📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

(𑀓)

𑀆𑀤𑀺𑀘𑁆𑀘𑀯𑀁𑀲𑀫𑁆𑀩𑀭𑀧𑀸𑀢𑀼𑀪𑀽𑀢𑀁 ¶ ¶ ;

𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑀤𑁂𑀯𑀘𑀸𑀧𑀁;

𑀥𑀫𑁆𑀫𑀫𑁆𑀩𑀼𑀦𑀺𑀚𑁆𑀛𑀸𑀧𑀺𑀢𑀧𑀸𑀧𑀖𑀫𑁆𑀫𑀁;

𑀯𑀦𑁆𑀤𑀸𑀫𑀳𑀁 𑀩𑀼𑀤𑁆𑀥 𑀫𑀳𑀫𑁆𑀩𑀼𑀯𑀦𑁆𑀢𑀁.

(𑀔)

𑀧𑀲𑀦𑁆𑀦𑀕𑀫𑁆𑀪𑀻𑀭𑀧𑀤𑀸𑀴𑀺𑀲𑁄𑀢𑀁;

𑀦𑀸𑀦𑀸𑀦𑀬𑀸𑀦𑀦𑁆𑀢𑀢𑀭𑀗𑁆𑀕𑀫𑀸𑀮𑀁;

𑀲𑀻𑀮𑀸𑀤𑀺𑀔𑀦𑁆𑀥𑀸𑀫𑀺𑀢𑀫𑀘𑁆𑀙𑀕𑀼𑀫𑁆𑀩𑀁 ¶ ;

𑀯𑀦𑁆𑀤𑀸𑀫𑀳𑀁 𑀥𑀫𑁆𑀫 𑀫𑀳𑀸𑀲𑀯𑀦𑁆𑀢𑀺𑀁.

(𑀕)

𑀲𑀻𑀮𑁄𑀭𑀼𑀯𑁂𑀮𑀁 𑀥𑀼𑀢𑀲𑀗𑁆𑀔𑀫𑀸𑀮𑀁;

𑀲𑀦𑁆𑀢𑁄𑀲𑀢𑁄𑀬𑀁 𑀲𑀫𑀣𑀽𑀫𑀺𑀘𑀺𑀢𑁆𑀢𑀁;

𑀧𑀥𑀸𑀦𑀓𑀺𑀘𑁆𑀘𑀁 𑀅𑀥𑀺𑀘𑀺𑀢𑁆𑀢𑀲𑀸𑀭𑀁;

𑀯𑀦𑁆𑀤𑀸𑀫𑀳𑀁 𑀲𑀗𑁆𑀖 𑀫𑀳𑀸𑀲𑀫𑀼𑀤𑁆𑀤𑀁.

(𑀖)

𑀬𑁂 𑀢𑀦𑁆𑀢𑀺𑀥𑀫𑁆𑀫𑀁 𑀫𑀼𑀦𑀺𑀭𑀸𑀚𑀧𑀼𑀢𑁆𑀢𑀸;

𑀬𑀸𑀯𑀚𑁆𑀚𑀓𑀸𑀮𑀁 𑀧𑀭𑀺𑀧𑀸𑀮𑀬𑀦𑁆𑀢𑀸;

𑀲𑀁𑀯𑀡𑁆𑀡𑀦𑀁 𑀦𑀺𑀫𑁆𑀫𑀮𑀫𑀸𑀦𑀬𑀺𑀁𑀲𑀼;

𑀢𑁂 𑀧𑀼𑀩𑁆𑀩𑀓𑁂 𑀘𑀸𑀘𑀭𑀺𑀬𑁂 𑀦𑀫𑀸𑀫𑀺.

(𑀗)

𑀬𑁄 ¶ 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑀼𑀮𑁆𑀬𑀦𑀸𑀫𑁄;

𑀢𑀣𑀽𑀧𑀫𑁄 𑀲𑀻𑀳𑀴𑀤𑀻𑀧𑀤𑀻𑀧𑁄;

𑀫𑀫𑀁 𑀫𑀳𑀸𑀲𑀸𑀫𑀺𑀫𑀳𑀸𑀬𑀢𑀺𑀦𑁆𑀤𑁄;

𑀧𑀸𑀧𑁂𑀲𑀺 𑀯𑀼𑀟𑁆𑀠𑀺𑀁 𑀚𑀺𑀦𑀲𑀸𑀲𑀦𑀫𑁆𑀳𑀺.

(𑀘)

𑀝𑀻𑀓𑀸 𑀓𑀢𑀸 𑀅𑀝𑁆𑀞𑀓𑀣𑀸𑀬 𑀬𑁂𑀦;

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀦𑀸𑀫𑀺𑀓𑀸𑀬;

𑀅𑀗𑁆𑀕𑀼𑀢𑁆𑀢𑀭𑀸𑀬𑀝𑁆𑀞𑀓𑀣𑀸𑀬 𑀘𑁂𑀯;

𑀲𑀢𑁆𑀣𑀦𑁆𑀢𑀭𑀲𑁆𑀲𑀸𑀧𑀺 𑀘 𑀚𑁄𑀢𑀺𑀲𑀢𑁆𑀣𑀁.

(𑀙)

𑀦𑀺𑀓𑀸𑀬𑀲𑀸𑀫𑀕𑁆𑀕𑀺𑀯𑀺𑀥𑀸𑀬𑀓𑁂𑀦;

𑀭𑀜𑁆𑀜𑀸 𑀧𑀭𑀓𑁆𑀓𑀦𑁆𑀢𑀺𑀪𑀼𑀚𑁂𑀦 𑀲𑀫𑁆𑀫𑀸;

𑀮𑀗𑁆𑀓𑀺𑀲𑁆𑀲𑀭𑁂𑀦𑀸𑀧𑀺 𑀓𑀢𑁄𑀧𑀳𑀸𑀭𑀁;

𑀯𑀦𑁆𑀤𑁂 𑀕𑀭𑀼𑀁 𑀕𑀸𑀭𑀯𑀪𑀸𑀚𑀦𑀁 𑀢𑀁.

(𑀚)

𑀦𑀫𑀲𑁆𑀲𑀫𑀸𑀦𑁄𑀳𑀫𑀮𑀢𑁆𑀣𑀫𑁂𑀯𑀁 ¶ ;

𑀯𑀢𑁆𑀣𑀼𑀢𑁆𑀢𑀬𑀁 𑀯𑀦𑁆𑀤𑀺𑀢𑀯𑀦𑁆𑀤𑀦𑁂𑀬𑁆𑀬𑀁;

𑀬𑀁 𑀧𑀼𑀜𑁆𑀜𑀲𑀦𑁆𑀤𑁄𑀳𑀫𑀫𑀦𑁆𑀤𑀪𑀽𑀢𑀁;

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄.

(𑀛)

𑀬𑁄 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀸𑀲𑀪𑁂𑀦;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀦𑀧𑀺 𑀲𑀼𑀧𑁆𑀧𑀲𑀢𑁆𑀣𑁄;

𑀲𑁄 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑀸𑀪𑀺𑀥𑀸𑀦𑁄;

𑀫𑀳𑀸𑀓𑀯𑀻 𑀣𑁂𑀭𑀺𑀬𑀯𑀁𑀲𑀤𑀻𑀧𑁄.

(𑀜)

𑀅𑀓𑀸𑀲𑀺 𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑁆𑀳𑀬𑀁;

𑀲𑀉𑀢𑁆𑀢𑀭𑀁 𑀧𑀓𑀭𑀡𑀫𑀼𑀢𑁆𑀢𑀫𑀁 𑀳𑀺𑀢𑀁;

𑀅𑀧𑁂𑀓𑁆𑀔𑀢𑀁 𑀯𑀺𑀦𑀬𑀦𑀬𑁂𑀲𑀼 𑀧𑀸𑀝𑀯𑀁;

𑀧𑀼𑀭𑀸𑀲𑀺 𑀬𑀁 𑀯𑀺𑀯𑀭𑀡𑀫𑀲𑁆𑀲 𑀲𑀻𑀳𑀴𑀁.

(𑀝)

𑀬𑀲𑁆𑀫𑀸 ¶ 𑀦 𑀤𑀻𑀧𑀦𑁆𑀢𑀭𑀺𑀓𑀸𑀦𑀫𑀢𑁆𑀣𑀁;

𑀲𑀸𑀥𑁂𑀢𑀺 𑀪𑀺𑀓𑁆𑀔𑀽𑀦𑀫𑀲𑁂𑀲𑀢𑁄 𑀢𑀁;

𑀢𑀲𑁆𑀫𑀸 𑀳𑀺 𑀲𑀩𑁆𑀩𑀢𑁆𑀣 𑀬𑀢𑀻𑀦𑀫𑀢𑁆𑀣𑀁;

𑀆𑀲𑀻𑀲𑀫𑀸𑀦𑁂𑀦 𑀤𑀬𑀸𑀮𑀬𑁂𑀦.

(𑀞)

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀯𑀭𑁂𑀦 𑀬𑀲𑁆𑀫𑀸;

𑀲𑀓𑁆𑀓𑀘𑁆𑀘 𑀓𑀮𑁆𑀬𑀸𑀡𑀫𑀦𑁄𑀭𑀣𑁂𑀦;

𑀦𑀬𑀜𑁆𑀜𑀼𑀦𑀸𑀭𑀜𑁆𑀜𑀦𑀺𑀯𑀸𑀲𑀺𑀓𑁂𑀦;

𑀅𑀚𑁆𑀛𑁂𑀲𑀺𑀢𑁄 𑀲𑀸𑀥𑀼𑀕𑀼𑀡𑀸𑀓𑀭𑁂𑀦.

(𑀟)

𑀆𑀓𑀗𑁆𑀔𑀫𑀸𑀦𑁂𑀦 𑀘𑀺𑀭𑀧𑁆𑀧𑀯𑀢𑁆𑀢𑀺𑀁;

𑀥𑀫𑁆𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀤𑁂𑀲𑀺𑀢𑀲𑁆𑀲;

𑀘𑁄𑀴𑀧𑁆𑀧𑀤𑀻𑀧𑁂𑀦 ¶ 𑀘 𑀩𑀼𑀤𑁆𑀥𑀫𑀺𑀢𑁆𑀢-

𑀢𑁆𑀣𑁂𑀭𑁂𑀦 𑀲𑀤𑁆𑀥𑀸𑀤𑀺𑀕𑀼𑀡𑁄𑀤𑀺𑀢𑁂𑀦.

(𑀠)

𑀢𑀣𑀸 𑀫𑀳𑀸𑀓𑀲𑁆𑀲𑀧𑀅𑀯𑁆𑀳𑀬𑁂𑀦;

𑀣𑁂𑀭𑁂𑀦 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑁂𑀦;

𑀓𑀼𑀤𑀺𑀝𑁆𑀞𑀺𑀫𑀢𑁆𑀢𑁂𑀪𑀯𑀺𑀤𑀸𑀭𑀓𑁂𑀦;

𑀲𑀻𑀳𑁂𑀦 𑀘𑁄𑀴𑀸𑀯𑀦𑀺𑀧𑀽𑀚𑀺𑀢𑁂𑀦.

(𑀡)

𑀬𑁄 𑀥𑀫𑁆𑀫𑀓𑀺𑀢𑁆𑀢𑀻𑀢𑀺 𑀧𑀲𑀢𑁆𑀣𑀦𑀸𑀫𑁄;

𑀢𑁂𑀦𑀸𑀧𑀺 𑀲𑀤𑁆𑀥𑁂𑀦 𑀉𑀧𑀸𑀲𑀓𑁂𑀦;

𑀲𑀻𑀮𑀸𑀤𑀺𑀦𑀸𑀦𑀸𑀕𑀼𑀡𑀫𑀡𑁆𑀟𑀺𑀢𑁂𑀦;

𑀲𑀤𑁆𑀥𑀫𑁆𑀫𑀓𑀸𑀫𑁂𑀦𑀺𑀥 𑀧𑀡𑁆𑀟𑀺𑀢𑁂𑀦.

(𑀢)

𑀲𑀤𑁆𑀥𑁂𑀦 𑀧𑀜𑁆𑀜𑀸𑀡𑀯𑀢𑀸 𑀯𑀴𑀢𑁆𑀢𑀸-;

𑀫𑀗𑁆𑀕𑀮𑁆𑀬𑀯𑀁𑀲𑁂𑀦 𑀫𑀳𑀸𑀬𑀲𑁂𑀦;

𑀆𑀬𑀸𑀘𑀺𑀢𑁄 𑀯𑀸𑀡𑀺𑀚𑀪𑀸𑀡𑀼𑀦𑀸𑀧𑀺;

𑀯𑀭𑀜𑁆𑀜𑀼𑀦𑀸 𑀲𑀸𑀥𑀼𑀕𑀼𑀡𑁄𑀤𑀬𑁂𑀦.

(𑀣)

𑀢𑀲𑁆𑀫𑀸 ¶ 𑀢𑀫𑀸𑀭𑁄𑀧𑀺𑀬 𑀧𑀸𑀴𑀺𑀪𑀸𑀲𑀁;

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑁄𑀧𑀤𑁂𑀲𑀁;

𑀳𑀺𑀢𑁆𑀯𑀸 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀤𑁄𑀲𑀁;

𑀓𑀢𑁆𑀯𑀸𑀢𑀺𑀯𑀺𑀢𑁆𑀣𑀸𑀭𑀦𑀬𑀁 𑀲𑀫𑀸𑀲𑀁.

(𑀤)

𑀅𑀯𑀼𑀢𑁆𑀢𑀫𑀢𑁆𑀣𑀜𑁆𑀘 𑀧𑀓𑀸𑀲𑀬𑀦𑁆𑀢𑁄;

𑀧𑀸𑀞𑀓𑁆𑀓𑀫𑀜𑁆𑀘𑀸𑀧𑀺 𑀅𑀯𑁄𑀓𑁆𑀓𑀫𑀦𑁆𑀢𑁄;

𑀲𑀁𑀯𑀡𑁆𑀡𑀬𑀺𑀲𑁆𑀲𑀸𑀫𑀺 𑀢𑀤𑀢𑁆𑀣𑀲𑀸𑀭𑀁;

𑀆𑀤𑀸𑀬 𑀕𑀦𑁆𑀣𑀦𑁆𑀢𑀭𑀢𑁄𑀧𑀺 𑀲𑀸𑀭𑀁.

(𑀥)

𑀘𑀺𑀭𑀝𑁆𑀞𑀺𑀢𑀺𑀁 ¶ 𑀧𑀢𑁆𑀣𑀬𑀢𑀸 𑀚𑀦𑀸𑀦𑀁;

𑀳𑀺𑀢𑀸𑀯𑀳𑀲𑁆𑀲𑀸𑀫𑀮𑀲𑀸𑀲𑀦𑀲𑁆𑀲;

𑀫𑀬𑀸 𑀲𑀫𑀸𑀲𑁂𑀦 𑀯𑀺𑀥𑀻𑀬𑀫𑀸𑀦𑀁;

𑀲𑀁𑀯𑀡𑁆𑀡𑀦𑀁 𑀲𑀸𑀥𑀼 𑀲𑀼𑀡𑀦𑁆𑀢𑀼 𑀲𑀦𑁆𑀢𑁄𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧-𑁫

. 𑀲𑀼𑀯𑀺𑀧𑀼𑀮𑀸𑀫𑀮𑀲𑀤𑁆𑀥𑀸𑀧𑀜𑁆𑀜𑀸𑀤𑀺𑀕𑀼𑀡𑀲𑀫𑀼𑀤𑀬𑀸𑀯𑀳𑀁 𑀲𑀓𑀮𑀚𑀦𑀳𑀺𑀢𑁂𑀓𑀳𑁂𑀢𑀼𑀚𑀺𑀦𑀲𑀸𑀲𑀦𑀝𑁆𑀞𑀺𑀢𑀺𑀫𑀽𑀮𑀪𑀽𑀢𑀁 𑀯𑀺𑀦𑀬𑀧𑁆𑀧𑀓𑀭𑀡𑀫𑀺𑀤𑀫𑀸𑀭𑀪𑀦𑁆𑀢𑁄𑀬𑀫𑀸𑀘𑀭𑀺𑀬𑁄 𑀧𑀓𑀭𑀡𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀧𑀓𑀭𑀡𑀸𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀓𑀭𑀡𑀧𑁆𑀧𑀓𑀸𑀭𑀧𑀬𑁄𑀚𑀦𑀦𑀺𑀫𑀺𑀢𑁆𑀢𑀓𑀢𑁆𑀢𑀼𑀧𑀭𑀺𑀫𑀸𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀭𑀢𑀦𑀢𑁆𑀢𑀬𑀁 𑀦𑀸𑀫.

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑁋

𑀦𑀺𑀤𑁆𑀤𑀺𑀝𑁆𑀞𑀲𑀪𑀸𑀯𑀁

‘‘𑀩𑀼𑀤𑁆𑀥𑁄 ¶ 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀥𑀫𑁆𑀫𑁄 𑀮𑁄𑀓𑀼𑀢𑁆𑀢𑀭𑁄 𑀦𑀯;

𑀲𑀗𑁆𑀖𑁄 𑀫𑀕𑁆𑀕𑀨𑀮𑀝𑁆𑀞𑁄 𑀘, 𑀇𑀘𑁆𑀘𑁂𑀢𑀁 𑀭𑀢𑀦𑀢𑁆𑀢𑀬’’𑀦𑁆𑀢𑀺. 𑁋

𑀯𑀺𑀪𑀸𑀯𑀺𑀢𑀧𑁆𑀧𑀪𑁂𑀤𑀁 𑀲𑀓𑀮𑀪𑀯𑀤𑀼𑀓𑁆𑀔𑀯𑀺𑀦𑀺𑀯𑀸𑀭𑀡𑀁 𑀢𑀺𑀪𑀯𑁂𑀦𑁂𑀓𑀧𑀝𑀺𑀲𑀭𑀡𑀁 𑀯𑀢𑁆𑀣𑀼𑀢𑁆𑀢𑀬𑀁.

𑀢𑀲𑁆𑀲 𑀧𑀡𑀸𑀫𑁄 𑀦𑀸𑀫 𑀧𑀡𑀸𑀫𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀺𑀓𑀸 𑀘𑁂𑀢𑀦𑀸. 𑀲𑀸 𑀢𑀺𑀯𑀺𑀥𑀸 𑀓𑀸𑀬𑀧𑀡𑀸𑀫𑁄 𑀯𑀘𑀻𑀧𑀡𑀸𑀫𑁄 𑀫𑀦𑁄𑀧𑀡𑀸𑀫𑁄𑀢𑀺. 𑀢𑀢𑁆𑀣 𑀓𑀸𑀬𑀧𑀡𑀸𑀫𑁄 𑀦𑀸𑀫 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀧𑀼𑀩𑁆𑀩𑀺𑀓𑀸 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀓𑀸𑀬𑀓𑀺𑀭𑀺𑀬𑀸𑀯𑀲𑀧𑁆𑀧𑀯𑀢𑁆𑀢𑀺𑀓𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀯𑀘𑀻𑀧𑀡𑀸𑀫𑁄 𑀦𑀸𑀫 𑀢𑀣𑁂𑀯 𑀧𑀯𑀢𑁆𑀢𑀸 𑀦𑀸𑀦𑀸𑀯𑀺𑀥𑀕𑀼𑀡𑀯𑀺𑀲𑁂𑀲𑀯𑀺𑀪𑀸𑀯𑀦𑀲𑀪𑀸𑀯𑀣𑁄𑀫𑀦𑀸𑀓𑀺𑀭𑀺𑀬𑀸𑀯𑀲𑀧𑁆𑀧𑀯𑀢𑁆𑀢𑀺𑀓𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 ¶ 𑀘𑁂𑀢𑀦𑀸. 𑀫𑀦𑁄𑀧𑀡𑀸𑀫𑁄 𑀦𑀸𑀫 𑀉𑀪𑀬𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑁂𑀯𑀮𑀁 𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀢𑀸𑀬 𑀕𑀸𑀭𑀯𑀩𑀳𑀼𑀫𑀸𑀦𑀦𑀯𑀲𑀧𑁆𑀧𑀯𑀢𑁆𑀢𑀺𑀲𑀸𑀥𑀺𑀓𑀸 𑀘𑁂𑀢𑀦𑀸.

𑀇𑀫𑀲𑁆𑀲 𑀢𑀸𑀯 𑀭𑀢𑀦𑀢𑁆𑀢𑀬𑀧𑀡𑀸𑀫𑀲𑁆𑀲 𑀤𑀲𑁆𑀲𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀢𑁆𑀣𑀁. 𑀕𑀼𑀡𑀸𑀢𑀺𑀲𑀬𑀬𑁄𑀕𑁂𑀦 𑀳𑀺 𑀧𑀡𑀸𑀫𑀸𑀭𑀳𑁂 𑀭𑀢𑀦𑀢𑁆𑀢𑀬𑁂 𑀓𑀢𑁄 𑀧𑀡𑀸𑀫𑁄 𑀧𑀼𑀜𑁆𑀜𑀯𑀺𑀲𑁂𑀲𑀪𑀸𑀯𑀢𑁄 𑀇𑀘𑁆𑀙𑀺𑀢𑀢𑁆𑀣𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀯𑀺𑀩𑀦𑁆𑀥𑀓𑁂𑀦 𑀉𑀧𑀖𑀸𑀢𑀓𑁂𑀦, 𑀉𑀧𑀧𑀻𑀴𑀓𑁂𑀦 𑀘 𑀅𑀧𑀼𑀜𑁆𑀜𑀓𑀫𑁆𑀫𑁂𑀦 𑀉𑀧𑀦𑀻𑀬𑀫𑀸𑀦𑀲𑁆𑀲 𑀉𑀧𑀤𑁆𑀤𑀯𑀚𑀸𑀮𑀲𑁆𑀲 𑀯𑀺𑀦𑀺𑀯𑀸𑀭𑀡𑁂𑀦 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑁂𑀦 𑀘 𑀢𑀩𑁆𑀩𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀆𑀬𑀼𑀲𑀼𑀔𑀩𑀮𑀸𑀤𑀺𑀯𑀟𑁆𑀠𑀦𑁂𑀦 𑀘 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀓𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀧𑀓𑀭𑀡𑀦𑀺𑀧𑁆𑀨𑀢𑁆𑀢𑀺𑀦𑀺𑀩𑀦𑁆𑀥𑀦𑀓𑁄 𑀳𑁄𑀢𑀺. 𑀅𑀣𑀸𑀧𑀺 𑀲𑁄𑀢𑀽𑀦𑀜𑁆𑀘 𑀯𑀦𑁆𑀤𑀦𑀻𑀬𑀯𑀦𑁆𑀤𑀦𑀸𑀧𑀼𑀩𑁆𑀩𑀓𑁂𑀦𑀸𑀭𑀫𑁆𑀪𑁂𑀦 𑀅𑀦𑀦𑁆𑀢𑀭𑀸𑀬𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑁂𑀦 𑀧𑀓𑀭𑀡𑀸𑀯𑀩𑁄𑀥𑀧𑁆𑀧𑀬𑁄𑀚𑀦𑀲𑀸𑀥𑀦𑀢𑁆𑀣𑀁. 𑀅𑀧𑀺𑀘 𑀲𑁄𑀢𑀽𑀦𑀫𑁂𑀯 𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀓𑀸𑀦𑀁 𑀪𑀕𑀯𑀢𑁄 𑀬𑀣𑀸𑀪𑀽𑀢𑀕𑀼𑀡𑀯𑀺𑀲𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀲𑀫𑀼𑀧𑀚𑀸𑀢𑀧𑁆𑀧𑀲𑀸𑀤𑀸𑀦𑀁 𑀧𑀓𑀭𑀡𑁂 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀁, 𑀅𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀓𑀸𑀦𑀁 ¶ 𑀧𑀦 𑀧𑀓𑀭𑀡𑀲𑁆𑀲 𑀲𑁆𑀯𑀸𑀔𑁆𑀬𑀸𑀢𑀢𑀸𑀬 𑀢𑀧𑁆𑀧𑀪𑀯𑁂 𑀲𑀢𑁆𑀣𑀭𑀺 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀜𑁆𑀘 𑀲𑁄𑀢𑀼𑀚𑀦𑀸𑀦𑀼𑀕𑁆𑀕𑀳𑀫𑁂𑀯 𑀧𑀥𑀸𑀦𑀁 𑀓𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀕𑀦𑁆𑀣𑀸𑀭𑀫𑁆𑀪𑁂 𑀣𑀼𑀢𑀺𑀧𑁆𑀧𑀡𑀸𑀫𑀧𑀭𑀺𑀤𑀻𑀧𑀓𑀸𑀦𑀁 𑀕𑀸𑀣𑀸𑀯𑀸𑀓𑁆𑀬𑀸𑀦𑀁 𑀦𑀺𑀓𑁆𑀔𑁂𑀧𑁄 𑀯𑀺𑀥𑀻𑀬𑀢𑀺. 𑀇𑀢𑀭𑀣𑀸 𑀯𑀺𑀦𑀸𑀧𑀺 𑀢𑀦𑁆𑀦𑀺𑀓𑁆𑀔𑁂𑀧𑀁 𑀓𑀸𑀬𑀫𑀦𑁄𑀧𑀡𑀸𑀫𑁂𑀦𑀸𑀧𑀺 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀢𑁄 𑀓𑀺𑀫𑁂𑀢𑁂𑀦 𑀕𑀦𑁆𑀣𑀕𑀸𑀭𑀯𑀓𑀭𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀡𑀸𑀫𑀧𑁆𑀧𑀬𑁄𑀚𑀦𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀸𑀤𑀻𑀲𑀼 (𑀲𑀸𑀭𑀢𑁆𑀣. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀯𑀺. 𑀯𑀺. 𑀝𑀻. 𑁨.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸) 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁.

𑀅𑀪𑀺𑀥𑀸𑀦𑀓𑀣𑀦𑀁 𑀧𑀦 𑀯𑁄𑀳𑀸𑀭𑀲𑀼𑀔𑀢𑁆𑀣𑀁. 𑀅𑀪𑀺𑀥𑁂𑀬𑁆𑀬𑀲𑁆𑀲 𑀲𑀫𑀼𑀤𑀺𑀢𑁂𑀦 𑀧𑀓𑀭𑀡𑁂𑀦 𑀧𑀝𑀺𑀧𑀸𑀤𑁂𑀢𑀩𑁆𑀩𑀲𑁆𑀲 𑀓𑀣𑀦𑀁 𑀧𑀓𑀭𑀡𑀲𑁆𑀲 𑀆𑀭𑀪𑀺𑀢𑀩𑁆𑀩𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀯𑀺𑀤𑀺𑀢𑀸𑀦𑀺𑀦𑁆𑀤𑀺𑀢𑀲𑀸𑀢𑁆𑀣𑀓𑀲𑀼𑀓𑀭𑀸𑀦𑀼𑀝𑁆𑀞𑀸𑀦𑀸𑀪𑀺 𑀥𑁂𑀬𑁆𑀬𑀫𑁂𑀯 𑀳𑀺 𑀧𑀓𑀭𑀡𑀁 𑀧𑀭𑀺𑀓𑁆𑀔𑀓𑀚𑀦𑀸 𑀆𑀭𑀪𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺. 𑀓𑀭𑀡𑀧𑁆𑀧𑀓𑀸𑀭𑀲𑀦𑁆𑀤𑀲𑁆𑀲𑀦𑀁 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀢𑁆𑀣𑀁. 𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀢𑀸𑀤𑀺𑀧𑁆𑀧𑀓𑀸𑀭𑁂𑀦 𑀳𑀺 𑀯𑀺𑀭𑀘𑀺𑀢𑀁 𑀧𑀓𑀭𑀡𑀁 𑀲𑁄𑀢𑀸𑀭𑁄 𑀲𑁄𑀢𑀼𑀫𑀼𑀲𑁆𑀲𑀳𑀦𑁆𑀢𑀻𑀢𑀺. 𑀧𑀬𑁄𑀚𑀦𑀓𑀣𑀦𑀁 𑀧𑀦 𑀧𑀓𑀭𑀡𑀚𑁆𑀛𑀸𑀬𑀦𑁂 𑀲𑁄𑀢𑀼𑀚𑀦𑀲𑀫𑀼𑀢𑁆𑀢𑁂𑀚𑀦𑀢𑁆𑀣𑀁. 𑀅𑀲𑀢𑀺 𑀳𑀺 𑀧𑀬𑁄𑀚𑀦𑀓𑀣𑀦𑁂 𑀅𑀯𑀺𑀜𑁆𑀜𑀸𑀢𑀧𑁆𑀧𑀬𑁄𑀚𑀦𑀸 𑀅𑀚𑁆𑀛𑀸𑀬𑀦𑁂 𑀩𑁆𑀬𑀸𑀯𑀝𑀸 𑀦 𑀳𑁄𑀦𑁆𑀢𑀻𑀢𑀺. 𑀦𑀺𑀫𑀺𑀢𑁆𑀢𑀓𑀣𑀦𑀁 𑀲𑀭𑀺𑀓𑁆𑀔𑀓𑀚𑀦𑀸𑀦𑀁 𑀧𑀓𑀭𑀡𑁂 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀁. 𑀧𑀲𑀢𑁆𑀣𑀓𑀸𑀭𑀡𑀼𑀧𑁆𑀧𑀦𑁆𑀦𑁂𑀬𑁂𑀯 𑀳𑀺 𑀧𑀓𑀭𑀡𑁂 𑀲𑀭𑀺𑀓𑁆𑀔𑀓𑀸 𑀕𑀸𑀭𑀯𑀁 𑀚𑀦𑁂𑀦𑁆𑀢𑀻𑀢𑀺.

𑀓𑀢𑁆𑀢𑀼𑀓𑀣𑀦𑀁 𑀧𑀼𑀕𑁆𑀕𑀮𑀕𑀭𑀼𑀓𑀲𑁆𑀲 𑀧𑀓𑀭𑀡𑁂 𑀕𑀸𑀭𑀯𑁄 𑀧𑀼𑀕𑁆𑀕𑀮𑀕𑀸𑀭𑀯𑁂𑀦𑀧𑀺 𑀳𑁄𑀢𑀽𑀢𑀺. 𑀧𑀭𑀺𑀫𑀸𑀡𑀓𑀣𑀦𑀁 𑀅𑀲𑀚𑁆𑀛𑀸𑀬𑀦𑀸𑀤𑀺𑀧𑀲𑀼𑀢𑀸𑀦𑀁 ¶ 𑀲𑀫𑁆𑀧𑀳𑀁𑀲𑀦𑀢𑁆𑀣𑀁. 𑀧𑀓𑀭𑀡𑀧𑀭𑀺𑀫𑀸𑀡𑀲𑁆𑀲𑀯𑀦𑁂𑀦 𑀳𑀺 𑀢𑁂 𑀲𑀫𑁆𑀧𑀳𑀝𑁆𑀞𑀸 ‘‘𑀓𑀺𑀢𑁆𑀢𑀓𑀫𑀺𑀤𑀫𑀧𑁆𑀧𑀓𑀁 𑀦 𑀘𑀺𑀭𑁂𑀦𑁂𑀯 𑀧𑀭𑀺𑀲𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀚𑁆𑀛𑀸𑀬𑀦𑀸𑀤𑀻𑀲𑀼 𑀯𑀢𑁆𑀢𑀦𑁆𑀢𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀓𑁆𑀓𑀘𑁆𑀘𑀲𑀯𑀦𑀦𑀺𑀬𑁄𑀚𑀦𑀁 𑀲𑀗𑁆𑀕𑀳𑀺𑀢𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀤𑀸𑀦𑀲𑀼𑀢𑀫𑀬𑀜𑀸𑀡𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀲𑀓𑁆𑀓𑀘𑁆𑀘𑀁 𑀲𑀼𑀡𑀫𑀸𑀦𑀲𑁆𑀲 𑀘 𑀲𑀯𑀦𑀸𑀪𑀸𑀯𑀢𑁄 𑀢𑀁𑀳𑁂𑀢𑀼𑀓𑀲𑁆𑀲 ¶ 𑀲𑀼𑀢𑀫𑀬𑀜𑀸𑀡𑀲𑁆𑀲𑀸𑀧𑀺 𑀅𑀪𑀸𑀯𑁄𑀢𑀺. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀺𑀢𑀩𑁆𑀩’’𑀦𑁆𑀢𑀺 𑀪𑀡𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀢𑀸𑀯 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀺𑀯𑀺𑀥𑁄𑀧𑀺 𑀧𑀡𑀸𑀫𑁄 𑀅𑀯𑀺𑀲𑁂𑀲𑀢𑁄 𑀤𑀲𑁆𑀲𑀺𑀢𑁄. 𑀯𑀺𑀲𑁂𑀲𑀢𑁄 𑀧𑀦 ‘‘𑀲𑁂𑀝𑁆𑀞𑀁, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁, 𑀪𑀯𑀸𑀪𑀸𑀯𑀓𑀭𑀁, 𑀦𑀺𑀭𑀗𑁆𑀕𑀡’’𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀘𑀻𑀧𑀡𑀸𑀫𑁄, ‘‘𑀲𑀺𑀭𑀲𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑁆𑀧𑀡𑀸𑀫𑁄, ‘‘𑀩𑀼𑀤𑁆𑀥𑀁, 𑀥𑀫𑁆𑀫𑀁, 𑀕𑀡𑀜𑁆𑀘𑀸’’𑀢𑀺 𑀇𑀫𑁂𑀳𑀺 𑀧𑀦 𑀢𑀻𑀳𑀺 𑀧𑀤𑁂𑀳𑀺 𑀧𑀡𑀸𑀫𑀓𑀺𑀭𑀺𑀬𑀸𑀬 𑀓𑀫𑁆𑀫𑀪𑀽𑀢𑀁 𑀭𑀢𑀦𑀢𑁆𑀢𑀬𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀥𑀸𑀦𑀁 𑀤𑀲𑁆𑀲𑀺𑀢𑀁 𑀅𑀮𑀼𑀢𑁆𑀢𑀲𑀫𑀸𑀲𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀦𑀸𑀫𑀲𑁆𑀲 𑀤𑀲𑁆𑀲𑀦𑀢𑁄. 𑀢𑀲𑁆𑀲 𑀅𑀦𑁆𑀯𑀢𑁆𑀣𑀪𑀸𑀯𑁂𑀦 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀓𑀮𑁂𑀦𑀸𑀦𑁂𑀦 𑀧𑀓𑀭𑀡𑁂𑀦 𑀧𑀝𑀺𑀧𑀸𑀤𑁂𑀢𑀩𑁆𑀩𑀫𑀪𑀺𑀥𑁂𑀬𑁆𑀬𑀫𑁆𑀧𑀺 𑀢𑁂𑀦𑁂𑀯 𑀤𑀲𑁆𑀲𑀺𑀢𑀁. ‘‘𑀲𑀫𑀸𑀲𑁂𑀦𑀸’’𑀢𑀺 𑀘 ‘‘𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀁, 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫’’𑀦𑁆𑀢𑀺 𑀘 𑀏𑀢𑁂𑀳𑀺 𑀓𑀭𑀡𑀧𑁆𑀧𑀓𑀸𑀭𑁄 𑀤𑀲𑁆𑀲𑀺𑀢𑁄. ‘‘𑀳𑀺𑀢𑀢𑁆𑀣𑀸𑀬𑀸’’𑀢𑀺 𑀘 ‘‘𑀧𑀝𑀼𑀪𑀸𑀯𑀓𑀭𑀁 𑀯𑀺𑀦𑀬𑀓𑁆𑀓𑀫𑁂’’𑀢𑀺 𑀘 ‘‘𑀅𑀧𑀸𑀭𑀁 𑀑𑀢𑀭𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀧𑀬𑁄𑀚𑀦𑀁. ‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀅𑀩𑁆𑀪𑀦𑁆𑀢𑀭𑀦𑀺𑀫𑀺𑀢𑁆𑀢𑀁 𑀧𑀦 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀪𑀽𑀢𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀯𑀺𑀲𑀬𑀸 𑀓𑀭𑀼𑀡𑀸, 𑀲𑀸 𑀆𑀘𑀭𑀺𑀬𑀲𑁆𑀲 𑀧𑀓𑀭𑀡𑀸𑀭𑀫𑁆𑀪𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. ‘‘𑀧𑀯𑀓𑁆𑀔𑀸𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 ‘‘𑀅𑀳’’𑀦𑁆𑀢𑀺 𑀲𑀼𑀤𑁆𑀥𑀓𑀢𑁆𑀢𑀸 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑀺𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀧𑀓𑀭𑀡𑀸𑀯𑀲𑀸𑀦𑁂 𑁋

‘‘𑀭𑀘𑀺𑀢𑁄 𑀩𑀼𑀤𑁆𑀥𑀤𑀢𑁆𑀢𑁂𑀦, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀥𑀻𑀫𑀢𑀸;

𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀸𑀲𑀦𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺. (𑀉. 𑀯𑀺. 𑁯𑁬𑁧) 𑁋

𑀇𑀫𑀸𑀬 ¶ 𑀕𑀸𑀣𑀸𑀬 𑀘𑁂𑀯 ‘‘𑀇𑀢𑀺 𑀢𑀫𑁆𑀩𑀧𑀡𑁆𑀡𑀺𑀬𑁂𑀦 𑀧𑀭𑀫𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀺𑀧𑀺𑀝𑀓𑀦𑀬𑀯𑀺𑀥𑀺𑀓𑀼𑀲𑀮𑁂𑀦 𑀧𑀭𑀫𑀓𑀯𑀺𑀯𑀭𑀚𑀦 𑀳𑀤𑀬𑀧𑀤𑀼𑀫𑀯𑀦𑀯𑀺𑀓𑀲𑀦𑀓𑀭𑁂𑀦 𑀓𑀯𑀺𑀯𑀭𑀸𑀲𑀪𑁂𑀦 𑀧𑀭𑀫𑀭𑀢𑀺𑀓𑀭𑀯𑀭𑀫𑀥𑀼𑀭𑀯𑀘𑀦𑀼𑀕𑁆𑀕𑀸𑀭𑁂𑀦 𑀉𑀭𑀕𑀧𑀼𑀭𑁂𑀦 𑀩𑀼𑀤𑁆𑀥𑀤𑀢𑁆𑀢𑁂𑀦 𑀭𑀘𑀺𑀢𑁄𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄’’𑀢𑀺 (𑀯𑀺. 𑀯𑀺. 𑁩𑁧𑁮𑁩) 𑀇𑀫𑀺𑀦𑀸 𑀯𑀸𑀓𑁆𑀬𑁂𑀦 𑀘 ¶ 𑀤𑀲𑁆𑀲𑀺𑀢𑁄 𑁋 ‘‘𑀫𑀸𑀤𑀺𑀲𑀸𑀧𑀺 𑀓𑀯𑀻 𑀳𑁄𑀦𑁆𑀢𑀺, 𑀩𑀼𑀤𑁆𑀥𑀤𑀢𑁆𑀢𑁂 𑀤𑀺𑀯𑀗𑁆𑀕𑀢𑁂’’𑀢𑀺𑀆𑀤𑀺𑀦𑀸 𑀧𑀘𑁆𑀙𑀺𑀫𑀓𑁂𑀳𑀺 𑀘 𑀧𑀲𑀢𑁆𑀣𑀢𑀭𑁂𑀳𑀺 𑀓𑀯𑀺𑀯𑀭𑁂𑀳𑀺 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀳𑁂𑀢𑀼𑀓𑀢𑁆𑀢𑀸 𑀘 𑀢𑀢𑁆𑀣𑁂𑀯 𑀯𑀓𑁆𑀔𑀫𑀸𑀦𑁄 𑀧𑀓𑀭𑀡𑀚𑁆𑀛𑁂𑀲𑀦𑁂 𑀓𑀢𑀸𑀥𑀻𑀦𑁄 𑀩𑀼𑀤𑁆𑀥𑀲𑀻𑀳𑀫𑀳𑀸𑀣𑁂𑀭𑁄, 𑀲𑁄 𑁋

‘‘𑀯𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑀻𑀳𑁂𑀦;

𑀯𑀺𑀦𑀬𑀲𑁆𑀲 𑀯𑀺𑀦𑀺𑀘𑁆𑀙𑀬𑁄;

𑀩𑀼𑀤𑁆𑀥𑀲𑀻𑀳𑀁 𑀲𑀫𑀼𑀤𑁆𑀤𑀺𑀲𑁆𑀲;

𑀫𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁;

𑀓𑀢𑁄𑀬𑀁 𑀧𑀦 𑀪𑀺𑀓𑁆𑀔𑀽𑀦𑀁;

𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄’’𑀢𑀺. (𑀯𑀺. 𑀯𑀺. 𑁩𑁧𑁭𑁭-𑁩𑁧𑁭𑁮) 𑁋

𑀏𑀯𑀁 𑀤𑀲𑁆𑀲𑀺𑀢𑁄.

𑀉𑀢𑁆𑀢𑀭𑀧𑁆𑀧𑀓𑀭𑀡𑀲𑁆𑀲 𑀳𑁂𑀢𑀼𑀓𑀢𑁆𑀢𑀸 𑀧𑀦 𑀲𑀗𑁆𑀖𑀧𑀸𑀮𑀫𑀳𑀸𑀣𑁂𑀭𑁄, 𑀲𑁄𑀧𑀺 𑁋

‘‘𑀔𑀦𑁆𑀢𑀺𑀲𑁄𑀭𑀘𑁆𑀘𑀲𑁄𑀲𑀺𑀮𑁆𑀬-𑀩𑀼𑀤𑁆𑀥𑀺𑀲𑀤𑁆𑀥𑀸𑀤𑀬𑀸𑀤𑀬𑁄;

𑀧𑀢𑀺𑀝𑁆𑀞𑀺𑀢𑀸 𑀕𑀼𑀡𑀸 𑀬𑀲𑁆𑀫𑀺𑀁, 𑀭𑀢𑀦𑀸𑀦𑀻𑀯 𑀲𑀸𑀕𑀭𑁂.

‘‘𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦, 𑀢𑁂𑀦 𑀲𑀓𑁆𑀓𑀘𑁆𑀘 𑀲𑀸𑀤𑀭𑀁;

𑀬𑀸𑀘𑀺𑀢𑁄 𑀲𑀗𑁆𑀖𑀧𑀸𑀮𑁂𑀦, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸.

‘‘𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦 ¶ , 𑀯𑀺𑀦𑀬𑀲𑁆𑀲 𑀫𑀳𑁂𑀲𑀺𑀦𑁄;

𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁂;

𑀅𑀓𑀸𑀲𑀺𑀁 𑀧𑀭𑀫𑀁 𑀏𑀢𑀁, 𑀉𑀢𑁆𑀢𑀭𑀁 𑀦𑀸𑀫 𑀦𑀸𑀫𑀢𑁄’’𑀢𑀺. (𑀉. 𑀯𑀺. 𑁯𑁬𑁫-𑁯𑁬𑁮) 𑁋

𑀏𑀯𑀁 𑀤𑀲𑁆𑀲𑀺𑀢𑁄. 𑀦 𑀓𑁂𑀯𑀮𑀫𑁂𑀢𑁂 𑀤𑁆𑀯𑁂𑀬𑁂𑀯 𑀫𑀳𑀸𑀣𑁂𑀭𑀸 𑀳𑁂𑀢𑀼𑀓𑀢𑁆𑀢𑀸𑀭𑁄, 𑀅𑀣 𑀔𑁄 𑀫𑀳𑀸𑀯𑀁𑀲𑀸𑀤𑀻𑀲𑀼 𑁋

‘‘𑀩𑀼𑀤𑁆𑀥𑀲𑁆𑀲 ¶ 𑀯𑀺𑀬 𑀕𑀫𑁆𑀪𑀻𑀭-

𑀖𑁄𑀲𑀢𑁆𑀢𑀸 𑀢𑀁 𑀯𑀺𑀬𑀸𑀓𑀭𑀼𑀁;

‘𑀩𑀼𑀤𑁆𑀥𑀖𑁄𑀲𑁄’𑀢𑀺 𑀬𑁄 𑀲𑁄 𑀳𑀺;

𑀩𑀼𑀤𑁆𑀥𑁄 𑀯𑀺𑀬 𑀫𑀳𑀻𑀢𑀮𑁂’’𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀬𑀸 𑀅𑀝𑁆𑀞𑀓𑀣𑀸𑀓𑀸𑀭𑁄 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄 𑀘 𑀅𑀦𑀼𑀲𑁆𑀲𑀼𑀢𑀺𑀯𑀲𑁂𑀦 ‘‘𑀳𑁂𑀢𑀼𑀓𑀢𑁆𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁? 𑀅𑀬𑀁 𑀓𑀺𑀭 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁄 𑀮𑀗𑁆𑀓𑀸𑀤𑀻𑀧𑀢𑁄 𑀲𑀚𑀸𑀢𑀺𑀪𑀽𑀫𑀺𑀁 𑀚𑀫𑁆𑀩𑀼𑀤𑀻𑀧𑀫𑀸𑀕𑀘𑁆𑀙𑀦𑁆𑀢𑁄 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑁂𑀳𑀺 𑀧𑀝𑀺𑀧𑀢𑁆𑀢𑀺𑀧𑀭𑀸𑀬𑀦𑁂𑀳𑀺 𑀬𑀼𑀢𑁆𑀢𑀩𑁆𑀬𑀢𑁆𑀢𑀕𑀼𑀡𑁄𑀧𑁂𑀢𑁂𑀳𑀺 𑀫𑀳𑀸𑀣𑁂𑀭𑀯𑀭𑁂𑀳𑀺 𑀓𑀢𑀸𑀭𑀸𑀥𑀦𑀁 𑀲𑀻𑀳𑀴𑀝𑁆𑀞𑀓𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑀮𑀚𑀦𑀲𑀸𑀥𑀸𑀭𑀡𑀸𑀬 𑀫𑀽𑀮𑀪𑀸𑀲𑀸𑀬 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀬𑀸 𑀅𑀝𑁆𑀞𑀓𑀣𑀁 𑀮𑀺𑀔𑀺𑀢𑀼𑀁 𑀮𑀗𑁆𑀓𑀸𑀤𑀻𑀧𑀁 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 𑀲𑀸𑀓𑀘𑁆𑀙𑀸𑀬 𑀲𑀫𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀩𑁆𑀩𑀮𑁄𑀓𑀸𑀢𑀻𑀢𑁂𑀦 𑀅𑀲𑀤𑀺𑀲𑁂𑀦 𑀧𑀡𑁆𑀟𑀺𑀘𑁆𑀘𑀕𑀼𑀡𑁂𑀦 𑀭𑀢𑀦𑀦𑀺𑀥𑀺𑀤𑀲𑁆𑀲𑀦𑁂 𑀧𑀭𑀫𑀤𑀮𑀺𑀤𑁆𑀤𑁄 𑀯𑀺𑀬 𑀩𑀮𑀯𑀧𑀭𑀺𑀢𑁄𑀲𑀁 𑀧𑀢𑁆𑀯𑀸 𑀅𑀝𑁆𑀞𑀓𑀣𑀫𑀲𑁆𑀲 𑀓𑀸𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀬𑀦𑁆𑀢𑀮𑀺𑀔𑀺𑀢𑀫𑀝𑁆𑀞𑀓𑀣𑀁 𑀅𑀫𑁆𑀳𑀸𑀓𑀁 𑀧𑁂𑀲𑁂𑀣, 𑀫𑀬𑀫𑀲𑁆𑀲𑀸 𑀧𑀓𑀭𑀡𑀁 𑀮𑀺𑀔𑀸𑀫𑀸’’𑀢𑀺 𑀢𑀲𑁆𑀲 𑀲𑀫𑁆𑀫𑀼𑀔𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑁂𑀦 𑀘 ‘‘𑀲𑀸𑀥𑀼 𑀢𑀣𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀚𑁆𑀛𑁂𑀲𑀺𑀢𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁, 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀉𑀢𑁆𑀢𑀭𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑀜𑁆𑀘 𑀅𑀓𑀸𑀲𑀻𑀢𑀺 𑀅𑀦𑀼𑀲𑁆𑀲𑀼𑀬𑁆𑀬𑀢𑁂𑀢𑀺.

‘‘𑀲𑀫𑀸𑀲𑁂𑀦𑀸’’𑀢𑀺 ¶ 𑀇𑀫𑀺𑀦𑀸 𑀘 𑀧𑀭𑀺𑀫𑀸𑀡𑀫𑁆𑀧𑀺 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑀺𑀢𑀁 𑀯𑀺𑀢𑁆𑀣𑀸𑀭𑀧𑀭𑀺𑀫𑀸𑀡𑁂 𑀢𑀲𑁆𑀲 𑀧𑀭𑀺𑀫𑀸𑀡𑀲𑀸𑀫𑀜𑁆𑀜𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀕𑀦𑁆𑀣𑀧𑀭𑀺𑀫𑀸𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀓𑀣𑀸𑀯𑁄𑀳𑀸𑀭𑁂𑀦 𑀯𑀼𑀘𑁆𑀘𑀢𑀺.

𑀲𑁂𑀬𑁆𑀬𑀣𑀺𑀤𑀁? 𑁋 𑀧𑀸𑀭𑀸𑀚𑀺𑀓𑀓𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸 𑀅𑀦𑀺𑀬𑀢𑀓𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸 𑀧𑀸𑀘𑀺𑀢𑁆𑀢𑀺𑀬𑀓𑀣𑀸 𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸 𑀲𑁂𑀔𑀺𑀬𑀓𑀣𑀸𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀓𑀣𑀸 𑀲𑀢𑁆𑀢𑀯𑀺𑀥𑀸, 𑀢𑀢𑁄 𑀅𑀦𑀺𑀬𑀢𑀓𑀣𑀁 𑀯𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀓𑀣𑀸 𑀙𑀩𑁆𑀩𑀺𑀥𑀸, 𑀫𑀳𑀸𑀔𑀦𑁆𑀥𑀓𑀓𑀣𑀸𑀤𑀺𑀓𑀸 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀲𑀸𑀦𑀸 𑀯𑀻𑀲𑀢𑀺𑀯𑀺𑀥𑀸 𑀔𑀦𑁆𑀥𑀓𑀓𑀣𑀸, 𑀓𑀫𑁆𑀫𑀓𑀣𑀸, 𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀣𑀸, 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀺𑀥𑀸𑀦𑀦𑁆𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑀣𑀸𑀧𑀭𑀺𑀘𑁆𑀙𑁂𑀤𑁄 𑀲𑀢𑁆𑀢𑀢𑀺𑀁𑀲.

𑀉𑀢𑁆𑀢𑀭𑀧𑁆𑀧𑀓𑀭𑀡𑁂 ¶ 𑀘 𑀯𑀼𑀢𑁆𑀢𑀦𑀬𑁂𑀦 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀲𑀢𑁆𑀢𑀯𑀺𑀥𑀸 𑀓𑀣𑀸, 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀙𑀩𑁆𑀩𑀺𑀥𑀸, 𑀢𑀤𑀦𑀦𑁆𑀢𑀭𑀸 𑀯𑀺𑀧𑀢𑁆𑀢𑀺𑀓𑀣𑀸, 𑀅𑀥𑀺𑀓𑀭𑀡𑀧𑀘𑁆𑀘𑀬𑀓𑀣𑀸, 𑀔𑀦𑁆𑀥𑀓𑀧𑀜𑁆𑀳𑀸𑀓𑀣𑀸, 𑀲𑀫𑀼𑀝𑁆𑀞𑀸𑀦𑀲𑀻𑀲𑀓𑀣𑀸, 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀓𑀣𑀸, 𑀏𑀓𑀼𑀢𑁆𑀢𑀭𑀦𑀬𑀓𑀣𑀸, 𑀲𑁂𑀤𑀫𑁄𑀘𑀦𑀓𑀣𑀸, 𑀯𑀺𑀪𑀗𑁆𑀕𑀤𑁆𑀯𑀬𑀦𑀺𑀤𑀸𑀦𑀸𑀤𑀺𑀓𑀣𑀸, 𑀲𑀩𑁆𑀩𑀗𑁆𑀕𑀮𑀓𑁆𑀔𑀡𑀓𑀣𑀸, 𑀧𑀭𑀺𑀯𑀸𑀭𑀲𑀗𑁆𑀓𑀮𑀦𑀓𑀣𑀸𑀢𑀺 𑀙𑀢𑁆𑀢𑀺𑀁𑀲 𑀓𑀣𑀸𑀧𑀭𑀺𑀘𑁆𑀙𑁂𑀤𑀸.

𑀦𑀺𑀲𑁆𑀲𑀦𑁆𑀤𑁂𑀳𑁂 𑀧𑀦 ‘‘𑀅𑀝𑁆𑀞𑀢𑀺𑀁𑀲 𑀓𑀣𑀸𑀧𑀭𑀺𑀘𑁆𑀙𑁂𑀤𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀏𑀓𑀼𑀢𑁆𑀢𑀭𑀦𑀬𑁂 𑀅𑀤𑀲𑁆𑀲𑀺𑀢𑁂𑀳𑀺𑀧𑀺 𑀤𑁆𑀯𑀸𑀤𑀲𑀓𑀧𑀦𑁆𑀦𑀭𑀲𑀓𑀦𑀬𑁂𑀳𑀺 𑀲𑀳 𑀲𑁄𑀴𑀲𑀧𑀭𑀺𑀘𑁆𑀙𑁂𑀤𑁂 𑀕𑀳𑁂𑀢𑁆𑀯𑀸 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀪𑀬𑀢𑁆𑀣 𑀓𑀣𑀸𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀢𑁂𑀲𑀢𑁆𑀢𑀢𑀺𑀯𑀺𑀥𑀁 𑀳𑁄𑀢𑀺. 𑀦𑀺𑀲𑁆𑀲𑀦𑁆𑀤𑁂𑀳𑁂 ‘‘𑀧𑀜𑁆𑀘𑀲𑀢𑁆𑀢𑀢𑀺𑀯𑀺𑀥𑀸’’𑀢𑀺 𑀯𑀘𑀦𑁂 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑀦𑀬𑁄𑀯. 𑀕𑀦𑁆𑀣𑀧𑀭𑀺𑀫𑀸𑀡𑀁 𑀧𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀅𑀲𑀻𑀢𑀺𑀕𑀦𑁆𑀣𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀕𑀦𑁆𑀣𑀲𑀳𑀲𑁆𑀲𑀸𑀦𑀺 ¶ , 𑀉𑀢𑁆𑀢𑀭𑁂 𑀧𑀜𑁆𑀜𑀸𑀲𑀕𑀦𑁆𑀣𑀸𑀥𑀺𑀓𑀸𑀦𑀺 𑀦𑀯 𑀕𑀦𑁆𑀣𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀉𑀢𑁆𑀢𑀭𑀸𑀯𑀲𑀸𑀦𑁂 𑁋

‘‘𑀕𑀸𑀣𑀸 𑀘𑀢𑀼𑀲𑀳𑀲𑁆𑀲𑀸𑀦𑀺, 𑀲𑀢𑀜𑁆𑀘 𑀊𑀦𑀯𑀻𑀲𑀢𑀺;

𑀧𑀭𑀺𑀫𑀸𑀡𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁄.

𑀧𑀜𑁆𑀜𑀸𑀲𑀸𑀥𑀺𑀓𑀲𑀗𑁆𑀔𑀸𑀦𑀺, 𑀦𑀯 𑀕𑀸𑀣𑀸𑀲𑀢𑀸𑀦𑀺 𑀳𑀺;

𑀕𑀡𑀦𑀸 𑀉𑀢𑁆𑀢𑀭𑀲𑁆𑀲𑀸𑀬𑀁, 𑀙𑀦𑁆𑀤𑀲𑀸𑀦𑀼𑀝𑁆𑀞𑀼𑀪𑁂𑀦 𑀢𑀽’’𑀢𑀺. (𑀉. 𑀯𑀺. 𑁯𑁬𑁯-𑁯𑁭𑁦);

𑀇𑀘𑁆𑀘𑁂𑀯𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀉𑀢𑁆𑀢𑀭𑁄 𑀘𑀸𑀢𑀺 𑀤𑁆𑀯𑁂 𑀧𑀓𑀭𑀡𑀸𑀦𑀺 𑀢𑀺𑀁𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀕𑀸𑀣𑀸𑀲𑀳𑀲𑁆𑀲𑀸𑀦𑀺. 𑀏𑀢𑁆𑀣 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀦𑀸𑀫 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀸𑀕𑀢𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀸𑀳𑀓𑀧𑀓𑀭𑀡𑀁. 𑀢𑀢𑁄 𑀧𑀭𑀁 𑀧𑀭𑀺𑀯𑀸𑀭𑀢𑁆𑀣𑀲𑀗𑁆𑀕𑀸𑀳𑀓𑀧𑀓𑀭𑀡𑀁 𑀉𑀢𑁆𑀢𑀭𑁄 𑀦𑀸𑀫. 𑀢𑁂𑀦𑁂𑀯 𑀯𑀓𑁆𑀔𑀢𑀺 𑁋

‘‘𑀬𑁄 𑀫𑀬𑀸 𑀭𑀘𑀺𑀢𑁄 𑀲𑀸𑀭𑁄, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁄;

𑀢𑀲𑁆𑀲 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀲𑀩𑁆𑀩𑀸𑀦𑀼𑀢𑁆𑀢𑀭𑀫𑀼𑀢𑁆𑀢𑀭’’𑀦𑁆𑀢𑀺. (𑀉. 𑀯𑀺. 𑁨)

𑀢𑀁 𑀓𑀲𑁆𑀫𑀸 𑀉𑀢𑁆𑀢𑀭𑀦𑀸𑀫𑁂𑀦 𑀯𑁄𑀳𑀭𑀺𑀬𑀢𑀻𑀢𑀺? 𑀧𑀜𑁆𑀳𑀼𑀢𑁆𑀢𑀭𑀯𑀲𑁂𑀦 𑀞𑀺𑀢𑁂 𑀧𑀭𑀺𑀯𑀸𑀭𑁂 𑀢𑀣𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑁂𑀧𑀺 𑀢𑁂𑀦 𑀧𑀓𑀸𑀭𑁂𑀦 𑀧𑀸𑀭𑀸𑀚𑀺𑀓𑀓𑀣𑀸𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀇𑀢𑁄 ¶ 𑀧𑀝𑁆𑀞𑀸𑀬 𑀫𑀼𑀜𑁆𑀘𑀺𑀢𑁆𑀯𑀸, 𑀧𑀜𑁆𑀳𑀸𑀧𑀼𑀘𑁆𑀙𑀦𑀫𑀢𑁆𑀢𑀓𑀁;

𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦𑁂𑀯, 𑀳𑁄𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄’’𑀢𑀺. (𑀉. 𑀯𑀺. 𑁧𑁪) 𑁋

𑀯𑀢𑁆𑀯𑀸 𑀧𑀜𑁆𑀳𑀁 𑀧𑀳𑀸𑀬 𑀢𑀢𑁄 𑀧𑀝𑁆𑀞𑀸𑀬 𑀉𑀢𑁆𑀢𑀭𑀫𑀢𑁆𑀢𑀲𑁆𑀲𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀢𑀣𑀸 𑀯𑁄𑀳𑀭𑀻𑀬𑀦𑁆𑀢𑀺.

‘‘𑀢𑀲𑁆𑀫𑀸 𑀯𑀺𑀦𑀬𑀦𑀽𑀧𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀲𑁄𑀢𑀼𑀚𑀦𑀁 𑀲𑀓𑁆𑀓𑀘𑁆𑀘𑀲𑀯𑀦𑁂 𑀦𑀺𑀬𑁄𑀚𑁂𑀢𑀺. 𑀲𑀓𑁆𑀓𑀘𑁆𑀘𑀲𑀯𑀦𑀧𑀝𑀺𑀩𑀤𑁆𑀥𑀸 𑀳𑀺 𑀲𑀩𑁆𑀩𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄. 𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀲𑁄 𑀬𑀲𑁆𑀫𑀸 𑀅𑀢𑁆𑀣𑀬𑁄𑀚𑀦𑀓𑁆𑀓𑀫𑁂𑀦 𑀧𑀤𑀬𑁄𑀚𑀦𑀁 ¶ 𑀓𑀢𑁆𑀯𑀸 𑀯𑀡𑁆𑀡𑀺𑀢𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀣𑀸 𑀧𑀤𑀬𑁄𑀚𑀦𑀁 𑀓𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫 𑁋

𑀲𑁂𑀝𑁆𑀞𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀜𑁆𑀘𑁂𑀯 𑀪𑀯𑀸𑀪𑀸𑀯𑀓𑀭𑀁 𑀥𑀫𑁆𑀫𑀜𑁆𑀘𑁂𑀯 𑀦𑀺𑀭𑀗𑁆𑀕𑀡𑀁 𑀕𑀡𑀜𑁆𑀘𑁂𑀯 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑁂𑀦 𑀲𑀫𑀸𑀳𑀺𑀢𑁄 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀲𑁂𑀝𑁆𑀞𑀦𑁆𑀢𑀺 𑀲𑀩𑁆𑀩𑁂 𑀇𑀫𑁂 𑀧𑀲𑀢𑁆𑀣𑀸 𑀅𑀬𑀫𑁂𑀢𑁂𑀲𑀁 𑀅𑀢𑀺𑀲𑀬𑁂𑀦 𑀧𑀲𑀢𑁆𑀣𑁄𑀢𑀺 𑀲𑁂𑀝𑁆𑀞𑁄. 𑀢𑀣𑀸 𑀳𑀺 𑀲𑁄 𑀪𑀕𑀯𑀸 ‘‘𑀅𑀳𑀜𑁆𑀳𑀺 𑀩𑁆𑀭𑀸𑀳𑁆𑀫𑀡 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧) 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀦𑁄 𑀚𑁂𑀝𑁆𑀞𑀲𑁂𑀝𑁆𑀞𑀪𑀸𑀯𑀲𑁆𑀲 𑀧𑀭𑀺𑀚𑀸𑀦𑀦𑀯𑀺𑀦𑀺𑀘𑁆𑀙𑀬𑀳𑁂𑀢𑀼𑀪𑀽𑀢𑀸𑀳𑀺 𑀛𑀸𑀦𑀸𑀤𑀻𑀳𑀺 𑀦𑀺𑀭𑀢𑀺𑀲𑀬𑀕𑀼𑀡𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑁋

‘‘𑀢𑁆𑀯𑀫𑁂𑀯 𑀅𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀼𑀯𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀢𑁂 𑀧𑀝𑀺𑀧𑀼𑀕𑁆𑀕𑀮𑁄. (𑀤𑀻. 𑀦𑀺. 𑁨.𑁩𑁭𑁦);

𑀢𑀼𑀯𑀁 𑀩𑀼𑀤𑁆𑀥𑁄 𑀢𑀼𑀯𑀁 𑀲𑀢𑁆𑀣𑀸, 𑀢𑀼𑀯𑀁 𑀫𑀸𑀭𑀸𑀪𑀺𑀪𑀽 𑀫𑀼𑀦𑀺;

𑀢𑀼𑀯𑀁 𑀅𑀦𑀼𑀲𑀬𑁂 𑀙𑁂𑀢𑁆𑀯𑀸, 𑀢𑀺𑀡𑁆𑀡𑁄 𑀢𑀸𑀭𑁂𑀲𑀺𑀫𑀁 𑀧𑀚𑀁.

𑀉𑀧𑀥𑀻 𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑀸, 𑀆𑀲𑀯𑀸 𑀢𑁂 𑀧𑀤𑀸𑀮𑀺𑀢𑀸;

𑀲𑀻𑀳𑁄𑀲𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀳𑀻𑀦𑀪𑀬𑀪𑁂𑀭𑀯𑁄. (𑀫. 𑀦𑀺. 𑁨.𑁪𑁦𑁦; 𑀲𑀼. 𑀦𑀺. 𑁫𑁫𑁦-𑁫𑁫𑁧; 𑀣𑁂𑀭𑀕𑀸. 𑁮𑁩𑁯-𑁯𑁪𑁦);

𑀫𑀳𑀸𑀯𑀻𑀭 ¶ 𑀫𑀳𑀸𑀧𑀜𑁆𑀜, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫𑀸’’𑀢𑀺. (𑀲𑀁. 𑀦𑀺. 𑁧.𑁧𑁫𑁯; 𑀥. 𑀧. 𑀅𑀝𑁆𑀞. 𑁧.𑁫𑁬); 𑁋

𑀆𑀤𑀻𑀳𑀻 𑀦𑀸𑀦𑀸𑀦𑀬𑁂𑀳𑀺 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀪𑀺𑀢𑁆𑀣𑀯𑀺𑀬𑀢𑀸𑀬 𑀧𑀲𑀢𑁆𑀣𑀢𑀫𑁄, 𑀢𑀫𑁂𑀯 𑀲𑁂𑀝𑁆𑀞𑀁 𑀧𑀲𑀢𑁆𑀣𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀦𑁆𑀢𑀺 ¶ 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀧𑀼𑀕𑁆𑀕𑀮𑁄 𑀅𑀥𑀺𑀓𑁄, 𑀲𑀤𑀺𑀲𑁄 𑀯𑀸𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀢𑀣𑀸 𑀳𑀺 𑀕𑀼𑀡𑀯𑀲𑁂𑀦 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀢𑁆𑀢𑀦𑀸 𑀅𑀥𑀺𑀓𑀲𑁆𑀲, 𑀲𑀤𑀺𑀲𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑁋

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀫𑀳𑀸𑀯. 𑁧𑁧) 𑁋

𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀯𑀺𑀧𑀭𑀻𑀢𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀪𑀸𑀯𑁄 𑀧𑀝𑀺𑀜𑁆𑀜𑀸𑀢𑁄, 𑀢𑀲𑁆𑀫𑀸 𑀢𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀩𑀼𑀤𑁆𑀥𑀦𑁆𑀢𑀺 𑀅𑀦𑀦𑁆𑀢𑀫𑀧𑀭𑀺𑀫𑁂𑀬𑁆𑀬𑀁 𑀜𑁂𑀬𑁆𑀬𑀫𑀡𑁆𑀟𑀮𑀫𑀦𑀯𑀲𑁂𑀲𑀁 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄, 𑀏𑀢𑁂𑀦 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀲𑀫𑁆𑀪𑀢𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸𑀦𑀼𑀪𑀸𑀯𑀲𑀺𑀤𑁆𑀥𑀺𑀥𑀫𑁆𑀫𑀭𑀽𑀧𑀓𑀸𑀬𑀲𑀺𑀭𑀺𑀯𑀺𑀮𑀸𑀲𑀧𑀝𑀺𑀫𑀡𑁆𑀟𑀺𑀢𑁄 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀲𑁆𑀲𑀺𑀢𑁄. 𑀅𑀣 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀬𑀁 𑀯𑀺𑀘𑀺𑀢𑁄𑀧𑀘𑀺𑀢𑀧𑀸𑀭𑀫𑀺𑀢𑀸𑀧𑀭𑀺𑀧𑀸𑀘𑀺𑀢𑁂𑀦 𑀲𑀯𑀸𑀲𑀦𑀸𑀦𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀬𑀓𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀩𑀼𑀚𑁆𑀛𑀻𑀢𑀺 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀫. 𑀦𑀺. 𑁨.𑁩𑁯𑁨, 𑁩𑁯𑁯; 𑀲𑀼. 𑀦𑀺. 𑁫𑁬𑁩; 𑀣𑁂𑀭𑀕𑀸. 𑁮𑁨𑁮);

𑀯𑀺𑀢𑁆𑀣𑀸𑀭𑁄 𑀧𑀦𑀲𑁆𑀲 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀺𑀤𑁆𑀤𑁂𑀲𑀸𑀤𑀻𑀲𑀼 ¶ 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀤𑁆𑀤𑀲𑀺𑀤𑁆𑀥𑀺 𑀲𑀸𑀲𑀦𑀺𑀓𑀸𑀦𑀁 𑀅𑀯𑀕𑀫𑀦𑀢𑁆𑀣𑁂 𑀯𑀢𑁆𑀢𑀫𑀸𑀦𑀸 𑀩𑀼𑀥-𑀥𑀸𑀢𑀼𑀢𑁄 ‘‘𑀪𑀸𑀯𑀓𑀫𑁆𑀫𑁂𑀲𑀼 𑀢’’ 𑀇𑀢𑀺 𑀇𑀢𑁄 𑀢𑀸𑀢𑀺𑀯𑀢𑁆𑀢𑀫𑀸𑀦𑁂 ‘‘𑀩𑀼𑀥𑀕𑀫𑀸𑀤𑀺𑀢𑁆𑀣𑁂 𑀓𑀢𑁆𑀢𑀭𑀻’’𑀢𑀺 𑀇𑀫𑀺𑀦𑀸 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑁂𑀦 𑀓𑀢𑁆𑀢𑀭𑀺 𑀢𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀺𑀬𑀸𑀦𑀁 𑀧𑀦 𑀩𑁄𑀥𑀦𑀢𑁆𑀣𑀥𑀸𑀢𑀽𑀦𑀫𑁆𑀧𑀺 𑀕𑀫𑀦𑀢𑁆𑀣𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀕𑀢𑁆𑀬𑀢𑁆𑀣𑀸𑀓𑀫𑁆𑀫𑀓𑀸𑀤𑀺 ¶ 𑀲𑀼𑀢𑁆𑀢𑀢𑁄 𑀓𑀢𑁆𑀢𑀭𑀺 𑀢-𑀧𑁆𑀧𑀘𑁆𑀘𑀬𑀓𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀥𑀸𑀢𑀽𑀦𑀁 𑀅𑀦𑁂𑀓𑀢𑁆𑀣𑀢𑀸𑀬 𑀩𑀼𑀥-𑀇𑀘𑁆𑀘𑀬𑀁 𑀥𑀸𑀢𑀼 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑁄 𑀅𑀓𑀫𑁆𑀫𑀓𑁄𑀢𑀺 ‘‘𑀧𑀩𑀼𑀤𑁆𑀥𑁄 𑀧𑀼𑀭𑀺𑀲𑁄, 𑀧𑀩𑀼𑀤𑁆𑀥𑀁 𑀧𑀤𑀼𑀫’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀩𑀼𑀤𑁆𑀥𑀯𑀸 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀯𑀺𑀕𑀫𑁂𑀦 𑀜𑀸𑀡𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑀦𑁆𑀢𑁄 𑀧𑀩𑀼𑀤𑁆𑀥𑁄, 𑀕𑀼𑀡𑁂𑀳𑀺 𑀯𑀸 𑀯𑀺𑀓𑀲𑀺𑀢𑁄𑀢𑀺 𑀓𑀢𑁆𑀢𑀭𑀺 𑀲𑀺𑀤𑁆𑀥𑁂𑀦 𑀩𑀼𑀤𑁆𑀥-𑀲𑀤𑁆𑀤𑁂𑀦 ‘‘𑀩𑀼𑀤𑁆𑀥𑁄’’𑀢𑀺 𑀢𑀺𑀪𑀯𑀦𑁂𑀓𑀘𑀽𑀴𑀸𑀫𑀡𑀺𑀧𑀸𑀤𑀧𑀗𑁆𑀓𑀚𑀭𑀸𑀕𑀭𑀢𑀦𑁄 𑀪𑀕𑀯𑀸 𑀮𑁄𑀓𑀦𑀸𑀣𑁄 𑀯𑀼𑀘𑁆𑀘𑀢𑀺, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂𑀧𑀺 𑀕𑀢𑁆𑀬𑀢𑁆𑀣𑀸𑀤𑀺𑀲𑀼𑀢𑁆𑀢𑁂 𑀅𑀓𑀫𑁆𑀫𑀓𑀕𑁆𑀕𑀳𑀡𑁂𑀦 𑀧𑀘𑁆𑀘𑀬𑀯𑀺𑀥𑀸𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀲𑀓𑀫𑁆𑀫𑀓𑀸𑀦𑀁 𑀥𑀸𑀢𑀽𑀦𑀁 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂 𑀅𑀓𑀫𑁆𑀫𑀓𑀪𑀸𑀯𑀢𑁄 ‘‘𑀨𑀮𑀁 𑀲𑀬𑀫𑁂𑀯 𑀧𑀓𑁆𑀓’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀩𑁄𑀥𑀦𑀢𑁆𑀣𑁂𑀬𑁂𑀯 𑀩𑀼𑀥-𑀥𑀸𑀢𑀼𑀢𑁄 𑀓𑀢𑁆𑀢𑀭𑀺 𑀯𑀺𑀥𑀸𑀦𑀁 𑀲𑀺𑀚𑁆𑀛𑀢𑀺. 𑀅𑀣 𑀯𑀸 𑀦𑀻𑀮𑀕𑀼𑀡𑀬𑁄𑀕𑁂𑀦 𑀧𑀝𑀸𑀤𑀻𑀲𑀼 𑀦𑀻𑀮𑀯𑁄𑀳𑀸𑀭𑁄 𑀯𑀺𑀬 𑀪𑀸𑀯𑀲𑀸𑀥𑀦𑀁 𑀩𑀼𑀤𑁆𑀥-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀬𑁄𑀕𑀢𑁄 ‘‘𑀩𑀼𑀤𑁆𑀥𑁄’’𑀢𑀺 𑀯𑁄𑀳𑀭𑀻𑀬𑀢𑀺. 𑀏𑀯𑀫𑀦𑁂𑀓𑀥𑀸 𑀲𑀺𑀤𑁆𑀥𑁂𑀦 𑀩𑀼𑀤𑁆𑀥-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀢𑀁 𑀪𑀕𑀯𑀦𑁆𑀢𑀁 𑀢𑀁 𑀥𑀫𑁆𑀫𑀭𑀸𑀚𑀦𑁆𑀢𑀺 𑀅𑀢𑁆𑀣𑁄.

‘‘𑀲𑁂𑀝𑁆𑀞𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮’’𑀦𑁆𑀢𑀺 𑀧𑀤𑀤𑁆𑀯𑀬𑀁 ‘‘𑀩𑀼𑀤𑁆𑀥’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀘 ‘‘𑀩𑀼𑀤𑁆𑀥𑀁, 𑀲𑁂𑀝𑁆𑀞𑀁, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮’’𑀦𑁆𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀦𑀬𑀢𑁄 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭; 𑁩.𑁬; 𑀫. 𑀦𑀺. 𑁧.𑁧𑁪𑁭, 𑁧𑁪𑁪; 𑁩.𑁪𑁩𑁪; 𑀲𑀁. 𑀦𑀺. 𑁧.𑁨𑁪𑁯; 𑁫.𑁪𑁭𑁯; 𑀅. 𑀦𑀺. 𑁫.𑁧𑁪, 𑁩𑁦; 𑁬.𑁨𑁫, 𑁨𑁬; 𑀦𑁂𑀢𑁆𑀢𑀺. 𑁯𑁩), ‘‘𑀬𑁄 𑀯𑀤𑀢𑀁 𑀧𑀯𑀭𑁄 𑀫𑀦𑀼𑀚𑁂𑀲𑀼, 𑀲𑀓𑁆𑀬𑀫𑀼𑀦𑀻 𑀪𑀕𑀯𑀸 𑀓𑀢𑀓𑀺𑀘𑁆𑀘𑁄’’𑀢𑀺𑀆𑀤𑀻𑀳𑀺 (𑀯𑀺. 𑀯. 𑁮𑁮𑁬) 𑀘 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀤𑀲𑁆𑀲𑀺𑀢𑀤𑀽𑀭𑀸𑀯𑀺𑀤𑀽𑀭𑀲𑀦𑁆𑀢𑀺𑀓𑀦𑀺𑀤𑀸𑀦𑀳𑁂𑀢𑀼𑀨𑀮𑀲𑀢𑁆𑀢𑁄𑀧𑀓𑀸𑀭𑀸𑀯𑀢𑁆𑀣𑀸𑀥𑀫𑁆𑀫𑀢𑁆𑀣- 𑀮𑁄𑀓𑀼𑀤𑁆𑀥𑀸𑀭𑀢𑁆𑀢𑀺𑀓𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀩𑀼𑀤𑁆𑀥𑀕𑀼𑀡𑀲𑀫𑀼𑀤𑀬𑀁 ¶ 𑀦𑀺𑀭𑀯𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀬𑀫𑁂𑀯 𑀳𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑀦𑀽𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀤𑀲𑁆𑀲𑀦𑀁. 𑀇𑀢𑀭𑀣𑀸 𑀧𑀝𑀺𑀧𑀤𑀯𑀡𑁆𑀡𑀦𑀸𑀬 𑀅𑀧𑀭𑀺𑀫𑀺𑀢𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑁄 𑀳𑀺 𑀦𑀸𑀫 𑀲𑀫𑀢𑁆𑀣𑁄 𑀧𑀭𑀺𑀬𑀦𑁆𑀢𑀁 𑀕𑀦𑁆𑀢𑀼𑀁. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 ¶ 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁;

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂;

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀅𑀧. 𑀅𑀝𑁆𑀞. 𑁨.𑁭.𑁨𑁦; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸, 𑀧𑀓𑀺𑀡𑁆𑀡𑀓𑀓𑀣𑀸; 𑀤𑀻. 𑀦𑀺. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀫. 𑀦𑀺. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀯𑀚𑀺𑀭. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀦𑁂𑀢𑁆𑀢𑀺. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸);

𑀏𑀯𑀫𑁂𑀢𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀦𑀺𑀭𑀯𑀲𑁂𑀲𑀕𑀼𑀡𑀲𑀁𑀓𑀺𑀢𑁆𑀢𑀦𑀣𑀼𑀢𑀺𑀬𑀸 𑀯𑀲𑁂𑀦 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀡𑀸𑀫𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀇𑀫𑀸𑀬 𑀅𑀟𑁆𑀠𑀕𑀸𑀣𑀸𑀬 𑀩𑀼𑀤𑁆𑀥𑀭𑀢𑀦𑀲𑀗𑁆𑀔𑀸𑀢𑀧𑀞𑀫𑀯𑀦𑁆𑀤𑀦𑀻𑀬𑀯𑀢𑁆𑀣𑀼𑀯𑀺𑀲𑀬𑀸 𑀣𑀼𑀢𑀺𑀧𑀡𑀸𑀫𑀲𑀪𑀸𑀯𑀸 𑀯𑀦𑁆𑀤𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀤𑀦𑀦𑁆𑀢𑀭𑀁 𑀥𑀫𑁆𑀫𑀭𑀢𑀦𑀲𑁆𑀲 𑀧𑀡𑀸𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀯𑀸𑀪𑀸𑀯𑀓𑀭𑀁 𑀥𑀫𑁆𑀫’’𑀦𑁆𑀢𑀺. 𑀏𑀢𑁆𑀣 𑀪𑀯-𑀲𑀤𑁆𑀤𑁂𑀦 𑀤𑁆𑀯𑁂 𑀪𑀯𑀸 𑀯𑀼𑀢𑁆𑀢𑀸 𑀓𑀫𑁆𑀫𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑁄𑀢𑀺. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀪𑀯𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 ‘‘𑀪𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀔𑀸𑀢𑁄 𑀧𑀦 𑀉𑀧𑀧𑀢𑁆𑀢𑀺𑀪𑀯𑁄 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀲𑀗𑁆𑀔𑀸𑀭𑀸𑀤𑀺𑀲𑀳𑀓𑀸𑀭𑀺𑀓𑀸𑀭𑀡𑀬𑀼𑀢𑁆𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀓𑀫𑁆𑀫𑀪𑀯𑀧𑀘𑁆𑀘𑀬𑁂𑀦 𑀬𑀣𑀸𑀭𑀳𑀁 𑀪𑀯𑀢𑀻𑀢𑀺 ‘‘𑀪𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀓𑀸𑀫𑀪𑀯𑀭𑀽𑀧𑀪𑀯𑀅𑀭𑀽𑀧𑀪𑀯𑀲𑀜𑁆𑀜𑀻𑀪𑀯𑀅𑀲𑀜𑁆𑀜𑀻𑀪𑀯𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯- 𑀏𑀓𑀯𑁄𑀓𑀸𑀭𑀪𑀯𑀘𑀢𑀼𑀯𑁄𑀓𑀸𑀭𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀦𑀯𑀯𑀺𑀥𑁄. 𑀏𑀯𑀫𑁂𑀢𑁂𑀲𑀼 𑀦𑀯𑀲𑀼 𑀪𑀯𑁂𑀲𑀼 𑀤𑀲𑀯𑀺𑀥𑁄𑀧𑀺 𑀥𑀫𑁆𑀫𑁄 𑀅𑀢𑁆𑀢𑀸𑀦𑀁 𑀥𑀸𑀭𑁂𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑀸𑀲𑀸𑀥𑀦𑁂𑀦 𑀪𑀯𑁂𑀲𑀼 ¶ , 𑀪𑀯𑀲𑁆𑀲 𑀯𑀸 𑀅𑀪𑀸𑀯𑀁 𑀓𑀭𑁄𑀢𑀻𑀢𑀺 𑀪𑀯𑀸𑀪𑀸𑀯𑀓𑀭𑁄, 𑀢𑀁, 𑀅𑀧𑀭𑀸𑀧𑀭𑀚𑀸𑀢𑀺𑀧𑁆𑀧𑀩𑀦𑁆𑀥𑀲𑁆𑀲 𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂𑀦 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀓𑀦𑁆𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀥𑀸𑀭𑁂𑀦𑁆𑀢𑁂 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼, 𑀲𑀁𑀲𑀸𑀭𑁂 𑀘 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀲𑁄 𑀘𑀢𑀼𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀢𑀧𑁆𑀧𑀝𑀺𑀧𑀸𑀤𑀓𑁄 𑀦𑀯𑀗𑁆𑀕𑀲𑀸𑀲𑀦𑀸𑀧𑀭𑀦𑀸𑀫𑀥𑁂𑀬𑁆𑀬𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀥𑀫𑁆𑀫𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀪𑀺𑀦𑁆𑀦𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀘𑀸𑀢𑀺 𑀤𑀲𑀯𑀺𑀥𑁄. 𑀲𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄, 𑀧𑀭𑀺𑀬𑀸𑀬𑀥𑀫𑁆𑀫𑁄 ¶ 𑀘𑀸𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄 𑀦𑀸𑀫 𑀅𑀧𑀸𑀬𑁂, 𑀲𑀁𑀲𑀸𑀭𑁂 𑀯𑀸 𑀧𑀥𑀸𑀦𑀳𑁂𑀢𑀼𑀪𑀽𑀢𑀸𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁, 𑀑𑀭𑀫𑁆𑀪𑀸𑀕𑀺𑀬𑀸𑀦𑀜𑁆𑀘 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀫𑀕𑁆𑀕𑀥𑀫𑁆𑀫𑁄, 𑀢𑀲𑁆𑀲 𑀢𑀁𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀓𑀢𑁆𑀯𑀸 ‘‘𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀘𑀢𑁆𑀢𑀸𑀭𑀺 𑀧𑀦 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑁂𑀦 𑀫𑀕𑁆𑀕𑀸𑀦𑀼𑀕𑀼𑀡𑀧𑁆𑀧𑀯𑀢𑁆𑀢𑀺𑀬𑀸, 𑀧𑀭𑀺𑀬𑀢𑁆𑀢𑀺 𑀘 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑀢𑁄𑀢𑀺 𑀧𑀜𑁆𑀘𑀯𑀺𑀥𑁄𑀧𑀺 𑀧𑀭𑀺𑀬𑀸𑀬𑀥𑀫𑁆𑀫𑁄 𑀦𑀸𑀫.

𑀏𑀢𑁆𑀢𑀸𑀯𑀢𑀸 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁯; 𑀅. 𑀦𑀺. 𑁩.𑁭𑁬; 𑀤𑀻. 𑀦𑀺. 𑁩.𑁬; 𑀅. 𑀦𑀺. 𑁬.𑁧𑁦, 𑁨𑁫, 𑁨𑁬), ‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓’’𑀦𑁆𑀢𑀺𑀆𑀤𑀻𑀳𑀺 (𑀯𑀺. 𑀯. 𑁮𑁮𑁭) 𑀘 𑀲𑀼𑀢𑁆𑀢𑀦𑁆𑀢𑁂𑀳𑀺 𑀯𑀼𑀢𑁆𑀢𑀲𑁆𑀲, 𑀢𑀤𑀝𑁆𑀞𑀓𑀣𑀸𑀤𑀻𑀲𑀼 𑀘 𑀯𑀡𑁆𑀡𑀺𑀢𑀲𑁆𑀲 𑀲𑀭𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑀸𑀧𑀺 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀅𑀦𑀯𑀲𑁂𑀲𑀲𑁆𑀲 𑀥𑀫𑁆𑀫𑀭𑀢𑀦𑀕𑀼𑀡𑀲𑁆𑀲 𑀦𑀬𑀢𑁄 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀘 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀡𑀸𑀫𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀘 𑀥𑀫𑁆𑀫𑀭𑀢𑀦𑀲𑀗𑁆𑀔𑀸𑀢𑀲𑁆𑀲 𑀤𑀼𑀢𑀺𑀬𑀲𑁆𑀲 𑀯𑀦𑁆𑀤𑀦𑀻𑀬𑀲𑁆𑀲 𑀣𑀼𑀢𑀺𑀧𑀡𑀸𑀫𑀲𑀪𑀸𑀯𑀸 𑀯𑀦𑁆𑀤𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀤𑀦𑀦𑁆𑀢𑀭𑀁 ¶ 𑀲𑀗𑁆𑀖𑀭𑀢𑀦𑀲𑁆𑀲 𑀯𑀦𑁆𑀤𑀦𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀕𑀡𑀜𑁆𑀘𑁂𑀯 𑀦𑀺𑀭𑀗𑁆𑀕𑀡’’𑀦𑁆𑀢𑀺. 𑀏𑀢𑁆𑀣 ‘‘𑀭𑀸𑀕𑁄 𑀅𑀗𑁆𑀕𑀡𑀁 𑀤𑁄𑀲𑁄 𑀅𑀗𑁆𑀕𑀡𑀁 𑀫𑁄𑀳𑁄 𑀅𑀗𑁆𑀕𑀡’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀯𑀼𑀢𑁆𑀢𑁂𑀳𑀺 𑀭𑀸𑀕𑀸𑀤𑀺𑀅𑀗𑁆𑀕𑀡𑁂𑀳𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀦𑀺𑀕𑁆𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀦𑀺𑀭𑀗𑁆𑀕𑀡𑁄, 𑀢𑀁 𑀦𑀺𑀭𑀗𑁆𑀕𑀡𑀁. 𑀅𑀭𑀺𑀬𑀯𑀁𑀲𑁂 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑀕𑀡𑁂𑀳𑀺 𑀕𑀡𑀻𑀬𑀢𑀻𑀢𑀺 𑀕𑀡𑁄, 𑀢𑀁.

𑀏𑀢𑁆𑀢𑀸𑀯𑀢𑀸 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁯; 𑀅. 𑀦𑀺. 𑁩.𑁭𑁬; 𑀤𑀻. 𑀦𑀺. 𑁩.𑁬; 𑀅. 𑀦𑀺. 𑁬.𑁧𑁦, 𑁨𑁫, 𑁨𑁬;), ‘‘𑀬𑀢𑁆𑀣 𑀘 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀫𑀸𑀳𑀼, 𑀘𑀢𑀽𑀲𑀼 𑀲𑀼𑀘𑀻𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀽’’𑀢𑀺𑀆𑀤𑀻𑀳𑀺 (𑀯𑀺. 𑀯. 𑁮𑁮𑁮) 𑀘 𑀢𑁂𑀳𑀺 𑀢𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀯𑀼𑀢𑁆𑀢𑀸𑀦𑀁, 𑀢𑀤𑀝𑁆𑀞𑀓𑀣𑀸𑀤𑀻𑀲𑀼 𑀘 𑀯𑀡𑁆𑀡𑀺𑀢𑀸𑀦𑀁 𑀯𑀺𑀫𑀮𑀸𑀢𑀼𑀮𑀦𑀺𑀔𑀺𑀮𑀯𑀺𑀲𑀸𑀮𑀧𑁂𑀲𑀮𑀲𑀻𑀮𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀦𑀕𑁆𑀖𑀲𑀗𑁆𑀖𑀭𑀢𑀦𑀕𑀼𑀡𑀸𑀦𑀁 𑀲𑀁𑀓𑀺𑀢𑁆𑀢𑀦𑀲𑀪𑀸𑀯𑀸𑀬 𑀣𑀼𑀢𑀺𑀬𑀸 𑀘 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑀧𑀪𑁂𑀤𑀧𑀡𑀸𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀗𑁆𑀖𑀭𑀢𑀦𑀲𑀗𑁆𑀔𑀸𑀢𑀢𑀢𑀺𑀬𑀯𑀦𑁆𑀤𑀦𑀻𑀬𑀯𑀢𑁆𑀣𑀼𑀯𑀺𑀲𑀬𑀸 𑀣𑀼𑀢𑀺𑀧𑁆𑀧𑀡𑀸𑀫𑀲𑀗𑁆𑀔𑀸𑀢𑀸 𑀯𑀦𑁆𑀤𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀺𑀭𑀲𑀸𑀢𑀺 𑀅𑀢𑁆𑀢𑀧𑁆𑀧𑀲𑀸𑀤𑀕𑀸𑀭𑀯𑀸𑀯𑀳𑀦𑁆𑀢𑁂𑀦 𑀫𑀼𑀤𑁆𑀥𑀦𑀸. 𑀯𑀦𑁆𑀤𑀺𑀢𑁆𑀯𑀸𑀢𑀺 𑀧𑀡𑀫𑀺𑀢𑁆𑀯𑀸 𑀣𑁄𑀫𑀺𑀢𑁆𑀯𑀸 𑀯𑀸.

𑀏𑀯𑀁 ¶ 𑀧𑀞𑀫𑀕𑀸𑀣𑀸𑀬 𑀯𑀦𑁆𑀤𑀦𑀻𑀬𑀲𑁆𑀲 𑀭𑀢𑀦𑀢𑁆𑀢𑀬𑀲𑁆𑀲 𑀣𑀼𑀢𑀺𑀧𑁆𑀧𑀡𑀸𑀫𑀲𑀗𑁆𑀔𑀸𑀢𑀁 𑀯𑀦𑁆𑀤𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀸𑀬 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀧𑀬𑁄𑀚𑀦𑀸𑀤𑀺𑀧𑀝𑀺𑀧𑀸𑀤𑀺𑀓𑀸𑀬 𑀕𑀸𑀣𑀸𑀬 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀢𑀻𑀢𑀺 ‘‘𑀪𑀺𑀓𑁆𑀔𑀽’’𑀢𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸 𑀯𑀼𑀘𑁆𑀘𑀦𑁆𑀢𑀺, 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁪-𑁪𑁫; 𑀯𑀺𑀪. 𑁫𑁧𑁦) 𑀧𑀦 ‘‘𑀪𑀺𑀦𑁆𑀦𑀧𑀝𑀁 𑀥𑀸𑀭𑁂𑀢𑀻𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀦𑀲𑀻𑀮𑁄𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀩𑁆𑀩𑀘𑀦𑀦𑁆𑀢𑀭𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ¶ 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀭𑀡𑀸𑀭𑀳𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽’’𑀢𑀺 𑀤𑀲𑁆𑀲𑀺𑀢𑀸 𑀲𑀺𑀓𑁆𑀔𑀸𑀓𑀸𑀫𑀸 𑀲𑀸𑀲𑀦𑀸𑀯𑀘𑀸𑀭𑀸 𑀓𑀼𑀮𑀧𑀼𑀢𑁆𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀜𑁆𑀘. 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑀸𑀢𑀺 𑀅𑀝𑁆𑀞𑀯𑀸𑀘𑀺𑀓𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀦 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀢𑀸𑀤𑀺𑀲𑀸𑀬𑁂𑀯 𑀓𑀼𑀮𑀥𑀻𑀢𑀭𑁄 𑀤𑀲𑁆𑀲𑀺𑀢𑀸. 𑀏𑀓𑀢𑁄𑀧𑀲𑀫𑁆𑀧𑀦𑁆𑀦𑀸𑀧𑀺 𑀲𑀸𑀫𑀜𑁆𑀜𑁂𑀦 𑀕𑀬𑁆𑀳𑀦𑁆𑀢𑀺. 𑀏𑀓𑀢𑁄𑀧𑀲𑀫𑁆𑀧𑀦𑁆𑀦𑀸𑀢𑀺 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀼𑀲𑀗𑁆𑀖𑁂 𑀦 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯, 𑀪𑀺𑀓𑁆𑀔𑀼𑀦𑀻 𑀘 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦 𑀪𑀺𑀓𑁆𑀔𑀼𑀦𑀺𑀪𑀸𑀯𑀧𑁆𑀧𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘.

𑀳𑀺𑀢𑀢𑁆𑀣𑀸𑀬𑀸𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀓𑀭𑀡𑀢𑁆𑀣𑀸𑀬 𑀳𑀺𑀦𑁄𑀢𑀺 𑀕𑀘𑁆𑀙𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀲𑀸𑀥𑀦𑁂 𑀧𑀯𑀢𑁆𑀢𑀢𑀻𑀢𑀺 𑀳𑀺𑀢𑀦𑁆𑀢𑀺 𑀅𑀭𑁄𑀕𑀢𑀸𑀤𑀺𑀓𑀸𑀭𑀡𑀁 𑀅𑀫𑀢𑁄𑀲𑀥𑀸𑀤𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀓𑀸𑀭𑀡𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀭𑀓𑁆𑀔𑀦𑀁 𑀯𑀼𑀘𑁆𑀘𑀢𑀺, 𑀢𑀤𑀢𑁆𑀣𑀸𑀬.

𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀆𑀳𑀺𑀢𑁄 𑀧𑀯𑀢𑁆𑀢𑀺𑀢𑁄 𑀯𑀺𑀦𑀺𑀘𑁆𑀙𑀬𑀫𑀕𑁆𑀕𑁄 𑀏𑀢𑁂𑀦𑀸𑀢𑀺 ‘‘𑀲𑀫𑀸𑀳𑀺𑀢𑁄’’𑀢𑀺 𑀧𑀓𑀭𑀡𑀓𑀸𑀭𑀓𑁄 𑀤𑀲𑁆𑀲𑀺𑀢𑁄. 𑀅𑀣 𑀯𑀸 𑀲𑀫𑁆𑀫𑀸 𑀆𑀳𑀺𑀢𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀞𑀧𑀺𑀢𑀁 𑀧𑀯𑀢𑁆𑀢𑀺𑀢𑀁 𑀘𑀺𑀢𑁆𑀢𑀫𑁂𑀢𑀲𑁆𑀲𑀸𑀢𑀺 ‘‘𑀲𑀫𑀸𑀳𑀺𑀢𑀘𑀺𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀲𑀫𑀸𑀳𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀭𑀫𑀕𑀫𑁆𑀪𑀻𑀭𑀲𑀼𑀤𑀼𑀢𑁆𑀢𑀭𑀯𑀺𑀦𑀬𑀧𑀺𑀝𑀓𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀯𑀢𑁆𑀢𑀦𑀸𑀭𑀳𑀲𑁆𑀲 𑀇𑀫𑀺𑀦𑀸 𑀯𑀺𑀲𑁂𑀲𑀦𑁂𑀦 𑀅𑀢𑁆𑀢𑀦𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁄 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑁄 𑀲𑀫𑀸𑀥𑀺 𑀤𑀲𑁆𑀲𑀺𑀢𑁄 𑀢𑁂𑀦 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀯𑀓𑁆𑀔𑀸𑀫𑀻𑀢𑀺 𑀧𑀓𑀸𑀭𑁂𑀦 𑀯𑀓𑁆𑀔𑀸𑀫𑀺, 𑀬𑁂𑀦 𑀧𑀓𑀸𑀭𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑁂 𑀅𑀚𑁆𑀚𑀢𑀦𑀸 𑀫𑀦𑁆𑀤𑀲𑀢𑀺𑀫𑀢𑀺𑀯𑀻𑀭𑀺𑀬𑀸 𑀧𑀝𑀺𑀧𑀚𑁆𑀚𑀦𑀓𑀸 𑀕𑀫𑁆𑀪𑀻𑀭𑀢𑀭𑀁 ¶ 𑀯𑀺𑀦𑀬𑀧𑀺𑀝𑀓𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀲𑀼𑀔𑁂𑀦 𑀉𑀕𑁆𑀕𑀡𑁆𑀳𑀺𑀢𑀼𑀁, 𑀥𑀸𑀭𑁂𑀢𑀼𑀜𑁆𑀘 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀤𑀺𑀲𑁂𑀦 𑀧𑀓𑀸𑀭𑀯𑀺𑀲𑁂𑀲𑁂𑀦 𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀲𑁂𑀦𑀸𑀢𑀺 𑀲𑀫𑀲𑀦𑀁 𑀲𑀁𑀔𑀺𑀧𑀦𑀁 𑀲𑀫𑀸𑀲𑁄, 𑀢𑁂𑀦, 𑀲𑀁𑀔𑀺𑀢𑁆𑀢𑀭𑀼𑀘𑀺𑀓𑀸𑀦𑀫𑀼𑀕𑁆𑀖𑀸𑀝𑀺𑀢𑀜𑁆𑀜𑀽𑀦𑀁 𑀓𑀢𑀸𑀥𑀺𑀓𑀸𑀭𑀸𑀦𑀁 𑀜𑀸𑀡𑀼𑀢𑁆𑀢𑀭𑀸𑀦𑀁 𑀧𑀼𑀕𑁆𑀕𑀮𑀸𑀦𑀜𑁆𑀘 ¶ 𑀧𑀧𑀜𑁆𑀘𑀪𑀻𑀭𑀼𑀓𑀸𑀦𑀁 𑀕𑀳𑀡𑀥𑀸𑀭𑀡𑁂 𑀫𑀦𑁆𑀤𑀬𑀦𑁆𑀢𑀸𑀦𑀁 𑀫𑀦𑁆𑀤𑀩𑀼𑀤𑁆𑀥𑀻𑀦𑀜𑁆𑀘 𑀉𑀧𑀓𑀸𑀭𑀓𑁂𑀦 𑀦𑀸𑀢𑀺𑀯𑀺𑀢𑁆𑀣𑀸𑀭𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀲𑁆𑀲𑀸𑀢𑀺 𑀯𑀺𑀦𑀬𑀧𑀺𑀝𑀓𑀲𑁆𑀲. 𑀢𑀜𑁆𑀳𑀺 𑁋

‘‘𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸;

𑀯𑀺𑀦𑀬𑀦𑀢𑁄 𑀘𑁂𑀯 𑀓𑀸𑀬𑀯𑀸𑀘𑀸𑀦𑀁;

𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀅𑀬𑀁;

𑀯𑀺𑀦𑀬𑁄 ‘𑀯𑀺𑀦𑀬𑁄’𑀢𑀺 𑀅𑀓𑁆𑀔𑀸𑀢𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑁋

𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑀯𑀺𑀲𑁂𑀲𑁂𑀳𑀺 ‘‘𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀏𑀯𑀁 𑀲𑀦𑁆𑀤𑀲𑁆𑀲𑀺𑀢𑀲𑀪𑀸𑀯𑀲𑁆𑀲 ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀅𑀪𑀺𑀢𑁆𑀣𑀼𑀢𑀕𑀼𑀡𑀲𑁆𑀲 𑀯𑀺𑀦𑀬𑀧𑀺𑀝𑀓𑀼𑀢𑁆𑀢𑀫𑀲𑁆𑀲. 𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀯𑀺𑀲𑁂𑀲𑁂𑀦, 𑀯𑀺𑀯𑀺𑀥𑁂𑀦 𑀯𑀸 𑀆𑀓𑀸𑀭𑁂𑀦 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀦𑀻𑀳𑀭𑀡𑀯𑀲𑁂𑀦 𑀘𑀻𑀬𑀢𑀺 𑀯𑀺𑀪𑀚𑀻𑀬𑀢𑀻𑀢𑀺 ‘‘𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀯𑀺𑀪𑀚𑀦𑀁, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀦𑀸𑀫 𑀧𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀘 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁 ‘‘𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄, 𑀓𑀡𑁆𑀞𑁂𑀓𑀸𑀴𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀏𑀯𑀁 𑀤𑀼𑀢𑀺𑀬𑀕𑀸𑀣𑀸𑀬 𑀓𑀢𑁆𑀢𑀼𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀸𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀧𑀓𑀭𑀡𑀧𑁆𑀧𑀓𑀸𑀭𑁂𑀓𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀲𑀯𑀦𑀓𑀸𑀭𑀡𑀦𑀺𑀤𑀲𑁆𑀲𑀦𑀫𑀼𑀔𑁂𑀦𑀸𑀧𑀺 𑀧𑀓𑀭𑀡𑀧𑁆𑀧𑀓𑀸𑀭𑀸𑀤𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀸𑀓𑀼𑀮’’𑀫𑀺𑀘𑁆𑀘𑀸𑀤𑀺. 𑀢𑀢𑁆𑀣 𑀅𑀦𑀸𑀓𑀼𑀮𑀦𑁆𑀢𑀺 𑀦𑀢𑁆𑀣𑀺 𑀏𑀢𑁆𑀣 𑀲𑀤𑁆𑀤𑀢𑁄, 𑀅𑀢𑁆𑀣𑀢𑁄, 𑀯𑀺𑀦𑀺𑀘𑁆𑀙𑀬𑀢𑁄 𑀯𑀸 𑀆𑀓𑀼𑀮𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄, 𑀫𑀺𑀲𑁆𑀲𑀢𑀸 ¶ 𑀯𑀸𑀢𑀺 𑀅𑀦𑀸𑀓𑀼𑀮𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀯𑀤𑀢𑁄 𑀫𑁂 𑀦𑀺𑀩𑁄𑀥𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀁𑀓𑀺𑀡𑁆𑀡𑀦𑁆𑀢𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁.

𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫𑀦𑁆𑀢𑀺 𑀧𑀤𑀸𑀦𑀁 𑀓𑀫𑁄 𑀧𑀤𑀓𑁆𑀓𑀫𑁄, 𑀧𑀤𑀕𑀢𑀺, 𑀲𑀤𑁆𑀤𑀸𑀦𑀫𑀼𑀘𑁆𑀘𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀫𑀥𑀼𑀭𑁄 𑀅𑀢𑁆𑀣𑁄 𑀘 𑀧𑀤𑀓𑁆𑀓𑀫𑁄 𑀘 𑀬𑀲𑁆𑀲 𑀲𑁄 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫𑁄, 𑀢𑀁 𑁋

‘‘𑀧𑀤𑀸𑀲𑀢𑁆𑀢𑀁 ¶ 𑀧𑀤𑀢𑁆𑀣𑀸𑀦𑀁, 𑀫𑀥𑀼𑀭𑀢𑁆𑀣𑀫𑀼𑀤𑀻𑀭𑀺𑀢𑀁;

𑀬𑁂𑀦 𑀫𑀚𑁆𑀚𑀦𑁆𑀢𑀺 𑀥𑀻𑀫𑀦𑁆𑀢𑁄, 𑀫𑀥𑀼𑀦𑁂𑀯 𑀫𑀥𑀼𑀩𑁆𑀩𑀢𑀸’’𑀢𑀺. 𑁋

𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀤𑁆𑀤𑀸𑀦𑀫𑀢𑁆𑀣𑀸𑀦𑀜𑁆𑀘 𑀯𑀲𑁂𑀦 𑀧𑀤𑀸𑀲𑀢𑁆𑀢𑀸𑀧𑀭𑀦𑀸𑀫𑀥𑁂𑀬𑁆𑀬𑀫𑀸𑀥𑀼𑀭𑀺𑀬𑀸𑀮𑀗𑁆𑀓𑀸𑀭𑁂𑀦 𑀲𑀫𑀮𑀗𑁆𑀓𑀢𑀢𑁆𑀢𑀸 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫𑀁.

𑀧𑀝𑀼𑀪𑀸𑀯𑀓𑀭𑀦𑁆𑀢𑀺 𑀧𑀝𑀢𑀺 𑀕𑀘𑁆𑀙𑀢𑀺 𑀧𑀚𑀸𑀦𑀸𑀢𑀻𑀢𑀺 𑀧𑀝𑀼, 𑀧𑀜𑁆𑀜𑀯𑀸, 𑀧𑀝𑀼𑀦𑁄 𑀪𑀸𑀯𑁄, 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀸 𑀧𑀜𑁆𑀜𑀸, 𑀢𑀁 𑀧𑀝𑀼𑀪𑀸𑀯𑀁 𑀧𑀜𑁆𑀜𑀸𑀯𑀺𑀲𑁂𑀲𑀁 𑀓𑀭𑁄𑀢𑀺 𑀚𑀦𑁂𑀢𑀻𑀢𑀺 𑀧𑀝𑀼𑀪𑀸𑀯𑀓𑀭𑁄, 𑀢𑀁, 𑀧𑀜𑁆𑀜𑀸𑀯𑀺𑀲𑁂𑀲𑀚𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀁 𑀯𑀺𑀦𑀬𑀲𑁆𑀲 𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀫𑀦𑁆𑀢𑀺 𑀉𑀢𑁆𑀢𑀫𑀁. 𑀯𑀺𑀦𑀬𑀓𑁆𑀓𑀫𑁂𑀢𑀺 𑀯𑀺𑀦𑀬𑀧𑀺𑀝𑀓𑁂, 𑀢𑀤𑀢𑁆𑀣𑁂 𑀘, 𑀧𑀯𑀢𑁆𑀢𑀺𑀓𑁆𑀓𑀫𑁂 𑀧𑀝𑀼𑀪𑀸𑀯𑀓𑀭𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀢𑀢𑀺𑀬𑀕𑀸𑀣𑀸𑀬 𑀧𑀓𑀭𑀡𑀕𑀼𑀡𑀸𑀧𑀤𑁂𑀲𑁂𑀦 𑀲𑁄𑀢𑀼𑀚𑀦𑀁 𑀲𑀫𑀼𑀲𑁆𑀲𑀸𑀳𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀧𑀸𑀭’’𑀦𑁆𑀢𑀺𑀆𑀤𑀺𑀘𑀢𑀼𑀢𑁆𑀣𑀕𑀸𑀣𑀸𑀬 𑀧𑀓𑀭𑀡𑀜𑁆𑀘 𑀢𑀦𑁆𑀦𑀺𑀲𑁆𑀲𑀬𑀁 𑀯𑀺𑀦𑀬𑀧𑀺𑀝𑀓𑀜𑁆𑀘 𑀦𑀸𑀯𑀸𑀲𑀸𑀕𑀭𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀺𑀭𑁄𑀪𑀽𑀢𑁄𑀧𑀫𑁂𑀬𑁆𑀬𑁄𑀧𑀫𑀸𑀦𑀪𑁂𑀤𑁂𑀦 𑀭𑀽𑀧𑀓𑀸𑀮𑀗𑁆𑀓𑀸𑀭𑁂𑀦 𑀧𑀓𑀭𑀡𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀲𑁄𑀢𑀼𑀚𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑀺. 𑀢𑀢𑁆𑀣 𑀅𑀧𑀸𑀭𑀦𑁆𑀢𑀺 𑀦𑀢𑁆𑀣𑀺 𑀧𑀸𑀭𑀁 𑀏𑀢𑀲𑁆𑀲𑀸𑀢𑀺 𑀅𑀧𑀸𑀭𑁄, 𑀯𑀺𑀦𑀬𑀲𑀸𑀕𑀭𑁄. 𑀲𑁄 𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼 𑀲𑀸𑀲𑀦𑀁 𑀧𑀲𑀻𑀤𑀺𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑁂 𑀉𑀕𑁆𑀕𑀳𑀡𑀥𑀸𑀭𑀡𑀧𑀝𑀺𑀧𑀸𑀤𑀦𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀅𑀓𑀢𑀸𑀥𑀺𑀓𑀸𑀭𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀤𑀼𑀭𑀥𑀺𑀕𑀫𑀦𑀻𑀬𑀥𑀫𑁆𑀫𑀢𑁆𑀣𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀭𑀺𑀬𑀦𑁆𑀢𑀢𑀸𑀬 ‘‘𑀅𑀧𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺.

𑀑𑀢𑀭𑀦𑁆𑀢𑀸𑀦𑀦𑁆𑀢𑀺 ¶ 𑀲𑀚𑁆𑀛𑀸𑀬𑀦𑀲𑀯𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀅𑀚𑁆𑀛𑁄𑀕𑀸𑀳𑀦𑁆𑀢𑀸𑀦𑀁. 𑀲𑀸𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀪𑀸𑀯𑁂𑀦 𑀲𑀸𑀭𑀪𑀽𑀢𑀸𑀬 𑀅𑀭𑀺𑀬𑀫𑀕𑁆𑀕𑀲𑀫𑁆𑀪𑀸𑀭𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀸 𑀫𑀽𑀮𑀪𑀽𑀢𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀗𑁆𑀔𑀸𑀢𑀲𑀻𑀮𑀲𑀸𑀭𑀧𑁆𑀧𑀓𑀸𑀲𑀓𑀢𑀸𑀬 𑀲𑀸𑀭𑀁. 𑀯𑀺𑀦𑀬𑀲𑀸𑀕𑀭𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀲𑀗𑁆𑀔𑀸𑀢𑀁 𑀲𑀸𑀕𑀭𑀁. 𑀯𑀺𑀦𑀬𑁄 𑀳𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀓𑀸𑀮𑀧𑁆𑀧𑀢𑁆𑀢𑀚𑀸𑀦𑀦𑀲𑁆𑀲𑀸𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀫𑁆𑀧𑀺 𑀅𑀯𑀺𑀲𑀬𑀢𑁆𑀢𑀸 𑀅𑀢𑀺𑀕𑀫𑁆𑀪𑀻𑀭𑀸𑀢𑀺𑀯𑀺𑀢𑁆𑀣𑀺𑀡𑁆𑀡𑀪𑀸𑀯𑁂𑀦 𑀲𑀸𑀕𑀭𑁄 𑀯𑀺𑀬𑀸𑀢𑀺 𑀲𑀸𑀕𑀭𑁄, 𑀯𑀺𑀦𑀬𑁄 𑀘 𑀲𑁄 𑀲𑀸𑀕𑀭𑁄 𑀘𑀸𑀢𑀺 𑀯𑀺𑀦𑀬𑀲𑀸𑀕𑀭𑁄, 𑀢𑀁, 𑀅𑀕𑀸𑀥𑀸𑀧𑀸𑀭𑀕𑀼𑀡𑀬𑁄𑀕𑀢𑁄 𑀲𑀸𑀕𑀭𑁄𑀧𑀫𑀁 𑀯𑀺𑀦𑀬𑀧𑀺𑀝𑀓𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀕𑀸𑀣𑀸𑀬 ‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀳𑀺𑀢𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀢𑁆𑀢𑀸 𑀘 𑀯𑀸𑀓𑁆𑀬𑀦𑁆𑀢𑀭𑁂𑀳𑀺 𑀅𑀦𑁆𑀢𑀭𑀺𑀢𑀪𑀸𑀯𑁂𑀦 𑀤𑀽𑀭𑀢𑁆𑀢𑀸 𑀘 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀏𑀢𑁆𑀣 𑀯𑀺𑀦𑀬𑀲𑀸𑀕𑀭𑀚𑁆𑀛𑁄𑀕𑀸𑀳𑀦𑀢𑀤𑀢𑁆𑀣𑀧𑀝𑀺𑀧𑀚𑁆𑀚𑀦𑀸𑀭𑀳𑀓𑀢𑁆𑀢𑀼𑀯𑀺𑀲𑁂𑀲𑀲𑀦𑁆𑀤𑀲𑁆𑀲𑀦𑀢𑁆𑀣𑀸𑀬 ¶ ‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀯𑀸 𑀯𑀺𑀬 𑀪𑀽𑀢𑁄 𑀦𑀸𑀯𑀸𑀪𑀽𑀢𑁄, 𑀢𑀁, 𑀦𑀸𑀯𑀸𑀝𑁆𑀞𑀸𑀦𑀺𑀬𑀁 𑀫𑀳𑀸𑀦𑀸𑀯𑀸𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀫𑀦𑁄𑀭𑀫𑀦𑁆𑀢𑀺 𑀫𑀦𑁄 𑀭𑀫𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀫𑀦𑁄𑀭𑀫𑁄, 𑀢𑀁, 𑀅𑀚𑁆𑀛𑀸𑀬𑀦𑀯𑁄𑀳𑀸𑀭𑀧𑀲𑀼𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀧𑀭𑀸𑀬𑀦𑀸𑀦𑀜𑁆𑀘 𑀲𑀸𑀥𑀽𑀦𑀁 𑀫𑀦𑁄𑀭𑀫𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀧𑀓𑀭𑀡𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦 𑀲𑁄𑀢𑀼𑀚𑀦𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀇𑀤𑀸𑀦𑀺 𑀲𑀓𑁆𑀓𑀘𑁆𑀘𑀲𑀯𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀯𑀺𑀦𑀬𑀦𑀽𑀧𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀁 𑀅𑀦𑀸𑀓𑀼𑀮𑀢𑀸𑀤𑀺𑀯𑀺𑀯𑀺𑀥𑀸𑀦𑀕𑁆𑀖𑀕𑀼𑀡𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁, 𑀢𑁂𑀦 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀦𑀽𑀧𑀸𑀬𑀦𑁆𑀢𑀺 𑀯𑀺𑀯𑀺𑀥𑀸𑀓𑀸𑀭𑁂𑀦, 𑀯𑀺𑀲𑁂𑀲𑀦𑀬𑀢𑁄 𑀯𑀸 𑀓𑀸𑀬𑀯𑀸𑀘𑀸𑀦𑀁 𑀦𑀬𑀦𑀁 𑀤𑀫𑀦𑀁 𑀅𑀓𑀢𑁆𑀢𑀩𑁆𑀩𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑁂𑀲𑀼 𑀦𑀺𑀬𑁄𑀚𑀦𑀁 𑀯𑀺𑀦𑀬𑀦𑀁, 𑀉𑀧𑁂𑀘𑁆𑀘 𑀢𑀁 𑀨𑀮𑀁 𑀆𑀬𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑀸𑀬𑁄, 𑀳𑁂𑀢𑀼, 𑀯𑀺𑀦𑀬𑀦𑀲𑁆𑀲 𑀉𑀧𑀸𑀬𑁄 𑀯𑀺𑀦𑀬𑀦𑀽𑀧𑀸𑀬𑁄, 𑀢𑀁, 𑀓𑀸𑀬𑀚𑀻𑀯𑀺𑀢𑀸𑀦𑀧𑁂𑀓𑁆𑀔𑀸𑀦𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀓𑀸𑀬𑀯𑀸𑀘𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀯𑀺𑀧𑁆𑀨𑀦𑁆𑀤𑀺𑀢𑀸𑀧𑀦𑀬𑀦𑀲𑀗𑁆𑀔𑀸𑀢𑀤𑀫𑀦𑀲𑁆𑀲 ¶ 𑀓𑀸𑀭𑀡𑀪𑀽𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑀸 𑀓𑀢𑁆𑀢𑀼𑀫𑀺𑀘𑁆𑀙𑀺𑀢𑁂 𑀧𑀓𑀭𑀡𑁂 𑀧𑀡𑁆𑀟𑀺𑀢𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀁 𑀅𑀦𑀸𑀓𑀼𑀮𑀢𑀸𑀤𑀺𑀕𑀼𑀡𑀸𑀦𑀁 𑀯𑀺𑀪𑀸𑀯𑀦𑀯𑀲𑁂𑀦 ‘‘𑀅𑀦𑀸𑀓𑀼𑀮’’𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀓𑁆𑀓𑀘𑁆𑀘𑀲𑀯𑀦𑀸𑀯𑀩𑁄𑀥𑁂 𑀯𑀺𑀲𑀬𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺. 𑀏𑀢𑁆𑀣 𑀘 𑀤𑀼𑀢𑀺𑀬𑀕𑀸𑀣𑀸𑀬 ‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 ‘‘𑀧𑀯𑀓𑁆𑀔𑀸𑀫𑀻’’𑀢𑀺 𑀓𑀺𑀭𑀺𑀬𑀸𑀬 𑀓𑀫𑁆𑀫𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀁 𑀇𑀥 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀬𑀫𑀸𑀦𑀫𑁆𑀧𑀺 𑀤𑀽𑀭𑀲𑀫𑁆𑀩𑀦𑁆𑀥𑀁 𑀳𑁄𑀢𑀻𑀢𑀺 𑀢𑀫𑀦𑀸𑀦𑁂𑀢𑁆𑀯𑀸 ‘‘𑀦𑀺𑀩𑁄𑀥𑀣𑀸’’𑀢𑀺 𑀇𑀫𑀺𑀲𑁆𑀲𑀸 𑀓𑀺𑀭𑀺𑀬𑀸𑀬 𑀓𑀫𑁆𑀫𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀯𑀺𑀯𑀺𑀥𑁂 𑀆𑀭𑀫𑁆𑀫𑀡𑁂 𑀔𑀺𑀢𑁆𑀢𑀁 𑀧𑁂𑀲𑀺𑀢𑀁 𑀯𑀺𑀓𑁆𑀔𑀺𑀢𑁆𑀢𑀁, 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀭𑁂𑀢𑀁 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁, 𑀦 𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀢𑀧𑁆𑀧𑀝𑀺𑀧𑀓𑁆𑀔𑀁 𑀲𑀫𑀸𑀳𑀺𑀢𑀁 𑀓𑀼𑀲𑀮𑀘𑀺𑀢𑁆𑀢𑀁, 𑀢𑁂𑀦, 𑀏𑀢𑀲𑁆𑀲 𑀧𑀓𑀭𑀡𑀼𑀢𑁆𑀢𑀫𑀲𑁆𑀲 𑀲𑀯𑀦𑀸𑀤𑀺𑀩𑁆𑀬𑀸𑀧𑀸𑀭𑀁 𑀯𑀺𑀦𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀯𑀺𑀓𑁆𑀔𑁂𑀧𑀫𑀦𑀸𑀧𑀦𑁆𑀦𑁂𑀦 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀺𑀓𑁆𑀔𑀺𑀢𑁆𑀢𑁂𑀦…𑀧𑁂… 𑀦𑀺𑀩𑁄𑀥𑀣𑀸’’𑀢𑀺 𑀯𑀤𑀦𑁆𑀢𑁂𑀦 𑀘 ‘‘𑀅𑀯𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀯𑀺𑀓𑁆𑀔𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀯𑀺𑀓𑁆𑀔𑀺𑀢𑁆𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸𑀪𑀸𑀯𑀢𑁄 𑀅𑀢𑁆𑀢𑀦𑁄 𑀧𑀓𑀭𑀡𑀢𑁆𑀣𑀪𑀽𑀢𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀸𑀧𑀤𑁂𑀲𑁄 𑀓𑀢𑁄 𑀳𑁄𑀢𑀺.

𑀯𑀤𑀢𑁄 ¶ 𑀫𑁂𑀢𑀺 𑀏𑀢𑁆𑀣 ‘‘𑀕𑀸𑀭𑀯𑁂𑀦 𑀘𑀸’’𑀢𑀺 𑀧𑀸𑀞𑀲𑁂𑀲𑁄. 𑀢𑀢𑁆𑀣𑀸𑀬𑀫𑀢𑁆𑀣𑁄 𑁋 𑀪𑀸𑀲𑀫𑀸𑀦𑁂 𑀫𑀬𑀺 𑀕𑀸𑀭𑀯𑁂𑀦, 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀘𑀸𑀢𑀺 𑀲𑀸𑀫𑀺𑀪𑀼𑀫𑁆𑀫𑀸𑀦𑀫𑀯𑀺𑀲𑁂𑀲𑀢𑀸𑀬 ‘‘𑀫𑁂’’𑀢𑀺 𑀲𑀸𑀫𑀺𑀯𑀘𑀦𑀲𑁆𑀲 ‘‘𑀫𑀬𑀻’’𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀓𑀭𑀡𑀲𑁆𑀲 𑀅𑀦𑀸𑀓𑀼𑀮𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀯𑀢𑁆𑀢𑀭𑀺 𑀫𑀬𑀺 𑀕𑀸𑀭𑀯𑁂𑀦 𑀘 𑀲𑀫𑀸𑀳𑀺𑀢𑁂𑀦 𑀘𑁂𑀢𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀩𑁄𑀥𑀣𑀸𑀢𑀺 𑀯𑀸𑀓𑁆𑀬𑀢𑁆𑀣𑀧𑀤𑀢𑁆𑀣𑀁 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀪𑀸𑀯𑀢𑁆𑀣𑀸𑀤𑀺𑀯𑀲𑁂𑀦 ¶ 𑀦𑀺𑀲𑁂𑀲𑀢𑁄 𑀩𑁄𑀥𑀣, 𑀲𑀓𑁆𑀓𑀘𑁆𑀘𑀁 𑀲𑀼𑀢𑁆𑀯𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀩𑀼𑀚𑁆𑀛𑀣 𑀯𑀺𑀚𑀸𑀦𑀸𑀣𑀸𑀢𑀺 𑀅𑀢𑁆𑀣𑁄, 𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑀜𑀸𑀡𑀸𑀦𑀁 𑀫𑀽𑀮𑀪𑀽𑀢𑀧𑀓𑀭𑀡𑀯𑀺𑀲𑀬𑀁 𑀲𑀼𑀢𑀫𑀬𑀜𑀸𑀡𑀁 𑀦𑀺𑀧𑁆𑀨𑀸𑀤𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁄

𑀧𑀸𑀭𑀸𑀚𑀺𑀓𑀓𑀣𑀸

𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁬. 𑀏𑀯𑀁 ¶ 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀺𑀯𑀺𑀥𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀢𑀺𑀯𑀺𑀥𑁂’’𑀢𑀺𑀆𑀤𑀺𑀦𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺. 𑀢𑀺𑀯𑀺𑀥𑁂𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀫𑀼𑀔𑀫𑀕𑁆𑀕𑀸𑀦𑀁 𑀯𑀲𑁂𑀦 𑀢𑀺𑀧𑁆𑀧𑀓𑀸𑀭𑁂 𑀫𑀕𑁆𑀕𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀺𑀮𑀫𑀢𑁆𑀢𑀫𑁆𑀧𑀻𑀢𑀺 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑁂𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀸𑀦𑀁 𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀢𑀸𑀬, 𑀅𑀦𑁆𑀦𑀧𑀸𑀦𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀦𑀁 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀢𑀸𑀬 𑀘 𑀫𑀕𑁆𑀕𑀯𑁄𑀳𑀸𑀭𑀕𑀢𑁂 𑀲𑀭𑀻𑀭𑀧𑁆𑀧𑀤𑁂𑀲𑁂, 𑀅𑀮𑁆𑀮𑁄𑀓𑀸𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀕𑁆𑀕𑁂𑀲𑀼 𑀢𑀺𑀮𑀫𑀢𑁆𑀢𑀫𑁆𑀧𑀺, 𑀢𑀻𑀲𑀼 𑀲𑁂𑀯𑀦𑀘𑁂𑀢𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 ‘‘𑀢𑀺𑀯𑀺𑀥𑁂’’𑀢𑀺 𑀧𑀓𑀸𑀭𑀯𑀸𑀘𑀺𑀯𑀺𑀥𑀲𑀤𑁆𑀤𑁄𑀧𑀸𑀤𑀸𑀦𑁂𑀦 𑀲𑀚𑀸𑀢𑀺𑀲𑀗𑁆𑀕𑀳𑀯𑀲𑁂𑀦 𑀢𑀻𑀳𑀺 𑀭𑀸𑀲𑀻𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀧𑀪𑁂𑀤𑀯𑀲𑁂𑀦 𑀢𑀺𑀁𑀲𑀯𑀺𑀥𑁄 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀲𑁂𑀬𑁆𑀬𑀣𑀺𑀤𑀁? 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀫𑀼𑀔𑀸𑀤𑀺𑀫𑀕𑁆𑀕𑀸𑀦𑀁 𑀦𑀺𑀲𑁆𑀲𑀬𑀪𑀽𑀢𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀫𑀦𑀼𑀲𑁆𑀲𑀺𑀢𑁆𑀣𑀻 ¶ 𑀅𑀫𑀦𑀼𑀲𑁆𑀲𑀺𑀢𑁆𑀣𑀻 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬) 𑀦𑀬𑁂𑀦 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁 𑀧𑀘𑁆𑀘𑁂𑀓𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀦𑀯 𑀫𑀕𑁆𑀕𑀸, 𑀢𑀣𑁂𑀯 𑀤𑀲𑁆𑀲𑀺𑀢𑀸𑀦𑀁 𑀢𑀺𑀡𑁆𑀡𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀯𑀲𑁂𑀦 𑀦𑀯 𑀫𑀕𑁆𑀕𑀸, 𑀢𑀺𑀡𑁆𑀡𑀁 𑀧𑀦 𑀧𑀡𑁆𑀟𑀓𑀸𑀦𑀁 𑀫𑀼𑀔𑀫𑀕𑁆𑀕𑀯𑀘𑁆𑀘𑀫𑀕𑁆𑀕𑀸𑀦𑀁 𑀯𑀲𑁂𑀦 𑀧𑀘𑁆𑀘𑁂𑀓𑀁 𑀤𑁆𑀯𑁂 𑀤𑁆𑀯𑁂 𑀫𑀕𑁆𑀕𑀸𑀢𑀺 𑀙 𑀫𑀕𑁆𑀕𑀸, 𑀢𑀣𑀸 𑀢𑀺𑀡𑁆𑀡𑀁 𑀧𑀦 𑀧𑀼𑀭𑀺𑀲𑀸𑀦𑀦𑁆𑀢𑀺 𑀏𑀯𑀁 𑀢𑀺𑀁𑀲𑀯𑀺𑀥𑁄 𑀳𑁄𑀢𑀺.

𑀲𑁂𑀯𑀦𑀘𑁂𑀢𑀦𑁄𑀢𑀺 𑀲𑁂𑀯𑀦𑁂 𑀫𑁂𑀣𑀼𑀦𑀧𑀬𑁄𑀕𑁂 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀫𑁂𑀣𑀼𑀦𑀭𑀸𑀕𑀽𑀧𑀲𑀁𑀳𑀺𑀢𑀸𑀬 𑀘𑁂𑀢𑀦𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 ¶ 𑀅𑀢𑁆𑀣𑁄. 𑀅𑀮𑁆𑀮𑁄𑀓𑀸𑀲𑁂𑀢𑀺 𑀢𑀺𑀁𑀲𑀫𑀕𑁆𑀕𑀸𑀦𑀫𑀜𑁆𑀜𑀢𑀭𑁂 𑀫𑀕𑁆𑀕𑁂 𑀧𑀓𑀢𑀺𑀯𑀸𑀢𑁂𑀦 𑀅𑀲𑀁𑀨𑀼𑀝𑁆𑀞𑁂 𑀅𑀮𑁆𑀮𑀧𑀤𑁂𑀲𑁂, 𑀇𑀫𑀺𑀦𑀸 𑀩𑀸𑀳𑀺𑀭𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀺𑀲𑁂𑀲𑀦𑀲𑁆𑀲 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀤𑀼𑀢𑀺𑀬𑀕𑀸𑀣𑀸𑀬 ‘‘𑀲𑀲𑀺𑀓𑁆𑀔𑁄 𑀲𑁄’’𑀢𑀺 𑀧𑀤𑀤𑁆𑀯𑀬𑀁 𑀆𑀳𑀭𑀺𑀢𑁆𑀯𑀸 ‘‘𑀲𑁂𑀯𑀦𑀘𑁂𑀢𑀦𑁄 𑀲𑀲𑀺𑀓𑁆𑀔𑁄 𑀲𑁄 𑀪𑀺𑀓𑁆𑀔𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀅𑀗𑁆𑀕𑁂 𑀲𑀭𑀻𑀭𑁂 𑀚𑀸𑀢𑀦𑁆𑀢𑀺 𑀅𑀗𑁆𑀕𑀚𑀸𑀢𑀁, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁. 𑀲𑀢𑀺𑀧𑀺 𑀅𑀯𑀲𑁂𑀲𑀲𑀭𑀻𑀭𑀸𑀯𑀬𑀯𑀸𑀦𑀁 𑀢𑀣𑀸𑀪𑀸𑀯𑁂 𑀭𑀼𑀴𑁆𑀳𑀺𑀯𑀲𑁂𑀦 𑀢𑀤𑁂𑀯 𑀢𑀣𑀸 𑀯𑀼𑀢𑁆𑀢𑀁. 𑀧𑀯𑁂𑀲𑁂𑀦𑁆𑀢𑁄𑀢𑀺 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀓𑀸𑀬𑀺𑀓𑀓𑀺𑀭𑀺𑀬𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄. 𑀧𑀭𑀸𑀚𑀺𑀢𑁄𑀢𑀺 𑀤𑀼𑀮𑁆𑀮𑀪𑀸𑀬 𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀩𑁆𑀩𑀢𑁄 𑀤𑀼𑀮𑁆𑀮𑀪𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺𑀲𑀼𑀔𑀢𑁄 𑀧𑀭𑀺𑀳𑀸𑀧𑁂𑀢𑁆𑀯𑀸 𑀓𑀺𑀮𑁂𑀲𑀲𑀧𑀢𑁆𑀢𑁂𑀳𑀺 𑀧𑀭𑀸𑀚𑀬𑀫𑀸𑀧𑀸𑀤𑀺𑀢𑁄𑀢𑀺 𑀅𑀢𑁆𑀣𑁄.

𑀅𑀬𑀫𑁂𑀢𑁆𑀣 𑀬𑁄𑀚𑀦𑀸 𑁋 𑀲𑀲𑀺𑀓𑁆𑀔𑁄 𑀲𑁂𑀯𑀦𑀘𑁂𑀢𑀦𑁄 𑀢𑀺𑀯𑀺𑀥𑁂 𑀫𑀕𑁆𑀕𑁂 𑀅𑀮𑁆𑀮𑁄𑀓𑀸𑀲𑁂 𑀅𑀗𑁆𑀕𑀚𑀸𑀢𑀁 𑀢𑀺𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑁄 𑀲𑁄 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁪𑁪) 𑁋

𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁭. 𑀏𑀯𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 (𑀧𑀸𑀭𑀸. 𑁫𑁮) 𑀅𑀗𑁆𑀕𑀚𑀸𑀢𑁂 ¶ 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑁄𑀧𑀓𑁆𑀓𑀫𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀯𑁂𑀲𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀯𑁂𑀲𑀦𑀦𑁆𑀢𑀺 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀲𑀼𑀢𑁆𑀢𑀧𑀫𑀢𑁆𑀢𑀸𑀤𑀺𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀫𑀜𑁆𑀜𑀢𑀭𑀁 𑀆𑀦𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀫𑀕𑁆𑀕𑀸𑀦𑀫𑀜𑁆𑀜𑀢𑀭𑀁 ¶ 𑀫𑀕𑁆𑀕𑀁 𑀬𑀣𑀸 𑀧𑀯𑀺𑀲𑀢𑀺, 𑀢𑀣𑀸 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀸𑀧𑀦𑁂 𑀲𑀫𑁆𑀪𑀯𑀦𑁆𑀢𑀁 𑀫𑀕𑁆𑀕𑀧𑁆𑀧𑀯𑁂𑀲𑀦𑀫𑀸𑀳. 𑀧𑀯𑁂𑀲𑀦𑀁 𑀲𑀸𑀤𑀺𑀬𑀦𑁆𑀢𑁄 𑀲𑀲𑀺𑀓𑁆𑀔𑁄 𑀲𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺 𑀅𑀥𑀺𑀯𑀸𑀲𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁮) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀅𑀕𑁆𑀕𑀢𑁄 𑀬𑀸𑀯 𑀫𑀽𑀮𑀁 𑀧𑀯𑁂𑀲𑁂𑀦𑁆𑀢𑁂𑀲𑀼 𑀅𑀲𑁆𑀲𑀸𑀤𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀢𑀗𑁆𑀔𑀡𑁂𑀬𑁂𑀯 𑀲𑀸𑀲𑀦𑀢𑁄 𑀘𑀼𑀢𑁄𑀢𑀺 𑀅𑀢𑁆𑀣𑁄. 𑀧𑀯𑀺𑀝𑁆𑀞𑀦𑁆𑀢𑀺𑀆𑀤𑀻𑀲𑀼 𑀧𑀤𑁂𑀲𑀼𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸.

𑀧𑀯𑀺𑀝𑁆𑀞𑀦𑁆𑀢𑀺 𑀧𑀯𑀺𑀝𑁆𑀞𑀓𑁆𑀔𑀡𑁄. ‘‘𑀧𑀯𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀢𑀸𑀬 𑀢𑀸𑀬 𑀓𑀺𑀭𑀺𑀬𑀸𑀬 𑀉𑀧𑀮𑀓𑁆𑀔𑀺𑀢𑁄 𑀔𑀡𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯𑁂𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀞𑀺𑀢𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁂’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀲𑀩𑁆𑀩𑀣𑀸 𑀩𑁆𑀬𑀸𑀧𑀸𑀭𑀭𑀳𑀺𑀢𑀁 𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀧𑀯𑀺𑀝𑁆𑀞𑀲𑁆𑀲 𑀘 𑀬𑀸𑀯 𑀉𑀤𑁆𑀥𑀭𑀡𑀸𑀭𑀫𑁆𑀪𑁄, 𑀢𑀸𑀯 𑀲𑀫𑁆𑀪𑀯𑀦𑁆𑀢𑁄 𑀞𑀺𑀢𑀓𑀸𑀮𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀉𑀤𑁆𑀥𑀭𑀡𑀦𑁆𑀢𑀺 𑀦𑀻𑀳𑀭𑀡𑀓𑀸𑀮𑁄.

𑀯𑀸𑀢𑀺 𑀯𑀺𑀓𑀧𑁆𑀧𑁂, 𑀅𑀧𑀻𑀢𑀺 𑀲𑀫𑀼𑀘𑁆𑀘𑀬𑁂, 𑀲𑁄 𑀯𑀸-𑀲𑀤𑁆𑀤𑁂𑀦 𑀯𑀺𑀓𑀧𑁆𑀧𑀺𑀢𑀸𑀦𑀁 𑀧𑀓𑁆𑀔𑀸𑀦𑀁 𑀢𑀼𑀮𑁆𑀬𑀩𑀮𑀢𑀁 𑀚𑁄𑀢𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺𑀧𑀺 ‘‘𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁮) 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀮𑀩𑁆𑀪𑀫𑀸𑀦𑀁 𑀧𑀯𑁂𑀲𑀦𑀸𑀤𑀺𑀏𑀓𑀓𑁆𑀔𑀡𑀫𑁆𑀧𑀺 𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀫𑀸𑀦𑀁 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑀺. 𑀲𑀲𑀺𑀓𑁆𑀔𑁄𑀢𑀺 𑀲𑀺𑀓𑁆𑀔𑀸𑀬 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀲𑀺𑀓𑁆𑀔𑁄, 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀲𑀸𑀤𑀺𑀬𑀦𑁆𑀢𑁄𑀢𑀺 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄. 𑀲𑁄 𑀪𑀺𑀓𑁆𑀔𑀼. 𑀞𑀧𑁂𑀢𑁆𑀯𑀸 𑀓𑀺𑀭𑀺𑀬𑀦𑁆𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑀦𑀁 𑀯𑀺𑀦𑀸. 𑀘𑀼𑀢𑁄𑀢𑀺 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀓𑀢𑀫𑀺𑀤𑀁, 𑀦 𑀫𑀬𑀸’’𑀢𑀺 𑀮𑁂𑀲𑁂𑀦 𑀦 𑀫𑀼𑀘𑁆𑀘𑀢𑀺, 𑀲𑀸𑀤𑀺𑀬𑀦𑀘𑀺𑀢𑁆𑀢𑁂 𑀲𑀢𑀺 𑀲𑀸𑀲𑀦𑀢𑁄 𑀘𑀼𑀢𑁄𑀬𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 ¶ 𑀘 𑀲𑀲𑀺𑀓𑁆𑀔𑁄𑀢𑀺 𑀇𑀤𑀁 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 (𑀧𑀸𑀭𑀸. 𑁪𑁪) 𑀲𑀺𑀓𑁆𑀔𑀸𑀧𑀤𑀧𑀸𑀞𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁪𑁫), 𑀢𑀤𑀝𑁆𑀞𑀓𑀣𑀸𑀬 𑀘 𑀯𑀺𑀪𑀢𑁆𑀢𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦𑁂𑀯 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀤𑀯𑀸 𑀯𑀸 𑀭𑀯𑀸 𑀯𑀸 𑀯𑀤𑀦𑁆𑀢𑀲𑁆𑀲. 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀣𑀸 ¶ ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀘𑀢𑀼𑀤𑁆𑀤𑀲𑀦𑁆𑀦𑀁, ‘‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀺, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄, 𑀢𑀺𑀢𑁆𑀣𑀺𑀬𑁄, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄, 𑀅𑀲𑁆𑀲𑀫𑀡𑁄, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀕𑀺𑀳𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀩𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑁂𑀯𑀘𑀦𑀲𑁆𑀲 𑀯𑀲𑁂𑀦 𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀯𑀤𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀲𑁆𑀲. 𑀏𑀯𑀁 𑀔𑁂𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀢𑁆𑀣 𑀬𑀤𑁂𑀢𑀁 ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘 ‘‘𑀫𑀁 𑀥𑀸𑀭𑁂𑀳𑀻’’𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁, 𑀬𑀸𑀦𑀺 𑀘 ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀓𑀺𑀁 𑀦𑀼 𑀫𑁂 𑀩𑀼𑀤𑁆𑀥𑁂𑀦, 𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦, 𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀔𑁆𑀬𑀸𑀢𑀯𑀲𑁂𑀦 𑀓𑀸𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 ‘‘𑀅𑀮𑀁 𑀫𑁂’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑁂𑀲𑀁𑀬𑁂𑀯 𑀲𑀯𑁂𑀯𑀘𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 ‘‘𑀧𑀘𑁆𑀘𑀓𑁆𑀔𑀸𑀲𑀺’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀯𑀸 ¶ ‘‘𑀫𑀁 𑀥𑀸𑀭𑁂𑀲𑀻’’𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑁆𑀲𑀢𑀻’’𑀢𑀺 𑀯𑀸 ‘‘𑀬𑀁 𑀦𑀽𑀦𑀸𑀳𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀺 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀘𑁂𑀯 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦 𑀘 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀬𑁄𑀕𑁄 𑀧𑀦 𑀤𑀼𑀯𑀺𑀥𑁄 𑀓𑀸𑀬𑀺𑀓𑁄 𑀘 𑀯𑀸𑀘𑀲𑀺𑀓𑁄 𑀘. 𑀢𑀢𑁆𑀣 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀅𑀓𑁆𑀔𑀭𑀮𑀺𑀔𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀁 𑀯𑀸 𑀓𑀸𑀬𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀏𑀯𑀁 𑀯𑀸𑀘𑀲𑀺𑀓𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀼𑀕𑁆𑀕𑀮𑁄 𑀧𑀦 𑀤𑀼𑀯𑀺𑀥𑁄 𑀬𑁄 𑀘 𑀧𑀘𑁆𑀘𑀓𑁆𑀔𑀸𑀢𑀺, 𑀬𑀲𑁆𑀲 𑀘 𑀧𑀘𑁆𑀘𑀓𑁆𑀔𑀸𑀢𑀺. 𑀢𑀢𑁆𑀣 𑀬𑁄 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄 𑀦 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀦 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄, 𑀲𑀫𑁆𑀫𑀼𑀔𑀻𑀪𑀽𑀢𑁄 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺. 𑀦 𑀳𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑀦𑀁 𑀭𑀼𑀳𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀯𑀺𑀚𑀸𑀦𑀦𑀫𑁆𑀧𑀺 ¶ 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀬𑀲𑁆𑀲, 𑀬𑁂𑀲𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 ‘‘𑀇𑀫𑀲𑁆𑀲, 𑀇𑀫𑁂𑀲𑀁 𑀯𑀸 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺. 𑀲𑀘𑁂 𑀢𑁂 𑀬𑀣𑀸 𑀧𑀓𑀢𑀺𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀬𑁂 𑀚𑀸𑀦𑀦𑁆𑀢𑀺, 𑀏𑀯𑀁 𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀢𑀲𑁆𑀲 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀢𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀚𑀸𑀦𑀦𑁆𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀦 𑀲𑀘𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀯𑀘𑀦𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀯𑀺𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 ¶ 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀬𑁄 𑀧𑀦 𑀅𑀦𑁆𑀢𑀫𑀲𑁄 𑀤𑀯𑀸𑀬𑀧𑀺 𑀧𑀘𑁆𑀘𑀓𑁆𑀔𑀸𑀢𑀺, 𑀢𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸.

𑀇𑀢𑀺 𑀇𑀫𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀘𑀺𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑁄 ‘‘𑀲𑀲𑀺𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄.

𑁮-𑁧𑁦. ‘‘𑀇𑀤𑀸𑀦𑀺 𑀲𑀦𑁆𑀣𑀢𑁂𑀦 𑀲𑀦𑁆𑀣𑀢𑀲𑁆𑀲 𑀖𑀝𑁆𑀝𑀦𑁂 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀸𑀪𑀸𑀯𑀢𑁄 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑀓𑀧𑁆𑀧𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦, 𑀧𑀲𑁆𑀲𑀸𑀯𑀫𑀕𑁆𑀕𑁂𑀦, 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁧) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑀦𑁆𑀣𑀢𑀯𑀸𑀭𑀸𑀦𑀫𑀢𑁆𑀣𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳 ‘‘𑀲𑀦𑁆𑀣𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀦𑁆𑀣𑀢𑁂𑀦𑀸𑀢𑀺 𑀘𑀫𑁆𑀫𑀘𑁄𑀴𑀢𑀺𑀧𑀼𑀧𑀝𑁆𑀝𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑁂𑀦. ‘‘𑀧𑀯𑁂𑀲𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀦𑁆𑀣𑀢𑀯𑀸𑀭𑀲𑁆𑀲 𑀧𑀭𑁄𑀧𑀓𑁆𑀓𑀫𑀁 𑀦𑀺𑀲𑁆𑀲𑀸𑀬 𑀤𑀲𑁆𑀲𑀦𑀫𑀼𑀧𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑁂𑀧𑀺 𑀬𑁄𑀚𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀲 𑀯𑀓𑁆𑀔𑀫𑀸𑀦𑁂𑀦 ‘‘𑀧𑀭𑀸𑀚𑀺𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 𑀧𑀯𑁂𑀲𑁂𑀦𑁆𑀢𑁄𑀢𑀺𑀆𑀤𑀺𑀧𑁆𑀧𑀓𑀸𑀭𑀁 𑀧𑀭𑀸𑀫𑀲𑀢𑀺.

𑀏𑀯𑀁 𑀧𑀯𑁂𑀲𑁂𑀦𑁆𑀢𑁄 𑀓𑀤𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀸𑀤𑀺𑀦𑁆𑀦𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀉𑀧𑀸𑀤𑀺𑀦𑁆𑀦𑁂𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀅𑀢𑁆𑀢𑀦𑁄 𑀨𑀮𑀪𑀸𑀯𑁂𑀦𑁂𑀯 𑀆𑀤𑀺𑀦𑁆𑀦𑀁 𑀕𑀳𑀺𑀢𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀁, 𑀏𑀢𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀲𑁆𑀲, 𑀯𑀢𑁆𑀣𑀼𑀧𑀼𑀕𑁆𑀕𑀮𑀸𑀦𑀁 𑀫𑀕𑁆𑀕𑀲𑁆𑀲 𑀘 𑀖𑀝𑁆𑀝𑀦𑀝𑁆𑀞𑀸𑀦𑀕𑀢𑀁 𑀓𑀸𑀬𑀧𑁆𑀧𑀲𑀸𑀤𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸𑀯 𑀅𑀗𑁆𑀕𑀚𑀸𑀢𑀕𑀢𑀁 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀘𑀫𑁆𑀫𑀔𑀺𑀮𑀁, 𑀧𑀺𑀴𑀓𑀸𑀤𑀺 𑀘 𑀕𑀳𑁂𑀢𑀩𑁆𑀩𑀁. ‘‘𑀉𑀧𑀸𑀤𑀺𑀦𑁆𑀦𑀓𑀁 𑀦𑀸𑀫 𑀓𑀸𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 ‘‘𑀅𑀦𑀼𑀧𑀸𑀤𑀺𑀦𑁆𑀦𑀓’’𑀦𑁆𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀁 𑀘𑁄𑀴𑀸𑀤𑀺 𑀯𑀼𑀢𑁆𑀢𑀁. 𑀉𑀧𑀸𑀤𑀺𑀦𑁆𑀦𑁂𑀦 𑀉𑀧𑀸𑀤𑀺𑀦𑁆𑀦𑁂, 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀖𑀝𑁆𑀝𑀺𑀢𑁂, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 ¶ 𑀯𑀸 𑀉𑀧𑀸𑀤𑀺𑀦𑁆𑀦𑁂 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 ¶ 𑀖𑀝𑁆𑀝𑀺𑀢𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀓𑀭𑀡𑀯𑀘𑀦𑀦𑁆𑀢𑀸𑀦𑀺 𑀧𑀤𑀸𑀦𑀺 ‘‘𑀅𑀗𑁆𑀕𑀚𑀸𑀢𑁂𑀦𑀸’’𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀸𑀦𑀺.

𑀏𑀢𑁆𑀢𑀸𑀯𑀢𑀸 𑀲𑀦𑁆𑀣𑀢𑀘𑀢𑀼𑀓𑁆𑀓𑀯𑀲𑁂𑀦 𑀅𑀢𑁆𑀢𑀽𑀧𑀓𑁆𑀓𑀫𑁂 𑀲𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀽𑀧𑀓𑁆𑀓𑀫𑁂𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼. 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀧𑀯𑀺𑀝𑁆𑀞𑁂 𑀢𑀽𑀢𑀺 𑀏𑀢𑁆𑀣 𑀢𑀼-𑀲𑀤𑁆𑀤𑁂𑀦 𑀧𑀯𑁂𑀲𑀦𑀝𑁆𑀞𑀺𑀢𑀼𑀤𑁆𑀥𑀸𑀭𑀓𑁆𑀔𑀡𑀢𑁆𑀢𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀢𑁆𑀢𑀸 𑀳𑀺 ‘‘𑀲𑁄’’𑀢𑀺 𑀢𑀁-𑀲𑀤𑁆𑀤𑁄𑀧𑀸𑀤𑀸𑀦𑁂 ‘‘𑀬𑁄’’𑀢𑀺 𑀬𑀁-𑀲𑀤𑁆𑀤𑁄𑀧𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄, 𑀲𑀸𑀫𑀢𑁆𑀣𑀺𑀬𑁂𑀦 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀅𑀧𑀺𑀲𑀤𑁆𑀤𑁄 𑀘. 𑀅𑀬𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀆𑀦𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀸𑀧𑀺𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀁 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑀫𑀕𑁆𑀕𑀲𑀗𑁆𑀔𑀸𑀢𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀧𑀯𑀺𑀝𑁆𑀞𑁂 𑀯𑀸 𑀢𑀼-𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀧𑀯𑁂𑀲𑀦𑀝𑁆𑀞𑀺𑀢𑀼𑀤𑁆𑀥𑀸𑀭𑀸𑀦𑀫𑀜𑁆𑀜𑀢𑀭𑀓𑁆𑀔𑀡𑁂 𑀯𑀸 𑀲𑀘𑁂 𑀬𑁄 𑀲𑀸𑀤𑀺𑀬𑀢𑀺, 𑀲𑀧𑁆𑀧𑀫𑀼𑀔𑀸𑀤𑀺𑀧𑁆𑀧𑀯𑁂𑀲𑀦𑀓𑀸𑀮𑁂 𑀯𑀺𑀬 𑀅𑀦𑀼𑀢𑁆𑀢𑀲𑀺𑀢𑁆𑀯𑀸 𑀓𑀸𑀫𑀭𑀸𑀕𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀬𑀤𑀺 𑀲𑀸𑀤𑀺𑀬𑀢𑀺, 𑀲𑁄𑀧𑀺 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀘𑁂 𑀲𑀸𑀤𑀺𑀬𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀲𑀗𑁆𑀓𑀯𑀘𑀦𑁂𑀦 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀲𑀽𑀘𑀺𑀢𑀁 𑀳𑁄𑀢𑀺.

‘‘𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀩𑁆𑀬𑀯𑀘𑁆𑀙𑀺𑀦𑁆𑀦𑁂 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀓𑀧𑁆𑀧𑁂 𑀲𑀫𑁆𑀪𑀯𑀦𑁆𑀢𑀺𑀬𑁄 𑀇𑀢𑀭𑀸𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀔𑁂𑀢𑁆𑀢𑁂’’𑀢𑀺𑀆𑀤𑀺. ‘‘𑀏𑀢𑁆𑀣𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. ‘‘𑀔𑁂𑀢𑁆𑀢𑁂’’𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀧𑀺 𑀳𑁂𑀝𑁆𑀞𑀸 ‘‘𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸, 𑀉𑀧𑀭𑀺𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀜𑁆𑀘 𑀯𑀺𑀥𑀻𑀬𑀫𑀸𑀦𑀢𑁆𑀢𑀸 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀸𑀬 𑀲𑀸𑀫𑀢𑁆𑀣𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀔𑁂𑀢𑁆𑀢𑁂𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. ‘‘𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀲𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀫𑀸𑀦𑁂𑀲𑀼 𑀚𑀻𑀯𑀫𑀸𑀦𑀓𑀲𑀭𑀻𑀭𑀕𑀢𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑁂𑀲𑀼 ¶ 𑀤𑁆𑀯𑀻𑀲𑀼 𑀔𑁂𑀢𑁆𑀢𑁂𑀲𑀼 ‘‘𑀲𑀦𑁆𑀣𑀢𑀸𑀤𑀺𑀦𑀸 𑀲𑀦𑁆𑀣𑀢𑀸𑀤𑀺𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀉𑀧𑀸𑀤𑀺𑀦𑁆𑀦𑀸𑀤𑀻𑀳𑀺 𑀉𑀧𑀸𑀤𑀺𑀦𑁆𑀦𑀸𑀤𑀻𑀦𑀁 𑀖𑀝𑁆𑀝𑀦𑁂 𑀅𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀯𑀼𑀢𑁆𑀢𑀲𑀩𑁆𑀩𑀯𑀺𑀓𑀧𑁆𑀧𑁂 𑀏𑀢𑁆𑀣 𑀬𑁄𑀚𑁂𑀦𑁆𑀢𑁂𑀳𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁 𑁋 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀲𑀦𑁆𑀣𑀢𑁂𑀦 𑀯𑀸 𑀅𑀲𑀦𑁆𑀣𑀢𑁂𑀦 𑀯𑀸 𑀅𑀗𑁆𑀕𑀚𑀸𑀢𑁂𑀦 𑀲𑁂𑀯𑀦𑁆𑀢𑀲𑁆𑀲 𑀉𑀧𑀸𑀤𑀺𑀦𑁆𑀦𑁂 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑁂 𑀯𑀸 𑀉𑀧𑀸𑀤𑀺𑀦𑁆𑀦𑁂𑀦, 𑀢𑀣𑀸 𑀅𑀦𑀼𑀧𑀸𑀤𑀺𑀦𑁆𑀦𑁂𑀦 𑀯𑀸 𑀖𑀝𑁆𑀝𑀺𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲 𑀯𑀺𑀦𑀺𑀤𑁆𑀤𑀺𑀲𑁂𑀢𑀺. 𑀏𑀯𑀁 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀦𑁆𑀣𑀢𑁂 𑀯𑀸…𑀧𑁂… 𑀖𑀝𑁆𑀝𑀺𑀢𑁂 𑀤𑀼𑀓𑁆𑀓𑀝𑀜𑁆𑀘 𑀢𑀲𑁆𑀲 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀳 ¶ 𑀲𑀩𑁆𑀩𑀢𑁆𑀣 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑁂𑀦 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀅𑀗𑁆𑀕𑀚𑀸𑀢𑀜𑁆𑀘 𑀢𑀢𑁆𑀣𑀚𑀸𑀢𑀘𑀫𑁆𑀫𑀔𑀺𑀮𑀧𑀺𑀴𑀓𑀸 𑀘 𑀕𑀬𑁆𑀳𑀦𑁆𑀢𑀺, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀧𑀦 𑀅𑀗𑁆𑀕𑀼𑀮𑀺𑀆𑀤𑀺𑀇𑀢𑀭𑀸𑀯𑀬𑀯𑀸𑀧𑀺. 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀅𑀦𑀼𑀧𑀸𑀤𑀺𑀦𑁆𑀦-𑀲𑀤𑁆𑀤𑁂𑀦 𑀅𑀗𑁆𑀕𑀚𑀸𑀢𑀸𑀤𑀺𑀧𑀝𑀺𑀘𑁆𑀙𑀸𑀤𑀺𑀢𑀯𑀢𑁆𑀣𑀸𑀤𑀬𑁄 𑀘 𑀕𑀬𑁆𑀳𑀦𑁆𑀢𑀺, 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀧𑀦 𑀦𑀺𑀫𑀺𑀢𑁆𑀢𑁂 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀘𑀫𑁆𑀫𑀔𑀺𑀮𑀧𑀺𑀴𑀓𑀭𑁄𑀫𑀸𑀤𑀻𑀦𑀺. 𑀇𑀫𑀸𑀦𑀺 𑀘 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀺. 𑀅𑀗𑁆𑀕𑀚𑀸𑀢𑁂𑀢𑀭𑁄𑀧𑀸𑀤𑀺𑀦𑁆𑀦𑀸𑀯𑀬𑀯𑁂 𑀘 𑀢𑀻𑀲𑀼𑀧𑀺 𑀔𑁂𑀢𑁆𑀢𑁂𑀲𑀼 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯.

𑁧𑁧. 𑀏𑀢𑁆𑀢𑀸𑀯𑀢𑀸 𑀚𑀻𑀯𑀫𑀸𑀦𑀲𑀭𑀻𑀭𑁂 𑀲𑀦𑁆𑀣𑀢𑀸𑀲𑀦𑁆𑀣𑀢𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑁂𑀲𑀼𑀧𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀼 𑀲𑀦𑁆𑀣𑀢𑀸𑀲𑀦𑁆𑀣𑀢𑀯𑀲𑁂𑀦𑁂𑀯 𑀤𑀼𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑁂𑀦 𑀲𑁂𑀯𑀦𑁆𑀢𑀲𑁆𑀲 𑀧𑀭𑁄𑀧𑀓𑁆𑀓𑀫𑁂 𑀲𑀢𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀮𑀩𑁆𑀪𑀫𑀸𑀦𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀬𑀣𑀸𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀫𑀢𑀲𑀭𑀻𑀭𑁂 𑀧𑀦 𑀢𑀣𑀸 𑀢𑀣𑀸 𑀲𑁂𑀯𑀦𑁆𑀢𑀸𑀦𑀁 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀝𑀺𑀩𑀸𑀳𑀦𑀢𑁆𑀣𑀁 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀢𑁂’’𑀢𑀺𑀆𑀤𑀺.

𑀢𑀢𑁆𑀣 ¶ ‘‘𑀫𑀢𑁂’’𑀢𑀺 𑀏𑀢𑀲𑁆𑀲 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀦𑀁 𑀲𑀭𑀻𑀭𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀫𑀺𑀦𑀸 ‘‘𑀅𑀓𑁆𑀔𑀸𑀬𑀺𑀢𑁂’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀫𑀸𑀦𑀕𑀸𑀣𑀸𑀬𑀁 𑀯𑀺𑀬 𑀲𑀓𑀮𑀲𑀭𑀻𑀭𑁂 𑀔𑀸𑀤𑀺𑀢𑁂𑀧𑀺 𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀪𑀸𑀯𑁄𑀬𑁂𑀯 𑀆𑀧𑀢𑁆𑀢𑀺𑀬𑀸𑀪𑀸𑀯𑀸𑀪𑀸𑀯𑀲𑁆𑀲 𑀧𑀫𑀸𑀡𑀦𑁆𑀢𑀺 ‘‘𑀅𑀓𑁆𑀔𑀸𑀬𑀺𑀢𑁂’’𑀢𑀺 𑀏𑀢𑁂𑀦 ‘‘𑀫𑀢𑁂’’𑀢𑀺 𑀏𑀢𑀁 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀦𑀺𑀫𑀺𑀢𑁆𑀢𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀢𑀁 𑀢𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀦𑀺𑀫𑀺𑀢𑁆𑀢𑀫𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀕𑀸𑀣𑀸𑀬 ‘‘𑀦𑀺𑀫𑀺𑀢𑁆𑀢𑁂’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀅𑀓𑁆𑀔𑀸𑀬𑀺𑀢𑁂𑀢𑀺 𑀲𑀩𑁆𑀩𑀣𑀸 𑀅𑀓𑁆𑀔𑀸𑀬𑀺𑀢𑁂 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀦𑀺𑀫𑀺𑀢𑁆𑀢𑁂. 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀧𑀺 𑀘𑀸𑀢𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀔𑀸𑀤𑀺𑀢𑁆𑀯𑀸 𑀩𑀳𑀼𑀓𑀸𑀯𑀲𑀺𑀝𑁆𑀞𑁂 𑀦𑀺𑀫𑀺𑀢𑁆𑀢𑁂. ‘‘𑀬𑀲𑁆𑀲 𑀘𑀢𑀽𑀲𑀼 𑀪𑀸𑀕𑁂𑀲𑀼 𑀢𑀺𑀪𑀸𑀕𑀫𑀢𑁆𑀢𑀁 𑀔𑀸𑀤𑀺𑀢𑀁, 𑀢𑀁 𑀦𑀺𑀫𑀺𑀢𑁆𑀢𑀁 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀫𑁂𑀣𑀼𑀦𑀦𑁆𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀺𑀣𑀼𑀦𑀸𑀦𑀁 𑀇𑀤𑀁 𑀫𑁂𑀣𑀼𑀦𑀁, 𑀫𑀢𑀺𑀢𑁆𑀣𑀺𑀆𑀤𑀻𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀢𑁆𑀢𑀸𑀪𑀸𑀯𑁂𑀧𑀺 𑀢𑀢𑁆𑀣 𑀯𑀻𑀢𑀺𑀓𑁆𑀓𑀫𑁄 𑀭𑀼𑀴𑁆𑀳𑀺𑀬𑀸 ‘‘𑀫𑁂𑀣𑀼𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀸𑀭𑀸𑀚𑀺𑀓𑁄𑀢𑀺𑀧𑀭𑀸𑀚𑀺𑀢𑁄, 𑀧𑀭𑀸𑀚𑀬𑀫𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀧𑀸𑀭𑀸𑀚𑀺𑀓-𑀲𑀤𑁆𑀤𑁄 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀺𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀆𑀦𑀦𑁆𑀤 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 ¶ 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁩) 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀆𑀧𑀢𑁆𑀢𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑁬𑁭) 𑀆𑀧𑀢𑁆𑀢𑀺𑀬𑀸. ‘‘𑀦 𑀫𑀬𑀁 𑀧𑀸𑀭𑀸𑀚𑀺𑀓𑀸, 𑀬𑁄 𑀅𑀯𑀳𑀝𑁄, 𑀲𑁄 𑀧𑀸𑀭𑀸𑀚𑀺𑀓𑁄’’𑀢𑀺 (𑀧𑀸𑀭𑀸. 𑁧𑁫𑁫) 𑀏𑀯𑀁 𑀧𑀼𑀕𑁆𑀕𑀮𑁂. ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁮𑁪) 𑀧𑀦 𑀥𑀫𑁆𑀫𑁂 𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 ¶ 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀓𑀢𑁆𑀣𑀘𑀺 𑀆𑀧𑀢𑁆𑀢𑀺, 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀲𑁄 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑁄.

𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀬𑁄 𑀢𑀁 𑀅𑀢𑀺𑀓𑁆𑀓𑀫𑀢𑀺 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀺 𑀧𑀦 𑀬𑁄 𑀦𑀁 𑀅𑀚𑁆𑀛𑀸𑀧𑀚𑁆𑀚𑀢𑀺 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀻𑀲𑀼 𑀧𑀸𑀭𑀸𑀚𑀺𑀓-𑀲𑀤𑁆𑀤𑁄 𑀧𑀭𑀸𑀚𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀓𑀢𑁆𑀢𑀼𑀲𑀸𑀥𑀦𑁄, 𑀧𑀼𑀕𑁆𑀕𑀮𑁂 𑀧𑀦 𑀧𑀭𑀸𑀚𑀻𑀬𑀢𑀻𑀢𑀺 𑀓𑀫𑁆𑀫𑀲𑀸𑀥𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀭𑁄’’𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀪𑀺𑀓𑁆𑀔𑀼𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺.

𑁧𑁨. 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀢𑀺 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀔𑀸𑀤𑀺𑀢𑁂. 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂𑀢𑀺 𑀲𑀫𑀪𑀸𑀕𑀸𑀯𑀲𑁂𑀲𑀁 𑀔𑀸𑀤𑀺𑀢𑁂. 𑀣𑀽𑀮𑁄 𑀅𑀘𑁆𑀘𑀬𑁄 𑀣𑀼𑀮𑁆𑀮𑀘𑁆𑀘𑀬𑁄, 𑀲𑁄𑀬𑁂𑀯 𑀆𑀧𑀚𑁆𑀚𑀻𑀬𑀢𑀻𑀢𑀺 𑀆𑀧𑀢𑁆𑀢𑀻𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀤𑀬𑁄 𑀲𑀦𑁆𑀥𑀸𑀬𑁂𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀯𑁄𑀳𑀸𑀭𑁄, 𑀦 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑁂𑀢𑀺 𑀅𑀯𑀲𑁂𑀲𑁂 𑀉𑀧𑀓𑀘𑁆𑀙𑀓𑀸𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀯𑀲𑁂𑀲𑀲𑀭𑀻𑀭𑁂 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦). 𑀤𑀼𑀝𑁆𑀞𑀼 𑀓𑀢𑀦𑁆𑀢𑀺 𑀤𑀼𑀓𑁆𑀓𑀝𑀁, 𑀤𑀼𑀓𑁆𑀓𑀝-𑀲𑀤𑁆𑀤𑁄 𑀦𑀺𑀬𑀢𑀦𑀧𑀼𑀁𑀲𑀓𑀢𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑀸𑀧𑀺 𑀆𑀧𑀢𑁆𑀢𑀺-𑀲𑀤𑁆𑀤𑀲𑁆𑀲 𑀲𑀮𑀺𑀗𑁆𑀕𑁂𑀦 𑀯𑀺𑀲𑁂𑀲𑀦𑀁 𑀳𑁄𑀢𑀺.

𑁧𑁩. 𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸 𑀔𑀸𑀬𑀺𑀢𑁂𑀧𑀻𑀢𑀺 𑀏𑀢𑁆𑀣 𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀦𑀺𑀫𑀺𑀢𑁆𑀢𑀁 𑀲𑁂𑀲𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑁂 𑀔𑀸𑀤𑀺𑀢𑁂𑀧𑀺. 𑀧𑀺-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂, 𑀧𑀕𑁂𑀯 𑀇𑀢𑀭𑁂𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀅𑀓𑁆𑀔𑀸𑀬𑀺𑀢𑁂 𑀯𑀸 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀯𑀸𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀁 𑀲𑁂𑀯𑀢𑁄𑀧𑀺 𑀧𑀭𑀸𑀚𑀬𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀲𑁂𑀯𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀅𑀧𑁂𑀓𑁆𑀔𑀸𑀬𑀁. 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀫𑁂𑀯𑀸𑀢𑀺 𑀅𑀧𑁂𑀓𑁆𑀔𑀢𑀺. 𑀲𑀦𑁆𑀣𑀢𑀸𑀤𑀬𑁄 𑀯𑀺𑀓𑀧𑁆𑀧𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁧𑁪. ‘‘𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂’’𑀢𑀺 ¶ 𑀏𑀢𑁆𑀣 ‘‘𑀬𑀤𑀸 𑀧𑀦 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀺 𑀓𑀼𑀣𑀺𑀢𑀁 𑀦𑀻𑀮𑀫𑀓𑁆𑀔𑀺𑀓𑀸𑀲𑀫𑀸𑀓𑀺𑀡𑁆𑀡𑀁 𑀓𑀺𑀫𑀺𑀓𑀼𑀮𑀲𑀫𑀸𑀓𑀼𑀮𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑀓𑀼𑀡𑀧𑀪𑀸𑀯𑁂𑀦 𑀉𑀧𑀕𑀦𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁, 𑀢𑀤𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀜𑁆𑀘 𑀚𑀳𑀢𑀺, 𑀢𑀸𑀤𑀺𑀲𑁂 𑀲𑀭𑀻𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀓𑁆𑀓𑀫𑀢𑁄 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀲𑀩𑁆𑀩𑀢𑁆𑀣𑀸𑀧𑀺 𑀘𑀸𑀢𑀺 𑀅𑀓𑁆𑀔𑀸𑀬𑀺𑀢𑀸𑀤𑀺𑀲𑀩𑁆𑀩𑀯𑀺𑀓𑀧𑁆𑀧𑁄𑀧𑀕𑀢𑀸𑀦𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣𑀸𑀧𑀺 𑀯𑀻𑀢𑀺𑀓𑁆𑀓𑀫𑁄 𑀅𑀦𑀸𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀔𑀸𑀬𑀺𑀢𑀓𑁆𑀔𑀸𑀬𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀔𑀸𑀬𑀺𑀢𑀓𑁆𑀔𑀸𑀬𑀺𑀢𑀜𑁆𑀘 𑀦𑀸𑀫𑁂𑀢𑀁 𑀲𑀩𑁆𑀩𑀁 𑀫𑀢𑀲𑀭𑀻𑀭𑀓𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀚𑀻𑀯𑀫𑀸𑀦𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁫. 𑀚𑀻𑀯𑀫𑀸𑀦𑁂 𑀓𑀣𑀦𑁆𑀢𑀺 𑀆𑀳 ‘‘𑀙𑀺𑀦𑁆𑀤𑀺𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀡𑀲𑀗𑁆𑀔𑁂𑀧𑀢𑁄𑀢𑀺 𑀯𑀡𑀲𑀗𑁆𑀕𑀳𑀢𑁄. 𑀢𑀲𑁆𑀫𑀺𑀦𑁆𑀢𑀺 𑀬𑀢𑁆𑀣 𑀞𑀺𑀢𑀁 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀝𑀺𑀢𑀁, 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀏𑀢𑁆𑀣 𑀤𑀼𑀢𑀺𑀬𑁄 𑀧𑀦-𑀲𑀤𑁆𑀤𑁄 𑀇𑀥 𑀅𑀤𑀲𑁆𑀲𑀺𑀢𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀅𑀝𑁆𑀞𑀓𑀣𑀸𑀬𑀳𑀺 ‘‘𑀬𑀤𑀺𑀧𑀺 𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁄 𑀔𑀸𑀬𑀺𑀢𑀁, 𑀙𑀯𑀺𑀘𑀫𑁆𑀫𑀫𑁆𑀧𑀺 𑀦𑀢𑁆𑀣𑀺, 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀯𑁂𑀲𑀦𑀁 𑀚𑀸𑀬𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀏𑀯𑀁 𑀅𑀚𑀻𑀯𑀫𑀸𑀦𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀸𑀭𑁂𑀦 𑀚𑀻𑀯𑀫𑀸𑀦𑁂𑀧𑀺 𑀙𑀯𑀺𑀘𑀫𑁆𑀫𑀫𑀢𑁆𑀢𑀁 𑀘𑁂 𑀲𑀩𑁆𑀩𑀲𑁄 𑀉𑀧𑁆𑀧𑀸𑀝𑀺𑀢𑀁, 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀯𑁂𑀲𑀦𑀓𑁆𑀔𑀫𑀁 𑀳𑁄𑀢𑀺, 𑀢𑀢𑁆𑀣 𑀲𑁂𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀫𑀢𑁆𑀣𑀁 𑀚𑁄𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁬. 𑀢𑀢𑁄 ¶ 𑀦𑀺𑀫𑀺𑀢𑁆𑀢𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑀺𑀢𑀸𑀬𑀸𑀢𑀺 𑀧𑀢𑀺𑀢𑀸𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦𑀺𑀫𑀺𑀢𑁆𑀢𑀢𑁄𑀢𑀺 𑀦𑀺𑀫𑀺𑀢𑁆𑀢𑀧𑁆𑀧𑀤𑁂𑀲𑀢𑁄 𑀧𑀢𑀺𑀢𑀸𑀬𑀁 𑀫𑀁𑀲𑀧𑁂𑀲𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀸 𑀧𑀢𑀺𑀢𑀸𑀬𑀁 𑀢𑀲𑁆𑀲𑀁 𑀦𑀺𑀫𑀺𑀢𑁆𑀢𑀫𑀁𑀲𑀧𑁂𑀲𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀭𑀸𑀕𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑁧𑁭. ‘‘𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀻’’𑀢𑀺𑀆𑀤𑀺𑀕𑀸𑀣𑀸𑀬 ‘‘𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺𑀓𑀸 𑀅𑀝𑁆𑀞𑀓𑀣𑀸 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸. 𑀲𑀢𑀻𑀢𑀺 𑀏𑀢𑁆𑀣 ‘‘𑀅𑀯𑀲𑀺𑀝𑁆𑀞𑁂’’𑀢𑀺 𑀧𑀸𑀞𑀲𑁂𑀲𑁄. 𑀚𑀻𑀯𑀫𑀸𑀦𑁂𑀢𑀺 𑀏𑀢𑁆𑀣 ‘‘𑀲𑀭𑀻𑀭𑁂’’𑀢𑀺 𑀧𑀸𑀞𑀲𑁂𑀲𑁄. 𑀚𑀻𑀯𑀫𑀸𑀦𑀲𑀭𑀻𑀭𑁂 𑀧𑀦 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑁂 𑀉𑀧𑁆𑀧𑀸𑀝𑀺𑀢𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀺 𑀫𑀁𑀲𑁂, 𑀦𑁆𑀳𑀸𑀭𑀼𑀫𑁆𑀳𑀺 𑀯𑀸 𑀅𑀯𑀲𑀺𑀝𑁆𑀞𑁂 𑀲𑀢𑀺 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸.

𑁧𑁮. ‘‘𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀻’’𑀢𑀺 𑀕𑀸𑀣𑀸𑀬 ‘‘𑀚𑀻𑀯𑀫𑀸𑀦𑁂’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, ‘‘𑀲𑀭𑀻𑀭𑁂’’𑀢𑀺 ¶ 𑀧𑀸𑀞𑀲𑁂𑀲𑁄. ‘‘𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀤𑀻𑀦𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀮𑀩𑁆𑀪𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀫𑀸𑀦𑀲𑀭𑀻𑀭𑁂 𑀓𑀡𑁆𑀡…𑀧𑁂… 𑀯𑀡𑁂𑀲𑀼 𑀯𑀸𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀺𑀓𑁄𑀲𑁂𑀢𑀺 𑀫𑀼𑀢𑁆𑀢𑀧𑀣𑀩𑁆𑀪𑀦𑁆𑀢𑀭𑁂. 𑀯𑀡𑁂𑀲𑀼 𑀯𑀸𑀢𑀺 𑀲𑀢𑁆𑀣𑀓𑀸𑀤𑀻𑀳𑀺 𑀓𑀢𑀯𑀡𑁂𑀲𑀼. 𑀅𑀗𑁆𑀕𑀚𑀸𑀢𑀦𑁆𑀢𑀺 𑀢𑀺𑀮𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑁂𑀓𑀤𑁂𑀲𑀁. 𑀭𑀸𑀕𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦.

𑁧𑁯. 𑀅𑀯𑀲𑁂𑀲𑀲𑀭𑀻𑀭𑀲𑁆𑀫𑀺𑀦𑁆𑀢𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀤𑀺𑀬𑀣𑀸𑀯𑀼𑀢𑁆𑀢𑀲𑀭𑀻𑀭𑀸𑀯𑀬𑀯𑀯𑀚𑁆𑀚𑀺𑀢𑀲𑀭𑀻𑀭𑀧𑁆𑀧𑀤𑁂𑀲𑁂. 𑀢𑁂𑀦𑀸𑀳 ‘‘𑀉𑀧𑀓𑀘𑁆𑀙𑀽𑀭𑀼𑀓𑀸𑀤𑀺𑀲𑀽’’𑀢𑀺 𑀉𑀧𑀓𑀘𑁆𑀙𑀁 𑀦𑀸𑀫 𑀩𑀸𑀳𑀼𑀫𑀽𑀮𑀦𑁆𑀢𑀭𑀁. 𑀊𑀭𑀼𑀓𑀸𑀤𑀺𑀲𑀽𑀢𑀺 𑀊𑀭𑀼𑀯𑁂𑀫𑀚𑁆𑀛𑀸𑀤𑀻𑀲𑀼. 𑀆𑀤𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀲𑀭𑀻𑀭𑀧𑁆𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀧𑀯𑁂𑀲𑁂𑀢𑁆𑀯𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, 𑀅𑀗𑁆𑀕𑀚𑀸𑀢𑀁 𑀢𑀺𑀮𑀩𑀻𑀚𑀫𑀢𑁆𑀢𑀁 𑀧𑀯𑁂𑀲𑁂𑀢𑁆𑀯𑀸𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲 𑀲𑁂𑀯𑀫𑀸𑀦𑀲𑁆𑀲𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀣𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄.

𑁨𑁦. 𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑁄𑀓𑀡𑁆𑀡𑀕𑀯𑀚𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀅𑀲𑁆𑀲𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. ‘‘𑀫𑀢𑀸𑀦’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀚𑀻𑀯𑀫𑀸𑀦𑀸𑀦’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀲𑁂𑀯𑀦𑁆𑀢𑀺 ‘‘𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁 𑀧𑀯𑁂𑀲𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀻𑀦𑀁, 𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀺𑀦’’𑀦𑁆𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀝𑁆𑀞𑀓𑀣𑀸𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀧𑀓𑀸𑀭𑀢𑁆𑀣𑀯𑀸𑀘𑀺𑀦𑀸 𑀆𑀤𑀺-𑀲𑀤𑁆𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀯𑀻𑀢𑀺𑀓𑁆𑀓𑀫𑀸𑀭𑀳𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀦𑁆𑀢𑁄 𑀅𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀕𑀬𑁆𑀳𑀦𑁆𑀢𑀺. ‘‘𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦’’𑀦𑁆𑀢𑀺 𑀧𑀞𑀫𑀧𑀸𑀤𑀸𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀢𑁂𑀲𑀁 𑀧𑀼𑀦𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺.

𑁨𑁧. 𑀢𑀣𑀸 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀦𑁆𑀢𑀺 𑀢𑀺𑀭𑀺𑀬𑀁 𑀅𑀜𑁆𑀘𑀦𑁆𑀢𑀺 𑀯𑀟𑁆𑀠𑀦𑁆𑀢𑀻𑀢𑀺 𑀢𑀺𑀭𑀘𑁆𑀙𑀸, 𑀲𑀩𑁆𑀩𑁂 𑀘 𑀢𑁂 𑀢𑀺𑀭𑀘𑁆𑀙𑀸𑀘𑀸𑀢𑀺 𑀲𑀩𑁆𑀩𑀢𑀺𑀭𑀘𑁆𑀙𑀸, 𑀢𑁂𑀲𑀁 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲𑀸’’𑀢𑀺𑀆𑀤𑀻𑀦𑀁 𑀧𑀭𑀸𑀫𑀝𑁆𑀞𑀢𑁆𑀢𑀸 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀸𑀦𑀁 𑀅𑀓𑁆𑀔𑀺𑀆𑀤𑀻𑀲𑀼 𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀁 𑀫𑁂𑀣𑀼𑀦𑀭𑀸𑀕𑁂𑀦 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀧𑀺 𑀲𑀦𑁆𑀣𑀢𑀸𑀤𑀺𑀯𑀺𑀓𑀧𑁆𑀧𑁂 𑀦𑀺𑀤𑁆𑀤𑁄𑀲𑀪𑀸𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀢𑀫𑁆𑀧𑀺 𑀬𑁄𑀚𑁂𑀢𑀩𑁆𑀩𑀁.

𑁨𑁨. 𑀏𑀯𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀸 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀫𑀢𑀲𑀭𑀻𑀭𑁂𑀧𑀺 ¶ 𑀲𑀫𑁆𑀪𑀯𑀦𑀓𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. ‘‘𑀢𑁂𑀲’’𑀦𑁆𑀢𑀺 ¶ 𑀇𑀫𑀺𑀦𑀸 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀫𑀢𑀸𑀫𑀢𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀲𑀼 𑀢𑀺𑀲𑁆𑀲𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀤𑀲𑁆𑀲𑀺𑀢𑀢𑁆𑀢𑀸, 𑀧𑀼𑀦 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀸 𑀢𑁂 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀯𑀢𑁆𑀢𑀫𑀸𑀦𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, 𑀢𑁂𑀲𑀁 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀮𑁆𑀮𑀲𑀭𑀻𑀭𑁂𑀲𑀽𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀫𑀲𑀫𑁆𑀧𑀢𑁆𑀢𑁂𑀲𑀼 𑀅𑀮𑁆𑀮𑀫𑀢𑀲𑀭𑀻𑀭𑁂𑀲𑀼 𑀢𑀺𑀯𑀺𑀥𑁂 𑀔𑁂𑀢𑁆𑀢𑀲𑁆𑀫𑀺𑀁 𑀅𑀲𑀦𑁆𑀣𑀢𑁂, 𑀲𑀦𑁆𑀣𑀢𑁂 𑀯𑀸 𑀲𑀢𑀺 𑀫𑁂𑀣𑀼𑀦𑀭𑀸𑀕𑀲𑁆𑀲 𑀯𑀲𑀸 𑀲𑁂𑀯𑀢𑁄 𑀢𑀺𑀯𑀺𑀥𑀸𑀧𑀺 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀧𑀤𑁂𑀳𑀺 𑀲𑀳 𑀬𑁄𑀚𑀦𑀸.

𑀢𑀺𑀯𑀺𑀥𑁂 𑀔𑁂𑀢𑁆𑀢𑀲𑁆𑀫𑀺𑀦𑁆𑀢𑀺 𑀫𑀢𑀫𑀦𑀼𑀲𑁆𑀲𑀲𑀭𑀻𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁂 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂 𑀘 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀪𑁂𑀤𑁂 𑀢𑀲𑁆𑀫𑀺𑀁𑀬𑁂𑀯 𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁂 𑀘, 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀡𑀲𑀗𑁆𑀔𑀸𑀢𑁂 𑀘 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀢𑀲𑁆𑀫𑀺𑀁𑀬𑁂𑀯 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀯𑀢𑁆𑀣𑀺𑀓𑁄𑀲𑀯𑀡𑀲𑀗𑁆𑀔𑀸𑀢𑁂 𑀘, 𑀅𑀓𑁆𑀔𑀸𑀬𑀺𑀢𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀉𑀧𑀟𑁆𑀠𑀓𑁆𑀔𑀸𑀬𑀺𑀢 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀪𑁂𑀤𑁂 𑀅𑀯𑀲𑁂𑀲𑀲𑀭𑀻𑀭𑀲𑀗𑁆𑀔𑀸𑀢𑁂 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀘𑀸𑀢𑀺 𑀢𑀺𑀯𑀺𑀥𑁂𑀧𑀺 𑀔𑁂𑀢𑁆𑀢𑁂. 𑀲𑀢𑀻𑀢𑀺 𑀯𑀺𑀚𑁆𑀚𑀫𑀸𑀦𑁂. 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀫𑁂𑀣𑀼𑀦𑀭𑀸𑀕𑀲𑁆𑀲 𑀯𑀲𑀸 𑀲𑁂𑀯𑀢𑁄 𑀬𑀣𑀸𑀭𑀳𑀁 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀲𑀗𑁆𑀔𑀸𑀢𑀸 𑀢𑀺𑀯𑀺𑀥𑀸 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁂𑀲𑀫𑁂𑀯 𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀁 𑀲𑀫𑁆𑀧𑀢𑁆𑀢𑁂 𑀲𑀭𑀻𑀭𑁂 𑀲𑀦𑁆𑀣𑀢𑀸𑀤𑀺𑀯𑀼𑀢𑁆𑀢𑀯𑀺𑀓𑀧𑁆𑀧𑀬𑀼𑀢𑁆𑀢𑁂𑀲𑀼 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀫𑁂𑀣𑀼𑀦𑀭𑀸𑀕𑁂𑀦 𑀲𑁂𑀯𑀢𑁄 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑀜𑁆𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀫𑀦𑀼𑀲𑁆𑀲𑀲𑀭𑀻𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀇𑀫𑀲𑁆𑀫𑀺𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑀭𑀻𑀭𑁂 𑀯𑀺𑀲𑁂𑀲𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀅𑀮𑁆𑀮𑀲𑀭𑀻𑀭𑁂𑀲𑀽’’𑀢𑀺𑀆𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀣𑀺𑀢𑀓𑀼𑀡𑀧𑁂 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝’’𑀦𑁆𑀢𑀺.

𑁨𑁩. 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦𑀺𑀫𑀺𑀢𑁆𑀢𑀁 𑀫𑀼𑀢𑁆𑀢𑀓𑀭𑀡𑀁. ‘‘𑀇𑀢𑁆𑀣𑀺𑀬𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀘𑀢𑀼𑀢𑁆𑀣𑀕𑀸𑀣𑀸𑀬 ‘‘𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀇𑀫𑀺𑀦𑀸 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀺𑀢𑁆𑀣𑀻𑀦𑀫𑁂𑀯 𑀕𑀳𑀡𑀁, 𑀇𑀫𑀺𑀦𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀕𑀳𑀡𑀲𑁆𑀲. 𑀇𑀫𑀺𑀲𑁆𑀲𑀸𑀦𑀦𑁆𑀢𑀭𑀕𑀸𑀣𑀸𑀬 𑀇𑀢𑁄 ‘‘𑀇𑀢𑁆𑀣𑀺𑀬𑀸’’𑀢𑀺 𑀅𑀦𑀼𑀯𑀢𑁆𑀢𑀺𑀢𑁂 𑀢𑀢𑁆𑀭𑀸𑀧𑀺 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀫𑁂𑀯 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀇𑀢𑁆𑀣𑀺𑀬𑀸’’𑀢𑀺𑀅𑀥𑀺𑀓𑀯𑀘𑀦𑀫𑁂𑀯 𑀜𑀸𑀧𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ¶ (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀫𑁂𑀣𑀼𑀦𑀭𑀸𑀕𑁂𑀦 𑀫𑀼𑀔𑁂𑀦 𑀙𑀼𑀧𑀢𑀺, 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀘 𑀥𑀫𑁆𑀫𑀓𑁆𑀔𑀦𑁆𑀥𑀓𑁂 ‘‘𑀦 𑀘 𑀪𑀺𑀓𑁆𑀔𑀯𑁂 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁨) 𑀲𑀸𑀫𑀜𑁆𑀜𑀯𑀘𑀦𑀢𑁄 𑀘 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀫𑀲𑀫𑁆𑀧𑀢𑁆𑀢𑀸𑀬 𑀅𑀮𑁆𑀮𑀫𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀘 𑀅𑀓𑁆𑀔𑀸𑀬𑀺𑀢𑁂 𑀯𑀸 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀯𑀸 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑀢𑁄 𑀢𑀢𑁆𑀣𑀸𑀧𑀺 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀬𑀫𑀢𑁆𑀣𑁄𑀧𑀺 𑀫𑀢𑀸𑀫𑀢𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 ‘‘𑀇𑀢𑁆𑀣𑀺𑀬𑀸’’𑀢𑀺 𑀇𑀫𑀺𑀦𑀸𑀯 𑀲𑀸𑀫𑀜𑁆𑀜𑀯𑀘𑀦𑁂𑀦 𑀕𑀳𑁂𑀢𑀩𑁆𑀩𑁄.

𑁨𑁪. 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑁂𑀦. 𑀫𑀼𑀔𑁂𑀦𑀸𑀢𑀺 𑀧𑀓𑀢𑀺𑀫𑀼𑀔𑁂𑀦. 𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸𑀢𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑀁. 𑀬𑀲𑁆𑀫𑀸 𑀧𑀦 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀫𑀢𑀺𑀢𑁆𑀣𑀺𑀯𑀢𑁆𑀣𑀼𑀫𑁆𑀳𑀺 𑀫𑀢𑀺𑀢𑁆𑀣𑀺𑀬𑀸 𑀲𑀭𑀻𑀭𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀬𑁄 𑀙𑀼𑀧𑀢𑀺, 𑀢𑀲𑁆𑀲 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 ¶ 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁮𑁧) 𑀯𑀼𑀢𑁆𑀢𑀢𑁆𑀢𑀸 𑀫𑀢𑀫𑀦𑀼𑀲𑁆𑀲𑀺𑀢𑁆𑀣𑀻 𑀦 𑀕𑀳𑁂𑀢𑀩𑁆𑀩𑀸. 𑀢𑀣𑁂𑀯 𑀬𑀓𑁆𑀔𑀺𑀯𑀢𑁆𑀣𑀼𑀫𑁆𑀳𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀬𑀓𑁆𑀔𑀺𑀦𑀺𑀬𑀸 𑀲𑀭𑀻𑀭𑀁 𑀬𑁂𑀦 𑀨𑀼𑀝𑁆𑀞𑀁, 𑀢𑀲𑁆𑀲 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀇𑀥𑁂𑀯 𑀉𑀧𑀭𑀺 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑁂 ‘‘𑀧𑀡𑁆𑀟𑀓𑁂 𑀬𑀓𑁆𑀔𑀺𑀧𑁂𑀢𑀻𑀲𑀼, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸’’𑀢𑀺 (𑀯𑀺. 𑀯𑀺. 𑁩𑁪𑁧) 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 𑀅𑀫𑀦𑀼𑀲𑁆𑀲𑀺𑀢𑁆𑀣𑀻𑀧𑀺 𑀦 𑀕𑀳𑁂𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢’’𑀦𑁆𑀢𑀺. 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀸𑀲𑀫𑁆𑀪𑀯𑀢𑁄 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺 𑀇𑀫𑀺𑀦𑀸 𑀘 𑀩𑀳𑀺 𑀙𑀼𑀧𑀺𑀢𑀼𑀓𑀸𑀫𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀩𑀳𑀻’’𑀢𑀺 𑀅𑀦𑀼𑀯𑀢𑁆𑀢𑀦𑀁 𑀯𑀺𑀦𑀸𑀧𑀺 𑀢𑀤𑀢𑁆𑀣𑁄 𑀮𑀩𑁆𑀪𑀢𑀺. 𑀕𑀭𑀼𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑁨𑁫. 𑀢𑀣𑁂𑀯 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸, 𑀅𑀦𑁆𑀢𑁄 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀩𑀳𑀺𑀬𑁂𑀯 𑀙𑀼𑀧𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀬𑀭𑀸𑀕𑁂𑀦𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸. 𑀧𑀼𑀭𑀺𑀲𑀲𑁆𑀲𑀸𑀧𑀻𑀢𑀺 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲𑀧𑀺. 𑀧𑀺-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀯𑀼𑀢𑁆𑀢𑀦𑀬𑁂𑀦 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀨𑀼𑀲𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀅𑀣 𑀔𑁄 𑀧𑀼𑀭𑀺𑀲𑀲𑁆𑀲𑀸𑀧𑀻𑀢𑀺 𑀤𑀻𑀧𑁂𑀢𑀺. ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀫𑀼𑀢𑁆𑀢𑀓𑀭𑀡𑀫𑁂𑀯 𑀯𑀼𑀘𑁆𑀘𑀢𑀺. ‘‘𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺 𑀘𑁂? ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀚𑀻𑀯𑀫𑀸𑀦𑀓𑀧𑀼𑀭𑀺𑀲𑀲𑁆𑀲 𑀯𑀢𑁆𑀣𑀺𑀓𑁄𑀲𑀁 𑀅𑀧𑁆𑀧𑀯𑁂𑀲𑁂𑀦𑁆𑀢𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀙𑀼𑀧𑀢𑀺, 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀢𑁄 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦) 𑀮𑀩𑁆𑀪𑀢𑀺.

𑁨𑁬. 𑀅𑀘𑀺𑀭𑀯𑀢𑀺𑀢𑀭𑀦𑁆𑀢𑀸𑀦𑀁 𑀕𑀼𑀦𑁆𑀦𑀁 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀦𑁆𑀢𑀸 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑁂𑀣𑀼𑀦𑀭𑀸𑀕𑁂𑀦 𑀅𑀗𑁆𑀕𑀚𑀸𑀢𑁂𑀦 ¶ 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀁𑀲𑀽𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺 ‘‘𑀦 𑀘 𑀪𑀺𑀓𑁆𑀔𑀯𑁂 𑀭𑀢𑁆𑀢𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀁 𑀙𑀼𑀧𑀺𑀢𑀩𑁆𑀩𑀁, 𑀬𑁄 𑀙𑀼𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁨) 𑀆𑀕𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ¶ ‘‘𑀦𑀺𑀫𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 ‘‘𑀢𑀣𑀸’’𑀢𑀺 𑀇𑀫𑀲𑁆𑀲𑀸𑀦𑀼𑀯𑀢𑁆𑀢𑀦𑀢𑁄 ‘‘𑀩𑀳𑀻’’𑀢𑀺 𑀮𑀩𑁆𑀪𑀢𑀺. 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀫𑁂𑀣𑀼𑀦𑀭𑀸𑀕𑀢𑁄 𑀩𑀳𑀺 𑀙𑀼𑀧𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭. ‘‘𑀫𑁂𑀣𑀼𑀦𑀭𑀸𑀕𑀢𑁄’’𑀢𑀺 𑀇𑀫𑀺𑀦𑀸 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀩𑀳𑀺 𑀙𑀼𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲. 𑀙𑀼𑀧𑀦𑁂𑀢𑀺 𑀨𑀼𑀲𑀦𑁂.

𑁨𑁮. 𑀢𑀫𑀸𑀯𑀝𑁆𑀝𑀓𑀢𑁂𑀢𑀺 𑀏𑀢𑁆𑀣 ‘‘𑀢𑀁 𑀆𑀯𑀝𑁆𑀝𑀓𑀢𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀯𑀝𑁆𑀝𑀓𑀢𑁂𑀢𑀺 𑀯𑀺𑀯𑀝𑁂. ‘‘𑀫𑀼𑀔𑁂’’𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸, 𑀅𑀜𑁆𑀜𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑁄 𑀘 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑀼𑀢𑀸𑀦𑀼𑀮𑁄𑀫𑀺𑀓𑀸𑀦𑀁 𑀲𑀼𑀢𑀲𑀫𑁆𑀩𑀦𑁆𑀥𑀲𑁆𑀲𑁂𑀯 𑀩𑀮𑀯𑀢𑁆𑀢𑀸 𑀘 𑀧𑀼𑀭𑀺𑀫𑀸𑀦𑀦𑁆𑀢𑀭𑀕𑀸𑀣𑀸𑀬 ‘‘𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀫𑀼𑀔𑁂’’𑀢𑀺 𑀓𑀺𑀜𑁆𑀘𑀸𑀧𑀺 𑀲𑀼𑀢𑀲𑁆𑀲𑁂𑀯 𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 𑀇𑀫𑀸𑀬 𑀕𑀸𑀣𑀸𑀬 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁭𑁩) ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 𑀕𑀦𑁆𑀢𑁆𑀯𑀸 𑀙𑀺𑀦𑁆𑀦𑀲𑀻𑀲𑀁 𑀧𑀲𑁆𑀲𑀺𑀢𑁆𑀯𑀸 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀲𑀻’’𑀢𑀺 𑀤𑀲𑁆𑀲𑀺𑀢𑀙𑀺𑀦𑁆𑀦𑀲𑀻𑀲𑀯𑀢𑁆𑀣𑀼𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀫𑀦𑀼𑀲𑁆𑀲𑀫𑀼𑀔𑀫𑁂𑀯 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁, 𑀧𑀦 𑀅𑀫𑀦𑀼𑀲𑁆𑀲𑀸𑀦𑀜𑁆𑀘 𑀫𑀼𑀔𑁂 𑀢𑀣𑀸 𑀧𑀯𑁂𑀲𑁄 𑀦𑀺𑀤𑁆𑀤𑁄𑀲𑁄𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀢𑁆𑀣𑀸𑀧𑀺 𑀇𑀤𑀫𑁂𑀯 𑀉𑀧𑀮𑀓𑁆𑀔𑀡𑀦𑁆𑀢𑀺 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀸𑀦𑀁 𑀲𑀩𑁆𑀩𑁂𑀲𑀁 𑀫𑀼𑀔𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀅𑀗𑁆𑀕𑀚𑀸𑀢𑀁. 𑀢𑀢𑁆𑀣 𑀆𑀯𑀝𑁆𑀝𑀓𑀢𑁂 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀸𑀦𑀁 𑀫𑀼𑀔𑁂 𑀆𑀓𑀸𑀲𑀕𑀢𑀁 𑀓𑀢𑁆𑀯𑀸 𑀓𑀢𑁆𑀣𑀘𑀺 𑀅𑀨𑀼𑀲𑀸𑀧𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀢𑀺𑀭𑀘𑁆𑀙𑀸𑀦𑀸𑀦𑀁 𑀆𑀯𑀝𑁆𑀝𑀓𑀢𑁂 𑀫𑀼𑀔𑁂𑀢𑀺 𑀬𑁄𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑀗𑁆𑀕𑀳𑁄 𑀉𑀧𑀮𑀓𑁆𑀔𑀡𑀯𑀲𑁂𑀦 𑀓𑀸𑀢𑀩𑁆𑀩𑁄.

𑁨𑁯. 𑀢𑀣𑀸𑀢𑀺 ¶ ‘‘𑀆𑀓𑀸𑀲𑀕𑀢𑀁 𑀓𑀢𑁆𑀯𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀭𑀸𑀫𑀲𑀢𑀺. 𑀘𑀢𑀽𑀳𑀺 𑀧𑀲𑁆𑀲𑁂𑀳𑀻𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. ‘‘𑀧𑀲𑁆𑀲𑁂𑀳𑀻’’𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. ‘‘𑀇𑀢𑁆𑀣𑀺𑀬𑀸’’𑀢𑀺 𑀲𑀸𑀫𑀜𑁆𑀜𑀲𑀤𑁆𑀤𑀢𑁆𑀢𑀸 ‘‘𑀲𑀩𑁆𑀩𑀲𑁆𑀲𑀸’’𑀢𑀺 𑀧𑀸𑀞𑀲𑁂𑀲𑁄. 𑀚𑀸𑀢𑀺𑀯𑀸𑀘𑀓𑀢𑁆𑀢𑀸 𑀏𑀓𑀯𑀘𑀦𑀁. ‘‘𑀘𑀢𑀽𑀳𑀺 𑀧𑀲𑁆𑀲𑁂𑀳𑀺, 𑀳𑁂𑀝𑁆𑀞𑀺𑀫𑀢𑁆𑀢𑀮’’𑀦𑁆𑀢𑀺 𑀘 𑀇𑀫𑁂𑀲𑀁 𑀲𑀫𑁆𑀩𑀦𑁆𑀥𑀺𑀧𑀤𑀲𑁆𑀲 𑀅𑀦𑀺𑀤𑁆𑀤𑁂𑀲𑁂𑀧𑀺 𑀫𑁂𑀣𑀼𑀦𑀧𑀸𑀭𑀸𑀚𑀺𑀓𑀸𑀥𑀺𑀓𑀸𑀭𑀢𑁆𑀢𑀸 𑀘 𑀲𑀦𑁆𑀣𑀢𑀘𑀢𑀼𑀓𑁆𑀓𑀲𑁆𑀲 𑀅𑀝𑁆𑀞𑀓𑀣𑀸𑀯𑀲𑀸𑀦𑁂 𑀇𑀫𑀸𑀬 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀲𑁆𑀲 𑀇𑀫𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 ‘‘𑀬𑀣𑀸 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁬𑁧-𑁬𑁨) 𑀦𑀺𑀫𑀺𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀢𑀺𑀤𑁂𑀲𑀲𑁆𑀲 ¶ 𑀓𑀢𑀢𑁆𑀢𑀸 𑀘 𑀲𑀸𑀫𑀢𑁆𑀣𑀺𑀬𑁂𑀦 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸’’𑀢𑀺 𑀮𑀩𑁆𑀪𑀢𑀺. 𑀇𑀤𑀫𑁂𑀯 ‘‘𑀧𑀯𑁂𑀲𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀆𑀥𑀸𑀭𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑀺.

𑀏𑀯𑀁 𑀯𑀸𑀓𑁆𑀬𑀁 𑀧𑀽𑀭𑁂𑀢𑁆𑀯𑀸 ‘‘𑀬𑀣𑀸 𑀆𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀫𑀸𑀓𑀸𑀲𑀕𑀢𑀁 𑀓𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀣𑀸 𑀲𑀩𑁆𑀩𑀲𑁆𑀲𑀸 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑁂 𑀧𑀲𑁆𑀲𑀸𑀯𑀫𑀕𑁆𑀕𑀲𑀗𑁆𑀔𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀲𑁆𑀲 𑀘𑀢𑀽𑀳𑀺 𑀧𑀲𑁆𑀲𑁂𑀳𑀺 𑀲𑀳 𑀳𑁂𑀝𑁆𑀞𑀺𑀫𑀢𑁆𑀢𑀮𑀁 𑀘𑀢𑁆𑀢𑀸𑀭𑁄 𑀧𑀲𑁆𑀲𑁂, 𑀳𑁂𑀝𑁆𑀞𑀺𑀫𑀢𑁆𑀢𑀮𑀜𑁆𑀘 𑀅𑀘𑁆𑀙𑀼𑀧𑀦𑁆𑀢𑀁 𑀆𑀓𑀸𑀲𑀕𑀢𑀁 𑀓𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄.

𑁩𑁦. 𑀉𑀧𑁆𑀧𑀸𑀝𑀺𑀢𑁄𑀝𑁆𑀞𑀫𑀁𑀲𑁂𑀲𑀽𑀢𑀺 𑀉𑀧𑁆𑀧𑀸𑀝𑀺𑀢𑀁 𑀑𑀝𑁆𑀞𑀫𑀁𑀲𑀁 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀢𑁂𑀲𑀼 𑀤𑀦𑁆𑀢𑁂𑀲𑀼. 𑀩𑀳𑀺𑀦𑀺𑀓𑁆𑀔𑀦𑁆𑀢𑀓𑁂𑀲𑀼 𑀯𑀸𑀢𑀺 𑀧𑀓𑀢𑀺𑀬𑀸 𑀑𑀝𑁆𑀞𑀫𑀁𑀲𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁂𑀲𑀼 𑀯𑀸 𑀤𑀦𑁆𑀢𑁂𑀲𑀼. 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀅𑀗𑁆𑀕𑀚𑀸𑀢𑁂𑀦 𑀙𑀼𑀧𑀦𑁆𑀢𑀲𑁆𑀲.

𑁩𑁧. 𑀅𑀝𑁆𑀞𑀺𑀲𑀗𑁆𑀖𑀝𑁆𑀝𑀦𑀁 𑀓𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀫𑀁𑀲𑀲𑀦𑁆𑀦𑀺𑀲𑁆𑀲𑀬𑀸𑀦𑀺 𑀅𑀝𑁆𑀞𑀻𑀦𑀺 𑀲𑀗𑁆𑀖𑀝𑁆𑀝𑁂𑀢𑁆𑀯𑀸. 𑀫𑀕𑁆𑀕𑁂𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀢𑀫𑀬𑁂 𑀫𑀕𑁆𑀕𑁂. 𑀤𑀼𑀯𑀺𑀥𑀭𑀸𑀕𑀢𑁄𑀢𑀺 ¶ 𑀫𑁂𑀣𑀼𑀦𑀭𑀸𑀕𑁂𑀦 𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀸. 𑀯𑀸𑀬𑀫𑀦𑁆𑀢𑀲𑁆𑀲𑀸𑀢𑀺 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸 𑀘𑀸𑀭𑁂𑀦𑁆𑀢𑀲𑁆𑀲.

𑁩𑁨. 𑀆𑀮𑀺𑀗𑁆𑀕𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀲𑁆𑀲𑀚𑀦𑁆𑀢𑀲𑁆𑀲. 𑀳𑀢𑁆𑀣𑀕𑀸𑀳𑀸𑀤𑀻𑀲𑀼 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸. 𑀳𑀢𑁆𑀣𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄. 𑀅𑀯𑀲𑁂𑀲𑀲𑀭𑀻𑀭𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀧𑀭𑀸𑀫𑀲𑀦𑀁 𑀧𑀭𑀸𑀫𑀸𑀲𑁄. 𑀦𑀺𑀲𑁆𑀲𑀦𑁆𑀤𑁂𑀳𑁂 𑀧𑀦 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀲𑁆𑀲 𑀯𑀸 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀯𑀸 𑀳𑀢𑁆𑀣𑁂𑀦 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑀲𑁆𑀲𑁂𑀯 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀢𑀸 𑀲𑁄𑀬𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀧𑀭𑀸𑀫𑀲𑁂𑀧𑀺 ‘‘𑀳𑀢𑁆𑀣𑁂𑀦 𑀲𑀭𑀻𑀭𑀲𑁆𑀲, 𑀢𑀧𑁆𑀧𑀝𑀺𑀩𑀦𑁆𑀥𑀲𑁆𑀲 𑀘 𑀧𑀭𑀸𑀫𑀲𑀦’’𑀦𑁆𑀢𑀺 𑀬𑀁 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀅𑀯𑀲𑁂𑀲𑀲𑀭𑀻𑀭𑀸𑀯𑀬𑀯𑁂𑀦𑀸𑀧𑀺 𑀧𑀭𑀸𑀫𑀲𑀢𑁄 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺. 𑀘𑀼𑀫𑁆𑀩𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀡𑀺𑀕𑁆𑀕𑀸𑀳𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀬𑀁 𑀦𑀬𑁄’’𑀢𑀺 𑀏𑀢𑁂𑀦 ‘‘𑀇𑀢𑁆𑀣𑀺𑀬𑀸 𑀫𑁂𑀣𑀼𑀦𑀭𑀸𑀕𑁂𑀦 𑀳𑀢𑁆𑀣𑀕𑁆𑀕𑀸𑀳𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑁩𑁩. 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 ¶ 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀤𑁂’’𑀢𑀺𑀆𑀤𑀺. ‘‘𑀅𑀧𑀤𑁂, 𑀤𑁆𑀯𑀺𑀧𑀤𑁂, 𑀘𑀢𑀼𑀧𑁆𑀧𑀤𑁂’’𑀢𑀺 𑀇𑀫𑁂𑀳𑀺 𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀁 ‘‘𑀲𑀢𑁆𑀢𑀦𑀺𑀓𑀸𑀬𑁂’’𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀁. 𑀅𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀅𑀳𑀬𑁄𑀢𑀺 𑀣𑀮𑀘𑀭𑁂𑀲𑀼 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀳𑀢𑁆𑀣𑀺𑀕𑀺𑀮𑀦𑀓𑁂 𑀅𑀚𑀕𑀭𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀦𑀸𑀕𑀸 𑀘. 𑀫𑀘𑁆𑀙𑀸𑀢𑀺 𑀚𑀮𑀚𑁂𑀲𑀼 𑀉𑀧𑀭𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀲𑀢𑀬𑁄𑀚𑀦𑀺𑀓𑀸𑀦𑀺 𑀢𑀺𑀫𑀺𑀭𑀧𑀺𑀗𑁆𑀕𑀮𑀸𑀤𑀺𑀫𑀘𑁆𑀙𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀧𑀸𑀞𑀻𑀦𑀧𑀸𑀯𑀼𑀲𑀸𑀤𑀬𑁄 𑀫𑀘𑁆𑀙𑀸 𑀘. 𑀤𑁆𑀯𑀺𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀓𑀧𑁄𑀢𑀸𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀕𑀭𑀼𑀴𑁂 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀓𑀧𑁄𑀢𑀸𑀓𑀧𑁄𑀢𑀧𑀓𑁆𑀔𑀻 𑀘. 𑀧𑀸𑀭𑀸𑀯𑀢𑀸𑀢𑀺 𑀓𑁂𑀘𑀺. 𑀘𑀢𑀼𑀧𑁆𑀧𑀤𑁂 𑀲𑀢𑁆𑀢𑀦𑀺𑀓𑀸𑀬𑁂. 𑀕𑁄𑀥𑀸𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀳𑀢𑁆𑀣𑀺𑀁 ¶ 𑀉𑀧𑀸𑀤𑀸𑀬 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀕𑁄𑀥𑀸 𑀘𑀸𑀢𑀺 𑀇𑀫𑁂 𑀲𑀢𑁆𑀢𑀸. 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄. 𑀧𑀸𑀭𑀸𑀚𑀺𑀓𑀲𑁆𑀲𑀯𑀢𑁆𑀣𑀽𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀽𑀦𑀻𑀢𑀺 𑀧𑀸𑀞𑀲𑁂𑀲𑁄.

𑁩𑁪. 𑀲𑁂𑀯𑁂𑀢𑀼𑀓𑀸𑀫𑀢𑀸 𑀫𑁂𑀣𑀼𑀦𑀲𑁂𑀯𑀸𑀬 𑀢𑀡𑁆𑀳𑀸, 𑀢𑀸𑀬 𑀫𑁂𑀣𑀼𑀦𑀭𑀸𑀕𑀲𑀗𑁆𑀔𑀸𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁. 𑀫𑀕𑁆𑀕𑁂𑀢𑀺 𑀯𑀘𑁆𑀘𑀫𑀕𑁆𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑁂 𑀫𑀕𑁆𑀕𑁂. 𑀫𑀕𑁆𑀕𑀲𑁆𑀲 𑀅𑀢𑁆𑀢𑀦𑁄 𑀫𑀼𑀢𑁆𑀢𑀓𑀭𑀡𑀲𑁆𑀲 𑀧𑀯𑁂𑀲𑀦𑀁. 𑀧𑀩𑁆𑀩𑀚𑁆𑀚𑀸𑀬, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀯𑀸 𑀅𑀦𑁆𑀢𑁂 𑀯𑀺𑀦𑀸𑀲𑁂 𑀪𑀯𑁄𑀢𑀺 𑀅𑀦𑁆𑀢𑀺𑀫𑁄, 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀯𑀢𑁆𑀣𑀼 𑀅𑀦𑁆𑀢𑀺𑀫𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀧𑀞𑀫𑀁 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀆𑀤𑀺𑀫𑁆𑀳𑀺 𑀤𑁂𑀲𑀺𑀢𑀢𑁆𑀢𑀸 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼, 𑀢𑀲𑁆𑀲 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑁄, 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁫. 𑀲𑀸𑀫𑀦𑁆𑀢𑀸 𑀆𑀧𑀢𑁆𑀢𑀺𑀲𑀫𑀻𑀧𑁂 𑀪𑀯𑀁 𑀲𑀸𑀫𑀦𑁆𑀢𑀁, 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀲𑀫𑀻𑀧𑁂 𑀧𑀼𑀩𑁆𑀩𑀪𑀸𑀕𑁂 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀻𑀢𑀺 𑀅𑀯𑀲𑁂𑀲𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀸𑀭𑀸𑀚𑀺𑀓𑀥𑀫𑁆𑀫𑀸𑀦𑀁. 𑀣𑀼𑀮𑁆𑀮𑀘𑁆𑀘𑀬𑀁 𑀲𑀸𑀫𑀦𑁆𑀢𑀫𑀺𑀢𑀺 𑀉𑀤𑀻𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀫𑀼𑀤𑀻𑀭𑀺𑀢𑀁? ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁪) 𑀤𑀼𑀢𑀺𑀬𑁂, ‘‘𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑁆𑀲 𑀑𑀧𑀸𑀢𑀁 𑀔𑀡𑀢𑀺, 𑀧𑀢𑀺𑀢𑁆𑀯𑀸 𑀤𑀼𑀓𑁆𑀔𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺, 𑀢𑀢𑀺𑀬𑁂, ‘‘𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁧𑁫) 𑀘𑀢𑀼𑀢𑁆𑀣𑁂 𑀲𑀫𑀼𑀤𑀻𑀭𑀺𑀢𑀁.

𑀏𑀢𑁆𑀣 𑀘 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑀸 𑀲𑀸𑀫𑀦𑁆𑀢𑀸𑀧𑀢𑁆𑀢𑀺𑀪𑀸𑀯𑁄 𑀬𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀲𑀫𑀼𑀮𑁆𑀮𑀧𑀢𑀺, 𑀲𑁄 𑀬𑀸𑀯 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀢𑀸𑀯 𑀲𑀫𑀼𑀮𑁆𑀮𑀧𑀦𑀧𑀘𑁆𑀘𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀲𑀫𑁆𑀪𑀸𑀯𑁂, 𑀲𑀫𑀼𑀮𑁆𑀮𑀧𑀺𑀢𑁂 𑀢𑀲𑁆𑀫𑀺𑀁 𑀲𑀫𑀼𑀮𑁆𑀮𑀧𑀺𑀢𑀫𑀢𑁆𑀣𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀫𑁆𑀪𑀸𑀯𑁂 𑀘 𑀬𑀼𑀚𑁆𑀚𑀢𑀺. 𑀲𑁄 ¶ 𑀘 ‘‘𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁬. 𑀅𑀚𑀸𑀦𑀦𑁆𑀢𑀲𑁆𑀲 ¶ 𑀯𑀸𑀢𑀽𑀧𑀢𑁆𑀣𑀤𑁆𑀥𑀁 𑀅𑀗𑁆𑀕𑀚𑀸𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸 𑀫𑀸𑀢𑀼𑀕𑀸𑀫𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀅𑀚𑀸𑀦𑀫𑀸𑀦𑀲𑁆𑀲, 𑀫𑀳𑀸𑀯𑀦𑁂 𑀤𑀺𑀯𑀸 𑀦𑀺𑀤𑁆𑀤𑀼𑀧𑀕𑀢𑀪𑀺𑀓𑁆𑀔𑀼𑀦𑁄 𑀯𑀺𑀬 𑀧𑀭𑁂𑀳𑀺 𑀓𑀺𑀭𑀺𑀬𑀫𑀸𑀦𑀁 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀫𑀸𑀓𑀟𑁆𑀠𑀢𑀺. 𑀅𑀲𑁆𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁂𑀲𑀼 𑀘 𑀓𑀸𑀭𑀸𑀧𑁂𑀦𑁆𑀢𑁂𑀲𑀼 𑀘, 𑀲𑀧𑁆𑀧𑀫𑀼𑀔𑀁 𑀧𑀯𑀺𑀝𑁆𑀞𑀓𑀸𑀮𑁂 𑀯𑀺𑀬 𑀉𑀢𑁆𑀢𑀲𑀺𑀢𑁆𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑀲𑁆𑀲 𑀘, 𑀫𑀳𑀸𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑁄𑀧𑀕𑀢𑀪𑀺𑀓𑁆𑀔𑀼𑀦𑁄 𑀯𑀺𑀬 𑀧𑀭𑁄𑀧𑀓𑁆𑀓𑀫𑀁 𑀜𑀢𑁆𑀯𑀸𑀧𑀺 𑀓𑀸𑀬𑁂 𑀆𑀤𑀺𑀢𑁆𑀢𑀅𑀕𑁆𑀕𑀺𑀦𑀸 𑀯𑀺𑀬 𑀉𑀢𑁆𑀢𑀲𑀺𑀢𑁆𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀩𑀼𑀤𑁆𑀥𑀲𑀸𑀲𑀦𑁂 𑀔𑀻𑀭𑀲𑀸𑀕𑀭𑀲𑀮𑀺𑀮𑀦𑀺𑀫𑁆𑀫𑀮𑁂 𑀲𑀩𑁆𑀩𑀧𑀞𑀫𑀁 𑀧𑀸𑀢𑀼𑀪𑀽𑀢𑀢𑁆𑀢𑀸 𑀆𑀤𑀺 𑀘 𑀢𑀁 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀆𑀤𑀺𑀓𑀫𑁆𑀫𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀤𑀺𑀓𑀫𑁆𑀫𑀻, 𑀏𑀢𑁆𑀣 𑀲𑀼𑀤𑀺𑀦𑁆𑀦𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀆𑀤𑀺𑀓𑀫𑁆𑀫𑀺𑀦𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀉𑀧𑀭𑀺𑀧𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀆𑀕𑀢𑀸𑀕𑀢𑀝𑁆𑀞𑀸𑀦𑁂 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀘 𑀉𑀧𑀭𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀘 𑀦𑀺𑀤𑀸𑀦𑀸𑀤𑀺𑀯𑀲𑁂𑀦 𑀲𑀢𑁆𑀢𑀭𑀲𑀯𑀺𑀥𑁄 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄 𑀧𑀓𑀺𑀡𑁆𑀡𑀓𑁂 𑀲𑀗𑁆𑀔𑁂𑀧𑀢𑁄, 𑀉𑀢𑁆𑀢𑀭𑁂 𑀯𑀺𑀢𑁆𑀣𑀸𑀭𑀢𑁄 𑀘 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁭-𑁩𑁮. 𑀯𑀺𑀦𑀬𑁂𑀢𑀺 𑀯𑀺𑀦𑀬𑀧𑀺𑀝𑀓𑁂. 𑀅𑀦𑀬𑀽𑀧𑀭𑀫𑁂𑀢𑀺 𑀦𑁂𑀢𑀺 𑀧𑀸𑀧𑁂𑀢𑀺 𑀲𑀻𑀮𑀲𑀫𑁆𑀧𑀤𑀁 𑀲𑀫𑀸𑀥𑀺𑀲𑀫𑁆𑀧𑀤𑀁 𑀧𑀜𑁆𑀜𑀸𑀲𑀫𑁆𑀧𑀤𑀜𑁆𑀘𑀸𑀢𑀺 𑀦𑀬𑁄, 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁄 𑀲𑀁𑀯𑀭𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀲𑀁𑀯𑀭𑁄 𑀅𑀦𑀬𑁄 𑀦𑀸𑀫, 𑀢𑀲𑁆𑀲 𑀉𑀧𑀭𑀫𑁄 𑀦𑀺𑀯𑀢𑁆𑀢𑀺 𑀏𑀢𑁆𑀣𑀸𑀢𑀺 𑀅𑀦𑀬𑀽𑀧𑀭𑀫𑁄, 𑀯𑀺𑀦𑀬𑁄, 𑀢𑀢𑁆𑀣 𑀅𑀦𑀬𑀽𑀧𑀭𑀫𑁂 𑀯𑀺𑀦𑀬𑁂.

𑀢𑀢𑁄 ¶ 𑀏𑀯 𑀧𑀭𑀫𑁂 𑀉𑀓𑁆𑀓𑀝𑁆𑀞𑁂. 𑀅𑀦𑀬𑀲𑁆𑀲 𑀯𑀸 𑀉𑀧𑀭𑀫𑁂 𑀦𑀺𑀯𑀢𑁆𑀢𑀦𑁂 𑀧𑀭𑀫𑁂 𑀉𑀓𑁆𑀓𑀝𑁆𑀞𑁂𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀭𑀸 𑀉𑀢𑁆𑀢𑀫𑀸 𑀫𑀸 𑀲𑀸𑀲𑀦𑀲𑀺𑀭𑀻 𑀏𑀢𑁆𑀣𑀸𑀢𑀺 𑀧𑀭𑀫𑁄, 𑀯𑀺𑀦𑀬𑁄𑀢𑀺 𑀏𑀯𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁨𑁫𑁧) 𑀯𑀘𑀦𑀢𑁄 𑀉𑀢𑁆𑀢𑀫𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁂𑀢𑀺 𑀅𑀢𑁆𑀣𑁄.

𑀲𑀼𑀚𑀦𑀲𑁆𑀲𑀸𑀢𑀺 𑀲𑁄𑀪𑀡𑁄 𑀚𑀦𑁄 𑀲𑀼𑀚𑀦𑁄, 𑀲𑀺𑀓𑁆𑀔𑀸𑀓𑀸𑀫𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑁄𑀪𑀫𑀸𑀦𑁄 𑀧𑀺𑀬𑀲𑀻𑀮𑁄 𑀓𑀼𑀮𑀧𑀼𑀢𑁆𑀢𑁄, 𑀢𑀲𑁆𑀲 𑀦𑀬𑀦𑁂 𑀦𑀬𑀦𑀽𑀧𑀫𑁂 𑀯𑀺𑀦𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀬𑀽𑀧𑀭𑀫𑀢𑁆𑀢𑀸, 𑀧𑀭𑀫𑀢𑁆𑀢𑀸 𑀘 𑀲𑀼𑀚𑀦𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀬𑀦𑁂 𑀦𑀬𑀦𑀽𑀧𑀫𑁂. 𑀲𑀼𑀔𑀸𑀦𑀬𑀦𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀁 𑀲𑀼𑀔𑀁 𑀆𑀦𑁂𑀢𑀻𑀢𑀺 𑀲𑀼𑀔𑀸𑀦𑀬𑀦𑀁, 𑀢𑀲𑁆𑀫𑀺𑀁. 𑀇𑀤𑀜𑁆𑀘 ‘‘𑀦𑀬𑀦𑁂’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁.

𑀏𑀢𑀁 ¶ 𑀯𑀺𑀲𑁂𑀲𑀦𑀁 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀉𑀧𑀫𑀸𑀪𑀸𑀯𑁂𑀦 𑀕𑀳𑀺𑀢𑀧𑀓𑀢𑀺𑀦𑀬𑀦𑀢𑁄 𑀇𑀥 𑀲𑀫𑁆𑀪𑀯𑀦𑁆𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀢𑀭𑁄 𑀲𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀧𑀓𑀢𑀺𑀦𑀬𑀦𑀁 𑀭𑀸𑀕𑀤𑁄𑀲𑀸𑀤𑀺𑀓𑀺𑀮𑁂𑀲𑀽𑀧𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀤𑀁 𑀧𑀦 𑀯𑀺𑀦𑀬𑀦𑀬𑀦𑀁 𑀇𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀯𑀁 𑀅𑀳𑀼𑀢𑁆𑀯𑀸 𑀏𑀓𑀁𑀲𑁂𑀦 𑀫𑁄𑀓𑁆𑀔𑀸𑀯𑀳𑀦𑀲𑀼𑀔𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀯𑀺𑀦𑀬𑀫𑀯𑀺𑀭𑀸𑀥𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀦𑁂𑀦 𑀲𑀺𑀚𑁆𑀛𑀦𑀓𑀲𑀻𑀮𑀲𑀁𑀯𑀭𑀫𑀽𑀮𑀓𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀸𑀯𑀲𑀸- 𑀦𑀨𑀮𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀯𑀳𑀦𑁂 𑀯𑀺𑀦𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀥𑀸𑀦𑀭𑀢𑁄𑀢𑀺 𑀏𑀢𑁆𑀣 ‘‘𑀅𑀧𑀻’’𑀢𑀺 𑀧𑀸𑀞𑀲𑁂𑀲𑁄. 𑀧𑀥𑀸𑀦𑁂 𑀯𑀺𑀦𑀬𑀸𑀪𑀺𑀬𑁄𑀕𑁂 𑀭𑀢𑁄𑀧𑀺, 𑀯𑀺𑀦𑀬𑁂 𑀅𑀚𑁆𑀛𑀸𑀬𑀦𑀲𑀯𑀦𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀯𑀸𑀬𑀫𑀦𑁆𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦’’𑀦𑁆𑀢𑀺 (𑀥. 𑀧. 𑁨𑁭𑁩; 𑀦𑁂𑀢𑁆𑀢𑀺. 𑁧𑁭𑁦; 𑀓𑀣𑀸. 𑁮𑁭𑁨) 𑀯𑀘𑀦𑀢𑁄 𑀧𑀥𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀭𑀢𑁄𑀢𑀺 𑀅𑀢𑁆𑀣𑁄 ¶ . 𑀲𑀸𑀭𑀫𑀢𑁂𑀢𑀺 ‘‘𑀲𑀸𑀭’’𑀦𑁆𑀢𑀺 𑀅𑀥𑀺𑀫𑀢𑁂. 𑀅𑀣 𑀯𑀸 𑀲𑀸𑀭𑀁 𑀅𑀨𑁂𑀕𑁆𑀕𑀼𑀫𑀢𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀆𑀘𑀭𑀺𑀬𑀫𑀢𑀁 𑀏𑀢𑁆𑀣𑀸𑀢𑀺 ‘‘𑀲𑀸𑀭𑀫𑀢𑁄’’𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀺𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂. 𑀭𑀢𑁄𑀢𑀺 𑀅𑀘𑁆𑀘𑀦𑁆𑀢𑀸𑀪𑀺𑀭𑀢𑁄. ‘‘𑀦 𑀭𑀢𑁄’’𑀢𑀺 𑀏𑀢𑁆𑀣 𑀦-𑀓𑀸𑀭𑀁 ‘‘𑀭𑀫𑀢𑁂’’𑀢𑀺 𑀑𑀲𑀸𑀦𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀬𑁄 𑀧𑀦 𑀦 𑀭𑀫𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀣𑁂𑀭𑀦𑀯𑀫𑀚𑁆𑀛𑀺𑀫𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑁆𑀢𑀭𑁂 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀦𑀺𑀘𑁆𑀘𑀧𑀭𑀺𑀯𑀢𑁆𑀢𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀘𑀺𑀦𑁆𑀢𑀦𑀯𑀲𑁂𑀦 𑀦 𑀭𑀫𑀢𑁂 𑀦 𑀓𑀻𑀴𑀢𑀺, 𑀲𑁄 𑀧𑀼𑀕𑁆𑀕𑀮𑁄 𑀯𑀺𑀦𑀬𑁂 𑀧𑀥𑀸𑀦𑀭𑀢𑁄𑀧𑀺 𑀯𑀺𑀦𑀬𑀧𑀺𑀝𑀓𑁂 𑀅𑀚𑁆𑀛𑀬𑀦𑀲𑀯𑀦𑀸𑀤𑀺𑀯𑀲𑁂𑀦 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀧𑀺 𑀧𑀝𑀼 𑀳𑁄𑀢𑀺 𑀓𑀺𑀁, 𑀦 𑀳𑁄𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀦𑀬𑀧𑀺𑀝𑀓𑁂 𑀧𑀸𑀝𑀯𑀫𑀸𑀓𑀗𑁆𑀔𑀦𑁆𑀢𑁂𑀳𑀺 𑀧𑀞𑀫𑀁 𑀢𑀸𑀯𑁂𑀢𑁆𑀣 𑀲𑀓𑁆𑀓𑀘𑁆𑀘𑀁 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑀫𑁂𑀯𑀢𑁆𑀣𑀁 𑀆𑀦𑀺𑀲𑀁𑀲𑀧𑀸𑀭𑀁𑀧𑀭𑀺𑀬𑀧𑀬𑁄𑀚𑀦𑁂𑀦 𑀲𑀳 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀇𑀫𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁, ‘‘𑀅𑀯𑁂𑀤𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀬𑁄’’𑀢𑀺 𑀧𑀸𑀞𑀲𑁂𑀲𑁄. 𑀬𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀲𑀫𑁆𑀫𑀸 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺. 𑀓𑀺𑀁 𑀪𑀽𑀢𑀦𑁆𑀢𑀺 𑀆𑀳 ‘‘𑀳𑀺𑀢𑀯𑀺𑀪𑀸𑀯𑀦’’𑀦𑁆𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑀸 𑀫𑀽𑀮𑀲𑀸𑀥𑀦𑀢𑁆𑀢𑀸 𑀲𑀻𑀮𑀫𑀺𑀥 𑀳𑀺𑀢𑀁 𑀦𑀸𑀫, 𑀢𑀁 𑀯𑀺𑀪𑀸𑀯𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀳𑀺𑀢𑀯𑀺𑀪𑀸𑀯𑀦𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬…𑀧𑁂… 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀫𑀺. 𑀧. 𑁨.𑁧.𑁯) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀓𑀺𑀮𑁂𑀲𑀚𑀝𑀸𑀯𑀺𑀚𑀝𑀦𑀮𑁄𑀓𑀼𑀢𑁆𑀢𑀭𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀲𑁄𑀧𑀘𑀸𑀭𑀲𑀸𑀪𑀺𑀜𑁆𑀜𑀸𑀭𑀽𑀧𑀸𑀭𑀽𑀧𑀅𑀝𑁆𑀞𑀲𑀫𑀸𑀥𑀻𑀦𑀁 𑀧𑀤𑀝𑁆𑀞𑀸𑀦𑀢𑀸𑀬 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀤𑀸𑀦𑀁 ¶ 𑀫𑀽𑀮𑀪𑀽𑀢𑁂𑀲𑀼 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀲𑀼 𑀧𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀢𑀧𑁆𑀧𑀓𑀸𑀲𑀓𑀢𑁆𑀢𑀸 𑀅𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 ‘‘𑀳𑀺𑀢𑀯𑀺𑀪𑀸𑀯𑀦𑁄’’𑀢𑀺 𑀯𑀼𑀢𑁆𑀢𑁄.

𑀪𑀸𑀯𑀦𑀦𑁆𑀢𑀺 ¶ 𑀪𑀸𑀯𑀻𑀬𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑁂𑀢𑀲𑀺 𑀦𑀺𑀯𑁂𑀲𑀻𑀬𑀢𑀻𑀢𑀺 𑀪𑀸𑀯𑀦𑁄, 𑀪𑀸𑀯𑀦𑀻𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀺𑀢𑀯𑀺𑀪𑀸𑀯𑀓𑀢𑁆𑀢𑀸𑀬𑁂𑀯 𑀳𑀺𑀢𑀢𑁆𑀣𑀻𑀳𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑁂 𑀯𑀸𑀲𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀏𑀯𑀁𑀯𑀺𑀥𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁. 𑀲𑀼𑀭𑀲𑀫𑁆𑀪𑀯𑀦𑁆𑀢𑀺 𑀭𑀲𑀻𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀭𑀲𑁄, 𑀲𑀤𑁆𑀤𑀭𑀲𑁄 𑀅𑀢𑁆𑀣𑀭𑀲𑁄 𑀓𑀭𑀼𑀡𑀸𑀤𑀺𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑀘, 𑀲𑁄𑀪𑀡𑁄 𑀭𑀲𑁄 𑀏𑀢𑀲𑁆𑀲𑀸𑀢𑀺 𑀲𑀼𑀭𑀲𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀲𑀼𑀭𑀲𑀁. 𑀪𑀯𑀁 𑀪𑀯𑀦𑁆𑀢𑀁, 𑀲𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀼𑀭𑀲𑀁 𑀲𑀫𑀸𑀦𑀁, 𑀲𑀼𑀭𑀲𑀁 𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀲𑀺𑀮𑁂𑀲𑁄 𑀧𑀲𑀸𑀤𑁄 𑀲𑀫𑀢𑀸 𑀫𑀥𑀼𑀭𑀢𑀸 𑀲𑀼𑀔𑀼𑀫𑀸𑀮𑀢𑀸 𑀅𑀢𑁆𑀣𑀩𑁆𑀬𑀢𑁆𑀢𑀺 𑀉𑀤𑀸𑀭𑀢𑀸 𑀑𑀚𑁄 𑀓𑀦𑁆𑀢𑀺 𑀲𑀫𑀸𑀥𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀓𑀯𑀺𑀚𑀦𑁂𑀳𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀲𑀺𑀮𑁂𑀲𑀸𑀤𑀺𑀤𑀲𑀯𑀺𑀥𑀲𑀤𑁆𑀤𑀚𑀻𑀯𑀺𑀢𑀕𑀼𑀡𑀲𑀗𑁆𑀔𑀸𑀢𑀲𑀤𑁆𑀤𑀭𑀲𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀪𑀸𑀯𑀸𑀔𑁆𑀬𑀸𑀦𑀁 𑀉𑀧𑀫𑀸 𑀭𑀽𑀧𑀓𑀁 𑀤𑀻𑀧𑀓𑀁 𑀆𑀯𑀼𑀢𑁆𑀢𑀻𑀢𑀺 𑀏𑀯𑀫𑀸𑀤𑀺𑀓𑁆𑀓𑀫𑀦𑀺𑀤𑁆𑀤𑀺𑀝𑁆𑀞𑀧𑀜𑁆𑀘𑀢𑀺𑀁𑀲𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀲𑀼 𑀅𑀦𑀼𑀭𑀽𑀧𑀲𑀪𑀸𑀯𑀸𑀔𑁆𑀬𑀸𑀦𑀸𑀤𑀺𑀧𑁆𑀧𑀥𑀸𑀦𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑀅𑀢𑁆𑀣𑀭𑀲𑀲𑀫𑁆𑀧𑀢𑁆𑀢𑀻𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀧𑀓𑀸𑀲𑀺𑀢𑀩𑁆𑀩𑀓𑀭𑀼𑀡𑀸𑀭𑀲𑀅𑀩𑁆𑀪𑀼𑀢𑀭𑀲𑀲𑀦𑁆𑀢𑀭𑀲𑀸𑀤𑀻𑀳𑀺 𑀘 𑀬𑀼𑀢𑁆𑀢𑀢𑁆𑀢𑀸 𑀲𑀼𑀭𑀲𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀯𑀸 𑀇𑀫𑀺𑀦𑀸 𑀧𑀓𑀭𑀡𑁂𑀦 𑀧𑀥𑀸𑀦𑀢𑁄 𑀯𑀺𑀥𑀻𑀬𑀫𑀸𑀦𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀏𑀓𑀦𑁆𑀢𑁂𑀦 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀢𑁆𑀢𑀸 𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀢𑁆𑀢𑀸 𑀧𑀜𑁆𑀜𑀸𑀬 𑀘 𑀦𑀺𑀩𑁆𑀩𑀸𑀦𑀧𑀸𑀧𑀦𑀢𑁄 𑀫𑀽𑀮𑀓𑀸𑀭𑀡𑀁 𑀳𑀼𑀢𑁆𑀯𑀸 𑀓𑀫𑁂𑀦 𑀦𑀺𑀩𑁆𑀩𑀸𑀦𑀸𑀫𑀢𑀨𑀮𑀭𑀲𑀲𑀫𑁆𑀧𑀤𑀸𑀬𑀓𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀧𑀭𑀫𑀲𑁆𑀲𑀸𑀤𑀦𑀻𑀬𑀭𑀽𑀧𑁂𑀦 𑀥𑀺𑀢𑀺𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀲𑀼𑀭𑀲𑀪𑀽𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁆𑀪𑀯𑀦𑁆𑀢𑀺 𑀏𑀢𑁆𑀣 𑀲𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘, 𑀢𑀁 𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄, 𑀢𑀁, 𑀓𑀸𑀬𑀘𑀺𑀢𑁆𑀢𑀲𑀼𑀔𑀸𑀦𑀁 𑀫𑀽𑀮𑀓𑀸𑀭𑀡𑀪𑀽𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀲𑀼𑀭𑀲𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑀭𑀲𑀲𑀫𑁆𑀧𑀤𑀲𑀸𑀭𑀫𑀳𑀼𑀲𑁆𑀲𑀯𑁂𑀦 𑀲𑀫𑁆𑀪𑀽𑀢𑀫𑀸𑀦𑀲𑀺𑀓𑀲𑀼𑀔𑀲𑁆𑀲, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑀺𑀲𑁆𑀲𑀬𑀓𑀸𑀬𑀺𑀓𑀲𑀼𑀔𑀲𑁆𑀲 𑀘 𑀧𑀪𑀯𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 ¶ 𑀇𑀫𑀲𑁆𑀲 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲 𑀲𑀫𑁆𑀫𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀏𑀯𑀁 𑀦𑀸𑀦𑀸𑀕𑀼𑀡𑀭𑀢𑀦𑀸𑀓𑀭𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀲𑀫𑁆𑀧𑀚𑀸𑀦𑀦𑁆𑀢𑁄 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀓𑀺𑀁 𑀳𑁄𑀢𑀻𑀢𑀺 𑀘𑁂? 𑀧𑀸𑀮𑀺𑀦𑀸 𑀉𑀧𑀸𑀮𑀺𑀦𑀸 𑀲𑀫𑁄 𑀪𑀯𑀢𑀺. 𑀧𑀸𑀮𑀺𑀦𑀸𑀢𑀺 𑀲𑀸𑀲𑀦𑀁 𑀧𑀸𑀮𑁂𑀢𑀻𑀢𑀺 ‘‘𑀧𑀸𑀮𑁄’’𑀢𑀺 𑀯𑀺𑀦𑀬𑁄 𑀯𑀼𑀘𑁆𑀘𑀢𑀺, 𑀯𑀼𑀢𑁆𑀢𑀜𑁆𑀳𑀺 ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀆𑀬𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀲𑀗𑁆𑀕𑀻𑀢𑀺𑀓𑀣𑀸; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁨𑁫𑁧) 𑀲𑁄 ¶ 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀮𑀻, 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀲𑀸𑀲𑀦𑀲𑁆𑀲 𑀚𑀻𑀯𑀺𑀢𑀪𑀽𑀢𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑀸𑀲𑀦𑀥𑀭𑀢𑁆𑀢𑀸 ‘‘𑀧𑀸𑀮𑀻’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀉𑀧𑀸𑀮𑀺𑀦𑀸, ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁮) 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁂𑀦 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀼𑀔𑀧𑀤𑀼𑀫𑀁 𑀯𑀺𑀓𑀸𑀲𑁂𑀢𑁆𑀯𑀸 𑀧𑀓𑀸𑀲𑀺𑀢𑀏𑀢𑀤𑀕𑁆𑀕𑀝𑁆𑀞𑀸𑀦𑁂𑀦 𑀯𑀺𑀲𑁂𑀲𑀢𑁄 𑀲𑀸𑀬𑀦𑀭𑀓𑁆𑀔𑀦𑀓𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀧𑀸𑀮𑀻𑀢𑀺𑀦𑀸𑀫𑀥𑁂𑀬𑁆𑀬𑁂𑀦 𑀉𑀧𑀸𑀮𑀺𑀫𑀳𑀸𑀣𑁂𑀭𑁂𑀦 𑀲𑀫𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀲𑁆𑀫𑀺𑀁 𑀯𑀺𑀲𑀬𑁂 𑀲𑀫𑁄 𑀪𑀯𑀢𑀻𑀢𑀺 𑀘𑁂? 𑀲𑀸𑀲𑀦𑁂. 𑀲𑀸𑀲𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀢𑀺𑀯𑀺𑀥𑁂 𑀲𑀸𑀲𑀦𑁂, 𑀢𑀢𑁆𑀭𑀸𑀧𑀺 𑀣𑀸𑀯𑀭𑀚𑀗𑁆𑀕𑀫𑀲𑀓𑀮𑀯𑀢𑁆𑀣𑀼𑀯𑀺𑀢𑁆𑀣𑀸𑀭𑀸𑀥𑀭𑀫𑀡𑁆𑀟𑀮𑀲𑀤𑀺𑀲𑁂 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀤𑁆𑀯𑀬𑀥𑀸𑀭𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂, 𑀢𑀢𑁆𑀣𑀸𑀧𑀺 𑀯𑀺𑀦𑀬𑀓𑀣𑀸𑀥𑀺𑀓𑀸𑀭𑀢𑁆𑀢𑀸 𑀮𑀩𑁆𑀪𑀫𑀸𑀦𑁂 𑀯𑀺𑀦𑀬𑀧𑀺𑀝𑀓𑀲𑀗𑁆𑀔𑀸𑀢𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂𑀓𑀤𑁂𑀲𑁂 𑀲𑀫𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀓𑀺𑀁𑀪𑀽𑀢𑁂 𑀲𑀸𑀲𑀦𑁂? 𑀫𑀸𑀭𑀩𑀮𑀺𑀲𑀸𑀲𑀦𑁂. 𑀫𑀸𑀭𑀲𑁆𑀲 𑀩𑀮𑀺 𑀫𑀸𑀭𑀩𑀮𑀺, 𑀫𑀸𑀭𑀕𑁄𑀘𑀭𑁄, 𑀢𑀲𑁆𑀲 𑀲𑀸𑀲𑀦𑀁 𑀳𑀺𑀁𑀲𑀓𑀁 𑀫𑀸𑀭𑀩𑀮𑀺𑀲𑀸𑀲𑀦𑀁, 𑀢𑀲𑁆𑀫𑀺𑀁. 𑀔𑀦𑁆𑀥𑀸𑀤𑀻𑀲𑀼 𑀧𑀜𑁆𑀘𑀲𑀼 𑀫𑀸𑀭𑁂𑀲𑀼 𑀧𑀥𑀸𑀦𑀪𑀽𑀢𑀓𑀸𑀫𑀭𑀸𑀕𑀸𑀤𑀺𑀧𑀪𑀯𑀓𑀺𑀮𑁂𑀲𑀫𑀸𑀭𑀲𑁆𑀲 𑀕𑁄𑀘𑀭𑀪𑀸𑀯𑁂𑀦 𑀩𑀮𑀺𑀲𑀗𑁆𑀔𑀸𑀢𑀇𑀢𑁆𑀣𑀺𑀲𑀭𑀻𑀭𑀸𑀤𑀺𑀦𑀺𑀲𑁆𑀲𑀬𑀨𑁄𑀝𑁆𑀞𑀩𑁆𑀩𑀸𑀤𑀺𑀯𑀺𑀲𑀬𑀲𑁆𑀲 𑀧𑀭𑀺𑀘𑁆𑀘𑀚𑀸𑀧𑀦𑀢𑁆𑀣𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼…𑀧𑁂… 𑀅𑀲𑀁𑀯𑀸𑀲𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪) 𑀦𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 ¶ 𑀫𑀸𑀭𑀩𑀮𑀺𑀲𑁆𑀲 𑀳𑀺𑀁𑀲𑀓𑀁 𑀳𑁄𑀢𑀻𑀢𑀺 𑀫𑀸𑀭𑀩𑀮𑀺𑀲𑀸𑀲𑀦𑀦𑀸𑀫𑀥𑁂𑀬𑁆𑀬𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑀸𑀲𑀦𑁂𑀢𑀺 𑀅𑀢𑁆𑀣𑁄.

𑀅𑀣 𑀯𑀸 ‘‘𑀩𑀴𑀺𑀲𑁂𑀦𑀧𑀺 𑀚𑀸𑀮𑁂𑀦, 𑀳𑀢𑁆𑀣𑁂𑀦 𑀓𑀼𑀫𑀺𑀦𑁂𑀦 𑀯𑀸’’𑀢𑀺 𑀉𑀤𑀓𑀝𑁆𑀞𑀓𑀣𑀸𑀬 𑀯𑀓𑁆𑀔𑀫𑀸𑀦𑀢𑁆𑀢𑀸 𑀩𑀴𑀺𑀲-𑀲𑀤𑁆𑀤𑁂𑀦 𑀫𑀘𑁆𑀙𑀫𑀸𑀭𑀡𑀓𑀡𑁆𑀝𑀓𑀫𑀸𑀳, 𑀢𑀁 𑀫𑀸𑀭𑀲𑁆𑀲 𑀩𑀴𑀺𑀲𑀁 𑀅𑀲𑀢𑀺 𑀔𑀺𑀧𑀢𑀺 𑀯𑀚𑁆𑀚𑁂𑀢𑀻𑀢𑀺 𑀫𑀸𑀭𑀩𑀴𑀺𑀲𑀸𑀲𑀦𑀁, 𑀢𑀲𑁆𑀫𑀺𑀁, ‘‘𑀲𑀫𑀦𑁆𑀢𑀧𑀸𑀲𑁄 𑀫𑀸𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀁𑀲𑀸𑀭𑀲𑀸𑀕𑀭𑁂 𑀧𑀭𑀺𑀯𑀢𑁆𑀢𑀫𑀸𑀦𑀓𑀲𑀁𑀓𑀺𑀮𑁂𑀲𑀤𑀸𑀲𑀧𑀼𑀣𑀼𑀚𑁆𑀚𑀦𑀲𑀗𑁆𑀔𑀸𑀢𑀫𑀘𑁆𑀙𑁂 𑀕𑀡𑁆𑀳𑀺𑀢𑀼𑀁 𑀫𑀸𑀭𑀫𑀳𑀸𑀓𑁂𑀯𑀝𑁆𑀝𑁂𑀦 𑀧𑀓𑁆𑀔𑀺𑀢𑁆𑀢𑀩𑀴𑀺𑀲𑀲𑀗𑁆𑀔𑀸𑀢𑀇𑀢𑁆𑀣𑀺𑀭𑀽𑀧𑀲𑀤𑁆𑀤𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸- 𑀫𑀺𑀲𑀸𑀯𑀼𑀢𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀫𑀳𑀸𑀩𑀴𑀺𑀲𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀸𑀤𑀺𑀯𑀲𑁂𑀦 𑀧𑀚𑀳𑀦𑁆𑀢𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀲𑀸𑀲𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 𑀲𑀸𑀭𑀫𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀬𑁄 𑀧𑀦 𑀦 𑀭𑀫𑀢𑁂, 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀬𑀽𑀧𑀭𑀫𑁂 ¶ 𑀢𑀢𑁄 𑀏𑀯 𑀧𑀭𑀫𑁂 𑀉𑀢𑁆𑀢𑀫𑁂 𑀲𑀼𑀚𑀦𑀲𑁆𑀲 𑀲𑀼𑀔𑀸𑀦𑀬𑀦𑁂 𑀦𑀬𑀦𑁂 𑀦𑀬𑀦𑀼𑀧𑀫𑁂 𑀯𑀺𑀦𑀬𑁂 𑀭𑀢𑁄 𑀅𑀪𑀺𑀭𑀢𑁄 𑀧𑀥𑀸𑀦𑀭𑀢𑁄𑀧𑀺 𑀯𑀺𑀦𑀬𑁂 𑀅𑀚𑁆𑀛𑀸𑀬𑀦𑀸𑀤𑀻𑀲𑀼 𑀬𑁄𑀕𑀫𑀸𑀧𑀚𑁆𑀚𑀦𑁆𑀢𑁄𑀧𑀺 𑀧𑀝𑀼 𑀳𑁄𑀢𑀺 𑀧𑀝𑀼𑀢𑀭𑁄 𑀳𑁄𑀢𑀺 𑀓𑀺𑀁, 𑀦 𑀳𑁄𑀢𑁂𑀯. 𑀢𑀲𑁆𑀫𑀸 𑀯𑀺𑀦𑀬𑁂 𑀧𑀸𑀝𑀯𑀢𑁆𑀣𑀺𑀦𑀸 𑀏𑀢𑁆𑀣𑁂𑀯 𑀲𑀓𑁆𑀓𑀘𑁆𑀘𑀸𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀲𑀗𑁆𑀔𑁂𑀧𑀢𑁄 𑀲𑀸𑀥𑀺𑀧𑁆𑀧𑀸𑀬𑀸 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀧𑀥𑀸𑀦𑁂 𑀘𑀢𑀼𑀩𑁆𑀩𑀺𑀥𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀯𑀻𑀭𑀺𑀬𑁂 𑀭𑀢𑁄 𑀅𑀪𑀺𑀭𑀢𑁄 𑀬𑁄 𑀧𑀦 𑀦𑀭𑁄 𑀲𑀸𑀭𑀫𑀢𑁂 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀬𑀢𑁄 𑀭𑀫𑀢𑁂, 𑀅𑀢𑁄 𑀢𑀲𑁆𑀫𑀸 𑀲𑁄 𑀅𑀦𑀬𑀽𑀧𑀭𑀫𑁂 𑀲𑀼𑀚𑀦𑀲𑁆𑀲 𑀲𑀼𑀔𑀸𑀦𑀬𑀦𑁂 𑀯𑀺𑀦𑀬𑁂 𑀧𑀝𑀼 𑀳𑁄𑀢𑀺 𑀓𑀼𑀲𑀮𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸𑀢𑀺 𑀦𑁄 𑀔𑀦𑁆𑀢𑀺.

