘𑀸𑀭𑁂𑀢𑀺 𑀦 𑀘 𑀕𑀘𑁆𑀙𑀢𑀺;

𑀤𑀼𑀓𑁆𑀓𑀝𑀁 𑀕𑀫𑀦𑀘𑁆𑀙𑁂𑀤𑁂, 𑀆𑀫𑀲𑀦𑁆𑀢𑀲𑁆𑀲 𑀘𑁂𑀯 𑀢𑀁.

𑀞𑀸𑀦𑀸 𑀫𑁄𑀭𑀫𑀫𑁄𑀘𑁂𑀦𑁆𑀢𑁄, 𑀨𑀦𑁆𑀤𑀸𑀧𑁂𑀢𑀺 𑀲𑀘𑁂 𑀧𑀦;

𑀏𑀯𑀁 𑀨𑀦𑁆𑀤𑀸𑀧𑀦𑁂 𑀢𑀲𑁆𑀲, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

𑀅𑀕𑁆𑀕𑀳𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀯𑀸, 𑀳𑀢𑁆𑀣𑁂𑀦 𑀧𑀦 𑀅𑀢𑁆𑀢𑀦𑁄;

𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀫𑁄𑀭𑀁, 𑀲𑀬𑀁 𑀞𑀸𑀦𑀸 𑀘𑀼𑀢𑁄 𑀲𑀺𑀬𑀸.

𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀔𑀕𑁆𑀕𑁂𑀦, 𑀓𑀮𑀸𑀧𑀕𑁆𑀕𑁂𑀦 𑀯𑀸 𑀧𑀦;

𑀓𑀮𑀸𑀧𑀕𑁆𑀕𑁂𑀦 𑀯𑀸 𑀨𑀼𑀝𑁆𑀞𑀁, 𑀫𑀼𑀔𑀢𑀼𑀡𑁆𑀟𑁂𑀦 𑀪𑀺𑀓𑁆𑀔𑀼 𑀘𑁂.

𑀅𑀢𑀺𑀓𑁆𑀓𑀸𑀫𑁂𑀬𑁆𑀬 𑀬𑁄 𑀫𑁄𑀭𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀦𑀸𑀫 𑀲𑁄;

𑀏𑀲𑁂𑀯 𑀘 𑀦𑀬𑁄 𑀧𑀸𑀤-𑀲𑀺𑀔𑀸𑀧𑀓𑁆𑀔𑁂𑀲𑀼 𑀤𑀻𑀧𑀺𑀢𑁄.

𑀕𑀕𑀦𑁂 𑀧𑀦 𑀕𑀘𑁆𑀙𑀦𑁆𑀢𑁄, 𑀓𑀭𑁂 𑀫𑁄𑀭𑁄 𑀦𑀺𑀮𑀻𑀬𑀢𑀺;

𑀢𑀁 𑀓𑀭𑁂𑀦𑁂𑀯 𑀘𑀸𑀭𑁂𑀦𑁆𑀢𑁄, 𑀨𑀦𑁆𑀤𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀲𑀘𑁂 ¶ 𑀕𑀡𑁆𑀳𑀸𑀢𑀺 𑀢𑀁 𑀫𑁄𑀭𑀁, 𑀇𑀢𑀭𑁂𑀦 𑀓𑀭𑁂𑀦 𑀲𑁄;

𑀘𑀸𑀯𑀺𑀢𑀢𑁆𑀢𑀸 𑀧𑀦 𑀞𑀸𑀦𑀸, 𑀪𑀺𑀓𑁆𑀔𑀼 𑀞𑀸𑀦𑀸 𑀘𑀼𑀢𑁄 𑀲𑀺𑀬𑀸.

𑀇𑀢𑀭𑀁 𑀧𑀦 𑀫𑁄𑀭𑀲𑁆𑀲, 𑀉𑀧𑀦𑁂𑀢𑀺 𑀲𑀘𑁂 𑀓𑀭𑀁;

𑀦 𑀤𑁄𑀲𑁄 𑀢𑀢𑁆𑀣 𑀉𑀟𑁆𑀟𑁂𑀢𑁆𑀯𑀸, 𑀲𑀬𑀫𑁂𑀯 𑀦𑀺𑀮𑀻𑀬𑀢𑀺.

𑀤𑀺𑀲𑁆𑀯𑀸 𑀅𑀗𑁆𑀕𑁂 𑀦𑀺𑀮𑀻𑀦𑀁 𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑁄;

𑀧𑀸𑀤𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺, 𑀤𑀼𑀢𑀺𑀬𑁂 𑀘 𑀧𑀭𑀸𑀚𑀬𑁄.

𑀪𑀽𑀫𑀺𑀬𑀁 𑀞𑀺𑀢𑀫𑁄𑀭𑀲𑁆𑀲, 𑀢𑀻𑀡𑀺 𑀞𑀸𑀦𑀸𑀦𑀺 𑀧𑀡𑁆𑀟𑀺𑀢𑁄;

𑀧𑀸𑀤𑀸𑀦𑀜𑁆𑀘 𑀓𑀮𑀸𑀧𑀲𑁆𑀲, 𑀯𑀲𑁂𑀦 𑀧𑀭𑀺𑀤𑀻𑀧𑀬𑁂.

𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺, 𑀫𑁄𑀭𑀁 𑀧𑀣𑀯𑀺𑀢𑁄 𑀧𑀦;

𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀢𑀲𑁆𑀲, 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀙𑀺𑀚𑁆𑀚𑀫𑀸𑀦𑀁 𑀲𑀼𑀯𑀡𑁆𑀡𑀸𑀤𑀺𑀁, 𑀧𑀢𑁆𑀢𑁂 𑀧𑀢𑀢𑀺 𑀘𑁂 𑀧𑀦;

𑀳𑀢𑁆𑀣𑁂𑀦 𑀉𑀤𑁆𑀥𑀭𑀦𑁆𑀢𑀲𑁆𑀲, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀲𑀘𑁂 ¶ 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑀺;

𑀤𑀼𑀢𑀺𑀬𑁂 𑀧𑀤𑀯𑀸𑀭𑀲𑁆𑀫𑀺𑀁, 𑀧𑀸𑀭𑀸𑀚𑀺𑀓𑀫𑀼𑀤𑀻𑀭𑀬𑁂.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀳𑀢𑁆𑀣𑁂 𑀯𑀢𑁆𑀣𑁂𑀯 𑀫𑀢𑁆𑀣𑀓𑁂;

𑀢𑀁 𑀢𑀁 𑀢𑀲𑁆𑀲 𑀪𑀯𑁂 𑀞𑀸𑀦𑀁, 𑀬𑀢𑁆𑀣 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀬𑀁 𑀓𑀺𑀜𑁆𑀘𑀺, 𑀫𑀜𑁆𑀘𑀧𑀻𑀞𑀸𑀤𑀺𑀲𑀼𑀝𑁆𑀞𑀺𑀢𑀁;

𑀆𑀫𑀸𑀲𑀫𑁆𑀧𑀺 𑀅𑀦𑀸𑀫𑀸𑀲𑀁, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀁𑀳𑀭𑀺𑀢𑁆𑀯𑀸 𑀲𑀘𑁂 𑀯𑀁𑀲𑁂, 𑀞𑀧𑀺𑀢𑀁 𑀳𑁄𑀢𑀺 𑀘𑀻𑀯𑀭𑀁;

𑀓𑀢𑁆𑀯𑀸 𑀧𑀼𑀦𑁄𑀭𑀢𑁄 𑀪𑁄𑀕𑀁, 𑀢𑀣𑀸 𑀅𑀦𑁆𑀢𑀜𑁆𑀘 𑀧𑀸𑀭𑀢𑁄.

𑀘𑀻𑀯𑀭𑁂𑀦 𑀨𑀼𑀝𑁆𑀞𑁄𑀓𑀸𑀲𑁄, 𑀞𑀸𑀦𑀁 𑀢𑀲𑁆𑀲 𑀧𑀯𑀼𑀘𑁆𑀘𑀢𑀺;

𑀦 𑀢𑀼 𑀘𑀻𑀯𑀭𑀯𑀁𑀲𑁄 𑀲𑁄, 𑀳𑁄𑀢𑀻𑀢𑀺 𑀲𑀓𑀮𑁄 𑀫𑀢𑁄.

𑀑𑀭𑀺𑀫𑀦𑁆𑀢𑁂𑀦 ¶ 𑀑𑀓𑀸𑀲𑀁, 𑀨𑀼𑀝𑁆𑀞𑀁 𑀢𑀫𑀺𑀢𑀭𑁂𑀦 𑀯𑀸;

𑀇𑀢𑀭𑁂𑀦𑀧𑀺 𑀯𑀸 𑀨𑀼𑀝𑁆𑀞𑀁, 𑀑𑀭𑀺𑀫𑀦𑁆𑀢𑁂𑀦 𑀯𑀸 𑀧𑀼𑀦.

𑀤𑀓𑁆𑀔𑀺𑀡𑀦𑁆𑀢𑁂𑀦 𑀨𑀼𑀝𑁆𑀞𑀁 𑀯𑀸, 𑀯𑀸𑀫𑀦𑁆𑀢𑁂𑀦𑀺𑀢𑀭𑁂𑀦 𑀯𑀸;

𑀯𑀸𑀫𑀦𑁆𑀢𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁, 𑀅𑀢𑀺𑀓𑁆𑀓𑀸𑀫𑀬𑀢𑁄 𑀘𑀼𑀢𑀺.

𑀉𑀤𑁆𑀥𑀁 𑀯𑀸 𑀉𑀓𑁆𑀔𑀺𑀧𑀦𑁆𑀢𑀲𑁆𑀲, 𑀘𑀻𑀯𑀭𑀁 𑀧𑀦 𑀯𑀁𑀲𑀢𑁄;

𑀓𑁂𑀲𑀕𑁆𑀕𑀫𑀢𑁆𑀢𑁂 𑀉𑀓𑁆𑀔𑀺𑀢𑁆𑀢𑁂, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀪𑀯𑁂.

𑀭𑀚𑁆𑀚𑀼𑀓𑁂𑀦 𑀘 𑀩𑀦𑁆𑀥𑀺𑀢𑁆𑀯𑀸, 𑀞𑀧𑀺𑀢𑀁 𑀧𑀦 𑀘𑀻𑀯𑀭𑀁;

𑀣𑀼𑀮𑁆𑀮𑀘𑁆𑀘𑀬𑀁 𑀯𑀺𑀫𑁄𑀘𑁂𑀦𑁆𑀢𑁄, 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀨𑀼𑀲𑁂.

𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀁 𑀯𑀁𑀲𑁂, 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀮𑀬𑀁 𑀙𑀺𑀦𑁆𑀤𑀢𑁄 𑀯𑀸𑀧𑀺, 𑀫𑁄𑀘𑁂𑀦𑁆𑀢𑀲𑁆𑀲𑀧𑁆𑀬𑀬𑀁 𑀦𑀬𑁄.

𑀘𑀻𑀯𑀭𑀲𑁆𑀲 𑀧𑀲𑀸𑀭𑁂𑀢𑁆𑀯𑀸, 𑀞𑀧𑀺𑀢𑀲𑁆𑀲 𑀳𑀺 𑀯𑀁𑀲𑀓𑁂;

𑀲𑀁𑀳𑀭𑀺𑀢𑁆𑀯𑀸 𑀢𑀼 𑀦𑀺𑀓𑁆𑀔𑀺𑀢𑁆𑀢𑁂, 𑀘𑀻𑀯𑀭𑁂 𑀯𑀺𑀬 𑀦𑀺𑀘𑁆𑀙𑀬𑁄.

𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀁, 𑀮𑀕𑁆𑀕𑀺𑀢𑀁 𑀳𑁄𑀢𑀺 𑀪𑀡𑁆𑀟𑀓𑀁;

𑀲𑀺𑀓𑁆𑀓𑀸𑀢𑁄 𑀢𑀁 𑀳𑀭𑀦𑁆𑀢𑁄 𑀯𑀸, 𑀲𑀳 𑀲𑀺𑀓𑁆𑀓𑀸𑀬 𑀯𑀸 𑀘𑀼𑀢𑁄.

𑀓𑀼𑀦𑁆𑀢𑀸𑀤𑀺𑀁 𑀦𑀸𑀕𑀤𑀦𑁆𑀢𑁂𑀲𑀼, 𑀞𑀺𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸;

𑀅𑀕𑁆𑀕𑁂 𑀯𑀸 𑀧𑀦 𑀩𑀼𑀦𑁆𑀤𑁂 𑀯𑀸, 𑀕𑀳𑁂𑀢𑁆𑀯𑀸 𑀧𑀭𑀺𑀓𑀟𑁆𑀠𑀢𑁄.

𑀧𑀸𑀭𑀸𑀚𑀺𑀓𑀁 ¶ 𑀨𑀼𑀝𑁆𑀞𑁄𑀓𑀸𑀲𑀁, 𑀅𑀢𑀺𑀓𑁆𑀓𑀸𑀫𑀬𑀢𑁄 𑀲𑀺𑀬𑀸;

𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲, 𑀓𑁂𑀲𑀕𑁆𑀕𑁂𑀦 𑀧𑀭𑀸𑀚𑀬𑁄.

𑀧𑀸𑀓𑀸𑀭𑀸𑀪𑀺𑀫𑀼𑀔𑁄 𑀞𑀢𑁆𑀯𑀸, 𑀆𑀓𑀟𑁆𑀠𑀢𑀺 𑀲𑀘𑁂 𑀧𑀦;

𑀑𑀭𑀺𑀫𑀦𑁆𑀢𑀨𑀼𑀝𑁆𑀞𑁄𑀓𑀸𑀲-𑀫𑀺𑀢𑀭𑀦𑁆𑀢𑀘𑁆𑀘𑀬𑁂 𑀘𑀼𑀢𑁄.

𑀢𑀣𑁂𑀯 𑀧𑀭𑀢𑁄 𑀢𑀲𑁆𑀲, 𑀧𑁂𑀮𑁆𑀮𑁂𑀦𑁆𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄;

𑀪𑀺𑀢𑁆𑀢𑀺𑀁 𑀧𑀦 𑀘 𑀦𑀺𑀲𑁆𑀲𑀸𑀬, 𑀞𑀧𑀺𑀢𑁂𑀧𑀺 𑀅𑀬𑀁 𑀦𑀬𑁄.

𑀘𑀸𑀮𑁂𑀦𑁆𑀢𑀲𑁆𑀲 𑀘 𑀢𑀸𑀮𑀲𑁆𑀲, 𑀨𑀮𑀁 𑀯𑀢𑁆𑀣𑀼 𑀳𑀺 𑀧𑀽𑀭𑀢𑀺;

𑀬𑁂𑀦𑀲𑁆𑀲 𑀩𑀦𑁆𑀥𑀦𑀸 𑀫𑀼𑀢𑁆𑀢𑁂, 𑀢𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑀁 𑀪𑀯𑁂.

𑀧𑀺𑀡𑁆𑀟𑀺𑀁 ¶ 𑀙𑀺𑀦𑁆𑀤𑀢𑀺 𑀢𑀸𑀮𑀲𑁆𑀲, 𑀲𑀘𑁂 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸;

𑀏𑀲𑁂𑀯 𑀘 𑀦𑀬𑁄 𑀲𑁂𑀲-𑀭𑀼𑀓𑁆𑀔𑀧𑀼𑀧𑁆𑀨𑀨𑀮𑁂𑀲𑀼𑀧𑀺.

𑀕𑀘𑁆𑀙𑀢𑁄 𑀳𑀺 𑀦𑀺𑀥𑀺𑀝𑁆𑀞𑀸𑀦𑀁, 𑀧𑀤𑀯𑀸𑀭𑁂𑀦 𑀤𑀼𑀓𑁆𑀓𑀝𑀁;

𑀉𑀤𑀓𑁂 𑀧𑀦 𑀕𑀫𑁆𑀪𑀻𑀭𑁂, 𑀢𑀣𑀸 𑀦𑀺𑀫𑀼𑀚𑁆𑀚𑀦𑀸𑀤𑀺𑀲𑀼.

𑀢𑀢𑁆𑀣𑀚𑀸𑀢𑀓𑀧𑀼𑀧𑁆𑀨𑁂𑀲𑀼, 𑀬𑁂𑀦 𑀧𑀼𑀧𑁆𑀨𑁂𑀦 𑀧𑀽𑀭𑀢𑀺;

𑀯𑀢𑁆𑀣𑀼 𑀢𑀁 𑀙𑀺𑀦𑁆𑀤𑀢𑁄 𑀧𑀼𑀧𑁆𑀨𑀁, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀯𑀤𑁂.

𑀏𑀓𑀦𑀸𑀴𑀲𑁆𑀲 𑀯𑀸 𑀧𑀲𑁆𑀲𑁂, 𑀯𑀸𑀓𑁄 𑀉𑀧𑁆𑀧𑀮𑀚𑀸𑀢𑀺𑀬𑀸;

𑀦 𑀙𑀺𑀚𑁆𑀚𑀢𑀺 𑀢𑀢𑁄 𑀬𑀸𑀯, 𑀢𑀸𑀯 𑀦𑀁 𑀧𑀭𑀺𑀭𑀓𑁆𑀔𑀢𑀺.

𑀲𑀸𑀫𑀺𑀓𑁂𑀳𑁂𑀯 𑀧𑀼𑀧𑁆𑀨𑁂𑀲𑀼, 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁂𑀲𑀼𑀧𑀺;

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀪𑀸𑀭𑀩𑀤𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀙𑀲𑁆𑀯𑀸𑀓𑀸𑀭𑁂𑀲𑀼 𑀓𑁂𑀦𑀘𑀺;

𑀆𑀓𑀸𑀭𑁂𑀦 𑀲𑀘𑁂 𑀢𑀸𑀦𑀺, 𑀞𑀸𑀦𑀸 𑀘𑀸𑀯𑁂𑀢𑀺 𑀦𑀲𑁆𑀲𑀢𑀺.

𑀞𑀧𑀺𑀢𑀁 𑀧𑀦 𑀧𑀼𑀧𑁆𑀨𑀸𑀦𑀁, 𑀓𑀮𑀸𑀧𑀁 𑀚𑀮𑀧𑀺𑀝𑁆𑀞𑀺𑀬𑀁;

𑀘𑀸𑀮𑁂𑀢𑁆𑀯𑀸 𑀉𑀤𑀓𑀁 𑀧𑀼𑀧𑁆𑀨-𑀝𑁆𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀧𑀭𑀺𑀓𑀧𑁆𑀧𑁂𑀢𑀺 𑀘𑁂 ‘‘𑀏𑀢𑁆𑀣, 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀭𑀓𑁆𑀔𑀢𑀺;

𑀉𑀤𑁆𑀥𑀭𑀦𑁆𑀢𑁄 𑀕𑀢𑀝𑁆𑀞𑀸𑀦𑀸, 𑀪𑀝𑁆𑀞𑁄 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀢𑀁 𑀞𑀸𑀦𑀁, 𑀚𑀮𑀢𑁄 𑀲𑀓𑀮𑀁 𑀚𑀮𑀁;

𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁄 𑀧𑀼𑀧𑁆𑀨𑀁, 𑀉𑀚𑀼𑀫𑀼𑀤𑁆𑀥𑀭𑀢𑁄 𑀧𑀦.

𑀦𑀸𑀴𑀦𑁆𑀢𑁂 ¶ 𑀚𑀮𑀢𑁄 𑀫𑀼𑀢𑁆𑀢-𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀪𑀯𑁂;

𑀅𑀫𑀼𑀢𑁆𑀢𑁂 𑀚𑀮𑀢𑁄 𑀢𑀲𑁆𑀫𑀺𑀁, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

𑀧𑀼𑀧𑁆𑀨𑁂 𑀕𑀳𑁂𑀢𑁆𑀯𑀸 𑀦𑀸𑀫𑁂𑀢𑁆𑀯𑀸, 𑀉𑀧𑁆𑀧𑀸𑀝𑁂𑀢𑀺 𑀲𑀘𑁂 𑀧𑀦;

𑀦 𑀢𑀲𑁆𑀲 𑀉𑀤𑀓𑀁 𑀞𑀸𑀦𑀁, 𑀦𑀝𑁆𑀞𑁄 𑀉𑀧𑁆𑀧𑀸𑀝𑀺𑀢𑀓𑁆𑀔𑀡𑁂.

𑀬𑁄 ¶ 𑀳𑀺 𑀲𑀲𑁆𑀲𑀸𑀫𑀺𑀓𑁂 𑀫𑀘𑁆𑀙𑁂, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑀺;

𑀩𑀴𑀺𑀲𑁂𑀦𑀧𑀺 𑀚𑀸𑀮𑁂𑀦, 𑀳𑀢𑁆𑀣𑁂𑀦 𑀓𑀼𑀫𑀺𑀦𑁂𑀦 𑀯𑀸.

𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀯𑀢𑁆𑀣𑀼, 𑀬𑁂𑀦 𑀫𑀘𑁆𑀙𑁂𑀦 𑀧𑀽𑀭𑀢𑀺;

𑀢𑀲𑁆𑀫𑀺𑀁 𑀉𑀤𑁆𑀥𑀝𑀫𑀢𑁆𑀢𑀲𑁆𑀫𑀺𑀁, 𑀚𑀮𑀸 𑀳𑁄𑀢𑀺 𑀧𑀭𑀸𑀚𑀬𑁄.

𑀞𑀸𑀦𑀁 𑀲𑀮𑀺𑀮𑀚𑀸𑀦𑀜𑁆𑀳𑀺, 𑀓𑁂𑀯𑀮𑀁 𑀲𑀓𑀮𑀁 𑀚𑀮𑀁;

𑀲𑀮𑀺𑀮𑀝𑁆𑀞𑀁 𑀯𑀺𑀫𑁄𑀘𑁂𑀦𑁆𑀢𑁄, 𑀚𑀮𑀸 𑀧𑀸𑀭𑀸𑀚𑀺𑀓𑁄 𑀪𑀯𑁂.

𑀦𑀻𑀭𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀬𑁄, 𑀢𑀻𑀭𑁂 𑀧𑀢𑀢𑀺 𑀯𑀸𑀭𑀺𑀚𑁄;

𑀕𑀡𑁆𑀳𑀢𑁄 𑀢𑀁 𑀧𑀦𑀸𑀧𑀢𑁆𑀢𑀺𑀁, 𑀪𑀡𑁆𑀟𑀕𑁆𑀖𑁂𑀦 𑀯𑀺𑀦𑀺𑀤𑁆𑀤𑀺𑀲𑁂.

𑀫𑀸𑀭𑀡𑀢𑁆𑀣𑀸𑀬 𑀫𑀘𑁆𑀙𑀸𑀦𑀁, 𑀢𑀴𑀸𑀓𑁂 𑀦𑀤𑀺𑀬𑀸𑀧𑀺 𑀯𑀸;

𑀦𑀺𑀦𑁆𑀦𑁂 𑀫𑀘𑁆𑀙𑀯𑀺𑀲𑀁 𑀦𑀸𑀫, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁂 𑀧𑀦.

𑀧𑀘𑁆𑀙𑀸 𑀫𑀘𑁆𑀙𑀯𑀺𑀲𑀁 𑀫𑀘𑁆𑀙𑀸, 𑀔𑀸𑀤𑀺𑀢𑁆𑀯𑀸 𑀧𑀺𑀮𑀯𑀦𑁆𑀢𑀺 𑀘𑁂;

𑀧𑀸𑀭𑀸𑀚𑀺𑀓𑀁 𑀫𑀢𑁂 𑀫𑀘𑁆𑀙𑁂, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄.

𑀧𑀁𑀲𑀼𑀓𑀽𑀮𑀺𑀓𑀲𑀜𑁆𑀜𑀸𑀬, 𑀦 𑀤𑁄𑀲𑁄 𑀓𑁄𑀘𑀺 𑀕𑀡𑁆𑀳𑀢𑁄;

𑀲𑀸𑀫𑀺𑀓𑁂𑀲𑁆𑀯𑀸𑀳𑀭𑀦𑁆𑀢𑁂𑀲𑀼, 𑀪𑀡𑁆𑀟𑀤𑁂𑀬𑁆𑀬𑀫𑀼𑀤𑀻𑀭𑀺𑀢𑀁.

𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑀸 𑀫𑀘𑁆𑀙𑁂, 𑀲𑀘𑁂 𑀬𑀦𑁆𑀢𑀺 𑀦𑀺𑀭𑀸𑀮𑀬𑀸;

𑀕𑀡𑁆𑀳𑀢𑁄 𑀧𑀦 𑀢𑁂 𑀲𑁂𑀲𑁂, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀼𑀓𑁆𑀓𑀝𑀁.

𑀅𑀫𑀢𑁂𑀲𑀼 𑀅𑀦𑀸𑀧𑀢𑁆𑀢𑀺𑀁, 𑀯𑀤𑀦𑁆𑀢𑀺 𑀯𑀺𑀦𑀬𑀜𑁆𑀜𑀼𑀦𑁄;

𑀏𑀲𑁂𑀯 𑀘 𑀦𑀬𑁄 𑀲𑁂𑀲𑁂, 𑀓𑀘𑁆𑀙𑀧𑀸𑀤𑀺𑀫𑁆𑀳𑀺 𑀯𑀸𑀭𑀺𑀚𑁂.

‘‘𑀦𑀸𑀯𑀁 𑀦𑀸𑀯𑀝𑁆𑀞𑀁 𑀯𑀸 𑀪𑀡𑁆𑀟𑀁, 𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺;

𑀧𑀸𑀤𑀼𑀤𑁆𑀥𑀸𑀭𑁂 𑀤𑁄𑀲𑀸 𑀯𑀼𑀢𑁆𑀢𑀸, 𑀪𑀺𑀓𑁆𑀔𑀼𑀲𑁆𑀲𑁂𑀯𑀁 𑀕𑀘𑁆𑀙𑀦𑁆𑀢𑀲𑁆𑀲.

𑀩𑀤𑁆𑀥𑀸𑀬 ¶ 𑀦𑀸𑀯𑀸𑀬 𑀳𑀺 𑀘𑀡𑁆𑀟𑀲𑁄𑀢𑁂;

𑀪𑀺𑀓𑁆𑀔𑀼𑀲𑁆𑀲 ¶ 𑀢𑀲𑁆𑀫𑀺𑀁 𑀫𑀼𑀢𑁆𑀢𑀫𑀢𑁆𑀢𑁂;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀯𑀤𑀦𑁆𑀢𑀺 𑀥𑀻𑀭𑀸.

𑀦𑀺𑀘𑁆𑀘𑀮𑁂 𑀉𑀤𑀓𑁂 𑀦𑀸𑀯-𑀫𑀩𑀦𑁆𑀥𑀦𑀫𑀯𑀝𑁆𑀞𑀺𑀢𑀁;

𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀧𑀲𑁆𑀲𑀢𑁄 𑀯𑀸𑀧𑀺 𑀓𑀟𑁆𑀠𑀢𑁄.

𑀏𑀓𑁂𑀦𑀦𑁆𑀢𑁂𑀦 𑀲𑀫𑁆𑀨𑀼𑀝𑁆𑀞-𑀫𑁄𑀓𑀸𑀲𑀫𑀺𑀢𑀭𑁂𑀦 𑀢𑀁;

𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀸𑀯𑀁, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺, 𑀉𑀤𑀓𑀫𑁆𑀳𑀸 𑀯𑀺𑀫𑁄𑀘𑀺𑀢𑁂;

𑀅𑀥𑁄𑀦𑀸𑀯𑀸𑀢𑀮𑀁 𑀢𑁂𑀦, 𑀨𑀼𑀝𑁆𑀞𑀜𑁆𑀘 𑀫𑀼𑀔𑀯𑀝𑁆𑀝𑀺𑀬𑀸.

𑀩𑀦𑁆𑀥𑀺𑀢𑁆𑀯𑀸 𑀧𑀦 𑀬𑀸 𑀢𑀻𑀭𑁂, 𑀞𑀧𑀺𑀢𑀸 𑀦𑀺𑀘𑁆𑀘𑀮𑁂 𑀚𑀮𑁂;

𑀩𑀦𑁆𑀥𑀦𑀜𑁆𑀘 𑀞𑀺𑀢𑁄𑀓𑀸𑀲𑁄, 𑀞𑀸𑀦𑀁 𑀢𑀲𑁆𑀲𑀸 𑀤𑁆𑀯𑀺𑀥𑀸 𑀫𑀢𑀁.

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀧𑀼𑀩𑁆𑀩𑀁, 𑀩𑀦𑁆𑀥𑀦𑀲𑁆𑀲 𑀯𑀺𑀫𑁄𑀘𑀦𑁂;

𑀧𑀘𑁆𑀙𑀸 𑀓𑁂𑀦𑀘𑀼𑀧𑀸𑀬𑁂𑀦, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀘𑀸𑀯𑁂𑀢𑁆𑀯𑀸 𑀧𑀞𑀫𑀁 𑀞𑀸𑀦𑀸, 𑀧𑀘𑁆𑀙𑀸 𑀩𑀦𑁆𑀥𑀦𑀫𑁄𑀘𑀦𑁂;

𑀏𑀲𑁂𑀯 𑀘 𑀦𑀬𑁄 𑀯𑀼𑀢𑁆𑀢𑁄, 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀉𑀲𑁆𑀲𑀸𑀭𑁂𑀢𑁆𑀯𑀸 𑀦𑀺𑀓𑀼𑀚𑁆𑀚𑀺𑀢𑁆𑀯𑀸, 𑀞𑀧𑀺𑀢𑀸𑀬 𑀣𑀮𑁂 𑀧𑀦;

𑀨𑀼𑀝𑁆𑀞𑁄𑀓𑀸𑀲𑁄𑀯 𑀳𑀺 𑀞𑀸𑀦𑀁, 𑀦𑀸𑀯𑀸𑀬 𑀫𑀼𑀔𑀯𑀝𑁆𑀝𑀺𑀬𑀸.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀦𑀸𑀯𑀸𑀬𑀼𑀓𑁆𑀓𑀼𑀚𑁆𑀚𑀺𑀢𑀸𑀬𑀧𑀺;

𑀞𑀧𑀺𑀢𑀸𑀬𑀧𑀺 𑀦𑀸𑀯𑀸𑀬, 𑀖𑀝𑀺𑀓𑀸𑀦𑀁 𑀢𑀣𑀽𑀧𑀭𑀺.

𑀣𑁂𑀬𑁆𑀬𑀸 ¶ 𑀢𑀺𑀢𑁆𑀣𑁂 𑀞𑀺𑀢𑀁 𑀦𑀸𑀯𑀁, 𑀆𑀭𑀼𑀳𑀺𑀢𑁆𑀯𑀸 𑀲𑀘𑁂 𑀧𑀦;

𑀅𑀭𑀺𑀢𑁆𑀢𑁂𑀦 𑀨𑀺𑀬𑁂𑀦𑀸𑀧𑀺, 𑀧𑀸𑀚𑁂𑀦𑁆𑀢𑀲𑁆𑀲 𑀧𑀭𑀸𑀚𑀬𑁄.

𑀲𑀘𑁂 𑀙𑀢𑁆𑀢𑀁 𑀧𑀡𑀸𑀫𑁂𑀢𑁆𑀯𑀸, 𑀉𑀲𑁆𑀲𑀸𑀧𑁂𑀢𑁆𑀯𑀸𑀯 𑀘𑀻𑀯𑀭𑀁;

𑀮𑀗𑁆𑀓𑀸𑀭𑀲𑀤𑀺𑀲𑀁 𑀓𑀢𑁆𑀯𑀸, 𑀕𑀡𑁆𑀳𑀸𑀧𑁂𑀢𑀺 𑀲𑀫𑀻𑀭𑀡𑀁.

𑀆𑀕𑀫𑁆𑀫 ¶ 𑀩𑀮𑀯𑀸 𑀯𑀸𑀢𑁄, 𑀦𑀸𑀯𑀁 𑀳𑀭𑀢𑀺 𑀘𑁂 𑀧𑀦;

𑀯𑀸𑀢𑁂𑀦𑁂𑀯 𑀳𑀝𑀸 𑀦𑀸𑀯𑀸, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

𑀲𑀬𑀫𑁂𑀯 𑀘 𑀬𑀁 𑀓𑀺𑀜𑁆𑀘𑀺, 𑀕𑀸𑀫𑀢𑀺𑀢𑁆𑀣𑀫𑀼𑀧𑀸𑀕𑀢𑀁;

𑀅𑀘𑀸𑀯𑁂𑀦𑁆𑀢𑁄𑀯 𑀢𑀁 𑀞𑀸𑀦𑀸, 𑀓𑀺𑀡𑀺𑀢𑁆𑀯𑀸 𑀘𑁂 𑀧𑀮𑀸𑀬𑀢𑀺.

𑀅𑀯𑀳𑀸𑀭𑁄 𑀦 𑀪𑀺𑀓𑁆𑀔𑀼𑀲𑁆𑀲, 𑀪𑀡𑁆𑀟𑀤𑁂𑀬𑁆𑀬𑀫𑀼𑀤𑀻𑀭𑀺𑀢𑀁;

𑀲𑀬𑀫𑁂𑀯 𑀘 𑀕𑀘𑁆𑀙𑀦𑁆𑀢𑀺𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀬𑀸𑀦𑀁 𑀦𑀸𑀫 𑀭𑀣𑁄 𑀯𑀬𑁆𑀳𑀁, 𑀲𑀓𑀝𑀁 𑀲𑀦𑁆𑀤𑀫𑀸𑀦𑀺𑀓𑀸;

𑀬𑀸𑀦𑀁 𑀅𑀯𑀳𑀭𑀺𑀲𑁆𑀲𑀸𑀫𑀺, 𑀬𑀸𑀦𑀝𑁆𑀞𑀫𑀺𑀢𑀺 𑀯𑀸 𑀧𑀦.

𑀕𑀘𑁆𑀙𑀢𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀁 𑀧𑀭𑀺𑀬𑁂𑀲𑀢𑁄;

𑀞𑀸𑀦𑀸 𑀘𑀸𑀯𑀦𑀬𑁄𑀕𑀲𑁆𑀫𑀺𑀁, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀸𑀚𑀬𑁄.

𑀬𑀸𑀦𑀲𑁆𑀲 𑀤𑀼𑀓𑀬𑀼𑀢𑁆𑀢𑀲𑁆𑀲, 𑀤𑀲 𑀞𑀸𑀦𑀸𑀦𑀺 𑀤𑀻𑀧𑀬𑁂;

𑀬𑀸𑀦𑀁 𑀧𑀸𑀚𑀬𑀢𑁄 𑀢𑀲𑁆𑀲, 𑀦𑀺𑀲𑀻𑀤𑀺𑀢𑁆𑀯𑀸 𑀥𑀼𑀭𑁂 𑀧𑀦.

𑀣𑀼𑀮𑁆𑀮𑀘𑁆𑀘𑀬𑀁 𑀢𑀼 𑀕𑁄𑀡𑀸𑀦𑀁, 𑀧𑀸𑀤𑀼𑀤𑁆𑀥𑀸𑀭𑁂 𑀯𑀺𑀦𑀺𑀤𑁆𑀤𑀺𑀲𑁂;

𑀘𑀓𑁆𑀓𑀸𑀦𑀜𑁆𑀳𑀺 𑀞𑀺𑀢𑁄𑀓𑀸𑀲-𑀫𑀢𑀺𑀓𑁆𑀓𑀦𑁆𑀢𑁂 𑀧𑀭𑀸𑀪𑀯𑁄.

𑀅𑀬𑀼𑀢𑁆𑀢𑀓𑀲𑁆𑀲𑀸𑀧𑀺 𑀘 𑀬𑀸𑀦𑀓𑀲𑁆𑀲, 𑀥𑀼𑀭𑁂𑀦𑀼𑀧𑀢𑁆𑀣𑀫𑁆𑀪𑀦𑀺𑀬𑀁 𑀞𑀺𑀢𑀲𑁆𑀲;

𑀯𑀲𑁂𑀦𑀼𑀧𑀢𑁆𑀣𑀫𑁆𑀪𑀦𑀺𑀘𑀓𑁆𑀓𑀓𑀸𑀦𑀁, 𑀞𑀸𑀦𑀸𑀦𑀺 𑀢𑀻𑀡𑁂𑀯 𑀪𑀯𑀦𑁆𑀢𑀺 𑀢𑀲𑁆𑀲.

𑀢𑀣𑀸 𑀥𑀼𑀭𑁂𑀦 𑀤𑀸𑀭𑀽𑀦𑀁, 𑀉𑀧𑀭𑀺𑀝𑁆𑀞𑀧𑀺𑀢𑀲𑁆𑀲 𑀘;

𑀪𑀽𑀫𑀺𑀬𑀫𑁆𑀧𑀺 𑀥𑀼𑀭𑁂𑀦𑁂𑀯, 𑀢𑀣𑁂𑀯 𑀞𑀧𑀺𑀢𑀲𑁆𑀲 𑀘.

𑀧𑀼𑀭𑀢𑁄 ¶ 𑀧𑀘𑁆𑀙𑀢𑁄 𑀯𑀸𑀧𑀺, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀧𑀦;

𑀣𑀼𑀮𑁆𑀮𑀘𑁆𑀘𑀬𑀁 𑀢𑀼 𑀢𑀺𑀡𑁆𑀡𑀫𑁆𑀧𑀺, 𑀞𑀸𑀦𑀸 𑀘𑀸𑀯𑁂 𑀧𑀭𑀸𑀚𑀬𑁄.

𑀅𑀧𑀦𑁂𑀢𑁆𑀯𑀸𑀦 𑀘𑀓𑁆𑀓𑀸𑀦𑀺, 𑀅𑀓𑁆𑀔𑀸𑀦𑀁 𑀲𑀻𑀲𑀓𑁂𑀳𑀺 𑀢𑀼;

𑀞𑀺𑀢𑀲𑁆𑀲𑀽𑀧𑀭𑀺 𑀤𑀸𑀭𑀽𑀦𑀁, 𑀞𑀸𑀦𑀸𑀦𑀺 𑀤𑁆𑀯𑁂 𑀯𑀺𑀦𑀺𑀤𑁆𑀤𑀺𑀲𑁂.

𑀓𑀟𑁆𑀠𑀦𑁆𑀢𑁄 𑀉𑀓𑁆𑀔𑀺𑀧𑀦𑁆𑀢𑁄 𑀯𑀸, 𑀨𑀼𑀝𑁆𑀞𑁄𑀓𑀸𑀲𑀘𑁆𑀘𑀬𑁂 𑀘𑀼𑀢𑁄;

𑀞𑀧𑀺𑀢𑀲𑁆𑀲 𑀧𑀦𑀜𑁆𑀜𑀲𑁆𑀲, 𑀪𑀽𑀫𑀺𑀬𑀁 𑀬𑀲𑁆𑀲 𑀓𑀲𑁆𑀲𑀘𑀺.

𑀅𑀓𑁆𑀔𑀼𑀤𑁆𑀥𑀻𑀦𑀁 𑀥𑀼𑀭𑀲𑁆𑀲𑀸𑀢𑀺, 𑀧𑀜𑁆𑀘 𑀞𑀸𑀦𑀸𑀦𑀺 𑀤𑀻𑀧𑀬𑁂;

𑀉𑀤𑁆𑀥𑀻𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀢𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀞𑀧𑀺𑀢𑀲𑁆𑀲 ¶ 𑀳𑀺 𑀘𑀓𑁆𑀓𑀲𑁆𑀲, 𑀦𑀸𑀪𑀺𑀬𑀸 𑀧𑀦 𑀪𑀽𑀫𑀺𑀬𑀁;

𑀏𑀓𑀫𑁂𑀯 𑀲𑀺𑀬𑀸 𑀞𑀸𑀦𑀁, 𑀧𑀭𑀺𑀘𑁆𑀙𑁂𑀤𑁄𑀧𑀺 𑀧𑀜𑁆𑀘𑀥𑀸.

𑀨𑀼𑀲𑀺𑀢𑁆𑀯𑀸 𑀬𑀁 𑀞𑀺𑀢𑀁 𑀪𑀽𑀫𑀺𑀁, 𑀦𑁂𑀫𑀺𑀧𑀲𑁆𑀲𑁂𑀦 𑀦𑀸𑀪𑀺𑀬𑀸;

𑀞𑀸𑀦𑀸𑀦𑀺 𑀤𑁆𑀯𑁂 𑀪𑀯𑀦𑁆𑀢𑀲𑁆𑀲, 𑀦𑀝𑁆𑀞𑁄 𑀢𑁂𑀲𑀫𑀢𑀺𑀓𑁆𑀓𑀫𑁂.

𑀤𑀺𑀲𑁆𑀯𑀸 𑀬𑀸𑀦𑀫𑀦𑀸𑀭𑀓𑁆𑀔𑀁, 𑀧𑀝𑀺𑀧𑀦𑁆𑀦𑀁 𑀫𑀳𑀸𑀧𑀣𑁂;

𑀆𑀭𑀼𑀳𑀺𑀢𑁆𑀯𑀸 𑀅𑀘𑁄𑀤𑁂𑀢𑁆𑀯𑀸, 𑀓𑀺𑀡𑀺𑀢𑁆𑀯𑀸 𑀬𑀸𑀢𑀺 𑀯𑀝𑁆𑀝𑀢𑀺.

𑀲𑀻𑀲𑀓𑁆𑀔𑀦𑁆𑀥𑀓𑀝𑁄𑀮𑀫𑁆𑀩-𑀯𑀲𑀸 𑀪𑀸𑀭𑁄 𑀘𑀢𑀼𑀩𑁆𑀩𑀺𑀥𑁄;

𑀢𑀢𑁆𑀣 𑀲𑀻𑀲𑀕𑀢𑀁 𑀪𑀸𑀭𑀁, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀇𑀢𑁄 𑀘𑀺𑀢𑁄 𑀘 𑀖𑀁𑀲𑀦𑁆𑀢𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀬𑁄 𑀧𑀦;

𑀲𑀺𑀭𑀲𑁆𑀫𑀺𑀁𑀬𑁂𑀯 𑀲𑀸𑀭𑁂𑀢𑀺, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑀔𑀦𑁆𑀥𑀁 𑀑𑀭𑁄𑀧𑀺𑀢𑁂 𑀪𑀸𑀭𑁂, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀫𑀢𑀁;

𑀲𑀻𑀲𑀢𑁄 𑀓𑁂𑀲𑀫𑀢𑁆𑀢𑀫𑁆𑀧𑀺, 𑀫𑁄𑀘𑁂𑀦𑁆𑀢𑁄𑀧𑀺 𑀧𑀭𑀸𑀚𑀺𑀢𑁄.

𑀪𑀸𑀭𑀁 𑀧𑀣𑀯𑀺𑀬𑀁 𑀓𑀺𑀜𑁆𑀘𑀺, 𑀞𑀧𑁂𑀢𑁆𑀯𑀸 𑀲𑀼𑀤𑁆𑀥𑀫𑀸𑀦𑀲𑁄;

𑀧𑀘𑁆𑀙𑀸 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀉𑀤𑁆𑀥𑀭𑀦𑁆𑀢𑁄 𑀧𑀭𑀸𑀚𑀺𑀢𑁄.𑁫𑁨𑁨

𑀏𑀢𑁆𑀣 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀲𑁂𑀲𑁂𑀲𑀼𑀧𑀺 𑀅𑀲𑁂𑀲𑀢𑁄;

𑀪𑀸𑀭𑁂𑀲𑀼 𑀫𑀢𑀺𑀲𑀸𑀭𑁂𑀦, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑁄;

𑀧𑀭𑀸𑀚𑁂𑀢𑀺 𑀧𑀭𑀁 𑀥𑀫𑁆𑀫𑀁, 𑀘𑀭𑀦𑁆𑀢𑁄 𑀘𑁂 𑀧𑀭𑀸𑀚𑀺𑀢𑁄.𑁫𑁨𑁨

𑀯𑀺𑀫𑀢𑀺𑀁 𑀚𑀦𑀬𑀦𑁆𑀢𑀲𑁆𑀲, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀧𑀭𑀚𑁆𑀚𑀢𑀺 𑀲𑀬𑀁 𑀥𑀫𑁆𑀫𑀁, 𑀘𑀭𑀦𑁆𑀢𑁄 𑀬𑁄𑀧𑀺 𑀢𑀲𑁆𑀲 𑀘.

𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑁂, ‘‘𑀦 𑀤𑀲𑁆𑀲𑀸𑀫𑀻’’𑀢𑀺 𑀘𑀢𑁆𑀢𑀦𑁄;

𑀧𑀸𑀭𑀸𑀚𑀺𑀓𑀁 𑀪𑀯𑁂 𑀢𑀲𑁆𑀲, 𑀲𑀩𑁆𑀩𑁂𑀲𑀁 𑀓𑀽𑀝𑀲𑀓𑁆𑀔𑀺𑀦𑀁.

𑀯𑀺𑀳𑀸𑀭𑀁 ¶ 𑀲𑀗𑁆𑀖𑀺𑀓𑀁 𑀓𑀺𑀜𑁆𑀘𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀦 𑀕𑀡𑁆𑀳𑀺𑀢𑀼𑀁;

𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀸-𑀪𑀸𑀯𑀢𑁄𑀯 𑀦 𑀲𑀺𑀚𑁆𑀛𑀢𑀺.

𑀲𑀻𑀲𑀸𑀦𑀺 𑀲𑀸𑀮𑀺𑀆𑀤𑀻𑀦𑀁, 𑀦𑀺𑀭𑀼𑀫𑁆𑀪𑀺𑀢𑁆𑀯𑀸𑀦 𑀕𑀡𑁆𑀳𑀢𑁄;

𑀅𑀲𑀺𑀢𑁂𑀦 𑀘 𑀮𑀸𑀬𑀺𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀓𑀭𑁂𑀦 𑀘.

𑀬𑀲𑁆𑀫𑀺𑀁 𑀩𑀻𑀚𑁂𑀧𑀺 𑀯𑀸 𑀯𑀢𑁆𑀣𑀼, 𑀲𑀻𑀲𑁂 𑀧𑀽𑀭𑁂𑀢𑀺 𑀫𑀼𑀝𑁆𑀞𑀺𑀬𑀁;

𑀩𑀦𑁆𑀥𑀦𑀸 𑀫𑁄𑀘𑀺𑀢𑁂 𑀢𑀲𑁆𑀫𑀺𑀁, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀪𑀯𑁂.

𑀅𑀘𑁆𑀙𑀺𑀦𑁆𑀦𑁄 𑀧𑀦 𑀤𑀡𑁆𑀟𑁄 𑀯𑀸, 𑀢𑀘𑁄 𑀯𑀸 𑀅𑀧𑁆𑀧𑀫𑀢𑁆𑀢𑀓𑁄;

𑀯𑀻𑀳𑀺𑀦𑀸𑀴𑀫𑁆𑀧𑀺 𑀯𑀸 𑀤𑀻𑀖𑀁, 𑀅𑀦𑀺𑀓𑁆𑀔𑀦𑁆𑀢𑁄𑀯 𑀭𑀓𑁆𑀔𑀢𑀺.

𑀲𑀘𑁂 ¶ 𑀲𑁄 𑀧𑀭𑀺𑀓𑀧𑁆𑀧𑁂𑀢𑀺, ‘‘𑀫𑀤𑁆𑀤𑀺𑀢𑁆𑀯𑀸 𑀧𑀦𑀺𑀤𑀁 𑀅𑀳𑀁;

𑀧𑀧𑁆𑀨𑁄𑀝𑁂𑀢𑁆𑀯𑀸 𑀇𑀢𑁄 𑀲𑀸𑀭𑀁, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀓𑁆𑀔𑀢𑀺.

𑀫𑀤𑁆𑀤𑀦𑀼𑀤𑁆𑀥𑀭𑀡𑁂 𑀦𑀢𑁆𑀣𑀺, 𑀤𑁄𑀲𑁄 𑀧𑀧𑁆𑀨𑁄𑀝𑀦𑁂𑀧𑀺 𑀯𑀸;

𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁, 𑀓𑀭𑁄𑀦𑁆𑀢𑀲𑁆𑀲 𑀧𑀭𑀸𑀚𑀬𑁄.

𑀚𑀸𑀦𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺, 𑀧𑀣𑀯𑀺𑀁 𑀧𑀭𑀲𑀦𑁆𑀢𑀓𑀁;

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀘𑁂 𑀔𑀻𑀮𑀁, 𑀲𑀗𑁆𑀓𑀸𑀫𑁂𑀢𑀺 𑀧𑀭𑀸𑀚𑀬𑁄.

𑀢𑀜𑁆𑀘 𑀔𑁄 𑀲𑀸𑀫𑀺𑀓𑀸𑀦𑀁 𑀢𑀼, 𑀥𑀼𑀭𑀦𑀺𑀓𑁆𑀔𑁂𑀧𑀦𑁂 𑀲𑀢𑀺;

𑀅𑀦𑀕𑁆𑀖𑀸 𑀪𑀽𑀫𑀺 𑀦𑀸𑀫𑁂𑀲𑀸, 𑀢𑀲𑁆𑀫𑀸 𑀏𑀯𑀫𑀼𑀤𑀻𑀭𑀺𑀢𑀁.

𑀕𑀳𑁂𑀢𑀩𑁆𑀩𑀸 𑀲𑀘𑁂 𑀳𑁄𑀢𑀺, 𑀤𑁆𑀯𑀻𑀳𑀺 𑀔𑀻𑀮𑁂𑀳𑀺 𑀬𑀸 𑀧𑀦;

𑀆𑀤𑁄 𑀣𑀼𑀮𑁆𑀮𑀘𑁆𑀘𑀬𑀁 𑀢𑁂𑀲𑀼, 𑀤𑀼𑀢𑀺𑀬𑁂𑀯 𑀧𑀭𑀸𑀚𑀬𑁄.

𑀜𑀸𑀧𑁂𑀢𑀼𑀓𑀸𑀫𑁄 𑀬𑁄 𑀪𑀺𑀓𑁆𑀔𑀼, ‘‘𑀫𑀫𑁂𑀤𑀁 𑀲𑀦𑁆𑀢𑀓’’𑀦𑁆𑀢𑀺 𑀘;

𑀭𑀚𑁆𑀚𑀼𑀁 𑀯𑀸𑀧𑀺 𑀧𑀲𑀸𑀭𑁂𑀢𑀺, 𑀬𑀝𑁆𑀞𑀺𑀁 𑀧𑀸𑀢𑁂𑀢𑀺 𑀤𑀼𑀓𑁆𑀓𑀝𑀁.

𑀬𑁂𑀳𑀺 𑀤𑁆𑀯𑀻𑀳𑀺 𑀧𑀬𑁄𑀕𑁂𑀳𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀺𑀬𑀸;

𑀆𑀤𑁄 𑀣𑀼𑀮𑁆𑀮𑀘𑁆𑀘𑀬𑀁 𑀢𑁂𑀲𑀼, 𑀤𑀼𑀢𑀺𑀬𑁂 𑀘 𑀧𑀭𑀸𑀚𑀬𑁄.

𑀔𑁂𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑀢𑁆𑀣𑀼𑀝𑁆𑀞𑀲𑁆𑀲 𑀯𑀺𑀦𑀺𑀘𑁆𑀙𑀬𑁄;

𑀕𑀸𑀫𑀝𑁆𑀞𑁂𑀧𑀺 𑀘 𑀯𑀢𑁆𑀢𑀩𑁆𑀩𑀁, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺.

𑀢𑀺𑀡𑀁 ¶ 𑀯𑀸 𑀧𑀦 𑀧𑀡𑁆𑀡𑀁 𑀯𑀸, 𑀮𑀢𑀁 𑀯𑀸 𑀓𑀝𑁆𑀞𑀫𑁂𑀯 𑀯𑀸;

𑀪𑀡𑁆𑀟𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑁄, 𑀕𑀡𑁆𑀳𑀦𑁆𑀢𑁄 𑀢𑀢𑁆𑀣𑀚𑀸𑀢𑀓𑀁.

𑀫𑀳𑀕𑁆𑀖𑁂 𑀧𑀦 𑀭𑀼𑀓𑁆𑀔𑀲𑁆𑀫𑀺𑀁, 𑀙𑀺𑀦𑁆𑀦𑀫𑀢𑁆𑀢𑁂𑀧𑀺 𑀦𑀲𑁆𑀲𑀢𑀺;

𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑁄 𑀭𑀼𑀓𑁆𑀔𑁄, 𑀕𑀳𑁂𑀢𑀩𑁆𑀩𑁄 𑀦 𑀓𑁄𑀘𑀺𑀧𑀺.

𑀙𑀺𑀦𑁆𑀤𑀺𑀢𑁆𑀯𑀸 ¶ 𑀞𑀧𑀺𑀢𑀁 𑀫𑀽𑀮𑁂, 𑀭𑀼𑀓𑁆𑀔𑀫𑀤𑁆𑀥𑀕𑀢𑀁 𑀧𑀦;

‘‘𑀙𑀟𑁆𑀟𑀺𑀢𑁄 𑀲𑀸𑀫𑀺𑀓𑁂𑀳𑀻’’𑀢𑀺, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀮𑀓𑁆𑀔𑀡𑁂 𑀙𑀮𑁆𑀮𑀺𑀬𑁄𑀦𑀤𑁆𑀥𑁂, 𑀦 𑀤𑁄𑀲𑁄 𑀓𑁄𑀘𑀺 𑀕𑀡𑁆𑀳𑀢𑁄;

𑀅𑀚𑁆𑀛𑀸𑀯𑀼𑀢𑁆𑀣𑀁 𑀓𑀢𑀁 𑀯𑀸𑀧𑀺, 𑀯𑀺𑀦𑀲𑁆𑀲𑀦𑁆𑀢𑀜𑁆𑀘 𑀕𑀡𑁆𑀳𑀢𑁄.

𑀬𑁄 𑀘𑀸𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸, 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺;

𑀘𑀺𑀢𑁆𑀢𑁂 𑀘𑀺𑀦𑁆𑀢𑁂𑀦𑁆𑀢𑁄 𑀯𑀸 𑀅𑀜𑁆𑀜𑀁, 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑁂𑀯𑀲𑁆𑀲.

𑀯𑀭𑀸𑀳𑀩𑁆𑀬𑀕𑁆𑀖𑀘𑁆𑀙𑀢𑀭𑀘𑁆𑀙𑀓𑀸𑀤𑀺𑀢𑁄;

𑀉𑀧𑀤𑁆𑀤𑀯𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀬 𑀬𑁄;

𑀢𑀣𑁂𑀯 𑀢𑀁 𑀞𑀸𑀦𑀫𑀢𑀺𑀓𑁆𑀓𑀫𑁂𑀢𑀺 𑀘𑁂;

𑀦 𑀓𑁄𑀘𑀺 𑀤𑁄𑀲𑁄 𑀧𑀦 𑀪𑀡𑁆𑀟𑀤𑁂𑀬𑁆𑀬𑀓𑀁.

𑀇𑀤𑀫𑀸𑀭𑀓𑁆𑀔𑀡𑀝𑁆𑀞𑀸𑀦𑀁, 𑀕𑀭𑀼𑀓𑀁 𑀲𑀼𑀗𑁆𑀓𑀖𑀸𑀢𑀢𑁄;

𑀢𑀲𑁆𑀫𑀸 𑀤𑀼𑀓𑁆𑀓𑀝𑀫𑀼𑀤𑁆𑀤𑀺𑀝𑁆𑀞𑀁, 𑀢𑀫𑀦𑁄𑀓𑁆𑀓𑀫𑁆𑀫 𑀕𑀘𑁆𑀙𑀢𑁄.

𑀏𑀢𑀁 𑀧𑀭𑀺𑀳𑀭𑀦𑁆𑀢𑀲𑁆𑀲, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀢𑁆𑀣𑀼𑀦𑀸;

𑀧𑀸𑀭𑀸𑀚𑀺𑀓𑀫𑀦𑀼𑀤𑁆𑀤𑀺𑀝𑁆𑀞𑀁, 𑀆𑀓𑀸𑀲𑁂𑀦𑀸𑀧𑀺 𑀕𑀘𑁆𑀙𑀢𑁄.

𑀢𑀲𑁆𑀫𑀸 𑀏𑀢𑁆𑀣 𑀯𑀺𑀲𑁂𑀲𑁂𑀦, 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑀸;

𑀅𑀧𑁆𑀧𑀫𑀢𑁆𑀢𑁂𑀦 𑀳𑁄𑀢𑀩𑁆𑀩𑀁, 𑀧𑀺𑀬𑀲𑀻𑀮𑁂𑀦 𑀪𑀺𑀓𑁆𑀔𑀼𑀦𑀸.

𑀢𑁄𑀬𑀤𑀼𑀮𑁆𑀮𑀪𑀓𑀸𑀮𑀲𑁆𑀫𑀺𑀁, 𑀪𑀸𑀚𑀦𑁂 𑀕𑁄𑀧𑀺𑀢𑀁 𑀚𑀮𑀁;

𑀆𑀯𑀺𑀜𑁆𑀚𑀺𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸, 𑀙𑀺𑀤𑁆𑀤𑀁 𑀓𑀢𑁆𑀯𑀸𑀧𑀺 𑀯𑀸 𑀢𑀣𑀸.

𑀯𑀸𑀧𑀺𑀬𑀁 𑀯𑀸 𑀢𑀴𑀸𑀓𑁂 𑀯𑀸, 𑀪𑀸𑀚𑀦𑀁 𑀅𑀢𑁆𑀢𑀦𑁄 𑀧𑀦;

𑀕𑀡𑁆𑀳𑀦𑁆𑀢𑀲𑁆𑀲 𑀧𑀯𑁂𑀲𑁂𑀢𑁆𑀯𑀸, 𑀪𑀡𑁆𑀟𑀕𑁆𑀖𑁂𑀦 𑀯𑀺𑀦𑀺𑀤𑁆𑀤𑀺𑀲𑁂.

𑀙𑀺𑀦𑁆𑀤𑀢𑁄 𑀫𑀭𑀺𑀬𑀸𑀤𑀁 𑀢𑀼, 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀢𑁄;

𑀪𑀽𑀢𑀕𑀸𑀫𑁂𑀦 𑀲𑀤𑁆𑀥𑀺𑀫𑁆𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀦𑁆𑀢𑁄 ¶ ¶ 𑀞𑀢𑁆𑀯𑀸 𑀩𑀳𑀺 𑀞𑀢𑁆𑀯𑀸, 𑀙𑀺𑀦𑁆𑀤𑀦𑁆𑀢𑁄 𑀉𑀪𑀬𑀢𑁆𑀣𑀧𑀺;

𑀩𑀳𑀺𑀅𑀦𑁆𑀢𑁂𑀦 𑀓𑀸𑀢𑀩𑁆𑀩𑁄, 𑀅𑀦𑁆𑀢𑁄𑀅𑀦𑁆𑀢𑁂𑀦 𑀫𑀚𑁆𑀛𑀢𑁄.

𑀯𑀸𑀭𑁂𑀦 𑀲𑀸𑀫𑀡𑁂𑀭𑀸 𑀬𑀁, 𑀤𑀦𑁆𑀢𑀓𑀝𑁆𑀞𑀫𑀭𑀜𑁆𑀜𑀢𑁄;

𑀆𑀦𑁂𑀢𑁆𑀯𑀸𑀘𑀭𑀺𑀬𑀸𑀦𑀫𑁆𑀧𑀺, 𑀆𑀳𑀭𑀦𑁆𑀢𑀺 𑀲𑀘𑁂 𑀧𑀦.

𑀙𑀺𑀦𑁆𑀤𑀺𑀢𑁆𑀯𑀸 𑀬𑀸𑀯 𑀲𑀗𑁆𑀖𑀲𑁆𑀲, 𑀦 𑀦𑀺𑀬𑁆𑀬𑀸𑀤𑁂𑀦𑁆𑀢𑀺 𑀢𑁂 𑀧𑀦;

𑀆𑀪𑀢𑀁 𑀢𑀸𑀯 𑀢𑀁 𑀲𑀩𑁆𑀩𑀁, 𑀢𑁂𑀲𑀫𑁂𑀯 𑀘 𑀲𑀦𑁆𑀢𑀓𑀁.

𑀢𑀲𑁆𑀫𑀸 𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄;

𑀕𑀭𑀼𑀪𑀡𑁆𑀟𑀜𑁆𑀘 𑀲𑀗𑁆𑀖𑀲𑁆𑀲, 𑀪𑀡𑁆𑀟𑀕𑁆𑀖𑁂𑀦 𑀧𑀭𑀸𑀪𑀯𑁄.

𑀬𑀤𑀸 𑀦𑀺𑀬𑁆𑀬𑀸𑀤𑀺𑀢𑀁 𑀢𑁂𑀳𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀺𑀓𑀁;

𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀣𑁂𑀬𑁆𑀬𑀸𑀬, 𑀅𑀯𑀳𑀸𑀭𑁄 𑀦 𑀯𑀺𑀚𑁆𑀚𑀢𑀺.

𑀅𑀭𑀓𑁆𑀔𑀢𑁆𑀢𑀸 𑀬𑀣𑀸𑀯𑀼𑀟𑁆𑀠-𑀫𑀪𑀸𑀚𑁂𑀢𑀩𑁆𑀩𑀢𑁄𑀧𑀺 𑀘;

𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀘, 𑀅𑀜𑁆𑀜𑀁 𑀯𑀺𑀬 𑀦 𑀳𑁄𑀢𑀺𑀤𑀁.

𑀅𑀕𑁆𑀕𑀺𑀁 𑀯𑀸 𑀤𑁂𑀢𑀺 𑀲𑀢𑁆𑀣𑁂𑀦, 𑀆𑀓𑁄𑀝𑁂𑀢𑀺 𑀲𑀫𑀦𑁆𑀢𑀢𑁄;

𑀆𑀓𑁄𑀝𑁂𑀢𑀺 𑀯𑀺𑀲𑀁 𑀯𑀸𑀧𑀺, 𑀫𑀡𑁆𑀟𑀽𑀓𑀡𑁆𑀝𑀓𑀦𑀸𑀫𑀓𑀁.

𑀬𑁂𑀦 𑀯𑀸 𑀢𑁂𑀦 𑀯𑀸 𑀭𑀼𑀓𑁆𑀔𑁄, 𑀯𑀺𑀦𑀲𑁆𑀲𑀢𑀺 𑀘 𑀟𑀬𑁆𑀳𑀢𑀺;

𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀼𑀦𑁄 𑀢𑀲𑁆𑀲, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀓𑀸𑀲𑀺𑀢𑀁.

𑀲𑀻𑀲𑀢𑁄 𑀓𑀡𑁆𑀡𑀢𑁄 𑀯𑀸𑀧𑀺, 𑀕𑀻𑀯𑀢𑁄 𑀳𑀢𑁆𑀣𑀢𑁄𑀧𑀺 𑀯𑀸;

𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀧𑀺 𑀫𑁄𑀘𑁂𑀢𑁆𑀯𑀸, 𑀕𑀡𑁆𑀳𑀢𑁄 𑀣𑁂𑀬𑁆𑀬𑀘𑁂𑀢𑀲𑀸.

𑀳𑁄𑀢𑀺 ¶ 𑀫𑁄𑀘𑀺𑀢𑀫𑀢𑁆𑀢𑀲𑁆𑀫𑀺𑀁, 𑀲𑀻𑀲𑀸𑀤𑀻𑀳𑀺 𑀧𑀭𑀸𑀚𑀬𑁄;

𑀣𑀼𑀮𑁆𑀮𑀘𑁆𑀘𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀁.

𑀳𑀢𑁆𑀣𑀸 𑀅𑀦𑀻𑀳𑀭𑀺𑀢𑁆𑀯𑀸𑀯, 𑀯𑀮𑀬𑀁 𑀓𑀝𑀓𑀫𑁆𑀧𑀺 𑀯𑀸;

𑀅𑀕𑁆𑀕𑀩𑀸𑀳𑀼𑀜𑁆𑀘 𑀖𑀁𑀲𑀦𑁆𑀢𑁄, 𑀘𑀸𑀭𑁂𑀢𑀺 𑀅𑀧𑀭𑀸𑀧𑀭𑀁.

𑀢𑀫𑀸𑀓𑀸𑀲𑀕𑀢𑀁 ¶ 𑀘𑁄𑀭𑁄, 𑀓𑀭𑁄𑀢𑀺 𑀬𑀤𑀺 𑀭𑀓𑁆𑀔𑀢𑀺;

𑀲𑀯𑀺𑀜𑁆𑀜𑀸𑀡𑀓𑀢𑁄 𑀫𑀽𑀮𑁂, 𑀯𑀮𑀬𑀁𑀯 𑀦 𑀳𑁄𑀢𑀺𑀤𑀁.

𑀦𑀺𑀯𑀢𑁆𑀣𑀁 𑀧𑀦 𑀯𑀢𑁆𑀣𑀁 𑀬𑁄, 𑀅𑀘𑁆𑀙𑀺𑀦𑁆𑀤𑀢𑀺 𑀧𑀭𑀲𑁆𑀲 𑀘𑁂;

𑀧𑀭𑁄𑀧𑀺 𑀧𑀦 𑀮𑀚𑁆𑀚𑀸𑀬, 𑀲𑀳𑀲𑀸 𑀢𑀁 𑀦 𑀫𑀼𑀜𑁆𑀘𑀢𑀺.

𑀆𑀓𑀟𑁆𑀠𑀢𑀺 𑀘 𑀘𑁄𑀭𑁄𑀧𑀺, 𑀲𑁄 𑀧𑀭𑁄 𑀢𑀸𑀯 𑀭𑀓𑁆𑀔𑀢𑀺;

𑀧𑀭𑀲𑁆𑀲 𑀳𑀢𑁆𑀣𑀢𑁄 𑀯𑀢𑁆𑀣𑁂, 𑀫𑀼𑀢𑁆𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑀲𑀪𑀡𑁆𑀟𑀳𑀸𑀭𑀓𑀁 𑀪𑀡𑁆𑀟𑀁, 𑀦𑁂𑀦𑁆𑀢𑀲𑁆𑀲 𑀧𑀞𑀫𑁂 𑀧𑀤𑁂;

𑀣𑀼𑀮𑁆𑀮𑀘𑁆𑀘𑀬𑀫𑀢𑀺𑀓𑁆𑀓𑀦𑁆𑀢𑁂, 𑀤𑀼𑀢𑀺𑀬𑁂𑀯 𑀘𑀼𑀢𑁄 𑀲𑀺𑀬𑀸.

𑀧𑀸𑀢𑀸𑀧𑁂𑀢𑀺 𑀲𑀘𑁂 𑀪𑀡𑁆𑀟𑀁, 𑀢𑀚𑁆𑀚𑁂𑀢𑁆𑀯𑀸 𑀣𑁂𑀬𑁆𑀬𑀘𑁂𑀢𑀦𑁄;

𑀧𑀭𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑁂, 𑀫𑀼𑀢𑁆𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑀅𑀣𑀸𑀧𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸, 𑀧𑀸𑀢𑀸𑀧𑁂𑀢𑀺 𑀯 𑀬𑁄 𑀧𑀦;

𑀢𑀲𑁆𑀲 𑀧𑀸𑀢𑀸𑀧𑀦𑁂 𑀯𑀼𑀢𑁆𑀢𑀁, 𑀤𑀼𑀓𑁆𑀓𑀝𑀸𑀫𑀲𑀦𑁂𑀧𑀺 𑀘.

𑀨𑀦𑁆𑀤𑀸𑀧𑁂𑀢𑀺 𑀬𑀣𑀸𑀯𑀢𑁆𑀣𑀼𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄;

‘‘𑀢𑀺𑀝𑁆𑀞 𑀢𑀺𑀝𑁆𑀞𑀸’’𑀢𑀺 𑀯𑀤𑀢𑁄, 𑀦 𑀤𑁄𑀲𑁄 𑀙𑀟𑁆𑀟𑀺𑀢𑁂𑀧𑀺 𑀘.

𑀆𑀕𑀦𑁆𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀧𑀘𑁆𑀙𑀸 𑀢𑀁 𑀕𑀡𑁆𑀳𑀢𑁄 𑀲𑀺𑀬𑀸;

𑀧𑀸𑀭𑀸𑀚𑀺𑀓𑀁 𑀢𑀤𑀼𑀤𑁆𑀥𑀸𑀭𑁂, 𑀲𑀸𑀮𑀬𑁂 𑀲𑀸𑀫𑀺𑀓𑁂 𑀕𑀢𑁂.

𑀕𑀡𑁆𑀳𑀢𑁄 𑀲𑀓𑀲𑀜𑁆𑀜𑀸𑀬, 𑀕𑀳𑀡𑁂 𑀧𑀦 𑀭𑀓𑁆𑀔𑀢𑀺;

𑀪𑀡𑁆𑀟𑀤𑁂𑀬𑁆𑀬𑀁 𑀢𑀣𑀸 𑀧𑀁𑀲𑀼-𑀓𑀽𑀮𑀲𑀜𑁆𑀜𑀸𑀬 𑀕𑀡𑁆𑀳𑀢𑁄.

‘‘𑀢𑀺𑀝𑁆𑀞 ¶ 𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁄 𑀘, 𑀙𑀟𑁆𑀟𑁂𑀢𑁆𑀯𑀸 𑀧𑀦 𑀪𑀡𑁆𑀟𑀓𑀁;

𑀓𑀢𑁆𑀯𑀸𑀯 𑀥𑀼𑀭𑀦𑀺𑀓𑁆𑀔𑁂𑀧𑀁, 𑀪𑀻𑀢𑁄 𑀘𑁄𑀭𑀸 𑀧𑀮𑀸𑀬𑀢𑀺.

𑀕𑀡𑁆𑀳𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀉𑀤𑁆𑀥𑀸𑀭𑁂 𑀤𑀼𑀓𑁆𑀓𑀝𑀁 𑀧𑀼𑀦;

𑀤𑀸𑀢𑀩𑁆𑀩𑀫𑀸𑀳𑀭𑀸𑀧𑁂𑀦𑁆𑀢𑁂, 𑀅𑀤𑁂𑀦𑁆𑀢𑀲𑁆𑀲 𑀧𑀭𑀸𑀚𑀬𑁄.

‘‘𑀓𑀲𑁆𑀫𑀸? 𑀢𑀲𑁆𑀲 𑀧𑀬𑁄𑀕𑁂𑀦, 𑀙𑀟𑁆𑀟𑀺𑀢𑀢𑁆𑀢𑀸’’𑀢𑀺 𑀲𑀸𑀤𑀭𑀁;

𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀢𑀼, 𑀯𑀼𑀢𑁆𑀢𑀫𑀜𑁆𑀜𑀸𑀲𑀼 𑀦𑀸𑀕𑀢𑀁.

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁, ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀪𑀸𑀲𑀢𑁄;

𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀢𑁆𑀢𑀸, 𑀤𑀼𑀓𑁆𑀓𑀝𑀁 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄.

‘‘𑀭𑀳𑁄 ¶ 𑀫𑀬𑀸 𑀧𑀦𑁂𑀢𑀲𑁆𑀲, 𑀞𑀧𑀺𑀢𑀁 𑀓𑀺𑀁 𑀦𑀼 𑀤𑀲𑁆𑀲𑀢𑀺’’;

𑀇𑀘𑁆𑀘𑁂𑀯𑀁 𑀯𑀺𑀫𑀢𑀼𑀧𑁆𑀧𑀸𑀤𑁂, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑀢𑀲𑁆𑀫𑀺𑀁 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁂, 𑀧𑀭𑁄 𑀘𑁂 𑀦𑀺𑀓𑁆𑀔𑀺𑀧𑁂 𑀥𑀼𑀭𑀁;

𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂, 𑀪𑀺𑀓𑁆𑀔𑀼 𑀳𑁄𑀢𑀺 𑀧𑀭𑀸𑀚𑀺𑀢𑁄.

𑀘𑀺𑀢𑁆𑀢𑁂𑀦𑀸𑀤𑀸𑀢𑀼𑀓𑀸𑀫𑁄𑀯, ‘‘𑀤𑀲𑁆𑀲𑀸𑀫𑀻’’𑀢𑀺 𑀫𑀼𑀔𑁂𑀦 𑀘𑁂;

𑀯𑀤𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑁂, 𑀲𑀸𑀫𑀺𑀦𑁄 𑀳𑀺 𑀧𑀭𑀸𑀚𑀬𑁄.

𑀲𑀼𑀗𑁆𑀓𑀖𑀸𑀢𑀲𑁆𑀲 𑀅𑀦𑁆𑀢𑁄𑀯, 𑀞𑀢𑁆𑀯𑀸 𑀧𑀸𑀢𑁂𑀢𑀺 𑀘𑁂 𑀩𑀳𑀺;

𑀥𑀼𑀯𑀁 𑀧𑀢𑀢𑀺 𑀘𑁂 𑀳𑀢𑁆𑀣𑀸, 𑀫𑀼𑀢𑁆𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑀢𑀁 𑀭𑀼𑀓𑁆𑀔𑁂 𑀔𑀸𑀡𑀼𑀓𑁂 𑀯𑀸𑀧𑀺, 𑀳𑀼𑀢𑁆𑀯𑀸 𑀧𑀝𑀺𑀳𑀢𑀁 𑀧𑀼𑀦;

𑀯𑀸𑀢𑀼𑀓𑁆𑀔𑀺𑀢𑁆𑀢𑀫𑁆𑀧𑀺 𑀯𑀸 𑀅𑀦𑁆𑀢𑁄, 𑀲𑀘𑁂 𑀧𑀢𑀢𑀺 𑀭𑀓𑁆𑀔𑀢𑀺.

𑀧𑀢𑀺𑀢𑁆𑀯𑀸 ¶ 𑀪𑀽𑀫𑀺𑀬𑀁 𑀧𑀘𑁆𑀙𑀸, 𑀯𑀝𑁆𑀝𑀦𑁆𑀢𑀁 𑀧𑀦 𑀪𑀡𑁆𑀟𑀓𑀁;

𑀲𑀘𑁂 𑀧𑀯𑀺𑀲𑀢𑁆𑀬𑀦𑁆𑀢𑁄𑀯, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀞𑀢𑁆𑀯𑀸 𑀞𑀢𑁆𑀯𑀸 𑀧𑀯𑀝𑁆𑀝𑀦𑁆𑀢𑀁, 𑀧𑀯𑀺𑀝𑁆𑀞𑀁 𑀘𑁂 𑀧𑀭𑀸𑀚𑀬𑁄;

𑀅𑀢𑀺𑀝𑁆𑀞𑀫𑀸𑀦𑀁 𑀯𑀝𑁆𑀝𑀺𑀢𑁆𑀯𑀸, 𑀧𑀯𑀺𑀝𑁆𑀞𑀁 𑀧𑀦 𑀭𑀓𑁆𑀔𑀢𑀺.

𑀇𑀢𑀺 𑀯𑀼𑀢𑁆𑀢𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀤𑀺𑀲𑀼;

𑀲𑀸𑀭𑀢𑁄 𑀢𑀁 𑀕𑀳𑁂𑀢𑀩𑁆𑀩𑀁, 𑀬𑀼𑀢𑁆𑀢𑀁 𑀯𑀺𑀬 𑀘 𑀤𑀺𑀲𑁆𑀲𑀢𑀺.

𑀲𑀬𑀁 𑀯𑀸 𑀬𑀤𑀺 𑀯𑀝𑁆𑀝𑁂𑀢𑀺, 𑀯𑀝𑁆𑀝𑀸𑀧𑁂𑀢𑀺 𑀧𑀭𑁂𑀦 𑀯𑀸;

𑀅𑀝𑁆𑀞𑀢𑁆𑀯𑀸 𑀯𑀝𑁆𑀝𑀫𑀸𑀦𑀁 𑀢𑀁, 𑀕𑀢𑀁 𑀦𑀸𑀲𑀓𑀭𑀁 𑀲𑀺𑀬𑀸.

𑀞𑀢𑁆𑀯𑀸 𑀞𑀢𑁆𑀯𑀸 𑀲𑀘𑁂 𑀅𑀦𑁆𑀢𑁄, 𑀩𑀳𑀺 𑀕𑀘𑁆𑀙𑀢𑀺 𑀭𑀓𑁆𑀔𑀢𑀺;

𑀞𑀧𑀺𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦, 𑀲𑀬𑀁 𑀯𑀝𑁆𑀝𑀢𑀺 𑀯𑀝𑁆𑀝𑀢𑀺.

𑀕𑀘𑁆𑀙𑀦𑁆𑀢𑁂 𑀧𑀦 𑀬𑀸𑀦𑁂 𑀯𑀸, 𑀕𑀚𑁂 𑀯𑀸 𑀢𑀁 𑀞𑀧𑁂𑀢𑀺 𑀘𑁂;

𑀩𑀳𑀺 𑀦𑀻𑀳𑀭𑀡𑀢𑁆𑀣𑀸𑀬, 𑀦𑀸𑀯𑀳𑀸𑀭𑁄𑀧𑀺 𑀦𑀻𑀳𑀝𑁂.

𑀞𑀧𑀺𑀢𑁂 𑀞𑀺𑀢𑀬𑀸𑀦𑁂 𑀯𑀸, 𑀧𑀬𑁄𑀕𑁂𑀦 𑀯𑀺𑀦𑀸 𑀕𑀢𑁂;

𑀲𑀢𑀺𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀫𑀺𑀁, 𑀅𑀯𑀳𑀸𑀭𑁄 𑀦 𑀯𑀺𑀚𑁆𑀚𑀢𑀺.

𑀲𑀘𑁂 𑀧𑀸𑀚𑁂𑀢𑀺 𑀢𑀁 𑀬𑀸𑀦𑀁, 𑀞𑀧𑁂𑀢𑁆𑀯𑀸 𑀬𑀸𑀦𑀓𑁂 𑀫𑀡𑀺𑀁;

𑀲𑀺𑀬𑀸 𑀧𑀸𑀭𑀸𑀚𑀺𑀓𑀁 𑀢𑀲𑁆𑀲, 𑀲𑀻𑀫𑀸𑀢𑀺𑀓𑁆𑀓𑀫𑀦𑁂 𑀧𑀦.

𑀲𑀼𑀗𑁆𑀓𑀝𑁆𑀞𑀸𑀦𑁂 ¶ 𑀫𑀢𑀁 𑀲𑀼𑀗𑁆𑀓𑀁, 𑀕𑀦𑁆𑀢𑀼𑀁 𑀤𑀢𑁆𑀯𑀸𑀯 𑀯𑀝𑁆𑀝𑀢𑀺;

𑀲𑁂𑀲𑁄 𑀇𑀥 𑀓𑀣𑀸𑀫𑀕𑁆𑀕𑁄, 𑀅𑀭𑀜𑁆𑀜𑀝𑁆𑀞𑀓𑀣𑀸𑀲𑀫𑁄.

𑀅𑀦𑁆𑀢𑁄𑀚𑀸𑀢𑀁 𑀥𑀦𑀓𑁆𑀓𑀻𑀢𑀁, 𑀤𑀺𑀦𑁆𑀦𑀁 𑀯𑀸 𑀧𑀦 𑀓𑁂𑀦𑀘𑀺;

𑀤𑀸𑀲𑀁 𑀓𑀭𑀫𑀭𑀸𑀦𑀻𑀢𑀁, 𑀳𑀭𑀦𑁆𑀢𑀲𑁆𑀲 𑀧𑀭𑀸𑀚𑀬𑁄.

𑀪𑀼𑀚𑀺𑀲𑁆𑀲𑀁 𑀯𑀸 𑀳𑀭𑀦𑁆𑀢𑀲𑁆𑀲, 𑀫𑀸𑀦𑀼𑀲𑀁 𑀫𑀸𑀢𑀭𑀸𑀧𑀺 𑀯𑀸;

𑀧𑀺𑀢𑀭𑀸𑀞𑀧𑀺𑀢𑀁 𑀯𑀸𑀧𑀺, 𑀅𑀯𑀳𑀸𑀭𑁄 𑀦 𑀯𑀺𑀚𑁆𑀚𑀢𑀺.

𑀢𑀁 ¶ 𑀧𑀮𑀸𑀧𑁂𑀢𑀼𑀓𑀸𑀫𑁄𑀯, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀼𑀚𑁂𑀳𑀺 𑀯𑀸;

𑀢𑀁 𑀞𑀺𑀢𑀝𑁆𑀞𑀸𑀦𑀢𑁄 𑀓𑀺𑀜𑁆𑀘𑀺, 𑀲𑀗𑁆𑀓𑀸𑀫𑁂𑀢𑀺 𑀧𑀭𑀸𑀚𑀬𑁄.

𑀢𑀚𑁆𑀚𑁂𑀢𑁆𑀯𑀸 𑀧𑀤𑀲𑀸 𑀤𑀸𑀲𑀁, 𑀦𑁂𑀦𑁆𑀢𑀲𑁆𑀲 𑀧𑀤𑀯𑀸𑀭𑀢𑁄;

𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄.

𑀳𑀢𑁆𑀣𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀢𑀁, 𑀓𑀟𑁆𑀠𑀢𑁄𑀧𑀺 𑀧𑀭𑀸𑀚𑀬𑁄;

‘‘𑀕𑀘𑁆𑀙 𑀬𑀸𑀳𑀺 𑀧𑀮𑀸𑀬𑀸’’𑀢𑀺, 𑀯𑀤𑀢𑁄𑀧𑀺 𑀅𑀬𑀁 𑀦𑀬𑁄.

𑀯𑁂𑀕𑀲𑀸𑀯 𑀧𑀮𑀸𑀬𑀦𑁆𑀢𑀁, ‘‘𑀧𑀮𑀸𑀬𑀸’’𑀢𑀺 𑀘 𑀪𑀸𑀲𑀢𑁄;

𑀳𑁄𑀢𑀺 𑀧𑀸𑀭𑀸𑀚𑀺𑀓𑁂𑀦𑀲𑁆𑀲, 𑀅𑀦𑀸𑀧𑀢𑁆𑀢𑀺 𑀳𑀺 𑀪𑀺𑀓𑁆𑀔𑀼𑀦𑁄.

𑀲𑀡𑀺𑀓𑀁 𑀧𑀦 𑀕𑀘𑁆𑀙𑀦𑁆𑀢𑀁, 𑀲𑀘𑁂 𑀯𑀤𑀢𑀺 𑀲𑁄𑀧𑀺 𑀘;

𑀲𑀻𑀖𑀁 𑀕𑀘𑁆𑀙𑀢𑀺 𑀘𑁂 𑀢𑀲𑁆𑀲, 𑀯𑀘𑀦𑁂𑀦 𑀧𑀭𑀸𑀚𑀬𑁄.

𑀧𑀮𑀸𑀬𑀺𑀢𑁆𑀯𑀸 𑀲𑀘𑁂 𑀅𑀜𑁆𑀜𑀁, 𑀕𑀸𑀫𑀁 𑀯𑀸 𑀦𑀺𑀕𑀫𑀫𑁆𑀧𑀺 𑀯𑀸;

𑀕𑀢𑀁 𑀤𑀺𑀲𑁆𑀯𑀸 𑀢𑀢𑁄 𑀢𑀜𑁆𑀘𑁂, 𑀧𑀮𑀸𑀧𑁂𑀢𑀺 𑀧𑀭𑀸𑀚𑀬𑁄.

𑀣𑁂𑀬𑁆𑀬𑀸 𑀲𑀧𑁆𑀧𑀓𑀭𑀡𑁆𑀟𑀁 𑀘𑁂, 𑀧𑀭𑀸𑀫𑀲𑀢𑀺 𑀤𑀼𑀓𑁆𑀓𑀝𑀁;

𑀨𑀦𑁆𑀤𑀸𑀧𑁂𑀢𑀺 𑀬𑀣𑀸𑀯𑀢𑁆𑀣𑀼𑀁, 𑀞𑀸𑀦𑀢𑁄 𑀘𑀸𑀯𑀦𑁂 𑀘𑀼𑀢𑁄.

𑀉𑀕𑁆𑀖𑀸𑀝𑁂𑀢𑁆𑀯𑀸 𑀓𑀭𑀡𑁆𑀟𑀁 𑀢𑀼, 𑀲𑀧𑁆𑀧𑀫𑀼𑀤𑁆𑀥𑀭𑀢𑁄 𑀧𑀦;

𑀓𑀭𑀡𑁆𑀟𑀢𑀮𑀢𑁄 𑀫𑀼𑀢𑁆𑀢𑁂, 𑀦𑀗𑁆𑀕𑀼𑀝𑁆𑀞𑁂 𑀢𑀼 𑀧𑀭𑀸𑀚𑀬𑁄.

𑀖𑀁𑀲𑀺𑀢𑁆𑀯𑀸 𑀓𑀟𑁆𑀠𑀢𑁄 𑀲𑀧𑁆𑀧𑀁, 𑀦𑀗𑁆𑀕𑀼𑀝𑁆𑀞𑁂 𑀫𑀼𑀔𑀯𑀝𑁆𑀝𑀺𑀢𑁄;

𑀢𑀲𑁆𑀲 𑀲𑀧𑁆𑀧𑀓𑀭𑀡𑁆𑀟𑀲𑁆𑀲, 𑀫𑀼𑀢𑁆𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑀓𑀭𑀡𑁆𑀟𑀁 ¶ 𑀯𑀺𑀯𑀭𑀺𑀢𑁆𑀯𑀸 𑀘𑁂, 𑀧𑀓𑁆𑀓𑁄𑀲𑀦𑁆𑀢𑀲𑁆𑀲 𑀦𑀸𑀫𑀢𑁄;

𑀲𑁄 𑀦𑀺𑀓𑁆𑀔𑀫𑀢𑀺 𑀘𑁂 𑀲𑀧𑁆𑀧𑁄, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀢𑀣𑀸 𑀓𑀢𑁆𑀯𑀸 𑀢𑀼 𑀫𑀡𑁆𑀟𑀽𑀓-𑀫𑀽𑀲𑀺𑀓𑀸𑀦𑀁 𑀭𑀯𑀫𑁆𑀧𑀺 𑀯𑀸;

𑀧𑀓𑁆𑀓𑁄𑀲𑀦𑁆𑀢𑀲𑁆𑀲 𑀦𑀸𑀫𑁂𑀦, 𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀭𑀸𑀚𑀬𑁄.

𑀫𑀼𑀔𑀁 ¶ 𑀅𑀯𑀺𑀯𑀭𑀺𑀢𑁆𑀯𑀸𑀯, 𑀓𑀭𑁄𑀦𑁆𑀢𑀲𑁆𑀲𑁂𑀯𑀫𑁂𑀯 𑀘;

𑀬𑁂𑀦 𑀓𑁂𑀦𑀘𑀺 𑀦𑀺𑀓𑁆𑀔𑀦𑁆𑀢𑁂, 𑀲𑀧𑁆𑀧𑁂 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀫𑀼𑀔𑁂 𑀯𑀺𑀯𑀭𑀺𑀢𑁂 𑀲𑀧𑁆𑀧𑁄, 𑀲𑀬𑀫𑁂𑀯 𑀧𑀮𑀸𑀬𑀢𑀺;

𑀦 𑀧𑀓𑁆𑀓𑁄𑀲𑀢𑀺 𑀘𑁂 𑀢𑀲𑁆𑀲, 𑀪𑀡𑁆𑀟𑀤𑁂𑀬𑁆𑀬𑀫𑀼𑀤𑀻𑀭𑀺𑀢𑀁.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀬𑁄 𑀳𑀢𑁆𑀣𑀺𑀁, 𑀓𑀭𑁄𑀢𑀸𑀫𑀲𑀦𑀸𑀤𑀬𑁄;

𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀢𑀲𑁆𑀲, 𑀢𑀺𑀯𑀺𑀥𑀸 𑀤𑀼𑀓𑁆𑀓𑀝𑀸𑀤𑀬𑁄.

𑀲𑀸𑀮𑀸𑀬𑀁 𑀞𑀺𑀢𑀳𑀢𑁆𑀣𑀺𑀲𑁆𑀲, 𑀅𑀦𑁆𑀢𑁄𑀯𑀢𑁆𑀣𑀗𑁆𑀕𑀡𑁂𑀲𑀼𑀧𑀺;

𑀞𑀸𑀦𑀁 𑀲𑀸𑀮𑀸 𑀘 𑀯𑀢𑁆𑀣𑀼 𑀘, 𑀅𑀗𑁆𑀕𑀡𑀁 𑀲𑀓𑀮𑀁 𑀲𑀺𑀬𑀸.

𑀅𑀩𑀤𑁆𑀥𑀲𑁆𑀲 𑀳𑀺 𑀩𑀤𑁆𑀥𑀲𑁆𑀲, 𑀞𑀺𑀢𑀝𑁆𑀞𑀸𑀦𑀜𑁆𑀘 𑀩𑀦𑁆𑀥𑀦𑀁;

𑀢𑀲𑁆𑀫𑀸 𑀢𑁂𑀲𑀁 𑀯𑀲𑀸 𑀳𑀢𑁆𑀣𑀺𑀁, 𑀳𑀭𑀢𑁄 𑀓𑀸𑀭𑀬𑁂 𑀩𑀼𑀥𑁄.

𑀦𑀕𑀭𑀲𑁆𑀲 𑀩𑀳𑀺𑀤𑁆𑀥𑀸 𑀢𑀼, 𑀞𑀺𑀢𑀲𑁆𑀲 𑀧𑀦 𑀳𑀢𑁆𑀣𑀺𑀦𑁄;

𑀞𑀺𑀢𑀝𑁆𑀞𑀸𑀦𑀁 𑀪𑀯𑁂 𑀞𑀸𑀦𑀁, 𑀧𑀤𑀯𑀸𑀭𑁂𑀦 𑀓𑀸𑀭𑀬𑁂.

𑀦𑀺𑀧𑀦𑁆𑀦𑀲𑁆𑀲 𑀕𑀚𑀲𑁆𑀲𑁂𑀓𑀁, 𑀞𑀸𑀦𑀁 𑀢𑀁 𑀉𑀝𑁆𑀞𑀧𑁂𑀢𑀺 𑀘𑁂;

𑀢𑀲𑁆𑀫𑀺𑀁 𑀉𑀝𑁆𑀞𑀺𑀢𑀫𑀢𑁆𑀢𑁂 𑀢𑀼, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀢𑀼𑀭𑀗𑁆𑀕𑀫𑀳𑀺𑀲𑀸𑀤𑀺𑀲𑀼;

𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀤𑁆𑀯𑀺𑀧𑀤𑁂𑀧𑀺 𑀩𑀳𑀼𑀧𑁆𑀧𑀤𑁂.

𑀧𑀭𑁂𑀲𑀦𑁆𑀢𑀺 𑀯𑀺𑀚𑀸𑀦𑀺𑀢𑁆𑀯𑀸, 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀥𑀦𑀁;

𑀕𑀭𑀼𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑀅𑀦𑀸𑀧𑀢𑁆𑀢𑀺 𑀲𑀲𑀜𑁆𑀜𑀺𑀲𑁆𑀲, 𑀢𑀺𑀭𑀘𑁆𑀙𑀸𑀦𑀧𑀭𑀺𑀕𑁆𑀕𑀳𑁂;

𑀢𑀸𑀯𑀓𑀸𑀮𑀺𑀓𑀯𑀺𑀲𑁆𑀲𑀸𑀲-𑀕𑁆𑀕𑀸𑀳𑁂 𑀧𑁂𑀢𑀧𑀭𑀺𑀕𑁆𑀕𑀳𑁂.

𑀬𑁄 ¶ ¶ 𑀧𑀦𑁂𑀢𑁆𑀣 𑀘 𑀯𑀢𑁆𑀢𑀩𑁆𑀩𑁄, 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄;

𑀢𑀁 𑀫𑀬𑀁 𑀧𑀭𑀢𑁄𑀬𑁂𑀯, 𑀪𑀡𑀺𑀲𑁆𑀲𑀸𑀫 𑀧𑀓𑀺𑀡𑁆𑀡𑀓𑁂.

𑀧𑀭𑀸𑀚𑀺𑀢𑀸𑀦𑁂𑀓𑀫𑀮𑁂𑀦 𑀯𑀼𑀢𑁆𑀢𑀁;

𑀧𑀸𑀭𑀸𑀚𑀺𑀓𑀁 𑀬𑀁 𑀤𑀼𑀢𑀺𑀬𑀁 𑀚𑀺𑀦𑁂𑀦;

𑀯𑀼𑀢𑁆𑀢𑁄 𑀲𑀫𑀸𑀲𑁂𑀦 𑀫𑀬𑀲𑁆𑀲 𑀘𑀢𑁆𑀣𑁄;

𑀯𑀢𑁆𑀢𑀼𑀁 𑀅𑀲𑁂𑀲𑁂𑀦 𑀳𑀺 𑀓𑁄 𑀲𑀫𑀢𑁆𑀣𑁄.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑀦𑀼𑀲𑁆𑀲𑀚𑀸𑀢𑀺𑀁 𑀚𑀸𑀦𑀦𑁆𑀢𑁄, 𑀚𑀻𑀯𑀺𑀢𑀸 𑀬𑁄 𑀯𑀺𑀬𑁄𑀚𑀬𑁂;

𑀦𑀺𑀓𑁆𑀔𑀺𑀧𑁂𑀬𑁆𑀬𑀲𑁆𑀲 𑀲𑀢𑁆𑀣𑀁 𑀯𑀸, 𑀯𑀤𑁂𑀬𑁆𑀬 𑀫𑀭𑀡𑁂 𑀕𑀼𑀡𑀁.

𑀤𑁂𑀲𑁂𑀬𑁆𑀬 𑀫𑀭𑀡𑀽𑀧𑀸𑀬𑀁, 𑀳𑁄𑀢𑀸𑀬𑀫𑁆𑀧𑀺 𑀧𑀭𑀸𑀚𑀺𑀢𑁄;

𑀅𑀲𑀦𑁆𑀥𑁂𑀬𑁆𑀬𑁄𑀯 𑀲𑁄 𑀜𑁂𑀬𑁆𑀬𑁄, 𑀤𑁆𑀯𑁂𑀥𑀸 𑀪𑀺𑀦𑁆𑀦𑀲𑀺𑀮𑀸 𑀯𑀺𑀬.

𑀯𑀼𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀲𑁆𑀲, 𑀧𑀬𑁄𑀕𑀸 𑀙 𑀫𑀳𑁂𑀲𑀺𑀦𑀸;

𑀲𑀸𑀳𑀢𑁆𑀣𑀺𑀓𑁄 𑀢𑀣𑀸𑀡𑀢𑁆𑀢𑀺-𑀦𑀺𑀲𑁆𑀲𑀕𑁆𑀕𑀺𑀣𑀸𑀯𑀭𑀸𑀤𑀬𑁄.

𑀢𑀢𑁆𑀣 𑀓𑀸𑀬𑁂𑀦 𑀯𑀸 𑀓𑀸𑀬-𑀧𑀝𑀺𑀩𑀤𑁆𑀥𑁂𑀦 𑀯𑀸 𑀲𑀬𑀁;

𑀫𑀸𑀭𑁂𑀦𑁆𑀢𑀲𑁆𑀲 𑀧𑀭𑀁 𑀖𑀸𑀢𑁄, 𑀅𑀬𑀁 𑀲𑀸𑀳𑀢𑁆𑀣𑀺𑀓𑁄 𑀫𑀢𑁄.

‘‘𑀏𑀯𑀁 𑀢𑁆𑀯𑀁 𑀧𑀳𑀭𑀺𑀢𑁆𑀯𑀸 𑀢𑀁, 𑀫𑀸𑀭𑁂𑀳𑀻’’𑀢𑀺 𑀘 𑀪𑀺𑀓𑁆𑀔𑀼𑀦𑁄;

𑀧𑀭𑀲𑁆𑀲𑀸𑀡𑀸𑀧𑀦𑀁 𑀦𑀸𑀫, 𑀅𑀬𑀫𑀸𑀡𑀢𑁆𑀢𑀺𑀓𑁄 𑀦𑀬𑁄.

𑀤𑀽𑀭𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲, 𑀉𑀲𑀼𑀆𑀤𑀺𑀦𑀺𑀧𑀸𑀢𑀦𑀁;

𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁂𑀦, 𑀅𑀬𑀁 𑀦𑀺𑀲𑁆𑀲𑀕𑁆𑀕𑀺𑀬𑁄 𑀯𑀺𑀥𑀺.

𑀅𑀲𑀜𑁆𑀘𑀸𑀭𑀺𑀫𑀼𑀧𑀸𑀬𑁂𑀦, 𑀫𑀸𑀭𑀡𑀢𑁆𑀣𑀁 𑀧𑀭𑀲𑁆𑀲 𑀘;

𑀑𑀧𑀸𑀢𑀸𑀤𑀺𑀯𑀺𑀥𑀸𑀦𑀁 𑀢𑀼, 𑀧𑀬𑁄𑀕𑁄 𑀣𑀸𑀯𑀭𑁄 𑀅𑀬𑀁.

𑀧𑀭𑀁 ¶ ¶ 𑀫𑀸𑀭𑁂𑀢𑀼𑀓𑀸𑀫𑀲𑁆𑀲, 𑀯𑀺𑀚𑁆𑀚𑀸𑀬 𑀚𑀧𑁆𑀧𑀦𑀁 𑀧𑀦;

𑀅𑀬𑀁 𑀯𑀺𑀚𑁆𑀚𑀸𑀫𑀬𑁄 𑀦𑀸𑀫, 𑀧𑀬𑁄𑀕𑁄 𑀧𑀜𑁆𑀘𑀫𑁄 𑀫𑀢𑁄.

𑀲𑀫𑀢𑁆𑀣𑀸 𑀫𑀸𑀭𑀡𑁂 𑀬𑀸 𑀘, 𑀇𑀤𑁆𑀥𑀺 𑀓𑀫𑁆𑀫𑀯𑀺𑀧𑀸𑀓𑀚𑀸;

𑀅𑀬𑀫𑀺𑀤𑁆𑀥𑀺𑀫𑀬𑁄 𑀦𑀸𑀫, 𑀧𑀬𑁄𑀕𑁄 𑀲𑀫𑀼𑀤𑀻𑀭𑀺𑀢𑁄.

𑀏𑀓𑁂𑀓𑁄 𑀤𑀼𑀯𑀺𑀥𑁄 𑀢𑀢𑁆𑀣, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑁄;

𑀉𑀤𑁆𑀤𑁂𑀲𑁄𑀧𑀺 𑀅𑀦𑀼𑀤𑁆𑀤𑁂𑀲𑁄, 𑀪𑁂𑀤𑁄 𑀢𑁂𑀲𑀫𑀬𑀁 𑀧𑀦.

𑀩𑀳𑀼𑀲𑁆𑀯𑀧𑀺 𑀬𑀫𑀼𑀤𑁆𑀤𑀺𑀲𑁆𑀲, 𑀧𑀳𑀸𑀭𑀁 𑀤𑁂𑀢𑀺 𑀘𑁂 𑀧𑀦;

𑀫𑀭𑀡𑁂𑀦 𑀘 𑀢𑀲𑁆𑀲𑁂𑀯, 𑀓𑀫𑁆𑀫𑀼𑀦𑀸 𑀢𑁂𑀦 𑀩𑀚𑁆𑀛𑀢𑀺.

𑀅𑀦𑀼𑀤𑁆𑀤𑀺𑀲𑁆𑀲 𑀧𑀳𑀸𑀭𑁂𑀧𑀺, 𑀬𑀲𑁆𑀲 𑀓𑀲𑁆𑀲𑀘𑀺 𑀤𑁂𑀳𑀺𑀦𑁄;

𑀧𑀳𑀸𑀭𑀧𑁆𑀧𑀘𑁆𑀘𑀬𑀸 𑀢𑀲𑁆𑀲, 𑀫𑀭𑀡𑀁 𑀘𑁂 𑀧𑀭𑀸𑀚𑀬𑁄.

𑀫𑀢𑁂 𑀧𑀳𑀝𑀫𑀢𑁆𑀢𑁂 𑀯𑀸, 𑀧𑀘𑁆𑀙𑀸 𑀫𑀼𑀪𑀬𑀣𑀸𑀧𑀺 𑀘;

𑀳𑀦𑁆𑀢𑀸 𑀧𑀳𑀝𑀫𑀢𑁆𑀢𑀲𑁆𑀫𑀺𑀁, 𑀓𑀫𑁆𑀫𑀼𑀦𑀸 𑀢𑁂𑀦 𑀩𑀚𑁆𑀛𑀢𑀺.

𑀏𑀯𑀁 𑀲𑀸𑀳𑀢𑁆𑀣𑀺𑀓𑁄 𑀜𑁂𑀬𑁆𑀬𑁄, 𑀢𑀣𑀸 𑀆𑀡𑀢𑁆𑀢𑀺𑀓𑁄𑀧𑀺 𑀘;

𑀏𑀢𑁆𑀢𑀸𑀯𑀢𑀸 𑀲𑀫𑀸𑀲𑁂𑀦, 𑀤𑁆𑀯𑁂 𑀧𑀬𑁄𑀕𑀸 𑀳𑀺 𑀤𑀲𑁆𑀲𑀺𑀢𑀸.

𑀯𑀢𑁆𑀣𑀼 𑀓𑀸𑀮𑁄 𑀘 𑀤𑁂𑀲𑁄 𑀘, 𑀲𑀢𑁆𑀣𑀜𑁆𑀘 𑀇𑀭𑀺𑀬𑀸𑀧𑀣𑁄;

𑀓𑀭𑀡𑀲𑁆𑀲 𑀯𑀺𑀲𑁂𑀲𑁄𑀢𑀺, 𑀙 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸.

𑀫𑀸𑀭𑁂𑀢𑀩𑁆𑀩𑁄 𑀳𑀺 𑀬𑁄 𑀢𑀢𑁆𑀣, 𑀲𑁄 ‘‘𑀯𑀢𑁆𑀣𑀽’’𑀢𑀺 𑀧𑀯𑀼𑀘𑁆𑀘𑀢𑀺;

𑀧𑀼𑀩𑁆𑀩𑀡𑁆𑀳𑀸𑀤𑀺 𑀲𑀺𑀬𑀸 𑀓𑀸𑀮𑁄, 𑀲𑀢𑁆𑀢𑀸𑀦𑀁 𑀬𑁄𑀩𑁆𑀩𑀦𑀸𑀤𑀺 𑀘.

𑀤𑁂𑀲𑁄 𑀕𑀸𑀫𑀸𑀤𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀲𑀢𑁆𑀣𑀁 𑀢𑀁 𑀲𑀢𑁆𑀢𑀫𑀸𑀭𑀡𑀁;

𑀫𑀸𑀭𑁂𑀢𑀩𑁆𑀩𑀲𑁆𑀲 𑀲𑀢𑁆𑀢𑀲𑁆𑀲, 𑀦𑀺𑀲𑀚𑁆𑀚𑀸𑀤𑀺𑀭𑀺𑀬𑀸𑀧𑀣𑁄.

𑀯𑀺𑀚𑁆𑀛𑀦𑀁 𑀪𑁂𑀤𑀦𑀜𑁆𑀘𑀸𑀧𑀺, 𑀙𑁂𑀤𑀦𑀁 𑀢𑀸𑀴𑀦𑀫𑁆𑀧𑀺 𑀯𑀸;

𑀏𑀯𑀫𑀸𑀤𑀺𑀯𑀺𑀥𑁄𑀦𑁂𑀓𑁄, 𑀯𑀺𑀲𑁂𑀲𑁄 𑀓𑀭𑀡𑀲𑁆𑀲 𑀢𑀼.

‘‘𑀬𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄, 𑀅𑀜𑁆𑀜𑀁 𑀫𑀸𑀭𑁂𑀢𑀺 𑀘𑁂 𑀢𑀢𑁄;

‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸𑀦, 𑀫𑀸𑀭𑁂𑀳𑀻’’𑀢𑀺 𑀘 𑀪𑀸𑀲𑀺𑀢𑁄.

𑀧𑀘𑁆𑀙𑀢𑁄 ¶ 𑀧𑀲𑁆𑀲𑀢𑁄 𑀯𑀸𑀧𑀺, 𑀧𑀳𑀭𑀺𑀢𑁆𑀯𑀸𑀦 𑀫𑀸𑀭𑀺𑀢𑁂;

𑀯𑀢𑁆𑀣𑀸𑀡𑀢𑁆𑀢𑀺 𑀯𑀺𑀲𑀗𑁆𑀓𑁂𑀢𑀸, 𑀫𑀽𑀮𑀝𑁆𑀞𑁄 𑀧𑀦 𑀫𑀼𑀘𑁆𑀘𑀢𑀺.

𑀯𑀢𑁆𑀣𑀼𑀁 𑀢𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸, 𑀬𑀣𑀸𑀡𑀢𑁆𑀢𑀺𑀜𑁆𑀘 𑀫𑀸𑀭𑀺𑀢𑁂;

𑀉𑀪𑀬𑁂𑀲𑀁 𑀬𑀣𑀸𑀓𑀸𑀮𑀁, 𑀓𑀫𑁆𑀫𑀩𑀤𑁆𑀥𑁄 𑀉𑀤𑀻𑀭𑀺𑀢𑁄.

𑀆𑀡𑀢𑁆𑀢𑁄 ¶ ‘‘𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁂, 𑀫𑀸𑀭𑁂𑀳𑀻’’𑀢𑀺 𑀘 𑀬𑁄 𑀧𑀦;

𑀲𑁄 𑀘𑁂 𑀫𑀸𑀭𑁂𑀢𑀺 𑀲𑀸𑀬𑀦𑁆𑀳𑁂, 𑀫𑀽𑀮𑀝𑁆𑀞𑁄 𑀧𑀭𑀺𑀫𑀼𑀘𑁆𑀘𑀢𑀺.

‘‘𑀅𑀚𑁆𑀚 𑀫𑀸𑀭𑁂𑀳𑀺 𑀧𑀼𑀩𑁆𑀩𑀡𑁆𑀳𑁂, 𑀲𑁆𑀯𑁂𑀯𑀸’’𑀢𑀺 𑀅𑀦𑀺𑀬𑀸𑀫𑀺𑀢𑁂;

𑀬𑀤𑀸 𑀓𑀤𑀸𑀘𑀺 𑀧𑀼𑀩𑁆𑀩𑀡𑁆𑀳𑁂, 𑀯𑀺𑀲𑀗𑁆𑀓𑁂𑀢𑁄 𑀦 𑀫𑀸𑀭𑀺𑀢𑁂.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀓𑀸𑀮𑀪𑁂𑀤𑁂𑀲𑀼 𑀲𑀩𑁆𑀩𑀲𑁄;

𑀲𑀗𑁆𑀓𑁂𑀢𑁄 𑀘 𑀯𑀺𑀲𑀗𑁆𑀓𑁂𑀢𑁄, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

‘‘𑀇𑀫𑀁 𑀕𑀸𑀫𑁂 𑀞𑀺𑀢𑀁 𑀯𑁂𑀭𑀺𑀁, 𑀫𑀸𑀭𑁂𑀳𑀻’’𑀢𑀺 𑀘 𑀪𑀸𑀲𑀺𑀢𑁄;

𑀲𑀘𑁂 𑀲𑁄 𑀧𑀦 𑀫𑀸𑀭𑁂𑀢𑀺, 𑀞𑀺𑀢𑀁 𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺.

𑀦𑀢𑁆𑀣𑀺 𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑁄, 𑀉𑀪𑁄 𑀩𑀚𑁆𑀛𑀦𑁆𑀢𑀺 𑀓𑀫𑁆𑀫𑀼𑀦𑀸;

‘‘𑀕𑀸𑀫𑁂𑀬𑁂𑀯𑀸’’𑀢𑀺 𑀆𑀡𑀢𑁆𑀢𑁄, 𑀯𑀦𑁂 𑀯𑀸 𑀲𑀸𑀯𑀥𑀸𑀭𑀡𑀁.

‘‘𑀯𑀦𑁂𑀬𑁂𑀯𑀸’’𑀢𑀺 𑀯𑀸 𑀯𑀼𑀢𑁆𑀢𑁄, 𑀕𑀸𑀫𑁂 𑀫𑀸𑀭𑁂𑀢𑀺 𑀘𑁂𑀧𑀺 𑀯𑀸;

𑀯𑀺𑀲𑀗𑁆𑀓𑁂𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄, 𑀫𑀽𑀮𑀝𑁆𑀞𑁄 𑀧𑀭𑀺𑀫𑀼𑀘𑁆𑀘𑀢𑀺.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀲𑀩𑁆𑀩𑀤𑁂𑀲𑁂𑀲𑀼 𑀪𑁂𑀤𑀢𑁄;

𑀲𑀗𑁆𑀓𑁂𑀢𑁄 𑀘 𑀯𑀺𑀲𑀗𑁆𑀓𑁂𑀢𑁄, 𑀯𑁂𑀤𑀺𑀢𑀩𑁆𑀩𑁄𑀯 𑀯𑀺𑀜𑁆𑀜𑀼𑀦𑀸.

‘‘𑀲𑀢𑁆𑀣𑁂𑀦 𑀧𑀦 𑀫𑀸𑀭𑁂𑀳𑀺, 𑀆𑀡𑀢𑁆𑀢𑁄’’𑀢𑀺 𑀘 𑀓𑁂𑀦𑀘𑀺;

𑀬𑁂𑀦 𑀓𑁂𑀦𑀘𑀺 𑀲𑀢𑁆𑀣𑁂𑀦, 𑀯𑀺𑀲𑀗𑁆𑀓𑁂𑀢𑁄 𑀦 𑀫𑀸𑀭𑀺𑀢𑁂.

‘‘𑀇𑀫𑀺𑀦𑀸 ¶ 𑀯𑀸𑀲𑀺𑀦𑀸 𑀳𑀻’’𑀢𑀺, 𑀯𑀼𑀢𑁆𑀢𑁄 𑀅𑀜𑁆𑀜𑁂𑀦 𑀯𑀸𑀲𑀺𑀦𑀸;

‘‘𑀇𑀫𑀲𑁆𑀲𑀸𑀲𑀺𑀲𑁆𑀲 𑀯𑀸𑀧𑀺 𑀢𑁆𑀯𑀁, 𑀥𑀸𑀭𑀸𑀬𑁂𑀢𑀸𑀬 𑀫𑀸𑀭𑀬’’.

𑀇𑀢𑀺 𑀯𑀼𑀢𑁆𑀢𑁄 𑀲𑀘𑁂 𑀯𑁂𑀭𑀺𑀁, 𑀥𑀸𑀭𑀸𑀬 𑀇𑀢𑀭𑀸𑀬 𑀯𑀸;

𑀣𑀭𑀼𑀦𑀸 𑀯𑀸𑀧𑀺 𑀢𑀼𑀡𑁆𑀟𑁂𑀦, 𑀯𑀺𑀲𑀗𑁆𑀓𑁂𑀢𑁄𑀯 𑀫𑀸𑀭𑀺𑀢𑁂.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀲𑀩𑁆𑀩𑀸𑀯𑀼𑀥𑀓𑀚𑀸𑀢𑀺𑀲𑀼;

𑀲𑀗𑁆𑀓𑁂𑀢𑁄 𑀘 𑀯𑀺𑀲𑀗𑁆𑀓𑁂𑀢𑁄, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀲𑁂𑀲𑀢𑁄.

‘‘𑀕𑀘𑁆𑀙𑀦𑁆𑀢𑀫𑁂𑀦𑀁 𑀫𑀸𑀭𑁂𑀳𑀺’’, 𑀇𑀢𑀺 𑀯𑀼𑀢𑁆𑀢𑁄 𑀧𑀭𑁂𑀦 𑀲𑁄;

𑀫𑀸𑀭𑁂𑀢𑀺 𑀦𑀁 𑀦𑀺𑀲𑀺𑀦𑁆𑀦𑀁 𑀘𑁂, 𑀯𑀺𑀲𑀗𑁆𑀓𑁂𑀢𑁄 𑀦 𑀯𑀺𑀚𑁆𑀚𑀢𑀺.

‘‘𑀦𑀺𑀲𑀺𑀦𑁆𑀦𑀁𑀬𑁂𑀯 ¶ 𑀫𑀸𑀭𑁂𑀳𑀺’’, ‘‘𑀕𑀘𑁆𑀙𑀦𑁆𑀢𑀁𑀬𑁂𑀯 𑀯𑀸’’𑀢𑀺 𑀘;

𑀯𑀼𑀢𑁆𑀢𑁄 𑀫𑀸𑀭𑁂𑀢𑀺 𑀕𑀘𑁆𑀙𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀯𑀸 𑀬𑀣𑀸𑀓𑁆𑀓𑀫𑀁.

𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀜𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸;

𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀘.

‘‘𑀫𑀸𑀭𑁂𑀳𑀻’’𑀢𑀺 𑀘 𑀯𑀺𑀚𑁆𑀛𑀺𑀢𑁆𑀯𑀸, 𑀆𑀡𑀢𑁆𑀢𑁄 𑀳𑀺 𑀧𑀭𑁂𑀦 𑀲𑁄;

𑀯𑀺𑀚𑁆𑀛𑀺𑀢𑁆𑀯𑀸𑀯 𑀢𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀦 𑀯𑀺𑀚𑁆𑀚𑀢𑀺.

‘‘𑀫𑀸𑀭𑁂𑀳𑀻’’𑀢𑀺 𑀘 𑀯𑀺𑀚𑁆𑀛𑀺𑀢𑁆𑀯𑀸, 𑀆𑀡𑀢𑁆𑀢𑁄 𑀳𑀺 𑀧𑀭𑁂𑀦 𑀲𑁄;

𑀙𑀺𑀦𑁆𑀤𑀺𑀢𑁆𑀯𑀸 𑀬𑀤𑀺 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄𑀯 𑀳𑁄𑀢𑀺 𑀲𑁄.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀲𑀩𑁆𑀩𑁂𑀲𑀼 𑀓𑀭𑀡𑁂𑀲𑀼𑀧𑀺;

𑀲𑀗𑁆𑀓𑁂𑀢𑁂 𑀘 𑀯𑀺𑀲𑀗𑁆𑀓𑁂𑀢𑁂, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀤𑀻𑀖𑀁 𑀭𑀲𑁆𑀲𑀁 𑀓𑀺𑀲𑀁 𑀣𑀽𑀮𑀁, 𑀓𑀸𑀴𑀁 𑀑𑀤𑀸𑀢𑀫𑁂𑀯 𑀯𑀸;

𑀆𑀡𑀢𑁆𑀢𑁄 𑀅𑀦𑀺𑀬𑀸𑀫𑁂𑀢𑁆𑀯𑀸, 𑀫𑀸𑀭𑁂𑀳𑀻𑀢𑀺 𑀘 𑀓𑁂𑀦𑀘𑀺.

𑀲𑁄𑀧𑀺 𑀬𑀁 𑀓𑀺𑀜𑁆𑀘𑀺 𑀆𑀡𑀢𑁆𑀢𑁄, 𑀲𑀘𑁂 𑀫𑀸𑀭𑁂𑀢𑀺 𑀢𑀸𑀤𑀺𑀲𑀁;

𑀦𑀢𑁆𑀣𑀺 𑀢𑀢𑁆𑀣 𑀯𑀺𑀲𑀗𑁆𑀓𑁂𑀢𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀭𑀸𑀚𑀬𑁄.

𑀫𑀦𑀼𑀲𑁆𑀲𑀁 𑀓𑀺𑀜𑁆𑀘𑀺 𑀉𑀤𑁆𑀤𑀺𑀲𑁆𑀲, 𑀲𑀘𑁂 𑀔𑀡𑀢𑀺𑀯𑀸𑀝𑀓𑀁;

𑀔𑀡𑀦𑁆𑀢𑀲𑁆𑀲 𑀘 𑀑𑀧𑀸𑀢𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 ¶ 𑀢𑀢𑁆𑀣, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀧𑀢𑀺𑀢𑁆𑀯𑀸 𑀘 𑀫𑀢𑁂 𑀢𑀲𑁆𑀫𑀺𑀁, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀪𑀯𑁂.

𑀦𑀺𑀧𑀢𑀺𑀢𑁆𑀯𑀸 𑀧𑀦𑀜𑁆𑀜𑀲𑁆𑀫𑀺𑀁, 𑀫𑀢𑁂 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺;

𑀅𑀦𑀼𑀤𑁆𑀤𑀺𑀲𑁆𑀲𑀓𑀫𑁄𑀧𑀸𑀢𑁄, 𑀔𑀢𑁄 𑀳𑁄𑀢𑀺 𑀲𑀘𑁂 𑀧𑀦.

‘‘𑀧𑀢𑀺𑀢𑁆𑀯𑀸 𑀏𑀢𑁆𑀣 𑀬𑁄 𑀓𑁄𑀘𑀺, 𑀫𑀭𑀢𑀽’’𑀢𑀺 𑀳𑀺 𑀬𑀢𑁆𑀢𑀓𑀸;

𑀫𑀭𑀦𑁆𑀢𑀺 𑀦𑀺𑀧𑀢𑀺𑀢𑁆𑀯𑀸 𑀘𑁂, 𑀤𑁄𑀲𑀸 𑀳𑁄𑀦𑁆𑀢𑀺𑀲𑁆𑀲 𑀢𑀢𑁆𑀢𑀓𑀸.

𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁, 𑀆𑀦𑀦𑁆𑀢𑀭𑀺𑀬𑀓𑀁 𑀯𑀤𑁂;

𑀢𑀣𑀸 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀁, 𑀳𑁄𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄.

𑀧𑀢𑀺𑀢𑁆𑀯𑀸 𑀕𑀩𑁆𑀪𑀺𑀦𑀻 𑀢𑀲𑁆𑀫𑀺𑀁, 𑀲𑀕𑀩𑁆𑀪𑀸 𑀘𑁂 𑀫𑀭𑀺𑀲𑁆𑀲𑀢𑀺;

𑀳𑁄𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀤𑁆𑀯𑁂, 𑀏𑀓𑁄𑀯𑁂𑀓𑁂𑀓𑀥𑀁𑀲𑀦𑁂.

𑀅𑀦𑀼𑀩𑀦𑁆𑀥𑁂𑀢𑁆𑀣 𑀘𑁄𑀭𑁂𑀳𑀺, 𑀧𑀢𑀺𑀢𑁆𑀯𑀸 𑀘𑁂 𑀫𑀭𑀺𑀲𑁆𑀲𑀢𑀺;

𑀑𑀧𑀸𑀢𑀔𑀡𑀓𑀲𑁆𑀲𑁂𑀯, 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀓𑀺𑀭.

𑀯𑁂𑀭𑀺𑀦𑁄 ¶ 𑀢𑀢𑁆𑀣 𑀧𑀸𑀢𑁂𑀢𑁆𑀯𑀸, 𑀲𑀘𑁂 𑀫𑀸𑀭𑁂𑀦𑁆𑀢𑀺 𑀯𑁂𑀭𑀺𑀦𑁄;

𑀧𑀢𑀺𑀢𑀁 𑀢𑀢𑁆𑀣 𑀫𑀸𑀭𑁂𑀦𑁆𑀢𑀺, 𑀦𑀻𑀳𑀭𑀺𑀢𑁆𑀯𑀸 𑀲𑀘𑁂 𑀩𑀳𑀺.

𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀺 𑀑𑀧𑀸𑀢𑁂, 𑀫𑀢𑀸 𑀘𑁂 𑀑𑀧𑀧𑀸𑀢𑀺𑀓𑀸;

𑀅𑀲𑀓𑁆𑀓𑁄𑀦𑁆𑀢𑀸 𑀘 𑀦𑀺𑀓𑁆𑀔𑀦𑁆𑀢𑀼𑀁, 𑀲𑀩𑁆𑀩𑀢𑁆𑀣 𑀘 𑀧𑀭𑀸𑀚𑀬𑁄.

𑀬𑀓𑁆𑀔𑀸𑀤𑀬𑁄 𑀧𑀦𑀼𑀤𑁆𑀤𑀺𑀲𑁆𑀲, 𑀔𑀡𑀦𑁂 𑀤𑀼𑀓𑁆𑀔𑀲𑀫𑁆𑀪𑀯𑁂;

𑀤𑀼𑀓𑁆𑀓𑀝𑀁 𑀫𑀭𑀡𑁂 𑀯𑀢𑁆𑀣𑀼-𑀯𑀲𑀸 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄.

𑀫𑀦𑀼𑀲𑁆𑀲𑁂𑀬𑁂𑀯 𑀉𑀤𑁆𑀤𑀺𑀲𑁆𑀲, 𑀔𑀢𑁂 𑀑𑀧𑀸𑀢𑀓𑁂 𑀧𑀦;

𑀅𑀦𑀸𑀧𑀢𑁆𑀢𑀺 𑀧𑀢𑀺𑀢𑁆𑀯𑀸 𑀳𑀺, 𑀬𑀓𑁆𑀔𑀸𑀤𑀻𑀲𑀼 𑀫𑀢𑁂𑀲𑀼𑀧𑀺.

𑀢𑀣𑀸 𑀬𑀓𑁆𑀔𑀸𑀤𑀬𑁄 𑀧𑀸𑀡𑁂, 𑀔𑀢𑁂 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀼𑀦𑀸;

𑀦𑀺𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼𑀧𑁆𑀬𑀬𑀁 𑀦𑀬𑁄.

‘‘𑀧𑀸𑀡𑀺𑀦𑁄 𑀏𑀢𑁆𑀣 𑀩𑀚𑁆𑀛𑀺𑀢𑁆𑀯𑀸, 𑀫𑀭𑀦𑁆𑀢𑀽’’𑀢𑀺 𑀅𑀦𑀼𑀤𑁆𑀤𑀺𑀲𑀁;

𑀧𑀸𑀲𑀁 𑀑𑀟𑁆𑀟𑁂𑀢𑀺 𑀬𑁄 𑀢𑀢𑁆𑀣, 𑀲𑀘𑁂 𑀩𑀚𑁆𑀛𑀦𑁆𑀢𑀺 𑀧𑀸𑀡𑀺𑀦𑁄.

𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑀲𑁆𑀫𑀺𑀁, 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸;

𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁, 𑀆𑀦𑀦𑁆𑀢𑀭𑀺𑀬𑀫𑁂𑀯 𑀘.

𑀉𑀤𑁆𑀤𑀺𑀲𑁆𑀲 ¶ 𑀳𑀺 𑀓𑀢𑁂 𑀧𑀸𑀲𑁂, 𑀬𑀁 𑀧𑀦𑀼𑀤𑁆𑀤𑀺𑀲𑁆𑀲 𑀑𑀟𑁆𑀟𑀺𑀢𑁄;

𑀩𑀦𑁆𑀥𑀦𑁂𑀲𑀼 𑀢𑀤𑀜𑁆𑀜𑁂𑀲𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸𑀧𑀺, 𑀤𑀺𑀦𑁆𑀦𑁂 𑀧𑀸𑀲𑁂 𑀧𑀭𑀲𑁆𑀲 𑀳𑀺;

𑀫𑀽𑀮𑀝𑁆𑀞𑀲𑁆𑀲𑁂𑀯 𑀳𑁄𑀢𑀻𑀢𑀺, 𑀓𑀫𑁆𑀫𑀩𑀤𑁆𑀥𑁄 𑀦𑀺𑀬𑀸𑀫𑀺𑀢𑁄.

𑀬𑁂𑀦 𑀮𑀤𑁆𑀥𑁄 𑀲𑀘𑁂 𑀮𑁄𑀧𑀺, 𑀧𑀸𑀲𑀫𑀼𑀕𑁆𑀕𑀴𑀺𑀢𑀫𑁆𑀧𑀺 𑀯𑀸;

𑀣𑀺𑀭𑀁 𑀯𑀸𑀧𑀺 𑀓𑀭𑁄𑀢𑁂𑀯𑀁, 𑀉𑀪𑀺𑀦𑁆𑀦𑀁 𑀓𑀫𑁆𑀫𑀩𑀦𑁆𑀥𑀦𑀁.

𑀬𑁄 𑀧𑀸𑀲𑀁 𑀉𑀕𑁆𑀕𑀴𑀸𑀧𑁂𑀢𑁆𑀯𑀸, 𑀬𑀸𑀢𑀺 𑀧𑀸𑀧𑀪𑀬𑀸 𑀲𑀘𑁂;

𑀢𑀁 𑀤𑀺𑀲𑁆𑀯𑀸 𑀧𑀼𑀦 𑀅𑀜𑁆𑀜𑁄𑀧𑀺, 𑀲𑀡𑁆𑀞𑀧𑁂𑀢𑀺 𑀳𑀺 𑀢𑀢𑁆𑀣 𑀘.

𑀩𑀤𑁆𑀥𑀸 𑀩𑀤𑁆𑀥𑀸 𑀫𑀭𑀦𑁆𑀢𑀺 𑀘𑁂, 𑀫𑀽𑀮𑀝𑁆𑀞𑁄 𑀦 𑀘 𑀫𑀼𑀘𑁆𑀘𑀢𑀺;

𑀞𑀧𑁂𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑁂, 𑀧𑀸𑀲𑀬𑀝𑁆𑀞𑀺𑀁 𑀯𑀺𑀫𑀼𑀘𑁆𑀘𑀢𑀺.

𑀕𑁄𑀧𑁂𑀢𑁆𑀯𑀸𑀧𑀺 𑀦 𑀫𑁄𑀓𑁆𑀔𑁄 𑀳𑀺, 𑀧𑀸𑀲𑀬𑀝𑁆𑀞𑀺𑀁 𑀲𑀬𑀁𑀓𑀢𑀁;

𑀢𑀫𑀜𑁆𑀜𑁄 𑀧𑀼𑀦 𑀕𑀡𑁆𑀳𑀺𑀢𑁆𑀯𑀸, 𑀲𑀡𑁆𑀞𑀧𑁂𑀢𑀺 𑀲𑀘𑁂 𑀧𑀦.

𑀢𑀧𑁆𑀧𑀘𑁆𑀘𑀬𑀸 𑀫𑀭𑀦𑁆𑀢𑁂𑀲𑀼, 𑀫𑀽𑀮𑀝𑁆𑀞𑁄 𑀦 𑀘 𑀫𑀼𑀘𑁆𑀘𑀢𑀺;

𑀦𑀸𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀯𑀸 𑀢𑀁, 𑀛𑀸𑀧𑁂𑀢𑁆𑀯𑀸 𑀯𑀸 𑀯𑀺𑀫𑀼𑀘𑁆𑀘𑀢𑀺.

𑀭𑁄𑀧𑁂𑀦𑁆𑀢𑀲𑁆𑀲 ¶ 𑀘 𑀲𑀽𑀮𑀁 𑀯𑀸, 𑀲𑀚𑁆𑀚𑁂𑀦𑁆𑀢𑀲𑁆𑀲 𑀅𑀤𑀽𑀳𑀮𑀁;

𑀑𑀧𑀸𑀢𑁂𑀦 𑀘 𑀧𑀸𑀲𑁂𑀦, 𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀢𑀣𑀸𑀫𑀭𑀡𑀘𑀺𑀢𑁆𑀢𑀲𑁆𑀲, 𑀫𑀢𑁂𑀧𑁆𑀬𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀫𑀦𑀼𑀲𑁆𑀲𑀧𑀸𑀡𑀺𑀫𑁆𑀳𑀺 𑀘 𑀧𑀸𑀡𑀲𑀜𑁆𑀜𑀺𑀢𑀸;

𑀲𑀘𑀲𑁆𑀲 𑀘𑀺𑀢𑁆𑀢𑀁 𑀫𑀭𑀡𑀽𑀧𑀲𑀁𑀳𑀺𑀢𑀁;

𑀉𑀧𑀓𑁆𑀓𑀫𑁄 𑀢𑁂𑀦 𑀘 𑀢𑀲𑁆𑀲 𑀦𑀸𑀲𑁄;

𑀧𑀜𑁆𑀘𑁂𑀢𑁆𑀣 𑀅𑀗𑁆𑀕𑀸𑀦𑀺 𑀫𑀦𑀼𑀲𑁆𑀲𑀖𑀸𑀢𑁂.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀢𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀦𑁆𑀢𑀫𑀢𑁆𑀢𑀲𑁆𑀲𑀺𑀢𑀫𑁂𑀯 ¶ 𑀓𑀢𑁆𑀯𑀸;

𑀪𑀯𑀁 𑀅𑀥𑀺𑀝𑁆𑀞𑀸𑀬 𑀘 𑀯𑀢𑁆𑀢𑀫𑀸𑀦𑀁;

𑀅𑀜𑁆𑀜𑀸𑀧𑀤𑁂𑀲𑀜𑁆𑀘 𑀯𑀺𑀦𑀸𑀥𑀺𑀫𑀸𑀦𑀁;

𑀛𑀸𑀦𑀸𑀤𑀺𑀪𑁂𑀤𑀁 𑀲𑀫𑀼𑀤𑀸𑀘𑀭𑁂𑀬𑁆𑀬.

𑀓𑀸𑀬𑁂𑀦 𑀯𑀸𑀘𑀸𑀬𑀧𑀺 𑀯𑀸 𑀢𑀤𑀢𑁆𑀣𑁂;

𑀜𑀸𑀢𑁂𑀯 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀅𑀪𑀩𑁆𑀩𑁄;

𑀬𑀣𑁂𑀯 𑀢𑀸𑀮𑁄 𑀧𑀦 𑀫𑀢𑁆𑀣𑀓𑀲𑁆𑀫𑀺𑀁;

𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀧𑀼𑀦 𑀭𑀼𑀴𑁆𑀳𑀺𑀪𑀸𑀯𑁂.

𑀅𑀲𑀦𑁆𑀢𑀫𑁂𑀯𑀢𑁆𑀢𑀦𑀺 𑀬𑁄 𑀧𑀭𑀲𑁆𑀲;

𑀤𑀻𑀧𑁂𑀢𑀺 𑀛𑀸𑀦𑀸𑀤𑀺𑀫𑀦𑀦𑁆𑀢𑀭𑀁 𑀲𑁄;

𑀚𑀸𑀦𑀸𑀢𑀺 𑀘𑁂 𑀳𑁄𑀢𑀺 𑀘𑀼𑀢𑁄 𑀳𑀺 𑀦𑁄 𑀘𑁂;

𑀚𑀸𑀦𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀫𑀲𑁆𑀲 𑀳𑁄𑀢𑀺.

‘‘𑀬𑁄 ¶ 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻𑀥 𑀪𑀺𑀓𑁆𑀔𑀼;

𑀲𑁄 𑀛𑀸𑀦𑀮𑀸𑀪𑀻’’𑀢𑀺 𑀘 𑀤𑀻𑀧𑀺𑀢𑁂 𑀘𑁂;

𑀚𑀸𑀦𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀫𑀲𑁆𑀲 𑀦𑁄 𑀘𑁂;

𑀚𑀸𑀦𑀸𑀢𑀺 𑀢𑀁 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑀅𑀲𑀦𑁆𑀢𑀫𑁂𑀯𑀢𑁆𑀢𑀦𑀺 𑀥𑀫𑁆𑀫𑀫𑁂𑀢𑀁;

𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀤𑀢𑁄𑀥𑀺𑀫𑀸𑀦𑀸;

𑀯𑀼𑀢𑁆𑀢𑁄 𑀅𑀦𑀸𑀧𑀢𑁆𑀢𑀺𑀦𑀬𑁄 𑀧𑀦𑁂𑀯𑀁;

𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀢𑀣𑀸𑀤𑀺𑀓𑀲𑁆𑀲.

𑀧𑀸𑀧𑀺𑀘𑁆𑀙𑀢𑀸 𑀢𑀲𑁆𑀲 𑀅𑀲𑀦𑁆𑀢𑀪𑀸𑀯𑁄;

𑀆𑀭𑁄𑀘𑀦𑀜𑁆𑀘𑁂𑀯 𑀫𑀦𑀼𑀲𑁆𑀲𑀓𑀲𑁆𑀲;

𑀧𑀜𑁆𑀘𑁂𑀢𑁆𑀣 𑀅𑀗𑁆𑀕𑀸𑀦𑀺 𑀯𑀤𑀦𑁆𑀢𑀺 𑀥𑀻𑀭𑀸.

