📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀯𑀺𑀦𑀬𑀯𑀺𑀦𑀺𑀘𑁆𑀙𑀬-𑀝𑀻𑀓𑀸 (𑀤𑀼𑀢𑀺𑀬𑁄 𑀪𑀸𑀕𑁄)

𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸

𑁧𑁮𑁩𑁦-𑁧. 𑀏𑀯𑀁 ¶ ¶ 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀤𑁆𑀯𑁂𑀦𑀯𑀼𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑁂 𑀧𑀸𑀝𑀺𑀤𑁂𑀲𑀦𑀻𑀬𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑁄 𑀘𑀦𑁆𑀢𑀭𑀖𑀭’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀦𑁆𑀢𑀭𑀖𑀭𑀦𑁆𑀢𑀺 𑀭𑀣𑀺𑀓𑀸𑀤𑀺𑀫𑀸𑀳. 𑀬𑀣𑀸𑀳 ‘‘𑀅𑀦𑁆𑀢𑀭𑀖𑀭𑀁 𑀦𑀸𑀫 𑀭𑀣𑀺𑀓𑀸 𑀩𑁆𑀬𑀽𑀳𑀁 𑀲𑀺𑀗𑁆𑀖𑀸𑀝𑀓𑀁 𑀖𑀭’’𑀦𑁆𑀢𑀺.

𑀬𑁄 ¶ 𑀧𑀦 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀁, 𑀪𑁄𑀚𑀦𑀫𑁆𑀧𑀺 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀪𑁄𑀕𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀇𑀢𑁄 𑀧𑀝𑁆𑀞𑀸𑀬 𑀘𑀢𑀲𑁆𑀲𑁄 𑀕𑀸𑀣𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀸, 𑀢𑀸𑀲𑀁 𑀅𑀬𑀁 𑀧𑀝𑀺𑀧𑀸𑀝𑀺 𑁋 ‘‘𑀏𑀢𑁆𑀣𑀦𑁆𑀢𑀭𑀖𑀭’’𑀦𑁆𑀢𑀺 𑀢𑀢𑀺𑀬𑀸, ‘‘𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀘𑀢𑀼𑀢𑁆𑀣𑀻, ‘‘𑀭𑀣𑀺𑀓𑀸𑀤𑀻𑀲𑀽’’𑀢𑀺 𑀧𑀜𑁆𑀘𑀫𑀻 ¶ , ‘‘𑀭𑀣𑀺𑀓𑀸𑀬𑀧𑀺 𑀯𑀸’’𑀢𑀺 𑀙𑀝𑁆𑀞𑀻. 𑀧𑀝𑀺𑀧𑀸𑀝𑀺 𑀧𑀦𑀸𑀬𑀁 𑀫𑀸𑀢𑀺𑀓𑀝𑁆𑀞𑀓𑀣𑀓𑁆𑀓𑀫𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀬 𑀧𑀝𑀺𑀧𑀸𑀝𑀺𑀬𑀸 𑀢𑀸𑀲𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑁋

𑁧𑁮𑁩𑁨-𑁩. 𑀧𑀼𑀭𑀺𑀫𑀕𑀸𑀣𑀸𑀤𑁆𑀯𑀬𑁂𑀦 𑀧𑀤𑀪𑀸𑀚𑀦𑀸𑀕𑀢𑀲𑀸𑀫𑀜𑁆𑀜𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑁂. 𑀢𑀲𑁆𑀲𑀸𑀢𑀺 𑀅𑀜𑁆𑀜𑀸𑀢𑀺𑀓𑀪𑀺𑀓𑁆𑀔𑀼𑀦𑀺𑀬𑀸. 𑀯𑀸𑀓𑁆𑀬𑀢𑁄𑀢𑀺 ‘‘𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬𑀸’’𑀢𑀺 𑀯𑀘𑀦𑀢𑁄. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀬𑀲𑁆𑀫𑀸 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀦𑀧𑁆𑀧𑀫𑀸𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀬 (𑀧𑀸𑀘𑀺. 𑀅𑀝𑁆𑀞. 𑁫𑁫𑁩) 𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀆𑀭𑀸𑀫𑀸𑀤𑀻𑀲𑀼 𑀞𑀢𑁆𑀯𑀸 𑀤𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀯𑀻𑀣𑀺𑀆𑀤𑀻𑀲𑀼 𑀞𑀢𑁆𑀯𑀸 𑀬𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬 𑀘𑁂, 𑀏𑀯𑀁 𑀧𑀝𑀺𑀕𑁆𑀕𑀡𑁆𑀳𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀧𑀭𑀺𑀪𑁄𑀕𑀲𑁆𑀲 𑀧𑀝𑀺𑀕𑁆𑀕𑀳𑀡𑀫𑀽𑀮𑀓𑀢𑁆𑀢𑀸 𑀦 𑀤𑁄𑀲𑁄. ‘‘𑀧𑀝𑀺𑀕𑁆𑀕𑀡𑁆𑀳𑀢𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀪𑁄𑀕𑁂 𑀧𑀸𑀝𑀺𑀤𑁂𑀲𑀦𑀻𑀬𑀸𑀪𑀸𑀯𑁄 𑀘 𑀤𑀻𑀧𑀺𑀢𑁄 𑀳𑁄𑀢𑀺.

𑁧𑁮𑁩𑁪. 𑀲𑀘𑁂 𑀪𑀺𑀓𑁆𑀔𑀼𑀦𑀻 𑀭𑀣𑀺𑀓𑀸𑀤𑀻𑀲𑀼 𑀞𑀢𑁆𑀯𑀸 𑀪𑁄𑀚𑀦𑀁 𑀤𑁂𑀢𑀺, 𑀪𑀺𑀓𑁆𑀔𑀼 𑀅𑀦𑁆𑀢𑀭𑀸𑀭𑀸𑀫𑁂 𑀞𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑁂, 𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀪𑀺𑀓𑁆𑀔𑀼𑀦𑀺 𑀪𑁄𑀚𑀦’’𑀦𑁆𑀢𑀺 𑀭𑀲𑁆𑀲𑀢𑁆𑀢𑀁. 𑀆𑀧𑀢𑁆𑀢𑀻𑀢𑀺 𑀘 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀤𑀼𑀓𑁆𑀓𑀝𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁮𑁩𑁫. 𑀭𑀣𑀺𑀓𑀸𑀤𑀻𑀲𑀼 𑀞𑀢𑁆𑀯𑀸 𑀪𑀺𑀓𑁆𑀔𑀼𑀦𑀻 𑀪𑁄𑀚𑀦𑀁 𑀤𑁂𑀢𑀺 𑀘𑁂, 𑀢𑀁 𑀭𑀣𑀺𑀓𑀸𑀬𑀧𑀺 𑀯𑀸…𑀧𑁂… 𑀅𑀬𑀁 𑀦𑀬𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀭𑀣𑀺𑀓𑀸𑀢𑀺 𑀭𑀘𑁆𑀙𑀸. 𑀩𑁆𑀬𑀽𑀳𑀦𑁆𑀢𑀺 𑀅𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸 𑀕𑀢𑀧𑀘𑁆𑀘𑀸𑀕𑀢𑀭𑀘𑁆𑀙𑀸. 𑀲𑀦𑁆𑀥𑀺 𑀦𑀸𑀫 𑀖𑀭𑀲𑀦𑁆𑀥𑀺. 𑀲𑀺𑀗𑁆𑀖𑀸𑀝𑀓𑀦𑁆𑀢𑀺 𑀘𑀢𑀼𑀓𑁆𑀓𑁄𑀡𑀁 𑀯𑀸 𑀢𑀺𑀓𑁄𑀡𑀁 𑀯𑀸 𑀫𑀕𑁆𑀕𑀲𑀫𑁄𑀥𑀸𑀦𑀝𑁆𑀞𑀸𑀦𑀁. 𑀅𑀬𑀁 𑀦𑀬𑁄𑀢𑀺 ‘‘𑀆𑀧𑀢𑁆𑀢𑀻’’𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁄.

𑁧𑁮𑁩𑁭. 𑀆𑀫𑀺𑀲𑁂𑀦 ¶ ¶ 𑀅𑀲𑀫𑁆𑀪𑀺𑀦𑁆𑀦𑀭𑀲𑀁 𑀲𑀦𑁆𑀥𑀸𑀬 𑀇𑀤𑀁 𑀤𑀼𑀓𑁆𑀓𑀝𑀁 𑀪𑀸𑀲𑀺𑀢𑀁. 𑀆𑀫𑀺𑀲𑁂𑀦 𑀲𑀫𑁆𑀪𑀺𑀦𑁆𑀦𑁂 𑀏𑀓𑀭𑀲𑁂 𑀬𑀸𑀫𑀓𑀸𑀮𑀺𑀓𑀸𑀤𑀺𑀫𑁆𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁧𑁮𑁩𑁮. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀳𑀢𑁆𑀣𑀢𑁄𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄. 𑀬𑀣𑀸𑀳 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁫𑁩). 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸𑀢𑀺.

𑁧𑁮𑁩𑁯. 𑀅𑀜𑁆𑀜𑀸𑀢𑀺𑀓𑀸𑀬 𑀜𑀸𑀢𑀺𑀓𑀲𑀜𑁆𑀜𑀺𑀲𑁆𑀲, 𑀢𑀣𑁂𑀯 𑀯𑀺𑀫𑀢𑀺𑀲𑁆𑀲 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁧𑁮𑁪𑁦. 𑀅𑀜𑁆𑀜𑀸𑀢𑀺𑀓𑀸𑀬 𑀤𑀸𑀧𑁂𑀦𑁆𑀢𑀺𑀬𑀸 𑀪𑀽𑀫𑀺𑀬𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀤𑀫𑀸𑀦𑀸𑀬 𑀯𑀸 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀼 𑀞𑀢𑁆𑀯𑀸 𑀤𑁂𑀦𑁆𑀢𑀺𑀬𑀸 𑀧𑀝𑀺𑀕𑁆𑀕𑀡𑁆𑀳𑀢𑁄 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀧𑀝𑀺𑀓𑁆𑀓𑀫𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀓𑁆𑀓𑀫𑀦𑀁 𑀦𑀸𑀫 𑀪𑁄𑀚𑀦𑀲𑀸𑀮𑀸.

𑁧𑁮𑁪𑁧. 𑀕𑀸𑀫𑀢𑁄 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀻𑀢𑀺 𑀬𑁄𑀚𑀦𑀸.

𑁧𑁮𑁪𑁨. 𑀳𑀢𑁆𑀣𑀢𑁄𑀢𑀺 𑀏𑀢𑁆𑀣 ‘‘𑀕𑀳𑀡𑁂’’𑀢𑀺 𑀲𑁂𑀲𑁄. 𑀢𑀣𑀸𑀢𑀺 𑀅𑀦𑀸𑀧𑀢𑁆𑀢𑀺. 𑀲𑀫𑀼𑀝𑁆𑀞𑀸𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀴𑀓𑀮𑁄𑀫𑁂𑀦 𑀲𑀫𑀁 𑀫𑀢𑀦𑁆𑀢𑀺 𑀬𑁄𑀚𑀦𑀸.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸.

𑁧𑁮𑁪𑁩-𑁪. 𑀅𑀯𑀼𑀢𑁆𑀢𑁂𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀅𑀯𑀼𑀢𑁆𑀢𑁂. 𑀏𑀓𑁂𑀦𑀧𑀺 𑀘 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀲𑀓𑁆𑀓𑀸𑀢𑀺 𑀅𑀧𑀕𑀘𑁆𑀙. 𑀆𑀤𑀺-𑀅𑀢𑁆𑀣𑀯𑀸𑀘𑀺𑀦𑀸 𑀇𑀢𑀺-𑀲𑀤𑁆𑀤𑁂𑀦 ‘‘𑀅𑀧𑀲𑀓𑁆𑀓 𑀢𑀸𑀯, 𑀪𑀕𑀺𑀦𑀺, 𑀬𑀸𑀯 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀯𑀸𑀓𑁆𑀬𑀲𑁂𑀲𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀫𑀺𑀦𑀸 𑀅𑀧𑀲𑀸𑀤𑀦𑀸𑀓𑀸𑀭𑁄 ¶ 𑀲𑀦𑁆𑀤𑀲𑁆𑀲𑀺𑀢𑁄. ‘‘𑀏𑀓𑁂𑀦𑀧𑀺 𑀘 𑀪𑀺𑀓𑁆𑀔𑀼𑀦𑀸’’𑀢𑀺 𑀇𑀫𑀺𑀦𑀸 𑀅𑀯𑀓𑀁𑀲𑁄 𑀤𑀲𑁆𑀲𑀺𑀢𑁄. 𑀉𑀓𑁆𑀓𑀁𑀲𑁄 𑀧𑀦 ‘‘𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀸 𑀪𑀺𑀓𑁆𑀔𑀼𑀦𑀻 𑀅𑀧𑀲𑀸𑀤𑁂𑀢𑀩𑁆𑀩𑀸’’𑀢𑀺 𑀧𑀸𑀴𑀺𑀢𑁄𑀧𑀺 𑀤𑀝𑁆𑀞𑀩𑁆𑀩𑁄. ‘‘𑀆𑀫𑀺𑀲’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀧𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀲𑁆𑀲𑁂𑀯 𑀕𑀳𑀡𑀁. 𑀬𑀣𑀸𑀳 ‘‘𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺. 𑀪𑁄𑀕𑁂𑀢𑀺 𑀘 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁧𑁮𑁪𑁫. 𑀢𑀣𑁂𑀯𑀸𑀢𑀺 ¶ 𑀤𑀼𑀓𑁆𑀓𑀝𑀁. 𑀢𑀢𑁆𑀣𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬.

𑁧𑁮𑁪𑁬. 𑀅𑀢𑁆𑀢𑀦𑁄 𑀪𑀢𑁆𑀢𑁂 𑀤𑀺𑀦𑁆𑀦𑁂𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀧𑀦 𑀆𑀧𑀢𑁆𑀢𑀺𑀲𑀫𑁆𑀪𑀯𑀸 ‘‘𑀦 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀅𑀢𑁆𑀢𑀦𑁄 𑀪𑀢𑁆𑀢𑀁 𑀤𑀸𑀧𑁂𑀢𑀺, 𑀦 𑀤𑁂𑀢𑀻𑀢𑀺 𑀏𑀢𑁆𑀣 𑀲𑀘𑁂𑀧𑀺 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀤𑁂𑀢𑀺, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺𑀬𑁂𑀯, 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁫𑁮). 𑀢𑀣𑀸𑀢𑀺 𑀅𑀦𑀸𑀧𑀢𑁆𑀢𑀺. 𑀉𑀪𑀬𑀲𑀺𑀓𑁆𑀔𑀸𑀧𑀤𑁂𑀳𑀺𑀧𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀤𑁂𑀢𑀺 𑀘𑁂’’𑀢𑀺. 𑀬𑀣𑀸𑀳 ‘‘𑀅𑀜𑁆𑀜𑁂𑀲𑀁 𑀪𑀢𑁆𑀢𑀁 𑀤𑁂𑀢𑀺, 𑀦 𑀤𑀸𑀧𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀘𑁂𑀧𑀺 𑀤𑀸𑀧𑁂𑀬𑁆𑀬, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬, 𑀤𑁂𑀦𑁆𑀢𑀺𑀬𑀸 𑀧𑀦 𑀦𑁂𑀯 𑀇𑀫𑀺𑀦𑀸, 𑀦 𑀧𑀼𑀭𑀺𑀫𑁂𑀦 𑀆𑀧𑀢𑁆𑀢𑀻’’𑀢𑀺.

𑁧𑁮𑁪𑁭. 𑀪𑀺𑀓𑁆𑀔𑀼𑀦𑀻 𑀬𑀁 𑀦 𑀤𑀺𑀦𑁆𑀦𑀁, 𑀢𑀁 𑀤𑀸𑀧𑁂𑀢𑀺, 𑀬𑀢𑁆𑀣 𑀯𑀸 𑀦 𑀤𑀺𑀦𑁆𑀦𑀁, 𑀢𑀢𑁆𑀣 𑀤𑀸𑀧𑁂𑀢𑀺, 𑀢𑀫𑁆𑀧𑀺 𑀲𑀩𑁆𑀩𑁂𑀲𑀁 𑀫𑀺𑀢𑁆𑀢𑀸𑀫𑀺𑀢𑁆𑀢𑀸𑀦𑀁 𑀲𑀫𑀁 𑀤𑀸𑀧𑁂𑀢𑀺, 𑀢𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺.

𑁧𑁮𑁪𑁮. 𑀲𑀺𑀓𑁆𑀔𑀫𑀸𑀦𑀸 𑀯𑀸 𑀲𑀸𑀫𑀡𑁂𑀭𑀺𑀓𑀸 𑀯𑀸 ‘‘𑀇𑀥 𑀲𑀽𑀧𑀁 𑀤𑁂𑀣, 𑀑𑀤𑀦𑀁 𑀤𑁂𑀣𑀸’’𑀢𑀺 𑀯𑁄𑀲𑀸𑀲𑀦𑁆𑀢𑀻 𑀯𑀺𑀥𑀸𑀦𑀁 𑀓𑀭𑁄𑀦𑁆𑀢𑀻 𑀞𑀺𑀢𑀸, 𑀢𑀁 𑀅𑀦𑀧𑀲𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀘𑁂𑀯 𑀪𑁄𑀚𑀦𑀸𑀦𑀺 𑀯𑀺𑀦𑀸 𑀅𑀜𑁆𑀜𑀁 𑀯𑁄𑀲𑀸𑀲𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀅𑀦𑀧𑀲𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀦𑀧𑀲𑀸𑀤𑁂𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀸𑀤𑀺𑀦𑁄𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁮𑁪𑁯. 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 ¶ 𑀏𑀢𑁆𑀣 ‘‘𑀇𑀫𑀲𑁆𑀲𑀸’’𑀢𑀺 𑀲𑁂𑀲𑁄. 𑀪𑁄𑀚𑀦𑀁 𑀓𑀺𑀭𑀺𑀬𑀁, 𑀯𑁄𑀲𑀸𑀲𑀦𑁆𑀢𑀺𑀬𑀸 𑀅𑀦𑀺𑀯𑀸𑀭𑀡𑀁 𑀅𑀓𑀺𑀭𑀺𑀬𑀦𑁆𑀢𑀺 𑀏𑀯𑀫𑀺𑀤𑀁 𑀓𑁆𑀭𑀺𑀬𑀸𑀓𑁆𑀭𑀺𑀬𑀁.

𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸.

𑁧𑁮𑁫𑁦-𑁧. 𑀲𑁂𑀓𑁆𑀔𑀦𑁆𑀢𑀺 𑀲𑀫𑁆𑀫𑀢𑁂𑀢𑀺 ‘‘𑀲𑁂𑀓𑁆𑀔𑀲𑀫𑁆𑀫𑀢𑀁 𑀦𑀸𑀫 𑀓𑀼𑀮𑀁 𑀬𑀁 𑀓𑀼𑀮𑀁 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀪𑁄𑀕𑁂𑀦 𑀳𑀸𑀬𑀢𑀺, 𑀏𑀯𑀭𑀽𑀧𑀲𑁆𑀲 𑀓𑀼𑀮𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑁂𑀓𑁆𑀔𑀲𑀫𑁆𑀫𑀼𑀢𑀺 𑀤𑀺𑀦𑁆𑀦𑀸 𑀳𑁄𑀢𑀻’’𑀢𑀺 (𑀧𑀸𑀘𑀺. 𑁫𑁬𑁭) 𑀯𑀼𑀢𑁆𑀢𑀁 𑀇𑀤𑀁 𑀓𑀼𑀮𑀁 𑀲𑁂𑀓𑁆𑀔𑀲𑀫𑁆𑀫𑀢𑀁 𑀦𑀸𑀫. 𑀢𑁂𑀦𑀸𑀳 ‘‘𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂 𑀓𑀼𑀮𑁂’’𑀢𑀺. 𑀮𑀤𑁆𑀥𑀸 𑀲𑀫𑁆𑀫𑀼𑀢𑀺 𑀬𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀦𑁆𑀢𑁂 𑀦𑀺𑀫𑀦𑁆𑀢𑀺𑀢𑁄𑀧𑀺 𑀅𑀦𑀺𑀫𑀦𑁆𑀢𑀺𑀢𑁄𑀯 𑀳𑁄𑀢𑀻𑀢𑀺 𑀆𑀳 ‘‘𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑀸 𑀧𑀼𑀩𑁆𑀩𑁂𑀯𑀸’’𑀢𑀺. 𑀬𑀣𑀸𑀳 ‘‘𑀅𑀦𑀺𑀫𑀦𑁆𑀢𑀺𑀢𑁄 𑀦𑀸𑀫 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 ¶ 𑀯𑀸 𑀅𑀦𑀺𑀫𑀦𑁆𑀢𑀺𑀢𑁄, 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑁂 𑀦𑀺𑀫𑀦𑁆𑀢𑁂𑀢𑀺, 𑀏𑀲𑁄 𑀅𑀦𑀺𑀫𑀦𑁆𑀢𑀺𑀢𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁫𑁬𑁭).

‘‘𑀅𑀕𑀺𑀮𑀸𑀦𑁄 𑀦𑀸𑀫 𑀬𑁄 𑀲𑀓𑁆𑀓𑁄𑀢𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀲𑀫𑀢𑁆𑀣𑁄 𑀅𑀕𑀺𑀮𑀸𑀦𑁄 𑀦𑀸𑀫. 𑀕𑀳𑁂𑀢𑁆𑀯𑀸𑀢𑀺 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. ‘‘𑀆𑀫𑀺𑀲’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀳 ‘‘𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 (𑀧𑀸𑀘𑀺. 𑁫𑁬𑁭). 𑀕𑀳𑀡𑁂𑀢𑀺 𑀏𑀢𑁆𑀣 ‘‘𑀆𑀳𑀸𑀭𑀢𑁆𑀣𑀸𑀬𑀸’’𑀢𑀺 𑀲𑁂𑀲𑁄.

𑁧𑁮𑁫𑁩. 𑀢𑀢𑁆𑀣𑀸𑀢𑀺 𑀅𑀲𑁂𑀓𑁆𑀔𑀲𑀫𑁆𑀫𑀢𑁂 𑀓𑀼𑀮𑁂. 𑀢𑀣𑁂𑀯 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁.

𑁧𑁮𑁫𑁪. 𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀦𑀺𑀫𑀦𑁆𑀢𑀺𑀢𑀲𑁆𑀲 𑀅𑀯𑀲𑁂𑀲𑀁 𑀕𑀡𑁆𑀳𑀸𑀢𑀺. 𑀬𑀣𑀸𑀳 ‘‘𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀲𑁂𑀲𑀓𑀁 𑀪𑀼𑀜𑁆𑀚𑀢𑀻’’𑀢𑀺. 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀸 𑀢𑀢𑁆𑀣 𑀤𑀻𑀬𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑁂𑀓𑁆𑀔𑀲𑀫𑁆𑀫𑀢𑁂 𑀓𑀼𑀮𑁂.

𑁧𑁮𑁫𑁫. 𑀬𑀢𑁆𑀣 ¶ 𑀓𑀢𑁆𑀣𑀘𑀻𑀢𑀺 𑀆𑀲𑀦𑀲𑀸𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺. 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀓𑁂 𑀯𑀸𑀧𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀓𑀉𑀧𑁄𑀲𑀣𑀺𑀓𑀧𑀸𑀝𑀺𑀧𑀤𑀺𑀓𑀪𑀢𑁆𑀢𑀸𑀦𑀁 𑀕𑀳𑀡𑀁.

𑁧𑁮𑁫𑁬. 𑀤𑁆𑀯𑀸𑀭𑁂𑀢𑀺 𑀏𑀢𑁆𑀣 ‘‘𑀞𑀧𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀲𑀫𑁆𑀧𑀢𑁆𑀢𑁂𑀢𑀺 𑀏𑀢𑁆𑀣 ‘‘𑀧𑀘𑁆𑀙𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀲𑀘𑁂𑀧𑀺 𑀅𑀦𑀸𑀕𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 𑀧𑀞𑀫𑀁𑀬𑁂𑀯 𑀦𑀻𑀳𑀭𑀺𑀢𑁆𑀯𑀸 𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀫𑁆𑀧𑀢𑁆𑀢𑀲𑁆𑀲 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁬𑁯).

𑁧𑁮𑁫𑁭. 𑀫𑀳𑀸𑀧𑀘𑁆𑀘𑀭𑀺𑀬𑀸(𑀧𑀆𑀘𑀺. 𑀅𑀝𑁆𑀞. 𑁫𑁬𑁯) 𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀺. 𑀲𑀫𑀼𑀝𑁆𑀞𑀸𑀦𑁂𑀴𑀓𑀽𑀧𑀫𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀢𑁄 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸.

𑁧𑁮𑁫𑁮-𑁯. ‘‘𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀁𑀯𑀺𑀤𑀺𑀢𑀁, 𑀏𑀢𑀁 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀦𑀸𑀫𑀸’’𑀢𑀺 𑀯𑀘𑀦𑀢𑁄 𑀘 𑀇𑀥𑀸𑀧𑀺 ‘‘𑀲𑀳𑀥𑀫𑁆𑀫𑀺𑀓𑀜𑀸𑀧𑀺𑀢’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 𑀅𑀕𑀳𑀝𑁆𑀞-𑀲𑀤𑁆𑀤𑁂𑀦 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀕𑀳𑀡𑀁. 𑀯𑀼𑀢𑁆𑀢𑀫𑁂𑀯 ¶ 𑀦𑀬𑀁 𑀯𑁄𑀳𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑁂𑀦 𑀯𑀸’’𑀢𑀺. ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀻’’𑀢𑀺 (𑀧𑀸𑀘𑀺. 𑁫𑁭𑁩) 𑀯𑀘𑀦𑀢𑁄 𑀆𑀭𑀸𑀫𑀦𑁆𑀢𑀺 𑀆𑀭𑀜𑁆𑀜𑀓𑀸𑀭𑀸𑀫𑀫𑀸𑀳. 𑀲𑀘𑁂 𑀏𑀯𑀫𑀸𑀭𑁄𑀘𑀺𑀢𑀁 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁 𑀧𑀤𑀪𑀸𑀚𑀦𑁂𑀢𑀺 (𑀧𑀸𑀘𑀺. 𑁫𑁭𑁩) 𑀬𑁄𑀚𑀦𑀸. 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀧𑀕𑁂𑀯 𑀦𑀺𑀯𑁂𑀤𑀺𑀢𑀁.

𑁧𑁮𑁬𑁦. 𑀧𑀘𑁆𑀙𑀸 𑀬𑀣𑀸𑀭𑁄𑀘𑀺𑀢𑀁 𑀢𑀫𑁂𑀯 𑀯𑀸 𑀢𑀲𑁆𑀲 𑀘 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀜𑁆𑀜𑀁 𑀩𑀳𑀼𑀁 𑀯𑀸 𑀆𑀳𑀭𑀻𑀬𑀢𑀼, 𑀢𑀫𑁆𑀧𑀺 𑀧𑀝𑀺𑀲𑀁𑀯𑁂𑀤𑀺𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁧𑁮𑁬𑁧. 𑀬𑀸𑀕𑀼𑀬𑀸 𑀯𑀺𑀤𑀺𑀢𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀢𑀁 𑀞𑀧𑁂𑀢𑁆𑀯𑀸’’𑀢𑀺 𑀇𑀤𑀁 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑀺. 𑀇𑀤𑀫𑁆𑀧𑀺 𑀯𑀺𑀤𑀺𑀢𑀁 𑀓𑀼𑀭𑀼𑀦𑁆𑀤𑀺𑀬𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁮𑁬𑁨. 𑀧𑀦𑀸𑀢𑀺 ¶ 𑀅𑀧𑀺-𑀲𑀤𑁆𑀤𑀢𑁆𑀣𑁄. 𑀅𑀜𑁆𑀜𑀸𑀦𑀺𑀧𑀺 𑀓𑀼𑀮𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀝𑀺𑀲𑀁𑀯𑁂𑀤𑀺𑀢𑀁 𑀓𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀲𑀼𑀢𑁆𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁭𑁩) 𑀅𑀝𑁆𑀞𑀓𑀣𑀸𑀲𑁂𑀲𑁄. 𑀢𑁂𑀦𑀸𑀢𑀺 𑀓𑀢𑀧𑀝𑀺𑀲𑀁𑀯𑁂𑀤𑀺𑀢𑁂𑀦. 𑀢𑀫𑁆𑀧𑀺 𑀘 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁮𑁬𑁩. 𑀏𑀯𑀁 𑀬𑀁 𑀅𑀦𑀸𑀭𑁄𑀘𑀺𑀢𑀦𑁆𑀢𑀺 ‘‘𑀆𑀭𑀸𑀫𑀁 𑀯𑀸 𑀉𑀧𑀘𑀸𑀭𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀁 𑀧𑀞𑀫𑀁 𑀅𑀦𑀺𑀯𑁂𑀤𑀺𑀢𑀁. ‘‘𑀏𑀯’’𑀦𑁆𑀢𑀺 𑀇𑀤𑀁 ‘‘𑀬𑀁 𑀆𑀭𑀸𑀫𑀫𑀦𑀸𑀪𑀢’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀦𑁆𑀢𑀺 ‘‘𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀓𑀸𑀭𑁂𑀦. ‘‘𑀢𑀁 𑀅𑀲𑀁𑀯𑀺𑀤𑀺𑀢𑀁 𑀦𑀸𑀫𑀸’’𑀢𑀺 𑀇𑀤𑀁 ‘‘𑀲𑀳𑀥𑀫𑁆𑀫𑀺𑀓𑀜𑀸𑀧𑀺𑀢’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸𑀳 ‘‘𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀁𑀯𑀺𑀤𑀺𑀢𑀁, 𑀏𑀢𑀁 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁫𑁭𑁩). 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀧𑀜𑁆𑀘𑀦𑁆𑀦𑀁 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑁂𑀲𑁂𑀢𑁆𑀯𑀸 ‘𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀆𑀳𑀭𑀺𑀲𑁆𑀲𑀸𑀫𑀸’𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑀫𑁆𑀧𑀺 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁭𑁩) 𑀯𑀼𑀢𑁆𑀢𑀁.

𑁧𑁮𑁬𑁪. 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀁𑀯𑀺𑀤𑀺𑀢’’𑀦𑁆𑀢𑀺 𑀲𑁂𑀲𑁄.

𑁧𑁮𑁬𑁫. 𑀪𑀺𑀓𑁆𑀔𑀼𑀦𑀸 𑀯𑀸 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀫𑀓𑀢𑁆𑀯𑀸𑀢𑀺 ‘‘𑀩𑀳𑀺𑀆𑀭𑀸𑀫𑀁 𑀧𑁂𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀓𑀢𑁆𑀯𑀸. 𑀉𑀧𑀘𑀸𑀭𑀢𑁄𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀢𑁄-𑀧𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁮𑁬𑁮. ‘‘𑀧𑀝𑀺𑀲𑀁𑀯𑀺𑀤𑀺𑀢𑁂’’𑀢𑀺𑀆𑀤𑀻𑀦𑀁 ¶ 𑀧𑀤𑀸𑀦𑀁 ‘‘𑀅𑀦𑀸𑀧𑀢𑁆𑀢𑁂 𑀯𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀲𑀁𑀯𑀺𑀤𑀺𑀢𑁂𑀢𑀺 𑀏𑀢𑁆𑀣 ‘‘𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀲𑁂𑀲𑁄. 𑀧𑀝𑀺𑀲𑀁𑀯𑀺𑀤𑀺𑀢𑁂 𑀅𑀦𑀸𑀧𑀢𑁆𑀢𑀺, 𑀕𑀺𑀮𑀸𑀦𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺, 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁂𑀧𑀺 𑀢𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀲𑁆𑀲 𑀅𑀯𑀲𑁂𑀲𑀓𑁂 𑀯𑀸 𑀕𑀺𑀮𑀸𑀦𑀲𑁆𑀲 𑀅𑀯𑀲𑁂𑀲𑀓𑁂 𑀯𑀸 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀬𑀣𑀸𑀳 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀧𑀝𑀺𑀲𑀁𑀯𑀺𑀤𑀺𑀢𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀲𑁂𑀲𑀓𑀁 𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀘𑀺. 𑁫𑁭𑁫). 𑀩𑀳𑀸𑀭𑀸𑀫𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀪𑀼𑀜𑁆𑀚𑀢𑁄 𑀅𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀕𑀳𑁂𑀢𑁆𑀯𑀸 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 ‘‘𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑁄.

𑁧𑁮𑁬𑁯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀭𑀜𑁆𑀜𑀓𑀸𑀭𑀸𑀫𑁂. 𑀔𑀸𑀤𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀬𑁄𑀚𑀦𑀸, 𑀢𑀢𑁆𑀣 ‘‘𑀅𑀜𑁆𑀜𑁂𑀦 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀤𑀺𑀦𑁆𑀦𑀸𑀦𑀻’’𑀢𑀺 𑀲𑁂𑀲𑁄.

𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀔𑀺𑀬𑀓𑀣𑀸𑀯𑀡𑁆𑀡𑀦𑀸

𑁧𑁮𑁭𑁦. 𑀏𑀯𑀁 𑀧𑀸𑀝𑀺𑀤𑁂𑀲𑀦𑀻𑀬𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸𑀦𑀁 𑀲𑁂𑀔𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑁄 𑀅𑀦𑀸𑀤𑀭𑀺𑀬𑁂𑀦𑁂𑀯𑀸’’𑀢𑀺𑀆𑀤𑀺. 𑀬𑁄𑀢𑀺 𑀣𑁂𑀭𑁄 𑀯𑀸 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸. 𑀏𑀢𑁆𑀣 𑀅𑀦𑀸𑀤𑀭𑀺𑀬𑀁 𑀦𑀸𑀫 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀁, 𑀦𑀺𑀯𑀸𑀲𑀦𑀸𑀤𑀺𑀯𑀢𑁆𑀣𑀲𑁆𑀲 𑀉𑀕𑁆𑀕𑀳𑀡𑁂 𑀦𑀺𑀭𑀼𑀲𑁆𑀲𑀸𑀳𑀜𑁆𑀘. 𑀧𑀘𑁆𑀙𑀢𑁄𑀧𑀺 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 ‘‘𑀧𑀲𑁆𑀲𑀢𑁄𑀧𑀺 𑀯𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀲𑀫𑀼𑀘𑁆𑀘𑀬𑁄.