𑀳𑀺𑀢𑀯𑀺𑀪𑀸𑀯𑀦𑀁 𑀳𑀺𑀢𑀧𑁆𑀧𑀓𑀸𑀲𑀓𑀁 𑀪𑀸𑀯𑀦𑀁 𑀪𑀸𑀯𑀦𑀻𑀬𑀁 𑀆𑀲𑁂𑀯𑀺𑀢𑀩𑁆𑀩𑀁 𑀲𑀼𑀭𑀲𑀫𑁆𑀪𑀯𑀁 𑀲𑀼𑀭𑀲𑀁 𑀲𑀫𑀸𑀦𑀁 𑀲𑀼𑀭𑀲𑀁 𑀪𑀽𑀢𑀁 𑀲𑀫𑁆𑀪𑀯𑀁 𑀲𑀼𑀔𑀳𑁂𑀢𑀼𑀓𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀬𑁄 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺, 𑀲𑁄 𑀧𑀼𑀕𑁆𑀕𑀮𑁄 𑀫𑀸𑀭𑀩𑀴𑀺𑀲𑀸𑀲𑀦𑁂 𑀫𑀸𑀭𑀯𑀺𑀲𑀬𑀧𑁆𑀧𑀳𑀸𑀦𑀓𑀭𑁂, 𑀅𑀣 𑀯𑀸 𑀫𑀸𑀭𑀩𑀴𑀺𑀲𑀲𑁆𑀲 ¶ 𑀫𑀸𑀭𑀲𑁆𑀲 𑀯𑀢𑁆𑀣𑀼𑀓𑀸𑀫𑀸𑀫𑀺𑀲𑀸𑀯𑀼𑀢𑀓𑀺𑀮𑁂𑀲𑀓𑀸𑀫𑀩𑀴𑀺𑀲𑀲𑁆𑀲 𑀅𑀲𑀦𑁂 𑀯𑀚𑁆𑀚𑀫𑀸𑀦𑁂 𑀲𑀸𑀲𑀦𑁂 𑀢𑀺𑀯𑀺𑀥𑁂𑀧𑀺 𑀚𑀺𑀦𑀲𑀸𑀲𑀦𑁂, 𑀢𑀢𑁆𑀣𑀸𑀧𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂, 𑀢𑀢𑁆𑀭𑀸𑀧𑀺 𑀲𑀓𑀮𑀲𑀸𑀲𑀦𑀲𑁆𑀲 𑀚𑀻𑀯𑀺𑀢𑀲𑀫𑀸𑀦𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂𑀓𑀤𑁂𑀲𑁂 𑀧𑀸𑀮𑀺𑀦𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀁 𑀏𑀢𑀤𑀕𑁆𑀕𑁂 𑀞𑀧𑀦𑁂𑀦 𑀲𑀸𑀲𑀦𑀧𑀸𑀮𑀦𑁂 𑀢𑀁𑀫𑀽𑀮𑀪𑀸𑀯𑀢𑁄 𑀧𑀸𑀮𑀲𑀗𑁆𑀔𑀸𑀢𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀧𑀲𑀢𑁆𑀣𑀢𑀭𑁂𑀦 𑀉𑀧𑀸𑀮𑀺𑀦𑀸 𑀉𑀧𑀸𑀮𑀺𑀫𑀳𑀸𑀣𑁂𑀭𑁂𑀦 𑀲𑀫𑁄 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁩𑁯. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀤𑀺𑀬𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀲𑁄 𑀘 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀦𑁆𑀢𑁂𑀳𑀺 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀤𑀺𑀬𑀦𑁆𑀢𑁄 𑀧𑀭𑀸𑀚𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀲𑀦𑁆𑀢𑀓𑀁 𑀆𑀭𑀸𑀫𑀸𑀤𑀺𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀢𑀤𑀢𑁆𑀣𑀸𑀬 𑀓𑀢𑁂 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 ¶ 𑀆𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀘 𑀅𑀢𑁆𑀢𑀦𑁄 𑀘 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀅𑀤𑀸𑀬𑀸𑀤𑁄 𑀳𑀼𑀢𑁆𑀯𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀢𑀣𑀸’’𑀢𑀺 𑀘 ‘‘𑀅𑀧𑀻’’𑀢𑀺 𑀘 ‘‘𑀧𑀭𑀸𑀚𑀺𑀢𑁄’’𑀢𑀺 𑀘 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀳 𑀏𑀓𑀢𑁄 𑀓𑀢𑁆𑀯𑀸 ‘‘𑀳𑀭𑀦𑁆𑀢𑁄’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀭𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸 𑀲𑀻𑀲𑀸𑀤𑀻𑀳𑀺 𑀧𑀭𑀲𑀦𑁆𑀢𑀓𑀁 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀡𑁆𑀟𑀲𑁆𑀲 𑀆𑀫𑀲𑀦𑁂 ¶ 𑀤𑀼𑀓𑁆𑀓𑀝𑀜𑁆𑀘 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀲𑀻𑀲𑀢𑁄 𑀔𑀦𑁆𑀥𑁄𑀳𑀭𑀡𑀸𑀤𑀺𑀧𑀬𑁄𑀕𑀁 𑀓𑀭𑁄𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀭𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀜𑁆𑀜𑁂𑀳𑀺 𑀲𑀗𑁆𑀕𑁄𑀧𑀦𑀸𑀤𑀺𑀁 𑀲𑀦𑁆𑀥𑀸𑀬 𑀅𑀢𑁆𑀢𑀦𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀦 𑀫𑀬𑀸 𑀕𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀫𑀼𑀲𑀸 𑀯𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄𑀧𑀺 𑀢𑀲𑁆𑀲 𑀯𑀺𑀫𑀢𑀼𑀧𑁆𑀧𑀸𑀤𑀦𑁂 𑀣𑀼𑀮𑁆𑀮𑀘𑁆𑀘𑀬𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀣𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺. ‘‘𑀦𑀸𑀳𑀁 𑀅𑀕𑁆𑀕𑀳𑁂𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀭𑀦𑁆𑀢𑁄 ‘‘𑀅𑀯𑀳𑀭𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀬𑀁 𑀧𑀦 𑀅𑀜𑁆𑀜𑁂𑀲𑀁 𑀪𑀡𑁆𑀟𑀳𑀭𑀡𑀓𑀫𑀦𑀼𑀲𑁆𑀲𑀸𑀤𑀻𑀦𑀫𑀜𑁆𑀜𑀢𑀭𑀁 ‘‘𑀢𑁂𑀦 𑀪𑀡𑁆𑀟𑁂𑀦 𑀲𑀳 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑁆𑀟𑀁 𑀳𑀭𑀦𑁆𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀦𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀓𑀢𑀺𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀦𑁆𑀢𑁄𑀧𑀺 𑀧𑀞𑀫𑀧𑀸𑀤𑀼𑀤𑁆𑀥𑀸𑀭𑁂𑀦 𑀣𑀼𑀮𑁆𑀮𑀘𑁆𑀘𑀬𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀧𑀤𑀯𑀸𑀭𑀸𑀢𑀺𑀓𑁆𑀓𑀫𑁂𑀦 𑀢𑀣𑁂𑀯 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀞𑀸𑀦𑀸 𑀘𑀸𑀯𑁂𑀦𑁆𑀢𑁄𑀧𑀺 𑀢𑀣𑀸 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸. 𑀣𑀮𑀸𑀤𑀻𑀲𑀼 𑀞𑀺𑀢𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀭𑀺𑀢𑀼𑀓𑀸𑀫𑀢𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀆𑀫𑀲𑀦𑀸𑀯𑀲𑀸𑀦𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀸𑀦𑀺 𑀘 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂𑀲𑀼 𑀯𑀺𑀬 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀦𑁆𑀢𑁄 𑀢𑀣𑁂𑀯 𑀧𑀭𑀸𑀚𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 ‘‘𑀆𑀤𑀺𑀬𑁂𑀬𑁆𑀬 𑀳𑀭𑁂𑀬𑁆𑀬 𑀅𑀯𑀳𑀭𑁂𑀬𑁆𑀬 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬 𑀞𑀸𑀦𑀸𑀘𑀸𑀯𑁂𑀬𑁆𑀬 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 ¶ (𑀧𑀸𑀭𑀸. 𑁯𑁨) 𑀧𑀤𑀪𑀸𑀚𑀦𑀸𑀕𑀢𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀆𑀤𑁄 𑀧𑀜𑁆𑀘 𑀧𑀤𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 ¶ 𑀙𑀝𑁆𑀞𑀁 𑀧𑀤𑀁 𑀓𑀲𑁆𑀫𑀸 𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀘𑁂? 𑀅𑀬𑀁 𑀕𑀸𑀣𑀸 𑀦 𑀢𑀁𑀧𑀤𑀪𑀸𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸, 𑀅𑀣 𑀔𑁄 𑀢𑁂𑀲𑀁 𑀧𑀤𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀯𑀼𑀢𑁆𑀢𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑀼𑀁 𑀢𑀤𑀯𑀬𑀯𑀪𑀽𑀢𑀧𑀜𑁆𑀘𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀏𑀢𑁆𑀣 𑀙𑀝𑁆𑀞𑀁 𑀧𑀤𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀯𑀓𑁆𑀔𑀫𑀸𑀦𑁂 𑀢𑀢𑀺𑀬𑀧𑀜𑁆𑀘𑀓𑁂 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀧𑀤𑁂𑀦, 𑀧𑀜𑁆𑀘𑀫𑀧𑀜𑁆𑀘𑀓𑁂 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀧𑀤𑁂𑀦 𑀘 𑀲𑀗𑁆𑀕𑀬𑁆𑀳𑀫𑀸𑀦𑀢𑁆𑀢𑀸 𑀏𑀢𑁆𑀣 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀤𑁆𑀯𑀬𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀙𑀝𑁆𑀞𑀁 𑀧𑀤𑀁 𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁦. 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑁂 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂 𑀓𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀸𑀦𑀁 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀘 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀧𑀜𑁆𑀘𑀧𑀜𑁆𑀘𑀓𑀪𑁂𑀤𑀸, 𑀢𑀢𑁆𑀣 𑀇𑀫𑀸𑀬 𑀕𑀸𑀣𑀸𑀬 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀤𑁆𑀯𑀬𑀧𑁆𑀧𑀪𑁂𑀤𑁂 𑀤𑀲 𑀅𑀯𑀳𑀸𑀭𑁂 𑀲𑀗𑁆𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀓𑀢𑁆𑀢𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀦𑀸𑀦𑁂𑀓𑀪𑀡𑁆𑀟𑀸𑀦𑀦𑁆𑀢𑀺 𑀦𑀸𑀦𑀸, 𑀏𑀓𑁄 𑀘 𑀪𑀡𑁆𑀟𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀪𑀡𑁆𑀟𑀯𑀲𑁂𑀦 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑀪𑀡𑁆𑀟𑀯𑀲𑁂𑀦𑁂𑀯 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘 𑀧𑀭𑀺𑀫𑀸𑀡𑀸 𑀬𑁂𑀲𑀦𑁆𑀢𑁂 𑀧𑀜𑁆𑀘𑀓𑀸, 𑀢𑁂𑀲𑀁. 𑀅𑀯𑀳𑀸𑀭𑀸𑀢𑀺 𑀅𑀯𑀳𑀭𑀡𑀸𑀦𑀺, 𑀘𑁄𑀭𑀓𑀫𑁆𑀫𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 ‘‘𑀆𑀤𑀺𑀬𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸 𑀆𑀤𑀺𑀬𑀦𑁆𑀢𑀸𑀤𑀬𑁄. 𑀧𑀝𑀺𑀧𑀢𑁆𑀢𑀺𑀲𑀦𑁆𑀢𑀸𑀦𑁂 𑀯𑀺𑀲𑁂𑀲𑀁 𑀯𑀺𑀦𑀺𑀘𑁆𑀙𑀬𑀁 𑀪𑀸𑀯𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀺𑀪𑀸𑀯𑀻, 𑀯𑀺𑀦𑀬𑀥𑀭𑁄, 𑀢𑁂𑀦 𑀯𑀺𑀪𑀸𑀯𑀺𑀦𑀸. 𑀯𑀺𑀜𑁆𑀜𑀸𑀢𑀩𑁆𑀩𑀸𑀢𑀺 𑀧𑀭𑁂𑀲𑀁 𑀆𑀭𑀸𑀫𑀸𑀤𑀺𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀽𑀦𑀺 𑀯𑀸 𑀤𑀸𑀲𑀫𑀬𑀽𑀭𑀸𑀤𑀺𑀁 𑀓𑁂𑀯𑀮𑀁 𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼𑀫𑀢𑁆𑀢𑀁 𑀯𑀸 𑀅𑀯𑀳𑀭𑀺𑀢𑀼𑀁 𑀓𑀢𑀸 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑀸 𑀆𑀤𑀺𑀬𑀦𑀸𑀤𑀬𑁄 𑀞𑀸𑀦𑀸𑀘𑀸𑀯𑀦𑀧𑀭𑀺𑀬𑁄𑀲𑀸𑀦𑀸 ¶ 𑀧𑀜𑁆𑀘 𑀅𑀯𑀳𑀸𑀭𑀸 𑀬𑀣𑀸𑀯𑀼𑀢𑁆𑀢𑀦𑀸𑀦𑀸𑀪𑀡𑁆𑀟𑀏𑀓𑀪𑀡𑁆𑀟𑀯𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀦𑁆𑀢𑀺 𑀤𑀲 𑀅𑀯𑀳𑀸𑀭𑀸 𑀪𑀯𑀦𑁆𑀢𑀻𑀢𑀺 𑀯𑀺𑀦𑀬𑀥𑀭𑁂𑀦 𑀑𑀢𑀺𑀡𑁆𑀡𑀲𑁆𑀲 𑀯𑀢𑁆𑀣𑀼𑀦𑁄 𑀯𑀺𑀦𑀺𑀘𑁆𑀙𑀬𑁄𑀧𑀓𑀸𑀭𑀓𑀢𑁆𑀢𑀸 𑀢𑀣𑀢𑁄 𑀜𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁪𑁧. 𑀏𑀯𑀁 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑀼𑀁 𑀯𑀢𑁆𑀢𑀩𑁆𑀩𑁂𑀲𑀼 𑀧𑀜𑁆𑀘𑀲𑀼 𑀧𑀜𑁆𑀘𑀓𑁂𑀲𑀼 𑀦𑀸𑀦𑁂𑀓𑀪𑀡𑁆𑀟𑀧𑀜𑁆𑀘𑀓𑀸𑀦𑀺 𑀤𑁆𑀯𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀲𑁂𑀲𑀧𑀜𑁆𑀘𑀓𑀢𑁆𑀢𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀸𑀳𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀳𑀢𑁆𑀣𑁄𑀢𑀺 𑀲𑀓𑁄 𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻𑀢𑀺 𑀲𑀸𑀳𑀢𑁆𑀣𑁄, 𑀅𑀯𑀳𑀸𑀭𑁄, 𑀘𑁄𑀭𑁂𑀦 𑀲𑀳𑀢𑁆𑀣𑀸 𑀓𑀢𑁄 𑀅𑀯𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀆𑀡𑀢𑁆𑀢𑀺𑀓𑁄 𑀘𑁂𑀯𑀸𑀢𑀺 𑀆𑀡𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑁄 𑀆𑀡𑀢𑁆𑀢𑀺𑀓𑁄, 𑀅𑀯𑀳𑀸𑀭𑁄, 𑀘𑁄𑀭𑀲𑁆𑀲 ‘‘𑀇𑀫𑀁 𑀦𑀸𑀫 𑀪𑀡𑁆𑀟𑀁 𑀕𑀡𑁆𑀳𑀸’’𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀡𑀸𑀧𑀦𑁂𑀦 ¶ 𑀲𑀺𑀤𑁆𑀥𑁄 𑀅𑀯𑀳𑀸𑀭𑁄 𑀘. 𑀦𑀺𑀲𑁆𑀲𑀕𑁆𑀕𑁄𑀢𑀺 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀅𑀯𑀳𑀸𑀭𑁄, 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑁂, 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁂 𑀯𑀸 𑀞𑀢𑁆𑀯𑀸 𑀪𑀡𑁆𑀟𑀲𑁆𑀲 𑀩𑀳𑀺 𑀧𑀸𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀢𑁆𑀣𑀲𑀸𑀥𑀓𑁄𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄, 𑀲𑁄 𑀅𑀯𑀳𑀸𑀭𑁄 𑀘 𑀬𑀣𑀸𑀡𑀢𑁆𑀢𑀺𑀓𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀏𑀓𑀁𑀲𑁂𑀦 𑀅𑀯𑀳𑀭𑀦𑁆𑀢𑀲𑁆𑀲 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀸 𑀅𑀯𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑁂𑀲𑁄 𑀕𑀳𑀡𑀓𑀸𑀮𑁄 𑀕𑀳𑀡𑀤𑁂𑀲𑁄 𑀕𑀳𑀡𑀸𑀓𑀸𑀭𑁄 𑀘𑀸𑀢𑀺 𑀏𑀯𑀫𑀸𑀤𑀺𑀯𑀺𑀲𑁂𑀲𑀸𑀦𑀫𑀜𑁆𑀜𑀢𑀭𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀸 𑀆𑀡𑀸𑀧𑀦𑀜𑁆𑀘 𑀏𑀓𑀁𑀲𑁂𑀦 𑀧𑀸𑀤𑀕𑁆𑀖𑀦𑀓𑀢𑁂𑀮𑀧𑀺𑀯𑀦𑀓𑀁 𑀉𑀧𑀸𑀳𑀦𑀸𑀤𑀺𑀓𑀺𑀜𑁆𑀘𑀺𑀯𑀢𑁆𑀣𑀼𑀁 𑀢𑁂𑀮𑀪𑀸𑀚𑀦𑀸𑀤𑀻𑀲𑀼 𑀧𑀸𑀢𑀦𑀸𑀤𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀏𑀯𑀫𑀸𑀤𑀺𑀧𑁆𑀧𑀬𑁄𑀕𑁄 𑀘 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀬𑀸 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄 𑀅𑀢𑁆𑀣𑀲𑀸𑀥𑀓𑁄 𑀅𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘𑀸𑀢𑀺 ¶ 𑀥𑀼𑀭𑀲𑁆𑀲 𑀦𑀺𑀓𑁆𑀔𑁂𑀧𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀦𑀁, 𑀢𑀜𑁆𑀘 𑀅𑀯𑀳𑀸𑀭𑁄, 𑀧𑀭𑀲𑀦𑁆𑀢𑀓𑀸𑀦𑀁 𑀆𑀭𑀸𑀫𑀸𑀤𑀻𑀦𑀁 𑀅𑀪𑀺𑀬𑁄𑀕𑀯𑀺𑀲𑀬𑁂 𑀘 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀸𑀤𑀺𑀦𑁄 𑀯𑀺𑀲𑀬𑁂 𑀘 𑀘𑁄𑀭𑀲𑁆𑀲 𑀲𑀸𑀫𑀺𑀦𑁄 𑀯𑀺𑀲𑁆𑀲𑀚𑁆𑀚𑀦𑁂 𑀘 𑀲𑀸𑀫𑀺𑀦𑁄 𑀘, 𑀬𑀤𑀸 𑀓𑀤𑀸𑀘𑀺 𑀬𑀣𑀸𑀓𑀣𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀕𑀳𑀡𑁂 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑀲𑀗𑁆𑀔𑀸𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑀸𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀇𑀤𑀁 𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀸𑀳𑀢𑁆𑀣𑀸𑀤𑀺𑀘𑀢𑀼𑀓𑁆𑀓𑀜𑁆𑀘 𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀲𑀫𑀽𑀳𑁄 𑀧𑀜𑁆𑀘𑀓𑀁, 𑀲𑀸𑀳𑀢𑁆𑀣𑀸𑀤𑀺𑀧𑀜𑁆𑀘𑀓𑀁 ‘‘𑀲𑀸𑀳𑀢𑁆𑀣𑀧𑀜𑁆𑀘𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀤𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁨. 𑀧𑀼𑀩𑁆𑀩𑀲𑀳𑀧𑀬𑁄𑀕𑀸 𑀘𑀸𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑀧𑀬𑁄𑀕𑁄 𑀲𑀳𑀧𑀬𑁄𑀕𑁄’’𑀢𑀺 𑀧𑀬𑁄𑀕-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. ‘‘𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀬𑀣𑀸𑀡𑀢𑁆𑀢𑀺𑀓𑀫𑀯𑀺𑀭𑀸𑀥𑁂𑀢𑁆𑀯𑀸 𑀕𑀡𑁆𑀳𑀢𑁄 ‘‘𑀅𑀲𑀼𑀓𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑀦𑀁 𑀧𑀼𑀩𑁆𑀩𑀧𑀬𑁄𑀕𑁄 𑀦𑀸𑀫 𑀅𑀯𑀳𑀸𑀭𑁄. 𑀓𑀸𑀬𑁂𑀦, 𑀯𑀸𑀘𑀸𑀬 𑀯𑀸 𑀧𑀬𑀼𑀚𑁆𑀚𑀦𑀁 𑀆𑀡𑀸𑀧𑀦𑀁 𑀧𑀬𑁄𑀕𑁄, 𑀆𑀡𑀢𑁆𑀢𑀲𑁆𑀲 𑀪𑀡𑁆𑀟𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑁄 𑀘 𑀲𑁄 𑀧𑀬𑁄𑀕𑁄 𑀘𑀸𑀢𑀺 𑀧𑀼𑀩𑁆𑀩𑀧𑀬𑁄𑀕𑁄 𑀅𑀯𑀳𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀉𑀧𑀮𑀓𑁆𑀔𑀡𑀧𑀤𑀢𑁆𑀢𑀸 𑀞𑀸𑀦𑀸𑀘𑀸𑀯𑀦𑀜𑁆𑀘 𑀧𑀭𑀸𑀬𑀢𑁆𑀢𑀪𑀽𑀫𑀺𑀕𑀳𑀡𑁂 𑀔𑀻𑀮𑀲𑀗𑁆𑀓𑀫𑀦𑀸𑀤𑀺𑀓𑀜𑁆𑀘 𑀲𑀳𑀧𑀬𑁄𑀕𑁄 𑀅𑀯𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀯𑀺𑀤𑀸𑀳𑀭𑀡𑀦𑁆𑀢𑀺 𑀩𑀳𑀽𑀳𑀺 𑀏𑀓𑀢𑁄 𑀳𑀼𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑀩𑁆𑀩𑁂𑀳𑀺, 𑀏𑀓𑀢𑁄 𑀯𑀸 𑀲𑀩𑁆𑀩𑁂𑀲𑀁 𑀅𑀦𑀼𑀫𑀢𑀺𑀬𑀸 𑀏𑀓𑁂𑀦 𑀯𑀸 𑀕𑀦𑁆𑀢𑁆𑀯𑀸 𑀧𑀭𑀲𑀦𑁆𑀢𑀓𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀭𑀡𑀲𑀗𑁆𑀔𑀸𑀢𑁄 𑀲𑀁𑀯𑀺𑀤𑀸𑀯𑀳𑀸𑀭𑁄 𑀘. 𑀲𑀫𑀁 𑀏𑀓𑀻 𑀳𑀼𑀢𑁆𑀯𑀸 𑀯𑀺𑀲𑀼𑀁 𑀏𑀓𑁂𑀦𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀤𑁂 𑀯𑀸 𑀧𑀸𑀤𑀸𑀭𑀳𑁂 ¶ 𑀯𑀸 𑀕𑀳𑀺𑀢𑁂 𑀓𑀢𑀫𑀦𑁆𑀢𑀦𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀲𑀁𑀯𑀺𑀤𑀳𑀺𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀅𑀯𑀳𑀭𑀡𑀁 𑀲𑀁𑀯𑀺𑀤𑀸𑀳𑀭𑀡𑀁. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀁𑀯𑀺𑀤𑀸𑀳𑀭𑀡’’𑀦𑁆𑀢𑀺 ‘‘𑀲𑀁𑀯𑀺𑀤𑀸𑀯𑀳𑀸𑀭𑁄’’𑀢𑀺 𑀇𑀫𑀲𑁆𑀲 𑀯𑁂𑀯𑀘𑀦𑀁. ‘‘𑀲𑀫𑁆𑀩𑀳𑀼𑀮𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁮) 𑀯𑀘𑀦𑀢𑁄 𑀏𑀯𑀁 𑀲𑀳𑀓𑀢𑀫𑀦𑁆𑀢𑀦𑁂𑀲𑀼 𑀏𑀓𑁂𑀦𑀸𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀤𑁂 𑀯𑀸 𑀧𑀸𑀤𑀸𑀭𑀳𑁂 𑀯𑀸 𑀕𑀳𑀺𑀢𑁂 𑀓𑀢𑀫𑀦𑁆𑀢𑀦𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀗𑁆𑀓𑁂𑀢𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀲𑀜𑁆𑀚𑀸𑀦𑀦𑀁 𑀲𑀗𑁆𑀓𑁂𑀢𑁄, 𑀢𑁂𑀦 𑀓𑀢𑀁 𑀓𑀫𑁆𑀫𑀁 𑀅𑀯𑀳𑀭𑀡𑀁 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫. 𑀢𑀁 𑀧𑀦 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀓𑀜𑁆𑀘𑀺 𑀓𑀸𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀢𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺 𑀘𑁂, 𑀲𑀗𑁆𑀓𑁂𑀢𑀓𑀸𑀭𑀓𑀲𑁆𑀲 𑀲𑀗𑁆𑀓𑁂𑀢𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀫𑀺𑀢𑁆𑀢𑀦𑁆𑀢𑀺 𑀧𑀭𑀪𑀡𑁆𑀟𑀸𑀯𑀳𑀸𑀭𑀲𑁆𑀲 𑀳𑁂𑀢𑀼𑀢𑁆𑀢𑀸 𑀅𑀓𑁆𑀔𑀺𑀦𑀺𑀔𑀡𑀦𑀸𑀤𑀺 𑀦𑀺𑀫𑀺𑀢𑁆𑀢𑀁 𑀦𑀸𑀫, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀦𑁂𑀫𑀺𑀢𑁆𑀢𑀁, 𑀅𑀯𑀳𑀭𑀡𑀲𑀗𑁆𑀔𑀸𑀢𑀓𑀫𑁆𑀫𑀁 𑀅𑀯𑀳𑀸𑀭𑁄. ‘‘𑀫𑀬𑀸 𑀅𑀓𑁆𑀔𑀺𑀫𑁆𑀳𑀺 𑀦𑀺𑀔𑀡𑀺𑀢𑁂 𑀯𑀸 𑀪𑀫𑀼𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁂 𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀆𑀡𑀢𑁆𑀢𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀯𑀼𑀢𑁆𑀢𑀫𑁂𑀯 𑀪𑀡𑁆𑀟𑀁 𑀯𑀼𑀢𑁆𑀢𑀦𑀺𑀬𑀸𑀫𑀫𑀯𑀺𑀭𑀸𑀥𑁂𑀢𑁆𑀯𑀸 𑀕𑀳𑀺𑀢𑀁 𑀘𑁂, 𑀦𑀺𑀫𑀺𑀢𑁆𑀢𑀓𑀸𑀭𑀓𑀲𑁆𑀲 𑀦𑀺𑀫𑀺𑀢𑁆𑀢𑀓𑀭𑀡𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀯𑀼𑀢𑁆𑀢𑀦𑀺𑀬𑀸𑀫𑀁 𑀯𑀺𑀭𑀸𑀥𑁂𑀢𑁆𑀯𑀸 𑀕𑀳𑀺𑀢𑀁 𑀘𑁂, 𑀦𑀺𑀫𑀺𑀢𑁆𑀢𑀓𑀸𑀭𑀓𑁄 𑀫𑀼𑀘𑁆𑀘𑀢𑀺, 𑀅𑀯𑀳𑀸𑀭𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀼𑀩𑁆𑀩𑀧𑀬𑁄𑀕𑁄 𑀆𑀤𑀺 𑀬𑀲𑁆𑀲 𑀢𑀁 𑀧𑀼𑀩𑁆𑀩𑀧𑀬𑁄𑀕𑀸𑀤𑀺, 𑀧𑀼𑀩𑁆𑀩𑀧𑀬𑁄𑀕𑀸𑀤𑀺 𑀘 𑀢𑀁 𑀧𑀜𑁆𑀘𑀓𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄.

𑁪𑁩. 𑀣𑁂𑀬𑁆𑀬𑀜𑁆𑀘 𑀧𑀲𑀬𑁆𑀳𑀜𑁆𑀘 𑀧𑀭𑀺𑀓𑀧𑁆𑀧𑁄 𑀘 𑀧𑀝𑀺𑀘𑁆𑀙𑀦𑁆𑀦𑁄 𑀘 𑀓𑀼𑀲𑁄 𑀘 𑀣𑁂𑀬𑁆𑀬𑀧𑀲𑀬𑁆𑀳𑀧𑀭𑀺𑀓𑀧𑁆𑀧𑀧𑀝𑀺𑀘𑁆𑀙𑀦𑁆𑀦𑀓𑀼𑀲𑀸, 𑀢𑁂 𑀆𑀤𑀻 𑀉𑀧𑀧𑀤𑀪𑀽𑀢𑀸 𑀬𑁂𑀲𑀁 𑀅𑀯𑀳𑀸𑀭𑀸𑀦𑀁 𑀢𑁂 𑀣𑁂𑀬𑁆𑀬…𑀧𑁂… 𑀓𑀼𑀲𑀸𑀤𑀺𑀓𑀸 ¶ , 𑀅𑀯𑀳𑀸𑀭𑀸, 𑀇𑀫𑀺𑀦𑀸 𑀣𑁂𑀬𑁆𑀬𑀸𑀯𑀳𑀸𑀭𑁄 𑀘…𑀧𑁂… 𑀓𑀼𑀲𑀸𑀯𑀳𑀸𑀭𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀣𑁂𑀬𑁆𑀬𑀸𑀯𑀳𑀸𑀭𑁄𑀢𑀺 𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀏𑀢𑁆𑀣 𑀦-𑀓𑀸𑀭𑀮𑁄𑀧𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀅𑀯𑀳𑀭𑀡𑀁 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦 𑀕𑀳𑀡𑀜𑁆𑀘 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀜𑁆𑀘𑁂𑀢𑁆𑀯𑀸 𑀕𑀳𑀡𑀜𑁆𑀘 𑀣𑁂𑀬𑁆𑀬𑀸𑀯𑀳𑀸𑀭𑁄.

𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀳𑀭𑀡𑀁 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀕𑀸𑀫𑀯𑀺𑀮𑁄𑀧𑀓𑀸 𑀯𑀺𑀬 𑀲𑀸𑀫𑀺𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀕𑀳𑀡𑀜𑁆𑀘 𑀭𑀸𑀚𑀪𑀝𑀸𑀤𑀬𑁄 𑀯𑀺𑀬 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀩𑀤𑁆𑀥𑀓𑀭𑀕𑁆𑀕𑀳𑀡𑁂 𑀅𑀥𑀺𑀓𑀕𑁆𑀕𑀳𑀡𑀜𑁆𑀘 𑀧𑀲𑀬𑁆𑀳𑀸𑀯𑀳𑀸𑀭𑁄.

𑀯𑀢𑁆𑀣𑀲𑀼𑀢𑁆𑀢𑀸𑀤𑀺𑀓𑀁 ¶ 𑀧𑀭𑀺𑀘𑁆𑀙𑀺𑀚𑁆𑀚 𑀓𑀧𑁆𑀧𑁂𑀢𑁆𑀯𑀸 𑀅𑀯𑀳𑀭𑀡𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀲𑁄 𑀘 𑀪𑀡𑁆𑀟𑁄𑀓𑀸𑀲𑀧𑀭𑀺𑀓𑀧𑁆𑀧𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 𑀅𑀦𑁆𑀥𑀓𑀸𑀭𑀧𑁆𑀧𑀤𑁂𑀲𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀢𑁆𑀢𑀸𑀤𑀺𑀪𑀡𑁆𑀟𑀸𑀦𑀺 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑁂 𑀧𑁂𑀴𑀸𑀤𑀬𑁄 𑀕𑀡𑁆𑀳𑀦𑁆𑀢𑀲𑁆𑀲 ‘‘𑀯𑀢𑁆𑀣𑀸𑀦𑀺 𑀘𑁂 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀼𑀢𑁆𑀢𑀸𑀦𑀺 𑀘𑁂 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑀧𑀼𑀩𑁆𑀩𑀓𑀢𑁆𑀢𑀸 𑀪𑀡𑁆𑀟𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦𑀸𑀫. 𑀆𑀭𑀸𑀫𑀧𑀭𑀺𑀯𑁂𑀡𑀸𑀤𑀻𑀦𑀺 𑀧𑀯𑀺𑀲𑀺𑀢𑁆𑀯𑀸 𑀮𑁄𑀪𑀦𑀻𑀬𑀁 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀕𑀩𑁆𑀪𑀧𑀸𑀲𑀸𑀤𑀢𑀮𑀧𑀫𑀼𑀔𑀫𑀸𑀴𑀓𑀧𑀸𑀓𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀏𑀢𑁆𑀣𑀦𑁆𑀢𑀭𑁂 𑀤𑀺𑀝𑁆𑀞𑁄 𑀘𑁂, 𑀑𑀮𑁄𑀓𑁂𑀢𑀼𑀁 𑀕𑀳𑀺𑀢𑀁 𑀯𑀺𑀬 𑀤𑀲𑁆𑀲𑀸𑀫𑀺, 𑀦𑁄 𑀘𑁂, 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑁄 𑀑𑀓𑀸𑀲𑀧𑀭𑀺𑀓𑀧𑁆𑀧𑀧𑀼𑀩𑁆𑀩𑀓𑀢𑁆𑀢𑀸 𑀑𑀓𑀸𑀲𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦𑀸𑀫𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀡𑀧𑀡𑁆𑀡𑀸𑀤𑀻𑀳𑀺 ¶ 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀪𑀡𑁆𑀟𑀲𑁆𑀲 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀉𑀬𑁆𑀬𑀸𑀦𑀸𑀤𑀻𑀲𑀼 𑀓𑀻𑀴𑀫𑀸𑀦𑁂𑀳𑀺 𑀯𑀸 𑀲𑀗𑁆𑀖𑀧𑀭𑀺𑀯𑀺𑀲𑀦𑁆𑀢𑁂𑀳𑀺 𑀯𑀸 𑀫𑀦𑀼𑀲𑁆𑀲𑁂𑀳𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀁 𑀅𑀮𑀗𑁆𑀓𑀸𑀭𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀪𑀡𑁆𑀟𑀁 𑀤𑀺𑀲𑁆𑀯𑀸 ‘‘𑀑𑀡𑀫𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀆𑀲𑀗𑁆𑀓𑀦𑁆𑀢𑀻’’𑀢𑀺 𑀞𑀢𑁆𑀯𑀸 𑀢𑀺𑀡𑀧𑀡𑁆𑀡𑀧𑀁𑀲𑀼𑀯𑀸𑀮𑀼𑀓𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀫𑀺𑀓𑁂𑀲𑀼 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀲𑀸𑀮𑀬𑁂𑀲𑀼 𑀕𑀢𑁂𑀲𑀼 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑀡𑀜𑁆𑀘 𑀢𑀤𑁂𑀯 𑀪𑀡𑁆𑀟𑀁 𑀓𑀤𑁆𑀤𑀫𑀸𑀤𑀻𑀲𑀼 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀗𑁆𑀕𑀼𑀝𑁆𑀞𑀸𑀤𑀻𑀳𑀺 𑀧𑀻𑀴𑁂𑀢𑁆𑀯𑀸 𑀑𑀲𑀻𑀤𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀸𑀕𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁 𑀉𑀧𑀭𑀺𑀪𑀸𑀕𑁂𑀦 𑀅𑀢𑀺𑀓𑁆𑀓𑀫𑀦𑀜𑁆𑀘 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀲𑁂𑀦 𑀅𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑀲𑁆𑀲 𑀅𑀕𑁆𑀖𑁂𑀦 𑀫𑀳𑀦𑁆𑀢𑀲𑁆𑀲 𑀯𑀸 𑀲𑀫𑀲𑀫𑀲𑁆𑀲 𑀯𑀸 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀓𑀼𑀲𑀧𑀸𑀢𑀦𑁂𑀦 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂𑀲𑀼 𑀪𑀸𑀚𑀺𑀬𑀫𑀸𑀦𑁂𑀲𑀼 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂𑀦 𑀲𑀫𑀁 𑀯𑀸 𑀅𑀥𑀺𑀓𑀁 𑀯𑀸 𑀊𑀦𑀓𑀁 𑀯𑀸 𑀅𑀕𑁆𑀖𑁂𑀦 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀜𑁆𑀜𑀲𑁆𑀲 𑀓𑁄𑀝𑁆𑀞𑀸𑀲𑀁 𑀅𑀯𑀳𑀭𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀢𑀺𑀢𑀁 𑀓𑀼𑀲𑀁 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑁄 𑀉𑀤𑁆𑀥𑀭𑀢𑀺, 𑀢𑀗𑁆𑀔𑀡𑁂 𑀘 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑀓𑁆𑀔𑀡𑁂 𑀘 𑀦 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑀢𑁄 𑀧𑀭𑀦𑀸𑀫𑀮𑀺𑀔𑀺𑀢𑀁 𑀓𑀼𑀲𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀞𑀫𑀁 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀝𑀓𑁆𑀔𑀡𑁂 𑀘 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑀓𑁆𑀔𑀡𑁂 𑀘 𑀲𑀓𑀦𑀸𑀫𑀮𑀺𑀔𑀺𑀢𑀁 𑀓𑀼𑀲𑀁 𑀉𑀤𑁆𑀥𑀭𑀡𑀓𑁆𑀔𑀡𑁂 𑀘 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑀦𑀓𑁆𑀔𑀡𑁂 𑀳𑀢𑁆𑀣𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺.

𑀬𑀤𑀺 ¶ 𑀤𑁆𑀯𑁂𑀧𑀺 𑀓𑀼𑀲𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀩𑁆𑀩𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀓𑀲𑀓𑀓𑁄𑀝𑁆𑀞𑀸𑀲𑀁 𑀆𑀤𑀸𑀬 𑀕𑀢𑁂𑀲𑀼 𑀬𑀲𑁆𑀫𑀺𑀁 𑀓𑀼𑀲𑀁 𑀧𑀝𑀺𑀘𑁆𑀙𑀸𑀤𑁂𑀲𑀺, 𑀢𑀲𑁆𑀲 𑀲𑀸𑀫𑀺𑀓𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀼𑀲𑁄 𑀓𑀲𑁆𑀫𑀸 𑀦 ¶ 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀘𑁄𑀭𑁄 ‘‘𑀫𑀬𑁆𑀳𑀫𑁆𑀧𑀺 𑀓𑀼𑀲𑁄 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀯𑀤𑀺𑀢𑁆𑀯𑀸 𑀯𑀸 𑀅𑀯𑀺𑀯𑀤𑀺𑀢𑁆𑀯𑀸 𑀯𑀸 𑀕𑀳𑁂𑀢𑁆𑀯𑀸 𑀕𑀢𑁂 𑀇𑀢𑀭𑀁 𑀓𑁄𑀝𑁆𑀞𑀸𑀲𑀁 𑀉𑀤𑁆𑀥𑀭𑀢𑀺 𑀘𑁂, 𑀉𑀤𑁆𑀥𑀝𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀭𑁄 ‘‘𑀫𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀢𑀼𑀬𑁆𑀳𑀁 𑀦 𑀤𑁂𑀫𑀺, 𑀢𑁆𑀯𑀁 𑀢𑀼𑀬𑁆𑀳𑀁 𑀓𑁄𑀝𑁆𑀞𑀸𑀲𑀁 𑀯𑀺𑀘𑀺𑀦𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀅𑀢𑁆𑀢𑀦𑁄 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀝𑀓𑁆𑀔𑀡𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑀤𑀺 𑀧𑀭𑁄 𑀯𑀺𑀯𑀸𑀤𑀪𑀻𑀭𑀼𑀓𑀢𑁆𑀢𑀸 ‘‘𑀓𑀺𑀁 𑀯𑀺𑀯𑀸𑀤𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀸 𑀧𑀢𑁆𑀢𑀁 𑀳𑁄𑀢𑀼 𑀢𑀼𑀬𑁆𑀳𑀁 𑀯𑀸, 𑀯𑀭𑀓𑁄𑀝𑁆𑀞𑀸𑀲𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑁂𑀬𑁆𑀬, 𑀤𑀺𑀦𑁆𑀦𑀓𑀁 𑀦𑀸𑀫 𑀕𑀳𑀺𑀢𑀁 𑀳𑁄𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀻𑀢𑀺. 𑀬𑀤𑀺 ‘‘𑀢𑀯 𑀭𑀼𑀘𑁆𑀘𑀦𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀺𑀯𑀸𑀤𑀪𑀬𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀭𑀪𑀸𑀕𑀁 𑀞𑀧𑁂𑀢𑁆𑀯𑀸 𑀮𑀸𑀫𑀓𑀪𑀸𑀕𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀘𑁄𑀭𑁄 𑀧𑀘𑁆𑀙𑀸 𑀕𑀡𑁆𑀳𑀦𑁆𑀢𑁄 𑀯𑀺𑀘𑀺𑀢𑀸𑀯𑀲𑁂𑀲𑀁 𑀦𑀸𑀫 𑀅𑀕𑁆𑀕𑀳𑁂𑀲𑀻𑀢𑀺 𑀧𑀸𑀭𑀸𑀚𑀺𑀓𑁄 𑀦 𑀳𑁄𑀢𑀺. 𑀏𑀯𑀁 𑀓𑀼𑀲𑀸𑀯𑀳𑀸𑀭𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑁂𑀲𑀼 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁪𑁪. 𑀏𑀢𑁆𑀢𑀸𑀯𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑀸𑀯𑀬𑀯𑀭𑀽𑀧𑁂𑀦 𑀉𑀕𑁆𑀕𑀳𑁂𑀢𑀩𑁆𑀩𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀦𑀺𑀘𑁆𑀙𑀬𑁂 𑀲𑀫𑁆𑀧𑀢𑁆𑀢𑁂 𑀲𑀳𑀲𑀸 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀧𑀞𑀫𑀁 𑀑𑀮𑁄𑀓𑁂𑀢𑀩𑁆𑀩𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀓𑀸𑀮𑀕𑁆𑀖𑀤𑁂𑀲𑁂 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀯𑀢𑁆𑀣𑀼 𑀦𑀸𑀫 𑀅𑀯𑀳𑀝𑀪𑀡𑁆𑀟𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀯𑀳𑀸𑀭𑀓𑁂𑀦 ‘‘𑀫𑀬𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀪𑀡𑁆𑀟𑀲𑁆𑀲 𑀲𑀲𑁆𑀲𑀸𑀫𑀺𑀓𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀲𑁆𑀲𑀸𑀫𑀺𑀓𑀁 ¶ 𑀘𑁂, 𑀅𑀯𑀳𑀸𑀭𑀓𑀸𑀮𑁂 𑀢𑁂𑀲𑀁 𑀲𑀸𑀮𑀬𑀪𑀸𑀯𑀁 𑀯𑀸 𑀦𑀺𑀭𑀸𑀮𑀬𑀪𑀸𑀯𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀲𑀸𑀮𑀬𑀓𑀸𑀮𑁂 𑀘𑁂 𑀕𑀳𑀺𑀢𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀤𑀼𑀓𑁆𑀓𑀝𑁂𑀦, 𑀅𑀢𑀺𑀭𑁂𑀓𑀫𑀸𑀲𑀓𑀁 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀘𑁆𑀘𑀬𑁂𑀦, 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀧𑀸𑀭𑀸𑀚𑀺𑀓𑁂𑀦 𑀓𑀸𑀢𑀩𑁆𑀩𑁄. 𑀲𑀸𑀫𑀺𑀓𑀸𑀦𑀁 𑀦𑀺𑀭𑀸𑀮𑀬𑀓𑀸𑀮𑁂 𑀘𑁂 𑀕𑀳𑀺𑀢𑀁, 𑀦𑀢𑁆𑀣𑀺 𑀧𑀸𑀭𑀸𑀚𑀺𑀓𑀁. 𑀪𑀡𑁆𑀟𑀲𑀸𑀫𑀺𑀓𑁂 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂 𑀢𑀁 𑀯𑀸 𑀪𑀡𑁆𑀟𑀁 𑀢𑀤𑀕𑁆𑀖𑀦𑀓𑀁 𑀯𑀸 𑀤𑀸𑀢𑀩𑁆𑀩𑀦𑁆𑀢𑀺.

𑀓𑀸𑀮𑁄 𑀦𑀸𑀫 𑀅𑀯𑀳𑀸𑀭𑀓𑀸𑀮𑁄. 𑀪𑀡𑁆𑀟𑀁 𑀦𑀸𑀫𑁂𑀢𑀁 𑀓𑀤𑀸𑀘𑀺 𑀫𑀳𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀲𑀫𑀕𑁆𑀖𑀁. 𑀢𑀲𑁆𑀫𑀸 ¶ 𑀅𑀯𑀳𑀝𑀪𑀡𑁆𑀟𑀲𑁆𑀲 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁂𑀳𑀺 𑀅𑀯𑀳𑀝𑀓𑀸𑀮𑀸𑀦𑀼𑀭𑀽𑀧𑀁 𑀓𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀓𑀸𑀮𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀕𑁆𑀖𑁄 𑀦𑀸𑀫 𑀅𑀯𑀳𑀝𑀪𑀡𑁆𑀟𑀲𑁆𑀲 𑀅𑀕𑁆𑀖𑁄. 𑀏𑀢𑁆𑀣 𑀘 𑀲𑀩𑁆𑀩𑀤𑀸 𑀪𑀡𑁆𑀟𑀸𑀦𑀁 𑀅𑀕𑁆𑀖𑁄 𑀲𑀫𑀸𑀦𑀭𑀽𑀧𑁄 𑀦 𑀳𑁄𑀢𑀺, 𑀦𑀯𑀪𑀡𑁆𑀟𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀧𑀼𑀭𑀸𑀡𑀁 𑀘𑁂 𑀲𑀫𑀕𑁆𑀖𑀁. 𑀢𑀲𑁆𑀫𑀸 𑀅𑀯𑀳𑀸𑀭𑀓𑀸𑀮𑁂 𑀪𑀡𑁆𑀟𑀲𑁆𑀲 𑀦𑀯𑀪𑀸𑀯𑀁 𑀯𑀸 𑀧𑀼𑀭𑀸𑀡𑀪𑀸𑀯𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀅𑀕𑁆𑀖𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑁂𑀲𑁄 𑀘𑀸𑀢𑀺 𑀪𑀡𑁆𑀟𑀸𑀯𑀳𑀸𑀭𑀤𑁂𑀲𑁄. 𑀏𑀢𑁆𑀣 𑀘 𑀲𑀩𑁆𑀩𑀲𑁆𑀲𑀸𑀧𑀺 𑀪𑀡𑁆𑀟𑀲𑁆𑀲 𑀉𑀝𑁆𑀞𑀸𑀦𑀤𑁂𑀲𑁂 𑀲𑀫𑀕𑁆𑀖𑀁 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀢𑁆𑀢𑀸 𑀅𑀯𑀳𑀝𑀪𑀡𑁆𑀟𑁂 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀸 𑀆𑀧𑀢𑁆𑀢𑀺𑀬𑁄 𑀦𑀺𑀬𑀫𑀦𑁆𑀢𑁂𑀳𑀺 𑀅𑀕𑁆𑀖𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀬 𑀅𑀯𑀳𑀸𑀭𑀤𑁂𑀲𑀁 𑀦𑀺𑀬𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀅𑀕𑁆𑀖𑀯𑀲𑁂𑀦 𑀢𑀤𑀦𑀼𑀭𑀽𑀧𑀸 𑀆𑀧𑀢𑁆𑀢𑀺𑀬𑁄 𑀓𑀸𑀭𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀭𑀺𑀪𑁄𑀕𑁄 𑀦𑀸𑀫 𑀅𑀯𑀳𑀝𑀪𑀡𑁆𑀟𑁂 𑀅𑀯𑀳𑀸𑀭𑀢𑁄 𑀧𑀼𑀩𑁆𑀩𑁂 𑀧𑀭𑁂𑀳𑀺 𑀓𑀢𑀧𑀭𑀺𑀪𑁄𑀕𑁄. 𑀏𑀢𑁆𑀣 𑀘 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀡𑁆𑀟𑀲𑁆𑀲 𑀧𑀭𑀺𑀪𑁄𑀕𑁂𑀦 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀻𑀢𑀺 𑀪𑀡𑁆𑀟𑀲𑀸𑀫𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 ¶ 𑀪𑀡𑁆𑀟𑁂 𑀦𑀯𑁂𑀧𑀺 𑀏𑀓𑀯𑀸𑀭𑀫𑁆𑀧𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀧𑀭𑀺𑀪𑀼𑀢𑁆𑀢𑁂 𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀕𑁆𑀖𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀏𑀢𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀜𑁆𑀘𑀧𑀺 𑀜𑀢𑁆𑀯𑀸 𑀏𑀢𑀸𑀦𑀺 𑀓𑀢𑁆𑀢𑀩𑁆𑀩𑁄 𑀧𑀡𑁆𑀟𑀺𑀢𑁂𑀦 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑁪𑁫. 𑀏𑀢𑁆𑀢𑀸𑀯𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀦𑀺𑀘𑁆𑀙𑀬𑀸𑀯𑀬𑀯𑀪𑀽𑀢𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑁂 𑀘 𑀧𑀜𑁆𑀘𑀝𑁆𑀞𑀸𑀦𑀸𑀯𑀮𑁄𑀓𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀕𑀢𑁂 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀁 𑀧𑀭𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀕𑀡𑁆𑀳𑀢𑁄 𑀫𑁄𑀓𑁆𑀔𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀢𑀣𑀸𑀕𑀢𑁂𑀦 𑀬𑀸 𑀧𑀦𑁂𑀢𑀸 𑁋

𑀪𑀽𑀫𑀝𑁆𑀞𑀜𑁆𑀘 𑀣𑀮𑀝𑁆𑀞𑀜𑁆𑀘;

𑀆𑀓𑀸𑀲𑀝𑁆𑀞 𑀫𑀣𑀸𑀧𑀭𑀁;

𑀯𑁂𑀳𑀸𑀲𑀝𑁆𑀞𑁄 ¶ 𑀤𑀓𑀝𑁆𑀞𑀜𑁆𑀘;

𑀦𑀸𑀯𑀸 𑀬𑀸𑀦𑀝𑁆𑀞𑀫𑁂𑀯 𑀘.

𑀪𑀸𑀭𑀸 𑀭𑀸𑀫 𑀯𑀺𑀳𑀸𑀭𑀝𑁆𑀞𑀁;

𑀔𑁂𑀢𑁆𑀢 𑀯𑀢𑁆𑀣𑀼𑀝𑁆𑀞𑀫𑁂𑀯 𑀘;

𑀕𑀸𑀫𑀸 𑀭𑀜𑁆𑀜𑀝𑁆𑀞 𑀫𑀼𑀤𑀓𑀁;

𑀤𑀦𑁆𑀢𑀧𑁄𑀦𑁄 𑀯𑀦𑀧𑁆𑀧𑀢𑀺.

𑀳𑀭𑀡𑀓𑁄 𑀧𑀦𑀺𑀥𑀺 𑀘𑁂𑀯;

𑀲𑀼𑀗𑁆𑀓𑀖𑀸𑀢𑀓𑀁 𑀧𑀸𑀡𑀓𑀸;

𑀅𑀧𑀤𑀁 𑀤𑁆𑀯𑀺𑀧𑀤𑀜𑁆𑀘𑁂𑀯;

𑀘𑀢𑀼𑀧𑁆𑀧𑀤𑀁 𑀩𑀳𑀼𑀧𑁆𑀧𑀤𑀁.

𑀑𑀘𑀭𑀓𑁄𑀡𑀺𑀭𑀓𑁆𑀔𑁄 𑀘;

𑀲𑀁𑀯𑀺𑀤𑀸𑀳𑀭𑀡𑀫𑁆𑀧𑀺 𑀘;

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀺𑀫𑀺𑀢𑁆𑀢-

𑀫𑀺𑀢𑀺 𑀢𑀺𑀁 𑀲𑁂𑀢𑁆𑀣 𑀫𑀸𑀢𑀺𑀓𑀸. 𑁋

𑀦𑀺𑀓𑁆𑀔𑀺𑀢𑁆𑀢𑀸 ¶ , 𑀢𑀸𑀲𑀁 𑀬𑀣𑀸𑀓𑁆𑀓𑀫𑀁 𑀧𑀤𑀪𑀸𑀚𑀦𑁂, 𑀢𑀤𑀝𑁆𑀞𑀓𑀣𑀸𑀬 𑀘 𑀆𑀕𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀽𑀫𑀝𑁆𑀞𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀢𑀺𑀬𑀁 𑀯𑀸𑀧𑀻’’𑀢𑀺𑀆𑀤𑀺.

𑀢𑀢𑁆𑀣 𑀤𑀼𑀢𑀺𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀬𑁂𑀲𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀉𑀧𑀭𑀺 𑀲𑀜𑁆𑀚𑀸𑀢𑀸𑀳𑀺 𑀭𑀼𑀓𑁆𑀔𑀮𑀢𑀸𑀳𑀺, 𑀇𑀝𑁆𑀞𑀓𑀧𑀸𑀲𑀸𑀡𑀸𑀤𑀻𑀳𑀺 𑀘 𑀲𑀜𑁆𑀙𑀦𑁆𑀦𑀁 𑀫𑀳𑀸𑀦𑀺𑀥𑀺𑀁 𑀉𑀤𑁆𑀥𑀭𑀺𑀢𑀼𑀓𑀸𑀫𑁂𑀦 ‘‘𑀫𑀬𑀸 𑀏𑀓𑁂𑀦𑁂𑀯 𑀦 𑀲𑀓𑁆𑀓𑀸’’𑀢𑀺 𑀅𑀢𑁆𑀢𑀦𑁄 𑀅𑀜𑁆𑀜𑀁 𑀲𑀳𑀸𑀬𑀁 𑀧𑀭𑀺𑀬𑁂𑀲𑀺𑀢𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀬𑀺𑀢𑀝𑁆𑀞𑀸𑀦𑀸 𑀉𑀝𑁆𑀞𑀸𑀦𑀸𑀤𑀻𑀲𑀼 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀼𑀤𑀸𑀮𑀁 𑀪𑀽𑀫𑀺𑀔𑀡𑀦𑀢𑁆𑀣𑀸𑀬 𑀧𑀺𑀝𑀓𑀁 𑀯𑀸𑀧𑀺 𑀧𑀁𑀲𑀼𑀉𑀤𑁆𑀥𑀭𑀡𑀢𑁆𑀣𑀸𑀬 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀁. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑀼𑀤𑀸𑀮𑀲𑁆𑀲 𑀘𑁂 𑀤𑀡𑁆𑀟𑁄 𑀦𑀢𑁆𑀣𑀺, 𑀤𑀡𑁆𑀟𑀢𑁆𑀣𑀸𑀬 𑀭𑀼𑀓𑁆𑀔𑀢𑁄 𑀤𑀡𑁆𑀟𑀁 𑀙𑀺𑀦𑁆𑀤𑀢𑁄 𑀘 𑀓𑀼𑀤𑀸𑀮𑁄 𑀘𑁂 𑀦 𑀳𑁄𑀢𑀺, 𑀓𑀼𑀤𑀸𑀮𑀓𑀭𑀡𑀢𑁆𑀣𑀸𑀬 𑀅𑀬𑁄𑀩𑀻𑀚𑀁 𑀉𑀤𑁆𑀥𑀭𑀡𑀢𑁆𑀣𑀸𑀬 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀲𑁆𑀲𑀧𑀺 𑀧𑀘𑁆𑀙𑀺𑀓𑀭𑀡𑀢𑁆𑀣𑀸𑀬 𑀧𑀡𑁆𑀡𑀸𑀦𑀺 𑀙𑀺𑀦𑁆𑀤𑀢𑁄𑀧𑀺 𑀧𑀺𑀝𑀓𑀯𑀸𑀬𑀦𑀢𑁆𑀣𑀸𑀬 𑀯𑀮𑁆𑀮𑀺𑀁 𑀙𑀺𑀦𑁆𑀤𑀢𑁄𑀧𑀺 ¶ 𑀉𑀪𑀬𑀢𑁆𑀣𑀸𑀧𑀺 𑀧𑀭𑀺𑀬𑁂𑀲𑀦𑁂 𑀫𑀼𑀲𑀸 𑀪𑀡𑀢𑁄𑀧𑀺 𑀤𑀼𑀓𑁆𑀓𑀝𑀜𑁆𑀘𑁂𑀯 𑀧𑀸𑀘𑀺𑀢𑁆𑀢𑀺𑀬𑀜𑁆𑀘, 𑀇𑀢𑀭𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀘𑁆𑀙𑀢𑁄𑀢𑀺 𑀤𑀼𑀢𑀺𑀬𑀸𑀤𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀧𑀭𑀺𑀬𑁂𑀲𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁯𑁪) ‘‘𑀣𑁂𑀬𑁆𑀬𑀘𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀇𑀥 ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀘𑀦𑀢𑁄 ‘‘𑀇𑀫𑀁 𑀦𑀺𑀥𑀺𑀁 𑀮𑀪𑀺𑀢𑁆𑀯𑀸 𑀩𑀼𑀤𑁆𑀥𑀧𑀽𑀚𑀁 𑀯𑀸 𑀓𑀭𑀺𑀲𑁆𑀲𑀸𑀫𑀺, 𑀲𑀗𑁆𑀖𑀪𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀩𑁆𑀩𑀬𑁄𑀕𑀢𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀪𑀸𑀯𑀢𑁄, 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀓𑀝𑀜𑁆𑀘 ¶ 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁 𑀜𑀸𑀢𑀤𑀼𑀓𑁆𑀓𑀝𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀦𑁆𑀢𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀥 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁. 𑀇𑀥 𑀅𑀤𑀺𑀦𑁆𑀦𑀸𑀤𑀸𑀦𑀲𑀳𑀺𑀢𑀧𑀬𑁄𑀕𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁆𑀳𑀺, 𑀇𑀢𑀭𑀢𑁆𑀭 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀲𑀼 𑀤𑀲𑀲𑀼 𑀭𑀢𑀦𑁂𑀲𑀼, 𑀲𑀸𑀮𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀥𑀜𑁆𑀜𑁂𑀲𑀼, 𑀲𑀩𑁆𑀩𑁂𑀲𑀼 𑀘 𑀆𑀯𑀼𑀥𑀪𑀡𑁆𑀟𑀸𑀤𑀻𑀲𑀼 𑀆𑀫𑀲𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁. 𑀓𑀤𑀮𑀺𑀦𑀸𑀴𑀺𑀓𑁂𑀭𑀧𑀦𑀲𑀸𑀤𑀺𑀭𑀼𑀓𑁆𑀔𑀝𑁆𑀞𑀫𑁂𑀯 𑀨𑀮𑀁 𑀆𑀫𑀲𑀦𑁆𑀢𑀲𑁆𑀲 𑀯𑀼𑀢𑁆𑀢𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀉𑀧𑀘𑀭𑀡𑀁 𑀉𑀧𑀘𑀺𑀡𑁆𑀡𑀁, 𑀧𑀭𑀸𑀫𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼 𑀉𑀧𑀘𑀺𑀡𑁆𑀡𑀁 𑀤𑀼𑀭𑀼𑀧𑀘𑀺𑀡𑁆𑀡𑀁, 𑀤𑀼𑀭𑀼𑀧𑀘𑀺𑀡𑁆𑀡𑁂 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁. 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀧𑀢𑁆𑀢𑁂 𑀭𑀚𑀲𑁆𑀫𑀺𑀁 𑀧𑀢𑀺𑀢𑁂 𑀧𑀢𑁆𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀅𑀥𑁄𑀯𑀺𑀢𑁆𑀯𑀸 𑀯𑀸 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑁂𑀦 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁, 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀓𑀺𑀜𑁆𑀘𑀸𑀧𑀺 𑀅𑀯𑀲𑁂𑀲𑀤𑀼𑀓𑁆𑀓𑀝𑀸𑀦𑀺𑀧𑀺 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀸𑀦𑁂𑀯, 𑀢𑀣𑀸𑀧𑀺 𑀭𑀼𑀴𑁆𑀳𑀺𑀬𑀸 𑀫𑀬𑀽𑀭𑀸𑀤𑀺𑀲𑀤𑁆𑀤𑁂𑀳𑀺 𑀫𑁄𑀭𑀸𑀤𑀬𑁄 𑀯𑀺𑀬 𑀇𑀤𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺. ‘‘𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀜𑀸𑀢𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀓𑀸𑀤𑀲𑀲𑀼 𑀲𑀫𑀦𑀼𑀪𑀸𑀲𑀦𑀸𑀲𑀼 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁. ‘‘𑀢𑀲𑁆𑀲 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀤𑀼𑀓𑁆𑀓𑀝𑁂𑀲𑀼 𑀇𑀥 𑀆𑀧𑀚𑁆𑀚𑀺𑀢𑀩𑁆𑀩𑀁 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀬𑁄𑀕𑀢𑁄’’𑀢𑀺. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ¶ 𑀉𑀧𑀲𑀕𑁆𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ‘‘𑀧𑀼𑀩𑁆𑀩𑀧𑀬𑁄𑀕𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀼𑀩𑁆𑀩𑀬𑁄𑀕𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀏𑀢𑁆𑀣 ¶ 𑀘 𑀓𑀺𑀜𑁆𑀘𑀸𑀧𑀺 𑀇𑀫𑁂𑀲𑀼 𑀤𑀼𑀓𑁆𑀓𑀝𑁂𑀲𑀼 𑀅𑀲𑀗𑁆𑀕𑀳𑀺𑀢𑀸𑀦𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀕𑀢𑀸𑀦𑀺 𑀤𑀺𑀯𑀸𑀲𑁂𑀬𑁆𑀬𑀸𑀤𑀺𑀤𑀼𑀓𑁆𑀓𑀝𑀸𑀦𑀺 𑀘𑁂𑀯 𑀔𑀦𑁆𑀥𑀓𑀸𑀕𑀢𑀸𑀦𑀺 𑀘 𑀩𑀳𑀽𑀦𑀺 𑀤𑀼𑀓𑁆𑀓𑀝𑀸𑀦𑀺 𑀲𑀦𑁆𑀢𑀺, 𑀢𑀸𑀦𑀺 𑀧𑀦𑁂𑀢𑁆𑀣 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑀺𑀢𑀩𑁆𑀩𑀸𑀦𑀺. ‘‘𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝’’𑀦𑁆𑀢𑀺 𑀳𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁯𑁪) 𑀯𑀼𑀢𑁆𑀢𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀧𑀦 𑀭𑀚𑁄𑀓𑀺𑀡𑁆𑀡𑀤𑀼𑀓𑁆𑀓𑀝𑀲𑁆𑀲𑁂𑀯 ‘‘𑀯𑀺𑀦𑀬𑀤𑀼𑀓𑁆𑀓𑀝’’𑀦𑁆𑀢𑀺 𑀕𑀳𑀡𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀇𑀢𑀭𑀣𑀸 𑀅𑀝𑁆𑀞 𑀤𑀼𑀓𑁆𑀓𑀝𑀸𑀦𑀻𑀢𑀺 𑀕𑀡𑀦𑀸𑀧𑀭𑀺𑀘𑁆𑀙𑁂𑀤𑁄𑀬𑁂𑀯 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸𑀢𑀺 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀸𑀤𑀻𑀦𑀫𑁆𑀧𑀺 𑀯𑀺𑀦𑀬𑀤𑀼𑀓𑁆𑀓𑀝𑁂𑀬𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑁂𑀧𑀺 𑀓𑀢𑀺𑀧𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀫𑁂𑀓𑀢𑁄 𑀤𑀲𑁆𑀲𑀦𑀢𑁆𑀣𑀁 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑀺𑀢𑀢𑁆𑀢𑁂𑀧𑀺 𑀕𑁂𑀬𑁆𑀬𑀕𑀸𑀣𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀲𑀼𑀁 𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁬. 𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸𑀢𑀺 𑀢𑀲𑁆𑀫𑀺𑀁 𑀘𑀺𑀭𑀦𑀺𑀳𑀺𑀢𑀦𑀺𑀥𑀽𑀧𑀭𑀺 𑀚𑀸𑀢𑀁 𑀅𑀮𑁆𑀮𑀁 𑀲𑀼𑀓𑁆𑀔𑀁 𑀓𑀝𑁆𑀞𑀁 𑀯𑀸. 𑀮𑀢𑀁 𑀯𑀸𑀢𑀺 𑀢𑀸𑀤𑀺𑀲𑀁 𑀯𑀮𑁆𑀮𑀺𑀁 𑀯𑀸. 𑀇𑀤𑀁 𑀉𑀧𑀮𑀓𑁆𑀔𑀡𑀁 𑀢𑀺𑀡𑀸𑀤𑀻𑀦𑀁 𑀔𑀼𑀤𑁆𑀤𑀓𑀕𑀘𑁆𑀙𑀸𑀦𑀜𑁆𑀘 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀅𑀮𑁆𑀮𑁂 𑀘 𑀲𑀼𑀓𑁆𑀔𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑁆𑀮𑀭𑀼𑀓𑁆𑀔𑀸𑀤𑀻𑀦𑀺 𑀙𑀺𑀦𑁆𑀤𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀅𑀳𑀼𑀢𑁆𑀯𑀸 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲 𑀪𑀯𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀲𑀳𑀧𑀬𑁄𑀕𑀢𑁄’’𑀢𑀺. 𑀅𑀯𑀳𑀸𑀭𑁂𑀦 𑀲𑀳𑀺𑀢𑀧𑀬𑁄𑀕𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀳𑀧𑀬𑁄𑀕𑀢𑁄 𑀉𑀪𑀬𑀢𑁆𑀣𑀸𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑁄 𑀧𑀞𑀫𑀕𑀸𑀣𑀸𑀬 𑀤𑀲𑁆𑀲𑀺𑀢𑀧𑀼𑀩𑁆𑀩𑀧𑀬𑁄𑀕𑀢𑁄 𑀇𑀫𑀸𑀬 𑀤𑀲𑁆𑀲𑀺𑀢𑀲𑀳𑀧𑀬𑁄𑀕𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑁪𑁭. 𑀧𑀣𑀯𑀺𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸 𑀧𑀣𑀯𑀺𑀁. 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀢𑁄 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯. 𑀩𑁆𑀬𑀽𑀳𑀢𑁄𑀢𑀺 𑀧𑀁𑀲𑀼𑀁 𑀏𑀓𑀢𑁄 𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲. ‘‘𑀯𑀺𑀬𑀽𑀳𑀢𑀺 𑀏𑀓𑀧𑀲𑁆𑀲𑁂 𑀭𑀸𑀲𑀺𑀁 𑀓𑀭𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀊𑀳-𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀦𑁄 𑀯𑀺𑀢𑀓𑁆𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑁂𑀧𑀺 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀯𑀺-𑀉𑀧𑀲𑀕𑁆𑀕𑀯𑀲𑁂𑀦 ¶ 𑀇𑀥 𑀭𑀸𑀲𑀺𑀓𑀭𑀡𑁂 𑀯𑀢𑁆𑀢𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀭𑀸𑀲𑀺𑀪𑀽𑀢𑀁 𑀧𑀁𑀲𑀼𑀁 𑀓𑀼𑀤𑀸𑀮𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀧𑀘𑁆𑀙𑀺𑀬𑀸 𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲 𑀘 𑀅𑀧𑀦𑁂𑀦𑁆𑀢𑀲𑁆𑀲 𑀘 𑀧𑀬𑁄𑀕𑀕𑀡𑀦𑀸𑀬 𑀤𑀼𑀓𑁆𑀓𑀝𑀁 𑀧𑀁𑀲𑀼𑀫𑁂𑀯 𑀯𑀸𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀫𑀲𑀦𑁆𑀢𑀲𑁆𑀲𑀸𑀢𑀺 𑀦𑀺𑀥𑀺𑀓𑀼𑀫𑁆𑀪𑀺𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑁆𑀢𑀲𑁆𑀲. 𑀯𑀸𑀢𑀺 𑀲𑀫𑀼𑀘𑁆𑀘𑀬𑁂. 𑀤𑀼𑀓𑁆𑀓𑀝𑀦𑁆𑀢𑀺 𑀤𑀼𑀝𑁆𑀞𑀼 𑀓𑀢𑀁 𑀓𑀺𑀭𑀺𑀬𑀁 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀁 𑀯𑀺𑀭𑀸𑀥𑁂𑀢𑁆𑀯𑀸 𑀔𑀮𑀺𑀢𑁆𑀯𑀸 𑀓𑀢𑀢𑁆𑀢𑀸𑀢𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁯) 𑁋

‘‘𑀤𑀼𑀓𑁆𑀓𑀝𑀦𑁆𑀢𑀺 ¶ 𑀳𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘, 𑀔𑀮𑀺𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝’’𑀦𑁆𑀢𑀺.

𑀤𑀼𑀝𑁆𑀞𑀼 𑀯𑀸 𑀯𑀺𑀭𑀽𑀧𑀁 𑀓𑀢𑀁 𑀓𑀺𑀭𑀺𑀬𑀸𑀢𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁯) 𑁋

‘‘𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂 𑀧𑀸𑀧𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

‘𑀤𑀼𑀓𑁆𑀓𑀝’𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀏𑀯𑀁 ‘‘𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀸𑀕𑀢𑀁 𑀙𑁂𑀤𑀦𑀤𑀼𑀓𑁆𑀓𑀝𑀁 𑀔𑀡𑀦𑀤𑀼𑀓𑁆𑀓𑀝𑀁 𑀩𑁆𑀬𑀽𑀳𑀦𑀤𑀼𑀓𑁆𑀓𑀝𑀁 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀆𑀫𑀲𑀦𑀤𑀼𑀓𑁆𑀓𑀝𑀦𑁆𑀢𑀺 𑀧𑀜𑁆𑀘𑀲𑀼 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑁂𑀲𑀼 𑀧𑀼𑀭𑀺𑀫𑀧𑀼𑀭𑀺𑀫𑀧𑀬𑁄𑀕𑁂𑀳𑀺 𑀆𑀧𑀦𑁆𑀦𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀤𑀼𑀓𑁆𑀓𑀝𑀁 𑀧𑀢𑁆𑀯𑀸 𑀧𑀝𑀺𑀧𑀲𑁆𑀲𑀫𑁆𑀪𑀦𑁆𑀢𑀺, 𑀢𑀁𑀢𑀁𑀧𑀬𑁄𑀕𑀸𑀯𑀲𑀸𑀦𑁂 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀭𑀫𑀢𑀺 𑀘𑁂, 𑀢𑀁𑀢𑀁𑀤𑀼𑀓𑁆𑀓𑀝𑀫𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀫𑀓𑀢𑁆𑀯𑀸 𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀧𑀢𑁆𑀯𑀸 𑀆𑀫𑀲𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑀲𑁆𑀲𑀫𑁆𑀪𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀯𑀼𑀢𑁆𑀢𑀁. 𑀬𑀣𑀸𑀧𑀸𑀴𑀺𑀬𑀸 𑀕𑀬𑁆𑀳𑀫𑀸𑀦𑁂 𑀧𑀼𑀭𑀺𑀫𑀧𑀼𑀭𑀺𑀫𑀸𑀧𑀢𑁆𑀢𑀻𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀺 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 ¶ 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁧𑁪, 𑁪𑁨𑁧, 𑁪𑁨𑁮, 𑁪𑁩𑁯) 𑀆𑀕𑀢𑀢𑁆𑀢𑀸 𑀅𑀦𑀼𑀲𑁆𑀲𑀸𑀯𑀦𑀸𑀬 𑀏𑀯 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀲 𑀧𑀦 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂𑀧𑀺 𑀆𑀧𑀢𑁆𑀢𑀺𑀧𑀝𑀺𑀧𑀲𑁆𑀲𑀤𑁆𑀥𑀺 𑀧𑀫𑀸𑀡𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁪𑁮. ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁪) 𑀯𑀼𑀢𑁆𑀢𑀁 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀜𑁆𑀘 𑀢𑀲𑁆𑀲 𑀲𑀸𑀫𑀦𑁆𑀢𑀸𑀧𑀢𑁆𑀢𑀺𑀪𑀽𑀢𑀁 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀞𑀸𑀦𑀪𑁂𑀤𑀯𑀺𑀜𑁆𑀜𑀸𑀧𑀦𑀫𑀼𑀔𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀼𑀔𑁂𑀧𑀸𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀫𑀼𑀔𑁂 𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀬𑀁. 𑀧𑀸𑀲𑀁 𑀧𑀯𑁂𑀲𑁂𑀢𑁆𑀯𑀸𑀢𑀺 𑀩𑀦𑁆𑀥𑀦𑀁 𑀧𑀸𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀔𑀸𑀡𑀼𑀓𑁂𑀢𑀺 𑀅𑀬𑁄𑀔𑀸𑀡𑀼𑀫𑁆𑀳𑀺, 𑀔𑀤𑀺𑀭𑀔𑀸𑀡𑀼𑀓𑁂 𑀯𑀸. 𑀩𑀤𑁆𑀥𑀓𑀼𑀫𑁆𑀪𑀺𑀬𑀸 𑀞𑀸𑀦𑀪𑁂𑀤𑁄 𑀩𑀦𑁆𑀥𑀦𑀸𑀦𑀁 𑀯𑀲𑀸 𑀜𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁯. 𑀇𑀤𑀸𑀦𑀺 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑀺 ‘‘𑀤𑁆𑀯𑁂’’𑀢𑀺𑀆𑀤𑀺𑀦𑀸. ‘‘𑀏𑀓𑀲𑁆𑀫𑀺𑀁 𑀔𑀸𑀡𑀼𑀓𑁂’’𑀢𑀺 𑀇𑀫𑀺𑀦𑀸 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀯𑀸 𑀢𑀻𑀲𑀼 𑀘𑀢𑀽𑀲𑀼 𑀯𑀸 𑀤𑀺𑀲𑀸𑀲𑀼 𑀔𑀸𑀡𑀼𑀓𑁂 𑀔𑀡𑀺𑀢𑁆𑀯𑀸 𑀩𑀤𑁆𑀥𑀔𑀸𑀡𑀼𑀕𑀡𑀦𑀸𑀬 𑀲𑀫𑁆𑀪𑀯𑀦𑁆𑀢𑁄 𑀞𑀸𑀦𑀪𑁂𑀤𑁄 ¶ 𑀉𑀧𑀮𑀓𑁆𑀔𑀺𑀢𑁄 𑀳𑁄𑀢𑀺. 𑀯𑀮𑀬𑀁…𑀧𑁂… 𑀓𑀢𑀸𑀬 𑀯𑀸 𑀤𑁆𑀯𑁂 𑀞𑀸𑀦𑀸𑀦𑀻𑀢𑀺 𑀬𑁄𑀚𑀦𑀸. 𑀯𑀸𑀢𑀺 𑀲𑀫𑀼𑀘𑁆𑀘𑀬𑁂 𑀉𑀧𑀮𑀓𑁆𑀔𑀺𑀢𑁄 𑀳𑁄𑀢𑀺.

𑁫𑁦. 𑀏𑀯𑀁 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀞𑀸𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀤𑁆𑀥𑀭𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀲𑀗𑁆𑀔𑀮𑀺𑀦𑁆𑀢𑀺 𑀤𑀸𑀫𑀁. 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀩𑁆𑀩𑀸𑀲𑀼 𑀆𑀧𑀢𑁆𑀢𑀻𑀲𑀼 𑀣𑀽𑀮𑀢𑁆𑀢𑀸, 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬𑀁 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 ¶ 𑀬𑀁 𑀯𑀼𑀢𑁆𑀢𑀁;

𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀓𑀲𑁆𑀲 𑀫𑀽𑀮𑁂 𑀬𑁄 𑀤𑁂𑀲𑁂𑀢𑀺;

𑀬𑁄 𑀘 𑀢𑀁 𑀧𑀝𑀺𑀕𑀡𑁆𑀳𑀢𑀺;

𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀺;

𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀏𑀢𑁆𑀣 𑀘 𑀣𑀽𑀮𑀘𑁆𑀘𑀬𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀫𑁆𑀧𑀭𑀸𑀬𑁂 𑀘 (𑀲𑀁. 𑀦𑀺. 𑁧.𑁪𑁯) 𑀲𑀼𑀕𑁆𑀕𑀢𑀺, 𑀢𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁬𑁬) 𑀯𑀺𑀬 𑀮𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀲𑀁𑀬𑁄𑀕𑁂 𑀊𑀓𑀸𑀭𑀲𑁆𑀲 𑀭𑀲𑁆𑀲𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀲𑀗𑁆𑀔𑀮𑀺𑀓𑀪𑁂𑀤𑀢𑁄 𑀧𑀭𑀁. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀢𑀺. 𑀏𑀢𑁆𑀣 𑀘 𑀦𑀸𑀯𑀝𑁆𑀞𑀓𑀣𑀸𑀬𑀁 ‘‘𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁯) 𑀯𑀼𑀢𑁆𑀢𑀦𑀬𑁂𑀦 ‘‘𑀢𑀺𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸, 𑀉𑀤𑁆𑀥𑀫𑀥𑁄 𑀘𑀸𑀢𑀺 𑀙𑀝𑁆𑀞𑀸𑀦𑀸𑀦𑀺. 𑀢𑀸𑀲𑀼 𑀏𑀓𑀁 𑀤𑀺𑀲𑀁 𑀅𑀧𑀦𑀻𑀬𑀫𑀸𑀦𑀸𑀬 𑀓𑀼𑀫𑁆𑀪𑀺𑀬𑀸 𑀢𑀁𑀤𑀺𑀲𑀸𑀪𑀺𑀫𑀼𑀔𑀁 𑀇𑀢𑀭𑀤𑀺𑀲𑀸𑀬𑀁 𑀞𑀺𑀢𑀧𑀲𑁆𑀲𑁂 𑀑𑀭𑀺𑀫𑀤𑀺𑀲𑀸𑀬 𑀞𑀺𑀢𑀧𑀲𑁆𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑀲𑁆𑀲 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀦𑀢𑀺𑀓𑁆𑀓𑀦𑁆𑀢𑁂 𑀨𑀦𑁆𑀤𑀸𑀧𑀦𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺, 𑀅𑀢𑀺𑀓𑁆𑀓𑀦𑁆𑀢𑁂 𑀞𑀸𑀦𑀸 𑀘𑀸𑀯𑀺𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀫𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀨𑀦𑁆𑀤𑀦𑀭𑀳𑀺𑀢𑀸𑀬 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀞𑀸𑀦𑀸𑀘𑀸𑀯𑀦𑁂𑀧𑀺.

𑁫𑁧. 𑀏𑀯𑀁 𑀧𑀞𑀫𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑀼𑀫𑁆𑀪𑀺𑀕𑁆𑀕𑀳𑀡𑁂 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀅𑀧𑀦𑁂𑀢𑁆𑀯𑀸 𑀧𑀘𑁆𑀙𑀸 𑀩𑀦𑁆𑀥𑀦𑀸𑀧𑀦𑀬𑀦𑁂 𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺. 𑀲𑁄 𑀦𑀬𑁄𑀢𑀺 ‘‘𑀧𑀞𑀫𑀼𑀤𑁆𑀥𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀼𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀢𑀫𑁂𑀯𑀢𑁆𑀣𑀫𑀢𑀺𑀤𑀺𑀲𑀢𑀺.

𑁫𑁨. 𑀯𑀮𑀬𑀦𑁆𑀢𑀺 ¶ ¶ 𑀓𑀼𑀫𑁆𑀪𑀺𑀬𑀸 𑀩𑀤𑁆𑀥𑀲𑀗𑁆𑀔𑀮𑀺𑀓𑀸𑀬 𑀫𑀽𑀮𑁂 𑀧𑀯𑁂𑀲𑀺𑀢𑀁 𑀯𑀮𑀬𑀁. 𑀫𑀽𑀮𑁂 𑀖𑀁𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀻𑀢𑀺 𑀬𑁄𑀚𑀦𑀸. 𑀖𑀁𑀲𑀦𑁆𑀢𑁄𑀢𑀺 𑀨𑀼𑀲𑀸𑀧𑁂𑀦𑁆𑀢𑁄. 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀻𑀢𑀺 𑀑𑀭𑀢𑁄 𑀘 𑀧𑀸𑀭𑀢𑁄 𑀘 𑀲𑀜𑁆𑀘𑀸𑀮𑁂𑀢𑀺. 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 ‘‘𑀲𑀻𑀮𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀽𑀮𑁂. 𑀔𑁂𑀕𑀢𑀁 𑀓𑀭𑁄𑀦𑁆𑀢𑁄𑀯𑀸𑀢𑀺 𑀲𑀩𑁆𑀩𑀧𑀲𑁆𑀲𑀢𑁄 𑀫𑀽𑀮𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑁄𑀯. 𑀧𑀭𑀸𑀚𑀺𑀢𑁄𑀢𑀺 𑀞𑀸𑀦𑀸𑀘𑀸𑀯𑀦𑀲𑁆𑀲 𑀓𑀢𑀢𑁆𑀢𑀸 𑀧𑀭𑀸𑀚𑀬𑀫𑀸𑀧𑀦𑁆𑀦𑁄 𑀳𑁄𑀢𑀺.

𑁫𑁩. 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀚𑀸𑀢𑀦𑁆𑀢𑀺 𑀬𑁄𑀚𑀦𑀸. 𑀘𑀺𑀭𑀓𑀸𑀮𑀁 𑀦𑀺𑀳𑀺𑀢𑀢𑁆𑀢𑀸 𑀫𑀽𑀮𑁂𑀳𑀺 𑀓𑀼𑀫𑁆𑀪𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀻𑀧𑁂 𑀚𑀸𑀢𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸’’𑀢𑀺𑀆𑀤𑀺𑀓𑀸𑀬 𑀕𑀸𑀣𑀸𑀬 𑀦𑀺𑀥𑀺𑀫𑀢𑁆𑀣𑀓𑁂 𑀪𑀽𑀫𑀺𑀬𑀁 𑀞𑀺𑀢𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀪𑀽𑀫𑀺𑀁 𑀦𑀺𑀔𑀡𑀺𑀢𑁆𑀯𑀸 𑀑𑀢𑀺𑀡𑁆𑀡𑀓𑀸𑀮𑁂 𑀦𑀺𑀥𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀫𑀽𑀮𑀁 𑀅𑀮𑁆𑀮𑀭𑀼𑀓𑁆𑀔𑀁, 𑀔𑀸𑀡𑀼𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀆𑀳𑀸𑀢𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀢𑀢𑁆𑀣𑀚’’𑀦𑁆𑀢𑀺 𑀇𑀫𑀺𑀦𑀸 𑀲𑀳𑀧𑀬𑁄𑀕𑀸𑀪𑀸𑀯𑀫𑀸𑀳. 𑀇𑀫𑀺𑀦𑀸𑀯 𑀧𑀼𑀭𑀺𑀫𑀕𑀸𑀣𑀸𑀬 𑀯𑀼𑀢𑁆𑀢𑀁 𑀓𑀝𑁆𑀞𑀮𑀢𑀸𑀤𑀻𑀦𑀺 𑀦𑀺𑀥𑀺𑀲𑀫𑁆𑀩𑀦𑁆𑀥𑀸𑀦𑀺 𑀘𑁂, 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀓𑀝𑀲𑁆𑀲 𑀯𑀢𑁆𑀣𑀽𑀦𑀺, 𑀲𑀫𑀻𑀧𑀸𑀦𑀺 𑀘𑁂, 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀢𑁆𑀣𑀽𑀦𑀻𑀢𑀺 𑀤𑀻𑀧𑁂𑀢𑀺.

𑁫𑁪. 𑀇𑀤𑀸𑀦𑀺 𑀏𑀯𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀺𑀝𑁆𑀞𑀦𑀺𑀥𑀺𑀪𑀸𑀚𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀅𑀘𑀸𑀮𑁂𑀢𑁆𑀯𑀸 𑀅𑀦𑁆𑀢𑁄𑀞𑀺𑀢𑀁 𑀪𑀡𑁆𑀟𑀫𑀢𑁆𑀢𑀁 𑀕𑀡𑁆𑀳𑀢𑁄 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑁆𑀢𑁄𑀓𑀼𑀫𑁆𑀪𑀺𑀕𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀨𑀦𑁆𑀤𑀸𑀧𑁂𑀢𑀻𑀢𑀺 𑀅𑀦𑁆𑀢𑁄𑀘𑀸𑀝𑀺𑀬𑀸 𑀧𑀓𑁆𑀔𑀺𑀢𑁆𑀢𑁂 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀭𑀸𑀲𑀺𑀓𑀭𑀡𑀸𑀤𑀺𑀯𑀲𑁂𑀦 𑀨𑀦𑁆𑀤𑀸𑀧𑁂𑀢𑀺. 𑀅𑀧𑀩𑁆𑀬𑀽𑀳𑀢𑀺 𑀯𑀸𑀢𑀺 𑀳𑁂𑀝𑁆𑀞𑀸 𑀞𑀺𑀢𑀁 𑀕𑀡𑁆𑀳𑀺𑀢𑀼𑀁 𑀉𑀧𑀭𑀺 𑀞𑀺𑀢𑀸𑀦𑀺 𑀅𑀧𑀦𑁂𑀦𑁆𑀢𑁄 𑀯𑀺𑀬𑀽𑀳𑀢𑀺 𑀯𑀸. 𑀅𑀣 𑀯𑀸 𑀅𑀧𑀩𑁆𑀬𑀽𑀳𑀦𑁆𑀢𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀤𑁆𑀯𑀺𑀥𑀸 𑀓𑀭𑁄𑀦𑁆𑀢𑁄𑀢𑀺 ¶ 𑀕𑀡𑁆𑀞𑀺𑀧𑀤𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀇𑀢𑁄 𑀘𑀺𑀢𑁄 𑀘 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑁂𑀯𑀸𑀢𑀺 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀫𑁂𑀯.

𑁫𑁫. 𑀳𑀭𑀦𑁆𑀢𑁄𑀢𑀺 𑀅𑀯𑀳𑀭𑀦𑁆𑀢𑁄. 𑀫𑀼𑀝𑁆𑀞𑀺𑀁 𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀅𑀦𑁆𑀢𑁄𑀓𑀼𑀫𑁆𑀪𑀺𑀫𑁆𑀳𑀺 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀓𑀼𑀫𑁆𑀪𑀺𑀕𑀢𑀪𑀡𑁆𑀟𑁂𑀦 𑀬𑀣𑀸 𑀅𑀩𑀤𑁆𑀥𑀁 𑀳𑁄𑀢𑀺, 𑀢𑀣𑀸 𑀫𑀼𑀝𑁆𑀞𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀓𑀼𑀫𑁆𑀪𑀺𑀕𑀢𑀁 𑀫𑀼𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑁄 𑀓𑀼𑀫𑁆𑀪𑀺𑀕𑀢𑁂𑀦 𑀫𑀼𑀝𑁆𑀞𑀺𑀕𑀢𑀁 𑀬𑀣𑀸 𑀅𑀲𑀫𑁆𑀫𑀺𑀲𑁆𑀲𑀁 𑀳𑁄𑀢𑀺, 𑀢𑀣𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑀕𑁆𑀖𑀦𑀓𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀕𑁆𑀖𑀦𑀓𑀁 𑀯𑀸 𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀕𑀢𑀁 𑀓𑀢𑁆𑀯𑀸 𑀯𑀸 𑀙𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀓𑀢𑁆𑀯𑀸 𑀓𑀼𑀫𑁆𑀪𑀺𑀕𑀢𑁂𑀦 𑀬𑀣𑀸 ¶ 𑀅𑀲𑀫𑁆𑀫𑀺𑀲𑁆𑀲𑀁 𑀳𑁄𑀢𑀺, 𑀢𑀣𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀢𑁆𑀣𑁄, 𑀲𑀘𑁂 𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀳𑀼𑀢𑁆𑀯𑀸 𑀓𑀼𑀫𑁆𑀪𑀺𑀕𑀢𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀪𑀡𑁆𑀟𑀁 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁬. 𑀳𑀸𑀭𑀁 𑀯𑀸𑀢𑀺 𑀫𑀼𑀢𑁆𑀢𑀸𑀳𑀸𑀭𑀁 𑀯𑀸. 𑀧𑀸𑀫𑀗𑁆𑀕𑀁 𑀯𑀸𑀢𑀺 𑀲𑀼𑀯𑀡𑁆𑀡𑀫𑀬𑀁, 𑀭𑀚𑀢𑀫𑀬𑀁 𑀯𑀸 𑀧𑀸𑀫𑀗𑁆𑀕𑀁 𑀤𑀸𑀫𑀁. 𑀲𑀼𑀢𑁆𑀢𑀸𑀭𑀼𑀴𑁆𑀳𑀦𑁆𑀢𑀺 𑀲𑀼𑀢𑁆𑀢𑁂 𑀆𑀭𑀼𑀴𑁆𑀳𑀁 𑀲𑀼𑀢𑁆𑀢𑀸𑀭𑀼𑀴𑁆𑀳𑀁, 𑀲𑀼𑀢𑁆𑀢𑀜𑁆𑀘 𑀲𑀼𑀢𑁆𑀢𑀸𑀭𑀼𑀴𑁆𑀳𑀜𑁆𑀘 𑀲𑀼𑀢𑁆𑀢𑀸𑀭𑀼𑀴𑁆𑀳𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. ‘‘𑀲𑀼𑀢𑁆𑀢𑁂𑀦 𑀆𑀯𑀼𑀢𑀲𑁆𑀲𑀸𑀧𑀺 𑀲𑀼𑀢𑁆𑀢𑀫𑀬𑀲𑁆𑀲𑀸𑀧𑀺 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀧𑀞𑀫𑀫𑀼𑀢𑁆𑀢𑀸𑀳𑀸𑀭𑀁 𑀯𑀺𑀦𑀸 𑀲𑀼𑀯𑀡𑁆𑀡𑀭𑀚𑀢𑀧𑀯𑀸𑀴𑀸𑀤𑀺𑀫𑀡𑀺𑀓𑀁 𑀯𑀸 𑀲𑀼𑀢𑁆𑀢𑁂𑀲𑀼 𑀆𑀯𑀼𑀡𑀺𑀢𑁆𑀯𑀸 𑀓𑀢𑀸 𑀦𑀸𑀦𑀸𑀯𑀮𑀺𑀬𑁄 𑀘𑁂𑀯 𑀲𑀼𑀢𑁆𑀢𑀫𑀬𑀸𑀦𑀺 𑀘 𑀪𑀡𑁆𑀟𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀓𑀼𑀫𑁆𑀪𑀺𑀬𑀸 𑀞𑀺𑀢𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀨𑀦𑁆𑀤𑀸𑀧𑁂𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀘𑀸𑀮𑁂𑀢𑀺. 𑀬𑀣𑀸𑀯𑀢𑁆𑀣𑀼𑀦𑁆𑀢𑀺 𑀯𑀻𑀢𑀺𑀓𑁆𑀓𑀫𑀸𑀦𑀼𑀭𑀽𑀧𑀁 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀺 ¶ . 𑀘𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸 𑀧𑀭𑀺𑀳𑀻𑀦𑁄𑀢𑀺 𑀅𑀢𑁆𑀣𑁄.

𑀅𑀧𑀭𑀺𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸𑀏𑀓𑀤𑁂𑀲𑀝𑁆𑀞𑀁 𑀪𑀡𑁆𑀟𑀁 𑀢𑀢𑁄 𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀅𑀧𑀦𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀸 𑀅𑀜𑁆𑀜𑀁 𑀞𑀸𑀦𑀁 𑀦𑁂𑀦𑁆𑀢𑀲𑁆𑀲 𑀘 𑀢𑀢𑁆𑀣𑁂𑀯 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀘 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 (𑀧𑀸𑀭𑀸. 𑁯𑁪) 𑀏𑀢𑁂𑀳𑀺 𑀲𑀤𑀺𑀲𑀢𑁆𑀢𑀸 𑀯𑀢𑁆𑀣𑀼𑀫𑁆𑀳𑀺 𑀧𑀸𑀤𑀁 𑀅𑀕𑁆𑀖𑀦𑁆𑀢𑁂 𑀧𑀸𑀭𑀸𑀚𑀺𑀓𑀸 𑀳𑁄𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀇𑀤𑀁 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀪𑀸𑀚𑀦𑀢𑀮𑁂 𑀓𑁄𑀝𑀺𑀁 𑀞𑀧𑁂𑀢𑁆𑀯𑀸 𑀓𑀫𑁂𑀦 𑀲𑀓𑀮𑀪𑀸𑀚𑀦𑀓𑀼𑀘𑁆𑀙𑀺𑀁 𑀢𑁂𑀦𑁂𑀯 𑀧𑀽𑀭𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀏𑀓𑀸 𑀓𑁄𑀝𑀺 𑀦𑀺𑀓𑁆𑀔𑀺𑀢𑁆𑀢𑀸 𑀘𑁂, 𑀢𑀣𑀸𑀞𑀧𑀺𑀢𑀲𑁆𑀲 𑀳𑀸𑀭𑀸𑀤𑀺𑀦𑁄 𑀲𑀓𑀮𑀪𑀸𑀚𑀦𑀁 𑀅𑀝𑁆𑀞𑀸𑀦𑀦𑁆𑀢𑀺 𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀑𑀲𑀸𑀦𑀓𑁄𑀝𑀺 𑀪𑀸𑀚𑀦𑀢𑀮𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀢𑁄 𑀘 𑀫𑀼𑀔𑀯𑀝𑁆𑀝𑀺𑀬𑀁 𑀖𑀁𑀲𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀲𑀓𑀮𑀪𑀸𑀚𑀦𑁄𑀤𑀭𑀁 𑀔𑁂𑀧𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀞𑀧𑀺𑀢𑀓𑁄𑀝𑀺𑀬𑀸 𑀨𑀼𑀝𑁆𑀞𑀝𑁆𑀞𑀸𑀦𑀁 𑀅𑀧𑀭𑀸𑀬 𑀓𑁄𑀝𑀺𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑀬𑀢𑁄 𑀘 𑀪𑀸𑀚𑀦𑀓𑀼𑀘𑁆𑀙𑀺𑀬𑀸 𑀉𑀧𑀟𑁆𑀠𑀁 𑀯𑀢𑁆𑀣𑀸𑀤𑀺𑀦𑀸 𑀓𑁂𑀦𑀘𑀺 𑀧𑀽𑀭𑁂𑀢𑁆𑀯𑀸 𑀢𑀲𑁆𑀲𑁄𑀧𑀭𑀺 𑀞𑀧𑀺𑀢𑀳𑀸𑀭𑀸𑀤𑀺𑀲𑀼𑀢𑁆𑀢𑀸𑀭𑀼𑀴𑁆𑀳𑀲𑁆𑀲 𑀞𑀺𑀢𑁄𑀓𑀸𑀲𑀫𑁂𑀯 𑀞𑀸𑀦𑀦𑁆𑀢𑀺 𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀁 𑀅𑀧𑀦𑁂𑀦𑁆𑀢𑀲𑁆𑀲𑀧𑀺 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁭. 𑀲𑀧𑁆𑀧𑀺𑀆𑀤𑀻𑀲𑀽𑀢𑀺 𑀪𑀸𑀚𑀦𑀕𑀢𑁂𑀲𑀼 𑀲𑀧𑁆𑀧𑀺𑀆𑀤𑀺𑀤𑁆𑀭𑀯𑀯𑀢𑁆𑀣𑀽𑀲𑀼 𑀬𑀁 𑀓𑀺𑀜𑁆𑀘𑀺. 𑀧𑀸𑀤𑀧𑀽𑀭𑀡𑀦𑁆𑀢𑀺 𑀧𑀸𑀤𑀁 𑀧𑀽𑀭𑁂𑀢𑀻𑀢𑀺 𑀧𑀸𑀤𑀧𑀽𑀭𑀡𑀁, 𑀧𑀸𑀤𑀕𑁆𑀖𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀯𑀢𑁄 𑀧𑀭𑀸𑀚𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀤𑀸𑀢𑀺 𑀘𑁂? 𑀏𑀓𑁂𑀦𑁂𑀯 ¶ 𑀧𑀬𑁄𑀕𑁂𑀦 𑀧𑀻𑀢𑀫𑀢𑁆𑀢𑁂 𑀧𑀸𑀤𑀧𑀽𑀭𑀡𑁂𑀢𑀺 𑀬𑁄𑀚𑀦𑀸. ‘‘𑀫𑀼𑀔𑀕𑀢𑀁 𑀯𑀺𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀢𑀢𑁆𑀣 𑀏𑀓𑁂𑀦𑁂𑀯 𑀧𑀬𑁄𑀕𑁂𑀦𑀸𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀫𑀓𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀆𑀓𑀟𑁆𑀠𑁂𑀢𑁆𑀯𑀸 ¶ 𑀧𑀺𑀯𑀦𑀧𑀬𑁄𑀕𑁂𑀦. ‘‘𑀫𑀼𑀔𑀕𑀢𑀁 𑀯𑀺𑀦𑀸’’𑀢𑀺 𑀇𑀫𑀺𑀦𑀸 𑀲𑀘𑁂 𑀕𑀮𑀕𑀢𑁂𑀦𑁂𑀯 𑀧𑀸𑀤𑁄 𑀧𑀽𑀭𑀢𑀺, 𑀅𑀦𑁆𑀢𑁄𑀕𑀮𑀁 𑀧𑀯𑀺𑀝𑁆𑀞𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀔𑀕𑀢𑁂𑀦 𑀧𑀽𑀭𑀢𑀺, 𑀫𑀼𑀔𑀕𑀢𑀁 𑀪𑀸𑀚𑀦𑀕𑀢𑁂𑀦 𑀯𑀺𑀬𑁄𑀚𑁂𑀢𑁆𑀯𑀸 𑀑𑀝𑁆𑀞𑁂𑀲𑀼 𑀧𑀺𑀳𑀺𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀴𑀼𑀦𑀴𑀸𑀤𑀻𑀳𑀺 𑀆𑀓𑀟𑁆𑀠𑁂𑀢𑁆𑀯𑀸 𑀧𑀺𑀯𑀦𑁆𑀢𑀲𑁆𑀲 𑀦𑀸𑀴𑀕𑀢𑁂𑀦 𑀧𑀽𑀭𑀢𑀺, 𑀦𑀸𑀴𑀕𑀢𑀁 𑀪𑀸𑀚𑀦𑀕𑀢𑁂𑀦 𑀯𑀺𑀬𑁄𑀚𑁂𑀢𑁆𑀯𑀸 𑀦𑀸𑀴𑀺𑀓𑁄𑀝𑀺𑀬𑀁 𑀅𑀗𑁆𑀕𑀼𑀮𑀺𑀬𑀸 𑀧𑀺𑀳𑀺𑀢𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 (𑀧𑀸𑀭𑀸. 𑁯𑁪) 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀏𑀓𑁂𑀦𑁂𑀯 𑀧𑀬𑁄𑀕𑁂𑀦 𑀧𑀻𑀢𑀫𑀢𑁆𑀢𑁂 𑀧𑀭𑀸𑀚𑀬𑁄’’𑀢𑀺 𑀇𑀫𑀺𑀦𑀸 𑀲𑀧𑁆𑀧𑀺𑀆𑀤𑀻𑀲𑀼 𑀫𑀳𑀕𑁆𑀖𑁂𑀲𑀼 𑀢𑀢𑁆𑀢𑀓𑁂𑀦𑁂𑀯 𑀧𑀸𑀤𑀧𑀽𑀭𑀡𑀜𑁆𑀘𑁂 𑀳𑁄𑀢𑀺, 𑀏𑀓𑀯𑀸𑀭𑀫𑁂𑀯 𑀫𑀼𑀔𑁂𑀦 𑀯𑀸 𑀲𑀧𑁆𑀧𑀺𑀆𑀤𑀺𑀦𑀸 𑀯𑀸 𑀪𑀸𑀚𑀦𑀕𑀢𑁂𑀦 𑀏𑀓𑀸𑀩𑀤𑁆𑀥𑀪𑀸𑀯𑁂 𑀙𑀺𑀦𑁆𑀦𑀫𑀢𑁆𑀢𑁂𑀧𑀺 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀓𑀼𑀫𑁆𑀪𑀺𑀁 𑀧𑀡𑀸𑀫𑁂𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁂𑀦 𑀓𑀼𑀫𑁆𑀪𑀺𑀕𑀢𑁂 𑀙𑀺𑀦𑁆𑀦𑀫𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁫𑁮. ‘‘𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀯𑀦𑁆𑀢𑀲𑁆𑀲 𑀦 𑀧𑀭𑀸𑀚𑀬𑁄’’𑀢𑀺 𑀇𑀫𑀺𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑀫𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀯𑀢𑁄 𑀧𑀭𑀸𑀚𑀬𑁄𑀢𑀺 𑀲𑀸𑀫𑀢𑁆𑀣𑀺𑀬𑀸 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀯𑀸 𑀧𑀼𑀝𑀸𑀤𑀻𑀳𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀤𑀧𑀽𑀭𑀡𑀫𑀢𑁆𑀢𑀁 𑀧𑀺𑀯𑀦𑁆𑀢𑀲𑁆𑀲 𑀧𑀭𑀸𑀚𑀬𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁫𑁯-𑁬𑁦. 𑀲𑀘𑁂 𑀔𑀺𑀧𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀓𑀺𑀜𑁆𑀘𑀺 𑀪𑀡𑁆𑀟𑀓𑀦𑁆𑀢𑀺 𑀢𑁂𑀮𑀧𑀺𑀯𑀦𑀸𑀭𑀳𑀁 𑀤𑀼𑀓𑀽𑀮𑀲𑀸𑀝𑀓𑀘𑀫𑁆𑀫𑀔𑀡𑁆𑀟𑀸𑀤𑀺𑀓𑀁 𑀪𑀡𑁆𑀟𑀁. 𑀢𑁂𑀮𑀓𑀼𑀫𑁆𑀪𑀺𑀬𑀁 𑀧𑀭𑀲𑁆𑀲𑀸𑀢𑀺 𑀮𑀩𑁆𑀪𑀢𑀺. 𑀢𑀁 𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁. 𑀥𑀼𑀯𑀦𑁆𑀢𑀺 𑀏𑀓𑀁𑀲𑁂𑀦. 𑀢𑀸𑀯𑀤𑁂 𑀯𑀺𑀦𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀯𑀤𑁂𑀢𑀺 𑀢𑀲𑁆𑀫𑀺𑀁 𑀔𑀡𑁂𑀬𑁂𑀯. 𑀓𑀢𑀭𑀲𑁆𑀫𑀺𑀁 𑀔𑀡𑁂𑀢𑀺 𑀆𑀳 ‘‘𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂’’𑀢𑀺, 𑀢𑁂𑀮𑀲𑁆𑀲 𑀧𑀻𑀢𑀓𑀸𑀮𑀁 𑀅𑀦𑀸𑀕𑀫𑁆𑀫 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 ¶ 𑀧𑀞𑀫𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀦𑀲𑁆𑀲𑀢𑀻𑀢𑀺 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀆𑀯𑀺𑀜𑁆𑀚𑁂𑀢𑁆𑀯𑀸𑀢𑀺 𑀧𑀡𑀸𑀫𑁂𑀢𑁆𑀯𑀸. 𑀕𑀸𑀴𑁂𑀢𑀻𑀢𑀺 𑀧𑀕𑁆𑀖𑀭𑀸𑀧𑁂𑀢𑀺. ‘‘𑀲𑀸𑀴𑁂𑀢𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯 𑀅𑀢𑁆𑀣𑁄. 𑀲𑀸𑀴 𑀲𑀯𑀦𑁂𑀢𑀺 𑀥𑀸𑀢𑀼. 𑀢𑀣𑀸𑀢𑀺 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀯𑀺𑀦𑀲𑁆𑀲𑀢𑀻’’𑀢𑀺 𑀆𑀓𑀟𑁆𑀠𑀢𑀺, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁧. 𑀢𑀦𑁆𑀢𑀺 𑀢𑁂𑀮𑀲𑁆𑀲 𑀑𑀓𑀺𑀭𑀡𑀪𑀸𑀯𑀁 𑀜𑀢𑁆𑀯𑀸 𑀧𑀞𑀫𑀫𑁂𑀯 𑀢𑀼𑀘𑁆𑀙𑀪𑀸𑀚𑀦𑁂 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀁 𑀧𑀸𑀤𑀕𑁆𑀖𑀦𑀓𑀢𑁂𑀮𑀧𑀺𑀯𑀦𑀓𑀁 ¶ 𑀢𑀁 𑀯𑀢𑁆𑀣𑀸𑀤𑀺𑀪𑀡𑁆𑀟𑀁. ‘‘𑀉𑀤𑁆𑀥𑀭𑀦𑁆𑀢𑁄𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀯𑀘𑀦𑁂𑀦 ‘‘𑀧𑀻𑀢𑀫𑀢𑁆𑀢𑁂 𑀧𑀭𑀸𑀚𑀬𑁄’’𑀢𑀺 𑀤𑀲𑁆𑀲𑀺𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀫𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀥𑀁𑀲𑀺𑀢𑁄𑀢𑀺 ‘‘𑀲𑀸𑀲𑀦𑀓𑀧𑁆𑀧𑀭𑀼𑀓𑁆𑀔𑀸 𑀧𑀸𑀢𑀺𑀢𑁄, 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀣𑁂𑀬𑁆𑀬𑀘𑀺𑀢𑁆𑀢𑁄’’𑀢𑀺 𑀆𑀓𑀟𑁆𑀠𑀦𑀢𑁆𑀣𑀁 ‘‘𑀢𑀣𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀇𑀫𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑁄𑀧𑀦𑀢𑁆𑀣𑀸𑀬 𑀢𑀼𑀘𑁆𑀙𑀪𑀸𑀚𑀦𑁂 𑀯𑀢𑁆𑀣𑀸𑀤𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑁂𑀦 𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑁂𑀮𑁂 𑀆𑀲𑀺𑀢𑁆𑀢𑁂 𑀧𑀘𑁆𑀙𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀉𑀤𑁆𑀥𑀭𑀢𑁄 𑀦 𑀤𑁄𑀲𑁄𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁬𑁨. 𑀢𑀢𑁆𑀣𑁂𑀯𑀸𑀢𑀺 𑀞𑀺𑀢𑀝𑁆𑀞𑀸𑀦𑁂𑀬𑁂𑀯. 𑀪𑀺𑀦𑁆𑀤𑀢𑁄𑀢𑀺 𑀞𑀸𑀦𑀸 𑀅𑀘𑀸𑀯𑁂𑀢𑁆𑀯𑀸 𑀢𑀺𑀡𑀚𑁆𑀛𑀸𑀧𑀓𑀲𑁆𑀲 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀞𑀸𑀦𑀸𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀧𑀸𑀲𑀸𑀡𑀸𑀤𑀺𑀦𑀸 𑀓𑁂𑀦𑀘𑀺 𑀧𑀳𑀭𑀺𑀢𑁆𑀯𑀸 𑀪𑀺𑀦𑁆𑀤𑀢𑁄. ‘‘𑀫𑀦𑁆𑀢𑁄𑀲𑀥𑀸𑀦𑀼𑀪𑀸𑀯𑁂𑀦 𑀪𑀺𑀦𑁆𑀤𑀢𑁄’’𑀢𑀺 𑀘 𑀯𑀤𑀦𑁆𑀢𑀺. 𑀙𑀟𑁆𑀟𑁂𑀦𑁆𑀢𑀲𑁆𑀲𑀸𑀢𑀺 𑀅𑀙𑀟𑁆𑀟𑁂𑀢𑀼𑀓𑀸𑀫𑀲𑁆𑀲𑀸𑀧𑀺 𑀲𑀢𑁄 𑀧𑀭𑀺𑀧𑀼𑀡𑁆𑀡𑀢𑁂𑀮𑀖𑀝𑀸𑀤𑀻𑀲𑀼 𑀘𑀸𑀧𑀮𑁆𑀮𑁂𑀦 𑀯𑀸𑀮𑀼𑀓𑀁 𑀯𑀸 𑀉𑀤𑀓𑀁 𑀯𑀸 𑀑𑀓𑀺𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀉𑀤𑀓𑀫𑀸𑀢𑀺𑀓𑀁 𑀖𑀝𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀑𑀧𑀺𑀮𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀞𑀸𑀦𑀸𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂 𑀲𑀢𑀺𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀸𑀪𑀸𑀯𑁂𑀦 𑀧𑀸𑀭𑀸𑀚𑀺𑀓𑀸 𑀦 𑀯𑀺𑀚𑁆𑀚𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁 ¶ 𑀧𑀦 𑀳𑁄𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀛𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀛𑀸𑀧𑁂𑀦𑁆𑀢𑀲𑁆𑀲. 𑀅𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀫𑁄𑀓𑀺𑀭𑀺𑀢𑁆𑀯𑀸 𑀅𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁂𑀲𑀼 𑀪𑀺𑀦𑁆𑀤𑀦𑀸𑀤𑀻𑀲𑀼 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀧𑀤𑀪𑀸𑀚𑀦𑀺𑀬𑀁 𑀤𑀼𑀓𑁆𑀓𑀝𑀫𑁂𑀯 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀪𑀽𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁬𑁩. 𑀇𑀤𑀸𑀦𑀺 𑀣𑀮𑀝𑁆𑀞𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀞𑀧𑀺𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑀭𑀺𑀢𑁆𑀯𑀸. 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀣𑀮𑁂 𑀭𑀸𑀲𑀺𑀓𑀢𑀥𑀜𑁆𑀜𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀦𑀺𑀫𑀺𑀓𑀼𑀫𑁆𑀪𑀺𑀬𑀸 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀢𑀁 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀅𑀢𑁆𑀣𑀭𑀡𑀸𑀤𑀺𑀓𑀦𑁆𑀢𑀺 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀓𑀁. 𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲𑀸𑀢𑀺 𑀓𑀺𑀮𑀜𑁆𑀚𑀲𑀁𑀳𑀭𑀡𑀦𑀺𑀬𑀸𑀫𑁂𑀦 𑀯𑀝𑁆𑀝𑁂𑀢𑁆𑀯𑀸 𑀲𑀁𑀳𑀭𑀺𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲. 𑀫𑀼𑀢𑁆𑀢𑁂 𑀞𑀸𑀦𑀸𑀢𑀺 𑀓𑀫𑁂𑀦 𑀲𑀁𑀳𑀭𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑁂 𑀲𑀢𑀺. 𑀧𑀭𑀸𑀪𑀯𑁄𑀢𑀺 𑀲𑀸𑀲𑀦𑀢𑁄 𑀧𑀭𑀺𑀳𑀻𑀦𑁄.

𑁬𑁪. 𑀏𑀯𑀁 𑀅𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑀸𑀤𑀻𑀦𑀁 𑀲𑀁𑀳𑀭𑀺𑀢𑁆𑀯𑀸 𑀕𑀳𑀡𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀺𑀭𑀺𑀬𑀢𑁄 𑀆𑀓𑀟𑁆𑀠𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀑𑀭𑀺𑀫𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀧𑀺, 𑀯𑀸𑀢𑀺 𑀧𑀓𑀸𑀭𑀦𑁆𑀢𑀭𑀫𑁂𑀯 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀉𑀚𑀼𑀓𑀁 𑀓𑀟𑁆𑀠𑀢𑁄𑀧𑀺 𑀯𑀸𑀢𑀺 𑀅𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑀸𑀤𑀺𑀓𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀏𑀓𑀁 𑀤𑀺𑀲𑀁 𑀉𑀚𑀼𑀓𑀫𑀸𑀓𑀟𑁆𑀠𑀢𑁄 ¶ 𑀘 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀓𑀤𑀸𑀢𑀺 𑀘𑁂? 𑀏𑀢𑁆𑀣𑀸𑀧𑀺 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑀫𑁄𑀓𑀸𑀲𑀁 𑀧𑀸𑀭𑀺𑀫𑀦𑁆𑀢𑀢𑁄 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑀫𑁄𑀓𑀸𑀲𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀞𑀺𑀢𑀤𑀺𑀲𑀸𑀕𑀢𑀧𑀭𑀺𑀬𑀦𑁆𑀢𑁂𑀦 𑀨𑀼𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀁. 𑀧𑀸𑀭𑀺𑀫𑀦𑁆𑀢𑀢𑁄𑀢𑀺 𑀧𑀸𑀭𑀺𑀫𑀦𑁆𑀢𑁂𑀦, 𑀓𑀭𑀡𑀢𑁆𑀣𑁂 𑀢𑁄-𑀧𑀘𑁆𑀘𑀬𑁄.

𑀣𑀮𑀁 ¶ 𑀦𑀸𑀫 𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀪𑀽𑀫𑀺𑀧𑀸𑀲𑀸𑀤𑀧𑀩𑁆𑀩𑀢𑀢𑀮𑀸𑀤𑀻𑀦𑀺, 𑀢𑀢𑁆𑀭𑀝𑁆𑀞𑀁 𑀥𑀜𑁆𑀜𑀸𑀤𑀺𑀪𑀡𑁆𑀟𑀁 𑀣𑀮𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀣𑀮𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁬𑁫-𑁬. 𑀧𑀭𑀺𑀘𑁆𑀙𑁂𑀤𑀸𑀢𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁬𑁭-𑁮. 𑀔𑁂𑀕𑀢𑀦𑁆𑀢𑀺 𑀆𑀓𑀸𑀲𑀕𑀢𑀁. 𑀅𑀲𑁆𑀲𑀸𑀢𑀺 𑀫𑁄𑀭𑀲𑁆𑀲. 𑀢𑀦𑁆𑀢𑀺 𑀫𑁄𑀭𑀁.

𑁬𑁯. 𑀞𑀸𑀦𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀸 𑀙𑀩𑁆𑀩𑀺𑀥𑀸 𑀞𑀸𑀦𑀸. 𑀢𑀲𑁆𑀲𑀸𑀢𑀺 𑀫𑁄𑀭𑀲𑁆𑀲 𑀨𑀦𑁆𑀤𑀸𑀧𑀦𑁂𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

𑁭𑁦. 𑀅𑀕𑁆𑀕𑀳𑁂𑀢𑁆𑀯𑀸 𑀳𑀢𑁆𑀣𑁂𑀦 𑀮𑁂𑀟𑁆𑀟𑀼𑀔𑀺𑀧𑀦𑀸𑀤𑀺𑀧𑀬𑁄𑀕𑁂𑀦 𑀫𑁄𑀭𑀁 𑀢𑀸𑀲𑁂𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑁂𑀢𑀺. 𑀅𑀢𑁆𑀢𑀦𑁄 𑀞𑀸𑀦𑀸𑀢𑀺 𑀫𑁄𑀭𑀲𑁆𑀲 𑀅𑀢𑁆𑀢𑀦𑁄 𑀙𑀧𑁆𑀧𑀓𑀸𑀭𑀝𑁆𑀞𑀸𑀦𑀸. 𑀲𑀬𑀁 𑀞𑀸𑀦𑀸𑀢𑀺 𑀪𑀺𑀓𑁆𑀔𑀼 𑀲𑀓𑀝𑁆𑀞𑀸𑀦𑀸, 𑀲𑀫𑀡𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁧-𑁨. 𑀇𑀤𑀸𑀦𑀺 ‘‘𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀫𑁄𑀭’’𑀦𑁆𑀢𑀺 𑀤𑀲𑁆𑀲𑀺𑀢𑀁 𑀞𑀸𑀦𑀸𑀘𑀸𑀯𑀦𑀁 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀨𑀼𑀝𑁆𑀞𑁄𑀓𑀸𑀲’’𑀦𑁆𑀢𑀺𑀆𑀤𑀺.

𑁭𑁩. 𑀓𑀭𑁂 𑀦𑀺𑀮𑀻𑀬𑀢𑀻𑀢𑀺 𑀧𑀲𑀸𑀭𑀺𑀢𑀳𑀢𑁆𑀣𑀢𑀮𑁂 𑀦𑀺𑀲𑀻𑀤𑀢𑀺.

𑁭𑁫. 𑀉𑀟𑁆𑀟𑁂𑀢𑁆𑀯𑀸𑀢𑀺 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸.

𑁭𑁬. 𑀅𑀗𑁆𑀕𑁂 ¶ 𑀦𑀺𑀮𑀻𑀦𑀦𑁆𑀢𑀺 𑀅𑀁𑀲𑀓𑀽𑀝𑀸𑀤𑀺𑀲𑀭𑀻𑀭𑀸𑀯𑀬𑀯𑁂 𑀦𑀺𑀮𑀻𑀦𑀁. 𑀧𑀸𑀤𑁂𑀢𑀺 𑀅𑀢𑁆𑀢𑀦𑁄 𑀧𑀞𑀫𑀼𑀤𑁆𑀥𑀸𑀭𑀧𑀸𑀤𑁂. 𑀤𑀼𑀢𑀺𑀬𑁂 𑀧𑀸𑀤𑁂.

𑁭𑁭. 𑀧𑀸𑀤𑀸𑀦𑀦𑁆𑀢𑀺 ¶ 𑀤𑁆𑀯𑀺𑀦𑁆𑀦𑀁 𑀧𑀸𑀤𑀸𑀦𑀁. 𑀓𑀮𑀸𑀧𑀲𑁆𑀲𑀸𑀢𑀺 𑀪𑀽𑀫𑀺𑀬𑀁 𑀨𑀼𑀲𑀺𑀬𑀫𑀸𑀦𑀲𑁆𑀲 𑀓𑀮𑀸𑀧𑀕𑁆𑀕𑀲𑁆𑀲.

𑁭𑁮. 𑀢𑀢𑁄 𑀧𑀣𑀯𑀺𑀢𑁄𑀢𑀺 𑀢𑀻𑀳𑀺 𑀅𑀯𑀬𑀯𑁂𑀳𑀺 𑀧𑀢𑀺𑀝𑁆𑀞𑀺𑀢𑀧𑀣𑀯𑀺𑀧𑁆𑀧𑀤𑁂𑀲𑀢𑁄, 𑀦 𑀧𑀞𑀫𑀢𑁄 𑀢𑀢𑁆𑀣 𑀤𑀼𑀓𑁆𑀓𑀝𑀢𑁆𑀢𑀸, 𑀦 𑀤𑀼𑀢𑀺𑀬𑀢𑁄 𑀢𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀢𑁆𑀢𑀸, 𑀢𑀢𑀺𑀬𑀸 𑀧𑀦 𑀞𑀸𑀦𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀯𑀬𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑁋

‘‘𑀧𑀜𑁆𑀚𑀭𑁂 𑀞𑀺𑀢𑀁 𑀫𑁄𑀭𑀁 𑀲𑀳 𑀧𑀜𑁆𑀚𑀭𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀧𑀸𑀤𑀁 𑀦𑀕𑁆𑀖𑀢𑀺, 𑀲𑀩𑁆𑀩𑀢𑁆𑀣 𑀅𑀕𑁆𑀖𑀯𑀲𑁂𑀦 𑀓𑀢𑁆𑀢𑀩𑁆𑀩𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀘𑀭𑀦𑁆𑀢𑀁 𑀫𑁄𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀧𑀤𑀲𑀸 𑀩𑀳𑀺𑀯𑀢𑁆𑀣𑀼𑀁 𑀦𑀻𑀳𑀭𑀦𑁆𑀢𑁄 𑀤𑁆𑀯𑀸𑀭𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀚𑁂 𑀞𑀺𑀢𑀩𑀮𑀺𑀩𑀤𑁆𑀤𑀲𑁆𑀲 𑀳𑀺 𑀯𑀚𑁄 𑀯𑀺𑀬 𑀅𑀦𑁆𑀢𑁄𑀯𑀢𑁆𑀣𑀼 𑀢𑀲𑁆𑀲 𑀞𑀸𑀦𑀁. 𑀳𑀢𑁆𑀣𑁂𑀦 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀦𑁆𑀢𑁄𑀕𑀸𑀫𑁂 𑀘𑀭𑀦𑁆𑀢𑀫𑁆𑀧𑀺 𑀕𑀸𑀫𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀬𑀫𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑁂 𑀯𑀸 𑀯𑀢𑁆𑀣𑀽𑀧𑀘𑀸𑀭𑁂 𑀯𑀸 𑀘𑀭𑀦𑁆𑀢𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁄 𑀓𑀝𑁆𑀞𑁂𑀦 𑀯𑀸 𑀓𑀣𑀮𑀸𑀬 𑀯𑀸 𑀉𑀢𑁆𑀭𑀸𑀲𑁂𑀢𑁆𑀯𑀸 𑀅𑀝𑀯𑀻𑀪𑀺𑀫𑀼𑀔𑀁 𑀓𑀭𑁄𑀢𑀺, 𑀫𑁄𑀭𑁄 𑀉𑀟𑁆𑀟𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀯𑀸 𑀙𑀤𑀦𑀧𑀺𑀝𑁆𑀞𑁂 𑀯𑀸 𑀦𑀺𑀮𑀻𑀬𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀅𑀝𑀯𑀻𑀪𑀺𑀫𑀼𑀔𑁄 𑀉𑀟𑁆𑀟𑁂𑀢𑀺 𑀯𑀸 𑀕𑀘𑁆𑀙𑀢𑀺 𑀯𑀸, ‘𑀅𑀝𑀯𑀺𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’𑀢𑀺 𑀧𑀭𑀺𑀓𑀧𑁆𑀧𑁂 𑀅𑀲𑀢𑀺 𑀧𑀣𑀯𑀺𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀧𑁆𑀧𑀢𑀺𑀢𑀫𑀢𑁆𑀢𑁂 𑀯𑀸 𑀤𑀼𑀢𑀺𑀬𑀧𑀤𑀯𑀸𑀭𑁂 𑀯𑀸 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁬) 𑁋

𑀅𑀝𑁆𑀞𑀓𑀣𑀸𑀕𑀢𑁄 ¶ 𑀯𑀺𑀦𑀺𑀘𑁆𑀙𑀬𑁄 𑀉𑀧𑀮𑀓𑁆𑀔𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀧𑀺𑀜𑁆𑀚𑀭𑀸𑀤𑀺𑀧𑀭𑀲𑀦𑁆𑀢𑀓𑀲𑀓𑀼𑀡𑁂𑀲𑀼 𑀘 𑀏𑀲𑁂𑀯 𑀯𑀺𑀦𑀺𑀘𑁆𑀙𑀬𑁄 𑀤𑀝𑁆𑀞𑀩𑁆𑀩𑁄.

𑁭𑁯. 𑀧𑀢𑁆𑀢𑁂𑀢𑀺 𑀤𑁆𑀯𑀸𑀭𑁂 𑀪𑀺𑀓𑁆𑀔𑀸𑀬 𑀞𑀺𑀢𑀁 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑀕𑀢𑁂 𑀧𑀢𑁆𑀢𑁂. 𑀢𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲.

𑁮𑁦. 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯𑀸𑀢𑀺 ¶ 𑀧𑀢𑁆𑀢𑁂 𑀧𑀢𑀺𑀢𑀁 𑀲𑀼𑀯𑀡𑁆𑀡𑀸𑀤𑀺𑀁 𑀳𑀢𑁆𑀣𑁂𑀦 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀧𑀞𑀫𑀧𑀤𑀯𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁 𑀕𑀫𑁆𑀫𑀫𑀸𑀦𑀢𑁆𑀢𑀸 𑀦 𑀯𑀼𑀢𑁆𑀢𑀁.

𑁮𑁧. 𑀳𑀢𑁆𑀣𑁂𑀢𑀺 𑀳𑀢𑁆𑀣𑀢𑀮𑁂. 𑀯𑀢𑁆𑀣𑁂𑀢𑀺 𑀘𑀻𑀯𑀭𑁂. 𑀫𑀢𑁆𑀣𑀓𑁂𑀢𑀺 𑀲𑀺𑀭𑀲𑀺. 𑀕𑀸𑀣𑀸𑀙𑀦𑁆𑀤𑀯𑀲𑁂𑀦 𑀯𑀸-𑀲𑀤𑁆𑀤𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀧𑀢𑀺𑀢𑀁. 𑀢𑀦𑁆𑀢𑀺 𑀙𑀺𑀚𑁆𑀚𑀫𑀸𑀦𑀁 𑀢𑀁 𑀲𑀼𑀯𑀡𑁆𑀡𑀔𑀡𑁆𑀟𑀸𑀤𑀺. 𑀬𑀤𑀺 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀁, 𑀧𑀢𑀦𑁆𑀢𑀁 𑀯𑀸 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺. 𑀕𑀳𑀺𑀢𑀳𑀢𑁆𑀣𑁂 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁, 𑀢𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀕𑀳𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑁄 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂. 𑀯𑀢𑁆𑀣𑀸𑀤𑀻𑀲𑀼 𑀧𑀢𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀆𑀓𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁮𑁨. 𑀫𑀜𑁆𑀘𑀧𑀻𑀞𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀜𑁆𑀘𑀧𑀻𑀞𑀲𑀤𑀺𑀲𑁂 𑀯𑁂𑀳𑀸𑀲𑀪𑀽𑀢𑁂 𑀅𑀝𑁆𑀝𑀯𑀺𑀢𑀸𑀦𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀫𑀸𑀲𑀫𑁆𑀧𑀻𑀢𑀺 𑀳𑀢𑁆𑀣𑁂𑀦 𑀯𑀸 𑀓𑀸𑀬𑁂𑀦 𑀯𑀸 𑀆𑀫𑀲𑀺𑀢𑀩𑁆𑀩𑀁 𑀯𑀢𑁆𑀣𑀸𑀤𑀺𑀜𑁆𑀘. 𑀅𑀦𑀸𑀫𑀸𑀲𑀫𑁆𑀧𑀻𑀢𑀺 𑀢𑀣𑀸 𑀅𑀧𑀭𑀸𑀫𑀲𑀺𑀢𑀩𑁆𑀩𑀁 𑀲𑀼𑀯𑀡𑁆𑀡𑀸𑀤𑀺𑀁. 𑀆𑀫𑀲𑀦𑁆𑀢𑀲𑁆𑀲𑀸𑀢𑀺 𑀳𑀢𑁆𑀣𑀸𑀤𑀻𑀳𑀺 𑀧𑀭𑀸𑀫𑀲𑀦𑁆𑀢𑀲𑁆𑀲. ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀜𑁆𑀘 𑀳𑁂𑀝𑁆𑀞𑀸 𑀣𑀮𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀅𑀢𑀺𑀤𑀺𑀲𑀢𑀺. 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀧𑀦 𑀫𑀜𑁆𑀘𑀸𑀤𑀻𑀳𑀺 𑀏𑀯 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀯𑀲𑁂𑀦, 𑀢𑀢𑁆𑀭𑀝𑁆𑀞𑀫𑁂𑀯 𑀕𑀡𑁆𑀳𑀦𑁆𑀢𑀲𑁆𑀲 𑀫𑀜𑁆𑀘𑀲𑁆𑀲 𑀘𑀢𑀽𑀲𑀼 𑀧𑀸𑀤𑀲𑀻𑀲𑁂𑀲𑀼 𑀨𑀼𑀲𑀺𑀢𑁆𑀯𑀸 ¶ 𑀫𑀚𑁆𑀛𑁂 𑀅𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀔𑀮𑀺𑀫𑀓𑁆𑀔𑀺𑀢𑀣𑀤𑁆𑀥𑀲𑀸𑀝𑀓𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀲𑀻𑀲𑀸𑀦𑀁 𑀯𑀲𑁂𑀦, 𑀅𑀝𑀦𑀻𑀲𑀼 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀅𑀝𑀦𑀻𑀦𑀁 𑀯𑀲𑁂𑀦 𑀯𑀸 𑀯𑁂𑀤𑀺𑀢𑀩𑁆𑀩𑁄.

𑁮𑁩. 𑀯𑀁𑀲𑁂𑀢𑀺 𑀘𑀻𑀯𑀭𑀯𑀁𑀲𑁂, 𑀇𑀫𑀺𑀦𑀸 𑀘𑀻𑀯𑀭𑀦𑀺𑀓𑁆𑀔𑁂𑀧𑀦𑀢𑁆𑀣𑀸𑀬 𑀞𑀧𑀺𑀢𑀭𑀼𑀓𑁆𑀔𑀤𑀡𑁆𑀟𑀲𑀮𑀸𑀓𑀸𑀭𑀚𑁆𑀚𑀼𑀆𑀤𑀬𑁄 𑀉𑀧𑀮𑀓𑁆𑀔𑀺𑀢𑀸. 𑀑𑀭𑀢𑁄𑀢𑀺 𑀅𑀢𑁆𑀢𑀦𑁄 𑀞𑀺𑀢𑀤𑀺𑀲𑀸𑀪𑀺𑀫𑀼𑀔𑀢𑁄. 𑀪𑁄𑀕𑀦𑁆𑀢𑀺 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀁 𑀢𑀲𑁆𑀲 𑀦𑀸𑀫𑁂𑀢𑁆𑀯𑀸 𑀞𑀧𑀺𑀢𑀫𑀚𑁆𑀛𑀝𑁆𑀞𑀸𑀦𑀁. 𑀅𑀦𑁆𑀢𑀦𑁆𑀢𑀺 𑀦𑀸𑀫𑁂𑀢𑁆𑀯𑀸 𑀏𑀓𑀢𑁄 𑀓𑀢𑀁, 𑀉𑀪𑀬𑀸𑀦𑀁 𑀯𑀸 𑀅𑀦𑁆𑀢𑀁. 𑀧𑀸𑀭𑀢𑁄 𑀓𑀢𑁆𑀯𑀸𑀢𑀺 𑀯𑀁𑀲𑀢𑁄 𑀧𑀭𑀪𑀸𑀕𑁂 𑀓𑀢𑁆𑀯𑀸.

𑁮𑁪. 𑀘𑀻𑀯𑀭𑁂𑀦 𑀨𑀼𑀝𑁆𑀞𑁄𑀓𑀸𑀲𑁄𑀢𑀺 𑀘𑀻𑀯𑀭𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁. 𑀢𑀲𑁆𑀲𑀸𑀢𑀺 𑀢𑀣𑀸 𑀞𑀧𑀺𑀢𑀲𑁆𑀲 𑀘𑀻𑀯𑀭𑀲𑁆𑀲. 𑀲𑁄 𑀲𑀓𑀮𑁄 𑀘𑀻𑀯𑀭𑀯𑀁𑀲𑁄 𑀞𑀸𑀦𑀁 𑀦 𑀢𑀼 𑀳𑁄𑀢𑀻𑀢𑀺 𑀫𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁫-𑁬. 𑀑𑀭𑀺𑀫𑀦𑁆𑀢𑁂𑀦 ¶ 𑀨𑀼𑀝𑁆𑀞𑀁 𑀯𑀸 𑀢𑀁 𑀑𑀓𑀸𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀻𑀯𑀭𑀪𑁄𑀕𑀁 𑀕𑀳𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀢𑁄 𑀅𑀢𑁆𑀢𑀦𑁄 𑀞𑀺𑀢𑀤𑀺𑀲𑀸𑀬 𑀘𑀻𑀯𑀭𑀯𑀁𑀲𑁂 𑀘𑀻𑀯𑀭𑁂𑀦 𑀨𑀼𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀧𑀭𑀺𑀬𑀦𑁆𑀢𑀁 𑀇𑀢𑀭𑁂𑀦 𑀅𑀢𑀺𑀓𑁆𑀓𑀸𑀫𑀬𑀢𑁄 𑀘𑀼𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀦 𑀧𑀸𑀭𑀺𑀫𑀦𑁆𑀢𑁂𑀦 𑀪𑀺𑀢𑁆𑀢𑀺𑀤𑀺𑀲𑀸𑀬 𑀘𑀻𑀯𑀭𑀲𑁆𑀲 𑀨𑀼𑀝𑁆𑀞𑁄𑀓𑀸𑀲𑀧𑀭𑀺𑀬𑀦𑁆𑀢𑀁 𑀇𑀢𑀭𑁂𑀦 𑀨𑀼𑀝𑁆𑀞𑀁 𑀢𑀁 𑀑𑀓𑀸𑀲𑀁 𑀑𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑀬𑀢𑁄 𑀯𑀸 𑀘𑀼𑀢𑀻𑀢𑀺 𑀬𑁄𑀚𑀦𑀸. 𑀇𑀢𑀭𑁂𑀦𑀸𑀢𑀺 𑀧𑀸𑀭𑀺𑀫𑀦𑁆𑀢𑁂𑀦 𑀪𑀺𑀢𑁆𑀢𑀺𑀧𑀲𑁆𑀲𑁂 𑀘𑀻𑀯𑀭𑀯𑀁𑀲𑁂 𑀨𑀼𑀲𑀺𑀢𑁆𑀯𑀸 𑀞𑀺𑀢𑀘𑀻𑀯𑀭𑀧𑀭𑀺𑀬𑀦𑁆𑀢𑁂𑀦. 𑀨𑀼𑀝𑁆𑀞𑀁 𑀘𑀻𑀯𑀭𑀯𑀁𑀲𑁄𑀓𑀸𑀲𑀁. 𑀑𑀭𑀺𑀫𑀦𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀞𑀺𑀢𑀤𑀺𑀲𑀸𑀬 𑀘𑀻𑀯𑀭𑀯𑀁𑀲𑁂 𑀨𑀼𑀲𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀧𑁆𑀧𑀤𑁂𑀲𑁂𑀦. 𑀅𑀢𑀺𑀓𑁆𑀓𑀸𑀫𑀬𑀢𑁄𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲.

𑀏𑀯𑀁 𑀤𑀻𑀖𑀦𑁆𑀢𑀸𑀓𑀟𑁆𑀠𑀦𑁂 𑀲𑀫𑁆𑀪𑀯𑀦𑁆𑀢𑀁 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀭𑀺𑀬𑀦𑁆𑀢𑁂𑀦 𑀅𑀢𑀺𑀓𑁆𑀓𑀫𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀓𑁆𑀔𑀺𑀡𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀧𑀼𑀦𑀸𑀢𑀺 𑀅𑀣 𑀯𑀸. 𑀤𑀓𑁆𑀔𑀺𑀡𑀦𑁆𑀢𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁 𑀯𑀸𑀫𑀦𑁆𑀢𑁂𑀦 ¶ 𑀅𑀢𑀺𑀓𑁆𑀓𑀸𑀫𑀬𑀢𑁄 𑀘𑀼𑀢𑀻𑀢𑀺 𑀬𑁄𑀚𑀦𑀸. 𑀘𑀻𑀯𑀭𑀁 𑀳𑀭𑀺𑀢𑀼𑀁 𑀘𑀻𑀯𑀭𑀸𑀪𑀺𑀫𑀼𑀔𑀁 𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀘𑀻𑀯𑀭𑀓𑁄𑀝𑀺𑀬𑀸 𑀨𑀼𑀝𑁆𑀞𑀁 𑀘𑀻𑀯𑀭𑀝𑁆𑀞𑀺𑀢𑀧𑁆𑀧𑀤𑁂𑀲𑀁 𑀯𑀸𑀫𑀧𑀲𑁆𑀲𑁂 𑀘𑀻𑀯𑀭𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑀬𑀢𑁄 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀸𑀫𑀦𑁆𑀢𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁 𑀇𑀢𑀭𑁂𑀦 𑀅𑀢𑀺𑀓𑁆𑀓𑀸𑀫𑀬𑀢𑁄 𑀯𑀸 𑀘𑀼𑀢𑀻𑀢𑀺 𑀬𑁄𑀚𑀦𑀸. 𑀯𑀸𑀫𑀦𑁆𑀢𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀦𑁆𑀢𑀺 𑀘𑀻𑀯𑀭𑀸𑀪𑀺𑀫𑀼𑀔𑀁 𑀞𑀺𑀢𑀲𑁆𑀲 𑀯𑀸𑀫𑀧𑀲𑁆𑀲𑁂 𑀘𑀻𑀯𑀭𑀦𑁆𑀢𑁂𑀦 𑀨𑀼𑀝𑁆𑀞𑀁 𑀘𑀻𑀯𑀭𑀝𑁆𑀞𑀺𑀢𑀧𑁆𑀧𑀤𑁂𑀲𑀁. 𑀇𑀢𑀭𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂 𑀘𑀻𑀯𑀭𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑀬𑀢𑁄 𑀯𑀸 𑀘𑀼𑀢𑀺 𑀧𑀸𑀭𑀸𑀚𑀺𑀓𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁮𑁭. 𑀯𑀁𑀲𑀢𑁄𑀢𑀺 𑀘𑀻𑀯𑀭𑁂𑀦 𑀨𑀼𑀲𑀺𑀢𑁆𑀯𑀸 𑀞𑀺𑀢𑀘𑀻𑀯𑀭𑀯𑀁𑀲𑀧𑁆𑀧𑀤𑁂𑀲𑀢𑁄. ‘‘𑀓𑁂𑀲𑀕𑁆𑀕𑀫𑀢𑁆𑀢’’𑀦𑁆𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀮𑀺𑀔𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀉𑀓𑁆𑀔𑀺𑀢𑁆𑀢𑁂’’𑀢𑀺 𑀪𑀼𑀫𑁆𑀫𑁂𑀓𑀯𑀘𑀦𑀦𑁆𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀧𑀘𑁆𑀘𑀢𑁆𑀢𑁂𑀓𑀯𑀘𑀦𑀦𑁆𑀢𑀢𑀸 𑀦 𑀬𑀼𑀚𑁆𑀚𑀢𑀻𑀢𑀺. ‘‘𑀓𑁂𑀲𑀕𑁆𑀕𑀫𑀢𑁆𑀢𑁂 𑀉𑀓𑁆𑀔𑀺𑀢𑁆𑀢𑁂’’𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀘 𑀧𑀫𑀸𑀡𑀁.

𑁮𑁮. 𑀯𑀺𑀫𑁄𑀘𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂𑀢𑀺 𑀬𑁄𑀚𑀦𑀸. 𑀘𑀻𑀯𑀭𑀯𑀁𑀲𑁂 𑀨𑀼𑀲𑀸𑀧𑁂𑀢𑁆𑀯𑀸, 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀩𑀦𑁆𑀥𑀦𑀁 𑀫𑁄𑀘𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑁂𑀢𑀺 𑀫𑀼𑀢𑁆𑀢𑀫𑀢𑁆𑀢𑁂. 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀞𑀸𑀦𑀸 𑀘𑀼𑀢𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁯. 𑀯𑁂𑀞𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀯𑀁𑀲𑀫𑁂𑀯𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀢𑀺. 𑀘𑀻𑀯𑀭𑀯𑀁𑀲𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑀺𑀢𑀘𑀻𑀯𑀭𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀧𑀺 𑀅𑀬𑀁 𑀦𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲𑀸𑀢𑀺 𑀯𑀺𑀦𑀺𑀯𑁂𑀞𑁂𑀦𑁆𑀢𑀲𑁆𑀲. 𑀅𑀬𑀁 𑀦𑀬𑁄𑀢𑀺 ‘‘𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀺𑀩𑁆𑀩𑁂𑀞𑀺𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑀫𑀢𑀺𑀤𑀺𑀲𑀢𑀺 ¶ . 𑀯𑀮𑀬𑀁 𑀙𑀺𑀦𑁆𑀤𑀢𑁄 𑀯𑀸𑀧𑀺 𑀅𑀬𑀁 𑀦𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀺𑀓𑁆𑀔𑀼𑀦𑁄, 𑀯𑀁𑀲𑁂, 𑀞𑀧𑀺𑀢𑀁, 𑀘𑀻𑀯𑀭’’𑀦𑁆𑀢𑀺 𑀘 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀘𑀻𑀯𑀭𑀯𑀁𑀲𑁂 𑀧𑀯𑁂𑀲𑁂𑀢𑁆𑀯𑀸 ¶ 𑀞𑀧𑀺𑀢𑀁 𑀘𑀻𑀯𑀭𑀯𑀮𑀬𑀁 𑀬𑀣𑀸 𑀙𑀺𑀦𑁆𑀦𑀫𑀢𑁆𑀢𑁂 𑀞𑀸𑀦𑀸 𑀘𑀯𑀢𑀺, 𑀢𑀣𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑁂𑀤𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀙𑀺𑀦𑁆𑀦𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀫𑁄𑀘𑁂𑀦𑁆𑀢𑀲𑁆𑀲𑀸𑀧𑁆𑀬𑀬𑀁 𑀦𑀬𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀮𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 ‘‘𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀁 𑀘𑀻𑀯𑀭𑀁 𑀯𑀮𑀬𑀁 𑀫𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀇𑀳 𑀧𑀼𑀭𑀺𑀫𑁂𑀦 𑀅𑀧𑀺-𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀧𑀓𑀸𑀭𑀤𑁆𑀯𑀬𑁂 𑀲𑀫𑁆𑀧𑀺𑀡𑁆𑀟𑀺𑀢𑁂 𑀇𑀢𑀭𑁂𑀦 𑀅𑀧𑀺-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀫𑀦𑁆𑀢𑀭𑁂𑀦 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 𑀅𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑁂𑀦 ‘‘𑀆𑀓𑀸𑀲𑀕𑀢𑀁 𑀯𑀸 𑀓𑀭𑁄𑀢𑀺, 𑀦𑀻𑀳𑀭𑀢𑀺 𑀯𑀸’’𑀢𑀺 𑀧𑀓𑀸𑀭𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀭𑀼𑀓𑁆𑀔𑀫𑀽𑀮𑁂 𑀧𑀯𑁂𑀲𑁂𑀢𑁆𑀯𑀸 𑀞𑀧𑀺𑀢𑀦𑀺𑀥𑀺𑀲𑀗𑁆𑀔𑀮𑀺𑀓𑀯𑀮𑀬𑀫𑀺𑀯 𑀘𑀻𑀯𑀭𑀯𑀁𑀲𑁂 𑀲𑀩𑁆𑀩𑀝𑁆𑀞𑀸𑀦𑁂𑀳𑀺𑀧𑀺 𑀅𑀨𑀼𑀲𑀸𑀧𑁂𑀢𑁆𑀯𑀸 𑀘𑀻𑀯𑀭𑀯𑀮𑀬𑀁 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀘𑀻𑀯𑀭𑀯𑀁𑀲𑀓𑁄𑀝𑀺𑀬𑀸 𑀩𑀳𑀺 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀸𑀦𑀻𑀢𑀺 𑀏𑀢𑁂𑀬𑁂𑀯 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀯𑀮𑀬𑀁 𑀙𑀺𑀦𑁆𑀤𑀢𑁄 𑀯𑀸𑀧𑀺, 𑀫𑁄𑀘𑁂𑀦𑁆𑀢𑀲𑁆𑀲 𑀯𑀸𑀧𑀺, 𑀯𑀮𑀬𑀁 𑀆𑀓𑀸𑀲𑀕𑀢𑀁 𑀯𑀸 𑀓𑀭𑁄𑀢𑀺, 𑀦𑀻𑀳𑀭𑀢𑀺 𑀯𑀸’’𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀏𑀓𑀫𑁆𑀧𑀺 𑀢𑀣𑀸 𑀅𑀓𑀢𑁆𑀯𑀸 𑀘𑀻𑀯𑀭𑀯𑀮𑀬𑀁 𑀘𑀻𑀯𑀭𑀯𑀁𑀲𑁂 𑀖𑀁𑀲𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀦𑁆𑀢𑀲𑁆𑀲 𑀘𑀻𑀯𑀭𑀯𑀮𑀬𑀲𑁆𑀲 𑀲𑀩𑁆𑀩𑁄𑀧𑀺 𑀘𑀻𑀯𑀭𑀯𑀁𑀲𑁄 𑀞𑀸𑀦𑀦𑁆𑀢𑀺 ‘‘𑀞𑀸𑀦𑀸𑀘𑀸𑀯𑀦𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁯𑁦. 𑀞𑀧𑀺𑀢𑀲𑁆𑀲 𑀳𑀻𑀢𑀺 𑀏𑀢𑁆𑀣 𑀧𑀲𑀺𑀤𑁆𑀥𑀺𑀲𑀽𑀘𑀓𑀁 𑀳𑀺-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 ‘‘𑀘𑀻𑀯𑀭𑁂 𑀯𑀺𑀬 𑀳𑀻’’𑀢𑀺 𑀬𑁄𑀚𑁂𑀢𑁆𑀯𑀸 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑀁 𑀢𑀼-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 ‘‘𑀞𑀧𑀺𑀢𑀲𑁆𑀲 𑀢𑀽’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀣 𑀯𑀸 𑀦𑀺𑀧𑀸𑀢𑀸𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑀫𑁂𑀯 𑀯𑀺𑀲𑁂𑀲𑀢𑁆𑀣𑁂 𑀳𑀺-𑀲𑀤𑁆𑀤𑁄, 𑀧𑀲𑀺𑀤𑁆𑀥𑀺𑀬𑀁 𑀢𑀼-𑀲𑀤𑁆𑀤𑁄 𑀘 𑀬𑁄𑀚𑁂𑀢𑀩𑁆𑀩𑁄. 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀤𑀻𑀖𑀢𑁄 𑀯𑀸 𑀢𑀺𑀭𑀺𑀬𑀢𑁄 𑀯𑀸 𑀧𑀲𑀸𑀭𑁂𑀢𑁆𑀯𑀸 ¶ 𑀘𑀻𑀯𑀭𑀯𑀁𑀲𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀘𑀻𑀯𑀭𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀧𑀦 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀘𑀻𑀯𑀭𑀯𑀺𑀦𑀺𑀘𑁆𑀙𑀬𑁄 𑀯𑀺𑀬 𑀯𑀼𑀢𑁆𑀢𑁄, ‘‘𑀑𑀭𑀺𑀫𑀦𑁆𑀢𑁂𑀦…𑀧𑁂… 𑀧𑀸𑀭𑀸𑀚𑀺𑀓𑀁 𑀪𑀯𑁂’’𑀢𑀺 𑀕𑀸𑀣𑀸𑀢𑁆𑀢𑀬𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁯𑁧. 𑀲𑀺𑀓𑁆𑀓𑀸𑀬𑀸𑀢𑀺 𑀑𑀮𑀫𑁆𑀩𑀺𑀓𑀸𑀥𑀸𑀭𑁂. 𑀬𑀁 𑀪𑀡𑁆𑀟𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀦𑀺𑀯𑁂𑀲𑁂𑀢𑁆𑀯𑀸. 𑀮𑀕𑁆𑀕𑀺𑀢𑀁 𑀳𑁄𑀢𑀻𑀢𑀺 𑀑𑀮𑀫𑁆𑀩𑀺𑀢𑀁 𑀳𑁄𑀢𑀺. ‘‘𑀲𑀺𑀓𑁆𑀓𑀸𑀢𑁄 𑀢𑀁 𑀳𑀭𑀦𑁆𑀢𑁄 𑀯𑀸 𑀘𑀼𑀢𑁄’’𑀢𑀺 𑀏𑀢𑀲𑁆𑀫𑀺𑀁 𑀯𑀺𑀓𑀧𑁆𑀧𑁂 ¶ 𑀲𑀺𑀓𑁆𑀓𑀸𑀬 𑀨𑀼𑀝𑁆𑀞𑀝𑁆𑀞𑀸𑀦𑀯𑀲𑁂𑀦 𑀞𑀸𑀦𑀸𑀘𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀲𑀺𑀓𑁆𑀓𑀸𑀬, 𑀩𑀦𑁆𑀥𑀦𑀝𑁆𑀞𑀸𑀦𑀲𑁆𑀲 𑀘 𑀪𑀺𑀢𑁆𑀢𑀺𑀧𑀲𑁆𑀲𑁂 𑀨𑀼𑀝𑁆𑀞𑀝𑁆𑀞𑀸𑀦𑀁 𑀬𑀤𑀺 𑀲𑀺𑀬𑀸, 𑀢𑀲𑁆𑀲 𑀘 𑀯𑀲𑁂𑀦 𑀞𑀸𑀦𑀸𑀘𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁯𑁨-𑁩. 𑀓𑀼𑀦𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑀺𑀦𑁆𑀤𑀺𑀯𑀸𑀮𑀸𑀤𑀺 𑀤𑀻𑀖𑀯𑀢𑁆𑀣𑀼 𑀕𑀳𑁂𑀢𑀩𑁆𑀩𑀁. 𑀢𑀝𑁆𑀝𑀺𑀓𑀸𑀔𑀸𑀡𑀼𑀓𑀸 𑀯𑀺𑀬 𑀪𑀺𑀢𑁆𑀢𑀺𑀬𑀁 𑀧𑀝𑀺𑀧𑀸𑀝𑀺𑀬𑀸 𑀦𑀺𑀯𑁂𑀲𑀺𑀢𑀸𑀦𑀺 𑀫𑀺𑀕𑀲𑀺𑀗𑁆𑀕𑀸𑀦𑀺 𑀯𑀸 𑀲𑀽𑀮𑀸𑀦𑀺 𑀯𑀸 𑀦𑀸𑀕𑀤𑀦𑁆𑀢𑀸 𑀦𑀸𑀫. 𑀅𑀕𑁆𑀕𑁂 𑀯𑀸𑀢𑀺 𑀓𑀼𑀦𑁆𑀢𑀨𑀮𑀓𑁄𑀝𑀺𑀬𑀁 𑀯𑀸. 𑀩𑀼𑀦𑁆𑀤𑁂 𑀯𑀸𑀢𑀺 𑀓𑀼𑀦𑁆𑀢𑀤𑀦𑁆𑀢𑀫𑀽𑀮𑁂 𑀯𑀸. 𑀧𑀭𑀺𑀓𑀟𑁆𑀠𑀢𑁄𑀢𑀺 𑀉𑀚𑀼𑀓𑀁 𑀆𑀓𑀟𑁆𑀠𑀢𑁄.

𑀨𑀼𑀝𑁆𑀞𑁄𑀓𑀸𑀲𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀸𑀕𑀤𑀦𑁆𑀢𑁂 𑀨𑀼𑀝𑁆𑀞𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑁂𑀦 𑀧𑀭𑀸𑀚𑀬𑁄 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀞𑀧𑀺𑀢𑀝𑁆𑀞𑀧𑀺𑀢𑀝𑁆𑀞𑀸𑀦𑀁 𑀯𑀺𑀳𑀸𑀬 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑀬𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀲𑀕𑁆𑀕𑁂𑀦 𑀅𑀦𑁆𑀢𑀭𑁂𑀦 𑀳𑁂𑀢𑀼𑀦𑀸 𑀧𑀭𑀸𑀚𑀬𑁄𑀢𑀺 𑀕𑀳𑁂𑀢𑀩𑁆𑀩𑀁, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑀬𑀦𑀳𑁂𑀢𑀼 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁯𑁪-𑁫. 𑀏𑀯𑀁 𑀤𑀻𑀖𑀢𑁄 𑀆𑀓𑀟𑁆𑀠𑀦𑁂, 𑀉𑀓𑁆𑀔𑀺𑀧𑀦𑁂 𑀘 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀺𑀭𑀺𑀬𑀁 𑀆𑀓𑀟𑁆𑀠𑀦𑁂, 𑀧𑀭𑀢𑁄 𑀦𑀬𑀦𑁂 𑀘 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀸𑀓𑀸𑀭𑀸𑀪𑀺𑀫𑀼𑀔𑁄’’𑀢𑀺𑀆𑀤𑀺. 𑀆𑀓𑀟𑁆𑀠𑀢𑀻𑀢𑀺 𑀅𑀢𑁆𑀢𑀦𑁄 ¶ 𑀞𑀺𑀢𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀆𑀯𑀺𑀜𑁆𑀙𑀢𑀺. 𑀑𑀭𑀺𑀫𑀦𑁆𑀢𑀨𑀼𑀝𑁆𑀞𑁄𑀓𑀸𑀲𑀦𑁆𑀢𑀺 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁, 𑀅𑀢𑁆𑀢𑀦𑁄 𑀤𑀺𑀲𑀸𑀬 𑀓𑀼𑀦𑁆𑀢𑀤𑀡𑁆𑀟𑁂𑀦 𑀨𑀼𑀝𑁆𑀞𑁄𑀓𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀅𑀘𑁆𑀘𑀬𑀦𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀲𑀓𑀫𑁆𑀫𑀓𑀥𑀸𑀢𑀼𑀧𑁆𑀧𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀲𑁆𑀲 𑀫𑀸𑀕𑀥𑀺𑀓𑀯𑁄𑀳𑀸𑀭𑁂 𑀤𑀲𑁆𑀲𑀦𑀢𑁄 𑀓𑀫𑁆𑀫𑀢𑁆𑀣𑁂𑀬𑁂𑀯 𑀉𑀧𑀬𑁄𑀕𑀯𑀘𑀦’’𑀦𑁆𑀢𑀺 𑀏𑀓𑁂 𑀯𑀤𑀦𑁆𑀢𑀺, 𑀏𑀢𑀁 𑀓𑀘𑁆𑀘𑀸𑀬𑀦𑀮𑀓𑁆𑀔𑀡𑁂𑀦 𑀲𑀫𑀸𑀦𑀁. 𑀇𑀢𑀭𑀦𑁆𑀢𑀘𑁆𑀘𑀬𑁂𑀢𑀺 𑀇𑀢𑀭𑀦𑁆𑀢𑁂𑀦 𑀓𑀢𑁄 𑀅𑀘𑁆𑀘𑀬𑁄𑀢𑀺 𑀇𑀢𑀭𑀦𑁆𑀢𑀘𑁆𑀘𑀬𑁄, 𑀫𑀚𑁆𑀛𑁂𑀧𑀤𑀮𑁄𑀧𑀲𑀫𑀸𑀲𑁄, 𑀧𑀸𑀭𑀺𑀫𑀦𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺𑀓𑁆𑀓𑀫𑁂 𑀓𑀢𑁂𑀢𑀺 𑀅𑀢𑁆𑀣𑁄. 𑀓𑁂𑀲𑀕𑁆𑀕𑁂𑀦 𑀘𑀼𑀢𑁄𑀢𑀺 𑀬𑁄𑀚𑀦𑀸. 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀅𑀢𑁆𑀣𑁄.

𑀧𑀭𑀢𑁄 𑀧𑁂𑀮𑁆𑀮𑀦𑁆𑀢𑀲𑁆𑀲𑀸𑀢𑀺 𑀧𑀭𑀢𑁄 𑀓𑀢𑁆𑀯𑀸 𑀧𑁂𑀮𑁆𑀮𑀦𑁆𑀢𑀲𑁆𑀲, 𑀪𑀺𑀢𑁆𑀢𑀺𑀧𑀲𑁆𑀲𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀦𑀺𑀧𑁆𑀧𑀻𑀴𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀣𑁂𑀯𑀸𑀢𑀺 ‘‘𑀓𑁂𑀲𑀕𑁆𑀕𑁂𑀦 𑀘𑀼𑀢𑁄’’𑀢𑀺 𑀆𑀓𑀟𑁆𑀠𑀢𑀺. 𑀞𑀧𑀺𑀢𑁂𑀧𑀺 𑀘 𑀓𑀼𑀦𑁆𑀢𑀸𑀤𑀺𑀫𑁆𑀳𑀺 𑀅𑀬𑀁 𑀦𑀬𑁄𑀢𑀺 𑀬𑁄𑀚𑀦𑀸. ‘‘𑀓𑁂𑀲𑀕𑁆𑀕𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑀦𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁯𑁬. 𑀢𑀸𑀮𑀲𑁆𑀲 𑀨𑀮𑀁 𑀘𑀸𑀮𑁂𑀦𑁆𑀢𑀲𑁆𑀲 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑁂𑀦 𑀨𑀮𑁂𑀦 𑀯𑀢𑁆𑀣𑀼 𑀧𑀜𑁆𑀘𑀫𑀸𑀲𑀓𑀁 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀨𑀮𑁂 𑀩𑀦𑁆𑀥𑀦𑀸 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁 𑀪𑀯𑁂𑀢𑀺 𑀬𑁄𑀚𑀦𑀸.

𑁯𑁭. 𑀢𑀸𑀮𑀲𑁆𑀲 ¶ 𑀧𑀺𑀡𑁆𑀟𑀺𑀁 𑀙𑀺𑀦𑁆𑀤𑀢𑀻𑀢𑀺 𑀢𑀸𑀮𑀨𑀮𑀓𑀡𑁆𑀡𑀺𑀓𑀁 𑀙𑀺𑀦𑁆𑀤𑀢𑀺. 𑀬𑀸𑀬 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀲𑀸 𑀙𑀺𑀦𑁆𑀦𑀫𑀢𑁆𑀢𑀸𑀬 ‘‘𑀅𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄 𑀇𑀥𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀢𑀸𑀮𑀧𑀺𑀡𑁆𑀟𑀺 𑀲𑀘𑁂 𑀆𑀓𑀸𑀲𑀕𑀢𑀸 𑀳𑁄𑀢𑀺, 𑀧𑀺𑀡𑁆𑀟𑀺𑀫𑀽𑀮𑀫𑁂𑀯 𑀞𑀸𑀦𑀁. 𑀧𑀡𑁆𑀡𑀤𑀡𑁆𑀟𑁂 𑀯𑀸 𑀧𑀡𑁆𑀡𑁂 𑀯𑀸 𑀅𑀧𑀲𑁆𑀲𑀸𑀬 𑀞𑀺𑀢𑀸 𑀘𑁂, 𑀞𑀺𑀢𑀝𑁆𑀞𑀸𑀦𑁂𑀳𑀺 𑀲𑀳 𑀧𑀺𑀡𑁆𑀟𑀺𑀫𑀽𑀮𑀁 𑀕𑀳𑁂𑀢𑁆𑀯𑀸 𑀞𑀸𑀦𑀪𑁂𑀤𑀁 𑀜𑀢𑁆𑀯𑀸 𑀞𑀸𑀦𑀸𑀘𑀸𑀯𑀦𑁂𑀦 𑀧𑀸𑀭𑀸𑀚𑀺𑀓𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄𑀢𑀺 ‘‘𑀬𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑁂 𑀅𑀲𑁆𑀲 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸’’𑀢𑀺 𑀬𑀣𑀸𑀯𑀼𑀢𑁆𑀢𑁄 𑀏𑀯 𑀦𑀬𑁄. 𑀏𑀢𑁂𑀲𑀼 𑀲𑀩𑁆𑀩𑁂𑀲𑀼 ¶ 𑀞𑀸𑀦𑁂𑀲𑀼 𑀧𑀸𑀭𑀸𑀚𑀺𑀓𑀯𑀻𑀢𑀺𑀓𑁆𑀓𑀫𑀢𑁄 𑀧𑀼𑀩𑁆𑀩𑀪𑀸𑀕𑀸𑀦𑀦𑁆𑀢𑀭𑀧𑁆𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀲𑀳𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀜𑁆𑀘 𑀢𑀢𑁄𑀧𑀺 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀕𑀫𑀦𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀺𑀅𑀯𑀲𑁂𑀲𑀧𑀬𑁄𑀕𑁂𑀲𑀼 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀓𑀢𑁆𑀢𑀸 𑀤𑀼𑀓𑁆𑀓𑀝𑀜𑁆𑀘 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀳𑀸𑀲𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁯𑁮. 𑀉𑀤𑀓𑁂 𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀕𑀫𑁆𑀪𑀻𑀭𑁄𑀤𑀓𑁂 𑀦𑀺𑀥𑀺𑀝𑁆𑀞𑀸𑀦𑀁 𑀧𑀤𑀯𑀸𑀭𑁂𑀦 𑀕𑀘𑁆𑀙𑀢𑁄 𑀧𑀤𑁂 𑀧𑀤𑁂 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀕𑀫𑁆𑀪𑀻𑀭𑁂 𑀧𑀦 𑀢𑀣𑀸𑀢𑀺 ‘‘𑀧𑀤𑀯𑀸𑀭𑁂𑀦 𑀕𑀘𑁆𑀙𑀢𑁄 𑀤𑀼𑀓𑁆𑀓𑀝’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺. 𑀕𑀘𑁆𑀙𑀢𑁄𑀢𑀺 𑀢𑀭𑀢𑁄, 𑀳𑀢𑁆𑀣𑀁 𑀅𑀘𑀸𑀮𑁂𑀢𑁆𑀯𑀸 𑀢𑀭𑀦𑁆𑀢𑀲𑁆𑀲 𑀧𑀤𑀯𑀸𑀭𑀕𑀡𑀦𑀸𑀬, 𑀳𑀢𑁆𑀣𑁂𑀦 𑀘 𑀯𑀸𑀬𑀫𑀦𑁆𑀢𑀲𑁆𑀲 ‘‘𑀧𑀤𑀯𑀸𑀭𑁂𑀦𑀸’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 𑀳𑀢𑁆𑀣𑀯𑀸𑀭𑀕𑀡𑀦𑀸𑀬 𑀧𑀤𑀯𑀸𑀭𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀕𑀫𑁆𑀪𑀻𑀭𑁂 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂𑀳𑀺 𑀯𑀸 𑀧𑀤𑀯𑀸𑀭𑁂𑀳𑀺 𑀯𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁮).

𑀉𑀫𑁆𑀫𑀼𑀚𑁆𑀚𑀦𑀸𑀤𑀺𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀫𑀼𑀚𑁆𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀧𑀺 ‘‘𑀢𑀣𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀳𑀺𑀢𑀓𑀼𑀫𑁆𑀪𑀺𑀬𑀸 𑀕𑀳𑀡𑀢𑁆𑀣𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑁂𑀲𑀼𑀧𑀺 𑀳𑀢𑁆𑀣𑀯𑀸𑀭𑁂𑀦, 𑀧𑀤𑀯𑀸𑀭𑁂𑀦, 𑀳𑀢𑁆𑀣𑀧𑀤𑀯𑀸𑀭𑁂𑀳𑀺 𑀘 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀲𑁂𑀯 𑀦𑀬𑁄 𑀓𑀼𑀫𑁆𑀪𑀺𑀕𑀳𑀡𑀢𑁆𑀣𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑁂𑀲𑀽’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁮).

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 ‘‘𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑁄 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀘𑀦𑀢𑁄 𑀢𑀣𑀸 𑀕𑀘𑁆𑀙𑀦𑁆𑀢𑀲𑁆𑀲 𑀉𑀤𑀓𑀲𑀧𑁆𑀧𑀘𑀡𑁆𑀟𑀫𑀘𑁆𑀙𑀤𑀲𑁆𑀲𑀦𑁂𑀦 𑀪𑀸𑀬𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀲𑁆𑀲 𑀕𑀫𑀦𑀲𑁆𑀲 𑀅𑀢𑀤𑀢𑁆𑀣𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑁂𑀦 ¶ 𑀯𑀺𑀜𑁆𑀜𑀸𑀬𑀢𑀺. 𑀏𑀢𑁆𑀣 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀺𑀲𑀩𑁆𑀩𑀧𑀬𑁄𑀕𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 ¶ 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀳 𑀤𑀼𑀓𑁆𑀓𑀝𑀜𑁆𑀘 𑀅𑀯𑀲𑁂𑀲𑀧𑀬𑁄𑀕𑁂𑀲𑀼 𑀲𑀼𑀤𑁆𑀥𑀤𑀼𑀓𑁆𑀓𑀝𑀜𑁆𑀘 𑀲𑀳𑀧𑀬𑁄𑀕𑁂 𑀪𑀸𑀚𑀦𑀸𑀫𑀲𑀦𑁂 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀜𑁆𑀘 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀜𑁆𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀞𑀸𑀦𑀪𑁂𑀤𑁄 𑀧𑀜𑁆𑀘𑀥𑀸 𑀳𑁄𑀢𑀺, 𑀇𑀥 𑀧𑀻𑀴𑁂𑀢𑁆𑀯𑀸 𑀑𑀲𑀸𑀭𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀥𑁄𑀤𑀺𑀲𑀸𑀬 𑀲𑀳 𑀙𑀩𑁆𑀩𑀺𑀥𑀁 𑀳𑁄𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁯𑁯. 𑀢𑀢𑁆𑀣 𑀚𑀸𑀢𑀓𑀧𑀼𑀧𑁆𑀨𑁂𑀲𑀽𑀢𑀺 𑀢𑀲𑁆𑀫𑀺𑀁 𑀚𑀮𑁂 𑀭𑀼𑀴𑁆𑀳𑁂𑀲𑀼 𑀉𑀧𑁆𑀧𑀮𑀸𑀤𑀺𑀓𑀼𑀲𑀼𑀫𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀬𑁂𑀦 𑀧𑀼𑀧𑁆𑀨𑁂𑀦𑀸𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀁. 𑀙𑀺𑀦𑁆𑀤𑀢𑁄𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀙𑀺𑀦𑁆𑀦𑀯𑀢𑁄’’𑀢𑀺 𑀪𑀽𑀢𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀅𑀕𑁆𑀕𑀳𑀺𑀢𑁂 𑀅𑀦𑁆𑀢𑀺𑀫𑀲𑁆𑀲 𑀧𑀬𑁄𑀕𑀲𑁆𑀲 𑀬𑀸𑀯 𑀅𑀦𑀼𑀧𑀭𑀫𑁄, 𑀣𑀼𑀮𑁆𑀮𑀘𑁆𑀘𑀬𑀸𑀭𑀳𑀢𑁆𑀢𑀸 𑀧𑀸𑀭𑀸𑀚𑀺𑀓𑀯𑀘𑀦𑀲𑁆𑀲 𑀯𑀢𑁆𑀣𑀼𑀯𑀺𑀭𑁄𑀥𑀺𑀢𑀸𑀬 𑀘 𑀇𑀫𑀲𑁆𑀲𑁂𑀯 𑀧𑀘𑁆𑀙𑀺𑀫𑀓𑀼𑀲𑀼𑀫𑀲𑁆𑀲 𑀓𑀦𑁆𑀢𑀦𑀓𑀸𑀮𑁂 𑀧𑀼𑀧𑁆𑀨𑀦𑀸𑀴𑀧𑀲𑁆𑀲𑁂 𑀢𑀘𑀫𑀢𑁆𑀢𑁂𑀧𑀺 𑀅𑀘𑁆𑀙𑀺𑀦𑁆𑀦𑁂 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀦𑀸𑀴…𑀧𑁂… 𑀧𑀭𑀺𑀭𑀓𑁆𑀔𑀢𑀻’’𑀢𑀺 𑀏𑀢𑁆𑀣𑁂𑀯 𑀅𑀦𑀦𑁆𑀢𑀭𑁂 𑀯𑀼𑀘𑁆𑀘𑀫𑀸𑀦𑀦𑀬𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑀸 𑀘 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 𑀮𑀺𑀔𑀺𑀢𑀲𑁆𑀲 ‘‘𑀬𑀲𑁆𑀫𑀺𑀁 𑀧𑀼𑀧𑁆𑀨𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁮) 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑀸 𑀘 𑀯𑀢𑁆𑀢𑀫𑀸𑀦𑀓𑀸𑀮𑀫𑀕𑀳𑁂𑀢𑁆𑀯𑀸 𑀪𑀽𑀢𑀓𑀸𑀮𑀲𑁆𑀲𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀓𑀤𑀸 𑀤𑁂𑀯𑀤𑀢𑁆𑀢 𑀆𑀕𑀢𑁄𑀲𑀻’’𑀢𑀺 𑀧𑀜𑁆𑀳𑀲𑁆𑀲 ‘‘𑀏𑀲𑁄𑀳𑀫𑀸𑀕𑀘𑁆𑀙𑀸𑀫𑀺, 𑀆𑀕𑀘𑁆𑀙𑀦𑁆𑀢𑀁 𑀫𑀸 𑀫𑀁 𑀯𑀺𑀚𑁆𑀛𑀸’’𑀢𑀺 𑀉𑀢𑁆𑀢𑀭𑁂 𑀯𑀺𑀬 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑁂𑀯𑀸𑀢𑀺 𑀪𑀽𑀢𑁂 𑀯𑀢𑁆𑀢𑀫𑀸𑀦𑀩𑁆𑀬𑀧𑀤𑁂𑀲𑀢𑁄 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁦𑁦. ‘‘𑀉𑀧𑁆𑀧𑀮𑀚𑀸𑀢𑀺𑀬𑀸’’𑀢𑀺 𑀇𑀫𑀺𑀦𑀸 ‘‘𑀧𑀤𑀼𑀫𑀚𑀸𑀢𑀺𑀬𑀸’’𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀤𑀼𑀫𑀚𑀸𑀢𑀺𑀓𑀸𑀦𑀁 𑀧𑀦 𑀤𑀡𑁆𑀟𑁂 𑀙𑀺𑀦𑁆𑀦𑁂 𑀅𑀩𑁆𑀪𑀦𑁆𑀢𑀭𑁂 𑀲𑀼𑀢𑁆𑀢𑀁 𑀅𑀘𑁆𑀙𑀺𑀦𑁆𑀦𑀫𑁆𑀧𑀺 𑀭𑀓𑁆𑀔𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁮) 𑀅𑀝𑁆𑀞𑀓𑀣𑀸𑀦𑀬𑁄 𑀲𑀗𑁆𑀕𑀳𑀺𑀢𑁄𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀏𑀓𑀦𑀸𑀴𑀲𑁆𑀲 𑀯𑀸 𑀧𑀲𑁆𑀲𑁂𑀢𑀺 ‘‘𑀦𑀸𑀴𑀲𑁆𑀲 𑀏𑀓𑀧𑀲𑁆𑀲𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄𑀢𑀺 𑀦𑀸𑀴𑀢𑁄.

𑁧𑁦𑁧. 𑀪𑀸𑀭𑀩𑀤𑁆𑀥𑀓𑀼𑀲𑀼𑀫𑁂𑀲𑀼 𑀯𑀺𑀦𑀺𑀘𑁆𑀙𑀬𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁂𑀲𑀽𑀢𑀺 𑀅𑀩𑀤𑁆𑀥𑀓𑀼𑀲𑀼𑀫𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀢𑀢𑁆𑀭𑀚𑀸𑀢𑀓𑀓𑀼𑀲𑀼𑀫𑁂𑀲𑀼 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀸𑀭𑁂𑀦. ‘‘𑀬𑁂𑀦 𑀧𑀼𑀧𑁆𑀨𑁂𑀦 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀙𑀺𑀦𑁆𑀦𑀫𑀢𑁆𑀢𑁂’’𑀢𑀺 𑀅𑀯𑀢𑁆𑀯𑀸 𑀕𑀳𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀬𑁄𑀚𑀦𑀸 𑀘𑁂𑀢𑁆𑀣 𑀯𑀺𑀲𑁂𑀲𑁄.

𑁧𑁦𑁨. 𑀪𑀸𑀭𑀁 𑀓𑀢𑁆𑀯𑀸 𑀩𑀤𑁆𑀥𑀸𑀦𑀺 𑀪𑀸𑀭𑀩𑀤𑁆𑀥𑀸𑀦𑀻𑀢𑀺 𑀫𑀚𑁆𑀛𑀧𑀤𑀮𑁄𑀧𑀻𑀲𑀫𑀸𑀲𑁄. 𑀧𑀼𑀧𑁆𑀨𑀸𑀦𑀻𑀢𑀺 𑀧𑀸𑀤𑀕𑁆𑀖𑀦𑀓𑀸𑀦𑀺 ¶ 𑀉𑀧𑁆𑀧𑀮𑀸𑀤𑀺𑀓𑀼𑀲𑀼𑀫𑀸𑀦𑀺. 𑀙𑀲𑁆𑀯𑀸𑀓𑀸𑀭𑁂𑀲𑀽𑀢𑀺 𑀉𑀤𑀓𑁂 𑀑𑀲𑀻𑀤𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀥𑁄𑀤𑀺𑀲𑀸𑀬 𑀲𑀳 𑀘𑀢𑀲𑁆𑀲𑁄 𑀤𑀺𑀲𑀸, 𑀉𑀤𑁆𑀥𑀦𑁆𑀢𑀺 𑀇𑀫𑀸𑀲𑀼 𑀙𑀲𑀼 𑀤𑀺𑀲𑀸𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀓𑁂𑀦𑀘𑀺 𑀆𑀓𑀸𑀭𑁂𑀦𑀸𑀢𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀤𑀲𑁆𑀲𑀦𑀁. 𑀞𑀸𑀦𑀸𑀘𑀸𑀯𑀦𑀲𑁆𑀲 𑀲𑀸𑀥𑀓𑀢𑀫𑀢𑁆𑀢𑀸 𑀓𑀭𑀡𑁂𑀬𑁂𑀯 𑀓𑀭𑀡𑀯𑀘𑀦𑀁. 𑀦𑀲𑁆𑀲𑀢𑀻𑀢𑀺 𑀧𑀸𑀤𑀕𑁆𑀖𑀦𑀓𑀧𑀼𑀧𑁆𑀨𑀸𑀦𑀁 𑀞𑀸𑀦𑀸𑀘𑀸𑀯𑀦𑁂𑀦 𑀧𑀸𑀭𑀸𑀚𑀺𑀓𑀫𑀸𑀧𑀚𑁆𑀚𑀺𑀢𑁆𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁 𑀅𑀦𑀯𑀲𑁂𑀲𑀕𑀼𑀡𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀦𑀸𑀲𑁂𑀢𑁆𑀯𑀸 𑀲𑀬𑀁 𑀕𑀼𑀡𑀫𑀭𑀡𑁂𑀦 𑀫𑀻𑀬𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁩. 𑀧𑀼𑀧𑁆𑀨𑀸𑀦𑀁 𑀓𑀮𑀸𑀧𑀦𑁆𑀢𑀺 𑀧𑀸𑀤𑀕𑁆𑀖𑀦𑀓𑀉𑀧𑁆𑀧𑀮𑀸𑀤𑀺𑀓𑀼𑀲𑀼𑀫𑀓𑀮𑀸𑀧𑀁. 𑀉𑀤𑀓𑀁 𑀘𑀸𑀮𑁂𑀢𑁆𑀯𑀸𑀢𑀺 𑀬𑀣𑀸 𑀯𑀻𑀘𑀺 𑀉𑀝𑁆𑀞𑀸𑀢𑀺, 𑀢𑀣𑀸 𑀘𑀸𑀮𑁂𑀢𑁆𑀯𑀸. 𑀧𑀼𑀧𑁆𑀨𑀝𑁆𑀞𑀸𑀦𑀸𑀢𑀺 𑀧𑀼𑀧𑁆𑀨𑀸𑀦𑀁 𑀞𑀺𑀢𑀝𑁆𑀞𑀸𑀦𑀸. 𑀘𑀸𑀯𑁂𑀢𑀻𑀢𑀺 𑀓𑀮𑀸𑀧𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀢𑀺. ‘‘𑀧𑀼𑀧𑁆𑀨𑀁 𑀞𑀸𑀦𑀸 𑀘𑀸𑀯𑁂𑀢𑀻’’𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀧𑀼𑀧𑁆𑀨𑀓𑀮𑀸𑀧𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀧𑀼𑀭𑀺𑀫𑁄𑀬𑁂𑀯 𑀕𑀳𑁂𑀢𑀩𑁆𑀩𑁄.

𑁧𑁦𑁪. ‘‘𑀏𑀢𑁆𑀣 𑀕𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀬𑁄𑀚𑀦𑀸. 𑀧𑀭𑀺𑀓𑀧𑁆𑀧𑁂𑀢𑀻𑀢𑀺 ‘‘𑀏𑀢𑁆𑀣 𑀕𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ¶ 𑀢𑀓𑁆𑀓𑁂𑀢𑀺. 𑀭𑀓𑁆𑀔𑀢𑀻𑀢𑀺 𑀞𑀸𑀦𑀸𑀘𑀸𑀯𑀦𑁂𑀧𑀺 𑀲𑀢𑀺 𑀲𑁄 𑀧𑀭𑀺𑀓𑀧𑁆𑀧𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀭𑀓𑁆𑀔𑀢𑀺. 𑀕𑀢𑀝𑁆𑀞𑀸𑀦𑀸𑀢𑀺 𑀧𑀼𑀧𑁆𑀨𑀓𑀮𑀸𑀧𑁂𑀦 𑀕𑀢𑀁 𑀲𑀫𑁆𑀧𑀢𑁆𑀢𑀜𑁆𑀘 𑀢𑀁 𑀞𑀸𑀦𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. ‘‘𑀉𑀤𑁆𑀥𑀭𑀦𑁆𑀢𑁄’’𑀢𑀺 𑀏𑀢𑁂𑀦 ‘‘𑀧𑀼𑀧𑁆𑀨𑀸𑀦𑀁 𑀓𑀮𑀸𑀧’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀓𑀢𑀝𑁆𑀞𑀸𑀦𑀸’’𑀢𑀺𑀧𑀺 𑀧𑀸𑀞𑁄, 𑀓𑀢𑀸 𑀧𑀼𑀧𑁆𑀨𑀸𑀦𑀁 𑀞𑀸𑀦𑀸 𑀉𑀤𑁆𑀥𑀭𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑀓𑀁 𑀘𑀸𑀮𑁂𑀢𑁆𑀯𑀸 𑀯𑀻𑀘𑀺𑀬𑁄 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀻𑀘𑀺𑀧𑁆𑀧𑀳𑀸𑀭𑁂𑀦 𑀉𑀤𑀓𑀧𑀺𑀝𑁆𑀞𑁂𑀦 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀁 𑀧𑀼𑀧𑁆𑀨𑀓𑀮𑀸𑀧𑀁 𑀞𑀺𑀢𑀝𑁆𑀞𑀸𑀦𑀸 𑀉𑀤𑁆𑀥𑀭𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀞𑀸𑀦𑀸’’𑀢𑀺 𑀇𑀤𑀁 ‘‘𑀪𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀪𑀝𑁆𑀞𑁄 𑀦𑀸𑀫 𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀢𑀦𑀸 𑀲𑀫𑀸𑀤𑀸𑀬 𑀭𑀓𑁆𑀔𑀺𑀬𑀫𑀸𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑀗𑁆𑀔𑀸𑀢𑀲𑀩𑁆𑀩𑀕𑀼𑀡𑀭𑀢𑀦𑀗𑁆𑀓𑀼𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀸 𑀧𑀢𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁫. 𑀚𑀮𑀢𑁄 𑀅𑀘𑁆𑀘𑀼𑀕𑁆𑀕𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀧𑀼𑀧𑁆𑀨𑀲𑁆𑀲𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀚𑀮𑀧𑀺𑀝𑁆𑀞𑀺𑀢𑁄 𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀧𑀼𑀧𑁆𑀨𑀲𑁆𑀲 𑀲𑀓𑀮𑀚𑀮𑀁 𑀞𑀸𑀦𑀁, 𑀓𑀤𑁆𑀤𑀫𑀧𑀺𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀉𑀤𑀓𑀧𑀺𑀝𑁆𑀞𑀺𑀧𑀭𑀺𑀬𑀦𑁆𑀢𑀁 𑀧𑀼𑀧𑁆𑀨𑀤𑀡𑁆𑀟𑁂𑀦 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀲𑀩𑁆𑀩𑀫𑀼𑀤𑀓𑀁 𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀧𑀼𑀧𑁆𑀨𑀕𑁆𑀕𑀁 𑀆𑀓𑀟𑁆𑀠𑀺𑀢𑁆𑀯𑀸 𑀉𑀧𑁆𑀧𑀻𑀴𑁂𑀢𑁆𑀯𑀸. 𑀢𑀢𑁄𑀢𑀺 𑀢𑀲𑁆𑀫𑀸 𑀧𑀼𑀧𑁆𑀨𑀝𑁆𑀞𑀸𑀦𑀪𑀽𑀢𑀲𑀓𑀮𑀚𑀮𑀭𑀸𑀲𑀺𑀢𑁄. 𑀉𑀚𑀼𑀦𑁆𑀢𑀺 𑀉𑀚𑀼𑀁 𑀓𑀢𑁆𑀯𑀸. 𑀉𑀤𑁆𑀥𑀭𑀢𑁄𑀢𑀺 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲.

𑁧𑁦𑁬. 𑀦𑀸𑀴𑀦𑁆𑀢𑁂𑀢𑀺 𑀉𑀧𑁆𑀧𑀸𑀝𑀺𑀢𑀧𑀼𑀧𑁆𑀨𑀦𑀸𑀴𑀲𑁆𑀲 𑀫𑀽𑀮𑀓𑁄𑀝𑀺𑀬𑀸. 𑀚𑀮𑀢𑁄𑀢𑀺 𑀉𑀤𑀓𑀧𑀺𑀝𑁆𑀞𑀺𑀢𑁄. 𑀫𑀼𑀢𑁆𑀢𑀫𑀢𑁆𑀢𑁂 ¶ 𑀓𑁂𑀲𑀕𑁆𑀕𑀫𑀢𑁆𑀢𑀁 𑀤𑀽𑀭𑀁 𑀓𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. ‘‘𑀚𑀮𑀢𑁄’’𑀢𑀺 𑀧𑀞𑀫𑀢𑀢𑀺𑀬𑀧𑀸𑀤𑁂𑀲𑀼 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀘𑀦𑀁 𑀅𑀢𑁆𑀣𑀸𑀯𑀺𑀲𑁂𑀲𑁂𑀧𑀺 𑀧𑀤𑀸𑀯𑀼𑀢𑁆𑀢𑀺𑀅𑀮𑀗𑁆𑀓𑀸𑀭𑁂 𑀅𑀟𑁆𑀠𑀬𑀫𑀓𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀼𑀢𑁆𑀢𑀫𑀢𑁆𑀢𑁂, 𑀅𑀫𑀼𑀢𑁆𑀢𑁂’’𑀢𑀺 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀅𑀢𑁆𑀣𑀸𑀦𑀁 𑀯𑀸 𑀯𑀺𑀲𑁂𑀲𑀢𑁄 𑀉𑀪𑀬𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀦𑀸𑀴𑀦𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁦𑁭. 𑀢𑀲𑁆𑀲 ¶ 𑀦𑀸𑀫𑁂𑀢𑁆𑀯𑀸 𑀉𑀧𑁆𑀧𑀸𑀝𑀺𑀢𑀲𑁆𑀲. 𑀲𑀳 𑀕𑀘𑁆𑀙𑁂𑀦 𑀉𑀧𑁆𑀧𑀸𑀝𑀺𑀢𑀲𑁆𑀲𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀇𑀥 𑀧𑀦 𑀲𑀩𑁆𑀩𑀧𑀼𑀧𑁆𑀨𑀧𑀡𑁆𑀡𑀦𑀸𑀴𑀸𑀦𑀺 𑀫𑀽𑀮𑀢𑁄 𑀧𑀪𑀼𑀢𑀺 𑀧𑀞𑀫𑀁 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑀸𑀫𑀦𑀯𑀲𑁂𑀦 𑀞𑀸𑀦𑀸𑀘𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀧𑀼𑀧𑁆𑀨𑀸𑀤𑀻𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀸𑀧𑀢𑁆𑀢𑀺𑀬𑀸 𑀞𑀸𑀦𑁂 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁦𑁮-𑁯. 𑀩𑀴𑀺𑀲𑀸𑀤𑀺𑀫𑀘𑁆𑀙𑀕𑁆𑀕𑀳𑀡𑁄𑀧𑀓𑀭𑀡𑀸𑀦𑀁 𑀯𑀘𑀦𑀢𑁄, 𑀚𑀮𑁂 𑀞𑀺𑀢𑀫𑀢𑀫𑀘𑁆𑀙𑀸𑀦𑀁 𑀯𑀺𑀦𑀺𑀘𑁆𑀙𑀬𑀲𑁆𑀲 𑀘 𑀯𑀓𑁆𑀔𑀫𑀸𑀦𑀢𑁆𑀢𑀸 𑀫𑀘𑁆𑀙𑁂𑀢𑀺 𑀚𑀻𑀯𑀫𑀸𑀦𑀓𑀫𑀘𑁆𑀙𑀸𑀦𑀁 𑀕𑀳𑀡𑀁. 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀸 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀯𑀸 𑀔𑀺𑀧𑀓𑀸𑀤𑀻𑀦𑀺 𑀫𑀘𑁆𑀙𑀯𑀥𑁄𑀧𑀓𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀽𑀢𑀺 𑀧𑀸𑀤𑁄. 𑀢𑀲𑁆𑀫𑀺𑀁 𑀫𑀘𑁆𑀙𑁂. 𑀉𑀤𑁆𑀥𑀝𑁄𑀬𑁂𑀯 𑀉𑀤𑁆𑀥𑀝𑀫𑀢𑁆𑀢𑁄, 𑀫𑀘𑁆𑀙𑁄, 𑀢𑀲𑁆𑀫𑀺𑀁. 𑀚𑀮𑀸𑀢𑀺 𑀉𑀤𑀓𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀧𑀦𑁂𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁧𑁦. 𑀧𑀼𑀧𑁆𑀨𑀸𑀦𑀁 𑀯𑀺𑀬 𑀫𑀘𑁆𑀙𑀸𑀦𑀫𑁆𑀧𑀺 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀓𑀮𑀚𑀮𑀁 𑀞𑀸𑀦𑀁 𑀓𑀢𑁆𑀯𑀸 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀞𑀸𑀦𑀁 𑀲𑀮𑀺𑀮𑀚𑀸𑀦𑀁 𑀳𑀻’’𑀢𑀺𑀆𑀤𑀺. 𑀲𑀮𑀺𑀮𑁂 𑀚𑀸𑀢𑀸 𑀲𑀮𑀺𑀮𑀚𑀸, 𑀇𑀢𑀺 𑀧𑀓𑀭𑀡𑀢𑁄 𑀫𑀘𑁆𑀙𑀸𑀬𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀣𑀧𑁆𑀧𑀓𑀭𑀡𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀸𑀤𑀻𑀳𑀺 𑀲𑀤𑁆𑀤𑀸 𑀯𑀺𑀲𑁂𑀲𑀢𑁆𑀣𑀁 𑀯𑀤𑀦𑁆𑀢𑀻𑀢𑀺. 𑀳𑀻𑀢𑀺 𑀧𑀲𑀺𑀤𑁆𑀥𑀺𑀬𑀁. 𑀓𑁂𑀯𑀮𑀦𑁆𑀢𑀺 𑀅𑀯𑀥𑀸𑀭𑀡𑁂, 𑀚𑀮𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀩𑀳𑀺𑀉𑀤𑀓𑀁 𑀦𑀺𑀯𑀢𑁆𑀢𑀺𑀢𑀁 𑀳𑁄𑀢𑀺. 𑀲𑀓𑀮𑀁 𑀚𑀮𑀫𑁂𑀯 𑀞𑀸𑀦𑀁 𑀬𑀲𑁆𑀫𑀸, 𑀢𑀲𑁆𑀫𑀸 𑀲𑀮𑀺𑀮𑀝𑁆𑀞𑀁 𑀚𑀮𑀸 𑀯𑀺𑀫𑁄𑀘𑁂𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀳𑁂𑀢𑀼𑀳𑁂𑀢𑀼𑀫𑀦𑁆𑀢𑀪𑀸𑀯𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀧𑀦𑁆𑀦𑀁 𑀧𑀭𑀸𑀚𑁂𑀢𑀻𑀢𑀺 𑀧𑀸𑀭𑀸𑀚𑀺𑀓𑀸, 𑀆𑀧𑀢𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀭𑀸𑀚𑀺𑀓𑁄, 𑀧𑀼𑀕𑁆𑀕𑀮𑁄.

𑁧𑁧𑁧. 𑀦𑀻𑀭𑀁 𑀉𑀤𑀓𑀁. 𑀯𑀸𑀭𑀺𑀫𑁆𑀳𑀺 𑀚𑀮𑁂 𑀚𑀸𑀢𑁄 𑀯𑀸𑀭𑀺𑀚𑁄, 𑀇𑀢𑀺 𑀧𑀓𑀭𑀡𑀢𑁄 𑀫𑀘𑁆𑀙𑁄𑀯 𑀕𑀬𑁆𑀳𑀢𑀺. 𑀏𑀢𑁂𑀦𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀫𑀘𑁆𑀙𑁄 ¶ , 𑀕𑁄𑀘𑀭𑀢𑁆𑀣𑀸𑀬 𑀘 𑀣𑀮𑀫𑀼𑀕𑁆𑀕𑀢𑀓𑀼𑀫𑁆𑀫𑀸𑀤𑀬𑁄 𑀉𑀧𑀮𑀓𑁆𑀔𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀁 𑀕𑀳𑀡𑁂 𑀯𑀺𑀦𑀺𑀘𑁆𑀙𑀬𑁄 𑀆𑀓𑀸𑀲𑀝𑁆𑀞𑀣𑀮𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀪𑀡𑁆𑀟𑀕𑁆𑀖𑁂𑀦 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀤𑀼𑀓𑁆𑀓𑀝𑀸𑀤𑀺𑀯𑀢𑁆𑀣𑀼𑀦𑁄 ¶ 𑀪𑀡𑁆𑀟𑀲𑁆𑀲 𑀅𑀕𑁆𑀖𑀯𑀲𑁂𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁧𑁨. 𑀢𑀴𑀸𑀓𑁂𑀢𑀺 𑀲𑀭𑀲𑁆𑀫𑀺𑀁, 𑀇𑀫𑀺𑀦𑀸 𑀘 𑀯𑀸𑀧𑀺𑀧𑁄𑀓𑁆𑀔𑀭𑀡𑀺𑀲𑁄𑀩𑁆𑀪𑀸𑀤𑀺𑀚𑀮𑀸𑀲𑀬𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀦𑀤𑀺𑀬𑀸𑀢𑀺 𑀦𑀺𑀦𑁆𑀦𑀕𑀸𑀬, 𑀇𑀫𑀺𑀦𑀸 𑀘 𑀓𑀦𑁆𑀤𑀭𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀦𑀺𑀦𑁆𑀦𑁂𑀢𑀺 𑀆𑀯𑀸𑀝𑁂. 𑀫𑀘𑁆𑀙𑀯𑀺𑀲𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀦𑀸𑀫-𑀲𑀤𑁆𑀤𑁄 𑀲𑀜𑁆𑀜𑀸𑀬𑀁. 𑀫𑀘𑁆𑀙𑀯𑀺𑀲𑀦𑀸𑀫𑀓𑀁 𑀫𑀤𑀦𑀨𑀮𑀸𑀤𑀺𑀓𑀁 𑀤𑀝𑁆𑀞𑀩𑁆𑀩𑀁. 𑀕𑀢𑁂𑀢𑀺 𑀯𑀺𑀲𑀧𑀓𑁆𑀔𑀺𑀧𑀓𑁂 𑀫𑀘𑁆𑀙𑀖𑀸𑀢𑀓𑁂 𑀕𑀢𑁂.

𑁧𑁧𑁪. 𑀲𑀸𑀫𑀺𑀓𑁂𑀲𑀽𑀢𑀺 𑀯𑀺𑀲𑀁 𑀬𑁄𑀚𑁂𑀢𑁆𑀯𑀸 𑀕𑀢𑁂𑀲𑀼 𑀫𑀘𑁆𑀙𑀲𑀸𑀫𑀺𑀓𑁂𑀲𑀼. 𑀆𑀳𑀭𑀦𑁆𑀢𑁂𑀲𑀽𑀢𑀺 𑀆𑀳𑀭𑀸𑀧𑁂𑀦𑁆𑀢𑁂𑀲𑀼. 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀪𑀡𑁆𑀟𑀜𑁆𑀘 𑀢𑀁 𑀤𑁂𑀬𑁆𑀬𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀅𑀢𑁆𑀢𑀦𑀸 𑀕𑀳𑀺𑀢𑀯𑀢𑁆𑀣𑀼𑀁 𑀯𑀸 𑀢𑀤𑀕𑁆𑀖𑀦𑀓𑀁 𑀯𑀸 𑀪𑀡𑁆𑀟𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁫. 𑀫𑀘𑁆𑀙𑁂𑀢𑀺 𑀫𑀢𑀫𑀘𑁆𑀙𑁂. 𑀲𑁂𑀲𑁂𑀢𑀺 𑀦𑀫𑀢𑀫𑀘𑁆𑀙𑁂.

𑁧𑁧𑁬. 𑀅𑀫𑀢𑁂𑀲𑀼 𑀕𑀳𑀺𑀢𑁂𑀲𑀽𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀦𑀸𑀧𑀢𑁆𑀢𑀺𑀁 𑀯𑀤𑀦𑁆𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀁 𑀯𑀤𑀦𑁆𑀢𑀺, 𑀫𑀸𑀭𑀡𑀧𑁆𑀧𑀢𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑁂𑀯. 𑀅𑀬𑀜𑁆𑀘 𑀯𑀺𑀦𑀺𑀘𑁆𑀙𑀬𑁄 𑀅𑀭𑀓𑁆𑀔𑀺𑀢𑀅𑀕𑁄𑀧𑀺𑀢𑁂𑀲𑀼 𑀅𑀲𑁆𑀲𑀸𑀫𑀺𑀓𑀢𑀴𑀸𑀓𑀸𑀤𑀻𑀲𑀼 𑀯𑁂𑀤𑀺𑀢𑀩𑁆𑀩𑁄.

𑀉𑀤𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁧𑁭. 𑀦𑀸𑀯𑀦𑁆𑀢𑀺 𑀏𑀢𑁆𑀣 ‘‘𑀦𑀸𑀯𑀸 𑀦𑀸𑀫 𑀬𑀸𑀬 𑀢𑀭𑀢𑀻’’𑀢𑀺 (𑀧𑀸𑀭𑀸. 𑁯𑁯) 𑀯𑀘𑀦𑀢𑁄 𑀚𑀮𑀢𑀸𑀭𑀡𑀸𑀭𑀳𑀁 𑀅𑀦𑁆𑀢𑀫𑀲𑁄 𑀏𑀓𑀫𑁆𑀧𑀺 𑀯𑀳𑀦𑁆𑀢𑀁 𑀭𑀚𑀦𑀤𑁄𑀡𑀺𑀯𑁂𑀡𑀼𑀓𑀮𑀸𑀧𑀸𑀤𑀺𑀓𑀁 ¶ 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀯𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀬𑀁 𑀓𑀺𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀸. ‘‘𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 ‘‘𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀧𑀸𑀤𑀼𑀤𑁆𑀥𑀸𑀭𑁂𑀢𑀺 𑀤𑀼𑀢𑀺𑀬𑀧𑀭𑀺𑀬𑁂𑀲𑀦𑀸𑀤𑀺𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑁂 𑀧𑀤𑁂. 𑀤𑁄𑀲𑀸𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄. 𑀯𑀼𑀢𑁆𑀢𑀸𑀢𑀺 ‘‘𑀦𑀸𑀯𑀝𑁆𑀞𑀁 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀻’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁯𑁯) 𑀧𑀤𑀪𑀸𑀚𑀦𑀺𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀇𑀫𑀺𑀦𑀸 𑀧𑀼𑀩𑁆𑀩𑀧𑀬𑁄𑀕𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀸𑀦𑀺, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀜𑁆𑀘 𑀉𑀧𑀮𑀓𑁆𑀔𑀡𑀯𑀲𑁂𑀦 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁮. 𑀘𑀡𑁆𑀟𑀲𑁄𑀢𑁂𑀢𑀺 ¶ 𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑁂 𑀉𑀤𑀓𑀧𑁆𑀧𑀯𑀸𑀳𑁂, ‘‘𑀘𑀡𑁆𑀟𑀲𑁄𑀢𑁂’’𑀢𑀺 𑀇𑀫𑀺𑀦𑀸 𑀩𑀦𑁆𑀥𑀦𑀁 𑀯𑀺𑀦𑀸 𑀲𑀪𑀸𑀯𑁂𑀦 𑀅𑀝𑁆𑀞𑀺𑀢𑀪𑀸𑀯𑀲𑁆𑀲 𑀲𑀽𑀘𑀦𑀢𑁄 ‘‘𑀩𑀦𑁆𑀥𑀦𑀫𑁂𑀯 𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀸, 𑀢𑀲𑁆𑀫𑀸 𑀩𑀦𑁆𑀥𑀦𑀫𑁂𑀓𑀫𑁂𑀯 𑀞𑀸𑀦𑀁 𑀫𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀩𑀦𑁆𑀥𑀦𑁂. 𑀥𑀻𑀭𑀸 𑀯𑀺𑀦𑀬𑀥𑀭𑀸.

𑁧𑁧𑁯-𑁧𑁨𑁦. ‘‘𑀦𑀺𑀘𑁆𑀘𑀮𑁂 𑀉𑀤𑀓𑁂 𑀦𑀸𑀯-𑀫𑀩𑀦𑁆𑀥𑀦𑀫𑀯𑀝𑁆𑀞𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀙𑀥𑀸 𑀞𑀸𑀦𑀧𑀭𑀺𑀘𑁆𑀙𑁂𑀤𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀦𑀸𑀯𑀁 𑀓𑀟𑁆𑀠𑀢𑁄 𑀢𑀲𑁆𑀲 𑀧𑀸𑀭𑀸𑀚𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦𑀧𑀺 𑀓𑀺𑀁 𑀓𑀭𑁄𑀦𑁆𑀢𑁄𑀢𑀺 𑀆𑀳 ‘‘𑀏𑀓𑁂𑀦𑀦𑁆𑀢𑁂𑀦 𑀲𑀫𑁆𑀨𑀼𑀝𑁆𑀞’’𑀦𑁆𑀢𑀺𑀆𑀤𑀺. 𑀢𑀁 𑀦𑀸𑀯𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀧𑀺 ‘‘𑀓𑀟𑁆𑀠𑀺𑀢𑀯𑀢𑁄 𑀅𑀢𑀺𑀓𑁆𑀓𑀫𑀺𑀢𑀯𑀢𑁄’’𑀢𑀺 𑀪𑀽𑀢𑀯𑀲𑁂𑀦 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁨𑁧. 𑀏𑀯𑀁 𑀘𑀢𑀼𑀧𑀲𑁆𑀲𑀸𑀓𑀟𑁆𑀠𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀤𑁆𑀥𑀁, 𑀅𑀥𑁄 𑀘 𑀉𑀓𑁆𑀔𑀺𑀧𑀦𑀑𑀲𑀻𑀤𑀸𑀧𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀣𑀸’’𑀢𑀺𑀆𑀤𑀺. 𑀢𑀣𑀸𑀢𑀺 ‘‘𑀢𑀲𑁆𑀲 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀆𑀓𑀟𑁆𑀠𑀢𑀺. 𑀓𑀲𑁆𑀫𑀺𑀁 ¶ 𑀓𑀸𑀮𑁂𑀢𑀺 𑀆𑀳 ‘‘𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀻’’𑀢𑀺𑀆𑀤𑀺. 𑀅𑀥𑁄𑀦𑀸𑀯𑀸𑀢𑀮𑀦𑁆𑀢𑀺 𑀦𑀸𑀯𑀸𑀢𑀮𑀲𑁆𑀲 𑀅𑀥𑁄 𑀅𑀥𑁄𑀦𑀸𑀯𑀸𑀢𑀮𑀁, 𑀢𑀲𑁆𑀫𑀺𑀁 𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀤𑀓𑀫𑁆𑀳𑀸 𑀯𑀺𑀫𑁄𑀘𑀺𑀢𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀨𑀼𑀝𑁆𑀞𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀔𑀯𑀝𑁆𑀝𑀺𑀬𑀸 𑀯𑀺𑀫𑁄𑀘𑀺𑀢𑁂𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀅𑀥𑁄𑀦𑀸𑀯𑀸𑀢𑀮𑁂𑀦 𑀨𑀼𑀝𑁆𑀞𑁂 𑀉𑀤𑀓𑁂 𑀫𑀼𑀔𑀯𑀝𑁆𑀝𑀺𑀬𑀸 𑀓𑀭𑀡𑀪𑀽𑀢𑀸𑀬 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀺𑀫𑁄𑀘𑀺𑀢𑁂𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁨𑁨. 𑀢𑀻𑀭𑁂 𑀩𑀦𑁆𑀥𑀺𑀢𑁆𑀯𑀸 𑀧𑀦 𑀦𑀺𑀘𑁆𑀘𑀮𑁂 𑀚𑀮𑁂 𑀞𑀧𑀺𑀢𑀸 𑀬𑀸 𑀦𑀸𑀯𑀸, 𑀢𑀲𑁆𑀲𑀸 𑀦𑀸𑀯𑀸𑀬 𑀞𑀸𑀦𑀁 𑀩𑀦𑁆𑀥𑀦𑀜𑁆𑀘 𑀞𑀺𑀢𑁄𑀓𑀸𑀲𑁄 𑀘𑀸𑀢𑀺 𑀤𑁆𑀯𑀺𑀥𑀸 𑀫𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁨𑁩. 𑀧𑀼𑀩𑁆𑀩𑀁 𑀧𑀞𑀫𑀁 𑀩𑀦𑁆𑀥𑀦𑀲𑁆𑀲 𑀯𑀺𑀫𑁄𑀘𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑁂𑀦𑀘𑀼𑀧𑀸𑀬𑁂𑀦𑀸𑀢𑀺 ‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀻’’𑀢𑀺𑀆𑀤𑀺𑀓𑁆𑀓𑀫𑁂𑀦 𑀬𑀣𑀸𑀯𑀼𑀢𑁆𑀢𑁄𑀧𑀸𑀬𑀙𑀓𑁆𑀓𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀞𑀸𑀦𑀸 𑀘𑀸𑀯𑁂𑀢𑀺 𑀦𑀸𑀯𑀁.

𑁧𑁨𑁪. 𑀧𑀞𑀫𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸𑀢𑀺 ‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀲𑀼 𑀙𑀲𑀼 𑀆𑀓𑀸𑀭𑁂𑀲𑀼 𑀅𑀜𑁆𑀜𑀢𑀭𑁂𑀦 𑀆𑀓𑀸𑀭𑁂𑀦 𑀦𑀸𑀯𑀁 𑀞𑀧𑀺𑀢𑀝𑁆𑀞𑀸𑀦𑀢𑁄 𑀧𑀞𑀫𑀁 𑀘𑀸𑀯𑁂𑀢𑁆𑀯𑀸. 𑀏𑀲𑁂𑀯 𑀘 𑀦𑀬𑁄𑀢𑀺 𑀦𑀸𑀯𑀸𑀬 ¶ 𑀧𑀞𑀫𑀁 𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀘𑁆𑀙𑀸 𑀩𑀦𑁆𑀥𑀦𑀫𑁄𑀘𑀦𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀲𑁂𑀯 𑀦𑀬𑁄 𑀦𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀢𑀻𑀭𑁂 𑀩𑀦𑁆𑀥𑀺𑀢𑁆𑀯𑀸 𑀦𑀺𑀘𑁆𑀘𑀮𑁂 𑀉𑀤𑀓𑁂 𑀞𑀧𑀺𑀢𑀦𑀸𑀯𑀸𑀬 𑀩𑀦𑁆𑀥𑀦𑀜𑁆𑀘 𑀞𑀺𑀢𑁄𑀓𑀸𑀲𑁄 𑀘𑀸𑀢𑀺 𑀤𑁆𑀯𑁂 𑀞𑀸𑀦𑀸𑀦𑀺, 𑀢𑀁 𑀧𑀞𑀫𑀁 𑀩𑀦𑁆𑀥𑀦𑀸 𑀫𑁄𑀘𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀙𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀧𑀘𑁆𑀙𑀸 𑀩𑀦𑁆𑀥𑀦𑀫𑁄𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 (𑀧𑀸𑀭𑀸. 𑁯𑁯) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀲𑀗𑁆𑀕𑀳𑀺𑀢𑁄. 𑀆𑀫𑀲𑀦𑀨𑀦𑁆𑀤𑀸𑀧𑀦𑁂𑀲𑀼 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀳𑁂𑀝𑁆𑀞𑀸 𑀓𑀼𑀫𑁆𑀪𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀼𑀧𑀭𑀺𑀧𑀺.

𑁧𑁨𑁫. 𑀉𑀲𑁆𑀲𑀸𑀭𑁂𑀢𑁆𑀯𑀸𑀢𑀺 ¶ 𑀉𑀤𑀓𑀢𑁄 𑀣𑀮𑀁 𑀆𑀭𑁄𑀧𑁂𑀢𑁆𑀯𑀸. 𑀦𑀺𑀓𑀼𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸. 𑀣𑀮𑁂 𑀞𑀧𑀺𑀢𑀸𑀬 𑀦𑀸𑀯𑀸𑀬 𑀫𑀼𑀔𑀯𑀝𑁆𑀝𑀺𑀬𑀸 𑀨𑀼𑀝𑁆𑀞𑁄𑀓𑀸𑀲𑁄 𑀏𑀯 𑀞𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀯𑀺𑀲𑁂𑀲𑁄, 𑀢𑁂𑀦 𑀚𑀮𑀝𑁆𑀞𑀢𑁄 𑀣𑀮𑀝𑁆𑀞𑀸𑀬 𑀦𑀸𑀯𑀸𑀬 𑀯𑀼𑀢𑁆𑀢𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺.

𑁧𑁨𑁬. 𑀏𑀢𑁆𑀣 𑀅𑀥𑁄 𑀑𑀲𑀻𑀤𑀸𑀧𑀦𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑀸𑀬 𑀢𑀁 𑀯𑀺𑀦𑀸 𑀇𑀢𑀭𑁂𑀲𑀁 𑀧𑀜𑁆𑀘𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀞𑀸𑀦𑀸𑀘𑀸𑀯𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀜𑁂𑀬𑁆𑀬𑁄’’𑀢𑀺𑀆𑀤𑀺. 𑀬𑀢𑁄 𑀓𑀼𑀢𑁄𑀘𑀻𑀢𑀺 𑀢𑀺𑀭𑀺𑀬𑀁 𑀘𑀢𑀲𑁆𑀲𑀦𑁆𑀦𑀁, 𑀉𑀧𑀭𑀺𑀤𑀺𑀲𑀸𑀬 𑀘 𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀤𑀺𑀲𑀸𑀪𑀺𑀫𑀼𑀔𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑁂𑀦𑁆𑀢𑁄.

𑁧𑁨𑁭. 𑀉𑀓𑁆𑀓𑀼𑀚𑁆𑀚𑀺𑀢𑀸𑀬𑀧𑀻𑀢𑀺 𑀉𑀤𑁆𑀥𑀁𑀫𑀼𑀔𑀁 𑀞𑀧𑀺𑀢𑀸𑀬𑀧𑀺. 𑀖𑀝𑀺𑀓𑀸𑀦𑀦𑁆𑀢𑀺 𑀤𑀸𑀭𑀼𑀔𑀡𑁆𑀟𑀸𑀦𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀜𑁂𑀬𑁆𑀬𑁄 𑀞𑀸𑀦𑀧𑀭𑀺𑀘𑁆𑀙𑁂𑀤𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀁 𑀅𑀢𑀺𑀤𑀺𑀲𑀢𑀺. 𑀲𑁄 𑀧𑀦 𑀉𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀦𑀸𑀯𑀸𑀬 𑀬𑀼𑀚𑁆𑀚𑀢𑀺. 𑀖𑀝𑀺𑀓𑀸𑀦𑀁 𑀉𑀧𑀭𑀺 𑀞𑀧𑀺𑀢𑀸𑀬 𑀧𑀦 𑀦𑀸𑀕𑀤𑀦𑁆𑀢𑁂𑀲𑀼 𑀞𑀧𑀺𑀢𑀓𑀼𑀦𑁆𑀢𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀬𑀼𑀚𑁆𑀚𑀢𑀺.

𑁧𑁨𑁮. ‘‘𑀣𑁂𑀬𑁆𑀬𑀸’’𑀢𑀺 𑀇𑀤𑀁 ‘‘𑀧𑀸𑀚𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀁. 𑀢𑀺𑀢𑁆𑀣𑁂𑀢𑀺 𑀢𑀺𑀢𑁆𑀣𑀸𑀲𑀦𑁆𑀦𑀚𑀮𑁂. 𑀅𑀭𑀺𑀢𑁆𑀢𑁂𑀦𑀸𑀢𑀺 𑀓𑁂𑀦𑀺𑀧𑀸𑀢𑁂𑀦. 𑀨𑀺𑀬𑁂𑀦𑀸𑀢𑀺 𑀧𑀸𑀚𑀦𑀨𑀮𑀓𑁂𑀦. 𑀧𑀸𑀚𑁂𑀦𑁆𑀢𑀲𑁆𑀲𑀸𑀢𑀺 𑀧𑁂𑀲𑁂𑀦𑁆𑀢𑀲𑁆𑀲. ‘‘𑀢𑀁 𑀧𑀸𑀚𑁂𑀢𑀻’’𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀁 𑀦𑀸𑀯𑀁 𑀬𑁄 𑀧𑀸𑀚𑁂𑀢𑀺, 𑀢𑀲𑁆𑀲 𑀧𑀭𑀸𑀚𑀬𑁄𑀢𑀺 𑀅𑀢𑁆𑀣𑁄.

𑁧𑁨𑁯-𑁩𑁦. 𑀙𑀢𑁆𑀢𑀦𑁆𑀢𑀺 𑀆𑀢𑀧𑀯𑀸𑀭𑀡𑀁. 𑀧𑀡𑀸𑀫𑁂𑀢𑁆𑀯𑀸𑀢𑀺 𑀬𑀣𑀸 𑀯𑀸𑀢𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀧𑀡𑀸𑀫𑁂𑀢𑁆𑀯𑀸. 𑀉𑀲𑁆𑀲𑀸𑀧𑁂𑀢𑁆𑀯𑀸𑀯 𑀘𑀻𑀯𑀭𑀦𑁆𑀢𑀺 𑀘𑀻𑀯𑀭𑀁 𑀉𑀤𑁆𑀥𑀁 𑀉𑀘𑁆𑀘𑀸𑀭𑁂𑀢𑁆𑀯𑀸 𑀯𑀸. 𑀕𑀸𑀣𑀸𑀙𑀦𑁆𑀤𑀯𑀲𑁂𑀦 ‘𑀯’𑀇𑀢𑀺 𑀭𑀲𑁆𑀲𑀢𑁆𑀢𑀁. 𑀮𑀗𑁆𑀓𑀸𑀭𑀲𑀤𑀺𑀲𑀦𑁆𑀢𑀺 𑀧𑀲𑀸𑀭𑀺𑀢𑀧𑀝𑀲𑀭𑀺𑀓𑁆𑀔𑀓𑀁. 𑀲𑀫𑀻𑀭𑀡𑀦𑁆𑀢𑀺 𑀫𑀸𑀮𑀼𑀢𑀁. 𑀦 𑀤𑁄𑀲𑁄 𑀢𑀲𑁆𑀲 𑀯𑀺𑀚𑁆𑀚𑀢𑀻𑀢𑀺 𑀇𑀤𑀁 𑀯𑀸𑀢𑀲𑁆𑀲 ¶ ¶ 𑀅𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀏𑀯𑀁 𑀓𑀭𑁄𑀢𑁄 𑀧𑀘𑁆𑀙𑀸 𑀆𑀕𑀢𑁂𑀦 𑀯𑀸𑀢𑁂𑀦 𑀦𑀻𑀢𑀦𑀸𑀯𑀸𑀬 𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀸𑀬𑀫𑀸𑀦𑁂 𑀧𑀦 𑀯𑀸𑀢𑁂 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁧-𑁨. 𑀲𑀬𑀫𑁂𑀯 𑀉𑀧𑀸𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀫𑀲𑀫𑀻𑀧𑁂 𑀢𑀺𑀢𑁆𑀣𑀁 𑀕𑀸𑀫𑀢𑀺𑀢𑁆𑀣𑀁. 𑀢𑀦𑁆𑀢𑀺 𑀦𑀸𑀯𑀁. 𑀞𑀸𑀦𑀸𑀢𑀺 𑀙𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀕𑀳𑀺𑀢𑀯𑀸𑀢𑁂𑀦 𑀕𑀦𑁆𑀢𑁆𑀯𑀸 𑀕𑀸𑀫𑀢𑀺𑀢𑁆𑀣𑁂 𑀞𑀺𑀢𑀝𑁆𑀞𑀸𑀦𑀸. 𑀅𑀘𑀸𑀮𑁂𑀦𑁆𑀢𑁄𑀢𑀺 𑀨𑀦𑁆𑀤𑀸𑀧𑀦𑀫𑁆𑀧𑀺 𑀅𑀓𑀭𑁄𑀦𑁆𑀢𑁄, 𑀇𑀫𑀺𑀦𑀸 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀅𑀘𑀸𑀯𑁂𑀦𑁆𑀢𑁄’’𑀢𑀺𑀧𑀺 𑀧𑀸𑀞𑁄, 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀦𑀧𑀦𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀧𑀸𑀭𑀸𑀚𑀺𑀓𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀺𑀡𑀺𑀢𑁆𑀯𑀸𑀢𑀺 𑀫𑀽𑀮𑁂𑀦 𑀯𑀺𑀓𑁆𑀓𑀺𑀡𑀺𑀢𑁆𑀯𑀸. 𑀲𑀬𑀫𑁂𑀯 𑀘 𑀕𑀘𑁆𑀙𑀦𑁆𑀢𑀺𑀦𑁆𑀢𑀺 𑀏𑀢𑁆𑀣 𑀘-𑀓𑀸𑀭𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂. 𑀢𑀣𑀸 𑀧𑀡𑀸𑀫𑀺𑀢𑀙𑀢𑁆𑀢𑁂𑀦 𑀯𑀸 𑀉𑀲𑁆𑀲𑀸𑀧𑀺𑀢𑀘𑀻𑀯𑀭𑁂𑀦 𑀯𑀸 𑀕𑀳𑀺𑀢𑀯𑀸𑀢𑁂𑀦 𑀅𑀢𑁆𑀢𑀦𑀸 𑀕𑀘𑁆𑀙𑀦𑁆𑀢𑀺𑀁. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀧𑀸𑀚𑀦𑀯𑀲𑁂𑀦 𑀕𑀫𑀦𑀝𑁆𑀞𑀸𑀦𑀸 𑀘𑀸𑀯𑁂𑀢𑀺.

𑀦𑀸𑀯𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁩𑁩-𑁪. 𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑀸𑀦𑀁. 𑀭𑀫𑀬𑀢𑀻𑀢𑀺 𑀭𑀣𑁄. 𑀯𑀳𑀢𑀺, 𑀯𑀼𑀬𑁆𑀳𑀢𑀺, 𑀯𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀬𑁆𑀳𑀁. ‘‘𑀉𑀧𑀭𑀺 𑀫𑀡𑁆𑀟𑀧𑀲𑀤𑀺𑀲𑀁 𑀧𑀤𑀭𑀘𑁆𑀙𑀦𑁆𑀦𑀁, 𑀲𑀩𑁆𑀩𑀧𑀸𑀮𑀺𑀕𑀼𑀡𑁆𑀞𑀺𑀫𑀁 𑀯𑀸 𑀙𑀸𑀤𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀓𑀢𑀁 𑀲𑀓𑀝𑀁 𑀯𑀬𑁆𑀳𑀁 𑀦𑀸𑀫. 𑀲𑀦𑁆𑀤𑀫𑀸𑀦𑀺𑀓𑀸𑀢𑀺 ‘‘𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀕𑁄𑀧𑀸𑀦𑀲𑀺𑀬𑁄 𑀤𑀢𑁆𑀯𑀸 𑀕𑀭𑀼𑀴𑀧𑀓𑁆𑀔𑀓𑀦𑀬𑁂𑀦 𑀓𑀢𑀸 𑀲𑀦𑁆𑀤𑀫𑀸𑀦𑀺𑀓𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀓𑀢𑀬𑀸𑀦𑀯𑀺𑀲𑁂𑀲𑁄. 𑀞𑀸𑀦𑀸 𑀘𑀸𑀯𑀦𑀬𑁄𑀕𑀲𑁆𑀫𑀺𑀦𑁆𑀢𑀺 𑀞𑀸𑀦𑀸 𑀘𑀸𑀯𑀦𑀧𑁆𑀧𑀬𑁄𑀕𑁂.

𑁧𑁩𑁫-𑁬. 𑀤𑀲𑀝𑁆𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑀤𑀦𑁆𑀢𑁂𑀳𑀺 𑀧𑀞𑀫𑀁 𑀞𑀸𑀦𑀪𑁂𑀤𑀲𑁆𑀲 𑀜𑀸𑀢𑀩𑁆𑀩𑀢𑁆𑀢𑀸 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ¶ ‘‘𑀬𑀸𑀦𑀲𑁆𑀲 𑀤𑀼𑀓𑀬𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀤𑀼𑀓𑀬𑀼𑀢𑁆𑀢𑀲𑁆𑀲𑀸𑀢𑀺 𑀤𑀼𑀓𑀁 𑀕𑁄𑀬𑀼𑀕𑀁 𑀬𑀼𑀢𑁆𑀢𑀲𑁆𑀲 𑀬𑀲𑁆𑀲𑀸𑀢𑀺, 𑀬𑀼𑀢𑁆𑀢𑁂 𑀬𑀲𑁆𑀫𑀺𑀦𑁆𑀢𑀺 𑀯𑀸 𑀯𑀺𑀕𑁆𑀕𑀳𑁄. 𑀤𑀲 𑀞𑀸𑀦𑀸𑀦𑀻𑀢𑀺 𑀤𑁆𑀯𑀺𑀦𑁆𑀦𑀁 𑀕𑁄𑀡𑀸𑀦𑀁 𑀅𑀝𑁆𑀞 𑀧𑀸𑀤𑀸, 𑀤𑁆𑀯𑁂 𑀘 𑀘𑀓𑁆𑀓𑀸𑀦𑀻𑀢𑀺 𑀏𑀢𑁂𑀲𑀁 𑀤𑀲𑀦𑁆𑀦𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀸𑀦𑀁 𑀯𑀲𑁂𑀦 𑀤𑀲 𑀞𑀸𑀦𑀸𑀦𑀺 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀘𑀢𑀼𑀬𑀼𑀢𑁆𑀢𑀸𑀤𑀺𑀬𑀸𑀦𑁂 𑀅𑀝𑁆𑀞𑀸𑀭𑀲𑀸𑀢𑀺 𑀞𑀸𑀦𑀪𑁂𑀤𑀲𑁆𑀲 𑀦𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀬𑀸𑀦𑀁 𑀧𑀸𑀚𑀬𑀢𑁄𑀢𑀺 𑀲𑀓𑀝𑀸𑀤𑀺𑀬𑀸𑀦𑀁 𑀧𑁂𑀲𑀬𑀢𑁄. ‘‘𑀥𑀼𑀭𑁂𑀢𑀺 𑀬𑀼𑀕𑀸𑀲𑀦𑁆𑀦𑁂’’𑀢𑀺 𑀅𑀝𑁆𑀞𑀓𑀣𑀸𑀬 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀭𑀣𑀻𑀲𑀸𑀬 𑀬𑀼𑀕𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑀸𑀲𑀦𑁆𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀥𑀼𑀭’’𑀦𑁆𑀢𑀺 𑀘 𑀬𑀼𑀕𑀲𑁆𑀲𑁂𑀯 𑀦𑀸𑀫𑀁. ‘‘𑀥𑀼𑀭𑀁 𑀙𑀟𑁆𑀟𑁂𑀢𑁆𑀯𑀸, 𑀥𑀼𑀭𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀢𑀁𑀲𑀳𑀘𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀦𑀝𑁆𑀞𑀸𑀦𑀫𑁆𑀧𑀺 ¶ 𑀥𑀼𑀭𑀁 𑀦𑀸𑀫. 𑀇𑀥 𑀧𑀦 𑀕𑀗𑁆𑀕𑀸-𑀲𑀤𑁆𑀤𑁄 𑀯𑀺𑀬 𑀕𑀗𑁆𑀕𑀸𑀲𑀫𑀻𑀧𑁂 𑀥𑀼𑀭𑀲𑀫𑀻𑀧𑁂 𑀧𑀸𑀚𑀓𑀲𑁆𑀲 𑀦𑀺𑀲𑀚𑁆𑀚𑀸𑀭𑀳𑀝𑁆𑀞𑀸𑀦𑁂 𑀥𑀼𑀭𑀲𑁆𑀲 𑀯𑀢𑁆𑀢𑀫𑀸𑀦𑀢𑀸 𑀮𑀩𑁆𑀪𑀢𑀺.

𑀕𑁄𑀡𑀸𑀦𑀁 𑀧𑀸𑀤𑀼𑀤𑁆𑀥𑀸𑀭𑁂 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀕𑁄𑀡𑀸𑀦𑀁 𑀅𑀯𑀺𑀮𑁄𑀫𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀮𑁄𑀫𑀓𑀸𑀮𑁂 𑀲𑀫𑁆𑀪𑀯𑀦𑁆𑀢𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀼𑀁 ‘‘𑀣𑀼𑀮𑁆𑀮𑀘𑁆𑀘𑀬𑀁 𑀢𑀼’’ 𑀇𑀘𑁆𑀘𑀢𑁆𑀭 𑀢𑀼-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀕𑁄𑀡𑀸 ‘𑀦𑀸𑀬𑀁 𑀅𑀫𑁆𑀳𑀸𑀓𑀁 𑀲𑀸𑀫𑀺𑀓𑁄’𑀢𑀺 𑀜𑀢𑁆𑀯𑀸 𑀥𑀼𑀭𑀁 𑀙𑀟𑁆𑀟𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺 𑀯𑀸 𑀨𑀦𑁆𑀤𑀦𑁆𑀢𑀺 𑀯𑀸, 𑀭𑀓𑁆𑀔𑀢𑀺 𑀢𑀸𑀯. 𑀕𑁄𑀡𑁂 𑀧𑀼𑀦 𑀉𑀚𑀼𑀓𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀥𑀼𑀭𑀁 𑀆𑀭𑁄𑀧𑁂𑀢𑁆𑀯𑀸 𑀤𑀴𑁆𑀳𑀁 𑀬𑁄𑀚𑁂𑀢𑁆𑀯𑀸 𑀧𑀸𑀘𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀚𑁂𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀁 𑀧𑀸𑀤𑀼𑀤𑁆𑀥𑀸𑀭𑁂𑀦 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀘𑀓𑁆𑀓𑀸𑀦𑀁 𑀳𑀻𑀢𑀺 𑀏𑀢𑁆𑀣 𑀅𑀥𑀺𑀓𑁂𑀦 𑀳𑀺-𑀲𑀤𑁆𑀤𑁂𑀦 ‘‘𑀲𑀘𑁂𑀧𑀺 𑀲𑀓𑀤𑁆𑀤𑀫𑁂 𑀫𑀕𑁆𑀕𑁂 𑀏𑀓𑀁 𑀘𑀓𑁆𑀓𑀁 𑀓𑀤𑁆𑀤𑀫𑁂 𑀮𑀕𑁆𑀕𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀘𑀓𑁆𑀓𑀁 𑀕𑁄𑀡𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀸 𑀧𑀯𑀢𑁆𑀢𑁂𑀦𑁆𑀢𑀺, 𑀏𑀓𑀲𑁆𑀲 𑀧𑀦 𑀞𑀺𑀢𑀢𑁆𑀢𑀸 𑀦 𑀢𑀸𑀯 𑀅𑀯𑀳𑀸𑀭𑁄 𑀳𑁄𑀢𑀺. 𑀕𑁄𑀡𑁂 𑀧𑀦 𑀧𑀼𑀦 𑀉𑀚𑀼𑀓𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀧𑀸𑀚𑁂𑀦𑁆𑀢𑀲𑁆𑀲 ¶ 𑀞𑀺𑀢𑀘𑀓𑁆𑀓𑁂 𑀓𑁂𑀲𑀕𑁆𑀕𑀫𑀢𑁆𑀢𑀁 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁭-𑁯. 𑀏𑀢𑁆𑀢𑀸𑀯𑀢𑀸 𑀬𑀼𑀢𑁆𑀢𑀬𑀸𑀦𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀬𑀼𑀢𑁆𑀢𑀬𑀸𑀦𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀬𑀼𑀢𑁆𑀢𑀓𑀲𑁆𑀲𑀸’’𑀢𑀺𑀆𑀤𑀺. 𑀥𑀼𑀭𑁂𑀦 𑀉𑀧𑀢𑁆𑀣𑀫𑁆𑀪𑀦𑀺𑀬𑀁 𑀞𑀺𑀢𑀲𑁆𑀲 𑀢𑀲𑁆𑀲 𑀅𑀬𑀼𑀢𑁆𑀢𑀓𑀲𑁆𑀲𑀸𑀧𑀺 𑀘 𑀬𑀸𑀦𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀺𑀘𑀓𑁆𑀓𑀓𑀸𑀦𑀁 𑀯𑀲𑁂𑀦 𑀢𑀻𑀡𑁂𑀯 𑀞𑀸𑀦𑀸𑀦𑀺 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀬𑀼𑀢𑁆𑀢𑀓𑀲𑁆𑀲𑀸𑀢𑀺 𑀕𑁄𑀡𑁂𑀳𑀺 𑀅𑀬𑀼𑀢𑁆𑀢𑀓𑀲𑁆𑀲. 𑀥𑀼𑀭𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀥𑀼𑀭𑀬𑀼𑀢𑁆𑀢𑀝𑁆𑀞𑀸𑀦𑀲𑀫𑀻𑀧𑀤𑁂𑀲𑁂𑀦, 𑀲𑀓𑀝𑀲𑀻𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀢𑁆𑀣𑀫𑁆𑀪𑀦𑀺𑀬𑀦𑁆𑀢𑀺 𑀲𑀓𑀝𑀲𑀻𑀲𑁄𑀧𑀢𑁆𑀣𑀫𑁆𑀪𑀦𑀺𑀬𑀸 𑀉𑀧𑀭𑀺 𑀞𑀺𑀢𑀲𑁆𑀲. 𑀉𑀧𑀢𑁆𑀣𑀫𑁆𑀪𑀬𑀢𑀺 𑀥𑀼𑀭𑀦𑁆𑀢𑀺 𑀉𑀧𑀢𑁆𑀣𑀫𑁆𑀪𑀦𑀻. 𑀲𑀓𑀝𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑁄𑀧𑀢𑁆𑀣𑀫𑁆𑀪𑀦𑀢𑁆𑀣𑀁 𑀤𑀻𑀬𑀫𑀸𑀦𑀁 𑀤𑀡𑁆𑀟𑀤𑁆𑀯𑀬𑀁 𑀧𑀘𑁆𑀙𑀺𑀫𑁄𑀧𑀢𑁆𑀣𑀫𑁆𑀪𑀦𑀻 𑀦𑀸𑀫, 𑀧𑀼𑀭𑀺𑀫𑀪𑀸𑀕𑀲𑁆𑀲 𑀤𑀻𑀬𑀫𑀸𑀦𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀻 𑀧𑀼𑀭𑀺𑀫𑁄𑀧𑀢𑁆𑀣𑀫𑁆𑀪𑀦𑀻 𑀦𑀸𑀫𑀸𑀢𑀺 𑀅𑀬𑀫𑀼𑀧𑀢𑁆𑀣𑀫𑁆𑀪𑀦𑀻𑀦𑀁 𑀯𑀺𑀲𑁂𑀲𑁄. 𑀇𑀥 𑀧𑀼𑀭𑀺𑀫𑁄𑀧𑀢𑁆𑀣𑀫𑁆𑀪𑀦𑀻 𑀅𑀥𑀺𑀧𑁆𑀧𑁂𑀢𑀸. ‘‘𑀉𑀧𑀢𑁆𑀣𑀫𑁆𑀪𑀦𑀺𑀘𑀓𑁆𑀓𑀓𑀸𑀦𑀁 𑀯𑀲𑁂𑀦 𑀢𑀻𑀡𑁂𑀯 𑀞𑀸𑀦𑀸𑀦𑀻’’𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀅𑀓𑀧𑁆𑀧𑀓𑀢𑀸𑀬 𑀉𑀧𑀢𑁆𑀣𑀫𑁆𑀪𑀦𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁, 𑀓𑀧𑁆𑀧𑀓𑀢𑀸𑀬 𑀧𑀦 𑀯𑀲𑁂𑀦 ‘‘𑀘𑀢𑁆𑀢𑀸𑀭𑀻’’𑀢𑀺 𑀯𑀢𑁆𑀢𑀩𑁆𑀩𑀁.

‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀞𑀸𑀦𑀸𑀦𑀺 𑀢𑀻𑀡𑁂𑀯𑀸’’𑀢𑀺 𑀆𑀓𑀟𑁆𑀠𑀢𑀺, 𑀤𑀸𑀭𑀼𑀘𑀓𑁆𑀓𑀤𑁆𑀯𑀬𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀤𑀸𑀭𑀽𑀦’’𑀦𑁆𑀢𑀺 𑀇𑀫𑀺𑀦𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀭𑀸𑀲𑀺𑀓𑀢𑀤𑀸𑀭𑀽𑀦𑀁 𑀤𑀸𑀭𑀼𑀓𑀲𑁆𑀲 𑀏𑀓𑀲𑁆𑀲𑀸𑀧𑀺 𑀨𑀮𑀓𑀲𑁆𑀲𑀸𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀽𑀫𑀺𑀬𑀫𑁆𑀧𑀺 𑀥𑀼𑀭𑁂𑀦𑁂𑀯, 𑀢𑀣𑁂𑀯 𑀞𑀧𑀺𑀢𑀲𑁆𑀲 𑀘𑀸’’𑀢𑀺 𑀇𑀫𑀺𑀦𑀸 ¶ 𑀢𑀻𑀡𑀺𑀬𑁂𑀯 𑀞𑀸𑀦𑀸𑀦𑀻𑀢𑀺 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀥𑀼𑀭𑀘𑀓𑁆𑀓𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀺. 𑀏𑀢𑁆𑀣 𑀘 𑀉𑀧𑀭𑀺𑀝𑁆𑀞𑀧𑀺𑀢𑀲𑁆𑀲 𑀘𑀸𑀢𑀺 𑀘-𑀓𑀸𑀭𑀁 ‘‘𑀪𑀽𑀫𑀺𑀬𑀁 𑀞𑀧𑀺𑀢𑀲𑁆𑀲𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑁆𑀯𑀸 𑀲𑀫𑀼𑀘𑁆𑀘𑀬𑀁 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀢𑀢𑁆𑀣 𑀅𑀥𑀺𑀓𑀯𑀘𑀦𑁂𑀦 𑀘-𑀓𑀸𑀭𑁂𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀧𑀦 𑀅𑀬𑀼𑀢𑁆𑀢𑀓𑀁 𑀥𑀼𑀭𑁂 𑀏𑀓𑀸𑀬, 𑀧𑀘𑁆𑀙𑀢𑁄 ¶ 𑀘 𑀤𑁆𑀯𑀻𑀳𑀺 𑀉𑀧𑀢𑁆𑀣𑀫𑁆𑀪𑀦𑀻𑀳𑀺 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀞𑀧𑀺𑀢𑀁, 𑀢𑀲𑁆𑀲 𑀢𑀺𑀡𑁆𑀡𑀁 𑀉𑀧𑀢𑁆𑀣𑀫𑁆𑀪𑀦𑀻𑀦𑀁, 𑀘𑀓𑁆𑀓𑀸𑀦𑀜𑁆𑀘 𑀯𑀲𑁂𑀦 𑀧𑀜𑁆𑀘 𑀞𑀸𑀦𑀸𑀦𑀺. 𑀲𑀘𑁂 𑀥𑀼𑀭𑁂 𑀉𑀧𑀢𑁆𑀣𑀫𑁆𑀪𑀦𑀻 𑀳𑁂𑀝𑁆𑀞𑀸𑀪𑀸𑀕𑁂 𑀓𑀧𑁆𑀧𑀓𑀢𑀸 𑀳𑁄𑀢𑀺, 𑀙 𑀞𑀸𑀦𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀻𑀢𑀺 𑀏𑀢𑁆𑀣 ‘‘𑀓𑀟𑁆𑀠𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀅𑀧𑀺-𑀲𑀤𑁆𑀤𑁂𑀦 ‘‘𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀻’’𑀢𑀺 𑀅𑀯𑀼𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀬𑁄 𑀧𑀦 𑀧𑀼𑀭𑀢𑁄 𑀓𑀟𑁆𑀠𑀺𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑀺, 𑀬𑁄 𑀯𑀸 𑀧𑀦 𑀧𑀘𑁆𑀙𑀢𑁄 𑀓𑀟𑁆𑀠𑀺𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑀺, 𑀬𑁄 𑀯𑀸 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀬𑁄𑀚𑀦𑀸. 𑀢𑀺𑀡𑁆𑀡𑀦𑁆𑀢𑀺 𑀇𑀫𑁂 𑀢𑀬𑁄 𑀕𑀳𑀺𑀢𑀸, ‘‘𑀢𑁂𑀲’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, 𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀤𑀸 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀣𑀼𑀮𑁆𑀮𑀘𑁆𑀘𑀬𑀁 𑀢𑀼…𑀧𑁂… 𑀧𑀭𑀸𑀚𑀬𑁄’’𑀢𑀺. ‘‘𑀞𑀸𑀦𑀸 𑀘𑀸𑀯𑁂’’𑀢𑀺 𑀇𑀤𑀁 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀢𑀼-𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀚𑁄𑀢𑀦𑀢𑁆𑀣𑀁 𑀉𑀧𑀸𑀢𑁆𑀢𑀢𑁆𑀢𑀸 𑀲𑀸𑀯𑀲𑁂𑀲𑀝𑁆𑀞𑀸𑀦𑀸𑀘𑀸𑀯𑀦𑁂 𑀨𑀦𑁆𑀤𑀸𑀧𑀦𑀣𑀼𑀮𑁆𑀮𑀘𑁆𑀘𑀬𑀁, 𑀦𑀺𑀭𑀯𑀲𑁂𑀲𑀝𑁆𑀞𑀸𑀦𑀸𑀘𑀸𑀯𑀦𑁂 𑀧𑀦 𑀓𑀢𑁂 𑀞𑀸𑀦𑀸𑀘𑀸𑀯𑀦𑀧𑀸𑀭𑀸𑀚𑀺𑀓𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁪𑁦. 𑀅𑀓𑁆𑀔𑀸𑀦𑀁 𑀲𑀻𑀲𑀓𑁂𑀳𑀻𑀢𑀺 𑀅𑀓𑁆𑀔𑀲𑁆𑀲 𑀉𑀪𑀬𑀓𑁄𑀝𑀻𑀳𑀺. ‘‘𑀚𑀸𑀢𑁆𑀬𑀸𑀔𑁆𑀬𑀸𑀬𑀫𑁂𑀓𑀲𑁆𑀫𑀺𑀁 𑀩𑀳𑀼𑀯𑀘𑀦𑀫𑀜𑁆𑀜𑀢𑀭𑀸𑀬’’𑀫𑀺𑀢𑀺 𑀯𑀘𑀦𑀢𑁄 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀩𑀳𑀼𑀯𑀘𑀦𑀁 𑀬𑀼𑀚𑁆𑀚𑀢𑀺. ‘‘𑀞𑀺𑀢𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀲𑁆𑀲 ‘‘𑀬𑀸𑀦𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. ‘‘𑀞𑀸𑀦𑀸𑀦𑀺 𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀲𑀓𑀝𑀥𑀼𑀭𑀁 𑀪𑀽𑀫𑀺𑀁 𑀦 𑀨𑀼𑀲𑀢𑀺, 𑀏𑀯𑀁 𑀉𑀘𑁆𑀘𑀢𑀭𑁂𑀲𑀼 𑀤𑁆𑀯𑀻𑀲𑀼 𑀢𑀼𑀮𑀸𑀤𑀺𑀤𑀸𑀭𑀽𑀲𑀼 𑀤𑁆𑀯𑁂 𑀅𑀓𑁆𑀔𑀲𑀻𑀲𑁂 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀁 𑀬𑀸𑀦𑀫𑁂𑀯 𑀕𑀬𑁆𑀳𑀢𑀺.

𑁧𑁪𑁧. 𑀓𑀟𑁆𑀠𑀦𑁆𑀢𑁄𑀢𑀺 𑀤𑁆𑀯𑀺𑀦𑁆𑀦𑀁 𑀅𑀓𑁆𑀔𑀲𑀻𑀲𑀸𑀦𑀁 𑀆𑀥𑀸𑀭𑀪𑀽𑀢𑁂𑀲𑀼 𑀤𑀸𑀭𑀽𑀲𑀼 𑀖𑀁𑀲𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀟𑁆𑀠𑀦𑁆𑀢𑁄. 𑀉𑀓𑁆𑀔𑀺𑀧𑀦𑁆𑀢𑁄𑀢𑀺 𑀉𑀚𑀼𑀁 𑀞𑀺𑀢𑀝𑁆𑀞𑀸𑀦𑀢𑁄 𑀉𑀘𑁆𑀘𑀸𑀭𑁂𑀦𑁆𑀢𑁄. 𑀨𑀼𑀝𑁆𑀞𑁄𑀓𑀸𑀲𑀘𑁆𑀘𑀬𑁂𑀢𑀺 𑀨𑀼𑀝𑁆𑀞𑁄𑀓𑀸𑀲𑀢𑁄 ¶ 𑀓𑁂𑀲𑀕𑁆𑀕𑀫𑀢𑁆𑀢𑀸𑀢𑀺𑀓𑁆𑀓𑀫𑁂. 𑀅𑀜𑁆𑀜𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀇𑀢𑀭𑀲𑁆𑀲. 𑀬𑀲𑁆𑀲 𑀓𑀲𑁆𑀲𑀘𑀺 𑀭𑀣𑀸𑀤𑀺𑀓𑀲𑁆𑀲 𑀬𑀸𑀦𑀲𑁆𑀲.