𑀧𑀞𑀫𑁂 𑀤𑀼𑀢𑀺𑀬𑁂 𑀘𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀦 𑀯𑀺𑀚𑁆𑀚𑀢𑀺;

𑀤𑀼𑀢𑀺𑀬𑁂 𑀢𑀢𑀺𑀬𑁂𑀬𑁂𑀯, 𑀆𑀡𑀢𑁆𑀢𑀺 𑀦 𑀧𑀦𑁂𑀢𑀭𑁂.

𑀆𑀤𑀺 ¶ 𑀫𑁂𑀓𑀲𑀫𑀼𑀝𑁆𑀞𑀸𑀦𑀁, 𑀤𑀼𑀯𑀗𑁆𑀕𑀁 𑀓𑀸𑀬𑀘𑀺𑀢𑁆𑀢𑀢𑁄;

𑀲𑁂𑀲𑀸 𑀘 𑀢𑀺𑀲𑀫𑀼𑀝𑁆𑀞𑀸𑀦𑀸, 𑀢𑁂𑀲𑀫𑀗𑁆𑀕𑀸𑀦𑀺 𑀲𑀢𑁆𑀢 𑀢𑀼.

𑀲𑀼𑀔𑁄𑀧𑁂𑀓𑁆𑀔𑀸𑀬𑀼𑀢𑀁 𑀆𑀤𑀺, 𑀢𑀢𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀁;

𑀤𑀼𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘, 𑀢𑀺𑀯𑁂𑀤𑀦𑀫𑀼𑀤𑀻𑀭𑀺𑀢𑀁.

𑀧𑀞𑀫𑀲𑁆𑀲𑀝𑁆𑀞 𑀘𑀺𑀢𑁆𑀢𑀸𑀦𑀺, 𑀢𑀢𑀺𑀬𑀲𑁆𑀲 𑀤𑀼𑀯𑁂 𑀧𑀦;

𑀤𑀼𑀢𑀺𑀬𑀲𑁆𑀲 𑀘𑀢𑀼𑀢𑁆𑀣𑀲𑁆𑀲, 𑀤𑀲 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀭𑁂.

𑀢𑀲𑁆𑀫𑀸 𑀲𑀘𑀺𑀢𑁆𑀢𑀓𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀫𑁂𑀢𑀁 𑀘𑀢𑀼𑀩𑁆𑀩𑀺𑀥𑀁;

𑀓𑁆𑀭𑀺𑀬𑀸 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀜𑁆𑀘, 𑀮𑁄𑀓𑀯𑀚𑁆𑀚𑀦𑁆𑀢𑀺 𑀤𑀻𑀧𑀺𑀢𑀁.

𑀇𑀤𑀫𑀸𑀧𑀢𑁆𑀢𑀺𑀬𑀁𑀬𑁂𑀯, 𑀯𑀺𑀥𑀸𑀦𑀁 𑀧𑀦 𑀬𑀼𑀚𑁆𑀚𑀢𑀺;

𑀢𑀲𑁆𑀫𑀸 𑀆𑀧𑀢𑁆𑀢𑀺𑀬𑀁𑀬𑁂𑀯, 𑀕𑀳𑁂𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑀫𑀼𑀤𑀼𑀧𑀺𑀝𑁆𑀞𑀺 𑀘 𑀮𑀫𑁆𑀩𑀻 𑀘, 𑀫𑀼𑀔𑀕𑁆𑀕𑀸𑀳𑀻 𑀦𑀺𑀲𑀻𑀤𑀓𑁄;

𑀧𑀸𑀭𑀸𑀚𑀺𑀓𑀸 𑀇𑀫𑁂 𑀢𑁂𑀲𑀁, 𑀘𑀢𑁆𑀢𑀸𑀭𑁄 𑀅𑀦𑀼𑀮𑁄𑀫𑀺𑀓𑀸.

𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀘𑀢𑁆𑀢𑀸𑀭𑀺, 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻 𑀲𑀬𑀁;

𑀢𑀣𑀸 𑀏𑀓𑀸𑀤𑀲𑀸𑀪𑀩𑁆𑀩𑀸, 𑀲𑀩𑁆𑀩𑁂𑀢𑁂 𑀘𑀢𑀼𑀯𑀻𑀲𑀢𑀺.

𑀇𑀫𑁂 ¶ 𑀧𑀸𑀭𑀸𑀚𑀺𑀓𑀸 𑀯𑀼𑀢𑁆𑀢𑀸, 𑀘𑀢𑀼𑀯𑀻𑀲𑀢𑀺 𑀧𑀼𑀕𑁆𑀕𑀮𑀸;

𑀅𑀪𑀩𑁆𑀩𑀸 𑀪𑀺𑀓𑁆𑀔𑀼𑀪𑀸𑀯𑀸𑀬, 𑀲𑀻𑀲𑀘𑁆𑀙𑀺𑀦𑁆𑀦𑁄𑀯 𑀚𑀻𑀯𑀺𑀢𑀼𑀁.

𑀧𑀡𑁆𑀟𑀓𑁄 𑀘 𑀢𑀺𑀭𑀘𑁆𑀙𑀸𑀦𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑁄𑀧𑀺 𑀘;

𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀳𑀺, 𑀅𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀓𑀸.

𑀧𑀜𑁆𑀘𑀸𑀦𑀦𑁆𑀢𑀭𑀺𑀓𑀸 𑀣𑁂𑀬𑁆𑀬-𑀲𑀁𑀯𑀸𑀲𑁄𑀧𑀺 𑀘 𑀤𑀽𑀲𑀓𑁄;

𑀢𑀺𑀢𑁆𑀣𑀺𑀧𑀓𑁆𑀓𑀦𑁆𑀢𑀓𑁄 𑀘𑁂𑀢𑀺, 𑀓𑁆𑀭𑀺𑀬𑀸𑀦𑀝𑁆𑀞𑀸 𑀧𑀦𑀝𑁆𑀞 𑀢𑁂.

𑀯𑀺𑀦𑀺𑀘𑁆𑀙𑀬𑁄 𑀬𑁄 𑀧𑀦 𑀲𑀸𑀭𑀪𑀽𑀢𑁄;

𑀧𑀸𑀭𑀸𑀚𑀺𑀓𑀸𑀦𑀁 𑀓𑀣𑀺𑀢𑁄 𑀫𑀬𑀸𑀬𑀁;

𑀢𑀲𑁆𑀲𑀸𑀦𑀼𑀲𑀸𑀭𑁂𑀦 𑀩𑀼𑀥𑁂𑀦 𑀜𑀸𑀢𑀼𑀁;

𑀲𑀓𑁆𑀓𑀸 𑀳𑀺 𑀲𑁂𑀲𑁄𑀧𑀺 𑀅𑀲𑁂𑀲𑀢𑁄𑀯.

𑀯𑀺𑀦𑀬𑁂 𑀯𑀺𑀯𑀺𑀥𑁂𑀳𑀺 𑀦𑀬𑁂𑀳𑀺 𑀬𑀼𑀢𑁂;

𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀫𑀬𑀁 𑀲𑀢𑀢𑀁.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀫𑁄𑀘𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀯𑀸𑀬𑀸𑀫𑁄 𑀲𑀼𑀓𑁆𑀓𑀫𑁄𑀘𑀦𑀁;

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑀧𑀭𑁂𑀦𑀼𑀧𑀓𑁆𑀓𑀫𑀸𑀧𑁂𑀢𑁆𑀯𑀸, 𑀅𑀗𑁆𑀕𑀚𑀸𑀢𑀁 𑀧𑀦𑀢𑁆𑀢𑀦𑁄;

𑀲𑀼𑀓𑁆𑀓𑀁 𑀬𑀤𑀺 𑀯𑀺𑀫𑁄𑀘𑁂𑀢𑀺, 𑀕𑀭𑀼𑀓𑀁 𑀢𑀲𑁆𑀲 𑀦𑀺𑀤𑁆𑀤𑀺𑀲𑁂.

𑀲𑀜𑁆𑀘𑀺𑀘𑁆𑀘𑀼𑀧𑀓𑁆𑀓𑀫𑀦𑁆𑀢𑀲𑁆𑀲, 𑀅𑀗𑁆𑀕𑀚𑀸𑀢𑀁 𑀧𑀦𑀢𑁆𑀢𑀦𑁄;

𑀣𑀼𑀮𑁆𑀮𑀘𑁆𑀘𑀬𑀁 𑀲𑀫𑀼𑀤𑁆𑀤𑀺𑀝𑁆𑀞𑀁, 𑀲𑀘𑁂 𑀲𑀼𑀓𑁆𑀓𑀁 𑀦 𑀫𑀼𑀘𑁆𑀘𑀢𑀺.

𑀲𑀜𑁆𑀘𑀺𑀘𑁆𑀘𑀼𑀧𑀓𑁆𑀓𑀫𑀦𑁆𑀢𑀲𑁆𑀲 ¶ , 𑀆𑀓𑀸𑀲𑁂 𑀓𑀫𑁆𑀧𑀦𑁂𑀦𑀧𑀺;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲, 𑀬𑀤𑀺 𑀲𑀼𑀓𑁆𑀓𑀁 𑀦 𑀫𑀼𑀘𑁆𑀘𑀢𑀺.

𑀯𑀢𑁆𑀣𑀺𑀁 𑀓𑀻𑀴𑀸𑀬 𑀧𑀽𑀭𑁂𑀢𑁆𑀯𑀸, 𑀧𑀲𑁆𑀲𑀸𑀯𑁂𑀢𑀼𑀁 𑀦 𑀯𑀝𑁆𑀝𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀦 𑀳𑀢𑁆𑀣𑁂𑀦, 𑀓𑀻𑀴𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀺𑀲𑁆𑀲𑀦𑁆𑀦𑀁 𑀧𑀦 𑀇𑀢𑁆𑀣𑀻𑀦𑀁, 𑀦𑀺𑀫𑀺𑀢𑁆𑀢𑀁 𑀭𑀢𑁆𑀢𑀘𑁂𑀢𑀲𑀸;

𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀏𑀓𑁂𑀦𑁂𑀓𑀁 𑀧𑀬𑁄𑀕𑁂𑀦, 𑀤𑀺𑀯𑀲𑀫𑁆𑀧𑀺 𑀘 𑀧𑀲𑁆𑀲𑀢𑁄;

𑀦𑀸𑀧𑀢𑁆𑀢𑀺𑀬𑀸 𑀪𑀯𑁂 𑀅𑀗𑁆𑀕𑀁, 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀁.

𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀦𑀼𑀧𑀓𑁆𑀓𑀫𑀢𑁄𑀧𑀺 𑀘;

𑀲𑀼𑀧𑀺𑀦𑀦𑁆𑀢𑁂𑀦 𑀫𑀼𑀢𑁆𑀢𑀲𑁆𑀫𑀺𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀆𑀫𑀲𑀦𑁆𑀢𑁄 ¶ 𑀫𑀦𑀼𑀲𑁆𑀲𑀺𑀢𑁆𑀣𑀺𑀁, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀢𑁄;

‘‘𑀫𑀦𑀼𑀲𑁆𑀲𑀺𑀢𑁆𑀣𑀻’’𑀢𑀺 𑀲𑀜𑁆𑀜𑀸𑀬, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀺𑀓𑁄.

𑀮𑁄𑀫𑁂𑀦𑀦𑁆𑀢𑀫𑀲𑁄 𑀮𑁄𑀫𑀁, 𑀨𑀼𑀲𑀦𑁆𑀢𑀲𑁆𑀲𑀸𑀧𑀺 𑀇𑀢𑁆𑀣𑀺𑀬𑀸;

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀳𑁄𑀢𑀺 𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀇𑀢𑁆𑀣𑀺𑀬𑀸 𑀬𑀤𑀺 𑀲𑀫𑁆𑀨𑀼𑀝𑁆𑀞𑁄, 𑀨𑀲𑁆𑀲𑀁 𑀲𑁂𑀯𑀦𑀘𑁂𑀢𑀦𑁄;

𑀯𑀸𑀬𑀫𑀺𑀢𑁆𑀯𑀸𑀥𑀺𑀯𑀸𑀲𑁂𑀢𑀺, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑀏𑀓𑁂𑀦 𑀧𑀦 𑀳𑀢𑁆𑀣𑁂𑀦, 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑁂𑀦 𑀯𑀸;

𑀢𑀢𑁆𑀣 𑀢𑀢𑁆𑀣 𑀨𑀼𑀲𑀦𑁆𑀢𑀲𑁆𑀲, 𑀏𑀓𑀸𑀯𑀸𑀧𑀢𑁆𑀢𑀺 𑀤𑀻𑀧𑀺𑀢𑀸.

𑀅𑀕𑁆𑀕𑀳𑁂𑀢𑁆𑀯𑀸 𑀨𑀼𑀲𑀦𑁆𑀢𑀲𑁆𑀲, 𑀬𑀸𑀯 𑀧𑀸𑀤𑀜𑁆𑀘 𑀲𑀻𑀲𑀢𑁄;

𑀓𑀸𑀬𑀸 𑀳𑀢𑁆𑀣𑀫𑀫𑁄𑀘𑁂𑀢𑁆𑀯𑀸, 𑀏𑀓𑀸𑀯 𑀤𑀺𑀯𑀲𑀫𑁆𑀧𑀺 𑀘.

𑀅𑀗𑁆𑀕𑀼𑀮𑀻𑀦𑀁 𑀢𑀼 𑀧𑀜𑁆𑀘𑀦𑁆𑀦𑀁, 𑀕𑀳𑀡𑁂 𑀏𑀓𑀢𑁄 𑀧𑀦;

𑀏𑀓𑀸𑀬𑁂𑀯 𑀲𑀺𑀬𑀸𑀧𑀢𑁆𑀢𑀺, 𑀦 𑀳𑀺 𑀓𑁄𑀝𑁆𑀞𑀸𑀲𑀢𑁄 𑀲𑀺𑀬𑀸.

𑀦𑀸𑀦𑀺𑀢𑁆𑀣𑀻𑀦𑀁 𑀲𑀘𑁂 𑀧𑀜𑁆𑀘, 𑀕𑀡𑁆𑀳𑀸𑀢𑁆𑀬𑀗𑁆𑀕𑀼𑀮𑀺𑀬𑁄 𑀧𑀦;

𑀏𑀓𑀢𑁄 𑀧𑀜𑁆𑀘 𑀲𑀗𑁆𑀖𑀸𑀤𑀺-𑀲𑁂𑀲𑀸 𑀳𑁄𑀦𑁆𑀢𑀺𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀇𑀢𑁆𑀣𑀺𑀬𑀸 𑀯𑀺𑀫𑀢𑀺𑀲𑁆𑀲𑀸𑀧𑀺, 𑀧𑀡𑁆𑀟𑀓𑀸𑀤𑀺𑀓𑀲𑀜𑁆𑀜𑀺𑀦𑁄;

𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬-𑀲𑀫𑁆𑀩𑀤𑁆𑀥𑀁 𑀨𑀼𑀲𑀢𑁄𑀧𑀺 𑀯𑀸.

𑀧𑀡𑁆𑀟𑀓𑁂 ¶ 𑀬𑀓𑁆𑀔𑀺𑀧𑁂𑀢𑀻𑀲𑀼, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀤𑀼𑀓𑁆𑀓𑀝𑀁 𑀓𑀸𑀬𑀲𑀁𑀲𑀕𑁆𑀕𑁂, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸.

𑀪𑀺𑀓𑁆𑀔𑀼𑀦𑁄 𑀧𑀝𑀺𑀩𑀤𑁆𑀥𑁂𑀦, 𑀓𑀸𑀬𑁂𑀦 𑀧𑀦 𑀇𑀢𑁆𑀣𑀺𑀬𑀸;

𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑀜𑁆𑀘, 𑀨𑀼𑀲𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁.

𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀭𑀽𑀧𑀜𑁆𑀘, 𑀤𑀸𑀭𑀼𑀮𑁄𑀳𑀫𑀬𑀸𑀤𑀺𑀓𑀁;

𑀢𑀸𑀲𑀁 𑀯𑀢𑁆𑀣𑀫𑀮𑀗𑁆𑀓𑀸𑀭𑀁, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀢𑁆𑀣𑀚𑀸𑀢𑀨𑀮𑀁 𑀔𑀚𑁆𑀚𑀁, 𑀫𑀼𑀕𑁆𑀕𑀸𑀤𑀺𑀁 𑀢𑀢𑁆𑀣𑀚𑀸𑀢𑀓𑀁;

𑀥𑀜𑁆𑀜𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀩𑁆𑀩𑀁 ¶ 𑀥𑀫𑀦𑀲𑀗𑁆𑀔𑀸𑀤𑀺𑀁, 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑀫𑁆𑀧𑀺 𑀘;

𑀭𑀢𑀦𑀸𑀦𑀺 𑀘 𑀲𑀩𑁆𑀩𑀸𑀦𑀺, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀩𑁆𑀩𑀫𑀸𑀯𑀼𑀥𑀪𑀡𑁆𑀟𑀜𑁆𑀘, 𑀚𑀺𑀬𑀸 𑀘 𑀥𑀦𑀼𑀤𑀡𑁆𑀟𑀓𑁄;

𑀅𑀦𑀸𑀫𑀸𑀲𑀫𑀺𑀤𑀁 𑀲𑀩𑁆𑀩𑀁, 𑀚𑀸𑀮𑀜𑁆𑀘 𑀲𑀭𑀯𑀸𑀭𑀡𑀁.

𑀲𑀼𑀯𑀡𑁆𑀡𑀧𑀝𑀺𑀩𑀺𑀫𑁆𑀩𑀸𑀤𑀺, 𑀘𑁂𑀢𑀺𑀬𑀁 𑀆𑀭𑀓𑀽𑀝𑀓𑀁;

𑀅𑀦𑀸𑀫𑀸𑀲𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬 𑀳𑀺.

𑀲𑀩𑁆𑀩𑀁 𑀑𑀦𑀳𑀺𑀢𑀼𑀁 𑀯𑀸𑀧𑀺, 𑀑𑀦𑀳𑀸𑀧𑁂𑀢𑀼𑀫𑁂𑀯 𑀯𑀸;

𑀯𑀸𑀤𑀸𑀧𑁂𑀢𑀼𑀜𑁆𑀘 𑀯𑀸𑀤𑁂𑀢𑀼𑀁, 𑀯𑀸𑀤𑀺𑀢𑀁 𑀦 𑀘 𑀯𑀝𑁆𑀝𑀢𑀺.

‘‘𑀓𑀭𑀺𑀲𑁆𑀲𑀸𑀫𑀼𑀧𑀳𑀸𑀭’’𑀦𑁆𑀢𑀺, 𑀯𑀼𑀢𑁆𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸;

𑀧𑀽𑀚𑀸 𑀩𑀼𑀤𑁆𑀥𑀲𑁆𑀲 𑀓𑀸𑀢𑀩𑁆𑀩𑀸, 𑀯𑀢𑁆𑀢𑀩𑁆𑀩𑀸𑀢𑀺 𑀘 𑀯𑀺𑀜𑁆𑀜𑀼𑀦𑀸.

𑀲𑀬𑀁 𑀨𑀼𑀲𑀺𑀬𑀫𑀸𑀦𑀲𑁆𑀲, 𑀇𑀢𑁆𑀣𑀺𑀬𑀸 𑀧𑀦 𑀥𑀼𑀢𑁆𑀢𑀺𑀬𑀸;

𑀅𑀯𑀸𑀬𑀫𑀺𑀢𑁆𑀯𑀸 𑀓𑀸𑀬𑁂𑀦, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀢𑁄.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀺𑀦𑁄 𑀘𑁂𑀯, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀧𑀞𑀫𑁂𑀦 𑀲𑀫𑀸𑀦𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀧𑀦;

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑁆𑀲, 𑀢𑀣𑀸 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀬𑀸.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄;

𑀤𑁆𑀯𑀺𑀦𑁆𑀦𑀜𑁆𑀘 𑀧𑀦 𑀫𑀕𑁆𑀕𑀸𑀦𑀁, 𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀘.

𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀺 ¶ , 𑀑𑀪𑀸𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀜𑁆𑀜𑀼𑀁 𑀅𑀦𑁆𑀢𑀫𑀲𑁄 𑀳𑀢𑁆𑀣-𑀫𑀼𑀤𑁆𑀤𑀸𑀬𑀧𑀺 𑀕𑀭𑀼𑀁 𑀲𑀺𑀬𑀸.

‘‘𑀲𑀺𑀔𑀭𑀡𑀻𑀲𑀺 ¶ , 𑀲𑀫𑁆𑀪𑀺𑀦𑁆𑀦𑀸, 𑀉𑀪𑀢𑁄𑀩𑁆𑀬𑀜𑁆𑀚𑀦𑀸’’𑀢𑀺 𑀘;

𑀅𑀓𑁆𑀓𑁄𑀲𑀯𑀘𑀦𑁂𑀦𑀸𑀧𑀺, 𑀕𑀭𑀼𑀓𑀁 𑀢𑀼 𑀲𑀼𑀡𑀦𑁆𑀢𑀺𑀬𑀸.

𑀧𑀼𑀦𑀧𑁆𑀧𑀼𑀦𑁄𑀪𑀸𑀲𑀦𑁆𑀢𑀲𑁆𑀲, 𑀏𑀓𑀯𑀸𑀘𑀸𑀬 𑀯𑀸 𑀩𑀳𑀽;

𑀕𑀡𑀦𑀸𑀬 𑀘 𑀯𑀸𑀘𑀸𑀦𑀁, 𑀇𑀢𑁆𑀣𑀻𑀦𑀁 𑀕𑀭𑀼𑀓𑀸 𑀲𑀺𑀬𑀼𑀁.

𑀲𑀸 𑀘𑁂 𑀦𑀧𑁆𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸;

𑀆𑀤𑀺𑀲𑁆𑀲 𑀪𑀡𑀦𑁂 𑀘𑀸𑀧𑀺, 𑀉𑀩𑁆𑀪𑀚𑀸𑀡𑀼𑀫𑀥𑀓𑁆𑀔𑀓𑀁.

𑀉𑀩𑁆𑀪𑀓𑁆𑀔𑀓𑀫𑀥𑁄𑀚𑀸𑀡𑀼-𑀫𑀡𑁆𑀟𑀮𑀁 𑀧𑀦 𑀉𑀤𑁆𑀤𑀺𑀲𑀁;

𑀯𑀡𑁆𑀡𑀸𑀤𑀺𑀪𑀡𑀦𑁂 𑀓𑀸𑀬-𑀧𑀝𑀺𑀩𑀤𑁆𑀥𑁂 𑀘 𑀤𑀼𑀓𑁆𑀓𑀝𑀁.

𑀣𑀼𑀮𑁆𑀮𑀘𑁆𑀘𑀬𑀁 𑀪𑀯𑁂 𑀢𑀲𑁆𑀲, 𑀧𑀡𑁆𑀟𑀓𑁂 𑀬𑀓𑁆𑀔𑀺𑀧𑁂𑀢𑀺𑀲𑀼;

𑀅𑀥𑀓𑁆𑀔𑀓𑁄𑀩𑁆𑀪𑀚𑀸𑀡𑀼𑀫𑁆𑀳𑀺, 𑀤𑀼𑀓𑁆𑀓𑀝𑀁 𑀧𑀡𑁆𑀟𑀓𑀸𑀤𑀺𑀲𑀼.

𑀉𑀩𑁆𑀪𑀓𑁆𑀔𑀓𑀫𑀥𑁄𑀚𑀸𑀡𑀼-𑀫𑀡𑁆𑀟𑀮𑁂𑀧𑀺 𑀅𑀬𑀁 𑀦𑀬𑁄;

𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸.

𑀅𑀢𑁆𑀣𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀁, 𑀓𑀢𑁆𑀯𑀸 𑀑𑀪𑀸𑀲𑀢𑁄𑀧𑀺 𑀘;

𑀯𑀤𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀼𑀭𑀓𑁆𑀔𑀢𑁆𑀯𑀸𑀦𑀼𑀲𑀸𑀲𑀦𑀺𑀁.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀯𑁂𑀤𑀦𑁂𑀢𑁆𑀣 𑀤𑁆𑀯𑀺𑀥𑀸 𑀫𑀢𑀸.

𑀯𑀡𑁆𑀡𑀁 𑀧𑀦𑀢𑁆𑀢𑀦𑁄 𑀓𑀸𑀫-𑀧𑀸𑀭𑀺𑀘𑀭𑀺𑀬𑀸𑀬 𑀪𑀸𑀲𑀢𑁄;

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀸 𑀘𑁂, 𑀚𑀸𑀦𑀸𑀢𑀺 𑀕𑀭𑀼𑀓𑀁 𑀲𑀺𑀬𑀸.

𑀦𑁄 𑀘𑁂 𑀚𑀸𑀦𑀸𑀢𑀺 𑀲𑀸 𑀬𑀓𑁆𑀔𑀺-𑀧𑁂𑀢𑀺𑀤𑁂𑀯𑀻𑀲𑀼 𑀧𑀡𑁆𑀟𑀓𑁂;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲, 𑀲𑁂𑀲𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀘𑀻𑀯𑀭𑀸𑀤𑀻𑀳𑀺 𑀅𑀜𑁆𑀜𑁂𑀳𑀺, 𑀯𑀢𑁆𑀣𑀼𑀓𑀸𑀫𑁂𑀳𑀺 𑀅𑀢𑁆𑀢𑀦𑁄;

𑀦𑀢𑁆𑀣𑀺 𑀤𑁄𑀲𑁄 𑀪𑀡𑀦𑁆𑀢𑀲𑁆𑀲, 𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀦𑀁.

𑀇𑀢𑁆𑀣𑀺𑀲𑀜𑁆𑀜𑀸 ¶ 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑀺𑀢𑀸;

𑀑𑀪𑀸𑀲𑁄 𑀢𑁂𑀦 𑀭𑀸𑀕𑁂𑀦, 𑀔𑀡𑁂 𑀢𑀲𑁆𑀫𑀺𑀁 𑀯𑀺𑀚𑀸𑀦𑀦𑀁.

𑀧𑀜𑁆𑀘𑀗𑁆𑀕𑀸𑀦𑀺 ¶ 𑀇𑀫𑀸𑀦𑁂𑀢𑁆𑀣, 𑀯𑁂𑀤𑀺𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄𑀧𑁆𑀬𑀲𑁆𑀲, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀲𑀦𑁆𑀤𑁂𑀲𑀁, 𑀧𑀼𑀭𑀺𑀲𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀯𑀸;

𑀯𑀻𑀫𑀁𑀲𑀢𑀺 𑀕𑀭𑀼 𑀳𑁄𑀢𑀺, 𑀧𑀘𑁆𑀘𑀸𑀳𑀭𑀢𑀺 𑀘𑁂 𑀧𑀦.

‘‘𑀬𑀲𑁆𑀲𑀸 𑀳𑀺 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀆𑀭𑁄𑀘𑁂𑀳𑀻’’𑀢𑀺 𑀧𑁂𑀲𑀺𑀢𑁄;

𑀢𑀫𑀤𑀺𑀲𑁆𑀯𑀸 𑀢𑀤𑀜𑁆𑀜𑀲𑁆𑀲, 𑀅𑀯𑀲𑁆𑀲𑀸𑀭𑁄𑀘𑀓𑀲𑁆𑀲 𑀲𑁄.

‘‘𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁, 𑀧𑀘𑁆𑀘𑀸𑀳𑀭𑀢𑀺 𑀘𑁂 𑀧𑀦;

𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀫𑁆𑀳𑀸, 𑀲𑀜𑁆𑀘𑀭𑀺𑀢𑁆𑀢𑀸 𑀦 𑀫𑀼𑀘𑁆𑀘𑀢𑀺.

‘‘𑀫𑀸𑀢𑀭𑀸 𑀭𑀓𑁆𑀔𑀺𑀢𑀁 𑀇𑀢𑁆𑀣𑀺𑀁, 𑀕𑀘𑁆𑀙 𑀩𑁆𑀭𑀽𑀳𑀻’’𑀢𑀺 𑀧𑁂𑀲𑀺𑀢𑁄;

𑀧𑀺𑀢𑀼𑀭𑀓𑁆𑀔𑀺𑀢𑀫𑀜𑁆𑀜𑀁 𑀯𑀸, 𑀯𑀺𑀲𑀗𑁆𑀓𑁂𑀢𑁄𑀯 𑀪𑀸𑀲𑀢𑁄.

𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀳𑀺, 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀁𑀬𑀼𑀢𑁂;

𑀲𑀜𑁆𑀘𑀭𑀺𑀢𑁆𑀢𑁂 𑀲𑀫𑀸𑀧𑀦𑁆𑀦𑁂, 𑀕𑀭𑀼𑀓𑀸𑀧𑀢𑁆𑀢𑀺𑀫𑀸𑀤𑀺𑀲𑁂.

𑀤𑁆𑀯𑀻𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀧𑀡𑁆𑀟𑀓𑀸𑀤𑀻𑀲𑀼 𑀢𑀻𑀳𑀺𑀧𑀺;

𑀏𑀓𑁂𑀦𑁂𑀯 𑀘 𑀲𑀩𑁆𑀩𑀢𑁆𑀣, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀘𑁂𑀢𑀺𑀬𑀲𑁆𑀲 𑀘 𑀲𑀗𑁆𑀖𑀲𑁆𑀲, 𑀕𑀺𑀮𑀸𑀦𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄;

𑀕𑀘𑁆𑀙𑀢𑁄 𑀧𑀦 𑀓𑀺𑀘𑁆𑀘𑁂𑀦, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀫𑀦𑀼𑀲𑁆𑀲𑀢𑁆𑀢𑀁 𑀢𑀣𑀸 𑀢𑀲𑁆𑀲𑀸, 𑀦𑀦𑀸𑀮𑀁𑀯𑀘𑀦𑀻𑀬𑀢𑀸;

𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀦𑀁, 𑀯𑀲𑀸 𑀧𑀜𑁆𑀘𑀗𑁆𑀕𑀺𑀓𑀁 𑀫𑀢𑀁.

𑀇𑀤𑀜𑁆𑀳𑀺 𑀙𑀲𑀫𑀼𑀝𑁆𑀞𑀸𑀦𑀁, 𑀅𑀘𑀺𑀢𑁆𑀢𑀓𑀫𑀼𑀤𑀻𑀭𑀺𑀢𑀁;

𑀅𑀮𑀁𑀯𑀘𑀦𑀻𑀬𑀢𑁆𑀢𑀁 𑀯𑀸, 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀚𑀸𑀦𑀢𑁄.

𑀕𑀳𑁂𑀢𑁆𑀯𑀸 ¶ 𑀲𑀸𑀲𑀦𑀁 𑀓𑀸𑀬-𑀯𑀺𑀓𑀸𑀭𑁂𑀦𑀽𑀧𑀕𑀫𑁆𑀫 𑀢𑀁;

𑀯𑀻𑀫𑀁𑀲𑀺𑀢𑁆𑀯𑀸 𑀳𑀭𑀦𑁆𑀢𑀲𑁆𑀲, 𑀕𑀭𑀼𑀓𑀁 𑀓𑀸𑀬𑀢𑁄 𑀲𑀺𑀬𑀸.

𑀲𑀼𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯, 𑀯𑀘𑀦𑀁 𑀇𑀢𑁆𑀣𑀺𑀬𑀸 𑀧𑀼𑀦;

𑀢𑀁 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑁂𑀯, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸𑀘𑀢𑁄.

𑀅𑀚𑀸𑀦𑀦𑁆𑀢𑀲𑁆𑀲 𑀧𑀡𑁆𑀡𑀢𑁆𑀢𑀺𑀁, 𑀓𑀸𑀬𑀯𑀸𑀘𑀸𑀳𑀺 𑀢𑀁 𑀯𑀺𑀥𑀺𑀁;

𑀓𑀭𑁄𑀢𑁄 𑀳𑀭𑀢𑁄 𑀯𑀸𑀧𑀺, 𑀕𑀭𑀼𑀓𑀁 𑀓𑀸𑀬𑀯𑀸𑀘𑀢𑁄.

𑀚𑀸𑀦𑀺𑀢𑁆𑀯𑀸𑀧𑀺 ¶ 𑀓𑀭𑁄𑀦𑁆𑀢𑀲𑁆𑀲, 𑀕𑀭𑀼𑀓𑀸𑀧𑀢𑁆𑀢𑀺𑀬𑁄 𑀢𑀣𑀸;

𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑁂𑀯, 𑀲𑀫𑀼𑀝𑁆𑀞𑀸𑀦𑁂𑀳𑀺 𑀚𑀸𑀬𑀭𑁂.

𑀲𑀬𑀁𑀬𑀸𑀘𑀺𑀢𑀓𑁂𑀳𑁂𑀯, 𑀓𑀼𑀝𑀺𑀓𑀁 𑀅𑀧𑁆𑀧𑀫𑀸𑀡𑀺𑀓𑀁;

𑀅𑀢𑁆𑀢𑀼𑀤𑁆𑀤𑁂𑀲𑀁 𑀓𑀭𑁄𑀦𑁆𑀢𑀲𑁆𑀲, 𑀢𑀣𑀸𑀤𑁂𑀲𑀺𑀢𑀯𑀢𑁆𑀣𑀼𑀓𑀁.

𑀳𑁄𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀤𑁆𑀯𑁂, 𑀲𑀸𑀭𑀫𑁆𑀪𑀸𑀤𑀻𑀲𑀼 𑀤𑀼𑀓𑁆𑀓𑀝𑀁;

𑀲𑀘𑁂 𑀏𑀓𑀯𑀺𑀧𑀦𑁆𑀦𑀸 𑀲𑀸, 𑀕𑀭𑀼𑀓𑀁 𑀏𑀓𑀓𑀁 𑀲𑀺𑀬𑀸.

𑀧𑀼𑀭𑀺𑀲𑀁 𑀬𑀸𑀘𑀺𑀢𑀼𑀁 𑀓𑀫𑁆𑀫-𑀲𑀳𑀸𑀬𑀢𑁆𑀣𑀸𑀬 𑀯𑀝𑁆𑀝𑀢𑀺;

𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑁂𑀯, 𑀬𑀸𑀘𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀯𑀚𑁆𑀚𑀁 𑀳𑀢𑁆𑀣𑀓𑀫𑁆𑀫𑀫𑁆𑀧𑀺, 𑀬𑀸𑀘𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀳𑀢𑁆𑀣𑀓𑀫𑁆𑀫𑀫𑁆𑀧𑀺 𑀦𑀸𑀫𑁂𑀢𑀁, 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺 𑀳𑀺.

𑀕𑁄𑀡𑀫𑀸𑀬𑀸𑀘𑀫𑀸𑀦𑀲𑁆𑀲, 𑀞𑀧𑁂𑀢𑁆𑀯𑀸 𑀜𑀸𑀢𑀓𑀸𑀤𑀺𑀓𑁂;

𑀤𑀼𑀓𑁆𑀓𑀝𑀁 𑀢𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀽𑀮𑀘𑁆𑀙𑁂𑀚𑁆𑀚𑁂𑀦 𑀢𑁂𑀲𑀼𑀧𑀺.

‘‘𑀕𑁄𑀡𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀲𑀓𑀝𑀁 𑀤𑀸𑀭𑀼𑀪𑀡𑁆𑀟𑀢𑁆𑀢𑀸, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀯𑀸𑀲𑀺𑀨𑀭𑀲𑀼𑀓𑀼𑀤𑁆𑀤𑀸𑀮-𑀓𑀼𑀞𑀸𑀭𑀸𑀤𑀻𑀲𑁆𑀯𑀬𑀁 𑀦𑀬𑁄;

𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀲𑀩𑁆𑀩𑀁, 𑀳𑀭𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀯𑀮𑁆𑀮𑀺𑀆𑀤𑀺𑀫𑁆𑀳𑀺 ¶ 𑀲𑀩𑁆𑀩𑀲𑁆𑀫𑀺𑀁, 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂;

𑀧𑀭𑁂𑀲𑀁 𑀲𑀦𑁆𑀢𑀓𑁂𑀬𑁂𑀯, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀘𑁆𑀘𑀬𑁂𑀲𑀼 𑀳𑀺 𑀢𑀻𑀲𑁆𑀯𑁂𑀯, 𑀯𑀺𑀜𑁆𑀜𑀢𑁆𑀢𑀺 𑀦 𑀘 𑀯𑀝𑁆𑀝𑀢𑀺;

𑀢𑀢𑀺𑀬𑁂 𑀧𑀭𑀺𑀓𑀣𑁄𑀪𑀸𑀲-𑀦𑀺𑀫𑀺𑀢𑁆𑀢𑀸𑀦𑀺 𑀘 𑀮𑀩𑁆𑀪𑀭𑁂.

‘‘𑀅𑀤𑁂𑀲𑀺𑀢𑁂 𑀘 𑀯𑀢𑁆𑀣𑀼𑀲𑁆𑀫𑀺𑀁, 𑀧𑀫𑀸𑀡𑁂𑀦𑀸𑀥𑀺𑀓𑀁 𑀓𑀼𑀝𑀺𑀁;

𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀅𑀭𑀜𑁆𑀜𑀁 𑀕𑀘𑁆𑀙𑀢𑁄𑀧𑀺 𑀘.

𑀨𑀭𑀲𑀼𑀁 𑀯𑀸𑀧𑀺 𑀯𑀸𑀲𑀺𑀁 𑀯𑀸, 𑀦𑀺𑀲𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁;

𑀙𑀺𑀦𑁆𑀤𑀢𑁄 𑀤𑀼𑀓𑁆𑀓𑀝𑀁 𑀭𑀼𑀓𑁆𑀔𑀁, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀸 𑀲𑀳.

𑀏𑀯𑀁 𑀧𑀼𑀩𑁆𑀩𑀧𑀬𑁄𑀕𑀲𑁆𑀫𑀺𑀁, 𑀓𑀼𑀝𑀺𑀓𑀸𑀭𑀓𑀪𑀺𑀓𑁆𑀔𑀼𑀦𑁄;

𑀬𑀣𑀸𑀧𑀬𑁄𑀕𑀫𑀸𑀧𑀢𑁆𑀢𑀺𑀁, 𑀯𑀺𑀦𑀬𑀜𑁆𑀜𑀽 𑀯𑀺𑀦𑀺𑀤𑁆𑀤𑀺𑀲𑁂.

𑀬𑀸 ¶ 𑀧𑀦 𑀤𑁆𑀯𑀻𑀳𑀺 𑀧𑀺𑀡𑁆𑀟𑁂𑀳𑀺, 𑀦𑀺𑀝𑁆𑀞𑀸𑀦𑀁 𑀢𑀼 𑀕𑀫𑀺𑀲𑁆𑀲𑀢𑀺;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑁂𑀲𑀼, 𑀧𑀞𑀫𑁂 𑀤𑀼𑀢𑀺𑀬𑁂 𑀕𑀭𑀼.

𑀅𑀦𑀸𑀧𑀢𑁆𑀢𑀺 𑀲𑀘𑀜𑁆𑀜𑀲𑁆𑀲, 𑀤𑁂𑀢𑀺 𑀯𑀺𑀧𑁆𑀧𑀓𑀢𑀁 𑀓𑀼𑀝𑀺𑀁;

𑀢𑀣𑀸 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸, 𑀪𑀺𑀦𑁆𑀤𑀢𑁄𑀧𑀺 𑀘 𑀢𑀁 𑀓𑀼𑀝𑀺𑀁.

𑀕𑀼𑀳𑀁 𑀮𑁂𑀡𑀁 𑀓𑀭𑁄𑀦𑁆𑀢𑀲𑁆𑀲, 𑀢𑀺𑀡𑀧𑀡𑁆𑀡𑀘𑁆𑀙𑀤𑀫𑁆𑀧𑀺 𑀯𑀸;

𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸𑀦, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸 𑀢𑀣𑀸.

𑀤𑁂𑀲𑀸𑀧𑁂𑀢𑁆𑀯𑀸𑀯 𑀪𑀺𑀓𑁆𑀔𑀽𑀳𑀺, 𑀯𑀢𑁆𑀣𑀼𑀁 𑀧𑀦 𑀘 𑀪𑀺𑀓𑁆𑀔𑀼𑀦𑁄;

𑀓𑁆𑀭𑀺𑀬𑀢𑁄𑀯 𑀲𑀫𑀼𑀝𑁆𑀞𑀸𑀢𑀺, 𑀓𑀭𑁄𑀢𑁄 𑀅𑀧𑁆𑀧𑀫𑀸𑀡𑀺𑀓𑀁.

𑀅𑀤𑁂𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲, 𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀢𑁄 𑀲𑀺𑀬𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑁂𑀲𑀸, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀅𑀤𑁂𑀲𑁂𑀢𑁆𑀯𑀸 𑀲𑀘𑁂 𑀯𑀢𑁆𑀣𑀼𑀁, 𑀬𑁄 𑀓𑀭𑁂𑀬𑁆𑀬 𑀫𑀳𑀮𑁆𑀮𑀓𑀁;

𑀯𑀺𑀳𑀸𑀭𑀁 𑀅𑀢𑁆𑀢𑀯𑀸𑀲𑀢𑁆𑀣𑀁, 𑀕𑀭𑀼𑀓𑀁 𑀢𑀲𑁆𑀲 𑀦𑀺𑀤𑁆𑀤𑀺𑀲𑁂.

𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 ¶ , 𑀤𑁄𑀲𑁄 𑀦𑀢𑁆𑀣𑀺 𑀫𑀳𑀮𑁆𑀮𑀓𑁂;

𑀢𑀲𑁆𑀫𑀸 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀸-𑀪𑀸𑀯𑀁 𑀲𑀫𑀼𑀧𑀮𑀓𑁆𑀔𑀬𑁂.

𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑀸, 𑀏𑀓𑀲𑀗𑁆𑀖𑀸𑀤𑀺𑀲𑁂𑀲𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀲𑁂𑀲𑀁, 𑀅𑀦𑀦𑁆𑀢𑀭𑀲𑀫𑀁 𑀫𑀢𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀘𑀢𑀼𑀯𑀻𑀲𑀢𑀺 𑀲𑀢𑁆𑀣𑀼𑀦𑀸;

𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀸𑀦𑀺, 𑀢𑁂𑀲𑀼 𑀏𑀓𑀽𑀦𑀯𑀻𑀲𑀢𑀺.

𑀅𑀫𑀽𑀮𑀓𑁂𑀦 𑀘𑁄𑀤𑁂𑀢𑀺, 𑀳𑀼𑀢𑁆𑀯𑀸 𑀘𑀸𑀯𑀦𑀘𑁂𑀢𑀦𑁄;

𑀲𑀼𑀤𑁆𑀥𑀁 𑀯𑀸 𑀬𑀤𑀺 𑀯𑀸𑀲𑀼𑀤𑁆𑀥𑀁, 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀬𑁄.

𑀕𑀭𑀼𑀓𑀁 𑀢𑀲𑁆𑀲 𑀆𑀧𑀢𑁆𑀢𑀺𑀁, 𑀓𑀢𑁄𑀓𑀸𑀲𑀫𑁆𑀳𑀺 𑀦𑀺𑀤𑁆𑀤𑀺𑀲𑁂;

𑀢𑀣𑁂𑀯 𑀅𑀓𑀢𑁄𑀓𑀸𑀲𑁂, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀳.

‘‘𑀓𑁄𑀡𑁆𑀞𑁄𑀲𑀺 𑀘 𑀦𑀺𑀕𑀡𑁆𑀞𑁄𑀲𑀺;

𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄𑀲𑀺, 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄’’;

𑀇𑀘𑁆𑀘𑁂𑀯𑀫𑁆𑀧𑀺 𑀯𑀤𑀦𑁆𑀢𑀲𑁆𑀲, 𑀕𑀭𑀼𑀓𑀁 𑀢𑀲𑁆𑀲 𑀦𑀺𑀤𑁆𑀤𑀺𑀲𑁂.

𑀲𑀫𑁆𑀫𑀼𑀔𑀸 𑀳𑀢𑁆𑀣𑀫𑀼𑀤𑁆𑀤𑀸𑀬, 𑀘𑁄𑀤𑁂𑀦𑁆𑀢𑀲𑁆𑀲𑀧𑀺 𑀢𑀗𑁆𑀔𑀡𑁂;

𑀢𑀁 𑀘𑁂 𑀧𑀭𑁄 𑀯𑀺𑀚𑀸𑀦𑀸𑀢𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀕𑀭𑀼𑀓𑀁 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸, 𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀓𑁂𑀦𑀘𑀺;

𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬, 𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀦𑀺𑀤𑁆𑀤𑀺𑀲𑁂.

𑀅𑀣 𑀲𑁄𑀧𑀺 ‘‘𑀫𑀬𑀸 𑀤𑀺𑀝𑁆𑀞𑀁, 𑀲𑀼𑀢𑀁 𑀯𑀸’’𑀢𑀺 𑀘 𑀪𑀸𑀲𑀢𑀺;

𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀗𑁆𑀖𑀸𑀤𑀺-𑀲𑁂𑀲𑁄 𑀳𑁄𑀢𑀺 𑀦 𑀲𑀁𑀲𑀬𑁄.

𑀤𑀽𑀢𑀁 ¶ 𑀯𑀸 𑀧𑀦 𑀧𑁂𑀲𑁂𑀢𑁆𑀯𑀸, 𑀧𑀡𑁆𑀡𑀁 𑀯𑀸 𑀧𑀦 𑀲𑀸𑀲𑀦𑀁;

𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀦 𑀳𑁄𑀢𑀻𑀢𑀺 𑀧𑀓𑀸𑀲𑀺𑀢𑀸.

𑀢𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺, 𑀯𑀼𑀢𑁆𑀢𑁂 𑀘𑀸𑀯𑀦𑀲𑀜𑁆𑀜𑀺𑀦𑁄;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀲𑁂𑀲𑀸𑀧𑀢𑁆𑀢𑀻𑀳𑀺 𑀤𑀼𑀓𑁆𑀓𑀝𑀁.

𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀓𑀢𑁄𑀓𑀸𑀲𑀫𑀢𑁆𑀢𑀦𑀸;

𑀲𑀳 𑀧𑀸𑀘𑀺𑀢𑁆𑀢𑀺𑀬𑁂𑀦𑀲𑁆𑀲, 𑀯𑀤𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀅𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲, 𑀆𑀧𑀢𑁆𑀢𑀻𑀳𑀺𑀧𑀺 𑀲𑀢𑁆𑀢𑀳𑀺;

𑀢𑀣𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀳𑁄𑀢𑀺 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑀁;

𑀉𑀧𑀲𑀫𑁆𑀧𑀦𑁆𑀦𑀢𑀸 𑀢𑀲𑁆𑀫𑀺𑀁, 𑀧𑀼𑀕𑁆𑀕𑀮𑁂 𑀲𑀼𑀤𑁆𑀥𑀲𑀜𑁆𑀜𑀺𑀢𑀸.

𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀬𑁂𑀦 𑀢𑀲𑁆𑀲 𑀅𑀫𑀽𑀮𑀢𑀸;

𑀲𑀫𑁆𑀫𑀼𑀔𑀸 𑀘𑁄𑀤𑀦𑀸 𑀘𑁂𑀯, 𑀢𑀲𑁆𑀲 𑀘𑀸𑀯𑀦𑀲𑀜𑁆𑀜𑀺𑀦𑁄.

𑀢𑀗𑁆𑀔𑀡𑁂 𑀚𑀸𑀦𑀦𑀜𑁆𑀘𑁂𑀯, 𑀧𑀜𑁆𑀘𑀗𑁆𑀕𑀸𑀦𑀺 𑀪𑀯𑀦𑁆𑀢𑀺 𑀳𑀺;

𑀇𑀤𑀁 𑀢𑀼 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀲𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀮𑁂𑀲𑀫𑀢𑁆𑀢𑀫𑀼𑀧𑀸𑀤𑀸𑀬, 𑀪𑀺𑀓𑁆𑀔𑀼𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀘𑁄𑀤𑁂𑀬𑁆𑀬 𑀕𑀭𑀼𑀓𑀸𑀧𑀢𑁆𑀢𑀺, 𑀲𑀘𑁂 𑀘𑀸𑀯𑀦𑀘𑁂𑀢𑀦𑁄.

𑀘𑁄𑀤𑁂𑀢𑀺 ¶ 𑀯𑀸 𑀢𑀣𑀸𑀲𑀜𑁆𑀜𑀻, 𑀘𑁄𑀤𑀸𑀧𑁂𑀢𑀺 𑀧𑀭𑁂𑀦 𑀯𑀸;

𑀅𑀦𑀸𑀧𑀢𑁆𑀢𑀺 𑀲𑀺𑀬𑀸 𑀲𑁂𑀲𑁄, 𑀅𑀦𑀦𑁆𑀢𑀭𑀲𑀫𑁄 𑀫𑀢𑁄.

𑀲𑀫𑀕𑁆𑀕𑀲𑁆𑀲 𑀘 𑀲𑀗𑁆𑀖𑀲𑁆𑀲, 𑀪𑁂𑀤𑀢𑁆𑀣𑀁 𑀯𑀸𑀬𑀫𑁂𑀬𑁆𑀬 𑀬𑁄;

𑀪𑁂𑀤𑀳𑁂𑀢𑀼𑀁 𑀕𑀳𑁂𑀢𑁆𑀯𑀸 𑀯𑀸, 𑀢𑀺𑀝𑁆𑀞𑁂𑀬𑁆𑀬 𑀧𑀭𑀺𑀤𑀻𑀧𑀬𑀁.

𑀲𑁄 ¶ 𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀩𑁆𑀩𑁄, ‘‘𑀪𑁂𑀤𑀢𑁆𑀣𑀁 𑀫𑀸 𑀧𑀭𑀓𑁆𑀓𑀫’’;

𑀇𑀢𑀺 ‘‘𑀲𑀗𑁆𑀖𑀲𑁆𑀲 𑀫𑀸 𑀢𑀺𑀝𑁆𑀞, 𑀕𑀳𑁂𑀢𑁆𑀯𑀸 𑀪𑁂𑀤𑀓𑀸𑀭𑀡𑀁’’.

𑀯𑀼𑀘𑁆𑀘𑀫𑀸𑀦𑁄 𑀳𑀺 𑀢𑁂𑀳𑁂𑀯, 𑀦𑀺𑀲𑁆𑀲𑀚𑁆𑀚𑁂𑀬𑁆𑀬 𑀦 𑀘𑁂𑀯 𑀬𑀁;

𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄 𑀢𑀁, 𑀅𑀘𑁆𑀘𑀚𑀁 𑀕𑀭𑀼𑀓𑀁 𑀨𑀼𑀲𑁂.

𑀧𑀭𑀓𑁆𑀓𑀫𑀦𑁆𑀢𑀁 𑀲𑀗𑁆𑀖𑀲𑁆𑀲, 𑀪𑀺𑀓𑁆𑀔𑀼𑀁 𑀪𑁂𑀤𑀸𑀬 𑀪𑀺𑀓𑁆𑀔𑀼𑀦𑁄;

𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀳𑀺 𑀜𑀢𑁆𑀯𑀸 𑀯𑀸, 𑀅𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀕𑀦𑁆𑀢𑁆𑀯𑀸 𑀘 𑀧𑀦 𑀯𑀢𑁆𑀢𑀩𑁆𑀩𑁄, 𑀅𑀤𑁆𑀥𑀬𑁄𑀚𑀦𑀢𑀸𑀤𑀺𑀓𑀁;

𑀤𑀽𑀭𑀫𑁆𑀧𑀺 𑀧𑀦 𑀕𑀦𑁆𑀢𑀩𑁆𑀩𑀁, 𑀲𑀘𑁂 𑀲𑀓𑁆𑀓𑁄𑀢𑀺 𑀢𑀸𑀯𑀤𑁂.

𑀢𑀺𑀓𑁆𑀔𑀢𑁆𑀢𑀼𑀁 𑀧𑀦 𑀯𑀼𑀢𑁆𑀢𑀲𑁆𑀲, 𑀅𑀧𑀭𑀺𑀘𑁆𑀘𑀚𑀢𑁄𑀧𑀺 𑀢𑀁;

𑀤𑀽𑀢𑀁 𑀯𑀸 𑀧𑀦 𑀧𑀡𑁆𑀡𑀁 𑀯𑀸, 𑀧𑁂𑀲𑀢𑁄𑀧𑀺 𑀘 𑀤𑀼𑀓𑁆𑀓𑀝𑀁.

𑀜𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑁂, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁;

𑀓𑀫𑁆𑀫𑀯𑀸𑀘𑀸𑀳𑀺 𑀘 𑀤𑁆𑀯𑀻𑀳𑀺, 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀤𑁆𑀯𑀬𑀁.

𑀬𑁆𑀬-𑀓𑀸𑀭𑁂 𑀧𑀦 𑀲𑀫𑁆𑀧𑀢𑁆𑀢𑁂, 𑀕𑀭𑀼𑀓𑁂𑀬𑁂𑀯 𑀢𑀺𑀝𑁆𑀞𑀢𑀺;

𑀧𑀲𑁆𑀲𑀫𑁆𑀪𑀦𑁆𑀢𑀺 𑀳𑀺 𑀢𑀺𑀲𑁆𑀲𑁄𑀧𑀺, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀸𑀤𑀬𑁄.

𑀅𑀓𑀢𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀅𑀧𑀭𑀺𑀘𑁆𑀘𑀚𑀢𑁄𑀧𑀺 𑀘;

𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁂𑀦, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀜𑀢𑁆𑀢𑀺𑀢𑁄 𑀧𑀦 𑀧𑀼𑀩𑁆𑀩𑁂 𑀯𑀸, 𑀧𑀘𑁆𑀙𑀸 𑀯𑀸 𑀢𑀗𑁆𑀔𑀡𑁂𑀧𑀺 𑀯𑀸;

𑀅𑀲𑀫𑁆𑀧𑀢𑁆𑀢𑁂 𑀬𑁆𑀬-𑀓𑀸𑀭𑀲𑁆𑀫𑀺𑀁, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄𑀧𑀺 𑀘.

𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀯𑀸𑀧𑀺, 𑀢𑀁 𑀯𑀸 𑀲𑀫𑀦𑀼𑀪𑀸𑀲𑀢𑁄;

𑀢𑀣𑁂𑀯𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀬𑀜𑁆𑀳𑀺 𑀪𑀺𑀓𑁆𑀔𑀼𑀫𑀦𑀼𑀤𑁆𑀤𑀺𑀲𑁆𑀲, 𑀫𑀘𑁆𑀙𑀫𑀁𑀲𑀁 𑀓𑀢𑀁 𑀪𑀯𑁂;

𑀬𑀲𑁆𑀫𑀺𑀜𑁆𑀘 𑀦𑀺𑀩𑁆𑀩𑁂𑀫𑀢𑀺𑀓𑁄, 𑀢𑀁 𑀲𑀩𑁆𑀩𑀁 𑀢𑀲𑁆𑀲 𑀯𑀝𑁆𑀝𑀢𑀺.

𑀲𑀫𑀼𑀤𑁆𑀤𑀺𑀲𑁆𑀲 ¶ 𑀓𑀢𑀁 𑀜𑀢𑁆𑀯𑀸, 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀤𑀼𑀓𑁆𑀓𑀝𑀁;

𑀢𑀣𑀸 𑀅𑀓𑀧𑁆𑀧𑀺𑀬𑀁 𑀫𑀁𑀲𑀁, 𑀅𑀚𑀸𑀦𑀺𑀢𑁆𑀯𑀸𑀧𑀺 𑀔𑀸𑀤𑀢𑁄.

𑀳𑀢𑁆𑀣𑀼𑀲𑁆𑀲𑀘𑁆𑀙𑀫𑀦𑀼𑀲𑁆𑀲𑀸𑀦𑀁 ¶ , 𑀅𑀳𑀺𑀓𑀼𑀓𑁆𑀓𑀼𑀭𑀤𑀻𑀧𑀺𑀦𑀁;

𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀸𑀦𑀁, 𑀫𑀁𑀲𑀁 𑀳𑁄𑀢𑀺 𑀅𑀓𑀧𑁆𑀧𑀺𑀬𑀁.

𑀣𑀼𑀮𑁆𑀮𑀘𑁆𑀘𑀬𑀁 𑀫𑀦𑀼𑀲𑁆𑀲𑀸𑀦𑀁, 𑀫𑀁𑀲𑁂 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀁;

𑀲𑀘𑀺𑀢𑁆𑀢𑀓𑀁 𑀲𑀫𑀼𑀤𑁆𑀤𑀺𑀲𑁆𑀲-𑀓𑀢𑀁 𑀲𑁂𑀲𑀫𑀘𑀺𑀢𑁆𑀢𑀓𑀁.

𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯 𑀫𑀁𑀲𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀕𑀳𑀡𑀁 𑀧𑀦;

𑀏𑀢𑀁 𑀯𑀢𑁆𑀢𑀦𑁆𑀢𑀺 𑀯𑀢𑁆𑀢𑀝𑁆𑀞𑀸, 𑀯𑀤𑀦𑁆𑀢𑀺 𑀯𑀺𑀦𑀬𑀜𑁆𑀜𑀼𑀦𑁄.

𑀇𑀤𑀫𑁂𑀓𑀲𑀫𑀼𑀝𑁆𑀞𑀸𑀦𑀁, 𑀯𑀼𑀢𑁆𑀢𑀁 𑀲𑀫𑀦𑀼𑀪𑀸𑀲𑀦𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀅𑀓𑁆𑀭𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀤𑀼𑀢𑀺𑀬𑁂 𑀲𑀗𑁆𑀖𑀪𑁂𑀤𑀲𑁆𑀫𑀺𑀁, 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄𑀧𑀺𑀲𑁆𑀲, 𑀧𑀞𑀫𑁂𑀦 𑀲𑀫𑀸 𑀫𑀢𑀸.

𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂, 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑀚𑀸𑀢𑀺𑀓𑁄;

𑀅𑀯𑀘𑀦𑀻𑀬𑀫𑀢𑁆𑀢𑀸𑀦𑀁, 𑀓𑀭𑁄𑀢𑀺 𑀕𑀭𑀼𑀓𑀁 𑀲𑀺𑀬𑀸.

𑀤𑀼𑀩𑁆𑀩𑀘𑁂𑀧𑀺 𑀧𑀦𑁂𑀢𑀲𑁆𑀫𑀺𑀁, 𑀲𑀗𑁆𑀖𑀪𑁂𑀤𑀓𑀯𑀡𑁆𑀡𑀦𑁂;

𑀲𑀩𑁆𑀩𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀬𑁄 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺, 𑀧𑀸𑀧𑁂𑀦𑁆𑀢𑁄 𑀓𑀼𑀮𑀤𑀽𑀲𑀓𑁄.

𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀢𑀁, 𑀅𑀘𑁆𑀘𑀚𑀁 𑀕𑀭𑀼𑀓𑀁 𑀨𑀼𑀲𑁂.

𑀘𑀼𑀡𑁆𑀡𑀁 𑀧𑀡𑁆𑀡𑀁 𑀨𑀮𑀁 𑀧𑀼𑀧𑁆𑀨𑀁, 𑀯𑁂𑀴𑀼𑀁 𑀓𑀝𑁆𑀞𑀜𑁆𑀘 𑀫𑀢𑁆𑀢𑀺𑀓𑀁;

𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸.

𑀲𑀦𑁆𑀢𑀓𑀁 ¶ 𑀤𑀤𑀢𑁄 𑀳𑁄𑀢𑀺, 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀁;

𑀪𑀡𑁆𑀟𑀕𑁆𑀖𑁂𑀦 𑀘 𑀓𑀸𑀢𑀩𑁆𑀩𑁄, 𑀣𑁂𑀬𑁆𑀬𑀸 𑀲𑀗𑁆𑀖𑀜𑁆𑀜𑀲𑀦𑁆𑀢𑀓𑁂.

𑀲𑀗𑁆𑀖𑀺𑀓𑀁 ¶ 𑀕𑀭𑀼𑀪𑀡𑁆𑀟𑀁 𑀯𑀸, 𑀲𑁂𑀦𑀸𑀲𑀦𑀦𑀺𑀬𑀸𑀫𑀺𑀢𑀁;

𑀬𑁄𑀧𑀺𑀲𑁆𑀲𑀭𑀯𑀢𑀸𑀬𑁂𑀯, 𑀤𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸, 𑀧𑀓𑁆𑀓𑁄𑀲𑀺𑀢𑁆𑀯𑀸𑀕𑀢𑀲𑁆𑀲 𑀯𑀸;

𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬, 𑀧𑀼𑀧𑁆𑀨𑀁 𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸, 𑀧𑀺𑀢𑀽𑀦𑀁 𑀧𑀦 𑀯𑀝𑁆𑀝𑀢𑀺;

𑀤𑀸𑀢𑀼𑀁 𑀧𑀼𑀧𑁆𑀨𑀁 𑀧𑀦𑀜𑁆𑀜𑀲𑁆𑀲, 𑀆𑀕𑀢𑀲𑁆𑀲𑁂𑀯 𑀜𑀸𑀢𑀺𑀦𑁄.

𑀢𑀜𑁆𑀘 𑀔𑁄 𑀯𑀢𑁆𑀣𑀼𑀧𑀽𑀚𑀢𑁆𑀣𑀁, 𑀤𑀸𑀢𑀩𑁆𑀩𑀁 𑀦 𑀧𑀦𑀜𑁆𑀜𑀣𑀸;

𑀲𑀺𑀯𑀸𑀤𑀺𑀧𑀽𑀚𑀦𑀢𑁆𑀣𑀁 𑀯𑀸, 𑀫𑀡𑁆𑀟𑀦𑀢𑁆𑀣𑀁 𑀦 𑀯𑀝𑁆𑀝𑀢𑀺.

𑀨𑀮𑀸𑀤𑀻𑀲𑀼𑀧𑀺 𑀲𑁂𑀲𑁂𑀲𑀼, 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸;

𑀧𑀼𑀧𑁆𑀨𑁂 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀼𑀧𑁆𑀨𑀸𑀤𑀺𑀪𑀸𑀚𑀦𑁂 𑀓𑁄𑀘𑀺, 𑀆𑀕𑀘𑁆𑀙𑀢𑀺 𑀲𑀘𑁂 𑀧𑀦;

𑀲𑀫𑁆𑀫𑀢𑁂𑀦𑀲𑁆𑀲 𑀤𑀸𑀢𑀩𑁆𑀩𑀁, 𑀜𑀸𑀧𑁂𑀢𑁆𑀯𑀸 𑀇𑀢𑀭𑁂𑀦 𑀢𑀼.

𑀉𑀧𑀟𑁆𑀠𑀪𑀸𑀕𑀁 𑀤𑀸𑀢𑀩𑁆𑀩𑀁, 𑀇𑀢𑀺 𑀯𑀼𑀢𑁆𑀢𑀁 𑀓𑀼𑀭𑀼𑀦𑁆𑀤𑀺𑀬𑀁;

‘‘𑀣𑁄𑀓𑀁 𑀣𑁄𑀓’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑀕𑀺𑀮𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀤𑀸𑀢𑀩𑁆𑀩𑀁 𑀢𑀼 𑀲𑀓𑀁 𑀨𑀮𑀁;

𑀧𑀭𑀺𑀩𑁆𑀩𑀬𑀯𑀺𑀳𑀻𑀦𑀲𑁆𑀲, 𑀲𑀫𑁆𑀧𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲𑀧𑀺.

𑀲𑀗𑁆𑀖𑀸𑀭𑀸𑀫𑁂 𑀬𑀣𑀸 𑀬𑀢𑁆𑀭, 𑀲𑀗𑁆𑀖𑁂𑀦 𑀓𑀢𑀺𑀓𑀸 𑀓𑀢𑀸;

𑀨𑀮𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑀁, 𑀓𑀢𑁆𑀯𑀸 𑀢𑀢𑁆𑀭𑀸𑀕𑀢𑀲𑁆𑀲𑀧𑀺.

𑀨𑀮𑀁 𑀬𑀣𑀸𑀧𑀭𑀺𑀘𑁆𑀙𑁂𑀤𑀁, 𑀤𑀤𑀢𑁄 𑀧𑀦 𑀯𑀝𑁆𑀝𑀢𑀺;

‘‘𑀤𑀲𑁆𑀲𑁂𑀢𑀩𑁆𑀩𑀸𑀧𑀺 𑀯𑀸 𑀭𑀼𑀓𑁆𑀔𑀸’’, ‘‘𑀇𑀢𑁄 𑀕𑀡𑁆𑀳 𑀨𑀮’’𑀦𑁆𑀢𑀺 𑀘.

𑀲𑀬𑀁 𑀔𑀡𑀺𑀢𑁆𑀯𑀸 𑀧𑀣𑀯𑀺𑀁, 𑀫𑀸𑀮𑀸𑀕𑀘𑁆𑀙𑀸𑀤𑀺𑀭𑁄𑀧𑀦𑁂;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑁂𑀦𑀲𑁆𑀲, 𑀤𑀼𑀓𑁆𑀓𑀝𑀁 𑀓𑀼𑀮𑀤𑀽𑀲𑀦𑁂.

𑀅𑀓𑀧𑁆𑀧𑀺𑀬𑁂𑀦 ¶ 𑀯𑀸𑀓𑁆𑀬𑁂𑀦, 𑀢𑀣𑀸 𑀭𑁄𑀧𑀸𑀧𑀦𑁂𑀧𑀺 𑀘;

𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄 𑀓𑀼𑀮𑀤𑀽𑀲𑀦𑁂.

𑀭𑁄𑀧𑀦𑁂 𑀤𑀼𑀓𑁆𑀓𑀝𑀁𑀬𑁂𑀯, 𑀳𑁄𑀢𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀁;

𑀢𑀣𑀸 𑀭𑁄𑀧𑀸𑀧𑀦𑁂 𑀯𑀼𑀢𑁆𑀢𑀁, 𑀉𑀪𑀬𑀢𑁆𑀣 𑀘 𑀪𑀺𑀓𑁆𑀔𑀼𑀦𑁄.

𑀲𑀓𑀺𑀁 𑀆𑀡𑀢𑁆𑀢𑀺𑀬𑀸 𑀢𑀲𑁆𑀲, 𑀩𑀳𑀽𑀦𑀁 𑀭𑁄𑀧𑀦𑁂 𑀧𑀦;

𑀲𑀤𑀼𑀓𑁆𑀓𑀝𑀸 𑀢𑀼 𑀧𑀸𑀘𑀺𑀢𑁆𑀢𑀺, 𑀲𑀼𑀤𑁆𑀥𑀁 𑀯𑀸 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀓𑀧𑁆𑀧𑀺𑀬𑁂𑀦𑁂𑀯 ¶ 𑀯𑀸𑀓𑁆𑀬𑁂𑀦, 𑀉𑀪𑀬𑀢𑁆𑀣 𑀘 𑀪𑀽𑀫𑀺𑀬𑀸;

𑀭𑁄𑀧𑀦𑁂 𑀧𑀭𑀺𑀪𑁄𑀕𑀢𑁆𑀣𑀁, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

𑀓𑀧𑁆𑀧𑀺𑀬𑀪𑀽𑀫𑀺 𑀘𑁂 𑀳𑁄𑀢𑀺, 𑀲𑀬𑀁 𑀭𑁄𑀧𑁂𑀢𑀼𑀫𑁂𑀯 𑀘;

𑀯𑀝𑁆𑀝𑀢𑀻𑀢𑀺 𑀘 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑀆𑀭𑀸𑀫𑀸𑀤𑀻𑀦𑀫𑀢𑁆𑀣𑀸𑀬, 𑀲𑀬𑀁 𑀲𑀁𑀭𑁄𑀧𑀺𑀢𑀲𑁆𑀲 𑀯𑀸;

𑀯𑀝𑁆𑀝𑀢𑁂𑀯 𑀘 𑀪𑀺𑀓𑁆𑀔𑀽𑀦𑀁, 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁.

𑀲𑀺𑀜𑁆𑀘𑀦𑁂 𑀧𑀦 𑀲𑀩𑁆𑀩𑀢𑁆𑀣, 𑀲𑀬𑀁 𑀲𑀺𑀜𑁆𑀘𑀸𑀧𑀦𑁂𑀧𑀺 𑀘;

𑀅𑀓𑀧𑁆𑀧𑀺𑀬𑁄𑀤𑀓𑁂𑀦𑁂𑀯, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀜𑁆𑀘, 𑀧𑀭𑀺𑀪𑁄𑀕𑀢𑁆𑀣𑀫𑁂𑀯 𑀯𑀸;

𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑁂𑀦𑀲𑁆𑀲, 𑀲𑀺𑀜𑁆𑀘𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀢𑁂𑀲𑀁𑀬𑁂𑀯 𑀧𑀦𑀢𑁆𑀣𑀸𑀬, 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀺𑀬𑀯𑀸𑀭𑀺𑀦𑀸;

𑀲𑀺𑀜𑁆𑀘𑀦𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀣𑀸 𑀲𑀺𑀜𑁆𑀘𑀸𑀧𑀦𑁂𑀧𑀺 𑀘.

𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬, 𑀧𑀼𑀧𑁆𑀨𑀸𑀦𑀁 𑀑𑀘𑀺𑀦𑀸𑀧𑀦𑁂;

𑀲𑀬𑀫𑁄𑀘𑀺𑀦𑀦𑁂 𑀘𑀸𑀧𑀺, 𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀁.

𑀧𑀼𑀧𑁆𑀨𑀸𑀦𑀁 𑀕𑀡𑀦𑀸𑀬𑀲𑁆𑀲, 𑀧𑀼𑀧𑁆𑀨𑀫𑁄𑀘𑀺𑀦𑀢𑁄 𑀧𑀦;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀓𑀼𑀮𑀢𑁆𑀣𑀁 𑀘𑁂 𑀲𑀤𑀼𑀓𑁆𑀓𑀝𑀸.

𑀕𑀦𑁆𑀣𑀺𑀫𑀁 𑀕𑁄𑀧𑁆𑀨𑀺𑀫𑀁 𑀦𑀸𑀫, 𑀯𑁂𑀥𑀺𑀫𑀁 𑀯𑁂𑀞𑀺𑀫𑀫𑁆𑀧𑀺 𑀘;

𑀧𑀽𑀭𑀺𑀫𑀁 𑀯𑀸𑀬𑀺𑀫𑀁 𑀘𑁂𑀢𑀺, 𑀙𑀩𑁆𑀩𑀺𑀥𑁄 𑀧𑀼𑀧𑁆𑀨𑀲𑀗𑁆𑀕𑀳𑁄.

𑀢𑀢𑁆𑀣 ¶ 𑀤𑀡𑁆𑀟𑁂𑀦 𑀤𑀡𑁆𑀟𑀁 𑀯𑀸, 𑀯𑀡𑁆𑀝𑁂𑀦𑀧𑀺 𑀘 𑀯𑀡𑁆𑀝𑀓𑀁;

𑀕𑀦𑁆𑀣𑀺𑀢𑁆𑀯𑀸 𑀓𑀭𑀡𑀁 𑀲𑀩𑁆𑀩𑀁, ‘‘𑀕𑀦𑁆𑀣𑀺𑀫’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀕𑁄𑀧𑁆𑀨𑀺𑀫𑀁 𑀦𑀸𑀫 𑀕𑁄𑀧𑁆𑀨𑁂𑀢𑁆𑀯𑀸, 𑀲𑀼𑀢𑁆𑀢𑀸𑀤𑀻𑀳𑀺 𑀓𑀭𑀻𑀬𑀢𑀺;

𑀏𑀓𑀢𑁄𑀯𑀡𑁆𑀝𑀺𑀓𑀸 𑀫𑀸𑀮𑀸, 𑀉𑀪𑀢𑁄𑀯𑀡𑁆𑀝𑀺𑀓𑀸 𑀘 𑀢𑀁.

𑀯𑁂𑀥𑀺𑀫𑀁 𑀦𑀸𑀫 𑀯𑀺𑀚𑁆𑀛𑀺𑀢𑁆𑀯𑀸, 𑀩𑀼𑀦𑁆𑀤𑁂𑀲𑀼 𑀫𑀓𑀼𑀮𑀸𑀤𑀺𑀓𑀁;

𑀆𑀯𑀼𑀢𑀸 𑀲𑀽𑀘𑀺𑀆𑀤𑀻𑀳𑀺, 𑀫𑀸𑀮𑀸𑀯𑀺𑀓𑀢𑀺 𑀯𑀼𑀘𑁆𑀘𑀢𑀺.

𑀯𑁂𑀞𑀺𑀫𑀁 𑀦𑀸𑀫 𑀯𑁂𑀞𑁂𑀢𑁆𑀯𑀸, 𑀓𑀢𑀁 𑀫𑀸𑀮𑀸𑀕𑀼𑀡𑁂𑀳𑀺 𑀯𑀸;

𑀯𑀸𑀓𑀸𑀤𑀻𑀳𑀺 𑀘 𑀩𑀤𑁆𑀥𑀁 𑀯𑀸, ‘‘𑀯𑁂𑀞𑀺𑀫’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀽𑀭𑀺𑀫𑀁 𑀧𑀦 𑀤𑀝𑁆𑀞𑀩𑁆𑀩𑀁, 𑀧𑀼𑀧𑁆𑀨𑀫𑀸𑀮𑀸𑀳𑀺 𑀧𑀽𑀭𑀡𑁂;

𑀩𑁄𑀥𑀺𑀁 𑀧𑀼𑀧𑁆𑀨𑀧𑀝𑀸𑀤𑀻𑀦𑀁, 𑀧𑀭𑀺𑀓𑁆𑀔𑁂𑀧𑁂𑀲𑀼 𑀮𑀩𑁆𑀪𑀢𑀺.

𑀯𑀸𑀬𑀺𑀫𑀁 ¶ 𑀦𑀸𑀫 𑀤𑀝𑁆𑀞𑀩𑁆𑀩𑀁, 𑀧𑀼𑀧𑁆𑀨𑀭𑀽𑀧𑀧𑀝𑀸𑀤𑀺𑀲𑀼;

𑀧𑀼𑀧𑁆𑀨𑀫𑀸𑀮𑀸𑀕𑀼𑀡𑁂𑀳𑁂𑀯, 𑀯𑀸𑀬𑀺𑀢𑁆𑀯𑀸 𑀓𑀭𑀡𑁂 𑀧𑀦.

𑀲𑀩𑁆𑀩𑀫𑁂𑀢𑀁 𑀲𑀬𑀁 𑀓𑀸𑀢𑀼𑀁, 𑀓𑀸𑀭𑀸𑀧𑁂𑀢𑀼𑀁 𑀧𑀭𑁂𑀳𑀺 𑀯𑀸;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀩𑀼𑀤𑁆𑀥𑀲𑁆𑀲𑀧𑀺 𑀦 𑀯𑀝𑁆𑀝𑀢𑀺.

𑀢𑀣𑀸 𑀓𑀮𑀫𑁆𑀩𑀓𑀁 𑀓𑀸𑀢𑀼𑀁, 𑀅𑀟𑁆𑀠𑀘𑀦𑁆𑀤𑀓𑀫𑁂𑀯 𑀯𑀸;

𑀅𑀜𑁆𑀜𑁂𑀳𑀺 𑀧𑀽𑀭𑀺𑀢𑀁 𑀧𑀼𑀧𑁆𑀨-𑀧𑀝𑀁 𑀯𑀸 𑀯𑀸𑀬𑀺𑀢𑀼𑀫𑁆𑀧𑀺 𑀘.

𑀧𑀺𑀝𑁆𑀞𑀓𑀸𑀘𑀫𑀬𑀁 𑀤𑀸𑀫𑀁, 𑀕𑁂𑀡𑁆𑀟𑀼𑀧𑀼𑀧𑁆𑀨𑀫𑀬𑀫𑁆𑀧𑀺 𑀘;

𑀔𑀭𑀧𑀢𑁆𑀢𑀫𑀬𑀁 𑀫𑀸𑀮𑀁, 𑀲𑀩𑁆𑀩𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑀓𑀡𑀺𑀓𑀸𑀭𑀸𑀤𑀺𑀧𑀼𑀧𑁆𑀨𑀸𑀦𑀺, 𑀯𑀺𑀢𑀸𑀦𑁂 𑀩𑀤𑁆𑀥𑀓𑀡𑁆𑀝𑀓𑁂;

𑀳𑀻𑀭𑀸𑀤𑀻𑀳𑀺 𑀧𑀝𑀸𑀓𑀢𑁆𑀣𑀁, 𑀯𑀺𑀚𑁆𑀛𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁.

𑀓𑀡𑁆𑀝𑀓𑀸𑀤𑀻𑀳𑀺 𑀪𑀺𑀓𑁆𑀔𑀼𑀲𑁆𑀲, 𑀏𑀓𑀧𑀼𑀧𑁆𑀨𑀫𑁆𑀧𑀺 𑀯𑀺𑀚𑁆𑀛𑀺𑀢𑀼𑀁;

𑀧𑀼𑀧𑁆𑀨𑁂𑀲𑀼𑀬𑁂𑀯 𑀯𑀸 𑀧𑀼𑀧𑁆𑀨𑀁, 𑀧𑀯𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀲𑁄𑀓𑀧𑀺𑀡𑁆𑀟𑀺𑀆𑀤𑀻𑀦𑀁, 𑀅𑀦𑁆𑀢𑀭𑁂 𑀥𑀫𑁆𑀫𑀭𑀚𑁆𑀚𑀼𑀬𑀸;

𑀧𑀯𑁂𑀲𑁂𑀦𑁆𑀢𑀲𑁆𑀲 𑀧𑀼𑀧𑁆𑀨𑀸𑀦𑀺, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

𑀞𑀧𑀺𑀢𑁂𑀲𑀼 ¶ 𑀧𑀯𑁂𑀲𑁂𑀢𑁆𑀯𑀸, 𑀓𑀤𑀮𑀺𑀘𑁆𑀙𑀢𑁆𑀢𑀪𑀺𑀢𑁆𑀢𑀺𑀲𑀼;

𑀓𑀡𑁆𑀝𑀓𑁂𑀲𑀼𑀧𑀺 𑀧𑀼𑀧𑁆𑀨𑀸𑀦𑀺, 𑀯𑀺𑀚𑁆𑀛𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁.

𑀓𑀧𑁆𑀧𑀺𑀬𑀁 𑀧𑀦 𑀯𑀢𑁆𑀢𑀩𑁆𑀩𑀁, 𑀯𑀘𑀦𑀁 𑀯𑀢𑁆𑀣𑀼𑀧𑀽𑀚𑀦𑁂;

𑀦𑀺𑀫𑀺𑀢𑁆𑀢𑁄𑀪𑀸𑀲𑀧𑀭𑀺𑀬𑀸, 𑀯𑀝𑁆𑀝𑀦𑁆𑀢𑀻𑀢𑀺 𑀧𑀓𑀸𑀲𑀺𑀢𑀸.

𑀦 𑀓𑁂𑀯𑀮𑀫𑀓𑀢𑁆𑀢𑀩𑁆𑀩𑀁, 𑀓𑀼𑀮𑀤𑀽𑀲𑀦𑀫𑁂𑀯 𑀘;

𑀅𑀣 𑀔𑁄 𑀯𑁂𑀚𑁆𑀚𑀓𑀫𑁆𑀫𑀸𑀤𑀺, 𑀦 𑀓𑀢𑁆𑀢𑀩𑁆𑀩𑀁 𑀓𑀼𑀤𑀸𑀘𑀦𑀁.

𑀓𑀸𑀢𑀩𑁆𑀩𑀁 𑀧𑀦 𑀪𑁂𑀲𑀚𑁆𑀚𑀁, 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀦𑀁;

𑀓𑀢𑁆𑀯𑀸𑀧𑁆𑀬𑀓𑀢𑀯𑀺𑀜𑁆𑀜𑀢𑁆𑀢𑀺𑀁, 𑀓𑀸 𑀓𑀣𑀸 𑀅𑀢𑁆𑀢𑀦𑁄 𑀥𑀦𑁂.

𑀢𑀣𑀸 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺, 𑀢𑀤𑀼𑀧𑀝𑁆𑀞𑀸𑀓𑀚𑀦𑁆𑀢𑀼𑀦𑁄;

𑀪𑀡𑁆𑀟𑀼𑀓𑀲𑁆𑀲𑀢𑁆𑀢𑀦𑁄 𑀘𑁂𑀯, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲𑀧𑀺.

𑀚𑁂𑀝𑁆𑀞𑀪𑀸𑀢𑀸 𑀓𑀦𑀺𑀝𑁆𑀞𑁄 𑀘, 𑀢𑀣𑀸 𑀪𑀕𑀺𑀦𑀺𑀬𑁄 𑀤𑀼𑀯𑁂;

𑀘𑀽𑀴𑀫𑀸𑀢𑀸 𑀘𑀽𑀴𑀧𑀺𑀢𑀸, 𑀫𑀳𑀸𑀫𑀸𑀢𑀸 𑀫𑀳𑀸𑀧𑀺𑀢𑀸.

𑀧𑀺𑀢𑀼𑀘𑁆𑀙𑀸 𑀫𑀸𑀢𑀼𑀮𑁄 𑀘𑀸𑀢𑀺, 𑀤𑀲𑀺𑀫𑁂 𑀜𑀸𑀢𑀬𑁄 𑀫𑀢𑀸;

𑀇𑀫𑁂𑀲𑀫𑁆𑀧𑀺 𑀤𑀲𑀦𑁆𑀦𑀜𑁆𑀘, 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄.

𑀲𑀘𑁂 ¶ 𑀪𑁂𑀲𑀚𑁆𑀚𑀫𑁂𑀢𑁂𑀲𑀁, 𑀦𑀧𑁆𑀧𑀳𑁄𑀢𑀺 𑀦 𑀳𑁄𑀢𑀺 𑀯𑀸;

𑀬𑀸𑀘𑀦𑁆𑀢𑀺𑀧𑀺 𑀘 𑀢𑀁 𑀪𑀺𑀓𑁆𑀔𑀼𑀁, 𑀤𑀸𑀢𑀩𑁆𑀩𑀁 𑀢𑀸𑀯𑀓𑀸𑀮𑀺𑀓𑀁.

𑀲𑀘𑁂 𑀢𑁂 𑀦 𑀘 𑀬𑀸𑀘𑀦𑁆𑀢𑀺, 𑀤𑀸𑀢𑀩𑁆𑀩𑀁 𑀢𑀸𑀯𑀓𑀸𑀮𑀺𑀓𑀁;

𑀆𑀪𑁄𑀕𑀁 𑀧𑀦 𑀓𑀢𑁆𑀯𑀸 𑀯𑀸, ‘‘𑀤𑀲𑁆𑀲𑀦𑁆𑀢𑀺 𑀧𑀼𑀦 𑀫𑁂 𑀇𑀫𑁂’’.

𑀏𑀢𑁂𑀲𑀁 𑀢𑀼 𑀓𑀼𑀮𑀸 𑀬𑀸𑀯, 𑀲𑀢𑁆𑀢𑀫𑀸 𑀓𑀼𑀮𑀤𑀽𑀲𑀦𑀁;

𑀪𑁂𑀲𑀚𑁆𑀚𑀓𑀭𑀡𑀸𑀧𑀢𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀦 𑀭𑀽𑀳𑀢𑀺.

𑀪𑀸𑀢𑀼𑀚𑀸𑀬𑀸𑀧𑀺 𑀯𑀸 𑀳𑁄𑀢𑀺, 𑀲𑀘𑁂 𑀪𑀕𑀺𑀦𑀺𑀲𑀸𑀫𑀺𑀓𑁄;

𑀲𑀘𑁂 𑀢𑁂 𑀜𑀸𑀢𑀓𑀸 𑀳𑁄𑀦𑁆𑀢𑀺, 𑀓𑀸𑀢𑀼𑀁 𑀢𑁂𑀲𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀜𑁆𑀜𑀸𑀢𑀓𑀸 𑀲𑀘𑁂 𑀳𑁄𑀦𑁆𑀢𑀺, 𑀪𑀸𑀢𑀼𑀦𑁄 𑀅𑀦𑀼𑀚𑀸𑀬 𑀯𑀸;

‘‘𑀢𑀼𑀫𑁆𑀳𑀸𑀓𑀁 𑀚𑀕𑁆𑀕𑀦𑀝𑁆𑀞𑀸𑀦𑁂, 𑀤𑁂𑀣𑀸’’𑀢𑀺 𑀘 𑀯𑀤𑁂 𑀩𑀼𑀥𑁄.

𑀅𑀣 ¶ 𑀢𑁂𑀲𑀫𑁆𑀧𑀺 𑀧𑀼𑀢𑁆𑀢𑀸𑀦𑀁, 𑀓𑀢𑁆𑀯𑀸 𑀤𑀸𑀢𑀩𑁆𑀩𑀫𑁂𑀯 𑀯𑀸;

‘‘𑀫𑀸𑀢𑀸𑀧𑀺𑀢𑀽𑀦𑀁 𑀢𑀼𑀫𑁆𑀳𑀸𑀓𑀁, 𑀤𑁂𑀣𑀸’’𑀢𑀺 𑀯𑀺𑀦𑀬𑀜𑁆𑀜𑀼𑀦𑀸.

𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀧𑀦𑀺𑀲𑁆𑀲𑀭𑁄 𑀯𑀸;

𑀘𑁄𑀭𑁄𑀧𑀺 𑀯𑀸 𑀬𑀼𑀤𑁆𑀥𑀧𑀭𑀸𑀚𑀺𑀢𑁄 𑀯𑀸;

𑀆𑀕𑀦𑁆𑀢𑀼𑀓𑁄 𑀔𑀻𑀡𑀧𑀭𑀺𑀩𑁆𑀩𑀬𑁄 𑀯𑀸;

𑀅𑀓𑀮𑁆𑀮𑀓𑁄 𑀜𑀸𑀢𑀺𑀚𑀦𑀼𑀚𑁆𑀛𑀺𑀢𑁄 𑀯𑀸.

𑀏𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀁, 𑀅𑀧𑀘𑁆𑀘𑀸𑀲𑀻𑀲𑀢𑀸 𑀲𑀢𑀸;

𑀓𑀸𑀢𑀩𑁆𑀩𑁄 𑀧𑀝𑀺𑀲𑀦𑁆𑀣𑀸𑀭𑁄, 𑀪𑀺𑀓𑁆𑀔𑀼𑀦𑀸 𑀲𑀸𑀥𑀼𑀦𑀸𑀥𑀼𑀦𑀸.

𑀧𑀭𑀺𑀢𑁆𑀢𑁄𑀤𑀓𑀲𑀼𑀢𑁆𑀢𑀸𑀦𑀺, 𑀯𑀼𑀢𑁆𑀢𑁂 𑀤𑁂𑀣𑀸𑀢𑀺 𑀓𑁂𑀦𑀘𑀺;

𑀚𑀮𑀁 𑀳𑀢𑁆𑀣𑁂𑀦 𑀘𑀸𑀮𑁂𑀢𑁆𑀯𑀸, 𑀫𑀤𑁆𑀤𑀺𑀢𑁆𑀯𑀸 𑀧𑀦 𑀲𑀼𑀢𑁆𑀢𑀓𑀁.

𑀤𑀸𑀢𑀩𑁆𑀩𑀁 𑀪𑀺𑀓𑁆𑀔𑀼𑀦𑀸 𑀓𑀢𑁆𑀯𑀸, 𑀢𑁂𑀲𑀫𑁂𑀯 𑀘 𑀲𑀦𑁆𑀢𑀓𑀁;

𑀅𑀢𑁆𑀢𑀦𑁄 𑀉𑀤𑀓𑀁 𑀢𑁂𑀲𑀁, 𑀲𑀼𑀢𑁆𑀢𑀁 𑀯𑀸 𑀤𑁂𑀢𑀺 𑀤𑀼𑀓𑁆𑀓𑀝𑀁.

𑀅𑀦𑀸𑀫𑀝𑁆𑀞𑁄𑀧𑀺 𑀤𑀸𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑁄 𑀯𑀺𑀚𑀸𑀦𑀢𑀸;

𑀤𑁆𑀯𑀺𑀦𑁆𑀦𑀁 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺, 𑀢𑀤𑀼𑀧𑀝𑁆𑀞𑀸𑀬𑀓𑀲𑁆𑀲 𑀘.

𑀇𑀲𑁆𑀲𑀭𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄, 𑀘𑁄𑀭𑀤𑀸𑀫𑀭𑀺𑀓𑀲𑁆𑀲 𑀘;

𑀪𑀡𑁆𑀟𑀼𑀓𑀲𑁆𑀲𑀢𑁆𑀢𑀦𑁄 𑀘𑁂𑀯, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲𑀧𑀺.

𑀤𑀸𑀢𑀼𑀁 𑀧𑀡𑁆𑀟𑀼𑀧𑀮𑀸𑀲𑀲𑁆𑀲, 𑀣𑀸𑀮𑀓𑁂𑀧𑀺 𑀘 𑀯𑀝𑁆𑀝𑀢𑀺;

𑀞𑀧𑁂𑀢𑁆𑀯𑀸 𑀢𑀁 𑀧𑀦𑀜𑁆𑀜𑀲𑁆𑀲, 𑀧𑀺𑀢𑀼𑀦𑁄𑀧𑀺 𑀦 𑀯𑀝𑁆𑀝𑀢𑀺.

𑀕𑀺𑀳𑀻𑀦𑀁 ¶ 𑀧𑀦 𑀤𑀽𑀢𑁂𑀬𑁆𑀬𑀁, 𑀚𑀗𑁆𑀖𑀧𑁂𑀲𑀦𑀺𑀬𑀫𑁆𑀧𑀺 𑀘;

𑀲𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑀭𑁄𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂.

𑀪𑀡𑁆𑀟𑀼𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘;

𑀲𑀸𑀲𑀦𑀁 𑀲𑀳𑀥𑀫𑁆𑀫𑀻𑀦𑀁, 𑀳𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀓𑀼𑀮𑀤𑀽𑀲𑀦𑀓𑀫𑁆𑀫𑁂𑀦, 𑀮𑀤𑁆𑀥𑀁 𑀅𑀝𑁆𑀞𑀯𑀺𑀥𑁂𑀦𑀧𑀺;

𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀻𑀦𑀁, 𑀦 𑀘 𑀯𑀝𑁆𑀝𑀢𑀺 𑀪𑀼𑀜𑁆𑀚𑀺𑀢𑀼𑀁.

𑀅𑀚𑁆𑀛𑁄𑀳𑀸𑀭𑁂𑀲𑀼 ¶ 𑀲𑀩𑁆𑀩𑀢𑁆𑀣, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁;

𑀧𑀭𑀺𑀪𑁄𑀕𑀯𑀲𑁂𑀦𑁂𑀯, 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄.

𑀓𑀢𑁆𑀯𑀸 𑀭𑀽𑀧𑀺𑀬𑀯𑁄𑀳𑀸𑀭𑀁, 𑀅𑀪𑀽𑀢𑀸𑀭𑁄𑀘𑀦𑁂𑀦 𑀘;

𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀲𑀩𑁆𑀩𑁂, 𑀲𑀫𑀸𑀦𑀸𑀢𑀺 𑀧𑀓𑀸𑀲𑀺𑀢𑀸.

𑀯𑀺𑀜𑁆𑀜𑀢𑁆𑀢𑀺𑀦𑀼𑀧𑁆𑀧𑀤𑀸𑀦𑀜𑁆𑀘, 𑀯𑁂𑀚𑁆𑀚𑀓𑀫𑁆𑀫𑀫𑀦𑁂𑀲𑀦𑀁;

𑀧𑀸𑀭𑀺𑀪𑀝𑀼𑀓𑀢𑀁 𑀫𑀼𑀕𑁆𑀕-𑀲𑀽𑀧𑀢𑀁 𑀯𑀢𑁆𑀣𑀼𑀯𑀺𑀚𑁆𑀚𑀓𑀁.

𑀚𑀗𑁆𑀖𑀧𑁂𑀲𑀦𑀺𑀬𑀁 𑀤𑀽𑀢-𑀓𑀫𑁆𑀫𑀜𑁆𑀘 𑀓𑀼𑀮𑀤𑀽𑀲𑀦𑀁;

𑀅𑀪𑀽𑀢𑀸𑀭𑁄𑀘𑀦𑀁 𑀩𑀼𑀤𑁆𑀥-𑀧𑀝𑀺𑀓𑀼𑀝𑁆𑀞𑀁 𑀯𑀺𑀯𑀚𑁆𑀚𑀬𑁂.

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄𑀧𑀺 𑀢𑀁;

𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀲𑀩𑁆𑀩𑀁, 𑀲𑀗𑁆𑀖𑀪𑁂𑀤𑀲𑀫𑀁 𑀫𑀢𑀁.

𑀚𑀸𑀦𑀁 𑀬𑀸𑀯𑀢𑀺𑀳𑀁 𑀬𑁂𑀦, 𑀙𑀸𑀤𑀺𑀢𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑀸;

𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀁, 𑀢𑁂𑀦 𑀢𑀸𑀯𑀢𑀺𑀳𑀁 𑀧𑀦.

𑀆𑀧𑀢𑁆𑀢𑀺 𑀘 𑀅𑀦𑀼𑀓𑁆𑀔𑀺𑀢𑁆𑀢𑁄, 𑀧𑀳𑀼 𑀘𑀸𑀦𑀦𑁆𑀢𑀭𑀸𑀬𑀺𑀓𑁄;

𑀘𑀢𑀼𑀲𑁆𑀯𑀧𑀺 𑀘 𑀢𑀁𑀲𑀜𑁆𑀜𑀻, 𑀢𑀲𑁆𑀲 𑀙𑀸𑀤𑁂𑀢𑀼𑀓𑀸𑀫𑀢𑀸.

𑀙𑀸𑀤𑀦𑀦𑁆𑀢𑀺 𑀧𑀦𑁂𑀢𑁂𑀳𑀺, 𑀤𑀲𑀳𑀗𑁆𑀕𑁂𑀳𑀺 𑀪𑀺𑀓𑁆𑀔𑀼𑀦𑀸;

𑀙𑀦𑁆𑀦𑀸 𑀦𑀸𑀫 𑀲𑀺𑀬𑀸𑀧𑀢𑁆𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂𑀦 𑀲𑀸.

𑀢𑀺𑀯𑀺𑀥𑁄 𑀧𑀭𑀺𑀯𑀸𑀲𑁄 𑀳𑀺, 𑀢𑀺𑀯𑀺𑀥𑀸𑀧𑁂𑀢𑀘𑁂𑀢𑀲𑀸;

𑀧𑀝𑀺𑀘𑁆𑀙𑀦𑁆𑀦𑁄 𑀘 𑀲𑀼𑀤𑁆𑀥𑀦𑁆𑀢𑁄, 𑀲𑀫𑁄𑀥𑀸𑀦𑁄𑀢𑀺 𑀤𑀻𑀧𑀺𑀢𑁄.

𑀢𑀢𑁆𑀭𑀸𑀬𑀁 ¶ ¶ 𑀢𑀼 𑀧𑀝𑀺𑀘𑁆𑀙𑀦𑁆𑀦-𑀧𑀭𑀺𑀯𑀸𑀲𑁄 𑀧𑀓𑀸𑀲𑀺𑀢𑁄;

𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑀸𑀢𑀩𑁆𑀩𑁄, 𑀯𑀲𑁂𑀦𑀸𑀧𑀢𑁆𑀢𑀺𑀬𑀸𑀢𑀺 𑀘.

𑀯𑀢𑁆𑀣𑀼𑀕𑁄𑀢𑁆𑀢𑀯𑀲𑁂𑀦𑀸𑀧𑀺, 𑀦𑀸𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸;

𑀓𑀫𑁆𑀫𑀯𑀸𑀘𑀸 𑀳𑀺 𑀓𑀸𑀢𑀩𑁆𑀩𑀸, 𑀤𑀸𑀢𑀩𑁆𑀩𑁄 𑀢𑀲𑁆𑀲 𑀢𑁂𑀦 𑀘.

‘‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺, ‘‘𑀧𑀭𑀺𑀯𑀸𑀲’’𑀦𑁆𑀢𑀺 𑀯𑀸 𑀧𑀼𑀦;

𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀗𑁆𑀖𑀲𑁆𑀲, 𑀆𑀭𑁄𑀘𑁂𑀢𑀩𑁆𑀩𑀫𑀸𑀤𑀺𑀢𑁄.

𑀧𑀼𑀦𑀧𑁆𑀧𑀼𑀦𑀸𑀕𑀢𑀸𑀦𑀫𑁆𑀧𑀺, 𑀆𑀭𑁄𑀘𑁂𑀦𑁆𑀢𑁄𑀯 𑀭𑀢𑁆𑀢𑀺𑀬𑀸;

𑀙𑁂𑀤𑀁 𑀯𑀸 𑀯𑀢𑁆𑀢𑀪𑁂𑀤𑀁 𑀯𑀸, 𑀅𑀓𑀢𑁆𑀯𑀸𑀯 𑀲𑀤𑀸 𑀯𑀲𑁂.

𑀧𑀭𑀺𑀯𑀸𑀲𑁄 𑀯𑀺𑀲𑁄𑀥𑁂𑀢𑀼𑀁, 𑀦 𑀲𑀓𑁆𑀓𑀸 𑀢𑀢𑁆𑀣 𑀘𑁂 𑀧𑀦;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀢𑀁 𑀯𑀢𑁆𑀢𑀁, 𑀯𑀢𑁆𑀣𑀩𑁆𑀩𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸.

𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸, 𑀧𑀼𑀕𑁆𑀕𑀮𑁂 𑀯𑀸𑀧𑀺 𑀦𑀺𑀓𑁆𑀔𑀺𑀧𑁂;

𑀦𑀺𑀓𑁆𑀔𑀺𑀧𑀸𑀫𑀻𑀢𑀺 𑀯𑀢𑁆𑀢𑀁 𑀯𑀸, 𑀧𑀭𑀺𑀯𑀸𑀲𑀦𑁆𑀢𑀺 𑀯𑀸 𑀢𑀣𑀸.

𑀏𑀯𑀫𑁂𑀓𑀧𑀤𑁂𑀦𑀸𑀧𑀺, 𑀧𑀤𑁂𑀳𑀺 𑀤𑁆𑀯𑀻𑀳𑀺 𑀯𑀸 𑀧𑀦;

𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀢𑀁, 𑀲𑀫𑀸𑀤𑀸𑀦𑁂𑀧𑁆𑀬𑀬𑀁 𑀦𑀬𑁄.

𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀉𑀤𑁆𑀥𑀁, 𑀧𑀓𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺;

𑀧𑀼𑀦 𑀧𑀘𑁆𑀘𑀽𑀲𑀓𑀸𑀮𑀲𑁆𑀫𑀺𑀁, 𑀲𑀤𑁆𑀥𑀺𑀫𑁂𑀓𑁂𑀦 𑀪𑀺𑀓𑁆𑀔𑀼𑀦𑀸.

𑀧𑀭𑀺𑀓𑁆𑀔𑀺𑀢𑁆𑀢𑀯𑀺𑀳𑀸𑀭𑀲𑁆𑀲, 𑀤𑁆𑀯𑁂 𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺;

𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸, 𑀅𑀧𑀭𑀺𑀓𑁆𑀔𑀺𑀢𑁆𑀢𑀢𑁄 𑀩𑀳𑀺.

𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫, 𑀑𑀓𑁆𑀓𑀫𑀺𑀢𑁆𑀯𑀸 𑀘 𑀫𑀕𑁆𑀕𑀢𑁄;

𑀕𑀼𑀫𑁆𑀩𑁂𑀦 𑀯𑀢𑀺𑀬𑀸 𑀯𑀸𑀧𑀺, 𑀙𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑁂𑀦 𑀢𑀼.

𑀢𑁂𑀦 𑀅𑀦𑁆𑀢𑁄𑀭𑀼𑀡𑁂𑀬𑁂𑀯, 𑀯𑀢𑁆𑀢𑀫𑀸𑀤𑀸𑀬 𑀯𑀺𑀜𑁆𑀜𑀼𑀦𑀸;

𑀆𑀭𑁄𑀘𑁂𑀢𑁆𑀯𑀸𑀭𑀼𑀡𑁂 𑀢𑀲𑁆𑀫𑀺𑀁, 𑀯𑀼𑀝𑁆𑀞𑀺𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀯𑀢𑁆𑀢𑀁, 𑀕𑀦𑁆𑀢𑀩𑁆𑀩𑀁 𑀢𑀼 𑀬𑀣𑀸𑀲𑀼𑀔𑀁;

𑀅𑀦𑁆𑀢𑁄𑀬𑁂𑀯𑀸𑀭𑀼𑀡𑁂 𑀪𑀺𑀓𑁆𑀔𑀼, 𑀕𑀢𑁄 𑀘𑁂 𑀬𑀲𑁆𑀲 𑀓𑀲𑁆𑀲𑀘𑀺.

𑀆𑀭𑁄𑀘𑁂𑀢𑁆𑀯𑀸𑀯 ¶ 𑀢𑀁 𑀯𑀢𑁆𑀢𑀁, 𑀦𑀺𑀓𑁆𑀔𑀺𑀧𑁂 𑀧𑀼𑀦 𑀧𑀡𑁆𑀟𑀺𑀢𑁄;

𑀲𑁂𑀲𑀁 𑀲𑀫𑀼𑀘𑁆𑀘𑀬𑀲𑁆𑀲𑀝𑁆𑀞-𑀓𑀣𑀸𑀬 𑀘 𑀯𑀺𑀪𑀸𑀯𑀬𑁂.

𑀆𑀧𑀢𑁆𑀢𑀻𑀦𑀜𑁆𑀘 𑀭𑀢𑁆𑀢𑀻𑀦𑀁, 𑀧𑀭𑀺𑀘𑁆𑀙𑁂𑀤𑀁 𑀦 𑀚𑀸𑀦𑀢𑀺;

𑀬𑁄 𑀢𑀲𑁆𑀲 𑀧𑀦 𑀤𑀸𑀢𑀩𑁆𑀩𑁄, ‘‘𑀲𑀼𑀤𑁆𑀥𑀦𑁆𑀢𑁄’’𑀢𑀺 𑀧𑀯𑀼𑀘𑁆𑀘𑀢𑀺.

𑀏𑀲𑁂𑀯 ¶ 𑀧𑀭𑀺𑀲𑀼𑀤𑁆𑀥𑁂𑀳𑀺, 𑀲𑀼𑀤𑁆𑀥𑀦𑁆𑀢𑁄 𑀤𑀼𑀯𑀺𑀥𑁄 𑀫𑀢𑁄;

𑀘𑀽𑀴𑀲𑀼𑀤𑁆𑀥𑀦𑁆𑀢𑀦𑀸𑀫𑁄 𑀘, 𑀫𑀳𑀸𑀲𑀼𑀤𑁆𑀥𑀦𑁆𑀢𑀦𑀸𑀫𑀓𑁄.

𑀤𑀼𑀯𑀺𑀥𑁄𑀧𑀺 𑀅𑀬𑀁 𑀭𑀢𑁆𑀢𑀺-𑀧𑀭𑀺𑀘𑁆𑀙𑁂𑀤𑀁 𑀅𑀚𑀸𑀦𑀢𑁄;

𑀏𑀓𑀘𑁆𑀘𑀁 𑀲𑀓𑀮𑀁 𑀯𑀸𑀧𑀺, 𑀤𑀸𑀢𑀩𑁆𑀩𑁄 𑀯𑀺𑀫𑀢𑀺𑀲𑁆𑀲 𑀯𑀸.

𑀇𑀢𑀭𑁄𑀧𑀺 𑀲𑀫𑁄𑀥𑀸𑀦-𑀧𑀭𑀺𑀯𑀸𑀲𑁄 𑀢𑀺𑀥𑀸 𑀫𑀢𑁄;

𑀲𑁄 𑀑𑀥𑀸𑀦𑀲𑀫𑁄𑀥𑀸𑀦𑁄, 𑀅𑀕𑁆𑀖𑀫𑀺𑀲𑁆𑀲𑀓𑀧𑀼𑀩𑁆𑀩𑀓𑁄.

𑀆𑀧𑀚𑁆𑀚𑀺𑀢𑁆𑀯𑀸𑀦𑁆𑀢𑀭𑀸𑀧𑀢𑁆𑀢𑀺𑀁, 𑀙𑀸𑀤𑁂𑀦𑁆𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄;

𑀤𑀺𑀯𑀲𑁂 𑀧𑀭𑀺𑀯𑀼𑀢𑁆𑀣𑁂 𑀢𑀼, 𑀑𑀥𑀼𑀦𑀺𑀢𑁆𑀯𑀸 𑀧𑀤𑀻𑀬𑀢𑁂.

𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸 𑀫𑀽𑀮-𑀤𑀺𑀯𑀲𑁂 𑀢𑀼 𑀯𑀺𑀦𑀺𑀘𑁆𑀙𑀺𑀢𑁂;

𑀧𑀘𑁆𑀙𑀸 𑀆𑀧𑀦𑁆𑀦𑀫𑀸𑀧𑀢𑁆𑀢𑀺𑀁, 𑀲𑀫𑁄𑀥𑀸𑀬 𑀯𑀺𑀥𑀸𑀦𑀢𑁄.

𑀬𑀸𑀘𑀫𑀸𑀦𑀲𑁆𑀲 𑀲𑀗𑁆𑀖𑁂𑀦, 𑀤𑀸𑀢𑀩𑁆𑀩𑁄 𑀧𑀦 𑀪𑀺𑀓𑁆𑀔𑀼𑀦𑁄;

𑀏𑀲𑁄𑀥𑀸𑀦𑀲𑀫𑁄𑀥𑀸𑀦-𑀧𑀭𑀺𑀯𑀸𑀲𑁄 𑀧𑀓𑀸𑀲𑀺𑀢𑁄.

𑀢𑀣𑀸 𑀲𑀫𑁆𑀩𑀳𑀼𑀮𑀸𑀲𑁆𑀯𑁂𑀓𑀸, 𑀤𑁆𑀯𑁂 𑀯𑀸 𑀲𑀫𑁆𑀩𑀳𑀼𑀮𑀸𑀧𑀺 𑀯𑀸;

𑀬𑀸 𑀬𑀸 𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸, 𑀢𑀸𑀲𑀁 𑀅𑀕𑁆𑀖𑀯𑀲𑁂𑀦 𑀳𑀺.

𑀆𑀧𑀢𑁆𑀢𑀻𑀦𑀁 𑀢𑀢𑁄 𑀊𑀦-𑀧𑀝𑀺𑀘𑁆𑀙𑀦𑁆𑀦𑀸𑀦𑀫𑁂𑀯 𑀬𑁄;

𑀲𑀫𑁄𑀥𑀸𑀬 𑀧𑀤𑀸𑀢𑀩𑁆𑀩𑁄, 𑀧𑀭𑀺𑀯𑀸𑀲𑁄𑀢𑀺 𑀯𑀼𑀘𑁆𑀘𑀢𑀺.

𑀦𑀸𑀦𑀸𑀯𑀢𑁆𑀣𑀼𑀓𑀲𑀜𑁆𑀜𑀸𑀬𑁄, 𑀲𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀧𑀦;

𑀲𑀩𑁆𑀩𑀸𑀢𑀸 𑀏𑀓𑀢𑁄 𑀓𑀢𑁆𑀯𑀸, 𑀤𑀸𑀢𑀩𑁆𑀩𑁄 𑀫𑀺𑀲𑁆𑀲𑀓𑁄 𑀫𑀢𑁄.

𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲, 𑀫𑀸𑀦𑀢𑁆𑀢𑀁 𑀤𑁂𑀬𑁆𑀬𑀫𑀼𑀢𑁆𑀢𑀭𑀺;

𑀙 𑀭𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀦𑁆𑀦𑀸-𑀧𑀝𑀺𑀘𑁆𑀙𑀦𑁆𑀦𑀯𑀲𑀸 𑀤𑀼𑀯𑁂.

𑀢𑀢𑁆𑀣 ¶ 𑀬𑀸 𑀅𑀧𑀝𑀺𑀘𑁆𑀙𑀦𑁆𑀦𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀬𑀲𑁆𑀲 𑀢𑀼;

𑀢𑀲𑁆𑀲 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀁, 𑀅𑀧𑀝𑀺𑀘𑁆𑀙𑀦𑁆𑀦𑀦𑀸𑀫𑀓𑀁.

𑀬𑀲𑁆𑀲𑀸𑀧𑀢𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸, 𑀧𑀭𑀺𑀯𑀸𑀲𑀸𑀯𑀲𑀸𑀦𑀓𑁂;

𑀢𑀲𑁆𑀲 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀁, ‘‘𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀕𑀦𑁆𑀢𑁆𑀯𑀸 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺, 𑀧𑀘𑁆𑀘𑀽𑀲𑀲𑀫𑀬𑁂 𑀲𑀳;

𑀧𑀭𑀺𑀯𑀸𑀲𑁂 𑀯𑀺𑀦𑀺𑀤𑁆𑀤𑀺𑀝𑁆𑀞-𑀧𑁆𑀧𑀓𑀸𑀭𑀁 𑀤𑁂𑀲𑀫𑁂𑀯 𑀘.

‘‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺, ‘‘𑀫𑀸𑀦𑀢𑁆𑀢’’𑀫𑀺𑀢𑀺 𑀯𑀸 𑀧𑀦;

𑀆𑀤𑀺𑀬𑀺𑀢𑁆𑀯𑀸𑀦 𑀢𑀁 𑀢𑁂𑀲𑀁, 𑀆𑀭𑁄𑀘𑁂𑀢𑁆𑀯𑀸 𑀯𑀺𑀲𑀸𑀭𑀤𑁄.

𑀦𑀺𑀓𑁆𑀔𑀺𑀧𑁂 ¶ 𑀲𑀦𑁆𑀢𑀺𑀓𑁂 𑀢𑁂𑀲𑀁, 𑀯𑀢𑁆𑀢𑀁 𑀢𑁂𑀲𑀼 𑀕𑀢𑁂𑀲𑀼 𑀯𑀸;

𑀪𑀺𑀓𑁆𑀔𑀼𑀲𑁆𑀲 𑀧𑀼𑀩𑁆𑀩𑀤𑀺𑀝𑁆𑀞𑀲𑁆𑀲, 𑀆𑀭𑁄𑀘𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂.

𑀢𑀲𑁆𑀲 𑀤𑀸𑀦𑀯𑀺𑀥𑀸𑀦𑀜𑁆𑀘, 𑀭𑀢𑁆𑀢𑀺𑀘𑁆𑀙𑁂𑀤𑀸𑀤𑀺𑀓𑁄 𑀦𑀬𑁄;

𑀜𑁂𑀬𑁆𑀬𑁄 𑀲𑀫𑀼𑀘𑁆𑀘𑀬𑀲𑁆𑀲𑀝𑁆𑀞-𑀓𑀣𑀸𑀧𑀸𑀴𑀺𑀯𑀲𑁂𑀦 𑀢𑀼.

𑀧𑀼𑀦 𑀢𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑀁, 𑀲𑀗𑁆𑀖𑁄 𑀯𑀻𑀲𑀢𑀺𑀯𑀕𑁆𑀕𑀺𑀓𑁄;

𑀅𑀩𑁆𑀪𑁂𑀬𑁆𑀬 𑀯𑀺𑀥𑀺𑀦𑀸 𑀪𑀺𑀓𑁆𑀔𑀼, 𑀧𑀓𑀢𑀢𑁆𑀢𑁄 𑀧𑀼𑀦𑀩𑁆𑀪𑀺𑀢𑁄.

𑀙𑀸𑀤𑁂𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺𑀁, 𑀧𑀭𑀺𑀯𑀸𑀲𑁄 𑀦 𑀯𑀺𑀚𑁆𑀚𑀢𑀺;

𑀦 𑀘 𑀪𑀺𑀓𑁆𑀔𑀼𑀦𑀺𑀬𑀸𑀧𑀢𑁆𑀢𑀺, 𑀅𑀢𑁆𑀢𑀦𑁄 𑀙𑀸𑀤𑀬𑀦𑁆𑀢𑀺𑀬𑀸.

𑀙𑀸𑀤𑁂𑀢𑁆𑀯𑀸 𑀯𑀸𑀧𑀺 𑀆𑀧𑀢𑁆𑀢𑀺𑀁, 𑀅𑀘𑁆𑀙𑀸𑀤𑁂𑀢𑁆𑀯𑀸𑀧𑀺 𑀯𑀸 𑀧𑀦;

𑀓𑁂𑀯𑀮𑀁 𑀘𑀭𑀺𑀢𑀩𑁆𑀩𑀦𑁆𑀢𑀺, 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀢𑀼.

𑀯𑀺𑀦𑀬𑀦𑀬𑀫𑀢𑀺𑀩𑀼𑀤𑁆𑀥𑀺𑀤𑀻𑀧𑀦𑀁;

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀫𑁂𑀢𑀫𑀼𑀢𑁆𑀢𑀫𑀁;

𑀯𑀺𑀯𑀺𑀥𑀦𑀬𑀦𑀬𑀼𑀢𑀁 𑀉𑀧𑁂𑀦𑁆𑀢𑀺 𑀬𑁂;

𑀯𑀺𑀦𑀬𑀦𑀬𑁂 𑀧𑀝𑀼𑀢𑀁 𑀉𑀧𑁂𑀦𑁆𑀢𑀺 𑀢𑁂.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀭𑀳𑁄 ¶ 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁;

𑀕𑀦𑁆𑀢𑀼𑀓𑀸𑀫𑁄 𑀦𑀺𑀯𑀸𑀲𑁂𑀢𑀺, 𑀅𑀓𑁆𑀔𑀺𑀁 𑀅𑀜𑁆𑀚𑁂𑀢𑀺 𑀪𑀼𑀜𑁆𑀚𑀢𑀺.

𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘, 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁;

𑀕𑀘𑁆𑀙𑀢𑁄 𑀧𑀤𑀯𑀸𑀭𑁂𑀦, 𑀕𑀦𑁆𑀢𑁆𑀯𑀸 𑀘𑀲𑁆𑀲 𑀦𑀺𑀲𑀻𑀤𑀢𑁄.

𑀦𑀺𑀲𑀚𑁆𑀚𑀸𑀬 𑀉𑀪𑀺𑀦𑁆𑀦𑀫𑁆𑀧𑀺, 𑀧𑀬𑁄𑀕𑀕𑀡𑀦𑀸𑀬 𑀘;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲, 𑀩𑀳𑀼𑀓𑀸𑀦𑀺 𑀩𑀳𑀽𑀲𑁆𑀯𑀧𑀺.

𑀲𑀫𑀻𑀧𑁂𑀧𑀺 ¶ 𑀞𑀺𑀢𑁄 𑀅𑀦𑁆𑀥𑁄, 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀓𑁂;

𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀁, 𑀇𑀢𑁆𑀣𑀻𑀦𑀁 𑀢𑀼 𑀲𑀢𑀫𑁆𑀧𑀺 𑀘.

𑀘𑀓𑁆𑀔𑀼𑀫𑀸𑀧𑀺 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀓𑁂𑀯𑀮𑀁;

𑀤𑁆𑀯𑀸𑀭𑁂 𑀧𑀺𑀳𑀺𑀢𑀕𑀩𑁆𑀪𑀲𑁆𑀲, 𑀦𑀺𑀲𑀺𑀦𑁆𑀦𑁄𑀧𑀺 𑀦 𑀭𑀓𑁆𑀔𑀢𑀺.

𑀅𑀦𑀦𑁆𑀥𑁂 𑀲𑀢𑀺 𑀯𑀺𑀜𑁆𑀜𑀼𑀲𑁆𑀫𑀺𑀁, 𑀞𑀺𑀢𑀲𑁆𑀲𑀸𑀭𑀳𑀲𑀜𑁆𑀜𑀺𑀦𑁄;

𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄, 𑀦𑀢𑁆𑀣𑀺 𑀯𑀺𑀓𑁆𑀔𑀺𑀢𑁆𑀢𑀘𑁂𑀢𑀲𑁄.

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀅𑀦𑀦𑁆𑀥𑀸𑀩𑀥𑀺𑀭𑁄 𑀯𑀺𑀜𑁆𑀜𑀽, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄𑀧𑀺 𑀯𑀸;

𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑁄, 𑀅𑀦𑀸𑀧𑀢𑁆𑀢𑀺𑀓𑀭𑁄 𑀲𑀺𑀬𑀸.

𑀅𑀦𑁆𑀥𑁄 𑀅𑀩𑀥𑀺𑀭𑁄 𑀯𑀸𑀧𑀺, 𑀩𑀥𑀺𑀭𑁄 𑀯𑀸𑀧𑀺 𑀘𑀓𑁆𑀔𑀼𑀫𑀸;

𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀁, 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀺𑀤𑀁.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀅𑀦𑀺𑀬𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀔𑁄𑀫𑀁 ¶ 𑀓𑀧𑁆𑀧𑀸𑀲𑀓𑁄𑀲𑁂𑀬𑁆𑀬𑀁, 𑀲𑀸𑀡𑀁 𑀪𑀗𑁆𑀕𑀜𑁆𑀘 𑀓𑀫𑁆𑀩𑀮𑀁;

𑀘𑀻𑀯𑀭𑀁 𑀙𑀩𑁆𑀩𑀺𑀥𑀁 𑀯𑀼𑀢𑁆𑀢𑀁, 𑀚𑀸𑀢𑀺𑀢𑁄 𑀧𑀦 𑀓𑀧𑁆𑀧𑀺𑀬𑀁.

𑀤𑀼𑀓𑀽𑀮𑀜𑁆𑀘𑁂𑀯 𑀧𑀢𑁆𑀢𑀼𑀡𑁆𑀡𑀁, 𑀘𑀺𑀦𑀁 𑀲𑁄𑀫𑀸𑀭𑀧𑀝𑁆𑀝𑀓𑀁;

𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀜𑁆𑀘, 𑀢𑀲𑁆𑀲𑁂𑀢𑀁 𑀅𑀦𑀼𑀮𑁄𑀫𑀺𑀓𑀁.

𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭-𑀘𑁄𑀴𑀜𑁆𑀘 𑀫𑀼𑀔𑀧𑀼𑀜𑁆𑀙𑀦𑀁;

𑀦𑀺𑀲𑀻𑀤𑀦𑀫𑀥𑀺𑀝𑁆𑀞𑁂𑀬𑁆𑀬, 𑀧𑀘𑁆𑀘𑀢𑁆𑀣𑀭𑀡𑀫𑁂𑀯 𑀘.

𑀏𑀓𑀸𑀳𑀫𑁆𑀧𑀺 ¶ 𑀯𑀺𑀦𑀸 𑀪𑀺𑀓𑁆𑀔𑀼, 𑀦 𑀯𑀲𑁂𑀬𑁆𑀬 𑀢𑀺𑀘𑀻𑀯𑀭𑀁;

𑀦 𑀯𑀲𑁂𑀬𑁆𑀬 𑀢𑀣𑀸𑀥𑀺𑀝𑁆𑀞𑀸, 𑀘𑀸𑀢𑀼𑀫𑀸𑀲𑀁 𑀦𑀺𑀲𑀻𑀤𑀦𑀁.

𑀭𑀚𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀩𑀺𑀦𑁆𑀤𑀼𑀁, 𑀤𑀢𑁆𑀯𑀸 𑀢𑀢𑁆𑀣 𑀢𑀺𑀘𑀻𑀯𑀭𑀁;

𑀉𑀧𑀧𑀦𑁆𑀦𑀁 𑀧𑀫𑀸𑀡𑁂𑀦, 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯 𑀢𑀁.

𑀧𑀘𑁆𑀙𑀺𑀫𑀦𑁆𑀢𑁂𑀦 𑀲𑀗𑁆𑀖𑀸𑀝𑀺, 𑀤𑀻𑀖𑀲𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀸;

𑀫𑀼𑀝𑁆𑀞𑀺𑀢𑁆𑀢𑀺𑀓𑀸 𑀘 𑀢𑀺𑀭𑀺𑀬𑀁, 𑀉𑀢𑁆𑀢𑀫𑀦𑁆𑀢𑁂𑀦 𑀲𑀸 𑀧𑀦.

𑀲𑀢𑁆𑀣𑀼𑀦𑁄 𑀘𑀻𑀯𑀭𑀽𑀦𑀸𑀧𑀺, 𑀯𑀝𑁆𑀝𑀢𑀻𑀢𑀺 𑀧𑀓𑀸𑀲𑀺𑀢𑀸;

𑀇𑀤𑀫𑁂𑀯𑀼𑀢𑁆𑀢𑀭𑀸𑀲𑀗𑁆𑀕𑁂, 𑀧𑀫𑀸𑀡𑀁 𑀧𑀭𑀺𑀤𑀻𑀧𑀺𑀢𑀁.

𑀫𑀼𑀝𑁆𑀞𑀺𑀧𑀜𑁆𑀘𑀓𑀁 𑀤𑀻𑀖𑀦𑁆𑀢𑀁, 𑀧𑀫𑀸𑀡𑀁 𑀢𑀺𑀭𑀺𑀬𑀦𑁆𑀢𑀢𑁄;

𑀅𑀟𑁆𑀠𑀢𑁂𑀬𑁆𑀬𑀁 𑀤𑁆𑀯𑀺𑀳𑀢𑁆𑀣𑀁 𑀯𑀸, 𑀲𑁂𑀲𑁂 𑀅𑀦𑁆𑀢𑀭𑀯𑀸𑀲𑀓𑁂.

𑀅𑀳𑀢𑀸𑀳𑀢𑀓𑀧𑁆𑀧𑀸𑀦𑀁, 𑀲𑀗𑁆𑀖𑀸𑀝𑀺 𑀤𑀺𑀕𑀼𑀡𑀸 𑀫𑀢𑀸;

𑀏𑀓𑀧𑀝𑁆𑀝𑀼𑀢𑁆𑀢𑀭𑀸𑀲𑀗𑁆𑀕𑁄, 𑀏𑀯𑀫𑀦𑁆𑀢𑀭𑀯𑀸𑀲𑀓𑁄.

𑀲𑀗𑁆𑀖𑀸𑀝𑀺 𑀪𑀺𑀓𑁆𑀔𑀼𑀲𑁆𑀲 𑀘𑀢𑀼𑀕𑁆𑀕𑀼𑀡𑀸 𑀯𑀸;

𑀤𑀼𑀯𑁂𑀧𑀺 𑀲𑁂𑀲𑀸 𑀤𑀺𑀕𑀼𑀡𑀸𑀯 𑀯𑀼𑀢𑁆𑀢𑀸;

𑀬𑀣𑀸𑀲𑀼𑀔𑀁 𑀯𑀝𑁆𑀝𑀢𑀺 𑀧𑀁𑀲𑀼𑀓𑀽𑀮𑀁.

𑀢𑀻𑀡𑀺𑀧𑀺 ¶ 𑀤𑁆𑀯𑁂𑀧𑀺 𑀘𑁂𑀓𑀁 𑀯𑀸, 𑀙𑀺𑀦𑁆𑀤𑀺𑀢𑀩𑁆𑀩𑀁 𑀧𑀳𑁄𑀢𑀺 𑀘𑁂;

𑀲𑀩𑁆𑀩𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼, 𑀤𑁂𑀬𑁆𑀬𑀫𑀦𑁆𑀯𑀸𑀥𑀺𑀓𑀫𑁆𑀧𑀺 𑀯𑀸.

𑀅𑀘𑁆𑀙𑀺𑀦𑁆𑀦𑀁 𑀯𑀸 𑀅𑀦𑀸𑀤𑀺𑀦𑁆𑀦𑀁, 𑀥𑀸𑀭𑁂𑀦𑁆𑀢𑀲𑁆𑀲 𑀢𑀺𑀘𑀻𑀯𑀭𑀁;

𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀤𑀼𑀩𑁆𑀪𑁄𑀕𑁂𑀦 𑀘 𑀲𑁂𑀯𑀢𑁄.

𑀓𑀼𑀲𑀺𑀁 𑀅𑀟𑁆𑀠𑀓𑀼𑀲𑀺𑀜𑁆𑀘𑀸𑀧𑀺, 𑀫𑀡𑁆𑀟𑀮𑀁 𑀅𑀟𑁆𑀠𑀫𑀡𑁆𑀟𑀮𑀁;

𑀯𑀺𑀯𑀝𑁆𑀝𑀁 𑀅𑀦𑀼𑀯𑀺𑀯𑀝𑁆𑀝𑀁, 𑀩𑀸𑀳𑀦𑁆𑀢𑀫𑁆𑀧𑀺 𑀘 𑀪𑀺𑀓𑁆𑀔𑀼𑀦𑁄.

𑀤𑀲𑁆𑀲𑁂𑀢𑁆𑀯𑀸𑀯 𑀯𑀺𑀥𑀺𑀁 𑀲𑀩𑁆𑀩𑀁, 𑀧𑀜𑁆𑀘𑀓𑀸𑀤𑀺𑀧𑁆𑀧𑀪𑁂𑀤𑀓𑀁;

𑀙𑀺𑀦𑁆𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁, 𑀓𑀸𑀢𑀩𑁆𑀩𑀁 𑀢𑀼 𑀢𑀺𑀘𑀻𑀯𑀭𑀁.

𑀤𑀸𑀦𑁂𑀦𑀘𑁆𑀙𑀺𑀚𑁆𑀚𑀕𑀸𑀳𑁂𑀦, 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀦 𑀘;

𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀧𑀺, 𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑀢𑁄.

𑀧𑀘𑁆𑀘𑀼𑀤𑁆𑀥𑀸𑀭𑀯𑀺𑀦𑀸𑀲𑁂𑀳𑀺, 𑀮𑀺𑀗𑁆𑀕𑀲𑁆𑀲 𑀧𑀭𑀺𑀯𑀢𑁆𑀢𑀦𑀸;

𑀲𑀩𑁆𑀩𑀁 𑀪𑀺𑀚𑁆𑀚𑀢𑀺𑀥𑀺𑀝𑁆𑀞𑀸𑀦𑀁, 𑀙𑀺𑀤𑁆𑀤𑀪𑀸𑀯𑁂 𑀢𑀺𑀘𑀻𑀯𑀭𑀁.

𑀓𑀦𑀺𑀝𑁆𑀞𑀲𑁆𑀲𑀗𑁆𑀕𑀼𑀮𑀲𑁆𑀲𑁂𑀯 ¶ , 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀓𑀁;

𑀯𑀺𑀦𑀺𑀯𑀺𑀤𑁆𑀥𑀁 𑀧𑀦𑀘𑁆𑀙𑀺𑀤𑁆𑀤-𑀫𑀥𑀺𑀝𑁆𑀞𑀸𑀦𑀯𑀺𑀦𑀸𑀲𑀦𑀁.

𑀏𑀓𑁄 𑀢𑀦𑁆𑀢𑀼𑀧𑀺 𑀅𑀘𑁆𑀙𑀺𑀦𑁆𑀦𑁄, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑀢𑀺;

𑀲𑁂𑀢𑀪𑀸𑀯𑀁 𑀓𑀭𑁄𑀦𑁆𑀢𑁂𑀦, 𑀥𑁄𑀢𑀫𑁆𑀧𑀺 𑀭𑀚𑀓𑁂𑀦 𑀯𑀸.

𑀧𑀞𑀫𑀁 𑀅𑀕𑁆𑀕𑀴𑀁 𑀤𑀢𑁆𑀯𑀸, 𑀧𑀘𑁆𑀙𑀸 𑀙𑀺𑀦𑁆𑀤𑀢𑀺 𑀭𑀓𑁆𑀔𑀢𑀺;

𑀖𑀝𑁂𑀢𑁆𑀯𑀸 𑀓𑁄𑀝𑀺𑀬𑁄 𑀤𑁆𑀯𑁂 𑀯𑀸, 𑀧𑀘𑁆𑀙𑀸 𑀙𑀺𑀦𑁆𑀤𑀢𑀺 𑀭𑀓𑁆𑀔𑀢𑀺.

𑀘𑀢𑀼𑀭𑀝𑁆𑀞𑀗𑁆𑀕𑀼𑀮𑀸 𑀑𑀭𑀁, 𑀏𑀓𑀤𑁆𑀯𑀺𑀦𑁆𑀦𑀁 𑀢𑀺𑀭𑀻𑀬𑀢𑁄;

𑀢𑀺𑀡𑁆𑀡𑀫𑁆𑀧𑀺 𑀤𑀻𑀖𑀢𑁄 𑀙𑀺𑀤𑁆𑀤𑀁, 𑀪𑀺𑀦𑁆𑀤𑀢𑁂𑀯 𑀯𑀺𑀤𑀢𑁆𑀣𑀺𑀬𑀸.

𑀦𑀺𑀲𑀻𑀤𑀦𑀲𑁆𑀲 𑀤𑀻𑀖𑁂𑀦, 𑀪𑀯𑀦𑁆𑀢𑀺 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄;

𑀯𑀺𑀢𑁆𑀣𑀸𑀭𑁂𑀦 𑀤𑀺𑀬𑀟𑁆𑀠𑀸 𑀘, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑀳𑁄𑀦𑁆𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀢𑀺𑀭𑀺𑀬𑀁 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄;

𑀤𑀻𑀖𑀢𑁄𑀧𑀺 𑀘𑀢𑀲𑁆𑀲𑁄𑀯, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑀤𑀻𑀖𑀢𑁄 ¶ 𑀲𑀼𑀕𑀢𑀲𑁆𑀲𑁂𑀯, 𑀪𑀯𑀦𑁆𑀢𑀺 𑀙 𑀯𑀺𑀤𑀢𑁆𑀣𑀺𑀬𑁄;

𑀯𑀺𑀢𑁆𑀣𑀸𑀭𑁂𑀦𑀟𑁆𑀠𑀢𑁂𑀬𑁆𑀬𑀸𑀯, 𑀲𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸.

𑀫𑀼𑀦𑀺𑀦𑀸 𑀢𑀻𑀲𑀼 𑀏𑀢𑁂𑀲𑀼, 𑀓𑀭𑁄𑀦𑁆𑀢𑀲𑁆𑀲 𑀢𑀤𑀼𑀢𑁆𑀢𑀭𑀺𑀁;

𑀅𑀥𑀺𑀓𑀘𑁆𑀙𑁂𑀤𑀦𑀁 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀲𑁆𑀲, 𑀧𑀘𑁆𑀘𑀢𑁆𑀣𑀭𑀡𑀓𑀲𑁆𑀲 𑀯𑀸;

𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑁂𑀦, 𑀦 𑀘𑁂𑀯 𑀧𑀭𑀺𑀤𑀻𑀧𑀺𑀢𑀁.

𑀲𑀤𑀲𑀁 𑀅𑀤𑀲𑀁 𑀲𑀩𑁆𑀩𑀁, 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀁;

𑀫𑀳𑀦𑁆𑀢𑀁 𑀔𑀼𑀤𑁆𑀤𑀓𑀁 𑀏𑀓-𑀫𑀦𑁂𑀓𑀫𑁆𑀧𑀺 𑀘 𑀯𑀝𑁆𑀝𑀢𑀺.

𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑁂𑀓𑀁, 𑀤𑁆𑀯𑁂𑀧𑀺 𑀯𑀝𑁆𑀝𑀦𑁆𑀢𑀺 𑀲𑀩𑁆𑀩𑀣𑀸;

𑀲𑀤𑀲𑀁 𑀅𑀤𑀲𑀁 𑀯𑀸𑀧𑀺, 𑀲𑀤𑀲𑀁𑀯 𑀦𑀺𑀲𑀻𑀤𑀦𑀁.

𑀅𑀤𑀲𑀸 𑀭𑀚𑀺𑀢𑀸𑀬𑁂𑀯, 𑀯𑀝𑁆𑀝𑀢𑀸𑀤𑀺𑀦𑁆𑀦𑀓𑀧𑁆𑀧𑀓𑀸;

𑀯𑀼𑀢𑁆𑀢𑀸 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀢𑀣𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸.