𑁧𑁮𑁭𑁧. 𑀦 𑀓𑁂𑀯𑀮𑀁 𑀯𑀼𑀢𑁆𑀢𑀦𑀬𑁂𑀦 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀔𑀦𑁆𑀥𑀓𑀸𑀕𑀢𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀆𑀓𑀸𑀭𑁂𑀦𑀸𑀧𑀺 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀻’’𑀢𑀺𑀆𑀤𑀺. 𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀦𑀺𑀯𑀸𑀲𑀦𑀁 𑀧𑀭𑀢𑁄 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁮𑁦) 𑀆𑀯𑀺 ¶ 𑀪𑀯𑀺𑀲𑁆𑀲𑀢𑀺. 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀁 𑀓𑀢𑁆𑀯𑀸. 𑀯𑀢𑁆𑀣𑀩𑁆𑀩𑀦𑁆𑀢𑀺 𑀦𑀺𑀯𑀢𑁆𑀣𑀩𑁆𑀩𑀁 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁭𑁨. 𑀚𑀸𑀡𑀼𑀫𑀡𑁆𑀟𑀮𑀢𑁄 ¶ 𑀳𑁂𑀝𑁆𑀞𑀸𑀢𑀺 𑀏𑀢𑁆𑀣 ‘‘𑀚𑀗𑁆𑀖𑀝𑁆𑀞𑀺𑀲𑀻𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀲𑁂𑀲𑁄. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀓𑀦𑁆𑀢𑀺 𑀯𑀟𑁆𑀠𑀓𑀺𑀅𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸. ‘‘𑀬𑁄 𑀧𑀦 𑀲𑀼𑀓𑁆𑀔𑀚𑀗𑁆𑀖𑁄 𑀯𑀸 𑀫𑀳𑀸𑀧𑀺𑀡𑁆𑀟𑀺𑀓𑀫𑀁𑀲𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀚𑀸𑀡𑀼𑀫𑀡𑁆𑀟𑀮𑀢𑁄 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀫𑁆𑀧𑀺 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁭𑁬) 𑀅𑀝𑁆𑀞𑀓𑀣𑀁 𑀲𑀗𑁆𑀕𑀡𑁆𑀳𑀺𑀢𑀼𑀫𑀸𑀳 ‘‘𑀢𑀢𑁄 𑀊𑀦𑀁 𑀦 𑀯𑀝𑁆𑀝𑀢𑀻’’𑀢𑀺.

𑁧𑁮𑁭𑁩. 𑀅𑀲𑀜𑁆𑀘𑀺𑀘𑁆𑀘 𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀫𑀼𑀧𑀭𑀺𑀧𑀺. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘, 𑀅𑀣 𑀔𑁄 ‘‘𑀧𑀭𑀺𑀫𑀡𑁆𑀟𑀮𑀁𑀬𑁂𑀯 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑀢𑀺𑀲𑁆𑀲𑀸𑀧𑀻𑀢𑀺 𑀅𑀜𑁆𑀜𑀯𑀺𑀳𑀺𑀢𑀲𑁆𑀲𑀸𑀧𑀺 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀓𑁂𑀯𑀮𑀁 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀼𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀧𑀺𑀘 𑀦𑀺𑀯𑀸𑀲𑀦𑀯𑀢𑁆𑀢𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑀯𑀢𑁆𑀢𑁄𑀧𑀺 𑀲𑀘𑁂 ‘‘𑀆𑀭𑀼𑀴𑁆𑀳’’𑀦𑁆𑀢𑀺 𑀯𑀸 ‘‘𑀑𑀭𑀼𑀴𑁆𑀳’’𑀦𑁆𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀕𑀺𑀮𑀸𑀦𑀲𑁆𑀲𑀸𑀢𑀺 𑀬𑀲𑁆𑀲 𑀚𑀗𑁆𑀖𑀸𑀬 𑀯𑀸 𑀧𑀸𑀤𑁂 𑀯𑀸 𑀯𑀡𑁄 𑀳𑁄𑀢𑀺, 𑀢𑀲𑁆𑀲 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀯𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀸𑀤𑁄𑀢𑀺 𑀘𑁂𑀢𑁆𑀣 𑀧𑀸𑀤𑀲𑀫𑀻𑀧𑀁 𑀅𑀥𑀺𑀧𑁆𑀧𑁂𑀢𑀁. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀸 𑀯𑀸 𑀘𑁄𑀭𑀸 𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺.

𑀧𑀭𑀺𑀫𑀡𑁆𑀟𑀮𑀓𑀣𑀸𑀯𑀡𑁆𑀡𑀦𑀸.

𑁧𑁮𑁭𑁪. 𑀉𑀪𑁄 𑀓𑁄𑀡𑁂 𑀲𑀫𑀁 𑀓𑀢𑁆𑀯𑀸𑀢𑀺 𑀧𑀸𑀭𑀼𑀧𑀦𑀲𑁆𑀲 𑀏𑀓𑀁𑀲𑁂 𑀓𑀢𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑁂, 𑀉𑀤𑀭𑀧𑀲𑁆𑀲𑁂 𑀘 𑀑𑀮𑀫𑁆𑀩𑀫𑀸𑀦𑁂 𑀉𑀪𑁄 ¶ 𑀓𑀡𑁆𑀡𑁂 𑀳𑀢𑁆𑀣𑀺𑀧𑀺𑀝𑁆𑀞𑁂 𑀕𑀡𑁆𑀟𑀸 𑀯𑀺𑀬 𑀲𑀫𑀁 𑀓𑀢𑁆𑀯𑀸. 𑀧𑀭𑀺𑀫𑀡𑁆𑀟𑀮𑀁 𑀓𑀢𑁆𑀯𑀸𑀢𑀺 𑀏𑀢𑀲𑁆𑀲𑁂𑀯 𑀅𑀢𑁆𑀣𑀧𑀤𑀁. 𑀲𑀸𑀤𑀭𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑀸𑀤𑀭𑀁 𑀯𑀸 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸, 𑀲𑀸𑀤𑀭𑀁 𑀧𑀸𑀭𑀼𑀧𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀸𑀭𑀼𑀧𑀦𑀯𑀢𑁆𑀢𑁂 𑀆𑀤𑀭𑀁 𑀚𑀦𑁂𑀢𑁆𑀯𑀸 𑀏𑀯𑀁 𑀅𑀧𑀸𑀭𑀼𑀧𑀦𑁆𑀢𑀲𑁆𑀲.

𑁧𑁮𑁭𑁫. ‘‘𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺 (𑀧𑀸𑀘𑀺. 𑁫𑁭𑁬) 𑀯𑀸 ‘‘𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺 (𑀧𑀸𑀘𑀺. 𑁫𑁭𑁭) 𑀯𑀸 ‘‘𑀅𑀦𑁆𑀢𑀭𑀖𑀭𑁂’’𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁 𑀬𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀖𑀭𑁂, 𑀯𑀺𑀳𑀸𑀭𑁂 𑀯𑀸 𑀓𑀸𑀢𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀬𑁄𑀚𑀦𑀸. 𑀖𑀭𑁂𑀢𑀺 𑀅𑀦𑁆𑀢𑀭𑀖𑀭𑁂. 𑀯𑀺𑀳𑀸𑀭𑁂 𑀯𑀸𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀫𑀡𑁆𑀟𑀮𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀭𑀺𑀫𑀡𑁆𑀟𑀮𑀫𑁂𑀯 𑀦𑀺𑀯𑀸𑀲𑁂𑀢𑀩𑁆𑀩𑀁 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀁.

𑁧𑁮𑁭𑁬. 𑀉𑀪𑁄 𑀓𑁄𑀡𑁂 𑀲𑀫𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀻𑀯𑀫𑁂𑀯 𑀘 𑀅𑀦𑀼𑀯𑀸𑀢𑁂𑀦 𑀙𑀸𑀤𑁂𑀢𑁆𑀯𑀸𑀢𑀺 𑀬𑁄𑀚𑀦𑀸.

𑁧𑁮𑁭𑁭. 𑀢𑀣𑀸 𑀅𑀓𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀓𑀢𑁆𑀯𑀸. 𑀚𑀢𑁆𑀢𑀽𑀦𑀺𑀧𑀻𑀢𑀺 𑀉𑀪𑁄 𑀅𑀁𑀲𑀓𑀽𑀝𑀸𑀦𑀺𑀧𑀺. 𑀉𑀭𑀫𑁆𑀧𑀺 𑀘𑀸𑀢𑀺 𑀳𑀤𑀬𑀫𑁆𑀧𑀺. 𑀯𑀺𑀯𑀭𑀺𑀢𑁆𑀯𑀸𑀢𑀺 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸. 𑀬𑀣𑀸𑀓𑀸𑀫𑀦𑁆𑀢𑀺 𑀇𑀘𑁆𑀙𑀸𑀦𑀼𑀭𑀽𑀧𑀁. 𑀕𑀘𑁆𑀙𑀢𑁄𑀢𑀺 𑀏𑀢𑁆𑀣 ‘‘𑀅𑀦𑁆𑀢𑀭𑀖𑀭𑁂’’𑀢𑀺 𑀲𑁂𑀲𑁄. 𑀅𑀦𑁆𑀢𑀭𑀖𑀭𑀁 𑀦𑀸𑀫 𑀕𑀸𑀫𑁂 𑀯𑀸 𑀳𑁄𑀢𑀼 𑀯𑀺𑀳𑀸𑀭𑁂 𑀯𑀸, 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀕𑀺𑀳𑀻𑀦𑀁 𑀯𑀲𑀦𑀝𑁆𑀞𑀸𑀦𑀁.

𑀢𑀢𑀺𑀬𑀁.

𑁧𑁮𑁭𑁮-𑁯. ‘‘𑀫𑀡𑀺𑀩𑀦𑁆𑀥𑀢𑁄’’𑀢𑀺 𑀇𑀫𑀺𑀦𑀸𑀧𑀺 ‘‘𑀳𑁂𑀝𑁆𑀞𑀸’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀸𑀲𑀽𑀧𑀕𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀲𑀻𑀤𑀢𑁄’’𑀢𑀺 ¶ 𑀲𑁂𑀲𑁄. 𑀯𑀸𑀲𑀽𑀧𑀕𑁄 𑀦𑀸𑀫 𑀭𑀢𑁆𑀢𑀺𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑁄, 𑀏𑀢𑁂𑀦 𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀖𑀭𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦𑁂𑀯 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺, 𑀏𑀢𑁂𑀦𑁂𑀯 𑀯𑀸𑀲𑀽𑀧𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀢𑀲𑁆𑀲 𑀬𑀣𑀸𑀓𑀸𑀫𑀁 𑀕𑀫𑀦𑁂 𑀦 𑀤𑁄𑀲𑁄𑀢𑀺 𑀘 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀏𑀓𑀤𑀺𑀯𑀲𑀫𑁆𑀧𑀺 𑀯𑀸𑀲𑀽𑀧𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀓𑁄 𑀧𑀦 𑀯𑀸𑀤𑁄 𑀘𑀢𑀼𑀧𑀜𑁆𑀘𑀸𑀳𑀁 𑀯𑀸𑀲𑀫𑀥𑀺𑀝𑁆𑀞𑀸𑀬 𑀯𑀲𑀺𑀢𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓’’𑀦𑁆𑀢𑀺.

𑀘𑀢𑀼𑀢𑁆𑀣𑀁.

𑁧𑁮𑁮𑁦. 𑀲𑀼𑀯𑀺𑀦𑀻𑀢𑁂𑀦𑀸𑀢𑀺 𑀳𑀢𑁆𑀣𑀧𑀸𑀤𑀸𑀦𑀁 𑀅𑀓𑀻𑀴𑀸𑀧𑀦𑁂𑀦𑁂𑀯 𑀲𑀼𑀝𑁆𑀞𑀼 𑀯𑀺𑀦𑀻𑀢𑁂𑀦.

𑀧𑀜𑁆𑀘𑀫𑀁.

𑁧𑁮𑁮𑁧. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀲𑀢𑀻𑀫𑀢𑀸’’𑀢𑀺 𑀤𑀻𑀖𑁄 𑀓𑀢𑁄. 𑀅𑀯𑀺𑀓𑀸𑀭𑁂𑀦𑀸𑀢𑀺 𑀢𑀁𑀢𑀤𑀯𑀮𑁄𑀓𑀸𑀲𑀳𑀺𑀢𑁂𑀦 ¶ . 𑀬𑀼𑀕𑀁 𑀫𑀢𑁆𑀢𑀸 𑀧𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀬𑀼𑀕𑀫𑀢𑁆𑀢𑀁, 𑀭𑀣𑀬𑀼𑀕𑀁 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀁, 𑀢𑀢𑁆𑀢𑀓𑀁 𑀧𑀤𑁂𑀲𑀁. 𑀧𑁂𑀓𑁆𑀔𑀺𑀦𑀸𑀢𑀺 𑀑𑀮𑁄𑀓𑁂𑀦𑁆𑀢𑁂𑀦. ‘‘𑀪𑀺𑀓𑁆𑀔𑀼𑀦𑀸 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑁧𑁮𑁮𑁨. 𑀅𑀦𑁆𑀢𑀭𑀖𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀏𑀓𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀞𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀢𑀣𑀸𑀭𑀽𑀧𑁂 𑀅𑀦𑁆𑀢𑀭𑀸𑀬𑁂 𑀲𑀢𑀺 𑀕𑀘𑁆𑀙𑀢𑁄𑀧𑀺 𑀑𑀮𑁄𑀓𑁂𑀢𑀼𑀁 𑀮𑀩𑁆𑀪𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸𑀢𑀺 𑀏𑀢𑁆𑀣 𑀕𑀘𑁆𑀙𑀦𑁆𑀢𑁄𑀧𑀺 𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀮𑀩𑁆𑀪𑀢𑀺𑀬𑁂𑀯. ‘‘𑀢𑀣𑀸 𑀕𑀸𑀫𑁂 𑀧𑀽𑀚’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀧𑀺-𑀲𑀤𑁆𑀤𑁄 𑀧𑀦-𑀲𑀤𑁆𑀤𑀢𑁆𑀣𑁄, 𑀑𑀮𑁄𑀓𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁮𑁮𑁩. 𑀑𑀮𑁄𑀓𑁂𑀦𑁆𑀢𑁄 𑀢𑀳𑀁 𑀢𑀳𑀦𑁆𑀢𑀺 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀧𑀸𑀲𑀸𑀤𑀁 𑀓𑀽𑀝𑀸𑀕𑀸𑀭𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄.

𑀲𑀢𑁆𑀢𑀫𑀁.

𑁧𑁮𑁮𑁪. 𑀏𑀓𑀢𑁄 ¶ 𑀯𑀸𑀧𑀻𑀢𑀺 𑀏𑀓𑀅𑀁𑀲𑀓𑀽𑀝𑀢𑁄 𑀯𑀸. 𑀉𑀪𑀢𑁄 𑀯𑀸𑀧𑀻𑀢𑀺 𑀉𑀪𑀬𑀁𑀲𑀓𑀽𑀝𑀢𑁄 𑀯𑀸. 𑀇𑀦𑁆𑀤𑀔𑀻𑀮𑀓𑀢𑁄 𑀅𑀦𑁆𑀢𑁄𑀢𑀺 𑀕𑀸𑀫𑀤𑁆𑀯𑀸𑀭𑀺𑀦𑁆𑀤𑀔𑀻𑀮𑀢𑁄 𑀅𑀦𑁆𑀢𑁄, 𑀖𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀯𑀫𑀁.

𑁧𑁮𑁮𑁫. 𑀢𑀣𑀸 𑀦𑀺𑀲𑀺𑀦𑁆𑀦𑀓𑀸𑀮𑁂𑀧𑀻𑀢𑀺 𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑀓𑀸𑀮𑁂𑀧𑀺. 𑀓𑀼𑀡𑁆𑀟𑀺𑀓𑀁 𑀦𑀻𑀳𑀭𑀦𑁆𑀢𑁂𑀦 𑀘 𑀘𑀻𑀯𑀭𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀢𑀩𑁆𑀩𑀸 𑀓𑀼𑀡𑁆𑀟𑀺𑀓𑀸𑀢𑀺 𑀬𑁄𑀚𑀦𑀸. 𑀓𑀼𑀡𑁆𑀟𑀺𑀓𑀦𑁆𑀢𑀺 𑀘 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀥𑀫𑁆𑀫𑀓𑀭𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁧𑁮𑁮𑁬. 𑀕𑀦𑁆𑀢𑀼𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁄 𑀓𑀺𑀭𑀺𑀬𑀸𑀲𑀫𑀼𑀘𑁆𑀘𑀬𑁄. 𑀳𑀲𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀳𑀸𑀲𑀚𑀦𑀓𑁂 𑀓𑀸𑀭𑀡𑁂. 𑀲𑀺𑀢𑀫𑀢𑁆𑀢𑀦𑁆𑀢𑀺 𑀫𑀦𑁆𑀤𑀳𑀸𑀲𑀁.

𑀧𑀞𑀫𑀤𑀼𑀢𑀺𑀬𑀸𑀦𑀺.

𑁧𑁮𑁮𑁭. 𑀅𑀧𑁆𑀧𑀲𑀤𑁆𑀤𑁂𑀦𑀸𑀢𑀺 ¶ ‘‘𑀓𑀺𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺? 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑁂𑀳𑁂 𑀆𑀤𑀺𑀫𑁆𑀳𑀺 𑀲𑀗𑁆𑀖𑀢𑁆𑀣𑁂𑀭𑁄, 𑀫𑀚𑁆𑀛𑁂 𑀤𑀼𑀢𑀺𑀬𑀢𑁆𑀣𑁂𑀭𑁄, 𑀅𑀦𑁆𑀢𑁂 𑀢𑀢𑀺𑀬𑀢𑁆𑀣𑁂𑀭𑁄𑀢𑀺 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼𑀬𑀁 𑀲𑀗𑁆𑀖𑀢𑁆𑀣𑁂𑀭𑁄 𑀤𑀼𑀢𑀺𑀬𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀺, 𑀤𑀼𑀢𑀺𑀬𑀢𑁆𑀣𑁂𑀭𑁄 𑀢𑀲𑁆𑀲 𑀲𑀤𑁆𑀤𑀜𑁆𑀘𑁂𑀯 𑀲𑀼𑀡𑀸𑀢𑀺, 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑀢𑀺𑀬𑀢𑁆𑀣𑁂𑀭𑁄 𑀧𑀦 𑀲𑀤𑁆𑀤𑀫𑁂𑀯 𑀲𑀼𑀡𑀸𑀢𑀺, 𑀓𑀣𑀁 𑀦 𑀯𑀯𑀢𑁆𑀣𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀻’’𑀢𑀺 (𑀧𑀸𑀘𑀺. 𑁫𑁮𑁮) 𑀯𑀼𑀢𑁆𑀢𑀅𑀧𑁆𑀧𑀲𑀤𑁆𑀤𑀬𑀼𑀢𑁆𑀢𑁂𑀦. 𑀲𑀘𑁂 ¶ 𑀧𑀦 𑀢𑀢𑀺𑀬𑀢𑁆𑀣𑁂𑀭𑁄 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺, 𑀫𑀳𑀸𑀲𑀤𑁆𑀤𑁄 𑀦𑀸𑀫 𑀳𑁄𑀢𑀻𑀢𑀺.

𑀢𑀢𑀺𑀬𑀁.

𑁧𑁮𑁮𑁮. 𑀓𑀸𑀬𑀧𑁆𑀧𑀘𑀸𑀮𑀓𑀁 𑀓𑀢𑁆𑀯𑀸𑀢𑀺 𑀓𑀸𑀬𑀁 𑀘𑀸𑀮𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸. 𑀉𑀧𑀭𑀺𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀲𑁆𑀲 𑀯𑀼𑀢𑁆𑀢𑀮𑀓𑁆𑀔𑀡𑀢𑁆𑀢𑀸 ‘‘𑀩𑀸𑀳𑀽’’𑀢𑀺 𑀫𑀡𑀺𑀩𑀦𑁆𑀥𑀢𑁄 𑀬𑀸𑀯 𑀅𑀁𑀲𑀓𑀽𑀝𑀸 𑀕𑀳𑁂𑀢𑀩𑁆𑀩𑀸.

𑁧𑁮𑁮𑁯. 𑀉𑀚𑀼𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀉𑀚𑀼𑀁 𑀞𑀧𑁂𑀢𑁆𑀯𑀸. 𑀆𑀲𑀺𑀢𑀩𑁆𑀩𑀦𑁆𑀢𑀺 𑀦𑀺𑀲𑀻𑀤𑀺𑀢𑀩𑁆𑀩𑀁. ‘‘𑀲𑀫𑁂𑀦 𑀇𑀭𑀺𑀬𑀸𑀧𑀣𑁂𑀦 𑀢𑀽’’𑀢𑀺 𑀧𑀤𑀘𑁆𑀙𑁂𑀤𑁄.

𑁧𑁮𑁯𑁦. 𑀇𑀢𑁆𑀣𑀫𑁆𑀪𑀽𑀢𑁂 𑀓𑀭𑀡𑀯𑀘𑀦𑀁. 𑀕𑀫𑀦𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀕𑀫𑀦𑀲𑁆𑀲 𑀅𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀦𑀺𑀲𑀻𑀤𑀦𑁂𑀦 𑀬𑀼𑀢𑁆𑀢𑁂𑀲𑀽’’𑀢𑀺.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁧𑁮𑁯𑁧. 𑀔𑀫𑁆𑀪𑀁 𑀓𑀢𑁆𑀯𑀸𑀢𑀺 𑀓𑀝𑀺𑀬𑀸 𑀏𑀓𑀧𑀲𑁆𑀲𑁂 𑀯𑀸 𑀤𑁆𑀯𑀻𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀓𑀧𑁆𑀧𑀭𑀲𑀦𑁆𑀥𑀺𑀢𑁄 𑀆𑀪𑀼𑀚𑀺𑀢𑁆𑀯𑀸 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸. 𑀬𑀣𑀸𑀳 𑁋 ‘‘𑀔𑀫𑁆𑀪𑀓𑀢𑁄 𑀦𑀸𑀫 𑀓𑀝𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀓𑀢𑀔𑀫𑁆𑀪𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁯𑁬). 𑀉𑀓𑁆𑀓𑀼𑀝𑀺𑀓𑀸𑀬 𑀯𑀸 𑀕𑀘𑁆𑀙𑀢𑁄𑀢𑀺 𑀬𑁄𑀚𑀦𑀸. 𑀉𑀓𑁆𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀺 𑀧𑀡𑁆𑀳𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀧𑀸𑀤𑁂𑀳𑀺 𑀯𑀸 𑀅𑀕𑁆𑀕𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀡𑁆𑀳𑀻𑀳𑀺 𑀏𑀯 𑀯𑀸 𑀪𑀽𑀫𑀺𑀁 𑀨𑀼𑀲𑀦𑁆𑀢𑀲𑁆𑀲 𑀕𑀫𑀦𑀁.

𑁧𑁮𑁯𑁨. 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀬. 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀦𑁆𑀢𑀲𑁆𑀲 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁧𑁮𑁯𑁩. 𑀤𑀼𑀢𑀺𑀬𑁂 ¶ 𑀘𑀸𑀢𑀺 ‘‘𑀦 𑀔𑀫𑁆𑀪𑀓𑀢𑁄 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁫𑁯𑁭) 𑀲𑀺𑀓𑁆𑀔𑀸𑀧𑀤𑁂 𑀘. 𑀘𑀢𑀼𑀢𑁆𑀣𑁂 𑀘𑀸𑀢𑀺 ‘‘𑀦 𑀑𑀕𑀼𑀡𑁆𑀞𑀺𑀢𑁄 ¶ 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁫𑁯𑁯) 𑀲𑀺𑀓𑁆𑀔𑀸𑀧𑀤𑁂 𑀘. 𑀙𑀝𑁆𑀞𑁂𑀢𑀺 ‘‘𑀦 𑀧𑀮𑁆𑀮𑀢𑁆𑀣𑀺𑀓𑀸𑀬 𑀅𑀦𑁆𑀢𑀭𑀖𑀭𑁂’’𑀇𑀘𑁆𑀘𑀸𑀤𑀺 (𑀧𑀸𑀘𑀺. 𑁬𑁦𑁧) 𑀲𑀺𑀓𑁆𑀔𑀸𑀧𑀤𑁂 𑀘. 𑀇𑀢𑀺 𑀏𑀯𑀁 𑀲𑀸𑀭𑀼𑀧𑁆𑀧𑀸 𑀲𑀫𑀡𑀸𑀘𑀸𑀭𑀸𑀦𑀼𑀘𑁆𑀙𑀯𑀺𑀓𑀸 𑀙𑀩𑁆𑀩𑀻𑀲𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀓𑀸𑀲𑀺𑀢𑀸𑀦𑀺.

𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁧𑁮𑁯𑁪. 𑀯𑀺𑀜𑁆𑀜𑀼𑀦𑀸 𑀪𑀺𑀓𑁆𑀔𑀼𑀦𑀸 𑀲𑀓𑁆𑀓𑀘𑁆𑀘𑀁 𑀲𑀢𑀺𑀬𑀼𑀢𑁆𑀢𑁂𑀦, 𑀧𑀢𑁆𑀢𑀲𑀜𑁆𑀜𑀺𑀦𑀸 𑀘 𑀳𑀼𑀢𑁆𑀯𑀸 𑀲𑀫𑀲𑀽𑀧𑁄𑀯 𑀧𑀺𑀡𑁆𑀟𑀧𑀸𑀢𑁄 𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀏𑀯𑀁 𑀏𑀢𑀸𑀬 𑀕𑀸𑀣𑀸𑀬 𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁 𑀲𑀗𑁆𑀕𑀳𑀺𑀢𑀁. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. ‘‘𑀲𑀢𑀺𑀬𑀼𑀢𑁆𑀢𑁂𑀦𑀸’’𑀢𑀺 𑀇𑀤𑀁 ‘‘𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁. ‘‘𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁦𑁨) 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀢𑁆𑀢𑁂 𑀲𑀜𑁆𑀜𑀸 𑀧𑀢𑁆𑀢𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀢𑁆𑀢𑀲𑀜𑁆𑀜𑀻, 𑀅𑀦𑀜𑁆𑀜𑀯𑀺𑀳𑀺𑀢𑁂𑀦 𑀅𑀢𑁆𑀢𑀦𑁄 𑀪𑀸𑀚𑀦𑁂𑀬𑁂𑀯 𑀉𑀧𑀦𑀺𑀩𑀤𑁆𑀥𑀲𑀜𑁆𑀜𑀺𑀦𑀸𑀢𑀺 𑀅𑀢𑁆𑀣𑁄.

𑁧𑁮𑁯𑁫. 𑀪𑀢𑁆𑀢𑀘𑀢𑀼𑀩𑁆𑀪𑀸𑀕𑁄𑀢𑀺 𑀪𑀢𑁆𑀢𑀲𑁆𑀲 𑀘𑀢𑀼𑀩𑁆𑀪𑀸𑀕𑀧𑁆𑀧𑀫𑀸𑀡𑁄. 𑀢𑀢𑁄 𑀅𑀥𑀺𑀓𑀁 𑀕𑀡𑁆𑀳𑀢𑁄 𑀤𑀼𑀓𑁆𑀓𑀝𑀁.

𑁧𑁮𑁯𑁬. ‘‘𑀭𑀲𑀭𑀲𑁂’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀭𑀲𑁂𑀭𑀲𑁂’’𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁆𑀯𑁂 𑀲𑀽𑀧𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀑𑀮𑁄𑀡𑀺𑀲𑀸𑀓𑀲𑀽𑀧𑁂𑀬𑁆𑀬𑀫𑀘𑁆𑀙𑀭𑀲𑀫𑀁𑀲𑀭𑀲𑀸𑀤𑀻𑀦𑀺 𑀭𑀲𑀭𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 ‘‘𑀑𑀮𑁄𑀡𑀻𑀢𑀺 𑀤𑀥𑀺𑀓𑀢𑀁 𑀕𑁄𑀭𑀲’’𑀦𑁆𑀢𑀺 𑀓𑁂𑀘𑀺. ‘‘𑀏𑀓𑀸 𑀩𑁆𑀬𑀜𑁆𑀚𑀦𑀯𑀺𑀓𑀢𑀻’’𑀢𑀺 𑀅𑀧𑀭𑁂. ‘‘𑀬𑁄 𑀓𑁄𑀘𑀺 𑀲𑀼𑀤𑁆𑀥𑁄 𑀓𑀜𑁆𑀚𑀺𑀓𑀢𑀓𑁆𑀓𑀸𑀤𑀺𑀭𑀲𑁄’’𑀢𑀺 𑀅𑀜𑁆𑀜𑁂. 𑀲𑀸𑀓𑀲𑀽𑀧𑁂𑀬𑁆𑀬𑀕𑁆𑀕𑀳𑀡𑁂𑀦 𑀬𑀸 𑀓𑀸𑀘𑀺 𑀲𑀽𑀧𑁂𑀬𑁆𑀬𑀲𑀸𑀓𑁂𑀳𑀺 𑀓𑀢𑀸 𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀯𑀼𑀢𑁆𑀢𑀸. 𑀫𑀁𑀲𑀭𑀲𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀜𑀸𑀢𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 ‘‘𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀅𑀜𑁆𑀜𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀓𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀥𑀦𑁂𑀦𑀸𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀘 ¶ ‘‘𑀓𑀻𑀢’’𑀦𑁆𑀢𑀺 𑀘 ‘‘𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺 𑀘 𑀲𑁂𑀲𑁄. 𑀜𑀸𑀢𑀓𑀸𑀤𑀻𑀦𑀁 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀅𑀜𑁆𑀜𑀢𑁆𑀣𑀸𑀬 𑀓𑀢𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀓𑀻𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀺.

𑁧𑁮𑁯𑁭. 𑀅𑀥𑀺𑀝𑁆𑀞𑀸𑀦𑀽𑀧𑀕𑀲𑁆𑀲 ¶ 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀅𑀦𑁆𑀢𑁄𑀮𑁂𑀔𑀸𑀧𑀫𑀸𑀡𑁂𑀦 𑀧𑀽𑀭𑀺𑀢𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁧𑁮𑁯𑁮. 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀅𑀥𑀺𑀝𑁆𑀞𑀸𑀦𑀽𑀧𑀕𑁂 𑀧𑀢𑁆𑀢𑁂. 𑀣𑀽𑀧𑀻𑀓𑀢𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀤𑀺𑀬𑁆𑀬𑀫𑀸𑀦’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀯𑀼𑀢𑁆𑀢𑀮𑁂𑀔𑀸𑀢𑀺𑀓𑁆𑀓𑀫𑁄 𑀬𑀣𑀸 𑀳𑁄𑀢𑀺, 𑀏𑀯𑀁 𑀣𑀽𑀧𑀻𑀓𑀢𑀁 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀢𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀧𑀞𑀫𑀁 𑀣𑀽𑀧𑀻𑀓𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀽𑀧𑀕𑀧𑀢𑁆𑀢𑀲𑁆𑀲 𑀧𑀘𑁆𑀙𑀸 𑀧𑀝𑀺𑀕𑁆𑀕𑀳𑀡𑀜𑁆𑀘 𑀧𑀞𑀫𑀧𑀝𑀺𑀕𑁆𑀕𑀳𑀺𑀢𑀧𑀢𑁆𑀢𑁂 𑀧𑀘𑁆𑀙𑀸 𑀪𑁄𑀚𑀦𑀲𑁆𑀲 𑀣𑀽𑀧𑀻𑀓𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀜𑁆𑀘 𑀦𑀺𑀯𑀸𑀭𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁮𑁯𑁯. 𑀓𑀸𑀮𑀺𑀓𑀢𑁆𑀢𑀬𑀫𑁂𑀯 𑀘 𑀣𑀽𑀧𑀻𑀓𑀢𑀁 𑀯𑀝𑁆𑀝𑀢𑁂𑀯𑀸𑀢𑀺 𑀬𑁄𑀚𑀦𑀸. 𑀲𑁂𑀲𑁂𑀢𑀺 𑀅𑀦𑀥𑀺𑀝𑁆𑀞𑀸𑀦𑀽𑀧𑀕𑁂 𑀧𑀢𑁆𑀢𑁂. 𑀲𑀩𑁆𑀩𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀓𑀸𑀮𑀺𑀓𑀁 𑀣𑀽𑀧𑀻𑀓𑀢𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁦𑁦. 𑀧𑁂𑀲𑁂𑀢𑀻𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽’’𑀢𑀺 𑀲𑁂𑀲𑁄. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀬𑀤𑀺 𑀧𑁂𑀲𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀺𑀳𑀸𑀭𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁦𑁫) 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀯𑀘𑀦𑁂𑀦 𑀧𑀝𑀺𑀕𑁆𑀕𑀳𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀸 𑀏𑀯 𑀧𑁂𑀲𑀺𑀢𑀁 𑀕𑀡𑁆𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 ‘‘𑀧𑀽𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁧𑁯𑁦𑁧. 𑀧𑀓𑁆𑀔𑀺𑀧𑁆𑀧𑀫𑀸𑀦𑀦𑁆𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀉𑀘𑁆𑀘𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀧𑀓𑁆𑀔𑀺𑀧𑀺𑀬𑀫𑀸𑀦𑀁. 𑀨𑀮𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀑𑀤𑀦𑀸𑀤𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀳𑁂𑀝𑁆𑀞𑀸 ¶ 𑀑𑀭𑁄𑀳𑀢𑀻𑀢𑀺 𑀲𑀫𑀦𑁆𑀢𑀸 𑀑𑀓𑀸𑀲𑀲𑀫𑁆𑀪𑀯𑀢𑁄 𑀘𑀸𑀮𑀺𑀬𑀫𑀸𑀦𑀁 𑀫𑀼𑀔𑀯𑀝𑁆𑀝𑀺𑀧𑁆𑀧𑀫𑀸𑀡𑀢𑁄 𑀳𑁂𑀝𑁆𑀞𑀸 𑀪𑀲𑁆𑀲𑀢𑀺.