𑁧𑁪𑁨. 𑀅𑀓𑁆𑀔𑀼𑀤𑁆𑀥𑀻𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀓𑁆𑀔𑀭𑀼𑀤𑁆𑀥𑀦𑀓𑀆𑀡𑀻𑀦𑀁. 𑀅𑀓𑁆𑀔𑀲𑁆𑀲 𑀉𑀪𑀬𑀓𑁄𑀝𑀻𑀲𑀼 𑀘𑀓𑁆𑀓𑀸𑀯𑀼𑀡𑀦𑀝𑁆𑀞𑀸𑀦𑀢𑁄 ¶ 𑀅𑀦𑁆𑀢𑁄 𑀤𑁆𑀯𑀻𑀲𑀼 𑀲𑀓𑀝𑀩𑀸𑀳𑀸𑀲𑀼 𑀅𑀓𑁆𑀔𑀭𑀼𑀤𑁆𑀥𑀦𑀢𑁆𑀣𑀸𑀬 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀯𑀺𑀬 𑀆𑀓𑁄𑀝𑀺𑀢𑀸 𑀘𑀢𑀲𑁆𑀲𑁄 𑀆𑀡𑀺𑀬𑁄 𑀅𑀓𑁆𑀔𑀼𑀤𑁆𑀥𑀺 𑀦𑀸𑀫. 𑀥𑀼𑀭𑀲𑁆𑀲𑀸𑀢𑀺 𑀥𑀼𑀭𑀩𑀦𑁆𑀥𑀦𑀝𑁆𑀞𑀸𑀦𑀸𑀲𑀦𑁆𑀦𑀲𑁆𑀲 𑀭𑀣𑀲𑀻𑀲𑀕𑁆𑀕𑀲𑁆𑀲. 𑀢𑀁 𑀬𑀸𑀦𑀁. 𑀯𑀸-𑀲𑀤𑁆𑀤𑁂𑀦 𑀧𑀲𑁆𑀲𑁂 𑀯𑀸 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑁄, 𑀫𑀚𑁆𑀛𑁂 𑀯𑀸 𑀕𑀳𑁂𑀢𑁆𑀯𑀸 𑀉𑀓𑁆𑀔𑀺𑀧𑁂𑀦𑁆𑀢𑁄𑀢𑀺 𑀓𑀺𑀭𑀺𑀬𑀦𑁆𑀢𑀭𑀁 𑀯𑀺𑀓𑀧𑁆𑀧𑁂𑀢𑀺. 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀓𑀟𑁆𑀠𑀦𑁆𑀢𑁄’’𑀢𑀺 𑀧𑀸𑀞𑀲𑁂𑀲𑁄. 𑀞𑀸𑀦𑀸 𑀘𑀸𑀯𑁂𑀢𑀻𑀢𑀺 𑀉𑀤𑁆𑀥𑀻𑀲𑀼 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑁄 𑀅𑀢𑁆𑀢𑀦𑁄 𑀤𑀺𑀲𑀸𑀬 𑀉𑀤𑁆𑀥𑀺𑀅𑀦𑁆𑀢𑁂𑀦 𑀨𑀼𑀝𑁆𑀞𑀝𑁆𑀞𑀸𑀦𑀁 𑀇𑀢𑀭𑁂𑀦 𑀉𑀤𑁆𑀥𑀺𑀧𑀭𑀺𑀬𑀦𑁆𑀢𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀺.

‘‘𑀉𑀤𑁆𑀥𑀻𑀲𑀼 𑀯𑀸’’𑀢𑀺 𑀲𑀸𑀲𑀗𑁆𑀓𑀯𑀘𑀦𑁂𑀦 𑀅𑀦𑀼𑀤𑁆𑀥𑀺𑀓𑀬𑀸𑀦𑀲𑁆𑀲𑀸𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀁 𑀲𑀽𑀘𑀺𑀢𑀁 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀣 𑀉𑀤𑁆𑀥𑀺𑀔𑀸𑀡𑀼𑀓𑀸 𑀦 𑀳𑁄𑀦𑁆𑀢𑀺, 𑀲𑀫𑀫𑁂𑀯 𑀩𑀸𑀳𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀓𑁆𑀔𑀲𑀻𑀲𑀸𑀦𑀺 𑀧𑀯𑁂𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀳𑁂𑀝𑁆𑀞𑀺𑀫𑀢𑀮𑀲𑁆𑀲 𑀲𑀫𑀦𑁆𑀢𑀸 𑀲𑀩𑁆𑀩𑀁 𑀧𑀣𑀯𑀺𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀘𑀢𑀽𑀲𑀼 𑀤𑀺𑀲𑀸𑀲𑀼, 𑀉𑀤𑁆𑀥𑀜𑁆𑀘 𑀨𑀼𑀝𑁆𑀞𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁦) 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀜𑁆𑀘 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁪𑁩. 𑀦𑀸𑀪𑀺𑀬𑀸𑀢𑀺 𑀦𑀸𑀪𑀺𑀫𑀼𑀔𑁂𑀦. 𑀏𑀓𑀫𑁂𑀯 𑀲𑀺𑀬𑀸 𑀞𑀸𑀦𑀦𑁆𑀢𑀺 𑀏𑀓𑀁 𑀦𑀸𑀪𑀺𑀬𑀸 𑀨𑀼𑀝𑁆𑀞𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀓𑀫𑀲𑁆𑀲 𑀲𑀺𑀬𑀸 𑀞𑀸𑀦’’𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺, 𑀢𑀢𑁄 𑀧𑀼𑀭𑀺𑀫𑀧𑀸𑀞𑁄𑀯 𑀲𑀼𑀦𑁆𑀤𑀭𑀢𑀭𑁄. 𑀧𑀭𑀺𑀘𑁆𑀙𑁂𑀤𑁄𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄, 𑀧𑀭𑀺𑀘𑁆𑀙𑁂𑀤𑁄 𑀧𑀦𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀥𑀸𑀢𑀺 𑀦𑀸𑀪𑀺𑀬𑀸 𑀘𑀢𑀼𑀧𑀲𑁆𑀲𑀧𑀭𑀺𑀬𑀦𑁆𑀢𑀁, 𑀉𑀤𑁆𑀥𑀜𑁆𑀘 𑀧𑀜𑁆𑀘𑀥𑀸, 𑀞𑀸𑀦𑀸𑀘𑀸𑀯𑀦𑀸𑀓𑀸𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁪. 𑀞𑀸𑀦𑀸𑀦𑀺 ¶ 𑀤𑁆𑀯𑁂𑀢𑀺 𑀦𑁂𑀫𑀺𑀬𑀸, 𑀦𑀸𑀪𑀺𑀬𑀸 𑀘 𑀨𑀼𑀝𑁆𑀞𑀝𑁆𑀞𑀸𑀦𑀯𑀲𑁂𑀦 𑀤𑁆𑀯𑁂 𑀞𑀸𑀦𑀸𑀦𑀺. 𑀅𑀲𑁆𑀲𑀸𑀢𑀺 𑀘𑀓𑁆𑀓𑀲𑁆𑀲. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀞𑀸𑀦𑀸𑀦𑀁. 𑀪𑀺𑀢𑁆𑀢𑀺𑀆𑀤𑀺𑀁 𑀅𑀧𑀲𑁆𑀲𑀸𑀬 𑀞𑀧𑀺𑀢𑀘𑀓𑁆𑀓𑀲𑁆𑀲𑀸𑀧𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀅𑀬𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀬𑁄𑀧𑀺 𑀇𑀫𑀺𑀦𑀸 𑀘 𑀧𑀸𑀞𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑁧𑁪𑁫. 𑀅𑀦𑀸𑀭𑀓𑁆𑀔𑀦𑁆𑀢𑀺 𑀲𑀸𑀫𑀺𑀓𑁂𑀦 𑀅𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁. 𑀅𑀥𑁄𑀤𑁂𑀢𑁆𑀯𑀸𑀢𑀺 𑀕𑁄𑀡𑁂 𑀅𑀧𑁂𑀲𑁂𑀢𑁆𑀯𑀸. 𑀯𑀝𑁆𑀝𑀢𑀺, 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀫𑀺𑀓𑁂 𑀆𑀳𑀭𑀸𑀧𑁂𑀦𑁆𑀢𑁂 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺.

𑀬𑀸𑀦𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁪𑁬. 𑀪𑀸𑀭𑀝𑁆𑀞𑀓𑀣𑀸𑀬 𑀲𑀻𑀲𑀓𑁆𑀔𑀦𑁆𑀥𑀓𑀝𑁄𑀮𑀫𑁆𑀩𑀯𑀲𑀸𑀢𑀺 𑀏𑀯𑀁𑀦𑀸𑀫𑀓𑀸𑀦𑀁 𑀲𑀭𑀻𑀭𑀸𑀯𑀬𑀯𑀸𑀦𑀁 𑀯𑀲𑁂𑀦 𑀪𑀸𑀭𑁄 ¶ 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀲𑀻𑀲𑀪𑀸𑀭𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀲𑀻𑀲𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀻𑀲𑀲𑁆𑀲 𑀢𑀸𑀯 𑀧𑀼𑀭𑀺𑀫𑀕𑀮𑁂 𑀕𑀮𑀯𑀸𑀝𑀓𑁄 𑀧𑀺𑀝𑁆𑀞𑀺𑀕𑀮𑁂 𑀓𑁂𑀲𑀜𑁆𑀘𑀺 𑀓𑁂𑀲𑀦𑁆𑀢𑁂 𑀆𑀯𑀝𑁆𑀝𑁄 𑀳𑁄𑀢𑀺, 𑀕𑀮𑀲𑁆𑀲𑁂𑀯 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑁂𑀲𑀜𑁆𑀘𑀺 𑀓𑁂𑀲𑀸𑀯𑀝𑁆𑀝𑀸 𑀑𑀭𑀼𑀬𑁆𑀳 𑀚𑀸𑀬𑀦𑁆𑀢𑀺, 𑀬𑁂 ‘‘𑀓𑀡𑁆𑀡𑀘𑀽𑀴𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀥𑁄𑀪𑀸𑀕𑁄 𑀘𑀸𑀢𑀺 𑀅𑀬𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀉𑀧𑀭𑀺 𑀲𑀻𑀲𑀁, 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀲𑀻𑀲𑀪𑀸𑀭𑁄 𑀦𑀸𑀫.

𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀓𑀧𑁆𑀧𑀭𑁂𑀳𑀺 𑀧𑀝𑁆𑀞𑀸𑀬 𑀉𑀧𑀭𑀺, 𑀧𑀺𑀝𑁆𑀞𑀺𑀕𑀮𑀸𑀯𑀝𑁆𑀝𑀢𑁄 𑀘 𑀕𑀮𑀯𑀸𑀝𑀓𑀢𑁄 𑀘 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀸𑀯𑀝𑁆𑀝𑀢𑁄 𑀘 𑀉𑀭𑀧𑀭𑀺𑀘𑁆𑀙𑁂𑀤𑀫𑀚𑁆𑀛𑁂 𑀳𑀤𑀬𑀆𑀯𑀸𑀝𑀢𑁄 𑀘 𑀧𑀝𑁆𑀞𑀸𑀬 𑀉𑀧𑀭𑀺 𑀔𑀦𑁆𑀥𑁄, 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀔𑀦𑁆𑀥𑀪𑀸𑀭𑁄 𑀦𑀸𑀫.

𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀸𑀯𑀝𑁆𑀝𑀢𑁄 ¶ , 𑀧𑀦 𑀳𑀤𑀬𑀆𑀯𑀸𑀝𑀢𑁄 𑀘 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀬𑀸𑀯 𑀧𑀸𑀤𑀦𑀔𑀲𑀺𑀔𑀸, 𑀅𑀬𑀁 𑀓𑀝𑀺𑀧𑀭𑀺𑀘𑁆𑀙𑁂𑀤𑁄, 𑀏𑀢𑁆𑀣𑀦𑁆𑀢𑀭𑁂 𑀲𑀫𑀦𑁆𑀢𑀢𑁄 𑀲𑀭𑀻𑀭𑁂 𑀞𑀺𑀢𑀪𑀸𑀭𑁄 𑀓𑀝𑀺𑀪𑀸𑀭𑁄 𑀦𑀸𑀫.

𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀧𑀦 𑀳𑁂𑀝𑁆𑀞𑀸 𑀬𑀸𑀯 𑀳𑀢𑁆𑀣𑀦𑀔𑀲𑀺𑀔𑀸, 𑀅𑀬𑀁 𑀑𑀮𑀫𑁆𑀩𑀓𑀧𑀭𑀺𑀘𑁆𑀙𑁂𑀤𑁄, 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑁄 𑀑𑀮𑀫𑁆𑀩𑀓𑁄 𑀦𑀸𑀫.

𑀪𑀭𑀢𑀻𑀢𑀺 𑀪𑀸𑀭𑁄, 𑀪𑀭𑀢𑀺 𑀏𑀢𑁂𑀦, 𑀏𑀢𑀲𑁆𑀫𑀺𑀦𑁆𑀢𑀺 𑀯𑀸 𑀪𑀸𑀭𑁄, 𑀇𑀢𑀺 𑀬𑀣𑀸𑀯𑀼𑀢𑁆𑀢𑀲𑀻𑀲𑀸𑀤𑀬𑁄 𑀅𑀯𑀬𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀪𑀸𑀭𑁂 𑀢𑀺𑀝𑁆𑀞𑀢𑀻𑀢𑀺 𑀪𑀸𑀭𑀝𑁆𑀞𑀁. 𑀇𑀢𑀺 𑀲𑀻𑀲𑀸𑀤𑀻𑀲𑀼 𑀞𑀺𑀢𑀁 𑀪𑀡𑁆𑀟𑀁 𑀯𑀼𑀘𑁆𑀘𑀢𑀺. ‘‘𑀪𑀸𑀭𑁄𑀬𑁂𑀯 𑀪𑀸𑀭𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁧) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀪𑀭𑀻𑀬𑀢𑀻𑀢𑀺 𑀪𑀸𑀭𑁄, 𑀓𑀫𑁆𑀫𑀦𑀺 𑀲𑀺𑀤𑁆𑀥𑁂𑀦 𑀪𑀸𑀭-𑀲𑀤𑁆𑀤𑁂𑀦 𑀪𑀡𑁆𑀟𑀫𑁂𑀯 𑀯𑀼𑀘𑁆𑀘𑀢𑀺.

𑁧𑁪𑁭. 𑀲𑀺𑀭𑀲𑁆𑀫𑀺𑀁𑀬𑁂𑀯𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀲𑀺𑀭𑀲𑀺 𑀏𑀯. 𑀲𑀸𑀭𑁂𑀢𑀻𑀢𑀺 𑀅𑀦𑀼𑀓𑁆𑀔𑀺𑀧𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺. 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀨𑀦𑁆𑀤𑀸𑀧𑀦𑀣𑀼𑀮𑁆𑀮𑀘𑁆𑀘𑀬𑀁 𑀪𑀯𑁂𑀬𑁆𑀬.

𑁧𑁪𑁮. 𑀔𑀦𑁆𑀥𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯 𑀔𑀦𑁆𑀥𑀁. 𑀑𑀭𑁄𑀧𑀺𑀢𑁂𑀢𑀺 𑀑𑀳𑀸𑀭𑀺𑀢𑁂. 𑀲𑀻𑀲𑀢𑁄𑀢𑀺 𑀏𑀢𑁆𑀣 ‘‘𑀉𑀤𑁆𑀥’’𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑀻𑀲𑀢𑁄 𑀉𑀧𑀭𑀻𑀢𑀺 𑀅𑀢𑁆𑀣𑁄. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀁 𑀤𑀽𑀭𑀁 𑀓𑀢𑁆𑀯𑀸. 𑀧𑀺-𑀲𑀤𑁆𑀤𑁄 𑀧𑀕𑁂𑀯 𑀢𑀢𑁄 𑀅𑀥𑀺𑀓𑀦𑁆𑀢𑀺 𑀤𑀻𑀧𑁂𑀢𑀺. 𑀫𑁄𑀘𑁂𑀦𑁆𑀢𑁄𑀧𑀻𑀢𑀺 𑀓𑁂𑀲𑀕𑁆𑀕𑁂𑀦 𑀅𑀨𑀼𑀲𑀦𑁆𑀢𑀁 𑀅𑀧𑀦𑁂𑀦𑁆𑀢𑁄. 𑀏𑀢𑁆𑀣𑀸𑀧𑀺 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀔𑀦𑁆𑀥𑀁 𑀑𑀭𑁄𑀧𑁂𑀦𑁆𑀢𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁, 𑀅𑀧𑀺𑀘 𑀔𑁄 𑀫𑁄𑀘𑁂𑀦𑁆𑀢𑁄𑀧𑀺 ¶ 𑀧𑀭𑀸𑀚𑀺𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑀧𑁂𑀓𑁆𑀔𑀢𑀺. 𑀧𑀲𑀺𑀩𑁆𑀩𑀓𑀸𑀤𑀺𑀬𑀫𑀓𑀪𑀸𑀭𑀁 𑀧𑀦 𑀲𑀻𑀲𑁂 𑀘 𑀧𑀺𑀝𑁆𑀞𑀺𑀬𑀜𑁆𑀘𑀸𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀞𑀺𑀢𑀢𑁆𑀢𑀸 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀅𑀧𑀦𑀬𑀦𑁂𑀦 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀢𑀜𑁆𑀘 ‘‘𑀲𑀻𑀲𑀢𑁄 𑀫𑁄𑀘𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸𑀯 𑀏𑀓𑀤𑁂𑀲𑀯𑀲𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁪𑁯-𑁫𑁦. 𑀏𑀯𑀁 ¶ 𑀲𑀻𑀲𑀪𑀸𑀭𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀲𑀼 𑀔𑀦𑁆𑀥𑀪𑀸𑀭𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁂 𑀤𑀲𑁆𑀲𑁂𑀢𑀩𑁆𑀩𑁂𑀧𑀺 𑀅𑀯𑀲𑀸𑀦𑁂 𑀯𑀼𑀢𑁆𑀢𑀑𑀮𑀫𑁆𑀩𑀓𑀪𑀸𑀭𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀆𑀤𑁆𑀬𑀦𑁆𑀢𑀪𑀸𑀭𑀸𑀦𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑁂𑀲𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑀁 𑀅𑀢𑀺𑀤𑀺𑀲𑀺𑀢𑀼𑀫𑀸𑀳 ‘‘𑀪𑀸𑀭’’𑀦𑁆𑀢𑀺𑀆𑀤𑀺. 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 𑀧𑀸𑀢𑀭𑀸𑀲𑀸𑀤𑀺𑀓𑀸𑀭𑀡𑁂𑀦 𑀅𑀣𑁂𑀬𑁆𑀬𑀘𑀺𑀢𑁆𑀢𑁄, 𑀳𑀢𑁆𑀣𑀕𑀢𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀽𑀫𑀺𑀬𑀁 𑀞𑀧𑀦𑀦𑀺𑀲𑁆𑀲𑀚𑁆𑀚𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀤𑀫𑁂𑀢𑁂𑀦 𑀉𑀧𑀮𑀓𑁆𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀻𑀲𑀪𑀸𑀭𑀑𑀮𑀫𑁆𑀩𑀓𑀪𑀸𑀭𑁂𑀲𑀼 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦. 𑀲𑁂𑀲𑁂𑀲𑀼𑀧𑀺 𑀪𑀸𑀭𑁂𑀲𑀽𑀢𑀺 𑀔𑀦𑁆𑀥𑀪𑀸𑀭𑀸𑀤𑀺𑀓𑁂𑀲𑀼𑀧𑀺. 𑀫𑀢𑀺𑀲𑀸𑀭𑁂𑀦 𑀲𑀸𑀭𑀫𑀢𑀺𑀦𑀸. 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀞𑀸𑀦𑁂𑀲𑀼 𑀞𑀺𑀢𑀁 𑀧𑀸𑀤𑀕𑁆𑀖𑀦𑀓𑀁 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀞𑀸𑀦𑀸 𑀅𑀘𑀸𑀯𑁂𑀢𑁆𑀯𑀸 𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀯𑀸 𑀉𑀤𑁆𑀥𑀁𑀉𑀓𑁆𑀔𑀺𑀧𑀦𑀯𑀲𑁂𑀦 𑀯𑀸 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀪𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁫𑁧-𑁩. 𑀇𑀤𑀸𑀦𑀺 𑀆𑀭𑀸𑀫𑀝𑁆𑀞𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀺. 𑀆𑀭𑀸𑀫𑀦𑁆𑀢𑀺 𑀘𑀫𑁆𑀧𑀓𑀸𑀤𑀺𑀧𑀼𑀧𑁆𑀨𑀸𑀭𑀸𑀫𑀜𑁆𑀘 𑀅𑀫𑁆𑀩𑀸𑀤𑀺𑀨𑀮𑀸𑀭𑀸𑀫𑀜𑁆𑀘𑀸𑀢𑀺 𑀤𑁆𑀯𑀻𑀲𑀼 𑀆𑀭𑀸𑀫𑁂𑀲𑀼 𑀬𑀁 𑀓𑀜𑁆𑀘𑀺 𑀆𑀭𑀸𑀫𑀁. 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀧𑀼𑀧𑁆𑀨𑀸𑀤𑀺𑀓𑀸𑀫𑀺𑀦𑁄𑀢𑀺 𑀯𑀺𑀕𑁆𑀕𑀳𑁄, 𑀢𑀁 𑀆𑀭𑀸𑀫𑀁, 𑀅𑀪𑀺-𑀲𑀤𑁆𑀤𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀪𑀺𑀬𑀼𑀜𑁆𑀚𑀢𑁄𑀢𑀺 𑀧𑀭𑀸𑀬𑀢𑁆𑀢𑀪𑀸𑀯𑀁 𑀚𑀸𑀦𑀦𑁆𑀢𑁄 ‘‘𑀫𑀫 𑀲𑀦𑁆𑀢𑀓’’𑀦𑁆𑀢𑀺 𑀅𑀝𑁆𑀝𑀁 𑀓𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀲𑀳𑀸𑀬𑀸𑀤𑀺𑀪𑀸𑀯𑀢𑁆𑀣𑀁 𑀤𑀼𑀢𑀺𑀬𑀓𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀅𑀪𑀺𑀬𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀦𑀻𑀬𑀁, 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 𑀲𑀳𑀧𑀬𑁄𑀕𑀕𑀡𑀦𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀪𑀕𑀯𑀢𑀸 ¶ 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀁 𑀘𑀭𑀦𑁆𑀢𑁄𑀢𑀺 𑀅𑀝𑁆𑀝𑀁 𑀓𑀭𑁄𑀦𑁆𑀢𑁄. 𑀧𑀭𑀁 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑀺 𑀘𑁂, 𑀲𑀬𑀁 𑀲𑀸𑀲𑀦𑀢𑁄 𑀧𑀭𑀸𑀚𑀺𑀢𑁄𑀢𑀺 𑀬𑁄𑀚𑀦𑀸.

𑀢𑀲𑁆𑀲𑀸𑀢𑀺 𑀪𑀡𑁆𑀟𑀲𑀸𑀫𑀺𑀦𑁄. 𑀯𑀺𑀫𑀢𑀺𑀁 𑀚𑀦𑀬𑀦𑁆𑀢𑀲𑁆𑀲𑀸𑀢𑀺 ‘‘𑀇𑀫𑀺𑀦𑀸 𑀲𑀳 𑀅𑀝𑁆𑀝𑀁 𑀓𑀢𑁆𑀯𑀸 𑀫𑀫 𑀲𑀦𑁆𑀢𑀓𑀁 𑀮𑀪𑀺𑀲𑁆𑀲𑀸𑀫𑀺 ¶ 𑀯𑀸, 𑀦 𑀯𑀸’’𑀢𑀺 𑀲𑀁𑀲𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀘𑁄𑀭𑀲𑁆𑀲. 𑀬𑁄𑀧𑀺 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀲𑀬𑀁 𑀧𑀭𑀚𑁆𑀚𑀢𑀺, 𑀢𑀲𑁆𑀲 𑀘 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑁄𑀚𑀦𑀸.

𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑁂𑀢𑀺 ‘‘𑀅𑀬𑀁 𑀣𑀤𑁆𑀥𑁄 𑀓𑀓𑁆𑀔𑀴𑁄 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬, 𑀅𑀮𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀆𑀭𑀸𑀫𑁂𑀦𑀸’’𑀢𑀺 𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑁂 𑀲𑀢𑀺, 𑀅𑀢𑁆𑀢𑀦𑁄 ‘‘𑀦 𑀤𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀘𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀢𑀲𑁆𑀲𑀸𑀢𑀺 𑀅𑀪𑀺𑀬𑀼𑀜𑁆𑀚𑀦𑁆𑀢𑀲𑁆𑀲. 𑀲𑀩𑁆𑀩𑁂𑀲𑀁 𑀓𑀽𑀝𑀲𑀓𑁆𑀔𑀻𑀦𑀜𑁆𑀘𑀸𑀢𑀺 𑀘-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑁄𑀭𑀲𑁆𑀲 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸𑀧𑀺 𑀢𑀤𑀸𑀬𑀢𑁆𑀢𑀓𑀭𑀡𑀢𑁆𑀣𑀁 𑀬𑀁 𑀓𑀺𑀜𑁆𑀘𑀺 𑀯𑀤𑀦𑁆𑀢𑀸 𑀓𑀽𑀝𑀲𑀓𑁆𑀔𑀺𑀦𑁄, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀆𑀭𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁫𑁪. 𑀯𑀺𑀳𑀸𑀭𑀝𑁆𑀞𑀓𑀣𑀸𑀬𑀁 𑀯𑀺𑀳𑀸𑀭𑀦𑁆𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀭𑀺𑀯𑁂𑀡𑀁 𑀯𑀸, 𑀆𑀯𑀸𑀲𑀁 𑀯𑀸’’𑀢𑀺 𑀘 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀺𑀓𑀦𑁆𑀢𑀺 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀢𑁆𑀢𑀸 𑀲𑀗𑁆𑀖𑀲𑀦𑁆𑀢𑀓𑀁. 𑀓𑀜𑁆𑀘𑀻𑀢𑀺 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀦 𑀕𑀡𑁆𑀳𑀺𑀢𑀼𑀁 𑀅𑀪𑀺𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀸 𑀦 𑀲𑀺𑀚𑁆𑀛𑀢𑀻𑀢𑀺𑀧𑀺 𑀧𑀸𑀞𑀲𑁂𑀲𑀬𑁄𑀚𑀦𑀸. 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄’’𑀢𑀺, 𑀲𑀩𑁆𑀩𑀲𑁆𑀲𑁂𑀯 𑀘𑀸𑀢𑀼𑀤𑁆𑀤𑀺𑀲𑀺𑀓𑀲𑀗𑁆𑀖𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑀲𑁆𑀲 𑀅𑀲𑀫𑁆𑀪𑀯𑀢𑁄𑀢𑀺 𑀅𑀢𑁆𑀣𑁄. ‘‘𑀯𑀺𑀳𑀸𑀭’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 ‘‘𑀲𑀗𑁆𑀖𑀺𑀓’’𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀕𑀡𑀲𑁆𑀲, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀺𑀦𑁆𑀦𑀯𑀺𑀳𑀸𑀭𑀸𑀤𑀺𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑁆𑀪𑀯𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀆𑀭𑀸𑀫𑁂 𑀯𑀺𑀬 ¶ 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀢𑀢𑁆𑀭𑀝𑁆𑀞𑀪𑀡𑁆𑀟𑁂 𑀯𑀺𑀦𑀺𑀘𑁆𑀙𑀬𑁄 𑀪𑀽𑀫𑀝𑁆𑀞𑀣𑀮𑀝𑁆𑀞𑀆𑀓𑀸𑀲𑀝𑁆𑀞𑀯𑁂𑀳𑀸𑀲𑀝𑁆𑀞𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑀸𑀭𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁫𑁫-𑁬. 𑀔𑁂𑀢𑁆𑀢𑀝𑁆𑀞𑁂 𑀲𑀻𑀲𑀸𑀦𑀻𑀢𑀺 𑀯𑀮𑁆𑀮𑀺𑀬𑁄. 𑀦𑀺𑀤𑀫𑁆𑀧𑀺𑀢𑁆𑀯𑀸𑀦𑀸𑀢𑀺 𑀬𑀣𑀸 𑀥𑀜𑁆𑀜𑀫𑀢𑁆𑀢𑀁 𑀳𑀢𑁆𑀣𑀕𑀢𑀁 𑀳𑁄𑀢𑀺, 𑀢𑀣𑀸 𑀓𑀢𑁆𑀯𑀸. 𑀅𑀲𑀺𑀢𑁂𑀦𑀸𑀢𑀺 𑀤𑀸𑀢𑁆𑀢𑁂𑀦. 𑀮𑀸𑀬𑀺𑀢𑁆𑀯𑀸𑀢𑀺 𑀤𑀸𑀬𑀺𑀢𑁆𑀯𑀸. 𑀲𑀩𑁆𑀩𑀓𑀺𑀭𑀺𑀬𑀸𑀧𑀤𑁂𑀲𑀼 ‘‘𑀲𑀸𑀮𑀺𑀆𑀤𑀻𑀦𑀁 𑀲𑀻𑀲𑀸𑀦𑀻’’𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀲𑀸𑀮𑀺𑀆𑀤𑀻𑀦𑀁 𑀲𑀻𑀲𑀸𑀦𑀺 𑀦𑀺𑀤𑀫𑁆𑀧𑀺𑀢𑁆𑀯𑀸 𑀕𑀡𑁆𑀳𑀢𑁄 𑀬𑀲𑁆𑀫𑀺𑀁 𑀩𑀻𑀚𑁂 𑀕𑀳𑀺𑀢𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑁄𑀘𑀺𑀢𑁂 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀪𑀯𑁂𑀢𑀺 𑀬𑁄𑀚𑀦𑀸. 𑀅𑀲𑀺𑀢𑁂𑀦 𑀮𑀸𑀬𑀺𑀢𑁆𑀯𑀸 𑀕𑀡𑁆𑀳𑀢𑁄 ¶ 𑀬𑀲𑁆𑀫𑀺𑀁 𑀲𑀻𑀲𑁂 𑀕𑀳𑀺𑀢𑁂…𑀧𑁂… 𑀪𑀯𑁂, 𑀓𑀭𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀢𑁄 𑀬𑀲𑁆𑀲𑀁 𑀫𑀼𑀝𑁆𑀞𑀺𑀬𑀁 𑀕𑀳𑀺𑀢𑀸𑀬𑀁…𑀧𑁂… 𑀪𑀯𑁂𑀢𑀺 𑀬𑁄𑀚𑀦𑀸. 𑀩𑀻𑀚𑁂𑀢𑀺 𑀯𑀻𑀳𑀸𑀤𑀺𑀨𑀮𑁂. 𑀯𑀢𑁆𑀣𑀼 𑀧𑀽𑀭𑀢𑀻𑀢𑀺 𑀧𑀸𑀤𑀕𑁆𑀖𑀦𑀓𑀁 𑀳𑁄𑀢𑀻𑀢𑀺. 𑀫𑀼𑀝𑁆𑀞𑀺𑀬𑀦𑁆𑀢𑀺 𑀲𑀻𑀲𑀫𑀼𑀝𑁆𑀞𑀺𑀬𑀁, 𑀩𑀻𑀚𑀫𑀼𑀝𑁆𑀞𑀺𑀬𑀁 𑀯𑀸. 𑀩𑀦𑁆𑀥𑀦𑀸 𑀫𑁄𑀘𑀺𑀢𑁂𑀢𑀺 𑀩𑀦𑁆𑀥𑀦𑀝𑁆𑀞𑀸𑀦𑀢𑁄 𑀫𑁄𑀘𑀺𑀢𑁂.

𑁧𑁫𑁭. 𑀤𑀡𑁆𑀟𑁄 𑀯𑀸𑀢𑀺 𑀯𑀢𑁆𑀣𑀼𑀧𑀽𑀭𑀓𑀯𑀻𑀳𑀺𑀤𑀡𑁆𑀟𑁄 𑀯𑀸. 𑀅𑀘𑁆𑀙𑀺𑀦𑁆𑀦𑁄 𑀭𑀓𑁆𑀔𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀘𑁄 𑀯𑀸𑀢𑀺 𑀢𑀲𑁆𑀲 𑀤𑀡𑁆𑀟𑀲𑁆𑀲 𑀏𑀓𑀧𑀲𑁆𑀲𑁂 𑀙𑀮𑁆𑀮𑀺 𑀯𑀸 𑀅𑀘𑁆𑀙𑀺𑀦𑁆𑀦𑁄 𑀭𑀓𑁆𑀔𑀢𑀺𑀘𑁆𑀘𑁂𑀯 𑀲𑀫𑁆𑀩𑀦𑁆𑀥𑁄. 𑀯𑀸-𑀕𑁆𑀕𑀳𑀡𑁂𑀦 𑀇𑀥𑀸𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀕𑀢𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁪) ‘‘𑀯𑀸𑀓𑁄’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀸𑀓𑁄 𑀦𑀸𑀫 𑀤𑀡𑁆𑀟𑁂 𑀯𑀸 𑀢𑀘𑁂 𑀯𑀸 𑀩𑀸𑀳𑀺𑀭𑀁. 𑀇𑀥𑀸𑀧𑀺 𑀢𑀘𑁄 𑀯𑀸 𑀅𑀘𑁆𑀙𑀺𑀦𑁆𑀦𑁄 𑀭𑀓𑁆𑀔𑀢𑀻𑀢𑀺 𑀬𑁄𑀚𑀦𑀸. 𑀯𑀻𑀳𑀺𑀦𑀸𑀴𑀫𑁆𑀧𑀺 𑀯𑀸𑀢𑀺 𑀕𑀳𑀺𑀢𑀥𑀜𑁆𑀜𑀲𑀸𑀮𑀺𑀲𑀻𑀲𑁂𑀦 𑀧𑀢𑀺𑀝𑁆𑀞𑀺𑀢𑀁 𑀯𑀻𑀳𑀺𑀓𑀼𑀤𑁆𑀭𑀽𑀲𑀸𑀤𑀺𑀕𑀘𑁆𑀙𑀸𑀦𑀁 𑀦𑀸𑀴𑀁, 𑀢𑀘𑀕𑀩𑁆𑀪𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀻𑀖𑀦𑁆𑀢𑀺 𑀤𑀻𑀖𑀁 𑀘𑁂 𑀳𑁄𑀢𑀺. ‘‘𑀅𑀦𑀺𑀓𑁆𑀔𑀦𑁆𑀢𑁄𑀯𑀸’’𑀢𑀺 𑀇𑀫𑀺𑀦𑀸 ‘‘𑀤𑀡𑁆𑀟𑁄’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀢𑁄’’𑀢𑀺 𑀧𑀸𑀞𑀲𑁂𑀲𑁄. 𑀢𑀢𑁄 ¶ 𑀤𑀻𑀖𑀯𑀻𑀳𑀺𑀦𑀸𑀴𑀢𑁄 𑀲𑀩𑀻𑀚𑀯𑀻𑀳𑀺𑀲𑀻𑀲𑀤𑀡𑁆𑀟𑁄 𑀲𑀩𑁆𑀩𑀲𑁄 𑀙𑀺𑀦𑁆𑀦𑁄 𑀙𑀺𑀦𑁆𑀦𑀓𑁄𑀝𑀺𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀩𑀳𑀺 𑀅𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀭𑀓𑁆𑀔𑀢𑀻𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀁 𑀅𑀦𑀼𑀭𑀽𑀧𑀸𑀧𑀢𑁆𑀢𑀺𑀢𑁄 𑀧𑀸𑀮𑁂𑀢𑀺. 𑀫𑀼𑀢𑁆𑀢𑁄 𑀘𑁂, 𑀦 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄.

𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀻𑀳𑀺𑀦𑀸𑀴𑀁 𑀤𑀻𑀖𑀫𑁆𑀧𑀺 𑀳𑁄𑀢𑀺, 𑀬𑀸𑀯 𑀅𑀦𑁆𑀢𑁄𑀦𑀸𑀴𑀢𑁄 𑀯𑀻𑀳𑀺𑀲𑀻𑀲𑀤𑀡𑁆𑀟𑀓𑁄 𑀦 𑀦𑀺𑀓𑁆𑀔𑀫𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀦𑀸𑀴𑀢𑁄 𑀤𑀡𑁆𑀟𑀓𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀪𑀡𑁆𑀟𑀕𑁆𑀖𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁧.𑁧𑁦𑁪). 𑀢𑀣𑀸 𑀇𑀫𑀺𑀦𑀸𑀯 𑀯𑀺𑀦𑀺𑀘𑁆𑀙𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀮𑀸𑀬𑀺𑀢𑀩𑁆𑀩𑀯𑀢𑁆𑀣𑀼𑀧𑀽𑀭𑀓𑀯𑀻𑀳𑀺𑀲𑀻𑀲𑀫𑀼𑀝𑁆𑀞𑀺𑀬𑀸 𑀫𑀽𑀮𑁂 𑀙𑀺𑀦𑁆𑀦𑁂𑀧𑀺 𑀲𑀻𑀲𑁂𑀲𑀼 𑀅𑀘𑁆𑀙𑀺𑀦𑁆𑀦𑀯𑀻𑀳𑀺𑀲𑀻𑀲𑀕𑁆𑀕𑁂𑀳𑀺 𑀲𑀤𑁆𑀥𑀺𑀁 𑀚𑀝𑁂𑀢𑁆𑀯𑀸 𑀞𑀺𑀢𑁂𑀲𑀼 𑀭𑀓𑁆𑀔𑀢𑀺, 𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀯𑀺𑀬𑁄𑀚𑀺𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀓𑁄 𑀯𑀺𑀦𑀺𑀘𑁆𑀙𑀬𑁄 𑀘 𑀲𑀽𑀘𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑁧𑁫𑁮. 𑀫𑀤𑁆𑀤𑀺𑀢𑁆𑀯𑀸𑀢𑀺 𑀯𑀻𑀳𑀺𑀲𑀻𑀲𑀸𑀦𑀺 𑀫𑀤𑁆𑀤𑀺𑀢𑁆𑀯𑀸. 𑀧𑀧𑁆𑀨𑁄𑀝𑁂𑀢𑁆𑀯𑀸𑀢𑀺 𑀪𑀼𑀲𑀸𑀤𑀻𑀦𑀺 𑀑𑀨𑀼𑀦𑀺𑀢𑁆𑀯𑀸. 𑀇𑀢𑁄 𑀲𑀸𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀓𑀧𑁆𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀇𑀢𑁄𑀢𑀺 𑀯𑀻𑀳𑀺𑀲𑀻𑀲𑀢𑁄. 𑀲𑀸𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀸𑀭𑀪𑀸𑀕𑀁 𑀆𑀤𑀺𑀬𑀺𑀲𑁆𑀲𑀸𑀫𑀺. 𑀲𑀘𑁂 𑀧𑀭𑀺𑀓𑀧𑁆𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀭𑀓𑁆𑀔𑀢𑀻𑀢𑀺 𑀯𑀢𑁆𑀣𑀼𑀧𑀳𑁄𑀦𑀓𑀧𑁆𑀧𑀫𑀸𑀡𑀁 𑀤𑀸𑀢𑁆𑀢𑁂𑀦 𑀮𑀸𑀬𑀺𑀢𑁆𑀯𑀸 𑀯𑀸 𑀳𑀢𑁆𑀣𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀕𑀳𑀺𑀢𑀫𑁆𑀧𑀺 𑀬𑀸𑀯 𑀧𑀭𑀺𑀓𑀧𑁆𑀧𑁄 𑀦 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀆𑀧𑀢𑁆𑀢𑀺𑀢𑁄 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁯. 𑀫𑀤𑁆𑀤𑀦𑁂𑀧𑀻𑀢𑀺 𑀯𑀻𑀳𑀺𑀲𑀻𑀲𑀫𑀤𑁆𑀤𑀦𑁂𑀧𑀺. 𑀉𑀤𑁆𑀥𑀭𑀡𑁂𑀧𑀻𑀢𑀺 𑀧𑀮𑀸𑀮𑀸𑀧𑀦𑀬𑀦𑁂𑀧𑀺. 𑀧𑀧𑁆𑀨𑁄𑀝𑀦𑁂𑀧𑀻𑀢𑀺 𑀪𑀼𑀲𑀸𑀤𑀺𑀓𑀘𑀯𑀭𑀸𑀧𑀦𑀬𑀦𑁂𑀧𑀺 ¶ . 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀅𑀕𑁆𑀖𑀯𑀲𑁂𑀦 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀬𑁄 𑀦 𑀪𑀯𑀦𑁆𑀢𑀺, 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀧𑀦 𑀳𑁄𑀢𑁂𑀯. 𑀅𑀢𑁆𑀢𑀦𑁄…𑀧𑁂… 𑀧𑀭𑀸𑀚𑀬𑁄𑀢𑀺 ¶ 𑀅𑀢𑁆𑀢𑀦𑁄 𑀧𑀞𑀫𑀁 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑁂𑀦 𑀲𑀩𑁆𑀩𑀁 𑀓𑀢𑁆𑀯𑀸 𑀲𑀸𑀭𑀪𑀸𑀕𑀁 𑀕𑀡𑁆𑀳𑀺𑀢𑀼𑀁 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀬𑀣𑀸𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁦. 𑀏𑀢𑁆𑀢𑀸𑀯𑀢𑀸 ‘‘𑀔𑁂𑀢𑁆𑀢𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀔𑁂𑀢𑁆𑀢𑁂 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺 𑀪𑀽𑀫𑀝𑁆𑀞𑀁 𑀣𑀮𑀝𑁆𑀞𑀁 𑀆𑀓𑀸𑀲𑀝𑁆𑀞𑀁 𑀯𑁂𑀳𑀸𑀲𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑁧𑁦𑁪) 𑀯𑀼𑀢𑁆𑀢𑀸𑀦𑀺 𑀔𑁂𑀢𑁆𑀢𑀝𑁆𑀞𑀸𑀦𑀺 𑀘𑀢𑁆𑀢𑀸𑀭𑀺 𑀬𑀣𑀸𑀯𑀼𑀢𑁆𑀢𑀲𑀤𑀺𑀲𑀸𑀦𑀻𑀢𑀺 𑀢𑀸𑀦𑀺 𑀧𑀳𑀸𑀬 ‘‘𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺𑀆𑀤𑀺 𑀧𑀸𑀴𑀺𑀬𑀁 𑀆𑀕𑀢𑁂 𑀢𑀢𑁆𑀭𑀚𑀸𑀢𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀔𑁂𑀢𑁆𑀢𑀁 𑀦𑀸𑀫 𑀬𑀢𑁆𑀣 𑀧𑀼𑀩𑁆𑀩𑀡𑁆𑀡𑀁 𑀯𑀸 𑀅𑀧𑀭𑀡𑁆𑀡𑀁 𑀯𑀸 𑀚𑀸𑀬𑀢𑀻’’𑀢𑀺 (𑀧𑀸𑀭𑀸. 𑁧𑁦𑁪) 𑀏𑀯𑀫𑀸𑀕𑀢𑁂 𑀔𑁂𑀢𑁆𑀢𑁂𑀧𑀺 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀚𑀸𑀦’’𑀦𑁆𑀢𑀺𑀆𑀤𑀺. 𑀚𑀸𑀦𑀦𑁆𑀢𑀺 𑀧𑀭𑀲𑀦𑁆𑀢𑀓𑀪𑀸𑀯𑀁 𑀚𑀸𑀦𑀦𑁆𑀢𑁄. 𑀔𑀻𑀮𑀦𑁆𑀢𑀺 𑀅𑀧𑁆𑀧𑀺𑀢𑀓𑁆𑀔𑀭𑀁 𑀯𑀸 𑀇𑀢𑀭𑀁 𑀯𑀸 𑀧𑀸𑀲𑀸𑀡𑀸𑀤𑀺𑀔𑀻𑀮𑀁. 𑀲𑀗𑁆𑀓𑀸𑀫𑁂𑀢𑀻𑀢𑀺 𑀧𑀭𑀸𑀬𑀢𑁆𑀢𑀪𑀽𑀫𑀺𑀁 𑀲𑀸𑀫𑀺𑀓𑀸 𑀬𑀣𑀸 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀯𑀸 𑀅𑀜𑁆𑀜𑀣𑀸 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀸𑀢𑀼𑀓𑀸𑀫𑀢𑀸𑀬 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀬𑀣𑀸 𑀲𑀲𑀦𑁆𑀢𑀓𑀁 𑀳𑁄𑀢𑀺, 𑀢𑀣𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀦𑀺𑀔𑀡𑀢𑀻𑀢𑀺 𑀅𑀢𑁆𑀣𑁄.

𑁧𑁬𑁧. 𑀢𑀁 𑀧𑀸𑀭𑀸𑀚𑀺𑀓𑀢𑁆𑀢𑀁 𑀢𑀲𑁆𑀲 𑀓𑀤𑀸 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀫𑀺𑀓𑀸𑀦𑀁 𑀢𑀼 𑀥𑀼𑀭𑀦𑀺𑀓𑁆𑀔𑁂𑀧𑀦𑁂 𑀲𑀢𑀻’’𑀢𑀺. ‘‘𑀳𑁄𑀢𑀻’’𑀢𑀺 𑀧𑀸𑀞𑀲𑁂𑀲𑁄. 𑀢𑀼-𑀲𑀤𑁆𑀤𑁂𑀦 ‘‘𑀅𑀢𑁆𑀢𑀦𑁄 𑀯𑀸’’𑀢𑀺 𑀯𑀺𑀲𑁂𑀲𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀸𑀫𑀺𑀦𑁄 𑀦𑀺𑀭𑀸𑀮𑀬𑀪𑀸𑀯𑀲𑀗𑁆𑀔𑀸𑀢𑀥𑀼𑀭𑀦𑀺𑀓𑁆𑀔𑁂𑀧𑁂 𑀘 ‘‘𑀲𑀸𑀫𑀺𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑁂 𑀘 𑀢𑀲𑁆𑀲 𑀧𑀸𑀭𑀸𑀚𑀺𑀓𑀢𑁆𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀼𑀤𑀻𑀭𑀺𑀢𑀦𑁆𑀢𑀺 ‘‘𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀻’’𑀢𑀺 𑀏𑀯𑀁 𑀦𑀺𑀬𑀫𑀺𑀢𑀁 𑀓𑀣𑀺𑀢𑀁.

𑁧𑁬𑁨. 𑀬𑀸 𑀧𑀦𑀸𑀢𑀺 𑀬𑀸 𑀪𑀽𑀫𑀺 𑀧𑀦. 𑀢𑁂𑀲𑀼 𑀤𑁆𑀯𑀻𑀲𑀼 𑀔𑀻𑀮𑁂𑀲𑀼. 𑀆𑀤𑁄 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀧𑀞𑀫𑁂 𑀔𑀻𑀮𑁂 𑀲𑀗𑁆𑀓𑀸𑀫𑀺𑀢𑁂 𑀲𑁄 𑀪𑀺𑀓𑁆𑀔𑀼 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀤𑀼𑀢𑀺𑀬𑁂𑀢𑀺 𑀤𑀼𑀢𑀺𑀬𑁂 𑀔𑀻𑀮𑁂 𑀲𑀗𑁆𑀓𑀸𑀫𑀺𑀢𑁂 𑀧𑀭𑀸𑀚𑀬𑁄 ¶ 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀩𑀳𑀽𑀳𑀺 𑀔𑀻𑀮𑁂𑀳𑀺 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑁂 𑀧𑀭𑀺𑀬𑀦𑁆𑀢𑀔𑀻𑀮𑁂𑀲𑀼 𑀤𑁆𑀯𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀘 𑀏𑀢𑁂𑀦𑁂𑀯 𑀯𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀅𑀦𑁆𑀢𑁂 𑀔𑀻𑀮𑀤𑁆𑀯𑀬𑀁 𑀯𑀺𑀦𑀸 𑀅𑀯𑀲𑁂𑀲𑀔𑀻𑀮𑀦𑀺𑀔𑀡𑀦𑁂 𑀘 𑀇𑀢𑀭𑁂𑀲𑀼 𑀢𑀤𑀢𑁆𑀣𑁂𑀲𑀼 𑀲𑀩𑁆𑀩𑀧𑀬𑁄𑀕𑁂𑀲𑀼 𑀘 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀺𑀲𑁂𑀲𑁄.

𑁧𑁬𑁩-𑁪. ‘‘𑀫𑀫𑁂𑀤𑀁 𑀲𑀦𑁆𑀢𑀓’’𑀦𑁆𑀢𑀺 𑀜𑀸𑀧𑁂𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀲𑀦𑁆𑀢𑀓𑀸𑀬 𑀪𑀽𑀫𑀺𑀬𑀸 𑀧𑀭𑀸𑀬𑀢𑁆𑀢𑀪𑀸𑀯𑀁 𑀜𑀢𑁆𑀯𑀸𑀯 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀫𑀫 𑀲𑀦𑁆𑀢𑀓’’𑀦𑁆𑀢𑀺 ¶ 𑀭𑀚𑁆𑀚𑀼𑀬𑀸 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀫𑀺𑀦𑀺𑀢𑁆𑀯𑀸 𑀧𑀭𑀲𑁆𑀲 𑀜𑀸𑀧𑁂𑀢𑀼𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀬𑁂𑀳𑀺 𑀤𑁆𑀯𑀻𑀳𑀺 𑀧𑀬𑁄𑀕𑁂𑀳𑀻𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀓𑁂𑀳𑀺 𑀭𑀚𑁆𑀚𑀼𑀧𑀲𑀸𑀭𑀡𑀬𑀝𑁆𑀞𑀺𑀧𑀸𑀢𑀦𑀸𑀦𑀫𑀜𑁆𑀜𑀢𑀭𑁂𑀳𑀺 𑀤𑁆𑀯𑀻𑀳𑀺 𑀧𑀬𑁄𑀕𑁂𑀳𑀺. 𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁.

𑀇𑀥 𑀭𑀚𑁆𑀚𑀼𑀁 𑀯𑀸𑀧𑀻𑀢𑀺 𑀯𑀺𑀓𑀧𑁆𑀧𑀢𑁆𑀣𑀯𑀸-𑀲𑀤𑁆𑀤𑁂𑀦 ‘‘𑀬𑀝𑁆𑀞𑀺𑀁 𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑁂𑀧𑀺 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑀁 𑀅𑀥𑀺𑀓𑀯𑀘𑀦𑀪𑀸𑀯𑁂𑀦 𑀯𑀼𑀢𑁆𑀢𑀧𑀺-𑀲𑀤𑁆𑀤𑁂𑀦 𑀇𑀥𑀸𑀯𑀼𑀢𑁆𑀢𑀫𑀭𑀺𑀬𑀸𑀤𑀯𑀢𑀻𑀦𑀁 𑀯𑀺𑀦𑀺𑀘𑁆𑀙𑀬𑀲𑁆𑀲 𑀜𑀸𑀧𑀺𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀭𑀚𑁆𑀚𑀼𑀬𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁂𑀲𑀼 𑀯𑀺𑀬 𑀧𑀭𑀲𑀦𑁆𑀢𑀓𑀸𑀬 𑀪𑀽𑀫𑀺𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀯𑀢𑀺𑀧𑀸𑀤𑁂 𑀦𑀺𑀔𑀡𑀺𑀢𑁆𑀯𑀸 𑀯𑀸 𑀲𑀸𑀔𑀸𑀫𑀢𑁆𑀢𑁂𑀦 𑀯𑀸 𑀯𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑀭𑀺𑀬𑀸𑀤𑀁 𑀯𑀸 𑀩𑀦𑁆𑀥𑀦𑁆𑀢𑀲𑁆𑀲 𑀧𑀸𑀓𑀸𑀭𑀁 𑀯𑀸 𑀘𑀺𑀦𑀦𑁆𑀢𑀲𑁆𑀲 𑀧𑀁𑀲𑀼𑀫𑀢𑁆𑀢𑀺𑀓𑀸 𑀯𑀸 𑀯𑀟𑁆𑀠𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀲𑀳𑀧𑀬𑁄𑀕𑁂 𑀓𑁂𑀯𑀮𑀤𑀼𑀓𑁆𑀓𑀝𑀜𑁆𑀘 𑀧𑀘𑁆𑀙𑀺𑀫𑀧𑀬𑁄𑀕𑁂𑀲𑀼 𑀤𑁆𑀯𑀻𑀲𑀼 𑀧𑀞𑀫𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀅𑀯𑀲𑀸𑀦𑀧𑀬𑁄𑀕𑁂 𑀧𑀸𑀭𑀸𑀚𑀺𑀓𑀜𑁆𑀘 𑀳𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀔𑁂𑀢𑁆𑀢𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁬𑁫. 𑀯𑀢𑁆𑀣𑀝𑁆𑀞𑀸𑀤𑀻𑀲𑀼 𑀯𑀢𑁆𑀣𑀝𑁆𑀞𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀯𑀢𑁆𑀣𑀼 𑀦𑀸𑀫 𑀆𑀭𑀸𑀫𑀯𑀢𑁆𑀣𑀼 𑀯𑀺𑀳𑀸𑀭𑀯𑀢𑁆𑀣𑀽’’𑀢𑀺 (𑀧𑀸𑀭𑀸. 𑁧𑁦𑁫) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀸𑀤𑀺𑀆𑀭𑀸𑀫𑁂 ¶ 𑀓𑀸𑀢𑀼𑀁 𑀲𑀗𑁆𑀔𑀭𑀺𑀢𑁆𑀯𑀸 𑀞𑀧𑀺𑀢𑀪𑀽𑀫𑀺 𑀘 𑀧𑀼𑀩𑁆𑀩𑀓𑀢𑀸𑀭𑀸𑀫𑀸𑀦𑀁 𑀯𑀺𑀦𑀸𑀲𑁂 𑀢𑀼𑀘𑁆𑀙𑀪𑀽𑀫𑀺 𑀘 𑀯𑀺𑀳𑀸𑀭𑀁 𑀓𑀸𑀢𑀼𑀁 𑀅𑀪𑀺𑀲𑀗𑁆𑀔𑀢𑀸 𑀪𑀽𑀫𑀺 𑀘 𑀦𑀝𑁆𑀞𑀯𑀺𑀳𑀸𑀭𑀪𑀽𑀫𑀺 𑀘𑀸𑀢𑀺 𑀏𑀯𑀁 𑀯𑀺𑀪𑀸𑀕𑀯𑀢𑀺 𑀯𑀲𑀢𑀺 𑀏𑀢𑁆𑀣 𑀉𑀧𑀭𑁄𑀧𑁄 𑀯𑀸 𑀯𑀺𑀳𑀸𑀭𑁄 𑀯𑀸𑀢𑀺 ‘‘𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺 𑀇𑀘𑁆𑀘𑁂𑀯𑀁 𑀤𑀼𑀯𑀺𑀥𑀁 𑀯𑀢𑁆𑀣𑀼𑀜𑁆𑀘 ‘‘𑀯𑀢𑁆𑀣𑀼𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀯𑀢𑁆𑀣𑀼𑀲𑁆𑀫𑀺𑀁 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺 𑀪𑀽𑀫𑀝𑁆𑀞𑀁 𑀣𑀮𑀝𑁆𑀞𑀁 𑀆𑀓𑀸𑀲𑀝𑁆𑀞𑀁 𑀯𑁂𑀳𑀸𑀲𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑁧𑁦𑁫) 𑀯𑀘𑀦𑀢𑁄 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀪𑀡𑁆𑀟𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀯𑀢𑁆𑀣𑀼 𑀘 𑀯𑀢𑁆𑀣𑀼𑀝𑁆𑀞𑀜𑁆𑀘 𑀯𑀢𑁆𑀣𑀼𑀯𑀢𑁆𑀣𑀼𑀝𑁆𑀞𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀲𑀫𑀸𑀲𑁂𑀢𑁆𑀯𑀸, 𑀉-𑀓𑀸𑀭𑀲𑁆𑀲 𑀘 𑀅𑀓𑀸𑀭𑀁 𑀓𑀢𑁆𑀯𑀸 ‘‘𑀯𑀢𑁆𑀣𑀝𑁆𑀞𑀲𑁆𑀲𑀸’’𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀤𑀼𑀯𑀺𑀥𑀯𑀢𑁆𑀣𑀼𑀦𑁄, 𑀯𑀢𑁆𑀣𑀝𑁆𑀞𑀲𑁆𑀲 𑀘 𑀪𑀡𑁆𑀟𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀔𑁂𑀢𑁆𑀢𑀝𑁆𑀞𑁂𑀢𑀺 𑀏𑀢𑁆𑀣𑀸𑀧𑀺 𑀅𑀬𑀫𑁂𑀯 𑀲𑀫𑀸𑀲𑁄𑀢𑀺 𑀔𑁂𑀢𑁆𑀢𑁂 𑀘 𑀔𑁂𑀢𑁆𑀢𑀝𑁆𑀞𑁂 𑀘𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀸𑀯𑀝𑁆𑀞𑀸𑀤𑀺𑀯𑁄𑀳𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀫𑀝𑁆𑀞𑁂𑀧𑀺 𑀘𑀸𑀢𑀺 ‘‘𑀕𑀸𑀫𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀕𑀸𑀫𑁂 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺 𑀪𑀽𑀫𑀝𑁆𑀞𑀁…𑀧𑁂… 𑀯𑁂𑀳𑀸𑀲𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑁧𑁦𑁬) 𑀯𑀼𑀢𑁆𑀢𑁂 𑀘𑀢𑀼𑀩𑁆𑀩𑀺𑀥𑁂 𑀕𑀸𑀫𑀝𑁆𑀞𑀪𑀡𑁆𑀟𑁂𑀧𑀻𑀢𑀺 𑀅𑀢𑁆𑀣𑁄.

𑀯𑀢𑁆𑀣𑀝𑁆𑀞𑀕𑀸𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁬𑁬. 𑀅𑀭𑀜𑁆𑀜𑀝𑁆𑀞𑀓𑀣𑀸𑀬𑀁 ¶ ‘‘𑀢𑀺𑀡𑀁 𑀯𑀸’’𑀢𑀺𑀆𑀤𑀺𑀧𑀤𑀸𑀦𑀁 ‘‘𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀚𑀸𑀢𑀓𑀦𑁆𑀢𑀺 ‘‘𑀅𑀭𑀜𑁆𑀜𑀁 𑀦𑀸𑀫 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀯𑀘𑀦𑀢𑁄 𑀢𑀢𑁆𑀣𑀚𑀸𑀢𑀁 𑀬𑀁 𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑀲𑀦𑁆𑀢𑀓𑀁 𑀲𑀸𑀫𑀺𑀓𑀸𑀦𑀁 𑀅𑀓𑀸𑀫𑀸 𑀅𑀕𑀳𑁂𑀢𑀩𑁆𑀩𑀢𑁄 𑀲𑀸𑀭𑀓𑁆𑀔𑁂 𑀅𑀭𑀜𑁆𑀜𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀡𑀁 𑀯𑀸𑀢𑀺 𑀧𑀭𑁂𑀳𑀺 𑀮𑀸𑀬𑀺𑀢𑁆𑀯𑀸 𑀞𑀧𑀺𑀢𑀁 𑀯𑀸 𑀅𑀢𑁆𑀢𑀦𑀸 𑀮𑀸𑀬𑀺𑀢𑀩𑁆𑀩𑀁 𑀯𑀸 𑀕𑁂𑀳𑀘𑁆𑀙𑀸𑀤𑀦𑀸𑀭𑀳𑀁 𑀢𑀺𑀡𑀁 𑀯𑀸. 𑀧𑀡𑁆𑀡𑀁 𑀯𑀸𑀢𑀺 𑀏𑀯𑀭𑀽𑀧𑀫𑁂𑀯 𑀕𑁂𑀳𑀘𑁆𑀙𑀸𑀤𑀦𑀸𑀭𑀳𑀁 𑀢𑀸𑀮𑀧𑀡𑁆𑀡𑀸𑀤𑀺𑀧𑀡𑁆𑀡𑀁 𑀯𑀸. 𑀮𑀢𑀁 𑀯𑀸𑀢𑀺 𑀢𑀣𑀸𑀭𑀽𑀧𑀫𑁂𑀯 𑀯𑁂𑀢𑁆𑀢𑀮𑀢𑀸𑀤𑀺𑀓𑀁 𑀯𑀮𑁆𑀮𑀺𑀁 𑀯𑀸. 𑀬𑀸 𑀧𑀦 𑀤𑀻𑀖𑀸 𑀳𑁄𑀢𑀺 ¶ , 𑀫𑀳𑀸𑀭𑀼𑀓𑁆𑀔𑁂 𑀘 𑀕𑀘𑁆𑀙𑁂 𑀘 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀸 𑀯𑁂𑀞𑁂𑀢𑁆𑀯𑀸 𑀯𑀸 𑀕𑀢𑀸, 𑀲𑀸 𑀫𑀽𑀮𑁂 𑀙𑀺𑀦𑁆𑀦𑀸𑀧𑀺 𑀅𑀯𑀳𑀸𑀭𑀁 𑀦 𑀚𑀦𑁂𑀢𑀺, 𑀅𑀕𑁆𑀕𑁂 𑀙𑀺𑀦𑁆𑀦𑀸𑀧𑀺. 𑀬𑀤𑀸 𑀧𑀦 𑀅𑀕𑁆𑀕𑁂𑀧𑀺 𑀫𑀽𑀮𑁂𑀧𑀺 𑀙𑀺𑀦𑁆𑀦𑀸 𑀳𑁄𑀢𑀺, 𑀢𑀤𑀸 𑀅𑀯𑀳𑀸𑀭𑀁 𑀚𑀦𑁂𑀢𑀺. 𑀲𑀘𑁂 𑀧𑀦 𑀯𑁂𑀞𑁂𑀢𑁆𑀯𑀸 𑀞𑀺𑀢𑀸 𑀳𑁄𑀢𑀺, 𑀯𑁂𑀞𑁂𑀢𑁆𑀯𑀸 𑀞𑀺𑀢𑀸 𑀧𑀦 𑀭𑀼𑀓𑁆𑀔𑀢𑁄 𑀫𑁄𑀘𑀺𑀢𑀫𑀢𑁆𑀢𑀸 𑀅𑀯𑀳𑀸𑀭𑀁 𑀚𑀦𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑀸𑀫𑀺𑀓𑁂𑀦 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀮𑀬𑀁 𑀙𑀮𑁆𑀮𑀺𑀯𑀸𑀓𑀸𑀤𑀺𑀅𑀯𑀲𑁂𑀲𑀪𑀡𑁆𑀟𑀜𑁆𑀘 𑀇𑀫𑀺𑀦𑀸𑀯 𑀉𑀧𑀮𑀓𑁆𑀔𑀺𑀢𑁆𑀯𑀸 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀝𑁆𑀞𑀫𑁂𑀯 𑀯𑀸𑀢𑀺 𑀤𑀸𑀭𑀼𑀁 𑀯𑀸. 𑀪𑀡𑁆𑀟𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀅𑀦𑁆𑀢𑁄𑀪𑀽𑀢𑀳𑁂𑀢𑀼𑀢𑁆𑀣𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺. 𑀅𑀯𑀳𑀝𑀢𑀺𑀡𑀸𑀤𑀺𑀪𑀡𑁆𑀟𑁂𑀲𑀼 𑀅𑀕𑁆𑀖𑀯𑀲𑁂𑀦 𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀤𑀼𑀓𑁆𑀓𑀝𑀁. 𑀅𑀢𑀺𑀭𑁂𑀓𑀫𑀸𑀲𑀓𑀁 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀸𑀭𑀸𑀚𑀺𑀓𑀁 𑀘𑁂 𑀅𑀦𑀸𑀧𑀦𑁆𑀦𑁄, 𑀆𑀫𑀲𑀦𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑀦𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀕𑀡𑁆𑀳𑀦𑁆𑀢𑁄𑀢𑀺 𑀅𑀯𑀳𑀭𑀦𑁆𑀢𑁄.

𑁧𑁬𑁭-𑁭𑁪. 𑀇𑀤𑀸𑀦𑀺 ‘‘𑀓𑀝𑁆𑀞𑀫𑁂𑀯 𑀯𑀸’’𑀢𑀺 𑀯𑀼𑀢𑁆𑀢𑀭𑀼𑀓𑁆𑀔𑀤𑀸𑀭𑀽𑀲𑀼 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀳𑀕𑁆𑀖𑁂’’𑀢𑀺𑀆𑀤𑀺. 𑀫𑀳𑀕𑁆𑀖𑁂𑀢𑀺 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀓𑀁 𑀳𑀼𑀢𑁆𑀯𑀸 𑀫𑀳𑀕𑁆𑀖𑁂. 𑀦𑀲𑁆𑀲𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀙𑀺𑀦𑁆𑀦𑀫𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀧𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. ‘‘𑀓𑁄𑀘𑀺𑀧𑀻’’𑀢𑀺 𑀇𑀫𑀺𑀦𑀸 𑀅𑀤𑁆𑀥𑀕𑀢𑁄𑀧𑀺 𑀅𑀮𑁆𑀮𑀁 𑀯𑀸 𑀳𑁄𑀢𑀼 𑀧𑀼𑀭𑀸𑀡𑀁 𑀯𑀸, 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀫𑀽𑀮𑁂𑀢𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. ‘‘𑀅𑀕𑁆𑀕𑁂 𑀘 𑀫𑀽𑀮𑁂 𑀘 𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀫𑀽𑀮𑀜𑁆𑀘 𑀅𑀕𑁆𑀕𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀕𑀳𑁂𑀢𑀩𑁆𑀩𑁄. 𑀅𑀤𑁆𑀥𑀕𑀢𑀦𑁆𑀢𑀺 𑀚𑀺𑀡𑁆𑀡𑀕𑀴𑀺𑀢𑀧𑀢𑀺𑀢𑀢𑀘𑀁, 𑀘𑀺𑀭𑀓𑀸𑀮𑀁 𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀮𑀓𑁆𑀔𑀡𑁂𑀢𑀺 ¶ 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀜𑀸𑀧𑁂𑀢𑀼𑀁 𑀭𑀼𑀓𑁆𑀔𑀓𑁆𑀔𑀦𑁆𑀥𑁂 𑀢𑀘𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀲𑀮𑁆𑀮𑀓𑁆𑀔𑀡𑁂. 𑀙𑀮𑁆𑀮𑀺𑀬𑁄𑀦𑀤𑁆𑀥𑁂𑀢𑀺 ¶ 𑀲𑀫𑀦𑁆𑀢𑀢𑁄 𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀸𑀳𑀺 𑀙𑀮𑁆𑀮𑀻𑀳𑀺 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀅𑀤𑀲𑁆𑀲𑀦𑀁 𑀕𑀫𑀺𑀢𑁂. 𑀅𑀚𑁆𑀛𑀸𑀯𑀼𑀢𑁆𑀣𑀜𑁆𑀘𑀸𑀢𑀺 𑀏𑀢𑁆𑀣 ‘‘𑀕𑁂𑀳’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀕𑁂𑀳𑀁 𑀓𑀢𑀜𑁆𑀘 𑀅𑀚𑁆𑀛𑀸𑀯𑀼𑀢𑁆𑀣𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀕𑁂𑀳𑀁 𑀓𑀸𑀢𑀼𑀁 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀫𑀽𑀮𑀁 𑀤𑀢𑁆𑀯𑀸 𑀭𑀼𑀓𑁆𑀔𑁂 𑀓𑀺𑀡𑀺𑀢𑁆𑀯𑀸 𑀙𑀺𑀦𑁆𑀦𑀤𑀸𑀭𑀽𑀳𑀺 𑀢𑀁 𑀕𑁂𑀳𑀁 𑀓𑀢𑀜𑁆𑀘 𑀧𑀭𑀺𑀪𑀼𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀲𑁆𑀲𑀦𑁆𑀢𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀯𑀲𑀺𑀝𑁆𑀞𑀁 𑀤𑀸𑀭𑀼’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀢𑀁 𑀕𑁂𑀳𑀁 𑀓𑀢𑁆𑀯𑀸 𑀅𑀯𑀲𑀺𑀝𑁆𑀞𑀁 𑀯𑀲𑁆𑀲𑀸𑀢𑀧𑀸𑀤𑀻𑀳𑀺 𑀯𑀺𑀯𑀺𑀥𑀸 𑀚𑀻𑀭𑀺𑀢𑁆𑀯𑀸 𑀯𑀺𑀦𑀲𑁆𑀲𑀫𑀸𑀦𑀁, 𑀯𑀺𑀧𑀦𑁆𑀦𑀤𑀸𑀭𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀡𑁆𑀳𑀢𑁄 𑀦 𑀤𑁄𑀲𑁄 𑀓𑁄𑀘𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀸𑀫𑀺𑀓𑀸 𑀦𑀺𑀭𑀸𑀮𑀬𑀸’’𑀢𑀺 𑀕𑀡𑁆𑀳𑀢𑁄 𑀓𑀸𑀘𑀺𑀧𑀺 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀁𑀓𑀸𑀭𑀡𑀦𑁆𑀢𑀺 𑀘𑁂? 𑀅𑀭𑀜𑁆𑀜𑀲𑀸𑀫𑀺𑀓𑁂𑀳𑀺 𑀫𑀽𑀮𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀤𑀺𑀦𑁆𑀦𑀢𑁆𑀢𑀸, 𑀢𑁂𑀲𑀜𑁆𑀘 𑀦𑀺𑀭𑀸𑀮𑀬𑀁 𑀙𑀟𑁆𑀟𑀺𑀢𑀢𑁆𑀢𑀸𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀕𑁂𑀳𑀸𑀤𑀻𑀦𑀁 𑀅𑀢𑁆𑀣𑀸𑀬 𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀬𑀤𑀸 𑀢𑀸𑀦𑀺 𑀓𑀢𑀸𑀦𑀺, 𑀅𑀚𑁆𑀛𑀸𑀯𑀼𑀢𑁆𑀣𑀸𑀦𑀺 𑀘 𑀳𑁄𑀦𑁆𑀢𑀺, 𑀤𑀸𑀭𑀽𑀦𑀺𑀧𑀺 𑀅𑀭𑀜𑁆𑀜𑁂 𑀯𑀲𑁆𑀲𑁂𑀦 𑀘 𑀆𑀢𑀧𑁂𑀦 𑀘 𑀯𑀺𑀦𑀲𑁆𑀲𑀦𑁆𑀢𑀺, 𑀈𑀤𑀺𑀲𑀸𑀦𑀺𑀧𑀺 𑀤𑀺𑀲𑁆𑀯𑀸 ‘𑀙𑀟𑁆𑀟𑀺𑀢𑀸𑀦𑀻’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀭𑀜𑁆𑀜𑀲𑀸𑀫𑀺𑀓𑀸 𑀏𑀢𑁂𑀲𑀁 𑀅𑀦𑀺𑀲𑁆𑀲𑀭𑀸. 𑀬𑁂𑀳𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀢𑁆𑀯𑀸 𑀙𑀺𑀦𑁆𑀦𑀸𑀦𑀺, 𑀢𑁂 𑀏𑀯 𑀇𑀲𑁆𑀲𑀭𑀸, 𑀢𑁂𑀳𑀺 𑀘 𑀢𑀸𑀦𑀺 𑀙𑀟𑁆𑀟𑀺𑀢𑀸𑀦𑀺, 𑀦𑀺𑀭𑀸𑀮𑀬𑀸 𑀢𑀢𑁆𑀣 𑀚𑀸𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭). 𑀏𑀯𑀫𑁆𑀧𑀺 𑀲𑀢𑀺 𑀧𑀘𑁆𑀙𑀸 𑀲𑀸𑀫𑀺𑀓𑁂𑀲𑀼 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀬𑁄 𑀘𑀸𑀢𑀺 𑀅𑀭𑀜𑁆𑀜𑀲𑀸𑀫𑀺𑀓𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀯𑀺𑀲𑀦𑁆𑀢𑁄 𑀅𑀤𑀢𑁆𑀯𑀸 ‘‘𑀦𑀺𑀓𑁆𑀔𑀫𑀦𑁆𑀢𑁄 𑀤𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑁂 𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀬𑁄 𑀘 𑀪𑀺𑀓𑁆𑀔𑀼. 𑀆𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸𑀢𑀺 𑀅𑀭𑀜𑁆𑀜𑀧𑀸𑀮𑀓𑀸 𑀬𑀢𑁆𑀣 𑀦𑀺𑀲𑀺𑀦𑁆𑀦𑀸 𑀅𑀭𑀜𑁆𑀜𑀁 𑀭𑀓𑁆𑀔𑀦𑁆𑀢𑀺, 𑀢𑀁 𑀞𑀸𑀦𑀁 𑀧𑀢𑁆𑀯𑀸. ‘‘𑀘𑀺𑀦𑁆𑀢𑁂𑀦𑁆𑀢𑁄’’𑀢𑀺 𑀓𑀺𑀭𑀺𑀬𑀦𑁆𑀢𑀭𑀲𑀸𑀧𑁂𑀓𑁆𑀔𑀢𑁆𑀢𑀸 ‘‘𑀅𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀢𑁄 ¶ 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀘𑀺𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀓𑀸𑀭𑀢𑁆𑀣𑁂𑀦 𑀓𑀼𑀲𑀮𑀧𑀓𑁆𑀔𑀺𑀬𑀸 𑀯𑀺𑀢𑀓𑁆𑀓𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀸 𑀆𑀭𑀓𑁆𑀔𑀦𑀝𑁆𑀞𑀸𑀦𑀁 𑀧𑀢𑁆𑀯𑀸𑀬𑁂𑀯 𑀅𑀢𑀺𑀓𑁆𑀓𑀸𑀫𑁂𑀬𑁆𑀬𑀸𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀸𑀢𑀺 𑀅𑀜𑁆𑀜𑀁 𑀯𑀺𑀳𑀺𑀢𑁄 𑀯𑀸, 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀯𑀺𑀢𑀓𑁆𑀓𑀸𑀦𑀁 𑀲𑀗𑁆𑀕𑀳𑁄. 𑀅𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀤𑁂𑀬𑁆𑀬’’𑀦𑁆𑀢𑀺 𑀓𑀺𑀢𑀬𑁄𑀕𑁂 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀢𑁆𑀢𑀸 𑀅𑀦𑁂𑀦𑀸𑀢𑀺 𑀅𑀢𑁆𑀣𑁄.

‘‘𑀬𑁄𑀘𑀸’’𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀲𑀤𑁆𑀤𑁂𑀦 𑀅𑀭𑀜𑁆𑀜𑀧𑀯𑀺𑀲𑀦𑀓𑀸𑀮𑁂 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀫𑀽𑀮𑀁 𑀅𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 ‘‘𑀅𑀭𑀜𑁆𑀜𑀧𑀸𑀮𑀓𑀸 𑀲𑀘𑁂 𑀬𑀸𑀘𑀦𑁆𑀢𑀺, 𑀤𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀅𑀬𑀸𑀘𑀺𑀢𑀢𑁆𑀢𑀸 𑀅𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀢𑀣𑁂𑀯 𑀆𑀕𑀦𑁆𑀢𑁆𑀯𑀸 𑀆𑀭𑀓𑁆𑀔𑀓𑁂𑀲𑀼 ¶ 𑀓𑀻𑀴𑀸𑀧𑀲𑀼𑀢𑁂𑀲𑀼 𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁂𑀲𑀼 𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂𑀲𑀼 𑀯𑀸 𑀢𑀢𑁆𑀣 𑀞𑀢𑁆𑀯𑀸 𑀆𑀭𑀓𑁆𑀔𑀓𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀢𑀣𑁂𑀯 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀬𑀼𑀢𑁆𑀢𑀇𑀲𑁆𑀲𑀭𑀚𑀦𑁂𑀳𑀺 𑀅𑀢𑁆𑀢𑀦𑁄 𑀳𑀢𑁆𑀣𑀢𑁄 𑀤𑀸𑀢𑀩𑁆𑀩𑀁 𑀤𑀢𑁆𑀯𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀯𑀸 𑀧𑀸𑀮𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀯𑀸 𑀧𑀸𑀮𑀓𑁂 𑀑𑀓𑀸𑀲𑀁 𑀬𑀸𑀘𑀺𑀢𑁆𑀯𑀸 𑀢𑁂𑀳𑀺 𑀤𑀺𑀦𑁆𑀦𑁄𑀓𑀸𑀲𑁄 𑀯𑀸 𑀕𑀘𑁆𑀙𑀦𑁆𑀢𑁄𑀧𑀻𑀢𑀺 𑀏𑀢𑁆𑀢𑀓𑀸 𑀯𑀼𑀢𑁆𑀢𑁂𑀦 𑀲𑀤𑀺𑀲𑀢𑁆𑀢𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀯𑀭𑀸𑀳𑀸𑀢𑀺 𑀲𑀽𑀓𑀭𑀸. 𑀯𑀕𑁆𑀖𑀸𑀢𑀺 𑀩𑁆𑀬𑀕𑁆𑀖𑀸. 𑀅𑀘𑁆𑀙𑀸𑀢𑀺 𑀇𑀲𑁆𑀲𑀸. 𑀢𑀭𑀘𑁆𑀙𑀸𑀢𑀺 𑀓𑀸𑀴𑀲𑀻𑀳𑀸. 𑀆𑀤𑀺-𑀲𑀤𑁆𑀤𑁂𑀦 𑀤𑀻𑀧𑀺𑀫𑀢𑁆𑀢𑀳𑀢𑁆𑀣𑀺𑀲𑀻𑀳𑀸𑀤𑀬𑁄 𑀯𑀸𑀴𑀫𑀺𑀕𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀏𑀢𑁂𑀬𑁂𑀯 𑀯𑀭𑀸𑀳𑀸𑀤𑀬𑁄 𑀲𑀫𑀸𑀕𑀫𑀯𑀲𑁂𑀦 𑀫𑀭𑀡𑀸𑀤𑀺𑀅𑀦𑀺𑀝𑁆𑀞𑀲𑀫𑀻𑀧𑀘𑀸𑀭𑀺𑀢𑀸𑀬 𑀉𑀧 𑀅𑀦𑀺𑀝𑁆𑀞𑀲𑀫𑀻𑀧𑁂 𑀤𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 ‘‘𑀉𑀧𑀤𑁆𑀤𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀭𑀓𑁆𑀔𑀝𑁆𑀞𑀸𑀦𑀁 𑀆𑀕𑀢𑀓𑀸𑀮𑁂 𑀤𑀺𑀝𑁆𑀞𑀯𑀭𑀸𑀳𑀸𑀤𑀺𑀉𑀧𑀤𑁆𑀤𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀬𑀸𑀢𑀺 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 𑀧𑀯𑀺𑀲𑀦𑀓𑀸𑀮𑁂 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀢𑁆𑀯𑀸 ‘‘𑀦𑀺𑀓𑁆𑀔𑀫𑀦𑀓𑀸𑀮𑁂 𑀤𑀲𑁆𑀲𑀸𑀫𑀻’’𑀢𑀺 ¶ 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀼𑀁 𑀕𑀳𑁂𑀢𑁆𑀯𑀸 𑀆𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀢𑁄𑀢𑀺 𑀧𑀼𑀭𑀺𑀫𑀕𑀸𑀣𑀸𑀬 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀫𑀸𑀦𑁄𑀬𑁂𑀯𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀁 𑀞𑀸𑀦𑀦𑁆𑀢𑀺 𑀢𑀁 𑀆𑀭𑀓𑁆𑀔𑀝𑁆𑀞𑀸𑀦𑀁. 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 ‘‘𑀇𑀤𑀁 𑀢𑀁 𑀞𑀸𑀦’’𑀦𑁆𑀢𑀺𑀧𑀺 𑀅𑀲𑀮𑁆𑀮𑀓𑁆𑀔𑀡𑀫𑀢𑁆𑀢𑀪𑀬𑀼𑀧𑀤𑁆𑀤𑀯𑁄 𑀳𑀼𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀅𑀢𑀺𑀓𑁆𑀓𑀫𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀲𑀼𑀗𑁆𑀓𑀖𑀸𑀢𑀢𑁄𑀢𑀺 𑀏𑀢𑁆𑀣𑀸𑀧𑀺 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀲𑀼𑀗𑁆𑀓𑀕𑀳𑀡𑀝𑁆𑀞𑀸𑀦𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀲𑀼𑀗𑁆𑀓𑀲𑁆𑀲 𑀭𑀜𑁆𑀜𑁄 𑀤𑀸𑀢𑀩𑁆𑀩𑀪𑀸𑀕𑀲𑁆𑀲 𑀖𑀸𑀢𑁄 𑀫𑀼𑀲𑀺𑀢𑁆𑀯𑀸 𑀕𑀳𑀡𑀫𑀢𑁆𑀢𑁄, 𑀲𑀼𑀗𑁆𑀓𑁄 𑀳𑀜𑁆𑀜𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀼𑀗𑁆𑀓𑀖𑀸𑀢𑁄𑀢𑀺 𑀯𑀺𑀕𑁆𑀕𑀳𑁄. 𑀲𑀼𑀗𑁆𑀓𑀖𑀸𑀢𑀲𑀭𑀽𑀧𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸𑀢𑀺 𑀲𑀼𑀗𑁆𑀓𑀖𑀸𑀢𑀢𑁄 𑀢𑀲𑁆𑀲 𑀕𑀭𑀼𑀓𑀢𑁆𑀢𑀸 𑀏𑀯. 𑀢𑀦𑁆𑀢𑀺 𑀢𑀁 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑀁. 𑀅𑀦𑁄𑀓𑁆𑀓𑀫𑁆𑀫 𑀕𑀘𑁆𑀙𑀢𑁄𑀢𑀺 𑀅𑀧𑀯𑀺𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲. 𑀤𑀼𑀓𑁆𑀓𑀝𑀁 𑀉𑀤𑁆𑀤𑀺𑀝𑁆𑀞𑀁 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁩).

𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀆𑀭𑀓𑁆𑀔𑀝𑁆𑀞𑀸𑀦𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀦𑁆𑀢𑀲𑁆𑀲𑀸𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀺𑀢𑁆𑀯𑀸 𑀤𑀽𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲. 𑀆𑀓𑀸𑀲𑁂𑀦𑀧𑀺 𑀕𑀘𑁆𑀙𑀢𑁄 𑀧𑀸𑀭𑀸𑀚𑀺𑀓𑀫𑀦𑀼𑀤𑁆𑀤𑀺𑀝𑁆𑀞𑀁 𑀲𑀢𑁆𑀣𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀦𑀼 𑀘 ‘‘𑀇𑀤𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀳𑀭𑀦𑁆𑀢𑀲𑁆𑀲 𑀆𑀓𑀸𑀲𑁂𑀦 𑀕𑀘𑁆𑀙𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀁 𑀯𑀺𑀦𑀸 𑀧𑀸𑀴𑀺𑀬𑀁 ‘‘𑀅𑀭𑀜𑁆𑀜𑀝𑁆𑀞’’𑀦𑁆𑀢𑀺 𑀫𑀸𑀢𑀺𑀓𑀸𑀧𑀤𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸 𑀢𑀺𑀡𑀁 𑀯𑀸 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 ¶ 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁦𑁬) 𑀲𑀸𑀫𑀜𑁆𑀜𑀯𑀘𑀦𑀢𑁄 𑀲𑀼𑀗𑁆𑀓𑀖𑀸𑀢𑁂 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀁 𑀯𑀺𑀬 𑀏𑀢𑁆𑀣 𑀆𑀭𑀓𑁆𑀔𑀝𑁆𑀞𑀸𑀦𑀁 ¶ 𑀧𑀭𑀺𑀳𑀭𑀦𑁆𑀢𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀘𑀦𑁂 𑀅𑀲𑀢𑀺𑀧𑀺 ‘‘𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀲𑀢𑁆𑀣𑀼𑀦𑀸’’𑀢𑀺 𑀓𑀲𑁆𑀫𑀸 𑀆𑀳𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀢𑀣𑁂𑀯 𑀯𑀼𑀢𑁆𑀢𑀢𑁆𑀢𑀸 𑀆𑀳. 𑀓𑀲𑁆𑀫𑀸 𑀧𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 ‘‘𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀸𑀫, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 (𑀧𑀸𑀭𑀸. 𑁫𑁬𑁫) 𑀧𑀸𑀴𑀺𑀧𑀸𑀞𑀁 𑀚𑀸𑀦𑀦𑁆𑀢𑁂𑀦𑀧𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀪𑀺𑀓𑁆𑀔𑀽𑀳𑀺 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀬 𑀆𑀕𑀢𑀢𑁆𑀢𑀸 𑀢𑀲𑁆𑀲𑁂𑀯 𑀦𑀬𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑀁 𑀚𑀸𑀦𑀦𑁆𑀢𑁂𑀦 𑀇𑀫𑀺𑀦𑀸𑀧𑀺 𑀆𑀘𑀭𑀺𑀬𑁂𑀦 𑀇𑀥 ‘‘𑀲𑀢𑁆𑀣𑀼𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀅𑀣 𑀯𑀸 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀆𑀭𑀓𑁆𑀔𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁂 𑀅𑀯𑀘𑀦𑀁 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑀲𑁆𑀲 𑀅𑀤𑀺𑀝𑁆𑀞𑀪𑀸𑀯𑁂𑀦 𑀯𑀸 𑀲𑀺𑀬𑀸, 𑀇𑀫𑀲𑁆𑀲 𑀢𑀣𑀸 𑀅𑀦𑀯𑀚𑁆𑀚𑀢𑀸 𑀯𑀸 𑀲𑀺𑀬𑀸, 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀸 𑀲𑀺𑀬𑀸𑀢𑀺 𑀢𑀬𑁄 𑀯𑀺𑀓𑀧𑁆𑀧𑀸. 𑀢𑁂𑀲𑀼 𑀧𑀞𑀫𑀯𑀺𑀓𑀧𑁆𑀧𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑀩𑀸𑀥𑀦𑀢𑁄 𑀤𑀼𑀩𑁆𑀩𑀺𑀓𑀧𑁆𑀧𑀫𑀢𑁆𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀮𑁄𑀓𑀯𑀚𑁆𑀚𑀲𑁆𑀲 𑀇𑀫𑀲𑁆𑀲 𑀅𑀦𑀯𑀚𑁆𑀚𑀪𑀸𑀯𑁄 𑀦𑀸𑀫 𑀅𑀦𑀼𑀧𑀧𑀦𑁆𑀦𑁄𑀢𑀺 𑀅𑀦𑀸𑀤𑀸𑀢𑀩𑁆𑀩𑁄. 𑀧𑀸𑀭𑀺𑀲𑁂𑀲𑀢𑁄 𑀢𑀢𑀺𑀬𑀯𑀺𑀓𑀧𑁆𑀧𑁄 𑀬𑀼𑀚𑁆𑀚𑀢𑀺.

𑀢𑀢𑁆𑀣 ‘‘𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸’’𑀢𑀺 𑀓𑀺𑀫𑁂𑀢𑁆𑀣 𑀯𑀼𑀢𑁆𑀢𑀁 𑀦𑀸𑀫, 𑀢𑀤𑀦𑀼𑀲𑀸𑀭𑁂𑀦 𑀇𑀫𑀲𑁆𑀲𑀸𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀸 𑀓𑀣𑀦𑁆𑀢𑀺 𑀘𑁂? 𑀧𑀞𑀫𑀦𑀺𑀤𑁆𑀤𑀺𑀝𑁆𑀞𑁂 𑀅𑀭𑀜𑁆𑀜𑀝𑁆𑀞𑀦𑀺𑀤𑁆𑀤𑁂𑀲𑁂 𑀲𑀸𑀫𑀜𑁆𑀜𑁂𑀦 ‘‘𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁦𑁬) 𑀇𑀤𑀁 𑀯𑀼𑀢𑁆𑀢𑀁, 𑀦 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀭𑀓𑁆𑀔𑀝𑁆𑀞𑀸𑀦𑀧𑀭𑀺𑀳𑀭𑀡𑀜𑁆𑀘. ‘‘𑀕𑀫𑀦𑀓𑀸𑀮𑁂 ‘𑀫𑀽𑀮𑀁 𑀤𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀧𑀼𑀩𑁆𑀩𑀧𑀭𑀺𑀓𑀧𑁆𑀧𑀺𑀢𑀦𑀺𑀬𑀸𑀫𑁂𑀦 𑀅𑀤𑀢𑁆𑀯𑀸 𑀕𑀘𑁆𑀙𑀢𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄𑀯 𑀳𑁄𑀢𑀻’’𑀢𑀺 𑀘 ‘‘𑀢𑀁 𑀧𑀦 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀧𑀳𑀸𑀬 𑀕𑀫𑀦𑀁 𑀞𑀸𑀦𑀸𑀘𑀸𑀯𑀦𑀁 𑀦𑀸𑀫 𑀳𑁄𑀢𑁂𑀯𑀸𑀢𑀺 𑀢𑁂𑀦 𑀯𑀢𑁆𑀣𑀼𑀦𑀸 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀻’’𑀢𑀺 ¶ 𑀘 ‘‘𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺 𑀇𑀫𑀺𑀦𑀸 𑀘 𑀯𑀺𑀜𑁆𑀜𑀸𑀢𑀢𑁆𑀣𑀫𑁂𑀯 𑀳𑁄𑀢𑀻’’𑀢𑀺 𑀘 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀲𑀼𑀗𑁆𑀓𑀝𑁆𑀞𑀸𑀦𑀧𑀭𑀺𑀳𑀭𑀡𑀁 𑀧𑀦 𑀞𑀸𑀦𑀧𑀭𑀺𑀳𑀭𑀡𑀲𑀪𑀸𑀯𑀢𑁆𑀢𑀸 𑀲𑀪𑀸𑀯𑀢𑁄 𑀈𑀤𑀺𑀲𑀁𑀯 𑀲𑀦𑁆𑀢𑀫𑁆𑀧𑀺 𑀇𑀤𑀁 𑀯𑀺𑀬 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀯𑀓𑁆𑀔𑀫𑀸𑀦𑀭𑀸𑀚𑀲𑀫𑁆𑀫𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀲𑀫𑀸𑀦𑀫𑁆𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦 𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀯𑀺𑀬 𑀧𑀸𑀭𑀸𑀚𑀺𑀓𑀸𑀬 𑀅𑀯𑀢𑁆𑀣𑀼𑀢𑀜𑁆𑀘 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀢𑁆𑀣𑀼𑀪𑀸𑀯𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀲𑀼𑀗𑁆𑀓𑀁 𑀧𑀭𑀺𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀼𑀦𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 ‘‘𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁭) 𑀯𑀼𑀢𑁆𑀢𑀢𑁆𑀢𑀸 ¶ 𑀢𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀻𑀳𑀸𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 𑀅𑀬𑀫𑀸𑀘𑀭𑀺𑀬𑁄𑀧𑀺 ‘‘𑀲𑀢𑁆𑀣𑀼𑀦𑀸 𑀧𑀸𑀭𑀸𑀚𑀺𑀓𑀫𑀦𑀼𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀆𑀳𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀽𑀭𑀢𑁄 𑀯𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀢𑀸𑀬 𑀅𑀘𑁆𑀘𑀦𑁆𑀢𑀪𑀸𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑀸𑀭𑀓𑁆𑀔𑀝𑁆𑀞𑀸𑀦𑁂. ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀇𑀤𑀁 ‘‘𑀅𑀧𑁆𑀧𑀫𑀢𑁆𑀢𑁂𑀦 𑀳𑁄𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀳𑁂𑀢𑀼𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑀸𑀢𑀺 𑀘 𑀧𑀺𑀬𑀲𑀻𑀮𑁂𑀦𑀸𑀢𑀺 𑀘 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀅𑀲𑀺𑀓𑁆𑀔𑀸𑀓𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑀲𑁆𑀲 𑀑𑀯𑀸𑀤𑀲𑁆𑀲 𑀅𑀪𑀸𑀚𑀦𑀢𑀸𑀬 𑀢𑀁 𑀧𑀭𑀺𑀯𑀚𑁆𑀚𑁂𑀢𑀼𑀫𑀸𑀳 ‘‘𑀧𑀺𑀬𑀲𑀻𑀮𑁂𑀦𑀸’’𑀢𑀺. 𑀧𑀺𑀬𑀲𑀻𑀮𑀲𑁆𑀲𑀸𑀧𑀺 𑀲𑀢𑀺𑀯𑀺𑀭𑀳𑀺𑀢𑀲𑁆𑀲 𑀧𑀫𑀢𑁆𑀢𑀝𑁆𑀞𑀸𑀦𑁂 𑀲𑀭𑀡𑀸𑀲𑀫𑁆𑀪𑀯𑀸 𑀇𑀫𑀲𑁆𑀲 𑀅𑀪𑀸𑀚𑀦𑀢𑀸𑀬 𑀢𑀁 𑀯𑀚𑁆𑀚𑁂𑀢𑀼𑀫𑀸𑀳 ‘‘𑀲𑀢𑀺𑀲𑀫𑁆𑀧𑀦𑁆𑀦𑀘𑁂𑀢𑀲𑀸’’𑀢𑀺.

𑀅𑀭𑀜𑁆𑀜𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁭𑁫-𑁬. 𑀢𑁄𑀬𑀤𑀼𑀮𑁆𑀮𑀪𑀓𑀸𑀮𑀲𑁆𑀫𑀺𑀦𑁆𑀢𑀺 𑀢𑁄𑀬𑀁 𑀤𑀼𑀮𑁆𑀮𑀪𑀁 𑀬𑀲𑁆𑀫𑀺𑀁 𑀲𑁄 𑀢𑁄𑀬𑀤𑀼𑀮𑁆𑀮𑀪𑁄, 𑀢𑁄𑀬𑀤𑀼𑀮𑁆𑀮𑀪𑁄 𑀘 𑀲𑁄 𑀓𑀸𑀮𑁄 𑀘𑀸𑀢𑀺 𑀢𑁄𑀬𑀤𑀼𑀮𑁆𑀮𑀪𑀓𑀸𑀮𑁄, 𑀢𑀲𑁆𑀫𑀺𑀁. 𑀆𑀯𑀚𑁆𑀚𑁂𑀢𑁆𑀯𑀸 𑀯𑀸𑀢𑀺 𑀉𑀤𑀓𑀪𑀸𑀚𑀦𑀁 𑀦𑀸𑀫𑁂𑀢𑁆𑀯𑀸 𑀯𑀸. 𑀧𑀯𑁂𑀲𑁂𑀢𑁆𑀯𑀸 𑀯𑀸𑀢𑀺 𑀅𑀢𑁆𑀢𑀦𑁄 ¶ 𑀪𑀸𑀚𑀦𑀁 𑀢𑀲𑁆𑀫𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸. 𑀙𑀺𑀤𑁆𑀤𑀁 𑀓𑀢𑁆𑀯𑀸𑀧𑀺 𑀯𑀸𑀢𑀺 𑀉𑀤𑀓𑀪𑀸𑀚𑀦𑁂 𑀑𑀫𑀝𑁆𑀞𑀸𑀤𑀺𑀪𑁂𑀤𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀪𑀡𑁆𑀟𑀕𑁆𑀖𑁂𑀦 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀯𑀓𑁆𑀔𑀫𑀸𑀦𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁.

𑀢𑀣𑀸𑀢𑀺 𑀬𑀣𑀸 𑀢𑁄𑀬𑀤𑀼𑀮𑁆𑀮𑀪𑀓𑀸𑀮𑀲𑁆𑀫𑀺𑀁 𑀪𑀸𑀚𑀦𑁂 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀉𑀤𑀓𑀁 𑀅𑀯𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦. 𑀯𑀸𑀧𑀺𑀬𑀁 𑀯𑀸𑀢𑀺 𑀧𑀭𑀲𑀦𑁆𑀢𑀓𑀸𑀬 𑀲𑀸𑀭𑀓𑁆𑀔𑀸𑀬 𑀯𑀸𑀧𑀺𑀬𑀁 𑀯𑀸. 𑀢𑀴𑀸𑀓𑁂 𑀯𑀸𑀢𑀺 𑀢𑀸𑀤𑀺𑀲𑁂 𑀚𑀸𑀢𑀲𑁆𑀲𑀭𑁂 𑀯𑀸. 𑀏𑀯𑀁 𑀲𑀸𑀭𑀓𑁆𑀔𑀸𑀦𑀁 𑀧𑁄𑀓𑁆𑀔𑀭𑀡𑀺𑀆𑀤𑀻𑀦𑀁 𑀏𑀢𑁂𑀳𑀺 𑀯𑀸 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑁂𑀦 𑀯𑀸-𑀲𑀤𑁆𑀤𑁂𑀦 𑀯𑀸 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀧𑀤𑀦𑁆𑀢𑀺 𑀪𑀸𑀚𑀦𑀕𑀢𑀚𑀮𑁂 𑀘 𑀇𑀥 𑀘 𑀢𑁂𑀮𑀪𑀸𑀚𑀦𑁂 𑀯𑀺𑀬 𑀫𑀼𑀔𑁂𑀦 𑀯𑀸 𑀯𑀁𑀲𑀸𑀤𑀻𑀳𑀺 𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀺𑀯𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀓𑀫𑀸𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁭𑁭. 𑀫𑀭𑀺𑀬𑀸𑀤𑀦𑁆𑀢𑀺 𑀯𑀸𑀧𑀺𑀆𑀤𑀻𑀦𑀁 𑀧𑀸𑀴𑀺𑀯𑀝𑁆𑀝𑀩𑀦𑁆𑀥𑀁. 𑀙𑀺𑀦𑁆𑀤𑀢𑁄𑀢𑀺 𑀓𑀼𑀤𑀸𑀮𑀸𑀤𑀻𑀳𑀺 𑀧𑀁𑀲𑀼𑀆𑀤𑀻𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀤𑁆𑀯𑀺𑀥𑀸 𑀓𑀭𑁄𑀦𑁆𑀢𑀲𑁆𑀲. 𑀯𑀺𑀲𑁂𑀲𑀢𑁆𑀣𑀸𑀯𑀚𑁄𑀢𑀓𑁂𑀦 𑀢𑀼-𑀲𑀤𑁆𑀤𑁂𑀦 ‘‘𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀢𑀲𑁆𑀲 ¶ 𑀙𑀺𑀦𑁆𑀤𑀦𑀢𑁆𑀣𑀸𑀬 𑀯𑀻𑀘𑀺𑀬𑁄 𑀉𑀝𑁆𑀞𑀸𑀧𑁂𑀢𑀼𑀁 𑀉𑀤𑀓𑀁 𑀲𑀬𑀁 𑀑𑀢𑀭𑀺𑀢𑁆𑀯𑀸 𑀯𑀸 𑀕𑁄𑀫𑀳𑀺𑀁𑀲𑁂 𑀯𑀸 𑀅𑀜𑁆𑀜𑁂 𑀫𑀦𑀼𑀲𑁆𑀲𑁂 𑀯𑀸 𑀓𑀻𑀴𑀦𑁆𑀢𑁂 𑀤𑀸𑀭𑀓𑁂 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀑𑀢𑀺𑀡𑁆𑀡𑁂 𑀢𑀸𑀲𑁂𑀢𑁆𑀯𑀸 𑀯𑀸 𑀉𑀤𑀓𑁂 𑀞𑀺𑀢𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀙𑁂𑀤𑀸𑀧𑁂𑀢𑁆𑀯𑀸 𑀯𑀸 𑀧𑀸𑀢𑁂𑀢𑁆𑀯𑀸 𑀯𑀸 𑀧𑀸𑀢𑀸𑀧𑁂𑀢𑁆𑀯𑀸 𑀯𑀸 𑀚𑀮𑀁 𑀔𑁄𑀪𑁂𑀢𑀺, 𑀢𑀢𑁄 𑀉𑀝𑁆𑀞𑀺𑀢𑀸𑀳𑀺 𑀯𑀻𑀘𑀻𑀳𑀺 𑀫𑀭𑀺𑀬𑀸𑀤𑁂 𑀙𑀺𑀦𑁆𑀦𑁂𑀧𑀺 𑀢𑁂𑀦𑁂𑀯 𑀙𑀺𑀦𑁆𑀦𑁄 𑀳𑁄𑀢𑀺. 𑀏𑀯𑀫𑁂𑀯 𑀕𑁄𑀫𑀳𑀺𑀁𑀲𑀸𑀤𑀬𑁄 𑀫𑀭𑀺𑀬𑀸𑀤𑀁 𑀆𑀭𑁄𑀳𑀦𑁆𑀢𑁂𑀦𑀸𑀧𑀺 𑀅𑀜𑁆𑀜𑁂𑀳𑀺 𑀆𑀭𑁄𑀳𑀸𑀧𑁂𑀦𑁆𑀢𑁂𑀦𑀸𑀧𑀺 𑀢𑁂𑀲𑀁 𑀔𑀼𑀭𑁂𑀳𑀺 𑀫𑀭𑀺𑀬𑀸𑀤𑁂 𑀙𑀺𑀦𑁆𑀦𑁂𑀧𑀺, 𑀉𑀤𑀓𑀦𑀺𑀤𑁆𑀥𑀫𑀦𑀸𑀤𑀺𑀁 𑀧𑀺𑀤𑀳𑀺𑀢𑁆𑀯𑀸 𑀯𑀸 𑀧𑀺𑀤𑀳𑀸𑀧𑁂𑀢𑁆𑀯𑀸 𑀯𑀸 𑀯𑀸𑀧𑀺𑀫𑀭𑀺𑀬𑀸𑀤𑀸𑀬 𑀦𑀻𑀘𑀝𑁆𑀞𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀩𑀦𑁆𑀥𑀸𑀧𑁂𑀢𑁆𑀯𑀸 𑀯𑀸 𑀅𑀢𑀺𑀭𑁂𑀓𑀚𑀮𑀸𑀧𑀕𑀫𑀦𑀫𑀕𑁆𑀕𑀢𑁄 𑀦𑀻𑀳𑀭𑀺𑀢𑀩𑁆𑀩𑁄𑀤𑀓𑀁 𑀯𑀸𑀭𑁂𑀢𑁆𑀯𑀸 𑀯𑀸 𑀩𑀸𑀳𑀺𑀭𑀢𑁄 𑀉𑀤𑀓𑀁 𑀧𑀯𑁂𑀲𑁂𑀢𑁆𑀯𑀸 𑀯𑀸 𑀧𑀽𑀭𑁂𑀢𑀺, 𑀑𑀖𑁂𑀦 𑀫𑀭𑀺𑀬𑀸𑀤𑁂 ¶ 𑀙𑀺𑀦𑁆𑀦𑁂𑀧𑀺 𑀢𑁂𑀦𑁂𑀯 𑀙𑀺𑀦𑁆𑀦𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀏𑀯𑀫𑀸𑀤𑀺𑀓𑀁 𑀅𑀝𑁆𑀞𑀓𑀣𑀸𑀕𑀢𑀯𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀢𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸. 𑀪𑀽𑀢𑀕𑀸𑀫𑁂𑀦 𑀲𑀤𑁆𑀥𑀺𑀫𑁆𑀧𑀻𑀢𑀺 𑀪𑀽𑀢𑀕𑀸𑀫𑁂𑀦𑀧𑀺 𑀲𑀤𑁆𑀥𑀺𑀁. 𑀅𑀧𑀺-𑀲𑀤𑁆𑀤𑁂𑀦 𑀧𑀣𑀯𑀺𑀔𑀡𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀦𑁆𑀢𑁄 𑀢𑀢𑁆𑀣𑀚𑀸𑀢𑀁 𑀢𑀺𑀡𑀸𑀤𑀺𑀁 𑀙𑀺𑀦𑁆𑀤𑀢𑀺, 𑀪𑀽𑀢𑀕𑀸𑀫𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀁. 𑀚𑀸𑀢𑀧𑀣𑀯𑀺𑀁 𑀙𑀺𑀦𑁆𑀤𑀢𑀺, 𑀧𑀣𑀯𑀺𑀔𑀡𑀦𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁭𑁮. 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀪𑀡𑁆𑀟𑀕𑁆𑀖𑁂𑀦 𑀆𑀧𑀢𑁆𑀢𑀺𑀬𑀸’’𑀢𑀺 𑀧𑀸𑀞𑀲𑁂𑀲𑁄. 𑀅𑀦𑁆𑀢𑁄𑀪𑀽𑀢𑀳𑁂𑀢𑁆𑀯𑀢𑁆𑀣𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀅𑀦𑁆𑀢𑁄 𑀞𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑁄 𑀩𑀳𑀺𑀅𑀦𑁆𑀢𑁂𑀦, 𑀩𑀳𑀺 𑀞𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑁄 𑀅𑀦𑁆𑀢𑁄𑀅𑀦𑁆𑀢𑁂𑀦, 𑀉𑀪𑀬𑀢𑁆𑀣𑀸𑀧𑀺 𑀞𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑁄 𑀫𑀚𑁆𑀛𑀢𑁄 𑀪𑀡𑁆𑀟𑀕𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀦𑁆𑀢𑁄𑀯𑀸𑀧𑀺𑀬𑀁 𑀞𑀢𑁆𑀯𑀸 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑁂 𑀩𑀳𑀺 𑀦𑀺𑀓𑁆𑀔𑀫𑀺𑀢𑁂 𑀦𑀺𑀓𑁆𑀔𑀦𑁆𑀢𑀉𑀤𑀓𑀕𑁆𑀖𑁂𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀲𑀼 𑀬𑀣𑀸𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀩𑀳𑀺 𑀞𑀢𑁆𑀯𑀸 𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀯𑀸𑀧𑀺𑀬𑀁 𑀧𑀯𑀺𑀲𑀦𑁆𑀢𑁄𑀤𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑀺𑀢𑀓𑁆𑀔𑀡𑁂 𑀦𑀺𑀓𑁆𑀔𑀦𑁆𑀢𑀉𑀤𑀓𑀕𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀓𑀤𑀸𑀘𑀺 𑀅𑀦𑁆𑀢𑁄 𑀓𑀤𑀸𑀘𑀺 𑀩𑀳𑀺 𑀞𑀢𑁆𑀯𑀸 𑀫𑀭𑀺𑀬𑀸𑀤𑀁 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑁄 𑀫𑀚𑁆𑀛𑁂 𑀞𑀺𑀢𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑀲𑁆𑀲 𑀦𑀻𑀳𑀝𑀓𑁆𑀔𑀡𑁂 𑀦𑀻𑀳𑀝𑀉𑀤𑀓𑀲𑁆𑀲 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀉𑀤𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁭𑁯-𑁮𑁦. 𑀯𑀸𑀭𑁂𑀦𑀸𑀢𑀺 𑀯𑀸𑀭𑁂𑀦 𑀯𑀸𑀭𑁂𑀦 𑀲𑀸𑀫𑀡𑁂𑀭𑀸 𑀅𑀭𑀜𑁆𑀜𑀢𑁄 𑀬𑀁 𑀤𑀦𑁆𑀢𑀓𑀝𑁆𑀞𑀁 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀆𑀦𑁂𑀢𑁆𑀯𑀸 𑀲𑀘𑁂 𑀆𑀘𑀭𑀺𑀬𑀸𑀦𑀫𑁆𑀧𑀺 𑀆𑀳𑀭𑀦𑁆𑀢𑀺, 𑀬𑀸𑀯 𑀢𑁂 𑀤𑀦𑁆𑀢𑀓𑀝𑁆𑀞𑀁 𑀧𑀫𑀸𑀡𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘 𑀆𑀘𑀭𑀺𑀬𑀸𑀦𑀜𑁆𑀘 ¶ 𑀦 𑀦𑀺𑀬𑁆𑀬𑀸𑀤𑁂𑀦𑁆𑀢𑀺, 𑀢𑀸𑀯 𑀅𑀭𑀜𑁆𑀜𑀢𑁄 ¶ 𑀆𑀪𑀢𑀢𑁆𑀢𑀸 𑀢𑀁 𑀲𑀩𑁆𑀩𑀁 𑀲𑀗𑁆𑀖𑀲𑁆𑀲 𑀘 𑀲𑀓𑀲𑀓𑀆𑀘𑀭𑀺𑀬𑀸𑀦𑀜𑁆𑀘 𑀆𑀪𑀢𑀁 𑀤𑀦𑁆𑀢𑀓𑀝𑁆𑀞𑀁 𑀢𑁂𑀲𑀫𑁂𑀯 𑀘 𑀤𑀦𑁆𑀢𑀓𑀝𑁆𑀞𑀳𑀸𑀭𑀓𑀸𑀦𑀁 𑀲𑀸𑀫𑀡𑁂𑀭𑀸𑀦𑀁 𑀲𑀦𑁆𑀢𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑀬𑁄𑀚𑀦𑀸.

𑁧𑁮𑁧. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁂𑀲𑀫𑁂𑀯 𑀲𑀸𑀫𑀡𑁂𑀭𑀸𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺, 𑀢𑀲𑁆𑀫𑀸. 𑀢𑀁 𑀅𑀭𑀜𑁆𑀜𑀢𑁄 𑀆𑀪𑀢𑀁 𑀤𑀦𑁆𑀢𑀓𑀝𑁆𑀞𑀜𑁆𑀘 𑀲𑀗𑁆𑀖𑀲𑁆𑀲 𑀕𑀭𑀼𑀪𑀡𑁆𑀟𑀜𑁆𑀘 𑀤𑀦𑁆𑀢𑀓𑀝𑁆𑀞𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀭𑀓𑁆𑀔𑀺𑀢𑀕𑁄𑀧𑀺𑀢𑀢𑁆𑀢𑀸 𑀕𑀭𑀼𑀪𑀡𑁆𑀟𑀪𑀽𑀢𑀁 𑀤𑀦𑁆𑀢𑀓𑀝𑁆𑀞𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀡𑁆𑀳𑀦𑁆𑀢𑀲𑁆𑀲 𑀘𑀸𑀢𑀺 𑀅𑀥𑀺𑀓𑀘-𑀓𑀸𑀭𑁂𑀦 𑀇𑀳𑀸𑀯𑀼𑀢𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀕𑀢𑀲𑁆𑀲 𑀕𑀡𑀧𑀼𑀕𑁆𑀕𑀮𑀕𑀺𑀳𑀺𑀧𑀭𑀺𑀩𑀤𑁆𑀥 𑀆𑀭𑀸𑀫𑀼𑀬𑁆𑀬𑀸𑀦𑀲𑀜𑁆𑀚𑀸𑀢𑀙𑀺𑀦𑁆𑀦𑀸𑀙𑀺𑀦𑁆𑀦𑀭𑀓𑁆𑀔𑀺𑀢𑀕𑁄𑀧𑀺𑀢𑀤𑀦𑁆𑀢𑀓𑀝𑁆𑀞𑀲𑁆𑀲 𑀲𑀫𑀼𑀘𑁆𑀘𑀺𑀢𑀢𑁆𑀢𑀸 𑀢𑀜𑁆𑀘 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀅𑀯𑀳𑀝𑀤𑀦𑁆𑀢𑀓𑀝𑁆𑀞𑀲𑁆𑀲 𑀅𑀕𑁆𑀖𑀯𑀲𑁂𑀦 𑀆𑀧𑀢𑁆𑀢𑀺𑀬𑁄 𑀯𑀢𑁆𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺.

𑁧𑁮𑁨. 𑀢𑁂𑀳𑀺 𑀤𑀦𑁆𑀢𑀓𑀝𑁆𑀞𑀳𑀸𑀭𑀓𑁂𑀳𑀺 𑀲𑀸𑀫𑀡𑁂𑀭𑁂𑀳𑀺. 𑀦𑀺𑀬𑁆𑀬𑀸𑀤𑀺𑀢𑀦𑁆𑀢𑀺 𑀫𑀳𑀸𑀲𑀗𑁆𑀖𑀲𑁆𑀲 𑀧𑀝𑀺𑀧𑀸𑀤𑀺𑀢𑀁.

𑁧𑁮𑁩. 𑀲𑀗𑁆𑀖𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄𑀧𑀺 𑀅𑀯𑀳𑀸𑀭𑀸𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀭𑀓𑁆𑀔𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀓𑁆𑀔𑀢𑁆𑀢𑀸𑀢𑀺 𑀲𑀗𑁆𑀖𑀺𑀓𑀪𑀸𑀯𑁂𑀦 𑀮𑀤𑁆𑀥𑁂𑀧𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑀤𑀦𑁆𑀢𑀓𑀝𑁆𑀞𑁂 𑀯𑀺𑀬 𑀲𑀗𑁆𑀖𑁂𑀦 𑀓𑀢𑀸𑀭𑀓𑁆𑀔𑀸𑀬𑀸𑀪𑀸𑀯𑀸. 𑀬𑀣𑀸𑀯𑀼𑀟𑁆𑀠𑀫𑀪𑀸𑀚𑁂𑀢𑀩𑁆𑀩𑀢𑁄𑀢𑀺 𑀲𑀗𑁆𑀖𑀺𑀓𑀢𑁆𑀢𑀲𑁆𑀲𑀸𑀧𑀺 𑀲𑀢𑁄 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀧𑀸𑀝𑀺𑀫𑀦𑀢𑀺𑀓𑁆𑀓𑀫𑁆𑀫 𑀪𑀸𑀚𑁂𑀢𑀩𑁆𑀩𑀨𑀮𑀧𑀼𑀧𑁆𑀨𑀸𑀤𑀻𑀦𑀁 𑀯𑀺𑀬 𑀪𑀸𑀚𑁂𑀢𑀩𑁆𑀩𑀢𑀸𑀪𑀸𑀯𑀢𑁄. 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀘𑀸𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀫𑁂𑀯 𑀲𑀸𑀥𑀸𑀭𑀡𑀢𑁆𑀢𑀸.

𑀇𑀤𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀺𑀢𑀤𑀦𑁆𑀢𑀓𑀝𑁆𑀞𑀁. 𑀅𑀜𑁆𑀜𑀁 𑀯𑀺𑀬𑀸𑀢𑀺 𑀅𑀜𑁆𑀜𑀁 𑀕𑀡𑀧𑀼𑀕𑁆𑀕𑀮𑀸𑀤𑀺𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑀤𑀦𑁆𑀢𑀓𑀝𑁆𑀞𑀁 𑀯𑀺𑀬. 𑀏𑀯𑀁 𑀘𑁄𑀭𑀺𑀓𑀸𑀬 𑀕𑀡𑁆𑀳𑀢𑁄 𑀅𑀯𑀳𑀸𑀭𑀸𑀪𑀸𑀯𑁂 𑀓𑀸𑀭𑀡𑁂𑀦 𑀲𑀸𑀥𑀺𑀢𑁂𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 ¶ 𑀲𑀓𑀧𑀭𑀺𑀓𑁆𑀔𑀸𑀭𑀫𑁆𑀧𑀺 𑀕𑀡𑁆𑀳𑀢𑁄 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀣𑀸 𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩𑀁 𑁋 𑀲𑀗𑁆𑀖𑀺𑀓𑀤𑀦𑁆𑀢𑀓𑀝𑁆𑀞𑀁 𑀕𑀡𑁆𑀳𑀦𑁆𑀢𑁂𑀦 𑀧𑀥𑀸𑀦𑀖𑀭𑀸𑀤𑀻𑀲𑀼 𑀧𑀯𑀺𑀲𑀺𑀢𑁆𑀯𑀸 𑀘𑀺𑀭𑁂𑀦 𑀑𑀲𑀭𑀦𑁆𑀢𑁂𑀦 𑀩𑀳𑀺 𑀯𑀻𑀢𑀺𑀦𑀸𑀫𑁂𑀢𑀩𑁆𑀩𑀤𑀺𑀯𑀲𑁂 𑀕𑀡𑁂𑀢𑁆𑀯𑀸 𑀢𑀁𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁, 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦 𑀏𑀓𑀁 𑀤𑁆𑀯𑁂 𑀤𑀦𑁆𑀢𑀓𑀝𑁆𑀞𑀸𑀦𑀺 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀢𑀢𑁆𑀣𑁂𑀯 𑀯𑀲𑀦𑁆𑀢𑁂𑀦 𑀤𑀺𑀯𑀲𑁂 𑀔𑀸𑀤𑀺𑀢𑀩𑁆𑀩𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀤𑀦𑁆𑀢𑀓𑀝𑁆𑀞𑀓𑀣𑀸𑀯𑀡𑁆𑀡𑀦𑀸.

𑁧𑁮𑁪. ‘‘𑀅𑀕𑁆𑀕𑀺𑀁 ¶ 𑀯𑀸 𑀤𑁂𑀢𑀻’’𑀢𑀺𑀆𑀤𑀻𑀲𑀼 ‘‘𑀭𑀼𑀓𑁆𑀔𑁂’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺 ‘‘𑀭𑀼𑀓𑁆𑀔𑁄 𑀯𑀺𑀦𑀲𑁆𑀲𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀭𑀼𑀓𑁆𑀔𑁄 𑀘 ‘‘𑀯𑀦𑀧𑁆𑀧𑀢𑀺 𑀦𑀸𑀫 𑀬𑁄 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑁄 𑀳𑁄𑀢𑀺 𑀭𑀼𑀓𑁆𑀔𑁄 𑀧𑀭𑀺𑀪𑁄𑀕𑁄’’𑀢𑀺 (𑀧𑀸𑀭𑀸. 𑁧𑁧𑁦) 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀘 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁦) 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀫𑁆𑀩𑀮𑀩𑀼𑀚𑀧𑀦𑀲𑀸𑀤𑀺𑀓𑁄 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑁄 𑀫𑀦𑀼𑀲𑁆𑀲𑀸𑀬𑀢𑁆𑀢𑁄 𑀭𑀓𑁆𑀔𑀺𑀢𑀕𑁄𑀧𑀺𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀅𑀕𑁆𑀕𑀺𑀁 𑀯𑀸 𑀤𑁂𑀢𑀻𑀢𑀺 𑀘𑁄𑀭𑀺𑀓𑀸𑀬 𑀅𑀕𑁆𑀕𑀺𑀁 𑀆𑀮𑀺𑀫𑁆𑀧𑁂𑀢𑀺 𑀯𑀸. 𑀲𑀢𑁆𑀣𑁂𑀦 𑀭𑀼𑀓𑁆𑀔𑁂 𑀲𑀫𑀦𑁆𑀢𑀢𑁄 𑀆𑀓𑁄𑀝𑁂𑀢𑀻𑀢𑀺 𑀯𑀸𑀲𑀺𑀨𑀭𑀲𑀼𑀆𑀤𑀺𑀲𑀢𑁆𑀣𑁂𑀦 𑀭𑀼𑀓𑁆𑀔𑀢𑀘𑀁 𑀙𑀺𑀦𑁆𑀤𑀦𑁆𑀢𑁄 𑀲𑀫𑀦𑁆𑀢𑀢𑁄 𑀆𑀯𑀸𑀝𑀁 𑀤𑀲𑁆𑀲𑁂𑀢𑀺. 𑀫𑀡𑁆𑀟𑀽𑀓𑀓𑀡𑁆𑀝𑀓𑀦𑀸𑀫𑀓𑀁 𑀯𑀺𑀲𑀁 𑀯𑀸 𑀭𑀼𑀓𑁆𑀔𑁂 𑀆𑀓𑁄𑀝𑁂𑀢𑀻𑀢𑀺 𑀘𑁄𑀭𑀺𑀓𑀸𑀬 𑀭𑀼𑀓𑁆𑀔𑀁 𑀦𑀸𑀲𑁂𑀢𑀼𑀓𑀸𑀫𑁄 𑀭𑀼𑀓𑁆𑀔𑁂 𑀫𑀡𑁆𑀟𑀽𑀓𑀓𑀡𑁆𑀝𑀓𑀦𑀸𑀫𑀓𑀁 𑀯𑀺𑀲𑀁 𑀧𑀯𑁂𑀲𑁂𑀢𑀺.

𑁧𑁮𑁫. 𑀬𑁂𑀦 𑀯𑀸 𑀢𑁂𑀦 𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀯𑀸 𑀅𑀯𑀼𑀢𑁆𑀢𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦. 𑀭𑀼𑀓𑁆𑀔𑁄 𑀯𑀺𑀦𑀲𑁆𑀲𑀢𑀻𑀢𑀺 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀛𑀸𑀧𑀺𑀢𑁄 𑀥𑀜𑁆𑀜𑀓𑀮𑀸𑀧𑁄 𑀯𑀺𑀬, 𑀢𑁂𑀮𑀓𑀼𑀫𑁆𑀪𑀻 𑀯𑀺𑀬 𑀘 𑀯𑀺𑀦𑀸𑀯 𑀞𑀸𑀦𑀸𑀘𑀸𑀯𑀦𑁂𑀦 𑀬𑀣𑀸𑀝𑁆𑀞𑀺𑀢𑀫𑁂𑀯𑀦𑀲𑁆𑀲𑀢𑀺. ‘‘𑀟𑀬𑁆𑀳𑀢𑀻’’𑀢𑀺 𑀇𑀤𑀁 ‘‘𑀅𑀕𑁆𑀕𑀺𑀁 𑀤𑁂𑀢𑀻’’𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀦𑀲𑁆𑀲𑀢𑀻𑀢𑀺 𑀫𑀡𑁆𑀟𑀽𑀓𑀓𑀡𑁆𑀝𑀓𑀸𑀓𑁄𑀝𑀦𑀸𑀤𑀺𑀅𑀯𑀲𑁂𑀲𑀧𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀙𑀺𑀦𑁆𑀤𑀢𑀺, 𑀧𑀳𑀸𑀭𑁂 𑀧𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀏𑀓𑀁 𑀧𑀳𑀸𑀭𑀁 ¶ 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀢𑀲𑁆𑀫𑀺𑀁 𑀧𑀳𑀸𑀭𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁦) 𑀞𑀸𑀦𑀸𑀘𑀸𑀯𑀦𑁂𑀦 𑀧𑀸𑀭𑀸𑀚𑀺𑀓𑀲𑁆𑀲 𑀆𑀕𑀢𑀢𑁆𑀢𑀸. 𑀧𑀓𑀸𑀲𑀺𑀢𑀦𑁆𑀢𑀺 𑀏𑀢𑁆𑀣 ‘‘𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀮𑀩𑁆𑀪𑀢𑀺. 𑀧𑀸𑀞𑀸𑀕𑀢𑀁 𑀧𑀸𑀭𑀸𑀚𑀺𑀓𑀁 𑀧𑀦 𑀧𑀸𑀭𑀺𑀲𑁂𑀲𑀢𑁄 𑀘 𑀲𑀽𑀘𑀻𑀬𑀢𑀻𑀢𑀺 𑀢𑀩𑁆𑀩𑀸𑀘𑀓𑀲𑁆𑀲 𑀯𑀸 𑀲𑀗𑁆𑀕𑀸𑀳𑀓𑀲𑁆𑀲 𑀯𑀸 𑀯𑀘𑀦𑀲𑁆𑀲 𑀇𑀳𑀸𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀧𑀸𑀲𑀁𑀲𑀺𑀓𑁄𑀧𑀺 𑀇𑀳𑀸𑀯𑀼𑀢𑁆𑀢𑁄.

𑀯𑀦𑀧𑁆𑀧𑀢𑀺𑀓𑀣𑀸𑀯𑀡𑁆𑀡𑀦𑀸.

𑁧𑁮𑁬-𑁭. ‘‘𑀳𑀭𑀡𑀓𑀁 𑀦𑀸𑀫 𑀅𑀜𑁆𑀜𑀲𑁆𑀲 𑀳𑀭𑀡𑀓𑀁 𑀪𑀡𑁆𑀟𑀁. 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁧) 𑀯𑀼𑀢𑁆𑀢𑀳𑀭𑀡𑀓𑀦𑀺𑀤𑁆𑀤𑁂𑀲𑁂 ‘‘𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁧𑁧) 𑀧𑀸𑀞𑁂 ‘‘𑀞𑀸𑀦’’𑀦𑁆𑀢𑀺 𑀕𑀳𑀺𑀢𑀲𑀻𑀲𑀸𑀤𑀺𑀝𑁆𑀞𑀸𑀦𑀧𑁆𑀧𑀪𑁂𑀤𑀯𑀲𑁂𑀦 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁦) 𑀆𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀙𑀺𑀦𑁆𑀤𑀺𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀕𑀡𑁆𑀳𑀢𑁄’’𑀢𑀺. 𑀓𑀺𑀭𑀺𑀬𑀸𑀦𑀁 𑀲𑀓𑀫𑁆𑀫𑀓𑀢𑁆𑀢𑀸 ‘‘𑀅𑀮𑀗𑁆𑀓𑀸𑀭’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀕𑀻𑀯𑁂𑀬𑁆𑀬𑀓𑀸𑀤𑀺𑀁. 𑀫𑁄𑀘𑁂𑀢𑁆𑀯𑀸𑀢𑀺 𑀓𑀡𑁆𑀡𑀧𑀺𑀴𑀦𑁆𑀥𑀦𑀸𑀤𑀺𑀁.

𑀲𑀻𑀲𑀸𑀤𑀻𑀳𑀺 ¶ 𑀫𑁄𑀘𑀺𑀢𑀫𑀢𑁆𑀢𑀲𑁆𑀫𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀺𑀲𑁂𑀲𑀺𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀁 ‘‘𑀅𑀮𑀗𑁆𑀓𑀸𑀭𑀲𑁆𑀫𑀺’’𑀦𑁆𑀢𑀺 𑀢𑀫𑁂𑀯 𑀪𑀼𑀫𑁆𑀫𑁂𑀓𑀯𑀘𑀦𑀦𑁆𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀦𑁆𑀢𑀺 𑀏𑀢𑁆𑀣 𑀅𑀪𑀺𑀫𑀼𑀔𑀁 𑀓𑀟𑁆𑀠𑀦𑀁 𑀆𑀓𑀟𑁆𑀠𑀦𑀦𑁆𑀢𑀺 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀻𑀧𑀫𑀸𑀯𑀺𑀜𑁆𑀙𑀦𑀁 𑀆𑀓𑀟𑁆𑀠𑀦𑀁, 𑀯𑀺𑀧𑀭𑀻𑀢𑀁 𑀓𑀟𑁆𑀠𑀦𑀁 𑀯𑀺𑀓𑀟𑁆𑀠𑀦𑀦𑁆𑀢𑀺 𑀓𑀢𑁆𑀯𑀸 𑀢𑀩𑁆𑀩𑀺𑀧𑀭𑀻𑀢𑀁 𑀯𑀺𑀓𑀟𑁆𑀠𑀦𑀁.

𑁧𑁮𑁮-𑁯. 𑀯𑀮𑀬𑀦𑁆𑀢𑀺 𑀅𑀯𑀗𑁆𑀓𑀁 𑀫𑀝𑁆𑀞𑀳𑀢𑁆𑀣𑀽𑀧𑀕𑀁. 𑀓𑀝𑀓𑀫𑁆𑀧𑀺 𑀯𑀸𑀢𑀺 𑀅𑀦𑁂𑀓𑀯𑀗𑁆𑀓𑁂 𑀬𑁄𑀚𑁂𑀢𑁆𑀯𑀸 𑀩𑀼𑀩𑁆𑀩𑀼𑀴𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀯𑀸 𑀅𑀤𑀲𑁆𑀲𑁂𑀢𑁆𑀯𑀸 ¶ 𑀯𑀸 𑀓𑀢𑀁 𑀳𑀢𑁆𑀣𑀽𑀧𑀕𑀁. 𑀅𑀕𑁆𑀕𑀩𑀸𑀳𑀼𑀦𑁆𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀅𑀕𑁆𑀕𑀳𑀢𑁆𑀣𑀁. 𑀅𑀧𑀭𑀸𑀧𑀭𑀁 𑀘𑀸𑀭𑁂𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀭𑁂𑀢𑀺. ‘‘𑀲𑀸𑀭𑁂𑀢𑀻’’𑀢𑀺 𑀯𑀸 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄. 𑀢𑀁 𑀯𑀮𑀬𑀁 𑀯𑀸 𑀓𑀝𑀓𑀁 𑀯𑀸. 𑀆𑀓𑀸𑀲𑀕𑀢𑀁 𑀓𑀭𑁄𑀢𑀻𑀢𑀺 𑀲𑀩𑁆𑀩𑀤𑀺𑀲𑀸𑀳𑀺 𑀬𑀣𑀸 𑀳𑀢𑁆𑀣𑀁 𑀦 𑀨𑀼𑀲𑀢𑀺, 𑀢𑀣𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺. 𑀦𑀺𑀥𑀺𑀯𑀮𑀬𑀲𑁆𑀲 𑀧𑀯𑁂𑀲𑀺𑀢𑀭𑀼𑀓𑁆𑀔𑀫𑀽𑀮𑁂 𑀲𑀩𑁆𑀩𑀤𑀺𑀲𑀸𑀳𑀺 𑀅𑀨𑀼𑀲𑀦𑁆𑀢𑀁 𑀆𑀓𑀸𑀲𑀕𑀢𑀓𑀭𑀡𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀇𑀥 ‘‘𑀭𑀓𑁆𑀔𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀯𑀺𑀜𑁆𑀜𑀸𑀡𑀓𑀢𑁄’’𑀢𑀺𑀆𑀤𑀺. 𑀇𑀤𑀦𑁆𑀢𑀺 𑀯𑀮𑀬𑀁 𑀓𑀝𑀓𑀜𑁆𑀘.

𑁧𑁯𑁦. ‘‘𑀦𑀺𑀯𑀢𑁆𑀣𑀁 𑀯𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀘𑀻𑀯𑀭𑀫𑁆𑀧𑀺 𑀕𑀬𑁆𑀳𑀢𑀺. 𑀧𑀭𑀲𑁆𑀲 𑀯𑀢𑁆𑀣𑀲𑀸𑀫𑀺𑀓𑀲𑁆𑀲. 𑀧𑀭𑁄𑀧𑀻𑀢𑀺 𑀯𑀢𑁆𑀣𑀲𑀸𑀫𑀺𑀓𑁄𑀧𑀺. 𑀢𑀦𑁆𑀢𑀺 𑀘𑁄𑀭𑁂𑀦 𑀅𑀘𑁆𑀙𑀺𑀚𑁆𑀚𑀫𑀸𑀦𑀁 𑀅𑀢𑁆𑀢𑀦𑀸 𑀦𑀺𑀯𑀢𑁆𑀣𑀯𑀢𑁆𑀣𑀁. 𑀮𑀚𑁆𑀚𑀸𑀬 𑀲𑀳𑀲𑀸 𑀦 𑀫𑀼𑀜𑁆𑀘𑀢𑀻𑀢𑀺 𑀮𑀚𑁆𑀚𑀸𑀬 𑀲𑀻𑀖𑀢𑀭𑀁 𑀦 𑀧𑀭𑀺𑀘𑁆𑀘𑀚𑀢𑀺.

𑁧𑁯𑁧. 𑀘𑁄𑀭𑁄𑀧𑀺 𑀆𑀓𑀟𑁆𑀠𑀢𑀺, 𑀲𑁄 𑀧𑀭𑁄𑀧𑀺 𑀆𑀓𑀟𑁆𑀠𑀢𑀻𑀢𑀺 𑀬𑁄𑀚𑀦𑀸. 𑀲𑁄 𑀧𑀭𑁄 𑀘𑁄𑀭𑀢𑁄 𑀅𑀜𑁆𑀜𑁄, 𑀯𑀢𑁆𑀣𑀲𑀸𑀫𑀺𑀓𑁄𑀢𑀺 𑀅𑀢𑁆𑀣𑁄. 𑀧𑀭𑀲𑁆𑀲𑀸𑀢𑀺 𑀯𑀢𑁆𑀣𑀲𑀸𑀫𑀺𑀓𑀲𑁆𑀲.

𑁧𑁯𑁨. ‘‘𑀞𑀸𑀦𑀸 𑀘𑀸𑀯𑁂𑀬𑁆𑀬𑀸’’𑀢𑀺 𑀧𑀸𑀞𑁂 𑀞𑀸𑀦-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀲𑀻𑀲𑀸𑀤𑀺𑀝𑁆𑀞𑀸𑀦𑀢𑁄 𑀳𑀭𑀻𑀬𑀢𑁂𑀢𑀺 𑀳𑀭𑀡𑀓𑀦𑁆𑀢𑀺 𑀯𑀼𑀢𑁆𑀢𑀸𑀮𑀗𑁆𑀓𑀸𑀭𑀸𑀤𑀺𑀪𑀡𑁆𑀟𑀲𑁆𑀲 𑀘𑀸𑀯𑀦𑁂𑀦 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑁂𑀯 𑀳𑀭𑀡𑀓𑀁 𑀳𑀸𑀭𑀓𑁂𑀦 𑀲𑀳 𑀳𑀭𑀦𑁆𑀢𑀲𑁆𑀲 𑀳𑀸𑀭𑀓𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀦𑀬𑀦𑁂𑀦 𑀞𑀸𑀦𑀸𑀘𑀸𑀯𑀦𑀜𑁆𑀘 ‘‘𑀞𑀸𑀦𑀸 𑀘𑀸𑀯𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀢𑀢𑁆𑀣𑀸𑀧𑀺 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀪𑀡𑁆𑀟𑀳𑀸𑀭𑀓’’𑀦𑁆𑀢𑀺𑀆𑀤𑀺. 𑀪𑀡𑁆𑀟𑀁 𑀳𑀭𑀢𑀺 𑀦𑁂𑀢𑀻𑀢𑀺 𑀪𑀡𑁆𑀟𑀳𑀸𑀭𑀓𑁄, 𑀧𑀼𑀭𑀺𑀲𑀸𑀤𑀺𑀓𑁄, 𑀢𑁂𑀦 𑀲𑀳𑀸𑀢𑀺 𑀲𑀪𑀡𑁆𑀟𑀳𑀸𑀭𑀓𑀁, 𑀅𑀮𑀗𑁆𑀓𑀸𑀭𑀯𑀢𑁆𑀣𑀸𑀤𑀻𑀦𑀺 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂𑀳𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀧𑀸𑀡𑁂𑀳𑀺 𑀲𑀳𑁂𑀯. 𑀪𑀡𑁆𑀟𑀦𑁆𑀢𑀺 𑀢𑁂𑀳𑀺 𑀳𑀭𑀺𑀬𑀫𑀸𑀦𑀢𑁆𑀢𑀸 𑀳𑀭𑀡𑀓𑀲𑀗𑁆𑀔𑀸𑀢𑀯𑀢𑁆𑀣𑀸𑀪𑀭𑀡𑀸𑀤𑀺𑀪𑀡𑁆𑀟𑀁 ¶ . 𑀦𑁂𑀦𑁆𑀢𑀲𑁆𑀲𑀸𑀢𑀺 ‘‘𑀦𑁂𑀦𑁆𑀢𑁄 𑀅𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀦𑁂𑀦𑁆𑀢𑁄𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀧𑀸𑀧𑁂𑀦𑁆𑀢𑁄. 𑀅𑀲𑁆𑀲 𑀧𑀞𑀫𑁂 𑀧𑀸𑀤𑁂 𑀅𑀢𑀺𑀓𑁆𑀓𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 ¶ 𑀧𑀸𑀞𑀲𑁂𑀲𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀪𑀡𑁆𑀟𑀳𑀸𑀭𑀓𑀲𑁆𑀲. 𑀧𑀞𑀫𑀧𑀸𑀤𑁂 𑀅𑀢𑀺𑀓𑁆𑀓𑀦𑁆𑀢𑁂 𑀅𑀢𑁆𑀢𑀦𑀸 𑀧𑀞𑀫𑀁 𑀕𑀦𑁆𑀢𑀩𑁆𑀩𑀤𑀺𑀲𑀢𑁄 𑀘𑁄𑀭𑀲𑁆𑀲𑀸𑀪𑀺𑀫𑀢𑀤𑀺𑀲𑀁 𑀕𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑁂 𑀅𑀢𑀺𑀓𑁆𑀓𑀦𑁆𑀢𑁂 𑀘𑀼𑀢𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁧𑁯𑁩. 𑀣𑁂𑀬𑁆𑀬𑀘𑁂𑀢𑀦𑁄 𑀲𑀘𑁂 𑀢𑀚𑁆𑀚𑁂𑀢𑁆𑀯𑀸 𑀧𑀭𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑀁 𑀧𑀸𑀢𑀸𑀧𑁂𑀢𑀺, 𑀧𑀭𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑁂 𑀫𑀼𑀢𑁆𑀢𑀫𑀢𑁆𑀢𑁂 𑀢𑀚𑁆𑀚𑁂𑀢𑁆𑀯𑀸 𑀧𑀸𑀢𑀸𑀧𑀓𑀲𑁆𑀲 𑀧𑀭𑀸𑀚𑀬𑁄𑀢𑀺 𑀬𑁄𑀚𑀦𑀸. 𑀪𑀡𑁆𑀟𑁂 𑀫𑀼𑀢𑁆𑀢𑀫𑀢𑁆𑀢𑁂𑀢𑀺 𑀪𑀡𑁆𑀟𑁂 𑀳𑀢𑁆𑀣𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑀓𑁆𑀔𑀡𑁂.

𑁧𑁯𑁪. 𑀅𑀣𑀸𑀧𑀻𑀢𑀺 𑀅𑀣 𑀯𑀸. 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀧𑀸𑀢𑀸𑀧𑁂𑀢𑀺 𑀯𑀸𑀢𑀺 𑀏𑀢𑁆𑀣 ‘‘𑀬𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀏𑀯𑀭𑀽𑀧𑀁 𑀘𑁂 𑀳𑁄𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀢𑀚𑁆𑀚𑁂𑀢𑁆𑀯𑀸 𑀧𑀸𑀢𑁂𑀢𑀺, 𑀤𑀼𑀓𑁆𑀓𑀝𑀁. 𑀏𑀯𑀁 𑀧𑀸𑀢𑀺𑀢𑀁 𑀪𑀡𑁆𑀟𑀁 𑀢𑀲𑁆𑀲 𑀘𑁄𑀭𑀲𑁆𑀲 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁯𑁫. 𑀬𑀣𑀸𑀯𑀢𑁆𑀣𑀼𑀦𑁆𑀢𑀺 𑀪𑀡𑁆𑀟𑀲𑁆𑀲 𑀅𑀕𑁆𑀖𑀸𑀦𑀼𑀭𑀽𑀧𑀁, 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀙𑀟𑁆𑀟𑀺𑀢𑁂𑀧𑀻𑀢𑀺 𑀢𑀲𑁆𑀲 𑀘𑁄𑀭𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀪𑀻𑀢𑀢𑀲𑀺𑀢𑁂𑀦 𑀅𑀢𑁆𑀢𑀦𑀸 𑀦𑀻𑀬𑀫𑀸𑀦𑁂 𑀪𑀡𑁆𑀟𑁂 𑀙𑀟𑁆𑀟𑀺𑀢𑁂𑀧𑀺 𑀲𑀢𑀺. 𑀢𑁂𑀦𑁂𑀯 𑀞𑀸𑀦𑀸𑀘𑀸𑀯𑀦𑀁 𑀓𑀸𑀭𑀸𑀧𑀺𑀢𑀦𑁆𑀢𑀺 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀤𑁄𑀲𑁄’’𑀢𑀺. ‘‘𑀢𑀺𑀝𑁆𑀞 𑀢𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀉𑀢𑁆𑀢𑀲𑀺𑀢𑁆𑀯𑀸 𑀙𑀟𑁆𑀟𑀦𑀁 𑀢𑀲𑁆𑀲 𑀆𑀡𑀢𑁆𑀢𑀺𑀬𑀸 𑀯𑀺𑀦𑀸 𑀳𑁄𑀢𑀻𑀢𑀺 𑀢𑀢𑁆𑀣 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀯𑀤𑀢𑁄 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯.

𑁧𑁯𑁬. 𑀢𑀦𑁆𑀢𑀺 𑀢𑀁 𑀙𑀟𑁆𑀟𑀺𑀢𑀁 𑀪𑀡𑁆𑀟𑀁. 𑀢𑀤𑀼𑀤𑁆𑀥𑀸𑀭𑁂𑀢𑀺 𑀢𑀲𑁆𑀲 𑀙𑀟𑁆𑀟𑀺𑀢𑀲𑁆𑀲 𑀪𑀡𑁆𑀟𑀲𑁆𑀲 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀧𑀸𑀭𑀸𑀚𑀺𑀓𑀁 𑀓𑀤𑀸 𑀲𑀺𑀬𑀸𑀢𑀺 ¶ 𑀆𑀳 ‘‘𑀲𑀸𑀫𑀺𑀓𑁂 𑀲𑀸𑀮𑀬𑁂 𑀕𑀢𑁂’’𑀢𑀺. 𑀦𑀺𑀭𑀸𑀮𑀬𑀁 𑀙𑀟𑁆𑀟𑀺𑀢𑀁 𑀧𑀦 𑀕𑀡𑁆𑀳𑀢𑁄 𑀅𑀲𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀦 𑀤𑁄𑀲𑁄𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑁂𑀢𑀺.

𑁧𑁯𑁭. 𑀲𑀸𑀫𑀺𑀓𑀲𑁆𑀲 𑀲𑀸𑀮𑀬𑀓𑀸𑀮𑁂 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀸𑀪𑀸𑀯𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀡𑁆𑀳𑀢𑁄’’𑀢𑀺. 𑀧𑀼𑀩𑁆𑀩𑀕𑀸𑀣𑀸𑀬 ‘‘𑀢’’𑀦𑁆𑀢𑀺 𑀇𑀥𑀸𑀦𑀼𑀯𑀢𑁆𑀢𑀢𑁂. 𑀲𑀓𑀲𑀜𑁆𑀜𑀸𑀬𑀕𑀡𑁆𑀳𑀢𑁄𑀢𑀺 ‘‘𑀢𑀺𑀝𑁆𑀞 𑀢𑀺𑀝𑁆𑀞𑀸’’𑀢𑀺 𑀯𑀘𑀦𑀢𑁄 𑀉𑀢𑁆𑀢𑀲𑀺𑀢𑁆𑀯𑀸 𑀲𑀸𑀮𑀬𑀁 𑀙𑀟𑁆𑀟𑀺𑀢𑀁 𑀢𑀁 𑀯𑀢𑁆𑀣𑀼𑀁 𑀲𑀓𑀲𑀜𑁆𑀜𑀸𑀬 𑀕𑀡𑁆𑀳𑀦𑁆𑀢𑀲𑁆𑀲. 𑀕𑀳𑀡𑁂𑀢𑀺 𑀲𑀓𑀲𑀜𑁆𑀜𑀸𑀬 𑀕𑀳𑀡𑀳𑁂𑀢𑀼, 𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀪𑀡𑁆𑀟𑀁 𑀅𑀢𑁆𑀢𑀦𑁄 𑀕𑀳𑀡𑀓𑀸𑀭𑀡𑀸 𑀪𑀺𑀓𑁆𑀔𑀼𑀁 𑀅𑀯𑀳𑀸𑀭𑀸𑀧𑀢𑁆𑀢𑀺𑀢𑁄 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀢𑁂𑀦𑀸𑀳 ‘‘𑀕𑀳𑀡𑁂 𑀧𑀦 𑀭𑀓𑁆𑀔𑀢𑀻’’𑀢𑀺. 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀕𑀳𑀡𑁂 𑀭𑀓𑁆𑀔𑀢𑀻𑀢𑀺 𑀅𑀢𑀺𑀤𑀺𑀲𑀢𑀺.

𑁧𑁯𑁮-𑁯. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀢𑀺 ‘‘𑀫𑀬𑁆𑀳𑀁 𑀓𑀺𑀫𑁂𑀢𑁂𑀦 𑀪𑀡𑁆𑀟𑁂𑀦, 𑀚𑀻𑀯𑀺𑀢𑀭𑀓𑁆𑀔𑀦𑀫𑁂𑀯 𑀯𑀭𑀢𑀭’’𑀦𑁆𑀢𑀺 𑀦𑀺𑀭𑀸𑀮𑀬𑁄 𑀳𑀼𑀢𑁆𑀯𑀸. 𑀢𑁂𑀦𑀸𑀳 ‘‘𑀪𑀻𑀢𑁄 𑀘𑁄𑀭𑀸 𑀧𑀮𑀸𑀬𑀢𑀻’’𑀢𑀺. 𑀘𑁄𑀭𑀸𑀢𑀺 𑀏𑀢𑁆𑀣 𑀘 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀁. 𑀕𑀡𑁆𑀳𑀢𑁄𑀢𑀺 𑀏𑀢𑁆𑀣 ‘‘𑀢’’𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀢𑀣𑀸 𑀙𑀟𑁆𑀟𑀺𑀢𑀁 𑀢𑀁 𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀸𑀭𑁂 𑀤𑀼𑀓𑁆𑀓𑀝𑀦𑁆𑀢𑀺 𑀯𑀢𑁆𑀣𑀼𑀫𑁆𑀳𑀺 𑀅𑀦𑀯𑀚𑁆𑀚𑁂𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑀯𑀲𑁂𑀦 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀅𑀲𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂 𑀤𑀼𑀓𑁆𑀓𑀝𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀳𑀭𑀸𑀧𑁂𑀦𑁆𑀢𑁂𑀢𑀺 𑀏𑀢𑁆𑀣 𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁, 𑀢𑀲𑁆𑀫𑀺𑀁 𑀪𑀡𑁆𑀟𑀲𑀸𑀫𑀺𑀦𑀺 𑀆𑀳𑀭𑀸𑀧𑁂𑀦𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑁨𑁦𑁦. 𑀦𑀺𑀭𑀸𑀮𑀬𑁂𑀦 𑀙𑀟𑁆𑀟𑀺𑀢𑀯𑀢𑁆𑀣𑀼𑀦𑁄 𑀕𑀳𑀡𑁂 𑀪𑀡𑁆𑀟𑀤𑁂𑀬𑁆𑀬𑀜𑁆𑀘 𑀅𑀤𑁂𑀦𑁆𑀢𑀲𑁆𑀲 𑀧𑀭𑀸𑀚𑀬𑁄 𑀘 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀅𑀜𑁆𑀜𑀸𑀲𑀽𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀇𑀢𑀭𑀸𑀲𑀼 𑀅𑀝𑁆𑀞𑀓𑀣𑀸𑀲𑀼.

𑀳𑀭𑀡𑀓𑀓𑀣𑀸𑀯𑀡𑁆𑀡𑀦𑀸.

𑁨𑁦𑁧. 𑀉𑀧𑀦𑀺𑀥𑀺𑀓𑀣𑀸𑀬 ¶ ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀪𑀸𑀲𑀢𑁄𑀢𑀺 𑀬𑁄𑀚𑀦𑀸. 𑀬𑁂𑀦 𑀓𑁂𑀦𑀘𑀺 𑀭𑀳𑀲𑀺 ‘‘𑀇𑀤𑀁 𑀫𑀬𑁆𑀳𑀁 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀦𑀺𑀬𑁆𑀬𑀸𑀤𑀺𑀢𑀁 𑀪𑀡𑁆𑀟𑀁 𑀧𑀘𑁆𑀙𑀸 𑀲𑀸𑀫𑀺𑀓𑁂𑀦 ‘‘𑀤𑁂𑀳𑀺 𑀫𑁂 𑀢𑀁 𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀘𑁆𑀘𑀦𑁆𑀢𑀫𑀼𑀧𑀕𑀦𑁆𑀢𑀼𑀁 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀪𑀸𑀲𑀢𑁄𑀢𑀺 𑀅𑀢𑁆𑀣𑁄. 𑀕𑀡𑁆𑀳𑀸𑀫𑀻𑀢𑀺 𑀅𑀕𑁆𑀕𑀳𑁂𑀲𑀺𑀁. 𑀅𑀘𑁆𑀘𑀦𑁆𑀢𑀸 𑀳𑁂𑀲𑁄 𑀅𑀢𑀻𑀢𑁂 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄𑀬𑀁. ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨) 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀲𑀬𑁂 𑀓𑀲𑁆𑀫𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀓𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀸𑀤𑀸𑀦𑀧𑀼𑀩𑁆𑀩𑀓𑀢𑁆𑀢𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀲𑀳𑀧𑀬𑁄𑀕𑀯𑀲𑁂𑀦 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸, 𑀦 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸. 𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀫𑀢𑁆𑀣𑀻𑀢𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸’’𑀢𑀺.

𑁨𑁦𑁨. 𑀏𑀢𑀲𑁆𑀲𑀸𑀢𑀺 𑀏𑀢𑀲𑁆𑀲 𑀲𑀫𑀻𑀧𑁂. 𑀓𑀺𑀁 𑀦𑀼 𑀤𑀲𑁆𑀲𑀢𑀻𑀢𑀺 𑀤𑀲𑁆𑀲𑀢𑀺 𑀓𑀺𑀁 𑀦𑀼. 𑀯𑀺𑀫𑀢𑀼𑀧𑁆𑀧𑀸𑀤𑁂𑀢𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀁. 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲.

𑁨𑁦𑁩. 𑀢𑀲𑁆𑀫𑀺𑀦𑁆𑀢𑀺 ¶ 𑀬𑀲𑁆𑀫𑀺𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀫𑁆𑀳𑀺. 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁂𑀢𑀺 𑀅𑀢𑁆𑀢𑀦𑀺 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀡𑁆𑀟𑀲𑁆𑀲 𑀲𑀸𑀫𑀺𑀓𑀲𑁆𑀲 𑀤𑀸𑀦𑀯𑀺𑀲𑀬𑁂 𑀉𑀲𑁆𑀲𑀸𑀳𑀭𑀳𑀺𑀢𑁂 𑀲𑀢𑀺, ‘‘𑀦 𑀤𑀸𑀦𑀺 𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀓𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂’’𑀢𑀺. 𑀧𑀭𑁄𑀢𑀺 𑀪𑀡𑁆𑀟𑀲𑀸𑀫𑀺𑀓𑁄. 𑀥𑀼𑀭𑀦𑁆𑀢𑀺 ‘‘𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀁. 𑀦𑀺𑀓𑁆𑀔𑀺𑀧𑁂𑀢𑀺 𑀦𑀺𑀓𑁆𑀔𑀺𑀧𑁂𑀬𑁆𑀬.

𑁨𑁦𑁪. 𑀘𑀺𑀢𑁆𑀢𑁂𑀦𑀸𑀤𑀸𑀢𑀼𑀓𑀸𑀫𑁄𑀯𑀸𑀢𑀺 𑀏𑀢𑁆𑀣 ‘‘𑀬𑁄 𑀢𑀲𑁆𑀲𑀸’’𑀢𑀺 𑀧𑀸𑀞𑀲𑁂𑀲𑁄. 𑀘𑁂𑀢𑀺 𑀅𑀧𑀺-𑀲𑀤𑁆𑀤𑀢𑁆𑀣𑁂. 𑀬𑁄 𑀘𑁄𑀭𑁄 𑀘𑀺𑀢𑁆𑀢𑁂𑀦 𑀅𑀤𑀸𑀢𑀼𑀓𑀸𑀫𑁄𑀯, 𑀢𑀲𑁆𑀲 𑀘𑁄𑀭𑀲𑁆𑀲 ‘‘𑀤𑀲𑁆𑀲𑀸𑀫𑀻’’𑀢𑀺 𑀫𑀼𑀔𑁂𑀦 ¶ 𑀯𑀤𑀢𑁄𑀧𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀅𑀤𑀸𑀢𑀼𑀓𑀸𑀫𑁄𑀢𑀺 𑀏𑀢𑁆𑀣 ‘‘𑀳𑀼𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀘𑁂𑀢𑀺 𑀯𑀼𑀢𑁆𑀢𑀢𑁆𑀣𑁄. 𑀏𑀯𑀸𑀢𑀺 ‘‘𑀧𑀭𑀸𑀚𑀬𑁄’’𑀢𑀺 𑀇𑀫𑀺𑀦𑀸 𑀬𑀼𑀚𑁆𑀚𑀢𑀺. 𑀘𑀺𑀢𑁆𑀢𑁂𑀦 𑀅𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀼𑀔𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑁄𑀧𑀺 𑀲𑀸𑀫𑀺𑀦𑁄 𑀥𑀼𑀭𑀦𑀺𑀓𑁆𑀔𑁂𑀧𑁂 𑀲𑀢𑀺 𑀧𑀭𑀸𑀚𑀬𑁄 𑀳𑁄𑀢𑁂𑀯𑀸𑀢𑀺 𑀬𑁄𑀚𑀦𑀸.

𑀉𑀧𑀦𑀺𑀥𑀺𑀓𑀣𑀸𑀯𑀡𑁆𑀡𑀦𑀸.

𑁨𑁦𑁫. 𑀲𑀼𑀗𑁆𑀓𑀖𑀸𑀢𑀲𑁆𑀲𑀸𑀢𑀺 ‘‘𑀲𑀼𑀗𑁆𑀓𑀖𑀸𑀢𑀁 𑀦𑀸𑀫 𑀭𑀜𑁆𑀜𑀸 𑀞𑀧𑀺𑀢𑀁 𑀳𑁄𑀢𑀺 𑀧𑀩𑁆𑀩𑀢𑀔𑀡𑁆𑀟𑁂 𑀯𑀸 𑀦𑀤𑀻𑀢𑀺𑀢𑁆𑀣𑁂 𑀯𑀸 𑀕𑀸𑀫𑀤𑁆𑀯𑀸𑀭𑁂 𑀯𑀸’’𑀢𑀺 (𑀧𑀸𑀭𑀸. 𑁧𑁧𑁩) 𑀧𑀸𑀴𑀺𑀬𑀁 𑀆𑀕𑀢𑀲𑁆𑀲 ‘‘𑀲𑀼𑀗𑁆𑀓𑀁 𑀢𑀢𑁄 𑀳𑀦𑀦𑁆𑀢𑀺…𑀧𑁂… 𑀯𑀺𑀦𑀸𑀲𑁂𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁩) 𑀅𑀝𑁆𑀞𑀓𑀣𑀸𑀬𑀁 𑀦𑀺𑀭𑀼𑀢𑁆𑀢𑀲𑁆𑀲 ‘‘𑀇𑀢𑁄 𑀧𑀝𑁆𑀞𑀸𑀬 𑀦𑀻𑀬𑀫𑀸𑀦𑁂 𑀪𑀡𑁆𑀟𑁂 𑀏𑀢𑁆𑀢𑀓𑀢𑁄 𑀏𑀢𑁆𑀢𑀓𑀁 𑀭𑀸𑀚𑀪𑀸𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀭𑀸𑀚𑀸𑀤𑀻𑀳𑀺 𑀢𑀁𑀢𑀁𑀧𑀤𑁂𑀲𑀲𑀸𑀫𑀺𑀓𑁂𑀳𑀺 𑀦𑀺𑀬𑀫𑀺𑀢𑀲𑁆𑀲 𑀧𑀩𑁆𑀩𑀢𑀔𑀡𑁆𑀟𑀸𑀤𑀺𑀝𑁆𑀞𑀸𑀦𑀲𑁆𑀲. 𑀩𑀳𑀻𑀢𑀺 𑀲𑀼𑀗𑁆𑀓𑀕𑀳𑀡𑀢𑁆𑀣𑀸𑀬 𑀧𑀭𑀺𑀓𑀧𑁆𑀧𑀺𑀢𑀲𑀻𑀫𑀢𑁄 𑀩𑀳𑀺. 𑀧𑀸𑀢𑁂𑀢𑀻𑀢𑀺 𑀏𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. ‘‘𑀭𑀸𑀚𑀸𑀭𑀳𑀁 𑀪𑀡𑁆𑀟’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀬𑀢𑁄 𑀓𑀼𑀢𑁄𑀘𑀺 𑀪𑀡𑁆𑀟𑀢𑁄 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑁄 𑀪𑀸𑀕𑁄 𑀭𑀸𑀚𑀸𑀤𑀺𑀤𑁂𑀲𑀲𑀸𑀫𑀺𑀓𑀲𑁆𑀲 𑀤𑀸𑀢𑀩𑁆𑀩𑁄 𑀳𑁄𑀢𑀺, 𑀢𑀸𑀤𑀺𑀲𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀬𑀣𑀸 𑀩𑀳𑀺 𑀧𑀢𑀢𑀺, 𑀏𑀯𑀁 𑀔𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀥𑀼𑀯𑀁 𑀧𑀢𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀢’’𑀦𑁆𑀢𑀺 𑀧𑀸𑀞𑀲𑁂𑀲𑁄, ‘‘𑀪𑀡𑁆𑀟’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀬𑀣𑀸 𑀔𑀺𑀢𑁆𑀢𑀁 𑀢𑀁 𑀪𑀡𑁆𑀟𑀁 𑀏𑀓𑀦𑁆𑀢𑁂𑀦 𑀩𑀳𑀺 𑀧𑀢𑀢𑀻𑀢𑀺. 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀢𑀲𑁆𑀫𑀺𑀁 𑀪𑀡𑁆𑀟𑁂.

𑁨𑁦𑁬. ‘‘𑀥𑀼𑀯𑀁 𑀧𑀢𑀢𑀻’’𑀢𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀁 𑀭𑀼𑀓𑁆𑀔𑁂’’𑀢𑀺𑀆𑀤𑀺. 𑀢𑀦𑁆𑀢𑀺 𑀣𑁂𑀬𑁆𑀬𑀸𑀬 𑀩𑀳𑀺 𑀧𑀸𑀢𑁂𑀢𑀼𑀁 𑀔𑀺𑀢𑁆𑀢𑀁 𑀪𑀡𑁆𑀟𑀁 𑀧𑀝𑀺𑀳𑀢𑀁 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀸𑀢𑀓𑁆𑀔𑀺𑀢𑁆𑀢𑀫𑁆𑀧𑀺 𑀯𑀸𑀢𑀺 𑀧𑀸𑀞𑁄 ¶ 𑀕𑀳𑁂𑀢𑀩𑁆𑀩𑁄. ‘‘𑀯𑀸𑀢𑀓𑁆𑀔𑀺𑀢𑁆𑀢𑁄’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀸 𑀤𑀝𑁆𑀞𑀩𑁆𑀩𑁄.

𑁨𑁦𑁭. 𑀧𑀘𑁆𑀙𑀸𑀢𑀺 ¶ 𑀧𑀢𑀺𑀢𑀝𑁆𑀞𑀸𑀦𑁂 𑀣𑁄𑀓𑀁 𑀘𑀺𑀭𑀸𑀬𑀺𑀢𑁆𑀯𑀸, 𑀇𑀫𑀺𑀦𑀸 𑀣𑁄𑀓𑀫𑁆𑀧𑀺 𑀘𑀺𑀭𑀸𑀬𑀺𑀢𑀫𑀢𑁆𑀢𑁂 𑀧𑀬𑁄𑀕𑀲𑀸𑀥𑀺𑀬𑀁 𑀓𑀸𑀭𑀺𑀬𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀓𑀸𑀭𑀡𑀁 𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀸𑀭𑀸𑀚𑀺𑀓𑀁 𑀲𑀺𑀬𑀸’’𑀢𑀺.

𑁨𑁦𑁮. ‘‘𑀞𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀢𑀺𑀢𑀝𑁆𑀞𑀸𑀦𑁂 𑀅𑀘𑀺𑀭𑀸𑀬𑀺𑀢𑁆𑀯𑀸 𑀕𑀢𑁂𑀧𑀺 𑀢𑀲𑁆𑀫𑀺𑀁 𑀩𑀳𑀺 𑀧𑀢𑀺𑀢𑀝𑁆𑀞𑀸𑀦𑀢𑁄 𑀇𑀢𑀭𑀢𑁆𑀭𑀸𑀧𑀺 𑀘𑀺𑀭𑀸𑀬𑀺𑀢𑁂𑀦 𑀩𑀳𑀺 𑀧𑀸𑀢𑀦𑀧𑁆𑀧𑀬𑁄𑀕𑁂𑀦 𑀲𑀸𑀥𑀺𑀬𑀁 𑀓𑀸𑀭𑀺𑀬𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀧𑀸𑀭𑀸𑀚𑀺𑀓𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀭𑀸𑀚𑀬𑁄’’𑀢𑀺. ‘‘𑀅𑀢𑀺𑀝𑁆𑀞𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀘𑀺𑀭𑀸𑀬𑀦𑁂𑀦 𑀧𑀬𑁄𑀕𑀲𑁆𑀲 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀭𑀓𑁆𑀔𑀢𑀻’’𑀢𑀺.

𑁨𑁦𑁯. 𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁.

𑁨𑁧𑁦. 𑀲𑀬𑀁 𑀯𑀸 𑀯𑀝𑁆𑀝𑁂𑀢𑀻𑀢𑀺 𑀅𑀦𑁆𑀢𑁄 𑀞𑀺𑀢𑁄 𑀲𑀬𑀁 𑀯𑀸 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀩𑀳𑀺𑀲𑀻𑀫𑀸𑀬 𑀦𑀺𑀦𑁆𑀦𑀝𑁆𑀞𑀸𑀦𑀁 𑀧𑀭𑀺𑀯𑀝𑁆𑀝𑁂𑀢𑀺. 𑀅𑀝𑁆𑀞𑀢𑁆𑀯𑀸𑀢𑀺 𑀧𑀯𑀝𑁆𑀝𑀺𑀢𑀫𑀢𑁆𑀢𑁂 𑀅𑀦𑁆𑀢𑁄 𑀓𑀢𑁆𑀣𑀘𑀺𑀧𑀺 𑀅𑀝𑁆𑀞𑀢𑁆𑀯𑀸. 𑀯𑀝𑁆𑀝𑀫𑀸𑀦𑀦𑁆𑀢𑀺 𑀧𑀯𑀝𑁆𑀝𑀦𑁆𑀢𑀁. 𑀕𑀢𑀦𑁆𑀢𑀺 𑀩𑀳𑀺𑀲𑀻𑀫𑀁 𑀓𑁂𑀲𑀕𑁆𑀕𑀫𑀢𑁆𑀢𑀝𑁆𑀞𑀸𑀦𑀫𑁆𑀧𑀺 𑀅𑀦𑁆𑀢𑁄𑀲𑀻𑀫𑀫𑀢𑀺𑀓𑁆𑀓𑀫𑀫𑀢𑁆𑀢𑀁.

𑁨𑁧𑁧. 𑀢𑀁 𑀪𑀡𑁆𑀟𑀁 𑀲𑀘𑁂 𑀅𑀦𑁆𑀢𑁄 𑀞𑀢𑁆𑀯𑀸 𑀞𑀢𑁆𑀯𑀸 𑀩𑀳𑀺 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺 𑀅𑀦𑁆𑀢𑁄𑀲𑀻𑀫𑀸𑀬 𑀞𑀢𑁆𑀯𑀸 𑀞𑀢𑁆𑀯𑀸 𑀩𑀳𑀺𑀲𑀻𑀫𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀭𑀓𑁆𑀔𑀢𑀻𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀧𑀞𑀫𑀕𑀢𑀺𑀦𑀺𑀯𑀢𑁆𑀢𑀦𑁂𑀦𑁂𑀯 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀬𑁄𑀕𑀯𑁂𑀕𑀲𑁆𑀲 𑀦𑀺𑀯𑀢𑁆𑀢𑀢𑁆𑀢𑀸, 𑀢𑀢𑁄 𑀉𑀧𑀭𑀺 𑀦𑀺𑀯𑀢𑁆𑀢𑀦𑀸𑀭𑀳𑀓𑀸𑀭𑀡𑀲𑁆𑀲 𑀅𑀮𑀤𑁆𑀥𑀪𑀸𑀯𑁂𑀦 𑀅𑀢𑁆𑀢𑀦𑀸 𑀘 𑀕𑀢𑀢𑁆𑀢𑀸 𑀢𑀣𑀸 𑀩𑀳𑀺𑀲𑀻𑀫𑀧𑁆𑀧𑀢𑁆𑀢𑀁 𑀢𑀁 𑀪𑀡𑁆𑀟𑀁 𑀢𑀁𑀫𑀽𑀮𑀓𑀧𑀬𑁄𑀚𑀓𑀁 ¶ 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀞𑀧𑀺𑀢𑁂𑀢𑀺 ‘‘𑀏𑀯𑀁 𑀞𑀧𑀺𑀢𑁂 𑀯𑀝𑁆𑀝𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀺𑀦𑀸 ‘‘𑀓𑁂𑀯𑀮𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀩𑀳𑀺𑀲𑀻𑀫𑀸𑀪𑀺𑀫𑀼𑀔𑀁 𑀦𑀺𑀦𑁆𑀦𑀝𑁆𑀞𑀸𑀦𑀁 𑀑𑀢𑀸𑀭𑁂𑀢𑁆𑀯𑀸 𑀞𑀧𑀺𑀢𑁂. 𑀲𑀬𑀁 𑀯𑀝𑁆𑀝𑀢𑀻𑀢𑀺 𑀪𑀡𑁆𑀟𑀁 𑀲𑀬𑀫𑁂𑀯 𑀦𑀺𑀦𑁆𑀦𑀝𑁆𑀞𑀸𑀦𑀁 𑀦𑀺𑀦𑁆𑀦𑀁 𑀳𑀼𑀢𑁆𑀯𑀸 𑀩𑀳𑀺𑀲𑀻𑀫𑀁 𑀘𑁂 𑀧𑀯𑀝𑁆𑀝𑀦𑁆𑀢𑀁 𑀕𑀘𑁆𑀙𑀢𑀺. 𑀯𑀝𑁆𑀝𑀢𑀻𑀢𑀺 𑀆𑀧𑀢𑁆𑀢𑀺𑀬𑀸 𑀅𑀓𑀭𑀡𑀢𑁄 𑀯𑀝𑁆𑀝𑀢𑀺.

𑁨𑁧𑁨. 𑀕𑀘𑁆𑀙𑀦𑁆𑀢𑁂𑀢𑀺 𑀘𑁄𑀭𑀲𑁆𑀲 𑀧𑀬𑁄𑀕𑀁 𑀯𑀺𑀦𑀸 𑀅𑀢𑁆𑀢𑀦𑀸𑀯 𑀕𑀘𑁆𑀙𑀦𑁆𑀢𑁂. 𑀢𑀦𑁆𑀢𑀺 𑀭𑀸𑀚𑀤𑁂𑀬𑁆𑀬𑀧𑀜𑁆𑀘𑀫𑀸𑀲𑀓𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀫𑀢𑁆𑀢𑀁 𑀲𑀼𑀗𑁆𑀓𑀯𑀦𑁆𑀢𑀁 𑀪𑀡𑁆𑀟𑀁. 𑀦𑀻𑀳𑀝𑁂𑀧𑀺 𑀦𑀸𑀯𑀳𑀸𑀭𑁄𑀢𑀺 𑀬𑁄𑀚𑀦𑀸. 𑀓𑁂𑀯𑀮𑀁 𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀅𑀦𑀗𑁆𑀕𑀪𑀸𑀯𑀢𑁄, 𑀬𑀸𑀦𑀸𑀤𑀺𑀧𑀬𑁄𑀚𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄, 𑀪𑀡𑁆𑀟𑀝𑁆𑀞𑀧𑀺𑀢𑀬𑀸𑀦𑀸𑀤𑀺𑀦𑁄 ¶ 𑀅𑀢𑁆𑀢𑀦𑀸𑀯 𑀩𑀳𑀺𑀲𑀻𑀫𑀧𑁆𑀧𑀢𑁆𑀢𑀢𑁆𑀢𑀸, 𑀢𑁂𑀦𑁂𑀯 𑀪𑀡𑁆𑀟𑀲𑁆𑀲𑀸𑀧𑀺 𑀕𑀢𑀢𑁆𑀢𑀸 𑀘 𑀪𑀺𑀓𑁆𑀔𑀼𑀦𑁄 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁨𑁧𑁩. 𑀧𑀬𑁄𑀕𑁂𑀦 𑀯𑀺𑀦𑀸𑀢𑀺 𑀘𑁄𑀭𑀲𑁆𑀲 𑀲𑀓𑀧𑀬𑁄𑀕𑀫𑀦𑁆𑀢𑀭𑁂𑀦. 𑀅𑀯𑀳𑀸𑀭𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀬𑀼𑀢𑁆𑀢𑀺 𑀯𑀼𑀢𑁆𑀢𑀦𑀬𑀸𑀯.

𑁨𑁧𑁪. 𑀫𑀡𑀺𑀦𑁆𑀢𑀺 𑀧𑀸𑀤𑀸𑀭𑀳𑀁 𑀲𑀼𑀗𑁆𑀓𑀤𑀸𑀢𑀩𑁆𑀩𑀫𑀡𑀺𑀭𑀢𑀦𑀁, 𑀏𑀢𑁂𑀦𑁂𑀯 𑀉𑀧𑀮𑀓𑁆𑀔𑀡𑀧𑀤𑀢𑁆𑀢𑀸 𑀬𑀁𑀓𑀺𑀜𑁆𑀘𑀺 𑀪𑀡𑁆𑀟𑀁 𑀲𑀗𑁆𑀕𑀳𑀺𑀢𑀫𑁂𑀯. 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸𑀢𑀺 𑀬𑀸𑀦𑀲𑁆𑀲 𑀅𑀢𑁆𑀢𑀦𑀸 𑀧𑀸𑀚𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀫𑀸𑀢𑀺𑀓𑁆𑀓𑀫𑀦𑁂𑀢𑀺 𑀲𑀼𑀗𑁆𑀓𑀕𑁆𑀕𑀳𑀡𑀲𑁆𑀲 𑀦𑀺𑀬𑀫𑀺𑀢𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀦𑁂.

𑁨𑁧𑁫. 𑀫𑀢𑀦𑁆𑀢𑀺 ‘‘𑀏𑀢𑁆𑀢𑀓𑀪𑀡𑁆𑀟𑀢𑁄 𑀏𑀢𑁆𑀢𑀓𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀭𑀸𑀚𑀽𑀳𑀺 𑀅𑀦𑀼𑀫𑀢𑀁. 𑀲𑁂𑀲𑁄 𑀓𑀣𑀸𑀫𑀕𑁆𑀕𑁄𑀢𑀺 ‘‘𑀲𑀼𑀗𑁆𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀲𑀼𑀗𑁆𑀓𑀺𑀓𑁂𑀲𑀼 𑀦𑀺𑀤𑁆𑀤𑀸𑀬𑀫𑀸𑀦𑁂𑀲𑀼, 𑀓𑀻𑀴𑀦𑁆𑀢𑁂𑀲𑀼, 𑀩𑀳𑀺𑀕𑀢𑁂𑀲𑀼 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀕𑀘𑁆𑀙𑀢𑁄 𑀦 𑀤𑁄𑀲𑁄, 𑀪𑀡𑁆𑀟𑀤𑁂𑀬𑁆𑀬𑀁 ¶ 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀓𑁄 𑀯𑀺𑀦𑀺𑀘𑁆𑀙𑀬𑀓𑀣𑀸𑀫𑀕𑁆𑀕𑁄. 𑀅𑀭𑀜𑁆𑀜𑀝𑁆𑀞𑀓𑀣𑀸𑀲𑀫𑁄𑀢𑀺 ‘‘𑀬𑁄 𑀘𑀸𑀭𑀓𑁆𑀔𑀝𑁆𑀞𑀸𑀦𑀁 𑀧𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁧𑁭𑁦) 𑀬𑀣𑀸𑀯𑀼𑀢𑁆𑀢𑀅𑀭𑀜𑁆𑀜𑀝𑁆𑀞𑀓𑀣𑀸𑀬 𑀲𑀤𑀺𑀲𑁄,

‘‘𑀓𑀫𑁆𑀫𑀝𑁆𑀞𑀸𑀦𑀁 𑀘𑀺𑀢𑁆𑀢𑁂 𑀓𑀢𑁆𑀯𑀸;

𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀯𑀺𑀳𑀺𑀢𑁄;

𑀲𑀼𑀗𑁆𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀕𑀘𑁆𑀙𑁂;

𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑁂𑀯𑀲𑁆𑀲𑀸’’𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀯𑀼𑀘𑁆𑀘𑀫𑀸𑀦𑀲𑀤𑀺𑀲𑁄𑀬𑁂𑀯. 𑀢𑁂𑀦𑁂𑀯 𑀕𑀢𑀢𑁆𑀣𑀢𑀸𑀬 𑀇𑀤𑀸𑀦𑀺 𑀦 𑀯𑀺𑀘𑀸𑀭𑀻𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀗𑁆𑀓𑀖𑀸𑀢𑀓𑀣𑀸𑀯𑀡𑁆𑀡𑀦𑀸.

𑁨𑁧𑁬. ‘‘𑀧𑀸𑀡𑁄 ¶ 𑀦𑀸𑀫 𑀫𑀦𑀼𑀲𑁆𑀲𑀧𑀸𑀡𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁧𑁧𑁪) 𑀧𑀸𑀴𑀺𑀢𑁄 𑀘 ‘‘𑀢𑀫𑁆𑀧𑀺 𑀪𑀼𑀚𑀺𑀲𑁆𑀲𑀁 𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁪) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀧𑀭𑀤𑀸𑀲𑀫𑀦𑀼𑀲𑁆𑀲𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀢𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑁆𑀢𑁄𑀚𑀸𑀢’’𑀦𑁆𑀢𑀺𑀆𑀤𑀺. 𑀕𑁂𑀳𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀤𑀸𑀲𑀲𑁆𑀲 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑁄 𑀦𑀸𑀫, 𑀢𑀁 𑀯𑀸. 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄, 𑀢𑀁 𑀯𑀸. 𑀤𑀺𑀦𑁆𑀦𑀁 𑀯𑀸 𑀧𑀦 𑀓𑁂𑀦𑀘𑀻𑀢𑀺 𑀫𑀸𑀢𑀼𑀮𑀅𑀬𑁆𑀬𑀓𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀤𑀸𑀲𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀯𑀸. 𑀤𑀸𑀲𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀓𑀭𑀫𑀭𑀸𑀦𑀻𑀢𑀁 𑀯𑀸 𑀤𑀸𑀲𑀦𑁆𑀢𑀺 𑀧𑀭𑀯𑀺𑀲𑀬𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀤𑀸𑀲𑀪𑀸𑀯𑀸𑀬 𑀕𑀳𑀺𑀢𑀲𑀗𑁆𑀔𑀸𑀢𑀁 𑀓𑀭𑀫𑀭𑀸𑀦𑀻𑀢𑀤𑀸𑀲𑀁 𑀯𑀸. 𑀳𑀭𑀦𑁆𑀢𑀲𑁆𑀲 𑀧𑀭𑀸𑀚𑀬𑁄𑀢𑀺 𑀏𑀢𑁆𑀣 ‘‘𑀘𑁄𑀭𑀺𑀓𑀸𑀬 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑀬𑀢𑁄 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁧𑁭. 𑀪𑀼𑀚𑀺𑀲𑁆𑀲𑀁 𑀯𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀦𑀼𑀲𑁆𑀲𑀲𑁆𑀲 𑀅𑀤𑀸𑀲𑀪𑀽𑀢𑀁. 𑀫𑀸𑀦𑀼𑀲𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀲𑀢𑁆𑀢𑀁. 𑀆𑀞𑀧𑀺𑀢𑀦𑁆𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁.

𑁨𑁧𑁮. 𑀢𑀦𑁆𑀢𑀺 ¶ 𑀅𑀦𑁆𑀢𑁄𑀚𑀸𑀢𑀸𑀤𑀻𑀲𑀼 𑀤𑀸𑀲𑁂𑀲𑀼 𑀬𑀁 𑀓𑀜𑁆𑀘𑀺 𑀤𑀸𑀲𑀁. 𑀧𑀮𑀸𑀬𑀺𑀢𑀼𑀓𑀸𑀫𑁄𑀯𑀸𑀢𑀺 𑀧𑀮𑀸𑀧𑁂𑀢𑀼𑀓𑀸𑀫𑁄 𑀦𑀻𑀳𑀭𑀺𑀢𑀼𑀓𑀸𑀫𑁄. 𑀅𑀣 𑀯𑀸 𑀢𑀁 𑀤𑀸𑀲𑀁 𑀪𑀼𑀚𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀧𑀮𑀸𑀬𑀺𑀢𑀼𑀓𑀸𑀫𑁄𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀪𑀼𑀚𑁂𑀳𑀻𑀢𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺. 𑀢𑀁 𑀞𑀺𑀢𑀝𑁆𑀞𑀸𑀦𑀢𑁄𑀢𑀺 𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀢𑀁𑀞𑀺𑀢𑀝𑁆𑀞𑀸𑀦𑀁, 𑀢𑀢𑁄 𑀢𑀁𑀞𑀺𑀢𑀝𑁆𑀞𑀸𑀦𑀢𑁄, 𑀘𑁄𑀭𑁂𑀦 𑀅𑀢𑁆𑀢𑀦𑀸 𑀞𑀺𑀢𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀫𑁂𑀯𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀺 𑀲𑀗𑁆𑀓𑀸𑀫𑁂𑀢𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀢𑀢𑁄 𑀅𑀜𑁆𑀜𑀁 𑀞𑀸𑀦𑀁 𑀧𑀸𑀧𑁂𑀢𑀺. 𑀪𑀼𑀚𑁂𑀳𑀺 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀧𑀓𑀸𑀭𑀦𑁆𑀢𑀭𑀸𑀧𑁂𑀓𑁆𑀔𑁄, ‘‘𑀲𑀗𑁆𑀓𑀸𑀫𑁂𑀢𑀺 𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁨𑁧𑁯. 𑀢𑀚𑁆𑀚𑁂𑀢𑁆𑀯𑀸𑀢𑀺 𑀪𑀬𑀓𑀭𑁂𑀦 𑀯𑀘𑀦𑁂𑀦 𑀮𑁂𑀲𑁂𑀦, 𑀇𑀗𑁆𑀕𑀺𑀢𑁂𑀦 𑀯𑀸 𑀢𑀸𑀲𑁂𑀢𑁆𑀯𑀸 𑀦𑁂𑀦𑁆𑀢𑀲𑁆𑀲 𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀤𑀯𑀸𑀭𑀢𑁄𑀢𑀺 𑀧𑀤𑀯𑀸𑀭𑁂𑀦 𑀬𑀼𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀞𑀫𑀧𑀤𑀯𑀸𑀭𑀬𑀼𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀤𑀼𑀢𑀺𑀬𑀧𑀤𑀯𑀸𑀭𑀬𑀼𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁨𑁦. 𑀳𑀢𑁆𑀣𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑁂𑀲𑀯𑀢𑁆𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀦𑁆𑀢𑀺 𑀤𑀸𑀲𑀁. 𑀓𑀟𑁆𑀠𑀢𑁄𑀧𑀻𑀢𑀺 𑀆𑀓𑀟𑁆𑀠𑀢𑁄𑀧𑀺. 𑀧𑀭𑀸𑀚𑀬𑁄𑀢𑀺 ‘‘𑀧𑀤𑀯𑀸𑀭𑀢𑁄’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀞𑀫𑀧𑀤𑀯𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀧𑀤𑀯𑀸𑀭𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀦𑀬𑁄𑀢𑀺 ‘‘𑀧𑀤𑀯𑀸𑀭𑀢𑁄 𑀬𑀼𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁄.

𑁨𑁨𑁧. 𑀯𑁂𑀕𑀲𑀸𑀯𑀸𑀢𑀺 ¶ 𑀯𑁂𑀕𑁂𑀦𑁂𑀯, 𑀘𑁄𑀭𑀲𑁆𑀲 𑀯𑀘𑀦𑁂𑀦 𑀓𑀸𑀢𑀩𑁆𑀩𑀯𑀺𑀲𑁂𑀲𑀭𑀳𑀺𑀢𑁂𑀦 𑀩𑀮𑀯𑀕𑀫𑀦𑀯𑁂𑀕𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺.

𑁨𑁨𑁨. 𑀲𑀡𑀺𑀓𑀦𑁆𑀢𑀺 ¶ 𑀫𑀦𑁆𑀤𑀕𑀢𑀺𑀬𑀸. 𑀯𑀤𑀢𑀻𑀢𑀺 ‘‘𑀕𑀘𑁆𑀙, 𑀬𑀸𑀳𑀺, 𑀧𑀮𑀸𑀬𑀸’’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀓𑀣𑁂𑀢𑀺. 𑀲𑁄𑀧𑀺 𑀘𑀸𑀢𑀺 𑀬𑁄 𑀫𑀦𑁆𑀤𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑁄 𑀏𑀯𑀁 𑀯𑀼𑀢𑁆𑀢𑁄, 𑀲𑁄𑀧𑀺 𑀘.

𑁨𑁨𑁩. 𑀧𑀮𑀸𑀬𑀺𑀢𑁆𑀯𑀸𑀢𑀺 𑀲𑀸𑀫𑀺𑀓𑀁 𑀧𑀳𑀸𑀬 𑀕𑀦𑁆𑀢𑁆𑀯𑀸. 𑀅𑀜𑁆𑀜𑀦𑁆𑀢𑀺 𑀲𑀸𑀫𑀺𑀓𑀸𑀬𑀢𑁆𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀞𑀸𑀦𑀁. 𑀲𑀸𑀧𑀡𑀁 𑀯𑀻𑀣𑀺𑀲𑀦𑁆𑀦𑀺𑀯𑁂𑀲𑀬𑀼𑀢𑁆𑀢𑀁 𑀦𑀺𑀕𑀫𑀫𑁆𑀧𑀺 𑀯𑀸. 𑀢𑀢𑁄𑀢𑀺 𑀧𑀮𑀸𑀬𑀺𑀢𑁆𑀯𑀸 𑀧𑀯𑀺𑀝𑁆𑀞𑀕𑀸𑀫𑀸𑀤𑀺𑀢𑁄. 𑀢𑀦𑁆𑀢𑀺 𑀧𑀮𑀸𑀬𑀺𑀢𑁆𑀯𑀸 𑀧𑀯𑀺𑀝𑁆𑀞𑀁 𑀢𑀁 𑀤𑀸𑀲𑀁.

𑀧𑀸𑀡𑀓𑀣𑀸𑀯𑀡𑁆𑀡𑀦𑀸.

𑁨𑁨𑁪. 𑀣𑁂𑀬𑁆𑀬𑀸𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦. 𑀲𑀧𑁆𑀧𑀓𑀭𑀡𑁆𑀟𑀦𑁆𑀢𑀺 𑀲𑀧𑁆𑀧𑀲𑀬𑀦𑀧𑁂𑀴𑀁. 𑀬𑀣𑀸𑀯𑀢𑁆𑀣𑀼𑀦𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀫𑀸𑀳. 𑀞𑀸𑀦𑀢𑁄𑀢𑀺 𑀲𑀧𑁆𑀧𑀧𑁂𑀴𑀸𑀬 𑀞𑀺𑀢𑀝𑁆𑀞𑀸𑀦𑀢𑁄. 𑀘𑀸𑀯𑀦𑁂𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀸𑀢𑀺𑀓𑁆𑀓𑀫𑁂.

𑁨𑁨𑁫. 𑀓𑀭𑀡𑁆𑀟𑀦𑁆𑀢𑀺 𑀲𑀧𑁆𑀧𑀧𑁂𑀴𑀁. 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀯𑀺𑀯𑀭𑀺𑀢𑁆𑀯𑀸. 𑀓𑀭𑀡𑁆𑀟𑀢𑀮𑀢𑁄𑀢𑀺 𑀅𑀦𑁆𑀢𑁄𑀧𑁂𑀴𑀸𑀬 𑀢𑀮𑀢𑁄. 𑀦𑀗𑁆𑀕𑀼𑀝𑁆𑀞𑁂𑀢𑀺 𑀦𑀗𑁆𑀕𑀼𑀝𑁆𑀞𑀧𑀭𑀺𑀬𑀦𑁆𑀢𑁂.

𑁨𑁨𑁬. 𑀖𑀁𑀲𑀺𑀢𑁆𑀯𑀸𑀢𑀺 𑀧𑁂𑀴𑀸𑀧𑀲𑁆𑀲𑁂 𑀨𑀼𑀲𑀸𑀧𑁂𑀢𑁆𑀯𑀸. 𑀲𑀧𑁆𑀧𑀓𑀭𑀡𑁆𑀟𑀲𑁆𑀲 𑀫𑀼𑀔𑀯𑀝𑁆𑀝𑀺𑀢𑁄𑀢𑀺 𑀓𑀭𑀡𑁆𑀟𑀧𑀼𑀝𑀫𑀼𑀔𑀯𑀝𑁆𑀝𑀺𑀢𑁄. 𑀢𑀲𑁆𑀲 𑀦𑀗𑁆𑀕𑀼𑀝𑁆𑀞𑁂 𑀫𑀼𑀢𑁆𑀢𑀫𑀢𑁆𑀢𑁂𑀢𑀺 𑀬𑁄𑀚𑀦𑀸.

𑁨𑁨𑁭. 𑀦𑀸𑀫𑀢𑁄𑀢𑀺 𑀦𑀸𑀫𑁂𑀦, 𑀦𑀸𑀫𑀁 𑀯𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑁆𑀓𑁄𑀲𑀦𑁆𑀢𑀲𑁆𑀲𑀸𑀢𑀺 𑀅𑀯𑁆𑀳𑀸𑀬𑀦𑁆𑀢𑀲𑁆𑀲. 𑀢𑀲𑁆𑀲𑀸𑀢𑀺 𑀧𑀓𑁆𑀓𑁄𑀲𑀓𑀲𑁆𑀲.

𑁨𑁨𑁮. 𑀢𑀣𑀸𑀢𑀺 𑀓𑀭𑀡𑁆𑀟𑀁 𑀯𑀺𑀯𑀭𑀺𑀢𑁆𑀯𑀸. 𑀫𑀡𑁆𑀟𑀽𑀓𑀫𑀽𑀲𑀺𑀓𑀸𑀦𑀁 𑀭𑀯𑀁 𑀓𑀢𑁆𑀯𑀸 𑀦𑀸𑀫𑁂𑀦 𑀧𑀓𑁆𑀓𑁄𑀲𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀯𑀸-𑀲𑀤𑁆𑀤𑁂𑀦 𑀮𑀸𑀚𑀸𑀯𑀺𑀓𑀺𑀭𑀡𑀅𑀘𑁆𑀙𑀭𑀧𑀳𑀸𑀭𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁨𑁯. 𑀫𑀼𑀔𑀦𑁆𑀢𑀺 ¶ 𑀲𑀧𑁆𑀧𑀓𑀭𑀡𑁆𑀟𑀲𑁆𑀲 𑀫𑀼𑀔𑀁. 𑀏𑀯𑀫𑁂𑀯 𑀘 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀫𑀡𑁆𑀟𑀽𑀓𑀲𑀜𑁆𑀜𑀁, 𑀫𑀽𑀲𑀺𑀓𑀲𑀜𑁆𑀜𑀁 𑀓𑀢𑁆𑀯𑀸 𑀯𑀸 𑀮𑀸𑀚𑀸 𑀯𑀺𑀓𑀺𑀭𑀺𑀢𑁆𑀯𑀸 ¶ 𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀯𑀸 𑀦𑀸𑀫𑀁 𑀯𑀢𑁆𑀯𑀸 𑀧𑀓𑁆𑀓𑁄𑀲𑀦𑁆𑀢𑀲𑁆𑀲. 𑀬𑁂𑀦 𑀓𑁂𑀦𑀘𑀻𑀢𑀺 𑀯𑀼𑀢𑁆𑀢𑀦𑀻𑀳𑀸𑀭𑀢𑁄 𑀬𑁂𑀦 𑀯𑀸 𑀢𑁂𑀦 𑀯𑀸.

𑁨𑁩𑁦. 𑀦 𑀧𑀓𑁆𑀓𑁄𑀲𑀢𑀺 𑀘𑁂𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀦𑀸𑀫𑀁 𑀯𑀢𑁆𑀯𑀸 𑀦 𑀧𑀓𑁆𑀓𑁄𑀲𑀢𑀺. 𑀢𑀲𑁆𑀲𑀸𑀢𑀺 𑀓𑀭𑀡𑁆𑀟𑀫𑀼𑀔𑀯𑀺𑀯𑀭𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.

𑀅𑀧𑀤𑀓𑀣𑀸𑀯𑀡𑁆𑀡𑀦𑀸.

𑁨𑁩𑁧. 𑀳𑀢𑁆𑀣𑀺𑀦𑁆𑀢𑀺 𑀳𑀢𑁆𑀣𑀺𑀫𑁆𑀳𑀺, 𑀪𑀼𑀫𑁆𑀫𑀢𑁆𑀣𑁂 𑀏𑀯 𑀉𑀧𑀬𑁄𑀕𑀯𑀘𑀦𑀁.

𑁨𑁩𑁨. 𑀲𑀸𑀮𑀸𑀬𑀦𑁆𑀢𑀺 𑀳𑀢𑁆𑀣𑀺𑀲𑀸𑀮𑀸𑀬𑀁. 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀭𑀸𑀚𑀸𑀕𑀸𑀭𑀁, 𑀢𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑁄𑀯𑀢𑁆𑀣𑀼, 𑀅𑀦𑁆𑀢𑁄𑀭𑀸𑀚𑀕𑁂𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀡𑁂𑀢𑀺 𑀅𑀦𑁆𑀢𑁄𑀭𑀸𑀚𑀗𑁆𑀕𑀡𑁂. 𑀧𑀺-𑀲𑀤𑁆𑀤𑁄 ‘‘𑀅𑀦𑁆𑀢𑁄𑀦𑀕𑀭𑁂’’𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀢𑁆𑀣𑀼 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀅𑀗𑁆𑀕𑀡𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀲𑀓𑀮𑀁 𑀅𑀗𑁆𑀕𑀡𑀁 𑀞𑀸𑀦𑀦𑁆𑀢𑀺 𑀳𑀢𑁆𑀣𑀺𑀦𑁄 𑀯𑀺𑀘𑀭𑀡𑀬𑁄𑀕𑁆𑀕𑀁 𑀅𑀗𑁆𑀕𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳, 𑀲𑀓𑀮𑀲𑀸𑀮𑀸𑀢𑀺 𑀕𑀳𑁂𑀢𑀩𑁆𑀩𑀁.

𑁨𑁩𑁩. 𑀅𑀩𑀤𑁆𑀥𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀸𑀮𑀸𑀭𑀸𑀚𑀯𑀢𑁆𑀣𑀗𑁆𑀕𑀡𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁. 𑀅𑀩𑀤𑁆𑀥𑀲𑁆𑀲 𑀳𑀺 𑀳𑀢𑁆𑀣𑀺𑀦𑁄 𑀲𑀓𑀮𑀲𑀸𑀮𑀸𑀤𑀬𑁄 𑀞𑀸𑀦𑀁, 𑀢𑀤𑀢𑀺𑀓𑁆𑀓𑀫𑁂 𑀞𑀸𑀦𑀸𑀘𑀸𑀯𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀅𑀯𑀥𑀸𑀭𑀡𑁂 𑀯𑀸. ‘‘𑀩𑀤𑁆𑀥𑀲𑁆𑀲 𑀳𑀻’’𑀢𑀺 𑀬𑁄𑀚𑀦𑀸𑀬 𑀯𑀺𑀲𑁂𑀲𑀢𑁆𑀣𑁄𑀯 𑀤𑀝𑁆𑀞𑀩𑁆𑀩𑁄, 𑀩𑀤𑁆𑀥𑀲𑁆𑀲 𑀧𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀤𑁆𑀥𑀲𑁆𑀲 𑀧𑀦𑀸𑀢𑀺 𑀲𑀸𑀮𑀸𑀤𑀻𑀲𑀼 𑀲𑀦𑁆𑀦𑀺𑀳𑀺𑀢𑀲𑁆𑀲 𑀧𑀦. 𑀞𑀺𑀢𑀝𑁆𑀞𑀸𑀦𑀜𑁆𑀘𑀸𑀢𑀺 𑀲𑀸𑀮𑀸𑀤𑀻𑀲𑀼 𑀞𑀺𑀢𑀝𑁆𑀞𑀸𑀦𑀜𑁆𑀘, 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀦𑁆𑀥𑀦𑀜𑁆𑀘𑀸𑀢𑀺 𑀕𑀻𑀯𑀸𑀬 𑀯𑀸 𑀧𑀘𑁆𑀙𑀸 𑀧𑀸𑀤𑀤𑁆𑀯𑀬𑀩𑀦𑁆𑀥𑀦𑀯𑀮𑀬𑁂 𑀯𑀸 𑀉𑀪𑀬𑀢𑁆𑀣 𑀯𑀸 𑀩𑀦𑁆𑀥𑀦𑀝𑁆𑀞𑀸𑀦𑀜𑁆𑀘. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀞𑀺𑀢𑀝𑁆𑀞𑀸𑀦𑀜𑁆𑀘 𑀩𑀦𑁆𑀥𑀦𑀜𑁆𑀘 𑀞𑀸𑀦𑀦𑁆𑀢𑀺 𑀙 𑀯𑀸 𑀧𑀜𑁆𑀘 𑀯𑀸 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸. 𑀢𑁂𑀲𑀁 𑀞𑀸𑀦𑀸𑀦𑀁. 𑀓𑀸𑀭𑀬𑁂𑀢𑀺 𑀏𑀢𑁆𑀣 ‘‘𑀆𑀧𑀢𑁆𑀢𑀺’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀻𑀢𑀺. 𑀳𑀭𑀢𑁄𑀢𑀺 𑀳𑀢𑁆𑀣𑀺𑀲𑀸𑀮𑀸𑀤𑀺𑀢𑁄 𑀘𑁄𑀭𑀺𑀓𑀸𑀬 𑀳𑀭𑀦𑁆𑀢𑀲𑁆𑀲 ¶ . 𑀓𑀸𑀭𑀬𑁂𑀢𑀺 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁, 𑀞𑀸𑀦𑀪𑁂𑀤𑀕𑀡𑀦𑀸𑀬 𑀬𑀸𑀯 𑀧𑀘𑁆𑀙𑀺𑀫𑀝𑁆𑀞𑀸𑀦𑀸 𑀧𑀼𑀭𑀺𑀫𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀸𑀦𑀺, 𑀅𑀦𑁆𑀢𑀺𑀫𑀝𑁆𑀞𑀸𑀦𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀁 𑀓𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁩𑁪. 𑀞𑀺𑀢𑀝𑁆𑀞𑀸𑀦𑀦𑁆𑀢𑀺 ¶ 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀁, 𑀇𑀤𑀜𑁆𑀘 𑀅𑀩𑀤𑁆𑀥𑀳𑀢𑁆𑀣𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀤𑁆𑀥𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀲𑀸𑀮𑀸𑀤𑀻𑀲𑀼 𑀩𑀤𑁆𑀥𑀲𑁆𑀲 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑀤𑀺𑀲𑁄𑀢𑀺 𑀕𑀢𑀢𑁆𑀣𑀢𑀸𑀬 𑀦 𑀯𑀼𑀢𑁆𑀢𑁄.

𑁨𑁩𑁫. 𑀏𑀓𑀁 𑀞𑀸𑀦𑀦𑁆𑀢𑀺 𑀲𑀬𑀺𑀢𑀝𑁆𑀞𑀸𑀦𑀫𑀢𑁆𑀢𑀁. 𑀢𑀲𑁆𑀫𑀺𑀦𑁆𑀢𑀺 𑀕𑀚𑁂. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀢𑀼𑀭𑀗𑁆𑀕𑀫𑀳𑀺𑀲𑀸𑀤𑀻𑀲𑀼 𑀤𑁆𑀯𑀺𑀧𑀤𑁂 𑀘 𑀩𑀳𑀼𑀧𑁆𑀧𑀤𑁂 𑀘.

𑁨𑁩𑁬. 𑀏𑀲𑁂𑀯 𑀦𑀬𑁄 𑀜𑁂𑀬𑁆𑀬𑁄, 𑀯𑀢𑁆𑀢𑀩𑁆𑀩𑀁 𑀓𑀺𑀜𑁆𑀘𑀺𑀧𑀺 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀢𑀼𑀭𑀗𑁆𑀕𑀸 𑀅𑀲𑁆𑀲𑀸. 𑀫𑀳𑀺𑀲𑀸 𑀮𑀼𑀮𑀸𑀬𑀸. 𑀆𑀤𑀺-𑀲𑀤𑁆𑀤𑁂𑀦 𑀕𑁄𑀕𑀤𑁆𑀭𑀪𑀑𑀝𑁆𑀞𑀸𑀤𑀺𑀘𑀢𑀼𑀧𑁆𑀧𑀤𑀸𑀦𑀁 𑀲𑀗𑁆𑀕𑀳𑁄. 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀲𑁆𑀲𑀲𑀸𑀮𑀸𑀭𑀸𑀚𑀸𑀕𑀸𑀭𑀗𑁆𑀕𑀡𑀩𑀳𑀺𑀦𑀕𑀭𑀸𑀤𑀻𑀲𑀼 𑀅𑀩𑀦𑁆𑀥𑀺𑀢𑀲𑀬𑀦𑀅𑀲𑁆𑀲𑀸𑀤𑀻𑀦𑀁 𑀞𑀸𑀦𑀪𑁂𑀤𑁄 𑀬𑀣𑀸𑀯𑀼𑀢𑁆𑀢𑀲𑀤𑀺𑀲𑀢𑁆𑀢𑀸 𑀦 𑀯𑀼𑀢𑁆𑀢𑁄.

𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀅𑀲𑁆𑀲𑀲𑁆𑀲 𑀧𑀦 𑀲𑀘𑁂 𑀲𑁄 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀩𑀤𑁆𑀥𑁄 𑀳𑁄𑀢𑀺, 𑀩𑀦𑁆𑀥𑀦𑀸𑀦𑀁, 𑀔𑀼𑀭𑀸𑀦𑀜𑁆𑀘 𑀕𑀡𑀦𑀸𑀬 𑀅𑀝𑁆𑀞 𑀞𑀸𑀦𑀸𑀦𑀺, 𑀲𑀘𑁂 𑀫𑀼𑀔𑁂 𑀘 𑀩𑀤𑁆𑀥𑁄 𑀳𑁄𑀢𑀺, 𑀦𑀯 𑀞𑀸𑀦𑀸𑀦𑀺, 𑀫𑀼𑀔𑁂𑀬𑁂𑀯 𑀩𑀤𑁆𑀥𑁄, 𑀧𑀜𑁆𑀘 𑀞𑀸𑀦𑀸𑀦𑀻𑀢𑀺 𑀞𑀸𑀦𑀪𑁂𑀤𑁄 𑀘 𑀢𑀣𑁂𑀯 𑀲𑀲𑀫𑀺𑀕𑀲𑀽𑀓𑀭𑀸𑀤𑀺𑀘𑀢𑀼𑀧𑁆𑀧𑀤𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀩𑀤𑁆𑀥𑀩𑀤𑁆𑀥𑀝𑁆𑀞𑀸𑀦𑁂𑀳𑀺 𑀲𑀳 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀯𑀲𑁂𑀦 𑀮𑀩𑁆𑀪𑀫𑀸𑀦𑁄 𑀞𑀸𑀦𑀪𑁂𑀤𑁄 𑀘 𑀕𑁄𑀫𑀳𑀺𑀲𑁂𑀲𑀼 𑀩𑀤𑁆𑀥𑁂𑀲𑀼 𑀏𑀯𑀫𑁂𑀯 𑀮𑀩𑁆𑀪𑀫𑀸𑀦𑁄 𑀞𑀸𑀦𑀪𑁂𑀤𑁄 𑀘 𑀯𑀚𑀸𑀤𑀻𑀲𑀼 𑀧𑀤𑁂𑀲𑁂𑀲𑀼 𑀧𑀯𑁂𑀲𑀺𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀭𑀼𑀓𑁆𑀔𑀲𑀽𑀘𑀺𑀬𑁄 𑀅𑀧𑀦𑁂𑀢𑁆𑀯𑀸 𑀯𑀸 𑀅𑀦𑀧𑀦𑁂𑀢𑁆𑀯𑀸 𑀯𑀸 𑀦𑀸𑀫𑀁 𑀯𑀢𑁆𑀯𑀸 𑀯𑀸 𑀅𑀯𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀦𑁆𑀢𑀲𑁆𑀲, 𑀲𑀸𑀔𑀸𑀪𑀗𑁆𑀕𑀢𑀺𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀅𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀧𑀮𑁄𑀪𑁂𑀦𑁆𑀢𑀲𑁆𑀲 𑀢𑀸𑀲𑁂𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 ¶ 𑀲𑀧𑁆𑀧𑀓𑀭𑀡𑁆𑀟𑀓𑁂 𑀲𑀧𑁆𑀧𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀮𑀩𑁆𑀪𑀫𑀸𑀦𑁄 𑀯𑀺𑀲𑁂𑀲𑁄 𑀘 𑀦𑁂𑀢𑀩𑁆𑀩𑁄. 𑀇𑀳 𑀲𑀩𑁆𑀩𑀢𑁆𑀣 𑀞𑀸𑀦𑀪𑁂𑀤𑁂𑀲𑀼 𑀩𑀳𑀼𑀓𑁂𑀲𑀼𑀧𑀺 𑀉𑀧𑀦𑁆𑀢𑀝𑁆𑀞𑀸𑀦𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀦𑁆𑀢𑀝𑁆𑀞𑀸𑀦𑁂 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀲𑀤𑀺𑀲𑀦𑁆𑀢𑀺 𑀇𑀫𑀲𑁆𑀲 𑀲𑀩𑁆𑀩𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸𑀯 𑀕𑀢𑀢𑁆𑀢𑀸, 𑀆𑀳𑀝𑀢𑁄 𑀅𑀯𑀺𑀜𑁆𑀜𑀸𑀬𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀯𑀺𑀲𑁂𑀲𑀲𑁆𑀲𑀸𑀪𑀸𑀯𑀸 𑀘 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺.

𑀤𑁆𑀯𑀺𑀧𑀤𑁂𑀧𑀻𑀢𑀺 ‘‘𑀤𑁆𑀯𑀺𑀧𑀤𑀁 𑀦𑀸𑀫 𑀫𑀦𑀼𑀲𑁆𑀲𑀸 𑀧𑀓𑁆𑀔𑀚𑀸𑀢𑀸’’𑀢𑀺 (𑀧𑀸𑀭𑀸. 𑁧𑁧𑁫) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸 𑀫𑀦𑀼𑀲𑁆𑀲𑀸 𑀘 𑀫𑀬𑀽𑀭𑀸𑀤𑀺𑀮𑁄𑀫𑀧𑀓𑁆𑀔𑀸 𑀘 𑀯𑀕𑁆𑀕𑀼𑀮𑀺𑀆𑀤𑀺𑀘𑀫𑁆𑀫𑀧𑀓𑁆𑀔𑀸 𑀘 𑀪𑀫𑀭𑀸𑀤𑀺𑀅𑀝𑁆𑀞𑀺𑀧𑀓𑁆𑀔𑀸 𑀘𑀸𑀢𑀺 𑀏𑀯𑀫𑀸𑀤𑀺𑀓𑁂 𑀲𑀢𑁆𑀢𑁂 𑀘. 𑀩𑀳𑀼𑀧𑁆𑀧𑀤𑁂𑀢𑀺 ‘‘𑀩𑀳𑀼𑀧𑁆𑀧𑀤𑀁 𑀦𑀸𑀫 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸’’𑀢𑀺 (𑀧𑀸𑀭𑀸. 𑁧𑁧𑁭) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀩𑀳𑀼𑀧𑁆𑀧𑀤𑀲𑀢𑁆𑀢𑁂 𑀘𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 ¶ 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀁 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀪𑀽𑀫𑀝𑁆𑀞𑀸𑀤𑀺𑀢𑀺𑀁𑀲𑀯𑀺𑀦𑀺𑀘𑁆𑀙𑀬𑀫𑀸𑀢𑀺𑀓𑀸𑀓𑀣𑀸𑀲𑀼 𑀧𑀜𑁆𑀘𑀯𑀻𑀲𑀢𑀺 𑀫𑀸𑀢𑀺𑀓𑀸𑀓𑀣𑀸 𑀤𑀲𑁆𑀲𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀸𑀲𑀼 𑀧𑀜𑁆𑀘𑀫𑀸𑀢𑀺𑀓𑀸𑀓𑀣𑀸𑀲𑀼 𑀲𑀁𑀯𑀺𑀤𑀸𑀯𑀳𑀸𑀭𑁄, 𑀲𑀗𑁆𑀓𑁂𑀢𑀓𑀫𑁆𑀫𑀁, 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀫𑀸𑀢𑀺𑀓𑀢𑁆𑀢𑀬𑀓𑀣𑀸 𑀧𑀞𑀫𑀫𑁂𑀯 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀦𑀺𑀘𑁆𑀙𑀬𑀲𑀫𑁆𑀪𑀸𑀭𑀪𑀽𑀢𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀤𑀲𑁆𑀲𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑁋

‘‘𑀧𑀼𑀩𑁆𑀩𑀲𑀳𑀧𑀬𑁄𑀕𑁄 𑀘, 𑀲𑀁𑀯𑀺𑀤𑀸𑀳𑀭𑀡𑀫𑁆𑀧𑀺 𑀘;

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑁂𑀫𑀺𑀢𑁆𑀢𑀁, 𑀧𑀼𑀩𑁆𑀩𑀬𑁄𑀕𑀸𑀤𑀺𑀧𑀜𑁆𑀘𑀓’’𑀦𑁆𑀢𑀺. (𑀯𑀺. 𑀯𑀺. 𑁪𑁨) 𑁋

𑀇𑀫𑀺𑀦𑀸 𑀲𑀗𑁆𑀕𑀳𑀺𑀢𑀸𑀢𑀺 𑀢𑀁 𑀧𑀳𑀸𑀬 𑀅𑀯𑀲𑁂𑀲𑁂 𑀑𑀘𑀭𑀓𑁄, 𑀑𑀡𑀺𑀭𑀓𑁆𑀔𑀓𑁄𑀢𑀺 𑀓𑀣𑀸𑀤𑁆𑀯𑀬𑁂 𑀑𑀘𑀭𑀡𑀓𑀓𑀣𑀸𑀬 𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑀢𑁆𑀢𑀸, 𑀢𑀜𑁆𑀘 𑀑𑀡𑀺𑀭𑀓𑁆𑀔𑀓𑁂𑀦 𑀓𑀭𑀺𑀬𑀫𑀸𑀦𑀁 𑀞𑀸𑀦𑀸𑀘𑀸𑀯𑀦𑀁 𑀲𑀸𑀳𑀢𑁆𑀣𑀺𑀓𑁂𑀦 𑀯𑀸 𑀆𑀡𑀢𑁆𑀢𑀺𑀓𑁂𑀦 𑀯𑀸 𑀧𑀬𑁄𑀕𑁂𑀦 𑀳𑁄𑀢𑀻𑀢𑀺 𑀢𑀲𑁆𑀲𑀸𑀧𑀺 ‘‘𑀲𑀸𑀳𑀢𑁆𑀣𑀸𑀡𑀢𑁆𑀢𑀺𑀓𑁄 𑀘𑁂𑀯𑀸’’𑀢𑀺 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑁂 𑀧𑀞𑀫𑀫𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀘 𑀣𑀮𑀝𑁆𑀞𑀯𑁂𑀳𑀸𑀲𑀝𑁆𑀞𑀓𑀣𑀸𑀤𑀻𑀲𑀼 ¶ 𑀲𑀗𑁆𑀕𑀳𑀺𑀢𑀢𑁆𑀢𑀸 𑀘 𑀢𑀜𑁆𑀘 𑀤𑁆𑀯𑀬𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀑𑀘𑀭𑀓𑁄 𑀦𑀸𑀫 𑀪𑀡𑁆𑀟𑀁 𑀑𑀘𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀢𑀻’’𑀢𑀺 (𑀧𑀸𑀭𑀸. 𑁧𑁧𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄 𑀘𑁄𑀭𑀸𑀧𑀦𑀧𑀼𑀭𑀺𑀲𑁄 ‘‘𑀑𑀘𑀭𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀑𑀘𑀭𑀢𑀻𑀢𑀺 𑀑𑀘𑀭𑀓𑁄, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. ‘‘𑀑𑀡𑀺𑀭𑀓𑁆𑀔𑁄 𑀦𑀸𑀫 𑀆𑀳𑀝𑀁 𑀪𑀡𑁆𑀟𑀁 𑀕𑁄𑀧𑁂𑀦𑁆𑀢𑁄’’𑀢𑀺 (𑀧𑀸𑀭𑀸. 𑁧𑁧𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄 𑀫𑀼𑀳𑀼𑀢𑁆𑀢𑀁 𑀅𑀢𑁆𑀢𑀦𑀺 𑀞𑀧𑀺𑀢𑀲𑁆𑀲 𑀧𑀭𑀪𑀡𑁆𑀟𑀲𑁆𑀲 𑀭𑀓𑁆𑀔𑀓𑁄 ‘‘𑀑𑀡𑀺𑀭𑀓𑁆𑀔𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀑𑀡𑀺𑀢𑀁 𑀭𑀓𑁆𑀔𑀢𑀻𑀢𑀺 𑀑𑀡𑀺𑀭𑀓𑁆𑀔𑁄, 𑀬𑁄 𑀧𑀭𑁂𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀆𑀪𑀢𑀁 𑀪𑀡𑁆𑀟𑀁 ‘‘𑀇𑀤𑀁 𑀢𑀸𑀯 𑀪𑀦𑁆𑀢𑁂 𑀫𑀼𑀳𑀼𑀢𑁆𑀢𑀁 𑀑𑀮𑁄𑀓𑁂𑀣, 𑀬𑀸𑀯𑀸𑀳𑀁 𑀇𑀤𑀁 𑀦𑀸𑀫 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁄 𑀭𑀓𑁆𑀔𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀤𑁆𑀯𑀺𑀘𑀢𑀼𑀩𑀳𑀼𑀧𑁆𑀧𑀤𑀓𑀣𑀸𑀯𑀡𑁆𑀡𑀦𑀸.

𑁨𑁩𑁭. ‘‘𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧𑁨𑁨) 𑀦𑀬𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀧𑀭𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀧𑀭𑁂𑀲𑀁 𑀲𑀦𑁆𑀢𑀓𑀁 𑀥𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀫𑀦𑀼𑀲𑁆𑀲𑀲𑀦𑁆𑀢𑀓𑀢𑀸, ‘‘𑀧𑀭𑁂𑀲𑀦𑁆𑀢𑀺 𑀯𑀺𑀚𑀸𑀦𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀭𑀸𑀬𑀢𑁆𑀢𑀪𑀸𑀯𑀲𑁆𑀲 𑀚𑀸𑀦𑀦𑀁, ‘‘𑀕𑀭𑀼𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀤𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀅𑀕𑁆𑀖𑀦𑀓𑀢𑀸, ‘‘𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀸’’𑀢𑀺 ¶ 𑀇𑀫𑀺𑀦𑀸 𑀣𑁂𑀬𑁆𑀬𑀘𑀺𑀢𑁆𑀢𑀢𑀸, ‘‘𑀞𑀸𑀦𑀸 𑀘𑀸𑀯𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀲𑀫𑀗𑁆𑀕𑀺𑀢𑀸𑀢𑀺 𑀏𑀯𑀫𑁂𑀢𑁆𑀣 𑀧𑀜𑁆𑀘𑀗𑁆𑀕𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁩𑁮. 𑀏𑀢𑁆𑀢𑀸𑀯𑀢𑀸 𑀢𑀺𑀁𑀲𑀫𑀸𑀢𑀺𑀓𑀸𑀓𑀣𑀸𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀦𑀸𑀧𑀢𑁆𑀢𑀺 𑀲𑀲𑀜𑁆𑀜𑀺𑀲𑁆𑀲 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂 𑀢𑀸𑀯𑀓𑀸𑀮𑀺𑀓𑁂 𑀧𑁂𑀢𑀧𑀭𑀺𑀕𑁆𑀕𑀳𑁂 𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂 𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 ¶ (𑀧𑀸𑀭𑀸. 𑁧𑁩𑁧) 𑀦𑀬𑁂𑀦 𑀧𑀸𑀴𑀺𑀬𑀁 𑀆𑀕𑀢𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀅𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀲𑀜𑁆𑀜𑀺𑀲𑁆𑀲𑀸𑀢𑀺 𑀧𑀭𑀲𑀦𑁆𑀢𑀓𑀫𑁆𑀧𑀺 ‘‘𑀲𑀲𑀦𑁆𑀢𑀓’’𑀦𑁆𑀢𑀺 𑀲𑀼𑀤𑁆𑀥𑀲𑀜𑁆𑀜𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀕𑀳𑀺𑀢𑀁 𑀲𑀸𑀫𑀺𑀓𑁂𑀳𑀺 𑀤𑀺𑀲𑁆𑀯𑀸 𑀬𑀸𑀘𑀺𑀢𑁂 𑀅𑀤𑁂𑀦𑁆𑀢𑀲𑁆𑀲 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁.

𑀢𑀺𑀭𑀘𑁆𑀙𑀸𑀦𑀧𑀭𑀺𑀕𑁆𑀕𑀳𑁂𑀢𑀺 𑀢𑀺𑀭𑀘𑁆𑀙𑀸𑀦𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼𑀫𑁆𑀳𑀺. 𑀲𑀘𑁂𑀧𑀺 𑀳𑀺 𑀦𑀸𑀕𑀕𑀭𑀼𑀴𑀫𑀸𑀡𑀯𑀓𑀫𑀸𑀡𑀯𑀺𑀓𑀸𑀧𑀺 𑀫𑀦𑀼𑀲𑁆𑀲𑀯𑁂𑀲𑁂𑀦 𑀆𑀧𑀡𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀼 𑀘 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀧𑀪𑀼𑀢𑀻𑀳𑀺 𑀯𑀸𑀴𑀫𑀺𑀕𑁂𑀳𑀺 𑀕𑀳𑀺𑀢𑀕𑁄𑀘𑀭𑀁 𑀧𑀞𑀫𑀁 𑀫𑁄𑀘𑀸𑀧𑁂𑀦𑁆𑀢𑀲𑁆𑀲 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀳𑀺𑀁𑀲𑀦𑀢𑁄 𑀣𑁄𑀓𑀁 𑀔𑀸𑀬𑀺𑀢𑁂 𑀯𑀸𑀭𑁂𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺. 𑀲𑁂𑀦𑀸𑀤𑀻𑀲𑀼 𑀢𑀺𑀭𑀘𑁆𑀙𑀸𑀦𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀕𑀳𑀺𑀢𑀁 𑀕𑁄𑀘𑀭𑀁 𑀫𑁄𑀘𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁂𑀦𑀸𑀤𑀬𑁄𑀧𑀺 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀧𑀸𑀢𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁧). 𑀏𑀯𑀫𑁂𑀯 𑀥𑀫𑁆𑀫𑀦𑀺𑀤𑁂𑀟𑁆𑀟𑀼𑀪𑀸𑀤𑀻𑀳𑀺 𑀕𑀳𑀺𑀢𑀫𑀡𑁆𑀟𑀽𑀓𑀸𑀤𑀬𑁄 𑀚𑀻𑀯𑀺𑀢𑀭𑀓𑁆𑀔𑀦𑀢𑁆𑀣𑀸𑀬 𑀫𑁄𑀘𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀸𑀯𑀓𑀸𑀮𑀺𑀓𑀕𑁆𑀕𑀸𑀳𑁂𑀢𑀺 ‘‘𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀸𑀯𑀓𑀸𑀮𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀏𑀯𑀁 𑀕𑀳𑀺𑀢𑀁 𑀲𑀘𑁂 𑀪𑀡𑁆𑀟𑀲𑀸𑀫𑀺𑀓𑁄 𑀧𑀼𑀕𑁆𑀕𑀮𑁄 𑀯𑀸 𑀕𑀡𑁄 𑀯𑀸 ‘‘𑀢𑀼𑀫𑁆𑀳𑁂𑀯 𑀕𑀡𑁆𑀳𑀣𑀸’’𑀢𑀺 𑀅𑀦𑀼𑀚𑀸𑀦𑁂𑀬𑁆𑀬, 𑀯𑀝𑁆𑀝𑀢𑀺. 𑀦𑀸𑀦𑀼𑀚𑀸𑀦𑁂𑀬𑁆𑀬, 𑀦 𑀕𑀡𑁆𑀳𑁂𑀬𑁆𑀬, 𑀤𑀸𑀢𑀩𑁆𑀩𑀁. 𑀅𑀤𑁂𑀦𑁆𑀢𑀲𑁆𑀲 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁. ‘‘𑀲𑀗𑁆𑀖𑀲𑀦𑁆𑀢𑀓𑀁 𑀧𑀦 𑀧𑀝𑀺𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁, 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 𑀘, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄 ¶ 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁩𑁫𑁬) 𑀧𑀸𑀴𑀺𑀬𑀁 𑀆𑀕𑀢𑀁 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀡𑁂 𑀯𑀺𑀦𑀺𑀘𑁆𑀙𑀬𑁄 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑁋

𑀢𑀢𑁆𑀣 ¶ 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀓𑀫𑀺𑀢𑁆𑀢𑁄. 𑀲𑀫𑁆𑀪𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀆𑀮𑀧𑀺𑀢𑁄𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀚𑀻𑀯𑀢𑀻𑀢𑀺 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀲𑀬𑀺𑀢𑁄𑀧𑀺 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺. 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄𑀢𑀺 𑀕𑀳𑀺𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺, 𑀏𑀯𑀭𑀽𑀧𑀲𑁆𑀲 𑀲𑀦𑁆𑀢𑀓𑀁 ‘‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘𑁂𑀢𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀧𑀦 𑀢𑀻𑀳𑀗𑁆𑀕𑁂𑀳𑀺 𑀭𑀼𑀳𑀢𑀺 𑁋 𑀲𑀦𑁆𑀤𑀺𑀝𑁆𑀞𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀲𑀫𑁆𑀪𑀢𑁆𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀆𑀮𑀧𑀺𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄𑀢𑀺.

𑀬𑁄 𑀧𑀦 𑀚𑀻𑀯𑀢𑀺, 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀁. 𑀤𑀤𑀫𑀸𑀦𑁂𑀦 𑀘 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁. 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄𑀧𑀺 𑀅𑀤𑀸𑀢𑀼𑀓𑀸𑀫𑁄𑀯, 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀺, 𑀲𑁄𑀧𑀺 𑀧𑀼𑀦 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀧𑀦 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 ¶ 𑀲𑀦𑁆𑀢𑀓𑀁 𑀕𑀳𑀺𑀢𑀁 𑀯𑀸 𑀧𑀭𑀺𑀪𑀼𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀕𑀳𑀺𑀢𑀁 𑀯𑀸 𑀳𑁄𑀢𑀼 𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀫𑀬𑀸 𑀧𑀦 𑀢𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀞𑀧𑀺𑀢𑀁, 𑀢𑀁 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀢𑀺, 𑀅𑀬𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁧).

𑀧𑁂𑀢𑀧𑀭𑀺𑀕𑁆𑀕𑀳𑁂𑀢𑀺 𑀧𑁂𑀢𑁆𑀢𑀺𑀯𑀺𑀲𑀬𑀼𑀧𑁆𑀧𑀦𑁆𑀦𑀸 𑀘 𑀫𑀭𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀸 𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄 𑀤𑁂𑀯𑀸 𑀘 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀧𑁂𑀢𑀸 𑀦𑀸𑀫, 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂𑀧𑀺 𑀳𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀧𑀡𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀘 𑀪𑀺𑀓𑁆𑀔𑀼 𑀢𑀁 𑀜𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀫𑁆𑀧𑀺 𑀯𑀢𑁆𑀣𑀁 𑀢𑀲𑁆𑀲 𑀯𑀺𑀭𑀯𑀦𑁆𑀢𑀲𑁆𑀲𑁂𑀯 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀤𑁂𑀯𑀧𑀽𑀚𑀢𑁆𑀣𑀁 𑀭𑀼𑀓𑁆𑀔𑀸𑀤𑀻𑀲𑀼 𑀫𑀝𑁆𑀞𑀯𑀢𑁆𑀣𑀸𑀤𑀻𑀦𑀺 𑀕𑀡𑁆𑀳𑀢𑁄 𑀦𑀺𑀤𑁆𑀤𑁄𑀲𑀢𑀸𑀬 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀕𑀡𑁆𑀳𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀕𑀳𑀺𑀢𑀫𑁆𑀧𑀺 𑀲𑀘𑁂 𑀲𑀲𑁆𑀲𑀸𑀫𑀺𑀓𑀁 𑀳𑁄𑀢𑀺, 𑀲𑀸𑀫𑀺𑀓𑁂 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀦𑁆𑀢𑀺 𑀉𑀧𑀮𑀓𑁆𑀔𑀡𑀢𑁄 𑀯𑁂𑀤𑀺𑀢𑀩𑁆𑀩𑀁.

𑁨𑁩𑁯. 𑀏𑀢𑁆𑀣𑀸𑀢𑀺 ¶ 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑁂. 𑀘-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀅𑀯𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀢𑁆𑀢𑀩𑁆𑀩𑁄𑀢𑀺 𑀫𑀸𑀢𑀺𑀓𑀝𑁆𑀞𑀓𑀣𑀸𑀤𑀻𑀲𑀼 𑀯𑀺𑀬 𑀅𑀯𑀲𑀸𑀦𑁂 𑀓𑀣𑁂𑀢𑀩𑁆𑀩𑁄. 𑀧𑀸𑀴𑀺𑀫𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁄 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀸𑀴𑀺𑀬𑀁 𑀅𑀦𑀸𑀕𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀻𑀳𑀺 𑀞𑀧𑀺𑀢𑁄 𑀯𑀺𑀦𑀺𑀘𑁆𑀙𑀬𑁄.

𑁨𑁪𑁦. 𑀧𑀭𑀸𑀚𑀺𑀢𑀸𑀦𑁂𑀓𑀫𑀮𑁂𑀦𑀸𑀢𑀺 𑀅𑀧𑀭𑀺𑀫𑁂𑀬𑁆𑀬𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑁄𑀧𑀘𑀺𑀢𑀧𑀸𑀭𑀫𑀺𑀢𑀸𑀲𑀫𑁆𑀪𑀽𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀭𑀸𑀚𑀺𑀢𑀸 𑀭𑀸𑀕𑀸𑀤𑀬𑁄 𑀅𑀦𑁂𑀓𑀓𑀺𑀮𑁂𑀲𑀫𑀮𑀸 𑀬𑁂𑀦 𑀲𑁄 𑀧𑀭𑀸𑀚𑀺𑀢𑀸𑀦𑁂𑀓𑀫𑀮𑁄, 𑀢𑁂𑀦 𑀧𑀭𑀸𑀚𑀺𑀢𑀸𑀦𑁂𑀓𑀫𑀮𑁂𑀦 ¶ . 𑀚𑀺𑀦𑁂𑀦 𑀬𑀁 𑀤𑀼𑀢𑀺𑀬𑀁 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁, 𑀅𑀲𑁆𑀲 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑁆𑀲 𑀘 𑀅𑀢𑁆𑀣𑁄 𑀫𑀬𑀸 𑀲𑀫𑀸𑀲𑁂𑀦 𑀯𑀼𑀢𑁆𑀢𑁄. 𑀅𑀲𑁂𑀲𑁂𑀦 𑀅𑀢𑀺𑀯𑀺𑀢𑁆𑀣𑀸𑀭𑀦𑀬𑁂𑀦 𑀯𑀢𑁆𑀢𑀼𑀁 𑀢𑀲𑁆𑀲 𑀅𑀢𑁆𑀣𑀁 𑀓𑀣𑁂𑀢𑀼𑀁 𑀓𑁄 𑀳𑀺 𑀲𑀫𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘-𑀲𑀤𑁆𑀤𑁄 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀘𑁆𑀘𑀬𑀢𑁆𑀣𑁄. 𑀳𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀢𑁂𑀦 𑀅𑀲𑁂𑀲𑁂𑀦 𑀢𑀤𑀢𑁆𑀣𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑁂𑀯 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸𑀢𑀺 𑀤𑀻𑀧𑁂𑀢𑀺.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁨𑁪𑁧-𑁨. 𑀏𑀯𑀫𑀢𑀺𑀲𑀼𑀔𑀼𑀫𑀦𑀬𑀲𑀫𑀸𑀓𑀼𑀮𑀁 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀦𑀼𑀲𑁆𑀲𑀚𑀸𑀢𑀺’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀚𑀸𑀢𑀺𑀦𑁆𑀢𑀺 𑀚𑀸𑀬𑀢𑀻𑀢𑀺 𑀚𑀸𑀢𑀺, 𑀭𑀽𑀧𑀸𑀭𑀽𑀧𑀧𑀝𑀺𑀲𑀦𑁆𑀥𑀺, 𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑀺 𑀬𑀲𑁆𑀲 𑀲𑁄 𑀫𑀦𑀼𑀲𑁆𑀲𑀚𑀸𑀢𑀺, 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀫𑀦𑀼𑀲𑁆𑀲𑀚𑀸𑀢𑀺𑀁.

𑀏𑀢𑁆𑀣 𑀘 𑀫𑀦𑀼𑀲𑁆𑀲𑁂𑀲𑀽𑀢𑀺 𑀓𑀼𑀲𑀮𑀸𑀓𑀼𑀲𑀮𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑁂𑀲𑀼 𑀦𑀭𑁂𑀲𑀼. ‘‘𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 (𑀧𑀸𑀭𑀸. 𑁧𑁭𑁨) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀞𑀫𑀁 𑀉𑀧𑁆𑀧𑀚𑁆𑀚𑀫𑀸𑀦𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀔𑀦𑁆𑀥𑀢𑁆𑀢𑀬𑀜𑁆𑀘 𑀢𑀁𑀲𑀳𑀚𑀸𑀢𑀸𑀦𑀺 𑁋

‘‘𑀢𑀺𑀮𑀢𑁂𑀮𑀲𑁆𑀲 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁 𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁, ‘𑀓𑀮𑀮’𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨; 𑀯𑀺𑀪. 𑀅𑀝𑁆𑀞. 𑁨𑁬) 𑁋

𑀯𑀼𑀢𑁆𑀢𑀸𑀦𑀺 ¶ 𑀚𑀸𑀢𑀺𑀉𑀡𑁆𑀡𑀁𑀲𑀼𑀫𑁆𑀳𑀺 𑀧𑀲𑀦𑁆𑀦𑀢𑀺𑀮𑀢𑁂𑀮𑁂 𑀯𑀸 𑀲𑀧𑁆𑀧𑀺𑀫𑀡𑁆𑀟𑁂 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀥𑀼𑀦𑀺𑀢𑁂 𑀅𑀕𑁆𑀕𑁂 𑀮𑀫𑁆𑀩𑀫𑀸𑀦𑀩𑀺𑀦𑁆𑀤𑀼𑀧𑁆𑀧𑀫𑀸𑀡𑀓𑀮𑀮𑀲𑀗𑁆𑀔𑀸𑀢𑀸𑀦𑀺 𑀲𑀪𑀸𑀯𑀓𑀸𑀦𑀁 𑀓𑀸𑀬𑀪𑀸𑀯𑀯𑀢𑁆𑀣𑀼𑀤𑀲𑀓𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀘 𑀅𑀪𑀸𑀯𑀓𑀸𑀦𑀁 𑀓𑀸𑀬𑀯𑀢𑁆𑀣𑀼𑀤𑀲𑀓𑀯𑀲𑁂𑀦 𑀯𑀻𑀲𑀢𑀺 𑀭𑀽𑀧𑀸𑀦𑀺 𑀘𑀸𑀢𑀺 𑀅𑀬𑀁 𑀦𑀸𑀫𑀭𑀽𑀧𑀧𑀝𑀺𑀲𑀦𑁆𑀥𑀺 𑀇𑀥 ‘‘𑀚𑀸𑀢𑀻’’𑀢𑀺 𑀕𑀳𑀺𑀢𑀸. ‘‘𑀬𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀧𑀤𑁂𑀦 ‘‘𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀏𑀲𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁧𑁭𑁨) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀧𑀞𑀫𑀪𑀯𑀗𑁆𑀕𑀢𑁄 𑀧𑀝𑁆𑀞𑀸𑀬 𑀘𑀼𑀢𑀺𑀘𑀺𑀢𑁆𑀢𑀸𑀲𑀦𑁆𑀦𑀪𑀯𑀗𑁆𑀕𑀧𑀭𑀺𑀬𑀦𑁆𑀢𑀲𑀦𑁆𑀢𑀸𑀦𑀲𑀗𑁆𑀔𑀸𑀢𑀲𑀢𑁆𑀢𑁄 𑀕𑀳𑀺𑀢𑁄. 𑀇𑀫𑀺𑀦𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀚𑀸𑀦𑀦𑁆𑀢𑁄𑀢𑀺 ‘‘𑀲𑀢𑁆𑀢𑁄 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑁄. 𑀚𑀻𑀯𑀺𑀢𑀸 𑀬𑁄 𑀯𑀺𑀬𑁄𑀚𑀬𑁂𑀢𑀺 𑀬𑁄 𑀪𑀺𑀓𑁆𑀔𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸 𑀯𑀺𑀬𑁄𑀚𑁂𑀬𑁆𑀬 𑀯𑁄𑀭𑁄𑀧𑁂𑀬𑁆𑀬, 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑁂𑀬𑁆𑀬 𑀉𑀧𑀭𑁄𑀥𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑀧𑀤𑀪𑀸𑀚𑀦𑁂 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀉𑀧𑀭𑁄𑀥𑁂𑀢𑀻’’𑀢𑀺 (𑀧𑀸𑀭𑀸. 𑁧𑁭𑁨).

𑀢𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀕𑁆𑀕𑀳𑀢𑁆𑀢𑀸 𑀉𑀧𑀓𑁆𑀓𑀫𑀯𑀺𑀲𑀬𑀁 𑀦 𑀳𑁄𑀢𑀺. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁂𑀦 𑀧𑀦 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀢𑀁𑀲𑀫𑀓𑀸𑀮𑀫𑁂𑀯 𑀑𑀘𑁆𑀙𑀺𑀚𑁆𑀚𑀫𑀸𑀦𑀢𑀸𑀬 𑀏𑀢𑁆𑀣 𑀲𑀸𑀫𑀜𑁆𑀜𑁂𑀦 𑀉𑀪𑀬𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀅𑀢𑀻𑀢𑀸𑀦𑀸𑀕𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀉𑀧𑀓𑁆𑀓𑀫𑀯𑀺𑀲𑀬𑀸𑀭𑀳𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀢𑀜𑁆𑀘 𑀔𑀡𑀲𑀦𑁆𑀢𑀢𑀺𑀅𑀤𑁆𑀥𑀸𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺.

𑀢𑀢𑁆𑀣 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀯𑀲𑁂𑀦 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑁄 𑀪𑀸𑀯𑁄 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀁 𑀲𑀭𑀲𑀪𑀗𑁆𑀕𑀪𑀽𑀢𑀢𑁆𑀢𑀸 𑀲𑀬𑀁 𑀪𑀺𑀚𑁆𑀚𑀫𑀸𑀦𑀁 𑀉𑀧𑀓𑁆𑀓𑀫𑀲𑀸𑀥𑀺𑀬𑀁 𑀯𑀺𑀦𑀸𑀲𑀯𑀦𑁆𑀢𑀁 𑀦 𑀳𑁄𑀢𑀺. 𑀆𑀢𑀧𑁂 𑀞𑀢𑁆𑀯𑀸 𑀕𑀩𑁆𑀪𑀁 𑀧𑀯𑀺𑀝𑁆𑀞𑀲𑁆𑀲 ¶ 𑀅𑀦𑁆𑀥𑀓𑀸𑀭𑀯𑀺𑀕𑀫𑀦𑁆𑀢𑀭𑀜𑁆𑀘 𑀲𑀻𑀢𑁂𑀦 𑀑𑀯𑀭𑀓𑀁 𑀧𑀯𑀺𑀝𑁆𑀞𑀲𑁆𑀲 𑀯𑀺𑀲𑀪𑀸𑀕𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀦 ¶ 𑀲𑀻𑀢𑀧𑀦𑀽𑀤𑀦𑁆𑀢𑀭𑀜𑁆𑀘 𑀭𑀽𑀧𑀲𑀦𑁆𑀢𑀢𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀧𑀝𑀺𑀲𑀦𑁆𑀥𑀺𑀘𑀼𑀢𑀻𑀦𑀫𑀦𑁆𑀢𑀭𑀸𑀴𑀧𑁆𑀧𑀯𑀢𑁆𑀢𑀺 𑀔𑀦𑁆𑀥𑀲𑀦𑁆𑀢𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀤𑁆𑀯𑀬𑁂 𑀉𑀧𑀓𑁆𑀓𑀫𑀲𑀫𑁆𑀪𑀯𑁄, 𑀢𑀁𑀯𑀲𑁂𑀦 𑀉𑀧𑀘𑁆𑀙𑀺𑀚𑁆𑀚𑀫𑀸𑀦𑀁 𑀚𑀻𑀯𑀺𑀢𑀁 𑀲𑀦𑁆𑀢𑀸𑀦𑀧𑀭𑀺𑀳𑀸𑀦𑀺𑀧𑀘𑁆𑀘𑀬𑀪𑀸𑀯𑀢𑁄 𑀲𑀦𑁆𑀢𑀢𑀺𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀯𑀬𑀁 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀫𑀧𑁆𑀧𑀢𑁆𑀯𑀸 𑀉𑀧𑀓𑁆𑀓𑀫𑀯𑀲𑁂𑀦 𑀅𑀦𑁆𑀢𑀭𑀸𑀬𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀦𑁆𑀢𑀢𑀺𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀢𑀁𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀫𑀸𑀦𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀉𑀪𑀬𑀁 𑀏𑀢𑁆𑀣 ‘‘𑀚𑀻𑀯𑀺𑀢𑀸’’𑀢𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀲𑀦𑁆𑀥𑀸𑀬𑀸𑀳 𑀧𑀤𑀪𑀸𑀚𑀦𑁂 ‘‘𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀻’’𑀢𑀺 (𑀧𑀸𑀭𑀸. 𑁧𑁭𑁨).

𑀇𑀫𑀺𑀲𑁆𑀲𑀸𑀯 𑀧𑀸𑀡𑀸𑀢𑀺𑀧𑀸𑀢𑀪𑀸𑀯𑁂 𑀆𑀧𑀢𑁆𑀢𑀺𑀪𑀸𑀯𑀢𑁄 𑀏𑀢𑁆𑀣 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀧𑀸𑀡𑀧𑀸𑀡𑀸𑀢𑀺𑀧𑀸𑀢𑀧𑀸𑀡𑀸𑀢𑀺𑀧𑀸𑀢𑀻𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑀸𑀦𑀁 𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀉𑀧𑀘𑁆𑀙𑀺𑀚𑁆𑀚𑀫𑀸𑀦𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀁 ‘‘𑀚𑀻𑀯𑀺𑀢𑀸’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀁. 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫 𑀯𑀥𑀓𑀘𑁂𑀢𑀦𑀸, 𑀲𑁄 𑀘 ‘‘𑀯𑀺𑀬𑁄𑀚𑀬𑁂’’𑀢𑀺 𑀇𑀫𑀺𑀦𑀸 𑀲𑀦𑁆𑀤𑀲𑁆𑀲𑀺𑀢𑁄. 𑀧𑀸𑀡𑀸𑀢𑀺𑀧𑀸𑀢𑀻 𑀦𑀸𑀫 𑀧𑀼𑀕𑁆𑀕𑀮𑁄, 𑀲𑁄 𑀘 ‘‘𑀬𑁄’’𑀢𑀺 𑀇𑀫𑀺𑀦𑀸 𑀲𑀦𑁆𑀤𑀲𑁆𑀲𑀺𑀢𑁄. 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑁄 𑀧𑀦 𑁋

‘‘𑀯𑀼𑀢𑁆𑀢𑀸 𑀧𑀸𑀡𑀸𑀢𑀺𑀧𑀸𑀢𑀲𑁆𑀲;

𑀧𑀬𑁄𑀕𑀸 𑀙 𑀫𑀳𑁂𑀲𑀺𑀦𑀸’’𑀢𑀺 𑁋

𑀆𑀤𑀺𑀦𑀸 𑀦𑀬𑁂𑀦 𑀇𑀥𑁂𑀯 𑀯𑀓𑁆𑀔𑀫𑀸𑀦𑀯𑀺𑀪𑀸𑀕𑀢𑁆𑀢𑀸 𑀯𑀓𑁆𑀔𑀫𑀸𑀦𑀦𑀬𑁂𑀦𑁂𑀯 𑀤𑀝𑁆𑀞𑀩𑁆𑀩𑁄.

𑀅𑀲𑁆𑀲 𑀲𑀢𑁆𑀣𑀁 𑀦𑀺𑀓𑁆𑀔𑀺𑀧𑁂𑀬𑁆𑀬 𑀯𑀸𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲. ‘‘𑀳𑀢𑁆𑀣𑀧𑀸𑀲𑁂’’𑀢𑀺 𑀧𑀸𑀞𑀲𑁂𑀲𑁄. 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀲𑀫𑀻𑀧𑁄𑀢𑀺. 𑀅𑀲𑁆𑀲𑀸𑀢𑀺 𑀲𑀫𑀻𑀧𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀲𑀢𑁆𑀣𑀦𑁆𑀢𑀺 𑀏𑀢𑁆𑀣 𑀚𑀻𑀯𑀺𑀢𑀯𑀺𑀳𑀺𑀁 𑀲𑀦𑀼𑀧𑀓𑀭𑀡𑀪𑀸𑀯𑁂𑀦 𑀲𑀫𑁆𑀫𑀢𑀸 𑀥𑀸𑀭𑀸𑀯𑀦𑁆𑀢𑀅𑀲𑀺𑀆𑀤𑀺 𑀘 𑀥𑀸𑀭𑀸𑀭𑀳𑀺𑀢𑀬𑀝𑁆𑀞𑀺𑀪𑀺𑀦𑁆𑀤𑀺𑀯𑀸𑀮𑀮𑀕𑀼𑀴𑀸𑀤𑀺 𑀘 ¶ 𑀉𑀧𑀮𑀓𑁆𑀔𑀡𑀯𑀲𑁂𑀦 𑀕𑀳𑁂𑀢𑀩𑁆𑀩𑀸. 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑁆𑀣𑀁. 𑀢𑁂𑀦𑁂𑀯𑀸𑀳 𑀧𑀤𑀪𑀸𑀚𑀦𑁂 ‘‘𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀪𑀺𑀦𑁆𑀤𑀺𑀯𑀸𑀮𑀁 𑀯𑀸 𑀮𑀕𑀼𑀴𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀲𑀢𑁆𑀣𑀁 𑀯𑀸 𑀯𑀺𑀲𑀁 𑀯𑀸 𑀭𑀚𑁆𑀚𑀼𑀁 𑀯𑀸’’𑀢𑀺. 𑀇𑀥𑀸𑀯𑀼𑀢𑁆𑀢𑀁 𑀓𑀭𑀧𑀸𑀮𑀺𑀓𑀸𑀙𑀼𑀭𑀺𑀓𑀸𑀤𑀺 𑀲𑀫𑀼𑀔𑀁 ‘‘𑀲𑀢𑁆𑀣𑀁 𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑀺𑀢𑀁. 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀬𑀣𑀸 𑀪𑁄𑀕𑀳𑁂𑀢𑀼𑀁 𑀮𑀪𑀢𑀺, 𑀢𑀣𑀸 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬, 𑀅𑀢𑁆𑀢𑀯𑀥𑀸𑀬 𑀇𑀘𑁆𑀙𑀺𑀢𑀓𑁆𑀔𑀡𑁂 𑀬𑀣𑀸 𑀕𑀡𑁆𑀳𑀸𑀢𑀺, 𑀢𑀣𑀸 𑀲𑀫𑀻𑀧𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀞𑀧𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀣𑀸𑀯𑀭𑀧𑁆𑀧𑀬𑁄𑀕𑁄 𑀲𑀦𑁆𑀤𑀲𑁆𑀲𑀺𑀢𑁄.

𑀫𑀭𑀡𑁂 ¶ 𑀕𑀼𑀡𑀁 𑀯𑀸 𑀯𑀤𑁂𑀬𑁆𑀬𑀸𑀢𑀺 𑀬𑁄𑀚𑀦𑀸, 𑀫𑀭𑀡𑀢𑁆𑀣𑀸𑀬 𑀫𑀭𑀡𑁂 𑀕𑀼𑀡𑀁 𑀯𑀡𑁆𑀡𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀫𑀭𑀡𑁂 𑀕𑀼𑀡𑀁 𑀪𑀡𑀢𑀻’’𑀢𑀺 (𑀧𑀸𑀭𑀸. 𑁧𑁭𑁨) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦, 𑀬𑁄 𑀢𑁆𑀯𑀁 𑀦 𑀮𑀪𑀲𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑀼’’𑀫𑀺𑀘𑁆𑀘𑀸𑀤𑀺𑀦𑀸 𑀦𑀬𑁂𑀦 𑀫𑀭𑀡𑀢𑁆𑀣𑀸𑀬 𑀚𑀻𑀯𑀺𑀢𑁂 𑀅𑀯𑀡𑁆𑀡𑀁 𑀯𑀤𑀦𑁆𑀢𑁄 𑀘 ‘‘𑀢𑁆𑀯𑀁 𑀔𑁄𑀲𑀺 𑀉𑀧𑀸𑀲𑀓 𑀓𑀢𑀓𑀮𑁆𑀬𑀸𑀡𑁄 𑀅𑀓𑀢𑀧𑀸𑀧𑁄, 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄, 𑀇𑀢𑁄 𑀢𑁆𑀯𑀁 𑀓𑀸𑀮𑀓𑀢𑁄 𑀯𑀺𑀯𑀺𑀥𑀯𑀺𑀳𑀗𑁆𑀕𑀫𑀯𑀺𑀓𑀽𑀚𑀺𑀢𑁂 𑀧𑀭𑀫𑀲𑀼𑀭𑀪𑀺𑀓𑀼𑀲𑀼𑀫𑀪𑀽𑀲𑀺𑀢𑀢𑀭𑀼𑀯𑀭𑀦𑀺𑀘𑀺𑀢𑁂 𑀧𑀭𑀫𑀭𑀢𑀺𑀓𑀭𑀮𑀴𑀺𑀢𑀕𑀢𑀺𑀪𑀸𑀲𑀺𑀢𑀯𑀺𑀮𑀧𑀺𑀢𑀲𑀼𑀭𑀬𑀼𑀯𑀢𑀺𑀕𑀡𑀯𑀺𑀘𑀭𑀺𑀢𑁂 𑀯𑀭𑀦𑀦𑁆𑀤𑀦𑁂 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀸𑀭𑀺𑀢𑁄 𑀯𑀺𑀘𑀭𑀺𑀲𑁆𑀲𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀢𑁆𑀣𑀸𑀬 𑀫𑀭𑀡𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀘 ‘‘𑀫𑀭𑀡𑁂 𑀕𑀼𑀡𑀁 𑀯𑀤𑁂𑀬𑁆𑀬’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺.