𑀕𑀡𑀦𑀁 𑀯𑀸 𑀧𑀫𑀸𑀡𑀁 𑀯𑀸, 𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀓𑁂;

𑀧𑀫𑀸𑀡𑀕𑀡𑀦𑀸𑀢𑀻𑀢𑀺, 𑀪𑀡𑀦𑁆𑀢𑀺 𑀧𑀓𑀢𑀜𑁆𑀜𑀼𑀦𑁄.

𑀲𑀼𑀕𑀢𑀝𑁆𑀞𑀗𑁆𑀕𑀼𑀮𑀸𑀬𑀸𑀫𑀁, 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁;

𑀯𑀺𑀓𑀧𑁆𑀧𑀦𑀼𑀧𑀕𑀁 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀦𑀸𑀫 𑀘𑀻𑀯𑀭𑀁.

𑀧𑀭𑀺𑀲𑁆𑀲𑀸𑀯𑀧𑀝𑀁 ¶ 𑀧𑀢𑁆𑀢-𑀧𑁄𑀢𑁆𑀣𑀓𑀢𑁆𑀣𑀯𑀺𑀓𑀸𑀤𑀺𑀓𑀁;

𑀅𑀥𑀺𑀝𑁆𑀞𑁂𑀬𑁆𑀬 𑀧𑀭𑀺𑀓𑁆𑀔𑀸𑀭-𑀘𑁄𑀴𑀁 𑀧𑀘𑁆𑀙𑀺𑀫𑀘𑀻𑀯𑀭𑀁.

𑀩𑀳𑀽𑀦𑀺 𑀏𑀓𑀢𑁄 𑀓𑀢𑁆𑀯𑀸, 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺;

𑀫𑀸𑀢𑀼𑀆𑀤𑀻𑀦𑀫𑀢𑁆𑀣𑀸𑀬, 𑀞𑀧𑀺𑀢𑁂 𑀦𑀢𑁆𑀣𑀺 𑀤𑁄𑀲𑀢𑀸.

𑀯𑀲𑁆𑀲𑀫𑀸𑀲𑁂 𑀅𑀥𑀺𑀝𑁆𑀞𑁂𑀬𑁆𑀬, 𑀘𑀢𑀼𑀭𑁄 𑀯𑀲𑁆𑀲𑀲𑀸𑀝𑀺𑀓𑀁;

𑀧𑀼𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀢𑀁, 𑀯𑀺𑀓𑀧𑁆𑀧𑁂𑀬𑁆𑀬 𑀢𑀢𑁄 𑀧𑀭𑀁.

𑀢𑀸𑀯 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁, 𑀬𑀸𑀯 𑀭𑁄𑀕𑁄 𑀦 𑀲𑀫𑁆𑀫𑀢𑀺;

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁, 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑀬𑁂.

‘‘𑀇𑀫𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁, 𑀇𑀫𑀫𑀦𑁆𑀢𑀭𑀯𑀸𑀲𑀓𑀁;

𑀅𑀥𑀺𑀝𑁆𑀞𑀸𑀫𑀻’’𑀢𑀺𑀥𑀺𑀝𑁆𑀞𑁂𑀬𑁆𑀬, 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄.

‘‘𑀇𑀫𑀁 ¶ 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁, 𑀏𑀢’’𑀦𑁆𑀢𑀺 𑀘 𑀅𑀲𑀫𑁆𑀫𑀼𑀔𑁂;

𑀯𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑁂𑀬𑁆𑀬𑁂𑀯𑀁, 𑀲𑁂𑀲𑁂𑀲𑀼𑀧𑀺 𑀯𑀺𑀘𑀓𑁆𑀔𑀡𑁄.

𑀆𑀪𑁄𑀕𑀁 𑀫𑀦𑀲𑀸 𑀓𑀢𑁆𑀯𑀸, 𑀓𑀸𑀬𑁂𑀦 𑀨𑀼𑀲𑀦𑀸𑀓𑀢𑀁;

𑀯𑀘𑀲𑀸𑀥𑀺𑀝𑁆𑀞𑀺𑀢𑀜𑁆𑀘𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀤𑁆𑀯𑀺𑀥𑀸 𑀫𑀢𑀁.

𑀇𑀢𑀺 𑀲𑀩𑁆𑀩𑀫𑀺𑀤𑀁 𑀯𑀼𑀢𑁆𑀢𑀁, 𑀢𑁂𑀘𑀻𑀯𑀭𑀺𑀓𑀪𑀺𑀓𑁆𑀔𑀼𑀦𑁄;

𑀢𑀣𑀸 𑀯𑀢𑁆𑀯𑀸𑀯𑀥𑀺𑀝𑁆𑀞𑁂𑀬𑁆𑀬, 𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀓𑁄.

𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭-𑀘𑁄𑀴𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺;

𑀏𑀯𑀁 𑀘𑀼𑀤𑁄𑀲𑀺𑀢𑁂 𑀯𑀼𑀢𑁆𑀢𑁄, 𑀧𑀭𑀺𑀳𑀸𑀭𑁄 𑀦𑀺𑀭𑀢𑁆𑀣𑀓𑁄.

𑀦, 𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯, 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀲𑀢𑁆𑀣𑀼𑀦𑀸;

𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺.

‘‘𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑁆𑀣 𑀘;

𑀅𑀥𑀺𑀝𑁆𑀞𑀸𑀢𑀩𑁆𑀩𑀓𑀲𑁆𑀲𑁂𑀯, 𑀯𑀺𑀓𑀧𑁆𑀧𑀦𑀯𑀺𑀥𑀸𑀦𑀢𑁄.

𑀪𑀺𑀓𑁆𑀔𑀼𑀲𑁆𑀲𑁂𑀯𑀁 𑀓𑀭𑁄𑀦𑁆𑀢𑀲𑁆𑀲, 𑀦 𑀤𑁄𑀲𑁄 𑀉𑀧𑀮𑀩𑁆𑀪𑀢𑀺;

𑀏𑀯𑀜𑁆𑀘 𑀦 𑀲𑀺𑀬𑀸 𑀓𑀲𑁆𑀫𑀸, 𑀫𑀼𑀔𑀧𑀼𑀜𑁆𑀙𑀦𑀓𑀸𑀤𑀺𑀓𑀁.

𑀫𑀼𑀔𑀧𑀼𑀜𑁆𑀙𑀦𑀓𑀸𑀤𑀻𑀦𑀁, 𑀢𑁂𑀲𑀁 𑀓𑀺𑀘𑁆𑀘𑀯𑀺𑀥𑀸𑀦𑀢𑁄;

𑀅𑀓𑀺𑀘𑁆𑀘𑀲𑁆𑀲𑀸𑀫𑀺𑀓𑀲𑁆𑀲𑀲𑁆𑀲, 𑀅𑀥𑀺𑀝𑁆𑀞𑀸𑀦𑀁 𑀢𑀼 𑀬𑀼𑀚𑁆𑀚𑀢𑀺.

𑀦𑀺𑀥𑀸𑀦𑀫𑀼𑀔𑀫𑁂𑀢𑀦𑁆𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦;

𑀯𑀼𑀢𑁆𑀢𑀢𑁆𑀢𑀸 𑀘 𑀦𑀺𑀲𑁂𑀥𑁂𑀢𑀼𑀁, 𑀦 𑀲𑀓𑁆𑀓𑀸 𑀯𑀺𑀦𑀬𑀜𑁆𑀜𑀼𑀦𑀸.

𑀘𑀻𑀯𑀭𑀁 ¶ 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀦𑀺𑀤𑀸𑀦𑀼𑀧𑁆𑀧𑀢𑁆𑀢𑀺𑀢𑁄𑀧𑀺 𑀘;

𑀦𑀺𑀥𑀸𑀦𑀫𑀼𑀔𑀫𑁂𑀢𑀦𑁆𑀢𑀺, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑀓𑀼𑀲𑀯𑀸𑀓𑀸𑀤𑀺𑀘𑀻𑀭𑀸𑀦𑀺, 𑀓𑀫𑁆𑀩𑀮𑀁 𑀓𑁂𑀲𑀯𑀸𑀮𑀚𑀁;

𑀣𑀼𑀮𑁆𑀮𑀘𑁆𑀘𑀬𑀁 𑀥𑀸𑀭𑀬𑀢𑁄-𑀮𑀽𑀓𑀧𑀓𑁆𑀔𑀸𑀚𑀺𑀦𑀓𑁆𑀔𑀺𑀧𑁂.

𑀓𑀤𑀮𑁂𑀭𑀓𑀤𑀼𑀲𑁆𑀲𑁂𑀲𑀼, 𑀅𑀓𑁆𑀓𑀤𑀼𑀲𑁆𑀲𑁂 𑀘 𑀧𑁄𑀢𑁆𑀣𑀓𑁂;

𑀤𑀼𑀓𑁆𑀓𑀝𑀁 𑀢𑀺𑀭𑀺𑀝𑁂 𑀯𑀸𑀧𑀺, 𑀯𑁂𑀞𑀦𑁂 𑀓𑀜𑁆𑀘𑀼𑀓𑁂𑀧𑀺 𑀘.

𑀲𑀩𑁆𑀩𑀦𑀻𑀮𑀓𑀫𑀜𑁆𑀚𑁂𑀝𑁆𑀞-𑀓𑀡𑁆𑀳𑀮𑁄𑀳𑀺𑀢𑀧𑀻𑀢𑀓𑁂 ¶ ;

𑀫𑀳𑀸𑀦𑀸𑀫𑀫𑀳𑀸𑀭𑀗𑁆𑀕-𑀭𑀢𑁆𑀢𑁂𑀲𑀼𑀧𑀺 𑀘 𑀤𑀼𑀓𑁆𑀓𑀝𑀁.

𑀅𑀘𑁆𑀙𑀺𑀦𑁆𑀦𑀤𑀲𑀓𑁂 𑀤𑀻𑀖-𑀨𑀮𑀧𑀼𑀧𑁆𑀨𑀤𑀲𑁂𑀲𑀼 𑀘;

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑁂𑀢𑁆𑀣, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀓𑀧𑁆𑀧𑀺𑀬𑀁.

𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀺𑀦𑀲𑁆𑀲𑀢𑀺;

𑀅𑀦𑁆𑀢𑁄𑀤𑀲𑀸𑀳𑀁 𑀯𑀺𑀲𑁆𑀲𑀸𑀲𑁂, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀓𑀣𑀺𑀦𑀁 𑀦𑀸𑀫 𑀦𑀸𑀫𑁂𑀦, 𑀲𑀫𑀼𑀝𑁆𑀞𑀸𑀦𑀫𑀺𑀤𑀁 𑀧𑀦;

𑀅𑀘𑀺𑀢𑁆𑀢𑀫𑀓𑁆𑀭𑀺𑀬𑀁 𑀯𑀼𑀢𑁆𑀢𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀼, 𑀢𑀺𑀧𑀜𑁆𑀘𑀲𑀼 𑀢𑀺𑀘𑀻𑀯𑀭𑀁;

𑀞𑀧𑁂𑀢𑁆𑀯𑀸 𑀏𑀓𑀭𑀢𑁆𑀢𑀫𑁆𑀧𑀺, 𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀯𑀺𑀦𑀸.

𑀪𑀺𑀓𑁆𑀔𑀼𑀦𑁄 𑀧𑀦 𑀢𑁂𑀦𑀲𑁆𑀲, 𑀯𑀺𑀧𑁆𑀧𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀺;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀺𑀧𑁆𑀧-𑀯𑀲𑀢𑁄 𑀅𑀭𑀼𑀡𑀼𑀕𑁆𑀕𑀫𑁂.

𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀦𑁆𑀳𑀸𑀬𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀺𑀬𑀁;

𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀓𑀺𑀁 𑀦𑀼, 𑀓𑀸𑀢𑀩𑁆𑀩𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸.

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀯𑀸𑀲𑀦𑁂;

𑀢𑀩𑁆𑀪𑀬𑀸 𑀧𑀦 𑀲𑁄 𑀪𑀺𑀓𑁆𑀔𑀼, 𑀦𑀕𑁆𑀕𑁄 𑀕𑀘𑁆𑀙𑀢𑀺 𑀤𑀼𑀓𑁆𑀓𑀝𑀁.

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂, 𑀞𑀺𑀢𑀢𑁆𑀢𑀸 𑀧𑀦 𑀪𑀺𑀓𑁆𑀔𑀼𑀦𑁄;

𑀦 𑀢𑀲𑁆𑀲𑀸𑀓𑀧𑁆𑀧𑀺𑀬𑀁 𑀦𑀸𑀫, 𑀘𑀻𑀯𑀭𑀁 𑀅𑀢𑁆𑀣𑀺 𑀓𑀺𑀜𑁆𑀘𑀺𑀧𑀺.

𑀦𑀺𑀕𑀸𑀲𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀘, 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁;

𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀦𑀸𑀧𑀢𑁆𑀢𑀺, 𑀤𑁂𑀲𑁂𑀢𑀩𑁆𑀩𑀸𑀯 𑀯𑀺𑀜𑁆𑀜𑀼𑀦𑀸.

𑀧𑀭𑀲𑁆𑀲 ¶ 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀢𑀁, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄;

𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘, 𑀳𑁄𑀢𑀺 𑀧𑀸𑀭𑀼𑀧𑀦𑀸𑀤𑀺𑀲𑀼.

𑀅𑀦𑀸𑀧𑀢𑁆𑀢𑀺 ¶ 𑀢𑀫𑀜𑁆𑀜𑀲𑁆𑀲, 𑀪𑀺𑀓𑁆𑀔𑀼𑀦𑁄 𑀧𑀭𑀺𑀪𑀼𑀜𑁆𑀚𑀢𑁄;

𑀅𑀤𑁂𑀦𑁆𑀢𑀲𑁆𑀲 𑀘 𑀦𑀺𑀲𑁆𑀲𑀝𑁆𑀞𑀁, 𑀤𑀼𑀓𑁆𑀓𑀝𑀁 𑀧𑀭𑀺𑀬𑀸𑀧𑀼𑀢𑀁.

𑀣𑁂𑀭𑁂 𑀘 𑀤𑀳𑀭𑁂 𑀫𑀕𑁆𑀕𑀁, 𑀕𑀘𑁆𑀙𑀦𑁆𑀢𑁂𑀲𑀼 𑀉𑀪𑁄𑀲𑀼𑀧𑀺;

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀑𑀳𑀻𑀦𑁂 𑀤𑀳𑀭𑁂 𑀧𑀦.

𑀅𑀲𑀫𑁆𑀧𑀢𑁆𑀢𑁂 𑀕𑀭𑀼𑀁 𑀢𑀲𑁆𑀫𑀺𑀁, 𑀉𑀕𑁆𑀕𑀘𑁆𑀙𑀢𑁆𑀬𑀭𑀼𑀡𑁄 𑀬𑀤𑀺;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀢𑁆𑀣𑀁, 𑀦 𑀧𑀲𑁆𑀲𑀫𑁆𑀪𑀢𑀺 𑀦𑀺𑀲𑁆𑀲𑀬𑁄.

𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸𑀦, 𑀕𑀘𑁆𑀙𑀦𑁆𑀢𑁂 𑀤𑀳𑀭𑁂 𑀧𑀦;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀢𑁆𑀣𑀁, 𑀧𑀲𑁆𑀲𑀫𑁆𑀪𑀢𑀺 𑀘 𑀦𑀺𑀲𑁆𑀲𑀬𑁄.

𑀲𑀼𑀢𑀸 𑀥𑀫𑁆𑀫𑀓𑀣𑀸 𑀬𑀲𑁆𑀫𑀺𑀁, 𑀉𑀕𑁆𑀕𑀘𑁆𑀙𑀢𑁆𑀬𑀭𑀼𑀡𑁄 𑀬𑀤𑀺;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀢𑁆𑀣𑀁, 𑀧𑀲𑁆𑀲𑀫𑁆𑀪𑀢𑀺 𑀘 𑀦𑀺𑀲𑁆𑀲𑀬𑁄.

𑀧𑀘𑁆𑀘𑀼𑀤𑁆𑀥𑀸𑀭𑁂 𑀅𑀦𑀸𑀧𑀢𑁆𑀢𑀺, 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲𑀧𑀺;

𑀅𑀦𑁆𑀢𑁄𑀬𑁂𑀯𑀸𑀭𑀼𑀡𑁂 𑀢𑀁 𑀯𑀸, 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀺𑀦𑀲𑁆𑀲𑀢𑀺.

𑀧𑀞𑀫𑁂𑀦 𑀲𑀫𑀸𑀦𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀧𑀘𑁆𑀘𑀼𑀤𑁆𑀥𑀭𑀡𑀁 𑀏𑀢𑁆𑀣, 𑀅𑀓𑁆𑀭𑀺𑀬𑀸𑀢𑀺 𑀯𑀺𑀲𑁂𑀲𑀺𑀢𑀁.

𑀅𑀓𑀸𑀮𑀘𑀻𑀯𑀭𑀁 𑀫𑀸𑀲-𑀧𑀭𑀫𑀁 𑀦𑀺𑀓𑁆𑀔𑀺𑀧𑁂 𑀲𑀢𑀺;

𑀧𑀘𑁆𑀘𑀸𑀲𑀸𑀬 𑀢𑀢𑁄 𑀉𑀤𑁆𑀥𑀁, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀫𑀸𑀲𑀲𑁆𑀲𑀸𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄;

𑀪𑀺𑀓𑁆𑀔𑀼 ¶ 𑀪𑀺𑀓𑁆𑀔𑀼𑀦𑀺𑀬𑀸 𑀪𑀼𑀢𑁆𑀢𑀁, 𑀯𑀢𑁆𑀣𑀁 𑀅𑀜𑁆𑀜𑀸𑀢𑀺𑀓𑀸𑀬 𑀬𑁄;

𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀺, 𑀆𑀓𑁄𑀝𑀸𑀧𑁂𑀢𑀺 𑀘𑁂 𑀢𑀢𑁄.

𑀢𑀲𑁆𑀲 ¶ 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀧𑀞𑀫𑁂𑀦 𑀧𑀓𑀸𑀲𑀺𑀢𑀸;

𑀢𑀣𑀸 𑀲𑁂𑀲𑁂𑀳𑀺 𑀘 𑀤𑁆𑀯𑀻𑀳𑀺, 𑀤𑀻𑀧𑀺𑀢𑀁 𑀤𑀼𑀓𑁆𑀓𑀝𑀤𑁆𑀯𑀬𑀁.

𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀳𑀢𑁆𑀣𑁂, 𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀺 𑀘𑁂;

𑀲𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀘𑁆𑀙𑀸 𑀥𑁄𑀯𑀢𑀺 𑀲𑁄 𑀦𑀬𑁄.

𑀲𑀸𑀫𑀡𑁂𑀭𑀦𑀺𑀤𑁆𑀤𑁂𑀲𑁂𑀧𑀺, 𑀮𑀺𑀗𑁆𑀕𑀁 𑀘𑁂 𑀧𑀭𑀺𑀯𑀢𑁆𑀢𑀢𑀺;

𑀪𑀺𑀓𑁆𑀔𑀼𑀦𑀻𑀲𑀼𑀧𑀲𑀫𑁆𑀧𑀚𑁆𑀚, 𑀥𑁄𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀤𑀳𑀭𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁, 𑀳𑀢𑁆𑀣𑁂 𑀯𑀢𑁆𑀣𑁂 𑀦𑀺𑀬𑁆𑀬𑀸𑀤𑀺𑀢𑁂;

𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑁂𑀲𑀼, 𑀢𑁂𑀲𑀼𑀧𑁂𑀲 𑀦𑀬𑁄 𑀫𑀢𑁄.

𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑁂, 𑀤𑀺𑀦𑁆𑀦𑁂 ‘‘𑀥𑁄𑀯𑀸’’𑀢𑀺 𑀘𑀻𑀯𑀭𑁂;

𑀧𑀭𑀺𑀯𑀢𑁆𑀢𑁂 𑀢𑀼 𑀮𑀺𑀗𑁆𑀕𑀲𑁆𑀫𑀺𑀁, 𑀲𑀘𑁂 𑀥𑁄𑀯𑀢𑀺 𑀯𑀝𑁆𑀝𑀢𑀺.

‘‘𑀥𑁄𑀯𑀸’’𑀢𑀺 𑀪𑀺𑀓𑁆𑀔𑀼𑀦𑀻 𑀯𑀼𑀢𑁆𑀢𑀸, 𑀲𑀘𑁂 𑀲𑀩𑁆𑀩𑀁 𑀓𑀭𑁄𑀢𑀺 𑀲𑀸;

𑀥𑁄𑀯𑀦𑀧𑁆𑀧𑀘𑁆𑀘𑀬𑀸𑀬𑁂𑀯, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

‘‘𑀇𑀫𑀲𑁆𑀫𑀺𑀁 𑀘𑀻𑀯𑀭𑁂 𑀲𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀢𑁆𑀯𑀁 𑀓𑀭𑁄𑀳𑀺’’𑀢𑀺;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀜𑁆𑀘𑁂𑀯, 𑀯𑀤𑀢𑁄 𑀤𑀼𑀓𑁆𑀓𑀝𑀤𑁆𑀯𑀬𑀁.

𑀜𑀸𑀢𑀺𑀓𑀸𑀜𑀸𑀢𑀺𑀲𑀜𑁆𑀜𑀺𑀲𑁆𑀲, 𑀧𑀘𑁆𑀘𑀢𑁆𑀣𑀭𑀦𑀺𑀲𑀻𑀤𑀦𑀁;

𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀯𑀸𑀧𑀺, 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀬𑀸;

𑀢𑀸𑀬 𑀥𑁄𑀯𑀸𑀧𑀦𑁂 𑀯𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀯𑀼𑀢𑁆𑀢𑀸 𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀅𑀜𑁆𑀜𑀁 𑀯𑀸 𑀬𑀤𑀺 𑀥𑁄𑀯𑀢𑀺;

𑀦 𑀤𑁄𑀲𑁄, 𑀲𑀜𑁆𑀘𑀭𑀺𑀢𑁆𑀢𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀯𑀺𑀓𑀧𑁆𑀧𑀦𑀼𑀧𑀕𑀁 ¶ 𑀓𑀺𑀜𑁆𑀘𑀺, 𑀧𑀘𑁆𑀙𑀺𑀫𑀁 𑀧𑀦 𑀘𑀻𑀯𑀭𑀁;

𑀕𑀡𑁆𑀳𑀢𑁄 𑀳𑁄𑀢𑀺 𑀆𑀧𑀢𑁆𑀢𑀺, 𑀞𑀧𑁂𑀢𑁆𑀯𑀸 𑀧𑀸𑀭𑀺𑀯𑀢𑁆𑀢𑀓𑀁.

𑀧𑀬𑁄𑀕𑁂 𑀕𑀳𑀡𑀢𑁆𑀣𑀸𑀬, 𑀤𑀼𑀓𑁆𑀓𑀝𑀁 𑀧𑀭𑀺𑀬𑀸𑀧𑀼𑀢𑀁;

𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀕𑀳𑀡𑁂𑀦 𑀧𑀓𑀸𑀲𑀺𑀢𑀸.

𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦-𑀳𑀢𑁆𑀣𑁂 𑀧𑁂𑀲𑁂𑀢𑀺 𑀘𑀻𑀯𑀭𑀁;

𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀸𑀧𑀺, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀜𑀸𑀢𑀺𑀓𑀸𑀬𑀧𑀺 ¶ 𑀅𑀜𑁆𑀜𑀸𑀢𑀺-𑀲𑀜𑁆𑀜𑀺𑀲𑁆𑀲 𑀯𑀺𑀫𑀢𑀺𑀲𑁆𑀲 𑀯𑀸;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦-𑀳𑀢𑁆𑀣𑀸 𑀕𑀡𑁆𑀳𑀸𑀢𑀺 𑀤𑀼𑀓𑁆𑀓𑀝𑀁.

‘‘𑀤𑀲𑁆𑀲𑀸𑀫𑀻’’𑀢𑀺 𑀘 𑀆𑀪𑁄𑀕𑀁, 𑀓𑀢𑁆𑀯𑀸 𑀯𑀸 𑀧𑀸𑀭𑀺𑀯𑀢𑁆𑀢𑀓𑀁;

𑀢𑀸𑀯𑀓𑀸𑀮𑀺𑀓𑀯𑀺𑀲𑁆𑀲𑀸𑀲-𑀕𑁆𑀕𑀸𑀳𑁂 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺.

𑀅𑀜𑁆𑀜𑀁 𑀧𑀦 𑀧𑀭𑀺𑀓𑁆𑀔𑀸𑀭𑀁, 𑀦 𑀤𑁄𑀲𑁄 𑀳𑁄𑀢𑀺 𑀕𑀡𑁆𑀳𑀢𑁄;

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀯𑀼𑀢𑁆𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀜𑁆𑀜𑀸𑀢𑀓𑀸𑀧𑁆𑀧𑀯𑀸𑀭𑀺𑀢𑀁;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀦.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀣𑁂𑀯 𑀤𑁆𑀯𑀺𑀓𑀤𑀼𑀓𑁆𑀓𑀝𑀁;

𑀜𑀸𑀢𑀓𑁂𑀜𑀸𑀢𑀺𑀲𑀜𑁆𑀜𑀺𑀲𑁆𑀲, 𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲 𑀘.

𑀲𑀫𑀬𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂;

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸 𑀢𑀲𑁆𑀲, 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂.

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀅𑀧𑁆𑀧𑀯𑀸𑀭𑀺𑀢𑀫𑀜𑁆𑀜𑀸𑀢𑀺𑀁 ¶ , 𑀘𑀻𑀯𑀭𑀁 𑀢𑀼 𑀢𑀤𑀼𑀢𑁆𑀢𑀭𑀺𑀁;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀬𑀲𑁆𑀲 𑀢𑀻𑀡𑀺𑀧𑀺 𑀦𑀝𑁆𑀞𑀸𑀦𑀺, 𑀤𑁆𑀯𑁂 𑀯𑀸 𑀏𑀓𑀫𑁆𑀧𑀺 𑀯𑀸 𑀧𑀦;

𑀤𑁆𑀯𑁂 𑀯𑀸 𑀏𑀓𑀫𑁆𑀧𑀺 𑀯𑀸 𑀢𑁂𑀦, 𑀲𑀸𑀤𑀺𑀢𑀩𑁆𑀩𑀁 𑀦 𑀓𑀺𑀜𑁆𑀘𑀺𑀧𑀺.

𑀲𑁂𑀲𑀓𑀁 𑀆𑀳𑀭𑀦𑁆𑀢𑀲𑁆𑀲, 𑀤𑀺𑀦𑁆𑀦𑁂 𑀦𑀘𑁆𑀙𑀺𑀦𑁆𑀦𑀓𑀸𑀭𑀡𑀸;

𑀲𑀦𑁆𑀢𑀓𑁂 𑀜𑀸𑀢𑀓𑀸𑀤𑀻𑀦𑀁, 𑀅𑀢𑁆𑀢𑀦𑁄𑀧𑀺 𑀥𑀦𑁂𑀦 𑀯𑀸.

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀓𑀮𑁆𑀬𑀸𑀡𑀓𑀫𑁆𑀬𑀢𑀸𑀳𑁂𑀢𑀼 ¶ , 𑀆𑀧𑀚𑁆𑀚𑀢𑀺 𑀯𑀺𑀓𑀧𑁆𑀧𑀦𑀁;

𑀘𑀻𑀯𑀭𑁂 𑀧𑀦 𑀬𑁄 𑀢𑀲𑁆𑀲, 𑀮𑀸𑀪𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂.

𑀫𑀳𑀕𑁆𑀖𑀁 𑀤𑀸𑀢𑀼𑀓𑀸𑀫𑀫𑁆𑀳𑀺, 𑀅𑀧𑁆𑀧𑀕𑁆𑀖𑀁 𑀯𑀺𑀜𑁆𑀜𑀸𑀧𑁂𑀢𑀺 𑀬𑁄;

𑀲𑀦𑁆𑀢𑀓𑁂 𑀜𑀸𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀜𑀸𑀢𑀓𑁂𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲, 𑀤𑀼𑀓𑁆𑀓𑀝𑀁 𑀯𑀺𑀫𑀢𑀺𑀲𑁆𑀲 𑀘;

𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀯𑀼𑀢𑁆𑀢𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀤𑀼𑀢𑀺𑀬𑁄𑀧𑀓𑁆𑀔𑀝𑁂 𑀬𑀲𑁆𑀫𑀸, 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀢𑀲𑁆𑀫𑀸 𑀅𑀦𑀦𑁆𑀢𑀭𑁂𑀦𑀲𑁆𑀲, 𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀭𑀜𑁆𑀜𑀸 𑀯𑀸 𑀭𑀸𑀚𑀪𑁄𑀕𑁆𑀕𑁂𑀦, 𑀪𑀺𑀓𑁆𑀔𑀼𑀫𑀼𑀤𑁆𑀤𑀺𑀲𑁆𑀲𑀫𑀸𑀪𑀢𑀁;

𑀅𑀓𑀧𑁆𑀧𑀺𑀬𑀁 𑀲𑀼𑀯𑀡𑁆𑀡𑀸𑀤𑀺𑀁, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀭𑀚𑀢𑀁 ¶ 𑀚𑀸𑀢𑀭𑀽𑀧𑀁 𑀯𑀸, 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸;

𑀅𑀢𑁆𑀣𑀸𑀬 𑀕𑀡𑁆𑀳𑀺𑀢𑀼𑀁 𑀓𑀺𑀜𑁆𑀘𑀺, 𑀤𑀻𑀬𑀫𑀸𑀦𑀁 𑀦 𑀯𑀝𑁆𑀝𑀢𑀺.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀦𑀺𑀤𑁆𑀤𑀺𑀝𑁆𑀞𑀁, 𑀪𑀺𑀓𑁆𑀔𑀼𑀦𑁄 𑀧𑀝𑀺𑀕𑁆𑀕𑀡𑁆𑀳𑀢𑁄;

𑀤𑀼𑀓𑁆𑀓𑀝𑀁 𑀢𑀲𑁆𑀲 𑀳𑁄𑀢𑀻𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑀦𑁂𑀢𑁆𑀯𑀸 𑀅𑀓𑀧𑁆𑀧𑀺𑀬𑀁 𑀪𑀡𑁆𑀟𑀁, 𑀇𑀢𑁆𑀣𑀁 𑀓𑁄𑀘𑀺 𑀲𑀘𑁂 𑀯𑀤𑁂;

‘‘𑀇𑀤𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀕𑀡𑀲𑁆𑀲 𑀯𑀸.

𑀆𑀭𑀸𑀫𑀁 𑀯𑀸 𑀯𑀺𑀳𑀸𑀭𑀁 𑀯𑀸, 𑀘𑁂𑀢𑀺𑀬𑀁 𑀯𑀸 𑀓𑀭𑁄𑀳𑀺’’𑀢𑀺;

𑀦 𑀘 𑀯𑀝𑁆𑀝𑀢𑀺 𑀢𑀁 𑀯𑀢𑁆𑀣𑀼𑀁, 𑀲𑀩𑁆𑀩𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁.

𑀅𑀦𑀸𑀫𑀲𑀺𑀢𑁆𑀯𑀸 𑀲𑀗𑁆𑀖𑀁 𑀯𑀸, 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀫𑁆𑀧𑀺 𑀯𑀸;

‘‘𑀘𑁂𑀢𑀺𑀬𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀤𑁂𑀫𑀸’’𑀢𑀺𑀧𑀺 𑀯𑀤𑀦𑁆𑀢𑀺 𑀘𑁂.

𑀢𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀯𑀸, 𑀦𑀺𑀲𑁂𑀥𑁂𑀢𑀼𑀁 𑀦 𑀯𑀝𑁆𑀝𑀢𑀺;

𑀆𑀭𑀸𑀫𑀺𑀓𑀸𑀦𑀁 𑀯𑀢𑁆𑀢𑀩𑁆𑀩𑀁, ‘‘𑀯𑀤𑀦𑁆𑀢𑁂𑀯𑀫𑀺𑀫𑁂’’𑀢𑀺 𑀘.

𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸, 𑀲𑀗𑁆𑀖𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀢𑁄;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀧𑀭𑀺𑀪𑁄𑀕𑁂 𑀘 𑀤𑀼𑀓𑁆𑀓𑀝𑀁.

𑀢𑀴𑀸𑀓𑀲𑁆𑀲 ¶ 𑀘 𑀔𑁂𑀢𑁆𑀢𑀢𑁆𑀢𑀸, 𑀲𑀲𑁆𑀲𑀼𑀧𑁆𑀧𑀢𑁆𑀢𑀺𑀦𑀺𑀤𑀸𑀦𑀢𑁄;

𑀕𑀳𑀡𑀁 𑀧𑀭𑀺𑀪𑁄𑀕𑁄 𑀯𑀸, 𑀦 𑀘 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄.

‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀗𑁆𑀖𑁄, 𑀕𑀡𑁄 𑀯𑀸 𑀧𑀭𑀺𑀪𑀼𑀜𑁆𑀚𑀢𑀼’’;

𑀇𑀘𑁆𑀘𑁂𑀯𑀁 𑀧𑀦 𑀯𑀢𑁆𑀯𑀸 𑀘𑁂, 𑀤𑁂𑀢𑀺 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺.

𑀓𑀸𑀭𑀸𑀧𑁂𑀢𑀺 𑀘 𑀓𑁂𑀤𑀸𑀭𑁂, 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀯𑀦𑀁 𑀧𑀦;

𑀓𑁂𑀤𑀸𑀭𑁂𑀲𑀼 𑀧𑀼𑀭𑀸𑀡𑁂𑀲𑀼, 𑀅𑀢𑀺𑀭𑁂𑀓𑀫𑁆𑀧𑀺 𑀕𑀡𑁆𑀳𑀢𑀺.

𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑀲𑁆𑀫𑀺𑀁, 𑀦𑀯𑀲𑀲𑁆𑀲𑁂𑀧𑀺 ‘‘𑀏𑀢𑁆𑀢𑀓𑀁;

𑀪𑀸𑀕𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀘𑁂, 𑀉𑀝𑁆𑀞𑀸𑀧𑁂𑀢𑀺 𑀓𑀳𑀸𑀧𑀡𑁂.

𑀯𑀢𑁆𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸𑀘𑀁, ‘‘𑀓𑀲𑀣 𑀯𑀧𑀣𑀸’’𑀢𑀺 𑀘;

𑀉𑀧𑁆𑀧𑀸𑀤𑀺𑀢𑀜𑁆𑀘 𑀲𑀩𑁆𑀩𑁂𑀲𑀁, 𑀳𑁄𑀢𑀺 𑀲𑀩𑁆𑀩𑀫𑀓𑀧𑁆𑀧𑀺𑀬𑀁.

‘‘𑀏𑀢𑁆𑀢𑀓𑁄 ¶ 𑀦𑀸𑀫 𑀪𑀸𑀕𑁄𑀢𑀺, 𑀏𑀢𑁆𑀢𑀺𑀓𑀸𑀬 𑀘 𑀪𑀽𑀫𑀺𑀬𑀸’’;

𑀧𑀢𑀺𑀝𑁆𑀞𑀸𑀧𑁂𑀢𑀺 𑀬𑁄 𑀪𑀽𑀫𑀺𑀁, 𑀅𑀯𑀢𑁆𑀯𑀸 𑀓𑀲𑀣𑀸𑀤𑀺𑀓𑀁.

𑀲𑀬𑀫𑁂𑀯 𑀧𑀫𑀸𑀡𑀲𑁆𑀲, 𑀚𑀸𑀦𑀦𑀢𑁆𑀣𑀁 𑀢𑀼 𑀪𑀽𑀫𑀺𑀬𑀸;

𑀭𑀚𑁆𑀚𑀼𑀬𑀸 𑀯𑀸𑀧𑀺 𑀤𑀡𑁆𑀟𑁂𑀦, 𑀔𑁂𑀢𑁆𑀢𑀁 𑀫𑀺𑀦𑀸𑀢𑀺 𑀬𑁄 𑀧𑀦.

𑀔𑀮𑁂 𑀯𑀸 𑀭𑀓𑁆𑀔𑀢𑀺 𑀞𑀢𑁆𑀯𑀸, 𑀔𑀮𑀢𑁄𑀧𑀺 𑀢𑀢𑁄 𑀧𑀼𑀦;

𑀦𑀻𑀳𑀭𑀸𑀧𑁂𑀢𑀺 𑀯𑀸 𑀯𑀻𑀳𑀻, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀁.

‘‘𑀏𑀢𑁆𑀢𑀓𑁂𑀳𑀺 𑀘 𑀯𑀻𑀳𑀻𑀳𑀺, 𑀇𑀤𑀁 𑀆𑀳𑀭𑀣𑀸’’𑀢𑀺 𑀘;

𑀆𑀳𑀭𑀦𑁆𑀢𑀺 𑀲𑀘𑁂 𑀯𑀼𑀢𑁆𑀢𑀸, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀁.

‘‘𑀏𑀢𑁆𑀢𑀓𑁂𑀦 𑀳𑀺𑀭𑀜𑁆𑀜𑁂𑀦, 𑀇𑀤𑀫𑀸𑀳𑀭𑀣𑀸’’𑀢𑀺 𑀘;

𑀆𑀳𑀭𑀦𑁆𑀢𑀺 𑀘 𑀬𑀁 𑀯𑀼𑀢𑁆𑀢𑀸, 𑀲𑀩𑁆𑀩𑁂𑀲𑀁 𑀢𑀫𑀓𑀧𑁆𑀧𑀺𑀬𑀁.

𑀧𑁂𑀲𑀓𑀸𑀭𑀓𑀤𑀸𑀲𑀁 𑀯𑀸, 𑀅𑀜𑁆𑀜𑀁 𑀯𑀸 𑀭𑀚𑀓𑀸𑀤𑀺𑀲𑀼;

𑀆𑀭𑀸𑀫𑀺𑀓𑀸𑀦𑀁 𑀦𑀸𑀫𑁂𑀦, 𑀤𑁂𑀦𑁆𑀢𑁂 𑀯𑀝𑁆𑀝𑀢𑀺 𑀕𑀡𑁆𑀳𑀺𑀢𑀼𑀁.

‘‘𑀕𑀸𑀯𑁄 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀧𑀜𑁆𑀘𑀕𑁄𑀭𑀲𑀪𑁄𑀕𑀢𑁆𑀣𑀁, 𑀯𑀼𑀢𑁆𑀢𑁂 𑀤𑁂𑀫𑀸𑀢𑀺 𑀯𑀝𑁆𑀝𑀢𑀺.

𑀅𑀚𑀺𑀓𑀸𑀤𑀻𑀲𑀼 𑀏𑀲𑁂𑀯, 𑀦𑀬𑁄 𑀜𑁂𑀬𑁆𑀬𑁄 𑀯𑀺𑀪𑀸𑀯𑀺𑀦𑀸;

𑀓𑀧𑁆𑀧𑀺𑀬𑁂𑀦 𑀘 𑀯𑀸𑀓𑁆𑀬𑁂𑀦, 𑀲𑀩𑁆𑀩𑀁 𑀯𑀝𑁆𑀝𑀢𑀺 𑀕𑀡𑁆𑀳𑀺𑀢𑀼𑀁.

𑀳𑀢𑁆𑀣𑀺𑀁 𑀯𑀸 𑀫𑀳𑀺𑀲𑀁 𑀅𑀲𑁆𑀲𑀁, 𑀕𑁄𑀡𑀁 𑀓𑀼𑀓𑁆𑀓𑀼𑀝𑀲𑀽𑀓𑀭𑀁;

𑀤𑁂𑀦𑁆𑀢𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼, 𑀦 𑀘 𑀯𑀝𑁆𑀝𑀢𑀺 𑀕𑀡𑁆𑀳𑀺𑀢𑀼𑀁.

𑀧𑀝𑀺𑀲𑀺𑀤𑁆𑀥𑁂𑀧𑀺 ¶ 𑀲𑀗𑁆𑀖𑀲𑁆𑀲, 𑀤𑀢𑁆𑀯𑀸 𑀕𑀘𑁆𑀙𑀢𑀺 𑀘𑁂 𑀧𑀦;

𑀫𑀽𑀮𑀁 𑀤𑀢𑁆𑀯𑀸 𑀘 𑀲𑀗𑁆𑀖𑀲𑁆𑀲, 𑀓𑁂𑀘𑀺 𑀕𑀡𑁆𑀳𑀦𑁆𑀢𑀺 𑀯𑀝𑁆𑀝𑀢𑀺.

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀢𑀴𑀸𑀓𑀁 𑀯𑀸, 𑀤𑁂𑀫 𑀕𑁄𑀅𑀚𑀺𑀓𑀸𑀤𑀺𑀓𑀁;

𑀯𑀺𑀳𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂𑀧𑀺, 𑀦𑀺𑀲𑁂𑀥𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸 𑀯𑀼𑀢𑁆𑀢𑀸, 𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑀫𑀩𑁆𑀭𑀯𑀺;

𑀬𑀤𑀺 𑀘𑁄𑀤𑁂𑀢𑀺𑀬𑁂𑀯 𑀙, 𑀘𑁄𑀤𑀦𑀸 𑀤𑀺𑀕𑀼𑀡𑀸 𑀞𑀺𑀢𑀺.

𑀅𑀦𑀸𑀧𑀢𑁆𑀢𑀺 ¶ 𑀅𑀘𑁄𑀤𑁂𑀢𑁆𑀯𑀸, 𑀮𑀤𑁆𑀥𑁂 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀏𑀓𑁂𑀦𑀸𑀧𑀺 𑀘 𑀫𑀺𑀲𑁆𑀲𑁂𑀢𑁆𑀯𑀸, 𑀲𑀦𑁆𑀣𑀢𑀁 𑀓𑁄𑀲𑀺𑀬𑀁𑀲𑀼𑀦𑀸;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀧𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀲𑀦𑁆𑀣𑀢𑀁;

𑀅𑀜𑁆𑀜𑁂𑀦 𑀘 𑀓𑀢𑀁 𑀮𑀤𑁆𑀥𑀸, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀺 𑀯𑀺𑀢𑀸𑀦𑀁 𑀯𑀸, 𑀪𑀽𑀫𑀢𑁆𑀣𑀭𑀡𑀫𑁂𑀯 𑀯𑀸;

𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀁 𑀯𑀸𑀧𑀺, 𑀓𑀭𑁄𑀦𑁆𑀢𑀲𑁆𑀲𑀸𑀤𑀺𑀓𑀫𑁆𑀫𑀺𑀦𑁄.

𑀓𑀸𑀴𑀓𑁂𑀴𑀓𑀮𑁄𑀫𑀸𑀦𑀁, 𑀲𑀼𑀤𑁆𑀥𑀸𑀦𑀁 𑀲𑀦𑁆𑀣𑀢𑀁 𑀲𑀘𑁂;

𑀓𑀭𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀺𑀲𑁆𑀲, 𑀲𑁂𑀲𑀁 𑀢𑀼 𑀧𑀞𑀫𑀽𑀧𑀫𑀁.

𑀅𑀦𑀸𑀧𑀢𑁆𑀢𑀺 𑀢𑀼𑀮𑀁 𑀯𑀸𑀧𑀺, 𑀩𑀳𑀼𑀁 𑀯𑀸 𑀲𑀩𑁆𑀩𑀫𑁂𑀯 𑀯𑀸;

𑀓𑀭𑁄𑀦𑁆𑀢𑀲𑁆𑀲 𑀕𑀳𑁂𑀢𑁆𑀯𑀸𑀦, 𑀑𑀤𑀸𑀢𑀁 𑀓𑀧𑀺𑀮𑀫𑁆𑀧𑀺 𑀯𑀸.

𑀅𑀦𑀼𑀓𑁆𑀓𑀫𑁂𑀦 𑀏𑀢𑀸𑀦𑀺, 𑀲𑀦𑁆𑀣𑀢𑀸𑀦𑀺 𑀘 𑀢𑀻𑀡𑀺𑀧𑀺;

𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀧𑀺 𑀮𑀤𑁆𑀥𑀸𑀦𑀺, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸;

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀢𑀢𑀺𑀬𑀁 𑀢𑀼 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀙𑀦𑁆𑀦𑀁 ¶ 𑀑𑀭𑁂𑀦 𑀯𑀲𑁆𑀲𑀸𑀦𑀁, 𑀓𑀭𑁄𑀦𑁆𑀢𑀲𑁆𑀲 𑀘 𑀲𑀦𑁆𑀣𑀢𑀁;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁.

𑀅𑀦𑀸𑀧𑀢𑁆𑀢𑀺 𑀧𑀭𑀢𑁆𑀣𑀸𑀬, 𑀓𑀸𑀭𑀸𑀧𑁂𑀢𑀺 𑀓𑀭𑁄𑀢𑀺 𑀯𑀸;

𑀓𑀢𑀁 𑀯𑀸 𑀧𑀦 𑀅𑀜𑁆𑀜𑁂𑀦, 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄.

𑀙𑀩𑁆𑀩𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀲𑁆𑀲, 𑀢𑀤𑀼𑀤𑁆𑀥𑀫𑁆𑀧𑀺 𑀘 𑀲𑀦𑁆𑀣𑀢𑀁;

𑀯𑀺𑀢𑀸𑀦𑁂 𑀲𑀸𑀡𑀺𑀧𑀸𑀓𑀸𑀭𑁂, 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀢𑁂𑀧𑀺 𑀘.

𑀅𑀦𑀸𑀧𑀢𑁆𑀢𑀺 𑀅𑀦𑀸𑀤𑀸𑀬, 𑀅𑀲𑀦𑁆𑀢𑁂 𑀲𑀦𑁆𑀣𑀢𑁂 𑀧𑀦;

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀸𑀭𑁂𑀢𑀼𑀁, 𑀓𑀢𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀁.

𑀅𑀦𑀸𑀤𑀸𑀦𑀯𑀲𑁂𑀦𑀲𑁆𑀲, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸;

𑀓𑀭𑀡𑁂𑀦 𑀘 𑀲𑀢𑁆𑀣𑀸𑀭𑀸, 𑀯𑀼𑀢𑁆𑀢𑀫𑁂𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸;

𑀅𑀦𑀦𑁆𑀢𑀭𑀲𑁆𑀲𑀺𑀫𑀲𑁆𑀲𑀸𑀧𑀺, 𑀯𑀺𑀲𑁂𑀲𑁄 𑀦𑀼𑀧𑀮𑀩𑁆𑀪𑀢𑀺.

𑀕𑀘𑁆𑀙𑀦𑁆𑀢𑁂 𑀧𑀦 𑀬𑀸𑀦𑁂 𑀯𑀸, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑁂𑀲𑀼 𑀯𑀸;

𑀞𑀧𑁂𑀢𑀺 𑀬𑀤𑀺 𑀮𑁄𑀫𑀸𑀦𑀺, 𑀲𑀸𑀫𑀺𑀓𑀲𑁆𑀲 𑀅𑀚𑀸𑀦𑀢𑁄.

𑀢𑀺𑀬𑁄𑀚𑀦𑀫𑀢𑀻𑀢𑁂𑀲𑀼, 𑀢𑁂𑀲𑀼 𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄;

𑀅𑀕𑀘𑁆𑀙𑀦𑁆𑀢𑁂𑀲𑀼 𑀢𑁂𑀲𑁆𑀯𑁂𑀯, 𑀞𑀧𑀺𑀢𑁂𑀲𑀼𑀧𑁆𑀬𑀬𑀁 𑀦𑀬𑁄.

𑀬𑀸𑀦𑁂 𑀧𑀦 𑀅𑀕𑀘𑁆𑀙𑀦𑁆𑀢𑁂, 𑀅𑀲𑁆𑀲𑁂 𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀬𑀁;

𑀞𑀧𑁂𑀢𑁆𑀯𑀸 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀲𑀘𑁂 𑀲𑀸𑀭𑁂𑀢𑀺 𑀯𑀝𑁆𑀝𑀢𑀺.

𑀦 𑀯𑀝𑁆𑀝𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬 𑀳𑀺;

𑀢𑀁 𑀧𑀦𑀜𑁆𑀜𑀁 𑀳𑀭𑀸𑀧𑁂𑀢𑀺, 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺.

𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀲𑀼 ¶ ¶ 𑀮𑁄𑀫𑀸𑀦𑀺, 𑀧𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑁄;

𑀳𑁄𑀢𑀺𑀬𑁂𑀯 𑀓𑀺𑀭𑀸𑀧𑀢𑁆𑀢𑀺, 𑀮𑁄𑀫𑀸𑀦𑀁 𑀕𑀡𑀦𑀸𑀯𑀲𑀸.

𑀲𑀼𑀢𑁆𑀢𑀓𑁂𑀦 𑀘 𑀩𑀦𑁆𑀥𑀺𑀢𑁆𑀯𑀸, 𑀞𑀧𑀺𑀢𑀁 𑀧𑀦 𑀯𑀝𑁆𑀝𑀢𑀺;

𑀯𑁂𑀡𑀺𑀁 𑀓𑀢𑁆𑀯𑀸 𑀳𑀭𑀦𑁆𑀢𑀲𑁆𑀲, 𑀆𑀧𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀲𑀼𑀗𑁆𑀓𑀖𑀸𑀢𑀁 𑀅𑀦𑀼𑀧𑁆𑀧𑀢𑁆𑀯𑀸, 𑀘𑁄𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄;

𑀬𑁄 𑀘𑀜𑁆𑀜𑀯𑀺𑀳𑀺𑀢𑁄 𑀯𑀸𑀧𑀺, 𑀆𑀧𑀢𑁆𑀢𑀺 𑀬𑀤𑀺 𑀕𑀘𑁆𑀙𑀢𑀺.

𑀢𑀺𑀬𑁄𑀚𑀦𑀁 𑀳𑀭𑀦𑁆𑀢𑀲𑁆𑀲, 𑀊𑀦𑀓𑀁 𑀯𑀸 𑀢𑀺𑀬𑁄𑀚𑀦𑀁;

𑀢𑀣𑀸 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲, 𑀢𑀸𑀦𑀺𑀬𑁂𑀯 𑀢𑀺𑀬𑁄𑀚𑀦𑀁.

𑀦𑀺𑀯𑀸𑀲𑀢𑁆𑀣𑀸𑀬 𑀯𑀸 𑀕𑀦𑁆𑀢𑁆𑀯𑀸, 𑀳𑀭𑀦𑁆𑀢𑀲𑁆𑀲 𑀢𑀢𑁄 𑀧𑀭𑀁;

𑀅𑀘𑁆𑀙𑀺𑀦𑁆𑀦𑀁 𑀯𑀸𑀧𑀺 𑀦𑀺𑀲𑁆𑀲𑀝𑁆𑀞𑀁, 𑀮𑀪𑀺𑀢𑁆𑀯𑀸 𑀳𑀭𑀢𑁄𑀧𑀺 𑀘.

𑀳𑀭𑀸𑀧𑁂𑀦𑁆𑀢𑀲𑁆𑀲 𑀅𑀜𑁆𑀜𑁂𑀦, 𑀳𑀭𑀢𑁄 𑀓𑀢𑀪𑀡𑁆𑀟𑀓𑀁;

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀇𑀤𑀁 𑀧𑀦 𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀢𑁄 𑀓𑀸𑀬𑀘𑀺𑀢𑁆𑀢𑀢𑁄;

𑀅𑀘𑀺𑀢𑁆𑀢𑀁 𑀓𑀸𑀬𑀓𑀫𑁆𑀫𑀜𑁆𑀘, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀮𑁄𑀫𑀥𑁄𑀯𑀸𑀧𑀦𑀫𑁆𑀧𑀺 𑀘;

𑀘𑀻𑀯𑀭𑀲𑁆𑀲 𑀧𑀼𑀭𑀸𑀡𑀲𑁆𑀲, 𑀥𑁄𑀯𑀸𑀧𑀦𑀲𑀫𑀁 𑀫𑀢𑀁.

𑀕𑀡𑁆𑀳𑁂𑀬𑁆𑀬 𑀯𑀸 𑀕𑀡𑁆𑀳𑀸𑀧𑁂𑀬𑁆𑀬, 𑀭𑀚𑀢𑀁 𑀚𑀸𑀢𑀭𑀽𑀧𑀓𑀁;

𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀦𑀸𑀧𑀢𑁆𑀢𑀺, 𑀤𑁂𑀲𑁂𑀢𑀩𑁆𑀩𑀸𑀯 𑀪𑀺𑀓𑁆𑀔𑀼𑀦𑀸.

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀉𑀪𑀺𑀦𑁆𑀦𑀁 𑀫𑀸𑀲𑀓𑁄𑀧𑀺 𑀘;

𑀏𑀢𑀁 𑀘𑀢𑀼𑀩𑁆𑀩𑀺𑀥𑀁 𑀯𑀢𑁆𑀣𑀼, 𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀁.

𑀫𑀼𑀢𑁆𑀢𑀸 ¶ 𑀫𑀡𑀺 𑀲𑀺𑀮𑀸 𑀲𑀗𑁆𑀔𑁄, 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑀓𑁄;

𑀫𑀲𑀸𑀭𑀕𑀮𑁆𑀮𑀁 𑀥𑀜𑁆𑀜𑀸𑀦𑀺, 𑀲𑀢𑁆𑀢 𑀕𑁄𑀫𑀳𑀺𑀲𑀸𑀤𑀺𑀓𑀁.

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀢𑀴𑀸𑀓𑀜𑁆𑀘, 𑀤𑀸𑀲𑀺𑀤𑀸𑀲𑀸𑀤𑀺𑀓𑀁 𑀧𑀦;

𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀢𑁆𑀣𑀽𑀦𑀺, 𑀤𑀻𑀧𑀺𑀢𑀸𑀦𑀺 𑀫𑀳𑁂𑀲𑀺𑀦𑀸.

𑀫𑀼𑀕𑁆𑀕𑀫𑀸𑀲𑀸𑀤𑀺𑀓𑀁 ¶ 𑀲𑀩𑁆𑀩𑀁, 𑀲𑀧𑁆𑀧𑀺𑀆𑀤𑀻𑀦𑀺 𑀢𑀡𑁆𑀟𑀼𑀮𑀸;

𑀲𑀼𑀢𑁆𑀢𑀁 𑀯𑀢𑁆𑀣𑀁 𑀳𑀮𑀁 𑀨𑀸𑀮𑀁, 𑀓𑀧𑁆𑀧𑀺𑀬𑀁 𑀏𑀯𑀫𑀸𑀤𑀺𑀓𑀁.

𑀢𑀢𑁆𑀣𑀢𑁆𑀢𑀦𑁄 𑀧𑀦𑀢𑁆𑀣𑀸𑀬, 𑀯𑀢𑁆𑀣𑀼𑀁 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀳𑀺;

𑀲𑀫𑁆𑀧𑀝𑀺𑀘𑁆𑀙𑀢𑀺 𑀬𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀲𑀗𑁆𑀖𑀸𑀤𑀻𑀦𑀁 𑀢𑀫𑀢𑁆𑀣𑀸𑀬, 𑀕𑀡𑁆𑀳𑀢𑁄 𑀤𑀼𑀓𑁆𑀓𑀝𑀁 𑀢𑀣𑀸;

𑀤𑀼𑀓𑁆𑀓𑀝𑀲𑁆𑀲 𑀘 𑀯𑀢𑁆𑀣𑀼𑀫𑁆𑀧𑀺, 𑀲𑀩𑁆𑀩𑀢𑁆𑀣𑀸𑀬 𑀘 𑀤𑀼𑀓𑁆𑀓𑀝𑀁.

𑀲𑀘𑁂 𑀓𑀳𑀸𑀧𑀡𑀸𑀤𑀻𑀦𑀁, 𑀲𑀳𑀲𑁆𑀲𑀁 𑀧𑀝𑀺𑀕𑀡𑁆𑀳𑀢𑀺;

𑀯𑀢𑁆𑀣𑀽𑀦𑀁 𑀕𑀡𑀦𑀸𑀬𑀲𑁆𑀲, 𑀆𑀧𑀢𑁆𑀢𑀺𑀕𑀡𑀦𑀸 𑀲𑀺𑀬𑀸.

𑀢𑀣𑀸 𑀲𑀺𑀣𑀺𑀮𑀩𑀤𑁆𑀥𑁂𑀲𑀼, 𑀣𑀯𑀺𑀓𑀸𑀤𑀻𑀲𑀼 𑀭𑀽𑀧𑀢𑁄;

𑀆𑀧𑀢𑁆𑀢𑀺𑀕𑀡𑀦𑀸 𑀯𑀼𑀢𑁆𑀢𑀸, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

‘‘𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽’’𑀢𑀺, 𑀯𑀼𑀢𑁆𑀢𑁂 𑀯𑀸 𑀧𑀦 𑀓𑁂𑀦𑀘𑀺;

𑀲𑀘𑁂 𑀕𑀡𑁆𑀳𑀺𑀢𑀼𑀓𑀸𑀫𑁄𑀧𑀺, 𑀦𑀺𑀲𑁂𑀥𑁂𑀢𑀩𑁆𑀩𑀫𑁂𑀯 𑀘.

𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺 𑀢𑀁 𑀯𑀢𑁆𑀣𑀼𑀁, 𑀞𑀧𑁂𑀢𑁆𑀯𑀸 𑀬𑀤𑀺 𑀕𑀘𑁆𑀙𑀢𑀺;

𑀢𑀣𑀸 𑀕𑁄𑀧𑀸𑀬𑀺𑀢𑀩𑁆𑀩𑀁 𑀢𑀁, 𑀬𑀣𑀸 𑀢𑀁 𑀦 𑀯𑀺𑀦𑀲𑁆𑀲𑀢𑀺.

‘‘𑀆𑀳𑀭𑁂𑀤𑀫𑀺𑀤𑀁 𑀕𑀡𑁆𑀳, 𑀇𑀤𑀁 𑀤𑁂𑀳𑀻𑀥 𑀦𑀺𑀓𑁆𑀔𑀺𑀧’’;

𑀇𑀘𑁆𑀘𑁂𑀯𑀁 𑀪𑀺𑀓𑁆𑀔𑀼𑀦𑁄 𑀯𑀢𑁆𑀢𑀼𑀁, 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀁.

𑀞𑀧𑁂𑀢𑁆𑀯𑀸 𑀭𑀽𑀧𑀺𑀬𑀕𑁆𑀕𑀸𑀳𑀁, 𑀦𑀺𑀲𑁆𑀲𑀝𑁆𑀞𑀧𑀭𑀺𑀯𑀢𑁆𑀢𑀺𑀢𑀁;

𑀲𑀩𑁆𑀩𑁂𑀳𑀺 𑀧𑀭𑀺𑀪𑁄𑀢𑁆𑀢𑀩𑁆𑀩𑀁, 𑀪𑀸𑀚𑁂𑀢𑁆𑀯𑀸 𑀲𑀧𑁆𑀧𑀺𑀆𑀤𑀺𑀓𑀁.

𑀅𑀢𑁆𑀢𑀦𑁄 𑀧𑀢𑁆𑀢𑀪𑀸𑀕𑀫𑁆𑀧𑀺, 𑀧𑀝𑀺𑀕𑁆𑀕𑀸𑀳𑀓𑀪𑀺𑀓𑁆𑀔𑀼𑀦𑁄;

𑀕𑀳𑁂𑀢𑀼𑀁 𑀅𑀜𑁆𑀜𑀢𑁄 𑀮𑀤𑁆𑀥𑀁, 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺.

𑀬𑀁 ¶ 𑀓𑀺𑀜𑁆𑀘𑀺 𑀧𑀦 𑀲𑀫𑁆𑀪𑀽𑀢𑀁, 𑀧𑀘𑁆𑀘𑀬𑀁 𑀯𑀢𑁆𑀣𑀼𑀢𑁄 𑀢𑀢𑁄;

𑀪𑀺𑀓𑁆𑀔𑀼𑀦𑁄 𑀲𑁂𑀯𑀫𑀸𑀦𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀚𑁆𑀛𑀸𑀭𑀸𑀫𑁂 𑀅𑀦𑀸𑀧𑀢𑁆𑀢𑀺, 𑀢𑀫𑀚𑁆𑀛𑀸𑀯𑀲𑀣𑁂𑀧𑀺 𑀯𑀸;

𑀕𑀳𑁂𑀢𑁆𑀯𑀸 𑀯𑀸 𑀕𑀳𑀸𑀧𑁂𑀢𑁆𑀯𑀸, 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀭𑀽𑀧𑀺𑀬𑀦𑁆𑀢𑀺 𑀅𑀭𑀽𑀧𑀺𑀬𑁂;

𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀯𑀢𑁆𑀣𑀼𑀁 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸𑀧𑀺, 𑀯𑀢𑁆𑀣𑀼𑀁 𑀯𑀸 𑀤𑀼𑀓𑁆𑀓𑀝𑀲𑁆𑀲 𑀘;

𑀓𑀧𑁆𑀧𑀺𑀬𑀲𑁆𑀲 𑀘 𑀯𑀢𑁆𑀣𑀼𑀁 𑀯𑀸, 𑀬𑁄 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸.

𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀲𑁆𑀲𑀸𑀧𑀺, 𑀯𑀢𑁆𑀣𑀼𑀁 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀯𑀸;

𑀧𑀭𑀺𑀯𑀢𑁆𑀢𑁂𑀢𑀺 𑀆𑀧𑀢𑁆𑀢𑀺, 𑀓𑀧𑁆𑀧𑀺𑀬𑁂𑀦 𑀘 𑀯𑀢𑁆𑀣𑀼𑀦𑀸.

𑀤𑀼𑀓𑁆𑀓𑀝𑀲𑁆𑀲 𑀘 𑀯𑀢𑁆𑀣𑀼𑀁 𑀯𑀸, 𑀯𑀢𑁆𑀣𑀼𑀁 𑀯𑀸 𑀓𑀧𑁆𑀧𑀺𑀬𑀲𑁆𑀲 𑀘;

𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀲𑁆𑀲𑁂𑀯, 𑀧𑀭𑀺𑀯𑀢𑁆𑀢𑁂𑀢𑀺 𑀤𑀼𑀓𑁆𑀓𑀝𑀁.

𑀯𑀢𑁆𑀣𑀼𑀦𑀸 𑀓𑀧𑁆𑀧𑀺𑀬𑀲𑁆𑀲𑀸𑀧𑀺, 𑀢𑀣𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀁;

𑀧𑀭𑀺𑀯𑀢𑁆𑀢𑁂𑀢𑀺 𑀬𑁄 𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀯𑀢𑁆𑀣𑀼𑀦𑁄 𑀤𑀼𑀓𑁆𑀓𑀝𑀲𑁆𑀲𑀸𑀧𑀺, 𑀢𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀘;

𑀕𑀳𑀡𑀁 𑀯𑀸𑀭𑀺𑀢𑀁 𑀧𑀼𑀩𑁆𑀩𑁂, 𑀇𑀫𑀺𑀦𑀸 𑀧𑀭𑀺𑀯𑀢𑁆𑀢𑀦𑀁.

𑀭𑀽𑀧𑀺𑀬𑀦𑁆𑀢𑀺 𑀘 𑀲𑀜𑁆𑀜𑀺𑀲𑁆𑀲, 𑀯𑀺𑀫𑀢𑀺𑀲𑁆𑀲 𑀅𑀭𑀽𑀧𑀺𑀬𑁂;

𑀢𑁂𑀦 𑀤𑁆𑀯𑁂 𑀤𑀼𑀓𑁆𑀓𑀝𑀸 𑀳𑁄𑀦𑁆𑀢𑀺, 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀭𑀽𑀧𑀺𑀬𑀁.

𑀅𑀭𑀽𑀧𑀺𑀬𑀦𑁆𑀢𑀺 𑀲𑀜𑁆𑀜𑀺𑀲𑁆𑀲, 𑀅𑀦𑀸𑀧𑀢𑁆𑀢𑀺 𑀅𑀭𑀽𑀧𑀺𑀬𑁂;

‘‘𑀇𑀤𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺, 𑀯𑀤𑀢𑁄𑀧𑀺 𑀘 𑀧𑀜𑁆𑀘𑀳𑀺.

𑀲𑁂𑀲𑀁 ¶ 𑀅𑀦𑀦𑁆𑀢𑀭𑁂𑀦𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀲𑀫𑀁;

𑀇𑀤𑀁 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀓𑀧𑁆𑀧𑀺𑀬𑀁 𑀓𑀧𑁆𑀧𑀺𑀬𑁂𑀦𑁂𑀯, 𑀧𑀭𑀺𑀯𑀢𑁆𑀢𑀬𑀢𑁄 𑀧𑀦;

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂.

𑀅𑀓𑀧𑁆𑀧𑀺𑀬𑀲𑁆𑀲 𑀯𑀢𑁆𑀣𑀼𑀲𑁆𑀲, 𑀢𑁂𑀦𑁂𑀯 𑀧𑀭𑀺𑀯𑀢𑁆𑀢𑀦𑀁;

𑀦 𑀕𑀘𑁆𑀙𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀬𑀯𑀺𑀓𑁆𑀓𑀬𑀲𑀗𑁆𑀕𑀳𑀁.

𑀢𑀲𑁆𑀫𑀸 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺, 𑀯𑀢𑁆𑀣𑀼𑀁 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀁;

‘‘𑀇𑀫𑀁 𑀤𑁂𑀳𑀺𑀫𑀺𑀦𑀸 𑀳𑀻’’𑀢𑀺, 𑀯𑀤𑀢𑁄 𑀧𑀦 𑀤𑀼𑀓𑁆𑀓𑀝𑀁.

𑀲𑀓𑀁 ¶ 𑀯𑀸 𑀤𑁂𑀢𑀺 𑀘𑁂 𑀪𑀡𑁆𑀟𑀁, 𑀏𑀯𑀁 𑀯𑀢𑁆𑀯𑀸𑀦 𑀫𑀸𑀢𑀼𑀬𑀸;

𑀫𑀸𑀢𑀼𑀬𑀸 𑀯𑀸 𑀢𑀣𑀸 𑀪𑀡𑁆𑀟𑀁, 𑀲𑀬𑀁 𑀕𑀡𑁆𑀳𑀸𑀢𑀺 𑀤𑀼𑀓𑁆𑀓𑀝𑀁.

𑀲𑀳𑀢𑁆𑀣𑀁 𑀧𑀭𑀪𑀡𑁆𑀟𑀲𑁆𑀫𑀺𑀁, 𑀧𑀭𑀳𑀢𑁆𑀣𑀜𑁆𑀘 𑀅𑀢𑁆𑀢𑀦𑁄;

𑀪𑀡𑁆𑀟𑀓𑁂 𑀧𑀦 𑀲𑀫𑁆𑀧𑀢𑁆𑀢𑁂, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

‘‘𑀕𑀳𑁂𑀢𑁆𑀯𑀸 𑀯𑀸 𑀇𑀤𑀁 𑀦𑀸𑀫, 𑀪𑀼𑀜𑁆𑀚𑀺𑀢𑁆𑀯𑀸 𑀑𑀤𑀦𑀁 𑀇𑀫𑀁;

𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺, 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺.

𑀯𑀺𑀖𑀸𑀲𑀸𑀤𑀫𑀣𑀜𑁆𑀜𑀁 𑀯𑀸, ‘‘𑀪𑀼𑀜𑁆𑀚𑀺𑀢𑁆𑀯𑀸 𑀑𑀤𑀦𑀁 𑀇𑀫𑀁;

𑀙𑀮𑁆𑀮𑀺𑀁 𑀯𑀸 𑀧𑀦 𑀯𑀮𑁆𑀮𑀺𑀁 𑀯𑀸, 𑀓𑀝𑁆𑀞𑀁 𑀯𑀸 𑀤𑀸𑀭𑀼𑀫𑁂𑀯 𑀯𑀸.

𑀆𑀳𑀭𑀸’’𑀢𑀺 𑀯𑀤𑀦𑁆𑀢𑀲𑁆𑀲, 𑀯𑀢𑁆𑀣𑀽𑀦𑀁 𑀕𑀡𑀦𑀸𑀯𑀲𑀸;

𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀢𑀲𑁆𑀲, 𑀪𑀺𑀓𑁆𑀔𑀼𑀦𑁄 𑀓𑀬𑀯𑀺𑀓𑁆𑀓𑀬𑁂.

‘‘𑀇𑀫𑀜𑁆𑀘 𑀬𑀸𑀕𑀼𑀁 𑀧𑀺𑀯 𑀪𑀼𑀜𑁆𑀚 𑀪𑀢𑁆𑀢𑀁;

𑀪𑀼𑀢𑁆𑀢𑁄𑀲𑀺 𑀪𑀼𑀜𑁆𑀚𑀺𑀲𑁆𑀲𑀲𑀺 𑀪𑀼𑀜𑁆𑀚𑀲𑀻𑀤𑀁;

𑀪𑀢𑁆𑀢𑀁, 𑀇𑀫𑀁 𑀦𑀸𑀫 𑀓𑀭𑁄𑀳𑀺 𑀓𑀫𑁆𑀫𑀁’’;

𑀇𑀘𑁆𑀘𑁂𑀯 𑀯𑀢𑁆𑀢𑀼𑀁 𑀧𑀦 𑀯𑀝𑁆𑀝𑀢𑁂𑀯.

𑀪𑀽𑀫𑀺𑀬𑀸 ¶ 𑀲𑁄𑀥𑀦𑁂 𑀯𑀸𑀧𑀺, 𑀮𑀺𑀫𑁆𑀧𑀦𑁂 𑀯𑀢𑁆𑀣𑀥𑁄𑀯𑀦𑁂;

𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀜𑁆𑀜𑀁, 𑀪𑀡𑁆𑀟𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀓𑀁.

𑀦𑀺𑀲𑁆𑀲𑀕𑁆𑀕𑀺𑀬𑁂 𑀘 𑀯𑀢𑁆𑀣𑀼𑀫𑁆𑀳𑀺, 𑀦𑀝𑁆𑀞𑁂 𑀪𑀼𑀢𑁆𑀢𑁂𑀧𑀺 𑀯𑀸 𑀬𑀣𑀸;

𑀤𑁂𑀲𑁂𑀢𑀩𑁆𑀩𑀸𑀯 𑀆𑀧𑀢𑁆𑀢𑀺, 𑀤𑁂𑀲𑁂𑀢𑀩𑁆𑀩𑀸 𑀢𑀣𑀸 𑀅𑀬𑀁.

‘‘𑀇𑀫𑀺𑀦𑀸𑀯 𑀇𑀫𑀁 𑀦𑀸𑀫, 𑀕𑀳𑁂𑀢𑁆𑀯𑀸 𑀤𑁂𑀳𑀺 𑀫𑁂’’𑀇𑀢𑀺;

𑀆𑀘𑀺𑀓𑁆𑀔𑀢𑀺 𑀅𑀦𑀸𑀧𑀢𑁆𑀢𑀺, 𑀞𑀧𑁂𑀢𑁆𑀯𑀸 𑀪𑀡𑁆𑀟𑀲𑀸𑀫𑀺𑀓𑀁.

‘‘𑀇𑀤𑀁 𑀫𑀫𑀢𑁆𑀣𑀺 𑀅𑀢𑁆𑀣𑁄 𑀫𑁂, 𑀇𑀫𑀺𑀦𑀸’’𑀢𑀺 𑀘 𑀪𑀸𑀲𑀢𑁄;

𑀲𑁂𑀲𑀁 𑀅𑀦𑀦𑁆𑀢𑀭𑁂𑀦𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀲𑀫𑀁.

𑀫𑀢𑁆𑀢𑀺𑀓𑀸𑀬𑁄𑀫𑀬𑀸 𑀧𑀢𑁆𑀢𑀸, 𑀓𑀧𑁆𑀧𑀺𑀬𑀸 𑀚𑀸𑀢𑀺𑀢𑁄 𑀤𑀼𑀯𑁂;

𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸 𑀢𑀼, 𑀉𑀓𑁆𑀓𑀝𑁆𑀞𑁄 𑀫𑀚𑁆𑀛𑀺𑀫𑁄𑀫𑀓𑁄.

𑀤𑁆𑀯𑀺𑀦𑁆𑀦𑀁 ¶ 𑀢𑀡𑁆𑀟𑀼𑀮𑀦𑀸𑀴𑀻𑀦𑀁, 𑀪𑀢𑁆𑀢𑀁 𑀫𑀕𑀥𑀦𑀸𑀴𑀺𑀬𑀸;

𑀔𑀸𑀤𑀦𑀜𑁆𑀘 𑀘𑀢𑀼𑀩𑁆𑀪𑀸𑀕𑀁, 𑀩𑁆𑀬𑀜𑁆𑀚𑀦𑀜𑁆𑀘 𑀢𑀤𑀽𑀧𑀺𑀬𑀁.

𑀉𑀓𑁆𑀓𑀝𑁆𑀞𑁄 𑀦𑀸𑀫 𑀲𑁄 𑀧𑀢𑁆𑀢𑁄, 𑀬𑁄 𑀢𑀁 𑀲𑀩𑁆𑀩𑀁 𑀢𑀼 𑀕𑀡𑁆𑀳𑀢𑀺;

𑀫𑀚𑁆𑀛𑀺𑀫𑁄 𑀢𑀲𑁆𑀲𑀼𑀧𑀟𑁆𑀠𑁄 𑀘, 𑀢𑀤𑀼𑀧𑀟𑁆𑀠𑁄 𑀘 𑀑𑀫𑀓𑁄.

𑀉𑀓𑁆𑀓𑀝𑁆𑀞𑀲𑁆𑀲 𑀘 𑀉𑀓𑁆𑀓𑀝𑁆𑀞𑁄, 𑀢𑀲𑁆𑀲𑁂𑀯𑁄𑀫𑀓𑀫𑀚𑁆𑀛𑀺𑀫𑀸;

𑀏𑀯𑀁 𑀫𑀚𑁆𑀛𑀺𑀫𑀑𑀫𑁂𑀲𑀼, 𑀦𑀯 𑀧𑀢𑁆𑀢𑀸 𑀪𑀯𑀦𑁆𑀢𑀺 𑀳𑀺.

𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀓𑁄 𑀢𑁂𑀲𑀼, 𑀅𑀧𑀢𑁆𑀢𑁄 𑀑𑀫𑀓𑁄𑀫𑀓𑁄;

𑀢𑀲𑁆𑀫𑀸 𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁, 𑀦 𑀕𑀘𑁆𑀙𑀦𑁆𑀢𑀺 𑀯𑀺𑀓𑀧𑁆𑀧𑀦𑀁.

𑀲𑁂𑀲𑀁 𑀲𑀢𑁆𑀢𑀯𑀺𑀥𑀁 𑀧𑀢𑁆𑀢𑀁, 𑀧𑀢𑁆𑀢𑀮𑀓𑁆𑀔𑀡𑀲𑀁𑀬𑀼𑀢𑀁;

𑀅𑀥𑀺𑀝𑁆𑀞𑀸𑀬 𑀯𑀺𑀓𑀧𑁆𑀧𑁂𑀢𑁆𑀯𑀸, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀧𑀡𑁆𑀟𑀺𑀢𑁄.

𑀤𑀲𑀸𑀳𑀧𑀭𑀫𑀁 ¶ 𑀓𑀸𑀮𑀁, 𑀥𑀸𑀭𑁂𑀬𑁆𑀬 𑀅𑀢𑀺𑀭𑁂𑀓𑀢𑁄;

𑀅𑀢𑀺𑀓𑁆𑀓𑀫𑀬𑀢𑁄 𑀧𑀢𑁆𑀢𑀁, 𑀢𑀜𑁆𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀬𑀁 𑀧𑀢𑁆𑀢𑀁 𑀦 𑀯𑀺𑀓𑀧𑁆𑀧𑁂𑀢𑀺, 𑀬𑀁 𑀦𑀸𑀥𑀺𑀝𑁆𑀞𑁂𑀢𑀺 𑀯𑀸 𑀧𑀦;

𑀯𑀺𑀦𑀬𑀜𑁆𑀜𑀽𑀳𑀺 𑀲𑁄 𑀧𑀢𑁆𑀢𑁄, 𑀅𑀢𑀺𑀭𑁂𑀓𑁄𑀢𑀺 𑀯𑀡𑁆𑀡𑀺𑀢𑁄.

𑀯𑀢𑁆𑀢𑀩𑁆𑀩𑀁 𑀢𑀼 ‘‘𑀇𑀫𑀁 𑀧𑀢𑁆𑀢𑀁, 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀲𑀫𑁆𑀫𑀼𑀔𑁂;

‘‘𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀤𑀽𑀭𑀲𑁆𑀫𑀺𑀁, 𑀧𑀘𑁆𑀘𑀼𑀤𑁆𑀥𑀸𑀭𑁂𑀧𑁆𑀬𑀬𑀁 𑀦𑀬𑁄.

𑀆𑀪𑁄𑀕𑀁 𑀫𑀦𑀲𑀸 𑀓𑀢𑁆𑀯𑀸, 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀓𑀁;

𑀓𑀸𑀬𑁂𑀦𑀧𑀺 𑀘 𑀧𑀢𑁆𑀢𑀲𑁆𑀲, 𑀅𑀥𑀺𑀝𑁆𑀞𑀸𑀦𑀁 𑀧𑀓𑀸𑀲𑀺𑀢𑀁.

𑀧𑀢𑁆𑀢𑁄 𑀚𑀳𑀢𑀺𑀥𑀺𑀝𑁆𑀞𑀸𑀦𑀁, 𑀤𑀸𑀦𑀪𑁂𑀤𑀓𑀦𑀸𑀲𑀢𑁄;

𑀯𑀺𑀩𑁆𑀪𑀫𑀼𑀤𑁆𑀥𑀸𑀭𑀧𑀘𑁆𑀘𑀓𑁆𑀔-𑀧𑀭𑀺𑀯𑀢𑁆𑀢𑀦𑀕𑀸𑀳𑀢𑁄.

𑀓𑀗𑁆𑀕𑀼𑀲𑀺𑀢𑁆𑀣𑀧𑁆𑀧𑀫𑀸𑀡𑁂𑀦, 𑀔𑁂𑀦𑀸𑀥𑀺𑀝𑁆𑀞𑀸𑀦𑀫𑀼𑀚𑁆𑀛𑀢𑀺;

𑀧𑀺𑀤𑀳𑀺𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬, 𑀅𑀬𑁄𑀘𑀼𑀡𑁆𑀡𑁂𑀦 𑀯𑀸𑀡𑀺𑀬𑀸.

𑀬𑁄 𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀢𑁆𑀢𑀁, 𑀅𑀦𑀺𑀲𑁆𑀲𑀚𑁆𑀚𑁂𑀯 𑀪𑀼𑀜𑁆𑀚𑀢𑀺;

𑀤𑀼𑀓𑁆𑀓𑀝𑀁 𑀢𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀁, 𑀪𑀼𑀢𑁆𑀯𑀸 𑀥𑁄𑀯𑀦𑀥𑁄𑀯𑀦𑁂.

𑀲𑀼𑀯𑀡𑁆𑀡𑀫𑀡𑀺𑀧𑀢𑁆𑀢𑁄 𑀘, 𑀯𑁂𑀴𑀼𑀭𑀺𑀬𑀨𑀮𑀺𑀓𑀼𑀩𑁆𑀪𑀯𑁄;

𑀓𑀁𑀲𑀓𑀸𑀘𑀫𑀬𑁄 𑀧𑀢𑁆𑀢𑁄, 𑀢𑀺𑀧𑀼𑀲𑀻𑀲𑀫𑀬𑁄𑀧𑀺 𑀘.

𑀢𑀣𑀸 𑀤𑀸𑀭𑀼𑀫𑀬𑁄 𑀧𑀢𑁆𑀢𑁄, 𑀢𑀫𑁆𑀩𑀲𑀚𑁆𑀛𑀼𑀫𑀬𑁄𑀧𑀺 𑀘;

𑀏𑀓𑀸𑀤𑀲𑀯𑀺𑀥𑁄 𑀧𑀢𑁆𑀢𑁄, 𑀯𑀼𑀢𑁆𑀢𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑁄.

𑀖𑀝𑀲𑀻𑀲𑀓𑀝𑀸𑀳𑁄 ¶ 𑀘, 𑀢𑀼𑀫𑁆𑀩𑀁 𑀘𑀲𑁆𑀲𑀸𑀦𑀼𑀮𑁄𑀫𑀺𑀓𑀁;

𑀢𑀫𑁆𑀩𑀮𑁄𑀳𑀫𑀬𑀁 𑀢𑀢𑁆𑀣, 𑀣𑀸𑀮𑀓𑀁 𑀧𑀦 𑀯𑀝𑁆𑀝𑀢𑀺.

𑀨𑀮𑀺𑀓𑀓𑀸𑀘𑀓𑀁𑀲𑀸𑀦𑀁, 𑀢𑀝𑁆𑀝𑀺𑀓𑀸𑀤𑀻𑀦𑀺 𑀓𑀸𑀦𑀺𑀘𑀺;

𑀧𑀼𑀕𑁆𑀕𑀮𑀲𑁆𑀲 𑀦 𑀯𑀝𑁆𑀝𑀦𑁆𑀢𑀺, 𑀯𑀝𑁆𑀝𑀦𑁆𑀢𑀺 𑀕𑀺𑀳𑀺𑀲𑀗𑁆𑀖𑀺𑀓𑀸.

𑀬𑀁 𑀓𑀺𑀜𑁆𑀘𑀺 𑀲𑁄𑀤𑀓𑀁 𑀧𑀢𑁆𑀢𑀁, 𑀧𑀝𑀺𑀲𑀸𑀫𑁂𑀬𑁆𑀬 𑀤𑀼𑀓𑁆𑀓𑀝𑀁;

𑀲𑀸𑀥𑀼𑀓𑀁 𑀯𑁄𑀤𑀓𑀁 𑀓𑀢𑁆𑀯𑀸, 𑀧𑀝𑀺𑀲𑀸𑀫𑁂𑀬𑁆𑀬 𑀧𑀡𑁆𑀟𑀺𑀢𑁄.

𑀪𑀺𑀓𑁆𑀔𑀼𑀦𑁄 ¶ 𑀲𑁄𑀤𑀓𑀁 𑀧𑀢𑁆𑀢𑀁, 𑀑𑀢𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺;

𑀉𑀡𑁆𑀳𑁂 𑀦 𑀦𑀺𑀤𑀳𑁂𑀢𑀩𑁆𑀩𑁄, 𑀦𑀺𑀤𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀫𑀺𑀟𑁆𑀠𑀦𑁆𑀢𑁂 𑀧𑀭𑀺𑀪𑀡𑁆𑀟𑀦𑁆𑀢𑁂, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀫𑀺𑀟𑁆𑀠𑀺𑀬𑀸 𑀧𑀭𑀺𑀪𑀡𑁆𑀟𑁂 𑀯𑀸, 𑀯𑀺𑀢𑁆𑀣𑀺𑀡𑁆𑀡𑁂 𑀧𑀦 𑀯𑀝𑁆𑀝𑀢𑀺.

𑀤𑀸𑀭𑀼𑀆𑀥𑀸𑀭𑀓𑁂 𑀧𑀢𑁆𑀢𑁂, 𑀤𑁆𑀯𑁂 𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺;

𑀅𑀬𑀫𑁂𑀯 𑀦𑀬𑁄 𑀤𑀡𑁆𑀟-𑀪𑀽𑀫𑀺𑀆𑀥𑀸𑀭𑀓𑁂𑀲𑀼𑀧𑀺.

𑀢𑀝𑁆𑀝𑀺𑀓𑀸𑀬𑀧𑀺 𑀘𑁄𑀴𑁂 𑀯𑀸, 𑀧𑁄𑀢𑁆𑀣𑀓𑁂 𑀓𑀝𑀲𑀸𑀭𑀓𑁂;

𑀧𑀭𑀺𑀪𑀡𑁆𑀟𑀓𑀢𑀸𑀬𑀸𑀧𑀺, 𑀪𑀽𑀫𑀺𑀬𑀁 𑀯𑀸𑀮𑀼𑀓𑀸𑀲𑀼 𑀯𑀸.

𑀢𑀣𑀸𑀭𑀽𑀧𑀸𑀲𑀼 𑀲𑀼𑀤𑁆𑀥𑀸𑀲𑀼, 𑀞𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀲𑀭𑀚𑀸𑀬 𑀞𑀧𑁂𑀦𑁆𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀔𑀭𑀪𑀽𑀫𑀺𑀬𑀸.

𑀤𑀡𑁆𑀟𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸, 𑀮𑀕𑁆𑀕𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺;

𑀙𑀢𑁆𑀢𑀗𑁆𑀕𑀫𑀜𑁆𑀘𑀧𑀻𑀞𑁂𑀲𑀼, 𑀞𑀧𑁂𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀅𑀝𑀦𑀻𑀲𑀼 𑀳𑀺 𑀩𑀦𑁆𑀥𑀺𑀢𑁆𑀯𑀸, 𑀑𑀮𑀫𑁆𑀩𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺;

𑀩𑀦𑁆𑀥𑀺𑀢𑁆𑀯𑀸 𑀧𑀦 𑀫𑀜𑁆𑀘𑀲𑁆𑀲, 𑀞𑀧𑁂𑀢𑀼𑀁𑀧𑀭𑀺 𑀯𑀝𑁆𑀝𑀢𑀺.

𑀫𑀜𑁆𑀘𑀧𑀻𑀞𑀝𑁆𑀝𑀓𑁂 𑀧𑀢𑁆𑀢𑀁, 𑀞𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀪𑀢𑁆𑀢𑀧𑀽𑀭𑁄𑀧𑀺 𑀯𑀸 𑀙𑀢𑁆𑀢𑁂, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀓𑀯𑀸𑀝𑀁 𑀦 𑀧𑀡𑀸𑀫𑁂𑀬𑁆𑀬, 𑀧𑀢𑁆𑀢𑀳𑀢𑁆𑀣𑁄 𑀲𑀘𑁂 𑀧𑀦;

𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑁂𑀦, 𑀧𑀡𑀸𑀫𑁂𑀬𑁆𑀬𑀲𑁆𑀲 𑀤𑀼𑀓𑁆𑀓𑀝𑀁.

𑀦 𑀦𑀻𑀳𑀭𑁂𑀬𑁆𑀬 𑀧𑀢𑁆𑀢𑁂𑀦, 𑀘𑀮𑀓𑀸𑀦𑀝𑁆𑀞𑀺𑀓𑀸𑀦𑀺 𑀯𑀸;

𑀉𑀘𑁆𑀙𑀺𑀝𑁆𑀞𑀫𑀼𑀤𑀓𑀁 𑀯𑀸𑀧𑀺, 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀧𑀢𑁆𑀢𑀁 ¶ 𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸, 𑀥𑁄𑀯𑀺𑀢𑀼𑀁 𑀳𑀢𑁆𑀣𑀫𑁂𑀯 𑀯𑀸;

𑀫𑀼𑀔𑀢𑁄 𑀦𑀻𑀳𑀝𑀁 𑀧𑀢𑁆𑀢𑁂, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀺 ¶ 𑀤𑀲𑀸𑀳𑀲𑁆𑀲, 𑀅𑀦𑁆𑀢𑁄𑀬𑁂𑀯 𑀘 𑀬𑁄 𑀧𑀦;

𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀺𑀦𑀲𑁆𑀲𑀢𑀺.

𑀧𑀞𑀫𑀲𑁆𑀲 𑀳𑀺 𑀧𑀢𑁆𑀢𑀲𑁆𑀲, 𑀧𑀞𑀫𑁂𑀦 𑀫𑀳𑁂𑀲𑀺𑀦𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀧𑀜𑁆𑀘𑀩𑀦𑁆𑀥𑀦𑀊𑀦𑀲𑁆𑀫𑀺𑀁, 𑀧𑀢𑁆𑀢𑁂 𑀲𑀢𑀺 𑀘 𑀬𑁄 𑀧𑀦;

𑀯𑀺𑀜𑁆𑀜𑀸𑀧𑁂𑀬𑁆𑀬 𑀦𑀯𑀁 𑀧𑀢𑁆𑀢𑀁, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀩𑀦𑁆𑀥𑀦𑀁 𑀏𑀓𑀫𑀼𑀤𑁆𑀤𑀺𑀝𑁆𑀞𑀁, 𑀤𑁆𑀯𑀗𑁆𑀕𑀼𑀮𑀸𑀬 𑀘 𑀭𑀸𑀚𑀺𑀬𑀸;

𑀩𑀦𑁆𑀥𑀦𑀸𑀦𑀺 𑀘 𑀘𑀢𑁆𑀢𑀸𑀭𑀺, 𑀢𑀣𑀸𑀝𑁆𑀞𑀗𑁆𑀕𑀼𑀮𑀭𑀸𑀚𑀺𑀬𑀸.

𑀧𑀜𑁆𑀘 𑀯𑀸 𑀭𑀸𑀚𑀺𑀬𑁄 𑀬𑀲𑁆𑀲, 𑀏𑀓𑀸 𑀯𑀸𑀧𑀺 𑀤𑀲𑀗𑁆𑀕𑀼𑀮𑀸;

𑀅𑀧𑀢𑁆𑀢𑁄 𑀦𑀸𑀫𑀬𑀁 𑀧𑀢𑁆𑀢𑁄, 𑀯𑀺𑀜𑁆𑀜𑀸𑀧𑁂𑀬𑁆𑀬 𑀢𑀢𑁄 𑀧𑀭𑀁.

𑀅𑀬𑁄𑀧𑀢𑁆𑀢𑁄 𑀅𑀦𑁂𑀓𑁂𑀳𑀺, 𑀮𑁄𑀳𑀫𑀡𑁆𑀟𑀮𑀓𑁂𑀳𑀺 𑀯𑀸;

𑀩𑀤𑁆𑀥𑁄 𑀯𑀝𑁆𑀝𑀢𑀺 𑀫𑀝𑁆𑀞𑁄 𑀘𑁂, 𑀅𑀬𑁄𑀘𑀼𑀡𑁆𑀡𑁂𑀦 𑀯𑀸𑀡𑀺𑀬𑀸.

𑀧𑀢𑁆𑀢𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀦;

𑀅𑀦𑀼𑀓𑀫𑁆𑀧𑀸𑀬 𑀢𑀁 𑀢𑀲𑁆𑀫𑀺𑀁, 𑀅𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀤𑀻𑀬𑀫𑀸𑀦𑁂 𑀢𑀼 𑀧𑀢𑁆𑀢𑀲𑁆𑀫𑀺𑀁, 𑀬𑀲𑁆𑀲 𑀲𑁄 𑀦 𑀘 𑀭𑀼𑀘𑁆𑀘𑀢𑀺;

𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀸 𑀧𑀢𑁆𑀢𑀁, 𑀢𑀁 𑀦 𑀕𑀡𑁆𑀳𑀸𑀢𑀺 𑀯𑀝𑁆𑀝𑀢𑀺.

𑀲𑁄 𑀤𑁂𑀬𑁆𑀬𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀲𑀘𑁂 𑀲𑁄 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄, 𑀅𑀧𑁆𑀧𑀤𑁂𑀲𑁂 𑀞𑀧𑁂𑀢𑀺 𑀯𑀸;

𑀯𑀺𑀲𑁆𑀲𑀚𑁆𑀚𑁂𑀢𑀺 𑀅𑀪𑁄𑀕𑁂𑀦, 𑀧𑀭𑀺𑀪𑀼𑀜𑁆𑀚𑀢𑀺 𑀤𑀼𑀓𑁆𑀓𑀝𑀁.

𑀦𑀝𑁆𑀞𑁂 ¶ 𑀪𑀺𑀦𑁆𑀦𑁂𑀧𑀺 𑀯𑀸 𑀧𑀢𑁆𑀢𑁂, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀅𑀢𑁆𑀢𑀦𑁄 𑀜𑀸𑀢𑀓𑀸𑀤𑀻𑀦𑀁, 𑀕𑀡𑁆𑀳𑀢𑁄 𑀯𑀸 𑀥𑀦𑁂𑀦 𑀯𑀸.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 ¶ , 𑀓𑁆𑀭𑀺𑀬𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑀧𑁆𑀧𑀺𑀆𑀤𑀺𑀁 𑀧𑀼𑀭𑁂𑀪𑀢𑁆𑀢𑀁, 𑀪𑁂𑀲𑀚𑁆𑀚𑀁 𑀧𑀝𑀺𑀕𑀬𑁆𑀳 𑀳𑀺;

𑀲𑀸𑀫𑀺𑀲𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁, 𑀧𑀭𑀺𑀪𑀼𑀜𑁆𑀚𑀢𑀺 𑀯𑀝𑁆𑀝𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁, 𑀢𑀁 𑀯𑀝𑁆𑀝𑀢𑀺 𑀦𑀺𑀭𑀸𑀫𑀺𑀲𑀁;

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀢𑀲𑁆𑀲, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀕𑀡𑁆𑀳𑀺𑀢𑁆𑀯𑀸, 𑀓𑀢𑁆𑀯𑀸 𑀲𑀦𑁆𑀦𑀺𑀥𑀺𑀓𑀸𑀭𑀓𑀁;

𑀲𑀸𑀬𑀢𑁄 𑀧𑀦 𑀲𑀢𑁆𑀢𑀸𑀳𑀁, 𑀯𑀝𑁆𑀝𑀢𑁂𑀯 𑀦𑀺𑀭𑀸𑀫𑀺𑀲𑀁.

𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀧𑀘𑁆𑀙𑀸 𑀯𑀸, 𑀲𑀬𑀫𑀼𑀕𑁆𑀕𑀳𑀺𑀢𑀁 𑀧𑀦;

𑀲𑀭𑀻𑀭𑀪𑁄𑀕𑁂 𑀦𑁂𑀢𑀩𑁆𑀩𑀁, 𑀲𑀸𑀬𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀦𑀯𑀦𑀻𑀢𑀁 𑀧𑀼𑀭𑁂𑀪𑀢𑁆𑀢𑀁, 𑀪𑀺𑀓𑁆𑀔𑀼𑀦𑀸 𑀕𑀳𑀺𑀢𑀁 𑀲𑀘𑁂;

𑀢𑀸𑀧𑁂𑀢𑁆𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑁄, 𑀤𑁂𑀢𑀺 𑀯𑀝𑁆𑀝𑀢𑀺 𑀲𑀸𑀫𑀺𑀲𑀁.

𑀲𑀬𑀁 𑀢𑀸𑀧𑁂𑀢𑀺 𑀘𑁂 𑀪𑀺𑀓𑁆𑀔𑀼, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀁;

𑀢𑀸𑀧𑀦𑀁 𑀦𑀯𑀦𑀻𑀢𑀲𑁆𑀲, 𑀲𑀸𑀫𑀧𑀸𑀓𑁄 𑀦 𑀳𑁄𑀢𑀺 𑀲𑁄.

𑀧𑀘𑁆𑀙𑀸𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑁂, 𑀬𑁂𑀦 𑀓𑁂𑀦𑀘𑀺 𑀢𑀸𑀧𑀺𑀢𑀁;

𑀯𑀝𑁆𑀝𑀢𑁂𑀯 𑀘 𑀢𑀁 𑀲𑀧𑁆𑀧𑀺, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀁.

𑀔𑀻𑀭𑀁 𑀤𑀥𑀺𑀁 𑀘𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸;

𑀲𑀧𑁆𑀧𑀺𑀁 𑀧𑀼𑀭𑁂𑀪𑀢𑁆𑀢𑀓𑀫𑁂𑀯 𑀢𑀲𑁆𑀲;

𑀦𑀺𑀭𑀸𑀫𑀺𑀲𑀁 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄 𑀢𑀁.

𑀧𑀘𑁆𑀙𑀸𑀪𑀢𑁆𑀢𑀓𑀢𑁄 𑀉𑀤𑁆𑀥𑀁, 𑀢𑀁 𑀦 𑀯𑀝𑁆𑀝𑀢𑀺 𑀲𑀸𑀬𑀺𑀢𑀼𑀁;

𑀲𑀯𑀢𑁆𑀣𑀼𑀓𑀲𑁆𑀲 𑀲𑀧𑁆𑀧𑀺𑀲𑁆𑀲, 𑀕𑀳𑀺𑀢𑀢𑁆𑀢𑀸𑀯 𑀪𑀺𑀓𑁆𑀔𑀼𑀦𑁄.

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺𑀲𑁆𑀲 ¶ , 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺;

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀦𑀻’’𑀢𑀺, 𑀯𑀼𑀢𑁆𑀢𑀢𑁆𑀢𑀸 𑀳𑀺 𑀫𑀳𑁂𑀲𑀺𑀦𑀸.

𑀬𑀣𑀸 𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁;

𑀢𑀣𑀸𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀲𑀩𑁆𑀩𑀸𑀓𑀧𑁆𑀧𑀺𑀬𑀫𑀁𑀲𑀸𑀦𑀁 ¶ , 𑀯𑀚𑁆𑀚𑁂𑀢𑁆𑀯𑀸 𑀫𑀁𑀲𑀫𑁂𑀯 𑀘;

𑀔𑀻𑀭𑀁 𑀤𑀥𑀺 𑀘 𑀲𑀧𑁆𑀧𑀺 𑀘, 𑀦𑀯𑀦𑀻𑀢𑀜𑁆𑀘 𑀯𑀝𑁆𑀝𑀢𑀺.

‘‘𑀬𑁂𑀲𑀁 𑀓𑀧𑁆𑀧𑀢𑀺 𑀫𑀁𑀲𑀜𑁆𑀳𑀺, 𑀢𑁂𑀲𑀁 𑀲𑀧𑁆𑀧𑀻’’𑀢𑀺 𑀓𑀺𑀁 𑀇𑀤𑀁?

𑀧𑀡𑀻𑀢𑀪𑁄𑀚𑀦𑀲𑁆𑀲𑀸𑀧𑀺, 𑀢𑀣𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑁂.

𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀯𑀢𑁆𑀣𑀽𑀦𑀁, 𑀧𑀭𑀺𑀘𑁆𑀙𑁂𑀤𑀦𑀺𑀬𑀸𑀫𑀦𑀁;

𑀦 𑀘𑀸𑀓𑀧𑁆𑀧𑀺𑀬𑀫𑀁𑀲𑀸𑀦𑀁, 𑀲𑀧𑁆𑀧𑀺𑀆𑀤𑀺 𑀦𑀺𑀯𑀸𑀭𑀺𑀢𑀁.

𑀦𑀯𑀦𑀻𑀢𑁂𑀧𑀺 𑀲𑀧𑁆𑀧𑀺𑀫𑁆𑀳𑀺, 𑀕𑀳𑀺𑀢𑀼𑀕𑁆𑀕𑀳𑀺𑀢𑀸𑀤𑀺𑀓𑁂;

𑀲𑀩𑁆𑀩𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑁂𑀮𑀪𑀺𑀓𑁆𑀔𑀸𑀬 𑀪𑀺𑀓𑁆𑀔𑀽𑀦𑀁, 𑀧𑀯𑀺𑀝𑁆𑀞𑀸𑀦𑀁 𑀉𑀧𑀸𑀲𑀓𑀸;

𑀢𑁂𑀮𑀁 𑀯𑀸 𑀦𑀯𑀦𑀻𑀢𑀁 𑀯𑀸, 𑀲𑀧𑁆𑀧𑀺𑀁 𑀯𑀸 𑀆𑀓𑀺𑀭𑀦𑁆𑀢𑀺 𑀳𑀺.

𑀪𑀢𑁆𑀢𑀲𑀺𑀢𑁆𑀣𑀸𑀦𑀺 𑀯𑀸 𑀢𑀢𑁆𑀣, 𑀢𑀡𑁆𑀟𑀼𑀮𑀸 𑀯𑀸 𑀪𑀯𑀦𑁆𑀢𑀺 𑀘𑁂;

𑀆𑀤𑀺𑀘𑁆𑀘𑀧𑀓𑁆𑀓𑀲𑀁𑀲𑀝𑁆𑀞𑀁, 𑀳𑁄𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁.

𑀢𑀺𑀮𑀲𑀸𑀲𑀧𑀢𑁂𑀮𑀁 𑀯𑀸, 𑀫𑀥𑀼𑀓𑁂𑀭𑀡𑁆𑀟𑀢𑁂𑀮𑀓𑀁;

𑀕𑀳𑀺𑀢𑀁 𑀢𑀼 𑀧𑀼𑀭𑁂𑀪𑀢𑁆𑀢𑀁, 𑀲𑀸𑀫𑀺𑀲𑀫𑁆𑀧𑀺 𑀦𑀺𑀭𑀸𑀫𑀺𑀲𑀁.

𑀧𑀘𑁆𑀙𑀸𑀪𑀢𑁆𑀢𑀓𑀢𑁄 𑀉𑀤𑁆𑀥𑀁, 𑀲𑀸𑀬𑀺𑀢𑀩𑁆𑀩𑀁 𑀦𑀺𑀭𑀸𑀫𑀺𑀲𑀁;

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀢𑁂𑀲𑀁, 𑀯𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀏𑀭𑀡𑁆𑀟𑀫𑀥𑀼𑀓𑀝𑁆𑀞𑀻𑀦𑀺, 𑀲𑀸𑀲𑀧𑀸𑀤𑀻𑀦𑀺 𑀘𑀢𑁆𑀢𑀦𑀸;

𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀫𑁆𑀧𑀺, 𑀳𑁄𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁.

𑀬𑀸𑀯𑀚𑀻𑀯𑀺𑀓𑀯𑀢𑁆𑀣𑀼𑀢𑁆𑀢𑀸, 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀪𑀺𑀓𑁆𑀔𑀼𑀦𑁄;

𑀲𑀯𑀢𑁆𑀣𑀼𑀕𑀳𑀡𑁂 𑀢𑀲𑁆𑀲, 𑀓𑀸𑀘𑀸𑀧𑀢𑁆𑀢𑀺 𑀦 𑀯𑀺𑀚𑁆𑀚𑀢𑀺.

𑀅𑀢𑁆𑀢𑀦𑀸 ¶ 𑀬𑀁 𑀓𑀢𑀁 𑀢𑁂𑀮𑀁, 𑀢𑀁 𑀯𑀝𑁆𑀝𑀢𑀺 𑀦𑀺𑀭𑀸𑀫𑀺𑀲𑀁;

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀦𑀲𑁆𑀲, 𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀦.

𑀤𑀼𑀓𑁆𑀓𑀝𑀁 𑀲𑀸𑀲𑀧𑀸𑀤𑀻𑀦𑀁, 𑀢𑁂𑀮𑀢𑁆𑀣𑀸𑀬𑁂𑀯 𑀪𑀺𑀓𑁆𑀔𑀼𑀦𑀸;

𑀕𑀳𑁂𑀢𑁆𑀯𑀸 𑀞𑀧𑀺𑀢𑀸𑀦𑀁 𑀢𑀼, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀺𑀬𑀸.

𑀦𑀸𑀴𑀺𑀓𑁂𑀭𑀓𑀭𑀜𑁆𑀚𑀸𑀦𑀁, 𑀢𑁂𑀮𑀁 𑀓𑀼𑀭𑀼𑀯𑀓𑀲𑁆𑀲 𑀘;

𑀦𑀺𑀫𑁆𑀩𑀓𑁄𑀲𑀫𑁆𑀩𑀓𑀸𑀦𑀜𑁆𑀘, 𑀢𑁂𑀮𑀁 𑀪𑀮𑁆𑀮𑀸𑀢𑀓𑀲𑁆𑀲 𑀘.

𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀲𑀩𑁆𑀩𑀁, 𑀅𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 𑀧𑀦;

𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀲𑀫𑀬𑀘𑁆𑀘𑀬𑁂.

𑀬𑀸𑀯𑀓𑀸𑀮𑀺𑀓𑀪𑁂𑀤𑀜𑁆𑀘 ¶ , 𑀬𑀸𑀯𑀚𑀻𑀯𑀓𑀫𑁂𑀯 𑀘;

𑀯𑀺𑀤𑀺𑀢𑁆𑀯𑀸 𑀲𑁂𑀲𑀫𑁂𑀢𑁆𑀣𑀸𑀧𑀺, 𑀲𑀧𑁆𑀧𑀺𑀦𑀸 𑀲𑀤𑀺𑀲𑁄 𑀦𑀬𑁄.

𑀅𑀘𑁆𑀙𑀫𑀘𑁆𑀙𑀯𑀭𑀸𑀳𑀸𑀦𑀁, 𑀲𑀼𑀲𑀼𑀓𑀸𑀕𑀤𑁆𑀭𑀪𑀲𑁆𑀲 𑀘;

𑀯𑀲𑀸𑀦𑀁 𑀧𑀦 𑀧𑀜𑁆𑀘𑀦𑁆𑀦𑀁, 𑀢𑁂𑀮𑀁 𑀧𑀜𑁆𑀘𑀯𑀺𑀥𑀁 𑀪𑀯𑁂.

𑀲𑀩𑁆𑀩𑀫𑁂𑀯 𑀯𑀲𑀸𑀢𑁂𑀮𑀁, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀲𑁆𑀲 𑀘;

𑀫𑀦𑀼𑀲𑁆𑀲𑀸𑀦𑀁 𑀯𑀲𑀸𑀢𑁂𑀮𑀁, 𑀞𑀧𑁂𑀢𑁆𑀯𑀸 𑀧𑀦 𑀯𑀝𑁆𑀝𑀢𑀺.

𑀯𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦, 𑀧𑀼𑀭𑁂𑀪𑀢𑁆𑀢𑀁 𑀧𑀦𑀢𑁆𑀢𑀦𑀸;

𑀧𑀓𑁆𑀓𑀁 𑀯𑀝𑁆𑀝𑀢𑀺 𑀲𑀁𑀲𑀝𑁆𑀞𑀁, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀁.

𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄, 𑀓𑀢𑁆𑀯𑀸 𑀢𑀁 𑀤𑁂𑀢𑀺 𑀯𑀝𑁆𑀝𑀢𑀺;

𑀲𑀸𑀫𑀺𑀲𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁, 𑀢𑀢𑁄 𑀉𑀤𑁆𑀥𑀁 𑀦𑀺𑀭𑀸𑀫𑀺𑀲𑀁.

𑀧𑀝𑀺𑀕𑁆𑀕𑀳𑁂𑀢𑀼𑀁 𑀓𑀸𑀢𑀼𑀁 𑀯𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺;

𑀲𑁂𑀲𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑀕𑀳𑀺𑀢𑀜𑁆𑀳𑀺 𑀧𑀼𑀭𑁂𑀪𑀢𑁆𑀢𑀁, 𑀫𑀥𑀼𑀁 𑀫𑀥𑀼𑀓𑀭𑀻𑀓𑀢𑀁;

𑀯𑀝𑁆𑀝𑀢𑁂𑀯 𑀧𑀼𑀭𑁂𑀪𑀢𑁆𑀢𑀁, 𑀲𑀸𑀫𑀺𑀲𑀫𑁆𑀧𑀺 𑀦𑀺𑀭𑀸𑀫𑀺𑀲𑀁.

𑀧𑀘𑁆𑀙𑀸𑀪𑀢𑁆𑀢𑀓𑀢𑁄 ¶ 𑀉𑀤𑁆𑀥𑀁, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀁;

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁄𑀲𑁄, 𑀯𑀢𑁆𑀣𑀽𑀦𑀁 𑀕𑀡𑀦𑀸𑀯𑀲𑀸.

𑀉𑀘𑁆𑀙𑀼𑀫𑁆𑀳𑀸 𑀧𑀦 𑀦𑀺𑀩𑁆𑀩𑀢𑁆𑀢𑀁, 𑀧𑀓𑁆𑀓𑀸𑀧𑀓𑁆𑀓𑀁 𑀖𑀦𑀸𑀖𑀦𑀁;

𑀭𑀲𑀸𑀤𑀺 𑀧𑀦 𑀢𑀁 𑀲𑀩𑁆𑀩𑀁, ‘‘𑀨𑀸𑀡𑀺𑀢’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀨𑀸𑀡𑀺𑀢𑀁 𑀢𑀼 𑀧𑀼𑀭𑁂𑀪𑀢𑁆𑀢𑀁, 𑀕𑀳𑀺𑀢𑀁 𑀧𑀦 𑀯𑀝𑁆𑀝𑀢𑀺;

𑀲𑀸𑀫𑀺𑀲𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁, 𑀢𑀢𑁄 𑀉𑀤𑁆𑀥𑀁 𑀦𑀺𑀭𑀸𑀫𑀺𑀲𑀁.

𑀅𑀲𑀁𑀲𑀝𑁆𑀞𑁂𑀦 𑀉𑀘𑁆𑀙𑀼𑀲𑁆𑀲, 𑀭𑀲𑁂𑀦 𑀓𑀢𑀨𑀸𑀡𑀺𑀢𑀁;

𑀕𑀳𑀺𑀢𑁂𑀦 𑀧𑀼𑀭𑁂𑀪𑀢𑁆𑀢𑀁, 𑀢𑀤𑀳𑁂𑀯 𑀦𑀺𑀭𑀸𑀫𑀺𑀲𑀁.

𑀉𑀘𑁆𑀙𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦, 𑀓𑀢𑁂𑀧𑁂𑀲 𑀦𑀬𑁄 𑀫𑀢𑁄;

𑀧𑀘𑁆𑀙𑀸𑀪𑀢𑁆𑀢𑀓𑀢𑁄 𑀉𑀤𑁆𑀥𑀁, 𑀢𑀁 𑀦 𑀯𑀝𑁆𑀝𑀢𑀺 𑀲𑀸𑀬𑀺𑀢𑀼𑀁.

𑀕𑀳𑀺𑀢𑀢𑁆𑀢𑀸 𑀲𑀯𑀢𑁆𑀣𑀼𑀲𑁆𑀲, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀘;

𑀳𑁄𑀢𑀺 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀓𑀢𑁂𑀧𑀺 𑀘.

𑀲𑀁𑀲𑀝𑁆𑀞𑀜𑁆𑀘 𑀧𑀼𑀭𑁂𑀪𑀢𑁆𑀢𑀁, 𑀕𑀳𑀺𑀢𑀁 𑀢𑀫𑀼𑀧𑀸𑀲𑀓𑁄;

𑀢𑀤𑀳𑁂 𑀤𑁂𑀢𑀺 𑀘𑁂 𑀓𑀢𑁆𑀯𑀸, 𑀲𑀸𑀫𑀺𑀲𑀫𑁆𑀧𑀺 𑀘 𑀯𑀝𑁆𑀝𑀢𑀺.

𑀲𑀁𑀲𑀝𑁆𑀞𑁂𑀦 ¶ 𑀧𑀼𑀭𑁂𑀪𑀢𑁆𑀢𑀁, 𑀕𑀳𑀺𑀢𑁂𑀦 𑀲𑀬𑀁𑀓𑀢𑀁;

𑀧𑀘𑁆𑀙𑀸𑀪𑀢𑁆𑀢𑀁 𑀓𑀢𑀜𑁆𑀘𑀸𑀧𑀺, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀁.

𑀓𑀢𑀁 𑀫𑀥𑀼𑀓𑀧𑀼𑀧𑁆𑀨𑀸𑀦𑀁, 𑀨𑀸𑀡𑀺𑀢𑀁 𑀲𑀻𑀢𑀯𑀸𑀭𑀺𑀦𑀸;

𑀲𑀸𑀫𑀺𑀲𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁, 𑀢𑀢𑁄 𑀉𑀤𑁆𑀥𑀁 𑀦𑀺𑀭𑀸𑀫𑀺𑀲𑀁.

𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺𑀲𑁆𑀲, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁;

𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀔𑀻𑀭𑀁, 𑀳𑁄𑀢𑀺 𑀢𑀁 𑀬𑀸𑀯𑀓𑀸𑀮𑀺𑀓𑀁.

𑀨𑀮𑀸𑀦𑀁 𑀧𑀦 𑀲𑀩𑁆𑀩𑁂𑀲𑀁, 𑀬𑀸𑀯𑀓𑀸𑀮𑀺𑀓𑀲𑀜𑁆𑀜𑀺𑀦𑀁;

𑀬𑀸𑀯𑀓𑀸𑀮𑀺𑀓𑀫𑀺𑀘𑁆𑀘𑁂𑀯, 𑀨𑀸𑀡𑀺𑀢𑀁 𑀧𑀭𑀺𑀤𑀻𑀧𑀺𑀢𑀁.

𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀧𑀘𑁆𑀘𑀬𑁂 𑀲𑀢𑀺 𑀓𑁂𑀯𑀮𑀁;

𑀓𑀸𑀮𑀺𑀓𑀸 𑀧𑀦 𑀯𑀝𑁆𑀝𑀦𑁆𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀬𑀣𑀸𑀲𑀼𑀔𑀁.

𑀮𑀪𑀺𑀢𑁆𑀯𑀸 𑀧𑀦 𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀢𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀁;

𑀅𑀭𑀼𑀆𑀤𑀻𑀦𑀺 𑀫𑀓𑁆𑀔𑁂𑀢𑀼𑀁, 𑀲𑀸𑀬𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺.

𑀅𑀜𑁆𑀜𑀲𑁆𑀲 ¶ 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀓𑀸𑀬𑀪𑁄𑀕𑁂 𑀘 𑀯𑀝𑁆𑀝𑀢𑀺;

𑀘𑀚𑀺𑀢𑁆𑀯𑀸 𑀦𑀺𑀭𑀧𑁂𑀓𑁆𑀔𑁄𑀯, 𑀮𑀪𑀺𑀢𑁆𑀯𑀸 𑀧𑀼𑀦 𑀲𑀸𑀬𑀺𑀢𑀼𑀁.

𑀅𑀦𑀸𑀧𑀢𑁆𑀢𑀺 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀺𑀦𑀲𑁆𑀲𑀢𑀺;

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘 𑀯𑀺𑀲𑁆𑀲𑀸𑀲𑀁, 𑀕𑀡𑁆𑀳𑀢𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸;

𑀲𑀤𑀸𑀓𑀣𑀺𑀦𑀘𑀺𑀢𑁆𑀢𑁂𑀦, 𑀧𑀞𑀫𑁂𑀦𑁂𑀯 𑀲𑀢𑁆𑀣𑀼𑀦𑀸.

𑀫𑀸𑀲𑁄 𑀲𑁂𑀲𑁄𑀢𑀺 𑀕𑀺𑀫𑁆𑀳𑀸𑀦𑀁, 𑀧𑀭𑀺𑀬𑁂𑀲𑁂𑀬𑁆𑀬 𑀲𑀸𑀝𑀺𑀓𑀁;

𑀅𑀤𑁆𑀥𑀫𑀸𑀲𑁄𑀯 𑀲𑁂𑀲𑁄𑀢𑀺, 𑀓𑀢𑁆𑀯𑀸 𑀧𑀭𑀺𑀤𑀳𑁂 𑀩𑀼𑀥𑁄.

𑀓𑀢𑁆𑀯𑀸 𑀧𑀦 𑀲𑀢𑀼𑀧𑁆𑀧𑀸𑀤𑀁, 𑀯𑀲𑁆𑀲𑀲𑀸𑀝𑀺𑀓𑀘𑀻𑀯𑀭𑀁;

𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀲𑀫𑀬𑁂 𑀧𑀺𑀝𑁆𑀞𑀺𑀲𑀫𑁆𑀫𑀢𑁂.

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀜𑀸𑀢𑀓𑀸𑀜𑁆𑀜𑀸𑀢𑀓𑀸𑀤𑀺𑀦𑁄;

𑀢𑁂𑀲𑀼𑀬𑁂𑀯 𑀘 𑀯𑀺𑀜𑁆𑀜𑀢𑁆𑀢𑀺𑀁, 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑀦𑁂 𑀢𑀣𑀸.

𑀓𑀢𑁆𑀯𑀸 𑀧𑀦 𑀲𑀢𑀼𑀧𑁆𑀧𑀸𑀤𑀁, 𑀲𑀫𑀬𑁂 𑀓𑀼𑀘𑁆𑀙𑀺𑀲𑀜𑁆𑀜𑀺𑀢𑁂;

𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀯𑀢𑁆𑀣𑀫𑀜𑁆𑀜𑀸𑀢𑀓𑀸𑀤𑀺𑀦𑁄.

𑀢𑀲𑁆𑀲𑀸𑀤𑀺𑀦𑁆𑀦𑀓𑀧𑀼𑀩𑁆𑀩𑁂𑀲𑀼 ¶ , 𑀯𑀢𑁆𑀢𑀪𑁂𑀤𑁂𑀦 𑀤𑀼𑀓𑁆𑀓𑀝𑀁;

𑀓𑀭𑁄𑀢𑁄 𑀢𑀢𑁆𑀭 𑀯𑀺𑀜𑁆𑀜𑀢𑁆𑀢𑀺𑀁, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

𑀑𑀯𑀲𑁆𑀲𑀸𑀧𑁂𑀢𑀺 𑀘𑁂 𑀓𑀸𑀬𑀁, 𑀦𑀕𑁆𑀕𑁄 𑀲𑀢𑀺𑀧𑀺 𑀘𑀻𑀯𑀭𑁂;

𑀦𑁆𑀳𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀤𑀼𑀓𑁆𑀓𑀝𑀁 𑀯𑀺𑀯𑀝𑀗𑁆𑀕𑀡𑁂.

𑀊𑀦𑀓𑁂 𑀧𑀦 𑀫𑀸𑀲𑀲𑁆𑀫𑀺𑀁, 𑀅𑀢𑀺𑀭𑁂𑀓𑁄𑀢𑀺 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀧𑀺, 𑀅𑀦𑀸𑀧𑀢𑁆𑀢𑀸𑀧𑀤𑀸𑀲𑀼𑀧𑀺;

𑀦𑁆𑀳𑀸𑀦𑀓𑁄𑀝𑁆𑀞𑀓𑀯𑀸𑀧𑀻𑀲𑀼, 𑀦𑁆𑀳𑀸𑀬𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 ¶ , 𑀓𑁆𑀭𑀺𑀬𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑀸𑀫𑀁 𑀢𑀼 𑀘𑀻𑀯𑀭𑀁 𑀤𑀢𑁆𑀯𑀸, 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀢𑀁 𑀧𑀼𑀦;

𑀲𑀓𑀲𑀜𑁆𑀜𑀸𑀬 𑀪𑀺𑀓𑁆𑀔𑀼𑀲𑁆𑀲, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀏𑀓𑀸𑀬𑁂𑀯 𑀧𑀦𑀸𑀧𑀢𑁆𑀢𑀺, 𑀏𑀓𑀫𑀘𑁆𑀙𑀺𑀦𑁆𑀤𑀢𑁄 𑀲𑀺𑀬𑀸;

𑀩𑀳𑀽𑀦𑀺 𑀏𑀓𑀩𑀤𑁆𑀥𑀸𑀦𑀺, 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀢𑀣𑀸.

𑀯𑀺𑀲𑀼𑀁 𑀞𑀺𑀢𑀸𑀦𑀺 𑀏𑀓𑁂𑀓-𑀫𑀸𑀳𑀭𑀸𑀧𑀬𑀢𑁄 𑀧𑀦;

𑀯𑀢𑁆𑀣𑀸𑀦𑀁 𑀕𑀡𑀦𑀸𑀬𑀲𑁆𑀲, 𑀆𑀧𑀢𑁆𑀢𑀺𑀕𑀡𑀦𑀸 𑀲𑀺𑀬𑀸.

‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺, 𑀆𑀳𑀭𑀸’’𑀢𑀺 𑀘 𑀪𑀸𑀲𑀢𑁄;

𑀏𑀓𑁂𑀦 𑀯𑀘𑀦𑁂𑀦𑁂𑀯, 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀩𑀳𑀽.

𑀆𑀡𑀸𑀧𑁂𑀢𑀺 𑀲𑀘𑁂 𑀅𑀜𑁆𑀜𑀁, 𑀪𑀺𑀓𑁆𑀔𑀼𑀁 𑀕𑀡𑁆𑀳𑀸𑀢𑀺 𑀘𑀻𑀯𑀭𑀁;

𑀩𑀳𑀽𑀦𑀺 𑀕𑀡𑁆𑀳𑀢𑀸𑀡𑀢𑁆𑀢𑁄, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺, 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀧𑀦;

𑀏𑀓𑀸𑀬𑀲𑁆𑀲 𑀘 𑀯𑀸𑀘𑀸𑀬, 𑀳𑁄𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀩𑀳𑀽.

‘‘𑀲𑀗𑁆𑀖𑀸𑀝𑀺𑀫𑀼𑀢𑁆𑀢𑀭𑀸𑀲𑀗𑁆𑀕𑀁, 𑀕𑀡𑁆𑀳 𑀕𑀡𑁆𑀳𑀸’’𑀢𑀺 𑀪𑀸𑀲𑀢𑁄;

𑀳𑁄𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬, 𑀆𑀡𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀯𑀺𑀓𑀧𑁆𑀧𑀦𑀼𑀧𑀕𑀁 𑀓𑀺𑀜𑁆𑀘𑀺, 𑀞𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀁 𑀧𑀭𑀁;

𑀅𑀜𑁆𑀜𑀁 𑀧𑀦 𑀧𑀭𑀺𑀓𑁆𑀔𑀸𑀭𑀁, 𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀞𑀧𑁂𑀢𑁆𑀯𑀸 ¶ 𑀉𑀧𑀲𑀫𑁆𑀧𑀦𑁆𑀦𑀁, 𑀅𑀜𑁆𑀜𑁂𑀲𑀁 𑀘𑀻𑀯𑀭𑀸𑀤𑀺𑀓𑀁;

𑀅𑀘𑁆𑀙𑀺𑀦𑁆𑀤𑀢𑁄𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀏𑀯𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂, 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑁄 ¶ 𑀯𑀸 𑀤𑁂𑀢𑀺 𑀲𑀘𑁂 𑀢𑀼𑀝𑁆𑀞𑁄, 𑀤𑀼𑀝𑁆𑀞𑁄 𑀯𑀺𑀲𑁆𑀲𑀸𑀲𑀫𑁂𑀯 𑀯𑀸;

𑀕𑀡𑁆𑀳𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬𑁂𑀢𑁆𑀣, 𑀳𑁄𑀢𑀺 𑀲𑀸 𑀤𑀼𑀓𑁆𑀔𑀯𑁂𑀤𑀦𑀸.

𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀘𑁂 𑀲𑀼𑀢𑁆𑀢𑀁, 𑀙𑀩𑁆𑀩𑀺𑀥𑀁 𑀲𑀸𑀦𑀼𑀮𑁄𑀫𑀺𑀓𑀁;

𑀘𑀻𑀯𑀭𑀁 𑀢𑀦𑁆𑀢𑀯𑀸𑀬𑁂𑀳𑀺, 𑀯𑀸𑀬𑀸𑀧𑁂𑀢𑀺 𑀦 𑀯𑀝𑁆𑀝𑀢𑀺.

𑀲𑀸𑀫𑀁 𑀯𑀺𑀜𑁆𑀜𑀸𑀧𑀺𑀢𑀁 𑀲𑀼𑀢𑁆𑀢𑀁, 𑀅𑀓𑀧𑁆𑀧𑀺𑀬𑀫𑀼𑀤𑀻𑀭𑀺𑀢𑀁;

𑀢𑀦𑁆𑀢𑀯𑀸𑀬𑁄𑀧𑀺 𑀯𑀺𑀜𑁆𑀜𑀢𑁆𑀢𑁄, 𑀢𑀣𑀸 𑀅𑀜𑁆𑀜𑀸𑀢𑀓𑀸𑀤𑀺𑀓𑁄.

𑀯𑀺𑀜𑁆𑀜𑀢𑁆𑀢𑀢𑀦𑁆𑀢𑀯𑀸𑀬𑁂𑀦, 𑀲𑀼𑀢𑁆𑀢𑁂𑀦𑀸𑀓𑀧𑁆𑀧𑀺𑀬𑁂𑀦 𑀘;

𑀘𑀻𑀯𑀭𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲, 𑀦𑀺𑀲𑁆𑀲𑀕𑁆𑀕𑀺𑀬𑀫𑀼𑀤𑀻𑀭𑀺𑀢𑀁.

𑀯𑀺𑀤𑀢𑁆𑀣𑀺𑀫𑀢𑁆𑀢𑁂 𑀤𑀻𑀖𑁂𑀦, 𑀳𑀢𑁆𑀣𑀫𑀢𑁆𑀢𑁂 𑀢𑀺𑀭𑀻𑀬𑀢𑁄;

𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀁, 𑀨𑀮𑀓𑁂 𑀨𑀮𑀓𑁂𑀧𑀺 𑀘.

𑀢𑁂𑀦𑁂𑀯 𑀓𑀧𑁆𑀧𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀢𑀣𑁂𑀯 𑀢𑀦𑁆𑀢𑀯𑀸𑀬𑁂𑀦, 𑀓𑀧𑁆𑀧𑀺𑀬𑁂𑀦 𑀅𑀓𑀧𑁆𑀧𑀺𑀬𑀁.

𑀏𑀓𑀦𑁆𑀢𑀭𑀺𑀓𑀢𑁄 𑀯𑀸𑀧𑀺, 𑀤𑀻𑀖𑀢𑁄 𑀯𑀸 𑀢𑀺𑀭𑀻𑀬𑀢𑁄;

𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑁂𑀯, 𑀯𑀻𑀢𑁂 𑀲𑀼𑀢𑁆𑀢𑁂𑀳𑀺 𑀤𑀼𑀓𑁆𑀓𑀝𑀁.

𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑁂𑀯, 𑀢𑀦𑁆𑀢𑀯𑀸𑀬𑁂𑀳𑀺 𑀯𑁂 𑀓𑀢𑁂;

𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑀼𑀢𑁆𑀢𑀁, 𑀫𑀺𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀘𑁂 𑀅𑀓𑀧𑁆𑀧𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀭𑁂𑀦𑁂𑀯 𑀯𑀺𑀦𑀦𑁆𑀢𑀺 𑀢𑁂;

𑀤𑀲𑁆𑀲𑁂𑀢𑁆𑀯𑀸𑀯 𑀧𑀭𑀺𑀘𑁆𑀙𑁂𑀤𑀁, 𑀅𑀓𑀧𑁆𑀧𑀺𑀬𑀯𑀺𑀢𑁂 𑀧𑀦.

𑀧𑀸𑀘𑀺𑀢𑁆𑀢𑀺𑀬𑀁 𑀧𑀫𑀸𑀡𑀲𑁆𑀫𑀺𑀁, 𑀢𑀤𑀽𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀇𑀢𑀭𑁂𑀦 𑀯𑀺𑀢𑁂 𑀯𑀢𑁆𑀣𑁂, 𑀉𑀪𑀬𑀢𑁆𑀣𑁂𑀯 𑀤𑀼𑀓𑁆𑀓𑀝𑀁.

𑀤𑁆𑀯𑁂𑀧𑀺 ¶ ¶ 𑀯𑁂𑀫𑀁 𑀕𑀳𑁂𑀢𑁆𑀯𑀸 𑀯𑀸, 𑀏𑀓𑀢𑁄 𑀯𑀸 𑀯𑀺𑀦𑀦𑁆𑀢𑀺 𑀘𑁂;

𑀨𑀮𑀓𑁂 𑀨𑀮𑀓𑁂 𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀏𑀢𑁂𑀦𑁂𑀯 𑀉𑀧𑀸𑀬𑁂𑀦, 𑀪𑁂𑀤𑁂 𑀲𑀩𑁆𑀩𑀢𑁆𑀣 𑀲𑀸𑀥𑀼𑀓𑀁;

𑀆𑀧𑀢𑁆𑀢𑀺𑀪𑁂𑀤𑁄 𑀯𑀺𑀜𑁆𑀜𑁂𑀬𑁆𑀬𑁄, 𑀯𑀺𑀜𑁆𑀜𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸.

𑀓𑀧𑁆𑀧𑀺𑀬𑁄 𑀢𑀦𑁆𑀢𑀯𑀸𑀬𑁄𑀧𑀺, 𑀲𑀘𑁂 𑀲𑀼𑀢𑁆𑀢𑀫𑁆𑀧𑀺 𑀓𑀧𑁆𑀧𑀺𑀬𑀁;

𑀘𑀻𑀯𑀭𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀅𑀦𑀸𑀧𑀢𑁆𑀢𑀺 𑀧𑀭𑀺𑀲𑁆𑀲𑀸𑀯𑁂, 𑀆𑀬𑁄𑀕𑁂 𑀅𑀁𑀲𑀩𑀤𑁆𑀥𑀓𑁂;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀅𑀧𑁆𑀧𑀯𑀸𑀭𑀺𑀢𑀜𑀸𑀢𑀻𑀦𑀁, 𑀢𑀦𑁆𑀢𑀯𑀸𑀬𑁂 𑀲𑀫𑁂𑀘𑁆𑀘 𑀘𑁂;

𑀯𑀺𑀓𑀧𑁆𑀧𑀁 𑀘𑀻𑀯𑀭𑁂 𑀪𑀺𑀓𑁆𑀔𑀼, 𑀆𑀧𑀚𑁆𑀚𑀢𑀺 𑀦 𑀯𑀝𑁆𑀝𑀢𑀺.

𑀤𑀻𑀖𑀸𑀬𑀢𑀧𑁆𑀧𑀺𑀢𑀢𑁆𑀣𑀸𑀬, 𑀲𑀼𑀢𑁆𑀢𑀯𑀟𑁆𑀠𑀦𑀓𑁂 𑀓𑀢𑁂;

𑀪𑀺𑀓𑁆𑀔𑀼 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺𑀁, 𑀆𑀧𑀚𑁆𑀚𑀢𑀺 𑀦 𑀲𑀁𑀲𑀬𑁄.

𑀪𑀺𑀓𑁆𑀔𑀼𑀦𑁄 𑀜𑀸𑀢𑀓𑀸𑀤𑀻𑀦𑀁, 𑀢𑀦𑁆𑀢𑀯𑀸𑀬𑁂𑀲𑀼 𑀅𑀢𑁆𑀢𑀦𑁄;

𑀥𑀦𑁂𑀦𑀜𑁆𑀜𑀲𑁆𑀲 𑀘𑀢𑁆𑀣𑀸𑀬, 𑀅𑀦𑀸𑀧𑀢𑁆𑀢𑀺𑀁 𑀯𑀺𑀦𑀺𑀤𑁆𑀤𑀺𑀲𑁂.

𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀅𑀧𑁆𑀧𑀕𑁆𑀖𑀁, 𑀫𑀳𑀕𑁆𑀖𑀁 𑀓𑀢𑁆𑀢𑀼𑀓𑀸𑀫𑀺𑀦𑁄;

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀲𑁂𑀲𑀁 𑀯𑀼𑀢𑁆𑀢𑀫𑀦𑀦𑁆𑀢𑀭𑁂.

𑀯𑀲𑁆𑀲𑀁𑀯𑀼𑀝𑁆𑀞𑁂 𑀬𑀫𑀼𑀤𑁆𑀤𑀺𑀲𑁆𑀲, 𑀪𑀺𑀓𑁆𑀔𑀽 𑀤𑀻𑀬𑀢𑀺 𑀘𑀻𑀯𑀭𑀁;

𑀧𑀯𑀸𑀭𑀡𑀸𑀬 𑀧𑀼𑀩𑁆𑀩𑁂𑀯, 𑀢𑀁 𑀳𑁄𑀢𑀘𑁆𑀘𑁂𑀓𑀘𑀻𑀯𑀭𑀁.

𑀧𑀼𑀭𑁂 𑀧𑀯𑀸𑀭𑀡𑀸𑀬𑁂𑀯, 𑀪𑀸𑀚𑁂𑀢𑁆𑀯𑀸 𑀬𑀤𑀺 𑀕𑀬𑁆𑀳𑀢𑀺;

𑀯𑀲𑁆𑀲𑀘𑁆𑀙𑁂𑀤𑁄 𑀦 𑀓𑀸𑀢𑀩𑁆𑀩𑁄, 𑀲𑀗𑁆𑀖𑀺𑀓𑀁 𑀢𑀁 𑀓𑀭𑁄𑀢𑀺 𑀘𑁂.