𑁧𑁯𑁦𑁨. 𑀢𑀓𑁆𑀓𑁄𑀮𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀽𑀕𑀨𑀮𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀞𑀧𑁂𑀢𑁆𑀯𑀸𑀢𑀺 𑀪𑀢𑁆𑀢𑀫𑀢𑁆𑀣𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀯𑀝𑀁𑀲𑀓𑀦𑁆𑀢𑀺 𑀅𑀯𑀝𑀁𑀲𑀓𑀁.

𑁧𑁯𑁦𑁩. 𑀧𑀽𑀯𑀲𑁆𑀲𑀸𑀢𑀺 𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, 𑀧𑀽𑀯𑀯𑀝𑀁𑀲𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀽𑀯𑀲𑁆𑀲 𑀬𑀸𑀯𑀓𑀸𑀮𑀺𑀓𑀢𑁆𑀢𑀸 𑀆𑀳 ‘‘𑀇𑀤𑀁 𑀣𑀽𑀧𑀻𑀓𑀢𑀁 𑀲𑀺𑀬𑀸’’𑀢𑀺.

𑁧𑁯𑁦𑁪. 𑀧𑀡𑁆𑀡𑀸𑀦𑀁 𑀯𑀺𑀲𑀼𑀁 𑀪𑀸𑀚𑀦𑀢𑁆𑀢𑀸 𑀆𑀳 ‘‘𑀯𑀝𑁆𑀝𑀢𑀻’’𑀢𑀺.

𑁧𑁯𑁦𑁫. 𑀅𑀲𑁆𑀲𑀸𑀢𑀺 ¶ 𑀪𑀺𑀓𑁆𑀔𑀼𑀲𑁆𑀲. 𑀢𑀁 𑀢𑀼 𑀲𑀩𑁆𑀩𑀦𑁆𑀢𑀺 ‘‘𑀣𑀽𑀧𑀻𑀓𑀢𑀢𑁆𑀢𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀁 𑀧𑀦 𑀲𑀩𑁆𑀩𑀁. 𑀕𑀳𑀺𑀢𑀁 𑀲𑀼𑀕𑀳𑀺𑀢𑀦𑁆𑀢𑀺 𑀯𑀺𑀭𑀸𑀥𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀺𑀢𑀁 𑀘𑁂, 𑀲𑀼𑀧𑁆𑀧𑀝𑀺𑀕𑁆𑀕𑀳𑀺𑀢𑀁.

𑀤𑀲𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑁧𑁯𑁦𑁬. ‘‘𑀉𑀧𑀭𑀺 𑀑𑀥𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀉𑀧𑀭𑀻𑀢𑀺 𑀪𑀢𑁆𑀢𑀲𑁆𑀲 𑀉𑀧𑀭𑀺. 𑀑𑀥𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀢𑁆𑀢𑀦𑁄 𑀤𑀺𑀲𑀸𑀬 𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦.

𑁧𑁯𑁦𑁭. 𑀅𑀜𑁆𑀜𑁂𑀲𑀦𑁆𑀢𑀺 𑀏𑀢𑁆𑀣 ‘‘𑀤𑁂𑀦𑁆𑀢𑁄’’𑀢𑀺 𑀲𑁂𑀲𑁄. 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀅𑀜𑁆𑀜𑁂𑀲𑀁 𑀤𑁂𑀦𑁆𑀢𑁄 𑀅𑀜𑁆𑀜𑀲𑁆𑀲 𑀪𑀸𑀚𑀦𑁂 𑀆𑀓𑀺𑀭𑀁 𑀆𑀓𑀺𑀭𑀦𑁆𑀢𑁄 𑀧𑀦 𑀧𑀝𑀺𑀧𑀸𑀝𑀺𑀁 𑀯𑀺𑀦𑀸𑀧𑀺 𑀢𑀳𑀺𑀁 𑀢𑀳𑀺𑀁 𑀑𑀫𑀲𑀢𑀺 𑀘𑁂, 𑀦𑀢𑁆𑀣𑀺 𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀉𑀢𑁆𑀢𑀭𑀺𑀪𑀗𑁆𑀕𑀓𑀁 𑀢𑀣𑀸 𑀆𑀓𑀺𑀭𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀑𑀫𑀲𑀢𑀺, 𑀦𑀢𑁆𑀣𑀺 𑀤𑁄𑀲𑁄𑀢𑀺 𑀬𑁄𑀚𑀦𑀸 ¶ . 𑀪𑀼𑀜𑁆𑀚𑀦𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑁄𑀧𑀺 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑁄. 𑀉𑀢𑁆𑀢𑀭𑀺𑀪𑀗𑁆𑀕𑀁 𑀦𑀸𑀫 𑀩𑁆𑀬𑀜𑁆𑀚𑀦𑀁.

𑀢𑀢𑀺𑀬𑀁.

𑁧𑁯𑁦𑁮. 𑀫𑀢𑁆𑀣𑀓𑀁 𑀑𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀤𑁄𑀲𑁄𑀢𑀺 𑀬𑁄𑀚𑀦𑀸. ‘‘𑀣𑀽𑀧𑀓𑀢𑁄𑀢𑀺 𑀫𑀢𑁆𑀣𑀓𑀢𑁄, 𑀯𑁂𑀫𑀚𑁆𑀛𑀢𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁧𑁦) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀫𑀢𑁆𑀣𑀓𑀦𑁆𑀢𑀺 𑀏𑀢𑁆𑀣 𑀪𑀢𑁆𑀢𑀫𑀢𑁆𑀣𑀓𑀫𑀸𑀳. 𑀑𑀫𑀤𑁆𑀤𑀺𑀢𑁆𑀯𑀸𑀢𑀺 𑀳𑀢𑁆𑀣𑁂𑀦 𑀪𑀢𑁆𑀢𑀁 𑀅𑀯𑀫𑀤𑁆𑀤𑀺𑀢𑁆𑀯𑀸.

𑁧𑁯𑁦𑁯. 𑀲𑁂𑀲𑀓𑁂 𑀧𑀭𑀺𑀢𑁆𑀢𑁂𑀧𑀺 𑀘𑀸𑀢𑀺 𑀅𑀯𑀲𑀺𑀝𑁆𑀞𑁂 𑀅𑀧𑁆𑀧𑀓𑁂𑀧𑀺 𑀘. 𑀲𑀁𑀓𑀟𑁆𑀠𑀺𑀢𑁆𑀯𑀸𑀦𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀲𑀁𑀳𑀭𑀺𑀢𑁆𑀯𑀸. 𑀏𑀓𑀢𑁄 𑀧𑀦 𑀫𑀤𑁆𑀤𑀺𑀢𑁆𑀯𑀸 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀫𑀁.

𑁧𑁯𑁧𑁦. 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀳𑁂𑀢𑀽𑀢𑀺 𑀧𑀼𑀦 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀳𑁂𑀢𑀼. 𑀲𑀽𑀧𑀁 𑀯𑀸𑀢𑀺 𑀫𑀼𑀕𑁆𑀕𑀸𑀤𑀺𑀲𑀽𑀧𑀁 𑀯𑀸. 𑀩𑁆𑀬𑀜𑁆𑀚𑀦𑀁 𑀯𑀸𑀢𑀺 𑀉𑀢𑁆𑀢𑀭𑀺𑀪𑀗𑁆𑀕𑀁 𑀯𑀸.

𑀙𑀝𑁆𑀞𑀁.

𑁧𑁯𑁧𑁧. 𑀯𑀺𑀜𑁆𑀜𑀢𑁆𑀢𑀺𑀬𑀦𑁆𑀢𑀺 ¶ 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀁. ‘‘𑀜𑀸𑀢𑀓𑀸𑀦𑀁 𑀯𑀸 𑀧𑀯𑀸𑀭𑀺𑀢𑀸𑀦𑀁 𑀯𑀸 𑀅𑀜𑁆𑀜𑀲𑁆𑀲 𑀅𑀢𑁆𑀣𑀸𑀬 𑀯𑀸 𑀅𑀢𑁆𑀢𑀦𑁄 𑀥𑀦𑁂𑀦 𑀯𑀸’’𑀢𑀺 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁. 𑀕𑀺𑀮𑀸𑀦𑁄𑀧𑀺 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀧𑀢𑁆𑀢𑀁 𑀉𑀚𑁆𑀛𑀸𑀦𑀲𑀜𑁆𑀜𑀸𑀬 𑀑𑀮𑁄𑀓𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀉𑀚𑁆𑀛𑀸𑀦𑁂 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺. 𑀉𑀚𑁆𑀛𑀸𑀦𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁.

𑁧𑁯𑁧𑁨. 𑀤𑀲𑁆𑀲𑀸𑀫𑀻𑀢𑀺 𑀇𑀫𑀲𑁆𑀲 𑀪𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀬𑀁 𑀢𑀢𑁆𑀣 𑀦𑀢𑁆𑀣𑀺, 𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸. 𑀅𑀯𑀫𑀜𑁆𑀜𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑀘𑀺𑀢𑁆𑀢𑀁 𑀉𑀚𑁆𑀛𑀸𑀦𑀁, 𑀉𑀚𑁆𑀛𑀸𑀦𑁂 𑀲𑀜𑁆𑀜𑀸 𑀉𑀚𑁆𑀛𑀸𑀦𑀲𑀜𑁆𑀜𑀸, 𑀲𑀸 ¶ 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀕𑁆𑀕𑀳𑁄. 𑀦𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑁧𑁯𑁧𑁩. ‘‘𑀢𑁂𑀲𑀁 𑀫𑀚𑁆𑀛𑀧𑁆𑀧𑀫𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀔𑀼𑀤𑁆𑀤𑀓𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀸𑀢𑀺𑀫𑀳𑀦𑁆𑀢’’𑀦𑁆𑀢𑀺 𑀘 𑀅𑀢𑀺𑀫𑀳𑀦𑁆𑀢𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀔𑀼𑀤𑁆𑀤𑀓𑁂 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻𑀢𑀺. 𑀓𑀩𑀴𑁄𑀢𑀺 𑀆𑀮𑁄𑀧𑁄.

𑁧𑁯𑁧𑁪. 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀓𑁂 𑀲𑀩𑁆𑀩𑀢𑁆𑀣 𑀔𑀚𑁆𑀚𑀓𑁂 𑀧𑀦𑀸𑀢𑀺 𑀬𑁄𑀚𑀦𑀸. 𑀨𑀮𑀸𑀨𑀮𑁂𑀢𑀺 𑀔𑀼𑀤𑁆𑀤𑀓𑁂, 𑀫𑀳𑀦𑁆𑀢𑁂 𑀘 𑀨𑀮𑁂.

𑀦𑀯𑀫𑀁.

𑁧𑁯𑁧𑁫. 𑀤𑀲𑀫𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁.

𑀤𑀲𑀫𑀁.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑁧𑁯𑁧𑁬. ‘‘𑀅𑀦𑀸𑀳𑀝𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁 ‘‘𑀫𑀼𑀔𑀤𑁆𑀯𑀸𑀭𑀁 𑀅𑀧𑁆𑀧𑀢𑁆𑀢𑁂’’𑀢𑀺. 𑀬𑀣𑀸𑀳 ‘‘𑀅𑀦𑀸𑀳𑀝𑁂𑀢𑀺 𑀅𑀦𑀸𑀳𑀭𑀺𑀢𑁂, 𑀫𑀼𑀔𑀤𑁆𑀯𑀸𑀭𑀁 𑀅𑀲𑀫𑁆𑀧𑀸𑀧𑀺𑀢𑁂𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁧𑁭). ‘‘𑀫𑀼𑀔𑀤𑁆𑀯𑀸𑀭𑀁 𑀯𑀺𑀯𑀭𑀦𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀫𑀼𑀔𑀤𑁆𑀯𑀸𑀭-𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 𑀓𑀲𑁆𑀲𑀸𑀢𑀺 𑀅𑀧𑁂𑀓𑁆𑀔𑀸𑀬 ‘‘𑀫𑀼𑀔𑀤𑁆𑀯𑀸𑀭𑀁 𑀯𑀺𑀯𑀭𑀺𑀲𑁆𑀲𑀸𑀫𑀻’’𑀢𑀺 ¶ 𑀅𑀢𑁆𑀢𑀦𑁄𑀧𑀤𑁂𑀓𑀯𑀘𑀦𑁂𑀦 𑀩𑁆𑀬𑀜𑁆𑀚𑀺𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀅𑀢𑁆𑀢𑀦𑁄-𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘-𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑁄, 𑀅𑀧𑁆𑀧𑀢𑁆𑀢𑁂 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑁄, 𑀅𑀲𑀫𑁆𑀧𑀢𑁆𑀢𑁂𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀧𑀞𑀫𑀁.

𑁧𑁯𑁧𑁭. 𑀲𑀓𑀮𑀁 ¶ 𑀳𑀢𑁆𑀣𑀦𑁆𑀢𑀺 𑀏𑀢𑁆𑀣 𑀳𑀢𑁆𑀣-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄. ‘‘𑀳𑀢𑁆𑀣𑀫𑀼𑀤𑁆𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀧𑀺 𑀧𑀯𑀢𑁆𑀢𑀦𑀢𑁄 𑀏𑀓𑀗𑁆𑀕𑀼𑀮𑀺𑀫𑁆𑀧𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁧𑁯𑁧𑁮. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀩𑁆𑀬𑀸𑀳𑀭𑀦𑁆𑀢𑀲𑁆𑀲𑀸𑀢𑀺 𑀓𑀣𑁂𑀦𑁆𑀢𑀲𑁆𑀲.

𑀤𑀼𑀢𑀺𑀬𑀢𑀢𑀺𑀬𑀸𑀦𑀺.

𑁧𑁯𑁨𑁦. 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀦𑁆𑀢𑀺 𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀇𑀥𑀸𑀧𑀺 𑀔𑀚𑁆𑀚𑀓𑀨𑀮𑀸𑀨𑀮𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀓𑀩𑀴𑀘𑁆𑀙𑁂𑀤𑀓𑀫𑁆𑀧𑀺 𑀯𑀸𑀢𑀺 𑀓𑀩𑀴𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀇𑀥 𑀔𑀚𑁆𑀚𑀓𑀨𑀮𑀸𑀨𑀮𑁂𑀳𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀺𑀪𑀗𑁆𑀕𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀕𑀡𑁆𑀟𑁂 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀨𑀮𑀸𑀨𑀮𑀫𑀢𑁆𑀢𑁂𑀬𑁂𑀯 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁧𑁯𑁨𑁧-𑁨. 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀺𑀢𑁆𑀯𑀸𑀦𑀸𑀢𑀺 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀺𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀢𑁄𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀲𑀺𑀢𑁆𑀣𑀸𑀯𑀓𑀸𑀭𑀓𑀦𑁆𑀢𑀺 𑀲𑀺𑀢𑁆𑀣𑀸𑀦𑀺 𑀅𑀯𑀓𑀺𑀭𑀺𑀢𑁆𑀯𑀸 𑀅𑀯𑀓𑀺𑀭𑀺𑀢𑁆𑀯𑀸. 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀁 𑀯𑀸𑀧𑀻𑀢𑀺 𑀚𑀺𑀯𑁆𑀳𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸. 𑀘𑀧𑀼 𑀘𑀧𑀽𑀢𑀺 𑀯𑀸𑀢𑀺 ‘‘𑀘𑀧𑀼 𑀘𑀧𑀽’’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸. 𑀲𑀢𑁆𑀢𑀫𑁂𑀢𑀺 ‘‘𑀦 𑀳𑀢𑁆𑀣𑀦𑀺𑀤𑁆𑀥𑀼𑀦𑀓’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑁂. 𑀅𑀝𑁆𑀞𑀫𑁂𑀢𑀺 ‘‘𑀦 𑀲𑀺𑀢𑁆𑀣𑀸𑀯𑀓𑀸𑀭𑀓’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑁂. 𑀓𑀘𑀯𑀭𑀼𑀚𑁆𑀛𑀦𑁂𑀢𑀺 𑀓𑀘𑀯𑀭𑀸𑀧𑀦𑀬𑀦𑁂.

𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺.

𑀧𑀜𑁆𑀘𑀫𑁄 𑀯𑀕𑁆𑀕𑁄.

𑁧𑁯𑁨𑁩. ‘‘𑀲𑀼𑀭𑀼 ¶ 𑀲𑀼𑀭𑀽’’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀦 𑀪𑁄𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀯𑀸𑀧𑀻𑀢𑀺 𑀳𑀢𑁆𑀣𑀁 𑀦𑀺𑀮𑁆𑀮𑁂𑀳𑀺𑀢𑁆𑀯𑀸 𑀦𑀺𑀮𑁆𑀮𑁂𑀳𑀺𑀢𑁆𑀯𑀸.

𑁧𑁯𑁨𑁪. 𑀨𑀸𑀡𑀺𑀢𑀁 ¶ , 𑀖𑀦𑀬𑀸𑀕𑀼𑀁 𑀯𑀸 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀧𑀯𑁂𑀲𑁂𑀢𑁆𑀯𑀸𑀧𑀺 𑀢𑀁 𑀪𑁄𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁨𑁫. 𑀏𑀓𑀸𑀬 𑀅𑀗𑁆𑀕𑀼𑀮𑀺𑀓𑀸𑀬𑀧𑀺 𑀧𑀢𑁆𑀢𑁄 𑀦 𑀮𑁂𑀳𑀺𑀢𑀩𑁆𑀩𑁄𑀯. 𑀚𑀺𑀯𑁆𑀳𑀸𑀬 𑀏𑀓𑀑𑀝𑁆𑀞𑁄𑀧𑀺 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑀓𑁄𑀢𑀺 𑀬𑁄𑀚𑀦𑀸. 𑀩𑀳𑀺 𑀑𑀝𑁆𑀞𑀜𑁆𑀘 𑀚𑀺𑀯𑁆𑀳𑀸𑀬 𑀦 𑀮𑁂𑀳𑀺𑀢𑀩𑁆𑀩𑀁. 𑀑𑀝𑁆𑀞𑁂 𑀮𑀕𑁆𑀕𑀁 𑀲𑀺𑀢𑁆𑀣𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀉𑀪𑁄𑀳𑀺 𑀑𑀝𑁆𑀞𑀫𑀁𑀲𑁂𑀳𑀺𑀬𑁂𑀯 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁧𑁯𑁨𑁬-𑁮. 𑀦 𑀘 𑀕𑀳𑁂𑀢𑀩𑁆𑀩𑀁, 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀳𑀺-𑀇𑀢𑀺 ‘‘𑀬𑀲𑁆𑀫𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑁂, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑀲𑁆𑀫𑀸’’𑀢𑀺. ‘‘𑀧𑀸𑀦𑀻𑀬𑀣𑀸𑀮𑀓’’𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀲𑀗𑁆𑀔𑀸𑀤𑀻𑀦𑀫𑁆𑀧𑀺 𑀢𑀣𑀸 𑀦𑀕𑀳𑁂𑀢𑀩𑁆𑀩𑀢𑁆𑀢𑀸. 𑀲𑀭𑀸𑀯𑀁 𑀯𑀸𑀢𑀺 𑀢𑀝𑁆𑀝𑀓𑀁 𑀯𑀸.

𑀅𑀦𑀸𑀫𑀺𑀲𑁂𑀦 𑀳𑀢𑁆𑀣𑁂𑀦𑀸𑀢𑀺 𑀆𑀫𑀺𑀲𑀭𑀳𑀺𑀢𑁂𑀦 𑀳𑀢𑁆𑀣𑁂𑀓𑀤𑁂𑀲𑁂𑀦. 𑀬𑀣𑀸𑀳 ‘‘𑀲𑀘𑁂 𑀧𑀦 𑀳𑀢𑁆𑀣𑀲𑁆𑀲

𑀏𑀓𑀤𑁂𑀲𑁄 𑀆𑀫𑀺𑀲𑀫𑀓𑁆𑀔𑀺𑀢𑁄 𑀦 𑀳𑁄𑀢𑀺, 𑀢𑁂𑀦 𑀧𑀤𑁂𑀲𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁩𑁧). 𑀆𑀫𑀺𑀲𑀫𑀓𑁆𑀔𑀺𑀢𑁂𑀦𑁂𑀯 𑀳𑀢𑁆𑀣𑁂𑀦 ‘‘𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀥𑁄𑀯𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀺.

𑀧𑀜𑁆𑀘𑀫𑀁.

𑁧𑁯𑁨𑁯. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀲𑀲𑀺𑀢𑁆𑀣𑀓𑀸 𑀧𑀢𑁆𑀢𑀥𑁄𑀯𑀦𑀸 𑀲𑀺𑀢𑁆𑀣𑀓𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀢𑀁 𑀧𑀢𑁆𑀢𑀥𑁄𑀯𑀦𑁄𑀤𑀓𑀁 𑀖𑀭𑀸 𑀩𑀳𑀺 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀲𑀺𑀢𑁆𑀣𑀓𑁂 𑀧𑀢𑁆𑀢𑀥𑁄𑀯𑀦𑁂 𑀲𑀺𑀢𑁆𑀣𑀓𑀸𑀦𑀺 𑀫𑀤𑁆𑀤𑀺𑀢𑁆𑀯𑀸 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑀕𑀢𑀺𑀓𑀸𑀦𑁂𑀯 𑀓𑀢𑁆𑀯𑀸 𑀢𑀁 𑀉𑀤𑀓𑀁 𑀖𑀭𑀸 𑀩𑀳𑀺 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀕𑀳𑁂𑀢𑁆𑀯𑀸𑀢𑀺 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑁄𑀤𑀓𑀁 𑀕𑀳𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑁄𑀤𑀓𑀁 𑀖𑀭𑀸 ¶ 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀧𑀝𑀺𑀕𑁆𑀕𑀳𑁄 𑀦𑀸𑀫 𑀔𑁂𑀴𑀫𑀮𑁆𑀮𑀸𑀤𑀺𑀓𑁄 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑀥𑁄𑀯𑀦𑀪𑀸𑀚𑀦𑀯𑀺𑀲𑁂𑀲𑁄.

𑀙𑀝𑁆𑀞𑀁.

𑁧𑁯𑁩𑁦. 𑀙𑀢𑁆𑀢𑀁 𑀬𑀁 𑀓𑀺𑀜𑁆𑀘𑀻𑀢𑀺 ‘‘𑀙𑀢𑁆𑀢𑀁 𑀦𑀸𑀫 𑀢𑀻𑀡𑀺 𑀙𑀢𑁆𑀢𑀸𑀦𑀺 𑀲𑁂𑀢𑀘𑁆𑀙𑀢𑁆𑀢𑀁 𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀁 𑀧𑀡𑁆𑀡𑀘𑁆𑀙𑀢𑁆𑀢𑀁 𑀫𑀡𑁆𑀟𑀮𑀩𑀤𑁆𑀥𑀁 𑀲𑀮𑀸𑀓𑀩𑀤𑁆𑀥’’𑀦𑁆𑀢𑀺 (𑀧𑀸𑀘𑀺. 𑁬𑁩𑁪) 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀙𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁. 𑀏𑀢𑁆𑀣 𑀘 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀯𑀢𑁆𑀣𑀧𑀮𑀺𑀕𑀼𑀡𑁆𑀞𑀺𑀢𑀁 𑀧𑀡𑁆𑀟𑀭𑀘𑁆𑀙𑀢𑁆𑀢𑀁. 𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀦𑁆𑀢𑀺 𑀯𑀺𑀮𑀻𑀯𑀘𑁆𑀙𑀢𑁆𑀢𑀁. 𑀧𑀡𑁆𑀡𑀘𑁆𑀙𑀢𑁆𑀢𑀦𑁆𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀢𑀁. ‘‘𑀫𑀡𑁆𑀟𑀮𑀩𑀤𑁆𑀥𑀁 𑀲𑀮𑀸𑀓𑀩𑀤𑁆𑀥’’𑀦𑁆𑀢𑀺 𑀇𑀤𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀙𑀢𑁆𑀢𑀸𑀦𑀁 𑀧𑀜𑁆𑀚𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀫𑀡𑁆𑀟𑀮𑀩𑀤𑁆𑀥𑀸𑀦𑀺 𑀘𑁂𑀯 𑀳𑁄𑀦𑁆𑀢𑀺 𑀲𑀮𑀸𑀓𑀩𑀤𑁆𑀥𑀸𑀦𑀺 𑀘. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀅𑀦𑀯𑀲𑁂𑀲𑀧𑀭𑀺𑀕𑁆𑀕𑀳𑀯𑀘𑀦𑁂𑀦 ‘‘𑀬𑀫𑁆𑀧𑀺 𑀘 𑀢𑀢𑁆𑀣𑀚𑀸𑀢𑀤𑀡𑁆𑀟𑁂𑀦 𑀓𑀢𑀁 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀙𑀢𑁆𑀢𑀫𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁩𑁪) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁 𑀙𑀢𑁆𑀢𑀯𑀺𑀲𑁂𑀲𑀁 𑀕𑀡𑁆𑀳𑀸𑀢𑀺. 𑀳𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 ‘‘𑀅𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺 𑀲𑁂𑀲𑁄. 𑀲𑀭𑀻𑀭𑀸𑀯𑀬𑀯𑁂𑀦𑀸𑀢𑀺 𑀏𑀢𑁆𑀣 ‘‘𑀕𑀳𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀯𑀸-𑀲𑀤𑁆𑀤𑁄 𑀅𑀧𑀺-𑀲𑀤𑁆𑀤𑀢𑁆𑀣𑁄. 𑀅𑀁𑀲𑀓𑀽𑀝𑀸𑀤𑀺𑀲𑀭𑀻𑀭𑀸𑀯𑀬𑀯𑁂𑀦 𑀕𑀳𑁂𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀅𑀫𑀼𑀜𑁆𑀘𑀺𑀢𑁆𑀯𑀸 𑀥𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑁄 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀙𑀢𑁆𑀢𑀧𑀸𑀤𑀼𑀓𑀸𑀬 𑀯𑀸 𑀞𑀺𑀢𑀁 𑀳𑁄𑀢𑀺, 𑀧𑀲𑁆𑀲𑁂 𑀯𑀸 𑀞𑀺𑀢𑀁 𑀳𑁄𑀢𑀺,

𑀳𑀢𑁆𑀣𑀢𑁄 𑀅𑀧𑀕𑀢𑀫𑀢𑁆𑀢𑁂 𑀙𑀢𑁆𑀢𑀧𑀸𑀡𑀺 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀯𑀘𑀦𑀢𑁄, 𑀇𑀥 ‘‘𑀲𑀩𑁆𑀩𑀢𑁆𑀣 𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 𑀏𑀢𑁆𑀣 ‘‘𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀮𑀩𑁆𑀪𑀢𑀺. 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀘𑁂𑀢𑁆𑀣 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑀼𑀧𑀭𑀺𑀧𑀺.

𑀲𑀢𑁆𑀢𑀫𑀁.

𑁧𑁯𑁩𑁧. 𑀤𑀡𑁆𑀟𑀧𑀸𑀡𑀺𑀫𑁆𑀳𑀻𑀢𑀺 ¶ 𑀏𑀢𑁆𑀣 𑀤𑀡𑁆𑀟𑁄 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑁄 𑀤𑀡𑁆𑀟𑁄𑀢𑀺 𑀆𑀳 ‘‘𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄’’𑀢𑀺𑀆𑀤𑀺. 𑀫𑀚𑁆𑀛𑀺𑀫𑀳𑀢𑁆𑀣𑀢𑁄𑀢𑀺 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀢𑁄, 𑀬𑁄 ‘‘𑀯𑀟𑁆𑀠𑀓𑀺𑀳𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀝𑁆𑀞𑀫𑀁.

𑁧𑁯𑁩𑁨. 𑀲𑀢𑁆𑀣𑀧𑀸𑀡𑀺𑀲𑁆𑀲𑀸𑀢𑀺 ¶ 𑀏𑀢𑁆𑀣𑀸𑀧𑀺 𑀯𑀺𑀕𑁆𑀕𑀳𑁄 𑀯𑀼𑀢𑁆𑀢𑀦𑀬𑁄𑀯. 𑀯𑀓𑁆𑀔𑀫𑀸𑀦𑀁 𑀲𑀓𑀮𑀁 𑀥𑀦𑀼𑀯𑀺𑀓𑀢𑀺𑀁, 𑀲𑀭𑀯𑀺𑀓𑀢𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀔𑀕𑁆𑀕𑀸𑀤𑀺 𑀲𑀢𑁆𑀣𑀁 𑀦𑀸𑀫. 𑀔𑀕𑁆𑀕𑀁 𑀲𑀦𑁆𑀦𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀲𑀢𑁆𑀣𑀧𑀸𑀡𑀺 𑀦𑀼 𑀔𑁄𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀲𑀢𑁆𑀣𑀧𑀸𑀡𑀻’’𑀢𑀺𑀆𑀤𑀺. ‘‘𑀦 𑀳𑁄𑀢𑀺 𑀅𑀲𑀺’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄.

𑀦𑀯𑀫𑀁.

𑁧𑁯𑁩𑁩-𑁫. 𑀲𑀭𑁂𑀦 𑀲𑀤𑁆𑀥𑀺𑀁 𑀥𑀦𑀼𑀁 𑀯𑀸 𑀲𑀼𑀤𑁆𑀥𑀥𑀦𑀼𑀁 𑀯𑀸 𑀲𑀼𑀤𑁆𑀥𑀲𑀭𑀁 𑀯𑀸 𑀲𑀚𑀺𑀬𑀁 𑀥𑀦𑀼𑀤𑀡𑁆𑀟𑀁 𑀯𑀸 𑀦𑀺𑀚𑀺𑀬𑀁 𑀥𑀦𑀼𑀤𑀡𑁆𑀟𑀁 𑀯𑀸 𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲𑀸𑀧𑀺 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀯𑀸 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀯𑀸 𑀲𑀘𑁂 𑀬𑁄 𑀢𑀣𑀸 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀘𑁂 𑀧𑀦𑀲𑁆𑀲 𑀥𑀦𑀼 𑀔𑀦𑁆𑀥𑁂 𑀧𑀝𑀺𑀫𑀼𑀓𑁆𑀓𑀁 𑀳𑁄𑀢𑀺, 𑀬𑀸𑀯 𑀦 𑀕𑀡𑁆𑀳𑀸𑀢𑀺, 𑀢𑀸𑀯 𑀯𑀝𑁆𑀝𑀢𑀺. 𑀚𑀺𑀬𑀸𑀬 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀚𑀺𑀬𑀁.

𑀤𑀲𑀫𑀁.

𑀙𑀝𑁆𑀞𑁄 𑀯𑀕𑁆𑀕𑁄.

𑁧𑁯𑁩𑁬. 𑀧𑀸𑀤𑀼𑀓𑀸𑀭𑀼𑀴𑁆𑀳𑀓𑀲𑁆𑀲𑀸𑀢𑀺 𑀧𑀸𑀤𑀼𑀓𑀁 𑀆𑀭𑀼𑀴𑁆𑀳𑁄 𑀧𑀸𑀤𑀼𑀓𑀸𑀭𑀼𑀴𑁆𑀳𑁄, 𑀲𑁄𑀬𑁂𑀯 𑀧𑀸𑀤𑀼𑀓𑀸𑀭𑀼𑀴𑁆𑀳𑀓𑁄, 𑀢𑀲𑁆𑀲. 𑀓𑀣𑀁 𑀆𑀭𑀼𑀴𑁆𑀳𑀲𑁆𑀲𑀸𑀢𑀺 𑀆𑀳 ‘‘𑀅𑀓𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺. 𑀅𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲𑀸𑀢𑀺 ¶ 𑀙𑀢𑁆𑀢𑀤𑀡𑁆𑀟𑀓𑁂 𑀅𑀗𑁆𑀕𑀼𑀮𑀦𑁆𑀢𑀭𑀁 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀓𑁂𑀯𑀮𑀁 𑀧𑀸𑀤𑀼𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀧𑀝𑀺𑀫𑀼𑀓𑁆𑀓𑀲𑁆𑀲 𑀯𑀸𑀢𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀏𑀢𑀁 𑀤𑁆𑀯𑀬𑀫𑁆𑀧𑀺 ‘‘𑀧𑀸𑀤𑀼𑀓𑀸𑀭𑀼𑀴𑁆𑀳𑀓𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁. 𑀬𑀣𑀸𑀳 ‘‘𑀦 𑀧𑀸𑀤𑀼𑀓𑀸𑀭𑀼𑀴𑁆𑀳𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀅𑀓𑁆𑀓𑀦𑁆𑀢𑀲𑁆𑀲 𑀯𑀸 𑀧𑀝𑀺𑀫𑀼𑀓𑁆𑀓𑀲𑁆𑀲 𑀯𑀸 𑀑𑀫𑀼𑀓𑁆𑀓𑀲𑁆𑀲 𑀯𑀸 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁩𑁮).

𑀧𑀞𑀫𑀁.