𑀫𑀭𑀡𑀽𑀧𑀸𑀬𑀁 𑀤𑁂𑀲𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦𑁂𑀯 ‘‘𑀲𑀢𑁆𑀣𑀁 𑀯𑀸 𑀆𑀳𑀭, 𑀯𑀺𑀲𑀁 𑀯𑀸 𑀔𑀸𑀤, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀗𑁆𑀓𑀭𑁄𑀳𑀻’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀲𑀢𑁆𑀣𑀳𑀭𑀡𑀸𑀦𑀺 𑀘 𑀅𑀯𑀼𑀢𑁆𑀢𑀫𑁆𑀧𑀺 𑀲𑁄𑀩𑁆𑀪𑀦𑀭𑀓𑀧𑀧𑀸𑀢𑀸𑀤𑀻𑀲𑀼 𑀧𑀧𑀢𑀦𑀜𑁆𑀘𑀸𑀢𑀺 𑀏𑀯𑀫𑀸𑀤𑀺𑀓𑀁 𑀫𑀭𑀡𑀽𑀧𑀸𑀬𑀁 𑀆𑀘𑀺𑀓𑁆𑀔𑁂𑀬𑁆𑀬. ‘‘𑀳𑁄𑀢𑀺 𑀅𑀬𑀫𑁆𑀧𑀻’’𑀢𑀺 𑀧𑀤𑀘𑁆𑀙𑁂𑀤𑁄, 𑀅𑀧𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁆𑀯𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀤𑁆𑀯𑁂𑀥𑀸 𑀪𑀺𑀦𑁆𑀦𑀲𑀺𑀮𑀸 𑀯𑀺𑀬 𑀅𑀲𑀦𑁆𑀥𑁂𑀬𑁆𑀬𑁄𑀯 ¶ 𑀲𑁄 𑀜𑁂𑀬𑁆𑀬𑁄𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀧𑀸𑀲𑀸𑀡𑁄 𑀯𑀺𑀬 𑀪𑀕𑀯𑀢𑁄 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀸𑀲𑀦𑀤𑁆𑀯𑀬𑁂𑀦 𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀪𑀸𑀯𑁂 𑀲𑀦𑁆𑀥𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁄𑀯𑀸𑀢𑀺 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁪𑁩. 𑀣𑀸𑀯𑀭𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀚𑁆𑀚𑀸𑀫𑀬𑀇𑀤𑁆𑀥𑀺𑀫𑀬𑀧𑀬𑁄𑀕𑀤𑁆𑀯𑀬𑀁 𑀲𑀗𑁆𑀕𑀳𑀺𑀢𑀁.

𑁨𑁪𑁪. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼. 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄 𑀲𑀸𑀳𑀢𑁆𑀣𑀺𑀓𑁄, 𑀧𑀬𑁄𑀕𑁄. 𑀇𑀥 𑀳𑀢𑁆𑀣𑀕𑁆𑀕𑀳𑀡𑀁 𑀉𑀧𑀮𑀓𑁆𑀔𑀡𑀁, 𑀢𑀲𑁆𑀫𑀸 𑀳𑀢𑁆𑀣𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀦𑀺𑀧𑁆𑀨𑀸𑀤𑀺𑀢𑁄 𑀯𑀥𑀧𑁆𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁪𑁫. ‘‘𑀢𑁆𑀯𑀁 𑀢𑀁 𑀏𑀯𑀁 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀳𑀻’’𑀢𑀺 𑀪𑀺𑀓𑁆𑀔𑀼𑀦𑁄 𑀧𑀭𑀲𑁆𑀲 𑀬𑀁 𑀆𑀡𑀸𑀧𑀦𑀁, 𑀅𑀬𑀫𑀸𑀡𑀢𑁆𑀢𑀺𑀓𑁄 𑀦𑀬𑁄𑀢𑀺 𑀬𑁄𑀚𑀦𑀸. 𑀆𑀡𑀢𑁆𑀢𑀺𑀓𑁄 𑀦𑀬𑁄𑀢𑀺 𑀆𑀡𑀢𑁆𑀢𑀺𑀬𑁂𑀯 𑀆𑀡𑀢𑁆𑀢𑀺𑀓𑁄. 𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀦𑀬𑁄, 𑀧𑀬𑁄𑀕𑀲𑁆𑀲𑁂𑀢𑀁 𑀦𑀸𑀫𑀁.

𑁨𑁪𑁬. 𑀤𑀽𑀭𑀦𑁆𑀢𑀺 𑀤𑀽𑀭𑀝𑁆𑀞𑀁. 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀏𑀢𑁆𑀣 𑀓𑀸𑀬𑁂𑀓𑀤𑁂𑀲𑁄 𑀳𑀢𑁆𑀣𑀸𑀤𑀺 𑀓𑀸𑀬𑁄 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀢𑁄 ‘‘𑀕𑀸𑀫𑁄 𑀤𑀟𑁆𑀠𑁄’’𑀢𑀺 𑀬𑀣𑀸. 𑀓𑀸𑀬𑀧𑀝𑀺𑀩𑀤𑁆𑀥𑀁 𑀘𑀸𑀧𑀸𑀤𑀺𑀓𑀁 𑀧𑀝𑀺𑀩𑀤𑁆𑀥𑀁 𑀦𑀸𑀫 𑀧𑀼𑀩𑁆𑀩𑀧𑀤𑀮𑁄𑀧𑁂𑀦 ¶ ‘‘𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺 𑀬𑀣𑀸. 𑀯𑀸-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀉𑀲𑀼𑀆𑀤𑀺𑀦𑀺𑀧𑀸𑀢𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀯𑀺𑀥𑀸𑀦𑀁 𑀯𑀺𑀥𑀺, 𑀧𑀬𑁄𑀕𑁄𑀢𑀺 𑀅𑀢𑁆𑀣𑁄.

𑁨𑁪𑁭. 𑀅𑀲𑀜𑁆𑀘𑀸𑀭𑀺𑀫𑀼𑀧𑀸𑀬𑁂𑀦𑀸𑀢𑀺 𑀅𑀲𑀜𑁆𑀘𑀸𑀭𑀺𑀫𑁂𑀦 𑀦𑀺𑀘𑁆𑀘𑀮𑁂𑀦 𑀉𑀧𑀸𑀬𑁂𑀦. 𑀑𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀧𑀸𑀢𑁄, 𑀲𑁄 𑀆𑀤𑀺 𑀬𑁂𑀲𑀁 𑀅𑀧𑀲𑁆𑀲𑁂𑀦𑀯𑀺𑀲𑀪𑁂𑀲𑀚𑁆𑀚𑀲𑀁𑀯𑀺𑀥𑀸𑀦𑀸𑀤𑀻𑀦𑀁 𑀢𑁂 𑀑𑀧𑀸𑀢𑀸𑀤𑀬𑁄, 𑀢𑁂𑀲𑀁 ¶ 𑀯𑀺𑀥𑀸𑀦𑀁 𑀑𑀧𑀸𑀢𑀸𑀤𑀺𑀯𑀺𑀥𑀸𑀦𑀁, 𑀑𑀧𑀸𑀢𑀓𑁆𑀔𑀡𑀦𑀸𑀤𑀺𑀓𑀺𑀭𑀺𑀬𑀸.

𑁨𑁪𑁮. 𑀯𑀺𑀚𑁆𑀚𑀸𑀬𑀸𑀢𑀺 𑀆𑀣𑀩𑁆𑀩𑀦𑀯𑁂𑀤𑀸𑀕𑀢𑀫𑀭𑀡𑀫𑀦𑁆𑀢𑀲𑀗𑁆𑀔𑀸𑀢𑀯𑀺𑀚𑁆𑀚𑀸𑀬. 𑀚𑀧𑁆𑀧𑀦𑀦𑁆𑀢𑀺 𑀬𑀣𑀸 𑀧𑀭𑁄 𑀦 𑀲𑀼𑀡𑀸𑀢𑀺, 𑀢𑀣𑀸 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁.

𑁨𑁪𑁯. 𑀫𑀸𑀭𑀡𑁂 𑀲𑀫𑀢𑁆𑀣𑀸 𑀬𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀅𑀬𑀁 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄 𑀦𑀸𑀫𑀸𑀢𑀺 𑀲𑀫𑀼𑀤𑀻𑀭𑀺𑀢𑁄𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀯𑀺𑀧𑀸𑀓𑁂 𑀚𑀸𑀢𑀸 𑀓𑀫𑁆𑀫𑀯𑀺𑀧𑀸𑀓𑀚𑀸, 𑀇𑀤𑁆𑀥𑀺, 𑀬𑀸 ‘‘𑀦𑀸𑀕𑀸𑀦𑀁 𑀦𑀸𑀕𑀺𑀤𑁆𑀥𑀺 𑀲𑀼𑀧𑀡𑁆𑀡𑀸𑀦𑀁 𑀲𑀼𑀧𑀡𑁆𑀡𑀺𑀤𑁆𑀥𑀺 𑀬𑀓𑁆𑀔𑀸𑀦𑀁 𑀬𑀓𑁆𑀔𑀺𑀤𑁆𑀥𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀩𑀳𑀼𑀥𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀤𑀺𑀝𑁆𑀞𑀤𑀝𑁆𑀞𑀨𑀼𑀝𑁆𑀞𑀯𑀺𑀲𑀸𑀦𑀁 𑀦𑀸𑀕𑀸𑀦𑀁 𑀤𑀺𑀲𑁆𑀯𑀸, 𑀟𑀁𑀲𑀺𑀢𑁆𑀯𑀸, 𑀨𑀼𑀲𑀺𑀢𑁆𑀯𑀸 𑀘 𑀧𑀭𑀽𑀧𑀖𑀸𑀢𑀓𑀭𑀡𑁂 𑀦𑀸𑀕𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺. 𑀇𑀤𑁆𑀥𑀺𑀬𑁂𑀯 𑀇𑀤𑁆𑀥𑀺𑀫𑀬𑁄, 𑀪𑀸𑀯𑀦𑀸𑀫𑀬𑁄 𑀇𑀤𑁆𑀥𑀺𑀧𑁆𑀧𑀬𑁄𑀕𑁄 𑀧𑀦𑁂𑀢𑁆𑀣 𑀦 𑀕𑀳𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀓𑁂𑀘𑀺 𑀧𑀦 𑀪𑀸𑀯𑀦𑀸𑀫𑀬𑀺𑀤𑁆𑀥𑀺𑀬𑀸𑀧𑀺 𑀧𑀭𑀽𑀧𑀖𑀸𑀢𑀓𑀭𑀡𑀁 𑀯𑀤𑀦𑁆𑀢𑀺. 𑀲𑀳 𑀧𑀭𑀽𑀧𑀖𑀸𑀢𑀓𑀭𑀡𑁂𑀦 𑀘 𑀆𑀤𑀺𑀢𑁆𑀢𑀖𑀭𑀽𑀧𑀭𑀺 𑀔𑀺𑀢𑁆𑀢𑀲𑁆𑀲 𑀉𑀤𑀓𑀖𑀝𑀲𑁆𑀲 𑀪𑁂𑀤𑀦𑀁 𑀯𑀺𑀬 𑀇𑀤𑁆𑀥𑀺𑀯𑀺𑀦𑀸𑀲𑀜𑁆𑀘 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀫𑁂𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀁 𑀓𑀼𑀲𑀮𑀯𑁂𑀤𑀦𑀸𑀯𑀺𑀢𑀓𑁆𑀓𑀧𑀭𑀺𑀢𑁆𑀢𑀢𑁆𑀢𑀺𑀓𑀸𑀤𑀻𑀳𑀺 𑀦 𑀲𑀫𑁂𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀪𑀸𑀯𑀦𑀸𑀫𑀬𑀺𑀤𑁆𑀥𑀺 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀬𑀸 𑀓𑀼𑀲𑀮𑀢𑁆𑀢𑀺𑀓𑁂 𑀓𑀼𑀲𑀮𑀸 𑀘𑁂𑀯 𑀅𑀩𑁆𑀬𑀸𑀓𑀢𑀸 𑀘, 𑀧𑀸𑀡𑀸𑀢𑀺𑀧𑀸𑀢𑁄 𑀅𑀓𑀼𑀲𑀮𑁄. 𑀯𑁂𑀤𑀦𑀸𑀢𑁆𑀢𑀺𑀓𑁂 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑁄. 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄. 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 ¶ 𑀫𑀳𑀕𑁆𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀧𑀭𑀺𑀢𑁆𑀢𑁄𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨).

𑁨𑁫𑁦. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀩𑁆𑀩𑀺𑀥𑁂𑀲𑀼 𑀧𑀬𑁄𑀕𑁂𑀲𑀼. 𑀉𑀤𑁆𑀤𑁂𑀲𑁄𑀧𑀻𑀢𑀺 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄, 𑀢𑀁𑀲𑀳𑀺𑀢𑁄 𑀧𑀬𑁄𑀕𑁄𑀧𑀺 ¶ 𑀉𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀓𑀼𑀦𑁆𑀢𑁂 𑀧𑀯𑁂𑀲𑁂𑀳𑀻’’𑀢𑀺 𑀬𑀣𑀸. 𑀏𑀯𑀁 𑀯𑀢𑁆𑀢𑀩𑁆𑀩𑀢𑀸𑀬 𑀘 𑀅𑀦𑀼𑀤𑁆𑀤𑁂𑀲𑁄𑀢𑀺 𑀢𑀩𑁆𑀩𑀺𑀧𑀭𑀻𑀢𑀯𑀘𑀦𑀫𑁂𑀯 𑀜𑀸𑀧𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀏𑀓𑁂𑀓𑁄 𑀉𑀤𑁆𑀤𑁂𑀲𑁄𑀧𑀺 𑀅𑀦𑀼𑀤𑁆𑀤𑁂𑀲𑁄𑀧𑀺 𑀳𑁄𑀢𑀻𑀢𑀺 𑀢𑁂𑀲𑀫𑀬𑀁 𑀪𑁂𑀤𑁄 𑀧𑀦 𑀤𑀼𑀯𑀺𑀥𑁄 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑁄𑀢𑀺 𑀬𑁄𑀚𑀦𑀸. 𑀇𑀫𑁂𑀲𑀼 𑀙𑀲𑀼 𑀧𑀬𑁄𑀕𑁂𑀲𑁆𑀯𑁂𑀯 𑀏𑀓𑁂𑀓𑀲𑁆𑀲𑁂𑀯 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀓𑀺𑀭𑀺𑀬𑀫𑀸𑀦𑀢𑀸𑀬 𑀤𑀼𑀯𑀺𑀥𑀪𑀸𑀯𑀢𑁄 𑀢𑁂𑀲𑀁 𑀤𑁆𑀯𑀸𑀤𑀲𑀯𑀺𑀥𑁄 𑀪𑁂𑀤𑁄 𑀧𑀤𑀪𑀸𑀚𑀦𑁂 𑀘 𑀅𑀝𑁆𑀞𑀓𑀣𑀸𑀬 𑀘 𑀤𑀻𑀧𑀺𑀢𑁄, 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑀫𑀺𑀤𑀸𑀦𑀺 𑀤𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫𑁧. 𑀩𑀳𑀽𑀲𑀼𑀧𑀻𑀢𑀺 𑀫𑀦𑀼𑀲𑁆𑀲𑁂𑀲𑀼 𑀩𑀳𑀽𑀲𑀼𑀧𑀺. 𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀧𑀳𑀸𑀭𑀤𑀸𑀦𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑁂𑀦. 𑀩𑀚𑁆𑀛𑀢𑀻𑀢𑀺 𑀅𑀧𑀸𑀬𑀁 𑀦𑁂𑀢𑀼𑀁 𑀓𑀫𑁆𑀫𑀧𑀸𑀲𑁂𑀦 𑀓𑀫𑁆𑀫𑀦𑁆𑀢𑀭𑀁 𑀦𑀺𑀯𑀸𑀭𑁂𑀢𑁆𑀯𑀸 𑀩𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁨. 𑀧𑀳𑀸𑀭𑁂𑀧𑀻𑀢𑀺 𑀧𑀳𑀭𑀡𑁂𑀧𑀺. 𑀤𑁂𑀳𑀺𑀦𑁄𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀢𑀲𑁆𑀲𑀸𑀢𑀺 𑀧𑀳𑀝𑀲𑁆𑀲.

𑁨𑁫𑁩. 𑀧𑀳𑀝𑀫𑀢𑁆𑀢𑁂 𑀯𑀸𑀢𑀺 𑀧𑀳𑀝𑀓𑁆𑀔𑀡𑁂 𑀯𑀸. 𑀧𑀘𑁆𑀙𑀸𑀢𑀺 𑀢𑀧𑁆𑀧𑀘𑁆𑀘𑀬𑀸 𑀓𑀸𑀮𑀦𑁆𑀢𑀭𑁂 𑀯𑀸. 𑀉𑀪𑀬𑀣𑀸𑀧𑀺 𑀘 𑀫𑀢𑁂𑀢𑀺 𑀤𑁆𑀯𑀺𑀦𑁆𑀦𑀁 𑀆𑀓𑀸𑀭𑀸𑀦𑀫𑀜𑁆𑀜𑀢𑀭𑁂𑀦 𑀫𑀢𑁂𑀧𑀺. 𑀳𑀦𑁆𑀢𑀸 𑀯𑀥𑀓𑁄. 𑀧𑀳𑀝𑀫𑀢𑁆𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀫𑀭𑀡𑀸𑀭𑀳𑀧𑀳𑀸𑀭𑀲𑁆𑀲 𑀮𑀤𑁆𑀥𑀓𑁆𑀔𑀡𑁂𑀬𑁂𑀯, 𑀫𑀭𑀡𑀢𑁄 𑀧𑀼𑀩𑁆𑀩𑀪𑀸𑀕𑁂𑀬𑁂𑀯𑀸𑀢𑀺 𑀫𑀢𑁆𑀢𑀲𑀤𑁆𑀤𑁂𑀦 𑀤𑀻𑀧𑁂𑀢𑀺. 𑀫𑀭𑀡𑀢𑁆𑀣𑀸𑀬 𑀘 𑀅𑀜𑁆𑀜𑀢𑁆𑀣𑀸𑀬 𑀘 𑀤𑀺𑀦𑁆𑀦𑁂𑀲𑀼 𑀅𑀦𑁂𑀓𑁂𑀲𑀼 𑀧𑀳𑀸𑀭𑁂𑀲𑀼 𑀫𑀭𑀡𑀢𑁆𑀣𑀸𑀬 ¶ 𑀤𑀺𑀦𑁆𑀦𑀧𑁆𑀧𑀳𑀸𑀭𑁂𑀦𑁂𑀯 𑀬𑀤𑀸 𑀓𑀤𑀸𑀘𑀺 𑀫𑀭𑀺𑀲𑁆𑀲𑀢𑀺, 𑀧𑀳𑀸𑀭𑀤𑀸𑀦𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀅𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀦𑁆𑀦𑀧𑁆𑀧𑀳𑀸𑀭𑀩𑀮𑁂𑀦 𑀘𑁂 𑀫𑀭𑁂𑀬𑁆𑀬, 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑁨𑁫𑁪. 𑀤𑁆𑀯𑁂 𑀧𑀬𑁄𑀕𑀸𑀢𑀺 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀓𑀺𑀭𑀺𑀬𑀸𑀪𑁂𑀤𑀪𑀺𑀦𑁆𑀦𑀸 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑀸 𑀤𑁆𑀯𑁂 𑀧𑀬𑁄𑀕𑀸.

𑁨𑁫𑁫. 𑀓𑀭𑀡𑀲𑁆𑀲𑀸𑀢𑀺 𑀓𑀺𑀭𑀺𑀬𑀸𑀬. 𑀯𑀺𑀲𑁂𑀲𑁄𑀢𑀺 𑀦𑀸𑀦𑀢𑁆𑀢𑀁. 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸𑀢𑀺 𑀆𑀡𑀢𑁆𑀢𑀺𑀁 𑀦𑀺𑀬𑀸𑀫𑁂𑀦𑁆𑀢𑀺 𑀯𑀯𑀢𑁆𑀣𑀸𑀧𑁂𑀦𑁆𑀢𑀻𑀢𑀺 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸.

𑁨𑁫𑁬. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑁂𑀲𑀼 𑀙𑀲𑀼 𑀆𑀓𑀸𑀭𑁂𑀲𑀼. 𑀬𑁄𑀩𑁆𑀩𑀦𑀸𑀤𑀺 𑀘𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀣𑀸𑀯𑀭𑀺𑀬𑀫𑀦𑁆𑀤𑀔𑀺𑀟𑁆𑀟𑀯𑀼𑀤𑁆𑀥𑀸𑀤𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁄.

𑁨𑁫𑁭. 𑀬𑀁 𑀫𑀸𑀢𑀺𑀓𑀸𑀬 𑀦𑀺𑀤𑁆𑀤𑀺𑀝𑁆𑀞𑀁 𑀲𑀢𑁆𑀣𑀁, 𑀢𑀁 𑀓𑀢𑀫𑀁?. 𑀲𑀢𑁆𑀢𑀫𑀸𑀭𑀡𑀦𑁆𑀢𑀺 𑀲𑀢𑁆𑀢𑁂 𑀫𑀸𑀭𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀢𑁆𑀢𑀫𑀸𑀭𑀡𑀁, 𑀅𑀲𑀺𑀆𑀤𑀺𑀯𑀥𑁄𑀧𑀓𑀭𑀡𑀁.

𑁨𑁫𑁮. 𑀯𑀺𑀚𑁆𑀛𑀦𑀦𑁆𑀢𑀺 ¶ 𑀉𑀲𑀼𑀆𑀤𑀻𑀳𑀺 𑀯𑀺𑀚𑁆𑀛𑀦𑀁. 𑀪𑁂𑀤𑀦𑀦𑁆𑀢𑀺 𑀓𑀓𑀘𑀸𑀤𑀻𑀳𑀺 𑀤𑁆𑀯𑀺𑀥𑀸𑀓𑀭𑀡𑀁. 𑀙𑁂𑀤𑀦𑀦𑁆𑀢𑀺 𑀔𑀕𑁆𑀕𑀸𑀤𑀻𑀳𑀺 𑀤𑁆𑀯𑀺𑀥𑀸𑀓𑀭𑀡𑀁. 𑀢𑀸𑀴𑀦𑀦𑁆𑀢𑀺 𑀫𑀼𑀕𑁆𑀕𑀭𑀸𑀤𑀻𑀳𑀺 𑀆𑀖𑀸𑀢𑀦𑀁. 𑀏𑀯𑀫𑀸𑀤𑀺𑀯𑀺𑀥𑁄𑀢𑀺 𑀏𑀯𑀫𑀸𑀤𑀺𑀧𑁆𑀧𑀓𑀸𑀭𑁄. 𑀅𑀦𑁂𑀓𑁄𑀢𑀺 𑀩𑀳𑀼𑀓𑁄 𑀪𑁂𑀤𑁄. 𑀓𑀭𑀡𑀲𑁆𑀲 𑀯𑀺𑀲𑁂𑀲𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄.

𑁨𑁫𑁯-𑁬𑁦. ‘‘𑀧𑀼𑀭𑀢𑁄 𑀧𑀳𑀭𑀺𑀢𑁆𑀯𑀸𑀦 𑀫𑀸𑀭𑁂𑀳𑀻’’𑀢𑀺 𑀬𑁄 𑀪𑀸𑀲𑀺𑀢𑁄 𑀆𑀡𑀸𑀧𑀓𑁂𑀦, 𑀢𑁂𑀦 𑀆𑀡𑀢𑁆𑀢𑁂𑀦 𑀧𑀘𑁆𑀙𑀢𑁄…𑀧𑁂… 𑀫𑀸𑀭𑀺𑀢𑁂𑀢𑀺 𑀬𑁄𑀚𑀦𑀸. 𑀯𑀢𑁆𑀣𑀸𑀡𑀢𑁆𑀢𑀺 𑀯𑀺𑀲𑀗𑁆𑀓𑁂𑀢𑀸𑀢𑀺 𑀏𑀢𑁆𑀣 ‘‘𑀬𑀁 ‘𑀫𑀸𑀭𑁂𑀳𑀻’𑀢𑀺…𑀧𑁂… 𑀢𑀢𑁄’’𑀢𑀺 𑀯𑀢𑁆𑀣𑀼𑀯𑀺𑀲𑀗𑁆𑀓𑁂𑀢𑁄 𑀤𑀲𑁆𑀲𑀺𑀢𑁄. ‘‘𑀧𑀼𑀭𑀢𑁄…𑀧𑁂… 𑀫𑀸𑀭𑀺𑀢𑁂’’𑀢𑀺 𑀆𑀡𑀢𑁆𑀢𑀺𑀯𑀺𑀲𑀗𑁆𑀓𑁂𑀢𑁄 𑀤𑀲𑁆𑀲𑀺𑀢𑁄. 𑀫𑀽𑀮𑀝𑁆𑀞𑁄𑀢𑀺 𑀆𑀡𑀸𑀧𑀓𑁄. 𑀫𑀽𑀮𑀦𑁆𑀢𑀺 𑀳𑀺 𑀧𑀼𑀩𑁆𑀩𑀓𑀺𑀭𑀺𑀬𑀸𑀦𑀼𑀭𑀽𑀧𑀁 𑀆𑀡𑀸𑀧𑀦𑀁, 𑀢𑀢𑁆𑀣 𑀞𑀺𑀢𑁄𑀢𑀺 𑀫𑀽𑀮𑀝𑁆𑀞𑁄.

𑁨𑁬𑁧. 𑀇𑀫𑀺𑀦𑀸 ¶ 𑀯𑀺𑀲𑀗𑁆𑀓𑁂𑀢𑁂 𑀆𑀡𑀸𑀧𑀓𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀓𑁂𑀢𑁂 𑀅𑀯𑀺𑀭𑀸𑀥𑀺𑀢𑁂 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺. 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀫𑀸𑀭𑀺𑀢𑁂 𑀉𑀪𑀬𑁂𑀲𑀁…𑀧𑁂… 𑀉𑀤𑀻𑀭𑀺𑀢𑁄, 𑀬𑀣𑀸𑀡𑀢𑁆𑀢𑀺 𑀘 𑀫𑀸𑀭𑀺𑀢𑁂…𑀧𑁂… 𑀉𑀤𑀻𑀭𑀺𑀢𑁄𑀢𑀺 𑀬𑁄𑀚𑀦𑀸. 𑀫𑀸𑀭𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀉𑀪𑀬𑁂𑀲𑀦𑁆𑀢𑀺 𑀆𑀡𑀸𑀧𑀓𑀆𑀡𑀢𑁆𑀢𑀸𑀦𑀁. 𑀬𑀣𑀸𑀓𑀸𑀮𑀦𑁆𑀢𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑀁, 𑀆𑀡𑀢𑁆𑀢𑀲𑁆𑀲 𑀫𑀸𑀭𑀡𑀓𑁆𑀔𑀡𑀜𑁆𑀘 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸. 𑀩𑀦𑁆𑀥𑀦𑀁 𑀩𑀦𑁆𑀥𑁄, 𑀓𑀫𑁆𑀫𑀼𑀦𑀸 𑀩𑀦𑁆𑀥𑁄 𑀓𑀫𑁆𑀫𑀩𑀦𑁆𑀥𑁄. 𑀅𑀣 𑀯𑀸 𑀩𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀩𑀦𑁆𑀥𑁄, 𑀓𑀫𑁆𑀫𑀫𑁂𑀯 𑀩𑀦𑁆𑀥𑁄 𑀓𑀫𑁆𑀫𑀩𑀦𑁆𑀥𑁄.

𑁨𑁬𑁪. 𑀯𑀺𑀲𑀗𑁆𑀓𑁂𑀢𑁄 𑀦𑀸𑀢𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀫𑁆𑀫𑀩𑀦𑁆𑀥𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁨𑁬𑁫. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀲𑀼 𑀓𑀸𑀮𑀪𑁂𑀤𑁂𑀲𑀼, 𑀲𑀩𑁆𑀩𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀯𑀺𑀪𑀸𑀯𑀺𑀦𑀸𑀢𑀺 𑀧𑀡𑁆𑀟𑀺𑀢𑁂𑀦. 𑀲𑁄 𑀳𑀺 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑁄.

𑁨𑁬𑁬-𑁭-𑁮. ‘‘𑀇𑀫𑀁 𑀕𑀸𑀫𑁂 𑀞𑀺𑀢’’𑀦𑁆𑀢𑀺 𑀇𑀤𑀁 𑀢𑀁 𑀲𑀜𑁆𑀚𑀸𑀦𑀺𑀢𑀼𑀁 𑀯𑀼𑀢𑁆𑀢𑀁, 𑀦 𑀫𑀸𑀭𑀡𑀓𑁆𑀔𑀡𑀝𑁆𑀞𑀸𑀦𑀦𑀺𑀬𑀫𑀢𑁆𑀣𑀸𑀬𑀸𑀢𑀺 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀦𑀢𑁆𑀣𑀺 𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑁄’’𑀢𑀺 𑀆𑀳. 𑀢𑀲𑁆𑀲𑀸𑀢𑀺 𑀆𑀡𑀸𑀧𑀓𑀲𑁆𑀲. ‘‘𑀢𑀢𑁆𑀣𑀸’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲𑀁 𑀆𑀡𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀕𑀸𑀫𑁂𑀬𑁂𑀯 𑀞𑀺𑀢𑀁 𑀯𑁂𑀭𑀺𑀁 𑀫𑀸𑀭𑁂𑀳𑀻’’𑀢𑀺 𑀲𑀸𑀯𑀥𑀸𑀭𑀡𑀁 𑀆𑀡𑀢𑁆𑀢𑁄 𑀯𑀦𑁂 𑀘𑁂 𑀞𑀺𑀢𑀁 𑀫𑀸𑀭𑁂𑀢𑀺 𑀯𑀸 ‘‘𑀯𑀦𑁂𑀬𑁂𑀯 𑀞𑀺𑀢𑀁 𑀯𑁂𑀭𑀺𑀁 𑀫𑀸𑀭𑁂𑀳𑀻’’𑀢𑀺 𑀲𑀸𑀯𑀥𑀸𑀭𑀡𑀁 𑀯𑀼𑀢𑁆𑀢𑁄 𑀕𑀸𑀫𑁂 𑀞𑀺𑀢𑀁 𑀘𑁂 𑀫𑀸𑀭𑁂𑀢𑀺 𑀯𑀸𑀢𑀺 𑀬𑁄𑀚𑀦𑀸. ‘‘𑀪𑀺𑀓𑁆𑀔𑀼𑀦𑀸 𑀲𑀸𑀯𑀥𑀸𑀭𑀡’’𑀦𑁆𑀢𑀺 ¶ 𑀘 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀯𑀦𑁂 𑀯𑀸 ¶ 𑀲𑀸𑀯𑀥𑀸𑀭𑀡’’𑀦𑁆𑀢𑀺 𑀧𑀸𑀞𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀯𑀺𑀕𑀢𑁄 𑀲𑀗𑁆𑀓𑁂𑀢𑁄 𑀆𑀡𑀢𑁆𑀢𑀺𑀦𑀺𑀬𑀸𑀫𑁄 𑀏𑀢𑁆𑀣𑀸𑀢𑀺 𑀯𑀺𑀲𑀗𑁆𑀓𑁂𑀢𑁄.

𑁨𑁬𑁯. 𑀲𑀩𑁆𑀩𑀤𑁂𑀲𑁂𑀲𑀽𑀢𑀺 𑀕𑀸𑀫𑀯𑀦𑀅𑀗𑁆𑀕𑀡𑀕𑁂𑀳𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼. 𑀪𑁂𑀤𑀢𑁄𑀢𑀺 𑀦𑀸𑀦𑀢𑁆𑀢𑀢𑁄.

𑁨𑁭𑁦. ‘‘𑀲𑀢𑁆𑀣𑁂𑀦 𑀧𑀦 𑀫𑀸𑀭𑁂𑀳𑀻’’𑀢𑀺 𑀬𑁂𑀦 𑀓𑁂𑀦𑀘𑀺 𑀬𑁄 𑀆𑀡𑀢𑁆𑀢𑁄, 𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀲𑀢𑁆𑀣𑁂𑀦 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁨𑁭𑁧-𑁨. 𑀇𑀫𑀺𑀦𑀸 𑀯𑀸𑀲𑀺𑀦𑀸 𑀳𑀻𑀢𑀺 𑀏𑀢𑁆𑀣 𑀳𑀻𑀢𑀺 𑀧𑀤𑀧𑀽𑀭𑀡𑁂. ‘‘𑀇𑀫𑀺𑀦𑀸 𑀅𑀲𑀺𑀦𑀸 𑀫𑀸𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁄 𑀅𑀜𑁆𑀜𑁂𑀦 𑀅𑀲𑀺𑀦𑀸 𑀫𑀸𑀭𑁂𑀢𑀺 𑀯𑀸 ‘‘𑀢𑁆𑀯𑀁 𑀇𑀫𑀲𑁆𑀲 𑀅𑀲𑀺𑀲𑁆𑀲 𑀏𑀢𑀸𑀬 𑀥𑀸𑀭𑀸𑀬 𑀫𑀸𑀭𑀬’’ 𑀇𑀢𑀺 𑀯𑀼𑀢𑁆𑀢𑁄 𑀢𑀁 𑀯𑁂𑀭𑀺𑀁 𑀲𑀘𑁂 𑀇𑀢𑀭𑀸𑀬 𑀥𑀸𑀭𑀸𑀬 𑀫𑀸𑀭𑁂𑀢𑀺 𑀯𑀸 𑀣𑀭𑀼𑀦𑀸 𑀫𑀸𑀭𑁂𑀢𑀺 𑀯𑀸 𑀢𑀼𑀡𑁆𑀟𑁂𑀦 𑀫𑀸𑀭𑁂𑀢𑀺 𑀯𑀸, 𑀢𑀣𑀸 𑀫𑀸𑀭𑀺𑀢𑁂 𑀯𑀺𑀲𑀗𑁆𑀓𑁂𑀢𑁄𑀬𑁂𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀣𑀭𑀼𑀦𑀸𑀢𑀺 𑀔𑀕𑁆𑀕𑀫𑀼𑀝𑁆𑀞𑀺𑀦𑀸. 𑀢𑀼𑀡𑁆𑀟𑁂𑀦𑀸𑀢𑀺 𑀔𑀕𑁆𑀕𑀢𑀼𑀡𑁆𑀟𑁂𑀦. ‘‘𑀯𑀺𑀲𑀗𑁆𑀓𑁂𑀢𑁄𑀯𑀸’’𑀢𑀺 𑀲𑀗𑁆𑀓𑁂𑀢𑀯𑀺𑀭𑀸𑀥𑁂𑀦𑁂𑀯 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀧𑀤𑀫𑁂𑀢𑀁.

𑁨𑁭𑁩. 𑀲𑀩𑁆𑀩𑀸𑀯𑀼𑀥𑀓𑀚𑀸𑀢𑀺𑀲𑀽𑀢𑀺 𑀇𑀥𑀸𑀯𑀼𑀢𑁆𑀢𑀓𑀭𑀧𑀸𑀮𑀺𑀓𑀸𑀙𑀼𑀭𑀺𑀓𑀸𑀤𑀺𑀲𑀩𑁆𑀩𑀧𑀳𑀭𑀡𑀲𑀸𑀫𑀜𑁆𑀜𑁂𑀲𑀼. 𑀯𑀺𑀲𑁂𑀲𑀢𑁄𑀢𑀺 𑀪𑁂𑀤𑀢𑁄.

𑁨𑁭𑁪. 𑀧𑀭𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀲𑁄𑀢𑀺 𑀆𑀡𑀢𑁆𑀢𑁄. 𑀦𑀺𑀲𑀺𑀦𑁆𑀦𑀁 𑀦𑀁 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀦 𑀯𑀺𑀚𑁆𑀚𑀢𑀻𑀢𑀺 ‘‘𑀕𑀘𑁆𑀙𑀦𑁆𑀢𑀫𑁂𑀯 𑀫𑀸𑀭𑁂𑀳𑀻’’𑀢𑀺 𑀲𑀸𑀯𑀥𑀸𑀭𑀡𑀁 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀲𑀺𑀦𑁆𑀦𑁄𑀧𑀺 𑀲𑁄𑀬𑁂𑀯𑀸’’𑀢𑀺 𑀢𑀁 𑀫𑀸𑀭𑁂𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑁄 𑀦 𑀳𑁄𑀢𑀺, 𑀅𑀯𑀥𑀸𑀭𑀡𑀁 𑀅𑀦𑁆𑀢𑀭𑁂𑀦 𑀓𑀣𑀦𑀁 𑀢𑀁 𑀲𑀜𑁆𑀚𑀸𑀦𑀸𑀧𑁂𑀢𑀼𑀁 𑀯𑀼𑀘𑁆𑀘𑀢𑀻𑀢𑀺 𑀇𑀭𑀺𑀬𑀸𑀧𑀣𑀦𑀺𑀬𑀸𑀫𑀓𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁫-𑁬. 𑀅𑀲𑀢𑀺 ¶ 𑀲𑀸𑀯𑀥𑀸𑀭𑀡𑁂 𑀯𑀺𑀲𑀗𑁆𑀓𑁂𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀸𑀯𑀥𑀸𑀭𑀡𑁂 𑀇𑀭𑀺𑀬𑀸𑀧𑀣𑀦𑁆𑀢𑀭𑁂𑀲𑀼 𑀯𑀺𑀲𑀗𑁆𑀓𑁂𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀲𑀺𑀦𑁆𑀦𑀁𑀬𑁂𑀯𑀸’’𑀢𑀺𑀆𑀤𑀺. ‘‘𑀦𑀺𑀲𑀺𑀦𑁆𑀦𑀁𑀬𑁂𑀯 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀕𑀘𑁆𑀙𑀦𑁆𑀢𑀁 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀜𑀸𑀢𑀩𑁆𑀩𑀁. ‘‘𑀕𑀘𑁆𑀙𑀦𑁆𑀢𑀁𑀬𑁂𑀯 𑀫𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑀁 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀫𑁂𑀯 𑀬𑁄𑀚𑀦𑀸𑀓𑁆𑀓𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀓𑁆𑀓𑀫’’𑀦𑁆𑀢𑀺.

𑁨𑁭𑁭. 𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀲𑀭𑀸𑀤𑀻𑀳𑀺 𑀯𑀺𑀚𑁆𑀛𑀺𑀢𑁆𑀯𑀸.

𑁨𑁭𑁮. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ¶ 𑀅𑀲𑀺𑀆𑀤𑀻𑀳𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀼𑀦 𑀲𑁄𑀢𑀺 𑀧𑀬𑁄𑀕𑁄.

𑁨𑁭𑁯. 𑀓𑀭𑀡𑁂𑀲𑀽𑀢𑀺 𑀯𑀺𑀚𑁆𑀛𑀦𑀸𑀤𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑁂𑀲𑀼.

𑁨𑁮𑁦-𑁧. 𑀏𑀢𑁆𑀢𑀸𑀯𑀢𑀸 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀦𑀺𑀤𑁆𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀻𑀖𑀸𑀤𑀺𑀮𑀺𑀗𑁆𑀕𑀯𑀲𑁂𑀦𑀸𑀧𑀺 𑀲𑀫𑁆𑀪𑀯𑀦𑁆𑀢𑀁 𑀯𑀺𑀲𑀗𑁆𑀓𑁂𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀻𑀖’’𑀦𑁆𑀢𑀺𑀆𑀤𑀺. ‘‘𑀤𑀻𑀖𑀁…𑀧𑁂… 𑀣𑀽𑀮𑀁 𑀫𑀸𑀭𑁂𑀳𑀻𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁪) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀏𑀯-𑀓𑀸𑀭𑀁 𑀯𑀺𑀦𑀸 ‘‘𑀤𑀻𑀖𑀁 𑀫𑀸𑀭𑁂𑀳𑀻’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀓𑁂𑀦𑀘𑀺 𑀬𑁄 𑀆𑀡𑀢𑁆𑀢𑁄 𑀳𑁄𑀢𑀺, 𑀲𑁄𑀧𑀺 𑀆𑀡𑀢𑁆𑀢𑁄 𑀬𑀁 𑀓𑀺𑀜𑁆𑀘𑀺 𑀢𑀸𑀤𑀺𑀲𑀁 𑀲𑀘𑁂 𑀫𑀸𑀭𑁂𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀯𑀺𑀲𑀗𑁆𑀓𑁂𑀢𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀭𑀸𑀚𑀬𑁄𑀢𑀺 𑀬𑁄𑀚𑀦𑀸. 𑀏𑀯𑀁 ‘‘𑀭𑀲𑁆𑀲’’𑀦𑁆𑀢𑀺𑀆𑀤𑀺𑀲𑀩𑁆𑀩𑀧𑀤𑁂𑀳𑀺𑀧𑀺 𑀧𑀘𑁆𑀘𑁂𑀓𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀦𑀺𑀬𑀫𑁂𑀢𑁆𑀯𑀸𑀢𑀺 𑀯𑀺𑀲𑀗𑁆𑀓𑁂𑀢𑀸𑀪𑀸𑀯𑀲𑁆𑀲 𑀳𑁂𑀢𑀼𑀤𑀲𑁆𑀲𑀦𑀁. 𑀏𑀯𑀓𑀸𑀭𑁄 𑀯𑀸𑀓𑁆𑀬𑀸𑀮𑀗𑁆𑀓𑀸𑀭𑁄. 𑀢𑀢𑁆𑀣𑀸𑀢𑀺 𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑁂. ‘‘𑀉𑀪𑀺𑀦𑁆𑀦𑀫𑁆𑀧𑀺 𑀧𑀭𑀸𑀚𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀡𑀸𑀧𑀓𑀁 𑀯𑀺𑀦𑀸 𑀅𑀜𑁆𑀜𑀁 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 ‘‘𑀬𑀁 𑀓𑀺𑀜𑁆𑀘𑀺 𑀢𑀸𑀤𑀺𑀲’’𑀦𑁆𑀢𑀺 𑀇𑀫𑀺𑀦𑀸 𑀤𑀲𑁆𑀲𑁂𑀢𑀺.

𑀲𑀘𑁂 𑀆𑀡𑀸𑀧𑀓𑁄 𑀆𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸 𑀫𑀭𑀢𑀺, 𑀆𑀡𑀢𑁆𑀢𑀲𑁆𑀲 ¶ 𑀧𑀸𑀭𑀸𑀚𑀺𑀓𑀁. 𑀆𑀡𑀸𑀧𑀓𑁂𑀦 𑀅𑀢𑁆𑀢𑀸𑀦𑀫𑀼𑀤𑁆𑀤𑀺𑀲𑁆𑀲 𑀆𑀡𑀢𑁆𑀢𑀺𑀬𑀸 𑀓𑀢𑀸𑀬 𑀆𑀡𑀢𑁆𑀢𑁄 𑀅𑀚𑀸𑀦𑀺𑀢𑁆𑀯𑀸 𑀢𑀸𑀤𑀺𑀲𑀁 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀑𑀓𑀸𑀲𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺, 𑀇𑀢𑀭𑁄 𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺. 𑀬𑀤𑀺 ‘‘𑀅𑀫𑀼𑀓𑀲𑁆𑀫𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀁 𑀈𑀤𑀺𑀲𑀁 𑀫𑀸𑀭𑁂𑀳𑀻’’𑀢𑀺 𑀑𑀓𑀸𑀲𑀁 𑀦𑀺𑀬𑀫𑁂𑀢𑁆𑀯𑀸 𑀆𑀡𑀸𑀧𑁂𑀢𑀺, 𑀢𑀢𑁆𑀣 𑀆𑀡𑀸𑀧𑀓𑀢𑁄 𑀅𑀜𑁆𑀜𑀲𑁆𑀫𑀺𑀁 𑀫𑀸𑀭𑀺𑀢𑁂 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀢𑀢𑁄 𑀩𑀳𑀺 𑀫𑀸𑀭𑀺𑀢𑁂 𑀯𑀥𑀓𑀲𑁆𑀲𑁂𑀯 𑀓𑀫𑁆𑀫𑀩𑀦𑁆𑀥𑁄. 𑀆𑀡𑀸𑀧𑀓𑁄 𑀅𑀢𑁆𑀢𑀸𑀦𑀫𑁂𑀯 𑀉𑀤𑁆𑀤𑀺𑀲𑁆𑀲 𑀆𑀡𑀸𑀧𑁂𑀢𑀺, 𑀇𑀢𑀭𑁄 𑀘 𑀢𑀫𑁂𑀯 𑀢𑀢𑁆𑀣 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀤𑀼𑀓𑁆𑀓𑀝𑀁, 𑀆𑀡𑀢𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀅𑀜𑁆𑀜𑀢𑁆𑀣 𑀫𑀸𑀭𑁂𑀢𑀺, 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. 𑀅𑀚𑀸𑀦𑀺𑀢𑁆𑀯𑀸 𑀅𑀜𑁆𑀜𑀁 𑀢𑀢𑁆𑀣 𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀫𑀸𑀭𑁂𑀢𑀺, 𑀯𑀥𑀓𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺, 𑀫𑀽𑀮𑀝𑁆𑀞𑁄 𑀫𑀼𑀘𑁆𑀘𑀢𑀺. 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀆𑀦𑀦𑁆𑀢𑀭𑀺𑀬𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁.

𑁨𑁮𑁨. 𑀬𑁄 𑀫𑀦𑀼𑀲𑁆𑀲𑀁 𑀓𑀜𑁆𑀘𑀺 𑀉𑀤𑁆𑀤𑀺𑀲𑁆𑀲 𑀲𑀘𑁂 𑀑𑀧𑀸𑀢𑀁 𑀔𑀡𑀢𑀺, 𑀢𑀣𑀸 𑀑𑀧𑀸𑀢𑀁 𑀔𑀡𑀦𑁆𑀢𑀲𑁆𑀲 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀦𑀸𑀫 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸. 𑀬𑁄𑀚𑀦𑀸 𑀘 𑀦𑀸𑀫𑁂𑀲𑀸 𑀬𑀣𑀸𑀭𑀼𑀢𑀬𑁄𑀚𑀦𑀸, 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀧𑀸𑀞𑀸𑀕𑀢𑀧𑀤𑀸𑀦𑀫𑁂𑀯 𑀬𑁄𑀚𑀦𑀸 𑀬𑀣𑀸𑀭𑀼𑀢𑀬𑁄𑀚𑀦𑀸, 𑀊𑀦𑀧𑀽𑀭𑀡𑀢𑁆𑀣𑀫𑀚𑁆𑀛𑀸𑀳𑀸𑀭𑀧𑀤𑁂𑀳𑀺 𑀲𑀳 𑀧𑀸𑀞𑀸𑀕𑀢𑀧𑀤𑀸𑀦𑀁 𑀬𑁄𑀚𑀦𑀸 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀔𑀡𑀦𑁆𑀢𑀲𑁆𑀲 ¶ 𑀘 𑀑𑀧𑀸𑀢’’𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄 𑀤𑀺𑀲𑁆𑀲𑀢𑀺. ‘‘𑀔𑀡𑀦𑁆𑀢𑀲𑁆𑀲 𑀢𑀣𑁄𑀧𑀸𑀢’𑀦𑁆𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. ‘‘𑀆𑀯𑀸𑀝𑀦𑁆𑀢𑀺 𑀏𑀢𑀲𑁆𑀲 ‘𑀑𑀧𑀸𑀢’𑀦𑁆𑀢𑀺 𑀧𑀭𑀺𑀬𑀸𑀬𑁄’’𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑁄𑀧𑀺 𑁋

‘‘𑀫𑀦𑀼𑀲𑁆𑀲𑀁 𑀓𑀜𑁆𑀘𑀺 𑀉𑀤𑁆𑀤𑀺𑀲𑁆𑀲;

𑀬𑁄 𑀘𑁂 𑀔𑀡𑀢𑀺𑀯𑀸𑀝𑀓𑀁;

𑀔𑀡𑀢𑁄 𑀢𑀁 𑀢𑀣𑀸 𑀢𑀲𑁆𑀲;

𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝’’𑀦𑁆𑀢𑀺. 𑁋

𑀧𑀸𑀞𑁄 ¶ 𑀲𑀼𑀦𑁆𑀤𑀭𑀢𑀭𑁄. 𑀚𑀸𑀢𑀧𑀣𑀯𑀺𑀁 𑀔𑀡𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀧𑀬𑁄𑀕𑀢𑁆𑀢𑀸 𑀧𑀬𑁄𑀕𑀕𑀡𑀦𑀸𑀬 𑀤𑀼𑀓𑁆𑀓𑀝𑀁.

𑁨𑁮𑁩. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀯𑀸𑀝𑁂. 𑀢𑀲𑁆𑀲𑀸𑀢𑀺 𑀧𑀢𑀺𑀢𑀲𑁆𑀲 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀤𑀼𑀓𑁆𑀔𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑀲𑁆𑀲𑀸𑀢𑀺 𑀬𑁂𑀦 𑀆𑀯𑀸𑀝𑁄 𑀔𑀢𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀧𑀢𑀺𑀢𑁆𑀯𑀸 𑀲𑁄 𑀘𑁂 𑀫𑀭𑀢𑀺, 𑀢𑀲𑁆𑀫𑀺𑀁 𑀫𑀢𑁂 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁 𑀪𑀯𑁂𑀢𑀺 𑀬𑁄𑀚𑀦𑀸.

𑁨𑁮𑁪. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀬𑀁 𑀲𑀫𑀼𑀤𑁆𑀤𑀺𑀲𑁆𑀲 𑀆𑀯𑀸𑀝𑁄 𑀔𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀅𑀦𑀼𑀤𑁆𑀤𑀺𑀲𑁆𑀲𑀓𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀅𑀦𑀼𑀤𑁆𑀤𑀺𑀲𑁆𑀲𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀧𑀸𑀢𑀯𑀺𑀲𑁂𑀲𑀦𑀁 𑀘𑁂, ‘‘𑀅𑀦𑀼𑀤𑁆𑀤𑀺𑀲𑁆𑀲𑀓𑁄 𑀑𑀧𑀸𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁩𑁯; 𑀅. 𑀦𑀺. 𑁪.𑁩𑁪; 𑁧𑁦.𑁧𑁫; 𑀇𑀢𑀺𑀯𑀼. 𑁯𑁦; 𑀦𑁂𑀢𑁆𑀢𑀺. 𑁧𑁭𑁦) 𑀯𑀺𑀬 𑀑-𑀓𑀸𑀭𑀝𑁆𑀞𑀸𑀦𑁂 𑀅-𑀓𑀸𑀭𑁄, 𑀫-𑀓𑀸𑀭𑀸𑀕𑀫𑁄 𑀘 𑀤𑀝𑁆𑀞𑀩𑁆𑀩𑁄, 𑀅𑀦𑁄𑀤𑀺𑀲𑁆𑀲𑀓𑁄 𑀑𑀧𑀸𑀢𑁄 𑀔𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁮𑁫. ‘‘𑀏𑀢𑁆𑀣 𑀧𑀢𑀺𑀢𑁆𑀯𑀸 𑀬𑁄 𑀓𑁄𑀘𑀺 𑀫𑀭𑀢𑀽’’𑀢𑀺 𑀅𑀦𑁄𑀤𑀺𑀲𑁆𑀲𑀓𑁄 𑀑𑀧𑀸𑀢𑁄 𑀲𑀘𑁂 𑀔𑀢𑁄 𑀳𑁄𑀢𑀺, 𑀬𑀢𑁆𑀢𑀓𑀸 𑀦𑀺𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀺 𑀘𑁂, 𑀅𑀲𑁆𑀲 𑀢𑀢𑁆𑀢𑀓𑀸 𑀤𑁄𑀲𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀬𑁄 𑀓𑁄𑀘𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀗𑁆𑀕𑀳𑀺𑀢𑀸. 𑀤𑁄𑀲𑀸𑀢𑀺 𑀓𑀫𑁆𑀫𑀩𑀦𑁆𑀥𑀤𑁄𑀲𑀸, 𑀧𑀸𑀭𑀸𑀚𑀺𑀓𑀁 𑀧𑀦 𑀏𑀓𑀫𑁂𑀯. 𑀅𑀲𑁆𑀲𑀸𑀢𑀺 𑀬𑁂𑀦 𑀅𑀦𑁄𑀤𑀺𑀲𑁆𑀲 𑀑𑀧𑀸𑀢𑁄 𑀔𑀢𑁄, 𑀢𑀲𑁆𑀲.

𑁨𑁮𑁬. 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀫𑀢𑁂𑀢𑀺 𑀧𑀸𑀞𑀲𑁂𑀲𑁄, ‘‘𑀢𑀢𑁆𑀣 𑀧𑀢𑀺𑀢𑁆𑀯𑀸’’𑀢𑀺 𑀅𑀥𑀺𑀓𑀸𑀭𑁄, 𑀅𑀭𑀳𑀦𑁆𑀢𑁂, 𑀫𑀸𑀢𑀭𑀺, 𑀧𑀺𑀢𑀭𑀺 𑀘 𑀢𑀲𑁆𑀫𑀺𑀁 𑀧𑀢𑀺𑀢𑁆𑀯𑀸 𑀫𑀢𑁂 𑀓𑀸𑀮𑀓𑀢𑁂𑀢𑀺 𑀅𑀢𑁆𑀣𑁄. 𑀆𑀦𑀦𑁆𑀢𑀭𑀺𑀬𑀓𑀦𑁆𑀢𑀺 𑀏𑀢𑁆𑀣 𑀲𑀓𑀢𑁆𑀣𑁂, 𑀓𑀼𑀘𑁆𑀙𑀺𑀢𑁂 ¶ , 𑀲𑀜𑁆𑀜𑀸𑀬𑀁 𑀯𑀸 𑀓-𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀫𑀸𑀲𑀧𑀤𑁂 ¶ 𑀅𑀯𑀬𑀯𑀪𑀽𑀢𑀫𑁆𑀧𑀺 ‘‘𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀇𑀤𑀜𑁆𑀘 ‘‘𑀢𑀢𑁆𑀣 𑀧𑀢𑀺𑀢𑁆𑀯𑀸 𑀫𑀢𑁂’’𑀢𑀺 𑀇𑀤𑀜𑁆𑀘 𑀆𑀓𑀟𑁆𑀠𑀢𑀺. 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀁 𑀯𑀢𑁆𑀣𑀼𑀲𑁆𑀫𑀺𑀁 𑀢𑀢𑁆𑀣 𑀧𑀢𑀺𑀢𑁆𑀯𑀸 𑀫𑀢𑁂 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀁 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀬𑀓𑁆𑀔𑀸𑀤𑀻𑀲𑀼 𑀫𑀢𑁂𑀲𑀼, 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑁄 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀫𑀢𑁂 𑀧𑀸𑀭𑀸𑀚𑀺𑀓𑀁, 𑀢𑀺𑀭𑀘𑁆𑀙𑀸𑀦𑁂 𑀫𑀢𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁮𑁭. 𑀧𑀸𑀡𑀸𑀢𑀺𑀧𑀸𑀢𑀸 𑀤𑁆𑀯𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀢𑀢𑁆𑀢𑀸 𑀤𑁆𑀯𑁂 𑀧𑀸𑀡𑀸𑀢𑀺𑀧𑀸𑀢𑀸, 𑀏𑀓𑁂𑀦 𑀧𑀸𑀭𑀸𑀚𑀺𑀓𑀁, 𑀇𑀢𑀭𑁂𑀦 𑀓𑀫𑁆𑀫𑀩𑀦𑁆𑀥𑁄𑀬𑁂𑀯. 𑀏𑀓𑁄𑀯𑁂𑀓𑁂𑀓𑀥𑀁𑀲𑀦𑁂𑀢𑀺 𑀫𑀸𑀢𑀼 𑀯𑀸 𑀤𑀸𑀭𑀓𑀲𑁆𑀲 𑀯𑀸 𑀫𑀭𑀡𑁂 𑀏𑀓𑁄 𑀧𑀸𑀡𑀸𑀢𑀺𑀧𑀸𑀢𑁄𑀯.

𑁨𑁮𑁮. 𑀘𑁄𑀭𑁂𑀳𑀺 𑀅𑀦𑀼𑀩𑀤𑁆𑀥𑁄 𑀏𑀢𑁆𑀣 𑀆𑀯𑀸𑀝𑁂 𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀺 𑀘𑁂, 𑀑𑀧𑀸𑀢𑀔𑀡𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑁂 𑀅𑀭𑀼𑀘𑀺𑀲𑀽𑀘𑀓𑀁.

𑁨𑁮𑁯-𑁯𑁦. 𑀯𑁂𑀭𑀺𑀦𑁄 𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁂 𑀯𑁂𑀭𑀺𑀧𑀼𑀕𑁆𑀕𑀮𑀸. 𑀢𑀢𑁆𑀣 𑀢𑀲𑁆𑀫𑀺𑀁 𑀑𑀧𑀸𑀢𑁂 𑀲𑀘𑁂 𑀫𑀦𑀼𑀲𑁆𑀲𑀁 𑀧𑀸𑀢𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺, 𑀢𑀣𑀸 𑀯𑁂𑀭𑀺𑀦𑁄 𑀢𑀢𑁆𑀣 𑀲𑀬𑀫𑁂𑀯 𑀧𑀢𑀺𑀢𑀁 𑀫𑀦𑀼𑀲𑁆𑀲𑀁 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀲𑀘𑁂 𑀫𑀸𑀭𑁂𑀦𑁆𑀢𑀺, 𑀢𑀢𑁆𑀣 𑀑𑀧𑀧𑀸𑀢𑀺𑀓𑀸 𑀫𑀦𑀼𑀲𑁆𑀲𑀸 𑀑𑀧𑀸𑀢𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀢𑀸 𑀘𑁂 𑀲𑀺𑀬𑀼𑀁, 𑀲𑀩𑁆𑀩𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑀲𑀩𑁆𑀩𑀯𑀸𑀭𑁂𑀲𑀼 𑀑𑀧𑀸𑀢𑀔𑀡𑀓𑀲𑁆𑀲𑁂𑀯 𑀧𑀭𑀸𑀚𑀬𑁄𑀢𑀺 𑀬𑁄𑀚𑀦𑀸. 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀳𑀻𑀢𑀺 𑀏𑀢𑁆𑀣 𑀳𑀻𑀢𑀺 𑀧𑀤𑀧𑀽𑀭𑀡𑁂. 𑀬𑀢𑁆𑀣 𑀬𑀢𑁆𑀣 𑀦𑀺𑀧𑀸𑀢𑀲𑀤𑁆𑀤𑀸𑀦𑀁 𑀅𑀢𑁆𑀣𑁄 𑀦 𑀤𑀲𑁆𑀲𑀺𑀢𑁄, 𑀢𑀢𑁆𑀣 𑀢𑀢𑁆𑀣 𑀧𑀤𑀧𑀽𑀭𑀡𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁯𑁧. 𑀬𑀓𑁆𑀔𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀭𑀘𑁆𑀙𑀸𑀦𑀸𑀦𑀁 𑀲𑀗𑁆𑀕𑀳𑁄. 𑀯𑀢𑁆𑀣𑀼𑀯𑀲𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀁 𑀯𑀢𑁆𑀣𑀼𑀪𑀽𑀢𑀬𑀓𑁆𑀔𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀲𑀸. 𑀣𑀼𑀮𑁆𑀮𑀘𑁆𑀘𑀬𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀲𑀗𑁆𑀕𑀳𑁄.

𑁨𑁯𑁩. 𑀅𑀬𑀁 ¶ 𑀦𑀬𑁄𑀢𑀺 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀬𑀣𑀸𑀯𑀼𑀢𑁆𑀢𑁄 𑀦𑀬𑁄.

𑁨𑁯𑁪-𑁫. 𑀩𑀚𑁆𑀛𑀦𑁆𑀢𑀻𑀢𑀺 𑀲𑀘𑁂 𑀅𑀯𑀲𑁆𑀲𑀁 𑀩𑀚𑁆𑀛𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀸𑀲𑁂. ‘‘𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀧𑀬𑁄𑀕𑀲𑁆𑀲 𑀅𑀢𑁆𑀣𑀲𑀸𑀥𑀓𑀢𑀁 𑀤𑀻𑀧𑁂𑀢𑀺.

𑁨𑁯𑁬. 𑀬𑀁 ¶ 𑀧𑀦 𑀉𑀤𑁆𑀤𑀺𑀲𑁆𑀲 𑀧𑀸𑀲𑁄 𑀑𑀟𑁆𑀟𑀺𑀢𑁄, 𑀢𑀢𑁄 𑀅𑀜𑁆𑀜𑀲𑁆𑀲 𑀩𑀦𑁆𑀥𑀦𑁂 𑀢𑀼 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁯𑁭. 𑀫𑀼𑀥𑀸 𑀯𑀸𑀧𑀻𑀢𑀺 𑀅𑀫𑀽𑀮𑁂𑀦 𑀯𑀸𑀧𑀺. 𑀫𑀽𑀮𑀝𑁆𑀞𑀲𑁆𑀲𑁂𑀯𑀸𑀢𑀺 𑀧𑀸𑀲𑀓𑀸𑀭𑀓𑀲𑁆𑀲𑁂𑀯. 𑀓𑀫𑁆𑀫𑀩𑀦𑁆𑀥𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀩𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀩𑀦𑁆𑀥𑁄, 𑀓𑀫𑁆𑀫𑀫𑁂𑀯 𑀩𑀦𑁆𑀥𑁄 𑀓𑀫𑁆𑀫𑀩𑀦𑁆𑀥𑁄. 𑀧𑀸𑀭𑀸𑀚𑀺𑀓𑀫𑀢𑁆𑀢𑁂 𑀯𑀢𑁆𑀢𑀩𑁆𑀩𑁂𑀧𑀺 𑀬𑀸𑀯 𑀲𑁄 𑀯𑀢𑁆𑀢𑀢𑀺, 𑀢𑀸𑀯 𑀢𑀢𑁆𑀣 𑀩𑀚𑁆𑀛𑀺𑀢𑁆𑀯𑀸 𑀫𑀢𑀲𑀢𑁆𑀢𑁂𑀲𑀼 𑀧𑀞𑀫𑀫𑀢𑀲𑁆𑀲 𑀯𑀲𑁂𑀦 𑀧𑀸𑀭𑀸𑀚𑀺𑀓𑀁, 𑀅𑀯𑀲𑁂𑀲𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀅𑀓𑀼𑀲𑀮𑀭𑀸𑀲𑀺𑀦𑁄 𑀲𑀫𑁆𑀪𑀯𑀢𑁄 𑀢𑀁 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀤𑁆𑀯𑀬𑀫𑁆𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀫𑁆𑀫𑀩𑀦𑁆𑀥𑁄’’𑀢𑀺.

𑁨𑁯𑁮. ‘‘𑀲𑀘𑁂 𑀬𑁂𑀦 𑀮𑀤𑁆𑀥𑁄, 𑀲𑁄 𑀉𑀕𑁆𑀕𑀴𑀺𑀢𑀁 𑀯𑀸 𑀧𑀸𑀲𑀁 𑀲𑀡𑁆𑀞𑀧𑁂𑀢𑀺, 𑀢𑀲𑁆𑀲 𑀧𑀲𑁆𑀲𑁂𑀦 𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀯𑀢𑀺𑀁 𑀓𑀢𑁆𑀯𑀸 𑀲𑀫𑁆𑀫𑀼𑀔𑁂 𑀧𑀯𑁂𑀲𑁂𑀢𑀺, 𑀣𑀤𑁆𑀥𑀢𑀭𑀁 𑀯𑀸 𑀧𑀸𑀲𑀬𑀝𑁆𑀞𑀺𑀁 𑀞𑀧𑁂𑀢𑀺, 𑀤𑀴𑁆𑀳𑀢𑀭𑀁 𑀯𑀸 𑀧𑀸𑀲𑀭𑀚𑁆𑀚𑀼𑀁 𑀩𑀦𑁆𑀥𑀢𑀺, 𑀣𑀺𑀭𑀢𑀭𑀁 𑀯𑀸 𑀔𑀸𑀡𑀼𑀓𑀁 𑀆𑀓𑁄𑀝𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁬) 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀳𑀺𑀢𑀼𑀫𑀸𑀳 ‘‘𑀧𑀸𑀲𑀫𑀼𑀕𑁆𑀕𑀴𑀺𑀢𑀫𑁆𑀧𑀺 𑀯𑀸’’𑀢𑀺. 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀧𑀺-𑀲𑀤𑁆𑀤𑁂𑀦 ‘‘𑀲𑀡𑁆𑀞𑀧𑁂𑀢𑀻’’𑀢𑀺𑀆𑀤𑀺𑀓𑀸 ‘‘𑀩𑀦𑁆𑀥𑀢𑀻’’𑀢𑀺 𑀤𑀲𑁆𑀲𑀺𑀢𑀓𑀺𑀭𑀺𑀬𑀸𑀯𑀲𑀸𑀦𑀸 𑀧𑀬𑁄𑀕𑀸 𑀤𑀲𑁆𑀲𑀺𑀢𑀸. 𑀣𑀺𑀭𑀁 𑀯𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀅𑀝𑁆𑀞𑀓𑀣𑀸𑀬 𑀅𑀯𑀲𑀺𑀝𑁆𑀞𑀁 ‘‘𑀔𑀸𑀡𑀼𑀓𑀁 𑀆𑀓𑁄𑀝𑁂𑀢𑀻’’𑀢𑀺 𑀓𑀺𑀭𑀺𑀬𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 𑀉𑀪𑀬𑀢𑁆𑀣𑀧𑀺 𑀧𑀓𑀸𑀭𑀦𑁆𑀢𑀭𑀯𑀺𑀓𑀧𑁆𑀧𑀢𑁆𑀣𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀦𑁆𑀢𑀺 ¶ 𑀏𑀯𑀁 𑀲𑀢𑀺. 𑀬𑁂𑀦 𑀧𑀸𑀲𑁄 𑀮𑀤𑁆𑀥𑁄, 𑀢𑁂𑀦𑀸𑀧𑀺 𑀏𑀯𑀁 𑀧𑀸𑀲𑁂 𑀓𑀢𑀯𑀺𑀲𑁂𑀲𑁂 𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀧𑀸𑀲𑀓𑀸𑀭𑀓𑀲𑁆𑀲 𑀘 𑀇𑀤𑀸𑀦𑀺 𑀮𑀪𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀘𑀸𑀢𑀺 𑀉𑀪𑀬𑁂𑀲𑀁.

𑁨𑁯𑁯-𑁩𑁦𑁦. 𑀬𑁄𑀢𑀺 𑀧𑀸𑀲𑀓𑀸𑀭𑀓𑁄, 𑀮𑀤𑁆𑀥𑀧𑀸𑀲𑀓𑁄𑀢𑀺 𑀇𑀫𑁂𑀲𑀁 𑀬𑁄 𑀓𑁄𑀘𑀺. 𑀉𑀕𑁆𑀕𑀴𑀸𑀧𑁂𑀢𑁆𑀯𑀸𑀢𑀺 𑀯𑀺𑀖𑀸𑀝𑁂𑀢𑁆𑀯𑀸, 𑀬𑀣𑀸 𑀢𑀢𑁆𑀣 𑀧𑀸𑀡𑀺𑀦𑁄 𑀦 𑀩𑀚𑁆𑀛𑀦𑁆𑀢𑀺, 𑀏𑀯𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘𑀸𑀢𑀺 𑀧𑀼𑀦 𑀲𑀡𑁆𑀞𑀧𑀺𑀢𑁂 𑀧𑀸𑀲𑁂 𑀘. 𑀓𑁄 𑀯𑀺𑀫𑀼𑀘𑁆𑀘𑀢𑀺? 𑀬𑁂𑀦 𑀮𑀤𑁆𑀥𑁄, 𑀲𑁄.

𑁩𑁦𑁧-𑁨. 𑀕𑁄𑀧𑁂𑀢𑁆𑀯𑀸𑀢𑀺 𑀕𑁄𑀧𑀦𑀳𑁂𑀢𑀼 𑀫𑁄𑀓𑁆𑀔𑁄 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀫𑁆𑀳𑀺 𑀢𑁆𑀯𑀸-𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. 𑀢𑀫𑀜𑁆𑀜𑁄…𑀧𑁂… 𑀦 𑀘 𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀦 𑀘𑀸𑀢𑀺 𑀦𑁂𑀯. 𑀦𑀸𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀯𑀸𑀢𑀺 𑀲𑁄 𑀬𑀣𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀯𑀺𑀦𑀸𑀲𑁄𑀧𑀓𑀭𑀡𑀁 𑀦 𑀳𑁄𑀢𑀺, 𑀢𑀣𑀸 𑀙𑀺𑀦𑁆𑀤𑀦𑀸𑀤𑀻𑀳𑀺 𑀦𑀸𑀲𑁂𑀢𑁆𑀯𑀸. 𑀢𑀁 𑀧𑀸𑀲𑀬𑀝𑁆𑀞𑀺𑀁. 𑀓𑁄 𑀯𑀺𑀫𑀼𑀘𑁆𑀘𑀢𑀺? 𑀧𑀸𑀲𑀓𑀸𑀭𑀓𑁄.

𑁩𑁦𑁩. 𑀲𑀽𑀮𑀁 ¶ 𑀭𑁄𑀧𑁂𑀦𑁆𑀢𑀲𑁆𑀲𑀸𑀢𑀺 𑀲𑀽𑀮𑀁 𑀦𑀺𑀔𑀡𑀦𑁆𑀢𑀲𑁆𑀲. 𑀲𑀚𑁆𑀚𑁂𑀦𑁆𑀢𑀲𑁆𑀲𑀸𑀢𑀺 𑀲𑀡𑁆𑀞𑀧𑁂𑀦𑁆𑀢𑀲𑁆𑀲.

𑁩𑁦𑁪. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀏𑀢𑁆𑀣 ‘‘𑀓𑀢𑁂𑀦 𑀧𑀬𑁄𑀕𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄, ‘‘𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑁂𑀳𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀫𑀺𑀦𑀸𑀳𑀁 𑀉𑀧𑀓𑁆𑀓𑀫𑁂𑀦 𑀇𑀫𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸 𑀅𑀧𑀓𑀧𑁆𑀧𑁂𑀢𑁆𑀯𑀸 𑀅𑀯𑀥𑀓𑀘𑁂𑀢𑀦𑁄 𑀳𑀼𑀢𑁆𑀯𑀸 𑀓𑀢𑁂𑀦 𑀅𑀜𑁆𑀜𑀢𑁆𑀣𑀺𑀓𑁂𑀦𑀧𑀺 𑀉𑀧𑀓𑁆𑀓𑀫𑁂𑀦 𑀧𑀭𑁂 𑀫𑀢𑁂𑀧𑀺 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀫𑀼𑀲𑀮𑀼𑀲𑁆𑀲𑀸𑀧𑀦𑀸𑀤𑀺𑀯𑀢𑁆𑀣𑀽𑀲𑀼 (𑀧𑀸𑀭𑀸. 𑁧𑁮𑁦) 𑀯𑀺𑀬 𑀅𑀬𑀁 𑀲𑀢𑁆𑀢𑁄𑀢𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀇𑀫𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀻𑀢𑀺𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀯𑀺𑀓𑀧𑁆𑀧𑀭𑀳𑀺𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀣𑀺𑀓𑁂𑀦 𑀧𑀬𑁄𑀕𑁂𑀦 𑀫𑀦𑀼𑀲𑁆𑀲𑁂 𑀫𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 ¶ ‘‘𑀇𑀫𑀺𑀦𑀸 𑀅𑀬𑀁 𑀫𑀭𑀺𑀲𑁆𑀲𑀢𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁧𑁮𑁧) 𑀯𑀺𑀬 ‘‘𑀇𑀤𑀁 𑀓𑀸𑀭𑀡’’𑀦𑁆𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑀢𑁂𑀦 𑀫𑀦𑀼𑀲𑁆𑀲𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀓𑀟𑁆𑀠𑀢𑀺. 𑀅𑀫𑀭𑀡𑀘𑀺𑀢𑁆𑀢𑀲𑁆𑀲 𑀅𑀫𑀭𑀡𑀺𑀘𑁆𑀙𑀸𑀲𑀳𑀺𑀢𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺 𑀯𑀼𑀤𑁆𑀥𑀧𑀩𑁆𑀩𑀚𑀺𑀢𑀸𑀤𑀺𑀯𑀢𑁆𑀣𑀽𑀲𑀼 (𑀧𑀸𑀭𑀸. 𑁧𑁮𑁦) 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀯𑀼𑀢𑁆𑀢𑀲𑀭𑀽𑀧𑀸𑀬𑁂𑀯.

𑁩𑁦𑁫. ‘‘𑀫𑀦𑀼𑀲𑁆𑀲𑀧𑀸𑀡𑀺𑀫𑁆𑀳𑀻’’𑀢𑀺 𑀇𑀫𑀺𑀦𑀸 𑀫𑀦𑀼𑀲𑁆𑀲𑀪𑀸𑀯𑁄 𑀅𑀗𑁆𑀕𑀪𑀸𑀯𑁂𑀦 𑀤𑀲𑁆𑀲𑀺𑀢𑁄. ‘‘𑀲𑀘𑀲𑁆𑀲 𑀘𑀺𑀢𑁆𑀢𑀁 𑀫𑀭𑀡𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀫𑀭𑀡𑀽𑀧𑀲𑀁𑀳𑀺𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀢𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁩𑁦𑁬-𑁭. 𑀏𑀯𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀲𑀦𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀲𑀦𑁆𑀢’’𑀦𑁆𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀢𑁆𑀢𑀦𑀻’’𑀢𑀺 𑀘 ‘‘𑀛𑀸𑀦𑀸𑀤𑀺𑀪𑁂𑀤’’𑀦𑁆𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫’’𑀦𑁆𑀢𑀺 𑀘 ‘‘𑀲𑀫𑀼𑀤𑀸𑀘𑀭𑁂𑀬𑁆𑀬𑀸’’𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀬𑁄 𑀪𑀺𑀓𑁆𑀔𑀽’’𑀢𑀺 𑀘 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀻𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀅𑀢𑁆𑀢𑀦𑀺 𑀅𑀲𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀅𑀢𑁆𑀢𑀦𑀺 ¶ 𑀅𑀲𑀦𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀸𑀤𑀺𑀢𑀢𑀸𑀬 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀢𑁆𑀢𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀁 𑀯𑀺𑀬 𑀓𑀢𑁆𑀯𑀸 𑀢𑀁 𑀉𑀧𑀦𑁂𑀢𑁆𑀯𑀸 ¶ . 𑀪𑀯𑀁 𑀅𑀥𑀺𑀝𑁆𑀞𑀸𑀬 𑀘 𑀯𑀢𑁆𑀢𑀫𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀘 𑀯𑀢𑁆𑀢𑀦𑁆𑀢𑀁 𑀪𑀯𑀁 𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀓𑁆𑀓𑁂𑀢𑁆𑀯𑀸, 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀸𑀧𑀤𑁂𑀲𑀜𑁆𑀘 𑀯𑀺𑀦𑀸𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻𑀥 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀓𑁆𑀔𑀫𑀸𑀦𑀁 𑀧𑀭𑀺𑀬𑀸𑀬𑀓𑀣𑀁 𑀞𑀧𑁂𑀢𑁆𑀯𑀸. 𑀅𑀥𑀺𑀫𑀸𑀦𑀜𑁆𑀘 𑀯𑀺𑀦𑀸𑀢𑀺 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀢𑀸𑀤𑀺𑀲𑀪𑀸𑀯𑀁 𑀅𑀥𑀺𑀕𑀢𑀫𑀸𑀦𑀲𑀗𑁆𑀔𑀸𑀢𑀁 ‘‘𑀅𑀥𑀺𑀕𑀢𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀳𑀫𑁆𑀳𑀻’’𑀢𑀺 𑀅𑀥𑀺𑀫𑀸𑀦𑀜𑁆𑀘 𑀞𑀧𑁂𑀢𑁆𑀯𑀸. 𑀛𑀸𑀦𑀸𑀤𑀺𑀪𑁂𑀤𑀦𑁆𑀢𑀺 𑀛𑀸𑀦𑀸𑀤𑀬𑁄 𑀪𑁂𑀤𑀸 𑀯𑀺𑀲𑁂𑀲𑀸 𑀬𑀲𑁆𑀲 𑀢𑀁 𑀛𑀸𑀦𑀸𑀤𑀺𑀪𑁂𑀤𑀁, ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺 𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 (𑀧𑀸𑀭𑀸. 𑁧𑁯𑁮, 𑁧𑁯𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 𑀛𑀸𑀦𑀸𑀤𑀺𑀥𑀫𑁆𑀫𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁭) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁 𑀛𑀸𑀦𑀮𑀸𑀪𑀻𑀳𑀺 𑀘𑁂𑀯 𑀅𑀝𑁆𑀞𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑁂𑀳𑀺 𑀘 𑀅𑀥𑀺𑀕𑀢𑀢𑁆𑀢𑀸 𑀢𑁂𑀲𑀁 𑀲𑀦𑁆𑀢𑀓𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁.

𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀬𑁄 𑀪𑀺𑀓𑁆𑀔𑀼 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀲𑁆𑀲𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀧𑀤𑁂𑀲𑁂 𑀞𑀺𑀢𑀲𑁆𑀲 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸’’𑀢𑀺 (𑀧𑀸𑀭𑀸. 𑁧𑁯𑁮) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺. 𑀓𑀸𑀬𑁂𑀦 𑀯𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀯𑀲𑁂𑀦 𑀓𑀸𑀬𑁂𑀦 𑀯𑀸. ‘‘𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀑𑀢𑀭𑀢𑀺, 𑀇𑀤𑀁 𑀅𑀪𑀽𑀢𑀸𑀭𑁄𑀘𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀑𑀢𑀭𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁧𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀳𑀢𑁆𑀣𑀯𑀺𑀓𑀸𑀭𑁄 𑀘 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁄𑀧𑀦𑀜𑁆𑀘 ‘‘𑀓𑀸𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀕𑀳𑁂𑀢𑀩𑁆𑀩𑀁. 𑀯𑀸𑀘𑀸𑀬 𑀯𑀸𑀢𑀺 𑀬𑁄 𑀲𑀯𑀦𑀽𑀧𑀘𑀸𑀭𑁂 𑀞𑀺𑀢𑁄 𑀢𑁂𑀦 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁂𑀦 𑀬𑁂𑀦 𑀓𑁂𑀦𑀘𑀺 𑀯𑁄𑀳𑀸𑀭𑁂𑀦 𑀯𑀸. 𑀬𑁄 𑀪𑀺𑀓𑁆𑀔𑀽𑀢𑀺 𑀬𑁄 𑀉𑀧𑀲𑀫𑁆𑀧𑀦𑁆𑀦𑁄 𑀣𑁂𑀭𑁄 𑀯𑀸 𑀦𑀯𑁄 ¶ 𑀯𑀸 𑀫𑀚𑁆𑀛𑀺𑀫𑁄 𑀯𑀸. 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀯𑀘𑀦𑀧𑁆𑀧𑀓𑀸𑀭𑁂𑀲𑀼 𑀬𑀁 𑀓𑀜𑁆𑀘𑀺 𑀧𑀓𑀸𑀭𑀁 𑀯𑀤𑁂𑀬𑁆𑀬. 𑀢𑀤𑀢𑁆𑀣𑁂𑀢𑀺 𑀢𑁂𑀦 𑀯𑀼𑀢𑁆𑀢𑀯𑀸𑀓𑁆𑀬𑀲𑁆𑀲 𑀅𑀢𑁆𑀣𑁂. 𑀜𑀸𑀢𑁂𑀯𑀸𑀢𑀺 𑀜𑀸𑀢𑁂 𑀏𑀯. 𑀫𑀸𑀢𑀼𑀕𑀸𑀫𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀉𑀤𑁆𑀤𑀺𑀲𑁆𑀲 𑀯𑀼𑀢𑁆𑀢𑁂, 𑀢𑁂𑀦𑁂𑀯 𑀯𑀸 𑀅𑀦𑀼𑀤𑁆𑀤𑀺𑀲𑁆𑀲 𑀯𑀼𑀢𑁆𑀢𑁂 𑀲𑀯𑀦𑀽𑀧𑀘𑀸𑀭𑁂 𑀞𑀺𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 ‘‘𑀅𑀬𑀁 𑀧𑀞𑀫𑀚𑁆𑀛𑀸𑀦𑀮𑀸𑀪𑀻’’𑀢𑀺𑀆𑀤𑀺𑀓𑁂 𑀬𑀣𑀸𑀯𑀼𑀢𑁆𑀢𑁂 𑀅𑀢𑁆𑀣𑀧𑁆𑀧𑀓𑀸𑀭𑁂 𑀜𑀸𑀢𑁂𑀬𑁂𑀯. ‘‘𑀲𑁄’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀲𑁄 𑀧𑀼𑀦 𑀭𑀼𑀴𑁆𑀳𑀺𑀪𑀸𑀯𑁂 𑀅𑀪𑀩𑁆𑀩𑁄’’𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀁 𑀲𑀦𑁆𑀢𑀁 𑀯𑀺𑀬 𑀓𑀢𑁆𑀯𑀸 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀏𑀯𑀁 𑀓𑀣𑀺𑀢𑀧𑀼𑀕𑁆𑀕𑀮𑁄 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀉𑀧𑀭𑀽𑀧𑀭𑀺 𑀮𑀩𑁆𑀪𑀫𑀸𑀦𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀩𑀼𑀤𑁆𑀥𑀺𑀲𑀗𑁆𑀔𑀸𑀢𑀁 𑀲𑀸𑀲𑀦𑁂 𑀩𑀼𑀤𑁆𑀥𑀺𑀫𑀥𑀺𑀕𑀦𑁆𑀢𑀼𑀁 𑀅𑀦𑀭𑀳𑁄𑀢𑀺 𑀅𑀢𑁆𑀣𑁄 ¶ . 𑀓𑀺𑀁 𑀯𑀺𑀬𑀸𑀢𑀺 𑀆𑀳 ‘‘𑀬𑀣𑁂𑀯…𑀧𑁂… 𑀭𑀼𑀴𑀺𑀪𑀸𑀯𑁂’’𑀢𑀺. ‘‘𑀬𑀣𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄 ‘‘𑀢𑀣𑀸’’𑀢𑀺, 𑀬𑀣𑀸 𑀢𑀸𑀮𑁄 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀧𑀼𑀦 𑀯𑀺𑀭𑀼𑀴𑁆𑀳𑀺𑀬𑀸, 𑀲𑁄𑀧𑀺 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄 𑀢𑀣𑁂𑀯 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁩𑁦𑁮-𑁯. 𑀇𑀤𑀸𑀦𑀺 ‘‘𑀜𑀸𑀢𑁂𑀯 𑀅𑀪𑀩𑁆𑀩𑁄’’𑀢𑀺 𑀘 ‘‘𑀅𑀜𑁆𑀜𑀸𑀧𑀤𑁂𑀲𑀜𑁆𑀘 𑀯𑀺𑀦𑀸’’𑀢𑀺 𑀘 𑀏𑀢𑀲𑁆𑀫𑀺𑀁 𑀯𑀸𑀓𑁆𑀬𑀤𑁆𑀯𑀬𑁂 𑀩𑁆𑀬𑀢𑀺𑀭𑁂𑀓𑀢𑁆𑀣𑀯𑀲𑁂𑀦 𑀲𑀫𑁆𑀪𑀯𑀦𑁆𑀢𑀁 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀲𑀦𑁆𑀢𑀫𑁂𑀯𑀸’’𑀢𑀺𑀆𑀤𑀺.

𑀅𑀦𑀦𑁆𑀢𑀭𑀦𑁆𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯. 𑀲𑁄𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀢𑁆𑀯𑀸 𑀬𑁂𑀦 𑀢𑀁 𑀯𑀘𑀦𑀁 𑀲𑀼𑀢𑀁, 𑀲𑁄 𑀧𑀭𑁄 𑀧𑀼𑀕𑁆𑀕𑀮𑁄. 𑀚𑀸𑀦𑀸𑀢𑀺 𑀘𑁂𑀢𑀺 ‘‘𑀅𑀬𑀁 𑀧𑀞𑀫𑀚𑁆𑀛𑀸𑀦𑀮𑀸𑀪𑀻’’𑀢𑀺𑀆𑀤𑀺𑀯𑀲𑁂𑀦 𑀢𑁂𑀦 𑀯𑀼𑀢𑁆𑀢𑀯𑀘𑀦𑀧𑁆𑀧𑀓𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀅𑀘𑀺𑀭𑁂𑀦𑁂𑀯 𑀲𑀘𑁂 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀛𑀸𑀦𑀸𑀤𑀻𑀦𑀁 𑀅𑀢𑁆𑀢𑀦𑀸 𑀅𑀮𑀤𑁆𑀥𑀪𑀸𑀯𑁂𑀦 𑀯𑀸 𑀆𑀕𑀫𑁂 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀅𑀧𑀭𑀺𑀘𑀺𑀢𑀢𑁆𑀢𑀸 𑀯𑀸 𑀛𑀸𑀦𑀸𑀤𑀺𑀲𑀭𑀽𑀧𑀁 𑀅𑀚𑀸𑀦𑀦𑁆𑀢𑁄𑀧𑀺 ¶ 𑀓𑁂𑀯𑀮𑀁 ‘‘𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀸𑀦𑀁 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 𑀢𑁂𑀦 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀯𑀘𑀦𑁂 𑀯𑀼𑀢𑁆𑀢𑁂 ‘‘𑀛𑀸𑀦𑀁 𑀓𑀺𑀭 𑀏𑀲 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀬𑀤𑀺 𑀏𑀢𑁆𑀢𑀓𑀫𑀢𑁆𑀣𑀫𑁆𑀧𑀺 𑀚𑀸𑀦𑀸𑀢𑀺, 𑀲𑁄𑀧𑀺 ‘‘𑀚𑀸𑀦𑀸𑀢𑀺’’𑀘𑁆𑀘𑁂𑀯 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁧𑁫) 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀘𑀼𑀢𑁄 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀅𑀢𑁆𑀢𑀦𑀸 𑀯𑀼𑀢𑁆𑀢𑁂 𑀢𑁂𑀦 𑀢𑀢𑁆𑀢𑀓𑁂𑀬𑁂𑀯 𑀜𑀸𑀢𑁂 𑀲𑁄 𑀅𑀲𑀦𑁆𑀢𑀕𑀼𑀡𑀤𑀻𑀧𑀓𑁄 𑀧𑀸𑀧𑀧𑀼𑀕𑁆𑀕𑀮𑁄 𑀨𑀮𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀇𑀫𑀁 𑀲𑀸𑀲𑀦𑀸𑀫𑀢𑀫𑀳𑀸𑀧𑀸𑀤𑀧𑀁 𑀆𑀭𑀼𑀬𑁆𑀳𑀸𑀧𑀺 𑀨𑀮𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀭𑀸𑀥𑁂𑀢𑁆𑀯𑀸 𑀧𑀢𑀺𑀢𑁆𑀯𑀸 𑀫𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀲𑁆𑀲𑁂𑀯𑀢𑁆𑀣𑀲𑁆𑀲 ‘‘𑀅𑀲𑀦𑁆𑀢’’𑀫𑀺𑀘𑁆𑀘𑀸𑀤𑀺𑀦𑀸 𑀧𑀞𑀫𑀁 𑀯𑀼𑀢𑁆𑀢𑀲𑁆𑀲𑀧𑀺 𑀩𑁆𑀬𑀢𑀺𑀭𑁂𑀓𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀦𑀼𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀢𑀁 𑀩𑁆𑀬𑀢𑀺𑀭𑁂𑀓𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑁄 𑀘𑁂…𑀧𑁂… 𑀳𑁄𑀢𑀻’’𑀢𑀺. 𑀬𑀲𑁆𑀲 𑀲𑁄 𑀆𑀭𑁄𑀘𑁂𑀢𑀺, 𑀲𑁄 𑀘𑁂 𑀦 𑀚𑀸𑀦𑀸𑀢𑀺, 𑀅𑀲𑁆𑀲 𑀅𑀲𑀦𑁆𑀢𑀕𑀼𑀡𑀤𑀻𑀧𑀓𑀲𑁆𑀲 𑀫𑀼𑀲𑀸𑀯𑀸𑀤𑀺𑀦𑁄.

‘‘𑀅𑀜𑁆𑀜𑀸𑀧𑀤𑁂𑀲𑀜𑁆𑀘 𑀯𑀺𑀦𑀸’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀩𑁆𑀬𑀢𑀺𑀭𑁂𑀓𑀢𑁆𑀣𑀲𑁆𑀲 𑀪𑀸𑀯𑀸𑀪𑀸𑀯𑁂 𑀲𑀫𑁆𑀪𑀯𑀦𑁆𑀢𑀁 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑁄 𑀢𑁂’’𑀢𑀺𑀆𑀤𑀺. 𑀬𑁄 𑀪𑀺𑀓𑁆𑀔𑀼 𑀢𑁂 𑀢𑀯 𑀇𑀥 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀢𑀻𑀢𑀺 𑀬𑁄𑀚𑀦𑀸. 𑀤𑀻𑀧𑀺𑀢𑁂𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀧𑀓𑀸𑀲𑀺𑀢𑁂. 𑀚𑀸𑀦𑀸𑀢𑀺 𑀘𑁂𑀢𑀺 𑀬𑁄 𑀢𑀣𑀸 𑀯𑀼𑀢𑁆𑀢𑀯𑀘𑀦𑀁 𑀅𑀲𑁆𑀲𑁄𑀲𑀺, 𑀲𑁄 ‘‘𑀏𑀲 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀛𑀸𑀦𑀮𑀸𑀪𑀺𑀢𑀁 𑀤𑀻𑀧𑁂𑀢𑀻’’𑀢𑀺 𑀯𑀸 ‘‘𑀏𑀲𑁄 𑀛𑀸𑀦𑀮𑀸𑀪𑀻’’𑀢𑀺 ¶ 𑀯𑀸 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀲𑀘𑁂 𑀚𑀸𑀦𑀸𑀢𑀺. 𑀅𑀲𑁆𑀲𑀸𑀢𑀺 𑀏𑀯𑀁 𑀓𑀣𑀺𑀢𑀯𑀘𑀦𑀯𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑀁 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁. 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺, 𑀦 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀆𑀯𑀸𑀲𑀓𑀸𑀭𑀸𑀦𑀁 𑀤𑀸𑀬𑀓𑀸𑀦𑀁 𑀅𑀜𑁆𑀜𑀲𑁆𑀲 𑀧𑀯𑀢𑁆𑀢𑀺𑀁 𑀓𑀣𑁂𑀦𑁆𑀢𑀲𑁆𑀲 𑀯𑀺𑀬 𑀅𑀢𑁆𑀢𑀦𑁄𑀬𑁂𑀯 𑀅𑀲𑀦𑁆𑀢𑀕𑀼𑀡𑀁 𑀲𑀦𑁆𑀢𑀫𑀺𑀯 ¶ 𑀓𑀢𑁆𑀯𑀸 𑀓𑀣𑀦𑀸𑀓𑀸𑀭𑁄 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀣𑀢𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣 𑀘 𑀛𑀸𑀦𑀮𑀸𑀪𑀻𑀢𑀺 𑀘𑀸𑀢𑀺 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀲𑀤𑁆𑀤𑁂𑀦 𑀧𑀸𑀴𑀺𑀬𑀁 (𑀧𑀸𑀭𑀸. 𑁨𑁨𑁦) 𑀆𑀕𑀢𑀸 𑀅𑀯𑀲𑁂𑀲𑀧𑀭𑀺𑀬𑀸𑀬𑀯𑀸𑀭𑀸 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀛𑀸𑀦𑀮𑀸𑀪𑀻𑀢𑀺 𑀏𑀢𑁆𑀣 𑀛𑀸𑀦𑀕𑁆𑀕𑀳𑀡𑁂𑀦 𑀯𑀺𑀫𑁄𑀓𑁆𑀔𑀸𑀤𑀻𑀦𑀜𑁆𑀘 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀛𑀸𑀦𑀸𑀤𑀺𑀤𑀲𑀯𑀺𑀥𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀲𑀬𑀧𑀭𑀺𑀬𑀸𑀬𑀓𑀣𑀁 𑀲𑀼𑀢𑀯𑀢𑀸 𑀢𑀗𑁆𑀔𑀡𑁂 𑀢𑀤𑀢𑁆𑀣𑁂 𑀜𑀸𑀢𑁂 𑀧𑀭𑀺𑀬𑀸𑀬𑀲𑀫𑀼𑀮𑁆𑀮𑀸𑀧𑀓𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀁 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀅𑀯𑀺𑀜𑁆𑀜𑀸𑀢𑁂 𑀯𑀸 𑀘𑀺𑀭𑁂𑀦 𑀯𑀺𑀜𑁆𑀜𑀸𑀢𑁂 𑀯𑀸 𑀆𑀧𑀚𑁆𑀚𑀺𑀢𑀩𑁆𑀩𑀁 𑀤𑀼𑀓𑁆𑀓𑀝𑀜𑁆𑀘 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁧𑁦. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀛𑀸𑀦𑀸𑀤𑀺𑀪𑁂𑀤𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀅𑀥𑀺𑀫𑀸𑀦𑀸𑀢𑀺 ‘‘𑀅𑀥𑀺𑀕𑀢𑁄𑀳’’𑀦𑁆𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑀸, 𑀅𑀥𑀺𑀓𑀫𑀸𑀦𑀸𑀢𑀺 𑀅𑀢𑁆𑀣𑁄, ‘‘𑀅𑀬𑀁 𑀥𑀫𑁆𑀫𑁄 𑀫𑀬𑀸 𑀅𑀥𑀺𑀕𑀢𑁄’’𑀢𑀺 𑀤𑀴𑁆𑀳𑀫𑀼𑀧𑁆𑀧𑀦𑁆𑀦𑁂𑀦 𑀫𑀸𑀦𑁂𑀦 𑀓𑀣𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑁄 𑀅𑀦𑀸𑀧𑀢𑁆𑀢𑀺𑀦𑀬𑁄𑀢𑀺 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑁄 𑀅𑀦𑀸𑀧𑀢𑁆𑀢𑀺, 𑀲𑀸 𑀏𑀯 𑀦𑀬𑁄 𑀦𑁂𑀢𑀩𑁆𑀩𑁄 𑀩𑀼𑀚𑁆𑀛𑀺𑀢𑀩𑁆𑀩𑁄𑀢𑀺 𑀓𑀢𑁆𑀯𑀸, 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀥𑀺𑀫𑀸𑀦𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄, ‘‘𑀅𑀥𑀺𑀕𑀢𑀥𑀫𑁆𑀫𑁄𑀳’’𑀦𑁆𑀢𑀺 𑀅𑀥𑀺𑀫𑀸𑀦𑁂𑀦 ‘‘𑀅𑀳𑀁 𑀧𑀞𑀫𑀚𑁆𑀛𑀸𑀦𑀮𑀸𑀪𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀬𑀫𑀥𑀺𑀫𑀸𑀦𑁄 𑀓𑀲𑁆𑀲 𑀳𑁄𑀢𑀺, 𑀓𑀲𑁆𑀲 𑀦 𑀳𑁄𑀢𑀻𑀢𑀺 𑀘𑁂? 𑀅𑀭𑀺𑀬𑀸𑀦𑀁 𑀦 𑀳𑁄𑀢𑀺 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑀸𑀦𑀁 𑀯𑀺𑀢𑀺𑀡𑁆𑀡𑀓𑀗𑁆𑀔𑀢𑁆𑀢𑀸. 𑀤𑀼𑀲𑁆𑀲𑀻𑀮𑀲𑁆𑀲𑀸𑀧𑀺 𑀦 𑀳𑁄𑀢𑀺 𑀢𑀲𑁆𑀲 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀼𑀲𑁆𑀲𑀸𑀳𑀢𑁆𑀢𑀸. 𑀲𑀼𑀲𑀻𑀮𑀲𑁆𑀲𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀭𑀳𑀺𑀢𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦 𑀳𑁄𑀢𑀺 𑀯𑀺𑀲𑁆𑀲𑀝𑁆𑀞𑀪𑀸𑀯𑀦𑀸𑀪𑀺𑀬𑁄𑀕𑀢𑁆𑀢𑀸. 𑀲𑀼𑀧𑀭𑀺𑀲𑀼𑀤𑁆𑀥𑀸𑀬 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀸𑀬 𑀲𑀫𑀣𑀪𑀸𑀯𑀦𑀸𑀫𑀦𑀼𑀬𑀼𑀢𑁆𑀢𑀲𑁆𑀲 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀧𑀢𑁆𑀢𑀸𑀲𑀺𑀦𑁄 𑀯𑀸 𑀯𑀺𑀧𑀲𑁆𑀲𑀦𑀸𑀪𑀺𑀬𑀼𑀢𑁆𑀢𑀲𑁆𑀲 ¶ 𑀲𑁄𑀧𑀓𑁆𑀓𑀺𑀮𑁂𑀲𑁄𑀤𑀬𑀩𑁆𑀩𑀬𑀜𑀸𑀡𑀮𑀸𑀪𑀺𑀦𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀳𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀲𑁆𑀲 𑀅𑀪𑀸𑀯𑁂 𑀉𑀧𑁆𑀧𑀦𑁆𑀦𑁂 𑀢𑁂 𑀯𑀺𑀲𑁂𑀲𑀪𑀸𑀕𑀺𑀦𑁄 𑀪𑀯𑀺𑀢𑀼𑀁 𑀅𑀤𑀢𑁆𑀯𑀸 𑀞𑀺𑀢𑀺𑀪𑀸𑀕𑀺𑀦𑁄 𑀓𑀢𑁆𑀯𑀸 𑀞𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀦𑀸𑀢𑀺 𑀅𑀧𑀺-𑀲𑀤𑁆𑀤𑀢𑁆𑀣𑁄. ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀺𑀦𑀬𑁄 𑀯𑀼𑀢𑁆𑀢𑁄’’𑀢𑀺 𑀧𑀘𑁆𑀘𑀸𑀫𑀲𑀢𑀺. ‘‘𑀅𑀯𑀢𑁆𑀢𑀼𑀓𑀸𑀫𑀲𑁆𑀲𑀸’’𑀢𑀺 𑀇𑀤𑀜𑁆𑀘 𑀧𑀸𑀴𑀺𑀬𑀁 𑀆𑀕𑀢𑀁 ‘‘𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 ¶ (𑀧𑀸𑀭𑀸. 𑁨𑁨𑁨, 𑁨𑁨𑁫) 𑀇𑀤𑀜𑁆𑀘 𑀅𑀦𑀢𑁆𑀣𑀦𑁆𑀢𑀭𑀁. 𑀅𑀯𑀢𑁆𑀢𑀼𑀓𑀸𑀫𑀲𑁆𑀲𑀸𑀢𑀺 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀓𑁄𑀳𑀜𑁆𑀜𑁂𑀦 𑀧𑀸𑀧𑀺𑀘𑁆𑀙𑀸𑀧𑀓𑀢𑀲𑁆𑀲 ‘‘𑀛𑀸𑀦𑀸𑀤𑀻𑀦𑀁 𑀮𑀸𑀪𑀺𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑁄 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀦𑀸𑀫, 𑀢𑀣𑀸 𑀅𑀳𑀼𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀏𑀯𑀫𑁂𑀯 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀓𑀲𑁆𑀲𑀸𑀧𑀺 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. ‘‘𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁨𑁨) 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽 𑀆𑀤𑀺𑀓𑀫𑁆𑀫𑀺𑀓𑀸. 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀢𑀣𑀸-𑀲𑀤𑁆𑀤𑁂𑀦 𑀇𑀥 𑀅𑀯𑀼𑀢𑁆𑀢𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀸 𑀕𑀳𑀺𑀢𑀸.

𑁩𑁧𑁧. 𑀧𑀸𑀧𑀺𑀘𑁆𑀙𑀢𑀸𑀢𑀺 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀛𑀸𑀦𑀮𑀸𑀪𑀺𑀢𑀸𑀤𑀺𑀳𑁂𑀢𑀼𑀓𑀸𑀬 𑀲𑀫𑁆𑀪𑀸𑀯𑀦𑀸𑀬 𑀲𑀫𑁆𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀧𑀝𑀺𑀮𑀸𑀪𑀲𑁆𑀲 𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀸𑀬 𑀧𑀸𑀧𑀺𑀓𑀸𑀬 𑀮𑀸𑀫𑀺𑀓𑀸𑀬 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀪𑀸𑀯𑁄 𑀘. 𑀢𑀲𑁆𑀲𑀸𑀢𑀺 𑀬𑀁 𑀛𑀸𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀲𑀫𑀼𑀮𑁆𑀮𑀧𑀺, 𑀢𑀲𑁆𑀲 𑀥𑀫𑁆𑀫𑀲𑁆𑀲. 𑀅𑀲𑀦𑁆𑀢𑀪𑀸𑀯𑁄𑀢𑀺 𑀅𑀢𑁆𑀢𑀲𑀦𑁆𑀢𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀢𑀺𑀬𑀁 𑀅𑀦𑀼𑀧𑁆𑀧𑀸𑀤𑀺𑀢𑀪𑀸𑀯𑁂𑀦 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑁄. 𑀫𑀦𑀼𑀲𑁆𑀲𑀓𑀲𑁆𑀲 𑀆𑀭𑁄𑀘𑀦𑀜𑁆𑀘𑁂𑀯𑀸𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀢𑁆𑀣𑀁 𑀢𑀗𑁆𑀔𑀡𑁂 𑀚𑀸𑀦𑀦𑀓𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀯𑀦𑀽𑀧𑀘𑀸𑀭𑁂 ¶ 𑀞𑀢𑁆𑀯𑀸 𑀆𑀭𑁄𑀘𑀦𑀜𑁆𑀘. 𑀦𑀜𑁆𑀜𑀸𑀧𑀤𑁂𑀲𑁂𑀦 𑀆𑀭𑁄𑀘𑀦𑀜𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁨𑁦) 𑀦𑀬𑁂𑀦 𑀧𑀯𑀢𑁆𑀢𑀅𑀜𑁆𑀜𑀸𑀧𑀤𑁂𑀲𑀁 𑀯𑀺𑀦𑀸 𑀉𑀚𑀼𑀓𑀫𑁂𑀯 𑀆𑀭𑁄𑀘𑀦𑀜𑁆𑀘. 𑀢𑀤𑁂𑀯 𑀜𑀸𑀡𑀦𑁆𑀢𑀺 𑀢𑀤𑀸 𑀏𑀯 𑀜𑀸𑀡𑀁, 𑀅𑀘𑀺𑀭𑀸𑀬𑀺𑀢𑁆𑀯𑀸 𑀯𑀼𑀢𑁆𑀢𑀓𑁆𑀔𑀡𑁂𑀬𑁂𑀯 𑀚𑀸𑀦𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀁. 𑀥𑀻𑀭𑀸 𑀯𑀺𑀦𑀬𑀥𑀭𑀸.

𑁩𑁧𑁨. 𑀧𑀞𑀫𑁂 𑀤𑀼𑀢𑀺𑀬𑁂 𑀘𑀦𑁆𑀢𑁂𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀯𑀚𑁆𑀚𑀺𑀢𑁂 𑀬𑀣𑀸𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀢𑁆𑀢𑀬𑁂. 𑀧𑀭𑀺𑀬𑀸𑀬𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀧𑀣𑀁 𑀧𑀭𑀺𑀬𑀸𑀬𑀯𑀘𑀦𑀁 𑀦 𑀮𑀪𑀢𑀺. ‘‘𑀦 𑀧𑀦𑁂𑀢𑀭𑁂’’𑀢𑀺 𑀇𑀤𑀁 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀇𑀢𑀭𑁂 𑀧𑀦 𑀢𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀭𑀺𑀬𑀸𑀬𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁧𑁭𑁨) 𑀘 ‘‘𑀅𑀫𑁆𑀪𑁄 𑀧𑀼𑀭𑀺𑀲 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧𑁭𑁧) 𑀘 ‘‘𑀬𑁄 𑀏𑀯𑀁 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧𑁭𑁫) 𑀘 𑀧𑀭𑀺𑀬𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀡𑀢𑁆𑀢𑀺 𑀧𑀸𑀭𑀸𑀚𑀺𑀓𑀳𑁂𑀢𑀼𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑁄. 𑀦 𑀧𑀦𑁂𑀢𑀭𑁂𑀢𑀺 𑀧𑀞𑀫𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀤𑁆𑀯𑀬𑁂 𑀧𑀦 𑀧𑀸𑀭𑀸𑀚𑀺𑀓𑀳𑁂𑀢𑀼𑀪𑀽𑀢𑀸 𑀆𑀡𑀢𑁆𑀢𑀺 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁩. 𑀆𑀤𑀻𑀢𑀺 ¶ 𑀧𑀞𑀫𑀧𑀸𑀭𑀸𑀚𑀺𑀓𑀁. 𑀏𑀓𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀓𑀓𑀸𑀭𑀡𑀁. 𑀲𑀫𑀼𑀝𑁆𑀞𑀸𑀢𑀺 𑀆𑀧𑀢𑁆𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀓𑀸𑀭𑀡𑀁 𑀓𑀸𑀬𑀸𑀤𑀺. 𑀢𑀁 𑀧𑀦 𑀙𑀩𑁆𑀩𑀺𑀥𑀁 𑀓𑀸𑀬𑁄, 𑀯𑀸𑀘𑀸, 𑀓𑀸𑀬𑀯𑀸𑀘𑀸, 𑀓𑀸𑀬𑀘𑀺𑀢𑁆𑀢𑀁, 𑀯𑀸𑀘𑀸𑀘𑀺𑀢𑁆𑀢𑀁, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺. 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑀁 𑀉𑀢𑁆𑀢𑀭𑁂 (𑀉. 𑀯𑀺. 𑁩𑁨𑁫 𑀆𑀤𑀬𑁄) 𑀬𑀣𑀸𑀕𑀢𑀝𑁆𑀞𑀸𑀦𑁂𑀬𑁂𑀯 𑀘 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑀢𑁆𑀭𑀺𑀤𑀁 𑀏𑀓𑀲𑀫𑀼𑀝𑁆𑀞𑀸𑀦𑀁 𑀏𑀓𑀁 𑀓𑀸𑀬𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀤𑀼𑀯𑀗𑁆𑀕𑀁 𑀓𑀸𑀬𑀘𑀺𑀢𑁆𑀢𑀢𑁄’’𑀢𑀺. ‘‘𑀢𑀁 𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑁄. 𑀬𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀁𑀲𑀫𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑀁 ¶ 𑀓𑀸𑀭𑀡𑀁. 𑀅𑀗𑁆𑀕𑀚𑀸𑀢𑀲𑀗𑁆𑀔𑀸𑀢𑀁 𑀓𑀸𑀬𑀜𑁆𑀘 𑀲𑁂𑀯𑀦𑀘𑀺𑀢𑁆𑀢𑀜𑁆𑀘𑀸𑀢𑀺 𑀤𑁆𑀯𑀬𑀁 𑀅𑀗𑁆𑀕𑀁 𑀅𑀯𑀬𑀯𑀁 𑀏𑀢𑀲𑁆𑀲𑀸𑀢𑀺 𑀤𑀼𑀯𑀗𑁆𑀕𑀁, 𑀢𑀤𑀼𑀪𑀬𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄 𑀬𑀣𑀸 ‘‘𑀤𑀼𑀯𑀗𑁆𑀕𑀁 𑀘𑀢𑀼𑀢𑁆𑀣𑀚𑁆𑀛𑀸𑀦’’𑀦𑁆𑀢𑀺. 𑀲𑁂𑀲𑀸𑀢𑀺 𑀅𑀯𑀲𑀺𑀝𑁆𑀞𑀸𑀦𑀺 𑀢𑀻𑀡𑀺 𑀧𑀸𑀭𑀸𑀚𑀺𑀓𑀸𑀦𑀺. 𑀢𑀺𑀲𑀫𑀼𑀝𑁆𑀞𑀸𑀦𑀸𑀢𑀺 𑀓𑀸𑀬𑀘𑀺𑀢𑁆𑀢𑀁, 𑀯𑀸𑀘𑀸𑀘𑀺𑀢𑁆𑀢𑀁, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀢𑀺𑀲𑀫𑀼𑀝𑁆𑀞𑀸𑀦𑀸 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑁂𑀲𑀦𑁆𑀢𑀺 𑀓𑀢𑁆𑀯𑀸. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀫𑀼𑀝𑁆𑀞𑀸𑀦𑀸𑀦𑀁. 𑀅𑀗𑁆𑀕𑀸𑀦𑀻𑀢𑀺 𑀅𑀯𑀬𑀯𑀸𑀦𑀺. 𑀲𑀢𑁆𑀢 𑀓𑀸𑀬𑁄, 𑀘𑀺𑀢𑁆𑀢𑀁, 𑀯𑀸𑀘𑀸, 𑀘𑀺𑀢𑁆𑀢𑀁, 𑀓𑀸𑀬𑁄, 𑀯𑀸𑀘𑀸, 𑀘𑀺𑀢𑁆𑀢𑀦𑁆𑀢𑀺, 𑀢𑀁𑀲𑀪𑀸𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧𑁪. 𑀆𑀤𑀻𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀲𑀪𑀸𑀯𑀁 𑀧𑀞𑀫𑀧𑀸𑀭𑀸𑀚𑀺𑀓𑀁. 𑀲𑀼𑀔𑁄𑀧𑁂𑀓𑁆𑀔𑀸𑀬𑀼𑀢𑀁 𑀉𑀤𑀻𑀭𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀇𑀝𑁆𑀞𑀸𑀮𑀫𑁆𑀩𑀡𑀧𑀝𑀺𑀮𑀸𑀪𑀸𑀤𑀺𑀲𑁄𑀫𑀦𑀲𑁆𑀲𑀳𑁂𑀢𑀼𑀫𑁆𑀳𑀺 𑀲𑀢𑀺 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺 𑀢𑀢𑀺𑀬𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀁 𑀤𑁄𑀲𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀲𑀪𑀸𑀯𑀢𑁆𑀢𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀘𑁂𑀢𑀦𑀸𑀮𑀓𑁆𑀔𑀡𑀁 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁. 𑀮𑁄𑀪𑁂𑀦 𑀧𑀭𑀲𑀦𑁆𑀢𑀓𑀁 𑀘𑁄𑀭𑀺𑀓𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀓𑁄𑀥𑁂𑀦 𑀅𑀪𑀺𑀪𑀽𑀢𑀲𑁆𑀲 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀸 𑀯𑀺𑀮𑀼𑀫𑁆𑀧𑀸𑀧𑁂𑀢𑁆𑀯𑀸 𑀯𑀸 𑀕𑀡𑁆𑀳𑀢𑁄 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀜𑁆𑀘 𑀯𑀺𑀦𑀸 𑀅𑀕𑁆𑀕𑀳𑁂𑀢𑀼𑀓𑀸𑀫𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀤𑀸𑀲𑀻𑀦𑀲𑁆𑀲 𑀕𑀡𑁆𑀳𑀢𑁄 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀢𑀺𑀯𑁂𑀤𑀦𑀫𑀼𑀤𑀻𑀭𑀺𑀢’’𑀦𑁆𑀢𑀺 𑀆𑀳.

𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀫𑀼𑀮𑁆𑀮𑀧𑀦𑀘𑁂𑀢𑀦𑀸𑀮𑀓𑁆𑀔𑀡𑀁 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀜𑁆𑀘. 𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀧𑀘𑁆𑀘𑀬𑀸𑀲𑀸𑀬 𑀯𑀸 𑀢𑀼𑀝𑁆𑀞𑀢𑀼𑀝𑁆𑀞𑀲𑁆𑀲𑁂𑀯 ‘‘𑀅𑀳𑀁 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 ¶ 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀮𑀸𑀪𑀺𑀢𑀁 𑀯𑀤𑀦𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀅𑀜𑁆𑀜𑀧𑀼𑀕𑁆𑀕𑀮𑁂𑀲𑀼 𑀧𑀝𑀺𑀳𑀢𑀘𑀺𑀢𑁆𑀢𑀲𑁆𑀲 𑀓𑀮𑀳𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀯𑀤𑀢𑁄 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀧𑀘𑁆𑀘𑀬𑀸𑀮𑀸𑀪𑁂𑀦 𑀚𑀺𑀖𑀘𑁆𑀙𑀸𑀤𑀺𑀤𑀼𑀓𑁆𑀔𑀁 ¶ 𑀲𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀉𑀤𑀸𑀲𑀻𑀦𑀲𑁆𑀲 𑀯𑀤𑀢𑁄 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀢𑀺𑀯𑁂𑀤𑀦𑀫𑀼𑀤𑀻𑀭𑀺𑀢’’𑀦𑁆𑀢𑀺 𑀆𑀳.

𑁩𑁧𑁫. 𑀅𑀝𑁆𑀞 𑀘𑀺𑀢𑁆𑀢𑀸𑀦𑀻𑀢𑀺 𑀮𑁄𑀪𑀲𑀳𑀕𑀢𑀸𑀦𑀺 𑀅𑀝𑁆𑀞 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀭𑁂𑀢𑀺 𑀬𑁄𑀚𑀦𑀸, 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀘𑁂𑀢𑀦𑀸𑀲𑀪𑀸𑀯𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀼𑀧𑀭𑀺𑀧𑀺. 𑀤𑀼𑀯𑁂𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺. 𑀤𑀲 𑀘𑀺𑀢𑁆𑀢𑀸𑀦𑀻𑀢𑀺 𑀮𑁄𑀪𑀲𑀳𑀕𑀢𑀸𑀦𑀺 𑀅𑀝𑁆𑀞, 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀦𑀻𑀢𑀺. 𑀮𑀩𑁆𑀪𑀭𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀺.

𑁩𑁧𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁, 𑀢𑁂𑀦 𑀳𑁂𑀢𑀼𑀦𑀸. 𑀓𑁆𑀭𑀺𑀬𑀸𑀢𑀺 𑀓𑀭𑀡𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀓𑀺𑀭𑀺𑀬𑀸. 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀬 𑀯𑀺𑀫𑁄𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀮𑁄𑀓𑀯𑀚𑁆𑀚𑀦𑁆𑀢𑀺 𑀮𑁄𑀓𑁂𑀦 𑀅𑀓𑀼𑀲𑀮𑀪𑀸𑀯𑀢𑁄 𑀯𑀚𑁆𑀚𑀦𑀻𑀬𑀦𑁆𑀢𑀺 𑀤𑀻𑀧𑀺𑀢𑀁 𑀧𑀓𑀸𑀲𑀺𑀢𑀁.

𑁩𑁧𑁭. 𑀆𑀧𑀢𑁆𑀢𑀺𑀬𑀁𑀬𑁂𑀯𑀸𑀢𑀺 𑀏𑀯𑀓𑀸𑀭𑁂𑀦 𑀦 𑀲𑀺𑀓𑁆𑀔𑀸𑀧𑀤𑁂𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀺𑀥𑀸𑀦𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑀁 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀯𑀺𑀥𑀸𑀦𑀁. 𑀯𑀺𑀪𑀸𑀯𑀺𑀦𑀸𑀢𑀺 𑀧𑀜𑁆𑀜𑀯𑀢𑀸 𑀯𑀺𑀦𑀬𑀥𑀭𑁂𑀦.

𑁩𑁧𑁮-𑁯. 𑀫𑀼𑀤𑀼𑀧𑀺𑀝𑁆𑀞𑀺 𑀘𑀸𑀢𑀺 𑀮𑀢𑀸 𑀯𑀺𑀬 𑀦𑀫𑀺𑀢𑁆𑀯𑀸 𑀓𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦𑀘𑁆𑀘𑀺𑀢𑀼𑀁 𑀲𑀫𑀯𑀸𑀳𑀺𑀢𑁆𑀯𑀸 𑀫𑀼𑀤𑀼𑀓𑀢𑀧𑀺𑀝𑁆𑀞𑀺𑀓𑁄 𑀘. 𑀮𑀫𑁆𑀩𑀻 𑀘𑀸𑀢𑀺 𑀧𑀮𑀫𑁆𑀩𑀫𑀸𑀦𑁂𑀦 𑀤𑀻𑀖𑁂𑀦 𑀅𑀗𑁆𑀕𑀚𑀸𑀢𑁂𑀦 𑀬𑀼𑀢𑁆𑀢𑁄. 𑀮𑀫𑁆𑀩𑀢𑀻𑀢𑀺 𑀮𑀫𑁆𑀩𑀁, 𑀅𑀗𑁆𑀕𑀚𑀸𑀢𑀁, 𑀢𑀁 𑀬𑀲𑁆𑀲 𑀅𑀢𑁆𑀣𑀺 𑀲𑁄 𑀮𑀫𑁆𑀩𑀻. 𑀇𑀫𑁂 𑀤𑁆𑀯𑁂𑀧𑀺 𑀓𑀸𑀫𑀧𑀭𑀺𑀴𑀸𑀳𑀸𑀢𑀼𑀭𑀪𑀸𑀯𑁂 𑀲𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 ¶ 𑀫𑀼𑀔𑀁, 𑀯𑀘𑁆𑀘𑀫𑀕𑁆𑀕𑀜𑁆𑀘 𑀧𑀯𑁂𑀲𑁂𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀺𑀢𑀼𑀫𑀭𑀳𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑀤𑀺𑀲𑀢𑁆𑀢𑀸 𑀧𑀭𑀺𑀯𑀚𑁆𑀚𑀺𑀢𑀸. 𑀫𑀼𑀔𑀕𑁆𑀕𑀸𑀳𑀻𑀢𑀺 𑀫𑀼𑀔𑁂𑀦 𑀕𑀳𑀡𑀁 𑀫𑀼𑀔𑀕𑁆𑀕𑀸𑀳𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀔𑀕𑁆𑀕𑀸𑀳𑀻, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀓𑁄𑀢𑀺 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑁂𑀦 𑀦𑀺𑀲𑀻𑀤𑀦𑁆𑀢𑁄. 𑀇𑀫𑁂 𑀤𑁆𑀯𑁂 𑀲𑀳𑀯𑀸𑀲𑀺𑀓𑀸𑀦𑀁 𑀲𑀻𑀮𑀯𑀺𑀦𑀸𑀲𑀦𑀢𑁄 𑀅𑀜𑁆𑀜𑁂𑀳𑀺 𑀲𑀁𑀯𑀲𑀺𑀢𑀼𑀁 𑀅𑀦𑀭𑀳𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑀤𑀺𑀲𑀢𑁆𑀢𑀸 𑀯𑀺𑀯𑀚𑁆𑀚𑀺𑀢𑀸. 𑀢𑁂𑀲𑀦𑁆𑀢𑀺 𑀅𑀲𑀁𑀯𑀸𑀲𑀢𑀸𑀲𑀸𑀫𑀜𑁆𑀜𑁂𑀦 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑁂 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀢𑁂𑀲𑀜𑁆𑀘 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀲𑀸𑀫𑀜𑁆𑀜𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀲𑁆𑀲𑁂𑀯 𑀅𑀦𑀼𑀮𑁄𑀫𑀺𑀓𑀸𑀢𑀺 𑀕𑀳𑁂𑀢𑀩𑁆𑀩𑀸’’ 𑀇𑀘𑁆𑀘𑁂𑀯𑀁 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀅𑀓𑀢𑀯𑀻𑀢𑀺𑀓𑁆𑀓𑀫𑀸𑀦𑀫𑁆𑀧𑀺 𑀫𑀼𑀤𑀼𑀧𑀺𑀝𑁆𑀞𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ¶ 𑀧𑀦 𑁋

‘‘𑀅𑀧𑀭𑀸𑀦𑀺𑀧𑀺 𑀮𑀫𑁆𑀩𑀻, 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀏𑀢𑀸𑀦𑀺 𑀳𑀺 𑀬𑀲𑁆𑀫𑀸 𑀉𑀪𑀺𑀦𑁆𑀦𑀁 𑀭𑀸𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀽𑀧𑀕𑀢𑀸𑀦𑀁 𑀥𑀫𑁆𑀫𑁄 ‘𑀫𑁂𑀣𑀼𑀦𑀥𑀫𑁆𑀫𑁄’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀢𑁆𑀯𑀸𑀬𑁂𑀯 𑀓𑁂𑀯𑀮𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀯𑁂𑀲𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 ‘𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻’𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁩) 𑁋

𑀯𑀼𑀢𑁆𑀢𑀢𑁆𑀢𑀸 𑀘 𑀢𑀩𑁆𑀩𑀡𑁆𑀡𑀦𑀸𑀬 𑀘 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑁋

‘‘𑀮𑀫𑁆𑀩𑀁𑀤𑀻𑀖𑀢𑀸𑀬 𑀧𑀮𑀫𑁆𑀩𑀫𑀸𑀦𑀁 𑀅𑀗𑁆𑀕𑀚𑀸𑀢𑀫𑁂𑀢𑀲𑁆𑀲𑀸𑀢𑀺 𑀮𑀫𑁆𑀩𑀻. 𑀲𑁄 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓𑁄, 𑀅𑀣 𑀔𑁄 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂 ¶ 𑀯𑀸 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀫𑀼𑀤𑀼𑀓𑀸 𑀧𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀓𑀢𑀧𑀭𑀺𑀓𑀫𑁆𑀫𑀸𑀬 𑀫𑀼𑀤𑀼𑀓𑀸𑀬 𑀧𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑁄𑀧𑀺 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂 𑀧𑀯𑁂𑀲𑁂𑀢𑀺 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀫𑀢𑁆𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑁂𑀦 𑀢𑀲𑁆𑀲𑀽𑀧𑀭𑀺 𑀅𑀪𑀺𑀦𑀺𑀲𑀻𑀤𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀧𑀦 𑀉𑀪𑀺𑀦𑁆𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁩𑁩) 𑁋

𑀯𑀼𑀢𑁆𑀢𑀢𑁆𑀢𑀸 𑀘 𑀓𑀢𑀯𑀻𑀢𑀺𑀓𑁆𑀓𑀫𑀸𑀬𑁂𑀯𑁂𑀢𑁂 ‘‘𑀧𑀸𑀭𑀸𑀚𑀺𑀓𑀸’’𑀢𑀺 𑀕𑀳𑁂𑀢𑀩𑁆𑀩𑀸.

𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀘𑀢𑁆𑀢𑀸𑀭𑀻𑀢𑀺 𑀏𑀢𑁆𑀣 ‘‘𑀅𑀲𑀸𑀥𑀸𑀭𑀡𑀸𑀦𑀻’’𑀢𑀺 𑀧𑀸𑀞𑀲𑁂𑀲𑁄, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀫𑁂𑀯 𑀦𑀺𑀬𑀢𑀸𑀦𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸, 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 ¶ 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀘. 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻 𑀲𑀬𑀦𑁆𑀢𑀺 𑀏𑀢𑁆𑀣 ‘‘𑀢𑁂𑀲𑀁 𑀅𑀦𑀼𑀮𑁄𑀫𑀺𑀓𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀦𑀼𑀮𑁄𑀫𑀺𑀓𑀸 𑀲𑀬𑀁 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻 𑀘𑀸𑀢𑀺 𑀬𑁄𑀚𑀦𑀸. 𑀘𑀺𑀢𑁆𑀢𑀯𑀲𑀺𑀓𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑀸 ¶ 𑀦𑀺𑀯𑀢𑁆𑀣𑀘𑀻𑀯𑀭𑀫𑁆𑀧𑀺 𑀳𑀺 𑀫𑀸𑀢𑀼𑀕𑀸𑀫𑀸𑀦𑀁 𑀦𑀺𑀯𑀸𑀲𑀦𑀦𑀻𑀳𑀸𑀭𑁂𑀦 𑀲𑀬𑀫𑁂𑀯 𑀦𑀺𑀯𑀸𑀲𑁂𑀢𑁆𑀯𑀸 𑀕𑀺𑀳𑀺𑀯𑁂𑀲𑀁 𑀭𑁄𑀘𑁂𑀢𑁆𑀯𑀸 𑀕𑀳𑀺𑀢𑀫𑀢𑁆𑀢𑁂 𑀲𑀸𑀲𑀦𑀢𑁄 𑀘𑀼𑀢𑀸 𑀪𑀺𑀓𑁆𑀔𑀼𑀦𑀻 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁𑀓𑀭𑀡𑁂𑀦 𑀕𑀺𑀳𑀺𑀪𑀸𑀯𑀸𑀧𑀦𑁆𑀦𑀢𑀸𑀲𑀸𑀫𑀜𑁆𑀜𑁂𑀦 𑀲𑀁𑀯𑀸𑀲𑀸𑀭𑀳𑀸 𑀦 𑀳𑁄𑀦𑁆𑀢𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀦𑀼𑀮𑁄𑀫𑀺𑀓𑀸 𑀚𑀸𑀢𑀸.

𑀢𑀣𑀸𑀢𑀺 𑀬𑀣𑀸 𑀇𑀫𑁂 𑀤𑀲𑁆𑀲𑀺𑀢𑀸 𑀢𑁂𑀦 𑀅𑀲𑀁𑀯𑀸𑀲𑀸𑀭𑀳𑀢𑀸𑀬, 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀪𑀩𑁆𑀩𑀢𑀸𑀬 𑀘 𑀧𑀸𑀭𑀸𑀚𑀺𑀓𑀸𑀯, 𑀢𑀣𑀸 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀸𑀤𑀲𑀸𑀪𑀩𑁆𑀩𑀸𑀢𑀺 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀲𑀗𑁆𑀖𑀪𑁂𑀤𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀧𑀡𑁆𑀟𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄𑀢𑀺 𑀏𑀓𑀸𑀤𑀲. 𑀲𑀩𑁆𑀩𑁂𑀢𑁂 𑀘𑀢𑀼𑀯𑀻𑀲𑀢𑀺 𑀏𑀢𑁂 𑀲𑀩𑁆𑀩𑁂 𑀘𑀢𑀼𑀯𑀻𑀲𑀢𑀺 𑀧𑀼𑀕𑁆𑀕𑀮𑀸 𑀲𑀫𑁄𑀥𑀸𑀦𑀢𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁦. 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸 𑀧𑀼𑀕𑁆𑀕𑀮𑀸 𑀲𑀻𑀲𑀘𑁆𑀙𑀺𑀦𑁆𑀦𑁄𑀯 𑀚𑀻𑀯𑀺𑀢𑀼𑀁 𑀇𑀥 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀪𑀩𑁆𑀩𑀸𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁩𑁨𑁧. 𑀇𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁 𑀅𑀪𑀩𑁆𑀩𑀢𑀸𑀬 𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀧𑀡𑁆𑀟𑀓𑁄 𑀘𑀸’’𑀢𑀺𑀆𑀤𑀺. 𑀧𑀡𑁆𑀟𑀓𑁄 𑀘𑀸𑀢𑀺 𑀆𑀲𑀺𑀢𑁆𑀢𑀧𑀡𑁆𑀟𑀓𑁄, 𑀉𑀲𑀽𑀬𑀧𑀡𑁆𑀟𑀓𑁄, 𑀧𑀓𑁆𑀔𑀧𑀡𑁆𑀟𑀓𑁄, 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄, 𑀦𑀧𑀼𑀁𑀲𑀓𑀧𑀡𑁆𑀟𑀓𑁄𑀢𑀺 𑀯𑀼𑀢𑁆𑀢𑁄 𑀧𑀜𑁆𑀘𑀯𑀺𑀥𑁄 𑀧𑀡𑁆𑀟𑀓𑁄 𑀘. 𑀢𑀺𑀭𑀘𑁆𑀙𑀸𑀦𑁄𑀢𑀺 𑀢𑀺𑀭𑀺𑀬𑀁 𑀅𑀜𑁆𑀙𑀢𑀺 𑀕𑀘𑁆𑀙𑀢𑀻𑀢𑀺 ‘‘𑀢𑀺𑀭𑀘𑁆𑀙𑀸𑀦𑁄’’𑀢𑀺 𑀕𑀳𑀺𑀢𑁄 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀓𑁄 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄 𑀘. 𑀬𑀓𑁆𑀔𑀸𑀤𑀬𑁄 𑀲𑀩𑁆𑀩𑁂 𑀅𑀫𑀦𑀼𑀲𑁆𑀲𑀸𑀧𑀺 𑀇𑀥 𑀢𑀺𑀭𑀘𑁆𑀙𑀸𑀦𑁂𑀬𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑁄𑀧𑀺 𑀘𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀲𑀸𑀥𑀓𑁂𑀳𑀺 𑀉𑀪𑀢𑁄 𑀓𑀫𑁆𑀫𑀢𑁄 𑀚𑀸𑀢𑀸𑀦𑀺 𑀣𑀦𑀸𑀤𑀺𑀓𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀬𑀲𑁆𑀲𑀸𑀢𑀺 𑀦𑀺𑀭𑀼𑀢𑁆𑀢𑁄 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑁄 ¶ , 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑁄𑀢𑀺 𑀤𑀼𑀯𑀺𑀥𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑁄 𑀘. 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀺𑀢𑀸𑀬 𑀪𑀺𑀓𑁆𑀔𑀼𑀪𑀸𑀯𑁄 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀧𑀼𑀕𑁆𑀕𑀮𑀸𑀦𑀁 𑀪𑀺𑀓𑁆𑀔𑀼𑀪𑀸𑀯𑀸𑀭𑀳𑀢𑀸, 𑀲𑀸 𑀧𑀦 𑀧𑀩𑁆𑀩𑀚𑁆𑀚𑀸𑀓𑁆𑀔𑀦𑁆𑀥𑀓𑀸𑀕𑀢𑀲𑀩𑁆𑀩𑀤𑁄𑀲𑀯𑀺𑀭𑀳𑀺𑀢𑀕𑀼𑀡𑀲𑀫𑁆𑀧𑀬𑀼𑀢𑁆𑀢𑀢𑀸, 𑀢𑀁 𑀯𑀺𑀧𑀦𑁆𑀦𑀁 𑀧𑀡𑁆𑀟𑀓𑀪𑀸𑀯𑀸𑀤𑀺𑀬𑁄𑀕𑁂𑀦 𑀬𑁂𑀲𑀁 𑀢𑁂 ‘‘𑀯𑀢𑁆𑀣𑀼𑀯𑀺𑀧𑀦𑁆𑀦𑀸’’𑀢𑀺 𑀕𑀳𑁂𑀢𑀩𑁆𑀩𑀸. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀬𑀲𑁆𑀫𑀸 𑀯𑀢𑁆𑀣𑀼𑀯𑀺𑀧𑀦𑁆𑀦𑀸, 𑀢𑀲𑁆𑀫𑀸 𑀇𑀥 𑀅𑀢𑁆𑀢𑀪𑀸𑀯𑁂 𑀧𑀩𑁆𑀩𑀚𑁆𑀚𑀸𑀬 𑀅𑀪𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀓𑀸’’𑀢𑀺 𑀯𑀘𑀦𑁂𑀦 ¶ 𑀇𑀫𑁂𑀲𑀁 𑀯𑀺𑀧𑀸𑀓𑀸𑀯𑀭𑀡𑀬𑀼𑀢𑁆𑀢𑀪𑀸𑀯𑀫𑀸𑀳, 𑀇𑀫𑀺𑀦𑀸 𑀏𑀢𑁂𑀲𑀁 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀯𑀸𑀭𑀺𑀢𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁨𑁨. 𑀧𑀜𑁆𑀘𑀸𑀦𑀦𑁆𑀢𑀭𑀺𑀓𑀸𑀢𑀺 𑀓𑀫𑁆𑀫𑀸𑀯𑀭𑀡𑁂𑀦 𑀬𑀼𑀢𑁆𑀢𑀢𑀸𑀬 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀫𑀭𑀡𑀸𑀦𑀦𑁆𑀢𑀭𑀁 𑀅𑀧𑀸𑀬𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀬𑀢𑀸 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀧𑀜𑁆𑀘𑀸𑀦𑀦𑁆𑀢𑀭𑀺𑀓𑀸 𑀘. 𑀣𑁂𑀬𑁆𑀬𑀲𑀁𑀯𑀸𑀲𑁄𑀧𑀺 𑀘𑀸𑀢𑀺 𑀮𑀺𑀗𑁆𑀕𑀢𑁆𑀣𑁂𑀦𑀓𑁄, 𑀲𑀁𑀯𑀸𑀲𑀢𑁆𑀣𑁂𑀦𑀓𑁄, 𑀉𑀪𑀬𑀢𑁆𑀣𑁂𑀦𑀓𑁄𑀢𑀺 𑀢𑀺𑀯𑀺𑀥𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀘. 𑀤𑀽𑀲𑀓𑁄𑀢𑀺 𑀧𑀓𑀢𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀢𑀲𑁆𑀲𑀸 𑀤𑀽𑀲𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀁 𑀤𑀽𑀲𑁂𑀢𑀻𑀢𑀺 ‘‘𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄’’𑀢𑀺 𑀯𑀼𑀢𑁆𑀢𑁄 𑀘. 𑀢𑀺𑀢𑁆𑀣𑀺𑀧𑀓𑁆𑀓𑀦𑁆𑀢𑀓𑁄 𑀘𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀮𑀤𑁆𑀥𑀺𑀁, 𑀯𑁂𑀲𑀜𑁆𑀘 𑀭𑁄𑀘𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀢𑁂𑀲𑀫𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀘. 𑀇𑀢𑀺 𑀅𑀝𑁆𑀞 𑀧𑀦 𑀓𑀺𑀭𑀺𑀬𑀸𑀦𑀝𑁆𑀞𑀸𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺 𑀇𑀤𑀫𑀢𑁆𑀣𑀢𑁆𑀢𑀸 𑀇𑀫𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀇𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀇𑀫𑁂 𑀅𑀝𑁆𑀞 𑀧𑀦 𑀫𑀸𑀢𑀼𑀯𑀥𑀸𑀤𑀺𑀓𑀺𑀭𑀺𑀬𑀸𑀬 𑀇𑀳𑀢𑁆𑀢𑀪𑀸𑀯𑁂 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀦𑀭𑀳𑀸 𑀳𑀼𑀢𑁆𑀯𑀸 𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀏𑀓𑀸𑀤𑀲𑀅𑀪𑀩𑁆𑀩𑀸𑀦𑀁 𑀅𑀪𑀩𑁆𑀩𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁩𑁨𑁩. 𑀫𑀬𑀸 𑀧𑀸𑀭𑀸𑀚𑀺𑀓𑀸𑀦𑀁 𑀲𑀸𑀭𑀪𑀽𑀢𑁄 𑀬𑁄 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀦𑀼𑀲𑀸𑀭𑁂𑀦 𑀅𑀦𑀼𑀕𑀫𑀦𑁂𑀦 𑀲𑁂𑀲𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀩𑀼𑀥𑁂𑀦 𑀧𑀡𑁆𑀟𑀺𑀢𑁂𑀦 𑀅𑀲𑁂𑀲𑀢𑁄𑀯 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺 𑀬𑁄𑀚𑀦𑀸.

𑁩𑁨𑁪. 𑀧𑀝𑀼𑀪𑀸𑀯𑀓𑀭𑁂 ¶ 𑀧𑀭𑀫𑁂 𑀯𑀺𑀯𑀺𑀥𑁂𑀳𑀺 𑀦𑀬𑁂𑀳𑀺 𑀬𑀼𑀢𑁆𑀢𑁂 𑀯𑀺𑀦𑀬𑀧𑀺𑀝𑀓𑁂 𑀧𑀭𑀫𑀢𑁆𑀣𑀦𑀬𑀁 𑀅𑀪𑀺𑀧𑀢𑁆𑀣𑀬𑀢𑀸 𑀅𑀬𑀁 𑀲𑀢𑀢𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀯𑀺𑀯𑀺𑀥𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺. 𑀦𑀬𑁂𑀳𑀻𑀢𑀺 𑀦𑀻𑀬𑀦𑁆𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀉𑀤𑀻𑀭𑀺𑀬𑀦𑁆𑀢𑀻𑀢𑀺 ‘‘𑀦𑀬𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀘𑀓𑁆𑀓𑀧𑁂𑀬𑁆𑀬𑀸𑀮𑀸𑀤𑀻𑀳𑀺 𑀦𑀬𑁂𑀳𑀺. 𑀧𑀭𑀫𑀢𑁆𑀣𑀦𑀬𑀦𑁆𑀢𑀺 𑀧𑀭𑀫𑁄 𑀘 𑀲𑁄 𑀅𑀢𑁆𑀣𑁄 𑀘𑀸𑀢𑀺 𑀧𑀭𑀫𑀢𑁆𑀣𑁄, 𑀧𑀭𑀫𑁄 𑀯𑀸 𑀯𑀺𑀲𑁂𑀲𑁂𑀦 𑀦𑀺𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑀢𑁆𑀣𑀺𑀓𑀸𑀦𑀁 𑀩𑀼𑀤𑁆𑀥𑀺𑀬𑀸 𑀦𑁂𑀢𑀩𑁆𑀩𑁄𑀢𑀺 𑀧𑀭𑀫𑀢𑁆𑀣𑀦𑀬𑁄, 𑀯𑀺𑀦𑀺𑀘𑁆𑀙𑀬𑀽𑀧𑀸𑀬𑁄 𑀦𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸 ‘‘𑀧𑀭𑀫𑀢𑁆𑀣𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀭𑀫𑀢𑁆𑀣𑀦𑀬𑀁. 𑀅𑀪𑀺𑀧𑀢𑁆𑀣𑀬𑀢𑀸𑀢𑀺 𑀯𑀺𑀦𑀬𑀧𑀺𑀝𑀓𑁂 𑀯𑀺𑀦𑀺𑀘𑁆𑀙𑀬𑀁 𑀯𑀸 𑀢𑀤𑀼𑀧𑀸𑀬𑀁 𑀯𑀸 𑀧𑀢𑁆𑀣𑀬𑀢𑀸, 𑀇𑀘𑁆𑀙𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄 𑀅𑀬’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀫-𑀓𑀸𑀭𑁄 𑀆𑀕𑀫𑀲𑀦𑁆𑀥𑀺𑀚𑁄, 𑀑-𑀓𑀸𑀭𑀲𑁆𑀲 𑀅-𑀓𑀸𑀭𑀸𑀤𑁂𑀲𑁄. 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁄𑀢𑀺 𑀧𑀞𑀺𑀢𑀩𑁆𑀩𑁄, 𑀲𑁄𑀢𑀩𑁆𑀩𑁄 𑀘𑀺𑀦𑁆𑀢𑁂𑀢𑀩𑁆𑀩𑁄 𑀥𑀸𑀭𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀦𑁆𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸

𑁩𑁨𑁫. 𑀏𑀯𑀁 ¶ 𑀦𑀸𑀦𑀸𑀦𑀬𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀸𑀭𑀸𑀚𑀺𑀓𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀲𑁆𑀲 𑀢𑁂𑀭𑀲𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺𑀆𑀤𑀺. 𑀫𑁄𑀘𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 𑀫𑁄𑀘𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀫𑁄𑀘𑁂𑀢𑀼𑀓𑀸𑀫𑀢𑀸, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑁄𑀘𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁. 𑀏𑀢𑁆𑀣 ‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺 𑀇𑀫𑀺𑀦𑀸 𑀏𑀓𑀸𑀤𑀲𑀲𑀼 𑀭𑀸𑀕𑁂𑀲𑀼 ‘‘𑀫𑁄𑀘𑀦𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑀁 𑀇𑀫𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀫𑀽𑀮𑀓𑀸𑀭𑀡𑀁 𑀲𑀼𑀓𑁆𑀓𑀫𑁄𑀘𑀦𑀯𑀺𑀲𑀬𑀁 𑀭𑀸𑀕𑀫𑀸𑀳.

𑀏𑀓𑀸𑀤𑀲 ¶ 𑀭𑀸𑀕𑀸 𑀦𑀸𑀫 ‘‘𑀫𑁄𑀘𑀦𑀲𑁆𑀲𑀸𑀤𑁄, 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀫𑀼𑀢𑁆𑀢𑀲𑁆𑀲𑀸𑀤𑁄, 𑀫𑁂𑀣𑀼𑀦𑀲𑁆𑀲𑀸𑀤𑁄, 𑀨𑀲𑁆𑀲𑀲𑁆𑀲𑀸𑀤𑁄, 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄, 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀯𑀸𑀘𑀲𑁆𑀲𑀸𑀤𑁄, 𑀕𑁂𑀳𑀲𑁆𑀲𑀺𑀢𑀧𑁂𑀫𑀁, 𑀯𑀦𑀪𑀗𑁆𑀕𑀺𑀬’’𑀦𑁆𑀢𑀺 𑀏𑀯𑀫𑀸𑀕𑀢𑀸. 𑀇𑀥 𑀫𑁄𑀘𑀦𑀁 𑀦𑀸𑀫 𑀲𑀫𑁆𑀪𑀯𑀥𑀸𑀢𑀼𑀫𑁄𑀘𑀦𑀁, 𑀢𑀤𑀢𑁆𑀣𑀸𑀬 𑀢𑀩𑁆𑀩𑀺𑀲𑀬𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸 𑀫𑁄𑀘𑀦𑀲𑁆𑀲𑀸𑀤𑁄 𑀦𑀸𑀫. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑁄𑀘𑁂𑀢𑀼𑀁 𑀅𑀲𑁆𑀲𑀸𑀤𑁄 𑀫𑁄𑀘𑀦𑀲𑁆𑀲𑀸𑀤𑁄’’𑀢𑀺. 𑀫𑀼𑀘𑁆𑀘𑀫𑀸𑀦𑁂 𑀅𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄, 𑀲𑀫𑁆𑀪𑀯𑀥𑀸𑀢𑀼𑀫𑁆𑀳𑀺 𑀫𑀼𑀘𑁆𑀘𑀫𑀸𑀦𑁂 𑀢𑀁𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀫𑀼𑀘𑁆𑀘𑀦𑀲𑁆𑀲𑀸𑀤𑁄 𑀦𑀸𑀫. 𑀏𑀢𑁂𑀦𑁂𑀯 𑀦𑀬𑁂𑀦 𑀫𑀼𑀢𑁆𑀢𑀲𑁆𑀲𑀸𑀤𑀸𑀤𑀺𑀯𑀸𑀘𑀲𑁆𑀲𑀸𑀤𑀸𑀯𑀲𑀸𑀦𑁂𑀲𑀼 𑀧𑀤𑁂𑀲𑀼 𑀅𑀢𑁆𑀣𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀅𑀲𑁆𑀲𑀸𑀤𑀲𑀻𑀲𑁂𑀦 𑀓𑀼𑀦𑁆𑀢𑀬𑀝𑁆𑀞𑀺𑀜𑀸𑀬𑁂𑀦 𑀢𑀁𑀲𑀳𑀘𑀭𑀺𑀢𑁄 𑀭𑀸𑀕𑁄 𑀤𑀲𑁆𑀲𑀺𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀯𑀳𑀺 𑀧𑀤𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀭𑀸𑀕𑁄 𑀯𑀼𑀢𑁆𑀢𑁄’’𑀢𑀺.

𑀕𑁂𑀳𑀲𑁆𑀲𑀺𑀢𑀧𑁂𑀫𑀦𑁆𑀢𑀺 𑀏𑀢𑁆𑀣 𑀕𑁂𑀳𑀝𑁆𑀞𑀸 𑀫𑀸𑀢𑀼𑀆𑀤𑀬𑁄 𑀆𑀥𑁂𑀬𑁆𑀬𑀆𑀥𑀸𑀭𑀯𑁄𑀳𑀸𑀭𑁂𑀦 ‘‘𑀕𑁂𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀦𑁆𑀦𑀺𑀲𑁆𑀲𑀺𑀢𑁄 𑀲𑀺𑀦𑁂𑀳𑀧𑀭𑀺𑀬𑀸𑀬𑁄 𑀭𑀸𑀕𑁄 ‘‘𑀕𑁂𑀳𑀲𑁆𑀲𑀺𑀢𑀧𑁂𑀫’’𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀧𑀤𑁂𑀦 𑀭𑀸𑀕𑀲𑁆𑀲 𑀲𑀪𑀸𑀯𑁄 𑀲𑀦𑁆𑀤𑀲𑁆𑀲𑀺𑀢𑁄. 𑀯𑀦𑀢𑁄 𑀪𑀜𑁆𑀚𑀺𑀢𑁆𑀯𑀸 𑀆𑀪𑀢𑀁 𑀬𑀁 𑀓𑀺𑀜𑁆𑀘𑀺 𑀨𑀮𑀧𑀼𑀧𑁆𑀨𑀸𑀤𑀺 𑀯𑀦𑀪𑀗𑁆𑀕𑀺𑀬𑀁 𑀦𑀸𑀫. 𑀇𑀥 𑀧𑀦 𑀭𑀸𑀕𑀯𑀲𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀁 𑀫𑀸𑀢𑀼𑀕𑀸𑀫𑁂𑀳𑀺 𑀯𑀺𑀭𑀳𑀤𑀼𑀓𑁆𑀔𑀸𑀧𑀦𑀬𑀦𑀢𑁆𑀣𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁪𑁦) 𑀢𑁂𑀲𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀤𑀲𑁆𑀲𑀦𑀨𑀼𑀲𑀦𑀯𑀲𑁂𑀦 𑀯𑀺𑀦𑁆𑀤𑀺𑀢𑀼𑀁 𑀭𑀸𑀕𑀻𑀳𑀺 𑀕𑀳𑁂𑀢𑀩𑁆𑀩𑀢𑁄 𑀢𑁂𑀳𑀺 𑀧𑀺𑀴𑀦𑁆𑀥𑀺𑀢𑀫𑀸𑀮𑀲𑀳𑀺𑀢𑀁 𑀢𑀫𑁆𑀩𑀽𑀮𑀦𑁆𑀢𑀺 𑀏𑀯𑀫𑀸𑀤𑀺 ‘‘𑀯𑀦𑀪𑀗𑁆𑀕𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀇𑀫𑀺𑀦𑀸 𑀧𑀢𑁆𑀣𑀺𑀢𑀯𑀺𑀲𑀬𑀕𑁄𑀘𑀭𑁄 𑀭𑀸𑀕𑁄 𑀢𑀤𑀸𑀬𑀢𑁆𑀢𑀯𑀢𑁆𑀣𑀼𑀯𑀲𑁂𑀦 𑀲𑀦𑁆𑀤𑀲𑁆𑀲𑀺𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑁂𑀦 𑀧𑀤𑁂𑀦 𑀲𑀭𑀽𑀧𑁂𑀦𑁂𑀯 𑀭𑀸𑀕𑁄, 𑀏𑀓𑁂𑀦 ¶ 𑀧𑀤𑁂𑀦 𑀯𑀢𑁆𑀣𑀼𑀦𑀸 𑀯𑀼𑀢𑁆𑀢𑁄. 𑀯𑀦𑀪𑀗𑁆𑀕𑁄 𑀳𑀺 𑀭𑀸𑀕𑀲𑁆𑀲 𑀯𑀢𑁆𑀣𑀼, 𑀦 𑀭𑀸𑀕𑁄𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁪𑁦).

‘‘𑀫𑁄𑀘𑁂𑀢𑀼𑀓𑀸𑀫𑀢𑀸’’𑀢𑀺 ¶ 𑀇𑀤𑀫𑁂𑀯 𑀅𑀯𑀢𑁆𑀯𑀸 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀘𑀦𑁂𑀦 𑀯𑀻𑀢𑀺𑀓𑁆𑀓𑀫𑀲𑀸𑀥𑀺𑀓𑀸𑀬 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀓𑀁 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀯𑀻𑀢𑀺𑀓𑁆𑀓𑀫𑀁 ‘‘𑀯𑀸𑀬𑀸𑀫𑁄’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑁂𑀢𑀺. 𑀯𑀸𑀬𑀸𑀫𑁄 𑀦𑀸𑀫 𑀢𑀁𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀁. 𑀏𑀢𑁆𑀣 𑀧𑀦 ‘‘𑀲𑁂𑀫𑁆𑀳𑁄 𑀕𑀼𑀴𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀨𑀮𑁂 𑀳𑁂𑀢𑀽𑀧𑀘𑀸𑀭𑀜𑀸𑀬𑁂𑀦 𑀯𑀻𑀢𑀺𑀓𑁆𑀓𑀫𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀽𑀢𑀯𑀻𑀭𑀺𑀬𑀯𑀸𑀘𑀓𑁂𑀦 𑀘 𑀧𑀤𑁂𑀦 𑀯𑀻𑀢𑀺𑀓𑁆𑀓𑀫𑁄𑀯 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀚𑁆𑀛𑀢𑁆𑀢𑀩𑀸𑀳𑀺𑀭𑀯𑀢𑁆𑀣𑀼𑀖𑀝𑁆𑀝𑀦𑀁, 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑀦𑁆𑀢𑀺 𑀲𑀼𑀓𑁆𑀓𑀫𑁄𑀘𑀦𑀢𑁆𑀣𑁄 𑀯𑀸𑀬𑀸𑀫𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀲𑁆𑀲 𑀫𑁄𑀘𑀦𑀁 𑀲𑀼𑀓𑁆𑀓𑀫𑁄𑀘𑀦𑀁.

𑀏𑀢𑁆𑀣 𑀘 𑀲𑀼𑀓𑁆𑀓𑀲𑁆𑀲𑀸𑀢𑀺 ‘‘𑀲𑀼𑀓𑁆𑀓𑀦𑁆𑀢𑀺 𑀤𑀲 𑀲𑀼𑀓𑁆𑀓𑀸𑀦𑀺 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀢𑀓𑁆𑀓𑀯𑀡𑁆𑀡𑀁 𑀤𑀓𑀯𑀡𑁆𑀡𑀁 𑀢𑁂𑀮𑀯𑀡𑁆𑀡𑀁 𑀔𑀻𑀭𑀯𑀡𑁆𑀡𑀁 𑀤𑀥𑀺𑀯𑀡𑁆𑀡𑀁 𑀲𑀧𑁆𑀧𑀺𑀯𑀡𑁆𑀡’’𑀦𑁆𑀢𑀺 (𑀧𑀸𑀭𑀸. 𑁨𑁩𑁭) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢𑀸𑀦𑀁 𑀧𑀺𑀢𑁆𑀢𑀸𑀤𑀺𑀆𑀲𑀬𑀪𑁂𑀤𑁂𑀦, 𑀧𑀣𑀯𑀺𑀥𑀸𑀢𑀼𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀭𑀲𑀲𑁄𑀡𑀺𑀢𑀫𑀁𑀲𑀫𑁂𑀤𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀸𑀦𑀁 𑀙𑀦𑁆𑀦𑀁 𑀤𑁂𑀳𑀥𑀸𑀢𑀽𑀦𑀁 𑀯𑀸 𑀪𑁂𑀤𑁂𑀦 𑀅𑀦𑁂𑀓𑀥𑀸 𑀪𑀺𑀦𑁆𑀦𑁂 𑀤𑀲𑀯𑀺𑀥𑁂 𑀲𑀼𑀓𑁆𑀓𑁂 𑀅𑀜𑁆𑀜𑀢𑀭𑀲𑁆𑀲 𑀲𑀼𑀓𑁆𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑁄𑀘𑀦𑀁 𑀯𑀺𑀲𑁆𑀲𑀝𑁆𑀞𑀻𑀢𑀺 𑀧𑀭𑀺𑀬𑀸𑀬𑀁, 𑀧𑀓𑀢𑀺𑀬𑀸 𑀞𑀺𑀢𑀲𑀓𑀝𑁆𑀞𑀸𑀦𑀢𑁄 𑀫𑁄𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄 𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭). 𑀇𑀳 ‘‘𑀞𑀸𑀦𑀁 𑀦𑀸𑀫 𑀯𑀢𑁆𑀣𑀺𑀲𑀻𑀲𑀲𑀗𑁆𑀔𑀸𑀢𑀁 𑀫𑀼𑀢𑁆𑀢𑀓𑀭𑀡𑀫𑀽𑀮’’𑀦𑁆𑀢𑀺 𑀓𑁂𑀘𑀺. ‘‘𑀓𑀝𑀻’’𑀢𑀺 𑀅𑀧𑀭𑁂. ‘‘𑀲𑀓𑀮𑀓𑀸𑀬𑁄’’𑀢𑀺 𑀅𑀜𑁆𑀜𑁂. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀘𑀦𑁂𑀲𑀼 ‘‘𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀅𑀝𑁆𑀞𑀓𑀣𑀸𑀬𑀁 𑀢𑀢𑀺𑀬𑀯𑀸𑀤𑀲𑁆𑀲 𑀓𑀢𑀧𑀸𑀲𑀁𑀲𑀢𑁆𑀢𑀸 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀁 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀜𑁆𑀘 𑀫𑀼𑀢𑁆𑀢𑀓𑀭𑀻𑀲𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀓𑀮𑀲𑀭𑀻𑀭𑀁 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀅𑀩𑀤𑁆𑀥𑀧𑀺𑀢𑁆𑀢𑀸𑀦𑀁 ¶ 𑀯𑀺𑀬 𑀲𑀫𑁆𑀪𑀯𑀥𑀸𑀢𑀼𑀬𑀸 𑀘 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀲𑀼𑀓𑁆𑀓𑀫𑁄𑀘𑀦’’𑀦𑁆𑀢𑀺 𑀇𑀫𑀺𑀦𑀸𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺? ‘‘𑀆𑀭𑁄𑀕𑁆𑀬𑀢𑁆𑀣𑀸𑀬, 𑀲𑀼𑀔𑀢𑁆𑀣𑀸𑀬, 𑀪𑁂𑀲𑀚𑁆𑀚𑀢𑁆𑀣𑀸𑀬, 𑀤𑀸𑀦𑀢𑁆𑀣𑀸𑀬, 𑀧𑀼𑀜𑁆𑀜𑀢𑁆𑀣𑀸𑀬, 𑀬𑀜𑁆𑀜𑀢𑁆𑀣𑀸𑀬, 𑀲𑀕𑁆𑀕𑀢𑁆𑀣𑀸𑀬, 𑀩𑀻𑀚𑀢𑁆𑀣𑀸𑀬, 𑀯𑀻𑀫𑀁𑀲𑀢𑁆𑀣𑀸𑀬, 𑀤𑀯𑀢𑁆𑀣𑀸𑀬 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀤𑀲𑀯𑀺𑀥𑀅𑀥𑀺𑀧𑁆𑀧𑀸𑀬𑀦𑁆𑀢𑁄𑀕𑀥𑀅𑀜𑁆𑀜𑀢𑀭𑀅𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑁂, 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑁂, 𑀧𑀲𑁆𑀲𑀸𑀯𑀽𑀧𑀢𑁆𑀣𑀫𑁆𑀪𑁂, 𑀯𑀸𑀢𑀽𑀧𑀢𑁆𑀣𑀫𑁆𑀪𑁂, 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀓𑀸𑀮𑀸𑀦𑀫𑀜𑁆𑀜𑀢𑀭𑀓𑀸𑀮𑁂 ‘‘𑀅𑀚𑁆𑀛𑀢𑁆𑀢𑀭𑀽𑀧𑁂, 𑀩𑀳𑀺𑀤𑁆𑀥𑀸𑀭𑀽𑀧𑁂, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂, 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄 𑀫𑁄𑀘𑁂𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀼𑀢𑁆𑀢𑀘𑀢𑀼𑀭𑀼𑀧𑀸𑀬𑀸𑀦𑀫𑀜𑁆𑀜𑀢𑀭𑁂𑀦 𑀉𑀧𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀭𑀸𑀕𑀧𑀺𑀲𑀸𑀘𑀯𑀲𑁂𑀦 𑀯𑀺𑀯𑀲𑁄 𑀳𑀼𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀻𑀮𑀸𑀤𑀺𑀤𑀲𑀯𑀺𑀥𑀲𑀫𑁆𑀪𑀯𑀥𑀸𑀢𑀽𑀦𑀫𑀜𑁆𑀜𑀢𑀭𑀁 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀲𑀘𑁂 𑀫𑁄𑀘𑁂𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 ¶ 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸 𑀦𑀸𑀫 𑀮𑁄𑀫𑀲𑀧𑀸𑀡𑀸, 𑀬𑁂𑀲𑀁 𑀮𑁄𑀫𑁂 𑀅𑀮𑁆𑀮𑀺𑀦𑁂 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺.

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦𑀸𑀢𑀺 𑀲𑀼𑀧𑀺𑀦𑁄 𑀏𑀯 𑀲𑀼𑀧𑀺𑀦𑀦𑁆𑀢𑁄, 𑀦𑀺𑀲𑁆𑀲𑀓𑁆𑀓𑀯𑀘𑀦𑀧𑁆𑀧𑀲𑀗𑁆𑀕𑁂 𑀓𑀭𑀡𑀯𑀘𑀦𑀢𑁄 𑀲𑀼𑀧𑀺𑀦𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀼𑀧𑀺𑀦𑀸 𑀦𑀸𑀫 ‘‘𑀯𑀸𑀢𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀧𑀼𑀩𑁆𑀩𑀸𑀦𑀼𑀪𑀽𑀢𑀇𑀢𑁆𑀣𑀺𑀭𑀽𑀧𑀸𑀤𑀺𑀯𑀺𑀲𑀬𑀯𑀲𑁂𑀦 𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀯𑀸 𑀧𑀼𑀜𑁆𑀜𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀅𑀢𑁆𑀣𑀲𑁆𑀲, 𑀅𑀧𑀼𑀜𑁆𑀜𑁂𑀦 𑀧𑀢𑁆𑀢𑀩𑁆𑀩𑀸𑀦𑀢𑁆𑀣𑀲𑁆𑀲 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀯𑀲𑁂𑀦 𑀯𑀸 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀓𑀸𑀭𑀡𑁂𑀲𑀼 𑀏𑀓𑁂𑀦 𑀓𑀸𑀭𑀡𑁂𑀦 𑀓𑀧𑀺𑀦𑀺𑀤𑁆𑀤𑀸𑀬 𑀲𑀼𑀧𑀺𑀦𑁂 𑀤𑀺𑀲𑁆𑀲𑀫𑀸𑀦𑀸𑀭𑀫𑁆𑀫𑀡𑀢𑁄 𑀬𑀁 𑀲𑀼𑀓𑁆𑀓𑀫𑁄𑀘𑀦𑀁 𑀳𑁄𑀢𑀺, 𑀢𑀁 𑀅𑀯𑀺𑀲𑀬𑀁 𑀲𑀼𑀓𑁆𑀓𑀫𑁄𑀘𑀦𑀁 𑀯𑀺𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑀢𑀸. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀆𑀤𑀺𑀫𑁆𑀳𑀺 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀁 ¶ , 𑀫𑀚𑁆𑀛𑁂 𑀘 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀯𑀺𑀦𑀸 𑀯𑀸 𑀲𑀳 𑀯𑀸 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀁, 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀜𑁆𑀘 𑀲𑀗𑁆𑀖𑁄 𑀏𑀲𑀺𑀢𑀩𑁆𑀩𑁄𑀢𑀺 ‘‘𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭; 𑀓𑀗𑁆𑀔𑀸. 𑀅𑀝𑁆𑀞. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀦𑀸𑀫, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀅𑀩𑁆𑀪𑁂𑀢𑀺, 𑀦 𑀲𑀫𑁆𑀩𑀳𑀼𑀮𑀸, 𑀦 𑀏𑀓𑀧𑀼𑀕𑁆𑀕𑀮𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀲𑀗𑁆𑀖𑀸𑀤𑀺𑀲𑁂𑀲𑁄’𑀢𑀺. 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀅𑀥𑀺𑀯𑀘𑀦𑀁, 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 ‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑁨𑁩𑁭). 𑀏𑀢𑁆𑀣 𑀘 𑀧𑀭𑀺𑀯𑀸𑀲𑀸𑀤𑀺𑀓𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀯𑀲𑀸𑀦𑁂 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁩𑁨𑁬. 𑀏𑀢𑁆𑀢𑀸𑀯𑀢𑀸 𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀕𑀢𑀁 𑀅𑀢𑁆𑀢𑀽𑀧𑀓𑁆𑀓𑀫𑀫𑀽𑀮𑀓𑀁 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀺𑀲𑁆𑀲𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀧𑀭𑀽𑀧𑀓𑁆𑀓𑀫𑁂𑀦𑀧𑀺 𑀆𑀧𑀚𑁆𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀭𑁂𑀦𑀸’’𑀢𑀺𑀆𑀤𑀺. 𑀉𑀧𑀓𑁆𑀓𑀫𑀸𑀧𑁂𑀢𑁆𑀯𑀸𑀢𑀺 𑀅𑀗𑁆𑀕𑀚𑀸𑀢𑀲𑁆𑀲 𑀕𑀳𑀡𑀁 𑀯𑀸 𑀖𑀝𑁆𑀝𑀦𑀁 𑀯𑀸 𑀓𑀸𑀭𑁂𑀢𑁆𑀯𑀸.

𑁩𑁨𑁭. 𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀉𑀧𑀓𑁆𑀓𑀫𑀸𑀫𑀺 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀢𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀖𑀝𑁆𑀝𑁂𑀦𑁆𑀢𑀲𑁆𑀲. 𑀲𑀫𑀼𑀤𑁆𑀤𑀺𑀝𑁆𑀞𑀦𑁆𑀢𑀺 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁨) 𑀧𑀤𑀪𑀸𑀚𑀦𑁂 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁮. 𑀇𑀫𑀺𑀲𑁆𑀲𑀁 ¶ 𑀕𑀸𑀣𑀸𑀬𑀁 ‘‘𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀯𑀸 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀖𑀝𑁆𑀝𑁂𑀦𑁆𑀢𑀲𑁆𑀲𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ¶ 𑀅𑀗𑁆𑀕𑀚𑀸𑀢𑀖𑀝𑁆𑀝𑀦𑁂𑀦 𑀯𑀺𑀦𑀸𑀪𑀸𑀯𑀢𑁄 𑀇𑀫𑀺𑀦𑀸 𑀅𑀲𑀗𑁆𑀕𑀬𑁆𑀳𑀫𑀸𑀦𑀲𑁆𑀲𑀸𑀧𑀺 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑁂𑀦 𑀲𑀼𑀓𑁆𑀓𑀫𑁄𑀘𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀧𑀞𑀫𑀕𑀸𑀣𑀸𑀬𑀁 ‘‘𑀯𑀸𑀬𑀸𑀫𑁄’’𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀁 𑀞𑀧𑁂𑀢𑁆𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀺…𑀧𑁂… 𑀅𑀲𑀼𑀘𑀺 𑀦 𑀫𑀼𑀘𑁆𑀘𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀆𑀓𑀸𑀲𑁂𑀓𑀝𑀺𑀓𑀫𑁆𑀧𑀦𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀢𑁆𑀢𑀸 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺.

𑀢𑀢𑁆𑀣 𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀉𑀧𑀓𑁆𑀓𑀫𑀸𑀫𑀺 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀢𑀁 𑀯𑀺𑀲𑁂𑀲𑁂𑀢𑀼𑀁 ‘‘𑀆𑀓𑀸𑀲𑁂 𑀓𑀫𑁆𑀧𑀦𑁂𑀦𑀧𑀻’’𑀢𑀺 𑀆𑀳, 𑀓𑀝𑀺𑀓𑀫𑁆𑀧𑀦𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀓𑀣𑀫𑀺𑀤𑀁 𑀮𑀩𑁆𑀪𑀢𑀻𑀢𑀺 𑀘𑁂? 𑀇𑀫𑀸𑀬 𑀓𑀣𑀸𑀬 𑀲𑀗𑁆𑀕𑀳𑁂𑀢𑀩𑁆𑀩𑀯𑀢𑁆𑀣𑀼𑀫𑁆𑀳𑀺 ‘‘𑀆𑀓𑀸𑀲𑁂 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁬) 𑀧𑀸𑀞𑁂 ‘‘𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀲𑀳𑀘𑀭𑀲𑁆𑀲 ‘‘𑀆𑀓𑀸𑀲𑁂’’𑀢𑀺 𑀯𑀘𑀦𑀲𑁆𑀲 𑀲𑀦𑁆𑀦𑀺𑀥𑀸𑀦𑀩𑀮𑁂𑀦 𑀮𑀩𑁆𑀪𑀢𑀺 𑀅𑀢𑁆𑀣𑀧𑁆𑀧𑀓𑀭𑀡𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀸 𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀢𑁄.

𑁩𑁨𑁯. 𑀯𑀢𑁆𑀣𑀺𑀦𑁆𑀢𑀺 𑀫𑀼𑀢𑁆𑀢𑀯𑀢𑁆𑀣𑀺𑀁, 𑀫𑀼𑀢𑁆𑀢𑀓𑀭𑀡𑀲𑁆𑀲 𑀯𑀢𑁆𑀣𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀻𑀴𑀸𑀬 𑀧𑀽𑀭𑁂𑀢𑁆𑀯𑀸𑀢𑀺 𑀕𑀸𑀫𑀤𑀸𑀭𑀓𑁄 𑀯𑀺𑀬 𑀓𑀻𑀴𑀺𑀢𑀼𑀓𑀸𑀫𑀢𑀸𑀬 𑀫𑀼𑀢𑁆𑀢𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀯𑀢𑁆𑀣𑀺𑀯𑀢𑁆𑀣𑀼𑀫𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂 𑀪𑀺𑀓𑁆𑀔𑀽 𑀯𑀢𑁆𑀣𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀸 𑀕𑀸𑀫𑀤𑀸𑀭𑀓𑀸𑀯𑀺𑀬 𑀧𑀲𑁆𑀲𑀸𑀯𑀫𑀓𑀁𑀲𑀽’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁪). ‘‘𑀦 𑀯𑀝𑁆𑀝𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑁄 𑀘𑁂𑀢𑁂𑀢𑀺, 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀻𑀢𑀺 𑀅𑀗𑁆𑀕𑀸𑀦𑀁 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 ¶ , 𑀅𑀫𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀲𑀫𑁆𑀪𑀯𑀢𑁄 𑀉𑀪𑀬𑀲𑀗𑁆𑀕𑀳𑀢𑁆𑀣𑀫𑀸𑀳.

𑁩𑁩𑁦. 𑀉𑀧𑀦𑀺𑀚𑁆𑀛𑀸𑀬𑀦𑀯𑀢𑁆𑀣𑀼𑀫𑁆𑀳𑀺 ‘‘𑀦 𑀘 𑀪𑀺𑀓𑁆𑀔𑀯𑁂 𑀲𑀸𑀭𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑀁 𑀉𑀧𑀦𑀺𑀚𑁆𑀛𑀸𑀬𑀺𑀢𑀩𑁆𑀩𑀁, 𑀬𑁄 𑀉𑀧𑀦𑀺𑀚𑁆𑀛𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁬) 𑀧𑀸𑀴𑀺𑀬𑀁 ‘‘𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀺𑀲𑁆𑀲𑀦𑁆𑀦’’𑀦𑁆𑀢𑀺 𑀯𑀤𑀢𑀺. 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀇𑀢𑁆𑀣𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁂𑀦 𑀢𑀺𑀲𑁆𑀲𑀦𑁆𑀦𑀁 𑀇𑀢𑁆𑀣𑀻𑀦𑀁. ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 ¶ 𑀫𑀼𑀢𑁆𑀢𑀓𑀭𑀡𑀫𑁂𑀯 𑀯𑀼𑀘𑁆𑀘𑀢𑀺, 𑀧𑀝𑀲𑀢𑁂𑀦𑀸𑀧𑀺 𑀧𑀝𑀺𑀘𑁆𑀙𑀸𑀤𑀺𑀢𑀁 𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀁 𑀯𑀸 𑀬𑁄𑀦𑀺𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂𑀧𑀺 𑀧𑀝𑀲𑀢𑀁 𑀦𑀺𑀯𑀢𑁆𑀣𑀸 𑀳𑁄𑀢𑀺, 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀞𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀦𑀺𑀫𑀺𑀢𑁆𑀢’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀅𑀦𑀺𑀯𑀢𑁆𑀣𑀸𑀦𑀁 𑀕𑀸𑀫𑀤𑀸𑀭𑀺𑀓𑀸𑀦𑀁 𑀦𑀺𑀫𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀦 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁬). 𑀧𑀼𑀭𑀢𑁄 𑀯𑀸𑀢𑀺 𑀏𑀢𑁆𑀣 ‘‘𑀞𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄.

𑁩𑁩𑁧. 𑀏𑀓𑁂𑀦…𑀧𑁂… 𑀧𑀲𑁆𑀲𑀢𑁄 𑀏𑀓𑀁 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀓𑁂𑀦 𑀧𑀬𑁄𑀕𑁂𑀦 𑀏𑀓𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀘𑀦𑀢𑁄 𑀅𑀦𑁂𑀓𑁂𑀳𑀺 𑀧𑀬𑁄𑀕𑁂𑀳𑀺 𑀅𑀦𑁂𑀓𑀸𑀦𑀺 𑀤𑀼𑀓𑁆𑀓𑀝𑀸𑀦𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀮𑀩𑁆𑀪𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁬). 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 ‘‘𑀇𑀢𑁄 𑀘𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀫𑁆𑀫𑀻𑀮𑀦𑀦𑀺𑀫𑀻𑀮𑀦𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀯𑀺𑀥𑀸 𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀫𑁂𑀯 𑀑𑀮𑁄𑀓𑁂𑀦𑁆𑀢𑀲𑁆𑀲𑀸’’𑀢𑀺 𑀮𑀩𑁆𑀪𑀢𑀺.

𑁩𑁩𑁨. 𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀫𑀼𑀢𑁆𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀪𑁂𑀲𑀚𑁆𑀚𑀓𑀭𑀡𑀢𑁆𑀣𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑁂 𑀪𑁂𑀲𑀚𑁆𑀚𑀮𑁂𑀧𑀁 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑁂𑀯 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 ¶ 𑀇𑀤𑀁 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀧𑀺𑀦𑀦𑁆𑀢𑁂𑀦 𑀦𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁬𑁩) 𑀦𑀬𑁂𑀦 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀧𑀸𑀞𑁂 ‘‘𑀅𑀦𑀼𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀇𑀫𑀲𑁆𑀲 𑀧𑀸𑀞𑀲𑁆𑀲 𑀧𑀼𑀭𑀢𑁄 ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁬𑁨) 𑀘 ‘‘𑀦 𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁬𑁨) 𑀘 𑀯𑀘𑀦𑀢𑁄 𑀢𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀅𑀦𑀼𑀧𑀓𑁆𑀓𑀫𑀢𑁄𑀧𑀺 𑀘 𑀫𑀼𑀢𑁆𑀢𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸’’𑀢𑀺. 𑀫𑁄𑀘𑀦𑀲𑁆𑀲𑀸𑀤𑀭𑀸𑀕𑁂𑀦 𑀧𑀻𑀴𑀺𑀢𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀯𑀢 𑀫𑁂 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 𑀏𑀯𑀭𑀽𑀧𑀫𑁄𑀘𑀦𑀲𑁆𑀲𑀸𑀤𑀭𑀸𑀕𑀧𑀻𑀴𑀸𑀧𑀼𑀩𑁆𑀩𑀗𑁆𑀕𑀫𑀘𑀺𑀢𑁆𑀢𑁂 𑀅𑀲𑀢𑀺𑀧𑀺 𑀓𑁂𑀯𑀮𑀁 𑀓𑀸𑀫𑀯𑀺𑀢𑀓𑁆𑀓𑀫𑀢𑁆𑀢𑁂𑀦 𑀉𑀧𑀳𑀢𑁄 𑀳𑀼𑀢𑁆𑀯𑀸 𑀢𑀸𑀤𑀺𑀲𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀽𑀲𑀼 𑀖𑀝𑁆𑀝𑀦𑀯𑀲𑁂𑀦 𑀯𑀸 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑀯𑀲𑁂𑀦 𑀯𑀸 𑀉𑀧𑀓𑁆𑀓𑀫𑀁 𑀅𑀓𑀭𑁄𑀦𑁆𑀢𑀲𑁆𑀲 𑀢𑀸𑀤𑀺𑀲𑀘𑀺𑀦𑁆𑀢𑀸𑀩𑀮𑁂𑀦 𑀯𑀸 𑀓𑀸𑀫𑀯𑀺𑀢𑀓𑁆𑀓𑀩𑀮𑁂𑀦 𑀯𑀸 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀧𑀸𑀞𑀯𑀲𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀧𑀺𑀦𑀦𑁆𑀢𑁂𑀦 𑀫𑀼𑀢𑁆𑀢𑀲𑁆𑀫𑀺𑀁, 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑀢𑁆𑀣𑀸𑀪𑀸𑀯𑀢𑁄 𑀲𑀼𑀧𑀺𑀦𑁂𑀢𑀺 𑀅𑀢𑁆𑀣𑁄. 𑀲𑀼𑀧𑀺𑀦𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑁂𑀳𑀺 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀸 𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 ¶ 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺 𑀧𑀸𑀴𑀺𑀬𑀁 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑁨𑁬𑁩) 𑀇𑀫𑀺𑀦𑀸 𑀧𑀓𑀸𑀲𑀺𑀢𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀞𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀧𑀺𑀦𑁂 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸𑀬 𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺, 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁 𑀓𑀻𑀴𑀸𑀧𑁂𑀢𑀩𑁆𑀩𑀁. 𑀓𑀸𑀲𑀸𑀯𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀦𑀢𑁆𑀣𑀁 𑀧𑀦 𑀳𑀢𑁆𑀣𑀧𑀼𑀝𑁂𑀦 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀅𑀡𑁆𑀟𑀧𑀸𑀮𑀺𑀓𑀸 𑀓𑀺𑀓𑀻𑀲𑀓𑀼𑀡𑀸 𑀯𑀺𑀬, 𑀯𑀸𑀮𑀧𑀸𑀮𑀺𑀓𑀸 𑀘𑀫𑀭𑀻 𑀯𑀺𑀬, 𑀏𑀓𑀦𑁂𑀢𑁆𑀢𑀧𑀸𑀮𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀓𑀸𑀬𑀚𑀻𑀯𑀺𑀢𑁂𑀧𑀺 𑀅𑀧𑁂𑀓𑁆𑀔𑀁 𑀧𑀳𑀸𑀬 𑀲𑀻𑀮𑀁 ¶ 𑀭𑀓𑁆𑀔𑀺𑀢𑀼𑀓𑀸𑀫𑁂𑀦 𑀲𑀺𑀓𑁆𑀔𑀸𑀓𑀸𑀫𑁂𑀦 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 (𑀧𑀸𑀭𑀸. 𑁨𑁩𑁭) 𑀯𑀤𑀢𑁄 𑀢𑀣𑀸𑀕𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀸𑀦𑀼𑀓𑀽𑀮𑀁 𑀅𑀝𑁆𑀞𑀓𑀣𑀸𑀢𑁄 𑀜𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑀢𑁆𑀭𑀸𑀦𑀼𑀲𑀸𑀲𑀦𑀻.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸𑀯𑀡𑁆𑀡𑀦𑀸.

𑁩𑁩𑁩. 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀇𑀢𑁆𑀣𑀺𑀁, ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻’’𑀢𑀺 (𑀧𑀸𑀭𑀸. 𑁨𑁭𑁧) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀢𑀤𑀳𑀼𑀚𑀸𑀢𑀓𑀼𑀫𑀸𑀭𑀺𑀓𑀸𑀪𑀸𑀯𑁂𑀦𑀧𑀺 𑀞𑀺𑀢𑀁 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀫𑀸𑀢𑀼𑀕𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 (𑀧𑀸𑀭𑀸. 𑁨𑁮𑁧 𑀆𑀤𑀬𑁄) 𑀫𑀢𑀺𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀯𑀘𑀦𑀢𑁄 𑀧𑀸𑀭𑀺𑀲𑁂𑀲𑀢𑁄 𑀮𑀩𑁆𑀪𑀢𑀺. 𑀆𑀫𑀲𑀦𑁆𑀢𑁄𑀢𑀺 ‘‘𑀳𑀢𑁆𑀣𑀕𑁆𑀕𑀸𑀳𑀁 𑀯𑀸 𑀯𑁂𑀡𑀺𑀕𑁆𑀕𑀸𑀳𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦’’𑀦𑁆𑀢𑀺 (𑀧𑀸𑀭𑀸. 𑁨𑁭𑁦) 𑀯𑀼𑀢𑁆𑀢𑀢𑁆𑀢𑀸 𑀳𑀢𑁆𑀣𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑀨𑀼𑀲𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀓𑀸𑀭𑁂𑀦 𑀆𑀫𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑁆𑀲 𑀲𑀁𑀲𑀕𑁆𑀕𑁂 𑀫𑀺𑀲𑁆𑀲𑀻𑀪𑀸𑀯𑁂 𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄. 𑀲𑀗𑁆𑀖𑀸𑀤𑀺𑀲𑁂𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀺𑀓𑁄, 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄 𑀆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁩𑁪. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀇𑀢𑁆𑀣𑀺𑀬𑀸 𑀅𑀦𑁆𑀢𑀫𑀲𑁄 𑀮𑁄𑀫𑀫𑁆𑀧𑀺 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀮𑁄𑀫𑁂𑀦 𑀨𑀼𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁭𑁪) ‘‘𑀮𑁄𑀫𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀫𑀢𑀲𑁆𑀲 𑀅𑀝𑁆𑀞𑀺𑀢𑀢𑁆𑀢𑀸 ¶ , ‘‘𑀓𑁄𑀝𑁆𑀞𑀸𑀲𑀕𑀡𑀦𑀸𑀬 𑀦 𑀳𑁄𑀢𑀺, 𑀇𑀢𑁆𑀣𑀺𑀕𑀡𑀦𑀸𑀬 𑀳𑁄𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀫𑀢𑀲𑁆𑀲 𑀞𑀺𑀢𑀢𑁆𑀢𑀸 𑀲𑀗𑁆𑀖𑀲𑀦𑁆𑀢𑀓𑁂 𑀫𑀜𑁆𑀘𑀧𑀻𑀞𑁂 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀦𑀸 𑀓𑁂𑀦𑀘𑀺 ¶ 𑀅𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑁂 𑀨𑀼𑀲𑀦𑁆𑀢𑀲𑁆𑀲 𑀯𑀺𑀬 𑀮𑁄𑀫𑀕𑀡𑀦𑀸𑀬 𑀅𑀳𑀼𑀢𑁆𑀯𑀸 𑀨𑀼𑀝𑁆𑀞𑀮𑁄𑀫𑀸𑀦𑀁 𑀩𑀳𑀼𑀢𑁆𑀢𑁂𑀧𑀺 𑀏𑀓𑀲𑁆𑀫𑀺𑀁 𑀧𑀬𑁄𑀕𑁂 𑀏𑀓𑀸 𑀏𑀯 𑀆𑀧𑀢𑁆𑀢𑀺, 𑀩𑀳𑀽𑀲𑀼 𑀧𑀬𑁄𑀕𑁂𑀲𑀼 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁.

𑁩𑁩𑁫. 𑀇𑀢𑁆𑀣𑀺𑀬𑀸𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀲𑀫𑁆𑀨𑀼𑀝𑁆𑀞𑁄𑀢𑀺 𑀳𑀢𑁆𑀣𑀸𑀤𑀺𑀲𑀭𑀻𑀭𑀸𑀯𑀬𑀯𑁂 𑀲𑀁𑀲𑀕𑁆𑀕𑀁 𑀲𑀫𑀸𑀧𑀦𑁆𑀦𑁄. 𑀲𑁂𑀯𑀦𑀘𑁂𑀢𑀦𑁄 𑀯𑀸𑀬𑀫𑀺𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀢𑁆𑀢𑀦𑁄 𑀓𑀸𑀬𑀁 𑀘𑀸𑀮𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀤𑀺𑀲𑁂𑀲𑀢𑀸𑀢𑀺 𑀏𑀢𑁆𑀣 𑀲𑀓𑀢𑁆𑀣𑁂 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁄. ‘‘𑀲𑀗𑁆𑀖𑀸𑀤𑀺𑀲𑁂𑀲𑀺𑀢𑀸’’𑀢𑀺 𑀧𑀦 𑀧𑀸𑀞𑁄 𑀲𑀼𑀦𑁆𑀤𑀭𑁄, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸 𑀯𑀺𑀚𑁆𑀚𑀫𑀸𑀦𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀲𑀗𑁆𑀔𑀸𑀢𑀸 𑀅𑀢𑁆𑀣𑀺𑀢𑀸 𑀈𑀧𑀘𑁆𑀘𑀬𑀢𑁆𑀣𑁂 𑀧𑀼𑀕𑁆𑀕𑀮𑁂 𑀲𑀗𑁆𑀖𑀸𑀤𑀺𑀲𑁂𑀲𑀻𑀲𑀤𑁆𑀤𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀪𑀸𑀯𑀧𑀘𑁆𑀘𑀬𑁄 𑀢𑀁𑀅𑀢𑁆𑀣𑀯𑀲𑁂𑀦 𑀮𑀩𑁆𑀪𑀢𑀺. 𑀬𑀣𑀸𑀳𑀼 ‘‘𑀬𑀲𑁆𑀲 𑀕𑀼𑀡𑀲𑁆𑀲 𑀳𑀺 𑀪𑀸𑀯𑀸 𑀤𑀩𑁆𑀩𑁂 𑀲𑀤𑁆𑀤𑀲𑀦𑁆𑀦𑀺𑀯𑁂𑀲𑁄, 𑀢𑀤𑀪𑀺𑀥𑀸𑀦𑁂 𑀢𑁆𑀢𑀢𑀸𑀤𑀬𑁄’’𑀢𑀺.

𑁩𑁩𑁬. 𑀏𑀓𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀢𑁆𑀣 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑁄. 𑀢𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀇𑀢𑁆𑀣𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀭𑀻𑀭𑀸𑀯𑀬𑀯𑁂. ‘‘𑀏𑀓𑀸𑀯𑀸𑀧𑀢𑁆𑀢𑀻’’𑀢𑀺 𑀧𑀞𑀫𑀁 𑀕𑀳𑀺𑀢𑀳𑀢𑁆𑀣𑀲𑁆𑀲 𑀅𑀦𑀧𑀦𑀻𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀕𑀳𑀺𑀢𑀳𑀢𑁆𑀣𑀁 𑀧𑀦 𑀫𑁄𑀘𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀨𑀼𑀲𑀦𑁆𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀮𑀩𑁆𑀪𑀢𑀺.

𑁩𑁩𑁭. 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀻𑀲𑀢𑁄 𑀬𑀸𑀯 𑀧𑀸𑀤𑀁, 𑀧𑀸𑀤𑀢𑁄 𑀬𑀸𑀯 𑀲𑀻𑀲𑀜𑁆𑀘 𑀓𑀸𑀬𑀸 𑀳𑀢𑁆𑀣𑀁 𑀅𑀫𑁄𑀘𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀢𑀁 𑀇𑀢𑁆𑀣𑀺𑀁 𑀨𑀼𑀲𑀦𑁆𑀢𑀲𑁆𑀲 𑀏𑀓𑀸𑀯𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀧𑀺 ‘‘𑀅𑀫𑁄𑀘𑁂𑀢𑁆𑀯𑀸’’𑀢𑀺 ¶ 𑀩𑁆𑀬𑀢𑀺𑀭𑁂𑀓𑀢𑁄 𑀫𑁄𑀘𑁂𑀢𑁆𑀯𑀸 𑀨𑀼𑀲𑀦𑁆𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀅𑀦𑁂𑀓𑀸𑀧𑀢𑁆𑀢𑀺𑀬𑁄𑀢𑀺 𑀮𑀩𑁆𑀪𑀢𑀺.

𑁩𑁩𑁮. 𑀏𑀓𑀢𑁄 𑀕𑀳𑀺𑀢𑀧𑀜𑁆𑀘𑀗𑁆𑀕𑀼𑀮𑀻𑀦𑀁 𑀕𑀡𑀦𑀸𑀬 𑀲𑀘𑁂 𑀆𑀧𑀢𑁆𑀢𑀺 𑀲𑀺𑀬𑀸, 𑀏𑀓𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑀁 𑀭𑀸𑀕𑀘𑀺𑀢𑁆𑀢𑁂𑀦 𑀨𑀼𑀲𑀦𑁆𑀢𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀓𑀮𑀸𑀧𑀓𑁄𑀝𑁆𑀞𑀸𑀲𑀢𑁄 𑀩𑁆𑀬𑀢𑀺𑀭𑁂𑀓𑀲𑁆𑀲 𑀲𑀭𑀻𑀭𑀲𑁆𑀲𑀸𑀪𑀸𑀯𑀸 𑀤𑁆𑀯𑀢𑁆𑀢𑀺𑀁𑀲𑀓𑀮𑀸𑀧𑀓𑁄𑀝𑁆𑀞𑀸𑀲𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀅𑀪𑀸𑀯𑀢𑁄 𑀇𑀤𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦 𑀳𑀺 𑀓𑁄𑀝𑁆𑀞𑀸𑀲𑀢𑁄 𑀲𑀺𑀬𑀸’’𑀢𑀺 𑀆𑀳.

𑁩𑁪𑁦-𑁧. 𑀇𑀢𑁆𑀣𑀺𑀬𑀸 𑀯𑀺𑀫𑀢𑀺𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸, 𑀇𑀢𑁆𑀣𑀺𑀬𑀸 𑀧𑀡𑁆𑀟𑀓𑀸𑀤𑀺𑀲𑀜𑁆𑀜𑀺𑀦𑁄𑀧𑀺 𑀅𑀢𑁆𑀢𑀦𑁄𑀧𑀺 𑀓𑀸𑀬𑁂𑀦 ¶ 𑀇𑀢𑁆𑀣𑀺𑀬𑀸 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀗𑁆𑀕𑀳𑁄. 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀩𑀤𑁆𑀥𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀡𑁆𑀟𑀓𑀲𑁆𑀲 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀬𑀓𑁆𑀔𑀺𑀧𑁂𑀢𑀻𑀲𑀼 𑀬𑀓𑁆𑀔𑀺𑀧𑁂𑀢𑀺𑀲𑀜𑁆𑀜𑀺𑀦𑁄 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀢𑀸𑀲𑀁 𑀓𑀸𑀬𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀧𑀡𑁆𑀟𑀓𑀕𑁆𑀕𑀳𑀡𑁂𑀦 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀧𑀺 𑀕𑀬𑁆𑀳𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. ‘‘𑀇𑀢𑁆𑀣𑀺𑀬𑀸 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀧𑀡𑁆𑀟𑀓𑀸𑀤𑀺𑀲𑀜𑁆𑀜𑀺𑀦𑁄𑀧𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀩𑀤𑁆𑀥𑀁 𑀨𑀼𑀲𑀢𑁄 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸’’𑀢𑀺 𑀦 𑀬𑁄𑀚𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀢𑀣𑀸 𑀬𑁄𑀚𑀦𑀸𑀬𑀁 𑀧𑀸𑀴𑀺𑀬𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀦 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄.

‘‘𑀤𑀼𑀓𑁆𑀓𑀝𑀁 𑀓𑀸𑀬𑀲𑀁𑀲𑀕𑁆𑀕𑁂, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀦𑀬𑁂 𑀲𑀗𑁆𑀕𑀳𑀺𑀢𑁂𑀧𑀺 𑀢𑁂𑀦𑁂𑀯 𑀦𑀬𑁂𑀦 𑀧𑀡𑁆𑀟𑀓𑁂 ¶ 𑀯𑀺𑀫𑀢𑀺𑀇𑀢𑁆𑀣𑀺𑀲𑀜𑁆𑀜𑀺𑀢𑀸𑀤𑀺𑀅𑀜𑁆𑀜𑀫𑀢𑀺𑀧𑀓𑁆𑀔𑁂 𑀘 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑁂𑀲𑀼 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀯𑀺𑀫𑀢𑀺𑀧𑀡𑁆𑀟𑀓𑀸𑀤𑀺𑀅𑀜𑁆𑀜𑀫𑀢𑀺𑀧𑀓𑁆𑀔𑁂 𑀘 𑀇𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀓𑀸𑀬𑀧𑀝𑀺𑀩𑀤𑁆𑀥𑀸𑀫𑀲𑀦𑀸𑀤𑀻𑀲𑀼 𑀘 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀲𑀩𑁆𑀩𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀉𑀧𑀮𑀓𑁆𑀔𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁪𑁨. 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁂𑀦 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑀁 𑀨𑀼𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀦 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀤𑀼𑀓𑁆𑀓𑀝𑀸𑀦𑀁 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀘-𑀲𑀤𑁆𑀤𑁂𑀦 𑀧𑀦 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 ‘‘𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀁 𑀆𑀫𑀲𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀫𑀲𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁭𑁬) 𑀧𑀸𑀴𑀺𑀬𑀁 𑀆𑀕𑀢𑀤𑀼𑀓𑁆𑀓𑀝𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁩-𑁪. 𑀦 𑀓𑁂𑀯𑀮𑀁 𑀧𑀤𑀪𑀸𑀚𑀦𑀸𑀕𑀢𑀇𑀢𑁆𑀣𑀺𑀲𑀭𑀻𑀭𑀸𑀤𑀺𑀓𑀫𑁂𑀯 𑀅𑀦𑀸𑀫𑀸𑀲𑀁, 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀤𑀸𑀭𑀼𑀥𑀻𑀢𑀮𑀺𑀓𑀯𑀢𑁆𑀣𑀼𑀅𑀦𑀼𑀮𑁄𑀫𑀢𑁄 𑀧𑁄𑀢𑁆𑀣𑀮𑀺𑀓𑀸𑀤𑀺𑀇𑀢𑁆𑀣𑀺𑀭𑀽𑀧𑀓𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀯𑀸𑀭𑀸𑀦𑀼𑀮𑁄𑀫𑀢𑁄 𑀅𑀲𑀭𑀻𑀭𑀝𑁆𑀞𑀁 𑀫𑀸𑀢𑀼𑀕𑀸𑀫𑁂𑀳𑀺 𑀧𑀭𑀺𑀪𑀼𑀢𑁆𑀢𑀯𑀢𑁆𑀣𑀸𑀪𑀭𑀡𑀸𑀤𑀺𑀜𑁆𑀘 𑀯𑀺𑀪𑀗𑁆𑀕𑀓𑁆𑀔𑀦𑁆𑀥𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀝𑁆𑀞𑀓𑀣𑀸𑀕𑀢𑀁 𑀅𑀯𑀲𑁂𑀲𑀁 𑀅𑀦𑀸𑀫𑀸𑀲𑀯𑀢𑁆𑀣𑀼𑀜𑁆𑀘 𑀆𑀫𑀲𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀇𑀢𑁆𑀣𑀻𑀦’’𑀦𑁆𑀢𑀺𑀆𑀤𑀺.

‘‘𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀭𑀽𑀧𑀜𑁆𑀘𑀸’’𑀢𑀺 𑀇𑀤𑀁 ‘‘𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁 (𑀧𑀸𑀭𑀸. 𑁩𑁪), 𑀲𑀤𑁆𑀥𑀸𑀦𑀁 𑀲𑀤𑁆𑀥𑀸𑀧𑀭𑀸𑀬𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑁆𑀣𑀻𑀦𑀁 𑀤𑀸𑀭𑀼𑀮𑁄𑀳𑀫𑀬𑀸𑀤𑀺𑀓𑀁 𑀇𑀢𑁆𑀣𑀺𑀭𑀽𑀧𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀫𑀢𑁆𑀢𑀺𑀓𑀸𑀬, 𑀧𑀺𑀝𑁆𑀞𑁂𑀦 𑀯𑀸 𑀓𑀢𑀁 𑀫𑀸𑀢𑀼𑀕𑀸𑀫𑀭𑀽𑀧𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀸𑀢𑀼𑀕𑀸𑀫𑀭𑀽𑀧𑀁 𑀬𑁂𑀦 𑀓𑁂𑀦𑀘𑀺 𑀤𑀺𑀦𑁆𑀦𑀁 𑀲𑀩𑁆𑀩𑀭𑀢𑀦𑀫𑀬𑀁 𑀯𑀺𑀦𑀸 𑀅𑀯𑀲𑁂𑀲𑀁 𑀲𑀸𑀤𑀺𑀬𑀺𑀢𑁆𑀯𑀸 ¶ 𑀪𑀺𑀦𑁆𑀤𑀺𑀢𑁆𑀯𑀸 ¶ 𑀲𑀫𑀡𑀲𑀸𑀭𑀼𑀧𑁆𑀧𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑀸𑀧𑁂𑀢𑀼𑀁, 𑀅𑀨𑀼𑀲𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁂 𑀯𑀸 𑀬𑁄𑀚𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀯𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀤𑁆𑀯𑀬𑀫𑁆𑀧𑀺 𑀲𑀸𑀫𑀜𑁆𑀜𑁂𑀦 𑀕𑀳𑀺𑀢𑀁. 𑀇𑀤𑀜𑁆𑀘 𑀫𑀸𑀢𑀼𑀕𑀸𑀫𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀞𑀧𑀺𑀢𑀫𑁆𑀧𑀺 𑀅𑀦𑀸𑀫𑀸𑀲𑀫𑁂𑀯, 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀢𑀺𑀡𑀘𑀼𑀫𑁆𑀩𑀝𑀓𑀁, 𑀅𑀗𑁆𑀕𑀼𑀮𑀺𑀬𑀸 𑀧𑀡𑁆𑀡𑀫𑀼𑀤𑁆𑀤𑀺𑀓𑀁 𑀉𑀧𑀸𑀤𑀸𑀬 𑀅𑀮𑀗𑁆𑀓𑀸𑀭𑀫𑁂𑀯. 𑀏𑀢𑁆𑀣 𑀘 𑀯𑀸𑀮𑀓𑁂𑀲𑀯𑀝𑁆𑀝𑀓𑁂𑀲𑁂𑀲𑀼 𑀧𑀯𑁂𑀲𑀦𑀓𑀤𑀦𑁆𑀢𑀲𑀽𑀘𑀺𑀆𑀤𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀺𑀬𑁆𑀬𑀫𑀸𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀣𑀚𑀸𑀢𑀨𑀮𑀁 𑀔𑀚𑁆𑀚𑀦𑁆𑀢𑀺 𑀭𑀼𑀓𑁆𑀔𑁂 𑀞𑀺𑀢𑀁 𑀔𑀸𑀤𑀺𑀢𑀩𑁆𑀩𑀁 𑀧𑀦𑀲𑀦𑀸𑀴𑀺𑀓𑁂𑀭𑀸𑀤𑀺𑀨𑀮𑀜𑁆𑀘 𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀨𑀮𑀜𑁆𑀘 ‘‘𑀫𑀦𑀼𑀲𑁆𑀲𑁂𑀳𑀺 𑀭𑀸𑀲𑀺𑀓𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀫𑀸𑀲𑀦𑁆𑀢𑀺 𑀉𑀧𑀮𑀓𑁆𑀔𑀡𑀢𑁄 𑀇𑀫𑀺𑀦𑀸𑀯 𑀕𑀳𑁂𑀢𑀩𑁆𑀩𑀁. 𑀅𑀭𑀜𑁆𑀜𑁂 𑀭𑀼𑀓𑁆𑀔𑀢𑁄 𑀧𑀢𑀺𑀢𑀁 𑀨𑀮𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀫𑀼𑀕𑁆𑀕𑀸𑀤𑀺𑀁 𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺 𑀉𑀧𑀮𑀓𑁆𑀔𑀡𑀧𑀤𑀢𑁆𑀢𑀸 𑀕𑀘𑁆𑀙𑀢𑁄 𑀯𑀺𑀬𑀼𑀢𑁆𑀢𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀫𑀼𑀕𑁆𑀕𑀸𑀤𑀺𑀦𑁆𑀢𑀺 𑀏𑀢𑁆𑀣 ‘‘𑀅𑀧𑀭𑀡𑁆𑀡’’𑀦𑁆𑀢𑀺 𑀧𑀸𑀞𑀲𑁂𑀲𑁄.

𑀲𑀩𑁆𑀩𑀸𑀦𑀺 𑀥𑀜𑁆𑀜𑀸𑀦𑀻𑀢𑀺 ‘‘𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼, 𑀓𑀼𑀤𑁆𑀭𑀽𑀲𑀯𑀭𑀓𑀕𑁄𑀥𑀼𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀥𑀜𑁆𑀜𑀸𑀦𑀺. 𑀔𑁂𑀢𑁆𑀢𑀫𑀕𑁆𑀕𑁂𑀦 𑀕𑀘𑁆𑀙𑀢𑀸 𑀲𑀸𑀮𑀺𑀲𑀻𑀲𑁂 𑀳𑀢𑁆𑀣𑁂𑀦 𑀅𑀨𑀼𑀲𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀫𑀕𑁆𑀕𑁄 𑀲𑀫𑁆𑀩𑀸𑀥𑁄 𑀳𑁄𑀢𑀺, 𑀲𑀭𑀻𑀭𑁂 𑀥𑀜𑁆𑀜𑀁 𑀨𑀼𑀲𑀦𑁆𑀢𑁂𑀧𑀺 𑀫𑀕𑁆𑀕𑀢𑁆𑀢𑀸 𑀦 𑀤𑁄𑀲𑁄. 𑀯𑀻𑀣𑀺𑀬𑀁, 𑀕𑁂𑀳𑀗𑁆𑀕𑀡𑁂 𑀯𑀸 𑀥𑀜𑁆𑀜𑁂𑀲𑀼 𑀧𑀲𑀸𑀭𑀺𑀢𑁂𑀲𑀼 𑀅𑀧𑀲𑀓𑁆𑀓𑀺𑀢𑁆𑀯𑀸 𑀘𑁂 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, ‘‘𑀫𑀕𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀇𑀫𑀁 𑀫𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀓𑀼𑀮𑀕𑁂𑀳𑁂 𑀥𑀜𑁆𑀜𑀫𑀢𑁆𑀣𑀓𑁂 𑀘𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺, 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀆𑀲𑀦𑀲𑀸𑀮𑀸𑀬𑀁 𑀥𑀜𑁆𑀜𑁂 𑀯𑀺𑀧𑁆𑀧𑀓𑀺𑀡𑁆𑀡𑁂 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀻𑀞𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 ¶ 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀢𑀲𑁆𑀫𑀺𑀁 𑀥𑀜𑁆𑀜𑀫𑀢𑁆𑀣𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑀸 𑀢𑀢𑁆𑀣 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁩𑁪𑁫. 𑀥𑀫𑀦𑀲𑀗𑁆𑀔𑀸𑀤𑀺𑀁 𑀲𑀩𑁆𑀩𑀁 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑀫𑁆𑀧𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀫𑀦𑀲𑀗𑁆𑀔𑁄 𑀦𑀸𑀫 𑀲𑀤𑁆𑀤𑀓𑀭𑀡𑀲𑀗𑁆𑀔𑁄 ¶ . 𑀆𑀤𑀺-𑀲𑀤𑁆𑀤𑁂𑀦 𑀯𑀁𑀲𑀲𑀺𑀗𑁆𑀕𑀢𑀸𑀴𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑀦𑁆𑀢𑀺 𑀆𑀢𑀢𑀁, 𑀯𑀺𑀢𑀢𑀁, 𑀆𑀢𑀢𑀯𑀺𑀢𑀢𑀁, 𑀖𑀦𑀁, 𑀲𑀼𑀲𑀺𑀭𑀦𑁆𑀢𑀺 𑀧𑀜𑁆𑀘𑀗𑁆𑀕𑀲𑀗𑁆𑀔𑀸𑀢𑀁 𑀢𑀼𑀭𑀺𑀬𑀁. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 𑀑𑀦𑀤𑁆𑀥𑀁 𑀏𑀓𑀢𑀮𑀢𑀼𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 𑀑𑀦𑀤𑁆𑀥𑀁 𑀉𑀪𑀬𑀢𑀮𑀢𑀼𑀭𑀺𑀬𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑁄 𑀘 𑀫𑀚𑁆𑀛𑀢𑁄 𑀘 𑀲𑀩𑁆𑀩𑀢𑁄 𑀧𑀭𑀺𑀬𑁄𑀦𑀦𑁆𑀥𑀺𑀢𑀁. 𑀖𑀦𑀁 𑀲𑀫𑁆𑀫𑀸𑀤𑀺. 𑀲𑀫𑁆𑀫𑀦𑁆𑀢𑀺 𑀢𑀸𑀴𑀁, 𑀖𑀡𑁆𑀝𑀸𑀓𑀺𑀗𑁆𑀓𑀡𑀺𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄. 𑀲𑀼𑀲𑀺𑀭𑀦𑁆𑀢𑀺 𑀯𑀁𑀲𑀸𑀤𑀺.

𑀇𑀥 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀪𑁂𑀭𑀺𑀧𑁄𑀓𑁆𑀔𑀭𑀜𑁆𑀘 𑀪𑁂𑀭𑀺𑀢𑀮𑀘𑀫𑁆𑀫𑀜𑁆𑀘 𑀯𑀻𑀡𑀸 𑀘 𑀯𑀻𑀡𑀸𑀧𑁄𑀓𑁆𑀔𑀭𑀘𑀫𑁆𑀫𑀜𑁆𑀘 𑀤𑀡𑁆𑀟𑁄 𑀘 𑀅𑀦𑀸𑀫𑀸𑀲𑀁. ‘‘𑀧𑀽𑀚𑀁 𑀓𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀞𑀧𑀺𑀢𑀪𑁂𑀭𑀺𑀬𑁄 𑀅𑀘𑀸𑀮𑁂𑀦𑁆𑀢𑁂𑀦 𑀅𑀯𑀲𑁂𑀲𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀓𑀘𑀯𑀭𑀙𑀟𑁆𑀟𑀦𑀓𑀸𑀮𑁂 𑀓𑀘𑀯𑀭𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀼𑀭𑀺𑀬𑀪𑀡𑁆𑀟𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀤𑀻𑀬𑀫𑀸𑀦𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑀼𑀁 𑀅𑀥𑀺𑀯𑀸𑀲𑁂𑀢𑀩𑁆𑀩𑀁. 𑀤𑁄𑀡𑀺 𑀯𑀸 𑀧𑁄𑀓𑁆𑀔𑀭𑀁 𑀯𑀸 𑀤𑀦𑁆𑀢𑀓𑀝𑁆𑀞𑀦𑀺𑀓𑁆𑀔𑀺𑀧𑀦𑀢𑁆𑀣𑀸𑀬, 𑀘𑀫𑁆𑀫𑀜𑁆𑀘 𑀲𑀢𑁆𑀣𑀓𑁄𑀲𑀓𑀭𑀡𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀭𑀢𑀦𑀸𑀦𑀺 𑀘 𑀲𑀩𑁆𑀩𑀸𑀦𑀻𑀢𑀺 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀯𑀼𑀢𑁆𑀢𑀸𑀦𑀺 𑀲𑀩𑁆𑀩𑀸𑀦𑀺 𑀭𑀢𑀦𑀸𑀦𑀺 𑀘. 𑀏𑀢𑁆𑀣 𑀘 𑀯𑀺𑀤𑁆𑀥𑀸, 𑀅𑀯𑀺𑀤𑁆𑀥𑀸 𑀯𑀸 𑀲𑀸𑀫𑀼𑀤𑁆𑀤𑀺𑀓𑀸𑀤𑀻 𑀲𑀩𑁆𑀩𑀸𑀧𑀺 𑀫𑀼𑀢𑁆𑀢𑀸 𑀅𑀦𑀸𑀫𑀸𑀲𑀸. 𑀪𑀡𑁆𑀟𑀫𑀽𑀮𑀢𑁆𑀣𑀜𑁆𑀘 𑀕𑀡𑁆𑀳𑀺𑀢𑀼𑀁 ¶ 𑀦 𑀯𑀝𑁆𑀝𑀢𑀺. 𑀅𑀦𑁆𑀢𑀫𑀲𑁄 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺 𑀥𑁄𑀢𑀯𑀺𑀤𑁆𑀥𑁄 𑀅𑀦𑀸𑀫𑀸𑀲𑁄. 𑀆𑀳𑀢𑀸𑀓𑀸𑀭𑁂𑀦𑁂𑀯 𑀞𑀺𑀢𑁄 𑀅𑀯𑀺𑀤𑁆𑀥𑀸𑀥𑁄𑀢𑁄 𑀫𑀡𑀺 𑀧𑀢𑁆𑀢𑀸𑀤𑀺 𑀪𑀡𑁆𑀟𑀫𑀽𑀮𑀢𑁆𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀧𑀘𑀺𑀢𑁆𑀯𑀸 𑀓𑀢𑁄 𑀓𑀸𑀘𑀫𑀡𑀺𑀬𑁂𑀯𑁂𑀓𑁄 𑀯𑀝𑁆𑀝𑀢𑀺. 𑀯𑁂𑀴𑀼𑀭𑀺𑀬𑁂 𑀘 𑀫𑀡𑀺𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀥𑀫𑀦𑀲𑀗𑁆𑀔𑁄 ‘‘𑀲𑀩𑁆𑀩𑀁 𑀥𑀫𑀦𑀲𑀗𑁆𑀔𑀸𑀤𑀺’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀢𑀼𑀭𑀺𑀬𑁂𑀲𑀼 𑀕𑀳𑀺𑀢𑁄. 𑀭𑀢𑀦𑀔𑀘𑀺𑀢𑁄 𑀲𑀗𑁆𑀔𑁄 𑀅𑀦𑀸𑀫𑀸𑀲𑁄. 𑀧𑀸𑀦𑀻𑀬𑀲𑀗𑁆𑀔𑁄 𑀥𑁄𑀢𑁄𑀧𑀺 𑀅𑀥𑁄𑀢𑁄𑀧𑀺 𑀆𑀫𑀸𑀲𑁄. 𑀅𑀯𑀲𑁂𑀲𑀲𑀗𑁆𑀔𑁄 𑀧𑀦 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀢𑁆𑀣𑀁, 𑀧𑀢𑁆𑀢𑀸𑀤𑀺𑀪𑀡𑁆𑀟𑀫𑀽𑀮𑀪𑀸𑀯𑁂𑀦 𑀘 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀯𑀡𑁆𑀡𑁂𑀦 𑀏𑀓𑀢𑁄 𑀯𑀺𑀮𑀺𑀬𑀸𑀧𑁂𑀢𑁆𑀯𑀸 𑀓𑀢𑀸 𑀫𑀼𑀕𑁆𑀕𑀯𑀡𑁆𑀡𑀸 𑀲𑀺𑀮𑀸 𑀅𑀦𑀸𑀫𑀸𑀲𑀸. 𑀲𑁂𑀲𑀸 𑀲𑀺𑀮𑀸 𑀔𑀼𑀤𑁆𑀤𑀓𑀦𑀺𑀲𑀸𑀦𑀸𑀤𑀺𑀓𑀫𑁆𑀫𑀢𑁆𑀣𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀧𑀯𑀸𑀴𑀁 𑀥𑁄𑀢𑀫𑀥𑁄𑀢𑀜𑁆𑀘 𑀯𑀺𑀤𑁆𑀥𑀫𑀯𑀺𑀤𑁆𑀥𑀜𑁆𑀘 𑀲𑀩𑁆𑀩𑀣𑀸 𑀅𑀦𑀸𑀫𑀸𑀲𑀁, 𑀦𑀸𑀧𑀺 𑀅𑀥𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀴𑀧𑀝𑀺𑀫𑀸𑀘𑁂𑀢𑀺𑀬𑀸𑀦𑀺 𑀘𑁂𑀯 𑀧𑁄𑀢𑁆𑀣𑀓𑁂𑀲𑀼 𑀧𑀯𑁂𑀲𑁂𑀢𑀩𑁆𑀩𑀆𑀡𑀺𑀬𑀸 ¶ 𑀫𑀽𑀮𑁂, 𑀅𑀕𑁆𑀕𑁂𑀘 𑀧𑀯𑁂𑀲𑁂𑀢𑀩𑁆𑀩𑀁 𑀧𑀤𑀼𑀫𑀸𑀤𑀺𑀆𑀓𑀸𑀭𑁂𑀦 𑀓𑀢𑀁 𑀯𑀝𑁆𑀝𑀜𑁆𑀘 𑀦 𑀕𑀳𑁂𑀢𑀩𑁆𑀩𑀁 𑀦 𑀨𑀼𑀲𑀺𑀢𑀩𑁆𑀩𑀁.

𑀩𑀻𑀚𑀢𑁄 𑀧𑀝𑁆𑀞𑀸𑀬 𑀭𑀚𑀢𑀁, 𑀚𑀸𑀢𑀭𑀽𑀧𑀜𑁆𑀘 𑀓𑀢𑀁 𑀯𑀸 𑀳𑁄𑀢𑀼 𑀅𑀓𑀢𑀁 𑀯𑀸, 𑀲𑀩𑁆𑀩𑀲𑁄 𑀅𑀦𑀸𑀫𑀸𑀲𑀁, 𑀦 𑀘 𑀲𑀸𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀓𑀢𑀁 𑀧𑀝𑀺𑀫𑀸𑀤𑀺𑀓𑀜𑁆𑀘 𑀆𑀭𑀓𑀽𑀝𑀮𑁄𑀳𑀜𑁆𑀘 𑀅𑀦𑀸𑀫𑀸𑀲𑀦𑁆𑀢𑀺 𑀯𑀓𑁆𑀔𑀢𑀺. 𑀓𑀢𑀸𑀓𑀢𑀲𑀼𑀯𑀡𑁆𑀡𑀭𑀚𑀢𑀸𑀦𑀁 𑀅𑀲𑀸𑀤𑀺𑀬𑀺𑀢𑀩𑁆𑀩𑀢𑀸𑀬 𑀇𑀥 𑀅𑀝𑁆𑀞𑀓𑀣𑀸𑀬 𑀆𑀕𑀢𑀢𑁆𑀢𑀸 𑀉𑀢𑁆𑀢𑀭𑁂𑀦 𑀭𑀸𑀚𑀧𑀼𑀢𑁆𑀢𑁂𑀦 𑀓𑀸𑀭𑁂𑀢𑁆𑀯𑀸 𑀆𑀳𑀝𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀼𑀯𑀡𑁆𑀡𑀧𑀝𑀺𑀫𑀸𑀘𑁂𑀢𑀺𑀬𑀧𑁄𑀢𑁆𑀣𑀓𑀸𑀯𑀘𑁆𑀙𑀸𑀤𑀓𑀫𑀡𑀺𑀧𑀤𑀼𑀫𑀯𑀝𑁆𑀝𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩𑀫𑁂𑀯, 𑀦 𑀘 𑀆𑀫𑀲𑀺𑀢𑀩𑁆𑀩𑀁. 𑀏𑀢𑁂𑀦 𑀓𑀢𑀁 𑀲𑁂𑀦𑀸𑀲𑀦𑁄𑀧𑀓𑀭𑀡𑀁 𑀧𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀥𑀫𑁆𑀫𑀫𑀡𑁆𑀟𑀧𑁂 𑀓𑀢𑀫𑁆𑀧𑀺 ¶ 𑀧𑀝𑀺𑀚𑀕𑁆𑀕𑀺𑀢𑀼𑀁 𑀯𑀝𑁆𑀝𑀢𑀺. 𑀮𑁄𑀳𑀺𑀢𑀯𑀡𑁆𑀡𑁄 𑀫𑀡𑀺, 𑀫𑀲𑀸𑀭𑀕𑀮𑁆𑀮𑀫𑀡𑀺 𑀘 𑀲𑀩𑁆𑀩𑀣𑀸 𑀅𑀦𑀸𑀫𑀸𑀲𑁄, 𑀦 𑀘 𑀅𑀥𑀺𑀯𑀸𑀲𑁂𑀢𑀩𑁆𑀩𑁄𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑁩𑁪𑁬. 𑀲𑀩𑁆𑀩𑀫𑀸𑀯𑀼𑀥𑀪𑀡𑁆𑀟𑀦𑁆𑀢𑀺 𑀔𑀕𑁆𑀕𑀸𑀤𑀺 𑀲𑀩𑁆𑀩𑀁 𑀆𑀯𑀼𑀥𑁄𑀧𑀓𑀭𑀡𑀁 𑀧𑀢𑁆𑀢𑀸𑀤𑀺𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀫𑀽𑀮𑀢𑁆𑀣𑀸𑀬 𑀤𑀻𑀬𑀫𑀸𑀦𑀁 𑀲𑀢𑁆𑀣𑀯𑀸𑀡𑀺𑀚𑀸𑀬 𑀅𑀓𑀸𑀢𑀩𑁆𑀩𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀁, ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀤𑀺𑀦𑁆𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 ‘‘𑀔𑀼𑀭𑀸𑀤𑀺𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀗𑁆𑀕𑀸𑀫𑀪𑀽𑀫𑀺𑀬𑀁 𑀫𑀕𑁆𑀕𑁂 𑀧𑀢𑀺𑀢𑀔𑀕𑁆𑀕𑀸𑀤𑀺𑀁 𑀤𑀺𑀲𑁆𑀯𑀸 𑀧𑀸𑀲𑀸𑀡𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀔𑀼𑀭𑀸𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀺 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀲𑀼𑀲𑀢𑁆𑀢𑀺𑀆𑀤𑀺𑀓𑀁 𑀨𑀮𑀢𑁄 𑀤𑀡𑁆𑀟𑀁 𑀅𑀧𑀦𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁.

𑀚𑀺𑀬𑀸𑀢𑀺 𑀥𑀦𑀼𑀕𑀼𑀡𑁄. 𑀘-𑀓𑀸𑀭𑁂𑀦 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀯𑀼𑀢𑁆𑀢𑀁 𑀅𑀗𑁆𑀓𑀼𑀲𑀢𑁄𑀫𑀭𑀸𑀤𑀺𑀁 𑀧𑀭𑀳𑀺𑀁 𑀲𑁄𑀧𑀓𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀥𑀦𑀼𑀤𑀡𑁆𑀟𑀓𑁄𑀢𑀺 𑀚𑀺𑀬𑀸𑀯𑀺𑀭𑀳𑀺𑀢𑁄 𑀥𑀦𑀼𑀤𑀡𑁆𑀟𑀓𑁄. 𑀇𑀤𑀁 𑀧𑀭𑀳𑀺𑀁𑀲𑁄𑀧𑀓𑀭𑀡𑀪𑀡𑁆𑀟𑀸𑀤𑀺𑀓𑀁 𑀯𑀺𑀳𑀸𑀭𑁂 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀧𑀺𑀢𑀁 𑀘𑁂, 𑀲𑀸𑀫𑀺𑀓𑀸𑀦𑀁 𑀯𑀢𑁆𑀯𑀸 𑀢𑁂𑀳𑀺 𑀅𑀕𑁆𑀕𑀳𑀺𑀢𑀁 𑀘𑁂, 𑀅𑀘𑀸𑀮𑁂𑀦𑁆𑀢𑁂𑀦 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁.

𑀚𑀸𑀮𑀜𑁆𑀘𑀸𑀢𑀺 𑀫𑀘𑁆𑀙𑀚𑀸𑀮𑀧𑀓𑁆𑀔𑀺𑀚𑀸𑀮𑀸𑀤𑀺𑀚𑀸𑀮𑀜𑁆𑀘. 𑀚𑀸𑀮𑀁 𑀤𑀻𑀬𑀫𑀸𑀦𑀁 𑀙𑀢𑁆𑀢𑀯𑁂𑀞𑀦𑀢𑁆𑀣𑀁, 𑀆𑀲𑀦𑀘𑁂𑀢𑀺𑀬𑀸𑀤𑀺𑀫𑀢𑁆𑀣𑀓𑁂 𑀩𑀦𑁆𑀥𑀦𑀸𑀤𑀺𑀧𑀬𑁄𑀚𑀦𑁂 𑀲𑀢𑀺 𑀢𑀤𑀢𑁆𑀣𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀲𑀭𑀯𑀸𑀭𑀡𑀁 𑀦𑀸𑀫 𑀨𑀮𑀓𑀸𑀤𑀺𑀓𑀁 𑀅𑀜𑁆𑀜𑁂𑀳𑀺 𑀅𑀢𑁆𑀢𑀦𑁄 𑀯𑀺𑀚𑁆𑀛𑀦𑀢𑁆𑀣𑀸𑀬 𑀯𑀺𑀲𑁆𑀲𑀝𑁆𑀞𑀲𑀭𑀦𑀺𑀯𑀸𑀭𑀡𑀁 𑀯𑀺𑀦𑀸𑀲𑀦𑁄𑀧𑀭𑁄𑀥𑀓𑀸𑀭𑀡𑀁 𑀳𑁄𑀢𑀻𑀢𑀺 𑀪𑀡𑁆𑀟𑀫𑀽𑀮𑀢𑁆𑀣𑀁 𑀲𑀸𑀤𑀺𑀢𑀼𑀁 ¶ 𑀯𑀝𑁆𑀝𑀢𑀺. ‘‘𑀤𑀦𑁆𑀢𑀓𑀝𑁆𑀞𑀸𑀥𑀸𑀭𑀨𑀮𑀓𑀸𑀤𑀺 𑀬𑀤𑀺𑀘𑁆𑀙𑀺𑀢𑀁 𑀓𑀭𑁄𑀫𑀻’’𑀢𑀺 𑀫𑀼𑀝𑁆𑀞𑀺𑀁 𑀅𑀧𑀦𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁩𑁪𑁭. 𑀘𑁂𑀢𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀯𑀡𑁆𑀡𑀘𑁂𑀢𑀺𑀬’’𑀦𑁆𑀢𑀺 𑀇𑀤𑀁 ‘‘𑀲𑀼𑀯𑀡𑁆𑀡𑀧𑀝𑀺𑀩𑀺𑀫𑁆𑀩𑀸𑀤𑀻’’𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑁆𑀢𑀸 𑀮𑀩𑁆𑀪𑀢𑀺. 𑀲𑀼𑀯𑀡𑁆𑀡𑀕𑁆𑀕𑀳𑀡𑀜𑁆𑀘𑀼𑀧𑀮𑀓𑁆𑀔𑀡𑀦𑁆𑀢𑀺 𑀭𑀚𑀢𑀫𑀬𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀆𑀭𑀓𑀽𑀝𑀓𑀦𑁆𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀮𑁄𑀳𑀯𑀺𑀲𑁂𑀲𑀫𑀸𑀳 ¶ . ‘‘𑀅𑀦𑀸𑀫𑀸𑀲’’𑀦𑁆𑀢𑀺 𑀇𑀤𑀁 ‘‘𑀅𑀲𑀫𑁆𑀧𑀝𑀺𑀘𑁆𑀙𑀺𑀬𑀁 𑀯𑀸’’𑀢𑀺 𑀏𑀢𑀲𑁆𑀲 𑀉𑀧𑀮𑀓𑁆𑀔𑀡𑀁.

𑁩𑁪𑁮. 𑀲𑀩𑁆𑀩𑀁 𑀯𑀸𑀤𑀺𑀢𑀫𑀺𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀦𑀳𑀺𑀢𑀼𑀦𑁆𑀢𑀺 𑀘𑀫𑁆𑀫𑀯𑀭𑀢𑁆𑀢𑀢𑀦𑁆𑀢𑀻𑀳𑀺 𑀩𑀦𑁆𑀥𑀺𑀢𑀼𑀁. 𑀑𑀦𑀳𑀸𑀧𑁂𑀢𑀼𑀦𑁆𑀢𑀺 𑀢𑀣𑁂𑀯 𑀅𑀜𑁆𑀜𑁂𑀳𑀺 𑀓𑀸𑀭𑀸𑀧𑁂𑀢𑀼𑀁. 𑀯𑀸𑀤𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑁂𑀳𑀺 𑀯𑀸𑀤𑀸𑀧𑁂𑀢𑀼𑀁. 𑀯𑀸𑀤𑁂𑀢𑀼𑀦𑁆𑀢𑀺 𑀅𑀢𑁆𑀢𑀦𑀸 𑀯𑀸𑀤𑁂𑀢𑀼𑀁. 𑀯𑀸𑀤𑀺𑀢𑀦𑁆𑀢𑀺 𑀯𑀸𑀤𑀦𑀻𑀬𑀁 𑀬𑀣𑀸 ‘‘𑀓𑀭𑀡𑀻𑀬𑀁 𑀓𑀸𑀭𑀺𑀢’’𑀦𑁆𑀢𑀺, 𑀯𑀸𑀤𑀦𑀸𑀭𑀳𑀁 𑀢𑀼𑀭𑀺𑀬𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀑𑀦𑀳𑀦𑀸𑀤𑀺𑀓𑀺𑀭𑀺𑀬𑀸𑀬 𑀓𑀫𑁆𑀫𑀁.

𑁩𑁪𑁯. 𑀉𑀧𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫. 𑀇𑀢𑀺 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑀸𑀬. 𑀯𑀢𑁆𑀢𑀩𑁆𑀩𑀸𑀢𑀺 𑀢𑁂 𑀯𑀢𑁆𑀢𑀸𑀭𑁄 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁩𑁫𑁦-𑁧. 𑀥𑀼𑀢𑁆𑀢𑀺𑀬𑀸 𑀇𑀢𑁆𑀣𑀺𑀬𑀸𑀢𑀺 𑀯𑀺𑀧𑀦𑁆𑀦𑀸𑀘𑀸𑀭𑀸𑀬 𑀮𑁄𑀴𑀺𑀢𑁆𑀣𑀺𑀬𑀸. 𑀲𑀬𑀁 𑀨𑀼𑀲𑀺𑀬𑀫𑀸𑀦𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄 𑀧𑀬𑁄𑀕𑀁 𑀯𑀺𑀦𑀸 𑀇𑀢𑁆𑀣𑀺𑀬𑀸 𑀅𑀢𑁆𑀢𑀦𑀸𑀯 𑀨𑀼𑀲𑀺𑀬𑀫𑀸𑀦𑀲𑁆𑀲. 𑀓𑀸𑀬𑁂𑀦 𑀅𑀯𑀸𑀬𑀫𑀺𑀢𑁆𑀯𑀸𑀢𑀺 𑀢𑀲𑁆𑀲𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑀸𑀦𑀼𑀪𑀯𑀦𑀢𑁆𑀣𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸. 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀢𑁄𑀢𑀺 𑀨𑀲𑁆𑀲𑀁 𑀅𑀦𑀼𑀪𑀯𑀦𑁆𑀢𑀲𑁆𑀲.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀏𑀢𑁆𑀣 ‘‘𑀨𑀼𑀲𑀦𑁂’’𑀢𑀺 𑀧𑀸𑀞𑀲𑁂𑀲𑁄, ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀁 𑀨𑀼𑀲𑀸𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀇𑀫𑀺𑀦𑀸 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 𑀉𑀧𑀸𑀬𑁂𑀦 𑀏𑀢𑀺𑀲𑁆𑀲𑀸 𑀲𑀭𑀻𑀭𑀲𑀫𑁆𑀨𑀲𑁆𑀲𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀢𑁆𑀢𑀣𑀸𑀮𑀓𑀢𑀝𑁆𑀝𑀓𑀧𑀡𑁆𑀡𑀧𑀼𑀝𑀪𑁂𑀲𑀚𑁆𑀚𑀸𑀤𑀺𑀁 𑀧𑀝𑀺𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀳𑀢𑁆𑀣𑁂 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀨𑀼𑀲𑀦𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀲𑁆𑀲𑀢𑀺𑀬𑀸’’𑀢𑀺 𑀇𑀤𑀁 𑀧𑀦 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀭𑀻𑀭𑁂 𑀨𑀼𑀲𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀅𑀜𑁆𑀜𑀯𑀺𑀳𑀺𑀢𑁄 𑀳𑀼𑀢𑁆𑀯𑀸 𑀲𑀢𑀺𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑀧𑀲𑀸𑀭𑀡𑀸𑀤𑀻𑀲𑀼 𑀨𑀼𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 ¶ 𑀤𑀸𑀭𑀓𑀸𑀓𑀸𑀭𑀁 𑀤𑀸𑀭𑀺𑀓𑀁 ‘‘𑀫𑀸𑀢𑀼𑀕𑀸𑀫𑁄’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀨𑀼𑀲𑀦𑁆𑀢𑀲𑁆𑀲 ¶ . 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀺𑀦𑁄 𑀘𑀸𑀢𑀺 ‘‘𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁭𑁯) 𑀯𑀼𑀢𑁆𑀢𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀯𑀢𑁄 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀇𑀫𑁂𑀲𑀼 𑀬𑁄 𑀫𑀸𑀢𑀼𑀕𑀸𑀫𑁂𑀦 𑀆𑀮𑀺𑀗𑁆𑀕𑀦𑀸𑀤𑀺𑀧𑀬𑁄𑀕𑁂𑀦 𑀅𑀚𑁆𑀛𑁄𑀢𑁆𑀣𑀭𑀬𑀫𑀸𑀦𑁄 𑀢𑀁 𑀅𑀢𑁆𑀢𑀦𑁄 𑀲𑀭𑀻𑀭𑀢𑁄 𑀅𑀧𑀦𑁂𑀢𑁆𑀯𑀸 𑀫𑀼𑀜𑁆𑀘𑀺𑀢𑀼𑀓𑀸𑀫𑁄 𑀳𑀢𑁆𑀣𑀘𑀸𑀮𑁂𑀦, 𑀫𑀼𑀝𑁆𑀞𑀺𑀆𑀤𑀻𑀳𑀺 𑀯𑀸 𑀧𑀝𑀺𑀧𑀡𑀸𑀫𑀦𑀁, 𑀧𑀳𑀭𑀡𑀸𑀤𑀺𑀓𑀜𑁆𑀘 𑀧𑀬𑁄𑀕𑀁 𑀓𑀭𑁄𑀢𑀺, 𑀅𑀬𑀁 𑀧𑀞𑀫𑁄 𑀧𑀼𑀕𑁆𑀕𑀮𑁄. 𑀅𑀢𑁆𑀢𑀸𑀦𑀫𑀚𑁆𑀛𑁄𑀢𑁆𑀣𑀭𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀧𑀳𑀭𑀡𑀸𑀓𑀸𑀭𑀸𑀤𑀺𑀲𑀩𑁆𑀩𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀨𑀼𑀲𑀺𑀢𑀼𑀁 𑀅𑀤𑁂𑀦𑁆𑀢𑁄 𑀤𑀼𑀢𑀺𑀬𑁄. 𑀇𑀢𑁆𑀣𑀺𑀬𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁄 𑀘𑁄𑀧𑀦𑀭𑀳𑀺𑀢𑀁 𑀫𑀁 ‘‘𑀅𑀦𑀢𑁆𑀣𑀺𑀓𑁄’’𑀢𑀺 𑀫𑀦𑁆𑀢𑁆𑀯𑀸 ‘‘𑀲𑀬𑀫𑁂𑀯 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺, ‘‘𑀅𑀘𑁄𑀧𑀦𑀫𑁂𑀯 𑀫𑁄𑀓𑁆𑀔𑁄𑀧𑀸𑀬𑁄’’𑀢𑀺 𑀜𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀢𑀢𑀺𑀬𑁄. 𑀅𑀢𑁆𑀢𑀸𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀼𑀫𑀸𑀕𑀘𑁆𑀙𑀦𑁆𑀢𑀺𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀤𑀼𑀢𑀺𑀬𑁄 𑀯𑀺𑀬 𑀢𑀸𑀲𑁂𑀢𑀼𑀁 𑀓𑀸𑀬𑀧𑁆𑀧𑀬𑁄𑀕𑀁 𑀅𑀓𑀢𑁆𑀯𑀸 ‘‘𑀅𑀕𑀢𑁂 𑀧𑀸𑀢𑁂𑀲𑁆𑀲𑀸𑀫𑀺, 𑀧𑀳𑀭𑀺𑀢𑁆𑀯𑀸 𑀢𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁄 𑀘𑀢𑀼𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁫𑁨. 𑀧𑀞𑀫𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄, 𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀘𑀺𑀢𑁆𑀢𑀁 𑀦𑀸𑀫 ¶ 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀫𑁆𑀳𑀺 𑀫𑁄𑀘𑁂𑀢𑀼𑀓𑀸𑀫𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁.

𑀓𑀸𑀬𑀲𑀁𑀲𑀕𑁆𑀕𑀓𑀣𑀸𑀯𑀡𑁆𑀡𑀦𑀸.

𑁩𑁫𑁩-𑁪. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦𑀸𑀢𑀺 𑀤𑀼𑀝𑁆𑀞𑀼 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀤𑀼𑀝𑁆𑀞𑀼𑀮𑁆𑀮𑀸, 𑀤𑀼𑀝𑁆𑀞𑀼𑀮𑁆𑀮𑀸 𑀘 𑀲𑀸 𑀯𑀸𑀘𑀸 𑀘𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸, 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸, 𑀬𑀣𑀸𑀳 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀯𑀸𑀘𑀸 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸’’𑀢𑀺 (𑀧𑀸𑀭𑀸. 𑁨𑁮𑁫), 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀅𑀲𑁆𑀲𑀸𑀤𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁄, 𑀢𑀣𑀸𑀧𑀯𑀢𑁆𑀢𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀭𑀸𑀕𑁄 𑀇𑀥 𑀲𑀳𑀘𑀭𑀺𑀬𑁂𑀦 ‘‘𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑁄, 𑀢𑁂𑀦, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑁂𑀦 ¶ 𑀭𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 ‘‘𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀓𑁆𑀔𑀫𑀸𑀦𑀑𑀪𑀸𑀲𑀦𑀲𑁆𑀲 𑀳𑁂𑀢𑀼 𑀤𑀲𑁆𑀲𑀺𑀢𑁄.

𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄𑀢𑀺 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 𑀧𑀤𑀪𑀸𑀚𑀦𑁂 𑀦𑀺𑀤𑁆𑀤𑀺𑀝𑁆𑀞𑀲𑀭𑀽𑀧𑀸𑀬 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀚𑀸𑀦𑀦𑁆𑀢𑀺𑀬𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀪𑀺𑀓𑁆𑀔𑀼𑀦𑁄𑀢𑀺 𑀅𑀢𑁆𑀣𑁄. ‘‘𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀲𑀫𑁆𑀩𑀦𑁆𑀥𑀻𑀯𑀲𑁂𑀦 ‘‘𑀇𑀢𑁆𑀣𑀺𑀬𑀸’’𑀢𑀺 𑀇𑀤𑀁 𑀲𑀸𑀫𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀘𑀸𑀢𑀺 ‘‘𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀣𑁄𑀫𑁂𑀢𑀺 𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀺. 𑀅𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀔𑀼𑀁𑀲𑁂𑀢𑀺 𑀯𑀫𑁆𑀪𑁂𑀢𑀺 𑀕𑀭𑀳𑀢𑀻’’𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀉𑀪𑁄 𑀫𑀕𑁆𑀕𑁂 𑀉𑀤𑁆𑀤𑀺𑀲𑁆𑀲 𑀣𑁄𑀫𑀦𑀕𑀭𑀳𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑁂𑀣𑀼𑀦𑀲𑁆𑀲 ¶ 𑀬𑀸𑀘𑀦𑀸𑀤𑀬𑁄 𑀫𑁂𑀣𑀼𑀦𑀬𑀸𑀘𑀦𑀸𑀤𑀬𑁄, 𑀢𑁂𑀳𑀺 𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀺, ‘‘𑀬𑀸𑀘𑀢𑀺𑀧𑀺 𑀆𑀬𑀸𑀘𑀢𑀺𑀧𑀺 𑀧𑀼𑀘𑁆𑀙𑀢𑀺𑀧𑀺 𑀧𑀝𑀺𑀧𑀼𑀘𑁆𑀙𑀢𑀺𑀧𑀺 𑀆𑀘𑀺𑀓𑁆𑀔𑀢𑀺𑀧𑀺 𑀅𑀦𑀼𑀲𑀸𑀲𑀢𑀺𑀧𑀺 𑀅𑀓𑁆𑀓𑁄𑀲𑀢𑀺𑀧𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀉𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀣𑀼𑀦𑀬𑀸𑀘𑀦𑀸𑀤𑀺𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀳𑀺 𑀤𑁆𑀯𑀻𑀳𑀺 ‘‘𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀑𑀪𑀸𑀲𑀦𑀸 𑀤𑀲𑁆𑀲𑀺𑀢𑀸. 𑀑𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀉𑀤𑁆𑀤𑁂𑀲𑀬𑀦𑁆𑀢𑀲𑁆𑀲, 𑀧𑀓𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀜𑁆𑀜𑀼’’𑀦𑁆𑀢𑀺 𑀇𑀫𑀺𑀦𑀸 𑀑𑀪𑀸𑀲𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀫𑀸𑀳, 𑀇𑀫𑀺𑀦𑀸 𑀯𑀺𑀲𑁂𑀲𑀺𑀢𑀩𑁆𑀩𑀁 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺’’𑀦𑁆𑀢𑀺 𑀇𑀤𑀁 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀬𑀣𑀸𑀤𑀲𑁆𑀲𑀺𑀢𑀧𑀤𑀪𑀸𑀚𑀦𑀸𑀕𑀢𑀲𑀭𑀽𑀧𑀁 𑀯𑀺𑀜𑁆𑀜𑀼𑀁 𑀧𑀝𑀺𑀩𑀮𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀻𑀢𑀺 𑀑𑀪𑀸𑀲𑀦𑁂 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀤𑀼𑀝𑁆𑀞𑀼𑀮𑁆𑀮𑀯𑀘𑀦𑀲𑁆𑀲𑀸𑀤𑀪𑀸𑀯𑁂 𑀲𑀢𑀺 𑀬𑁄 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀧𑀝𑀺𑀩𑀤𑁆𑀥𑀁 𑀕𑀼𑀡𑀤𑁄𑀲𑀁 𑀯𑀸 𑀫𑁂𑀣𑀼𑀦𑀥𑀫𑁆𑀫𑀬𑀸𑀘𑀦𑀸𑀤𑀺𑀯𑀲𑁂𑀦 𑀯𑀸 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀚𑀸𑀦𑀦𑁆𑀢𑀺𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀕𑀸𑀣𑀸𑀤𑁆𑀯𑀬𑁂 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀯𑀺𑀜𑁆𑀜𑀼𑀁 𑀢𑀁 𑀇𑀢𑁆𑀣𑀺𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀯𑀲𑁂𑀦 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀑𑀪𑀸𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀭𑀼𑀓𑀁 𑀲𑀺𑀬𑀸𑀢𑀺 𑀏𑀓𑀁 𑀯𑀸𑀓𑁆𑀬𑀁, 𑀢𑀣𑀸 ‘‘𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀅𑀯𑀡𑁆𑀡𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀘 ‘‘𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀻’’𑀢𑀺 𑀇𑀫𑀺𑀦𑀸 𑀘 𑀬𑁄𑀚𑀦𑀸𑀬 𑀯𑀸𑀓𑁆𑀬𑀤𑁆𑀯𑀬𑀦𑁆𑀢𑀺 𑀏𑀯𑀁 𑀬𑁄𑀚𑀦𑀸𑀯𑀲𑁂𑀦 𑀢𑀻𑀡𑀺 𑀯𑀸𑀓𑁆𑀬𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁆𑀣 ¶ 𑀧𑀞𑀫𑀯𑀸𑀓𑁆𑀬𑁂 𑀯𑀡𑁆𑀡𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀁 𑀣𑁄𑀫𑀦𑀸𑀤𑀺𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺. ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀣𑁄𑀫𑀦𑀢𑁆𑀣𑀁 𑀯𑀤𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀳𑁄𑀢𑀺, ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀈𑀤𑀺𑀲𑁄 𑀲𑀼𑀪𑁄 𑀲𑀼𑀲𑀡𑁆𑀞𑀸𑀦𑁄, 𑀢𑁂𑀦 𑀦𑀸𑀫 ¶ 𑀈𑀤𑀺𑀲𑁂𑀦 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀳𑁄𑀢𑀺. ‘‘𑀯𑀡𑁆𑀡𑁂𑀢𑀺, 𑀧𑀲𑀁𑀲𑀢𑀻’’𑀢𑀺 𑀧𑀤𑀤𑁆𑀯𑀬𑀜𑁆𑀘 ‘‘𑀣𑁄𑀫𑁂𑀢𑀻’’𑀢𑀺 𑀧𑀤𑀲𑁆𑀲 𑀧𑀭𑀺𑀬𑀸𑀬𑁄.

𑀤𑀼𑀢𑀺𑀬𑀯𑀸𑀓𑁆𑀬𑁂 𑀅𑀯𑀡𑁆𑀡𑀧𑀤𑀲𑀗𑁆𑀕𑀳𑀺𑀢𑀁 𑀔𑀼𑀁𑀲𑀦𑀸𑀤𑀺𑀢𑁆𑀢𑀬𑁂 𑀔𑀼𑀁𑀲𑀦𑀁 𑀦𑀸𑀫 𑀧𑀢𑁄𑀤𑁄𑀧𑀫𑁂𑀳𑀺 𑀨𑀭𑀼𑀲𑀯𑀘𑀦𑁂𑀳𑀺 𑀢𑀼𑀤𑀦𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀔𑀼𑀁𑀲𑁂𑀢𑀻𑀢𑀺 𑀯𑀸𑀘𑀸𑀧𑀢𑁄𑀤𑁂𑀦 𑀖𑀝𑁆𑀝𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀧𑀢𑀼𑀚𑁆𑀚𑀢𑁂𑀦𑁂𑀦𑀸𑀢𑀺 ‘‘𑀧𑀢𑁄𑀤𑁄’’𑀢𑀺𑀅𑀕𑀘𑁆𑀙𑀦𑁆𑀢𑁂 𑀅𑀲𑁆𑀲𑀸𑀤𑀬𑁄 𑀧𑀯𑀢𑁆𑀢𑁂𑀢𑀼𑀁 𑀯𑀺𑀚𑁆𑀛𑀦𑀓𑀧𑀸𑀘𑀦𑀤𑀡𑁆𑀟𑁄 𑀯𑀼𑀘𑁆𑀘𑀢𑀺. 𑀯𑀫𑁆𑀪𑀦𑀁 𑀦𑀸𑀫 𑀅𑀧𑀲𑀸𑀤𑀦𑀁. 𑀅𑀧𑀲𑀸𑀤𑀦𑀁 𑀦𑀸𑀫 𑀕𑀼𑀡𑀢𑁄 𑀧𑀭𑀺𑀳𑀸𑀧𑀦𑀁. 𑀬𑀣𑀸𑀳 ‘‘𑀯𑀫𑁆𑀪𑁂𑀢𑀻𑀢𑀺 𑀅𑀧𑀲𑀸𑀤𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀕𑀭𑀳𑀸 𑀦𑀸𑀫 𑀤𑁄𑀲𑀸𑀭𑁄𑀧𑀦𑀁. 𑀬𑀣𑀸𑀳 ‘‘𑀕𑀭𑀳𑀢𑀻𑀢𑀺 𑀤𑁄𑀲𑀁 𑀤𑁂𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫). 𑀇𑀫𑀁 𑀔𑀼𑀁𑀲𑀦𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀁 𑀯𑀓𑁆𑀔𑀫𑀸𑀦𑁂𑀲𑀼 ‘‘𑀲𑀺𑀔𑀭𑀡𑀻𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀅𑀜𑁆𑀜𑀢𑀭𑁂𑀦 𑀬𑁄𑀚𑁂𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀇𑀢𑀭𑀲𑁆𑀲.

𑀢𑀢𑀺𑀬𑀯𑀸𑀓𑁆𑀬𑁂 𑀫𑁂𑀣𑀼𑀦𑀬𑀸𑀘𑀦𑀸𑀤𑀺𑀯𑀘𑀦𑁂𑀳𑀺 𑀲𑀗𑁆𑀕𑀳𑀺𑀢𑀁 𑀆𑀬𑀸𑀘𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. ‘‘𑀬𑀸𑀘𑀢𑀺 𑀦𑀸𑀫 𑀤𑁂𑀳𑀺 𑀫𑁂 𑀅𑀭𑀳𑀲𑀺 𑀫𑁂 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁮𑁫) 𑀦𑀬𑁂𑀦 𑀏𑀓𑁂𑀓𑀁 𑀧𑀤𑀁 ‘‘𑀤𑁂𑀳𑀺 𑀫𑁂 𑀫𑁂𑀣𑀼𑀦𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑀁 𑀬𑀸𑀘𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀧𑀺𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀤𑁂𑀯𑀢𑀸𑀬𑁄 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀓𑀤𑀸 𑀢𑁂 𑀲𑀼𑀔𑀡𑁄 𑀲𑀼𑀮𑀬𑁄 𑀲𑀼𑀫𑀼𑀳𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀆𑀬𑀸𑀘𑀦𑀧𑀤𑀦𑀺𑀤𑁆𑀤𑁂𑀲𑁂 𑀏𑀓𑁂𑀓𑀁 𑀧𑀤𑀁 𑀢𑀢𑁆𑀣𑁂𑀯 𑀑𑀲𑀸𑀦𑁂 𑀯𑀼𑀢𑁆𑀢𑁂𑀦 ‘‘𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀤𑁂𑀦 𑀖𑀝𑁂𑀢𑁆𑀯𑀸 𑀫𑁂𑀣𑀼𑀦𑀁 𑀬𑀸𑀘𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀣𑀁 ¶ 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀓𑀣𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀘𑀦𑁂𑀲𑀼 𑀘 𑀅𑀜𑁆𑀜𑀢𑀭𑀁 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀖𑀝𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀏𑀯𑀁 ¶ 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀏𑀯𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀧𑀝𑀺𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀁 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀖𑀝𑁂𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲𑁂𑀯 𑀳𑁄𑀢𑀺.