𑀅𑀦𑀸𑀧𑀢𑁆𑀢𑀺 ¶ 𑀅𑀥𑀺𑀝𑁆𑀞𑁂𑀢𑀺, 𑀅𑀦𑁆𑀢𑁄𑀲𑀫𑀬𑀫𑁂𑀯 𑀢𑀁;

𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀺𑀓𑀧𑁆𑀧𑁂𑀢𑀺, 𑀯𑀺𑀦𑀲𑁆𑀲𑀢𑀺 𑀘 𑀟𑀬𑁆𑀳𑀢𑀺.

𑀢𑀲𑁆𑀲𑀘𑁆𑀘𑀸𑀬𑀺𑀓𑀯𑀢𑁆𑀣𑀲𑁆𑀲, 𑀓𑀣𑀺𑀦𑁂 𑀢𑀼 𑀅𑀦𑀢𑁆𑀣𑀢𑁂;

𑀧𑀭𑀺𑀳𑀸𑀭𑁂𑀓𑀫𑀸𑀲𑁄𑀯, 𑀤𑀲𑀸𑀳𑀧𑀭𑀫𑁄 𑀫𑀢𑁄.

𑀅𑀢𑁆𑀣𑀢𑁂 ¶ 𑀓𑀣𑀺𑀦𑁂 𑀢𑀲𑁆𑀲, 𑀧𑀜𑁆𑀘 𑀫𑀸𑀲𑀸 𑀧𑀓𑀸𑀲𑀺𑀢𑀸;

𑀧𑀭𑀺𑀳𑀸𑀭𑁄 𑀫𑀼𑀦𑀺𑀦𑁆𑀤𑁂𑀦, 𑀤𑀲𑀸𑀳𑀧𑀭𑀫𑀸 𑀧𑀦.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸;

𑀧𑀞𑀫𑁂𑀦𑀸𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀯𑀲𑀺𑀢𑁆𑀯𑀸 𑀧𑀦 𑀘𑁂 𑀪𑀺𑀓𑁆𑀔𑀼, 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁;

𑀞𑀧𑁂𑀢𑁆𑀯𑀸 𑀘𑀻𑀯𑀭𑀁 𑀕𑀸𑀫𑁂, 𑀧𑀘𑁆𑀘𑀬𑁂 𑀲𑀢𑀺 𑀢𑀸𑀤𑀺𑀲𑁂.

𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦, 𑀯𑀲𑀺𑀢𑀩𑁆𑀩𑀁 𑀯𑀺𑀦𑀸 𑀢𑀢𑁄;

𑀉𑀢𑁆𑀢𑀭𑀺𑀁 𑀯𑀲𑀢𑁄 𑀤𑁄𑀲𑁄, 𑀯𑀺𑀦𑀸 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀢𑀺𑀁.

𑀓𑀢𑁆𑀢𑀺𑀓𑁂𑀬𑁂𑀯 𑀫𑀸𑀲𑀲𑁆𑀫𑀺𑀁, 𑀧𑀞𑀫𑀸𑀬 𑀧𑀯𑀸𑀭𑀺𑀢𑁄;

𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦, 𑀬𑀼𑀢𑁆𑀢𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂.

𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀯, 𑀞𑀧𑁂𑀢𑀼𑀁 𑀏𑀓𑀘𑀻𑀯𑀭𑀁;

𑀘𑀢𑀼𑀭𑀗𑁆𑀕𑀲𑀫𑀸𑀬𑁄𑀕𑁂, 𑀮𑀪𑀢𑀻𑀢𑀺 𑀧𑀓𑀸𑀲𑀺𑀢𑁄.

𑀬𑀁 𑀕𑀸𑀫𑀁 𑀕𑁄𑀘𑀭𑀁 𑀓𑀢𑁆𑀯𑀸, 𑀪𑀺𑀓𑁆𑀔𑀼 𑀆𑀭𑀜𑁆𑀜𑀓𑁂 𑀯𑀲𑁂;

𑀢𑀲𑁆𑀫𑀺𑀁 𑀕𑀸𑀫𑁂 𑀞𑀧𑁂𑀢𑀼𑀁 𑀢𑀁, 𑀫𑀸𑀲𑀫𑁂𑀓𑀁 𑀢𑀼 𑀯𑀝𑁆𑀝𑀢𑀺.

𑀅𑀜𑁆𑀜𑀢𑁆𑀣𑁂𑀯 𑀯𑀲𑀦𑁆𑀢𑀲𑁆𑀲, 𑀙𑀸𑀭𑀢𑁆𑀢𑀧𑀭𑀫𑀁 𑀫𑀢𑀁;

𑀅𑀬𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀧𑀓𑀸𑀲𑀺𑀢𑁄.

𑀲𑁂𑀦𑀸𑀲𑀦𑀫𑀣𑀸𑀕𑀦𑁆𑀢𑁆𑀯𑀸, 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀧𑀦;

𑀉𑀝𑁆𑀞𑀸𑀧𑁂𑀢𑀼𑀁 𑀯𑀺𑀤𑀽𑀭𑀢𑁆𑀢𑀸, 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀕𑀸𑀫𑀲𑀻𑀫𑀫𑁆𑀧𑀺 ¶ 𑀯𑀸 𑀕𑀦𑁆𑀢𑁆𑀯𑀸, 𑀯𑀲𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺;

𑀘𑀻𑀯𑀭𑀲𑁆𑀲 𑀧𑀯𑀢𑁆𑀢𑀺𑀁 𑀲𑁄, 𑀜𑀢𑁆𑀯𑀸 𑀕𑀘𑁆𑀙𑀢𑀺 𑀯𑀝𑁆𑀝𑀢𑀺.

𑀏𑀯𑀜𑁆𑀘𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑁄, 𑀜𑀢𑁆𑀯𑀸 𑀢𑀢𑁆𑀣𑁂𑀯 𑀧𑀡𑁆𑀟𑀺𑀢𑁄;

𑀔𑀺𑀧𑁆𑀧𑀁 𑀧𑀘𑁆𑀘𑀼𑀤𑁆𑀥𑀭𑁂 𑀞𑀸𑀦𑁂, 𑀅𑀢𑀺𑀭𑁂𑀓𑁂 𑀳𑀺 𑀢𑀺𑀝𑁆𑀞𑀢𑀺.

𑀯𑀺𑀲𑁆𑀲𑀚𑁆𑀚𑁂𑀢𑀺 𑀅𑀦𑀸𑀧𑀢𑁆𑀢𑀺, 𑀯𑀺𑀦𑀲𑁆𑀲𑀢𑀺 𑀘 𑀟𑀬𑁆𑀳𑀢𑀺;

𑀅𑀘𑁆𑀙𑀺𑀦𑁆𑀤𑀦𑁂 𑀘 𑀯𑀺𑀲𑁆𑀲𑀸𑀲𑁂, 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀧𑀺 𑀯𑀸.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸;

𑀤𑀼𑀢𑀺𑀬𑁂𑀦, 𑀫𑀼𑀦𑀺𑀦𑁆𑀤𑁂𑀦, 𑀢𑁂𑀦 𑀲𑀸𑀲𑀗𑁆𑀓𑀲𑀫𑁆𑀫𑀢𑁂.

𑀚𑀸𑀦𑀁 𑀧𑀭𑀺𑀡𑀢𑀁 𑀮𑀸𑀪𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑁄 𑀧𑀦;

𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀲𑀘𑁂 ‘‘𑀅𑀜𑁆𑀜𑀲𑁆𑀲 𑀤𑁂𑀳𑀻’’𑀢𑀺, 𑀧𑀭𑀺𑀡𑀸𑀫𑁂𑀢𑀺 𑀪𑀺𑀓𑁆𑀔𑀼𑀦𑁄;

𑀲𑀼𑀤𑁆𑀥𑀺𑀓𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀘𑀻𑀯𑀭𑀁 𑀯𑀸 𑀧𑀭𑀲𑁆𑀲𑁂𑀓-𑀫𑁂𑀓𑀁 𑀯𑀸 𑀧𑀦 𑀅𑀢𑁆𑀢𑀦𑁄;

𑀧𑀭𑀺𑀡𑀸𑀫𑁂𑀬𑁆𑀬 𑀘𑁂 𑀲𑀤𑁆𑀥𑀺𑀁, 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀁.

𑀲𑀗𑁆𑀖𑀲𑁆𑀲 𑀧𑀦 𑀬𑀁 𑀤𑀺𑀦𑁆𑀦𑀁, 𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺;

𑀲𑀗𑁆𑀖𑀲𑁆𑀲𑁂𑀯 𑀧𑀤𑀸𑀢𑀩𑁆𑀩𑁄, 𑀅𑀤𑁂𑀦𑁆𑀢𑀲𑁆𑀲 𑀧𑀭𑀸𑀚𑀬𑁄.

𑀘𑁂𑀢𑀺𑀬𑀲𑁆𑀲 𑀘 𑀲𑀗𑁆𑀖𑀲𑁆𑀲, 𑀧𑀼𑀕𑁆𑀕𑀮𑀲𑁆𑀲𑀧𑀺 𑀯𑀸 𑀧𑀦;

𑀅𑀜𑁆𑀜𑀲𑁆𑀲 𑀧𑁄𑀡𑀫𑀜𑁆𑀜𑀲𑁆𑀲, 𑀧𑀭𑀺𑀡𑀸𑀫𑁂𑀬𑁆𑀬 𑀤𑀼𑀓𑁆𑀓𑀝𑀁.

𑀬𑁄 𑀧𑀦𑀦𑁆𑀢𑀫𑀲𑁄 𑀪𑀺𑀓𑁆𑀔𑀼, 𑀲𑀼𑀦𑀔𑀲𑁆𑀲𑀧𑀺 𑀑𑀡𑀢𑀁;

𑀲𑀼𑀦𑀔𑀲𑁆𑀲 𑀧𑀦𑀜𑁆𑀜𑀲𑁆𑀲, 𑀧𑀭𑀺𑀡𑀸𑀫𑁂𑀬𑁆𑀬 𑀤𑀼𑀓𑁆𑀓𑀝𑀁.

𑀇𑀤𑀜𑁆𑀳𑀺 ¶ 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀓𑁆𑀭𑀺𑀬𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀓𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀢𑁂𑀦𑁂𑀓𑀯𑀢𑁆𑀣𑀼𑀕𑁆𑀕𑀢𑀭𑀗𑁆𑀕𑀫𑀸𑀮𑀁;

𑀲𑀻𑀮𑀦𑁆𑀢𑀫𑀸𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀕𑀸𑀳𑀁;

𑀢𑀭𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀫𑀳𑀸𑀲𑀫𑀼𑀤𑁆𑀤𑀁;

𑀯𑀺𑀦𑀺𑀘𑁆𑀙𑀬𑀁 𑀬𑁂 𑀧𑀦𑀺𑀫𑀁 𑀢𑀭𑀦𑁆𑀢𑀺.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 ¶ , 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁;

𑀤𑀯𑀸 𑀭𑀯𑀸 𑀪𑀡𑀦𑁆𑀢𑀲𑁆𑀲, 𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀅𑀜𑁆𑀜𑀢𑁆𑀣𑀸𑀧𑀢𑁆𑀢𑀺𑀬𑁄 𑀧𑀜𑁆𑀘, 𑀫𑀼𑀲𑀸𑀯𑀸𑀤𑀲𑁆𑀲 𑀓𑀸𑀭𑀡𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀓𑀸.

𑀚𑀸𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑁂𑀲𑀼, 𑀤𑀲𑀲𑁆𑀯𑀓𑁆𑀓𑁄𑀲𑀯𑀢𑁆𑀣𑀼𑀲𑀼;

𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦, 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸.

𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬, 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀧𑀦;

𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀁, 𑀪𑀺𑀓𑁆𑀔𑀼𑀫𑀸𑀧𑀦𑁆𑀦𑀫𑁂𑀯 𑀯𑀸.

𑀅𑀜𑁆𑀜𑀢𑁆𑀭𑀜𑁆𑀜𑀸𑀧𑀤𑁂𑀲𑁂𑀦, 𑀑𑀫𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸.

𑀢𑁂𑀳𑁂𑀯𑀜𑁆𑀜𑀸𑀧𑀤𑁂𑀲𑁂𑀦 ¶ , 𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀳𑀺𑀧𑀺;

𑀲𑀩𑁆𑀩𑀢𑁆𑀣𑀸𑀦𑀼𑀧𑀲𑀫𑁆𑀧𑀦𑁆𑀦𑀁, 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀦𑀓𑁆𑀓𑁄𑀲𑀺𑀢𑀼𑀓𑀸𑀫𑀲𑁆𑀲, 𑀓𑁂𑀯𑀮𑀁 𑀤𑀯𑀓𑀫𑁆𑀬𑀢𑀸;

𑀯𑀤𑀢𑁄 𑀧𑀦 𑀲𑀩𑁆𑀩𑀢𑁆𑀣, 𑀤𑀼𑀩𑁆𑀪𑀸𑀲𑀺𑀢𑀫𑀼𑀤𑀻𑀭𑀺𑀢𑀁.

𑀧𑀯𑀺𑀝𑁆𑀞𑀸𑀦𑀼𑀧𑀲𑀫𑁆𑀧𑀦𑁆𑀦-𑀝𑁆𑀞𑀸𑀦𑁂 𑀇𑀥 𑀘 𑀪𑀺𑀓𑁆𑀔𑀼𑀦𑀻;

𑀅𑀦𑀸𑀧𑀢𑁆𑀢𑀺 𑀧𑀼𑀭𑀓𑁆𑀔𑀢𑁆𑀯𑀸, 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀦𑀺𑀁.

𑀯𑀤𑀢𑁄 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀦𑀦𑁆𑀢𑀭𑀲𑀫𑀸 𑀯𑀼𑀢𑁆𑀢𑀸, 𑀤𑀼𑀓𑁆𑀔𑀸 𑀳𑁄𑀢𑁂𑀢𑁆𑀣 𑀯𑁂𑀤𑀦𑀸.

𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂, 𑀤𑀼𑀯𑀺𑀥𑀸𑀓𑀸𑀭𑀢𑁄 𑀲𑀺𑀬𑀸;

𑀅𑀢𑁆𑀢𑀦𑁄 𑀧𑀺𑀬𑀓𑀸𑀫𑀲𑁆𑀲, 𑀧𑀭𑀪𑁂𑀤𑀢𑁆𑀣𑀺𑀦𑁄𑀧𑀺 𑀯𑀸.

𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀧𑀭𑀺𑀬𑀸𑀬-𑀧𑀸𑀴𑀺𑀫𑀼𑀢𑁆𑀢𑀦𑀬𑁂𑀳𑀺 𑀘;

𑀯𑀘𑀦𑀲𑁆𑀲𑀼𑀧𑀲𑀁𑀳𑀸𑀭𑁂, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀢𑀣𑀸 ¶ 𑀅𑀦𑀼𑀧𑀲𑀫𑁆𑀧𑀦𑁆𑀦-𑀅𑀓𑁆𑀓𑁄𑀲𑀁 𑀳𑀭𑀢𑁄𑀧𑀺 𑀘;

𑀞𑀺𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦-𑀝𑁆𑀞𑀸𑀦𑁂 𑀇𑀥 𑀘 𑀪𑀺𑀓𑁆𑀔𑀼𑀦𑀻.

𑀦 𑀘𑁂𑀯 𑀧𑀺𑀬𑀓𑀸𑀫𑀲𑁆𑀲, 𑀦 𑀘 𑀪𑁂𑀤𑀢𑁆𑀣𑀺𑀦𑁄𑀧𑀺 𑀯𑀸;

𑀧𑀸𑀧𑀸𑀦𑀁 𑀕𑀭𑀳𑀢𑁆𑀣𑀸𑀬, 𑀯𑀤𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀤𑀺𑀦𑁆𑀦𑀸𑀤𑀸𑀦𑀲𑀸𑀤𑀺𑀲𑀸.

𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀁 𑀪𑀺𑀓𑁆𑀔𑀼𑀁, 𑀅𑀜𑁆𑀜𑁂𑀦 𑀧𑀺𑀝𑀓𑀢𑁆𑀢𑀬𑀁;

𑀥𑀫𑁆𑀫𑀁 𑀲𑀳 𑀪𑀡𑀦𑁆𑀢𑀲𑁆𑀲, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀭𑀸𑀚𑁄𑀯𑀸𑀤𑀸𑀤𑀬𑁄 ¶ 𑀯𑀼𑀢𑁆𑀢𑀸, 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀲𑀼;

𑀅𑀦𑀸𑀭𑀼𑀴𑁆𑀳𑁂𑀲𑀼 𑀲𑀗𑁆𑀕𑀻𑀢𑀺𑀁, 𑀆𑀧𑀢𑁆𑀢𑀺𑀚𑀦𑀓𑀸𑀢𑀺 𑀳𑀺.

𑀤𑀼𑀓𑁆𑀓𑀝𑀁 𑀳𑁄𑀢𑀺 𑀪𑀺𑀓𑁆𑀔𑀼𑀲𑁆𑀫𑀺𑀁, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀘;

𑀪𑀺𑀓𑁆𑀔𑀼𑀲𑁆𑀲𑀸𑀦𑀼𑀧𑀲𑀫𑁆𑀧𑀦𑁆𑀦-𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸.

𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑀺, 𑀲𑀚𑁆𑀛𑀸𑀬𑀁 𑀯𑀸 𑀓𑀭𑁄𑀢𑀺 𑀬𑁄;

𑀪𑀡𑀦𑁆𑀢𑀁 𑀧𑀕𑀼𑀡𑀁 𑀕𑀦𑁆𑀣𑀁, 𑀑𑀧𑀸𑀢𑁂𑀢𑀺 𑀘 𑀬𑁄 𑀧𑀦.

𑀢𑀲𑁆𑀲 𑀘𑀸𑀦𑀼𑀧𑀲𑀫𑁆𑀧𑀦𑁆𑀦-𑀲𑀦𑁆𑀢𑀺𑀓𑁂 𑀕𑀡𑁆𑀳𑀢𑁄𑀧𑀺 𑀘;

𑀉𑀤𑁆𑀤𑁂𑀲𑀁 𑀢𑀼 𑀅𑀦𑀸𑀧𑀢𑁆𑀢𑀺, 𑀪𑀡𑀦𑁂 𑀢𑁂𑀦 𑀏𑀓𑀢𑁄.

𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀯𑀸𑀘𑀸𑀘𑀺𑀢𑁆𑀢𑀤𑁆𑀯𑀬𑀸𑀧𑀺 𑀘;

𑀲𑀫𑀼𑀝𑁆𑀞𑀸𑀦𑀫𑀺𑀤𑀁 𑀯𑀼𑀢𑁆𑀢𑀁, 𑀧𑀤𑀲𑁄𑀥𑀫𑁆𑀫𑀲𑀜𑁆𑀜𑀺𑀢𑀁.

𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂, 𑀦𑀺𑀧𑀚𑁆𑀚𑁂𑀬𑁆𑀬 𑀲𑀘𑁂 𑀧𑀦;

𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑁂, 𑀙𑀦𑁆𑀦𑁂 𑀲𑁂𑀦𑀸𑀲𑀦𑁂𑀧𑀺 𑀯𑀸.

𑀢𑀺𑀲𑁆𑀲𑀦𑁆𑀦𑀁 𑀧𑀦 𑀭𑀢𑁆𑀢𑀻𑀦𑀁, 𑀉𑀤𑁆𑀥𑀁 𑀬𑁄 𑀧𑀦 𑀭𑀢𑁆𑀢𑀺𑀬𑀁;

𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂𑀦, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀯𑀢𑁆𑀣𑀼𑀁 𑀬𑀁 𑀧𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀫𑁂𑀣𑀼𑀦𑀲𑁆𑀲 𑀧𑀳𑁄𑀦𑀓𑀁;

𑀆𑀧𑀢𑁆𑀬𑀦𑁆𑀢𑀫𑀲𑁄 𑀢𑁂𑀦, 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺.

𑀦𑀺𑀧𑀦𑁆𑀦𑁂 ¶ 𑀉𑀧𑀲𑀫𑁆𑀧𑀦𑁆𑀦𑁂, 𑀇𑀢𑀭𑁄 𑀘𑁂 𑀦𑀺𑀧𑀚𑁆𑀚𑀢𑀺;

𑀇𑀢𑀭𑀲𑁆𑀫𑀺𑀁 𑀦𑀺𑀧𑀦𑁆𑀦𑁂 𑀯𑀸, 𑀲𑀘𑁂 𑀪𑀺𑀓𑁆𑀔𑀼 𑀦𑀺𑀧𑀚𑁆𑀚𑀢𑀺.

𑀉𑀪𑀺𑀦𑁆𑀦𑀁 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸, 𑀦𑀺𑀧𑀚𑁆𑀚𑀦𑀧𑀬𑁄𑀕𑀢𑁄;

𑀆𑀧𑀢𑁆𑀢𑀸𑀦𑀼𑀧𑀲𑀫𑁆𑀧𑀦𑁆𑀦-𑀕𑀡𑀦𑀸𑀬𑀧𑀺 𑀯𑀸 𑀲𑀺𑀬𑀸.

𑀲𑀘𑁂 𑀧𑀺𑀥𑀸𑀬 𑀯𑀸 𑀕𑀩𑁆𑀪𑀁, 𑀦𑀺𑀧𑀚𑁆𑀚𑀢𑀺𑀧𑀺𑀥𑀸𑀬 𑀯𑀸;

𑀆𑀧𑀢𑁆𑀢𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀘𑀢𑀼𑀢𑁆𑀣𑀤𑀺𑀯𑀲𑁂 𑀲𑀺𑀬𑀸.

𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 ¶ , 𑀧𑀸𑀓𑀸𑀭𑀘𑀬𑀦𑀸𑀤𑀺𑀦𑀸;

𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀢𑀁 𑀲𑀩𑁆𑀩𑀁, 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀪𑀺𑀓𑁆𑀔𑀼𑀲𑁆𑀲𑀦𑁆𑀢𑀫𑀲𑁄 𑀤𑀼𑀲𑁆𑀲-𑀓𑀼𑀝𑀺𑀬𑀁 𑀯𑀲𑀢𑁄𑀧𑀺 𑀘;

𑀲𑀳𑀲𑁂𑀬𑁆𑀬𑀸𑀬 𑀆𑀧𑀢𑁆𑀢𑀺, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑁄.

𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦-𑀬𑁂𑀪𑀼𑀬𑁆𑀬𑀸𑀤𑀺𑀧𑁆𑀧𑀪𑁂𑀤𑀢𑁄;

𑀲𑀢𑁆𑀢 𑀧𑀸𑀘𑀺𑀢𑁆𑀢𑀺𑀬𑀸𑀦𑁂𑀢𑁆𑀣, 𑀤𑀝𑁆𑀞𑀩𑁆𑀩𑀸𑀦𑀺 𑀲𑀼𑀩𑀼𑀤𑁆𑀥𑀺𑀦𑀸.

𑀅𑀟𑁆𑀠𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁;

𑀲𑀩𑁆𑀩𑀘𑀽𑀴𑀧𑀭𑀺𑀘𑁆𑀙𑀦𑁆𑀦-𑀙𑀦𑁆𑀦𑀸𑀤𑀻𑀳𑀺𑀧𑀺 𑀧𑀜𑁆𑀘𑀥𑀸.

𑀅𑀦𑀸𑀧𑀢𑁆𑀢𑀺 𑀤𑀺𑀭𑀢𑁆𑀢𑀁 𑀯𑀸, 𑀢𑀺𑀭𑀢𑁆𑀢𑀁 𑀯𑀲𑀢𑁄 𑀲𑀳;

𑀅𑀭𑀼𑀡𑀲𑁆𑀲 𑀧𑀼𑀭𑁂𑀬𑁂𑀯, 𑀢𑀢𑀺𑀬𑀸𑀬 𑀘 𑀭𑀢𑁆𑀢𑀺𑀬𑀸.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲, 𑀧𑀼𑀦 𑀲𑀤𑁆𑀥𑀺𑀜𑁆𑀘 𑀪𑀺𑀓𑁆𑀔𑀼𑀦𑁄;

𑀢𑀣𑀸 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦-𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀺𑀓𑁂𑀧𑀺 𑀘.

𑀏𑀯𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂, 𑀦𑀺𑀧𑀦𑁆𑀦𑁂𑀧𑀺 𑀦𑀺𑀲𑀻𑀤𑀢𑁄;

𑀲𑁂𑀲𑀸 𑀏𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀲𑀘𑁂 𑀢𑀤𑀳𑀼𑀚𑀸𑀢𑀸𑀬, 𑀅𑀧𑀺 𑀬𑁄 𑀫𑀸𑀦𑀼𑀲𑀺𑀢𑁆𑀣𑀺𑀬𑀸;

𑀲𑀳𑀲𑁂𑀬𑁆𑀬𑀁 𑀧𑀓𑀧𑁆𑀧𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀤𑀺𑀲𑁆𑀲𑀫𑀸𑀦𑀓𑀭𑀽𑀧𑀸𑀬, 𑀬𑀓𑁆𑀔𑀺𑀬𑀸 𑀧𑁂𑀢𑀺𑀬𑀸 𑀲𑀳;

𑀭𑀢𑁆𑀢𑀺𑀬𑀁 𑀬𑁄 𑀦𑀺𑀧𑀚𑁆𑀚𑁂𑀬𑁆𑀬, 𑀤𑁂𑀯𑀺𑀬𑀸 𑀧𑀡𑁆𑀟𑀓𑁂𑀦 𑀯𑀸.

𑀫𑁂𑀣𑀼𑀦𑀯𑀢𑁆𑀣𑀼𑀪𑀽𑀢𑀸𑀬, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸;

𑀯𑀢𑁆𑀣𑀽𑀦𑀁 𑀕𑀡𑀦𑀸𑀬𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀇𑀥𑁂𑀓𑀤𑀺𑀯𑀲𑁂𑀦𑁂𑀯 ¶ , 𑀆𑀧𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀲𑁂𑀲𑁄 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢-𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀉𑀤𑁆𑀥𑀁 ¶ 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺, 𑀯𑀺𑀜𑁆𑀜𑀼𑀁 𑀧𑀼𑀭𑀺𑀲𑀯𑀺𑀕𑁆𑀕𑀳𑀁;

𑀯𑀺𑀦𑀸 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀇𑀢𑁆𑀣𑀺𑀬𑀸.

𑀕𑀸𑀣𑀸𑀧𑀸𑀤𑁄 𑀧𑀦𑁂𑀓𑁄𑀯, 𑀏𑀓𑀯𑀸𑀘𑀸𑀢𑀺 𑀲𑀜𑁆𑀜𑀺𑀢𑁄;

𑀧𑀤𑀲𑁄𑀥𑀫𑁆𑀫𑀁 𑀦𑀺𑀤𑁆𑀤𑀺𑀝𑁆𑀞𑀁, 𑀥𑀫𑁆𑀫𑀫𑀝𑁆𑀞𑀓𑀣𑀫𑁆𑀧𑀺 𑀯𑀸.

𑀙𑀦𑁆𑀦𑀁 𑀉𑀧𑀭𑀺 𑀯𑀸𑀘𑀸𑀦𑀁, 𑀧𑀤𑀸𑀤𑀻𑀦𑀁 𑀯𑀲𑀸 𑀧𑀦;

𑀤𑁂𑀲𑁂𑀦𑁆𑀢𑀲𑁆𑀲 𑀲𑀺𑀬𑀸𑀧𑀢𑁆𑀢𑀺, 𑀧𑀤𑀸𑀤𑀺𑀕𑀡𑀦𑀸𑀬 𑀘.

𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀞𑀺𑀢𑁂𑀦𑀸𑀧𑀺, 𑀲𑀤𑁆𑀥𑀺𑀁 𑀧𑀼𑀭𑀺𑀲𑀯𑀺𑀕𑁆𑀕𑀳𑀁;

𑀬𑀓𑁆𑀔𑁂𑀦𑀧𑀺 𑀘 𑀧𑁂𑀢𑁂𑀦, 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺.

𑀞𑀺𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲, 𑀥𑀫𑁆𑀫𑀁 𑀬𑁄 𑀧𑀦 𑀪𑀸𑀲𑀢𑀺;

𑀙𑀦𑁆𑀦𑀁 𑀉𑀧𑀭𑀺 𑀯𑀸𑀘𑀸𑀦𑀁, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀧𑀼𑀭𑀺𑀲𑁂 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲, 𑀯𑀺𑀫𑀢𑀺𑀲𑁆𑀲 𑀘 𑀧𑀡𑁆𑀟𑀓𑁂;

𑀉𑀢𑁆𑀢𑀭𑀺 𑀙𑀳𑀺 𑀯𑀸𑀘𑀸𑀳𑀺, 𑀯𑀤𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀇𑀢𑁆𑀣𑀺𑀭𑀽𑀧𑀁 𑀕𑀳𑁂𑀢𑁆𑀯𑀸𑀦, 𑀞𑀺𑀢𑀸𑀦𑀁 𑀪𑀸𑀲𑀢𑁄𑀧𑀺 𑀘;

𑀤𑀼𑀓𑁆𑀓𑀝𑀁 𑀬𑀓𑁆𑀔𑀺𑀧𑁂𑀢𑀻𑀦𑀁, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸.

𑀧𑀼𑀭𑀺𑀲𑁂 𑀲𑀢𑀺 𑀯𑀺𑀜𑁆𑀜𑀼𑀲𑁆𑀫𑀺𑀁, 𑀲𑀬𑀁 𑀉𑀝𑁆𑀞𑀸𑀬 𑀯𑀸 𑀧𑀼𑀦;

𑀤𑁂𑀲𑁂𑀦𑁆𑀢𑀲𑁆𑀲 𑀦𑀺𑀲𑀻𑀤𑀺𑀢𑁆𑀯𑀸, 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀢𑀣𑀸.

𑀅𑀜𑁆𑀜𑀺𑀲𑁆𑀲𑀸 𑀧𑀼𑀦 𑀅𑀜𑁆𑀜𑀺𑀲𑁆𑀲𑀸, 𑀇𑀢𑁆𑀣𑀺𑀬𑀸 𑀪𑀡𑀢𑁄𑀧𑀺 𑀘;

𑀙𑀳𑀺 𑀧𑀜𑁆𑀘𑀳𑀺 𑀯𑀸𑀘𑀸𑀳𑀺, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀧𑀤𑀲𑁄𑀥𑀫𑁆𑀫𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀫𑀢𑀸;

𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺, 𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀧𑀦.

𑀫𑀳𑀕𑁆𑀕𑀢𑀁 𑀧𑀡𑀻𑀢𑀁 𑀯𑀸, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀁 𑀪𑀺𑀓𑁆𑀔𑀼𑀁, 𑀪𑀽𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀦𑁄 ¶ ¶ 𑀘𑁂 𑀚𑀸𑀦𑀸𑀢𑀺 𑀲𑁄 𑀯𑀼𑀢𑁆𑀢𑀁, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀧𑀭𑀺𑀬𑀸𑀬𑀯𑀘𑀦𑁂 𑀘𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀺 𑀢𑀣𑀸𑀭𑀽𑀧𑁂, 𑀓𑀸𑀭𑀡𑁂 𑀲𑀢𑀺 𑀪𑀸𑀲𑀢𑁄;

𑀲𑀩𑁆𑀩𑀲𑁆𑀲𑀧𑀺 𑀘 𑀲𑀻𑀮𑀸𑀤𑀺𑀁, 𑀯𑀤𑀢𑁄 𑀆𑀤𑀺𑀓𑀫𑁆𑀫𑀺𑀦𑁄.

𑀉𑀫𑁆𑀫𑀢𑁆𑀢𑀓𑀧𑀤𑀁 𑀏𑀢𑁆𑀣, 𑀦 𑀯𑀼𑀢𑁆𑀢𑀁 𑀢𑀤𑀲𑀫𑁆𑀪𑀯𑀸;

𑀪𑀽𑀢𑀸𑀭𑁄𑀘𑀦𑀓𑀁 𑀦𑀸𑀫, 𑀲𑀫𑀼𑀝𑁆𑀞𑀸𑀦𑀫𑀺𑀤𑀁 𑀫𑀢𑀁.

𑀓𑀸𑀬𑀢𑁄 𑀯𑀸𑀘𑀢𑁄 𑀓𑀸𑀬-𑀯𑀸𑀘𑀢𑁄 𑀘 𑀢𑀺𑀥𑀸 𑀲𑀺𑀬𑀸;

𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑁂𑀯, 𑀤𑁆𑀯𑀺𑀘𑀺𑀢𑁆𑀢𑀜𑁆𑀘 𑀤𑁆𑀯𑀺𑀯𑁂𑀤𑀦𑀁.

𑀆𑀧𑀢𑁆𑀢𑀺𑀁 𑀧𑀦 𑀤𑀼𑀝𑁆𑀞𑀼𑀮𑁆𑀮𑀁, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀆𑀧𑀢𑁆𑀢𑀸𑀦𑀼𑀧𑀲𑀫𑁆𑀧𑀦𑁆𑀦𑁂, 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁.

𑀲𑀗𑁆𑀖𑀸𑀤𑀺𑀲𑁂𑀲𑀫𑀸𑀧𑀦𑁆𑀦𑁄, 𑀫𑁄𑀘𑁂𑀢𑁆𑀯𑀸 𑀅𑀲𑀼𑀘𑀺𑀁 𑀅𑀬𑀁;

𑀖𑀝𑁂𑀢𑁆𑀯𑀸 𑀯𑀢𑁆𑀣𑀼𑀦𑀸𑀧𑀢𑁆𑀢𑀺𑀁, 𑀯𑀤𑀦𑁆𑀢𑀲𑁆𑀲𑁂𑀯 𑀯𑀚𑁆𑀚𑀢𑀸.

𑀇𑀥 𑀲𑀗𑁆𑀖𑀸𑀤𑀺𑀲𑁂𑀲𑀸𑀯, 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀬𑁄 𑀫𑀢𑀸;

𑀢𑀲𑁆𑀫𑀸 𑀲𑀼𑀤𑁆𑀥𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁, 𑀯𑀤𑀁 𑀧𑀸𑀘𑀺𑀢𑁆𑀢𑀺𑀬𑀁 𑀨𑀼𑀲𑁂.

𑀅𑀤𑀼𑀝𑁆𑀞𑀼𑀮𑁆𑀮𑀸𑀬 𑀤𑀼𑀝𑁆𑀞𑀼𑀮𑁆𑀮-𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸;

𑀆𑀧𑀢𑁆𑀢𑀺𑀬𑁄𑀧𑀺 𑀯𑀸 𑀲𑁂𑀲𑀸, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀣𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂, 𑀤𑀼𑀝𑁆𑀞𑀼𑀮𑁆𑀮𑀁 𑀧𑀜𑁆𑀘𑀥𑀸 𑀫𑀢𑀁;

𑀅𑀚𑁆𑀛𑀸𑀘𑀸𑀭𑀫𑀤𑀼𑀝𑁆𑀞𑀼𑀮𑁆𑀮𑀁, 𑀆𑀭𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀯𑀢𑁆𑀣𑀼𑀁 𑀯𑀸 𑀧𑀦 𑀆𑀧𑀢𑁆𑀢𑀺𑀁, 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑁂𑀯𑀮𑀁;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀢𑀣𑀸.

𑀏𑀯𑀫𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀯𑁂𑀤𑀦𑀸 𑀤𑀼𑀓𑁆𑀔𑀯𑁂𑀤𑀦𑀸.

𑀔𑀡𑁂𑀬𑁆𑀬 ¶ 𑀯𑀸 𑀔𑀡𑀸𑀧𑁂𑀬𑁆𑀬, 𑀧𑀣𑀯𑀺𑀁 𑀬𑁄 𑀅𑀓𑀧𑁆𑀧𑀺𑀬𑀁;

𑀪𑁂𑀤𑀸𑀧𑁂𑀬𑁆𑀬 𑀘 𑀪𑀺𑀦𑁆𑀤𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀲𑀬𑀫𑁂𑀯 ¶ 𑀔𑀡𑀦𑁆𑀢𑀲𑁆𑀲, 𑀧𑀣𑀯𑀺𑀁 𑀧𑀦 𑀪𑀺𑀓𑁆𑀔𑀼𑀦𑁄;

𑀧𑀳𑀸𑀭𑀲𑁆𑀫𑀺𑀁 𑀧𑀳𑀸𑀭𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀆𑀡𑀸𑀧𑁂𑀦𑁆𑀢𑀲𑁆𑀲 𑀏𑀓𑀸𑀯, 𑀤𑀺𑀯𑀲𑀁 𑀔𑀡𑀢𑁄𑀧𑀺 𑀘;

𑀧𑀼𑀦𑀧𑁆𑀧𑀼𑀦𑀸𑀡𑀸𑀧𑁂𑀦𑁆𑀢𑀲𑁆𑀲, 𑀯𑀸𑀘𑀢𑁄 𑀯𑀸𑀘𑀢𑁄 𑀲𑀺𑀬𑀸.

‘‘𑀔𑀡 𑀧𑁄𑀓𑁆𑀔𑀭𑀡𑀺𑀁 𑀯𑀸𑀧𑀺𑀁, 𑀆𑀯𑀸𑀝𑀁 𑀔𑀡 𑀓𑀽𑀧𑀓𑀁’’;

𑀇𑀘𑁆𑀘𑁂𑀯𑀁 𑀢𑀼 𑀯𑀤𑀦𑁆𑀢𑀲𑁆𑀲, 𑀓𑁄𑀘𑀺 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺.

‘‘𑀇𑀫𑀁 𑀔𑀡 𑀘 𑀑𑀓𑀸𑀲𑀁, 𑀇𑀥 𑀧𑁄𑀓𑁆𑀔𑀭𑀡𑀺𑀁 𑀔𑀡;

𑀇𑀫𑀲𑁆𑀫𑀺𑀁 𑀔𑀡 𑀑𑀓𑀸𑀲𑁂’’, 𑀯𑀢𑁆𑀢𑀼𑀫𑁂𑀯𑀁 𑀦 𑀯𑀝𑁆𑀝𑀢𑀺.

‘‘𑀓𑀦𑁆𑀤𑀁 𑀔𑀡 𑀓𑀼𑀭𑀼𑀦𑁆𑀤𑀁 𑀯𑀸, 𑀣𑀽𑀡𑀁 𑀔𑀡 𑀘 𑀔𑀸𑀡𑀼𑀓𑀁;

𑀫𑀽𑀮𑀁 𑀔𑀡 𑀘 𑀢𑀸𑀮𑀁 𑀯𑀸’’, 𑀏𑀯𑀁 𑀯𑀤𑀢𑀺 𑀯𑀝𑁆𑀝𑀢𑀺.

‘‘𑀇𑀫𑀁 𑀫𑀽𑀮𑀁 𑀇𑀫𑀁 𑀯𑀮𑁆𑀮𑀺𑀁, 𑀇𑀫𑀁 𑀢𑀸𑀮𑀁 𑀇𑀫𑀁 𑀦𑀴𑀁;

𑀔𑀡𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸𑀦, 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺.

𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀘𑁂 𑀲𑀓𑁆𑀓𑀸, 𑀖𑀝𑁂𑀳𑀺 𑀢𑀦𑀼𑀓𑀤𑁆𑀤𑀫𑁄;

𑀪𑀺𑀓𑁆𑀔𑀼𑀦𑀸 𑀅𑀧𑀦𑁂𑀢𑀩𑁆𑀩𑁄, 𑀩𑀳𑀮𑀁 𑀦 𑀘 𑀯𑀝𑁆𑀝𑀢𑀺.

𑀪𑀺𑀚𑁆𑀚𑀺𑀢𑁆𑀯𑀸 𑀦𑀤𑀺𑀬𑀸𑀤𑀻𑀦𑀁, 𑀧𑀢𑀺𑀢𑀁 𑀢𑁄𑀬𑀲𑀦𑁆𑀢𑀺𑀓𑁂;

𑀢𑀝𑀁 𑀯𑀝𑁆𑀞𑀁 𑀯𑀺𑀓𑁄𑀧𑁂𑀢𑀼𑀁, 𑀘𑀸𑀢𑀼𑀫𑀸𑀲𑀫𑁆𑀧𑀺 𑀯𑀝𑁆𑀝𑀢𑀺.

𑀲𑀘𑁂 𑀧𑀢𑀢𑀺 𑀢𑁄𑀬𑀲𑁆𑀫𑀺𑀁, 𑀤𑁂𑀯𑁂 𑀯𑀼𑀝𑁆𑀞𑁂𑀧𑀺 𑀯𑀝𑁆𑀝𑀢𑀺;

𑀘𑀸𑀢𑀼𑀫𑀸𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑁄𑀬𑁂 𑀤𑁂𑀯𑁄 𑀳𑀺 𑀯𑀲𑁆𑀲𑀢𑀺.

𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀲𑁄𑀡𑁆𑀟𑀺𑀁, 𑀔𑀡𑀦𑁆𑀢𑀺 𑀬𑀤𑀺 𑀢𑀢𑁆𑀣 𑀢𑀼;

𑀭𑀚𑀁 𑀧𑀢𑀢𑀺 𑀘𑁂 𑀧𑀼𑀩𑁆𑀩𑀁, 𑀧𑀘𑁆𑀙𑀸 𑀤𑁂𑀯𑁄𑀪𑀺𑀯𑀲𑁆𑀲𑀢𑀺.

𑀲𑁄𑀥𑁂𑀢𑀼𑀁 𑀪𑀺𑀦𑁆𑀤𑀺𑀢𑀼𑀁 𑀅𑀦𑁆𑀢𑁄-𑀘𑀸𑀢𑀼𑀫𑀸𑀲𑀁 𑀢𑀼 𑀯𑀝𑁆𑀝𑀢𑀺;

𑀘𑀸𑀢𑀼𑀫𑀸𑀲𑀓𑀢𑁄 𑀉𑀤𑁆𑀥𑀁, 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀯𑀸𑀭𑀺𑀦𑀸 ¶ 𑀧𑀞𑀫𑀁 𑀧𑀼𑀡𑁆𑀡𑁂, 𑀧𑀘𑁆𑀙𑀸 𑀧𑀢𑀢𑀺 𑀘𑁂 𑀭𑀚𑀁;

𑀢𑀁 𑀯𑀝𑁆𑀝𑀢𑀺 𑀯𑀺𑀓𑁄𑀧𑁂𑀢𑀼𑀁, 𑀢𑁄𑀬𑁂 𑀤𑁂𑀯𑁄 𑀳𑀺 𑀯𑀲𑁆𑀲𑀢𑀺.

𑀅𑀮𑁆𑀮𑀻𑀬𑀢𑀺 𑀨𑀼𑀲𑀸𑀬𑀦𑁆𑀢𑁂, 𑀧𑀺𑀝𑁆𑀞𑀺𑀧𑀸𑀲𑀸𑀡𑀓𑁂 𑀭𑀚𑀁;

𑀘𑀸𑀢𑀼𑀫𑀸𑀲𑀘𑁆𑀘𑀬𑁂 𑀢𑀫𑁆𑀧𑀺, 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀲𑀘𑁂 𑀅𑀓𑀢𑀧𑀩𑁆𑀪𑀸𑀭𑁂, 𑀯𑀫𑁆𑀫𑀺𑀓𑁄 𑀧𑀦 𑀉𑀝𑁆𑀞𑀺𑀢𑁄;

𑀬𑀣𑀸𑀲𑀼𑀔𑀁 𑀯𑀺𑀓𑁄𑀧𑁂𑀬𑁆𑀬, 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀧𑀺 𑀘.

𑀅𑀩𑁆𑀪𑁄𑀓𑀸𑀲𑁂 ¶ 𑀲𑀘𑁂 𑀯𑀝𑁆𑀞𑁄, 𑀘𑀸𑀢𑀼𑀫𑀸𑀲𑀁 𑀢𑀼 𑀯𑀝𑁆𑀝𑀢𑀺;

𑀭𑀼𑀓𑁆𑀔𑁂 𑀉𑀧𑀘𑀺𑀓𑀸𑀤𑀻𑀦𑀁, 𑀫𑀢𑁆𑀢𑀺𑀓𑀸𑀬𑀧𑀺 𑀲𑁄 𑀦𑀬𑁄.

𑀫𑀽𑀲𑀺𑀓𑀼𑀓𑁆𑀓𑀭 𑀕𑁄𑀓𑀡𑁆𑀝-𑀕𑀡𑁆𑀟𑀼𑀧𑁆𑀧𑀸𑀤𑀫𑀮𑁂𑀲𑀼𑀧𑀺;

𑀅𑀬𑀫𑁂𑀯 𑀦𑀬𑁄 𑀯𑀼𑀢𑁆𑀢𑁄, 𑀅𑀲𑀫𑁆𑀩𑀤𑁆𑀥𑁂𑀲𑀼 𑀪𑀽𑀫𑀺𑀬𑀸.

𑀢𑁂𑀳𑁂𑀯 𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀓𑀲𑀺𑀦𑀗𑁆𑀕𑀮𑀫𑀢𑁆𑀢𑀺𑀓𑀸;

𑀅𑀘𑁆𑀙𑀺𑀦𑁆𑀦𑀸 𑀪𑀽𑀫𑀺𑀲𑀫𑁆𑀩𑀦𑁆𑀥𑀸, 𑀲𑀸 𑀚𑀸𑀢𑀧𑀣𑀯𑀻 𑀲𑀺𑀬𑀸.

𑀲𑁂𑀦𑀸𑀲𑀦𑀫𑁆𑀧𑀺 𑀅𑀘𑁆𑀙𑀦𑁆𑀦𑀁, 𑀯𑀺𑀦𑀝𑁆𑀞𑀙𑀤𑀦𑀫𑁆𑀧𑀺 𑀯𑀸;

𑀘𑀸𑀢𑀼𑀫𑀸𑀲𑀓𑀢𑁄 𑀉𑀤𑁆𑀥𑀁, 𑀑𑀯𑀝𑁆𑀞𑀁 𑀦 𑀯𑀺𑀓𑁄𑀧𑀬𑁂.

𑀢𑀢𑁄 ‘‘𑀕𑁄𑀧𑀸𑀦𑀲𑀺𑀁 𑀪𑀺𑀢𑁆𑀢𑀺𑀁, 𑀣𑀫𑁆𑀪𑀁 𑀯𑀸 𑀧𑀤𑀭𑀢𑁆𑀣𑀭𑀁;

𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀜𑀸𑀬, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀕𑀡𑁆𑀳𑀦𑁆𑀢𑀲𑁆𑀲𑀺𑀝𑁆𑀞𑀓𑀸𑀤𑀻𑀦𑀺, 𑀲𑀘𑁂 𑀧𑀢𑀢𑀺 𑀫𑀢𑁆𑀢𑀺𑀓𑀸;

𑀅𑀦𑀸𑀧𑀢𑁆𑀢𑀺 𑀲𑀺𑀬𑀸𑀧𑀢𑁆𑀢𑀺, 𑀫𑀢𑁆𑀢𑀺𑀓𑀁 𑀬𑀤𑀺 𑀕𑀡𑁆𑀳𑀢𑀺.

𑀅𑀢𑀺𑀦𑁆𑀢𑁄 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄, 𑀅𑀦𑁆𑀢𑁄𑀕𑁂𑀳𑁂 𑀲𑀘𑁂 𑀲𑀺𑀬𑀸;

𑀅𑀦𑁄𑀯𑀝𑁆𑀞𑁄 𑀘 𑀪𑀺𑀓𑁆𑀔𑀽𑀦𑀁, 𑀲𑀩𑁆𑀩𑀤𑀸 𑀳𑁄𑀢𑀺 𑀓𑀧𑁆𑀧𑀺𑀬𑁄.

𑀯𑀼𑀝𑁆𑀞𑁂 𑀧𑀼𑀦 𑀘 𑀕𑁂𑀳𑀲𑁆𑀫𑀺𑀁, 𑀕𑁂𑀳𑀁 𑀙𑀸𑀤𑁂𑀦𑁆𑀢𑀺 𑀢𑀁 𑀲𑀘𑁂;

𑀘𑀸𑀢𑀼𑀫𑀸𑀲𑀘𑁆𑀘𑀬𑁂 𑀲𑀩𑁆𑀩𑁄, 𑀢𑀺𑀦𑁆𑀢𑁄 𑀳𑁄𑀢𑀺 𑀅𑀓𑀧𑁆𑀧𑀺𑀬𑁄.

𑀬𑀢𑁆𑀢𑀓𑀁 𑀢𑀢𑁆𑀣 𑀢𑀺𑀦𑁆𑀢𑀁 𑀢𑀼, 𑀢𑀢𑁆𑀢𑀓𑀁 𑀳𑁄𑀢𑁆𑀬𑀓𑀧𑁆𑀧𑀺𑀬𑀁;

𑀅𑀢𑀺𑀦𑁆𑀢𑀁 𑀢𑀢𑁆𑀣 𑀬𑀁 𑀬𑀁 𑀢𑀼, 𑀢𑀁 𑀢𑀁 𑀳𑁄𑀢𑀺 𑀳𑀺 𑀓𑀧𑁆𑀧𑀺𑀬𑀁.

𑀢𑁂𑀫𑀺𑀢𑁄 ¶ 𑀯𑀸𑀭𑀺𑀦𑀸 𑀲𑁄 𑀘𑁂, 𑀏𑀓𑀸𑀩𑀤𑁆𑀥𑁄𑀯 𑀪𑀽𑀫𑀺𑀬𑀸;

𑀧𑀣𑀯𑀻 𑀘𑁂𑀯 𑀲𑀸 𑀚𑀸𑀢𑀸, 𑀦 𑀯𑀝𑁆𑀝𑀢𑀺 𑀢𑀢𑁄 𑀧𑀭𑀁.

𑀅𑀩𑁆𑀪𑁄𑀓𑀸𑀲𑁂 𑀘 𑀧𑀸𑀓𑀸𑀭𑁄, 𑀑𑀯𑀝𑁆𑀞𑁄 𑀫𑀢𑁆𑀢𑀺𑀓𑀸𑀫𑀬𑁄;

𑀘𑀸𑀢𑀼𑀫𑀸𑀲𑀘𑁆𑀘𑀬𑁂 ‘‘𑀚𑀸𑀢𑀸, 𑀧𑀣𑀯𑀻’’𑀢𑀺 𑀧𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀮𑀕𑁆𑀕𑀁 𑀭𑀚𑀁 𑀲𑀡𑁆𑀳𑀁, 𑀅𑀖𑀁𑀲𑀦𑁆𑀢𑁄𑀯 𑀫𑀢𑁆𑀢𑀲𑁄;

𑀙𑀼𑀧𑀺𑀢𑁆𑀯𑀸 𑀅𑀮𑁆𑀮𑀳𑀢𑁆𑀣𑁂𑀦, 𑀲𑀘𑁂 𑀕𑀡𑁆𑀳𑀸𑀢𑀺 𑀯𑀝𑁆𑀝𑀢𑀺.

𑀲𑀘𑁂 𑀇𑀝𑁆𑀞𑀓𑀧𑀸𑀓𑀸𑀭𑁄, 𑀬𑁂𑀪𑀼𑀬𑁆𑀬𑀓𑀣𑀮𑁂 𑀧𑀦;

𑀞𑀸𑀦𑁂 𑀢𑀺𑀝𑁆𑀞𑀢𑀺 𑀲𑁄 𑀢𑀲𑁆𑀫𑀸, 𑀯𑀺𑀓𑁄𑀧𑁂𑀬𑁆𑀬 𑀬𑀣𑀸𑀲𑀼𑀔𑀁.

𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑀁 𑀣𑀫𑁆𑀪𑀁, 𑀘𑀸𑀮𑁂𑀢𑁆𑀯𑀸 𑀧𑀦𑀺𑀢𑁄 𑀘𑀺𑀢𑁄;

𑀧𑀣𑀯𑀺𑀁 𑀢𑀼 𑀯𑀺𑀓𑁄𑀧𑁂𑀢𑁆𑀯𑀸, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀅𑀜𑁆𑀜𑀫𑁆𑀧𑀺 ¶ 𑀲𑀼𑀓𑁆𑀔𑀭𑀼𑀓𑁆𑀔𑀁 𑀯𑀸, 𑀔𑀸𑀡𑀼𑀓𑀁 𑀯𑀸𑀧𑀺 𑀕𑀡𑁆𑀳𑀢𑁄;

𑀅𑀬𑀫𑁂𑀯 𑀦𑀬𑁄 𑀤𑁄𑀲𑁄, 𑀉𑀚𑀼𑀫𑀼𑀤𑁆𑀥𑀭𑀢𑁄 𑀦 𑀘.

𑀧𑀸𑀲𑀸𑀡𑀁 𑀬𑀤𑀺 𑀯𑀸 𑀭𑀼𑀓𑁆𑀔𑀁, 𑀉𑀘𑁆𑀘𑀸𑀮𑁂𑀢𑁆𑀯𑀸 𑀧𑀯𑀝𑁆𑀝𑀢𑀺;

𑀦 𑀤𑁄𑀲𑁄 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲, 𑀲𑀘𑁂 𑀧𑀣𑀯𑀺 𑀪𑀺𑀚𑁆𑀚𑀢𑀺.

𑀨𑀸𑀮𑁂𑀦𑁆𑀢𑀸𑀦𑀫𑁆𑀧𑀺 𑀤𑀸𑀭𑀽𑀦𑀺, 𑀲𑀸𑀔𑀸𑀤𑀻𑀦𑀺 𑀘 𑀓𑀟𑁆𑀠𑀢𑁄;

𑀅𑀬𑀫𑁂𑀯 𑀦𑀬𑁄 𑀯𑀼𑀢𑁆𑀢𑁄, 𑀪𑀽𑀫𑀺𑀬𑀁 𑀲𑀼𑀤𑁆𑀥𑀘𑁂𑀢𑀲𑁄.

𑀓𑀡𑁆𑀝𑀓𑀁 𑀲𑀽𑀘𑀺𑀫𑀝𑁆𑀞𑀺𑀁 𑀯𑀸, 𑀔𑀺𑀮𑀁 𑀯𑀸 𑀪𑀽𑀫𑀺𑀬𑀁 𑀧𑀦;

𑀆𑀓𑁄𑀝𑁂𑀢𑀼𑀁 𑀧𑀯𑁂𑀲𑁂𑀢𑀼𑀁, 𑀪𑀺𑀓𑁆𑀔𑀼𑀦𑁄 𑀦 𑀘 𑀯𑀝𑁆𑀝𑀢𑀺.

‘‘𑀅𑀳𑀁 𑀧𑀲𑁆𑀲𑀸𑀯𑀥𑀸𑀭𑀸𑀬, 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀫𑁂𑀤𑀺𑀦𑀺𑀁;

𑀪𑀺𑀓𑁆𑀔𑀼𑀲𑁆𑀲 𑀧𑀦 𑀧𑀲𑁆𑀲𑀸𑀯-𑀫𑁂𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀺 𑀓𑀭𑁄𑀦𑁆𑀢𑀲𑁆𑀲, 𑀲𑀘𑁂 𑀪𑀺𑀚𑁆𑀚𑀢𑀺 𑀫𑁂𑀤𑀺𑀦𑀻;

𑀲𑀫𑀚𑁆𑀚𑀢𑁄 𑀲𑀫𑀁 𑀓𑀸𑀢𑀼𑀁, 𑀖𑀁𑀲𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀯𑀸 𑀪𑀽𑀫𑀺𑀁, 𑀮𑀺𑀔𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺;

𑀪𑀺𑀦𑁆𑀤𑀦𑁆𑀢𑁂𑀦 𑀘 𑀧𑀸𑀤𑁂𑀳𑀺, 𑀢𑀣𑀸 𑀘𑀗𑁆𑀓𑀫𑀺𑀢𑀼𑀫𑁆𑀧𑀺 𑀯𑀸.

𑀧𑀣𑀯𑀺𑀁 𑀅𑀮𑁆𑀮𑀳𑀢𑁆𑀣𑁂𑀦, 𑀙𑀼𑀧𑀺𑀢𑁆𑀯𑀸 𑀲𑀼𑀔𑀼𑀫𑀁 𑀭𑀚𑀁;

𑀅𑀖𑀁𑀲𑀦𑁆𑀢𑁄 𑀕𑀳𑁂𑀢𑁆𑀯𑀸 𑀘𑁂, 𑀳𑀢𑁆𑀣𑀁 𑀥𑁄𑀯𑀢𑀺 𑀯𑀝𑁆𑀝𑀢𑀺.

𑀲𑀬𑀁 ¶ 𑀤𑀳𑀢𑀺 𑀘𑁂 𑀪𑀽𑀫𑀺𑀁, 𑀤𑀳𑀸𑀧𑁂𑀢𑀺 𑀧𑀭𑁂𑀳𑀺 𑀯𑀸;

𑀆𑀧𑀢𑁆𑀢𑀦𑁆𑀢𑀫𑀲𑁄 𑀧𑀢𑁆𑀢𑀁, 𑀤𑀳𑀦𑁆𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄.

𑀞𑀸𑀦𑁂𑀲𑀼 𑀬𑀢𑁆𑀢𑀓𑁂𑀲𑁆𑀯𑀕𑁆𑀕𑀺𑀁, 𑀤𑁂𑀢𑀺 𑀤𑀸𑀧𑁂𑀢𑀺 𑀯𑀸 𑀧𑀦;

𑀢𑀢𑁆𑀢𑀓𑀸𑀦𑁂𑀯 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺𑀧𑀺.

𑀞𑀧𑁂𑀢𑀼𑀁 𑀪𑀺𑀓𑁆𑀔𑀼𑀦𑁄 𑀅𑀕𑁆𑀕𑀺𑀁, 𑀪𑀽𑀫𑀺𑀬𑀁 𑀦 𑀘 𑀯𑀝𑁆𑀝𑀢𑀺;

𑀓𑀧𑀸𑀮𑁂 𑀧𑀢𑁆𑀢𑀧𑀘𑀦𑁂, 𑀞𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀅𑀕𑁆𑀕𑀺𑀁 𑀉𑀧𑀭𑀺 𑀤𑀸𑀭𑀽𑀦𑀁, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀤𑀳𑀦𑁆𑀢𑁄 𑀢𑀸𑀦𑀺 𑀕𑀦𑁆𑀢𑁆𑀯𑀸 𑀲𑁄, 𑀪𑀽𑀫𑀺𑀁 𑀤𑀳𑀢𑀺 𑀘𑁂 𑀧𑀦.

𑀏𑀲𑁂𑀯 𑀘 𑀦𑀬𑁄 𑀯𑀼𑀢𑁆𑀢𑁄, 𑀇𑀝𑁆𑀞𑀓𑀸𑀯𑀸𑀲𑀓𑀸𑀤𑀺𑀲𑀼;

𑀞𑀧𑁂𑀢𑀼𑀁 𑀇𑀝𑁆𑀞𑀓𑀸𑀤𑀻𑀦𑀁, 𑀫𑀢𑁆𑀣𑀓𑁂𑀲𑁆𑀯𑁂𑀯 𑀯𑀝𑁆𑀝𑀢𑀺.

𑀓𑀲𑁆𑀫𑀸 𑀧𑀦𑀸𑀢𑀺 𑀘𑁂? 𑀢𑁂𑀲-𑀫𑀦𑀼𑀧𑀸𑀤𑀸𑀦𑀪𑀸𑀯𑀢𑁄;

𑀔𑀸𑀡𑀼𑀓𑁂 𑀲𑀼𑀓𑁆𑀔𑀭𑀼𑀓𑁆𑀔𑁂 𑀯𑀸, 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀺 ¶ 𑀢𑀺𑀡𑀼𑀓𑁆𑀓𑀁 𑀢𑀼, 𑀕𑀳𑁂𑀢𑁆𑀯𑀸 𑀧𑀦 𑀕𑀘𑁆𑀙𑀢𑁄;

𑀟𑀬𑁆𑀳𑀫𑀸𑀦𑁂 𑀢𑀼 𑀳𑀢𑁆𑀣𑀲𑁆𑀫𑀺𑀁, 𑀲𑀘𑁂 𑀧𑀸𑀢𑁂𑀢𑀺 𑀪𑀽𑀫𑀺𑀬𑀁.

𑀧𑀼𑀦 𑀢𑀁 𑀧𑀢𑀺𑀢𑀝𑁆𑀞𑀸𑀦𑁂, 𑀤𑀢𑁆𑀯𑀸 𑀢𑀲𑁆𑀲 𑀧𑀦𑀺𑀦𑁆𑀥𑀦𑀁;

𑀅𑀕𑁆𑀕𑀺𑀁 𑀯𑀝𑁆𑀝𑀢𑀺 𑀓𑀸𑀢𑀼𑀦𑁆𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀭𑀼𑀢𑀁.

𑀢𑀲𑁆𑀲𑀸𑀧𑀣𑀯𑀺𑀬𑀁𑀬𑁂𑀯, 𑀧𑀣𑀯𑀻𑀢𑀺 𑀘 𑀲𑀜𑁆𑀜𑀺𑀦𑁄;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀬𑀸𑀧𑀼𑀢𑀁.

𑀅𑀦𑀸𑀧𑀢𑁆𑀢𑀺 ‘‘𑀇𑀫𑀁 𑀚𑀸𑀦, 𑀇𑀫𑀫𑀸𑀳𑀭 𑀤𑁂𑀳𑀺’’𑀢𑀺;

𑀯𑀤𑀦𑁆𑀢𑀲𑁆𑀲, 𑀲𑀘𑀺𑀢𑁆𑀢𑀜𑁆𑀘, 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯 𑀘.

𑀪𑀯𑀦𑁆𑀢𑀲𑁆𑀲 ¶ 𑀘 𑀪𑀽𑀢𑀲𑁆𑀲, 𑀪𑀽𑀢𑀕𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀧𑀸𑀢𑀩𑁆𑀬𑀢𑀸𑀦𑀺𑀫𑀺𑀢𑁆𑀢𑀁 𑀢𑀼, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀉𑀤𑀓𑀝𑁆𑀞𑁄 𑀣𑀮𑀝𑁆𑀞𑁄𑀢𑀺, 𑀤𑀼𑀯𑀺𑀥𑁄 𑀳𑁄𑀢𑀺 𑀲𑁄 𑀧𑀦;

𑀢𑀺𑀮𑀩𑀻𑀚𑀸𑀤𑀺𑀓𑁄 𑀢𑀢𑁆𑀣, 𑀲𑀧𑀡𑁆𑀡𑁄𑀧𑀺 𑀅𑀧𑀡𑁆𑀡𑀓𑁄.

𑀉𑀤𑀓𑀝𑁆𑀞𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀲𑀩𑁆𑀩𑁄 𑀲𑁂𑀯𑀸𑀮𑀚𑀸𑀢𑀺𑀓𑁄;

𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀢𑀁 𑀲𑀩𑁆𑀩𑀁, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀯𑀺𑀬𑀽𑀳𑀺𑀢𑁆𑀯𑀸 𑀢𑀼 𑀳𑀢𑁆𑀣𑁂𑀦, 𑀦𑁆𑀳𑀸𑀬𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀳𑁄𑀢𑀺 𑀢𑀲𑁆𑀲 𑀘 𑀲𑀩𑁆𑀩𑀫𑁆𑀧𑀺, 𑀞𑀸𑀦𑀜𑁆𑀳𑀺 𑀲𑀓𑀮𑀁 𑀚𑀮𑀁.

𑀉𑀤𑀓𑁂𑀦 𑀯𑀺𑀦𑀸 𑀘𑁂𑀘𑁆𑀘, 𑀢𑀁 𑀧𑀦𑀼𑀤𑁆𑀥𑀭𑀺𑀢𑀼𑀁 𑀚𑀮𑀸;

𑀦 𑀘 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀞𑀸𑀦𑀲𑀗𑁆𑀓𑀫𑀦𑀜𑁆𑀳𑀺 𑀢𑀁.

𑀉𑀤𑀓𑁂𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀢𑀁, 𑀧𑀓𑁆𑀔𑀺𑀧𑀦𑁆𑀢𑀲𑁆𑀲 𑀯𑀸𑀭𑀺𑀲𑀼;

𑀯𑀝𑁆𑀝𑀢𑀻𑀢𑀺 𑀘 𑀦𑀺𑀤𑁆𑀤𑀺𑀝𑁆𑀞𑀁, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼𑀧𑀺.

𑀚𑀮𑁂 𑀯𑀮𑁆𑀮𑀺𑀢𑀺𑀡𑀸𑀤𑀻𑀦𑀺, 𑀉𑀤𑁆𑀥𑀭𑀦𑁆𑀢𑀲𑁆𑀲 𑀢𑁄𑀬𑀢𑁄;

𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀧𑀭𑁂𑀳𑀼𑀧𑁆𑀧𑀸𑀝𑀺𑀢𑀸𑀦𑁂𑀢𑁆𑀣, 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀕𑀘𑁆𑀙𑀦𑁆𑀢𑀺 𑀳𑀺 𑀬𑀢𑁄 𑀢𑀸𑀦𑀺, 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁.

𑀣𑀮𑀝𑁆𑀞𑁂 ¶ 𑀙𑀺𑀦𑁆𑀦𑀭𑀼𑀓𑁆𑀔𑀸𑀦𑀁, 𑀞𑀺𑀢𑁄 𑀳𑀭𑀺𑀢𑀔𑀸𑀡𑀼𑀓𑁄;

𑀉𑀤𑁆𑀥𑀁 𑀯𑀟𑁆𑀠𑀦𑀓𑁄 𑀢𑀲𑁆𑀲, 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑁄.

𑀦𑀸𑀴𑀺𑀓𑁂𑀭𑀸𑀤𑀺𑀓𑀸𑀦𑀫𑁆𑀧𑀺, 𑀔𑀸𑀡𑀼 𑀉𑀤𑁆𑀥𑀁 𑀦 𑀯𑀟𑁆𑀠𑀢𑀺;

𑀢𑀲𑁆𑀫𑀸 𑀢𑀲𑁆𑀲 𑀓𑀢𑁄 𑀳𑁄𑀢𑀺, 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑁄.

𑀢𑀣𑀸 𑀓𑀤𑀮𑀺𑀬𑀸 𑀔𑀸𑀡𑀼, 𑀨𑀮𑀺𑀢𑀸𑀬 𑀧𑀓𑀸𑀲𑀺𑀢𑁄;

𑀅𑀨𑀮𑀺𑀢𑀸𑀬 𑀬𑁄 𑀔𑀸𑀡𑀼, 𑀪𑀽𑀢𑀕𑀸𑀫𑁂𑀦 𑀲𑁄 𑀫𑀢𑁄.

𑀨𑀮𑀺𑀢𑀸 𑀓𑀤𑀮𑀻 𑀬𑀸𑀯, 𑀦𑀻𑀮𑀧𑀡𑁆𑀡𑀸 𑀘 𑀢𑀸𑀯 𑀲𑀸;

𑀦𑀴𑀯𑁂𑀴𑀼𑀢𑀺𑀡𑀸𑀤𑀻𑀦-𑀫𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀕𑁆𑀕𑀢𑁄 ¶ 𑀧𑀦 𑀧𑀝𑁆𑀞𑀸𑀬, 𑀬𑀤𑀸𑀬𑀁 𑀯𑁂𑀴𑀼 𑀲𑀼𑀲𑁆𑀲𑀢𑀺;

𑀢𑀤𑀸 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺, 𑀩𑀻𑀚𑀕𑀸𑀫𑁂𑀦 𑀦𑀸𑀫𑀲𑁄.

𑀇𑀦𑁆𑀤𑀲𑀸𑀮𑀸𑀤𑀺𑀭𑀼𑀓𑁆𑀔𑀸𑀦𑀁, 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑁄;

𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀸𑀦𑀁 𑀢𑀼, 𑀯𑀺𑀜𑁆𑀜𑁂𑀬𑁆𑀬𑁄 𑀯𑀺𑀦𑀬𑀜𑁆𑀜𑀼𑀦𑀸.

𑀫𑀡𑁆𑀟𑀧𑀸𑀤𑀻𑀦𑀫𑀢𑁆𑀣𑀸𑀬, 𑀦𑀺𑀓𑁆𑀔𑀡𑀦𑁆𑀢𑀺 𑀘 𑀢𑁂 𑀲𑀘𑁂;

𑀦𑀺𑀕𑁆𑀕𑀢𑁂 𑀫𑀽𑀮𑀧𑀡𑁆𑀡𑀲𑁆𑀫𑀺𑀁, 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑁄.

𑀫𑀽𑀮𑀫𑀢𑁆𑀢𑁂𑀧𑀺 𑀯𑀸 𑀬𑁂𑀲𑀁, 𑀧𑀡𑁆𑀡𑀫𑀢𑁆𑀢𑁂𑀧𑀺 𑀯𑀸 𑀧𑀦;

𑀦𑀺𑀕𑁆𑀕𑀢𑁂𑀧𑀺 𑀓𑀢𑁄 𑀢𑁂𑀲𑀁, 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑁄.

𑀲𑀓𑀦𑁆𑀤𑀸 𑀧𑀦 𑀢𑀸𑀮𑀝𑁆𑀞𑀺, 𑀩𑀻𑀚𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺;

𑀧𑀢𑁆𑀢𑀯𑀝𑁆𑀝𑀺 𑀬𑀤𑀸 𑀦𑀻𑀮𑀸, 𑀦𑀺𑀕𑁆𑀕𑀘𑁆𑀙𑀢𑀺 𑀢𑀤𑀸 𑀦 𑀘.

𑀦𑀸𑀴𑀺𑀓𑁂𑀭𑀢𑀘𑀁 𑀪𑀺𑀢𑁆𑀯𑀸, 𑀤𑀦𑁆𑀢𑀲𑀽𑀘𑀻𑀯 𑀅𑀗𑁆𑀓𑀼𑀭𑁄;

𑀦𑀺𑀕𑁆𑀕𑀘𑁆𑀙𑀢𑀺 𑀢𑀤𑀸 𑀲𑁄𑀧𑀺, 𑀩𑀻𑀚𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺.

𑀫𑀺𑀕𑀲𑀺𑀗𑁆𑀕𑀲𑀫𑀸𑀦𑀸𑀬, 𑀲𑀢𑀺𑀬𑀸 𑀧𑀢𑁆𑀢𑀯𑀝𑁆𑀝𑀺𑀬𑀸;

𑀅𑀦𑀺𑀕𑁆𑀕𑀢𑁂𑀧𑀺 𑀫𑀽𑀮𑀲𑁆𑀫𑀺𑀁, 𑀪𑀽𑀢𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺.

𑀦 𑀳𑁄𑀦𑁆𑀢𑀺 𑀳𑀭𑀺𑀢𑀸 𑀬𑀸𑀯, 𑀯𑀻𑀳𑀺𑀆𑀤𑀻𑀦𑀫𑀗𑁆𑀓𑀼𑀭𑀸;

𑀦𑀺𑀕𑁆𑀕𑀢𑁂𑀲𑀼𑀧𑀺 𑀧𑀡𑁆𑀡𑁂𑀲𑀼, 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑁄.

𑀘𑀢𑁆𑀢𑀸𑀭𑁄 𑀪𑀸𑀡𑀯𑀸𑀭𑀸 𑀦𑀺𑀝𑁆𑀞𑀺𑀢𑀸.

𑀅𑀫𑁆𑀩𑀚𑀫𑁆𑀩𑀼𑀝𑁆𑀞𑀺𑀓𑀸𑀤𑀻𑀦-𑀫𑁂𑀲𑁂𑀯 𑀘 𑀯𑀺𑀦𑀺𑀘𑁆𑀙𑀬𑁄;

𑀯𑀦𑁆𑀤𑀸𑀓𑀸 𑀯𑀸𑀧𑀺 𑀅𑀜𑁆𑀜𑀁 𑀯𑀸, 𑀭𑀼𑀓𑁆𑀔𑁂 𑀚𑀸𑀬𑀢𑀺 𑀬𑀁 𑀧𑀦.

𑀭𑀼𑀓𑁆𑀔𑁄𑀯𑀲𑁆𑀲 ¶ 𑀲𑀺𑀬𑀸 𑀞𑀸𑀦𑀁, 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺;

𑀅𑀫𑀽𑀮𑀯𑀮𑁆𑀮𑀺𑀆𑀤𑀻𑀦-𑀫𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀧𑀸𑀓𑀸𑀭𑀸𑀤𑀻𑀲𑀼 𑀲𑁂𑀯𑀸𑀮𑁄, 𑀅𑀕𑁆𑀕𑀩𑀻𑀚𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀬𑀸𑀯 𑀤𑁆𑀯𑁂 𑀢𑀻𑀡𑀺 𑀧𑀢𑁆𑀢𑀸𑀦𑀺, 𑀦 𑀲𑀜𑁆𑀚𑀸𑀬𑀦𑁆𑀢𑀺 𑀢𑀸𑀯 𑀲𑁄.

𑀧𑀢𑁆𑀢𑁂𑀲𑀼 𑀧𑀦 𑀚𑀸𑀢𑁂𑀲𑀼, 𑀯𑀢𑁆𑀣𑀼 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀲𑁄;

𑀖𑀁𑀲𑀺𑀢𑁆𑀯𑀸 𑀧𑀦 𑀢𑀁 𑀢𑀲𑁆𑀫𑀸, 𑀅𑀧𑀦𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀲𑁂𑀯𑀸𑀮𑁂 ¶ 𑀩𑀳𑀺 𑀧𑀸𑀦𑀻𑀬-𑀖𑀝𑀸𑀤𑀻𑀦𑀁 𑀢𑀼 𑀤𑀼𑀓𑁆𑀓𑀝𑀁;

𑀅𑀩𑁆𑀩𑁄𑀳𑀸𑀭𑁄𑀯 𑀲𑁄 𑀅𑀦𑁆𑀢𑁄, 𑀧𑀽𑀯𑀸𑀤𑀻𑀲𑀼𑀧𑀺 𑀓𑀡𑁆𑀡𑀓𑀁.

𑀧𑀸𑀲𑀸𑀡𑀤𑀤𑁆𑀤𑀼𑀲𑁂𑀯𑀸𑀮-𑀲𑁂𑀮𑁂𑀬𑁆𑀬𑀧𑁆𑀧𑀪𑀼𑀢𑀻𑀦𑀺 𑀘;

𑀳𑁄𑀦𑁆𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀺, 𑀅𑀧𑀢𑁆𑀢𑀸𑀦𑀻𑀢𑀺 𑀦𑀺𑀤𑁆𑀤𑀺𑀲𑁂.

𑀧𑀼𑀧𑁆𑀨𑀺𑀢𑀁 𑀢𑀼 𑀅𑀳𑀺𑀘𑁆𑀙𑀢𑁆𑀢𑀁, 𑀅𑀩𑁆𑀩𑁄𑀳𑀸𑀭𑀺𑀓𑀢𑀁 𑀕𑀢𑀁;

𑀲𑀘𑁂 𑀢𑀁 𑀫𑀓𑀼𑀴𑀁 𑀳𑁄𑀢𑀺, 𑀳𑁄𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀁.

𑀭𑀼𑀓𑁆𑀔𑁂 𑀢𑀘𑀁 𑀯𑀺𑀓𑁄𑀧𑁂𑀢𑁆𑀯𑀸, 𑀢𑀣𑀸 𑀧𑀧𑁆𑀧𑀝𑀺𑀓𑀫𑁆𑀧𑀺 𑀘;

𑀦𑀺𑀬𑁆𑀬𑀸𑀲𑀫𑁆𑀧𑀺 𑀧𑀦𑀮𑁆𑀮𑀲𑁆𑀫𑀺𑀁, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀦𑀼𑀳𑀺𑀆𑀤𑀻𑀲𑀼 𑀭𑀼𑀓𑁆𑀔𑁂𑀲𑀼, 𑀢𑀸𑀮𑀧𑀡𑁆𑀡𑀸𑀤𑀺𑀓𑁂𑀲𑀼 𑀯𑀸;

𑀮𑀺𑀔𑀢𑁄 𑀢𑀢𑁆𑀣𑀚𑀸𑀢𑁂𑀲𑀼, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀬𑁂.

𑀧𑀼𑀧𑁆𑀨𑀁 𑀧𑀡𑁆𑀟𑀼𑀧𑀮𑀸𑀲𑀁 𑀯𑀸, 𑀨𑀮𑀁 𑀯𑀸 𑀧𑀓𑁆𑀓𑀫𑁂𑀯 𑀯𑀸;

𑀧𑀸𑀢𑁂𑀦𑁆𑀢𑀲𑁆𑀲 𑀘 𑀘𑀸𑀮𑁂𑀢𑁆𑀯𑀸, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀦𑀸𑀫𑁂𑀢𑁆𑀯𑀸 𑀨𑀮𑀺𑀦𑀺𑀁 𑀲𑀸𑀔𑀁, 𑀤𑀸𑀢𑀼𑀁 𑀯𑀝𑁆𑀝𑀢𑀺 𑀕𑀡𑁆𑀳𑀢𑁄;

𑀲𑀬𑀁 𑀔𑀸𑀤𑀺𑀢𑀼𑀓𑀸𑀫𑁄 𑀘𑁂, 𑀤𑀸𑀢𑀼𑀫𑁂𑀯𑀁 𑀦 𑀯𑀝𑁆𑀝𑀢𑀺.

𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀁 𑀓𑀜𑁆𑀘𑀺, 𑀕𑀸𑀳𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺;

𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑁂𑀲𑀼, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀬𑁂𑀲𑀁 𑀭𑀼𑀳𑀢𑀺 𑀭𑀼𑀓𑁆𑀔𑀸𑀦𑀁, 𑀲𑀸𑀔𑀸 𑀢𑁂𑀲𑀫𑁆𑀧𑀺 𑀲𑀸𑀔𑀺𑀦𑀁;

𑀓𑀧𑁆𑀧𑀺𑀬𑀁 𑀢𑀫𑀓𑀸𑀭𑁂𑀢𑁆𑀯𑀸, 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀬𑀫𑁂𑀯 𑀦𑀬𑁄 𑀅𑀮𑁆𑀮-𑀲𑀺𑀗𑁆𑀕𑀺𑀯𑁂𑀭𑀸𑀤𑀺𑀓𑁂𑀲𑀼𑀧𑀺;

𑀤𑀼𑀓𑁆𑀓𑀝𑀁 𑀩𑀻𑀚𑀕𑀸𑀫𑁂𑀲𑀼, 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀫𑀳𑁂𑀲𑀺𑀦𑀸.

‘‘𑀭𑀼𑀓𑁆𑀔𑀁 𑀙𑀺𑀦𑁆𑀤 𑀮𑀢𑀁 𑀙𑀺𑀦𑁆𑀤, 𑀓𑀦𑁆𑀤𑀁 𑀫𑀽𑀮𑀫𑁆𑀧𑀺 𑀉𑀤𑁆𑀥𑀭;

𑀉𑀧𑁆𑀧𑀸𑀝𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺, 𑀯𑀝𑁆𑀝𑀢𑁂𑀯𑀸𑀦𑀺𑀬𑀸𑀫𑀢𑁄.

‘‘𑀅𑀫𑁆𑀩𑀁 ¶ 𑀚𑀫𑁆𑀩𑀼𑀫𑁆𑀧𑀺 𑀦𑀺𑀫𑁆𑀩𑀁 𑀯𑀸, 𑀙𑀺𑀦𑁆𑀤 𑀪𑀺𑀦𑁆𑀤𑀼𑀤𑁆𑀥𑀭𑀸’’𑀢𑀺 𑀯𑀸;

𑀕𑀳𑁂𑀢𑁆𑀯𑀸 𑀧𑀦 𑀦𑀸𑀫𑀫𑁆𑀧𑀺, 𑀯𑀝𑁆𑀝𑀢𑁂𑀯𑀸𑀦𑀺𑀬𑀸𑀫𑀢𑁄.

‘‘𑀇𑀫𑀁 ¶ 𑀭𑀼𑀓𑁆𑀔𑀁 𑀇𑀫𑀁 𑀯𑀮𑁆𑀮𑀺𑀁, 𑀇𑀫𑀁 𑀙𑀮𑁆𑀮𑀺𑀁 𑀇𑀫𑀁 𑀮𑀢𑀁;

𑀙𑀺𑀦𑁆𑀤 𑀪𑀺𑀦𑁆𑀤𑀸’’𑀢𑀺 𑀯𑀸 𑀯𑀢𑁆𑀢𑀼𑀁, 𑀦𑀺𑀬𑀫𑁂𑀢𑁆𑀯𑀸 𑀦 𑀯𑀝𑁆𑀝𑀢𑀺.

𑀧𑀽𑀭𑁂𑀢𑁆𑀯𑀸 𑀉𑀘𑁆𑀙𑀼𑀔𑀡𑁆𑀟𑀸𑀦𑀁, 𑀧𑀘𑁆𑀙𑀺𑀬𑁄 𑀆𑀳𑀭𑀦𑁆𑀢𑀺 𑀘𑁂;

𑀲𑀩𑁆𑀩𑀫𑁂𑀯 𑀓𑀢𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀓𑀧𑁆𑀧𑀺𑀬𑁂 𑀓𑀢𑁂.

𑀏𑀓𑀢𑁄 𑀧𑀦 𑀩𑀤𑁆𑀥𑀸𑀦𑀺, 𑀉𑀘𑁆𑀙𑀼𑀤𑀸𑀭𑀽𑀦𑀺 𑀳𑁄𑀦𑁆𑀢𑀺 𑀘𑁂;

𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁄 𑀧𑀦, 𑀤𑀸𑀭𑀼𑀁 𑀯𑀺𑀚𑁆𑀛𑀢𑀺 𑀯𑀝𑁆𑀝𑀢𑀺.

𑀯𑀮𑁆𑀮𑀺𑀬𑀸 𑀭𑀚𑁆𑀚𑀼𑀬𑀸 𑀯𑀸𑀧𑀺, 𑀬𑀸𑀬 𑀩𑀤𑁆𑀥𑀸𑀦𑀺 𑀢𑀸𑀦𑀺 𑀳𑀺;

𑀪𑀸𑀚𑀦𑁂𑀦 𑀲𑀫𑀸𑀦𑀢𑁆𑀢𑀸, 𑀢𑀁 𑀯𑀺𑀚𑁆𑀛𑀢𑀺 𑀦 𑀯𑀝𑁆𑀝𑀢𑀺.

𑀪𑀢𑁆𑀢𑀁 𑀫𑀭𑀺𑀘𑀧𑀓𑁆𑀓𑁂𑀳𑀺, 𑀫𑀺𑀲𑁆𑀲𑁂𑀢𑁆𑀯𑀸 𑀆𑀳𑀭𑀦𑁆𑀢𑀺 𑀘𑁂;

𑀏𑀓𑀲𑀺𑀢𑁆𑀣𑁂𑀧𑀺 𑀪𑀢𑁆𑀢𑀲𑁆𑀲, 𑀲𑀘𑁂 𑀯𑀺𑀚𑁆𑀛𑀢𑀺 𑀯𑀝𑁆𑀝𑀢𑀺.

𑀅𑀬𑀫𑁂𑀯 𑀦𑀬𑁄 𑀯𑀼𑀢𑁆𑀢𑁄, 𑀢𑀺𑀮𑀢𑀡𑁆𑀟𑀼𑀮𑀓𑀸𑀤𑀺𑀲𑀼;

𑀏𑀓𑀸𑀩𑀤𑁆𑀥𑁂 𑀓𑀧𑀺𑀢𑁆𑀣𑁂𑀧𑀺, 𑀓𑀝𑀸𑀳𑁂 𑀓𑀧𑁆𑀧𑀺𑀬𑀁 𑀓𑀭𑁂.

𑀓𑀝𑀸𑀳𑀁 𑀬𑀤𑀺 𑀫𑀼𑀜𑁆𑀘𑀺𑀢𑁆𑀯𑀸, 𑀅𑀦𑁆𑀢𑁄 𑀘𑀭𑀢𑀺 𑀫𑀺𑀜𑁆𑀚𑀓𑀁;

𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑀺𑀢𑁆𑀣𑀁 𑀢𑀁, 𑀓𑀸𑀭𑁂𑀢𑀩𑁆𑀩𑀁 𑀢𑀼 𑀓𑀧𑁆𑀧𑀺𑀬𑀁.

𑀅𑀪𑀽𑀢𑀕𑀸𑀫𑀩𑀻𑀚𑁂𑀲𑀼, 𑀪𑀽𑀢𑀕𑀸𑀫𑀸𑀤𑀺𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀢𑀣𑀸𑀲𑀜𑁆𑀜𑀺𑀦𑁄 𑀢𑀢𑁆𑀣, 𑀅𑀲𑀜𑁆𑀘𑀺𑀘𑁆𑀘𑀸𑀲𑀢𑀺𑀲𑁆𑀲 𑀘;

𑀉𑀫𑁆𑀫𑀢𑁆𑀢𑀓𑀸𑀤𑀺𑀓𑀸𑀦𑀜𑁆𑀘, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀇𑀤𑀜𑁆𑀘 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀓𑁆𑀭𑀺𑀬𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀓𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀓𑀢𑁂 𑀲𑀗𑁆𑀖𑁂𑀦 𑀓𑀫𑁆𑀫𑀲𑁆𑀫𑀺𑀁, 𑀅𑀜𑁆𑀜𑀯𑀸𑀤𑀯𑀺𑀳𑁂𑀲𑀓𑁂;

𑀢𑀣𑀸 𑀧𑀼𑀦 𑀓𑀭𑁄𑀦𑁆𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 ¶ 𑀥𑀫𑁆𑀫𑁂, 𑀅𑀥𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁;

𑀓𑀫𑁆𑀫𑁂 𑀅𑀭𑁄𑀧𑀺𑀢𑁂 𑀘𑁂𑀯𑀁, 𑀯𑀤𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀆𑀧𑀢𑁆𑀢𑀺𑀁 ¶ 𑀯𑀸𑀧𑀺 𑀆𑀧𑀦𑁆𑀦𑀁, 𑀅𑀚𑀸𑀦𑀦𑁆𑀢𑀲𑁆𑀲, ‘‘𑀪𑀡𑁆𑀟𑀦𑀁;

𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀺𑀲𑁆𑀲, 𑀕𑀺𑀮𑀸𑀦𑀲𑁆𑀲 𑀦 𑀤𑁄𑀲𑀢𑀸.

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀯𑁂𑀤𑀦𑀸 𑀤𑀼𑀓𑁆𑀔𑀯𑁂𑀤𑀦𑀸.

𑀅𑀬𑀲𑀁 𑀓𑀢𑁆𑀢𑀼𑀓𑀸𑀫𑁄𑀯, 𑀲𑀫𑁆𑀫𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄;

𑀯𑀤𑀦𑁆𑀢𑁄 𑀉𑀧𑀲𑀫𑁆𑀧𑀦𑁆𑀦𑁂, 𑀉𑀚𑁆𑀛𑀸𑀧𑁂𑀢𑀺 𑀘 𑀔𑀻𑀬𑀢𑀺.

𑀢𑀲𑁆𑀫𑀺𑀁 𑀯𑀢𑁆𑀣𑀼𑀤𑁆𑀯𑀬𑁂 𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀥𑀫𑁆𑀫𑁂, 𑀅𑀥𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀅𑀯𑀡𑁆𑀡𑀁𑀦𑀼𑀧𑀲𑀫𑁆𑀧𑀦𑁆𑀦-𑀲𑀦𑁆𑀢𑀺𑀓𑁂 𑀧𑀦 𑀪𑀺𑀓𑁆𑀔𑀼𑀦𑁄;

𑀅𑀲𑀫𑁆𑀫𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀪𑀸𑀲𑀢𑁄 𑀬𑀲𑁆𑀲 𑀓𑀲𑁆𑀲𑀘𑀺.

𑀲𑀸𑀫𑀡𑁂𑀭𑀲𑁆𑀲 𑀯𑀸 𑀯𑀡𑁆𑀡𑀁, 𑀲𑀫𑁆𑀫𑀢𑀸𑀲𑀫𑁆𑀫𑀢𑀲𑁆𑀲𑀧𑀺;

𑀯𑀤𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂.

𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦𑁂𑀯, 𑀓𑀭𑁄𑀦𑁆𑀢𑀁 𑀪𑀡𑀢𑁄 𑀧𑀦;

𑀅𑀦𑀸𑀧𑀢𑁆𑀢𑀺 𑀓𑁆𑀭𑀺𑀬𑀸𑀲𑁂𑀲-𑀫𑀦𑀦𑁆𑀢𑀭𑀲𑀫𑀁 𑀫𑀢𑀁.

𑀅𑀚𑁆𑀛𑁄𑀓𑀸𑀲𑁂 𑀢𑀼 𑀫𑀜𑁆𑀘𑀸𑀤𑀺𑀁, 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸;

𑀅𑀢𑁆𑀣𑀸𑀬 𑀲𑀦𑁆𑀣𑀭𑀸𑀧𑁂𑀢𑁆𑀯𑀸, 𑀲𑀦𑁆𑀣𑀭𑀺𑀢𑁆𑀯𑀸𑀧𑀺 𑀯𑀸 𑀧𑀦.

𑀦𑁂𑀯𑀼𑀤𑁆𑀥𑀭𑁂𑀬𑁆𑀬 𑀲𑀗𑁆𑀖𑀲𑁆𑀲, 𑀉𑀤𑁆𑀥𑀭𑀸𑀧𑁂𑀬𑁆𑀬 𑀯𑀸 𑀦 𑀢𑀁;

𑀧𑀓𑁆𑀓𑀫𑀦𑁆𑀢𑁄 𑀲𑀘𑁂 𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀯𑀲𑁆𑀲𑀺𑀓𑁂 ¶ 𑀘𑀢𑀼𑀭𑁄 𑀫𑀸𑀲𑁂, 𑀲𑀘𑁂 𑀤𑁂𑀯𑁄 𑀦 𑀯𑀲𑁆𑀲𑀢𑀺;

𑀅𑀚𑁆𑀛𑁄𑀓𑀸𑀲𑁂 𑀢𑀣𑀸 𑀘𑀸𑀧𑀺, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀬𑀢𑁆𑀣 𑀯𑀲𑁆𑀲𑀢𑀺 𑀳𑁂𑀫𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀅𑀧𑀭𑁂𑀧𑀺 𑀘;

𑀞𑀧𑁂𑀢𑀼𑀁 𑀢𑀢𑁆𑀣 𑀫𑀜𑁆𑀘𑀸𑀤𑀺𑀁, 𑀅𑀝𑁆𑀞 𑀫𑀸𑀲𑁂 𑀦 𑀯𑀝𑁆𑀝𑀢𑀺.

𑀓𑀸𑀓𑀸𑀤𑀻𑀦𑀁 𑀦𑀺𑀯𑀸𑀲𑀲𑁆𑀫𑀺𑀁, 𑀭𑀼𑀓𑁆𑀔𑀫𑀽𑀮𑁂 𑀓𑀤𑀸𑀘𑀺𑀧𑀺;

𑀫𑀜𑁆𑀘𑀸𑀤𑀺𑀁 𑀧𑀦 𑀲𑀗𑁆𑀖𑀲𑁆𑀲, 𑀞𑀧𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 ¶ 𑀬𑀁 𑀓𑀺𑀜𑁆𑀘𑀺, 𑀲𑀦𑁆𑀣𑀢𑀁 𑀬𑀤𑀺 𑀲𑀗𑁆𑀖𑀺𑀓𑀁;

𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀞𑀸𑀦𑁂, 𑀬𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸.

𑀬𑀸𑀯 𑀲𑁄 𑀦 𑀦𑀺𑀲𑀻𑀤𑁂𑀬𑁆𑀬, ‘‘𑀕𑀘𑁆𑀙𑀸’’𑀢𑀺 𑀦 𑀯𑀤𑁂𑀬𑁆𑀬 𑀯𑀸;

𑀢𑀸𑀯 𑀲𑀦𑁆𑀣𑀸𑀭𑀓𑀲𑁆𑀲𑁂𑀯, 𑀪𑀸𑀭𑁄 𑀢𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀲𑀘𑁂 𑀢𑀁 𑀲𑀸𑀫𑀡𑁂𑀭𑁂𑀦, 𑀲𑀦𑁆𑀣𑀭𑀸𑀧𑁂𑀢𑀺 𑀲𑀦𑁆𑀣𑀢𑀁;

𑀲𑀦𑁆𑀣𑀭𑀸𑀧𑀺𑀢𑀪𑀺𑀓𑁆𑀔𑀼𑀲𑁆𑀲, 𑀧𑀮𑀺𑀩𑁄𑀥𑁄𑀢𑀺 𑀤𑀻𑀧𑀺𑀢𑁄.

𑀲𑀦𑁆𑀣𑀢𑀁 𑀪𑀺𑀓𑁆𑀔𑀼𑀦𑀸 𑀢𑀁 𑀘𑁂, 𑀪𑀸𑀭𑁄 𑀢𑀲𑁆𑀲𑁂𑀯 𑀢𑀸𑀯 𑀢𑀁;

𑀬𑀸𑀯 𑀆𑀡𑀸𑀧𑀓𑁄 𑀢𑀢𑁆𑀣, 𑀆𑀕𑀦𑁆𑀢𑁆𑀯𑀸 𑀦 𑀦𑀺𑀲𑀻𑀤𑀢𑀺.

𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸, 𑀆𑀭𑀸𑀫𑀺𑀓𑀫𑀼𑀧𑀸𑀲𑀓𑀁;

𑀅𑀦𑀸𑀧𑀼𑀘𑁆𑀙𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸, 𑀲𑀗𑁆𑀖𑀺𑀓𑀁 𑀲𑀬𑀦𑀸𑀲𑀦𑀁.

𑀮𑁂𑀟𑁆𑀟𑀼𑀧𑁆𑀧𑀸𑀢𑀫𑀢𑀺𑀓𑁆𑀓𑀫𑁆𑀫, 𑀕𑀘𑁆𑀙𑀢𑁄 𑀧𑀞𑀫𑁂 𑀧𑀤𑁂;

𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀯𑀸𑀭𑁂, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀞𑀢𑁆𑀯𑀸 𑀪𑁄𑀚𑀦𑀲𑀸𑀮𑀸𑀬𑀁, 𑀯𑀢𑁆𑀯𑀸 𑀬𑁄 𑀲𑀸𑀫𑀡𑁂𑀭𑀓𑀁;

𑀅𑀲𑀼𑀓𑀲𑁆𑀫𑀺𑀁 𑀤𑀺𑀯𑀸𑀝𑁆𑀞𑀸𑀦𑁂, 𑀧𑀜𑁆𑀜𑀸𑀧𑁂𑀳𑀻𑀢𑀺 𑀫𑀜𑁆𑀘𑀓𑀁.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀘𑁂 𑀢𑀲𑁆𑀫𑀸, 𑀞𑀸𑀦𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺;

𑀧𑀸𑀤𑀼𑀤𑁆𑀥𑀸𑀭𑁂𑀦 𑀲𑁄 𑀪𑀺𑀓𑁆𑀔𑀼, 𑀓𑀸𑀭𑁂𑀢𑀩𑁆𑀩𑁄𑀢𑀺 𑀤𑀻𑀧𑀺𑀢𑁄.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀺𑀓𑀸𑀢𑀻𑀢𑁂𑀦 𑀲𑀢𑁆𑀣𑀼𑀦𑀸;

𑀢𑀣𑀸 𑀧𑀼𑀕𑁆𑀕𑀮𑀺𑀓𑁂 𑀢𑁂𑀦, 𑀤𑀻𑀧𑀺𑀢𑀁 𑀢𑀺𑀓𑀤𑀼𑀓𑁆𑀓𑀝𑀁.

𑀘𑀺𑀫𑀺𑀮𑀺𑀁 𑀢𑀝𑁆𑀝𑀺𑀓𑀁 𑀘𑀫𑁆𑀫𑀁, 𑀨𑀮𑀓𑀁 𑀧𑀸𑀤𑀧𑀼𑀜𑁆𑀙𑀦𑀺𑀁;

𑀪𑀽𑀫𑀢𑁆𑀣𑀭𑀡𑀓𑀁 𑀯𑀸𑀧𑀺, 𑀉𑀢𑁆𑀢𑀭𑀢𑁆𑀣𑀭𑀡𑀫𑁆𑀧𑀺 𑀯𑀸.

𑀤𑀸𑀭𑀼𑀫𑀢𑁆𑀢𑀺𑀓𑀪𑀡𑁆𑀟𑀸𑀦𑀺 ¶ , 𑀧𑀢𑁆𑀢𑀸𑀥𑀸𑀭𑀓𑀫𑁂𑀯 𑀯𑀸;

𑀅𑀩𑁆𑀪𑁄𑀓𑀸𑀲𑁂 𑀞𑀧𑁂𑀢𑁆𑀯𑀸 𑀢𑀁, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀲𑀘𑁂 𑀆𑀭𑀜𑁆𑀜𑀓𑁂𑀦𑀸𑀧𑀺, 𑀅𑀦𑁄𑀯𑀲𑁆𑀲𑁂 𑀘 𑀦𑁄 𑀲𑀢𑀺;

𑀮𑀕𑁆𑀕𑁂𑀢𑁆𑀯𑀸 𑀧𑀦 𑀭𑀼𑀓𑁆𑀔𑀲𑁆𑀫𑀺𑀁, 𑀕𑀦𑁆𑀢𑀩𑁆𑀩𑀁 𑀢𑀼 𑀬𑀣𑀸𑀲𑀼𑀔𑀁.

𑀬𑀣𑀸 𑀉𑀧𑀘𑀺𑀓𑀸𑀤𑀻𑀳𑀺, 𑀦 𑀔𑀚𑁆𑀚𑀢𑀺 𑀦 𑀮𑀼𑀚𑁆𑀚𑀢𑀺;

𑀢𑀣𑀸 𑀓𑀢𑁆𑀯𑀸𑀧𑀺 𑀢𑀁 𑀲𑀩𑁆𑀩𑀁, 𑀕𑀦𑁆𑀢𑀼𑀁 𑀧𑀦 𑀘 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀼𑀤𑁆𑀥𑀭𑀸𑀧𑁂𑀢𑁆𑀯𑀸, 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑁄;

𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀭𑀼𑀤𑁆𑀥𑁂, 𑀆𑀧𑀤𑀸𑀲𑀼𑀧𑀺 𑀪𑀺𑀓𑁆𑀔𑀼𑀦𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢-𑀫𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀪𑀺𑀲𑀺𑀘𑀺𑀫𑀺𑀮𑀺𑀓𑀸 𑀪𑀽𑀫-𑀢𑁆𑀣𑀭𑀡𑀁 𑀉𑀢𑁆𑀢𑀭𑀢𑁆𑀣𑀭𑀁;

𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀘, 𑀧𑀘𑁆𑀘𑀢𑁆𑀣𑀭𑀦𑀺𑀲𑀻𑀤𑀦𑀁.

𑀲𑀦𑁆𑀣𑀸𑀭𑁄 𑀢𑀺𑀡𑀧𑀡𑁆𑀡𑀸𑀦𑀁, 𑀲𑁂𑀬𑁆𑀬𑀸 𑀤𑀲𑀯𑀺𑀥𑀸 𑀲𑀺𑀬𑀸;

𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼 𑀬𑁄 𑀧𑀦.

𑀏𑀢𑀁 𑀤𑀲𑀯𑀺𑀥𑀁 𑀲𑁂𑀬𑁆𑀬𑀁, 𑀲𑀦𑁆𑀣𑀭𑀺𑀢𑁆𑀯𑀸𑀧𑀺 𑀯𑀸 𑀲𑀬𑀁;

𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀦𑀸𑀧𑀼𑀘𑁆𑀙𑀸, 𑀅𑀢𑀺𑀓𑁆𑀓𑀫𑀢𑀺 𑀢𑀁 𑀲𑀘𑁂.

𑀆𑀭𑀸𑀫𑀲𑁆𑀲𑀽𑀧𑀘𑀸𑀭𑀁 𑀯𑀸, 𑀧𑀭𑀺𑀓𑁆𑀔𑁂𑀧𑀁 𑀧𑀦𑀲𑁆𑀲 𑀯𑀸;

𑀧𑀞𑀫𑁂 𑀤𑀼𑀓𑁆𑀓𑀝𑀁 𑀧𑀸𑀤𑁂, 𑀧𑀸𑀘𑀺𑀢𑁆𑀢𑀺 𑀤𑀼𑀢𑀺𑀬𑁂 𑀲𑀺𑀬𑀸.

𑀲𑁂𑀦𑀸𑀲𑀦𑀲𑁆𑀲 𑀲𑁂𑀬𑁆𑀬𑀸𑀬, 𑀉𑀪𑀬𑁂𑀲𑀁 𑀯𑀺𑀦𑀸𑀲𑀢𑁄;

𑀕𑀘𑁆𑀙𑀢𑁄 𑀲𑀦𑁆𑀣𑀭𑀺𑀢𑁆𑀯𑀦𑁆𑀢𑁄-𑀕𑀩𑁆𑀪𑁂 𑀧𑀸𑀘𑀺𑀢𑁆𑀢𑀺 𑀯𑀡𑁆𑀡𑀺𑀢𑀸.

𑀉𑀧𑀘𑀸𑀭𑁂 𑀯𑀺𑀳𑀸𑀭𑀲𑁆𑀲, 𑀤𑀼𑀓𑁆𑀓𑀝𑀁 𑀫𑀡𑁆𑀟𑀧𑀸𑀤𑀺𑀓𑁂;

𑀕𑀘𑁆𑀙𑀢𑁄 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸, 𑀲𑁂𑀬𑁆𑀬𑀸𑀫𑀢𑁆𑀢𑀁 𑀯𑀺𑀦𑀸𑀲𑀢𑁄.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 ¶ 𑀯𑀼𑀢𑁆𑀢𑀁, 𑀲𑀗𑁆𑀖𑀺𑀓𑁂 𑀤𑀲𑀯𑀢𑁆𑀣𑀼𑀓𑁂;

𑀢𑀣𑀸 𑀧𑀼𑀕𑁆𑀕𑀮𑀺𑀓𑁂 𑀢𑀲𑁆𑀲, 𑀤𑀻𑀧𑀺𑀢𑀁 𑀢𑀺𑀓𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀼𑀤𑁆𑀥𑀭𑀺𑀢𑁆𑀯𑀸 𑀯𑀸, 𑀆𑀧𑀼𑀘𑁆𑀙𑀁 𑀯𑀸𑀧𑀺 𑀕𑀘𑁆𑀙𑀢𑁄;

𑀧𑀮𑀺𑀩𑀼𑀤𑁆𑀥𑁂𑀧𑀺 𑀯𑀸𑀜𑁆𑀜𑁂𑀦, 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀧𑀺 𑀯𑀸.

𑀲𑀸𑀧𑁂𑀓𑁆𑀔𑁄𑀯 𑀘 𑀕𑀦𑁆𑀢𑁆𑀯𑀸 𑀢𑀁, 𑀢𑀢𑁆𑀣 𑀞𑀢𑁆𑀯𑀸𑀧𑀺 𑀧𑀼𑀘𑁆𑀙𑀢𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑀬𑁄 𑀧𑀼𑀩𑁆𑀩𑀼𑀧𑀕𑀢𑀁 𑀪𑀺𑀓𑁆𑀔𑀼𑀁, 𑀚𑀸𑀦𑀁 𑀅𑀦𑀼𑀧𑀔𑀚𑁆𑀚 𑀘;

𑀓𑀧𑁆𑀧𑁂𑀬𑁆𑀬 𑀲𑀗𑁆𑀖𑀺𑀓𑀸𑀯𑀸𑀲𑁂, 𑀲𑁂𑀬𑁆𑀬𑀁 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀘𑁂.

𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀸, 𑀧𑀯𑀺𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀬𑀸𑀯 𑀢𑀁 𑀫𑀜𑁆𑀘𑀧𑀻𑀞𑀁 𑀯𑀸, 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸 𑀧𑀦.

𑀫𑀜𑁆𑀘𑀧𑀻𑀞𑀓𑀢𑁄 ¶ 𑀬𑀸𑀯, 𑀧𑀲𑁆𑀲𑀸𑀯𑀝𑁆𑀞𑀸𑀦𑀫𑁂𑀯 𑀢𑀼;

𑀏𑀢𑁆𑀣𑀦𑁆𑀢𑀭𑁂 𑀇𑀤𑀁 𑀞𑀸𑀦𑀁, 𑀉𑀧𑀘𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀩𑀸𑀥𑁂𑀢𑀼𑀓𑀸𑀫𑀲𑁆𑀲, 𑀉𑀧𑀘𑀸𑀭𑁂 𑀢𑀼 𑀪𑀺𑀓𑁆𑀔𑀼𑀦𑁄;

𑀤𑀲𑀲𑁆𑀯𑀜𑁆𑀜𑀢𑀭𑀁 𑀲𑁂𑀬𑁆𑀬𑀁, 𑀲𑀦𑁆𑀣𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀦𑀺𑀲𑀻𑀤𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣, 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀯𑀸 𑀧𑀦;

𑀢𑀣𑀸 𑀤𑁆𑀯𑁂𑀧𑀺 𑀓𑀭𑁄𑀦𑁆𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁.

𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀲𑁆𑀲, 𑀧𑀬𑁄𑀕𑀕𑀡𑀦𑀸𑀯𑀲𑀸;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀯𑀼𑀢𑁆𑀢𑀽𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸, 𑀲𑁂𑀬𑁆𑀬𑀁 𑀲𑀦𑁆𑀣𑀭𑀢𑁄𑀧𑀺 𑀯𑀸;

𑀯𑀺𑀳𑀸𑀭𑀲𑁆𑀲𑀽𑀧𑀘𑀸𑀭𑁂 𑀯𑀸, 𑀅𑀚𑁆𑀛𑁄𑀓𑀸𑀲𑁂𑀧𑀺 𑀯𑀸 𑀧𑀦.

𑀲𑀦𑁆𑀣𑀭𑀸𑀧𑀬𑀢𑁄 𑀯𑀸𑀧𑀺, 𑀢𑀢𑁆𑀣 𑀢𑀲𑁆𑀲 𑀦𑀺𑀲𑀻𑀤𑀢𑁄;

𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦𑀺𑀯𑀸𑀲𑁄 𑀘 𑀦𑀺𑀯𑀸𑀭𑀺𑀢𑁄.

𑀅𑀦𑀸𑀧𑀢𑁆𑀢𑀺 ¶ 𑀕𑀺𑀮𑀸𑀦𑀲𑁆𑀲, 𑀲𑀻𑀢𑀸𑀤𑀼𑀧𑁆𑀧𑀻𑀴𑀺𑀢𑀲𑁆𑀲 𑀯𑀸;

𑀆𑀧𑀤𑀸𑀲𑀼𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀲𑀤𑀺𑀲𑀸𑀢𑀺 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀳𑁄𑀢𑀻𑀤𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀯𑀺𑀳𑀸𑀭𑀸 𑀲𑀗𑁆𑀖𑀺𑀓𑀸 𑀪𑀺𑀓𑁆𑀔𑀼𑀁, 𑀦𑀺𑀓𑁆𑀓𑀟𑁆𑀠𑁂𑀬𑁆𑀬 𑀲𑀘𑁂 𑀧𑀦;

𑀦𑀺𑀓𑁆𑀓𑀟𑁆𑀠𑀸𑀧𑁂𑀬𑁆𑀬 𑀯𑀸 𑀓𑀼𑀤𑁆𑀥𑁄, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀩𑀳𑀼𑀪𑀽𑀫𑀸𑀧𑀺 𑀧𑀸𑀲𑀸𑀤𑀸, 𑀧𑀬𑁄𑀕𑁂𑀦𑁂𑀓𑀓𑁂𑀦 𑀬𑁄;

𑀦𑀺𑀓𑁆𑀓𑀟𑁆𑀠𑁂𑀢𑀺 𑀲𑀘𑁂 𑀢𑀲𑁆𑀲, 𑀏𑀓𑀸 𑀧𑀸𑀘𑀺𑀢𑁆𑀢𑀺 𑀤𑀻𑀧𑀺𑀢𑀸.

𑀞𑀧𑁂𑀢𑁆𑀯𑀸 𑀘 𑀞𑀧𑁂𑀢𑁆𑀯𑀸 𑀘, 𑀦𑀺𑀓𑁆𑀓𑀟𑁆𑀠𑀦𑁆𑀢𑀲𑁆𑀲 𑀅𑀦𑁆𑀢𑀭𑀸;

𑀤𑁆𑀯𑀸𑀭𑀸𑀦𑀁 𑀕𑀡𑀦𑀸𑀬𑀲𑁆𑀲, 𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁄 𑀧𑀦.

‘‘𑀦𑀺𑀓𑁆𑀔𑀫𑀸’’𑀢𑀺 𑀯𑀤𑀦𑁆𑀢𑀲𑁆𑀲, 𑀯𑀸𑀘𑀸𑀬𑀧𑀺 𑀅𑀬𑀁 𑀦𑀬𑁄;

𑀆𑀡𑀢𑁆𑀢𑀺𑀬𑀸 𑀔𑀡𑁂𑀬𑁂𑀯, 𑀆𑀡𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀘𑁂 𑀲𑁄 𑀲𑀓𑀺𑀫𑀸𑀡𑀢𑁆𑀢𑁄, 𑀤𑁆𑀯𑀸𑀭𑁂𑀧𑀺 𑀩𑀳𑀼𑀓𑁂 𑀧𑀦;

𑀅𑀢𑀺𑀓𑁆𑀓𑀸𑀫𑁂𑀢𑀺 𑀏𑀓𑀸𑀯, 𑀩𑀳𑀼𑀓𑀸𑀦𑀺 𑀩𑀳𑀽𑀦𑀺 𑀘𑁂.

𑀢𑀲𑁆𑀲𑀽𑀧𑀝𑁆𑀞𑀸𑀦𑀲𑀸𑀮𑀸𑀤𑀺-𑀯𑀺𑀳𑀸𑀭𑀲𑁆𑀲𑀽𑀧𑀘𑀸𑀭𑀢𑁄 ¶ ;

𑀓𑀸𑀬𑁂𑀦𑀧𑀺 𑀘 𑀯𑀸𑀘𑀸𑀬, 𑀢𑀣𑀸 𑀦𑀺𑀓𑁆𑀓𑀟𑁆𑀠𑀦𑁂𑀧𑀺 𑀘.

𑀯𑀺𑀳𑀸𑀭𑀲𑁆𑀲𑀽𑀧𑀘𑀸𑀭𑀸 𑀯𑀸, 𑀯𑀺𑀳𑀸𑀭𑀸 𑀯𑀸𑀧𑀺 𑀘𑁂𑀢𑀭𑀁;

𑀦𑀺𑀓𑁆𑀓𑀟𑁆𑀠𑀦𑁆𑀢𑀲𑁆𑀲 𑀲𑀩𑁆𑀩𑁂𑀲𑀁, 𑀧𑀭𑀺𑀓𑁆𑀔𑀸𑀭𑀫𑁆𑀧𑀺 𑀤𑀼𑀓𑁆𑀓𑀝𑀁.

𑀅𑀲𑀫𑁆𑀩𑀤𑁆𑀥𑁂𑀲𑀼 𑀪𑀺𑀓𑁆𑀔𑀼𑀲𑁆𑀲, 𑀧𑀭𑀺𑀓𑁆𑀔𑀸𑀭𑁂𑀲𑀼 𑀧𑀡𑁆𑀟𑀺𑀢𑁄;

𑀯𑀢𑁆𑀣𑀽𑀦𑀁 𑀕𑀡𑀦𑀸𑀬𑀲𑁆𑀲, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀬𑁂.

𑀅𑀦𑁆𑀢𑁂𑀯𑀸𑀲𑀺𑀫𑀮𑀚𑁆𑀚𑀺𑀁 𑀯𑀸, 𑀢𑀣𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁;

𑀦𑀺𑀓𑁆𑀓𑀟𑁆𑀠𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀁, 𑀲𑀬𑀁 𑀉𑀫𑁆𑀫𑀢𑁆𑀢𑀓𑀲𑁆𑀲 𑀘.

𑀅𑀢𑁆𑀢𑀦𑁄 ¶ 𑀯𑀲𑀦𑀝𑁆𑀞𑀸𑀦𑀸, 𑀢𑀣𑀸 𑀯𑀺𑀲𑁆𑀲𑀸𑀲𑀺𑀓𑀲𑁆𑀲 𑀯𑀸;

𑀧𑀭𑀺𑀓𑁆𑀔𑀸𑀭𑀜𑁆𑀘 𑀯𑀸 𑀢𑁂𑀲𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀲𑀗𑁆𑀖𑀸𑀭𑀸𑀫𑀸𑀧𑀺 𑀲𑀩𑁆𑀩𑀲𑁆𑀫𑀸, 𑀢𑀣𑀸 𑀓𑀮𑀳𑀓𑀸𑀭𑀓𑀁;

𑀇𑀤𑀁 𑀢𑀼 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀯𑁂𑀤𑀦𑀸 𑀤𑀼𑀓𑁆𑀔𑀯𑁂𑀤𑀦𑀸.

𑀫𑀚𑁆𑀛𑀺𑀫𑀸𑀲𑀻𑀲𑀖𑀝𑁆𑀝𑀸𑀬, 𑀯𑁂𑀳𑀸𑀲𑀓𑀼𑀝𑀺𑀬𑀽𑀧𑀭𑀺;

𑀆𑀳𑀘𑁆𑀘𑀧𑀸𑀤𑀓𑁂 𑀫𑀜𑁆𑀘𑁂, 𑀧𑀻𑀞𑁂 𑀯𑀸 𑀧𑀦 𑀪𑀺𑀓𑁆𑀔𑀼𑀦𑁄.

𑀦𑀺𑀲𑀻𑀤𑀦𑁆𑀢𑀲𑁆𑀲 𑀯𑀸 𑀢𑀲𑁆𑀫𑀺𑀁, 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀯𑀸 𑀧𑀦;

𑀧𑀬𑁄𑀕𑀕𑀡𑀦𑀸𑀬𑁂𑀯, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀁.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑁂 𑀢𑀺𑀓𑀤𑀼𑀓𑁆𑀓𑀝𑀁;

𑀳𑁂𑀝𑁆𑀞𑀸 𑀅𑀧𑀭𑀺𑀪𑁄𑀕𑁂 𑀯𑀸, 𑀲𑀻𑀲𑀖𑀝𑁆𑀝𑀸𑀬 𑀯𑀸 𑀧𑀦.

𑀅𑀯𑁂𑀳𑀸𑀲𑀯𑀺𑀳𑀸𑀭𑁂 𑀯𑀸, 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀧𑀺 𑀯𑀸;

𑀯𑀺𑀲𑁆𑀲𑀸𑀲𑀺𑀓𑀯𑀺𑀳𑀸𑀭𑁂 𑀯𑀸, 𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀬𑀢𑁆𑀣 𑀧𑀝𑀸𑀡𑀺 𑀯𑀸 𑀤𑀺𑀦𑁆𑀦𑀸, 𑀢𑀢𑁆𑀣 𑀞𑀢𑁆𑀯𑀸 𑀮𑀕𑁂𑀢𑀺 𑀯𑀸;

𑀇𑀤𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀲𑀫𑀁 𑀫𑀢𑀁.

𑀬𑀸𑀯 𑀤𑁆𑀯𑀸𑀭𑀲𑁆𑀲 𑀓𑁄𑀲𑀫𑁆𑀳𑀸, 𑀅𑀕𑁆𑀕𑀴𑀝𑁆𑀞𑀧𑀦𑀸𑀬 𑀢𑀼;

𑀪𑀺𑀓𑁆𑀔𑀼𑀦𑀸 𑀮𑀺𑀫𑁆𑀧𑀺𑀢𑀩𑁆𑀩𑀁 𑀯𑀸, 𑀮𑁂𑀧𑀸𑀧𑁂𑀢𑀩𑁆𑀩𑀫𑁂𑀯 𑀯𑀸.

𑀜𑁂𑀬𑁆𑀬𑁄 ¶ 𑀆𑀮𑁄𑀓𑀲𑀦𑁆𑀥𑀻𑀦𑀁, 𑀧𑀭𑀺𑀓𑀫𑁆𑀫𑁂𑀧𑁆𑀬𑀬𑀁 𑀦𑀬𑁄;

𑀙𑀤𑀦𑀲𑁆𑀲 𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑀁, 𑀞𑀺𑀢𑁂𑀦 𑀳𑀭𑀺𑀢𑁂 𑀧𑀦.

𑀅𑀥𑀺𑀝𑁆𑀞𑁂𑀬𑁆𑀬𑀁 𑀢𑀢𑁄 𑀉𑀤𑁆𑀥𑀁, 𑀅𑀥𑀺𑀝𑁆𑀞𑁂𑀢𑀺 𑀲𑀘𑁂 𑀧𑀦;

𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀤𑀼𑀓𑁆𑀓𑀝𑀁 𑀢𑀢𑁆𑀣 𑀢𑀺𑀝𑁆𑀞𑀢𑁄.

𑀧𑀺𑀝𑁆𑀞𑀺𑀯𑀁𑀲𑁂 ¶ 𑀞𑀺𑀢𑁄 𑀓𑁄𑀘𑀺, 𑀙𑀤𑀦𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸;

𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀪𑀺𑀓𑁆𑀔𑀼𑀁, 𑀑𑀮𑁄𑀓𑁂𑀦𑁆𑀢𑁄 𑀦 𑀧𑀲𑁆𑀲𑀢𑀺.

𑀢𑀲𑁆𑀫𑀺𑀁 𑀞𑀸𑀦𑁂 𑀧𑀦 𑀞𑀸𑀢𑀼𑀁, 𑀦𑁂𑀯 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀺;

𑀯𑀺𑀳𑀸𑀭𑀲𑁆𑀲 𑀧𑀢𑀦𑁆𑀢𑀲𑁆𑀲, 𑀧𑀢𑀦𑁄𑀓𑀸𑀲𑀢𑁄 𑀳𑀺 𑀢𑀁.

𑀊𑀦𑀓𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑁂, 𑀅𑀢𑀺𑀭𑁂𑀓𑁄𑀢𑀺 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀦 𑀤𑁄𑀲𑁄 𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑁂, 𑀮𑁂𑀡𑁂 𑀢𑀺𑀡𑀓𑀼𑀝𑀻𑀲𑀼 𑀯𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀢𑁄𑀬𑀁, 𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀫𑁆𑀧𑀺 𑀯𑀸;

𑀬𑀤𑀺 𑀲𑀺𑀜𑁆𑀘𑁂𑀬𑁆𑀬 𑀧𑀸𑀘𑀺𑀢𑁆𑀢𑀺, 𑀲𑀺𑀜𑁆𑀘𑀸𑀧𑁂𑀬𑁆𑀬 𑀧𑀭𑁂𑀳𑀺 𑀯𑀸.

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀘𑁂 𑀥𑀸𑀭𑀁, 𑀫𑀢𑁆𑀢𑀺𑀓𑀁 𑀲𑀺𑀜𑁆𑀘𑀢𑁄 𑀧𑀦;

𑀏𑀓𑀲𑁆𑀫𑀺𑀫𑁆𑀧𑀺 𑀖𑀝𑁂 𑀏𑀓𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀯𑀺𑀘𑁆𑀙𑀺𑀦𑁆𑀤𑀢𑀺 𑀲𑀘𑁂 𑀥𑀸𑀭𑀁, 𑀧𑀬𑁄𑀕𑀕𑀡𑀦𑀸𑀯𑀲𑀸;

𑀲𑀫𑁆𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀲𑁆𑀲, 𑀫𑀸𑀢𑀺𑀓𑀁 𑀲𑀦𑁆𑀤𑀫𑀸𑀦𑀓𑀁.

𑀏𑀓𑀸𑀯 𑀘𑁂 𑀲𑀺𑀬𑀸𑀧𑀢𑁆𑀢𑀺, 𑀤𑀺𑀯𑀲𑀫𑁆𑀧𑀺 𑀘 𑀲𑀦𑁆𑀤𑀢𑀼;

𑀩𑀦𑁆𑀥𑀢𑁄 𑀢𑀢𑁆𑀣 𑀢𑀢𑁆𑀣𑀲𑁆𑀲, 𑀧𑀬𑁄𑀕𑀕𑀡𑀦𑀸 𑀲𑀺𑀬𑀸.

𑀲𑀘𑁂 𑀲𑀓𑀝𑀧𑀼𑀡𑁆𑀡𑀫𑁆𑀧𑀺, 𑀫𑀢𑁆𑀢𑀺𑀓𑀁 𑀢𑀺𑀡𑀫𑁂𑀯 𑀯𑀸;

𑀉𑀤𑀓𑁂 𑀧𑀓𑁆𑀔𑀺𑀧𑀦𑁆𑀢𑀲𑁆𑀲, 𑀏𑀓𑀸 𑀧𑀸𑀘𑀺𑀢𑁆𑀢𑀺 𑀏𑀓𑀢𑁄.

𑀏𑀓𑁂𑀓𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲, 𑀧𑀬𑁄𑀕𑀕𑀡𑀦𑀸𑀬 𑀘𑁂;

𑀔𑀬𑀁 𑀯𑀸 𑀆𑀯𑀺𑀮𑀢𑁆𑀢𑀁 𑀯𑀸, 𑀚𑀮𑀁 𑀕𑀘𑁆𑀙𑀢𑀺 𑀢𑀸𑀤𑀺𑀲𑁂.

‘‘𑀲𑀺𑀜𑁆𑀘𑀸𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀏𑀓𑀸, 𑀤𑀺𑀯𑀲𑀫𑁆𑀧𑀺 𑀘 𑀲𑀺𑀜𑁆𑀘𑀢𑁄.

𑀅𑀧𑁆𑀧𑀸𑀡𑁂 ¶ ¶ 𑀉𑀤𑀓𑁂 𑀲𑀼𑀤𑁆𑀥𑁂, 𑀲𑀧𑁆𑀧𑀸𑀡𑀫𑀺𑀢𑀺 𑀲𑀜𑁆𑀜𑀺𑀦𑁄;

𑀲𑀩𑁆𑀩𑀢𑁆𑀣 𑀯𑀺𑀫𑀢𑀺𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀩𑁆𑀩𑀢𑁆𑀣𑀸𑀧𑀸𑀡𑀲𑀜𑁆𑀜𑀺𑀲𑁆𑀲, 𑀅𑀲𑀜𑁆𑀘𑀺𑀘𑁆𑀘𑀸𑀲𑀢𑀺𑀲𑁆𑀲 𑀯𑀸;

𑀅𑀚𑀸𑀦𑀢𑁄 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀲𑀧𑁆𑀧𑀸𑀡𑀓𑀢𑁆𑀢𑀁 𑀢𑁄𑀬𑀲𑁆𑀲, 𑀲𑀧𑁆𑀧𑀸𑀡𑀦𑁆𑀢𑀺 𑀯𑀺𑀚𑀸𑀦𑀦𑀁;

𑀯𑀺𑀦𑀸 𑀯𑀥𑀓𑀘𑀺𑀢𑁆𑀢𑁂𑀦, 𑀢𑀺𑀡𑀸𑀤𑀻𑀦𑀁 𑀦𑀺𑀲𑁂𑀘𑀦𑀁.

𑀘𑀢𑁆𑀢𑀸𑀭𑁂𑀯𑀲𑁆𑀲 𑀅𑀗𑁆𑀕𑀸𑀦𑀺, 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀫𑀳𑁂𑀲𑀺𑀦𑀸;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘, 𑀢𑀺𑀘𑀺𑀢𑁆𑀢𑀜𑁆𑀘𑀸𑀢𑀺 𑀤𑀻𑀧𑀺𑀢𑀁;

𑀇𑀤𑀫𑁂𑀯𑁂𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲 𑀘𑀲𑁆𑀲 𑀯𑀺𑀲𑁂𑀲𑀦𑀁.

𑀪𑀺𑀓𑁆𑀔𑀼𑀲𑁆𑀲𑀸𑀝𑁆𑀞𑀗𑁆𑀕𑀬𑀼𑀢𑁆𑀢𑀲𑁆𑀲, 𑀪𑀺𑀓𑁆𑀔𑀼𑀦𑁄𑀯𑀸𑀤𑀲𑀫𑁆𑀫𑀼𑀢𑀺;

𑀇𑀥 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦, 𑀅𑀦𑀼𑀜𑁆𑀜𑀸𑀢𑀸 𑀫𑀳𑁂𑀲𑀺𑀦𑀸.

𑀬𑁄 𑀢𑀸𑀬𑀸𑀲𑀫𑁆𑀫𑀢𑁄 𑀪𑀺𑀓𑁆𑀔𑀼, 𑀕𑀭𑀼𑀥𑀫𑁆𑀫𑁂𑀳𑀺 𑀅𑀝𑁆𑀞𑀳𑀺;

𑀏𑀓𑀁 𑀲𑀫𑁆𑀩𑀳𑀼𑀮𑀸 𑀯𑀸𑀧𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀫𑁂𑀯 𑀯𑀸.

𑀑𑀲𑀸𑀭𑁂𑀦𑁆𑀢𑁄𑀯 𑀢𑁂 𑀥𑀫𑁆𑀫𑁂, 𑀑𑀯𑀤𑁂𑀬𑁆𑀬 𑀲𑀘𑁂 𑀧𑀦;

𑀑𑀯𑀸𑀤𑀧𑀭𑀺𑀬𑁄𑀲𑀸𑀦𑁂, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀅𑀜𑁆𑀜𑁂𑀦 𑀧𑀦 𑀥𑀫𑁆𑀫𑁂𑀦, 𑀑𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁, 𑀕𑀭𑀼𑀥𑀫𑁆𑀫𑁂𑀳𑀺 𑀯𑀸 𑀢𑀣𑀸.

𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂𑀬𑁂𑀯, 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀺𑀁;

𑀢𑀣𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂, 𑀧𑀸𑀘𑀺𑀢𑁆𑀢𑁂𑀯 𑀧𑀓𑀸𑀲𑀺𑀢𑀸.

𑀲𑀫𑁆𑀫𑀢𑀲𑁆𑀲𑀸𑀧𑀺 ¶ 𑀪𑀺𑀓𑁆𑀔𑀼𑀲𑁆𑀲, 𑀤𑀼𑀓𑁆𑀓𑀝𑀁 𑀲𑀫𑀼𑀤𑀻𑀭𑀺𑀢𑀁;

𑀑𑀯𑀸𑀤𑀁 𑀅𑀦𑀺𑀬𑀸𑀤𑁂𑀢𑁆𑀯𑀸, 𑀥𑀫𑁆𑀫𑁂𑀦𑀜𑁆𑀜𑁂𑀦 𑀪𑀸𑀲𑀢𑁄.

‘‘𑀲𑀫𑀕𑁆𑀕𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂𑀧𑀺, 𑀅𑀜𑁆𑀜𑁂𑀦𑁄𑀯𑀤𑀢𑁄 𑀢𑀣𑀸;

‘‘𑀯𑀕𑁆𑀕𑀫𑁆𑀳𑀸’’𑀢𑀺 𑀘 𑀯𑀼𑀢𑁆𑀢𑁂𑀧𑀺, 𑀕𑀭𑀼𑀥𑀫𑁆𑀫𑁂𑀳𑀺 𑀤𑀼𑀓𑁆𑀓𑀝𑀁.

𑀅𑀕𑀡𑁆𑀳𑀦𑁆𑀢𑀲𑁆𑀲 ¶ 𑀑𑀯𑀸𑀤𑀁, 𑀅𑀧𑀘𑁆𑀘𑀸𑀳𑀭𑀢𑁄𑀧𑀺 𑀢𑀁;

𑀞𑀧𑁂𑀢𑁆𑀯𑀸 𑀤𑀼𑀓𑁆𑀓𑀝𑀁 𑀩𑀸𑀮𑀁, 𑀕𑀺𑀮𑀸𑀦𑀁 𑀕𑀫𑀺𑀓𑀁 𑀲𑀺𑀬𑀸.

𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀅𑀥𑀫𑁆𑀫𑀦𑁆𑀢𑀺 𑀘 𑀲𑀜𑁆𑀜𑀺𑀦𑁄;

𑀯𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀫𑀺𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀢𑀣𑀸 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀦𑀯 𑀧𑀸𑀘𑀺𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀲𑀫𑀕𑁆𑀕𑁂𑀧𑀺 𑀘 𑀢𑀢𑁆𑀢𑀓𑀸.

𑀦𑀯𑀓𑀸𑀦𑀁 𑀯𑀲𑀸 𑀤𑁆𑀯𑀺𑀦𑁆𑀦𑀁, 𑀅𑀝𑁆𑀞𑀸𑀭𑀲 𑀪𑀯𑀦𑁆𑀢𑀺 𑀢𑀸;

𑀤𑀼𑀓𑁆𑀓𑀝𑀁 𑀥𑀫𑁆𑀫𑀓𑀫𑁆𑀫𑁂𑀧𑀺, 𑀲𑀢𑁆𑀢𑀭𑀲𑀯𑀺𑀥𑀁 𑀲𑀺𑀬𑀸.

‘‘𑀑𑀲𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀸, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀺 𑀯𑀸;

𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀦𑁂𑀯, 𑀤𑁄𑀲𑁄 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀯𑀸𑀘𑀼𑀕𑁆𑀕𑀢𑀸𑀯 𑀓𑀸𑀢𑀩𑁆𑀩𑀸, 𑀧𑀕𑀼𑀡𑀸 𑀤𑁆𑀯𑁂𑀧𑀺 𑀫𑀸𑀢𑀺𑀓𑀸;

𑀲𑀼𑀢𑁆𑀢𑀦𑁆𑀢𑀢𑁄 𑀘 𑀘𑀢𑁆𑀢𑀸𑀭𑁄, 𑀪𑀸𑀡𑀯𑀸𑀭𑀸 𑀧𑀓𑀸𑀲𑀺𑀢𑀸.

𑀏𑀓𑁄 𑀧𑀭𑀺𑀓𑀣𑀢𑁆𑀣𑀸𑀬, 𑀓𑀣𑀸𑀫𑀕𑁆𑀕𑁄 𑀧𑀓𑀸𑀲𑀺𑀢𑁄;

𑀫𑀗𑁆𑀕𑀮𑀸𑀫𑀗𑁆𑀕𑀮𑀢𑁆𑀣𑀸𑀬, 𑀢𑀺𑀲𑁆𑀲𑁄𑀬𑁂𑀯𑀸𑀦𑀼𑀫𑁄𑀤𑀦𑀸.

𑀉𑀧𑁄𑀲𑀣𑀸𑀤𑀺𑀅𑀢𑁆𑀣𑀸𑀬, 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄;

𑀓𑀫𑁆𑀫𑀝𑁆𑀞𑀸𑀦𑀁 𑀢𑀣𑀸 𑀏𑀓𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀸𑀧𑀓𑀁.

𑀏𑀢𑁆𑀢𑀓𑀁 𑀉𑀕𑁆𑀕𑀳𑁂𑀢𑁆𑀯𑀸𑀦, 𑀧𑀜𑁆𑀘𑀯𑀲𑁆𑀲𑁄 𑀩𑀳𑀼𑀲𑁆𑀲𑀼𑀢𑁄;

𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀲𑁆𑀲𑀬𑀁 𑀓𑀸𑀫𑀁, 𑀯𑀲𑀺𑀢𑀼𑀁 𑀮𑀪𑀢𑀺𑀲𑁆𑀲𑀭𑁄.

𑀯𑀸𑀘𑀼𑀕𑁆𑀕𑀢𑀸 𑀯𑀺𑀪𑀗𑁆𑀕𑀸 𑀤𑁆𑀯𑁂, 𑀧𑀕𑀼𑀡𑀸 𑀩𑁆𑀬𑀜𑁆𑀚𑀦𑀸𑀤𑀺𑀢𑁄;

𑀘𑀢𑀽𑀲𑁆𑀯𑀧𑀺 𑀦𑀺𑀓𑀸𑀬𑁂𑀲𑀼, 𑀏𑀓𑁄 𑀯𑀸 𑀧𑁄𑀢𑁆𑀣𑀓𑁄𑀧𑀺 𑀘.