𑁧𑁯𑁩𑁭-𑁪𑁦. 𑀉𑀧𑀸𑀳𑀦𑀕𑀢𑀲𑁆𑀲𑀸𑀧𑀻𑀢𑀺 𑀅𑀓𑁆𑀓𑀦𑁆𑀢𑀸𑀤𑀺𑀆𑀓𑀸𑀭𑁂𑀦 𑀉𑀧𑀸𑀳𑀦𑀸𑀭𑀼𑀴𑁆𑀳𑀲𑁆𑀲 𑀘. 𑀬𑀣𑀸𑀳 ‘‘𑀅𑀓𑁆𑀓𑀦𑁆𑀢𑀲𑁆𑀲 𑀯𑀸 𑀧𑀝𑀺𑀫𑀼𑀓𑁆𑀓𑀲𑁆𑀲 𑀯𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀙𑀢𑁆𑀢𑀧𑀸𑀡𑀺𑀆𑀤𑀻𑀲𑀼 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼. 𑀅𑀕𑀺𑀮𑀸𑀦𑀲𑁆𑀲𑀸𑀢𑀺 𑀇𑀤𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀲𑁂𑀲𑁄. 𑀬𑀸𑀦𑁂 𑀯𑀸 𑀕𑀢𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀬𑀸𑀦𑁂 𑀯𑀸 𑀕𑀢𑀲𑁆𑀲𑀸𑀢𑀺 𑀲𑀘𑁂 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀳𑀢𑁆𑀣𑀲𑀗𑁆𑀖𑀸𑀢𑁂𑀦 𑀕𑀳𑀺𑀢𑁄, 𑀲𑀸𑀝𑀓𑁂 ¶ 𑀯𑀸 𑀞𑀧𑁂𑀢𑁆𑀯𑀸 𑀯𑀁𑀲𑁂𑀦 𑀯𑀬𑁆𑀳𑀢𑀺, 𑀅𑀬𑀼𑀢𑁆𑀢𑁂 𑀯𑀸 𑀯𑀬𑁆𑀳𑀸𑀤𑀺𑀓𑁂 𑀬𑀸𑀦𑁂, 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀘𑀓𑁆𑀓𑀫𑀢𑁆𑀢𑁂𑀧𑀺 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀬𑀸𑀦𑀕𑀢𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

𑀲𑀬𑀦𑁂𑀧𑀺 𑀯𑀸 𑀅𑀦𑁆𑀢𑀫𑀲𑁄 𑀓𑀝𑀲𑀸𑀭𑀓𑁂 𑀯𑀸 𑀙𑀫𑀸𑀬 𑀯𑀸 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀅𑀕𑀺𑀮𑀸𑀦𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀲𑀬𑀦𑀕𑀢𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀓𑀝𑀲𑀸𑀭𑀓𑁂𑀧𑀺 𑀧𑀓𑀢𑀺𑀪𑀽𑀫𑀺𑀬𑀫𑁆𑀧𑀺 𑀦𑀺𑀧𑀦𑁆𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁪𑁧). 𑀉𑀘𑁆𑀘𑁂 𑀧𑀻𑀞𑁂 𑀯𑀸 𑀉𑀘𑁆𑀘𑁂 𑀫𑀜𑁆𑀘𑁂𑀧𑀺 𑀯𑀸 𑀦𑀺𑀲𑀺𑀦𑁆𑀦𑁂𑀦, 𑀞𑀺𑀢𑁂𑀦 𑀯𑀸 𑀦𑀺𑀧𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀞𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀇𑀤𑀜𑁆𑀘 𑀲𑀗𑁆𑀕𑀳𑀺𑀢𑀫𑁂𑀯. 𑀲𑀬𑀦𑁂𑀲𑀼 𑀕𑀢𑀲𑁆𑀲 𑀘 𑀤𑁂𑀲𑁂𑀦𑁆𑀢𑁂𑀦 𑀲𑀬𑀦𑁂𑀲𑀼 𑀕𑀢𑁂𑀦𑀸𑀧𑀺 𑀲𑀫𑀸𑀦𑁂 𑀯𑀸𑀧𑀺 𑀉𑀘𑁆𑀘𑁂 𑀯𑀸 𑀦𑀺𑀧𑀦𑁆𑀦𑁂𑀦𑁂𑀯 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁪𑁧. ‘‘𑀢𑀣𑁂𑀯 ¶ 𑀘𑀸’’𑀢𑀺 𑀇𑀫𑀺𑀦𑀸 ‘‘𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀕𑀳𑀺𑀢𑀁.

𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁧𑁯𑁪𑁨. ‘‘𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀬𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀧𑀮𑁆𑀮𑀢𑁆𑀣𑀺𑀓𑀸 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀬𑀸𑀬 𑀓𑀸𑀬𑀘𑀺 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑁂𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀤𑀼𑀲𑁆𑀲𑀯𑁂𑀞𑀦𑁂𑀦 𑀯𑀸 𑀫𑁄𑀮𑀺𑀆𑀤𑀻𑀳𑀺 𑀯𑀸 𑀬𑀣𑀸 𑀓𑁂𑀲𑀦𑁆𑀢𑁄 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀯𑁂𑀞𑀺𑀢𑀲𑀻𑀲𑀲𑁆𑀲.

𑁧𑁯𑁪𑁩. 𑀬𑀤𑀺 𑀓𑁂𑀲𑀦𑁆𑀢𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀇𑀫𑀺𑀦𑀸 ‘‘𑀲𑀻𑀲𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁄𑀧𑀺 𑀯𑀼𑀢𑁆𑀢𑁄 𑀳𑁄𑀢𑀺.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀸𑀦𑀺.

𑁧𑁯𑁪𑁪-𑁫. 𑀅𑀝𑁆𑀞𑀫𑁂 ‘‘𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑀫𑁆𑀧𑀺 𑀢𑀺𑀡𑀸𑀦𑀺𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁪𑁫) 𑀇𑀤𑀜𑁆𑀘 𑀦𑀯𑀫𑁂 ‘‘𑀉𑀘𑁆𑀘𑁂 𑀆𑀲𑀦𑁂𑀢𑀺 𑀅𑀦𑁆𑀢𑀫𑀲𑁄 𑀪𑀽𑀫𑀺𑀧𑁆𑀧𑀤𑁂𑀲𑁂𑀧𑀺 𑀉𑀦𑁆𑀦𑀢𑁂 𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁪𑁭) 𑀇𑀤𑀜𑁆𑀘 𑀤𑀲𑀫𑁂 ‘‘𑀲𑀘𑁂𑀧𑀻’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀯𑀺𑀦𑀺𑀘𑁆𑀙𑀬𑀜𑁆𑀘 𑀞𑀧𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑀸𑀪𑀸𑀯𑀸 𑀆𑀳 ‘‘𑀅𑀝𑁆𑀞𑀫𑁂 𑀦𑀯𑀫𑁂 ¶ 𑀯𑀸𑀧𑀺, 𑀤𑀲𑀫𑁂 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀻’’𑀢𑀺. 𑀏𑀢𑁆𑀣 ‘‘𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀲𑁂𑀲𑁄. 𑀣𑁂𑀭𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸𑀦 𑀞𑀺𑀢𑀁 𑀤𑀳𑀭𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑁄 𑀘𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸. 𑀓𑀣𑁂𑀢𑀩𑁆𑀩𑀫𑀼𑀧𑀸𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀲𑁆𑀲 𑀧𑀲𑁆𑀲𑁂 𑀧𑀦𑀜𑁆𑀜𑀲𑁆𑀲, 𑀓𑀣𑁂𑀢𑀩𑁆𑀩𑀁 𑀯𑀺𑀚𑀸𑀦𑀢𑀸’’𑀢𑀺. 𑀏𑀢𑁆𑀣 ‘‘𑀞𑀺𑀢𑀲𑁆𑀲𑀸’’𑀢𑀺 𑀲𑁂𑀲𑁄 ¶ . 𑀢𑀲𑁆𑀲 𑀲𑀫𑀻𑀧𑀯𑀢𑁆𑀢𑀺𑀦𑁄 𑀓𑀲𑁆𑀲𑀘𑀺 𑀅𑀪𑀸𑀯𑁂 𑀲𑀚𑁆𑀛𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺.

𑀲𑀢𑁆𑀢𑀫𑁄 𑀯𑀕𑁆𑀕𑁄.

𑁧𑁯𑁪𑁬. 𑀕𑀘𑁆𑀙𑀢𑁄 𑀧𑀼𑀭𑀢𑁄𑀢𑀺 𑀏𑀢𑁆𑀣 ‘‘𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀲𑁂𑀲𑁄. 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁂𑀦 𑀧𑀼𑀭𑀢𑁄 𑀕𑀘𑁆𑀙𑀢𑁄 𑀧𑀜𑁆𑀳𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀘𑁂 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀲𑁆𑀲𑀸’’𑀢𑀺𑀆𑀤𑀺.

𑁧𑁯𑁪𑁭. 𑀉𑀕𑁆𑀕𑀳𑀺𑀢𑀁 𑀥𑀫𑁆𑀫𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀲𑀚𑁆𑀛𑀸𑀬𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀲𑀫𑀫𑁂𑀯 𑀕𑀘𑁆𑀙𑀢𑁄 𑀬𑀼𑀕𑀕𑁆𑀕𑀸𑀳𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀬𑀼𑀕𑀕𑁆𑀕𑀸𑀳𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁. 𑀅𑀜𑁆𑀜𑀫𑀜𑁆𑀜-𑀲𑀤𑁆𑀤𑀧𑀭𑀺𑀬𑀸𑀬𑁄 𑀳𑀺 𑀬𑀼𑀕𑀕𑁆𑀕𑀸𑀳-𑀲𑀤𑁆𑀤𑁄.

𑀧𑀞𑀫𑀁.

𑁧𑁯𑁪𑁮. 𑀲𑀓𑀝𑀫𑀕𑁆𑀕𑁂 𑀏𑀓𑁂𑀓𑀲𑁆𑀲 𑀘𑀓𑁆𑀓𑀲𑁆𑀲 𑀧𑀣𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑁂𑀓𑀲𑁆𑀲 𑀘𑀓𑁆𑀓𑀲𑁆𑀲 𑀧𑀣𑁂𑀦 𑀲𑀫𑀁 𑀕𑀘𑁆𑀙𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀧𑁆𑀧𑀣𑁂𑀦𑀸𑀧𑀺 𑀕𑀘𑁆𑀙𑀦𑁆𑀢𑁄 𑀉𑀧𑁆𑀧𑀣𑁂𑀦 𑀲𑀫𑀁 𑀕𑀘𑁆𑀙𑀦𑁆𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸. 𑀉𑀧𑁆𑀧𑀣𑁂𑀦𑀸𑀢𑀺 𑀅𑀫𑀕𑁆𑀕𑁂𑀦. 𑀏𑀯𑀁 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑁂 𑀤𑀲𑁆𑀲𑀺𑀢𑁂 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀆𑀧𑀢𑁆𑀢𑀺𑀯𑀺𑀲𑀬𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀁.

𑁧𑁯𑁪𑁯. 𑀢𑀢𑀺𑀬𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀦 𑀞𑀺𑀢𑁄 𑀅𑀕𑀺𑀮𑀸𑀦𑁄 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁬𑁫𑁧) 𑀏𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀬𑀣𑀸𑀭𑀼𑀢𑀯𑀲𑁂𑀦 ¶ 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀁 𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀳𑀲𑀸 𑀉𑀘𑁆𑀘𑀸𑀭𑁄 𑀯𑀸 𑀧𑀲𑁆𑀲𑀸𑀯𑁄 𑀯𑀸 𑀦𑀺𑀓𑁆𑀔𑀫𑀢𑀺, 𑀅𑀲𑀜𑁆𑀘𑀺𑀘𑁆𑀘 ¶ 𑀓𑀢𑁄 𑀦𑀸𑀫, 𑀅𑀦𑀸𑀧𑀢𑁆𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀗𑁆𑀖𑀸𑀡𑀺𑀓𑀸𑀬 𑀔𑁂𑀴𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑁂𑀧𑀺 𑀩𑀸𑀢𑁆𑀢𑀺𑀁𑀲𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀲𑀼𑀁𑀬𑁂𑀯 𑀤𑀲𑁆𑀲𑀺𑀢𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀯𑀼𑀢𑁆𑀢𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀆𑀳 ‘‘𑀉𑀘𑁆𑀘𑀸𑀭𑀸𑀤𑀺𑀘𑀢𑀼𑀓𑁆𑀓’’𑀦𑁆𑀢𑀺.

𑁧𑁯𑁫𑁦. 𑀏𑀢𑁆𑀣 𑀳𑀭𑀺𑀢𑀁 𑀦𑀸𑀫 𑀇𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀚𑀻𑀯𑀭𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺. 𑀭𑀼𑀓𑁆𑀔𑀲𑁆𑀲𑀸𑀢𑀺 𑀉𑀧𑀮𑀓𑁆𑀔𑀡𑀁 𑀚𑀻𑀯𑀫𑀸𑀦𑀓𑀢𑀺𑀡𑀮𑀢𑀸𑀤𑀻𑀦𑀫𑁆𑀧𑀺 𑀳𑀭𑀺𑀢𑁂𑀬𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀤𑀺𑀲𑁆𑀲𑀫𑀸𑀦𑀁 𑀕𑀘𑁆𑀙𑀢𑀻’’𑀢𑀺 𑀯𑀘𑀦𑁂𑀦𑁂𑀯 𑀅𑀤𑀺𑀲𑁆𑀲𑀫𑀸𑀦𑀕𑀢𑀁 𑀅𑀳𑀭𑀺𑀢𑀦𑁆𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀤𑀺𑀲𑁆𑀲𑀫𑀸𑀦𑀸 𑀕𑀘𑁆𑀙𑀢𑀺, 𑀢𑀁 𑀲𑀩𑁆𑀩𑀁 𑀳𑀭𑀺𑀢𑀫𑁂𑀯𑀸𑀢𑀺 𑀬𑁄𑀚𑀦𑀸.

𑁧𑁯𑁫𑁧. 𑀲𑀳𑀲𑀸 𑀯𑀘𑁆𑀘𑀁 𑀦𑀺𑀓𑁆𑀔𑀫𑀢𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀯𑀘𑁆𑀘𑀦𑁆𑀢𑀺 𑀉𑀧𑀮𑀓𑁆𑀔𑀡𑀁 𑀧𑀲𑁆𑀲𑀸𑀯𑀸𑀤𑀻𑀦𑀫𑁆𑀧𑀺 𑀤𑀲𑁆𑀲𑀺𑀢𑀢𑁆𑀢𑀸. 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀕𑀺𑀮𑀸𑀦𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸’’𑀢𑀺 𑀲𑁂𑀲𑁄.

𑁧𑁯𑁫𑁨. 𑀧𑀮𑀸𑀮𑀡𑁆𑀟𑀼𑀧𑀓𑁂 𑀯𑀸𑀧𑀻𑀢𑀺 𑀧𑀮𑀸𑀮𑀘𑀼𑀫𑁆𑀩𑀝𑀓𑁂𑀧𑀺. 𑀏𑀢𑁆𑀣 ‘‘𑀅𑀧𑁆𑀧𑀳𑀭𑀺𑀢𑀁 𑀅𑀮𑀪𑀦𑁆𑀢𑁂𑀦𑀸’’𑀢𑀺 𑀲𑁂𑀲𑁄. 𑀓𑀺𑀲𑁆𑀫𑀺𑀜𑁆𑀘𑀻𑀢𑀺 𑀲𑀼𑀓𑁆𑀔𑀢𑀺𑀡𑀸𑀤𑀺𑀫𑁆𑀳𑀺 𑀓𑀺𑀲𑁆𑀫𑀺𑀜𑁆𑀘𑀺. 𑀢𑀁 𑀯𑀘𑁆𑀘𑀁 𑀧𑀘𑁆𑀙𑀸 𑀳𑀭𑀺𑀢𑀁 𑀑𑀢𑁆𑀣𑀭𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁫𑁩. 𑀏𑀢𑀻𑀢𑀺 𑀧𑀯𑀺𑀲𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. ‘‘𑀔𑁂𑀴𑁂𑀦 𑀏𑀯 𑀘𑀸’’𑀢𑀺 𑀧𑀤𑀘𑁆𑀙𑁂𑀤𑁄.

𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁧𑁯𑁫𑁪. 𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀁 𑀅𑀧𑀭𑀺𑀪𑁄𑀕𑀚𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯 ‘‘𑀢𑁂𑀲𑀁 𑀅𑀧𑀭𑀺𑀪𑁄𑀕𑀢𑁆𑀢𑀸’’𑀢𑀺 𑀅𑀧𑀭𑀺𑀪𑁄𑀕𑀢𑁆𑀢𑀫𑁂𑀯 𑀓𑀸𑀭𑀡𑀫𑀸𑀳.

𑁧𑁯𑁫𑁫. 𑀉𑀤𑀓𑁄𑀖𑁂𑀢𑀺 ¶ 𑀏𑀢𑁆𑀣 ‘‘𑀚𑀸𑀢𑁂’’𑀢𑀺 𑀲𑁂𑀲𑁄. 𑀅𑀚𑀮𑀦𑁆𑀢𑀺 𑀅𑀚𑀮𑀝𑁆𑀞𑀸𑀦𑀁. 𑀚𑀮𑁂𑀢𑀺 𑀧𑀭𑀺𑀪𑁄𑀕𑀸𑀭𑀳𑀚𑀮𑁂. 𑀇𑀥𑀸𑀧𑀺 𑀣𑀮𑀓𑀢𑁄 𑀉𑀤𑀓𑀁 𑀑𑀢𑁆𑀣𑀭𑀢𑀺, 𑀅𑀦𑀸𑀧𑀢𑁆𑀢𑀺.

𑀧𑀜𑁆𑀘𑀫𑀁.

𑀅𑀝𑁆𑀞𑀫𑁄 𑀯𑀕𑁆𑀕𑁄.

𑁧𑁯𑁫𑁬-𑁭. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀁 ¶ 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀫𑀼𑀝𑁆𑀞𑀸𑀦𑀸𑀤𑀬𑁄’’𑀢𑀺𑀆𑀤𑀺. 𑀜𑁂𑀬𑁆𑀬𑀸𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑁂𑀔𑀺𑀬𑁂𑀲𑀼. 𑀉𑀚𑁆𑀚𑀕𑁆𑀖𑀺𑀓𑀸 𑀆𑀤𑀺 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄𑀬𑀁 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄, 𑀉𑀚𑁆𑀚𑀕𑁆𑀖𑀺𑀓𑀸𑀅𑀧𑁆𑀧𑀲𑀤𑁆𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀙𑀫𑀸 𑀘 𑀦𑀻𑀘𑀸𑀲𑀦𑀜𑁆𑀘 𑀞𑀸𑀦𑀜𑁆𑀘 𑀧𑀘𑁆𑀙𑀸 𑀘 𑀉𑀧𑁆𑀧𑀣𑁄 𑀘 𑀙𑀫𑀸𑀦𑀻𑀘𑀸𑀲𑀦𑀝𑁆𑀞𑀸𑀦𑀧𑀘𑁆𑀙𑀸𑀉𑀧𑁆𑀧𑀣𑀸, 𑀢𑁂 𑀲𑀤𑁆𑀤𑀸 𑀏𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀢𑁆𑀣𑀻𑀢𑀺 𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀙𑀫𑀸…𑀧𑁂… 𑀉𑀧𑁆𑀧𑀣𑀯𑀸, 𑀙𑀫𑀸𑀤𑀺𑀧𑀤𑀯𑀦𑁆𑀢𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀞𑀸𑀦-𑀲𑀤𑁆𑀤𑁂𑀦 𑀞𑀸-𑀥𑀸𑀢𑀼𑀲𑁆𑀲𑁂𑀯 𑀭𑀽𑀧𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀸𑀕𑀢𑁄 𑀞𑀺𑀢-𑀲𑀤𑁆𑀤𑁄 𑀕𑀳𑀺𑀢𑁄. ‘‘𑀤𑀲𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀡𑁆𑀡𑀮𑁄𑀧𑁂𑀦, 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦 𑀯𑀸 ‘‘𑀤𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀦𑀼𑀪𑀸𑀲𑀦𑁂 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺 𑀏𑀢𑁂𑀲𑀼 𑀤𑀲𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀓𑁂𑀓𑀫𑁂𑀢𑁆𑀣 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁯𑁫𑁮-𑁯. ‘‘𑀙𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀧𑀮𑀓𑁆𑀔𑀡𑀧𑀤𑀸𑀦𑀺. 𑀏𑀢𑀸𑀦𑀺 𑀏𑀓𑀸𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀦 𑀥𑀫𑁆𑀫𑀤𑁂𑀲𑀦𑁂𑀦 𑀢𑀼𑀮𑁆𑀬𑀸𑀯 𑀲𑀤𑀺𑀲𑀸 𑀏𑀯𑀸𑀢𑀺 𑀬𑁄𑀚𑀦𑀸. 𑀇𑀤𑀁 𑀯𑀼𑀢𑁆𑀢𑀁 ¶ 𑀳𑁄𑀢𑀺 𑁋 𑀇𑀫𑀸𑀦𑀺 𑀏𑀓𑀸𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀸𑀦𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀦𑀺, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸𑀦𑀺, 𑀲𑀘𑀺𑀢𑁆𑀢𑀓𑀸𑀦𑀺, 𑀮𑁄𑀓𑀯𑀚𑁆𑀚𑀸𑀦𑀺, 𑀯𑀘𑀻𑀓𑀫𑁆𑀫𑀸𑀦𑀺, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀼𑀓𑁆𑀔𑀯𑁂𑀤𑀦𑀸𑀦𑀻𑀢𑀺.

𑀲𑀽𑀧𑁄𑀤𑀦𑁂𑀦 𑀯𑀺𑀜𑁆𑀜𑀢𑁆𑀢𑀻𑀢𑀺 𑀲𑀽𑀧𑁄𑀤𑀦-𑀲𑀤𑁆𑀤𑁂𑀦 𑀮𑀓𑁆𑀔𑀺𑀢𑀁 𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁. 𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀁 𑀩𑀳𑀼𑀢𑁆𑀢𑀸 𑀇𑀤𑀫𑁂𑀯 𑀯𑀺𑀲𑁂𑀲𑀺𑀢𑀁. 𑀣𑁂𑀬𑁆𑀬𑀲𑀢𑁆𑀣𑀲𑀫𑀁 𑀫𑀢𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀸𑀦𑀁 𑀫𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑁧𑁯𑁬𑁦. 𑀅𑀯𑀲𑁂𑀲𑀸 𑀢𑀺𑀧𑀜𑁆𑀜𑀸𑀲𑀸𑀢𑀺 𑀅𑀯𑀲𑁂𑀲𑀸𑀦𑀺 𑀢𑁂𑀧𑀜𑁆𑀜𑀸𑀲𑀲𑀺𑀓𑁆𑀔𑀸𑀧𑀤𑀸𑀦𑀺. 𑀲𑀫𑀸𑀦𑀸 𑀧𑀞𑀫𑁂𑀦 𑀢𑀽𑀢𑀺 𑀧𑀞𑀫𑁂𑀦 𑀧𑀸𑀭𑀸𑀚𑀺𑀓𑁂𑀦 𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑁄 𑀲𑀫𑀸𑀦𑀸𑀦𑀻𑀢𑀺 𑀅𑀢𑁆𑀣𑁄, 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀦𑀸𑀧𑀢𑁆𑀢𑀺 𑀆𑀧𑀤𑀸𑀲𑀽’’𑀢𑀺 𑀧𑀤𑀘𑁆𑀙𑁂𑀤𑁄. 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸 𑀘𑀭𑀦𑁆𑀢𑀸𑀦𑀁 𑀘𑁄𑀭𑀼𑀧𑀤𑁆𑀤𑀯𑀸𑀤𑀺 𑀆𑀧𑀤𑀸 𑀦𑀸𑀫. 𑀅𑀧𑀺-𑀲𑀤𑁆𑀤𑁂𑀦 𑀦𑀤𑀺𑀲𑀦𑁆𑀢𑀭𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀔𑀺𑀬𑁂𑀲𑀼 𑀲𑀩𑁆𑀩𑁂𑀲𑀽𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁.

𑁧𑁯𑁬𑁧. ‘‘𑀦 𑀉𑀚𑁆𑀛𑀸𑀦𑀲𑀜𑁆𑀜𑀻 𑀧𑀭𑁂𑀲𑀁 𑀧𑀢𑁆𑀢𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀁 (𑀧𑀸𑀘𑀺. 𑁬𑁧𑁪) 𑀇𑀫𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀦 𑀧𑀦𑀸𑀕𑀢𑁄𑀢𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑁄. 𑀢𑀲𑁆𑀲𑀸𑀧𑀺 𑀬𑀣𑀸𑀯𑀢𑁆𑀣𑀼𑀓𑀸𑀯 𑀆𑀧𑀢𑁆𑀢𑀺𑀬𑁄 𑀤𑀝𑁆𑀞𑀩𑁆𑀩𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀲𑁂𑀔𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯𑁬𑁨. 𑀬𑁄 ¶ 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀯𑀺𑀤𑀺𑀢𑁆𑀯𑀸 𑀞𑀺𑀢𑁄, 𑀲𑁄 𑀳𑀺 𑀬𑀲𑁆𑀫𑀸 𑀯𑀺𑀦𑀬𑁂 𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀯𑀺𑀦𑀻𑀢𑀫𑀸𑀦𑀲𑁄 𑀘 𑀳𑁄𑀢𑀺, 𑀧𑀭𑁂𑀳𑀺 𑀤𑀼𑀧𑁆𑀧𑀥𑀁𑀲𑀺𑀬𑁄 𑀘 𑀳𑁄𑀢𑀺, 𑀢𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀲𑀫𑀸𑀳𑀺𑀢𑁄 𑀲𑀢𑀢𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀯𑀺𑀤𑀺𑀢𑁆𑀯𑀸𑀢𑀺 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺𑀦𑀺𑀤𑀸𑀦𑀁 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀅𑀢𑁆𑀣𑀢𑁄, 𑀕𑀦𑁆𑀣𑀢𑁄, 𑀯𑀺𑀦𑀺𑀘𑁆𑀙𑀬𑀢𑁄 𑀘 𑀲𑀓𑁆𑀓𑀘𑁆𑀘𑀁 𑀜𑀢𑁆𑀯𑀸. 𑀯𑀺𑀲𑀸𑀭𑀤𑁄𑀢𑀺 𑀲𑀸𑀭𑀚𑁆𑀚𑀦𑀁 𑀲𑀸𑀭𑀤𑁄, 𑀯𑀺𑀕𑀢𑁄 𑀲𑀸𑀭𑀤𑁄 𑀅𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄, 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸, 𑀆𑀧𑀢𑁆𑀢𑀸𑀤𑀺𑀯𑀺𑀪𑀸𑀕𑁂 𑀘 𑀦𑀺𑀩𑁆𑀪𑀬𑁄 𑀦𑀺𑀭𑀸𑀲𑀗𑁆𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀓𑁂𑀯𑀮𑀁 𑀇𑀫𑀲𑁆𑀲 𑀚𑀸𑀦𑀦𑁂 𑀏𑀲𑁄𑀯 𑀆𑀦𑀺𑀲𑀁𑀲𑁄, 𑀅𑀣 𑀔𑁄 𑀯𑀺𑀦𑀻𑀢𑀫𑀸𑀦𑀲𑁄 𑀘 𑀳𑁄𑀢𑀺, 𑀲𑀁𑀬𑀢𑀘𑀺𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀇𑀫𑀁 𑀯𑀺𑀦𑀺𑀘𑁆𑀙𑀬𑀁 𑀲𑀓𑁆𑀓𑀘𑁆𑀘𑀁 𑀯𑀺𑀤𑀺𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼. 𑀧𑀭𑁂𑀳𑀻𑀢𑀺 𑀇𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀅𑀜𑁆𑀜𑁂𑀳𑀺. 𑀤𑀼𑀧𑁆𑀧𑀥𑀁𑀲𑀺𑀬𑁄 𑀘 𑀳𑁄𑀢𑀻𑀢𑀺 𑀅𑀦𑀪𑀺𑀪𑀯𑀦𑀻𑀬𑁄 𑀘 𑀳𑁄𑀢𑀺.

𑀢𑀢𑁄𑀢𑀺 𑀢𑀲𑁆𑀫𑀸 𑀯𑀺𑀦𑀬𑁂 𑀯𑀺𑀲𑀸𑀭𑀤𑀢𑀸𑀤𑀺𑀲𑀩𑁆𑀩𑀕𑀼𑀡𑀲𑀫𑁆𑀧𑀦𑁆𑀦𑀳𑁂𑀢𑀼𑀢𑁆𑀢𑀸. 𑀳𑀻𑀢𑀺 𑀬𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑁂𑀢𑀺 𑀲𑀚𑁆𑀛𑀸𑀬𑀦𑀲𑀯𑀦𑀸𑀤𑀺𑀯𑀲𑁂𑀦 𑀲𑀺𑀓𑁆𑀔𑁂𑀬𑁆𑀬, 𑀉𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀢𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀬 𑀏𑀢𑁆𑀣𑀸𑀧𑀺 𑀲𑀢𑀢𑀸𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀓𑁆𑀔𑀺𑀢𑁆𑀢𑀲𑁆𑀲 𑀬𑀣𑀸𑀪𑀽𑀢𑀧𑀝𑀺𑀯𑁂𑀥𑀸𑀪𑀸𑀯𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀸𑀬 𑀏𑀓𑀕𑁆𑀕𑀢𑀸𑀬 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀲𑀫𑀸𑀳𑀺𑀢𑁄’’𑀢𑀺, 𑀲𑀫𑁆𑀫𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 ¶ 𑀆𑀳𑀺𑀢𑁄 𑀧𑀢𑀺𑀝𑁆𑀞𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀅𑀯𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀯𑀺𑀓𑁆𑀔𑀺𑀢𑁆𑀢𑀲𑁆𑀲𑀸’’𑀢𑀺.

𑁧𑁯𑁬𑁩. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀢𑁂𑀢𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀬𑁂’’𑀢𑀺 ¶ 𑀮𑀩𑁆𑀪𑀢𑀺. 𑀬𑁂 𑀣𑁂𑀭𑀸 𑀯𑀸 𑀦𑀯𑀸 𑀯𑀸 𑀫𑀚𑁆𑀛𑀺𑀫𑀸 𑀯𑀸. 𑀧𑀭𑀫𑀦𑁆𑀢𑀺 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀫𑀽𑀮𑀓𑀸𑀭𑀡𑀲𑁆𑀲 𑀲𑀻𑀮𑀲𑁆𑀲 𑀧𑀓𑀸𑀲𑀦𑀢𑁄 𑀉𑀢𑁆𑀢𑀫𑀁. 𑀅𑀲𑀁𑀓𑀭𑀦𑁆𑀢𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁. 𑀲𑀁𑀓𑀭𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀕𑀼𑀡𑁄𑀧𑁂𑀢𑀢𑁆𑀢𑀸 𑀓𑀸𑀬𑀘𑀺𑀢𑁆𑀢𑀲𑀼𑀔𑀓𑀸𑀭𑀡𑀁 𑀲𑀫𑁆𑀫𑀼𑀔𑀁 𑀓𑀭𑁄𑀢𑀻𑀢𑀺 𑀲𑀁𑀓𑀭𑀁. 𑀲𑀯𑀦𑀸𑀫𑀢𑀦𑁆𑀢𑀺 𑀲𑀤𑁆𑀤𑀭𑀲𑀸𑀤𑀺𑀬𑁄𑀕𑁂𑀦 𑀓𑀡𑁆𑀡𑀭𑀲𑀸𑀬𑀦𑀁. 𑀅𑀫𑀢𑀦𑁆𑀢𑀺 𑀢𑀢𑁄𑀬𑁂𑀯 𑀅𑀫𑀢𑀁 𑀲𑀼𑀫𑀥𑀼𑀭𑀁. 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀸𑀯𑀳𑀢𑁆𑀢𑀸 𑀯𑀸 𑀨𑀮𑀽𑀧𑀘𑀸𑀭𑁂𑀦 𑀅𑀫𑀢𑀁. 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁. 𑀅𑀯𑁂𑀘𑁆𑀘𑀸𑀢𑀺 𑀲𑀓𑁆𑀓𑀘𑁆𑀘𑀁 𑀯𑀺𑀤𑀺𑀢𑁆𑀯𑀸. 𑀅𑀥𑀺𑀓𑁂𑀢𑀺 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀧𑁆𑀧𑀓𑀸𑀲𑀦𑁂𑀦 𑀉𑀓𑁆𑀓𑀝𑁆𑀞𑁂. 𑀳𑀺𑀢𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀳𑁂𑀢𑀼𑀢𑁆𑀢𑁂𑀦 𑀳𑀺𑀢𑁂. 𑀳𑀺𑀦𑁄𑀢𑀺 𑀅𑀢𑁆𑀢𑀦𑁄 𑀨𑀮𑀦𑁆𑀢𑀺 ‘‘𑀳𑀺𑀢’’𑀦𑁆𑀢𑀺 𑀲𑀼𑀔𑀳𑁂𑀢𑀼 𑀯𑀼𑀘𑁆𑀘𑀢𑀺. 𑀓𑀮𑀺𑀲𑀸𑀲𑀦𑁂𑀢𑀺 𑀮𑁄𑀪𑀸𑀤𑀺𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑁂. 𑀲𑀸𑀲𑀦𑁂𑀢𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀲𑀗𑁆𑀔𑀸𑀢𑀲𑀸𑀲𑀦𑁂𑀓𑀤𑁂𑀲𑁂. 𑀧𑀝𑀼𑀢𑁆𑀢𑀦𑁆𑀢𑀺 𑀩𑁆𑀬𑀢𑁆𑀢𑀪𑀸𑀯𑀁. 𑀦 𑀬𑀦𑁆𑀢𑀺 𑀦 𑀕𑀘𑁆𑀙𑀦𑁆𑀢𑀺. 𑀓𑁂 𑀢𑁂𑀢𑀺 𑀓𑀢𑀫𑁂 𑀢𑁂. ‘‘𑀦 𑀓𑁂𑀘𑀺 𑀲𑀦𑁆𑀢𑀺 𑀘𑀸’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀮𑀺𑀔𑀺𑀢𑁄.