‘‘𑀓𑀣𑀁 𑀤𑀤𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 ‘‘𑀏𑀯𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑀻 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀦𑀸𑀧𑀸 𑀘𑀸’’𑀢𑀺 𑀆𑀡𑀢𑁆𑀢𑀺𑀯𑀘𑀦𑁂, 𑀅𑀦𑀼𑀲𑀸𑀲𑀦𑀺𑀯𑀘𑀦𑁂 𑀘 𑀏𑀲𑁂𑀯 𑀦𑀬𑁄.

𑁩𑁫𑁫. 𑀅𑀓𑁆𑀓𑁄𑀲𑀦𑀺𑀤𑁆𑀤𑁂𑀲𑀸𑀕𑀢𑁂𑀲𑀼 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀺 𑀅𑀮𑁄𑀳𑀺𑀢𑀸𑀲𑀺 𑀥𑀼𑀯𑀮𑁄𑀳𑀺𑀢𑀸𑀲𑀺 𑀥𑀼𑀯𑀘𑁄𑀴𑀸𑀲𑀺 𑀧𑀕𑁆𑀖𑀭𑀦𑁆𑀢𑀻𑀲𑀺 𑀲𑀺𑀔𑀭𑀡𑀻𑀲𑀺 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺 𑀯𑁂𑀧𑀼𑀭𑀺𑀲𑀺𑀓𑀸𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀏𑀓𑀸𑀤𑀲𑀲𑀼 𑀧𑀤𑁂𑀲𑀼 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀧𑀤𑀢𑁆𑀢𑀬𑀁 𑀧𑀘𑁆𑀘𑁂𑀓𑀁 𑀆𑀧𑀢𑁆𑀢𑀺𑀓𑀭𑀁, 𑀇𑀫𑀺𑀦𑀸 𑀧𑀤𑀢𑁆𑀢𑀬𑁂𑀦 𑀲𑀳 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀤𑀸𑀦𑀺 𑀢𑀻𑀡𑀺 𑀘𑀸𑀢𑀺 𑀙𑀧𑁆𑀧𑀤𑀸𑀦𑀁 𑀧𑀘𑁆𑀘𑁂𑀓𑀁 𑀆𑀧𑀢𑁆𑀢𑀺𑀓𑀭𑀢𑁆𑀢𑀸 𑀇𑀢𑁄 𑀧𑀭𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀅𑀝𑁆𑀞 𑀧𑀤𑀸𑀦𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺 𑀫𑁂𑀣𑀼𑀦𑀥𑀫𑁆𑀫𑀁 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀤𑁂𑀦 𑀲𑀳 𑀖𑀝𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑁂𑀯 𑀆𑀧𑀢𑁆𑀢𑀺𑀓𑀭𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, ‘‘𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀻’’𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑁂𑀲𑀼 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀏𑀓𑀸𑀤𑀲𑀲𑀼 𑀅𑀓𑁆𑀓𑁄𑀲𑀧𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑁂𑀧𑀺 𑀓𑁂𑀯𑀮𑀁 𑀆𑀧𑀢𑁆𑀢𑀺𑀓𑀭𑀢𑁆𑀢𑀸 𑀕𑀭𑀼𑀢𑀭𑀁 𑀧𑀤𑀢𑁆𑀢𑀬𑀁 𑀯𑀺𑀲𑀼𑀁 𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀜𑀸𑀧𑁂𑀢𑀼𑀫𑀸𑀳 ‘‘𑀲𑀺𑀔𑀭𑀡𑀻𑀲𑀻’’𑀢𑀺𑀆𑀤𑀺.

𑀲𑀺𑀔𑀭𑀡𑀻𑀲𑀻𑀢𑀺 𑀏𑀢𑁆𑀣 ‘‘𑀲𑀺𑀔𑀭𑀡𑀻 𑀅𑀲𑀻’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀅𑀲𑀻’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀼-𑀲𑀤𑁆𑀤𑁄 𑀓𑁂𑀯𑀮𑀬𑀼𑀢𑁆𑀢𑀫𑁆𑀧𑀺 𑀆𑀧𑀢𑁆𑀢𑀺𑀓𑀭𑀁 ¶ 𑀳𑁄𑀢𑀻𑀢𑀺 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀓𑁂𑀯𑀮𑁂𑀦𑀸𑀧𑀺 𑀅𑀓𑁆𑀓𑁄𑀲𑀯𑀘𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀲𑀺𑀔𑀭𑀡𑀻𑀲𑀻𑀢𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀆𑀡𑀺𑀫𑀁𑀲𑀸 𑀪𑀯𑀲𑀺. 𑀲𑀫𑁆𑀪𑀺𑀦𑁆𑀦𑀸𑀲𑀻𑀢𑀺 𑀫𑀺𑀲𑁆𑀲𑀻𑀪𑀽𑀢𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂𑀦, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀘𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀫𑀼𑀢𑁆𑀢𑀓𑀭𑀡𑀸𑀦𑀺. 𑀲𑀼𑀡𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺, 𑀇𑀫𑀺𑀦𑀸 𑀅𑀓𑁆𑀓𑁄𑀲𑀺𑀢𑀩𑁆𑀩𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀪𑀸𑀲𑀺𑀢𑀁 𑀲𑀼𑀡𑀦𑁆𑀢𑀺𑀬𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀚𑀸𑀦𑀦𑁆𑀢𑀺𑀬𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀯𑀺𑀲𑀬𑁂 𑀧𑀯𑀢𑁆𑀢𑀅𑀓𑁆𑀓𑁄𑀲𑀯𑀘𑀦𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁫𑁬. 𑀧𑀼𑀦𑀧𑁆𑀧𑀼𑀦𑀁 𑀑𑀪𑀸𑀲𑀦𑁆𑀢𑀲𑁆𑀲 𑀯𑀸𑀘𑀸𑀦𑀁 𑀕𑀡𑀦𑀸𑀬 𑀕𑀭𑀼𑀓𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀏𑀓𑀁 ¶ 𑀇𑀢𑁆𑀣𑀺’’𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀏𑀓𑀯𑀸𑀘𑀸𑀬 𑀩𑀳𑀽 𑀑𑀪𑀸𑀲𑀦𑁆𑀢𑀲𑁆𑀲 𑀘 𑀇𑀢𑁆𑀣𑀻𑀦𑀁 𑀕𑀡𑀦𑀸𑀬 𑀕𑀭𑀼𑀓𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀧𑀺 ‘‘𑀇𑀢𑁆𑀣𑀺𑀬𑁄𑀧𑀻’’𑀢𑀺 𑀮𑀩𑁆𑀪𑀢𑀺.

𑁩𑁫𑁭. 𑀲𑀸 𑀘𑁂 𑀦𑀧𑁆𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 ‘‘𑀬𑀁 𑀲𑀼𑀡𑀦𑁆𑀢𑀺𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀑𑀪𑀸𑀲𑀢𑀺, 𑀲𑀸 𑀘𑁂 𑀦 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀁 𑀆𑀤𑀸𑀬 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀁 𑀯𑀼𑀢𑁆𑀢𑀲𑀫𑀦𑀦𑁆𑀢𑀭𑀫𑁂𑀯 𑀅𑀢𑁆𑀣𑀯𑀲𑁂𑀦 𑀲𑀘𑁂 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀪𑀸𑀲𑀺𑀢𑀪𑀺𑀓𑁆𑀔𑀼𑀲𑁆𑀲. 𑀉𑀩𑁆𑀪𑀚𑀸𑀡𑀼𑀁, 𑀅𑀥𑀓𑁆𑀔𑀓𑀁 𑀯𑀸 𑀆𑀤𑀺𑀲𑁆𑀲 𑀪𑀡𑀦𑁂 𑀘𑀸𑀧𑀺 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀪𑀡𑀦𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀤𑀺𑀓𑀣𑀦𑁂, ‘‘𑀪𑀡𑀢𑁄’’𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲, 𑀪𑀡𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀫𑁆𑀳𑀺 𑀅𑀬𑀫𑀦𑁆𑀢𑀧𑀘𑁆𑀘𑀬𑁄 ‘‘𑀅𑀲𑀫𑁆𑀩𑀼𑀥’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬. 𑀉𑀩𑁆𑀪𑀚𑀸𑀡𑀼𑀦𑁆𑀢𑀺 𑀚𑀸𑀡𑀼𑀢𑁄 𑀉𑀤𑁆𑀥𑀁. 𑀅𑀓𑁆𑀔𑁂𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀳𑁂𑀝𑁆𑀞𑀸.

𑁩𑁫𑁮. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 ¶ 𑀅𑀓𑁆𑀔𑀓𑀢𑁄 𑀉𑀤𑁆𑀥𑀁. 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀅𑀥𑁄. 𑀉𑀤𑁆𑀤𑀺𑀲𑀦𑁆𑀢𑀺 𑀉𑀤𑁆𑀤𑀺𑀲𑁆𑀲. ‘‘𑀉𑀤𑁆𑀤𑀺𑀲𑁆𑀲𑀼𑀩𑁆𑀪𑀓𑁆𑀔𑀁 𑀯𑀸 𑀢𑀣𑀸, 𑀅𑀥𑁄𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀘 𑀮𑀺𑀔𑀦𑁆𑀢𑀺, 𑀲𑁄 𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀯𑀡𑁆𑀡𑀸𑀤𑀺𑀪𑀡𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺. 𑀓𑀸𑀬𑀧𑀝𑀺𑀩𑀤𑁆𑀥𑁂 𑀯𑀡𑁆𑀡𑀸𑀤𑀺𑀪𑀡𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸 𑀲𑀗𑁆𑀖𑀸𑀤𑀺𑀲𑁂𑀲𑀓𑁆𑀔𑁂𑀢𑁆𑀢𑀁, 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑀁, 𑀉𑀤𑁆𑀥𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀅𑀓𑁆𑀔𑀓𑀜𑁆𑀘𑁂𑀯 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀯𑀥𑀺𑀪𑀽𑀢𑀁 𑀓𑀢𑁆𑀣 𑀲𑀗𑁆𑀕𑀬𑁆𑀳𑀢𑀻𑀢𑀺? 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂𑀬𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀓𑁆𑀔𑀓𑀁, 𑀧𑀦 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀏𑀢𑁆𑀣𑁂𑀯 𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁬).

𑁩𑁫𑁯. 𑀧𑀡𑁆𑀟𑀓𑁂 𑀬𑀓𑁆𑀔𑀺𑀧𑁂𑀢𑀻𑀲𑀼 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀡𑁆𑀡𑀸𑀤𑀺𑀪𑀡𑀦𑁂 𑀢𑀲𑁆𑀲 𑀪𑀡𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀪𑀯𑁂𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀆𑀕𑀢𑀧𑀤𑁂𑀳𑀺 𑀲𑀳 𑀬𑁄𑀚𑁂𑀢𑀩𑁆𑀩𑀁. 𑀧𑀡𑁆𑀟𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀓𑁆𑀔𑀺𑀧𑁂𑀢𑀻𑀦𑀁 𑀕𑀳𑀡𑀁.

𑁩𑁬𑁦. 𑀉𑀩𑁆𑀪𑀓𑁆𑀔𑀓…𑀧𑁂… 𑀅𑀬𑀁 𑀦𑀬𑁄𑀢𑀺 ‘‘𑀧𑀡𑁆𑀟𑀓𑀸𑀤𑀻𑀲𑀽’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀁 𑀦𑀬𑁄𑀢𑀺 ‘‘𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄 𑀦𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀓𑁆𑀔𑁂𑀢𑁆𑀢𑀯𑀲𑁂𑀦 𑀲𑀩𑁆𑀩𑁂𑀲𑀼 𑀔𑁂𑀢𑁆𑀢𑁂𑀲𑀼.

𑁩𑁬𑁧. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 ¶ 𑀳𑀼𑀢𑁆𑀯𑀸 𑀑𑀪𑀸𑀲𑀢𑁄𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀸𑀢𑀼𑀕𑀸𑀫𑀸𑀦𑀁 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀅𑀢𑁆𑀣𑀓𑀣𑀦𑀁 𑀧𑀼𑀭𑁂𑀓𑁆𑀔𑀢𑁆𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀺𑀧𑀤𑀁 𑀪𑀡𑀦𑁆𑀢𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑁂𑀳𑀺 𑀲𑀳 𑀅𑀝𑁆𑀞𑀓𑀣𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸 𑀑𑀪𑀸𑀲𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸 𑀢𑀸𑀲𑀁 ¶ 𑀲𑀼𑀡𑀦𑁆𑀢𑀻𑀦𑀁 𑀲𑀚𑁆𑀛𑀸𑀬𑀦𑀁 𑀯𑀸 𑀧𑀼𑀭𑁂𑀓𑁆𑀔𑀢𑁆𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀇𑀢𑀭𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀓𑀣𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀢𑁆𑀯𑀸𑀦𑀼𑀲𑀸𑀲𑀦𑀺𑀦𑁆𑀢𑀺 ‘‘𑀇𑀤𑀸𑀦𑀺 𑀅𑀦𑀺𑀫𑀺𑀢𑁆𑀢𑀸𑀲𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀺, 𑀅𑀧𑁆𑀧𑀫𑀸𑀤𑀁 𑀤𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀸 𑀦𑀸𑀳𑁄𑀲𑀻’’𑀢𑀺 𑀅𑀦𑀼𑀲𑀸𑀲𑀦𑀺𑀁 𑀧𑀼𑀭𑁂𑀓𑁆𑀔𑀢𑁆𑀯𑀸.

𑁩𑁬𑁨. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀉𑀫𑁆𑀫𑀢𑁆𑀢𑀓𑀸𑀦𑀜𑁆𑀘 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑀲𑁆𑀲 𑀇𑀫𑀲𑁆𑀫𑀺𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁭) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺 ‘‘𑀲𑀫𑀼𑀝𑁆𑀞𑀸𑀦𑀸𑀤𑀬𑁄…𑀧𑁂… 𑀢𑀼𑀮𑁆𑀬𑀸𑀯𑀸’’𑀢𑀺. 𑀯𑁂𑀤𑀦𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑁂𑀦 𑀅𑀲𑀫𑀢𑁆𑀢𑀸 ‘‘𑀯𑁂𑀤𑀦𑁂𑀢𑁆𑀣 𑀤𑁆𑀯𑀺𑀥𑀸 𑀫𑀢𑀸’’𑀢𑀺 𑀆𑀳, 𑀲𑀼𑀔𑁄𑀧𑁂𑀓𑁆𑀔𑀸𑀯𑁂𑀤𑀦𑀸𑀯𑀲𑁂𑀦 𑀤𑁆𑀯𑀺𑀥𑀸 𑀫𑀢𑀸𑀢𑀺 𑀅𑀢𑁆𑀣𑁄.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀓𑀣𑀸𑀯𑀡𑁆𑀡𑀦𑀸.

𑁩𑁬𑁩. 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬, 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀸𑀫𑀺𑀢𑀸 𑀧𑀢𑁆𑀣𑀺𑀢𑀸𑀢𑀺 𑀓𑀸𑀫𑀸, 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄, 𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀲𑁆𑀲𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺𑀧𑀺 𑀕𑀳𑁂𑀢𑀩𑁆𑀩𑀁, 𑀫𑁂𑀣𑀼𑀦𑀭𑀸𑀕𑀘𑀺𑀢𑁆𑀢𑁂𑀦 𑀅𑀪𑀺𑀧𑀢𑁆𑀣𑀺𑀢𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺𑀅𑀢𑁆𑀣𑁄. ‘‘𑀯𑀡𑁆𑀡𑀁 𑀪𑀸𑀲𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, ‘‘𑀏𑀢𑀤𑀕𑁆𑀕𑀁 𑀪𑀕𑀺𑀦𑀺 𑀧𑀸𑀭𑀺𑀘𑀭𑀺𑀬𑀸𑀦𑀁 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀦𑁄 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀺𑀘𑀭𑀺𑀬𑀸𑀬 ¶ 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀓𑀣𑁂𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀪𑀡𑀺𑀢𑀓𑁆𑀔𑀡𑁂𑀬𑁂𑀯. 𑀲𑀸 𑀘𑁂 𑀚𑀸𑀦𑀸𑀢𑀻𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀅𑀪𑀸𑀲𑀺, 𑀲𑀘𑁂 𑀲𑀸 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀺.

𑁩𑁬𑁪. 𑀲𑀸 ¶ 𑀫𑀦𑀼𑀲𑁆𑀲𑀺𑀢𑁆𑀣𑀻 𑀦𑁄 𑀚𑀸𑀦𑀸𑀢𑀺 𑀘𑁂, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀓𑁆𑀔𑀺𑀧𑁂𑀢𑀺𑀤𑁂𑀯𑀻𑀲𑀼 𑀚𑀸𑀦𑀦𑁆𑀢𑀻𑀲𑀼, 𑀧𑀡𑁆𑀟𑀓𑁂 𑀘 𑀚𑀸𑀦𑀦𑁆𑀢𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑁂𑀢𑀺 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀺𑀲𑀬𑁂, 𑀬𑀓𑁆𑀔𑀺𑀆𑀤𑀻𑀦𑀁 𑀅𑀚𑀸𑀦𑀦𑀯𑀺𑀲𑀬𑁂 𑀘 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑁄 𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁩𑁬𑁫. 𑀘𑀻𑀯𑀭𑀸𑀤𑀻𑀳𑀻𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺. 𑀯𑀢𑁆𑀣𑀼𑀓𑀸𑀫𑁂𑀳𑀻𑀢𑀺 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀸𑀯𑁂𑀦 𑀯𑀢𑁆𑀣𑀽 𑀘 𑀓𑀸𑀫𑀺𑀢𑀢𑁆𑀢𑀸 𑀓𑀸𑀫𑀸𑀢𑀺 𑀘 𑀲𑀗𑁆𑀔𑀸𑀢𑁂𑀳𑀺 𑀧𑀘𑁆𑀘𑀬𑁂𑀳𑀺.

𑁩𑁬𑁬. 𑀭𑀸𑀕𑁄 𑀏𑀯 𑀭𑀸𑀕𑀢𑀸. ‘‘𑀭𑀸𑀕𑀺𑀢𑀸’’𑀢𑀺 𑀯𑀸 𑀧𑀸𑀞𑁄, 𑀭𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀸𑀕𑀻, 𑀢𑀲𑁆𑀲 𑀪𑀸𑀯𑁄 𑀭𑀸𑀕𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄𑀢𑀺 𑀅𑀢𑁆𑀣𑁄. 𑀑𑀪𑀸𑀲𑁄𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀕𑀼𑀡𑀪𑀡𑀦𑀁. 𑀢𑁂𑀦 𑀭𑀸𑀕𑁂𑀦𑀸𑀢𑀺 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁂𑀦. 𑀔𑀡𑁂 𑀢𑀲𑁆𑀫𑀺𑀦𑁆𑀢𑀺 𑀪𑀡𑀺𑀢𑀓𑁆𑀔𑀡𑁂. 𑀯𑀺𑀚𑀸𑀦𑀦𑀦𑁆𑀢𑀺 𑀬𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀡𑀢𑀺, 𑀢𑀸𑀬 𑀢𑀲𑁆𑀲 𑀯𑀘𑀦𑀢𑁆𑀣𑀲𑁆𑀲 𑀯𑀺𑀚𑀸𑀦𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁬𑁭. 𑀧𑀜𑁆𑀘𑀗𑁆𑀕𑀸𑀦𑀻𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀸, 𑀢𑀁𑀲𑀜𑁆𑀜𑀺𑀢𑀸, 𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑀺𑀢𑀸, 𑀢𑁂𑀦 𑀭𑀸𑀕𑁂𑀦 𑀑𑀪𑀸𑀲𑀦𑀁, 𑀔𑀡𑁂 𑀢𑀲𑁆𑀫𑀺𑀁 𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑀺 𑀏𑀢𑁆𑀣 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀘 𑀅𑀗𑁆𑀕𑀸𑀦𑀺 ¶ , 𑀧𑀜𑁆𑀘 𑀆𑀧𑀢𑁆𑀢𑀺𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀲𑁆𑀲.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸.

𑁩𑁬𑁮. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀓𑀺𑀭𑀺𑀬𑀸𑀢𑁆𑀢𑀬𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀧𑀸𑀤𑀦𑀓𑀁 ‘‘𑀬𑁄 𑀪𑀺𑀓𑁆𑀔𑀽’’𑀢𑀺 𑀘 ‘‘𑀕𑀭𑀼 𑀳𑁄𑀢𑀻’’𑀢𑀺 𑀧𑀤𑀲𑀸𑀫𑀢𑁆𑀣𑀺𑀬𑁂𑀦 ‘‘𑀢𑀲𑁆𑀲𑀸’’𑀢𑀺 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸 𑀢𑀺𑀯𑀺𑀥𑁂𑀳𑀺 𑀲𑀳 ‘‘𑀬𑁄 𑀪𑀺𑀓𑁆𑀔𑀼 𑀧𑀼𑀭𑀺𑀲𑀲𑁆𑀲 𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺 𑀘𑁂, 𑀢𑀲𑁆𑀲 𑀕𑀭𑀼 𑀳𑁄𑀢𑀻’’𑀢𑀺 𑀏𑀓𑀁 𑀯𑀸𑀓𑁆𑀬𑀁 𑀳𑁄𑀢𑀺. 𑀏𑀯𑀁 ‘‘𑀇𑀢𑁆𑀣𑀺𑀬𑀸𑀧𑀺 𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑀦𑀸𑀬𑀧𑀺 𑀏𑀓𑀁 𑀯𑀸𑀓𑁆𑀬𑀁 𑀳𑁄𑀢𑀻𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀸𑀓𑁆𑀬𑀤𑁆𑀯𑀬𑀁 𑀬𑀼𑀚𑁆𑀚𑀢𑀺.

𑀇𑀥 𑀲𑀦𑁆𑀤𑁂𑀲𑀓𑁆𑀓𑀫𑀜𑁆𑀘 𑀬𑁄𑀚𑀦𑀸𑀓𑁆𑀓𑀫𑀜𑁆𑀘 𑀚𑀸𑀦𑀦𑀢𑁆𑀣𑀁 𑀧𑀞𑀫𑀁 𑀢𑀸𑀯 𑀇𑀢𑁆𑀣𑀻𑀦𑀜𑁆𑀘 𑀪𑀭𑀺𑀬𑀸𑀦𑀜𑁆𑀘 𑀧𑀪𑁂𑀤𑁄 𑀘 𑀲𑀭𑀽𑀧𑀜𑁆𑀘 𑀯𑀺𑀪𑀸𑀯𑀻𑀬𑀢𑀺 𑁋 𑀢𑁂𑀲𑀼 𑀇𑀢𑁆𑀣𑀺𑀬𑁄 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀤𑀲 𑀇𑀢𑁆𑀣𑀺𑀬𑁄 ¶ 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸’’𑀢𑀺. 𑀪𑀭𑀺𑀬𑀸 𑀘 𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀤𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸’’𑀢𑀺 (𑀧𑀸𑀭𑀸. 𑁩𑁦𑁩). 𑀇𑀫𑀸𑀲𑀁 𑀧𑀪𑁂𑀤𑁄 𑀘 𑀲𑀭𑀽𑀧𑀸𑀦𑀺 𑀘 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋

𑀧𑀼𑀭𑀺𑀲𑁂𑀳𑀺 𑀲𑀳 𑀬𑀣𑀸 𑀲𑀁𑀯𑀸𑀲𑀁 𑀦 𑀓𑀭𑁄𑀢𑀺, 𑀏𑀯𑀁 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸. 𑀬𑀣𑀸𑀳 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀫𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺. 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑁄𑀡𑁆𑀟𑀜𑁆𑀜𑀸𑀤𑀺𑀕𑁄𑀢𑁆𑀢𑁂 𑀚𑀸𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀕𑁄𑀢𑁆𑀢𑁂 𑀚𑀸𑀢𑁂𑀳𑀺 ¶ 𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸. 𑀬𑀣𑀸𑀳 ‘‘𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀦𑀸𑀫 𑀲𑀕𑁄𑀢𑁆𑀢𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺. 𑀏𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀺 𑀯𑀸 𑀏𑀓𑀕𑀡𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀯𑀸 𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀦𑀸𑀫. 𑀬𑀣𑀸𑀳 ‘‘𑀥𑀫𑁆𑀫𑀭𑀓𑁆𑀔𑀺𑀢𑀸 𑀦𑀸𑀫 𑀲𑀳𑀥𑀫𑁆𑀫𑀺𑀓𑀸 𑀭𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁩𑁦𑁪). 𑀲𑀸𑀭𑀓𑁆𑀔𑀸 𑀦𑀸𑀫 ‘‘𑀕𑀩𑁆𑀪𑁂𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺 ‘𑀫𑀬𑁆𑀳𑀁 𑀏𑀲𑀸’𑀢𑀺 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑀭𑀽𑀧𑀸. 𑀲𑀧𑀭𑀺𑀤𑀡𑁆𑀟𑀸 𑀦𑀸𑀫 ‘‘𑀓𑁂𑀳𑀺𑀘𑀺 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 ‘𑀬𑁄 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀏𑀢𑁆𑀢𑀓𑁄 𑀤𑀡𑁆𑀟𑁄’’𑀢𑀺 𑀯𑀼𑀢𑁆𑀢𑀲𑀭𑀽𑀧𑀸𑀢𑀺 𑀅𑀬𑀁 𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀲𑀭𑀽𑀧𑀲𑀗𑁆𑀔𑁂𑀧𑁄. 𑀇𑀫𑀸𑀲𑀼 𑀤𑀲𑀲𑀼 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀭𑀧𑀼𑀭𑀺𑀲𑀲𑁂𑀯𑀸𑀬𑀁 𑀫𑀺𑀘𑁆𑀙𑀸𑀘𑀸𑀭𑁄 𑀳𑁄𑀢𑀺, 𑀇𑀢𑀭𑀸𑀲𑀁 𑀦 𑀳𑁄𑀢𑀺. 𑀇𑀫𑀸 𑀤𑀲𑀧𑀺 𑀧𑀜𑁆𑀘𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀳𑀺 𑀅𑀕𑀫𑀦𑀻𑀬𑀸.

𑀤𑀲𑀲𑀼 𑀪𑀭𑀺𑀬𑀸𑀲𑀼 ‘‘𑀥𑀦𑀓𑁆𑀓𑀻𑀢𑀸 𑀦𑀸𑀫 𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀭𑀺𑀬𑀪𑀸𑀯𑀸𑀬 𑀅𑀧𑁆𑀧𑀓𑀁 𑀯𑀸 𑀩𑀳𑀼𑀁 𑀯𑀸 𑀥𑀦𑀁 𑀤𑀢𑁆𑀯𑀸 𑀕𑀳𑀺𑀢𑀸 𑀥𑀦𑀓𑁆𑀓𑀻𑀢𑀸 𑀦𑀸𑀫. ‘‘𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫 𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀭𑀼𑀘𑀺𑀬𑀸 𑀲𑀁𑀯𑀲𑀺𑀢𑁂𑀦 𑀧𑀼𑀭𑀺𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫. ‘‘𑀪𑁄𑀕𑀯𑀸𑀲𑀺𑀦𑀻 𑀦𑀸𑀫 𑀪𑁄𑀕𑀁 𑀤𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀕𑁂𑀳𑁄𑀧𑀓𑀭𑀡𑀁 𑀮𑀪𑀺𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀚𑀦𑀧𑀤𑀺𑀢𑁆𑀣𑀻 𑀪𑁄𑀕𑀯𑀸𑀲𑀺𑀦𑀻 𑀦𑀸𑀫. ‘‘𑀧𑀝𑀯𑀸𑀲𑀺𑀦𑀻 𑀦𑀸𑀫 𑀧𑀝𑀁 𑀤𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀯𑀸𑀲𑀦𑀫𑀢𑁆𑀢𑀁 𑀯𑀸 𑀧𑀸𑀭𑀼𑀧𑀦𑀫𑀢𑁆𑀢𑀁 𑀯𑀸 𑀮𑀤𑁆𑀥𑀸 𑀪𑀭𑀺𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀤𑀮𑀺𑀤𑁆𑀤𑀺𑀢𑁆𑀣𑀻 𑀧𑀝𑀯𑀸𑀲𑀺𑀦𑀻 𑀦𑀸𑀫. 𑀑𑀤𑀧𑀢𑁆𑀢𑀓𑀺𑀦𑀻 𑀦𑀸𑀫 ‘‘𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀤𑀁 𑀉𑀤𑀓𑀁 𑀯𑀺𑀬 𑀲𑀁𑀲𑀝𑁆𑀞𑀸 𑀅𑀪𑁂𑀚𑁆𑀚𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑀓𑀧𑀢𑁆𑀢𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀦𑀻𑀢𑁄 𑀫𑀸𑀢𑀼𑀕𑀸𑀫𑁄 𑀯𑀼𑀘𑁆𑀘𑀢𑀺. ‘‘𑀑𑀪𑀝𑀘𑀼𑀫𑁆𑀩𑀝𑀸 𑀦𑀸𑀫 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 ¶ 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀲𑀻𑀲𑀢𑁄 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀫𑀼𑀧𑀦𑀻𑀢𑀸 𑀓𑀝𑁆𑀞𑀳𑀸𑀭𑀺𑀓𑀸𑀤𑀺𑀇𑀢𑁆𑀣𑀻 𑀑𑀪𑀝𑀘𑀼𑀫𑁆𑀩𑀝𑀸 𑀦𑀸𑀫. 𑀤𑀸𑀲𑀻 ¶ 𑀘 𑀪𑀭𑀺𑀬𑀸 𑀘 𑀦𑀸𑀫 ‘‘𑀤𑀸𑀲𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘𑀸’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀪𑀭𑀺𑀬𑀁 𑀓𑀢𑁆𑀯𑀸 𑀯𑀸𑀲𑀺𑀢𑀸 ‘‘𑀢𑀲𑁆𑀲𑁂𑀯 𑀤𑀸𑀲𑀻 𑀘 𑀪𑀭𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀸. 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀦𑀸𑀫 ‘‘𑀓𑀫𑁆𑀫𑀓𑀸𑀭𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘𑀸’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀧𑀥𑀸𑀦𑀺𑀢𑁆𑀣𑀺𑀦𑀺𑀭𑀧𑁂𑀓𑁆𑀔𑁂𑀦 𑀓𑀼𑀝𑀼𑀫𑁆𑀩𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀁 𑀦𑀻𑀢𑀸 𑀪𑀭𑀺𑀬𑀸 𑀓𑀢𑀓𑀫𑁆𑀫𑀸 ‘‘𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀸. ‘‘𑀥𑀚𑀸𑀳𑀝𑀸 𑀦𑀸𑀫 𑀓𑀭𑀫𑀭𑀸𑀦𑀻𑀢𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀫𑀳𑀸𑀲𑁂𑀦𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀭𑀯𑀺𑀲𑀬𑀁 𑀯𑀺𑀮𑀼𑀫𑁆𑀧𑀦𑁆𑀢𑁂𑀦 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀦𑁂𑀢𑁆𑀯𑀸 𑀪𑀭𑀺𑀬𑀪𑀸𑀯𑀫𑀼𑀧𑀦𑀻𑀢𑀸 𑀇𑀢𑁆𑀣𑀻 𑀥𑀚𑀸𑀳𑀝𑀸 𑀦𑀸𑀫. ‘‘𑀫𑀼𑀳𑀼𑀢𑁆𑀢𑀺𑀓𑀸 𑀦𑀸𑀫 𑀢𑀗𑁆𑀔𑀡𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀅𑀘𑀺𑀭𑀓𑀸𑀮𑀁 𑀲𑀁𑀯𑀸𑀲𑀢𑁆𑀣𑀸𑀬 𑀕𑀳𑀺𑀢𑀸 𑀇𑀢𑁆𑀣𑀻 𑀫𑀼𑀳𑀼𑀢𑁆𑀢𑀺𑀓𑀸 𑀦𑀸𑀫𑀸𑀢𑀺 𑀅𑀬𑀁 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀲𑀭𑀽𑀧𑀲𑀗𑁆𑀔𑁂𑀧𑁄. 𑀬𑀣𑀸𑀯𑀼𑀢𑁆𑀢𑀸𑀲𑀼 𑀤𑀲𑀲𑀼 𑀇𑀢𑁆𑀣𑀻𑀲𑀼 𑀅𑀜𑁆𑀜𑀢𑀭𑀁 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀝𑁆𑀞𑀸𑀦𑁂 𑀞𑀧𑀦𑀢𑁆𑀣𑀫𑀥𑀺𑀧𑁆𑀧𑁂𑀢𑀪𑀸𑀯𑀁 𑀯𑀢𑁆𑀢𑀼𑀁 𑀧𑀼𑀭𑀺𑀲𑁂𑀦 ‘‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’𑀢𑀺’’𑀆𑀤𑀺𑀦𑀸 𑀦𑀬𑁂𑀦 𑀤𑀺𑀦𑁆𑀦𑀲𑀦𑁆𑀤𑁂𑀲𑀁 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀻𑀲𑀓𑀫𑁆𑀧𑀦𑀸𑀤𑀺𑀯𑀲𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀲𑀦𑁆𑀤𑁂𑀲𑀁 𑀧𑀼𑀭𑀺𑀲𑀲𑁆𑀲𑀸’’𑀢𑀺.

𑀏𑀢𑁆𑀣 𑀧𑀼𑀭𑀺𑀲𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁨𑁧) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀼𑀭𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀼𑀆𑀤𑀬𑁄 𑀘 𑀕𑀳𑁂𑀢𑀩𑁆𑀩𑀸. 𑀯𑀻𑀫𑀁𑀲𑀢𑀻𑀢𑀺 𑀏𑀯𑀁 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀦𑀁 𑀢𑀲𑁆𑀲𑀸𑀬𑁂𑀯 𑀏𑀓𑀁𑀲𑁂𑀦 𑀅𑀯𑀺𑀭𑀸𑀥𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀫𑀜𑁆𑀜𑀢𑀭𑀲𑁆𑀲 𑀯𑀸 𑀆𑀭𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀧𑀺 𑀯𑀻𑀫𑀁𑀲𑀢𑀻𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀻𑀫𑀁𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀯𑀻𑀫𑀁𑀲𑀸𑀧𑁂𑀢𑀻𑀢𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀧𑀘𑁆𑀘𑀸𑀳𑀭𑀢𑀻𑀢𑀺 𑀢𑀣𑀸 𑀆𑀳𑀝𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 ¶ 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀘 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀘 𑀮𑀚𑁆𑀚𑀸𑀬 𑀢𑀼𑀡𑁆𑀳𑀻𑀪𑀽𑀢𑀸𑀬 𑀘 𑀢𑀁 𑀧𑀯𑀢𑁆𑀢𑀺𑀁 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀸𑀧𑀺 𑀧𑀘𑁆𑀘𑀸𑀳𑀭𑀢𑀻𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀸𑀳𑀭𑀸𑀧𑁂𑀢𑀻𑀢𑀺 𑀘 𑀕𑀳𑁂𑀢𑀩𑁆𑀩𑀁.

‘‘𑀇𑀢𑁆𑀣𑀺𑀬𑀸𑀧𑀺 𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑁆𑀯𑀸 𑀕𑀳𑀺𑀢𑀤𑀼𑀢𑀺𑀬𑀯𑀸𑀓𑁆𑀬𑁂 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀲𑀦𑁆𑀤𑁂𑀲𑀓𑁆𑀓𑀫𑁄 𑀧𑀦 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 ¶ 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’𑀢𑀺’’𑀆𑀤𑀺𑀧𑀸𑀴𑀺𑀦𑀬𑁂𑀦 (𑀧𑀸𑀭𑀸. 𑁩𑁩𑁦) 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣𑀸𑀧𑀺 ‘‘𑀯𑀻𑀫𑀁𑀲𑀸𑀧𑁂𑀢𑀺 𑀧𑀘𑁆𑀘𑀸𑀳𑀭𑀸𑀧𑁂𑀢𑀻’’𑀢𑀺 𑀇𑀤𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀦𑀸𑀫𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀢𑁆𑀯𑀸 𑀤𑀲𑀦𑁆𑀦𑀁 𑀪𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀢𑁆𑀣𑀸𑀬 𑀤𑀻𑀬𑀫𑀸𑀦𑀲𑀦𑁆𑀤𑁂𑀲𑀓𑁆𑀓𑀫𑁄 𑀬𑁄𑀚𑁂𑀢𑀩𑁆𑀩𑁄. 𑀇𑀥𑀸𑀧𑀺 𑀇𑀢𑁆𑀣𑀺𑀬𑀸𑀧𑀺 𑀯𑀸𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺𑀆𑀤𑀺𑀧𑀸𑀴𑀺𑀯𑀲𑁂𑀦 (𑀧𑀸𑀭𑀸. 𑁩𑁨𑁪) 𑀇𑀢𑁆𑀣𑀺𑀬𑀸 𑀫𑀸𑀢𑀼𑀧𑀺𑀢𑀼𑀆𑀤𑀻𑀦𑀜𑁆𑀘 𑀲𑀦𑁆𑀤𑁂𑀲𑀓𑁆𑀓𑀫𑁄 𑀬𑁄𑀚𑁂𑀢𑀩𑁆𑀩𑁄.

𑁩𑁭𑁦. 𑀢𑀁 𑀧𑀯𑀢𑁆𑀢𑀺𑀁. 𑀲𑀜𑁆𑀘𑀭𑀺𑀢𑁆𑀢𑀸 𑀲𑀜𑁆𑀘𑀭𑀡𑀳𑁂𑀢𑀼. 𑀦 𑀫𑀼𑀘𑁆𑀘𑀢𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀜𑁆𑀘𑀭𑀡𑀳𑁂𑀢𑀼 𑀆𑀧𑀚𑁆𑀚𑀺𑀢𑀩𑁆𑀩𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀦 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁧. 𑀅𑀜𑁆𑀜𑀁 𑀯𑀸𑀢𑀺 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀸. ‘‘𑀪𑀸𑀲𑀢𑁄’’𑀢𑀺 𑀮𑀺𑀔𑀦𑁆𑀢𑀺. ‘‘𑀧𑁂𑀲𑀺𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀤𑁆𑀥𑀢𑁆𑀢𑀸 𑀢𑀁 𑀧𑀳𑀸𑀬 ‘‘𑀪𑀸𑀲𑀢𑀻’’𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀧𑀸𑀞𑀲𑁂𑀲𑁄 𑀯𑀸 𑀓𑀸𑀢𑀩𑁆𑀩𑁄. ‘‘𑀬𑁄 𑀅𑀜𑁆𑀜𑀁 𑀪𑀸𑀲𑀢𑀺 𑀘𑁂, 𑀢𑀲𑁆𑀲 𑀪𑀸𑀲𑀢𑁄𑀢𑀺 𑀬𑁄𑀚𑀦𑀸’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. ‘‘𑀫𑀸𑀢𑀭𑀸 𑀭𑀓𑁆𑀔𑀺𑀢𑀁 𑀇𑀢𑁆𑀣𑀺𑀁 ‘𑀕𑀘𑁆𑀙 𑀩𑁆𑀭𑀽𑀳𑀻’𑀢𑀺 𑀬𑁄 𑀧𑁂𑀲𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀧𑀺𑀢𑀼𑀭𑀓𑁆𑀔𑀺𑀢𑀁 ¶ 𑀯𑀸 𑀅𑀜𑁆𑀜𑀁 𑀯𑀸 𑀪𑀸𑀲𑀢𑁄 𑀯𑀺𑀲𑀗𑁆𑀓𑁂𑀢𑁄𑀯𑀸’’𑀢𑀺, ‘‘𑀫𑀸𑀢𑀭𑀸…𑀧𑁂… 𑀩𑁆𑀭𑀽𑀳𑀻’𑀢𑀺 𑀧𑁂𑀲𑀺𑀢𑁄 𑀳𑀼𑀢𑁆𑀯𑀸 𑀧𑀺𑀢𑀼𑀭𑀓𑁆𑀔𑀺𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀪𑀸𑀲𑀢𑁄 𑀯𑀺𑀲𑀗𑁆𑀓𑁂𑀢𑁄𑀯𑀸’’𑀢𑀺 𑀬𑁄𑀚𑀦𑀸 𑀬𑀼𑀢𑁆𑀢𑀢𑀭𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑁩𑁭𑁨. 𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀳𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑀫𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀲𑀜𑁆𑀘𑀭𑀺𑀢𑁆𑀢𑁂𑀢𑀺 𑀲𑀜𑁆𑀘𑀭𑀡𑁂. 𑀲𑀫𑀸𑀧𑀦𑁆𑀦𑁂𑀢𑀺 𑀕𑀢𑁂 𑀲𑀢𑀺. 𑀕𑀭𑀼𑀓𑀸𑀧𑀢𑁆𑀢𑀺𑀫𑀸𑀤𑀺𑀲𑁂𑀢𑀺 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀆𑀤𑀺𑀲𑁂𑀢𑀺 𑀓𑀣𑁂𑀬𑁆𑀬.

𑁩𑁭𑁩. 𑀤𑁆𑀯𑀻𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑁂 𑀲𑀫𑀸𑀧𑀦𑁆𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁩𑁮) 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀓𑀸𑀤𑀻𑀲𑀽𑀢𑀺 𑀧𑀡𑁆𑀟𑀓𑀬𑀓𑁆𑀔𑀺𑀧𑁂𑀢𑀻𑀲𑀼. 𑀢𑀻𑀳𑀺𑀧𑀺 𑀅𑀗𑁆𑀕𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑁂 𑀲𑀫𑀸𑀧𑀦𑁆𑀦𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀏𑀓𑁂𑀦𑁂𑀯𑀸𑀢𑀺 ¶ 𑀏𑀓𑁂𑀦𑁂𑀯 𑀅𑀗𑁆𑀕𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀲𑀩𑁆𑀩𑀫𑀸𑀢𑀼𑀕𑀸𑀫𑁂𑀲𑀼 𑀘 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀲𑀺 ‘𑀕𑀘𑁆𑀙 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀯𑀻𑀫𑀁𑀲𑀸’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 ‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑀸’𑀢𑀺. 𑀲𑀼𑀢𑁆𑀢𑀸 𑀪𑀦𑁆𑀢𑁂𑀢𑀺…𑀧𑁂… 𑀫𑀢𑀸 𑀪𑀦𑁆𑀢𑁂𑀢𑀺. 𑀦𑀺𑀓𑁆𑀔𑀦𑁆𑀢𑀸 𑀪𑀦𑁆𑀢𑁂𑀢𑀺. 𑀅𑀦𑀺𑀢𑁆𑀣𑀻 𑀪𑀦𑁆𑀢𑁂𑀢𑀺. 𑀇𑀢𑁆𑀣𑀺𑀧𑀡𑁆𑀟𑀓𑀸 𑀪𑀦𑁆𑀢𑁂𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁪𑁧) 𑀆𑀕𑀢𑀸𑀲𑀼 𑀲𑀼𑀢𑁆𑀢𑀸𑀤𑀻𑀲𑀼 𑀧𑀜𑁆𑀘𑀲𑀼 𑀘.

𑁩𑁭𑁪. 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀘𑁂𑀢𑀺𑀬𑀸𑀤𑀻𑀲𑀼 𑀓𑀢𑁆𑀢𑀩𑁆𑀩𑀁 𑀦𑀺𑀲𑁆𑀲𑀸𑀬 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑁂𑀦 𑀘 𑀇𑀢𑁆𑀣𑀺𑀬𑀸 𑀤𑀺𑀦𑁆𑀦𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ¶ 𑀯𑀻𑀫𑀁𑀲𑀺𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 ‘‘𑀅𑀦𑀸𑀧𑀢𑁆𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁪𑁦) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁩𑁭𑁫. 𑀢𑀣𑀸 𑀢𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀬 𑀢𑀲𑁆𑀲𑀸. 𑀦𑀦𑀸𑀮𑀁𑀯𑀘𑀦𑀻𑀬𑀢𑀸𑀢𑀺 ‘‘𑀫𑀫𑀸𑀬’’𑀦𑁆𑀢𑀺 𑀯𑀸 𑀦𑀺𑀕𑁆𑀕𑀳𑀧𑀕𑁆𑀕𑀳𑁂 𑀯𑀸 𑀦𑀺𑀭𑀸𑀲𑀗𑁆𑀓𑀁 𑀯𑀢𑁆𑀢𑀼𑀁 𑀦𑀸𑀳𑀭𑀢𑀻𑀢𑀺 𑀅𑀮𑀁𑀯𑀘𑀦𑀻𑀬𑀸, 𑀅𑀲𑁆𑀲𑀸𑀫𑀺𑀓𑀸, 𑀲𑀸 𑀳𑀺 𑀓𑁂𑀦𑀘𑀺 ‘‘𑀫𑀬𑁆𑀳𑀁 𑀏𑀲𑀸’’𑀢𑀺 𑀯𑀢𑁆𑀢𑀼𑀁 𑀯𑀸 𑀦𑀺𑀭𑀸𑀲𑀗𑁆𑀓𑁂𑀦 𑀦𑀺𑀕𑁆𑀕𑀳𑀧𑀕𑁆𑀕𑀳𑀯𑀘𑀦𑀁 𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸, 𑀅𑀮𑀁𑀯𑀘𑀦𑀻𑀬𑀸 𑀦 𑀪𑀯𑀢𑀻𑀢𑀺 𑀦𑀸𑀮𑀁𑀯𑀘𑀦𑀻𑀬𑀸, 𑀲𑀲𑁆𑀲𑀸𑀫𑀺𑀓𑀸, 𑀲𑀸 𑀳𑀺 𑀲𑀸𑀫𑀺𑀓𑁂𑀦 𑀢𑀣𑀸 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀦𑀸𑀮𑀁𑀯𑀘𑀦𑀻𑀬𑀸, 𑀦𑀸𑀮𑀁𑀯𑀘𑀦𑀻𑀬𑀸 𑀦 𑀪𑀯𑀢𑀻𑀢𑀺 𑀦𑀦𑀸𑀮𑀁𑀯𑀘𑀦𑀻𑀬𑀸, 𑀅𑀮𑀁𑀯𑀘𑀦𑀻𑀬𑀧𑀤𑁂𑀦 𑀯𑀼𑀢𑁆𑀢𑀸 𑀅𑀲𑁆𑀲𑀸𑀫𑀺𑀓𑀸 𑀏𑀯, 𑀧𑀝𑀺𑀲𑁂𑀥𑀸 𑀤𑁆𑀯𑁂 𑀧𑀓𑀢𑀺𑀫𑀢𑁆𑀣𑀁 𑀕𑀫𑀬𑀦𑁆𑀢𑀻𑀢𑀺, 𑀦𑀦𑀸𑀮𑀁𑀯𑀘𑀦𑀻𑀬𑀸𑀬 𑀪𑀸𑀯𑁄 𑀦𑀦𑀸𑀮𑀁𑀯𑀘𑀦𑀻𑀬𑀢𑀸, 𑀦𑀺𑀭𑀸𑀲𑀗𑁆𑀓𑁂𑀦 𑀅𑀯𑀘𑀦𑀻𑀬𑀢𑀸 𑀅𑀲𑁆𑀲𑀸𑀫𑀺𑀓𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀘𑀭𑀺𑀢𑁆𑀢𑀯𑀲𑁂𑀦 𑀪𑀺𑀓𑁆𑀔𑀼𑀦𑀸 𑀯𑀘𑀦𑀻𑀬𑀸 𑀦 𑀳𑁄𑀢𑀻𑀢𑀺 𑀯𑀸 ‘‘𑀅𑀮𑀁𑀯𑀘𑀦𑀻𑀬𑀸’’𑀢𑀺𑀧𑀺 𑀕𑀳𑁂𑀢𑀩𑁆𑀩𑀫𑁂𑀯. 𑀧𑀝𑀺𑀕𑁆𑀕𑀡𑁆𑀳𑀦𑀢𑀸𑀤𑀻𑀦𑀁 𑀯𑀲𑀸𑀢𑀺 𑀏𑀢𑁆𑀣 𑀘𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀸 𑀦𑀦𑀸𑀮𑀁𑀯𑀘𑀦𑀻𑀬𑀢𑀸𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀘 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀆𑀧𑀢𑁆𑀢𑀺𑀓𑀸𑀭𑀡𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁭𑁬. 𑀇𑀤𑀁 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀅𑀣 𑀯𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀘 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀓𑀸𑀬𑀢𑁄, 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀙𑀲𑀫𑀼𑀝𑁆𑀞𑀸𑀦𑀁. 𑀢𑀢𑁄 𑀏𑀯 𑀅𑀘𑀺𑀢𑁆𑀢𑀓𑀫𑀼𑀤𑀻𑀭𑀺𑀢𑀁. 𑀫𑀺𑀲𑁆𑀲𑀓𑀲𑀫𑀼𑀝𑁆𑀞𑀸𑀦𑀜𑁆𑀳𑀺 𑀅𑀘𑀺𑀢𑁆𑀢𑀓𑀁. 𑀅𑀯𑀲𑁂𑀲𑀘𑀺𑀢𑁆𑀢𑁂𑀲𑀼𑀧𑀺 ¶ 𑀬𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀲𑀢𑀺 𑀅𑀘𑀺𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀮𑀁𑀯𑀘𑀦𑀺𑀬𑀢𑁆𑀢𑀁 ¶ 𑀯𑀸’’𑀢𑀺𑀆𑀤𑀺. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄, ‘‘𑀅𑀮𑀁𑀯𑀘𑀦𑀻𑀬𑀢𑁆𑀢’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑁄 𑀲𑀦𑁆𑀤𑁂𑀲𑀁 𑀧𑁂𑀲𑁂𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀩𑀤𑁆𑀥𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀡𑀢𑁆𑀢𑀺𑀁 𑀯𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀚𑀸𑀦𑀢𑁄 𑀅𑀘𑀺𑀢𑁆𑀢𑀓𑀫𑀼𑀤𑀻𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁭𑁭. 𑀲𑀸𑀲𑀦𑀦𑁆𑀢𑀺 𑀫𑀸𑀢𑀼𑀕𑀸𑀫𑀲𑁆𑀲, 𑀧𑀼𑀭𑀺𑀲𑀲𑁆𑀲 𑀯𑀸 𑀲𑀸𑀲𑀦𑀁. 𑀓𑀸𑀬𑀯𑀺𑀓𑀸𑀭𑁂𑀦𑀸𑀢𑀺 𑀲𑀻𑀲𑀓𑀫𑁆𑀧𑀦𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦. 𑀕𑀳𑁂𑀢𑁆𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀢𑀁 𑀉𑀧𑀕𑀫𑁆𑀫𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀦𑀁 𑀬𑀲𑁆𑀲 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀫𑀸𑀢𑀼𑀕𑀸𑀫𑀁, 𑀧𑀼𑀭𑀺𑀲𑀁 𑀯𑀸 𑀉𑀧𑀕𑀫𑁆𑀫. 𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸. 𑀳𑀭𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲. 𑀓𑀸𑀬𑀢𑁄 𑀲𑀺𑀬𑀸𑀢𑀺 𑀯𑀘𑀻𑀪𑁂𑀤𑀁 𑀯𑀺𑀦𑀸 𑀧𑀝𑀺𑀕𑁆𑀕𑀳𑀡𑀸𑀤𑀻𑀦𑀁 𑀓𑀸𑀬𑁂𑀦𑁂𑀯 𑀓𑀢𑀢𑁆𑀢𑀸 𑀓𑀸𑀬𑀲𑀫𑀼𑀝𑁆𑀞𑀸𑀦𑀢𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁮. 𑀇𑀢𑁆𑀣𑀺𑀬𑀸 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀧𑀓𑀢𑀺𑀬𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀲𑀺𑀦𑁆𑀦𑁄. 𑀢𑀁 𑀯𑀘𑀦𑀁. 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑁂𑀯𑀸𑀢𑀺 𑀬𑀢𑁆𑀣 𑀦𑀺𑀲𑀺𑀦𑁆𑀦𑁄 𑀇𑀢𑁆𑀣𑀺𑀬𑀸 𑀲𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺, 𑀢𑀫𑁂𑀯 𑀆𑀲𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀢𑁆𑀢𑀦𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀆𑀕𑀢𑀲𑁆𑀲 𑀲𑀦𑁆𑀦𑀺𑀲𑀺𑀢𑀩𑁆𑀩𑀧𑀼𑀭𑀺𑀲𑀲𑁆𑀲𑁂𑀯, 𑀏𑀢𑁆𑀣 ‘‘𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀧𑀼𑀦 ‘‘𑀆𑀭𑁄𑀘𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀁 𑀢𑀢𑁆𑀣𑁂𑀯𑀸𑀕𑀢𑀸𑀬 𑀢𑀲𑁆𑀲𑀸 𑀏𑀯 𑀇𑀢𑁆𑀣𑀺𑀬𑀸 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀲𑀦𑀁 𑀤𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯 𑀆𑀕𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲𑁂𑀯 𑀜𑀸𑀢𑀫𑀦𑀦𑁆𑀢𑀭𑀁 𑀓𑀸𑀬𑀺𑀓𑀓𑀺𑀭𑀺𑀬𑀁 𑀯𑀺𑀦𑀸 𑀯𑀘𑀦𑁂𑀦𑁂𑀯 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀇𑀢𑁆𑀣𑀺𑀬𑀸 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀣 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀢𑀁 𑀯𑀘𑀦𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 ¶ 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀢𑀺 𑀏𑀯𑀁 𑀧𑀼𑀭𑀺𑀲𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦𑀸𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀢𑁆𑀣 𑀘 𑀢𑀢𑁆𑀣𑁂𑀯𑀸𑀕𑀢𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀁. 𑀲𑀸𑀲𑀦𑀯𑀘𑀦𑀫𑀢𑁆𑀢𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, 𑀓𑀺𑀘𑁆𑀘𑀦𑁆𑀢𑀭𑁂𑀦 𑀕𑀦𑁆𑀢𑁆𑀯𑀸 𑀯𑀸 𑀬𑀤𑀺𑀘𑁆𑀙𑀸𑀯𑀲𑁂𑀦 𑀤𑀺𑀝𑁆𑀞𑀝𑁆𑀞𑀸𑀦𑁂 𑀯𑀸 𑀯𑀢𑁆𑀯𑀸 𑀧𑀼𑀦𑀧𑀺 𑀢𑀢𑁆𑀣𑁂𑀯 𑀤𑀺𑀝𑁆𑀞𑀝𑁆𑀞𑀸𑀦𑁂 𑀧𑀼𑀦 𑀆𑀭𑁄𑀘𑁂𑀦𑁆𑀢𑀲𑁆𑀲 𑀘 𑀯𑀘𑀦𑁂𑀦𑁂𑀯 𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁭𑁯. ‘‘𑀅𑀮𑀁…𑀧𑁂… 𑀅𑀚𑀸𑀦𑀢𑁄’’𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯, 𑀓𑀲𑁆𑀫𑀸 𑀧𑀼𑀦 ‘‘𑀅𑀚𑀸𑀦𑀦𑁆𑀢𑀲𑁆𑀲 𑀧𑀡𑁆𑀡𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀤𑀼𑀪𑀬𑀲𑁆𑀲𑀸𑀧𑀺 𑀯𑀺𑀲𑀼𑀁 𑀓𑀸𑀭𑀡𑀸𑀪𑀸𑀯𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀁 𑀯𑀺𑀥𑀺𑀦𑁆𑀢𑀺 𑀲𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀆𑀭𑁄𑀘𑀦𑀲𑀗𑁆𑀔𑀸𑀢𑀁 ¶ 𑀯𑀺𑀥𑀸𑀦𑀁. 𑀅𑀭𑀳𑀢𑁄𑀧𑀻𑀢𑀺 𑀔𑀻𑀡𑀸𑀲𑀯𑀲𑁆𑀲𑀧𑀺, 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀕𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀲𑀫𑁆𑀪𑀸𑀯𑀦𑀢𑁆𑀣𑁂𑀦 𑀅𑀧𑀺-𑀲𑀤𑁆𑀤𑁂𑀦 𑀚𑁄𑀢𑀺𑀢𑁄.

𑁩𑁮𑁦. 𑀚𑀸𑀦𑀺𑀢𑁆𑀯𑀸𑀢𑀺 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀉𑀪𑀬𑀫𑁂𑀯 𑀯𑀸 𑀚𑀸𑀦𑀺𑀢𑁆𑀯𑀸. 𑀢𑀣𑀸𑀢𑀺 𑀓𑀸𑀬𑀯𑀸𑀘𑀢𑁄 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀘𑀺𑀢𑁆𑀢𑀓𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑁂𑀳𑀺. 𑀢𑁂𑀳𑁂𑀯𑀸𑀢𑀺 𑀓𑀸𑀬𑀸𑀤𑀻𑀳𑀺 𑀢𑁂𑀳𑀺 𑀏𑀯, ‘‘𑀢𑀻𑀳𑁂𑀯𑀸’’𑀢𑀺𑀧𑀺 𑀧𑀸𑀞𑁄.

𑀲𑀜𑁆𑀘𑀭𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁩𑁮𑁧-𑁨. 𑀲𑀬𑀁𑀬𑀸𑀘𑀺𑀢𑀓𑁂𑀳𑁂𑀯𑀸𑀢𑀺 𑀏𑀢𑁆𑀣 ‘‘𑀉𑀧𑀓𑀭𑀡𑁂𑀳𑀻’’𑀢𑀺 𑀧𑀸𑀞𑀲𑁂𑀲𑁄, ‘‘𑀧𑀼𑀭𑀺𑀲𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑀸𑀯 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑁂𑀳𑀺 𑀉𑀧𑀓𑀭𑀡𑁂𑀳𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀺 𑀧𑀼𑀭𑀺𑀲𑀢𑁆𑀢𑀓𑀭𑀫𑁆𑀧𑀺 𑀕𑁄𑀡𑀫𑁆𑀧𑀺 𑀲𑀓𑀝𑀫𑁆𑀧𑀺 𑀯𑀸𑀲𑀺𑀫𑁆𑀧𑀺 𑀧𑀭𑀲𑀼𑀫𑁆𑀧𑀺 𑀓𑀼𑀞𑀸𑀭𑀺𑀫𑁆𑀧𑀺 𑀓𑀼𑀤𑀸𑀮𑀫𑁆𑀧𑀺 𑀦𑀺𑀔𑀸𑀤𑀦𑀫𑁆𑀧𑀻’’𑀢𑀺 ¶ . 𑀏𑀢𑁆𑀣 𑀏𑀯-𑀓𑀸𑀭𑁂𑀦 𑀅𑀬𑀸𑀘𑀺𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀅𑀲𑁆𑀲𑀸𑀫𑀺𑀓𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. ‘‘𑀓𑀼𑀝𑀺𑀓’’𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀯𑀼𑀢𑁆𑀢𑀢𑁆𑀢𑀸 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀪𑀺𑀢𑁆𑀢𑀺𑀘𑁆𑀙𑀤𑀦𑀸𑀦𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀲𑀼𑀥𑀸𑀬 𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀺𑀅𑀮𑁂𑀧𑁄𑀓𑀸𑀲𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑁄 𑀮𑀺𑀢𑁆𑀢𑀪𑀸𑀯𑁂𑀦 𑀉𑀮𑁆𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀢𑀣𑀸 𑀩𑀳𑀺 𑀮𑀺𑀢𑁆𑀢𑀪𑀸𑀯𑁂𑀦 𑀅𑀯𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀢𑁆𑀢𑀪𑀸𑀯𑁂𑀦 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀸𑀫𑀓𑀁 𑀯𑀸 𑀓𑀼𑀝𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀫𑀸𑀡𑀺𑀓𑀦𑁆𑀢𑀺 ‘‘𑀢𑀢𑁆𑀭𑀺𑀤𑀁 𑀧𑀫𑀸𑀡𑀁, 𑀤𑀻𑀖𑀲𑁄 𑀤𑁆𑀯𑀸𑀤𑀲𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁩𑁪𑁮) 𑀤𑀻𑀖𑀧𑀼𑀣𑀼𑀮𑀸𑀦𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦 𑀅𑀢𑀺𑀭𑁂𑀓𑀢𑁆𑀢𑀸 𑀅𑀧𑁆𑀧𑀫𑀸𑀡𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀢𑀺𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀻𑀡𑀺 𑀓𑀺𑀮𑁂𑀲𑀫𑀽𑀮𑀸𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀸𑀮𑀢𑁆𑀢𑀬𑀯𑀢𑁆𑀢 𑀲𑀩𑁆𑀩𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀼𑀯𑀦𑁂𑀓𑀧𑀝𑀺𑀲𑀭𑀡𑀪𑀽𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀭𑀸𑀚𑀲𑁆𑀲 𑀅𑀗𑁆𑀕𑀼𑀮𑀁 𑀧𑀫𑀸𑀡𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀅𑀗𑁆𑀕𑀼𑀮𑀢𑁄 𑀢𑀺𑀯𑀗𑁆𑀕𑀼𑀮𑀁 𑀳𑁄𑀢𑀺, 𑀏𑀓𑀸 𑀯𑀺𑀤𑀢𑁆𑀣𑀺 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀳𑁄𑀦𑁆𑀢𑀺, 𑀏𑀓𑀁 𑀭𑀢𑀦𑀁 𑀢𑀻𑀡𑀺 𑀭𑀢𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀦𑀺𑀬𑀫𑀺𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀘 𑀯𑀟𑁆𑀠𑀓𑀺𑀭𑀢𑀦𑁂𑀦 𑀤𑀺𑀬𑀟𑁆𑀠𑀭𑀢𑀦𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯). 𑀢𑀲𑁆𑀫𑀸 ¶ 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑁆𑀯𑀸𑀤𑀲 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀅𑀝𑁆𑀞𑀸𑀭𑀲 𑀳𑀢𑁆𑀣𑀸 𑀳𑁄𑀦𑁆𑀢𑀺. ‘‘𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺 𑀩𑀸𑀳𑀺𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺 (𑀧𑀸𑀭𑀸. 𑁩𑁪𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀁 𑀲𑀼𑀥𑀸𑀮𑁂𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀣𑀼𑀲𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁂𑀦 𑀯𑀸 𑀫𑀳𑀸𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑁂𑀦 𑀯𑀸 𑀩𑀸𑀳𑀺𑀭𑀦𑁆𑀢𑀢𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑀧𑁆𑀧𑀫𑀸𑀡𑀁, ‘‘𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸𑀢𑀺 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀫𑀸𑀦𑁂𑀦𑀸’’𑀢𑀺 (𑀧𑀸𑀭𑀸. 𑁩𑁪𑁯) ¶ 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀧𑀼𑀣𑀼𑀮𑀢𑁄 𑀤𑁆𑀯𑀸𑀤𑀲𑀗𑁆𑀕𑀼𑀮𑀸𑀥𑀺𑀓𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀜𑁆𑀘 𑀓𑀼𑀝𑀺𑀬𑀸 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀞𑀺𑀢𑀧𑀫𑀸𑀡𑀢𑁄 𑀤𑀻𑀖𑀢𑁄 𑀧𑀼𑀣𑀼𑀮𑀢𑁄 𑀯𑀸 𑀉𑀪𑀢𑁄 𑀯𑀸 𑀓𑁂𑀲𑀕𑁆𑀕𑀫𑀢𑁆𑀢𑀸𑀥𑀺𑀓𑀸𑀧𑀺 𑀓𑀼𑀝𑀺 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀆𑀳𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀉𑀤𑁆𑀤𑁂𑀲𑁄, 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀓𑀼𑀝𑀺, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. ‘‘𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀬𑁆𑀳𑀁 𑀏𑀲𑀸 𑀯𑀸𑀲𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀁 ‘‘𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀧𑀬𑁄𑀚𑀓𑀓𑀢𑁆𑀢𑀼𑀦𑁄 𑀘 𑀕𑀳𑁂𑀢𑀩𑁆𑀩𑀢𑁆𑀢𑀸 𑀉𑀧𑀮𑀓𑁆𑀔𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸𑀢𑀺 𑀢𑁂𑀦𑁂𑀯 𑀧𑀓𑀸𑀭𑁂𑀦, 𑀬𑁂𑀳𑀺 𑀅𑀲𑁆𑀲𑀸𑀫𑀺𑀓𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀢𑁂𑀳𑁂𑀯 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀫𑁆𑀧𑀺 𑀓𑀼𑀝𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺. 𑀇𑀫𑀺𑀦𑀸 𑀅𑀧𑁆𑀧𑀫𑀸𑀡𑀺𑀓𑀁 𑀯𑀺𑀬 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀫𑁆𑀧𑀺 𑀯𑀺𑀲𑀼𑀁𑀬𑁂𑀯 𑀆𑀧𑀢𑁆𑀢𑀺𑀬𑀸 𑀧𑀥𑀸𑀦𑀗𑁆𑀕𑀦𑁆𑀢𑀺. 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀪𑀽𑀫𑀺, 𑀲𑀸 𑀅𑀤𑁂𑀲𑀺𑀢𑀸 𑀏𑀢𑀺𑀲𑁆𑀲𑀸𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸, 𑀓𑀼𑀝𑀺, 𑀢𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑁂𑀦 𑀓𑀼𑀝𑀺𑀓𑀸𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀬𑀸𑀘𑀺𑀢𑁂𑀦 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑁂𑀳𑀺 𑀩𑁆𑀬𑀢𑁆𑀢𑁂𑀳𑀺 ¶ 𑀧𑀝𑀺𑀩𑀮𑁂𑀳𑀺 𑀤𑁆𑀯𑀻𑀳𑀺 𑀪𑀺𑀓𑁆𑀔𑀽𑀳𑀺 𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀲𑀸𑀭𑀫𑁆𑀪𑀪𑀸𑀯𑀁 𑀯𑀸 𑀅𑀧𑀭𑀺𑀓𑁆𑀓𑀫𑀦𑀪𑀸𑀯𑀁 𑀯𑀸 𑀉𑀪𑀬𑀫𑁂𑀯 𑀯𑀸 𑀧𑀲𑁆𑀲𑀦𑁆𑀢𑁂𑀳𑀺 ‘‘𑀫𑀸𑀬𑀺𑀥 𑀓𑀭𑀻’’𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑀸𑀭𑀫𑁆𑀪𑀁 𑀘𑁂 𑀳𑁄𑀢𑀺 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀭𑁄𑀘𑀺𑀢𑁂 𑀓𑀼𑀝𑀺𑀓𑀸𑀭𑀓𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀬𑀸𑀘𑀺𑀢𑁂 𑀯𑀼𑀟𑁆𑀠𑀸𑀦𑀼𑀫𑀢𑁂𑀦 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑁂𑀲𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑀺𑀢𑀓𑀼𑀝𑀺𑀯𑀢𑁆𑀣𑀼𑀲𑁆𑀲 ¶ 𑀅𑀪𑀸𑀯𑀸 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁, 𑀢𑁂𑀦𑁂𑀯 𑀅𑀲𑁆𑀲𑀸𑀫𑀺𑀓𑀢𑀸𑀤𑀺𑀧𑀓𑀸𑀭𑁂𑀦 𑀬𑀼𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀼𑀝𑀺𑀓𑀁 𑀅𑀢𑁆𑀢𑀦𑀸 𑀬𑀸𑀘𑀺𑀢𑁂𑀳𑀺 𑀉𑀧𑀓𑀭𑀡𑁂𑀳𑀺 𑀓𑀭𑁄𑀦𑁆𑀢𑀲𑁆𑀲, 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 ‘‘𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬 𑀯𑀢𑁆𑀣𑀼𑀤𑁂𑀲𑀦𑀸𑀬, 𑀧𑀫𑀸𑀡𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀬𑁆𑀬, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑁩𑁪𑁮) 𑀢𑀼𑀮𑁆𑀬𑀩𑀮𑀢𑀸𑀲𑀽𑀘𑀓𑁂𑀦 𑀯𑀸-𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀯𑀼𑀢𑁆𑀢𑀅𑀗𑁆𑀕𑀤𑁆𑀯𑀬𑀲𑀳𑀺𑀢𑀢𑁆𑀢𑀸 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦’’𑀦𑁆𑀢𑀺 (𑀧𑀸𑀭𑀸. 𑁩𑁫𑁫) 𑀘 ‘‘𑀪𑀺𑀓𑁆𑀔𑀼𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁪) 𑀘 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁫) 𑀘 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀻𑀲𑀼 𑀅𑀗𑁆𑀕𑁂𑀲𑀼 𑀏𑀓𑀁 𑀘𑁂, 𑀏𑀓𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 ¶ 𑀳𑁄𑀢𑀻𑀢𑀺. 𑀢𑀁 𑀧𑀦 ‘‘𑀲𑀘𑁂 𑀏𑀓𑀯𑀺𑀧𑀦𑁆𑀦𑀸 𑀲𑀸, 𑀕𑀭𑀼𑀓𑀁 𑀏𑀓𑀓𑀁 𑀲𑀺𑀬𑀸’’𑀢𑀺 𑀯𑀓𑁆𑀔𑀢𑀺.

𑀲𑀸𑀭𑀫𑁆𑀪𑀸𑀤𑀻𑀲𑀽𑀢𑀺 𑀏𑀢𑁆𑀣 𑀲𑀸𑀭𑀫𑁆𑀪-𑀲𑀤𑁆𑀤𑁄 𑀲𑁄𑀧𑀤𑁆𑀤𑀯𑀧𑀭𑀺𑀬𑀸𑀬𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀦𑁆𑀢𑀺 𑀲𑀉𑀧𑀤𑁆𑀤𑀯𑀁 𑀅𑀦𑀼𑀧𑀤𑁆𑀤𑀯’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯). 𑀏𑀢𑁆𑀣 ‘‘𑀲𑁂𑀢𑀁 𑀙𑀸𑀕𑀫𑀸𑀭𑀪𑁂𑀣 𑀬𑀚𑀫𑀸𑀦𑁄’’𑀢𑀺 𑀧𑀬𑁄𑀕𑁂 𑀯𑀺𑀬 𑀆-𑀧𑀼𑀩𑁆𑀩𑀲𑁆𑀲 𑀭𑀪𑀲𑁆𑀲 𑀳𑀺𑀁𑀲𑀢𑁆𑀣𑁂𑀧𑀺 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀓𑀢𑁆𑀢𑀼𑀲𑀸𑀥𑀦𑁄 𑀆𑀭𑀫𑁆𑀪-𑀲𑀤𑁆𑀤𑁄 𑀳𑀺𑀁𑀲𑀓𑀸𑀦𑀁 𑀓𑀺𑀧𑀺𑀮𑁆𑀮𑀺𑀓𑀸𑀤𑀺𑀲𑀢𑁆𑀢𑀸𑀦𑀁 𑀯𑀸𑀘𑀓𑁄 𑀪𑀯𑀢𑀻𑀢𑀺 𑀢𑀁𑀲𑀳𑀺𑀢𑀝𑁆𑀞𑀸𑀦𑀁 𑀲𑀸𑀭𑀫𑁆𑀪𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯 𑀧𑀤𑀪𑀸𑀚𑀦𑁂𑀧𑀺 𑀯𑀼𑀢𑁆𑀢𑀁 ‘‘𑀲𑀸𑀭𑀫𑁆𑀪𑀁 𑀦𑀸𑀫 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀉𑀧𑀘𑀺𑀓𑀸𑀦𑀁 𑀯𑀸, 𑀉𑀦𑁆𑀤𑀽𑀭𑀸𑀦𑀁 𑀯𑀸, 𑀅𑀳𑀻𑀦𑀁 𑀯𑀸, 𑀯𑀺𑀘𑁆𑀙𑀺𑀓𑀸𑀦𑀁 𑀯𑀸, 𑀲𑀢𑀧𑀤𑀻𑀦𑀁 𑀯𑀸, 𑀳𑀢𑁆𑀣𑀻𑀦𑀁 𑀯𑀸, 𑀅𑀲𑁆𑀲𑀸𑀦𑀁 𑀯𑀸, 𑀲𑀻𑀳𑀸𑀦𑀁 𑀯𑀸, 𑀩𑁆𑀬𑀕𑁆𑀖𑀸𑀦𑀁 𑀯𑀸…𑀧𑁂… 𑀆𑀲𑀬𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁩𑁫𑁩).

𑀆𑀤𑀺-𑀲𑀤𑁆𑀤𑁂𑀦 𑀅𑀧𑀭𑀺𑀓𑁆𑀓𑀫𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀏𑀢𑀁 𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁩𑁫𑁩) 𑀯𑀼𑀢𑁆𑀢𑀮𑀓𑁆𑀔𑀡𑀯𑀺𑀧𑀭𑀺𑀬𑀸𑀬𑀢𑁄 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀏𑀓𑀁 𑀘𑀓𑁆𑀓𑀁 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀘𑀓𑁆𑀓𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀓𑀼𑀝𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀯𑀚𑁆𑀚𑀺𑀬𑀫𑀸𑀦𑀲𑁆𑀲 𑀕𑁄𑀬𑀼𑀢𑁆𑀢𑀲𑀓𑀝𑀲𑁆𑀲 𑀯𑀸 𑀦𑀺𑀲𑁆𑀲𑁂𑀡𑀺𑀬𑀁 𑀞𑀢𑁆𑀯𑀸 𑀓𑀼𑀝𑀺𑀁 𑀙𑀸𑀤𑀬𑀫𑀸𑀦𑀸𑀦𑀁 𑀦𑀺𑀲𑁆𑀲𑁂𑀡𑀺𑀬𑀸 𑀯𑀸 𑀧𑀭𑀢𑁄 𑀕𑀫𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 ¶ 𑀯𑀼𑀢𑁆𑀢𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀲𑀗𑁆𑀔𑀸𑀢𑀅𑀗𑁆𑀕𑀤𑁆𑀯𑀬𑁂𑀦 𑀬𑀼𑀢𑁆𑀢𑀁 𑀘𑁂, 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺 (𑀧𑀸𑀭𑀸. 𑁩𑁫𑁫). 𑀏𑀓𑀁 𑀘𑁂, 𑀏𑀓𑀫𑁂𑀯 𑀳𑁄𑀢𑀺. 𑀬𑀣𑀸𑀳 ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 ¶ 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁫) 𑀏𑀢𑀁 𑀢𑀬𑀫𑁆𑀧𑀺 ‘‘𑀲𑀸𑀭𑀫𑁆𑀪𑀸𑀤𑀻𑀲𑀼 𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓𑀁 𑀅𑀗𑁆𑀕𑀁 𑀧𑀫𑀸𑀡𑀺𑀓𑀢𑁆𑀢𑀁 𑀯𑀸 𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑁆𑀢𑀁 𑀯𑀸 𑀯𑀺𑀧𑀦𑁆𑀦𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀯𑀺𑀧𑀦𑁆𑀦𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀧𑀤𑀸𑀦𑀫𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀓𑀼𑀝𑀺.

𑁩𑁮𑁩. 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀢𑁂 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀺 ‘𑀧𑀼𑀭𑀺𑀲𑀁 𑀤𑁂𑀣 𑀧𑀼𑀭𑀺𑀲𑀢𑁆𑀢𑀓𑀭𑀁 𑀤𑁂𑀣𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 (𑀧𑀸𑀭𑀸. 𑁩𑁪𑁨) 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀆𑀕𑀢𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀭𑀺𑀲’’𑀦𑁆𑀢𑀺𑀆𑀤𑀺. 𑀓𑀫𑁆𑀫𑀲𑀳𑀸𑀬𑀢𑁆𑀣𑀸𑀬𑀸𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀫𑁆𑀫𑁂 𑀲𑀳𑀸𑀬𑀪𑀸𑀯𑀸𑀬, 𑀓𑀫𑁆𑀫𑀓𑀭𑀡𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀼𑀭𑀺𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀫𑁆𑀫𑀓𑀭𑀡𑀢𑁆𑀣𑀸𑀬 ‘𑀧𑀼𑀭𑀺𑀲𑀁 𑀤𑁂𑀣𑀸’𑀢𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨). 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑀸𑀢𑀺 𑀲𑀸𑀫𑀺𑀓𑀸𑀦𑀁 𑀆𑀬𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀫𑀽𑀮𑀲𑁆𑀲 𑀙𑀺𑀦𑁆𑀤𑀦𑀯𑀲𑁂𑀦, 𑀅𑀢𑁆𑀢𑀦𑁄 𑀆𑀬𑀢𑁆𑀢𑀪𑀸𑀯𑀓𑀭𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁮𑁪. 𑀅𑀯𑀚𑁆𑀚𑀦𑁆𑀢𑀺 𑀯𑀚𑁆𑀚𑀭𑀳𑀺𑀢𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀫𑀺𑀕𑀮𑀼𑀤𑁆𑀤𑀓𑀫𑀘𑁆𑀙𑀩𑀦𑁆𑀥𑀓𑀸𑀤𑀻𑀦𑀁 𑀲𑀓𑀓𑀫𑁆𑀫𑀁 𑀯𑀚𑁆𑀚𑀓𑀫𑁆𑀫𑀁 𑀦𑀸𑀫. 𑀢𑀲𑁆𑀫𑀸 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀦𑁆𑀢𑁂𑀦 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺, ‘‘𑀳𑀢𑁆𑀣𑀓𑀫𑁆𑀫𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀅𑀯𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀫𑁆𑀫𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸𑀬𑁂𑀯 𑀬𑀸𑀘𑀺𑀢𑀩𑁆𑀩𑀁. 𑀮𑀼𑀤𑁆𑀤𑀓𑁂 𑀯𑀸 𑀇𑀢𑀭𑁂 𑀯𑀸 𑀦𑀺𑀓𑁆𑀓𑀫𑁆𑀫𑁂 𑀅𑀬𑀸𑀘𑀺𑀢𑁆𑀯𑀸𑀧𑀺 𑀬𑀣𑀸𑀭𑀼𑀘𑀺 𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀸𑀬 𑀲𑀩𑁆𑀩𑀣𑀸𑀧𑀺 𑀓𑀧𑁆𑀧𑀺𑀬𑀪𑀸𑀯𑀁 𑀤𑀻𑀧𑁂𑀢𑀼𑀁 𑀢𑀁𑀢𑀁𑀲𑀺𑀧𑁆𑀧𑀺𑀓𑁂 𑀬𑀸𑀘𑀺𑀢𑁆𑀯𑀸 𑀫𑀳𑀦𑁆𑀢𑀫𑁆𑀧𑀺 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀦𑁆𑀢𑁂𑀦 ¶ 𑀳𑀢𑁆𑀣𑀓𑀫𑁆𑀫𑁂 𑀬𑀸𑀘𑀺𑀢𑁂 𑀅𑀢𑁆𑀢𑀦𑁄 𑀅𑀦𑁄𑀓𑀸𑀲𑀪𑀸𑀯𑀁 𑀜𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀭𑁄𑀦𑁆𑀢𑀸𑀦𑀁 𑀤𑀸𑀢𑀩𑁆𑀩𑀁 𑀫𑀽𑀮𑀁 𑀤𑀺𑀬𑁆𑀬𑀫𑀸𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨 𑀅𑀢𑁆𑀣𑀢𑁄𑀲𑀫𑀸𑀦𑀁) 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀸𑀦𑀁 𑀅𑀢𑁆𑀣𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀓𑀧𑁆𑀧𑀺𑀬𑁂𑀦 𑀲𑀸𑀭𑀼𑀧𑁆𑀧𑁂𑀦 𑀧𑀬𑁄𑀕𑁂𑀦 𑀬𑀸𑀘𑀺𑀢𑀩𑁆𑀩𑀁. 𑀬𑀸𑀘𑀺𑀢𑀓𑀫𑁆𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁂𑀳𑀺 𑀓𑀭𑁄𑀦𑁆𑀢𑀸𑀦𑀁 𑀤𑀺𑀬𑁆𑀬𑀫𑀸𑀦𑀁 𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 ¶ 𑀓𑀫𑁆𑀫𑀓𑀸𑀭𑀓𑁂 𑀤𑀲𑁆𑀲𑁂𑀢𑁆𑀯𑀸 𑀤𑀸𑀧𑁂𑀢𑀩𑁆𑀩𑀁. 𑀏𑀯𑀁 𑀬𑀸𑀘𑀦𑀸𑀬 𑀅𑀦𑀯𑀚𑁆𑀚𑀪𑀸𑀯𑁂 𑀅𑀝𑁆𑀞𑀓𑀣𑀸𑀕𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀳𑀢𑁆𑀣𑀓𑀫𑁆𑀫𑀫𑁆𑀧𑀻’’𑀢𑀺𑀆𑀤𑀺. 𑀧𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀧𑀤𑀧𑀽𑀭𑀡𑁂 𑀯𑀸. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀬𑀲𑁆𑀫𑀸 𑀇𑀤𑀁 𑀳𑀢𑁆𑀣𑀓𑀫𑁆𑀫𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀫𑁂𑀯 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺.

𑁩𑁮𑁫. 𑀜𑀸𑀢𑀓𑀸𑀤𑀺𑀓𑁂𑀢𑀺 𑀜𑀸𑀢𑀓𑀧𑀯𑀸𑀭𑀺𑀢𑁂. 𑀞𑀧𑁂𑀢𑁆𑀯𑀸𑀢𑀺 𑀯𑀚𑁆𑀚𑁂𑀢𑁆𑀯𑀸. 𑀕𑁄𑀡𑀫𑀸𑀬𑀸𑀘𑀫𑀸𑀦𑀲𑁆𑀲𑀸𑀢𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀢𑀸𑀯𑀓𑀸𑀮𑀺𑀓𑀁 𑀯𑀺𑀦𑀸 𑀓𑁂𑀯𑀮𑀁 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀕𑁄𑀡𑀁 𑀬𑀸𑀘𑀦𑁆𑀢𑀲𑁆𑀲. 𑀢𑁂𑀲𑀼𑀧𑀻𑀢𑀺 𑀜𑀸𑀢𑀓𑀸𑀤𑀻𑀲𑀼𑀧𑀺 𑀫𑀽𑀮𑀘𑁆𑀙𑁂𑀚𑁆𑀚𑁂𑀦 𑀕𑁄𑀡𑀫𑀸𑀬𑀸𑀘𑀦𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. ‘‘𑀢𑀸𑀯𑀓𑀸𑀮𑀺𑀓𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀬𑀸𑀯 𑀓𑀫𑁆𑀫𑀓𑀭𑀡𑀓𑀸𑀮𑀁, 𑀢𑀸𑀯 𑀦𑀺𑀬𑀫𑁂𑀢𑁆𑀯𑀸 𑀜𑀸𑀢𑀓𑀅𑀜𑁆𑀜𑀸𑀢𑀓𑀧𑀯𑀸𑀭𑀺𑀢𑀅𑀧𑁆𑀧𑀯𑀸𑀭𑀺𑀢𑁂 𑀲𑀩𑁆𑀩𑁂𑀧𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀬𑀸𑀘𑀺𑀢𑁆𑀯𑀸 𑀯𑀸 𑀅𑀬𑀸𑀘𑀺𑀢𑁆𑀯𑀸 𑀯𑀸 𑀕𑀳𑀺𑀢𑁄 𑀘𑁂, 𑀭𑀓𑁆𑀔𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀲𑀸𑀫𑀺𑀓𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑁄, 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀯𑀺𑀲𑀸𑀡𑁂 𑀯𑀸 𑀪𑀺𑀦𑁆𑀦𑁂 𑀲𑀸𑀫𑀺𑀓𑁂𑀲𑀼 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼 𑀪𑀡𑁆𑀟𑀤𑁂𑀬𑁆𑀬𑀁.

𑁩𑁮𑁬. 𑀤𑁂𑀫𑀸𑀢𑀺 𑀏𑀢𑁆𑀣 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀧𑀸𑀞𑀲𑁂𑀲𑁄. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 𑀧𑀦 ‘𑀆𑀭𑀸𑀫𑀺𑀓𑀸𑀦𑀁 𑀆𑀘𑀺𑀓𑁆𑀔𑀣 𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬𑀸’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀓𑀝𑀯𑀺𑀦𑀺𑀘𑁆𑀙𑀬𑀲𑁆𑀲𑀸𑀧𑀺 ¶ 𑀕𑁄𑀡𑀯𑀺𑀦𑀺𑀘𑁆𑀙𑀬𑁂𑀦 𑀲𑀫𑀸𑀦𑀢𑁆𑀢𑀸 𑀢𑀁 𑀅𑀯𑀢𑁆𑀯𑀸 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀓𑀝𑀁…𑀧𑁂… 𑀯𑀝𑁆𑀝𑀢𑀻’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀼𑀫𑁆𑀳𑀸𑀓𑀫𑁂𑀯 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂 𑀤𑀸𑀭𑀼𑀪𑀡𑁆𑀟𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨).

𑁩𑁮𑁭. 𑀓𑀼𑀞𑀸𑀭𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀔𑀸𑀤𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀸𑀞𑀲𑁂𑀲𑁄. ‘‘𑀲𑀓𑀝𑀁 𑀕𑁄𑀡𑁄 𑀯𑀺𑀬 𑀢𑀸𑀯𑀓𑀸𑀮𑀺𑀓𑀁 𑀅𑀓𑀢𑁆𑀯𑀸 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀦 𑀬𑀸𑀘𑀺𑀢𑀩𑁆𑀩𑀁, 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀦 𑀬𑀸𑀘𑀺𑀢𑀩𑁆𑀩𑀁, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑁄 𑀘 ‘‘𑀲𑀓𑀝𑀁…𑀧𑁂… 𑀯𑀝𑁆𑀝𑀢𑀻’’𑀢𑀺 𑀯𑀺𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑀘𑀸𑀢𑀺 𑀅𑀬𑀁 𑀦𑀬𑁄 𑀯𑀸𑀲𑀺𑀆𑀤𑀻𑀲𑀼 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀓𑁂𑀦𑀘𑀺 ‘‘𑀫𑀫𑁂𑀢’’𑀦𑁆𑀢𑀺 𑀅𑀧𑀭𑀺𑀕𑁆𑀕𑀳𑀺𑀢𑀁, ‘‘𑀭𑀓𑁆𑀔𑀺𑀢𑀕𑁄𑀧𑀺𑀢𑀝𑁆𑀞𑀸𑀦𑁂𑀬𑁂𑀯 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀅𑀭𑀓𑁆𑀔𑀺𑀢𑀸𑀕𑁄𑀧𑀺𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬 𑀯𑀮𑁆𑀮𑀺𑀆𑀤𑀺𑀯𑀺𑀦𑀺𑀘𑁆𑀙𑀬𑀫𑁆𑀧𑀺 𑀯𑀢𑁆𑀯𑀸 ‘‘𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀦𑁆𑀢𑀺 ¶ 𑀇𑀥 𑀯𑀼𑀢𑁆𑀢𑀕𑁄𑀡𑀸𑀤𑀺𑀓𑀜𑁆𑀘 𑀯𑀓𑁆𑀔𑀫𑀸𑀦𑀯𑀮𑁆𑀮𑀺𑀆𑀤𑀺𑀓𑀜𑁆𑀘 𑀕𑀳𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀯𑀺𑀲𑀬𑀢𑁆𑀢𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀳𑀭𑀸𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀓𑁂𑀦𑀘𑀺 𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀦𑁆𑀢𑀺 𑀤𑀻𑀧𑁂𑀢𑀺.

𑁩𑁮𑁮. 𑀯𑀮𑁆𑀮𑀺𑀆𑀤𑀺𑀫𑁆𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀢𑁆𑀢𑀫𑀼𑀜𑁆𑀚𑀢𑀺𑀡𑀫𑀢𑁆𑀢𑀺𑀓𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀁 𑀯𑀺𑀦𑀸 𑀕𑁂𑀳𑀘𑁆𑀙𑀸𑀤𑀦𑀢𑀺𑀡𑀁 𑀢𑀺𑀡𑀁 𑀦𑀸𑀫. 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀢𑀺 ‘‘𑀯𑀮𑁆𑀮𑀺 𑀅𑀟𑁆𑀠𑀩𑀸𑀳𑀼𑀫𑀢𑁆𑀢𑀸𑀧𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀮𑀓𑁆𑀔𑀡𑁂 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂. 𑀧𑀭𑁂𑀲𑀁 𑀲𑀦𑁆𑀢𑀓𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑁂 𑀤𑀼𑀓𑁆𑀓𑀝𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀻𑀧𑁂𑀢𑀺.

𑁩𑁮𑁯. 𑀧𑀘𑁆𑀘𑀬𑁂𑀲𑀽𑀢𑀺 ¶ 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀧𑀘𑁆𑀘𑀬𑁂𑀲𑀼. 𑀏𑀯-𑀓𑀸𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀲𑀗𑁆𑀔𑀸𑀢𑁂 𑀘𑀢𑀼𑀢𑁆𑀣𑀧𑀘𑁆𑀘𑀬𑁂 𑀯𑀺𑀜𑁆𑀜𑀢𑁆𑀢𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 ‘‘𑀆𑀳𑀭, 𑀤𑁂𑀳𑀻’’𑀢𑀺 𑀇𑀘𑁆𑀙𑀺𑀢𑀧𑀘𑁆𑀘𑀬𑁂 𑀦𑀸𑀫𑀁 𑀯𑀢𑁆𑀯𑀸 𑀬𑀸𑀘𑀦𑀸. 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀲𑀸𑀯𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀘 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑁂𑀯 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀮𑀩𑁆𑀪𑀫𑀸𑀦𑀪𑀸𑀯𑁂𑀦 𑀲𑀫𑀢𑁆𑀢𑀸 𑀧𑀘𑁆𑀘𑀬𑁂𑀲𑀼 𑀢𑀻𑀲𑀼 𑀅𑀦𑀦𑁆𑀢𑀭𑀁 𑀲𑀳𑀦𑀺𑀤𑁆𑀤𑀺𑀝𑁆𑀞𑀧𑀘𑁆𑀘𑀬𑀢𑁆𑀢𑀬𑀢𑁄 𑀢𑀢𑀺𑀬𑀧𑀘𑁆𑀘𑀬𑁂𑀬𑁂𑀯 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑀺𑀬𑁂 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀸𑀦𑀺 𑀘 𑀮𑀩𑁆𑀪𑀭𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑀤𑁆𑀯𑀬𑁂 𑀧𑀦 𑀧𑀭𑀺𑀓𑀣𑀸𑀤𑀬𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀼𑀢𑁆𑀢𑁂 𑀘𑀢𑀼𑀢𑁆𑀣𑀧𑀘𑁆𑀘𑀬𑁂𑀧𑀺 𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀓𑀸𑀭𑁂𑀦 𑀧𑀭𑀺𑀓𑀣𑀸𑀤𑀺𑀢𑁆𑀢𑀬𑀁 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 ‘‘𑀢𑀻𑀲𑁆𑀯𑁂𑀯𑀸’’𑀢𑀺 𑀏𑀯-𑀓𑀸𑀭𑁂𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘𑀢𑀼𑀢𑁆𑀣𑁂 𑀕𑀺𑀮𑀸𑀦𑀧𑀘𑁆𑀘𑀬𑁂 𑀧𑀭𑀺𑀓𑀣𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀝𑁆𑀝𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀏𑀢𑁆𑀢𑀸𑀯𑀢𑀸 𑀘𑀢𑀼𑀢𑁆𑀣𑁂 𑀧𑀘𑁆𑀘𑀬𑁂 𑀧𑀭𑀺𑀓𑀣𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀯𑀝𑁆𑀝𑀦𑁆𑀢𑀺, 𑀢𑀢𑀺𑀬𑀧𑀘𑁆𑀘𑀬𑁂 𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀦𑀸 𑀲𑁂𑀲𑀢𑁆𑀢𑀬𑀁 𑀯𑀝𑁆𑀝𑀢𑀺, 𑀧𑀼𑀭𑀺𑀫𑀧𑀘𑁆𑀘𑀬𑀤𑁆𑀯𑀬𑁂 𑀲𑀩𑁆𑀩𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀧𑀭𑀺𑀓𑀣𑀸𑀤𑀺𑀓𑀦𑁆𑀢𑀺 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀭𑀡𑀸𑀭𑀳𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀉𑀧𑀸𑀲𑀓𑀸𑀦𑀁 𑀲𑀼𑀡𑀦𑁆𑀢𑀸𑀦𑀁 ‘‘𑀇𑀫𑀲𑁆𑀫𑀺𑀁 𑀯𑀢 𑀑𑀓𑀸𑀲𑁂 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀬𑀼𑀢𑁆𑀢’’𑀦𑁆𑀢𑀺 𑀯𑀸 ‘‘𑀅𑀦𑀼𑀭𑀽𑀧’’𑀦𑁆𑀢𑀺 𑀯𑀸 𑀧𑀯𑀢𑁆𑀢𑀸 𑀓𑀣𑀸 𑀧𑀭𑀺𑀓𑀣𑀸 𑀦𑀸𑀫. ‘‘𑀉𑀧𑀸𑀲𑀓𑀸 𑀢𑀼𑀫𑁆𑀳𑁂 𑀓𑀢𑁆𑀣 𑀯𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀸𑀲𑀸𑀤𑁂 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀽𑀦𑀁 𑀧𑀦 𑀉𑀧𑀸𑀲𑀓𑀸 𑀧𑀸𑀲𑀸𑀤𑁄 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 ¶ 𑀓𑀣𑀸 𑀑𑀪𑀸𑀲𑁄 𑀦𑀸𑀫. 𑀉𑀧𑀸𑀲𑀓𑁂𑀲𑀼 𑀧𑀲𑁆𑀲𑀫𑀸𑀦𑁂𑀲𑀼 𑀪𑀽𑀫𑀺𑀬𑀁 𑀭𑀚𑁆𑀚𑀼𑀁 𑀧𑀲𑀸𑀭𑁂𑀢𑁆𑀯𑀸 𑀪𑀽𑀫𑀺𑀁 𑀪𑀸𑀚𑁂𑀢𑁆𑀯𑀸 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 ‘‘𑀓𑀺𑀫𑀺𑀤𑀁 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ¶ ‘‘𑀏𑀢𑁆𑀣 𑀆𑀯𑀸𑀲𑀁 𑀓𑀭𑁄𑀫 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀓𑀸 𑀓𑀣𑀸 𑀦𑀺𑀫𑀺𑀢𑁆𑀢𑀓𑀣𑀸 𑀦𑀸𑀫. 𑀕𑀺𑀮𑀸𑀦𑀧𑀘𑁆𑀘𑀬𑁂 𑀘 𑀇𑀫𑀺𑀦𑀸 𑀦𑀬𑁂𑀦 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁂𑀢𑀁 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁨) 𑀯𑀼𑀢𑁆𑀢𑀁.

𑁩𑁯𑁦-𑁩. 𑀇𑀤𑀸𑀦𑀺 𑀓𑀼𑀝𑀺𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀅𑀤𑁂𑀲𑀺𑀢𑁂’’𑀢𑀺𑀆𑀤𑀺. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀦𑀺𑀲𑁂𑀦𑁆𑀢𑀲𑁆𑀲𑀸𑀢𑀺 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀢𑀺𑀔𑀺𑀡𑀁 𑀓𑀭𑁄𑀦𑁆𑀢𑀲𑁆𑀲. 𑀧𑀸𑀘𑀺𑀢𑁆𑀢𑀺𑀬𑀸 𑀲𑀳𑀸𑀢𑀺 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁦) 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁.

𑀆𑀧𑀢𑁆𑀢𑀺𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘 𑀇𑀢𑀭𑀢𑁆𑀭 𑀲𑀼𑀤𑁆𑀥𑀧𑀬𑁄𑀕𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀆𑀧𑀢𑁆𑀢𑀺𑀁.

𑀬𑀸 𑀧𑀦𑀸𑀢𑀺 𑀬𑀸 𑀓𑀼𑀝𑀺. 𑀧𑀞𑀫𑁂 𑀤𑀼𑀢𑀺𑀬𑁂𑀢𑀺 𑀏𑀢𑁆𑀣 ‘‘𑀧𑀺𑀡𑁆𑀟𑁂𑀳𑀻’’𑀢𑀺 𑀓𑀭𑀡𑀩𑀳𑀼𑀯𑀘𑀦𑀁 𑀯𑀺𑀪𑀢𑁆𑀢𑀺𑀯𑀘𑀦𑀯𑀺𑀧𑀭𑀺𑀡𑀸𑀫𑀯𑀲𑁂𑀦 ‘‘𑀧𑀺𑀡𑁆𑀟𑁂’’𑀢𑀺 𑀪𑀼𑀫𑁆𑀫𑁂𑀓𑀯𑀘𑀦𑀦𑁆𑀢𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁, ‘‘𑀦𑀺𑀓𑁆𑀔𑀺𑀢𑁆𑀢𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁, 𑀦𑀺𑀓𑁆𑀔𑀺𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑁩𑁯𑁪. ‘‘𑀲𑀘𑁂 𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀧𑁆𑀧𑀓𑀢𑀦𑁆𑀢𑀺 𑀆𑀭𑀤𑁆𑀥𑀫𑀦𑀺𑀝𑁆𑀞𑀺𑀢𑀁. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀦𑀺𑀝𑁆𑀞𑀺𑀢𑁂 𑀆𑀧𑀚𑁆𑀚𑀺𑀢𑀩𑁆𑀩𑀲𑀗𑁆𑀖𑀸𑀤𑀺𑀲𑁂𑀲𑀸𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀧𑀼𑀩𑁆𑀩𑀧𑀬𑁄𑀕𑀫𑀢𑁆𑀢𑁂𑀦 𑀳𑀺 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺𑀧𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀧𑀦 𑀤𑁂𑀲𑁂𑀢𑀩𑁆𑀩𑀸𑀦𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀓𑀟𑁆𑀠𑀢𑀺, 𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀧𑀼𑀩𑁆𑀩𑀪𑀸𑀕𑁂 𑀆𑀧𑀦𑁆𑀦𑀸𑀦𑀁 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀁 𑀤𑁂𑀲𑁂𑀢𑀩𑁆𑀩𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀢𑀁 𑀓𑀼𑀝𑀺𑀦𑁆𑀢𑀺 𑀢𑀁 𑀯𑀺𑀧𑁆𑀧𑀓𑀢𑀓𑀼𑀝𑀺𑀁.

𑁩𑁯𑁫. 𑀅𑀜𑁆𑀜𑀁 𑀪𑁄𑀚𑀦𑀲𑀸𑀮𑀸𑀤𑀺𑀁. 𑀢𑀣𑀸𑀢𑀺 𑀅𑀦𑀸𑀧𑀢𑁆𑀢𑀺𑀫𑀸𑀳.

𑁩𑁯𑁬. ‘‘𑀓𑀭𑁄𑀢𑁄’’𑀢𑀺 ¶ 𑀇𑀫𑀺𑀦𑀸 ‘‘𑀓𑀸𑀭𑀸𑀧𑀬𑀢𑁄’’𑀢𑀺𑀧𑀺 𑀮𑀩𑁆𑀪𑀢𑀺. 𑀉𑀪𑀬𑁂𑀦𑀸𑀧𑀺 ‘‘𑀓𑁆𑀭𑀺𑀬𑀢𑁄’’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀅𑀗𑁆𑀕𑀁 𑀤𑀲𑁆𑀲𑁂𑀢𑀺.

𑁩𑁯𑁭. 𑀢𑀦𑁆𑀢𑀺 ¶ ‘‘𑀅𑀧𑁆𑀧𑀫𑀸𑀡𑀺𑀓’’𑀦𑁆𑀢𑀺 𑀏𑀯𑀁 𑀧𑀘𑁆𑀘𑀸𑀫𑀲𑀢𑀺. ‘‘𑀓𑁆𑀭𑀺𑀬𑀸𑀓𑁆𑀭𑀺𑀬𑀢𑁄’’𑀢𑀺 𑀇𑀤𑀁 𑀓𑀼𑀝𑀺𑀬𑀸 𑀓𑀭𑀡𑀜𑁆𑀘 𑀯𑀢𑁆𑀣𑀼𑀤𑁂𑀲𑀦𑀸𑀬 𑀅𑀓𑀭𑀡𑀜𑁆𑀘 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸.

𑁩𑁯𑁮. 𑀯𑀢𑁆𑀣𑀼𑀁 𑀅𑀤𑁂𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀢𑁂𑀦 𑀯𑀺𑀳𑀸𑀭𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀳𑀸𑀭𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁬𑁭) 𑀧𑀤𑀪𑀸𑀚𑀦𑁂 𑀆𑀕𑀢𑀦𑀬𑁂𑀦 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀳𑀸𑀭𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑁆𑀫 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀓𑀢𑁆𑀢𑀼𑀓𑀸𑀫𑁄 𑀲𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀯𑀺𑀳𑀸𑀭𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑁂 𑀯𑀼𑀟𑁆𑀠𑁂 𑀯𑀸 𑀪𑀺𑀓𑁆𑀔𑀽 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑁂𑀦 𑀲𑀫𑁆𑀫𑀢𑁂 𑀯𑀸 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸 𑀓𑀢𑀧𑀭𑀺𑀓𑀫𑁆𑀫𑀁 𑀯𑀺𑀳𑀸𑀭𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑁂 𑀯𑀺𑀬 𑀕𑀢𑀪𑀺𑀓𑁆𑀔𑀽𑀳𑀺 𑀑𑀮𑁄𑀓𑁂𑀢𑁆𑀯𑀸 𑀲𑀸𑀭𑀫𑁆𑀪𑀸𑀤𑀺𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀦𑀸𑀭𑀫𑁆𑀪𑀲𑀧𑀭𑀺𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀭𑁄𑀘𑀺𑀢𑁂 𑀧𑀼𑀦 𑀢𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀓𑀢𑁆𑀢𑀼𑀓𑀸𑀫𑁄 𑀲𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀺𑀳𑀸𑀭𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁 ¶ , 𑀢𑀣𑀸 𑀅𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀳 𑀲𑀸𑀭𑀫𑁆𑀪𑀸𑀤𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀮𑁆𑀮𑀓𑀦𑁆𑀢𑀺 ‘‘𑀲𑀲𑁆𑀲𑀸𑀫𑀺𑀓𑀪𑀸𑀯𑁂𑀦 𑀲𑀜𑁆𑀜𑀸𑀘𑀺𑀓𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄. 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁬𑁬) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀫𑀳𑀦𑁆𑀢𑀪𑀸𑀯𑁂𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀦𑁆𑀢𑀺 ‘‘𑀯𑀺𑀳𑀸𑀭𑁄 𑀦𑀸𑀫 𑀉𑀮𑁆𑀮𑀺𑀢𑁆𑀢𑁄 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑁄 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑁄 𑀯𑀸’’𑀢𑀺 (𑀧𑀸𑀭𑀸. 𑁩𑁭𑁧) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑁂𑀦𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀉𑀮𑁆𑀮𑀺𑀢𑁆𑀢𑀸𑀤𑀺𑀲𑀭𑀽𑀧𑀁 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀁 𑀯𑀺𑀳𑀸𑀭𑀁 𑀬𑁄 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀓𑀭𑁂𑀬𑁆𑀬 𑀯𑀸 𑀓𑀸𑀭𑀸𑀧𑁂𑀬𑁆𑀬 𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀢𑁆𑀢𑀯𑀸𑀲𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸𑀲𑀁 𑀧𑀝𑀺𑀘𑁆𑀘, 𑀇𑀫𑀺𑀦𑀸 𑀧𑀭𑀲𑁆𑀲 𑀯𑀸𑀲𑀢𑁆𑀣𑀸𑀬 𑀓𑀭𑁄𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀜𑁆𑀜𑀸𑀬𑀢𑀺. ‘‘𑀕𑀭𑀼𑀓’’𑀦𑁆𑀢𑀺 𑀏𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀸𑀬 𑀅𑀓𑀸𑀭𑀸𑀧𑀦𑁂𑀦 ‘‘𑀏𑀓𑁄𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀢𑀬𑀁 ¶ 𑀦 𑀕𑀳𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀯𑀓𑁆𑀔𑀢𑀺 ‘‘𑀧𑀫𑀸𑀡𑀸…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑀢𑀸’’𑀢𑀺 (𑀯𑀺. 𑀯𑀺. 𑁩𑁯𑁯 𑀆𑀤𑀬𑁄).

𑁩𑁯𑁯. 𑀓𑁆𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀧𑀺 𑀆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀲𑁆𑀲 𑀇𑀥 𑀅𑀪𑀸𑀯𑁄 𑀜𑀸𑀢𑀩𑁆𑀩𑁄. 𑀓𑁆𑀭𑀺𑀬…𑀧𑁂… 𑀮𑀓𑁆𑀔𑀬𑁂𑀢𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀢𑁄 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸𑀬 𑀅𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀦𑀢𑀸 𑀅𑀦𑀼𑀜𑁆𑀜𑀸𑀢𑀸.

𑀫𑀳𑀮𑁆𑀮𑀓𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁪𑁦𑁧-𑁩. 𑀢𑁂𑀲𑀽𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼. 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀸𑀦𑀺 𑀏𑀓𑀽𑀦𑀯𑀻𑀲𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀦𑀺𑀬𑀢𑀸 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀤𑀬𑁄 ¶ 𑀘𑀢𑁆𑀢𑀸𑀭𑁄 𑀢𑀤𑀦𑀼𑀮𑁄𑀫𑀸𑀬 𑀯𑀺𑀩𑁆𑀪𑀦𑁆𑀢𑀪𑀺𑀓𑁆𑀔𑀼𑀦𑀺𑀬𑀸 𑀲𑀳 𑀧𑀜𑁆𑀘 𑀧𑀸𑀭𑀸𑀚𑀺𑀓𑁂 𑀯𑀺𑀦𑀸 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀸 𑀲𑁂𑀲𑀸 𑀏𑀓𑀽𑀦𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸.

𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀤𑀪𑀸𑀚𑀦𑁂 ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 (𑀧𑀸𑀭𑀸. 𑁩𑁮𑁬) 𑀯𑀼𑀢𑁆𑀢𑀦𑀬𑀲𑁆𑀲 𑀇𑀥 ‘‘𑀏𑀓𑀽𑀦𑀯𑀻𑀲𑀢𑀻’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀤𑀪𑀸𑀚𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀕𑀢𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁, 𑀇𑀤𑀁 𑀧𑀦 𑀩𑀼𑀤𑁆𑀥𑀸𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀧𑀯𑀢𑁆𑀢𑀓𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑁄 𑀲𑀩𑁆𑀩𑀧𑀸𑀭𑀸𑀚𑀺𑀓𑀸𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 (𑀧𑀸𑀭𑀸. 𑁩𑁮𑁫) 𑀯𑀼𑀢𑁆𑀢𑀅𑀦𑀼𑀤𑁆𑀥𑀁𑀲𑀦𑀲𑁆𑀲 𑀏𑀓𑀦𑁆𑀢𑀲𑀸𑀥𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀝𑀺𑀦𑀺𑀬𑀢𑀲𑀸𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀧𑀜𑁆𑀘𑀓𑀁 𑀯𑀺𑀦𑀸 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀺, 𑀢𑁂𑀦𑁂𑀯 𑀯𑀺𑀦𑀬𑀝𑁆𑀞𑀓𑀣𑀸𑀬 𑀕𑀡𑁆𑀞𑀺𑀧𑀤𑀯𑀺𑀯𑀭𑀡𑁂 ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀏𑀯 𑀆𑀕𑀢𑁂 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀁 𑀅𑀜𑁆𑀜𑀢𑀭𑁂𑀦𑀸𑀧𑀺 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁩𑁮𑁪) 𑀧𑀸𑀞𑁂 𑀅𑀥𑀺𑀧𑁆𑀧𑀸𑀬𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀇𑀫𑁂𑀲𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀏𑀓𑀽𑀦𑀯𑀻𑀲𑀢𑀻’’𑀢𑀺 𑀏𑀢𑁆𑀣 ‘‘𑀬𑀸𑀦𑀻’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑀅𑀜𑁆𑀜𑀢𑀭𑁂𑀦 𑀅𑀫𑀽𑀮𑀓𑁂𑀦𑀸𑀢𑀺 𑀬𑁄𑀚𑀦𑀸. 𑀅𑀫𑀽𑀮𑀓𑁂𑀦𑀸𑀢𑀺 𑀘𑁄𑀤𑀓𑀲𑁆𑀲 𑀤𑀲𑁆𑀲𑀦𑀸𑀤𑀻𑀳𑀺 𑀘𑁄𑀤𑀦𑀸𑀫𑀽𑀮𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀅𑀫𑀽𑀮𑀓𑀁, 𑀧𑀸𑀭𑀸𑀚𑀺𑀓𑀁, 𑀢𑁂𑀦. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀧𑀸𑀭𑀸𑀚𑀺𑀓𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑀦 𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 ¶ 𑀫𑀽𑀮𑀸𑀦𑀁 𑀅𑀪𑀸𑀯𑁂𑀦 𑀅𑀫𑀽𑀮𑀓𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬). 𑀏𑀢𑁆𑀣 𑀘 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀦𑀸𑀫 ¶ . 𑀧𑀓𑀢𑀺𑀲𑁄𑀢𑁂𑀦 𑀯𑀸 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸 𑀲𑀼𑀢𑀁 𑀲𑀼𑀢𑀁 𑀦𑀸𑀫. 𑀘𑀺𑀢𑁆𑀢𑁂𑀦 𑀧𑀭𑀺𑀲𑀗𑁆𑀓𑀺𑀢𑀁 𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀢𑀁 𑀢𑀺𑀯𑀺𑀥𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀯𑀲𑁂𑀦.

𑀢𑀢𑁆𑀣 𑀢𑀸𑀤𑀺𑀲𑁂 𑀓𑀫𑁆𑀫𑀦𑀺𑀬𑁂 𑀑𑀓𑀸𑀲𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀦𑁄 𑀅𑀜𑁆𑀜𑀣𑀺𑀬𑀁 𑀧𑀬𑁄𑀕𑀁 𑀤𑀺𑀲𑁆𑀯𑀸 𑀅𑀜𑁆𑀜𑀣𑀸 𑀕𑀳𑁂𑀢𑁆𑀯𑀸 ‘‘𑀯𑀻𑀢𑀺𑀓𑁆𑀓𑀫𑀦𑀁 𑀦𑀼 𑀔𑁄𑀬𑀫𑀓𑀸𑀲𑀻’’𑀢𑀺 𑀕𑀳𑀡𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀓𑀼𑀝𑁆𑀝𑀢𑀺𑀭𑁄𑀳𑀺𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀼𑀧𑀼𑀭𑀺𑀲𑀲𑁆𑀲 𑀲𑀩𑁆𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀯𑀻𑀢𑀺𑀓𑁆𑀓𑀫𑀦𑀁 𑀦𑀼 𑀔𑁄𑀬𑀫𑀓𑀸𑀲𑀻’’𑀢𑀺 𑀏𑀯𑀁 𑀕𑀳𑀡𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀢𑀭𑀼𑀡𑀫𑀸𑀢𑀼𑀕𑀸𑀫𑀧𑀼𑀭𑀺𑀲𑀸𑀦𑀁 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀯𑀺𑀧𑁆𑀧𑀓𑀺𑀡𑁆𑀡𑀧𑀼𑀧𑁆𑀨𑀸𑀦𑀺 𑀑𑀮𑁄𑀓𑁂𑀢𑁆𑀯𑀸, 𑀫𑀁𑀲𑀲𑀼𑀭𑀕𑀦𑁆𑀥𑀜𑁆𑀘 𑀖𑀸𑀬𑀺𑀢𑁆𑀯𑀸 ‘‘𑀇𑀤𑀁 𑀓𑀲𑁆𑀲 𑀓𑀫𑁆𑀫’’𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑁄 𑀘𑁂𑀢𑀺𑀬𑀧𑀽𑀚𑀺𑀢𑀫𑀸𑀮𑀸𑀕𑀦𑁆𑀥𑀲𑁆𑀲 𑀧𑀻𑀢𑀸𑀭𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀢𑀁 𑀏𑀢𑀲𑁆𑀲 𑀓𑀫𑁆𑀫𑀁 𑀦𑀼 𑀔𑁄’’𑀢𑀺 𑀓𑀺𑀭𑀺𑀬𑀫𑀸𑀦𑀲𑀁𑀲𑀬𑁄 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀭𑀽𑀧𑀲𑁆𑀲 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀫𑀽𑀮𑀓𑀲𑁆𑀲 𑀅𑀪𑀸𑀯𑀢𑁄 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀯𑀼𑀢𑁆𑀢𑀦𑀬𑁂𑀦 𑀤𑀝𑁆𑀞𑀩𑁆𑀩𑁄.

𑀘𑁄𑀤𑁂𑀢𑀻𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀦 𑀲𑀬𑀁 𑀘𑁄𑀤𑁂𑀢𑀺. 𑀘𑁄𑀤𑀸𑀧𑀦𑀁 𑀧𑀦 𑀯𑀓𑁆𑀔𑀢𑀺. 𑀘𑀸𑀯𑀦𑀘𑁂𑀢𑀦𑁄 𑀳𑀼𑀢𑁆𑀯𑀸𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀉𑀧𑁆𑀧𑀦𑁆𑀦𑁂𑀦 𑀧𑀭𑀁 𑀲𑀸𑀲𑀦𑀸 𑀘𑀸𑀯𑁂𑀢𑀼𑀓𑀸𑀫𑁂𑀦 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. ‘‘𑀲𑀼𑀤𑁆𑀥𑀁 𑀯𑀸 𑀅𑀲𑀼𑀤𑁆𑀥𑀁 𑀯𑀸’’𑀢𑀺 𑀇𑀤𑀁 ‘‘𑀘𑁄𑀤𑁂𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀘𑁄𑀤𑀦𑀸𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄, ‘‘𑀅𑀜𑁆𑀜𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀲𑁂𑀲𑁄, 𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀁 𑀯𑀸 𑀆𑀧𑀦𑁆𑀦𑀁 𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀦𑁆𑀢𑀺 𑀅𑀢𑁆𑀣𑁄. 𑀬𑁄𑀢𑀺 𑀫𑀸𑀢𑀺𑀓𑀸𑀕𑀢𑀪𑀺𑀓𑁆𑀔𑀼, ‘‘𑀤𑀼𑀝𑁆𑀞𑁄 𑀤𑁄𑀲𑁄 𑀅𑀧𑁆𑀧𑀢𑀻𑀢𑁄’’𑀢𑀺 𑀇𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀉𑀧𑁆𑀧𑀦𑁆𑀦𑁂𑀦 𑀤𑁄𑀲𑀮𑁂𑀲𑁂𑀦 ¶ 𑀲𑀬𑀁 𑀤𑀽𑀲𑀺𑀢𑁄, 𑀧𑀭𑀜𑁆𑀘 𑀤𑀽𑀲𑁂𑀦𑁆𑀢𑁄 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀅𑀧𑀕𑀢𑁄 𑀬𑁄 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀯𑀓𑁆𑀔𑀫𑀸𑀦𑁂𑀦 ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

‘‘𑀓𑀢𑁂 𑀑𑀓𑀸𑀲𑀫𑁆𑀳𑀻’’𑀢𑀺 𑀧𑀤𑀘𑁆𑀙𑁂𑀤𑁄, 𑀑𑀓𑀸𑀲𑀁 ‘‘𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀧𑀸𑀞𑀢𑁄 𑀅𑀦𑁆𑀢𑁄𑀦𑀻𑀢𑀳𑁂𑀢𑁆𑀯𑀢𑁆𑀣𑀢𑀸𑀬 ‘‘𑀓𑀢𑁂’’𑀢𑀺 ‘‘𑀓𑀸𑀭𑀺𑀢𑁂’’𑀢𑀺 𑀏𑀢𑀲𑁆𑀲 𑀧𑀭𑀺𑀬𑀸𑀬𑁄 𑀳𑁄𑀢𑀺, ‘‘𑀑𑀓𑀸𑀲𑀁 𑀫𑁂 𑀓𑀭𑁄𑀳𑀺, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀑𑀓𑀸𑀲𑁂 𑀓𑀸𑀭𑀸𑀧𑀺𑀢𑁂𑀢𑀺 𑀅𑀢𑁆𑀣𑁄. ‘‘𑀅𑀓𑀢𑁂 𑀑𑀓𑀸𑀲𑁂’’𑀢𑀺 𑀧𑀤𑀘𑁆𑀙𑁂𑀤𑁄 ¶ , 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀬𑁂𑀯𑀢𑁆𑀣𑁄. 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀳𑀸𑀢𑀺 𑀑𑀓𑀸𑀲𑀲𑁆𑀲 𑀅𑀓𑀸𑀭𑀸𑀧𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁.

𑁪𑁦𑁪-𑁫. 𑀓𑁄𑀡𑁆𑀞𑁄𑀲𑀻𑀢𑀺 𑀥𑀼𑀢𑁆𑀢𑁄𑀲𑀺. 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀲𑀻𑀢𑀺 𑀓𑀸𑀮𑀻𑀤𑁂𑀯𑀻𑀯𑀢𑀦𑀺𑀬𑀼𑀢𑁆𑀢𑁄𑀲𑀺. 𑀓𑀸𑀮𑀻𑀤𑁂𑀯𑀻 𑀓𑀺𑀭 𑀲𑀺𑀭𑀺𑀤𑁂𑀯𑀺𑀬𑀸 𑀚𑁂𑀝𑁆𑀞𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀢𑀥𑀭𑁄 𑀚𑁂𑀝𑁆𑀞𑀩𑁆𑀩𑀢𑀺𑀓𑁄 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀯𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑀓𑀮𑀲𑀭𑀻𑀭𑁂 𑀫𑀲𑀺𑀁 𑀫𑀓𑁆𑀔𑁂𑀢𑁆𑀯𑀸 𑀓𑀸𑀓𑀧𑀢𑁆𑀢𑀸𑀦𑀺 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀓𑀸𑀮𑀻𑀤𑁂𑀯𑀺𑀁 𑀨𑀮𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑀁 𑀓𑀸𑀚𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀸𑀤𑀺𑀅𑀲𑀼𑀘𑀺𑀲𑀦𑁆𑀦𑀺𑀘𑀺𑀢𑀑𑀮𑀺𑀕𑀮𑁆𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀤𑀼𑀲𑁆𑀲𑀻𑀮𑁄𑀲𑀺 𑀦𑀺𑀲𑁆𑀲𑀻𑀮𑁄𑀲𑀺 𑀲𑀻𑀮𑀯𑀺𑀭𑀳𑀺𑀢𑁄𑀲𑀻’’𑀢𑀺 𑀣𑁄𑀫𑁂𑀦𑁆𑀢𑁄 𑀯𑀺𑀘𑀭𑀢𑀻𑀢𑀺.

𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀧𑀸𑀧𑀥𑀫𑁆𑀫𑁄 𑀮𑀸𑀫𑀓𑀲𑀪𑀸𑀯𑁄𑀲𑀺. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺. 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀕𑀭𑀼𑀓𑀁 𑀦𑀺𑀤𑁆𑀤𑀺𑀲𑁂𑀢𑀺 𑀏𑀢𑁆𑀣 ‘‘𑀓𑀢𑁄𑀓𑀸𑀲𑀫𑁆𑀳𑀻’’𑀢𑀺 𑀘 ‘‘𑀢𑀣𑁂𑀯 𑀅𑀓𑀢𑁄𑀓𑀸𑀲𑁂, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀲𑀳𑀸’’𑀢𑀺 𑀘 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭𑀸𑀧𑀺.

𑁪𑁦𑁬. 𑀲𑀫𑁆𑀫𑀼𑀔𑀸𑀢𑀺 ¶ 𑀘𑀼𑀤𑀺𑀢𑀓𑀲𑁆𑀲 𑀲𑀫𑁆𑀫𑀼𑀔𑀸, 𑀅𑀯𑀺𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀫𑀼𑀤𑁆𑀤𑀸𑀬𑀸𑀢𑀺 𑀫𑀼𑀢𑁆𑀢𑀧𑀸𑀡𑀸𑀤𑀺𑀯𑀲𑁂𑀦. 𑀢𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀓𑀣𑀺𑀢𑀁. 𑀧𑀭𑁄𑀢𑀺 𑀬𑀁 𑀘𑁄𑀤𑁂𑀲𑀺, 𑀲𑁄 𑀘𑀼𑀤𑀺𑀢𑀓𑁄 𑀧𑀭𑁄. 𑀪𑀺𑀓𑁆𑀔𑀼𑀦𑁄𑀢𑀺 𑀘𑁄𑀤𑀓𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁪𑁦𑁭. 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸𑀢𑀺 𑀘𑀼𑀤𑀺𑀢𑀓𑀲𑁆𑀲 𑀆𑀲𑀦𑁆𑀦𑁂 𑀞𑀢𑁆𑀯𑀸. ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀓𑀫𑁆𑀫𑀪𑀸𑀯𑀢𑁄 𑀧𑀭𑁄𑀢𑀺 𑀇𑀤𑀁 𑀉𑀧𑀬𑁄𑀕𑀦𑁆𑀢𑀯𑀲𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀼𑀢𑁆𑀢𑀭𑀢𑁆𑀭. 𑀓𑁂𑀦𑀘𑀻𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦. 𑀢𑀲𑁆𑀲 𑀘𑁄𑀤𑀓𑀲𑁆𑀲. ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀧𑀼𑀦 𑀯𑀘𑀦𑀁 𑀦𑀺𑀬𑀫𑀢𑁆𑀣𑀁.

𑁪𑁦𑁮. 𑀲𑁄𑀧𑀻𑀢𑀺 𑀉𑀕𑁆𑀕𑀳𑀸𑀧𑀺𑀢𑀢𑁆𑀢𑀸 𑀘𑁄𑀤𑀦𑀁 𑀓𑀭𑁄𑀦𑁆𑀢𑁄 𑀇𑀢𑀭𑁄 𑀧𑀬𑁄𑀚𑁆𑀚𑀓𑀧𑀼𑀕𑁆𑀕𑀮𑁄𑀧𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀻𑀢𑀺 𑀧𑀬𑁄𑀚𑀓𑀧𑀬𑁄𑀚𑁆𑀚𑀓𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺.

𑁪𑁦𑁯. 𑀯𑀼𑀢𑁆𑀢𑀝𑁆𑀞𑀸𑀦𑀁 𑀧𑀡𑁆𑀡𑀁 𑀯𑀸 𑀲𑀦𑁆𑀤𑁂𑀲𑀁 𑀯𑀸 𑀳𑀭𑀦𑁆𑀢𑁄 𑀤𑀽𑀢𑁄 𑀦𑀸𑀫, 𑀲𑁄 ‘‘𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀬𑁆𑀳𑀢𑀻𑀢𑀺 𑀢𑀲𑁆𑀫𑀺𑀁 𑀯𑀺𑀲𑀼𑀁 𑀅𑀯𑀢𑁆𑀢𑀩𑁆𑀩𑁂𑀧𑀺 ‘‘𑀤𑀼𑀢’’𑀦𑁆𑀢𑀺 𑀯𑀘𑀦𑁂𑀦 𑀦𑀺𑀲𑁆𑀲𑀝𑁆𑀞𑀤𑀽𑀢𑀫𑀸𑀳 ¶ . 𑀧𑀡𑁆𑀡𑀁 𑀯𑀸 𑀅𑀤𑀢𑁆𑀯𑀸 ‘‘𑀏𑀯𑀜𑁆𑀘 𑀏𑀯𑀜𑁆𑀘 𑀯𑀤𑀸’’𑀢𑀺 𑀲𑀸𑀲𑀦𑀜𑁆𑀘 𑀅𑀤𑀢𑁆𑀯𑀸 ‘‘𑀢𑀁 𑀘𑁄𑀤𑁂𑀳𑀻’’𑀢𑀺 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑁄 𑀪𑀺𑀓𑁆𑀔𑀼 𑀇𑀥 ‘‘𑀦𑀺𑀲𑁆𑀲𑀝𑁆𑀞𑀤𑀽𑀢𑁄’’𑀢𑀺 𑀕𑀳𑁂𑀢𑀩𑁆𑀩𑁄.

𑀅𑀣 𑀯𑀸 ‘‘𑀤𑀽𑀢’’𑀦𑁆𑀢𑀺 𑀇𑀫𑀺𑀦𑀸 𑀘𑁄𑀤𑁂𑀢𑀼𑀁 𑀉𑀕𑁆𑀕𑀳𑀸𑀧𑁂𑀢𑁆𑀯𑀸, 𑀢𑀫𑀦𑀼𑀕𑁆𑀕𑀳𑀸𑀧𑁂𑀢𑁆𑀯𑀸 𑀯𑀸 𑀦𑀺𑀲𑁆𑀲𑀝𑁆𑀞𑁄 𑀪𑀺𑀓𑁆𑀔𑀼 𑀤𑀽𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. ‘‘𑀧𑀡𑁆𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀅𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑀢𑁆𑀣𑁂 𑀘𑁄𑀤𑀦𑀁 𑀮𑀺𑀔𑀺𑀢𑁆𑀯𑀸 𑀤𑀺𑀦𑁆𑀦𑀧𑀡𑁆𑀡𑀁 𑀕𑀳𑁂𑀢𑀩𑁆𑀩𑀁. 𑀲𑀸𑀲𑀦𑀦𑁆𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀯𑀸 𑀧𑁂𑀲𑀺𑀬𑀫𑀸𑀦𑀁 𑀲𑀸𑀲𑀦𑀁 𑀕𑀳𑁂𑀢𑀩𑁆𑀩𑀁. 𑀇𑀤𑀁 𑀢𑀬𑀫𑁆𑀧𑀺 𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑁂𑀳𑀺 𑀓𑀸𑀭𑀸𑀧𑀦𑀢𑁄 ‘‘𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀆𑀳. ‘‘𑀧𑀭’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑁆𑀣 𑀑𑀓𑀸𑀲𑀓𑀸𑀭𑀸𑀧𑀦𑀁 𑀦𑀢𑁆𑀣𑀺.

𑁪𑁧𑁦. 𑀢𑀣𑀸𑀢𑀺 ¶ 𑀬𑀣𑀸 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀲𑀫𑁆𑀫𑀼𑀔𑀸 𑀑𑀓𑀸𑀲𑁂 𑀓𑀸𑀭𑀺𑀢𑁂, 𑀅𑀓𑀸𑀭𑀺𑀢𑁂 𑀘, 𑀢𑀣𑀸 𑀅𑀫𑀽𑀮𑀓𑁂𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀼𑀢𑁆𑀢𑁂 𑀲𑀫𑁆𑀫𑀼𑀔𑀸 𑀧𑀭𑁂’’𑀢𑀺 𑀪𑀼𑀫𑁆𑀫𑀯𑀲𑁂𑀦 𑀅𑀥𑀺𑀓𑀢𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀘𑁄𑀤𑁂𑀢𑀺 𑀘𑁄𑀤𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻𑀢𑀺 𑀑𑀓𑀸𑀲𑁂 𑀓𑀸𑀭𑀺𑀢𑁂 𑀓𑁂𑀯𑀮𑀸, 𑀅𑀓𑀸𑀭𑀺𑀢𑁂 𑀤𑀼𑀓𑁆𑀓𑀝𑁂𑀦 𑀲𑀳𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀫𑁆𑀫𑀼𑀔𑀸 𑀲𑁂𑀲𑀸𑀧𑀢𑁆𑀢𑀻𑀳𑀺 𑀧𑀭𑁂 𑀯𑀼𑀢𑁆𑀢𑁂 𑀘𑀸𑀯𑀦𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀑𑀓𑀸𑀲𑀸𑀓𑀸𑀭𑀸𑀧𑀦𑁂𑀦𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑁪𑁧𑁧. 𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀔𑀼𑀁𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲. 𑀅𑀓𑀢𑁄𑀓𑀸𑀲𑀦𑁆𑀢𑀺 𑀅𑀓𑀸𑀭𑀺𑀢𑁄𑀓𑀸𑀲𑀁, ‘‘𑀧𑀭’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀢𑀦𑀸𑀢𑀺 𑀘𑁄𑀤𑀓𑁂𑀦, ‘‘𑀲𑀬𑀁 𑀅𑀓𑀸𑀭𑀺𑀢𑁄𑀓𑀸𑀲’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀳 𑀧𑀸𑀘𑀺𑀢𑁆𑀢𑀺𑀬𑁂𑀦𑀸𑀢𑀺 ‘‘𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁧𑁪) 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀳. 𑀯𑀤𑀦𑁆𑀢𑀲𑁆𑀲𑀸𑀢𑀺 𑀘𑁄𑀤𑁂𑀦𑁆𑀢𑀲𑁆𑀲 𑀯𑀸 𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀯𑀸, 𑀏𑀢𑁆𑀣 ‘‘𑀲𑀫𑁆𑀫𑀼𑀔𑀸’’𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑀲𑁆𑀲 ‘‘𑀅𑀲𑀫𑁆𑀫𑀼𑀔𑀸’’𑀢𑀺 𑀏𑀢𑀲𑁆𑀲 𑀯𑀺𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺, 𑀘-𑀓𑀸𑀭𑁂𑀦 𑀓𑀸𑀭𑀺𑀢𑁄𑀓𑀸𑀲𑀧𑀓𑁆𑀔𑁂 𑀤𑀼𑀓𑁆𑀓𑀝𑁂𑀦 𑀧𑀸𑀘𑀺𑀢𑁆𑀢𑀺𑀬𑀲𑀫𑁆𑀩𑀦𑁆𑀥𑀻.

𑁪𑁧𑁨. 𑀅𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀅𑀓𑀢𑁄𑀓𑀸𑀲𑀫𑀢𑁆𑀢𑀦𑀸’’𑀢𑀺 𑀦𑀸𑀦𑀼𑀯𑀢𑁆𑀢𑀢𑀺. 𑀲𑀢𑁆𑀢𑀳𑀺 𑀆𑀧𑀢𑁆𑀢𑀻𑀳𑀻𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀲𑀗𑁆𑀔𑀸𑀢𑁂𑀲𑀼 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀬𑁂𑀦 𑀓𑁂𑀦𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀅𑀲𑀫𑁆𑀫𑀼𑀔𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀦𑁆𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀲𑀢𑁆𑀢𑀯𑀺𑀥𑀁 𑀓𑀫𑁆𑀫𑀁.

𑁪𑁧𑁩. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀅𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 ¶ (𑀧𑀸𑀭𑀸. 𑁩𑁯𑁦) 𑀯𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑀦𑁆𑀢𑀺 𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀲𑀗𑁆𑀔𑁆𑀬𑀽𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸 𑀘𑁄𑀤𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀁 𑀳𑁄𑀢𑀺.

𑁪𑁧𑁫. 𑀇𑀤𑀦𑁆𑀢𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀲𑁂𑀲𑁄, ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀘 𑀇𑀫𑀺𑀦𑀸 𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑀸 𑀆𑀧𑀢𑁆𑀢𑀺𑀬𑁂𑀯 𑀕𑀬𑁆𑀳𑀢𑀺. 𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄𑀢𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑀢𑁄 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀲𑀘𑀺𑀢𑁆𑀢’’𑀦𑁆𑀢𑀺. 𑀧𑀝𑀺𑀖𑀘𑀺𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀲𑀳𑀺𑀢𑀢𑁆𑀢𑀸 𑀲𑀘𑀺𑀢𑁆𑀢𑀓𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀬 𑀯𑀲𑁂𑀦 𑀤𑀼𑀓𑁆𑀔𑀯𑁂𑀤𑀦𑀁.

𑀤𑀼𑀝𑁆𑀞𑀤𑁄𑀲𑀓𑀣𑀸𑀯𑀡𑁆𑀡𑀦𑀸.

𑁪𑁧𑁬. 𑀮𑁂𑀲𑀫𑀢𑁆𑀢𑀦𑁆𑀢𑀺 ‘‘𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄, 𑀚𑀸𑀢𑀺𑀆𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁯𑁧) 𑀅𑀝𑁆𑀞𑀓𑀣𑀸𑀬 𑀤𑀲𑁆𑀲𑀺𑀢𑀦𑀺𑀩𑁆𑀩𑀘𑀦𑁂𑀲𑀼 ‘‘𑀮𑁂𑀲𑁄 𑀦𑀸𑀫 𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄 𑀦𑀸𑀫𑀮𑁂𑀲𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁩𑁯𑁪) 𑀦𑀬𑁂𑀦 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀲𑀼 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀸𑀤𑀻𑀲𑀼 𑀤𑀲𑀲𑀼 𑀮𑁂𑀲𑁂𑀲𑀼 𑀅𑀜𑁆𑀜𑀢𑀭𑀮𑁂𑀲𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀚𑀸𑀢𑀺 𑀦𑀸𑀫 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀚𑀸𑀢𑀺. 𑀦𑀸𑀫𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 ‘‘𑀙𑀕𑀮𑀓𑁄 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫, 𑀙𑀕𑀮𑀺𑀓𑀸 𑀫𑁂𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀦𑀸𑀫𑀸’’𑀢𑀺 𑀞𑀧𑀺𑀢𑀁 𑀦𑀸𑀫𑀁 𑀯𑀺𑀬 𑀘𑁄𑀤𑀓𑁂𑀳𑀺 𑀞𑀧𑀺𑀢𑀦𑀸𑀫𑀜𑁆𑀘 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀤𑀺𑀲𑀓𑀦𑀸𑀫𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀦𑀸𑀫𑀁. 𑀕𑁄𑀢𑁆𑀢𑀁 𑀦𑀸𑀫 𑀕𑁄𑀢𑀫𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀺𑀕𑁄𑀢𑁆𑀢𑀁. 𑀮𑀺𑀗𑁆𑀕𑀁 𑀦𑀸𑀫 ¶ 𑀤𑀻𑀖𑀢𑀸𑀤𑀺𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑀜𑁆𑀘 𑀓𑀡𑁆𑀳𑀢𑀸𑀤𑀺𑀯𑀡𑁆𑀡𑀦𑀸𑀦𑀢𑁆𑀢𑀜𑁆𑀘𑀸𑀢𑀺 𑀇𑀤𑀁 𑀤𑀼𑀯𑀺𑀥𑀮𑀺𑀗𑁆𑀕𑀁. 𑀆𑀧𑀢𑁆𑀢𑀺𑀮𑁂𑀲𑁄 𑀦𑀸𑀫 𑀮𑀳𑀼𑀓𑀸𑀤𑀺𑀭𑀽𑀧𑁂𑀦 𑀞𑀺𑀢𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀆𑀧𑀢𑁆𑀢𑀺. 𑀧𑀢𑁆𑀢𑁄 𑀦𑀸𑀫 𑀮𑁄𑀳𑀧𑀢𑁆𑀢𑀸𑀤𑀺. 𑀘𑀻𑀯𑀭𑀁 𑀦𑀸𑀫 𑀧𑀁𑀲𑀼𑀓𑀽𑀮𑀸𑀤𑀺. 𑀉𑀧𑀚𑁆𑀛𑀸𑀬𑁄 𑀦𑀸𑀫 𑀘𑀼𑀤𑀺𑀢𑀓𑀲𑁆𑀲 𑀉𑀧𑀚𑁆𑀛𑀸𑀬𑁄. 𑀆𑀘𑀭𑀺𑀬𑁄 𑀦𑀸𑀫 𑀘𑀼𑀤𑀺𑀢𑀓𑀲𑁆𑀲 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑀸𑀤𑀺𑀓𑁄. 𑀲𑁂𑀦𑀸𑀲𑀦𑀁 𑀦𑀸𑀫 𑀘𑀼𑀤𑀺𑀢𑀓𑀲𑁆𑀲𑁂𑀯 𑀦𑀺𑀯𑀸𑀲𑀧𑀸𑀲𑀸𑀤𑀸𑀤𑀺𑀓𑀁.

𑀘𑁄𑀤𑁂𑀬𑁆𑀬𑀸𑀢𑀺 𑀅𑀜𑁆𑀜𑀔𑀢𑁆𑀢𑀺𑀬𑀚𑀸𑀢𑀺𑀓𑀁 𑀧𑀼𑀕𑁆𑀕𑀮𑀁 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑁂𑀭𑀺𑀔𑀢𑁆𑀢𑀺𑀬𑀚𑀸𑀢𑀺𑀓𑀁 ¶ 𑀧𑀼𑀕𑁆𑀕𑀮𑀁 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑁄𑀤𑁂𑀢𑀺. 𑀕𑀭𑀼𑀓𑀸𑀧𑀢𑁆𑀢𑀺 𑀦𑀸𑀫 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀘𑀸𑀯𑀦𑀘𑁂𑀢𑀦𑁄𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 (𑀧𑀸𑀭𑀸. 𑁩𑁯𑁨) 𑀯𑀼𑀢𑁆𑀢𑀢𑁆𑀢𑀸 𑀲𑀘𑁂 𑀇𑀫𑀁 𑀲𑀸𑀲𑀦𑀸 𑀘𑀸𑀯𑁂𑀬𑁆𑀬𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀘𑁄𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀫𑀺𑀦𑀸 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀦 𑀅𑀜𑁆𑀜𑀸𑀥𑀺𑀧𑁆𑀧𑀸𑀬𑁄𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁂𑀲𑀼 ‘‘𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁯) 𑀏𑀯𑀫𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀸𑀥𑀺𑀧𑁆𑀧𑀸𑀬𑁂𑀲𑀼 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀪𑀽𑀢𑀁 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀸𑀥𑀺𑀧𑁆𑀧𑀸𑀬𑁂 𑀧𑀝𑀺𑀓𑁆𑀔𑀺𑀧𑀢𑀺.

𑁪𑁧𑁭. 𑀢𑀣𑀸𑀲𑀜𑁆𑀜𑀻𑀢𑀺 𑀅𑀬𑀁 𑀧𑀸𑀭𑀸𑀚𑀺𑀓𑀫𑀚𑁆𑀛𑀸𑀧𑀦𑁆𑀦𑁄𑀬𑁂𑀯𑀸𑀢𑀺 𑀢𑀣𑀸𑀲𑀜𑁆𑀜𑀻. ‘‘𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀣𑀸𑀲𑀜𑁆𑀜𑀻’’𑀢𑀺 𑀇𑀤𑀁 ‘‘𑀘𑁄𑀤𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀲𑁂𑀲𑁄𑀢𑀺 𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺𑀁 𑀓𑀢𑁆𑀯𑀸 ‘‘𑀲𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀸𑀳𑀓𑀓𑀣𑀸𑀧𑀩𑀦𑁆𑀥𑁂𑀦 𑀯𑀼𑀢𑁆𑀢𑀲𑀩𑁆𑀩𑀯𑀺𑀦𑀺𑀘𑁆𑀙𑀬𑁂𑀲𑀼 𑀢𑀁𑀲𑀺𑀓𑁆𑀔𑀸𑀧𑀤𑀦𑀺𑀬𑀢𑀁 ‘‘𑀅𑀫𑀽𑀮𑀓𑁂𑀦𑀸’’𑀢𑀺 𑀇𑀤𑀜𑁆𑀘 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 ‘‘𑀪𑀺𑀓𑁆𑀔𑀼𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸…𑀧𑁂… 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀜𑁆𑀘 ¶ 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀲𑀩𑁆𑀩𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀲𑀫𑁄 𑀫𑀢𑁄 𑀳𑁂𑀝𑁆𑀞𑀸 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀲𑀤𑀺𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀓𑀣𑀸𑀯𑀡𑁆𑀡𑀦𑀸.

𑁪𑁧𑁮. 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲𑀸𑀢𑀺 ‘‘𑀲𑀫𑀕𑁆𑀕𑁄 𑀦𑀸𑀫 𑀲𑀗𑁆𑀖𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑁂𑀦 𑀘 𑀓𑀸𑀬𑁂𑀦 𑀘 𑀏𑀓𑀻𑀪𑀽𑀢𑀲𑁆𑀲 𑀲𑀗𑁆𑀖𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘-𑀓𑀸𑀭𑁄 𑀧𑀤𑀧𑀽𑀭𑀡𑁄, 𑀏𑀯-𑀓𑀸𑀭𑀢𑁆𑀣𑁄 𑀯𑀸, 𑀦𑀲𑀫𑀕𑁆𑀕𑀲𑁆𑀲𑀸𑀢𑀺 𑀩𑁆𑀬𑀢𑀺𑀭𑁂𑀓𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑁂𑀤𑀢𑁆𑀣𑀁 𑀯𑀸𑀬𑀫𑁂𑀬𑁆𑀬𑀸𑀢𑀺 ‘‘𑀇𑀫𑁂 𑀓𑀣𑀁 𑀓𑀤𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀸𑀬𑀁 𑀕𑀯𑁂𑀲𑀺𑀢𑁆𑀯𑀸 𑀧𑀓𑁆𑀔𑀧𑀭𑀺𑀬𑁂𑀲𑀦𑀸𑀤𑀺𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀧𑀸𑀴𑀺𑀬𑀁 ‘‘𑀪𑁂𑀤𑀸𑀬 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺 𑀓𑀣𑀁 𑀇𑀫𑁂 𑀦𑀸𑀦𑀸 𑀅𑀲𑁆𑀲𑀼 𑀯𑀺𑀦𑀸 𑀅𑀲𑁆𑀲𑀼 𑀯𑀕𑁆𑀕𑀸 𑀅𑀲𑁆𑀲𑀽𑀢𑀺 𑀧𑀓𑁆𑀔𑀁 𑀧𑀭𑀺𑀬𑁂𑀲𑀢𑀺 𑀕𑀡𑀁 𑀩𑀦𑁆𑀥𑀢𑀻’’𑀢𑀺 (𑀧𑀸𑀭𑀸. 𑁪𑁧𑁨).

𑀪𑁂𑀤𑀳𑁂𑀢𑀼𑀦𑁆𑀢𑀺 ‘‘𑀇𑀥𑀼𑀧𑀸𑀮𑀺 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 ‘𑀥𑀫𑁆𑀫𑁄’𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 ‘𑀅𑀥𑀫𑁆𑀫𑁄’𑀢𑀺 𑀤𑀻𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁪𑁫𑁯) 𑀦𑀬𑁂𑀦 𑀔𑀦𑁆𑀥𑀓𑁂 𑀯𑀼𑀢𑁆𑀢𑀁 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀲𑀗𑁆𑀖𑀪𑁂𑀤𑀓𑀸𑀭𑀡𑀫𑀸𑀳 ¶ . 𑀇𑀤𑀫𑁂𑀯 𑀳𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 ‘‘𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡𑀦𑁆𑀢𑀺 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀻’’𑀢𑀺. 𑀕𑀳𑁂𑀢𑁆𑀯𑀸𑀢𑀺 𑀧𑀕𑁆𑀕𑀬𑁆𑀳. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬. 𑀧𑀭𑀺𑀤𑀻𑀧𑀬𑀦𑁆𑀢𑀺 𑀏𑀢𑁆𑀣 𑀧𑀭𑀺𑀤𑀻𑀧𑁂𑀦𑁆𑀢𑁄, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺.

𑁪𑁧𑁯. 𑀪𑀺𑀓𑁆𑀔𑀽𑀳𑀻𑀢𑀺 𑀢𑀲𑁆𑀲 𑀲𑀗𑁆𑀖𑀪𑁂𑀤𑀓𑀲𑁆𑀲 𑀧𑀭𑀓𑁆𑀓𑀫𑀦𑀁 𑀧𑀲𑁆𑀲𑀦𑁆𑀢𑁂𑀳𑀺 𑀯𑀸 𑀤𑀽𑀭𑁂 𑀘𑁂, 𑀞𑀺𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁂𑀳𑀺 𑀯𑀸 𑀮𑀚𑁆𑀚𑀻𑀳𑀺 𑀲𑀼𑀧𑁂𑀲𑀮𑁂𑀳𑀺 𑀲𑁂𑀲𑀪𑀺𑀓𑁆𑀔𑀽𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀪𑀺𑀓𑁆𑀔𑀽𑀳𑀻𑀢𑀺 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀬𑁂 𑀧𑀲𑁆𑀲𑀦𑁆𑀢𑀺 𑀬𑁂 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀯𑀢𑁆𑀢𑀩𑁆𑀩𑁄’’𑀢𑀺 ¶ (𑀧𑀸𑀭𑀸. 𑁪𑁧𑁨). 𑀢𑀲𑁆𑀲 𑀯𑀤𑀦𑁆𑀢𑁂𑀳𑀺 𑀏𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀘𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀫𑀸𑀬𑀲𑁆𑀫𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀺, 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡𑀁 𑀲𑀫𑀸𑀤𑀸𑀬 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺, 𑀲𑀫𑁂𑀢𑀸𑀬𑀲𑁆𑀫𑀸 𑀲𑀗𑁆𑀖𑁂𑀦, 𑀲𑀫𑀕𑁆𑀕𑁄 𑀳𑀺 𑀲𑀗𑁆𑀖𑁄 𑀲𑀫𑁆𑀫𑁄𑀤𑀫𑀸𑀦𑁄 𑀅𑀯𑀺𑀯𑀤𑀫𑀸𑀦𑁄 𑀏𑀓𑀼𑀤𑁆𑀤𑁂𑀲𑁄 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺 (𑀧𑀸𑀭𑀸. 𑁪𑁧𑁧) 𑀧𑀸𑀞𑀁, 𑀢𑀁 𑀏𑀓𑀤𑁂𑀲𑀲𑀗𑁆𑀕𑀳𑀯𑀲𑁂𑀦 𑀉𑀧𑀮𑀓𑁆𑀔𑁂𑀢𑀼𑀫𑀸𑀳 ‘‘𑀪𑁂𑀤𑀢𑁆𑀣𑀁…𑀧𑁂… 𑀪𑁂𑀤𑀓𑀸𑀭𑀡’’𑀦𑁆𑀢𑀺. 𑀇𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁪𑁨𑁦. 𑀯𑀼𑀘𑁆𑀘𑀫𑀸𑀦𑁄 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀅𑀧𑀺-𑀲𑀤𑁆𑀤𑀢𑁆𑀣𑁄. ‘‘𑀧𑀻’’𑀢𑀺 𑀯𑀸 𑀧𑀸𑀞𑁄, 𑀢𑁂𑀳𑀺 𑀮𑀚𑁆𑀚𑀺𑀪𑀺𑀓𑁆𑀔𑀽𑀳𑀺 ‘‘𑀫𑀸𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀚𑁆𑀚𑁂𑀬𑁆𑀬 𑀦 𑀘𑁂𑀯 𑀦𑀦𑁆𑀢𑀺 𑀢𑀁 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀦 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁨). 𑀢𑀣𑀸 𑀳𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀳𑀢𑁆𑀣𑁂𑀲𑀼, 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀆𑀦𑁂𑀢𑁆𑀯𑀸 𑀢𑀣𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀧𑀺 𑀢𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀘 𑀲𑀗𑁆𑀕𑀳𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀲𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 ‘𑀫𑀸𑀬𑀲𑁆𑀫𑀸…𑀧𑁂… 𑀨𑀸𑀲𑀼 𑀯𑀺𑀳𑀭𑀢𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀇𑀘𑁆𑀘𑁂𑀢𑀁𑀓𑀼𑀲𑀮𑀁. 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀇𑀤𑀁 𑀉𑀪𑀬𑀢𑁆𑀣 𑀤𑀼𑀓𑁆𑀓𑀝𑀁 𑀲𑀸𑀫𑀜𑁆𑀜𑁂𑀦 𑀯𑀓𑁆𑀔𑀢𑀺 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀧𑀦 𑀯𑀼𑀢𑁆𑀢𑀲𑁆𑀲, 𑀅𑀧𑀭𑀺𑀘𑁆𑀘𑀚𑀢𑁄𑀧𑀺 𑀢’’𑀦𑁆𑀢𑀺.

𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀲𑁄 𑀪𑀺𑀓𑁆𑀔𑀽’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, ‘‘𑀬𑀸𑀯𑀢𑀢𑀺𑀬’’𑀦𑁆𑀢𑀺 𑀲𑁂𑀲𑁄, 𑀬𑀣𑀸𑀳 ‘‘𑀲𑁄 𑀪𑀺𑀓𑁆𑀔𑀼 ¶ 𑀪𑀺𑀓𑁆𑀔𑀽𑀳𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁧𑁧), 𑀢𑀣𑀸 𑀲𑀗𑁆𑀖𑀫𑀚𑁆𑀛𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀦𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄 𑀲𑁄 𑀆𑀥𑀸𑀦𑀕𑁆𑀕𑀸𑀳𑀻 𑀪𑀺𑀓𑁆𑀔𑀼 ¶ 𑀲𑀗𑁆𑀖𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄𑀢𑀺 𑀬𑀸𑀯 𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀁, 𑀢𑀸𑀯 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄, 𑀢𑀻𑀳𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁧). 𑀢𑀦𑁆𑀢𑀺 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀅𑀥𑀺𑀓𑀭𑀡𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀸𑀦𑀜𑁆𑀘. 𑀅𑀘𑁆𑀘𑀚𑀦𑁆𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀼𑀘𑁆𑀘𑀫𑀸𑀦𑀸𑀬𑀧𑀺 𑀅𑀘𑁆𑀘𑀚𑀦𑁆𑀢𑁄. 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀢𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 ‘‘𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺.

𑁪𑁨𑁧. 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸, 𑀲𑀼𑀢𑁆𑀯𑀸, 𑀜𑀢𑁆𑀯𑀸 𑀘 𑀅𑀯𑀤𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁪𑁨𑁨. 𑀓𑀻𑀯𑀤𑀽𑀭𑁂 𑀯𑀲𑀦𑁆𑀢𑁂𑀳𑀺 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺. 𑀅𑀤𑁆𑀥𑀬𑁄𑀚𑀦𑀫𑁂𑀯 𑀅𑀤𑁆𑀥𑀬𑁄𑀚𑀦𑀢𑀸, 𑀢𑀢𑁄 𑀅𑀥𑀺𑀓𑀁 𑀯𑀸. 𑀕𑀺𑀮𑀸𑀦𑀁 𑀧𑀝𑀺𑀘𑁆𑀘 𑀅𑀤𑁆𑀥𑀬𑁄𑀚𑀦𑀁 𑀯𑀼𑀢𑁆𑀢𑀁, 𑀇𑀢𑀭𑀁 𑀧𑀝𑀺𑀘𑁆𑀘 ‘‘𑀅𑀥𑀺𑀓𑀁 𑀤𑀽𑀭𑀫𑁆𑀧𑀺 𑀧𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀘𑁂 𑀲𑀓𑁆𑀓𑁄𑀢𑀻’’𑀢𑀺. 𑀢𑀸𑀯𑀤𑁂𑀢𑀺 𑀢𑀤𑀸 𑀏𑀯, 𑀅𑀘𑀺𑀭𑀸𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁪𑁨𑁩. 𑀢𑀺𑀓𑁆𑀔𑀢𑁆𑀢𑀼𑀁 𑀧𑀦 𑀯𑀼𑀢𑁆𑀢𑀲𑁆𑀲𑀸𑀢𑀺 ‘‘𑀫𑀸𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑀼𑀜𑁆𑀘 𑀲𑀗𑁆𑀖𑀫𑀚𑁆𑀛𑁂 𑀘 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀲𑁆𑀲𑀸𑀧𑀺 𑀅𑀧𑀭𑀺𑀘𑁆𑀘𑀚𑀦𑁆𑀢𑀲𑁆𑀲. 𑀢𑀁 𑀪𑁂𑀤𑀸𑀬 𑀧𑀭𑀓𑁆𑀓𑀫𑀸𑀤𑀺𑀓𑀁. 𑀪𑁂𑀤𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀢𑀓𑁆𑀔𑀡𑁂 𑀲𑀬𑀁 𑀅𑀕𑀦𑁆𑀢𑁆𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀽𑀢𑀁 𑀯𑀸’’𑀢𑀺𑀆𑀤𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ¶ (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁧) ‘‘𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀯𑀤𑀢𑁄𑀧𑀺 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀻’’𑀢𑀺𑀆𑀤𑀺.

𑁪𑁨𑁫. 𑀬𑁆𑀬𑀓𑀸𑀭𑁂 𑀧𑀦 𑀲𑀫𑁆𑀧𑀢𑁆𑀢𑁂𑀢𑀺 ‘‘𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁧𑁩) 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀅𑀦𑁆𑀢𑁂 𑀬𑁆𑀬𑀓𑀸𑀭𑁂 𑀉𑀘𑁆𑀘𑀸𑀭𑀺𑀢𑁂. 𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀯𑀽𑀧𑀲𑀫𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀝𑀸𑀤𑀬𑁄𑀢𑀺 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑁆𑀯𑁂 𑀘 𑀣𑀼𑀮𑁆𑀮𑀘𑁆𑀘𑀬𑀸. 𑀬𑀣𑀸𑀳 ‘‘𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀲𑁆𑀲 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀧𑀸𑀭𑀸. 𑁪𑁧𑁪). 𑀢𑀲𑁆𑀫𑀸 𑀜𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀩𑀳𑀺 𑀘 𑀲𑀗𑁆𑀖𑀫𑀚𑁆𑀛𑁂 𑀘 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂𑀦 𑀆𑀧𑀦𑁆𑀦𑀸𑀦𑀺 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺 𑀤𑁂𑀲𑁂𑀢𑀩𑁆𑀩𑀸𑀦𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀇𑀫𑀺𑀲𑁆𑀲𑀸 ¶ 𑀓𑀫𑁆𑀫𑀯𑀸𑀘𑀸𑀬 𑀓𑀺𑀁 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀉𑀤𑀸𑀳𑀼 𑀅𑀦𑀸𑀧𑀦𑁆𑀦𑀸𑀢𑀺 𑀯𑀺𑀘𑀸𑀭𑀡𑀸𑀬 ‘‘𑀬𑁄 𑀅𑀯𑀲𑀸𑀦𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀢𑀺, 𑀲𑁄 𑀢𑀸 𑀆𑀧𑀢𑁆𑀢𑀺𑀬𑁄 𑀦 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁪) 𑀫𑀳𑀸𑀲𑀼𑀫𑀢𑁆𑀣𑁂𑀭𑀲𑁆𑀲 𑀯𑀸𑀤𑀁 ‘‘𑀓𑀺𑀫𑀦𑀸𑀧𑀦𑁆𑀦𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸’’𑀢𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀯𑀺𑀬 𑀆𑀧𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀯𑀸𑀤𑁄 𑀞𑀺𑀢𑁄.

𑁪𑁨𑁬. 𑀅𑀓𑀢𑁂 𑀧𑀦 𑀓𑀫𑁆𑀫𑀲𑁆𑀫𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀅𑀓𑀢𑁂. 𑀅𑀧𑀭𑀺𑀘𑁆𑀘𑀚𑀢𑁄𑀧𑀺 𑀘𑀸𑀢𑀺 𑀢𑀁 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑀲𑁆𑀲𑀸𑀧𑀺. ‘‘𑀲𑀗𑁆𑀖𑀸𑀤𑀺𑀲𑁂𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀘 𑀩𑀳𑀺 𑀘 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂𑀦 𑀤𑀼𑀓𑁆𑀓𑀝𑀁 𑀧𑀦 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄𑀯 𑀤𑀲𑁆𑀲𑁂𑀢𑀺.

𑁪𑁨𑁭. 𑀧𑀼𑀩𑁆𑀩𑁂 𑀯𑀸𑀢𑀺 𑀜𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀯𑀺𑀲𑀼𑀁, 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁂𑀧𑀺. 𑀢𑀗𑁆𑀔𑀡𑁂𑀧𑀻𑀢𑀺 𑀜𑀢𑁆𑀢𑀺𑀓𑁆𑀔𑀡𑁂 𑀯𑀸. 𑀜𑀢𑁆𑀢𑀺𑀬𑀸 ¶ 𑀅𑀦𑀺𑀝𑁆𑀞𑀺𑀢𑀸𑀬𑀧𑀺 𑀧𑀘𑁆𑀙𑀸𑀧𑀺, 𑀇𑀫𑀲𑁆𑀲 𑀅𑀯𑀥𑀺𑀁 𑀤𑀲𑁆𑀲𑁂𑀢𑀺 ‘‘𑀅𑀲𑀫𑁆𑀧𑀢𑁆𑀢𑁂 𑀬𑁆𑀬𑀓𑀸𑀭𑀲𑁆𑀫𑀺’’𑀦𑁆𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄𑀧𑀺 𑀘 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀧𑀞𑀫𑀕𑀸𑀣𑀸𑀬 𑀧𑀘𑁆𑀙𑀺𑀫𑀟𑁆𑀠𑀁 𑀇𑀥𑀸𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁪𑁨𑁮. 𑀏𑀢𑁆𑀢𑀸𑀯𑀢𑀸 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸𑀝𑁆𑀝𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁬) 𑀧𑀸𑀞𑁂 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺 𑀧𑀤𑁂𑀦 𑀕𑀳𑀺𑀢𑁂𑀲𑀼 ‘‘𑀜𑀢𑁆𑀢𑀺𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀦𑀺𑀕𑀫𑁂𑀢𑀼𑀁 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀯𑀸𑀧𑀺 𑀢’’𑀦𑁆𑀢𑀺 𑀆𑀳. 𑀦𑀺𑀕𑀫𑀦𑀢𑁆𑀣𑀚𑁄𑀢𑀓𑁄 𑀏𑀯𑀁-𑀲𑀤𑁆𑀤𑁄 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, 𑀏𑀯𑀁 ‘‘𑀜𑀢𑁆𑀢𑀺𑀢𑁄’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀲𑀗𑁆𑀖𑀪𑁂𑀤𑀧𑁆𑀧𑀬𑁄𑀕𑀁. 𑀅𑀲𑀫𑀦𑀼𑀪𑀸𑀲𑀢𑁄 𑀯𑀸𑀢𑀺 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲. ‘‘𑀅𑀲𑀫𑀦𑀼𑀪𑀸𑀲𑀺𑀬𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀓𑀭𑀡𑀧𑀘𑁆𑀘𑀬𑀮𑁄𑀧𑁂𑀦 ‘‘𑀅𑀲𑀫𑀦𑀼𑀪𑀸𑀲𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁬). ‘‘𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸’’𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 𑀇𑀘𑁆𑀙𑀺𑀢𑀢𑁆𑀣𑁂 𑀲𑀺𑀤𑁆𑀥𑁂𑀧𑀺 𑀧𑀼𑀦 ‘‘𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸’’𑀢𑀺 𑀯𑀘𑀦𑁂 𑀧𑀼𑀦𑀭𑀼𑀢𑁆𑀢𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀤𑀸𑀯𑀼𑀢𑁆𑀢𑀺 𑀦𑀸𑀫 𑀅𑀮𑀁𑀓𑀸𑀭𑁄 𑀳𑁄𑀢𑀻𑀢𑀺.

𑁪𑁨𑁯. 𑀇𑀫𑀲𑁆𑀲 ¶ 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀲𑀗𑁆𑀖𑀪𑁂𑀤𑀢𑁆𑀣𑀁 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀦𑁆𑀢𑁂𑀦 𑀤𑁂𑀯𑀤𑀢𑁆𑀢𑁂𑀦 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀫𑀘𑁆𑀙𑀫𑀁𑀲𑀁 𑀦 𑀔𑀸𑀤𑁂𑀬𑁆𑀬𑀼𑀁, 𑀬𑁄 𑀫𑀘𑁆𑀙𑀫𑀁𑀲𑀁 𑀔𑀸𑀤𑁂𑀬𑁆𑀬, 𑀯𑀚𑁆𑀚𑀁 𑀦𑀁 𑀨𑀼𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁦𑁯) 𑀯𑀼𑀢𑁆𑀢𑁂 ‘‘𑀅𑀮𑀁 𑀤𑁂𑀯𑀤𑀢𑁆𑀢 𑀫𑀬𑀸 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀫𑀘𑁆𑀙𑀫𑀁𑀲𑀁 𑀅𑀦𑀼𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺 (𑀧𑀸𑀭𑀸. 𑁪𑁦𑁯) 𑀅𑀦𑀼𑀜𑁆𑀜𑀸𑀢𑁂𑀲𑀼 𑀫𑀘𑁆𑀙𑀫𑀁𑀲𑁂𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀦𑀺𑀘𑁆𑀙𑀬𑀁 𑀧𑀼𑀩𑁆𑀩𑁂 𑀅𑀦𑁄𑀓𑀸𑀲𑀸𑀪𑀸𑀯𑁂𑀦 𑀅𑀯𑀢𑁆𑀯𑀸 𑀧𑀓𑀢𑀁 𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀧𑀢𑁆𑀢𑀸𑀯𑀲𑁂𑀲𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁 ¶ . ‘‘𑀢𑀁 𑀢𑀲𑁆𑀲𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀬’’𑀦𑁆𑀢𑀺 𑀇𑀤𑀁 ‘‘𑀪𑀺𑀓𑁆𑀔𑀼’’𑀦𑁆𑀢𑀺 𑀇𑀫𑀺𑀦𑀸 𑀘 ‘‘𑀫𑀘𑁆𑀙𑀫𑀁𑀲’’𑀦𑁆𑀢𑀺 𑀏𑀢𑁂𑀦 𑀘 𑀬𑁄𑀚𑁂𑀢𑀩𑁆𑀩𑀁. 𑀫𑀘𑁆𑀙𑀦𑁆𑀢𑀺 𑀑𑀤𑀓𑀁. 𑀫𑀁𑀲𑀦𑁆𑀢𑀺 𑀣𑀮𑀚𑀸𑀦𑀁 𑀫𑀁𑀲𑀁. 𑀦𑀺𑀩𑁆𑀩𑁂𑀫𑀢𑀺𑀓𑁄𑀢𑀺 ‘‘𑀫𑀁 𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀯𑀸 ‘‘𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢’’𑀦𑁆𑀢𑀺 𑀯𑀸 𑀉𑀧𑁆𑀧𑀦𑁆𑀦𑀸𑀬 𑀯𑀺𑀫𑀢𑀺𑀬𑀸 𑀯𑀺𑀭𑀳𑀺𑀢𑁄.

𑁪𑁩𑁦. 𑀲𑀫𑀼𑀤𑁆𑀤𑀺𑀲𑁆𑀲 𑀓𑀢𑀦𑁆𑀢𑀺 𑀲𑀗𑁆𑀖𑀁 𑀯𑀸 𑀅𑀢𑁆𑀢𑀸𑀦𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀓𑀢𑀁. ‘‘𑀜𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀚𑀸𑀦𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑀫𑀸𑀳.

𑁪𑁩𑁧. 𑀳𑀢𑁆𑀣𑀻𑀦𑀁 𑀅𑀲𑁆𑀲𑀸𑀦𑀁 𑀅𑀘𑁆𑀙𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀳𑀻𑀦𑀁 𑀓𑀼𑀓𑁆𑀓𑀼𑀭𑀸𑀦𑀁 𑀤𑀻𑀧𑀻𑀦𑀁 𑀲𑀻𑀳𑀸𑀦𑀁 𑀩𑁆𑀬𑀕𑁆𑀖𑀸𑀦𑀁 𑀢𑀭𑀘𑁆𑀙𑀸𑀦𑀁 𑀫𑀁𑀲𑀁 𑀅𑀓𑀧𑁆𑀧𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁪𑁩𑁨. 𑀲𑀘𑀺𑀢𑁆𑀢𑀓𑀢𑀸 𑀆𑀧𑀢𑁆𑀢𑀺𑀬𑀸𑀬𑁂𑀯 𑀬𑀼𑀚𑁆𑀚𑀢𑀺, 𑀇𑀥 𑀧𑀦 𑀢𑀁𑀳𑁂𑀢𑀼𑀓𑀁 𑀫𑀁𑀲𑀫𑁂𑀯 𑀳𑁂𑀢𑀼𑀫𑁆𑀳𑀺 𑀨𑀮𑀽𑀧𑀘𑀸𑀭𑁂𑀦 𑀲𑀘𑀺𑀢𑁆𑀢𑀓𑀦𑁆𑀢𑀺 𑀕𑀳𑀺𑀢𑀁. 𑀏𑀢𑁆𑀣 𑀘𑀺𑀢𑁆𑀢𑀁 𑀦𑀸𑀫 𑀅𑀢𑁆𑀢𑀸𑀦𑀁 𑀯𑀸 𑀲𑀗𑁆𑀖𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀓𑀢𑀪𑀸𑀯𑀚𑀸𑀦𑀦𑀘𑀺𑀢𑁆𑀢𑀁. 𑀲𑁂𑀲𑀦𑁆𑀢𑀺 𑀅𑀦𑀼𑀤𑁆𑀤𑀺𑀲𑁆𑀲𑀓𑀢𑀁 𑀅𑀓𑀧𑁆𑀧𑀺𑀬𑀫𑀁𑀲𑀁. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀦𑀬𑀫𑁂𑀯.

𑁪𑁩𑁩. 𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯𑀸𑀢𑀺 𑀅𑀓𑀧𑁆𑀧𑀺𑀬𑀫𑀁𑀲𑀧𑀭𑀺𑀳𑀸𑀭𑀢𑁆𑀣𑀁 𑀤𑀲𑀲𑀼 𑀫𑀁𑀲𑁂𑀲𑀼 𑀦𑀸𑀫𑀜𑁆𑀘 𑀉𑀤𑁆𑀤𑀺𑀲𑁆𑀲𑀓𑀢𑀲𑁆𑀲 𑀧𑀭𑀺𑀳𑀸𑀭𑀢𑁆𑀣𑀁 𑀉𑀪𑀬𑀲𑁆𑀲𑀸𑀧𑀺 𑀧𑀝𑀺𑀮𑀤𑁆𑀥𑀸𑀓𑀸𑀭𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀑𑀤𑀓𑁂𑀲𑀼 𑀫𑀘𑁆𑀙𑁂𑀲𑀼 𑀅𑀓𑀧𑁆𑀧𑀺𑀬𑀸𑀪𑀸𑀯𑀢𑁄 𑀮𑀤𑁆𑀥𑀸𑀓𑀸𑀭𑁄𑀯 𑀜𑀸𑀢𑀩𑁆𑀩𑁄. 𑀫𑀁𑀲𑁂 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 ‘‘𑀇𑀤𑀁 𑀅𑀲𑀼𑀓𑀫𑀁𑀲’’𑀦𑁆𑀢𑀺 𑀚𑀸𑀦𑀦𑁆𑀢𑀺 𑀘𑁂, 𑀅𑀧𑀼𑀘𑁆𑀙𑀺𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺. 𑀤𑀸𑀬𑀓𑁂𑀲𑀼 𑀫𑀁𑀲𑀲𑁆𑀲𑀸𑀪𑀸𑀯𑁂 𑀮𑀤𑁆𑀥𑀦𑀺𑀬𑀸𑀫𑁂 𑀅𑀧𑀼𑀘𑁆𑀙𑀺𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺. 𑀬𑀣𑀸 𑀯𑀸 𑀢𑀣𑀸 𑀯𑀸 𑀯𑀺𑀫𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀅𑀧𑁆𑀧𑀝𑀺𑀕𑁆𑀕𑀸𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 ‘‘𑀓𑀲𑁆𑀫𑀸 𑀦 𑀧𑀝𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁂 𑀯𑀺𑀫𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀓𑀸𑀭𑀁 𑀯𑀢𑁆𑀯𑀸 ‘‘𑀫𑀬𑀁 𑀢𑀼𑀫𑁆𑀳𑁂 𑀯𑀸 𑀇𑀢𑀭𑁂 𑀪𑀺𑀓𑁆𑀔𑀽 𑀯𑀸 𑀉𑀤𑁆𑀤𑀺𑀲𑁆𑀲 𑀦 𑀓𑀭𑀺𑀫𑁆𑀳𑀸’’𑀢𑀺 ¶ 𑀯𑀢𑁆𑀯𑀸 ‘‘𑀅𑀫𑁆𑀳𑀸𑀓𑀫𑁂𑀯 𑀲𑀦𑁆𑀥𑀸𑀬 𑀓𑀢𑀁, 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀓𑀢𑀁, 𑀅𑀢𑀺𑀣𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺𑀆𑀤𑀺𑀦𑀸 ¶ 𑀅𑀢𑁆𑀢𑀦𑀸 𑀮𑀤𑁆𑀥𑀧𑁆𑀧𑀓𑀸𑀭𑀁 𑀯𑀢𑁆𑀯𑀸 ‘‘𑀲𑀁𑀲𑀬𑀁 𑀅𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑁂𑀬𑁆𑀬𑀼𑀁 𑀘𑁂, 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀩𑁆𑀩𑀫𑀺𑀤𑀁 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀽𑀦𑀁 𑀏𑀢𑀁 𑀯𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀯𑀢𑁆𑀢𑀝𑁆𑀞𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀳𑀸𑀓𑀭𑀼𑀡𑀸𑀬 𑀤𑁂𑀲𑀺𑀢𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀦𑁂 𑀧𑀢𑀺𑀝𑁆𑀞𑀺𑀢𑀸. ‘‘𑀯𑀺𑀦𑀬𑀜𑁆𑀜𑀼𑀦𑁄’’𑀢𑀺 𑀇𑀫𑀺𑀦𑀸 𑀯𑀺𑀦𑀬𑀁 𑀅𑀚𑀸𑀦𑀺𑀢𑁆𑀯𑀸 𑀉𑀧𑀤𑁂𑀲𑀧𑁆𑀧𑀫𑀸𑀡𑁂𑀦𑁂𑀯 𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀳𑀺 𑀯𑀢𑁆𑀢𑀲𑁆𑀲 𑀯𑀺𑀭𑁄𑀥𑁄𑀧𑀺 𑀲𑀺𑀬𑀸𑀢𑀺 𑀢𑁂 𑀦𑀺𑀯𑀢𑁆𑀢𑁂𑀢𑀺. ‘‘𑀯𑀢𑁆𑀢𑀝𑁆𑀞𑀸’’𑀢𑀺 𑀯𑀺𑀲𑁂𑀲𑀦𑁂𑀦 𑀯𑀺𑀦𑀬𑀁 𑀜𑀢𑁆𑀯𑀸𑀧𑀺 𑀅𑀧𑀽𑀭𑀡𑁂 𑀦𑀺𑀯𑀢𑁆𑀢𑁂𑀢𑀺. 𑀉𑀪𑀬𑁂𑀦𑀧𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀤𑀻𑀧𑁂𑀢𑀺.

𑁪𑁩𑁪. 𑀇𑀤𑀁 𑀲𑀫𑀦𑀼𑀪𑀸𑀲𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀫𑀸𑀳. 𑀲𑀫𑀦𑀼𑀪𑀸𑀲𑀦𑁂𑀦 𑀲𑀸𑀥𑁂𑀢𑀩𑁆𑀩𑀸 𑀆𑀧𑀢𑁆𑀢𑀺 𑀲𑀫𑀦𑀼𑀪𑀸𑀲𑀦𑀸 𑀓𑀸𑀭𑀡𑀽𑀧𑀘𑀸𑀭𑁂𑀦. 𑀅𑀜𑁆𑀜𑀣𑀸 𑀏𑀓𑀲𑀫𑀼𑀝𑁆𑀞𑀸𑀦𑀸𑀤𑀺𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺. 𑀏𑀓𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀓𑀸𑀬𑀓𑀫𑁆𑀫𑀦𑁆𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀯𑀲𑁂𑀦 𑀓𑀸𑀬𑁂𑀦 𑀓𑀸𑀢𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀓𑀢𑀢𑁆𑀢𑀸 𑀓𑀸𑀬𑀓𑀫𑁆𑀫𑀁. 𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑀘𑀲𑀸 𑀓𑀸𑀢𑀩𑁆𑀩𑀲𑁆𑀲 𑀅𑀓𑀢𑀢𑁆𑀢𑀸 𑀯𑀘𑀻𑀓𑀫𑁆𑀫𑀁. 𑀅𑀓𑁆𑀭𑀺𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 ‘‘𑀲𑀗𑁆𑀖𑀪𑁂𑀤𑁄𑀧𑀓𑁆𑀓𑀫𑀦𑀺𑀯𑀸𑀭𑀡𑀸𑀬 𑀧𑀭𑀓𑁆𑀓𑀫𑀦𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀓𑀸𑀬𑀯𑀺𑀓𑀸𑀭𑁂𑀦 𑀯𑀸 𑀯𑀘𑀻𑀪𑁂𑀤𑁂𑀦 𑀯𑀸 𑀅𑀯𑀺𑀜𑁆𑀜𑀸𑀧𑀦𑀢𑁄 𑀅𑀓𑀺𑀭𑀺𑀬𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀗𑁆𑀖𑀪𑁂𑀤𑀓𑀣𑀸𑀯𑀡𑁆𑀡𑀦𑀸.

𑁪𑁩𑁫. 𑀓𑀺𑀜𑁆𑀘𑀺𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸’𑀢𑀺 𑀯𑀼𑀢𑁆𑀢𑀲𑀗𑁆𑀖𑀪𑁂𑀤𑀸𑀦𑀼𑀯𑀢𑁆𑀢𑀓𑀪𑀺𑀓𑁆𑀔𑀼𑀁 𑀧𑀲𑁆𑀲𑀦𑁆𑀢𑁂𑀳𑀺 𑀲𑀼𑀡𑀦𑁆𑀢𑁂𑀳𑀺 𑀮𑀚𑁆𑀚𑀺𑀪𑀺𑀓𑁆𑀔𑀽𑀳𑀺 ¶ 𑀯𑀺𑀲𑀼𑀜𑁆𑀘 𑀲𑀗𑁆𑀖𑀫𑀚𑁆𑀛𑁂 𑀘 𑀦𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁𑀬𑁂𑀯 𑀲𑀗𑁆𑀖𑀪𑁂𑀤𑀸𑀦𑀼𑀯𑀢𑁆𑀢𑀦𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑀁 𑀯𑀢𑁆𑀯𑀸 𑀢𑀢𑁄 𑀅𑀦𑁄𑀭𑀫𑀦𑁆𑀢𑀸𑀦𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀜𑁆𑀘 ‘‘𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸𑀬 𑀬𑁆𑀬-𑀓𑀸𑀭𑀧𑁆𑀧𑀢𑁆𑀢𑀸𑀬 𑀆𑀧𑀚𑁆𑀚𑀦𑀓𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 𑀇𑀤𑀜𑁆𑀘 𑀅𑀦𑀸𑀧𑀢𑁆𑀢𑀺𑀧𑀓𑀸𑀭𑁄 𑀘𑀸𑀢𑀺 𑀇𑀫𑀁 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬𑀸𑀳. 𑀯𑀘𑀦𑀧𑁆𑀧𑀓𑀸𑀭𑀪𑁂𑀤𑁄 𑀧𑀦 𑀅𑀢𑁆𑀣𑁂𑀯, 𑀲𑁄 𑀲𑀗𑁆𑀔𑁂𑀧𑀢𑁄 𑀫𑀸𑀢𑀺𑀓𑀸𑀬 (𑀧𑀸𑀭𑀸. 𑁪𑁧𑁮-𑁪𑁧𑁯) 𑀯𑀺𑀢𑁆𑀣𑀸𑀭𑀢𑁄 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁪𑁧𑁮-𑁪𑁧𑁯) 𑀆𑀕𑀢𑀦𑀬𑁂𑀦 𑀯𑀢𑁆𑀢𑀩𑁆𑀩𑁄. 𑀅𑀲𑁆𑀲𑀸𑀢𑀺 𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀲𑁆𑀲. ‘‘𑀲𑀫𑀼𑀝𑁆𑀞𑀸𑀦𑀸…𑀧𑁂… 𑀫𑀢𑀸’’𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄 𑀅𑀢𑀺𑀤𑀺𑀝𑁆𑀞𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀓𑀣𑀸𑀯𑀡𑁆𑀡𑀦𑀸.

𑁪𑁩𑁬. 𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂𑀢𑀺 ¶ 𑀏𑀢𑁆𑀣 ‘‘𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀲𑁂𑀲𑁄, 𑀦𑀺𑀤𑀸𑀦𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀅𑀦𑀺𑀬𑀢𑀯𑀺𑀢𑁆𑀣𑀸𑀭𑀲𑀗𑁆𑀔𑀸𑀢𑁂 𑀧𑀜𑁆𑀘𑀯𑀺𑀥𑀉𑀤𑁆𑀤𑁂𑀲𑀮𑀓𑁆𑀔𑀡𑀧𑀸𑀢𑀺𑀫𑁄𑀓𑁆𑀔𑁂 𑀅𑀦𑁆𑀢𑁄𑀕𑀥𑀲𑀺𑀓𑁆𑀔𑀸𑀧𑀤𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. ‘‘𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂 𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀇𑀫𑀺𑀦𑀸 ‘‘𑀅𑀯𑀘𑀦𑀻𑀬𑀫𑀢𑁆𑀢𑀸𑀦𑀁 𑀓𑀭𑁄𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀼 𑀤𑀼𑀩𑁆𑀩𑀘𑀚𑀸𑀢𑀺𑀓𑁄𑀢𑀺 𑀏𑀢𑁆𑀣 ‘‘𑀬𑁄’’𑀢𑀺 𑀅𑀚𑁆𑀛𑀸𑀳𑀸𑀭𑁄. ‘‘𑀤𑀼𑀩𑁆𑀩𑀘𑀚𑀸𑀢𑀺𑀓𑁄𑀢𑀺 𑀤𑀼𑀩𑁆𑀩𑀘𑀲𑀪𑀸𑀯𑁄, 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁨𑁫-𑁪𑁨𑁬) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀤𑁄𑀯𑀘𑀲𑁆𑀲𑀢𑀸𑀬 𑀳𑁂𑀢𑀼𑀪𑀽𑀢𑀧𑀸𑀧𑀺𑀘𑁆𑀙𑀢𑀸𑀤𑀻𑀳𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑀺 𑀯𑀼𑀢𑁆𑀢𑀁 𑀅𑀦𑀼𑀲𑀺𑀝𑁆𑀞𑀺𑀁 𑀲𑀸𑀤𑀭𑀫𑀕𑁆𑀕𑀳𑀡𑁂𑀦 𑀦𑀸𑀲𑀦𑀢𑀸 𑀤𑁄𑀯𑀘𑀲𑁆𑀲𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀤𑀪𑀸𑀚𑀦𑁂 ‘‘𑀤𑀼𑀩𑁆𑀩𑀘𑀚𑀸𑀢𑀺𑀓𑁄 𑀳𑁄𑀢𑀻𑀢𑀺 𑀤𑀼𑀩𑁆𑀩𑀘𑁄 𑀳𑁄𑀢𑀺 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀓𑁆𑀔𑀫𑁄 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 (𑀧𑀸𑀭𑀸. 𑁪𑁨𑁬).

𑀅𑀯𑀘𑀦𑀻𑀬𑀫𑀢𑁆𑀢𑀸𑀦𑀁 ¶ 𑀓𑀭𑁄𑀢𑀻𑀢𑀺 ‘‘𑀫𑀸 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸, 𑀅𑀳𑀫𑁆𑀧𑀸𑀬𑀲𑁆𑀫𑀦𑁆𑀢𑁂 𑀦 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫𑀺 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸, 𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫 𑀯𑀘𑀦𑀸𑀬𑀸’’𑀢𑀺 (𑀧𑀸𑀭𑀸. 𑁪𑁨𑁫) 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀸𑀦𑀁 𑀅𑀯𑀘𑀦𑀻𑀬𑀁 𑀓𑀭𑁄𑀢𑀺. 𑀕𑀭𑀼𑀓𑀁 𑀲𑀺𑀬𑀸𑀢𑀺 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀇𑀤𑀁 𑀅𑀚𑁆𑀛𑀸𑀳𑀸𑀭𑀦𑀬𑀲𑀫𑁆𑀩𑀦𑁆𑀥𑁂𑀦 𑀮𑀩𑁆𑀪𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀤𑀼𑀩𑁆𑀩𑀘𑀚𑀸𑀢𑀺𑀓𑁄 𑀬𑁄 𑀪𑀺𑀓𑁆𑀔𑀼 𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂 𑀲𑀺𑀓𑁆𑀔𑀸𑀧𑀤𑁂 𑀅𑀢𑁆𑀢𑀸𑀦𑀁 𑀅𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀕𑀭𑀼𑀓𑀁 𑀲𑀺𑀬𑀸𑀢𑀺.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀤𑁄𑀯𑀘𑀲𑁆𑀲𑀢𑀁 𑀧𑀲𑁆𑀲𑀦𑁆𑀢𑁂𑀳𑀺, 𑀲𑀼𑀡𑀦𑁆𑀢𑁂𑀳𑀺 𑀘 𑀮𑀚𑁆𑀚𑀺𑀪𑀺𑀓𑁆𑀔𑀽𑀳𑀺 ‘‘𑀫𑀸 𑀆𑀬𑀲𑁆𑀫𑀸 𑀅𑀢𑁆𑀢𑀸𑀦𑀁 𑀅𑀯𑀘𑀦𑀻𑀬𑀁 𑀅𑀓𑀸𑀲𑀺…𑀧𑁂… 𑀅𑀜𑁆𑀜𑀫𑀜𑁆𑀜𑀯𑀼𑀝𑁆𑀞𑀸𑀧𑀦𑁂𑀦𑀸’’𑀢𑀺 (𑀧𑀸𑀭𑀸. 𑁪𑁨𑁫) 𑀯𑀼𑀢𑁆𑀢𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, ‘‘𑀲𑁄 𑀪𑀺𑀓𑁆𑀔𑀼 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁨𑁬) 𑀯𑀼𑀢𑁆𑀢𑀢𑁆𑀢𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸𑀧𑀺 𑀲𑀗𑁆𑀖𑀫𑀚𑁆𑀛𑀁 𑀦𑁂𑀢𑁆𑀯𑀸 𑀢𑀣𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀲𑁆𑀲 𑀤𑀼𑀩𑁆𑀩𑀘𑀚𑀸𑀢𑀺𑀓𑀲𑁆𑀲 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀭𑀺𑀬𑀫𑀸𑀦𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀢𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑀸𑀬 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑁂 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀬𑀫𑀸𑀦𑁄 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁩𑁭. 𑀤𑀼𑀩𑁆𑀩𑀘𑁂𑀢𑀺 𑀏𑀢𑁆𑀣 ‘‘𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀲𑁂𑀲𑁄, 𑀢𑀣𑀸 𑀲𑀗𑁆𑀖𑀪𑁂𑀤𑀓𑀯𑀡𑁆𑀡𑀦𑁂𑀢𑀺 𑀏𑀢𑁆𑀣𑀸𑀧𑀺. 𑀲𑀗𑁆𑀖𑀪𑁂𑀤𑁄 𑀏𑀯 𑀲𑀗𑁆𑀖𑀪𑁂𑀤𑀓𑁄, 𑀢𑀁 𑀯𑀡𑁆𑀡𑁂𑀢𑀺 𑀓𑀣𑁂𑀢𑀻𑀢𑀺 𑀲𑀗𑁆𑀖𑀪𑁂𑀤𑀓𑀯𑀡𑁆𑀡𑀦𑀁, 𑀓𑀺𑀁 𑀢𑀁? 𑀲𑀺𑀓𑁆𑀔𑀸𑀧𑀤𑀁, 𑀢𑀜𑁆𑀘 ¶ 𑀧𑀞𑀫𑀫𑁂𑀯 𑀲𑀗𑁆𑀖𑀪𑁂𑀤𑀓𑀲𑀺𑀓𑁆𑀔𑀸𑀧𑀤𑀁 𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀲𑀗𑁆𑀖𑀪𑁂𑀤𑀲𑀤𑀺𑀲𑀸𑀦𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁨𑁫-𑁪𑁨𑁬). ‘‘𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀏𑀢𑁂𑀦 𑀇𑀥 𑀤𑀲𑁆𑀲𑀺𑀢𑁂𑀦 ¶ ‘‘𑀕𑀭𑀼𑀓𑀁 𑀲𑀺𑀬𑀸’’𑀢𑀺 𑀏𑀢𑁂𑀦 𑀲𑀗𑁆𑀕𑀳𑀺𑀢𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀯𑀲𑀸𑀦𑀯𑀺𑀦𑀺𑀘𑁆𑀙𑀬𑀁 𑀯𑀚𑁆𑀚𑁂𑀢𑁆𑀯𑀸 ‘‘𑀅𑀓𑀢𑁂 𑀧𑀦𑀸’’𑀢𑀺𑀆𑀤𑀺𑀕𑀸𑀣𑀸𑀢𑁆𑀢𑀬𑁂𑀦 𑀯𑀼𑀢𑁆𑀢𑀅𑀦𑀸𑀧𑀢𑁆𑀢𑀺𑀧𑁆𑀧𑀓𑀸𑀭𑁂 𑀘 ‘‘𑀇𑀤𑀫𑁂𑀓𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀯𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁂 𑀘 𑀅𑀢𑀺𑀤𑀺𑀲𑀢𑀺.

𑀤𑀼𑀩𑁆𑀩𑀘𑀓𑀣𑀸𑀯𑀡𑁆𑀡𑀦𑀸.

𑁪𑁩𑁮. 𑀬𑁄 𑀓𑀼𑀮𑀤𑀽𑀲𑀓𑁄 𑀪𑀺𑀓𑁆𑀔𑀼, 𑀲𑁄 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀧𑀸𑀧𑁂𑀦𑁆𑀢𑁄 𑀪𑀺𑀓𑁆𑀔𑀼𑀳𑀺 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀢𑀁 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀧𑀸𑀧𑀦𑀁 𑀅𑀘𑁆𑀘𑀚𑀦𑁆𑀢𑁄 𑀕𑀭𑀼𑀓𑀁 𑀨𑀼𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. ‘‘𑀓𑀼𑀮𑀤𑀽𑀲𑀓𑁄𑀢𑀺 𑀓𑀼𑀮𑀸𑀦𑀺 𑀤𑀽𑀲𑁂𑀢𑀺 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀘𑀼𑀡𑁆𑀡𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀤𑀦𑁆𑀢𑀓𑀝𑁆𑀞𑁂𑀦 𑀯𑀸 𑀯𑁂𑀴𑀼𑀬𑀸 𑀯𑀸 𑀯𑁂𑀚𑁆𑀚𑀺𑀓𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁩𑁭) 𑀯𑀘𑀦𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀺 𑀮𑀸𑀪𑀁 𑀦𑀺𑀲𑁆𑀲𑀸𑀬 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑀣𑀸 𑀅𑀓𑀭𑁄𑀦𑁆𑀢𑁂𑀲𑀼 𑀮𑀚𑁆𑀚𑀺𑀪𑀺𑀓𑁆𑀔𑀽𑀲𑀼 𑀓𑀼𑀮𑀸𑀦𑀁 𑀲𑀤𑁆𑀥𑀸𑀤𑀽𑀲𑀦𑀢𑁄 𑀓𑀼𑀮𑀤𑀽𑀲𑀓𑁄, 𑀪𑀺𑀓𑁆𑀔𑀼.

𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀧𑀸𑀧𑁂𑀦𑁆𑀢𑁄𑀢𑀺 𑀓𑀼𑀮𑀤𑀽𑀲𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀅𑀯𑀘𑀦𑀢𑁄 𑀆𑀧𑀚𑁆𑀚𑀺𑀢𑀩𑁆𑀩𑀤𑀼𑀓𑁆𑀓𑀝𑀢𑁄 𑀫𑀼𑀘𑁆𑀘𑀦𑀢𑁆𑀣𑀸𑀬 ‘‘𑀆𑀬𑀲𑁆𑀫𑀸 𑀔𑁄…𑀧𑁂… 𑀅𑀮𑀦𑁆𑀢𑁂 𑀇𑀥 𑀯𑀸𑀲𑁂𑀦𑀸’’𑀢𑀺 𑀯𑀤𑀦𑁆𑀢𑁂 𑀮𑀚𑁆𑀚𑀻 𑀧𑁂𑀲𑀮𑁂 𑀪𑀺𑀓𑁆𑀔𑀽 ‘‘𑀙𑀦𑁆𑀤𑀕𑀸𑀫𑀺𑀦𑁄 𑀘 𑀪𑀺𑀓𑁆𑀔𑀽…𑀧𑁂… 𑀏𑀓𑀘𑁆𑀘𑀁 𑀦 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀘𑀢𑀽𑀳𑀺 𑀅𑀕𑀢𑀺𑀕𑀫𑀦𑁂𑀳𑀺 𑀬𑁄𑀚𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀸𑀦𑀁 𑀕𑀭𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀭𑀺𑀬𑀫𑀸𑀦𑀁 𑀅𑀓𑁆𑀓𑁄𑀲𑀦𑀜𑁆𑀘 𑀧𑀭𑀺𑀪𑀸𑀲𑀦𑀜𑁆𑀘 𑀬𑁂 𑀧𑀲𑁆𑀲𑀦𑁆𑀢𑀺, 𑀬𑁂 𑀘 𑀲𑀼𑀡𑀦𑁆𑀢𑀺, 𑀢𑁂𑀳𑀺 ‘‘𑀫𑀸𑀬𑀲𑁆𑀫𑀸 𑀏𑀯𑀁 𑀅𑀯𑀘, 𑀦 𑀘 𑀪𑀺𑀓𑁆𑀔𑀽 𑀙𑀦𑁆𑀤𑀕𑀸𑀫𑀺𑀦𑁄…𑀧𑁂… 𑀅𑀮𑀦𑁆𑀢𑁂 𑀇𑀥 𑀯𑀸𑀲𑁂𑀦𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑀁 𑀆𑀦𑁂𑀢𑁆𑀯𑀸 ‘‘𑀫𑀸𑀬𑀲𑁆𑀫𑀸 𑀏𑀯𑀁 𑀅𑀯𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀯 ¶ 𑀧𑀼𑀦𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑁂 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀅𑀦𑁆𑀢𑁂 𑀬𑁆𑀬𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁩𑁯-𑁪𑁦. ‘‘𑀓𑀼𑀮𑀸𑀦𑀺 ¶ 𑀤𑀽𑀲𑁂𑀢𑀺 𑀧𑀼𑀧𑁆𑀨𑁂𑀦 𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁩𑁭) 𑀦𑀬𑁂𑀦 𑀯𑀼𑀢𑁆𑀢𑀓𑀼𑀮𑀤𑀽𑀲𑀦𑁄𑀧𑀓𑀭𑀡𑀪𑀽𑀢𑀘𑀼𑀡𑁆𑀡𑀧𑀡𑁆𑀡𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀘𑀼𑀡𑁆𑀡’’𑀦𑁆𑀢𑀺𑀆𑀤𑀺. 𑀘𑀼𑀡𑁆𑀡𑀦𑁆𑀢𑀺 𑀲𑀺𑀭𑀻𑀲𑀧𑀡𑁆𑀡𑀸𑀤𑀺𑀘𑀼𑀡𑁆𑀡𑀁. 𑀧𑀡𑁆𑀡𑀦𑁆𑀢𑀺 𑀢𑀫𑁆𑀩𑀽𑀮𑀧𑀡𑁆𑀡𑀢𑀸𑀮𑀧𑀡𑁆𑀡𑀸𑀤𑀺𑀔𑀸𑀤𑀺𑀢𑀩𑁆𑀩𑀸𑀔𑀸𑀤𑀺𑀢𑀩𑁆𑀩𑀧𑀡𑁆𑀡𑀁. 𑀨𑀮𑀦𑁆𑀢𑀺 𑀢𑀸𑀮𑀧𑀦𑀲𑀸𑀤𑀺𑀨𑀮𑀁. 𑀧𑀼𑀧𑁆𑀨𑀦𑁆𑀢𑀺 𑀘𑀫𑁆𑀧𑀓𑀸𑀤𑀺𑀧𑀼𑀧𑁆𑀨𑀁. 𑀯𑁂𑀴𑀼𑀦𑁆𑀢𑀺 𑀅𑀦𑁆𑀤𑁄𑀴𑀺𑀓𑀸𑀧𑀸𑀝𑀁 𑀓𑀺𑀭𑀡𑁆𑀟𑀸𑀤𑀺𑀓𑀁 𑀯𑁂𑀴𑀼𑀁. 𑀓𑀝𑁆𑀞𑀦𑁆𑀢𑀺 𑀕𑁂𑀳𑀤𑀸𑀭𑀼𑀁, 𑀇𑀦𑁆𑀥𑀦𑀜𑁆𑀘. 𑀫𑀢𑁆𑀢𑀺𑀓𑀦𑁆𑀢𑀺 𑀧𑀸𑀓𑀢𑀺𑀓𑀁, 𑀧𑀜𑁆𑀘𑀯𑀡𑁆𑀡𑀁 𑀯𑀸 𑀫𑀢𑁆𑀢𑀺𑀓𑀁.

𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀢𑀸𑀯𑀓𑀸𑀮𑀺𑀓𑀸𑀤𑀺𑀯𑀲𑁂𑀦 𑀕𑀳𑀺𑀢𑀁 𑀯𑀸 𑀘𑀼𑀡𑁆𑀡𑀁…𑀧𑁂… 𑀫𑀢𑁆𑀢𑀺𑀓𑀁 𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬 𑀤𑀤𑀢𑁄 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀬𑁆𑀬𑀸𑀢𑀺 𑀘𑁄𑀭𑀺𑀓𑀸. ‘‘𑀤𑀤𑀢𑁄’’𑀢𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁 ‘‘𑀓𑀸𑀢𑀩𑁆𑀩𑁄’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀁 𑀯𑀺𑀲𑁂𑀲𑀺𑀢𑀩𑁆𑀩𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀤𑀤𑀦𑁆𑀢𑁄’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀁 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀁. 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀗𑁆𑀖𑀲𑀦𑁆𑀢𑀓𑀁, 𑀕𑀡𑀲𑀦𑁆𑀢𑀓𑀁, 𑀅𑀜𑁆𑀜𑀧𑀼𑀕𑁆𑀕𑀮𑀲𑀦𑁆𑀢𑀓𑀜𑁆𑀘 𑀘𑀼𑀡𑁆𑀡𑀸𑀤𑀺𑀁 𑀓𑀼𑀮𑀲𑀗𑁆𑀕𑀳𑀢𑁆𑀣𑀁 𑀘𑁄𑀭𑀺𑀓𑀸𑀬 𑀤𑁂𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀖𑀜𑁆𑀜𑀲𑀦𑁆𑀢𑀓𑁂𑀢𑀺 𑀲𑀗𑁆𑀖𑀜𑁆𑀜𑀲𑀦𑁆𑀢𑀓𑀘𑀼𑀡𑁆𑀡𑀸𑀤𑀺𑀓𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀅𑀜𑁆𑀜-𑀲𑀤𑁆𑀤𑁂𑀦 𑀕𑀡𑀧𑀼𑀕𑁆𑀕𑀮𑀸𑀦𑀁 𑀕𑀳𑀡𑀁.

𑁪𑁪𑁧. 𑀲𑀗𑁆𑀖𑀺𑀓𑀁 𑀕𑀭𑀼𑀪𑀡𑁆𑀟𑀁 𑀯𑀸𑀢𑀺 𑀲𑀗𑁆𑀖𑀲𑀦𑁆𑀢𑀓𑀁 𑀕𑀭𑀼𑀪𑀡𑁆𑀟𑀧𑀳𑁄𑀦𑀓𑀁 𑀯𑀸 𑀧𑀡𑁆𑀡𑀸𑀤𑀺𑀓𑀁. 𑀲𑁂𑀦𑀸𑀲𑀦𑀦𑀺𑀬𑀸𑀫𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀸 𑀨𑀮𑀭𑀼𑀓𑁆𑀔𑀸𑀤𑀬𑁄 𑀲𑁂𑀦𑀸𑀲𑀦𑁂 𑀦𑀯𑀓𑀫𑁆𑀫𑀢𑁆𑀣𑀸𑀬𑀸’’𑀢𑀺 𑀏𑀯𑀁 𑀦𑀺𑀬𑀫𑀺𑀢𑀁 ¶ 𑀯𑀸. 𑀇𑀲𑁆𑀲𑀭𑀯𑀢𑀸𑀬𑁂 𑀯𑀸𑀢𑀺 𑀏𑀯𑀓𑀸𑀭𑁂𑀦 ‘‘𑀣𑁂𑀬𑁆𑀬𑀸’’𑀢𑀺 𑀇𑀤𑀁 𑀦𑀺𑀯𑀢𑁆𑀢𑀺𑀢𑀁.

𑁪𑁪𑁨. 𑀳𑀭𑀺𑀢𑁆𑀯𑀸 𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀳𑀭𑀺𑀢𑁆𑀯𑀸 𑀯𑀸. ‘‘𑀧𑀼𑀧𑁆𑀨𑀁 𑀤𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀉𑀧𑀭𑀺𑀧𑀺. 𑀳𑀭𑀸𑀧𑁂𑀢𑁆𑀯𑀸 𑀯𑀸𑀢𑀺 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀧𑁂𑀲𑁂𑀢𑁆𑀯𑀸 𑀯𑀸. 𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸𑀢𑀺 𑀆𑀫𑀦𑁆𑀢𑁂𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸𑀢𑀺 𑀉𑀧𑀮𑀓𑁆𑀔𑀡𑀢𑁄 𑀮𑀩𑁆𑀪𑀢𑀺. 𑀆𑀕𑀢𑀲𑁆𑀲 𑀯𑀸𑀢𑀺 𑀅𑀢𑁆𑀢𑀦𑀸 𑀏𑀯 𑀆𑀕𑀢𑀲𑁆𑀲 𑀯𑀸. ‘‘𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬𑀸’’𑀢𑀺 𑀯𑀘𑀦𑁂𑀦 ‘‘𑀏𑀯𑀭𑀽𑀧𑁂 𑀅𑀥𑀺𑀧𑁆𑀧𑀸𑀬𑁂 𑀅𑀲𑀢𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀘𑁂𑀢𑀺𑀬𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸𑀧𑀺 ‘𑀧𑀽𑀚𑁂𑀲𑁆𑀲𑀸𑀫𑀸’𑀢𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀸𑀦𑀁 𑀘𑁂𑀢𑀺𑀬𑀧𑀽𑀚𑀦𑀢𑁆𑀣𑀸𑀬 𑀤𑁂𑀦𑁆𑀢𑀺, 𑀏𑀢𑀫𑁆𑀧𑀺 𑀧𑀼𑀧𑁆𑀨𑀤𑀸𑀦𑀁 𑀦𑀸𑀫 𑀦 𑀳𑁄𑀢𑀻’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀅𑀝𑁆𑀞𑀓𑀣𑀸𑀕𑀢𑀁 𑀲𑀩𑁆𑀩𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁪𑁪𑁩. 𑀏𑀯𑀁 𑀉𑀲𑁆𑀲𑀕𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀯𑀸𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀳𑀭𑀺𑀢𑁆𑀯𑀸 𑀯𑀸’’𑀢𑀺𑀆𑀤𑀺. ‘‘𑀳𑀭𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀲𑁆𑀲 𑀯𑀸-𑀲𑀤𑁆𑀤𑀲𑁆𑀲 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀢𑀸𑀬 ‘‘𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ¶ 𑀯𑀸, 𑀆𑀕𑀢𑀸𑀦𑀁 𑀯𑀸’’𑀢𑀺 𑀘 𑀲𑀗𑁆𑀕𑀬𑁆𑀳𑀢𑀺. 𑀆𑀕𑀢𑀲𑁆𑀲𑁂𑀯𑀸𑀢𑀺 𑀏𑀯𑀓𑀸𑀭𑁂𑀦 𑀳𑀭𑀺𑀢𑁆𑀯𑀸 𑀤𑀸𑀦𑀸𑀤𑀺𑀁 𑀦𑀺𑀯𑀢𑁆𑀢𑁂𑀢𑀺.

𑁪𑁪𑁪. 𑀢𑀜𑁆𑀘𑀸𑀢𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀢𑀁 𑀧𑀼𑀧𑁆𑀨𑀤𑀸𑀦𑀜𑁆𑀘. 𑀯𑀢𑁆𑀣𑀼𑀧𑀽𑀚𑀢𑁆𑀣𑀦𑁆𑀢𑀺 𑀭𑀢𑀦𑀢𑁆𑀢𑀬𑀧𑀽𑀚𑀦𑀢𑁆𑀣𑀁. 𑀦 𑀧𑀦𑀜𑁆𑀜𑀣𑀸𑀢𑀺 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁂𑀦 𑀧𑀓𑀸𑀭𑁂𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄𑀬𑀁 𑀧𑀓𑀸𑀭𑁄𑀢𑀺 𑀆𑀳 ‘‘𑀲𑀺𑀯𑀸𑀤𑀻’’𑀢𑀺𑀆𑀤𑀺. 𑀲𑀺𑀯𑀸𑀤𑀺𑀧𑀽𑀚𑀦𑀢𑁆𑀣𑀦𑁆𑀢𑀺 𑀫𑀳𑀺𑀲𑁆𑀲𑀭𑀸𑀤𑀺𑀤𑁂𑀯𑀢𑀸𑀧𑀽𑀚𑀦𑀢𑁆𑀣𑀜𑁆𑀘. 𑀫𑀡𑁆𑀟𑀦𑀢𑁆𑀣𑀦𑁆𑀢𑀺 𑀧𑀺𑀴𑀦𑁆𑀥𑀦𑀢𑁆𑀣𑀁. 𑀏𑀯𑀁 𑀅𑀤𑀸𑀢𑀩𑁆𑀩𑀧𑁆𑀧𑀓𑀸𑀭𑀦𑀺𑀬𑀫𑀦𑁂𑀦 ‘‘𑀇𑀫𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑁪𑁪𑁫. ‘‘𑀨𑀮𑀸𑀤𑀻𑀲𑀼 ¶ …𑀧𑁂… 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀇𑀫𑀺𑀦𑀸 ‘‘𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸 𑀯𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁄 𑀨𑀮𑀧𑀡𑁆𑀡𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀲𑀫𑀸𑀦𑁄𑀢𑀺 𑀤𑀲𑁆𑀲𑁂𑀢𑀺.

𑁪𑁪𑁬. ‘‘𑀧𑀼𑀧𑁆𑀨𑀸𑀤𑀺𑀪𑀸𑀚𑀦𑁂’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀦𑀁 𑀪𑀸𑀚𑀦𑀓𑀸𑀮𑁂. 𑀲𑀫𑁆𑀫𑀢𑁂𑀦𑀸𑀢𑀺 𑀧𑀼𑀧𑁆𑀨𑀸𑀤𑀺𑀪𑀸𑀚𑀦𑀢𑁆𑀣𑀁 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑁂𑀦 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀅𑀲𑁆𑀲𑀸𑀢𑀺 𑀪𑀸𑀚𑀦𑀝𑁆𑀞𑀸𑀦𑀁 𑀆𑀕𑀢𑀲𑁆𑀲. 𑀇𑀢𑀭𑁂𑀦𑀸𑀢𑀺 𑀲𑀗𑁆𑀖𑀲𑀫𑁆𑀫𑀼𑀢𑀺𑀁 𑀯𑀺𑀦𑀸 𑀧𑀼𑀧𑁆𑀨𑀸𑀤𑀻𑀦𑀺 𑀪𑀸𑀚𑀸𑀧𑁂𑀦𑁆𑀢𑁂𑀦. 𑀜𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀲𑀗𑁆𑀖𑀁 𑀚𑀸𑀦𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

𑁪𑁪𑁭. 𑀉𑀧𑀟𑁆𑀠𑀪𑀸𑀯𑀦𑁆𑀢𑀺 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀩𑁆𑀩𑀪𑀸𑀕𑀢𑁄 𑀉𑀧𑀟𑁆𑀠𑀁. ‘‘𑀣𑁄𑀓𑀁 𑀣𑁄𑀓’’𑀦𑁆𑀢𑀺 𑀇𑀫𑀺𑀦𑀸 𑀉𑀧𑀟𑁆𑀠𑀢𑁄𑀧𑀺 𑀅𑀧𑁆𑀧𑀢𑀭𑀁 𑀕𑀳𑀺𑀢𑀁.

𑁪𑁪𑁮. 𑀧𑀭𑀺𑀩𑁆𑀩𑀬𑀯𑀺𑀳𑀻𑀦𑀲𑁆𑀲𑀸𑀢𑀺 𑀢𑀡𑁆𑀟𑀼𑀮𑀸𑀤𑀺𑀚𑀻𑀯𑀺𑀢𑀯𑀼𑀢𑁆𑀢𑀺𑀯𑀬𑀫𑀽𑀮𑀭𑀳𑀺𑀢𑀲𑁆𑀲. 𑀲𑀫𑁆𑀧𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲𑀸𑀧𑀻𑀢𑀺 𑀅𑀢𑁆𑀢𑀦𑁄 𑀲𑀫𑀻𑀧𑀫𑀼𑀧𑀕𑀢𑀲𑁆𑀲 𑀇𑀲𑁆𑀲𑀭𑀲𑁆𑀲 𑀘. ‘‘𑀤𑀸𑀢𑀩𑁆𑀩𑀁 𑀢𑀼 𑀲𑀓𑀁 𑀨𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀧𑀭𑀺𑀩𑁆𑀩𑀬𑀯𑀺𑀳𑀻𑀦𑀸𑀦𑀁, 𑀤𑀸𑀢𑀼𑀁 𑀲𑀧𑀭𑀲𑀦𑁆𑀢𑀓’’𑀦𑁆𑀢𑀺 𑀔𑀼𑀤𑁆𑀤𑀲𑀺𑀓𑁆𑀔𑀸𑀬 𑀆𑀕𑀢𑀁, 𑀇𑀥 ‘‘𑀲𑀓𑀁 𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀯𑀘𑀦𑁂𑀦 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀕𑀳𑀡𑀁, 𑀇𑀥 𑀧𑀦 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀕𑀳𑁂𑀢𑁆𑀯𑀸 𑀤𑀻𑀬𑀫𑀸𑀦𑀫𑁆𑀧𑀺 𑀲𑀲𑀦𑁆𑀢𑀓𑀫𑁂𑀯𑀸𑀢𑀺 ‘‘𑀲𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁪𑁪𑁯-𑁫𑁦. 𑀬𑀢𑁆𑀭 𑀲𑀗𑁆𑀖𑀸𑀭𑀸𑀫𑁂 𑀲𑀗𑁆𑀖𑁂𑀦 𑀨𑀮𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀓𑀢𑀺𑀓𑀸 𑀓𑀢𑀸𑀢𑀺 𑀬𑁄𑀚𑀦𑀸, ‘‘𑀆𑀕𑀦𑁆𑀢𑀼𑀓𑀸𑀦𑀁 𑀏𑀢𑁆𑀢𑀓𑀁 𑀨𑀮𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀨𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀨𑀮𑀁 𑀤𑀸𑀢𑀩𑁆𑀩’’𑀦𑁆𑀢𑀺 ¶ 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀗𑁆𑀖𑁂𑀦 𑀓𑀢𑀺𑀓𑀸 𑀬𑁂𑀦 𑀧𑀓𑀸𑀭𑁂𑀦 𑀓𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀕𑀢𑀲𑁆𑀲𑀧𑀻𑀢𑀺 𑀏𑀯𑀁 𑀞𑀧𑀺𑀢𑀓𑀢𑀺𑀓𑀯𑀢𑁆𑀢𑀁 𑀢𑀁 𑀲𑀗𑁆𑀖𑀸𑀭𑀸𑀫𑀁 𑀨𑀮𑀢𑁆𑀣𑀸𑀬 𑀆𑀕𑀢𑀲𑁆𑀲𑀸𑀧𑀺.

𑀬𑀣𑀸𑀧𑀭𑀺𑀘𑁆𑀙𑁂𑀤𑀦𑁆𑀢𑀺 ¶ 𑀲𑀗𑁆𑀖𑁂𑀦 𑀢𑀣𑀸𑀓𑀢𑀨𑀮𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑀫𑀦𑀢𑀺𑀓𑁆𑀓𑀫𑁆𑀫. 𑀤𑀤𑀢𑁄𑀢𑀺 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀨𑀮𑀁, 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀑𑀘𑀺𑀦𑀸𑀧𑁂𑀢𑁆𑀯𑀸 𑀯𑀸 𑀤𑁂𑀦𑁆𑀢𑀲𑁆𑀲. 𑀑𑀘𑀺𑀢𑀨𑀮𑁂 𑀘 𑀓𑀧𑁆𑀧𑀺𑀬𑀓𑀸𑀭𑀓𑁂 𑀘 𑀅𑀲𑀢𑀺 𑀨𑀮𑀢𑁆𑀣𑀸𑀬 𑀆𑀕𑀢𑁂𑀲𑀼 𑀯𑀢𑁆𑀢𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀲𑁆𑀲𑁂𑀢𑀩𑁆𑀩𑀸𑀧𑀺 𑀯𑀸’’𑀢𑀺𑀆𑀤𑀺. ‘‘𑀯𑀢𑁆𑀯𑀸’’𑀢𑀺 𑀲𑁂𑀲𑁄. 𑀘-𑀓𑀸𑀭𑀁 𑀅𑀧𑀺-𑀲𑀤𑁆𑀤𑁂𑀦 𑀏𑀓𑀢𑁄 𑀓𑀢𑁆𑀯𑀸 ‘‘𑀅𑀧𑀺𑀘𑀸’’𑀢𑀺 𑀬𑁄𑀚𑀦𑀸. 𑀏𑀯𑀁 𑀯𑀢𑁆𑀯𑀸 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀭𑀼𑀓𑁆𑀔𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 ‘‘𑀇𑀥 𑀨𑀮𑀸𑀦𑀺 𑀲𑀼𑀦𑁆𑀤𑀭𑀸𑀦𑀺, 𑀇𑀢𑁄 𑀕𑀡𑁆𑀳𑀣𑀸’𑀢𑀺 𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀅𑀝𑁆𑀞𑀓𑀣𑀸 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑁪𑁫𑁧. ‘‘𑀔𑀡𑀺𑀢𑁆𑀯𑀸’’𑀢𑀺 𑀏𑀢𑁂𑀦 ‘‘𑀔𑀡𑀸𑀧𑁂𑀢𑁆𑀯𑀸’’𑀢𑀺 𑀇𑀤𑀫𑁆𑀧𑀺 𑀲𑀗𑁆𑀕𑀳𑀺𑀢𑀁, ‘‘𑀓𑀧𑁆𑀧𑀺𑀬𑀪𑀽𑀫𑀺’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀣𑀯𑀺𑀦𑁆𑀢𑀺 𑀏𑀢𑁆𑀣 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀮𑀩𑁆𑀪𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀸𑀘𑀺𑀢𑁆𑀢𑀺𑀬𑁂𑀦𑀸’’𑀢𑀺. ‘‘𑀫𑀸𑀮𑀸𑀕𑀘𑁆𑀙’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀧𑁆𑀨𑀽𑀧𑀕𑁂 𑀢𑀭𑀼𑀡𑀕𑀘𑁆𑀙𑁂 𑀘 𑀫𑀮𑁆𑀮𑀺𑀓𑀸𑀲𑀼𑀫𑀦𑀸𑀤𑀺𑀕𑀼𑀫𑁆𑀩𑀕𑀸𑀕𑀘𑁆𑀙𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬 ‘‘𑀢𑀭𑀼𑀡𑀓𑀸 𑀳𑀺 𑀧𑀼𑀧𑁆𑀨𑀭𑀼𑀓𑁆𑀔𑀸𑀧𑀺 𑀧𑀼𑀧𑁆𑀨𑀕𑀘𑁆𑀙𑀸𑀧𑀺 ‘𑀫𑀸𑀮𑀸𑀯𑀘𑁆𑀙𑀸’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧). 𑀆𑀤𑀺-𑀲𑀤𑁆𑀤𑁂𑀦 𑀨𑀮𑀽𑀧𑀕𑀭𑀼𑀓𑁆𑀔𑁂 𑀘 𑀪𑁂𑀲𑀚𑁆𑀚𑀭𑀲𑁂 𑀑𑀲𑀥𑀕𑀘𑁆𑀙𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀭𑁄𑀧𑀸𑀧𑀦𑁂’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀲𑀬’’𑀦𑁆𑀢𑀺 𑀇𑀤𑀁 ‘‘𑀭𑁄𑀧𑀦𑁂’’𑀢𑀺 𑀇𑀫𑀺𑀦𑀸 𑀬𑀼𑀚𑁆𑀚𑀢𑀺.

‘‘𑀲𑀬𑀁 𑀔𑀡𑀺𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀦 𑀬𑀼𑀚𑁆𑀚𑀢𑀻𑀢𑀺? ‘‘𑀔𑀡𑀸𑀧𑁂𑀢𑁆𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀅𑀪𑀸𑀯𑀸 𑀘 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸 𑀔𑀡𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁫) 𑀯𑀘𑀦𑀢𑁄 𑀔𑀡𑀸𑀧𑀦𑁂 𑀧𑀸𑀘𑀺𑀢𑁆𑀢𑀺𑀬𑁂𑀦 𑀪𑀯𑀺𑀢𑀩𑁆𑀩𑀢𑁆𑀢𑀸 𑀘 ‘‘𑀔𑀡𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘 𑀔𑀡𑀦𑀔𑀡𑀸𑀧𑀦𑀸𑀦𑀁 𑀤𑁆𑀯𑀺𑀦𑁆𑀦𑀫𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸 𑀦 𑀬𑀼𑀚𑁆𑀚𑀢𑀺. 𑀓𑀼𑀮𑀤𑀽𑀲𑀦𑁂𑀢𑀺 𑀓𑀼𑀮𑀤𑀽𑀲𑀦𑀦𑀺𑀫𑀺𑀢𑁆𑀢𑀁. 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀺𑀢𑁆𑀯𑀸, 𑀔𑀡𑀸𑀧𑁂𑀢𑁆𑀯𑀸 𑀘 𑀲𑀬𑀁 𑀫𑀸𑀮𑀸𑀕𑀘𑁆𑀙𑀸𑀤𑀺𑀭𑁄𑀧𑀦𑁂 𑀓𑀢𑁂 𑀅𑀲𑁆𑀲 𑀫𑀸𑀮𑀸𑀕𑀘𑁆𑀙𑀸𑀤𑀺𑀭𑁄𑀧𑀓𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀅𑀓𑀧𑁆𑀧𑀺𑀬𑀧𑀣𑀯𑀻𑀔𑀡𑀦𑀧𑀘𑁆𑀘𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀓𑀼𑀮𑀤𑀽𑀲𑀦𑁂 𑀓𑀼𑀮𑀤𑀽𑀲𑀦𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁪𑁫𑁨. ‘‘𑀢𑀣𑀸’’𑀢𑀺 ¶ 𑀇𑀫𑀺𑀦𑀸 ‘‘𑀲𑀬𑀁 𑀭𑁄𑀧𑀦𑁂’’𑀢𑀺 𑀇𑀤𑀁 𑀯𑀺𑀦𑀸 𑀅𑀯𑀲𑁂𑀲𑀧𑁆𑀧𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀓𑀧𑁆𑀧𑀺𑀬𑁂𑀦 𑀯𑀸𑀓𑁆𑀬𑁂𑀦𑀸’’𑀢𑀺 𑀇𑀤𑀁 ‘‘𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘 ‘‘𑀭𑁄𑀧𑀸𑀧𑀦𑁂’’𑀢𑀺 𑀇𑀫𑀺𑀦𑀸 𑀘 𑀬𑀼𑀚𑁆𑀚𑀢𑀺. ‘‘𑀇𑀫𑀁 𑀪𑀽𑀫𑀺𑀁 𑀔𑀡, 𑀇𑀫𑀁 𑀕𑀘𑁆𑀙𑀁 𑀭𑁄𑀧𑁂𑀳𑀻’’𑀢𑀺𑀆𑀤𑀺𑀓𑀁 𑀅𑀓𑀧𑁆𑀧𑀺𑀬𑀁 𑀯𑁄𑀳𑀸𑀭𑀁 𑀯𑀢𑁆𑀯𑀸 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀸𑀧𑁂𑀢𑁆𑀯𑀸 𑀫𑀸𑀮𑀸𑀕𑀘𑁆𑀙𑀸𑀤𑀺𑀭𑁄𑀧𑀦𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀢𑀣𑁂𑀯 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀔𑀡𑀦𑀭𑁄𑀧𑀦𑁂𑀳𑀺 𑀤𑁆𑀯𑀻𑀳𑀺 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺 𑀅𑀯𑀲𑀺𑀝𑁆𑀞𑁂𑀳𑀺 𑀢𑀤𑀢𑁆𑀣𑀺𑀓𑁂𑀳𑀺 𑀲𑀩𑁆𑀩𑀯𑁄𑀳𑀸𑀭𑀧𑀬𑁄𑀕𑀪𑁂𑀤𑁂𑀳𑀺 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺. 𑀓𑀼𑀮𑀤𑀽𑀲𑀦𑁂𑀢𑀺 𑀦𑀺𑀫𑀺𑀢𑁆𑀢𑁂, 𑀯𑀺𑀲𑀬𑁂 𑀯𑀸 𑀪𑀼𑀫𑁆𑀫𑀁. 𑀅𑀓𑀧𑁆𑀧𑀺𑀬𑁂𑀦 𑀯𑀸𑀓𑁆𑀬𑁂𑀦 𑀧𑀦 𑀧𑀣𑀯𑀺𑀁 𑀔𑀡𑀸𑀧𑁂𑀢𑁆𑀯𑀸 𑀅𑀓𑀧𑁆𑀧𑀺𑀬𑁂𑀦 𑀯𑀸𑀓𑁆𑀬𑁂𑀦 𑀭𑁄𑀧𑀸𑀧𑀦𑁂𑀧𑀺 𑀢𑀣𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀳 𑀓𑀼𑀮𑀤𑀽𑀲𑀦𑁂 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀤𑀢𑁆𑀣𑀺𑀓𑁂𑀦 𑀲𑀩𑁆𑀩𑀯𑁄𑀳𑀸𑀭𑀩𑁆𑀬𑀸𑀧𑀸𑀭𑁂𑀲𑀼 𑀓𑀼𑀮𑀤𑀽𑀲𑀦𑀦𑀺𑀫𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁪𑁫𑁩. 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀅𑀢𑁆𑀢𑀦𑀸 𑀔𑀡𑀦𑁂, 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀔𑀡𑀸𑀧𑀦𑁂 𑀘 𑀧𑀸𑀘𑀺𑀢𑁆𑀢𑀺𑀬𑀸𑀪𑀸𑀯𑀢𑁄 𑀤𑀼𑀓𑁆𑀓𑀝𑀁𑀬𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀪𑀬𑀢𑁆𑀣 𑀘𑀸’’𑀢𑀺𑀆𑀤𑀺. 𑀏𑀢𑁆𑀣 ‘‘𑀏𑀯’’𑀦𑁆𑀢𑀺 𑀲𑁂𑀲𑁄, 𑀲𑁄 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀓𑀧𑁆𑀧𑀺𑀬𑀪𑀽𑀫𑀺𑀬𑀫𑁆𑀧𑀺 𑀫𑀸𑀮𑀸𑀕𑀘𑁆𑀙𑀸𑀤𑀺𑀭𑁄𑀧𑀦𑀭𑁄𑀧𑀸𑀧𑀦𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀘 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁪𑁫𑁪. 𑀲𑀤𑀼𑀓𑁆𑀓𑀝𑀸 ¶ 𑀧𑀸𑀘𑀺𑀢𑁆𑀢𑀻𑀢𑀺 ‘‘𑀆𑀯𑀸𑀝𑀁 𑀔𑀡, 𑀕𑀘𑁆𑀙𑀁 𑀭𑁄𑀧𑁂𑀳𑀻’’𑀢𑀺 𑀏𑀓𑀯𑀸𑀭𑀁 𑀆𑀡𑀢𑁆𑀢𑁂 𑀩𑀳𑀽 𑀆𑀯𑀸𑀝𑁂 𑀔𑀡𑀺𑀢𑁆𑀯𑀸 𑀩𑀳𑀽𑀲𑀼 𑀕𑀘𑁆𑀙𑁂𑀲𑀼 𑀭𑁄𑀧𑀺𑀢𑁂𑀲𑀼𑀧𑀺 𑀆𑀡𑀢𑁆𑀢𑀺𑀬𑀸 𑀏𑀓𑀢𑁆𑀢𑀸 𑀤𑀼𑀓𑁆𑀓𑀝𑁂𑀦 𑀲𑀳 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀅𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. ‘‘𑀲𑀼𑀤𑁆𑀥𑀁 𑀯𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀁 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀓𑀧𑁆𑀧𑀺𑀬𑁂𑀦 𑀯𑁄𑀳𑀸𑀭𑁂𑀦 𑀆𑀯𑀸𑀝𑀁 𑀔𑀡𑀸𑀧𑀓𑀲𑁆𑀲 𑀘 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀆𑀯𑀸𑀝𑀁 𑀔𑀡𑀸𑀧𑀓𑀲𑁆𑀲 𑀘 ‘‘𑀇𑀫𑀁 𑀕𑀘𑁆𑀙𑀁 𑀭𑁄𑀧𑁂𑀳𑀻’’𑀢𑀺 𑀏𑀓𑀯𑀸𑀭𑀸𑀡𑀢𑁆𑀢𑀧𑀘𑁆𑀘𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀁 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁫𑁫. 𑀓𑀧𑁆𑀧𑀺𑀬𑁂𑀦𑁂𑀯 𑀯𑀸𑀓𑁆𑀬𑁂𑀦𑀸𑀢𑀺 𑀏𑀢𑁆𑀣 𑀓𑀧𑁆𑀧𑀺𑀬𑀯𑀸𑀓𑁆𑀬𑀁 𑀦𑀸𑀫 ‘‘𑀏𑀢𑁆𑀣 𑀆𑀯𑀸𑀝𑀁 𑀚𑀸𑀦, 𑀏𑀢𑁆𑀣 𑀆𑀯𑀸𑀝𑀁 𑀚𑀸𑀦𑀺𑀢𑀩𑁆𑀩𑀁, 𑀏𑀢𑁆𑀣 𑀆𑀯𑀸𑀝𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀭𑀽𑀧𑀁 𑀯𑀸𑀓𑁆𑀬𑀜𑁆𑀘 ‘‘𑀇𑀫𑀁 𑀕𑀘𑁆𑀙𑀁 𑀏𑀢𑁆𑀣 𑀚𑀸𑀦, 𑀅𑀬𑀁 𑀕𑀘𑁆𑀙𑁄 𑀏𑀢𑁆𑀣 𑀚𑀸𑀦𑀺𑀢𑀩𑁆𑀩𑁄’’𑀢𑀺𑀆𑀤𑀺𑀯𑀸𑀓𑁆𑀬𑀜𑁆𑀘. 𑀏𑀯𑀓𑀸𑀭𑁂𑀦 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀜𑁆𑀘 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀺𑀲𑁆𑀲𑀓𑀯𑁄𑀳𑀸𑀭𑀜𑁆𑀘 𑀦𑀺𑀯𑀢𑁆𑀢𑁂𑀢𑀺. 𑀧𑀭𑀺𑀬𑀸𑀬𑁄𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀧𑀦 ‘‘𑀇𑀢𑀭𑀢𑁆𑀢𑀬𑀁 𑀯𑀝𑁆𑀝𑀢𑀻’’𑀢𑀺 ¶ (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀯𑀝𑁆𑀝𑀢𑀺. 𑀉𑀪𑀬𑀢𑁆𑀣 𑀘 𑀪𑀽𑀫𑀺𑀬𑀸𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀽𑀫𑀻𑀲𑀼 𑀤𑁆𑀯𑀻𑀲𑀼. 𑀭𑁄𑀧𑀦𑁂𑀢𑀺 𑀏𑀢𑁆𑀣 𑀲𑀫𑁆𑀩𑀦𑁆𑀥𑀢𑁄, 𑀧𑀓𑀭𑀡𑀢𑁄 𑀘 ‘‘𑀫𑀸𑀮𑀸𑀕𑀘𑁆𑀙𑀸𑀤𑀻𑀦’’𑀦𑁆𑀢𑀺 𑀮𑀩𑁆𑀪𑀢𑀺.

‘‘𑀯𑀸𑀓𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀭𑁄𑀧𑀸𑀧𑀦𑁂’’𑀢𑀺 𑀯𑀢𑁆𑀢𑀩𑁆𑀩𑁄, ‘‘𑀭𑁄𑀧𑀦𑁂’’𑀢𑀺 𑀓𑀺𑀫𑀢𑁆𑀣𑀫𑀸𑀳𑀸𑀢𑀺 𑀘𑁂? 𑀲𑀼𑀤𑁆𑀥𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁂𑀦 𑀧𑀬𑁄𑀚𑀓𑀲𑁆𑀲𑀸𑀧𑀺 𑀲𑀗𑁆𑀕𑀳𑁂𑀢𑀩𑁆𑀩𑀢𑁄 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀭𑀺𑀕𑀸𑀣𑀸𑀬 ‘‘𑀲𑀬𑀁 𑀭𑁄𑀧𑁂𑀢𑀼’’𑀦𑁆𑀢𑀺 𑀏𑀢𑁆𑀣 ‘‘𑀲𑀬’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀭𑁄𑀧𑀸𑀧𑁂𑀢𑀼’’𑀦𑁆𑀢𑀺 𑀇𑀤𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀧𑀭𑀺𑀪𑁄𑀕𑀢𑁆𑀣𑀸𑀬 𑀳𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑁄𑀧𑀸𑀧𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑀇𑀫𑀸𑀬 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀘𑀺 𑀤𑁄𑀲𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀯𑀼𑀢𑁆𑀢𑀤𑁄𑀲𑁂𑀲𑀼 𑀏𑀓𑁄𑀧𑀺 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁪𑁫𑁬-𑁭. ‘‘𑀲𑀬𑀁 ¶ 𑀭𑁄𑀧𑁂𑀢𑀼’’𑀦𑁆𑀢𑀺 𑀇𑀤𑀁 ‘‘𑀆𑀭𑀸𑀫𑀸𑀤𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀆𑀤𑀺-𑀲𑀤𑁆𑀤𑁂𑀦 𑀯𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀬𑀁 𑀭𑁄𑀧𑀺𑀢𑀲𑁆𑀲 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 ‘‘𑀭𑁄𑀧𑀸𑀧𑀺𑀢𑀲𑁆𑀲𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀏𑀢𑀲𑁆𑀲 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀧𑁆𑀧𑀺𑀬𑁂𑀦 𑀯𑁄𑀳𑀸𑀭𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄. 𑀅𑀬𑀁 𑀧𑀦 𑀯𑀺𑀦𑀺𑀘𑁆𑀙𑀬𑁄 ‘‘𑀆𑀭𑀸𑀫𑀢𑁆𑀣𑀸𑀬 𑀧𑀦 𑀯𑀦𑀢𑁆𑀣𑀸𑀬 𑀘 𑀙𑀸𑀬𑀢𑁆𑀣𑀸𑀬 𑀘 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀫𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀺, 𑀲𑁂𑀲𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑁄 𑀆𑀭𑀸𑀫𑀪𑀽𑀲𑀦𑀢𑁆𑀣𑀸𑀬, 𑀩𑀳𑀺 𑀅𑀭𑀜𑁆𑀜𑀢𑁆𑀣𑀸𑀬 𑀯𑀺𑀬 𑀙𑀸𑀬𑀢𑁆𑀣𑀸𑀬 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 ‘‘𑀇𑀫𑀁 𑀚𑀸𑀦𑀸’’𑀢𑀺𑀆𑀤𑀺𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑁄𑀧𑀸𑀧𑀺𑀢𑀭𑀼𑀓𑁆𑀔𑁂 𑀘 𑀓𑀧𑁆𑀧𑀺𑀬𑀪𑀽𑀫𑀺𑀬𑀜𑁆𑀘 𑀅𑀢𑁆𑀢𑀦𑀸 𑀓𑀢𑁂 𑀯𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑀸𑀧𑀺𑀢𑁂 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀜𑁆𑀘 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀅𑀢𑁆𑀢𑀦𑀸 𑀓𑀸𑀭𑀸𑀧𑀺𑀢𑁂 𑀯𑀸 𑀅𑀜𑁆𑀜𑁂𑀳𑀺 𑀓𑀢𑁂 𑀯𑀸 𑀆𑀯𑀸𑀝𑁂 𑀅𑀢𑁆𑀢𑀦𑀸 𑀭𑁄𑀧𑀺𑀢𑁂 𑀭𑀼𑀓𑁆𑀔𑁂 𑀘 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀢𑀺 𑀘𑁂, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑀆𑀭𑀸𑀫𑀸𑀤𑀻𑀦𑀫𑀢𑁆𑀣𑀸𑀬 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀬𑀁 𑀭𑁄𑀧𑀺𑀢𑀲𑁆𑀲 𑀯𑀸 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀸 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀭𑁄𑀧𑀸𑀧𑀺𑀢𑀲𑁆𑀲 𑀯𑀸 𑀭𑀼𑀓𑁆𑀔𑀲𑁆𑀲 𑀬𑀜𑁆𑀘 𑀨𑀮𑀁, 𑀢𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀪𑀺𑀓𑁆𑀔𑀽𑀦𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀆𑀭𑀸𑀫𑀸𑀤𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀕𑀸𑀣𑀸𑀬 𑀮𑀺𑀔𑀺𑀢𑀝𑁆𑀞𑀸𑀦𑁂 ¶ ‘‘𑀓𑀼𑀮𑀲𑀗𑁆𑀕𑀳𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺𑀕𑀸𑀣𑀸 𑀤𑀺𑀲𑁆𑀲𑀢𑀺. 𑀲𑀸 𑀧𑀸𑀴𑀺𑀓𑁆𑀓𑀫𑀯𑀺𑀭𑀼𑀤𑁆𑀥𑀢𑁆𑀢𑀸 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑀸, ‘‘𑀧𑀼𑀧𑁆𑀨𑀸𑀦’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀧𑀼𑀭𑀢𑁄 𑀯𑀼𑀘𑁆𑀘𑀫𑀸𑀦𑀸 𑀧𑀦 𑀞𑀸𑀦𑀧𑁆𑀧𑀬𑀼𑀢𑁆𑀢𑀸 𑀳𑁄𑀢𑀺.

𑁪𑁫𑁮. 𑀲𑀩𑁆𑀩𑀢𑁆𑀣𑀸𑀢𑀺 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬 𑀧𑀼𑀩𑁆𑀩𑁂 𑀯𑀺𑀬 𑀅𑀢𑁆𑀢𑀦𑀸 𑀭𑁄𑀧𑀺𑀢𑁂𑀲𑀼, 𑀭𑁄𑀧𑀸𑀧𑀺𑀢𑁂𑀲𑀼 𑀘 𑀲𑀩𑁆𑀩𑁂𑀲𑀼 𑀫𑀸𑀮𑀸𑀕𑀘𑁆𑀙𑀸𑀤𑀻𑀲𑀼. 𑀅𑀓𑀧𑁆𑀧𑀺𑀬𑁄𑀤𑀓𑁂𑀦𑁂𑀯 𑀧𑀸𑀘𑀺𑀢𑁆𑀢𑀻𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 ¶ 𑀉𑀤𑀓𑀁 𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀲𑀺𑀜𑁆𑀘𑁂𑀬𑁆𑀬 𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁪𑁦) 𑀯𑀼𑀢𑁆𑀢𑀸 𑀧𑀸𑀘𑀺𑀢𑁆𑀢𑀺 𑀏𑀯, 𑀦 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑁪𑁫𑁯. 𑀇𑀤𑀸𑀦𑀺 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀯𑀺𑀲𑀬𑀁 𑀤𑀲𑁆𑀲𑁂𑀢𑀺 ‘‘𑀓𑀼𑀮…𑀧𑁂… 𑀤𑀼𑀓𑁆𑀓𑀝’’𑀦𑁆𑀢𑀺. 𑀲𑀺𑀜𑁆𑀘𑀢𑁄𑀢𑀺 𑀓𑀧𑁆𑀧𑀺𑀬𑁄𑀤𑀓𑁂𑀦𑁂𑀯 𑀲𑀺𑀜𑁆𑀘𑀢𑁄, 𑀲𑀺𑀜𑁆𑀘𑀸𑀧𑀬𑀢𑁄 𑀘.

𑁪𑁬𑁦. 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀧𑀦 𑀅𑀢𑁆𑀣𑀸𑀬𑀸𑀢𑀺 𑀓𑀼𑀮𑀤𑀽𑀲𑀦𑀧𑀭𑀺𑀪𑁄𑀕𑀸𑀦𑀁 𑀤𑁆𑀯𑀺𑀦𑁆𑀦𑀫𑀢𑁆𑀣𑀸𑀬. 𑀲𑀺𑀜𑁆𑀘𑀦𑁂 𑀲𑀺𑀜𑁆𑀘𑀸𑀧𑀦𑁂𑀢𑀺 𑀏𑀢𑁆𑀣 ‘‘𑀫𑀸𑀮𑀸𑀕𑀘𑁆𑀙𑀸𑀤𑀻𑀦’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 ‘‘𑀓𑁂𑀯𑀮’’𑀦𑁆𑀢𑀺 𑀲𑁂𑀲𑁄.

𑁪𑁬𑁧. 𑀑𑀘𑀺𑀦𑀸𑀧𑀦𑁂𑀢𑀺 𑀅𑀜𑁆𑀜𑁂𑀳𑀺 𑀧𑀼𑀧𑁆𑀨𑀸𑀦𑀁 𑀑𑀘𑀺𑀦𑀸𑀧𑀦𑁂. 𑀲𑀬𑀫𑁄𑀘𑀺𑀦𑀦𑁂 𑀘𑀸𑀧𑀻𑀢𑀺 𑀅𑀢𑁆𑀢𑀦𑀸𑀯 𑀑𑀘𑀺𑀦𑀦𑁂 𑀘. 𑀲𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀦𑁆𑀢𑀺 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁦) 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑁄𑀘𑀺𑀦𑀦𑀳𑁂𑀢𑀼 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀓𑀼𑀮𑀤𑀽𑀲𑀦𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁬𑁨. 𑀧𑀽𑀚𑀸𑀤𑀺𑀅𑀢𑁆𑀣𑀸𑀬, 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀘 𑀧𑀼𑀧𑁆𑀨𑀸𑀦𑀁 𑀑𑀘𑀺𑀦𑀦𑀑𑀘𑀺𑀦𑀸𑀧𑀦𑀸𑀦𑀺 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀆𑀧𑀚𑁆𑀚𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀧𑁆𑀨𑀸𑀦’’𑀦𑁆𑀢𑀺. ‘‘𑀧𑀼𑀧𑁆𑀨𑀸𑀦𑀁 𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀫𑁄𑀘𑀺𑀦𑀢𑁄𑀢𑀺 𑀏𑀢𑁆𑀣 ‘‘𑀯𑀺𑀲𑀼𑀁 𑀯𑀺𑀲𑀼’’𑀦𑁆𑀢𑀺 𑀲𑁂𑀲𑁄. 𑀏𑀓𑁂𑀓𑀧𑀼𑀧𑁆𑀨𑀁 𑀑𑀘𑀺𑀦𑀦𑁆𑀢𑀲𑁆𑀲 𑀧𑀼𑀧𑁆𑀨𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀓𑁂𑀦 𑀧𑀬𑁄𑀕𑁂𑀦 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀲𑁆𑀲 𑀧𑀦 𑀧𑀬𑁄𑀕𑀕𑀡𑀦𑀸𑀬 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀇𑀥 𑀩𑁆𑀬𑀢𑀺𑀭𑁂𑀓𑀢𑁄 𑀮𑀩𑁆𑀪𑀢𑀺. ‘‘𑀑𑀘𑀺𑀦𑀢𑁄’’𑀢𑀺 𑀇𑀫𑀺𑀦𑀸 ‘‘𑀑𑀘𑀺𑀦𑀸𑀧𑀬𑀢𑁄’’𑀢𑀺 𑀇𑀤𑀜𑁆𑀘 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑁂 𑀯𑀺𑀲𑁂𑀲𑀲𑁆𑀲 𑀅𑀦𑁆𑀢𑁄𑀕𑀥𑀪𑀸𑀯𑀢𑁄 𑀯𑀸 𑀉𑀧𑀮𑀓𑁆𑀔𑀡𑀢𑁄 𑀯𑀸 𑀤𑀲𑁆𑀲𑀺𑀢𑀦𑁆𑀢𑀺.

𑀢𑀢𑁆𑀣 ¶ 𑀘 𑀧𑀼𑀧𑁆𑀨𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀢𑁆𑀯𑀸 𑀑𑀘𑀺𑀦𑀸𑀧𑁂𑀦𑁆𑀢𑀲𑁆𑀲 𑀧𑀼𑀧𑁆𑀨𑀸𑀦𑀁 𑀕𑀡𑀦𑀸𑀬 𑀳𑁄𑀢𑀻𑀢𑀺 𑀇𑀤𑀫𑁂𑀯 ¶ 𑀆𑀧𑀚𑁆𑀚𑀢𑀺. 𑀏𑀓𑀯𑀸𑀭𑀫𑀸𑀡𑀢𑁆𑀢𑁂𑀦 𑀩𑀳𑀽𑀦𑀺 𑀧𑀼𑀧𑁆𑀨𑀸𑀦𑀺 𑀩𑀳𑀽𑀲𑀼 𑀘 𑀯𑀸𑀭𑁂𑀲𑀼 𑀑𑀘𑀺𑀢𑁂𑀲𑀼 𑀆𑀡𑀢𑁆𑀢𑀺𑀕𑀡𑀦𑀸𑀬 𑀳𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀲𑀩𑁆𑀩𑀧𑁆𑀧𑀓𑀸𑀭𑀁 𑀅𑀦𑀦𑁆𑀢𑀭𑀯𑀼𑀢𑁆𑀢𑀕𑀸𑀣𑀸𑀬 𑀤𑀲𑁆𑀲𑀺𑀢𑀯𑀺𑀥𑀺𑀫𑁆𑀳𑀺 𑀘 𑀤𑀝𑁆𑀞𑀩𑁆𑀩𑀦𑁆𑀢𑀺 𑀜𑀸𑀧𑁂𑀢𑀼𑀫𑀸𑀳 ‘‘𑀓𑀼𑀮𑀢𑁆𑀣𑀁 𑀘𑁂 𑀲𑀤𑀼𑀓𑁆𑀓𑀝𑀸’’𑀢𑀺. 𑀓𑀼𑀮𑀢𑁆𑀣𑀦𑁆𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀁. ‘‘𑀲𑀤𑀼𑀓𑁆𑀓𑀝𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀧𑀼𑀧𑁆𑀨𑀕𑀡𑀦𑀸𑀬 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀧𑁆𑀨𑀕𑀡𑀦𑀸𑀬 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧).

𑁪𑁬𑁩. 𑀕𑀦𑁆𑀣𑀦𑀁 𑀕𑀦𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀕𑀦𑁆𑀣𑀺𑀫𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀕𑀦𑁆𑀣𑀺𑀫𑀸𑀤𑀺𑀲𑀭𑀽𑀧𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀲𑀗𑁆𑀕𑀳𑀡𑀁 𑀲𑀗𑁆𑀕𑀳𑁄, 𑀧𑀼𑀧𑁆𑀨𑀸𑀦𑀁 𑀲𑀗𑁆𑀕𑀳𑁄𑀢𑀺 𑀯𑀺𑀕𑁆𑀕𑀳𑁄.

𑁪𑁬𑁪. 𑀇𑀫𑀸𑀦𑀺 𑀕𑀦𑁆𑀣𑀺𑀫𑀸𑀤𑀻𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀢𑁆𑀣 𑀤𑀡𑁆𑀟𑁂𑀦 𑀤𑀡𑁆𑀟𑀁 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀧𑀼𑀧𑁆𑀨𑀲𑀗𑁆𑀕𑀳𑁂𑀲𑀼. ‘‘𑀤𑀡𑁆𑀟𑁂𑀦 𑀤𑀡𑁆𑀟𑀁 𑀯𑀸’’𑀢𑀺 𑀇𑀤𑀁 𑀲𑀤𑀡𑁆𑀟𑀉𑀧𑁆𑀧𑀮𑀸𑀤𑀺𑀓𑀼𑀲𑀼𑀫𑀁 𑀲𑀦𑁆𑀥𑀸𑀬𑀸𑀳. ‘‘𑀯𑀡𑁆𑀝𑁂𑀦𑀧𑀺 𑀘 𑀯𑀡𑁆𑀝𑀓’’𑀦𑁆𑀢𑀺 𑀇𑀤𑀁 𑀲𑀯𑀡𑁆𑀝𑀓𑀭𑀢𑁆𑀢𑀓𑀼𑀲𑀼𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀭𑀡𑀁 𑀲𑀩𑁆𑀩𑀦𑁆𑀢𑀺 𑀓𑀢𑀁 𑀲𑀩𑁆𑀩𑀁. 𑀇𑀥 𑀲𑀩𑁆𑀩𑀢𑁆𑀣 𑀓𑀧𑁆𑀧𑀺𑀬𑀯𑀺𑀥𑀺𑀯𑀺𑀪𑀸𑀕𑀁 ‘‘𑀲𑀩𑁆𑀩𑀫𑁂𑀢’’𑀫𑀺𑀘𑁆𑀘𑀸𑀤𑀺𑀕𑀸𑀣𑀸𑀬𑀁 𑀯𑀓𑁆𑀔𑀢𑀺.