𑀓𑀫𑁆𑀫𑀸𑀓𑀫𑁆𑀫𑀜𑁆𑀘 𑀯𑀢𑁆𑀢𑀸𑀦𑀺, 𑀉𑀕𑁆𑀕𑀳𑁂𑀢𑀩𑁆𑀩𑀫𑁂𑀢𑁆𑀢𑀓𑀁;

𑀲𑀩𑁆𑀩𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑁄, 𑀤𑀲𑀯𑀲𑁆𑀲𑁄 𑀲𑀘𑁂 𑀧𑀦.

𑀩𑀳𑀼𑀲𑁆𑀲𑀼𑀢𑁄 ¶ 𑀤𑀺𑀲𑀸𑀫𑁄𑀓𑁆𑀔𑁄, 𑀬𑁂𑀦𑀓𑀸𑀫𑀁𑀕𑀫𑁄 𑀲𑀺𑀬𑀸;

𑀧𑀭𑀺𑀲𑀁 𑀮𑀪𑀢𑁂 𑀓𑀸𑀫𑀁, 𑀉𑀧𑀝𑁆𑀞𑀸𑀧𑁂𑀢𑀼𑀫𑀺𑀲𑁆𑀲𑀭𑁄.

𑀬𑀲𑁆𑀲 𑀲𑀸𑀝𑁆𑀞𑀓𑀣𑀁 𑀲𑀩𑁆𑀩𑀁, 𑀯𑀸𑀘𑀼𑀕𑁆𑀕𑀁 𑀧𑀺𑀝𑀓𑀢𑁆𑀢𑀬𑀁;

𑀲𑁄𑀬𑀁 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀺𑀬𑀸.

𑀅𑀲𑁆𑀲𑀸𑀲𑀫𑁆𑀫𑀢𑀢𑀸𑀤𑀻𑀦𑀺 ¶ , 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀤𑀻𑀧𑀬𑁂;

𑀧𑀤𑀲𑁄𑀥𑀫𑁆𑀫𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀧𑀸𑀘𑀺𑀢𑁆𑀢𑀺 𑀕𑀭𑀼𑀥𑀫𑁆𑀫𑁂𑀳𑀺, 𑀥𑀫𑁆𑀫𑁂𑀦𑀜𑁆𑀜𑁂𑀦 𑀯𑀸 𑀧𑀦;

𑀳𑁄𑀢𑁆𑀬𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀑𑀯𑀤𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑀺𑀁.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑀫𑁆𑀫𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁, 𑀑𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀣𑀸𑀦𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀕𑀢𑁂 𑀅𑀢𑁆𑀣𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀉𑀤𑁆𑀤𑁂𑀲𑀸𑀤𑀺𑀦𑀬𑁂𑀦𑀲𑁆𑀲, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀅𑀦𑀦𑁆𑀢𑀭𑀲𑀫𑀸 𑀲𑁂𑀲𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀪𑀺𑀓𑁆𑀔𑀼𑀦𑀺𑀁 𑀑𑀯𑀤𑀦𑁆𑀢𑀲𑁆𑀲, 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀕𑀭𑀼𑀥𑀫𑁆𑀫𑁂𑀳𑀺 𑀅𑀜𑁆𑀜𑀢𑁆𑀭, 𑀓𑀸𑀮𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀲𑀘𑁂 𑀅𑀲𑀫𑁆𑀫𑀢𑁄 𑀳𑁄𑀢𑀺, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁;

𑀅𑀢𑁆𑀣𑀗𑁆𑀕𑀢𑁂 𑀘 𑀲𑀽𑀭𑀺𑀬𑁂, 𑀲𑀘𑁂 𑀯𑀤𑀢𑀺 𑀢𑀻𑀡𑀺𑀧𑀺.

𑀅𑀜𑁆𑀜𑁂𑀦 𑀧𑀦 𑀥𑀫𑁆𑀫𑁂𑀦, 𑀯𑀤𑀢𑁄 𑀤𑀼𑀓𑁆𑀓𑀝𑀤𑁆𑀯𑀬𑀁;

𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀳𑁂𑀢𑀼𑀓𑀁.

𑀲𑀫𑁆𑀫𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁;

𑀕𑀭𑀼𑀥𑀫𑁆𑀫𑀦𑀺𑀤𑀸𑀦𑀲𑁆𑀲, 𑀲𑀫𑁆𑀫𑀢𑀢𑁆𑀢𑀸 𑀅𑀪𑀸𑀯𑀢𑁄.

𑀢𑀲𑁆𑀲𑁂𑀯𑀜𑁆𑀜𑁂𑀦 ¶ 𑀥𑀫𑁆𑀫𑁂𑀦, 𑀑𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀲𑀫𑁆𑀫𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀏𑀓𑀸 𑀧𑀸𑀘𑀺𑀢𑁆𑀢𑀺 𑀭𑀢𑁆𑀢𑀺𑀬𑀁.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀤𑀼𑀓𑁆𑀓𑀝𑀁 𑀇𑀢𑀭𑀤𑁆𑀯𑀬𑁂;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁, 𑀑𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀣𑀸 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦, 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀘𑀻𑀯𑀭𑀸𑀤𑀻𑀦𑀫𑀢𑁆𑀣𑀸𑀬 ¶ , 𑀑𑀯𑀤𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀁;

𑀯𑀤𑀢𑁄 𑀲𑀫𑁆𑀫𑀢𑁂 𑀪𑀺𑀓𑁆𑀔𑀼, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀣𑁂𑀯 𑀢𑀺𑀓𑀤𑀼𑀓𑁆𑀓𑀝𑀁;

𑀲𑀗𑁆𑀖𑁂𑀦𑀸𑀲𑀫𑁆𑀫𑀢𑀁 𑀪𑀺𑀓𑁆𑀔𑀼𑀁, 𑀯𑀤𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀢𑀁 𑀯𑀸 𑀅𑀲𑀫𑁆𑀫𑀢𑀁;

𑀦 𑀤𑁄𑀲𑁄 𑀆𑀫𑀺𑀲𑀢𑁆𑀣𑀸𑀬, 𑀑𑀯𑀤𑀦𑁆𑀢𑀲𑁆𑀲 𑀪𑀸𑀲𑀢𑁄.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀇𑀤𑀜𑁆𑀳𑀺 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀯𑁂𑀤𑀦𑀸 𑀤𑀼𑀓𑁆𑀔𑀯𑁂𑀤𑀦𑀸.

𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼, 𑀤𑀤𑁂𑀬𑁆𑀬 𑀧𑀦 𑀘𑀻𑀯𑀭𑀁;

𑀅𑀜𑁆𑀜𑀸𑀢𑀺𑀓𑀸𑀬 𑀧𑀸𑀘𑀺𑀢𑁆𑀢𑀺, 𑀞𑀧𑁂𑀢𑁆𑀯𑀸 𑀧𑀸𑀭𑀺𑀯𑀢𑁆𑀢𑀓𑀁.

𑀘𑀻𑀯𑀭𑀲𑁆𑀲 𑀧𑀝𑀺𑀕𑁆𑀕𑀸𑀳-𑀲𑀺𑀓𑁆𑀔𑀸𑀧𑀤𑀲𑀫𑁄 𑀦𑀬𑁄;

𑀅𑀯𑀲𑁂𑀲𑁄 𑀫𑀢𑁄 𑀲𑀤𑁆𑀥𑀺𑀁, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀦.

𑀢𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀤𑀺𑀦𑁆𑀦𑀁, 𑀘𑀻𑀯𑀭𑀁 𑀇𑀥 𑀪𑀺𑀓𑁆𑀔𑀼𑀦𑀸;

𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀼𑀤𑁆𑀥-𑀧𑀸𑀘𑀺𑀢𑁆𑀢𑀺 𑀇𑀥 𑀲𑀽𑀘𑀺𑀢𑀸.

𑀘𑀻𑀯𑀭𑀁 ¶ 𑀬𑁄 𑀳𑀺 𑀲𑀺𑀩𑁆𑀩𑁂𑀬𑁆𑀬, 𑀲𑀺𑀩𑁆𑀩𑀸𑀧𑁂𑀬𑁆𑀬 𑀧𑀭𑁂𑀦 𑀯𑀸;

𑀅𑀜𑁆𑀜𑀸𑀢𑀺𑀓𑀸𑀬 𑀧𑀸𑀘𑀺𑀢𑁆𑀢𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

𑀬𑀁 𑀯𑀸 𑀦𑀺𑀯𑀸𑀲𑀺𑀢𑀼𑀁 𑀲𑀓𑁆𑀓𑀸, 𑀬𑀁 𑀯𑀸 𑀧𑀸𑀭𑀼𑀧𑀦𑀽𑀧𑀕𑀁;

𑀘𑀻𑀯𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀇𑀤𑀫𑁂𑀢𑁆𑀣 𑀫𑀳𑁂𑀲𑀺𑀦𑀸.

𑀲𑀬𑀁 𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸, 𑀲𑀺𑀩𑁆𑀩𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄;

𑀲𑀽𑀘𑀺𑀦𑀻𑀳𑀭𑀡𑁂 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸, 𑀲𑀓𑀺𑀁 𑀦𑀻𑀳𑀭𑀢𑁄 𑀧𑀦;

𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀧𑀬𑁄𑀕𑀲𑁆𑀲 𑀯𑀲𑀸 𑀩𑀳𑀽.

‘‘𑀲𑀺𑀩𑁆𑀩𑀸’’𑀢𑀺 𑀧𑀦 𑀆𑀡𑀢𑁆𑀢𑁄, 𑀅𑀯𑀺𑀲𑁂𑀲𑁂𑀦 𑀪𑀺𑀓𑁆𑀔𑀼𑀦𑀸;

𑀦𑀺𑀝𑁆𑀞𑀸𑀧𑁂𑀢𑀺 𑀲𑀘𑁂 𑀲𑀩𑁆𑀩𑀁, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

‘‘𑀬𑀫𑁂𑀢𑁆𑀣 ¶ 𑀘𑀻𑀯𑀭𑁂 𑀓𑀫𑁆𑀫𑀁, 𑀪𑀸𑀭𑁄 𑀲𑀩𑁆𑀩𑀁 𑀢𑀯𑀸’’𑀢𑀺 𑀳𑀺;

𑀆𑀡𑀢𑁆𑀢𑁄 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀁, 𑀦𑀺𑀝𑁆𑀞𑀸𑀧𑁂𑀢𑀺 𑀲𑀘𑁂 𑀧𑀦.

𑀪𑀺𑀓𑁆𑀔𑀼𑀲𑁆𑀲𑀸𑀡𑀸𑀧𑀓𑀲𑁆𑀲𑁂𑀯, 𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀧𑀦;

𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀅𑀦𑁂𑀓𑀸𑀭𑀸𑀧𑀣𑁂 𑀧𑀣𑁂.

𑀧𑀼𑀦𑀧𑁆𑀧𑀼𑀦𑀸𑀡𑀸𑀧𑁂𑀦𑁆𑀢𑀲𑁆𑀲, 𑀅𑀦𑁂𑀓𑀸𑀡𑀢𑁆𑀢𑀺𑀬𑀁 𑀧𑀦;

𑀓𑀸 𑀳𑀺 𑀦𑀸𑀫 𑀓𑀣𑀸 𑀅𑀢𑁆𑀣𑀺? 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀜𑀸𑀢𑀺𑀓𑀸𑀬 𑀘 𑀅𑀜𑁆𑀜𑀸𑀢𑀺-𑀲𑀜𑁆𑀜𑀺𑀲𑁆𑀲 𑀯𑀺𑀫𑀢𑀺𑀲𑁆𑀲 𑀯𑀸;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦-𑀘𑀻𑀯𑀭𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀞𑀧𑁂𑀢𑁆𑀯𑀸 𑀘𑀻𑀯𑀭𑀁 𑀅𑀜𑁆𑀜𑀁, 𑀧𑀭𑀺𑀓𑁆𑀔𑀸𑀭𑀜𑁆𑀘 𑀲𑀺𑀩𑁆𑀩𑀢𑁄;

𑀅𑀦𑀸𑀧𑀢𑁆𑀢𑀺 𑀯𑀺𑀦𑀺𑀤𑁆𑀤𑀺𑀝𑁆𑀞𑀸, 𑀲𑀺𑀓𑁆𑀔𑀫𑀸𑀦𑀸𑀤𑀺𑀓𑀸𑀬𑀧𑀺.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀓𑁆𑀭𑀺𑀬𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀪𑀺𑀓𑁆𑀔𑀼 ¶ 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀺𑀥𑀸𑀬 𑀧𑀦𑁂𑀓𑀢𑁄;

𑀧𑀝𑀺𑀧𑀚𑁆𑀚𑁂𑀬𑁆𑀬 𑀫𑀕𑁆𑀕𑀁 𑀘𑁂, 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀇𑀥.

𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑁂 𑀯𑀸𑀧𑀺, 𑀅𑀤𑁆𑀥𑀬𑁄𑀚𑀦𑀢𑀺𑀓𑁆𑀓𑀫𑁂;

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀯𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀏𑀢𑁆𑀣𑀸𑀓𑀧𑁆𑀧𑀺𑀬𑀪𑀽𑀫𑀝𑁆𑀞𑁄, 𑀲𑀁𑀯𑀺𑀥𑀸𑀦𑀁 𑀓𑀭𑁄𑀢𑀺 𑀬𑁄;

𑀲𑀁𑀯𑀺𑀥𑀸𑀦𑀦𑀺𑀫𑀺𑀢𑁆𑀢𑀁 𑀢𑀼, 𑀤𑀼𑀓𑁆𑀓𑀝𑀁 𑀢𑀲𑁆𑀲 𑀤𑀻𑀧𑀺𑀢𑀁.

𑀲𑀁𑀯𑀺𑀥𑀸𑀦𑀁 𑀓𑀭𑁄𑀦𑁆𑀢𑀲𑁆𑀲, 𑀞𑀢𑁆𑀯𑀸 𑀓𑀧𑁆𑀧𑀺𑀬𑀪𑀽𑀫𑀺𑀬𑀁;

𑀲𑀁𑀯𑀺𑀥𑀸𑀦𑀦𑀺𑀫𑀺𑀢𑁆𑀢𑀁 𑀢𑀼, 𑀦 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀉𑀪𑀬𑀢𑁆𑀣𑀸𑀧𑀺 𑀧𑀸𑀘𑀺𑀢𑁆𑀢𑀺, 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄;

𑀅𑀦𑀦𑁆𑀢𑀭𑀲𑁆𑀲 𑀕𑀸𑀫𑀲𑁆𑀲, 𑀉𑀧𑀘𑀸𑀭𑁄𑀓𑁆𑀓𑀫𑁂 𑀲𑀺𑀬𑀸.

𑀢𑀢𑁆𑀭𑀸𑀧𑀺 𑀧𑀞𑀫𑁂 𑀧𑀸𑀤𑁂, 𑀤𑀼𑀓𑁆𑀓𑀝𑀁 𑀲𑀫𑀼𑀤𑀻𑀭𑀺𑀢𑀁;

𑀤𑀼𑀢𑀺𑀬𑁂 𑀧𑀤𑀯𑀸𑀭𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁.

𑀅𑀦𑁆𑀢𑀭𑀸 𑀲𑀁𑀯𑀺𑀥𑀸𑀦𑁂𑀧𑀺, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀤𑁆𑀯𑀸𑀭𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂, 𑀲𑀢𑀺 𑀘𑀸𑀧𑀢𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀲𑀁𑀯𑀺𑀤𑀳𑀺𑀢𑁂 ¶ 𑀓𑀸𑀮𑁂, 𑀯𑀺𑀤𑀳𑀺𑀢𑁄𑀢𑀺 𑀲𑀜𑁆𑀜𑀺𑀦𑁄;

𑀪𑀺𑀓𑁆𑀔𑀼𑀲𑁆𑀲𑁂𑀯 𑀯𑀺𑀥𑀸𑀦𑀲𑁆𑀫𑀺𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀫𑀬𑁂 𑀯𑀺𑀤𑀳𑀺𑀢𑁆𑀯𑀸 𑀯𑀸, 𑀯𑀺𑀲𑀗𑁆𑀓𑁂𑀢𑁂𑀦 𑀕𑀘𑁆𑀙𑀢𑁄;

𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀇𑀤𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄;

𑀓𑀸𑀬𑀘𑀺𑀢𑁆𑀢𑀸 𑀲𑀫𑀼𑀝𑁆𑀞𑀸𑀢𑀺, 𑀓𑀸𑀬𑀯𑀸𑀘𑀸𑀤𑀺𑀓𑀢𑁆𑀢𑀬𑀸.

𑀏𑀓𑀫𑀼𑀚𑁆𑀚𑀯𑀦𑀺𑀁 𑀦𑀸𑀯𑀁, 𑀢𑀣𑀸 𑀑𑀚𑀯𑀦𑀺𑀫𑁆𑀧𑀺 𑀯𑀸;

𑀅𑀪𑀺𑀭𑀽𑀳𑁂𑀬𑁆𑀬 𑀧𑀸𑀘𑀺𑀢𑁆𑀢𑀺, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀲𑀘𑁂.

𑀲𑀕𑀸𑀫𑀢𑀻𑀭𑀧𑀲𑁆𑀲𑁂𑀦 ¶ , 𑀕𑀸𑀫𑀦𑁆𑀢𑀭𑀯𑀲𑁂𑀦 𑀯𑀸;

𑀅𑀕𑀸𑀫𑀢𑀻𑀭𑀧𑀲𑁆𑀲𑁂𑀦, 𑀕𑀫𑀦𑁂 𑀅𑀤𑁆𑀥𑀬𑁄𑀚𑀦𑁂.

𑀢𑀣𑀸 𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡-𑀦𑀤𑀻𑀫𑀚𑁆𑀛𑁂𑀦 𑀕𑀘𑁆𑀙𑀢𑁄;

𑀅𑀤𑁆𑀥𑀬𑁄𑀚𑀦𑀲𑀗𑁆𑀔𑀸𑀬, 𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁄 𑀧𑀦.

𑀬𑀣𑀸𑀲𑀼𑀔𑀁 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀳𑀺;

𑀦𑀤𑀺𑀬𑀁𑀬𑁂𑀯 𑀆𑀧𑀢𑁆𑀢𑀺, 𑀦 𑀲𑀫𑀼𑀤𑁆𑀤𑁂 𑀯𑀺𑀘𑀸𑀭𑀺𑀢𑀸.

𑀢𑀺𑀢𑁆𑀣𑀲𑀫𑁆𑀧𑀸𑀤𑀦𑀢𑁆𑀣𑀸𑀬, 𑀉𑀤𑁆𑀥𑀁 𑀯𑀸 𑀦𑀤𑀺𑀬𑀸 𑀅𑀥𑁄;

𑀲𑀘𑁂 𑀳𑀭𑀦𑁆𑀢𑀺 𑀢𑀁𑀬𑀼𑀢𑁆𑀢𑀸, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀢𑀣𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀸, 𑀢𑀺𑀭𑀺𑀬𑀁 𑀢𑀭𑀡𑀸𑀬 𑀯𑀸;

𑀆𑀧𑀤𑀸𑀲𑀼 𑀯𑀺𑀲𑁂𑀲𑁄 𑀳𑀺, 𑀅𑀦𑀦𑁆𑀢𑀭𑀲𑀫𑁄 𑀫𑀢𑁄.

𑀜𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀢𑁆𑀢𑀁, 𑀪𑀼𑀜𑁆𑀚𑀢𑁄 𑀧𑀭𑀺𑀧𑀸𑀘𑀺𑀢𑀁;

𑀳𑀺𑀢𑁆𑀯𑀸 𑀕𑀺𑀳𑀺𑀲𑀫𑀸𑀭𑀫𑁆𑀪𑀁, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀪𑁄𑀚𑀦𑀁 𑀧𑀜𑁆𑀘𑀥𑀸 𑀯𑀼𑀢𑁆𑀢𑀁, 𑀕𑀳𑀡𑁂 𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀅𑀚𑁆𑀛𑁄𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀁.

𑀲𑀦𑁆𑀢𑀓𑀁 𑀜𑀸𑀢𑀓𑀸𑀤𑀻𑀦𑀁, 𑀕𑀺𑀳𑀺𑀲𑀫𑁆𑀧𑀸𑀤𑀺𑀢𑀫𑁆𑀧𑀺 𑀯𑀸;

𑀯𑀺𑀦𑀸 𑀪𑀺𑀓𑁆𑀔𑀼𑀦𑀺𑀬𑀸 𑀤𑁄𑀲𑁄, 𑀪𑀼𑀜𑁆𑀚𑀢𑁄 𑀧𑀭𑀺𑀧𑀸𑀘𑀺𑀢𑀁.

𑀧𑀭𑀺𑀧𑀸𑀘𑀺𑀢𑀲𑀜𑁆𑀜𑀺𑀲𑁆𑀲 ¶ , 𑀪𑀺𑀓𑁆𑀔𑀼𑀲𑁆𑀲𑀸𑀧𑀭𑀺𑀧𑀸𑀘𑀺𑀢𑁂;

𑀉𑀪𑁄𑀲𑀼 𑀯𑀺𑀫𑀢𑀺𑀲𑁆𑀲𑀸𑀧𑀺, 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁.

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦-𑀧𑀭𑀺𑀧𑀸𑀘𑀺𑀢𑀪𑁄𑀚𑀦𑀁;

𑀅𑀚𑁆𑀛𑁄𑀳𑀸𑀭𑀯𑀲𑁂𑀦𑁂𑀯, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄.

𑀅𑀜𑁆𑀜𑀁 𑀯𑀸 𑀧𑀦 𑀬𑀁 𑀓𑀺𑀜𑁆𑀘𑀺, 𑀞𑀧𑁂𑀢𑁆𑀯𑀸 𑀧𑀜𑁆𑀘𑀪𑁄𑀚𑀦𑀁;

𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀬𑀸𑀕𑀼𑀔𑀚𑁆𑀚𑀨𑀮𑀸𑀤𑀺𑀓𑀁.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀢𑀼, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀤𑀼𑀢𑀺𑀬𑀸𑀦𑀺𑀬𑀢𑁂𑀦𑁂𑀯, 𑀤𑀲𑀫𑀁 𑀲𑀤𑀺𑀲𑀁 𑀫𑀢𑀁;

𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑀁, 𑀲𑀫𑀼𑀝𑁆𑀞𑀸𑀦𑀦𑀬𑀸𑀤𑀺𑀦𑀸.

𑀏𑀓𑁄 𑀆𑀯𑀲𑀣𑁄 𑀧𑀺𑀡𑁆𑀟𑁄, 𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸;

𑀪𑀼𑀜𑁆𑀚𑀺𑀢𑀩𑁆𑀩𑁄 𑀢𑀢𑁄 𑀉𑀤𑁆𑀥𑀁, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄.

𑀅𑀦𑁄𑀤𑀺𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑁂, 𑀬𑀸𑀯𑀤𑀢𑁆𑀣𑁂𑀯 𑀪𑀺𑀓𑁆𑀔𑀼𑀦𑀸;

𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀓𑀺𑀁 𑀢𑀢𑁆𑀣, 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺.

𑀤𑀼𑀢𑀺𑀬𑁂 𑀤𑀺𑀯𑀲𑁂 𑀢𑀢𑁆𑀣, 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀫𑀢𑀁;

𑀅𑀚𑁆𑀛𑁄𑀳𑀸𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁄 𑀫𑀢𑀸.

𑀓𑀼𑀮𑁂𑀦𑁂𑀓𑁂𑀦 𑀧𑀜𑁆𑀜𑀢𑁆𑀢𑁂, 𑀲𑀳 𑀦𑀸𑀦𑀸𑀓𑀼𑀮𑁂𑀳𑀺 𑀯𑀸;

𑀦𑀸𑀦𑁂𑀓𑀝𑁆𑀞𑀸𑀦𑀪𑁂𑀤𑁂𑀲𑀼, 𑀏𑀓𑀪𑀸𑀕𑁄𑀯 𑀯𑀝𑁆𑀝𑀢𑀺.

𑀦𑀸𑀦𑀸𑀝𑁆𑀞𑀸𑀦𑁂𑀲𑀼 𑀧𑀜𑁆𑀜𑀢𑁆𑀢𑁄, 𑀬𑁄 𑀘, 𑀦𑀸𑀦𑀸𑀓𑀼𑀮𑁂𑀳𑀺 𑀯𑀸;

𑀪𑀼𑀜𑁆𑀚𑀢𑁄 𑀧𑀦 𑀲𑀩𑁆𑀩𑀢𑁆𑀣, 𑀦 𑀤𑁄𑀲𑁄 𑀧𑀝𑀺𑀧𑀸𑀝𑀺𑀬𑀸.

𑀧𑀝𑀺𑀧𑀸𑀝𑀺𑀫𑀲𑁂𑀲𑁂𑀦, 𑀔𑁂𑀧𑁂𑀢𑁆𑀯𑀸 𑀧𑀼𑀦 𑀪𑀼𑀜𑁆𑀚𑀢𑁄;

𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬, 𑀦 𑀘 𑀓𑀧𑁆𑀧𑀢𑀺 𑀪𑀺𑀓𑁆𑀔𑀼𑀦𑁄.

𑀅𑀦𑀸𑀧𑀢𑁆𑀢𑀺 ¶ 𑀕𑀺𑀮𑀸𑀦𑀲𑁆𑀲, 𑀆𑀕𑀘𑁆𑀙𑀦𑁆𑀢𑀲𑁆𑀲 𑀕𑀘𑁆𑀙𑀢𑁄;

𑀑𑀤𑀺𑀲𑁆𑀲𑀧𑀺 𑀘 𑀧𑀜𑁆𑀜𑀢𑁆𑀢𑁂, 𑀧𑀭𑀺𑀢𑁆𑀢𑁂 𑀪𑀼𑀜𑁆𑀚𑀢𑁄 𑀲𑀓𑀺𑀁.

𑀬𑀸𑀕𑀼𑀆𑀤𑀻𑀦𑀺 ¶ 𑀦𑀺𑀘𑁆𑀘𑀫𑁆𑀧𑀺, 𑀪𑀼𑀜𑁆𑀚𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀲𑁂𑀲𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀲𑀫𑀁.

𑀅𑀜𑁆𑀜𑀢𑁆𑀭 𑀲𑀫𑀬𑀸 𑀯𑀼𑀢𑁆𑀢𑀸, 𑀧𑀸𑀘𑀺𑀢𑁆𑀢𑀺 𑀕𑀡𑀪𑁄𑀚𑀦𑁂;

𑀕𑀡𑁄𑀢𑀺 𑀧𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀢𑁆𑀢𑀸𑀭𑁄 𑀯𑀸 𑀢𑀢𑀼𑀢𑁆𑀢𑀭𑀺𑀁.

𑀬𑀁 𑀦𑀺𑀫𑀦𑁆𑀢𑀦𑀢𑁄 𑀯𑀸𑀧𑀺, 𑀮𑀤𑁆𑀥𑀁 𑀯𑀺𑀜𑁆𑀜𑀢𑁆𑀢𑀺𑀢𑁄𑀧𑀺 𑀯𑀸;

𑀪𑁄𑀚𑀦𑀁 𑀧𑀦 𑀧𑀜𑁆𑀘𑀦𑁆𑀦𑀁, 𑀳𑁄𑀢𑀺 𑀅𑀜𑁆𑀜𑀢𑀭𑀁 𑀇𑀥.

𑀪𑁄𑀚𑀦𑀸𑀦𑀫𑁆𑀧𑀺 𑀧𑀜𑁆𑀘𑀦𑁆𑀦𑀁, 𑀕𑀳𑁂𑀢𑁆𑀯𑀸 𑀦𑀸𑀫𑀫𑁂𑀯 𑀢𑀼;

𑀦𑀺𑀫𑀦𑁆𑀢𑁂𑀢𑀺 𑀲𑀘𑁂 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀩𑀳𑀼𑀓𑁂𑀧𑀺 𑀯𑀸.

‘‘𑀑𑀤𑀦𑀁 𑀪𑁄𑀚𑀦𑀁 𑀪𑀢𑁆𑀢𑀁, 𑀲𑀫𑁆𑀧𑀝𑀺𑀘𑁆𑀙𑀣 𑀕𑀡𑁆𑀳𑀣’’;

𑀇𑀢𑀺 𑀯𑁂𑀯𑀘𑀦𑁂𑀳𑁂𑀯, 𑀅𑀣 𑀪𑀸𑀲𑀦𑁆𑀢𑀭𑁂𑀦 𑀯𑀸.

𑀢𑀢𑁄 𑀢𑀲𑁆𑀲 𑀘 𑀢𑁂 𑀪𑀺𑀓𑁆𑀔𑀽, 𑀲𑀸𑀤𑀺𑀬𑀺𑀢𑁆𑀯𑀸 𑀦𑀺𑀫𑀦𑁆𑀢𑀦𑀁;

𑀏𑀓𑀢𑁄 𑀦𑀸𑀦𑀢𑁄 𑀯𑀸 𑀘𑁂, 𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺 𑀏𑀓𑀢𑁄.

𑀲𑀩𑁆𑀩𑁂𑀲𑀁 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺, 𑀕𑀡𑀪𑁄𑀚𑀦𑀓𑀸𑀭𑀡𑀸;

𑀏𑀓𑀢𑁄 𑀕𑀳𑀡𑀁 𑀏𑀢𑁆𑀣, 𑀕𑀡𑀪𑁄𑀚𑀦𑀓𑀸𑀭𑀡𑀁.

𑀏𑀓𑀢𑁄 𑀦𑀸𑀦𑀢𑁄 𑀯𑀸𑀧𑀺, 𑀕𑀫𑀦𑀁 𑀪𑁄𑀚𑀦𑀫𑁆𑀧𑀺 𑀯𑀸;

𑀓𑀸𑀭𑀡𑀦𑁆𑀢𑀺 𑀦 𑀢𑀁 𑀯𑀺𑀜𑁆𑀜𑀽, 𑀪𑀡𑀦𑁆𑀢𑀺 𑀕𑀡𑀪𑁄𑀚𑀦𑁂.

𑀲𑀘𑁂𑀧𑀺 𑀑𑀤𑀦𑀸𑀤𑀻𑀦𑀁, 𑀕𑀳𑁂𑀢𑁆𑀯𑀸 𑀦𑀸𑀫𑀫𑁂𑀯 𑀯𑀸;

𑀏𑀓𑀢𑁄 𑀦𑀸𑀦𑀢𑁄 𑀯𑀸𑀧𑀺, 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀓𑁂.

𑀦𑀸𑀦𑀢𑁄 𑀯𑁂𑀓𑀢𑁄 𑀕𑀦𑁆𑀢𑁆𑀯𑀸, 𑀲𑀘𑁂 𑀕𑀡𑁆𑀳𑀦𑁆𑀢𑀺 𑀏𑀓𑀢𑁄;

𑀏𑀯𑀫𑁆𑀧𑀺 𑀧𑀦 𑀳𑁄𑀢𑀻𑀢𑀺, 𑀯𑀡𑁆𑀡𑀺𑀢𑀁 𑀕𑀡𑀪𑁄𑀚𑀦𑀁.

𑀤𑀼𑀯𑀺𑀥𑀲𑁆𑀲𑀸𑀧𑀺 𑀏𑀢𑀲𑁆𑀲, 𑀧𑀝𑀺𑀕𑁆𑀕𑀳𑀡𑀓𑀸𑀭𑀡𑀸;

𑀤𑀼𑀓𑁆𑀓𑀝𑀁 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺, 𑀅𑀚𑁆𑀛𑁄𑀳𑀸𑀭𑁂𑀲𑀼 𑀤𑀻𑀧𑀺𑀢𑀸.

𑀲𑀫𑀬𑁂𑀲𑀼 ¶ 𑀅𑀦𑀸𑀧𑀢𑁆𑀢𑀺, 𑀲𑀢𑁆𑀢𑀲𑁆𑀯𑀧𑀺 𑀧𑀓𑀸𑀲𑀺𑀢𑀸;

𑀕𑀳𑁂𑀢𑁆𑀯𑀸 𑀏𑀓𑀢𑁄 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁 𑀯𑀸 𑀪𑀼𑀜𑁆𑀚𑀢𑀁 𑀢𑀣𑀸.

𑀫𑀼𑀦𑀺𑀦𑀸𑀦𑀼𑀧𑀲𑀫𑁆𑀧𑀦𑁆𑀦-𑀘𑀸𑀭𑀺𑀧𑀢𑁆𑀢𑀸𑀦𑀺𑀫𑀦𑁆𑀢𑀺𑀢𑀸 ¶ ;

𑀘𑀢𑀼𑀢𑁆𑀣𑁂 𑀏𑀓𑀢𑁄 𑀓𑀢𑁆𑀯𑀸𑀧𑀺, 𑀕𑀡𑀪𑁂𑀤𑁄 𑀧𑀓𑀸𑀲𑀺𑀢𑁄.

𑀦𑁂𑀯 𑀲𑀫𑀬𑀮𑀤𑁆𑀥𑀸𑀦𑀁, 𑀯𑀲𑁂𑀦𑀧𑀺 𑀳𑀺 𑀲𑀩𑁆𑀩𑀲𑁄;

𑀕𑀡𑀪𑁂𑀤𑁄 𑀧𑀦𑀸𑀧𑀢𑁆𑀢𑀺, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑀪𑁄𑀚𑀦𑀸𑀦𑀜𑁆𑀘 𑀧𑀜𑁆𑀘𑀦𑁆𑀦𑀁, 𑀯𑀲𑁂𑀦 𑀕𑀡𑀪𑁄𑀚𑀦𑁂;

𑀦𑀢𑁆𑀣𑁂𑀯 𑀘 𑀯𑀺𑀲𑀗𑁆𑀓𑁂𑀢𑀁, 𑀬𑀸𑀕𑀼𑀆𑀤𑀻𑀲𑀼 𑀢𑀁 𑀲𑀺𑀬𑀸.

𑀕𑀡𑀪𑁄𑀚𑀦𑀲𑀜𑁆𑀜𑀺𑀲𑁆𑀲, 𑀪𑀺𑀓𑁆𑀔𑀼𑀲𑁆𑀲𑀸𑀕𑀡𑀪𑁄𑀚𑀦𑁂;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀪𑁄𑀚𑀦𑀸𑀦𑀺 𑀘 𑀧𑀜𑁆𑀘𑁂𑀯, 𑀞𑀧𑁂𑀢𑁆𑀯𑀸 𑀬𑀸𑀕𑀼𑀆𑀤𑀺𑀲𑀼;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀸, 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀓𑁂𑀲𑀼𑀧𑀺.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀦;

𑀇𑀤𑀁 𑀏𑀴𑀓𑀮𑁄𑀫𑁂𑀦, 𑀲𑀤𑀺𑀲𑀦𑁆𑀢𑀺 𑀧𑀓𑀸𑀲𑀺𑀢𑀁.

𑀩𑀳𑀽𑀳𑀺 𑀬𑁄 𑀪𑀺𑀓𑁆𑀔𑀼 𑀫𑀦𑀼𑀲𑁆𑀲𑀓𑁂𑀳𑀺;

𑀦𑀺𑀫𑀦𑁆𑀢𑀺𑀢𑁄 𑀧𑀜𑁆𑀘𑀳𑀺 𑀪𑁄𑀚𑀦𑁂𑀳𑀺;

𑀳𑀺𑀢𑁆𑀯𑀸 𑀲𑀘𑁂 𑀧𑀼𑀩𑁆𑀩𑀦𑀺𑀫𑀦𑁆𑀢𑀦𑀸𑀬;

𑀯𑀺𑀓𑀧𑁆𑀧𑀦𑀁 𑀧𑀜𑁆𑀘𑀲𑀼 𑀬𑀲𑁆𑀲 𑀓𑀲𑁆𑀲.

𑀧𑀘𑁆𑀙𑀸 𑀦𑀺𑀫𑀦𑁆𑀢𑀺𑀢𑀁 𑀪𑀢𑁆𑀢𑀁, 𑀢𑀣𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸;

𑀪𑀼𑀜𑁆𑀚𑀢𑁄 𑀏𑀓𑀲𑀺𑀢𑁆𑀣𑀫𑁆𑀧𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀪𑁄𑀚𑀦𑀸𑀦𑀁 𑀢𑀼 𑀧𑀜𑁆𑀘𑀦𑁆𑀦𑀁, 𑀬𑁂𑀦 𑀓𑁂𑀦 𑀦𑀺𑀫𑀦𑁆𑀢𑀺𑀢𑁄;

𑀢𑀁 𑀞𑀧𑁂𑀢𑁆𑀯𑀸 𑀲𑀘𑁂 𑀅𑀜𑁆𑀜𑀁, 𑀪𑁄𑀚𑀦𑀁 𑀧𑀭𑀺𑀪𑀼𑀜𑁆𑀚𑀢𑀺.

𑀢𑁂𑀲𑀫𑁂𑀯 ¶ 𑀘 𑀧𑀜𑁆𑀘𑀦𑁆𑀦𑀁, 𑀪𑁄𑀚𑀦𑀸𑀦𑀁 𑀫𑀳𑁂𑀲𑀺𑀦𑀸;

𑀏𑀢𑀁 𑀧𑀭𑀫𑁆𑀧𑀭𑀁 𑀦𑀸𑀫, 𑀪𑁄𑀚𑀦𑀁 𑀧𑀭𑀺𑀤𑀻𑀧𑀺𑀢𑀁.

𑀬𑀢𑁆𑀣 𑀔𑀻𑀭𑀁 𑀭𑀲𑀁 𑀯𑀸𑀧𑀺, 𑀆𑀓𑀺𑀭𑀦𑁆𑀢𑀺 𑀲𑀘𑁂 𑀧𑀦;

𑀬𑁂𑀦 𑀅𑀚𑁆𑀛𑁄𑀢𑁆𑀣𑀝𑀁 𑀪𑀢𑁆𑀢𑀁, 𑀲𑀩𑁆𑀩𑀫𑁂𑀓𑀭𑀲𑀁 𑀲𑀺𑀬𑀸.

𑀓𑁄𑀝𑀺𑀢𑁄 𑀧𑀦 𑀧𑀝𑁆𑀞𑀸𑀬, 𑀲𑀁𑀲𑀝𑁆𑀞𑀁 𑀧𑀭𑀺𑀪𑀼𑀜𑁆𑀚𑀢𑁄;

𑀅𑀦𑀸𑀧𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑀧𑀭𑀫𑁆𑀧𑀭𑀦𑁆𑀢𑀺 ¶ 𑀲𑀜𑁆𑀜𑀸𑀬, 𑀅𑀧𑀭𑀫𑁆𑀧𑀭𑀪𑁄𑀚𑀦𑁂;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄.

𑀲𑀓𑀮𑁂𑀦𑀧𑀺 𑀕𑀸𑀫𑁂𑀦, 𑀧𑀽𑀕𑁂𑀦 𑀦𑀺𑀕𑀫𑁂𑀦 𑀯𑀸;

𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀸 𑀦𑀺𑀘𑁆𑀘-𑀪𑀢𑁆𑀢𑁂 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦𑀸𑀤𑀺𑀦𑀸 𑀲𑀫𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀪𑁄𑀚𑀦𑀜𑁆𑀘𑀸𑀯𑀺𑀓𑀧𑁆𑀧𑀦𑀁.

𑀧𑀽𑀯𑀸 𑀧𑀳𑁂𑀡𑀓𑀢𑁆𑀣𑀸𑀬, 𑀧𑀝𑀺𑀬𑀢𑁆𑀢𑀸 𑀲𑀘𑁂 𑀧𑀦;

𑀧𑀸𑀣𑁂𑀬𑁆𑀬𑀢𑁆𑀣𑀸𑀬 𑀫𑀦𑁆𑀣𑀸 𑀯𑀸, 𑀬𑁂 𑀳𑀺 𑀢𑀢𑁆𑀣 𑀘 𑀪𑀺𑀓𑁆𑀔𑀼𑀦𑀸.

𑀤𑁆𑀯𑀢𑁆𑀢𑀺𑀧𑀢𑁆𑀢𑀸 𑀕𑀳𑁂𑀢𑀩𑁆𑀩𑀸, 𑀧𑀽𑀭𑀸 𑀧𑀽𑀯𑁂𑀳𑀺 𑀲𑀢𑁆𑀢𑀼𑀳𑀺;

𑀢𑀢𑁄 𑀘𑁂 𑀉𑀢𑁆𑀢𑀭𑀺𑀁 𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀕𑀡𑁆𑀳𑀢𑁄.

𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂𑀦, ‘‘𑀤𑁆𑀯𑀢𑁆𑀢𑀺𑀧𑀢𑁆𑀢𑀸 𑀫𑀬𑀸 𑀇𑀥;

𑀕𑀳𑀺𑀢𑀸 𑀧𑀦 𑀧𑀽𑀯𑀸’’𑀢𑀺, 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀯𑀤𑁂 𑀩𑀼𑀥𑁄.

‘‘𑀫𑀸 𑀔𑁄 𑀢𑁆𑀯𑀁 𑀧𑀝𑀺𑀕𑀡𑁆𑀳𑀸’’𑀢𑀺, 𑀅𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀕𑀡𑁆𑀳𑀢𑁄𑀧𑀺 𑀘 𑀢𑀁 𑀲𑀼𑀢𑁆𑀯𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀊𑀦𑀓𑀤𑁆𑀯𑀢𑁆𑀢𑀺𑀧𑀢𑁆𑀢𑁂𑀲𑀼, 𑀅𑀢𑀺𑀭𑁂𑀓𑁄𑀢𑀺 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀬𑁂𑀦 ¶ 𑀢𑀢𑁆𑀣 𑀢𑀬𑁄 𑀮𑀤𑁆𑀥𑀸, 𑀧𑀢𑁆𑀢𑀧𑀽𑀭𑀸 𑀢𑀢𑁄 𑀧𑀦;

𑀤𑁆𑀯𑁂 𑀲𑀗𑁆𑀖𑀲𑁆𑀲 𑀧𑀤𑀸𑀢𑀩𑁆𑀩𑀸, 𑀤𑁆𑀯𑁂 𑀘𑁂 𑀏𑀓𑁄, 𑀦 𑀏𑀓𑀢𑁄.

𑀅𑀧𑀳𑁂𑀡𑀓𑀧𑀸𑀣𑁂𑀬𑁆𑀬𑀁, 𑀅𑀯𑀲𑁂𑀲𑀫𑁆𑀧𑀺 𑀯𑀸 𑀢𑀢𑁄;

𑀲𑀦𑁆𑀢𑀓𑀁 𑀜𑀸𑀢𑀓𑀸𑀤𑀻𑀦𑀁, 𑀤𑁂𑀦𑁆𑀢𑀸𑀦𑀫𑁆𑀧𑀺 𑀢𑀤𑀽𑀦𑀓𑀁.

𑀕𑀡𑁆𑀳𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀅𑀜𑁆𑀜𑁂𑀦 𑀧𑀦 𑀧𑀜𑁆𑀘𑀦𑁆𑀦𑀁, 𑀪𑁄𑀚𑀦𑀸𑀦𑀁 𑀧𑀯𑀸𑀭𑀺𑀢𑁄;

𑀧𑀸𑀘𑀺𑀢𑁆𑀢𑀺𑀦𑀢𑀺𑀭𑀺𑀢𑁆𑀢𑀁 𑀘𑁂, 𑀧𑀼𑀦 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑀅𑀲𑀦𑀁 ¶ 𑀪𑁄𑀚𑀦𑀜𑁆𑀘𑁂𑀯, 𑀳𑀢𑁆𑀣𑀧𑀸𑀲𑀸𑀪𑀺𑀳𑀸𑀭𑀢𑀸;

𑀓𑀸𑀬𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁄, 𑀧𑀜𑁆𑀘𑀗𑁆𑀕𑁂𑀳𑀺 𑀧𑀯𑀸𑀭𑀡𑀸.

𑀑𑀤𑀦𑁄 𑀲𑀢𑁆𑀢𑀼 𑀓𑀼𑀫𑁆𑀫𑀸𑀲𑁄, 𑀫𑀘𑁆𑀙𑁄 𑀫𑀁𑀲𑀦𑁆𑀢𑀺 𑀲𑀩𑁆𑀩𑀲𑁄;

𑀦𑀺𑀧𑁆𑀧𑀧𑀜𑁆𑀘𑁂𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀪𑁄𑀚𑀦𑀁 𑀧𑀜𑁆𑀘𑀥𑀸 𑀫𑀢𑀁.

𑀑𑀤𑀦𑁄 𑀢𑀢𑁆𑀣 𑀲𑀢𑁆𑀢𑀦𑁆𑀦𑀁, 𑀥𑀜𑁆𑀜𑀸𑀦𑀁 𑀑𑀤𑀦𑁄 𑀫𑀢𑁄;

𑀪𑀚𑁆𑀚𑀺𑀢𑀸𑀦𑀁 𑀢𑀼 𑀥𑀜𑁆𑀜𑀸𑀦𑀁, 𑀘𑀼𑀡𑁆𑀡𑀁 ‘‘𑀲𑀢𑁆𑀢𑀽’’𑀢𑀺 𑀯𑀼𑀘𑁆𑀘𑀢𑀺.

𑀓𑀼𑀫𑁆𑀫𑀸𑀲𑁄 𑀬𑀯𑀓𑀼𑀫𑁆𑀫𑀸𑀲𑁄, 𑀫𑀘𑁆𑀙𑁄 𑀯𑀼𑀘𑁆𑀘𑀢𑀺 𑀑𑀤𑀓𑁄;

𑀫𑀁𑀲𑀫𑁆𑀧𑀺 𑀓𑀧𑁆𑀧𑀺𑀬𑀫𑀁𑀲𑀁, 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼, 𑀯𑀭𑀓𑁄 𑀕𑁄𑀥𑀼𑀫𑁄 𑀢𑀣𑀸;

𑀓𑀼𑀤𑁆𑀭𑀽𑀲𑀓𑁄𑀢𑀺 𑀲𑀢𑁆𑀢𑁂𑀢𑁂, 𑀥𑀜𑁆𑀜𑀸 𑀥𑀜𑁆𑀜𑁂𑀦 𑀤𑁂𑀲𑀺𑀢𑀸.

𑀲𑀸𑀫𑀸𑀓𑀸𑀤𑀺𑀢𑀺𑀡𑀁 𑀲𑀩𑁆𑀩𑀁, 𑀓𑀼𑀤𑁆𑀭𑀽𑀲𑁂𑀦𑁂𑀯 𑀤𑀻𑀧𑀺𑀢𑀁;

𑀦𑀻𑀯𑀸𑀭𑁄 𑀲𑀸𑀮𑀺𑀬𑀁 𑀯𑀼𑀢𑁆𑀢𑁄, 𑀯𑀭𑀓𑁂 𑀯𑀭𑀓𑀘𑁄𑀭𑀓𑁄.

𑀲𑀢𑁆𑀢𑀦𑁆𑀦𑀁 𑀧𑀦 𑀥𑀜𑁆𑀜𑀸𑀦𑀁, 𑀑𑀤𑀦𑁄 𑀬𑀸𑀕𑀼 𑀯𑀸 𑀧𑀦;

𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀸, 𑀲𑀜𑁆𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀳𑀢𑁆𑀣𑁂𑀦 ¶ 𑀕𑀳𑀺𑀢𑁄𑀓𑀸𑀲𑁂, 𑀑𑀥𑀺𑀁 𑀤𑀲𑁆𑀲𑁂𑀢𑀺 𑀬𑀸 𑀧𑀦;

𑀬𑀸𑀕𑀼𑀲𑀸 𑀇𑀥 𑀲𑀩𑁆𑀩𑀸𑀧𑀺, 𑀑𑀤𑀦𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀅𑀩𑁆𑀪𑀼𑀡𑁆𑀳𑀸 𑀧𑀦 𑀬𑀸 𑀬𑀸𑀕𑀼, 𑀉𑀤𑁆𑀥𑀦𑁄𑀭𑁄𑀧𑀺𑀢𑀸 𑀢𑀦𑀼;

𑀲𑀘𑁂 𑀑𑀥𑀺𑀁 𑀦 𑀤𑀲𑁆𑀲𑁂𑀢𑀺, 𑀦 𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀧𑀼𑀦 𑀲𑀸 𑀲𑀻𑀢𑀮𑀻𑀪𑀽𑀢𑀸, 𑀖𑀦𑀪𑀸𑀯𑀁 𑀕𑀢𑀸 𑀲𑀘𑁂;

𑀑𑀥𑀺𑀁 𑀤𑀲𑁆𑀲𑁂𑀢𑀺 𑀲𑁄 𑀧𑀼𑀩𑁆𑀩𑁂, 𑀢𑀦𑀼𑀪𑀸𑀯𑁄 𑀦 𑀭𑀓𑁆𑀔𑀢𑀺.

𑀢𑀓𑁆𑀓𑀥𑀜𑁆𑀜𑀭𑀲𑀸𑀤𑀻𑀦𑀺, 𑀆𑀭𑁄𑀧𑁂𑀢𑁆𑀯𑀸 𑀩𑀳𑀽𑀦𑀺𑀧𑀺;

𑀨𑀮𑀧𑀡𑁆𑀡𑀓𑀴𑀻𑀭𑀸𑀦𑀺, 𑀧𑀓𑁆𑀔𑀺𑀧𑀺𑀢𑁆𑀯𑀸𑀦 𑀢𑀢𑁆𑀣 𑀘.

𑀢𑀡𑁆𑀟𑀼𑀮𑁂 𑀫𑀼𑀝𑁆𑀞𑀺𑀫𑀢𑁆𑀢𑁂𑀧𑀺, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀦𑁆𑀢𑀺 𑀘𑁂;

𑀑𑀥𑀺𑀁 𑀧𑀦 𑀘 𑀤𑀲𑁆𑀲𑁂𑀢𑀺, 𑀲𑀜𑁆𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀭𑀲𑁂 𑀥𑀜𑁆𑀜𑀭𑀲𑁂 𑀔𑀻𑀭𑁂, 𑀯𑀸𑀓𑀺𑀭𑀺𑀢𑁆𑀯𑀸𑀦 𑀑𑀤𑀦𑀁;

‘‘𑀬𑀸𑀕𑀼𑀁 𑀕𑀡𑁆𑀳𑀣, 𑀬𑀸𑀕𑀼’’𑀦𑁆𑀢𑀺, 𑀯𑀢𑁆𑀯𑀸 𑀤𑁂𑀦𑁆𑀢𑀺 𑀲𑀘𑁂 𑀧𑀦.

𑀓𑀺𑀜𑁆𑀘𑀸𑀧𑀺 𑀢𑀦𑀼𑀓𑀸 𑀳𑁄𑀢𑀺, 𑀲𑀜𑁆𑀚𑀦𑁂𑀢𑀺 𑀧𑀯𑀸𑀭𑀡𑀁;

𑀢𑀁 𑀧𑀘𑀺𑀢𑁆𑀯𑀸 𑀲𑀘𑁂 𑀤𑁂𑀦𑁆𑀢𑀺, 𑀬𑀸𑀕𑀼𑀲𑀗𑁆𑀕𑀳𑀺𑀢𑀸 𑀧𑀦.

𑀙𑀼𑀧𑀦𑁆𑀢𑀺 ¶ 𑀫𑀘𑁆𑀙𑀫𑀁𑀲𑀁 𑀯𑀸, 𑀢𑀦𑀼𑀓𑀸𑀬𑀧𑀺 𑀬𑀸𑀕𑀼𑀬𑀸;

𑀲𑀘𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺, 𑀧𑀜𑁆𑀜𑀸𑀬𑀢𑀺 𑀧𑀯𑀸𑀭𑀡𑀁.

𑀫𑀘𑁆𑀙𑀫𑀁𑀲𑀭𑀲𑁄 𑀲𑀼𑀤𑁆𑀥𑁄, 𑀲𑀁𑀲𑀢𑁆𑀢𑁄 𑀭𑀲𑀬𑀸𑀕𑀼 𑀯𑀸;

𑀦 𑀘𑀸𑀓𑀧𑁆𑀧𑀺𑀬𑀫𑀁𑀲𑀁 𑀯𑀸, 𑀲𑀜𑁆𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀥𑀜𑁆𑀜𑀸𑀦𑀁, 𑀑𑀤𑀦𑀁 𑀧𑀦 𑀲𑀩𑁆𑀩𑀲𑁄;

𑀯𑁂𑀴𑀼𑀢𑀡𑁆𑀟𑀼𑀮𑀓𑀸𑀤𑀻𑀦𑀁, 𑀦 𑀧𑀯𑀸𑀭𑁂𑀢𑀺 𑀑𑀤𑀦𑁄.

𑀧𑀼𑀣𑀼𑀓𑀸 𑀯𑀸 𑀢𑀢𑁄 𑀢𑀸𑀳𑀺, 𑀓𑀢𑀪𑀢𑁆𑀢𑀫𑁆𑀧𑀺 𑀲𑀢𑁆𑀢𑀼𑀧𑀺;

𑀲𑀼𑀤𑁆𑀥𑀸 𑀦 𑀧𑀦 𑀧𑀽𑀯𑀸 𑀯𑀸, 𑀧𑀯𑀸𑀭𑁂𑀦𑁆𑀢𑀺 𑀓𑀤𑀸𑀘𑀺𑀧𑀺.

𑀔𑀭𑀧𑀸𑀓𑁂𑀦 𑀪𑀝𑁆𑀞𑀸𑀦𑀁, 𑀯𑀻𑀳𑀻𑀦𑀁 𑀢𑀡𑁆𑀟𑀼𑀮𑁂 𑀧𑀦;

𑀓𑁄𑀝𑁆𑀝𑁂𑀢𑁆𑀯𑀸 𑀤𑁂𑀦𑁆𑀢𑀺 𑀢𑀁 𑀘𑀼𑀡𑁆𑀡𑀁, 𑀲𑀢𑁆𑀢𑀼𑀲𑀗𑁆𑀕𑀳𑀺𑀢𑀁 𑀫𑀢𑀁.

𑀪𑀚𑁆𑀚𑀺𑀢𑀸𑀦𑀁 ¶ 𑀢𑀼 𑀯𑀻𑀳𑀻𑀦𑀁, 𑀦 𑀧𑀯𑀸𑀭𑁂𑀦𑁆𑀢𑀺 𑀢𑀡𑁆𑀟𑀼𑀮𑀸;

𑀢𑁂𑀲𑀁 𑀧𑀦 𑀘 𑀬𑀁 𑀘𑀼𑀡𑁆𑀡𑀁, 𑀢𑀁 𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀔𑀭𑀧𑀸𑀓𑁂𑀦 𑀪𑀝𑁆𑀞𑀸𑀦𑀁, 𑀯𑀻𑀳𑀻𑀦𑀁 𑀓𑀼𑀡𑁆𑀟𑀓𑀫𑁆𑀧𑀺 𑀘;

𑀲𑀢𑁆𑀢𑀼𑀦𑀁 𑀫𑁄𑀤𑀓𑁄 𑀯𑀸𑀧𑀺, 𑀲𑀜𑁆𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀲𑀫𑀧𑀸𑀓𑁂𑀦 𑀪𑀝𑁆𑀞𑀸𑀦𑀁, 𑀲𑀼𑀓𑁆𑀔𑀸𑀦𑀁 𑀆𑀢𑀧𑁂𑀦 𑀘;

𑀓𑀼𑀡𑁆𑀟𑀓𑀁 𑀧𑀦 𑀯𑀻𑀳𑀻𑀦𑀁, 𑀦 𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀮𑀸𑀚𑀸 𑀯𑀸 𑀧𑀦 𑀢𑁂𑀳𑁂𑀯, 𑀓𑀢𑀪𑀢𑁆𑀢𑀫𑁆𑀧𑀺 𑀲𑀢𑁆𑀢𑀼 𑀯𑀸;

𑀔𑀚𑁆𑀚𑀓𑀁 𑀧𑀦 𑀲𑀼𑀤𑁆𑀥𑀁 𑀯𑀸, 𑀦 𑀚𑀦𑁂𑀢𑀺 𑀧𑀯𑀸𑀭𑀡𑀁.

𑀧𑀽𑀭𑀺𑀢𑀁 𑀫𑀘𑁆𑀙𑀫𑀁𑀲𑁂𑀳𑀺, 𑀢𑀁 𑀚𑀦𑁂𑀢𑀺 𑀧𑀯𑀸𑀭𑀡𑀁;

𑀬𑀁 𑀓𑀺𑀜𑁆𑀘𑀺 𑀪𑀚𑁆𑀚𑀺𑀢𑀁 𑀧𑀺𑀝𑁆𑀞𑀁, 𑀦 𑀧𑀯𑀸𑀭𑁂𑀢𑀺 𑀲𑀼𑀤𑁆𑀥𑀓𑀁.

𑀬𑀯𑁂𑀳𑀺 𑀓𑀢𑀓𑀼𑀫𑁆𑀫𑀸𑀲𑁄, 𑀧𑀯𑀸𑀭𑁂𑀢𑀺, 𑀦 𑀘𑀸𑀧𑀭𑁄;

𑀫𑀘𑁆𑀙𑀫𑀁𑀲𑁂𑀲𑀼 𑀯𑀢𑁆𑀢𑀩𑁆𑀩𑀁, 𑀧𑀸𑀓𑀝𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

𑀔𑀸𑀤𑀦𑁆𑀢𑁄 𑀓𑀧𑁆𑀧𑀺𑀬𑀁 𑀫𑀁𑀲𑀁, 𑀦𑀺𑀲𑁂𑀥𑁂𑀢𑀺 𑀅𑀓𑀧𑁆𑀧𑀺𑀬𑀁;

𑀦 𑀲𑁄 𑀢𑁂𑀦 𑀧𑀯𑀸𑀭𑁂𑀢𑀺, 𑀅𑀯𑀢𑁆𑀣𑀼𑀢𑁆𑀢𑀸𑀢𑀺 𑀤𑀻𑀧𑀺𑀢𑀁.

𑀢𑀣𑁂𑀯𑀸𑀓𑀧𑁆𑀧𑀺𑀬𑀁 𑀫𑀁𑀲𑀁, 𑀔𑀸𑀤𑀦𑁆𑀢𑁄 𑀓𑀧𑁆𑀧𑀺𑀬𑀁 𑀲𑀘𑁂;

𑀦𑀺𑀲𑁂𑀥𑁂𑀢𑀺 𑀧𑀯𑀸𑀭𑁂𑀢𑀺, 𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀯𑀡𑁆𑀡𑀺𑀢𑀁.

𑀫𑀁𑀲𑀁 𑀧𑀦 𑀘 𑀔𑀸𑀤𑀦𑁆𑀢𑁄, 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁;

𑀧𑀯𑀸𑀭𑁂𑀢𑀺 𑀦𑀺𑀲𑁂𑀥𑁂𑀢𑀺, 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑁄𑀚𑀦𑀁.

𑀲𑀘𑁂 ¶ 𑀅𑀓𑀧𑁆𑀧𑀺𑀬𑀁 𑀫𑀁𑀲𑀁, 𑀔𑀸𑀤𑀦𑁆𑀢𑁄𑀯 𑀅𑀓𑀧𑁆𑀧𑀺𑀬𑀁;

𑀦𑀺𑀲𑁂𑀥𑀁 𑀦 𑀧𑀯𑀸𑀭𑁂𑀢𑀺, 𑀢𑀣𑀸 𑀅𑀜𑁆𑀜𑀁 𑀅𑀓𑀧𑁆𑀧𑀺𑀬𑀁.

𑀲𑀘𑁂 𑀅𑀚𑁆𑀛𑁄𑀳𑀝𑀁 𑀳𑁄𑀢𑀺, 𑀲𑀺𑀢𑁆𑀣𑀫𑁂𑀓𑀫𑁆𑀧𑀺 𑀪𑀺𑀓𑁆𑀔𑀼𑀦𑀸;

𑀧𑀢𑁆𑀢𑁂 𑀳𑀢𑁆𑀣𑁂 𑀫𑀼𑀔𑁂 𑀯𑀸𑀧𑀺, 𑀪𑁄𑀚𑀦𑀁 𑀧𑀦 𑀯𑀺𑀚𑁆𑀚𑀢𑀺.

𑀧𑀯𑀸𑀭𑀡𑀧𑀳𑁄𑀦𑀁 𑀘𑁂, 𑀧𑀝𑀺𑀓𑁆𑀔𑀺𑀧𑀢𑀺 𑀪𑁄𑀚𑀦𑀁;

𑀧𑀯𑀸𑀭𑁂𑀢𑀺 𑀲𑀘𑁂 𑀦𑀢𑁆𑀣𑀺, 𑀦 𑀧𑀯𑀸𑀭𑁂𑀢𑀺 𑀓𑀢𑁆𑀣𑀘𑀺.

𑀕𑀺𑀮𑀺𑀢𑁆𑀯𑀸 𑀘 𑀫𑀼𑀔𑁂 𑀪𑀢𑁆𑀢𑀁, 𑀲𑁂𑀲𑀫𑀸𑀤𑀸𑀬 𑀕𑀘𑁆𑀙𑀢𑀺;

𑀅𑀦𑁆𑀢𑀭𑀸 𑀘 𑀦𑀺𑀲𑁂𑀥𑁂𑀦𑁆𑀢𑁄, 𑀦 𑀧𑀯𑀸𑀭𑁂𑀢𑀺 𑀪𑁄𑀚𑀦𑀁.

𑀫𑀼𑀔𑁂 ¶ 𑀘 𑀪𑀢𑁆𑀢𑀁 𑀕𑀺𑀮𑀺𑀢𑀜𑁆𑀘 𑀳𑀢𑁆𑀣𑁂;

𑀪𑀢𑁆𑀢𑀁 𑀢𑀼 𑀅𑀜𑁆𑀜𑀲𑁆𑀲 𑀘 𑀤𑀸𑀢𑀼𑀓𑀸𑀫𑁄;

𑀧𑀢𑁆𑀢𑁂 𑀘 𑀪𑀢𑁆𑀢𑀁 𑀧𑀼𑀦 𑀤𑀸𑀢𑀼𑀓𑀸𑀫𑁄;

𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀧𑀯𑀸𑀭𑀺𑀢𑁄 𑀲𑁄.

𑀅𑀲𑀦𑀲𑁆𑀲 𑀉𑀧𑀘𑁆𑀙𑁂𑀤𑀸, 𑀦 𑀧𑀯𑀸𑀭𑁂𑀢𑀺 𑀲𑁄𑀢𑀺 𑀳𑀺;

𑀓𑀣𑀬𑀦𑁆𑀢𑀺 𑀫𑀳𑀸𑀧𑀜𑁆𑀜𑀸, 𑀓𑀸𑀭𑀡𑀸𑀓𑀸𑀭𑀡𑀜𑁆𑀜𑀼𑀦𑁄.

𑀕𑀡𑁆𑀳𑀢𑁄 𑀧𑀘𑁆𑀙𑀺𑀫𑀁 𑀅𑀗𑁆𑀕𑀁, 𑀤𑀤𑀢𑁄 𑀧𑀼𑀭𑀺𑀫𑀁 𑀧𑀦;

𑀉𑀪𑀺𑀦𑁆𑀦𑀁 𑀅𑀟𑁆𑀠𑀢𑁂𑀬𑁆𑀬𑀁 𑀘𑁂, 𑀯𑀺𑀦𑀸 𑀳𑀢𑁆𑀣𑀁 𑀧𑀲𑀸𑀭𑀺𑀢𑀁.

𑀢𑀲𑁆𑀫𑀺𑀁 𑀅𑀪𑀺𑀳𑀝𑀁 𑀞𑀸𑀦𑁂, 𑀧𑀯𑀸𑀭𑀡𑀧𑀳𑁄𑀦𑀓𑀁;

𑀢𑀸𑀤𑀺𑀲𑀁 𑀪𑀼𑀜𑁆𑀚𑀫𑀸𑀦𑁄𑀯, 𑀦𑀺𑀲𑁂𑀥𑁂𑀢𑀺 𑀧𑀯𑀸𑀭𑀺𑀢𑁄.

𑀳𑀢𑁆𑀣𑁂 𑀆𑀥𑀸𑀭𑀓𑁂 𑀯𑀸𑀧𑀺, 𑀧𑀢𑁆𑀢𑀁 𑀊𑀭𑀽𑀲𑀼 𑀯𑀸 𑀞𑀺𑀢𑀁;

𑀆𑀳𑀭𑀺𑀢𑁆𑀯𑀸 𑀲𑀘𑁂 𑀪𑀺𑀓𑁆𑀔𑀼, ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀪𑀸𑀲𑀢𑀺.

𑀅𑀦𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄𑀯, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀦;

𑀅𑀪𑀺𑀳𑀸𑀭𑀲𑁆𑀲 𑀘𑀸𑀪𑀸𑀯𑀸, 𑀦𑀢𑁆𑀣𑀺 𑀢𑀲𑁆𑀲 𑀧𑀯𑀸𑀭𑀡𑀸.

𑀪𑀢𑁆𑀢𑀧𑀘𑁆𑀙𑀺𑀁 𑀧𑀡𑀸𑀫𑁂𑀢𑁆𑀯𑀸, 𑀞𑀧𑁂𑀢𑁆𑀯𑀸 𑀧𑀼𑀭𑀢𑁄 ‘‘𑀇𑀤𑀁;

𑀕𑀡𑁆𑀳𑀸𑀳𑀻’’𑀢𑀺 𑀘 𑀯𑀼𑀢𑁆𑀢𑁂𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀦𑀦𑁆𑀢𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀤𑀻𑀬𑀫𑀸𑀦𑁂 𑀧𑀦𑁂𑀢𑀭𑁄;

𑀧𑀺𑀤𑀳𑀦𑁆𑀢𑁄 𑀲𑀓𑀁 𑀧𑀢𑁆𑀢𑀁, 𑀳𑀢𑁆𑀣𑁂𑀳𑀺 𑀦 𑀧𑀯𑀸𑀭𑀺𑀢𑁄.

𑀓𑀸𑀬𑁂𑀦𑀸𑀪𑀺𑀳𑀝𑀁 𑀪𑀢𑁆𑀢𑀁, 𑀧𑀝𑀺𑀓𑁆𑀔𑀺𑀧𑀢𑀺 𑀬𑁄 𑀧𑀦;

𑀓𑀸𑀬𑁂𑀦 𑀯𑀸𑀧𑀺 𑀯𑀸𑀘𑀸𑀬, 𑀳𑁄𑀢𑀺 𑀓𑀲𑁆𑀲 𑀧𑀯𑀸𑀭𑀡𑀸.

𑀏𑀓𑁄 ¶ 𑀅𑀪𑀺𑀳𑀝𑁂 𑀪𑀢𑁆𑀢𑁂, 𑀧𑀯𑀸𑀭𑀡𑀪𑀬𑀸 𑀧𑀦;

‘‘𑀆𑀓𑀺𑀭𑀸𑀓𑀺𑀭 𑀓𑁄𑀝𑁆𑀝𑁂𑀢𑁆𑀯𑀸, 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑀬𑀸’’𑀢𑀺 𑀘.

𑀲𑀘𑁂 𑀯𑀤𑀢𑀺 𑀢𑀲𑁆𑀲𑀸𑀧𑀺, 𑀦 𑀧𑀦𑀢𑁆𑀣𑀺 𑀧𑀯𑀸𑀭𑀡𑀸;

𑀇𑀘𑁆𑀘𑁂𑀯𑀸𑀳 𑀫𑀳𑀸𑀣𑁂𑀭𑁄, 𑀫𑀳𑀸𑀧𑀤𑀼𑀫𑀦𑀸𑀫𑀓𑁄.

𑀲𑀫𑀁𑀲𑀜𑁆𑀳𑀺 ¶ 𑀭𑀲𑀁 𑀦𑁂𑀢𑁆𑀯𑀸, 𑀕𑀡𑁆𑀳𑀣𑀸𑀢𑀺 𑀭𑀲𑀁 𑀯𑀤𑁂;

𑀢𑀁 𑀲𑀼𑀢𑁆𑀯𑀸 𑀘 𑀦𑀺𑀲𑁂𑀥𑁂𑀦𑁆𑀢𑁄, 𑀦𑁂𑀯 𑀳𑁄𑀢𑀺 𑀧𑀯𑀸𑀭𑀺𑀢𑁄.

‘‘𑀕𑀡𑁆𑀳 𑀫𑀘𑁆𑀙𑀭𑀲𑀁 𑀲𑀸𑀭𑀁, 𑀕𑀡𑁆𑀳 𑀫𑀁𑀲𑀭𑀲’’𑀦𑁆𑀢𑀺 𑀯𑀸;

‘‘𑀇𑀤𑀁 𑀕𑀡𑁆𑀳𑀸’’𑀢𑀺 𑀯𑀸 𑀯𑀼𑀢𑁆𑀢𑁂, 𑀧𑀝𑀺𑀓𑁆𑀔𑁂𑀧𑁂 𑀧𑀯𑀸𑀭𑀡𑀸.

𑀲𑀘𑁂 𑀫𑀁𑀲𑀁 𑀯𑀺𑀲𑀼𑀁 𑀓𑀢𑁆𑀯𑀸, ‘‘𑀕𑀡𑁆𑀳 𑀫𑀁𑀲𑀭𑀲’’𑀦𑁆𑀢𑀺 𑀯𑀸;

𑀯𑀤𑁂𑀬𑁆𑀬𑀢𑁆𑀣𑀺 𑀘 𑀫𑀁𑀲𑀁 𑀘𑁂, 𑀧𑀝𑀺𑀓𑁆𑀔𑁂𑀧𑁂 𑀧𑀯𑀸𑀭𑀡𑀸.

𑀑𑀤𑀦𑁂𑀦 𑀘 𑀧𑀼𑀘𑁆𑀙𑀦𑁆𑀢𑀁, ‘‘𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀳𑀺’’𑀢𑀺;

𑀕𑀳𑀡𑀢𑁆𑀣𑀁 𑀞𑀧𑁂𑀦𑁆𑀢𑀲𑁆𑀲, 𑀦𑁂𑀯 𑀢𑀲𑁆𑀲 𑀧𑀯𑀸𑀭𑀡𑀸.

𑀓𑀴𑀻𑀭𑀧𑀦𑀲𑀸𑀤𑀻𑀳𑀺, 𑀫𑀺𑀲𑁆𑀲𑀓𑀁 𑀫𑀘𑁆𑀙𑀫𑀁𑀲𑀓𑀁;

‘‘𑀓𑀴𑀻𑀭𑀲𑀽𑀧𑀓𑀁 𑀕𑀡𑁆𑀳, 𑀧𑀦𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀸.

𑀯𑀤𑀦𑁆𑀢𑀺 𑀘𑁂 𑀧𑀝𑀺𑀓𑁆𑀔𑁂𑀧𑁂, 𑀦𑁂𑀯 𑀳𑁄𑀢𑀺 𑀧𑀯𑀸𑀭𑀡𑀸;

𑀅𑀧𑀯𑀸𑀭𑀡𑀳𑁂𑀢𑀽𑀦𑀁, 𑀦𑀸𑀫𑁂𑀦 𑀧𑀦 𑀯𑀼𑀢𑁆𑀢𑀢𑁄.

‘‘𑀫𑀘𑁆𑀙𑀲𑀽𑀧’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂, ‘‘𑀫𑀁𑀲𑀲𑀽𑀧’’𑀦𑁆𑀢𑀺 𑀯𑀸 𑀧𑀦;

‘‘𑀇𑀤𑀁 𑀕𑀡𑁆𑀳𑀸’’𑀢𑀺 𑀯𑀸 𑀯𑀼𑀢𑁆𑀢𑁂, 𑀳𑁄𑀢𑀺𑀬𑁂𑀯 𑀧𑀯𑀸𑀭𑀡𑀸.

𑀏𑀲𑁂𑀯 𑀘 𑀦𑀬𑁄 𑀯𑀼𑀢𑁆𑀢𑁄, 𑀜𑁂𑀬𑁆𑀬𑁄 𑀫𑀁𑀲𑀓𑀭𑀫𑁆𑀩𑀓𑁂;

𑀲𑀩𑁆𑀩𑁂𑀲𑀼 𑀫𑀘𑁆𑀙𑀫𑀁𑀲𑁂𑀳𑀺, 𑀫𑀺𑀲𑁆𑀲𑀓𑁂𑀲𑀼 𑀅𑀬𑀁 𑀦𑀬𑁄.

𑀪𑀢𑁆𑀢𑀲𑀫𑁆𑀫𑀺𑀲𑁆𑀲𑀺𑀢𑀁 𑀬𑀸𑀕𑀼𑀁, 𑀆𑀳𑀭𑀺𑀢𑁆𑀯𑀸 𑀲𑀘𑁂 𑀧𑀦;

‘‘𑀬𑀸𑀕𑀼𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀲𑁆𑀫𑀺𑀁, 𑀦 𑀧𑀯𑀸𑀭𑁂𑀢𑀺 𑀯𑀸𑀭𑀬𑀁.

‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀢𑀼, 𑀧𑀯𑀸𑀭𑁂𑀢𑀺 𑀧𑀝𑀺𑀓𑁆𑀔𑀺𑀧𑀁;

𑀬𑁂𑀦 𑀯𑀸𑀧𑀼𑀘𑁆𑀙𑀺𑀢𑁄 𑀢𑀲𑁆𑀲, 𑀅𑀢𑁆𑀣𑀺𑀢𑀸𑀬𑀸𑀢𑀺 𑀓𑀸𑀭𑀡𑀁.

‘‘𑀬𑀸𑀕𑀼𑀫𑀺𑀲𑁆𑀲𑀓𑀁 𑀕𑀡𑁆𑀳𑀸’’𑀢𑀺, 𑀯𑀼𑀢𑁆𑀢𑁂 𑀢𑀢𑁆𑀣 𑀘 𑀬𑀸𑀕𑀼 𑀘𑁂;

𑀲𑀫𑀸 𑀩𑀳𑀼𑀢𑀭𑀸 𑀯𑀸 𑀲𑀸, 𑀦 𑀧𑀯𑀸𑀭𑁂𑀢𑀺 𑀲𑁄 𑀓𑀺𑀭.

𑀫𑀦𑁆𑀤𑀸 𑀬𑀸𑀕𑀼, 𑀩𑀳𑀼𑀁 𑀪𑀢𑁆𑀢𑀁, 𑀲𑀘𑁂 𑀳𑁄𑀢𑀺 𑀧𑀯𑀸𑀭𑀡𑀸;

𑀇𑀤𑀁 𑀲𑀩𑁆𑀩𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀸𑀭𑀡𑀁 𑀧𑀦 𑀤𑀼𑀤𑁆𑀤𑀲𑀁.

𑀭𑀲𑀁 ¶ 𑀩𑀳𑀼𑀭𑀲𑁂 𑀪𑀢𑁆𑀢𑁂, 𑀔𑀻𑀭𑀁 𑀯𑀸 𑀩𑀳𑀼𑀔𑀻𑀭𑀓𑁂;

𑀕𑀡𑁆𑀳𑀣𑀸𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸, 𑀤𑁂𑀢𑀺 𑀦𑀢𑁆𑀣𑀺 𑀧𑀯𑀸𑀭𑀡𑀸.

𑀕𑀘𑁆𑀙𑀦𑁆𑀢𑁂𑀦𑁂𑀯 ¶ 𑀪𑁄𑀢𑁆𑀢𑀩𑁆𑀩𑀁, 𑀕𑀘𑁆𑀙𑀦𑁆𑀢𑁄 𑀘𑁂 𑀧𑀯𑀸𑀭𑀺𑀢𑁄;

𑀪𑀼𑀜𑁆𑀚𑀺𑀢𑀩𑁆𑀩𑀁 𑀞𑀺𑀢𑁂𑀦𑁂𑀯, 𑀞𑀢𑁆𑀯𑀸 𑀬𑀤𑀺 𑀧𑀯𑀸𑀭𑀺𑀢𑁄.

𑀉𑀤𑀓𑀁 𑀯𑀸𑀧𑀺 𑀧𑀢𑁆𑀯𑀸 𑀲𑁄, 𑀲𑀘𑁂 𑀢𑀺𑀝𑁆𑀞𑀢𑀺 𑀓𑀤𑁆𑀤𑀫𑀁;

𑀅𑀢𑀺𑀭𑀺𑀢𑁆𑀢𑀁 𑀢𑀼 𑀓𑀸𑀭𑁂𑀢𑁆𑀯𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀢𑁄 𑀧𑀼𑀦.

𑀧𑀻𑀞𑀓𑁂 𑀬𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀯𑀸𑀭𑁂𑀢𑀺 𑀲𑀘𑁂 𑀧𑀦;

𑀆𑀲𑀦𑀁 𑀅𑀯𑀺𑀘𑀸𑀮𑁂𑀢𑁆𑀯𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑀲𑀘𑁂 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀯𑀸𑀭𑁂𑀢𑀺 𑀢𑀢𑁄 𑀧𑀦;

𑀇𑀢𑁄 𑀲𑀁𑀲𑀭𑀺𑀢𑀼𑀁 𑀏𑀢𑁆𑀢𑁄, 𑀈𑀲𑀓𑀫𑁆𑀧𑀺 𑀦 𑀮𑀩𑁆𑀪𑀢𑀺.

𑀢𑁂𑀦 𑀫𑀜𑁆𑀘𑁂𑀦 𑀦𑀁 𑀲𑀤𑁆𑀥𑀺𑀁, 𑀯𑀝𑁆𑀝𑀢𑀜𑁆𑀜𑀢𑁆𑀭 𑀦𑁂𑀦𑁆𑀢𑀺 𑀘𑁂;

𑀏𑀯𑀁 𑀲𑀩𑁆𑀩𑀢𑁆𑀣 𑀜𑀸𑀢𑀩𑁆𑀩𑀁, 𑀯𑀺𑀜𑁆𑀜𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸.

𑀦𑀺𑀧𑀚𑁆𑀚𑀺𑀢𑁆𑀯𑀸𑀯 𑀪𑁄𑀢𑁆𑀢𑀩𑁆𑀩𑀁, 𑀦𑀺𑀧𑀦𑁆𑀦𑁄 𑀘𑁂 𑀧𑀯𑀸𑀭𑀺𑀢𑁄;

𑀯𑀸𑀭𑁂𑀢𑀼𑀓𑁆𑀓𑀼𑀝𑀺𑀓𑁄 𑀳𑀼𑀢𑁆𑀯𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀣𑁂𑀯 𑀘.

𑀅𑀣𑀸𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺, 𑀯𑀢𑁆𑀢𑀩𑁆𑀩𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦, 𑀑𑀦𑀫𑁂𑀢𑁆𑀯𑀸𑀦 𑀪𑀸𑀚𑀦𑀁.

𑀓𑀧𑁆𑀧𑀺𑀬𑀁 𑀧𑀦 𑀓𑀸𑀢𑀩𑁆𑀩𑀁, 𑀦 𑀧𑀢𑁆𑀢𑁂𑀬𑁂𑀯 𑀓𑁂𑀯𑀮𑀁;

𑀧𑀘𑁆𑀙𑀺𑀬𑀁 𑀬𑀤𑀺 𑀯𑀸 𑀓𑀼𑀡𑁆𑀟𑁂, 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀪𑀸𑀚𑀦𑁂.

𑀬𑁂𑀦𑀸𑀢𑀺𑀭𑀺𑀢𑁆𑀢𑀁 𑀢𑀼 𑀓𑀢𑀁 𑀞𑀧𑁂𑀢𑁆𑀯𑀸;

𑀢𑀫𑁂𑀯 𑀘𑁂𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀓𑀧𑁆𑀧𑀺𑀬𑀁 𑀧𑀦 𑀓𑀸𑀭𑁂𑀢𑁆𑀯𑀸, 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄;

𑀩𑁆𑀬𑀜𑁆𑀚𑀦𑀁 𑀯𑀸𑀧𑀺 𑀬𑀁 𑀓𑀺𑀜𑁆𑀘𑀺, 𑀧𑀢𑁆𑀢𑁂 𑀢𑀲𑁆𑀲𑀸𑀓𑀺𑀭𑀦𑁆𑀢𑀺 𑀘𑁂.

𑀅𑀢𑀺𑀭𑀺𑀢𑁆𑀢𑀁 𑀢𑀼 𑀓𑀸𑀭𑁂𑀢𑁆𑀯𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀣𑀸 𑀧𑀼𑀦;

𑀬𑁂𑀦 𑀢𑀁 𑀅𑀓𑀢𑀁 𑀬𑀁 𑀯𑀸, 𑀓𑀸𑀢𑀩𑁆𑀩𑀁 𑀢𑁂𑀦 𑀢𑀁 𑀯𑀺𑀲𑀼𑀁.

𑀓𑀢𑀁 ¶ 𑀅𑀓𑀧𑁆𑀧𑀺𑀬𑀸𑀤𑀻𑀳𑀺, 𑀅𑀢𑀺𑀭𑀺𑀢𑁆𑀢𑀁 𑀢𑀼 𑀲𑀢𑁆𑀢𑀳𑀺;

𑀦 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀜𑁆𑀘, 𑀢𑀁 𑀳𑁄𑀢𑀺𑀦𑀢𑀺𑀭𑀺𑀢𑁆𑀢𑀓𑀁.

𑀬𑁄𑀧𑀺 ¶ 𑀧𑀸𑀢𑁄𑀯 𑀏𑀓𑀫𑁆𑀧𑀺, 𑀲𑀺𑀢𑁆𑀣𑀁 𑀪𑀼𑀢𑁆𑀯𑀸 𑀦𑀺𑀲𑀻𑀤𑀢𑀺;

𑀉𑀧𑀓𑀝𑁆𑀞𑀽𑀧𑀦𑀻𑀢𑀫𑁆𑀧𑀺, 𑀓𑀸𑀢𑀼𑀁 𑀮𑀪𑀢𑀺 𑀓𑀧𑁆𑀧𑀺𑀬𑀁.

𑀆𑀳𑀸𑀭𑀢𑁆𑀣𑀸𑀬 𑀬𑀸𑀫𑀸𑀤𑀺-𑀓𑀸𑀮𑀺𑀓𑀁 𑀧𑀝𑀺𑀕𑀡𑁆𑀳𑀢𑁄;

𑀅𑀦𑀸𑀫𑀺𑀲𑀁 𑀢𑀫𑁂𑀯𑀲𑁆𑀲, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄.

𑀢𑀣𑀸 𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺, 𑀲𑀜𑁆𑀜𑀺𑀦𑁄 𑀅𑀢𑀺𑀭𑀺𑀢𑁆𑀢𑀓𑁂;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀦𑀸𑀧𑀢𑁆𑀢𑀸𑀢𑀺𑀭𑀺𑀢𑁆𑀢𑀁 𑀢𑀼, 𑀓𑀸𑀭𑀸𑀧𑁂𑀢𑁆𑀯𑀸𑀦 𑀪𑀼𑀜𑁆𑀚𑀢𑁄;

𑀕𑀺𑀮𑀸𑀦𑀲𑁆𑀲𑀸𑀢𑀺𑀭𑀺𑀢𑁆𑀢𑀁 𑀯𑀸, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸;

𑀓𑀧𑁆𑀧𑀺𑀬𑀸𑀓𑀭𑀡𑀜𑁆𑀘𑁂𑀯, 𑀪𑁄𑀚𑀦𑀜𑁆𑀘 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀬𑁄 𑀧𑀦𑀸𑀦𑀢𑀺𑀭𑀺𑀢𑁆𑀢𑁂𑀦, 𑀧𑀯𑀸𑀭𑁂𑀬𑁆𑀬 𑀧𑀯𑀸𑀭𑀺𑀢𑀁;

𑀚𑀸𑀦𑀁 𑀆𑀲𑀸𑀤𑀦𑀸𑀧𑁂𑀓𑁆𑀔𑁄, 𑀪𑀼𑀢𑁆𑀢𑁂 𑀧𑀸𑀘𑀺𑀢𑁆𑀢𑀺 𑀢𑀲𑁆𑀲 𑀢𑀼.

𑀤𑀼𑀓𑁆𑀓𑀝𑀁 𑀅𑀪𑀺𑀳𑀸𑀭𑁂 𑀘, 𑀕𑀳𑀡𑁂 𑀇𑀢𑀭𑀲𑁆𑀲 𑀳𑀺;

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀲𑀩𑁆𑀩𑁂𑀲𑀼𑀧𑀺 𑀘 𑀤𑀼𑀓𑁆𑀓𑀝𑀁.

𑀪𑁄𑀚𑀦𑀲𑁆𑀲𑀸𑀯𑀲𑀸𑀦𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀅𑀪𑀺𑀳𑀸𑀭𑀓𑀪𑀺𑀓𑁆𑀔𑀼𑀲𑁆𑀲, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀤𑀲𑁆𑀲𑀺𑀢𑀁.

𑀧𑀯𑀸𑀭𑀺𑀢𑁄𑀢𑀺 𑀲𑀜𑁆𑀜𑀺𑀲𑁆𑀲, 𑀪𑀺𑀓𑁆𑀔𑀼𑀲𑁆𑀫𑀺𑀁 𑀅𑀧𑀯𑀸𑀭𑀺𑀢𑁂;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀦𑀸𑀧𑀢𑁆𑀢𑀸𑀢𑀺𑀭𑀺𑀢𑁆𑀢𑀁 𑀯𑀸, 𑀓𑀸𑀭𑀸𑀧𑁂𑀢𑁆𑀯𑀸𑀯 𑀤𑁂𑀢𑀺 𑀘𑁂;

𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀁 𑀯𑀸, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑁂𑀢𑀺 𑀯𑀸.

𑀲𑁂𑀲𑀁 ¶ 𑀲𑀩𑁆𑀩𑀫𑀲𑁂𑀲𑁂𑀦, 𑀅𑀦𑀦𑁆𑀢𑀭𑀲𑀫𑀁 𑀫𑀢𑀁;

𑀑𑀫𑀲𑀯𑀸𑀤𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀓𑀺𑀜𑁆𑀘𑀺 𑀯𑀺𑀓𑀸𑀮𑁂 𑀬𑁄 𑀧𑀦 𑀪𑀺𑀓𑁆𑀔𑀼;

𑀔𑀸𑀤𑀢𑀺 ¶ 𑀪𑀼𑀜𑁆𑀚𑀢𑀺 𑀯𑀸𑀧𑀺 𑀘 𑀢𑀁;

𑀲𑁄 𑀚𑀺𑀦𑀯𑀼𑀢𑁆𑀢𑀁 𑀤𑁄𑀲𑀫𑀼𑀧𑁂𑀢𑀺.

𑀬𑀫𑀸𑀫𑀺𑀲𑀕𑀢𑀜𑁆𑀘𑁂𑀢𑁆𑀣, 𑀯𑀦𑀫𑀽𑀮𑀨𑀮𑀸𑀤𑀺𑀓𑀁;

𑀓𑀸𑀮𑀺𑀓𑁂𑀲𑁆𑀯𑀲𑀫𑁆𑀫𑁄𑀳𑀢𑁆𑀣𑀁, 𑀯𑁂𑀤𑀺𑀢𑀩𑁆𑀩𑀫𑀺𑀤𑀁 𑀧𑀦.

𑀫𑀽𑀮𑀁 𑀓𑀦𑁆𑀤𑀁 𑀫𑀼𑀴𑀸𑀮𑀜𑁆𑀘, 𑀫𑀢𑁆𑀣𑀓𑀁 𑀔𑀦𑁆𑀥𑀓𑀁 𑀢𑀘𑀁;

𑀧𑀢𑁆𑀢𑀁 𑀧𑀼𑀧𑁆𑀨𑀁 𑀨𑀮𑀁 𑀅𑀝𑁆𑀞𑀺, 𑀧𑀺𑀝𑁆𑀞𑀁 𑀦𑀺𑀬𑁆𑀬𑀸𑀲𑀫𑁂𑀯 𑀘.

𑀫𑀽𑀮𑀔𑀸𑀤𑀦𑀻𑀬𑀸𑀤𑀻𑀦𑀁, 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁;

𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬, 𑀦𑀸𑀫𑀢𑁆𑀣𑁂𑀲𑀼 𑀦𑀺𑀩𑁄𑀥𑀣.

𑀫𑀽𑀮𑀓𑀁 𑀔𑀸𑀭𑀓𑀜𑁆𑀘𑁂𑀯, 𑀯𑀢𑁆𑀣𑀼𑀮𑀁 𑀢𑀡𑁆𑀟𑀼𑀮𑁂𑀬𑁆𑀬𑀓𑀁;

𑀢𑀫𑁆𑀩𑀓𑀁 𑀚𑀚𑁆𑀛𑀭𑀺𑀓𑀜𑁆𑀘, 𑀘𑀘𑁆𑀘𑀼 𑀯𑀚𑀓𑀮𑀻𑀧𑀺 𑀘.

𑀫𑀽𑀮𑀸𑀦𑀺 𑀏𑀯𑀫𑀸𑀤𑀻𑀦𑀁, 𑀲𑀸𑀓𑀸𑀦𑀁 𑀆𑀫𑀺𑀲𑁂 𑀧𑀦;

𑀲𑀗𑁆𑀕𑀳𑀁 𑀇𑀥 𑀕𑀘𑁆𑀙𑀦𑁆𑀢𑀺, 𑀆𑀳𑀸𑀭𑀢𑁆𑀣𑀁 𑀨𑀭𑀦𑁆𑀢𑀺 𑀳𑀺.

𑀙𑀟𑁆𑀟𑁂𑀦𑁆𑀢𑀺 𑀚𑀭𑀝𑁆𑀞𑀁 𑀙𑁂𑀢𑁆𑀯𑀸, 𑀬𑀁 𑀢𑀁 𑀯𑀚𑀓𑀮𑀺𑀲𑁆𑀲 𑀢𑀼;

𑀢𑀁 𑀬𑀸𑀯𑀚𑀻𑀯𑀺𑀓𑀁 𑀯𑀼𑀢𑁆𑀢𑀁, 𑀲𑁂𑀲𑀸𑀦𑀁 𑀬𑀸𑀯𑀓𑀸𑀮𑀺𑀓𑀁.

𑀳𑀮𑀺𑀤𑁆𑀤𑀺 𑀲𑀺𑀗𑁆𑀕𑀺𑀯𑁂𑀭𑀜𑁆𑀘, 𑀯𑀘𑀢𑁆𑀢𑀁 𑀅𑀢𑀺𑀯𑀺𑀲𑀁 𑀯𑀘𑀁;

𑀉𑀲𑀻𑀭𑀁 𑀪𑀤𑁆𑀤𑀫𑀼𑀢𑁆𑀢𑀜𑁆𑀘, 𑀢𑀣𑀸 𑀓𑀝𑀼𑀓𑀭𑁄𑀳𑀺𑀡𑀻.

𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀅𑀜𑁆𑀜𑀁, 𑀧𑀜𑁆𑀘𑀫𑀽𑀮𑀸𑀤𑀺𑀓𑀁 𑀩𑀳𑀼;

𑀦𑀸𑀦𑀧𑁆𑀧𑀓𑀸𑀭𑀓𑀁 𑀫𑀽𑀮𑀁, 𑀯𑀺𑀜𑁆𑀜𑁂𑀬𑁆𑀬𑀁 𑀬𑀸𑀯𑀚𑀻𑀯𑀺𑀓𑀁.

𑀫𑀲𑀸𑀮𑀼𑀧𑀺𑀡𑁆𑀟𑀮𑀸𑀤𑀻𑀦𑀁 ¶ , 𑀯𑀮𑁆𑀮𑀻𑀦𑀁 𑀆𑀮𑀼𑀯𑀲𑁆𑀲 𑀘;

𑀓𑀦𑁆𑀤𑁄 𑀉𑀧𑁆𑀧𑀮𑀚𑀸𑀢𑀻𑀦𑀁, 𑀢𑀣𑀸 𑀧𑀤𑀼𑀫𑀚𑀸𑀢𑀺𑀬𑀸.

𑀓𑀤𑀮𑀻𑀲𑀺𑀕𑁆𑀕𑀼𑀢𑀸𑀮𑀸𑀦𑀁, 𑀫𑀸𑀮𑀼𑀯𑀲𑁆𑀲 𑀘 𑀯𑁂𑀴𑀼𑀬𑀸;

𑀲𑀢𑀸𑀯𑀭𑀺 𑀓𑀲𑁂𑀭𑀽𑀦𑀁, 𑀓𑀦𑁆𑀤𑁄 𑀅𑀫𑁆𑀩𑀸𑀝𑀓𑀲𑁆𑀲 𑀘.

𑀅𑀥𑁄𑀢𑁄 𑀮𑀲𑀼𑀡𑀜𑁆𑀘𑁂𑀯, 𑀔𑀻𑀭𑀓𑀸𑀓𑁄𑀮𑀺𑀆𑀤𑀬𑁄;

𑀓𑀦𑁆𑀤𑀸 𑀯𑀸𑀓𑁆𑀬𑀧𑀣𑀸𑀢𑀻𑀢𑀸, 𑀯𑀺𑀜𑁆𑀜𑁂𑀬𑁆𑀬𑀸 𑀬𑀸𑀯𑀚𑀻𑀯𑀺𑀓𑀸.

𑀧𑀼𑀡𑁆𑀟𑀭𑀻𑀓𑀫𑀼𑀴𑀸𑀮𑀜𑁆𑀘 ¶ , 𑀫𑀼𑀴𑀸𑀮𑀁 𑀧𑀤𑀼𑀫𑀲𑁆𑀲 𑀘;

𑀏𑀯𑀫𑀸𑀤𑀺𑀫𑀦𑁂𑀓𑀫𑁆𑀧𑀺, 𑀫𑀼𑀴𑀸𑀮𑀁 𑀬𑀸𑀯𑀓𑀸𑀮𑀺𑀓𑀁.

𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮-𑀦𑀸𑀴𑀺𑀓𑁂𑀭𑀸𑀤𑀺𑀲𑀫𑁆𑀪𑀯𑀁;

𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀸𑀦𑀁, 𑀫𑀼𑀴𑀸𑀮𑀁 𑀬𑀸𑀯𑀚𑀻𑀯𑀺𑀓𑀁.

𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮-𑀓𑀴𑀻𑀭𑁄 𑀓𑁂𑀢𑀓𑀲𑁆𑀲 𑀘;

𑀓𑀤𑀮𑀻𑀦𑀸𑀴𑀺𑀓𑁂𑀭𑀸𑀦𑀁, 𑀫𑀢𑁆𑀣𑀓𑀁 𑀫𑀽𑀮𑀓𑀲𑁆𑀲 𑀘.

𑀔𑀚𑁆𑀚𑀼𑀭𑁂𑀭𑀓𑀯𑁂𑀢𑁆𑀢𑀸𑀦𑀁, 𑀉𑀘𑁆𑀙𑀼𑀯𑁂𑀴𑀼𑀦𑀴𑀸𑀤𑀺𑀦𑀁;

𑀲𑀢𑁆𑀢𑀦𑁆𑀦𑀁 𑀧𑀦 𑀥𑀜𑁆𑀜𑀸𑀦𑀁, 𑀓𑀴𑀻𑀭𑁄 𑀲𑀸𑀲𑀧𑀲𑁆𑀲 𑀘.

𑀇𑀘𑁆𑀘𑁂𑀯𑀫𑀸𑀤𑀬𑁄𑀦𑁂𑀓𑁂, 𑀫𑀢𑁆𑀣𑀓𑀸 𑀬𑀸𑀯𑀓𑀸𑀮𑀺𑀓𑀸;

𑀅𑀜𑁆𑀜𑁂 𑀳𑀮𑀺𑀤𑁆𑀤𑀺𑀆𑀤𑀻𑀦𑀁, 𑀫𑀢𑁆𑀣𑀓𑀸 𑀬𑀸𑀯𑀚𑀻𑀯𑀺𑀓𑀸.

𑀢𑀸𑀮𑀓𑀼𑀦𑁆𑀢𑀸𑀮𑀓𑀸𑀤𑀻𑀦𑀁, 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀢𑁄 𑀧𑀦;

𑀕𑀢𑁄 𑀚𑀭𑀝𑁆𑀞𑀩𑀼𑀦𑁆𑀤𑁄 𑀲𑁄, 𑀲𑀗𑁆𑀕𑀳𑀁 𑀬𑀸𑀯𑀚𑀻𑀯𑀺𑀓𑁂.

𑀔𑀦𑁆𑀥𑀔𑀸𑀤𑀦𑀻𑀬𑀁 𑀦𑀸𑀫, 𑀉𑀘𑁆𑀙𑀼𑀔𑀦𑁆𑀥𑁄 𑀧𑀓𑀸𑀲𑀺𑀢𑁄;

𑀲𑀸𑀮𑀓𑀮𑁆𑀬𑀸𑀡𑀺𑀬𑀸 𑀔𑀦𑁆𑀥𑁄, 𑀢𑀣𑀸 𑀧𑀣𑀯𑀺𑀬𑀁 𑀕𑀢𑁄.

𑀏𑀯𑀫𑀼𑀧𑁆𑀧𑀮𑀚𑀸𑀢𑀻𑀦𑀁, 𑀤𑀡𑁆𑀟𑀓𑁄 𑀬𑀸𑀯𑀓𑀸𑀮𑀺𑀓𑁄;

𑀧𑀡𑁆𑀡𑀤𑀡𑁆𑀟𑀼𑀧𑁆𑀧𑀮𑀸𑀤𑀻𑀦𑀁, 𑀲𑀩𑁆𑀩𑁄 𑀧𑀤𑀼𑀫𑀚𑀸𑀢𑀺𑀬𑀸.

𑀬𑀸𑀯𑀚𑀻𑀯𑀺𑀓𑀲𑀗𑁆𑀔𑀸𑀢𑀸 ¶ , 𑀓𑀭𑀫𑀤𑁆𑀤𑀸𑀤𑀺𑀤𑀡𑁆𑀟𑀓𑀸;

𑀢𑀘𑁂𑀲𑀼𑀘𑁆𑀙𑀼𑀢𑀘𑁄𑀯𑁂𑀓𑁄, 𑀲𑀭𑀲𑁄 𑀬𑀸𑀯𑀓𑀸𑀮𑀺𑀓𑁄.

𑀫𑀽𑀮𑀓𑀁 𑀔𑀸𑀭𑀓𑁄 𑀘𑀘𑁆𑀘𑀼, 𑀢𑀫𑁆𑀩𑀓𑁄 𑀢𑀡𑁆𑀟𑀼𑀮𑁂𑀬𑁆𑀬𑀓𑁄;

𑀯𑀢𑁆𑀣𑀼𑀮𑁄 𑀘𑀻𑀦𑀫𑀼𑀕𑁆𑀕𑁄 𑀘, 𑀉𑀫𑁆𑀫𑀸 𑀯𑀚𑀓𑀮𑀻 𑀢𑀣𑀸.

𑀚𑀚𑁆𑀛𑀭𑀻 𑀓𑀸𑀲𑀫𑀤𑁆𑀤𑁄 𑀘, 𑀲𑁂𑀮𑁆𑀮𑀼 𑀲𑀺𑀕𑁆𑀕𑀼 𑀘 𑀦𑀸𑀴𑀺𑀓𑀸;

𑀯𑀭𑀼𑀡𑁄 𑀅𑀕𑁆𑀕𑀺𑀫𑀦𑁆𑀣𑁄 𑀘, 𑀚𑀻𑀯𑀦𑁆𑀢𑀻 𑀲𑀼𑀦𑀺𑀲𑀦𑁆𑀦𑀓𑁄.

𑀭𑀸𑀚𑀫𑀸𑀲𑁄 𑀘 𑀫𑀸𑀲𑁄 𑀘, 𑀦𑀺𑀧𑁆𑀨𑀸𑀯𑁄 𑀫𑀺𑀕𑀧𑀼𑀧𑁆𑀨𑀺𑀓𑀸;

𑀯𑀡𑁆𑀝𑀓𑁄 𑀪𑀽𑀫𑀺𑀮𑁄𑀡𑀻𑀢𑀺, 𑀏𑀯𑀫𑀸𑀤𑀺𑀫𑀦𑁂𑀓𑀓𑀁.

𑀧𑀢𑁆𑀢𑀔𑀸𑀤𑀦𑀻𑀬𑀁 𑀦𑀸𑀫, 𑀓𑀣𑀺𑀢𑀁 𑀬𑀸𑀯𑀓𑀸𑀮𑀺𑀓𑀁;

𑀇𑀢𑀭𑀸 𑀘 𑀫𑀳𑀸𑀮𑁄𑀡𑀺, 𑀤𑀻𑀧𑀺𑀢𑀸 𑀬𑀸𑀯𑀚𑀻𑀯𑀺𑀓𑀸.

𑀬𑀸𑀯𑀓𑀸𑀮𑀺𑀓𑀫𑀺𑀘𑁆𑀘𑁂𑀯, 𑀓𑀣𑀺𑀢𑀁 𑀅𑀫𑁆𑀩𑀧𑀮𑁆𑀮𑀯𑀁;

𑀦𑀺𑀫𑁆𑀩𑀲𑁆𑀲 𑀓𑀼𑀝𑀚𑀲𑁆𑀲𑀸𑀧𑀺, 𑀧𑀡𑁆𑀡𑀁 𑀲𑀼𑀮𑀲𑀺𑀬𑀸𑀧𑀺 𑀘.

𑀓𑀧𑁆𑀧𑀸𑀲𑀺𑀓𑀧𑀝𑁄𑀮𑀸𑀦𑀁 ¶ , 𑀢𑁂𑀲𑀁 𑀧𑀼𑀧𑁆𑀨𑀨𑀮𑀸𑀦𑀺 𑀘;

𑀨𑀡𑀺𑀚𑁆𑀚𑀓𑀚𑁆𑀚𑀼𑀓𑀸𑀦𑀜𑁆𑀘, 𑀧𑀡𑁆𑀡𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑀅𑀝𑁆𑀞𑀦𑁆𑀦𑀁 𑀫𑀽𑀮𑀓𑀸𑀤𑀻𑀦𑀁, 𑀧𑀼𑀧𑁆𑀨𑀁 𑀦𑀺𑀧𑁆𑀨𑀸𑀯𑀓𑀲𑁆𑀲 𑀘;

𑀢𑀣𑀸 𑀧𑀼𑀧𑁆𑀨𑀁 𑀓𑀭𑀻𑀭𑀲𑁆𑀲, 𑀧𑀼𑀧𑁆𑀨𑀁 𑀯𑀭𑀼𑀡𑀓𑀲𑁆𑀲 𑀘.

𑀧𑀼𑀧𑁆𑀨𑀁 𑀓𑀲𑁂𑀭𑀼𑀓𑀲𑁆𑀲𑀸𑀧𑀺, 𑀚𑀻𑀯𑀦𑁆𑀢𑀻 𑀲𑀺𑀕𑁆𑀕𑀼𑀧𑀼𑀧𑁆𑀨𑀓𑀁;

𑀧𑀤𑀼𑀫𑀼𑀧𑁆𑀧𑀮𑀚𑀸𑀢𑀻𑀦𑀁, 𑀧𑀼𑀧𑁆𑀨𑀸𑀦𑀁 𑀓𑀡𑁆𑀡𑀺𑀓𑀸𑀧𑀺 𑀘.

𑀦𑀸𑀴𑀺𑀓𑁂𑀭𑀲𑁆𑀲 𑀢𑀸𑀮𑀲𑁆𑀲, 𑀢𑀭𑀼𑀡𑀁 𑀓𑁂𑀢𑀓𑀲𑁆𑀲 𑀘;

𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀧𑀼𑀧𑁆𑀨-𑀫𑀦𑁂𑀓𑀁 𑀬𑀸𑀯𑀓𑀸𑀮𑀺𑀓𑀁.

𑀬𑀸𑀯𑀓𑀸𑀮𑀺𑀓𑀧𑀼𑀧𑁆𑀨𑀸𑀦𑀺, 𑀞𑀧𑁂𑀢𑁆𑀯𑀸 𑀧𑀦 𑀲𑁂𑀲𑀓𑀁;

𑀬𑀸𑀯𑀚𑀻𑀯𑀺𑀓𑀧𑀼𑀧𑁆𑀨𑀦𑁆𑀢𑀺, 𑀤𑀻𑀧𑀬𑁂 𑀲𑀩𑁆𑀩𑀫𑁂𑀯 𑀘.

𑀢𑀺𑀮𑀓𑀫𑀓𑀼𑀮𑀲𑀸𑀮𑀫𑀮𑁆𑀮𑀺𑀓𑀸𑀦𑀁 ¶ ;

𑀓𑀓𑀼𑀥𑀓𑀧𑀺𑀢𑁆𑀣𑀓𑀓𑀼𑀦𑁆𑀤𑀓𑀴𑀻𑀦𑀁;

𑀓𑀼𑀲𑀼𑀫𑀫𑀺𑀤𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁.

𑀅𑀫𑁆𑀩𑀫𑁆𑀩𑀸𑀝𑀓𑀚𑀫𑁆𑀩𑀽𑀦𑀁, 𑀨𑀮𑀜𑁆𑀘 𑀧𑀦𑀲𑀲𑁆𑀲 𑀘;

𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀢𑁆𑀣𑀸𑀦𑀁, 𑀨𑀮𑀁 𑀢𑀺𑀦𑁆𑀢𑀺𑀡𑀺𑀓𑀲𑁆𑀲 𑀘.

𑀢𑀸𑀮𑀲𑁆𑀲 𑀦𑀸𑀴𑀺𑀓𑁂𑀭𑀲𑁆𑀲, 𑀨𑀮𑀁 𑀔𑀚𑁆𑀚𑀽𑀭𑀺𑀬𑀸𑀧𑀺 𑀘;

𑀮𑀩𑀼𑀚𑀲𑁆𑀲 𑀘 𑀘𑁄𑀘𑀲𑁆𑀲, 𑀫𑁄𑀘𑀲𑁆𑀲 𑀫𑀥𑀼𑀓𑀲𑁆𑀲 𑀘.

𑀩𑀤𑀭𑀲𑁆𑀲 𑀓𑀭𑀫𑀤𑁆𑀤𑀲𑁆𑀲, 𑀨𑀮𑀁 𑀯𑀸𑀢𑀺𑀗𑁆𑀕𑀡𑀲𑁆𑀲 𑀘;

𑀓𑀼𑀫𑁆𑀪𑀡𑁆𑀟𑀢𑀺𑀧𑀼𑀲𑀸𑀦𑀜𑁆𑀘, 𑀨𑀮𑀁 𑀏𑀴𑀸𑀮𑀼𑀓𑀲𑁆𑀲 𑀘.

𑀭𑀸𑀚𑀸𑀬𑀢𑀦𑀨𑀮𑀁 𑀧𑀼𑀲𑁆𑀲-𑀨𑀮𑀁 𑀢𑀺𑀫𑁆𑀩𑀭𑀼𑀓𑀲𑁆𑀲 𑀘;

𑀏𑀯𑀫𑀸𑀤𑀺𑀫𑀦𑁂𑀓𑀫𑁆𑀧𑀺, 𑀨𑀮𑀁 𑀢𑀁 𑀬𑀸𑀯𑀓𑀸𑀮𑀺𑀓𑀁.

𑀢𑀺𑀨𑀮𑀁 𑀧𑀺𑀧𑁆𑀨𑀮𑀻 𑀚𑀸𑀢𑀺-𑀨𑀮𑀜𑁆𑀘 𑀓𑀝𑀼𑀓𑀧𑁆𑀨𑀮𑀁;

𑀕𑁄𑀝𑁆𑀞𑀨𑀮𑀁 𑀩𑀺𑀮𑀗𑁆𑀕𑀜𑁆𑀘, 𑀢𑀓𑁆𑀓𑁄𑀮𑀫𑀭𑀺𑀘𑀸𑀦𑀺 𑀘.

𑀏𑀯𑀫𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺, 𑀅𑀯𑀼𑀢𑁆𑀢𑀸𑀦𑀺 𑀘 𑀧𑀸𑀴𑀺𑀬𑀁;

𑀨𑀮𑀸𑀦𑀺 𑀧𑀦 𑀕𑀘𑁆𑀙𑀦𑁆𑀢𑀺, 𑀬𑀸𑀯𑀚𑀻𑀯𑀺𑀓𑀲𑀗𑁆𑀕𑀳𑀁.

𑀧𑀦𑀲𑀫𑁆𑀩𑀸𑀝𑀓𑀝𑁆𑀞𑀻𑀦𑀺, 𑀲𑀸𑀮𑀝𑁆𑀞𑀺 𑀮𑀩𑀼𑀚𑀝𑁆𑀞𑀺 𑀘;

𑀘𑀺𑀜𑁆𑀘𑀸𑀩𑀺𑀫𑁆𑀩𑀨𑀮𑀝𑁆𑀞𑀻𑀦𑀺, 𑀧𑁄𑀓𑁆𑀔𑀭𑀝𑁆𑀞𑀺 𑀘 𑀲𑀩𑁆𑀩𑀲𑁄.

𑀔𑀚𑁆𑀚𑀽𑀭𑀺𑀓𑁂𑀢𑀓𑀸𑀤𑀻𑀦𑀁 ¶ , 𑀢𑀣𑀸 𑀢𑀸𑀮𑀨𑀮𑀝𑁆𑀞𑀺 𑀘;

𑀏𑀯𑀫𑀸𑀤𑀻𑀦𑀺 𑀕𑀘𑁆𑀙𑀦𑁆𑀢𑀺, 𑀬𑀸𑀯𑀓𑀸𑀮𑀺𑀓𑀲𑀗𑁆𑀕𑀳𑀁.

𑀧𑀼𑀦𑁆𑀦𑀸𑀕𑀫𑀥𑀼𑀓𑀝𑁆𑀞𑀻𑀦𑀺, 𑀲𑁂𑀮𑁆𑀮𑀝𑁆𑀞𑀺 𑀢𑀺𑀨𑀮𑀝𑁆𑀞𑀺 𑀘;

𑀏𑀯𑀫𑀸𑀤𑀻𑀦𑀺 𑀅𑀝𑁆𑀞𑀻𑀦𑀺, 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀅𑀦𑀸𑀫𑀺𑀲𑁂.

𑀲𑀢𑁆𑀢𑀦𑁆𑀦𑀁 𑀧𑀦 𑀥𑀜𑁆𑀜𑀸𑀦𑀁, 𑀅𑀧𑀭𑀡𑁆𑀡𑀸𑀦𑀫𑁂𑀯 𑀘;

𑀧𑀺𑀝𑁆𑀞𑀁 𑀧𑀦𑀲𑀲𑀸𑀮𑀸𑀦𑀁, 𑀮𑀩𑀼𑀚𑀫𑁆𑀩𑀸𑀝𑀓𑀲𑁆𑀲 𑀘.

𑀢𑀸𑀮𑀧𑀺𑀝𑁆𑀞𑀁 ¶ 𑀢𑀣𑀸 𑀥𑁄𑀢𑀁, 𑀧𑀺𑀝𑁆𑀞𑀁 𑀬𑀁 𑀔𑀻𑀭𑀯𑀮𑁆𑀮𑀺𑀬𑀸;

𑀏𑀯𑀫𑀸𑀤𑀺𑀫𑀦𑁂𑀓𑀫𑁆𑀧𑀺, 𑀓𑀣𑀺𑀢𑀁 𑀬𑀸𑀯𑀓𑀸𑀮𑀺𑀓𑀁.

𑀅𑀥𑁄𑀢𑀁 𑀢𑀸𑀮𑀧𑀺𑀝𑁆𑀞𑀜𑁆𑀘, 𑀧𑀺𑀝𑁆𑀞𑀁 𑀬𑀁 𑀔𑀻𑀭𑀯𑀮𑁆𑀮𑀺𑀬𑀸;

𑀅𑀲𑁆𑀲𑀕𑀦𑁆𑀥𑀸𑀤𑀺𑀧𑀺𑀝𑁆𑀞𑀜𑁆𑀘, 𑀳𑁄𑀢𑀺 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑀦𑀺𑀬𑁆𑀬𑀸𑀲𑁄 𑀉𑀘𑁆𑀙𑀼𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄;

𑀅𑀯𑀲𑁂𑀲𑁄 𑀘 𑀳𑀺𑀗𑁆𑀕𑀸𑀤𑀺, 𑀦𑀺𑀬𑁆𑀬𑀸𑀲𑁄 𑀬𑀸𑀯𑀚𑀻𑀯𑀺𑀓𑁄.

𑀫𑀽𑀮𑀸𑀤𑀻𑀲𑀼 𑀫𑀬𑀸 𑀓𑀺𑀜𑁆𑀘𑀺, 𑀫𑀼𑀔𑀫𑀢𑁆𑀢𑀁 𑀦𑀺𑀤𑀲𑁆𑀲𑀺𑀢𑀁;

𑀏𑀢𑀲𑁆𑀲𑁂𑀯𑀸𑀦𑀼𑀲𑀸𑀭𑁂𑀦, 𑀲𑁂𑀲𑁄 𑀜𑁂𑀬𑁆𑀬𑁄 𑀯𑀺𑀪𑀸𑀯𑀺𑀦𑀸.

‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀺 𑀯𑀺𑀓𑀸𑀮𑁂’’𑀢𑀺, 𑀆𑀫𑀺𑀲𑀁 𑀧𑀝𑀺𑀕𑀡𑁆𑀳𑀢𑁄;

𑀓𑀸𑀮𑁂 𑀯𑀺𑀓𑀸𑀮𑀲𑀜𑁆𑀜𑀺𑀲𑁆𑀲, 𑀓𑀸𑀮𑁂 𑀯𑁂𑀫𑀢𑀺𑀓𑀲𑁆𑀲 𑀘.

𑀤𑀼𑀓𑁆𑀓𑀝𑀁, 𑀓𑀸𑀮𑀲𑀜𑁆𑀜𑀺𑀲𑁆𑀲, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀇𑀤𑀁 𑀏𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀫𑀁.

𑀪𑁄𑀚𑀦𑀁 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸, 𑀔𑀸𑀤𑀦𑀁 𑀯𑀸𑀧𑀺 𑀬𑁄 𑀧𑀦;

𑀪𑀼𑀜𑁆𑀚𑁂𑀬𑁆𑀬 𑀯𑀸𑀧𑀺 𑀔𑀸𑀤𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀪𑀺𑀓𑁆𑀔𑀼 𑀬𑀁 𑀲𑀸𑀫𑀡𑁂𑀭𑀸𑀦𑀁, 𑀧𑀭𑀺𑀘𑁆𑀘𑀚𑀢𑁆𑀬𑀦𑀸𑀮𑀬𑁄;

𑀦𑀺𑀤𑀳𑀺𑀢𑁆𑀯𑀸 𑀲𑀘𑁂 𑀢𑀲𑁆𑀲, 𑀤𑁂𑀦𑁆𑀢𑀺 𑀢𑀁 𑀧𑀼𑀦 𑀯𑀝𑁆𑀝𑀢𑀺.

𑀲𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦, 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀬𑀁;

𑀤𑀼𑀢𑀺𑀬𑁂 𑀤𑀺𑀯𑀲𑁂 𑀢𑀲𑁆𑀲, 𑀦𑀺𑀳𑀺𑀢𑀁 𑀢𑀁 𑀦 𑀯𑀝𑁆𑀝𑀢𑀺.

𑀢𑀢𑁄 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀏𑀓𑀲𑀺𑀢𑁆𑀣𑀫𑁆𑀧𑀺 𑀪𑀺𑀓𑁆𑀔𑀼𑀦𑁄;

𑀧𑀸𑀘𑀺𑀢𑁆𑀢𑀺 𑀓𑀣𑀺𑀢𑀸 𑀲𑀼𑀤𑁆𑀥𑀸, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀢𑀸𑀤𑀺𑀦𑀸.

𑀅𑀓𑀧𑁆𑀧𑀺𑀬𑁂𑀲𑀼 ¶ 𑀫𑀁𑀲𑁂𑀲𑀼, 𑀫𑀦𑀼𑀲𑁆𑀲𑀲𑁆𑀲𑁂𑀯 𑀫𑀁𑀲𑀓𑁂;

𑀣𑀼𑀮𑁆𑀮𑀘𑁆𑀘𑀬𑁂𑀦 𑀧𑀸𑀘𑀺𑀢𑁆𑀢𑀺, 𑀤𑀼𑀓𑁆𑀓𑀝𑁂𑀦 𑀲𑀳𑁂𑀢𑀭𑁂.

𑀬𑀸𑀫𑀓𑀸𑀮𑀺𑀓𑀲𑀗𑁆𑀔𑀸𑀢𑀁 ¶ , 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄;

𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁, 𑀆𑀳𑀸𑀭𑀢𑁆𑀣𑀸𑀬 𑀪𑀼𑀜𑁆𑀚𑀢𑁄.

𑀲𑀘𑁂 𑀧𑀯𑀸𑀭𑀺𑀢𑁄 𑀳𑀼𑀢𑁆𑀯𑀸, 𑀅𑀦𑁆𑀦𑀁 𑀅𑀦𑀢𑀺𑀭𑀺𑀢𑁆𑀢𑀓𑀁;

𑀪𑀼𑀜𑁆𑀚𑀢𑁄 𑀧𑀓𑀢𑀁 𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁.

𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂, 𑀫𑀁𑀲𑁂 𑀫𑀸𑀦𑀼𑀲𑀓𑁂 𑀲𑀺𑀬𑀼𑀁;

𑀲𑁂𑀲𑁂 𑀅𑀓𑀧𑁆𑀧𑀺𑀬𑁂 𑀫𑀁𑀲𑁂, 𑀤𑀼𑀓𑁆𑀓𑀝𑁂𑀦 𑀲𑀳 𑀤𑁆𑀯𑀬𑀁.

𑀬𑀸𑀫𑀓𑀸𑀮𑀺𑀓𑀲𑀗𑁆𑀔𑀸𑀢𑀁, 𑀪𑀼𑀜𑁆𑀚𑀢𑁄 𑀲𑀢𑀺 𑀧𑀘𑁆𑀘𑀬𑁂;

𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀤𑁆𑀯𑁂, 𑀏𑀓𑀫𑁂𑀯 𑀦𑀺𑀭𑀸𑀫𑀺𑀲𑀁.

𑀢𑀫𑁂𑀯𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀆𑀳𑀸𑀭𑀢𑁆𑀣𑀸𑀬 𑀓𑁂𑀯𑀮𑀁;

𑀤𑁆𑀯𑀻𑀲𑀼 𑀢𑁂𑀲𑀼 𑀯𑀺𑀓𑀧𑁆𑀧𑁂𑀲𑀼, 𑀤𑀼𑀓𑁆𑀓𑀝𑀁 𑀧𑀦 𑀯𑀟𑁆𑀠𑀢𑀺.

𑀯𑀺𑀓𑀸𑀮𑁂 𑀪𑀼𑀜𑁆𑀚𑀢𑁄 𑀲𑀼𑀤𑁆𑀥𑀁, 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸𑀧𑀺 𑀘;

𑀯𑀺𑀓𑀸𑀮𑀪𑁄𑀚𑀦𑀸 𑀘𑁂𑀯, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁.

𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘𑁂𑀯, 𑀤𑀼𑀓𑁆𑀓𑀝𑀫𑁆𑀧𑀺 𑀘 𑀯𑀟𑁆𑀠𑀢𑀺;

𑀫𑀦𑀼𑀲𑁆𑀲𑀫𑀁𑀲𑁂 𑀲𑁂𑀲𑁂 𑀘, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀤𑁆𑀯𑀬𑀁.

𑀦𑀢𑁆𑀣𑁂𑀯𑀸𑀦𑀢𑀺𑀭𑀺𑀢𑁆𑀢𑀫𑁆𑀧𑀺, 𑀯𑀺𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀢𑁄;

𑀤𑁄𑀲𑁄 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼, 𑀪𑀺𑀓𑁆𑀔𑀼𑀦𑁄 𑀢𑀦𑁆𑀦𑀺𑀫𑀺𑀢𑁆𑀢𑀓𑁄.

𑀯𑀺𑀓𑀸𑀮𑀧𑀘𑁆𑀘𑀬𑀸 𑀯𑀸𑀧𑀺, 𑀦 𑀤𑁄𑀲𑁄 𑀬𑀸𑀫𑀓𑀸𑀮𑀺𑀓𑁂;

𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯-𑀚𑀻𑀯𑀺𑀓𑀁 𑀧𑀝𑀺𑀕𑀡𑁆𑀳𑀢𑁄.

𑀆𑀳𑀸𑀭𑀲𑁆𑀲𑁂𑀯 𑀅𑀢𑁆𑀣𑀸𑀬, 𑀕𑀳𑀡𑁂 𑀤𑀼𑀯𑀺𑀥𑀲𑁆𑀲 𑀢𑀼;

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀤𑀼𑀓𑁆𑀓𑀝𑀁 𑀢𑀼 𑀦𑀺𑀭𑀸𑀫𑀺𑀲𑁂.

𑀅𑀣 𑀆𑀫𑀺𑀲𑀲𑀁𑀲𑀝𑁆𑀞𑀁, 𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀲𑀘𑁂;

𑀧𑀼𑀦 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀧𑀸𑀘𑀺𑀢𑁆𑀢𑁂𑀯 𑀧𑀓𑀸𑀲𑀺𑀢𑀸.

𑀓𑀸𑀮𑁄 𑀬𑀸𑀫𑁄 𑀘 𑀲𑀢𑁆𑀢𑀸𑀳𑀁, 𑀇𑀢𑀺 𑀓𑀸𑀮𑀢𑁆𑀢𑀬𑀁 𑀇𑀤𑀁;

𑀅𑀢𑀺𑀓𑁆𑀓𑀫𑀬𑀢𑁄 𑀤𑁄𑀲𑁄, 𑀓𑀸𑀮𑀁 𑀢𑀁 𑀢𑀁 𑀢𑀼 𑀓𑀸𑀮𑀺𑀓𑀁.

𑀅𑀢𑁆𑀢𑀦𑀸 𑀢𑀻𑀡𑀺 𑀲𑀫𑁆𑀪𑀺𑀦𑁆𑀦-𑀭𑀲𑀸𑀦𑀺 𑀇𑀢𑀭𑀸𑀦𑀺 𑀳𑀺;

𑀲𑀪𑀸𑀯𑀫𑀼𑀧𑀦𑁂𑀢𑁂𑀯, 𑀬𑀸𑀯𑀓𑀸𑀮𑀺𑀓𑀫𑀢𑁆𑀢𑀦𑁄.

𑀏𑀯𑀫𑁂𑀯 ¶ ¶ 𑀘 𑀲𑁂𑀲𑁂𑀲𑀼, 𑀓𑀸𑀮𑀺𑀓𑁂𑀲𑀼 𑀯𑀺𑀦𑀺𑀤𑁆𑀤𑀺𑀲𑁂;

𑀇𑀫𑁂𑀲𑀼 𑀧𑀦 𑀲𑀩𑁆𑀩𑁂𑀲𑀼, 𑀓𑀸𑀮𑀺𑀓𑁂𑀲𑀼 𑀘𑀢𑀽𑀲𑁆𑀯𑀧𑀺.

𑀓𑀸𑀮𑀺𑀓𑀤𑁆𑀯𑀬𑀫𑀸𑀤𑀺𑀫𑁆𑀳𑀺, 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀲𑀦𑁆𑀦𑀺𑀥𑀺;

𑀉𑀪𑀬𑀫𑁆𑀧𑀺 𑀦 𑀳𑁄𑀢𑁂𑀯, 𑀧𑀘𑁆𑀙𑀺𑀫𑀁 𑀓𑀸𑀮𑀺𑀓𑀤𑁆𑀯𑀬𑀁.

𑀅𑀓𑀧𑁆𑀧𑀺𑀬𑀸𑀬 𑀓𑀼𑀝𑀺𑀬𑀸, 𑀯𑀼𑀢𑁆𑀣𑁂𑀦𑀦𑁆𑀢𑀤𑁆𑀯𑀬𑁂𑀦 𑀢𑀁;

𑀕𑀳𑀺𑀢𑀁 𑀢𑀤𑀳𑁂 𑀯𑀸𑀧𑀺, 𑀤𑁆𑀯𑀬𑀁 𑀧𑀼𑀩𑁆𑀩𑀁 𑀦 𑀯𑀝𑁆𑀝𑀢𑀺.

𑀫𑀼𑀔𑀲𑀦𑁆𑀦𑀺𑀥𑀺 𑀦𑀸𑀫𑀸𑀬𑀁, 𑀅𑀦𑁆𑀢𑁄𑀯𑀼𑀢𑁆𑀣𑀁 𑀦 𑀓𑀧𑁆𑀧𑀢𑀺;

𑀇𑀢𑀺 𑀯𑀼𑀢𑁆𑀢𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦.

𑀦 𑀤𑁄𑀲𑁄 𑀦𑀺𑀤𑀳𑀺𑀢𑁆𑀯𑀸𑀧𑀺, 𑀧𑀞𑀫𑀁 𑀓𑀸𑀮𑀺𑀓𑀢𑁆𑀢𑀬𑀁;

𑀢𑀁 𑀢𑀁 𑀲𑀓𑀁 𑀲𑀓𑀁 𑀓𑀸𑀮-𑀫𑀦𑀢𑀺𑀓𑁆𑀓𑀫𑁆𑀫 𑀪𑀼𑀜𑁆𑀚𑀢𑁄.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀇𑀤𑀁.

𑀪𑁄𑀚𑀦𑀸𑀦𑀺 𑀧𑀡𑀻𑀢𑀸𑀦𑀺, 𑀅𑀕𑀺𑀮𑀸𑀦𑁄 𑀧𑀦𑀢𑁆𑀢𑀦𑁄;

𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄.

‘‘𑀲𑀧𑁆𑀧𑀺𑀦𑀸 𑀤𑁂𑀳𑀺 𑀪𑀢𑁆𑀢𑀁 𑀫𑁂, 𑀲𑀲𑀧𑁆𑀧𑀺𑀁 𑀲𑀧𑁆𑀧𑀺𑀫𑀺𑀲𑁆𑀲𑀓𑀁;

𑀲𑀧𑁆𑀧𑀺𑀪𑀢𑁆𑀢𑀜𑁆𑀘 𑀤𑁂𑀳𑀻’’𑀢𑀺, 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀣𑀸 𑀢𑀁 𑀘𑁂, 𑀤𑀼𑀓𑁆𑀓𑀝𑀁 𑀧𑀝𑀺𑀕𑀡𑁆𑀳𑀢𑁄;

𑀧𑀼𑀦 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑀲𑀼𑀤𑁆𑀥𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺, 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦 𑀪𑀼𑀜𑁆𑀚𑀢𑁄;

𑀲𑁂𑀔𑀺𑀬𑁂𑀲𑀼𑀧𑀺 𑀯𑀺𑀜𑁆𑀜𑀢𑁆𑀢𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀬𑁂.

𑀢𑀲𑁆𑀫𑀸 𑀧𑀡𑀻𑀢𑀲𑀁𑀲𑀝𑁆𑀞𑀁, 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀯 𑀪𑀼𑀜𑁆𑀚𑀢𑁄;

𑀲𑀢𑁆𑀢𑀥𑀜𑁆𑀜𑀫𑀬𑀁 𑀪𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀬𑁂.

𑀲𑀘𑁂 ¶ ‘‘𑀕𑁄𑀲𑀧𑁆𑀧𑀺𑀦𑀸 𑀫𑀬𑁆𑀳𑀁, 𑀤𑁂𑀳𑀺 𑀪𑀢𑁆𑀢’’𑀦𑁆𑀢𑀺 𑀬𑀸𑀘𑀺𑀢𑁄;

𑀅𑀚𑀺𑀬𑀸 𑀲𑀧𑁆𑀧𑀺𑀆𑀤𑀻𑀳𑀺, 𑀯𑀺𑀲𑀗𑁆𑀓𑁂𑀢𑀁 𑀤𑀤𑀸𑀢𑀺 𑀘𑁂.

‘‘𑀲𑀧𑁆𑀧𑀺𑀦𑀸 𑀤𑁂𑀳𑀺’’ 𑀯𑀼𑀢𑁆𑀢𑁄 𑀘𑁂, 𑀦𑀯𑀦𑀻𑀢𑀸𑀤𑀺𑀓𑁂𑀲𑀼𑀧𑀺;

𑀤𑁂𑀢𑀺 𑀅𑀜𑁆𑀜𑀢𑀭𑁂𑀦𑀲𑁆𑀲, 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀤𑀻𑀧𑀺𑀢𑀁.

𑀬𑁂𑀦 ¶ 𑀬𑁂𑀦 𑀳𑀺 𑀯𑀺𑀜𑁆𑀜𑀢𑁆𑀢𑀁, 𑀢𑀲𑁆𑀫𑀺𑀁 𑀫𑀽𑀮𑁂𑀧𑀺 𑀢𑀲𑁆𑀲 𑀯𑀸;

𑀮𑀤𑁆𑀥𑁂𑀧𑀺 𑀧𑀦 𑀢𑀁 𑀮𑀤𑁆𑀥𑀁, 𑀳𑁄𑀢𑀺𑀬𑁂𑀯 𑀦 𑀅𑀜𑁆𑀜𑀣𑀸.

𑀞𑀧𑁂𑀢𑁆𑀯𑀸 𑀲𑀧𑁆𑀧𑀺𑀆𑀤𑀻𑀦𑀺, 𑀆𑀕𑀢𑀸𑀦𑀺 𑀳𑀺 𑀧𑀸𑀴𑀺𑀬𑀁;

𑀅𑀜𑁆𑀜𑁂𑀳𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀩𑁆𑀩𑁂𑀳𑀺 𑀲𑀧𑁆𑀧𑀺𑀆𑀤𑀻𑀳𑀺, 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀯 𑀏𑀓𑀢𑁄;

𑀪𑀼𑀜𑁆𑀚𑀢𑁂𑀓𑀭𑀲𑀁 𑀓𑀢𑁆𑀯𑀸, 𑀦𑀯 𑀧𑀸𑀘𑀺𑀢𑁆𑀢𑀺𑀬𑁄 𑀫𑀢𑀸.

𑀅𑀓𑀧𑁆𑀧𑀺𑀬𑁂𑀦 𑀯𑀼𑀢𑁆𑀢𑁂𑀧𑀺, 𑀲𑀧𑁆𑀧𑀺𑀦𑀸 𑀤𑁂𑀢𑀺 𑀢𑁂𑀦 𑀘𑁂;

𑀕𑀳𑀡𑁂 𑀧𑀭𑀺𑀪𑁄𑀕𑁂𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑁄𑀢𑀺, 𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸;

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀕𑀺𑀮𑀸𑀦𑀓𑀸𑀮𑁂 𑀯𑀺𑀜𑁆𑀜𑀢𑁆𑀢-𑀫𑀕𑀺𑀮𑀸𑀦𑀲𑁆𑀲 𑀪𑀼𑀜𑁆𑀚𑀢𑁄;

𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀁 𑀯𑀸, 𑀜𑀸𑀢𑀓𑀸𑀤𑀻𑀦𑀫𑁂𑀯 𑀯𑀸.

𑀇𑀤𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄;

𑀓𑀸𑀬𑀘𑀺𑀢𑁆𑀢𑀸 𑀢𑀣𑀸 𑀓𑀸𑀬-𑀯𑀸𑀘𑀸𑀘𑀺𑀢𑁆𑀢𑀢𑁆𑀢𑀬𑀸𑀧𑀺 𑀘.