𑀏𑀯𑀁 𑀏𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀧𑀭𑀫𑀁 𑀉𑀢𑁆𑀢𑀫𑀁 𑀅𑀲𑀁𑀓𑀭𑀁 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀲𑀁𑀓𑀭𑀁 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀧𑁆𑀨𑀸𑀤𑀓𑀁 𑀲𑀯𑀦𑀸𑀫𑀢𑀁 𑀲𑁄𑀢𑀭𑀲𑀸𑀬𑀦𑀁 𑀇𑀫𑀁 𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑀁 𑀅𑀯𑁂𑀘𑁆𑀘 𑀲𑀓𑁆𑀓𑀘𑁆𑀘𑀁 𑀯𑀺𑀤𑀺𑀢𑁆𑀯𑀸 𑀅𑀥𑀺𑀓𑁂 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀧𑁆𑀧𑀓𑀸𑀲𑀦𑁂𑀦 𑀉𑀓𑁆𑀓𑀝𑁆𑀞𑁂 𑀳𑀺𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀳𑁂𑀢𑀼𑀪𑀽𑀢𑁂 𑀓𑀮𑀺𑀲𑀸𑀲𑀦𑁂 𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀓𑁂 𑀲𑀸𑀲𑀦𑁂 𑀯𑀺𑀦𑀬𑀧𑀺𑀝𑀓𑀲𑀗𑁆𑀔𑀸𑀢𑁂 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑁂 𑀬𑁂 𑀧𑀝𑀼𑀢𑁆𑀢𑀁 𑀦 𑀬𑀦𑁆𑀢𑀺, 𑀢𑁂 𑀓𑁂 𑀦𑀸𑀫𑀸𑀢𑀺 𑀬𑁄𑀚𑀦𑀸, 𑀬𑁂 𑀇𑀫𑀁 𑀧𑀓𑀭𑀡𑀁 𑀅𑀯𑁂𑀘𑁆𑀘 𑀯𑀺𑀤𑀺𑀢𑁆𑀯𑀸 𑀞𑀺𑀢𑀸, 𑀢𑁂 𑀏𑀓𑀁𑀲𑀢𑁄 𑀯𑀺𑀦𑀬𑀧𑀺𑀝𑀓𑁂 𑀧𑀝𑀼𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀺 𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁄

𑁧𑁯𑁬𑁪. 𑀏𑀯𑀁 ¶ 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀆𑀕𑀢𑀁 𑀯𑀺𑀦𑀺𑀘𑁆𑀙𑀬𑀲𑀸𑀭𑀁 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 ¶ 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀸𑀬 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀧𑀸𑀴𑀺𑀬𑀸, 𑀢𑀤𑀝𑁆𑀞𑀓𑀣𑀸𑀬 𑀘 𑀆𑀕𑀢𑀯𑀺𑀦𑀺𑀘𑁆𑀙𑀬𑀲𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺𑀆𑀤𑀺. 𑀢𑀲𑁆𑀫𑀺𑀁 𑀅𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀸𑀧𑁂𑀓𑁆𑀔𑀸𑀬𑀁. ‘‘𑀲𑀫𑀸𑀲𑁂𑀦𑀸’’𑀢𑀺 𑀇𑀤𑀁 𑀕𑀦𑁆𑀣𑀯𑀲𑁂𑀦 𑀲𑀗𑁆𑀔𑀺𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀓𑀺𑀜𑁆𑀘𑀺𑀫𑀢𑁆𑀢’’𑀦𑁆𑀢𑀺 𑀇𑀤𑀁 𑀅𑀢𑁆𑀣𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸

𑁧𑁯𑁬𑁫. 𑀙𑀦𑁆𑀤𑀲𑁄𑀢𑀺 𑀫𑁂𑀣𑀼𑀦𑀲𑁂𑀯𑀦𑀭𑀸𑀕𑀧𑀝𑀺𑀲𑀁𑀬𑀼𑀢𑁆𑀢𑁂𑀦 𑀙𑀦𑁆𑀤𑁂𑀦. 𑀏𑀢𑁂𑀦 ‘‘𑀙𑀦𑁆𑀤𑁂 𑀧𑀦 𑀅𑀲𑀢𑀺 𑀩𑀮𑀓𑁆𑀓𑀸𑀭𑁂𑀦 𑀧𑀥𑀁𑀲𑀺𑀢𑀸𑀬 𑀅𑀦𑀸𑀧𑀢𑁆𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀫𑁂𑀣𑀼𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀅𑀝𑁆𑀞𑀓𑀣𑀸 𑀲𑀽𑀘𑀺𑀢𑀸 𑀳𑁄𑀢𑀺. 𑀲𑀸 𑀲𑀫𑀡𑀻 𑀧𑀸𑀭𑀸𑀚𑀺𑀓𑀸 𑀦𑀸𑀫 𑀳𑁄𑀢𑀻𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁬𑁬-𑁭. ‘‘𑀲𑀚𑀻𑀯𑀲𑁆𑀲 𑀅𑀧𑀺 𑀅𑀚𑀻𑀯𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢’’𑀦𑁆𑀢𑀺 𑀇𑀤𑀁 ‘‘𑀅𑀗𑁆𑀕𑀚𑀸𑀢’’𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀁. 𑀅𑀢𑁆𑀢𑀦𑁄 𑀢𑀺𑀯𑀺𑀥𑁂 𑀫𑀕𑁆𑀕𑁂𑀢𑀺 𑀅𑀢𑁆𑀢𑀦𑁄 𑀯𑀘𑁆𑀘𑀧𑀲𑁆𑀲𑀸𑀯𑀫𑀼𑀔𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀕𑁆𑀕𑁂. 𑀏𑀢𑁆𑀣 ‘‘𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸’’𑀢𑀺 𑀲𑁂𑀲𑁄, ‘‘𑀅𑀮𑁆𑀮𑁄𑀓𑀸𑀲𑁂’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀬𑁂𑀪𑀼𑀬𑁆𑀬𑀅𑀓𑁆𑀔𑀸𑀬𑀺𑀢𑀸𑀤𑀺𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀔𑀸𑀬𑀺𑀢𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀁 𑀦𑀯𑀦𑁆𑀦𑀁 𑀲𑀚𑀻𑀯𑀲𑁆𑀲𑀧𑀺 𑀅𑀚𑀻𑀯𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁 𑀯𑀸 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑀸𑀤𑀺𑀓𑀁 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀢𑀺𑀯𑀺𑀥𑁂 𑀫𑀕𑁆𑀕𑁂 𑀅𑀮𑁆𑀮𑁄𑀓𑀸𑀲𑁂 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀻 𑀧𑀭𑀸𑀚𑀺𑀢𑀸𑀢𑀺 𑀬𑁄𑀚𑀦𑀸.

𑁧𑁯𑁬𑁮. 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀦𑁆𑀢𑀺 ¶ 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀁.

𑁧𑁯𑁬𑁯-𑁭𑁦. 𑀅𑀥𑀓𑁆𑀔𑀓𑀦𑁆𑀢𑀺 𑀏𑀢𑁆𑀣 𑀅𑀓𑁆𑀔𑀓𑀸𑀦𑀁 𑀅𑀥𑁄𑀢𑀺 𑀯𑀺𑀕𑁆𑀕𑀳𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀩𑁆𑀪𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀉𑀩𑁆𑀪-𑀲𑀤𑁆𑀤𑁄 𑀉𑀤𑁆𑀥𑀁-𑀲𑀤𑁆𑀤𑀧𑀭𑀺𑀬𑀸𑀬𑁄. 𑀇𑀥 ‘‘𑀅𑀢𑁆𑀢𑀦𑁄’’𑀢𑀺 𑀲𑁂𑀲𑁄. 𑀅𑀯𑀲𑁆𑀲𑀼𑀢𑀲𑁆𑀲𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀲𑁆𑀲. 𑀅𑀯𑀲𑁆𑀲𑀼𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀸’’𑀢𑀺 𑀮𑀩𑁆𑀪𑀢𑀺. 𑀲𑀭𑀻𑀭𑀦𑁆𑀢𑀺 𑀏𑀢𑁆𑀣 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀲𑁂𑀲𑁄. 𑀧𑀭𑁄𑀧𑀓𑁆𑀓𑀫𑀫𑀽𑀮𑀓𑀁 𑀧𑀸𑀭𑀸𑀚𑀺𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ¶ ‘‘𑀢𑁂𑀦 𑀯𑀸 𑀨𑀼𑀝𑁆𑀞𑀸’’𑀢𑀺. 𑀏𑀢𑁆𑀣 ‘‘𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀬𑁂’’𑀢𑀺 𑀘 ‘‘𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁.

𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀫𑀦𑀼𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀲𑀭𑀻𑀭𑀁 𑀅𑀢𑁆𑀢𑀦𑁄 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀬𑀁 𑀲𑀭𑀻𑀭𑀓𑀁, 𑀢𑁂𑀦 𑀲𑀭𑀻𑀭𑀓𑁂𑀦 𑀙𑀼𑀧𑁂𑀬𑁆𑀬, 𑀢𑁂𑀦 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀬𑁂 𑀨𑀼𑀝𑁆𑀞𑀸 𑀲𑀸𑀤𑀺𑀬𑁂𑀬𑁆𑀬 𑀯𑀸, 𑀲𑀸 𑀧𑀸𑀭𑀸𑀚𑀺𑀓𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁧𑁯𑁭𑁧-𑁨. ‘‘𑀕𑀳𑀺𑀢𑀁 𑀉𑀩𑁆𑀪𑀚𑀸𑀡𑀼𑀦𑀸’’𑀢𑀺 𑀇𑀫𑀺𑀦𑀸 𑀓𑀧𑁆𑀧𑀭𑀢𑁄 𑀉𑀤𑁆𑀥𑀁 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀫𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀅𑀢𑁆𑀢𑀦𑁄 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀸𑀬𑁂𑀦𑀸𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 ‘‘𑀅𑀥𑀓𑁆𑀔𑀓’’𑀦𑁆𑀢𑀺𑀆𑀤𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀯𑀲𑁆𑀲𑀼𑀢𑀸𑀬 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀧𑀝𑀺𑀩𑀤𑁆𑀥𑀁 𑀨𑀼𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀢𑀣𑀸 𑀅𑀯𑀲𑁆𑀲𑀼𑀢𑀸𑀬 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀁 𑀨𑀼𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺.

𑁧𑁯𑁭𑁩. 𑀅𑀢𑁆𑀢𑀦𑁄 𑀅𑀯𑀲𑁂𑀲𑁂𑀦 𑀓𑀸𑀬𑁂𑀦 𑀅𑀯𑀲𑁆𑀲𑀼𑀢𑀸𑀬 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀓𑀸𑀬𑀁 𑀨𑀼𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 ¶ 𑀳𑁄𑀢𑀺. 𑀏𑀯𑀁 𑀅𑀢𑁆𑀢𑀦𑁄 𑀧𑀬𑁄𑀕𑁂 𑀘 𑀧𑀼𑀭𑀺𑀲𑀲𑁆𑀲 𑀧𑀬𑁄𑀕𑁂 𑀘 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸𑀬𑁂𑀯 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁭𑁪. 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀧𑀡𑁆𑀟𑀓𑀸𑀦𑀁 𑀓𑀸𑀬𑀁 ‘‘𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀢𑀣𑁂𑀯 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀉𑀪𑀢𑁄𑀅𑀯𑀲𑁆𑀲𑀯𑁂 𑀲𑀢𑀺 𑀨𑀼𑀲𑀦𑁆𑀢𑀺𑀬𑀸 𑀅𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑁂𑀯 𑀬𑀓𑁆𑀔𑀸𑀤𑀻𑀦𑀁 𑀧𑀬𑁄𑀕𑁂𑀧𑀺 𑀢𑀲𑁆𑀲𑀸𑀬𑁂𑀯 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁭𑁫. 𑀏𑀓𑀢𑁄𑀯𑀲𑁆𑀲𑀯𑁂 𑀘𑀸𑀧𑀻𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁂𑀦 𑀏𑀓𑀢𑁄𑀅𑀯𑀲𑁆𑀲𑀯𑁂 𑀘𑀸𑀧𑀺. 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀦𑁆𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀪𑀽𑀢𑁂𑀦 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀓𑀸𑀬𑀁 𑀨𑀼𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁬𑁨) 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑁂 𑀘 𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀢𑁄 𑀅𑀯𑀲𑁂𑀲𑁂 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑁂 𑀲𑀩𑁆𑀩𑀢𑁆𑀣 𑀏𑀓𑀢𑁄𑀅𑀯𑀲𑁆𑀲𑀯𑁂 𑀲𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀸𑀫𑀲𑀦𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀉𑀪𑀢𑁄𑀅𑀯𑀲𑁆𑀲𑀯𑁂 𑀯𑀸 𑀏𑀓𑀢𑁄𑀅𑀯𑀲𑁆𑀲𑀯𑁂 𑀯𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑁧𑁯𑁭𑁬. ‘‘𑀉𑀩𑁆𑀪𑀓𑁆𑀔𑀓𑀫𑀥𑁄𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 ¶ 𑀬𑀁 𑀅𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀁 𑀇𑀥 𑀤𑀲𑁆𑀲𑀺𑀢𑀁, 𑀏𑀢𑁆𑀣 𑀏𑀓𑀢𑁄𑀅𑀯𑀲𑁆𑀲𑀯𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀓𑀧𑁆𑀧𑀭𑀲𑁆𑀲 𑀘 𑀳𑁂𑀝𑁆𑀞𑀸𑀧𑀺 𑀏𑀢𑁆𑀣𑁂𑀯 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑁂 𑀲𑀗𑁆𑀕𑀳𑀁 𑀕𑀢𑀦𑁆𑀢𑀺 𑀬𑁄𑀚𑀦𑀸.

𑁧𑁯𑁭𑁭-𑁯. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀘𑁂 𑀓𑀸𑀬𑀲𑀁𑀲𑀕𑁆𑀕𑀁 𑀓𑁂𑀮𑀸𑀬𑀢𑀺 𑀲𑁂𑀯𑀢𑀻𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀺𑀬𑀸 𑀦𑀸𑀲𑁄 𑀲𑀺𑀬𑀸𑀢𑀺 𑀲𑀻𑀮𑀯𑀺𑀦𑀸𑀲𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀕𑁂𑀳𑀧𑁂𑀫𑀦𑁆𑀢𑀺 𑀏𑀢𑁆𑀣 ‘‘𑀕𑁂𑀳𑀲𑀺𑀢𑀧𑁂𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀺𑀢-𑀲𑀤𑁆𑀤𑀮𑁄𑀧𑁄, 𑀅𑀢𑁆𑀣𑁄 𑀧𑀦𑀲𑁆𑀲 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁄𑀯.

𑁧𑁯𑁮𑁦. 𑀅𑀯𑀺𑀲𑁂𑀲𑁂𑀦𑀸𑀢𑀺 ¶ ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲𑀸’’𑀢𑀺 𑀯𑀸 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸.

𑁧𑁯𑁮𑁧. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸. 𑀬𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀁 𑀯𑀸 𑀪𑀺𑀓𑁆𑀔𑀼𑀲𑁆𑀫𑀺𑀁 𑀯𑀸. 𑀫𑀦𑁄𑀲𑀼𑀤𑁆𑀥𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀭𑀸𑀕𑀭𑀳𑀺𑀢𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀢𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀁 𑀯𑀸 𑀪𑀺𑀓𑁆𑀔𑀼𑀲𑁆𑀫𑀺𑀁 𑀯𑀸 𑀯𑀺𑀲𑀬𑁂 𑀦𑀤𑁄𑀲𑀢𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁯𑁮𑁨. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀻𑀮𑀪𑁂𑀤𑀁 𑀓𑀢𑁆𑀯𑀸. 𑀪𑀺𑀓𑁆𑀔𑀼𑀦𑀺𑀬𑀸 𑀅𑀧𑀓𑀢𑀢𑁆𑀢𑀸 𑀆𑀳 ‘‘𑀦𑁂𑀯 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄’’𑀢𑀺.

𑁧𑁯𑁮𑁩. 𑀅𑀣𑀸𑀢𑀺 𑀯𑀸𑀓𑁆𑀬𑀸𑀭𑀫𑁆𑀪𑁂. 𑀦 𑀳𑁄𑀢𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀻𑀳𑀺 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀫𑀸𑀳.

𑁧𑁯𑁮𑁪. ‘‘𑀔𑁂𑀢𑁆𑀢𑁂’’𑀢𑀺 𑀯𑀓𑁆𑀔𑀫𑀸𑀦𑀁 ‘‘𑀨𑀼𑀝𑁆𑀞𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑁆𑀯𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺𑀆𑀤𑀻𑀳𑀺, ‘‘𑀣𑀼𑀮𑁆𑀮𑀘𑁆𑀘𑀬𑀁 𑀔𑁂𑀢𑁆𑀢𑁂’’𑀢𑀺𑀆𑀤𑀻𑀳𑀺 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀨𑀼𑀝𑁆𑀞𑀸𑀢𑀺 𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂’’𑀢𑀺 𑀲𑁂𑀲𑁄.

𑁧𑁯𑁮𑁫. 𑀢𑀣𑀸𑀢𑀺 𑀦𑀺𑀘𑁆𑀘𑀮𑀸𑀧𑀺 𑀲𑀸𑀤𑀺𑀬𑀢𑀺. 𑀔𑁂𑀢𑁆𑀢𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀁 𑀔𑁂𑀢𑁆𑀢𑁂. 𑀓𑀸𑀬𑁂𑀦 𑀦𑀺𑀘𑁆𑀘𑀮𑀸𑀬𑀧𑀺 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀯𑀼𑀢𑁆𑀢𑀢𑁆𑀢𑀸…𑀧𑁂… 𑀲𑀢𑁆𑀣𑀼𑀦𑀸’’𑀢𑀺 ¶ , 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀯𑀺𑀬 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 𑀇𑀥 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁯𑁮𑁬. 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸. 𑀓𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀓𑀺𑀭𑀺𑀬𑀸𑀬 𑀲𑀫𑀼𑀝𑁆𑀞𑀸𑀦𑀁. 𑀏𑀯𑀁 𑀲𑀢𑀻𑀢𑀺 𑀲𑀸𑀤𑀺𑀬𑀦𑀫𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀪𑀸𑀯𑁂 𑀲𑀢𑀺. 𑀇𑀤𑀦𑁆𑀢𑀺 ‘‘𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦’’𑀫𑀺𑀢𑀺𑀯𑀺𑀥𑀸𑀦𑀁. 𑀢𑀩𑁆𑀩𑀳𑀼𑀮𑁂𑀦𑁂𑀯 𑀦𑀬𑁂𑀦𑀸𑀢𑀺 ¶ 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀩𑀸𑀳𑀼𑀮𑁆𑀮𑁂𑀦 𑀦𑀬𑁂𑀦 𑀔𑀤𑀺𑀭𑀯𑀦𑀸𑀤𑀺𑀯𑁄𑀳𑀸𑀭𑁄 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁯𑁮𑁭. 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀲𑀜𑁆𑀘𑀺𑀘𑁆𑀘 𑀯𑀺𑀭𑀚𑁆𑀛𑀺𑀢𑁆𑀯𑀸 𑀆𑀫𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, ‘‘𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀯𑀸 ‘‘𑀇𑀢𑁆𑀣𑀻’’𑀢𑀺 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀆𑀫𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀧𑀼𑀭𑀺𑀲𑀲𑁆𑀲 𑀆𑀫𑀲𑀦𑁂 𑀲𑀢𑀺 𑀨𑀲𑁆𑀲𑀁 𑀅𑀲𑀸𑀤𑀺𑀬𑀦𑁆𑀢𑀺𑀬𑀸 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁯𑁮𑁮. 𑀔𑀺𑀢𑁆𑀢𑀘𑀺𑀢𑁆𑀢𑀸𑀬𑀸𑀢𑀺 𑀬𑀓𑁆𑀔𑀼𑀫𑁆𑀫𑀢𑁆𑀢𑀸𑀬. 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸𑀢𑀺 𑀧𑀺𑀢𑁆𑀢𑀓𑁄𑀧𑁂𑀦 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑀸𑀬. 𑀇𑀤𑀜𑁆𑀘 ‘‘𑀅𑀲𑀼𑀘𑀻’’𑀢𑀺 𑀯𑀸 ‘‘𑀘𑀦𑁆𑀤𑀦’’𑀦𑁆𑀢𑀺 𑀯𑀸 𑀯𑀺𑀲𑁂𑀲𑀢𑀁 𑀅𑀚𑀸𑀦𑀦𑀫𑁂𑀯 𑀧𑀫𑀸𑀡𑀁.

𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀓𑀣𑀸𑀯𑀡𑁆𑀡𑀦𑀸.

𑁧𑁯𑁮𑁯-𑁯𑁦. ‘‘𑀧𑀸𑀭𑀸𑀚𑀺𑀓𑀢𑁆𑀢𑀁 𑀚𑀸𑀦𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀯𑀲𑁂𑀲𑀸𑀧𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀦𑁆𑀢𑀺𑀬𑀸 𑀧𑀸𑀭𑀸𑀚𑀺𑀓𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀮𑀺𑀗𑁆𑀕𑁂 𑀢𑀼 𑀞𑀺𑀢𑀸𑀬𑀸𑀢𑀺 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑁂𑀬𑁂𑀯 𑀞𑀺𑀢𑀸𑀬. 𑀇𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀲𑁆𑀫𑀺𑀦𑁆𑀢𑀺 𑀬𑁄𑀚𑀦𑀸. 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀇𑀢𑀭𑀸𑀬 𑀧𑀼𑀩𑁆𑀩𑁂𑀬𑁂𑀯 𑀆𑀧𑀦𑁆𑀦𑀢𑁆𑀢𑀸 𑀢𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀸 𑀘𑀸’’𑀢𑀺 𑀆𑀳.

𑁧𑁯𑁯𑁧. 𑀯𑀼𑀢𑁆𑀢𑀸𑀯𑀺𑀲𑀺𑀝𑁆𑀞𑀁 𑀲𑀩𑁆𑀩𑀁 𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀲𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀧𑀝𑀺𑀘𑁆𑀙𑀸𑀤𑀦𑁂.

𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀣𑀸𑀯𑀡𑁆𑀡𑀦𑀸.

𑁧𑁯𑁯𑁨-𑁫. 𑀲𑀗𑁆𑀖𑁂𑀦𑀸𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦. 𑀉𑀓𑁆𑀔𑀺𑀢𑁆𑀢𑀓𑁄𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀓𑁆𑀔𑀺𑀢𑁆𑀢𑀓𑁄. ‘‘𑀉𑀓𑁆𑀔𑁂𑀧𑀦𑁂 𑀞𑀺𑀢𑁄’’𑀢𑀺 𑀇𑀫𑀺𑀦𑀸 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀅𑀦𑁄𑀲𑀸𑀭𑀺𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀬𑀸 ¶ 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀬𑀁𑀤𑀺𑀝𑁆𑀞𑀺𑀓𑁄, 𑀲𑁄 𑀉𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀬𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . ‘‘𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀕𑀳𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀯𑀢𑁆𑀢𑀧𑁆𑀧𑀓𑀸𑀭𑁄 𑀤𑀲𑁆𑀲𑀺𑀢𑁄. 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀸 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀲𑀼𑀫𑁆𑀧𑀺𑀘 𑀲𑀗𑁆𑀖𑀫𑀚𑁆𑀛𑁂𑀧𑀺 ‘‘𑀏𑀲𑁄 𑀔𑁄 𑀅𑀬𑁆𑀬𑁂 𑀪𑀺𑀓𑁆𑀔𑀼 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁬𑁬𑁯) 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑀸𑀢𑀺 𑀬𑁄𑀚𑀦𑀸. 𑀢𑀁 𑀯𑀢𑁆𑀣𑀼𑀁 𑀅𑀘𑀚𑀦𑁆𑀢𑀻 𑀕𑀳𑁂𑀢𑁆𑀯𑀸 𑀬𑀤𑀺 𑀢𑀣𑁂𑀯 𑀢𑀺𑀝𑁆𑀞𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸’’𑀢𑀺 𑀲𑁂𑀲𑁄. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀑𑀲𑀸𑀦𑁂𑀢𑀺 𑀢𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑀯𑀲𑁂𑀦 𑀅𑀲𑁆𑀲 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑁂. 𑀅𑀲𑀸𑀓𑀺𑀬𑀥𑀻𑀢𑀭𑀸𑀢𑀺 𑀅𑀲𑀸𑀓𑀺𑀬𑀥𑀻𑀢𑀸, 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁. ‘‘𑀧𑀼𑀦 𑀅𑀧𑁆𑀧𑀝𑀺𑀲𑀦𑁆𑀥𑁂𑀬𑀸’’𑀢𑀺 𑀇𑀫𑀺𑀦𑀸 𑀧𑀼𑀦 𑀢𑁂𑀦𑁂𑀯 𑀘 𑀅𑀢𑁆𑀢𑀪𑀸𑀯𑁂𑀦 𑀪𑀺𑀓𑁆𑀔𑀼𑀦𑀺𑀪𑀸𑀯𑁂 𑀧𑀝𑀺𑀲𑀦𑁆𑀥𑀸𑀢𑀼𑀁 𑀅𑀦𑀭𑀳𑀢𑀸 𑀯𑀼𑀢𑁆𑀢𑀸.

𑁧𑁯𑁯𑁬. 𑀢𑀺𑀓𑀤𑀼𑀓𑁆𑀓𑀝𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸𑀢𑀺 𑀏𑀢𑀸𑀲𑀁 𑀯𑀲𑁂𑀦 𑀢𑀺𑀓𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀲𑀫𑀦𑀼𑀪𑀸𑀲𑀦𑁂 𑀯𑀼𑀢𑁆𑀢𑀸 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀲𑀩𑁆𑀩𑁂 𑀇𑀥 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀓𑀣𑀸𑀯𑀡𑁆𑀡𑀦𑀸.

𑁧𑁯𑁯𑁭. ‘‘𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸. 𑀏𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀕𑀳𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁭𑁬) 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀅𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. ‘‘𑀢’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀬’’𑀦𑁆𑀢𑀺 𑀮𑀩𑁆𑀪𑀢𑀺. 𑀅𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀗𑁆𑀕𑀲𑁆𑀲 𑀬𑀁 𑀕𑀳𑀡𑀁, 𑀢𑀁 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀳𑀢𑁆𑀣𑁂 𑀕𑀳𑀡𑀁 𑀳𑀢𑁆𑀣𑀕𑁆𑀕𑀳𑀡𑀁.

𑁧𑁯𑁯𑁮. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀻𑀯𑀭𑀲𑁆𑀲 𑀬𑀁 𑀕𑀳𑀡𑀦𑁆𑀢𑀺 𑀬𑁄𑀚𑀦𑀸.

𑁧𑁯𑁯𑁯. 𑀅𑀲𑀤𑁆𑀥𑀫𑁆𑀫-𑀲𑀤𑁆𑀤𑁂𑀦 ¶ 𑀫𑁂𑀣𑀼𑀦𑀲𑁆𑀲𑀸𑀧𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀢𑀢𑁄 𑀯𑀺𑀲𑁂𑀲𑁂𑀢𑀼𑀫𑀸𑀳 ‘‘𑀓𑀸𑀬𑀲𑀁𑀲𑀕𑁆𑀕 ¶ …𑀧𑁂… 𑀓𑀸𑀭𑀡𑀸’’𑀢𑀺. 𑀪𑀺𑀓𑁆𑀔𑀼𑀦𑀻 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀓𑀸𑀭𑀡𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀲𑁆𑀫𑀺𑀁 𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺 𑀬𑁄𑀚𑀦𑀸.

𑁨𑁦𑁦𑁦. 𑀢𑀢𑁄𑀢𑀺 𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀓𑀸𑀭𑀡𑀸. 𑀢𑀢𑁆𑀣𑀸𑀢𑀺 𑀳𑀢𑁆𑀣𑀧𑀸𑀲𑁂. 𑀧𑀼𑀭𑀺𑀲𑁂𑀦𑀸𑀢𑀺 𑀏𑀢𑁆𑀣 ‘‘𑀓𑀢’’𑀦𑁆𑀢𑀺 𑀲𑁂𑀲𑁄, ‘‘𑀲𑀗𑁆𑀓𑁂𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀆𑀕𑀫𑀦𑀁 𑀅𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀇𑀘𑁆𑀙𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀕𑀫𑀦𑀺𑀘𑁆𑀙𑀸𑀫𑀢𑁆𑀢𑁂𑀦, 𑀅𑀣 𑀔𑁄 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁, 𑀧𑀼𑀭𑀺𑀲𑁂𑀦 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀧𑀸𑀲𑀁 𑀑𑀓𑁆𑀓𑀦𑁆𑀢𑀓𑀸𑀮𑁂𑀬𑁂𑀯 𑀯𑀢𑁆𑀣𑀼𑀧𑀽𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 ‘‘𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀧𑀼𑀭𑀺𑀲𑁂𑀦 ‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀕𑀘𑁆𑀙𑀸’𑀢𑀺 𑀯𑀼𑀢𑁆𑀢𑀸 𑀕𑀘𑁆𑀙𑀢𑀺, 𑀧𑀤𑁂 𑀧𑀤𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁭𑁬) 𑀘 ‘‘𑀧𑀼𑀭𑀺𑀲𑀲𑁆𑀲 𑀅𑀩𑁆𑀪𑀸𑀕𑀫𑀦𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀳𑀢𑁆𑀣𑀧𑀸𑀲𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁭𑁬) 𑀘. 𑀏𑀢𑁆𑀣 𑀘 𑀇𑀢𑁆𑀣𑀦𑁆𑀦𑀸𑀫𑀁 𑀆𑀕𑀘𑁆𑀙𑀸𑀢𑀺 𑀇𑀢𑁆𑀣𑀦𑁆𑀦𑀸𑀫𑀁 𑀞𑀸𑀦𑀁 𑀆𑀕𑀘𑁆𑀙𑀸𑀢𑀺 𑀅𑀢𑁆𑀣𑁄.

𑁨𑁦𑁦𑁧. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀲𑁆𑀲𑁂𑀯 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀅𑀲𑀤𑁆𑀥𑀫𑁆𑀫𑀲𑁆𑀲 𑀲𑁂𑀯𑀦𑀢𑁆𑀣𑀸𑀬. 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀜𑁆𑀘𑀸𑀢𑀺 𑀯𑀢𑁆𑀣𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀑𑀓𑀸𑀲𑀁. 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀢𑀤𑀢𑁆𑀣𑀸𑀬 𑀓𑀸𑀬𑀁 𑀉𑀧𑀲𑀁𑀳𑀭𑁂𑀬𑁆𑀬 𑀯𑀸𑀢𑀺 𑀬𑁄𑀚𑀦𑀸.

𑁨𑁦𑁦𑁨. 𑀳𑀢𑁆𑀣𑀕𑁆𑀕𑀳𑀡𑀸𑀤𑀻𑀦𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀅𑀝𑁆𑀞𑀦𑁆𑀦𑀁 𑀯𑀢𑁆𑀣𑀽𑀦𑀁 𑀧𑀽𑀭𑀡𑁂𑀦 ‘‘𑀅𑀝𑁆𑀞𑀯𑀢𑁆𑀣𑀼𑀓𑀸’’𑀢𑀺 𑀲𑀗𑁆𑀔𑀸𑀢𑀸 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀯𑀺𑀦𑀝𑁆𑀞𑀸 𑀳𑁄𑀢𑀺 𑀲𑀻𑀮𑀯𑀺𑀦𑀸𑀲𑁂𑀦, 𑀢𑀢𑁄𑀬𑁂𑀯 𑀅𑀲𑁆𑀲𑀫𑀡𑀻 𑀳𑁄𑀢𑀺 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁦𑁩. 𑀅𑀦𑀼𑀮𑁄𑀫𑁂𑀦 ¶ 𑀯𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀧𑀝𑀺𑀧𑀸𑀝𑀺𑀬𑀸 𑀯𑀸. 𑀧𑀝𑀺𑀮𑁄𑀫𑁂𑀦 𑀯𑀸𑀢𑀺 𑀢𑀩𑁆𑀩𑀺𑀧𑀭𑀺𑀬𑀢𑁄 𑀧𑀝𑀺𑀮𑁄𑀫𑁂𑀦 𑀯𑀸. 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸𑀢𑀺 𑀏𑀓𑀫𑁂𑀓𑀁 𑀅𑀦𑁆𑀢𑀭𑀺𑀢𑁆𑀯𑀸 𑀧𑀼𑀦 𑀢𑀲𑁆𑀲𑀸𑀧𑀺 𑀓𑀭𑀡𑀯𑀲𑁂𑀦 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸. 𑀅𑀦𑀼𑀮𑁄𑀫𑁂𑀦 𑀯𑀸 𑀧𑀝𑀺𑀮𑁄𑀫𑁂𑀦 𑀯𑀸 𑀢𑀣𑁂𑀓𑀦𑁆𑀢𑀭𑀺𑀓𑀸𑀬 𑀯𑀸 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑁂𑀦𑁆𑀢𑀻 𑀘𑀼𑀢𑀸𑀢𑀺 𑀬𑁄𑀚𑀦𑀸.