𑁪𑁬𑁫. 𑀲𑀼𑀢𑁆𑀢𑀸𑀤𑀻𑀳𑀺 𑀕𑁄𑀧𑁆𑀨𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀦𑀻’’𑀢𑀺 𑀲𑁂𑀲𑁄. 𑀲𑀼𑀢𑁆𑀢𑁂𑀦 𑀯𑀸 𑀓𑀤𑀮𑀺𑀯𑀸𑀓𑀸𑀤𑀻𑀳𑀺 𑀯𑀸 𑀯𑀲𑁆𑀲𑀺𑀓𑀸𑀤𑀺𑀧𑀼𑀧𑁆𑀨𑁂 𑀕𑀦𑁆𑀣𑀺𑀢𑁆𑀯𑀸 𑀓𑀢𑀧𑀼𑀧𑁆𑀨𑀯𑀺𑀓𑀸𑀭𑁄 𑀕𑁄𑀧𑁆𑀨𑀺𑀫𑀁 𑀦𑀸𑀫. 𑀏𑀓𑀢𑁄 𑀯𑀡𑁆𑀝𑀸𑀦𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀉𑀪𑀢𑁄𑀯𑀡𑁆𑀝𑀺𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑁆𑀧𑀢𑁆𑀣𑁂 𑀯𑀸 𑀲𑀓𑀢𑁆𑀣𑁂 𑀯𑀸 𑀓-𑀓𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀇𑀢𑁆𑀣𑀺𑀮𑀺𑀗𑁆𑀕𑀯𑀺𑀲𑀬𑁂 𑀓-𑀓𑀸𑀭𑀢𑁄 𑀧𑀼𑀩𑁆𑀩𑀸𑀓𑀸𑀭𑀲𑁆𑀲 𑀇-𑀓𑀸𑀭𑀸𑀤𑁂𑀲𑁄.

𑀲𑀩𑁆𑀩𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑀸𑀦𑀺 𑀏𑀓𑀤𑀺𑀲𑀸𑀬 𑀓𑀢𑁆𑀯𑀸 𑀕𑀦𑁆𑀣𑀺𑀢𑀧𑀼𑀧𑁆𑀨𑀸𑀯𑀮𑀺 𑀏𑀓𑀢𑁄𑀯𑀡𑁆𑀝𑀺𑀓𑀸 𑀦𑀸𑀫, 𑀯𑀡𑁆𑀝𑀸𑀦𑀺 𑀉𑀪𑀬𑀤𑀺𑀲𑀸𑀬 𑀓𑀢𑁆𑀯𑀸 𑀕𑀦𑁆𑀣𑀺𑀢𑀧𑀼𑀧𑁆𑀨𑀸𑀯𑀮𑀺 ¶ 𑀉𑀪𑀢𑁄𑀯𑀡𑁆𑀝𑀺𑀓𑀸 𑀦𑀸𑀫𑀸𑀢𑀺 𑀢𑀁 𑀕𑁄𑀧𑁆𑀨𑀺𑀫𑀁 𑀏𑀯𑀁 𑀤𑀼𑀯𑀺𑀥𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀸𑀓𑀁 𑀯𑀸 𑀯𑀮𑁆𑀮𑀺𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀻𑀧𑀓𑀤𑀫𑁆𑀩𑀸𑀤𑀺𑀯𑀡𑁆𑀝𑀭𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑁂𑀞𑁂𑀢𑁆𑀯𑀸 𑀕𑀳𑀡𑀁 𑀕𑁄𑀧𑁆𑀨𑀺𑀫𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁.

𑁪𑁬𑁬. 𑀩𑀼𑀦𑁆𑀤𑁂𑀲𑀽𑀢𑀺 𑀫𑀽𑀮𑁂𑀲𑀼. 𑀫𑀓𑀼𑀮𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑀡𑁆𑀝𑀭𑀳𑀺𑀢𑀫𑀥𑀼𑀓𑀸𑀤𑀺𑀧𑀼𑀧𑁆𑀨𑀜𑁆𑀘 𑀯𑀡𑁆𑀝𑀲𑀳𑀺𑀢𑀫𑀮𑁆𑀮𑀺𑀓𑀸𑀤𑀺𑀧𑀼𑀧𑁆𑀨𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀲𑀽𑀘𑀺𑀆𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀢𑀸𑀮𑀳𑀻𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 ¶ . 𑀫𑀸𑀮𑀸𑀯𑀺𑀓𑀢𑀻𑀢𑀺 𑀧𑀼𑀧𑁆𑀨𑀫𑀸𑀮𑀸𑀯𑀺𑀓𑀢𑀺. 𑀲𑀽𑀘𑀺𑀆𑀤𑀻𑀳𑀺 𑀫𑀓𑀼𑀮𑀸𑀤𑀺𑀓𑀁 𑀧𑀼𑀧𑁆𑀨𑀁 𑀩𑀼𑀦𑁆𑀤𑁂𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀆𑀯𑀼𑀢𑀸 𑀫𑀸𑀮𑀸𑀯𑀺𑀓𑀢𑀺 𑀯𑁂𑀥𑀺𑀫𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁪𑁬𑁭. ‘‘𑀯𑁂𑀞𑀺𑀫𑀁 𑀦𑀸𑀫 𑀧𑀼𑀧𑁆𑀨𑀤𑀸𑀫𑀧𑀼𑀧𑁆𑀨𑀳𑀢𑁆𑀣𑀓𑁂𑀲𑀼 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀬 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑁂𑀲𑀼 𑀧𑀞𑀫𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀯𑁂𑀞𑁂𑀢𑁆𑀯𑀸 𑀓𑀢𑀁 𑀫𑀸𑀮𑀸𑀕𑀼𑀡𑁂𑀳𑀺 𑀯𑀸’’𑀢𑀺. 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀧𑀝𑀺𑀫𑀸𑀬 𑀯𑀸 𑀥𑀸𑀢𑀼𑀬𑀸 𑀯𑀸 𑀧𑀽𑀚𑀁 𑀓𑀢𑁆𑀢𑀼𑀓𑀸𑀫𑀸 𑀫𑀼𑀤𑁆𑀥𑀦𑀺 𑀉𑀚𑀼𑀓𑀁 𑀓𑀢𑁆𑀯𑀸 𑀫𑀸𑀮𑀸𑀤𑀸𑀫𑀓𑀮𑀸𑀧𑀁 𑀑𑀮𑀫𑁆𑀩𑀺𑀢𑁆𑀯𑀸 𑀅𑀕𑁆𑀕𑁂 𑀖𑀝𑀺𑀓𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀫𑀸𑀮𑀸𑀯𑀮𑀺𑀬𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀯𑁂𑀞𑁂𑀦𑁆𑀢𑀺, 𑀇𑀤𑀁 𑀏𑀯𑀭𑀽𑀧𑀁 𑀫𑀸𑀮𑀸𑀕𑀼𑀡𑀓𑀭𑀡𑀫𑁆𑀧𑀺 𑀯𑁂𑀞𑀺𑀫𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀯𑀸𑀓𑀸𑀤𑀻𑀳𑀺 𑀘 𑀩𑀤𑁆𑀥𑀁 𑀯𑀸’’𑀢𑀺, ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, ‘‘𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀏𑀓𑀘𑁆𑀘𑁂 𑀉𑀧𑁆𑀧𑀮𑀸𑀤𑀺𑀤𑀻𑀖𑀤𑀡𑁆𑀟𑀓𑀼𑀲𑀼𑀫𑀸𑀦𑀺 𑀅𑀝𑁆𑀞 𑀯𑀸 𑀦𑀯 𑀯𑀸 𑀤𑀲 𑀯𑀸 𑀓𑀮𑀸𑀧𑀁 𑀓𑀢𑁆𑀯𑀸 𑀢𑁂𑀲𑀫𑁂𑀯 𑀤𑀡𑁆𑀟𑀸𑀦𑀁 𑀯𑀸𑀓𑁂𑀳𑀺 𑀯𑀸 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀤𑀡𑁆𑀟𑀓𑀕𑁆𑀕𑁂 𑀞𑀧𑁂𑀢𑁆𑀯𑀸 𑀯𑀸 𑀯𑀺𑀲𑀼𑀁 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀮𑀳𑀢𑁆𑀣𑀸𑀤𑀺𑀁 𑀓𑀭𑁄𑀦𑁆𑀢𑀺, 𑀢𑀜𑁆𑀘 𑀯𑁂𑀞𑀺𑀫𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀁 𑀤𑁆𑀯𑀬𑀫𑁆𑀧𑀺 𑀦 𑀯𑀝𑁆𑀝𑀢𑀺.

𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 ¶ 𑀑𑀘𑀺𑀦𑀺𑀢𑁆𑀯𑀸 𑀞𑀧𑀺𑀢𑀧𑀼𑀧𑁆𑀨𑀸𑀦𑀺 𑀲𑀸𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀲𑀼𑀬𑁂𑀯 𑀧𑀼𑀧𑁆𑀨𑁂𑀲𑀼 𑀅𑀘𑁆𑀙𑀺𑀦𑁆𑀦𑁂𑀦 𑀤𑀡𑁆𑀟𑁂𑀦 𑀯𑀸 𑀢𑀲𑁆𑀫𑀺𑀁𑀬𑁂𑀯 𑀤𑀡𑁆𑀟𑁂 𑀅𑀘𑁆𑀙𑀺𑀦𑁆𑀦𑀯𑀸𑀓𑁂𑀦 𑀯𑀸 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀼𑀁, 𑀅𑀁𑀲𑀪𑀡𑁆𑀟𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀲𑀁𑀬𑁂𑀯 𑀧𑀦 𑀯𑀸𑀓𑁂𑀦 𑀯𑀸 𑀤𑀡𑁆𑀟𑁂𑀦 𑀩𑀦𑁆𑀥𑀺𑀢𑀼𑀁 𑀅𑀁𑀲𑀪𑀡𑁆𑀟𑀺𑀓𑀁 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀯𑀸𑀓𑁂𑀦 𑀯𑀸 𑀤𑀡𑁆𑀟𑁂𑀦 𑀯𑀸’𑀢𑀺 𑀘 𑀇𑀤𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀻’’𑀢𑀺 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀧𑀤𑀼𑀫𑀸𑀤𑀺𑀧𑀼𑀧𑁆𑀨𑀸𑀦𑀺 𑀧𑀤𑀼𑀫𑀸𑀤𑀺𑀧𑀡𑁆𑀡𑁂𑀲𑀼 𑀦𑀸𑀴𑁂𑀳𑀺 𑀧𑀯𑁂𑀲𑁂𑀢𑁆𑀯𑀸 𑀦𑀸𑀴𑁂𑀳𑀺 𑀩𑀳𑀺 𑀓𑀢𑁆𑀯𑀸 𑀧𑀡𑁆𑀡𑁂𑀦 𑀧𑀼𑀧𑁆𑀨𑀸𑀦𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀡𑁆𑀡𑀕𑁆𑀕𑁂 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀤𑀡𑁆𑀟𑁂 𑀧𑀦 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀘 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁.

𑁪𑁬𑁮. 𑀧𑀼𑀧𑁆𑀨𑀫𑀸𑀮𑀸𑀳𑀺 𑀧𑀽𑀭𑀡𑁂𑀢𑀺 𑀧𑀼𑀧𑁆𑀨𑀸𑀯𑀮𑀻𑀳𑀺 𑀧𑀽𑀭𑀡𑁂. 𑀇𑀤𑀁 𑀓𑀢𑁆𑀣 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀩𑁄𑀥𑀺’’𑀦𑁆𑀢𑀺𑀆𑀤𑀺. 𑀧𑀼𑀧𑁆𑀨𑀧𑀝𑀁 𑀦𑀸𑀫 𑀫𑀸𑀮𑀸𑀯𑀮𑀺𑀬𑁄 𑀢𑀦𑁆𑀢𑀁 𑀯𑀺𑀬 𑀧𑀲𑀸𑀭𑁂𑀢𑁆𑀯𑀸 𑀯𑀢𑁆𑀣𑀁 𑀯𑀸𑀬𑀦𑁆𑀢𑁂𑀳𑀺 𑀯𑀺𑀬 𑀢𑀺𑀭𑀺𑀬𑀜𑁆𑀘 𑀫𑀸𑀮𑀸𑀯𑀮𑀻𑀳𑀺 𑀯𑀸𑀬𑀺𑀢𑀧𑀝𑀁 𑀯𑀼𑀘𑁆𑀘𑀢𑀺. 𑀇𑀤𑀁 𑀧𑀼𑀧𑁆𑀨𑀧𑀝𑀁 𑀫𑀸𑀮𑀸𑀯𑀮𑀻𑀳𑀺 𑀤𑀻𑀖𑀲𑁄 𑀧𑀽𑀭𑀡𑀁 𑀲𑀦𑁆𑀥𑀸𑀬 ¶ 𑀧𑀼𑀭𑀺𑀫𑁂 𑀕𑀳𑀺𑀢𑀁, 𑀢𑀺𑀭𑀺𑀬𑀢𑁄 𑀯𑀸𑀬𑀦𑀁 𑀲𑀦𑁆𑀥𑀸𑀬 𑀯𑀓𑁆𑀔𑀫𑀸𑀦𑁂 𑀯𑀸𑀬𑀺𑀫𑁂𑀧𑀺 𑀕𑀳𑀺𑀢𑀦𑁆𑀢𑀺 𑀧𑀼𑀦𑀭𑀼𑀢𑁆𑀢𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀥𑀸𑀢𑀼𑀓𑀭𑀡𑁆𑀟𑀓𑀯𑁂𑀤𑀺𑀓𑀸𑀤𑀻𑀦𑀁 𑀕𑀳𑀡𑀁.

𑀧𑀭𑀺𑀓𑁆𑀔𑁂𑀧𑁂𑀲𑀼 𑀮𑀩𑁆𑀪𑀢𑀻𑀢𑀺 𑀩𑁄𑀥𑀺𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀓𑁆𑀔𑀺𑀧𑀦𑁂𑀲𑀼 𑀮𑀩𑁆𑀪𑀢𑀺. 𑀩𑁄𑀥𑀺𑀓𑁆𑀔𑀦𑁆𑀥𑀸𑀤𑀬𑁄 𑀧𑀼𑀧𑁆𑀨𑀸𑀯𑀮𑀻𑀳𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀳𑀺 𑀧𑀞𑀫𑀯𑀤𑁆𑀥𑀝𑁆𑀞𑀸𑀦𑁂 𑀧𑀼𑀧𑁆𑀨𑀸𑀯𑀮𑀺𑀬𑀸 𑀅𑀦𑀢𑀺𑀓𑁆𑀓𑀸𑀫𑀺𑀢𑁂 𑀧𑀼𑀭𑀺𑀫𑀁 𑀦𑀸𑀫 𑀞𑀸𑀦𑀁 𑀬𑀸𑀯 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀅𑀜𑁆𑀜𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀆𑀳𑀭𑀺𑀢𑁆𑀯𑀸 𑀧𑀼𑀦𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀢𑁆𑀢𑁂 𑀅𑀜𑁆𑀜𑀲𑁆𑀲 𑀤𑀸𑀦𑀯𑀲𑁂𑀦 𑀩𑁄𑀥𑀺𑀓𑁆𑀔𑀦𑁆𑀥𑀁, 𑀘𑁂𑀢𑀺𑀬𑀁, 𑀥𑀸𑀢𑀼𑀓𑀭𑀡𑁆𑀟𑀓𑀁 𑀯𑀸 𑀧𑀼𑀧𑁆𑀨𑀓𑀜𑁆𑀘𑀼𑀓𑁂𑀦 𑀙𑀸𑀤𑁂𑀢𑀼𑀁 ¶ 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁. 𑀲𑀘𑁂𑀧𑀺 𑀤𑁆𑀯𑁂𑀬𑁂𑀯 𑀪𑀺𑀓𑁆𑀔𑀽 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀢𑁆𑀯𑀸 𑀧𑀭𑀺𑀬𑀸𑀬𑁂𑀦 𑀳𑀭𑀦𑁆𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀧𑀼𑀧𑁆𑀨𑀧𑀝𑀯𑀸𑀬𑀦𑀢𑁆𑀣𑀁 𑀧𑀲𑀸𑀭𑀺𑀬𑀫𑀸𑀦𑀧𑀼𑀧𑁆𑀨𑀸𑀯𑀮𑀻𑀲𑀼 𑀘 𑀏𑀲𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀤𑀻𑀖𑀧𑀼𑀧𑁆𑀨𑀸𑀯𑀮𑀺𑀁 𑀦𑀸𑀕𑀤𑀦𑁆𑀢𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀦𑀸𑀕𑀤𑀦𑁆𑀢𑁂𑀲𑀼 𑀧𑀦 𑀧𑀼𑀧𑁆𑀨𑀯𑀮𑀬𑀁 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀳𑀺 𑀯𑀮𑀬𑀁 𑀓𑀢𑁆𑀯𑀸 𑀤𑀺𑀦𑁆𑀦𑀧𑀼𑀧𑁆𑀨𑀸𑀯𑀮𑀺𑀯𑀮𑀬𑀁 𑀥𑀸𑀢𑀼𑀓𑀭𑀡𑁆𑀟𑀣𑀼𑀧𑀺𑀓𑀸𑀬 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀫𑀸𑀮𑀸𑀕𑀼𑀡𑁂𑀳𑀺 𑀧𑀦 𑀩𑀳𑀽𑀳𑀺𑀧𑀺 𑀓𑀢𑀁 𑀧𑀼𑀧𑁆𑀨𑀤𑀸𑀫𑀁 𑀮𑀪𑀺𑀢𑁆𑀯𑀸 𑀆𑀲𑀦𑀫𑀢𑁆𑀣𑀓𑀸𑀤𑀻𑀲𑀼 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀧𑁆𑀨𑀤𑀸𑀫𑀧𑀼𑀧𑁆𑀨𑀸𑀯𑀮𑀻𑀦𑀁 𑀧𑀼𑀧𑁆𑀨𑀭𑀳𑀺𑀢𑀸𑀬 𑀲𑀼𑀢𑁆𑀢𑀓𑁄𑀝𑀺𑀬𑀸 𑀭𑀚𑁆𑀚𑀼𑀤𑀡𑁆𑀟𑀸𑀤𑀻𑀲𑀼 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺.

𑁪𑁬𑁯. 𑀧𑀼𑀧𑁆𑀨𑀭𑀽𑀧𑀁 𑀦𑀸𑀫 ‘‘𑀕𑁄𑀧𑁆𑀨𑀺𑀫𑀧𑀼𑀧𑁆𑀨𑁂𑀳𑁂𑀯 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀓𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀦𑀺𑀧𑀺 𑀯𑀸𑀬𑀺𑀫𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀯𑀼𑀢𑁆𑀢𑀢𑁆𑀢𑀸 𑀢𑀁𑀢𑀁𑀭𑀽𑀧𑀲𑀡𑁆𑀞𑀸𑀦𑀁 𑀓𑀢𑁆𑀯𑀸 𑀧𑀼𑀧𑁆𑀨𑀸𑀯𑀮𑀺𑀬𑁄 𑀦𑀺𑀯𑁂𑀲𑁂𑀢𑁆𑀯𑀸 𑀓𑀭𑀺𑀬𑀫𑀸𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀁. 𑀇𑀫𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀧𑀸𑀞𑁂 ‘‘𑀢𑀸𑀦𑀺𑀧𑀺 𑀯𑀸𑀬𑀺𑀫𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀅𑀜𑁆𑀜𑁂𑀳𑀺 𑀓𑀢𑀧𑀭𑀺𑀘𑁆𑀙𑁂𑀤𑁂 𑀧𑀦 𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀭𑀽𑀧𑀓𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀧𑀸𑀞𑀲𑁆𑀲 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦𑀸𑀢𑀺 𑀅𑀕𑀦𑁆𑀣𑀺𑀢𑀸𑀦𑀺 𑀧𑀸𑀓𑀢𑀺𑀓𑀧𑀼𑀧𑁆𑀨𑀸𑀦𑀺 𑀞𑀧𑁂𑀦𑁆𑀢𑁂𑀦. 𑀧𑀼𑀧𑁆𑀨𑀤𑀸𑀫𑀁 𑀧𑀦 𑀧𑀽𑀚𑀦𑀢𑁆𑀣𑀸𑀬 𑀪𑀽𑀫𑀺𑀬𑀁 𑀞𑀧𑁂𑀦𑁆𑀢𑁂𑀦 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀅𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁩𑁧) 𑀯𑀼𑀢𑁆𑀢𑀢𑁆𑀢𑀸 𑀘 𑀇𑀫𑀁 𑀳𑀢𑁆𑀣𑀺𑀆𑀤𑀺𑀭𑀽𑀧𑀁 𑀧𑀽𑀭𑁂𑀦𑁆𑀢𑁂𑀦 𑀫𑀸𑀮𑀸𑀯𑀮𑀺𑀁 𑀅𑀜𑁆𑀜𑁂𑀳𑀺 𑀓𑀢𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀧𑀸𑀲𑀸𑀡𑀆𑀲𑀦𑀫𑀜𑁆𑀘𑀧𑀻𑀞𑀳𑀢𑁆𑀣𑀺𑀭𑀽𑀧𑀸𑀤𑀺𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀧𑀽𑀚𑀦𑀧𑁆𑀧𑀓𑀸𑀭𑁄 𑀯𑀸𑀬𑀺𑀫𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀧𑀼𑀧𑁆𑀨𑀧𑀝𑀦𑁆𑀢𑀺 ¶ ¶ 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀼𑀧𑁆𑀨𑀧𑀝𑀁 𑀧𑀽𑀭𑁂𑀦𑁆𑀢𑁂𑀦 𑀏𑀓𑀸𑀧𑀺 𑀧𑀼𑀧𑁆𑀨𑀸𑀯𑀮𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦 𑀞𑀧𑁂𑀢𑀩𑁆𑀩𑀸, 𑀯𑀸𑀬𑀦𑁆𑀢𑁂𑀦 𑀅𑀜𑁆𑀜𑁂𑀳𑀺 𑀧𑀽𑀭𑀺𑀢𑁂𑀧𑀺 𑀏𑀓𑀸𑀧𑀺 𑀧𑀼𑀧𑁆𑀨𑀸𑀯𑀮𑀺 𑀦 𑀧𑀸𑀢𑁂𑀢𑀩𑁆𑀩𑀸, 𑀇𑀤𑀁 𑀧𑀽𑀭𑀺𑀫𑀯𑀸𑀬𑀺𑀫𑀸𑀦𑀁 𑀦𑀸𑀦𑀸𑀓𑀭𑀡𑀁. 𑀆𑀤𑀺𑀕𑁆𑀕𑀳𑀡𑁂𑀦 𑀧𑀼𑀧𑁆𑀨𑀚𑀸𑀮𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀁 𑀓𑀭𑁄𑀦𑁆𑀢𑀲𑁆𑀲 𑀚𑀸𑀮𑀘𑁆𑀙𑀺𑀤𑁆𑀤𑀕𑀡𑀦𑀸𑀬 𑀤𑀼𑀓𑁆𑀓𑀝𑀁 𑀳𑁄𑀢𑀺. ‘‘𑀪𑀺𑀢𑁆𑀢𑀺𑀘𑁆𑀙𑀢𑁆𑀢𑀩𑁄𑀥𑀺𑀢𑁆𑀣𑀫𑁆𑀪𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀙𑀢𑁆𑀢𑀸𑀤𑀻𑀲𑀼 𑀘 𑀧𑀼𑀧𑁆𑀨𑀚𑀸𑀮𑀁 𑀦 𑀤𑀸𑀢𑀩𑁆𑀩𑀁.

𑁪𑁭𑁦. 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀸𑀥𑀸𑀭𑀡𑀢𑁆𑀢𑀸 ‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑀸’’𑀢𑀺 𑀆𑀳. 𑀩𑀼𑀤𑁆𑀥𑀲𑁆𑀲𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, ‘‘𑀧𑀽𑀚𑀢𑁆𑀣’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀩𑀼𑀤𑁆𑀥𑀲𑁆𑀲 𑀧𑀽𑀚𑀢𑁆𑀣𑀸𑀬𑀧𑀺 𑀓𑀸𑀢𑀼𑀁 𑀯𑀸 𑀓𑀸𑀭𑀸𑀧𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺𑀧𑀺 𑀉𑀧𑀮𑀓𑁆𑀔𑀡𑀢𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀲𑁂𑀲𑁂 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑀢𑁆𑀣𑁄.

𑁪𑁭𑁧. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀲𑀬𑀁 𑀧𑀭𑁂𑀳𑀺 𑀯𑀸 𑀓𑀸𑀭𑀸𑀧𑁂𑀢𑀼𑀁 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀩𑀼𑀤𑁆𑀥𑀲𑁆𑀲𑀧𑀻’’𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺. 𑀓𑀮𑀫𑁆𑀩𑀓𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀥𑀦𑀼𑀓𑀸𑀦𑀫𑀦𑁆𑀢𑀭𑁂 𑀑𑀮𑀫𑁆𑀩𑀓𑀤𑀸𑀫𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀮𑀫𑁆𑀩𑀓𑁄𑀢𑀺 𑀅𑀟𑁆𑀠𑀘𑀦𑁆𑀤𑀦𑀸𑀕𑀤𑀦𑁆𑀢𑀦𑁆𑀢𑀭𑁂 𑀖𑀝𑀺𑀓𑀸𑀤𑀸𑀫𑀑𑀮𑀫𑁆𑀩𑀓𑁄 𑀯𑀼𑀢𑁆𑀢𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧). 𑀏𑀢𑁆𑀣 𑀘 𑀖𑀝𑀺𑀓𑀸𑀤𑀸𑀫𑀑𑀮𑀫𑁆𑀩𑀓𑁄 𑀦𑀸𑀫 𑀅𑀦𑁆𑀢𑁂 𑀖𑀝𑀺𑀓𑀸𑀓𑀸𑀭𑀬𑀼𑀢𑁆𑀢𑁄 𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄. 𑀓𑀸𑀢𑀼𑀦𑁆𑀢𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀓𑁂𑀓𑀧𑀼𑀧𑁆𑀨𑀤𑀸𑀫𑀁 𑀧𑀦 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸 𑀧𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀧𑁆𑀨𑀤𑀸𑀫𑀤𑁆𑀯𑀬𑀁 𑀲𑀗𑁆𑀖𑀝𑀺𑀢𑀼𑀓𑀸𑀫𑁂𑀦𑀧𑀺 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀓𑁄𑀝𑀺𑀬𑀸𑀯 𑀲𑀼𑀢𑁆𑀢𑀓𑁄𑀝𑀺 𑀲𑀗𑁆𑀖𑀝𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀟𑁆𑀠𑀘𑀦𑁆𑀤𑀓𑀫𑁂𑀯 𑀯𑀸𑀢𑀺 ‘‘𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑁂𑀧𑁄’’𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀲𑀭𑀽𑀧𑀁 𑀯𑀸.

𑀏𑀢𑁆𑀣 𑀘 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑁂𑀧𑁄 𑀦𑀸𑀫 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀦𑀁. 𑀢𑁂𑀦𑁂𑀯 𑀢𑀁 𑀧𑀽𑀭𑀺𑀫𑁂 𑀧𑀯𑀺𑀝𑁆𑀞𑀁. 𑀢𑀲𑁆𑀫𑀸 𑀏𑀢𑀫𑁆𑀧𑀺 ¶ 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑀯𑀲𑁂𑀦 𑀧𑀽𑀭𑀺𑀢𑀁 𑀦 𑀯𑀝𑁆𑀝𑀢𑀺, 𑀏𑀓𑀯𑀸𑀭𑀁 𑀧𑀦 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁂𑀦 𑀫𑀸𑀮𑀸𑀕𑀼𑀡𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀤𑀼𑀪𑀬𑀫𑁆𑀧𑀺 𑀧𑀽𑀭𑀺𑀫𑁂𑀬𑁂𑀯 𑀧𑀯𑀺𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀳𑀺 𑀧𑀽𑀭𑀺𑀢𑀦𑁆𑀢𑀺 𑀅𑀜𑁆𑀜𑁂𑀳𑀺 𑀆𑀬𑀢𑀁 𑀧𑀲𑀸𑀭𑁂𑀢𑁆𑀯𑀸 𑀧𑀽𑀭𑀺𑀢𑀁 𑀧𑀼𑀧𑁆𑀨𑀧𑀝𑀁. 𑀯𑀸𑀬𑀺𑀢𑀼𑀫𑁆𑀧𑀺 𑀘𑀸𑀢𑀺 𑀢𑀺𑀭𑀺𑀬𑀁 𑀏𑀓𑀧𑀼𑀧𑁆𑀨𑀸𑀯𑀮𑀺𑀫𑁆𑀧𑀺 𑀯𑀸𑀬𑀺𑀢𑀼𑀁 ‘‘𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀫𑁆𑀩𑀦𑁆𑀥𑁄.

𑁪𑁭𑁨. 𑀧𑀺𑀝𑁆𑀞𑀓𑀸𑀘𑀫𑀬𑀦𑁆𑀢𑀺 ¶ 𑀢𑀡𑁆𑀟𑀼𑀮𑀧𑀺𑀝𑁆𑀞𑀸𑀤𑀻𑀳𑀺 𑀓𑀢𑀜𑁆𑀘𑁂𑀯 𑀓𑀸𑀘𑀫𑀢𑁆𑀢𑀺𑀓𑀸𑀬 𑀘 𑀓𑀢𑀁 𑀧𑀼𑀧𑁆𑀨𑀤𑀸𑀫𑀁. 𑀪𑁂𑀡𑁆𑀟𑀼𑀧𑀼𑀧𑁆𑀨𑀫𑀬𑀫𑁆𑀧𑀺 𑀘𑀸𑀢𑀺 𑀪𑁂𑀡𑁆𑀟𑀼𑀤𑀡𑁆𑀟𑀓𑁂𑀳𑀺 𑀫𑀮𑁆𑀮𑀺𑀓𑀸𑀲𑀼𑀫𑀦𑀘𑀫𑁆𑀧𑀓𑀸𑀤𑀺𑀲𑀤𑀺𑀲𑀁 𑀓𑀢𑁆𑀯𑀸 𑀙𑀺𑀤𑁆𑀤𑁂𑀳𑀺 𑀓𑀢𑀤𑀸𑀫𑀜𑁆𑀘. ‘‘𑀕𑁂𑀡𑁆𑀟𑀼𑀧𑀼𑀧𑁆𑀨𑀫𑀬’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀔𑀭𑀧𑀢𑁆𑀢𑀫𑀬𑀦𑁆𑀢𑀺 𑀏𑀢𑁆𑀣 𑀔𑀭𑀧𑀢𑁆𑀢𑀁 𑀦𑀸𑀫 𑀓𑀼𑀗𑁆𑀓𑀼𑀝𑁆𑀞𑀔𑀘𑀺𑀢𑀁 𑀧𑀼𑀧𑁆𑀨𑀧𑀝𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀸𑀢𑀼𑀦𑁆𑀢𑀺 𑀕𑀦𑁆𑀣𑀦𑀕𑀦𑁆𑀣𑀸𑀧𑀦𑀸𑀤𑀻𑀦𑀺 𑀓𑀸𑀢𑀼𑀁. 𑀪𑁂𑀡𑁆𑀟𑀼𑀔𑀭𑀧𑀢𑁆𑀢𑀤𑀸𑀫𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑁂𑀮𑀸𑀤𑀻𑀳𑀺 𑀓𑀢𑀤𑀸𑀫𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸𑀢𑀺 𑀯𑀤𑀦𑁆𑀢𑀺.

𑁪𑁭𑁩. 𑀳𑀻𑀭𑀸𑀤𑀻𑀳𑀻𑀢𑀺 𑀢𑀸𑀮𑀦𑀸𑀴𑀺𑀓𑁂𑀭𑀳𑀻𑀭𑀸𑀤𑀻𑀳𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀡𑀲𑀮𑀸𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀸𑀓𑀢𑁆𑀣𑀦𑁆𑀢𑀺 𑀧𑀝𑀸𑀓𑀸𑀓𑀸𑀭𑁂𑀦 𑀧𑀽𑀚𑀦𑀢𑁆𑀣𑀁. ‘‘𑀯𑀺𑀚𑁆𑀛𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀓𑀡𑁆𑀝𑀓𑁂𑀳𑀺 𑀯𑀺𑀚𑁆𑀛𑀦𑀁, 𑀳𑀻𑀭𑀸𑀤𑀻𑀳𑀺 𑀆𑀯𑀼𑀡𑀦𑀜𑁆𑀘 𑀲𑀗𑁆𑀕𑀳𑀺𑀢𑀁.

𑁪𑁭𑁫. 𑀅𑀲𑁄𑀓𑀧𑀺𑀡𑁆𑀟𑀺𑀆𑀤𑀻𑀦𑀦𑁆𑀢𑀺 𑀅𑀲𑁄𑀓𑀧𑀼𑀧𑁆𑀨𑀫𑀜𑁆𑀚𑀭𑀺𑀓𑀸𑀤𑀻𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀏𑀢𑁂𑀳𑁂𑀯 𑀲𑀤𑁆𑀥𑀺𑀁 𑀤𑀲𑁆𑀲𑀺𑀢𑀁 𑀚𑀸𑀮𑀯𑀺𑀢𑀸𑀦𑀁, 𑀙𑀺𑀤𑁆𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀯𑁂𑀤𑀺𑀓𑀸, 𑀦𑀸𑀕𑀤𑀦𑁆𑀢𑀓𑀁, 𑀧𑀼𑀧𑁆𑀨𑀘𑀗𑁆𑀓𑁄𑀝𑀓𑀸𑀧𑀺𑀥𑀸𑀦𑀁, 𑀢𑀸𑀮𑀧𑀡𑁆𑀡𑀯𑀮𑀬𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀥𑀫𑁆𑀫𑀭𑀚𑁆𑀚𑀼𑀬𑀸𑀢𑀺 𑀏𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀥𑀫𑁆𑀫𑀭𑀚𑁆𑀚𑀼 𑀦𑀸𑀫 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀼𑀧𑁆𑀨𑀧𑀯𑁂𑀲𑀦𑀢𑁆𑀣 𑀆𑀯𑀚𑁆𑀚𑀺𑀢𑁆𑀯𑀸 𑀩𑀤𑁆𑀥𑀭𑀚𑁆𑀚𑀽’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂, 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀣𑀸 𑀩𑀤𑁆𑀥𑀸𑀬 𑀭𑀚𑁆𑀚𑀼𑀬𑀸 𑀘𑁂𑀢𑀺𑀬𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ¶ 𑀯𑀺𑀜𑁆𑀜𑀸𑀬𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘𑀥𑀫𑁆𑀫𑀭𑀚𑁆𑀚𑀼𑀦𑁆𑀢𑀺 𑀲𑀺𑀣𑀺𑀮𑀯𑀝𑁆𑀝𑀺𑀢𑀁 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀩𑁄𑀥𑀺𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀯𑀸 𑀮𑀫𑁆𑀩𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀺𑀣𑀺𑀮𑀯𑀝𑁆𑀝𑀺𑀢𑀸𑀬 𑀭𑀚𑁆𑀚𑀼𑀬𑀸 𑀅𑀦𑁆𑀢𑀭𑁂𑀧𑀺 𑀧𑀼𑀧𑁆𑀨𑀸𑀦𑀺 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀉𑀪𑀬𑀢𑁆𑀣𑀸𑀧𑀺 𑀧𑀦𑁂𑀢𑁆𑀣 𑀦𑁂𑀯𑀢𑁆𑀣𑀺 𑀯𑀺𑀭𑁄𑀥𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁩𑁧) 𑀮𑀺𑀔𑀺𑀢𑀁.

𑁪𑁭𑁬. 𑀯𑀺𑀚𑁆𑀛𑀦𑁆𑀢𑀲𑁆𑀲𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀥𑀫𑁆𑀫𑀸𑀲𑀦𑀯𑀺𑀢𑀸𑀦𑀸𑀤𑀻𑀲𑀼 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀁 𑀲𑀬𑀁 𑀓𑀡𑁆𑀝𑀓𑀳𑀻𑀭𑀸𑀤𑀺𑀧𑁆𑀧𑀯𑁂𑀲𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀯𑀺𑀢𑀸𑀦𑀸𑀤𑀻𑀲𑀼 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀁 𑀓𑀡𑁆𑀝𑀓𑀳𑀻𑀭𑀸𑀤𑀺𑀧𑁆𑀧𑀯𑁂𑀲𑀦𑀁 𑀦 𑀯𑀝𑁆𑀝𑀢𑀻’𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁.

𑁪𑁭𑁭. 𑀓𑀧𑁆𑀧𑀺𑀬𑀯𑀘𑀦𑀁 𑀦𑀸𑀫 ‘‘𑀏𑀯𑀁 𑀚𑀸𑀦, 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬, 𑀬𑀣𑀸 𑀏𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀢𑀣𑀸 𑀓𑀭𑁄𑀳𑀻’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁧) 𑀅𑀝𑁆𑀞𑀓𑀣𑀸𑀕𑀢𑀁 𑀓𑀧𑁆𑀧𑀺𑀬𑀯𑀘𑀦𑀁. 𑀯𑀢𑁆𑀣𑀼𑀧𑀽𑀚𑀦𑁂𑀢𑀺 𑀭𑀢𑀦𑀢𑁆𑀢𑀬𑀧𑀽𑀚𑀦𑁂. 𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀧𑀼𑀧𑁆𑀨𑀸𑀦𑀺 𑀘 𑀕𑀦𑁆𑀣𑀦𑀯𑀸𑀓𑁂 ¶ 𑀘 𑀕𑀳𑁂𑀢𑁆𑀯𑀸 𑀕𑀦𑁆𑀣𑀺𑀢𑀼𑀁 𑀚𑀸𑀦𑀦𑁆𑀢𑀸𑀦𑀁 𑀲𑀫𑀻𑀧𑁂 𑀞𑀧𑀦𑀁. 𑀑𑀪𑀸𑀲𑁄 𑀦𑀸𑀫 ‘‘𑀢𑀼𑀫𑁆𑀳𑁂𑀳𑀺 𑀧𑀺𑀴𑀦𑁆𑀥𑀺𑀢𑀓𑀼𑀲𑀼𑀫𑀸𑀦𑀺 𑀓𑀲𑁆𑀫𑀸 𑀦 𑀯𑀺𑀓𑀺𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀕𑀦𑁆𑀣𑀺𑀢𑀢𑁆𑀢𑀸’’𑀢𑀺 𑀘𑁂 𑀯𑀤𑀢𑀺, 𑀦𑀦𑀼 𑀧𑀽𑀚𑀦𑀓𑀧𑀼𑀧𑁆𑀨𑀸𑀦𑀺 𑀕𑀦𑁆𑀣𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺𑀆𑀤𑀺𑀯𑀘𑀦𑀸𑀦𑀺. 𑀧𑀭𑀺𑀬𑀸𑀬𑁄 𑀦𑀸𑀫 𑀧𑀡𑁆𑀟𑀺𑀢𑁂𑀳𑀺 𑀧𑀼𑀧𑁆𑀨𑀸𑀦𑀺 𑀬𑀣𑀸 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺, 𑀢𑀣𑀸 𑀕𑀦𑁆𑀣𑀺𑀢𑁆𑀯𑀸 𑀧𑀽𑀚𑁂𑀢𑀼𑀁 𑀫𑀦𑀸𑀧𑀦𑁆𑀢𑀺𑀆𑀤𑀺𑀯𑀘𑀦𑀁. 𑀧𑀓𑀸𑀲𑀺𑀢𑀸 𑀅𑀝𑁆𑀞𑀓𑀣𑀸𑀬𑀁.

𑁪𑁭𑁮. ‘‘𑀓𑀼𑀮𑀸𑀦𑀺 𑀤𑀽𑀲𑁂𑀢𑀺 𑀧𑀼𑀧𑁆𑀨𑁂𑀦 𑀯𑀸’’𑀢𑀺𑀆𑀤𑀺𑀧𑀸𑀞𑁂 (𑀧𑀸𑀭𑀸. 𑁪𑁩𑁭) ‘‘𑀯𑁂𑀚𑁆𑀚𑀺𑀓𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁩𑁭) 𑀯𑀼𑀢𑁆𑀢𑀁 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀁 𑀓𑀼𑀮𑀤𑀽𑀲𑀦𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 ‘‘𑀦 𑀓𑁂𑀯𑀮𑀁…𑀧𑁂… 𑀓𑀼𑀤𑀸𑀘𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀯𑀺𑀲𑀼𑀁 𑀓𑀸𑀢𑀼𑀁 𑀦 𑀯𑀼𑀢𑁆𑀢𑀁. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 ¶ ‘‘𑀦 𑀓𑁂𑀯𑀮𑀫𑀺𑀤𑀫𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀼𑀧𑁆𑀨𑀤𑀸𑀦𑀸𑀤𑀺𑀓𑀼𑀮𑀤𑀽𑀲𑀦𑀁 𑀓𑀼𑀤𑀸𑀘𑀦𑀁 𑀅𑀓𑀢𑁆𑀢𑀩𑁆𑀩𑀁, 𑀅𑀣 𑀔𑁄 𑀯𑁂𑀚𑁆𑀚𑀓𑀫𑁆𑀫𑀸𑀤𑀺 𑀓𑀼𑀮𑀤𑀽𑀲𑀦𑀫𑁆𑀧𑀺 𑀓𑀼𑀤𑀸𑀘𑀦𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺. 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑀓𑁆𑀔𑀫𑀸𑀦𑀧𑀭𑀺𑀢𑁆𑀢𑁄𑀤𑀓𑀲𑀼𑀢𑁆𑀢𑀤𑀸𑀦𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀤𑀸𑀦𑀤𑀽𑀢𑁂𑀬𑁆𑀬𑀚𑀗𑁆𑀖𑀧𑁂𑀲𑀦𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁪𑁭𑁯. ‘‘𑀓𑀼𑀤𑀸𑀘𑀦𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀦𑀺𑀲𑁂𑀥𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀢𑁆𑀢𑀩𑁆𑀩’’𑀫𑀺𑀘𑁆𑀘𑀸𑀤𑀺𑀦𑀸 𑀅𑀧𑀯𑀸𑀤𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀦𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀦𑀁 𑀧𑀜𑁆𑀘𑀦𑁆𑀦𑀁 𑀲𑀳 𑀲𑀤𑁆𑀥𑀺𑀁 𑀘𑀭𑀺𑀢𑀩𑁆𑀩𑁄 𑀧𑀩𑁆𑀩𑀚𑁆𑀚𑀸𑀲𑀸𑀲𑀦𑀥𑀫𑁆𑀫𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 ‘‘𑀲𑀳𑀥𑀫𑁆𑀫𑀺𑀓𑀸’’𑀢𑀺 𑀲𑀗𑁆𑀔𑀁 𑀕𑀢𑀸𑀦𑀁. 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸𑀧𑀻𑀢𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀪𑁂𑀲𑀚𑁆𑀚𑀁 𑀬𑀸𑀘𑀺𑀢𑁆𑀯𑀸𑀧𑀺 ‘‘𑀯𑀤𑁂𑀬𑁆𑀬𑀸𑀣 𑀪𑀦𑁆𑀢𑁂 𑀬𑁂𑀦𑀢𑁆𑀣𑁄’’𑀢𑀺 𑀏𑀯𑀁 𑀅𑀓𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀢𑁆𑀢𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺. 𑀅𑀢𑁆𑀢𑀦𑁄 𑀥𑀦𑁂𑀢𑀺 𑀲𑀲𑀦𑁆𑀢𑀓𑀯𑀺𑀲𑀬𑁂.

𑁪𑁮𑁦. ‘‘𑀢𑀣𑀸’’𑀢𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺. 𑀢𑀤𑀼𑀧𑀝𑁆𑀞𑀸𑀓𑀚𑀦𑁆𑀢𑀼𑀦𑁄𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲. 𑀪𑀡𑁆𑀟𑀼𑀓𑀲𑁆𑀲𑀸𑀢𑀺 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑀲𑁆𑀲𑀸𑀧𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲𑀧𑀻𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀓𑀭𑀲𑁆𑀲𑀧𑀺. 𑀏𑀢𑁆𑀢𑀓𑀸𑀦𑀜𑁆𑀘 𑀚𑀦𑀸𑀦𑀁 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑀸𑀦𑀁 𑀯𑀺𑀬 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀪𑁂𑀲𑀚𑁆𑀚𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁮𑁧. 𑀚𑁂𑀝𑁆𑀞𑀪𑀸𑀢𑀸𑀢𑀺 𑀅𑀢𑁆𑀢𑀦𑁄 𑀧𑀼𑀩𑁆𑀩𑀚𑁄 𑀪𑀸𑀢𑀸. 𑀓𑀦𑀺𑀝𑁆𑀞𑁄𑀢𑀺 𑀅𑀦𑀼𑀚𑁄 𑀪𑀸𑀢𑀸. 𑀢𑀣𑀸 𑀪𑀕𑀺𑀦𑀺𑀬𑁄 𑀤𑀼𑀯𑁂𑀢𑀺 𑀚𑁂𑀝𑁆𑀞𑀓𑀦𑀺𑀝𑁆𑀞𑀸 𑀤𑁆𑀯𑁂 𑀪𑀕𑀺𑀦𑀺𑀬𑁄. 𑀘𑀽𑀴𑀫𑀸𑀢𑀸𑀢𑀺 𑀫𑀸𑀢𑀼 𑀓𑀦𑀺𑀝𑁆𑀞𑀸. 𑀘𑀽𑀴𑀧𑀺𑀢𑀸𑀢𑀺 𑀧𑀺𑀢𑀼 𑀓𑀦𑀺𑀝𑁆𑀞𑁄. 𑀫𑀳𑀸𑀫𑀸𑀢𑀸𑀢𑀺 𑀫𑀸𑀢𑀼 𑀚𑁂𑀝𑁆𑀞𑀸. 𑀫𑀳𑀸𑀧𑀺𑀢𑀸 𑀧𑀺𑀢𑀼 𑀚𑁂𑀝𑁆𑀞𑀪𑀸𑀢𑀸.

𑁪𑁮𑁨. 𑀧𑀺𑀢𑀼𑀘𑁆𑀙𑀸𑀢𑀺 𑀧𑀺𑀢𑀼𑀪𑀕𑀺𑀦𑀻 𑀚𑁂𑀝𑁆𑀞𑀓𑀦𑀺𑀝𑁆𑀞𑀸. 𑀫𑀸𑀢𑀼𑀮𑁄𑀢𑀺 𑀫𑀸𑀢𑀼 𑀪𑀸𑀢𑀸. 𑀚𑁂𑀝𑁆𑀞𑀓𑀦𑀺𑀝𑁆𑀞𑁂 𑀤𑁆𑀯𑁂 𑀧𑀺𑀢𑀼𑀘𑁆𑀙𑀸 ¶ , 𑀤𑁆𑀯𑁂 𑀫𑀸𑀢𑀼𑀮𑁂 ¶ 𑀘 𑀏𑀓𑀢𑁄 𑀓𑀢𑁆𑀯𑀸 ‘‘𑀤𑀲𑀸’’𑀢𑀺 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁮𑁪. ‘‘𑀤𑀲𑁆𑀲𑀦𑁆𑀢𑀺 𑀫𑁂 𑀇𑀫𑁂’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁪𑁮𑁫. 𑀏𑀢𑁂𑀲𑀁 𑀤𑀲𑀦𑁆𑀦𑀁 𑀜𑀸𑀢𑀻𑀦𑀁. 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀸𑀢𑀺 𑀏𑀢𑁆𑀣 𑀓𑀼𑀮𑀧𑀭𑀺𑀘𑁆𑀙𑁂𑀤𑁄 𑀓𑀣𑀁 𑀕𑀳𑁂𑀢𑀩𑁆𑀩𑁄𑀢𑀺? ‘‘𑀲𑀧𑀼𑀢𑁆𑀢𑀤𑀸𑀭𑀁 𑀪𑀸𑀢𑀼 𑀓𑀼𑀝𑀼𑀫𑁆𑀩𑀁 𑀏𑀓𑀁 𑀓𑀼𑀮𑀁, 𑀏𑀯𑀁 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀯𑀸 𑀥𑀻𑀢𑀼 𑀯𑀸 𑀓𑀼𑀝𑀼𑀫𑁆𑀩𑀁 𑀏𑀓𑀁 𑀓𑀼𑀮’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀕𑀳𑁂𑀢𑀩𑁆𑀩𑀸. ‘‘𑀲𑀧𑀼𑀢𑁆𑀢𑀧𑀢𑀺𑀪𑀕𑀺𑀦𑀺𑀬𑀸 𑀓𑀼𑀝𑀼𑀫𑁆𑀩𑀁 𑀏𑀓𑀁 𑀓𑀼𑀮𑀁, 𑀢𑀣𑀸 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀯𑀸 𑀥𑀻𑀢𑀼 𑀯𑀸 𑀓𑀼𑀝𑀼𑀫𑁆𑀩𑀁 𑀏𑀓𑀁 𑀓𑀼𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀕𑀳𑁂𑀢𑀩𑁆𑀩𑀸. 𑀘𑀽𑀴𑀫𑀸𑀢𑀸𑀤𑀻𑀦𑀫𑁆𑀧𑀺 𑀓𑀼𑀮𑀧𑀭𑀫𑁆𑀧𑀭𑀸 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀯𑀤𑀦𑁆𑀢𑀺. 𑀓𑀼𑀮𑀤𑀽𑀲𑀦𑀁 𑀦 𑀭𑀽𑀳𑀢𑀻𑀢𑀺 ‘‘𑀤𑀸𑀢𑀼𑀁 𑀧𑀼𑀧𑁆𑀨𑀁 𑀧𑀦𑀜𑁆𑀜𑀲𑁆𑀲, 𑀆𑀕𑀢𑀲𑁆𑀲𑁂𑀯 𑀜𑀸𑀢𑀺𑀦𑁄’’𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁪𑁪𑁩) 𑀦𑀬𑁂𑀦 𑀓𑀣𑀺𑀢𑀯𑀺𑀥𑀺𑀦𑀸 𑀏𑀢𑁂𑀲𑀼 𑀧𑀯𑀢𑁆𑀢𑀦𑁆𑀢𑀲𑁆𑀲 𑀓𑀼𑀮𑀤𑀽𑀲𑀦𑀁 𑀦 𑀭𑀼𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁮𑁬. 𑀪𑀸𑀢𑀼𑀚𑀸𑀬𑀸𑀢𑀺 𑀅𑀢𑁆𑀢𑀦𑁄 𑀚𑁂𑀝𑁆𑀞𑀲𑁆𑀲 𑀯𑀸 𑀓𑀦𑀺𑀝𑁆𑀞𑀲𑁆𑀲 𑀯𑀸 𑀪𑀸𑀢𑀼 𑀪𑀭𑀺𑀬𑀸. 𑀪𑀕𑀺𑀦𑀺𑀲𑀸𑀫𑀺𑀓𑁄𑀢𑀺 𑀅𑀢𑁆𑀢𑀦𑁄 𑀚𑁂𑀝𑁆𑀞𑀸𑀬 𑀯𑀸 𑀓𑀦𑀺𑀝𑁆𑀞𑀸𑀬 𑀯𑀸 𑀪𑀕𑀺𑀦𑀺𑀬𑀸 𑀲𑀸𑀫𑀺𑀓𑁄.

𑁪𑁮𑁭. 𑀪𑀸𑀢𑀼𑀦𑁄𑀢𑀺 𑀚𑁂𑀝𑁆𑀞𑀲𑁆𑀲, 𑀓𑀦𑀺𑀝𑁆𑀞𑀲𑁆𑀲 𑀘 𑀪𑀸𑀢𑀼𑀦𑁄. 𑀅𑀦𑀼 𑀧𑀘𑁆𑀙𑀸 𑀚𑀸𑀢𑀸𑀢𑀺 𑀅𑀦𑀼𑀚𑀸, 𑀓𑀦𑀺𑀝𑁆𑀞𑀪𑀕𑀺𑀦𑀻. ‘‘𑀅𑀦𑀼𑀚𑀸’’𑀢𑀺 𑀉𑀧𑀮𑀓𑁆𑀔𑀡𑀦𑁆𑀢𑀺 𑀚𑁂𑀝𑁆𑀞𑀸𑀬𑀧𑀺 𑀲𑀗𑁆𑀕𑀳𑁄. 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀽𑀦𑀁 𑀪𑀭𑀺𑀬𑀸 𑀘 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀕𑀺𑀦𑀻𑀦𑀁 𑀲𑀸𑀫𑀺𑀓𑀸 𑀘 𑀲𑀘𑁂 𑀅𑀜𑁆𑀜𑀸𑀢𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀤𑁂𑀣𑀸𑀢𑀺 𑀏𑀢𑁆𑀣 ‘‘𑀇𑀫𑀁 𑀪𑁂𑀲𑀚𑁆𑀚’’𑀦𑁆𑀢𑀺 𑀧𑀸𑀞𑀲𑁂𑀲𑁄.

𑁪𑁮𑁮. 𑀢𑁂𑀲𑀫𑁆𑀧𑀺 ¶ 𑀪𑀸𑀢𑀼𑀪𑀕𑀺𑀦𑀻𑀦𑀁. ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀥𑀻𑀢𑀽𑀦𑀫𑁆𑀧𑀺 𑀲𑀗𑁆𑀕𑀳𑁄. 𑀓𑀢𑁆𑀯𑀸𑀢𑀺 𑀯𑀢𑁆𑀯𑀸. 𑀢𑀼𑀫𑁆𑀳𑀸𑀓𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀣𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀇𑀫𑀁 𑀪𑁂𑀲𑀚𑁆𑀚’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀫𑀸𑀢𑀸𑀧𑀺𑀢𑀽𑀦𑀦𑁆𑀢𑀺 𑀉𑀪𑀬𑀲𑀗𑁆𑀕𑀸𑀳𑀓𑀯𑀘𑀦𑀢𑁄 ‘‘𑀢𑀼𑀬𑁆𑀳𑀁 𑀫𑀸𑀢𑀼 𑀯𑀸, 𑀢𑀼𑀬𑁆𑀳𑀁 𑀧𑀺𑀢𑀼 𑀯𑀸’’𑀢𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀲𑀼𑀁 𑀯𑀺𑀲𑀼𑀜𑁆𑀘 𑀯𑀢𑁆𑀢𑀩𑁆𑀩𑀁. 𑀢𑁂𑀲𑀦𑁆𑀢𑀺 𑀘 𑀢𑀼𑀫𑁆𑀳𑀸𑀓𑀦𑁆𑀢𑀺 𑀘 𑀲𑀸𑀫𑀺𑀯𑀘𑀦𑀁. 𑀧𑀼𑀢𑁆𑀢𑀸𑀦𑀦𑁆𑀢𑀺 𑀘 𑀫𑀸𑀢𑀸𑀧𑀺𑀢𑀽𑀦𑀦𑁆𑀢𑀺 𑀘 𑀲𑀫𑁆𑀧𑀤𑀸𑀦𑀯𑀘𑀦𑀁.

𑁪𑁮𑁯. 𑀪𑁂𑀲𑀚𑁆𑀚𑀓𑀭𑀡𑀸𑀭𑀳𑀸𑀦𑀁 ¶ 𑀯𑀢𑁆𑀢𑀩𑁆𑀩𑀢𑀸𑀬 ‘‘𑀅𑀓𑀮𑁆𑀮𑀓𑁄’’𑀢𑀺 𑀇𑀤𑀁 𑀇𑀲𑁆𑀲𑀭𑀸𑀤𑀺𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀓𑀮𑁆𑀮𑀓𑁄𑀢𑀺 𑀆𑀢𑀼𑀭𑁄. 𑀓𑀮𑁆𑀮𑀁 𑀯𑀼𑀘𑁆𑀘𑀢𑀺 𑀲𑀼𑀔𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀮𑁆𑀮𑀓𑁄, 𑀦 𑀓𑀮𑁆𑀮𑀓𑁄 𑀅𑀓𑀮𑁆𑀮𑀓𑁄. 𑀜𑀸𑀢𑀺𑀚𑀦𑀼𑀚𑁆𑀛𑀺𑀢𑁄 𑀯𑀸𑀢𑀺 𑀜𑀸𑀢𑀺𑀚𑀦𑁂𑀦 𑀧𑀭𑀺𑀘𑁆𑀘𑀢𑁆𑀢𑁄 𑀯𑀸.

𑁪𑁯𑁦. 𑀏𑀢𑁂𑀲𑀁 𑀲𑀩𑁆𑀩𑁂𑀲𑀦𑁆𑀢𑀺 𑀇𑀲𑁆𑀲𑀭𑀸𑀤𑀺𑀆𑀢𑀼𑀭𑀸𑀦𑀁 𑀲𑀩𑁆𑀩𑁂𑀲𑀫𑁂𑀢𑁂𑀲𑀁 𑀚𑀦𑀸𑀦𑀁. ‘‘𑀲𑀸𑀥𑀼𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀧𑀘𑁆𑀘𑀸𑀲𑀻𑀲𑀢𑀸 𑀲𑀢𑀸𑀢𑀺 𑀏𑀢𑁆𑀣 𑀲𑀢𑀸𑀢𑀺 𑀓𑀺𑀭𑀺𑀬𑀸𑀧𑀤𑀁. ‘‘𑀇𑀫𑀲𑁆𑀫𑀺𑀁 𑀓𑀢𑁂 𑀇𑀫𑁂 𑀫𑀬𑁆𑀳𑀁 𑀏𑀯𑀭𑀽𑀧𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀘𑁆𑀘𑀸𑀲𑀻𑀲𑀦𑀁 𑀅𑀓𑀭𑁄𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀢𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄, 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀤𑀼𑀯𑀺𑀥𑁄 𑀧𑀝𑀺𑀲𑀦𑁆𑀣𑀸𑀭𑁄. 𑀏𑀢𑁆𑀣 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀕𑀬𑁆𑀳𑀢𑀺. 𑀪𑁂𑀲𑀚𑁆𑀚𑀁 𑀆𑀫𑀺𑀲𑁂𑀦𑀧𑀺 𑀳𑁄𑀢𑀻𑀢𑀺 𑀥𑀫𑁆𑀫𑀓𑀣𑀸𑀬 𑀲𑀗𑁆𑀕𑀳𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀧𑀝𑀺𑀲𑀦𑁆𑀣𑀭𑀡𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀧𑀝𑀺𑀮𑀤𑁆𑀥𑀸𑀫𑀺𑀲𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀘 𑀢𑁂𑀲𑀼 𑀘 𑀅𑀢𑁆𑀢𑀦𑀺 𑀘 𑀧𑀢𑀺𑀭𑀽𑀧𑁂𑀦𑀸𑀓𑀸𑀭𑁂𑀦 𑀲𑀫𑀁 𑀅𑀢𑁆𑀣𑀭𑀡𑀁 𑀧𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀭𑁄 𑀦𑀬𑁄 𑁋 𑀆𑀫𑀺𑀲𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀘 𑀅𑀮𑀸𑀪𑁂𑀦 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀫𑁆𑀪𑀯𑀦𑁆𑀢𑀲𑁆𑀲 𑀙𑀺𑀤𑁆𑀤𑀲𑁆𑀲 𑀯𑀺𑀯𑀭𑀲𑁆𑀲 𑀪𑁂𑀤𑀲𑁆𑀲 𑀧𑀝𑀺𑀲𑀦𑁆𑀣𑀭𑀡𑀁 𑀧𑀺𑀤𑀳𑀦𑀁 𑀲𑀗𑁆𑀕𑀳𑀡𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀅𑀬𑀜𑁆𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀮𑀩𑁆𑀪𑀫𑀸𑀦𑁂𑀦 𑀆𑀫𑀺𑀲𑁂𑀦 𑀘 𑀥𑀫𑁆𑀫𑁂𑀦 ¶ 𑀘𑀸𑀢𑀺 𑀤𑁆𑀯𑀻𑀳𑀺 𑀙𑀺𑀤𑁆𑀤𑁄, 𑀢𑀲𑁆𑀲 𑀢𑀁 𑀙𑀺𑀤𑁆𑀤𑀁 𑀬𑀣𑀸 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀻𑀞𑀲𑁆𑀲 𑀯𑀺𑀬 𑀧𑀘𑁆𑀘𑀢𑁆𑀣𑀭𑀡𑁂𑀦 𑀆𑀫𑀺𑀲𑁂𑀦, 𑀥𑀫𑁆𑀫𑁂𑀦 𑀘 𑀧𑀝𑀺𑀲𑀦𑁆𑀣𑀭𑀡𑀁 ‘‘𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄, 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀸𑀥𑀼𑀦𑀸𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀅𑀭𑀺𑀬𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀼𑀓𑀸𑀫𑁂𑀦 𑀅𑀭𑀺𑀬𑀸𑀘𑀸𑀭𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀥𑀼𑀦𑀸’’𑀢𑀺 𑀇𑀤𑀁 𑀇𑀫𑀺𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀓𑀸𑀮𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀬𑀧𑀺 𑀧𑀸𑀧𑀚𑀦𑀓𑀡𑁆𑀳𑀓𑀲𑀁𑀕𑀸𑀫𑁂 𑀇𑀫𑀲𑁆𑀫𑀺𑀁 𑀯𑀺𑀧𑀦𑁆𑀦𑀓𑀸𑀮𑁂 𑀯𑀺𑀲𑁂𑀲𑁂𑀦 𑀅𑀧𑁆𑀧𑀫𑀢𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁.

𑁪𑁯𑁧-𑁨. 𑀓𑁂𑀦𑀘𑀻𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 𑀉𑀧𑀸𑀲𑀓𑁂𑀦 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸𑀢𑀺 𑀅𑀢𑁆𑀣𑁄. 𑀳𑀢𑁆𑀣𑁂𑀦𑀸𑀢𑀺 𑀳𑀢𑁆𑀣𑀸𑀯𑀬𑀯𑀸 𑀅𑀗𑁆𑀕𑀼𑀮𑀺𑀬𑁄 𑀯𑀼𑀢𑁆𑀢𑀸 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀲𑁆𑀲 𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂 𑀧𑀯𑀢𑁆𑀢𑀦𑀢𑁄. 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀧𑀭𑀺𑀢𑁆𑀢’’𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀓𑀭𑁄𑀢𑀺𑀲𑁆𑀲 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑁂 𑀯𑀢𑁆𑀢𑀦𑀢𑁄 𑀪𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀫𑁂𑀯 𑀘 𑀲𑀦𑁆𑀢𑀓𑀦𑁆𑀢𑀺 𑀧𑀭𑀺𑀢𑁆𑀢𑀁 𑀪𑀡𑀸𑀧𑁂𑀦𑁆𑀢𑀸𑀦𑀫𑁂𑀯 𑀲𑀦𑁆𑀢𑀓𑀁 𑀲𑀼𑀢𑁆𑀢𑁄𑀤𑀓𑀁. 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀢𑁆𑀢𑀦𑁄 𑀲𑀼𑀢𑁆𑀢𑁄𑀤𑀓𑀁 𑀆𑀳𑀭𑀺𑀢𑁆𑀯𑀸 𑀧𑀼𑀜𑁆𑀜𑀢𑁆𑀣𑀸𑀬 𑀇𑀤𑀁 𑀳𑀢𑁆𑀣𑁂𑀦 𑀘𑀸𑀮𑁂𑀢𑁆𑀯𑀸, 𑀆𑀫𑀲𑀺𑀢𑁆𑀯𑀸 𑀯𑀸 𑀧𑀭𑀺𑀢𑁆𑀢𑀁 𑀪𑀡𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑁂𑀦𑀘𑀺 𑀧𑀭𑀺𑀢𑁆𑀢𑁄𑀤𑀓𑀁 𑀲𑀼𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀓𑁂𑀦𑀘𑀺 ‘‘𑀧𑀭𑀺𑀢𑁆𑀢𑁄𑀤𑀓𑀲𑀼𑀢𑁆𑀢𑀸𑀦𑀺 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ¶ 𑀪𑀺𑀓𑁆𑀔𑀼𑀦𑀸 𑀢𑁂𑀲𑀫𑁂𑀯 𑀲𑀦𑁆𑀢𑀓𑀁 𑀚𑀮𑀁 𑀳𑀢𑁆𑀣𑁂𑀦 𑀘𑀸𑀮𑁂𑀢𑁆𑀯𑀸 𑀲𑀼𑀢𑁆𑀢𑀓𑀁 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁪𑁯𑁩. 𑀅𑀦𑀸𑀫𑀝𑁆𑀞𑁄𑀧𑀻𑀢𑀺 𑀳𑀢𑁆𑀣𑁂𑀦 𑀅𑀦𑀸𑀫𑀲𑀺𑀢𑁄𑀧𑀺, 𑀅𑀧𑀩𑁆𑀩𑀚𑀺𑀢𑀲𑁆𑀲 𑀳𑀢𑁆𑀣𑀢𑁄 𑀮𑀤𑁆𑀥𑀸 𑀅𑀢𑁆𑀢𑀦𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 𑀅𑀕𑀳𑀺𑀢𑀕𑁆𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁯𑁪. 𑀘𑁄𑀭𑀤𑀸𑀫𑀭𑀺𑀓𑀲𑁆𑀲 𑀘𑀸𑀢𑀺 𑀕𑀸𑀫𑀯𑀺𑀮𑁄𑀧𑀓𑀲𑁆𑀲 𑀘𑁄𑀭𑀲𑁆𑀲 𑀘.

𑁪𑁯𑁫. 𑀧𑀡𑁆𑀟𑀼𑀧𑀮𑀸𑀲𑀲𑁆𑀲𑀸𑀢𑀺 ¶ 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲 𑀪𑀡𑁆𑀟𑀼𑀓𑀲𑁆𑀲, 𑀧𑀡𑁆𑀟𑀼𑀯𑀡𑁆𑀡𑁄 𑀧𑀮𑀸𑀲𑁄 𑀧𑀡𑁆𑀟𑀼𑀧𑀮𑀸𑀲𑁄, 𑀲𑁄 𑀯𑀺𑀬𑀸𑀢𑀺 𑀧𑀡𑁆𑀟𑀼𑀧𑀮𑀸𑀲𑁄, 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑁄 ‘‘𑀲𑀻𑀳𑁄𑀬𑀁 𑀫𑀸𑀡𑀯𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀣𑀸 𑀧𑀡𑁆𑀟𑀼𑀧𑀮𑀸𑀲𑁄 𑀭𑀼𑀓𑁆𑀔𑀸 𑀧𑀢𑀦𑀸𑀪𑀺𑀫𑀼𑀔𑁄 𑀢𑀺𑀝𑁆𑀞𑀢𑀺 𑀦𑀺𑀬𑀢𑀧𑀸𑀢𑁄, 𑀏𑀯𑀫𑀬𑀫𑁆𑀧𑀺 𑀕𑀺𑀳𑀺𑀮𑀺𑀗𑁆𑀕𑀢𑁄 𑀅𑀧𑀕𑀫𑀸𑀪𑀺𑀫𑀼𑀔𑁄 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂 𑀦𑀺𑀬𑀢𑁄𑀯 𑀢𑀺𑀝𑁆𑀞𑀢𑀻𑀢𑀺 ‘‘𑀧𑀡𑁆𑀟𑀼𑀧𑀮𑀸𑀲𑀲𑀤𑀺𑀲𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀣𑀸𑀮𑀓𑁂𑀧𑀺 𑀘𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀣𑀸𑀮𑀓𑁂𑀧𑀺. 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀧𑀢𑁆𑀢𑁄𑀧𑀺 𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀞𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀧𑀺𑀡𑁆𑀟𑀧𑀸𑀢’’𑀦𑁆𑀢𑀺 𑀉𑀧𑀬𑁄𑀕𑀯𑀲𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀢𑀁 𑀧𑀦𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀣𑀸𑀮𑀓𑁂 𑀞𑀧𑁂𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀧𑀺𑀡𑁆𑀟𑀧𑀸𑀢𑀁. ‘‘𑀫𑀸𑀢𑀸𑀧𑀺𑀢𑀽𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀏𑀢𑁆𑀣 ‘‘𑀧𑀺𑀢𑀼𑀦𑁄’’𑀢𑀺 𑀉𑀧𑀮𑀓𑁆𑀔𑀡𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀏𑀓𑀲𑁂𑀲𑁄 𑀇𑀘𑁆𑀙𑀺𑀢𑁄, ‘‘𑀧𑀺𑀢𑀽𑀦𑀫𑁆𑀧𑀻’’𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺.

𑁪𑁯𑁬. 𑀚𑀗𑁆𑀖𑀧𑁂𑀲𑀦𑀺𑀬𑀦𑁆𑀢𑀺 𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀲𑀸𑀲𑀦𑀳𑀭𑀡𑀓𑀫𑁆𑀫𑀁 ‘‘𑀚𑀗𑁆𑀖𑀧𑁂𑀲𑀦𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺 𑀘𑀸𑀢𑀺 𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑁄.

𑁪𑁯𑁭. 𑀏𑀢𑁆𑀢𑀸𑀯𑀢𑀸 𑀲𑀸𑀫𑀜𑁆𑀜𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀯𑀸𑀤𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀡𑁆𑀟𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀲𑀦𑀦𑁆𑀢𑀺 𑀲𑀦𑁆𑀤𑁂𑀲𑀁. 𑀳𑀭𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑁂𑀢𑀼𑀁.

𑁪𑁯𑁮. 𑀅𑀝𑁆𑀞𑀯𑀺𑀥𑁂𑀦𑀧𑀻𑀢𑀺 𑀧𑀼𑀧𑁆𑀨𑀤𑀸𑀦𑀸𑀤𑀺𑀚𑀗𑁆𑀖𑀧𑁂𑀲𑀦𑀺𑀬𑀸𑀯𑀲𑀸𑀦𑁂𑀦 𑀅𑀝𑁆𑀞𑀧𑁆𑀧𑀓𑀸𑀭𑁂𑀦𑀧𑀺. 𑀓𑀼𑀮𑀤𑀽𑀲𑀦𑀓𑀫𑁆𑀫𑁂𑀦𑀸𑀢𑀺 𑀓𑀼𑀮𑀸𑀦𑀁 𑀲𑀤𑁆𑀥𑀸𑀯𑀺𑀦𑀸𑀲𑀓𑁂𑀦 𑀅𑀦𑀸𑀘𑀸𑀭𑀓𑀫𑁆𑀫𑁂𑀦. 𑀮𑀤𑁆𑀥𑀦𑁆𑀢𑀺 𑀏𑀢𑁆𑀣 ‘‘𑀪𑁄𑀚𑀦’’𑀦𑁆𑀢𑀺 𑀇𑀤𑀁 ‘‘𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀘 ‘‘𑀅𑀚𑁆𑀛𑁄𑀳𑀸𑀭𑁂𑀲𑀽’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸, ‘‘𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ¶ 𑀘 𑀮𑀩𑁆𑀪𑀢𑀺. 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀏𑀓𑁂𑀦𑀸𑀧𑀺 𑀓𑀼𑀮𑀤𑀽𑀲𑀦𑁂𑀦 𑀓𑀫𑁆𑀫𑁂𑀦 𑀉𑀧𑁆𑀧𑀸𑀤𑀺𑀢𑀧𑀘𑁆𑀘𑀬𑁄 ¶ 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 ‘‘𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀻𑀦𑀁 𑀦 𑀘 𑀯𑀝𑁆𑀝𑀢𑀻’’𑀢𑀺 𑀲𑀩𑁆𑀩𑀧𑀝𑀺𑀲𑁂𑀥𑁄 𑀓𑀢𑁄.

𑁪𑁯𑁯. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀅𑀚𑁆𑀛𑁄𑀳𑀸𑀭𑁂𑀲𑀽’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁, 𑀲𑀩𑁆𑀩𑁂𑀲𑀽𑀢𑀺 𑀅𑀢𑁆𑀣𑁄. ‘‘𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀚𑁆𑀛𑁄𑀳𑀸𑀭𑁂𑀲𑀽’’𑀢𑀺 𑀇𑀤𑀁 𑀧𑀭𑀕𑀮𑀁 𑀓𑀸𑀢𑀩𑁆𑀩𑀁 𑀆𑀫𑀺𑀲𑀁 𑀲𑀦𑁆𑀥𑀸𑀬𑀸𑀳. 𑀲𑁂𑀲𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀧𑀭𑀺𑀪𑁄𑀕𑀯𑀲𑁂𑀦𑁂𑀯 ‘‘𑀲𑁂𑀲𑁂𑀲𑀽’’𑀢𑀺 𑀆𑀳, 𑀅𑀦𑀚𑁆𑀛𑁄𑀳𑀭𑀡𑀻𑀬𑁂𑀲𑀼 𑀲𑁂𑀲𑀧𑀘𑁆𑀘𑀬𑁂𑀲𑀽𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀘𑀻𑀯𑀭𑀧𑀘𑁆𑀘𑀬𑁂 𑀲𑀭𑀻𑀭𑀢𑁄 𑀫𑁄𑀘𑁂𑀢𑁆𑀯𑀸 𑀧𑀭𑀺𑀪𑁄𑀕𑀕𑀡𑀦𑀸𑀬, 𑀲𑁂𑀦𑀸𑀲𑀦𑀧𑀘𑁆𑀘𑀬𑁂 𑀦𑀺𑀩𑁆𑀩𑀓𑁄𑀲𑁂 𑀉𑀤𑀓𑀧𑀢𑀦𑀝𑁆𑀞𑀸𑀦𑀢𑁄 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀝𑁆𑀞𑀯𑀸𑀭𑀕𑀡𑀦𑀸𑀬, 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑁂 𑀦𑀺𑀲𑀻𑀤𑀦𑀲𑀬𑀦𑀸𑀤𑀺𑀧𑀭𑀺𑀪𑁄𑀕𑀕𑀡𑀦𑀸𑀬, 𑀅𑀦𑀚𑁆𑀛𑁄𑀳𑀭𑀺𑀢𑁆𑀯𑀸 𑀅𑀩𑁆𑀪𑀜𑁆𑀚𑀦𑀸𑀮𑁂𑀧𑀦𑀸𑀤𑀺𑀯𑀲𑁂𑀦 𑀓𑀸𑀢𑀩𑁆𑀩𑀪𑁂𑀲𑀚𑁆𑀚𑁂 𑀲𑀭𑀻𑀭𑀢𑁄 𑀫𑁄𑀘𑁂𑀢𑁆𑀯𑀸 𑀯𑀸𑀭𑀕𑀡𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀦𑀬𑁄𑀢𑀺 ‘‘𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁄 𑀦𑀬𑁄.

𑁫𑁦𑁦. ‘‘𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸’’𑀢𑀺 𑀇𑀤𑀁 ‘‘𑀅𑀪𑀽𑀢𑀸𑀭𑁄𑀘𑀦𑁂𑀦𑀸’’𑀢𑀺 𑀇𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀓𑀢𑁆𑀯𑀸 𑀭𑀽𑀧𑀺𑀬𑀯𑁄𑀳𑀸𑀭’’𑀦𑁆𑀢𑀺 𑀇𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀉𑀧𑁆𑀧𑀸𑀤𑀺𑀢𑀧𑀘𑁆𑀘𑀬𑀸’’𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀭𑀽𑀧𑀺𑀬𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄 𑀦𑀺𑀲𑁆𑀲𑀕𑁆𑀕𑀺𑀬𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀪𑀽𑀢𑀸𑀭𑁄𑀘𑀦𑀯𑀺𑀦𑀺𑀘𑁆𑀙𑀬𑁄 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀯𑀼𑀢𑁆𑀢𑁄. 𑀲𑀫𑀸𑀦𑀸𑀢𑀺 𑀧𑀓𑀸𑀲𑀺𑀢𑀸𑀢𑀺 𑀓𑀼𑀮𑀤𑀽𑀲𑀦𑀓𑀫𑁆𑀫𑁂𑀦 𑀉𑀧𑁆𑀧𑀸𑀤𑀺𑀢𑀧𑀘𑁆𑀘𑀬𑁂𑀳𑀺 𑀲𑀤𑀺𑀲𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀢𑀢𑁆𑀣𑀸𑀧𑀺 𑀯𑀺𑀦𑀺𑀘𑁆𑀙𑀬𑁄 𑀏𑀢𑁆𑀢𑀓𑁄𑀬𑁂𑀯𑀸𑀢𑀺 𑀅𑀢𑀺𑀤𑀺𑀲𑀢𑀺.

𑁫𑁦𑁧. ‘‘𑀲𑀁𑀲𑀸𑀭𑀯𑀸𑀲𑁄 𑀤𑀼𑀓𑁆𑀔’’𑀦𑁆𑀢𑀺 𑀜𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁂 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀲𑀦𑁆𑀥𑀸𑀬 𑀲𑀸𑀲𑀦𑀸𑀯𑀢𑀺𑀡𑁆𑀡𑁂𑀦 𑀲𑀺𑀓𑁆𑀔𑀸𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀲𑁂𑀯𑀺𑀢𑀓𑁆𑀔𑀡𑁂𑀬𑁂𑀯 𑀚𑀻𑀯𑀺𑀢𑀳𑀭𑀡𑀲𑀫𑀢𑁆𑀣𑀯𑀺𑀲𑀫𑀺𑀲𑁆𑀲𑀧𑀽𑀢𑀺𑀫𑀼𑀢𑁆𑀢𑀁 ¶ 𑀯𑀺𑀬 𑀯𑀚𑁆𑀚𑀦𑀻𑀬𑀁 𑀅𑀓𑀧𑁆𑀧𑀺𑀬𑀧𑀘𑁆𑀘𑀬𑀁 𑀉𑀧𑁆𑀧𑀸𑀤𑁂𑀢𑀼𑀁 𑀓𑀭𑀺𑀬𑀫𑀸𑀦𑀁 𑀅𑀓𑀧𑁆𑀧𑀺𑀬𑁄𑀧𑀸𑀬𑀧𑁆𑀧𑀓𑀸𑀭𑀁 𑀏𑀓𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀜𑁆𑀜𑀢𑁆𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀢𑁆𑀢𑀺 𑀬𑀸𑀘𑀦𑀸. 𑀅𑀦𑀼𑀧𑁆𑀧𑀤𑀸𑀦𑀦𑁆𑀢𑀺 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀤𑀸𑀦𑀁. 𑀯𑁂𑀚𑁆𑀚𑀓𑀫𑁆𑀫𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀦𑁂𑀲𑀦𑀁 𑀦𑀸𑀫 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀦𑀦𑀼𑀭𑀽𑀧𑁂𑀦 𑀧𑀬𑁄𑀕𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁.

𑀧𑀸𑀭𑀺𑀪𑀝𑁆𑀬𑀢𑀸 𑀦𑀸𑀫 𑀇𑀲𑁆𑀲𑀭𑁂 𑀲𑁂𑀯𑀺𑀢𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀭𑀼𑀘𑀺𑀢𑀁 𑀯𑀺𑀮𑀧𑀦𑁆𑀢𑀸𑀦𑀁 𑀧𑀭𑀺𑀪𑀝𑀸𑀦𑀁 𑀲𑁂𑀯𑀓𑀚𑀦𑀸𑀦𑀁 𑀯𑀺𑀬 𑀮𑀸𑀪𑀢𑁆𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀬𑀤𑀸𑀬𑀓𑁂𑀲𑀼 𑀧𑀯𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺 𑀲𑀫𑀦𑁆𑀢𑀢𑁄 𑀪𑀝𑀢𑀺 𑀲𑁂𑀯𑀢𑀻𑀢𑀺 𑀧𑀭𑀺𑀪𑀝𑁄, 𑀇𑀲𑁆𑀲𑀭𑀚𑀦𑀸𑀦𑀁 𑀲𑀫𑀻𑀧𑀸𑀯𑀘𑀭𑁄 𑀲𑁂𑀯𑀓𑀚𑀦𑁄, 𑀧𑀭𑀺𑀪𑀝𑁄 𑀯𑀺𑀬𑀸𑀢𑀺 ¶ 𑀧𑀭𑀺𑀪𑀝𑁄, 𑀪𑀺𑀓𑁆𑀔𑀼, 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑁆𑀬𑀢𑀸. 𑀅𑀣 𑀯𑀸 𑀧𑀭𑀺𑀪𑀝𑀢𑀺 𑀥𑀸𑀢𑀺 𑀯𑀺𑀬 𑀓𑀼𑀮𑀤𑀸𑀭𑀓𑁂 𑀅𑀗𑁆𑀓𑁂 𑀓𑀭𑀡𑀸𑀤𑀺𑀯𑀲𑁂𑀦 𑀥𑀸𑀭𑁂𑀢𑀻𑀢𑀺 𑀧𑀭𑀺𑀪𑀝𑁄, 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑁆𑀬𑀢𑀸𑀢𑀺 𑀮𑀸𑀪𑀸𑀲𑀸𑀬 𑀪𑀺𑀓𑁆𑀔𑀼𑀦𑁄 𑀓𑀼𑀮𑀤𑀸𑀭𑀓𑁂𑀲𑀼 𑀅𑀦𑀦𑀼𑀮𑁄𑀫𑀺𑀓𑀸 𑀧𑀯𑀢𑁆𑀢𑀺 𑀯𑀼𑀘𑁆𑀘𑀢𑀺.

𑀫𑀼𑀕𑁆𑀕𑀲𑀽𑀧𑀢𑀸 𑀦𑀸𑀫 𑀧𑀓𑁆𑀓𑀫𑀼𑀕𑁆𑀕𑀸 𑀯𑀺𑀬 𑀧𑀓𑁆𑀓𑀸𑀧𑀓𑁆𑀓𑀩𑀻𑀚𑀫𑀺𑀲𑁆𑀲𑀸 𑀮𑀸𑀪𑀸𑀲𑀸𑀬 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀸𑀬 𑀲𑀘𑁆𑀘𑀸𑀮𑀻𑀓𑀫𑀺𑀲𑁆𑀲𑀓𑀢𑀸. 𑀬𑀣𑀸 𑀫𑀼𑀕𑁆𑀕𑁂𑀲𑀼 𑀧𑀘𑁆𑀘𑀫𑀸𑀦𑁂𑀲𑀼 𑀓𑁄𑀘𑀺𑀤𑁂𑀯 𑀦 𑀧𑀘𑁆𑀘𑀢𑀺, 𑀩𑀳𑀯𑁄 𑀧𑀘𑁆𑀘𑀦𑁆𑀢𑀺, 𑀏𑀯𑀫𑁂𑀯 𑀬𑀲𑁆𑀲 𑀤𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀲𑁆𑀲 𑀓𑀺𑀜𑁆𑀘𑀺𑀤𑁂𑀯 𑀲𑀘𑁆𑀘𑀁 𑀳𑁄𑀢𑀺, 𑀅𑀲𑀘𑁆𑀘𑀫𑁂𑀯 𑀩𑀳𑀼𑀓𑀁 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀼𑀕𑁆𑀕𑀲𑀽𑀧𑀲𑀤𑀺𑀲𑀢𑁆𑀢𑀸 ‘‘𑀫𑀼𑀕𑁆𑀕𑀲𑀽𑀧𑁄’’𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀫𑀼𑀕𑁆𑀕𑀲𑀽𑀧𑀁, 𑀢𑀲𑁆𑀲 𑀪𑀸𑀯𑁄 𑀫𑀼𑀕𑁆𑀕𑀲𑀽𑀧𑀢𑀸. 𑀯𑀢𑁆𑀣𑀼𑀯𑀺𑀚𑁆𑀚𑀓𑀁 𑀦𑀸𑀫 𑀓𑀽𑀧𑀯𑀢𑁆𑀣𑀼𑀕𑁂𑀳𑀯𑀢𑁆𑀣𑀼𑀆𑀤𑀻𑀦𑀁 𑀆𑀘𑀺𑀓𑁆𑀔𑀦𑀁. 𑀯𑀢𑁆𑀣𑀼𑀯𑀺𑀚𑁆𑀚𑀸𑀬𑀓𑀸𑀦𑀁 𑀓𑀢𑀁 𑀯𑀢𑁆𑀣𑀼𑀯𑀺𑀚𑁆𑀚𑀓𑀁.

𑁫𑁦𑁨. 𑀚𑀗𑁆𑀖𑀧𑁂𑀲𑀦𑀺𑀬𑀁, 𑀤𑀽𑀢𑀓𑀫𑁆𑀫𑀜𑁆𑀘 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀼𑀮𑀤𑀽𑀲𑀦𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁. 𑀅𑀪𑀽𑀢𑀸𑀭𑁄𑀘𑀦𑀜𑁆𑀘 𑀯𑀼𑀢𑁆𑀢𑀦𑀬𑀫𑁂𑀯. 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀦𑁆𑀢𑀺 ¶ 𑀩𑀼𑀤𑁆𑀥𑁂𑀳𑀺 𑀧𑀝𑀺𑀓𑁆𑀓𑁄𑀲𑀺𑀢𑀁 𑀕𑀭𑀳𑀺𑀢𑀁 𑀬𑀣𑀸𑀯𑀼𑀢𑁆𑀢𑀁 𑀫𑀺𑀘𑁆𑀙𑀸𑀚𑀻𑀯𑀜𑁆𑀘 𑀅𑀯𑀼𑀢𑁆𑀢𑀜𑁆𑀘 𑀅𑀗𑁆𑀕𑀯𑀺𑀚𑁆𑀚𑀸𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀉𑀓𑁆𑀓𑀸𑀧𑀸𑀢𑀤𑀺𑀲𑀸𑀟𑀸𑀳𑀪𑀽𑀫𑀺𑀘𑀸𑀮𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀚𑀻𑀯𑀦𑀽𑀧𑀸𑀬𑀁 𑀲𑀩𑁆𑀩𑀁. 𑀯𑀺𑀯𑀚𑁆𑀚𑀬𑁂𑀢𑀺 𑀯𑀺𑀲𑀫𑀺𑀯, 𑀕𑀽𑀣𑀫𑀼𑀢𑁆𑀢𑀁 𑀯𑀺𑀬 𑀘 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀺𑀓𑁆𑀔𑀸𑀓𑀸𑀫𑁄 𑀓𑀼𑀮𑀧𑀼𑀢𑁆𑀢𑁄’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑁫𑁦𑁩. 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄𑀧𑀺 𑀢𑀦𑁆𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀢𑁄 𑀧𑀼𑀩𑁆𑀩𑁂 𑀯𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀲𑀼 𑀓𑀫𑁆𑀫𑀯𑀸𑀘𑀸𑀲𑀼 𑀅𑀦𑁆𑀢𑀓𑀫𑁆𑀫𑀯𑀸𑀘𑀸𑀬 𑀬𑁆𑀬-𑀓𑀸𑀭𑀁 𑀅𑀧𑁆𑀧𑀢𑁆𑀢𑀸𑀬 𑀯𑀸 𑀓𑀼𑀮𑀤𑀽𑀲𑀦𑀓𑀫𑁆𑀫𑀁 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀖𑀪𑁂𑀤𑀲𑀫𑀦𑁆𑀢𑀺 𑀧𑀞𑀫𑀲𑀗𑁆𑀖𑀪𑁂𑀤𑁂𑀦 𑀲𑀫𑀦𑁆𑀢𑀺.

𑀓𑀼𑀮𑀤𑀽𑀲𑀦𑀓𑀣𑀸𑀯𑀡𑁆𑀡𑀦𑀸.

𑁫𑁦𑁪. ‘‘𑀚𑀸𑀦’’𑀦𑁆𑀢𑀺 𑀇𑀫𑀲𑁆𑀲 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑀸 𑀚𑀸𑀦𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀬𑀸 𑀮𑀺𑀔𑀺𑀢𑁂 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀧𑀦 𑀏𑀯𑀭𑀽𑀧𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑁆𑀫𑀻𑀢𑀺 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑀸𑀯𑀢𑀻𑀳𑀦𑁆𑀢𑀺 𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀺, ‘‘𑀙𑀸𑀤𑀺𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀙𑀸𑀤𑀦𑀓𑀺𑀭𑀺𑀬𑀸𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀙𑀸𑀤𑀺𑀢𑀸𑀢𑀺 ‘‘𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀦𑀸𑀭𑁄𑀘𑀦𑀤𑀺𑀯𑀲𑁂𑀦 ¶ 𑀧𑀝𑀺𑀘𑁆𑀙𑀸𑀤𑀺𑀢𑀸. 𑀆𑀧𑀢𑁆𑀢𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺. 𑀅𑀓𑀸𑀫𑀸𑀢𑀺 𑀅𑀭𑀼𑀘𑀺𑀬𑀸𑀯 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀓𑀢𑀧𑀝𑀺𑀓𑀫𑁆𑀫𑀲𑁆𑀲 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀧𑀭𑀺𑀯𑀸𑀲𑀁 𑀲𑀫𑀸𑀤𑀸𑀬 𑀯𑀢𑁆𑀣𑀩𑁆𑀩𑀁. 𑀓𑀺𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀆𑀳 ‘‘𑀢𑀸𑀯𑀢𑀻𑀳’’𑀦𑁆𑀢𑀺, 𑀢𑀢𑁆𑀢𑀓𑀸𑀦𑀺 𑀅𑀳𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀧𑀚𑁆𑀚𑀺𑀢𑁆𑀯𑀸 𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀺 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀢𑁆𑀢𑀓𑀸𑀦𑁂𑀯 𑀅𑀳𑀸𑀦𑀻𑀢𑀺 𑀅𑀢𑁆𑀣𑁄.

𑁫𑁦𑁫-𑁬. 𑀆𑀧𑀢𑁆𑀢𑀺 𑀓𑀺𑀢𑁆𑀢𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀆𑀧𑀢𑁆𑀢𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀆𑀧𑀢𑁆𑀢𑀺 𑀘𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀘. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀘𑀸𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀦 𑀲𑀬𑀁 𑀅𑀦𑀺𑀲𑁆𑀲𑀸𑀭𑀺𑀢𑁄 ¶ 𑀘. 𑀧𑀳𑀽 𑀘𑀸𑀢𑀺 𑀲𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀼𑀁 𑀧𑀳𑁄𑀢𑀺 𑀘. 𑀅𑀦𑀦𑁆𑀢𑀭𑀸𑀬𑀺𑀓𑁄 𑀘𑀸𑀢𑀺 𑀕𑀫𑀦𑀯𑀺𑀩𑀦𑁆𑀥𑀓𑁂𑀦 𑀭𑀸𑀚𑀘𑁄𑀭𑀸𑀤𑀺𑀅𑀦𑁆𑀢𑀭𑀸𑀬𑁂𑀦 𑀯𑀺𑀭𑀳𑀺𑀢𑁄 𑀘. 𑀘𑀢𑀼𑀲𑁆𑀯 𑀧𑀻𑀢𑀺 𑀏𑀢𑁆𑀣 ‘‘𑀏𑀢𑁂𑀲𑀽’’𑀢𑀺 𑀲𑁂𑀲𑁄, 𑀏𑀢𑁂𑀲𑀼 𑀘𑀢𑀽𑀲𑀽𑀢𑀺 𑀅𑀢𑁆𑀣𑁄. 𑀢𑀁𑀲𑀜𑁆𑀜𑀻𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻 𑀅𑀦𑀼𑀓𑁆𑀔𑀺𑀢𑁆𑀢𑀲𑀜𑁆𑀜𑀻 𑀧𑀳𑀼𑀲𑀜𑁆𑀜𑀻 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁𑀲𑀜𑁆𑀜𑀺𑀦𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀢𑀣𑀸𑀲𑀜𑁆𑀜𑀺𑀦𑁄 𑀧𑀼𑀕𑁆𑀕𑀮𑀲𑁆𑀲. 𑀙𑀸𑀤𑁂𑀢𑀼𑀓𑀸𑀫𑀢𑀸𑀢𑀺 𑀆𑀘𑀭𑀺𑀬𑀸𑀤𑀻𑀲𑀼 𑀕𑀸𑀭𑀯𑁂𑀦 𑀯𑀸 𑀕𑀭𑀳𑀸𑀤𑀺𑀪𑀬𑀸 𑀯𑀸 ‘‘𑀦 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸 𑀘. 𑀙𑀸𑀤𑀦𑀦𑁆𑀢𑀺 𑀢𑀣𑀸 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀦𑁆𑀦𑁄’’𑀢𑀺 𑀅𑀯𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀜𑁆𑀘𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺. ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀢𑁆𑀢𑀸 𑀙𑀦𑁆𑀦𑀸𑀢𑀺 𑀏𑀢𑁆𑀣 𑀙𑀸𑀤𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑀯𑀺𑀥𑀺𑀁 𑀤𑀲𑁆𑀲𑁂𑀢𑀺 ‘‘𑀅𑀭𑀼𑀡𑀼𑀕𑁆𑀕𑀫𑀦𑁂𑀦𑀸’’𑀢𑀺, 𑀆𑀧𑀢𑁆𑀢𑀺𑀆𑀧𑀦𑁆𑀦𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸 𑀅𑀭𑀼𑀡𑀼𑀝𑁆𑀞𑀸𑀦𑁂𑀦 𑀲𑀤𑁆𑀥𑀺𑀁 𑀙𑀦𑁆𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁆𑀯𑁂𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁦𑁭. 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑀲𑀗𑁆𑀖𑀸𑀤𑀺𑀲𑁂𑀲𑀧𑀝𑀺𑀓𑀫𑁆𑀫𑀢𑁆𑀣𑀁 ‘‘𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀺𑀳𑀺𑀢𑀲𑁆𑀲 𑀧𑀭𑀺𑀯𑀸𑀲𑀲𑁆𑀲 𑀓𑁄 𑀪𑁂𑀤𑁄, 𑀓𑁄 𑀧𑀯𑀢𑁆𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀢𑀺𑀯𑀺𑀥𑁄’’𑀢𑀺𑀆𑀤𑀺. 𑀲𑁄 𑀧𑀭𑀺𑀯𑀸𑀲𑁄 𑀢𑀺𑀯𑀺𑀥𑁄 𑀤𑀻𑀧𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦𑀸𑀢𑀺 𑀆𑀳 ‘‘𑀢𑀺𑀯𑀺𑀥𑀸𑀧𑁂𑀢𑀘𑁂𑀢𑀲𑀸’’𑀢𑀺. ‘‘𑀢𑀺𑀲𑁆𑀲𑁄 𑀯𑀺𑀥𑀸, 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀯𑀼𑀢𑁆𑀢𑀯𑀺𑀥𑀸𑀬 𑀫𑀸𑀦𑀦𑀸𑀫𑀥𑁂𑀬𑁆𑀬𑀢𑁄 𑀢𑀺𑀯𑀺𑀥𑀫𑀸𑀦𑀢𑁄 𑀅𑀧𑀕𑀢𑀘𑀺𑀢𑁆𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀝𑀺𑀘𑁆𑀙𑀦𑁆𑀦𑀸 𑀆𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑁄. 𑀅𑀭𑀺𑀲𑀸𑀤𑀻𑀦𑀁 𑀆𑀕𑀢𑀺𑀕𑀡𑀢𑁆𑀢𑀸 𑀢𑀢𑁆𑀣 𑀧𑀓𑁆𑀔𑀺𑀧𑀦𑁂𑀦 𑀅-𑀓𑀸𑀭𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀝𑀺𑀘𑁆𑀙𑀦𑁆𑀦𑀸𑀬 𑀤𑀸𑀢𑀩𑁆𑀩𑁄’’𑀢𑀺𑀆𑀤𑀺.

𑀲𑀼𑀤𑁆𑀥𑀦𑁆𑀢𑁄𑀢𑀺 ¶ ¶ ‘‘𑀉𑀪𑁄 𑀓𑁄𑀝𑀺𑀬𑁄 𑀲𑁄𑀥𑁂𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀲𑀼𑀤𑁆𑀥𑀦𑁆𑀢𑁄 𑀦𑀸𑀫𑀸’’𑀢𑀺 𑀧𑀸𑀴𑀺𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀢𑁆𑀢𑀸 𑀉𑀧𑀲𑀫𑁆𑀧𑀤𑀸𑀓𑀸𑀮𑀲𑀗𑁆𑀔𑀸𑀢𑁄 𑀲𑀼𑀤𑁆𑀥𑁄 𑀧𑀼𑀩𑁆𑀩𑀦𑁆𑀢𑁄, 𑀆𑀭𑁄𑀘𑀺𑀢𑀓𑀸𑀮𑀲𑀗𑁆𑀔𑀸𑀢𑁄 𑀲𑀼𑀤𑁆𑀥𑁄 𑀅𑀧𑀭𑀦𑁆𑀢𑁄 𑀘 𑀧𑀭𑀺𑀯𑀸𑀲𑀲𑀫𑀸𑀤𑀸𑀦𑀓𑀸𑀮𑁂 𑀯𑀸 𑀧𑀭𑀺𑀯𑀲𑀦𑀓𑀸𑀮𑁂 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀺𑀝𑁆𑀞𑀸 𑀲𑀼𑀤𑁆𑀥𑀸 𑀅𑀦𑁆𑀢𑀸 𑀅𑀦𑀸𑀧𑀢𑁆𑀢𑀺𑀓𑀸𑀮𑀲𑀗𑁆𑀔𑀸𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀲𑁆𑀲𑀸𑀢𑀺 𑀓𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑀦𑀸𑀫𑀓𑁄 𑀧𑀭𑀺𑀯𑀸𑀲𑁄 𑀘. 𑀏𑀢𑁆𑀣 𑀘 𑀪𑁂𑀤𑀸𑀤𑀺𑀁 𑀯𑀓𑁆𑀔𑀢𑀺.

𑀲𑀫𑁆𑀫𑀸 𑀤𑀺𑀯𑀲𑀸𑀤𑀻𑀦𑀁 𑀑𑀥𑀸𑀦𑀁 𑀧𑀓𑁆𑀔𑁂𑀧𑁄 𑀬𑀢𑁆𑀣 𑀲𑁄 𑀲𑀫𑁄𑀥𑀸𑀦𑁄, 𑀧𑀭𑀺𑀯𑀸𑀲𑁄. 𑀤𑀺𑀯𑀲𑁂𑀲𑀼 𑀤𑀺𑀯𑀲𑁂 𑀯𑀸 𑀆𑀧𑀢𑁆𑀢𑀻𑀲𑀼 𑀆𑀧𑀢𑁆𑀢𑀺𑀬𑁄 𑀯𑀸 𑀲𑀩𑁆𑀩𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀑𑀥𑀸𑀬 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀧𑀺 𑀪𑁂𑀤𑀸𑀤𑀺𑀁 𑀯𑀓𑁆𑀔𑀢𑀺.

𑁫𑁦𑁮. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀧𑀭𑀺𑀯𑀸𑀲𑁂𑀲𑀼. ‘‘𑀬𑁄’’𑀢𑀺 𑀲𑁂𑀲𑁄. 𑀇𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁄 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀅𑀬𑀦𑁆𑀢𑀺 𑀏𑀯𑀁 𑀧𑀓𑀸𑀲𑀺𑀢𑁄𑀢𑀺 𑀬𑁄𑀚𑀦𑀸.

𑁫𑁦𑁯-𑁧𑁦. 𑀧𑀭𑀺𑀯𑀸𑀲𑀤𑀸𑀦𑀓𑀸𑀮𑁂 𑀯𑀼𑀘𑁆𑀘𑀫𑀸𑀦𑀸𑀬 𑀓𑀫𑁆𑀫𑀯𑀸𑀘𑀸𑀬 𑀧𑀥𑀸𑀦𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀢𑁆𑀣𑀼𑀕𑁄𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀯𑀢𑁆𑀣𑀽’’𑀢𑀺 𑀲𑀼𑀓𑁆𑀓𑀫𑁄𑀘𑀦𑀸𑀤𑀺𑀓𑁄 𑀯𑀻𑀢𑀺𑀓𑁆𑀓𑀫𑁄 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀯 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀁 𑀕𑀁 𑀯𑀸𑀘𑀁 𑀲𑀜𑁆𑀜𑀜𑁆𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀓𑀢𑁆𑀯𑀸 ‘‘𑀕𑁄𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀚𑀸𑀢𑀺𑀬𑀲𑀸𑀥𑀸𑀭𑀡𑀯𑀺𑀚𑀸𑀢𑀺𑀬𑀯𑀺𑀦𑀺𑀯𑀢𑁆𑀢𑀦𑀯𑀲𑁂𑀦 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀯𑀸𑀘𑀁 𑀲𑀤𑁆𑀤𑀁, 𑀢𑀩𑁆𑀩𑀺𑀲𑀬𑀁 𑀲𑀜𑁆𑀜𑀜𑁆𑀘 𑀭𑀓𑁆𑀔𑀢𑀺. 𑀇𑀤𑀁 𑀯𑀢𑁆𑀣𑀼𑀕𑁄𑀢𑁆𑀢𑀤𑁆𑀯𑀬𑀯𑀸𑀘𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀯𑀺𑀲𑁂𑀲𑀯𑀘𑀦𑀜𑁆𑀘 ‘‘𑀦𑀸𑀦𑀸𑀯𑀢𑁆𑀣𑀼𑀓𑀸’’𑀢𑀺 𑀲𑀸𑀫𑀜𑁆𑀜𑀯𑀘𑀦𑀜𑁆𑀘𑀸𑀢𑀺 𑀇𑀫𑀺𑀦𑀸 𑀯𑀘𑀦𑀤𑁆𑀯𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀓𑀸𑀬𑀲𑀁𑀲𑀕𑁆𑀕’𑀦𑁆𑀢𑀺𑀆𑀤𑀺𑀯𑀘𑀦𑁂𑀦𑀸𑀧𑀺 ‘𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄’𑀢𑀺𑀆𑀤𑀺𑀯𑀘𑀦𑁂𑀦𑀸𑀧𑀺 𑀯𑀢𑁆𑀣𑀼𑀘𑁂𑀯 ¶ 𑀕𑁄𑀢𑁆𑀢𑀜𑁆𑀘 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). 𑀦𑀸𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸𑀢𑀺 𑀏𑀢𑁆𑀣 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀚𑀸𑀢𑀺𑀲𑀸𑀥𑀸𑀭𑀡𑀦𑀸𑀫𑀁, 𑀆𑀧𑀢𑁆𑀢𑀻𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀦𑁆𑀢𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀢𑀁𑀢𑀁𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀢𑀤𑁂𑀯 𑀆𑀧𑀢𑁆𑀢𑀻𑀢𑀺 𑀏𑀯𑀫𑀼𑀪𑀺𑀦𑁆𑀦𑀁 𑀦𑀸𑀫𑀸𑀧𑀢𑁆𑀢𑀻𑀦𑀁 𑀯𑀲𑁂𑀦 𑀯𑀸𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀯𑀸𑀘𑀸 𑀳𑀺 𑀓𑀸𑀢𑀩𑁆𑀩𑀸𑀢𑀺 ‘‘𑀯𑀢𑁆𑀣𑀼𑀕𑁄𑀢𑁆𑀢𑀯𑀲𑁂𑀦𑀸𑀧𑀻’’𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 ‘‘𑀦𑀸𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸’’𑀢𑀺 𑀏𑀢𑁆𑀣 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀚𑀸𑀢𑀺𑀲𑀸𑀥𑀸𑀭𑀡𑀦𑀸𑀫𑀁, 𑀆𑀧𑀢𑁆𑀢𑀻𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀦𑁆𑀢𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀻𑀢𑀺 𑀇𑀤𑀁 𑀲𑀫𑀼𑀘𑁆𑀘𑀺𑀦𑁄𑀢𑀻𑀢𑀺 𑀉𑀪𑀬𑀁 𑀏𑀓𑀢𑁄 𑀬𑁄𑀚𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸𑀢𑀺. ‘‘𑀦𑀸𑀫𑀸𑀧𑀢𑁆𑀢𑀺𑀯𑀲𑁂𑀦 ¶ 𑀯𑀸’’𑀢𑀺 𑀏𑀢𑁆𑀣 𑀯𑀺𑀓𑀧𑁆𑀧𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦, ‘‘𑀅𑀳𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’𑀢𑀺 𑀏𑀯𑀁 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀺𑀲𑁂𑀲𑀦𑀺𑀯𑀢𑁆𑀢𑀦𑀢𑁆𑀣𑀫𑀢𑁆𑀢𑀲𑀤𑁆𑀤𑀯𑀲𑁂𑀦 𑀘 𑀯𑀢𑁆𑀣𑀼𑀕𑁄𑀢𑁆𑀢𑀯𑀺𑀭𑀳𑀺𑀢𑁂𑀦 𑀓𑁂𑀯𑀮𑁂𑀦 𑀦𑀸𑀫𑀸𑀧𑀢𑁆𑀢𑀺𑀫𑀢𑁆𑀢𑁂𑀦 𑀧𑀬𑁄𑀚𑁂𑀢𑁆𑀯𑀸 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀯𑀸𑀘𑀸𑀬 𑀓𑀭𑀡𑀧𑁆𑀧𑀓𑀸𑀭𑁄 𑀧𑀦 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦 𑀆𑀧𑀦𑁆𑀦𑀧𑀼𑀕𑁆𑀕𑀮𑀦𑀸𑀫𑁂𑀦 𑀘 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀤𑀺𑀯𑀘𑀦𑁂𑀦 𑀘 𑀬𑁄𑀚𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀧𑀭𑀺𑀯𑀸𑀲𑁄’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀢𑁂𑀦 𑀘𑀸𑀢𑀺 𑀮𑀤𑁆𑀥𑀧𑀭𑀺𑀯𑀸𑀲𑁂𑀦 𑀅𑀦𑁆𑀢𑁄𑀲𑀻𑀫𑀸𑀬 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀺𑀦𑁆𑀦𑁂𑀦 𑀧𑀕𑁆𑀕𑀳𑀺𑀢𑀜𑁆𑀚𑀮𑀺𑀦𑀸 𑀪𑀺𑀓𑁆𑀔𑀼𑀦𑀸 𑀘. 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀢𑁆𑀢’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. ‘‘𑀲𑀫𑀸𑀤𑀸𑀦𑁂𑀧𑁆𑀬𑀬𑀁 𑀦𑀬𑁄’’𑀢𑀺 (𑀯𑀺. 𑀯𑀺. 𑁫𑁧𑁪) 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀺, 𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀢𑀭𑀁 𑀯𑀸 𑀤𑁆𑀯𑀬𑀫𑁂𑀯 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀯𑀢𑁆𑀢𑀧𑀽𑀭𑀡𑀢𑁆𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀺𑀢𑁄 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑀣𑀸 ¶ 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀧𑀞𑀫𑀁 𑀲𑀗𑁆𑀖𑀲𑁆𑀲 ‘‘𑀅𑀳𑀁 𑀪𑀦𑁆𑀢𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺, 𑀲𑁄𑀳𑀁 𑀧𑀭𑀺𑀯𑀲𑀸𑀫𑀺, 𑀯𑁂𑀤𑀬𑀸𑀫𑀸𑀳𑀁 𑀪𑀦𑁆𑀢𑁂, 𑀯𑁂𑀤𑀬𑀢𑀻𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁.

‘‘𑀇𑀫𑀜𑁆𑀘 𑀧𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀬𑀸𑀬 𑀓𑀸𑀬𑀘𑀺 𑀯𑀸𑀘𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬𑀧𑀺 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺.

𑁫𑁧𑁧. 𑀧𑀼𑀦𑀧𑁆𑀧𑀼𑀦𑀸𑀕𑀢𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀲𑁂𑀲𑁄. 𑀧𑀼𑀩𑁆𑀩𑁂 𑀆𑀭𑁄𑀘𑀦𑀝𑁆𑀞𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀫𑁆𑀧𑀺. 𑀆𑀭𑁄𑀘𑁂𑀦𑁆𑀢𑁄𑀯𑀸𑀢𑀺 𑀏𑀓𑀲𑁆𑀲 𑀆𑀭𑁄𑀘𑀦𑁂 𑀲𑁄 𑀘𑁂 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀯𑀸, 𑀦𑀯𑀓𑁄 𑀘𑁂, ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀅𑀯𑀲𑀸𑀦𑁂 ‘‘𑀫𑀁 𑀆𑀬𑀲𑁆𑀫𑀸 𑀥𑀸𑀭𑁂𑀢𑀽’’𑀢𑀺, 𑀤𑁆𑀯𑁂 𑀘𑁂 𑀳𑁄𑀦𑁆𑀢𑀺, ‘‘𑀫𑀁 𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀽’’𑀢𑀺, 𑀢𑀬𑁄 𑀘𑁂, ‘‘𑀫𑀁 𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑁄𑀯. 𑀭𑀢𑁆𑀢𑀺𑀬𑀸 𑀙𑁂𑀤𑀁 𑀅𑀓𑀢𑁆𑀯𑀸𑀢𑀺 ‘‘𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁮𑁧) 𑀦𑀬𑁂𑀦 𑀯𑀼𑀢𑁆𑀢𑀏𑀓𑀲𑁂𑀦𑀸𑀲𑀦𑁂 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀅𑀭𑀼𑀡𑀼𑀝𑁆𑀞𑀸𑀧𑀦𑀯𑀲𑁂𑀦 ¶ 𑀓𑀭𑀺𑀬𑀫𑀸𑀦𑁂𑀦 𑀲𑀳𑀯𑀸𑀲𑁂𑀦 𑀯𑀸 ‘‘𑀧𑀓𑀢𑀢𑁆𑀢𑀪𑀺𑀓𑁆𑀔𑀽𑀳𑀺 𑀯𑀺𑀦𑀸 𑀏𑀓𑀓𑁂𑀦 𑀯𑀸𑀲𑁄’’𑀢𑀺 𑀯𑀼𑀢𑁆𑀢𑀯𑀺𑀧𑁆𑀧𑀯𑀸𑀲𑁂𑀦 𑀯𑀸 ‘‘𑀆𑀕𑀦𑁆𑀢𑀼𑀓𑀸𑀦𑀁 𑀆𑀭𑁄𑀘𑀦𑀸𑀬 𑀅𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀅𑀦𑀸𑀭𑁄𑀘𑀦𑁂𑀦 𑀯𑀸 𑀲𑀫𑁆𑀪𑀯𑀦𑁆𑀢𑀁 𑀭𑀢𑁆𑀢𑀺𑀘𑁆𑀙𑁂𑀤𑀫𑀓𑀢𑁆𑀯𑀸. 𑀯𑀢𑁆𑀢𑀪𑁂𑀤𑀁 𑀅𑀓𑀢𑁆𑀯𑀸 𑀯𑀸 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀧𑀜𑁆𑀜𑀢𑁆𑀢𑀯𑀢𑁆𑀢𑀢𑁄 𑀏𑀓𑀫𑁆𑀧𑀺 𑀅𑀳𑀸𑀧𑁂𑀢𑁆𑀯𑀸 𑀘. 𑀲𑀤𑀸 𑀯𑀲𑁂𑀢𑀺 𑀧𑀭𑀺𑀯𑀸𑀲𑀁 𑀯𑀲𑀺𑀢𑀼𑀁 ¶ 𑀧𑀭𑀺𑀓𑀧𑁆𑀧𑀺𑀢𑀸 𑀲𑀩𑁆𑀩𑀤𑀺𑀯𑀲𑀸 𑀬𑀸𑀯 𑀔𑀺𑀡𑀦𑁆𑀢𑀺, 𑀢𑀸𑀯 𑀯𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁫𑁧𑁨. 𑀢𑀢𑁆𑀣 𑀧𑀭𑀺𑀯𑀸𑀲𑁄 𑀯𑀺𑀲𑁄𑀥𑁂𑀢𑀼𑀁 𑀦 𑀲𑀓𑁆𑀓𑀸 𑀘𑁂𑀢𑀺 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀆𑀕𑀢𑁂 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀭𑀺𑀯𑀸𑀲𑀁 𑀲𑁄𑀥𑁂𑀢𑀼𑀁 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺. 𑀢𑀁 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦𑀸𑀢𑀺 𑀢𑀣𑀸 𑀲𑀫𑀸𑀤𑀺𑀦𑁆𑀦𑀁 𑀯𑀢𑁆𑀢𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀺𑀓𑁆𑀔𑀺𑀧𑀺𑀢𑁆𑀯𑀸.

𑁫𑁧𑁩. 𑀓𑀢𑁆𑀣 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸𑀢𑀺 𑀅𑀢𑁆𑀢𑀦𑁄 𑀬𑀲𑁆𑀫𑀺𑀁 𑀯𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸. 𑀧𑀼𑀕𑁆𑀕𑀮𑁂 𑀯𑀸𑀢𑀺 𑀪𑀺𑀓𑁆𑀔𑀽𑀲𑀼 𑀉𑀝𑁆𑀞𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀢𑁂𑀲𑀼 𑀅𑀦𑁆𑀢𑁄𑀲𑀻𑀫𑀸𑀬𑀬𑁂𑀯 𑀑𑀳𑀻𑀦𑁂 𑀏𑀓𑀪𑀺𑀓𑁆𑀔𑀼𑀫𑁆𑀳𑀺 𑀯𑀸 𑀅𑀲𑀢𑀺𑀬𑀸 𑀩𑀳𑀺𑀲𑀻𑀫𑀁 𑀕𑀢𑁂𑀦 𑀲𑀭𑀺𑀢𑀓𑁆𑀔𑀡𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁂 𑀢𑀲𑁆𑀲𑀸𑀬𑁂𑀯 𑀧𑀭𑀺𑀲𑀸𑀬 𑀧𑀭𑀺𑀯𑀸𑀲𑀤𑀸𑀦𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀼𑀕𑁆𑀕𑀮𑁂 𑀯𑀸 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼 𑀘𑁂, 𑀢𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀦𑀺𑀓𑁆𑀔𑀺𑀧𑁂’𑀢𑀺 𑀆𑀳 ‘‘𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺𑀆𑀤𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀏𑀢𑀁 𑀧𑀘𑁆𑀘𑀸𑀫𑀲𑀢𑀺. 𑀢𑀁 𑀯𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑀸 𑀲𑀫𑀸𑀤𑀺𑀦𑁆𑀦𑀁 𑀢𑀁 𑀯𑀢𑁆𑀢𑀁.

𑁫𑁧𑁪. 𑀅𑀬𑀁 𑀦𑀬𑁄𑀢𑀺 ‘‘𑀏𑀓𑀧𑀤𑁂𑀦𑀸𑀧𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀸 𑀧𑀦𑀸’’𑀢𑀺 𑀏𑀯𑀁 𑀅𑀦𑀦𑁆𑀢𑀭𑁄𑀤𑀺𑀢𑀦𑀬𑁄.

𑁫𑁧𑁫-𑁨𑁦. 𑀧𑀓𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀕𑁆𑀕𑀫𑁄𑀓𑁆𑀔𑀸𑀯𑀭𑀡𑀸𑀪𑀸𑀯𑁂𑀦 𑀧𑀓𑀢𑁄 𑀧𑀼𑀩𑁆𑀩𑀲𑀭𑀽𑀧𑁂𑀦𑁂𑀯 𑀞𑀺𑀢𑁄 𑀅𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 ‘‘𑀧𑀓𑀢𑀢𑁆𑀢𑁄’’𑀢𑀺 𑀓𑀣𑀻𑀬𑀢𑀺. 𑀧𑀘𑁆𑀘𑀽𑀲𑀓𑀸𑀮𑀲𑁆𑀫𑀺𑀦𑁆𑀢𑀺 𑀅𑀭𑀼𑀡𑀢𑁄 𑀧𑀼𑀭𑀺𑀫𑀓𑀸𑀮𑁂.

𑀧𑀭𑀺𑀓𑁆𑀔𑀺𑀢𑁆𑀢𑀯𑀺𑀳𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 𑀧𑀸𑀓𑀸𑀭𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀏𑀓𑀫𑁆𑀧𑀺 𑀲𑁂𑀦𑀸𑀲𑀦𑀁 𑀯𑀺𑀳𑀭𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀘𑁆𑀘𑀢𑀺. 𑀤𑁆𑀯𑁂 ¶ 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀬𑁄𑀚𑀦𑀸. 𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀲𑁆𑀲 𑀅𑀯𑀥𑀺𑀁 𑀤𑀲𑁆𑀲𑁂𑀢𑀺 ‘‘𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀻’’𑀢𑀺, ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀢𑁄 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸 𑀩𑀳𑀻’’𑀢𑀺 𑀘.

𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 ¶ 𑀦𑀸𑀫 𑀓𑀢𑀫𑀦𑁆𑀢𑀺? 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 ‘‘𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀳𑀸𑀭𑀲𑁆𑀲𑀸𑀧𑀺 𑀕𑀸𑀫𑀲𑁆𑀲𑁂𑀯 𑀉𑀧𑀘𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀸 𑀫𑀺𑀦𑀺𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀁 𑀳𑁄𑀢𑀺, 𑀕𑀸𑀫𑁂 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑀢𑁆𑀢𑀲𑀸𑀮𑀕𑀺𑀮𑀸𑀦𑀲𑀸𑀮𑀸𑀤𑀺𑀲𑁂𑀦𑀸𑀲𑀦𑁂 𑀘𑁂 𑀧𑀭𑀺𑀓𑁆𑀔𑁂𑀧𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀸, 𑀦𑀢𑁆𑀣𑀺 𑀘𑁂, 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀞𑀺𑀢𑁂𑀦 𑀫𑀸𑀢𑀼𑀕𑀸𑀫𑁂𑀦 𑀙𑀟𑁆𑀟𑀺𑀢𑀪𑀸𑀚𑀦𑀥𑁄𑀯𑀦𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀯𑀸 𑀲𑁂𑀦𑀸𑀲𑀦𑀢𑁄 𑀤𑀽𑀭𑁂 𑀘𑁂𑀢𑀺𑀬𑀗𑁆𑀕𑀡𑁂, 𑀩𑁄𑀥𑀺𑀬𑀗𑁆𑀕𑀡𑁂 𑀯𑀸 𑀞𑀢𑁆𑀯𑀸 𑀩𑀮𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀧𑁆𑀧𑀫𑀸𑀡𑁂𑀦 𑀔𑀺𑀢𑁆𑀢𑀲𑁆𑀲 𑀫𑀼𑀝𑁆𑀞𑀺𑀬𑀸 𑀕𑀳𑀺𑀢𑀧𑀸𑀲𑀸𑀡𑀲𑁆𑀲 𑀧𑀢𑀦𑀝𑁆𑀞𑀸𑀦𑀁 𑀯𑀺𑀳𑀸𑀭𑀽𑀧𑀘𑀸𑀭𑁄 𑀦𑀸𑀫, 𑀢𑀤𑁂𑀯 𑀧𑀸𑀓𑀸𑀭𑀸𑀤𑀻𑀳𑀺 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀦𑀸𑀫. 𑀢𑀢𑁆𑀣 𑀞𑀢𑁆𑀯𑀸 𑀢𑀣𑁂𑀯 𑀔𑀺𑀢𑁆𑀢𑀲𑁆𑀲 𑀧𑀸𑀲𑀸𑀡𑀲𑁆𑀲 𑀧𑀢𑀦𑀝𑁆𑀞𑀸𑀦𑀁 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄, 𑀢𑀢𑁆𑀣𑀸𑀧𑀺 𑀞𑀢𑁆𑀯𑀸 𑀢𑀣𑁂𑀯 𑀔𑀺𑀢𑁆𑀢𑀲𑁆𑀲 𑀧𑀸𑀲𑀸𑀡𑀲𑁆𑀲 𑀧𑀢𑀦𑀝𑁆𑀞𑀸𑀦𑀁 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀏𑀯𑀁 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸 𑀕𑀳𑁂𑀢𑀩𑁆𑀩𑀸.

𑀫𑀕𑁆𑀕𑀢𑁄 𑀑𑀓𑁆𑀓𑀫𑀺𑀢𑁆𑀯𑀸𑀢𑀺 𑀫𑀕𑁆𑀕𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀕𑀼𑀫𑁆𑀩𑁂𑀦𑀸𑀢𑀺 𑀭𑀼𑀓𑁆𑀔𑀕𑀳𑀦𑁂𑀦 𑀯𑀸 𑀮𑀢𑀸𑀕𑀳𑀦𑁂𑀦 𑀯𑀸. 𑀯𑀢𑀺𑀬𑀸𑀢𑀺 𑀓𑀡𑁆𑀝𑀓𑀲𑀸𑀔𑀸𑀤𑀻𑀳𑀺 𑀓𑀢𑀸𑀬 𑀯𑀢𑀺𑀬𑀸.

𑀯𑀢𑁆𑀢𑀫𑀸𑀤𑀸𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸. 𑀆𑀭𑁄𑀘𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀆𑀭𑁄𑀘𑁂𑀢𑁆𑀯𑀸.

𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀪𑀺𑀓𑁆𑀔𑀽𑀢𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀳𑀢𑁆𑀣𑀧𑀸𑀲𑀤𑀸𑀦𑀢𑁆𑀣𑀸𑀬 𑀆𑀕𑀢𑁄 𑀪𑀺𑀓𑁆𑀔𑀼. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀏𑀢𑁆𑀣 ‘‘𑀲𑀦𑁆𑀢𑀺𑀓𑁂’’𑀢𑀺 𑀲𑁂𑀲𑁄.

𑀆𑀭𑁄𑀘𑁂𑀢𑁆𑀯𑀸 ¶ 𑀯𑀸𑀢𑀺 𑀅𑀢𑁆𑀢𑀦𑁄 𑀦𑀯𑀓𑀢𑀭𑁄 𑀘𑁂, ‘‘𑀆𑀯𑀼𑀲𑁄’’𑀢𑀺, 𑀯𑀼𑀟𑁆𑀠𑁄 𑀘𑁂, ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑁄𑀘𑁂𑀢𑁆𑀯𑀸. 𑀲𑁂𑀲𑀦𑁆𑀢𑀺 𑀅𑀯𑀲𑁂𑀲𑀯𑀺𑀦𑀺𑀘𑁆𑀙𑀬𑀁. 𑀲𑀫𑀼𑀘𑁆𑀘𑀬𑀲𑁆𑀲𑀸𑀢𑀺 𑀘𑀽𑀴𑀯𑀕𑁆𑀕𑀸𑀕𑀢𑀲𑁆𑀲 𑀢𑀢𑀺𑀬𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀲𑁆𑀲. 𑀅𑀝𑁆𑀞𑀓𑀣𑀸𑀬𑀘𑀸𑀢𑀺 ‘‘𑀲𑀘𑁂 𑀅𑀜𑁆𑀜𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑁂𑀦𑀸𑀧𑀺.

𑀯𑀺𑀪𑀸𑀯𑀬𑁂𑀢𑀺 ‘‘𑀲𑀘𑁂 𑀬𑀁 𑀪𑀺𑀓𑁆𑀔𑀼𑀁 𑀢𑀢𑁆𑀣 𑀆𑀕𑀢𑀁 𑀧𑀲𑁆𑀲𑀢𑀺, 𑀪𑀸𑀲𑀫𑀸𑀦𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁. 𑀢𑀣𑀸 𑀅𑀓𑀭𑁄𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀯𑀢𑁆𑀢𑀪𑁂𑀤𑁄 𑀘 𑀳𑁄𑀢𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀲𑁄 𑀤𑁆𑀯𑀸𑀤𑀲𑀭𑀢𑀦𑀩𑁆𑀪𑀦𑁆𑀢𑀭𑀁 𑀧𑀢𑁆𑀯𑀸 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑁄 ¶ . 𑀲𑀘𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀕𑀢𑁄 𑀳𑁄𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑀤𑀺𑀯𑀲𑁂 𑀧𑀼𑀡𑁆𑀡𑁂 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁 𑀅𑀢𑀺𑀭𑁂𑀓𑁂 𑀘 𑀤𑀺𑀯𑀲𑁂 𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀯𑀢𑁆𑀢𑁂 𑀅𑀲𑀫𑀸𑀤𑀺𑀦𑁆𑀦𑁂 𑀫𑀸𑀦𑀢𑁆𑀢𑀸𑀭𑀳𑁄 𑀦 𑀳𑁄𑀢𑀻𑀢𑀺 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑁆𑀫 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦𑁂𑀯 𑀫𑀸𑀦𑀢𑁆𑀢𑀁 𑀬𑀸𑀘𑀺𑀢𑀩𑁆𑀩𑀁. 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀘𑀭𑀺𑀢𑀼𑀓𑀸𑀫𑀲𑁆𑀲 𑀧𑀼𑀦 𑀯𑀢𑁆𑀢𑀲𑀫𑀸𑀤𑀸𑀦𑀁 𑀓𑀸𑀢𑀩𑁆𑀩𑀁 𑀦 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁄 𑀯𑀺𑀲𑁂𑀲𑁄, 𑀇𑀫𑀁 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀧𑀓𑀸𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸.

𑁫𑁨𑁧. 𑀦 𑀚𑀸𑀦𑀢𑀻𑀢𑀺 𑀏𑀢𑁆𑀣 𑀙𑀦𑁆𑀤𑀯𑀲𑁂𑀦 𑀭𑀲𑁆𑀲𑁄 𑀓𑀢𑁄. 𑀆𑀧𑀢𑁆𑀢𑀻𑀦𑀜𑁆𑀘 𑀭𑀢𑁆𑀢𑀻𑀦𑀁, 𑀧𑀭𑀺𑀘𑁆𑀙𑁂𑀤𑀁 𑀦 𑀚𑀸𑀦𑀢𑀻𑀢𑀺 𑀩𑀳𑀽 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 ‘‘𑀏𑀢𑁆𑀢𑀓𑀸𑀳𑀁 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄’’𑀢𑀺 𑀅𑀢𑁆𑀢𑀦𑁄 𑀆𑀧𑀦𑁆𑀦𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀻𑀦𑀁 𑀧𑀭𑀺𑀘𑁆𑀙𑁂𑀤𑀁 ¶ 𑀦 𑀚𑀸𑀦𑀸𑀢𑀺, ‘‘𑀫𑀬𑀸 𑀆𑀧𑀦𑁆𑀦𑀸𑀧𑀢𑁆𑀢𑀺 𑀏𑀢𑁆𑀢𑀓𑁂 𑀤𑀺𑀯𑀲𑁂 𑀧𑀝𑀺𑀘𑁆𑀙𑀦𑁆𑀦𑀸’’𑀢𑀺 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑀁 𑀦 𑀚𑀸𑀦𑀸𑀢𑀺.

𑁫𑁨𑁨. 𑀇𑀤𑀸𑀦𑀺 𑀢𑀲𑁆𑀲 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀲𑁂𑀯𑀸’’𑀢𑀺𑀆𑀤𑀺. 𑀧𑀭𑀺𑀲𑀼𑀤𑁆𑀥𑁂𑀳𑀻𑀢𑀺 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀧𑀭𑀺𑀲𑀼𑀤𑁆𑀥𑀲𑀦𑁆𑀢𑀸𑀦𑁂𑀳𑀺 𑀉𑀧𑀸𑀮𑀺𑀢𑁆𑀣𑁂𑀭𑀸𑀤𑀺𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺. 𑀏𑀲𑁄𑀯 𑀲𑀼𑀤𑁆𑀥𑀦𑁆𑀢𑁄𑀢𑀺 𑀏𑀲𑁄 𑀬𑀣𑀸𑀯𑀼𑀢𑁆𑀢𑀲𑀭𑀽𑀧𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄. 𑀘𑀽𑀴𑀲𑀼𑀤𑁆𑀥𑀦𑁆𑀢𑀦𑀸𑀫𑁄 𑀘𑀸𑀢𑀺 ‘‘𑀬𑁄 𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀓𑁆𑀓𑀫𑁂𑀦 𑀯𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀉𑀧𑀲𑀫𑁆𑀧𑀤𑀫𑀸𑀴𑀓𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀯𑀲𑁂𑀦 𑀯𑀸 𑀆𑀭𑁄𑀘𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀯𑀲𑁂𑀦 𑀯𑀸 𑀲𑀭𑀦𑁆𑀢𑁂 ‘‘𑀓𑀺𑀢𑁆𑀢𑀓𑀸𑀦𑀺 𑀤𑀺𑀯𑀲𑀸𑀦𑀺 𑀧𑀭𑀺𑀲𑀼𑀤𑁆𑀥𑁄𑀢𑀺 𑀲𑀭𑀲𑀻’’𑀢𑀺 𑀯𑀺𑀦𑀬𑀥𑀭𑁂𑀳𑀺 𑀧𑀼𑀘𑁆𑀙𑀺𑀢𑁂 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀧𑀭𑀺𑀲𑀼𑀤𑁆𑀥𑁄𑀲𑁆𑀫𑀻’’𑀢𑀺 𑀯𑀼𑀢𑁆𑀢𑀯𑀢𑁄 𑀢𑁂𑀦 𑀯𑀼𑀢𑁆𑀢𑀲𑀼𑀤𑁆𑀥𑀤𑀺𑀦𑀸𑀦𑀺 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀤𑀺𑀦𑁆𑀦𑁄 𑀬𑀸𑀯 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑁄, 𑀢𑀸𑀯 𑀩𑀳𑀼𑀤𑀺𑀯𑀲𑁂𑀲𑀼 𑀦𑁂𑀢𑀩𑁆𑀩𑀁 𑀫𑀳𑀸𑀲𑀼𑀤𑁆𑀥𑀦𑁆𑀢𑀁 𑀲𑀦𑁆𑀥𑀸𑀬 𑀇𑀢𑀭𑀤𑀺𑀦𑀸𑀦𑀁 𑀧𑀽𑀭𑁂𑀢𑀩𑁆𑀩𑀢𑁆𑀢𑀸 𑀘𑀽𑀴𑀲𑀼𑀤𑁆𑀥𑀦𑁆𑀢𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀅𑀬𑀜𑁆𑀳𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀺, 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀺, 𑀇𑀤𑀫𑀲𑁆𑀲 𑀮𑀓𑁆𑀔𑀡’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀼𑀢𑁆𑀢𑀢𑁆𑀢𑀸 𑀇𑀫𑀁 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑀢𑁄 𑀧𑀘𑁆𑀙𑀸 𑀤𑀺𑀯𑀲𑀁 𑀲𑀭𑀦𑁆𑀢𑁄 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀬𑁄𑀚𑁂𑀢𑁆𑀯𑀸 𑀕𑀳𑀺𑀢𑀤𑀺𑀯𑀲𑀢𑁄 𑀯𑀟𑁆𑀠𑁂𑀢𑀺 𑀯𑀸 𑀳𑀸𑀧𑁂𑀢𑀺 𑀯𑀸, 𑀉𑀪𑀬𑀢𑁆𑀣𑀸𑀧𑀺 ‘‘𑀧𑀼𑀦 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀘𑀦𑀢𑁄 𑀧𑀼𑀩𑁆𑀩𑁂 𑀤𑀺𑀦𑁆𑀦𑀧𑀭𑀺𑀯𑀸𑀲𑁄𑀬𑁂𑀯 𑀧𑀫𑀸𑀡𑀁 ¶ . ‘‘𑀏𑀢𑀲𑁆𑀲 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 ‘𑀧𑀝𑀺𑀘𑁆𑀙𑀦𑁆𑀦𑀸’𑀢𑀺 𑀯𑀸 𑀅𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀁 ‘𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸’𑀢𑀺 𑀯𑀸 𑀅𑀲𑀫𑁆𑀩𑀳𑀼𑀮𑀫𑁆𑀧𑀺 ‘𑀲𑀫𑁆𑀩𑀳𑀼𑀮𑀸’𑀢𑀺 𑀯𑀸 𑀯𑀺𑀧𑀭𑀻𑀢𑀢𑁄 𑀕𑀳𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀧𑀝𑀺𑀘𑁆𑀙𑀦𑁆𑀦𑀁 ‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸’𑀢𑀺𑀆𑀤𑀺𑀯𑀺𑀧𑀭𑀺𑀬𑀸𑀬𑁂𑀦 𑀦 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀕𑀢𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀲𑀼𑀤𑁆𑀥𑀦𑁆𑀢𑀦𑀸𑀫𑀓𑁄𑀢𑀺 ¶ ‘‘𑀬𑁄 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑀬𑁂𑀦 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀦𑁂𑀯 𑀲𑀭𑀢𑀺, 𑀯𑁂𑀫𑀢𑀺𑀓𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀤𑀺𑀦𑁆𑀦𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑀲𑀭𑀽𑀧𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄 𑀦𑀸𑀫. ‘‘𑀅𑀬𑀁 𑀉𑀤𑁆𑀥𑀁 𑀦𑀸𑀭𑁄𑀳𑀢𑀺, 𑀳𑁂𑀝𑁆𑀞𑀸 𑀧𑀦 𑀑𑀭𑁄𑀳𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀬𑀁 𑀧𑀭𑀺𑀯𑀸𑀲𑁄 𑀬𑀸𑀯 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑁄, 𑀢𑀸𑀯 𑀧𑀽𑀭𑁂𑀢𑀩𑁆𑀩𑀢𑁄 𑀢𑀢𑁄 𑀉𑀤𑁆𑀥𑀁 𑀦𑀸𑀭𑁄𑀳𑀢𑀺. 𑀅𑀦𑁆𑀢𑀭𑀸𑀴𑁂 𑀅𑀢𑁆𑀢𑀦𑁄 𑀲𑀼𑀤𑁆𑀥𑀓𑀸𑀮𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀲𑀭𑀢𑀺 𑀘𑁂, 𑀢𑀢𑁄 𑀧𑀝𑁆𑀞𑀸𑀬 𑀦𑀺𑀯𑀢𑁆𑀢𑀦𑀢𑁄 𑀤𑀺𑀯𑀲𑀳𑀸𑀦𑀁 𑀧𑀦 𑀳𑁄𑀢𑁂𑀯.

𑁫𑁨𑁩. ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀳𑁄𑀢𑀺, 𑀲𑁄 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺 (𑀘𑀽𑀴𑀯. 𑁧𑁫𑁬) 𑀆𑀕𑀢𑀯𑀢𑁆𑀣𑀼𑀫𑁆𑀳𑀺 𑀇𑀫𑀲𑁆𑀲 𑀧𑀭𑀺𑀯𑀸𑀲𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀁 𑀯𑀢𑁆𑀣𑀼𑀁 𑀲𑀗𑁆𑀕𑀳𑁂𑀢𑀼𑀁 ‘‘𑀆𑀧𑀢𑁆𑀢𑀻𑀦𑀁 𑀘𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸𑀧𑀺 ‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀧𑀦 ‘𑀏𑀢𑁆𑀢𑀓𑀸 𑀅𑀳𑀁 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄’𑀢𑀺 𑀚𑀸𑀦𑀸𑀢𑀼 𑀯𑀸 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀧𑀝𑀺𑀲𑁂𑀥𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀲𑁆𑀲 𑀅𑀧𑀭𑀺𑀚𑀸𑀦𑀦𑀫𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀼𑀯𑀺𑀥𑁄𑀧𑀻’’𑀢𑀺𑀆𑀤𑀺. 𑀤𑀼𑀯𑀺𑀥𑁄𑀧𑀺 𑀅𑀬𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀏𑀓𑀘𑁆𑀘𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁, 𑀲𑀓𑀮𑀁 𑀯𑀸 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀅𑀚𑀸𑀦𑀢𑁄 𑀯𑀸 𑀯𑀺𑀫𑀢𑀺𑀲𑁆𑀲 𑀯𑀸 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸.

𑁫𑁨𑁪. 𑀇𑀢𑀭𑁄𑀧𑀺 𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀢𑀺𑀥𑀸 𑀫𑀢𑁄𑀢𑀺 𑀬𑁄𑀚𑀦𑀸. 𑀥𑀸𑀢𑀼𑀲𑀤𑁆𑀤𑀸𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 ‘‘𑀑𑀥𑀸𑀦’’𑀦𑁆𑀢𑀺 𑀫𑀓𑁆𑀔𑀦𑀁 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀑𑀥𑀼𑀦𑀺𑀢𑁆𑀯𑀸 ¶ 𑀫𑀓𑁆𑀔𑁂𑀢𑁆𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). ‘‘𑀲𑀫𑁄𑀥𑀸𑀦’’𑀦𑁆𑀢𑀺 𑀧𑀓𑁆𑀔𑁂𑀧𑁄 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑁄𑀤𑀳𑀺𑀢𑁆𑀯𑀸’’𑀢𑀺. 𑀑𑀥𑀸𑀦𑀜𑁆𑀘 𑀲𑀫𑁄𑀥𑀸𑀦𑀜𑁆𑀘 𑀑𑀥𑀸𑀦𑀲𑀫𑁄𑀥𑀸𑀦𑀁, 𑀢𑀁 𑀬𑀢𑁆𑀣 𑀲𑁄 𑀧𑀭𑀺𑀯𑀸𑀲𑁄 ‘‘𑀑𑀥𑀸𑀦𑀲𑀫𑁄𑀥𑀸𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀲𑀸𑀤𑀺𑀕𑀡𑁂 𑀅𑀦𑁆𑀢𑁄𑀕𑀥𑀢𑁆𑀢𑀸 𑀳𑁂𑀢𑁆𑀣, 𑀉𑀧𑀭𑀺 𑀘 𑀏𑀯𑀭𑀽𑀧𑁂 𑀞𑀸𑀦𑁂 𑀅-𑀓𑀸𑀭𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄 ¶ . 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸𑀦𑀁 𑀫𑀓𑁆𑀔𑀦𑀜𑁆𑀘 𑀫𑀽𑀮𑀸𑀧𑀢𑁆𑀢𑀺𑀬𑀁 𑀅𑀦𑁆𑀢𑀭𑀸𑀧𑀢𑁆𑀢𑀻𑀦𑀁 𑀧𑀓𑁆𑀔𑀺𑀧𑀦𑀜𑁆𑀘 𑀬𑀲𑁆𑀫𑀺𑀁 𑀲𑁄 𑀧𑀭𑀺𑀯𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀤𑀺𑀯𑀲𑁂 𑀧𑀭𑀺𑀯𑀼𑀢𑁆𑀣𑁂 𑀢𑀼, 𑀑𑀥𑀼𑀦𑀺𑀢𑁆𑀯𑀸 𑀧𑀤𑀻𑀬𑀢𑁂’’𑀢𑀺 𑀯𑀓𑁆𑀔𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀑𑀥𑀼𑀦𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀫𑀽𑀮𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁂 𑀧𑀘𑁆𑀙𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀲𑀫𑁄𑀤𑀳𑀺𑀢𑁆𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨).

𑀅𑀕𑁆𑀖𑀧𑀼𑀩𑁆𑀩𑀓𑁄 𑀫𑀺𑀲𑁆𑀲𑀓𑀧𑀼𑀩𑁆𑀩𑀓𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀬𑁄𑀚𑀦𑀸, 𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀕𑁆𑀖𑁄 𑀘 𑀫𑀺𑀲𑁆𑀲𑀓𑁄 𑀘 𑀅𑀕𑁆𑀖𑀫𑀺𑀲𑁆𑀲𑀓𑀸, 𑀢𑁂 𑀧𑀼𑀩𑁆𑀩𑀓𑀸 𑀏𑀢𑀲𑁆𑀲𑀸𑀢𑀺 𑀅𑀕𑁆𑀖𑀫𑀺𑀲𑁆𑀲𑀓𑀧𑀼𑀩𑁆𑀩𑀓𑁄, 𑀲𑀫𑁄𑀥𑀸𑀦𑁄. 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑀁 𑀅𑀕𑁆𑀖𑀲𑀫𑁄𑀥𑀸𑀦𑀁, 𑀢𑀁 𑀬𑀢𑁆𑀣 𑀲𑁄 𑀅𑀕𑁆𑀖𑀲𑀫𑁄𑀥𑀸𑀦𑁄, 𑀆𑀧𑀦𑁆𑀦𑀸𑀲𑀼 𑀩𑀳𑀽𑀲𑀼 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀻𑀦𑀁 𑀤𑀺𑀯𑀲𑀕𑀡𑀦𑀕𑁆𑀖𑁂𑀦𑁂𑀯 𑀧𑀘𑁆𑀙𑀸 𑀆𑀧𑀦𑁆𑀦𑀆𑀧𑀢𑁆𑀢𑀻𑀦𑀁 𑀧𑀓𑁆𑀔𑁂𑀧𑀬𑀼𑀢𑁆𑀢𑀧𑀭𑀺𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼 𑀬𑀸 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀬 𑀢𑀸𑀲𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀅𑀯𑀲𑁂𑀲𑀸𑀦𑀁 𑀊𑀦𑀢𑀭𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀁 𑀧𑀭𑀺𑀯𑀸𑀲𑁄 𑀤𑀺𑀬𑁆𑀬𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀕𑁆𑀖𑀲𑀫𑁄𑀥𑀸𑀦𑁄’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). 𑀫𑀺𑀲𑁆𑀲𑀓𑀸𑀦𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀁 𑀆𑀧𑀢𑁆𑀢𑀻𑀦𑀁 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀁, 𑀢𑀁 𑀬𑀢𑁆𑀣 𑀲𑁄 𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄. 𑀫𑀺𑀲𑁆𑀲𑀓𑀸𑀦𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀁 𑀆𑀧𑀢𑁆𑀢𑀻𑀦𑀁 𑀏𑀓𑀢𑁄 𑀧𑀓𑁆𑀔𑁂𑀧𑀬𑀼𑀢𑁆𑀢𑁄 𑀧𑀭𑀺𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄 ¶ 𑀦𑀸𑀫 𑀬𑁄 𑀦𑀸𑀦𑀸𑀯𑀢𑁆𑀣𑀼𑀓𑀸 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀤𑀺𑀬𑁆𑀬𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨).

𑁫𑁨𑁫-𑁭. 𑀏𑀯𑀁 𑀢𑀺𑀯𑀺𑀥𑁂 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁂 𑀧𑀞𑀫𑀧𑀭𑀺𑀯𑀸𑀲𑀲𑁆𑀲 𑀯𑀺𑀲𑁂𑀲𑀦𑀪𑀽𑀢𑀢𑀸𑀬 𑀅𑀯𑀬𑀯𑀸𑀦𑀁 𑀤𑁆𑀯𑀺𑀦𑁆𑀦𑀁 𑀑𑀥𑀸𑀦𑀲𑀫𑁄𑀥𑀸𑀦𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀦𑀼𑀯𑀸𑀤𑁂𑀦 𑀢𑀤𑀼𑀪𑀬𑀑𑀥𑀸𑀦𑀲𑀫𑁄𑀥𑀸𑀦𑀲𑀭𑀽𑀧𑀁 𑀯𑀺𑀥𑀸𑀢𑀼𑀫𑀸𑀳 ‘‘𑀆𑀧𑀚𑁆𑀚𑀺𑀢𑁆𑀯𑀸…𑀧𑁂… 𑀧𑀓𑀸𑀲𑀺𑀢𑁄’’𑀢𑀺. 𑀢𑀢𑁆𑀣 𑀧𑀞𑀫𑀲𑁆𑀲 𑀑𑀥𑀸𑀦-𑀲𑀤𑁆𑀤𑀲𑀗𑁆𑀔𑀸𑀢𑀲𑁆𑀲 𑀅𑀯𑀬𑀯𑀲𑁆𑀲 𑀅𑀢𑁆𑀣𑀲𑀭𑀽𑀧𑀸𑀦𑀼𑀯𑀸𑀤𑀫𑀸𑀳 ‘‘𑀆𑀧𑀚𑁆𑀚𑀺𑀢𑁆𑀯𑀸…𑀧𑁂… 𑀧𑀤𑀻𑀬𑀢𑁂’’𑀢𑀺. 𑀤𑀼𑀢𑀺𑀬𑀸𑀯𑀬𑀯𑀲𑀗𑁆𑀔𑀸𑀢𑀲𑀫𑁄𑀥𑀸𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀲𑀭𑀽𑀧𑀸𑀦𑀼𑀯𑀸𑀤𑀫𑀸𑀳 ‘‘𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀪𑀺𑀓𑁆𑀔𑀼𑀦𑁄’’𑀢𑀺. 𑀢𑁂𑀦𑁂𑀯 𑀉𑀪𑀬𑀢𑁆𑀣𑀸𑀦𑀼𑀯𑀸𑀤𑁂 ‘‘𑀪𑀺𑀓𑁆𑀔𑀼𑀦𑁄’’𑀢𑀺 𑀧𑀤𑀤𑁆𑀯𑀬𑀲𑁆𑀲, ‘‘𑀧𑀤𑀻𑀬𑀢𑁂 𑀤𑀸𑀢𑀩𑁆𑀩𑁄’’𑀢𑀺 𑀓𑀺𑀭𑀺𑀬𑀸𑀧𑀤𑀤𑁆𑀯𑀬𑀲𑁆𑀲 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀯𑀬𑀯𑀢𑁆𑀣𑀸𑀦𑀼𑀯𑀸𑀤𑁂𑀦 𑀯𑀺𑀥𑀸𑀢𑀩𑁆𑀩𑀲𑀫𑀼𑀤𑀸𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀲𑁄𑀥𑀸𑀦𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀧𑀓𑀸𑀲𑀺𑀢𑁄’’𑀢𑀺. 𑀏𑀢𑁆𑀣 𑀙𑀸𑀤𑁂𑀦𑁆𑀢𑀲𑁆𑀲 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀏𑀲𑁄𑀥𑀸𑀦𑀲𑀫𑁄𑀥𑀸𑀦𑁄𑀢𑀺 𑀏𑀢𑁆𑀣 𑀏𑀢-𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 ‘‘𑀬𑁄’’𑀢𑀺 𑀮𑀩𑁆𑀪𑀢𑀺.

𑀢𑀢𑁆𑀭𑀸𑀬𑀁 ¶ 𑀬𑁄𑀚𑀦𑀸 𑁋 𑀆𑀧𑀚𑁆𑀚𑀺𑀢𑁆𑀯𑀸…𑀧𑁂… 𑀑𑀥𑀼𑀦𑀺𑀢𑁆𑀯𑀸 𑀬𑁄 𑀬𑀲𑁆𑀫𑀸 𑀧𑀤𑀻𑀬𑀢𑁂, 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀬𑁄 𑀬𑀲𑁆𑀫𑀸 𑀤𑀸𑀢𑀩𑁆𑀩𑁄, 𑀢𑀲𑁆𑀫𑀸 𑀏𑀲𑁄𑀥𑀸𑀦𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀧𑀓𑀸𑀲𑀺𑀢𑁄𑀢𑀺.

𑀢𑀢𑁆𑀣 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀬𑀸 𑀧𑀭𑀺𑀯𑀲𑀦𑁆𑀢𑁄 𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀯𑀸 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀯𑀸 𑀅𑀩𑁆𑀪𑀸𑀦𑀸𑀭𑀳𑁄 𑀯𑀸 𑀳𑀼𑀢𑁆𑀯𑀸 𑀓𑀤𑀸𑀘𑀺 𑀅𑀜𑁆𑀜𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸. 𑀙𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀧𑀞𑀫𑀁 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑀸𑀧𑀝𑀺𑀘𑁆𑀙𑀸𑀤𑀺𑀢𑀓𑀸𑀮𑁂𑀦 𑀲𑀫𑀁 𑀯𑀸 𑀊𑀦𑀁 𑀯𑀸 𑀓𑀸𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲. ‘‘𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀘 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑁂 ¶ 𑀘 𑀲𑀩𑁆𑀩𑁂 𑀑𑀥𑀼𑀦𑀺𑀢𑁆𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀏𑀢𑁆𑀣 ‘‘𑀧𑀭𑀺𑀯𑀼𑀢𑁆𑀣𑁂’’𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ‘‘𑀫𑀸𑀦𑀢𑁆𑀢𑀘𑀺𑀡𑁆𑀡𑁂 𑀘𑀸’’𑀢𑀺 𑀕𑀳𑁂𑀢𑀩𑁆𑀩𑀁. 𑀑𑀥𑀼𑀦𑀺𑀢𑁆𑀯𑀸𑀢𑀺 𑀘 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀯𑀲𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀅𑀤𑀺𑀯𑀲𑁂 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑁄 𑀬𑀲𑁆𑀫𑀸 𑀧𑀤𑀻𑀬𑀢𑁂, 𑀲𑁄 𑀧𑀭𑀺𑀯𑀸𑀲𑁄 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀢𑁆𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀳𑀼𑀢𑁆𑀯𑀸𑀧𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀏𑀓𑀸𑀳𑀫𑁆𑀧𑀺 𑀧𑀝𑀺𑀘𑁆𑀙𑀸𑀤𑀺𑀢𑁂 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀢𑁂 𑀤𑀺𑀯𑀲𑁂 𑀲𑀩𑁆𑀩𑁂 𑀫𑀓𑁆𑀔𑁂𑀢𑁆𑀯𑀸 𑀢𑀸𑀦𑁂𑀯 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀼𑀦𑀧𑀺 𑀬𑀲𑁆𑀫𑀸 𑀧𑀤𑀻𑀬𑀢𑁂𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀢𑁆𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀳𑀼𑀢𑁆𑀯𑀸𑀧𑀺 𑀳𑀺 𑀏𑀓𑀤𑀺𑀯𑀲𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦𑀧𑀺 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀧𑀭𑀺𑀯𑀸𑀲𑀸𑀭𑀳𑁄 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨).

𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸𑀢𑀺 𑀢𑁂𑀦 𑀆𑀧𑀦𑁆𑀦𑀸𑀲𑀼 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀧𑀼𑀭𑁂𑀢𑀭𑀫𑁂𑀯 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸. 𑀫𑀽𑀮𑀤𑀺𑀯𑀲𑁂𑀢𑀺 𑀧𑀞𑀫𑀁 𑀯𑀻𑀢𑀺𑀓𑁆𑀓𑀫𑀤𑀺𑀯𑀲𑁂. 𑀯𑀺𑀦𑀺𑀘𑁆𑀙𑀺𑀢𑁂𑀢𑀺 ‘‘𑀅𑀲𑀼𑀓𑀲𑀁𑀯𑀘𑁆𑀙𑀭𑁂 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀤𑀺𑀯𑀲𑁂’’𑀢𑀺 𑀦𑀺𑀬𑀫𑀺𑀢𑁂. 𑀲𑀫𑁄𑀥𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀥𑀸𑀦𑀢𑁄 𑀬𑀸𑀘𑀫𑀸𑀦𑀲𑁆𑀲𑀸𑀢𑀺 𑀯𑀺𑀥𑀸𑀦𑀢𑁄 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀬𑀸𑀘𑀫𑀸𑀦𑀲𑁆𑀲 𑀢𑀢𑁆𑀣𑁂𑀯 𑀯𑀼𑀢𑁆𑀢𑀯𑀺𑀥𑀺𑀦𑀸 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. ‘‘𑀏𑀲𑁄 𑀑𑀥𑀸𑀦𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄’’𑀢𑀺 𑀧𑀤𑀘𑁆𑀙𑁂𑀤𑁄.

𑁫𑁨𑁮-𑁯. 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀲𑀁 𑀅𑀕𑁆𑀖𑀯𑀲𑁂𑀦 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. ‘‘𑀲𑁄𑀢𑀺 𑀢𑀁𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 ‘‘𑀬𑁄’’𑀢𑀺 𑀮𑀩𑁆𑀪𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀲𑀫𑁆𑀩𑀳𑀼𑀮𑀸…𑀧𑁂… 𑀢𑀸𑀲𑀁 𑀅𑀕𑁆𑀖𑀯𑀲𑁂𑀦 𑀢𑀢𑁄 𑀊𑀦𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀁 ¶ 𑀲𑀫𑁄𑀥𑀸𑀬 𑀬𑁄 𑀬𑀲𑁆𑀫𑀸 𑀧𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄, 𑀢𑀲𑁆𑀫𑀸 𑀲𑁄 𑀬𑀣𑀸 𑀅𑀯𑀬𑀯𑀢𑁆𑀣𑀯𑀲𑁂𑀦 ¶ ‘‘𑀑𑀥𑀸𑀦𑀲𑀫𑁄𑀥𑀸𑀦𑁄’’𑀢𑀺 𑀧𑀭𑀺𑀯𑀸𑀲𑁄 𑀯𑀼𑀢𑁆𑀢𑁄, 𑀢𑀣𑀸 ‘‘𑀅𑀕𑁆𑀖𑀲𑀫𑁄𑀥𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀢𑀢𑁆𑀣 𑀲𑀫𑁆𑀩𑀳𑀼𑀮𑀸𑀲𑀽𑀢𑀺 𑀬𑀸𑀲𑀁 𑀆𑀧𑀢𑁆𑀢𑀻𑀦𑀁 𑀧𑀭𑀺𑀯𑀲𑀺𑀢𑀼𑀓𑀸𑀫𑁄, 𑀢𑀸𑀲𑀼 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. ‘‘𑀏𑀓𑀸 𑀯𑀸’’𑀢𑀺𑀆𑀤𑀺 𑀦𑀺𑀤𑁆𑀥𑀸𑀭𑀺𑀬𑀦𑀺𑀤𑁆𑀤𑁂𑀲𑁄. 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁. 𑀅𑀕𑁆𑀖𑀯𑀲𑁂𑀦𑀸𑀢𑀺 𑀕𑀡𑀦𑀯𑀲𑁂𑀦, 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀸𑀲𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). ‘‘𑀧𑀤𑀸𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀢𑁄. 𑀊𑀦𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀦𑁆𑀢𑀺 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀊𑀦𑀧𑀝𑀺𑀘𑁆𑀙𑀦𑁆𑀦𑀸𑀬𑁄 𑀆𑀧𑀢𑁆𑀢𑀺𑀬𑁄 𑀲𑀫𑁄𑀥𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁩𑁦. 𑀦𑀸𑀦𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀦𑀺 𑀯𑀢𑁆𑀣𑀽𑀦𑀺 𑀬𑀸𑀲𑀁 𑀢𑀸 𑀦𑀸𑀦𑀸𑀯𑀢𑁆𑀣𑀼𑀓𑀸, 𑀦𑀸𑀦𑀸𑀯𑀢𑁆𑀣𑀼𑀓𑀸 𑀲𑀜𑁆𑀜𑀸 𑀬𑀸𑀲𑀁 𑀆𑀧𑀢𑁆𑀢𑀻𑀦𑀁 𑀢𑀸 𑀦𑀸𑀦𑀸𑀯𑀢𑁆𑀣𑀼𑀓𑀲𑀜𑁆𑀜𑀸𑀬𑁄. 𑀲𑀩𑁆𑀩𑀸𑀢𑀺 𑀏𑀢𑁆𑀣 ‘‘𑀬𑀸’’𑀢𑀺 𑀲𑁂𑀲𑁄, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀼𑀮𑀤𑀽𑀲𑀦𑀸𑀯𑀲𑀸𑀦𑀸 𑀬𑀸 𑀲𑀩𑁆𑀩𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀢𑀸 𑀲𑀩𑁆𑀩𑀸𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑁄. 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀧𑀭𑀺𑀯𑀸𑀲𑁄’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀸 𑀲𑀩𑁆𑀩𑀸𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑁄𑀧𑀺 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀳𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁…𑀧𑁂… 𑀏𑀓𑀁 𑀓𑀼𑀮𑀤𑀽𑀲𑀓𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀦𑀸𑀬 𑀘 𑀢𑀤𑀦𑀼𑀭𑀽𑀧𑀸𑀬 𑀜𑀢𑁆𑀢𑀺𑀬𑀸 𑀘 𑀓𑀫𑁆𑀫𑀯𑀸𑀘𑀸𑀲𑀼 𑀘 𑀦𑀸𑀫𑀁 ¶ 𑀯𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑁄 𑀫𑀢𑁄 ‘‘𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄’’𑀢𑀺 𑀜𑀸𑀢𑁄. 𑀤𑁆𑀯𑁂, 𑀢𑀺𑀲𑁆𑀲𑁄, 𑀘𑀢𑀲𑁆𑀲𑁄, 𑀅𑀢𑀺𑀭𑁂𑀓𑀸 𑀘 𑀆𑀧𑀦𑁆𑀦𑀲𑁆𑀲𑀸𑀧𑀺 𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑁂𑀦 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀯𑀢𑁆𑀣𑀼𑀁, 𑀦𑀸𑀫𑀁 𑀯𑀺𑀲𑁂𑀲𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸.

𑁫𑁩𑁧. 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲𑀸𑀢𑀺 𑀢𑀺𑀯𑀺𑀥𑁂 𑀧𑀭𑀺𑀯𑀸𑀲𑁂 𑀅𑀜𑁆𑀜𑀢𑀭𑀲𑁆𑀲 𑀯𑀲𑁂𑀦 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲. 𑀉𑀢𑁆𑀢𑀭𑀺 𑀙 𑀭𑀢𑁆𑀢𑀺𑀬𑁄𑀢𑀺 𑀧𑀭𑀺𑀯𑀸𑀲𑀢𑁄 𑀉𑀢𑁆𑀢𑀭𑀺 𑀙 𑀭𑀢𑁆𑀢𑀺𑀬𑁄, 𑀙 𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀘𑀭𑀺𑀢𑀼’’𑀦𑁆𑀢𑀺 𑀲𑁂𑀲𑁄, 𑀘𑀭𑀡𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀫𑀸𑀦𑀢𑁆𑀢𑀁 𑀤𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸, ‘‘𑀲𑀗𑁆𑀖𑁂𑀦𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀸 ¶ 𑀮𑀩𑁆𑀪𑀢𑀺. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑁆𑀯𑀸 𑀙𑀸𑀭𑀢𑁆𑀢𑀜𑁆𑀘 𑀤𑀸𑀢𑀩𑁆𑀩𑁄, 𑀪𑀺𑀓𑁆𑀔𑀼𑀫𑀸𑀦𑀦𑀯𑀺𑀥𑀺 𑀪𑀺𑀓𑁆𑀔𑀼𑀲𑁆𑀲 𑀤𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

‘‘𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀧𑀓𑀢𑀁, 𑀢𑀢𑁆𑀣 𑀧𑀪𑁂𑀤𑁂 𑀅𑀲𑀢𑀺 𑀓𑀲𑁆𑀫𑀸 ‘‘𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀯𑀲𑀸 𑀤𑀼𑀯𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀧𑀓𑀢𑀪𑁂𑀤𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀙𑀸𑀭𑀢𑁆𑀢𑀫𑀸𑀦𑀢𑁆𑀢𑁂 𑀮𑀩𑁆𑀪𑀫𑀸𑀦𑀯𑀺𑀲𑀬𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑁂 𑀘 ‘‘𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀤𑁂𑀢𑀽’’𑀢𑀺 (𑀘𑀽𑀴𑀯. 𑁧𑁨𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 ‘‘𑀢𑀺𑀥𑀸’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀢𑀫𑁆𑀧𑀺 𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀬𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲𑁂𑀯 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀯𑀘𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀘𑀢𑀼𑀩𑁆𑀩𑀺𑀥𑁂 𑀫𑀸𑀦𑀢𑁆𑀢𑁂 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀯𑀺𑀦𑀸 𑀤𑀲𑁆𑀲𑁂𑀢𑀩𑁆𑀩𑁂𑀲𑀼 𑀤𑁆𑀯𑀻𑀲𑀼 𑀫𑀸𑀦𑀢𑁆𑀢𑁂𑀲𑀼 𑀧𑀓𑁆𑀔𑀫𑀸𑀦𑀢𑁆𑀢𑀫𑀢𑁆𑀢𑀁 ‘‘𑀙𑀸𑀤𑁂𑀦𑁆𑀢𑀺𑀬𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀤𑀲𑁆𑀲𑁂𑀢𑁆𑀯𑀸 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁 𑀯𑀺𑀲𑀼𑀁 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁩𑁪-𑁬. 𑀯𑀺𑀦𑀺𑀤𑁆𑀤𑀺𑀝𑁆𑀞𑀧𑁆𑀧𑀓𑀸𑀭𑀦𑁆𑀢𑀺 ‘‘𑀧𑀭𑀺𑀓𑁆𑀔𑀺𑀢𑁆𑀢𑀯𑀺𑀳𑀸𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀕𑀸𑀣𑀸𑀤𑁆𑀯𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑀧𑁆𑀧𑀓𑀸𑀭𑀁. 𑀆𑀤𑀺𑀬𑀺𑀢𑁆𑀯𑀸𑀦 𑀢𑀁 ¶ 𑀢𑁂𑀲𑀦𑁆𑀢𑀺 𑀏𑀢𑁆𑀣 ‘‘𑀲𑀦𑁆𑀢𑀺𑀓𑁂’’𑀢𑀺 𑀯𑀓𑁆𑀔𑀫𑀸𑀦𑀢𑁄 𑀮𑀩𑁆𑀪𑀢𑀺. 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀼𑀔𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑀁 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀁 𑀢𑁂𑀲𑀁 𑀲𑀦𑁆𑀢𑀺𑀓𑁂’’𑀢𑀺 𑀇𑀤𑀁 ‘‘𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸𑀧𑀺 𑀬𑀼𑀚𑁆𑀚𑀢𑀺. 𑀢𑁂𑀲𑀫𑁂𑀯 𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁂𑀦 ‘‘𑀅𑀳𑀁 𑀪𑀦𑁆𑀢𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀸𑀕𑀢𑀁 𑀆𑀭𑁄𑀘𑀦𑀁 𑀓𑀢𑁆𑀯𑀸. 𑀇𑀫𑀺𑀦𑀸 𑀅𑀦𑁆𑀢𑁄𑀅𑀭𑀼𑀡𑁂 𑀤𑀺𑀝𑁆𑀞𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀆𑀭𑁄𑀘𑀦𑀁 𑀉𑀧𑀮𑀓𑁆𑀔𑀺𑀢𑀁.

𑀦𑀺𑀓𑁆𑀔𑀺𑀧𑁂 𑀲𑀦𑁆𑀢𑀺𑀓𑁂 𑀢𑁂𑀲𑀁 𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 ‘‘𑀅𑀭𑀼𑀡𑁂 𑀉𑀝𑁆𑀞𑀺𑀢𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀫𑀸𑀦𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀏𑀓𑀁 𑀯𑀸 𑀤𑁆𑀯𑀬𑀫𑁂𑀯 𑀯𑀸 𑀯𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑁂.

𑁫𑁩𑁭. 𑀢𑀲𑁆𑀲 𑀫𑀸𑀦𑀢𑁆𑀢𑀲𑁆𑀲. 𑀭𑀢𑁆𑀢𑀺𑀘𑁆𑀙𑁂𑀤𑀸𑀤𑀺𑀓𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑀢𑁆𑀢𑀪𑁂𑀤𑁄 𑀕𑀳𑀺𑀢𑁄. 𑀅𑀝𑁆𑀞𑀓𑀣𑀸𑀯𑀲𑁂𑀦 𑀧𑀸𑀴𑀺𑀯𑀲𑁂𑀦𑀸𑀢𑀺 𑀬𑁄𑀚𑀦𑀸.

𑁫𑁩𑁮. 𑀯𑀻𑀲𑀢𑀺𑀬𑀸 ¶ 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑁄 𑀲𑀫𑀽𑀳𑁄 𑀯𑀻𑀲𑀢𑀺𑀯𑀕𑁆𑀕𑁄, 𑀲𑁄 𑀏𑀯 𑀯𑀻𑀲𑀢𑀺𑀯𑀕𑁆𑀕𑀺𑀓𑁄. 𑀅𑀩𑁆𑀪𑁂𑀬𑁆𑀬𑀸𑀢𑀺 𑀑𑀲𑀸𑀭𑁂𑀬𑁆𑀬, 𑀅𑀩𑁆𑀪𑀦𑁆𑀢𑀭𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀥𑀺𑀦𑀸𑀢𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀸𑀕𑀢𑀓𑁆𑀓𑀫𑁂𑀦. 𑀅𑀩𑁆𑀪𑀺𑀢𑁄𑀢𑀺 𑀲𑀁𑀯𑀸𑀲𑁂𑀦 𑀅𑀦𑁆𑀢𑁄 𑀓𑀢𑁄, 𑀧𑀓𑀢𑀢𑁆𑀢𑁄𑀢𑀺 𑀧𑀓𑀢𑀺𑀲𑀪𑀸𑀯𑁄, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀦𑁆𑀦𑀓𑀸𑀮𑀲𑀤𑀺𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁫𑁩𑁯. 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀬𑁄𑀚𑀦𑀸, ‘‘𑀆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀲𑁂𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀆𑀧𑀢𑁆𑀢𑀺 𑀘𑀸’’𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁫𑁦𑁫) 𑀦𑀬𑁂𑀦 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑁂𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸. 𑀦 𑀘 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀺𑀲𑁆𑀲𑀸 ¶ 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺𑀬𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸𑀲𑀗𑁆𑀔𑀸𑀢𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀪𑀸𑀯𑀁 𑀤𑀻𑀧𑁂𑀢𑀺.

𑁫𑁪𑁧. 𑀯𑀺𑀭𑀼𑀤𑁆𑀥𑀫𑀢𑁆𑀣𑀁 𑀦𑀬𑀢𑀺 𑀧𑀚𑀳𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀯𑀺𑀦𑀬𑀧𑀺𑀝𑀓𑀢𑁆𑀣𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀯𑀺𑀲𑀬𑀁 𑀲𑀫𑁆𑀫𑁄𑀳𑀲𑀗𑁆𑀔𑀸𑀢𑀁 𑀯𑀺𑀭𑀼𑀤𑁆𑀥𑀁 𑀧𑀘𑁆𑀘𑀢𑁆𑀣𑀺𑀓𑀁 𑀢𑀤𑀗𑁆𑀕𑀯𑀲𑁂𑀦 𑀧𑀚𑀳𑀦𑀢𑁄 𑀯𑀺𑀦𑀬𑀦𑀬𑀲𑀗𑁆𑀔𑀸𑀢𑀁 𑀢𑀢𑁄 𑀏𑀯 𑀅𑀢𑀺𑀩𑀼𑀤𑁆𑀥𑀺𑀤𑀻𑀧𑀦𑀁, 𑀅𑀢𑀺𑀲𑀬𑁂𑀦 𑀩𑀼𑀤𑁆𑀥𑀺𑀁 𑀤𑀻𑀧𑁂𑀢𑀻𑀢𑀺 𑀅𑀢𑀺𑀩𑀼𑀤𑁆𑀥𑀺𑀤𑀻𑀧𑀦𑀁, 𑀢𑀁 𑀯𑀺𑀦𑀬𑀢𑁆𑀣𑀯𑀺𑀦𑀺𑀘𑁆𑀙𑀬𑀓𑀁 𑀜𑀸𑀡𑀧𑀤𑀻𑀧𑀁 𑀯𑀺𑀲𑁂𑀲𑁂𑀦 𑀚𑀸𑀮𑁂𑀦𑁆𑀢𑀁. 𑀯𑀺𑀯𑀺𑀥𑁂𑀳𑀺 𑀦𑀬𑁂𑀳𑀺 𑀬𑀼𑀢𑁆𑀢𑀢𑀸𑀬 𑀯𑀺𑀯𑀺𑀥𑀦𑀬𑀬𑀼𑀢𑀁. 𑀯𑀺𑀦𑀬𑀦𑀬𑁂𑀢𑀺 𑀯𑀺𑀦𑀬𑀧𑀺𑀝𑀓𑀲𑁆𑀲 𑀧𑀭𑀲𑀦𑁆𑀢𑀸𑀦𑀧𑀸𑀧𑀦𑁂, 𑀯𑀺𑀦𑀬𑀯𑀡𑁆𑀡𑀦𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸

𑁫𑁪𑁨-𑁩. 𑀇𑀤𑀸𑀦𑀺 ¶ 𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀦𑀦𑁆𑀢𑀭𑀁 𑀅𑀦𑀺𑀬𑀢𑀓𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦𑀸’’𑀢𑀺𑀆𑀤𑀺. 𑀭𑀳𑀲𑀺 𑀦𑀺𑀲𑀚𑁆𑀚𑀸 𑀭𑀳𑁄𑀦𑀺𑀲𑀚𑁆𑀚𑀸, 𑀢𑀲𑁆𑀲𑀸 𑀅𑀲𑁆𑀲𑀸𑀤𑁄 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄, 𑀢𑁂𑀦 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦, 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀓𑀺𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁫𑁧). ‘‘𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁪𑁫) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀭𑀳𑁂𑀲𑀼 ¶ 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘𑀲𑁄𑀢𑀲𑁆𑀲 𑀭𑀳𑁄’𑀢𑀺 𑀆𑀕𑀢𑀁, 𑀘𑀓𑁆𑀔𑀼𑀲𑁆𑀲 𑀭𑀳𑁂𑀦𑁂𑀯 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁪𑁪-𑁪𑁪𑁫).

𑀘𑀓𑁆𑀔𑀼𑀲𑁆𑀲 𑀭𑀳𑀢𑁆𑀢𑀸 ‘‘𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀇𑀫𑀫𑁆𑀧𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀏𑀯 ‘‘𑀅𑀮𑀁𑀓𑀫𑁆𑀫𑀦𑀺𑀬’’𑀦𑁆𑀢𑀺 𑀇𑀫𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀲𑀚𑁆𑀚𑀲𑀤𑁆𑀤𑁄𑀧𑀸𑀤𑀸𑀦𑁂𑀦 ‘‘𑀆𑀲𑀦𑁂’’𑀢𑀺 𑀇𑀤𑀫𑁆𑀧𑀺 𑀕𑀳𑀺𑀢𑀫𑁂𑀯. ‘‘𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄’’𑀢𑀺 𑀇𑀫𑀺𑀦𑀸 ‘‘𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀇𑀤𑀫𑁆𑀧𑀺 𑀕𑀳𑀺𑀢𑀫𑁂𑀯. 𑀏𑀯𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀧𑀤𑁄𑀧𑀸𑀤𑀸𑀦𑁂𑀦 𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀓𑁆𑀔𑀼𑀲𑁆𑀲 𑀭𑀳𑀪𑀸𑀯𑁂𑀦 𑀓𑀼𑀝𑁆𑀝𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑁂 𑀢𑁂𑀦𑁂𑀯 𑀫𑁂𑀣𑀼𑀦𑀲𑁂𑀯𑀦𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑁂 𑀆𑀲𑀦𑁂 𑀢𑀤𑀳𑀼𑀚𑀸𑀢𑀸𑀬𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀳 𑀦𑀺𑀲𑀚𑁆𑀚𑀲𑁆𑀲𑀸𑀤𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 ‘‘𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺 𑀢𑀤𑀳𑀼𑀚𑀸𑀢𑀫𑁆𑀧𑀺 𑀇𑀢𑁆𑀣𑀺𑀁 𑀕𑀡𑁆𑀳𑀸𑀢𑀻𑀢𑀺 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻’’𑀢𑀺 (𑀧𑀸𑀭𑀸. 𑁪𑁪𑁫) 𑀧𑀤𑀪𑀸𑀚𑀦𑀢𑁄 𑀮𑀩𑁆𑀪𑀢𑀺.

‘‘𑀦𑀺𑀯𑀸𑀲𑁂𑀢𑀻’’𑀢𑀺 𑀇𑀫𑀺𑀦𑀸 ‘‘𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀢𑀻’’𑀢𑀺 𑀇𑀤𑀁 𑀮𑀓𑁆𑀔𑀻𑀬𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀬𑁄𑀕𑀢𑁄 𑀧𑀼𑀩𑁆𑀩𑀸𑀧𑀭𑀧𑀬𑁄𑀕𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯 ‘‘𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘𑀸’’𑀢𑀺 𑀯𑀺𑀘𑁆𑀙𑀸𑀧𑀬𑁄𑀕𑁄 𑀓𑀢𑁄. 𑀦𑀺𑀲𑀻𑀤𑀢𑁄 𑀘𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. ‘‘𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀤𑀼𑀓𑁆𑀓𑀝𑀁 𑀲𑀦𑁆𑀥𑀸𑀬 𑀏𑀓𑀓𑀲𑁆𑀲 𑀦𑀺𑀲𑀻𑀤𑀢𑁄𑀢𑀺 𑀕𑀳𑁂𑀢𑀩𑁆𑀩𑀁.

𑁫𑁪𑁪. 𑀦𑀺𑀲𑀚𑁆𑀚𑀸𑀬 ¶ 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀏𑀢𑁆𑀣 ‘‘𑀲𑀓𑀺’’𑀦𑁆𑀢𑀺 𑀲𑁂𑀲𑁄, 𑀉𑀪𑀺𑀦𑁆𑀦𑀁 𑀦𑀺𑀲𑀚𑁆𑀚𑀸𑀧𑀽𑀭𑀡𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀏𑀓𑀓𑁆𑀔𑀡𑁂 ¶ 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀏𑀓𑀯𑀸𑀭𑀁 𑀦𑀺𑀲𑀚𑁆𑀚𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀸𑀴𑀺𑀬𑀁 ‘‘𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁪𑁪𑁫). 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀬𑁄𑀕𑀕𑀡𑀦𑀸𑀬 𑀘 𑀳𑁄𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀯𑀸 𑀉𑀪𑀺𑀦𑁆𑀦𑀁 𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀉𑀧𑀦𑀺𑀲𑀻𑀤𑀦𑀧𑀬𑁄𑀕𑀕𑀡𑀦𑀸𑀬 𑀘𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀕𑁆𑀕𑀳𑀡𑀁 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀉𑀧𑀮𑀓𑁆𑀔𑀡𑀁 𑀳𑁄𑀢𑀺, 𑀢𑀻𑀲𑀼 𑀏𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 ‘‘𑀧𑀬𑁄𑀕𑀕𑀡𑀦𑀸𑀬𑀸’’𑀢𑀺 𑀇𑀤𑀁 𑀧𑀸𑀭𑀸𑀚𑀺𑀓𑀸𑀬 𑀦 𑀮𑀩𑁆𑀪𑀢𑀺 𑀏𑀓𑀧𑀬𑁄𑀕𑁂𑀦𑁂𑀯 𑀲𑀺𑀚𑁆𑀛𑀦𑀢𑁄. 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀦 𑀲𑀭𑀻𑀭𑀢𑁄 𑀧𑀼𑀦𑀧𑁆𑀧𑀼𑀦𑀁 𑀯𑀺𑀬𑀼𑀚𑁆𑀚𑀺𑀢𑁆𑀯𑀸 𑀨𑀼𑀲𑀦𑁂𑀦 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀮𑀩𑁆𑀪𑀢𑀺.

𑀩𑀳𑀽𑀲𑀼𑀧𑀺 𑀫𑀸𑀢𑀼𑀕𑀸𑀫𑁂𑀲𑀼 𑀩𑀳𑀼𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀩𑀳𑀽𑀲𑀼 𑀫𑀸𑀢𑀼𑀕𑀸𑀫𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀕𑀡𑀦𑀸𑀬 𑀏𑀓𑁂𑀦𑁂𑀯 𑀧𑀬𑁄𑀕𑁂𑀦 𑀩𑀳𑀽𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑀘 𑀳𑁄𑀦𑁆𑀢𑀺. ‘‘𑀧𑀬𑁄𑀕𑀕𑀡𑀦𑀸𑀬 𑀘𑀸’’𑀢𑀺 𑀇𑀫𑀲𑁆𑀲 𑀏𑀢𑁆𑀣𑀸𑀧𑀺 𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀢𑀸𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀦𑁆𑀢𑀻𑀲𑀼, 𑀲𑀬𑀜𑁆𑀘 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀢𑁄 𑀢𑀸𑀲𑀁 𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑁄 𑀧𑀬𑁄𑀕𑀕𑀡𑀦𑀸𑀬 𑀘 𑀩𑀳𑀽 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀮𑀩𑁆𑀪𑀢𑀺. 𑀏𑀢𑁆𑀣𑀸𑀧𑀺 𑀧𑀦 𑀧𑀸𑀭𑀸𑀚𑀺𑀓𑀁 𑀦 𑀮𑀩𑁆𑀪𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀮𑀩𑁆𑀪𑀢𑀺.

𑁫𑁪𑁫. 𑀲𑀫𑀻𑀧𑁂 𑀞𑀺𑀢𑁄𑀧𑀺 𑀅𑀦𑁆𑀥𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀲𑁄𑀢𑀲𑁆𑀲 𑀭𑀳𑀪𑀸𑀯𑁂 𑀅𑀲𑀢𑀺𑀧𑀺 𑀧𑀥𑀸𑀦𑀪𑀽𑀢𑀲𑁆𑀲 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺 𑀇𑀫𑀲𑁆𑀲 𑀅𑀗𑁆𑀕𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀓𑁂’’𑀢𑀺, 𑀇𑀫𑀺𑀦𑀸 𑀲𑀯𑀦𑀽𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁆𑀣𑀻𑀦𑀁 𑀢𑀼 𑀲𑀢𑀫𑁆𑀧𑀺 𑀘 𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀦𑁆𑀢𑀺 ¶ 𑀬𑁄𑀚𑀦𑀸, 𑀯𑀺𑀜𑁆𑀜𑀼𑀦𑁄 𑀧𑀼𑀭𑀺𑀲𑀲𑁆𑀲 𑀅𑀲𑀦𑁆𑀦𑀺𑀳𑀺𑀢𑀪𑀸𑀯𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀢𑁆𑀣𑀻𑀦𑀫𑁆𑀧𑀺 𑀲𑀢𑀫𑁆𑀧𑀺 𑀘𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀢𑁄𑀧𑀺 𑀅𑀬𑀫𑁂𑀯 𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀧𑀺-𑀲𑀤𑁆𑀤𑁄 𑀯𑀸 𑀢𑀼-𑀲𑀤𑁆𑀤𑀢𑁆𑀣𑁂 𑀤𑀝𑁆𑀞𑀩𑁆𑀩𑁄.

𑁫𑁪𑁬. 𑀦𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀫𑀻𑀧𑁂’’𑀢𑀺 𑀲𑁂𑀲𑁄, ‘‘𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀻’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀓𑁂𑀦 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀢𑀺 𑀇𑀫𑀲𑁆𑀲 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀦𑁆𑀥𑁄 𑀫𑀦𑀼𑀲𑁆𑀲𑀧𑀼𑀭𑀺𑀲𑁄 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀮𑀩𑁆𑀪𑀢𑀺. ‘‘𑀓𑁂𑀯𑀮’’𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀩𑀮𑀯𑀦𑀺𑀤𑁆𑀤𑀽𑀧𑀕𑀢𑁄 ¶ 𑀕𑀳𑀺𑀢𑁄𑀢𑀺 𑀢𑀣𑀸 𑀅𑀳𑀼𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀆𑀧𑀦𑁆𑀦𑀸𑀧𑀦𑁆𑀦𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀓𑀧𑀺𑀦𑀺𑀤𑁆𑀤𑀸𑀬 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. ‘‘𑀧𑀺𑀳𑀺𑀢𑀤𑁆𑀯𑀸𑀭𑀕𑀩𑁆𑀪𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑀧𑀤𑀮𑁄𑀧𑀻𑀲𑀫𑀸𑀲𑀯𑀲𑁂𑀦 ‘‘𑀧𑀺𑀳𑀺𑀢𑀕𑀩𑁆𑀪𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑀸𑀭𑁂’’𑀢𑀺 𑀇𑀫𑀺𑀦𑀸 𑀤𑁆𑀯𑀸𑀭𑁂𑀓𑀤𑁂𑀲𑀪𑀽𑀢𑀁 𑀉𑀫𑁆𑀫𑀸𑀭𑀁 𑀯𑀸 𑀢𑀁𑀲𑀫𑀻𑀧𑀁 𑀯𑀸 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀕𑀩𑁆𑀪𑁄 𑀧𑀺𑀳𑀺𑀢𑀤𑁆𑀯𑀸𑀭𑁄 𑀦 𑀳𑁄𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀺𑀢𑀁.

𑁫𑁪𑁭. 𑀇𑀫𑀲𑁆𑀫𑀺𑀁 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑁂 𑀧𑀸𑀴𑀺𑀬𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀲𑀢𑀺𑀧𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁮𑁫) 𑀧𑀜𑁆𑀘𑀫𑀲𑁆𑀲 𑀅𑀘𑁂𑀮𑀓𑀯𑀕𑁆𑀕𑀲𑁆𑀲 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀦𑀸𑀧𑀢𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀺, 𑀢𑀺𑀝𑁆𑀞𑀢𑀺 𑀦 𑀦𑀺𑀲𑀻𑀤𑀢𑀺, 𑀅𑀭𑀳𑁄𑀧𑁂𑀓𑁆𑀔𑁄, 𑀅𑀜𑁆𑀜𑀯𑀺𑀳𑀺𑀢𑁄 𑀦𑀺𑀲𑀻𑀤𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀘𑀺. 𑁨𑁮𑁮) 𑀯𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀅𑀦𑀦𑁆𑀥𑁂 𑀲𑀢𑀻’’𑀢𑀺𑀆𑀤𑀺. ‘‘𑀏𑀢𑀲𑁆𑀲 𑀲𑀫𑀻𑀧𑁂’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀇𑀥 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁂𑀦 𑀧𑀼𑀭𑀺𑀲𑁄 𑀮𑀩𑁆𑀪𑀢𑀺, ‘‘𑀢𑁂𑀦𑀸𑀧𑀺 𑀅𑀩𑀸𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀜𑁆𑀘 ¶ ‘‘𑀯𑀺𑀜𑁆𑀜𑀼𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀮𑀩𑁆𑀪𑀢𑀺. 𑀅𑀦𑁆𑀥𑀲𑀤𑀺𑀲𑀦𑀺𑀤𑁆𑀤𑀽𑀧𑀕𑀢𑀧𑀝𑀺𑀧𑀓𑁆𑀔𑀯𑀸𑀘𑀺𑀅𑀦𑀦𑁆𑀥𑀧𑀤𑁂𑀦 ‘‘𑀅𑀦𑀺𑀤𑁆𑀤𑀸𑀬𑀦𑁆𑀢𑁂’’𑀢𑀺 𑀮𑀩𑁆𑀪𑀢𑀺, 𑀫𑀦𑀸𑀧𑀸𑀫𑀦𑀸𑀧𑀁 𑀚𑀸𑀦𑀦𑁆𑀢𑁂 𑀅𑀦𑀺𑀤𑁆𑀤𑀸𑀬𑀦𑁆𑀢𑁂 𑀫𑀦𑀼𑀲𑁆𑀲𑀧𑀼𑀭𑀺𑀲𑁂 𑀤𑀲𑁆𑀲𑀦𑀽𑀧𑀘𑀸𑀭𑀲𑁆𑀲 𑀅𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁂𑀢𑀺 𑀅𑀢𑁆𑀣𑁄.

‘‘𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀏𑀯𑀭𑀽𑀧𑁂 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀞𑀺𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸𑀧𑀺 𑀢𑀤𑁂𑀯 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀜𑁆𑀜𑀼𑀫𑁆𑀳𑀺 𑀧𑀝𑀺𑀩𑀮𑁂 𑀫𑀦𑀼𑀲𑁆𑀲𑀧𑀼𑀭𑀺𑀲𑁂 𑀅𑀲𑀦𑁆𑀦𑀺𑀳𑀺𑀢𑁂𑀧𑀺 𑀢𑀣𑀸𑀯𑀺𑀥𑁂 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂𑀧𑀺 𑀲𑀬𑀸𑀦𑁂𑀧𑀺 𑀞𑀺𑀢𑁂𑀧𑀺 𑀲𑀬𑀁 𑀞𑀺𑀢𑀲𑁆𑀲 𑀦𑀺𑀲𑀚𑁆𑀚𑀸𑀬 𑀅𑀪𑀸𑀯𑀸 𑀢𑀧𑁆𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀭𑀳𑀲𑀜𑁆𑀜𑀺𑀦𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀭𑀳𑁄 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀚𑁆𑀚𑀦𑁆𑀢𑀲𑁆𑀲𑀸𑀧𑀺 ‘‘𑀭𑀳𑁄’’𑀢𑀺 𑀲𑀜𑁆𑀜𑀸𑀭𑀳𑀺𑀢𑀲𑁆𑀲 𑀦𑀺𑀲𑀻𑀤𑀢𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀺𑀢𑁆𑀢𑀘𑁂𑀢𑀲𑁄 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁫𑁪𑁮. 𑀏𑀢𑁆𑀢𑀸𑀯𑀢𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀫𑀢𑁆𑀢𑀢𑁄 𑀅𑀦𑀸𑀧𑀢𑁆𑀢𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀺𑀬𑀢𑀯𑁄𑀳𑀸𑀭𑀳𑁂𑀢𑀼𑀪𑀽𑀢𑀸𑀳𑀺 𑀢𑀻𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦 𑀤𑁄𑀲𑁄’’𑀢𑀺𑀆𑀤𑀺. 𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀻𑀢𑀺 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 ¶ 𑀓𑀸𑀭𑁂𑀢𑀩𑁆𑀩𑁄 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁪𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀳𑀺 ‘‘𑀧𑀞𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻’’𑀢𑀺 𑀇𑀫𑀸𑀳𑀺 𑀢𑀻𑀳𑀺𑀧𑀺 𑀆𑀧𑀢𑁆𑀢𑀻𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑀧𑀞𑀫𑀸𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸.

𑁫𑁪𑁯. 𑀯𑀢𑁆𑀢𑀩𑁆𑀩𑀪𑀸𑀯𑁂𑀦𑀸𑀥𑀺𑀓𑀢𑀤𑀼𑀢𑀺𑀬𑀸𑀦𑀺𑀬𑀢𑀯𑀺𑀦𑀺𑀘𑁆𑀙𑀬𑀢𑁄 𑀧𑀞𑀫𑀸𑀦𑀺𑀬𑀢𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀳𑀺 𑀲𑀫𑀁 𑀯𑀺𑀦𑀺𑀘𑁆𑀙𑀬𑀁 𑀧𑀳𑀸𑀬 𑀢𑀢𑁆𑀣 ¶ 𑀅𑀯𑀼𑀢𑁆𑀢𑀁 𑀇𑀫𑀲𑁆𑀲𑁂𑀯 𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀦𑁆𑀥𑀸’’𑀢𑀺𑀆𑀤𑀺. 𑀇𑀥 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸 𑀢𑀢𑁄 𑀅𑀦𑀸𑀧𑀢𑁆𑀢𑀺𑀓𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀩𑀥𑀺𑀭𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀦𑁆𑀥𑁄 𑀅𑀩𑀥𑀺𑀭𑁄𑀢𑀺 ‘‘𑀧𑀼𑀭𑀺𑀲𑁄’’𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀇𑀢𑁆𑀣𑀻’’𑀢𑀺 𑀇𑀤𑀁 𑀲𑀦𑁆𑀥𑀸𑀬 ‘‘𑀅𑀦𑀦𑁆𑀥𑀸𑀩𑀥𑀺𑀭𑀸’’𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀫𑀼𑀧𑀭𑀺𑀧𑀺. 𑀢𑁂𑀦𑀸𑀧𑀺 𑀲𑀯𑀦𑀽𑀧𑀘𑀸𑀭𑀦𑁆𑀢𑁄𑀕𑀥𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁.

𑁫𑁫𑁦. ‘‘𑀅𑀦𑁆𑀥𑁄 𑀅𑀩𑀥𑀺𑀭𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻’’𑀢𑀺 𑀇𑀤𑀁 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀩𑀥𑀺𑀭𑁄 𑀯𑀸𑀧𑀺 𑀘𑀓𑁆𑀔𑀼𑀫𑀸, 𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺’’𑀦𑁆𑀢𑀺 𑀇𑀤𑀁 𑀧𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑀦𑁆𑀥𑀸𑀬 𑀪𑀸𑀲𑀺𑀢𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀺𑀫𑀸𑀦𑀺𑀬𑀢𑀓𑀣𑀸𑀬 𑀅𑀯𑀼𑀢𑁆𑀢𑀯𑀺𑀲𑁂𑀲𑀲𑁆𑀲 𑀤𑀼𑀢𑀺𑀬𑀸𑀦𑀺𑀬𑀢𑀓𑀣𑀸𑀬 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀇𑀥 𑀯𑀢𑁆𑀢𑀩𑁆𑀩𑁄. 𑀓𑁄𑀬𑀁 𑀯𑀺𑀲𑁂𑀲𑁄, 𑀬𑁄 𑀇𑀥 𑀯𑀢𑁆𑀢𑀩𑁆𑀩𑁄𑀢𑀺 𑀘𑁂? 𑀢𑀢𑁆𑀣 ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂’’𑀢𑀺 (𑀧𑀸𑀭𑀸. 𑁪𑁪𑁪) 𑀯𑀼𑀢𑁆𑀢𑀁 𑀆𑀲𑀦𑀗𑁆𑀕𑀤𑁆𑀯𑀬𑀁 𑀇𑀥 ‘‘𑀦 𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑀁 𑀳𑁄𑀢𑀺 𑀦𑀸𑀮𑀁𑀓𑀫𑁆𑀫𑀦𑀺𑀬’’𑀦𑁆𑀢𑀺 (𑀧𑀸𑀭𑀸. 𑁪𑁫𑁩) 𑀦𑀺𑀲𑁂𑀥𑁂𑀢𑁆𑀯𑀸 ‘‘𑀅𑀮𑀜𑁆𑀘 𑀔𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁫𑁩) 𑀇𑀤𑀁 𑀅𑀧𑀼𑀩𑁆𑀩𑀗𑁆𑀕𑀁 𑀯𑀼𑀢𑁆𑀢𑀁. 𑀢𑀢𑁆𑀭 𑀫𑀸𑀢𑀼𑀕𑀸𑀫𑁄𑀢𑀺 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸 𑀕𑀳𑀺𑀢𑀸, 𑀇𑀥 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁫𑁪) 𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀫𑀸𑀢𑀼𑀕𑀸𑀫𑁄𑀯 𑀯𑀼𑀢𑁆𑀢𑁄. 𑀢𑀢𑁆𑀣 ‘‘𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁪𑁪) 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀇𑀥 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 ¶ 𑀓𑀸𑀭𑁂𑀢𑀩𑁆𑀩𑁄 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁫𑁩) 𑀤𑁆𑀯𑁂𑀬𑁂𑀯 𑀆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸. 𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀼 𑀘 𑀢𑀢𑁆𑀣 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑁄 ¶ 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁪𑁮) 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀯𑀼𑀢𑁆𑀢𑁄, 𑀇𑀥 𑀲𑁄 𑀘 𑀯𑀼𑀢𑁆𑀢𑁄, ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑁂𑀦𑁆𑀢𑀲𑁆𑀲𑀸’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁪𑁫𑁫) 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑁄 𑀘 𑀯𑀼𑀢𑁆𑀢𑁄. 𑀏𑀢𑁆𑀢𑀓𑁄 𑀉𑀪𑀺𑀦𑁆𑀦𑀫𑀦𑀺𑀬𑀢𑀸𑀦𑀁 𑀯𑀺𑀲𑁂𑀲𑁄.

𑀅𑀬𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺? 𑀅𑀬𑀁 𑀲𑀫𑁆𑀩𑁄𑀥𑀯𑀢𑁆𑀣𑀼𑀯𑀺𑀲𑁂𑀲𑁄 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄 𑀧𑀦 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀢𑁄𑀢𑀺 𑀢𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀺𑀤𑀁 𑀓𑀸𑀬𑀘𑀺𑀢𑁆𑀢𑀯𑀸𑀘𑀸𑀘𑀺𑀢𑁆𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀲𑁂𑀦 𑀢𑀻𑀡𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸.

𑀇𑀫𑁂𑀳𑀺𑀧𑀺 𑀤𑁆𑀯𑀻𑀳𑀺 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀬𑁂𑀯 𑀆𑀧𑀢𑁆𑀢𑀺𑀬𑁄, 𑀅𑀦𑀸𑀧𑀢𑁆𑀢𑀺𑀬𑁄 𑀘 𑀤𑀲𑁆𑀲𑀺𑀢𑀸, 𑀦 𑀓𑁄𑀘𑀺 𑀆𑀧𑀢𑁆𑀢𑀺𑀯𑀺𑀲𑁂𑀲𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀓𑀺𑀫𑁂𑀢𑁂𑀲𑀁 𑀯𑀘𑀦𑁂𑀦𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁 𑀞𑀧𑁂𑀢𑀼𑀁 𑀪𑀕𑀯𑀢𑀸 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀤𑁆𑀯𑁂 𑀅𑀦𑀺𑀬𑀢𑀸 𑀧𑀜𑁆𑀜𑀢𑁆𑀢𑀸. 𑀓𑀣𑀁? 𑀏𑀯𑀭𑀽𑀧𑀸𑀬𑀧𑀺 𑀲𑀤𑁆𑀥𑁂𑀬𑁆𑀬𑀯𑀘𑀦𑀸𑀬 𑀉𑀧𑀸𑀲𑀺𑀓𑀸𑀬 𑀯𑀼𑀘𑁆𑀘𑀫𑀸𑀦𑁄 𑀧𑀝𑀺𑀚𑀸𑀦𑀫𑀸𑀦𑁄𑀯 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄, 𑀢𑀲𑁆𑀫𑀸 ‘‘𑀬𑀸𑀬 𑀓𑀸𑀬𑀘𑀺 𑀆𑀧𑀢𑁆𑀢𑀺𑀬𑀸 𑀬𑁂𑀦 𑀓𑁂𑀦𑀘𑀺 𑀘𑁄𑀤𑀺𑀢𑁂 𑀧𑀝𑀺𑀜𑁆𑀜𑀸𑀢𑀓𑀭𑀡𑀁𑀬𑁂𑀯𑀗𑁆𑀕𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑁂𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀁 𑀞𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀓𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀺𑀬𑀢𑀁 ¶ 𑀦 𑀯𑀼𑀢𑁆𑀢𑀦𑁆𑀢𑀺? 𑀇𑀤𑀫𑁂𑀯 𑀮𑀓𑁆𑀔𑀡𑀁 𑀲𑀩𑁆𑀩𑀢𑁆𑀣 𑀅𑀦𑀼𑀕𑀢𑀦𑁆𑀢𑀺 𑀦 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀸𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀅𑀦𑀺𑀬𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸

𑁫𑁫𑁧. 𑀏𑀯𑀁 𑀅𑀦𑀺𑀬𑀢𑀓𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀔𑁄𑀫’’𑀦𑁆𑀢𑀺𑀆𑀤𑀺 ¶ . 𑀔𑁄𑀫𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀘𑀻𑀯𑀭𑀁. 𑀔𑁄𑀫𑀦𑁆𑀢𑀺 𑀕𑀘𑁆𑀙𑀯𑀺𑀲𑁂𑀲𑀲𑁆𑀲 𑀦𑀸𑀫𑀁, 𑀢𑀲𑁆𑀲 𑀯𑀸𑀓𑁂𑀳𑀺 𑀓𑀢𑀘𑀻𑀯𑀭𑀁 𑀓𑀸𑀭𑀡𑁄𑀧𑀘𑀸𑀭𑀯𑁄𑀳𑀸𑀭𑀯𑀲𑁂𑀦 ‘‘𑀔𑁄𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀧𑁆𑀧𑀸𑀲𑀦𑁆𑀢𑀺 𑀓𑀧𑁆𑀧𑀸𑀲𑀲𑀼𑀢𑁆𑀢𑀫𑀬𑀁 𑀘𑀻𑀯𑀭𑀁, 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀓𑀧𑁆𑀧𑀸𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁄𑀲𑁂𑀬𑁆𑀬𑀁 𑀦𑀸𑀫 𑀓𑁄𑀲𑀓𑀸𑀭𑀓𑀺𑀫𑀺𑀓𑁄𑀲𑀁, 𑀓𑁄𑀲𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀼𑀢𑁆𑀢𑀁 𑀓𑁄𑀲𑁂𑀬𑁆𑀬𑀁. 𑀇𑀥 𑀧𑀦 𑀢𑁂𑀦 𑀓𑁄𑀲𑁂𑀬𑁆𑀬𑀲𑀼𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀻𑀯𑀭𑀁 ‘‘𑀓𑁄𑀲𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀡𑀦𑁆𑀢𑀺 𑀲𑀸𑀡𑀯𑀸𑀓𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀇𑀤𑀜𑁆𑀘 𑀔𑁄𑀫𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀪𑀗𑁆𑀕𑀦𑁆𑀢𑀺 𑀔𑁄𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀇𑀤𑀫𑁆𑀧𑀺 𑀓𑀭𑀡𑀧𑁆𑀧𑀓𑀸𑀭𑁂𑀦 𑀮𑀤𑁆𑀥𑀦𑀸𑀫𑀓𑀁. ‘‘𑀪𑀗𑁆𑀕𑀁 𑀦𑀸𑀫 𑀏𑀓𑀸 𑀕𑀘𑁆𑀙𑀚𑀸𑀢𑀺, 𑀢𑀲𑁆𑀲𑀸 𑀯𑀸𑀓𑀫𑀬𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭’’𑀦𑁆𑀢𑀺 𑀓𑁂𑀘𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀔𑁄𑀫𑀁 𑀯𑀺𑀬 𑀕𑀳𑁂𑀢𑀩𑁆𑀩𑀁. 𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀫𑀯𑀸𑀴𑀮𑁄𑀫𑀁 𑀯𑀺𑀦𑀸 𑀲𑁂𑀲𑀮𑁄𑀫𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀘𑀻𑀯𑀭𑀁 𑀯𑀼𑀢𑁆𑀢𑀦𑁆𑀢𑀺. 𑀇𑀤𑀁 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭’’𑀦𑁆𑀢𑀺 (𑀧𑀸𑀭𑀸. 𑁪𑁬𑁩) 𑀧𑀤𑀪𑀸𑀚𑀦𑁂 𑀘 ‘‘𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁨-𑁪𑁬𑁩) 𑀅𑀝𑁆𑀞𑀓𑀣𑀸𑀬 𑀘 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. ‘‘𑀚𑀸𑀢𑀺𑀢𑁄’’𑀢𑀺 ¶ 𑀇𑀤𑀁 𑀧𑀫𑀸𑀡𑀸𑀤𑀺𑀪𑁂𑀤𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀚𑀸𑀢𑀺𑀢𑁄𑀢𑀺 𑀔𑁄𑀫𑀸𑀤𑀺𑀲𑀸𑀫𑀜𑁆𑀜𑀢𑁄. 𑀲𑀸𑀫𑀜𑁆𑀜𑀜𑁆𑀳𑀺 ‘‘𑀚𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀤𑀻𑀖𑀭𑀲𑁆𑀲𑀣𑀽𑀮𑀲𑀼𑀔𑀼𑀫𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀯𑀢𑁆𑀣𑀸𑀯𑀬𑀯𑀸𑀦𑀁 𑀲𑀗𑁆𑀕𑀸𑀳𑀺𑀓𑀔𑁄𑀫𑀲𑀼𑀢𑁆𑀢𑀫𑀬𑀢𑀸𑀲𑀸𑀫𑀜𑁆𑀜𑀁 𑀚𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁫𑁫𑁨. 𑀤𑀼𑀓𑀽𑀮𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀭𑀼𑀓𑁆𑀔𑀯𑀸𑀓𑀫𑀬𑀘𑀻𑀯𑀭𑀁. 𑀧𑀢𑁆𑀢𑀼𑀡𑁆𑀡𑀦𑁆𑀢𑀺 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀲𑀜𑁆𑀚𑀸𑀢𑀯𑀢𑁆𑀣𑀁. ‘‘𑀧𑀢𑁆𑀢𑀼𑀡𑁆𑀡𑀁 𑀓𑁄𑀲𑁂𑀬𑁆𑀬𑀯𑀺𑀲𑁂𑀲𑁄’’𑀢𑀺 𑀅𑀪𑀺𑀥𑀸𑀦𑀓𑁄𑀲𑁂 𑀯𑀼𑀢𑁆𑀢𑀁. 𑀘𑀺𑀦𑀦𑁆𑀢𑀺 𑀘𑀺𑀦𑀤𑁂𑀲𑁂 𑀉𑀧𑁆𑀧𑀦𑁆𑀦𑀯𑀢𑁆𑀣𑀁. 𑀲𑁄𑀫𑀸𑀭𑀧𑀝𑁆𑀝𑀓𑀦𑁆𑀢𑀺 𑀲𑁄𑀫𑀸𑀭𑀤𑁂𑀲𑁂 𑀉𑀧𑁆𑀧𑀦𑁆𑀦𑀯𑀢𑁆𑀣𑀁. ‘‘𑀲𑁄𑀫𑀸𑀭𑀘𑀺𑀦𑀧𑀝𑀓’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀲𑁄𑀬𑁂𑀯𑀢𑁆𑀣𑁄. 𑀇𑀤𑁆𑀥𑀺𑀚𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀁 𑀘𑀻𑀯𑀭𑀁. 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀤𑁂𑀯𑀢𑀸𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁. 𑀢𑀜𑁆𑀳𑀺 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁, 𑀚𑀸𑀮𑀺𑀦𑀺𑀬𑀸 𑀤𑁂𑀯𑀓𑀜𑁆𑀜𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀲𑀤𑀺𑀲𑀁. 𑀢𑀲𑁆𑀲𑀸𑀢𑀺 𑀚𑀸𑀢𑀺𑀢𑁄 𑀙𑀩𑁆𑀩𑀺𑀥𑀲𑁆𑀲 𑀓𑀧𑁆𑀧𑀺𑀬𑀘𑀻𑀯𑀭𑀲𑁆𑀲. 𑀇𑀤𑀁 𑀙𑀩𑁆𑀩𑀺𑀥𑀘𑀻𑀯𑀭𑀁 𑀬𑀣𑀸𑀭𑀳𑀁 𑀅𑀦𑀼𑀮𑁄𑀫𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑀽𑀮𑀜𑁆𑀳𑀺 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸, 𑀧𑀢𑁆𑀢𑀼𑀡𑁆𑀡𑀸𑀤𑀻𑀦𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸, 𑀇𑀤𑁆𑀥𑀺𑀚𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀅𑀦𑀼𑀮𑁄𑀫𑀁, 𑀤𑁂𑀯𑀤𑀺𑀦𑁆𑀦𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀢𑁂𑀲𑀁 𑀅𑀜𑁆𑀜𑀢𑀭𑀪𑀸𑀯𑀢𑁄. 𑀬𑀣𑀸𑀳 𑁋

‘‘𑀲𑀸𑀡𑀲𑁆𑀲 𑀢𑀼 𑀤𑀼𑀓𑀽𑀮𑀜𑁆𑀳𑀺, 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀓𑀁;

𑀔𑁄𑀫𑀸𑀤𑀻𑀦𑀁𑀯𑀲𑀺𑀝𑁆𑀞𑀁𑀢𑀼, 𑀓𑁄𑀲𑁂𑀬𑁆𑀬𑀲𑁆𑀲𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺.

𑁫𑁫𑁩. 𑀢𑀺𑀡𑁆𑀡𑀁 ¶ 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀘𑀻𑀯𑀭𑀦𑁆𑀢𑀺 𑀧𑀫𑀸𑀡𑀬𑀼𑀢𑁆𑀢𑀁 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲𑁂𑀯 𑀦𑀸𑀫𑀢𑁆𑀢𑀸 𑀢𑀤𑁂𑀯 𑀯𑀼𑀘𑁆𑀘𑀢𑀺. 𑀕𑀡𑀦𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀢𑁆𑀢𑀬𑀁 𑀦 𑀯𑀢𑁆𑀢𑀩𑁆𑀩𑀁. 𑀲𑀫𑀼𑀤𑁆𑀤𑁂𑀓𑀤𑁂𑀲𑁄𑀧𑀺 𑀬𑀣𑀸 ‘‘𑀲𑀫𑀼𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂𑀲𑀼 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀁 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 ¶ 𑀲𑀗𑁆𑀖𑀸𑀝𑀺𑀆𑀤𑀺𑀯𑀺𑀲𑀺𑀝𑁆𑀞𑀦𑀸𑀫𑁂𑀳𑀺 𑀅𑀦𑀥𑀺𑀝𑁆𑀞𑀺𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭’’𑀦𑁆𑀢𑀺 (𑀧𑀸𑀭𑀸. 𑁩𑁫𑁮) 𑀅𑀦𑀼𑀜𑁆𑀜𑀸𑀢𑀁 𑀧𑀘𑁆𑀙𑀺𑀫𑀘𑀻𑀯𑀭𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀢𑀸𑀓𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀻𑀯𑀭𑀲𑁆𑀲 𑀭𑀼𑀴𑁆𑀳𑀺𑀲𑀜𑁆𑀜𑀸.

𑀫𑀼𑀔𑀁 𑀲𑀦𑁆𑀤𑀫𑀸𑀦𑀮𑀸𑀮𑀁 𑀧𑀼𑀜𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀼𑀔𑀧𑀼𑀜𑁆𑀙𑀦𑀦𑁆𑀢𑀺 𑀓𑀧𑁄𑀮𑀢𑁄 𑀦𑀺𑀘𑁆𑀘𑀁 𑀲𑀦𑁆𑀤𑀫𑀸𑀦𑀮𑀸𑀮𑀸𑀦𑀁 𑀧𑀼𑀜𑁆𑀙𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀲𑁆𑀲 𑀘𑀻𑀯𑀭𑀯𑀺𑀲𑁂𑀲𑀲𑁆𑀲 𑀦𑀸𑀫𑀁. 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀲𑀻𑀤𑀦𑀦𑁆𑀢𑀺 𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁. 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 ‘‘𑀇𑀫𑀁 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁫𑁮𑁫) 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀢𑁆𑀣𑀭𑀡𑀫𑁂𑀯 𑀘𑀸𑀢𑀺 𑀲𑀗𑁆𑀖𑀺𑀓𑁂 𑀫𑀜𑁆𑀘𑀧𑀻𑀞𑁂 𑀲𑀭𑀻𑀭𑀲𑀫𑁆𑀨𑀼𑀲𑀦𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀫𑁄𑀘𑀦𑀢𑁆𑀣𑀸𑀬 𑀢𑀢𑁆𑀣 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑁄𑀕𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀜𑁆𑀘.

𑁫𑁫𑁪. 𑀏𑀓𑀸𑀳𑀦𑁆𑀢𑀺 𑀯𑀲𑀦𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀘𑀻𑀯𑀭𑁂𑀦. 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 ‘‘𑀲𑀗𑁆𑀖𑀸𑀝𑀺𑀬𑀸 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀯𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀯𑀸’’𑀢𑀺 (𑀧𑀸𑀭𑀸. 𑁪𑁭𑁬) 𑀯𑀼𑀢𑁆𑀢𑀢𑁆𑀢𑀸 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 𑀅𑀯𑀬𑀯𑀲𑁆𑀲 𑀯𑀘𑀦𑀢𑁄 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑁂𑀦𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀯𑀺𑀦𑀸’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀅𑀥𑀺𑀝𑁆𑀞𑀸𑀢𑀺 𑀅𑀥𑀺𑀝𑁆𑀞𑀸𑀬𑀸𑀢𑀺 𑀕𑀳𑁂𑀢𑀩𑁆𑀩𑀁 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺 (𑀫. 𑀦𑀺. 𑁧.𑁨𑁨, 𑁨𑁩; 𑀅. 𑀦𑀺. 𑁬.𑁫𑁮) 𑀬𑀣𑀸, 𑀏𑀢𑁆𑀣 ‘‘𑀯𑀴𑀜𑁆𑀚𑀺𑀬𑀫𑀸𑀦’’𑀦𑁆𑀢𑀺 𑀲𑁂𑀲𑁄, 𑀅𑀥𑀺𑀝𑁆𑀞𑀸𑀬 𑀯𑀴𑀜𑁆𑀚𑀺𑀬𑀫𑀸𑀦𑀁 𑀦𑀺𑀲𑀻𑀤𑀦𑀁 𑀢𑀣𑀸 𑀯𑀺𑀦𑀸 𑀘𑀢𑀼𑀫𑀸𑀲𑀁 𑀦 𑀯𑀲𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁫𑁫𑁫. 𑀓𑀧𑁆𑀧𑀺𑀬𑀦𑁆𑀢𑀺 𑀓𑀧𑁆𑀧𑀺𑀬𑀓𑀸𑀭𑀡𑀁 𑀦𑀻𑀮𑀸𑀤𑀺𑀯𑀡𑁆𑀡𑀪𑁂𑀤𑀓𑀭𑀡𑀁. 𑀓𑀧𑁆𑀧𑀺𑀬𑀦𑁆𑀢𑀺 𑀘 𑀓𑀸𑀭𑀡𑁂 𑀓𑀸𑀭𑀺𑀬𑀽𑀧𑀘𑀸𑀭𑁂𑀦 𑀕𑀳𑁂𑀢𑀩𑁆𑀩𑀁. 𑀩𑀺𑀦𑁆𑀤𑀼𑀁 𑀤𑀢𑁆𑀯𑀸𑀢𑀺 ‘‘𑀦𑀻𑀮𑀁 𑀯𑀸 𑀓𑀤𑁆𑀤𑀫𑀁 𑀯𑀸 𑀓𑀸𑀴𑀲𑀸𑀫𑀁 𑀯𑀸’’𑀢𑀺 (𑀧𑀸𑀘𑀺. 𑁩𑁬𑁮) 𑀯𑀼𑀢𑁆𑀢𑀮𑁄𑀳𑀫𑀮𑀸𑀤𑀺𑀦𑀸 ¶ 𑀬𑁂𑀦 𑀓𑁂𑀦𑀘𑀺𑀧𑀺 𑀫𑀗𑁆𑀕𑀼𑀮𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀸𑀤𑀺𑀓𑀁 𑀩𑀺𑀦𑁆𑀤𑀼𑀁 𑀤𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀥𑀺𑀝𑁆𑀞𑀸𑀢𑀩𑁆𑀩𑁂𑀲𑀼 𑀢𑀺𑀘𑀻𑀯𑀭𑀸𑀤𑀻𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀺𑀘𑀻𑀯𑀭𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀁. 𑀉𑀧𑀧𑀦𑁆𑀦𑀦𑁆𑀢𑀺 𑀬𑀼𑀢𑁆𑀢𑀁. 𑀧𑀫𑀸𑀡𑁂𑀦𑀸𑀢𑀺 𑀅𑀦𑀦𑁆𑀢𑀭𑀁 𑀯𑀓𑁆𑀔𑀫𑀸𑀦𑁂𑀦 𑀧𑀫𑀸𑀡𑁂𑀦. 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 ¶ 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀏𑀯𑀓𑀸𑀭𑁂𑀦 𑀧𑀦 𑀦𑀸𑀫𑀁 𑀯𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑀘𑀻𑀯𑀭𑁂𑀲𑀼𑀧𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁩𑁫𑁮). 𑀢𑀲𑁆𑀫𑀸 𑀢𑀺𑀘𑀻𑀯𑀭𑀸𑀤𑀻𑀦𑀺 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀢𑀺𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀅𑀜𑁆𑀜𑀁 𑀯𑀸, 𑀬𑀤𑀺 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺, 𑀅𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁫𑁬-𑁭. ‘‘𑀉𑀧𑀧𑀦𑁆𑀦𑀁 𑀧𑀫𑀸𑀡𑁂𑀦𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀘𑁆𑀙𑀺𑀫𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀺. 𑀯𑀢𑁆𑀣𑀔𑀡𑁆𑀟𑀸𑀦𑀺 𑀲𑀺𑀩𑁆𑀩𑀦𑀓𑀫𑁆𑀫𑁂𑀦 𑀲𑀗𑁆𑀖𑀝𑁂𑀢𑁆𑀯𑀸 𑀓𑀢𑀢𑁆𑀢𑀸 ‘‘𑀲𑀗𑁆𑀖𑀸𑀝𑀻’’𑀢𑀺 𑀘𑀻𑀯𑀭𑀸𑀦𑀁 𑀲𑀸𑀫𑀜𑁆𑀜𑀦𑀸𑀫𑀁. 𑀇𑀥 𑀧𑀦 𑀭𑀼𑀴𑁆𑀳𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑀸𑀤𑀺𑀯𑀺𑀲𑁂𑀲𑀦𑀸𑀫𑀩𑁆𑀬𑀢𑀺𑀭𑀺𑀢𑁆𑀢𑁂 𑀘𑀻𑀯𑀭𑀯𑀺𑀲𑁂𑀲𑁂 𑀯𑀢𑁆𑀢𑀢𑀺. 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀢𑀺 𑀏𑀢𑁆𑀣 𑀏𑀓𑀸𑀤𑀻𑀦𑀫𑀝𑁆𑀞𑀸𑀭𑀲𑀦𑁆𑀢𑀸𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀸𑀦𑀁 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀜𑁆𑀘𑀲𑀤𑁆𑀤𑁄 𑀘𑀻𑀯𑀭𑀧𑁆𑀧𑀫𑀸𑀡𑀧𑁆𑀧𑀓𑀭𑀡𑀢𑁄 𑀮𑀩𑁆𑀪𑀫𑀸𑀦𑀳𑀢𑁆𑀣𑀲𑀗𑁆𑀔𑀸𑀢𑀭𑀢𑀦𑁂𑀬𑁂𑀯 𑀧𑀯𑀢𑁆𑀢𑀢𑀺, 𑀢𑁂𑀦𑁂𑀯 𑀫𑀼𑀝𑁆𑀞𑀺𑀲𑀤𑁆𑀤𑁄𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀫𑀼𑀝𑁆𑀞𑀺𑀭𑀢𑀦𑁂 𑀯𑀢𑁆𑀢𑀢𑀺. 𑀧𑀜𑁆𑀘𑀦𑁆𑀦𑀁 𑀧𑀽𑀭𑀡𑁄 𑀧𑀜𑁆𑀘𑀫𑁄, 𑀫𑀼𑀝𑁆𑀞𑀺𑀬𑀸 𑀧𑀜𑁆𑀘𑀫𑁄 𑀫𑀼𑀝𑁆𑀞𑀺𑀧𑀜𑁆𑀘𑀫𑁄. 𑀫𑀼𑀝𑁆𑀞𑀺𑀧𑀜𑁆𑀘𑀫𑁄 𑀧𑀭𑀺𑀫𑀸𑀡𑀫𑁂𑀢𑀺𑀲𑁆𑀲𑀸𑀢𑀺 ‘‘𑀫𑀼𑀝𑁆𑀞𑀺𑀧𑀜𑁆𑀘𑀫𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫-𑀓𑀸𑀭𑀮𑁄𑀧𑁂𑀦 ‘‘𑀫𑀼𑀝𑁆𑀞𑀺𑀧𑀜𑁆𑀘𑀓𑀸’’𑀢𑀺 𑀲𑀗𑁆𑀖𑀸𑀝𑀺 𑀯𑀼𑀢𑁆𑀢𑀸.

𑀫𑀼𑀝𑁆𑀞𑀺𑀢𑁆𑀢𑀺𑀓𑀸𑀢𑀺 ¶ 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀫𑀸𑀦𑁄 𑀢𑀺-𑀲𑀤𑁆𑀤𑁄 𑀘𑀻𑀯𑀭𑀧𑁆𑀧𑀫𑀸𑀡𑀧𑁆𑀧𑀓𑀭𑀡𑀢𑁄 𑀮𑀩𑁆𑀪𑀫𑀸𑀦𑀳𑀢𑁆𑀣𑀲𑀗𑁆𑀔𑀸𑀢𑀭𑀢𑀦𑁂𑀬𑁂𑀯 𑀯𑀢𑁆𑀢𑀢𑀺, 𑀢𑁂𑀦𑁂𑀯 𑀫𑀼𑀝𑁆𑀞𑀺𑀲𑀤𑁆𑀤𑁄𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀫𑀼𑀝𑁆𑀞𑀺𑀭𑀢𑀦𑁂 𑀯𑀢𑁆𑀢𑀢𑀺. 𑀢𑀺𑀡𑁆𑀡𑀁 𑀧𑀽𑀭𑀡𑁄 𑀢𑀢𑀺𑀬𑁄, 𑀫𑀼𑀝𑁆𑀞𑀺𑀬𑀸 𑀢𑀢𑀺𑀬𑁄 𑀫𑀼𑀝𑁆𑀞𑀺𑀢𑀢𑀺𑀬𑁄, 𑀫𑀼𑀝𑁆𑀞𑀺𑀢𑀢𑀺𑀬𑁄 𑀧𑀭𑀺𑀫𑀸𑀡𑀫𑁂𑀢𑀺𑀲𑁆𑀲𑀸𑀢𑀺 ‘‘𑀫𑀼𑀝𑁆𑀞𑀺𑀢𑀢𑀺𑀬𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀺𑀬-𑀧𑀘𑁆𑀘𑀬𑀮𑁄𑀧𑁂𑀦 ‘‘𑀫𑀼𑀝𑁆𑀞𑀺𑀢𑁆𑀢𑀺𑀓𑀸’’𑀢𑀺 𑀲𑀗𑁆𑀖𑀸𑀝𑀺𑀬𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀫𑀼𑀧𑀭𑀺𑀧𑀺. 𑀢𑀺𑀭𑀺𑀬𑀦𑁆𑀢𑀺 𑀢𑀺𑀭𑀺𑀬𑀢𑁄.

𑀉𑀢𑁆𑀢𑀫𑀦𑁆𑀢𑁂𑀦𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀫𑀸𑀡𑀦𑁆𑀢𑁂𑀦. 𑀲𑀢𑁆𑀣𑀼𑀦𑁄 𑀘𑀻𑀯𑀭𑀽𑀦𑀸𑀧𑀻𑀢𑀺 ‘‘𑀢𑀢𑁆𑀭𑀺𑀤𑀁 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁, 𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄’’𑀢𑀺 (𑀧𑀸𑀘𑀺. 𑁫𑁪𑁮) 𑀯𑀼𑀢𑁆𑀢𑀧𑁆𑀧𑀫𑀸𑀡𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀸𑀧𑀺. 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀢𑀢𑁆𑀢𑀓𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀢𑁄 𑀘𑁂 𑀊𑀦𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀤𑁆𑀯𑀬𑀲𑀦𑁆𑀤𑀲𑁆𑀲𑀦𑁂𑀦 𑀉𑀪𑀬𑀫𑀚𑁆𑀛𑁂 𑀬𑀁 𑀧𑀳𑁄𑀦𑀓𑀭𑀼𑀘𑁆𑀘𑀦𑀓𑀧𑁆𑀧𑀫𑀸𑀡𑀁, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫𑁫𑁮. 𑀫𑀼𑀝𑁆𑀞𑀺𑀧𑀜𑁆𑀘𑀓𑀲𑀤𑁆𑀤𑁄 ¶ 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀺𑀥 𑀤𑀻𑀖𑀦𑁆𑀢𑁂 𑀯𑀢𑁆𑀢𑀢𑀺. 𑀫𑀼𑀝𑁆𑀞𑀺𑀧𑀜𑁆𑀘𑀓𑁄 𑀤𑀻𑀖𑀦𑁆𑀢𑁄 𑀬𑀲𑁆𑀲, 𑀬𑀲𑁆𑀫𑀺𑀁 𑀯𑀸 𑀧𑀫𑀸𑀡𑁂𑀢𑀺 𑀯𑀺𑀕𑁆𑀕𑀳𑁄, 𑀤𑀻𑀖𑀦𑁆𑀢𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀧𑁆𑀧𑀫𑀸𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀫𑀼𑀝𑁆𑀞𑀺𑀧𑀜𑁆𑀘𑀫’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀢𑀺𑀭𑀺𑀬𑀦𑁆𑀢𑀢𑁄𑀢𑀺 𑀯𑀺𑀢𑁆𑀣𑀸𑀭𑀦𑁆𑀢𑀢𑁄. 𑀅𑀟𑁆𑀠𑀳𑀢𑁆𑀣𑁄 𑀅𑀟𑁆𑀠𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀲𑁄 𑀢𑁂𑀬𑁆𑀬𑁄 𑀢𑀢𑀺𑀬𑁄 𑀬𑀲𑁆𑀲 𑀧𑀫𑀸𑀡𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀁, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀳𑀢𑁆𑀣𑀁 𑀯𑀸𑀢𑀺 𑀤𑁆𑀯𑁂 𑀳𑀢𑁆𑀣𑀸 𑀬𑀲𑁆𑀲 𑀧𑀫𑀸𑀡𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀤𑁆𑀯𑀺𑀭𑀢𑀦𑀧𑁆𑀧𑀫𑀸𑀡𑀁 𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 ‘‘𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀺. 𑀧𑀸𑀭𑀼𑀧𑀦𑁂𑀦𑀧𑀺 𑀳𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀲𑁂𑀲𑁂 𑀅𑀦𑁆𑀢𑀭𑀯𑀸𑀲𑀓𑁂’’𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀫𑀸𑀡𑁂𑀦 𑀧𑀭𑀺𑀫𑀺𑀢𑀘𑀻𑀯𑀭𑀦𑀺𑀤𑀲𑁆𑀲𑀦𑀁.

𑁫𑁫𑁯. 𑀅𑀳𑀢𑀸𑀳𑀢𑀓𑀧𑁆𑀧𑀸𑀦𑀦𑁆𑀢𑀺 ¶ 𑀏𑀢𑁆𑀣 ‘‘𑀯𑀢𑁆𑀣𑀸𑀦’’𑀦𑁆𑀢𑀺 𑀲𑁂𑀲𑁄. 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀦𑀯𑀯𑀢𑁆𑀣𑀸𑀦𑀁. 𑀅𑀳𑀢𑀢𑁄 𑀓𑀺𑀜𑁆𑀘𑀺 𑀊𑀦𑀸𑀦𑀺 𑀅𑀳𑀢𑀓𑀧𑁆𑀧𑀸𑀦𑀺, 𑀢𑁂𑀲𑀁 𑀦𑀯𑀯𑁄𑀳𑀸𑀭𑀽𑀧𑀕𑀸𑀦𑀁 𑀓𑀢𑀺𑀧𑀬𑀥𑁄𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀖𑀸𑀝𑀻𑀢𑀺 𑀲𑀗𑁆𑀖𑀸𑀝𑀺𑀦𑀸𑀫𑀓𑀘𑀻𑀯𑀭𑀁. 𑀤𑀺𑀕𑀼𑀡𑀸𑀢𑀺 𑀤𑀼𑀧𑀝𑁆𑀝𑀓𑀢𑀸.

𑁫𑁬𑁦. 𑀉𑀢𑀼𑀤𑁆𑀥𑀝𑀸𑀦𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀤𑀺𑀯𑀲𑀸𑀦𑀁, 𑀩𑀳𑀼𑀓𑀸𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀭𑀺𑀘𑁆𑀘𑀢𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀸𑀦𑀺 𑀉𑀢𑀼𑀢𑁄 𑀉𑀤𑁆𑀥𑀝𑀸𑀦𑀺, 𑀢𑁂𑀲𑀁 𑀯𑀢𑁆𑀣𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀺𑀡𑁆𑀡𑀁 𑀉𑀢𑀽𑀦𑀫𑀜𑁆𑀜𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀁 𑀧𑀼𑀭𑀸𑀡𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀻𑀯𑀭𑀸𑀦𑀦𑁆𑀢𑀺 𑀘𑀻𑀯𑀭𑀢𑁆𑀣𑀸𑀦𑀺 𑀯𑀢𑁆𑀣𑀸𑀦𑁂𑀯 𑀕𑀳𑀺𑀢𑀸𑀦𑀺. 𑀘𑀢𑀼𑀕𑁆𑀕𑀼𑀡𑀸𑀢𑀺 𑀘𑀢𑀼𑀧𑀝𑁆𑀝𑀸. 𑀲𑁂𑀲𑀸 𑀤𑀼𑀯𑁂𑀢𑀺 𑀅𑀦𑁆𑀢𑀭𑀯𑀸𑀲𑀓𑀉𑀢𑁆𑀢𑀭𑀸𑀲𑀗𑁆𑀕𑀸 𑀤𑁆𑀯𑁂. 𑀬𑀣𑀸𑀲𑀼𑀔𑀦𑁆𑀢𑀺 𑀬𑀣𑀸𑀭𑀼𑀘𑀺. 𑀧𑀁𑀲𑀼𑀓𑀽𑀮𑀦𑁆𑀢𑀺 𑀲𑀼𑀲𑀸𑀦𑀸𑀤𑀻𑀲𑀼 𑀧𑀢𑀺𑀢𑀧𑀺𑀮𑁄𑀢𑀺𑀓𑀘𑀻𑀯𑀭𑀁.

𑁫𑁬𑁧. ‘‘𑀢𑀻𑀡𑀺𑀧𑀻’’𑀢𑀺𑀆𑀤𑀻𑀲𑀼 ‘‘𑀢𑀺𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀯𑀢𑁆𑀣𑀼𑀫𑁆𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀙𑀺𑀦𑁆𑀦𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁦) 𑀆𑀤𑀺𑀯𑀘𑀦𑀢𑁄 ‘‘𑀘𑀻𑀯𑀭’’𑀦𑁆𑀢𑀺 𑀲𑁂𑀲𑁄. 𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀧𑀳𑁄𑀢𑀺 𑀘𑁂𑀢𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀭𑀡𑁂 𑀬𑀤𑀺 𑀘𑀻𑀯𑀭𑀲𑁆𑀲 𑀧𑀳𑁄𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼. 𑀅𑀧𑁆𑀧𑀳𑁄𑀦𑁆𑀢𑁂𑀲𑀽𑀢𑀺 𑀯𑀢𑁆𑀣𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀩𑁆𑀩𑀦𑁂𑀦 𑀅𑀧𑁆𑀧𑀳𑁄𑀦𑁆𑀢𑁂𑀲𑀼. 𑀅𑀦𑁆𑀯𑀸𑀥𑀺𑀓𑀦𑁆𑀢𑀺 𑀯𑀢𑁆𑀣𑁂 𑀊𑀦𑀸𑀢𑀺𑀭𑁂𑀓𑀁 𑀅𑀧𑀦𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑀧𑀢𑁆𑀢𑀲𑀗𑁆𑀔𑀸𑀢𑀁 𑀅𑀦𑀼𑀯𑀸𑀢𑀁 𑀘𑀻𑀯𑀭𑀲𑁆𑀲 𑀧𑀭𑀺𑀬𑀦𑁆𑀢𑁂, 𑀫𑀚𑁆𑀛𑁂 𑀘 𑀬𑀣𑀸𑀭𑀳𑀁 𑀤𑀻𑀖𑀭𑀲𑁆𑀲𑀧𑀭𑀺𑀫𑀸𑀡𑀬𑀼𑀢𑁆𑀢𑀁 𑀅𑀮𑁆𑀮𑀺𑀬𑀸𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁬𑁨. 𑀅𑀘𑁆𑀙𑀺𑀦𑁆𑀦𑀁 𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀘𑁆𑀙𑀺𑀦𑁆𑀦𑀁 𑀯𑀸. 𑀅𑀦𑀸𑀤𑀺𑀦𑁆𑀦𑀦𑁆𑀢𑀺 𑀅𑀦𑀸𑀤𑀺𑀦𑁆𑀦𑀆𑀕𑀦𑁆𑀢𑀼𑀓𑀧𑀢𑁆𑀢𑀁 ¶ . 𑀢𑀺𑀘𑀻𑀯𑀭𑀦𑁆𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀏𑀓𑁂𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀩𑁆𑀪𑁄𑀕𑁂𑀦𑀸𑀢𑀺 𑀤𑀼𑀝𑁆𑀞𑀼 𑀧𑀭𑀺𑀪𑁄𑀕𑁂𑀦 ¶ . 𑀬𑀣𑀸 𑀧𑀭𑀺𑀪𑀼𑀢𑁆𑀢𑀁 𑀦𑀲𑁆𑀲𑀢𑀺, 𑀢𑀣𑀸 𑀓𑀺𑀮𑀺𑀝𑁆𑀞𑀸𑀦𑀁 𑀥𑁄𑀯𑀦𑀸𑀤𑀺𑀫𑀓𑀢𑁆𑀯𑀸 𑀦𑀺𑀯𑀸𑀲𑀦𑀸𑀤𑀺𑀦𑀸 𑀧𑀭𑀺𑀪𑁄𑀕𑁂𑀦.

𑁫𑁬𑁩-𑁪. 𑀓𑀼𑀲𑀺𑀦𑁆𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀼𑀯𑀸𑀢𑀁 𑀘𑀻𑀯𑀭𑀫𑀚𑁆𑀛𑁂 𑀢𑀸𑀤𑀺𑀲𑀫𑁂𑀯 𑀤𑀻𑀖𑀧𑀢𑁆𑀢𑀜𑁆𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀘𑀻𑀯𑀭𑀓𑁆𑀔𑀦𑁆𑀥𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀲𑀻𑀢𑀺 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀼𑀯𑀸𑀢𑀸𑀤𑀻𑀦𑀁 𑀤𑀻𑀖𑀧𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀟𑁆𑀠𑀓𑀼𑀲𑀺𑀦𑁆𑀢𑀺 𑀅𑀦𑀼𑀯𑀸𑀢𑀲𑀤𑀺𑀲𑀁 𑀘𑀻𑀯𑀭𑀫𑀚𑁆𑀛𑁂 𑀢𑀢𑁆𑀣 𑀢𑀢𑁆𑀣 𑀭𑀲𑁆𑀲𑀧𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀟𑁆𑀠𑀓𑀼𑀲𑀻𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀭𑀲𑁆𑀲𑀧𑀢𑁆𑀢𑀸𑀦𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀫𑀡𑁆𑀟𑀮𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀡𑁆𑀟𑁂 𑀫𑀳𑀸𑀫𑀡𑁆𑀟𑀮𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀫𑀡𑁆𑀟𑀮𑀦𑁆𑀢𑀺 𑀧𑀜𑁆𑀘𑀔𑀡𑁆𑀟𑀺𑀓𑀘𑀻𑀯𑀭𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀔𑀡𑁆𑀟𑁂 𑀫𑀳𑀸𑀫𑀡𑁆𑀟𑀮’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀟𑁆𑀠𑀫𑀡𑁆𑀟𑀮𑀦𑁆𑀢𑀺 𑀫𑀡𑁆𑀟𑀮𑀲𑁆𑀲 𑀅𑀦𑁆𑀢𑁄 𑀦𑀺𑀯𑁂𑀲𑀺𑀬𑀫𑀸𑀦𑀁 𑀔𑀼𑀤𑁆𑀤𑀓𑀫𑀡𑁆𑀟𑀮𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀟𑁆𑀠𑀫𑀡𑁆𑀟𑀮𑀦𑁆𑀢𑀺 𑀔𑀼𑀤𑁆𑀤𑀓𑀫𑀡𑁆𑀟𑀮’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀯𑀺𑀯𑀝𑁆𑀝𑀦𑁆𑀢𑀺 𑀫𑀡𑁆𑀟𑀮𑀁, 𑀅𑀟𑁆𑀠𑀫𑀡𑁆𑀟𑀮𑀜𑁆𑀘𑀸𑀢𑀺 𑀤𑁆𑀯𑁂 𑀏𑀓𑀢𑁄 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀯𑁂𑀫𑀚𑁆𑀛𑁂 𑀔𑀡𑁆𑀟𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀯𑀺𑀯𑀝𑁆𑀝𑀦𑁆𑀢𑀺 𑀫𑀡𑁆𑀟𑀮𑀜𑁆𑀘 𑀅𑀟𑁆𑀠𑀫𑀡𑁆𑀟𑀮𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀫𑀚𑁆𑀛𑀺𑀫𑀔𑀡𑁆𑀟’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀫𑀚𑁆𑀛𑀺𑀫𑀔𑀡𑁆𑀟𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀺𑀩𑁆𑀩𑀺𑀢𑀁 𑀢𑀣𑁂𑀯 𑀤𑁆𑀯𑀺𑀫𑀡𑁆𑀟𑀮𑀧𑀢𑁆𑀢𑀁 𑀔𑀡𑁆𑀟𑀤𑁆𑀯𑀬𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀔𑀡𑁆𑀟𑀸𑀦𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀩𑀸𑀳𑀦𑁆𑀢𑀦𑁆𑀢𑀺 𑀢𑁂𑀲𑀁 𑀅𑀦𑀼𑀯𑀺𑀯𑀝𑁆𑀝𑀸𑀦𑀁 𑀩𑀸𑀳𑀺𑀭𑀧𑀲𑁆𑀲𑁂 𑀲𑀺𑀩𑁆𑀩𑀺𑀢𑀁 𑀩𑀸𑀳𑀺𑀭𑀔𑀡𑁆𑀟𑀤𑁆𑀯𑀬𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀩𑀸𑀳𑀦𑁆𑀢𑀦𑁆𑀢𑀺 𑀢𑁂𑀲𑀁 𑀅𑀦𑀼𑀯𑀺𑀯𑀝𑁆𑀝𑀸𑀦𑀁 𑀩𑀳𑀺 𑀏𑀓𑁂𑀓𑀁 𑀔𑀡𑁆𑀟’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫).

𑀧𑀜𑁆𑀘𑀦𑁆𑀦𑀁 𑀲𑀫𑀸𑀳𑀸𑀭𑁄 𑀧𑀜𑁆𑀘𑀓𑀁, 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀧𑀜𑁆𑀘𑀔𑀡𑁆𑀟𑁂𑀳𑀺 𑀲𑀺𑀩𑁆𑀩𑀺𑀢𑀘𑀻𑀯𑀭𑀁 𑀧𑀜𑁆𑀘𑀓𑀁 𑀦𑀸𑀫. 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀢𑀔𑀡𑁆𑀟𑀸𑀤𑀻𑀳𑀺 𑀲𑀺𑀩𑁆𑀩𑀺𑀢𑀘𑀻𑀯𑀭𑀸𑀦𑀁 𑀕𑀳𑀡𑀁. 𑀢𑁂𑀦𑁂𑀯𑁂𑀢𑁆𑀣𑀸𑀳 ‘‘𑀓𑀢𑁆𑀢𑀩𑁆𑀩𑀁 𑀢𑀼 𑀢𑀺𑀘𑀻𑀯𑀭’’𑀦𑁆𑀢𑀺. 𑀲𑀢𑁆𑀢𑀔𑀡𑁆𑀟𑀲𑁆𑀲 𑀘𑀻𑀯𑀭𑀲𑁆𑀲 𑀏𑀓𑀁 𑀫𑀚𑁆𑀛𑀺𑀫𑀔𑀡𑁆𑀟𑀁 𑀯𑀺𑀯𑀝𑁆𑀝𑀦𑀸𑀫𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀔𑀡𑁆𑀟𑀸𑀦𑀺 ¶ 𑀘𑀽𑀴𑀸𑀦𑀼𑀯𑀺𑀯𑀝𑁆𑀝𑀫𑀳𑀸𑀦𑀼𑀯𑀺𑀯𑀝𑁆𑀝𑀲𑀗𑁆𑀔𑀸𑀢𑀸𑀦𑀺 𑀅𑀦𑀼𑀯𑀺𑀯𑀝𑁆𑀝𑀦𑀸𑀫𑀸𑀦𑁂𑀯 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀣 𑀯𑀸 𑀅𑀦𑀼𑀯𑀺𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀲𑁆𑀲 𑀏𑀓𑀧𑀲𑁆𑀲𑀢𑁄 𑀤𑁆𑀯𑀺𑀦𑁆𑀦𑀁, 𑀏𑀓𑀧𑀲𑁆𑀲𑀢𑁄 𑀤𑁆𑀯𑀺𑀦𑁆𑀦𑀦𑁆𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀔𑀡𑁆𑀟𑀸𑀦𑀫𑁂𑀢𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀩𑀸𑀳𑀦𑁆𑀢𑀦𑁆𑀢𑀺 𑀤𑁆𑀯𑀻𑀲𑀼 𑀧𑀭𑀺𑀬𑀦𑁆𑀢𑁂𑀲𑀼 𑀲𑀺𑀩𑁆𑀩𑀦𑀻𑀬𑀁 𑀩𑀸𑀳𑀺𑀭𑀔𑀡𑁆𑀟𑀤𑁆𑀯𑀬𑀁, 𑀢𑀜𑁆𑀘 𑀲𑀗𑁆𑀖𑀝𑁂𑀢𑁆𑀯𑀸 𑀩𑀸𑀳𑀫𑀢𑁆𑀣𑀓𑁂 𑀞𑀧𑀺𑀬𑀫𑀸𑀦𑀢𑁆𑀢𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀆𑀥𑁂𑀬𑁆𑀬𑁂 𑀆𑀥𑀸𑀭𑁄𑀧𑀘𑀸𑀭𑀯𑀲𑁂𑀦 𑀩𑀸𑀳𑀸𑀢𑀺 𑀘 𑀘𑀻𑀯𑀭𑀲𑁆𑀲 𑀧𑀭𑀺𑀬𑀦𑁆𑀢𑀸𑀯𑀬𑀯𑀢𑁆𑀢𑀸 ‘‘𑀅𑀦𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀩𑀸𑀳𑀦𑁆𑀢𑀦𑁆𑀢𑀺 𑀲𑀼𑀧𑁆𑀧𑀫𑀸𑀡𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂𑀦 𑀲𑀁𑀳𑀭𑀺𑀢𑁆𑀯𑀸 𑀩𑀸𑀳𑀸𑀬 ¶ 𑀉𑀧𑀭𑀺 𑀞𑀧𑀺𑀢𑀸 𑀉𑀪𑁄 𑀅𑀦𑁆𑀢𑀸 𑀩𑀳𑀺𑀫𑀼𑀔𑀸 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀏𑀢𑀁 𑀦𑀸𑀫’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁫). 𑀇𑀤𑀁 𑀲𑀢𑁆𑀢𑀔𑀡𑁆𑀟𑀘𑀻𑀯𑀭𑀫𑁂𑀯 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀳𑀺𑀢𑀦𑁆𑀢𑀺 𑀇𑀤𑀸𑀦𑀺𑀧𑀺 𑀢𑀤𑁂𑀯 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀬𑀫𑁂𑀯 𑀳𑀺 𑀦𑀬𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄’’𑀢𑀺. 𑀪𑀺𑀓𑁆𑀔𑀼𑀦𑀸 𑀓𑀼𑀲𑀺𑀁…𑀧𑁂… 𑀩𑀸𑀳𑀦𑁆𑀢𑀫𑁆𑀧𑀺𑀘𑀸𑀢𑀺 𑀲𑀩𑁆𑀩𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸𑀯 𑀙𑀺𑀦𑁆𑀦𑀁 𑀧𑀜𑁆𑀘𑀓𑀸𑀤𑀺𑀧𑁆𑀧𑀪𑁂𑀤𑀓𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀢𑀺𑀘𑀻𑀯𑀭𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁫𑁬𑁫-𑁬. 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀘𑀻𑀯𑀭𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀓𑀣𑀁 𑀪𑀺𑀚𑁆𑀚𑀢𑀻𑀢𑀺 𑀆𑀳 ‘‘𑀤𑀸𑀦𑁂𑀦𑀸’’𑀢𑀺𑀆𑀤𑀺. 𑀤𑀸𑀦𑁂𑀦𑀸𑀢𑀺 𑀅𑀜𑁆𑀜𑀲𑁆𑀲 𑀤𑀸𑀦𑁂𑀦. 𑀅𑀘𑁆𑀙𑀺𑀚𑁆𑀚𑀕𑀸𑀳𑁂𑀦𑀸𑀢𑀺 𑀅𑀜𑁆𑀜𑁂𑀦 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦. 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀦 𑀘𑀸𑀢𑀺 𑀅𑀢𑁆𑀢𑀦𑀺 𑀯𑀺𑀲𑁆𑀲𑀸𑀲𑁂𑀦 𑀅𑀜𑁆𑀜𑀲𑁆𑀲 𑀕𑀳𑀡𑁂𑀦. 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀜𑁆𑀜𑀲𑁆𑀲 𑀤𑀸𑀦𑁂 𑀯𑀺𑀬 𑀘𑀻𑀯𑀭𑁂 𑀦𑀺𑀭𑀸𑀮𑀬𑀪𑀸𑀯𑁂𑀦𑁂𑀯 𑀧𑀭𑀺𑀘𑁆𑀘𑀢𑁆𑀢𑀸.

𑀓𑁂𑀘𑀺 𑀧𑀦 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦𑀸𑀢𑀺 𑀏𑀯𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼 𑀧𑀦 𑀯𑀺𑀩𑁆𑀪𑀦𑁆𑀢𑁄𑀧𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻’’𑀢𑀺 ¶ 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺 𑀢𑀲𑁆𑀲𑀸 𑀯𑀺𑀩𑁆𑀪𑀫𑀦𑁂𑀦𑁂𑀯 𑀅𑀲𑁆𑀲𑀫𑀡𑀺𑀪𑀸𑀯𑀢𑁄.

𑀲𑀺𑀓𑁆𑀔𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬. 𑀧𑀳𑀸𑀦𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀸𑀦𑁂𑀦. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀧𑀦𑁂𑀢𑁆𑀣 𑀲𑀘𑁂 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀲𑁆𑀲 𑀓𑀸𑀬𑀮𑀕𑁆𑀕𑀫𑁆𑀧𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀁. ‘‘𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑀢𑁄’’𑀢𑀺 𑀘 𑀮𑀺𑀔𑀦𑁆𑀢𑀺, 𑀢𑀁 ‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀧𑀺, 𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑀢𑁄’’𑀢𑀺 𑀧𑀸𑀞𑀓𑁆𑀓𑀫𑁂 𑀲𑀢𑀺 𑀬𑀼𑀚𑁆𑀚𑀢𑀺. 𑀬𑀣𑀸𑀯𑀼𑀢𑁆𑀢𑁄 𑀧𑀦 𑀧𑀸𑀞𑁄 ‘‘𑀲𑀺𑀓𑁆𑀔𑀸𑀬 𑀘 𑀧𑀳𑀸𑀦𑁂𑀦, 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀧𑀻’’𑀢𑀺 𑀧𑀸𑀞𑀓𑁆𑀓𑀫𑁂 𑀬𑀼𑀚𑁆𑀚𑀢𑀺. 𑀬𑀣𑀸 𑀢𑀣𑀸 𑀯𑀸 𑀳𑁄𑀢𑀼, 𑀦 𑀓𑁄𑀘𑀺 𑀯𑀺𑀭𑁄𑀥𑁄.