𑀅𑀤𑀺𑀦𑁆𑀦𑀜𑁆𑀳𑀺 𑀫𑀼𑀔𑀤𑁆𑀯𑀸𑀭𑀁, 𑀆𑀳𑀸𑀭𑀁 𑀆𑀳𑀭𑁂𑀬𑁆𑀬 𑀬𑁄;

𑀤𑀦𑁆𑀢𑀧𑁄𑀦𑁄𑀤𑀓𑀁 𑀳𑀺𑀢𑁆𑀯𑀸, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀳𑀢𑁆𑀣𑀧𑀸𑀲𑁄𑀪𑀺𑀦𑀻𑀳𑀸𑀭𑁄, 𑀫𑀚𑁆𑀛𑀺𑀫𑀼𑀘𑁆𑀘𑀸𑀭𑀡𑀓𑁆𑀔𑀫𑁄;

𑀫𑀦𑀼𑀲𑁆𑀲𑁄 𑀯𑀸𑀫𑀦𑀼𑀲𑁆𑀲𑁄 𑀯𑀸, 𑀤𑁂𑀢𑀺 𑀓𑀸𑀬𑀸𑀤𑀺𑀦𑀸 𑀢𑀺𑀥𑀸.

𑀧𑀝𑀺𑀕𑁆𑀕𑀡𑁆𑀳𑀸𑀢𑀺 ¶ 𑀢𑀁 𑀪𑀺𑀓𑁆𑀔𑀼, 𑀤𑀻𑀬𑀫𑀸𑀦𑀁 𑀲𑀘𑁂 𑀤𑁆𑀯𑀺𑀥𑀸;

𑀏𑀯𑀁 𑀧𑀜𑁆𑀘𑀗𑁆𑀕𑀲𑀁𑀬𑁄𑀕𑁂, 𑀕𑀳𑀡𑀁 𑀢𑀲𑁆𑀲 𑀭𑀽𑀳𑀢𑀺.

𑀤𑀸𑀬𑀓𑁄 𑀕𑀕𑀦𑀝𑁆𑀞𑁄 𑀘𑁂, 𑀪𑀽𑀫𑀝𑁆𑀞𑁄 𑀘𑁂𑀢𑀭𑁄 𑀲𑀺𑀬𑀸;

𑀪𑀽𑀫𑀝𑁆𑀞𑀲𑁆𑀲 𑀘 𑀲𑀻𑀲𑁂𑀦, 𑀕𑀕𑀦𑀝𑁆𑀞𑀲𑁆𑀲 𑀤𑁂𑀳𑀺𑀦𑁄.

𑀬𑀫𑀸𑀲𑀦𑁆𑀦𑀢𑀭𑀁 𑀅𑀗𑁆𑀕𑀁, 𑀑𑀭𑀺𑀫𑀦𑁆𑀢𑁂𑀦 𑀢𑀲𑁆𑀲 𑀢𑀼;

𑀤𑀸𑀢𑀼𑀁 𑀯𑀸𑀧𑀺 𑀕𑀳𑁂𑀢𑀼𑀁 𑀯𑀸, 𑀯𑀺𑀦𑀸 𑀳𑀢𑁆𑀣𑀁 𑀧𑀲𑀸𑀭𑀺𑀢𑀁.

𑀳𑀢𑁆𑀣𑀧𑀸𑀲𑁄 𑀫𑀺𑀦𑁂𑀢𑀩𑁆𑀩𑁄, 𑀦𑀕𑀝𑁆𑀞𑀸𑀤𑀻𑀲𑁆𑀯𑀬𑀁 𑀦𑀬𑁄;

𑀏𑀯𑀭𑀽𑀧𑁂 𑀧𑀦 𑀞𑀸𑀦𑁂, 𑀞𑀢𑁆𑀯𑀸 𑀘𑁂 𑀤𑁂𑀢𑀺 𑀯𑀝𑁆𑀝𑀢𑀺.

𑀧𑀓𑁆𑀔𑀻 ¶ 𑀯𑀸 𑀫𑀼𑀔𑀢𑀼𑀡𑁆𑀟𑁂𑀦, 𑀳𑀢𑁆𑀣𑀻 𑀲𑁄𑀡𑁆𑀟𑀸𑀬 𑀯𑀸 𑀧𑀦;

𑀲𑀘𑁂 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀯𑀸, 𑀨𑀮𑀁 𑀯𑀸 𑀤𑁂𑀢𑀺 𑀯𑀝𑁆𑀝𑀢𑀺.

𑀪𑀢𑁆𑀢𑀩𑁆𑀬𑀜𑁆𑀚𑀦𑀧𑀼𑀡𑁆𑀡𑀸𑀦𑀺, 𑀪𑀸𑀚𑀦𑀸𑀦𑀺 𑀩𑀳𑀽𑀦𑀺𑀧𑀺;

𑀲𑀻𑀲𑁂𑀦𑀸𑀤𑀸𑀬 𑀪𑀺𑀓𑁆𑀔𑀼𑀲𑁆𑀲, 𑀕𑀦𑁆𑀢𑁆𑀯𑀸 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑀁.

𑀈𑀲𑀓𑀁 𑀧𑀦 𑀑𑀦𑀢𑁆𑀯𑀸, ‘‘𑀕𑀡𑁆𑀳𑀸’’𑀢𑀺 𑀬𑀤𑀺 𑀪𑀸𑀲𑀢𑀺;

𑀢𑁂𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸, 𑀳𑁂𑀝𑁆𑀞𑀺𑀫𑀁 𑀧𑀦 𑀪𑀸𑀚𑀦𑀁.

𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀢𑀁 𑀏𑀓- 𑀤𑁂𑀲𑁂𑀦𑀸𑀧𑀺 𑀘 𑀪𑀺𑀓𑁆𑀔𑀼𑀦𑀸;

𑀳𑁄𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀢𑀸𑀦𑀺, 𑀕𑀳𑀺𑀢𑀸𑀦𑁂𑀯 𑀲𑀩𑁆𑀩𑀲𑁄.

𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀲𑀩𑁆𑀩𑀁, 𑀑𑀭𑁄𑀧𑁂𑀢𑁆𑀯𑀸 𑀬𑀣𑀸𑀲𑀼𑀔𑀁;

𑀉𑀕𑁆𑀖𑀸𑀝𑁂𑀢𑁆𑀯𑀸 𑀢𑀢𑁄 𑀇𑀝𑁆𑀞𑀁, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀧𑀘𑁆𑀙𑀺𑀆𑀤𑀺𑀫𑁆𑀳𑀺 𑀯𑀢𑁆𑀢𑀩𑁆𑀩-𑀫𑀢𑁆𑀣𑀺 𑀓𑀺𑀁 𑀏𑀓𑀪𑀸𑀚𑀦𑁂;

𑀓𑀸𑀚𑀪𑀢𑁆𑀢𑀁 𑀳𑀭𑀦𑁆𑀢𑁄 𑀘𑁂, 𑀑𑀦𑀢𑁆𑀯𑀸 𑀤𑁂𑀢𑀺 𑀯𑀝𑁆𑀝𑀢𑀺.

𑀢𑀺𑀁𑀲𑀳𑀢𑁆𑀣𑁄 𑀲𑀺𑀬𑀸 𑀯𑁂𑀴𑀼, 𑀅𑀦𑁆𑀢𑁂𑀲𑀼 𑀘 𑀤𑀼𑀯𑁂 𑀖𑀝𑀸;

𑀲𑀧𑁆𑀧𑀺𑀦𑁄, 𑀕𑀳𑀺𑀢𑁂𑀓𑀲𑁆𑀫𑀺𑀁, 𑀲𑀩𑁆𑀩𑀁 𑀕𑀳𑀺𑀢𑀫𑁂𑀯 𑀢𑀁.

𑀩𑀳𑀼𑀧𑀢𑁆𑀢𑀸 𑀘 𑀫𑀜𑁆𑀘𑁂 𑀯𑀸, 𑀧𑀻𑀞𑁂 𑀯𑀸 𑀓𑀝𑀲𑀸𑀭𑀓𑁂;

𑀞𑀧𑀺𑀢𑀸 𑀤𑀸𑀬𑀓𑁄 𑀳𑀢𑁆𑀣-𑀧𑀸𑀲𑁂 𑀞𑀢𑁆𑀯𑀸𑀦 𑀤𑁂𑀢𑀺 𑀘𑁂.

𑀧𑀝𑀺𑀕𑁆𑀕𑀳𑀡𑀲𑀜𑁆𑀜𑀸𑀬, 𑀫𑀜𑁆𑀘𑀸𑀤𑀻𑀦𑀺 𑀲𑀘𑁂 𑀧𑀦;

𑀦𑀺𑀲𑀻𑀤𑀢𑀺 𑀨𑀼𑀲𑀺𑀢𑁆𑀯𑀸 𑀬𑁄, 𑀬𑀜𑁆𑀘 𑀧𑀢𑁆𑀢𑁂𑀲𑀼 𑀤𑀻𑀬𑀢𑀺.

𑀕𑀳𑀺𑀢𑀁 ¶ 𑀢𑁂𑀦 𑀢𑀁 𑀲𑀩𑁆𑀩𑀁, 𑀳𑁄𑀢𑀺𑀬𑁂𑀯 𑀦 𑀲𑀁𑀲𑀬𑁄;

𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺𑀘𑁆𑀘𑁂𑀯, 𑀫𑀜𑁆𑀘𑀸𑀤𑀻𑀦𑀺 𑀲𑀘𑁂 𑀧𑀦.

𑀕𑀳𑀺𑀢𑀁 𑀳𑁄𑀢𑀺 𑀢𑀁 𑀲𑀩𑁆𑀩𑀁, 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺;

𑀆𑀳𑀘𑁆𑀘 𑀓𑀼𑀘𑁆𑀙𑀺𑀬𑀸 𑀓𑀼𑀘𑁆𑀙𑀺𑀁, 𑀞𑀺𑀢𑀸 𑀧𑀢𑁆𑀢𑀸 𑀳𑀺 𑀪𑀽𑀫𑀺𑀬𑀁.

𑀬𑀁 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀯𑀸𑀧𑀺, 𑀨𑀼𑀲𑀺𑀢𑁆𑀯𑀸 𑀲𑀽𑀘𑀺𑀬𑀸𑀧𑀺 𑀯𑀸;

𑀦𑀺𑀲𑀺𑀦𑁆𑀦𑁄 𑀢𑀢𑁆𑀣 𑀢𑀢𑁆𑀣𑁂𑀯, 𑀤𑀻𑀬𑀫𑀸𑀦𑀁 𑀢𑀼 𑀯𑀝𑁆𑀝𑀢𑀺.

𑀓𑀝𑀲𑀸𑀭𑁂 𑀫𑀳𑀦𑁆𑀢𑀲𑁆𑀫𑀺𑀁, 𑀢𑀣𑀸 𑀳𑀢𑁆𑀣𑀢𑁆𑀣𑀭𑀸𑀤𑀺𑀲𑀼;

𑀕𑀡𑁆𑀳𑀢𑁄 𑀳𑀢𑁆𑀣𑀧𑀸𑀲𑀲𑁆𑀫𑀺𑀁, 𑀯𑀺𑀚𑁆𑀚𑀫𑀸𑀦𑁂 𑀢𑀼 𑀯𑀝𑁆𑀝𑀢𑀺.

𑀢𑀢𑁆𑀣𑀚𑀸𑀢𑀓𑀧𑀡𑁆𑀡𑁂𑀲𑀼, 𑀕𑀳𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀦 𑀧𑀦𑁂𑀢𑀸𑀦𑀺 𑀓𑀸𑀬𑁂𑀦, 𑀧𑀝𑀺𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺 𑀳𑀺.

𑀅𑀲𑀁𑀳𑀸𑀭𑀺𑀫𑀧𑀸𑀲𑀸𑀡𑁂 ¶ , 𑀨𑀮𑀓𑁂 𑀯𑀸𑀧𑀺 𑀢𑀸𑀤𑀺𑀲𑁂;

𑀔𑀸𑀡𑀼𑀩𑀤𑁆𑀥𑁂𑀧𑀺 𑀯𑀸 𑀫𑀜𑁆𑀘𑁂, 𑀕𑀳𑀡𑀁 𑀦𑁂𑀯 𑀭𑀽𑀳𑀢𑀺.

𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀼, 𑀪𑀽𑀫𑀺𑀬𑀁 𑀧𑀢𑁆𑀣𑀝𑁂𑀲𑀼 𑀯𑀸;

𑀥𑀸𑀭𑁂𑀢𑀼𑀫𑀲𑀫𑀢𑁆𑀣𑀢𑁆𑀢𑀸, 𑀕𑀳𑀡𑀁 𑀦 𑀘 𑀭𑀽𑀳𑀢𑀺.

𑀳𑀢𑁆𑀣𑀧𑀸𑀲𑀫𑀢𑀺𑀓𑁆𑀓𑀫𑁆𑀫, 𑀤𑀻𑀖𑀤𑀡𑁆𑀟𑁂𑀦 𑀤𑁂𑀢𑀺 𑀘𑁂;

𑀯𑀢𑁆𑀢𑀩𑁆𑀩𑁄 𑀪𑀺𑀓𑁆𑀔𑀼𑀦𑀸𑀕𑀦𑁆𑀢𑁆𑀯𑀸, 𑀤𑁂𑀳𑀻𑀢𑀺 𑀧𑀭𑀺𑀯𑁂𑀲𑀓𑁄.

𑀲𑀘𑁂 𑀧𑀢𑁆𑀢𑁂 𑀭𑀚𑁄 𑀳𑁄𑀢𑀺, 𑀥𑁄𑀯𑀺𑀢𑀩𑁆𑀩𑁄 𑀚𑀮𑁂 𑀲𑀢𑀺;

𑀢𑀲𑁆𑀫𑀺𑀁 𑀅𑀲𑀢𑀺 𑀧𑀼𑀜𑁆𑀙𑀺𑀢𑁆𑀯𑀸, 𑀕𑀳𑁂𑀢𑀩𑁆𑀩𑁄 𑀅𑀲𑁂𑀲𑀢𑁄.

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀭𑀚𑀁 𑀧𑀢𑀢𑀺 𑀘𑁂 𑀧𑀦;

𑀪𑀺𑀓𑁆𑀔𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀯, 𑀕𑀳𑁂𑀢𑀩𑁆𑀩𑀸 𑀯𑀺𑀚𑀸𑀦𑀢𑀸.

𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁂 𑀪𑀺𑀓𑁆𑀔𑀼𑀁, 𑀕𑀡𑁆𑀳𑀢𑁄 𑀧𑀦 𑀤𑀼𑀓𑁆𑀓𑀝𑀁;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸 𑀢𑀁 𑀧𑀭𑀺𑀪𑀼𑀜𑁆𑀚𑀢𑁄.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺, 𑀯𑀼𑀢𑁆𑀢𑁂 𑀢𑀁 𑀯𑀘𑀦𑀁 𑀧𑀦;

𑀅𑀲𑀼𑀢𑁆𑀯𑀸𑀦𑀸𑀤𑀺𑀬𑀺𑀢𑁆𑀯𑀸 𑀯𑀸, 𑀤𑁂𑀦𑁆𑀢𑀺 𑀘𑁂 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁.

𑀧𑀘𑁆𑀙𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀯, 𑀕𑀳𑁂𑀢𑀩𑁆𑀩𑀁 𑀯𑀺𑀚𑀸𑀦𑀢𑀸;

𑀲𑀘𑁂 𑀭𑀚𑀁 𑀦𑀺𑀧𑀸𑀢𑁂𑀢𑀺, 𑀫𑀳𑀸𑀯𑀸𑀢𑁄 𑀢𑀢𑁄 𑀢𑀢𑁄.

𑀦 ¶ 𑀲𑀓𑁆𑀓𑀸 𑀘 𑀲𑀺𑀬𑀸 𑀪𑀺𑀓𑁆𑀔𑀁, 𑀕𑀳𑁂𑀢𑀼𑀁 𑀬𑀤𑀺 𑀪𑀺𑀓𑁆𑀔𑀼𑀦𑀸;

𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑁂𑀦, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀲𑀸𑀫𑀡𑁂𑀭𑀲𑁆𑀲 𑀢𑀁 𑀤𑀢𑁆𑀯𑀸, 𑀤𑀺𑀦𑁆𑀦𑀁 𑀯𑀸 𑀢𑁂𑀦 𑀢𑀁 𑀧𑀼𑀦;

𑀢𑀲𑁆𑀲 𑀯𑀺𑀲𑁆𑀲𑀸𑀲𑀢𑁄 𑀯𑀸𑀧𑀺, 𑀪𑀼𑀜𑁆𑀚𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀸𑀘𑀸𑀭𑁂 𑀲𑀘𑁂 𑀪𑀢𑁆𑀢𑀁, 𑀲𑀭𑀚𑀁 𑀤𑁂𑀢𑀺 𑀪𑀺𑀓𑁆𑀔𑀼𑀦𑁄;

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀁 𑀢𑁆𑀯𑀁, 𑀕𑀡𑁆𑀳 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 𑀘.

𑀯𑀢𑁆𑀢𑀩𑁆𑀩𑁄 𑀲𑁄 𑀢𑀣𑀸 𑀢𑁂𑀦, 𑀓𑀢𑁆𑀢𑀩𑁆𑀩𑀜𑁆𑀘𑁂𑀯 𑀪𑀺𑀓𑁆𑀔𑀼𑀦𑀸;

𑀭𑀚𑀁 𑀉𑀧𑀭𑀺 𑀪𑀢𑁆𑀢𑀲𑁆𑀲, 𑀢𑀲𑁆𑀲𑀼𑀧𑁆𑀮𑀯𑀢𑀺 𑀘𑁂 𑀧𑀦.

𑀓𑀜𑁆𑀚𑀺𑀓𑀁 𑀢𑀼 𑀧𑀯𑀸𑀳𑁂𑀢𑁆𑀯𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁;

𑀅𑀦𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀯𑀺𑀝𑁆𑀞𑀁 𑀢𑀼 𑀲𑀘𑁂 𑀧𑀦.

𑀧𑀢𑀺𑀢𑀁 𑀲𑀼𑀓𑁆𑀔𑀪𑀢𑁆𑀢𑁂 𑀘𑁂, 𑀅𑀧𑀦𑀻𑀬𑀸𑀯 𑀢𑀁 𑀭𑀚𑀁;

𑀲𑀼𑀔𑀼𑀫𑀁 𑀘𑁂 𑀲𑀪𑀢𑁆𑀢𑀫𑁆𑀧𑀺, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑀉𑀴𑀼𑀗𑁆𑀓𑁂𑀦𑀸𑀳𑀭𑀺𑀢𑁆𑀯𑀸𑀧𑀺 ¶ , 𑀤𑁂𑀦𑁆𑀢𑀲𑁆𑀲 𑀧𑀞𑀫𑀁 𑀧𑀦;

𑀣𑁂𑀯𑁄 𑀉𑀴𑀼𑀗𑁆𑀓𑀢𑁄 𑀧𑀢𑁆𑀢𑁂, 𑀲𑀘𑁂 𑀧𑀢𑀢𑀺 𑀯𑀝𑁆𑀝𑀢𑀺.

𑀪𑀢𑁆𑀢𑁂 𑀆𑀓𑀺𑀭𑀫𑀸𑀦𑁂 𑀢𑀼, 𑀘𑀭𑀼𑀓𑁂𑀦 𑀢𑀢𑁄 𑀧𑀦;

𑀫𑀲𑀺 𑀯𑀸 𑀙𑀸𑀭𑀺𑀓𑀸 𑀯𑀸𑀧𑀺, 𑀲𑀘𑁂 𑀧𑀢𑀢𑀺 𑀪𑀸𑀚𑀦𑁂.

𑀢𑀲𑁆𑀲 𑀘𑀸𑀪𑀺𑀳𑀝𑀢𑁆𑀢𑀸𑀧𑀺, 𑀦 𑀤𑁄𑀲𑁄 𑀉𑀧𑀮𑀩𑁆𑀪𑀢𑀺;

𑀅𑀦𑀦𑁆𑀢𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀤𑀻𑀬𑀫𑀸𑀦𑀁 𑀢𑀼 𑀧𑀢𑁆𑀢𑀢𑁄.

𑀉𑀧𑁆𑀧𑀪𑀺𑀢𑁆𑀯𑀸 𑀲𑀘𑁂 𑀧𑀢𑁆𑀢𑁂, 𑀇𑀢𑀭𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄;

𑀧𑀢𑀢𑀺 𑀯𑀝𑁆𑀝𑀢𑁂𑀯𑀸𑀬𑀁, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀢𑀁.

𑀧𑀸𑀬𑀸𑀲𑀲𑁆𑀲 𑀘 𑀧𑀽𑀭𑁂𑀢𑁆𑀯𑀸, 𑀧𑀢𑁆𑀢𑀁 𑀘𑁂 𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀦𑁄;

𑀉𑀡𑁆𑀳𑀢𑁆𑀢𑀸 𑀧𑀦 𑀢𑀁 𑀳𑁂𑀝𑁆𑀞𑀸, 𑀕𑀳𑁂𑀢𑀼𑀁 𑀦 𑀘 𑀲𑀓𑁆𑀓𑀢𑀺.

𑀯𑀝𑁆𑀝𑀢𑀻𑀢𑀺 𑀘 𑀦𑀺𑀤𑁆𑀤𑀺𑀝𑁆𑀞𑀁, 𑀕𑀳𑁂𑀢𑀼𑀁 𑀫𑀼𑀔𑀯𑀝𑁆𑀝𑀺𑀬𑀁;

𑀦 𑀲𑀓𑁆𑀓𑀸 𑀘𑁂 𑀕𑀳𑁂𑀢𑀩𑁆𑀩𑁄, 𑀢𑀣𑀸 𑀆𑀥𑀸𑀭𑀓𑁂𑀦𑀧𑀺.

𑀲𑀘𑁂 ¶ 𑀆𑀲𑀦𑀲𑀸𑀮𑀸𑀬𑀁, 𑀕𑀳𑁂𑀢𑁆𑀯𑀸 𑀧𑀢𑁆𑀢𑀫𑀢𑁆𑀢𑀦𑁄;

𑀦𑀺𑀤𑁆𑀤𑀸𑀬𑀢𑀺 𑀦𑀺𑀲𑀺𑀦𑁆𑀦𑁄𑀯, 𑀤𑀻𑀬𑀫𑀸𑀦𑀁 𑀦 𑀚𑀸𑀦𑀢𑀺.

𑀦𑁂𑀯𑀸𑀳𑀭𑀺𑀬𑀫𑀸𑀦𑀁 𑀯𑀸, 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀢𑀁;

𑀆𑀪𑁄𑀕𑀁 𑀧𑀦 𑀓𑀢𑁆𑀯𑀸 𑀘𑁂, 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀯𑀝𑁆𑀝𑀢𑀺.

𑀲𑀘𑁂 𑀳𑀢𑁆𑀣𑁂𑀦 𑀫𑀼𑀜𑁆𑀘𑀺𑀢𑁆𑀯𑀸, 𑀧𑀢𑁆𑀢𑀁 𑀆𑀥𑀸𑀭𑀓𑀫𑁆𑀧𑀺 𑀯𑀸;

𑀧𑁂𑀮𑁆𑀮𑁂𑀢𑁆𑀯𑀸 𑀧𑀦 𑀧𑀸𑀤𑁂𑀦, 𑀦𑀺𑀤𑁆𑀤𑀸𑀬𑀢𑀺 𑀳𑀺 𑀯𑀝𑁆𑀝𑀢𑀺.

𑀧𑀸𑀤𑁂𑀦𑀸𑀥𑀸𑀭𑀓𑀁 𑀅𑀓𑁆𑀓-𑀫𑀺𑀢𑁆𑀯𑀸𑀧𑀺 𑀧𑀝𑀺𑀕𑀡𑁆𑀳𑀢𑁄;

𑀚𑀸𑀕𑀭𑀲𑁆𑀲𑀸𑀧𑀺 𑀳𑁄𑀢𑁂𑀯, 𑀕𑀳𑀡𑀲𑁆𑀫𑀺𑀁 𑀅𑀦𑀸𑀤𑀭𑁄.

𑀢𑀲𑁆𑀫𑀸 𑀢𑀁 𑀦 𑀘 𑀓𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸;

𑀬𑀁 𑀤𑀻𑀬𑀫𑀸𑀦𑀁 𑀧𑀢𑀢𑀺, 𑀕𑀳𑁂𑀢𑀼𑀁 𑀢𑀁 𑀢𑀼 𑀯𑀝𑁆𑀝𑀢𑀺.

𑀪𑀼𑀜𑁆𑀚𑀦𑁆𑀢𑀸𑀦𑀜𑁆𑀘 𑀤𑀦𑁆𑀢𑀸 𑀯𑀸, 𑀔𑀻𑀬𑀦𑁆𑀢𑀺𑀧𑀺 𑀦𑀔𑀸𑀧𑀺 𑀯𑀸;

𑀢𑀣𑀸 𑀧𑀢𑁆𑀢𑀲𑁆𑀲 𑀯𑀡𑁆𑀡𑁄 𑀯𑀸, 𑀅𑀩𑁆𑀩𑁄𑀳𑀸𑀭𑀦𑀬𑁄 𑀅𑀬𑀁.

𑀲𑀢𑁆𑀣𑀓𑁂𑀦𑀼𑀘𑁆𑀙𑀼𑀆𑀤𑀻𑀦𑀺, 𑀨𑀸𑀮𑁂𑀦𑁆𑀢𑀸𑀦𑀁 𑀲𑀘𑁂 𑀫𑀮𑀁;

𑀧𑀜𑁆𑀜𑀸𑀬𑀢𑀺 𑀳𑀺 𑀢𑀁 𑀢𑁂𑀲𑀼, 𑀲𑀺𑀬𑀸 𑀦𑀯𑀲𑀫𑀼𑀝𑁆𑀞𑀺𑀢𑀁.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀧𑀘𑁆𑀙𑀸, 𑀔𑀸𑀤𑀺𑀢𑀩𑁆𑀩𑀁 𑀢𑀼 𑀪𑀺𑀓𑁆𑀔𑀼𑀦𑀸;

𑀦 𑀧𑀜𑁆𑀜𑀸𑀬𑀢𑀺 𑀘𑁂 𑀢𑀲𑁆𑀫𑀺𑀁, 𑀫𑀮𑀁 𑀯𑀝𑁆𑀝𑀢𑀺 𑀔𑀸𑀤𑀺𑀢𑀼𑀁.

𑀧𑀺𑀲𑀦𑁆𑀢𑀸𑀦𑀫𑁆𑀧𑀺 ¶ 𑀪𑁂𑀲𑀚𑁆𑀚𑀁, 𑀓𑁄𑀝𑁆𑀝𑁂𑀦𑁆𑀢𑀸𑀦𑀫𑁆𑀧𑀺 𑀯𑀸 𑀢𑀣𑀸;

𑀦𑀺𑀲𑀤𑁄𑀤𑀼𑀓𑁆𑀔𑀮𑀸𑀤𑀻𑀦𑀁, 𑀔𑀻𑀬𑀦𑁂𑀧𑀺 𑀅𑀬𑀁 𑀦𑀬𑁄.

𑀪𑁂𑀲𑀚𑁆𑀚𑀢𑁆𑀣𑀸𑀬 𑀢𑀸𑀧𑁂𑀢𑁆𑀯𑀸, 𑀯𑀸𑀲𑀺𑀁 𑀔𑀻𑀭𑁂 𑀔𑀺𑀧𑀦𑁆𑀢𑀺 𑀘𑁂;

𑀉𑀝𑁆𑀞𑁂𑀢𑀺 𑀦𑀻𑀮𑀺𑀓𑀸 𑀢𑀢𑁆𑀣, 𑀲𑀢𑁆𑀣𑀓𑁂 𑀯𑀺𑀬 𑀦𑀺𑀘𑁆𑀙𑀬𑁄.

𑀲𑀘𑁂 𑀆𑀫𑀓𑀢𑀓𑁆𑀓𑁂 𑀯𑀸, 𑀔𑀻𑀭𑁂 𑀯𑀸 𑀧𑀓𑁆𑀔𑀺𑀧𑀦𑁆𑀢𑀺 𑀢𑀁;

𑀲𑀸𑀫𑀧𑀸𑀓𑀦𑀺𑀫𑀺𑀢𑁆𑀢𑀫𑁆𑀳𑀸, 𑀦 𑀢𑀼 𑀫𑀼𑀘𑁆𑀘𑀢𑀺 𑀤𑀼𑀓𑁆𑀓𑀝𑀸.

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀯𑀲𑁆𑀲𑀓𑀸𑀮𑁂𑀲𑀼 𑀪𑀺𑀓𑁆𑀔𑀼𑀦𑁄;

𑀧𑀢𑁆𑀢𑁂 𑀧𑀢𑀢𑀺 𑀘𑁂 𑀢𑁄𑀬𑀁, 𑀓𑀺𑀮𑀺𑀝𑁆𑀞𑀁 𑀓𑀸𑀬𑀯𑀢𑁆𑀣𑀢𑁄.

𑀧𑀘𑁆𑀙𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀁, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁;

𑀏𑀲𑁂𑀯 𑀘 𑀦𑀬𑁄 𑀯𑀼𑀢𑁆𑀢𑁄, 𑀭𑀼𑀓𑁆𑀔𑀫𑀽𑀮𑁂𑀧𑀺 𑀪𑀼𑀜𑁆𑀚𑀢𑁄.

𑀲𑀢𑁆𑀢𑀸𑀳𑀁 ¶ 𑀧𑀦 𑀯𑀲𑁆𑀲𑀦𑁆𑀢𑁂, 𑀤𑁂𑀯𑁂 𑀲𑀼𑀤𑁆𑀥𑀁 𑀚𑀮𑀁 𑀲𑀘𑁂;

𑀅𑀩𑁆𑀪𑁄𑀓𑀸𑀲𑁂𑀧𑀺 𑀯𑀸 𑀧𑀢𑁆𑀢𑁂, 𑀢𑁄𑀬𑀁 𑀧𑀢𑀢𑀺 𑀯𑀝𑁆𑀝𑀢𑀺.

𑀑𑀤𑀦𑀁 𑀧𑀦 𑀤𑁂𑀦𑁆𑀢𑁂𑀦, 𑀲𑀸𑀫𑀡𑁂𑀭𑀲𑁆𑀲 𑀪𑀺𑀓𑁆𑀔𑀼𑀦𑀸;

𑀤𑀸𑀢𑀩𑁆𑀩𑁄 𑀅𑀘𑁆𑀙𑀼𑀧𑀦𑁆𑀢𑁂𑀦, 𑀢𑀲𑁆𑀲 𑀧𑀢𑁆𑀢𑀕𑀢𑁄𑀤𑀦𑀁.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀧𑀢𑁆𑀢𑀁, 𑀤𑀸𑀢𑀩𑁆𑀩𑁄 𑀢𑀲𑁆𑀲 𑀑𑀤𑀦𑁄;

𑀙𑀼𑀧𑀺𑀢𑁆𑀯𑀸 𑀤𑁂𑀢𑀺 𑀘𑁂 𑀪𑀢𑁆𑀢𑀁, 𑀢𑀁 𑀧𑀦𑀼𑀕𑁆𑀕𑀳𑀺𑀢𑀁 𑀲𑀺𑀬𑀸.

𑀅𑀜𑁆𑀜𑀲𑁆𑀲 𑀤𑀸𑀢𑀼𑀓𑀸𑀫𑁂𑀦, 𑀧𑀭𑀺𑀘𑁆𑀘𑀢𑁆𑀢𑀁 𑀲𑀘𑁂 𑀧𑀦;

𑀬𑀸𑀯 𑀳𑀢𑁆𑀣𑀕𑀢𑀁 𑀢𑀸𑀯, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀢𑀁.

‘‘𑀕𑀡𑁆𑀳𑀸’’𑀢𑀺 𑀦𑀺𑀭𑀧𑁂𑀓𑁆𑀔𑁄𑀯, 𑀧𑀢𑁆𑀢𑀫𑀸𑀥𑀸𑀭𑀓𑁂 𑀞𑀺𑀢𑀁;

𑀲𑀘𑁂 𑀯𑀤𑀢𑀺 𑀧𑀘𑁆𑀙𑀸 𑀢𑀁, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀧𑀡𑁆𑀟𑀺𑀢𑁄.

𑀲𑀸𑀧𑁂𑀓𑁆𑀔𑁄𑀬𑁂𑀯 𑀬𑁄 𑀧𑀢𑁆𑀢𑀁, 𑀞𑀧𑁂𑀢𑁆𑀯𑀸𑀥𑀸𑀭𑀓𑁂 𑀧𑀦;

‘‘𑀏𑀢𑁆𑀢𑁄 𑀧𑀽𑀯𑀫𑁆𑀧𑀺 𑀪𑀢𑁆𑀢𑀁 𑀯𑀸, 𑀓𑀺𑀜𑁆𑀘𑀺 𑀕𑀡𑁆𑀳𑀸’’𑀢𑀺 𑀪𑀸𑀲𑀢𑀺.

𑀲𑀸𑀫𑀡𑁂𑀭𑁄𑀧𑀺 𑀢𑀁 𑀪𑀢𑁆𑀢𑀁, 𑀥𑁄𑀯𑀺𑀢𑁆𑀯𑀸 𑀳𑀢𑁆𑀣𑀫𑀢𑁆𑀢𑀦𑁄;

𑀅𑀢𑁆𑀢𑀧𑀢𑁆𑀢𑀕𑀢𑀁 𑀪𑀢𑁆𑀢𑀁, 𑀅𑀨𑀼𑀲𑀺𑀢𑁆𑀯𑀸 𑀲𑀘𑁂 𑀧𑀦.

𑀧𑀓𑁆𑀔𑀺𑀧𑀦𑁆𑀢𑁄 𑀲𑀢𑀓𑁆𑀔𑀢𑁆𑀢𑀼𑀁, 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀕𑀡𑁆𑀳𑀢𑀼;

𑀢𑀁𑀧𑀝𑀺𑀕𑁆𑀕𑀳𑀡𑁂 𑀓𑀺𑀘𑁆𑀘𑀁, 𑀧𑀼𑀦 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀅𑀢𑁆𑀢𑀧𑀢𑁆𑀢𑀕𑀢𑀁 𑀪𑀢𑁆𑀢𑀁, 𑀨𑀼𑀲𑀺𑀢𑁆𑀯𑀸 𑀬𑀤𑀺 𑀕𑀡𑁆𑀳𑀢𑀺;

𑀧𑀘𑁆𑀙𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀲𑀁𑀲𑀝𑁆𑀞𑀢𑁆𑀢𑀸 𑀧𑀭𑁂𑀦 𑀢𑀁.

𑀪𑀺𑀓𑁆𑀔𑀽𑀦𑀁 ¶ 𑀬𑀸𑀕𑀼𑀆𑀤𑀻𑀦𑀁, 𑀧𑀘𑀦𑁂 𑀪𑀸𑀚𑀦𑁂 𑀧𑀦;

𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑁂𑀦, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀑𑀤𑀦𑀁.

𑀪𑀸𑀚𑀦𑀼𑀧𑀭𑀺 𑀳𑀢𑁆𑀣𑁂𑀲𑀼, 𑀲𑀸𑀫𑀡𑁂𑀭𑀲𑁆𑀲 𑀧𑀓𑁆𑀔𑀺𑀧𑁂;

𑀧𑀢𑀺𑀢𑀁 𑀳𑀢𑁆𑀣𑀢𑁄 𑀢𑀲𑁆𑀫𑀺𑀁, 𑀦 𑀓𑀭𑁄𑀢𑀺 𑀅𑀓𑀧𑁆𑀧𑀺𑀬𑀁.

𑀧𑀭𑀺𑀘𑁆𑀘𑀢𑁆𑀢𑀜𑁆𑀳𑀺 𑀢𑀁 𑀏𑀯𑀁, 𑀅𑀓𑀢𑁆𑀯𑀸𑀓𑀺𑀭𑀢𑁂𑀯 𑀘𑁂;

𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀼 𑀢𑀁 𑀓𑀢𑁆𑀯𑀸, 𑀧𑀢𑁆𑀢𑀁 𑀯𑀺𑀬 𑀦𑀺𑀭𑀸𑀫𑀺𑀲𑀁.

𑀲𑀘𑁂 𑀬𑀸𑀕𑀼𑀓𑀼𑀝𑀁 𑀧𑀼𑀡𑁆𑀡𑀁, 𑀲𑀸𑀫𑀡𑁂𑀭𑁄 𑀳𑀺 𑀤𑀼𑀩𑁆𑀩𑀮𑁄;

𑀪𑀺𑀓𑁆𑀔𑀼𑀁 𑀧𑀝𑀺𑀕𑁆𑀕𑀳𑀸𑀧𑁂𑀢𑀼𑀁, 𑀦 𑀲𑀓𑁆𑀓𑁄𑀢𑀺 𑀳𑀺 𑀢𑀁 𑀧𑀼𑀦.

𑀓𑀼𑀝𑀲𑁆𑀲 ¶ 𑀕𑀻𑀯𑀁 𑀧𑀢𑁆𑀢𑀲𑁆𑀲, 𑀞𑀧𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀁;

𑀪𑀺𑀓𑁆𑀔𑀼𑀦𑀸 𑀉𑀧𑀦𑀻𑀢𑀲𑁆𑀲, 𑀆𑀯𑀚𑁆𑀚𑁂𑀢𑀺 𑀳𑀺 𑀯𑀝𑁆𑀝𑀢𑀺.

𑀅𑀣 𑀯𑀸 𑀪𑀽𑀫𑀺𑀬𑀁𑀬𑁂𑀯, 𑀳𑀢𑁆𑀣𑁂 𑀪𑀺𑀓𑁆𑀔𑀼 𑀞𑀧𑁂𑀢𑀺 𑀘𑁂;

𑀆𑀭𑁄𑀧𑁂𑀢𑀺 𑀧𑀯𑀝𑁆𑀝𑁂𑀢𑁆𑀯𑀸, 𑀢𑀢𑁆𑀣 𑀘𑁂 𑀧𑀦 𑀯𑀝𑁆𑀝𑀢𑀺.

𑀪𑀢𑁆𑀢𑀧𑀘𑁆𑀙𑀼𑀘𑁆𑀙𑀼𑀪𑀸𑀭𑁂𑀲𑀼, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄;

𑀤𑁆𑀯𑁂 𑀢𑀬𑁄 𑀲𑀸𑀫𑀡𑁂𑀭𑀸 𑀯𑀸, 𑀤𑁂𑀦𑁆𑀢𑀺 𑀘𑁂 𑀕𑀳𑀡𑀽𑀧𑀕𑀁.

𑀪𑀸𑀭𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀕𑀳𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺;

𑀏𑀓𑁂𑀦 𑀯𑀸 𑀢𑀣𑀸 𑀤𑀺𑀦𑁆𑀦𑀁, 𑀕𑀡𑁆𑀳𑀦𑁆𑀢𑀺 𑀤𑁆𑀯𑁂 𑀢𑀬𑁄𑀧𑀺 𑀯𑀸.

𑀫𑀜𑁆𑀘𑀲𑁆𑀲 𑀧𑀸𑀤𑁂 𑀧𑀻𑀞𑀲𑁆𑀲, 𑀧𑀸𑀤𑁂 𑀢𑁂𑀮𑀖𑀝𑀸𑀤𑀺𑀓𑀁;

𑀮𑀕𑁆𑀕𑁂𑀦𑁆𑀢𑀺 𑀢𑀢𑁆𑀣 𑀪𑀺𑀓𑁆𑀔𑀼𑀲𑁆𑀲, 𑀯𑀝𑁆𑀝𑀢𑁂𑀯 𑀦𑀺𑀲𑀻𑀤𑀺𑀢𑀼𑀁.

𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀳𑁂𑀝𑁆𑀞𑀸-𑀫𑀜𑁆𑀘𑁂 𑀘𑁂 𑀢𑁂𑀮𑀣𑀸𑀮𑀓𑀁;

𑀲𑀫𑁆𑀫𑀼𑀚𑁆𑀚𑀦𑁆𑀢𑁄 𑀘 𑀖𑀝𑁆𑀝𑁂𑀢𑀺, 𑀦 𑀧𑀦𑀼𑀕𑁆𑀕𑀳𑀺𑀢𑀁 𑀲𑀺𑀬𑀸.

𑀧𑀝𑀺𑀕𑁆𑀕𑀳𑀺𑀢𑀲𑀜𑁆𑀜𑀸𑀬, 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀧𑀦;

𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑀁 𑀜𑀢𑁆𑀯𑀸, 𑀞𑀧𑁂𑀢𑀼𑀁 𑀢𑀢𑁆𑀣 𑀯𑀝𑁆𑀝𑀢𑀺.

𑀯𑀺𑀯𑀭𑀺𑀢𑁆𑀯𑀸 𑀲𑀘𑁂 𑀧𑀼𑀩𑁆𑀩𑁂, 𑀞𑀧𑀺𑀢𑀁 𑀧𑀺𑀳𑀺𑀢𑀫𑁆𑀧𑀺 𑀘;

𑀢𑀣𑁂𑀯 𑀢𑀁 𑀞𑀧𑁂𑀢𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀦 𑀧𑀦𑀜𑁆𑀜𑀣𑀸.

𑀩𑀳𑀺 𑀞𑀧𑁂𑀢𑀺 𑀘𑁂 𑀢𑁂𑀦, 𑀙𑀼𑀧𑀺𑀢𑀩𑁆𑀩𑀁 𑀦 𑀢𑀁 𑀧𑀼𑀦;

𑀬𑀤𑀺 𑀙𑀼𑀧𑀢𑀺 𑀘𑁂 𑀜𑀢𑁆𑀯𑀸, 𑀢𑀁 𑀧𑀦𑀼𑀕𑁆𑀕𑀳𑀺𑀢𑀁 𑀲𑀺𑀬𑀸.

𑀧𑀝𑀺𑀕𑁆𑀕𑀳𑀺𑀢𑀢𑁂𑀮𑀲𑁆𑀫𑀺𑀁, 𑀉𑀝𑁆𑀞𑁂𑀢𑀺 𑀬𑀤𑀺 𑀓𑀡𑁆𑀡𑀓𑀸;

𑀲𑀺𑀗𑁆𑀕𑀻𑀯𑁂𑀭𑀸𑀤𑀺𑀓𑁂 𑀫𑀽𑀮𑁂, 𑀖𑀦𑀘𑀼𑀡𑁆𑀡𑀫𑁆𑀧𑀺 𑀯𑀸 𑀢𑀣𑀸.

𑀢𑀁𑀲𑀫𑀼𑀝𑁆𑀞𑀸𑀦𑀢𑁄 ¶ 𑀲𑀩𑁆𑀩𑀁, 𑀢𑀜𑁆𑀜𑁂𑀯𑀸𑀢𑀺 𑀧𑀯𑀼𑀘𑁆𑀘𑀢𑀺;

𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀢𑀼, 𑀢𑀲𑁆𑀫𑀺𑀁 𑀧𑀼𑀦 𑀦 𑀯𑀺𑀚𑁆𑀚𑀢𑀺.

𑀢𑀸𑀮𑀁 𑀯𑀸 𑀦𑀸𑀴𑀺𑀓𑁂𑀭𑀁 𑀯𑀸, 𑀆𑀭𑀼𑀴𑁆𑀳𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄;

𑀢𑀢𑁆𑀭𑀝𑁆𑀞𑁄 𑀢𑀸𑀮𑀧𑀺𑀡𑁆𑀟𑀺𑀁 𑀲𑁄, 𑀑𑀢𑀸𑀭𑁂𑀢𑁆𑀯𑀸𑀦 𑀭𑀚𑁆𑀚𑀼𑀬𑀸.

𑀲𑀘𑁂 ¶ 𑀯𑀤𑀢𑀺 ‘‘𑀕𑀡𑁆𑀳𑀸’’𑀢𑀺, 𑀦 𑀕𑀳𑁂𑀢𑀩𑁆𑀩𑀫𑁂𑀯 𑀘;

𑀢𑀫𑀜𑁆𑀜𑁄 𑀧𑀦 𑀪𑀽𑀫𑀝𑁆𑀞𑁄, 𑀕𑀳𑁂𑀢𑁆𑀯𑀸 𑀤𑁂𑀢𑀺 𑀯𑀝𑁆𑀝𑀢𑀺.

𑀙𑀺𑀦𑁆𑀤𑀺𑀢𑁆𑀯𑀸 𑀘𑁂 𑀯𑀢𑀺𑀁 𑀉𑀘𑁆𑀙𑀼𑀁, 𑀨𑀮𑀁 𑀯𑀸 𑀤𑁂𑀢𑀺 𑀕𑀡𑁆𑀳𑀺𑀢𑀼𑀁;

𑀤𑀡𑁆𑀟𑀓𑁂 𑀅𑀨𑀼𑀲𑀺𑀢𑁆𑀯𑀸𑀯, 𑀦𑀺𑀕𑁆𑀕𑀢𑀁 𑀧𑀦 𑀯𑀝𑁆𑀝𑀢𑀺.

𑀲𑀘𑁂 𑀦 𑀧𑀼𑀣𑀼𑀮𑁄 𑀳𑁄𑀢𑀺, 𑀧𑀸𑀓𑀸𑀭𑁄 𑀅𑀢𑀺𑀉𑀘𑁆𑀘𑀓𑁄;

𑀅𑀦𑁆𑀢𑁄𑀝𑁆𑀞𑀺𑀢𑀩𑀳𑀺𑀝𑁆𑀞𑀸𑀦𑀁, 𑀳𑀢𑁆𑀣𑀧𑀸𑀲𑁄 𑀧𑀳𑁄𑀢𑀺 𑀘𑁂.

𑀉𑀤𑁆𑀥𑀁 𑀳𑀢𑁆𑀣𑀲𑀢𑀁 𑀕𑀦𑁆𑀢𑁆𑀯𑀸, 𑀲𑀫𑁆𑀧𑀢𑁆𑀢𑀁 𑀧𑀼𑀦 𑀢𑀁 𑀧𑀦;

𑀕𑀡𑁆𑀳𑀢𑁄 𑀪𑀺𑀓𑁆𑀔𑀼𑀦𑁄 𑀤𑁄𑀲𑁄, 𑀓𑁄𑀘𑀺 𑀦𑁂𑀯𑀽𑀧𑀮𑀩𑁆𑀪𑀢𑀺.

𑀪𑀺𑀓𑁆𑀔𑀼𑀦𑁄 𑀲𑀸𑀫𑀡𑁂𑀭𑀁 𑀢𑀼, 𑀔𑀦𑁆𑀥𑁂𑀦 𑀯𑀳𑀢𑁄 𑀲𑀘𑁂;

𑀨𑀮𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯, 𑀦𑀺𑀲𑀺𑀦𑁆𑀦𑁄 𑀤𑁂𑀢𑀺 𑀯𑀝𑁆𑀝𑀢𑀺.

𑀅𑀧𑀭𑁄𑀧𑀺 𑀯𑀳𑀦𑁆𑀢𑁄𑀯, 𑀪𑀺𑀓𑁆𑀔𑀼𑀁 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄;

𑀨𑀮𑀁 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑀲𑁆𑀲, 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀯𑀝𑁆𑀝𑀢𑀺.

𑀕𑀳𑁂𑀢𑁆𑀯𑀸 𑀨𑀮𑀺𑀦𑀺𑀁 𑀲𑀸𑀔𑀁, 𑀙𑀸𑀬𑀢𑁆𑀣𑀁 𑀬𑀤𑀺 𑀕𑀘𑁆𑀙𑀢𑀺;

𑀧𑀼𑀦 𑀘𑀺𑀢𑁆𑀢𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀔𑀸𑀤𑀺𑀢𑀼𑀁 𑀧𑀦 𑀪𑀺𑀓𑁆𑀔𑀼𑀦𑁄.

𑀲𑀸𑀔𑀁 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸, 𑀨𑀮𑀁 𑀔𑀸𑀤𑀢𑀺 𑀯𑀝𑁆𑀝𑀢𑀺;

𑀫𑀓𑁆𑀔𑀺𑀓𑀸𑀦𑀁 𑀦𑀺𑀯𑀸𑀭𑀢𑁆𑀣𑀁, 𑀕𑀳𑀺𑀢𑀸𑀬𑀧𑁆𑀬𑀬𑀁 𑀦𑀬𑁄.

𑀓𑀧𑁆𑀧𑀺𑀬𑀁 𑀧𑀦 𑀓𑀸𑀭𑁂𑀢𑁆𑀯𑀸, 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀢𑀁 𑀧𑀼𑀦;

𑀪𑁄𑀢𑁆𑀢𑀼𑀓𑀸𑀫𑁄 𑀲𑀘𑁂 𑀫𑀽𑀮-𑀕𑀳𑀡𑀁𑀬𑁂𑀯 𑀯𑀝𑁆𑀝𑀢𑀺.

𑀫𑀸𑀢𑀸𑀧𑀺𑀢𑀽𑀦𑀫𑀢𑁆𑀣𑀸𑀬, 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀆𑀤𑀺𑀓𑀁;

𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀬𑀁 𑀇𑀘𑁆𑀙𑀢𑀺 𑀢𑀢𑁄 𑀧𑀦.

𑀢𑀁 𑀲𑁄 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸, 𑀧𑀭𑀺𑀪𑀼𑀜𑁆𑀚𑀢𑀺 𑀯𑀝𑁆𑀝𑀢𑀺;

𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀫𑀽𑀮-𑀕𑀳𑀡𑀁𑀬𑁂𑀯 𑀯𑀝𑁆𑀝𑀢𑀺.

𑀲𑀸𑀫𑀡𑁂𑀭𑀲𑁆𑀲 𑀧𑀸𑀣𑁂𑀬𑁆𑀬-𑀢𑀡𑁆𑀟𑀼𑀮𑁂 𑀪𑀺𑀓𑁆𑀔𑀼 𑀕𑀡𑁆𑀳𑀢𑀺;

𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀡𑁂𑀭𑁄𑀧𑀺, 𑀕𑀳𑁂𑀢𑁆𑀯𑀸 𑀧𑀦 𑀕𑀘𑁆𑀙𑀢𑀺.

𑀢𑀡𑁆𑀟𑀼𑀮𑁂𑀲𑀼 ¶ 𑀳𑀺 𑀔𑀻𑀡𑁂𑀲𑀼, 𑀅𑀢𑁆𑀢𑀦𑀸 𑀕𑀳𑀺𑀢𑁂𑀲𑀼 𑀲𑁄;

𑀲𑀘𑁂 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸𑀦, 𑀢𑀡𑁆𑀟𑀼𑀮𑁂𑀳𑀺𑀢𑀭𑁂𑀳𑀺𑀧𑀺.

𑀉𑀪𑀺𑀦𑁆𑀦𑀁 ¶ 𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼, 𑀆𑀓𑀺𑀭𑀺𑀢𑁆𑀯𑀸 𑀧𑀦𑀢𑁆𑀢𑀦𑁄;

𑀬𑀸𑀕𑀼𑀁 𑀪𑀺𑀓𑁆𑀔𑀼𑀲𑁆𑀲 𑀢𑀁 𑀤𑀢𑁆𑀯𑀸, 𑀲𑀬𑀁 𑀧𑀺𑀯𑀢𑀺 𑀢𑀲𑁆𑀲 𑀘𑁂.

𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀦𑁂𑀯, 𑀦 𑀉𑀕𑁆𑀕𑀳𑀺𑀢𑀓𑀸𑀭𑀡𑀸;

𑀲𑀸𑀫𑀡𑁂𑀭𑀲𑁆𑀲 𑀧𑀻𑀢𑀢𑁆𑀢𑀸, 𑀤𑁄𑀲𑁄 𑀪𑀺𑀓𑁆𑀔𑀼𑀲𑁆𑀲 𑀯𑀺𑀚𑁆𑀚𑀢𑀺.

𑀫𑀸𑀢𑀸𑀧𑀺𑀢𑀽𑀦𑀫𑀢𑁆𑀣𑀸𑀬, 𑀢𑁂𑀮𑀸𑀤𑀺𑀁 𑀳𑀭𑀢𑁄𑀧𑀺 𑀘;

𑀲𑀸𑀔𑀁 𑀙𑀸𑀬𑀸𑀤𑀺𑀅𑀢𑁆𑀣𑀸𑀬, 𑀇𑀫𑀲𑁆𑀲 𑀦 𑀯𑀺𑀲𑁂𑀲𑀢𑀸.

𑀢𑀲𑁆𑀫𑀸 𑀳𑀺𑀲𑁆𑀲 𑀯𑀺𑀲𑁂𑀲𑀲𑁆𑀲, 𑀘𑀺𑀦𑁆𑀢𑁂𑀢𑀩𑁆𑀩𑀁 𑀢𑀼 𑀓𑀸𑀭𑀡𑀁;

𑀢𑀲𑁆𑀲 𑀲𑀸𑀮𑀬𑀪𑀸𑀯𑀁 𑀢𑀼, 𑀯𑀺𑀲𑁂𑀲𑀁 𑀢𑀓𑁆𑀓𑀬𑀸𑀫𑀳𑀁.

𑀢𑀡𑁆𑀟𑀼𑀮𑁂 𑀧𑀦 𑀥𑁄𑀯𑀺𑀢𑁆𑀯𑀸, 𑀦𑀺𑀘𑁆𑀘𑀸𑀮𑁂𑀢𑀼𑀜𑁆𑀳𑀺 𑀘𑁂𑀮𑀓𑁄;

𑀦 𑀲𑀓𑁆𑀓𑁄𑀢𑀺 𑀲𑀘𑁂 𑀢𑁂 𑀘, 𑀢𑀡𑁆𑀟𑀼𑀮𑁂 𑀪𑀸𑀚𑀦𑀫𑁆𑀧𑀺 𑀘.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸, 𑀆𑀭𑁄𑀧𑁂𑀢𑁆𑀯𑀸 𑀧𑀦𑀼𑀤𑁆𑀥𑀦𑀁;

𑀪𑀺𑀓𑁆𑀔𑀼𑀦𑀸𑀕𑁆𑀕𑀺 𑀦 𑀓𑀸𑀢𑀩𑁆𑀩𑁄, 𑀯𑀺𑀯𑀭𑀺𑀢𑁆𑀯𑀸𑀧𑀺 𑀧𑀓𑁆𑀓𑀢𑀸.

𑀜𑀸𑀢𑀩𑁆𑀩𑀸 𑀧𑀓𑁆𑀓𑀓𑀸𑀮𑀲𑁆𑀫𑀺𑀁, 𑀑𑀭𑁄𑀧𑁂𑀢𑁆𑀯𑀸 𑀬𑀣𑀸𑀲𑀼𑀔𑀁;

𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀘𑁆𑀙𑀲𑁆𑀲, 𑀧𑀝𑀺𑀕𑁆𑀕𑀳𑀡𑀓𑀸𑀭𑀡𑀁.

𑀆𑀭𑁄𑀧𑁂𑀢𑁆𑀯𑀸 𑀲𑀘𑁂 𑀪𑀺𑀓𑁆𑀔𑀼, 𑀉𑀤𑁆𑀥𑀦𑀁 𑀲𑀼𑀤𑁆𑀥𑀪𑀸𑀚𑀦𑀁;

𑀉𑀤𑀓𑀁 𑀬𑀸𑀕𑀼𑀅𑀢𑁆𑀣𑀸𑀬, 𑀢𑀸𑀧𑁂𑀢𑀺 𑀬𑀤𑀺 𑀯𑀝𑁆𑀝𑀢𑀺.

𑀢𑀢𑁆𑀢𑁂 𑀧𑀦𑀼𑀤𑀓𑁂 𑀓𑁄𑀘𑀺, 𑀘𑁂 𑀧𑀓𑁆𑀔𑀺𑀧𑀢𑀺 𑀢𑀡𑁆𑀟𑀼𑀮𑁂;

𑀢𑀢𑁄 𑀧𑀝𑁆𑀞𑀸𑀬 𑀢𑁂𑀦𑀕𑁆𑀕𑀺, 𑀦 𑀓𑀸𑀢𑀩𑁆𑀩𑁄𑀯 𑀪𑀺𑀓𑁆𑀔𑀼𑀦𑀸.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀬𑀸𑀕𑀼𑀁, 𑀧𑀸𑀢𑀼𑀁 𑀯𑀝𑁆𑀝𑀢𑀺 𑀪𑀺𑀓𑁆𑀔𑀼𑀦𑁄;

𑀲𑀘𑁂 𑀧𑀘𑀢𑀺 𑀧𑀘𑁆𑀙𑀸 𑀢𑀁, 𑀲𑀸𑀫𑀧𑀸𑀓𑀸 𑀦 𑀫𑀼𑀘𑁆𑀘𑀢𑀺.

𑀢𑀢𑁆𑀣𑀚𑀸𑀢𑀨𑀮𑀁 𑀓𑀺𑀜𑁆𑀘𑀺, 𑀲𑀳 𑀘𑀸𑀮𑁂𑀢𑀺 𑀯𑀮𑁆𑀮𑀺𑀬𑀸;

𑀢𑀲𑁆𑀲𑁂𑀯 𑀘 𑀢𑀢𑁄 𑀮𑀤𑁆𑀥𑀁, 𑀨𑀮𑀁 𑀓𑀺𑀜𑁆𑀘𑀺 𑀦 𑀯𑀝𑁆𑀝𑀢𑀺.

𑀨𑀮𑀭𑀼𑀓𑁆𑀔𑀁 𑀧𑀭𑀸𑀫𑀝𑁆𑀞𑀼𑀁, 𑀢𑀫𑀧𑀲𑁆𑀲𑀬𑀺𑀢𑀼𑀫𑁆𑀧𑀺 𑀯𑀸;

𑀓𑀡𑁆𑀝𑀓𑁂 𑀩𑀦𑁆𑀥𑀺𑀢𑀼𑀁 𑀯𑀸𑀧𑀺, 𑀪𑀺𑀓𑁆𑀔𑀼𑀦𑁄 𑀓𑀺𑀭 𑀯𑀝𑁆𑀝𑀢𑀺.

𑀲𑀡𑁆𑀟𑀸𑀲𑁂𑀦 ¶ 𑀘 𑀤𑀻𑀖𑁂𑀦, 𑀕𑀳𑁂𑀢𑁆𑀯𑀸 𑀣𑀸𑀮𑀓𑀁 𑀧𑀦;

𑀧𑀘𑀢𑁄 𑀪𑀺𑀓𑁆𑀔𑀼𑀦𑁄 𑀢𑁂𑀮𑀁, 𑀪𑀲𑁆𑀫𑀁 𑀧𑀢𑀢𑀺 𑀢𑀢𑁆𑀣 𑀘𑁂.

𑀅𑀫𑀼𑀜𑁆𑀘𑀦𑁆𑀢𑁂𑀦 ¶ 𑀳𑀢𑁆𑀣𑁂𑀦, 𑀧𑀘𑀺𑀢𑁆𑀯𑀸 𑀢𑁂𑀮𑀣𑀸𑀮𑀓𑀁;

𑀑𑀢𑀸𑀭𑁂𑀢𑁆𑀯𑀸𑀯 𑀢𑀁 𑀧𑀘𑁆𑀙𑀸, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀯𑀝𑁆𑀝𑀢𑀺.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑁂, 𑀢𑀸𑀦𑀺 𑀤𑀸𑀭𑀽𑀦𑀺 𑀯𑀸 𑀧𑀦;

𑀞𑀧𑀺𑀢𑀸𑀦𑀺 𑀲𑀘𑁂 𑀳𑁄𑀦𑁆𑀢𑀺, 𑀧𑀼𑀩𑁆𑀩𑀕𑀸𑀳𑁄𑀯 𑀯𑀝𑁆𑀝𑀢𑀺.

𑀉𑀘𑁆𑀙𑀼𑀁 𑀔𑀸𑀤𑀢𑀺 𑀘𑁂 𑀪𑀺𑀓𑁆𑀔𑀼, 𑀲𑀸𑀫𑀡𑁂𑀭𑁄𑀧𑀺 𑀇𑀘𑁆𑀙𑀢𑀺;

‘‘𑀙𑀺𑀦𑁆𑀤𑀺𑀢𑁆𑀯𑀸 𑀢𑁆𑀯𑀫𑀺𑀢𑁄 𑀕𑀡𑁆𑀳’’, 𑀇𑀢𑀺 𑀯𑀼𑀢𑁆𑀢𑁄 𑀘 𑀕𑀡𑁆𑀳𑀢𑀺.

𑀦𑀢𑁆𑀣𑁂𑀯 𑀅𑀯𑀲𑁂𑀲𑀲𑁆𑀲, 𑀧𑀝𑀺𑀕𑁆𑀕𑀳𑀡𑀓𑀸𑀭𑀡𑀁;

𑀔𑀸𑀤𑀢𑁄 𑀕𑀼𑀴𑀧𑀺𑀡𑁆𑀟𑀫𑁆𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀓𑀸𑀢𑀼𑀁 𑀲𑀸𑀕𑀭𑀢𑁄𑀬𑁂𑀦, 𑀮𑁄𑀡𑀓𑀺𑀘𑁆𑀘𑀁 𑀢𑀼 𑀯𑀝𑁆𑀝𑀢𑀺;

𑀬𑀸𑀯𑀚𑀻𑀯𑀺𑀓𑀲𑀗𑁆𑀔𑀸𑀢𑀁, 𑀢𑁄𑀬𑀢𑁆𑀢𑀸 𑀦 𑀢𑀼 𑀕𑀘𑁆𑀙𑀢𑀺.

𑀇𑀤𑀁 𑀓𑀸𑀮𑀯𑀺𑀦𑀺𑀫𑁆𑀫𑀼𑀢𑁆𑀢𑀁, 𑀉𑀤𑀓𑀁 𑀧𑀭𑀺𑀤𑀻𑀧𑀺𑀢𑀁;

𑀦𑀺𑀩𑁆𑀩𑀸𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦-𑀓𑀼𑀲𑀮𑁂𑀦 𑀫𑀳𑁂𑀲𑀺𑀦𑀸.

𑀉𑀤𑀓𑁂𑀦 𑀲𑀫𑀸 𑀯𑀼𑀢𑁆𑀢𑀸, 𑀳𑀺𑀫𑀲𑁆𑀲 𑀓𑀭𑀓𑀸𑀧𑀺 𑀘;

𑀓𑀽𑀧𑀸𑀤𑀻𑀲𑀼 𑀚𑀮𑀁 𑀧𑀸𑀢𑀼𑀁, 𑀩𑀳𑀮𑀫𑁆𑀧𑀺 𑀘 𑀯𑀝𑁆𑀝𑀢𑀺.

𑀔𑁂𑀢𑁆𑀢𑁂𑀲𑀼 𑀓𑀲𑀺𑀢𑀝𑁆𑀞𑀸𑀦𑁂, 𑀩𑀳𑀮𑀁 𑀢𑀁 𑀦 𑀯𑀝𑁆𑀝𑀢𑀺;

𑀲𑀦𑁆𑀤𑀺𑀢𑁆𑀯𑀸 𑀬𑀤𑀺 𑀢𑀁 𑀕𑀦𑁆𑀢𑁆𑀯𑀸, 𑀦𑀤𑀺𑀁 𑀧𑀽𑀭𑁂𑀢𑀺 𑀯𑀝𑁆𑀝𑀢𑀺.

𑀲𑁄𑀩𑁆𑀪𑁂𑀲𑀼 𑀓𑀓𑀼𑀥𑀸𑀤𑀻𑀦𑀁, 𑀚𑀮𑁂 𑀧𑀼𑀧𑁆𑀨𑀲𑀫𑀸𑀓𑀼𑀮𑁂;

𑀦 𑀜𑀸𑀬𑀢𑀺 𑀭𑀲𑁄 𑀢𑁂𑀲𑀁, 𑀦 𑀧𑀝𑀺𑀕𑁆𑀕𑀳𑀡𑀓𑀸𑀭𑀡𑀁.

𑀲𑀭𑁂𑀡𑀼𑀓𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀧𑀸𑀦𑀻𑀬𑀲𑁆𑀲 𑀖𑀝𑁂 𑀧𑀦;

𑀧𑀓𑁆𑀔𑀺𑀢𑁆𑀢𑀸𑀦𑀺 𑀲𑀘𑁂 𑀳𑁄𑀦𑁆𑀢𑀺, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀢𑀁 𑀧𑀦.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀬𑁆𑀬𑀸𑀦𑀺, 𑀯𑀸𑀲𑀧𑀼𑀧𑁆𑀨𑀸𑀦𑀺 𑀢𑀢𑁆𑀣 𑀯𑀸;

𑀓𑀫𑀮𑁆𑀮𑀺𑀓𑀸𑀲𑀼 𑀤𑀺𑀦𑁆𑀦𑀸𑀲𑀼, 𑀅𑀩𑁆𑀩𑁄𑀳𑀸𑀭𑁄𑀢𑀺 𑀯𑀝𑁆𑀝𑀢𑀺.

𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑁆𑀲𑁂𑀯 ¶ , 𑀤𑀦𑁆𑀢𑀓𑀝𑁆𑀞𑀲𑁆𑀲 𑀬𑁄 𑀭𑀲𑁄;

𑀅𑀚𑀸𑀦𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺, 𑀲𑁄 𑀘𑁂 𑀯𑀺𑀲𑀢𑀺 𑀔𑀸𑀤𑀢𑁄.

𑀲𑀭𑀻𑀭𑀝𑁆𑀞𑁂𑀲𑀼 𑀪𑀽𑀢𑁂𑀲𑀼, 𑀓𑀺𑀁 𑀯𑀝𑁆𑀝𑀢𑀺? 𑀦 𑀯𑀝𑁆𑀝𑀢𑀺?

𑀓𑀧𑁆𑀧𑀸𑀓𑀧𑁆𑀧𑀺𑀬𑀫𑀁𑀲𑀸𑀦𑀁, 𑀔𑀻𑀭𑀁 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺.

𑀓𑀡𑁆𑀡𑀓𑁆𑀔𑀺𑀕𑀽𑀣𑀓𑁄 𑀤𑀦𑁆𑀢- 𑀫𑀮𑀁 𑀫𑀼𑀢𑁆𑀢𑀁 𑀓𑀭𑀻𑀲𑀓𑀁;

𑀲𑁂𑀫𑁆𑀳𑀁 𑀲𑀺𑀗𑁆𑀖𑀸𑀡𑀺𑀓𑀸 𑀔𑁂𑀴𑁄, 𑀅𑀲𑁆𑀲𑀼 𑀮𑁄𑀡𑀦𑁆𑀢𑀺 𑀯𑀝𑁆𑀝𑀢𑀺.

𑀬𑀁 ¶ 𑀧𑀦𑁂𑀢𑁆𑀣 𑀲𑀓𑀝𑁆𑀞𑀸𑀦𑀸, 𑀘𑀯𑀺𑀢𑁆𑀯𑀸 𑀧𑀢𑀺𑀢𑀁 𑀲𑀺𑀬𑀸;

𑀧𑀢𑁆𑀢𑁂 𑀯𑀸 𑀧𑀦 𑀳𑀢𑁆𑀣𑁂 𑀯𑀸, 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀢𑀁 𑀧𑀼𑀦.

𑀅𑀗𑁆𑀕𑀮𑀕𑁆𑀕𑀫𑀯𑀺𑀘𑁆𑀙𑀦𑁆𑀦𑀁, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀢𑀁;

𑀉𑀡𑁆𑀳𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲, 𑀲𑁂𑀤𑁄 𑀳𑀢𑁆𑀣𑁂𑀲𑀼 𑀚𑀸𑀬𑀢𑀺.

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀲𑁆𑀲, 𑀲𑁂𑀤𑁄 𑀳𑀢𑁆𑀣𑀸𑀦𑀼𑀲𑀸𑀭𑀢𑁄;

𑀑𑀭𑁄𑀳𑀢𑀺 𑀲𑀘𑁂 𑀧𑀢𑁆𑀢𑀁, 𑀦 𑀧𑀝𑀺𑀕𑁆𑀕𑀳𑀡𑀓𑀸𑀭𑀡𑀁.

𑀲𑀸𑀫𑀁 𑀕𑀳𑁂𑀢𑁆𑀯𑀸 𑀘𑀢𑁆𑀢𑀸𑀭𑀺, 𑀯𑀺𑀓𑀝𑀸𑀦𑀺 𑀦𑀤𑀸𑀬𑀓𑁂;

𑀲𑀧𑁆𑀧𑀤𑀝𑁆𑀞𑀓𑁆𑀔𑀡𑁂𑀬𑁂𑀯, 𑀦 𑀤𑁄𑀲𑁄 𑀧𑀭𑀺𑀪𑀼𑀜𑁆𑀚𑀢𑁄.

𑀧𑀣𑀯𑀺𑀁 𑀫𑀢𑁆𑀢𑀺𑀓𑀢𑁆𑀣𑀸𑀬, 𑀔𑀡𑀺𑀢𑀼𑀁 𑀙𑀺𑀦𑁆𑀤𑀺𑀢𑀼𑀫𑁆𑀧𑀺 𑀯𑀸;

𑀢𑀭𑀼𑀫𑁆𑀧𑀺 𑀙𑀸𑀭𑀺𑀓𑀢𑁆𑀣𑀸𑀬, 𑀪𑀺𑀓𑁆𑀔𑀼𑀦𑁄 𑀧𑀦 𑀯𑀝𑁆𑀝𑀢𑀺.

𑀅𑀘𑁆𑀙𑁂𑀤𑀕𑀸𑀳𑀦𑀺𑀭𑀧𑁂𑀓𑁆𑀔𑀦𑀺𑀲𑀚𑁆𑀚𑀢𑁄 𑀘;

𑀲𑀺𑀓𑁆𑀔𑀧𑁆𑀧𑀳𑀸𑀦𑀫𑀭𑀡𑁂𑀳𑀺 𑀘 𑀮𑀺𑀗𑁆𑀕𑀪𑁂𑀤𑀸;

𑀤𑀸𑀦𑁂𑀦 𑀢𑀲𑁆𑀲 𑀘 𑀧𑀭𑀲𑁆𑀲 𑀅𑀪𑀺𑀓𑁆𑀔𑀼𑀓𑀲𑁆𑀲;

𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀡𑀫𑁂𑀢𑀺 𑀯𑀺𑀦𑀸𑀲𑀫𑁂𑀯𑀁.

𑀤𑀼𑀭𑀽𑀧𑀘𑀺𑀡𑁆𑀡𑁂 𑀦𑀺𑀤𑁆𑀤𑀺𑀝𑁆𑀞𑀁, 𑀕𑀳𑀡𑀼𑀕𑁆𑀕𑀳𑀺𑀢𑀲𑁆𑀲𑀧𑀺;

𑀅𑀦𑁆𑀢𑁄𑀯𑀼𑀢𑁆𑀣𑁂 𑀲𑀬𑀁𑀧𑀓𑁆𑀓𑁂, 𑀅𑀦𑁆𑀢𑁄𑀧𑀓𑁆𑀓𑁂 𑀘 𑀤𑀼𑀓𑁆𑀓𑀝𑀁.

𑀧𑀝𑀺𑀕𑁆𑀕𑀳𑀺𑀢𑀓𑁂 𑀢𑀲𑁆𑀫𑀺𑀁, 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀝𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀲𑁆𑀲 ¶ , 𑀤𑀦𑁆𑀢𑀧𑁄𑀦𑁄𑀤𑀓𑁂𑀲𑀼𑀧𑀺;

𑀦 𑀤𑁄𑀲𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀦𑀯𑀫𑀚𑁆𑀛𑀺𑀫𑀣𑁂𑀭𑀪𑀺𑀓𑁆𑀔𑀼𑀦𑀻𑀦𑀁;

𑀅𑀯𑀺𑀲𑁂𑀲𑁂𑀦 𑀬𑀢𑀺𑀘𑁆𑀙𑀺𑀢𑀩𑁆𑀩𑀓𑁄;

𑀓𑀣𑀺𑀢𑁄 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀢𑀢𑁄.

𑀬𑀁 ¶ 𑀓𑀺𑀜𑁆𑀘𑀺𑀘𑁂𑀮𑀓𑀸𑀤𑀻𑀦𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀧𑀦𑀸𑀫𑀺𑀲𑀁;

𑀤𑁂𑀦𑁆𑀢𑀲𑁆𑀲𑁂𑀓𑀧𑀬𑁄𑀕𑁂𑀦, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀦 𑀤𑁂𑀦𑁆𑀢𑀲𑁆𑀲, 𑀧𑀬𑁄𑀕𑀕𑀡𑀦𑀸𑀯𑀲𑀸;

𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁄 𑀢𑀲𑁆𑀲, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀉𑀤𑀓𑀁 𑀤𑀦𑁆𑀢𑀧𑁄𑀦𑀁 𑀯𑀸, 𑀤𑁂𑀦𑁆𑀢𑀲𑁆𑀲 𑀘 𑀅𑀢𑀺𑀢𑁆𑀣𑀺𑀬𑁂;

𑀢𑀺𑀢𑁆𑀣𑀺𑀬𑁄𑀢𑀺 𑀘 𑀲𑀜𑁆𑀜𑀺𑀲𑁆𑀲, 𑀤𑀼𑀓𑁆𑀓𑀝𑀁 𑀯𑀺𑀫𑀢𑀺𑀲𑁆𑀲 𑀘.

𑀤𑀸𑀧𑁂𑀦𑁆𑀢𑀲𑁆𑀲 𑀧𑀦𑀜𑁆𑀜𑁂𑀦, 𑀲𑀸𑀫𑀡𑁂𑀭𑀸𑀤𑀺𑀓𑁂𑀦 𑀯𑀸;

𑀦𑀺𑀓𑁆𑀔𑀺𑀢𑁆𑀢𑀪𑀸𑀚𑀦𑁂 𑀢𑁂𑀲𑀁, 𑀤𑁂𑀦𑁆𑀢𑀲𑁆𑀲 𑀩𑀳𑀺𑀮𑁂𑀧𑀦𑀁.

𑀞𑀧𑁂𑀢𑁆𑀯𑀸 𑀪𑁄𑀚𑀦𑀁 𑀢𑁂𑀲𑀁, 𑀲𑀦𑁆𑀢𑀺𑀓𑁂 ‘‘𑀕𑀡𑁆𑀳𑀣𑀸’’𑀢𑀺 𑀘;

𑀯𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀁.

𑀤𑀸𑀧𑁂𑀢𑁆𑀯𑀸 𑀯𑀸 𑀅𑀤𑀸𑀧𑁂𑀢𑁆𑀯𑀸, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁;

𑀓𑀢𑁆𑀢𑀼𑀓𑀸𑀫𑁄 𑀲𑀘𑁂 𑀲𑀤𑁆𑀥𑀺𑀁, 𑀳𑀲𑀦𑀸𑀤𑀻𑀦𑀺 𑀇𑀢𑁆𑀣𑀺𑀬𑀸.

𑀉𑀬𑁆𑀬𑁄𑀚𑁂𑀢𑀺 ¶ 𑀳𑀺 ‘‘𑀕𑀘𑁆𑀙𑀸’’𑀢𑀺, 𑀯𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀸 𑀧𑀦;

𑀢𑀲𑁆𑀲𑀼𑀬𑁆𑀬𑁄𑀚𑀦𑀫𑀢𑁆𑀢𑀲𑁆𑀫𑀺𑀁, 𑀤𑀼𑀓𑁆𑀓𑀝𑀁 𑀧𑀞𑀫𑁂𑀦 𑀘.

𑀧𑀸𑀤𑁂𑀦𑀲𑁆𑀲𑀼𑀧𑀘𑀸𑀭𑀲𑁆𑀫𑀺𑀁, 𑀅𑀢𑀺𑀓𑁆𑀓𑀦𑁆𑀢𑁂 𑀘 𑀤𑀼𑀓𑁆𑀓𑀝𑀁;

𑀤𑀼𑀢𑀺𑀬𑁂𑀦𑀲𑁆𑀲 𑀧𑀸𑀘𑀺𑀢𑁆𑀢𑀺, 𑀲𑀻𑀫𑀸𑀢𑀺𑀓𑁆𑀓𑀫𑀦𑁂 𑀧𑀦.

𑀤𑀲𑁆𑀲𑀦𑁂 𑀉𑀧𑀘𑀸𑀭𑀲𑁆𑀲, 𑀳𑀢𑁆𑀣𑀸 𑀤𑁆𑀯𑀸𑀤𑀲 𑀤𑁂𑀲𑀺𑀢𑀸;

𑀧𑀫𑀸𑀡𑀁 𑀲𑀯𑀦𑁂 𑀘𑁂𑀯𑀁, 𑀅𑀚𑁆𑀛𑁄𑀓𑀸𑀲𑁂 𑀦 𑀘𑁂𑀢𑀭𑁂.

𑀪𑀺𑀓𑁆𑀔𑀼𑀲𑁆𑀫𑀺𑀁 𑀢𑀺𑀓𑀧𑀸𑀘𑀺𑀢𑁆𑀢𑀺, 𑀇𑀢𑀭𑁂 𑀢𑀺𑀓𑀤𑀼𑀓𑁆𑀓𑀝𑀁;

𑀉𑀪𑀺𑀦𑁆𑀦𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀓𑀮𑀺𑀲𑀸𑀲𑀦𑀭𑁄𑀧𑀦𑁂.

𑀉𑀬𑁆𑀬𑁄𑀚𑁂𑀦𑁆𑀢𑀲𑁆𑀲 𑀓𑀺𑀘𑁆𑀘𑁂𑀦, 𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀔𑀼𑀤𑁆𑀤𑀓𑁂 𑀧𑀺𑀝𑁆𑀞𑀺𑀯𑀁𑀲𑀁 𑀬𑁄, 𑀅𑀢𑀺𑀓𑁆𑀓𑀫𑁆𑀫 𑀦𑀺𑀲𑀻𑀤𑀢𑀺;

𑀲𑀪𑁄𑀚𑀦𑁂 𑀓𑀼𑀮𑁂 𑀢𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀳𑀢𑁆𑀣𑀧𑀸𑀲𑀁 ¶ 𑀅𑀢𑀺𑀓𑁆𑀓𑀫𑁆𑀫, 𑀧𑀺𑀝𑁆𑀞𑀺𑀲𑀗𑁆𑀖𑀸𑀝𑀓𑀲𑁆𑀲 𑀘;

𑀲𑀬𑀦𑀲𑁆𑀲 𑀧𑀦𑀸𑀲𑀦𑁆𑀦𑁂, 𑀞𑀸𑀦𑁂 𑀤𑁄𑀲𑁄 𑀫𑀳𑀮𑁆𑀮𑀓𑁂.

𑀅𑀲𑀬𑀦𑀺𑀖𑀭𑁂 𑀢𑀲𑁆𑀲, 𑀲𑀬𑀦𑀺𑀖𑀭𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀦𑀺𑀲𑀻𑀤𑀦𑁆𑀢𑀲𑁆𑀲𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀤𑀼𑀢𑀺𑀬𑁂 𑀲𑀢𑀺;

𑀯𑀻𑀢𑀭𑀸𑀕𑁂𑀲𑀼 𑀯𑀸 𑀢𑁂𑀲𑀼, 𑀦𑀺𑀓𑁆𑀔𑀦𑁆𑀢𑁂𑀲𑀼 𑀉𑀪𑁄𑀲𑀼 𑀯𑀸.

𑀦𑀺𑀲𑀺𑀦𑁆𑀦𑀲𑁆𑀲𑀸𑀦𑀢𑀺𑀓𑁆𑀓𑀫𑁆𑀫, 𑀧𑀤𑁂𑀲𑀁 𑀯𑀼𑀢𑁆𑀢𑀮𑀓𑁆𑀔𑀡𑀁;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀘𑀢𑀼𑀢𑁆𑀣𑁂 ¶ 𑀧𑀜𑁆𑀘𑀫𑁂 𑀘𑁂𑀯, 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀯𑀢𑁆𑀢𑀩𑁆𑀩𑀁 𑀬𑀜𑁆𑀘 𑀢𑀁 𑀲𑀩𑁆𑀩𑀁, 𑀯𑀼𑀢𑁆𑀢𑀁 𑀅𑀦𑀺𑀬𑀢𑀤𑁆𑀯𑀬𑁂.

𑀲𑀫𑀼𑀝𑁆𑀞𑀸𑀦𑀁 𑀧𑀦𑁂𑀢𑁂𑀲𑀁, 𑀅𑀦𑀦𑁆𑀢𑀭𑀲𑀫𑀁 𑀫𑀢𑀁;

𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺, 𑀢𑁂𑀲𑀫𑁂𑀲𑀜𑁆𑀘 𑀤𑀻𑀧𑀺𑀢𑁄.

𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀭𑀳𑁄𑀦𑀺𑀲𑀚𑁆𑀚𑀓𑀣𑀸.

𑀪𑁄𑀚𑀦𑀸𑀦𑀁 𑀢𑀼 𑀧𑀜𑁆𑀘𑀦𑁆𑀦𑀁, 𑀯𑀼𑀢𑁆𑀢𑁄 𑀅𑀜𑁆𑀜𑀢𑀭𑁂𑀦 𑀬𑁄;

𑀲𑀦𑁆𑀢𑀁 𑀪𑀺𑀓𑁆𑀔𑀼𑀫𑀦𑀸𑀧𑀼𑀘𑁆𑀙𑀸, 𑀆𑀧𑀚𑁆𑀚𑁂𑀬𑁆𑀬 𑀓𑀼𑀮𑁂𑀲𑀼 𑀘𑁂.

𑀘𑀸𑀭𑀺𑀢𑁆𑀢𑀁 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀲𑀺𑀬𑀸;

𑀞𑀧𑁂𑀢𑁆𑀯𑀸 𑀲𑀫𑀬𑀁 𑀪𑀺𑀓𑁆𑀔𑀼, 𑀤𑀼𑀯𑀺𑀥𑀁 𑀯𑀼𑀢𑁆𑀢𑀮𑀓𑁆𑀔𑀡𑀁.

𑀅𑀯𑀻𑀢𑀺𑀯𑀢𑁆𑀢𑁂 𑀫𑀚𑁆𑀛𑀡𑁆𑀳𑁂, 𑀖𑀭𑀫𑀜𑁆𑀜𑀲𑁆𑀲 𑀕𑀘𑁆𑀙𑀢𑀺;

𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑁂, 𑀧𑀞𑀫𑁂𑀦 𑀳𑀺 𑀤𑀼𑀓𑁆𑀓𑀝𑀁.

𑀅𑀢𑀺𑀓𑁆𑀓𑀦𑁆𑀢𑁂 𑀖𑀭𑀼𑀫𑁆𑀫𑀸𑀭𑁂, 𑀅𑀧𑀭𑀫𑁆𑀧𑀺 𑀘 𑀤𑀼𑀓𑁆𑀓𑀝𑀁;

𑀤𑀼𑀢𑀺𑀬𑁂𑀦 𑀘 𑀧𑀸𑀤𑁂𑀦, 𑀧𑀸𑀘𑀺𑀢𑁆𑀢𑀺 𑀲𑀫𑀢𑀺𑀓𑁆𑀓𑀫𑁂.

𑀞𑀺𑀢𑀝𑁆𑀞𑀸𑀦𑁂 𑀲𑀘𑁂 𑀪𑀺𑀓𑁆𑀔𑀼𑀁, 𑀑𑀮𑁄𑀓𑁂𑀢𑁆𑀯𑀸 𑀦 𑀧𑀲𑁆𑀲𑀢𑀺;

‘‘𑀅𑀲𑀦𑁆𑀢’’𑀦𑁆𑀢𑀺 𑀅𑀦𑀸𑀧𑀼𑀘𑁆𑀙𑀸, 𑀧𑀯𑀺𑀝𑁆𑀞𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑀲𑀘𑁂 𑀤𑀽𑀭𑁂 𑀞𑀺𑀢𑁄 𑀳𑁄𑀢𑀺, 𑀅𑀲𑀦𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀲𑁄;

𑀦𑀢𑁆𑀣𑀺 𑀆𑀭𑁄𑀘𑀦𑁂 𑀓𑀺𑀘𑁆𑀘𑀁, 𑀕𑀯𑁂𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄.

𑀦 ¶ 𑀤𑁄𑀲𑁄 𑀲𑀫𑀬𑁂 𑀲𑀦𑁆𑀢𑀁, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘 𑀕𑀘𑁆𑀙𑀢𑁄;

𑀪𑀺𑀓𑁆𑀔𑀼𑀁 𑀖𑀭𑁂𑀦 𑀫𑀕𑁆𑀕𑁄 𑀘𑁂, 𑀆𑀭𑀸𑀫𑀁 𑀕𑀘𑁆𑀙𑀢𑁄𑀧𑀺 𑀘.

𑀢𑀺𑀢𑁆𑀣𑀺𑀬𑀸𑀦𑀫𑁆𑀧𑀺 𑀲𑁂𑀬𑁆𑀬𑀁 𑀯𑀸, 𑀢𑀣𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁;

𑀆𑀧𑀤𑀸𑀲𑀦𑀲𑀸𑀮𑀁 𑀯𑀸, 𑀪𑀢𑁆𑀢𑀺𑀬𑀲𑁆𑀲 𑀖𑀭𑀫𑁆𑀧𑀺 𑀯𑀸.

𑀇𑀤𑀁 𑀧𑀦 𑀲𑀫𑀼𑀝𑁆𑀞𑀸𑀦𑀁, 𑀓𑀣𑀺𑀦𑁂𑀦 𑀲𑀫𑀁 𑀫𑀢𑀁;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀘𑀺𑀢𑁆𑀢𑀜𑁆𑀘, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑀩𑁆𑀩𑀸𑀧𑀺 ¶ 𑀲𑀸𑀤𑀺𑀢𑀩𑁆𑀩𑀸𑀯, 𑀘𑀢𑀼𑀫𑀸𑀲𑀧𑀯𑀸𑀭𑀡𑀸;

𑀪𑀺𑀓𑁆𑀔𑀼𑀦𑀸 𑀅𑀕𑀺𑀮𑀸𑀦𑁂𑀦, 𑀧𑀼𑀦 𑀦𑀺𑀘𑁆𑀘𑀧𑀯𑀸𑀭𑀡𑀸.

‘‘𑀯𑀺𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀭𑁄𑀕𑀲𑁆𑀫𑀺𑀁, 𑀲𑀢𑀺 𑀫𑁂 𑀧𑀘𑁆𑀘𑀬𑁂’’𑀢𑀺 𑀘;

𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸 𑀲𑀸, ‘‘𑀭𑁄𑀕𑁄 𑀤𑀸𑀦𑀺 𑀦 𑀫𑁂’’𑀢𑀺 𑀘.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀤𑀼𑀓𑁆𑀓𑀝𑀁 𑀦𑀢𑀢𑀼𑀢𑁆𑀢𑀭𑀺𑀁;

𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀲𑀜𑁆𑀜𑀺𑀲𑁆𑀲, 𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲 𑀘.

𑀦𑀢𑀢𑀼𑀢𑁆𑀢𑀭𑀺𑀲𑀜𑁆𑀜𑀺𑀲𑁆𑀲, 𑀬𑁂𑀳𑀺 𑀬𑁂𑀦 𑀧𑀯𑀸𑀭𑀺𑀢𑁄;

𑀢𑀢𑁄 𑀅𑀜𑁆𑀜𑁂𑀳𑀺 𑀯𑀸 𑀪𑀺𑀬𑁆𑀬𑁄, 𑀆𑀘𑀺𑀓𑁆𑀔𑀺𑀢𑁆𑀯𑀸 𑀬𑀣𑀸𑀢𑀣𑀁.

𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸 𑀧𑀦;

𑀜𑀸𑀢𑀓𑀸𑀦𑀫𑀦𑀸𑀧𑀢𑁆𑀢𑀺, 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀧𑀺.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀉𑀬𑁆𑀬𑀼𑀢𑁆𑀢𑀁 𑀪𑀺𑀓𑁆𑀔𑀼𑀦𑁄 𑀲𑁂𑀦𑀁, 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀢𑁄;

𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀢𑀼 𑀧𑀤𑁂 𑀧𑀤𑁂.

𑀤𑀲𑁆𑀲𑀦𑀲𑁆𑀲𑀼𑀧𑀘𑀸𑀭𑀲𑁆𑀫𑀺𑀁, 𑀞𑀢𑁆𑀯𑀸 𑀧𑀸𑀘𑀺𑀢𑁆𑀢𑀺 𑀧𑀲𑁆𑀲𑀢𑁄;

𑀉𑀧𑀘𑀸𑀭𑀁 𑀯𑀺𑀫𑀼𑀜𑁆𑀘𑀺𑀢𑁆𑀯𑀸, 𑀧𑀲𑁆𑀲𑀦𑁆𑀢𑀲𑁆𑀲 𑀧𑀬𑁄𑀕𑀢𑁄.

𑀆𑀭𑁄𑀳𑀸 𑀧𑀦 𑀘𑀢𑁆𑀢𑀸𑀭𑁄, 𑀤𑁆𑀯𑁂 𑀤𑁆𑀯𑁂 𑀢𑀁𑀧𑀸𑀤𑀭𑀓𑁆𑀔𑀓𑀸;

𑀏𑀯𑀁 𑀤𑁆𑀯𑀸𑀤𑀲𑀧𑁄𑀲𑁄 𑀘, 𑀏𑀓𑁄 𑀳𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺.

𑀤𑁆𑀯𑁂𑀧𑀸𑀤𑀭𑀓𑁆𑀔𑀸 ¶ 𑀆𑀭𑁄𑀳𑁄, 𑀏𑀓𑁄 𑀢𑀺𑀧𑀼𑀭𑀺𑀲𑁄𑀳𑀬𑁄;

𑀏𑀓𑁄 𑀲𑀸𑀭𑀣𑀺 𑀬𑁄𑀥𑁂𑀓𑁄, 𑀆𑀡𑀺𑀭𑀓𑁆𑀔𑀸 𑀤𑀼𑀯𑁂 𑀚𑀦𑀸.

𑀘𑀢𑀼𑀧𑁄𑀲𑁄 𑀭𑀣𑁄 𑀯𑀼𑀢𑁆𑀢𑁄, 𑀘𑀢𑀼𑀲𑀘𑁆𑀘𑀯𑀺𑀪𑀸𑀯𑀺𑀦𑀸;

𑀘𑀢𑁆𑀢𑀸𑀭𑁄 𑀧𑀤𑀳𑀢𑁆𑀣𑀸 𑀘, 𑀧𑀼𑀭𑀺𑀲𑀸 𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀯𑀼𑀢𑁆𑀢𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 ¶ , 𑀅𑀬𑀁 𑀧𑀘𑁆𑀙𑀺𑀫𑀓𑁄𑀝𑀺𑀬𑀸;

𑀘𑀢𑀼𑀭𑀗𑁆𑀕𑀲𑀫𑀸𑀬𑀼𑀢𑁆𑀢𑀸, 𑀲𑁂𑀦𑀸 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑀳𑀢𑁆𑀣𑀺𑀆𑀤𑀻𑀲𑀼 𑀏𑀓𑁂𑀓𑀁, 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀢𑁄;

𑀅𑀦𑀼𑀬𑁆𑀬𑀼𑀢𑁆𑀢𑁂𑀧𑀺 𑀉𑀬𑁆𑀬𑀼𑀢𑁆𑀢-𑀲𑀜𑁆𑀜𑀺𑀲𑁆𑀲𑀸𑀧𑀺 𑀘 𑀤𑀼𑀓𑁆𑀓𑀝𑀁.

𑀅𑀢𑁆𑀢𑀦𑁄 𑀘 𑀞𑀺𑀢𑁄𑀓𑀸𑀲𑀁, 𑀲𑀫𑁆𑀧𑀢𑁆𑀢𑀁 𑀧𑀦 𑀧𑀲𑁆𑀲𑀢𑀺;

𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺, 𑀢𑀣𑀸𑀭𑀽𑀧𑁂 𑀘 𑀧𑀘𑁆𑀘𑀬𑁂.

𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀅𑀢𑁆𑀣-𑀗𑁆𑀕𑀢𑁂 𑀲𑀽𑀭𑀺𑀬𑁂 𑀅𑀭𑁄𑀕𑀯𑀸;

𑀲𑀘𑁂 𑀢𑀺𑀝𑁆𑀞𑀢𑀼 𑀲𑁂𑀦𑀸𑀬, 𑀦𑀺𑀲𑀻𑀤𑀢𑀼 𑀦𑀺𑀧𑀚𑁆𑀚𑀢𑀼.

𑀆𑀓𑀸𑀲𑁂 𑀇𑀤𑁆𑀥𑀺𑀬𑀸 𑀲𑁂𑀬𑁆𑀬𑀁, 𑀧𑀓𑀧𑁆𑀧𑁂𑀢𑀼 𑀘 𑀇𑀤𑁆𑀥𑀺𑀫𑀸;

𑀳𑁄𑀢𑁂𑀯 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀊𑀦𑀓𑁂 𑀘 𑀢𑀺𑀭𑀢𑁆𑀢𑀲𑁆𑀫𑀺𑀁, 𑀅𑀢𑀺𑀭𑁂𑀓𑁄𑀢𑀺 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀼𑀭𑀸𑀭𑀼𑀡𑀸𑀯 𑀦𑀺𑀓𑁆𑀔𑀫𑁆𑀫, 𑀢𑀢𑀺𑀬𑀸𑀬 𑀘 𑀭𑀢𑁆𑀢𑀺𑀬𑀸;

𑀦 𑀤𑁄𑀲𑁄 𑀧𑀼𑀦 𑀯𑀲𑀦𑁆𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲𑀸𑀧𑀤𑀸𑀲𑀼𑀧𑀺.

𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀯𑀸, 𑀲𑁂𑀦𑀸𑀩𑁆𑀬𑀽𑀳𑀫𑁆𑀧𑀺 𑀯𑀸 𑀧𑀦;

𑀤𑀲𑁆𑀲𑀦𑀢𑁆𑀣𑀸𑀬𑀦𑀻𑀓𑀁 𑀯𑀸, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀕𑀘𑁆𑀙𑀢𑁄.

𑀧𑀼𑀭𑀺𑀫𑁂 𑀧𑀦 𑀬𑁄 𑀯𑀼𑀢𑁆𑀢𑁄, ‘‘𑀳𑀢𑁆𑀣𑀻 𑀤𑁆𑀯𑀸𑀤𑀲𑀧𑁄𑀭𑀺𑀲𑁄’’;

𑀇𑀢𑀺 𑀢𑁂𑀦 𑀢𑀬𑁄 𑀳𑀢𑁆𑀣𑀻, ‘‘𑀳𑀢𑁆𑀣𑀸𑀦𑀻𑀓’’𑀦𑁆𑀢𑀺 𑀤𑀻𑀧𑀺𑀢𑀁.

𑀲𑁂𑀲𑁂𑀲𑀼𑀧𑀺 ¶ 𑀘 𑀏𑀲𑁂𑀯, 𑀦𑀬𑁄 𑀜𑁂𑀬𑁆𑀬𑁄 𑀯𑀺𑀪𑀸𑀯𑀺𑀦𑀸;

𑀢𑀺𑀡𑁆𑀡𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀧𑀺𑀝𑁆𑀞𑀸𑀤𑀻𑀳𑀺 ¶ 𑀓𑀢𑀁 𑀫𑀚𑁆𑀚𑀁, 𑀲𑀼𑀭𑀸 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺;

𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑁄 𑀲𑀩𑁆𑀩𑁄, 𑀆𑀲𑀯𑁄 𑀳𑁄𑀢𑀺 𑀫𑁂𑀭𑀬𑀁.

𑀩𑀻𑀚𑀢𑁄 𑀧𑀦 𑀧𑀝𑁆𑀞𑀸𑀬, 𑀧𑀺𑀯𑀦𑁆𑀢𑀲𑁆𑀲𑀼𑀪𑀬𑀫𑁆𑀧𑀺 𑀘;

𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀅𑀫𑀚𑁆𑀚𑁂 𑀫𑀚𑁆𑀚𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀫𑀚𑁆𑀚𑀁 𑀫𑀚𑁆𑀚𑀯𑀡𑁆𑀡𑀜𑁆𑀘, 𑀫𑀚𑁆𑀚𑀕𑀦𑁆𑀥𑀭𑀲𑀫𑁆𑀧𑀺 𑀘;

𑀅𑀭𑀺𑀝𑁆𑀞𑀁 𑀮𑁄𑀡𑀲𑁄𑀯𑀻𑀭𑀁, 𑀲𑀼𑀢𑁆𑀢𑀓𑀁 𑀧𑀺𑀯𑀢𑁄𑀧𑀺 𑀘.

𑀯𑀸𑀲𑀕𑀸𑀳𑀸𑀧𑀦𑀢𑁆𑀣𑀸𑀬, 𑀧𑀓𑁆𑀔𑀺𑀧𑀺𑀢𑁆𑀯𑀸𑀦 𑀈𑀲𑀓𑀁;

𑀲𑀽𑀧𑀸𑀤𑀻𑀦𑀁 𑀢𑀼 𑀧𑀸𑀓𑁂𑀧𑀺, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀳𑁄𑀢𑁂𑀴𑀓𑀲𑀫𑀼𑀝𑁆𑀞𑀸𑀦𑀁, 𑀅𑀘𑀺𑀢𑁆𑀢𑀁 𑀯𑀢𑁆𑀣𑀼𑀚𑀸𑀦𑀦𑀸;

𑀇𑀤𑀜𑁆𑀘𑀸𑀓𑀼𑀲𑀮𑁂𑀦𑁂𑀯, 𑀧𑀸𑀦𑀢𑁄 𑀮𑁄𑀓𑀯𑀚𑁆𑀚𑀓𑀁.

𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑁂𑀦, 𑀳𑀲𑀸𑀥𑀺𑀧𑁆𑀧𑀸𑀬𑀺𑀦𑁄 𑀧𑀦;

𑀨𑀼𑀲𑀢𑁄 𑀉𑀧𑀲𑀫𑁆𑀧𑀦𑁆𑀦𑀁, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁 𑀓𑀸𑀬-𑀧𑀝𑀺𑀩𑀤𑁆𑀥𑀸𑀤𑀺𑀓𑁂 𑀦𑀬𑁂;

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑁂, 𑀤𑀻𑀧𑀺𑀢𑀁 𑀢𑀺𑀓𑀤𑀼𑀓𑁆𑀓𑀝𑀁.

𑀏𑀢𑁆𑀣 ¶ 𑀘𑀸𑀦𑀼𑀧𑀲𑀫𑁆𑀧𑀦𑁆𑀦-𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺 𑀪𑀺𑀓𑁆𑀔𑀼𑀦𑀻;

𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑀺𑀦𑁄 𑀢𑀫𑁆𑀧𑀺, 𑀨𑀼𑀲𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀺 𑀦𑀳𑀲𑀸𑀥𑀺-𑀧𑁆𑀧𑀸𑀬𑀲𑁆𑀲 𑀨𑀼𑀲𑀢𑁄 𑀧𑀭𑀁;

𑀲𑀢𑀺 𑀓𑀺𑀘𑁆𑀘𑁂 𑀨𑀼𑀲𑀦𑁆𑀢𑀲𑁆𑀲, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀚𑀮𑁂 𑀦𑀺𑀫𑀼𑀚𑁆𑀚𑀦𑀸𑀤𑀻𑀦-𑀫𑀢𑁆𑀣𑀸𑀬 𑀧𑀦 𑀓𑁂𑀯𑀮𑀁;

𑀧𑀤𑀯𑀸𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀑𑀢𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀓𑀻𑀴𑀸𑀧𑁂𑀓𑁆𑀔𑁄 𑀲𑀘𑁂 𑀳𑀼𑀢𑁆𑀯𑀸, 𑀚𑀮𑁂 𑀉𑀧𑀭𑀺𑀕𑁄𑀧𑁆𑀨𑀓𑁂;

𑀦𑀺𑀫𑀼𑀚𑁆𑀚𑁂𑀬𑁆𑀬𑀧𑀺 𑀯𑀸 𑀪𑀺𑀓𑁆𑀔𑀼, 𑀉𑀫𑁆𑀫𑀼𑀚𑁆𑀚𑁂𑀬𑁆𑀬 𑀢𑀭𑁂𑀬𑁆𑀬 𑀯𑀸.

𑀧𑀬𑁄𑀕𑁂 ¶ 𑀘 𑀧𑀬𑁄𑀕𑁂 𑀘, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸;

𑀅𑀦𑁆𑀢𑁄𑀬𑁂𑀯𑁄𑀤𑀓𑁂 𑀢𑀲𑁆𑀲, 𑀦𑀺𑀫𑀼𑀚𑁆𑀚𑀺𑀢𑁆𑀯𑀸𑀦 𑀕𑀘𑁆𑀙𑀢𑁄.

𑀳𑀢𑁆𑀣𑀧𑀸𑀤𑀧𑀬𑁄𑀕𑁂𑀳𑀺, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂;

𑀳𑀢𑁆𑀣𑁂𑀳𑁂𑀯 𑀢𑀭𑀦𑁆𑀢𑀲𑁆𑀲, 𑀳𑀢𑁆𑀣𑀯𑀸𑀭𑁂𑀳𑀺 𑀓𑀸𑀭𑀬𑁂.

𑀬𑁂𑀦 𑀬𑁂𑀦 𑀧𑀦𑀗𑁆𑀕𑁂𑀦, 𑀪𑀺𑀓𑁆𑀔𑀼𑀦𑁄 𑀢𑀭𑀢𑁄 𑀚𑀮𑀁;

𑀢𑀲𑁆𑀲 𑀢𑀲𑁆𑀲 𑀧𑀬𑁄𑀕𑁂𑀦, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂.

𑀢𑀭𑀼𑀢𑁄 𑀢𑀻𑀭𑀢𑁄 𑀯𑀸𑀧𑀺, 𑀧𑀸𑀘𑀺𑀢𑁆𑀢𑀺 𑀧𑀢𑀢𑁄 𑀚𑀮𑁂;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀣𑁂𑀯 𑀢𑀺𑀓𑀤𑀼𑀓𑁆𑀓𑀝𑀁.

𑀧𑀸𑀚𑁂𑀦𑁆𑀢𑁄𑀧𑀺 𑀲𑀘𑁂 𑀦𑀸𑀯𑀁, 𑀅𑀭𑀺𑀢𑁆𑀢𑁂𑀦 𑀨𑀺𑀬𑁂𑀦 𑀯𑀸;

𑀉𑀲𑁆𑀲𑀸𑀭𑁂𑀦𑁆𑀢𑁄𑀧𑀺 𑀢𑀻𑀭𑁂 𑀯𑀸, 𑀦𑀸𑀯𑀁 𑀓𑀻𑀴𑀢𑀺 𑀤𑀼𑀓𑁆𑀓𑀝𑀁.

𑀳𑀢𑁆𑀣𑁂𑀦 𑀯𑀸𑀧𑀺 𑀧𑀸𑀤𑁂𑀦, 𑀓𑀝𑁆𑀞𑁂𑀦 𑀓𑀣𑀮𑀸𑀬 𑀯𑀸;

𑀉𑀤𑀓𑀁 𑀦𑀻𑀳𑀭𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀉𑀤𑀓𑀁 𑀓𑀜𑁆𑀚𑀺𑀓𑀁 𑀯𑀸𑀧𑀺, 𑀘𑀺𑀓𑁆𑀔𑀮𑁆𑀮𑀁 𑀯𑀸𑀧𑀺 𑀯𑀺𑀓𑁆𑀔𑀺𑀧𑀁;

𑀓𑀻𑀴𑀦𑁆𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀯𑀺𑀕𑀸𑀳𑀺𑀢𑁆𑀯𑀸 ¶ 𑀚𑀮𑀁 𑀓𑀺𑀘𑁆𑀘𑁂, 𑀲𑀢𑀺 𑀦𑀺𑀫𑁆𑀫𑀼𑀚𑁆𑀚𑀦𑀸𑀤𑀺𑀓𑀁;

𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀧𑀸𑀭𑀜𑁆𑀘 𑀕𑀘𑁆𑀙𑀢𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀅𑀦𑀦𑁆𑀢𑀭𑀲𑁆𑀲𑀺𑀫𑀲𑁆𑀲𑀸𑀧𑀺, 𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸.

𑀯𑀼𑀘𑁆𑀘𑀫𑀸𑀦𑁄 𑀲𑀘𑁂 𑀪𑀺𑀓𑁆𑀔𑀼, 𑀧𑀜𑁆𑀜𑀢𑁆𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀸;

𑀅𑀓𑀢𑁆𑀢𑀼𑀓𑀸𑀫𑀢𑀸𑀬𑀲𑁆𑀲, 𑀯𑀘𑀦𑀁 𑀥𑀫𑁆𑀫𑀫𑁂𑀯 𑀯𑀸.

𑀬𑁄 𑀅𑀲𑀺𑀓𑁆𑀔𑀺𑀢𑀼𑀓𑀸𑀫𑁄𑀯, 𑀦 𑀓𑀭𑁄𑀢𑀺 𑀧𑀦𑀸𑀤𑀭𑀁;

𑀢𑀲𑁆𑀲𑀸𑀦𑀸𑀤𑀭𑀺𑀬𑁂 𑀢𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀬𑁂.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀺𑀓𑀸𑀢𑀻𑀢𑁂𑀦 𑀲𑀢𑁆𑀣𑀼𑀦𑀸;

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑀸-𑀦𑀸𑀤𑀭𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀲𑀼𑀢𑁆𑀢𑁂𑀦𑁂𑀯𑀸𑀪𑀺𑀥𑀫𑁆𑀫𑁂𑀦, 𑀅𑀧𑀜𑁆𑀜𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀤𑀼𑀓𑁆𑀓𑀝𑀁 𑀲𑀸𑀫𑀡𑁂𑀭𑁂𑀦, 𑀯𑀼𑀢𑁆𑀢𑀲𑁆𑀲 𑀉𑀪𑀬𑁂𑀦𑀧𑀺.

‘‘𑀆𑀘𑀭𑀺𑀬𑀸𑀦𑀫𑀬𑀁 ¶ 𑀕𑀸𑀳𑁄, 𑀅𑀫𑁆𑀳𑀸𑀓𑀁 𑀢𑀼 𑀧𑀯𑁂𑀡𑀺𑀬𑀸;

𑀆𑀕𑀢𑁄’’𑀢𑀺 𑀪𑀡𑀦𑁆𑀢𑀲𑁆𑀲, 𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀏𑀢𑁆𑀣 𑀦𑁂𑀯 𑀕𑀳𑁂𑀢𑀩𑁆𑀩𑁄, 𑀕𑀸𑀭𑀬𑁆𑀳𑀸𑀘𑀭𑀺𑀬𑀼𑀕𑁆𑀕𑀳𑁄;

𑀑𑀫𑀲𑀯𑀸𑀤𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀪𑀬𑀲𑀜𑁆𑀚𑀦𑀦𑀢𑁆𑀣𑀸𑀬, 𑀭𑀽𑀧𑀸𑀤𑀺𑀁 𑀉𑀧𑀲𑀁𑀳𑀭𑁂;

𑀪𑀬𑀸𑀦𑀓𑀁 𑀓𑀣𑀁 𑀯𑀸𑀧𑀺, 𑀓𑀣𑁂𑀬𑁆𑀬 𑀧𑀭𑀲𑀦𑁆𑀢𑀺𑀓𑁂.

𑀤𑀺𑀲𑁆𑀯𑀸 𑀯𑀸 𑀧𑀦 𑀢𑀁 𑀲𑀼𑀢𑁆𑀯𑀸, 𑀫𑀸 𑀯𑀸 𑀪𑀸𑀬𑀢𑀼, 𑀪𑀸𑀬𑀢𑀼;

𑀇𑀢𑀭𑀲𑁆𑀲 𑀢𑀼 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀢𑀗𑁆𑀔𑀡𑁂.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 ¶ 𑀯𑀼𑀢𑁆𑀢𑀁, 𑀢𑀣𑁂𑀯 𑀢𑀺𑀓𑀤𑀼𑀓𑁆𑀓𑀝𑀁;

𑀲𑀸𑀫𑀡𑁂𑀭𑀁 𑀕𑀳𑀝𑁆𑀞𑀁 𑀯𑀸, 𑀪𑀺𑀁𑀲𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀦𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑀲𑁆𑀲, 𑀅𑀦𑀸𑀧𑀢𑁆𑀢𑀸𑀤𑀺𑀓𑀫𑁆𑀫𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀺 𑀲𑀩𑁆𑀩𑀫𑁆𑀧𑀺, 𑀅𑀦𑀦𑁆𑀢𑀭𑀲𑀫𑀁 𑀫𑀢𑀁.

𑀚𑁄𑀢𑀺𑀁 𑀢𑀧𑁆𑀧𑁂𑀢𑀼𑀓𑀸𑀫𑁄 𑀘𑁂, 𑀚𑀮𑀸𑀧𑁂𑀬𑁆𑀬 𑀚𑀮𑁂𑀬𑁆𑀬 𑀯𑀸;

𑀞𑀧𑁂𑀢𑁆𑀯𑀸 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺, 𑀢𑀣𑀸𑀭𑀽𑀧𑀁 𑀢𑀼 𑀧𑀘𑁆𑀘𑀬𑀁.

𑀲𑀬𑀁 𑀲𑀫𑀸𑀤𑀳𑀦𑁆𑀢𑀲𑁆𑀲, 𑀬𑀸𑀯 𑀚𑀸𑀮𑀸 𑀦 𑀚𑀸𑀬𑀢𑀺;

𑀢𑀸𑀯 𑀲𑀩𑁆𑀩𑀧𑀬𑁄𑀕𑁂𑀲𑀼, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀚𑀸𑀮𑀼𑀝𑁆𑀞𑀸𑀦𑁂 𑀧𑀦𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀚𑀸𑀮𑀸𑀧𑁂𑀦𑁆𑀢𑀲𑁆𑀲 𑀅𑀜𑁆𑀜𑁂𑀦, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑁄𑀢𑀺, 𑀲𑀜𑁆𑀜𑀺𑀲𑁆𑀲 𑀯𑀺𑀫𑀢𑀺𑀲𑁆𑀲 𑀯𑀸;

𑀅𑀮𑀸𑀢𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲, 𑀅𑀯𑀺𑀚𑁆𑀛𑀸𑀢𑀁 𑀢𑀼 𑀤𑀼𑀓𑁆𑀓𑀝𑀁.

𑀯𑀺𑀚𑁆𑀛𑀸𑀢𑀁 𑀢𑀼𑀚𑁆𑀚𑀮𑀦𑁆𑀢𑀲𑁆𑀲, 𑀬𑀣𑀸𑀯𑀢𑁆𑀣𑀼𑀓𑀢𑀸 𑀫𑀢𑀸;

𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲, 𑀓𑀢𑀁 𑀅𑀜𑁆𑀜𑁂𑀦 𑀯𑀸 𑀧𑀦.

𑀯𑀺𑀲𑀺𑀩𑁆𑀩𑁂𑀦𑁆𑀢𑀲𑁆𑀲 𑀅𑀗𑁆𑀕𑀸𑀭𑀁, 𑀧𑀤𑀻𑀧𑀼𑀚𑁆𑀚𑀸𑀮𑀦𑀸𑀤𑀺𑀓𑁂;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀅𑀧𑀼𑀡𑁆𑀡𑁂 ¶ 𑀅𑀤𑁆𑀥𑀫𑀸𑀲𑀲𑁆𑀫𑀺𑀁, 𑀤𑁂𑀲𑁂 𑀘𑁂 𑀫𑀚𑁆𑀛𑀺𑀫𑁂 𑀧𑀦;

‘‘𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀼𑀡𑁆𑀡𑀁 𑀯𑀸, 𑀫𑀢𑁆𑀢𑀺𑀓𑀁 𑀯𑀸𑀧𑀺 𑀕𑁄𑀫𑀬𑀁.

𑀅𑀪𑀺𑀲𑀗𑁆𑀔𑀭𑀢𑁄 𑀲𑀩𑁆𑀩-𑀧𑀬𑁄𑀕𑁂𑀲𑀼𑀧𑀺 𑀤𑀼𑀓𑁆𑀓𑀝𑀁;

𑀦𑁆𑀳𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑀽𑀦-𑀲𑀜𑁆𑀜𑀺𑀦𑁄 ¶ 𑀯𑀺𑀫𑀢𑀺𑀲𑁆𑀲 𑀯𑀸;

𑀤𑀼𑀓𑁆𑀓𑀝𑀁 𑀅𑀢𑀺𑀭𑁂𑀓𑀤𑁆𑀥- 𑀫𑀸𑀲𑁂 𑀘 𑀲𑀫𑀬𑁂𑀲𑀼 𑀘.

𑀦𑁆𑀳𑀸𑀬𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀦𑀤𑀻𑀧𑀸𑀭𑀫𑁆𑀧𑀺 𑀕𑀘𑁆𑀙𑀢𑁄;

𑀯𑀸𑀮𑀺𑀓𑀁 𑀉𑀓𑁆𑀓𑀺𑀭𑀺𑀢𑁆𑀯𑀸𑀦, 𑀓𑀢𑀸𑀯𑀸𑀝𑁂𑀲𑀼 𑀯𑀸 𑀢𑀣𑀸.

𑀧𑀘𑁆𑀘𑀦𑁆𑀢𑀺𑀫𑁂𑀧𑀺 𑀯𑀸 𑀤𑁂𑀲𑁂, 𑀲𑀩𑁆𑀩𑁂𑀲𑀁 𑀆𑀧𑀤𑀸𑀲𑀼𑀧𑀺;

𑀇𑀤𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀫𑀁.

𑀘𑀻𑀯𑀭𑀁 𑀬𑀁 𑀦𑀺𑀯𑀸𑀲𑁂𑀢𑀼𑀁, 𑀲𑀓𑁆𑀓𑀸 𑀧𑀸𑀭𑀼𑀧𑀺𑀢𑀼𑀫𑁆𑀧𑀺 𑀯𑀸;

𑀙𑀦𑁆𑀦𑀫𑀜𑁆𑀜𑀢𑀭𑀁 𑀪𑀺𑀓𑁆𑀔𑀼, 𑀭𑀚𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺.

𑀧𑀤𑁂𑀲𑁂 𑀓𑀁𑀲𑀦𑀻𑀮𑁂𑀦, 𑀧𑀢𑁆𑀢𑀦𑀻𑀮𑁂𑀦 𑀯𑀸 𑀧𑀦;

𑀬𑁂𑀦 𑀓𑁂𑀦𑀘𑀺 𑀓𑀸𑀴𑁂𑀦, 𑀓𑀤𑁆𑀤𑀫𑁂𑀦𑀧𑀺 𑀯𑀸 𑀢𑀣𑀸.

𑀫𑀗𑁆𑀕𑀼𑀮𑀲𑁆𑀲 𑀫𑀬𑀽𑀭𑀲𑁆𑀲, 𑀧𑀺𑀝𑁆𑀞𑀺𑀅𑀓𑁆𑀔𑀺𑀧𑁆𑀧𑀫𑀸𑀡𑀓𑀁;

𑀅𑀓𑀢𑁆𑀯𑀸 𑀓𑀧𑁆𑀧𑀺𑀬𑀁 𑀩𑀺𑀦𑁆𑀤𑀼𑀁, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄.

𑀧𑀸𑀴𑀺𑀓𑀡𑁆𑀡𑀺𑀓𑀓𑀧𑁆𑀧𑁄 𑀯𑀸, 𑀦 𑀘 𑀯𑀝𑁆𑀝𑀢𑀺 𑀓𑀢𑁆𑀣𑀘𑀺;

𑀏𑀓𑀁 𑀯𑀸𑀧𑀺 𑀅𑀦𑁂𑀓𑀁 𑀯𑀸, 𑀩𑀺𑀦𑁆𑀤𑀼 𑀯𑀝𑁆𑀝𑀢𑀺 𑀯𑀝𑁆𑀝𑀓𑀁.

𑀆𑀤𑀺𑀦𑁆𑀦𑁂𑀧𑀺 𑀅𑀦𑀸𑀤𑀺𑀦𑁆𑀦-𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀘;

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀓𑀧𑁆𑀧𑁂 𑀦𑀝𑁆𑀞𑁂𑀧𑀺 𑀯𑀸 𑀲𑀤𑁆𑀥𑀺𑀁, 𑀢𑁂𑀦 𑀲𑀁𑀲𑀺𑀩𑁆𑀩𑀺𑀢𑁂𑀲𑀼 𑀯𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀁.

𑀯𑀺𑀓𑀧𑁆𑀧𑀦𑀸 𑀤𑀼𑀯𑁂 𑀯𑀼𑀢𑁆𑀢𑀸, 𑀲𑀫𑁆𑀫𑀼𑀔𑀸𑀲𑀫𑁆𑀫𑀼𑀔𑀸𑀢𑀺𑀧𑀺;

𑀲𑀫𑁆𑀫𑀼𑀔𑀸𑀬 𑀯𑀺𑀓𑀧𑁆𑀧𑁂𑀦𑁆𑀢𑁄, 𑀪𑀺𑀓𑁆𑀔𑀼𑀲𑁆𑀲𑁂𑀓𑀲𑁆𑀲 𑀲𑀦𑁆𑀢𑀺𑀓𑁂.

𑀏𑀓𑀢𑁆𑀢𑀁 ¶ ¶ 𑀩𑀳𑀼𑀪𑀸𑀯𑀁 𑀯𑀸, 𑀤𑀽𑀭𑀲𑀦𑁆𑀢𑀺𑀓𑀢𑀫𑁆𑀧𑀺 𑀯𑀸;

𑀘𑀻𑀯𑀭𑀸𑀦𑀁 𑀢𑀼 𑀚𑀸𑀦𑀺𑀢𑁆𑀯𑀸, 𑀬𑀣𑀸𑀯𑀘𑀦𑀬𑁄𑀕𑀢𑁄.

‘‘𑀇𑀫𑀸𑀳𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁, 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀦𑀺𑀤𑁆𑀤𑀺𑀲𑁂;

𑀓𑀧𑁆𑀧𑀢𑁂𑀢𑁆𑀢𑀸𑀯𑀢𑀸 𑀓𑀸𑀫𑀁, 𑀦𑀺𑀥𑁂𑀢𑀼𑀁, 𑀦 𑀘 𑀓𑀧𑁆𑀧𑀢𑀺.

𑀧𑀭𑀺𑀪𑁄𑀕𑀸𑀤𑀺𑀓𑀁 𑀢𑁂𑀦, 𑀅𑀧𑀘𑁆𑀘𑀼𑀤𑁆𑀥𑀝𑀢𑁄 𑀧𑀦;

𑀢𑁂𑀦 𑀧𑀘𑁆𑀘𑀼𑀤𑁆𑀥𑀝𑁂𑀬𑁂𑀯, 𑀧𑀭𑀺𑀪𑁄𑀕𑀸𑀤𑀺 𑀯𑀝𑁆𑀝𑀢𑀺.

‘‘𑀲𑀦𑁆𑀢𑀓𑀁 𑀧𑀦 𑀫𑀬𑁆𑀳𑀁 𑀢𑁆𑀯𑀁, 𑀧𑀭𑀺𑀪𑀼𑀜𑁆𑀚 𑀧𑀭𑀺𑀘𑁆𑀘𑀚;

𑀬𑀣𑀸𑀧𑀘𑁆𑀘𑀬𑀁 𑀓𑀭𑁄𑀳𑀻’’𑀢𑀺, 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀝𑀁 𑀲𑀺𑀬𑀸.

𑀅𑀧𑀭𑀸 𑀲𑀫𑁆𑀫𑀼𑀔𑀸 𑀯𑀼𑀢𑁆𑀢𑀸, 𑀪𑀺𑀓𑁆𑀔𑀼𑀲𑁆𑀲𑁂𑀓𑀲𑁆𑀲 𑀲𑀦𑁆𑀢𑀺𑀓𑁂;

𑀬𑀲𑁆𑀲 𑀓𑀲𑁆𑀲𑀘𑀺 𑀦𑀸𑀫𑀁 𑀢𑀼, 𑀕𑀳𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀦𑀁.

‘‘𑀇𑀫𑀸𑀳𑀁 𑀘𑀻𑀯𑀭𑀁 𑀢𑀺𑀲𑁆𑀲- 𑀪𑀺𑀓𑁆𑀔𑀼𑀦𑁄, 𑀢𑀺𑀲𑁆𑀲𑀣𑁂𑀭𑀺𑀬𑀸;

𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀯𑀢𑁆𑀢𑀩𑁆𑀩𑀁 𑀧𑀼𑀦 𑀢𑁂𑀦𑀧𑀺.

‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀸 𑀢𑁆𑀯𑀁, 𑀢𑀲𑁆𑀲𑀸 𑀢𑀺𑀲𑁆𑀲𑀸𑀬 𑀣𑁂𑀭𑀺𑀬𑀸;

𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀸𑀳𑀺, 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀸 𑀢𑀣𑀸.

𑀢𑀢𑁄 𑀧𑀪𑀼𑀢𑀺 𑀲𑀩𑁆𑀩𑀫𑁆𑀧𑀺, 𑀧𑀭𑀺𑀪𑁄𑀕𑀸𑀤𑀺 𑀯𑀝𑁆𑀝𑀢𑀺;

𑀏𑀯𑀁 𑀧𑀭𑀫𑁆𑀫𑀼𑀔𑀸𑀬𑀸𑀧𑀺, 𑀯𑀢𑁆𑀢𑀩𑁆𑀩𑀁 𑀏𑀓𑀲𑀦𑁆𑀢𑀺𑀓𑁂.

‘‘𑀇𑀫𑀸𑀳𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁, 𑀯𑀺𑀓𑀧𑁆𑀧𑀢𑁆𑀣𑀸𑀬 𑀤𑀫𑁆𑀫𑀺’’𑀢𑀺;

𑀧𑀼𑀦 𑀢𑁂𑀦𑀧𑀺 𑀯𑀢𑁆𑀢𑀩𑁆𑀩𑀁, ‘‘𑀓𑁄 𑀢𑁂 𑀫𑀺𑀢𑁆𑀢𑁄’’𑀢𑀺 𑀪𑀺𑀓𑁆𑀔𑀼𑀦𑀸.

𑀇𑀢𑀭𑁂𑀦𑀧𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀺𑀲𑁆𑀲𑁄 𑀢𑀺𑀲𑁆𑀲𑀸’’𑀢𑀺 𑀯𑀸 𑀧𑀼𑀦;

𑀯𑀢𑁆𑀢𑀩𑁆𑀩𑀁 𑀪𑀺𑀓𑁆𑀔𑀼𑀦𑀸 𑀢𑁂𑀦, ‘‘𑀇𑀤𑀁 𑀢𑀺𑀲𑁆𑀲𑀲𑁆𑀲 𑀲𑀦𑁆𑀢𑀓𑀁.

𑀢𑀺𑀲𑁆𑀲𑀸𑀬 𑀣𑁂𑀭𑀺𑀬𑀸 𑀯𑀸 𑀢𑁆𑀯𑀁, 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸;

𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂, 𑀳𑁄𑀢𑀺 𑀧𑀘𑁆𑀘𑀼𑀤𑁆𑀥𑀝𑀁 𑀧𑀼𑀦.

𑀇𑀘𑁆𑀘𑁂𑀢𑀸𑀲𑀼 𑀧𑀦 𑀤𑁆𑀯𑀻𑀲𑀼, 𑀬𑀸𑀬 𑀓𑀸𑀬𑀘𑀺 𑀘𑀻𑀯𑀭𑀁;

𑀯𑀺𑀓𑀧𑁆𑀧𑁂𑀢𑁆𑀯𑀸 𑀲𑀥𑀫𑁆𑀫𑁂𑀲𑀼, 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀜𑁆𑀘𑀲𑀼.

𑀅𑀧𑀘𑁆𑀘𑀼𑀤𑁆𑀥𑀸𑀭𑀓𑀁 𑀯𑀸𑀧𑀺, 𑀅𑀯𑀺𑀲𑁆𑀲𑀸𑀲𑁂𑀦 𑀢𑀲𑁆𑀲 𑀯𑀸;

𑀬𑁂𑀦 𑀢𑀁 𑀯𑀺𑀦𑀬𑀁 𑀓𑀫𑁆𑀫𑀁, 𑀓𑀢𑀁 𑀧𑀦𑀺𑀥 𑀪𑀺𑀓𑁆𑀔𑀼𑀦𑀸.

𑀘𑀻𑀯𑀭𑀁 ¶ 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺 𑀪𑀺𑀓𑁆𑀔𑀼𑀦𑁄;

𑀢𑀜𑁆𑀘𑁂𑀯𑀸𑀥𑀺𑀝𑁆𑀞𑀳𑀦𑁆𑀢𑀲𑁆𑀲, 𑀯𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀧𑀘𑁆𑀘𑀼𑀤𑁆𑀥𑀸𑀭𑀓𑀯𑀢𑁆𑀣𑁂𑀲𑀼 ¶ , 𑀅𑀧𑀘𑁆𑀘𑀼𑀤𑁆𑀥𑀸𑀭𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀘𑁆𑀘𑀼𑀤𑁆𑀥𑀸𑀭𑀡𑀲𑀜𑁆𑀜𑀺𑀲𑁆𑀲, 𑀯𑀺𑀲𑁆𑀲𑀸𑀲𑀸 𑀧𑀭𑀺𑀪𑀼𑀜𑁆𑀚𑀢𑁄;

𑀅𑀦𑀸𑀧𑀢𑁆𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀣𑀺𑀦𑁂𑀦𑀸𑀤𑀺𑀦𑀸 𑀲𑀫𑀁.

𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢𑀁, 𑀘𑀻𑀯𑀭𑀁 𑀯𑀸𑀧𑀺 𑀢𑀸𑀤𑀺𑀲𑀁;

𑀢𑀣𑀸 𑀲𑀽𑀘𑀺𑀖𑀭𑀁 𑀓𑀸𑀬-𑀩𑀦𑁆𑀥𑀦𑀁 𑀯𑀸 𑀦𑀺𑀲𑀻𑀤𑀦𑀁.

𑀅𑀧𑀦𑁂𑀢𑁆𑀯𑀸 𑀦𑀺𑀥𑁂𑀦𑁆𑀢𑀲𑁆𑀲, 𑀳𑀲𑀸𑀧𑁂𑀓𑁆𑀔𑀲𑁆𑀲 𑀓𑁂𑀯𑀮𑀁;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀅𑀜𑁆𑀜𑀁, 𑀆𑀡𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑁂𑀦𑀸𑀧𑀦𑀺𑀳𑀺𑀢𑁂 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂;

𑀯𑀼𑀢𑁆𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦-𑀲𑀦𑁆𑀢𑀓𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀯𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺, 𑀧𑀢𑁆𑀢𑀸𑀤𑀻𑀦𑀺 𑀢𑀢𑁄 𑀧𑀦;

𑀅𑀜𑁆𑀜𑀁 𑀅𑀧𑀦𑀺𑀥𑁂𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀩𑁆𑀩𑁂𑀲𑁆𑀯𑀦𑀼𑀧𑀲𑀫𑁆𑀧𑀦𑁆𑀦-𑀲𑀦𑁆𑀢𑀓𑁂𑀲𑀼𑀧𑀺 𑀤𑀼𑀓𑁆𑀓𑀝𑀁;

𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀫𑀦𑀸𑀧𑀢𑁆𑀢𑀺, 𑀧𑀝𑀺𑀲𑀸𑀫𑀬𑀢𑁄 𑀧𑀦.

𑀢𑀣𑀸 ‘‘𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀤𑀲𑁆𑀲𑀸𑀫𑀻’’𑀢𑀺 𑀦𑀺𑀥𑁂𑀢𑀺 𑀘𑁂;

𑀅𑀯𑀺𑀳𑁂𑀲𑁂𑀢𑀼𑀓𑀸𑀫𑀲𑁆𑀲, 𑀅𑀓𑀻𑀴𑀲𑁆𑀲𑀸𑀤𑀺𑀓𑀫𑁆𑀫𑀺𑀦𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀤𑀼𑀢𑀺𑀬𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀇𑀤𑀁 𑀅𑀓𑀼𑀲𑀮𑁂𑀦𑁂𑀯, 𑀲𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀢𑀺𑀭𑀘𑁆𑀙𑀸𑀦𑀕𑀢𑀁 ¶ 𑀧𑀸𑀡𑀁, 𑀫𑀳𑀦𑁆𑀢𑀁 𑀔𑀼𑀤𑁆𑀤𑀓𑀫𑁆𑀧𑀺 𑀯𑀸;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀫𑀸𑀭𑁂𑀦𑁆𑀢𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀅𑀧𑁆𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀲𑁆𑀲, 𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣 𑀘;

𑀤𑀼𑀓𑁆𑀓𑀝𑀁 𑀢𑀼 𑀅𑀦𑀸𑀧𑀢𑁆𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀅𑀚𑀸𑀦𑀢𑁄.

𑀦 ¶ 𑀘 𑀫𑀸𑀭𑁂𑀢𑀼𑀓𑀸𑀫𑀲𑁆𑀲, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀢𑀢𑀺𑀬𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀲𑀧𑁆𑀧𑀸𑀡𑀓𑀁 𑀚𑀮𑀁 𑀚𑀸𑀦𑀁, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄;

𑀧𑀬𑁄𑀕𑀩𑀳𑀼𑀢𑀸𑀬𑀲𑁆𑀲, 𑀧𑀸𑀘𑀺𑀢𑁆𑀢𑀺𑀩𑀳𑀼𑀢𑀸 𑀲𑀺𑀬𑀸.

𑀏𑀓𑁂𑀦𑁂𑀯 𑀧𑀬𑁄𑀕𑁂𑀦, 𑀅𑀯𑀺𑀘𑁆𑀙𑀺𑀚𑁆𑀚 𑀲𑀘𑁂 𑀧𑀦;

𑀧𑀺𑀯𑀢𑁄 𑀧𑀢𑁆𑀢𑀧𑀽𑀭𑀫𑁆𑀧𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀢𑀸𑀤𑀺𑀲𑁂𑀦𑀼𑀤𑀓𑁂𑀦𑀲𑁆𑀲, 𑀆𑀯𑀺𑀜𑁆𑀙𑀺𑀢𑁆𑀯𑀸𑀦 𑀲𑀸𑀫𑀺𑀲𑀁;

𑀥𑁄𑀯𑀢𑁄 𑀧𑀦 𑀧𑀢𑁆𑀢𑀁 𑀯𑀸, 𑀦𑀺𑀩𑁆𑀩𑀸𑀧𑁂𑀦𑁆𑀢𑀲𑁆𑀲 𑀬𑀸𑀕𑀼𑀬𑁄.

𑀳𑀢𑁆𑀣𑁂𑀦 𑀢𑀁 𑀉𑀴𑀼𑀗𑁆𑀓𑁂𑀦, 𑀕𑀳𑁂𑀢𑁆𑀯𑀸 𑀦𑁆𑀳𑀸𑀬𑀢𑁄𑀧𑀺 𑀯𑀸;

𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀅𑀧𑁆𑀧𑀸𑀡𑀓𑁂𑀧𑀺 𑀲𑀧𑁆𑀧𑀸𑀡-𑀲𑀜𑁆𑀜𑀺𑀲𑁆𑀲 𑀉𑀪𑀬𑀢𑁆𑀣𑀧𑀺;

𑀯𑀺𑀫𑀢𑀺𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀲𑀧𑁆𑀧𑀸𑀡𑁂𑀧𑀺 𑀘 𑀅𑀧𑁆𑀧𑀸𑀡𑁂, 𑀅𑀧𑁆𑀧𑀸𑀡𑀫𑀺𑀢𑀺 𑀲𑀜𑁆𑀜𑀺𑀦𑁄;

𑀦 𑀤𑁄𑀲𑁄 ‘‘𑀧𑀭𑀺𑀪𑁄𑀕𑁂𑀦, 𑀦 𑀫𑀭𑀦𑁆𑀢𑀻’’𑀢𑀺 𑀚𑀸𑀦𑀢𑁄.