𑁨𑁦𑁦𑁪. 𑀏𑀢𑀤𑁂𑀯 𑀅𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀲𑀫𑀢𑁆𑀣𑁂𑀢𑀼𑀫𑀸𑀳 ‘‘𑀅𑀣𑀸𑀤𑀺𑀢𑁄’’𑀢𑀺𑀆𑀤𑀺. 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀻𑀢𑀺 ¶ 𑀩𑀳𑀼𑀓𑁆𑀔𑀢𑁆𑀢𑀼𑀫𑁆𑀧𑀺. 𑀲𑀢-𑀲𑀤𑁆𑀤𑁄 𑀳𑁂𑀢𑁆𑀣 𑀩𑀳𑀼-𑀲𑀤𑁆𑀤𑀧𑀭𑀺𑀬𑀸𑀬𑁄. 𑀧𑀸𑀭𑀸𑀚𑀺𑀓𑀸 𑀦𑁂𑀯 𑀲𑀺𑀬𑀸𑀢𑀺 𑀬𑁄𑀚𑀦𑀸, 𑀇𑀫𑀺𑀦𑀸 𑀢𑀁𑀢𑀁𑀯𑀢𑁆𑀣𑀼𑀫𑀽𑀮𑀓𑀁 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁦𑁦𑁫. 𑀬𑀸 𑀧𑀦 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑀸, 𑀤𑁂𑀲𑁂𑀢𑁆𑀯𑀸 𑀢𑀸𑀳𑀺 𑀫𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀥𑀼𑀭𑀦𑀺𑀓𑁆𑀔𑁂𑀧𑀦𑀁 𑀓𑀢𑁆𑀯𑀸𑀢𑀺 ‘‘𑀦 𑀧𑀼𑀦𑁂𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸𑀢𑀺 𑀤𑁂𑀲𑀺𑀢𑀸 𑀤𑁂𑀲𑀺𑀢𑀕𑀡𑀦𑀫𑁂𑀯 𑀉𑀧𑁂𑀢𑀺, 𑀧𑀸𑀭𑀸𑀚𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀬𑀸 𑀏𑀓𑀁 𑀆𑀧𑀦𑁆𑀦𑀸, 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀓𑀺𑀮𑁂𑀲𑀯𑀲𑁂𑀦 𑀆𑀧𑀚𑁆𑀚𑀢𑀺, 𑀧𑀼𑀦 𑀤𑁂𑀲𑁂𑀢𑀺, 𑀏𑀯𑀁 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀧𑀽𑀭𑁂𑀦𑁆𑀢𑀻𑀧𑀺 𑀧𑀸𑀭𑀸𑀚𑀺𑀓𑀸 𑀦 𑀳𑁄𑀢𑀺.

𑁨𑁦𑁦𑁬. 𑀲𑀉𑀲𑁆𑀲𑀸𑀳𑀸𑀬 𑀤𑁂𑀲𑀺𑀢𑀸𑀢𑀺 𑀧𑀼𑀦 𑀆𑀧𑀚𑁆𑀚𑀦𑁂 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑁂𑀲𑀺𑀢𑀸𑀧𑀺 𑀆𑀧𑀢𑁆𑀢𑀺 𑀤𑁂𑀲𑀦𑀸𑀕𑀡𑀦𑀁 𑀦 𑀉𑀧𑁂𑀢𑀺. 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸’’𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁦𑁦𑁮. 𑀅𑀬𑀁 𑀅𑀢𑁆𑀣𑁄𑀢𑀺 ‘‘𑀅𑀲𑀤𑁆𑀥𑀫𑁆𑀫𑁄 𑀦𑀸𑀫 𑀓𑀸𑀬𑀲𑀁𑀲𑀕𑁆𑀕𑁄’’𑀢𑀺 𑀅𑀬𑀁 𑀅𑀢𑁆𑀣𑁄. 𑀉𑀤𑁆𑀤𑀺𑀲𑀺𑀢𑁄𑀢𑀺 𑀧𑀓𑀸𑀲𑀺𑀢𑁄.

𑁨𑁦𑁦𑁯. 𑀅𑀬𑀫𑀢𑁆𑀣𑁄 ¶ 𑀓𑁂𑀦 𑀯𑀘𑀦𑁂𑀦 𑀉𑀤𑁆𑀤𑀺𑀲𑀺𑀢𑁄𑀢𑀺 𑀆𑀳 ‘‘𑀯𑀺𑀜𑁆𑀜𑀽…𑀧𑁂… 𑀲𑀸𑀥𑀓𑀁 𑀯𑀘𑀦𑀁 𑀇𑀤’’𑀦𑁆𑀢𑀺. 𑀇𑀤𑀁 𑀯𑀘𑀦𑀦𑁆𑀢𑀺 ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀧𑀸𑀘𑀺. 𑁬𑁭𑁬) 𑀇𑀤𑀁 𑀯𑀘𑀦𑀁. 𑀲𑀸𑀥𑀓𑀁 𑀧𑀫𑀸𑀡𑀁.

𑀅𑀝𑁆𑀞𑀯𑀢𑁆𑀣𑀼𑀓𑀓𑀣𑀸𑀯𑀡𑁆𑀡𑀦𑀸.

𑁨𑁦𑁧𑁦. 𑀅𑀯𑀲𑁆𑀲𑀼𑀢𑀸, 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀸, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀫𑀳𑁂𑀲𑀺𑀦𑀸 𑀅𑀲𑀸𑀥𑀸𑀭𑀡𑀸 𑀪𑀺𑀓𑁆𑀔𑀼𑀦𑀻𑀦𑀫𑁂𑀯 𑀧𑀜𑁆𑀜𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀸𑀭𑀸𑀚𑀺𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸

𑁨𑁦𑁧𑁧. 𑀏𑀯𑀁 ¶ 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀆𑀕𑀢𑀁 𑀧𑀸𑀭𑀸𑀚𑀺𑀓𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀼𑀤𑁆𑀤𑀺𑀝𑁆𑀞𑀁 𑀲𑀗𑁆𑀖𑀸𑀤𑀺𑀲𑁂𑀲𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻’’𑀢𑀺𑀆𑀤𑀺. 𑀉𑀲𑁆𑀲𑀬𑀯𑀸𑀤𑀸𑀢𑀺 𑀓𑁄𑀥𑀼𑀲𑁆𑀲𑀬𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀯𑀺𑀯𑀤𑀫𑀸𑀦𑀸. 𑀢𑀢𑁄𑀬𑁂𑀯 𑀅𑀝𑁆𑀝𑀁 𑀓𑀭𑁄𑀢𑀺 𑀲𑀻𑀮𑁂𑀦𑀸𑀢𑀺 𑀅𑀝𑁆𑀝𑀓𑀸𑀭𑀻. 𑀏𑀢𑁆𑀣 𑀘 ‘‘𑀅𑀝𑁆𑀝𑁄’’𑀢𑀺 𑀯𑁄𑀳𑀸𑀭𑀺𑀓𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑀺, 𑀬𑀁 𑀧𑀩𑁆𑀩𑀚𑀺𑀢𑀸 ‘‘𑀅𑀥𑀺𑀓𑀭𑀡’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀯𑀢𑁆𑀢𑀩𑁆𑀩𑁂 𑀫𑀼𑀔𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀫𑀼𑀔𑀭𑀻, 𑀩𑀳𑀼𑀪𑀸𑀡𑀻𑀢𑀺 𑀅𑀢𑁆𑀣𑁄. 𑀬𑁂𑀦 𑀓𑁂𑀦𑀘𑀺 𑀦𑀭𑁂𑀦 𑀲𑀤𑁆𑀥𑀺𑀦𑁆𑀢𑀺 ‘‘𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁬𑁭𑁯) 𑀤𑀲𑁆𑀲𑀺𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀫𑀦𑀼𑀲𑁆𑀲𑁂𑀦 𑀲𑀤𑁆𑀥𑀺𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀓𑀺𑀭𑀸𑀢𑀺 𑀧𑀤𑀧𑀽𑀭𑀡𑁂, 𑀅𑀦𑀼𑀲𑁆𑀲𑀯𑀦𑁂 𑀯𑀸.

𑁨𑁦𑁧𑁨. 𑀲𑀓𑁆𑀔𑀺𑀁 ¶ 𑀯𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀓𑀁 𑀯𑀸. 𑀅𑀝𑁆𑀝𑀁 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑁂 𑀧𑀤𑁂 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁦𑁧𑁩. 𑀯𑁄𑀳𑀸𑀭𑀺𑀓𑁂𑀢𑀺 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁂.

𑁨𑁦𑁧𑁪. 𑀅𑀦𑀦𑁆𑀢𑀭𑀦𑁆𑀢𑀺 𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭𑀁.

𑁨𑁦𑁧𑁫. 𑀇𑀢𑀭𑁄𑀢𑀺 𑀅𑀝𑁆𑀝𑀓𑀸𑀭𑀓𑁄. 𑀧𑀼𑀩𑁆𑀩𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄𑀢𑀺 𑀧𑀞𑀫𑀸𑀭𑁄𑀘𑀦𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀸𑀭𑁄𑀘𑀦𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁦𑁧𑁬. ‘‘𑀢𑀯, 𑀫𑀫𑀸𑀧𑀺 𑀘 𑀓𑀣𑀁 𑀢𑀼𑀯𑀫𑁂𑀯 𑀆𑀭𑁄𑀘𑁂𑀳𑀻’’𑀢𑀺 𑀇𑀢𑀭𑁂𑀦 𑀯𑀼𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀓𑀸𑀫𑀦𑁆𑀢𑀺 𑀢𑀲𑁆𑀲𑀸 𑀘 𑀅𑀢𑁆𑀢𑀦𑁄 𑀘 𑀯𑀘𑀦𑁂 𑀬𑀁 𑀧𑀞𑀫𑀁 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀁 𑀇𑀘𑁆𑀙𑀸𑀦𑀼𑀭𑀽𑀧𑀁 𑀆𑀭𑁄𑀘𑁂𑀢𑀼.

𑁨𑁦𑁧𑁮-𑁯. 𑀉𑀪𑀺𑀦𑁆𑀦𑀫𑁆𑀧𑀺 𑀬𑀣𑀸 𑀢𑀣𑀸 𑀆𑀭𑁄𑀘𑀺𑀢𑀓𑀣𑀁 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀢𑀣𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦. 𑀢𑁂𑀳𑀻𑀢𑀺 𑀯𑁄𑀳𑀸𑀭𑀺𑀓𑁂𑀳𑀺. 𑀅𑀝𑁆𑀝𑁂 𑀧𑀦 𑀘 𑀦𑀺𑀝𑁆𑀞𑀺𑀢𑁂𑀢𑀺 𑀅𑀝𑁆𑀝𑀓𑀸𑀭𑀓𑁂𑀲𑀼 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀧𑀭𑀸𑀚𑀺𑀢𑁂. 𑀬𑀣𑀸𑀳 ‘‘𑀧𑀭𑀸𑀚𑀺𑀢𑁂 𑀅𑀝𑁆𑀝𑀓𑀸𑀭𑀓𑁂 𑀅𑀝𑁆𑀝𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀳𑁄𑀢𑀻’’𑀢𑀺. 𑀅𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀢𑀺 𑀏𑀢𑁆𑀣 ‘‘𑀢𑀲𑁆𑀲𑀸’’𑀢𑀺 𑀲𑁂𑀲𑁄. 𑀢𑀲𑁆𑀲 𑀅𑀝𑁆𑀝𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀢𑀺 𑀬𑁄𑀚𑀦𑀸.

𑁨𑁦𑁨𑁦-𑁨𑁩. 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑀁 ¶ 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀽𑀢𑀁 𑀯𑀸𑀧𑀻’’𑀢𑀺𑀆𑀤𑀺. 𑀧𑀘𑁆𑀘𑀢𑁆𑀣𑀺𑀓𑀫𑀦𑀼𑀲𑁆𑀲𑁂𑀳𑀺 𑀤𑀽𑀢𑀁 𑀯𑀸𑀧𑀺 𑀧𑀳𑀺𑀡𑀺𑀢𑁆𑀯𑀸 𑀲𑀬𑀫𑁆𑀧𑀺 𑀯𑀸 𑀆𑀕𑀦𑁆𑀢𑁆𑀯𑀸 𑀬𑀸 𑀧𑀦 𑀆𑀓𑀟𑁆𑀠𑀻𑀬𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀳𑀻𑀢𑀺 𑀕𑀸𑀫𑀤𑀸𑀭𑀓𑀸𑀤𑀻𑀳𑀺 𑀅𑀜𑁆𑀜𑁂𑀳𑀺. 𑀓𑀺𑀜𑁆𑀘𑀺 𑀧𑀭𑀁 𑀅𑀦𑁄𑀤𑀺𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀲𑁆𑀲𑀸 𑀑𑀤𑀺𑀲𑁆𑀲 𑀯𑀼𑀢𑁆𑀢𑁂 𑀢𑁂𑀳𑀺 𑀕𑀳𑀺𑀢𑀤𑀡𑁆𑀟𑁂 𑀢𑀲𑁆𑀲𑀸 𑀘 𑀕𑀻𑀯𑀸𑀢𑀺 𑀲𑀽𑀘𑀺𑀢𑀁 𑀳𑁄𑀢𑀺. 𑀬𑀸 𑀭𑀓𑁆𑀔𑀁 𑀬𑀸𑀘𑀢𑀺 ¶ , 𑀢𑀢𑁆𑀣 𑀢𑀲𑁆𑀫𑀺𑀁 𑀭𑀓𑁆𑀔𑀸𑀬𑀸𑀘𑀦𑁂 𑀢𑀲𑁆𑀲𑀸 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀢𑁄 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀺𑀓𑀫𑁆𑀫𑀺𑀓𑀸 𑀕𑀳𑀺𑀢𑀸.

𑀲𑀫𑀼𑀝𑁆𑀞𑀸𑀦𑀁 𑀓𑀣𑀺𑀦𑁂𑀦 𑀢𑀼𑀮𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀓𑀺𑀭𑀺𑀬𑀁 𑀇𑀤’’𑀦𑁆𑀢𑀺. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁. 𑀓𑀺𑀭𑀺𑀬𑀸𑀬 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀓𑀺𑀭𑀺𑀬𑀁 𑀅𑀝𑁆𑀝𑀓𑀭𑀡𑁂𑀦 𑀆𑀧𑀚𑁆𑀚𑀦𑀢𑁄. ‘‘𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀘 𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑁄 𑀉𑀧𑀮𑀓𑁆𑀔𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀝𑁆𑀝𑀓𑀸𑀭𑀺𑀓𑀸𑀓𑀣𑀸𑀯𑀡𑁆𑀡𑀦𑀸.

𑁨𑁦𑁨𑁪-𑁫. 𑀚𑀸𑀦𑀦𑁆𑀢𑀻𑀢𑀺 ‘‘𑀲𑀸𑀫𑀁 𑀯𑀸 𑀚𑀸𑀦𑀸𑀢𑀺, 𑀅𑀜𑁆𑀜𑁂 𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀦𑁆𑀢𑀻’’𑀢𑀺 (𑀧𑀸𑀘𑀺. 𑁬𑁮𑁪) 𑀯𑀼𑀢𑁆𑀢𑀦𑀬𑁂𑀦 𑀚𑀸𑀦𑀦𑁆𑀢𑀻. 𑀘𑁄𑀭𑀺𑀦𑁆𑀢𑀺 𑀬𑀸𑀬 𑀧𑀜𑁆𑀘𑀫𑀸𑀲𑀕𑁆𑀖𑀦𑀓𑀢𑁄 𑀧𑀝𑁆𑀞𑀸𑀬 𑀬𑀁 𑀓𑀺𑀜𑁆𑀘𑀺 𑀧𑀭𑀲𑀦𑁆𑀢𑀓𑀁 𑀅𑀯𑀳𑀭𑀺𑀢𑀁, 𑀅𑀬𑀁 𑀘𑁄𑀭𑀻 𑀦𑀸𑀫. 𑀯𑀚𑁆𑀛𑀁 𑀯𑀺𑀤𑀺𑀢𑀦𑁆𑀢𑀺 ‘‘𑀢𑁂𑀦 𑀓𑀫𑁆𑀫𑁂𑀦 𑀯𑀥𑀸𑀭𑀳𑀸 𑀅𑀬’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑀁. 𑀲𑀗𑁆𑀖𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀸. 𑀭𑀸𑀚𑀸𑀦𑀁 𑀯𑀸𑀢𑀺 𑀭𑀜𑁆𑀜𑀸 𑀅𑀦𑀼𑀲𑀸𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀢𑀁 𑀭𑀸𑀚𑀸𑀦𑀁 𑀯𑀸. 𑀬𑀣𑀸𑀳 ‘‘𑀭𑀸𑀚𑀸 𑀦𑀸𑀫 𑀬𑀢𑁆𑀣 𑀭𑀸𑀚𑀸 𑀅𑀦𑀼𑀲𑀸𑀲𑀢𑀺, 𑀭𑀸𑀚𑀸 𑀅𑀧𑀮𑁄𑀓𑁂𑀢𑀩𑁆𑀩𑁄’’𑀢𑀺. 𑀕𑀡𑀫𑁂𑀯 𑀯𑀸𑀢𑀺 ‘‘𑀢𑀼𑀫𑁆𑀳𑁂𑀯 𑀢𑀢𑁆𑀣 𑀅𑀦𑀼𑀲𑀸𑀲𑀣𑀸’’𑀢𑀺 𑀭𑀸𑀚𑀽𑀳𑀺 𑀤𑀺𑀦𑁆𑀦𑀁 𑀕𑀸𑀫𑀦𑀺𑀕𑀫𑀫𑀮𑁆𑀮𑀕𑀡𑀸𑀤𑀺𑀓𑀁 𑀕𑀡𑀁 𑀯𑀸. 𑀫𑀮𑁆𑀮𑀕𑀡𑀁 𑀦𑀸𑀫 𑀧𑀸𑀦𑀻𑀬𑀝𑁆𑀞𑀧𑀦𑀧𑁄𑀓𑁆𑀔𑀭𑀡𑀺𑀔𑀡𑀦𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀦𑀺𑀬𑀼𑀢𑁆𑀢𑁄 𑀚𑀦𑀲𑀫𑀽𑀳𑁄. 𑀏𑀢𑁂𑀦𑁂𑀯 𑀏𑀯𑀫𑁂𑀯 𑀤𑀺𑀦𑁆𑀦𑀕𑀸𑀫𑀯𑀭𑀸 𑀧𑀽𑀕𑀸 𑀘 𑀲𑁂𑀦𑀺𑀬𑁄 𑀘 𑀲𑀗𑁆𑀕𑀳𑀺𑀢𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬. 𑀓𑀧𑁆𑀧𑀦𑁆𑀢𑀺 𑀘 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑀁 𑀓𑀧𑁆𑀧𑀁. 𑀲𑀸 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸 𑀬𑀸 𑀘𑁄𑀭𑀺𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀲𑀸 𑀪𑀺𑀓𑁆𑀔𑀼𑀦𑀻𑀢𑀺 𑀅𑀢𑁆𑀣𑁄. 𑀉𑀧𑀚𑁆𑀛𑀸𑀬𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁦𑁨𑁬. 𑀧𑀜𑁆𑀘𑀫𑀸𑀲𑀕𑁆𑀖𑀦𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀫𑀸𑀲𑀜𑁆𑀘 𑀧𑀜𑁆𑀘𑀫𑀸𑀲𑀕𑁆𑀖𑀦𑀓𑀜𑁆𑀘 𑀧𑀜𑁆𑀘𑀫𑀸𑀲𑀕𑁆𑀖𑀦𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀧𑀜𑁆𑀘𑀫𑀸𑀲𑀲𑁆𑀲𑀸𑀧𑀺 ¶ 𑀕𑀳𑀡𑀁. 𑀅𑀢𑀺𑀭𑁂𑀓𑀕𑁆𑀖𑀦𑀁 𑀯𑀸𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁨𑁦𑁨𑁭. 𑀧𑀩𑁆𑀩𑀚𑀺𑀢𑀁 ¶ 𑀧𑀼𑀩𑁆𑀩𑀁 𑀬𑀸𑀬 𑀲𑀸 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸𑀧𑀺 𑀢𑀺𑀢𑁆𑀣𑀸𑀬𑀢𑀦𑀸𑀤𑀻𑀲𑀼 𑀬𑀸 𑀧𑀞𑀫𑀁 𑀧𑀩𑁆𑀩𑀚𑀺𑀢𑀸𑀢𑀺 𑀅𑀢𑁆𑀣𑁄.

𑁨𑁦𑁨𑁮-𑁩𑁦. 𑀇𑀤𑀸𑀦𑀺 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀼𑀝𑁆𑀞𑀸𑀧𑁂𑀢𑀺 𑀘 𑀬𑀸 𑀘𑁄𑀭𑀺’’𑀦𑁆𑀢𑀺𑀆𑀤𑀺. 𑀇𑀥 ‘‘𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸’’𑀢𑀺 𑀲𑁂𑀲𑁄. 𑀇𑀤𑀁 𑀓𑀧𑁆𑀧𑀁 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀘𑀸𑀢𑀺 𑀅𑀪𑀺𑀦𑀯𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀩𑀦𑁆𑀥𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀘 ‘‘𑀣𑀼𑀮𑁆𑀮𑀘𑁆𑀘𑀬𑀁 𑀤𑁆𑀯𑀬’’𑀦𑁆𑀢𑀺 𑀇𑀫𑀺𑀦𑀸 𑀘 𑀬𑁄𑀚𑁂𑀢𑀩𑁆𑀩𑀁.

𑀓𑀫𑁆𑀫𑀦𑁆𑀢𑁂𑀢𑀺 𑀉𑀧𑀲𑀫𑁆𑀧𑀤𑀓𑀫𑁆𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀢𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁦𑁩𑁧. 𑀅𑀚𑀸𑀦𑀦𑁆𑀢𑀻𑀢𑀺 𑀘𑁄𑀭𑀺𑀁 𑀅𑀚𑀸𑀦𑀦𑁆𑀢𑀻. (𑀇𑀤𑀁 𑀲𑀺𑀓𑁆𑀔𑀸𑀧𑀤𑀁.)

𑁨𑁦𑁩𑁨. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁 𑀦𑀸𑀫𑀸𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀯𑀸𑀘𑀘𑀺𑀢𑁆𑀢𑀢𑁄𑀢𑀺 𑀔𑀡𑁆𑀟𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑁂𑀳𑀺. 𑀓𑀸𑀬𑀯𑀸𑀘𑀸𑀤𑀺𑀢𑁄 𑀘𑁂𑀯𑀸𑀢𑀺 𑀕𑀦𑁆𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀬𑀣𑀸𑀳 ‘‘𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀦𑁆𑀢𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀅𑀕𑀦𑁆𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀯𑀸 𑀦𑀤𑀺𑀁 𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀔𑀡𑁆𑀟𑀲𑀻𑀫𑀁 𑀯𑀸 𑀦𑀤𑀺𑀁 𑀯𑀸 𑀕𑀦𑁆𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 ¶ 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁮𑁩). 𑀓𑁆𑀭𑀺𑀬𑀸𑀓𑁆𑀭𑀺𑀬𑀦𑁆𑀢𑀺 𑀅𑀦𑀸𑀧𑀼𑀘𑁆𑀙𑀸𑀯𑀼𑀝𑁆𑀞𑀸𑀧𑀦𑀯𑀲𑁂𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀁.

𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀓𑀣𑀸𑀯𑀡𑁆𑀡𑀦𑀸.

𑁨𑁦𑁩𑁩-𑁪. 𑀕𑀸𑀫𑀦𑁆𑀢𑀭𑀦𑁆𑀢𑀺 𑀅𑀜𑁆𑀜𑀁 𑀕𑀸𑀫𑀁. 𑀬𑀸 𑀏𑀓𑀸 𑀲𑀘𑁂 𑀕𑀘𑁆𑀙𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀤𑀻𑀧𑀸𑀭𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀤𑀺𑀬𑀸 𑀧𑀸𑀭𑀁 𑀦𑀤𑀻𑀧𑀸𑀭𑀁. ‘‘𑀏𑀓𑀸 𑀯𑀸’’𑀢𑀺 𑀉𑀧𑀭𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀑𑀳𑀻𑀬𑁂𑀬𑁆𑀬𑀸𑀢𑀺 𑀯𑀺𑀦𑀸 𑀪𑀯𑁂𑀬𑁆𑀬. 𑀇𑀥 ‘‘𑀅𑀭𑀜𑁆𑀜𑁂’’𑀢𑀺 𑀲𑁂𑀲𑁄. 𑀅𑀭𑀜𑁆𑀜𑀮𑀓𑁆𑀔𑀡𑀁 ‘‘𑀇𑀦𑁆𑀤𑀔𑀻𑀮’’𑀇𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀢𑀺. ‘‘𑀏𑀓𑀸 𑀯𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬, 𑀏𑀓𑀸 𑀯𑀸 𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀓𑁆𑀓𑀫𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺 𑀅𑀦𑁆𑀢𑁂 𑀯𑀼𑀢𑁆𑀢𑀁 ¶ . 𑀢𑁂𑀦𑁂𑀯 𑀯𑀺𑀪𑀸𑀕𑀯𑀺𑀦𑀺𑀘𑁆𑀙𑀬𑁂 𑀤𑁂𑀲𑀦𑀸𑀭𑀼𑀴𑁆𑀳𑀓𑁆𑀓𑀫𑁂𑀦𑁂𑀯 ‘‘𑀧𑀼𑀭𑁂𑀭𑀼𑀡𑁄𑀤𑀬𑀸𑀬𑁂𑀯𑀸’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀺. 𑀲𑀸 𑀧𑀞𑀫𑀸𑀧𑀢𑁆𑀢𑀺𑀓𑀁 𑀕𑀭𑀼𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑁄, 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. ‘‘𑀕𑀭𑀼𑀓𑀁 𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀓𑀕𑀸𑀫𑀸 𑀦𑀺𑀓𑁆𑀔𑀫𑀦𑁆𑀢𑀺𑀬𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀢𑁆𑀢𑀦𑁄 𑀯𑀲𑀦𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀺𑀬𑀸.

𑁨𑁦𑁩𑁫. 𑀢𑀢𑁄 𑀲𑀓𑀕𑀸𑀫𑀢𑁄.

𑁨𑁦𑁩𑁬-𑁭. 𑀏𑀓𑁂𑀦 𑀧𑀤𑀯𑀸𑀭𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀅𑀢𑀺𑀓𑁆𑀓𑀦𑁆𑀢𑁂, 𑀉𑀧𑀘𑀸𑀭𑁄𑀓𑁆𑀓𑀫𑁂 𑀯𑀸 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑁄𑀚𑀦𑀸. 𑀅𑀢𑀺𑀓𑁆𑀓𑀦𑁆𑀢𑁂 𑀑𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 ‘‘𑀧𑀭𑀺𑀓𑁆𑀔𑁂𑀧𑁂 𑀉𑀧𑀘𑀸𑀭𑁂’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺.

𑁨𑁦𑁩𑁮-𑁯. 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀯𑀺𑀝𑁆𑀞𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀅𑀬𑀫𑁂𑀯 𑀦𑀬𑁄𑀢𑀺 ‘‘𑀏𑀓𑁂𑀦 𑀧𑀤𑀯𑀸𑀭𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀕𑀭𑀼𑀓𑀸𑀧𑀢𑁆𑀢𑀻’’𑀢𑀺 𑀅𑀬𑀁 𑀦𑀬𑁄.

𑀯𑀢𑀺𑀘𑁆𑀙𑀺𑀤𑁆𑀤𑁂𑀦 ¶ 𑀯𑀸 𑀔𑀡𑁆𑀟𑀧𑀸𑀓𑀸𑀭𑁂𑀦 𑀯𑀸𑀢𑀺 𑀬𑁄𑀚𑀦𑀸. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀧𑀸𑀓𑀸𑀭𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀯𑀸-𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀦𑀻𑀬𑀢𑀁 𑀤𑀲𑁆𑀲𑁂𑀢𑀺. ‘‘𑀪𑀺𑀓𑁆𑀔𑀼𑀯𑀺𑀳𑀸𑀭𑀲𑁆𑀲 𑀪𑀽𑀫𑀺 𑀢𑀸𑀲𑀫𑀓𑀧𑁆𑀧𑀺𑀬𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀺𑀳𑀸𑀭𑀲𑁆𑀲 𑀪𑀽𑀫𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑀪𑀽𑀫𑀺 𑀕𑀳𑀺𑀢𑀸. ‘‘𑀓𑀧𑁆𑀧𑀺𑀬𑀦𑁆𑀢𑀺 𑀧𑀯𑀺𑀝𑁆𑀞𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑀓𑁆𑀔𑀫𑀸𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀓𑁄𑀘𑀺 𑀤𑁄𑀲𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀘𑁆𑀘𑀫𑀸𑀦𑁄 𑀬𑁄 𑀓𑁄𑀘𑀺 𑀤𑁄𑀲𑁄.

𑁨𑁦𑁪𑁦. 𑀢𑀸𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁. ‘‘𑀅𑀓𑀧𑁆𑀧𑀺𑀬𑀸’’𑀢𑀺 𑀇𑀫𑀺𑀦𑀸 𑀢𑀢𑁆𑀣𑀸𑀧𑀺 𑀧𑀯𑀺𑀝𑁆𑀞𑀸𑀬 𑀕𑀸𑀫𑀦𑁆𑀢𑀭𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀲𑀫𑁆𑀪𑀯𑀫𑀸𑀳.

𑁨𑁦𑁪𑁧. ‘‘𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 (𑀧𑀸𑀘𑀺. 𑁬𑁯𑁨) 𑀯𑀼𑀢𑁆𑀢𑀢𑁆𑀢𑀸 ‘‘𑀳𑀢𑁆𑀣𑀺…𑀧𑁂… 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸𑀧𑀢𑁆𑀢𑀺, 𑀧𑀤𑀲𑀸 𑀕𑀫𑀦𑁂 𑀧𑀦𑀸’’𑀢𑀺 𑀯𑀼𑀢𑁆𑀢𑀁.

𑁨𑁦𑁪𑁨. ‘‘𑀬𑀁 𑀓𑀺𑀜𑁆𑀘𑀺…𑀧𑁂… 𑀆𑀧𑀢𑁆𑀢𑀺 𑀧𑀯𑀺𑀲𑀦𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀉𑀧𑀲𑀁𑀳𑀸𑀭𑀢𑁆𑀢𑀸 𑀦 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄.

𑁨𑁦𑁪𑁩-𑁪. 𑀮𑀓𑁆𑀔𑀡𑁂𑀦𑀼𑀧𑀧𑀦𑁆𑀦𑀸𑀬𑀸𑀢𑀺 ¶ ‘‘𑀦𑀤𑀻 𑀦𑀸𑀫 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀻’’𑀢𑀺 (𑀧𑀸𑀘𑀺. 𑁬𑁯𑁨) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀬 𑀦𑀤𑀺𑀬𑀸. 𑀬𑀸 𑀧𑀸𑀭𑀁 𑀢𑀻𑀭𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸.

𑀧𑀞𑀫𑀁 𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸𑀦 𑀢𑀻𑀭𑁂 𑀞𑀧𑁂𑀦𑁆𑀢𑀺𑀬𑀸𑀢𑀺 ‘‘𑀇𑀤𑀸𑀦𑀺 𑀧𑀤𑀯𑀸𑀭𑁂𑀦 𑀅𑀢𑀺𑀓𑁆𑀓𑀫𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑁂 𑀧𑀞𑀫𑀁 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀢𑀻𑀭𑁂 𑀞𑀧𑁂𑀦𑁆𑀢𑀺𑀬𑀸. ‘‘𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 ‘‘𑀅𑀢𑀺𑀓𑁆𑀓𑀫𑁂’’𑀢𑀺 𑀇𑀫𑀺𑀦𑀸 𑀉𑀤𑁆𑀥𑀸𑀭𑁄 𑀕𑀳𑀺𑀢𑁄.

𑁨𑁦𑁪𑁫. 𑀅𑀦𑁆𑀢𑀭𑀦𑀤𑀺𑀬𑀦𑁆𑀢𑀺 𑀦𑀤𑀺𑀯𑁂𑀫𑀚𑁆𑀛𑁂. 𑀪𑀡𑁆𑀟𑀺𑀢𑁆𑀯𑀸𑀢𑀺 𑀓𑀮𑀳𑀁 𑀓𑀢𑁆𑀯𑀸. 𑀑𑀭𑀺𑀫𑀁 𑀢𑀻𑀭𑀦𑁆𑀢𑀺 𑀆𑀕𑀢𑀤𑀺𑀲𑀸𑀬 𑀢𑀻𑀭𑀁. 𑀢𑀣𑀸 𑀧𑀞𑀫𑁂 𑀣𑀼𑀮𑁆𑀮𑀘𑁆𑀘𑀬𑀁 ¶ , 𑀤𑀼𑀢𑀺𑀬𑁂 𑀕𑀭𑀼 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀓𑀮𑁂𑀦 𑀯𑀘𑀦𑁂𑀦 ‘‘𑀇𑀢𑀭𑀺𑀲𑁆𑀲𑀸 𑀧𑀦 𑀅𑀬𑀁 𑀧𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀞𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀢𑀻𑀭𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀧𑀺 𑀉𑀮𑁆𑀮𑀺𑀗𑁆𑀕𑀺𑀢𑀸.

𑁨𑁦𑁪𑁬. 𑀭𑀚𑁆𑀚𑀼𑀬𑀸𑀢𑀺 𑀯𑀮𑁆𑀮𑀺𑀆𑀤𑀺𑀓𑀸𑀬 𑀬𑀸𑀬 𑀓𑀸𑀬𑀘𑀺 𑀭𑀚𑁆𑀚𑀼𑀬𑀸.

𑁨𑁦𑁪𑁭. 𑀧𑀺𑀯𑀺𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀧𑀸𑀦𑀻𑀬’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀅𑀧𑀺-𑀲𑀤𑁆𑀤𑁂𑀦 𑀪𑀡𑁆𑀟𑀥𑁄𑀯𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀣𑀸𑀢𑀺 𑀯𑀸𑀓𑁆𑀬𑀸𑀭𑀫𑁆𑀪𑁂 𑀦𑀺𑀧𑀸𑀢𑁄. ‘‘𑀦𑀳𑀸𑀦𑀸𑀤𑀺𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀑𑀭𑀺𑀫𑀫𑁂𑀯 𑀢𑀻𑀭𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀆𑀳 ‘‘𑀯𑀝𑁆𑀝𑀢𑀻’’𑀢𑀺.