𑀧𑀘𑁆𑀘𑀼𑀤𑁆𑀥𑀸𑀭𑁂𑀦𑀸𑀢𑀺 𑀘𑀻𑀯𑀭𑀲𑁆𑀲 𑀧𑀘𑁆𑀘𑀼𑀤𑁆𑀥𑀭𑀡𑁂𑀦. ‘‘𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀯𑀺𑀦𑀸𑀲𑁂𑀦𑀸𑀢𑀺 𑀘𑀻𑀯𑀭𑀲𑀸𑀫𑀺𑀓𑀲𑁆𑀲 𑀚𑀻𑀯𑀺𑀢𑀯𑀺𑀦𑀸𑀲𑁄𑀯 𑀯𑀼𑀘𑁆𑀘𑀢𑀻𑀢𑀺. 𑀮𑀺𑀗𑁆𑀕𑀲𑁆𑀲 𑀧𑀭𑀺𑀯𑀢𑁆𑀢𑀦𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀸𑀢𑀺 𑀏𑀯𑀁 𑀉𑀪𑀬𑀣𑀸 𑀮𑀺𑀗𑁆𑀕𑀲𑁆𑀲 𑀧𑀭𑀺𑀯𑀢𑁆𑀢𑀦𑁂𑀦. 𑀲𑀩𑁆𑀩𑀁 ¶ 𑀦𑀯𑀯𑀺𑀥𑀫𑁆𑀧𑀺 𑀘𑀻𑀯𑀭𑀁. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀇𑀫𑁂𑀳𑀺 𑀅𑀝𑁆𑀞𑀳𑀻’’𑀢𑀺 𑀲𑁂𑀲𑁄. 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀅𑀝𑁆𑀞𑀳𑀺 𑀲𑀩𑁆𑀩𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). 𑀪𑀺𑀚𑁆𑀚𑀢𑀻𑀢𑀺 𑀧𑀚𑀳𑀢𑀺. 𑀙𑀺𑀤𑁆𑀤𑀲𑁆𑀲 𑀪𑀸𑀯𑁄 𑀙𑀺𑀤𑁆𑀤𑀪𑀸𑀯𑁄, 𑀢𑀲𑁆𑀫𑀺𑀁, 𑀙𑀺𑀤𑁆𑀤𑁂 𑀲𑀢𑀺 𑀙𑀺𑀤𑁆𑀤𑁂 𑀚𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑀦𑁆𑀢𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀘𑀻𑀯𑀭𑀫𑁂𑀯 𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀘 ‘‘𑀙𑀺𑀤𑁆𑀤𑀪𑀸𑀯𑁂𑀦 𑀧𑀦 𑀢𑀺𑀘𑀻𑀯𑀭𑀲𑁆𑀲𑁂𑀯𑀸’’𑀢𑀺.

𑁫𑁬𑁭. 𑀓𑀻𑀯𑀧𑁆𑀧𑀫𑀸𑀡𑁂 𑀙𑀺𑀤𑁆𑀤𑁂 𑀚𑀸𑀢𑁂𑀢𑀺 𑀆𑀳 ‘‘𑀓𑀦𑀺𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺. ‘‘𑀓𑀦𑀺𑀝𑁆𑀞…𑀧𑁂… 𑀫𑀸𑀡𑀓’’𑀦𑁆𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺.

𑁫𑁬𑁮. 𑀏𑀓𑁄 ¶ 𑀢𑀦𑁆𑀢𑀼𑀧𑀻𑀢𑀺 𑀤𑀻𑀖𑀢𑁄 𑀯𑀸 𑀢𑀺𑀭𑀺𑀬𑀢𑁄 𑀯𑀸 𑀏𑀓𑀫𑁆𑀧𑀺 𑀲𑀼𑀢𑁆𑀢𑀁.

𑁫𑁬𑁯. 𑀚𑀺𑀡𑁆𑀡𑀝𑁆𑀞𑀸𑀦𑁂 𑀅𑀕𑁆𑀕𑀴𑀁 𑀤𑁂𑀦𑁆𑀢𑁂𑀦 𑀢𑁂𑀘𑀻𑀯𑀭𑀺𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺. 𑀧𑀞𑀫𑀦𑁆𑀢𑀺 𑀙𑀺𑀦𑁆𑀦𑀝𑁆𑀞𑀸𑀦𑀲𑁆𑀲 𑀙𑀺𑀦𑁆𑀤𑀦𑀢𑁄 𑀧𑀼𑀩𑁆𑀩𑁂𑀬𑁂𑀯. 𑀅𑀕𑁆𑀕𑀴𑀁 𑀤𑀢𑁆𑀯𑀸𑀢𑀺 𑀯𑀢𑁆𑀣𑀔𑀡𑁆𑀟𑀁 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸. 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑁂, ‘‘𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀽’’𑀢𑀺 𑀮𑀩𑁆𑀪𑀢𑀺, 𑀏𑀯𑀁 𑀯𑀢𑁆𑀣𑀔𑀡𑁆𑀟𑀁 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀅𑀥𑀺𑀝𑁆𑀞𑀸𑀦𑀁 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀻𑀢𑀺 𑀮𑀩𑁆𑀪𑀢𑀺. 𑀧𑀞𑀫𑀁 𑀤𑁆𑀯𑁂 𑀓𑁄𑀝𑀺𑀬𑁄 𑀖𑀝𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀫𑀚𑁆𑀛𑁂 𑀚𑀺𑀡𑁆𑀡𑀁 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀫𑀚𑁆𑀛𑁂 𑀙𑀺𑀦𑁆𑀤𑀦𑁆𑀢𑁄 𑀢𑀢𑁄 𑀧𑀼𑀩𑁆𑀩𑁂𑀬𑁂𑀯 𑀤𑁆𑀯𑁂 𑀓𑁄𑀝𑀺𑀬𑁄 𑀏𑀓𑀢𑁄 𑀖𑀝𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸. 𑀧𑀘𑁆𑀙𑀸𑀢𑀺 𑀓𑁄𑀝𑀺𑀖𑀝𑀦𑀢𑁄 𑀧𑀘𑁆𑀙𑀸. 𑀙𑀺𑀦𑁆𑀤𑀢𑀻𑀢𑀺 𑀫𑀚𑁆𑀛𑀁 𑀉𑀪𑀬𑀓𑁄𑀝𑀺𑀁 𑀓𑀸𑀢𑀼𑀁 𑀙𑀺𑀦𑁆𑀤𑀢𑀺. 𑀭𑀓𑁆𑀔𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯.

𑁫𑁭𑁦. 𑀢𑀺𑀘𑀻𑀯𑀭𑁂 𑀓𑀢𑁆𑀣 𑀚𑀸𑀢𑀁 𑀙𑀺𑀤𑁆𑀤𑀫𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀻𑀢𑀺 𑀆𑀳 ‘‘𑀘𑀢𑀼𑀭𑀗𑁆𑀕𑀼𑀮𑀸’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑀺 𑀘 𑀅𑀝𑁆𑀞 𑀘 𑀘𑀢𑀼𑀭𑀝𑁆𑀞𑀁, 𑀘𑀢𑀼𑀦𑁆𑀦𑀁 𑀅𑀝𑁆𑀞𑀦𑁆𑀦𑀁 𑀯𑀸 𑀅𑀗𑁆𑀕𑀼𑀮𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀭𑀝𑁆𑀞𑀗𑁆𑀕𑀼𑀮𑀁, 𑀢𑀲𑁆𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀘𑀢𑀼𑀭𑀗𑁆𑀕𑀼𑀮𑀸 𑀅𑀝𑁆𑀞𑀗𑁆𑀕𑀼𑀮𑀸𑀢𑀺 𑀬𑁄𑀚𑀦𑀸. 𑀑𑀭𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀁. 𑀏𑀓𑀜𑁆𑀘 𑀤𑁆𑀯𑁂 𑀘 𑀏𑀓𑀤𑁆𑀯𑁂, 𑀢𑁂𑀲𑀁 𑀏𑀓𑀤𑁆𑀯𑀺𑀦𑁆𑀦𑀁, ‘‘𑀘𑀻𑀯𑀭𑀸𑀦’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺, 𑀏𑀓𑀲𑁆𑀲 𑀘𑀻𑀯𑀭𑀲𑁆𑀲, 𑀤𑁆𑀯𑀺𑀦𑁆𑀦𑀜𑁆𑀘 𑀘𑀻𑀯𑀭𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸𑀲𑀗𑁆𑀔𑁆𑀬𑀸𑀦𑀼𑀤𑁆𑀤𑁂𑀲𑀯𑀲𑁂𑀦 𑀏𑀓𑀲𑁆𑀲 𑀢𑀺𑀭𑀺𑀬𑀢𑁄 𑀘𑀢𑀼𑀭𑀗𑁆𑀕𑀼𑀮𑀢𑁄 𑀑𑀭𑀁, 𑀤𑁆𑀯𑀺𑀦𑁆𑀦𑀁 𑀢𑀺𑀭𑀺𑀬𑀢𑁄 𑀅𑀝𑁆𑀞𑀗𑁆𑀕𑀼𑀮𑀢𑁄 𑀑𑀭𑀦𑁆𑀢𑀺 𑀬𑁄𑀚𑀦𑀸. 𑀯𑀸𑀓𑁆𑀬𑀤𑁆𑀯𑀬𑁂𑀧𑀺 ‘‘𑀙𑀺𑀤𑁆𑀤𑀁 𑀪𑀺𑀦𑁆𑀤𑀢𑁂𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀓𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀘𑀻𑀯𑀭𑀲𑁆𑀲. 𑀢𑀺𑀭𑀺𑀬𑀢𑁄𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀘𑀢𑀼𑀭𑀗𑁆𑀕𑀼𑀮𑀁 𑀑𑀭𑀦𑁆𑀢𑀺 𑀘𑀢𑀼𑀭𑀗𑁆𑀕𑀼𑀮𑀢𑁄 ¶ 𑀅𑀩𑁆𑀪𑀦𑁆𑀢𑀭𑁂 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺. 𑀤𑁆𑀯𑀺𑀦𑁆𑀦𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑀗𑁆𑀖𑀸𑀝𑀻𑀦𑀁. 𑀢𑀺𑀭𑀺𑀬𑀢𑁄𑀢𑀺 ¶ 𑀯𑀺𑀢𑁆𑀣𑀸𑀭𑀢𑁄. 𑀅𑀝𑁆𑀞𑀗𑁆𑀕𑀼𑀮𑀢𑁄 𑀑𑀭𑀦𑁆𑀢𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀩𑁆𑀪𑀦𑁆𑀢𑀭𑁂. 𑀢𑀺𑀡𑁆𑀡𑀫𑁆𑀧𑀺 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺𑀬𑀸 𑀑𑀭𑀁 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑁂𑀯𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀯𑀺𑀤𑀢𑁆𑀣𑀺 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀁 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀙𑀺𑀤𑁆𑀤𑁂 𑀚𑀸𑀢𑁂 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀢𑀺𑀭𑁂𑀓𑀘𑀻𑀯𑀭𑀢𑁆𑀢𑀸 𑀤𑀲𑀸𑀳𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀣𑀸 𑀅𑀓𑀭𑁄𑀦𑁆𑀢𑁂𑀦 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑁫𑁭𑁧. ‘‘𑀦𑀺𑀲𑀻𑀤𑀦𑀲𑁆𑀲𑀸’’𑀢𑀺 ‘‘𑀦𑀺𑀲𑀻𑀤𑀦𑀘𑀻𑀯𑀭𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀬𑀟𑁆𑀠𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑀺𑀢𑀩𑁆𑀩𑀸 𑀯𑀺𑀤𑀢𑁆𑀣𑀺 ‘‘𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺 𑀘 ‘‘𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀅𑀟𑁆𑀠𑁂𑀦 𑀤𑀼𑀢𑀺𑀬𑀸 𑀤𑀺𑀬𑀟𑁆𑀠𑀸, 𑀤𑀼𑀢𑀺𑀬𑀁 𑀅𑀟𑁆𑀠𑀫𑁂𑀢𑀲𑁆𑀲𑀸𑀢𑀺 ‘‘𑀤𑀼𑀢𑀺𑀬𑀟𑁆𑀠𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀺𑀬-𑀧𑀘𑁆𑀘𑀬𑀮𑁄𑀧𑁂𑀦 ‘‘𑀤𑀺𑀬𑀟𑁆𑀠𑀸’’𑀢𑀺 𑀯𑀼𑀢𑁆𑀢𑀁, 𑀅𑀟𑁆𑀠𑀤𑀼𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸’’𑀢𑀺 𑀧𑀫𑀸𑀡𑀦𑀺𑀬𑀫𑀲𑁆𑀲 𑀓𑀢𑀢𑁆𑀢𑀸 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺𑀬𑀸 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄 𑀏𑀓𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀳𑁄𑀢𑀺. 𑀇𑀤𑀁 𑀦𑀺𑀲𑀻𑀤𑀦𑀘𑀻𑀯𑀭𑀁 𑀤𑀻𑀖𑀢𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀁, 𑀯𑀺𑀢𑁆𑀣𑀸𑀭𑀢𑁄 𑀙𑀴𑀗𑁆𑀕𑀼𑀮𑀸𑀥𑀺𑀓𑀤𑁆𑀯𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺. ‘‘𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺 (𑀧𑀸𑀘𑀺. 𑁫𑁩𑁩) 𑀯𑀼𑀢𑁆𑀢𑀢𑁆𑀢𑀸 𑀤𑀺𑀬𑀟𑁆𑀠𑀳𑀢𑁆𑀣𑀸 𑀤𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁫𑁭𑁨. 𑀘𑀢𑀲𑁆𑀲𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀺𑀤𑀢𑁆𑀣𑀺𑀬𑁄’’𑀢𑀺 𑀲𑀸𑀫𑀢𑁆𑀣𑀺𑀬𑀸𑀯 𑀮𑀩𑁆𑀪𑀢𑀺. ‘‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀬𑀸’’𑀢𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑁂𑀦 𑀤𑀻𑀖𑀢𑁄𑀢𑀺 𑀬𑁄𑀚𑀦𑀸.

𑁫𑁭𑁩. 𑀅𑀟𑁆𑀠𑀁 𑀢𑁂𑀬𑁆𑀬𑀁 𑀢𑀢𑀺𑀬𑀁 𑀬𑀲𑁆𑀲𑀸 𑀲𑀸 𑀅𑀟𑁆𑀠𑀢𑁂𑀬𑁆𑀬𑀸, 𑀅𑀟𑁆𑀠𑀢𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁭𑁪. 𑀢𑀢𑁄 𑀉𑀢𑁆𑀢𑀭𑀺𑀁 𑀢𑀤𑀼𑀢𑁆𑀢𑀭𑀺𑀁, 𑀢𑀲𑁆𑀲 𑀢𑀲𑁆𑀲 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀢𑀺𑀭𑁂𑀓𑀁. 𑀅𑀥𑀺𑀓𑀘𑁆𑀙𑁂𑀤𑀦𑀦𑁆𑀢𑀺 𑀅𑀥𑀺𑀓𑀲𑁆𑀲 𑀧𑀫𑀸𑀡𑀸𑀢𑀺𑀭𑀺𑀢𑁆𑀢𑀝𑁆𑀞𑀸𑀦𑀲𑁆𑀲 𑀙𑁂𑀤𑀦𑀁 𑀅𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀤𑁂𑀲𑀦𑀸𑀬𑀸𑀢𑀺 ¶ 𑀅𑀥𑀺𑀓𑀘𑁆𑀙𑁂𑀤𑀦𑀁, 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀤𑀻𑀭𑀺𑀢𑀁 𑀯𑀼𑀢𑁆𑀢𑀁 𑀧𑀸𑀴𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁭𑁫. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀕𑀼𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑁫𑁭𑁬. 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀬 𑀆𑀕𑀢𑀁 𑀦𑀻𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀳𑀦𑁆𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀁 𑀯𑀝𑁆𑀝𑀢𑀺.

𑁫𑁭𑁭. ‘‘𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 ¶ 𑀏𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀓𑀁 𑀥𑁄𑀯𑀺𑀢𑁆𑀯𑀸 𑀬𑀸𑀯 𑀲𑀼𑀓𑁆𑀔𑀸𑀧𑀻𑀬𑀢𑀺, 𑀢𑀸𑀯 𑀅𑀜𑁆𑀜𑁂𑀦 𑀫𑀼𑀔𑀧𑀼𑀜𑁆𑀙𑀦𑁂𑀦 𑀪𑀯𑀺𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀤𑁆𑀯𑁂𑀧𑀺 𑀯𑀝𑁆𑀝𑀦𑁆𑀢𑀺 𑀲𑀩𑁆𑀩𑀣𑀸’’𑀢𑀺.

𑁫𑁭𑁯. 𑀧𑀫𑀸𑀡𑀢𑁄, 𑀕𑀡𑀦𑀢𑁄 𑀘 𑀅𑀢𑀻𑀢𑀸𑀢𑀺 𑀧𑀫𑀸𑀡𑀕𑀡𑀦𑀸𑀢𑀻𑀢𑀸. ‘‘𑀧𑀫𑀸𑀡𑀸𑀢𑀻𑀢𑀸’’𑀢𑀺 𑀯𑀘𑀦𑁂𑀦 𑀯𑀺𑀦𑀬𑀥𑀭𑀸𑀦𑀁 𑀅𑀧𑁆𑀧𑀫𑀸𑀡𑀕𑀼𑀡𑀢𑀁 𑀤𑀲𑁆𑀲𑁂𑀢𑀺, ‘‘𑀕𑀡𑀦𑀸𑀢𑀻𑀢𑀸’’𑀢𑀺 𑀇𑀫𑀺𑀦𑀸 𑀅𑀢𑀺𑀓𑁆𑀓𑀦𑁆𑀢𑀕𑀡𑀦𑀢𑀁. 𑀧𑀓𑀢𑀁 𑀯𑀺𑀦𑀬𑁂 𑀧𑀞𑀫𑀁 𑀓𑀢𑀁 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀚𑀸𑀦𑀦𑁆𑀢𑀻𑀢𑀺 𑀧𑀓𑀢𑀜𑁆𑀜𑀽, 𑀯𑀺𑀦𑀬𑀥𑀭𑀸, 𑀢𑁂 𑀧𑀓𑀢𑀜𑁆𑀜𑀼𑀦𑁄. 𑀅𑀧𑀭𑀺𑀫𑀸𑀡𑀕𑀼𑀡𑀫𑀡𑀺𑀕𑀡𑀪𑀽𑀲𑀺𑀢𑀉𑀧𑀸𑀮𑀺𑀤𑀸𑀲𑀓𑀸𑀤𑀺𑀫𑀳𑀸𑀣𑁂𑀭𑀸𑀘𑀭𑀺𑀬𑀧𑀭𑀫𑁆𑀧𑀭𑀸𑀕𑀢𑀸 𑀲𑀗𑁆𑀔𑁆𑀬𑀸𑀧𑀣𑀸𑀢𑀻𑀢𑀸 𑀯𑀺𑀦𑀬𑀥𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁦. 𑀲𑀼𑀕𑀢𑀝𑁆𑀞𑀗𑁆𑀕𑀼𑀮𑀸𑀬𑀸𑀫𑀦𑁆𑀢𑀺 𑀯𑀟𑁆𑀠𑀓𑀺𑀭𑀢𑀦𑀧𑁆𑀧𑀫𑀸𑀡𑀤𑀻𑀖𑀁. 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀦𑁆𑀢𑀺 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀯𑀺𑀢𑁆𑀣𑀸𑀭𑀁. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺. 𑀧𑀘𑁆𑀙𑀺𑀫𑀁 𑀘𑀻𑀯𑀭𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀦𑀧𑀝𑀸𑀤𑀻𑀦𑀁 𑀯𑀺𑀲𑁂𑀲𑀦𑀁, 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁧. 𑀧𑀭𑀺𑀲𑁆𑀲𑀸𑀯𑀧𑀝𑀦𑁆𑀢𑀺 𑀉𑀤𑀓𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀁 𑀧𑀝𑀁. 𑀧𑀢𑁆𑀢𑀢𑁆𑀣𑀯𑀺𑀓𑀦𑁆𑀢𑀺 𑀧𑀢𑁆𑀢𑀓𑀜𑁆𑀘𑀼𑀓𑀁. 𑀧𑁄𑀢𑁆𑀣𑀓𑀢𑁆𑀣𑀯𑀺𑀓𑀦𑁆𑀢𑀺 𑀧𑁄𑀢𑁆𑀣𑀓𑀓𑀜𑁆𑀘𑀼𑀓𑀁 ¶ . 𑀆𑀤𑀺𑀕𑁆𑀕𑀳𑀡𑁂𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀧𑀝𑀁, 𑀤𑀡𑁆𑀟𑀧𑀝𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁫𑁮𑁨. 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁. 𑀞𑀧𑀺𑀢𑁂𑀢𑀺 𑀅𑀦𑀥𑀺𑀝𑁆𑀞𑀸𑀬 𑀞𑀧𑀺𑀢𑁂. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀆𑀳. 𑀦𑀢𑁆𑀣𑀺 𑀤𑁄𑀲𑀢𑀸𑀢𑀺 𑀤𑁄𑀲𑁄 𑀏𑀯 𑀤𑁄𑀲𑀢𑀸. ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀞𑀧𑀺𑀢𑀁 𑀲𑀦𑁆𑀥𑀸𑀬 𑀫𑀳𑀸𑀧𑀘𑁆𑀘𑀭𑀺𑀬𑀁 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀇𑀫𑀺𑀦𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀲𑁆𑀲𑀸𑀫𑀺, 𑀇𑀤𑀁 𑀫𑀸𑀢𑀼𑀬𑀸 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. ‘‘𑀇𑀤𑀁 𑀪𑁂𑀲𑀚𑁆𑀚𑀲𑁆𑀲, 𑀫𑀸𑀢𑀼𑀬𑀸’’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀲𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑀺𑀢𑁂 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀬𑀁 𑀯𑀢𑁆𑀣𑀁 𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀁, 𑀓𑀢𑀁 𑀫𑀸𑀢𑀸𑀤𑀺𑀲𑀦𑁆𑀢𑀓𑀁;

𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺, 𑀢𑀫𑀸𑀳𑀼 𑀯𑀺𑀦𑀬𑀜𑁆𑀜𑀼𑀦𑁄’’𑀢𑀺.

𑁫𑁮𑁩. 𑀯𑀲𑁆𑀲𑀫𑀸𑀲𑁂 𑀘𑀢𑀼𑀭𑁄𑀢𑀺 𑀯𑀲𑁆𑀲𑀸𑀦𑁂 𑀘𑀢𑀼𑀭𑁄 𑀫𑀸𑀲𑁂, 𑀅𑀥𑀺𑀝𑁆𑀞𑀸𑀦𑀓𑀺𑀭𑀺𑀬𑀸𑀬 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀯𑀺𑀘𑁆𑀙𑁂𑀤𑁄𑀢𑀺 ¶ 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀯𑀸𑀲𑁂𑀢𑀩𑁆𑀩𑀸 𑀲𑀸𑀝𑀺𑀓𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸.

𑁫𑁮𑁪. 𑀓𑀡𑁆𑀟𑀼𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀓𑀡𑁆𑀟𑀼𑀭𑁄𑀕𑀸𑀢𑀼𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀫𑀦𑀼𑀜𑁆𑀜𑀸𑀢𑀘𑀻𑀯𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀲𑁆𑀲𑀸, 𑀓𑀡𑁆𑀟𑀼𑀘𑁆𑀙𑀸𑀤𑀺𑀓𑀲𑀸𑀝𑀺𑀬𑀸;

𑀦 𑀓𑀸𑀮𑀸𑀢𑀺𑀓𑁆𑀓𑀫𑁂 𑀯𑀼𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑀁.

𑀅𑀥𑀺𑀝𑁆𑀞𑀸𑀦𑀧𑀳𑀸𑀦𑀗𑁆𑀕𑁂-𑀲𑀼 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁂𑀲𑀢𑁄;

𑀯𑀻𑀫𑀁𑀲𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀺, 𑀢𑀢𑁆𑀣 𑀬𑀁 𑀓𑀸𑀭𑀡𑀁 𑀲𑀺𑀬𑀸’’𑀢𑀺.

𑁫𑁮𑁬. ‘‘𑀅𑀲𑀫𑁆𑀫𑀼𑀔𑁂 ¶ 𑀏𑀢𑀦𑁆𑀢𑀺 𑀘𑀸’’𑀢𑀺 𑀯𑀘𑀦𑁂𑀦𑁂𑀯 𑀲𑀫𑁆𑀫𑀼𑀔𑁂 ‘‘𑀇𑀫’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀯𑀺𑀘𑀓𑁆𑀔𑀡𑁄 𑀧𑀘𑁆𑀘𑀼𑀤𑁆𑀥𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁫𑁮𑁭. 𑀅𑀥𑀺𑀝𑁆𑀞𑀺𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁.

𑁫𑁮𑁮. 𑀇𑀢𑀺 𑀲𑀩𑁆𑀩𑀫𑀺𑀤𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀇𑀤𑀁 𑀢𑀺𑀘𑀻𑀯𑀭𑀸𑀤𑀻𑀦𑀁 𑀧𑀫𑀸𑀡𑀸𑀤𑀺𑀲𑀩𑁆𑀩𑀯𑀺𑀥𑀸𑀦𑀁. 𑀢𑁂𑀘𑀻𑀯𑀭𑀺𑀓𑀪𑀺𑀓𑁆𑀔𑀼𑀦𑁄𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑀲𑁆𑀲 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑀲𑁆𑀲. 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀘𑀻𑀯𑀭𑀁, 𑀢𑀺𑀡𑁆𑀡𑀁 𑀢𑀺𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 ‘‘𑀢𑀺𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀦𑀯𑀘𑀻𑀯𑀭𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺, 𑀢𑀺𑀘𑀻𑀯𑀭𑁂 𑀦𑀺𑀬𑀼𑀢𑁆𑀢𑁄 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑁄 𑀯𑀼𑀘𑁆𑀘𑀢𑀺. 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑀲𑁆𑀲𑀸𑀧𑀺 𑀢𑀺𑀘𑀻𑀯𑀭𑁂 𑀇𑀤𑀫𑁂𑀯 𑀯𑀺𑀥𑀸𑀦𑀦𑁆𑀢𑀺 𑀲𑁄𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀅𑀜𑁆𑀜𑁂𑀲𑀼 𑀯𑀸 𑀧𑀦 𑀙𑀲𑀼 𑀘𑀻𑀯𑀭𑁂𑀲𑀼 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀏𑀓𑀁 𑀅𑀁𑀲𑀓𑀸𑀲𑀸𑀯𑀫𑁂𑀯 𑀯𑀝𑁆𑀝𑀢𑀺. 𑀢𑀣𑀸 𑀯𑀢𑁆𑀯𑀸𑀯𑀸𑀢𑀺 ‘‘𑀇𑀫𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀯𑀸. 𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀓𑁄.

𑁫𑁮𑁯. ‘‘𑀢𑀺𑀘𑀻𑀯𑀭𑀁 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀬𑁄𑀕𑀁 𑀓𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 ¶ (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀥 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀘𑀻𑀯𑀭𑀢𑁆𑀢𑀬𑀫𑁂𑀯 𑀯𑀼𑀢𑁆𑀢𑀁. ‘‘𑀲𑀼𑀔𑀧𑀭𑀺𑀳𑀸𑀭𑀢𑁆𑀣𑀁 𑀏𑀓𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀏𑀓𑀤𑁂𑀲𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 𑀏𑀓𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀫𑁂𑀯 𑀳𑁄𑀢𑀺.

𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀩𑀤𑁆𑀥𑀲𑀻𑀫𑀢𑁄 𑀩𑀳𑀺 𑀯𑀲𑀦𑁆𑀢𑁂𑀦 𑀏𑀓𑀓𑁂𑀦 𑀢𑁂𑀘𑀻𑀯𑀭𑀺𑀓𑁂𑀦 𑀅𑀦𑁆𑀢𑁄𑀅𑀭𑀼𑀡𑁂 𑀅𑀲𑀢𑀺𑀬𑀸 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀳𑀢𑁆𑀣𑀧𑀸𑀲𑁂 𑀅𑀓𑀢𑁂𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺, 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀁 𑀤𑀼𑀮𑁆𑀮𑀪𑀢𑁆𑀢𑀸 ¶ 𑀘 𑀲𑀼𑀔𑀧𑀭𑀺𑀳𑀸𑀭𑀢𑁆𑀣𑀁 𑀢𑀻𑀲𑀼 𑀏𑀓𑀁 𑀯𑀸 𑀲𑀩𑁆𑀩𑀸𑀦𑀺 𑀏𑀯 𑀯𑀸 𑀢𑀺𑀘𑀻𑀯𑀭𑀦𑀸𑀫𑁂𑀦 𑀓𑀢𑀸𑀥𑀺𑀝𑁆𑀞𑀸𑀦𑀸𑀦𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀲𑀘𑁂 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁 𑀮𑀪𑁂𑀬𑁆𑀬, 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀳𑀸𑀭𑁄 𑀦𑀺𑀭𑀢𑁆𑀣𑀓𑁄 𑀪𑀯𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀼𑀢𑁆𑀢𑀁 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀫𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯𑀁 𑀘𑀼𑀤𑁄𑀲𑀺𑀢𑁂’’𑀢𑀺𑀆𑀤𑀺. 𑀏𑀯𑀁 𑀘𑁂𑀢𑀺 𑀏𑀯𑀁 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀺 𑀘𑁂. 𑀉𑀤𑁄𑀲𑀺𑀢𑁂𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀦𑁆𑀢𑀭𑁂 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂. 𑀯𑀼𑀢𑁆𑀢𑁄 𑀧𑀭𑀺𑀳𑀸𑀭𑁄𑀢𑀺 ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘. 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀦𑀬𑁂𑀦 𑀧𑀤𑀪𑀸𑀚𑀦𑀸𑀯𑀲𑀸𑀦𑁂 𑀯𑀼𑀢𑁆𑀢𑁄, 𑀇𑀥 𑀘 ‘‘𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀦𑁆𑀢𑀭𑀁 𑀯𑀓𑁆𑀔𑀫𑀸𑀦𑁄 𑀢𑀺𑀘𑀻𑀯𑀭𑀲𑁆𑀲 𑀧𑀭𑀺𑀳𑀭𑀡𑀯𑀺𑀥𑀺. 𑀦𑀺𑀭𑀢𑁆𑀣𑀓𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀢𑁂𑀦 𑀯𑀺𑀥𑀺𑀦𑀸 𑀢𑀺𑀘𑀻𑀯𑀭𑀁 𑀅𑀧𑀭𑀺𑀳𑀭𑀦𑁆𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 𑀦𑀺𑀧𑁆𑀧𑀬𑁄𑀚𑀦𑁄𑀢𑀺 𑀅𑀢𑁆𑀣𑁄.

𑁫𑁯𑁦. 𑀢𑀧𑁆𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀦’’𑀇𑀘𑁆𑀘𑀸𑀤𑀺. 𑀦 𑀦𑀺𑀭𑀢𑁆𑀣𑀓𑁄𑀢𑀺 𑀬𑁄𑀚𑀦𑀸. 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯𑀸’’𑀢𑀺𑀆𑀤𑀺. 𑀬𑁄 𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑀢𑁄 𑀅𑀫𑁄𑀘𑁂𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀢𑀸𑀤𑀺𑀲𑀲𑁆𑀲 𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀉𑀤𑁄𑀲𑀺𑀢𑀧𑀭𑀺𑀳𑀸𑀭𑀲𑁆𑀲 𑀪𑀕𑀯𑀢𑀸 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀸𑀤𑀺𑀲𑀲𑁆𑀲𑁂𑀯 𑀢𑁂𑀘𑀻𑀯𑀭𑀺𑀓𑀲𑁆𑀲 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀦𑀯𑀯𑀺𑀥𑀁 𑀲𑀩𑁆𑀩𑀫𑁆𑀧𑀺 𑀘𑀻𑀯𑀭𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺.

𑁫𑁯𑁧. 𑀇𑀫𑀺𑀦𑀸 ¶ 𑀉𑀤𑁄𑀲𑀺𑀢𑀧𑀭𑀺𑀳𑀸𑀭𑀲𑁆𑀲 𑀅𑀦𑀺𑀭𑀢𑁆𑀣𑀓𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦𑀸𑀧𑀺 ¶ 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀫𑀲𑁆𑀲 𑀅𑀥𑀺𑀓𑀢𑁆𑀣𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑁂𑀦 𑀅𑀦𑀼𑀜𑁆𑀜𑀸𑀢𑀪𑀸𑀯𑁂 𑀓𑀺𑀭𑀺𑀬𑀦𑁆𑀢𑀭𑀸𑀦𑀼𑀚𑀸𑀦𑀦𑀲𑀗𑁆𑀔𑀸𑀢𑀅𑀥𑀺𑀓𑀯𑀘𑀦𑀲𑁆𑀲 𑀜𑀸𑀧𑀓𑀳𑁂𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀧𑀸𑀞𑁂 𑀅𑀦𑀸𑀧𑀢𑁆𑀢𑀺𑀪𑀸𑀯𑁂 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀧𑀭𑀺𑀬𑀢𑁆𑀢𑁂 (𑀧𑀸𑀭𑀸. 𑁪𑁬𑁯) ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀓𑀺𑀭𑀺𑀬𑀦𑁆𑀢𑀭𑀸𑀦𑀼𑀚𑀸𑀦𑀦𑁂𑀦 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁫𑁯𑁨. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲. 𑀇𑀤𑀸𑀦𑀺 𑀅𑀢𑀺𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀼𑀓𑀸𑀫𑀲𑁆𑀲 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀫𑀽𑀮𑀸𑀥𑀺𑀝𑁆𑀞𑀸𑀦𑀁 𑀧𑀳𑀸𑀬 𑀓𑀸𑀢𑀩𑁆𑀩𑀧𑁆𑀧𑀓𑀸𑀭𑀦𑁆𑀢𑀭𑀲𑁆𑀲𑀸𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀺𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀫𑀼𑀔𑀧𑀼𑀜𑁆𑀙𑀦𑀸𑀤𑀺𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀳𑀢𑁄𑀧𑀺 𑀤𑁄𑀲𑁄 𑀦 𑀲𑀺𑀬𑀸𑀢𑀺 𑀓𑀲𑁆𑀫𑀸 𑀦𑀸𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦𑀇𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑁂.

𑁫𑁯𑁩. 𑀓𑀺𑀘𑁆𑀘𑀯𑀺𑀥𑀸𑀦𑀢𑁄𑀢𑀺 𑀢𑁂𑀲𑀁 𑀫𑀼𑀔𑀧𑀼𑀜𑁆𑀙𑀦𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑁆𑀲 𑀲𑀸𑀥𑀦𑀢𑁄, 𑀢𑀸𑀤𑀺𑀲𑀁 𑀓𑀺𑀘𑁆𑀘𑀯𑀺𑀲𑁂𑀲𑀸𑀧𑁂𑀓𑁆𑀔𑀁 𑀯𑀺𑀦𑀸 𑀢𑀁𑀢𑀁𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀺𑀘𑁆𑀘𑀲𑁆𑀲𑀸𑀢𑀺 𑀫𑀼𑀔𑀧𑀼𑀜𑁆𑀙𑀦𑀸𑀤𑀺𑀓𑀺𑀘𑁆𑀘𑀭𑀳𑀺𑀢𑀲𑁆𑀲. 𑀅𑀥𑀺𑀓𑀲𑁆𑀲𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀞𑀫𑀁 𑀅𑀥𑀺𑀝𑁆𑀞𑀸𑀦𑀲𑁆𑀲 𑀯𑀺𑀚𑀳𑀺𑀢𑀢𑁆𑀢𑀸 𑀅𑀢𑀺𑀭𑁂𑀓𑀲𑁆𑀲. 𑀅𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑀲𑁆𑀲. 𑀅𑀥𑀺𑀝𑁆𑀞𑀸𑀦𑀁 𑀢𑀼 𑀬𑀼𑀚𑁆𑀚𑀢𑀻𑀢𑀺 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀧𑀦 𑀬𑀼𑀚𑁆𑀚𑀢𑀺.

𑁫𑁯𑁪. 𑀦𑀺𑀥𑀸𑀦𑀲𑁆𑀲 ¶ 𑀫𑀼𑀔𑀁 𑀉𑀧𑀸𑀬𑁄𑀢𑀺 𑀦𑀺𑀥𑀸𑀦𑀫𑀼𑀔𑀁, 𑀅𑀦𑁆𑀢𑀭𑀯𑀸𑀲𑀓𑀸𑀤𑀺𑀢𑀁𑀢𑀁𑀘𑀻𑀯𑀭𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀢𑁄 𑀅𑀢𑀺𑀭𑁂𑀓𑀁 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀬𑀣𑀸 𑀞𑀧𑀺𑀢𑀁 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺, 𑀢𑀣𑀸 𑀦𑀺𑀥𑀸𑀦𑀲𑁆𑀲 𑀉𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀏𑀢𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁. 𑀫𑀳𑀸𑀧𑀘𑁆𑀘𑀭𑀺𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀚𑀫𑁆𑀩𑀼𑀤𑀻𑀧𑀁 𑀦𑁂𑀢𑀼𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀡𑀢𑁆𑀢𑀺𑀬𑀸 𑀯𑀺𑀲𑀼𑀓𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑀫𑀳𑀸𑀧𑀘𑁆𑀘𑀭𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀮𑀺𑀔𑀺𑀢𑀢𑁆𑀢𑀸 𑀢𑀁𑀦𑀸𑀫𑀓𑀸𑀬𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁, ‘‘𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀲𑀽’’𑀢𑀺𑀧𑀺 𑀮𑀺𑀔𑀦𑁆𑀢𑀺.

𑁫𑁯𑁫. 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀯𑀺𑀥𑀸𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀓𑀢𑀫𑀦𑁆𑀢𑀺 𑀆𑀳 ‘‘𑀘𑀻𑀯𑀭’’𑀦𑁆𑀢𑀺𑀆𑀤𑀺. ‘‘𑀦𑀺𑀤𑀸𑀦𑁂 𑀉𑀧𑁆𑀧𑀢𑁆𑀢𑀺𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀘𑀻𑀯𑀭𑀁 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀦𑀺𑀤𑀸𑀦𑁂 ‘‘𑀢𑀺𑀘𑀻𑀯𑀭𑀁 𑀲𑀫𑁆𑀧𑀼𑀡𑁆𑀡𑀁 𑀯𑀺𑀚𑁆𑀚𑀢𑀺, 𑀇𑀤𑀫𑀢𑀺𑀭𑁂𑀓𑀘𑀻𑀯𑀭𑀁 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀢𑁄 𑀆𑀭𑁄𑀘𑀺𑀢𑀯𑀢𑁆𑀣𑀼𑀫𑁆𑀳𑀺 ¶ . 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁, 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 (𑀫𑀳𑀸𑀯. 𑁩𑁫𑁭) 𑀏𑀢𑁆𑀣 𑀧𑀸𑀴𑀺𑀬𑀁 𑀏𑀯𑀁 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀥𑀦𑁂𑀦 𑀢𑀤𑁂𑀓𑀲𑀸𑀥𑀦𑀢𑁆𑀢𑀸 𑀏𑀯 𑀏𑀓𑀫𑁆𑀧𑀺 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀜𑁆𑀘 𑀲𑀢𑀺 𑀬𑁄 𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯).

𑁫𑁯𑁬-𑁮. 𑀏𑀢𑁆𑀢𑀸𑀯𑀢𑀸 𑀓𑀧𑁆𑀧𑀺𑀬𑀘𑀻𑀯𑀭𑀜𑁆𑀘 𑀢𑀢𑁆𑀣 𑀓𑀢𑁆𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀼𑀲𑀯𑀸𑀓𑀸𑀤𑀻’’𑀢𑀺𑀆𑀤𑀺. 𑀓𑀼𑀲𑀦𑁆𑀢𑀺 𑀤𑀩𑁆𑀩𑀢𑀺𑀡𑀁. 𑀯𑀸𑀓𑀦𑁆𑀢𑀺 𑀭𑀼𑀓𑁆𑀔𑀸𑀤𑀻𑀦𑀁 𑀯𑀸𑀓𑀁. 𑀆𑀤𑀺-𑀲𑀤𑁆𑀤𑁂𑀦 ¶ 𑀨𑀮𑀓𑀁 𑀕𑀳𑀺𑀢𑀁, 𑀘𑀻𑀭-𑀲𑀤𑁆𑀤𑁄 𑀘𑀻𑀯𑀭𑀧𑀭𑀺𑀬𑀸𑀬𑁄, 𑀇𑀫𑀲𑁆𑀫𑀺𑀁 𑀓𑀼𑀲𑀸𑀤𑀬𑁄 𑀕𑀦𑁆𑀣𑁂𑀢𑁆𑀯𑀸 𑀓𑀢𑁂 𑀘𑀻𑀯𑀭𑁂𑀬𑁂𑀯 𑀯𑀢𑁆𑀢𑀢𑀺. 𑀓𑁂𑀲𑀚𑀁 𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀯𑀻𑀢𑀓𑀫𑁆𑀩𑀮𑀜𑁆𑀘. 𑀯𑀸𑀮𑀚𑀁 𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀮𑀘𑀫𑀭𑀯𑀸𑀮𑁂𑀳𑀺 𑀯𑀻𑀢𑀓𑀫𑁆𑀩𑀮𑀜𑁆𑀘. 𑀉𑀮𑀽𑀓𑀧𑀓𑁆𑀔𑀦𑁆𑀢𑀺 𑀓𑁄𑀲𑀺𑀬𑀲𑀓𑀼𑀡𑀧𑀢𑁆𑀢𑀁. 𑀇𑀥 𑀧𑀦 𑀢𑀁 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀯𑀭𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀚𑀺𑀦𑀓𑁆𑀔𑀺𑀧𑁂𑀢𑀺 𑀅𑀚𑀺𑀦𑀤𑀻𑀧𑀺𑀘𑀫𑁆𑀫𑁂. ‘‘𑀥𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑁄.

𑀓𑀤𑀮𑀺𑀤𑀼𑀲𑁆𑀲𑁂𑀢𑀺 𑀓𑀤𑀮𑀺𑀯𑀸𑀓𑀫𑀬𑀯𑀢𑁆𑀣𑁂. 𑀏𑀭𑀓𑀤𑀼𑀲𑁆𑀲𑁂𑀢𑀺 𑀏𑀭𑀓𑀫𑀬𑀯𑀢𑁆𑀣𑁂. 𑀅𑀓𑁆𑀓𑀤𑀼𑀲𑁆𑀲𑁂𑀢𑀺 𑀅𑀓𑁆𑀓𑀤𑀡𑁆𑀟𑁂 𑀯𑀸 𑀢𑁂𑀲𑀁 𑀲𑀼𑀢𑁆𑀢𑀸𑀦𑀺 𑀯𑀸 𑀕𑀳𑁂𑀢𑁆𑀯𑀸 𑀓𑀢𑀯𑀢𑁆𑀣𑁂. 𑀧𑁄𑀢𑁆𑀣𑀓𑁂𑀢𑀺 𑀫𑀓𑀘𑀺𑀯𑀸𑀓𑀫𑀬𑀯𑀢𑁆𑀣𑁂. 𑀢𑀺𑀭𑀻𑀝𑁂 𑀯𑀸𑀢𑀺 𑀏𑀯𑀁𑀦𑀸𑀫𑀓𑁂 𑀭𑀼𑀓𑁆𑀔𑀢𑀘𑁂. 𑀯𑁂𑀞𑀦𑁂𑀢𑀺 𑀲𑀻𑀲𑀯𑁂𑀞𑀦𑁂. 𑀓𑀜𑁆𑀘𑀼𑀓𑁂𑀢𑀺 𑀓𑀯𑀘𑁂.

𑀲𑀩𑁆𑀩𑀦𑀻𑀮𑀓𑁂𑀢𑀺 𑀓𑁂𑀯𑀮𑀦𑀻𑀮𑀓𑁂. 𑀏𑀲 𑀦𑀬𑁄 𑀫𑀜𑁆𑀚𑁂𑀝𑁆𑀞𑀸𑀤𑀻𑀲𑀼. 𑀫𑀳𑀸𑀦𑀸𑀫𑀭𑀢𑁆𑀢𑁂𑀢𑀺 𑀢𑀦𑀼𑀧𑀤𑀼𑀫𑀤𑀮𑀯𑀡𑁆𑀡𑀭𑀢𑁆𑀢𑁂. 𑀫𑀳𑀸𑀭𑀗𑁆𑀕𑀭𑀢𑁆𑀢𑁂𑀢𑀺 𑀲𑀢𑀧𑀤𑀺𑀯𑀡𑁆𑀡𑀭𑀢𑁆𑀢𑁂.

𑁫𑁯𑁯. 𑀅𑀘𑁆𑀙𑀺𑀦𑁆𑀦𑀤𑀲𑀓𑁂𑀢𑀺 𑀅𑀘𑁆𑀙𑀺𑀦𑁆𑀦𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁 𑀘𑀻𑀯𑀭𑁂. 𑀏𑀲 𑀦𑀬𑁄 𑀤𑀻𑀖𑀤𑀲𑁂𑀧𑀺. 𑀨𑀮𑀤𑀲𑁂𑀢𑀺 𑀨𑀮𑀲𑀤𑀺𑀲𑀕𑀦𑁆𑀣𑀺𑀢𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁. 𑀧𑀼𑀧𑁆𑀨𑀤𑀲𑁂𑀢𑀺 𑀓𑀡𑁆𑀡𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀓𑀸𑀲𑁂𑀢𑁆𑀯𑀸 𑀓𑀢𑀸 𑀤𑀲𑀸 𑀬𑀲𑁆𑀲, 𑀢𑀲𑁆𑀫𑀺𑀁 𑀘𑀻𑀯𑀭𑁂𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀢𑀺 𑀦𑀕𑁆𑀕𑀁 𑀓𑀢𑁆𑀯𑀸 𑀘𑁄𑀭𑁂𑀳𑀺 𑀯𑀺𑀮𑀼𑀢𑁆𑀢𑀘𑀻𑀯𑀭𑀲𑁆𑀲 ¶ . 𑀏𑀢𑁆𑀣𑀸𑀢𑀺 𑀓𑀼𑀲𑀯𑀸𑀓𑀸𑀤𑀻𑀲𑀼, 𑀲𑀩𑁆𑀩𑀦𑀻𑀮𑀸𑀤𑀻𑀲𑀼 𑀘. 𑀓𑀺𑀜𑁆𑀘𑀻𑀢𑀺 𑀏𑀓𑀫𑁆𑀧𑀺 𑀅𑀓𑀧𑁆𑀧𑀺𑀬𑀁 𑀦𑀢𑁆𑀣𑀺 𑀅𑀦𑀦𑀼𑀮𑁄𑀫𑀺𑀓𑀁 𑀦𑀢𑁆𑀣𑀺. ‘‘𑀦𑀕𑁆𑀕𑁂𑀦 𑀏𑀢𑁂𑀲𑀼 𑀅𑀓𑀧𑁆𑀧𑀺𑀬𑀘𑀻𑀯𑀭𑁂𑀲𑀼 𑀬𑀁𑀓𑀺𑀜𑁆𑀘𑀺 𑀮𑀤𑁆𑀥𑀁, 𑀢𑁂𑀦 𑀳𑀺𑀭𑀺𑀓𑁄𑀧𑀺𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀓𑀧𑁆𑀧𑀺𑀬𑀘𑀻𑀯𑀭𑁂 𑀮𑀤𑁆𑀥𑁂 𑀢𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀇𑀤𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀲𑀩𑁆𑀩𑀦𑀻𑀮𑀓𑀸𑀤𑀺𑀯𑀢𑁆𑀣𑁂𑀲𑀼 𑀮𑀤𑁆𑀥𑁂𑀲𑀼 𑀓𑀧𑁆𑀧𑀺𑀬𑀭𑀚𑀦𑁂𑀦 𑀭𑀚𑀺𑀢𑁆𑀯𑀸, 𑀢𑀁 𑀯𑀡𑁆𑀡𑀁 𑀦𑀸𑀲𑁂𑀢𑁆𑀯𑀸 𑀯𑀸 𑀓𑀧𑁆𑀧𑀺𑀬𑀯𑀢𑁆𑀣𑀸𑀦𑀺 𑀉𑀪𑀬𑀧𑀲𑁆𑀲𑁂𑀲𑀼 ¶ 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸, 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁬𑁦𑁦. ‘‘𑀅𑀦𑁆𑀢𑁄𑀤𑀲𑀸𑀳’’𑀦𑁆𑀢𑀺 𑀇𑀤𑀁 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀻𑀳𑀺 𑀲𑀩𑁆𑀩𑀧𑀤𑁂𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀇𑀥 𑀤𑀸𑀦𑀁 𑀤𑀼𑀯𑀺𑀥𑀁 𑀲𑀫𑁆𑀫𑀼𑀔𑀸𑀤𑀸𑀦𑀁, 𑀧𑀭𑀫𑁆𑀫𑀼𑀔𑀸𑀤𑀸𑀦𑀦𑁆𑀢𑀺. 𑀧𑀝𑀺𑀕𑁆𑀕𑀸𑀳𑀓𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀤𑀸𑀦𑀁 𑀲𑀫𑁆𑀫𑀼𑀔𑀸𑀤𑀸𑀦𑀁 𑀦𑀸𑀫. 𑀧𑀭𑀫𑁆𑀫𑀼𑀔𑀸 ‘‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀭𑀫𑁆𑀫𑀼𑀔𑀸𑀤𑀸𑀦𑀁. ‘‘𑀇𑀤𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀸 ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑀘𑁂 𑀯𑀤𑀢𑀺, 𑀤𑀸𑀦𑀕𑀳𑀡𑀤𑁆𑀯𑀬𑀫𑁆𑀧𑀺 𑀲𑀼𑀤𑁆𑀥𑀁. ‘‘𑀇𑀤𑀁 𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀤𑀸𑀬𑀓𑁂𑀦 𑀯𑀼𑀢𑁆𑀢𑁂 𑀕𑀡𑁆𑀳𑀦𑁆𑀢𑁄𑀧𑀺 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀯𑀤𑀢𑀺 𑀘𑁂, 𑀤𑀸𑀦𑀁, 𑀕𑀳𑀡𑀜𑁆𑀘 𑀅𑀲𑀼𑀤𑁆𑀥𑀁 𑀳𑁄𑀢𑀺. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀸𑀥𑀼 𑀪𑀦𑁆𑀢𑁂 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀕𑀳𑀡𑀁 𑀲𑀼𑀤𑁆𑀥𑀁. ‘‘𑀇𑀤𑀁 𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀧𑀼𑀦 ‘‘𑀤𑀺𑀦𑁆𑀦𑀁 𑀫𑀬𑀸, 𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁄𑀧𑀺 𑀧𑀼𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀘𑀻𑀯𑀭𑀁 𑀓𑀲𑁆𑀲𑀘𑀺 𑀅𑀲𑀦𑁆𑀢𑀓𑀢𑁆𑀢𑀸 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀧𑀘𑁆𑀙𑀸 𑀢𑁂𑀲𑀼 𑀤𑁆𑀯𑀻𑀲𑀼 𑀬𑁄 𑀇𑀘𑁆𑀙𑀢𑀺, 𑀢𑁂𑀦 𑀅𑀥𑀺𑀝𑁆𑀞𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀫𑀺𑀤𑀁 𑀅𑀝𑁆𑀞𑀓𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁.

𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂 𑀅𑀥𑀺𑀝𑁆𑀞𑀸𑀦𑁂 𑀯𑁂𑀫𑀢𑀺𑀓𑁂𑀦 𑀅𑀢𑁆𑀢𑀦𑁄 𑀯𑀺𑀫𑀢𑀺𑀁 𑀧𑀞𑀫𑀁 𑀆𑀯𑀺 𑀓𑀢𑁆𑀯𑀸 ‘‘𑀲𑀘𑁂 𑀅𑀦𑀥𑀺𑀝𑁆𑀞𑀺𑀢𑀁, 𑀏𑀯𑀁 𑀓𑀢𑁂 𑀓𑀧𑁆𑀧𑀺𑀬𑀁 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀤𑁄𑀲𑁄 𑀦𑀸𑀧𑀚𑁆𑀚𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀳𑀺 𑀏𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). ‘‘𑀓𑁂𑀘𑀺 ‘𑀢𑀣𑀸 𑀯𑁂𑀫𑀢𑀺𑀓𑀘𑀻𑀯𑀭𑀁 𑀅𑀜𑁆𑀜𑁂𑀦 ¶ 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀧𑀼𑀦 𑀤𑀸𑀢𑀩𑁆𑀩’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁.

𑀯𑀺𑀦𑀲𑁆𑀲𑀢𑀻𑀢𑀺 𑀘𑁄𑀭𑀸𑀤𑀻𑀳𑀺 𑀯𑀺𑀦𑀲𑁆𑀲𑀢𑀺. ‘‘𑀦𑀲𑁆𑀲𑀢𑀺, 𑀟𑀬𑁆𑀳𑀢𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀻’’𑀢𑀺 𑀇𑀫𑀸𑀦𑀺𑀧𑀺 ¶ 𑀯𑀺𑀦𑀸𑀲𑀧𑁆𑀧𑀓𑀸𑀭𑀢𑁆𑀢𑀸 ‘‘𑀯𑀺𑀦𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀢𑁆𑀣 ‘‘𑀦𑀲𑁆𑀲𑀢𑀻’’𑀢𑀺 𑀇𑀤𑀁 𑀘𑁄𑀭𑀸𑀤𑀻𑀳𑀺 𑀳𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀯𑀺𑀦𑀲𑁆𑀲𑀢𑀻’’𑀢𑀺 𑀇𑀤𑀁 𑀉𑀦𑁆𑀤𑀽𑀭𑀔𑀸𑀬𑀺𑀢𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀟𑀬𑁆𑀳𑀢𑀻’’𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁 𑀲𑀦𑁆𑀥𑀸𑀬. 𑀯𑀺𑀲𑁆𑀲𑀸𑀲𑁂𑀢𑀺 𑀏𑀢𑁆𑀣 𑀲𑀦𑁆𑀤𑀺𑀝𑁆𑀞𑁄 𑀘 𑀲𑀫𑁆𑀪𑀢𑁆𑀢𑁄 𑀘 𑀆𑀮𑀧𑀺𑀢𑁄 𑀘 𑀚𑀻𑀯𑀢𑀺 𑀘 𑀕𑀳𑀺𑀢𑁂 𑀘𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀅𑀢𑁆𑀢𑀦𑀺 𑀯𑀺𑀲𑁆𑀲𑀸𑀲𑁂𑀦 𑀅𑀜𑁆𑀜𑁂𑀦 𑀕𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀺𑀢𑀸𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁬𑁯) 𑀦𑀬𑁂𑀦 𑀯𑀼𑀢𑁆𑀢𑀸.

𑁬𑁦𑁧. 𑀇𑀤𑀁 𑀧𑀦 𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑁂𑀦 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀓𑀸𑀬𑀯𑀸𑀘𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀅𑀢𑀺𑀭𑁂𑀓𑀘𑀻𑀯𑀭𑀪𑀸𑀯𑀲𑁆𑀲 𑀚𑀸𑀦𑀦𑀘𑀺𑀢𑁆𑀢𑁂𑀦 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂 𑀅𑀲𑀢𑀺𑀧𑀺 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀅𑀘𑀺𑀢𑁆𑀢𑀁. 𑀅𑀦𑀥𑀺𑀝𑁆𑀞𑀸𑀦𑀢𑁄, 𑀅𑀯𑀺𑀓𑀧𑁆𑀧𑀦𑀢𑁄 𑀘 𑀅𑀓𑁆𑀭𑀺𑀬𑀁. 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀯𑀸 𑀘𑁂𑀢𑀺𑀬𑀸𑀤𑀺𑀁 𑀯𑀦𑁆𑀤𑀦𑁆𑀢𑁄 𑀯𑀸 𑀏𑀓𑀸𑀤𑀲𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀓𑀮𑀳𑀸𑀤𑀺𑀧𑀲𑀼𑀢𑁄 𑀯𑀸 𑀯𑀻𑀢𑀺𑀓𑁆𑀓𑀫𑀁 𑀚𑀸𑀦𑀦𑁆𑀢𑁄 𑀯𑀸 𑀉𑀝𑁆𑀞𑀸𑀧𑁂𑀢𑀺, 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀔𑀻𑀡𑀸𑀲𑀯𑁄 𑀧𑀦 𑀅𑀲𑀢𑀺𑀬𑀸 𑀯𑀸 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 𑀯𑀸 𑀢𑀣𑀸 𑀓𑀭𑁄𑀦𑁆𑀢𑁄 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀻𑀢𑀺 𑀢𑀺𑀘𑀺𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀲𑀼𑀔𑀯𑁂𑀤𑀦𑀸, 𑀉𑀧𑁂𑀓𑁆𑀔𑀸𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀉𑀧𑁂𑀓𑁆𑀔𑀸𑀯𑁂𑀤𑀦𑀸, 𑀓𑀮𑀳𑀸𑀤𑀺𑀧𑀲𑀼𑀢𑀲𑁆𑀲 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀤𑀼𑀓𑁆𑀔𑀯𑁂𑀤𑀦𑀸 𑀳𑁄𑀢𑀻𑀢𑀺 𑀢𑀺𑀯𑁂𑀤𑀦𑀁. 𑀏𑀲 𑀦𑀬𑁄 𑀉𑀧𑀭𑀺𑀧𑀺 𑀏𑀯𑀭𑀽𑀧𑁂 𑀞𑀸𑀦𑁂 𑀬𑁄𑀚𑁂𑀢𑀩𑁆𑀩𑁄.

𑀧𑀞𑀫𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁦𑁨. 𑀕𑀸𑀫𑀸𑀤𑀻𑀲𑀼 ¶ 𑀧𑀤𑁂𑀲𑁂𑀲𑀼 𑀢𑀺𑀧𑀜𑁆𑀘𑀲𑀽𑀢𑀺 𑀢𑀺𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑁂𑀦 𑀤𑁄𑀲𑀁, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁭) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀕𑀸𑀫𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀅𑀝𑁆𑀝𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀔𑁂𑀢𑁆𑀢𑀥𑀜𑁆𑀜𑀓𑀭- 𑀡𑀆𑀭𑀸𑀫𑀯𑀺𑀳𑀸𑀭𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑀲𑀗𑁆𑀔𑀸𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀘𑀻𑀯𑀭𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀕𑀸𑀫𑁄 𑀦𑀸𑀫 𑀏𑀓𑀓𑀼𑀝𑀺𑀓𑀸𑀤𑀺𑀕𑀸𑀫𑁄.

𑀦𑀺𑀯𑁂𑀲𑀦𑀁 𑀦𑀸𑀫 𑀕𑀸𑀫𑀢𑁄 𑀩𑀳𑀺 𑀘𑀢𑀼𑀲𑀸𑀮𑀸𑀤𑀺𑀓𑁄 𑀕𑁂𑀳𑁄. 𑀢𑁂𑀦𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀕𑀸𑀫𑀦𑀺𑀯𑁂𑀲𑀦𑀸𑀦𑀁 𑀯𑀺𑀲𑁂𑀲𑀁 𑀯𑀤𑀦𑁆𑀢𑀸 ‘𑀧𑀼𑀦 𑀏𑀓𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀦𑀺𑀯𑁂𑀲𑀺𑀢𑀸 𑀩𑀳𑀼𑀕𑁂𑀳𑀸 𑀦𑀺𑀯𑁂𑀲𑀦𑀁 𑀦𑀸𑀫 𑀳𑁄𑀦𑁆𑀢𑀻’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀇𑀤𑀁 𑀦𑀺𑀯𑁂𑀲𑀦𑀸𑀤𑀺 𑀲𑀩𑁆𑀩𑀁 ‘𑀕𑀸𑀫𑀢𑁄 𑀩𑀳𑀻’𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀇𑀤𑀜𑁆𑀘 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁 ‘‘𑀦𑀺𑀯𑁂𑀲𑀦𑀸𑀤𑀺𑀓𑀁 ¶ 𑀅𑀦𑁆𑀢𑁄𑀕𑀸𑀫𑁂 𑀘𑁂 𑀳𑁄𑀢𑀺, 𑀕𑀸𑀫𑁂 𑀯𑀼𑀢𑁆𑀢𑀧𑀭𑀺𑀳𑀸𑀭𑀲𑁆𑀲𑁂𑀯 𑀮𑀩𑁆𑀪𑀦𑀢𑁄 𑀅𑀦𑁆𑀢𑁄𑀕𑀸𑀫𑀢𑁄 𑀩𑀳𑀻’𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 ‘‘𑀉𑀤𑁄𑀲𑀺𑀢𑁄𑀢𑀺 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀯𑀼𑀢𑁆𑀢𑀲𑀭𑀽𑀧𑀁 𑀉𑀤𑁄𑀲𑀺𑀢𑀁 𑀦𑀸𑀫. ‘‘𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀯𑀼𑀢𑁆𑀢𑀲𑀭𑀽𑀧𑁄 𑀅𑀝𑁆𑀝𑁄 𑀦𑀸𑀫. ‘‘𑀫𑀸𑀴𑁄𑀢𑀺 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁪𑁮𑁨-𑁪𑁮𑁭) 𑀯𑀼𑀢𑁆𑀢𑁄 𑀏𑀓𑀓𑀡𑁆𑀡𑀺𑀓𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀕𑁂𑀳𑁄 𑀫𑀸𑀴𑁄 𑀦𑀸𑀫. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀦𑀸𑀯𑀸𑀢𑀺 𑀬𑀸𑀦𑀧𑁆𑀧𑀢𑁆𑀢𑀺. 𑀲𑀢𑁆𑀣𑀦𑁆𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀯𑀲𑁂𑀦 𑀤𑀼𑀯𑀺𑀥𑁄 𑀚𑀦𑀲𑀫𑀽𑀳𑁄, 𑀲𑁄 𑀘 𑀦𑀺𑀯𑀺𑀝𑁆𑀞𑀸𑀦𑀺𑀯𑀺𑀝𑁆𑀞𑀯𑀲𑁂𑀦 𑀧𑀘𑁆𑀘𑁂𑀓𑀁 𑀤𑀼𑀯𑀺𑀥𑁄. 𑀢𑀢𑁆𑀣 𑀦𑀺𑀯𑀺𑀝𑁆𑀞𑁂 𑀯𑀢𑀺𑀆𑀤𑀺𑀧𑀭𑀺𑀓𑁆𑀔𑁂𑀧𑁄𑀧𑀺 𑀳𑁄𑀢𑁂𑀯.

𑀔𑁂𑀢𑁆𑀢𑀦𑁆𑀢𑀺 ¶ 𑀬𑀯𑀔𑁂𑀢𑁆𑀢𑀸𑀤𑀺𑀔𑁂𑀢𑁆𑀢𑀁. 𑀥𑀜𑁆𑀜𑀓𑀭𑀡𑀁 𑀔𑀮𑀁. 𑀆𑀭𑀸𑀫𑁄 𑀧𑀼𑀧𑁆𑀨𑀸𑀭𑀸𑀫𑁄, 𑀨𑀮𑀸𑀭𑀸𑀫𑁄 𑀘. 𑀯𑀺𑀳𑀸𑀭𑁄𑀢𑀺 𑀏𑀓𑀫𑁆𑀧𑀺 𑀲𑁂𑀦𑀸𑀲𑀦𑀁 𑀯𑀼𑀘𑁆𑀘𑀢𑀺. ‘‘𑀭𑀼𑀓𑁆𑀔𑁄 𑀦𑀸𑀫 𑀬𑀁 𑀫𑀚𑁆𑀛𑀦𑁆𑀢𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀻’’𑀢𑀺 (𑀧𑀸𑀭𑀸. 𑁪𑁯𑁪) 𑀯𑀼𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑀦𑁆𑀦𑁄 𑀭𑀼𑀓𑁆𑀔𑁄. 𑀅𑀚𑁆𑀛𑁄𑀓𑀸𑀲𑁄 𑀦𑀸𑀫 𑀲𑀢𑁆𑀢𑀩𑁆𑀪𑀦𑁆𑀢𑀭𑁄, 𑀲𑁄 𑀯𑀺𑀜𑁆𑀘𑀸𑀝𑀯𑀺𑀆𑀤𑀺𑀅𑀕𑀸𑀫𑀓𑀸𑀭𑀜𑁆𑀜𑁂 𑀘 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂 𑀲𑀫𑀼𑀤𑁆𑀤𑀤𑀻𑀧𑁂 𑀘 𑀮𑀩𑁆𑀪𑀢𑀺. 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁄 𑀦𑀸𑀫 𑀉𑀤𑀓𑀧𑀺𑀝𑁆𑀞𑀺𑀬𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀢𑀤𑀳𑁂𑀯 𑀕𑁂𑀳𑀁 𑀆𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀽𑀭𑁄 𑀲𑀫𑀼𑀤𑁆𑀤𑀧𑁆𑀧𑀤𑁂𑀲𑁄 𑀯𑀼𑀘𑁆𑀘𑀢𑀺.

𑀅𑀬𑀁 𑀕𑀸𑀫𑀸𑀤𑀺𑀓𑁄 𑀧𑀘𑁆𑀘𑁂𑀓𑀁 𑀏𑀓𑀽𑀧𑀘𑀸𑀭𑁄, 𑀦𑀸𑀦𑀽𑀧𑀘𑀸𑀭𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀚𑁆𑀛𑁄𑀓𑀸𑀲𑀁 𑀯𑀺𑀦𑀸 𑀕𑀸𑀫𑀸𑀤𑀺𑀓𑁄 𑀢𑀁𑀢𑀁𑀭𑀸𑀚𑀸𑀤𑀺𑀲𑀸𑀫𑀺𑀓𑀓𑀼𑀮𑀸𑀦𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀯𑀲𑁂𑀦 𑀏𑀓𑀓𑀼𑀮𑀲𑀦𑁆𑀢𑀓𑁄 𑀘𑁂 𑀳𑁄𑀢𑀺, 𑀏𑀓𑀽𑀧𑀘𑀸𑀭𑁄. 𑀦𑀸𑀦𑀸𑀓𑀼𑀮𑀲𑀦𑁆𑀢𑀓𑁄 𑀘𑁂, 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁪𑁭𑁮). 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀸 𑀪𑁄𑀚𑀓𑀲𑁆𑀲 𑀯𑀸 𑀕𑀸𑀫𑁄’’𑀢𑀺 𑀘 ‘‘𑀦𑀸𑀦𑀸𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀕𑀸𑀫𑁄 𑀯𑁂𑀲𑀸𑀮𑀻𑀓𑀼𑀲𑀺𑀦𑀸𑀭𑀸𑀤𑀺𑀲𑀤𑀺𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁯) 𑀘.

𑀏𑀓𑀓𑀼𑀮𑁂𑀦 𑀓𑀸𑀭𑀸𑀧𑀺𑀢𑁄 𑀯𑀺𑀳𑀸𑀭𑁄 𑀏𑀓𑀽𑀧𑀘𑀸𑀭𑁄, 𑀦𑀸𑀦𑀸𑀓𑀼𑀮𑁂𑀳𑀺 𑀓𑀸𑀭𑀸𑀧𑀺𑀢𑁄 𑀦𑀸𑀦𑀽𑀧𑀘𑀸𑀭𑁄 𑀳𑁄𑀢𑀺. 𑀬𑀣𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀯𑀺𑀳𑀸𑀭𑁂 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀯𑁄𑀳𑀸𑀭𑁄 𑀓𑀸𑀭𑀸𑀧𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺. 𑀅𑀚𑁆𑀛𑁄𑀓𑀸𑀲𑁂 𑀧𑀦 ¶ 𑀉𑀧𑀘𑀸𑀭𑀪𑁂𑀤𑁄 𑀅𑀩𑁆𑀪𑀦𑁆𑀢𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑀸𑀴𑀺𑀬𑀁 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀏𑀓𑀽𑀧𑀘𑀸𑀭𑁄. 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄’’𑀢𑀺. 𑀇𑀥 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀭𑀢𑀦𑀁 𑀳𑁄𑀢𑀺. 𑀬𑀣𑀸𑀳 ¶ 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁯). 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑀭𑀽𑀧𑀧𑁆𑀧𑀪𑁂𑀤𑀸𑀦𑀺 𑀧𑀦𑁆𑀦𑀭𑀲 𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀸𑀫𑀸𑀤𑀻𑀲𑀼 𑀧𑀤𑁂𑀲𑁂𑀲𑀼 𑀢𑀺𑀧𑀜𑁆𑀘𑀲𑀽’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀸𑀴𑀺𑀅𑀝𑁆𑀞𑀓𑀣𑀸𑀯𑀡𑁆𑀡𑀦𑀢𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑁂𑀬𑁆𑀬𑀸𑀢𑀺 𑀲𑀗𑁆𑀖𑀸𑀝𑀺𑀬𑀸 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀯𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀯𑀸. 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 (𑀧𑀸𑀭𑀸. 𑁪𑁭𑁬, 𑁪𑁭𑁮) 𑀯𑀘𑀦𑀢𑁄 𑀏𑀢𑁆𑀣 𑀢𑀺𑀘𑀻𑀯𑀭𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀫𑀜𑁆𑀜𑀢𑀭𑀫𑁂𑀯 𑀘𑀻𑀯𑀭𑀁 𑀯𑀢𑁆𑀢𑀩𑁆𑀩𑀁. 𑀏𑀓𑀭𑀢𑁆𑀢𑀦𑁆𑀢𑀺 𑀯𑀺𑀧𑁆𑀧𑀯𑀸𑀲𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀧𑀺-𑀲𑀤𑁆𑀤𑁂𑀦 𑀓𑀺𑀁 𑀧𑀦 𑀤𑀺𑀭𑀢𑁆𑀢𑀸𑀤𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀯𑀺𑀦𑀸𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀳𑀭𑀺𑀢𑀼𑀁 𑀅𑀲𑀫𑀢𑁆𑀣𑁂𑀦 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀅𑀳𑀁 𑀪𑀦𑁆𑀢𑁂 𑀕𑀺𑀮𑀸𑀦𑁄, 𑀦 𑀲𑀓𑁆𑀓𑁄𑀫𑀺 𑀢𑀺𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁂𑀦 𑀲𑀗𑁆𑀖𑁂𑀦 𑀢𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑀺𑀦𑁆𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀯𑀺𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁 𑀕𑁂𑀮𑀜𑁆𑀜𑁂 𑀅𑀯𑀽𑀧𑀲𑀦𑁆𑀢𑁂 𑀯𑀸 𑀯𑀽𑀧𑀲𑀦𑁆𑀢𑁂𑀧𑀺 𑀘𑀻𑀯𑀭𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀁 𑀆𑀕𑀫𑀦𑀓𑀸𑀮𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑁂𑀧𑀺 𑀭𑁄𑀕𑁂 𑀅𑀯𑀽𑀧𑀲𑀦𑁆𑀢𑁂 𑀢𑀸𑀬𑀬𑁂𑀯 𑀲𑀫𑁆𑀫𑀼𑀢𑀺𑀬𑀸 𑀦 𑀤𑁄𑀲𑁄.

𑁬𑁦𑁩. 𑀪𑀺𑀓𑁆𑀔𑀼𑀦𑁄𑀢𑀺 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑁂𑀦 𑀘𑀻𑀯𑀭𑁂𑀦. 𑀯𑀺𑀧𑁆𑀧𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀢𑁆𑀣𑀩𑁆𑀩𑀁, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀦𑀸𑀦𑀸𑀓𑀼𑀮𑀲𑁆𑀲 ¶ 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀢𑁆𑀣𑀩𑁆𑀩𑀁 𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀦𑀬𑁂𑀦 𑀧𑀸𑀴𑀺𑀬𑀸 𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀩𑀳𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑀲𑁆𑀫𑀺𑀁 ¶ 𑀧𑀸𑀞𑁂 ‘‘𑀧𑀭𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀤𑀁 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀭𑀺𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑀧𑀸𑀲𑀸 𑀯𑀸𑀢𑀺 𑀏𑀢𑁆𑀣 𑀳𑀢𑁆𑀣𑀧𑀸𑀲𑀸 𑀦𑀸𑀫 𑀅𑀟𑁆𑀠𑀢𑀺𑀬𑀭𑀢𑀦𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀁 𑀖𑀭𑀁 𑀲𑀫𑀦𑁆𑀢𑀢𑁄 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀸 𑀧𑀤𑁂𑀲𑀸 𑀉𑀤𑁆𑀥𑀁 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁭-𑁪𑁭𑁮).

𑀯𑀺𑀧𑁆𑀧𑀯𑀲𑀦𑁆𑀢𑀲𑁆𑀲 𑀓𑁄 𑀤𑁄𑀲𑁄𑀢𑀺 𑀆𑀳 ‘‘𑀳𑁄𑀢𑀺…𑀧𑁂… 𑀅𑀭𑀼𑀡𑀼𑀕𑁆𑀕𑀫𑁂’’𑀢𑀺. 𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑀢𑁄 𑀳𑀺 𑀩𑀳𑀺 𑀘𑀻𑀯𑀭𑁂𑀦 𑀯𑀺𑀦𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀢𑀁 𑀘𑀻𑀯𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀁𑀳𑁂𑀢𑀼𑀓𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀧𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸…𑀧𑁂… 𑀯𑀺𑀜𑁆𑀜𑀼𑀦𑀸’’𑀢𑀺.

𑁬𑁦𑁪. 𑀦𑁆𑀳𑀸𑀬𑀦𑁆𑀢𑀲𑁆𑀲𑁂𑀯𑀸𑀢𑀺 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀢𑁄 𑀤𑀽𑀭𑁂 𑀦𑀳𑀸𑀬𑀦𑁆𑀢𑀲𑁆𑀲𑁂𑀯, 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁.

𑁬𑁦𑁬. 𑀅𑀘𑁆𑀙𑀺𑀦𑁆𑀦𑀁 𑀯𑀺𑀮𑀼𑀢𑁆𑀢𑀁 𑀘𑀻𑀯𑀭𑀁 𑀬𑀲𑁆𑀲 𑀲𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄, 𑀪𑀺𑀓𑁆𑀔𑀼, 𑀢𑀲𑁆𑀲 𑀞𑀸𑀦𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁.

𑁬𑁦𑁭. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺 𑀘 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀇𑀢𑀭𑀸𑀦𑀻’’𑀢𑀺 𑀘 𑀲𑁂𑀲𑁄. 𑀇𑀤𑀜𑁆𑀘 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑁂, 𑀆𑀲𑀦𑁆𑀦𑁂 𑀫𑀕𑁆𑀕𑁂 𑀘 𑀫𑀦𑀼𑀲𑁆𑀲𑀲𑀫𑁆𑀩𑀸𑀥𑁂 𑀅𑀲𑀢𑀺 𑀓𑀢𑁆𑀢𑀩𑁆𑀩𑀤𑀲𑁆𑀲𑀦𑀁. 𑀇𑀢𑀭𑀢𑁆𑀣 𑀦𑀺𑀯𑀸𑀲𑁂𑀢𑁆𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀲𑀗𑁆𑀖𑀸𑀝𑀺𑀁 𑀅𑀁𑀲𑁂 𑀓𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀯𑀺𑀳𑀸𑀭𑁂 𑀲𑀪𑀸𑀕𑁂𑀲𑀼 𑀅𑀮𑀩𑁆𑀪𑀫𑀸𑀦𑁂𑀲𑀼 𑀆𑀲𑀦𑀲𑀸𑀮𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀪𑀸𑀕𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 ¶ 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁯𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁. ‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀇𑀤𑀁 𑀫𑁂 𑀪𑀦𑁆𑀢𑁂 𑀘𑀻𑀯𑀭𑀁 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀲𑀗𑁆𑀖𑁂 𑀯𑀸 ‘‘𑀇𑀤𑀁 𑀫𑁂 𑀪𑀦𑁆𑀢𑁂 𑀘𑀻𑀯𑀭𑀁…𑀧𑁂… 𑀅𑀳𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀢𑀺𑀡𑁆𑀡𑀁, 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀦𑁆𑀢𑀺𑀓𑁂 𑀯𑀸 ‘‘𑀇𑀤𑀁 𑀫𑁂 𑀆𑀯𑀼𑀲𑁄…𑀧𑁂… 𑀇𑀫𑀸𑀳𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀸 𑀯𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀜𑁆𑀜𑀼𑀦𑀸𑀢𑀺 𑀏𑀯𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀥𑀺𑀚𑀸𑀦𑀦𑀓𑁂𑀦 𑀜𑀸𑀡𑀯𑀢𑀸𑀢𑀺 𑀅𑀢𑁆𑀣𑁄.

𑁬𑁦𑁮. 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀁.

𑁬𑁦𑁯. ‘‘𑀅𑀤𑁂𑀦𑁆𑀢𑀲𑁆𑀲 𑀘 𑀦𑀺𑀲𑁆𑀲𑀝𑁆𑀞𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀆𑀧𑀢𑁆𑀢𑀺 ¶ 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸, 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀫𑀁 𑀯𑀺𑀥𑀺𑀁 𑀚𑀸𑀦𑀦𑀢𑀸𑀬 𑀩𑁆𑀬𑀢𑁆𑀢𑁂𑀦 𑀬𑀣𑀸𑀯𑀺𑀥𑀺𑀁 𑀓𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀧𑀝𑀺𑀩𑀮𑁂𑀦 𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁩𑁯) 𑀆𑀕𑀢𑀦𑀬𑁂𑀦 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀘𑁂 𑀲𑀗𑁆𑀖𑁄 𑀳𑁄𑀢𑀺, ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺, 𑀲𑀘𑁂 𑀢𑀬𑁄 𑀳𑁄𑀦𑁆𑀢𑀺, ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀆𑀬𑀲𑁆𑀫𑀦𑁆𑀢𑀸 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀼’’𑀦𑁆𑀢𑀺, 𑀲𑀘𑁂 𑀏𑀓𑀓𑁄 𑀳𑁄𑀢𑀺, ‘‘𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀤𑀸𑀢𑀩𑁆𑀩𑀁, 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 ‘‘𑀅𑀢𑁆𑀢𑀦𑁄𑀬𑁂𑀯 𑀤𑀺𑀦𑁆𑀦’’𑀦𑁆𑀢𑀺 𑀲𑀼𑀤𑁆𑀥𑀲𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀅𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 𑀮𑁂𑀲𑁂𑀦 𑀯𑀺𑀮𑀼𑀫𑁆𑀧𑀦𑁆𑀢𑀲𑁆𑀲 𑀧𑀦 𑀪𑀡𑁆𑀟𑀕𑁆𑀖𑀯𑀲𑁂𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀬𑀣𑀸𑀳 ¶ 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀧𑀦 𑀜𑀢𑁆𑀯𑀸 𑀮𑁂𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯). 𑀧𑀭𑀺𑀬𑀸𑀧𑀼𑀢𑀦𑁆𑀢𑀺 ‘‘𑀦 𑀪𑀺𑀓𑁆𑀔𑀯𑁂 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀦 𑀤𑀸𑀢𑀩𑁆𑀩𑀁, 𑀬𑁄 𑀦 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁭𑁦) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁧𑁦-𑁧. 𑀣𑁂𑀭𑁂 𑀤𑀳𑀭𑁂 𑀘𑀸𑀢𑀺 𑀏𑀢𑁂𑀲𑀼 𑀉𑀪𑁄𑀲𑀼𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀲𑀽𑀢𑀺 𑀬𑁄𑀚𑀦𑀸. ‘‘𑀣𑁂𑀭𑁂’’𑀢𑀺 𑀇𑀫𑀺𑀦𑀸 𑀅𑀦𑀺𑀲𑁆𑀲𑀺𑀢𑀪𑀸𑀯𑀫𑀸𑀳, ‘‘𑀤𑀳𑀭𑁂 𑀘𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀺𑀢𑀪𑀸𑀯𑀁. 𑀑𑀳𑀻𑀦𑁂𑀢𑀺 𑀑𑀲𑀓𑁆𑀓𑀺𑀢𑁂. 𑀲𑀘𑁂 𑀲𑁄 𑀣𑁂𑀭𑁄 𑀦𑀺𑀲𑁆𑀲𑀬𑀸𑀘𑀭𑀺𑀬𑁄 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀕𑀭𑀼’’𑀦𑁆𑀢𑀺. 𑀢𑀲𑁆𑀫𑀺𑀁 𑀤𑀳𑀭𑁂. 𑀯𑀢𑁆𑀣𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀞𑀺𑀢𑀘𑀻𑀯𑀭𑀁. 𑀦 𑀧𑀲𑁆𑀲𑀫𑁆𑀪𑀢𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 ‘‘𑀫𑀼𑀳𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑁬𑁧𑁪. 𑀧𑀘𑁆𑀘𑀼𑀤𑁆𑀥𑀸𑀭𑁂 𑀅𑀦𑁆𑀢𑁄𑀬𑁂𑀯𑀸𑀭𑀼𑀡𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀤𑀳𑀭𑀪𑀺𑀓𑁆𑀔𑀼𑀦𑁄 𑀤𑀽𑀭𑀪𑀸𑀯𑀜𑁆𑀘 𑀅𑀭𑀼𑀡𑀼𑀕𑁆𑀕𑀫𑀦𑀜𑁆𑀘 𑀜𑀢𑁆𑀯𑀸 𑀘𑀻𑀯𑀭𑀲𑁆𑀲 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀣𑀁 𑀢𑀲𑁆𑀲 𑀳𑀢𑁆𑀣𑁂 𑀞𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀭𑀸𑀭𑀼𑀡𑀸 𑀧𑀘𑁆𑀘𑀼𑀤𑁆𑀥𑀭𑁂𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀯𑀺𑀦𑀲𑁆𑀲𑀢𑀻𑀢𑀺 𑀘𑁄𑀭𑀸𑀤𑀻𑀳𑀺 𑀦𑀲𑁆𑀲𑀢𑀺.

𑀤𑀼𑀢𑀺𑀬𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁧𑁬. 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 ¶ ‘‘𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀅𑀦𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 ‘‘𑀘𑀻𑀯𑀭𑀫𑀸𑀲𑁄’’𑀢𑀺 𑀬𑁄 𑀧𑀼𑀩𑁆𑀩𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀻, 𑀢𑀸𑀯 𑀫𑀸𑀲𑁄 𑀯𑀼𑀘𑁆𑀘𑀢𑀺, 𑀢𑀢𑁄 𑀧𑀭𑁂𑀲𑀼 𑀏𑀓𑀸𑀤𑀲𑀲𑀼 𑀫𑀸𑀲𑁂𑀲𑀼 ¶ 𑀉𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 𑀬𑁄 𑀘𑀻𑀯𑀭𑀫𑀸𑀲𑁄, 𑀳𑁂𑀫𑀦𑁆𑀢𑀸 𑀘 𑀘𑀢𑁆𑀢𑀸𑀭𑁄 𑀫𑀸𑀲𑀸𑀢𑀺 𑀧𑀜𑁆𑀘𑀫𑀸𑀲𑀢𑁄 𑀩𑀳𑀺 𑀲𑀢𑁆𑀢𑀲𑀼 𑀫𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀢𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀲𑀗𑁆𑀖𑀲𑁆𑀲 𑀘 ‘‘𑀇𑀤𑀁 𑀅𑀓𑀸𑀮𑀘𑀻𑀯𑀭𑀁 𑀤𑀫𑁆𑀫𑀻’’𑀢𑀺 𑀧𑀼𑀕𑁆𑀕𑀮𑀲𑁆𑀲 𑀘 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀜𑁆𑀘𑁂𑀢𑀺 𑀇𑀤𑀁 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑁂𑀲𑁄, ‘‘𑀉𑀧𑁆𑀧𑀚𑁆𑀚𑁂𑀬𑁆𑀬 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀲𑀗𑁆𑀖𑀲𑁆𑀲 𑀯𑀸 ‘‘𑀇𑀤𑀁 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀲𑁆𑀲 𑀤𑁂𑀫, 𑀇𑀤𑀁 𑀆𑀪𑀺𑀥𑀫𑁆𑀫𑀺𑀓𑀕𑀡𑀲𑁆𑀲 𑀤𑁂𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀡𑀲𑁆𑀲 𑀯𑀸 𑀤𑀺𑀦𑁆𑀦𑀢𑁄 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀯𑀸 𑀜𑀸𑀢𑀺𑀆𑀤𑀺𑀢𑁄 𑀯𑀸 𑀲𑀼𑀲𑀸𑀦𑀸𑀤𑀺𑀧𑀁𑀲𑀼𑀓𑀽𑀮𑀔𑁂𑀢𑁆𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀲𑀼𑀢𑁆𑀢𑀓𑀧𑁆𑀧𑀸𑀲𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀼𑀢𑁄 𑀯𑀸 𑀉𑀧𑁆𑀧𑀦𑁆𑀦𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀫𑀸𑀲𑀧𑀭𑀫𑀁 𑀦𑀺𑀓𑁆𑀔𑀺𑀧𑁂𑀢𑀺 𑀫𑀸𑀲𑁄 𑀧𑀭𑀫𑀁 𑀧𑀫𑀸𑀡𑀁 𑀏𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀲𑁆𑀲𑀸𑀢𑀺 𑀫𑀸𑀲𑀧𑀭𑀫𑀁, 𑀦𑀺𑀓𑁆𑀔𑀺𑀧𑀦𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀓𑀸𑀢𑀩𑁆𑀩𑀁, 𑀫𑀸𑀲𑀧𑀭𑀫𑀁 𑀦𑀺𑀓𑁆𑀔𑀺𑀧𑀦𑀁 𑀓𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀁, 𑀦𑁄 𑀘𑀲𑁆𑀲 𑀧𑀸𑀭𑀺𑀧𑀽𑀭𑀻, 𑀫𑀸𑀲𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀁 𑀇𑀘𑁆𑀙𑀦𑁆𑀢𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑁂 𑀧𑀳𑁄𑀢𑀺, 𑀤𑀲𑀸𑀳𑀫𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀦𑀧𑁆𑀧𑀳𑁄𑀢𑀺, 𑀊𑀦𑀲𑁆𑀲 𑀧𑀭𑀺𑀧𑀽𑀭𑀡𑀢𑁆𑀣𑀁 𑀫𑀸𑀲𑀧𑀭𑀫𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀓𑀤𑀸 𑀏𑀯𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀢𑀺 𑀧𑀘𑁆𑀘𑀸𑀲𑀸𑀬𑀸’’𑀢𑀺, ‘‘𑀧𑀘𑁆𑀘𑀸𑀲𑀸 𑀳𑁄𑀢𑀺 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀼𑀢𑁆𑀢𑀲𑀗𑁆𑀖𑀸𑀤𑀺𑀢𑁄 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑀸𑀤𑀺𑀢𑁄 𑀮𑀪𑁂𑀬𑁆𑀬, 𑀢𑁂𑀦 ‘‘𑀇𑀫𑀲𑁆𑀲 𑀊𑀦𑁂 𑀧𑀭𑀺𑀧𑀼𑀡𑁆𑀡𑁂 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑀸𑀲𑀸𑀬 𑀲𑀢𑀺 𑀏𑀯𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀉𑀤𑁆𑀥𑀁 𑀞𑀧𑁂𑀢𑀼𑀁 ¶ 𑀦 𑀯𑀝𑁆𑀝𑀢𑀻𑀢𑀺 𑀫𑀸𑀲𑀢𑁄 𑀅𑀢𑀺𑀭𑁂𑀓𑀓𑀸𑀮𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀬𑀤𑀺 𑀏𑀯𑀁 ‘‘𑀢𑀤𑀳𑀼𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀲𑀸𑀳𑀸 𑀓𑀸𑀭𑁂𑀢𑀩𑁆𑀩𑀁…𑀧𑁂… 𑀯𑀻𑀲𑁂 ¶ 𑀉𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀲𑀸𑀳𑀸 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀓𑀲𑁆𑀫𑀸 𑀆𑀳𑀸𑀢𑀺? 𑀧𑀘𑁆𑀘𑀸𑀲𑀸𑀘𑀻𑀯𑀭𑀲𑁆𑀲 𑀤𑀲𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑀼𑀁 𑀅𑀬𑀼𑀢𑁆𑀢𑀢𑁆𑀢𑀸, 𑀫𑀽𑀮𑀘𑀻𑀯𑀭𑀲𑁆𑀲 𑀢𑀕𑁆𑀕𑀢𑀺𑀓𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀽𑀮𑀘𑀻𑀯𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀯𑀲𑀢𑁄 𑀬𑀸𑀯 𑀯𑀻𑀲𑀢𑀺𑀫𑁄 𑀤𑀺𑀯𑀲𑁄, 𑀢𑀸𑀯 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀫𑀽𑀮𑀘𑀻𑀯𑀭𑀁 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁦).

𑀢𑀢𑀺𑀬𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸.

𑁬𑁧𑁮-𑁯. 𑀪𑀺𑀓𑁆𑀔𑀼𑀦𑀺𑀬𑀸 𑀬𑁄 𑀥𑁄𑀯𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀅𑀝𑁆𑀞𑀯𑀸𑀘𑀺𑀓𑀸𑀬 𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀦𑀸𑀫. 𑀪𑀼𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀁 𑀭𑀚𑀺𑀢𑀁 𑀆𑀤𑀺𑀦𑁆𑀦𑀓𑀧𑁆𑀧𑀁, ‘‘𑀧𑀭𑀺𑀪𑁄𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑀫𑀲𑁄 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀦𑀫𑀢𑁆𑀢𑁂𑀦𑀸𑀧𑀺 𑀧𑀼𑀭𑀸𑀡𑀪𑀽𑀢𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸 𑀏𑀓𑀯𑀸𑀭𑀫𑁆𑀧𑀺 𑀦𑀺𑀯𑀢𑁆𑀣𑀁 𑀯𑀸 𑀧𑀸𑀭𑀼𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀫𑀢𑁆𑀣𑀓𑁂 𑀯𑀸 𑀓𑀢𑁆𑀯𑀸 𑀫𑀕𑁆𑀕𑀁 𑀕𑀢𑁄 𑀳𑁄𑀢𑀺, 𑀉𑀲𑁆𑀲𑀻𑀲𑀓𑀁 𑀯𑀸 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀢𑀫𑁆𑀧𑀺 𑀧𑀼𑀭𑀸𑀡𑀘𑀻𑀯𑀭𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀯𑀢𑁆𑀣𑀦𑁆𑀢𑀺 𑀓𑀸𑀭𑀺𑀬𑁂 𑀓𑀸𑀭𑀡𑁄𑀧𑀘𑀸𑀭𑀯𑀲𑁂𑀦 𑀘𑀻𑀯𑀭𑀫𑁂𑀯 𑀆𑀳.

𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 ‘‘𑀅𑀜𑁆𑀜𑀸𑀢𑀺𑀓𑀸 𑀦𑀸𑀫 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀲𑀫𑁆𑀩𑀤𑁆𑀥𑀸’’𑀢𑀺 𑀯𑀘𑀦𑀢𑁄 ¶ 𑀅𑀢𑁆𑀢𑀦𑁄 𑀯𑀸 𑀢𑀲𑁆𑀲𑀸 𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀏𑀢𑁆𑀣𑀦𑁆𑀢𑀭𑁂 𑀬𑁂𑀦 𑀓𑁂𑀦𑀘𑀺 𑀜𑀸𑀢𑀓𑁂𑀦 𑀅𑀲𑀫𑁆𑀩𑀤𑁆𑀥𑀪𑀸𑀯𑁂𑀦 𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀬𑀸 𑀅𑀲𑀫𑁆𑀩𑀤𑁆𑀥𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀆𑀓𑁄𑀝𑀸𑀧𑁂𑀢𑀻𑀢𑀺 𑀧𑀳𑀭𑀸𑀧𑁂𑀢𑀺.

𑀢𑀢𑁄 𑀥𑁄𑀯𑀸𑀧𑀦𑀸𑀤𑀺𑀢𑁄. 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀆𑀧𑀢𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑁂𑀦 𑀯𑀺𑀲𑀺𑀝𑁆𑀞𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀢𑀺𑀡𑁆𑀡𑀁 𑀧𑀬𑁄𑀕𑀸𑀦𑀁 𑀅𑀦𑁆𑀢𑁂 𑀆𑀧𑀚𑁆𑀚𑀺𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑀁. 𑀢𑀲𑁆𑀲 𑀦𑀺𑀬𑁄𑀕𑁂𑀦 𑀥𑁄𑀯𑀦𑀸𑀤𑀺𑀁 𑀓𑀭𑁄𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀢𑁆𑀣𑀁 𑀲𑀩𑁆𑀩𑀧𑀼𑀩𑁆𑀩𑀧𑀬𑁄𑀕𑀕𑀡𑀦𑀸𑀬 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯 𑀦𑀁 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀦𑀺𑀬𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 ¶ (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫). 𑀧𑀞𑀫𑁂𑀦𑀸𑀢𑀺 𑀢𑀻𑀡𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀬𑀁 𑀧𑀞𑀫𑀁 𑀓𑀸𑀭𑀸𑀧𑁂𑀢𑀺, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀻𑀧𑀺𑀢𑀦𑁆𑀢𑀺 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻 𑀧𑀼𑀭𑀸𑀡𑀘𑀻𑀯𑀭𑀁 𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀺 𑀆𑀓𑁄𑀝𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁦𑁬) 𑀤𑁂𑀲𑀺𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀤𑁆𑀯𑁂 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀧𑀞𑀫𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀺, 𑀤𑀼𑀢𑀺𑀬𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀬𑁆𑀳𑀢𑀺.

𑁬𑁨𑁦. ‘‘𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀻’’𑀢𑀺 𑀇𑀫𑀺𑀦𑀸 ‘‘𑀪𑀼𑀢𑁆𑀢𑀁 𑀯𑀢𑁆𑀣’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺.

𑁬𑁨𑁧. 𑀲𑀸𑀫𑀡𑁂𑀭𑀦𑀺𑀤𑁆𑀤𑁂𑀲𑁂𑀧𑀻𑀢𑀺 ‘‘𑀲𑀸𑀫𑀡𑁂𑀭𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀦𑀸𑀫 𑀬𑀲𑁆𑀲, 𑀢𑀲𑁆𑀫𑀺𑀫𑁆𑀧𑀺, 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀁 𑀯𑀢𑁆𑀣𑀁 𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀻𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 𑀧𑀭𑀺𑀪𑀼𑀢𑁆𑀢𑀁 𑀘𑀻𑀯𑀭𑀁 𑀥𑁄𑀯𑀦𑀢𑁆𑀣𑀸𑀬 ¶ 𑀲𑀸𑀫𑀡𑁂𑀭𑀲𑁆𑀲 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀼𑀩𑁆𑀩𑀓𑀺𑀭𑀺𑀬𑀸𑀬 ‘‘𑀥𑁄𑀯𑀢𑀻’’𑀢𑀺 𑀅𑀧𑀭𑀓𑀺𑀭𑀺𑀬𑀸 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑁬𑁨𑁨. 𑀤𑀳𑀭𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀦𑁆𑀢𑀺 𑀅𑀢𑁆𑀢𑀦𑁄 𑀦𑀯𑀓𑀢𑀭𑀸𑀦𑀁 𑀪𑀺𑀓𑁆𑀔𑀽𑀦𑀁. 𑀦𑀺𑀬𑁆𑀬𑀸𑀤𑀺𑀢𑁂 𑀤𑀺𑀦𑁆𑀦𑁂. 𑀏𑀲 𑀦𑀬𑁄𑀢𑀺 ‘‘𑀏𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀲𑀺𑀝𑁆𑀞𑁂𑀳𑀺 𑀤𑁆𑀯𑀻𑀳𑀺 𑀯𑀸 𑀏𑀓𑁂𑀦 𑀯𑀸 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀦𑀬𑁄.

𑁬𑁨𑁩. 𑀘𑀻𑀯𑀭𑁂𑀢𑀺 𑀧𑀭𑀺𑀪𑀼𑀢𑁆𑀢𑀘𑀻𑀯𑀭𑁂.

𑁬𑁨𑁪. ‘‘𑀥𑁄𑀯𑀦𑀧𑁆𑀧𑀘𑁆𑀘𑀬𑀸𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀇𑀢𑀭𑀤𑁆𑀯𑀬𑀲𑁆𑀲 𑀢𑀲𑁆𑀲 𑀅𑀦𑀸𑀡𑀢𑁆𑀢𑀺𑀬𑀸 𑀓𑀢𑀢𑁆𑀢𑀸 𑀢𑀢𑁄 𑀅𑀦𑀸𑀧𑀢𑁆𑀢𑀺𑀪𑀸𑀯𑀫𑀸𑀳.

𑁬𑁨𑁬. 𑀜𑀸𑀢𑀺𑀓𑀸𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨-𑁨𑁩, 𑁪𑁨𑁨; 𑀅. 𑀦𑀺. 𑁬.𑁫𑁮; 𑁮.𑁯; 𑀫𑀳𑀸𑀦𑀺. 𑁨𑁦𑁬; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮) 𑀯𑀺𑀬 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀬-𑀓𑀸𑀭𑀮𑁄𑀧𑁄, 𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀜𑀸𑀢𑀺𑀓𑀸 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀫𑀜𑁆𑀘𑀧𑀻𑀞𑁂 𑀅𑀢𑁆𑀣𑀭𑀺𑀢𑀩𑁆𑀩𑀁 𑀧𑀘𑁆𑀘𑀢𑁆𑀣𑀭𑀡𑀘𑀻𑀯𑀭𑀜𑁆𑀘.

𑁬𑁨𑁭. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦𑀸’’𑀢𑀺 𑀇𑀤𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀧𑀺 𑀉𑀧𑀲𑀫𑁆𑀧𑀦𑁆𑀦𑀸 𑀘𑁂, 𑀧𑀸𑀘𑀺𑀢𑁆𑀢𑀺𑀬𑀲𑀫𑁆𑀪𑀯𑀸 𑀯𑀼𑀢𑁆𑀢𑀁 ¶ . 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁬). 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀧𑀞𑀫𑀁 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑁂 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀢𑀸 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀧𑀞𑀫𑀁 𑀧𑀩𑁆𑀩𑀚𑀺𑀢𑀸 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁬). 𑀪𑀺𑀓𑁆𑀔𑀼𑀦𑁄 ¶ 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀦𑁆𑀦𑀓𑀫𑁆𑀫𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀲𑁄𑀧𑀺 𑀕𑀳𑁂𑀢𑀩𑁆𑀩𑁄𑀬𑁂𑀯.

𑁬𑁨𑁮. 𑀅𑀯𑀼𑀢𑁆𑀢𑀸 𑀥𑁄𑀯𑀢𑀻𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀥𑁄𑀯𑀸’’𑀢𑀺 𑀅𑀯𑀼𑀢𑁆𑀢𑀸 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀤𑀺𑀲𑁆𑀯𑀸 𑀅𑀯𑀢𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀸 𑀲𑀬𑀫𑁂𑀯 𑀯𑀢𑁆𑀯𑀸 𑀬𑀸𑀘𑀦𑀸𑀤𑀺𑀦𑀬𑁂𑀦 𑀯𑀸 𑀅𑀦𑀸𑀡𑀢𑁆𑀢𑀺𑀬𑀸 𑀘 𑀕𑀳𑁂𑀢𑁆𑀯𑀸 𑀘𑀻𑀯𑀭𑀥𑁄𑀯𑀦𑀸𑀤𑀺𑀁 𑀓𑀭𑁂𑀬𑁆𑀬 𑀘𑁂. 𑀅𑀧𑀭𑀺𑀪𑀼𑀢𑁆𑀢𑀁 𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀧𑀭𑀺𑀪𑀼𑀢𑁆𑀢𑀁 𑀘𑀻𑀯𑀭𑀁. 𑀅𑀜𑁆𑀜𑀁 𑀯𑀸𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀧𑁄𑀢𑁆𑀣𑀓𑀢𑁆𑀣𑀯𑀺𑀓𑀫𑀜𑁆𑀘𑀧𑀻𑀞𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁.

𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀓𑀣𑀸𑀯𑀡𑁆𑀡𑀦𑀸.

𑁬𑁨𑁯. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀉𑀧𑀸𑀤𑀸𑀬 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀕𑀡𑁆𑀳𑀢𑁄𑀢𑀺 𑀬𑁄𑀚𑀦𑀸, 𑀏𑀢𑁆𑀣 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄’’𑀢𑀺 𑀘 ‘‘𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀘 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀻’’𑀢𑀺 𑀘 𑀯𑀓𑁆𑀔𑀫𑀸𑀦𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀫𑀸𑀦𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀸𑀢𑀺𑀓𑀸𑀬 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀯𑀺𑀓𑀧𑁆𑀧𑀦𑀼𑀧𑀕𑀭𑀢𑀦𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀯𑀢𑁆𑀣𑀢𑁄 𑀧𑀝𑁆𑀞𑀸𑀬 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀢𑁆𑀢𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀻’’𑀢𑀺 𑀧𑀓𑀭𑀡𑀢𑁄 𑀘 ‘‘𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁄 𑀘 𑀮𑀩𑁆𑀪𑀢𑀺. 𑀞𑀧𑁂𑀢𑁆𑀯𑀸 𑀧𑀸𑀭𑀺𑀯𑀢𑁆𑀢𑀓𑀦𑁆𑀢𑀺 ‘‘𑀧𑀸𑀭𑀺𑀯𑀢𑁆𑀢𑀓𑀁 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑀁, 𑀯𑀺𑀧𑀼𑀮𑁂𑀦 𑀯𑀸 𑀧𑀭𑀺𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑁫𑁧𑁪) 𑀯𑀘𑀦𑀢𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀅𑀦𑁆𑀢𑀫𑀲𑁄 𑀳𑀭𑀻𑀢𑀓𑀔𑀡𑁆𑀟𑁂𑀦𑀸𑀧𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁪) 𑀯𑀼𑀢𑁆𑀢𑀢𑁆𑀢𑀸 𑀘 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀳𑀭𑀻𑀢𑀓𑀔𑀡𑁆𑀟𑀫𑁆𑀧𑀺 𑀤𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀢𑀺𑀘𑀻𑀯𑀭𑀜𑁆𑀘 𑀧𑀸𑀭𑀺𑀯𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀯𑀢𑁆𑀢𑀦𑀁 𑀧𑀭𑀺𑀯𑀢𑁆𑀢𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀭𑀺𑀯𑀢𑁆𑀢𑀓𑀁, 𑀓𑀬𑀯𑀺𑀓𑁆𑀓𑀬𑁂𑀦 𑀕𑀳𑁂𑀢𑀩𑁆𑀩𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁦. 𑀕𑀳𑀡𑀢𑁆𑀣𑀸𑀬 ¶ 𑀧𑀬𑁄𑀕𑁂𑀢𑀺 𑀕𑀡𑁆𑀳𑀺𑀢𑀼𑀁 𑀳𑀢𑁆𑀣𑀧𑀲𑀸𑀭𑀡𑀸𑀤𑀺𑀧𑁆𑀧𑀬𑁄𑀕𑁂. 𑀧𑀭𑀺𑀬𑀸𑀧𑀼𑀢𑀦𑁆𑀢𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑁫𑁧𑁨) 𑀤𑁂𑀲𑀺𑀢𑀁.

𑁬𑁩𑁧. 𑀅𑀦𑀼𑀧𑀲𑀫𑁆𑀧𑀦𑁆𑀦𑀳𑀢𑁆𑀣𑁂𑀢𑀺 ¶ 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀢𑁄 𑀅𑀜𑁆𑀜𑁂 𑀲𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀕𑀳𑀺𑀢𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀳𑀢𑁆𑀣𑁂 𑀧𑁂𑀲𑀺𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁨).

𑁬𑁩𑁨. 𑀏𑀓𑀢𑁄𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀓𑁆𑀔𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁩).

𑁬𑁩𑁩. ‘‘𑀧𑀸𑀭𑀺𑀯𑀢𑁆𑀢𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁬𑁩𑁪. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀣𑀯𑀺𑀓𑀓𑀸𑀬𑀩𑀦𑁆𑀥𑀦𑀸𑀤𑀺 𑀅𑀯𑀺𑀓𑀧𑁆𑀧𑀺𑀬𑀁 𑀯𑀸 𑀅𑀯𑀺𑀓𑀧𑁆𑀧𑀦𑀼𑀧𑀕𑀁 𑀯𑀸 𑀧𑀭𑀺𑀓𑁆𑀔𑀸𑀭𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀦 𑀦 𑀯𑀝𑁆𑀝𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 𑀧𑀦 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁪). 𑀘𑀻𑀯𑀭𑀧𑀝𑀺𑀕𑁆𑀕𑀡𑁆𑀳𑀦𑀁 𑀓𑀺𑀭𑀺𑀬𑀸, 𑀧𑀸𑀭𑀺𑀯𑀢𑁆𑀢𑀓𑀲𑁆𑀲 𑀅𑀤𑀸𑀦𑀁 𑀅𑀓𑀺𑀭𑀺𑀬𑀸𑀢𑀺 𑀓𑀺𑀭𑀺𑀬𑀸𑀬 𑀘 𑀅𑀓𑀺𑀭𑀺𑀬𑀸𑀬 𑀘 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀓𑀣𑀸𑀯𑀡𑁆𑀡𑀦𑀸.

𑁬𑁩𑁫. ‘‘𑀅𑀜𑁆𑀜𑀸𑀢𑀓𑀁 𑀅𑀧𑁆𑀧𑀯𑀸𑀭𑀺𑀢’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁧𑁬, 𑁫𑁧𑁮). 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀲𑀫𑁆𑀩𑀤𑁆𑀥𑀜𑁆𑀜𑀸𑀢𑀺𑀓𑀢𑀸𑀬 𑀅𑀪𑀸𑀯𑀢𑁄 𑀅𑀜𑁆𑀜𑀸𑀢𑀓𑀁. ‘‘𑀬𑀁 𑀫𑀬𑁆𑀳𑀁 𑀕𑁂𑀳𑁂 ¶ 𑀅𑀢𑁆𑀣𑀺, 𑀢𑀁 𑀧𑀯𑀸𑀭𑁂𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀁. ‘‘𑀕𑀳𑀧𑀢𑀺 𑀦𑀸𑀫 𑀬𑁄 𑀓𑁄𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀕𑀳𑀧𑀢𑀺𑀁 𑀯𑀸. ‘‘𑀕𑀳𑀧𑀢𑀸𑀦𑀻 𑀦𑀸𑀫 𑀬𑀸 𑀓𑀸𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀖𑀭𑀡𑀺𑀁 𑀯𑀸𑀢𑀺 𑀅𑀢𑁆𑀣𑁄.

𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻𑀢𑀺 ‘‘𑀅𑀜𑁆𑀜𑀢𑁆𑀭 𑀲𑀫𑀬𑀸 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁 ¶ 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 ‘‘𑀢𑀢𑁆𑀣𑀸𑀬𑀁 𑀲𑀫𑀬𑁄, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀳𑁄𑀢𑀺 𑀪𑀺𑀓𑁆𑀔𑀼 𑀦𑀝𑁆𑀞𑀘𑀻𑀯𑀭𑁄 𑀯𑀸’’𑀢𑀺 (𑀧𑀸𑀭𑀸. 𑁫𑁧𑁮) 𑀫𑀸𑀢𑀺𑀓𑀸𑀬, ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 𑀥𑀼𑀢𑁆𑀢𑁂𑀳𑀺 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀦𑀝𑁆𑀞𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑀁 𑀳𑁄𑀢𑀺, 𑀉𑀤𑀓𑁂𑀦 𑀯𑀸 𑀯𑀽𑀴𑁆𑀳𑀁 𑀳𑁄𑀢𑀺, 𑀉𑀦𑁆𑀤𑀽𑀭𑁂𑀳𑀺 𑀯𑀸 𑀉𑀧𑀘𑀺𑀓𑀸𑀳𑀺 𑀯𑀸 𑀔𑀸𑀬𑀺𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯) 𑀧𑀤𑀪𑀸𑀚𑀦𑁂 𑀘 𑀦𑀺𑀤𑁆𑀤𑀺𑀝𑁆𑀞𑀲𑀭𑀽𑀧𑀓𑀸𑀮𑀢𑁄 𑀅𑀜𑁆𑀜𑀢𑁆𑀭𑀸𑀢𑀺 𑀅𑀢𑁆𑀣𑁄.

𑁬𑁩𑁬. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀜𑁆𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀜𑀸𑀢𑀓𑀲𑀜𑁆𑀜𑀻 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁨𑁦) 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀬𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁. ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀜𑀸𑀢𑀓𑁂. 𑀯𑁂𑀫𑀢𑀺𑀓𑀲𑁆𑀲𑀸𑀢𑀺 ‘‘𑀜𑀸𑀢𑀓𑁄 𑀦𑀼 𑀔𑁄, 𑀅𑀜𑁆𑀜𑀸𑀢𑀓𑁄’’𑀢𑀺 𑀯𑁂𑀫𑀢𑀺𑀓𑀲𑁆𑀲. 𑀤𑁆𑀯𑀺𑀓𑀤𑀼𑀓𑁆𑀓𑀝𑀁 𑀢𑀣𑁂𑀯𑀸𑀢𑀺 𑀬𑁄𑀚𑀦𑀸. ‘‘𑀢𑀣𑁂𑀯𑀸’’𑀢𑀺 ‘‘𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀆𑀓𑀟𑁆𑀠𑀢𑀺, ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁨𑁦) 𑀤𑁂𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁩𑁭-𑁮. 𑀲𑀫𑀬𑁂 ¶ 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀤𑁆𑀯𑀬𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀢𑁆𑀢𑀦𑁄’’𑀢𑀺 𑀅𑀚𑁆𑀛𑀸𑀳𑀸𑀭𑁄, ‘‘𑀲𑀫𑀬𑁂’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂 𑀅𑀲𑀫𑀬𑁂𑀧𑀺 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀲𑁂𑀲𑁄, 𑀅𑀢𑁆𑀢𑀦𑁄 𑀜𑀸𑀢𑀓𑁂, 𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸, 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀭𑀁 𑀧𑀓𑁆𑀔𑀁 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀲 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸’’𑀢𑀺. 𑀢𑀲𑁆𑀲𑀸𑀢𑀺 ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀲𑁆𑀲, ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀸𑀢𑀺 𑀧𑀼𑀭𑀺𑀫𑀯𑀺𑀓𑀧𑁆𑀧𑀸𑀧𑁂𑀓𑁆𑀔𑀁. 𑀬𑀁 𑀲𑀦𑁆𑀥𑀸𑀬 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀲𑁆𑀲 𑀜𑀸𑀢𑀓𑁂 𑀯𑀸 𑀧𑀯𑀸𑀭𑀺𑀢𑁂 𑀯𑀸 𑀢𑀁𑀬𑁂𑀯 𑀲𑀦𑁆𑀥𑀸𑀬 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀅𑀦𑀸𑀧𑀢𑁆𑀢𑀺𑀅𑀗𑁆𑀕𑀁 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀬𑁆𑀳𑀢𑀺 ¶ , 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀲𑀼𑀢𑁆𑀢𑀓𑀧𑁆𑀧𑀸𑀲𑀸𑀤𑀺𑀓𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀬𑀸𑀘𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁬𑁩𑁯. 𑀅𑀧𑁆𑀧𑀯𑀸𑀭𑀺𑀢𑀫𑀜𑁆𑀜𑀸𑀢𑀺𑀦𑁆𑀢𑀺 𑀏𑀢𑁆𑀣 ‘‘𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸’’𑀢𑀺 𑀇𑀤𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀢𑀢𑀼𑀢𑁆𑀢𑀭𑀺𑀦𑁆𑀢𑀺 𑀢𑀢𑁄 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑁄 𑀉𑀢𑁆𑀢𑀭𑀺𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁩) 𑀯𑀼𑀢𑁆𑀢𑀢𑁆𑀢𑀸 ¶ 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀲𑀸𑀤𑀺𑀢𑀩𑁆𑀩𑀅𑀦𑁆𑀢𑀭𑀯𑀸𑀲𑀓𑀉𑀢𑁆𑀢𑀭𑀸𑀲𑀗𑁆𑀕𑀫𑀢𑁆𑀢𑁂𑀦 𑀅𑀥𑀺𑀓𑀦𑁆𑀢𑀺 𑀅𑀢𑁆𑀣𑁄.

‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁫𑁨𑁩) 𑀯𑀘𑀦𑀢𑁄 ‘‘𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀯𑀢𑁆𑀢𑀩𑁆𑀩𑁂 ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀙𑀩𑁆𑀩𑀕𑁆𑀕𑀺𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂 𑀫𑁄𑀖𑀧𑀼𑀭𑀺𑀲𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀣𑀸’’𑀢𑀺 (𑀧𑀸𑀭𑀸. 𑁫𑁨𑁨) 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀢𑁂𑀦𑁂𑀯 𑀇𑀫𑀲𑁆𑀫𑀺𑀁 𑀧𑀤𑀪𑀸𑀚𑀦𑁂 ‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑁫𑁨𑁪) 𑀘 𑀆𑀧𑀢𑁆𑀢𑀺𑀪𑁂𑀤𑀲𑀦𑁆𑀤𑀲𑁆𑀲𑀦𑀝𑁆𑀞𑀸𑀦𑁂 ‘‘𑀅𑀜𑁆𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀻 𑀢𑀢𑀼𑀢𑁆𑀢𑀭𑀺 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁫𑁨𑁫) 𑀘 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂𑀬𑁂𑀯 ‘‘𑀲𑀸𑀤𑀺𑀢𑀩𑁆𑀩𑀁, 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀘 𑀉𑀪𑀬𑀢𑁆𑀣 ‘‘𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺 𑀘 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀪𑀸𑀯𑀁 𑀜𑀢𑁆𑀯𑀸 𑀅𑀯𑀺𑀜𑁆𑀜𑀸𑀧𑀺𑀢𑁂𑀧𑀺 𑀅𑀪𑀺𑀳𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀅𑀥𑀺𑀯𑀸𑀲𑁂𑀦𑁆𑀢𑁂𑀦 𑀏𑀯𑀫𑁂𑀯 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀲𑁂𑀯 𑀘 𑀅𑀥𑀺𑀓𑀯𑀺𑀜𑁆𑀜𑀸𑀧𑀦𑀦𑀺𑀲𑁂𑀥𑀦𑀢𑁆𑀣𑀁 𑀯𑀤𑀦𑁆𑀢𑁂𑀦𑀸𑀧𑀺 ‘‘𑀢𑀜𑁆𑀘𑁂 𑀅𑀜𑁆𑀜𑀸𑀢𑀓𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸 𑀩𑀳𑀽𑀳𑀺 𑀘𑀻𑀯𑀭𑁂𑀳𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀲𑀸𑀤𑀺𑀢𑀩𑁆𑀩𑀦𑀺𑀬𑀫𑀧𑁆𑀧𑀥𑀸𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀅𑀢𑁆𑀢𑀦𑀸 𑀯𑀸 𑀢𑀁 𑀲𑀦𑁆𑀥𑀸𑀬 𑀅𑀜𑁆𑀜𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦𑀧𑀺 𑀅𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀧𑀺 𑀤𑀺𑀬𑁆𑀬𑀫𑀸𑀦𑀁 𑀲𑀸𑀤𑀺𑀬𑀦𑁆𑀢𑁂𑀦𑀸𑀧𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀁 𑀦𑀸𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀦𑁆𑀥𑀸𑀬 𑀪𑀸𑀲𑀺𑀢𑀢𑁆𑀣𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀢𑀓𑀁 𑀜𑀸𑀧𑁂𑀢𑀼𑀁 ‘‘𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸𑀪𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁪𑁦. 𑀇𑀤𑀸𑀦𑀺 ¶ ¶ 𑀯𑀺𑀜𑁆𑀜𑀸𑀧𑀦𑁂 𑀘 𑀅𑀥𑀺𑀯𑀸𑀲𑀦𑁂 𑀘 𑀉𑀪𑀬𑀢𑁆𑀣𑁂𑀯 𑀦𑀺𑀬𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀢𑀻𑀡𑀺 𑀦𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀏𑀓𑀁 𑀦𑀝𑁆𑀞𑀁, 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. ‘‘𑀬𑀲𑁆𑀲 𑀢𑀻𑀡𑀺𑀧𑀺 𑀦𑀝𑁆𑀞𑀸𑀦𑀺, 𑀤𑁆𑀯𑁂 𑀯𑀸 𑀦𑀝𑁆𑀞𑀸𑀦𑀺, 𑀏𑀓𑀁 𑀯𑀸 𑀦𑀝𑁆𑀞’’𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 ‘‘𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀦 𑀓𑀺𑀜𑁆𑀘𑀺𑀧𑀺 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀬𑀲𑁆𑀲 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀦𑀝𑁆𑀞𑀸𑀦𑀺, 𑀩𑀳𑀼 𑀘 𑀤𑀺𑀬𑁆𑀬𑀢𑀺, 𑀢𑁂𑀦 𑀤𑁆𑀯𑁂𑀬𑁂𑀯 𑀘𑀻𑀯𑀭𑀸𑀦𑀺 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀦𑀝𑁆𑀞𑀸𑀦𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀏𑀓𑀜𑁆𑀘𑁂 𑀦𑀝𑁆𑀞𑀁, 𑀦 𑀲𑀸𑀤𑀺𑀢𑀩𑁆𑀩𑀁, 𑀅𑀯𑀲𑀺𑀝𑁆𑀞𑀁 𑀧𑀘𑁆𑀙𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀦𑀻𑀳𑀸𑀭𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁂𑀲𑀁 𑀲𑀪𑀸𑀕𑀝𑁆𑀞𑀸𑀦𑀢𑁄 𑀧𑀭𑀺𑀬𑁂𑀲𑀺𑀲𑁆𑀲𑀢𑀻’’𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀧𑀜𑁆𑀘𑀲𑀼𑀧𑀺 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀘𑀢𑀽𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁨-𑁫𑁨𑁪) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁬𑁪𑁧-𑁨. 𑀲𑁂𑀲𑀓𑀁 𑀆𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀫𑀼𑀧𑀭𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀘𑀻𑀯𑀭𑀁 𑀬𑁄𑀚𑁂𑀢𑁆𑀯𑀸 𑀅𑀢𑀺𑀭𑁂𑀓𑀁 𑀯𑀢𑁆𑀣𑀁 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 ‘‘𑀤𑀲𑁆𑀲𑀸𑀫𑀻’’𑀢𑀺 𑀩𑀳𑀼𑀫𑁆𑀧𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑀺𑀭𑁂𑀓𑀫𑁆𑀧𑀺 𑀢𑀼𑀫𑁆𑀳𑁂𑀬𑁂𑀯 𑀕𑀡𑁆𑀳𑀣𑀸𑀢𑀺 𑀤𑀺𑀦𑁆𑀦𑀁 𑀕𑀡𑁆𑀳𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀦 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀤𑀺𑀦𑁆𑀦𑁂𑀢𑀺 𑀬𑁄𑀚𑀦𑀸, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀪𑀸𑀯𑀁 𑀅𑀦𑀼𑀤𑁆𑀤𑀺𑀲𑁆𑀲 𑀩𑀳𑀽𑀦𑀁 𑀘𑀻𑀯𑀭𑀸𑀦𑀁 𑀕𑀳𑀡𑀦𑀺𑀫𑀺𑀢𑁆𑀢𑁂𑀦𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 ‘‘𑀦 𑀦𑀝𑁆𑀞𑀓𑀸𑀭𑀡𑀸 𑀤𑁂𑀦𑁆𑀢𑀻’’𑀢𑀺 𑀇𑀤𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂 𑀦𑀺𑀲𑁆𑀲𑀸𑀬 𑀢𑀢𑀼𑀢𑁆𑀢𑀭𑀺𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀫𑁆𑀳𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀕𑀳𑀺𑀢𑀁.

𑀢𑀢𑀼𑀢𑁆𑀢𑀭𑀺𑀓𑀣𑀸𑀯𑀡𑁆𑀡𑀦𑀸.

𑁬𑁪𑁩. 𑀓𑀮𑁆𑀬𑀸𑀡𑀓𑀫𑁆𑀬𑀢𑀸𑀳𑁂𑀢𑀽𑀢𑀺 ¶ 𑀲𑀼𑀦𑁆𑀤𑀭𑀲𑁆𑀲 𑀫𑀳𑀕𑁆𑀖𑀲𑁆𑀲 𑀓𑀸𑀫𑀢𑀁 𑀧𑀝𑀺𑀘𑁆𑀘 𑀘𑀻𑀯𑀭𑁂 𑀯𑀺𑀓𑀧𑁆𑀧𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑁄𑀚𑀦𑀸, ‘‘𑀓𑀻𑀤𑀺𑀲𑁂𑀦 𑀢𑁂 𑀪𑀦𑁆𑀢𑁂 𑀘𑀻𑀯𑀭𑁂𑀦 𑀅𑀢𑁆𑀣𑁄’’𑀢𑀺 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 ‘‘𑀆𑀬𑀢𑀁 𑀯𑀸 𑀳𑁄𑀢𑀼 𑀯𑀺𑀢𑁆𑀣𑀢𑀁 𑀯𑀸 𑀅𑀧𑁆𑀧𑀺𑀢𑀁 𑀯𑀸 𑀲𑀡𑁆𑀳𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁨𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀮𑀸𑀪𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂𑀢𑀺 𑀢𑀣𑀸 𑀅𑀧𑁆𑀧𑀯𑀸𑀭𑀺𑀢𑁂𑀦 𑀳𑀼𑀢𑁆𑀯𑀸 𑀓𑀢𑁂𑀦 𑀅𑀥𑀺𑀓𑀯𑀺𑀥𑀸𑀦𑁂𑀦 𑀦𑀺𑀧𑁆𑀨𑀦𑁆𑀦𑀘𑀻𑀯𑀭𑀲𑁆𑀲 𑀮𑀸𑀪𑀧𑁆𑀧𑀬𑁄𑀕𑁂𑀦 𑀤𑀼𑀓𑁆𑀓𑀝𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸 𑀳𑁄𑀦𑁆𑀢𑀺.

𑁬𑁪𑁪. 𑀫𑀳𑀕𑁆𑀖𑀁 ¶ …𑀧𑁂… 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀻𑀲𑀢𑀺𑀅𑀕𑁆𑀖𑀦𑀓𑀁 𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑀫𑁆𑀳𑀺 𑀉𑀧𑀸𑀲𑀓𑁂, ‘‘𑀅𑀮𑀁 𑀫𑀬𑁆𑀳𑀁 𑀏𑀢𑁂𑀦, 𑀤𑀲𑀕𑁆𑀖𑀦𑀓𑀁 𑀯𑀸 𑀅𑀧𑁆𑀧𑀕𑁆𑀖𑀦𑀓𑀁 𑀯𑀸 𑀤𑁂𑀳𑀻’’𑀢𑀺 𑀯𑀤𑀢𑀺.

𑁬𑁪𑁫. ‘‘𑀜𑀸𑀢𑀓𑁂 𑀅𑀜𑁆𑀜𑀸𑀢𑀺𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑀧𑀞𑀫𑁄𑀧𑀓𑁆𑀔𑀝𑀓𑀣𑀸𑀯𑀡𑁆𑀡𑀦𑀸.

𑁬𑁪𑁬. 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀏𑀓𑁂𑀦 𑀉𑀧𑀸𑀲𑀓𑁂𑀦 𑀧𑀻𑀴𑀸 𑀮𑀤𑁆𑀥𑀸, 𑀇𑀥 𑀤𑁆𑀯𑀻𑀳𑀻𑀢𑀺 𑀏𑀢𑁆𑀢𑀓𑀁 𑀦𑀸𑀦𑀸𑀓𑀭𑀡𑀁. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀫𑁂𑀯𑀸𑀢𑀺 𑀆𑀳 ‘‘𑀤𑀼𑀢𑀺𑀬𑁄…𑀧𑁂… 𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀉𑀧𑀓𑁆𑀔𑀝𑀧𑀤𑁂𑀦 𑀮𑀓𑁆𑀔𑀺𑀢𑀁 𑀲𑀺𑀓𑁆𑀔𑀸𑀧𑀤𑀁 𑀉𑀧𑀓𑁆𑀔𑀝𑀁, 𑀤𑀼𑀢𑀺𑀬𑀜𑁆𑀘 𑀢𑀁 𑀉𑀧𑀓𑁆𑀔𑀝𑀜𑁆𑀘𑀸𑀢𑀺 𑀤𑀼𑀢𑀺𑀬𑁄𑀧𑀓𑁆𑀔𑀝𑀁, 𑀢𑀲𑁆𑀫𑀺𑀁 𑀤𑀼𑀢𑀺𑀬𑁄𑀧𑀓𑁆𑀔𑀝𑁂. 𑀅𑀲𑁆𑀲𑀸𑀢𑀺 𑀤𑀼𑀢𑀺𑀬𑁄𑀧𑀓𑁆𑀔𑀝𑀲𑁆𑀲.

𑀤𑀼𑀢𑀺𑀬𑁄𑀧𑀓𑁆𑀔𑀝𑀓𑀣𑀸𑀯𑀡𑁆𑀡𑀦𑀸.

𑁬𑁪𑁭. 𑀭𑀜𑁆𑀜𑀸 𑀯𑀸𑀢𑀺 𑀭𑀸𑀚𑀢𑁄 𑀯𑀸. 𑀭𑀸𑀚𑀢𑁄 𑀪𑁄𑀕𑁆𑀕𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀭𑀸𑀚𑀪𑁄𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀭𑀸𑀚𑀢𑁄 𑀪𑀢𑁆𑀢𑀯𑁂𑀢𑁆𑀢𑀦𑀮𑀸𑀪𑀺𑀢𑁄 𑀬𑀢𑁄 𑀓𑀼𑀢𑁄𑀘𑀺 𑀤𑀸𑀬𑀓𑀸 𑀆𑀪𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀪𑀸𑀯𑀢𑁄’’𑀢𑀺 ¶ 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀇𑀥 𑀉𑀢𑁆𑀢𑀭𑀺𑀓𑀭𑀡𑀻𑀬𑀁 ‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 (𑀯𑀺. 𑀯𑀺. 𑁬𑁭𑁧) 𑀯𑀓𑁆𑀔𑀢𑀺.

𑁬𑁪𑁮. 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀯𑀲𑁂𑀦 𑀅𑀥𑀺𑀕𑀢𑀭𑀚𑀢𑀸𑀤𑀺 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀧𑀺 𑀦 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀚𑀢𑀁 𑀯𑀸’’𑀢𑀺𑀆𑀤𑀺. 𑀥𑀯𑀮𑀲𑀪𑀸𑀯𑀢𑀸𑀬 𑀭𑀸𑀚𑀢𑀻𑀢𑀺 𑀭𑀚𑀢𑀁, 𑀲𑀚𑁆𑀛𑀼. 𑀚𑀸𑀢𑀁 𑀭𑀽𑀧𑀁 𑀯𑀡𑁆𑀡𑀸𑀬𑀢𑀦𑀫𑁂𑀢𑀲𑁆𑀲𑀸𑀢𑀺 𑀚𑀸𑀢𑀭𑀽𑀧𑀁, 𑀲𑀼𑀯𑀡𑁆𑀡𑀁. 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀅𑀢𑁆𑀢𑀦𑁄 𑀯𑀸 𑀅𑀢𑁆𑀣𑀸𑀬 𑀧𑀭𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀁 𑀓𑀺𑀜𑁆𑀘𑀺 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁬𑁪𑁯. 𑀅𑀢𑁆𑀢𑀦𑁄 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀬𑀸 𑀭𑀽𑀧𑀺𑀬𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑀸𑀬 𑀕𑀳𑀡𑁂 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀕𑀡𑀲𑁆𑀲, 𑀲𑀗𑁆𑀖𑀲𑁆𑀲, 𑀘𑁂𑀢𑀺𑀬𑀲𑁆𑀲, 𑀦𑀯𑀓𑀫𑁆𑀫𑀲𑁆𑀲 𑀯𑀸 𑀅𑀢𑁆𑀣𑀸𑀬. 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀁 𑀭𑀚𑀢𑀁, 𑀚𑀸𑀢𑀭𑀽𑀧𑀁 𑀯𑀸 𑀅𑀜𑁆𑀜𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀯𑀢𑁆𑀣𑀼𑀁 ¶ 𑀧𑀝𑀺𑀕𑁆𑀕𑀡𑁆𑀳𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁬𑁫𑁦-𑁧. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀦𑁂𑀢𑁆𑀯𑀸’’𑀢𑀺𑀆𑀤𑀺. 𑀦𑁂𑀢𑁆𑀯𑀸𑀢𑀺 𑀆𑀦𑁂𑀢𑁆𑀯𑀸. 𑀅𑀓𑀧𑁆𑀧𑀺𑀬𑀁 𑀪𑀡𑁆𑀟𑀦𑁆𑀢𑀺 ‘‘𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀅𑀓𑀧𑁆𑀧𑀺𑀬𑀪𑀡𑁆𑀟𑀁. 𑀇𑀢𑁆𑀣𑀦𑁆𑀢𑀺 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂𑀦. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀘-𑀓𑀸𑀭𑁂𑀦 𑀯𑀝𑁆𑀝𑀢𑀺 𑀘𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀓𑀢𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀲𑀘𑁂 𑀧𑀦 ‘𑀦𑀬𑀺𑀤𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂 ‘𑀯𑀟𑁆𑀠𑀓𑀻𑀦𑀁 𑀯𑀸 𑀓𑀫𑁆𑀫𑀓𑀭𑀸𑀦𑀁 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀲𑀼𑀓𑀢𑀤𑀼𑀓𑁆𑀓𑀝𑀁 𑀚𑀸𑀦𑀸𑀣𑀸’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 ‘𑀫𑀫 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀫𑁂𑀯 ¶ 𑀯𑀸 𑀳𑀢𑁆𑀣𑁂 𑀪𑀯𑀺𑀲𑁆𑀲𑀢𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 𑀬𑀁 𑀬𑀲𑁆𑀲 𑀤𑀸𑀢𑀩𑁆𑀩𑀁, 𑀢𑀤𑀢𑁆𑀣𑀸𑀬 𑀧𑁂𑀲𑁂𑀬𑁆𑀬𑀸𑀣𑀸’𑀢𑀺 𑀯𑀤𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁫𑁨. 𑀯𑀺𑀳𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀦𑀯𑀓𑀫𑁆𑀫𑀲𑁆𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀢𑀩𑁆𑀩𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦 𑀯𑀼𑀢𑁆𑀢𑀁.

𑁬𑁫𑁪. 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀯𑀸 𑀲𑀗𑁆𑀖𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸𑀢𑀺 𑀤𑀺𑀦𑁆𑀦’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀓𑁄𑀘𑀺 𑀩𑀳𑀼𑀫𑁆𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀆𑀦𑁂𑀢𑁆𑀯𑀸 ‘𑀇𑀤𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀯𑀤𑀢𑀺, 𑀢𑀁 𑀘𑁂 𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀆𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀏𑀯𑀁 𑀆𑀪𑀢𑀁 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀲𑀘𑁂 𑀧𑀝𑀺𑀓𑁆𑀔𑀺𑀧𑀢𑀺, ‘‘𑀅𑀬𑀁 𑀲𑀗𑁆𑀖𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀳𑀺 𑀢𑀁 𑀘𑁄𑀤𑁂𑀢𑀺, 𑀲𑁆𑀯𑁂𑀯 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀢𑁂𑀦 𑀧𑀦 𑀏𑀓𑁂𑀦 𑀩𑀳𑀽 𑀅𑀦𑀸𑀧𑀢𑁆𑀢𑀺𑀓𑀸 𑀓𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀇𑀥 𑀲𑁆𑀯𑁂𑀯 𑀲𑀸𑀧𑀢𑁆𑀢𑀺𑀓𑁄𑀢𑀺 𑀏𑀢𑁆𑀣 ‘‘𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀮𑀺𑀔𑀺𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑁄’’𑀢𑀺 𑀘 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀇𑀤𑀸𑀦𑀺 𑀤𑀲𑁆𑀲𑀺𑀢𑀅𑀝𑁆𑀞𑀓𑀣𑀸𑀧𑀸𑀞𑁂 ‘‘𑀲𑀗𑁆𑀖𑁄 𑀲𑀫𑁆𑀧𑀝𑀺𑀘𑁆𑀙𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄.

𑁬𑁫𑁫. 𑀢𑀴𑀸𑀓𑀲𑁆𑀲𑀸𑀢𑀺 ¶ 𑀯𑀸𑀧𑀺𑀬𑀸. 𑀲𑀲𑁆𑀲𑀼𑀧𑁆𑀧𑀢𑁆𑀢𑀺𑀦𑀺𑀤𑀸𑀦𑀢𑁄 𑀢𑀴𑀸𑀓𑀁 𑀔𑁂𑀢𑁆𑀢𑀁, 𑀢𑀢𑁄 𑀢𑀲𑁆𑀲 𑀕𑀳𑀡𑀁 𑀯𑀸 𑀧𑀭𑀺𑀪𑁄𑀕𑁄 𑀯𑀸 𑀦 𑀘 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀴𑀸𑀓𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀘-𑀓𑀸𑀭𑁂𑀦 𑀔𑁂𑀢𑁆𑀢𑀯𑀢𑁆𑀣𑀼 𑀲𑀗𑁆𑀕𑀳𑀺𑀢𑀁. 𑀦 𑀘 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀘𑀓𑀸𑀭𑁂𑀦 𑀯𑀝𑁆𑀝𑀢𑀺 𑀘𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁬𑁫𑁬. 𑀢𑀁 ¶ 𑀓𑀢𑀫𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀔𑁂𑀢𑁆𑀢𑀸𑀤𑀺 𑀲𑀩𑁆𑀩𑀫𑁆𑀧𑀺.

𑁬𑁫𑁮-𑁯. 𑀅𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀕𑀲𑁆𑀫𑀺𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀓𑀢𑀲𑁆𑀲 𑀓𑀫𑁆𑀫𑁂𑀳𑀺 𑀏𑀢𑁆𑀢𑀓𑁄 𑀪𑀸𑀕𑁄 𑀤𑁂𑀬𑁆𑀬𑁄’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀅𑀦𑀺𑀬𑀫𑀺𑀢𑀆𑀬𑁂 𑀪𑀽𑀫𑀺𑀪𑀸𑀕𑁂. 𑀅𑀓𑀢𑀧𑀼𑀩𑁆𑀩𑀁 𑀦𑀯𑀲𑀲𑁆𑀲𑀁 𑀦𑀸𑀫. 𑀏𑀢𑁆𑀢𑀓𑀁 𑀪𑀸𑀕𑀁 𑀤𑁂𑀣𑀸𑀢𑀺 𑀏𑀢𑁆𑀢𑀓𑀁 𑀓𑀳𑀸𑀧𑀡𑀪𑀸𑀕𑀁 𑀤𑁂𑀣. 𑀉𑀝𑁆𑀞𑀸𑀧𑁂𑀢𑀻𑀢𑀺 𑀉𑀧𑁆𑀧𑀸𑀤𑁂𑀢𑀺.

‘‘𑀓𑀲𑀣 𑀯𑀧𑀣𑀸’’𑀢𑀺 𑀅𑀓𑀧𑁆𑀧𑀺𑀬𑀁 𑀯𑀸𑀘𑀁 𑀯𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀧𑀣𑀸𑀢𑀺 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀇𑀥 𑀅𑀯𑀼𑀢𑁆𑀢𑀁 𑀢𑀁𑀓𑀢𑁆𑀢𑀼𑀬𑁄𑀕𑀓𑀸𑀮𑁂 𑀯𑀼𑀘𑁆𑀘𑀫𑀸𑀦𑀁 𑀅𑀓𑀧𑁆𑀧𑀺𑀬𑀯𑀘𑀦𑀦𑁆𑀢𑀭𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀉𑀧𑁆𑀧𑀸𑀤𑀺𑀢𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀓𑀳𑀸𑀧𑀡𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀲𑀩𑁆𑀩𑀦𑁆𑀢𑀺 𑀢𑀣𑀸 𑀉𑀧𑁆𑀧𑀸𑀤𑀺𑀢𑀓𑀳𑀸𑀧𑀡𑀜𑁆𑀘 𑀏𑀯𑀁 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀉𑀧𑁆𑀧𑀸𑀤𑀺𑀢𑀜𑁆𑀘𑀸𑀢𑀺 𑀲𑀩𑁆𑀩𑀁.

𑁬𑁬𑁦. 𑀓𑀲𑀣𑀸𑀤𑀺𑀓𑀁 𑀯𑀘𑀦𑀁 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀺𑀓𑀸𑀬 𑀪𑀽𑀫𑀺𑀬𑀸 𑀏𑀢𑁆𑀢𑀓𑁄 𑀦𑀸𑀫 𑀪𑀸𑀕𑁄’’𑀢𑀺 𑀪𑀽𑀫𑀺𑀁 𑀬𑁄 𑀘 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀘-𑀲𑀤𑁆𑀤𑁄 ‘‘𑀬𑁄 𑀧𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀧𑀼𑀕𑁆𑀕𑀮𑀦𑁆𑀢𑀭𑀸𑀧𑁂𑀓𑁆𑀔𑁄.

𑁬𑁬𑁧-𑁨. 𑀪𑀽𑀫𑀺𑀬𑀸 𑀲𑀬𑀫𑁂𑀯 𑀧𑀫𑀸𑀡𑀲𑁆𑀲 𑀚𑀸𑀦𑀦𑀢𑁆𑀣𑀁 𑀢𑀽𑀢𑀺 𑀬𑁄𑀚𑀦𑀸, ‘‘𑀏𑀢𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀅𑀫𑁆𑀳𑁂𑀳𑀺 𑀲𑀲𑁆𑀲𑀁 𑀓𑀢𑀁, 𑀏𑀢𑁆𑀢𑀓𑀁 𑀦𑀸𑀫 𑀪𑀸𑀕𑀁 𑀕𑀡𑁆𑀳𑀣𑀸’’𑀢𑀺 𑀓𑀲𑀓𑁂𑀳𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀯𑀘𑀦𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀲𑀬𑀫𑁂𑀯 𑀔𑁂𑀢𑁆𑀢𑀪𑀽𑀫𑀺𑀬𑀸 𑀧𑀫𑀸𑀡𑀁 𑀜𑀸𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀼-𑀲𑀤𑁆𑀤𑁄 𑀇𑀫𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀬𑁄 𑀧𑀦 𑀫𑀺𑀦𑀸𑀢𑀺, 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀭𑀚𑁆𑀚𑀼𑀬𑀸𑀧𑀺 𑀘 𑀤𑀡𑁆𑀟𑁂𑀦𑀸𑀢𑀺 𑀏𑀢𑁆𑀣 𑀧𑀸𑀤𑁂𑀦𑀸𑀧𑀺 𑀫𑀺𑀦𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀭𑀓𑁆𑀔𑀢𑀻’’𑀢𑀺𑀆𑀤𑀺𑀓𑀺𑀭𑀺𑀬𑀸𑀧𑀤𑁂𑀳𑀺𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀔𑀮𑁂 ¶ 𑀞𑀢𑁆𑀯𑀸 𑀭𑀓𑁆𑀔𑀢𑀻𑀢𑀺 𑀥𑀜𑁆𑀜𑀓𑀭𑀡𑁂 𑀞𑀢𑁆𑀯𑀸 𑀅𑀜𑁆𑀜𑁂 𑀕𑀡𑁆𑀳𑀺𑀢𑀼𑀁 𑀅𑀤𑀢𑁆𑀯𑀸 𑀧𑀸𑀮𑁂𑀢𑀺. 𑀓𑀣𑀁 𑀭𑀓𑁆𑀔𑀺𑀢𑀼𑀁 ¶ 𑀯𑀝𑁆𑀝𑀢𑀺, 𑀓𑀣𑀁 𑀭𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺? 𑀢𑀁 𑀧𑀦 𑀯𑀻𑀳𑀺𑀁 ‘‘𑀇𑀤𑀁 𑀯𑀸 𑀏𑀢𑁆𑀢𑀓𑀁 𑀯𑀸 𑀫𑀸 𑀕𑀡𑁆𑀳, 𑀇𑀤𑀁 𑀕𑀳𑁂𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺 𑀯𑀸 ‘‘𑀇𑀢𑁄 𑀅𑀧𑀦𑁂𑀳𑀺, 𑀇𑀥 𑀧𑀼𑀜𑁆𑀚𑀁 𑀓𑀭𑁄𑀳𑀻’’𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀧𑀬𑁄𑀕𑁂𑀦 𑀘𑁂 𑀭𑀓𑁆𑀔𑀢𑀺, 𑀢𑀁 𑀅𑀓𑀧𑁆𑀧𑀺𑀬𑀁. 𑀲𑀘𑁂 ‘‘𑀫𑀬𑀺 𑀞𑀺𑀢𑁂 𑀭𑀓𑁆𑀔𑀺𑀢𑀁 𑀳𑁄𑀢𑀻’’𑀢𑀺 𑀭𑀓𑁆𑀔𑀢𑀺, 𑀕𑀡𑁆𑀳𑀦𑁆𑀢𑁂 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀣𑀸’’𑀢𑀺 𑀪𑀡𑀢𑀺, 𑀯𑀝𑁆𑀝𑀢𑀺. 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑁂𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀣𑁂𑀦𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀲𑀢𑀺 𑀏𑀢𑀁 𑀪𑁄 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀺𑀁 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺. 𑀦𑀻𑀳𑀭𑀸𑀧𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀲𑀘𑁂 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬𑀦𑁆𑀢𑀺 𑀇𑀤𑀁 𑀔𑁂𑀢𑁆𑀢𑀫𑀺𑀦𑀦𑀸𑀤𑀺𑀁 𑀓𑀭𑁄𑀦𑁆𑀢𑁂𑀦 𑀮𑀤𑁆𑀥𑀩𑁆𑀩𑀢𑁄 𑀅𑀜𑁆𑀜𑀲𑁆𑀲 𑀅𑀪𑀺𑀦𑀯𑀼𑀧𑁆𑀧𑀸𑀤𑀺𑀢𑀲𑁆𑀲 𑀅𑀪𑀸𑀯𑀸 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀻𑀢𑀺 𑀤𑁆𑀯𑀻𑀲𑀼 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑁬𑁬𑁩. ‘‘𑀏𑀢𑁆𑀢𑀓𑁂𑀳𑀺 𑀯𑀻𑀳𑀻𑀳𑀺 𑀇𑀤𑀁 𑀆𑀳𑀭𑀣𑀸’’𑀢𑀺 𑀯𑀼𑀢𑁆𑀢𑀸 𑀲𑀘𑁂 𑀆𑀳𑀭𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀢𑀲𑁆𑀲𑁂𑀯𑁂𑀢𑀫𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀤𑀁 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁬𑁪. 𑀳𑀺𑀭𑀜𑁆𑀜𑁂𑀦𑀸𑀢𑀺 𑀓𑀳𑀸𑀧𑀡𑁂𑀦. ‘‘𑀢𑀫𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀤𑀁 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯).

𑁬𑁬𑁫. 𑀧𑁂𑀲𑀓𑀸𑀭𑀓𑀤𑀸𑀲𑀁 𑀯𑀸𑀢𑀺 𑀧𑁂𑀲𑀓𑀸𑀭𑀓𑀲𑀗𑁆𑀔𑀸𑀢𑀁 𑀤𑀸𑀲𑀁 𑀯𑀸, 𑀧𑁂𑀲𑀓𑀸𑀭𑁄 𑀢𑀦𑁆𑀢𑀯𑀸𑀬𑁄. 𑀆𑀭𑀸𑀫𑀺𑀓𑀸𑀦𑀁 𑀦𑀸𑀫𑁂𑀦 𑀤𑁂𑀦𑁆𑀢𑁂𑀢𑀺 ‘‘𑀆𑀭𑀸𑀫𑀺𑀓𑀁 𑀤𑀫𑁆𑀫𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀤𑀫𑁆𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀦𑁆𑀢𑁂.

𑁬𑁬𑁬. 𑀔𑀻𑀭𑀁 ¶ 𑀤𑀥𑀺 𑀢𑀓𑁆𑀓𑀁 𑀲𑀧𑁆𑀧𑀺 𑀦𑀯𑀦𑀻𑀢𑀦𑁆𑀢𑀺 𑀧𑀜𑁆𑀘𑀕𑁄𑀭𑀲𑀸.

𑁬𑁬𑁭. 𑀅𑀚𑀺𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀺𑀲𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁬𑁯. 𑀧𑀝𑀺𑀲𑀺𑀤𑁆𑀥𑁂𑀧𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂𑀧𑀺. 𑀫𑀽𑀮𑀁 𑀤𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑀫𑀽𑀮𑀁 𑀤𑀢𑁆𑀯𑀸. 𑀓𑀼𑀓𑁆𑀓𑀼𑀝𑀸𑀤𑀬𑁄 𑀧𑀦 ‘‘𑀲𑀼𑀔𑁂𑀦 𑀯𑀲𑀦𑁆𑀢𑀽’’𑀢𑀺 𑀅𑀭𑀜𑁆𑀜𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀓𑁆𑀓𑀼𑀝𑀲𑀽𑀓𑀭𑁂 ¶ ‘𑀲𑀼𑀔𑀁 𑀚𑀻𑀯𑀦𑁆𑀢𑀽’𑀢𑀺 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯). 𑀲𑀽𑀓𑀭𑀫𑀬𑀽𑀭𑀸𑀤𑀻𑀲𑀼𑀧𑀺 𑀮𑀤𑁆𑀥𑁂𑀲𑀼 𑀢𑁂𑀲𑀁 𑀅𑀦𑀼𑀭𑀽𑀧𑁂𑀬𑁂𑀯 𑀯𑀺𑀲𑀬𑁂 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸.

𑁬𑁭𑁧. ‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀓𑁄 𑀲𑀫𑁆𑀩𑀦𑁆𑀥𑁄? ‘‘𑀭𑀜𑁆𑀜𑀸 𑀯𑀸 𑀭𑀸𑀚𑀪𑁄𑀕𑁆𑀕𑁂𑀦𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀦𑀬𑁂𑀦 𑀭𑀸𑀚𑀭𑀸𑀚𑀸𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀢𑁆𑀢𑀦𑀸 𑀯𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀲𑀗𑁆𑀔𑀸𑀢𑀁 𑀘𑀻𑀯𑀭𑀫𑀽𑀮𑀁 𑀤𑀢𑁆𑀯𑀸 𑀧𑀳𑀺𑀢𑀤𑀽𑀢𑁂𑀦 𑀯𑀸 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀤𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬, 𑀪𑀺𑀓𑁆𑀔𑀼𑀦𑀸 ‘‘𑀦 𑀔𑁄 𑀫𑀬𑀁 𑀆𑀯𑀼𑀲𑁄 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀢𑁂𑀦 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀯𑀼𑀢𑁆𑀢𑁂 𑀘𑀻𑀯𑀭𑀢𑁆𑀣𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀏𑀲𑁄 𑀔𑁄 𑀆𑀯𑀼𑀲𑁄 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀆𑀭𑀸𑀫𑀺𑀓𑁂 𑀯𑀸 𑀉𑀧𑀸𑀲𑀓𑁂 𑀯𑀸 𑀤𑀲𑁆𑀲𑀺𑀢𑁂 𑀬𑀤𑀺 𑀲𑁄 𑀢𑀲𑁆𑀲 𑀅𑀢𑁆𑀢𑀦𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀇𑀫𑀺𑀦𑀸 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀬𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺, 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸, 𑀉𑀧𑀲𑀗𑁆𑀓𑀫𑀢𑀼 𑀆𑀬𑀲𑁆𑀫𑀸 𑀓𑀸𑀮𑁂𑀦, 𑀘𑀻𑀯𑀭𑁂𑀦 ¶ 𑀢𑀁 𑀅𑀘𑁆𑀙𑀸𑀤𑁂𑀲𑁆𑀲𑀢𑀻’’𑀢𑀺 𑀬𑀤𑀺 𑀯𑀤𑁂𑀬𑁆𑀬, 𑀢𑁂𑀦 𑀘𑀻𑀯𑀭𑀢𑁆𑀣𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳𑀸𑀢𑀺 𑀅𑀬𑀫𑀺𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄.

𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸 𑀯𑀼𑀢𑁆𑀢𑀸𑀢𑀺 ‘‘𑀘𑀻𑀯𑀭𑀢𑁆𑀣𑀺𑀓𑁂𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀩𑁆𑀩𑁄 𑀲𑀸𑀭𑁂𑀢𑀩𑁆𑀩𑁄 ‘𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸.

𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑀫𑀩𑁆𑀭𑀯𑀻𑀢𑀺 ‘‘𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀲𑀸𑀭𑀬𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁩𑁮) 𑀯𑀼𑀢𑁆𑀢𑀢𑁆𑀢𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸’’𑀢𑀺 𑀓𑀢𑀸𑀬 𑀘𑁄𑀤𑀦𑀸𑀬 𑀦 𑀦𑀺𑀧𑁆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀧𑀼𑀦 𑀕𑀦𑁆𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 ‘‘𑀦 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁫𑁩𑁯) 𑀯𑀘𑀦𑀢𑁄 𑀞𑀸𑀦𑀪𑀜𑁆𑀚𑀦𑀓𑀁 𑀦𑀺𑀲𑀚𑁆𑀚𑀸𑀤𑀺𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀁 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀚𑀸𑀦𑀸𑀳𑀺 ¶ , 𑀆𑀯𑀼𑀲𑁄’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀁 𑀯𑀢𑁆𑀯𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑀁 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀤𑀺 𑀘𑁄𑀤𑁂𑀢𑀺𑀬𑁂𑀯𑀸𑀢𑀺 𑀲𑀘𑁂 𑀞𑀸𑀦𑀁 𑀅𑀓𑀢𑁆𑀯𑀸 𑀘𑁄𑀤𑀦𑀸𑀫𑀢𑁆𑀢𑀁 𑀓𑀭𑁄𑀢𑀺, 𑀙 𑀅𑀩𑁆𑀭𑀯𑀻𑀢𑀺 𑀬𑁄𑀚𑀦𑀸, ‘‘𑀘𑁄𑀤𑀦𑀸’’𑀢𑀺 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀢𑀺, 𑀙𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀲𑀓𑀺𑀫𑁆𑀧𑀺 𑀦 𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀙𑀘𑁄𑀤𑀦𑀁 𑀅𑀓𑀢𑁆𑀯𑀸 𑀬𑁄 𑀞𑀸𑀦𑀫𑁂𑀯 𑀓𑀭𑁄𑀢𑀺, 𑀢𑁂𑀦 𑀓𑀢𑀺 𑀞𑀸𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀘𑁄𑀤𑀦𑀸𑀤𑀺𑀕𑀼𑀡𑀸 𑀞𑀺𑀢𑀻’’𑀢𑀺, ‘‘𑀓𑀸𑀢𑀩𑁆𑀩𑀸’’𑀢𑀺 𑀲𑁂𑀲𑁄, ‘‘𑀅𑀩𑁆𑀭𑀯𑀻’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁, ‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁, 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁, 𑀙𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀦 ¶ 𑀞𑀸𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁩𑁯) 𑀯𑀘𑀦𑀢𑁄, ‘‘𑀙𑀓𑁆𑀔𑀢𑁆𑀢𑀼𑀧𑀭𑀫’’𑀦𑁆𑀢𑀺 (𑀧𑀸𑀭𑀸. 𑁫𑁩𑁯) 𑀯𑀘𑀦𑀢𑁄 𑀘 𑀙𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀤𑀺𑀕𑀼𑀡𑀸 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀓𑀸 𑀞𑀺𑀢𑀺 𑀳𑁄𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 𑀘𑁄𑀤𑀦𑀫𑁂𑀯 𑀅𑀓𑀢𑁆𑀯𑀸 𑀞𑀸𑀦𑀫𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀲𑁆𑀲 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀦𑀬𑁂𑀦 𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀓𑀸𑀢𑀩𑁆𑀩𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀢𑁆𑀢𑀓𑁂𑀦𑁂𑀯 𑀦𑀺𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀜𑀸𑀧𑁂𑀦𑁆𑀢𑁄 ‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀸𑀬𑀫𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁩𑁯) 𑀯𑀼𑀢𑁆𑀢𑀦𑀬𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁬𑁭𑁨. ‘‘𑀅𑀘𑁄𑀤𑁂𑀢𑁆𑀯𑀸 𑀮𑀤𑁆𑀥𑁂’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁 ‘‘𑀅𑀝𑁆𑀞𑀢𑁆𑀯𑀸 𑀮𑀤𑁆𑀥𑁂’’𑀢𑀺 𑀘 𑀕𑀬𑁆𑀳𑀫𑀸𑀦𑀢𑁆𑀢𑀸.

𑀭𑀸𑀚𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸.

𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.

𑁬𑁭𑁩. ‘‘𑀏𑀓𑁂𑀦𑀸𑀧𑀻’’𑀢𑀺 𑀇𑀫𑀺𑀦𑀸 𑀓𑀺𑀁 𑀧𑀦 𑀤𑁆𑀯𑀻𑀳𑀺, 𑀩𑀳𑀽𑀳𑀺 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀅𑀦𑁆𑀢𑀫𑀲𑁄 𑀯𑀸𑀢𑁂𑀦 𑀆𑀳𑀝𑁂𑀦𑀸𑀧𑀺 𑀓𑁄𑀲𑀺𑀬𑀁𑀲𑀼𑀦𑀸 𑀫𑀺𑀲𑁆𑀲𑁂𑀢𑁆𑀯𑀸. 𑀲𑀦𑁆𑀣𑀢𑀦𑁆𑀢𑀺 ‘‘𑀲𑀦𑁆𑀣𑀢𑀁 𑀦𑀸𑀫 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑀁 𑀳𑁄𑀢𑀺 𑀅𑀯𑀸𑀬𑀺𑀫’’𑀦𑁆𑀢𑀺 (𑀧𑀸𑀭𑀸. 𑁫𑁪𑁪) 𑀧𑀤𑀪𑀸𑀚𑀦𑁂 𑀘 ‘‘𑀲𑀫𑁂 𑀪𑀽𑀫𑀺𑀪𑀸𑀕𑁂 𑀓𑁄𑀲𑀺𑀬𑀁𑀲𑀽𑀦𑀺 𑀉𑀧𑀭𑀽𑀧𑀭𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀜𑁆𑀚𑀺𑀓𑀸𑀤𑀻𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀓𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁪𑁨) 𑀅𑀝𑁆𑀞𑀓𑀣𑀸𑀬 𑀘 𑀯𑀼𑀢𑁆𑀢𑀲𑀭𑀽𑀧𑀁 𑀓𑀜𑁆𑀚𑀺𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀓𑁄𑀲𑀺𑀬𑀁𑀲𑀽𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀬𑀸𑀯 𑀩𑀳𑀮𑀫𑀺𑀘𑁆𑀙𑀢𑀺, 𑀢𑀸𑀯 𑀯𑀟𑁆𑀠𑁂𑀢𑁆𑀯𑀸 𑀦𑀺𑀲𑀻𑀤𑀦𑀦𑀺𑀧𑀚𑁆𑀚𑀦𑀸𑀤𑀺𑀅𑀢𑁆𑀣𑀁 𑀓𑀸𑀢𑀩𑁆𑀩𑀁 𑀲𑀦𑁆𑀣𑀢𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀲𑀺𑀬𑀁𑀲𑀼𑀦𑀸𑀢𑀺 𑀓𑁄𑀲𑀺𑀬𑀓𑀺𑀫𑀺𑀓𑁄𑀲𑀺𑀬𑀲𑁆𑀲 𑀇𑀤𑀦𑁆𑀢𑀺 𑀓𑁄𑀲𑀺𑀬𑀁, 𑀲𑀼𑀢𑁆𑀢𑀁, 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀁𑀲𑀼, 𑀢𑁂𑀦 𑀓𑁄𑀲𑀺𑀬𑀁𑀲𑀼𑀦𑀸𑀢𑀺 𑀅𑀢𑁆𑀣𑁄 ¶ . 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀢𑁆𑀢𑀸 ¶ ‘‘𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀏𑀓𑁂𑀦𑀸𑀧𑀺 𑀓𑁄𑀲𑀺𑀬𑀁𑀲𑀼𑀦𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸’’𑀢𑀺 (𑀧𑀸𑀭𑀸. 𑁫𑁪𑁪). 𑀢𑁂𑀦𑁂𑀯𑀸𑀳 ‘‘𑀧𑀭𑀢𑁆𑀣𑀸𑀬 𑀓𑀭𑁄𑀦𑁆𑀢𑀲𑁆𑀲 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺.

𑁬𑁭𑁫. 𑀪𑀽𑀫𑀢𑁆𑀣𑀭𑀡𑀦𑁆𑀢𑀺 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀙𑀯𑀺𑀭𑀓𑁆𑀔𑀦𑀢𑁆𑀣𑀸𑀬 𑀅𑀢𑁆𑀣𑀭𑀺𑀢𑀩𑁆𑀩𑀁 𑀅𑀢𑁆𑀣𑀭𑀡𑀁. 𑀪𑀺𑀲𑀺 𑀦𑀸𑀫 𑀫𑀜𑁆𑀘𑀪𑀺𑀲𑀺, 𑀧𑀻𑀞𑀪𑀺𑀲𑀻𑀢𑀺 𑀤𑁆𑀯𑀬𑀁. 𑀩𑀺𑀩𑁆𑀩𑁄𑀳𑀦𑀁 𑀉𑀧𑀥𑀸𑀦𑀁.

𑀓𑁄𑀲𑀺𑀬𑀓𑀣𑀸𑀯𑀡𑁆𑀡𑀦𑀸.

𑁬𑁭𑁬. 𑀓𑀸𑀴𑀓𑁂𑀴𑀓𑀮𑁄𑀫𑀸𑀦𑀦𑁆𑀢𑀺 ‘‘𑀓𑀸𑀴𑀓𑀁 𑀦𑀸𑀫 𑀤𑁆𑀯𑁂 𑀓𑀸𑀴𑀓𑀸𑀦𑀺 𑀚𑀸𑀢𑀺𑀬𑀸 𑀓𑀸𑀴𑀓𑀁 𑀯𑀸 𑀭𑀚𑀦𑀓𑀸𑀴𑀓𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁪𑁯) 𑀯𑀘𑀦𑀢𑁄 𑀏𑀯𑀁 𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁. 𑀲𑀼𑀤𑁆𑀥𑀸𑀦𑀦𑁆𑀢𑀺 𑀇𑀢𑀭𑀯𑀡𑁆𑀡𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀅𑀫𑀺𑀲𑁆𑀲𑀸𑀦𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀤𑁆𑀥𑀓𑀸𑀴𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀦𑀁 𑀓𑀸𑀴𑀓𑀸𑀦𑀁, 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀺𑀢𑀓𑀸𑀴𑀓𑀸𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁪𑁭). 𑀓𑀭𑁂𑀬𑁆𑀬𑀸𑀢𑀺 𑀓𑀭𑁄𑀦𑁆𑀢𑀲𑁆𑀲 𑀘 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸’’𑀢𑀺. 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 ‘‘𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀆𑀳.

𑀲𑀼𑀤𑁆𑀥𑀓𑀸𑀴𑀓𑀓𑀣𑀸𑀯𑀡𑁆𑀡𑀦𑀸.

𑁬𑁭𑁭. 𑀑𑀤𑀸𑀢𑀁 𑀢𑀼𑀮𑀁 𑀯𑀸 𑀩𑀳𑀼𑀁 𑀯𑀸 𑀲𑀩𑁆𑀩𑀫𑁂𑀯 𑀯𑀸 𑀕𑀳𑁂𑀢𑁆𑀯𑀸𑀦𑀸𑀢𑀺 𑀬𑁄𑀚𑀦𑀸. 𑀓𑀧𑀺𑀮𑀫𑁆𑀧𑀺 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀲𑀩𑁆𑀩𑀫𑁂𑀯 𑀯𑀸𑀢𑀺 𑀲𑀦𑁆𑀣𑀢𑀲𑁆𑀲 𑀕𑀳𑁂𑀢𑀩𑁆𑀩𑀁 𑀲𑀩𑁆𑀩𑀫𑁂𑀯 𑀯𑀸 𑀮𑁄𑀫𑀁. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀲𑀦𑁆𑀣𑀢’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄 ¶ 𑀮𑀩𑁆𑀪𑀢𑀺. ‘‘𑀦𑀯’’𑀦𑁆𑀢𑀺 𑀇𑀤𑀁 ‘‘𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺 𑀧𑀤𑀲𑀸𑀫𑀢𑁆𑀣𑀺𑀬𑁂𑀦 𑀮𑀩𑁆𑀪𑀢𑀺, 𑀦𑀯𑀁 𑀲𑀦𑁆𑀣𑀢𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀧𑀺𑀮𑀫𑁆𑀧𑀺 𑀯𑀸𑀢𑀺 𑀯𑀸𑀓𑀸𑀭𑁂𑀦 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀬𑁆𑀬𑀣𑀺𑀤𑀁? ‘‘𑀦𑀯𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀲𑀦𑁆𑀣𑀢𑀁 𑀓𑀸𑀭𑀬𑀫𑀸𑀦𑁂𑀦 𑀤𑁆𑀯𑁂 𑀪𑀸𑀕𑀸 𑀲𑀼𑀤𑁆𑀥𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀆𑀤𑀸𑀢𑀩𑁆𑀩𑀸 𑀢𑀢𑀺𑀬𑀁 𑀑𑀤𑀸𑀢𑀸𑀦𑀁 𑀘𑀢𑀼𑀢𑁆𑀣𑀁 𑀕𑁄𑀘𑀭𑀺𑀬𑀸𑀦’’𑀦𑁆𑀢𑀺 (𑀧𑀸𑀭𑀸. 𑁫𑁫𑁩) 𑀫𑀸𑀢𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 ¶ ‘‘𑀑𑀤𑀸𑀢𑀁 𑀓𑀧𑀺𑀮𑀫𑁆𑀧𑀺 𑀯𑀸’’𑀢𑀺 𑀏𑀢𑀲𑁆𑀲 ‘‘𑀩𑀳𑀼𑀁 𑀯𑀸’’𑀢𑀺 𑀯𑀺𑀲𑁂𑀲𑀦𑁂𑀦 𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀬𑀣𑀸𑀯𑀼𑀢𑁆𑀢𑀪𑀸𑀕𑀤𑁆𑀯𑀬𑀢𑁄 𑀅𑀥𑀺𑀓𑀁 𑀏𑀴𑀓𑀮𑁄𑀫𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺 𑀓𑁂𑀯𑀮𑀸𑀦𑀁 𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀅𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀩𑁆𑀩𑀫𑁂𑀯 𑀯𑀸’’𑀢𑀺 𑀇𑀫𑀺𑀦𑀸𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀇𑀫𑁂 𑀑𑀤𑀸𑀢𑀸𑀤𑀬𑁄 𑀲𑀩𑁆𑀩𑁂 𑀓𑁂𑀯𑀮𑀸 𑀦 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀏𑀯𑀁 𑀅𑀓𑀢𑁆𑀯𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀻𑀧𑀺𑀢𑀁 𑀳𑁄𑀢𑀺.

𑀲𑁂𑀬𑁆𑀬𑀣𑀺𑀤𑀁? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀸𑀤𑀸 𑀘𑁂 𑀪𑀺𑀓𑁆𑀔𑀼 𑀤𑁆𑀯𑁂 𑀪𑀸𑀕𑁂 𑀲𑀼𑀤𑁆𑀥𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀢𑀢𑀺𑀬𑀁 𑀑𑀤𑀸𑀢𑀸𑀦𑀁 𑀘𑀢𑀼𑀢𑁆𑀣𑀁 𑀕𑁄𑀘𑀭𑀺𑀬𑀸𑀦𑀁 𑀦𑀯𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀬𑀢𑁆𑀢𑀓𑀧𑁆𑀧𑀫𑀸𑀡𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀦𑀯𑀁 𑀲𑀦𑁆𑀣𑀢𑀁 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂 𑀮𑁄𑀫𑁂 𑀘𑀢𑀼𑀪𑀸𑀕𑀁 𑀢𑀼𑀮𑀬𑀺𑀢𑁆𑀯𑀸 𑀤𑁆𑀯𑁂 𑀢𑀼𑀮𑁂 𑀯𑀸 𑀊𑀦𑁂 𑀯𑀸 𑀓𑀸𑀴𑀓𑀮𑁄𑀫𑁂 𑀕𑀳𑁂𑀢𑁆𑀯𑀸 𑀏𑀓𑀁 𑀢𑀼𑀮𑀁 𑀑𑀤𑀸𑀢𑁂𑀳𑀺 𑀯𑀸 𑀏𑀓𑀁 𑀢𑀼𑀮𑀁 𑀕𑁄𑀘𑀭𑀺𑀬𑁂𑀳𑀺 𑀯𑀸 𑀓𑀸𑀴𑀓𑁂𑀳𑀺 𑀯𑀸 𑀊𑀦𑁂 𑀓𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 𑀅𑀥𑀺𑀓𑁂 𑀯𑀸 𑀓𑀢𑁆𑀯𑀸 𑀓𑀸𑀴𑀓𑀮𑁄𑀫𑁂 𑀯𑀚𑁆𑀚𑁂𑀢𑁆𑀯𑀸 𑀤𑁆𑀯𑀻𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀏𑀯 𑀯𑀸 𑀕𑀳𑁂𑀢𑁆𑀯𑀸 𑀓𑀸𑀢𑀼𑀜𑁆𑀘 𑀓𑀸𑀭𑀸𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀏𑀯𑀁 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀲𑀩𑁆𑀩𑁄𑀧𑀺 𑀲𑀺𑀓𑁆𑀔𑀸𑀧𑀤𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁬𑁭𑁮. ‘‘𑀅𑀦𑀼𑀓𑁆𑀓𑀫𑁂𑀦𑀸’’𑀢𑀺 𑀇𑀫𑀺𑀦𑀸 𑀇𑀫𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀮𑀤𑁆𑀥𑀸𑀦𑀺𑀧𑀻𑀢𑀺 𑀬𑁄𑀚𑀦𑀸. ‘‘𑀅𑀧𑀻’’𑀢𑀺 𑀇𑀫𑀺𑀦𑀸 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁫𑁫) 𑀯𑀼𑀢𑁆𑀢𑀤𑀼𑀓𑁆𑀓𑀝𑀜𑁆𑀘 ‘‘𑀦𑀺𑀲𑁆𑀲𑀕𑁆𑀕𑀺𑀬𑀁 𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁬𑁮) 𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀇𑀳𑀸𑀧𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀦𑁆𑀣𑀢𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀫𑁆𑀧𑀺 𑀥𑀫𑁆𑀫𑀲𑀗𑁆𑀕𑀳𑀓𑀸𑀭𑀓𑁂𑀳𑀺 𑀧𑁂𑀬𑁆𑀬𑀸𑀮𑀯𑀲𑁂𑀦 𑀲𑀁𑀔𑀺𑀢𑁆𑀢𑀁 𑀢𑀁 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁭𑁯. 𑀢𑀢𑀺𑀬𑀁 𑀢𑀼 𑀓𑁆𑀭𑀺𑀬𑀸𑀓𑁆𑀭𑀺𑀬𑀦𑁆𑀢𑀺 𑀇𑀤𑀁 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀧𑀦 ‘‘𑀤𑁆𑀯𑁂 𑀪𑀸𑀕𑀸 𑀲𑀼𑀤𑁆𑀥𑀓𑀸𑀴𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁫𑁪) 𑀯𑀼𑀢𑁆𑀢𑀦𑀬𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀓𑀸𑀴𑀓𑀸𑀦𑀁 𑀅𑀢𑀺𑀭𑁂𑀓𑀕𑁆𑀕𑀳𑀡𑀯𑀲𑁂𑀦 𑀅𑀦𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑁂𑀦 𑀓𑀭𑀡𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀦𑀸𑀫. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀤𑀸𑀬 𑀘 𑀅𑀦𑀸𑀤𑀸𑀬 𑀘 𑀓𑀭𑀡𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁫𑁨).

𑀤𑁆𑀯𑁂𑀪𑀸𑀕𑀓𑀣𑀸𑀯𑀡𑁆𑀡𑀦𑀸.

𑁬𑁮𑁦. 𑀙𑀦𑁆𑀦𑀁 ¶ 𑀯𑀲𑁆𑀲𑀸𑀦𑀁 𑀑𑀭𑁂𑀦𑀸𑀢𑀺 𑀧𑀼𑀩𑁆𑀩𑁂 𑀲𑀦𑁆𑀣𑀢𑀲𑁆𑀲 𑀓𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻𑀢𑀺 𑀙𑀩𑁆𑀩𑀲𑁆𑀲𑀦𑁆𑀢𑀭𑁂 𑀓𑀢𑀲𑀦𑁆𑀣𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀓𑀸𑀭𑀓𑀲𑁆𑀲 𑀘 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀲𑀦𑁆𑀣𑀢𑀁 𑀕𑀳𑁂𑀢𑁆𑀯𑀸 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀕𑀺𑀮𑀸𑀦𑀲𑁆𑀲 ‘‘𑀅𑀳𑀁 𑀪𑀦𑁆𑀢𑁂 𑀕𑀺𑀮𑀸𑀦𑁄 ¶ 𑀦 𑀲𑀓𑁆𑀓𑁄𑀫𑀺 𑀲𑀦𑁆𑀣𑀢𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁, 𑀲𑁄𑀳𑀁 𑀪𑀦𑁆𑀢𑁂 𑀲𑀗𑁆𑀖𑀁 𑀲𑀦𑁆𑀣𑀢𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺 (𑀧𑀸𑀭𑀸. 𑁫𑁫𑁯) 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀚𑁆𑀚 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁂 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀕𑀢𑀝𑁆𑀞𑀸𑀦𑁂 𑀙𑀩𑁆𑀩𑀲𑁆𑀲𑀸𑀦𑀁 𑀅𑀦𑁆𑀢𑁄𑀧𑀺 𑀲𑀦𑁆𑀣𑀢𑀁 𑀓𑀸𑀢𑀼𑀁 𑀲𑀗𑁆𑀖𑁂𑀦 𑀤𑀺𑀦𑁆𑀦𑀲𑀫𑁆𑀫𑀼𑀢𑀺𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄.

𑁬𑁮𑁨. 𑀙𑀩𑁆𑀩𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀬𑀤𑀸 𑀧𑀭𑀺𑀧𑀼𑀡𑁆𑀡𑀸𑀦𑀺, 𑀢𑀤𑀸’’𑀢𑀺 𑀲𑁂𑀲𑁄, 𑀙𑀩𑁆𑀩𑀲𑁆𑀲𑁂𑀲𑀼 𑀧𑀭𑀺𑀧𑀼𑀡𑁆𑀡𑁂𑀲𑀼 𑀲𑀦𑁆𑀣𑀢𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀤𑀸 𑀙𑀩𑁆𑀩𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺, 𑀢𑀤𑀸 𑀲𑀦𑁆𑀣𑀢𑀁 𑀓𑀭𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁫𑁭). 𑀢𑀤𑀼𑀤𑁆𑀥𑀫𑁆𑀧𑀻𑀢𑀺 𑀙𑀩𑁆𑀩𑀲𑁆𑀲𑀢𑁄 𑀉𑀧𑀭𑀺𑀧𑀺. 𑀯𑀺𑀢𑀸𑀦𑁂𑀢𑀺 𑀯𑀺𑀢𑀸𑀦𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀲𑀸𑀡𑀺𑀧𑀸𑀓𑀸𑀭𑁂𑀢𑀺 𑀧𑀸𑀓𑀸𑀭𑀲𑀤𑀺𑀲𑀢𑀺𑀭𑁄𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀢𑁂𑀧𑀺 𑀘𑀸𑀢𑀺 𑀧𑀼𑀭𑀸𑀡𑀲𑀦𑁆𑀣𑀢𑁂 𑀅𑀜𑁆𑀜𑀲𑁆𑀲 𑀤𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀲𑀦𑁆𑀣𑀢𑁂 𑀑𑀭𑀢𑁄 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀓𑀢𑁂𑀧𑀺 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀫𑀦𑀸𑀧𑀢𑁆𑀢𑀺𑀯𑀸𑀭𑁄 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀲𑀼 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑁄 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑁄 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀧𑀦 ‘‘𑀅𑀦𑀦𑁆𑀢𑀭𑀲𑁆𑀲𑀺𑀫𑀲𑁆𑀲𑀸𑀧𑀺, 𑀯𑀺𑀲𑁂𑀲𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀯𑀓𑁆𑀔𑀢𑀺.

𑀙𑀩𑁆𑀩𑀲𑁆𑀲𑀓𑀣𑀸𑀯𑀡𑁆𑀡𑀦𑀸.

𑁬𑁮𑁩. 𑀅𑀦𑀸𑀤𑀸𑀬𑀸𑀢𑀺 𑀦𑀯𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀲𑁆𑀲 𑀯𑀺𑀯𑀡𑁆𑀡𑀓𑀭𑀡𑀢𑁆𑀣𑀸𑀬 𑀧𑀸𑀴𑀺𑀬𑀁 ‘‘𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺 𑀆𑀤𑀸𑀢𑀩𑁆𑀩𑀸 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀬𑀸’’𑀢𑀺 (𑀧𑀸𑀭𑀸. 𑁫𑁬𑁭) 𑀬𑀸 𑀆𑀤𑀸𑀢𑀼𑀁 𑀯𑀼𑀢𑁆𑀢𑀸, 𑀢𑀁 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀙𑀺𑀦𑁆𑀦𑀫𑀼𑀔𑀸𑀯𑀢𑁆𑀢𑀢𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀅𑀤𑀢𑁆𑀯𑀸. 𑀏𑀯𑀫𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀅𑀦𑀸𑀤𑀸𑀦𑀯𑀲𑁂𑀦𑀲𑁆𑀲, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸’’𑀢𑀺 𑀯𑀓𑁆𑀔𑀫𑀸𑀦𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀲𑀦𑁆𑀣𑀢𑁂𑀢𑀺 𑀏𑀢𑁆𑀣 ‘‘𑀧𑀼𑀭𑀸𑀡𑁂’’𑀇𑀢𑀺 𑀘 𑀓𑀸𑀭𑁂𑀢𑀼𑀁 𑀓𑀢𑀜𑁆𑀘𑀸𑀢𑀺 𑀏𑀢𑁆𑀣 ‘‘𑀦𑀯𑀁 𑀦𑀺𑀲𑀻𑀤𑀦𑀁 𑀲𑀦𑁆𑀣𑀢’’𑀦𑁆𑀢𑀺 𑀘 𑀲𑁂𑀲𑁄 ¶ , 𑀧𑀼𑀭𑀸𑀡𑁂 𑀲𑀦𑁆𑀣𑀢𑁂 𑀅𑀲𑀦𑁆𑀢𑁂 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀅𑀦𑀸𑀤𑀸𑀬 𑀦𑀯𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀦𑀯𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀓𑀸𑀭𑁂𑀢𑀼𑀁, 𑀦𑀯𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀜𑁆𑀘 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬 ¶ 𑀓𑀸𑀭𑁂𑀢𑀼’’𑀦𑁆𑀢𑀺 𑀇𑀤𑀫𑁂𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁬𑁯) 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀝𑁆𑀞𑀓𑀣𑀸𑀬, 𑀢𑀩𑁆𑀩𑀡𑁆𑀡𑀦𑀸𑀲𑀼 𑀘 𑀅𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀯𑀸 𑀢𑀁 𑀦 𑀯𑀢𑁆𑀢𑀩𑁆𑀩𑀁. ‘‘𑀅𑀦𑀸𑀧𑀢𑁆𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀓𑀭𑁄𑀢𑀺…𑀧𑁂… 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸’’𑀢𑀺 (𑀧𑀸𑀭𑀸. 𑁫𑁬𑁪) 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀫𑁄𑀮𑁄𑀓𑁂𑀢𑁆𑀯𑀸 𑀯𑀸 𑀤𑀼𑀓𑁆𑀓𑀝𑀲𑁆𑀲 𑀘 𑀯𑀺𑀳𑀺𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀲𑀦𑁆𑀥𑀸𑀬 𑀮𑀺𑀔𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀢𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀅𑀜𑁆𑀜𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀫𑀺𑀦𑀸 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀸𑀞𑁄𑀯 𑀤𑀲𑁆𑀲𑀺𑀢𑁄.

𑁬𑁮𑁪. 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸 𑀅𑀦𑀸𑀤𑀸𑀦𑀯𑀲𑁂𑀦 𑀘 𑀅𑀲𑁆𑀲 𑀲𑀦𑁆𑀣𑀢𑀲𑁆𑀲 𑀓𑀭𑀡𑁂𑀦 𑀘 𑀲𑀢𑁆𑀣𑀸𑀭𑀸 𑀏𑀢𑀁 𑀲𑀺𑀓𑁆𑀔𑀸𑀧𑀤𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁬𑁮𑁫. 𑀦𑀦𑀼 𑀘 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀝𑁆𑀞𑀓𑀣𑀸𑀬 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁬𑁭) 𑀯𑀼𑀢𑁆𑀢𑀸𑀦𑀺, 𑀇𑀳 ‘‘𑀲𑀜𑁆𑀘𑀭𑀺𑀢𑁆𑀢𑀲𑀫𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀸𑀦𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑁂 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁫𑁨) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀸𑀦𑀺, 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑁂 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀁 𑀲𑀜𑁆𑀘𑀭𑀺𑀢𑁆𑀢𑁂𑀦 𑀲𑀫𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, 𑀫𑀽𑀮𑀫𑁂𑀯 𑀲𑀭𑀺𑀢𑁆𑀯𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀲𑀗𑁆𑀔𑀸𑀢𑀯𑀺𑀲𑁂𑀲𑀲𑁆𑀲 ¶ 𑀯𑀺𑀲𑀼𑀁 𑀤𑀲𑁆𑀲𑀺𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑀯𑀺𑀦𑀺𑀘𑁆𑀙𑀬𑀫𑀢𑁆𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀫𑀁 𑀯𑀺𑀲𑁂𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀯𑀲𑀺𑀝𑁆𑀞𑀯𑀺𑀦𑀺𑀘𑁆𑀙𑀬𑁂𑀦 𑀤𑁆𑀯𑀻𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀯𑀺𑀲𑁂𑀲𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀦𑁆𑀢𑀭𑀲𑁆𑀲𑀸’’𑀢𑀺𑀆𑀤𑀺.

𑀦𑀺𑀲𑀻𑀤𑀦𑀲𑀦𑁆𑀣𑀢𑀓𑀣𑀸𑀯𑀡𑁆𑀡𑀦𑀸.

𑁬𑁮𑁬-𑁭. 𑀕𑀘𑁆𑀙𑀦𑁆𑀢𑁂𑀢𑀺 𑀢𑀺𑀬𑁄𑀚𑀦𑀧𑀽𑀭𑀡𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑁆𑀫 𑀕𑀘𑁆𑀙𑀦𑁆𑀢𑁂. 𑀬𑀸𑀦𑁂𑀢𑀺 𑀲𑀓𑀝𑀸𑀤𑀺𑀓𑁂. 𑀮𑁄𑀫𑀸𑀦𑀻𑀢𑀺 𑀏𑀴𑀓𑀮𑁄𑀫𑀸𑀦𑀺. 𑀲𑀸𑀫𑀺𑀓𑀲𑁆𑀲𑀸𑀢𑀺 𑀬𑀸𑀦𑀸𑀤𑀺𑀲𑀸𑀫𑀺𑀦𑁄. 𑀅𑀚𑀸𑀦𑀢𑁄𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀴𑀓𑀮𑁄𑀫𑀁 𑀮𑀪𑀺𑀢𑁆𑀯𑀸 ‘‘𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀳𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑁫𑁭𑁩) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀺𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀲𑀳𑀢𑁆𑀣𑁂𑀦𑀸𑀧𑀺 𑀳𑀭𑀺𑀢𑁆𑀯𑀸 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀧𑀭𑁂𑀲𑀁 𑀬𑀸𑀦𑀸𑀤𑀻𑀲𑀼 𑀲𑀸𑀫𑀺𑀓𑁂𑀲𑀼 𑀅𑀚𑀸𑀦𑀦𑁆𑀢𑁂𑀲𑀼 ‘‘𑀏𑀢𑁂 𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀤𑀺 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀽𑀢𑀺 𑀬𑁂𑀲𑀼 𑀏𑀴𑀓𑀮𑁄𑀫𑀸𑀦𑀺 𑀞𑀧𑀺𑀢𑀸𑀦𑀺, 𑀢𑁂𑀲𑀼 𑀬𑀸𑀦𑀸𑀤𑀻𑀲𑀼 𑀢𑀺𑀬𑁄𑀚𑀦𑀫𑀢𑀻𑀢𑁂𑀲𑀼 ¶ 𑀪𑀺𑀓𑁆𑀔𑀼𑀲𑁆𑀲 𑀧𑀬𑁄𑀕𑀁 𑀯𑀺𑀦𑀸𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀧𑀞𑀫𑀁 𑀧𑀸𑀤𑀁 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁭𑁩) 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀬𑀁 𑀦𑀬𑁄𑀢𑀺 𑀪𑀺𑀓𑁆𑀔𑀼𑀦𑁄 𑀧𑀬𑁄𑀕𑀁 𑀯𑀺𑀦𑀸 𑀬𑀢𑁆𑀣 𑀏𑀴𑀓𑀮𑁄𑀫𑀸𑀦𑀺 𑀞𑀧𑀺𑀢𑀸𑀦𑀺, 𑀢𑁂𑀲𑀼 𑀬𑀸𑀦𑀸𑀤𑀻𑀲𑀼 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑁂𑀲𑀼 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁬𑁮𑁮. 𑀅𑀕𑀘𑁆𑀙𑀦𑁆𑀢𑁂𑀢𑀺 𑀢𑀺𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀞𑀺𑀢𑁂. ‘‘𑀅𑀪𑀺𑀭𑀽𑀳𑀺𑀢𑁆𑀯𑀸’’𑀢𑀺 𑀇𑀤𑀁 𑀅𑀦𑀸𑀧𑀢𑁆𑀢𑀺𑀓𑀸𑀭𑀡𑁂𑀲𑀼 𑀏𑀓𑀁 𑀤𑀲𑁆𑀲𑁂𑀢𑀼𑀫𑀸𑀳. ‘‘𑀪𑀽𑀫𑀺𑀬𑀜𑁆𑀳𑀺 ¶ 𑀞𑀢𑁆𑀯𑀸 𑀤𑁂𑀦𑁆𑀢𑁄, 𑀅𑀯𑁆𑀳𑀸𑀬𑀦𑁆𑀢𑁄 𑀯𑀸 𑀧𑀼𑀭𑀢𑁄 𑀕𑀘𑁆𑀙𑀢𑀺, 𑀏𑀲𑁂𑀯𑀦𑀬𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀅𑀢𑁆𑀢𑀦𑀸 𑀧𑁂𑀲𑀺𑀢𑁂 𑀅𑀜𑁆𑀜𑀲𑁆𑀫𑀺𑀁 𑀳𑀭𑀦𑁆𑀢𑁂 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂 𑀲𑀸𑀭𑁂𑀢𑀺 𑀯𑀝𑁆𑀝𑀢𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀁 𑀧𑀦𑀜𑁆𑀜𑀁 𑀳𑀭𑀸𑀧𑁂𑀢𑀺, 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺.

𑁬𑁯𑁦. 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀲𑀽𑀢𑀺 𑀅𑀢𑁆𑀢𑀦𑁄 𑀓𑀡𑁆𑀡𑀩𑀺𑀮𑁂𑀲𑀼.

𑁬𑁯𑁧. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀓𑀢𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦 𑀩𑀤𑁆𑀥𑀫𑀢𑁆𑀢𑀫𑁆𑀧𑀺 𑀓𑀢𑀪𑀡𑁆𑀟𑀫𑁂𑀯𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀓𑁂𑀦 𑀘 𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀯𑁂𑀡𑀺𑀁 𑀓𑀢𑁆𑀯𑀸𑀢𑀺 𑀓𑀼𑀤𑁆𑀭𑀽𑀲𑀲𑀻𑀲𑀧𑀮𑀸𑀮𑀯𑁂𑀡𑀺𑀲𑀤𑀺𑀲𑀁 𑀯𑁂𑀡𑀺𑀁 𑀓𑀢𑁆𑀯𑀸. 𑀆𑀧𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 ‘‘𑀯𑁂𑀡𑀺𑀁 𑀓𑀢𑁆𑀯𑀸 𑀳𑀭𑀢𑀺, 𑀇𑀤𑀁 𑀦𑀺𑀥𑀸𑀦𑀫𑀼𑀔𑀁 𑀦𑀸𑀫, 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁬𑁯𑁨. 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀏𑀢𑁆𑀣 ‘‘𑀢𑀁 𑀞𑀸𑀦’’𑀦𑁆𑀢𑀺 𑀲𑁂𑀲𑁄, 𑀬𑀤𑀺 𑀢𑀁 𑀞𑀸𑀦𑀁 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 𑀬𑁄𑀚𑀦𑀸, 𑀢𑀺𑀬𑁄𑀚𑀦𑁄𑀲𑀸𑀦𑀝𑁆𑀞𑀸𑀦𑀁 𑀬𑀤𑀺 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑁆𑀧𑀢𑁆𑀯𑀸𑀢𑀺 𑀢𑀁 𑀞𑀸𑀦𑀁 𑀧𑀢𑁆𑀯𑀸. 𑀘𑁄𑀭𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀯𑀸 𑀕𑀘𑁆𑀙𑀢𑀺, 𑀬𑁄 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺 𑀢𑀲𑁆𑀲 𑀕𑀘𑁆𑀙𑀢𑁄𑀢𑀺 𑀮𑀩𑁆𑀪𑀢𑀺. 𑀏𑀢𑁆𑀣 ‘‘𑀆𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺𑀫𑀸𑀳. 𑀇𑀫𑀺𑀲𑁆𑀲𑀸 𑀅𑀘𑀺𑀢𑁆𑀢𑀓𑀢𑀸𑀬 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀁 𑀧𑀦 𑀲𑀘𑀺𑀢𑁆𑀢𑀓𑀢𑀸𑀬 𑀏𑀢𑁂𑀲𑀁 𑀦 𑀳𑁄𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸 𑀳𑀺 𑀢𑀢𑁆𑀣 𑀆𑀧𑀢𑁆𑀢𑀺, 𑀲𑀸 𑀇𑀥 𑀅𑀦𑀸𑀧𑀢𑁆𑀢𑀺. 𑀬𑀸 𑀇𑀥 𑀆𑀧𑀢𑁆𑀢𑀺, 𑀲𑀸 𑀢𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁨). 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀳𑀭𑀢𑁄 𑀪𑀡𑁆𑀟𑀕𑁆𑀖𑀯𑀲𑁂𑀦 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑁂𑀲𑀼 ¶ 𑀏𑀓𑀁 𑀳𑁄𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ¶ ‘‘𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀦 𑀲𑀼𑀗𑁆𑀓𑀖𑀸𑀢𑁂 𑀆𑀧𑀢𑁆𑀢𑀺 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁨).

𑁬𑁯𑁩. 𑀢𑀺𑀬𑁄𑀚𑀦𑀦𑁆𑀢𑀺 𑀏𑀢𑁆𑀣 𑀳𑀭𑀡𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀳𑀭𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀓𑀫𑁆𑀫𑀤𑀻𑀧𑀓𑀁 ‘‘𑀮𑁄𑀫𑀸𑀦𑀻’’𑀢𑀺 𑀇𑀤𑀁 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. ‘‘𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸’’𑀢𑀺 𑀇𑀤𑀁 𑀲𑀩𑁆𑀩𑀢𑁆𑀣 𑀯𑀓𑁆𑀔𑀫𑀸𑀦𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀢𑀸𑀦𑀺𑀬𑁂𑀯 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀺𑀬𑁄𑀚𑀦𑀦𑁆𑀢𑀺 𑀏𑀢𑁆𑀣 𑀢𑀁𑀬𑁂𑀯 𑀢𑀺𑀬𑁄𑀚𑀦𑀦𑁆𑀢𑀺 𑀮𑀩𑁆𑀪𑀢𑀺. 𑀅𑀢𑁆𑀢𑀦𑀸 𑀕𑀢𑀁 𑀢𑀺𑀬𑁄𑀚𑀦𑀁 𑀧𑀼𑀦 𑀢𑀸𑀦𑁂𑀯 𑀮𑁄𑀫𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁬𑁯𑁪. 𑀦𑀺𑀯𑀸𑀲𑀢𑁆𑀣𑀸𑀬 𑀯𑀸 𑀕𑀦𑁆𑀢𑁆𑀯𑀸𑀢𑀺 𑀢𑀺𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀯𑀸 𑀲𑀻𑀫𑀸𑀬 𑀯𑀸 𑀆𑀯𑀸𑀲𑁂 𑀯𑀲𑀺𑀢𑀼𑀓𑀸𑀫𑀢𑀸𑀬 𑀕𑀦𑁆𑀢𑁆𑀯𑀸. 𑀢𑀢𑁄 𑀧𑀭𑀁 𑀳𑀭𑀦𑁆𑀢𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀉𑀤𑁆𑀤𑁂𑀲𑀸𑀤𑀺𑀁 𑀅𑀮𑀪𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀜𑁆𑀜𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀺𑀢𑀼𑀓𑀸𑀫𑀢𑀸𑀬 𑀧𑀼𑀦𑀧𑀺 𑀢𑀺𑀬𑁄𑀚𑀦𑀁 𑀳𑀭𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀢𑀢𑁄𑀧𑀺 𑀅𑀜𑁆𑀜𑀁 𑀞𑀸𑀦𑀁, 𑀢𑀢𑁄𑀧𑀺 𑀅𑀜𑁆𑀜𑀦𑁆𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀢𑀕𑀢𑀝𑁆𑀞𑀸𑀦𑀢𑁄 𑀧𑀼𑀦𑀧𑀺 𑀧𑀭𑀫𑁆𑀧𑀭𑀁 𑀞𑀸𑀦𑀁 𑀕𑀫𑀦𑀯𑀲𑁂𑀦 𑀬𑁄𑀚𑀦𑀲𑀢𑀫𑁆𑀧𑀺 𑀳𑀭𑀢𑁄 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀁 𑀬𑁄𑀚𑀦𑀲𑀢𑀫𑁆𑀧𑀺 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁫). 𑀅𑀘𑁆𑀙𑀺𑀦𑁆𑀦𑀁 𑀯𑀸𑀧𑀺 𑀮𑀪𑀺𑀢𑁆𑀯𑀸 𑀳𑀭𑀢𑁄𑀧𑀻𑀢𑀺 ‘‘𑀘𑁄𑀭𑀸𑀯𑀳𑀝𑀧𑀭𑀺𑀘𑁆𑀘𑀢𑁆𑀢𑀁 𑀮𑀪𑀺𑀢𑁆𑀯𑀸 𑀳𑀭𑀦𑁆𑀢𑀲𑁆𑀲. 𑀇𑀥 𑀲𑀩𑁆𑀩𑀢𑁆𑀣𑁂𑀯 ‘‘𑀦𑀺𑀯𑀸𑀲𑀢𑁆𑀣𑀸𑀬 𑀯𑀸 𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀓𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀧𑀞𑀫𑀮𑀤𑁆𑀥𑀝𑁆𑀞𑀸𑀦𑀢𑁄 𑀧𑀪𑀼𑀢𑀺 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀫𑁆𑀧𑀺 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀦𑀺𑀲𑁆𑀲𑀝𑁆𑀞𑀁 𑀮𑀪𑀺𑀢𑁆𑀯𑀸𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀮𑀪𑀺𑀢𑁆𑀯𑀸.

𑁬𑁯𑁫. 𑀅𑀜𑁆𑀜𑁂𑀦𑀸𑀢𑀺 𑀢𑀸𑀦𑀺 𑀳𑀸𑀭𑀺𑀦𑀸 𑀅𑀜𑁆𑀜𑁂𑀦. 𑀓𑀢𑀪𑀡𑁆𑀟𑀓𑀦𑁆𑀢𑀺 ‘‘𑀓𑀫𑁆𑀩𑀮𑀓𑁄𑀚𑀯𑀲𑀦𑁆𑀣𑀢𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦 ¶ 𑀩𑀤𑁆𑀥𑀫𑀢𑁆𑀢𑀫𑁆𑀧𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀏𑀴𑀓𑀮𑁄𑀫𑁂𑀳𑀺 𑀓𑀢𑀪𑀡𑁆𑀟𑀓𑀁.

𑁬𑁯𑁬. 𑀇𑀤𑀁 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑀢𑀸𑀬 𑀯𑀸 𑀜𑀢𑁆𑀯𑀸𑀧𑀺 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑁂𑀲𑀼 𑀮𑁄𑀫𑀲𑁆𑀲 𑀅𑀮𑁆𑀮𑀺𑀦𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 𑀯𑀸 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀅𑀭𑀳𑀢𑁄𑀧𑀺 𑀇𑀫𑀸𑀬 𑀆𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑀢𑁄 ‘‘𑀅𑀘𑀺𑀢𑁆𑀢’’𑀦𑁆𑀢𑀺 𑀆𑀳.

𑀏𑀴𑀓𑀮𑁄𑀫𑀓𑀣𑀸𑀯𑀡𑁆𑀡𑀦𑀸.

𑁬𑁯𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀓𑀣𑀸 ¶ 𑀉𑀢𑁆𑀢𑀸𑀦𑀸𑀬𑁂𑀯.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀓𑀣𑀸𑀯𑀡𑁆𑀡𑀦𑀸.

𑁬𑁯𑁮. 𑀕𑀡𑁆𑀳𑁂𑀬𑁆𑀬 𑀯𑀸𑀢𑀺 𑀏𑀢𑁆𑀣 ‘‘𑀬𑁄’’𑀢𑀺 𑀲𑁂𑀲𑁄. ‘‘𑀕𑀡𑁆𑀳𑁂𑀬𑁆𑀬 𑀯𑀸 𑀕𑀡𑁆𑀳𑀸𑀧𑁂𑀬𑁆𑀬 𑀯𑀸’’𑀢𑀺 𑀇𑀫𑀺𑀦𑀸 ‘‘𑀢𑀢𑁆𑀣𑀢𑁆𑀢𑀦𑁄 𑀧𑀦𑀢𑁆𑀣𑀸𑀬𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 ‘‘𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀕𑁆𑀕𑀡𑁆𑀳𑁂𑀬𑁆𑀬 𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀸𑀓𑀸𑀭𑁂𑀦 ‘‘𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, ‘‘𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽’’𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀘𑁂 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄.

𑀭𑀚𑀢𑀦𑁆𑀢𑀺 𑀅𑀜𑁆𑀜𑀢𑁆𑀣 𑀲𑀚𑁆𑀛𑀼 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀯𑁄𑀳𑀸𑀭𑀽𑀧𑀕𑀓𑀳𑀸𑀧𑀡𑀸𑀤𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀸𑀴𑀺𑀬𑀁 ‘‘𑀭𑀚𑀢𑀁 𑀦𑀸𑀫 𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄, 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 (𑀧𑀸𑀭𑀸. 𑁫𑁮𑁪). 𑀇𑀥 𑀓𑀳𑀸𑀧𑀡𑀸𑀤𑀻𑀦𑀁 𑀲𑀭𑀽𑀧𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀢𑁆𑀣 𑀓𑀳𑀸𑀧𑀡𑁄𑀢𑀺 𑀲𑁄𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀧𑀸𑀓𑀢𑀺𑀓𑁄 𑀯𑀸. 𑀮𑁄𑀳𑀫𑀸𑀲𑀓𑁄𑀢𑀺 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀓𑀢𑀫𑀸𑀲𑀓𑁄. 𑀤𑀸𑀭𑀼𑀫𑀸𑀲𑀓𑁄𑀢𑀺 ¶ 𑀲𑀸𑀭𑀤𑀸𑀭𑀼𑀦𑀸 𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑁂𑀧𑀺 𑀭𑀽𑀧𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀫𑀸𑀲𑀓𑁄. 𑀚𑀢𑀼𑀫𑀸𑀲𑀓𑁄𑀢𑀺 𑀮𑀸𑀔𑀸𑀬 𑀯𑀸 𑀦𑀺𑀬𑁆𑀬𑀸𑀲𑁂𑀦 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀫𑀸𑀲𑀓𑁄. ‘𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁄 𑀬𑁄 𑀬𑀢𑁆𑀣 𑀬𑀢𑁆𑀣 𑀚𑀦𑀧𑀤𑁂 𑀬𑀤𑀸 𑀬𑀤𑀸 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀫𑀲𑁄 𑀅𑀝𑁆𑀞𑀺𑀫𑀬𑁄𑀧𑀺 𑀘𑀫𑁆𑀫𑀫𑀬𑁄𑀧𑀺 𑀭𑀼𑀓𑁆𑀔𑀨𑀮𑀩𑀻𑀚𑀫𑀬𑁄𑀧𑀺 𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀅𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑁋

𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀧𑀸𑀓𑀢𑀺𑀓𑁄 𑀦𑀸𑀫 𑀏𑀢𑀭𑀳𑀺 𑀧𑀓𑀢𑀺𑀓𑀳𑀸𑀧𑀡𑁄. 𑀭𑀼𑀓𑁆𑀔𑀨𑀮𑀩𑀻𑀚𑀫𑀬𑁄𑀢𑀺 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀭𑀼𑀓𑁆𑀔𑀸𑀦𑀁 𑀨𑀮𑀩𑀻𑀚𑁂𑀦 𑀓𑀢𑁄.

𑀚𑀸𑀢𑀭𑀽𑀧𑀓𑀁 𑀲𑀼𑀯𑀡𑁆𑀡𑀁. 𑀬𑀣𑀸𑀳 𑀧𑀸𑀴𑀺𑀬𑀁 ‘‘𑀚𑀸𑀢𑀭𑀽𑀧𑀁 𑀦𑀸𑀫 𑀲𑀢𑁆𑀣𑀼𑀯𑀡𑁆𑀡𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁫𑁮𑁪). 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 ¶ 𑀏𑀢𑁆𑀣 ‘‘𑀢𑁂𑀦𑀸’’𑀢𑀺 𑀮𑀩𑁆𑀪𑀢𑀺, ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀇𑀫𑀺𑀦𑀸 𑀬𑀼𑀚𑁆𑀚𑀢𑀺, 𑀏𑀯𑀁 𑀲𑀸𑀤𑀺𑀢𑀪𑀺𑀓𑁆𑀔𑀼𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀁 𑀯𑀸 𑀧𑀭𑁂𑀦 𑀉𑀕𑁆𑀕𑀳𑀸𑀧𑀺𑀢𑀁 𑀯𑀸 𑀉𑀧𑀦𑀺𑀓𑁆𑀔𑀺𑀧𑀺𑀢𑀲𑁆𑀲 𑀲𑀸𑀤𑀺𑀬𑀦𑀯𑀲𑁂𑀦 𑀲𑀸𑀤𑀺𑀢𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸 ‘‘𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑁫𑁮𑁪) 𑀯𑀘𑀦𑀢𑁄 𑀲𑀗𑁆𑀖𑀫𑀚𑁆𑀛𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀅𑀳𑀁 𑀪𑀦𑁆𑀢𑁂 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀇𑀤𑀁 𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀆𑀧𑀢𑁆𑀢𑀺 ¶ 𑀤𑁂𑀲𑁂𑀢𑀩𑁆𑀩𑀸𑀯𑀸𑀢𑀺 𑀅𑀢𑁆𑀢𑀦𑀸 𑀏𑀯 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂 𑀏𑀯𑀫𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀸. 𑀏𑀯𑀁 𑀤𑁂𑀲𑀺𑀢𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀦𑀼𑀫𑀢𑁂𑀦 𑀩𑁆𑀬𑀢𑁆𑀢𑁂𑀦 𑀧𑀝𑀺𑀩𑀮𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑁫𑁮𑁪).

𑁬𑁯𑁯. 𑀭𑀚𑀢𑀦𑁆𑀢𑀺 𑀭𑀽𑀧𑀺𑀬𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀓𑀢𑀸𑀓𑀢𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀪𑀺𑀦𑁆𑀦𑀁 𑀫𑀸𑀲𑀓𑁄𑀢𑀺 𑀚𑀸𑀢𑀭𑀽𑀧𑀫𑀸𑀲𑀓𑁄, 𑀭𑀚𑀢𑀫𑀸𑀲𑀓𑁄𑀧𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀭𑀚𑀢𑀫𑀸𑀲𑀓𑁄𑀢𑀺 ‘‘𑀭𑀚𑀢’’𑀦𑁆𑀢𑀺 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁫𑁮𑁪) 𑀯𑀼𑀢𑁆𑀢𑀓𑀳𑀸𑀧𑀡𑀸𑀤𑀺 𑀧𑀜𑁆𑀘𑀧𑁆𑀧𑀓𑀸𑀭𑁄 𑀫𑀸𑀲𑀓𑁄 𑀕𑀳𑀺𑀢𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑀩𑁆𑀩𑁄𑀧𑀺 𑀭𑀚𑀢𑀫𑀸𑀲𑀓𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪). 𑀇𑀥 ‘‘𑀚𑀸𑀢𑀭𑀽𑀧𑀫𑀸𑀲𑀓𑁄’’𑀢𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀓𑀳𑀸𑀧𑀡𑀧𑀤𑁂𑀦 𑀲𑀼𑀯𑀡𑁆𑀡𑀓𑀳𑀸𑀧𑀡𑀁 𑀯𑀚𑁆𑀚𑁂𑀢𑁆𑀯𑀸 𑀇𑀢𑀭𑀤𑁆𑀯𑀬𑀫𑁂𑀯 𑀯𑀢𑁆𑀢𑀩𑁆𑀩𑀁. ‘‘𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳’’𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀕𑁆𑀕𑀡𑁆𑀳𑀦𑀉𑀕𑁆𑀕𑀡𑁆𑀳𑀸𑀧𑀦𑀲𑀸𑀤𑀺𑀬𑀦𑀸𑀦𑀺 𑀓𑀭𑁄𑀦𑁆𑀢𑀁 𑀲𑀦𑁆𑀥𑀸𑀬𑀸𑀳. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀤𑀼𑀓𑁆𑀓𑀝𑀸𑀯𑀳𑀜𑁆𑀘 𑀳𑁄𑀢𑁂𑀯.

𑁭𑁦𑁦-𑁧. 𑀫𑀼𑀢𑁆𑀢𑀸𑀤𑀻𑀦𑀁 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀅𑀯𑀼𑀢𑁆𑀢𑀢𑁆𑀢𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑁂 𑀦𑀯𑀫𑀯𑀕𑁆𑀕𑁂 𑀤𑀼𑀢𑀺𑀬𑀲𑁆𑀲 𑀭𑀢𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀭𑀢𑀦𑀁 𑀦𑀸𑀫 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀮𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺 (𑀧𑀸𑀘𑀺. 𑁫𑁦𑁬) 𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀭𑀢𑀦𑀸𑀦𑀁 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀭𑀚𑀢𑀁, 𑀚𑀸𑀢𑀭𑀽𑀧𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀸𑀦𑀁 𑀅𑀝𑁆𑀞𑀦𑁆𑀦𑀁 𑀭𑀢𑀦𑀸𑀦𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀸𑀯𑁄 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀫𑀼𑀢𑁆𑀢𑀸…𑀧𑁂… 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺. 𑀏𑀢𑁆𑀣 𑀯𑁂𑀴𑀼𑀭𑀺𑀬𑁄 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦 𑀯𑀼𑀢𑁆𑀢𑁄 ¶ , 𑀲𑁄 𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀸𑀦𑀁 ¶ 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀕𑀳𑀡𑁂𑀦𑁂𑀯 𑀕𑀬𑁆𑀳𑀢𑀺. 𑀫𑀼𑀢𑁆𑀢𑀸𑀤𑀬𑁄 𑀬𑀣𑀸𑀤𑀲𑁆𑀲𑀺𑀢𑀲𑀭𑀽𑀧𑀸𑀬𑁂𑀯. 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀲𑀼𑀢𑁆𑀢𑀦𑁆𑀢𑀯𑀲𑁂𑀦𑀸𑀧𑀺 ‘‘𑀅𑀓𑀧𑁆𑀧𑀺𑀬𑀸’’𑀢𑀺 𑀲𑀺𑀤𑁆𑀥𑀸𑀦𑀁 𑀲𑀢𑁆𑀢𑀥𑀜𑁆𑀜𑀸𑀤𑀻𑀦𑀁 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀥𑀜𑁆𑀜𑀸𑀦𑀻’’𑀢𑀺𑀆𑀤𑀺.

𑁭𑁦𑁨. 𑀭𑀢𑀦𑀲𑀺𑀓𑁆𑀔𑀸𑀧𑀤𑁂𑀬𑁂𑀯 ‘‘𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀆𑀕𑀢𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀧𑀝𑀺𑀕𑁆𑀕𑀡𑁆𑀳𑀢𑁄 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀼𑀕𑁆𑀕𑀫𑀸𑀲𑀸𑀤𑀺𑀓’’𑀦𑁆𑀢𑀺𑀆𑀤𑀺.

𑁭𑁦𑁩-𑁪. 𑀏𑀯𑀁 𑀢𑀺𑀧𑁆𑀧𑀓𑀸𑀭𑁂𑀦 𑀞𑀺𑀢𑀁 𑀯𑀢𑁆𑀣𑀼𑀁 𑀕𑀡𑁆𑀳𑀢𑁄 𑀅𑀥𑀺𑀧𑁆𑀧𑀸𑀬𑀦𑀸𑀦𑀢𑁆𑀢𑁂𑀦 𑀲𑀫𑁆𑀪𑀯𑀦𑁆𑀢𑀁 𑀆𑀧𑀢𑁆𑀢𑀺𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀸𑀤𑀺𑀯𑀢𑁆𑀣𑀽𑀲𑀼. 𑀲𑀗𑁆𑀖𑀸𑀤𑀻𑀦𑀦𑁆𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀘𑁂𑀢𑀺𑀬𑀸𑀤𑀻𑀦𑀁. 𑀢𑀦𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁. 𑀲𑀩𑁆𑀩𑀢𑁆𑀣𑀸𑀬𑀸𑀢𑀺 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀬𑀸𑀢𑀺 𑀯𑀺𑀕𑁆𑀕𑀳𑁄. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀘 𑀲𑀗𑁆𑀖𑀸𑀤𑀻𑀦𑀫𑀢𑁆𑀣𑀸𑀬 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑁂𑀦𑁂𑀢𑁆𑀣 𑀘-𑀲𑀤𑁆𑀤𑁂𑀦 ‘‘𑀲𑀩𑁆𑀩𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑀢𑁆𑀣𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀢𑁄 𑀉𑀧𑀭𑀺 𑀭𑀢𑀦𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄.

𑁭𑁦𑁫. 𑀓𑀳𑀸𑀧𑀡𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. ‘‘𑀲𑀳𑀲𑁆𑀲’’𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁, 𑀲𑀳𑀲𑁆𑀲𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁦𑁬. 𑀣𑀯𑀺𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀺𑀣𑀺𑀮𑀧𑀽𑀭𑀺𑀢𑀸𑀦𑀺 𑀪𑀸𑀚𑀦𑀸𑀦𑀺 𑀕𑀳𑀺𑀢𑀸𑀦𑀺. ‘‘𑀲𑀺𑀣𑀺𑀮𑀩𑀤𑁆𑀥𑁂𑀲𑀽’’𑀢𑀺 𑀯𑀺𑀲𑁂𑀲𑀦𑁂𑀦 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 ‘‘𑀖𑀦𑀩𑀤𑁆𑀥𑁂, 𑀧𑀦 𑀖𑀦𑀧𑀽𑀭𑀺𑀢𑁂 𑀯𑀸 𑀏𑀓𑀸𑀯 𑀆𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑀅𑀝𑁆𑀞𑀓𑀣𑀸𑀲𑁂𑀲𑀁 𑀤𑀻𑀧𑁂𑀢𑀺.

𑁭𑁦𑁭. 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀓𑀫𑁆𑀫𑀁 ¶ 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀤’’𑀦𑁆𑀢𑀺𑀆𑀤𑀺. 𑀕𑀡𑁆𑀳𑀺𑀢𑀼𑀓𑀸𑀫𑁄𑀧𑀻𑀢𑀺 𑀏𑀢𑁆𑀣 ‘‘𑀳𑁄𑀢𑀽’’𑀢𑀺 𑀲𑁂𑀲𑁄. 𑀦𑀺𑀲𑁂𑀥𑁂𑀢𑀩𑁆𑀩𑀫𑁂𑀯𑀸𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 ‘‘𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯, 𑀏𑀯𑀁 𑀲𑀢𑀺 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀸𑀬𑀯𑀸𑀘𑀸𑀳𑀺 𑀯𑀸 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘𑀦𑀬𑀺𑀤𑀁 𑀅𑀫𑁆𑀳𑀸𑀓𑀁 𑀓𑀧𑁆𑀧𑀢𑀻’𑀢𑀺 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑀆𑀕𑀢𑁄𑀬𑁂𑀯.

𑁭𑁦𑁮. 𑀢𑀁 ¶ 𑀯𑀢𑁆𑀣𑀼𑀦𑁆𑀢𑀺 𑀢𑀣𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀯𑀢𑁆𑀣𑀼𑀁. 𑀞𑀧𑁂𑀢𑁆𑀯𑀸 𑀬𑀤𑀺 𑀕𑀘𑁆𑀙𑀢𑀻𑀢𑀺 ‘‘𑀢𑀼𑀫𑁆𑀳𑁂 𑀕𑀡𑁆𑀳𑀣 𑀯𑀸, 𑀫𑀸 𑀯𑀸, 𑀤𑀺𑀦𑁆𑀦𑀁 𑀤𑀺𑀦𑁆𑀦𑀫𑁂𑀯𑀸’’𑀢𑀺 𑀲𑀘𑁂 𑀲𑁄 𑀞𑀧𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀬𑀣𑀸 𑀢𑀁 𑀦 𑀯𑀺𑀦𑀲𑁆𑀲𑀢𑀺, 𑀢𑀣𑀸 𑀢𑀁 𑀕𑁄𑀧𑀬𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀜𑁆𑀜𑁄 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀢𑀢𑁆𑀣𑀸𑀕𑀢𑁂𑀦 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀲𑀭𑀽𑀧𑀁 𑀆𑀯𑀺 𑀓𑀢𑁆𑀯𑀸 ‘‘𑀕𑁄𑀧𑀬𑀺𑀲𑁆𑀲𑀸𑀫𑀳𑀁 𑀪𑀦𑁆𑀢𑁂, 𑀕𑀼𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀏𑀳𑀻’’𑀢𑀺 𑀅𑀯𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀫𑁆𑀧𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀇𑀥 𑀞𑀧𑁂𑀳𑀻’’𑀢𑀺 𑀅𑀯𑀢𑁆𑀯𑀸 ‘‘𑀇𑀤𑀁 𑀕𑀼𑀢𑁆𑀢𑀝𑁆𑀞𑀸𑀦’’𑀦𑁆𑀢𑀺 𑀲𑀼𑀭𑀓𑁆𑀔𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀞𑀧𑀺𑀢𑁂 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀭𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁦𑁯. 𑀕𑀼𑀢𑁆𑀢𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀅𑀯𑀢𑁆𑀢𑀩𑁆𑀩𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀳𑀭𑁂𑀤𑀫𑀺𑀤’’𑀦𑁆𑀢𑀺𑀆𑀤𑀺. 𑀅𑀓𑀧𑁆𑀧𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀯𑀘𑀦’’𑀦𑁆𑀢𑀺 𑀮𑀩𑁆𑀪𑀢𑀺. 𑀏𑀯𑀁 𑀅𑀓𑀧𑁆𑀧𑀺𑀬𑀯𑀘𑀦𑀁 𑀅𑀯𑀢𑁆𑀯𑀸 𑀲𑀼𑀭𑀓𑁆𑀔𑀺𑀢𑀝𑁆𑀞𑀸𑀦𑁂 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀯𑀺𑀓𑁆𑀓𑀸𑀬𑀺𑀓𑁂 𑀧𑀢𑁆𑀢𑀘𑀻𑀯𑀭𑀸𑀤𑀺𑀓𑀧𑁆𑀧𑀺𑀬𑀪𑀡𑁆𑀟𑁂 𑀆𑀳𑀝𑁂 ‘‘𑀅𑀫𑁆𑀳𑀸𑀓𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀲𑁆𑀲 𑀏𑀯𑀭𑀽𑀧𑀁 𑀫𑀽𑀮𑀫𑁆𑀧𑀺 𑀅𑀢𑁆𑀣𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀏𑀯 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀅𑀳𑀁 𑀓𑀧𑁆𑀧𑀺𑀬𑀓𑀸𑀭𑀓𑁄, 𑀫𑀬𑁆𑀳𑀁 𑀤𑀲𑁆𑀲𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀭𑀼𑀘𑁆𑀘𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀇𑀤𑀁 𑀕𑀡𑁆𑀳𑀸’’𑀢𑀺 𑀅𑀯𑀢𑁆𑀯𑀸 ‘‘𑀏𑀢𑁆𑀣 𑀞𑀧𑀺𑀢’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀲 𑀅𑀕𑁆𑀖𑀧𑁆𑀧𑀫𑀸𑀡𑀁 ¶ 𑀕𑀳𑁂𑀢𑁆𑀯𑀸 𑀤𑁂𑀦𑁆𑀢𑁂 𑀅𑀥𑀺𑀯𑀸𑀲𑁂𑀢𑀩𑁆𑀩𑀁. 𑀅𑀢𑀺𑀭𑁂𑀓𑀁 𑀕𑀡𑁆𑀳𑀦𑁆𑀢𑁂 ‘‘𑀫𑀬𑀁 𑀢𑀼𑀫𑁆𑀳𑀸𑀓𑀁 𑀪𑀡𑁆𑀟𑀁 𑀦 𑀕𑀡𑁆𑀳𑀸𑀫, 𑀕𑀘𑁆𑀙𑀣𑀸’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂 𑀮𑀤𑁆𑀥𑁂 ‘‘𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑁂𑀦 𑀅𑀢𑁆𑀣𑁄, 𑀇𑀤𑀁 𑀦𑀸𑀫 𑀫𑀽𑀮𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀓𑀺𑀡𑀺𑀢𑁆𑀯𑀸 𑀤𑀺𑀦𑁆𑀦𑁂 𑀅𑀥𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁭𑁧𑁦. 𑀞𑀧𑁂𑀢𑁆𑀯𑀸 𑀭𑀽𑀧𑀺𑀬𑀕𑁆𑀕𑀸𑀳𑀦𑁆𑀢𑀺 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀫𑀸𑀦𑀲𑀭𑀽𑀧𑀁 𑀲𑀼𑀯𑀡𑁆𑀡𑀸𑀤𑀺𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀁 𑀧𑀼𑀕𑁆𑀕𑀮𑀁 𑀞𑀧𑁂𑀢𑁆𑀯𑀸. 𑀦𑀺𑀲𑁆𑀲𑀝𑁆𑀞𑀧𑀭𑀺𑀯𑀢𑁆𑀢𑀺𑀢𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀸𑀬 ‘‘𑀲𑀘𑁂 𑀢𑀢𑁆𑀣 𑀆𑀕𑀘𑁆𑀙𑀢𑀺 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁮𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀢𑀢𑁆𑀣𑀸𑀕𑀢𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 ‘‘𑀆𑀯𑀼𑀲𑁄 𑀇𑀫𑀁 𑀚𑀸𑀦𑀸’’𑀢𑀺 𑀯𑀢𑁆𑀯𑀸 ‘‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀺𑀬𑁆𑀬𑀢𑀽’’𑀢𑀺 𑀢𑁂𑀦 𑀯𑀼𑀢𑁆𑀢𑁂 ‘‘𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀫𑀥𑀼 𑀯𑀸 𑀨𑀸𑀡𑀺𑀢𑀁 𑀯𑀸’’𑀢𑀺 (𑀧𑀸𑀭𑀸. 𑁫𑁮𑁪) 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀫𑀢𑁆𑀢𑁂 𑀆𑀘𑀺𑀓𑁆𑀔𑀺𑀢𑁂 𑀢𑁂𑀦 𑀦𑀺𑀲𑁆𑀲𑀝𑁆𑀞𑀯𑀢𑁆𑀣𑀼𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀳𑀝𑀁 𑀓𑀧𑁆𑀧𑀺𑀬𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄.

𑁭𑁧𑁧. 𑀅𑀢𑁆𑀢𑀦𑁄 ¶ 𑀧𑀢𑁆𑀢𑀪𑀸𑀕𑀫𑁆𑀧𑀻𑀢𑀺 𑀢𑀣𑀸 𑀆𑀳𑀝𑁂 𑀓𑀧𑁆𑀧𑀺𑀬𑀪𑀡𑁆𑀟𑁂 𑀲𑀗𑁆𑀖𑀲𑁆𑀲 𑀪𑀸𑀚𑀺𑀬𑀫𑀸𑀦𑁂 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀓𑁄𑀝𑁆𑀞𑀸𑀲𑀫𑁆𑀧𑀺. 𑀧𑀝𑀺𑀕𑁆𑀕𑀸𑀳𑀓𑀪𑀺𑀓𑁆𑀔𑀼𑀦𑁄𑀢𑀺 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁄𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑀲𑁆𑀫𑀸 𑀧𑀩𑁆𑀩𑀚𑀺𑀢𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀢𑀭𑀢𑁄. 𑀮𑀤𑁆𑀥𑀦𑁆𑀢𑀺 𑀢𑁂𑀳𑀺 𑀅𑀢𑁆𑀢𑀦𑀸 𑀮𑀤𑁆𑀥𑀓𑁄𑀝𑁆𑀞𑀸𑀲𑀢𑁄 𑀤𑀺𑀦𑁆𑀦𑀯𑀲𑁂𑀦𑀧𑀺 𑀮𑀤𑁆𑀥𑀁 𑀢𑀁 𑀯𑀢𑁆𑀣𑀼𑀁.

𑁭𑁧𑁨. 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀦𑁆𑀢𑀺 𑀢𑀁 𑀯𑀢𑁆𑀣𑀼𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑀺𑀢𑁂𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀜𑁆𑀜𑀢𑀭𑀫𑁆𑀧𑀺 𑀧𑀘𑁆𑀘𑀬𑀁. 𑀅𑀦𑁆𑀢𑀫𑀲𑁄 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 ¶ 𑀉𑀧𑁆𑀧𑀸𑀤𑀺𑀢𑁄𑀤𑀓𑀫𑁆𑀧𑀺 𑀤𑀸𑀭𑀽𑀳𑀺 𑀆𑀤𑀺𑀢𑁆𑀢𑀅𑀕𑁆𑀕𑀺𑀫𑁆𑀧𑀺 𑀢𑁂𑀮𑁂𑀦 𑀚𑀮𑀺𑀢𑀧𑀤𑀻𑀧𑀫𑁆𑀧𑀺 𑀭𑀼𑀓𑁆𑀔𑁂 𑀯𑀸 𑀕𑁂𑀳𑁂 𑀯𑀸 𑀧𑀓𑀢𑀺𑀙𑀸𑀬𑀫𑁆𑀧𑀺 𑀢𑀸𑀮𑀧𑀡𑁆𑀡𑀫𑁆𑀧𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀁 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑀁 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑀫𑀲𑁄 𑀫𑀓𑁆𑀓𑀝𑀸𑀤𑀻𑀳𑀺 𑀢𑀢𑁄 𑀳𑀭𑀺𑀢𑁆𑀯𑀸 𑀅𑀭𑀜𑁆𑀜𑁂 𑀞𑀧𑀺𑀢𑀁 𑀯𑀸 𑀢𑁂𑀲𑀁 𑀳𑀢𑁆𑀣𑀢𑁄 𑀕𑀴𑀺𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀧𑀁𑀲𑀼𑀓𑀽𑀮𑀫𑁆𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪), ‘‘𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁫) 𑀘𑀸𑀢𑀺. 𑀪𑀺𑀓𑁆𑀔𑀼𑀦𑁄𑀢𑀺 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.

𑁭𑁧𑁩. 𑀅𑀚𑁆𑀛𑀸𑀭𑀸𑀫𑁂 𑀯𑀸𑀢𑀺 𑀉𑀧𑀭𑀺 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀚𑁆𑀛𑀸𑀭𑀸𑀫𑁂 𑀯𑀸. 𑀢𑀁 𑀭𑀽𑀧𑀺𑀬𑀁, ‘‘𑀧𑀢𑀺𑀢𑀁 𑀤𑀺𑀲𑁆𑀯𑀸’’𑀢𑀺 𑀲𑁂𑀲𑁄. 𑀅𑀚𑁆𑀛𑀸𑀯𑀲𑀣𑁂𑀧𑀺 𑀯𑀸𑀢𑀺 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁂 𑀅𑀦𑁆𑀢𑁄𑀆𑀯𑀸𑀲𑁂 𑀘. 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲𑀸𑀢𑀺 ‘‘𑀬𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀲𑁄 𑀳𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀞𑀸𑀦𑁂 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀕𑀡𑀦𑀜𑁆𑀘 𑀉𑀧𑀮𑀓𑁆𑀔𑀡𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲.

𑁭𑁧𑁪. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀅𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁮𑁬) 𑀪𑀕𑀯𑀢𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 ‘‘𑀤𑁆𑀯𑀺𑀓𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺.

𑁭𑁧𑁫. 𑀓𑁆𑀭𑀺𑀬𑀸𑀓𑁆𑀭𑀺𑀬𑀦𑁆𑀢𑀺 𑀕𑀳𑀡𑁂𑀦 𑀆𑀧𑀚𑁆𑀚𑀦𑀢𑁄 𑀓𑀺𑀭𑀺𑀬𑀁. 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄 𑀅𑀓𑀺𑀭𑀺𑀬𑀦𑁆𑀢𑀺.

𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀓𑀣𑀸𑀯𑀡𑁆𑀡𑀦𑀸.

𑁭𑁧𑁬-𑁭. 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸𑀧𑀺 ¶ 𑀯𑀢𑁆𑀣𑀼𑀦𑁆𑀢𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀯𑀢𑁆𑀣𑀽’’𑀢𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀭𑀚𑀢𑀸𑀤𑀻𑀲𑀼 𑀘𑀢𑀽𑀲𑀼 𑀅𑀜𑁆𑀜𑀢𑀭𑀁 ¶ 𑀯𑀢𑁆𑀣𑀼𑀁. 𑀤𑀼𑀓𑁆𑀓𑀝𑀲𑁆𑀲 𑀘 𑀯𑀢𑁆𑀣𑀼𑀁 𑀯𑀸𑀢𑀺 𑀧𑀞𑀫𑀁 𑀤𑀲𑁆𑀲𑀺𑀢𑀫𑀼𑀢𑁆𑀢𑀸𑀤𑀺𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼 𑀅𑀜𑁆𑀜𑀢𑀭𑀁 𑀯𑀸, 𑀇𑀳𑁄𑀪𑀬𑀢𑁆𑀣 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀓𑀧𑁆𑀧𑀺𑀬𑀲𑁆𑀲 𑀘 𑀯𑀢𑁆𑀣𑀼𑀁 𑀯𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑁂𑀲𑀼 𑀏𑀯 𑀫𑀼𑀕𑁆𑀕𑀫𑀸𑀲𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀽𑀲𑀼 𑀅𑀜𑁆𑀜𑀢𑀭𑀁 𑀯𑀸, 𑀇𑀳 𑀅𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀅𑀯𑀬𑀯𑀸𑀯𑀬𑀯𑀻𑀦𑀁 𑀅𑀪𑁂𑀤𑁂𑀧𑀺 𑀪𑁂𑀤𑀽𑀧𑀘𑀸𑀭𑀯𑀲𑁂𑀦 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀓𑀧𑁆𑀧𑀺𑀬𑁂𑀦 𑀯𑀢𑁆𑀣𑀼𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀇𑀤𑀸𑀦𑁂𑀢𑁆𑀣 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄, 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑁄 𑀘 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀬𑁄 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀤𑀼𑀓𑁆𑀓𑀝𑀲𑁆𑀲 𑀯𑀢𑁆𑀣𑀼𑀦𑀸, 𑀓𑀧𑁆𑀧𑀺𑀬𑁂𑀦 𑀘 𑀯𑀢𑁆𑀣𑀼𑀦𑀸 𑀯𑀢𑁆𑀣𑀼𑀁 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀧𑀭𑀺𑀯𑀢𑁆𑀢𑁂𑀢𑀺, 𑀆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀥 𑀉𑀪𑀬𑀢𑁆𑀣𑀸𑀧𑀺 𑀧𑀭𑀺𑀯𑀢𑁆𑀢𑀺𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀢𑁆𑀢𑀸 𑀆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 ‘‘𑀆𑀧𑀢𑁆𑀢𑀻’’𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺.

𑁭𑁧𑁮. 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀲𑁆𑀲 𑀘 𑀯𑀢𑁆𑀣𑀼𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. ‘‘𑀯𑀢𑁆𑀣𑀼𑀁 𑀯𑀸 𑀓𑀧𑁆𑀧𑀺𑀬𑀲𑁆𑀲𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯, 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀲𑁆𑀲 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑁄𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁭𑁧𑁯. ‘‘𑀯𑀢𑁆𑀣𑀼𑀦𑀸 𑀓𑀧𑁆𑀧𑀺𑀬𑀲𑁆𑀲𑀸’’𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸𑀧𑀺 𑀧𑀭𑀺𑀯𑀢𑁆𑀢𑀺𑀢𑁂 𑀤𑀼𑀓𑁆𑀓𑀝𑀯𑀢𑁆𑀣𑀼𑀯𑀲𑁂𑀦 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀣𑀸’’𑀢𑀺.

𑁭𑁨𑁦. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀯𑀢𑁆𑀣𑀼𑀦𑁄’’𑀢𑀺 𑀇𑀤𑀁 𑀆𑀓𑀟𑁆𑀠𑀢𑀺. ‘‘𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀫𑀸𑀳. 𑀧𑀼𑀩𑁆𑀩𑀦𑁆𑀢𑀺 𑀧𑀞𑀫𑀁, 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑁂𑀦. 𑀧𑀭𑀺𑀯𑀢𑁆𑀢𑀦𑀁 𑀯𑀸𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁨𑁧. 𑀭𑀽𑀧𑀺𑀬𑀦𑁆𑀢𑀺 𑀘 𑀲𑀜𑁆𑀜𑀺𑀲𑁆𑀲𑀸𑀢𑀺 ‘‘𑀭𑀽𑀧𑀺𑀬𑀁 𑀦𑀸𑀫 𑀲𑀢𑁆𑀣𑀼𑀯𑀡𑁆𑀡𑁄 𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄, 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 (𑀧𑀸𑀭𑀸. 𑁫𑁮𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀲𑀼 𑀭𑀽𑀧𑀺𑀬𑀲𑀜𑁆𑀜𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 ‘‘𑀅𑀜𑁆𑀜𑀢𑀭’’𑀦𑁆𑀢𑀺 𑀲𑀜𑁆𑀜𑀺𑀲𑁆𑀲. 𑀅𑀭𑀽𑀧𑀺𑀬𑁂𑀢𑀺 𑀔𑀭𑀧𑀢𑁆𑀢𑀸𑀤𑀺𑀫𑁆𑀳𑀺. 𑀢𑁂𑀦 𑀅𑀭𑀽𑀧𑀺𑀬𑁂𑀦. ‘‘𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀅𑀭𑀽𑀧𑀺𑀬’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀺 ¶ , 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁯𑁧) 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀺𑀬𑀧𑀭𑀺𑀯𑀢𑁆𑀢𑀦𑁂 𑀤𑀼𑀓𑁆𑀓𑀝𑀲𑁆𑀲 𑀅𑀪𑀸𑀯𑀢𑁄, 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀘 𑀲𑀫𑁆𑀪𑀯𑀢𑁄 𑀭𑀽𑀧𑀺𑀬𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀁 𑀇𑀢𑀺 𑀲𑀜𑁆𑀜𑀺𑀲𑁆𑀲 𑀘 𑀯𑀺𑀫𑀢𑀺𑀲𑁆𑀲 𑀘 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀢𑁂𑀦 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁭𑁨𑁨. 𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀦𑁆𑀢𑀺 𑀲𑀜𑁆𑀜𑀺𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀭𑀽𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀧𑀜𑁆𑀘𑀳𑀻𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁, ‘‘𑀲𑀳𑀥𑀫𑁆𑀫𑀺𑀓𑁂𑀳𑀻’’𑀢𑀺 𑀲𑁂𑀲𑁄, 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀤𑀢𑁄𑀢𑀺 𑀯𑁄𑀳𑀭𑀢𑁄, 𑀓𑀬𑀯𑀺𑀓𑁆𑀓𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀲𑀺𑀓𑁆𑀔𑀫𑀸𑀦𑀸𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀅𑀭𑀽𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑁭𑁨𑁩. 𑀲𑀁𑀯𑁄𑀳𑀸𑀭𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸.

𑁭𑁨𑁪. 𑀓𑀧𑁆𑀧𑀺𑀬𑀁 𑀦𑀸𑀫 ‘‘𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀅𑀦𑁆𑀢𑀫𑀲𑁄 𑀘𑀼𑀡𑁆𑀡𑀧𑀺𑀡𑁆𑀟𑁄𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀻’’𑀢𑀺 ¶ 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀦𑀺 𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀘𑀻𑀯𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀁 𑀯𑀲𑁂𑀦 𑀅𑀦𑁂𑀓𑀯𑀺𑀥’’𑀦𑁆𑀢𑀺. 𑀓𑀧𑁆𑀧𑀺𑀬𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀓𑀧𑁆𑀧𑀺𑀬𑁂𑀦 𑀯𑀢𑁆𑀣𑀼𑀦𑀸. ‘‘𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 ‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀺, 𑀇𑀫𑀺𑀦𑀸 𑀇𑀫𑀁 𑀆𑀳𑀭, 𑀇𑀫𑀺𑀦𑀸 𑀇𑀫𑀁 𑀧𑀭𑀺𑀯𑀢𑁆𑀢𑁂𑀳𑀺, 𑀇𑀫𑀺𑀦𑀸 𑀇𑀫𑀁 𑀘𑁂𑀢𑀸𑀧𑁂𑀳𑀻’𑀢𑀺 𑀅𑀚𑁆𑀛𑀸𑀘𑀭𑀢𑀻’’𑀢𑀺 (𑀧𑀸𑀭𑀸. 𑁫𑁯𑁫) 𑀯𑀘𑀦𑀢𑁄 ‘‘𑀧𑀭𑀺𑀯𑀢𑁆𑀢𑀬𑀢𑁄’’𑀢𑀺 𑀇𑀫𑀲𑁆𑀲 ‘‘𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑀢𑁄’’𑀢𑀺 𑀧𑀭𑀺𑀬𑀸𑀬𑁄.

𑀢𑀢𑁆𑀣 𑀅𑀜𑁆𑀜𑀲𑁆𑀲 𑀳𑀢𑁆𑀣𑀢𑁄 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑀡𑀁 𑀓𑀬𑁄 𑀦𑀸𑀫. 𑀅𑀢𑁆𑀢𑀦𑁄 𑀳𑀢𑁆𑀣𑀢𑁄 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀸𑀦𑀁 𑀯𑀺𑀓𑁆𑀓𑀬𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀧𑀭𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀦𑁆𑀢𑁄 𑀓𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀁 𑀤𑁂𑀦𑁆𑀢𑁄 𑀯𑀺𑀓𑁆𑀓𑀬’’𑀦𑁆𑀢𑀺. ‘‘𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀯𑀢𑁆𑀢𑀬𑀢𑁄𑀢𑀺 𑀏𑀢𑁆𑀣 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀮𑀩𑁆𑀪𑀢𑀺. 𑀏𑀢𑁆𑀣 𑀅𑀜𑁆𑀜𑁂 𑀦𑀸𑀫 𑀕𑀺𑀳𑀺𑀦𑁄 𑀇𑀢𑁆𑀣𑀺𑀧𑀼𑀭𑀺𑀲𑀸, 𑀲𑀸𑀲𑀦𑀢𑁄 𑀩𑀸𑀳𑀺𑀭𑀸 𑀧𑀩𑁆𑀩𑀚𑀺𑀢𑀸 𑀘. 𑀢𑀲𑁆𑀫𑀸 𑀅𑀬𑀁 𑀓𑀬𑀯𑀺𑀓𑁆𑀓𑀬𑁄 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀦 𑀓𑀸𑀢𑀩𑁆𑀩𑁄𑀬𑁂𑀯. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀜𑁆𑀳𑀺 𑀓𑀬𑀯𑀺𑀓𑁆𑀓𑀬𑁄 ¶ 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑁂𑀳𑀺 𑀕𑀺𑀳𑀺𑀧𑀩𑁆𑀩𑀚𑀺𑀢𑁂𑀳𑀺 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀤𑁆𑀥𑀺𑀁 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁯𑁫).

𑁭𑁨𑁫. 𑀅𑀓𑀧𑁆𑀧𑀺𑀬𑀲𑁆𑀲 𑀯𑀢𑁆𑀣𑀼𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀘𑀻𑀯𑀭𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀼𑀢𑁄 𑀅𑀜𑁆𑀜𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀯𑀢𑁆𑀣𑀼𑀲𑁆𑀲. 𑀢𑁂𑀦𑁂𑀯𑀸𑀢𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸𑀬𑁂𑀯. ‘‘𑀓𑀧𑁆𑀧𑀺𑀬𑀲𑁆𑀲 𑀘𑀸’’𑀢𑀺 𑀧𑀸𑀞𑀲𑁂𑀲𑁄, 𑀢𑁂𑀦𑁂𑀯 𑀅𑀓𑀧𑁆𑀧𑀺𑀬𑁂𑀦 𑀯𑀢𑁆𑀣𑀼𑀦𑀸 𑀓𑀧𑁆𑀧𑀺𑀬𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀭𑀺𑀯𑀢𑁆𑀢𑀦𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀏𑀯𑀜𑁆𑀳𑀺 𑀧𑀸𑀞𑀲𑁂𑀲𑁂 𑀅𑀓𑀢𑁂 𑀅𑀓𑀧𑁆𑀧𑀺𑀬𑁂𑀦 𑀯𑀢𑁆𑀣𑀼𑀦𑀸 𑀓𑀧𑁆𑀧𑀺𑀬𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀓𑀬𑀯𑀺𑀓𑁆𑀓𑀬𑁂 𑀲𑀗𑁆𑀕𑀳𑁂𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀦 𑀬𑀼𑀚𑁆𑀚𑀢𑀺 𑀢𑀲𑁆𑀲 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂𑀬𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀇𑀥 𑀘 ‘‘𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑁆𑀲𑁂𑀯 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 ¶ 𑀧𑀭𑀺𑀯𑀢𑁆𑀢𑀦𑀁 𑀓𑀬𑀯𑀺𑀓𑁆𑀓𑀬𑁄’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸. 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 ‘‘𑀅𑀓𑀧𑁆𑀧𑀺𑀬𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑀜𑁆𑀳𑀺 𑀓𑀬𑀯𑀺𑀓𑁆𑀓𑀬𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁯𑁪) 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄.

𑁭𑁨𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑀢𑁆𑀭 𑀲𑀳𑀥𑀫𑁆𑀫𑀺𑀓𑁂𑀳𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑁆𑀲𑀸𑀧𑀺 𑀓𑀬𑀯𑀺𑀓𑁆𑀓𑀬𑁄 𑀦 𑀯𑀝𑁆𑀝𑀢𑀺, 𑀅𑀓𑀧𑁆𑀧𑀺𑀬𑀲𑁆𑀲, 𑀓𑀧𑁆𑀧𑀺𑀬𑀲𑁆𑀲 𑀘 𑀯𑀢𑁆𑀣𑀼𑀦𑁄 𑀅𑀓𑀧𑁆𑀧𑀺𑀬𑁂𑀦𑁂𑀯 𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑀦𑀜𑁆𑀘 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀬𑀯𑀺𑀓𑁆𑀓𑀬𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸.

𑁭𑁨𑁯. 𑀇𑀤𑀁 𑀦𑀸𑀫𑀸𑀢𑀺 𑀑𑀤𑀦𑀸𑀤𑀺𑀓𑀧𑁆𑀧𑀺𑀬𑀯𑀢𑁆𑀣𑀼𑀫𑁂𑀯 𑀆𑀳.

𑁭𑁩𑁦-𑁧. ‘‘𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀕𑀸𑀣𑀸𑀬 𑀯𑀢𑁆𑀣𑀼𑀮𑀓𑁆𑀔𑀡𑀲𑁆𑀲 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑁆𑀯𑀸𑀯 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀖𑀸𑀲𑀸𑀤’’𑀦𑁆𑀢𑀺𑀆𑀤𑀺. 𑀙𑀮𑁆𑀮𑀺𑀦𑁆𑀢𑀺 𑀭𑀼𑀓𑁆𑀔𑀢𑀘𑀁. 𑀯𑀮𑁆𑀮𑀺𑀦𑁆𑀢𑀺 𑀮𑀢𑀁. 𑀓𑀝𑁆𑀞𑀦𑁆𑀢𑀺 𑀇𑀦𑁆𑀥𑀦𑀤𑀸𑀭𑀼𑀁. 𑀤𑀸𑀭𑀼𑀦𑁆𑀢𑀺 𑀕𑁂𑀳𑀲𑀫𑁆𑀪𑀸𑀭𑀸𑀤𑀺𑀤𑀸𑀭𑀼𑀁. 𑀯𑀺𑀧𑀮𑁆𑀮𑀸𑀲𑁂𑀦𑀸𑀧𑀺 𑀯𑀢𑁆𑀢𑀩𑁆𑀩𑀁 ‘‘𑀯𑀮𑁆𑀮𑀺𑀁 𑀯𑀸 𑀧𑀦 𑀙𑀮𑁆𑀮𑀺𑀁 𑀯𑀸, 𑀤𑀸𑀭𑀼𑀁 𑀯𑀸 𑀓𑀝𑁆𑀞𑀫𑁂𑀯 𑀯𑀸’’𑀢𑀺. 𑀯𑀢𑁆𑀣𑀽𑀦𑀦𑁆𑀢𑀺 𑀢𑀣𑀸 𑀯𑀢𑁆𑀯𑀸 𑀆𑀳𑀭𑀸𑀧𑀺𑀢𑀸𑀦𑀁 𑀙𑀮𑁆𑀮𑀺𑀆𑀤𑀺𑀯𑀢𑁆𑀣𑀽𑀦𑀁. 𑀓𑀬𑀯𑀺𑀓𑁆𑀓𑀬𑁂 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸, 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁩𑁨. ‘‘𑀇𑀢𑀺 𑀏𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄, ‘‘𑀧𑀺𑀯𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀩𑁆𑀩𑀓𑀸𑀮𑁂 𑀯𑀺𑀳𑀺𑀢𑀧𑀘𑁆𑀘𑀬𑀦𑁆𑀢𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀢𑁆𑀣𑁄.

𑁭𑁩𑁩. 𑀪𑀽𑀫𑀺𑀬𑀸 𑀮𑀺𑀫𑁆𑀧𑀦𑁂𑀢𑀺 𑀬𑁄𑀚𑀦𑀸𑀬𑀁 𑀧𑀦 𑀲𑁂𑀦𑀸𑀲𑀦𑀪𑀽𑀫𑀺𑀬𑀁 𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀴𑀓𑀸𑀤𑀺𑀯𑀡𑁆𑀡𑀓𑀭𑀡𑀯𑀲𑁂𑀦 ¶ 𑀮𑁂𑀧𑀦𑁂. 𑀯𑀢𑁆𑀣𑀼𑀥𑁄𑀯𑀦𑁂𑀢𑀺 𑀘𑀻𑀯𑀭𑀸𑀤𑀺𑀯𑀢𑁆𑀣𑀽𑀦𑀁 𑀥𑁄𑀯𑀦𑁂. 𑀏𑀢𑁆𑀣𑀸𑀢𑀺 𑀢𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼. 𑀏𑀢𑁂𑀲𑀁 𑀕𑀳𑀡𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀢𑀸 𑀏𑀯𑀭𑀽𑀧𑁂𑀲𑀼 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼.

𑁭𑁩𑁪. 𑀅𑀬𑀦𑁆𑀢𑀺 ¶ 𑀪𑀽𑀫𑀺𑀲𑁄𑀥𑀦𑀸𑀤𑀺𑀯𑀲𑁂𑀦 𑀆𑀧𑀦𑁆𑀦𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺.

𑁭𑁩𑁫. 𑀞𑀧𑁂𑀢𑁆𑀯𑀸 𑀪𑀡𑁆𑀟𑀲𑀸𑀫𑀺𑀓𑀦𑁆𑀢𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀅𑀜𑁆𑀜𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀲𑁆𑀲𑀸𑀢𑀺 𑀮𑀩𑁆𑀪𑀢𑀺.

𑁭𑁩𑁬. 𑀪𑀸𑀲𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑀬𑀯𑀺𑀓𑁆𑀓𑀬𑀓𑀣𑀸𑀯𑀡𑁆𑀡𑀦𑀸.

𑀓𑁄𑀲𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁭𑁩𑁭. 𑀓𑀧𑁆𑀧𑀺𑀬𑀸 𑀧𑀢𑁆𑀢𑀸 𑀫𑀢𑁆𑀢𑀺𑀓𑀸𑀬𑁄𑀫𑀬𑀸 𑀚𑀸𑀢𑀺𑀢𑁄 𑀤𑀼𑀯𑁂𑀢𑀺 𑀬𑁄𑀚𑀦𑀸. 𑀯𑀡𑁆𑀡𑀸𑀢𑀺 𑀧𑀫𑀸𑀡𑀸𑀦𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸𑀢𑀺 𑀢𑀻𑀡𑀺 𑀧𑀢𑁆𑀢𑀲𑁆𑀲 𑀧𑀫𑀸𑀡𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨). 𑀢𑁂𑀦𑀸𑀳 ‘‘𑀉𑀓𑁆𑀓𑀝𑁆𑀞𑁄 𑀫𑀚𑁆𑀛𑀺𑀫𑁄𑀫𑀓𑁄’’𑀢𑀺.