𑀧𑀢𑀦𑀁 𑀲𑀮𑀪𑀸𑀤𑀻𑀦𑀁, 𑀜𑀢𑁆𑀯𑀸 𑀲𑀼𑀤𑁆𑀥𑁂𑀦 𑀘𑁂𑀢𑀲𑀸;

𑀧𑀤𑀻𑀧𑀼𑀚𑁆𑀚𑀮𑀦𑀜𑁆𑀘𑁂𑀢𑁆𑀣, 𑀜𑀢𑁆𑀯𑀸 𑀲𑀧𑁆𑀧𑀸𑀡𑀪𑀸𑀯𑀢𑀁.

𑀪𑀼𑀜𑁆𑀚𑀢𑁄 𑀚𑀮𑀲𑀜𑁆𑀜𑀸𑀬, 𑀜𑁂𑀬𑁆𑀬𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑀸;

𑀲𑀺𑀜𑁆𑀘𑀦𑁂 𑀲𑀺𑀜𑁆𑀘𑀦𑀁 𑀯𑀼𑀢𑁆𑀢𑀁, 𑀧𑀭𑀺𑀪𑁄𑀕𑁂 𑀇𑀤𑀁 𑀧𑀦.

𑀅𑀬𑀫𑁂𑀯 ¶ 𑀯𑀺𑀲𑁂𑀲𑁄𑀢𑀺, 𑀢𑀲𑁆𑀲 𑀘𑁂𑀯 𑀧𑀦𑀲𑁆𑀲 𑀘;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀦𑀺𑀳𑀢𑀁 𑀢𑀼 𑀬𑀣𑀸𑀥𑀫𑁆𑀫𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀧𑀼𑀦;

𑀦𑀺𑀳𑀸𑀢𑀩𑁆𑀩𑀦𑁆𑀢𑀺 𑀧𑀸𑀘𑀺𑀢𑁆𑀢𑀺, 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

‘‘𑀅𑀓𑀢𑀁 𑀤𑀼𑀓𑁆𑀓𑀢𑀁 𑀓𑀫𑁆𑀫𑀁, 𑀓𑀸𑀢𑀩𑁆𑀩𑀁 𑀧𑀼𑀦𑀤𑁂𑀯𑀺’’𑀢𑀺;

𑀯𑀤𑀢𑀸 𑀧𑀦 𑀢𑀁 𑀓𑀫𑁆𑀫𑀁, 𑀉𑀘𑁆𑀘𑀸𑀮𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀲𑀘𑁂 ¶ 𑀯𑀺𑀧𑁆𑀧𑀓𑀢𑁂 𑀓𑀫𑁆𑀫𑁂, 𑀧𑀝𑀺𑀓𑁆𑀓𑁄𑀲𑀢𑀺 𑀢𑀁 𑀧𑀼𑀦;

𑀲𑀜𑁆𑀜𑀸𑀧𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀦 𑀓𑀸𑀢𑀩𑁆𑀩𑀁 𑀧𑀦𑀜𑁆𑀜𑀣𑀸.

𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

‘‘𑀅𑀥𑀫𑁆𑀫𑁂𑀦 𑀘 𑀯𑀕𑁆𑀕𑁂𑀦, 𑀦 𑀘 𑀓𑀫𑁆𑀫𑀸𑀭𑀳𑀲𑁆𑀲 𑀯𑀸;

𑀓𑀢’’𑀦𑁆𑀢𑀺 𑀚𑀸𑀦𑀢𑁄 𑀦𑀢𑁆𑀣𑀺, 𑀤𑁄𑀲𑁄 𑀉𑀓𑁆𑀓𑁄𑀝𑀦𑁂 𑀧𑀦.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀑𑀫𑀲𑀯𑀸𑀤𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀲𑀗𑁆𑀖𑀸𑀤𑀺𑀲𑁂𑀲𑀁 𑀤𑀼𑀝𑁆𑀞𑀼𑀮𑁆𑀮𑀁, 𑀆𑀧𑀢𑁆𑀢𑀺𑀁 𑀪𑀺𑀓𑁆𑀔𑀼𑀦𑁄 𑀧𑀦;

𑀜𑀢𑁆𑀯𑀸 𑀙𑀸𑀤𑀬𑀢𑁄 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀼𑀭𑀁 𑀢𑀲𑁆𑀲, 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼𑀓𑀁;

𑀆𑀭𑁄𑀘𑁂𑀢𑀺 𑀲𑀘𑀜𑁆𑀜𑀲𑁆𑀲, 𑀲𑁄𑀧𑀺 𑀅𑀜𑁆𑀜𑀲𑁆𑀲 𑀯𑀸𑀢𑀺 𑀳𑀺.

𑀏𑀯𑀁 𑀲𑀢𑀫𑁆𑀧𑀺 𑀪𑀺𑀓𑁆𑀔𑀽𑀦𑀁, 𑀲𑀳𑀲𑁆𑀲𑀫𑁆𑀧𑀺 𑀘 𑀢𑀸𑀯 𑀢𑀁;

𑀆𑀧𑀚𑁆𑀚𑀢𑁂𑀯 𑀆𑀧𑀢𑁆𑀢𑀺𑀁, 𑀬𑀸𑀯 𑀓𑁄𑀝𑀺 𑀦 𑀙𑀺𑀚𑁆𑀚𑀢𑀺.

𑀫𑀽𑀮𑁂𑀦𑀸𑀭𑁄𑀘𑀺𑀢𑀲𑁆𑀲𑁂𑀯 ¶ , 𑀤𑀼𑀢𑀺𑀬𑀲𑁆𑀲 𑀧𑀓𑀸𑀲𑀺𑀢𑁂;

𑀢𑀢𑀺𑀬𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀓𑁄𑀝𑀺 𑀙𑀺𑀦𑁆𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀝𑁆𑀞𑀼𑀮𑁆𑀮𑀸𑀬 𑀘 𑀤𑀼𑀝𑁆𑀞𑀮𑁆𑀮-𑀲𑀜𑁆𑀜𑀻 𑀧𑀸𑀘𑀺𑀢𑁆𑀢𑀺𑀬𑀁 𑀨𑀼𑀲𑁂;

𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀤𑀼𑀝𑁆𑀞𑀼𑀮𑁆𑀮𑀸𑀬 𑀲𑀩𑁆𑀩𑀢𑁆𑀣, 𑀦𑀺𑀤𑁆𑀤𑀺𑀝𑁆𑀞𑀁 𑀢𑀺𑀓𑀤𑀼𑀓𑁆𑀓𑀝𑀁;

𑀲𑀩𑁆𑀩𑀢𑁆𑀣𑀸𑀦𑀼𑀧𑀲𑀫𑁆𑀧𑀦𑁆𑀦-𑀯𑀸𑀭𑁂𑀲𑀼𑀧𑀺 𑀘 𑀤𑀼𑀓𑁆𑀓𑀝𑀁.

‘‘𑀲𑀗𑁆𑀖𑀲𑁆𑀲 𑀪𑁂𑀤𑀦𑀸𑀤𑀻𑀦𑀺, 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀧𑀦;

𑀦 𑀘 𑀙𑀸𑀤𑁂𑀢𑀼𑀓𑀸𑀫𑁄 𑀯𑀸, 𑀲𑀪𑀸𑀕𑀁 𑀯𑀸 𑀦 𑀧𑀲𑁆𑀲𑀢𑀺.

‘‘𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀓𑀫𑁆𑀫𑁂𑀦, 𑀲𑀓𑁂𑀦𑀸𑀬𑀦𑁆𑀢𑀺 𑀓𑀓𑁆𑀔𑀴𑁄’’;

𑀅𑀦𑀸𑀭𑁄𑀘𑁂𑀢𑀺 𑀘𑁂 𑀤𑁄𑀲𑁄, 𑀦𑀢𑁆𑀣𑀺 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀥𑀼𑀭𑀦𑀺𑀓𑁆𑀔𑁂𑀧𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀅𑀓𑁆𑀭𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀊𑀦𑀯𑀻𑀲𑀢𑀺𑀯𑀲𑁆𑀲𑀁 ¶ 𑀬𑁄, 𑀓𑀭𑁂𑀬𑁆𑀬 𑀉𑀧𑀲𑀫𑁆𑀧𑀤𑀁;

𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀲𑁂𑀲𑀸𑀦𑀁 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀉𑀧𑀲𑀫𑁆𑀧𑀸𑀤𑀺𑀢𑁄 𑀘𑁂𑀲𑁄, 𑀚𑀸𑀦𑀢𑀸 𑀯𑀸 𑀅𑀚𑀸𑀦𑀢𑀸;

𑀳𑁄𑀢𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑁄, 𑀓𑀸𑀢𑀩𑁆𑀩𑁄 𑀧𑀼𑀦𑀭𑁂𑀯 𑀲𑁄.

𑀤𑀲𑀯𑀲𑁆𑀲𑀘𑁆𑀘𑀬𑁂𑀦𑀲𑁆𑀲, 𑀉𑀧𑀚𑁆𑀛𑀸𑀬𑀲𑁆𑀲 𑀘𑁂 𑀲𑀢𑁄;

𑀉𑀧𑀲𑀫𑁆𑀧𑀸𑀤𑀦𑁂 𑀤𑁄𑀲𑁄, 𑀅𑀜𑁆𑀜𑁂𑀲𑀁 𑀦𑀢𑁆𑀣𑀺 𑀓𑁄𑀘𑀺𑀧𑀺.

𑀫𑀼𑀜𑁆𑀘𑀺𑀢𑁆𑀯𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁, 𑀕𑀡𑁄 𑀘𑁂 𑀧𑀭𑀺𑀧𑀽𑀭𑀢𑀺;

𑀳𑁄𑀦𑁆𑀢𑀺 𑀢𑁂 𑀲𑀽𑀧𑀲𑀫𑁆𑀧𑀦𑁆𑀦𑀸, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

𑀉𑀧𑀚𑁆𑀛𑀸𑀬𑁄 𑀲𑀘𑁂 𑀳𑀼𑀢𑁆𑀯𑀸, 𑀕𑀡𑀁 𑀆𑀘𑀭𑀺𑀬𑀫𑁆𑀧𑀺 𑀯𑀸;

𑀧𑀭𑀺𑀬𑁂𑀲𑀢𑀺 𑀧𑀢𑁆𑀢𑀁 𑀯𑀸, 𑀲𑀫𑁆𑀫𑀦𑁆𑀦𑀢𑀺 𑀘 𑀫𑀸𑀴𑀓𑀁.

‘‘𑀉𑀧𑀲𑀫𑁆𑀧𑀸𑀤𑀬𑀺𑀲𑁆𑀲𑀸𑀫𑀺’’ ¶ , 𑀇𑀢𑀺 𑀲𑀩𑁆𑀩𑁂𑀲𑀼 𑀢𑀲𑁆𑀲 𑀳𑀺;

𑀜𑀢𑁆𑀢𑀺𑀬𑀸 𑀘 𑀢𑀣𑀸 𑀤𑁆𑀯𑀻𑀲𑀼, 𑀓𑀫𑁆𑀫𑀯𑀸𑀘𑀸𑀲𑀼 𑀤𑀼𑀓𑁆𑀓𑀝𑀁.

𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀊𑀦𑀯𑀻𑀲𑀢𑀺𑀲𑀜𑁆𑀜𑀺𑀲𑁆𑀲, 𑀧𑀭𑀺𑀧𑀼𑀡𑁆𑀡𑁂𑀧𑀺 𑀧𑀼𑀕𑁆𑀕𑀮𑁂.

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀧𑀭𑀺𑀧𑀼𑀡𑁆𑀡𑁄𑀢𑀺 𑀲𑀜𑁆𑀜𑀺𑀲𑁆𑀲, 𑀉𑀪𑀬𑀢𑁆𑀣 𑀦 𑀤𑁄𑀲𑀢𑀸.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀧𑀺, 𑀆𑀤𑀺𑀓𑀫𑁆𑀫𑀺𑀓𑀪𑀺𑀓𑁆𑀔𑀼𑀦𑁄;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀣𑁂𑀬𑁆𑀬𑀲𑀢𑁆𑀣𑁂𑀦 𑀚𑀸𑀦𑀦𑁆𑀢𑁄, 𑀲𑀁𑀯𑀺𑀥𑀸𑀬 𑀲𑀘𑁂 𑀧𑀦;

𑀫𑀕𑁆𑀕𑀁 𑀕𑀘𑁆𑀙𑀢𑀺 𑀲𑀤𑁆𑀥𑀺𑀁 𑀬𑁄, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀕𑀫𑀦𑁂 𑀲𑀁𑀯𑀺𑀥𑀸𑀦𑁂 𑀘, 𑀯𑀢𑁆𑀢𑀩𑁆𑀩𑁄 𑀬𑁄 𑀯𑀺𑀦𑀺𑀘𑁆𑀙𑀬𑁄;

𑀲𑁄 𑀘 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑀲𑁆𑀫𑀺𑀁, 𑀯𑀼𑀢𑁆𑀢𑀢𑁆𑀢𑀸 𑀦 𑀘 𑀉𑀤𑁆𑀥𑀝𑁄.

𑀫𑀕𑁆𑀕𑀸𑀝𑀯𑀺𑀯𑀺𑀲𑀗𑁆𑀓𑁂𑀢𑁂, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀢𑀼;

𑀢𑁂𑀲𑁆𑀯𑀲𑀁𑀯𑀺𑀤𑀳𑀦𑁆𑀢𑁂𑀲𑀼, 𑀲𑀬𑀁 𑀯𑀺𑀤𑀳𑀢𑁄𑀧𑀺 𑀘.

𑀢𑀣𑁂𑀯𑀸𑀣𑁂𑀬𑁆𑀬𑀲𑀢𑁆𑀣𑁂𑀧𑀺, 𑀣𑁂𑀬𑁆𑀬𑀲𑀢𑁆𑀣𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀣𑁂𑀬𑁆𑀬𑀲𑀢𑁆𑀣𑀲𑀜𑁆𑀜𑀺𑀲𑁆𑀲 ¶ , 𑀅𑀲𑀁𑀯𑀺𑀤𑀳𑀢𑁄𑀧𑀺 𑀘;

𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺, 𑀯𑀺𑀲𑀗𑁆𑀓𑁂𑀢𑁂 𑀘 𑀓𑀸𑀮𑀺𑀓𑁂.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀣𑀺𑀢𑀁 𑀓𑀸𑀬𑀘𑀺𑀢𑁆𑀢𑀢𑁄;

𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀳𑁄𑀢𑀺 ¶ 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀺𑀥𑀸𑀦𑁂𑀦 𑀲𑀢𑁆𑀢𑀫𑀁;

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀢𑀼𑀮𑁆𑀬𑀁, 𑀯𑀺𑀲𑁂𑀲𑁄 𑀦𑀢𑁆𑀣𑀺 𑀓𑁄𑀘𑀺𑀧𑀺.

𑀓𑀫𑁆𑀫𑀁 𑀓𑀺𑀮𑁂𑀲𑁄 𑀧𑀸𑀓𑁄 𑀘, 𑀉𑀧𑀯𑀸𑀤𑁄 𑀅𑀢𑀺𑀓𑁆𑀓𑀫𑁄;

𑀅𑀦𑁆𑀢𑀭𑀸𑀬𑀓𑀭𑀸 𑀏𑀢𑁂, 𑀧𑀜𑁆𑀘 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

‘‘𑀅𑀦𑀦𑁆𑀢𑀭𑀸𑀬𑀺𑀓𑀸 𑀏𑀢𑁂, 𑀬𑀣𑀸 𑀳𑁄𑀦𑁆𑀢𑀺 𑀢𑀣𑀸 𑀅𑀳𑀁;

𑀤𑁂𑀲𑀺𑀢𑀁 𑀫𑀼𑀦𑀺𑀦𑀸 𑀥𑀫𑁆𑀫-𑀫𑀸𑀚𑀸𑀦𑀸𑀫𑀻’’𑀢𑀺 𑀬𑁄 𑀯𑀤𑁂.

𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀳𑀺 𑀯𑀢𑁆𑀢𑀩𑁆𑀩𑁄, 𑀬𑁂 𑀧𑀲𑁆𑀲𑀦𑁆𑀢𑀺 𑀲𑀼𑀡𑀦𑁆𑀢𑀺 𑀘;

‘‘𑀫𑀸 𑀳𑁂𑀯𑀁 𑀅𑀯𑀘𑀸𑀬𑀲𑁆𑀫𑀸’’, 𑀇𑀢𑀺 𑀪𑀺𑀓𑁆𑀔𑀽𑀳𑀺 𑀲𑁄 𑀧𑀦.

𑀤𑀼𑀓𑁆𑀓𑀝𑀁 𑀅𑀯𑀤𑀦𑁆𑀢𑀲𑁆𑀲, 𑀢𑀁 𑀅𑀦𑀺𑀲𑁆𑀲𑀚𑀢𑁄𑀧𑀺 𑀘;

𑀜𑀢𑁆𑀢𑀺𑀬𑀸 𑀘 𑀢𑀣𑀸 𑀤𑁆𑀯𑀻𑀳𑀺, 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀁.

𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀅𑀥𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀦𑀸𑀧𑀢𑁆𑀢𑀸𑀓𑀢𑀓𑀫𑁆𑀫𑀲𑁆𑀲, 𑀧𑀝𑀺𑀦𑀺𑀲𑁆𑀲𑀚𑀢𑁄𑀧𑀺 𑀘;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀯𑀼𑀢𑁆𑀢𑀸 𑀲𑀫𑀦𑀼𑀪𑀸𑀲𑀦𑁂

𑀜𑀢𑁆𑀯𑀸𑀓𑀢𑀸𑀦𑀼𑀥𑀫𑁆𑀫𑁂𑀦, 𑀢𑀣𑀸𑀯𑀸𑀤𑀺𑀓𑀪𑀺𑀓𑁆𑀔𑀼𑀦𑀸;

𑀲𑀁𑀯𑀲𑁂𑀬𑁆𑀬 𑀘 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺 𑀲𑀳 𑀲𑁂𑀬𑁆𑀬 𑀯𑀸.

𑀉𑀧𑁄𑀲𑀣𑀸𑀤𑀺𑀓𑀁 𑀓𑀫𑁆𑀫𑀁, 𑀓𑀭𑁄𑀢𑁄 𑀲𑀳 𑀢𑁂𑀦 𑀳𑀺;

𑀓𑀫𑁆𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀏𑀓𑁂𑀦𑁂𑀯 ¶ 𑀧𑀬𑁄𑀕𑁂𑀦, 𑀕𑀡𑁆𑀳𑀢𑁄 𑀆𑀫𑀺𑀲𑀁 𑀩𑀳𑀼𑀁;

𑀤𑀤𑀢𑁄𑀧𑀺 𑀢𑀣𑀸 𑀏𑀓𑀁, 𑀩𑀳𑀽𑀦𑀺 𑀘 𑀩𑀳𑀽𑀲𑁆𑀯𑀧𑀺.

𑀉𑀓𑁆𑀔𑀺𑀢𑁆𑀢𑀓𑁂 ¶ 𑀦𑀺𑀧𑀦𑁆𑀦𑀲𑁆𑀫𑀺𑀁, 𑀇𑀢𑀭𑁄 𑀲𑁂𑀢𑀺 𑀘𑁂 𑀧𑀦;

𑀇𑀢𑀭𑀲𑁆𑀫𑀺𑀁 𑀦𑀺𑀧𑀦𑁆𑀦𑁂 𑀯𑀸, 𑀧𑀭𑁄 𑀲𑁂𑀢𑀺 𑀉𑀪𑁄𑀧𑀺 𑀯𑀸.

𑀦𑀺𑀧𑀚𑁆𑀚𑀦𑀧𑀬𑁄𑀕𑀸𑀦𑀁, 𑀯𑀲𑁂𑀦𑀸𑀧𑀢𑁆𑀢𑀺𑀬𑁄 𑀲𑀺𑀬𑀼𑀁;

𑀏𑀓𑀦𑀸𑀦𑀽𑀧𑀘𑀸𑀭𑁂𑀲𑀼, 𑀏𑀓𑀘𑁆𑀙𑀦𑁆𑀦𑁂 𑀯𑀺𑀦𑀺𑀘𑁆𑀙𑀬𑁄.

𑀅𑀦𑀼𑀓𑁆𑀔𑀺𑀢𑁆𑀢𑁂𑀧𑀺 𑀉𑀓𑁆𑀔𑀺𑀢𑁆𑀢-𑀲𑀜𑁆𑀜𑀺𑀦𑁄 𑀧𑀦 𑀪𑀺𑀓𑁆𑀔𑀼𑀦𑁄;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀦𑀸𑀧𑀢𑁆𑀢𑀼𑀪𑀬𑀢𑁆𑀣𑀸𑀧𑀺, 𑀅𑀦𑀼𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀺𑀦𑁄;

𑀦𑀺𑀲𑁆𑀲𑀝𑁆𑀞𑁄𑀢𑀺 𑀘 𑀢𑀁 𑀤𑀺𑀝𑁆𑀞𑀺𑀁, 𑀲𑀜𑁆𑀜𑀺𑀲𑁆𑀲𑁄𑀲𑀸𑀭𑀺𑀢𑁄𑀢𑀺 𑀘.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀓𑀁;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀢𑀣𑀸 𑀯𑀺𑀦𑀸𑀲𑀺𑀢𑀁 𑀚𑀸𑀦𑀁, 𑀉𑀧𑀮𑀸𑀧𑁂𑀬𑁆𑀬 𑀢𑁂𑀦 𑀯𑀸;

𑀉𑀧𑀝𑁆𑀞𑀸𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺, 𑀲𑀁𑀪𑀼𑀜𑁆𑀚𑁂𑀬𑁆𑀬 𑀯𑀲𑁂𑀬𑁆𑀬 𑀯𑀸.

𑀲𑀁𑀯𑀸𑀲𑁂𑀦 𑀘 𑀮𑀺𑀗𑁆𑀕𑁂𑀦, 𑀤𑀡𑁆𑀟𑀓𑀫𑁆𑀫𑁂𑀦 𑀦𑀸𑀲𑀦𑀸;

𑀢𑀺𑀲𑁆𑀲𑁄 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀸, 𑀤𑀡𑁆𑀟𑀓𑀫𑁆𑀫𑁂𑀦 𑀦𑀸𑀲𑀦𑀸.

𑀲𑀫𑁆𑀪𑁄𑀕𑀸 𑀲𑀳𑀲𑁂𑀬𑁆𑀬𑀸 𑀘, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸;

𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀭𑀺𑀝𑁆𑀞𑁂𑀦 𑀲𑀫𑀸 𑀫𑀢𑀸;

𑀦 𑀳𑁂𑀢𑁆𑀣 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀺𑀤𑀁.

𑀯𑀼𑀘𑁆𑀘𑀫𑀸𑀦𑁄 ¶ 𑀳𑀺 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀧𑀤𑁂𑀦 𑀬𑁄;

‘‘𑀲𑀺𑀓𑁆𑀔𑀸𑀧𑀤𑁂 𑀧𑀦𑁂𑀢𑀲𑁆𑀫𑀺𑀁, 𑀦 𑀲𑀺𑀓𑁆𑀔𑀺𑀲𑁆𑀲𑀸𑀫𑀺 𑀢𑀸𑀯𑀳𑀁.

𑀬𑀸𑀯 ¶ 𑀦𑀸𑀜𑁆𑀜𑀁 𑀯𑀺𑀬𑀢𑁆𑀢𑀜𑁆𑀘, 𑀧𑀓𑀢𑀜𑁆𑀜𑀼𑀁 𑀩𑀳𑀼𑀲𑁆𑀲𑀼𑀢𑀁;

𑀧𑀼𑀘𑁆𑀙𑀸𑀫𑀻’’𑀢𑀺 𑀪𑀡𑀦𑁆𑀢𑀲𑁆𑀲, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀲𑀢𑁆𑀣𑀼𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑁂, 𑀤𑀻𑀧𑀺𑀢𑀁 𑀢𑀺𑀓𑀤𑀼𑀓𑁆𑀓𑀝𑀁;

𑀦 𑀲𑀮𑁆𑀮𑁂𑀔𑀸𑀬𑀺𑀤𑀁 𑀳𑁄𑀢𑀺, 𑀯𑀼𑀘𑁆𑀘𑀫𑀸𑀦𑀲𑁆𑀲𑀼𑀪𑁄𑀳𑀺𑀧𑀺.

𑀅𑀧𑀜𑁆𑀜𑀢𑁆𑀢𑁂𑀦 𑀢𑀲𑁆𑀲𑁂𑀯𑀁, 𑀯𑀤𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, ‘‘𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀲𑀢𑁄.

𑀉𑀤𑁆𑀤𑀺𑀝𑁆𑀞𑁂𑀳𑀺 𑀓𑀺𑀫𑁂𑀢𑁂𑀳𑀺, 𑀓𑀼𑀓𑁆𑀓𑀼𑀘𑁆𑀘𑀸𑀤𑀺𑀦𑀺𑀤𑀸𑀦𑀢𑁄;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀲𑀺𑀓𑁆𑀔𑀸𑀧𑀤𑀯𑀺𑀯𑀡𑁆𑀡𑀦𑁂.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀣𑁂𑀯 𑀢𑀺𑀓𑀤𑀼𑀓𑁆𑀓𑀝𑀁;

𑀯𑀺𑀯𑀡𑁆𑀡𑁂𑀦𑀼𑀧𑀲𑀫𑁆𑀧𑀦𑁆𑀦-𑀲𑀦𑁆𑀢𑀺𑀓𑁂 𑀢𑀁 𑀲𑀘𑁂 𑀧𑀦.

𑀤𑀼𑀓𑁆𑀓𑀝𑀁 𑀧𑀦𑀼𑀪𑀺𑀦𑁆𑀦𑀫𑁆𑀧𑀺, 𑀅𑀜𑁆𑀜𑀥𑀫𑁆𑀫𑀯𑀺𑀯𑀡𑁆𑀡𑀦𑁂;

𑀦𑀯𑀺𑀯𑀡𑁆𑀡𑁂𑀢𑀼𑀓𑀸𑀫𑀲𑁆𑀲, ‘‘𑀲𑀼𑀢𑁆𑀢𑀦𑁆𑀢𑀁 𑀧𑀭𑀺𑀬𑀸𑀧𑀼𑀡.

𑀯𑀺𑀦𑀬𑀁 𑀧𑀦 𑀧𑀘𑁆𑀙𑀸𑀧𑀺, 𑀳𑀦𑁆𑀤 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀲𑀺’’;

𑀇𑀘𑁆𑀘𑁂𑀯𑀁 𑀢𑀼 𑀯𑀤𑀦𑁆𑀢𑀲𑁆𑀲, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀅𑀦𑀦𑁆𑀢𑀭𑀲𑁆𑀲𑀺𑀫𑀲𑁆𑀲𑀸𑀧𑀺, 𑀑𑀫𑀲𑀯𑀸𑀤𑀲𑀸𑀤𑀺𑀲𑀸.

𑀅𑀜𑁆𑀜𑀸𑀡𑁂𑀦 𑀧𑀦𑀸𑀧𑀢𑁆𑀢𑀺, 𑀫𑁄𑀓𑁆𑀔𑁄 𑀦𑁂𑀯𑀲𑁆𑀲 𑀯𑀺𑀚𑁆𑀚𑀢𑀺;

𑀓𑀸𑀭𑁂𑀢𑀩𑁆𑀩𑁄 𑀢𑀣𑀸 𑀪𑀺𑀓𑁆𑀔𑀼, 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄 𑀧𑀦.

𑀢𑀲𑁆𑀲𑀸𑀭𑁄𑀧𑀦𑀺𑀬𑁄 ¶ 𑀫𑁄𑀳𑁄, 𑀉𑀢𑁆𑀢𑀭𑀺𑀫𑁆𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄;

𑀤𑀼𑀢𑀺𑀬𑁂𑀦𑁂𑀯 𑀓𑀫𑁆𑀫𑁂𑀦, 𑀦𑀺𑀦𑁆𑀤𑀺𑀢𑁆𑀯𑀸 𑀢𑀜𑁆𑀳𑀺 𑀧𑀼𑀕𑁆𑀕𑀮𑀁.

𑀏𑀯𑀁 𑀆𑀭𑁄𑀧𑀺𑀢𑁂 𑀫𑁄𑀳𑁂, 𑀬𑀤𑀺 𑀫𑁄𑀳𑁂𑀢𑀺 𑀬𑁄 𑀧𑀦;

𑀢𑀲𑁆𑀫𑀺𑀁 𑀫𑁄𑀳𑀦𑀓𑁂 𑀯𑀼𑀢𑁆𑀢𑀸, 𑀧𑀸𑀘𑀺𑀢𑁆𑀢𑀺 𑀧𑀦 𑀧𑀼𑀕𑁆𑀕𑀮𑁂.

𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀤𑀻𑀧𑀺𑀢𑀁 𑀢𑀺𑀓𑀤𑀼𑀓𑁆𑀓𑀝𑀁;

𑀢𑀣𑀸𑀦𑀸𑀭𑁄𑀧𑀺𑀢𑁂 𑀫𑁄𑀳𑁂, 𑀤𑀼𑀓𑁆𑀓𑀝𑀁 𑀧𑀭𑀺𑀓𑀺𑀢𑁆𑀢𑀺𑀢𑀁.

𑀦 ¶ 𑀘 𑀫𑁄𑀳𑁂𑀢𑀼𑀓𑀸𑀫𑀲𑁆𑀲, 𑀯𑀺𑀢𑁆𑀣𑀸𑀭𑁂𑀦𑀸𑀲𑀼𑀢𑀲𑁆𑀲𑀧𑀺;

𑀊𑀦𑀓𑁂 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀸, 𑀯𑀺𑀢𑁆𑀣𑀸𑀭𑁂𑀦𑀸𑀲𑀼𑀢𑀲𑁆𑀲 𑀘.

𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑀓𑀼𑀤𑁆𑀥𑁄 𑀤𑁂𑀢𑀺 𑀧𑀳𑀸𑀭𑀁 𑀘𑁂, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸;

𑀲𑀫𑁆𑀧𑀳𑀭𑀺𑀢𑀼𑀓𑀸𑀫𑁂𑀦, 𑀧𑀳𑀸𑀭𑁂 𑀪𑀺𑀓𑁆𑀔𑀼𑀦𑁄 𑀧𑀦.

𑀤𑀺𑀦𑁆𑀦𑁂 𑀪𑀺𑀚𑁆𑀚𑀢𑀼 𑀲𑀻𑀲𑀁 𑀯𑀸, 𑀧𑀸𑀤𑁄 𑀯𑀸 𑀧𑀭𑀺𑀪𑀺𑀚𑁆𑀚𑀢𑀼;

𑀲𑁄 𑀘𑁂 𑀫𑀭𑀢𑀼 𑀯𑀸, 𑀫𑀸 𑀯𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀯𑀺𑀭𑀽𑀧𑀓𑀭𑀡𑀸𑀧𑁂𑀓𑁆𑀔𑁄, ‘‘𑀇𑀘𑁆𑀘𑀸𑀬𑀁 𑀦 𑀯𑀺𑀭𑁄𑀘𑀢𑀺’’;

𑀓𑀡𑁆𑀡𑀁 𑀯𑀸 𑀢𑀲𑁆𑀲 𑀦𑀸𑀲𑀁 𑀯𑀸, 𑀬𑀤𑀺 𑀙𑀺𑀦𑁆𑀤𑀢𑀺 𑀤𑀼𑀓𑁆𑀓𑀝𑀁.

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑁂, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲𑀸𑀧𑀺, 𑀧𑀳𑀸𑀭𑀁 𑀤𑁂𑀢𑀺 𑀤𑀼𑀓𑁆𑀓𑀝𑀁.

𑀲𑀘𑁂 𑀧𑀳𑀭𑀢𑀺𑀢𑁆𑀣𑀺𑀜𑁆𑀘, 𑀪𑀺𑀓𑁆𑀔𑀼 𑀭𑀢𑁆𑀢𑁂𑀦 𑀘𑁂𑀢𑀲𑀸;

𑀕𑀭𑀼𑀓𑀸 𑀢𑀲𑁆𑀲 𑀆𑀧𑀢𑁆𑀢𑀺, 𑀯𑀺𑀦𑀺𑀤𑁆𑀤𑀺𑀝𑁆𑀞𑀸 𑀫𑀳𑁂𑀲𑀺𑀦𑀸.

𑀧𑀳𑀸𑀭𑀁 𑀤𑁂𑀢𑀺 𑀫𑁄𑀓𑁆𑀔𑀸𑀥𑀺-𑀧𑁆𑀧𑀸𑀬𑁄 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀺;

𑀓𑀸𑀬𑁂𑀦 𑀓𑀸𑀬𑀩𑀤𑁆𑀥𑁂𑀦, 𑀢𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸.

𑀧𑀲𑁆𑀲𑀺𑀢𑁆𑀯𑀸 ¶ 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀘𑁄𑀭𑀁 𑀧𑀘𑁆𑀘𑀢𑁆𑀣𑀺𑀓𑀫𑁆𑀧𑀺 𑀯𑀸;

𑀳𑁂𑀞𑁂𑀢𑀼𑀓𑀸𑀫𑀫𑀸𑀬𑀦𑁆𑀢𑀁, ‘‘𑀫𑀸 𑀇𑀥𑀸𑀕𑀘𑁆𑀙𑀼𑀧𑀸𑀲𑀓’’.

𑀇𑀢𑀺 𑀯𑀢𑁆𑀯𑀸 𑀧𑀦𑀸𑀬𑀦𑁆𑀢𑀁, ‘‘𑀕𑀘𑁆𑀙 𑀭𑁂’’𑀢𑀺 𑀘 𑀫𑀼𑀕𑁆𑀕𑀭𑀁;

𑀲𑀢𑁆𑀣𑀁 𑀯𑀸𑀧𑀺 𑀕𑀳𑁂𑀢𑁆𑀯𑀸 𑀯𑀸, 𑀧𑀳𑀭𑀺𑀢𑁆𑀯𑀸 𑀢𑀼 𑀬𑀸𑀢𑀺 𑀘𑁂.

𑀅𑀦𑀸𑀧𑀢𑁆𑀢𑀺 𑀲𑀘𑁂 𑀢𑁂𑀦, 𑀧𑀳𑀸𑀭𑁂𑀦 𑀫𑀢𑁂𑀧𑀺 𑀘;

𑀏𑀲𑁂𑀯 𑀘 𑀦𑀬𑁄 𑀯𑀼𑀢𑁆𑀢𑁄, 𑀥𑀼𑀢𑁆𑀢𑀯𑀸𑀴𑀫𑀺𑀕𑁂𑀲𑀼𑀧𑀺.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑁂 𑀘 𑀢𑀺𑀓𑀤𑀼𑀓𑁆𑀓𑀝𑀁;

𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀲𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀓𑀸𑀬𑀁 ¶ 𑀯𑀸 𑀓𑀸𑀬𑀩𑀤𑁆𑀥𑀁 𑀯𑀸, 𑀉𑀘𑁆𑀘𑀸𑀭𑁂𑀬𑁆𑀬 𑀲𑀘𑁂 𑀧𑀦;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀢𑀲𑁆𑀲𑀼𑀕𑁆𑀕𑀺𑀭𑀡𑀧𑀘𑁆𑀘𑀬𑀸.

𑀉𑀕𑁆𑀕𑀺𑀭𑀺𑀢𑁆𑀯𑀸 𑀯𑀺𑀭𑀤𑁆𑀥𑁄 𑀲𑁄, 𑀧𑀳𑀸𑀭𑀁 𑀤𑁂𑀢𑀺 𑀘𑁂 𑀧𑀦;

𑀅𑀲𑀫𑁆𑀧𑀳𑀭𑀺𑀢𑀼𑀓𑀸𑀫𑁂𑀦, 𑀤𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀲𑀘𑁂 𑀢𑁂𑀦 𑀧𑀳𑀸𑀭𑁂𑀦, 𑀧𑀳𑀝𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄;

𑀳𑀢𑁆𑀣𑀸𑀤𑀻𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺, 𑀅𑀗𑁆𑀕𑀁 𑀪𑀺𑀚𑁆𑀚𑀢𑀺 𑀤𑀼𑀓𑁆𑀓𑀝𑀁.

𑀲𑁂𑀲𑁄 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢-𑀦𑀬𑁂𑀦 𑀯𑀺𑀦𑀬𑀜𑁆𑀜𑀼𑀦𑀸;

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺-𑀲𑁂𑀲𑁂𑀦 𑀧𑀦 𑀪𑀺𑀓𑁆𑀔𑀼 𑀬𑁄;

𑀘𑁄𑀤𑀸𑀧𑁂𑀬𑁆𑀬𑀧𑀺 𑀘𑁄𑀤𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀢𑀢𑁆𑀣, 𑀤𑀺𑀝𑁆𑀞𑀸𑀘𑀸𑀭𑀯𑀺𑀧𑀢𑁆𑀢𑀺𑀬𑀸;

𑀘𑁄𑀤𑀢𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺, 𑀲𑁂𑀲𑁂 𑀘 𑀢𑀺𑀓𑀤𑀼𑀓𑁆𑀓𑀝𑀁.

𑀢𑀣𑀸𑀲𑀜𑁆𑀜𑀺𑀲𑁆𑀲𑀦𑀸𑀧𑀢𑁆𑀢𑀺 ¶ , 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀑𑀫𑀲𑀯𑀸𑀤𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀲𑀜𑁆𑀘𑀺𑀘𑁆𑀘 𑀧𑀦 𑀓𑀼𑀓𑁆𑀓𑀼𑀘𑁆𑀘𑀁, 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀢𑁆𑀯𑀁, 𑀫𑀜𑁆𑀜𑁂’’ 𑀇𑀘𑁆𑀘𑁂𑀯𑀫𑀸𑀤𑀺𑀦𑀸.

𑀳𑁄𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬, 𑀧𑀸𑀘𑀺𑀢𑁆𑀢𑀺 𑀧𑀦 𑀪𑀺𑀓𑁆𑀔𑀼𑀦𑁄;

𑀢𑀣𑀸𑀭𑀽𑀧𑁂 𑀧𑀦𑀜𑁆𑀜𑀲𑁆𑀫𑀺𑀁, 𑀲𑀘𑁂 𑀅𑀲𑀢𑀺 𑀧𑀘𑁆𑀘𑀬𑁂.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑁂 𑀘 𑀢𑀺𑀓𑀤𑀼𑀓𑁆𑀓𑀝𑀁;

𑀦𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀲𑁆𑀲, 𑀓𑀼𑀓𑁆𑀓𑀼𑀘𑁆𑀘𑀁 𑀦𑀢𑁆𑀣𑀺 𑀯𑀚𑁆𑀚𑀢𑀸.

‘‘𑀳𑀺𑀢𑁂𑀲𑀺𑀢𑀸𑀬𑀳𑀁 𑀫𑀜𑁆𑀜𑁂, 𑀦𑀺𑀲𑀺𑀦𑁆𑀦𑀁 𑀇𑀢𑁆𑀣𑀺𑀬𑀸 𑀲𑀳;

𑀯𑀺𑀓𑀸𑀮𑁂 𑀘 𑀢𑀬𑀸 𑀪𑀼𑀢𑁆𑀢𑀁, 𑀫𑀸 𑀏𑀯’’𑀦𑁆𑀢𑀺 𑀘 𑀪𑀸𑀲𑀢𑁄.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑀲𑀘𑁂 ¶ 𑀪𑀡𑁆𑀟𑀦𑀚𑀸𑀢𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀧𑀦 𑀪𑀺𑀓𑁆𑀔𑀼 𑀬𑁄;

𑀢𑀺𑀝𑁆𑀞𑁂𑀬𑁆𑀬𑀼𑀧𑀲𑁆𑀲𑀼𑀢𑀺𑀁 𑀲𑁄𑀢𑀼𑀁, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

‘‘𑀬𑀁 𑀇𑀫𑁂 𑀢𑀼 𑀪𑀡𑀺𑀲𑁆𑀲𑀦𑁆𑀢𑀺, 𑀢𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑁄;

𑀘𑁄𑀤𑁂𑀢𑀼𑀓𑀸𑀫𑀢𑀸𑀬𑀲𑁆𑀲, 𑀤𑀼𑀓𑁆𑀓𑀝𑀁 𑀢𑀼 𑀧𑀤𑁂 𑀧𑀤𑁂.

𑀧𑀼𑀭𑀢𑁄 𑀕𑀘𑁆𑀙𑀢𑁄 𑀲𑁄𑀢𑀼𑀁, 𑀑𑀳𑀻𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀕𑀘𑁆𑀙𑀢𑁄 𑀢𑀼𑀭𑀺𑀢𑀁 𑀯𑀸𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀞𑀺𑀢𑁄𑀓𑀸𑀲𑀁 𑀧𑀦𑀸𑀕𑀦𑁆𑀢𑁆𑀯𑀸, 𑀬𑀤𑀺 𑀫𑀦𑁆𑀢𑁂𑀦𑁆𑀢𑀺 𑀅𑀢𑁆𑀢𑀦𑁄;

𑀉𑀓𑁆𑀓𑀸𑀲𑀺𑀢𑁆𑀯𑀸𑀧𑀺 𑀯𑀸 𑀏𑀢𑁆𑀣, 𑀜𑀸𑀧𑁂𑀢𑀩𑁆𑀩𑀫𑀳𑀦𑁆𑀢𑀺 𑀯𑀸.

𑀢𑀲𑁆𑀲𑁂𑀯𑀫𑀓𑀭𑁄𑀦𑁆𑀢𑀲𑁆𑀲 ¶ , 𑀧𑀸𑀘𑀺𑀢𑁆𑀢𑀺 𑀲𑀯𑀦𑁂 𑀲𑀺𑀬𑀸;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑁂 𑀘 𑀢𑀺𑀓𑀤𑀼𑀓𑁆𑀓𑀝𑀁.

‘‘𑀇𑀫𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀑𑀭𑀫𑀺𑀲𑁆𑀲’’𑀦𑁆𑀢𑀺 𑀕𑀘𑁆𑀙𑀢𑁄;

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀳𑁄𑀢𑀺 𑀓𑁆𑀭𑀺𑀬𑀸𑀓𑁆𑀭𑀺𑀬𑀁;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀲𑀤𑁄𑀲𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀥𑀫𑁆𑀫𑀺𑀓𑀸𑀦𑀁 𑀢𑀼 𑀓𑀫𑁆𑀫𑀸𑀦𑀁, 𑀙𑀦𑁆𑀤𑀁 𑀤𑀢𑁆𑀯𑀸 𑀲𑀘𑁂 𑀧𑀦;

𑀧𑀘𑁆𑀙𑀸 𑀔𑀻𑀬𑀢𑀺 𑀧𑀸𑀘𑀺𑀢𑁆𑀢𑀺, 𑀯𑀸𑀘𑀢𑁄 𑀯𑀸𑀘𑀢𑁄 𑀲𑀺𑀬𑀸.

𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀯𑀺𑀫𑀢𑀺𑀲𑁆𑀲𑀼𑀪𑀬𑀢𑁆𑀣𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

‘‘𑀅𑀥𑀫𑁆𑀫𑁂𑀦 𑀘 𑀯𑀕𑁆𑀕𑁂𑀦, 𑀢𑀣𑀸𑀓𑀫𑁆𑀫𑀸𑀭𑀳𑀲𑁆𑀲 𑀘;

𑀇𑀫𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺, 𑀜𑀢𑁆𑀯𑀸 𑀔𑀻𑀬𑀢𑀺 𑀢𑀲𑁆𑀲 𑀘.

𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀅𑀫𑀽𑀮𑀓𑀲𑀫𑀸𑀦𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀬𑀸𑀯 𑀆𑀭𑁄𑀘𑀺𑀢𑀁 𑀯𑀢𑁆𑀣𑀼, 𑀅𑀯𑀺𑀦𑀺𑀘𑁆𑀙𑀺𑀢𑀫𑁂𑀯 𑀯𑀸;

𑀞𑀧𑀺𑀢𑀸 𑀜𑀢𑁆𑀢𑀺 𑀯𑀸 𑀦𑀺𑀝𑁆𑀞𑀁, 𑀓𑀫𑁆𑀫𑀯𑀸𑀘𑀸 𑀦 𑀕𑀘𑁆𑀙𑀢𑀺.

𑀏𑀢𑀲𑁆𑀫𑀺𑀁 ¶ 𑀅𑀦𑁆𑀢𑀭𑁂 𑀓𑀫𑁆𑀫𑀁, 𑀓𑁄𑀧𑁂𑀢𑀼𑀁 𑀧𑀭𑀺𑀲𑀸𑀬 𑀳𑀺;

𑀳𑀢𑁆𑀣𑀧𑀸𑀲𑀁 𑀚𑀳𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀤𑀢𑁆𑀯𑀸 𑀚𑀳𑀺𑀢𑁂 𑀙𑀦𑁆𑀤𑀁, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸;

𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑁂 𑀘, 𑀯𑀺𑀫𑀢𑀺𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀅𑀥𑀫𑁆𑀫𑁂𑀧𑀺 ¶ 𑀘 𑀓𑀫𑁆𑀫𑀲𑁆𑀫𑀺𑀁, 𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀲𑀜𑁆𑀜𑀺𑀦𑁄;

‘‘𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀸𑀤𑀻𑀦𑀺, 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀜𑁆𑀜𑀺𑀦𑁄.

𑀕𑀺𑀮𑀸𑀦𑁄 𑀯𑀸 𑀕𑀺𑀮𑀸𑀦𑀲𑁆𑀲, 𑀓𑀭𑀡𑀻𑀬𑁂 𑀦 𑀤𑁄𑀲𑀢𑀸;

𑀦 𑀘 𑀓𑁄𑀧𑁂𑀢𑀼𑀓𑀸𑀫𑀲𑁆𑀲, 𑀓𑀫𑁆𑀫𑀁 𑀧𑀲𑁆𑀲𑀸𑀯𑀦𑀸𑀤𑀺𑀦𑀸.

𑀧𑀻𑀴𑀺𑀢𑀲𑁆𑀲𑀸𑀕𑀫𑀺𑀲𑁆𑀲𑀸𑀫𑀺, 𑀇𑀘𑁆𑀘𑁂𑀯𑀁 𑀕𑀘𑁆𑀙𑀢𑁄𑀧𑀺 𑀯𑀸;

𑀲𑀫𑀁 𑀲𑀫𑀦𑀼𑀪𑀸𑀲𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀲𑀫𑀕𑁆𑀕𑁂𑀦 𑀘 𑀲𑀗𑁆𑀖𑁂𑀦, 𑀲𑀤𑁆𑀥𑀺𑀁 𑀤𑀢𑁆𑀯𑀸𑀦 𑀘𑀻𑀯𑀭𑀁;

𑀲𑀫𑁆𑀫𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀲𑁆𑀲, 𑀧𑀘𑁆𑀙𑀸 𑀔𑀻𑀬𑀢𑀺 𑀬𑁄 𑀧𑀦.

𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀥𑀫𑁆𑀫- 𑀓𑀫𑁆𑀫𑁂 𑀯𑀼𑀢𑁆𑀢𑀁 𑀢𑀼 𑀘𑀻𑀯𑀭𑀁.

𑀞𑀧𑁂𑀢𑁆𑀯𑀸𑀜𑁆𑀜𑀧𑀭𑀺𑀓𑁆𑀔𑀸𑀭𑀁, 𑀤𑀢𑁆𑀯𑀸 𑀔𑀻𑀬𑀢𑀺 𑀤𑀼𑀓𑁆𑀓𑀝𑀁;

𑀲𑀗𑁆𑀖𑁂𑀦𑀸𑀲𑀫𑁆𑀫𑀢𑀲𑁆𑀲𑀸𑀧𑀺, 𑀘𑀻𑀯𑀭𑀁 𑀅𑀜𑁆𑀜𑀫𑁂𑀯 𑀯𑀸.

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑁂, 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀁;

𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦𑁂𑀯, 𑀓𑀭𑁄𑀦𑁆𑀢𑀜𑁆𑀘 𑀲𑀪𑀸𑀯𑀢𑁄.

𑀔𑀻𑀬𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀅𑀫𑀽𑀮𑀓𑀲𑀫𑀸 𑀜𑁂𑀬𑁆𑀬𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀇𑀤𑀁 𑀢𑀺𑀁𑀲𑀓𑀓𑀡𑁆𑀟𑀲𑁆𑀫𑀺𑀁, 𑀅𑀦𑁆𑀢𑀺𑀫𑁂𑀦 𑀘 𑀲𑀩𑁆𑀩𑀣𑀸;

𑀢𑀼𑀮𑁆𑀬𑀁 𑀤𑁆𑀯𑀸𑀤𑀲𑀫𑀁 𑀲𑀩𑁆𑀩𑀁, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀢𑀢𑁆𑀣 ¶ 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀸;

𑀇𑀥 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺, 𑀧𑀼𑀕𑁆𑀕𑀮𑁂 𑀧𑀭𑀺𑀡𑀸𑀫𑀦𑀸.

𑀅𑀦𑀺𑀓𑁆𑀔𑀦𑁆𑀢𑁂 ¶ 𑀘𑁂 𑀭𑀸𑀚𑀲𑁆𑀫𑀺𑀁, 𑀅𑀦𑀺𑀓𑁆𑀔𑀦𑁆𑀢𑀸𑀬 𑀤𑁂𑀯𑀺𑀬𑀸;

𑀲𑀬𑀦𑀻𑀬𑀖𑀭𑀸 𑀢𑀲𑁆𑀲, 𑀉𑀫𑁆𑀫𑀸𑀭𑀁 𑀬𑁄 𑀅𑀢𑀺𑀓𑁆𑀓𑀫𑁂.

𑀤𑀼𑀓𑁆𑀓𑀝𑀁 𑀧𑀞𑀫𑁂 𑀧𑀸𑀤𑁂, 𑀧𑀸𑀘𑀺𑀢𑁆𑀢𑀺 𑀤𑀼𑀢𑀺𑀬𑁂 𑀲𑀺𑀬𑀸;

𑀤𑁂𑀯𑀺𑀬𑀸 𑀯𑀸𑀧𑀺 𑀭𑀜𑁆𑀜𑁄 𑀯𑀸, 𑀲𑀘𑁂 𑀦 𑀯𑀺𑀤𑀺𑀢𑀸𑀕𑀫𑁄.

𑀧𑀝𑀺𑀲𑀁𑀯𑀺𑀤𑀺𑀢𑁂 𑀦𑁂𑀯-𑀧𑀝𑀺𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀧𑀝𑀺𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀲𑁆𑀲, 𑀦𑁂𑀯 𑀘 𑀔𑀢𑁆𑀢𑀺𑀬𑀲𑁆𑀲 𑀯𑀸;

𑀦 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦, 𑀅𑀪𑀺𑀲𑀺𑀢𑁆𑀢𑀲𑁆𑀲 𑀯𑀸 𑀧𑀦.

𑀉𑀪𑁄𑀲𑀼𑀪𑀺𑀦𑁆𑀦𑀫𑀜𑁆𑀜𑀲𑁆𑀫𑀺𑀁, 𑀦𑀺𑀓𑁆𑀔𑀦𑁆𑀢𑁂 𑀯𑀺𑀲𑀢𑁄𑀧𑀺 𑀯𑀸;

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀓𑀣𑀺𑀦𑁂𑀦 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸, 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀉𑀕𑁆𑀕𑀡𑁆𑀳𑀸𑀧𑀬𑀢𑁄𑀧𑀺 𑀯𑀸.

𑀕𑀡𑀧𑀼𑀕𑁆𑀕𑀮𑀲𑀗𑁆𑀖𑀸𑀦𑀁, 𑀦𑀯𑀓𑀫𑁆𑀫𑀲𑁆𑀲 𑀘𑁂𑀢𑀺𑀬𑁂;

𑀉𑀕𑁆𑀕𑀡𑁆𑀳𑀸𑀧𑀬𑀢𑁄 𑀳𑁄𑀢𑀺, 𑀤𑀼𑀓𑁆𑀓𑀝𑀁 𑀕𑀡𑁆𑀳𑀢𑁄𑀧𑀺 𑀯𑀸.

𑀅𑀯𑀲𑁂𑀲𑀜𑁆𑀘 𑀫𑀼𑀢𑁆𑀢𑀸𑀤𑀺-𑀭𑀢𑀦𑀁 𑀅𑀢𑁆𑀢𑀦𑁄𑀧𑀺 𑀯𑀸;

𑀲𑀗𑁆𑀖𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬, 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀲𑀘𑁂 ¶ 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸, 𑀯𑀢𑁆𑀣𑀼𑀁 𑀯𑀸𑀧𑀺 𑀅𑀓𑀧𑁆𑀧𑀺𑀬𑀁;

𑀢𑀸𑀮𑀧𑀡𑁆𑀡𑀫𑁆𑀧𑀺 𑀯𑀸 𑀳𑁄𑀢𑀼, 𑀫𑀸𑀢𑀼𑀓𑀡𑁆𑀡𑀧𑀺𑀮𑀦𑁆𑀥𑀦𑀁.

𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦, 𑀬𑀁 𑀓𑀺𑀜𑁆𑀘𑀺 𑀕𑀺𑀳𑀺𑀲𑀦𑁆𑀢𑀓𑀁;

𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀧𑀝𑀺𑀲𑀸𑀫𑀬𑀢𑁄 𑀧𑀦.

‘‘𑀇𑀤𑀁 𑀞𑀧𑁂𑀢𑁆𑀯𑀸 𑀤𑁂𑀳𑀻’’𑀢𑀺, 𑀯𑀼𑀢𑁆𑀢𑁂𑀦 𑀧𑀦 𑀓𑁂𑀦𑀘𑀺;

‘‘𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀢𑀁, 𑀦 𑀦𑀺𑀥𑁂𑀢𑀩𑁆𑀩𑀫𑁂𑀯 𑀢𑀼.

‘‘𑀞𑀧𑁂𑀳𑀻’’𑀢𑀺 𑀘 𑀧𑀸𑀢𑁂𑀢𑁆𑀯𑀸, 𑀲𑀘𑁂 𑀕𑀘𑁆𑀙𑀢𑀺 𑀧𑀼𑀕𑁆𑀕𑀮𑁄;

𑀧𑀮𑀺𑀩𑁄𑀥𑁄 𑀳𑀺 𑀦𑀸𑀫𑁂𑀲𑁄, 𑀞𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀅𑀦𑀼𑀜𑁆𑀜𑀸𑀢𑁂 𑀧𑀦𑀝𑁆𑀞𑀸𑀦𑁂, 𑀉𑀕𑁆𑀕𑀳𑁂𑀢𑁆𑀯𑀸 𑀅𑀦𑀸𑀤𑀭𑀸;

𑀲𑀫𑁆𑀫𑀸 𑀅𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀦𑀼𑀜𑁆𑀜𑀸𑀢𑁂 ¶ 𑀧𑀦𑀝𑁆𑀞𑀸𑀦𑁂, 𑀕𑀳𑁂𑀢𑁆𑀯𑀸 𑀭𑀢𑀦𑀁 𑀧𑀦;

𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀯𑀸 𑀲𑀫𑁆𑀫𑀸, 𑀪𑀡𑁆𑀟𑀁 𑀭𑀢𑀦𑀲𑀫𑁆𑀫𑀢𑀁.

𑀕𑀡𑁆𑀳𑀦𑁆𑀢𑀲𑁆𑀲 𑀘 𑀯𑀺𑀲𑁆𑀲𑀸𑀲𑀁, 𑀢𑀸𑀯𑀓𑀸𑀮𑀺𑀓𑀫𑁂𑀯 𑀘;

𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀲𑀜𑁆𑀘𑀭𑀺𑀢𑁆𑀢𑀲𑀫𑁄𑀤𑀬𑀁.

𑀫𑀚𑁆𑀛𑀡𑁆𑀳𑀲𑀫𑀬𑀸 𑀉𑀤𑁆𑀥𑀁, 𑀅𑀭𑀼𑀡𑀼𑀕𑁆𑀕𑀫𑀢𑁄 𑀧𑀼𑀭𑁂;

𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀓𑀸𑀮𑁄, 𑀯𑀺𑀓𑀸𑀮𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀲𑀦𑁆𑀢𑀁 𑀪𑀺𑀓𑁆𑀔𑀼𑀫𑀦𑀸𑀧𑀼𑀘𑁆𑀙𑀸, 𑀯𑀺𑀓𑀸𑀮𑁂 𑀧𑀘𑁆𑀘𑀬𑀁 𑀯𑀺𑀦𑀸;

𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲, 𑀧𑀭𑀺𑀓𑁆𑀔𑁂𑀧𑁄𑀓𑁆𑀓𑀫𑁂 𑀧𑀦.

𑀅𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑀲𑁆𑀲, 𑀉𑀧𑀘𑀸𑀭𑁄𑀓𑁆𑀓𑀫𑁂𑀧𑀺 𑀯𑀸;

𑀤𑀼𑀓𑁆𑀓𑀝𑀁 𑀧𑀞𑀫𑁂 𑀧𑀸𑀤𑁂, 𑀧𑀸𑀘𑀺𑀢𑁆𑀢𑀺 𑀤𑀼𑀢𑀺𑀬𑁂 𑀲𑀺𑀬𑀸.

𑀅𑀣 𑀲𑀫𑁆𑀩𑀳𑀼𑀮𑀸 𑀕𑀸𑀫𑀁, 𑀯𑀺𑀓𑀸𑀮𑁂 𑀧𑀯𑀺𑀲𑀦𑁆𑀢𑀺 𑀘𑁂;

𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, 𑀅𑀜𑁆𑀜𑀫𑀜𑁆𑀜𑀁 𑀦 𑀘𑀜𑁆𑀜𑀣𑀸.

𑀕𑀘𑁆𑀙𑀦𑁆𑀢𑀺 ¶ 𑀘𑁂 𑀢𑀢𑁄 𑀅𑀜𑁆𑀜𑀁, 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀯𑀝𑁆𑀝𑀢𑀺;

𑀧𑀼𑀦 𑀆𑀧𑀼𑀘𑁆𑀙𑀦𑁂 𑀓𑀺𑀘𑁆𑀘𑀁, 𑀦𑀢𑁆𑀣𑀺 𑀕𑀸𑀫𑀲𑀢𑁂𑀧𑀺 𑀘.

𑀧𑀲𑁆𑀲𑀫𑁆𑀪𑁂𑀢𑁆𑀯𑀸𑀦 𑀉𑀲𑁆𑀲𑀸𑀳𑀁, 𑀯𑀺𑀳𑀸𑀭𑀢𑁆𑀣𑀸𑀬 𑀦𑀺𑀕𑁆𑀕𑀢𑀸;

𑀧𑀯𑀺𑀲𑀦𑁆𑀢𑀺 𑀲𑀘𑁂 𑀅𑀜𑁆𑀜𑀁, 𑀧𑀼𑀘𑁆𑀙𑀺𑀢𑀩𑁆𑀩𑀁 𑀢𑀼 𑀅𑀦𑁆𑀢𑀭𑀸.

𑀓𑀢𑁆𑀯𑀸 𑀓𑀼𑀮𑀖𑀭𑁂 𑀪𑀢𑁆𑀢- 𑀓𑀺𑀘𑁆𑀘𑀁 𑀅𑀜𑁆𑀜𑀢𑁆𑀣 𑀯𑀸 𑀧𑀦;

𑀲𑀘𑁂 𑀘𑀭𑀺𑀢𑀼𑀓𑀸𑀫𑁄 𑀬𑁄, 𑀲𑀧𑁆𑀧𑀺𑀪𑀺𑀓𑁆𑀔𑀸𑀬 𑀯𑀸 𑀲𑀺𑀬𑀸.

𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, 𑀧𑀲𑁆𑀲𑁂 𑀘𑁂 𑀪𑀺𑀓𑁆𑀔𑀼 𑀮𑀩𑁆𑀪𑀢𑀺;

𑀅𑀲𑀦𑁆𑀢𑁂 𑀧𑀦 𑀦𑀢𑁆𑀣𑀻𑀢𑀺, 𑀕𑀦𑁆𑀢𑀩𑁆𑀩𑀁 𑀢𑀼 𑀬𑀣𑀸𑀲𑀼𑀔𑀁.

𑀑𑀢𑀭𑀺𑀢𑁆𑀯𑀸 𑀫𑀳𑀸𑀯𑀻𑀣𑀺𑀁, 𑀪𑀺𑀓𑁆𑀔𑀼𑀁 𑀬𑀤𑀺 𑀘 𑀧𑀲𑁆𑀲𑀢𑀺;

𑀦𑀢𑁆𑀣𑀺 𑀆𑀧𑀼𑀘𑁆𑀙𑀦𑁂 𑀓𑀺𑀘𑁆𑀘𑀁, 𑀘𑀭𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑀕𑀸𑀫𑀫𑀚𑁆𑀛𑁂𑀦 𑀫𑀕𑁆𑀕𑁂𑀦, 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄;

‘‘𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑁂, 𑀢𑁂𑀮𑀪𑀺𑀓𑁆𑀔𑀸𑀬 𑀫𑀸𑀦𑀲𑁂.

𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, 𑀧𑀲𑁆𑀲𑁂 𑀘𑁂 𑀪𑀺𑀓𑁆𑀔𑀼 𑀯𑀺𑀚𑁆𑀚𑀢𑀺;

𑀅𑀦𑁄𑀓𑁆𑀓𑀫𑁆𑀫 𑀘𑀭𑀦𑁆𑀢𑀲𑁆𑀲, 𑀫𑀕𑁆𑀕𑀸 𑀆𑀧𑀼𑀘𑁆𑀙𑀦𑁂𑀦 𑀓𑀺𑀁?

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 ¶ , 𑀓𑀸𑀮𑁂, 𑀯𑀺𑀓𑀸𑀮𑁄𑀬𑀦𑁆𑀢𑀺 𑀲𑀜𑁆𑀜𑀺𑀦𑁄;

𑀓𑀸𑀮𑁂 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀲𑀦𑁆𑀢𑀁 𑀯𑀸, 𑀅𑀦𑀸𑀧𑀼𑀘𑁆𑀙𑀸 𑀅𑀲𑀦𑁆𑀢𑀓𑀁;

𑀓𑀺𑀘𑁆𑀘𑁂 𑀅𑀘𑁆𑀘𑀸𑀬𑀺𑀓𑁂 𑀯𑀸𑀧𑀺, 𑀧𑀯𑀺𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀭𑀸𑀫𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑁆𑀲𑀬𑀁;

𑀢𑀣𑀸 𑀆𑀲𑀦𑀲𑀸𑀮𑀁 𑀯𑀸, 𑀢𑀺𑀢𑁆𑀣𑀺𑀬𑀸𑀦𑀁 𑀉𑀧𑀲𑁆𑀲𑀬𑀁.

𑀲𑀺𑀬𑀸 𑀕𑀸𑀫𑁂𑀦 𑀫𑀕𑁆𑀕𑁄 𑀘𑁂, 𑀅𑀦𑀸𑀧𑀢𑁆𑀢𑀸𑀧𑀤𑀸𑀲𑀼𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀦 𑀓𑁂𑀯𑀮𑀫𑀦𑀸𑀧𑀼𑀘𑁆𑀙𑀸, 𑀅𑀩𑀦𑁆𑀥𑀺𑀢𑁆𑀯𑀸 𑀘 𑀩𑀦𑁆𑀥𑀦𑀁;

𑀅𑀧𑀸𑀭𑀼𑀧𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁, 𑀕𑀘𑁆𑀙𑀢𑁄𑀧𑀺𑀦𑀯𑀚𑁆𑀚𑀢𑀸.

𑀅𑀝𑁆𑀞𑀺𑀤𑀦𑁆𑀢𑀫𑀬𑀁 ¶ 𑀲𑀽𑀘𑀺-𑀖𑀭𑀁 𑀯𑀸𑀧𑀺 𑀯𑀺𑀲𑀸𑀡𑀚𑀁;

𑀓𑀸𑀭𑀸𑀧𑀦𑁂 𑀘 𑀓𑀭𑀡𑁂, 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀮𑀸𑀪𑁂 𑀪𑁂𑀤𑀦𑀓𑀁 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁;

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑀡𑁂, 𑀢𑀣𑀸 𑀓𑀸𑀭𑀸𑀧𑀦𑁂𑀧𑀺 𑀘.

𑀅𑀜𑁆𑀜𑁂𑀦 𑀘 𑀓𑀢𑀁 𑀮𑀤𑁆𑀥𑀸, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄;

𑀅𑀦𑀸𑀧𑀢𑁆𑀢𑀸𑀭𑀡𑀺𑀓𑁂 𑀯𑀺𑀥𑁂, 𑀕𑀡𑁆𑀞𑀺𑀓𑀜𑁆𑀚𑀦𑀺𑀓𑀸𑀲𑀼𑀧𑀺.

𑀤𑀓𑀧𑀼𑀜𑁆𑀙𑀦𑀺𑀬𑀸 𑀯𑀸𑀲𑀺-𑀚𑀝𑁂 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀦𑀯𑀁 𑀫𑀜𑁆𑀘𑀫𑁆𑀧𑀺 𑀧𑀻𑀞𑀁 𑀯𑀸, 𑀓𑀸𑀭𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁂𑀦, 𑀲𑀼𑀕𑀢𑀗𑁆𑀕𑀼𑀮𑀢𑁄 𑀧𑀦.

𑀓𑀸𑀭𑀸𑀧𑁂𑀢𑀩𑁆𑀩𑀫𑁂𑀯𑀁 𑀢𑀼, 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀸𑀝𑀦𑀺𑀁;

𑀲𑀘𑁆𑀙𑁂𑀤𑀸 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺, 𑀢𑀫𑀢𑀺𑀓𑁆𑀓𑀫𑀢𑁄 𑀲𑀺𑀬𑀸.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑀡𑁂, 𑀢𑀣𑀸 𑀓𑀸𑀭𑀸𑀧𑀦𑁂𑀧𑀺 𑀘;

𑀅𑀜𑁆𑀜𑁂𑀦 𑀘 𑀓𑀢𑀁 𑀮𑀤𑁆𑀥𑀸, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄.

𑀅𑀦𑀸𑀧𑀢𑁆𑀢𑀺 ¶ 𑀧𑀫𑀸𑀡𑁂𑀦, 𑀓𑀭𑁄𑀦𑁆𑀢𑀲𑁆𑀲𑀧𑁆𑀧𑀫𑀸𑀡𑀺𑀓𑀁;

𑀮𑀪𑀺𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂𑀲𑀼, 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄.

𑀦𑁂𑀯 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀘𑁂, 𑀦𑀺𑀔𑀡𑀺𑀢𑁆𑀯𑀸 𑀧𑀫𑀸𑀡𑀢𑁄;

𑀉𑀢𑁆𑀢𑀸𑀦𑀁 𑀯𑀸𑀧𑀺 𑀅𑀝𑁆𑀝𑀁 𑀯𑀸, 𑀩𑀦𑁆𑀥𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄.

𑀫𑀜𑁆𑀘𑀁 𑀯𑀸 𑀧𑀦 𑀧𑀻𑀞𑀁 𑀯𑀸, 𑀢𑀽𑀮𑁄𑀦𑀤𑁆𑀥𑀁 𑀓𑀭𑁂𑀬𑁆𑀬 𑀬𑁄;

𑀢𑀲𑁆𑀲𑀼𑀤𑁆𑀤𑀸𑀮𑀦𑀓𑀁 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺𑀬𑀫𑀦𑀻𑀢𑀺𑀦𑀸.

𑀅𑀦𑀸𑀧𑀢𑁆𑀢𑀺 ¶ 𑀧𑀦𑀸𑀬𑁄𑀕𑁂, 𑀩𑀦𑁆𑀥𑀦𑁂 𑀅𑀁𑀲𑀩𑀤𑁆𑀥𑀓𑁂;

𑀩𑀺𑀩𑁆𑀩𑁄𑀳𑀦𑁂 𑀧𑀭𑀺𑀲𑁆𑀲𑀸𑀯𑁂, 𑀣𑀯𑀺𑀓𑀸𑀤𑀻𑀲𑀼 𑀪𑀺𑀓𑁆𑀔𑀼𑀦𑁄.

𑀅𑀜𑁆𑀜𑁂𑀦 𑀘 𑀓𑀢𑀁 𑀮𑀤𑁆𑀥𑀸, 𑀉𑀤𑁆𑀤𑀸𑀮𑁂𑀢𑁆𑀯𑀸 𑀦𑀺𑀲𑁂𑀯𑀢𑁄;

𑀅𑀦𑀦𑁆𑀢𑀭𑀲𑁆𑀲𑀺𑀫𑀲𑁆𑀲𑀸𑀧𑀺, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀦𑀬𑀸.

𑀦𑀺𑀲𑀻𑀤𑀦𑀁 𑀓𑀭𑁄𑀦𑁆𑀢𑁂𑀦, 𑀓𑀸𑀢𑀩𑁆𑀩𑀁 𑀢𑀼 𑀧𑀫𑀸𑀡𑀢𑁄;

𑀧𑀫𑀸𑀡𑀸𑀢𑀺𑀓𑁆𑀓𑀫𑁂 𑀢𑀲𑁆𑀲, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀧𑀝𑀺𑀮𑀸𑀪𑁂𑀦 𑀲𑀘𑁆𑀙𑁂𑀤𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁;

𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑁂𑀢𑁆𑀯𑀸, 𑀢𑀲𑁆𑀲 𑀢𑀺𑀲𑁆𑀲𑁄 𑀤𑀲𑀸 𑀲𑀺𑀬𑀼𑀁.

𑀅𑀦𑀸𑀧𑀢𑁆𑀢𑀺 𑀧𑀫𑀸𑀡𑁂𑀦, 𑀓𑀭𑁄𑀦𑁆𑀢𑀲𑁆𑀲 𑀢𑀤𑀽𑀦𑀓𑀁;

𑀯𑀺𑀢𑀸𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀦𑀬𑀸.

𑀭𑁄𑀕𑁂 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺, 𑀓𑀸𑀢𑀩𑁆𑀩𑀸 𑀳𑀺 𑀧𑀫𑀸𑀡𑀢𑁄;

𑀧𑀫𑀸𑀡𑀸𑀢𑀺𑀓𑁆𑀓𑀫𑁂 𑀢𑀲𑁆𑀲, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀧𑀝𑀺𑀮𑀸𑀪𑁂𑀦 𑀲𑀘𑁆𑀙𑁂𑀤𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁;

𑀅𑀦𑀸𑀧𑀢𑁆𑀢𑀺𑀦𑀬𑁄𑀧𑁂𑀢𑁆𑀣, 𑀅𑀦𑀦𑁆𑀢𑀭𑀲𑀫𑁄 𑀫𑀢𑁄.

𑀧𑀫𑀸𑀡𑁂𑀦𑁂𑀯 ¶ 𑀓𑀸𑀢𑀩𑁆𑀩𑀸, 𑀢𑀣𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸;

𑀧𑀫𑀸𑀡𑀸𑀢𑀺𑀓𑁆𑀓𑀫𑁂 𑀢𑀲𑁆𑀲, 𑀅𑀦𑀦𑁆𑀢𑀭𑀲𑀫𑁄 𑀦𑀬𑁄.

𑀘𑀻𑀯𑀭𑁂𑀦 ¶ 𑀲𑀘𑁂 𑀢𑀼𑀮𑁆𑀬-𑀧𑁆𑀧𑀫𑀸𑀡𑀁 𑀲𑀼𑀕𑀢𑀲𑁆𑀲 𑀢𑀼;

𑀘𑀻𑀯𑀭𑀁 𑀪𑀺𑀓𑁆𑀔𑀼 𑀓𑀸𑀭𑁂𑀬𑁆𑀬, 𑀓𑀭𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀧𑀝𑀺𑀮𑀸𑀪𑁂𑀦 𑀲𑀘𑁆𑀙𑁂𑀤𑀁, 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀁;

𑀅𑀦𑀦𑁆𑀢𑀭𑀲𑀫𑁄𑀬𑁂𑀯, 𑀅𑀦𑀸𑀧𑀢𑁆𑀢𑀺𑀦𑀬𑁄 𑀫𑀢𑁄.

𑀤𑀻𑀖𑀲𑁄 𑀘 𑀧𑀫𑀸𑀡𑁂𑀦, 𑀦𑀯 𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑁄;

𑀢𑀺𑀭𑀺𑀬𑀁 𑀙 𑀯𑀺𑀦𑀺𑀤𑁆𑀤𑀺𑀝𑁆𑀞𑀸, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑀅𑀜𑁆𑀜𑁂𑀦 𑀘 𑀓𑀢𑀁 𑀮𑀤𑁆𑀥𑀸, 𑀲𑁂𑀯𑀢𑁄 𑀤𑀼𑀓𑁆𑀓𑀝𑀁 𑀪𑀯𑁂;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀸𑀘𑀺𑀢𑁆𑀢𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑁄 𑀘𑀦𑁆𑀢𑀭𑀖𑀭𑀁 𑀪𑀺𑀓𑁆𑀔𑀼, 𑀧𑀯𑀺𑀝𑁆𑀞𑀸𑀬 𑀢𑀼 𑀳𑀢𑁆𑀣𑀢𑁄;

𑀅𑀜𑁆𑀜𑀸𑀢𑀺𑀓𑀸𑀬 𑀬𑀁 𑀓𑀺𑀜𑁆𑀘𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀔𑀸𑀤𑀦𑀁 𑀪𑁄𑀚𑀦𑀫𑁆𑀧𑀺 𑀯𑀸;

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸.

𑀭𑀣𑀺𑀓𑀸𑀬𑀧𑀺 𑀯𑀸 𑀩𑁆𑀬𑀽𑀳𑁂, 𑀲𑀦𑁆𑀥𑀺𑀲𑀺𑀗𑁆𑀖𑀸𑀝𑀓𑁂𑀲𑀼 𑀯𑀸;

𑀳𑀢𑁆𑀣𑀺𑀲𑀸𑀮𑀸𑀤𑀺𑀓𑁂 𑀞𑀢𑁆𑀯𑀸, 𑀕𑀡𑁆𑀳𑀢𑁄𑀧𑀺 𑀅𑀬𑀁 𑀦𑀬𑁄.

𑀭𑀣𑀺𑀓𑀸𑀬 ¶ 𑀲𑀘𑁂 𑀞𑀢𑁆𑀯𑀸, 𑀤𑁂𑀢𑀺 𑀪𑀺𑀓𑁆𑀔𑀼𑀦𑀺 𑀪𑁄𑀚𑀦𑀁;

𑀆𑀧𑀢𑁆𑀢𑀺 𑀅𑀦𑁆𑀢𑀭𑀸𑀭𑀸𑀫𑁂, 𑀞𑀢𑁆𑀯𑀸 𑀕𑀡𑁆𑀳𑀸𑀢𑀺 𑀪𑀺𑀓𑁆𑀔𑀼 𑀘𑁂.

𑀏𑀢𑁆𑀣𑀦𑁆𑀢𑀭𑀖𑀭𑀁 𑀢𑀲𑁆𑀲𑀸, 𑀧𑀯𑀺𑀝𑁆𑀞𑀸𑀬 𑀳𑀺 𑀯𑀸𑀓𑁆𑀬𑀢𑁄;

𑀪𑀺𑀓𑁆𑀔𑀼𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀁, 𑀦𑀧𑁆𑀧𑀫𑀸𑀡𑀦𑁆𑀢𑀺 𑀯𑀡𑁆𑀡𑀺𑀢𑀁.

𑀢𑀲𑁆𑀫𑀸 ¶ 𑀪𑀺𑀓𑁆𑀔𑀼𑀦𑀺𑀬𑀸 𑀞𑀢𑁆𑀯𑀸, 𑀆𑀭𑀸𑀫𑀸𑀤𑀻𑀲𑀼 𑀤𑁂𑀦𑁆𑀢𑀺𑀬𑀸;

𑀯𑀻𑀣𑀺𑀬𑀸𑀤𑀻𑀲𑀼 𑀘𑁂 𑀞𑀢𑁆𑀯𑀸, 𑀦 𑀤𑁄𑀲𑁄 𑀧𑀝𑀺𑀕𑀡𑁆𑀳𑀢𑁄.

𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳-𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁;

𑀆𑀳𑀸𑀭𑀢𑁆𑀣𑀸𑀬 𑀕𑀳𑀡𑁂, 𑀅𑀚𑁆𑀛𑁄𑀳𑀸𑀭𑁂 𑀘 𑀤𑀼𑀓𑁆𑀓𑀝𑀁.

𑀆𑀫𑀺𑀲𑁂𑀦 𑀅𑀲𑀫𑁆𑀪𑀺𑀦𑁆𑀦-𑀭𑀲𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁;

𑀧𑀸𑀝𑀺𑀤𑁂𑀲𑀦𑀺𑀬𑀸𑀧𑀢𑁆𑀢𑀺, 𑀲𑀫𑁆𑀪𑀺𑀦𑁆𑀦𑁂𑀓𑀭𑀲𑁂 𑀲𑀺𑀬𑀸.

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦-𑀳𑀢𑁆𑀣𑀢𑁄 𑀧𑀝𑀺𑀕𑀡𑁆𑀳𑀢𑁄;

𑀓𑀸𑀮𑀺𑀓𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀆𑀳𑀸𑀭𑀢𑁆𑀣𑀸𑀬 𑀤𑀼𑀓𑁆𑀓𑀝𑀁.

𑀜𑀸𑀢𑀺𑀓𑀸𑀬𑀧𑀺 𑀅𑀜𑁆𑀜𑀸𑀢𑀺-𑀲𑀜𑁆𑀜𑀺𑀦𑁄 𑀯𑀺𑀫𑀢𑀺𑀲𑁆𑀲 𑀯𑀸;

𑀤𑀼𑀓𑁆𑀓𑀝𑀁 𑀜𑀸𑀢𑀺𑀲𑀜𑁆𑀜𑀺𑀲𑁆𑀲, 𑀢𑀣𑀸 𑀅𑀜𑁆𑀜𑀸𑀢𑀺𑀓𑀸𑀬 𑀯𑀸.

𑀤𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀤𑀤𑀫𑀸𑀦𑀸𑀬 𑀯𑀸 𑀧𑀦;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦𑁆𑀢𑀭𑀸𑀭𑀸𑀫𑀸-𑀤𑀻𑀲𑀼 𑀞𑀢𑁆𑀯𑀸𑀧𑀺 𑀤𑁂𑀦𑁆𑀢𑀺𑀬𑀸.

𑀕𑀸𑀫𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸, 𑀤𑁂𑀢𑀺 𑀘𑁂 𑀩𑀳𑀺 𑀯𑀝𑁆𑀝𑀢𑀺;

‘‘𑀧𑀘𑁆𑀘𑀬𑁂 𑀲𑀢𑀺 𑀪𑀼𑀜𑁆𑀚𑀸’’𑀢𑀺, 𑀤𑁂𑀢𑀺 𑀘𑁂 𑀓𑀸𑀮𑀺𑀓𑀢𑁆𑀢𑀬𑀁.

𑀳𑀢𑁆𑀣𑀢𑁄 𑀲𑀸𑀫𑀡𑁂𑀭𑀻𑀦𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀢𑀣𑀸;

𑀇𑀤𑀁 𑀏𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀲𑀫𑀁 𑀫𑀢𑀁.

𑀅𑀯𑀼𑀢𑁆𑀢𑁂 ‘‘𑀅𑀧𑀲𑀓𑁆𑀓𑀸’’𑀢𑀺, 𑀏𑀓𑁂𑀦𑀸𑀧𑀺 𑀘 𑀪𑀺𑀓𑁆𑀔𑀼𑀦𑀸;

𑀲𑀘𑁂𑀚𑁆𑀛𑁄𑀳𑀭𑀡𑀢𑁆𑀣𑀸𑀬, 𑀆𑀫𑀺𑀲𑀁 𑀧𑀝𑀺𑀕𑀡𑁆𑀳𑀢𑀺.

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸;

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁, 𑀦 𑀯𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀢𑀣𑁂𑀯𑀸𑀦𑀼𑀧𑀲𑀫𑁆𑀧𑀦𑁆𑀦𑀸-𑀬𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀺𑀢𑁆𑀢𑀦𑁄 ¶ ¶ 𑀪𑀢𑁆𑀢𑀁, 𑀧𑀤𑀸𑀧𑁂𑀢𑀺 𑀦 𑀤𑁂𑀢𑀺 𑀘𑁂;

𑀢𑀣𑀸 𑀅𑀜𑁆𑀜𑀲𑁆𑀲 𑀪𑀢𑁆𑀢𑀁 𑀯𑀸, 𑀦 𑀤𑀸𑀧𑁂𑀢𑀺 𑀧𑀤𑁂𑀢𑀺 𑀘𑁂.

𑀬𑀁 𑀦 𑀤𑀺𑀦𑁆𑀦𑀁 𑀢𑀁 𑀤𑀸𑀧𑁂𑀢𑀺, 𑀦 𑀤𑀺𑀦𑁆𑀦𑀁 𑀬𑀢𑁆𑀣 𑀯𑀸𑀧𑀺 𑀘;

𑀢𑀢𑁆𑀣 𑀢𑀫𑁆𑀧𑀺 𑀘 𑀲𑀩𑁆𑀩𑁂𑀲𑀁, 𑀲𑀫𑀁 𑀤𑀸𑀧𑁂𑀢𑀺 𑀪𑀺𑀓𑁆𑀔𑀼𑀦𑀻.

𑀯𑁄𑀲𑀸𑀲𑀦𑁆𑀢𑀻 𑀞𑀺𑀢𑀸 𑀲𑀺𑀓𑁆𑀔-𑀫𑀸𑀦𑀸 𑀯𑀸 𑀲𑀸𑀫𑀡𑁂𑀭𑀺𑀓𑀸;

𑀪𑁄𑀚𑀦𑀸𑀦𑀺 𑀘 𑀧𑀜𑁆𑀘𑁂𑀯, 𑀯𑀺𑀦𑀸, 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀓𑀣𑀺𑀦𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀲𑀫𑀸𑀦𑀦𑁆𑀢𑀺 𑀧𑀓𑀸𑀲𑀺𑀢𑀁;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑁂𑀓𑁆𑀔𑀦𑁆𑀢𑀺 𑀲𑀫𑁆𑀫𑀢𑁂 𑀪𑀺𑀓𑁆𑀔𑀼, 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂 𑀓𑀼𑀮𑁂;

𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑀸, 𑀧𑀼𑀩𑁆𑀩𑁂𑀯 𑀅𑀦𑀺𑀫𑀦𑁆𑀢𑀺𑀢𑁄.

𑀅𑀕𑀺𑀮𑀸𑀦𑁄 𑀕𑀳𑁂𑀢𑁆𑀯𑀸 𑀘𑁂, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀆𑀫𑀺𑀲𑀁;

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀪𑁄𑀕𑁂, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀲𑀺𑀬𑀸.

𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳-𑀓𑀸𑀮𑀺𑀓𑁂 𑀬𑀸𑀯𑀚𑀻𑀯𑀺𑀓𑁂;

𑀕𑀳𑀡𑁂 𑀧𑀭𑀺𑀪𑁄𑀕𑁂 𑀘, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀲𑁂𑀓𑁆𑀔𑀲𑀫𑁆𑀫𑀢𑁂 𑀲𑁂𑀓𑁆𑀔-𑀲𑀫𑁆𑀫𑀢𑀦𑁆𑀢𑀺 𑀘 𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀢𑀣𑁂𑀯 𑀧𑀭𑀺𑀤𑀻𑀧𑀺𑀢𑀁.

𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲, 𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀓𑁂;

𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀸 𑀪𑀺𑀓𑁆𑀔𑀸, 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀤𑀻𑀬𑀢𑀺.

𑀖𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸, 𑀤𑁂𑀦𑁆𑀢𑀺 𑀘𑁂 𑀬𑀢𑁆𑀣 𑀓𑀢𑁆𑀣𑀘𑀺;

𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀓𑁂 𑀯𑀸𑀧𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀅𑀦𑀸𑀕𑀢𑁂 𑀳𑀺 𑀪𑀺𑀓𑁆𑀔𑀼𑀫𑁆𑀳𑀺, 𑀖𑀭𑀢𑁄 𑀧𑀞𑀫𑀁 𑀧𑀦;

𑀦𑀻𑀳𑀭𑀺𑀢𑁆𑀯𑀸 𑀲𑀘𑁂 𑀤𑁆𑀯𑀸𑀭𑁂, 𑀲𑀫𑁆𑀧𑀢𑁆𑀢𑁂 𑀤𑁂𑀦𑁆𑀢𑀺 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀼𑀁 ¶ 𑀧𑀦 𑀘 𑀤𑀺𑀲𑁆𑀯𑀸𑀯, 𑀦𑀻𑀳𑀭𑀺𑀢𑁆𑀯𑀸𑀦 𑀕𑁂𑀳𑀢𑁄;

𑀦 𑀯𑀝𑁆𑀝𑀢𑀺 𑀲𑀘𑁂 𑀤𑁂𑀦𑁆𑀢𑀺, 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀁.

𑀕𑀳𑀝𑁆𑀞𑁂𑀦𑀸𑀕𑀳𑀝𑁆𑀞𑁂𑀦 ¶ , 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑁂𑀦 𑀯𑀸;

𑀆𑀭𑀸𑀫𑀁 𑀉𑀧𑀘𑀸𑀭𑀁 𑀯𑀸, 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀧𑀦.

‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀢𑁂 𑀪𑀢𑁆𑀢𑀁, 𑀬𑀸𑀕𑀼 𑀯𑀸 𑀆𑀳𑀭𑀻𑀬𑀢𑀺’’;

𑀏𑀯𑀫𑀸𑀭𑁄𑀘𑀺𑀢𑀁 𑀯𑀼𑀢𑁆𑀢𑀁, 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀳𑀺.

𑀆𑀳𑀭𑀻𑀬𑀢𑀼 𑀢𑀁 𑀧𑀘𑁆𑀙𑀸, 𑀬𑀣𑀸𑀭𑁄𑀘𑀺𑀢𑀫𑁂𑀯 𑀯𑀸;

𑀢𑀲𑁆𑀲 𑀯𑀸 𑀧𑀭𑀺𑀯𑀸𑀭𑀫𑁆𑀧𑀺, 𑀅𑀜𑁆𑀜𑀁 𑀓𑀢𑁆𑀯𑀸 𑀩𑀳𑀼𑀁 𑀧𑀦.

𑀬𑀸𑀕𑀼𑀬𑀸 𑀯𑀺𑀤𑀺𑀢𑀁 𑀓𑀢𑁆𑀯𑀸, 𑀧𑀽𑀯𑀁 𑀪𑀢𑁆𑀢𑀁 𑀳𑀭𑀦𑁆𑀢𑀺 𑀘𑁂;

𑀇𑀤𑀫𑁆𑀧𑀺 𑀯𑀺𑀤𑀺𑀢𑀁 𑀯𑀼𑀢𑁆𑀢𑀁, 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁.

𑀓𑀼𑀮𑀸𑀦𑀺 𑀧𑀦 𑀅𑀜𑁆𑀜𑀸𑀦𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀧𑀦𑀢𑁆𑀢𑀦𑁄;

𑀳𑀭𑀦𑁆𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀘𑁂, 𑀲𑀩𑁆𑀩𑀁 𑀯𑀝𑁆𑀝𑀢𑀺 𑀢𑀫𑁆𑀧𑀺 𑀘.

𑀅𑀦𑀸𑀭𑁄𑀘𑀺𑀢𑀫𑁂𑀯𑀁 𑀬𑀁, 𑀬𑀁 𑀆𑀭𑀸𑀫𑀫𑀦𑀸𑀪𑀢𑀁;

𑀢𑀁 𑀅𑀲𑀁𑀯𑀺𑀤𑀺𑀢𑀁 𑀦𑀸𑀫, 𑀲𑀳𑀥𑀫𑁆𑀫𑀺𑀓𑀜𑀸𑀧𑀺𑀢𑀁.

𑀬𑀁 𑀅𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸, 𑀆𑀪𑀢𑀁 𑀧𑀦 𑀢𑀁 𑀩𑀳𑀺;

𑀆𑀭𑀸𑀫𑀁 𑀧𑀦 𑀧𑁂𑀲𑁂𑀢𑁆𑀯𑀸, 𑀓𑀸𑀭𑀸𑀧𑁂𑀢𑁆𑀯𑀸 𑀢𑀫𑀸𑀳𑀭𑁂.

𑀕𑀦𑁆𑀢𑁆𑀯𑀸 𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀕𑀳𑁂𑀢𑀩𑁆𑀩𑀁 𑀢𑀼 𑀪𑀺𑀓𑁆𑀔𑀼𑀦𑀸;

𑀲𑀘𑁂 𑀏𑀯𑀫𑀓𑀢𑁆𑀯𑀸 𑀢𑀁, 𑀆𑀭𑀸𑀫𑁂 𑀉𑀧𑀘𑀸𑀭𑀢𑁄.

𑀕𑀳𑁂𑀢𑁆𑀯𑀸𑀚𑁆𑀛𑁄𑀳𑀭𑀦𑁆𑀢𑀲𑁆𑀲, 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸;

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀧𑀸𑀝𑀺𑀤𑁂𑀲𑀦𑀺𑀬𑀁 𑀫𑀢𑀁.

𑀧𑀝𑀺𑀲𑀁𑀯𑀺𑀤𑀺𑀢𑁂𑀬𑁂𑀯, 𑀅𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀦𑁄;

𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀝𑀺𑀲𑀁𑀯𑀺𑀤𑀺𑀢𑁂 ¶ 𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲𑀸𑀯𑀲𑁂𑀲𑀓𑁂;

𑀩𑀳𑀸𑀭𑀸𑀫𑁂 𑀕𑀳𑁂𑀢𑁆𑀯𑀸 𑀯𑀸, 𑀅𑀦𑁆𑀢𑁄𑀬𑁂𑀯𑀲𑁆𑀲 𑀪𑀼𑀜𑁆𑀚𑀢𑁄.

𑀢𑀢𑁆𑀣𑀚𑀸𑀢𑀨𑀮𑀸𑀤𑀻𑀦𑀺, 𑀅𑀦𑀸𑀧𑀢𑁆𑀢𑁂𑀯 𑀔𑀸𑀤𑀢𑁄;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑁄 ¶ 𑀅𑀦𑀸𑀤𑀭𑀺𑀬𑁂𑀦𑁂𑀯, 𑀧𑀼𑀭𑀢𑁄 𑀧𑀘𑁆𑀙𑀢𑁄𑀧𑀺 𑀯𑀸;

𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀬𑁆𑀬, 𑀢𑀲𑁆𑀲 𑀘𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀢𑀼𑀮𑁆𑀬𑀁 𑀢𑀼, 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀆𑀧𑀢𑁆𑀢𑀺𑀪𑀻𑀭𑀼𑀦𑀸 𑀦𑀺𑀘𑁆𑀘𑀁, 𑀯𑀢𑁆𑀣𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀁.

𑀚𑀸𑀡𑀼𑀫𑀡𑁆𑀟𑀮𑀢𑁄 𑀳𑁂𑀝𑁆𑀞𑀸, 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀓𑀁;

𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀢𑁆𑀣𑀩𑁆𑀩𑀁, 𑀢𑀢𑁄 𑀊𑀦𑀁 𑀦 𑀯𑀝𑁆𑀝𑀢𑀺.

𑀅𑀲𑀜𑁆𑀘𑀺𑀘𑁆𑀘𑀸𑀲𑀢𑀺𑀲𑁆𑀲𑀸𑀧𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀓𑁂𑀯𑀮𑀁;

𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲𑀸-𑀧𑀤𑀸𑀲𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀉𑀪𑁄 𑀓𑁄𑀡𑁂 𑀲𑀫𑀁 𑀓𑀢𑁆𑀯𑀸, 𑀲𑀸𑀤𑀭𑀁 𑀧𑀭𑀺𑀫𑀡𑁆𑀟𑀮𑀁;

𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀩𑁆𑀩𑁂𑀯𑀁, 𑀅𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀢𑀼, 𑀇𑀤𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁;

𑀢𑀲𑁆𑀫𑀸 𑀖𑀭𑁂 𑀯𑀺𑀳𑀸𑀭𑁂 𑀯𑀸, 𑀓𑀢𑁆𑀢𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀁.

𑀕𑀡𑁆𑀞𑀺𑀓𑀁 ¶ 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸, 𑀓𑀢𑁆𑀯𑀸 𑀓𑁄𑀡𑁂 𑀉𑀪𑁄 𑀲𑀫𑀁;

𑀙𑀸𑀤𑁂𑀢𑁆𑀯𑀸 𑀫𑀡𑀺𑀩𑀦𑁆𑀥𑀜𑁆𑀘, 𑀕𑀦𑁆𑀢𑀩𑁆𑀩𑀁 𑀕𑀻𑀯𑀫𑁂𑀯 𑀘.

𑀢𑀣𑀸 𑀅𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲, 𑀚𑀢𑁆𑀢𑀽𑀦𑀺𑀧𑀺 𑀉𑀭𑀫𑁆𑀧𑀺 𑀘;

𑀯𑀺𑀯𑀭𑀺𑀢𑁆𑀯𑀸 𑀬𑀣𑀸𑀓𑀸𑀫𑀁, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀕𑀮𑀯𑀸𑀝𑀓𑀢𑁄 𑀉𑀤𑁆𑀥𑀁, 𑀲𑀻𑀲𑀜𑁆𑀘 𑀫𑀡𑀺𑀩𑀦𑁆𑀥𑀢𑁄;

𑀳𑀢𑁆𑀣𑁂 𑀧𑀺𑀡𑁆𑀟𑀺𑀓𑀫𑀁𑀲𑀫𑁆𑀳𑀸, 𑀳𑁂𑀝𑁆𑀞𑀸 𑀧𑀸𑀤𑁂 𑀉𑀪𑁄𑀧𑀺 𑀘.

𑀯𑀺𑀯𑀭𑀺𑀢𑁆𑀯𑀸𑀯𑀲𑁂𑀲𑀜𑁆𑀘 ¶ , 𑀙𑀸𑀤𑁂𑀢𑁆𑀯𑀸 𑀘𑁂 𑀦𑀺𑀲𑀻𑀤𑀢𑀺;

𑀳𑁄𑀢𑀺 𑀲𑁄 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄, 𑀤𑁄𑀲𑁄 𑀯𑀸𑀲𑀽𑀧𑀕𑀲𑁆𑀲 𑀦.

𑀳𑀢𑁆𑀣𑀁 𑀯𑀸 𑀧𑀦 𑀧𑀸𑀤𑀁 𑀯𑀸, 𑀅𑀘𑀸𑀮𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀲𑀼𑀯𑀺𑀦𑀻𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀙𑀝𑁆𑀞𑁂 𑀦𑀢𑁆𑀣𑀺 𑀯𑀺𑀲𑁂𑀲𑀢𑀸.

𑀲𑀢𑀻𑀫𑀢𑀸𑀯𑀺𑀓𑀸𑀭𑁂𑀦, 𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀺𑀦𑀸;

𑀲𑀼𑀲𑀁𑀯𑀼𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑁄𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸.

𑀬𑀢𑁆𑀣 𑀓𑀢𑁆𑀣𑀘𑀺 𑀳𑀺 𑀝𑁆𑀞𑀸𑀦𑁂, 𑀏𑀓𑀲𑁆𑀫𑀺𑀁 𑀅𑀦𑁆𑀢𑀭𑁂 𑀖𑀭𑁂;

𑀞𑀢𑁆𑀯𑀸 𑀧𑀭𑀺𑀲𑁆𑀲𑀬𑀸𑀪𑀸𑀯𑀁, 𑀑𑀮𑁄𑀓𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀬𑁄 𑀅𑀦𑀸𑀤𑀭𑀺𑀬𑀁 𑀓𑀢𑁆𑀯𑀸, 𑀑𑀮𑁄𑀓𑁂𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁;

𑀲𑀘𑁂𑀦𑁆𑀢𑀭𑀖𑀭𑁂 𑀬𑀸𑀢𑀺, 𑀤𑀼𑀓𑁆𑀓𑀝𑀁 𑀅𑀝𑁆𑀞𑀫𑀁 𑀢𑀣𑀸.

𑀏𑀓𑀢𑁄 ¶ 𑀉𑀪𑀢𑁄 𑀯𑀸𑀧𑀺, 𑀳𑀼𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄;

𑀇𑀦𑁆𑀤𑀔𑀻𑀮𑀓𑀢𑁄 𑀅𑀦𑁆𑀢𑁄, 𑀕𑀘𑁆𑀙𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀢𑀣𑀸 𑀦𑀺𑀲𑀺𑀦𑁆𑀦𑀓𑀸𑀮𑁂𑀧𑀺, 𑀦𑀻𑀳𑀭𑀦𑁆𑀢𑁂𑀦 𑀓𑀼𑀡𑁆𑀟𑀺𑀓𑀁;

𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀢𑀩𑁆𑀩𑀸, 𑀤𑁄𑀲𑁄 𑀯𑀸𑀲𑀽𑀧𑀕𑀲𑁆𑀲 𑀦.

𑀦 𑀯𑀝𑁆𑀝𑀢𑀺 𑀳𑀲𑀦𑁆𑀢𑁂𑀦, 𑀕𑀦𑁆𑀢𑀼𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀼𑀁;

𑀯𑀢𑁆𑀣𑀼𑀲𑁆𑀫𑀺𑀁 𑀳𑀲𑀦𑀻𑀬𑀲𑁆𑀫𑀺𑀁, 𑀲𑀺𑀢𑀫𑀢𑁆𑀢𑀁 𑀢𑀼 𑀯𑀝𑁆𑀝𑀢𑀺.

𑀅𑀧𑁆𑀧𑀲𑀤𑁆𑀤𑁂𑀦 ¶ 𑀕𑀦𑁆𑀢𑀩𑁆𑀩𑀁, 𑀘𑀢𑀼𑀢𑁆𑀣𑁂𑀧𑀺 𑀅𑀬𑀁 𑀦𑀬𑁄;

𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀲𑁆𑀲, 𑀉𑀪𑀬𑀢𑁆𑀣𑀸𑀧𑀺 𑀤𑀼𑀓𑁆𑀓𑀝𑀁.

𑀓𑀸𑀬𑀧𑁆𑀧𑀘𑀸𑀮𑀓𑀁 𑀓𑀢𑁆𑀯𑀸, 𑀩𑀸𑀳𑀼𑀲𑀻𑀲𑀧𑁆𑀧𑀘𑀸𑀮𑀓𑀁;

𑀕𑀘𑁆𑀙𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀢𑀣𑁂𑀯 𑀘 𑀦𑀺𑀲𑀻𑀤𑀢𑁄.

𑀓𑀸𑀬𑀁 𑀩𑀸𑀳𑀼𑀜𑁆𑀘 𑀲𑀻𑀲𑀜𑁆𑀘, 𑀧𑀕𑁆𑀕𑀳𑁂𑀢𑁆𑀯𑀸 𑀉𑀚𑀼𑀁 𑀧𑀦;

𑀕𑀦𑁆𑀢𑀩𑁆𑀩𑀫𑀸𑀲𑀺𑀢𑀩𑁆𑀩𑀜𑁆𑀘, 𑀲𑀫𑁂𑀦𑀺𑀭𑀺𑀬𑀸𑀧𑀣𑁂𑀦 𑀢𑀼.

𑀦𑀺𑀲𑀻𑀤𑀦𑁂𑀦 𑀬𑀼𑀢𑁆𑀢𑁂𑀲𑀼, 𑀢𑀻𑀲𑀼 𑀯𑀸𑀲𑀽𑀧𑀕𑀲𑁆𑀲 𑀳𑀺;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀯𑀺𑀜𑁆𑀜𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸.

𑀔𑀫𑁆𑀪𑀁 ¶ 𑀓𑀢𑁆𑀯𑀸 𑀲𑀲𑀻𑀲𑀁 𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸𑀦 𑀕𑀘𑁆𑀙𑀢𑁄;

𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁, 𑀢𑀣𑀸 𑀉𑀓𑁆𑀓𑀼𑀝𑀺𑀓𑀸𑀬 𑀯𑀸.

𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀧𑀺, 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸;

𑀢𑀲𑁆𑀲𑀦𑁆𑀢𑀭𑀖𑀭𑁂 𑀳𑁄𑀢𑀺, 𑀦𑀺𑀲𑀻𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀤𑀼𑀢𑀺𑀬𑁂 𑀘 𑀘𑀢𑀼𑀢𑁆𑀣𑁂 𑀘, 𑀙𑀝𑁆𑀞𑁂 𑀯𑀸𑀲𑀽𑀧𑀕𑀲𑁆𑀲 𑀢𑀼;

𑀅𑀦𑀸𑀧𑀢𑁆𑀢𑀻𑀢𑀺 𑀲𑀸𑀭𑀼𑀧𑁆𑀧𑀸, 𑀙𑀩𑁆𑀩𑀻𑀲𑀢𑀺 𑀧𑀓𑀸𑀲𑀺𑀢𑀸.

𑀲𑀓𑁆𑀓𑀘𑁆𑀘𑀁 𑀲𑀢𑀺𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀼𑀦𑀸 𑀧𑀢𑁆𑀢𑀲𑀜𑁆𑀜𑀺𑀦𑀸;

𑀧𑀺𑀡𑁆𑀟𑀧𑀸𑀢𑁄 𑀕𑀳𑁂𑀢𑀩𑁆𑀩𑁄, 𑀲𑀫𑀲𑀽𑀧𑁄𑀯 𑀯𑀺𑀜𑁆𑀜𑀼𑀦𑀸.

𑀲𑀽𑀧𑁄 𑀪𑀢𑁆𑀢𑀘𑀢𑀼𑀩𑁆𑀪𑀸𑀕𑁄, ‘‘𑀲𑀫𑀲𑀽𑀧𑁄’’𑀢𑀺 𑀯𑀼𑀘𑁆𑀘𑀢𑀺;

𑀫𑀼𑀕𑁆𑀕𑀫𑀸𑀲𑀓𑀼𑀮𑀢𑁆𑀣𑀸𑀦𑀁, 𑀲𑀽𑀧𑁄 ‘‘𑀲𑀽𑀧𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀕𑀺𑀮𑀸𑀦𑀲𑁆𑀲 𑀭𑀲𑁂𑀭𑀲𑁂;

𑀢𑀣𑁂𑀯 𑀜𑀸𑀢𑀓𑀸𑀤𑀻𑀦𑀁, 𑀅𑀜𑁆𑀜𑀢𑁆𑀣𑀸𑀬 𑀥𑀦𑁂𑀦 𑀯𑀸.

𑀅𑀦𑁆𑀢𑁄𑀮𑁂𑀔𑀸𑀧𑀫𑀸𑀡𑁂𑀦 ¶ , 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸;

𑀧𑀽𑀭𑀺𑀢𑁄𑀯 𑀕𑀳𑁂𑀢𑀩𑁆𑀩𑁄, 𑀅𑀥𑀺𑀝𑁆𑀞𑀸𑀦𑀽𑀧𑀕𑀲𑁆𑀲 𑀢𑀼.

𑀢𑀢𑁆𑀣 𑀣𑀽𑀧𑀻𑀓𑀢𑀁 𑀓𑀢𑁆𑀯𑀸, 𑀕𑀡𑁆𑀳𑀢𑁄 𑀬𑀸𑀯𑀓𑀸𑀮𑀺𑀓𑀁;

𑀬𑀁 𑀓𑀺𑀜𑁆𑀘𑀺 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀅𑀥𑀺𑀝𑁆𑀞𑀸𑀦𑀽𑀧𑀕𑁂 𑀧𑀢𑁆𑀢𑁂, 𑀓𑀸𑀮𑀺𑀓𑀢𑁆𑀢𑀬𑀫𑁂𑀯 𑀘;

𑀲𑁂𑀲𑁂 𑀣𑀽𑀧𑀻𑀓𑀢𑀁 𑀲𑀩𑁆𑀩𑀁, 𑀯𑀝𑁆𑀝𑀢𑁂𑀯 𑀦 𑀲𑀁𑀲𑀬𑁄.

𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼 𑀪𑀢𑁆𑀢𑀁 𑀢𑀼, 𑀕𑀳𑁂𑀢𑁆𑀯𑀸 𑀧𑀢𑁆𑀢𑀫𑁂𑀓𑀓𑀁;

𑀧𑀽𑀭𑁂𑀢𑁆𑀯𑀸 𑀬𑀤𑀺 𑀧𑁂𑀲𑁂𑀢𑀺, 𑀪𑀺𑀓𑁆𑀔𑀽𑀦𑀁 𑀧𑀦 𑀯𑀝𑁆𑀝𑀢𑀺.

𑀧𑀢𑁆𑀢𑁂 ¶ 𑀧𑀓𑁆𑀔𑀺𑀧𑁆𑀧𑀫𑀸𑀦𑀁 𑀬𑀁, 𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀤𑀺𑀓𑀁;

𑀑𑀭𑁄𑀳𑀢𑀺 𑀲𑀘𑁂 𑀳𑁂𑀝𑁆𑀞𑀸, 𑀦 𑀢𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑀧𑀼𑀧𑁆𑀨𑀢𑀓𑁆𑀓𑁄𑀮𑀓𑀸𑀤𑀻𑀦𑀁, 𑀞𑀧𑁂𑀢𑁆𑀯𑀸 𑀘𑁂 𑀯𑀝𑀁𑀲𑀓𑀁;

𑀤𑀺𑀦𑁆𑀦𑀁 𑀅𑀬𑀸𑀯𑀓𑀸𑀮𑀺𑀢𑁆𑀢𑀸, 𑀦 𑀢𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑀯𑀝𑀁𑀲𑀓𑀁 𑀢𑀼 𑀧𑀽𑀯𑀲𑁆𑀲, 𑀞𑀧𑁂𑀢𑁆𑀯𑀸 𑀑𑀤𑀦𑁄𑀧𑀭𑀺;

𑀧𑀺𑀡𑁆𑀟𑀧𑀸𑀢𑀁 𑀲𑀘𑁂 𑀤𑁂𑀦𑁆𑀢𑀺, 𑀇𑀤𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸.

𑀪𑀢𑁆𑀢𑀲𑁆𑀲𑀽𑀧𑀭𑀺 𑀧𑀡𑁆𑀡𑀁 𑀯𑀸, 𑀣𑀸𑀮𑀓𑀁 𑀯𑀸𑀧𑀺 𑀓𑀺𑀜𑁆𑀘𑀺𑀧𑀺;

𑀞𑀧𑁂𑀢𑁆𑀯𑀸 𑀧𑀭𑀺𑀧𑀽𑀭𑁂𑀢𑁆𑀯𑀸, 𑀲𑀘𑁂 𑀕𑀡𑁆𑀳𑀸𑀢𑀺 𑀯𑀝𑁆𑀝𑀢𑀺.

𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯𑀲𑁆𑀲, 𑀢𑀁 𑀢𑀼 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺;

𑀕𑀳𑀺𑀢𑀁 𑀲𑀼𑀕𑀳𑀺𑀢𑀁, 𑀧𑀘𑁆𑀙𑀸, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀣𑀸𑀲𑀼𑀔𑀁.

𑀧𑀞𑀫𑀁 𑀤𑀼𑀢𑀺𑀬𑀁 𑀯𑀼𑀢𑁆𑀢-𑀦𑀬𑀁 𑀢𑀼 𑀢𑀢𑀺𑀬𑁂 𑀧𑀦;

𑀉𑀧𑀭𑁄𑀥𑀺𑀫𑀤𑀲𑁆𑀲𑁂𑀢𑁆𑀯𑀸, 𑀪𑁄𑀢𑁆𑀢𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸.

𑀅𑀜𑁆𑀜𑁂𑀲𑀁 𑀅𑀢𑁆𑀢𑀦𑁄 𑀪𑀢𑁆𑀢𑀁, 𑀆𑀓𑀺𑀭𑀁 𑀧𑀦 𑀪𑀸𑀚𑀦𑁂;

𑀦𑀢𑁆𑀣𑁄𑀫𑀲𑀢𑀺 𑀘𑁂 𑀤𑁄𑀲𑁄, 𑀢𑀣𑀸 𑀉𑀢𑁆𑀢𑀭𑀺𑀪𑀗𑁆𑀕𑀓𑀁.

𑀘𑀢𑀼𑀢𑁆𑀣𑁂 𑀬𑀁 𑀢𑀼 𑀯𑀢𑁆𑀢𑀩𑁆𑀩𑀁, 𑀯𑀼𑀢𑁆𑀢𑀁 𑀧𑀼𑀩𑁆𑀩𑁂 𑀅𑀲𑁂𑀲𑀢𑁄;

𑀧𑀜𑁆𑀘𑀫𑁂 𑀫𑀢𑁆𑀣𑀓𑀁 𑀤𑁄𑀲𑁄, 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄.

𑀅𑀦𑀸𑀧𑀢𑁆𑀢𑀺 ¶ 𑀕𑀺𑀮𑀸𑀦𑀲𑁆𑀲, 𑀧𑀭𑀺𑀢𑁆𑀢𑁂𑀧𑀺 𑀘 𑀲𑁂𑀲𑀓𑁂;

𑀏𑀓𑀢𑁄 𑀧𑀦 𑀫𑀤𑁆𑀤𑀺𑀢𑁆𑀯𑀸, 𑀲𑀁𑀓𑀟𑁆𑀠𑀺𑀢𑁆𑀯𑀸𑀦 𑀪𑀼𑀜𑁆𑀚𑀢𑁄.

𑀬𑁄 ¶ 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀳𑁂𑀢𑀼, 𑀲𑀽𑀧𑀁 𑀯𑀸 𑀩𑁆𑀬𑀜𑁆𑀚𑀦𑀫𑁆𑀧𑀺 𑀯𑀸;

𑀧𑀝𑀺𑀘𑁆𑀙𑀸𑀤𑁂𑀬𑁆𑀬 𑀪𑀢𑁆𑀢𑁂𑀦, 𑀢𑀲𑁆𑀲 𑀘𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀯𑀺𑀜𑁆𑀜𑀢𑁆𑀢𑀺𑀬𑀁 𑀢𑀼 𑀯𑀢𑁆𑀢𑀩𑁆𑀩𑀁, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀅𑀝𑁆𑀞𑀫𑁂 𑀧𑀦 𑀉𑀚𑁆𑀛𑀸𑀦𑁂, 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀺.

‘‘𑀤𑀲𑁆𑀲𑀸𑀫𑀺 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺, 𑀑𑀮𑁄𑀓𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀦 𑀘 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄.

𑀫𑀳𑀦𑁆𑀢𑀁 𑀧𑀦 𑀫𑁄𑀭𑀡𑁆𑀟𑀁, 𑀓𑀼𑀓𑁆𑀓𑀼𑀝𑀡𑁆𑀟𑀜𑁆𑀘 𑀔𑀼𑀤𑁆𑀤𑀓𑀁;

𑀢𑁂𑀲𑀁 𑀫𑀚𑁆𑀛𑀧𑁆𑀧𑀫𑀸𑀡𑁂𑀦, 𑀓𑀢𑁆𑀢𑀩𑁆𑀩𑁄 𑀓𑀩𑀴𑁄 𑀧𑀦.

𑀔𑀚𑁆𑀚𑀓𑁂 𑀧𑀦 𑀲𑀩𑁆𑀩𑀢𑁆𑀣, 𑀫𑀽𑀮𑀔𑀸𑀤𑀦𑀺𑀬𑀸𑀤𑀺𑀓𑁂;

𑀨𑀮𑀸𑀨𑀮𑁂 𑀅𑀦𑀸𑀧𑀢𑁆𑀢𑀺, 𑀕𑀺𑀮𑀸𑀦𑀼𑀫𑁆𑀫𑀢𑁆𑀢𑀓𑀸𑀤𑀺𑀦𑁄.

𑀅𑀤𑀻𑀖𑁄 𑀧𑀦 𑀓𑀸𑀢𑀩𑁆𑀩𑁄, 𑀆𑀮𑁄𑀧𑁄 𑀧𑀭𑀺𑀫𑀡𑁆𑀟𑀮𑁄;

𑀔𑀚𑁆𑀚𑀢𑀼𑀢𑁆𑀢𑀭𑀺𑀪𑀗𑁆𑀕𑀲𑁆𑀫𑀺𑀁, 𑀅𑀦𑀸𑀧𑀢𑁆𑀢𑀺 𑀨𑀮𑀸𑀨𑀮𑁂.

𑀅𑀦𑀸𑀳𑀝𑁂 𑀫𑀼𑀔𑀤𑁆𑀯𑀸𑀭𑀁, 𑀅𑀧𑁆𑀧𑀢𑁆𑀢𑁂 𑀓𑀩𑀴𑁂 𑀧𑀦;

𑀅𑀢𑁆𑀢𑀦𑁄 𑀘 𑀫𑀼𑀔𑀤𑁆𑀯𑀸𑀭𑀁, 𑀯𑀺𑀯𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀫𑀼𑀔𑁂 ¶ ¶ 𑀘 𑀲𑀓𑀮𑀁 𑀳𑀢𑁆𑀣𑀁, 𑀧𑀓𑁆𑀔𑀺𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀫𑀼𑀔𑁂 𑀘 𑀓𑀩𑀴𑀁 𑀓𑀢𑁆𑀯𑀸, 𑀓𑀣𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀯𑀘𑀦𑀁 𑀬𑀢𑁆𑀢𑀓𑁂𑀦𑀲𑁆𑀲, 𑀧𑀭𑀺𑀧𑀼𑀡𑁆𑀡𑀁 𑀦 𑀳𑁄𑀢𑀺 𑀳𑀺;

𑀫𑀼𑀔𑀲𑁆𑀫𑀺𑀁𑀢𑀢𑁆𑀢𑀓𑁂 𑀲𑀦𑁆𑀢𑁂, 𑀩𑁆𑀬𑀸𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀫𑀼𑀔𑁂 𑀳𑀭𑀻𑀢𑀓𑀸𑀤𑀻𑀦𑀺, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀺 𑀬𑁄;

𑀯𑀘𑀦𑀁 𑀧𑀭𑀺𑀧𑀼𑀡𑁆𑀡𑀁 𑀘𑁂, 𑀓𑀣𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺.

𑀬𑁄 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀁 𑀪𑀺𑀓𑁆𑀔𑀼, 𑀓𑀩𑀴𑀘𑁆𑀙𑁂𑀤𑀓𑀫𑁆𑀧𑀺 𑀯𑀸;

𑀫𑀓𑁆𑀓𑀝𑁄 𑀯𑀺𑀬 𑀕𑀡𑁆𑀟𑁂 𑀯𑀸, 𑀓𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬 𑀤𑀼𑀓𑁆𑀓𑀝𑀁.

𑀦𑀺𑀤𑁆𑀥𑀼𑀦𑀺𑀢𑁆𑀯𑀸𑀦 𑀳𑀢𑁆𑀣𑀁 𑀯𑀸, 𑀪𑀢𑁆𑀢𑀁 𑀲𑀺𑀢𑁆𑀣𑀸𑀯𑀓𑀸𑀭𑀓𑀁;

𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀁 𑀯𑀸𑀧𑀺, 𑀢𑀣𑀸 ‘‘𑀘𑀧𑀼 𑀘𑀧𑀽’’𑀢𑀺 𑀯𑀸.

𑀅𑀦𑀸𑀤𑀭𑀯𑀲𑁂𑀦𑁂𑀯, 𑀪𑀼𑀜𑁆𑀚𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

𑀲𑀢𑁆𑀢𑀫𑁂 𑀅𑀝𑁆𑀞𑀫𑁂 𑀦𑀢𑁆𑀣𑀺, 𑀤𑁄𑀲𑁄 𑀓𑀘𑀯𑀭𑀼𑀚𑁆𑀛𑀦𑁂.

𑀓𑀢𑁆𑀯𑀸 𑀏𑀯𑀁 𑀦 𑀪𑁄𑀢𑁆𑀢𑀩𑁆𑀩𑀁, 𑀲𑀤𑁆𑀤𑀁 ‘‘𑀲𑀼𑀭𑀼 𑀲𑀼𑀭𑀽’’𑀢𑀺 𑀘;

𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀯𑀸𑀧𑀺, 𑀦 𑀘 𑀯𑀝𑁆𑀝𑀢𑀺 𑀪𑀼𑀜𑁆𑀚𑀺𑀢𑀼𑀁.

𑀨𑀸𑀡𑀺𑀢𑀁 𑀖𑀦𑀬𑀸𑀕𑀼𑀁 𑀯𑀸, 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀻𑀳𑀺 𑀢𑀁;

𑀫𑀼𑀔𑁂 𑀅𑀗𑁆𑀕𑀼𑀮𑀺𑀬𑁄 𑀪𑁄𑀢𑁆𑀢𑀼𑀁, 𑀧𑀯𑁂𑀲𑁂𑀢𑁆𑀯𑀸𑀧𑀺 𑀯𑀝𑁆𑀝𑀢𑀺.

𑀦 ¶ 𑀧𑀢𑁆𑀢𑁄 𑀮𑁂𑀳𑀺𑀢𑀩𑁆𑀩𑁄𑀯, 𑀏𑀓𑀸𑀬𑀗𑁆𑀕𑀼𑀮𑀺𑀓𑀸𑀬 𑀯𑀸;

𑀏𑀓𑀑𑀝𑁆𑀞𑁄𑀧𑀺 𑀚𑀺𑀯𑁆𑀳𑀸𑀬, 𑀦 𑀘 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑀓𑁄.

𑀲𑀸𑀫𑀺𑀲𑁂𑀦 ¶ 𑀢𑀼 𑀳𑀢𑁆𑀣𑁂𑀦, 𑀦 𑀘 𑀧𑀸𑀦𑀻𑀬𑀣𑀸𑀮𑀓𑀁;

𑀕𑀳𑁂𑀢𑀩𑁆𑀩𑀁, 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀳𑀺.

𑀧𑀼𑀕𑁆𑀕𑀮𑀲𑁆𑀲 𑀘 𑀲𑀗𑁆𑀖𑀲𑁆𑀲, 𑀕𑀳𑀝𑁆𑀞𑀲𑁆𑀲𑀢𑁆𑀢𑀦𑁄𑀧𑀺 𑀘;

𑀲𑀦𑁆𑀢𑀓𑁄 𑀧𑀦 𑀲𑀗𑁆𑀔𑁄 𑀯𑀸, 𑀲𑀭𑀸𑀯𑀁 𑀯𑀸𑀧𑀺 𑀣𑀸𑀮𑀓𑀁.

𑀢𑀲𑁆𑀫𑀸 𑀦 𑀘 𑀕𑀳𑁂𑀢𑀩𑁆𑀩𑀁, 𑀕𑀡𑁆𑀳𑀢𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

𑀅𑀦𑀸𑀫𑀺𑀲𑁂𑀦 𑀳𑀢𑁆𑀣𑁂𑀦, 𑀕𑀳𑀡𑀁 𑀧𑀦 𑀯𑀝𑁆𑀝𑀢𑀺.

𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂;

𑀦𑀻𑀳𑀭𑀺𑀢𑁆𑀯𑀸 𑀅𑀦𑀸𑀧𑀢𑁆𑀢𑀺, 𑀙𑀟𑁆𑀟𑁂𑀦𑁆𑀢𑀲𑁆𑀲 𑀖𑀭𑀸 𑀩𑀳𑀺.

𑀙𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑁂𑀦, 𑀲𑀭𑀻𑀭𑀸𑀯𑀬𑀯𑁂𑀦 𑀯𑀸;

𑀲𑀘𑁂 𑀥𑀸𑀭𑀬𑀫𑀸𑀦𑀲𑁆𑀲, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀓𑀝𑀁.

𑀅𑀬𑀫𑁂𑀯 𑀦𑀬𑁄 𑀯𑀼𑀢𑁆𑀢𑁄, 𑀤𑀡𑁆𑀟𑀧𑀸𑀡𑀺𑀫𑁆𑀳𑀺 𑀧𑀼𑀕𑁆𑀕𑀮𑁂;

𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄𑀯, 𑀤𑀡𑁆𑀟𑁄 𑀫𑀚𑁆𑀛𑀺𑀫𑀳𑀢𑁆𑀣𑀢𑁄.

𑀢𑀣𑁂𑀯 ¶ 𑀲𑀢𑁆𑀣𑀧𑀸𑀡𑀺𑀲𑁆𑀲, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀓𑀝𑀁;

𑀲𑀢𑁆𑀣𑀧𑀸𑀡𑀻 𑀦 𑀳𑁄𑀢𑀸𑀲𑀺𑀁, 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀞𑀺𑀢𑁄 𑀧𑀦.

𑀥𑀦𑀼𑀁 𑀲𑀭𑁂𑀦 𑀲𑀤𑁆𑀥𑀺𑀁 𑀯𑀸, 𑀥𑀦𑀼𑀁 𑀯𑀸 𑀲𑀭𑀫𑁂𑀯 𑀯𑀸;

𑀲𑀚𑀺𑀬𑀁 𑀦𑀺𑀚𑀺𑀬𑀁 𑀯𑀸𑀧𑀺, 𑀕𑀳𑁂𑀢𑁆𑀯𑀸 𑀥𑀦𑀼𑀤𑀡𑁆𑀟𑀓𑀁.

𑀞𑀺𑀢𑀲𑁆𑀲𑀧𑀺 𑀦𑀺𑀲𑀺𑀦𑁆𑀦𑀲𑁆𑀲, 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀯𑀸 𑀢𑀣𑀸;

𑀲𑀘𑁂 𑀤𑁂𑀲𑁂𑀢𑀺 𑀲𑀤𑁆𑀥𑀫𑁆𑀫𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀧𑀝𑀺𑀫𑀼𑀓𑁆𑀓𑀫𑁆𑀧𑀺 ¶ 𑀓𑀡𑁆𑀞𑀫𑁆𑀳𑀺, 𑀥𑀦𑀼𑀁 𑀳𑀢𑁆𑀣𑁂𑀦 𑀬𑀸𑀯𑀢𑀸;

𑀦 𑀕𑀡𑁆𑀳𑀸𑀢𑀺 𑀦𑀭𑁄 𑀢𑀸𑀯, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬 𑀯𑀝𑁆𑀝𑀢𑀺.

𑀧𑀸𑀤𑀼𑀓𑀸𑀭𑀼𑀴𑁆𑀳𑀓𑀲𑁆𑀲𑀸𑀧𑀺, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀓𑀝𑀁;

𑀅𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲𑀸𑀧𑀺, 𑀧𑀝𑀺𑀫𑀼𑀓𑁆𑀓𑀲𑁆𑀲 𑀯𑀸 𑀢𑀣𑀸.

𑀉𑀧𑀸𑀳𑀦𑀕𑀢𑀲𑁆𑀲𑀸𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄;

𑀲𑀩𑁆𑀩𑀢𑁆𑀣 𑀅𑀕𑀺𑀮𑀸𑀦𑀲𑁆𑀲, 𑀬𑀸𑀦𑁂 𑀯𑀸 𑀲𑀬𑀦𑁂𑀧𑀺 𑀯𑀸.

𑀦𑀺𑀧𑀦𑁆𑀦𑀲𑁆𑀲𑀸𑀕𑀺𑀮𑀸𑀦𑀲𑁆𑀲, 𑀓𑀝𑀲𑀸𑀭𑁂 𑀙𑀫𑀸𑀬 𑀯𑀸;

𑀧𑀻𑀞𑁂 𑀫𑀜𑁆𑀘𑁂𑀧𑀺 𑀯𑀸 𑀉𑀘𑁆𑀘𑁂, 𑀦𑀺𑀲𑀺𑀦𑁆𑀦𑁂𑀦 𑀞𑀺𑀢𑁂𑀦 𑀯𑀸.

𑀦 𑀘 𑀯𑀝𑁆𑀝𑀢𑀺 𑀤𑁂𑀲𑁂𑀢𑀼𑀁, 𑀞𑀢𑁆𑀯𑀸 𑀯𑀸 𑀉𑀘𑁆𑀘𑀪𑀽𑀫𑀺𑀬𑀁;

𑀲𑀬𑀦𑁂𑀲𑀼 𑀕𑀢𑁂𑀦𑀸𑀧𑀺, 𑀲𑀬𑀦𑁂𑀲𑀼 𑀕𑀢𑀲𑁆𑀲 𑀘.

𑀲𑀫𑀸𑀦𑁂 𑀯𑀸𑀧𑀺 𑀉𑀘𑁆𑀘𑁂 𑀯𑀸, 𑀦𑀺𑀧𑀦𑁆𑀦𑁂 𑀦𑁂𑀯 𑀯𑀝𑁆𑀝𑀢𑀺;

𑀦𑀺𑀧𑀦𑁆𑀦𑁂𑀦 𑀞𑀺𑀢𑀲𑁆𑀲𑀸𑀧𑀺, 𑀦𑀺𑀧𑀦𑁆𑀦𑀲𑁆𑀲𑀧𑀺 𑀯𑀝𑁆𑀝𑀢𑀺.

𑀦𑀺𑀲𑀺𑀦𑁆𑀦𑁂𑀦 ¶ 𑀦𑀺𑀲𑀺𑀦𑁆𑀦𑀲𑁆𑀲, 𑀞𑀺𑀢𑀲𑁆𑀲𑀸𑀧𑀺 𑀘 𑀯𑀝𑁆𑀝𑀢𑀺;

𑀞𑀺𑀢𑀲𑁆𑀲𑁂𑀯 𑀞𑀺𑀢𑁂𑀦𑀸𑀧𑀺, 𑀤𑁂𑀲𑁂𑀢𑀼𑀫𑁆𑀧𑀺 𑀢𑀣𑁂𑀯 𑀘.

𑀧𑀮𑁆𑀮𑀢𑁆𑀣𑀺𑀓𑀸 𑀦𑀺𑀲𑀺𑀦𑁆𑀦𑀲𑁆𑀲, 𑀅𑀕𑀺𑀮𑀸𑀦𑀲𑁆𑀲 𑀤𑁂𑀳𑀺𑀦𑁄;

𑀢𑀣𑀸 𑀯𑁂𑀞𑀺𑀢𑀲𑀻𑀲𑀲𑁆𑀲, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀼𑀓𑁆𑀓𑀝𑀁.

𑀓𑁂𑀲𑀦𑁆𑀢𑀁 𑀯𑀺𑀯𑀭𑀸𑀧𑁂𑀢𑁆𑀯𑀸, 𑀤𑁂𑀲𑁂𑀢𑀺 𑀬𑀤𑀺 𑀯𑀝𑁆𑀝𑀢𑀺;

𑀲𑀲𑀻𑀲𑀁 𑀧𑀸𑀭𑀼𑀢𑀲𑁆𑀲𑀸𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀝𑁆𑀞𑀫𑁂 ¶ 𑀦𑀯𑀫𑁂 𑀯𑀸𑀧𑀺, 𑀤𑀲𑀫𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀲𑀘𑁂𑀧𑀺 𑀣𑁂𑀭𑀼𑀧𑀝𑁆𑀞𑀸𑀦𑀁, 𑀕𑀦𑁆𑀢𑁆𑀯𑀸𑀦 𑀤𑀳𑀭𑀁 𑀞𑀺𑀢𑀁.

𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑀘𑁂 𑀣𑁂𑀭𑁄, 𑀓𑀣𑁂𑀢𑀼𑀁 𑀦 𑀘 𑀯𑀝𑁆𑀝𑀢𑀺;

𑀢𑀲𑁆𑀲 𑀧𑀲𑁆𑀲𑁂 𑀧𑀦𑀜𑁆𑀜𑀲𑁆𑀲, 𑀓𑀣𑁂𑀢𑀩𑁆𑀩𑀁 𑀯𑀺𑀚𑀸𑀦𑀢𑀸.

𑀕𑀘𑁆𑀙𑀢𑁄 𑀧𑀼𑀭𑀢𑁄 𑀧𑀜𑁆𑀳𑀁, 𑀦 𑀯𑀢𑁆𑀢𑀩𑁆𑀩𑀁 𑀢𑀼 𑀧𑀘𑁆𑀙𑀢𑁄;

‘‘𑀧𑀘𑁆𑀙𑀺𑀫𑀲𑁆𑀲 𑀓𑀣𑁂𑀫𑀻’’𑀢𑀺, 𑀯𑀢𑁆𑀢𑀩𑁆𑀩𑀁 𑀯𑀺𑀦𑀬𑀜𑁆𑀜𑀼𑀦𑀸.

𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀁 𑀥𑀫𑁆𑀫𑀁, 𑀲𑀚𑁆𑀛𑀸𑀬𑀢𑀺 𑀳𑀺 𑀯𑀝𑁆𑀝𑀢𑀺;

𑀲𑀫𑀫𑁂𑀯 𑀬𑀼𑀕𑀕𑁆𑀕𑀸𑀳𑀁, 𑀓𑀣𑁂𑀢𑀼𑀁 𑀕𑀘𑁆𑀙𑀢𑁄𑀧𑀺 𑀘.

𑀏𑀓𑁂𑀓𑀲𑁆𑀲𑀸𑀧𑀺 ¶ 𑀘𑀓𑁆𑀓𑀲𑁆𑀲, 𑀧𑀣𑁂𑀦𑀸𑀧𑀺 𑀘 𑀕𑀘𑁆𑀙𑀢𑁄;

𑀉𑀧𑁆𑀧𑀣𑁂𑀦 𑀲𑀫𑀁 𑀯𑀸𑀧𑀺, 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀯𑀝𑁆𑀝𑀢𑀺.

𑀢𑀢𑀺𑀬𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁, 𑀘𑀢𑀼𑀢𑁆𑀣𑁂 𑀳𑀭𑀺𑀢𑁂 𑀧𑀦;

𑀉𑀘𑁆𑀘𑀸𑀭𑀸𑀤𑀺𑀘𑀢𑀼𑀓𑁆𑀓𑀁 𑀢𑀼, 𑀓𑀭𑁄𑀢𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀚𑀻𑀯𑀭𑀼𑀓𑁆𑀔𑀲𑁆𑀲 𑀬𑀁 𑀫𑀽𑀮𑀁, 𑀤𑀺𑀲𑁆𑀲𑀫𑀸𑀦𑀁 𑀢𑀼 𑀕𑀘𑁆𑀙𑀢𑀺;

𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀢𑀁, 𑀲𑀩𑁆𑀩𑀁 𑀳𑀭𑀺𑀢𑀫𑁂𑀯 𑀳𑀺.

𑀲𑀘𑁂 𑀅𑀳𑀭𑀺𑀢𑀁 𑀞𑀸𑀦𑀁, 𑀧𑁂𑀓𑁆𑀔𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄;

𑀯𑀘𑁆𑀘𑀁 𑀦𑀺𑀓𑁆𑀔𑀫𑀢𑁂𑀯𑀲𑁆𑀲, 𑀲𑀳𑀲𑀸 𑀧𑀦 𑀯𑀝𑁆𑀝𑀢𑀺.

𑀧𑀮𑀸𑀮𑀡𑁆𑀟𑀼𑀧𑀓𑁂 𑀯𑀸𑀧𑀺, 𑀕𑁄𑀫𑀬𑁂 𑀯𑀸𑀧𑀺 𑀓𑀺𑀲𑁆𑀫𑀺𑀘𑀺;

𑀓𑀢𑁆𑀢𑀩𑁆𑀩𑀁, 𑀳𑀭𑀺𑀢𑀁 𑀧𑀘𑁆𑀙𑀸, 𑀢𑀫𑁄𑀢𑁆𑀣𑀭𑀢𑀺 𑀯𑀝𑁆𑀝𑀢𑀺.

𑀓𑀢𑁄 𑀅𑀳𑀭𑀺𑀢𑁂 𑀞𑀸𑀦𑁂, 𑀳𑀭𑀺𑀢𑀁 𑀏𑀢𑀺 𑀯𑀝𑁆𑀝𑀢𑀺;

𑀲𑀺𑀗𑁆𑀖𑀸𑀡𑀺𑀓𑀸 𑀕𑀢𑀸 𑀏𑀢𑁆𑀣, 𑀔𑁂𑀴𑁂𑀦𑁂𑀯 𑀘 𑀲𑀗𑁆𑀕𑀳𑀁.

𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺-𑀉𑀤𑀓𑁂𑀲𑀼𑀧𑀺 ¶ 𑀪𑀺𑀓𑁆𑀔𑀼𑀦𑁄;

𑀢𑁂𑀲𑀁 𑀅𑀧𑀭𑀺𑀪𑁄𑀕𑀢𑁆𑀢𑀸, 𑀓𑀭𑁄𑀢𑁄 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁.

𑀤𑁂𑀯𑁂 𑀧𑀦 𑀘 𑀯𑀲𑁆𑀲𑀦𑁆𑀢𑁂, 𑀉𑀤𑀓𑁄𑀖𑁂 𑀲𑀫𑀦𑁆𑀢𑀢𑁄;

𑀅𑀚𑀮𑀁 𑀅𑀮𑀪𑀦𑁆𑀢𑁂𑀦, 𑀚𑀮𑁂 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 ¶ 𑀜𑁂𑀬𑁆𑀬𑀸, 𑀲𑁂𑀔𑀺𑀬𑀸𑀦𑀁 𑀧𑀦𑁂𑀢𑁆𑀣 𑀳𑀺;

𑀉𑀚𑁆𑀚𑀕𑁆𑀖𑀺𑀓𑀸𑀤𑀺𑀘𑀢𑁆𑀢𑀸𑀭𑀺, 𑀓𑀩𑀴𑁂𑀦 𑀫𑀼𑀔𑁂𑀦 𑀘.

𑀙𑀫𑀸𑀦𑀻𑀘𑀸𑀲𑀦𑀝𑁆𑀞𑀸𑀦-𑀧𑀘𑁆𑀙𑀸 𑀉𑀧𑁆𑀧𑀣𑀯𑀸 𑀤𑀲;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀯𑀼𑀢𑁆𑀢𑀸 𑀲𑀫𑀦𑀼𑀪𑀸𑀲𑀦𑁂.

𑀙𑀢𑁆𑀢𑀁 𑀤𑀡𑁆𑀟𑀸𑀯𑀼𑀥𑀁 𑀲𑀢𑁆𑀣𑀁, 𑀧𑀸𑀤𑀼𑀓𑀸𑀭𑀼𑀴𑁆𑀳𑀼𑀧𑀸𑀳𑀦𑀸;

𑀬𑀸𑀦𑀁 𑀲𑀬𑀦𑀧𑀮𑁆𑀮𑀢𑁆𑀣-𑀯𑁂𑀞𑀺𑀢𑁄𑀕𑀼𑀡𑁆𑀞𑀺𑀢𑀸𑀦𑀺 𑀘.

𑀥𑀫𑁆𑀫𑀤𑁂𑀲𑀦𑀸𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀦;

𑀲𑀽𑀧𑁄𑀤𑀦𑁂𑀦 𑀯𑀺𑀜𑁆𑀜𑀢𑁆𑀢𑀺, 𑀣𑁂𑀬𑁆𑀬𑀲𑀢𑁆𑀣𑀲𑀫𑀁 𑀫𑀢𑀁.

𑀅𑀯𑀲𑁂𑀲𑀸 𑀢𑀺𑀧𑀜𑁆𑀜𑀸𑀲, 𑀲𑀫𑀸𑀦𑀸 𑀧𑀞𑀫𑁂𑀦 𑀢𑀼;

𑀲𑁂𑀔𑀺𑀬𑁂𑀲𑀼𑀧𑀺 𑀲𑀩𑁆𑀩𑁂𑀲𑀼, 𑀅𑀦𑀸𑀧𑀢𑁆𑀢𑀸𑀧𑀤𑀸𑀲𑀼𑀧𑀺.

𑀉𑀚𑁆𑀛𑀸𑀦𑀲𑀜𑁆𑀜𑀺𑀓𑁂 𑀣𑀽𑀧𑀻-𑀓𑀢𑁂 𑀲𑀽𑀧𑀧𑀝𑀺𑀘𑁆𑀙𑀤𑁂;

𑀢𑀻𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑁆𑀯𑁂𑀯, 𑀕𑀺𑀮𑀸𑀦𑁄 𑀦 𑀧𑀦𑀸𑀕𑀢𑁄.

𑀇𑀫𑀁 𑀯𑀺𑀤𑀺𑀢𑁆𑀯𑀸 𑀯𑀺𑀦𑀬𑁂 𑀯𑀺𑀦𑀺𑀘𑁆𑀙𑀬𑀁;

𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀯𑀺𑀦𑀻𑀢𑀫𑀸𑀦𑀲𑁄;

𑀧𑀭𑁂𑀳𑀺 𑀲𑁄 𑀳𑁄𑀢𑀺 𑀘 𑀤𑀼𑀧𑁆𑀧𑀥𑀁𑀲𑀺𑀬𑁄;

𑀢𑀢𑁄 𑀳𑀺 𑀲𑀺𑀓𑁆𑀔𑁂 𑀲𑀢𑀢𑀁 𑀲𑀫𑀸𑀳𑀺𑀢𑁄.

𑀧𑀝𑀼𑀢𑁆𑀢𑀫𑀥𑀺𑀓𑁂 𑀳𑀺𑀢𑁂 𑀓𑁂 𑀳𑀺 𑀢𑁂;

𑀦 𑀬𑀦𑁆𑀢𑀺 𑀓𑀮𑀺𑀲𑀸𑀲𑀦𑁂 𑀲𑀸𑀲𑀦𑁂.

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀦𑀁 ¶ ¶ 𑀳𑀺𑀢𑀢𑁆𑀣𑀸𑀬, 𑀯𑀺𑀪𑀗𑁆𑀕𑀁 𑀬𑀁 𑀚𑀺𑀦𑁄𑀩𑁆𑀭𑀯𑀺;

𑀢𑀲𑁆𑀫𑀺𑀁 𑀅𑀧𑀺 𑀲𑀫𑀸𑀲𑁂𑀦, 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑀡𑀸𑀫𑀳𑀁.

𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁, 𑀧𑀝𑀺𑀲𑁂𑀯𑁂𑀬𑁆𑀬 𑀬𑀸 𑀧𑀦;

𑀳𑁄𑀢𑀺 𑀧𑀸𑀭𑀸𑀚𑀺𑀓𑀸 𑀦𑀸𑀫, 𑀲𑀫𑀡𑀻 𑀲𑀸 𑀧𑀯𑀼𑀘𑁆𑀘𑀢𑀺.

𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀁, 𑀦𑀯𑀦𑁆𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀲𑀚𑀻𑀯𑀲𑁆𑀲𑀸𑀧𑁆𑀬𑀚𑀻𑀯𑀲𑁆𑀲, 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁.

𑀅𑀢𑁆𑀢𑀦𑁄 𑀢𑀺𑀯𑀺𑀥𑁂 𑀫𑀕𑁆𑀕𑁂, 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀸𑀤𑀺𑀓𑀁;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀻, 𑀅𑀮𑁆𑀮𑁄𑀓𑀸𑀲𑁂 𑀧𑀭𑀸𑀚𑀺𑀢𑀸.

𑀇𑀢𑁄 𑀧𑀭𑀫𑀯𑀢𑁆𑀯𑀸𑀯, 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁;

𑀅𑀲𑀸𑀥𑀸𑀭𑀡𑀫𑁂𑀯𑀸𑀳𑀁, 𑀪𑀡𑀺𑀲𑁆𑀲𑀸𑀫𑀺 𑀲𑀫𑀸𑀲𑀢𑁄.

𑀅𑀥𑀓𑁆𑀔𑀓𑀁 𑀲𑀭𑀻𑀭𑀓𑀁, 𑀬𑀤𑀼𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁;

𑀲𑀭𑀻𑀭𑀓𑁂𑀦 𑀘𑁂 𑀢𑁂𑀦, 𑀨𑀼𑀲𑁂𑀬𑁆𑀬 𑀪𑀺𑀓𑁆𑀔𑀼𑀦𑀻 𑀧𑀦.

𑀅𑀯𑀲𑁆𑀲𑀼𑀢𑀲𑁆𑀲𑀸𑀯𑀲𑁆𑀲𑀼𑀢𑀸, 𑀫𑀦𑀼𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀬𑀸;

𑀲𑀭𑀻𑀭𑀫𑀲𑁆𑀲 𑀢𑁂𑀦 𑀯𑀸, 𑀨𑀼𑀝𑁆𑀞𑀸 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸.

𑀓𑀧𑁆𑀧𑀭𑀲𑁆𑀲 𑀧𑀦𑀼𑀤𑁆𑀥𑀫𑁆𑀧𑀺, 𑀕𑀳𑀺𑀢𑀁 𑀉𑀩𑁆𑀪𑀚𑀸𑀡𑀼𑀦𑀸;

𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦, 𑀓𑀸𑀬𑁂𑀦𑀸𑀦𑁂𑀦 𑀅𑀢𑁆𑀢𑀦𑁄.

𑀧𑀼𑀭𑀺𑀲𑀲𑁆𑀲 𑀢𑀣𑀸 𑀓𑀸𑀬- 𑀧𑀝𑀺𑀩𑀤𑁆𑀥𑀁 𑀨𑀼𑀲𑀦𑁆𑀢𑀺𑀬𑀸;

𑀢𑀣𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦- 𑀓𑀸𑀬𑀩𑀤𑁆𑀥𑁂𑀦 𑀅𑀢𑁆𑀢𑀦𑁄.

𑀅𑀯𑀲𑁂𑀲𑁂𑀦 𑀯𑀸 𑀢𑀲𑁆𑀲, 𑀓𑀸𑀬𑀁 𑀓𑀸𑀬𑁂𑀦 𑀅𑀢𑁆𑀢𑀦𑁄;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲𑀸, 𑀧𑀬𑁄𑀕𑁂 𑀧𑀼𑀭𑀺𑀲𑀲𑁆𑀲 𑀘.

𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦- 𑀧𑀡𑁆𑀟𑀓𑀸𑀦𑀁 ¶ ¶ 𑀅𑀥𑀓𑁆𑀔𑀓𑀁;

𑀉𑀩𑁆𑀪𑀚𑀸𑀡𑀼𑀁 𑀢𑀣𑁂𑀯𑀲𑁆𑀲𑀸, 𑀉𑀪𑀢𑁄𑀯𑀲𑁆𑀲𑀯𑁂 𑀲𑀢𑀺.

𑀏𑀓𑀢𑁄𑀯𑀲𑁆𑀲𑀯𑁂 𑀘𑀸𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁;

𑀅𑀯𑀲𑁂𑀲𑁂 𑀘 𑀲𑀩𑁆𑀩𑀢𑁆𑀣, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀉𑀩𑁆𑀪𑀓𑁆𑀔𑀓𑀫𑀥𑁄𑀚𑀸𑀡𑀼-𑀫𑀡𑁆𑀟𑀮𑀁 𑀧𑀦 𑀬𑀁 𑀇𑀥;

𑀓𑀧𑁆𑀧𑀭𑀲𑁆𑀲 𑀘 𑀳𑁂𑀝𑁆𑀞𑀸𑀧𑀺, 𑀕𑀢𑀁 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁.

𑀓𑁂𑀮𑀸𑀬𑀢𑀺 𑀲𑀘𑁂 𑀪𑀺𑀓𑁆𑀔𑀼, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦;

𑀉𑀪𑀺𑀦𑁆𑀦𑀁 𑀓𑀸𑀬𑀲𑀁𑀲𑀕𑁆𑀕-𑀭𑀸𑀕𑁂 𑀲𑀢𑀺 𑀳𑀺 𑀪𑀺𑀓𑁆𑀔𑀼𑀦𑁄.

𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯, 𑀦𑀸𑀲𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀬𑀸;

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄 𑀘, 𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀬𑀸.

𑀪𑀺𑀓𑁆𑀔𑀼𑀦𑁄 𑀫𑁂𑀣𑀼𑀦𑁄 𑀭𑀸𑀕𑁄, 𑀕𑁂𑀳𑀧𑁂𑀫𑀫𑁆𑀧𑀺 𑀯𑀸 𑀪𑀯𑁂;

𑀢𑀲𑁆𑀲𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀉𑀪𑀺𑀦𑁆𑀦𑀁 𑀫𑁂𑀣𑀼𑀦𑁂 𑀭𑀸𑀕𑁂, 𑀕𑁂𑀳𑀧𑁂𑀫𑁂𑀧𑀺 𑀯𑀸 𑀲𑀢𑀺;

𑀅𑀯𑀺𑀲𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀉𑀪𑀺𑀦𑁆𑀦𑀁 𑀤𑀼𑀓𑁆𑀓𑀝𑀁 𑀧𑀦.

𑀬𑀲𑁆𑀲 𑀬𑀢𑁆𑀣 𑀫𑀦𑁄𑀲𑀼𑀤𑁆𑀥𑀁, 𑀢𑀲𑁆𑀲 𑀢𑀢𑁆𑀣 𑀦 𑀤𑁄𑀲𑀢𑀸;

𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀉𑀪𑀺𑀦𑁆𑀦𑀁 𑀘𑀺𑀢𑁆𑀢𑀲𑀼𑀤𑁆𑀥𑀺𑀬𑀸.

𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀁 𑀧𑀦;

𑀧𑀘𑁆𑀙𑀸 𑀤𑀽𑀲𑁂𑀢𑀺 𑀘𑁂 𑀦𑁂𑀯, 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄.

𑀅𑀣 𑀪𑀺𑀓𑁆𑀔𑀼𑀦𑀺𑀬𑀸 𑀨𑀼𑀝𑁆𑀞𑁄, 𑀲𑀸𑀤𑀺𑀬𑀦𑁆𑀢𑁄𑀯 𑀘𑁂𑀢𑀲𑀸;

𑀦𑀺𑀘𑁆𑀘𑀮𑁄 𑀳𑁄𑀢𑀺 𑀘𑁂 𑀪𑀺𑀓𑁆𑀔𑀼, 𑀦 𑀳𑁄𑀢𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄.

𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀸 𑀨𑀼𑀝𑁆𑀞𑀸, 𑀲𑀘𑁂 𑀳𑁄𑀢𑀺𑀧𑀺 𑀦𑀺𑀘𑁆𑀘𑀮𑀸;

𑀅𑀥𑀺𑀯𑀸𑀲𑁂𑀢𑀺 𑀲𑀫𑁆𑀨𑀲𑁆𑀲𑀁, 𑀢𑀲𑁆𑀲𑀸 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀢𑀣𑀸 𑀣𑀼𑀮𑁆𑀮𑀘𑁆𑀘𑀬𑀁 𑀔𑁂𑀢𑁆𑀢𑁂, 𑀤𑀼𑀓𑁆𑀓𑀝𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂;

𑀯𑀼𑀢𑁆𑀢𑀢𑁆𑀢𑀸 ‘‘𑀓𑀸𑀬𑀲𑀁𑀲𑀕𑁆𑀕𑀁, 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀼𑀦𑀸.

𑀢𑀲𑁆𑀲𑀸 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀢𑀺 𑀦 𑀤𑀺𑀲𑁆𑀲𑀢𑀺;

𑀇𑀤𑀁 𑀢𑀩𑁆𑀩𑀳𑀼𑀮𑁂𑀦𑁂𑀯, 𑀦𑀬𑁂𑀦 𑀧𑀭𑀺𑀤𑀻𑀧𑀺𑀢𑀁.

𑀅𑀦𑀸𑀧𑀢𑁆𑀢𑀺 ¶ 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀺𑀢𑁆𑀯𑀸𑀫𑀲𑀦𑁆𑀢𑀺𑀬𑀸;

𑀲𑀢𑀺 𑀆𑀫𑀲𑀦𑁂 𑀢𑀲𑁆𑀲𑀸, 𑀨𑀲𑁆𑀲𑀁 𑀯𑀸𑀲𑀸𑀤𑀺𑀬𑀦𑁆𑀢𑀺𑀬𑀸.

𑀯𑁂𑀤𑀦𑀝𑁆𑀝𑀸𑀬 ¶ 𑀯𑀸 𑀔𑀺𑀢𑁆𑀢-𑀘𑀺𑀢𑁆𑀢𑀸𑀬𑀼𑀫𑁆𑀫𑀢𑁆𑀢𑀺𑀓𑀸𑀬 𑀯𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀧𑀸𑀭𑀸𑀚𑀺𑀓𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀲𑀮𑀺𑀗𑁆𑀕𑁂 𑀢𑀼 𑀞𑀺𑀢𑀸𑀬 𑀳𑀺;

‘‘𑀦 𑀓𑀲𑁆𑀲𑀘𑀺 𑀧𑀭𑀲𑁆𑀲𑀸𑀳𑀁, 𑀆𑀭𑁄𑀘𑁂𑀲𑁆𑀲𑀸𑀫𑀺 𑀤𑀸𑀦𑀺’’𑀢𑀺.

𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀲𑁆𑀫𑀺𑀁, 𑀲𑀸 𑀘 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸;

𑀅𑀬𑀁 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺- 𑀦𑀸𑀫𑀺𑀓𑀸 𑀧𑀦 𑀦𑀸𑀫𑀢𑁄.

𑀲𑁂𑀲𑀁 𑀲𑀧𑁆𑀧𑀸𑀡𑀯𑀕𑁆𑀕𑀲𑁆𑀫𑀺𑀁, 𑀤𑀼𑀝𑁆𑀞𑀼𑀮𑁆𑀮𑁂𑀦 𑀲𑀫𑀁 𑀦𑀬𑁂;

𑀯𑀺𑀲𑁂𑀲𑁄 𑀢𑀢𑁆𑀭 𑀧𑀸𑀘𑀺𑀢𑁆𑀢𑀺, 𑀇𑀥 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸.

𑀲𑀗𑁆𑀖𑁂𑀦𑀼𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼, 𑀞𑀺𑀢𑁄 𑀉𑀓𑁆𑀔𑁂𑀧𑀦𑁂 𑀧𑀦;

𑀬𑀁𑀤𑀺𑀝𑁆𑀞𑀺𑀓𑁄 𑀘 𑀲𑁄 𑀢𑀲𑁆𑀲𑀸, 𑀤𑀺𑀝𑁆𑀞𑀺𑀬𑀸 𑀕𑀳𑀡𑁂𑀦 𑀢𑀁.

𑀅𑀦𑀼𑀯𑀢𑁆𑀢𑁂𑀬𑁆𑀬 𑀬𑀸 𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀼𑀦𑀻 𑀲𑀸 𑀯𑀺𑀲𑀼𑀫𑁆𑀧𑀺 𑀘;

𑀲𑀗𑁆𑀖𑀫𑀚𑁆𑀛𑁂𑀧𑀺 𑀅𑀜𑁆𑀜𑀸𑀳𑀺, 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀘.

𑀅𑀘𑀚𑀦𑁆𑀢𑀻𑀯 𑀢𑀁 𑀯𑀢𑁆𑀣𑀼𑀁, 𑀕𑀳𑁂𑀢𑁆𑀯𑀸 𑀬𑀤𑀺 𑀢𑀺𑀝𑁆𑀞𑀢𑀺;

𑀢𑀲𑁆𑀲 𑀓𑀫𑁆𑀫𑀲𑁆𑀲 𑀑𑀲𑀸𑀦𑁂, 𑀉𑀓𑁆𑀔𑀺𑀢𑁆𑀢𑀲𑁆𑀲𑀸𑀦𑀼𑀯𑀢𑁆𑀢𑀺𑀓𑀸.

𑀳𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸, 𑀳𑁄𑀢𑀸𑀲𑀸𑀓𑀺𑀬𑀥𑀻𑀢𑀭𑀸;

𑀧𑀼𑀦 𑀅𑀧𑁆𑀧𑀝𑀺𑀲𑀦𑁆𑀥𑁂𑀬𑀸, 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 𑀲𑀺𑀮𑀸 𑀯𑀺𑀬.

𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁, 𑀦𑀺𑀤𑁆𑀤𑀺𑀝𑁆𑀞𑀁 𑀢𑀺𑀓𑀤𑀼𑀓𑁆𑀓𑀝𑀁;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀯𑀼𑀢𑁆𑀢𑀸 𑀲𑀫𑀦𑀼𑀪𑀸𑀲𑀦𑁂.

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀓𑀣𑀸.

𑀅𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀲𑁆𑀲 ¶ , 𑀕𑀳𑀡𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀅𑀗𑁆𑀕𑀲𑁆𑀲 𑀧𑀦 𑀢𑀁 𑀳𑀢𑁆𑀣-𑀕𑁆𑀕𑀳𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀸𑀭𑀼𑀢𑀲𑁆𑀲 𑀦𑀺𑀯𑀢𑁆𑀣𑀲𑁆𑀲, 𑀕𑀳𑀡𑀁 𑀬𑀲𑁆𑀲 𑀓𑀲𑁆𑀲𑀘𑀺;

𑀏𑀢𑀁 𑀲𑀗𑁆𑀖𑀸𑀝𑀺𑀬𑀸 𑀓𑀡𑁆𑀡-𑀕𑁆𑀕𑀳𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢-𑀅𑀲𑀤𑁆𑀥𑀫𑁆𑀫𑀲𑁆𑀲 ¶ 𑀓𑀸𑀭𑀡𑀸;

𑀪𑀺𑀓𑁆𑀔𑀼𑀦𑀻 𑀳𑀢𑁆𑀣𑀧𑀸𑀲𑀲𑁆𑀫𑀺𑀁, 𑀢𑀺𑀝𑁆𑀞𑁂𑀬𑁆𑀬 𑀧𑀼𑀭𑀺𑀲𑀲𑁆𑀲 𑀯𑀸.

𑀲𑀮𑁆𑀮𑀧𑁂𑀬𑁆𑀬 𑀢𑀣𑀸 𑀢𑀢𑁆𑀣, 𑀞𑀢𑁆𑀯𑀸 𑀢𑀼 𑀧𑀼𑀭𑀺𑀲𑁂𑀦 𑀯𑀸;

𑀲𑀗𑁆𑀓𑁂𑀢𑀁 𑀯𑀸𑀧𑀺 𑀕𑀘𑁆𑀙𑁂𑀬𑁆𑀬, 𑀇𑀘𑁆𑀙𑁂𑀬𑁆𑀬𑀸 𑀕𑀫𑀦𑀲𑁆𑀲 𑀯𑀸.

𑀢𑀤𑀢𑁆𑀣𑀸𑀬 𑀧𑀝𑀺𑀘𑁆𑀙𑀦𑁆𑀦-𑀝𑁆𑀞𑀸𑀦𑀜𑁆𑀘 𑀧𑀯𑀺𑀲𑁂𑀬𑁆𑀬 𑀯𑀸;

𑀉𑀧𑀲𑀁𑀳𑀭𑁂𑀬𑁆𑀬 𑀓𑀸𑀬𑀁 𑀯𑀸, 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀧𑀦.

𑀅𑀬𑀫𑀲𑁆𑀲𑀫𑀡𑀻 𑀳𑁄𑀢𑀺, 𑀯𑀺𑀦𑀝𑁆𑀞𑀸 𑀅𑀝𑁆𑀞𑀯𑀢𑁆𑀣𑀼𑀓𑀸;

𑀅𑀪𑀩𑁆𑀩𑀸 𑀧𑀼𑀦𑀭𑀼𑀴𑁆𑀳𑀸𑀬, 𑀙𑀺𑀦𑁆𑀦𑁄 𑀢𑀸𑀮𑁄𑀯 𑀫𑀢𑁆𑀣𑀓𑁂.

𑀅𑀦𑀼𑀮𑁄𑀫𑁂𑀦 𑀯𑀸 𑀯𑀢𑁆𑀣𑀼𑀁, 𑀧𑀝𑀺𑀮𑁄𑀫𑁂𑀦 𑀯𑀸 𑀘𑀼𑀢𑀸;

𑀅𑀝𑁆𑀞𑀫𑀁 𑀧𑀭𑀺𑀧𑀽𑀭𑁂𑀦𑁆𑀢𑀻, 𑀢𑀣𑁂𑀓𑀦𑁆𑀢𑀭𑀺𑀓𑀸𑀬 𑀯𑀸.

𑀅𑀣𑀸𑀤𑀺𑀢𑁄 𑀧𑀦𑁂𑀓𑀁 𑀯𑀸, 𑀤𑁆𑀯𑁂 𑀯𑀸 𑀢𑀻𑀡𑀺𑀧𑀺 𑀲𑀢𑁆𑀢 𑀯𑀸;

𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀽𑀭𑁂𑀦𑁆𑀢𑀻, 𑀦𑁂𑀯 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸.

𑀆𑀧𑀢𑁆𑀢𑀺𑀬𑁄 𑀧𑀦𑀸𑀧𑀦𑁆𑀦𑀸, 𑀤𑁂𑀲𑁂𑀢𑁆𑀯𑀸 𑀢𑀸𑀳𑀺 𑀫𑀼𑀘𑁆𑀘𑀢𑀺;

𑀥𑀼𑀭𑀦𑀺𑀓𑁆𑀔𑁂𑀧𑀦𑀁 𑀓𑀢𑁆𑀯𑀸, 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸.

𑀦 𑀳𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀁, 𑀲𑀉𑀲𑁆𑀲𑀸𑀳𑀸𑀬 𑀤𑁂𑀲𑀺𑀢𑀸;

𑀤𑁂𑀲𑀦𑀸𑀕𑀡𑀦𑀁 𑀦𑁂𑀢𑀺, 𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀺𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

‘‘𑀅𑀲𑀤𑁆𑀥𑀫𑁆𑀫𑁄’’𑀢𑀺 𑀦𑀸𑀫𑁂𑀢𑁆𑀣, 𑀓𑀸𑀬𑀲𑀁𑀲𑀕𑁆𑀕𑀦𑀸𑀫𑀓𑁄;

𑀅𑀬𑀫𑀼𑀤𑁆𑀤𑀺𑀲𑀺𑀢𑁄 𑀅𑀢𑁆𑀣𑁄, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼𑀧𑀺.

𑀯𑀺𑀜𑁆𑀜𑀽 ¶ 𑀧𑀝𑀺𑀩𑀮𑁄 𑀓𑀸𑀬-𑀲𑀁𑀲𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁;

𑀓𑀸𑀬𑀲𑀁𑀲𑀕𑁆𑀕𑀪𑀸𑀯𑁂 𑀢𑀼, 𑀲𑀸𑀥𑀓𑀁 𑀯𑀘𑀦𑀁 𑀇𑀤𑀁.

𑀅𑀯𑀲𑁆𑀲𑀼𑀢𑀸 𑀧𑀝𑀺𑀘𑁆𑀙𑀸𑀤𑀻, 𑀉𑀓𑁆𑀔𑀺𑀢𑁆𑀢𑀸 𑀅𑀝𑁆𑀞𑀯𑀢𑁆𑀣𑀼𑀓𑀸;

𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀸, 𑀘𑀢𑀲𑁆𑀲𑁄𑀯 𑀫𑀳𑁂𑀲𑀺𑀦𑀸.

𑀬𑀸 ¶ 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀲𑁆𑀲𑀬𑀯𑀸𑀤𑀸;

𑀅𑀝𑁆𑀝𑀓𑀭𑀻 𑀫𑀼𑀔𑀭𑀻 𑀯𑀺𑀳𑀭𑁂𑀬𑁆𑀬;

𑀬𑁂𑀦 𑀓𑁂𑀦𑀘𑀺 𑀦𑀭𑁂𑀦𑀺𑀥 𑀲𑀤𑁆𑀥𑀺𑀁;

𑀲𑀸 𑀕𑀭𑀼𑀓𑀁 𑀓𑀺𑀭 𑀤𑁄𑀲𑀫𑀼𑀧𑁂𑀢𑀺.

𑀲𑀓𑁆𑀔𑀺𑀁 𑀯𑀸𑀧𑀺 𑀲𑀳𑀸𑀬𑀁 𑀯𑀸, 𑀧𑀭𑀺𑀬𑁂𑀲𑀢𑀺 𑀤𑀼𑀓𑁆𑀓𑀝𑀁;

𑀧𑀤𑁂 𑀧𑀤𑁂 𑀢𑀣𑀸 𑀅𑀝𑁆𑀝𑀁, 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀘.

𑀆𑀭𑁄𑀘𑁂𑀢𑀺 𑀲𑀘𑁂 𑀧𑀼𑀩𑁆𑀩𑀁, 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀓𑀣𑀁;

𑀤𑀺𑀲𑁆𑀯𑀸 𑀯𑁄𑀳𑀸𑀭𑀺𑀓𑀁 𑀢𑀲𑁆𑀲𑀸, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀆𑀭𑁄𑀘𑁂𑀢𑀺 𑀲𑀘𑁂 𑀧𑀘𑁆𑀙𑀸, 𑀇𑀢𑀭𑁄 𑀅𑀢𑁆𑀢𑀦𑁄 𑀓𑀣𑀁;

𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀢𑀲𑁆𑀲𑀸, 𑀣𑀼𑀮𑁆𑀮𑀘𑁆𑀘𑀬𑀫𑀦𑀦𑁆𑀢𑀭𑀁.

𑀆𑀭𑁄𑀘𑁂𑀢𑀺𑀢𑀭𑁄 𑀧𑀼𑀩𑁆𑀩𑀁, 𑀲𑀘𑁂 𑀲𑁄 𑀅𑀢𑁆𑀢𑀦𑁄 𑀓𑀣𑀁;

𑀧𑀘𑁆𑀙𑀸 𑀪𑀺𑀓𑁆𑀔𑀼𑀦𑀻 𑀘𑁂 𑀧𑀼𑀩𑁆𑀩-𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

‘‘𑀆𑀭𑁄𑀘𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀘𑁂, ‘‘𑀓𑀣𑀁 𑀢𑀯 𑀫𑀫𑀸𑀧𑀺 𑀘’’;

𑀆𑀭𑁄𑀘𑁂𑀢𑀼 𑀬𑀣𑀸𑀓𑀸𑀫𑀁, 𑀧𑀞𑀫𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀤𑀼𑀢𑀺𑀬𑀸𑀭𑁄𑀘𑀦𑁂 ¶ 𑀢𑀲𑁆𑀲𑀸, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁;

𑀉𑀧𑀸𑀲𑀓𑁂𑀦 𑀯𑀼𑀢𑁆𑀢𑁂𑀧𑀺, 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀆𑀭𑁄𑀘𑀺𑀢𑀓𑀣𑀁 𑀲𑀼𑀢𑁆𑀯𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀬𑀣𑀸 𑀢𑀣𑀸;

𑀯𑀺𑀦𑀺𑀘𑁆𑀙𑀬𑁂 𑀓𑀢𑁂 𑀢𑁂𑀳𑀺, 𑀅𑀝𑁆𑀝𑁂 𑀧𑀦 𑀘 𑀦𑀺𑀝𑁆𑀞𑀺𑀢𑁂.

𑀅𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀚𑀬𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦;

𑀧𑀭𑀸𑀚𑀬𑁂𑀧𑀺 𑀯𑀸 𑀢𑀲𑁆𑀲𑀸, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸.

𑀤𑀽𑀢𑀁 𑀯𑀸𑀧𑀺 𑀧𑀳𑀺𑀡𑀺𑀢𑁆𑀯𑀸, 𑀆𑀕𑀦𑁆𑀢𑁆𑀯𑀸𑀦 𑀲𑀬𑀫𑁆𑀧𑀺 𑀯𑀸;

𑀧𑀘𑁆𑀘𑀢𑁆𑀣𑀺𑀓𑀫𑀦𑀼𑀲𑁆𑀲𑁂𑀳𑀺, 𑀆𑀓𑀟𑁆𑀠𑀻𑀬𑀢𑀺 𑀬𑀸 𑀧𑀦.

𑀆𑀭𑀸𑀫𑁂 𑀧𑀦 𑀅𑀜𑁆𑀜𑁂𑀳𑀺, 𑀅𑀦𑀸𑀘𑀸𑀭𑀁 𑀓𑀢𑀁 𑀲𑀘𑁂;

𑀅𑀦𑁄𑀤𑀺𑀲𑁆𑀲 𑀧𑀭𑀁 𑀓𑀺𑀜𑁆𑀘𑀺, 𑀭𑀓𑁆𑀔𑀁 𑀬𑀸𑀘𑀢𑀺 𑀢𑀢𑁆𑀣 𑀬𑀸.

𑀬𑀸𑀬 ¶ 𑀓𑀺𑀜𑁆𑀘𑀺 𑀅𑀯𑀼𑀢𑁆𑀢𑀸𑀯, 𑀥𑀫𑁆𑀫𑀝𑁆𑀞𑀸 𑀲𑀬𑀫𑁂𑀯 𑀢𑀼;

𑀲𑀼𑀢𑁆𑀯𑀸 𑀢𑀁 𑀅𑀜𑁆𑀜𑀢𑁄 𑀅𑀝𑁆𑀝𑀁, 𑀦𑀺𑀝𑁆𑀞𑀸𑀧𑁂𑀦𑁆𑀢𑀺 𑀲𑀘𑁂 𑀧𑀦.

𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀓𑀣𑀺𑀦𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀢𑀼𑀮𑁆𑀬𑀁 𑀲𑀓𑀺𑀭𑀺𑀬𑀁 𑀇𑀤𑀁.

𑀚𑀸𑀦𑀦𑁆𑀢𑀻 𑀪𑀺𑀓𑁆𑀔𑀼𑀦𑀻 𑀘𑁄𑀭𑀺𑀁, 𑀯𑀚𑁆𑀛𑀁 𑀯𑀺𑀤𑀺𑀢𑀫𑁂𑀯 𑀬𑀸;

𑀲𑀗𑁆𑀖𑀁 𑀅𑀦𑀧𑀮𑁄𑀓𑁂𑀢𑁆𑀯𑀸, 𑀭𑀸𑀚𑀸𑀦𑀁 𑀕𑀡𑀫𑁂𑀯 𑀯𑀸.

𑀯𑀼𑀝𑁆𑀞𑀸𑀧𑁂𑀬𑁆𑀬 𑀯𑀺𑀦𑀸 𑀓𑀧𑁆𑀧𑀁, 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀧𑀦;

𑀲𑀗𑁆𑀖𑀸𑀤𑀺𑀲𑁂𑀲𑀫𑀸𑀧𑀢𑁆𑀢𑀺-𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀺 𑀲𑀸.

𑀧𑀜𑁆𑀘𑀫𑀸𑀲𑀕𑁆𑀖𑀦𑀁 𑀬𑀸𑀬, 𑀳𑀭𑀺𑀢𑀁 𑀧𑀭𑀲𑀦𑁆𑀢𑀓𑀁;

𑀅𑀢𑀺𑀭𑁂𑀓𑀕𑁆𑀖𑀦𑀁 𑀯𑀸𑀧𑀺, 𑀅𑀬𑀁 ‘‘𑀘𑁄𑀭𑀻’’𑀢𑀺 𑀯𑀼𑀘𑁆𑀘𑀢𑀺.

𑀪𑀺𑀓𑁆𑀔𑀼𑀦𑀻𑀲𑀼 𑀧𑀦𑀜𑁆𑀜𑀸𑀲𑀼, 𑀢𑀺𑀢𑁆𑀣𑀺𑀬𑁂𑀲𑀼𑀧𑀺 𑀯𑀸 𑀢𑀣𑀸;

𑀬𑀸 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀸 𑀲𑀸, 𑀅𑀬𑀁 ‘‘𑀓𑀧𑁆𑀧𑀸’’𑀢𑀺 𑀯𑀼𑀘𑁆𑀘𑀢𑀺.

𑀯𑀼𑀝𑁆𑀞𑀸𑀧𑁂𑀢𑀺 ¶ 𑀘 𑀬𑀸 𑀘𑁄𑀭𑀺𑀁, 𑀞𑀧𑁂𑀢𑁆𑀯𑀸 𑀓𑀧𑁆𑀧𑀫𑁂𑀯𑀺𑀤𑀁;

𑀲𑀘𑁂 𑀆𑀘𑀭𑀺𑀦𑀺𑀁 𑀧𑀢𑁆𑀢𑀁, 𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺.

𑀲𑀫𑁆𑀫𑀦𑁆𑀦𑀢𑀺 𑀘 𑀲𑀻𑀫𑀁 𑀯𑀸, 𑀢𑀲𑁆𑀲𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀤𑁆𑀯𑀻𑀳𑀺, 𑀓𑀫𑁆𑀫𑀯𑀸𑀘𑀸𑀳𑀺 𑀘 𑀤𑁆𑀯𑀬𑀁.

𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀓𑀫𑁆𑀫𑀦𑁆𑀢𑁂, 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂 𑀩𑀼𑀥𑁄;

𑀕𑀡𑁄 𑀆𑀘𑀭𑀺𑀦𑀻 𑀘𑁂𑀯, 𑀦 𑀘 𑀫𑀼𑀘𑁆𑀘𑀢𑀺 𑀤𑀼𑀓𑁆𑀓𑀝𑀁.

𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀻, 𑀯𑀼𑀝𑁆𑀞𑀸𑀧𑁂𑀢𑀺, 𑀢𑀣𑁂𑀯 𑀘;

𑀓𑀧𑁆𑀧𑀁 𑀯𑀸 𑀅𑀧𑀮𑁄𑀓𑁂𑀢𑁆𑀯𑀸, 𑀢𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸.

𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀦𑀸𑀫, 𑀚𑀸𑀬𑀢𑁂 𑀯𑀸𑀘𑀘𑀺𑀢𑁆𑀢𑀢𑁄;

𑀓𑀸𑀬𑀯𑀸𑀘𑀸𑀤𑀺𑀢𑁄 𑀘𑁂𑀯, 𑀲𑀘𑀺𑀢𑁆𑀢𑀜𑁆𑀘 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀕𑀸𑀫𑀦𑁆𑀢𑀭𑀁 𑀦𑀤𑀻𑀧𑀸𑀭𑀁, 𑀕𑀘𑁆𑀙𑁂𑀬𑁆𑀬𑁂𑀓𑀸𑀯 𑀬𑀸 𑀲𑀘𑁂;

𑀑𑀳𑀻𑀬𑁂𑀬𑁆𑀬 𑀕𑀡𑀫𑁆𑀳𑀸 𑀯𑀸, 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬 𑀯𑀸.

𑀧𑀞𑀫𑀸𑀧𑀢𑁆𑀢𑀺𑀓𑀁 ¶ 𑀥𑀫𑁆𑀫𑀁, 𑀲𑀸𑀧𑀦𑁆𑀦𑀸 𑀕𑀭𑀼𑀓𑀁 𑀲𑀺𑀬𑀸;

𑀲𑀓𑀕𑀸𑀫𑀸 𑀅𑀦𑀸𑀧𑀢𑁆𑀢𑀺, 𑀜𑀸𑀢𑀩𑁆𑀩𑀸 𑀦𑀺𑀓𑁆𑀔𑀫𑀦𑁆𑀢𑀺𑀬𑀸.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁, 𑀕𑀸𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦;

𑀤𑀼𑀓𑁆𑀓𑀝𑀁 𑀧𑀤𑀯𑀸𑀭𑁂𑀦, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑀏𑀓𑁂𑀦 𑀧𑀤𑀯𑀸𑀭𑁂𑀦, 𑀕𑀸𑀫𑀲𑁆𑀲 𑀇𑀢𑀭𑀲𑁆𑀲 𑀘;

𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀉𑀧𑀘𑀸𑀭𑁄𑀓𑁆𑀓𑀫𑁂𑀧𑀺 𑀯𑀸.

𑀣𑀼𑀮𑁆𑀮𑀘𑁆𑀘𑀬𑀁 𑀅𑀢𑀺𑀓𑁆𑀓𑀦𑁆𑀢𑁂, 𑀑𑀓𑁆𑀓𑀦𑁆𑀢𑁂 𑀤𑀼𑀢𑀺𑀬𑁂𑀦 𑀢𑀼;

𑀧𑀸𑀤𑁂𑀦 𑀕𑀭𑀼𑀓𑀸𑀧𑀢𑁆𑀢𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀘𑁂 𑀧𑀘𑁆𑀙𑀸, 𑀲𑀓𑀁 𑀕𑀸𑀫𑀁 𑀯𑀺𑀲𑀦𑁆𑀢𑀺𑀬𑀸;

𑀅𑀬𑀫𑁂𑀯 𑀦𑀬𑁄 𑀜𑁂𑀬𑁆𑀬𑁄, 𑀯𑀢𑀺𑀘𑁆𑀙𑀺𑀤𑁆𑀤𑁂𑀦 𑀯𑀸 𑀢𑀣𑀸.

𑀧𑀸𑀓𑀸𑀭𑁂𑀦 ¶ 𑀯𑀺𑀳𑀸𑀭𑀲𑁆𑀲, 𑀪𑀽𑀫𑀺𑀁 𑀢𑀼 𑀧𑀯𑀺𑀲𑀦𑁆𑀢𑀺𑀬𑀸;

𑀓𑀧𑁆𑀧𑀺𑀬𑀦𑁆𑀢𑀺 𑀧𑀯𑀺𑀝𑁆𑀞𑀢𑁆𑀢𑀸, 𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺.

𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀳𑀸𑀭𑀲𑁆𑀲, 𑀪𑀽𑀫𑀺 𑀢𑀸𑀲𑀁 𑀢𑀼 𑀓𑀧𑁆𑀧𑀺𑀬𑀸;

𑀳𑁄𑀢𑀺 𑀪𑀺𑀓𑁆𑀔𑀼𑀯𑀺𑀳𑀸𑀭𑀲𑁆𑀲, 𑀪𑀽𑀫𑀺 𑀢𑀸𑀲𑀫𑀓𑀧𑁆𑀧𑀺𑀬𑀸.

𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀻𑀳𑀺, 𑀇𑀤𑁆𑀥𑀺𑀬𑀸 𑀯𑀸 𑀯𑀺𑀲𑀦𑁆𑀢𑀺𑀬𑀸;

𑀅𑀦𑀸𑀧𑀢𑁆𑀢𑀺 𑀲𑀺𑀬𑀸𑀧𑀢𑁆𑀢𑀺, 𑀧𑀤𑀲𑀸 𑀕𑀫𑀦𑁂 𑀧𑀦.

𑀬𑀁 𑀓𑀺𑀜𑁆𑀘𑀺 𑀲𑀓𑀕𑀸𑀫𑀁 𑀯𑀸, 𑀧𑀭𑀕𑀸𑀫𑀫𑁆𑀧𑀺 𑀯𑀸 𑀢𑀣𑀸;

𑀩𑀳𑀺𑀕𑀸𑀫𑁂 𑀧𑀦 𑀞𑀢𑁆𑀯𑀸, 𑀆𑀧𑀢𑁆𑀢𑀺 𑀧𑀯𑀺𑀲𑀦𑁆𑀢𑀺𑀬𑀸.

𑀮𑀓𑁆𑀔𑀡𑁂𑀦𑀼𑀧𑀧𑀦𑁆𑀦𑀸𑀬, 𑀦𑀤𑀺𑀬𑀸 𑀤𑀼𑀢𑀺𑀬𑀁 𑀯𑀺𑀦𑀸;

𑀧𑀸𑀭𑀁 𑀕𑀘𑁆𑀙𑀢𑀺 𑀬𑀸 𑀢𑀻𑀭𑀁, 𑀢𑀲𑁆𑀲𑀸 𑀲𑀫𑀡𑀺𑀬𑀸 𑀧𑀦.

𑀧𑀞𑀫𑀁 𑀉𑀤𑁆𑀥𑀭𑀺𑀢𑁆𑀯𑀸𑀦, 𑀧𑀸𑀤𑀁 𑀢𑀻𑀭𑁂 𑀞𑀧𑁂𑀦𑁆𑀢𑀺𑀬𑀸;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂 𑀕𑀭𑀼.

𑀅𑀦𑁆𑀢𑀭𑀦𑀤𑀺𑀬𑀁𑀬𑁂𑀯, 𑀲𑀤𑁆𑀥𑀺𑀁 𑀤𑀼𑀢𑀺𑀬𑀺𑀓𑀸𑀬 𑀳𑀺;

𑀪𑀡𑁆𑀟𑀺𑀢𑁆𑀯𑀸 𑀑𑀭𑀺𑀫𑀁 𑀢𑀻𑀭𑀁, 𑀢𑀣𑀸 𑀧𑀘𑁆𑀘𑀼𑀢𑁆𑀢𑀭𑀦𑁆𑀢𑀺𑀬𑀸.

𑀇𑀤𑁆𑀥𑀺𑀬𑀸 𑀲𑁂𑀢𑀼𑀦𑀸 𑀦𑀸𑀯𑀸-𑀬𑀸𑀦𑀭𑀚𑁆𑀚𑀽𑀳𑀺 𑀯𑀸 𑀧𑀦;

𑀏𑀯𑀫𑁆𑀧𑀺 𑀘 𑀧𑀭𑀁 𑀢𑀻𑀭𑀁, 𑀅𑀦𑀸𑀧𑀢𑁆𑀢𑀼𑀢𑁆𑀢𑀭𑀦𑁆𑀢𑀺𑀬𑀸.

𑀦𑁆𑀳𑀸𑀬𑀺𑀢𑀼𑀁 𑀧𑀺𑀯𑀺𑀢𑀼𑀁 𑀯𑀸𑀧𑀺, 𑀑𑀢𑀺𑀡𑁆𑀡𑀸𑀣 𑀦𑀤𑀺𑀁 𑀧𑀼𑀦;

𑀧𑀤𑀲𑀸𑀯𑁄𑀭𑀺𑀫𑀁 𑀢𑀻𑀭𑀁, 𑀧𑀘𑁆𑀘𑀼𑀢𑁆𑀢𑀭𑀢𑀺 𑀯𑀝𑁆𑀝𑀢𑀺.

𑀧𑀤𑀲𑀸 ¶ 𑀑𑀢𑀭𑀺𑀢𑁆𑀯𑀸𑀦, 𑀦𑀤𑀺𑀁 𑀉𑀢𑁆𑀢𑀭𑀡𑁂 𑀧𑀦;

𑀆𑀭𑁄𑀳𑀺𑀢𑁆𑀯𑀸 𑀢𑀣𑀸 𑀲𑁂𑀢𑀼𑀁, 𑀅𑀦𑀸𑀧𑀢𑁆𑀢𑀼𑀢𑁆𑀢𑀭𑀦𑁆𑀢𑀺𑀬𑀸.

𑀲𑁂𑀢𑀼𑀦𑀸 𑀉𑀧𑀕𑀦𑁆𑀢𑁆𑀯𑀸 𑀯𑀸, 𑀬𑀸𑀦𑀸𑀓𑀸𑀲𑁂𑀳𑀺 𑀯𑀸 𑀲𑀘𑁂;

𑀬𑀸𑀢𑀺 𑀉𑀢𑁆𑀢𑀭𑀡𑁂 𑀓𑀸𑀮𑁂, 𑀧𑀤𑀲𑀸 𑀕𑀭𑀼𑀓𑀁 𑀨𑀼𑀲𑁂.

𑀦𑀤𑀺𑀬𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀇𑀢𑁄 𑀑𑀭𑀺𑀫𑀢𑀻𑀭𑀢𑁄;

𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀦 𑀯𑁂𑀕𑁂𑀦, 𑀅𑀦𑀸𑀧𑀢𑁆𑀢𑀼𑀢𑁆𑀢𑀭𑀦𑁆𑀢𑀺𑀬𑀸.

𑀧𑀺𑀝𑁆𑀞𑀺𑀬𑀁 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀔𑀦𑁆𑀥𑁂 𑀯𑀸 𑀉𑀢𑁆𑀢𑀭𑀦𑁆𑀢𑀺𑀬𑀸;

𑀳𑀢𑁆𑀣𑀲𑀗𑁆𑀖𑀸𑀢𑀦𑁂 𑀯𑀸𑀧𑀺, 𑀤𑀼𑀲𑁆𑀲𑀬𑀸𑀦𑁂𑀧𑀺 𑀯𑀝𑁆𑀝𑀢𑀺.

‘‘𑀧𑀼𑀭𑁂𑀭𑀼𑀡𑁄𑀤𑀬𑀸𑀬𑁂𑀯 ¶ , 𑀧𑀸𑀲𑀁 𑀤𑀼𑀢𑀺𑀬𑀺𑀓𑀸𑀬 𑀳𑀺;

𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁, 𑀯𑀺𑀦𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

𑀏𑀓𑀕𑀩𑁆𑀪𑁂𑀧𑀺 𑀯𑀸 𑀳𑀢𑁆𑀣-𑀧𑀸𑀲𑀁 𑀤𑀼𑀢𑀺𑀬𑀺𑀓𑀸𑀬 𑀳𑀺;

𑀅𑀢𑀺𑀓𑁆𑀓𑀫𑁆𑀫 𑀲𑀺𑀬𑀸𑀧𑀢𑁆𑀢𑀺, 𑀅𑀭𑀼𑀡𑀁 𑀉𑀝𑁆𑀞𑀧𑁂𑀦𑁆𑀢𑀺𑀬𑀸.

‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁, 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦;

𑀦 𑀤𑁄𑀲𑁄 𑀤𑀼𑀢𑀺𑀬𑀸 𑀧𑀸𑀲𑀁, 𑀉𑀝𑁆𑀞𑁂𑀢𑀺 𑀅𑀭𑀼𑀡𑀁 𑀲𑀘𑁂.

𑀇𑀦𑁆𑀤𑀔𑀻𑀮𑀫𑀢𑀺𑀓𑁆𑀓𑀫𑁆𑀫, 𑀅𑀭𑀜𑁆𑀜𑀁 𑀏𑀢𑁆𑀣 𑀤𑀻𑀧𑀺𑀢𑀁;

𑀕𑀸𑀫𑀢𑁄 𑀩𑀳𑀺 𑀦𑀺𑀓𑁆𑀔𑀫𑁆𑀫, 𑀢𑀲𑁆𑀲𑀸 𑀤𑀼𑀢𑀺𑀬𑀺𑀓𑀸𑀬 𑀢𑀼.

𑀤𑀲𑁆𑀲𑀦𑀲𑁆𑀲𑀼𑀧𑀘𑀸𑀭𑀁 𑀢𑀼, 𑀚𑀸𑀦𑀺𑀢𑁆𑀯𑀸 𑀯𑀺𑀚𑀳𑀦𑁆𑀢𑀺𑀬𑀸;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀚𑀳𑀺𑀢𑁂 𑀕𑀭𑀼𑀓𑀁 𑀲𑀺𑀬𑀸.

𑀲𑀸𑀡𑀺𑀧𑀸𑀓𑀸𑀭𑀧𑀸𑀓𑀸𑀭-𑀢𑀭𑀼𑀅𑀦𑁆𑀢𑀭𑀺𑀢𑁂 𑀧𑀦;

𑀲𑀯𑀦𑀲𑁆𑀲𑀼𑀧𑀘𑀸𑀭𑁂𑀧𑀺, 𑀲𑀢𑀺 𑀆𑀧𑀢𑁆𑀢𑀺 𑀳𑁄𑀢𑀺 𑀳𑀺.

𑀅𑀚𑁆𑀛𑁄𑀓𑀸𑀲𑁂 𑀢𑀼 𑀤𑀽𑀭𑁂𑀧𑀺, 𑀤𑀲𑁆𑀲𑀦𑀲𑁆𑀲𑀼𑀧𑀘𑀸𑀭𑀢𑀸;

𑀳𑁄𑀢𑀺, 𑀏𑀢𑁆𑀣 𑀓𑀣𑀁 𑀥𑀫𑁆𑀫-𑀲𑀯𑀦𑀸𑀭𑁄𑀘𑀦𑁂 𑀯𑀺𑀬.

𑀫𑀕𑁆𑀕𑀫𑀽𑀴𑁆𑀳𑀲𑁆𑀲 𑀲𑀤𑁆𑀤𑁂𑀦, 𑀯𑀺𑀬 𑀓𑀽𑀚𑀦𑁆𑀢𑀺𑀬𑀸 𑀧𑀦;

‘‘𑀅𑀬𑁆𑀬𑁂’’𑀢𑀺 𑀢𑀲𑁆𑀲𑀸 𑀲𑀤𑁆𑀤𑀲𑁆𑀲, 𑀲𑀯𑀦𑀸𑀢𑀺𑀓𑁆𑀓𑀫𑁂𑀧𑀺 𑀘.

𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸𑀧𑀢𑁆𑀢𑀺, 𑀕𑀭𑀼𑀓𑀸 𑀏𑀯𑀭𑀽𑀧𑀓𑁂;

𑀏𑀢𑁆𑀣 𑀪𑀺𑀓𑁆𑀔𑀼𑀦𑀻 𑀏𑀓𑀸𑀧𑀺, 𑀕𑀡𑀸𑀬𑁂𑀯𑀸𑀢𑀺 𑀯𑀼𑀘𑁆𑀘𑀢𑀺.

𑀑𑀳𑀻𑀬𑀺𑀢𑁆𑀯𑀸𑀣 𑀕𑀘𑁆𑀙𑀦𑁆𑀢𑀻, ‘‘𑀧𑀸𑀧𑀼𑀡𑀺𑀲𑁆𑀲𑀸𑀫𑀺 𑀤𑀸𑀦𑀺𑀳𑀁’’;

𑀇𑀘𑁆𑀘𑁂𑀯𑀁 𑀢𑀼 𑀲𑀉𑀲𑁆𑀲𑀸𑀳𑀸, 𑀅𑀦𑀼𑀩𑀦𑁆𑀥𑀢𑀺 𑀯𑀝𑁆𑀝𑀢𑀺.

𑀤𑁆𑀯𑀺𑀦𑁆𑀦𑀁 ¶ 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻𑀦𑀁, 𑀏𑀓𑀸 𑀕𑀦𑁆𑀢𑀼𑀁 𑀦𑁄 𑀲𑀓𑁆𑀓𑁄𑀢𑀺;

𑀉𑀲𑁆𑀲𑀸𑀳𑀲𑁆𑀲𑀘𑁆𑀙𑁂𑀤𑀁 𑀓𑀢𑁆𑀯𑀸, 𑀑𑀳𑀻𑀦𑀸 𑀘𑁂 𑀢𑀲𑁆𑀲𑀸𑀧𑀢𑁆𑀢𑀺.

𑀇𑀢𑀭𑀸𑀧𑀺 𑀲𑀘𑁂 𑀬𑀸𑀢𑀺, ‘‘𑀑𑀳𑀻𑀬𑀢𑀼 𑀅𑀬’’𑀦𑁆𑀢𑀺 𑀘;

𑀳𑁄𑀢𑀺 𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺, 𑀲𑀉𑀲𑁆𑀲𑀸𑀳𑀸 𑀦 𑀳𑁄𑀢𑀺 𑀘𑁂.

𑀕𑀘𑁆𑀙𑀦𑁆𑀢𑀻𑀲𑀼 𑀢𑀣𑀸 𑀤𑁆𑀯𑀻𑀲𑀼, 𑀧𑀼𑀭𑀺𑀫𑀸 𑀬𑀸𑀢𑀺 𑀏𑀓𑀓𑀁;

𑀅𑀜𑁆𑀜𑀁 𑀧𑀦 𑀲𑀘𑁂 𑀫𑀕𑁆𑀕𑀁, 𑀧𑀘𑁆𑀙𑀺𑀫𑀸𑀧𑀺 𑀘 𑀕𑀡𑁆𑀳𑀢𑀺.

𑀏𑀓𑀺𑀲𑁆𑀲𑀸 ¶ 𑀧𑀦 𑀧𑀓𑁆𑀓𑀦𑁆𑀢-𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺 𑀘𑁂𑀢𑀭𑀸;

𑀢𑀲𑁆𑀫𑀸 𑀢𑀢𑁆𑀣 𑀉𑀪𑀺𑀦𑁆𑀦𑀫𑁆𑀧𑀺, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀅𑀭𑀼𑀡𑀼𑀕𑁆𑀕𑀫𑀦𑀸 𑀧𑀼𑀩𑁆𑀩𑁂, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀕𑀸𑀫𑀢𑁄;

𑀅𑀭𑀼𑀡𑀼𑀕𑁆𑀕𑀫𑀦𑁂 𑀓𑀸𑀮𑁂, 𑀕𑀸𑀫𑀦𑁆𑀢𑀭𑀕𑀢𑀸𑀬 𑀳𑀺.

𑀅𑀢𑀺𑀓𑁆𑀓𑀫𑀦𑁆𑀢𑀺𑀬𑀸 𑀧𑀸𑀭𑀁, 𑀦𑀤𑀺𑀬𑀸 𑀤𑀼𑀢𑀺𑀬𑀺𑀓𑀁 𑀯𑀺𑀦𑀸;

𑀆𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄𑀧𑀺, 𑀳𑁄𑀦𑁆𑀢𑀺 𑀏𑀓𑀓𑁆𑀔𑀡𑁂 𑀧𑀦.

𑀧𑀓𑁆𑀓𑀦𑁆𑀢𑀸 𑀯𑀸𑀧𑀺 𑀯𑀺𑀩𑁆𑀪𑀦𑁆𑀢𑀸, 𑀬𑀸𑀢𑀸 𑀧𑁂𑀢𑀸𑀦𑀁 𑀮𑁄𑀓𑀁 𑀯𑀸;

𑀧𑀓𑁆𑀔𑀲𑀗𑁆𑀓𑀦𑁆𑀢𑀸 𑀯𑀸 𑀦𑀝𑁆𑀞𑀸, 𑀲𑀤𑁆𑀥𑀺𑀁 𑀬𑀸𑀢𑀸 𑀲𑀸 𑀘𑁂 𑀳𑁄𑀢𑀺.

𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀸𑀤𑀻𑀦𑀺, 𑀘𑀢𑁆𑀢𑀸𑀭𑀺𑀧𑀺 𑀓𑀭𑁄𑀦𑁆𑀢𑀺𑀬𑀸;

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀏𑀯𑀁 𑀉𑀫𑁆𑀫𑀢𑁆𑀢𑀺𑀓𑀸𑀬𑀧𑀺.

𑀭𑀢𑁆𑀢𑀺𑀬𑀁 𑀯𑀺𑀧𑁆𑀧𑀯𑀸𑀲𑀁 𑀢𑀼, 𑀳𑀢𑁆𑀣𑀧𑀸𑀲𑁄𑀯 𑀭𑀓𑁆𑀔𑀢𑀺;

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀢𑀼, 𑀕𑀡𑀸 𑀑𑀳𑀻𑀬𑀦𑀁 𑀫𑀢𑀁.

𑀲𑀓𑀕𑀸𑀫𑁂 𑀬𑀣𑀸𑀓𑀸𑀫𑀁, 𑀤𑀺𑀯𑀸 𑀘 𑀯𑀺𑀘𑀭𑀦𑁆𑀢𑀺𑀬𑀸;

𑀘𑀢𑁆𑀢𑀸𑀭𑁄𑀧𑀺 𑀘 𑀲𑀗𑁆𑀖𑀸𑀤𑀺-𑀲𑁂𑀲𑀸 𑀢𑀲𑁆𑀲𑀸 𑀦 𑀯𑀺𑀚𑁆𑀚𑀭𑁂.

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸;

𑀲𑀘𑀺𑀢𑁆𑀢𑀁 𑀓𑀸𑀬𑀓𑀫𑁆𑀫𑀜𑁆𑀘, 𑀢𑀺𑀘𑀺𑀢𑁆𑀢𑀜𑁆𑀘 𑀢𑀺𑀯𑁂𑀤𑀦𑀁.

𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸 𑀘𑁂𑀯, 𑀕𑀡𑀲𑁆𑀲 𑀧𑀭𑀺𑀬𑁂𑀲𑀦𑁂;

𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺, 𑀳𑁄𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀸 𑀤𑀼𑀯𑁂.

𑀓𑀫𑁆𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸;

𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀢𑀼, 𑀅𑀥𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁.

𑀧𑀼𑀘𑁆𑀙𑀺𑀢𑁆𑀯𑀸 ¶ 𑀓𑀸𑀭𑀓𑀁 𑀲𑀗𑁆𑀖𑀁, 𑀙𑀦𑁆𑀤𑀁 𑀤𑀢𑁆𑀯𑀸 𑀕𑀡𑀲𑁆𑀲 𑀯𑀸;

𑀯𑀢𑁆𑀢𑁂 𑀯𑀸 𑀧𑀦 𑀯𑀢𑁆𑀢𑀦𑁆𑀢𑀺𑀁, 𑀅𑀲𑀦𑁆𑀢𑁂 𑀓𑀸𑀭𑀓𑁂𑀧𑀺 𑀯𑀸.

𑀪𑀺𑀓𑁆𑀔𑀼𑀦𑀺𑀁 ¶ 𑀧𑀦 𑀉𑀓𑁆𑀔𑀺𑀢𑁆𑀢𑀁, 𑀬𑀸 𑀑𑀲𑀸𑀭𑁂𑀢𑀺 𑀪𑀺𑀓𑁆𑀔𑀼𑀦𑀻;

𑀢𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸.

𑀲𑀗𑁆𑀖𑀪𑁂𑀤𑀲𑀫𑀸 𑀯𑀼𑀢𑁆𑀢𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀯𑀼𑀢𑁆𑀢𑀁, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀲𑀬𑀁 𑀅𑀯𑀲𑁆𑀲𑀼𑀢𑀸 𑀢𑀣𑀸, 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄;

𑀫𑀦𑀼𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀘𑁂, 𑀬𑀤𑁂𑀯 𑀓𑀺𑀜𑁆𑀘𑀺 𑀕𑀡𑁆𑀳𑀢𑀺.

𑀏𑀓𑀢𑁄𑀯𑀲𑁆𑀲𑀼𑀢𑁂 𑀓𑀺𑀜𑁆𑀘𑀺, 𑀧𑀝𑀺𑀕𑁆𑀕𑀡𑁆𑀳𑀢𑀺, 𑀤𑀼𑀓𑁆𑀓𑀝𑀁;

𑀅𑀚𑁆𑀛𑁄𑀳𑀸𑀭𑀧𑁆𑀧𑀬𑁄𑀕𑁂𑀲𑀼, 𑀣𑀼𑀮𑁆𑀮𑀘𑁆𑀘𑀬𑀘𑀬𑁄 𑀲𑀺𑀬𑀸.

𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦-𑀧𑀡𑁆𑀟𑀓𑀸𑀦𑀜𑁆𑀘 𑀳𑀢𑁆𑀣𑀢𑁄;

𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀫𑁆𑀧𑀺, 𑀉𑀪𑀢𑁄𑀯𑀲𑁆𑀲𑀼𑀢𑁂 𑀢𑀣𑀸.

𑀏𑀓𑀢𑁄𑀯𑀲𑁆𑀲𑀼𑀢𑁂 𑀏𑀢𑁆𑀣, 𑀉𑀤𑀓𑁂 𑀤𑀦𑁆𑀢𑀓𑀝𑁆𑀞𑀓𑁂;

𑀕𑀳𑀡𑁂 𑀧𑀭𑀺𑀪𑁄𑀕𑁂 𑀘, 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀁.

𑀉𑀪𑀬𑀸𑀯𑀲𑁆𑀲𑀼𑀢𑀸𑀪𑀸𑀯𑁂, 𑀦 𑀤𑁄𑀲𑁄 𑀬𑀤𑀺 𑀕𑀡𑁆𑀳𑀢𑀺;

‘‘𑀅𑀯𑀲𑁆𑀲𑀼𑀢𑁄 𑀦 𑀘𑀸𑀬’’𑀦𑁆𑀢𑀺, 𑀜𑀢𑁆𑀯𑀸 𑀕𑀡𑁆𑀳𑀢𑀺 𑀬𑀸 𑀧𑀦.

𑀢𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀉𑀬𑁆𑀬𑁄𑀚𑀦𑁂 𑀧𑀦𑁂𑀓𑀺𑀲𑁆𑀲𑀸, 𑀇𑀢𑀭𑀺𑀲𑁆𑀲𑀸 𑀧𑀝𑀺𑀕𑁆𑀕𑀳𑁂;

𑀤𑀼𑀓𑁆𑀓𑀝𑀸𑀦𑀺 𑀘 𑀪𑁄𑀕𑁂𑀲𑀼, 𑀣𑀼𑀮𑁆𑀮𑀘𑁆𑀘𑀬𑀕𑀡𑁄 𑀲𑀺𑀬𑀸.

𑀪𑁄𑀚𑀦𑀲𑁆𑀲𑀸𑀯𑀲𑀸𑀦𑀲𑁆𑀫𑀺𑀁 ¶ ¶ , 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀢𑀸;

𑀬𑀓𑁆𑀔𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀢𑀣𑁂𑀯 𑀧𑀼𑀭𑀺𑀲𑀲𑁆𑀲 𑀘.

𑀤𑀦𑁆𑀢𑀓𑀝𑁆𑀞𑀼𑀤𑀓𑀸𑀦𑀜𑁆𑀘, 𑀕𑀳𑀡𑀼𑀬𑁆𑀬𑁄𑀚𑀦𑁂 𑀧𑀦;

𑀢𑁂𑀲𑀜𑁆𑀘 𑀧𑀭𑀺𑀪𑁄𑀕𑁂𑀧𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀓𑀺𑀢𑁆𑀢𑀺𑀢𑀁.

𑀬𑀓𑁆𑀔𑀸𑀤𑀻𑀦𑀁 𑀢𑀼 𑀲𑁂𑀲𑀲𑁆𑀲, 𑀕𑀳𑀡𑀼𑀬𑁆𑀬𑁄𑀚𑀦𑁂 𑀧𑀦;

𑀪𑁄𑀕𑁂 𑀘 𑀤𑀼𑀓𑁆𑀓𑀝𑀁, 𑀪𑀼𑀢𑁆𑀢𑁂, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

‘‘𑀦𑀸𑀯𑀲𑁆𑀲𑀼𑀢𑁄’’𑀢𑀺 𑀜𑀢𑁆𑀯𑀸 𑀯𑀸, 𑀓𑀼𑀧𑀺𑀢𑀸 𑀯𑀸 𑀦 𑀕𑀡𑁆𑀳𑀢𑀺;

𑀓𑀼𑀮𑀸𑀦𑀼𑀤𑁆𑀤𑀬𑀢𑀸 𑀯𑀸𑀧𑀺, 𑀉𑀬𑁆𑀬𑁄𑀚𑁂𑀢𑀺 𑀘 𑀬𑀸 𑀧𑀦.

𑀢𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀲𑀢𑁆𑀢𑀫𑀁 𑀅𑀝𑁆𑀞𑀫𑀁 𑀲𑀗𑁆𑀖-𑀪𑁂𑀤𑁂𑀦 𑀲𑀤𑀺𑀲𑀁 𑀫𑀢𑀁;

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸.

𑀦𑀯𑀫𑁂 𑀤𑀲𑀫𑁂 𑀯𑀸𑀧𑀺, 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀅𑀦𑀦𑁆𑀢𑀭𑀲𑀫𑀸𑀬𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀤𑀼𑀝𑁆𑀞𑀤𑁄𑀲𑀤𑁆𑀯𑀬𑁂𑀦𑀸𑀧𑀺, 𑀲𑀜𑁆𑀘𑀭𑀺𑀢𑁆𑀢𑁂𑀦 𑀢𑁂𑀦 𑀙;

𑀬𑀸𑀯𑀢𑀢𑀺𑀬𑀓𑀸 𑀅𑀝𑁆𑀞, 𑀘𑀢𑁆𑀢𑀸𑀭𑀺 𑀘 𑀇𑀢𑁄 𑀢𑀢𑁄.

𑀅𑀥𑀺𑀝𑁆𑀞𑀸𑀦𑀽𑀧𑀕𑀁 ¶ ¶ 𑀧𑀢𑁆𑀢𑀁, 𑀅𑀦𑀥𑀺𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀻;

𑀯𑀺𑀓𑀧𑁆𑀧𑀦𑀫𑀓𑀢𑁆𑀯𑀸 𑀯𑀸, 𑀏𑀓𑀸𑀳𑀫𑁆𑀧𑀺 𑀞𑀧𑁂𑀬𑁆𑀬 𑀘𑁂.

𑀅𑀭𑀼𑀡𑀼𑀕𑁆𑀕𑀫𑀦𑁂𑀦𑁂𑀯, 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀬𑀸;

𑀢𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀧𑀢𑁆𑀢𑀲𑀦𑁆𑀦𑀺𑀥𑀺𑀓𑀸𑀭𑀡𑀸.

𑀲𑁂𑀲𑁄 𑀧𑀦 𑀓𑀣𑀸𑀫𑀕𑁆𑀕𑁄, 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀇𑀥;

𑀲𑀩𑁆𑀩𑁄 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀢𑀢𑁆𑀣, 𑀏𑀓𑀸𑀳𑀸𑀢𑀺𑀓𑁆𑀓𑀫𑁂 𑀇𑀥;

𑀢𑀲𑁆𑀲𑀺𑀫𑀲𑁆𑀲 𑀉𑀪𑀺𑀦𑁆𑀦𑀫𑁆𑀧𑀺, 𑀅𑀬𑀫𑁂𑀯 𑀯𑀺𑀲𑁂𑀲𑀢𑀸.

𑀅𑀓𑀸𑀮𑁂 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀤𑀺𑀦𑁆𑀦𑀁 𑀓𑀸𑀮𑁂𑀧𑀺 𑀓𑁂𑀦𑀘𑀺;

𑀆𑀤𑀺𑀲𑁆𑀲 𑀧𑀦 ‘‘𑀲𑀫𑁆𑀧𑀢𑁆𑀢𑀸, 𑀪𑀸𑀚𑁂𑀦𑁆𑀢𑀽’’𑀢𑀺 𑀦𑀺𑀬𑀸𑀫𑀺𑀢𑀁.

𑀅𑀓𑀸𑀮𑀘𑀻𑀯𑀭𑀁 ‘‘𑀓𑀸𑀮-𑀘𑀻𑀯𑀭’’𑀦𑁆𑀢𑀺 𑀲𑀘𑁂 𑀧𑀦;

𑀪𑀸𑀚𑀸𑀧𑁂𑀬𑁆𑀬 𑀘 𑀬𑀸 𑀢𑀲𑁆𑀲𑀸, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀁 𑀬𑀁, 𑀢𑀁 𑀢𑀼 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂;

𑀮𑀪𑀺𑀢𑁆𑀯𑀸 𑀧𑀦 𑀦𑀺𑀲𑁆𑀲𑀝𑁆𑀞𑀁, 𑀬𑀣𑀸𑀤𑀸𑀦𑁂 𑀦𑀺𑀬𑁄𑀚𑀬𑁂.

𑀓𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀢𑀼, 𑀧𑀝𑀺𑀮𑀤𑁆𑀥𑀫𑁆𑀧𑀺 𑀢𑀁 𑀧𑀼𑀦;

𑀢𑀲𑁆𑀲 𑀘𑀸𑀬𑀫𑀥𑀺𑀧𑁆𑀧𑀸𑀬𑁄, 𑀲𑁂𑀯𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀺.

𑀅𑀓𑀸𑀮𑀯𑀢𑁆𑀣𑀲𑀜𑁆𑀜𑀸𑀬, 𑀤𑀼𑀓𑁆𑀓𑀝𑀁 𑀓𑀸𑀮𑀘𑀻𑀯𑀭𑁂;

𑀉𑀪𑀬𑀢𑁆𑀣𑀧𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀣𑀸 𑀯𑁂𑀫𑀢𑀺𑀓𑀸𑀬𑀧𑀺.

𑀓𑀸𑀮𑀘𑀻𑀯𑀭𑀲𑀜𑁆𑀜𑀸𑀬, 𑀘𑀻𑀯𑀭𑁂 𑀉𑀪𑀬𑀢𑁆𑀣𑀧𑀺;

𑀦 𑀤𑁄𑀲𑀼𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀁, 𑀢𑀺𑀲𑀫𑀼𑀝𑁆𑀞𑀸𑀦𑀢𑀸 𑀫𑀢𑀸.

𑀘𑀻𑀯𑀭𑁂𑀲𑀼𑀧𑀺 ¶ 𑀩𑀦𑁆𑀥𑀺𑀢𑁆𑀯𑀸, 𑀞𑀧𑀺𑀢𑁂𑀲𑀼 𑀩𑀳𑀽𑀲𑁆𑀯𑀧𑀺;

𑀏𑀓𑀸𑀬𑁂𑀯 𑀲𑀺𑀬𑀸𑀧𑀢𑁆𑀢𑀺, 𑀅𑀘𑁆𑀙𑀺𑀦𑁆𑀤𑀢𑀺 𑀲𑀘𑁂 𑀲𑀬𑀁.

𑀢𑀣𑀸𑀘𑁆𑀙𑀺𑀦𑁆𑀤𑀸𑀧𑀦𑁂 ¶ 𑀏𑀓𑀸, 𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀪𑀯𑁂;

𑀇𑀢𑀭𑁂𑀲𑀼 𑀘 𑀯𑀢𑁆𑀣𑀽𑀦𑀁, 𑀧𑀬𑁄𑀕𑀲𑁆𑀲 𑀯𑀲𑀸 𑀲𑀺𑀬𑀸.

𑀢𑀺𑀓𑀧𑀸𑀘𑀺𑀢𑁆𑀢𑀺 𑀅𑀜𑁆𑀜𑀲𑁆𑀫𑀺𑀁, 𑀧𑀭𑀺𑀓𑁆𑀔𑀸𑀭𑁂 𑀢𑀼 𑀤𑀼𑀓𑁆𑀓𑀝𑀁;

𑀢𑀺𑀓𑀤𑀼𑀓𑁆𑀓𑀝𑀫𑀼𑀤𑁆𑀤𑀺𑀝𑁆𑀞𑀁, 𑀇𑀢𑀭𑀺𑀲𑁆𑀲𑀸 𑀢𑀼 𑀘𑀻𑀯𑀭𑁂.

𑀢𑀸𑀬 𑀯𑀸 𑀤𑀻𑀬𑀫𑀸𑀦𑀁 𑀢𑀼, 𑀢𑀲𑁆𑀲𑀸 𑀯𑀺𑀲𑁆𑀲𑀸𑀲𑀫𑁂𑀯 𑀯𑀸;

𑀕𑀡𑁆𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀢𑀺𑀲𑀫𑀼𑀝𑁆𑀞𑀸𑀦𑀢𑀸 𑀫𑀢𑀸.

𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀘𑁂 𑀅𑀜𑁆𑀜𑀁, 𑀢𑀤𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸;

𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀢𑀲𑁆𑀲𑀸, 𑀮𑀸𑀪𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀅𑀦𑀜𑁆𑀜𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁;

𑀅𑀦𑀜𑁆𑀜𑁂𑀦𑀜𑁆𑀜𑀲𑀜𑁆𑀜𑀸𑀬, 𑀅𑀧𑁆𑀧𑀳𑁄𑀦𑁆𑀢𑁂𑀧𑀺 𑀯𑀸 𑀧𑀼𑀦.

𑀢𑀲𑁆𑀫𑀺𑀁 𑀢𑀜𑁆𑀜𑁂𑀯 𑀯𑀸 𑀅𑀜𑁆𑀜𑀁, 𑀅𑀜𑁆𑀜𑁂𑀦𑀢𑁆𑀣𑁂𑀧𑀺 𑀯𑀸 𑀲𑀢𑀺;

𑀆𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸, 𑀢𑀤𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸.

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀬𑀧𑀺;

𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀯𑀼𑀢𑁆𑀢𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸.

𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑁆𑀯𑀸 𑀧𑀼𑀩𑁆𑀩𑀁, 𑀧𑀘𑁆𑀙𑀸 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬;

𑀏𑀯𑀁 𑀲𑀜𑁆𑀜𑀸𑀬𑀜𑁆𑀜𑀁 𑀥𑀜𑁆𑀜𑀁, 𑀫𑀬𑁆𑀳𑀁 𑀆𑀦𑁂𑀢𑁆𑀯𑀸 𑀤𑁂𑀢𑀻𑀢𑀺.

𑀘𑁂𑀢𑀸𑀧𑀦𑀧𑀬𑁄𑀕𑁂𑀦, 𑀫𑀽𑀮𑀝𑁆𑀞𑀸𑀬 𑀳𑀺 𑀤𑀼𑀓𑁆𑀓𑀝𑀁;

𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑁂𑀦 𑀘𑀜𑁆𑀜𑁂𑀦 𑀯𑀸𑀪𑀢𑀁.

𑀲𑁂𑀲𑀁 ¶ 𑀅𑀦𑀦𑁆𑀢𑀭𑁂𑀦𑁂𑀯, 𑀲𑀤𑀺𑀲𑀦𑁆𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺.

𑀅𑀜𑁆𑀜𑀤𑀢𑁆𑀣𑀸𑀬 𑀤𑀺𑀦𑁆𑀦𑁂𑀦, 𑀧𑀭𑀺𑀓𑁆𑀔𑀸𑀭𑁂𑀦 𑀬𑀸 𑀧𑀦;

𑀘𑁂𑀢𑀸𑀧𑁂𑀬𑁆𑀬 𑀲𑀘𑁂 𑀅𑀜𑁆𑀜𑀁, 𑀲𑀗𑁆𑀖𑀺𑀓𑁂𑀦𑀺𑀥 𑀪𑀺𑀓𑁆𑀔𑀼𑀦𑀻.

𑀧𑀬𑁄𑀕𑁂 ¶ 𑀤𑀼𑀓𑁆𑀓𑀝𑀁, 𑀮𑀸𑀪𑁂, 𑀢𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸;

𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀏𑀢𑁆𑀣, 𑀦𑀺𑀤𑁆𑀤𑀺𑀝𑁆𑀞𑀁 𑀤𑁆𑀯𑀺𑀓𑀤𑀼𑀓𑁆𑀓𑀝𑀁.

𑀲𑁂𑀲𑀓𑀁 𑀅𑀜𑁆𑀜𑀤𑀢𑁆𑀣𑀸𑀬, 𑀅𑀦𑀸𑀧𑀢𑁆𑀢𑀼𑀧𑀦𑁂𑀦𑁆𑀢𑀺𑀬𑀸;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀸𑀫𑀺𑀓𑁂 𑀯𑀸𑀧𑁆𑀬𑀸-𑀧𑀤𑀸𑀲𑀼𑀫𑁆𑀫𑀢𑁆𑀢𑀺𑀓𑀸𑀬 𑀯𑀸.

𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀯𑀼𑀢𑁆𑀢𑀸, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀦𑀬𑀸;

𑀲𑀢𑁆𑀢𑀫𑀁 𑀙𑀝𑁆𑀞𑀲𑀤𑀺𑀲𑀁, 𑀲𑀬𑀁 𑀬𑀸𑀘𑀺𑀢𑀓𑀁 𑀯𑀺𑀦𑀸.

𑀅𑀝𑁆𑀞𑀫𑁂 𑀦𑀯𑀫𑁂 𑀯𑀸𑀧𑀺, 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

‘‘𑀫𑀳𑀸𑀚𑀦𑀺𑀓𑀲𑀜𑁆𑀜𑀸𑀘𑀺-𑀓𑁂𑀦𑀸’’𑀢𑀺 𑀧𑀤𑀢𑀸𑀥𑀺𑀓𑀸.

𑀤𑀲𑀫𑁂𑀧𑀺 𑀓𑀣𑀸 𑀲𑀩𑁆𑀩𑀸, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁, 𑀯𑀺𑀲𑁂𑀲𑁄 𑀦𑀢𑁆𑀣𑀺 𑀓𑁄𑀘𑀺𑀧𑀺.

𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀁, 𑀕𑀭𑀼𑀧𑀸𑀯𑀼𑀭𑀡𑀁 𑀧𑀦;

𑀘𑁂𑀢𑀸𑀧𑁂𑀬𑁆𑀬 𑀲𑀘𑁂 𑀢𑀲𑁆𑀲𑀸, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀺𑀦𑀸.

𑀧𑀬𑁄𑀕𑁂 ¶ 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀫𑀢𑀁;

𑀓𑀳𑀸𑀧𑀡𑀘𑀢𑀼𑀓𑁆𑀓𑀁 𑀢𑀼, 𑀓𑀁𑀲𑁄 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑀊𑀦𑀓𑁂 𑀢𑀼 𑀘𑀢𑀼𑀓𑁆𑀓𑀁𑀲𑁂, 𑀉𑀤𑁆𑀤𑀺𑀝𑁆𑀞𑀁 𑀤𑁆𑀯𑀺𑀓𑀤𑀼𑀓𑁆𑀓𑀝𑀁;

𑀅𑀦𑀸𑀧𑀢𑁆𑀢𑀺 𑀘𑀢𑀼𑀓𑁆𑀓𑀁𑀲-𑀧𑀭𑀫𑀁 𑀕𑀭𑀼𑀓𑀁 𑀧𑀦.

𑀘𑁂𑀢𑀸𑀧𑁂𑀢𑀺 𑀢𑀤𑀽𑀦𑀁 𑀯𑀸, 𑀜𑀸𑀢𑀓𑀸𑀦𑀜𑁆𑀘 𑀲𑀦𑁆𑀢𑀓𑁂;

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸 𑀅𑀢𑁆𑀢-𑀥𑀦𑁂𑀦𑀼𑀫𑁆𑀫𑀢𑁆𑀢𑀺𑀓𑀸𑀬 𑀯𑀸.

𑀘𑁂𑀢𑀸𑀧𑁂𑀦𑁆𑀢𑀁 𑀫𑀳𑀕𑁆𑀖𑀁 𑀬𑀸, 𑀘𑁂𑀢𑀸𑀧𑁂𑀢𑀧𑁆𑀧𑀫𑁂𑀯 𑀯𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀮𑀳𑀼𑀧𑀸𑀯𑀼𑀭𑀡𑀁 ¶ 𑀅𑀟𑁆𑀠- 𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀁 𑀧𑀦;

𑀢𑀢𑁄 𑀘𑁂 𑀉𑀢𑁆𑀢𑀭𑀺𑀁 𑀬𑀁 𑀢𑀼, 𑀘𑁂𑀢𑀸𑀧𑁂𑀢𑀺 𑀳𑀺 𑀪𑀺𑀓𑁆𑀔𑀼𑀦𑀻.

𑀢𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸;

𑀅𑀦𑀦𑁆𑀢𑀭𑀲𑀫𑀁 𑀲𑁂𑀲𑀁, 𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸.

𑀲𑀸𑀥𑀸𑀭𑀡𑀸𑀦𑀺 𑀲𑁂𑀲𑀸𑀦𑀺, 𑀢𑀸𑀦𑀺 𑀅𑀝𑁆𑀞𑀸𑀭𑀲𑀸𑀧𑀺 𑀘;

𑀇𑀫𑀸𑀦𑀺 𑀤𑁆𑀯𑀸𑀤𑀲𑁂𑀯𑀸𑀧𑀺, 𑀲𑀫𑀢𑀺𑀁𑀲𑁂𑀯 𑀳𑁄𑀦𑁆𑀢𑀺 𑀳𑀺.

𑀮𑀲𑀼𑀡𑀁 𑀪𑀡𑁆𑀟𑀺𑀓𑀁 𑀯𑀼𑀢𑁆𑀢𑀁, 𑀦 𑀏𑀓𑀤𑁆𑀯𑀺𑀢𑀺𑀫𑀺𑀜𑁆𑀚𑀓𑀁;

𑀆𑀫𑀓𑀁 𑀫𑀸𑀕𑀥𑀁𑀬𑁂𑀯, ‘‘𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑀺.

𑀕𑀳𑀡𑁂 𑀤𑀼𑀓𑁆𑀓𑀝𑀁 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀬𑀤𑀺 𑀔𑀸𑀤𑀢𑀺;

𑀅𑀚𑁆𑀛𑁄𑀳𑀸𑀭𑀯𑀲𑁂𑀦𑁂𑀯, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂.

𑀤𑁆𑀯𑁂 ¶ 𑀢𑀬𑁄 𑀪𑀡𑁆𑀟𑀺𑀓𑁂 𑀲𑀤𑁆𑀥𑀺𑀁, 𑀲𑀗𑁆𑀔𑀸𑀤𑀺𑀢𑁆𑀯𑀸 𑀲𑀘𑁂 𑀧𑀦;

𑀅𑀚𑁆𑀛𑁄𑀳𑀭𑀢𑀺 𑀬𑀸 𑀢𑀲𑁆𑀲𑀸, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀏𑀓𑁂𑀓𑀁, 𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺𑀬𑀸 𑀧𑀦;

𑀫𑀺𑀜𑁆𑀚𑀸𑀦𑀁 𑀕𑀡𑀦𑀸𑀬𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺𑀕𑀡𑀦𑀸 𑀲𑀺𑀬𑀸.

𑀧𑀮𑀡𑁆𑀟𑀼𑀓𑁄 𑀪𑀜𑁆𑀚𑀦𑀓𑁄, 𑀳𑀭𑀺𑀢𑁄 𑀘𑀸𑀧𑀮𑁄𑀧𑀺 𑀘;

𑀮𑀲𑀼𑀡𑀸 𑀧𑀦 𑀘𑀢𑁆𑀢𑀸𑀭𑁄, 𑀯𑀝𑁆𑀝𑀦𑁆𑀢𑁂𑀯 𑀲𑀪𑀸𑀯𑀢𑁄.

𑀧𑀮𑀡𑁆𑀟𑀼𑀓𑁄 𑀧𑀡𑁆𑀟𑀼𑀯𑀡𑁆𑀡𑁄, 𑀪𑀜𑁆𑀚𑀦𑁄 𑀮𑁄𑀳𑀺𑀢𑁄𑀧𑀺 𑀘;

𑀳𑀭𑀺𑀢𑁄 𑀳𑀭𑀺𑀢𑀯𑀡𑁆𑀡𑁄, 𑀘𑀸𑀧𑀮𑁄 𑀲𑁂𑀢𑀓𑁄𑀧𑀺 𑀘.

𑀏𑀓𑀸 𑀫𑀺𑀜𑁆𑀚𑀸 𑀧𑀮𑀡𑁆𑀟𑀼𑀲𑁆𑀲, 𑀪𑀜𑁆𑀚𑀦𑀲𑁆𑀲 𑀤𑀼𑀯𑁂 𑀲𑀺𑀬𑀼𑀁;

𑀢𑀺𑀲𑁆𑀲𑁄 𑀳𑀭𑀺𑀢𑀓𑀲𑁆𑀲𑀸𑀧𑀺, 𑀘𑀸𑀧𑀮𑁄 𑀳𑁄𑀢𑁆𑀬𑀫𑀺𑀜𑁆𑀚𑀓𑁄.

𑀲𑀽𑀧𑀫𑀁𑀲𑀸𑀤𑀺𑀲𑀁𑀧𑀸𑀓𑁂 ¶ , 𑀲𑀸𑀴𑀯𑀼𑀢𑁆𑀢𑀭𑀺𑀪𑀗𑁆𑀕𑀓𑁂;

𑀦 𑀤𑁄𑀲𑀼𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀁, 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀁.

𑀲𑀫𑁆𑀩𑀸𑀥𑁂 𑀉𑀧𑀓𑀘𑁆𑀙𑁂𑀲𑀼, 𑀫𑀼𑀢𑁆𑀢𑀲𑁆𑀲 𑀓𑀭𑀡𑁂𑀧𑀺 𑀯𑀸;

𑀏𑀓𑀮𑁄𑀫𑀫𑁆𑀧𑀺 𑀧𑀸𑀘𑀺𑀢𑁆𑀢𑀺, 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀲𑀺𑀬𑀸.

𑀩𑀳𑀼𑀓𑁂𑀧𑀺 𑀢𑀣𑀸 𑀮𑁄𑀫𑁂, 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀧𑀦;

𑀧𑀬𑁄𑀕𑀕𑀡𑀦𑀸𑀬𑀲𑁆𑀲𑀸, 𑀦 𑀮𑁄𑀫𑀕𑀡𑀦𑀸𑀬 𑀳𑀺.

𑀦 𑀤𑁄𑀲𑁄 𑀲𑀢𑀺 𑀆𑀩𑀸𑀥𑁂, 𑀮𑁄𑀫𑀓𑁂 𑀲𑀁𑀳𑀭𑀦𑁆𑀢𑀺𑀬𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀫𑀕𑁆𑀕- 𑀲𑀁𑀯𑀺𑀥𑀸𑀦𑀲𑀫𑀸 𑀫𑀢𑀸.

𑀳𑁄𑀢𑀺 𑀅𑀦𑁆𑀢𑀫𑀲𑁄 𑀫𑀼𑀢𑁆𑀢-𑀓𑀭𑀡𑀲𑁆𑀲 𑀢𑀮𑀖𑀸𑀢𑀦𑁂;

𑀓𑁂𑀲𑀭𑁂𑀦𑀸𑀧𑀺 𑀭𑀸𑀕𑁂𑀦, 𑀧𑀸𑀘𑀺𑀢𑁆𑀢𑀺 𑀧𑀤𑀼𑀫𑀲𑁆𑀲 𑀯𑀸.

𑀕𑀡𑁆𑀟𑀁 ¶ 𑀢𑀢𑁆𑀣 𑀯𑀡𑀁 𑀯𑀸𑀧𑀺, 𑀦 𑀤𑁄𑀲𑁄 𑀧𑀳𑀭𑀦𑁆𑀢𑀺𑀬𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀬𑀸 𑀧𑀦𑀼𑀧𑁆𑀧𑀮𑀧𑀢𑁆𑀢𑀫𑁆𑀧𑀺, 𑀩𑁆𑀬𑀜𑁆𑀚𑀦𑁂 𑀪𑀺𑀓𑁆𑀔𑀼𑀦𑀢𑁆𑀢𑀦𑁄;

𑀓𑀸𑀫𑀭𑀸𑀕𑀧𑀭𑁂𑀢𑀸 𑀢𑀼, 𑀧𑀯𑁂𑀲𑁂𑀢𑀺 𑀦 𑀯𑀝𑁆𑀝𑀢𑀺.

𑀇𑀤𑀁 𑀯𑀢𑁆𑀣𑀼𑀯𑀲𑁂𑀦𑁂𑀯, 𑀯𑀼𑀢𑁆𑀢𑀁 𑀢𑀼 𑀚𑀢𑀼𑀫𑀝𑁆𑀞𑀓𑀁;

𑀤𑀡𑁆𑀟𑀫𑁂𑀮𑀸𑀴𑀼𑀓𑀁 𑀯𑀸𑀧𑀺, 𑀫𑀼𑀢𑁆𑀢𑀲𑁆𑀲 𑀓𑀭𑀡𑁂 𑀧𑀦.

𑀲𑀫𑁆𑀨𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑀺𑀬𑀸, 𑀧𑀯𑁂𑀲𑁂𑀢𑀺 𑀲𑀘𑁂 𑀧𑀦;

𑀧𑀯𑁂𑀲𑀸𑀧𑁂𑀢𑀺 𑀯𑀸 𑀢𑀲𑁆𑀫𑀺𑀁, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀆𑀩𑀸𑀥𑀧𑀘𑁆𑀘𑀬𑀸 𑀤𑁄𑀲𑁄, 𑀦𑀢𑁆𑀣𑀺 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸;

𑀢𑀮𑀖𑀸𑀢𑀓𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀫𑀢𑀸.

𑀅𑀗𑁆𑀕𑀼𑀮𑀻𑀦𑀁 ¶ 𑀧𑀦 𑀤𑁆𑀯𑀺𑀦𑁆𑀦𑀁, 𑀅𑀕𑁆𑀕𑀧𑀩𑁆𑀩𑀤𑁆𑀯𑀬𑀸𑀥𑀺𑀓𑀁;

𑀧𑀸𑀘𑀺𑀢𑁆𑀢𑀺𑀬𑀁 𑀧𑀯𑁂𑀲𑁂𑀢𑁆𑀯𑀸, 𑀤𑀓𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀺𑀬𑀸.

𑀏𑀓𑀺𑀲𑁆𑀲𑀸𑀗𑁆𑀕𑀼𑀮𑀺𑀬𑀸 𑀢𑀻𑀡𑀺, 𑀧𑀩𑁆𑀩𑀸𑀦𑀺 𑀧𑀦 𑀤𑀻𑀖𑀢𑁄;

𑀧𑀸𑀘𑀺𑀢𑁆𑀢𑀺𑀬𑀁 𑀪𑀯𑁂 𑀲𑀼𑀤𑁆𑀥𑀺𑀁, 𑀧𑀯𑁂𑀲𑁂𑀢𑁆𑀯𑀸𑀤𑀺𑀬𑀦𑁆𑀢𑀺𑀬𑀸.

𑀘𑀢𑀼𑀦𑁆𑀦𑀁 𑀯𑀸𑀧𑀺 𑀢𑀺𑀲𑁆𑀲𑀦𑁆𑀦𑀁, 𑀏𑀓𑀧𑀩𑁆𑀩𑀫𑁆𑀧𑀺 𑀬𑀸 𑀧𑀦;

𑀯𑀺𑀢𑁆𑀣𑀸𑀭𑀢𑁄 𑀧𑀯𑁂𑀲𑁂𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀇𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀫𑀳𑀸𑀧𑀘𑁆𑀘𑀭𑀺𑀬𑀸 𑀧𑀦;

𑀅𑀪𑀺𑀩𑁆𑀬𑀢𑁆𑀢𑀢𑀭𑀁 𑀓𑀢𑁆𑀯𑀸, 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄.

𑀤𑁄𑀲𑁄 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀯𑀸, 𑀦𑀢𑁆𑀣𑀺 𑀆𑀩𑀸𑀥𑀓𑀸𑀭𑀡𑀸;

𑀅𑀥𑀺𑀓𑀫𑁆𑀧𑀺 𑀧𑀯𑁂𑀲𑁂𑀢𑁆𑀯𑀸, 𑀤𑀓𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀺𑀬𑀸.

𑀢𑀣𑀸 ¶ 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀢𑀮𑀖𑀸𑀢𑀲𑀫𑀸 𑀫𑀢𑀸.

𑀪𑀼𑀜𑁆𑀚𑀢𑁄 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀧𑀸𑀦𑀻𑀬𑀁 𑀯𑀸 𑀯𑀺𑀥𑀽𑀧𑀦𑀁;

𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀕𑀳𑀺𑀢𑀸 𑀉𑀤𑀓𑁂𑀦𑁂𑀯, 𑀔𑀻𑀭𑀢𑀓𑁆𑀓𑀸𑀤𑀬𑁄 𑀭𑀲𑀸;

‘‘𑀩𑀻𑀚𑀦𑀻’’𑀢𑀺 𑀘 𑀬𑀸 𑀓𑀸𑀘𑀺, 𑀯𑀢𑁆𑀣𑀓𑁄𑀡𑀸𑀤𑀺 𑀯𑀼𑀘𑁆𑀘𑀢𑀺.

𑀳𑀢𑁆𑀣𑀧𑀸𑀲𑁂 𑀇𑀥𑀝𑁆𑀞𑀸𑀦-𑀧𑀘𑁆𑀘𑀬𑀸𑀧𑀢𑁆𑀢𑀺 𑀤𑀻𑀧𑀺𑀢𑀸;

𑀧𑀳𑀸𑀭𑀧𑀘𑁆𑀘𑀬𑀸 𑀯𑀼𑀢𑁆𑀢𑀁, 𑀔𑀦𑁆𑀥𑀓𑁂 𑀤𑀼𑀓𑁆𑀓𑀝𑀁 𑀯𑀺𑀲𑀼𑀁.

𑀳𑀢𑁆𑀣𑀧𑀸𑀲𑀁 𑀚𑀳𑀺𑀢𑁆𑀯𑀸 𑀯𑀸, 𑀉𑀧𑀢𑀺𑀝𑁆𑀞𑀦𑁆𑀢𑀺𑀬𑀸 𑀧𑀦;

𑀔𑀸𑀤𑀢𑁄 𑀔𑀸𑀤𑀦𑀁 𑀯𑀸𑀧𑀺, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑀦 𑀤𑁄𑀲𑁄 𑀤𑁂𑀢𑀺 𑀤𑀸𑀧𑁂𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸;

𑀇𑀤𑀁 𑀏𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀲𑀫𑀁 𑀫𑀢𑀁.

𑀯𑀺𑀜𑁆𑀜𑀢𑁆𑀯𑀸 𑀆𑀫𑀓𑀁 𑀥𑀜𑁆𑀜𑀁, 𑀪𑀚𑁆𑀚𑀺𑀢𑁆𑀯𑀸 𑀬𑀤𑀺 𑀪𑀺𑀓𑁆𑀔𑀼𑀦𑀻;

𑀓𑁄𑀝𑁆𑀝𑁂𑀢𑁆𑀯𑀸 𑀘 𑀧𑀘𑀺𑀢𑁆𑀯𑀸 𑀘, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑀺.

𑀦 ¶ 𑀓𑁂𑀯𑀮𑀁 𑀢𑀼 𑀥𑀜𑁆𑀜𑀸𑀦𑀁, 𑀕𑀳𑀡𑁂𑀬𑁂𑀯 𑀤𑀼𑀓𑁆𑀓𑀝𑀁;

𑀳𑀭𑀡𑁂𑀧𑀺 𑀘 𑀥𑀜𑁆𑀜𑀸𑀦𑀁, 𑀢𑀣𑀸 𑀲𑀼𑀓𑁆𑀔𑀸𑀧𑀦𑁂 𑀧𑀦.

𑀪𑀚𑁆𑀚𑀦𑀢𑁆𑀣𑀸𑀬 𑀥𑀜𑁆𑀜𑀸𑀦𑀁, 𑀓𑀧𑀮𑁆𑀮𑀼𑀤𑁆𑀥𑀦𑀲𑀚𑁆𑀚𑀦𑁂;

𑀅𑀕𑁆𑀕𑀺𑀲𑁆𑀲 𑀓𑀭𑀡𑁂 𑀤𑀩𑁆𑀩𑀺-𑀲𑀚𑁆𑀚𑀦𑁂 𑀘, 𑀓𑀧𑀮𑁆𑀮𑀓𑁂.

𑀥𑀜𑁆𑀜𑀧𑀓𑁆𑀔𑀺𑀧𑀦𑁂 𑀢𑀢𑁆𑀣, 𑀤𑀩𑁆𑀩𑀺𑀬𑀸 𑀖𑀝𑁆𑀝𑀓𑁄𑀝𑁆𑀝𑀦𑁂;

𑀧𑀧𑁆𑀨𑁄𑀝𑀦𑀸𑀤𑀺𑀓𑁂 𑀲𑀩𑁆𑀩-𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀪𑀯𑁂.

𑀪𑁄𑀚𑀦𑀜𑁆𑀘𑁂𑀯 ¶ 𑀯𑀺𑀜𑁆𑀜𑀢𑁆𑀢𑀺, 𑀧𑀫𑀸𑀡𑀁 𑀇𑀤𑀫𑁂𑀢𑁆𑀣 𑀳𑀺;

𑀯𑀺𑀜𑁆𑀜𑀢𑁆𑀯𑀸 𑀯𑀸 𑀲𑀬𑀁 𑀢𑀲𑁆𑀫𑀸, 𑀪𑀚𑁆𑀚𑀦𑀸𑀤𑀻𑀦𑀺 𑀅𑀜𑁆𑀜𑀢𑁄.

𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀦𑀜𑁆𑀜𑀸𑀬, 𑀪𑀚𑁆𑀚𑀦𑀸𑀤𑀻𑀦𑀺 𑀯𑀸 𑀲𑀬𑀁;

𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀓𑀢𑁆𑀯𑀸 𑀯𑀸, 𑀅𑀚𑁆𑀛𑁄𑀳𑀭𑀢𑀺 𑀬𑀸 𑀧𑀦.

𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀁;

𑀫𑀸𑀢𑀭𑀁 𑀯𑀸𑀧𑀺 𑀬𑀸𑀘𑀺𑀢𑁆𑀯𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑀺.

𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀸, 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀯𑀸 𑀧𑀦;

𑀅𑀯𑀺𑀜𑁆𑀜𑀢𑁆𑀢𑀺 𑀲𑀬𑀁 𑀮𑀤𑁆𑀥𑀁, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑀺.

𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀦𑀜𑁆𑀜𑀸𑀬, 𑀮𑀤𑁆𑀥𑀁 𑀢𑀸𑀬 𑀲𑀬𑀫𑁆𑀧𑀺 𑀯𑀸;

𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀓𑀢𑁆𑀯𑀸 𑀯𑀸, 𑀢𑀣𑀸 𑀅𑀚𑁆𑀛𑁄𑀳𑀭𑀦𑁆𑀢𑀺𑀬𑀸.

𑀲𑁂𑀤𑀓𑀫𑁆𑀫𑀸𑀤𑀺𑀅𑀢𑁆𑀣𑀸𑀬, 𑀥𑀜𑁆𑀜𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀦;

𑀞𑀧𑁂𑀢𑁆𑀯𑀸 𑀲𑀢𑁆𑀢 𑀥𑀜𑁆𑀜𑀸𑀦𑀺, 𑀲𑁂𑀲𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀘.

𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁, 𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀘;

𑀜𑀸𑀢𑀓𑀸𑀦𑀫𑁆𑀧𑀺 𑀥𑀜𑁆𑀜𑀁 𑀢𑀼, 𑀆𑀫𑀓𑀁 𑀦 𑀘 𑀯𑀝𑁆𑀝𑀢𑀺.

𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁, 𑀦𑀯𑀓𑀫𑁆𑀫𑁂𑀲𑀼 𑀯𑀝𑁆𑀝𑀢𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀤𑁆𑀥𑀸𑀦𑀲𑀤𑀺𑀲𑀸 𑀫𑀢𑀸.

𑀉𑀘𑁆𑀘𑀸𑀭𑀁 𑀯𑀸𑀧𑀺 𑀧𑀲𑁆𑀲𑀸𑀯𑀁, 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀓𑀁;

𑀙𑀟𑁆𑀟𑁂𑀬𑁆𑀬 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂, 𑀙𑀟𑁆𑀟𑀸𑀧𑁂𑀬𑁆𑀬 𑀧𑀭𑁂𑀳𑀺 𑀯𑀸.

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲𑀸, 𑀧𑀸𑀓𑀸𑀭𑁂𑀧𑀺 𑀅𑀬𑀁 𑀦𑀬𑁄;

𑀙𑀟𑁆𑀟𑁂𑀦𑁆𑀢𑀺𑀬𑀸 𑀧𑀦𑁂𑀓𑁂𑀓-𑀫𑀦𑁂𑀓𑀸𑀧𑀢𑁆𑀢𑀺 𑀤𑀻𑀧𑀺𑀢𑀸.

𑀏𑀢𑀸𑀦𑀺 ¶ 𑀧𑀦 𑀯𑀢𑁆𑀣𑀽𑀦𑀺, 𑀘𑀢𑁆𑀢𑀸𑀭𑀺 𑀲𑀓𑀮𑀸𑀦𑀺𑀧𑀺;

𑀏𑀓𑁂𑀦𑁂𑀯 𑀧𑀬𑁄𑀕𑁂𑀦, 𑀏𑀓𑀸 𑀙𑀟𑁆𑀟𑁂𑀦𑁆𑀢𑀺𑀬𑀸 𑀲𑀺𑀬𑀸.

𑀆𑀡𑀢𑁆𑀢𑀺𑀬𑀫𑁆𑀧𑀺 ¶ 𑀏𑀲𑁂𑀯, 𑀦𑀬𑁄 𑀜𑁂𑀬𑁆𑀬𑁄 𑀯𑀺𑀪𑀸𑀯𑀺𑀦𑀸;

𑀙𑀟𑁆𑀟𑀦𑁂 𑀤𑀦𑁆𑀢𑀓𑀝𑁆𑀞𑀲𑁆𑀲, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸.

𑀲𑀩𑁆𑀩𑀢𑁆𑀣 𑀧𑀦 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀅𑀯𑀮𑀜𑁆𑀚𑁂𑀧𑀺 𑀯𑀸 𑀞𑀸𑀦𑁂, 𑀑𑀮𑁄𑀓𑁂𑀢𑁆𑀯𑀸𑀧𑀺 𑀯𑀸 𑀧𑀦.

𑀙𑀟𑁆𑀟𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸;

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀓𑁆𑀭𑀺𑀬𑀸𑀓𑁆𑀭𑀺𑀬𑀫𑀺𑀤𑀁 𑀲𑀺𑀬𑀸.

𑀔𑁂𑀢𑁆𑀢𑁂 𑀯𑀸 𑀦𑀸𑀴𑀺𑀓𑁂𑀭𑀸𑀤𑀺-𑀆𑀭𑀸𑀫𑁂 𑀯𑀸𑀧𑀺 𑀬𑀸 𑀧𑀦;

𑀭𑁄𑀧𑀺𑀫𑁂 𑀳𑀭𑀺𑀢𑀝𑁆𑀞𑀸𑀦𑁂, 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀺𑀓𑁆𑀔𑀼𑀦𑀻.

𑀢𑀸𑀦𑀺 𑀘𑀢𑁆𑀢𑀸𑀭𑀺 𑀯𑀢𑁆𑀣𑀽𑀦𑀺, 𑀲𑀘𑁂 𑀙𑀟𑁆𑀟𑁂𑀢𑀺 𑀯𑀸 𑀲𑀬𑀁;

𑀙𑀟𑁆𑀟𑀸𑀧𑁂𑀢𑀺 𑀢𑀣𑀸 𑀯𑀼𑀢𑁆𑀢-𑀦𑀬𑁄 𑀆𑀧𑀢𑁆𑀢𑀺𑀦𑀺𑀘𑁆𑀙𑀬𑁄.

𑀪𑀼𑀜𑁆𑀚𑀫𑀸𑀦𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀔𑁂𑀢𑁆𑀢𑁂 𑀢𑀼 𑀳𑀭𑀺𑀢𑁂 𑀢𑀣𑀸;

𑀉𑀘𑁆𑀙𑀼𑀆𑀤𑀻𑀦𑀺 𑀔𑀸𑀤𑀦𑁆𑀢𑀻, 𑀕𑀘𑁆𑀙𑀦𑁆𑀢𑀻 𑀧𑀦 𑀢𑀢𑁆𑀣 𑀬𑀸.

𑀙𑀟𑁆𑀟𑁂𑀢𑀺 𑀬𑀤𑀺 𑀉𑀘𑁆𑀙𑀺𑀝𑁆𑀞𑀁, 𑀉𑀤𑀓𑀁 𑀘𑀮𑀓𑀸𑀦𑀺 𑀯𑀸;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲𑀸, 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁.

𑀙𑀟𑁆𑀟𑁂𑀦𑁆𑀢𑀺𑀬𑀸 𑀲𑀺𑀬𑀸𑀧𑀢𑁆𑀢𑀺, 𑀞𑀸𑀦𑁂 𑀅𑀦𑁆𑀢𑀫𑀲𑁄 𑀚𑀮𑀁;

𑀧𑀺𑀯𑀺𑀢𑁆𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀁, 𑀦𑀸𑀴𑀺𑀓𑁂𑀭𑀫𑁆𑀧𑀺 𑀢𑀸𑀤𑀺𑀲𑁂.

𑀓𑀲𑀺𑀢𑁂 𑀢𑀼 𑀧𑀦𑀝𑁆𑀞𑀸𑀦𑁂, 𑀩𑀻𑀚𑀦𑀺𑀓𑁆𑀔𑁂𑀧𑀦𑁂 𑀓𑀢𑁂;

𑀦 𑀉𑀝𑁆𑀞𑁂𑀢𑀗𑁆𑀓𑀼𑀭𑀁 𑀬𑀸𑀯, 𑀲𑀩𑁆𑀩𑁂𑀲𑀁 𑀢𑀸𑀯 𑀤𑀼𑀓𑁆𑀓𑀝𑀁.

𑀮𑀸𑀬𑀺𑀢𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁, 𑀔𑁂𑀢𑁆𑀢𑀁 𑀭𑀓𑁆𑀔𑀢𑀺 𑀘𑁂 𑀧𑀼𑀦;

𑀭𑁄𑀳𑀦𑀢𑁆𑀣𑀸𑀬 𑀢𑀢𑁆𑀣𑀲𑁆𑀲𑀸, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀳𑀺.

𑀦 𑀤𑁄𑀲𑁄 𑀙𑀟𑁆𑀟𑀺𑀢𑁂 𑀔𑁂𑀢𑁆𑀢𑁂, 𑀲𑀩𑁆𑀩𑀁 𑀙𑀟𑁆𑀟𑁂𑀦𑁆𑀢𑀺𑀬𑀸 𑀧𑀦;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀝𑁆𑀞𑀫𑁂𑀦 𑀲𑀫𑀸 𑀫𑀢𑀸.

𑀦𑀘𑁆𑀘𑀁 ¶ ¶ 𑀯𑀸 𑀧𑀦 𑀕𑀻𑀢𑀁 𑀯𑀸, 𑀯𑀸𑀤𑀺𑀢𑀁 𑀯𑀸𑀧𑀺 𑀪𑀺𑀓𑁆𑀔𑀼𑀦𑀻;

𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀤𑀲𑁆𑀲𑀦𑀢𑁆𑀣𑀸𑀬 𑀦𑀘𑁆𑀘𑀲𑁆𑀲, 𑀕𑀻𑀢𑀲𑁆𑀲 𑀲𑀯𑀦𑀸𑀬 𑀘;

𑀕𑀘𑁆𑀙𑀦𑁆𑀢𑀺𑀬𑀸 𑀲𑀺𑀬𑀸 𑀢𑀲𑁆𑀲𑀸, 𑀧𑀤𑀯𑀸𑀭𑁂𑀦 𑀤𑀼𑀓𑁆𑀓𑀝𑀁.

𑀲𑀘𑁂 𑀏𑀓𑀧𑀬𑁄𑀕𑁂𑀦, 𑀑𑀮𑁄𑀓𑁂𑀦𑁆𑀢𑀻 𑀘 𑀧𑀲𑁆𑀲𑀢𑀺;

𑀲𑀼𑀡𑀸𑀢𑀺 𑀢𑁂𑀲𑀁 𑀕𑀻𑀢𑀫𑁆𑀧𑀺, 𑀏𑀓𑀸 𑀧𑀸𑀘𑀺𑀢𑁆𑀢𑀺 𑀤𑀻𑀧𑀺𑀢𑀸.

𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀤𑀺𑀲𑀸𑀪𑀸𑀕𑁂, 𑀦𑀘𑁆𑀘𑀁 𑀧𑀲𑁆𑀲𑀢𑀺 𑀘𑁂 𑀧𑀦;

𑀲𑀼𑀡𑀸𑀢𑀺 𑀅𑀜𑁆𑀜𑀢𑁄 𑀕𑀻𑀢𑀁, 𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀁.

𑀧𑀬𑁄𑀕𑀕𑀡𑀦𑀸𑀬𑁂𑀢𑁆𑀣, 𑀆𑀧𑀢𑁆𑀢𑀺𑀕𑀡𑀦𑀸 𑀲𑀺𑀬𑀸;

𑀦𑀘𑁆𑀘𑀺𑀢𑀼𑀁 𑀕𑀸𑀬𑀺𑀢𑀼𑀁 𑀦𑁂𑀯, 𑀲𑀬𑀁 𑀮𑀪𑀢𑀺 𑀪𑀺𑀓𑁆𑀔𑀼𑀦𑀻.

‘‘𑀅𑀜𑁆𑀜𑀁 𑀦𑀘𑁆𑀘𑀸𑀢𑀺 𑀯𑀸𑀤𑁂𑀳𑀺’’, 𑀇𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺;

‘‘𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸’’𑀢𑀺, 𑀯𑀼𑀢𑁆𑀢𑁂 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁.

𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺 𑀲𑀩𑁆𑀩𑀢𑁆𑀣, 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺 𑀤𑀼𑀓𑁆𑀓𑀝𑀁;

‘‘𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸’’𑀢𑀺, 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦.

‘‘𑀉𑀧𑀝𑁆𑀞𑀸𑀦𑀁 𑀧𑀲𑀢𑁆𑀣’’𑀦𑁆𑀢𑀺, 𑀯𑀢𑁆𑀢𑀼𑀫𑁂𑀯𑀁 𑀢𑀼 𑀯𑀝𑁆𑀝𑀢𑀺;

𑀆𑀭𑀸𑀫𑁂𑀬𑁂𑀯 𑀞𑀢𑁆𑀯𑀸 𑀯𑀸, 𑀬𑀸 𑀧𑀲𑁆𑀲𑀢𑀺 𑀲𑀼𑀡𑀸𑀢𑀺 𑀯𑀸.

𑀅𑀢𑁆𑀢𑀦𑁄 𑀘 𑀞𑀺𑀢𑁄𑀓𑀸𑀲𑀁, 𑀆𑀕𑀦𑁆𑀢𑁆𑀯𑀸 𑀘 𑀧𑀬𑁄𑀚𑀺𑀢𑀁;

𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀺𑀬𑀸 𑀯𑀸𑀧𑀺, 𑀢𑀣𑀸𑀭𑀽𑀧𑀸 𑀳𑀺 𑀓𑀸𑀭𑀡𑀸.

𑀧𑀲𑁆𑀲𑀦𑁆𑀢𑀺𑀬𑀸 𑀢𑀣𑀸 𑀫𑀕𑁆𑀕𑀁, 𑀦𑀘𑁆𑀘𑀁 𑀧𑀝𑀺𑀧𑀣𑁂𑀧𑀺 𑀘;

𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀸𑀧𑀤𑀸𑀲𑀼𑀧𑀺.

𑀇𑀤𑀫𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀁 𑀲𑀫𑀁 𑀫𑀢𑀁;

𑀮𑁄𑀓𑀯𑀚𑁆𑀚𑀫𑀺𑀤𑀁 𑀧𑀸𑀧-𑀘𑀺𑀢𑁆𑀢𑀜𑁆𑀘𑁂𑀯 𑀢𑀺𑀯𑁂𑀤𑀦𑀁.

𑀬𑀸𑀥 ¶ 𑀭𑀢𑁆𑀢𑀦𑁆𑀥𑀓𑀸𑀭𑀲𑁆𑀫𑀺𑀁, 𑀅𑀧𑁆𑀧𑀤𑀻𑀧𑁂 𑀧𑀦𑁂𑀓𑀺𑀓𑀸;

𑀲𑀦𑁆𑀢𑀺𑀝𑁆𑀞𑀢𑀺 𑀲𑀘𑁂 𑀲𑀤𑁆𑀥𑀺𑀁, 𑀧𑀼𑀭𑀺𑀲𑁂𑀦 𑀘 𑀪𑀺𑀓𑁆𑀔𑀼𑀦𑀻.

𑀢𑀲𑁆𑀲𑀸 ¶ 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑀤𑁆𑀥𑀺𑀁 𑀯𑀸 𑀲𑀮𑁆𑀮𑀧𑀦𑁆𑀢𑀺𑀬𑀸;

𑀳𑀢𑁆𑀣𑀧𑀸𑀲𑀁 𑀲𑀫𑀸𑀕𑀦𑁆𑀢𑁆𑀯𑀸, 𑀭𑀳𑀲𑁆𑀲𑀸𑀤𑀯𑀲𑁂𑀦 𑀢𑀼.

𑀳𑀢𑁆𑀣𑀧𑀸𑀲𑀁 𑀚𑀳𑀺𑀢𑁆𑀯𑀸 𑀯𑀸, 𑀧𑀼𑀭𑀺𑀲𑀲𑁆𑀲 𑀲𑀘𑁂 𑀧𑀦;

𑀅𑀚𑀳𑀺𑀢𑁆𑀯𑀸𑀧𑀺 𑀯𑀸 𑀬𑀓𑁆𑀔-𑀧𑁂𑀢𑀸𑀤𑀻𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻.

𑀲𑀦𑁆𑀢𑀺𑀝𑁆𑀞𑀢𑀺 𑀘 𑀬𑀸 𑀢𑀲𑁆𑀲𑀸, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁;

𑀅𑀦𑀸𑀧𑀢𑁆𑀢𑀺 𑀲𑀘𑁂 𑀓𑁄𑀘𑀺, 𑀤𑀼𑀢𑀺𑀬𑀸 𑀯𑀺𑀜𑁆𑀜𑀼 𑀯𑀺𑀚𑁆𑀚𑀢𑀺.

𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀣𑀜𑁆𑀜𑀯𑀺𑀳𑀺𑀢𑀸𑀬 𑀯𑀸;

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑁆𑀭𑀺𑀬𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀓𑀁.

𑀤𑀼𑀢𑀺𑀬𑁂 𑀢𑀼 ‘‘𑀧𑀝𑀺𑀘𑁆𑀙𑀦𑁆𑀦𑁂, 𑀑𑀓𑀸𑀲𑁂’’𑀢𑀺 𑀇𑀤𑀁 𑀧𑀦;

𑀅𑀥𑀺𑀓𑀁 𑀇𑀢𑀭𑀁 𑀲𑀩𑁆𑀩𑀁, 𑀧𑀞𑀫𑁂𑀦 𑀲𑀫𑀁 𑀫𑀢𑀁.

𑀢𑀢𑀺𑀬𑁂𑀧𑀺 𑀘𑀢𑀼𑀢𑁆𑀣𑁂𑀧𑀺, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀲𑀫𑀸𑀦𑀁 𑀧𑀞𑀫𑁂𑀦𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀳.

𑀙𑀤𑀦𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀦𑁄𑀯𑀲𑁆𑀲𑀧𑁆𑀧𑀤𑁂𑀲𑀓𑀁;

𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀉𑀧𑀘𑀸𑀭𑀫𑁆𑀧𑀺 𑀯𑀸 𑀲𑀘𑁂.

𑀅𑀢𑀺𑀓𑁆𑀓𑀫𑁂𑀢𑀺 𑀬𑀸, 𑀳𑁄𑀢𑀺, 𑀤𑀼𑀓𑁆𑀓𑀝𑀁 𑀧𑀞𑀫𑁂 𑀧𑀤𑁂;

𑀤𑀼𑀢𑀺𑀬𑁂 𑀘 𑀧𑀤𑁂 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸.

𑀧𑀮𑁆𑀮𑀗𑁆𑀓𑀲𑁆𑀲 ¶ 𑀅𑀦𑁄𑀓𑀸𑀲𑁂, 𑀤𑀼𑀓𑁆𑀓𑀝𑀁 𑀲𑀫𑀼𑀤𑀻𑀭𑀺𑀢𑀁;

𑀢𑀣𑀸𑀧𑀼𑀝𑁆𑀞𑁂 𑀅𑀦𑀸𑀧𑀼𑀝𑁆𑀞-𑀲𑀜𑁆𑀜𑀸𑀬 𑀯𑀺𑀘𑀺𑀓𑀺𑀘𑁆𑀙𑀢𑁄.

𑀅𑀲𑀁𑀳𑀸𑀭𑀺𑀫𑁂𑀦𑀸𑀧𑀢𑁆𑀢𑀺, 𑀕𑀺𑀮𑀸𑀦𑀸𑀬𑀸𑀧𑀤𑀸𑀲𑀼 𑀯𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀏𑀓𑀸𑀧𑀢𑁆𑀢𑀺 ¶ 𑀦𑀺𑀲𑀻𑀤𑀺𑀢𑁆𑀯𑀸, 𑀳𑁄𑀢𑀺 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦;

𑀏𑀓𑀸𑀯 𑀅𑀦𑀺𑀲𑀻𑀤𑀺𑀢𑁆𑀯𑀸, 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀚𑀦𑁆𑀢𑀺𑀬𑀸.

𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀳𑁄𑀦𑁆𑀢𑀺 𑀕𑀘𑁆𑀙𑀦𑁆𑀢𑀺𑀬𑀸 𑀤𑀼𑀯𑁂;

𑀲𑁂𑀲𑀁 𑀅𑀦𑀦𑁆𑀢𑀭𑁂𑀦𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀫𑀁.

𑀙𑀝𑁆𑀞𑁂𑀦 𑀲𑀢𑁆𑀢𑀫𑀁 𑀢𑀼𑀮𑁆𑀬𑀁, 𑀅𑀝𑁆𑀞𑀫𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀯𑀢𑁆𑀢𑀩𑁆𑀩𑀁 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀲𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦𑀁.

𑀦𑀺𑀭𑀬𑀩𑁆𑀭𑀳𑁆𑀫𑀘𑀭𑀺𑀬𑁂𑀳𑀺, 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀫𑁆𑀧𑀺 𑀯𑀸;

𑀅𑀪𑀺𑀲𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺, 𑀯𑀸𑀘𑀢𑁄 𑀯𑀸𑀘𑀢𑁄 𑀲𑀺𑀬𑀸

𑀞𑀧𑁂𑀢𑁆𑀯𑀸 𑀦𑀺𑀭𑀬𑀜𑁆𑀘𑁂𑀯, 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀬𑀸 𑀧𑀦;

‘‘𑀲𑀼𑀦𑀔𑀻 𑀲𑀽𑀓𑀭𑀻 𑀓𑀸𑀓𑀻, 𑀓𑀸𑀡𑀸 𑀓𑀼𑀡𑀻’’𑀢𑀺𑀆𑀤𑀺𑀦𑀸.

𑀅𑀓𑁆𑀓𑁄𑀲𑀢𑀺 𑀘 𑀯𑀸𑀘𑀸𑀬, 𑀯𑀸𑀘𑀸𑀬𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑀸𑀬 𑀢𑀺𑀓𑀤𑀼𑀓𑁆𑀓𑀝𑀁.

𑀧𑀼𑀭𑀓𑁆𑀔𑀢𑁆𑀯𑀸 𑀯𑀤𑀦𑁆𑀢𑀻𑀦-𑀫𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀦𑀺𑀁;

𑀅𑀦𑀸𑀧𑀢𑁆𑀢𑀝𑁆𑀞𑀫𑁂𑀦𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀭𑁄𑀤𑀦𑁆𑀢𑀺𑀬𑀸 ¶ 𑀯𑀥𑀺𑀢𑁆𑀯𑀸 𑀯𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀤𑁆𑀯𑀻𑀲𑀼 𑀢𑁂𑀲𑀼 𑀧𑀦𑁂𑀓𑁂𑀓𑀁, 𑀤𑀼𑀓𑁆𑀓𑀝𑀁 𑀢𑀼 𑀓𑀭𑁄𑀦𑁆𑀢𑀺𑀬𑀸.

𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯𑁂𑀢𑁆𑀣, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀧𑀦;

𑀥𑀼𑀭𑀦𑀺𑀓𑁆𑀔𑁂𑀧𑀢𑀼𑀮𑁆𑀬𑀸𑀯, 𑀓𑁆𑀭𑀺𑀬𑀸𑀫𑀢𑁆𑀢𑀁 𑀯𑀺𑀲𑁂𑀲𑀓𑀁.

𑀦𑁆𑀳𑀸𑀬𑀢𑀺 ¶ 𑀦𑀕𑁆𑀕𑀸 𑀬𑀸 𑀧𑀦 𑀳𑀼𑀢𑁆𑀯𑀸;

𑀲𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀫𑀲𑁆𑀲𑀸;

𑀢𑀲𑁆𑀲 𑀘 𑀯𑁄𑀲𑀸𑀦𑁂 𑀚𑀺𑀦𑀯𑀼𑀢𑁆𑀢𑀁;

𑀪𑀺𑀓𑁆𑀔𑀼𑀦𑀺 𑀤𑁄𑀲𑀁 𑀲𑀸 𑀲𑀫𑀼𑀧𑁂𑀢𑀺.

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀦𑀝𑁆𑀞-𑀘𑀻𑀯𑀭𑀸 𑀆𑀧𑀤𑀸𑀲𑀼 𑀯𑀸;

𑀦 𑀤𑁄𑀲𑁂𑀴𑀓𑀮𑁄𑀫𑁂𑀦, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀫𑀸.

𑀤𑀼𑀢𑀺𑀬𑁂 𑀧𑀦 𑀯𑀢𑁆𑀢𑀩𑁆𑀩𑀁, 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀲𑀜𑁆𑀘𑀭𑀺𑀢𑁆𑀢𑀲𑀫𑀸 𑀫𑀢𑀸.

𑀤𑀼𑀲𑁆𑀲𑀺𑀩𑁆𑀩𑀺𑀢𑀁 𑀯𑀺𑀲𑀺𑀩𑁆𑀩𑁂𑀢𑁆𑀯𑀸, 𑀲𑀺𑀩𑁆𑀩𑀦𑀢𑁆𑀣𑀸𑀬 𑀘𑀻𑀯𑀭𑀁;

𑀅𑀦𑀦𑁆𑀢𑀭𑀸𑀬 𑀢𑀁 𑀧𑀘𑁆𑀙𑀸, 𑀬𑀸 𑀦 𑀲𑀺𑀩𑁆𑀩𑁂𑀬𑁆𑀬 𑀪𑀺𑀓𑁆𑀔𑀼𑀦𑀻.

𑀞𑀧𑁂𑀢𑁆𑀯𑀸 𑀘𑀢𑀼𑀧𑀜𑁆𑀘𑀸𑀳𑀁, ‘‘𑀦 𑀲𑀺𑀩𑁆𑀩𑀺𑀲𑁆𑀲𑀸𑀫𑁆𑀬𑀳’’𑀦𑁆𑀢𑀺 𑀳𑀺;

𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀯, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀧𑀘𑁆𑀙𑀸 ¶ 𑀲𑀺𑀩𑁆𑀩𑀢𑀺 𑀧𑀸𑀘𑀺𑀢𑁆𑀢𑀺, 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀼𑀭𑀁 𑀲𑀘𑁂;

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑀸𑀬 𑀢𑀺𑀓𑀤𑀼𑀓𑁆𑀓𑀝𑀁.

𑀯𑀼𑀢𑁆𑀢𑀁 𑀉𑀪𑀺𑀦𑁆𑀦𑀫𑀜𑁆𑀜𑀲𑁆𑀫𑀺𑀁, 𑀧𑀭𑀺𑀓𑁆𑀔𑀸𑀭𑁂 𑀢𑀼 𑀤𑀼𑀓𑁆𑀓𑀝𑀁;

𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀸𑀬, 𑀅𑀦𑁆𑀢𑀭𑀸𑀬𑁂𑀧𑀺 𑀯𑀸 𑀲𑀢𑀺.

𑀅𑀢𑀺𑀓𑁆𑀓𑀫𑁂𑀢𑀺 𑀧𑀜𑁆𑀘𑀸𑀳𑀁, 𑀓𑀭𑁄𑀦𑁆𑀢𑀻 𑀯𑀸𑀧𑀺 𑀘𑀻𑀯𑀭𑀁;

𑀥𑀼𑀭𑀦𑀺𑀓𑁆𑀔𑁂𑀧𑀦𑀁 𑀦𑀸𑀫, 𑀲𑀫𑀼𑀝𑁆𑀞𑀸𑀦𑀫𑀺𑀤𑀁 𑀫𑀢𑀁.

𑀧𑀜𑁆𑀘𑀸𑀳𑀺𑀓𑀁 𑀢𑀼 𑀲𑀗𑁆𑀖𑀸𑀝𑀺-𑀘𑀸𑀭𑀁 𑀬𑀸𑀢𑀺𑀓𑁆𑀓𑀫𑁂𑀬𑁆𑀬 𑀳𑀺;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺, 𑀙𑀝𑁆𑀞𑁂 𑀢𑀲𑁆𑀲𑀸𑀭𑀼𑀡𑀼𑀕𑁆𑀕𑀫𑁂.

𑀏𑀓𑀲𑁆𑀫𑀺𑀁 𑀘𑀻𑀯𑀭𑁂 𑀏𑀓𑀸, 𑀧𑀜𑁆𑀘 𑀧𑀜𑁆𑀘𑀲𑀼 𑀤𑀻𑀧𑀺𑀢𑀸;

𑀢𑀺𑀘𑀻𑀯𑀭𑀜𑁆𑀘 𑀲𑀁𑀓𑀘𑁆𑀘𑀺, 𑀤𑀓𑀲𑀸𑀝𑀻𑀢𑀺 𑀧𑀜𑁆𑀘 𑀢𑀼.

𑀢𑀺𑀓𑀧𑀸𑀘𑀺𑀢𑁆𑀢𑀺 ¶ 𑀧𑀜𑁆𑀘𑀸𑀳𑀸-𑀦𑀢𑀺𑀓𑁆𑀓𑀦𑁆𑀢𑁂 𑀤𑁆𑀯𑀺𑀤𑀼𑀓𑁆𑀓𑀝𑀁;

𑀧𑀜𑁆𑀘𑀫𑁂 𑀤𑀺𑀯𑀲𑁂 𑀧𑀜𑁆𑀘, 𑀘𑀻𑀯𑀭𑀸𑀦𑀺 𑀦𑀺𑀲𑁂𑀯𑀢𑀺.

𑀑𑀢𑀸𑀧𑁂𑀢𑀺 𑀕𑀺𑀮𑀸𑀦𑀸𑀬, 𑀅𑀦𑀸𑀧𑀢𑁆𑀢𑀺𑀧𑀤𑀸𑀲𑀼𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀓𑀣𑀺𑀦𑁂𑀦 𑀲𑀫𑀸 𑀫𑀢𑀸.

𑀕𑀳𑁂𑀢𑁆𑀯𑀸 𑀬𑀸 𑀅𑀦𑀸𑀧𑀼𑀘𑁆𑀙𑀸, 𑀲𑀗𑁆𑀓𑀫𑁂𑀢𑀩𑁆𑀩𑀘𑀻𑀯𑀭𑀁;

𑀧𑀭𑀺𑀪𑀼𑀜𑁆𑀚𑀢𑀺 𑀅𑀜𑁆𑀜𑀺𑀲𑁆𑀲𑀸, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀲𑁂𑀲𑀸𑀬 𑀢𑀺𑀓𑀤𑀼𑀓𑁆𑀓𑀝𑀁;

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀦𑀝𑁆𑀞-𑀘𑀻𑀯𑀭𑀸 𑀆𑀧𑀤𑀸𑀲𑀼 𑀯𑀸.

𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀓𑀣𑀺𑀦𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀢𑀼𑀮𑁆𑀬𑀫𑁂𑀢𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀬𑀸 ¶ 𑀳𑀺 𑀪𑀺𑀓𑁆𑀔𑀼𑀦𑀺 𑀲𑀗𑁆𑀖𑀲𑁆𑀲, 𑀮𑀪𑀺𑀢𑀩𑁆𑀩𑀁 𑀢𑀼 𑀘𑀻𑀯𑀭𑀁;

𑀦𑀺𑀯𑀸𑀭𑁂𑀢𑀺 𑀲𑀘𑁂 𑀢𑀲𑁆𑀲𑀸, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀬𑁂.

𑀕𑀡𑀲𑁆𑀲𑀸𑀧𑀺 𑀘 𑀏𑀓𑀺𑀲𑁆𑀲𑀸, 𑀮𑀸𑀪𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁;

𑀢𑀣𑁂𑀯𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁, 𑀦𑀺𑀯𑀸𑀭𑁂𑀢𑀺 𑀲𑀘𑁂 𑀧𑀦.

𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸, 𑀦𑀺𑀯𑀸𑀭𑁂𑀢𑀺 𑀦 𑀤𑁄𑀲𑀢𑀸;

𑀅𑀤𑀺𑀦𑁆𑀦𑀸𑀤𑀸𑀦𑀢𑀼𑀮𑁆𑀬𑀸𑀯, 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀫𑀢𑀸.

𑀘𑀻𑀯𑀭𑀸𑀦𑀁 𑀯𑀺𑀪𑀗𑁆𑀕𑀁 𑀬𑀸, 𑀧𑀝𑀺𑀲𑁂𑀥𑁂𑀬𑁆𑀬 𑀥𑀫𑁆𑀫𑀺𑀓𑀁;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲𑀸, 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀸𑀬, 𑀉𑀪𑁄 𑀯𑁂𑀫𑀢𑀺𑀓𑀸𑀬 𑀯𑀸;

𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸, 𑀧𑀝𑀺𑀲𑁂𑀥𑁂𑀦𑁆𑀢𑀺𑀬𑀸 𑀧𑀦.

𑀢𑀣𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦-𑀫𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂, 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸.

𑀦𑀺𑀯𑀸𑀲𑀦𑀽𑀧𑀕𑀁 ¶ 𑀯𑀸𑀧𑀺, 𑀢𑀣𑀸 𑀧𑀸𑀭𑀼𑀧𑀦𑀽𑀧𑀕𑀁;