𑁨𑁦𑁪𑁮. 𑀧𑀤𑀲𑀸𑀦𑀤𑀺𑀁 𑀑𑀢𑀭𑀺𑀢𑁆𑀯𑀸𑀦𑀸𑀢𑀺 𑀬𑁄𑀚𑀦𑀸. 𑀲𑁂𑀢𑀼𑀁 𑀆𑀭𑁄𑀳𑀺𑀢𑁆𑀯𑀸 𑀢𑀣𑀸 𑀧𑀤𑀲𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁪𑁯. 𑀕𑀦𑁆𑀢𑁆𑀯𑀸𑀦𑀸𑀢𑀺 𑀏𑀢𑁆𑀣 ‘‘𑀦𑀤𑀺’’𑀦𑁆𑀢𑀺 𑀲𑁂𑀲𑁄. 𑀉𑀢𑁆𑀢𑀭𑀡𑀓𑀸𑀮𑁂 𑀧𑀤𑀲𑀸 𑀬𑀸𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁫𑁦. 𑀯𑁂𑀕𑁂𑀦𑀸𑀢𑀺 𑀏𑀓𑁂𑀦𑁂𑀯 𑀯𑁂𑀕𑁂𑀦, 𑀅𑀦𑁆𑀢𑀭𑀸 𑀅𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁦𑁫𑁧. ‘‘𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀇𑀤𑀁 ‘‘𑀔𑀦𑁆𑀥𑁂 𑀯𑀸’’𑀢𑀺𑀆𑀤𑀻𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀔𑀦𑁆𑀥𑀸𑀤𑀬𑁄 𑀘𑁂𑀢𑁆𑀣 𑀲𑀪𑀸𑀕𑀸𑀦𑀫𑁂𑀯 𑀕𑀳𑁂𑀢𑀩𑁆𑀩𑀸. 𑀳𑀢𑁆𑀣𑀲𑀗𑁆𑀖𑀸𑀢𑀦𑁂 𑀯𑀸𑀢𑀺 𑀉𑀪𑁄𑀳𑀺 𑀩𑀤𑁆𑀥𑀳𑀢𑁆𑀣𑀯𑀮𑀬𑁂 𑀯𑀸.

𑁨𑁦𑁫𑁨-𑁩. 𑀧𑀸𑀲𑀦𑁆𑀢𑀺 ¶ 𑀳𑀢𑁆𑀣𑀧𑀸𑀲𑀁. ‘‘𑀆𑀪𑁄𑀕𑀁 𑀯𑀺𑀦𑀸’’𑀢𑀺 𑀇𑀫𑀺𑀦𑀸 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑁂 𑀓𑀢𑁂 𑀅𑀚𑀸𑀦𑀦𑁆𑀢𑀺𑀬𑀸 𑀅𑀭𑀼𑀡𑁂 ¶ 𑀉𑀝𑁆𑀞𑀺𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀲𑀘𑁂 𑀲𑀚𑁆𑀛𑀸𑀬𑀁 𑀯𑀸 𑀲𑀯𑀦𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑀸 ‘𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀤𑀼𑀢𑀺𑀬𑀺𑀓𑀸𑀬 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀪𑁄𑀕𑀁 𑀓𑀭𑁄𑀢𑀺, 𑀅𑀚𑀸𑀦𑀦𑁆𑀢𑀺𑀬𑀸 𑀏𑀯 𑀘𑀲𑁆𑀲𑀸 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨). 𑀦𑀸𑀦𑀸𑀕𑀩𑁆𑀪𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀕𑀩𑁆𑀪𑁂𑀧𑀺 𑀯𑀸’’𑀢𑀺. 𑀏𑀓𑀕𑀩𑁆𑀪𑁂𑀧𑀺 𑀯𑀸 𑀤𑀼𑀢𑀺𑀬𑀺𑀓𑀸𑀬 𑀳𑀢𑁆𑀣𑀧𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀅𑀭𑀼𑀡𑀁 𑀉𑀝𑁆𑀞𑀧𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁦𑁫𑁪. 𑀤𑀼𑀢𑀺𑀬𑀸𑀧𑀸𑀲𑀦𑁆𑀢𑀺 𑀤𑀼𑀢𑀺𑀬𑀺𑀓𑀸𑀬 𑀳𑀢𑁆𑀣𑀧𑀸𑀲𑀁. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀲𑀘𑁂 𑀅𑀭𑀼𑀡𑀁 𑀉𑀝𑁆𑀞𑁂𑀢𑀺, 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑁨𑁦𑁫𑁫-𑁬. 𑀅𑀜𑁆𑀜𑀢𑁆𑀣 𑀧𑀜𑁆𑀘𑀥𑀦𑀼𑀲𑀢𑀺𑀓𑀲𑁆𑀲 (𑀧𑀸𑀭𑀸. 𑁬𑁫𑁪) 𑀧𑀘𑁆𑀙𑀺𑀫𑀲𑁆𑀲 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀦𑀺𑀯𑀢𑁆𑀢𑁂𑀢𑀼𑀫𑀸𑀳 ‘‘𑀇𑀦𑁆𑀤𑀔𑀻𑀮𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀤𑀻𑀧𑀺𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬 ‘‘𑀅𑀭𑀜𑁆𑀜𑁂𑀢𑀺 𑀏𑀢𑁆𑀣 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀅𑀭𑀜𑁆𑀜𑀁 𑀤𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀺𑀓𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀦𑁆𑀢𑀺𑀬𑀸 𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀚𑀳𑀺𑀢𑁂’’𑀢𑀺 𑀇𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀉𑀧𑀘𑀸𑀭𑁂’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄.

𑁨𑁦𑁫𑁭. 𑀲𑀸𑀡𑀺𑀧𑀸𑀓𑀸𑀭𑀧𑀸𑀓𑀸𑀭𑀢𑀭𑀼𑀅𑀦𑁆𑀢𑀭𑀺𑀢𑁂 𑀞𑀸𑀦𑁂 𑀅𑀲𑀢𑀺 𑀤𑀲𑁆𑀲𑀦𑀽𑀧𑀘𑀸𑀭𑁂 𑀲𑀢𑀺𑀧𑀺 𑀲𑀯𑀦𑀽𑀧𑀘𑀸𑀭𑁂 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁫𑁮-𑁬𑁦. 𑀏𑀢𑁆𑀣 𑀓𑀣𑀦𑁆𑀢𑀺 𑀬𑀢𑁆𑀣 𑀤𑀽𑀭𑁂𑀧𑀺 𑀤𑀲𑁆𑀲𑀦𑀁 𑀳𑁄𑀢𑀺, 𑀏𑀯𑀭𑀽𑀧𑁂 𑀅𑀚𑁆𑀛𑁄𑀓𑀸𑀲𑁂 𑀆𑀧𑀢𑁆𑀢𑀺𑀦𑀺𑀬𑀫𑁄 𑀓𑀣𑀁 𑀓𑀸𑀢𑀩𑁆𑀩𑁄𑀢𑀺 ¶ 𑀅𑀢𑁆𑀣𑁄. 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 ‘‘𑀲𑀯𑀦𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀢𑀢𑁆𑀣 𑀮𑀓𑁆𑀔𑀡𑀁 𑀞𑀧𑁂𑀢𑀼𑀫𑀸𑀳 ‘‘𑀫𑀕𑁆𑀕…𑀧𑁂… 𑀏𑀯𑀭𑀽𑀧𑀓𑁂’’𑀢𑀺. 𑀏𑀢𑁆𑀣 ‘‘𑀞𑀸𑀦𑁂’’𑀢𑀺 𑀲𑁂𑀲𑁄. 𑀓𑀽𑀚𑀦𑁆𑀢𑀺𑀬𑀸𑀢𑀺 𑀬𑀣𑀸𑀯𑀡𑁆𑀡𑀯𑀯𑀢𑁆𑀣𑀸𑀦𑀁 𑀦 𑀳𑁄𑀢𑀺, 𑀏𑀯𑀁 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸.

𑀏𑀯𑀭𑀽𑀧𑀓𑁂 𑀞𑀸𑀦𑁂 𑀥𑀫𑁆𑀫𑀲𑁆𑀲𑀯𑀦𑀸𑀭𑁄𑀘𑀦𑁂 𑀯𑀺𑀬 𑀘 𑀫𑀕𑁆𑀕𑀫𑀽𑀴𑁆𑀳𑀲𑁆𑀲 𑀲𑀤𑁆𑀤𑁂𑀦 𑀯𑀺𑀬 𑀘 ‘‘𑀅𑀬𑁆𑀬𑁂’’𑀢𑀺 𑀓𑀽𑀚𑀦𑁆𑀢𑀺𑀬𑀸 ¶ 𑀢𑀲𑁆𑀲𑀸 𑀲𑀤𑁆𑀤𑀲𑁆𑀲 𑀲𑀯𑀦𑀸𑀢𑀺𑀓𑁆𑀓𑀫𑁂 𑀪𑀺𑀓𑁆𑀔𑀼𑀦𑀺𑀬𑀸 𑀕𑀭𑀼𑀓𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀪𑀺𑀓𑁆𑀔𑀼𑀦𑀺𑀬𑀸 𑀕𑀭𑀼𑀓𑀸 𑀳𑁄𑀢𑀻’’𑀢𑀺 𑀇𑀤𑀁 ‘‘𑀤𑀼𑀢𑀺𑀬𑀺𑀓𑀁 𑀦 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀭𑀼𑀲𑁆𑀲𑀸𑀳𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀑𑀳𑀻𑀬𑀺𑀢𑁆𑀯𑀸𑀣 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 ‘‘𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀫𑀺𑀁.

𑁨𑁦𑁬𑁧. 𑀅𑀣 𑀕𑀘𑁆𑀙𑀦𑁆𑀢𑀻 𑀑𑀳𑀻𑀬𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀇𑀤𑀸𑀦𑀺 𑀅𑀳𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀺’’ 𑀇𑀢𑀺 𑀏𑀯𑀁 𑀲𑀉𑀲𑁆𑀲𑀸𑀳𑀸 𑀅𑀦𑀼𑀩𑀦𑁆𑀥𑀢𑀺, 𑀯𑀝𑁆𑀝𑀢𑀺, 𑀤𑀼𑀢𑀺𑀬𑁄𑀧𑀘𑀸𑀭𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁦𑁬𑁨. ‘‘𑀕𑀘𑁆𑀙𑀢𑀼 𑀅𑀬𑀁’’ 𑀇𑀢𑀺 𑀉𑀲𑁆𑀲𑀸𑀳𑀲𑁆𑀲𑀘𑁆𑀙𑁂𑀤𑀁 𑀓𑀢𑁆𑀯𑀸 𑀑𑀳𑀻𑀦𑀸 𑀘𑁂, 𑀢𑀲𑁆𑀲𑀸 𑀆𑀧𑀢𑁆𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸.

𑁨𑁦𑁬𑁩. 𑀇𑀢𑀭𑀸𑀧𑀻𑀢𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑀸𑀧𑀺. 𑀑𑀳𑀻𑀬𑀢𑀼 𑀅𑀬𑀦𑁆𑀢𑀺 𑀘𑀸𑀢𑀺 𑀦𑀺𑀭𑀼𑀲𑁆𑀲𑀸𑀳𑀧𑁆𑀧𑀓𑀸𑀭𑁄 𑀲𑀦𑁆𑀤𑀲𑁆𑀲𑀺𑀢𑁄. 𑀯𑀼𑀢𑁆𑀢𑀢𑁆𑀣𑀫𑁂𑀯 𑀲𑀫𑀢𑁆𑀣𑀬𑀺𑀢𑀼𑀫𑀸𑀳 ‘‘𑀲𑀉𑀲𑁆𑀲𑀸𑀳𑀸 𑀦 𑀳𑁄𑀢𑀺 𑀘𑁂’’𑀢𑀺.

𑁨𑁦𑁬𑁪-𑁫. 𑀧𑀼𑀭𑀺𑀫𑀸 𑀏𑀓𑀓𑀁 𑀫𑀕𑁆𑀕𑀁 𑀬𑀸𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀫𑁂𑀯 𑀏𑀓𑀓𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀺𑀲𑁆𑀲𑀸 𑀇𑀢𑀭𑀸 𑀧𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀡𑀫𑁆𑀳𑀸𑀑𑀳𑀻𑀬𑀦𑁂. 𑀧𑀺-𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑁄. 𑀅𑀦𑀸𑀧𑀢𑁆𑀢𑀺 𑀏𑀯 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁦𑁬𑁬-𑁭. 𑀕𑀸𑀫𑀦𑁆𑀢𑀭𑀕𑀢𑀸𑀬𑀸𑀢𑀺 𑀕𑀸𑀫𑀲𑀻𑀫𑀕𑀢𑀸𑀬. ‘‘𑀦𑀤𑀺𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀆𑀧𑀢𑁆𑀢𑀺𑀬𑁄𑀘𑀢𑀲𑁆𑀲𑁄𑀧𑀻𑀢𑀺 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲 𑀕𑀸𑀫𑀦𑁆𑀢𑀭𑀕𑀫𑀦 𑀦𑀤𑀺𑀧𑀸𑀭𑀕𑀫𑀦 𑀕𑀡𑀫𑁆𑀳𑀸𑀑𑀳𑀻𑀬𑀦 𑀲𑀗𑁆𑀔𑀸𑀢𑀸 𑀘𑀢𑀲𑁆𑀲𑁄 ¶ 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑁄. 𑀕𑀡𑀫𑁆𑀳𑀸𑀑𑀳𑀻𑀬𑀦𑀫𑀽𑀮𑀓𑀸𑀧𑀢𑁆𑀢𑀺𑀬𑀸 𑀕𑀸𑀫𑀢𑁄 𑀩𑀳𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑁂𑀧𑀺 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑀫𑀽𑀮𑀓𑀸𑀧𑀢𑁆𑀢𑀺𑀬𑀸 𑀅𑀦𑁆𑀢𑁄𑀕𑀸𑀫𑁂 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑁂𑀧𑀺 𑀏𑀓𑀓𑁆𑀔𑀡𑁂𑀢𑀺 𑀕𑀸𑀫𑀽𑀧𑀘𑀸𑀭𑀁 𑀲𑀦𑁆𑀥𑀸𑀬𑀸𑀳.

𑁨𑁦𑁬𑁮-𑁯. 𑀬𑀸 𑀲𑀤𑁆𑀥𑀺𑀁 𑀬𑀸𑀢𑀸 𑀤𑀼𑀢𑀺𑀬𑀺𑀓𑀸, 𑀲𑀸 𑀘 𑀧𑀓𑁆𑀓𑀦𑁆𑀢𑀸 𑀯𑀸 𑀲𑀘𑁂 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑀸 𑀯𑀸 𑀳𑁄𑀢𑀺, 𑀧𑁂𑀢𑀸𑀦𑀁 𑀮𑁄𑀓𑀁 𑀬𑀸𑀢𑀸 𑀯𑀸 𑀳𑁄𑀢𑀺, 𑀓𑀸𑀮𑀓𑀢𑀸 𑀯𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀧𑀓𑁆𑀔𑀲𑀗𑁆𑀓𑀦𑁆𑀢𑀸 𑀯𑀸 𑀳𑁄𑀢𑀺, 𑀢𑀺𑀢𑁆𑀣𑀸𑀬𑀢𑀦𑀲𑀗𑁆𑀓𑀦𑁆𑀢𑀸 𑀯𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦𑀝𑁆𑀞𑀸 𑀯𑀸 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸 𑀯𑀸 𑀳𑁄𑀢𑀻𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀭𑀽𑀧𑁂 𑀓𑀸𑀮𑁂 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑀸𑀤𑀻𑀦𑀺…𑀧𑁂… 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀉𑀫𑁆𑀫𑀢𑁆𑀢𑀺𑀓𑀸𑀬𑀧𑀺 𑀏𑀯𑀁 𑀘𑀢𑁆𑀢𑀸𑀭𑀺𑀧𑀺 𑀓𑀭𑁄𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁭𑁦. ‘‘𑀅𑀕𑀸𑀫𑀓𑁂 𑀅𑀭𑀜𑁆𑀜𑁂’’𑀢𑀺 𑀇𑀤𑀁 𑀕𑀸𑀫𑀸𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑀢𑀸𑀬.

𑁨𑁦𑁭𑁧. 𑀕𑀸𑀫𑀪𑀸𑀯𑀢𑁄 𑀦𑀤𑀺𑀧𑀸𑀭𑀕𑀫𑀦𑀕𑀡𑀫𑁆𑀳𑀸𑀑𑀳𑀻𑀬𑀦𑀸𑀧𑀢𑁆𑀢𑀺 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀲𑀸𑀧𑀺 𑀲𑀓𑀕𑀸𑀫𑀢𑁆𑀢𑀸 𑀕𑀸𑀫𑀦𑁆𑀢𑀭𑀕𑀫𑀦𑀫𑀽𑀮𑀺𑀓𑀸𑀧𑀢𑁆𑀢𑀺 𑀘 𑀤𑀺𑀯𑀲𑀪𑀸𑀕𑀢𑁆𑀢𑀸 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀫𑀽𑀮𑀺𑀓𑀸𑀧𑀢𑁆𑀢𑀺 𑀘 𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀲𑀓𑀕𑀸𑀫𑁂…𑀧𑁂… 𑀦 𑀯𑀺𑀚𑁆𑀚𑀭𑁂’’𑀢𑀺. 𑀬𑀣𑀸𑀓𑀸𑀫𑀦𑁆𑀢𑀺 𑀬𑀣𑀺𑀘𑁆𑀙𑀺𑀢𑀁, 𑀤𑀼𑀢𑀺𑀬𑀺𑀓𑀸𑀬 𑀅𑀲𑀦𑁆𑀢𑀺𑀬𑀸𑀧𑀻𑀢𑀺 𑀅𑀢𑁆𑀣𑁄.

𑁨𑁦𑁭𑁨. 𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀢𑀼𑀮𑁆𑀬𑀸𑀢𑀺 𑀬𑁄𑀚𑀦𑀸.

𑀕𑀸𑀫𑀦𑁆𑀢𑀭𑀕𑀫𑀦𑀓𑀣𑀸𑀯𑀡𑁆𑀡𑀦𑀸.

𑁨𑁦𑁭𑁩. 𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸 𑀘𑁂𑀯𑀸𑀢𑀺 ‘‘𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀓𑀸𑀭𑀓𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀸 𑀢𑀲𑁆𑀲𑁂𑀯 𑀓𑀸𑀭𑀓𑀲𑀗𑁆𑀖𑀲𑁆𑀲 𑀙𑀦𑁆𑀤𑀁 𑀅𑀚𑀸𑀦𑀺𑀢𑁆𑀯𑀸 𑀑𑀲𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀦𑀯𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑁂 𑀘. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀯𑁂 𑀣𑀼𑀮𑁆𑀮𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁭𑁪. 𑀓𑀫𑁆𑀫𑀲𑁆𑀲 ¶ 𑀧𑀭𑀺𑀬𑁄𑀲𑀸𑀦𑁂𑀢𑀺 𑀑𑀲𑀸𑀭𑀡𑀓𑀫𑁆𑀫𑀲𑁆𑀲 𑀅𑀯𑀲𑀸𑀦𑁂. 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺 ‘‘𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁯𑁭) 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀼𑀢𑁆𑀢𑀁. 𑀓𑀫𑁆𑀫𑀦𑁆𑀢𑀺 𑀘 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁. 𑀅𑀥𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀦𑁆𑀢𑀺 ‘‘𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀢𑀺𑀓𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑁨𑁦𑁭𑁫. 𑀕𑀡𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀓𑀸𑀭𑀓𑀕𑀡𑀲𑁆𑀲. 𑀯𑀢𑁆𑀢𑁂 𑀯𑀸 𑀧𑀦 𑀯𑀢𑁆𑀢𑀦𑁆𑀢𑀺𑀦𑁆𑀢𑀺 𑀢𑁂𑀘𑀢𑁆𑀢𑀸𑀮𑀻𑀲𑀧𑁆𑀧𑀪𑁂𑀤𑁂 𑀦𑁂𑀢𑁆𑀢𑀸𑀭𑀯𑀢𑁆𑀢𑁂 𑀯𑀢𑁆𑀢𑀫𑀸𑀦𑀁. 𑀢𑁂𑀘𑀢𑁆𑀢𑀸𑀮𑀻𑀲𑀧𑁆𑀧𑀪𑁂𑀤𑀁 𑀧𑀦 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁭𑁬) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀦𑁂𑀢𑁆𑀢𑀸𑀭𑀯𑀢𑁆𑀢𑁂𑀢𑀺 𑀓𑀫𑁆𑀫𑀢𑁄 𑀦𑀺𑀢𑁆𑀣𑀭𑀡𑀲𑁆𑀲 𑀳𑁂𑀢𑀼𑀪𑀽𑀢𑁂 𑀯𑀢𑁆𑀢𑁂.

𑁨𑁦𑁭𑁭. 𑀑𑀲𑀸𑀭𑀡𑀁 ¶ 𑀓𑁆𑀭𑀺𑀬𑀁. 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑁆𑀭𑀺𑀬𑀁.

𑀘𑀢𑀼𑀢𑁆𑀣𑀁.

𑁨𑁦𑁭𑁮-𑁯. 𑀅𑀯𑀲𑁆𑀲𑀼𑀢𑀸𑀢𑀺 𑀫𑁂𑀣𑀼𑀦𑀭𑀸𑀕𑁂𑀦 𑀢𑀺𑀦𑁆𑀢𑀸. 𑀏𑀯𑀫𑀼𑀧𑀭𑀺𑀧𑀺. ‘‘𑀫𑀦𑀼𑀲𑁆𑀲𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀬𑀓𑁆𑀔𑀸𑀤𑀻𑀦𑀁 𑀧𑀝𑀺𑀓𑁆𑀔𑁂𑀧𑁄. ‘‘𑀉𑀤𑀓𑁂…𑀧𑁂… 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀆𑀫𑀺𑀲𑀦𑁆𑀢𑀺 𑀅𑀜𑁆𑀜𑀢𑁆𑀭 𑀤𑀦𑁆𑀢𑀧𑁄𑀦𑀸 𑀅𑀚𑁆𑀛𑁄𑀳𑀭𑀡𑀻𑀬𑀲𑁆𑀲 𑀕𑀳𑀡𑀁. 𑀧𑀬𑁄𑀕𑀢𑁄𑀢𑀺 𑀧𑀬𑁄𑀕𑀕𑀡𑀦𑀸𑀬.

𑁨𑁦𑁮𑁦. 𑀏𑀓𑀢𑁄𑀯𑀲𑁆𑀲𑀼𑀢𑁂𑀢𑀺 𑀧𑀼𑀫𑀺𑀢𑁆𑀣𑀺𑀬𑀸 𑀲𑀸𑀫𑀜𑁆𑀜𑁂𑀦 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀏𑀓𑀢𑁄𑀅𑀯𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑀁 𑀦 𑀯𑀼𑀢𑁆𑀢𑀁, 𑀢𑀁 ¶ 𑀧𑀸𑀴𑀺𑀬𑀸 𑀲𑀫𑁂𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁦𑁧) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀏𑀢𑁆𑀣 𑀘 𑀏𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀏𑀢𑀁 𑀦𑀺𑀬𑀫𑀦𑀁 𑀦 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀢𑀁 𑀦𑀺𑀬𑀫𑁂𑀢𑁆𑀯𑀸 𑀅𑀯𑀘𑀦𑀁. 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 ‘‘𑀏𑀓𑀢𑁄𑀅𑀯𑀲𑁆𑀲𑀼𑀢𑁂’’𑀢𑀺 (𑀧𑀸𑀘𑀺. 𑁭𑁦𑁧-𑁭𑁦𑁨) 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀧𑀸𑀴𑀺𑀬𑀸, ‘‘𑀅𑀦𑀯𑀲𑁆𑀲𑀼𑀢𑁄𑀢𑀺 𑀚𑀸𑀦𑀦𑁆𑀢𑀻 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 (𑀧𑀸𑀘𑀺. 𑁭𑁦𑁩) 𑀇𑀫𑀸𑀬 𑀘 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀬𑀤𑀺 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀅𑀯𑀲𑁆𑀲𑀼𑀢𑀪𑀸𑀯𑁄 𑀦𑀧𑁆𑀧𑀫𑀸𑀡𑀁, 𑀓𑀺𑀁 ‘‘𑀅𑀦𑀯𑀲𑁆𑀲𑀼𑀢𑁄𑀢𑀺 𑀚𑀸𑀦𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. ‘‘𑀅𑀦𑀸𑀧𑀢𑁆𑀢𑀺 𑀉𑀪𑁄 𑀅𑀦𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀅𑀦𑀯𑀲𑁆𑀲𑀼𑀢𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼 𑀩𑀳𑀽𑀲𑀼 𑀣𑀼𑀮𑁆𑀮𑀘𑁆𑀘𑀬𑀘𑀬𑁄 𑀣𑀼𑀮𑁆𑀮𑀘𑁆𑀘𑀬𑀸𑀦𑀁 𑀲𑀫𑀽𑀳𑁄 𑀲𑀺𑀬𑀸, 𑀧𑀬𑁄𑀕𑀕𑀡𑀦𑀸𑀬 𑀩𑀳𑀽𑀦𑀺 𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁦𑁮𑁧. 𑀲𑀫𑁆𑀪𑀯𑁂, 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀪𑀯𑀢𑀻𑀢𑀺 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦’’𑀦𑁆𑀢𑀺 𑀇𑀤𑀁 𑀯𑀺𑀲𑁂𑀲𑀦𑀁 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀢𑁄𑀅𑀯𑀲𑁆𑀲𑀼𑀢𑁂 𑀲𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀁 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀳𑀢𑁆𑀣𑀢𑁄 𑀘 𑀧𑀡𑁆𑀟𑀓𑀸𑀦𑀁 𑀳𑀢𑁆𑀣𑀢𑁄 𑀘 𑀢𑀣𑀸𑀢𑀺 𑀬𑁄𑀚𑀦𑀸. 𑀢𑀣𑀸-𑀲𑀤𑁆𑀤𑁂𑀦𑁂𑀢𑁆𑀣 ‘‘𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀤𑀼𑀓𑁆𑀓𑀝𑀁. 𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀘𑀬𑁄 𑀲𑀺𑀬𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺.

𑁨𑁦𑁮𑁨. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀬𑀓𑁆𑀔𑀸𑀤𑀻𑀲𑀼. 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 𑀲𑀢𑀺 𑀆𑀫𑀺𑀲𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑁂𑀲𑀼 𑀏𑀓𑀢𑁄, 𑀉𑀪𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁂𑀲𑀼. 𑀉𑀤𑀓𑁂 𑀤𑀦𑁆𑀢𑀓𑀝𑁆𑀞𑀓𑁂𑀢𑀺 ¶ 𑀉𑀤𑀓𑀲𑁆𑀲, 𑀤𑀦𑁆𑀢𑀓𑀝𑁆𑀞𑀲𑁆𑀲 𑀘 𑀕𑀳𑀡𑁂. 𑀧𑀭𑀺𑀪𑁄𑀕𑁂 𑀘𑀸𑀢𑀺 𑀧𑀝𑀺𑀕𑁆𑀕𑀳𑀡𑁂 𑀘𑁂𑀯 𑀧𑀭𑀺𑀪𑁄𑀕𑁂 𑀘.

𑁨𑁦𑁮𑁩-𑁪. 𑀉𑀪𑀬𑀸𑀯𑀲𑁆𑀲𑀼𑀢𑀸𑀪𑀸𑀯𑁂𑀢𑀺 𑀪𑀺𑀓𑁆𑀔𑀼𑀦𑀺𑀬𑀸, 𑀧𑀼𑀕𑁆𑀕𑀮𑀲𑁆𑀲 𑀘 𑀉𑀪𑀺𑀦𑁆𑀦𑀁 𑀅𑀯𑀲𑁆𑀲𑀼𑀢𑀢𑁆𑀢𑁂 𑀅𑀲𑀢𑀺 𑀬𑀤𑀺 𑀆𑀫𑀺𑀲𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 ¶ , 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄. 𑀦 𑀘 𑀅𑀯𑀲𑁆𑀲𑀼𑀢𑁄𑀢𑀺 𑀦𑁂𑀯 𑀅𑀯𑀲𑁆𑀲𑀼𑀢𑁄𑀢𑀺 𑀜𑀢𑁆𑀯𑀸. 𑀬𑀸 𑀧𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲𑀸 𑀘 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. ‘‘𑀬𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲𑀸 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸𑀯 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀘𑀫𑀁.

𑁨𑁦𑁮𑁫. 𑀉𑀬𑁆𑀬𑁄𑀚𑀦𑁂𑀢𑀺 ‘‘𑀓𑀺𑀁 𑀢𑁂 𑀅𑀬𑁆𑀬𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸, 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸, 𑀇𑀗𑁆𑀖 𑀅𑀬𑁆𑀬𑁂 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸, 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 (𑀧𑀸𑀘𑀺. 𑁭𑁦𑁫) 𑀯𑀼𑀢𑁆𑀢𑀦𑀬𑁂𑀦 𑀦𑀺𑀬𑁄𑀚𑀦𑁂. 𑀏𑀓𑀺𑀲𑁆𑀲𑀸𑀢𑀺 𑀉𑀬𑁆𑀬𑁄𑀚𑀺𑀓𑀸𑀬. 𑀇𑀢𑀭𑀺𑀲𑁆𑀲𑀸𑀢𑀺 𑀉𑀬𑁆𑀬𑁄𑀚𑀺𑀢𑀸𑀬. 𑀧𑀝𑀺𑀕𑁆𑀕𑀳𑁂𑀢𑀺 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑁂. 𑀤𑀼𑀓𑁆𑀓𑀝𑀸𑀦𑀺 𑀘𑀸𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀪𑁄𑀕𑁂𑀲𑀽𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀆𑀫𑀺𑀲𑀲𑁆𑀲 𑀧𑀭𑀺𑀪𑁄𑀕𑁂𑀲𑀼. 𑀣𑀼𑀮𑁆𑀮𑀘𑁆𑀘𑀬𑀕𑀡𑁄 𑀲𑀺𑀬𑀸𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀣𑀼𑀮𑁆𑀮𑀘𑁆𑀘𑀬𑀲𑀫𑀽𑀳𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁨𑁦𑁮𑁬-𑁭. 𑀪𑁄𑀚𑀦𑀲𑁆𑀲𑀸𑀯𑀲𑀸𑀦𑀲𑁆𑀫𑀺𑀦𑁆𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀪𑁄𑀚𑀦𑀧𑀭𑀺𑀬𑀦𑁆𑀢𑁂. 𑀲𑀗𑁆𑀖𑀸𑀤𑀺𑀲𑁂𑀲𑀢𑀸𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀳𑁄𑀢𑀺.

𑀬𑀓𑁆𑀔𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑁂𑀢𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀸 𑀕𑀳𑀺𑀢𑀸. 𑀢𑀣𑁂𑀯 𑀧𑀼𑀭𑀺𑀲𑀲𑁆𑀲 𑀘𑀸𑀢𑀺 𑀅𑀯𑀲𑁆𑀲𑀼𑀢𑀲𑁆𑀲 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲. ‘‘𑀕𑀳𑀡𑁂 𑀉𑀬𑁆𑀬𑁄𑀚𑀦𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀕𑀳𑀡𑁂𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀕𑀳𑀡𑁂. 𑀉𑀬𑁆𑀬𑁄𑀚𑀦𑁂𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀅𑀢𑁆𑀢𑀦𑁄 𑀉𑀬𑁆𑀬𑁄𑀚𑀦𑁂. 𑀢𑁂𑀲𑀦𑁆𑀢𑀺 𑀉𑀤𑀓𑀤𑀦𑁆𑀢𑀧𑁄𑀦𑀸𑀦𑀁. 𑀧𑀭𑀺𑀪𑁄𑀕𑁂𑀢𑀺 𑀉𑀬𑁆𑀬𑁄𑀚𑀺𑀢𑀸𑀬 𑀧𑀭𑀺𑀪𑀼𑀜𑁆𑀚𑀦𑁂. 𑀤𑀼𑀓𑁆𑀓𑀝𑀁 𑀧𑀭𑀺𑀓𑀺𑀢𑁆𑀢𑀺𑀢𑀦𑁆𑀢𑀺 𑀉𑀬𑁆𑀬𑁄𑀚𑀺𑀓𑀸𑀬 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑁨𑁦𑁮𑁮. 𑀲𑁂𑀲𑀲𑁆𑀲𑀸𑀢𑀺 ¶ ¶ 𑀉𑀤𑀓𑀤𑀦𑁆𑀢𑀧𑁄𑀦𑀢𑁄 𑀅𑀜𑁆𑀜𑀲𑁆𑀲 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀫𑀺𑀲𑀲𑁆𑀲. ‘‘𑀕𑀳𑀡𑀼𑀬𑁆𑀬𑁄𑀚𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁦𑁮𑁯-𑁯𑁦. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀜𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀺, ‘‘𑀓𑀼𑀧𑀺𑀢𑀸 𑀯𑀸 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀓𑀼𑀮𑀸𑀦𑀼𑀤𑁆𑀤𑀬𑀢𑀸 𑀯𑀸𑀧𑀺 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀢𑀲𑁆𑀲𑀸 𑀘 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀅𑀦𑀸𑀧𑀢𑁆𑀢𑀺 ‘𑀅𑀦𑀯𑀲𑁆𑀲𑀼𑀢𑁄’𑀢𑀺 𑀚𑀸𑀦𑀦𑁆𑀢𑀻 𑀉𑀬𑁆𑀬𑁄𑀚𑁂𑀢𑀺, ‘𑀓𑀼𑀧𑀺𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’𑀢𑀺 𑀉𑀬𑁆𑀬𑁄𑀚𑁂𑀢𑀻’’𑀢𑀺𑀆𑀤𑀺 (𑀧𑀸𑀘𑀺. 𑁭𑁦𑁮).

𑀙𑀝𑁆𑀞𑀁.

𑁨𑁦𑁯𑁧. 𑀲𑀢𑁆𑀢𑀫𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀬𑁆𑀬 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀧𑀸𑀘𑀺. 𑁭𑁧𑁦) 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀝𑁆𑀞𑀫𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀧𑀸𑀘𑀺. 𑁭𑁧𑁬) 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀜𑁆𑀘.

𑀲𑀢𑁆𑀢𑀫𑀝𑁆𑀞𑀫𑀸𑀦𑀺.