𑁭𑁩𑁮. 𑀤𑁆𑀯𑀺𑀦𑁆𑀦𑀁 𑀢𑀡𑁆𑀟𑀼𑀮𑀦𑀸𑀴𑀻𑀦𑀦𑁆𑀢𑀺 𑀲𑀼𑀓𑁄𑀝𑁆𑀝𑀺𑀢𑀸𑀦𑀁 𑀅𑀔𑀡𑁆𑀟𑀸𑀦𑀁 𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀤𑁆𑀯𑁂 𑀦𑀸𑀴𑀺𑀬𑁄 𑀕𑀳𑁂𑀢𑀩𑁆𑀩𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀧𑀳𑀢𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀲𑀼𑀓𑁄𑀝𑁆𑀝𑀺𑀢𑀧𑀭𑀺𑀲𑀼𑀤𑁆𑀥𑀸𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨). 𑀪𑀢𑁆𑀢𑀦𑁆𑀢𑀺 𑀅𑀯𑀲𑁆𑀲𑀸𑀯𑀺𑀢𑀁 𑀅𑀦𑀼𑀢𑁆𑀢𑀡𑁆𑀟𑀼𑀮𑀁 𑀅𑀓𑀺𑀮𑀺𑀦𑁆𑀦𑀁 𑀅𑀧𑀺𑀡𑁆𑀟𑀺𑀢𑀁 𑀲𑀼𑀯𑀺𑀲𑀤𑀁 𑀓𑀼𑀦𑁆𑀤𑀫𑀓𑀼𑀮𑀭𑀸𑀲𑀺𑀲𑀤𑀺𑀲𑀁 𑀲𑀼𑀧𑀓𑁆𑀓𑁄𑀤𑀦𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀢𑁆𑀢𑀡𑁆𑀟𑀼𑀮𑀁 𑀅𑀓𑀺𑀮𑀺𑀦𑁆𑀦𑀁 𑀅𑀧𑀺𑀡𑁆𑀟𑀺𑀢𑀁 𑀲𑀼𑀯𑀺𑀲𑀤𑀁 𑀓𑀼𑀦𑁆𑀤𑀫𑀓𑀼𑀮𑀭𑀸𑀲𑀺𑀲𑀤𑀺𑀲𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨). 𑀫𑀕𑀥𑀦𑀸𑀴𑀺𑀬𑀸𑀢𑀺 𑀫𑀕𑀥𑀭𑀝𑁆𑀞𑁂 𑀦𑀸𑀴𑀺𑀬𑀸, 𑀲𑀸 𑀦𑀸𑀴𑀺 𑀢𑀺𑀮𑀸𑀦𑀁 𑀅𑀝𑁆𑀞𑀧𑀲𑀢𑀸𑀦𑀺 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀔𑀸𑀭𑀺𑀤𑀲𑀤𑁆𑀯𑀬𑀁 ¶ 𑀯𑀸𑀳𑁄, 𑀔𑀸𑀭𑀻 𑀤𑁄𑀡𑀝𑁆𑀞𑀓𑀤𑁆𑀯𑀬𑀁;

𑀤𑁆𑀯𑀺𑀅𑀝𑁆𑀞𑀦𑀸𑀴𑀺𑀬𑁄 𑀤𑁄𑀡𑁄, 𑀦𑀸𑀴𑁂𑀓𑀸 𑀧𑀲𑀢𑀝𑁆𑀞𑀓𑀁;

𑀮𑀓𑁆𑀔𑀁 𑀢𑀺𑀮𑀸𑀦𑀁 𑀧𑀲𑀢𑀁, 𑀏𑀢𑀁 𑀯𑀼𑀢𑁆𑀢𑀁 𑀧𑀫𑀸𑀡𑀢𑁄’’𑀢𑀺.

‘‘𑀫𑀕𑀥𑀦𑀸𑀴𑀺 ¶ 𑀦𑀸𑀫 𑀅𑀟𑁆𑀠𑀢𑁂𑀭𑀲𑀧𑀮𑀸 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨) 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀩𑁆𑀩𑀡𑁆𑀡𑀦𑀸𑀬 ‘‘𑀅𑀟𑁆𑀠𑀢𑁂𑀭𑀲𑀧𑀮𑀸𑀦𑀺 𑀫𑀸𑀲𑁂𑀳𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦𑀸𑀳𑀼 𑁋

‘‘𑀘𑀢𑀼𑀧𑁆𑀧𑀲𑀢𑀺𑀓𑀸 𑀫𑀼𑀝𑁆𑀞𑀺, 𑀧𑀮𑀜𑁆𑀘𑁂𑀢𑀁 𑀘𑀢𑀼𑀕𑁆𑀕𑀼𑀡𑀁;

𑀓𑀼𑀟𑀼𑀯𑀧𑁆𑀧𑀲𑀢𑀜𑁆𑀘𑁂𑀯, 𑀘𑀢𑁆𑀢𑀸𑀭𑀺 𑀘𑁂𑀯 𑀦𑀸𑀴𑀺 𑀢𑀼.

‘‘𑀲𑁄𑀬𑁂𑀯 𑀧𑀢𑁆𑀣𑁄 𑀘𑀢𑁆𑀢𑀸𑀭𑁄, 𑀧𑀢𑁆𑀣𑀸 𑀅𑀴𑁆𑀳𑀓𑀫𑀼𑀘𑁆𑀘𑀢𑁂;

𑀅𑀴𑁆𑀳𑀓𑀸𑀦𑀫𑁆𑀧𑀺 𑀘𑀢𑁆𑀢𑀸𑀭𑀺, ‘𑀤𑁄𑀡𑁄’𑀢𑀺 𑀧𑀭𑀺𑀓𑀺𑀢𑁆𑀢𑀺𑀢𑁄’’𑀢𑀺.

𑀆𑀘𑀭𑀺𑀬𑀸 𑀧𑀦 ‘‘𑀅𑀝𑁆𑀞𑀧𑀲𑀢𑀸 𑀫𑀸𑀕𑀥𑀦𑀸𑀴𑀻’’𑀢𑀺 𑀧𑀼𑀩𑁆𑀩𑀧𑀓𑁆𑀔𑀫𑁂𑀯 𑀭𑁄𑀘𑀬𑀦𑁆𑀢𑀺.

𑀔𑀸𑀤𑀦𑀜𑁆𑀘 𑀘𑀢𑀼𑀩𑁆𑀪𑀸𑀕𑀦𑁆𑀢𑀺 𑀢𑀲𑁆𑀫𑀺𑀁 𑀪𑀢𑁆𑀢𑁂 𑀘𑀢𑀼𑀥𑀸 𑀯𑀺𑀪𑀢𑁆𑀢𑁂 𑀏𑀓𑀪𑀸𑀕𑀫𑀢𑁆𑀢𑀁 𑀳𑀢𑁆𑀣𑀳𑀸𑀭𑀺𑀬𑀖𑀦𑀫𑀼𑀕𑁆𑀕𑀲𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀲 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀦𑀸𑀢𑀺𑀖𑀦𑁄 𑀦𑀸𑀢𑀺𑀢𑀦𑀼𑀓𑁄 𑀳𑀢𑁆𑀣𑀳𑀸𑀭𑀺𑀬𑁄 𑀲𑀩𑁆𑀩𑀲𑀫𑁆𑀪𑀸𑀭𑀲𑀗𑁆𑀔𑀢𑁄 𑀫𑀼𑀕𑁆𑀕𑀲𑀽𑀧𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨).

𑀩𑁆𑀬𑀜𑁆𑀚𑀦𑀜𑁆𑀘 𑀢𑀤𑀽𑀧𑀺𑀬𑀦𑁆𑀢𑀺 𑀬𑀸𑀯 𑀘𑀭𑀺𑀫𑀸𑀮𑁄𑀧𑀁, 𑀢𑀸𑀯 𑀲𑀩𑁆𑀩𑀸𑀮𑁄𑀧𑀸𑀦𑀼𑀭𑀽𑀧𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀘. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀮𑁄𑀧𑀲𑁆𑀲 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀁 𑀬𑀸𑀯𑀘𑀭𑀺𑀫𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀁 𑀧𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺. 𑀏𑀢𑁆𑀣 𑀘 𑀆𑀮𑁄𑀧𑀲𑁆𑀲 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 ‘‘𑀩𑁆𑀬𑀜𑁆𑀚𑀦𑀲𑁆𑀲 𑀫𑀢𑁆𑀢𑀸 𑀦𑀸𑀫 𑀑𑀤𑀦𑀘𑀢𑀼𑀢𑁆𑀣𑀪𑀸𑀕𑁄’’𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁭) 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀆𑀮𑁄𑀧𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀁 𑀩𑁆𑀬𑀜𑁆𑀚𑀦𑀁 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀥 𑀧𑀦 𑀲𑀽𑀧𑀲𑁆𑀲𑁂𑀯 𑀑𑀤𑀦𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀁 ¶ 𑀤𑀲𑁆𑀲𑁂𑀢𑁆𑀯𑀸 𑀏𑀢𑀲𑁆𑀲 𑀮𑀓𑁆𑀔𑀡𑁂 𑀤𑀲𑁆𑀲𑀺𑀢𑁂 𑀇𑀢𑀭𑀲𑁆𑀲𑀸𑀧𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 𑀩𑁆𑀬𑀜𑁆𑀚𑀦𑀲𑁆𑀲 𑀢𑀣𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀫𑀸𑀡𑀁 𑀦 𑀤𑀲𑁆𑀲𑀺𑀢𑀁. 𑀑𑀤𑀦𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺 𑀲𑀧𑁆𑀧𑀺𑀢𑁂𑀮𑀢𑀓𑁆𑀓𑀭𑀲𑀓𑀜𑁆𑀚𑀺𑀓𑀸𑀤𑀻𑀦𑀺 𑀕𑀡𑀦𑀽𑀧𑀕𑀸𑀦𑀺 𑀦 𑀳𑁄𑀦𑁆𑀢𑀺.

𑁭𑁩𑁯. 𑀢𑀁 𑀲𑀩𑁆𑀩𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀪𑀢𑁆𑀢𑀸𑀤𑀺𑀦𑀺𑀭𑀯𑀲𑁂𑀲𑀁. 𑀕𑀡𑁆𑀳𑀢𑀻𑀢𑀺 𑀯𑀓𑁆𑀔𑀫𑀸𑀦𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀕𑀡𑁆𑀳𑀸𑀢𑀺. 𑀢𑀲𑁆𑀲𑀸𑀢𑀺 𑀉𑀓𑁆𑀓𑀝𑁆𑀞𑀲𑁆𑀲 𑀧𑀢𑁆𑀢𑀲𑁆𑀲. 𑀉𑀧𑀟𑁆𑀠𑁄𑀢𑀺 𑀢𑀲𑁆𑀫𑀺𑀁 𑀧𑀢𑁆𑀢𑁂 𑀕𑀡𑁆𑀳𑀦𑀓𑀤𑀩𑁆𑀩𑀲𑀫𑁆𑀪𑀸𑀭𑀕𑀸𑀳𑀻 𑀧𑀢𑁆𑀢𑁄 𑀢𑀁𑀲𑀳𑀘𑀭𑀺𑀬𑁂𑀦 ¶ ‘‘𑀉𑀧𑀟𑁆𑀠𑁄’’𑀢𑀺 𑀯𑀼𑀢𑁆𑀢𑁄. 𑀢𑀤𑀼𑀧𑀟𑁆𑀠𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀢𑁆𑀢𑀲𑁆𑀲 𑀉𑀧𑀟𑁆𑀠𑁄 𑀢𑀤𑀼𑀧𑀟𑁆𑀠𑁄𑀢𑀺 𑀕𑀳𑁂𑀢𑀩𑁆𑀩𑀁.

𑁭𑁪𑁦. 𑀇𑀫𑁂𑀲𑀼 𑀢𑀻𑀲𑀼 𑀧𑀢𑁆𑀢𑁂𑀲𑀼 𑀉𑀓𑁆𑀓𑀝𑁆𑀞𑀲𑁆𑀲 𑀯𑀼𑀢𑁆𑀢𑀁 𑀑𑀤𑀦𑀸𑀤𑀺 𑀲𑀩𑁆𑀩𑀁 𑀬𑀲𑁆𑀫𑀺𑀁 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀫𑀢𑁆𑀣𑀓𑁂 𑀧𑀼𑀜𑁆𑀚𑀺𑀬𑀫𑀸𑀦𑀁 𑀳𑀻𑀭𑀓𑀁 𑀳𑁂𑀝𑁆𑀞𑀸𑀪𑀸𑀕𑁂 𑀨𑀼𑀲𑀢𑀺, 𑀲𑁄 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁄 𑀦𑀸𑀫, 𑀳𑀻𑀭𑀢𑁄 𑀅𑀢𑀺𑀭𑁂𑀓𑀁 𑀢𑀺𑀝𑁆𑀞𑀢𑀺, 𑀲𑁄 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫, 𑀅𑀦𑁆𑀢𑁄𑀧𑀢𑁆𑀢𑁂 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫, 𑀏𑀯𑀁 𑀫𑀚𑁆𑀛𑀺𑀫𑁄 𑀘 𑀑𑀫𑀓𑁄 𑀘 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑁄 𑀳𑁄𑀢𑀻𑀢𑀺 𑀲𑀩𑁆𑀩𑁂 𑀦𑀯 𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀓𑁆𑀓𑀝𑁆𑀞𑀲𑁆𑀲𑀸’’𑀢𑀺𑀆𑀤𑀺. 𑀢𑀲𑁆𑀲𑁂𑀯𑀸𑀢𑀺 𑀉𑀓𑁆𑀓𑀝𑁆𑀞𑀲𑁆𑀲𑁂𑀯. 𑀑𑀫𑀓𑁄 𑀘 𑀫𑀚𑁆𑀛𑀺𑀫𑁄 𑀘𑀸𑀢𑀺 𑀑𑀫𑀓𑀫𑀚𑁆𑀛𑀺𑀫𑀸. 𑀇𑀥 𑀫𑀚𑁆𑀛𑀺𑀫𑁄 𑀘 𑀑𑀫𑀓𑁄 𑀘 𑀉𑀓𑁆𑀓𑀝𑁆𑀞𑀲𑁆𑀲𑁂𑀯 𑀪𑁂𑀤𑁄. 𑀏𑀲 𑀦𑀬𑁄 𑀇𑀢𑀭𑀤𑁆𑀯𑀬𑁂𑀧𑀺. ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸 ‘‘𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀉𑀓𑁆𑀓𑀝𑁆𑀞𑁄𑀫𑀓𑁄 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁄’’𑀢𑀺 𑀬𑁄𑀚𑁂𑀢𑀩𑁆𑀩𑁄, 𑀏𑀯𑀁 𑀫𑀚𑁆𑀛𑀺𑀫𑁄𑀫𑀓𑀸𑀦𑀫𑁆𑀧𑀺 𑀬𑀣𑀸𑀓𑁆𑀓𑀫𑀬𑁄𑀚𑀦𑀁 𑀤𑀲𑁆𑀲𑁂𑀢𑀺 ‘‘𑀫𑀚𑁆𑀛𑀺𑀫𑁄 𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁄 𑀫𑀚𑁆𑀛𑀺𑀫𑁄𑀫𑀓𑁄, 𑀑𑀫𑀓𑀼𑀓𑁆𑀓𑀝𑁆𑀞𑁄 𑀑𑀫𑀓𑀫𑀚𑁆𑀛𑀺𑀫𑁄 𑀑𑀫𑀓𑁄𑀫𑀓𑁄 𑀘𑀸’’𑀢𑀺.

𑁭𑁪𑁧. 𑀢𑁂𑀲𑀽𑀢𑀺 ¶ 𑀦𑀯𑀲𑀼 𑀧𑀢𑁆𑀢𑁂𑀲𑀼. 𑀢𑀲𑁆𑀫𑀸𑀢𑀺 𑀅𑀧𑀢𑁆𑀢𑀪𑀸𑀯𑀢𑁄. 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀜𑁆𑀘 𑀑𑀫𑀓𑁄𑀫𑀓𑀜𑁆𑀘𑀸𑀢𑀺 𑀤𑁆𑀯𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀯𑀘𑀦𑀁 𑀓𑀢𑀁. 𑀏𑀢𑁂 𑀪𑀸𑀚𑀦𑀲𑀗𑁆𑀔𑁂𑀧𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀫𑀸 𑀏𑀢𑁂 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁨).

𑁭𑁪𑁨. 𑀧𑀢𑁆𑀢𑀮𑀓𑁆𑀔𑀡𑀲𑀁𑀬𑀼𑀢𑀦𑁆𑀢𑀺 𑀏𑀢𑁆𑀣 𑀧𑀢𑁆𑀢𑀮𑀓𑁆𑀔𑀡𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀧𑀫𑀸𑀡𑀬𑀼𑀢𑁆𑀢𑀢𑀸, ‘‘𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁮) 𑀯𑀼𑀢𑁆𑀢𑀸 𑀧𑀸𑀓𑀲𑀫𑁆𑀧𑀢𑁆𑀢𑀺, 𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀘𑁂, 𑀢𑀲𑁆𑀲 𑀤𑀸𑀢𑀩𑁆𑀩𑀫𑀽𑀮𑀲𑁆𑀲 𑀅𑀲𑁂𑀲𑁂𑀢𑁆𑀯𑀸 𑀤𑀺𑀦𑁆𑀦𑀪𑀸𑀯𑁄, 𑀙𑀺𑀤𑁆𑀤𑀸𑀪𑀸𑀯𑁄, 𑀙𑀺𑀦𑁆𑀦𑀭𑀸𑀚𑀻𑀦𑀁 𑀅𑀪𑀸𑀯𑁄𑀢𑀺 𑀧𑀜𑁆𑀘𑀯𑀺𑀥𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀧𑀫𑀸𑀡𑀬𑀼𑀢𑁆𑀢𑀢𑀸 𑀧𑀸𑀓-𑀲𑀫𑁆𑀧𑀢𑁆𑀢𑀺 𑀤𑀺𑀦𑁆𑀦𑀫𑀽𑀮𑀢𑀸;

𑀅𑀘𑁆𑀙𑀺𑀤𑁆𑀤𑀸𑀭𑀸𑀚𑀺𑀢𑀸 𑀘𑁂𑀢𑀺, 𑀧𑀢𑁆𑀢𑀮𑀓𑁆𑀔𑀡𑀧𑀜𑁆𑀘𑀓’’𑀦𑁆𑀢𑀺.

‘‘𑀅𑀥𑀺𑀝𑁆𑀞𑀸𑀬 𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸’’𑀢𑀺 𑀯𑀸-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀥𑀺𑀝𑁆𑀞𑀸𑀬𑀸𑀢𑀺 𑀧𑀞𑀫𑀁 𑀧𑀭𑀺𑀪𑀼𑀢𑁆𑀢𑁂 𑀧𑀢𑁆𑀢𑁂 𑀲𑀢𑀺 𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀧𑀢𑁆𑀢𑁄 𑀳𑀢𑁆𑀣𑀧𑀸𑀲𑁂 𑀘𑁂 𑀳𑁄𑀢𑀺, 𑀯𑀓𑁆𑀔𑀫𑀸𑀦𑀦𑀬𑁂𑀦 ‘‘𑀇𑀫𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 ¶ 𑀯𑀘𑀻𑀪𑁂𑀤𑀓𑀭𑀡𑀯𑀲𑁂𑀦 𑀯𑀸𑀘𑀸𑀬 𑀯𑀸 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀏𑀯𑀫𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀨𑀦𑁆𑀤𑀸𑀧𑁂𑀦𑁆𑀢𑁂𑀦 𑀓𑀸𑀬𑁂𑀦 𑀯𑀸 𑀤𑀽𑀭𑁂 𑀘𑁂 𑀳𑀢𑁆𑀣𑀧𑀸𑀲𑀸 𑀳𑁄𑀢𑀺, 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀦𑀬𑁂𑀦 𑀏𑀓𑀓𑁂𑀦 𑀯𑀸 𑀧𑀘𑁆𑀙𑀸 𑀲𑀢𑀺𑀲𑀫𑁆𑀫𑁄𑀲𑁂 𑀲𑀭𑀸𑀧𑁂𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀯𑀽𑀧𑀲𑀫𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀥𑀸𑀦𑁂 𑀯𑀸 𑀅𑀥𑀺𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀦𑁂 𑀅𑀬𑀫𑀸𑀦𑀺𑀲𑀁𑀲𑁄 𑁋 𑀲𑀘𑀲𑁆𑀲 ‘𑀅𑀥𑀺𑀝𑁆𑀞𑀺𑀢𑁄 𑀦𑀼 𑀔𑁄 𑀫𑁂, 𑀦𑁄’𑀢𑀺 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑁄 𑀲𑀸𑀭𑁂𑀢𑁆𑀯𑀸 𑀯𑀺𑀫𑀢𑀺𑀁 𑀙𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 ¶ (𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁮) 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. ‘‘𑀤𑁆𑀯𑁂 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀯𑀺𑀓𑀧𑁆𑀧𑁂𑀢𑁆𑀯𑀸𑀢𑀺 (𑀧𑀸𑀘𑀺. 𑁩𑁭𑁩; 𑀧𑀸𑀭𑀸. 𑀅𑀝𑁆𑀞. 𑁨.𑁬𑁦𑁮; 𑀓𑀗𑁆𑀓𑀸. 𑀅𑀝𑁆𑀞. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀢𑁆𑀣 𑀯𑀺𑀓𑀧𑁆𑀧𑁂𑀢𑀩𑁆𑀩𑀲𑁆𑀲 𑀧𑀢𑁆𑀢𑀲𑁆𑀲 𑀏𑀓𑀢𑁆𑀢𑀩𑀳𑀼𑀢𑁆𑀢𑀁, 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀢𑁆𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀓𑀁 𑀘𑁂 𑀲𑀦𑁆𑀦𑀺𑀳𑀺𑀢𑀁, ‘‘𑀇𑀫𑀁 𑀧𑀢𑁆𑀢𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 ‘‘𑀇𑀫𑀁 𑀧𑀢𑁆𑀢𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀏𑀓𑀁 𑀯𑀺𑀓𑀧𑁆𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 ‘‘𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑁂𑀳𑀺 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀢𑁂𑀦 𑀅𑀧𑀘𑁆𑀘𑀼𑀤𑁆𑀥𑀝𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀬𑀼𑀢𑁆𑀢𑀢𑁆𑀢𑀸 ‘‘𑀯𑀺𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀧𑀘𑁆𑀘𑀼𑀤𑁆𑀥𑀝𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄.

𑁭𑁪𑁩. 𑀥𑀸𑀭𑁂𑀬𑁆𑀬𑀸𑀢𑀺 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸, 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀘 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀢𑀁 𑀓𑀸𑀮𑀁 𑀧𑀢𑁆𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀢𑀺 𑀬𑁄𑀚𑀦𑀸. ‘‘𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀇𑀫𑀺𑀦𑀸𑀧𑀺 ‘‘𑀧𑀢𑁆𑀢’’𑀦𑁆𑀢𑀺 𑀇𑀤𑀁 𑀬𑀼𑀚𑁆𑀚𑀢𑀺. 𑀧𑀢𑁆𑀢-𑀲𑀤𑁆𑀤𑁄 𑀫𑀸𑀕𑀥𑀺𑀓𑀸𑀦𑀁 𑀤𑁆𑀯𑀺𑀮𑀺𑀗𑁆𑀕𑀓𑁄, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁄.

𑁭𑁪𑁪. 𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀦𑀦𑁆𑀢𑁄𑀕𑀥𑀢𑁆𑀢𑀸 𑀅𑀢𑀺𑀭𑁂𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀁 𑀧𑀢𑁆𑀢’’𑀦𑁆𑀢𑀺𑀆𑀤𑀺.

𑁭𑁪𑁫. 𑀲𑀫𑁆𑀫𑀼𑀔𑁂𑀢𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀤𑁂𑀲𑀢𑁄 𑀅𑀦𑁆𑀢𑁄 𑀞𑀺𑀢𑀁 𑀧𑀢𑁆𑀢𑀁. 𑀤𑀽𑀭𑀲𑁆𑀫𑀺𑀦𑁆𑀢𑀺 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀢𑁄 𑀧𑀭𑀪𑀸𑀕𑁂 ‘‘𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀤𑀽𑀭𑁂𑀧𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀓𑀧𑁆𑀧𑀦𑀓𑀸𑀮𑁂𑀧𑀺 𑀲𑀦𑁆𑀢𑀺𑀓𑀤𑀽𑀭𑀯𑀘𑀦𑀪𑁂𑀤𑀸 𑀏𑀯𑀫𑁂𑀯 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. ‘‘𑀯𑀺𑀓𑀧𑁆𑀧𑁂𑀢𑀼𑀁 ¶ 𑀧𑀦 𑀩𑀳𑀽𑀦𑀺𑀧𑀺 𑀮𑀩𑁆𑀪𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀅𑀬𑀁 𑀦𑀬𑁄𑀢𑀺 ‘‘𑀇𑀫𑀁 𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺𑀆𑀤𑀺𑀦𑀬𑁄.

𑁭𑁪𑁬. 𑀯𑀸𑀘𑀸𑀓𑀸𑀬𑀯𑀲𑁂𑀦 ¶ 𑀤𑀼𑀯𑀺𑀥𑁂 𑀅𑀥𑀺𑀝𑁆𑀞𑀸𑀦𑁂 𑀯𑀸𑀘𑀸𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀓𑀸𑀬𑀸𑀥𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀪𑁄𑀕’’𑀦𑁆𑀢𑀺𑀆𑀤𑀺. 𑀆𑀪𑁄𑀕𑀦𑁆𑀢𑀺 ‘‘𑀇𑀫𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀆𑀪𑁄𑀕𑀁. ‘‘𑀫𑀦𑀲𑀸’’𑀢𑀺 𑀇𑀫𑀺𑀦𑀸 𑀦 𑀯𑀘𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀯𑀺𑀓𑀸𑀭𑁄𑀯 𑀓𑀸𑀬𑀯𑀺𑀓𑀸𑀭𑀓𑀁, 𑀳𑀢𑁆𑀣𑁂𑀦 𑀨𑀦𑁆𑀤𑀸𑀧𑀦𑀸𑀤𑀺𑀓𑀸𑀬𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦𑁂𑀯 𑀓𑀸𑀬𑀸𑀥𑀺𑀝𑁆𑀞𑀸𑀦𑀁 𑀳𑀢𑁆𑀣𑁂𑀦 𑀅𑀧𑀢𑁆𑀢𑀩𑁆𑀩𑁂 𑀤𑀽𑀭𑁂 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁭𑁪𑁭-𑁮. ‘‘𑀚𑀳𑀢𑀺 𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀤𑀸𑀦𑀢𑁄𑀢𑀺 𑀅𑀜𑁆𑀜𑀲𑁆𑀲 𑀤𑀸𑀦𑁂𑀦. 𑀪𑁂𑀤𑀓𑀢𑁄𑀢𑀺 𑀪𑀺𑀚𑁆𑀚𑀦𑁂𑀦. 𑀦𑀸𑀲𑀢𑁄𑀢𑀺 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬. 𑀯𑀺𑀩𑁆𑀪𑀫𑀢𑁄𑀢𑀺 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦. 𑀉𑀤𑁆𑀥𑀸𑀭𑀢𑁄𑀢𑀺 𑀧𑀘𑁆𑀘𑀼𑀤𑁆𑀥𑀭𑀡𑁂𑀦. 𑀧𑀘𑁆𑀘𑀓𑁆𑀔𑀢𑁄𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦. 𑀧𑀭𑀺𑀯𑀢𑁆𑀢𑀦𑀢𑁄𑀢𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦. 𑀕𑀸𑀳𑀢𑁄𑀢𑀺 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀦, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦 𑀘.

𑀓𑀗𑁆𑀕𑀼𑀲𑀺𑀢𑁆𑀣𑀧𑁆𑀧𑀫𑀸𑀡𑁂𑀦𑀸𑀢𑀺 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀔𑀼𑀤𑁆𑀤𑀓𑀢𑀭𑀲𑁆𑀲 𑀓𑀗𑁆𑀕𑀼𑀦𑁄 𑀲𑀺𑀢𑁆𑀣𑀧𑁆𑀧𑀫𑀸𑀡𑁂𑀦. 𑀔𑁂𑀦𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀸 𑀤𑁆𑀯𑀗𑁆𑀕𑀼𑀮𑀢𑁄 𑀳𑁂𑀝𑁆𑀞𑀸 𑀆𑀓𑀸𑀲𑀧𑀭𑀺𑀬𑀸𑀬𑁂𑀦 𑀙𑀺𑀤𑁆𑀤𑁂𑀦. 𑀆𑀡𑀺𑀬𑀸 𑀯𑀸𑀢𑀺 𑀅𑀬𑁄𑀫𑀬𑀸𑀬 𑀆𑀡𑀺𑀬𑀸 𑀯𑀸.

𑁭𑁫𑁦-𑁧. 𑀫𑀡𑀺𑀧𑀢𑁆𑀢𑁄𑀢𑀺 𑀫𑀡𑀺𑀦𑀸 𑀓𑀢𑁄. 𑀯𑁂𑀴𑀼𑀭𑀺𑀬𑀼𑀩𑁆𑀪𑀯𑁄𑀢𑀺 𑀫𑀭𑀓𑀢𑀫𑀡𑀺𑀫𑀬𑁄. 𑀨𑀮𑀺𑀓𑀼𑀩𑁆𑀪𑀯𑁄𑀢𑀺 𑀨𑀮𑀺𑀓𑀧𑀸𑀲𑀸𑀡𑁂𑀦 𑀓𑀢𑁄. 𑀓𑀸𑀘𑀫𑀬𑁄𑀢𑀺 𑀓𑀸𑀘𑀫𑀢𑁆𑀢𑀺𑀓𑀸𑀫𑀬𑁄. 𑀓𑀁𑀲𑀫𑀬𑁄𑀢𑀺 𑀓𑀁𑀲𑀮𑁄𑀳𑁂𑀦 𑀓𑀢𑁄. 𑀢𑀺𑀧𑀼𑀫𑀬𑁄𑀢𑀺 𑀓𑀸𑀴𑀢𑀺𑀧𑀼𑀫𑀬𑁄. 𑀲𑀻𑀲𑀫𑀬𑁄𑀢𑀺 𑀲𑁂𑀢𑀢𑀺𑀧𑀼𑀫𑀬𑁄. 𑀯𑀺𑀧𑀮𑁆𑀮𑀸𑀲𑁂𑀦 𑀘 𑀯𑀤𑀦𑁆𑀢𑀺. 𑀲𑀚𑁆𑀛𑀼𑀫𑀬𑁄𑀢𑀺 𑀭𑀚𑀢𑀫𑀬𑁄.

𑁭𑁫𑁨. 𑀖𑀝𑀓𑀝𑀸𑀳𑁄𑀢𑀺 𑀖𑀝𑀓𑀧𑀸𑀮𑀁. 𑀲𑀻𑀲𑀓𑀝𑀸𑀳𑁄𑀢𑀺 𑀙𑀯𑀲𑀻𑀲𑀓𑀧𑀸𑀮𑀁. 𑀢𑀼𑀫𑁆𑀩𑀦𑁆𑀢𑀺 𑀅𑀮𑀸𑀩𑀼. 𑀅𑀲𑁆𑀲𑀸𑀢𑀺 𑀏𑀓𑀸𑀤𑀲𑀯𑀺𑀥𑀲𑁆𑀲 ¶ 𑀧𑀢𑁆𑀢𑀲𑁆𑀲. 𑀅𑀦𑀼𑀮𑁄𑀫𑀺𑀓𑀦𑁆𑀢𑀺 𑀅𑀓𑀧𑁆𑀧𑀺𑀬𑀯𑀲𑁂𑀦 𑀅𑀦𑀼𑀮𑁄𑀫𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀏𑀓𑀸𑀤𑀲𑀯𑀺𑀥𑁂. 𑀢𑀫𑁆𑀩𑀫𑀬𑀁 𑀮𑁄𑀳𑀫𑀬𑀁 𑀣𑀸𑀮𑀓𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸, 𑀧𑀢𑁆𑀢𑁄𑀬𑁂𑀯 𑀦 𑀯𑀝𑁆𑀝𑀢𑀺, 𑀢𑀫𑁆𑀩𑀮𑁄𑀳𑀫𑀬𑀸 𑀣𑀸𑀮𑀓𑀸 𑀧𑀦 𑀯𑀝𑁆𑀝𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁭𑁫𑁩. 𑀢𑀝𑁆𑀝𑀺𑀓𑀸𑀤𑀻𑀦𑀻𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀯𑀝𑁆𑀝𑀓𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀯𑀝𑁆𑀝𑀓𑀦𑁆𑀢𑀺 𑀘 𑀅𑀟𑁆𑀠𑀘𑀦𑁆𑀤𑀸𑀓𑀸𑀭𑁄 𑀮𑁄𑀳𑀸𑀤𑀺𑀫𑀬𑁄 𑀪𑀸𑀚𑀦𑀺𑀬𑀯𑀺𑀲𑁂𑀲𑁄. 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀕𑀺𑀳𑀻 𑀘 𑀲𑀗𑁆𑀖𑁄 𑀘 𑀕𑀺𑀳𑀺𑀲𑀗𑁆𑀖𑀸, 𑀢𑁂𑀲𑀁 𑀲𑀦𑁆𑀢𑀓𑀸 𑀕𑀺𑀳𑀺𑀲𑀗𑁆𑀖𑀺𑀓𑀸.

𑁭𑁫𑁪. 𑀬𑀁 𑀓𑀺𑀜𑁆𑀘𑀺 𑀧𑀢𑁆𑀢𑀦𑁆𑀢𑀺 𑀲𑀢𑁆𑀢𑀲𑀼 𑀧𑀢𑁆𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀢𑁆𑀢𑀁. 𑀯𑁄𑀤𑀓𑀁 𑀓𑀢𑁆𑀯𑀸𑀢𑀺 𑀯𑀺𑀕𑀢𑁄𑀤𑀓𑀁 𑀓𑀢𑁆𑀯𑀸. 𑀧𑀝𑀺𑀲𑀸𑀫𑁂𑀬𑁆𑀬𑀸𑀢𑀺 𑀦𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂 𑀦𑀺𑀓𑁆𑀔𑀺𑀧𑀦𑀯𑀲𑁂𑀦, 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀦𑀯𑀲𑁂𑀦 𑀯𑀸 𑀲𑀗𑁆𑀕𑁄𑀧𑁂𑀬𑁆𑀬.

𑁭𑁫𑁫. 𑀑𑀢𑀸𑀧𑁂𑀢𑀼𑀦𑁆𑀢𑀺 𑀆𑀢𑀧𑁂, 𑀅𑀕𑁆𑀕𑀺𑀫𑁆𑀳𑀺 𑀯𑀸 𑀢𑀸𑀧𑁂𑀢𑀼𑀁. 𑀉𑀡𑁆𑀳𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀉𑀡𑁆𑀳𑁂. 𑀦 𑀦𑀺𑀤𑀳𑁂𑀢𑀩𑁆𑀩𑁄𑀢𑀺 𑀦 𑀛𑀸𑀧𑁂𑀢𑀩𑁆𑀩𑁄. 𑀲𑀻𑀲𑀸𑀧𑀦𑀬𑀦𑀫𑁂𑀯 𑀦 𑀯𑀝𑁆𑀝𑀢𑀻𑀢𑀺 𑀦 𑀦𑀺𑀤𑀳𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄 𑀅𑀥𑀺𑀓𑀦𑀺𑀯𑀸𑀭𑀡𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀺.

𑁭𑁫𑁬. 𑀫𑀺𑀟𑁆𑀠𑀦𑁆𑀢𑁂𑀢𑀺 𑀫𑀺𑀟𑁆𑀠𑀺𑀬𑀸 𑀅𑀦𑁆𑀢𑁂. 𑀧𑀭𑀺𑀪𑀡𑁆𑀟𑀦𑁆𑀢𑁂𑀢𑀺 𑀧𑀫𑀼𑀔𑁂 𑀫𑀳𑀸𑀫𑀺𑀟𑁆𑀠𑀺𑀬𑀸 𑀅𑀦𑁆𑀢𑁂. ‘‘𑀯𑀺𑀢𑁆𑀣𑀺𑀡𑁆𑀡𑁂𑀢𑀺 𑀅𑀦𑁆𑀢𑀫𑀲𑁄 𑀤𑁆𑀯𑀺𑀧𑀢𑁆𑀢𑀫𑀢𑁆𑀢𑁄𑀓𑀸𑀲𑀯𑀺𑀢𑁆𑀣𑀸𑀭𑁂’’𑀢𑀺 𑀓𑁂𑀘𑀺. 𑀞𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸, 𑀯𑀮𑀬𑀸𑀤𑀺𑀆𑀥𑀸𑀭𑁂𑀦 𑀯𑀺𑀦𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. ‘‘𑀫𑀺𑀟𑁆𑀠𑀺𑀬𑀸 𑀧𑀫𑀼𑀔𑁂 𑀫𑀺𑀟𑁆𑀠𑀺𑀬𑀸 𑀘 𑀔𑀭𑀪𑀽𑀫𑀺𑀧𑀤𑁂𑀲𑀸𑀤𑀻𑀲𑀼 𑀘 𑀯𑀮𑀬𑀫𑀢𑁆𑀣𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

𑁭𑁫𑁭. 𑀤𑀸𑀭𑀼𑀆𑀥𑀸𑀭𑀓𑁂𑀢𑀺 𑀉𑀤𑀼𑀓𑁆𑀔𑀮𑀲𑀤𑀺𑀲𑁂 𑀤𑀸𑀭𑀼𑀫𑀬𑁂 𑀆𑀥𑀸𑀭𑁂. 𑀤𑁆𑀯𑁂 𑀧𑀢𑁆𑀢𑁂 𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀧𑀢𑁆𑀢𑀫𑀢𑁆𑀣𑀓𑁂 𑀅𑀧𑀭𑀲𑁆𑀲𑀸𑀧𑀺 𑀧𑀢𑁆𑀢𑀲𑁆𑀲 𑀞𑀧𑀦𑀯𑀲𑁂𑀦 𑀤𑁆𑀯𑁂 𑀧𑀢𑁆𑀢𑁂 𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀧𑀺-𑀲𑀤𑁆𑀤𑁂𑀦 ¶ 𑀏𑀓𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀫𑁂𑀯 𑀦𑀬𑁄𑀢𑀺 ‘‘𑀤𑁆𑀯𑁂𑀧𑀺 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀬𑀁 𑀦𑀬𑁄. 𑀤𑀡𑁆𑀟𑀪𑀽𑀫𑀺𑀆𑀥𑀸𑀭𑀓𑁂𑀲𑀽𑀢𑀺 𑀏𑀢𑁆𑀣 𑀤𑀡𑁆𑀟𑀸𑀥𑀸𑀭𑁄 𑀦𑀸𑀫 𑀩𑀳𑀽𑀳𑀺 𑀤𑀡𑁆𑀟𑁂𑀳𑀺 𑀓𑀢𑁄. 𑀪𑀽𑀫𑀺𑀆𑀥𑀸𑀭𑀓𑁄 𑀦𑀸𑀫 𑀪𑀽𑀫𑀺𑀬𑀁 𑀓𑀢𑁄 𑀆𑀮𑀯𑀸𑀮𑀯𑀮𑀬𑀸𑀓𑀸𑀭𑁄 𑀲𑀺𑀮𑀺𑀝𑁆𑀞𑀸𑀥𑀸𑀭𑁄. ‘‘𑀤𑀦𑁆𑀢𑀯𑁂𑀢𑁆𑀢𑀮𑀢𑀸𑀤𑀺𑀫𑀬𑁄 𑀪𑀽𑀫𑀺𑀆𑀥𑀸𑀭𑀓𑁄’’𑀢𑀺 𑀓𑁂𑀘𑀺.

𑁭𑁫𑁮-𑁯. 𑀢𑀝𑁆𑀝𑀺𑀓𑀸𑀬𑀸𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀢𑀝𑁆𑀝𑀺𑀓𑀸𑀬. 𑀧𑁄𑀢𑁆𑀣𑀓𑁂𑀢𑀺 𑀫𑀓𑀘𑀺𑀯𑀸𑀓𑀫𑀬𑁂 𑀯𑀸 𑀭𑀼𑀓𑁆𑀔𑀯𑀸𑀓𑀫𑀬𑁂 𑀯𑀸 𑀅𑀢𑁆𑀣𑀭𑀡𑁂. 𑀓𑀝𑀲𑀸𑀭𑀓𑁂𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀯𑀻𑀢𑁂 𑀅𑀢𑁆𑀣𑀭𑀡𑁂. 𑀧𑀭𑀺𑀪𑀡𑁆𑀟𑀓𑀢𑀸𑀬𑀸𑀢𑀺 𑀓𑀢𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀬. 𑀅𑀧𑀺-𑀲𑀤𑁆𑀤𑁂𑀦 𑀲𑀼𑀥𑀸𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀲𑀸𑀡𑁂𑀦 𑀖𑀁𑀲𑀺𑀢𑁆𑀯𑀸 𑀫𑀝𑁆𑀞𑀓𑀢𑀸𑀬 𑀪𑀽𑀫𑀺𑀬𑀸 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀸𑀮𑀼𑀓𑀸𑀲𑀼 𑀯𑀸𑀢𑀺 𑀮𑁂𑀟𑁆𑀟𑀼𑀧𑀸𑀲𑀸𑀡𑀲𑀓𑁆𑀔𑀭𑀓𑀧𑀸𑀮𑀸𑀤𑀺𑀅𑀫𑀺𑀲𑁆𑀲𑀸𑀲𑀼 𑀲𑀡𑁆𑀳𑀲𑀼𑀔𑀼𑀫𑀯𑀸𑀮𑀼𑀓𑀸𑀲𑀽𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀣𑀸𑀭𑀽𑀧𑀸𑀲𑀽’’𑀢𑀺𑀆𑀤𑀺. 𑀭𑀚𑀫𑁆𑀳𑀺 𑀲𑀦𑁆𑀢𑁂𑀧𑀺 𑀅𑀲𑀦𑁆𑀢𑁂𑀧𑀺 𑀯𑀺𑀲𑀼𑀁𑀬𑁂𑀯 ‘‘𑀔𑀭𑀪𑀽𑀫𑀺𑀬𑀸 𑀦 𑀞𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀭𑀚𑀸𑀬𑀸’’𑀢𑀺 𑀇𑀫𑀺𑀦𑀸 𑀭𑀚𑁄𑀓𑀺𑀡𑁆𑀡𑀁 𑀲𑀡𑁆𑀳𑀪𑀽𑀫𑀺𑀫𑀸𑀳. 𑀔𑀭𑀪𑀽𑀫𑀺𑀬𑀸𑀢𑀺 𑀨𑀭𑀼𑀲𑀪𑀽𑀫𑀺𑀬𑀸.

𑁭𑁬𑁦. 𑀮𑀕𑁆𑀕𑁂𑀢𑀼𑀦𑁆𑀢𑀺 𑀑𑀮𑀫𑁆𑀩𑁂𑀢𑀼𑀁. 𑀤𑀡𑁆𑀟𑀓𑁄𑀝𑀺𑀬𑀸, 𑀦𑀸𑀕𑀤𑀦𑁆𑀢𑀓𑁄𑀝𑀺𑀬𑀸 𑀘 𑀧𑀢𑁆𑀢𑀫𑀼𑀔𑁂𑀦 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀦𑀫𑁆𑀧𑀺 𑀮𑀕𑁆𑀕𑀦𑀁 𑀦𑀸𑀫. 𑀙𑀢𑁆𑀢𑀗𑁆𑀓𑀫𑀜𑁆𑀘𑀧𑀻𑀞𑁂𑀲𑀽𑀢𑀺 𑀙𑀢𑁆𑀢𑁂, 𑀅𑀗𑁆𑀓𑁂, 𑀫𑀜𑁆𑀘𑀧𑀻𑀞𑁂 𑀘.

𑁭𑁬𑁧. 𑀅𑀝𑀦𑀻𑀲𑀽𑀢𑀺 𑀅𑀗𑁆𑀕𑁂𑀲𑀼. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀣𑀯𑀺𑀓𑀸𑀬 𑀅𑀁𑀲𑀯𑀤𑁆𑀥𑀦𑀓𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀩𑀦𑁆𑀥𑀺𑀢𑁆𑀯𑀸. 𑀑𑀮𑀫𑁆𑀩𑁂𑀢𑀼𑀫𑁆𑀧𑀻𑀢𑀺 𑀮𑀕𑁆𑀕𑁂𑀢𑀼𑀫𑁆𑀧𑀺. ‘‘𑀞𑀧𑁂𑀢𑀼𑀁 𑀉𑀧𑀭𑀻’’𑀢𑀺 𑀧𑀤𑀘𑁆𑀙𑁂𑀤𑁄.

𑁭𑁬𑁨. 𑀫𑀜𑁆𑀘𑀧𑀻𑀞𑀝𑁆𑀝𑀓𑁂𑀢𑀺 𑀫𑀜𑁆𑀘𑀧𑀻𑀞𑁂𑀲𑀼 𑀞𑀧𑀺𑀢𑀧𑀢𑁆𑀢𑀸 𑀬𑀣𑀸 𑀦 𑀧𑀢𑀦𑁆𑀢𑀺, 𑀢𑀣𑀸 𑀅𑀝𑀦𑀺𑀫𑀢𑁆𑀣𑀓𑁂 𑀤𑀸𑀭𑀼𑀦𑀸 𑀧𑀭𑀺𑀓𑁆𑀔𑁂𑀧𑁂 𑀓𑀢𑁂 𑀫𑀜𑁆𑀘𑀧𑀻𑀞𑀝𑁆𑀝𑀓𑀸 ¶ 𑀦𑀸𑀫 𑀳𑁄𑀦𑁆𑀢𑀺, 𑀢𑀸𑀤𑀺𑀲𑁂 𑀫𑀜𑁆𑀘𑀧𑀻𑀞𑀝𑁆𑀝𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀪𑀢𑁆𑀢𑀧𑀽𑀭𑁄𑀧𑀻𑀢𑀺 𑀪𑀢𑁆𑀢𑀲𑁆𑀲 𑀧𑀽𑀭𑁄𑀧𑀺. 𑀅𑀧𑀺-𑀲𑀤𑁆𑀤𑁂𑀦 𑀬𑀸𑀕𑀼𑀢𑁂𑀮𑀧𑀭𑀺𑀧𑀽𑀭𑀺𑀢𑀲𑁆𑀲𑀸𑀧𑀺 𑀲𑀗𑁆𑀕𑀳𑁄. 𑀢𑀼𑀘𑁆𑀙𑀧𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄 𑀬𑀣𑀸𑀯𑀼𑀢𑁆𑀢𑁄𑀬𑁂𑀯. 𑀧𑀽𑀭𑀡𑀁 𑀧𑀽𑀭𑁄, 𑀪𑀢𑁆𑀢𑀲𑁆𑀲 𑀧𑀽𑀭𑁄 𑀪𑀢𑁆𑀢𑀧𑀽𑀭𑁄.

𑀢𑀺𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭𑁬𑁩. 𑀓𑀯𑀸𑀝𑀦𑁆𑀢𑀺 𑀤𑁆𑀯𑀸𑀭𑀓𑀯𑀸𑀝𑀨𑀮𑀓𑀁. ‘‘𑀲𑁂𑀦𑀸𑀲𑀦𑁂 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀓𑀯𑀸𑀝𑀸𑀤𑀻’’𑀢𑀺𑀆𑀤𑀻𑀲𑀼 𑀤𑁆𑀯𑀸𑀭𑀨𑀮𑀓𑀁 ‘‘𑀓𑀯𑀸𑀝’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀦 𑀧𑀡𑀸𑀫𑁂𑀬𑁆𑀬𑀸𑀢𑀺 𑀦 𑀦𑀸𑀫𑁂𑀬𑁆𑀬 𑀦 𑀘𑀸𑀮𑁂𑀬𑁆𑀬, 𑀦 𑀘 𑀧𑀺𑀤𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀁 𑀳𑀢𑁆𑀣𑁂 𑀬𑀲𑁆𑀲 𑀲𑁄 𑀧𑀢𑁆𑀢𑀳𑀢𑁆𑀣𑁄𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑁄𑀬𑀁 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 ‘‘𑀯𑀚𑀺𑀭𑀧𑀸𑀡𑀻’’𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀧𑀡𑀸𑀫𑁂𑀬𑁆𑀬 𑀅𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑁭𑁬𑁪. 𑀦 𑀦𑀻𑀳𑀭𑁂𑀬𑁆𑀬 𑀧𑀢𑁆𑀢𑁂𑀦 𑀘𑀮𑀓𑀸𑀦𑀻𑀢𑀺 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀧𑀸𑀢𑀺𑀢𑀫𑀥𑀼𑀓𑀨𑀮𑀝𑁆𑀞𑀺𑀓𑀸𑀤𑀺 𑀙𑀟𑁆𑀟𑀺𑀢𑀸𑀦𑀺 𑀩𑀳𑀺 𑀙𑀟𑁆𑀟𑁂𑀢𑀼𑀁 𑀧𑀢𑁆𑀢𑁂𑀦 𑀦 𑀦𑀻𑀳𑀭𑁂𑀬𑁆𑀬. 𑀅𑀝𑁆𑀞𑀺𑀓𑀸𑀦𑀺 𑀯𑀸𑀢𑀺 𑀧𑀦𑀲𑀝𑁆𑀞𑀺𑀓𑁄𑀮𑀝𑁆𑀞𑀺𑀆𑀤𑀺𑀅𑀝𑁆𑀞𑀺𑀓𑀸𑀦𑀺 𑀯𑀸. 𑀉𑀘𑁆𑀙𑀺𑀝𑁆𑀞𑀫𑀼𑀤𑀓𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀓𑀁 𑀉𑀘𑁆𑀙𑀺𑀝𑁆𑀞𑀫𑀼𑀤𑀓𑀁. 𑀧𑀢𑁆𑀢𑁂𑀦 𑀦𑀻𑀳𑀭𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸, 𑀩𑀳𑀺 𑀙𑀟𑁆𑀟𑁂𑀢𑀼𑀁 𑀢𑀁 𑀧𑀢𑁆𑀢𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀳𑀭𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀭𑀣𑀸 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑀥𑁄𑀯𑀦𑁄𑀤𑀓𑀫𑁆𑀧𑀺 𑀢𑁂𑀦𑁂𑀯 𑀧𑀢𑁆𑀢𑁂𑀦 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑀁 𑀲𑀺𑀬𑀸.

𑁭𑁬𑁫. 𑀧𑀝𑀺𑀕𑁆𑀕𑀳𑁂𑀢𑀺 ¶ 𑀫𑀼𑀔𑀥𑁄𑀯𑀦𑁄𑀤𑀓𑀦𑁆𑀢𑀺 𑀧𑀝𑀺𑀕𑁆𑀕𑀳𑁄, 𑀔𑁂𑀴𑀫𑀮𑁆𑀮𑀓𑁄𑀯. 𑀫𑀼𑀔𑀢𑁄 𑀦𑀻𑀳𑀝𑀦𑁆𑀢𑀺 𑀫𑀼𑀔𑁂𑀦 𑀙𑀟𑁆𑀟𑀺𑀢𑀁 𑀫𑀁𑀲𑀔𑀡𑁆𑀟𑀸𑀤𑀺 𑀬𑀁 𑀓𑀺𑀜𑁆𑀘𑀺.

𑁭𑁬𑁬. 𑀯𑀺𑀦𑀲𑁆𑀲𑀢𑀻𑀢𑀺 𑀯𑀺𑀩𑁆𑀪𑀫𑁂𑀦 𑀯𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀯𑀸 𑀓𑀸𑀮𑀓𑀺𑀭𑀺𑀬𑀸𑀬 𑀯𑀸 𑀯𑀺𑀦𑀲𑁆𑀲𑀢𑀺. 𑀅𑀣 𑀯𑀸 𑀬𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 ‘‘𑀬𑀲𑁆𑀲𑀸’’𑀢𑀺 𑀲𑀸𑀫𑀺𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 ¶ 𑀧𑀢𑁆𑀢𑁄 𑀪𑁂𑀤𑁂𑀦 𑀯𑀸 𑀅𑀘𑁆𑀙𑁂𑀤𑁂𑀦 𑀯𑀸 𑀘𑁄𑀭𑀺𑀓𑀸𑀬 𑀳𑀭𑀡𑁂𑀦 𑀯𑀸 𑀦𑀲𑁆𑀲𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁭𑁬𑁭. 𑀧𑀞𑀫𑀲𑁆𑀲𑀸𑀢𑀺 𑀧𑀢𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀞𑀫𑀲𑁆𑀲. 𑀧𑀢𑁆𑀢𑀲𑁆𑀲𑀸𑀢𑀺 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲. 𑀧𑀞𑀫𑁂𑀦𑀸𑀢𑀺 𑀘𑀻𑀯𑀭𑀯𑀕𑁆𑀕𑀲𑁆𑀲 𑀧𑀞𑀫𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀞𑀫𑁂𑀦 𑀓𑀣𑀺𑀦𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑁂𑀲𑀺𑀦𑀸𑀢𑀺 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀕𑀼𑀡𑁂 𑀏𑀲𑀺 𑀕𑀯𑁂𑀲𑀻𑀢𑀺 𑀫𑀳𑁂𑀲𑀺. 𑀧𑀞𑀫𑀲𑁆𑀲 𑀧𑀢𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂 𑀇𑀥 𑀅𑀦𑀺𑀤𑁆𑀤𑀺𑀝𑁆𑀞𑀯𑀺𑀦𑀺𑀘𑁆𑀙𑀬𑀸 𑀧𑀞𑀫𑁂𑀦 𑀓𑀣𑀺𑀦𑁂𑀦 𑀲𑀫𑀸 𑀲𑀤𑀺𑀲𑀸 𑀇𑀢𑀺 𑀫𑀳𑁂𑀲𑀺𑀦𑀸 𑀫𑀢𑀸 𑀅𑀦𑀼𑀫𑀢𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸.

𑀧𑀞𑀫𑀧𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁭𑁬𑁮. 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀊𑀦𑀸𑀦𑀺 𑀬𑀲𑁆𑀲 𑀲𑁄 𑀧𑀜𑁆𑀘𑀩𑀦𑁆𑀥𑀦𑀊𑀦𑁄, 𑀧𑀢𑁆𑀢𑁄, 𑀢𑀲𑁆𑀫𑀺𑀁, 𑀅𑀩𑀦𑁆𑀥𑀦𑀜𑁆𑀘 𑀏𑀓𑀤𑁆𑀯𑀺𑀢𑀺𑀘𑀢𑀼𑀩𑀦𑁆𑀥𑀦𑀜𑁆𑀘 ‘‘𑀧𑀜𑁆𑀘𑀩𑀦𑁆𑀥𑀦𑀊𑀦’’𑀦𑁆𑀢𑀺 𑀕𑀳𑀺𑀢𑀁. 𑀬𑀣𑀸𑀳 𑀧𑀸𑀴𑀺𑀬𑀁 ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁄 𑀦𑀸𑀫 𑀧𑀢𑁆𑀢𑁄 𑀅𑀩𑀦𑁆𑀥𑀦𑁄 𑀯𑀸 𑀏𑀓𑀩𑀦𑁆𑀥𑀦𑁄 𑀯𑀸 𑀤𑁆𑀯𑀺𑀩𑀦𑁆𑀥𑀦𑁄 𑀯𑀸 𑀢𑀺𑀩𑀦𑁆𑀥𑀦𑁄 𑀯𑀸 𑀘𑀢𑀼𑀩𑀦𑁆𑀥𑀦𑁄 𑀯𑀸’’𑀢𑀺 (𑀧𑀸𑀭𑀸. 𑁬𑁧𑁩). 𑀩𑀦𑁆𑀥𑀦𑁂 𑀅𑀓𑀢𑁂𑀧𑀺 𑀩𑀦𑁆𑀥𑀦𑀸𑀭𑀳𑁄 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑀭𑀸𑀚𑀺𑀬𑀼𑀢𑁆𑀢𑁄𑀧𑀺 ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁄𑀬𑁂𑀯𑀸’’𑀢𑀺 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣 𑀅𑀩𑀦𑁆𑀥𑀦𑁄 𑀦𑀸𑀫 𑀬𑀲𑁆𑀲 𑀩𑀦𑁆𑀥𑀦𑀫𑁂𑀯 𑀦𑀢𑁆𑀣𑀺, 𑀲𑁄. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀫𑀸 𑀅𑀩𑀦𑁆𑀥𑀦𑀲𑁆𑀲𑀧𑀺 𑀧𑀢𑁆𑀢𑀲𑁆𑀲 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀦 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀲𑁄 𑀦𑀢𑁆𑀣𑀺𑀢𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁨-𑁬𑁧𑁩). 𑀤𑁆𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀢𑁄 𑀊𑀦𑀭𑀸𑀚𑀺𑀬𑀼𑀢𑁆𑀢𑁄 𑀅𑀩𑀦𑁆𑀥𑀦𑁄𑀓𑀸𑀲𑁄𑀧𑀺 ‘‘𑀅𑀩𑀦𑁆𑀥𑀦𑁄𑀬𑁂𑀯𑀸’’𑀢𑀺 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀳 𑀧𑀸𑀴𑀺𑀬𑀁 ‘‘𑀅𑀩𑀦𑁆𑀥𑀦𑁄𑀓𑀸𑀲𑁄 𑀦𑀸𑀫 𑀧𑀢𑁆𑀢𑁄 𑀬𑀲𑁆𑀲 𑀤𑁆𑀯𑀗𑁆𑀕𑀼𑀮𑀸 𑀭𑀸𑀚𑀺 𑀦 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁬𑁧𑁩).

𑁭𑁬𑁯. 𑀉𑀤𑁆𑀤𑀺𑀝𑁆𑀞𑀦𑁆𑀢𑀺 ‘‘𑀩𑀦𑁆𑀥𑀦𑁄𑀓𑀸𑀲𑁄 𑀦𑀸𑀫 𑀧𑀢𑁆𑀢𑁄 𑀬𑀲𑁆𑀲 𑀤𑁆𑀯𑀗𑁆𑀕𑀼𑀮𑀸 𑀭𑀸𑀚𑀺 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁬𑁧𑁩) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁. 𑀤𑁆𑀯𑀗𑁆𑀕𑀼𑀮𑀸𑀬 𑀭𑀸𑀚𑀺𑀬𑀸 𑀏𑀓𑀜𑁆𑀘 𑀩𑀦𑁆𑀥𑀦𑀦𑁆𑀢𑀺 𑀬𑁄𑀚𑀦𑀸. ‘‘𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀪𑀝𑁆𑀞𑀸’’𑀢𑀺 ¶ 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁨-𑁬𑁧𑁩) ‘‘𑀲𑀩𑁆𑀩𑀸𑀧𑀺 𑀭𑀸𑀚𑀺𑀬𑁄 𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 ¶ 𑀳𑁂𑀝𑁆𑀞𑀸 𑀪𑀝𑁆𑀞𑀸𑀬𑁂𑀯 𑀕𑀳𑁂𑀢𑀩𑁆𑀩𑀸’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀯𑀼𑀢𑁆𑀢𑀁. 𑀫𑀼𑀔𑀯𑀝𑁆𑀝𑀺𑀁 𑀯𑀺𑀦𑀸 𑀅𑀜𑁆𑀜𑀢𑁆𑀣𑀸𑀧𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑁂 𑀯𑀸 𑀊𑀦𑀧𑀜𑁆𑀘𑀩𑀦𑁆𑀥𑀦𑁄𑀓𑀸𑀲𑁂 𑀯𑀸 𑀲𑀢𑀺 𑀲𑁄𑀧𑀺 𑀧𑀢𑁆𑀢𑁄 𑀊𑀦𑀧𑀜𑁆𑀘𑀩𑀦𑁆𑀥𑀦𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘‘𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁨-𑁬𑁧𑁩) 𑀅𑀝𑁆𑀞𑀓𑀣𑀸𑀬𑀁 𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀇𑀥 𑀧𑀦 𑀢𑀣𑀸 𑀦𑀺𑀬𑀫𑁄 𑀦 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. 𑀘-𑀓𑀸𑀭𑀲𑁆𑀲 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑀢𑁆𑀢𑀸 𑀤𑁆𑀯𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀳𑀺 𑀤𑁆𑀯𑀻𑀳𑀺 𑀤𑁆𑀯𑁂 𑀩𑀦𑁆𑀥𑀦𑀸𑀦𑀺 𑀘 𑀢𑀻𑀡𑀺 𑀩𑀦𑁆𑀥𑀦𑀸𑀦𑀺 𑀘𑀸𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀲 𑀧𑀦 𑀤𑁆𑀯𑁂 𑀭𑀸𑀚𑀺𑀬𑁄, 𑀏𑀓𑀸𑀬𑁂𑀯 𑀯𑀸 𑀘𑀢𑀼𑀭𑀗𑁆𑀕𑀼𑀮𑀸, 𑀢𑀲𑁆𑀲 𑀤𑁆𑀯𑁂 𑀩𑀦𑁆𑀥𑀦𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀢𑀺𑀲𑁆𑀲𑁄, 𑀏𑀓𑀸𑀬𑁂𑀯 𑀯𑀸 𑀙𑀴𑀗𑁆𑀕𑀼𑀮𑀸, 𑀢𑀲𑁆𑀲 𑀢𑀻𑀡𑀺 𑀩𑀦𑁆𑀥𑀦𑀸𑀦𑀺 𑀤𑀸𑀢𑀩𑁆𑀩𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁨-𑁬𑁧𑁩).

𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑁂𑀲𑀼 𑀅𑀦𑁆𑀢𑀺𑀫𑀧𑀢𑁆𑀢𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀩𑀦𑁆𑀥𑀦𑀸𑀦𑀺 𑀘𑀸’’𑀢𑀺𑀆𑀤𑀺. 𑀫𑀼𑀔𑀯𑀝𑁆𑀝𑀺𑀬𑀸 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀦𑀁 𑀘𑀢𑀼𑀦𑁆𑀦𑀁 𑀭𑀸𑀚𑀻𑀦𑀁 𑀘𑀢𑁆𑀢𑀸𑀭𑀺 𑀩𑀦𑁆𑀥𑀦𑀸𑀦𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀓𑀸𑀭𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲𑁂𑀯 𑀲𑀫𑀼𑀘𑁆𑀘𑀬𑀁 𑀓𑀭𑁄𑀢𑀺. 𑀅𑀝𑁆𑀞𑀗𑁆𑀕𑀼𑀮𑀭𑀸𑀚𑀺𑀬𑀸 𑀢𑀣𑀸𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀗𑁆𑀕𑀼𑀮𑀸𑀬𑀸𑀫𑀁 𑀪𑀝𑁆𑀞𑀸𑀬 𑀭𑀸𑀚𑀺𑀬𑀸 𑀤𑁆𑀯𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁂 𑀞𑀸𑀦𑁂 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀩𑀤𑁆𑀥𑀸𑀦𑀺 𑀘𑀢𑁆𑀢𑀸𑀭𑀺 𑀩𑀦𑁆𑀥𑀦𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄.

𑁭𑁭𑁦. 𑀏𑀯𑀁 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀜𑁆𑀘 𑀯𑀸’’𑀢𑀺𑀆𑀤𑀺. 𑀫𑀼𑀔𑀯𑀝𑁆𑀝𑀺𑀬𑀸 𑀤𑁆𑀯𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀬𑀸𑀫𑀁 𑀑𑀢𑀺𑀡𑁆𑀡𑀸 𑀧𑀜𑁆𑀘 𑀭𑀸𑀚𑀺𑀬𑁄 𑀘. 𑀯𑀸-𑀲𑀤𑁆𑀤𑁂𑀦 𑀧𑀜𑁆𑀘𑀩𑀦𑁆𑀥𑀦𑀯𑀺𑀓𑀧𑁆𑀧𑀸 𑀤𑀲𑁆𑀲𑀺𑀢𑀸. 𑀏𑀓𑀸 𑀯𑀸𑀧𑀺 𑀤𑀲𑀗𑁆𑀕𑀼𑀮𑀸𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀤𑀲𑀗𑁆𑀕𑀼𑀮𑀸𑀬𑀸𑀫𑀸 𑀏𑀓𑀸 𑀯𑀸 𑀭𑀸𑀚𑀺 𑀳𑁄𑀢𑀺. 𑀅𑀧𑀺-𑀲𑀤𑁆𑀤𑁂𑀦 𑀢𑀲𑁆𑀲𑀸 𑀭𑀸𑀚𑀺𑀬𑀸 𑀩𑀦𑁆𑀥𑀦𑁄 𑀧𑀜𑁆𑀘𑀩𑀦𑁆𑀥𑀦𑀧𑀓𑁆𑀔𑁄 𑀤𑀲𑁆𑀲𑀺𑀢𑁄. 𑀅𑀬𑀁 𑀧𑀢𑁆𑀢𑁄𑀢𑀺 ¶ 𑀬𑀲𑁆𑀲 𑀧𑀜𑁆𑀘 𑀭𑀸𑀚𑀺𑀬𑁄 𑀯𑀸 𑀢𑀢𑁆𑀣 𑀩𑀦𑁆𑀥𑀦𑀸𑀦𑀺 𑀧𑀜𑁆𑀘𑀩𑀦𑁆𑀥𑀦𑀸𑀦𑀺 𑀯𑀸, 𑀤𑀲𑀗𑁆𑀕𑀼𑀮𑀸 𑀏𑀓𑀸 𑀭𑀸𑀚𑀺 𑀯𑀸 𑀢𑀢𑁆𑀣 𑀩𑀦𑁆𑀥𑀦𑀸𑀦𑀺 𑀧𑀜𑁆𑀘𑀩𑀦𑁆𑀥𑀦𑀸𑀦𑀺 𑀯𑀸 𑀲𑀦𑁆𑀢𑀺, 𑀅𑀬𑀁 𑀧𑀢𑁆𑀢𑁄 𑀧𑀜𑁆𑀘𑀩𑀦𑁆𑀥𑀦𑁄 𑀦𑀸𑀫.

𑁭𑁭𑁧. 𑀏𑀢𑁆𑀢𑀸𑀯𑀢𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀬𑁄𑀧𑀢𑁆𑀢𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀬𑁄𑀧𑀢𑁆𑀢𑁄’’𑀢𑀺𑀆𑀤𑀺. 𑀙𑀺𑀤𑁆𑀤𑀸𑀦𑀺 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀩𑀦𑁆𑀥𑀺𑀢𑀩𑁆𑀩𑀸𑀦𑀺 𑀅𑀬𑁄𑀧𑀝𑁆𑀝𑀸𑀦𑀺 𑀮𑁄𑀳𑀫𑀡𑁆𑀟𑀮𑀓𑀸𑀦𑀺 𑀦𑀸𑀫. ‘‘𑀪𑀡𑁆𑀟𑀻’’𑀢𑀺𑀧𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑁄. 𑀪𑀡𑁆𑀟𑀺𑀢𑀩𑁆𑀩𑀁 𑀩𑀦𑁆𑀥𑀺𑀢𑁆𑀯𑀸 𑀙𑀺𑀤𑁆𑀤𑁂 𑀧𑀝𑀺𑀘𑁆𑀙𑀸𑀤𑀺𑀢𑁂𑀧𑀺 𑀬𑀢𑁆𑀣 𑀅𑀲𑀡𑁆𑀳𑀢𑀸𑀬 𑀆𑀫𑀺𑀲𑀁 𑀢𑀺𑀝𑁆𑀞𑀢𑀺, 𑀢𑀸𑀤𑀺𑀲𑁄𑀧𑀺 𑀅𑀧𑀢𑁆𑀢𑁄𑀬𑁂𑀯𑀸𑀢𑀺 𑀆𑀳 ‘‘𑀫𑀝𑁆𑀞𑁄 𑀯𑀝𑁆𑀝𑀢𑀻’’𑀢𑀺. 𑀅𑀬𑁄𑀘𑀼𑀡𑁆𑀡𑁂𑀦 𑀯𑀸𑀡𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀫𑀝𑁆𑀞𑁄 𑀯𑀝𑁆𑀝𑀢𑀻’’𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁.

𑁭𑁭𑁨. 𑀢𑀲𑁆𑀲 ¶ 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁 𑀢𑀁 𑀧𑀢𑁆𑀢𑀁 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀅𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸, ‘‘𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁬𑁧𑁩) 𑀯𑀘𑀦𑀢𑁄 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀝𑁆𑀞𑀁 𑀢𑀲𑁆𑀲 𑀢𑀁 𑀧𑀢𑁆𑀢𑀁 𑀢𑀲𑁆𑀫𑀺𑀁 𑀧𑀢𑁆𑀢𑀦𑀺𑀲𑁆𑀲𑀚𑁆𑀚𑀓𑁂 𑀧𑀼𑀕𑁆𑀕𑀮𑁂 𑀅𑀦𑀼𑀓𑀫𑁆𑀧𑀸𑀬 𑀅𑀕𑀡𑁆𑀳𑀦𑁆𑀢𑀲𑁆𑀲.

𑁭𑁭𑁩. 𑀤𑀻𑀬𑀫𑀸𑀦𑁂 𑀢𑀼 𑀧𑀢𑁆𑀢𑀲𑁆𑀫𑀺𑀦𑁆𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀯𑀺𑀜𑁆𑀜𑀸𑀧𑀺𑀢𑀦𑀯𑀧𑀢𑁆𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 𑀢𑀁 𑀧𑀢𑁆𑀢𑀁 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀘𑀢𑀲𑁆𑀲𑁄 𑀅𑀕𑀢𑀺𑀬𑁄 𑀅𑀕𑀫𑀦𑀁, 𑀕𑀳𑀺𑀢𑀸𑀕𑀳𑀺𑀢𑀚𑀸𑀦𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀲𑀗𑁆𑀖𑀁 𑀬𑀸𑀘𑀺𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑁂𑀦 𑀧𑀢𑁆𑀢𑀕𑀸𑀳𑀓𑀁 𑀓𑀢𑁆𑀯𑀸 𑀲𑀫𑁆𑀫𑀢𑁂𑀦 𑀦𑀺𑀲𑁆𑀲𑀝𑁆𑀞𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀲𑀗𑁆𑀖𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀉𑀧𑀲𑀗𑁆𑀓𑀫𑁆𑀫 𑀯𑀺𑀜𑁆𑀜𑀸𑀬𑀫𑀸𑀦𑀁 𑀕𑀼𑀡𑀁 𑀯𑀢𑁆𑀯𑀸 𑀧𑀡𑀸𑀫𑀺𑀢𑁂. 𑀬𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀲𑁆𑀲 𑀬𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄, 𑀭𑁄𑀘𑀦𑀢𑁆𑀣𑀬𑁄𑀕𑁂 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀲𑁄 𑀤𑀻𑀬𑀫𑀸𑀦𑁄 𑀧𑀢𑁆𑀢𑁄. 𑀢𑀁 𑀤𑀻𑀬𑀫𑀸𑀦𑀁 𑀧𑀢𑁆𑀢𑀁.

𑁭𑁭𑁪. 𑀤𑀻𑀧𑀺𑀢𑁄𑀢𑀺 ‘‘𑀅𑀧𑀢𑁆𑀢𑀓𑀲𑁆𑀲 𑀦 𑀕𑀸𑀳𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁬𑁧𑁫) 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀪𑀺𑀓𑁆𑀔𑀼𑀧𑀭𑀺𑀲𑀸𑀬𑀁. 𑀧𑀢𑁆𑀢𑀧𑀭𑀺𑀬𑀦𑁆𑀢𑁄𑀢𑀺 𑀏𑀢𑁆𑀣 ‘‘𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀧𑀢𑁆𑀢𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀧𑀢𑁆𑀢𑀧𑀭𑀺𑀯𑀢𑁆𑀢𑀦𑁂𑀦 𑀆𑀕𑀢𑁄 𑀯𑀸 𑀲𑀩𑁆𑀩𑁂𑀳𑀺 𑀅𑀕𑁆𑀕𑀳𑀺𑀢𑀢𑁆𑀢𑀸 𑀆𑀕𑀢𑁄 𑀲𑁄 𑀏𑀯 𑀯𑀸 𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀧𑀢𑁆𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁭𑁭𑁫. 𑀢𑀦𑁆𑀢𑀺 𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀢𑀁 𑀧𑀭𑀺𑀬𑀦𑁆𑀢𑀧𑀢𑁆𑀢𑀁. 𑀅𑀧𑁆𑀧𑀤𑁂𑀲𑁂𑀢𑀺 𑀫𑀜𑁆𑀘𑀧𑀻𑀞𑀸𑀤𑀺𑀅𑀝𑁆𑀞𑀸𑀦𑁂. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀜𑁆𑀘𑀧𑀻𑀞𑀙𑀢𑁆𑀢𑀦𑀸𑀕𑀤𑀦𑁆𑀢𑀸𑀤𑀺𑀓𑁂 𑀅𑀤𑁂𑀲𑁂’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁫). 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀅𑀢𑁆𑀢𑀦𑀸 𑀅𑀤𑀸𑀧𑁂𑀢𑁆𑀯𑀸 𑀅𑀜𑁆𑀜𑁂𑀦 𑀢𑀁 𑀧𑀢𑁆𑀢𑀁 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀅𑀦𑀼𑀭𑀽𑀧𑀁 𑀧𑀢𑁆𑀢𑀁 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀬𑀸𑀕𑀼𑀭𑀦𑁆𑀥𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀪𑁄𑀕𑁂𑀦𑀸𑀢𑀺 𑀬𑀸𑀕𑀼𑀭𑀦𑁆𑀥𑀦𑀭𑀚𑀦𑀧𑀘𑀦𑀸𑀤𑀺𑀦𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁫). ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀩𑁆𑀬𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀅𑀲𑀢𑀺 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀺𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀧𑀘𑀺𑀢𑀼𑀁 𑀉𑀤𑀓𑀁 𑀯𑀸 𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁧𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀸𑀤𑀺𑀲𑁂 𑀞𑀸𑀦𑁂 𑀢𑀣𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀯𑀺𑀲𑁂𑀲𑁄.

𑁭𑁭𑁬. 𑀦𑀝𑁆𑀞𑁂𑀢𑀺 ¶ 𑀅𑀢𑁆𑀢𑀦𑁄 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁂 𑀧𑀢𑁆𑀢𑁂 𑀘𑁄𑀭𑀕𑁆𑀕𑀳𑀡𑀸𑀤𑀺𑀦𑀸 𑀦𑀝𑁆𑀞𑁂. 𑀪𑀺𑀦𑁆𑀦𑁂𑀢𑀺 𑀪𑁂𑀤𑀫𑀼𑀧𑀕𑀢𑁂. 𑀅𑀦𑀸𑀧𑀢𑁆𑀢𑀻𑀢𑀺 𑀅𑀜𑁆𑀜𑀁 𑀧𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀓𑀸𑀲𑀺𑀢𑀸𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀦𑀝𑁆𑀞𑀧𑀢𑁆𑀢𑀲𑁆𑀲 𑀪𑀺𑀦𑁆𑀦𑀧𑀢𑁆𑀢𑀲𑁆𑀲 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 ¶ 𑀅𑀢𑁆𑀢𑀦𑁄 𑀥𑀦𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁧𑁭) 𑀦𑀬𑁂𑀦 𑀧𑀸𑀴𑀺𑀬𑀁 𑀤𑁂𑀲𑀺𑀢𑀸. 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀯𑀴𑀜𑁆𑀚𑀺𑀬𑀫𑀸𑀦𑁂 𑀧𑀢𑁆𑀢𑁂 𑀲𑀢𑀺𑀧𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀧𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀜𑀸𑀢𑀓𑀸𑀤𑀻𑀦𑀁 𑀕𑀡𑁆𑀳𑀢𑁄𑀢𑀺 𑀏𑀢𑁆𑀣 ‘‘𑀲𑀦𑁆𑀢𑀓’’𑀦𑁆𑀢𑀺 𑀮𑀩𑁆𑀪𑀢𑀺. 𑀅𑀢𑁆𑀢𑀦𑁄 𑀥𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀥𑀦𑀁 𑀦𑀸𑀫 𑀲𑀼𑀢𑁆𑀢𑀯𑀢𑁆𑀣𑀸𑀤𑀺 𑀓𑀧𑁆𑀧𑀺𑀬𑀯𑀢𑁆𑀣𑀼.

𑁭𑁭𑁭. 𑀏𑀢𑁆𑀣 𑀯𑀺𑀜𑁆𑀜𑀸𑀧𑀦𑀁 𑀓𑁆𑀭𑀺𑀬𑀁.

𑀤𑀼𑀢𑀺𑀬𑀧𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁭𑁭𑁮. 𑀲𑀧𑁆𑀧𑀺𑀆𑀤𑀺𑀁 𑀪𑁂𑀲𑀚𑁆𑀚𑀦𑁆𑀢𑀺 𑀏𑀢𑁆𑀣 𑀧𑀸𑀴𑀺𑀬𑀁 ‘‘𑀲𑁂𑀬𑁆𑀬𑀣𑀺𑀤𑀁? 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁨) 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀲𑀧𑁆𑀧𑀺 𑀦𑀸𑀫 𑀕𑁄𑀲𑀧𑁆𑀧𑀺 𑀯𑀸 𑀅𑀚𑀺𑀓𑀸𑀲𑀧𑁆𑀧𑀺 𑀯𑀸 𑀫𑀳𑀺𑀁𑀲𑀲𑀧𑁆𑀧𑀺 𑀯𑀸, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀻’’𑀢𑀺 (𑀧𑀸𑀭𑀸. 𑁬𑁨𑁩) 𑀦𑀺𑀤𑁆𑀤𑀺𑀝𑁆𑀞𑀁 𑀖𑀢𑀜𑁆𑀘 ‘‘𑀢𑁂𑀲𑀁𑀬𑁂𑀯 𑀦𑀯𑀦𑀻𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀦𑀺𑀤𑁆𑀤𑀺𑀝𑁆𑀞𑀁 𑀦𑀯𑀦𑀻𑀢𑀜𑁆𑀘 ‘‘𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀓𑀢𑁂𑀮𑀁 𑀯𑀲𑀸𑀢𑁂𑀮’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀦𑀺𑀤𑁆𑀤𑀺𑀝𑁆𑀞𑀁 𑀢𑁂𑀮𑀜𑁆𑀘 ‘‘𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀽’’𑀢𑀺 (𑀧𑀸𑀭𑀸. 𑁬𑁨𑁩) 𑀦𑀺𑀤𑁆𑀤𑀺𑀝𑁆𑀞𑀁 𑀫𑀥𑀼𑀜𑁆𑀘 ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀦𑀺𑀤𑁆𑀤𑀺𑀝𑁆𑀞𑀁 𑀕𑀼𑀴𑀸𑀤𑀺𑀨𑀸𑀡𑀺𑀢𑀜𑁆𑀘𑀸𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀘𑀪𑁂𑀲𑀚𑁆𑀚𑀭𑀸𑀲𑀺𑀫𑁆𑀳𑀺 𑀬𑀁 𑀬𑀁 𑀪𑁂𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀧𑀼𑀭𑁂𑀪𑀢𑁆𑀢𑁂. 𑀧𑀝𑀺𑀕𑀬𑁆𑀳𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸.

𑁭𑁭𑁯. 𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀪𑁂𑀲𑀚𑁆𑀚𑀁. 𑀲𑀢𑁆𑀢𑀸𑀳𑀦𑁆𑀢𑀺 𑀏𑀢𑁆𑀣 ‘‘𑀯𑀝𑁆𑀝𑀢𑀻’’𑀢𑀺 𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀢𑀲𑁆𑀲𑀸’’𑀢𑀺 𑀯𑀸 𑀧𑀸𑀞𑁄. 𑀲𑀢𑁆𑀢𑀸𑀳𑀲𑁆𑀲 𑀅𑀢𑀺𑀓𑁆𑀓𑀫𑁄 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁄, 𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂. 𑀢𑀲𑁆𑀲𑀸𑀢𑀺 𑀪𑁂𑀲𑀚𑁆𑀚𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. ‘‘𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀤𑀲𑁆𑀲𑀺𑀢𑀁. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀪𑀸𑀚𑀦𑀕𑀡𑀦𑀸𑀬 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀧𑀺𑀢𑀸𑀦𑀺 𑀦𑀯𑀦𑀻𑀢𑀧𑀺𑀡𑁆𑀟𑀕𑀼𑀴𑀧𑀺𑀡𑁆𑀟𑀲𑀓𑁆𑀓𑀭𑀫𑀥𑀼𑀧𑀝𑀮𑀸𑀦𑀺𑀧𑀺 ¶ 𑀅𑀢𑁆𑀢𑀦𑁄 𑀕𑀡𑀦𑀸𑀬 𑀆𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀺.

𑁭𑁮𑁦. 𑀕𑀡𑁆𑀳𑀺𑀢𑁆𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀲𑀦𑁆𑀦𑀺𑀥𑀻𑀬𑀢𑀻𑀢𑀺 𑀲𑀦𑁆𑀦𑀺𑀥𑀺, 𑀲𑀦𑁆𑀦𑀺𑀳𑀺𑀢𑀯𑀢𑁆𑀣𑀼, 𑀢𑀲𑁆𑀲 𑀓𑀸𑀭𑀓𑀁 𑀓𑀭𑀡𑀁 ¶ 𑀅𑀧𑀭𑀸𑀧𑀭𑀤𑀺𑀯𑀲𑀢𑁆𑀣𑀸𑀬 𑀞𑀧𑀦𑀁, 𑀢𑀁 𑀓𑀢𑁆𑀯𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀬𑀣𑀸 𑀅𑀧𑀭𑀁 𑀤𑀺𑀯𑀲𑀁 𑀕𑀘𑁆𑀙𑀢𑀺, 𑀢𑀣𑀸 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑀸𑀫𑀺𑀲𑀁 𑀲𑀸𑀬𑀢𑁄𑀢𑀺 𑀆𑀫𑀺𑀲𑁂𑀦 𑀅𑀫𑀺𑀲𑁆𑀲𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲.

𑁭𑁮𑁧. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀁. 𑀲𑀭𑀻𑀭𑀪𑁄𑀕𑁂𑀢𑀺 𑀩𑀳𑀺 𑀲𑀭𑀻𑀭𑀧𑀭𑀺𑀪𑁄𑀕𑁂𑀦𑁂𑀯.

𑁭𑁮𑁨. 𑀕𑀳𑀺𑀢𑀁 𑀧𑀝𑀺𑀕𑁆𑀕𑀳𑀺𑀢𑀁. 𑀢𑀸𑀧𑁂𑀢𑁆𑀯𑀸𑀢𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸.

𑁭𑁮𑁩. ‘‘𑀲𑀬𑀁 𑀢𑀸𑀧𑁂𑀢𑀺…𑀧𑁂… 𑀦 𑀳𑁄𑀢𑀺 𑀲𑁄’’𑀢𑀺 𑀇𑀤𑀁 𑀲𑀼𑀥𑁄𑀢𑀦𑀯𑀦𑀻𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀤𑀼𑀤𑁆𑀥𑁄𑀢𑁂𑀦 𑀧𑀦 𑀤𑀥𑀺𑀕𑀼𑀴𑀺𑀓𑀸𑀤𑀺𑀲𑀳𑀺𑀢𑁂𑀦 𑀲𑀸𑀫𑀁𑀧𑀸𑀓𑁄 𑀳𑁄𑀢𑁂𑀯. 𑀦𑀯𑀦𑀻𑀢𑀲𑁆𑀲 𑀬𑀁 𑀲𑀬𑀁 𑀢𑀸𑀧𑀦𑀁, 𑀲𑁄 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁭𑁮𑁪. 𑀬𑁂𑀦 𑀓𑁂𑀦𑀘𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑁂𑀦, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀯𑀸.

𑁭𑁮𑁫. ‘‘𑀲𑀬𑀁 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀓𑀢𑀁 𑀧𑀦 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑁂𑀦 𑀯𑀸 𑀤𑀥𑀺𑀦𑀸 𑀯𑀸 𑀓𑀢𑀲𑀧𑁆𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀲𑀸𑀫𑀺𑀲𑀫𑁆𑀧𑀺 𑀢𑀤𑀳𑀼 𑀧𑀼𑀭𑁂𑀪𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨).

𑁭𑁮𑁬. 𑀲𑀯𑀢𑁆𑀣𑀼𑀓𑀲𑁆𑀲𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼 𑀦𑀸𑀫 𑀔𑀻𑀭𑀤𑀥𑀺.

𑁭𑁮𑁭. 𑀅𑀲𑁆𑀲𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀤𑀥𑀻𑀳𑀺 𑀓𑀢𑀲𑀧𑁆𑀧𑀺𑀫𑀸𑀳. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀇𑀤𑀁 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 ¶ 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁? 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 (𑀧𑀸𑀭𑀸. 𑁬𑁨𑁨) 𑀇𑀫𑀲𑁆𑀫𑀺𑀁 𑀫𑀸𑀢𑀺𑀓𑀸𑀧𑀸𑀞𑁂 ‘‘𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀲𑀧𑁆𑀧𑀺𑀆𑀤𑀻𑀦𑀫𑁂𑀯 ‘‘𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁆𑀣 𑀔𑀻𑀭𑀤𑀥𑀻𑀦𑀁 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁮𑁮. 𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀻𑀢𑀺 ¶ 𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀲𑀢𑁆𑀢𑀸𑀦𑀁 𑀖𑀢𑁂. 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀻𑀢𑀺 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀲𑀢𑁆𑀢𑀸𑀦𑀁 𑀖𑀢𑁂, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑁂 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁮𑁯. 𑀢𑁂𑀦 𑀲𑀧𑁆𑀧𑀺𑀦𑀸 𑀅𑀓𑀧𑁆𑀧𑀺𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀤𑀼𑀓𑁆𑀓𑀝𑀁 𑀓𑀣𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀸’’𑀢𑀺𑀆𑀤𑀺. 𑀅𑀓𑀧𑁆𑀧𑀺𑀬𑀁 𑀫𑀁𑀲𑀁 𑀬𑁂𑀲𑀁 𑀢𑁂 𑀅𑀓𑀧𑁆𑀧𑀺𑀬𑀫𑀁𑀲𑀸, 𑀫𑀦𑀼𑀲𑁆𑀲𑀸𑀤𑀬𑁄, 𑀲𑀩𑁆𑀩𑁂 𑀘 𑀢𑁂 𑀅𑀓𑀧𑁆𑀧𑀺𑀬𑀫𑀁𑀲𑀸 𑀘𑀸𑀢𑀺 𑀲𑀩𑁆𑀩𑀸𑀓𑀧𑁆𑀧𑀺𑀬𑀫𑀁𑀲𑀸, 𑀢𑁂𑀲𑀁.

𑁭𑁯𑁦-𑁧. 𑀏𑀯𑀁 𑀘𑁂 𑀯𑀝𑁆𑀝𑀢𑀺, ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀻’’𑀢𑀺 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀬𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀬𑁂𑀲𑀜𑁆𑀳𑀺 𑀓𑀧𑁆𑀧𑀢𑀺 𑀫𑀁𑀲𑀁, 𑀢𑁂𑀲𑀁 𑀲𑀧𑁆𑀧𑀻’’𑀢𑀺 𑀇𑀤𑀁 𑀯𑀘𑀦𑀁 𑀓𑀺𑀁 𑀧𑀬𑁄𑀚𑀦𑀁 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀦𑀲𑀗𑁆𑀔𑀸𑀢𑀁 𑀢𑀁𑀧𑀬𑁄𑀚𑀦𑀜𑁆𑀘 𑀢𑀩𑁆𑀩𑀺𑀲𑀬𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀡𑀻𑀢𑀪𑁄𑀚𑀦𑀲𑁆𑀲𑀸’’𑀢𑀺𑀆𑀤𑀺. 𑀧𑀡𑀻𑀢𑀪𑁄𑀚𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀺𑀬𑀸𑀫𑀦𑀦𑁆𑀢𑀺 𑀬𑁄𑀚𑀦𑀸. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀧𑀜𑁆𑀘𑀯𑀺𑀥𑁂 𑀪𑁂𑀲𑀚𑁆𑀚𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲 𑀯𑀢𑁆𑀣𑀽𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀤𑀲𑁆𑀲𑀦𑀁. 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀢𑀁𑀳𑁂𑀢𑀼𑀓𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀽𑀦𑀦𑁆𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀯𑀢𑁆𑀣𑀼 𑀦𑀸𑀫 𑀏𑀢𑁂𑀲𑀫𑁂𑀯 𑀲𑀧𑁆𑀧𑀺𑀦𑀯𑀦𑀻𑀢𑀸𑀦𑀺, 𑀧𑀡𑀻𑀢𑀪𑁄𑀚𑀦𑀜𑁆𑀘 𑀢𑁂𑀲𑀫𑁂𑀯 𑀔𑀻𑀭𑀤𑀥𑀺𑀲𑀧𑁆𑀧𑀺𑀦𑀯𑀦𑀻𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀼𑀢𑁆𑀢𑀁, 𑀦 𑀅𑀓𑀧𑁆𑀧𑀺𑀬𑀫𑀁𑀲𑀲𑀢𑁆𑀢𑀸𑀦𑀁 𑀲𑀧𑁆𑀧𑀺𑀆𑀤𑀺𑀦𑀺𑀯𑀸𑀭𑀡𑀢𑁆𑀣𑀁 ¶ 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀧𑀸𑀴𑀺𑀬𑀁 𑀢𑀣𑀸𑀕𑀢𑀸 𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁯𑁨. 𑀕𑀳𑀺𑀢𑀼𑀕𑁆𑀕𑀳𑀺𑀢𑀸𑀤𑀺𑀓𑁂 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑀺𑀢𑀸𑀤𑀺𑀓𑁂 𑀦𑀯𑀦𑀻𑀢𑁂𑀧𑀺 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀲𑀧𑁆𑀧𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀭𑁂𑀪𑀢𑁆𑀢𑀁, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀤𑀥𑀻𑀳𑀺, 𑀉𑀕𑁆𑀕𑀳𑀺𑀢𑀔𑀻𑀭𑀤𑀥𑀻𑀳𑀺 𑀘 𑀓𑀢𑀁 𑀦𑀯𑀦𑀻𑀢𑀁, 𑀢𑀸𑀤𑀺𑀲𑀫𑁂𑀯 𑀅𑀓𑀧𑁆𑀧𑀺𑀬𑀫𑀁𑀲𑀦𑀯𑀦𑀻𑀢𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀆𑀧𑀢𑁆𑀢𑀺𑀆𑀤𑀺𑀓𑀁 𑀲𑀩𑁆𑀩𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁄 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀧𑀭𑀺𑀪𑁄𑀕𑀸𑀧𑀭𑀺𑀪𑁄𑀕𑀦𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨).

𑁭𑁯𑁩-𑁪. 𑀪𑀺𑀓𑁆𑀔𑀽𑀦𑀁 𑀆𑀓𑀺𑀭𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀧𑀢𑁆𑀢𑁂’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀆𑀤𑀺𑀘𑁆𑀘𑀧𑀓𑁆𑀓𑀦𑁆𑀢𑀺 𑀆𑀢𑀧𑁂 𑀯𑀺𑀮𑀻𑀦𑀁. 𑀲𑀁𑀲𑀝𑁆𑀞𑀁 𑀧𑀭𑀺𑀲𑁆𑀲𑀸𑀯𑀺𑀢𑀁.

𑁭𑁯𑁫-𑁬. 𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀓𑀢𑁂𑀮𑀁. 𑀕𑀳𑀺𑀢𑀦𑁆𑀢𑀺 𑀧𑀝𑀺𑀕𑁆𑀕𑀳𑀺𑀢𑀁. 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 ¶ 𑀦𑀺𑀭𑀸𑀫𑀺𑀲𑀫𑁆𑀧𑀺 𑀲𑀸𑀬𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀲𑀁 𑀯𑀲𑀸𑀢𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀸𑀦𑀁 𑀢𑁂𑀲𑀁 𑀢𑁂𑀮𑀸𑀦𑀁 𑀯𑀲𑁂𑀦, 𑀢𑁂𑀮𑀪𑀸𑀚𑀦𑀕𑀡𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁯𑁮. 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀻𑀢𑀺 𑀏𑀭𑀡𑁆𑀟𑀫𑀥𑀼𑀓𑀲𑀸𑀲𑀧𑀩𑀻𑀚𑀸𑀦𑀁 𑀢𑀺𑀡𑁆𑀡𑀁.

𑁭𑁯𑁯. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁮𑁦𑁦. 𑀲𑀸𑀲𑀧𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀝𑀺𑀮𑁄𑀫𑁂𑀦 𑀫𑀥𑀼𑀓𑁂𑀭𑀡𑁆𑀟𑀓𑀸𑀦𑀁 𑀕𑀳𑀡𑀁. 𑀕𑀳𑁂𑀢𑁆𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀪𑀺𑀓𑁆𑀔𑀼𑀦𑀸 𑀢𑁂𑀮𑀢𑁆𑀣𑀸𑀬𑁂𑀯 𑀕𑀳𑁂𑀢𑁆𑀯𑀸 𑀞𑀧𑀺𑀢𑀸𑀦𑀁 𑀲𑀸𑀲𑀧𑀸𑀤𑀻𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁮𑁦𑁧-𑁨. 𑀦𑀸𑀴𑀺𑀓𑁂𑀭𑀜𑁆𑀘 ¶ 𑀓𑀭𑀜𑁆𑀚𑀜𑁆𑀘 𑀦𑀸𑀴𑀺𑀓𑁂𑀭𑀓𑀭𑀜𑁆𑀚𑀸𑀦𑀺, 𑀢𑁂𑀲𑀁, 𑀦𑀸𑀴𑀺𑀓𑁂𑀭𑀨𑀮𑀸𑀦𑀁, 𑀦𑀢𑁆𑀢𑀫𑀸𑀮𑀝𑁆𑀞𑀻𑀦𑀜𑁆𑀘 𑀢𑁂𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀭𑀼𑀯𑀓𑀲𑁆𑀲𑀸𑀢𑀺 𑀅𑀢𑀲𑀺𑀩𑀻𑀚𑀲𑁆𑀲. 𑀦𑀺𑀫𑁆𑀩𑀜𑁆𑀘 𑀓𑁄𑀲𑀫𑁆𑀩𑀓𑀜𑁆𑀘 𑀦𑀺𑀫𑁆𑀩𑀓𑁄𑀲𑀫𑁆𑀩𑀓𑀸𑀦𑀺, 𑀢𑁂𑀲𑀁, 𑀧𑀼𑀘𑀺𑀫𑀦𑁆𑀤𑀩𑀻𑀚𑀲𑁆𑀲 𑀘 𑀨𑀦𑁆𑀤𑀦𑀩𑀻𑀚𑀲𑁆𑀲 𑀘 𑀢𑁂𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀮𑁆𑀮𑀸𑀢𑀓𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀭𑀼𑀓𑁆𑀔𑀩𑀻𑀚𑀲𑁆𑀲. 𑀲𑀫𑀬𑀘𑁆𑀘𑀬𑁂𑀢𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂.

𑁮𑁦𑁩. 𑀬𑀸𑀯𑀓𑀸𑀮𑀺𑀓𑀪𑁂𑀤𑀜𑁆𑀘𑀸𑀢𑀺 𑀏𑀢𑁆𑀣 ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀪𑁂𑀤𑁄 𑀯𑀺𑀲𑁂𑀲𑀦𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, ‘‘𑀇𑀤𑀁 𑀯𑀢𑁆𑀣𑀼’’𑀦𑁆𑀢𑀺 𑀏𑀢𑀲𑁆𑀲 𑀅𑀚𑁆𑀛𑁄𑀳𑀭𑀡𑀻𑀬𑀯𑀺𑀲𑁂𑀲𑀺𑀢𑀩𑁆𑀩𑀲𑁆𑀲 𑀯𑀺𑀲𑁂𑀲𑀦𑀁. 𑀬𑀸𑀯𑀚𑀻𑀯𑀺𑀓𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀯𑀺𑀲𑁂𑀲𑀦𑀁. 𑀲𑁂𑀲𑀦𑁆𑀢𑀺 ‘‘𑀲𑀸𑀫𑀁𑀧𑀸𑀓𑀲𑀯𑀢𑁆𑀣𑀼𑀓 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀝𑀺𑀕𑁆𑀕𑀳𑀺𑀢𑀉𑀕𑁆𑀕𑀳𑀺𑀢𑀓𑀯𑀢𑁆𑀣𑀼𑀯𑀺𑀥𑀸𑀦𑀁 𑀲𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨) 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀁 𑀲𑁂𑀲𑀁 𑀯𑀺𑀲𑁂𑀲𑀧𑁆𑀧𑀓𑀸𑀭𑀚𑀸𑀢𑀫𑀸𑀳. 𑀏𑀢𑁆𑀣𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀢𑁂𑀮𑀯𑀺𑀦𑀺𑀘𑁆𑀙𑀬𑁂𑀧𑀺.

𑁮𑁦𑁪. 𑀅𑀘𑁆𑀙𑀲𑁆𑀲 𑀇𑀲𑀲𑁆𑀲. 𑀫𑀘𑁆𑀙𑀲𑁆𑀲 𑀚𑀮𑀚𑀲𑁆𑀲. 𑀯𑀭𑀸𑀳𑀲𑁆𑀲 𑀲𑀽𑀓𑀭𑀲𑁆𑀲. 𑀲𑀼𑀲𑀼𑀓𑀸𑀲𑀗𑁆𑀔𑀸𑀢𑀲𑁆𑀲 𑀫𑀓𑀭𑀲𑁆𑀲. 𑀫𑀘𑁆𑀙𑀯𑀘𑀦𑁂𑀦𑁂𑀯 𑀫𑀓𑀭𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑁂𑀧𑀺 𑀯𑀸𑀴𑀫𑀘𑁆𑀙𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀕𑀤𑁆𑀭𑀪𑀲𑁆𑀲 𑀔𑀭𑀲𑁆𑀲. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀢𑁆𑀢𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀦𑀁 𑀯𑀲𑀸𑀦𑀁 𑀢𑁂𑀮𑀜𑁆𑀘 𑀧𑀜𑁆𑀘𑀧𑁆𑀧𑀓𑀸𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁮𑁦𑁫. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀲𑁆𑀲 𑀘𑀸𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀲𑁆𑀲 𑀲𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀩𑁆𑀩𑀫𑁂𑀯 ¶ 𑀯𑀲𑀸𑀢𑁂𑀮𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀅𑀦𑀼𑀜𑁆𑀜𑀸𑀢𑀧𑀸𑀞𑁂 𑀅𑀘𑁆𑀙𑀯𑀲𑀸𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑁂𑀳𑀺 𑀅𑀜𑁆𑀜𑁂𑀲𑀁 𑀲𑀩𑁆𑀩𑀸𑀓𑀧𑁆𑀧𑀺𑀬𑀫𑀁𑀲𑀲𑀢𑁆𑀢𑀸𑀦𑀁 𑀯𑀲𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ¶ 𑀢𑀁 𑀲𑀗𑁆𑀕𑀳𑁂𑀢𑀼𑀁 𑀅𑀓𑀧𑁆𑀧𑀺𑀬𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀘𑁆𑀙𑀯𑀲’𑀦𑁆𑀢𑀺 𑀯𑀘𑀦𑁂𑀦 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩). 𑀏𑀢𑁆𑀣 𑀅𑀓𑀧𑁆𑀧𑀺𑀬𑀫𑀁𑀲𑀲𑀢𑁆𑀢𑀸𑀦𑀁 𑀫𑀁𑀲𑀸𑀦𑀁 𑀅𑀓𑀧𑁆𑀧𑀺𑀬𑀪𑀸𑀯𑁄 ‘‘𑀫𑀁𑀲𑁂𑀲𑀼 𑀳𑀺 𑀤𑀲 𑀫𑀦𑀼𑀲𑁆𑀲𑀳𑀢𑁆𑀣𑀺𑀅𑀲𑁆𑀲𑀲𑀼𑀦𑀔𑀅𑀳𑀺𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀅𑀘𑁆𑀙𑀢𑀭𑀘𑁆𑀙𑀸𑀦𑀁 𑀫𑀁𑀲𑀸𑀦𑀺 𑀅𑀓𑀧𑁆𑀧𑀺𑀬𑀸𑀦𑀺. 𑀯𑀲𑀸𑀲𑀼 𑀏𑀓𑀸 𑀫𑀦𑀼𑀲𑁆𑀲𑀯𑀲𑀸𑀯. 𑀔𑀻𑀭𑀸𑀤𑀻𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀧𑁆𑀧𑀺𑀬𑀯𑀘𑀦𑁂𑀦 𑀫𑀦𑀼𑀲𑁆𑀲𑀯𑀲𑀸𑀬𑀧𑀺 𑀕𑀬𑁆𑀳𑀫𑀸𑀦𑀢𑁆𑀢𑀸 𑀢𑀲𑁆𑀫𑀺𑀁 𑀦𑀻𑀳𑀭𑀺𑀢𑀼𑀫𑀸𑀳 ‘‘𑀞𑀧𑁂𑀢𑁆𑀯𑀸’’𑀢𑀺.

𑁮𑁦𑁬. 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀧𑀼𑀭𑁂𑀪𑀢𑁆𑀢𑁂. 𑀲𑀁𑀲𑀝𑁆𑀞𑀁 𑀧𑀭𑀺𑀲𑁆𑀲𑀸𑀯𑀺𑀢𑀁. ‘‘𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺 𑀇𑀤𑀁 ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦, 𑀧𑀓𑁆𑀓𑀁, 𑀲𑀁𑀲𑀝𑁆𑀞’’𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸𑀳 𑀧𑀸𑀴𑀺𑀬𑀁 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨).

𑁮𑁦𑁭. 𑀢𑀁 𑀓𑀢𑁆𑀯𑀸 𑀤𑁂𑀢𑀻𑀢𑀺 𑀅𑀧𑀝𑀺𑀕𑁆𑀕𑀳𑀺𑀢𑀯𑀲𑀁 𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀢𑁂𑀮𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀦𑀺𑀩𑁆𑀩𑀝𑁆𑀝𑀺𑀢𑀯𑀲𑀸𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩). 𑀢𑀢𑁄 𑀉𑀤𑁆𑀥𑀁 𑀲𑀢𑁆𑀢𑀸𑀳𑀫𑀦𑀢𑀺𑀓𑁆𑀓𑀫𑁆𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩). 𑀇𑀥 𑀉𑀪𑀬𑀢𑁆𑀣𑀸𑀧𑀺 𑀓𑀸𑀮𑁂, 𑀯𑀺𑀓𑀸𑀮𑁂 𑀘 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀯𑀲𑀸𑀦𑀁 𑀢𑁂𑀮𑀁 𑀤𑀺𑀬𑁆𑀬𑀫𑀸𑀦𑀁 𑀲𑀼𑀔𑀼𑀫𑀫𑀁𑀲𑀘𑀼𑀡𑁆𑀡𑀸𑀤𑀺𑀓𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀧𑀦 𑀢𑀢𑁆𑀣 𑀲𑀼𑀔𑀼𑀫𑀭𑀚𑀲𑀤𑀺𑀲𑀁 𑀫𑀁𑀲𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀅𑀝𑁆𑀞𑀺 𑀯𑀸 𑀮𑁄𑀳𑀺𑀢𑀁 𑀯𑀸 𑀳𑁄𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩).

𑁮𑁦𑁮. 𑀧𑀝𑀺𑀕𑁆𑀕𑀳𑁂𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀯𑀲’’𑀦𑁆𑀢𑀺 𑀘 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀢𑁂𑀮’’𑀦𑁆𑀢𑀺 𑀘 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 𑀧𑀘𑀺𑀢𑀼𑀁 𑀧𑀭𑀺𑀲𑁆𑀲𑀸𑀯𑀺𑀢𑀼𑀦𑁆𑀢𑀺 ¶ 𑀉𑀪𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀧𑀝𑀺𑀕𑁆𑀕𑀳𑀡𑀸𑀤𑀺𑀧𑀬𑁄𑀕𑀢𑁆𑀢𑀬𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀼𑀓𑁆𑀓𑀝𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀣𑀸𑀳 𑀧𑀸𑀴𑀺𑀬𑀁 ‘‘𑀯𑀺𑀓𑀸𑀮𑁂 𑀘𑁂 𑀪𑀺𑀓𑁆𑀔𑀯𑁂 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺 ¶ (𑀫𑀳𑀸𑀯. 𑁨𑁬𑁨). 𑀇𑀫𑀸𑀦𑀺 𑀳𑀺 𑀢𑀻𑀳𑀺 𑀧𑀬𑁄𑀕𑁂𑀳𑀺 𑀢𑀻𑀡𑀺 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀲𑁄𑀢𑀺 𑀉𑀕𑁆𑀕𑀳𑀺𑀢𑀓𑀧𑀝𑀺𑀕𑁆𑀕𑀳𑀺𑀢𑀓𑀲𑀯𑀢𑁆𑀣𑀼𑀓𑀯𑀺𑀲𑀬𑁄 𑀯𑀺𑀦𑀺𑀘𑁆𑀙𑀬𑁄 𑀘 𑀪𑀸𑀚𑀦𑀕𑀡𑀦𑀸𑀬 𑀆𑀧𑀢𑁆𑀢𑀺𑀪𑁂𑀤𑁄 𑀘𑀸𑀢𑀺 𑀏𑀯𑀁𑀧𑀓𑀸𑀭𑁄 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑁄.

𑁮𑁦𑁯. 𑀕𑀳𑀺𑀢𑀦𑁆𑀢𑀺 𑀧𑀝𑀺𑀕𑁆𑀕𑀳𑀺𑀢𑀁. 𑀫𑀥𑀼𑀓𑀭𑀻𑀓𑀢𑀦𑁆𑀢𑀺 𑀫𑀥𑀼𑀫𑀓𑁆𑀔𑀺𑀓𑀸𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀪𑀫𑀭𑀫𑀓𑁆𑀔𑀺𑀓𑀸𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀫𑀥𑀼𑀓𑀭𑀻𑀳𑀺 𑀓𑀢𑀁.

𑁮𑁧𑁦. 𑀯𑀢𑁆𑀣𑀽𑀦𑀁 𑀕𑀡𑀦𑀸𑀢𑀺 𑀫𑀥𑀼𑀧𑀝𑀮𑁂𑀦 𑀞𑀺𑀢𑀁 𑀘𑁂, 𑀧𑀝𑀮𑀕𑀡𑀦𑀸𑀬, 𑀧𑀻𑀴𑁂𑀢𑁆𑀯𑀸 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀁 𑀘𑁂, 𑀪𑀸𑀚𑀦𑀕𑀡𑀦𑀸𑀬, 𑀲𑀺𑀮𑁂𑀲𑀫𑀺𑀯 𑀧𑀢𑁆𑀣𑀺𑀦𑁆𑀦𑀁 𑀘𑁂, 𑀫𑀳𑀸𑀪𑀫𑀭𑀫𑀥𑀼𑀔𑀡𑁆𑀟𑀧𑀺𑀡𑁆𑀟𑀯𑀲𑁂𑀦, 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁂 𑀢𑁂𑀲𑀁 𑀕𑀡𑀦𑀸𑀬𑀸𑀢𑀺 𑀅𑀢𑁆𑀣𑁄.

𑁮𑁧𑁧. 𑀖𑀦𑀸𑀖𑀦𑀦𑁆𑀢𑀺 𑀏𑀢𑁆𑀣 𑀕𑀼𑀴𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀸 𑀲𑀓𑁆𑀓𑀭𑀸 𑀘 𑀖𑀦𑀧𑀓𑁆𑀓𑀁 𑀦𑀸𑀫. 𑀧𑀓𑁆𑀓𑀢𑀦𑀼𑀓𑀁 𑀨𑀸𑀡𑀺𑀢𑀁 𑀅𑀖𑀦𑀧𑀓𑁆𑀓𑀁 𑀦𑀸𑀫. 𑀉𑀘𑁆𑀙𑀼𑀲𑀺𑀮𑁂𑀲𑁄 𑀅𑀧𑀓𑁆𑀓𑀖𑀦𑀁 𑀦𑀸𑀫. 𑀉𑀘𑁆𑀙𑀼𑀤𑀡𑁆𑀟𑀢𑁄 𑀧𑀻𑀴𑀺𑀢𑀭𑀲𑁄 𑀅𑀧𑀓𑁆𑀓𑀸𑀖𑀦𑀁 𑀦𑀸𑀫. ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑁬𑁨𑁩) 𑀲𑀸𑀥𑀸𑀭𑀡𑀧𑀸𑀴𑀺𑀯𑀘𑀦𑀢𑁄, ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸; 𑀯𑀺. 𑀲𑀗𑁆𑀕 𑀅𑀝𑁆𑀞. 𑁯𑁮) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀇𑀳 𑀭𑀲𑀸𑀤𑀻𑀳𑀺 𑀉𑀘𑁆𑀙𑀼𑀧𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀓𑁂𑀘𑀺 𑀉𑀘𑁆𑀙𑀼𑀦𑁄 𑀘𑀢𑀼𑀓𑀸𑀮𑀺𑀓𑀢𑁆𑀢𑀁 𑀯𑀡𑁆𑀡𑀬𑀦𑁆𑀢𑀺, 𑀢𑀁 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑁮𑁧𑁨. 𑀨𑀸𑀡𑀺𑀢𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀢𑀲𑁆𑀫𑀺𑀁 𑀨𑀸𑀡𑀺𑀢𑁂 𑀅𑀜𑁆𑀜𑀢𑀭𑀁. 𑀕𑀳𑀺𑀢𑀁 𑀧𑀝𑀺𑀕𑁆𑀕𑀳𑀺𑀢𑀁.

𑁮𑁧𑁩. 𑀅𑀲𑀁𑀲𑀝𑁆𑀞𑁂𑀦𑀸𑀢𑀺 ¶ 𑀅𑀧𑀭𑀺𑀲𑁆𑀲𑀸𑀯𑀺𑀢𑁂𑀦. 𑀓𑀢𑀨𑀸𑀡𑀺𑀢𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀨𑀸𑀡𑀺𑀢𑀁. 𑀧𑀼𑀭𑁂𑀪𑀢𑁆𑀢𑀁 𑀕𑀳𑀺𑀢𑁂𑀦𑀸𑀢𑀺 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦. ‘‘𑀲𑀬𑀁 𑀓𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩) 𑀯𑀼𑀢𑁆𑀢𑀢𑁆𑀢𑀸 𑀓𑀢𑀦𑁆𑀢𑀺 𑀉𑀘𑁆𑀙𑀼𑀭𑀲𑁄 𑀕𑀳𑁂𑀢𑀩𑁆𑀩𑁄.

𑁮𑁧𑁬. 𑀓𑀢𑁆𑀯𑀸𑀢𑀺 𑀧𑀘𑀺𑀢𑁆𑀯𑀸 𑀨𑀸𑀡𑀺𑀢𑀁 𑀓𑀢𑁆𑀯𑀸.

𑁮𑁧𑁭. 𑀧𑀘𑁆𑀙𑀸𑀪𑀢𑁆𑀢𑀁 𑀓𑀢𑀜𑁆𑀘𑀸𑀧𑀻𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀅𑀢𑁆𑀢𑀦𑀸 𑀘 𑀓𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀘 𑀓𑀢𑀁 𑀨𑀸𑀡𑀺𑀢𑀫𑁆𑀧𑀺.

𑁮𑁧𑁮. 𑀓𑀢𑀁 ¶ …𑀧𑁂… 𑀲𑀻𑀢𑀯𑀸𑀭𑀺𑀦𑀸𑀢𑀺 𑀲𑀻𑀢𑀼𑀤𑀓𑁂 𑀫𑀥𑀼𑀓𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀺𑀢𑀭𑀲𑁂𑀦 𑀓𑀢𑀁 𑀫𑀥𑀼𑀓𑀨𑀸𑀡𑀺𑀢𑀁.

𑁮𑁧𑁯. 𑀅𑀲𑁆𑀲𑀸𑀢𑀺 𑀫𑀥𑀼𑀓𑀨𑀸𑀡𑀺𑀢𑀲𑁆𑀲. 𑀤𑀼𑀓𑁆𑀓𑀝𑀦𑁆𑀢𑀺 𑀢𑀤𑀸𑀥𑀸𑀭𑀪𑀸𑀚𑀦𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀫𑀥𑀼𑀓𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀁 𑀘𑁂 𑀳𑁄𑀢𑀺, 𑀓𑀣𑀁 𑀔𑀡𑁆𑀟𑀲𑀓𑁆𑀓𑀭𑀸𑀓𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀳𑁄𑀢𑀻𑀢𑀺 𑀯𑀺𑀘𑀸𑀭𑀡𑀸𑀬𑀁 𑀔𑀻𑀭𑀚𑀮𑁆𑀮𑀺𑀓𑀁 𑀥𑁄𑀯𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀢𑁆𑀢𑀸 𑀯𑀝𑁆𑀝𑀢𑀻𑀢𑀺 𑀧𑀭𑀺𑀳𑀭𑀦𑁆𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀔𑀡𑁆𑀟𑀲𑀓𑁆𑀓𑀭𑀁 𑀧𑀦 𑀔𑀻𑀭𑀚𑀮𑁆𑀮𑀺𑀓𑀁 𑀅𑀧𑀦𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁩). ‘‘𑀩𑀻𑀚𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑀥𑀼𑀓𑀧𑀼𑀧𑁆𑀨𑀫𑁂𑀭𑀬𑀁 𑀯𑀺𑀦𑀸 𑀆𑀫𑀓𑀜𑁆𑀘 𑀧𑀓𑁆𑀓𑀜𑁆𑀘 𑀫𑀥𑀼𑀓𑀧𑀼𑀧𑁆𑀨𑀁 𑀧𑀼𑀭𑁂𑀪𑀢𑁆𑀢𑀁 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑁮𑁨𑁦. 𑀲𑀩𑁆𑀩𑁂𑀲𑀁 𑀧𑀦 𑀨𑀮𑀸𑀦𑀦𑁆𑀢𑀺 𑀓𑀤𑀮𑀺𑀔𑀚𑁆𑀚𑀽𑀭𑀺𑀆𑀤𑀺𑀨𑀮𑀸𑀦𑀁.

𑁮𑁨𑁧. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂𑀧𑀺 𑀅𑀯𑀝𑁆𑀞𑀸𑀦𑀢𑁄 ‘‘𑀓𑀸𑀮𑀺𑀓𑀸’’𑀢𑀺 𑀇𑀫𑀺𑀦𑀸 ‘‘𑀧𑀘𑁆𑀙𑀸𑀪𑀢𑁆𑀢𑀁 𑀲𑀢𑀺 𑀧𑀘𑁆𑀘𑀬𑁂’’𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀬𑀸𑀯𑀓𑀸𑀮𑀺𑀓𑀯𑀚𑁆𑀚𑀸 𑀢𑀬𑁄 𑀓𑀸𑀮𑀺𑀓𑀸 𑀕𑀳𑁂𑀢𑀩𑁆𑀩𑀸 ¶ , ‘‘𑀧𑀼𑀭𑁂𑀪𑀢𑁆𑀢𑀁 𑀬𑀣𑀸𑀲𑀼𑀔’’𑀦𑁆𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀘𑀢𑁆𑀢𑀸𑀭𑁄𑀧𑀺 𑀕𑀳𑁂𑀢𑀩𑁆𑀩𑀸. 𑀬𑀸𑀯𑀓𑀸𑀮𑀺𑀓𑀯𑀚𑁆𑀚𑀸 𑀢𑀬𑁄 𑀓𑀸𑀮𑀺𑀓𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀓𑀸𑀮𑁂 𑀧𑀘𑁆𑀘𑀬𑁂 𑀧𑀺𑀧𑀸𑀲𑀸𑀤𑀺𑀓𑀸𑀭𑀡𑁂 𑀲𑀢𑀺 𑀓𑁂𑀯𑀮𑀫𑁆𑀧𑀺 𑀧𑀘𑁆𑀘𑁂𑀓𑀫𑁆𑀧𑀺 𑀫𑀺𑀲𑁆𑀲𑁂𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀦𑁆𑀢𑀺. 𑀓𑀸𑀮𑀺𑀓𑀸 𑀘𑀢𑁆𑀢𑀸𑀭𑁄𑀧𑀺 𑀧𑀼𑀭𑁂𑀪𑀢𑁆𑀢𑀁 𑀓𑀸𑀮𑁂 𑀬𑀸𑀯𑀫𑀚𑁆𑀛𑀦𑁆𑀳𑀸 𑀓𑁂𑀯𑀮𑀫𑁆𑀧𑀺 𑀫𑀺𑀲𑁆𑀲𑁂𑀢𑁆𑀯𑀸𑀧𑀺 𑀬𑀣𑀸𑀲𑀼𑀔𑀁 𑀅𑀲𑀢𑀺𑀧𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁮𑁨𑁨. 𑀅𑀭𑀼𑀆𑀤𑀻𑀦𑀻𑀢𑀺 𑀯𑀡𑀸𑀤𑀻𑀦𑀺. ‘‘𑀫𑀓𑁆𑀔𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀧𑀭𑀺𑀪𑁄𑀕𑁄𑀧𑀺 𑀦𑀺𑀯𑀸𑀭𑀺𑀢𑁄.

𑁮𑁨𑁩. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳’’𑀦𑁆𑀢𑀺 𑀅𑀥𑀺𑀓𑀸𑀭𑁂 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘𑀢𑁆𑀢𑁂𑀦 𑀯𑀦𑁆𑀢𑁂𑀦 𑀫𑀼𑀢𑁆𑀢𑁂𑀦 𑀅𑀦𑀧𑁂𑀓𑁆𑀔𑁄 𑀤𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀭𑀸. 𑁬𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀘𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀮𑀪𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀻’’𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀢𑁂𑀦𑀸𑀳 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀤𑀺𑀦𑁆𑀦𑀲𑁆𑀲 𑀳𑀺 𑀧𑀼𑀦 𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺𑀬𑁂𑀯 𑀦𑀢𑁆𑀣𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀧𑀦 𑀧𑀭𑀺𑀪𑁄𑀕𑁂 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀮𑀪𑀺𑀢𑁆𑀯𑀸𑀢𑀺 ¶ 𑀕𑀳𑀺𑀢𑀢𑁂𑀮𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀓𑁆𑀓𑀘𑁆𑀘𑀁, 𑀅𑀲𑀓𑁆𑀓𑀘𑁆𑀘𑀁 𑀯𑀸 𑀤𑀺𑀦𑁆𑀦𑀁 𑀮𑀪𑀺𑀢𑁆𑀯𑀸. 𑀲𑀸𑀬𑀺𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀮𑀪𑀢𑀻’’𑀢𑀺 𑀲𑁂𑀲𑁄.

𑁮𑁨𑁪. ‘‘𑀅𑀦𑀸𑀧𑀢𑁆𑀢𑀺 𑀅𑀥𑀺𑀝𑁆𑀞𑁂𑀢𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀦𑁆𑀢𑀭𑁂 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳’’𑀦𑁆𑀢𑀺 𑀲𑁂𑀲𑁄, 𑀲𑀩𑁆𑀩𑀧𑀤𑁂𑀳𑀺𑀧𑀺 𑀬𑀼𑀚𑁆𑀚𑀢𑀺. 𑀅𑀥𑀺𑀝𑁆𑀞𑁂𑀢𑀻𑀢𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀲𑀧𑁆𑀧𑀺𑀜𑁆𑀘 𑀢𑁂𑀮𑀜𑁆𑀘 𑀯𑀲𑀜𑁆𑀘 𑀫𑀼𑀤𑁆𑀥𑀦𑀺 𑀢𑁂𑀮𑀁 𑀯𑀸 𑀅𑀩𑁆𑀪𑀜𑁆𑀚𑀦𑀁 𑀯𑀸, 𑀫𑀥𑀼𑀁 𑀅𑀭𑀼𑀫𑀓𑁆𑀔𑀦𑀁, 𑀨𑀸𑀡𑀺𑀢𑀁 𑀖𑀭𑀥𑀽𑀧𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀝𑁆𑀞𑁂𑀢𑀺. 𑀅𑀥𑀺𑀝𑁆𑀞𑀺𑀢𑁂𑀦 𑀅𑀦𑀥𑀺𑀝𑁆𑀞𑀺𑀢𑀁 𑀘𑁂 𑀫𑀺𑀲𑁆𑀲𑀁 𑀳𑁄𑀢𑀺, 𑀧𑀼𑀦𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀜𑁆𑀜𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑁂𑀢𑀺. 𑀲𑀘𑁂 𑀢𑀣𑀸 𑀤𑀺𑀦𑁆𑀦𑀁 𑀅𑀜𑁆𑀜𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 ¶ , 𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀇𑀢𑀭𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀢𑁂𑀲𑀁 𑀅𑀦𑀸𑀧𑀢𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁.

𑀯𑀺𑀦𑀲𑁆𑀲𑀢𑀻𑀢𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀬𑀣𑀸 𑀅𑀧𑀭𑀺𑀪𑁄𑀕𑀁 𑀳𑁄𑀢𑀺, 𑀢𑀣𑀸 𑀘𑁄𑀭𑀺𑀓𑀸𑀬 𑀳𑀭𑀡𑀸𑀤𑀺𑀯𑀲𑁂𑀦 𑀦𑀲𑁆𑀲𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀦𑀲𑁆𑀲𑀢𑀻𑀢𑀺 𑀅𑀧𑀭𑀺𑀪𑁄𑀕𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁫). 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀢𑀻𑀢𑀺 𑀅𑀜𑁆𑀜𑁄 𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑁄 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀸𑀢𑀺.

𑁮𑁨𑁫. 𑀅𑀓𑀣𑀺𑀦𑀘𑀺𑀢𑁆𑀢𑁂𑀦 𑀲𑀢𑁆𑀣𑀼𑀦𑀸 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂𑀯 𑀧𑀞𑀫𑁂𑀦 𑀓𑀣𑀺𑀦𑁂𑀦 𑀲𑀫𑀸 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀓𑀣𑀺𑀦𑀘𑀺𑀢𑁆𑀢𑁂𑀦𑀸𑀢𑀺 𑀫𑀳𑀸𑀓𑀭𑀼𑀡𑀸𑀭𑀲𑁂𑀦 𑀢𑀺𑀦𑁆𑀢𑀢𑀸𑀬 𑀅𑀓𑀓𑁆𑀓𑀲𑀘𑀺𑀢𑁆𑀢𑁂𑀦, 𑀅𑀯𑀺𑀳𑀺𑀁𑀲𑀸𑀪𑀺𑀭𑀢𑀘𑀺𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀣𑀼𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀤𑀻𑀳𑀺 𑀅𑀢𑁆𑀣𑁂𑀳𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸, 𑀢𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀤𑀲𑀩𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸.

𑁮𑁨𑁬. 𑀕𑀺𑀫𑁆𑀳𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀫𑀸𑀲𑀸𑀦’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺, 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀕𑀺𑀫𑁆𑀳𑁂𑀲𑀼 𑀘𑀢𑀽𑀲𑀼 𑀫𑀸𑀲𑁂𑀲𑀽𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀺 ‘‘𑀫𑀸𑀲𑁄 𑀲𑁂𑀲𑁄’’𑀢𑀺, 𑀏𑀢𑁆𑀣 ‘‘𑀯𑀢𑁆𑀢𑀩𑁆𑀩𑁂 𑀓𑀸𑀮𑁂’’𑀢𑀺 𑀲𑁂𑀲𑁄. 𑀨𑀕𑁆𑀕𑀼𑀦𑀫𑀸𑀲𑀓𑀡𑁆𑀳𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀚𑁂𑀝𑁆𑀞𑀫𑀸𑀲𑀧𑀼𑀡𑁆𑀡𑀫𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀢𑀻𑀲𑀼 𑀫𑀸𑀲𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀲𑁂𑀲𑀫𑀸𑀲𑁄 𑀦𑀸𑀫 𑀚𑁂𑀝𑁆𑀞𑀫𑀸𑀲𑀲𑁆𑀲 𑀓𑀡𑁆𑀳𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀆𑀲𑀸𑀴𑁆𑀳𑀺𑀫𑀸𑀲𑀧𑀼𑀡𑁆𑀡𑀫𑀺𑀧𑀭𑀺𑀬𑁄𑀲𑀸𑀦𑁄. 𑀕𑀺𑀫𑁆𑀳𑀸𑀦𑀁 𑀫𑀸𑀲𑁄 𑀲𑁂𑀲𑁄𑀢𑀺 𑀯𑀢𑁆𑀢𑀩𑁆𑀩𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄.

𑀇𑀫𑀲𑁆𑀫𑀺𑀁 ¶ ¶ 𑀧𑀘𑁆𑀙𑀺𑀫𑁂 𑀕𑀺𑀫𑁆𑀳𑀫𑀸𑀲𑁂 𑀚𑁂𑀝𑁆𑀞𑀫𑀸𑀲𑀲𑁆𑀲 𑀓𑀡𑁆𑀳𑀧𑀓𑁆𑀔𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀘𑁂 𑀦 𑀮𑀤𑁆𑀥𑀸, 𑀧𑀭𑀺𑀬𑁂𑀲𑀺𑀢𑀼𑀁 𑀮𑀤𑁆𑀥𑀁 𑀓𑀸𑀢𑀼𑀁 𑀔𑁂𑀢𑁆𑀢𑀁, 𑀅𑀥𑀺𑀝𑁆𑀞𑀸𑀦𑀦𑀺𑀯𑀸𑀲𑀦𑀸𑀦𑀁 𑀅𑀔𑁂𑀢𑁆𑀢𑀁. 𑀆𑀲𑀸𑀴𑁆𑀳𑀺𑀧𑀼𑀭𑀺𑀫𑀧𑀓𑁆𑀔𑁄 𑀧𑀭𑀺𑀬𑁂𑀲𑀦𑀓𑀭𑀡𑀦𑀺𑀯𑀸𑀲𑀦𑀸𑀦𑀁 𑀔𑁂𑀢𑁆𑀢𑀁, 𑀅𑀥𑀺𑀝𑁆𑀞𑀸𑀢𑀼𑀁 𑀅𑀔𑁂𑀢𑁆𑀢𑀁. 𑀆𑀲𑀸𑀴𑁆𑀳𑀺𑀓𑀡𑁆𑀳𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀬𑀸𑀯 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀻, 𑀇𑀤𑀁 𑀘𑀢𑀼𑀦𑁆𑀦𑀫𑁆𑀧𑀺 𑀔𑁂𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 ‘‘𑀬𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁨𑁮) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀧𑀼𑀩𑁆𑀩𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑀁 𑀉𑀧𑀲𑀗𑁆𑀓𑀫𑁆𑀫 ‘‘𑀤𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀘𑀦𑁂𑀦 𑀅𑀯𑀺𑀜𑁆𑀜𑀸𑀧𑁂𑀢𑁆𑀯𑀸 ‘‘𑀓𑀸𑀮𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀲𑀫𑀬𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬, 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑁂𑀦𑁆𑀢𑀻’’𑀢𑀺 𑀏𑀯𑀁 𑀲𑀢𑀼𑀧𑁆𑀧𑀸𑀤𑀫𑀢𑁆𑀢𑀓𑀭𑀡𑁂𑀦 𑀧𑀭𑀺𑀬𑁂𑀲𑁂𑀬𑁆𑀬.

𑀲𑀸𑀝𑀺𑀓𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀁. ‘‘𑀅𑀤𑁆𑀥𑀫𑀸𑀲𑁄 𑀲𑁂𑀲𑁄’’𑀢𑀺 𑀇𑀤𑀁 ‘‘𑀕𑀺𑀫𑁆𑀳𑀸𑀦’’𑀦𑁆𑀢𑀺 𑀇𑀫𑀺𑀦𑀸𑀯 𑀬𑀼𑀚𑁆𑀚𑀢𑀺. 𑀢𑀢𑁆𑀣 ‘‘𑀯𑀢𑁆𑀢𑀩𑁆𑀩𑁂 𑀓𑀸𑀮𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀆𑀲𑀸𑀴𑁆𑀳𑀺𑀫𑀸𑀲𑀲𑁆𑀲 𑀧𑀼𑀭𑀺𑀫𑀧𑀓𑁆𑀔𑁂𑀢𑀺 𑀅𑀢𑁆𑀣𑁄. 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀮𑀤𑁆𑀥’’𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀢𑀼𑀧𑁆𑀧𑀸𑀤𑁂𑀦 𑀯𑀸 𑀅𑀯𑀲𑁂𑀲𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀓𑀼𑀮𑀸𑀦𑀁 𑀯𑀸 𑀲𑀦𑁆𑀢𑀺𑀓𑀸 𑀮𑀤𑁆𑀥𑀁 𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀩𑀺𑀦𑁆𑀤𑀼𑀤𑀸𑀦𑀯𑀲𑁂𑀦 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀤𑀳𑁂𑀢𑀺 𑀦𑀺𑀯𑀸𑀲𑁂𑀬𑁆𑀬.

𑁮𑁨𑁭-𑁮. 𑀧𑀺𑀝𑁆𑀞𑀺𑀲𑀫𑁆𑀫𑀢𑁂 𑀲𑀫𑀬𑁂𑀢𑀺 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀦 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸 𑀇𑀫𑁂 𑀲𑀢𑁆𑀢 𑀫𑀸𑀲𑀸 𑀧𑀺𑀝𑁆𑀞𑀺𑀲𑀫𑀬𑁄 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁮) 𑀏𑀯𑀁 𑀤𑀲𑁆𑀲𑀺𑀢𑁂𑀲𑀼 𑀲𑀢𑁆𑀢𑀲𑀼 𑀫𑀸𑀲𑁂𑀲𑀼. 𑀜𑀸𑀢𑀓𑀸𑀜𑁆𑀜𑀸𑀢𑀓𑀸𑀤𑀺𑀦𑁄 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀧𑀯𑀸𑀭𑀺𑀢𑀸𑀧𑀯𑀸𑀭𑀺𑀢𑀸𑀦𑀁 𑀲𑀗𑁆𑀕𑀳𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄’’𑀢𑀺.

𑀢𑁂𑀲𑀼𑀬𑁂𑀯𑀸𑀢𑀺 ¶ 𑀜𑀸𑀢𑀓𑀅𑀜𑁆𑀜𑀸𑀢𑀓𑀧𑀯𑀸𑀭𑀺𑀢𑀅𑀧𑁆𑀧𑀯𑀸𑀭𑀺𑀢𑁂𑀲𑀼. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀳𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀤𑀲𑁆𑀲𑀺𑀢𑀁. 𑀲𑀸 𑀆𑀧𑀢𑁆𑀢𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁮). 𑀜𑀸𑀢𑀓𑀧𑀯𑀸𑀭𑀺𑀢𑁂𑀲𑀼 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀧𑀺𑀝𑁆𑀞𑀺𑀲𑀫𑀬𑀢𑁆𑀢𑀸 𑀇𑀫𑀺𑀦𑀸 ¶ 𑀆𑀧𑀢𑁆𑀢𑀺 𑀳𑁄𑀢𑀺. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀘 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁨𑁯-𑁩𑁦. 𑀅𑀜𑁆𑀜𑀸𑀢𑀓𑀸𑀤𑀺𑀦𑁄 𑀓𑀢𑁆𑀯𑀸 𑀧𑀦 𑀲𑀢𑀼𑀧𑁆𑀧𑀸𑀤𑀦𑁆𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀲𑀗𑁆𑀕𑀳𑁄. 𑀓𑀼𑀘𑁆𑀙𑀺𑀲𑀜𑁆𑀜𑀺𑀢𑁂 𑀲𑀫𑀬𑁂𑀢𑀺 𑀬𑀣𑀸𑀯𑀼𑀢𑁆𑀢𑀧𑀺𑀝𑁆𑀞𑀺𑀲𑀫𑀬𑁂 𑀲𑀢𑁆𑀢𑀫𑀸𑀲𑁂 𑀯𑀺𑀦𑀸 𑀇𑀢𑀭𑁂 𑀧𑀜𑁆𑀘 𑀫𑀸𑀲𑀸 𑀯𑀼𑀢𑁆𑀢𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀦 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀇𑀫𑁂 𑀧𑀜𑁆𑀘 𑀫𑀸𑀲𑀸 𑀓𑀼𑀘𑁆𑀙𑀺𑀲𑀫𑀬𑁄 𑀦𑀸𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁮). 𑀯𑀢𑁆𑀣𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀁. 𑀅𑀤𑀺𑀦𑁆𑀦𑀧𑀼𑀩𑁆𑀩𑁂𑀲𑀽𑀢𑀺 𑀬𑁂𑀳𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀦 𑀤𑀺𑀦𑁆𑀦𑀧𑀼𑀩𑁆𑀩𑀸, 𑀢𑁂𑀲𑀼, 𑀇𑀫𑀺𑀦𑀸 𑀯𑀢𑁆𑀢𑀪𑁂𑀤𑀲𑁆𑀲 𑀓𑀸𑀭𑀡𑀫𑀸𑀳. 𑀇𑀳 𑀯𑀢𑁆𑀢𑀪𑁂𑀤𑁄 𑀦𑀸𑀫 ‘‘𑀬𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀤𑁂𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁬𑁨𑁮) 𑀤𑀺𑀦𑁆𑀦𑀧𑀼𑀩𑁆𑀩𑁂𑀲𑀼 𑀓𑀸𑀢𑀩𑁆𑀩𑀲𑁆𑀲 𑀲𑀢𑀼𑀧𑁆𑀧𑀸𑀤𑀲𑁆𑀲 𑀅𑀤𑀺𑀦𑁆𑀦𑀧𑀼𑀩𑁆𑀩𑁂𑀲𑀼 𑀓𑀭𑀡𑀁. 𑀩𑁆𑀬𑀢𑀺𑀭𑁂𑀓𑀢𑁄 𑀤𑀺𑀦𑁆𑀦𑀧𑀼𑀩𑁆𑀩𑁂𑀲𑀼 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀢𑀢𑁆𑀭𑀸𑀢𑀺 𑀅𑀜𑁆𑀜𑀸𑀢𑀓𑀸𑀤𑀺𑀫𑁆𑀳𑀺. ‘‘𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺𑀁 𑀆𑀳. 𑀬𑀣𑀸𑀳 𑀓𑀼𑀘𑁆𑀙𑀺𑀲𑀫𑀬𑀘𑀢𑀼𑀓𑁆𑀓𑁂 ‘‘𑀯𑀺𑀜𑁆𑀜𑀢𑁆𑀢𑀺𑀫𑁆𑀧𑀺 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀅𑀬𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀧𑀓𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑁂𑀲𑀼𑀧𑀺 𑀳𑁄𑀢𑀻𑀢𑀺 𑀇𑀤𑀁 ¶ 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀤𑀁 𑀧𑀦 𑀧𑀓𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑁂𑀲𑀼𑀧𑀺 𑀳𑁄𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁮) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺.

𑁮𑁩𑁧. 𑀑𑀯𑀲𑁆𑀲𑀸𑀧𑁂𑀢𑀻𑀢𑀺 𑀆𑀓𑀸𑀲𑀢𑁄 𑀧𑀢𑀺𑀢𑀉𑀤𑀓𑁂𑀦𑁂𑀯 𑀓𑀸𑀬𑀁 𑀢𑁂𑀫𑁂𑀢𑀺, 𑀇𑀫𑀺𑀦𑀸 ‘‘𑀖𑀝𑀸𑀤𑀻𑀳𑀺 𑀑𑀲𑀺𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. ‘‘𑀦𑀺𑀩𑁆𑀩𑀓𑁄𑀲𑀫𑁆𑀩𑀼𑀦𑀸 𑀦𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀘𑀻𑀯𑀭𑁂𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀲𑀢𑀺𑀬𑀸𑀧𑀺. ‘‘𑀧𑀭𑀺𑀬𑁄𑀲𑀸𑀦𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀩𑀺𑀦𑁆𑀤𑀼𑀕𑀡𑀦𑀸𑀬𑀸𑀢𑀺 𑀤𑀻𑀧𑁂𑀢𑀺. 𑀯𑀺𑀯𑀝𑀗𑁆𑀕𑀡𑁂𑀢𑀺 𑀭𑀼𑀓𑁆𑀔𑀸𑀤𑀺𑀦𑀸 𑀓𑁂𑀦𑀘𑀺 𑀅𑀦𑀸𑀯𑀝𑀝𑁆𑀞𑀸𑀦𑁂.

𑁮𑁩𑁨. 𑀫𑀸𑀲𑀲𑁆𑀫𑀺𑀦𑁆𑀢𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀲𑁆𑀫𑀺𑀁.

𑁮𑁩𑁩. ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀢𑀺 𑀏𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁩𑁦) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀳𑀸𑀬𑀦𑁆𑀢𑀲𑁆𑀲 𑀘𑁄𑀭𑀼𑀧𑀤𑁆𑀤𑀯𑁄 𑀆𑀧𑀤𑀸 𑀦𑀸𑀫. 𑀦𑁆𑀳𑀸𑀦𑀓𑁄𑀝𑁆𑀞𑀓𑀦𑁆𑀢𑀺 𑀦𑀳𑀸𑀦𑀢𑁆𑀣𑀸𑀬 𑀓𑀢𑀓𑁄𑀝𑁆𑀞𑀓𑀁. ‘‘𑀯𑀸𑀧𑀻’’𑀢𑀺 𑀇𑀫𑀺𑀦𑀸 𑀧𑁄𑀓𑁆𑀔𑀭𑀡𑀺𑀚𑀸𑀢𑀲𑁆𑀲𑀭𑀸𑀤𑀬𑁄 ¶ 𑀉𑀧𑀮𑀓𑁆𑀔𑀺𑀢𑀸. 𑀦𑁆𑀳𑀸𑀬𑀦𑁆𑀢𑀲𑁆𑀲𑀸𑀢𑀺 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀦𑀳𑀸𑀬𑀦𑁆𑀢𑀲𑁆𑀲𑀸𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. ‘‘𑀆𑀓𑀸𑀲𑀢𑁄 𑀧𑀢𑀺𑀢𑀉𑀤𑀓𑁂𑀦𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁯) 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁.

𑁮𑁩𑁪. 𑀓𑁆𑀭𑀺𑀬𑀦𑁆𑀢𑀺 𑀅𑀓𑀸𑀮𑁂 𑀧𑀭𑀺𑀬𑁂𑀲𑀦𑀓𑀭𑀡𑀅𑀥𑀺𑀝𑁆𑀞𑀸𑀦𑀦𑀺𑀯𑀸𑀲𑀦𑁂𑀳𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑀺𑀭𑀺𑀬𑀁. 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀯𑀺𑀜𑁆𑀜𑀸𑀧𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀓𑀣𑀸𑀯𑀡𑁆𑀡𑀦𑀸.

𑁮𑁩𑁫. ‘‘𑀬𑁄 ¶ 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸’’𑀢𑀺 (𑀧𑀸𑀭𑀸. 𑁬𑁩𑁨) 𑀯𑀘𑀦𑀢𑁄 𑀲𑀸𑀫𑀦𑁆𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽’’𑀢𑀺 𑀘 𑀤𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀲𑁆𑀲’’𑀇𑀢𑀺 𑀘 𑀮𑀩𑁆𑀪𑀢𑀺. 𑀘𑀻𑀯𑀭𑀦𑁆𑀢𑀺 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁. ‘‘𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀘𑁆𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁬𑁩𑁨) 𑀯𑀘𑀦𑀢𑁄 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀓𑀼𑀧𑀺𑀢𑀲𑁆𑀲 𑀅𑀦𑀢𑁆𑀢𑀫𑀦𑀲𑁆𑀲𑀸’’𑀢𑀺 𑀲𑁂𑀲𑁄, 𑀓𑀼𑀧𑀺𑀢𑀲𑁆𑀲 𑀅𑀦𑀢𑁆𑀢𑀫𑀦𑀲𑁆𑀲 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀘𑀻𑀯𑀭𑀁. ‘‘𑀲𑀓𑀲𑀜𑁆𑀜𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀸𑀭𑀸𑀚𑀺𑀓𑀸𑀬 𑀅𑀯𑀢𑁆𑀣𑀼𑀪𑀸𑀯𑀁 𑀤𑀻𑀧𑁂𑀢𑀺.

𑁮𑁩𑁬. 𑀢𑀣𑀸𑀢𑀺 𑀏𑀓𑀸𑀬𑁂𑀯 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺.

𑁮𑁩𑁭. 𑀯𑀢𑁆𑀣𑀸𑀦𑀦𑁆𑀢𑀺 𑀘𑀻𑀯𑀭𑀸𑀦𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲.

𑁮𑁪𑁧. 𑀲𑀗𑁆𑀖𑀸𑀝𑀺𑀁 𑀕𑀡𑁆𑀳, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀕𑀡𑁆𑀳𑀸𑀢𑀺 𑀬𑁄𑀚𑀦𑀸.

𑁮𑁪𑁨. 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀦𑁆𑀢𑀺 𑀏𑀢𑁆𑀣 ‘‘𑀘𑀻𑀯𑀭’’𑀦𑁆𑀢𑀺 𑀮𑀩𑁆𑀪𑀢𑀺. 𑀆𑀬𑀸𑀫𑀢𑁄 𑀯𑀟𑁆𑀠𑀓𑀺𑀳𑀢𑁆𑀣𑀁 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁 𑀯𑀢𑁆𑀣𑀔𑀡𑁆𑀟𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀯𑀺𑀓𑀧𑁆𑀧𑀦𑀼𑀧𑀕𑀁 𑀦𑀸𑀫. 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀬𑁄𑀚𑀦𑀸, 𑀅𑀦𑁆𑀢𑀫𑀲𑁄 𑀲𑀼𑀘𑀺𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀁 𑀧𑀼𑀕𑁆𑀕𑀮𑀁. 𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀘𑁆𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲. 𑀓𑀸𑀭𑀺𑀢𑀦𑁆𑀢𑀲𑁆𑀲 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 ‘‘𑀧𑀭’’𑀦𑁆𑀢𑀺 𑀘 ‘‘𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 𑀘 𑀓𑀫𑁆𑀫𑀤𑁆𑀯𑀬𑀕𑀳𑀡𑀁. 𑀅𑀜𑁆𑀜𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀯𑀺𑀲𑁂𑀲𑀦𑀁. 𑀤𑀼𑀓𑁆𑀓𑀝𑀁 𑀯𑀢𑁆𑀣𑀼𑀕𑀡𑀦𑀸𑀬, 𑀯𑀘𑀦𑀕𑀡𑀦𑀸𑀬 𑀘.

𑁮𑁪𑁪. 𑀏𑀯𑀦𑁆𑀢𑀺 ¶ 𑀬𑀣𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁, 𑀏𑀯𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂…𑀧𑁂… 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸 ‘‘𑀤𑀺𑀦𑁆𑀦’’𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑁂𑀦 𑀲𑀳 𑀬𑁄𑀚𑁂𑀢𑀩𑁆𑀩𑀁, ‘‘𑀘𑀻𑀯𑀭’’𑀦𑁆𑀢𑀺 𑀧𑀓𑀭𑀡𑀢𑁄 ¶ 𑀮𑀩𑁆𑀪𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁪𑁫. 𑀲𑁄 𑀯𑀸𑀢𑀺 𑀬𑀲𑁆𑀲 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀲𑁄 𑀏𑀯 𑀯𑀸 𑀪𑀺𑀓𑁆𑀔𑀼. 𑀢𑀼𑀝𑁆𑀞𑁄 𑀯𑀸 𑀤𑀼𑀝𑁆𑀞𑁄 𑀯𑀸 𑀲𑁄 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀯𑀺𑀲𑁆𑀲𑀸𑀲𑀫𑁂𑀯 𑀯𑀸𑀢𑀺 𑀯𑀺𑀲𑁆𑀲𑀸𑀲𑀁 𑀓𑀢𑁆𑀯𑀸 𑀕𑀡𑁆𑀳𑀢𑁄𑀢𑀺 𑀬𑁄𑀚𑀦𑀸.

𑁮𑁪𑁬. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑀘𑀻𑀯𑀭𑀘𑁆𑀙𑀺𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸.

𑁮𑁪𑁭. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀯𑀢𑁆𑀣𑀯𑀸𑀬𑀸𑀧𑀦𑀁 𑀲𑀦𑁆𑀥𑀸𑀬 𑀬𑀸𑀘𑀺𑀢𑁆𑀯𑀸. 𑀙𑀩𑁆𑀩𑀺𑀥𑀁 𑀲𑀼𑀢𑁆𑀢𑀦𑁆𑀢𑀺 𑀧𑀤𑀪𑀸𑀚𑀦𑁂 ‘‘𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕’’𑀦𑁆𑀢𑀺 (𑀧𑀸𑀭𑀸. 𑁬𑁩𑁮) 𑀆𑀕𑀢𑀁 𑀙𑀧𑁆𑀧𑀓𑀸𑀭𑀁 𑀲𑀼𑀢𑁆𑀢𑀁. 𑀓𑀫𑁆𑀩𑀮𑀦𑁆𑀢𑀺 𑀏𑀴𑀓𑀮𑁄𑀫𑀲𑀼𑀢𑁆𑀢𑀁. 𑀲𑀸𑀦𑀼𑀮𑁄𑀫𑀸𑀦𑀺 𑀙𑀧𑁆𑀧𑀓𑀸𑀭𑀲𑀼𑀢𑁆𑀢𑀸𑀦𑀺 𑀳𑁂𑀝𑁆𑀞𑀸 𑀘𑀻𑀯𑀭𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀻𑀯𑀭𑀢𑁆𑀣𑀁 𑀯𑀢𑁆𑀣𑀁 ‘‘𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀯𑀸𑀬𑁂𑀳𑀻𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑀺 𑀧𑁂𑀲𑀓𑀸𑀭𑁂𑀳𑀺. 𑀧𑁄𑀢𑁆𑀣𑀓𑁂𑀲𑀼 ‘‘𑀯𑀸𑀬𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, ‘‘𑀲𑀘𑁂’’𑀢𑀺 𑀇𑀫𑀺𑀦𑀸 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀲𑁄 𑀅𑀧𑀸𑀞𑁄. ‘‘𑀯𑀸𑀬𑀸𑀧𑁂𑀢𑀺 𑀦 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀻𑀢𑀺 𑀲𑀘𑁂 𑀯𑀸𑀬𑀸𑀧𑁂𑀢𑀻𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀬𑀤𑀺 𑀯𑀸𑀬𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁮𑁪𑁮. 𑀢𑀣𑀸 𑀅𑀓𑀧𑁆𑀧𑀺𑀬𑁄. 𑀓𑀻𑀤𑀺𑀲𑁄𑀢𑀺 𑀆𑀳 ‘‘𑀅𑀜𑁆𑀜𑀸𑀢𑀓𑀸𑀤𑀺𑀓𑁄’’𑀢𑀺. 𑀅𑀜𑁆𑀜𑀸𑀢𑀓𑀸𑀤𑀺𑀓𑁄𑀢𑀺 𑀅𑀜𑁆𑀜𑀸𑀢𑀓𑁄 𑀆𑀤𑀺 𑀬𑀲𑁆𑀲 𑀲𑁄 𑀅𑀜𑁆𑀜𑀸𑀢𑀓𑀸𑀤𑀺𑀓𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀯𑀸𑀭𑀺𑀢𑁄 𑀕𑀳𑀺𑀢𑁄. 𑀬𑁄 𑀪𑀺𑀓𑁆𑀔𑀼 𑀢𑀦𑁆𑀢𑀯𑀸𑀬𑀲𑁆𑀲 𑀅𑀜𑁆𑀜𑀸𑀢𑀓𑁄, 𑀢𑁂𑀦 𑀅𑀧𑁆𑀧𑀯𑀸𑀭𑀺𑀢𑁄 𑀘, 𑀢𑀲𑁆𑀲 𑀅𑀜𑁆𑀜𑀸𑀢𑀓𑀸𑀤𑀺𑀓𑁄 𑀪𑀺𑀓𑁆𑀔𑀼𑀦𑀸 𑀯𑀺𑀜𑁆𑀜𑀢𑁆𑀢𑁄 𑀲𑁄 𑀢𑀦𑁆𑀢𑀯𑀸𑀬𑁄 𑀅𑀓𑀧𑁆𑀧𑀺𑀬𑁄𑀢𑀺 𑀅𑀢𑁆𑀣𑁄.

𑁮𑁪𑁯. 𑀅𑀓𑀧𑁆𑀧𑀺𑀬𑁂𑀦𑀸𑀢𑀺 ¶ 𑀯𑀺𑀜𑁆𑀜𑀸𑀧𑀺𑀢𑁂𑀦. 𑀯𑀸𑀬𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀯𑀸𑀬𑀸𑀧𑁂𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁬𑁩𑁮).

𑁮𑁫𑁦. 𑀓𑀺𑀢𑁆𑀢𑀓𑁂 ¶ 𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀤𑀢𑁆𑀣𑀺𑀫𑀢𑁆𑀢𑁂’’𑀢𑀺𑀆𑀤𑀺. 𑀳𑀢𑁆𑀣𑀫𑀢𑁆𑀢𑁂𑀢𑀺 𑀭𑀢𑀦𑀫𑀢𑁆𑀢𑁂. 𑀧𑀤𑀪𑀸𑀚𑀦𑁂 ‘‘𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀓𑀲𑁆𑀫𑀸 𑀆𑀳𑀸𑀢𑀺? 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣𑀸𑀧𑀺 𑀢𑀣𑀸 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀢𑀤𑀦𑀦𑁆𑀢𑀭𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀸 𑀯𑀻𑀢𑀯𑀻𑀢𑀝𑁆𑀞𑀸𑀦𑀁 𑀧𑀝𑀺𑀮𑀤𑁆𑀥𑀫𑁂𑀯 𑀳𑁄𑀢𑀺, 𑀧𑀤𑀪𑀸𑀚𑀦𑁂𑀧𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀸𑀯 𑀘𑀻𑀯𑀭𑀁 𑀯𑀟𑁆𑀠𑀢𑀺, 𑀢𑀸𑀯 𑀇𑀫𑀺𑀦𑀸 𑀧𑀫𑀸𑀡𑁂𑀦 𑀆𑀧𑀢𑁆𑀢𑀺𑀬𑁄 𑀯𑀟𑁆𑀠𑀦𑁆𑀢𑀺. 𑀨𑀮𑀓𑁂𑀧𑀺 𑀘𑀸𑀢𑀺 𑀏𑀢𑁆𑀣 𑀨𑀮𑀓𑀁 𑀦𑀸𑀫 𑀢𑀼𑀭𑀺𑀯𑀻𑀢𑀝𑁆𑀞𑀸𑀦𑀁, 𑀬𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀨𑀮𑀓𑁂 𑀨𑀮𑀓𑁂𑀧𑀺 𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁮𑁫𑁧. 𑀢𑁂𑀦𑁂𑀯𑀸𑀢𑀺 𑀯𑀺𑀜𑁆𑀜𑀢𑁆𑀢𑀢𑀦𑁆𑀢𑀯𑀸𑀬𑁂𑀦𑁂𑀯. 𑀓𑀧𑁆𑀧𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀲𑀼𑀢𑁆𑀢𑀁. 𑀓𑀧𑁆𑀧𑀺𑀬𑁂𑀦 𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀢𑀣𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁮𑁫𑁨. 𑀏𑀓𑀦𑁆𑀢𑀭𑀺𑀓𑀢𑁄 𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑁂𑀯 𑀲𑀼𑀢𑁆𑀢𑁂𑀳𑀺 𑀯𑀻𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸, 𑀅𑀦𑁆𑀢𑀭𑀦𑁆𑀢𑀭𑀸 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀸𑀦𑀁 𑀧𑀲𑀸𑀭𑀡𑁂𑀦, 𑀯𑀸𑀬𑀦𑁂𑀦 𑀘 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀻𑀖𑀢𑁄 𑀯𑀸 𑀢𑀺𑀭𑀺𑀬𑀢𑁄 𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑁂𑀯 𑀲𑀼𑀢𑁆𑀢𑁂𑀳𑀺 𑀯𑀻𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸, 𑀤𑀻𑀖𑀢𑁄 𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀢𑀺𑀭𑀺𑀬𑀁 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑁂𑀦 𑀯𑀻𑀢𑁂 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀸𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀻𑀖𑀢𑁄 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀢𑀺𑀭𑀺𑀬𑀢𑁄 𑀓𑀧𑁆𑀧𑀺𑀬𑀲𑀼𑀢𑁆𑀢𑁂𑀦 ¶ 𑀯𑀻𑀢𑁂𑀢𑀺 𑀅𑀬𑀫𑁂𑀢𑁆𑀣 𑀯𑀺𑀧𑀭𑀺𑀬𑀸𑀬𑁄. 𑀯𑀻𑀢𑁂𑀢𑀺 𑀏𑀢𑁆𑀣 ‘‘𑀨𑀮𑀓𑁂 𑀨𑀮𑀓𑁂’’𑀢𑀺 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀁.

𑁮𑁫𑁩. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑀺 𑀢𑀦𑁆𑀢𑀯𑀸𑀬𑁂𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑁂 𑀯𑀻𑀢𑁂 𑀨𑀮𑀓𑁂 𑀨𑀮𑀓𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀣 𑀯𑀸 𑀯𑁂 𑀢𑀲𑁆𑀫𑀺𑀁 𑀓𑀢𑁂 𑀯𑀻𑀢𑁂𑀢𑀺 𑀅𑀢𑁆𑀣𑁄.

𑁮𑁫𑁪-𑁫. 𑀢𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑀸 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀯𑀸𑀭𑁂𑀦𑁂𑀯 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀲𑀘𑁂 𑀯𑀺𑀦𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀓𑀧𑁆𑀧𑀺𑀬𑁂𑀦 𑀢𑀦𑁆𑀢𑀯𑀸𑀬𑁂𑀦 𑀯𑀻𑀢𑁂. 𑀙𑀦𑁆𑀤𑀸𑀦𑀼𑀭𑀓𑁆𑀔𑀦𑀢𑁆𑀣𑀁 ‘‘𑀯𑀺𑀢𑁂’’𑀢𑀺 𑀯𑀼𑀢𑁆𑀢𑀁. 𑀧𑀫𑀸𑀡𑀲𑁆𑀫𑀺𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀲𑁆𑀫𑀺𑀁. 𑀢𑀤𑀽𑀦𑁂𑀢𑀺 𑀢𑀢𑁄 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀢𑁄 𑀊𑀦𑁂. 𑀇𑀢𑀭𑁂𑀦𑀸𑀢𑀺 𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦. 𑀉𑀪𑀬𑀢𑁆𑀣𑀸𑀢𑀺 𑀧𑀫𑀸𑀡𑀲𑁆𑀫𑀺𑀁, 𑀢𑀤𑀽𑀦𑁂 𑀘 𑀤𑀼𑀓𑁆𑀓𑀝𑀁 𑀏𑀯𑀸𑀢𑀺 𑀬𑁄𑀚𑀦𑀸.

𑁮𑁫𑁬. 𑀲𑀘𑁂 ¶ 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑀸 𑀤𑁆𑀯𑁂𑀧𑀺 𑀯𑁂𑀫𑀁 𑀉𑀪𑀬𑀓𑁄𑀝𑀺𑀬𑀸 𑀕𑀳𑁂𑀢𑁆𑀯𑀸 𑀏𑀓𑀢𑁄𑀯 𑀯𑀺𑀦𑀦𑁆𑀢𑀺 𑀯𑀸𑀢𑀺 𑀬𑁄𑀚𑀦𑀸. 𑀢𑀺𑀭𑀺𑀬𑀁 𑀲𑀼𑀢𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀬𑁂𑀦 𑀆𑀓𑁄𑀝𑁂𑀦𑁆𑀢𑁄 𑀖𑀦𑀪𑀸𑀯𑀁 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑀁 𑀯𑁂𑀫𑀁 𑀯𑀼𑀘𑁆𑀘𑀢𑀺.

𑁮𑁫𑁭. 𑀲𑀩𑁆𑀩𑀢𑁆𑀣 𑀪𑁂𑀤𑁂𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀲𑀼𑀢𑁆𑀢𑀢𑀦𑁆𑀢𑀯𑀸𑀬𑁂𑀳𑀺 𑀓𑀢𑁂 𑀧𑀫𑀸𑀡𑀢𑀤𑀽𑀦𑀏𑀓𑀦𑁆𑀢𑀭𑀺𑀓𑀤𑀻𑀖𑀢𑀺𑀭𑀺𑀬𑀧𑁆𑀧𑀓𑀸𑀭𑁂 𑀲𑀩𑁆𑀩𑀢𑁆𑀣 𑀯𑀸𑀭𑀪𑁂𑀤𑁂. 𑀆𑀧𑀢𑁆𑀢𑀺𑀪𑁂𑀤𑁄𑀢𑀺 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑁂𑀳𑀺 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀯𑀻𑀢𑀧𑁆𑀧𑀤𑁂𑀲𑁂 𑀧𑀫𑀸𑀡𑀬𑀼𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑀢𑁆𑀭 𑀤𑀼𑀓𑁆𑀓𑀝𑀦𑁆𑀢𑀺 𑀪𑁂𑀤𑁄.

𑁮𑁫𑁮. 𑀓𑀧𑁆𑀧𑀺𑀬𑁄 𑀢𑀦𑁆𑀢𑀯𑀸𑀬𑁄 𑀦𑀸𑀫 𑀜𑀸𑀢𑀓𑁄 𑀯𑀸 𑀧𑀯𑀸𑀭𑀺𑀢𑁄 𑀯𑀸 𑀓𑀧𑁆𑀧𑀺𑀬𑀫𑀽𑀮𑁂𑀦 𑀧𑀬𑁄𑀚𑀺𑀢𑁄 𑀯𑀸.

𑁮𑁫𑁯. ‘‘𑀅𑀦𑀸𑀧𑀢𑁆𑀢𑀺 ¶ 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀁, 𑀆𑀬𑁄𑀕𑁂, 𑀓𑀸𑀬𑀩𑀦𑁆𑀥𑀦𑁂, 𑀅𑀁𑀲𑀩𑀤𑁆𑀥𑀓𑁂, 𑀧𑀢𑁆𑀢𑀢𑁆𑀣𑀯𑀺𑀓𑀸𑀬, 𑀧𑀭𑀺𑀲𑁆𑀲𑀸𑀯𑀦𑁂, 𑀜𑀸𑀢𑀓𑀸𑀦𑀁, 𑀧𑀯𑀸𑀭𑀺𑀢𑀸𑀦𑀁, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀥𑀦𑁂𑀦𑀸’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑁬𑁪𑁦) 𑀅𑀦𑀸𑀧𑀢𑁆𑀢𑀺𑀯𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺. 𑀇𑀥 𑀦𑀺𑀤𑁆𑀤𑀺𑀝𑁆𑀞𑁄𑀯 𑀮𑀓𑁆𑀔𑀡𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀥𑀦𑀁 𑀦𑀸𑀫 𑀢𑀡𑁆𑀟𑀼𑀮𑀸𑀤𑀺 𑀓𑀧𑁆𑀧𑀺𑀬𑀯𑀢𑁆𑀣𑀼. ‘‘𑀧𑀭𑀺𑀲𑁆𑀲𑀸𑀯𑀦𑁂’’𑀢𑀺𑀆𑀤𑀻𑀲𑀼 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀧𑀭𑀺𑀲𑁆𑀲𑀸𑀯𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀲𑀼𑀢𑁆𑀢𑀜𑁆𑀘 𑀢𑀦𑁆𑀢𑀯𑀸𑀬𑁂 𑀘 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁮𑁬𑁦. 𑀅𑀧𑁆𑀧𑀯𑀸𑀭𑀺𑀢𑀜𑁆𑀜𑀸𑀢𑀻𑀦𑀦𑁆𑀢𑀺 𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀸𑀢𑀻𑀦𑀁, ‘‘𑀓𑀻𑀤𑀺𑀲𑁂𑀦 𑀢𑁂 𑀪𑀦𑁆𑀢𑁂 𑀘𑀻𑀯𑀭𑁂𑀦 𑀅𑀢𑁆𑀣𑁄, 𑀓𑀻𑀤𑀺𑀲𑀁 𑀢𑁂 𑀘𑀻𑀯𑀭𑀁 𑀯𑀸𑀬𑀸𑀧𑁂𑀫𑀻’’𑀢𑀺 (𑀧𑀸𑀭𑀸. 𑁬𑁪𑁩) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀸𑀢𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀯𑀺𑀓𑀧𑁆𑀧𑀦𑁆𑀢𑀺 𑀯𑀺𑀲𑀺𑀝𑁆𑀞𑀁 𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁. 𑀆𑀧𑀚𑁆𑀚𑀢𑀻𑀢𑀺 𑀓𑀭𑁄𑀢𑀺, ‘‘𑀇𑀤𑀁 𑀔𑁄 𑀆𑀯𑀼𑀲𑁄 𑀘𑀻𑀯𑀭𑀁 𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀬𑁆𑀬𑀢𑀺, 𑀆𑀬𑀢𑀜𑁆𑀘 𑀓𑀭𑁄𑀣, 𑀯𑀺𑀢𑁆𑀣𑀢𑀜𑁆𑀘 𑀅𑀧𑁆𑀧𑀺𑀢𑀜𑁆𑀘 𑀲𑀼𑀯𑀻𑀢𑀜𑁆𑀘 𑀲𑀼𑀧𑁆𑀧𑀯𑀸𑀬𑀺𑀢𑀜𑁆𑀘 𑀲𑀼𑀯𑀺𑀮𑁂𑀔𑀺𑀢𑀜𑁆𑀘 𑀲𑀼𑀯𑀺𑀢𑀘𑁆𑀙𑀺𑀢𑀜𑁆𑀘 𑀓𑀭𑁄𑀣𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁪𑁨) 𑀦𑀬𑁂𑀦 𑀤𑀸𑀬𑀓𑀸𑀦𑀁 𑀅𑀥𑀺𑀧𑁆𑀧𑀸𑀬𑀢𑁄 𑀅𑀥𑀺𑀓𑀢𑀭𑀆𑀬𑀢𑀸𑀤𑀺𑀓𑀭𑀡𑀢𑁆𑀣𑀁 𑀯𑀺𑀥𑀸𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 ¶ 𑀆𑀬𑀢𑀦𑁆𑀢𑀺 𑀤𑀻𑀖𑀁. 𑀯𑀺𑀢𑁆𑀣𑀢𑀦𑁆𑀢𑀺 𑀧𑀼𑀣𑀼𑀮𑀁. 𑀅𑀧𑁆𑀧𑀺𑀢𑀦𑁆𑀢𑀺 𑀖𑀦𑀁. 𑀲𑀼𑀯𑀻𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀻𑀢𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑀁 𑀓𑀢𑁆𑀯𑀸 𑀯𑀻𑀢𑀁. 𑀲𑀼𑀧𑁆𑀧𑀯𑀸𑀬𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀯𑀸𑀬𑀺𑀢𑀁 𑀲𑀩𑁆𑀩𑀝𑁆𑀞𑀸𑀦𑁂 𑀲𑀫𑀁 𑀓𑀢𑁆𑀯𑀸 𑀢𑀦𑁆𑀢𑁂 𑀧𑀲𑀸𑀭𑀺𑀢𑀁. 𑀲𑀼𑀯𑀺𑀮𑁂𑀔𑀺𑀢𑀦𑁆𑀢𑀺 𑀮𑁂𑀔𑀦𑀺𑀬𑀸 𑀲𑀼𑀝𑁆𑀞𑀼 𑀯𑀺𑀮𑀺𑀔𑀺𑀢𑀁. 𑀲𑀼𑀯𑀺𑀢𑀘𑁆𑀙𑀺𑀢𑀦𑁆𑀢𑀺 𑀓𑁄𑀘𑁆𑀙𑁂𑀦 𑀲𑀼𑀝𑁆𑀞𑀼 𑀯𑀺𑀢𑀘𑁆𑀙𑀺𑀢𑀁, 𑀲𑀼𑀯𑀺𑀦𑀺𑀤𑁆𑀥𑁄𑀢𑀦𑁆𑀢𑀺 𑀅𑀢𑁆𑀣𑁄.

𑁮𑁬𑁧. 𑀲𑀼𑀢𑁆𑀢𑀯𑀟𑁆𑀠𑀦𑀧𑁆𑀧𑀓𑀸𑀭𑀁 ¶ 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀻𑀖𑀸𑀬𑀢𑀧𑁆𑀧𑀺𑀢𑀢𑁆𑀣𑀸𑀬𑀸’’𑀢𑀺. 𑀢𑁂𑀦 𑀘 𑀧𑀤𑀪𑀸𑀚𑀦𑁂 ‘‘𑀢𑀲𑁆𑀲 𑀯𑀘𑀦𑁂𑀦 𑀆𑀬𑀢𑀁 𑀯𑀸 𑀯𑀺𑀢𑁆𑀣𑀢𑀁 𑀯𑀸 𑀅𑀧𑁆𑀧𑀺𑀢𑀁 𑀯𑀸 𑀓𑀭𑁄𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁬𑁪𑁩) 𑀏𑀢𑀁 𑀆𑀬𑀢𑀸𑀤𑀺𑀢𑁆𑀢𑀬𑀫𑁂𑀯 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀯𑀟𑁆𑀠𑀦𑀓𑁂 𑀓𑀢𑁂𑀢𑀺 𑀏𑀢𑁆𑀣 𑀅𑀦𑀦𑁆𑀢𑀭𑀁 𑀯𑀢𑁆𑀢𑀩𑁆𑀩𑁂𑀦 ‘‘𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀧𑀝𑀺𑀮𑀸𑀪𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁂𑀦 𑀲𑀳 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸, 𑀤𑀸𑀬𑀓𑁂𑀳𑀺 𑀢𑀼𑀮𑀬𑀺𑀢𑁆𑀯𑀸 𑀤𑀺𑀦𑁆𑀦𑀧𑁆𑀧𑀫𑀸𑀡𑀢𑁄 𑀲𑀼𑀢𑁆𑀢𑀁 𑀯𑀟𑁆𑀠𑀺𑀢𑀼𑀁 𑀢𑁂𑀦 𑀓𑀢𑁂𑀦 𑀲𑀩𑁆𑀩𑁂𑀦𑀸𑀧𑀺 𑀧𑀬𑁄𑀕𑁂𑀦 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀜𑁆𑀘 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁮𑁬𑁨. 𑀜𑀸𑀢𑀓𑀸𑀤𑀻𑀦𑀁 𑀢𑀦𑁆𑀢𑀯𑀸𑀬𑁂𑀲𑀼 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀦𑁄 𑀥𑀦𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀬𑁄𑀚𑀺𑀢𑁂𑀲𑀽’’𑀢𑀺 𑀲𑁂𑀲𑁄, 𑀢𑀦𑁆𑀢𑀯𑀸𑀬𑁂𑀲𑀽𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀅𑀢𑁆𑀢𑀦𑁄 𑀥𑀦𑁂𑀦 𑀧𑀬𑁄𑀚𑀺𑀢𑁂𑀲𑀼 𑀢𑀦𑁆𑀢𑀯𑀸𑀬𑁂𑀲𑀼 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀕𑀳𑁂𑀢𑁆𑀯𑀸 𑀯𑀺𑀦𑀦𑁆𑀢𑁂𑀲𑀼 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀦𑀦𑁆𑀢𑁂𑀲𑀼 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑁮𑁬𑁩. 𑀫𑀳𑀕𑁆𑀖𑀁 𑀓𑀢𑁆𑀢𑀼𑀓𑀸𑀫𑀺𑀦𑁄 𑀢𑀦𑁆𑀢𑀯𑀸𑀬𑁂𑀳𑀺 𑀅𑀧𑁆𑀧𑀕𑁆𑀖𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀁 𑀯𑀺𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑀧𑁂𑀲𑀓𑀸𑀭𑀓𑀣𑀸𑀯𑀡𑁆𑀡𑀦𑀸.

𑁮𑁬𑁪. 𑀯𑀲𑁆𑀲𑀁𑀯𑀼𑀢𑁆𑀣𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀺𑀢𑁆𑀯𑀸. 𑀧𑀯𑀸𑀭𑀡𑀸𑀬 𑀧𑀼𑀩𑁆𑀩𑁂𑀯 𑀬𑀁 𑀘𑀻𑀯𑀭𑀁 𑀤𑀻𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀤𑀲𑀸𑀳𑀸𑀦𑀸𑀕𑀢𑀁 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫’’𑀦𑁆𑀢𑀺 ¶ (𑀧𑀸𑀭𑀸. 𑁬𑁪𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀫𑀳𑀸𑀧𑀯𑀸𑀭𑀡𑀸𑀉𑀧𑁄𑀲𑀣𑀤𑀺𑀯𑀲𑀲𑁆𑀲 𑀧𑀼𑀭𑁂𑀢𑀭𑀫𑁂𑀯 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀬𑀁 𑀬𑀁 𑀘𑀻𑀯𑀭𑀁 ‘‘𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀸𑀫 𑀲𑁂𑀦𑀸𑀬 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁪𑁯) 𑀧𑀤𑀪𑀸𑀚𑀦𑀸𑀕𑀢𑁂𑀲𑀼 𑀕𑀫𑀺𑀓𑀕𑀺𑀮𑀸𑀦𑀕𑀩𑁆𑀪𑀺𑀦𑀺𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀲𑀤𑁆𑀥𑀸𑀤𑀻𑀲𑀼 ¶ 𑀅𑀜𑁆𑀜𑀢𑀭𑁂𑀦 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀯𑀸 𑀅𑀢𑁆𑀢𑀦𑀸 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀤𑀺𑀬𑁆𑀬𑀢𑀻𑀢𑀺. 𑀢𑀁 𑀳𑁄𑀢𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀢𑀁 𑀅𑀘𑁆𑀘𑀸𑀬𑀺𑀓𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺.

𑁮𑁬𑁫. 𑀧𑀼𑀭𑁂 𑀧𑀯𑀸𑀭𑀡𑀸𑀬𑁂𑀯𑀸𑀢𑀺 𑀫𑀳𑀸𑀧𑀯𑀸𑀭𑀡𑀸𑀬 𑀧𑀼𑀭𑁂𑀢𑀭𑀫𑁂𑀯 𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀤𑀺𑀯𑀲𑁂. 𑀪𑀸𑀚𑁂𑀢𑁆𑀯𑀸 𑀬𑀤𑀺 𑀕𑀬𑁆𑀳𑀢𑀻𑀢𑀺 𑀏𑀢𑁆𑀣 ‘‘𑀬𑁂𑀦𑀸’’𑀢𑀺 𑀘 𑀦 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀢𑁂𑀦𑀸’’𑀢𑀺 𑀘 𑀓𑀭𑁄𑀢𑀺 𑀘𑁂𑀢𑀺 𑀏𑀢𑁆𑀣 ‘‘𑀲𑁄 𑀯𑀲𑁆𑀲𑀘𑁆𑀙𑁂𑀤’’𑀦𑁆𑀢𑀺 𑀘 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀪𑀸𑀚𑁂𑀢𑁆𑀯𑀸 𑀬𑀤𑀺 𑀬𑁂𑀦 𑀕𑀬𑁆𑀳𑀢𑀺, 𑀢𑁂𑀦 𑀯𑀲𑁆𑀲𑀘𑁆𑀙𑁂𑀤𑁄 𑀦 𑀓𑀸𑀢𑀩𑁆𑀩𑁄. 𑀲𑁄 𑀯𑀲𑁆𑀲𑀘𑁆𑀙𑁂𑀤𑀁 𑀓𑀭𑁄𑀢𑀺 𑀘𑁂, 𑀢𑀁 𑀪𑀸𑀚𑁂𑀢𑁆𑀯𑀸 𑀕𑀳𑀺𑀢𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸, 𑀙𑀺𑀦𑁆𑀦𑀯𑀲𑁆𑀲𑁂𑀦 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁬𑁬. ‘‘𑀅𑀦𑁆𑀢𑁄𑀲𑀫𑀬𑀫𑁂𑀯𑀸’’𑀢𑀺 𑀇𑀤𑀁 ‘‘𑀅𑀥𑀺𑀝𑁆𑀞𑁂𑀢𑀻’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀤𑀪𑀸𑀚𑀦𑁂 ‘‘𑀘𑀻𑀯𑀭𑀓𑀸𑀮𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘𑀫𑀸𑀲𑀸’’𑀢𑀺 𑀯𑀼𑀢𑁆𑀢𑀲𑀫𑀬𑀩𑁆𑀪𑀦𑁆𑀢𑀭𑁂𑀬𑁂𑀯 𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁.

𑁮𑁬𑁭. 𑀓𑀣𑀺𑀦𑁂 𑀢𑀼 𑀅𑀦𑀢𑁆𑀣𑀢𑁂𑀢𑀺 𑀬𑀲𑁆𑀫𑀺𑀁 𑀓𑀣𑀺𑀦𑀁 𑀅𑀦𑀢𑁆𑀣𑀢𑀁, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀼-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀅𑀦𑀥𑀺𑀝𑁆𑀞𑀸𑀬 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀳𑀭𑀻𑀬𑀢𑀺 𑀏𑀢𑁆𑀣 𑀅𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀧𑀭𑀺𑀳𑀸𑀭𑁄, 𑀫𑀸𑀲𑁄, 𑀏𑀓𑁄 𑀘 𑀲𑁄 𑀫𑀸𑀲𑁄 ¶ 𑀘𑀸𑀢𑀺 𑀏𑀓𑀫𑀸𑀲𑁄, 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀻, 𑀅𑀬𑀁 𑀘𑀻𑀯𑀭𑀓𑀸𑀮𑀲𑀫𑀬𑁄𑀢𑀺 𑀯𑀼𑀢𑁆𑀢𑁄 𑀫𑀸𑀲𑁄. 𑀤𑀲𑀦𑁆𑀦𑀁 𑀅𑀳𑀸𑀦𑀁 𑀲𑀫𑀸𑀳𑀸𑀭𑁄 𑀤𑀲𑀸𑀳𑀁, 𑀢𑀁 𑀧𑀭𑀫𑀁 𑀅𑀥𑀺𑀓𑀁 𑀏𑀢𑀲𑁆𑀲𑀸𑀢𑀺 𑀤𑀲𑀸𑀳𑀧𑀭𑀫𑁄, 𑀫𑀸𑀲𑁄. ‘‘𑀤𑀲𑀸𑀳𑀸𑀦𑀸𑀕𑀢𑀁 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫’’𑀦𑁆𑀢𑀺 (𑀧𑀸𑀭𑀸. 𑁬𑁪𑁮) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀧𑀭𑀺𑀬𑀦𑁆𑀢𑀤𑀲𑀸𑀳𑀸𑀥𑀺𑀓𑁄𑀢𑀺 𑀅𑀢𑁆𑀣𑁄. 𑀓𑀣𑀺𑀦𑁂 𑀅𑀦𑀢𑁆𑀣𑀢𑁂 𑀢𑀼 𑀤𑀲𑀸𑀳𑀧𑀭𑀫𑁄 𑀏𑀓𑀫𑀸𑀲𑁄𑀯 𑀢𑀲𑁆𑀲 𑀅𑀘𑁆𑀘𑀸𑀬𑀺𑀓𑀯𑀢𑁆𑀣𑀲𑁆𑀲 𑀧𑀭𑀺𑀳𑀸𑀭𑁄 𑀫𑀢𑁄𑀢𑀺 𑀬𑁄𑀚𑀦𑀸.

𑁮𑁬𑁮. 𑀅𑀢𑁆𑀣𑀢𑁂 𑀓𑀣𑀺𑀦𑁂𑀢𑀺 𑀓𑀣𑀺𑀦𑀢𑁆𑀣𑀢𑀯𑀺𑀳𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀅𑀘𑁆𑀘𑀸𑀬𑀺𑀓𑀯𑀢𑁆𑀣𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀲𑀸𑀳𑀧𑀭𑀫𑀸 𑀧𑀜𑁆𑀘 𑀫𑀸𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 𑀬𑀣𑀸𑀯𑀼𑀢𑁆𑀢𑀘𑀻𑀯𑀭𑀓𑀸𑀮𑀲𑀫𑀬𑀲𑀗𑁆𑀔𑀸𑀢𑀯𑀲𑁆𑀲𑀸𑀦𑀸𑀯𑀲𑀸𑀦𑀫𑀸𑀲𑁄 𑀘 𑀓𑀣𑀺𑀦𑀼𑀤𑁆𑀥𑀸𑀭𑀤𑀺𑀯𑀲𑀲𑀗𑁆𑀔𑀸𑀢𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀬𑀸𑀯 𑀨𑀕𑁆𑀕𑀼𑀦𑀫𑀸𑀲𑀧𑀼𑀡𑁆𑀡𑀫𑀻, 𑀢𑀸𑀯 𑀳𑁂𑀫𑀦𑁆𑀢𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀘𑀸𑀢𑀺 𑀧𑀜𑁆𑀘 𑀫𑀸𑀲𑀸. 𑀧𑀓𑀸𑀲𑀺𑀢𑀸𑀢𑀺 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸’’𑀢𑀺 ¶ (𑀧𑀸𑀭𑀸. 𑁬𑁪𑁯) 𑀤𑀻𑀧𑀺𑀢𑀸. 𑀤𑀲𑀸𑀳𑀧𑀭𑀫𑀸𑀢𑀺 𑀯𑀼𑀢𑁆𑀢𑀢𑁆𑀣𑁄𑀬𑁂𑀯. 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀤𑀲𑀸𑀳𑀧𑀭𑀫𑀸 𑀧𑀜𑁆𑀘 𑀫𑀸𑀲𑀸 𑀢𑀲𑁆𑀲 𑀅𑀘𑁆𑀘𑀸𑀬𑀺𑀓𑀯𑀢𑁆𑀣𑀲𑁆𑀲 𑀧𑀭𑀺𑀳𑀸𑀭𑁄 𑀓𑀸𑀮𑁄𑀢𑀺 𑀫𑀼𑀦𑀺𑀦𑁆𑀤𑁂𑀦 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑀅𑀬𑀫𑀼𑀪𑀬𑀢𑁆𑀣 𑀯𑀼𑀢𑁆𑀢𑀸 𑀤𑀲𑀸𑀳𑀧𑀭𑀫𑀢𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁦) 𑀯𑀼𑀢𑁆𑀢𑀧𑀸𑀞𑁂𑀦 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀧𑀸𑀞𑁂 𑀲𑀢𑀺 𑀦 𑀯𑀺𑀭𑀼𑀚𑁆𑀛𑀢𑀺 𑁋

‘‘𑀢𑀲𑁆𑀲𑀘𑁆𑀘𑀸𑀬𑀺𑀓𑀯𑀢𑁆𑀣𑀲𑁆𑀲 ¶ , 𑀓𑀣𑀺𑀦𑁂 𑀢𑀼 𑀅𑀦𑀢𑁆𑀣𑀢𑁂;

𑀧𑀭𑀺𑀳𑀸𑀭𑁂𑀓𑀫𑀸𑀲𑁂𑀓𑀸-𑀤𑀲𑀸𑀳𑀧𑀭𑀫𑁄 𑀫𑀢𑁄.

𑀅𑀢𑁆𑀣𑀢𑁂 𑀓𑀣𑀺𑀦𑁂 𑀢𑀲𑁆𑀲, 𑀧𑀜𑁆𑀘 𑀫𑀸𑀲𑀸 𑀧𑀓𑀸𑀲𑀺𑀢𑀸;

𑀧𑀭𑀺𑀳𑀸𑀭𑁄 𑀤𑀺𑀦𑁂𑀦𑁂𑀓𑀸-𑀤𑀲𑀸𑀳𑀧𑀭𑀫𑀸 𑀧𑀦𑀸’’𑀢𑀺.

𑁮𑁬𑁯. 𑀧𑀞𑀫𑁂𑀦 𑀓𑀣𑀺𑀦𑁂𑀦𑀸𑀢𑀺 𑀬𑁄𑀚𑀦𑀸. ‘‘𑀅𑀓𑁆𑀭𑀺𑀬𑀁 𑀅𑀘𑀺𑀢𑁆𑀢’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀓𑁆𑀭𑀺𑀬𑀦𑁆𑀢𑀺 𑀅𑀦𑁆𑀢𑁄𑀲𑀫𑀬𑁂 𑀅𑀥𑀺𑀝𑁆𑀞𑀸𑀦𑀸𑀤𑀺𑀅𑀓𑀭𑀡𑀁.

𑀅𑀘𑁆𑀘𑁂𑀓𑀘𑀻𑀯𑀭𑀓𑀣𑀸𑀯𑀡𑁆𑀡𑀦𑀸.

𑁮𑁭𑁦-𑁧. 𑀪𑀺𑀓𑁆𑀔𑀽𑀢𑀺 𑀲𑀸𑀲𑀗𑁆𑀓𑀲𑀫𑁆𑀫𑀢𑁂 𑀲𑀧𑁆𑀧𑀝𑀺𑀪𑀬𑁂 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀁 𑀪𑀺𑀓𑁆𑀔𑀼𑀫𑀸𑀳. 𑀬𑀣𑀸𑀳 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄’’𑀢𑀺 (𑀧𑀸𑀭𑀸. 𑁬𑁫𑁩). 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁 𑀯𑀲𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀦𑀸𑀫 𑀅𑀲𑁆𑀲𑀬𑀼𑀚𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀦𑁆𑀦𑀭𑀲𑀻, 𑀏𑀢𑁆𑀣 𑀧𑀦 𑀲𑀳𑀘𑀭𑀺𑀬𑀦𑀬𑁂𑀦 𑀢𑀤𑀼𑀧𑀮𑀓𑁆𑀔𑀺𑀢𑀸 𑀧𑀼𑀭𑀺𑀫𑀺𑀓𑀸 𑀢𑀬𑁄 𑀯𑀲𑁆𑀲𑀸𑀦𑀫𑀸𑀲𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀡𑁆𑀡𑀫𑀦𑁆𑀢𑀺 𑀏𑀢𑁆𑀣 𑀯𑀸𑀲𑀓𑀺𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀯𑀲𑁆𑀲𑁄 𑀳𑀼𑀢𑁆𑀯𑀸 𑀢𑀬𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀲𑁆𑀫𑀸 𑀧𑀦 𑀬𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀬𑀸𑀯 𑀧𑀞𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁 𑀯𑀲𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁩-𑁬𑁫𑁪).

‘‘𑀘𑀻𑀯𑀭’’𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀯𑀼𑀘𑁆𑀘𑀢𑀺. 𑀕𑀸𑀫𑁂 𑀞𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁆𑀣 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫’’𑀦𑁆𑀢𑀺 ¶ 𑀘 ‘‘𑀆𑀓𑀗𑁆𑀔𑀫𑀸𑀦𑁄’’𑀢𑀺 𑀘 𑀲𑁂𑀲𑁄, 𑀅𑀧𑀭𑀓𑀢𑁆𑀢𑀺𑀓𑀫𑀸𑀲𑁂 𑀓𑀢𑁆𑀢𑀺𑀓𑀘𑁄𑀭𑀪𑀬𑁂𑀦 𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀲𑀸𑀫𑀦𑁆𑀢𑀸 𑀕𑁄𑀘𑀭𑀕𑀸𑀫𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀉𑀧𑀯𑀲𑁆𑀲𑀁 ¶ 𑀔𑁄 𑀧𑀦 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁…𑀧𑁂… 𑀆𑀓𑀗𑁆𑀔𑀫𑀸𑀦𑁄 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁬𑁫𑁩).

‘‘𑀲𑀫𑀦𑁆𑀢𑀸 𑀕𑁄𑀘𑀭𑀕𑀸𑀫𑁂’’𑀢𑀺 𑀇𑀤𑀁 ‘‘𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀲𑀫𑀦𑁆𑀢𑀸 𑀕𑁄𑀘𑀭𑀕𑀸𑀫𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁬𑁫𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀅𑀧𑀭𑀓𑀢𑁆𑀢𑀺𑀓𑀫𑀸𑀲𑁂’’𑀢𑀺 𑀘 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀦𑁆𑀢𑀺 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀦𑀻 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁬𑁫𑁪) 𑀧𑀤𑀪𑀸𑀚𑀦𑀺𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀳𑀺 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫’’𑀦𑁆𑀢𑀺 𑀅𑀧𑀭𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑀧𑀦𑁆𑀦𑀭𑀲𑀺𑀬𑀸 𑀯𑀼𑀘𑁆𑀘𑀫𑀸𑀦𑀸𑀬𑀸𑀧𑀺 𑀲𑀳𑀘𑀭𑀺𑀬𑀦𑀬𑁂𑀦 𑀢𑀁𑀲𑀳𑀘𑀭𑀺𑀢𑁄 𑀘𑀢𑀼𑀢𑁆𑀣𑁄 𑀫𑀸𑀲𑁄 𑀯𑀼𑀢𑁆𑀢𑁄.

𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀮𑀓𑁆𑀔𑀡𑁂 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀲𑁆𑀲 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂 𑀓𑀢𑁆𑀢𑀺𑀓𑀘𑁄𑀭𑀪𑀬𑁂 𑀲𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀕𑁄𑀘𑀭𑀕𑀸𑀫𑁂 𑀞𑀧𑁂𑀢𑁆𑀯𑀸 𑀆𑀭𑀜𑁆𑀜𑀓𑀗𑁆𑀕𑀁 𑀧𑀽𑀭𑀬𑀢𑁄 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑁄 𑀢𑀲𑁆𑀫𑀺𑀁 𑀫𑀸𑀲𑁂 𑀦 𑀳𑁄𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑀪𑀸𑀯𑁄 𑀤𑀻𑀧𑀺𑀢𑁄. 𑀢𑀤𑁂𑀯 𑀧𑀓𑀸𑀲𑁂𑀢𑀼𑀁 𑀦𑀺𑀓𑁆𑀔𑁂𑀧𑁄𑀧𑀸𑀬𑀲𑀦𑁆𑀤𑀲𑁆𑀲𑀦𑀫𑀼𑀔𑁂𑀦 𑀯𑀓𑁆𑀔𑀢𑀺 ‘‘𑀓𑀢𑁆𑀢𑀺𑀓𑁂𑀬𑁂𑀯 𑀫𑀸𑀲𑀲𑁆𑀫𑀺𑀁…𑀧𑁂… 𑀯𑀝𑁆𑀝𑀢𑀻’’𑀢𑀺.

𑀇𑀤𑀸𑀦𑀺 𑀅𑀲𑁆𑀫𑀺𑀁𑀬𑁂𑀯 𑀫𑀸𑀲𑁂 𑀢𑀢𑁄 𑀅𑀜𑁆𑀜𑀢𑁆𑀣 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑁄 𑀕𑀸𑀫𑁂 𑀞𑀧𑀺𑀢𑁂𑀦 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀢𑁄 𑀦𑀺𑀤𑁆𑀤𑁄𑀲𑀪𑀸𑀯𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀲𑀺𑀬𑀸 𑀘 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄…𑀧𑁂… 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁫𑁩) 𑀯𑀼𑀢𑁆𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀘𑁆𑀘𑀬𑁂…𑀧𑁂… 𑀲𑀫𑁆𑀫𑀼𑀢𑀺’’𑀦𑁆𑀢𑀺. 𑀧𑀘𑁆𑀘𑀬𑁂 𑀲𑀢𑀺 𑀢𑀸𑀤𑀺𑀲𑁂𑀢𑀺 ‘‘𑀲𑀺𑀬𑀸 𑀧𑀘𑁆𑀘𑀬𑁄, 𑀲𑀺𑀬𑀸 𑀓𑀭𑀡𑀻𑀬’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀯𑀘𑀦𑀢𑁄 𑀢𑀸𑀤𑀺𑀲𑁂 𑀓𑀺𑀘𑁆𑀘𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀙𑀸𑀭𑀢𑁆𑀢𑀧𑀭𑀫𑀦𑁆𑀢𑀺 𑀙 𑀭𑀢𑁆𑀢𑀺𑀬𑁄 𑀧𑀭𑀫𑀸 𑀬𑀲𑁆𑀲 𑀯𑀸𑀲𑀓𑀫𑁆𑀫𑀲𑁆𑀲 𑀢𑀁 𑀙𑀸𑀭𑀢𑁆𑀢𑀧𑀭𑀫𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀙𑀸𑀭𑀢𑁆𑀢𑀧𑀭𑀫𑀁 𑀯𑀸𑀲𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀺𑀦𑀸 𑀯𑀲𑀺𑀢𑀩𑁆𑀩𑀦𑁆𑀢𑀺 𑀕𑀸𑀫𑁂 𑀦𑀺𑀓𑁆𑀔𑀺𑀢𑁆𑀢𑁂𑀦 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀦𑀸 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀢𑀤𑁂𑀯 ¶ 𑀧𑀸𑀓𑀝𑀁 𑀓𑀸𑀢𑀼𑀁 𑀯𑀓𑁆𑀔𑀢𑀺 ‘‘𑀅𑀜𑁆𑀜𑀢𑁆𑀣𑁂𑀯 𑀯𑀲𑀦𑁆𑀢𑀲𑁆𑀲, 𑀙𑀸𑀭𑀢𑁆𑀢𑀧𑀭𑀫𑀁 𑀫𑀢’’𑀦𑁆𑀢𑀺.

𑀢𑀢𑁄𑀢𑀺 𑀙𑀸𑀭𑀢𑁆𑀢𑀢𑁄. 𑀉𑀢𑁆𑀢𑀭𑀺 𑀯𑀲𑀢𑁄𑀢𑀺 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ¶ ‘‘𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀲𑀢𑁆𑀢𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪). 𑀤𑁄𑀲𑁄𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀁. ‘‘𑀯𑀺𑀦𑀸 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀢𑀺’’𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀕𑀺𑀮𑀸𑀦𑀪𑀺𑀓𑁆𑀔𑀼𑀦𑁄 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑀸𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁭𑁩) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀧𑀼𑀭𑀺𑀫𑀫𑁂𑀯 𑀬𑀸 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀤𑀺𑀦𑁆𑀦𑀸, 𑀢𑀁 𑀯𑀺𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂𑀦 𑀬𑀸𑀯 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀢𑀸𑀯 𑀘𑀺𑀭𑀫𑁆𑀧𑀺 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀦𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀸 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀓𑁄𑀲𑀫𑁆𑀩𑀓𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸, 𑀢𑀲𑁆𑀲𑀸 𑀲𑀫𑁆𑀫𑀼𑀢𑀺𑀬𑀸 𑀅𑀜𑁆𑀜𑀢𑁆𑀭. 𑀲𑀘𑁂 𑀲𑀸 𑀮𑀤𑁆𑀥𑀸 𑀳𑁄𑀢𑀺, 𑀙𑀸𑀭𑀢𑁆𑀢𑀸𑀢𑀺𑀭𑁂𑀓𑀫𑁆𑀧𑀺 𑀯𑀺𑀧𑁆𑀧𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁩-𑁬𑁫𑁪).

𑁮𑁭𑁨-𑁩. 𑀘𑀻𑀯𑀭𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀢𑁆𑀢𑀺𑀓𑁂𑀬𑁂𑀯…𑀧𑁂… 𑀧𑀓𑀸𑀲𑀺𑀢𑁄’’𑀢𑀺. 𑀓𑀢𑁆𑀢𑀺𑀓𑁂𑀬𑁂𑀯 𑀫𑀸𑀲𑀲𑁆𑀫𑀺𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀸𑀦𑀁 𑀫𑀸𑀲𑀸𑀦𑀁 𑀧𑀘𑁆𑀙𑀺𑀫𑁂 𑀓𑀢𑁆𑀢𑀺𑀓𑀫𑀸𑀲𑁂𑀬𑁂𑀯 𑀇𑀤𑀫𑁂𑀓𑀗𑁆𑀕𑀁. 𑀧𑀞𑀫𑀸𑀬 𑀧𑀯𑀸𑀭𑀺𑀢𑁄𑀢𑀺 𑀤𑀼𑀢𑀺𑀬𑀫𑀗𑁆𑀕𑀁, 𑀇𑀥 𑀧𑀞𑀫𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀯𑀸𑀭𑀺𑀢𑁄𑀢𑀺 𑀬𑁄𑀚𑀦𑀸, 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁩-𑁬𑁫𑁪). 𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦 𑀬𑀼𑀢𑁆𑀢𑁂𑀢𑀺 𑀢𑀢𑀺𑀬𑀫𑀗𑁆𑀕𑀁. 𑀲𑁂𑀦𑀸𑀲𑀦𑁂𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀇𑀳 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 ¶ 𑀦𑀸𑀫 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀭𑀺𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀲𑀗𑁆𑀔𑀸𑀢𑀕𑀸𑀫𑀤𑁆𑀯𑀸𑀭𑀓𑁄𑀝𑁆𑀞𑀓𑀼𑀫𑁆𑀫𑀸𑀭𑀢𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀧𑀭𑀺𑀬𑀦𑁆𑀢𑀕𑁂𑀳𑀲𑁆𑀲 𑀉𑀧𑀘𑀸𑀭𑁂 𑀞𑀺𑀢𑀲𑁆𑀲 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀩𑀮𑀧𑁆𑀧𑀫𑀸𑀡𑁂𑀦 𑀯𑀺𑀲𑁆𑀲𑀝𑁆𑀞𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀢𑁄 𑀯𑀸 𑀧𑀝𑁆𑀞𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀧𑀭𑀺𑀓𑁆𑀔𑁂𑀧𑀁 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀕𑀸𑀫𑁄 𑀳𑁄𑀢𑀺, 𑀢𑀢𑁆𑀣 𑀕𑀸𑀫𑀧𑀭𑀺𑀬𑀦𑁆𑀢𑀲𑁂𑀦𑀸𑀲𑀦𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀅𑀯𑀥𑀺𑀁 𑀓𑀢𑁆𑀯𑀸 𑀯𑀺𑀳𑀸𑀭𑀕𑀫𑀦𑀻𑀬𑁂𑀦 𑀧𑀓𑀢𑀺𑀫𑀕𑁆𑀕𑁂𑀦 𑀯𑀺𑀤𑀢𑁆𑀣𑀺𑀕𑀫𑁆𑀪𑀻𑀭𑀁 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸 𑀧𑀫𑀺𑀢𑀧𑀜𑁆𑀘𑀥𑀦𑀼𑀲𑀢𑀧𑀫𑀸𑀡𑀤𑀽𑀭𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀕𑀳𑁂𑀢𑀩𑁆𑀩𑀁.

𑀲𑀸𑀲𑀗𑁆𑀓𑀲𑀫𑁆𑀫𑀢𑁂𑀢𑀺 𑀘𑀢𑀼𑀢𑁆𑀣𑀫𑀗𑁆𑀕𑀁, ‘‘𑀇𑀳 𑀲𑀧𑁆𑀧𑀝𑀺𑀪𑀬𑁂’’𑀢𑀺 𑀲𑁂𑀲𑁄. ‘‘𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀻’’𑀢𑀺 (𑀧𑀸𑀭𑀸. 𑁬𑁫𑁩) 𑀳𑀺 𑀧𑀸𑀴𑀺. 𑀇𑀤𑀁 𑀤𑁆𑀯𑀬𑀫𑁆𑀧𑀺 ‘‘𑀲𑁂𑀦𑀸𑀲𑀦𑁂’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀆𑀭𑀸𑀫𑀆𑀭𑀸𑀫𑀽𑀧𑀘𑀸𑀭𑁂𑀲𑀼 𑀘𑁄𑀭𑀸𑀦𑀁 𑀦𑀺𑀲𑀺𑀦𑁆𑀦𑀲𑀬𑀺𑀢𑀝𑁆𑀞𑀺𑀢𑀪𑀼𑀢𑁆𑀢𑀧𑀻𑀢𑀝𑁆𑀞𑀸𑀦𑀸𑀤𑀻𑀦𑀁 𑀤𑀺𑀲𑁆𑀲𑀫𑀸𑀦𑀢𑀸𑀬 𑀆𑀲𑀗𑁆𑀓𑀸𑀲𑀳𑀺𑀢𑁂 𑀢𑀢𑁆𑀣𑁂𑀯 𑀆𑀭𑀸𑀫𑀸𑀤𑀻𑀲𑀼 𑀧𑀳𑀝𑀫𑀸𑀭𑀺𑀢𑀯𑀺𑀮𑀼𑀢𑁆𑀢𑀫𑀦𑀼𑀲𑁆𑀲𑀸𑀦𑀁 𑀤𑀺𑀲𑁆𑀲𑀫𑀸𑀦𑀢𑀸𑀬 𑀯𑀺𑀲𑁂𑀲𑁂𑀦 𑀲𑀳𑀪𑀬𑀢𑀸𑀬 ¶ 𑀲𑀧𑁆𑀧𑀝𑀺𑀪𑀬𑁂 𑀆𑀭𑀜𑁆𑀜𑀓𑁂 𑀲𑁂𑀦𑀸𑀲𑀦𑁂𑀢𑀺 𑀅𑀢𑁆𑀣𑁄. 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼. 𑀯𑀲𑀦𑁆𑀢𑁄𑀯𑀸𑀢𑀺 𑀏𑀢𑁆𑀣 𑀏𑀯𑀓𑀸𑀭𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄. 𑀢𑀲𑁆𑀫𑀸 𑀢𑀢𑁄 𑀆𑀦𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀸𑀬𑁄𑀕𑁂 𑀏𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀘𑀢𑀼𑀭𑀗𑁆𑀕𑀲𑀫𑀸𑀬𑁄𑀕𑁂 𑀏𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀫𑀸𑀬𑁄𑀕𑁂 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀏𑀯. 𑀏𑀢𑁆𑀣 𑀏𑀯𑀓𑀸𑀭𑁂𑀦 𑀢𑀲𑁆𑀲 𑀅𑀗𑁆𑀕𑀲𑁆𑀲 𑀅𑀪𑀸𑀯𑁂 𑀅𑀮𑀩𑁆𑀪𑀫𑀸𑀦𑀢𑀁 𑀤𑀻𑀧𑁂𑀢𑀺. 𑀧𑀓𑀸𑀲𑀺𑀢𑁄𑀢𑀺 ‘‘𑀢𑀢𑁆𑀭𑀸𑀬𑀁 𑀅𑀗𑁆𑀕𑀲𑀫𑁆𑀧𑀢𑁆𑀢𑀻’’𑀢𑀺𑀆𑀤𑀺𑀓𑀸𑀬 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁩-𑁬𑁫𑁪) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑁄.

𑁮𑁭𑁪. 𑀢𑀁 𑀘𑀻𑀯𑀭𑀁. 𑀫𑀸𑀲𑀫𑁂𑀓𑀦𑁆𑀢𑀺 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀫𑀸𑀲𑀲𑀗𑁆𑀔𑀸𑀢𑀁 𑀏𑀓𑀁 𑀫𑀸𑀲𑀁. 𑀬𑁄 𑀕𑀸𑀫𑁄 𑀲𑀘𑁂 𑀧𑀼𑀭𑀺𑀫𑀩𑀤𑁆𑀥𑀸𑀬 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 ¶ 𑀅𑀦𑁆𑀢𑁄 𑀳𑁄𑀢𑀺, 𑀢𑀢𑁆𑀣 𑀫𑀸𑀲𑀢𑁄 𑀅𑀢𑀺𑀭𑁂𑀓𑀫𑁆𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁬𑁫𑁩 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁.

𑁮𑁭𑁫. 𑀅𑀜𑁆𑀜𑀢𑁆𑀣𑁂𑀯𑀸𑀢𑀺 𑀬𑀲𑁆𑀲 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀕𑁄𑀘𑀭𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁄 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀢𑁄 𑀩𑀳𑀺 𑀏𑀯. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀬𑀁 𑀕𑀸𑀫’’𑀦𑁆𑀢𑀺𑀆𑀤𑀺𑀓𑀸𑀬 𑀤𑀺𑀬𑀟𑁆𑀠𑀕𑀸𑀣𑀸𑀬 𑀧𑀝𑀺𑀧𑀸𑀤𑀺𑀢𑀢𑁆𑀣𑀤𑁆𑀯𑀬𑀲𑀗𑁆𑀔𑀸𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀲𑁆𑀲. 𑀏𑀯𑀁 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 ‘‘𑀘𑀻𑀯𑀭𑁂𑀦 𑀯𑀺𑀦𑀸 𑀓𑀢𑁆𑀢𑀺𑀓𑀫𑀸𑀲𑁂 𑀅𑀭𑀜𑁆𑀜𑁂 𑀯𑀲𑁂𑀬𑁆𑀬𑀸’’𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁬𑁫𑁩) 𑀇𑀫𑀺𑀦𑀸 𑀕𑁄𑀘𑀭𑀕𑀸𑀫𑁂 𑀢𑀁 𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀆𑀭𑀜𑁆𑀜𑀓𑀸𑀯𑀸𑀲𑁂 𑀯𑀲𑀺𑀢𑁆𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀢𑀢𑁄 𑀆𑀯𑀸𑀲𑀢𑁄 𑀕𑀦𑁆𑀢𑁆𑀯𑀸 𑀩𑀳𑀺 𑀯𑀲𑀢𑁄 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸𑀬𑁂𑀯𑀸𑀳 ‘‘𑀧𑀝𑀺𑀘𑁆𑀙𑀦𑁆𑀦𑁄 𑀧𑀓𑀸𑀲𑀺𑀢𑁄’’𑀢𑀺.

𑁮𑁭𑁬. ‘‘𑀲𑀘𑁂 𑀕𑁄𑀘𑀭𑀕𑀸𑀫𑀢𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑁂𑀦𑀸𑀲𑀦𑀁, 𑀅𑀬𑀜𑁆𑀘 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀕𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁬) 𑀅𑀝𑁆𑀞𑀓𑀣𑀸𑀬𑀁 𑀓𑀣𑀺𑀢𑀦𑀺𑀬𑀸𑀫𑁂𑀦 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑁂𑀦𑀸𑀲𑀦𑀫𑀣𑀸𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺. 𑀲𑁂𑀦𑀸𑀲𑀦𑀦𑁆𑀢𑀺 𑀅𑀢𑁆𑀢𑀦𑀸 𑀦𑀺𑀯𑀼𑀢𑁆𑀣𑀁 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀁. 𑀆𑀕𑀦𑁆𑀢𑁆𑀯𑀸𑀢𑀺 𑀩𑀳𑀺 𑀕𑀢𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸. 𑀕𑁄𑀘𑀭𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑁂 𑀯𑀺𑀳𑀭𑀢𑁄 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀢𑀢𑁄 𑀕𑁄𑀘𑀭𑀕𑀸𑀫𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀬 𑀤𑀽𑀭𑀝𑁆𑀞𑀸𑀦𑀁 𑀕𑀢𑀲𑁆𑀲 𑀆𑀕𑀢𑀝𑁆𑀞𑀸𑀦𑀢𑁄 𑀢𑀁 𑀲𑁂𑀦𑀸𑀲𑀦𑀁 𑀆𑀕𑀦𑁆𑀢𑁆𑀯𑀸 𑀯𑀺𑀤𑀽𑀭𑀢𑁆𑀢𑀸 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀁 𑀯𑀺𑀳𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸.

𑁮𑁭𑁭. 𑀕𑀸𑀫𑀲𑀻𑀫𑀫𑁆𑀧𑀺 ¶ 𑀯𑀸𑀕𑀦𑁆𑀢𑁆𑀯𑀸𑀢𑀺 𑀬𑀢𑁆𑀣 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀕𑀸𑀫𑀲𑀻𑀫𑀫𑁆𑀧𑀺 𑀧𑀼𑀭𑀸𑀭𑀼𑀡𑀸𑀬𑁂𑀯 𑀆𑀕𑀦𑁆𑀢𑁆𑀯𑀸. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁬) 𑀲𑀪𑀸𑀤𑁂𑀯𑀸𑀮𑀬𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀧𑁆𑀧𑀺𑀬𑀝𑁆𑀞𑀸𑀦𑁂 ¶ . ‘‘𑀬𑀢𑁆𑀣 𑀓𑀢𑁆𑀣𑀘𑀻’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲𑀸 𑀕𑀸𑀫𑀲𑀻𑀫𑀸𑀬 𑀅𑀦𑁆𑀢𑁄 𑀆𑀭𑀜𑁆𑀜𑀓𑀗𑁆𑀕𑀸𑀭𑀓𑁆𑀔𑀦𑀸𑀭𑀳𑀁 𑀤𑀽𑀭𑀝𑁆𑀞𑀸𑀦𑀁 𑀮𑀤𑁆𑀥𑀁 𑀘𑁂, 𑀅𑀗𑁆𑀕𑀪𑁂𑀤𑀁 𑀅𑀓𑀢𑁆𑀯𑀸 𑀢𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀥𑀼𑀢𑀗𑁆𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀧𑀚𑁆𑀚𑀺𑀢𑀼𑀁 𑀅𑀦𑁆𑀢𑁄𑀕𑀸𑀫𑁂𑀧𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀘𑀻𑀯𑀭𑀧𑀯𑀢𑁆𑀢𑀺𑀬𑁂𑀯 𑀜𑀸𑀢𑀩𑁆𑀩𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀕𑀸𑀫𑀲𑀻𑀫𑀫𑁆𑀧𑀺 𑀑𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀬𑀁 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀯𑀲𑀺𑀢𑁆𑀯𑀸 𑀘𑀻𑀯𑀭𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁬).

𑁮𑁭𑁮. 𑀏𑀯𑀜𑁆𑀘𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀗𑁆𑀕𑀪𑁂𑀤𑀁 𑀅𑀓𑀢𑁆𑀯𑀸, 𑀓𑀢𑁆𑀯𑀸 𑀯𑀸 𑀅𑀦𑁆𑀢𑁄𑀕𑀸𑀫𑀲𑀻𑀫𑀸𑀬 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀫𑁆𑀧𑀺 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀜𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑀲𑁆𑀲 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀏𑀢𑁆𑀣 ‘‘𑀞𑀺𑀢𑁄’’𑀢𑀺 𑀮𑀩𑁆𑀪𑀢𑀺. 𑀔𑀺𑀧𑁆𑀧𑀦𑁆𑀢𑀺 𑀲𑀻𑀖𑀁, 𑀧𑀼𑀭𑀸𑀭𑀼𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑀺𑀭𑁂𑀓𑁂 𑀞𑀸𑀦𑁂𑀢𑀺 𑀬𑁄𑀚𑀦𑀸, 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀲𑁆𑀲𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁬), ‘‘𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁮𑁭𑁯. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀲𑀢𑁆𑀢𑀫𑀅𑀭𑀼𑀡𑀼𑀝𑁆𑀞𑀸𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀉𑀧𑀭𑀺𑀧𑀺 𑀏𑀯𑀫𑁂𑀯 𑀯𑀢𑁆𑀢𑀩𑁆𑀩𑀁.

𑁮𑁮𑁦. 𑀲𑀸𑀲𑀗𑁆𑀓𑀲𑀫𑁆𑀫𑀢𑁂 𑀏𑀯𑀁𑀦𑀸𑀫𑀓𑁂 𑀲𑀺𑀓𑁆𑀔𑀸𑀧𑀤𑁂 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂 𑀢𑁂𑀦 𑀤𑀼𑀢𑀺𑀬𑁂𑀦 𑀓𑀣𑀺𑀦𑁂𑀦 𑀲𑀫𑀸 𑀇𑀢𑀺 𑀫𑀼𑀦𑀺𑀦𑁆𑀤𑁂𑀦 𑀫𑀢𑀸 𑀅𑀦𑀼𑀫𑀢𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸.

𑀲𑀸𑀲𑀗𑁆𑀓𑀓𑀣𑀸𑀯𑀡𑁆𑀡𑀦𑀸.

𑁮𑁮𑁧. 𑀚𑀸𑀦𑀦𑁆𑀢𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀘𑀦𑁂𑀦 𑀧𑀭𑀺𑀡𑀸𑀫𑀺𑀢𑀪𑀸𑀯𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀚𑀸𑀦𑀦𑁆𑀢𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ¶ ‘‘𑀲𑀸𑀫𑀁 𑀯𑀸 𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁬𑁫𑁯). 𑀧𑀭𑀺𑀡𑀢𑀦𑁆𑀢𑀺 𑀏𑀢𑁆𑀣 𑀧𑀤𑀪𑀸𑀚𑀦𑁂 ‘‘𑀧𑀭𑀺𑀡𑀢𑀁 𑀦𑀸𑀫 ‘𑀤𑀲𑁆𑀲𑀸𑀫 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀦𑁆𑀢𑀺 𑀅𑀢𑁆𑀣𑁄. 𑀮𑀸𑀪𑀦𑁆𑀢𑀺 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀸𑀤𑀺 𑀬𑀁 𑀓𑀺𑀜𑁆𑀘𑀺. 𑀬𑀣𑀸𑀳 ‘‘𑀮𑀸𑀪𑁄 𑀦𑀸𑀫 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀅𑀦𑁆𑀢𑀫𑀲𑁄 𑀘𑀼𑀡𑁆𑀡𑀧𑀺𑀡𑁆𑀟𑁄𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀻’’𑀢𑀺. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺 ‘‘𑀩𑀳𑀽 𑀆𑀯𑀼𑀲𑁄 𑀲𑀗𑁆𑀖𑀲𑁆𑀲 𑀤𑀸𑀬𑀓𑀸, 𑀩𑀳𑀽 𑀲𑀗𑁆𑀖𑀲𑁆𑀲 𑀪𑀢𑁆𑀢𑀸, 𑀫𑀬𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀲𑀫𑁆𑀧𑀲𑁆𑀲𑀦𑁆𑀢𑀸 𑀇𑀥 𑀯𑀺𑀳𑀭𑀸𑀫. 𑀢𑀼𑀫𑁆𑀳𑁂 𑀘𑁂 𑀅𑀫𑁆𑀳𑀸𑀓𑀁 𑀦 𑀤𑀲𑁆𑀲𑀣, 𑀅𑀣 𑀓𑁄 𑀘𑀭𑀳𑀺 𑀅𑀫𑁆𑀳𑀸𑀓𑀁 𑀤𑀲𑁆𑀲𑀢𑀺. 𑀤𑁂𑀣𑀸𑀯𑀼𑀲𑁄 𑀅𑀫𑁆𑀳𑀸𑀓𑀁 𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺 (𑀧𑀸𑀭𑀸. 𑁬𑁫𑁭) 𑀧𑀸𑀴𑀺𑀬𑀸 ¶ 𑀆𑀕𑀢𑀦𑀬𑁂𑀦 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦𑀸’’𑀢𑀺 𑀲𑁂𑀲𑁄. 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀇𑀤𑀁 𑀧𑀭𑀺𑀡𑀢𑁂 𑀧𑀭𑀺𑀡𑀢𑀲𑀜𑁆𑀜𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀫𑀢𑀺𑀓𑀲𑁆𑀲 𑀧𑀦 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀬𑀣𑀸𑀳 ‘‘𑀧𑀭𑀺𑀡𑀢𑁂 𑀯𑁂𑀫𑀢𑀺𑀓𑁄 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀅𑀧𑀭𑀺𑀡𑀢𑀲𑀜𑁆𑀜𑀺𑀦𑁄 𑀅𑀦𑀸𑀧𑀢𑁆𑀢𑀺. 𑀬𑀣𑀸𑀳 ‘‘𑀧𑀭𑀺𑀡𑀢𑁂 𑀅𑀧𑀭𑀺𑀡𑀢𑀲𑀜𑁆𑀜𑀻 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺.

𑁮𑁮𑁨. ‘‘𑀅𑀜𑁆𑀜𑀲𑁆𑀲 𑀤𑁂𑀳𑀻’’𑀢𑀺 𑀲𑀘𑁂 𑀧𑀭𑀺𑀡𑀸𑀫𑁂𑀢𑀻𑀢𑀺 𑀢𑀣𑀸 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑀁 𑀚𑀸𑀦𑀦𑁆𑀢𑁄 ‘‘𑀅𑀜𑁆𑀜𑀲𑁆𑀲 𑀤𑁂𑀳𑀻’’𑀢𑀺 𑀬𑀤𑀺 𑀧𑀭𑀺𑀡𑀸𑀫𑁂𑀢𑀺. 𑀲𑀼𑀤𑁆𑀥𑀺𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀯𑀢𑁆𑀣𑀼𑀭𑀳𑀺𑀢𑀁 𑀓𑁂𑀯𑀮𑀁 𑀧𑀸𑀘𑀺𑀢𑁆𑀢𑀺𑀬𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑀸𑀢𑀺 𑀲𑀯𑀸𑀲𑀦𑀸𑀦𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀪𑀕𑀯𑀢𑀸. 𑀧𑀸𑀘𑀺𑀢𑁆𑀢𑀺𑀬𑀫𑀼𑀤𑀻𑀭𑀺𑀢𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁂𑀲𑀼 𑀅𑀝𑁆𑀞𑀫𑀲𑁆𑀲 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑀲𑁆𑀲 𑀅𑀯𑀲𑀸𑀦𑁂 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢𑀁 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁪𑁯𑁦) 𑀤𑁂𑀲𑀺𑀢𑀁.

𑁮𑁮𑁩. 𑀏𑀓𑀁 ¶ 𑀘𑀻𑀯𑀭𑀦𑁆𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀘𑀻𑀯𑀭𑀢𑁄 𑀏𑀓𑀁 𑀘𑀻𑀯𑀭𑀁. 𑀘𑀻𑀯𑀭𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀧𑁆𑀧𑀢𑁆𑀣𑁄. 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀢𑁆𑀣𑀯𑀺𑀓𑀧𑁆𑀧𑀢𑁆𑀣𑁄. 𑀏𑀓𑀁 𑀘𑀻𑀯𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀘𑁆𑀘𑀬𑀁 𑀧𑀭𑀲𑁆𑀲, 𑀏𑀓𑀁 𑀧𑀦 𑀅𑀢𑁆𑀢𑀦𑁄 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬 𑀘𑁂𑀢𑀺 𑀬𑁄𑀚𑀦𑀸. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄, 𑀏𑀓𑀓𑁆𑀔𑀡𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑁄 𑀲𑀤𑁆𑀥𑀺𑀁 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸, 𑀅𑀜𑁆𑀜𑀲𑁆𑀲 𑀧𑀭𑀺𑀡𑀸𑀫𑀦𑁂𑀦 𑀲𑀼𑀤𑁆𑀥𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑀸𑀢𑀺 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑁄 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁮𑁮𑁪. 𑀧𑀭𑀺𑀡𑀸𑀫𑁂𑀢𑁆𑀯𑀸 𑀞𑀧𑀺𑀢𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺. ‘‘𑀧𑀭𑀸𑀚𑀬𑁄’’𑀢𑀺 𑀇𑀤𑀁 𑀧𑀸𑀤𑀧𑁆𑀧𑀳𑁄𑀦𑀓𑀁 𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸𑀯𑀢𑁆𑀣𑀼𑀯𑀲𑁂𑀦 𑀧𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀧𑀺 𑀯𑀢𑁆𑀢𑀩𑁆𑀩𑀸.

𑁮𑁮𑁫. 𑀅𑀜𑁆𑀜𑀲𑁆𑀲 𑀘𑁂𑀢𑀺𑀬𑀲𑁆𑀲 𑀧𑁄𑀡𑀁 𑀧𑀭𑀺𑀡𑀢𑀁 𑀅𑀜𑁆𑀜𑀲𑁆𑀲 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸𑀧𑀺 𑀧𑀦 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀲𑀗𑁆𑀖𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀧𑀤𑀤𑁆𑀯𑀬𑁂𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸𑀳 ‘‘𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺 ¶ , 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀘𑀺. 𑁪𑁯𑁨). 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑁄𑀡𑀁 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺.

𑁮𑁮𑁬. 𑀇𑀫𑀲𑁆𑀲 𑀲𑀩𑁆𑀩𑀲𑀢𑁆𑀢𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺.

𑁮𑁮𑁭. 𑀇𑀤𑀁 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀁. 𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀯𑀸𑀘𑀸𑀘𑀺𑀢𑁆𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀦𑀢𑁄 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀧𑀭𑀺𑀡𑀸𑀫𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀓𑁆𑀭𑀺𑀬𑀁. 𑀲𑀗𑁆𑀖𑀸𑀤𑀻𑀦𑀁 𑀧𑀭𑀺𑀡𑀢𑀦𑁆𑀢𑀺𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 ¶ 𑀯𑀺𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑁄 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁.

𑀧𑀭𑀺𑀡𑀢𑀓𑀣𑀸𑀯𑀡𑁆𑀡𑀦𑀸.

𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑁮𑁮𑁮. 𑀬𑁂 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀢𑀭𑀦𑁆𑀢𑀺, 𑀢𑁂 𑀧𑀜𑁆𑀜𑀢𑁆𑀢𑀺𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀯𑀺𑀦𑀬𑀧𑀺𑀝𑀓𑀫𑁂𑀯 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬𑀸𑀢𑀺 𑀧𑀜𑁆𑀜𑀢𑁆𑀢𑀺𑀫𑀳𑀸𑀲𑀫𑀼𑀤𑁆𑀤𑁄, 𑀢𑀁. 𑀏𑀯𑀁 𑀲𑀫𑀼𑀤𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀯𑀬𑀯𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑁂𑀓𑀸’’𑀢𑀺𑀆𑀤𑀺. 𑀦𑁂𑀓𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀯𑀢𑁆𑀢𑀸𑀦𑀺 𑀲𑁂𑀦𑀸𑀲𑀦𑀯𑀢𑁆𑀢𑀸𑀤𑀻𑀦𑀺 𑀔𑀦𑁆𑀥𑀓𑀸𑀕𑀢𑀸𑀦𑀺 𑀉𑀕𑁆𑀕𑀸 𑀉𑀢𑁆𑀢𑀼𑀗𑁆𑀕𑀸 𑀢𑀭𑀗𑁆𑀕𑀫𑀸𑀮𑀸 𑀫𑀳𑀸𑀯𑀻𑀘𑀺𑀧𑀭𑀫𑁆𑀧𑀭𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀦𑀸𑀦𑀧𑁆𑀧𑀓𑀸𑀭𑀔𑀦𑁆𑀥𑀓𑀯𑀢𑁆𑀢𑀲𑀗𑁆𑀔𑀸𑀢𑀫𑀳𑀸𑀢𑀭𑀗𑁆𑀕𑀧𑀭𑀫𑁆𑀧𑀭𑀸𑀬 𑀲𑀚𑁆𑀚𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀮𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀓𑀫𑁂𑀯 𑀅𑀦𑁆𑀢𑁄 𑀯𑁂𑀮𑀸𑀯𑀮𑀬𑁄 𑀬𑀲𑁆𑀲 𑀲𑁄 𑀲𑀻𑀮𑀦𑁆𑀢𑁄, 𑀢𑀁, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸𑀤𑀺𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁂𑀯 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑀸𑀬 𑀅𑀦𑁆𑀢𑀁 𑀯𑁂𑀮𑀸𑀯𑀮𑀬𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸, 𑀲𑀻𑀮𑀸𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑁄 𑀘 𑀕𑀸𑀳𑀓𑀸 𑀫𑀓𑀭𑀸𑀤𑀬𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀲𑀻𑀮𑀸𑀘𑀸𑀭𑀸𑀚𑀻𑀯𑀤𑀺𑀝𑁆𑀞𑀺𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀫𑀼𑀤𑀼𑀲𑀢𑁆𑀢𑀦𑀸𑀲𑀓𑀆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀲𑀗𑁆𑀔𑀸- 𑀢𑀫𑀸𑀢𑀗𑁆𑀕𑀫𑀓𑀭𑀸𑀤𑀺𑀘𑀡𑁆𑀟𑀲𑀢𑁆𑀢𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀬𑀁 𑀕𑀸𑀣𑀸 𑀲𑀫𑀼𑀤𑀸𑀬𑀸𑀯𑀬𑀯𑀸𑀦𑀁 𑀲𑀩𑁆𑀩𑁂𑀲𑀫𑁂𑀯 𑀭𑀽𑀧𑀓𑀸𑀮𑀗𑁆𑀓𑀸𑀭𑁂𑀦 𑀯𑀺𑀭𑀘𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀘𑀺𑀢𑁆𑀢𑀺𑀬𑀓𑀣𑀸𑀯𑀡𑁆𑀡𑀦𑀸

𑁮𑁮𑁯. 𑀏𑀯𑀁 ¶ 𑀦𑀸𑀢𑀺𑀯𑀺𑀢𑁆𑀣𑀸𑀭𑀲𑀗𑁆𑀔𑁂𑀧𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀫𑀼𑀲𑀸𑀪𑀸𑀯𑀁 𑀜𑀢𑁆𑀯𑀸, 𑀅𑀤𑀺𑀝𑁆𑀞𑀁 ‘‘𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀼𑀲𑀸𑀯𑀸𑀤𑁂 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀪𑀡𑀦𑁂𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀚𑀸𑀦𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲 𑀘 𑀫𑀼𑀲𑀸𑀪𑀡𑀦𑁂’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨). ‘‘𑀫𑀼𑀲𑀸𑀯𑀸𑀤𑁂’’𑀢𑀺 𑀳𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀫𑀼𑀲𑀸𑀯𑀸𑀤𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀯𑀸 𑀪𑀡𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘‘𑀅𑀤𑀺𑀝𑁆𑀞𑀁 𑀫𑁂’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀤𑀯𑀸 𑀪𑀡𑀢𑀺 𑀦𑀸𑀫 𑀲𑀳𑀲𑀸 𑀪𑀡𑀢𑀻’’𑀢𑀺 𑀧𑀤𑀪𑀸𑀚𑀦𑀻𑀅𑀝𑁆𑀞𑀓𑀣𑀸𑀬𑀁 ‘‘𑀲𑀳𑀲𑀸 𑀪𑀡𑀢𑀻𑀢𑀺 𑀅𑀯𑀻𑀫𑀁𑀲𑀺𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘𑀅𑀤𑀺𑀝𑁆𑀞𑀁 𑀫𑁂’𑀢𑀺 𑀪𑀡𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧). 𑀭𑀯𑀸 𑀪𑀡𑀦𑁆𑀢𑀲𑁆𑀲𑀸𑀢𑀺 ‘‘𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 ‘‘𑀘𑀻𑀭’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑀲𑁆𑀲. 𑀬𑀣𑀸𑀳 ‘‘𑀭𑀯𑀸 𑀪𑀡𑀢𑀺 𑀦𑀸𑀫 ‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’𑀢𑀺 𑀅𑀜𑁆𑀜𑀁 𑀪𑀡𑀢𑀻’’𑀢𑀺.

𑁮𑁯𑁦. 𑀅𑀜𑁆𑀜𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀸𑀤𑀻𑀲𑀼. 𑀅𑀢𑁆𑀢𑀦𑀸 𑀅𑀮𑀤𑁆𑀥𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 ‘‘𑀮𑀤𑁆𑀥𑀁 𑀫𑀬𑀸’’𑀢𑀺 𑀫𑀼𑀲𑀸 𑀬𑀲𑁆𑀲 𑀪𑀡𑀢𑀺, 𑀢𑁂𑀦 𑀢𑀗𑁆𑀔𑀡𑀫𑁂𑀯 𑀲𑀼𑀢𑁆𑀯𑀸 𑀢𑀤𑀢𑁆𑀣𑁂 𑀜𑀸𑀢𑁂 𑀧𑀸𑀭𑀸𑀚𑀺𑀓𑀲𑁆𑀲, 𑀅𑀜𑁆𑀜𑀸𑀢𑁂 𑀓𑀸𑀮𑀦𑁆𑀢𑀭𑁂𑀦 𑀜𑀸𑀢𑁂 𑀘 𑀧𑀭𑀺𑀬𑀸𑀬𑀯𑀘𑀦𑁂 𑀘 𑀜𑀸𑀢𑁂 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀧𑀭𑀺𑀬𑀸𑀬𑀯𑀘𑀦𑁂 𑀅𑀯𑀺𑀜𑁆𑀜𑀸𑀢𑁂 𑀤𑀼𑀓𑁆𑀓𑀝𑀲𑁆𑀲, 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑁂 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀲𑁆𑀲 ‘‘𑀆𑀧𑀦𑁆𑀦𑁄’’𑀢𑀺 𑀫𑀼𑀲𑀸𑀪𑀡𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲, 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀫𑀼𑀲𑀸𑀯𑀸𑀤𑀲𑁆𑀲 𑀓𑀸𑀭𑀡𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄’’𑀢𑀺. 𑀇𑀫𑀸𑀬 𑀧𑀸𑀘𑀺𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺.

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀓𑀣𑀸𑀯𑀡𑁆𑀡𑀦𑀸.

𑁮𑁯𑁧-𑁩. 𑀯𑀼𑀢𑁆𑀢𑁂𑀲𑀼 ¶ 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀽𑀢𑀺 𑀬𑁄𑀚𑀦𑀸, 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀲𑀼 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀆𑀧𑀢𑁆𑀢𑀺𑀅𑀓𑁆𑀓𑁄𑀲𑀸𑀦𑀁 𑀯𑀲𑁂𑀦 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀽𑀢𑀺 𑀅𑀢𑁆𑀣𑁄 ¶ . 𑀢𑁂𑀲𑀼 𑀓𑀺𑀮𑁂𑀲𑀁 𑀯𑀺𑀦𑀸 𑀲𑀩𑁆𑀩𑁂𑀢𑁂 𑀳𑀻𑀦𑀼𑀓𑁆𑀓𑀝𑁆𑀞𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀚𑀸𑀢𑀺 𑀦𑀸𑀫 𑀤𑁆𑀯𑁂 𑀚𑀸𑀢𑀺𑀬𑁄 𑀳𑀻𑀦𑀸 𑀘 𑀚𑀸𑀢𑀺 𑀉𑀓𑁆𑀓𑀝𑁆𑀞𑀸 𑀘 𑀚𑀸𑀢𑀻’’𑀢𑀺𑀆𑀤𑀺.

𑀢𑀢𑁆𑀣 𑀘𑀡𑁆𑀟𑀸𑀮𑀸𑀤𑀺𑀚𑀸𑀢𑀺 𑀳𑀻𑀦𑀸, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄 𑀉𑀓𑁆𑀓𑀝𑁆𑀞𑀸. 𑀦𑀸𑀫𑁂𑀲𑀼 𑀅𑀯𑀓𑀡𑁆𑀡𑀓𑀚𑀯𑀓𑀡𑁆𑀡𑀓𑀸𑀤𑀺𑀦𑀸𑀫𑀸𑀦𑀺 𑀤𑀸𑀲𑀦𑀸𑀫𑀢𑁆𑀢𑀸 𑀳𑀻𑀦𑀸𑀦𑀺, 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀤𑀺𑀦𑀸𑀫𑀸𑀦𑀺 𑀉𑀓𑁆𑀓𑀝𑁆𑀞𑀸𑀦𑀺. 𑀓𑁄𑀲𑀺𑀬𑀸𑀤𑀺𑀕𑁄𑀢𑁆𑀢𑀁 𑀳𑀻𑀦𑀁, 𑀕𑁄𑀢𑀫𑀸𑀤𑀺𑀕𑁄𑀢𑁆𑀢𑀁 𑀉𑀓𑁆𑀓𑀝𑁆𑀞𑀁. 𑀓𑀫𑁆𑀫𑁂𑀲𑀼 𑀯𑀟𑁆𑀠𑀓𑀺𑀫𑀡𑀺𑀓𑀸𑀭𑀸𑀤𑀺𑀓𑀫𑁆𑀫𑀸𑀦𑀺 𑀳𑀻𑀦𑀸𑀦𑀺, 𑀓𑀲𑀺𑀯𑀸𑀡𑀺𑀚𑁆𑀚𑀸𑀕𑁄𑀭𑀓𑁆𑀔𑀓𑀫𑁆𑀫𑀸𑀦𑀺 𑀉𑀓𑁆𑀓𑀝𑁆𑀞𑀸𑀦𑀺. 𑀲𑀺𑀧𑁆𑀧𑁂𑀲𑀼 𑀦𑀴𑀓𑀸𑀭𑀓𑀼𑀫𑁆𑀪𑀓𑀸𑀭𑀸𑀤𑀺𑀲𑀺𑀧𑁆𑀧𑀁 𑀳𑀻𑀦𑀁, 𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀲𑀺𑀧𑁆𑀧𑀁 𑀉𑀓𑁆𑀓𑀝𑁆𑀞𑀁. 𑀆𑀩𑀸𑀥𑁂𑀲𑀼 𑀲𑀩𑁆𑀩𑁂𑀧𑀺 𑀆𑀩𑀸𑀥𑀸 𑀳𑀻𑀦𑀸, 𑀅𑀧𑀺𑀘 𑀫𑀥𑀼𑀫𑁂𑀳𑁄 𑀧𑀻𑀴𑀸𑀚𑀦𑀓𑀢𑁆𑀢𑀸𑀪𑀸𑀯𑀸 𑀉𑀓𑁆𑀓𑀝𑁆𑀞𑁄. 𑀮𑀺𑀗𑁆𑀕𑁂𑀲𑀼 𑀅𑀢𑀺𑀤𑀻𑀖𑀢𑀸𑀤𑀬𑁄 𑀳𑀻𑀦𑀸, 𑀦𑀸𑀢𑀺𑀤𑀻𑀖𑀢𑀸𑀤𑀬𑁄 𑀉𑀓𑁆𑀓𑀝𑁆𑀞𑀸. 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀳𑀻𑀦𑀸. 𑀲𑀩𑁆𑀩𑀸𑀧𑀢𑁆𑀢𑀺𑀬𑁄𑀧𑀺 𑀳𑀻𑀦𑀸, 𑀅𑀧𑀺𑀘 𑀲𑁄𑀢𑀸𑀧𑀢𑁆𑀢𑀺𑀲𑀫𑀸𑀧𑀢𑁆𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀓𑁆𑀓𑁄𑀲𑁂𑀲𑀼 ‘‘𑀑𑀝𑁆𑀞𑁄𑀲𑀺 𑀫𑁂𑀡𑁆𑀟𑁄𑀲𑀺 𑀕𑁄𑀡𑁄𑀲𑀻’’𑀢𑀺𑀆𑀤𑀺𑀓𑁄 𑀳𑀻𑀦𑁄, ‘‘𑀧𑀡𑁆𑀟𑀺𑀢𑁄𑀲𑀺 𑀩𑁆𑀬𑀢𑁆𑀢𑁄𑀲𑀻’’𑀢𑀺𑀆𑀤𑀺𑀓𑁄 𑀉𑀓𑁆𑀓𑀝𑁆𑀞𑁄.

𑀅𑀜𑁆𑀜𑀢𑁆𑀭𑀜𑁆𑀜𑀸𑀧𑀤𑁂𑀲𑁂𑀦𑀸𑀢𑀺 𑀧𑀭𑀺𑀬𑀸𑀬𑀓𑀣𑀦𑁂𑀦 𑀯𑀺𑀦𑀸. 𑀑𑀫𑀲𑀦𑁆𑀢𑀲𑁆𑀲𑀸𑀢𑀺 𑀯𑀘𑀦𑀧𑀢𑁄𑀤𑁂𑀦 𑀑𑀯𑀺𑀚𑁆𑀛𑀦𑁆𑀢𑀲𑁆𑀲. 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸𑀢𑀺 ‘‘𑀘𑀡𑁆𑀟𑀸𑀮𑁄𑀲𑀺 𑀯𑁂𑀦𑁄𑀲𑀺 𑀦𑁂𑀲𑀸𑀤𑁄𑀲𑀺 𑀭𑀣𑀓𑀸𑀭𑁄𑀲𑀺 𑀧𑀼𑀓𑁆𑀓𑀼𑀲𑁄𑀲𑀻’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄 ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀜𑁆𑀜𑀸𑀢𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸.

𑁮𑁯𑁪. 𑀢𑁂𑀳𑁂𑀯𑀸𑀢𑀺 ¶ 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑁂𑀯. 𑀅𑀜𑁆𑀜𑀸𑀧𑀤𑁂𑀲𑁂𑀦 𑀪𑀽𑀢𑁂𑀦 𑀯𑀸…𑀧𑁂… 𑀆𑀧𑀦𑁆𑀦𑀫𑁂𑀯 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥 𑀪𑀽𑀢𑀸𑀪𑀽𑀢𑀧𑀤𑀸𑀦𑀺 𑀢𑁂𑀳𑀻𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀯𑀘𑀦𑀦𑁆𑀢𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀢𑁂𑀦 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂’’𑀢𑀺𑀆𑀤𑀺𑀤𑀼𑀢𑀺𑀬𑀯𑀸𑀭𑀢𑁆𑀣𑀁 (𑀧𑀸𑀘𑀺. 𑁨𑁬) 𑀤𑀲𑁆𑀲𑁂𑀦𑁆𑀢𑁂𑀦 𑀤𑀼𑀓𑁆𑀓𑀝𑀲𑀸𑀥𑀦𑀢𑁆𑀣𑁂𑀦 𑀢𑀤𑁂𑀓𑀓𑀸𑀭𑀺𑀬𑀁 𑀢𑀢𑀺𑀬𑀁 𑀬𑁂𑀦𑀽𑀦𑀯𑀸𑀭𑀜𑁆𑀘 𑀘𑀢𑀼𑀢𑁆𑀣𑀁 𑀦 𑀫𑀬𑀦𑁆𑀢𑀺𑀆𑀤𑀺𑀯𑀸𑀭𑀜𑁆𑀘 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂’𑀢𑀺 𑀯𑀸𑀭𑁂 𑀧𑀦 𑀧𑀭𑀺𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀪𑀸𑀯𑁂𑀦 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 ‘𑀬𑁂𑀦𑀽𑀦…𑀧𑁂… 𑀦 𑀫𑀬’𑀦𑁆𑀢𑀺 𑀯𑀸𑀭𑁂𑀲𑀼𑀧𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬).

𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀳𑀺𑀧𑀻𑀢𑀺 𑀏𑀢𑁆𑀣𑀸𑀧𑀺 𑀢𑀣𑁂𑀯 ‘‘𑀪𑀽𑀢𑁂𑀦 𑀯𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺. ‘‘𑀘𑁄𑀭𑁄𑀲𑀺, 𑀕𑀡𑁆𑀞𑀺𑀪𑁂𑀤𑀓𑁄𑀲𑀻’’𑀢𑀺𑀆𑀤𑀺 𑀧𑀸𑀴𑀺𑀫𑀼𑀢𑁆𑀢𑀧𑀤𑀁 𑀦𑀸𑀫. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀘𑀢𑀽𑀲𑀼 𑀯𑀸𑀭𑁂𑀲𑀼, 𑀧𑀸𑀴𑀺𑀫𑀼𑀢𑁆𑀢𑀧𑀤𑁂𑀲𑀼 ¶ 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀧𑀦 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯. ‘𑀘𑁄𑀭𑁄𑀲𑀺, 𑀕𑀡𑁆𑀞𑀺𑀪𑁂𑀤𑀓𑁄𑀲𑀻’𑀢𑀺𑀆𑀤𑀺𑀯𑀘𑀦𑁂𑀳𑀺 𑀧𑀦 𑀉𑀧𑀲𑀫𑁆𑀧𑀦𑁆𑀦𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀲𑀩𑁆𑀩𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬). ‘‘𑀅𑀦𑀼𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 ‘‘𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑀺𑀆𑀤𑀬𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀲𑀗𑁆𑀕𑀳𑀺𑀢𑀸. 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 𑀯𑀓𑁆𑀔𑀢𑀺 ‘‘𑀧𑀯𑀺𑀝𑁆𑀞𑀸𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀇𑀥 𑀘 𑀪𑀺𑀓𑁆𑀔𑀼𑀦𑀻’’𑀢𑀺.

𑁮𑁯𑁫. 𑀤𑀯𑀓𑀫𑁆𑀬𑀢𑀸𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨, 𑁨𑁩, 𑁪𑁨𑁨; 𑀅. 𑀦𑀺. 𑁬.𑁫𑁮; 𑁯.𑁯; 𑀫𑀳𑀸𑀦𑀺. 𑁨𑁦𑁬; 𑀯𑀺𑀪. 𑁫𑁧𑁮) 𑀯𑀺𑀬 𑀬-𑀓𑀸𑀭𑀮𑁄𑀧𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀲𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣𑁂𑀯. 𑀤𑀼𑀩𑁆𑀪𑀸𑀲𑀺𑀢𑀫𑀼𑀤𑀻𑀭𑀺𑀢𑀦𑁆𑀢𑀺 ‘‘𑀘𑀡𑁆𑀟𑀸𑀮𑁄𑀲𑀺…𑀧𑁂… 𑀧𑀼𑀓𑁆𑀓𑀼𑀲𑁄𑀲𑀻’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 ¶ 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀩𑁆𑀪𑀸𑀲𑀺𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁨) 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀫𑁆𑀫𑀼𑀔𑀸 𑀧𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀳𑀺 𑀘 𑀤𑀼𑀓𑁆𑀓𑀝𑀯𑀢𑁆𑀣𑀽𑀳𑀺 𑀘 𑀅𑀓𑁆𑀓𑁄𑀲𑀦𑁂 𑀤𑀼𑀓𑁆𑀓𑀝𑀫𑁂𑀯. 𑀢𑀣𑀸 𑀤𑀯𑀓𑀫𑁆𑀬𑀢𑀸𑀬 𑀧𑀭𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀩𑁆𑀪𑀸𑀲𑀺𑀢𑀫𑁂𑀯𑀸𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑁮𑁯𑁬-𑁭. 𑀅𑀢𑁆𑀣𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀤𑀢𑁄 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑁄 𑀦𑀸𑀫 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀧𑀸𑀴𑀺𑀬𑁂𑀯. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁫). 𑀅𑀦𑀼𑀲𑀸𑀲𑀦𑀻 𑀦𑀸𑀫 ‘‘𑀇𑀤𑀸𑀦𑀺𑀧𑀺 𑀘𑀡𑁆𑀟𑀸𑀮𑁄𑀲𑀺, 𑀫𑀸 𑀧𑀸𑀧𑀥𑀫𑁆𑀫𑀁 𑀅𑀓𑀸𑀲𑀺, 𑀫𑀸 𑀢𑀫𑁄 𑀢𑀫𑀧𑀭𑀸𑀬𑀦𑁄 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁩𑁫) 𑀦𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀲𑀭𑀽𑀧𑀸𑀬𑁂𑀯 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀢𑀸𑀬 𑀞𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀪𑀸𑀯𑀢𑁄 𑀅𑀦𑁆𑀢𑀭𑀸 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂. 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑀸𑀦𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀯 𑀳𑁄𑀢𑀺.

𑀑𑀫𑀲𑀯𑀸𑀤𑀓𑀣𑀸𑀯𑀡𑁆𑀡𑀦𑀸.

𑁮𑁯𑁮. 𑀤𑀼𑀯𑀺𑀥𑀸𑀓𑀸𑀭𑀢𑁄 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑀸, 𑀯𑀸𑀘𑀸 ¶ , 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑁂 𑀪𑀺𑀦𑁆𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀺𑀲𑀼𑀡𑀸 𑀏𑀯 𑀧𑁂𑀲𑀼𑀜𑁆𑀜𑀁, 𑀢𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀲𑀳𑀘𑀭𑀺𑀬𑀦𑀬𑁂𑀦 𑀧𑀺𑀲𑀼𑀡𑁄, 𑀢𑀲𑁆𑀲 𑀓𑀫𑁆𑀫𑀁 𑀧𑁂𑀲𑀼𑀜𑁆𑀜𑀁, 𑀪𑀺𑀓𑁆𑀔𑀽𑀦𑀁 𑀧𑁂𑀲𑀼𑀜𑁆𑀜𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀁, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂. 𑀧𑀤𑀪𑀸𑀚𑀦𑁂 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 ‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀘𑀡𑁆𑀟𑀸𑀮𑁄…𑀧𑁂… 𑀧𑀼𑀓𑁆𑀓𑀼𑀲𑁄’𑀢𑀺 𑀪𑀡𑀢𑀻’𑀢𑀺 𑀆𑀧𑀢𑁆𑀢𑀺…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁯) 𑀯𑀼𑀢𑁆𑀢𑀢𑁆𑀢𑀸 𑀲𑀬𑀁 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀼 𑀅𑀜𑁆𑀜𑀢𑀭𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀦𑁆𑀦𑀁 ¶ 𑀧𑀭𑀫𑁆𑀫𑀼𑀔𑀸 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀓𑁆𑀔𑀫𑀸𑀦𑀲𑀭𑀽𑀧𑁂𑀲𑀼 𑀅𑀢𑁆𑀢𑀦𑁄 𑀧𑀺𑀬𑀓𑀸𑀫𑀢𑀸𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀓𑀸𑀭𑀡𑁂𑀲𑀼 𑀅𑀜𑁆𑀜𑀢𑀭𑀓𑀸𑀭𑀡𑀁 𑀧𑀝𑀺𑀘𑁆𑀘 ‘‘𑀅𑀲𑀼𑀓𑁄 𑀢𑀼𑀬𑁆𑀳𑀁 𑀏𑀯𑀁 𑀯𑀤𑀢𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀳𑀭𑀢𑀺, 𑀢𑀲𑁆𑀲 𑀧𑁂𑀲𑀼𑀜𑁆𑀜𑀓𑀣𑀦𑀦𑀺𑀫𑀺𑀢𑁆𑀢𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.