𑁨𑁦𑁯𑁨. 𑀦𑀯𑀫𑁂𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀧𑀦𑁂𑀯 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀻’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁭𑁨𑁨) 𑀘. 𑀤𑀲𑀫𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀬𑁆𑀬 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂 𑀢𑀼𑀫𑁆𑀳𑁂 𑀯𑀺𑀳𑀭𑀣, 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣𑀸’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁭𑁨𑁮) 𑀘.

𑀦𑀯𑀫𑀤𑀲𑀫𑀸𑀦𑀺.

𑁨𑁦𑁯𑁩. 𑀢𑁂𑀦 𑀫𑀳𑀸𑀯𑀺𑀪𑀗𑁆𑀕𑀸𑀕𑀢𑁂𑀦 𑀤𑀼𑀝𑁆𑀞𑀤𑁄𑀲𑀤𑁆𑀯𑀬𑁂𑀦 𑀘 𑀢𑀢𑁆𑀣𑁂𑀯 𑀆𑀕𑀢𑁂𑀦 𑀢𑁂𑀦 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀲𑀤𑁆𑀥𑀺𑀁 𑀇𑀥𑀸𑀕𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀏𑀯𑀁 𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸 ¶ . 𑀇𑀢𑁄 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀢𑁄 𑀘𑀢𑁆𑀢𑀸𑀭𑀺 𑀬𑀸𑀯𑀢𑀢𑀺𑀬𑀓𑀸𑀦𑀺 𑀢𑀢𑁄 𑀫𑀳𑀸𑀯𑀺𑀪𑀗𑁆𑀕𑀢𑁄 𑀘𑀢𑁆𑀢𑀸𑀭𑀺 𑀬𑀸𑀯𑀢𑀢𑀺𑀬𑀓𑀸𑀦𑀻𑀢𑀺 ¶ 𑀏𑀯𑀁 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸𑀦𑀺, 𑀧𑀼𑀭𑀺𑀫𑀸𑀦𑀺 𑀦𑀯 𑀘𑀸𑀢𑀺 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀬𑀸 𑀘𑁂𑀢𑁆𑀣 𑀤𑀲𑁆𑀲𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁦𑁯𑁪-𑁫. 𑀏𑀯𑀁 𑀲𑀢𑁆𑀢𑀭𑀲𑀲𑀗𑁆𑀖𑀸𑀤𑀺𑀲𑁂𑀲𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢’’𑀦𑁆𑀢𑀺𑀆𑀤𑀺. ‘‘𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑁂 𑀧𑀢𑁆𑀢𑁂 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀢𑀲𑁆𑀲𑀸’’𑀢𑀺 𑀢-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀪𑀺𑀓𑁆𑀔𑀼𑀦𑀻𑀢𑀺 𑀏𑀢𑁆𑀣 ‘‘𑀬𑀸’’𑀢𑀺 𑀮𑀩𑁆𑀪𑀢𑀺. 𑀧𑀢𑁆𑀢𑀲𑀦𑁆𑀦𑀺𑀥𑀺𑀓𑀸𑀭𑀡𑀸𑀢𑀺 𑀅𑀦𑀥𑀺𑀝𑁆𑀞𑀸𑀬, 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀏𑀓𑀭𑀢𑁆𑀢𑀫𑁆𑀧𑀺 𑀧𑀢𑁆𑀢𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀓𑀸𑀭𑀡𑀸.

𑁨𑁦𑁯𑁬. 𑀇𑀥 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑁂𑀲𑁄 𑀲𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄 𑀓𑀣𑀸𑀫𑀕𑁆𑀕𑁄𑀢𑀺 𑀬𑁄𑀚𑀦𑀸, 𑀅𑀯𑀲𑁂𑀲𑀲𑀩𑁆𑀩𑀯𑀺𑀦𑀺𑀘𑁆𑀙𑀬𑀓𑀣𑀸𑀫𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀢𑀺 𑀫𑀳𑀸𑀯𑀺𑀪𑀗𑁆𑀕𑀧𑀞𑀫𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑁂.

𑁨𑁦𑁯𑁭. 𑀯𑀺𑀲𑁂𑀲𑁄𑀯 𑀯𑀺𑀲𑁂𑀲𑀢𑀸.

𑀧𑀞𑀫𑀁.

𑁨𑁦𑁯𑁮. 𑀅𑀓𑀸𑀮𑁂𑀢𑀺 ‘‘𑀅𑀦𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 𑀏𑀓𑀸𑀤𑀲 𑀫𑀸𑀲𑀸, 𑀅𑀢𑁆𑀣𑀢𑀓𑀣𑀺𑀦𑁂 𑀯𑀺𑀳𑀸𑀭𑁂 𑀲𑀢𑁆𑀢 𑀫𑀸𑀲𑀸’’𑀢𑀺 (𑀧𑀸𑀘𑀺. 𑁭𑁪𑁦 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀏𑀯𑀁 ¶ 𑀯𑀼𑀢𑁆𑀢𑁂 𑀅𑀓𑀸𑀮𑁂. 𑀯𑀺𑀓𑀧𑁆𑀧𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀺𑀦𑁆𑀦𑀁 𑀓𑀸𑀮𑁂𑀧𑀺 𑀓𑁂𑀦𑀘𑀻’’𑀢𑀺𑀆𑀤𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀓𑀸𑀮𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀦𑀘𑀺 𑀅𑀓𑀸𑀮𑁂 𑀬𑀁 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀓𑀸𑀮𑁂𑀧𑀺 𑀬𑀁 𑀘𑀻𑀯𑀭𑀁 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀆𑀤𑀺𑀲𑁆𑀲 𑀤𑀸𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽’’𑀢𑀺. 𑀦𑀺𑀬𑀸𑀫𑀺𑀢𑀦𑁆𑀢𑀺 ‘‘𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽’’𑀢𑀺 𑀏𑀯𑀁 𑀯𑀢𑁆𑀯𑀸 𑀤𑀺𑀦𑁆𑀦𑀜𑁆𑀘 ‘‘𑀇𑀤𑀁 𑀕𑀡𑀲𑁆𑀲, 𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀯𑀸 𑀤𑀸𑀢𑀼𑀓𑀸𑀫𑀢𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀜𑁆𑀘 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽’𑀢𑀺 𑀯𑀢𑁆𑀯𑀸 𑀯𑀸 ‘𑀇𑀤𑀁 ¶ 𑀕𑀡𑀲𑁆𑀲, 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’𑀢𑀺 𑀯𑀢𑁆𑀯𑀸 𑀯𑀸 𑀤𑀸𑀢𑀼𑀓𑀫𑁆𑀬𑀢𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁪𑁦).

𑁨𑁦𑁯𑁯. 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀓𑀸𑀮𑀘𑀻𑀯𑀭𑀁.

𑁨𑁧𑁦𑁦. 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀢𑀢𑁄 𑀬𑀁 𑀘𑀻𑀯𑀭𑀁 𑀅𑀢𑁆𑀢𑀦𑀸 𑀯𑀲𑁆𑀲𑀕𑁆𑀕𑁂𑀦 𑀧𑀝𑀺𑀮𑀤𑁆𑀥𑀁. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀓𑀸𑀮𑁂 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀮𑀪𑀺𑀢𑁆𑀯𑀸…𑀧𑁂… 𑀦𑀺𑀬𑁄𑀚𑀬𑁂’’𑀢𑀺. 𑀬𑀣𑀸𑀤𑀸𑀦𑁂 𑀦𑀺𑀬𑁄𑀚𑀬𑁂𑀢𑀺 𑀬𑀣𑀸 𑀤𑀸𑀬𑀓𑁂𑀦 𑀤𑀺𑀦𑁆𑀦𑀁, 𑀢𑀣𑀸 𑀉𑀧𑀦𑁂𑀢𑀩𑁆𑀩𑀁, 𑀅𑀓𑀸𑀮𑀘𑀻𑀯𑀭𑀧𑀓𑁆𑀔𑁂𑀬𑁂𑀯 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁧𑁦𑁧. 𑀢𑀲𑁆𑀲𑀸𑀢𑀺 ‘‘𑀬𑀣𑀸𑀤𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺 𑀯𑀘𑀦𑀲𑁆𑀲. 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀫𑁆𑀧𑀺 𑀢𑀁 𑀧𑀼𑀦 𑀲𑁂𑀯𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀻𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄𑀢𑀺 𑀬𑁄𑀚𑀦𑀸.

𑁨𑁧𑁦𑁨. 𑀓𑀸𑀮𑀘𑀻𑀯𑀭𑁂 𑀅𑀓𑀸𑀮𑀯𑀢𑁆𑀣𑀲𑀜𑁆𑀜𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀉𑀪𑀬𑀢𑁆𑀣𑀧𑀻𑀢𑀺 𑀅𑀓𑀸𑀮𑀘𑀻𑀯𑀭𑁂𑀧𑀺 𑀓𑀸𑀮𑀘𑀻𑀯𑀭𑁂𑀧𑀺. 𑀯𑁂𑀫𑀢𑀺𑀓𑀸𑀬 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁧𑁦𑁩. 𑀉𑀪𑀬𑀢𑁆𑀣𑀧𑀺 ¶ 𑀘𑀻𑀯𑀭𑁂 𑀓𑀸𑀮𑀘𑀻𑀯𑀭𑁂 𑀘 𑀅𑀓𑀸𑀮𑀘𑀻𑀯𑀭𑁂 𑀘𑀸𑀢𑀺 𑀉𑀪𑀬𑀘𑀻𑀯𑀭𑁂𑀧𑀺 𑀓𑀸𑀮𑀘𑀻𑀯𑀭𑀲𑀜𑁆𑀜𑀸𑀬 𑀪𑀸𑀚𑀸𑀧𑁂𑀦𑁆𑀢𑀺𑀬𑀸 𑀦𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀢𑁆𑀢𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀺𑀲𑀫𑀼𑀝𑁆𑀞𑀸𑀦𑀢𑀸’’𑀢𑀺.

𑀤𑀼𑀢𑀺𑀬𑀁.

𑁨𑁧𑁦𑁪. 𑀲𑀘𑁂 𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀺 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 ‘‘𑀢𑀼𑀬𑁆𑀳𑀁 𑀘𑀻𑀯𑀭𑀁 𑀢𑁆𑀯𑀫𑁂𑀯 𑀕𑀡𑁆𑀳, 𑀫𑀬𑁆𑀳𑀁 𑀘𑀻𑀯𑀭𑀁 𑀤𑁂𑀳𑀻’’𑀢𑀺 𑀏𑀯𑀁 𑀬𑀤𑀺 𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀺. 𑀏𑀢𑁆𑀣 ‘‘𑀲𑀓𑀲𑀜𑁆𑀜𑀸𑀬𑀸’’𑀢𑀺 𑀲𑁂𑀲𑁄. 𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀼𑀓𑁆𑀓𑀝𑀜𑁆𑀘 𑀯𑀼𑀢𑁆𑀢𑀁, 𑀇𑀢𑀭𑀣𑀸 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

𑁨𑁧𑁦𑁫. 𑀇𑀢𑀭𑁂𑀲𑀽𑀢𑀺 𑀅𑀩𑀦𑁆𑀥𑀦𑀜𑁆𑀘 𑀆𑀡𑀢𑁆𑀢𑀺𑀩𑀳𑀼𑀢𑁆𑀢𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀯𑀢𑁆𑀣𑀽𑀦𑀁 𑀧𑀬𑁄𑀕𑀲𑁆𑀲 𑀯𑀲𑀸 𑀲𑀺𑀬𑀸’’𑀢𑀺.

𑁨𑁧𑁦𑁬. ‘‘𑀢𑀺𑀓𑀧𑀸𑀘𑀺𑀢𑁆𑀢𑀻’’𑀢𑀺 ¶ 𑀇𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀉𑀤𑁆𑀤𑀺𑀝𑁆𑀞𑀸’’𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁, 𑀉𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀢𑀺 𑀏𑀢𑀸𑀲𑀁 𑀯𑀲𑁂𑀦 𑀢𑀺𑀓𑀧𑀸𑀘𑀺𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂. 𑀇𑀢𑀭𑀺𑀲𑁆𑀲𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬. 𑀢𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀯𑁂𑀫𑀢𑀺𑀓𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀦𑀁 𑀯𑀲𑁂𑀦 𑀢𑀺𑀓𑀤𑀼𑀓𑁆𑀓𑀝𑀁 𑀉𑀤𑁆𑀤𑀺𑀝𑁆𑀞𑀁.

𑁨𑁧𑁦𑁭. 𑀢𑀸𑀬 𑀯𑀸 𑀤𑀻𑀬𑀫𑀸𑀦𑀁 𑀢𑀸𑀬 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀝𑁆𑀞𑀸𑀬 𑀯𑀸 𑀢𑀼𑀝𑁆𑀞𑀸𑀬 𑀯𑀸 𑀤𑀻𑀬𑀫𑀸𑀦𑀁 𑀕𑀡𑁆𑀳𑀦𑁆𑀢𑀺𑀬𑀸, 𑀢𑀲𑁆𑀲𑀸 𑀯𑀺𑀲𑁆𑀲𑀸𑀲𑀫𑁂𑀯 𑀯𑀸 𑀕𑀡𑁆𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀺𑀲𑀫𑀼𑀝𑁆𑀞𑀸𑀦𑀢𑀸 𑀫𑀢𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀢𑀢𑀺𑀬𑀁.

𑁨𑁧𑁦𑁮. 𑀬𑀸 ¶ 𑀧𑀦 𑀪𑀺𑀓𑁆𑀔𑀼𑀦𑀻 ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀅𑀨𑀸𑀲𑀼, 𑀓𑀺𑀁 𑀆𑀳𑀭𑀻𑀬𑀢𑀽’’𑀢𑀺 𑀯𑀼𑀢𑁆𑀢𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀆𑀳𑀝𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀜𑁆𑀘 𑀅𑀜𑁆𑀜𑀜𑁆𑀘 𑀕𑀡𑁆𑀳𑀺𑀢𑀼𑀓𑀸𑀫𑀸 𑀲𑀘𑁂 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀲𑁆𑀲𑀸 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁, 𑀮𑀸𑀪𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀲𑀸𑀥𑀺𑀧𑁆𑀧𑀸𑀬𑀬𑁄𑀚𑀦𑀸. 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁.

𑁨𑁧𑁦𑁯-𑁧𑁧. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀜𑁆𑀜𑁂 𑀅𑀜𑁆𑀜𑀲𑀜𑁆𑀜𑀸, 𑀅𑀜𑁆𑀜𑁂 𑀯𑁂𑀫𑀢𑀺𑀓𑀸, 𑀅𑀜𑁆𑀜𑁂 𑀅𑀦𑀜𑁆𑀜𑀲𑀜𑁆𑀜𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁭𑁫𑁧) 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀅𑀦𑀜𑁆𑀜𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀅𑀦𑀜𑁆𑀜𑁂 𑀅𑀜𑁆𑀜𑀲𑀜𑁆𑀜𑀸𑀬, 𑀯𑁂𑀫𑀢𑀺𑀓𑀸𑀬 𑀘 𑀯𑀲𑁂𑀦 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. ‘‘𑀅𑀦𑀜𑁆𑀜𑁂𑀦𑀜𑁆𑀜𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑁄 𑀤𑀲𑁆𑀲𑀺𑀢𑁄. ‘‘𑀅𑀦𑀜𑁆𑀜𑁂 𑀅𑀦𑀜𑁆𑀜𑀲𑀜𑁆𑀜𑀸𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀦𑀜𑁆𑀜𑁂 𑀅𑀦𑀜𑁆𑀜𑀲𑀜𑁆𑀜𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀫𑀺𑀁 𑀧𑀞𑀫𑀯𑀺𑀜𑁆𑀜𑀸𑀧𑀺𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀯𑀸 𑀢𑀜𑁆𑀜𑁂𑀯 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑁂𑀦𑀧𑀺 𑀅𑀢𑁆𑀣𑁂 𑀲𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀧𑀞𑀫𑀁 𑀲𑀧𑁆𑀧𑀺 𑀯𑀺𑀜𑁆𑀜𑀢𑁆𑀢𑀁, ‘‘𑀆𑀫𑀓𑀫𑀁𑀲𑀁 𑀧𑀘𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑁂𑀚𑁆𑀚𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀮𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀢𑁄 ‘‘𑀢𑁂𑀮𑁂𑀦𑀸𑀧𑀺 𑀫𑁂 𑀅𑀢𑁆𑀣𑁄’’𑀢𑀺 𑀏𑀯𑀁 𑀅𑀜𑁆𑀜𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀻𑀢𑀺. 𑀆𑀦𑀺𑀲𑀁𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑀳𑀸𑀧𑀡𑀲𑁆𑀲 ¶ 𑀲𑀧𑁆𑀧𑀺 𑀆𑀪𑀢𑀁 𑀳𑁄𑀢𑀺, 𑀇𑀫𑀺𑀦𑀸 𑀫𑀽𑀮𑁂𑀦 𑀤𑀺𑀕𑀼𑀡𑀁 𑀢𑁂𑀮𑀁 𑀮𑀩𑁆𑀪𑀢𑀺, 𑀢𑁂𑀮𑁂𑀦𑀸𑀧𑀺 𑀘 𑀇𑀤𑀁 𑀓𑀺𑀘𑁆𑀘𑀁 𑀦𑀺𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀮𑀫𑀸𑀳𑀭𑀸𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑀻𑀢𑀺.

𑀘𑀢𑀼𑀢𑁆𑀣𑀁.

𑁨𑁧𑁧𑁨-𑁩. 𑀧𑀼𑀩𑁆𑀩𑀁 ¶ 𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸, 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 ‘‘𑀇𑀤𑀁 𑀦𑀸𑀫 𑀆𑀳𑀭𑀸’’𑀢𑀺 𑀧𑀼𑀩𑁆𑀩𑀁 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀏𑀢𑁆𑀣 ‘‘𑀯𑀼𑀢𑁆𑀢𑁂’’𑀢𑀺 𑀲𑁂𑀲𑁄. 𑀥𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀥𑀜𑁆𑀜𑀁, 𑀅𑀢𑁆𑀢𑀦𑁄 𑀥𑀦𑁂𑀦 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀢𑁂𑀮𑀸𑀤𑀺 𑀇𑀥 ‘‘𑀥𑀜𑁆𑀜’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀯𑀻𑀳𑀸𑀤𑀺. 𑀏𑀯𑀁 𑀯𑀼𑀢𑁆𑀢𑁂 𑀫𑀬𑁆𑀳𑀁 𑀅𑀜𑁆𑀜𑀁 𑀥𑀜𑁆𑀜𑀁 𑀆𑀦𑁂𑀢𑁆𑀯𑀸 𑀤𑁂𑀢𑀺 𑀇𑀢𑀺 𑀲𑀜𑁆𑀜𑀸𑀬 𑀧𑀘𑁆𑀙𑀸 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 𑀬𑁄𑀚𑀦𑀸, 𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄, 𑀅𑀜𑁆𑀜𑀁 𑀆𑀳𑀭𑀸𑀢𑀺 𑀯𑀼𑀢𑁆𑀢𑁂 𑀇𑀤𑀜𑁆𑀘 𑀤𑀢𑁆𑀯𑀸 𑀅𑀜𑁆𑀜𑀜𑁆𑀘 𑀆𑀳𑀭𑀺𑀢𑁆𑀯𑀸 𑀤𑁂𑀢𑀻𑀢𑀺 𑀲𑀜𑁆𑀜𑀸𑀬 ‘‘𑀦 𑀫𑁂 𑀇𑀤𑀁 𑀭𑀼𑀘𑁆𑀘𑀢𑀺, 𑀅𑀜𑁆𑀜𑀁 𑀆𑀳𑀭𑀸’’𑀢𑀺 𑀧𑀘𑁆𑀙𑀸 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀸𑀧𑀦𑀧𑀬𑁄𑀕𑁂𑀦𑀸𑀢𑀺 𑀆𑀡𑀢𑁆𑀢𑀸𑀬 𑀘𑁂𑀢𑀸𑀧𑀦𑀯𑀲𑁂𑀦. 𑀫𑀽𑀮𑀝𑁆𑀞𑀸𑀬𑀸𑀢𑀺 𑀆𑀡𑀸𑀧𑀺𑀓𑀸𑀬. 𑀢𑁂𑀦 𑀘 𑀅𑀜𑁆𑀜𑁂𑀦 𑀯𑀸 𑀫𑀽𑀮𑁂𑀦 𑀆𑀪𑀢𑀁 𑀳𑁄𑀢𑀼, 𑀢𑀲𑁆𑀲 𑀮𑀸𑀪𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁧𑁧𑁪. 𑀲𑁂𑀲𑀦𑁆𑀢𑀺 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀓𑀁 𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀁.

𑀧𑀜𑁆𑀘𑀫𑀁.

𑁨𑁧𑁧𑁫-𑁬. 𑀅𑀜𑁆𑀜𑀤𑀢𑁆𑀣𑀸𑀬 𑀤𑀺𑀦𑁆𑀦𑁂𑀦𑀸𑀢𑀺 𑀉𑀧𑀸𑀲𑀓𑁂𑀳𑀺 ‘‘𑀏𑀯𑀭𑀽𑀧𑀁 𑀕𑀳𑁂𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦. ‘‘𑀲𑀗𑁆𑀖𑀺𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀓𑁆𑀔𑀸𑀭𑁂𑀦𑀸𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑁂𑀦. 𑀲𑀗𑁆𑀖𑀺𑀓𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀢𑀲𑁆𑀲𑀸𑀢𑀺 𑀬𑀸𑀬 𑀘𑁂𑀢𑀸𑀧𑀺𑀢𑀁. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀏𑀢𑁆𑀣 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀁 𑀬𑀣𑀸𑀤𑀸𑀦𑁂 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸𑀳 ‘‘𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸 𑀬𑀣𑀸𑀤𑀸𑀦𑁂 𑀉𑀧𑀦𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁭𑁬𑁧). 𑀇𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀥𑀺𑀧𑁆𑀧𑀸𑀬𑀫𑁂𑀯. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. ‘‘𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀅𑀜𑁆𑀜𑀤𑀢𑁆𑀣𑀺𑀓𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀦𑀺𑀤𑁆𑀤𑀺𑀝𑁆𑀞𑀁 ¶ 𑀤𑁆𑀯𑀺𑀓𑀤𑀼𑀓𑁆𑀓𑀝’’𑀦𑁆𑀢𑀺. 𑀇𑀫𑀺𑀦𑀸 𑀘 ‘‘𑀅𑀜𑁆𑀜𑀤𑀢𑁆𑀣𑀺𑀓𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀫𑁂𑀯. ‘‘𑀅𑀜𑁆𑀜𑀤𑀢𑁆𑀣𑀺𑀓𑁂 𑀅𑀜𑁆𑀜𑀤𑀢𑁆𑀣𑀺𑀓𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀜𑁆𑀜𑀤𑀢𑁆𑀣𑀺𑀓𑀲𑀜𑁆𑀜𑀸 𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁭𑁬𑁧) 𑀳𑀺 𑀯𑀼𑀢𑁆𑀢𑀁.

𑁨𑁧𑁧𑁭. 𑀲𑁂𑀲𑀓𑀦𑁆𑀢𑀺 ¶ 𑀬𑀤𑀢𑁆𑀣𑀸𑀬 𑀤𑀺𑀦𑁆𑀦𑀁, 𑀢𑀁 𑀘𑁂𑀢𑀸𑀧𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀫𑀽𑀮𑀁 𑀅𑀜𑁆𑀜𑀤𑀢𑁆𑀣𑀸𑀬 𑀉𑀧𑀦𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀫𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂𑀳𑀺 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁, 𑀅𑀫𑁆𑀳𑀸𑀓𑀜𑁆𑀘 𑀘𑀻𑀯𑀭𑀁 𑀲𑀁𑀯𑀺𑀚𑁆𑀚𑀢𑀺, 𑀢𑁂𑀮𑀸𑀤𑀻𑀳𑀺 𑀧𑀦 𑀅𑀢𑁆𑀣𑁄’’𑀢𑀺 𑀏𑀯𑀁 𑀲𑀸𑀫𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸. 𑀢𑀦𑁆𑀢𑀺 𑀢𑀁 𑀘𑁂𑀢𑀸𑀧𑀦𑁆𑀦𑀁. 𑀆𑀧𑀤𑀸𑀲𑀽𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀳𑀸𑀭𑀁 𑀧𑀳𑀸𑀬 𑀕𑀫𑀦𑀸𑀭𑀳𑀫𑀼𑀧𑀤𑁆𑀤𑀯𑁄 𑀕𑀳𑀺𑀢𑁄. 𑀬𑀣𑀸𑀳 ‘‘𑀆𑀧𑀤𑀸𑀲𑀽𑀢𑀺 𑀢𑀣𑀸𑀭𑀽𑀧𑁂𑀲𑀼 𑀉𑀧𑀤𑁆𑀤𑀯𑁂𑀲𑀼 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀬𑀁 𑀯𑀸 𑀢𑀁 𑀯𑀸 𑀘𑁂𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁬𑁨).

𑁨𑁧𑁧𑁮. 𑀲𑀬𑀁 𑀬𑀸𑀘𑀺𑀢𑀓𑀁 𑀯𑀺𑀦𑀸𑀢𑀺 ‘‘𑀲𑀁𑀬𑀸𑀘𑀺𑀢𑀓’’𑀦𑁆𑀢𑀺 𑀧𑀤𑀁 𑀯𑀺𑀦𑀸, 𑀏𑀢𑁆𑀢𑀓𑀫𑁂𑀯 𑀯𑀺𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀙𑀝𑁆𑀞𑀲𑀢𑁆𑀢𑀫𑀸𑀦𑀺.

𑁨𑁧𑁧𑁯. 𑀅𑀥𑀺𑀓𑀯𑀘𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀳𑀸𑀚𑀦𑀺𑀓𑀲𑀜𑁆𑀜𑀸𑀘𑀺𑀓𑁂𑀦𑀸’’𑀢𑀺. 𑀧𑀤𑀢𑀸𑀥𑀺𑀓𑀸𑀢𑀺 𑀧𑀤𑀫𑁂𑀯 𑀧𑀤𑀢𑀸. 𑀫𑀳𑀸𑀚𑀦𑀺𑀓𑁂𑀦𑀸𑀢𑀺 𑀕𑀡𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦.

𑁨𑁧𑁨𑁦. 𑀅𑀦𑀦𑁆𑀢𑀭𑀲𑀫𑀸 𑀫𑀢𑀸𑀢𑀺 𑀇𑀥 ‘‘𑀧𑀼𑀕𑁆𑀕𑀮𑀺𑀓𑁂𑀦𑀸’’𑀢𑀺 𑀧𑀤𑀁 𑀯𑀺𑀦𑀸 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀩𑁆𑀩𑁂 𑀯𑀺𑀦𑀺𑀘𑁆𑀙𑀬𑀸 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸 𑀫𑀢𑀸𑀢𑀺 𑀅𑀢𑁆𑀣𑁄. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀤𑀢𑁆𑀣𑀺𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦 𑀧𑀼𑀕𑁆𑀕𑀮𑀺𑀓𑁂𑀦𑀸’’𑀢𑀺 𑀳𑀺 ¶ 𑀲𑀺𑀓𑁆𑀔𑀸𑀧𑀤𑀁. 𑀧𑀼𑀕𑁆𑀕𑀮𑀺𑀓𑁂𑀦𑀸𑀢𑀺 𑀏𑀓𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀘𑁆𑀘𑀢𑁆𑀢𑁂𑀦. ‘‘𑀓𑀺𑀜𑁆𑀘𑀺𑀧𑀻’’𑀢𑀺 𑀮𑀺𑀔𑀦𑁆𑀢𑀺. ‘‘𑀓𑁄𑀘𑀺𑀧𑀻’’𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄 ‘‘𑀯𑀺𑀲𑁂𑀲𑁄’’𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀸.

𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺.

𑀧𑀞𑀫𑁄 𑀯𑀕𑁆𑀕𑁄.

𑁨𑁧𑁨𑁧-𑁨. 𑀘𑀢𑁆𑀢𑀸𑀭𑀺 𑀓𑀁𑀲𑀸𑀦𑀺 𑀲𑀫𑀸𑀳𑀝𑀸𑀦𑀺, 𑀘𑀢𑀼𑀦𑁆𑀦𑀁 𑀓𑀁𑀲𑀸𑀦𑀁 𑀲𑀫𑀸𑀳𑀸𑀭𑁄 𑀯𑀸 𑀘𑀢𑀼𑀓𑁆𑀓𑀁𑀲𑀁, 𑀘𑀢𑀼𑀓𑁆𑀓𑀁𑀲𑀢𑁄 𑀅𑀢𑀺𑀭𑁂𑀓𑀁 𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀁, 𑀢𑁂𑀦 𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀕𑁆𑀖𑀦𑀓𑀁 𑀧𑀸𑀯𑀼𑀭𑀡𑀫𑀸𑀳, 𑀉𑀧𑀘𑀸𑀭𑁂𑀦 ‘‘𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀁𑀲𑀧𑀭𑀺𑀫𑀸𑀡𑀁 𑀧𑀦𑁂𑀢𑁆𑀣 𑀲𑀬𑀫𑁂𑀯 𑀯𑀓𑁆𑀔𑀢𑀺 ‘‘𑀓𑀳𑀸𑀧𑀡𑀘𑀢𑀼𑀓𑁆𑀓𑀁 𑀢𑀼, 𑀓𑀁𑀲𑁄 𑀦𑀸𑀫 𑀧𑀯𑀼𑀘𑁆𑀘𑀢𑀻’’𑀢𑀺. 𑀢𑀲𑁆𑀫𑀸 𑀅𑀢𑀺𑀭𑁂𑀓𑀲𑁄𑀴𑀲𑀓𑀳𑀸𑀧𑀡𑀕𑁆𑀖𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀕𑀭𑀼𑀧𑀸𑀯𑀼𑀭𑀡𑀦𑁆𑀢𑀺 𑀲𑀻𑀢𑀓𑀸𑀮𑁂 𑀧𑀸𑀭𑀼𑀧𑀺𑀢𑀩𑁆𑀩𑀧𑀸𑀯𑀼𑀭𑀡𑀁. 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 𑀯𑀺𑀜𑁆𑀜𑀸𑀧𑁂𑀬𑁆𑀬. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 ¶ 𑀲𑀫𑀸𑀳𑀝𑀸𑀦𑀺, 𑀘𑀢𑀼𑀦𑁆𑀦𑀁 𑀯𑀸 𑀲𑀘𑁆𑀘𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀲𑀘𑁆𑀘𑀁, 𑀢𑀁 𑀧𑀓𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀻, 𑀢𑁂𑀦, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀦𑀺𑀤𑁆𑀤𑀺𑀲𑀓𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀧𑀬𑁄𑀕𑁂𑀢𑀺 ‘‘𑀤𑁂𑀳𑀻’’𑀢𑀺 𑀏𑀯𑀁 𑀯𑀺𑀜𑁆𑀜𑀸𑀧𑀦𑀧𑀬𑁄𑀕𑁂. 𑀮𑀸𑀪𑁂𑀢𑀺 𑀧𑀝𑀺𑀮𑀸𑀪𑁂.

𑀘𑀢𑀼𑀦𑁆𑀦𑀁 𑀲𑀫𑀽𑀳𑁄 𑀘𑀢𑀼𑀓𑁆𑀓𑀁, 𑀓𑀳𑀸𑀧𑀡𑀸𑀦𑀁 𑀘𑀢𑀼𑀓𑁆𑀓𑀁 𑀓𑀳𑀸𑀧𑀡𑀘𑀢𑀼𑀓𑁆𑀓𑀁. 𑀓𑀳𑀸𑀧𑀡𑁄 𑀘𑁂𑀢𑁆𑀣 𑀢𑀁𑀢𑀁𑀓𑀸𑀮𑁂, 𑀢𑀁𑀢𑀁𑀧𑀤𑁂𑀲𑁂 𑀘 𑀯𑁄𑀳𑀸𑀭𑀽𑀧𑀕𑁄 𑀕𑀳𑁂𑀢𑀩𑁆𑀩𑁄. 𑀇𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀲𑀸𑀦𑀸𑀧𑀢𑁆𑀢𑀺𑀬𑁄 ‘‘𑀜𑀸𑀢𑀓𑀸𑀦𑀜𑁆𑀘 𑀲𑀦𑁆𑀢𑀓𑁂’’𑀢𑀺 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑁂 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀬𑀤𑀸 𑀬𑁂𑀦 𑀅𑀢𑁆𑀣𑁄, 𑀢𑀤𑀸 𑀢𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀦𑀺𑀘𑁆𑀘𑀧𑀯𑀸𑀭𑀡𑀁 𑀅𑀓𑀢𑁆𑀯𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀺𑀲𑁆𑀫𑀺𑀜𑁆𑀘𑀺 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 ‘‘𑀯𑀤𑁂𑀬𑁆𑀬𑀸𑀣 𑀬𑁂𑀦 𑀅𑀢𑁆𑀣𑁄’’𑀢𑀺 𑀏𑀯𑀁 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑁨𑁧𑁨𑁩-𑁫. 𑀊𑀦𑀓𑀘𑀢𑀼𑀓𑁆𑀓𑀁𑀲𑁂 ¶ 𑀅𑀢𑀺𑀭𑁂𑀓𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀘𑀢𑀼𑀓𑁆𑀓𑀁𑀲𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀊𑀦𑀓𑁂 𑀢𑀼 𑀘𑀢𑀼𑀓𑁆𑀓𑀁𑀲𑁂, 𑀉𑀤𑁆𑀤𑀺𑀝𑁆𑀞𑀁 𑀤𑁆𑀯𑀺𑀓𑀤𑀼𑀓𑁆𑀓𑀝’’𑀦𑁆𑀢𑀺. 𑀇𑀫𑀺𑀦𑀸 ‘‘𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑁂 𑀅𑀢𑀺𑀭𑁂𑀓𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀊𑀦𑀓𑀲𑀜𑁆𑀜𑀸 𑀘𑁂𑀢𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀕𑀭𑀼𑀓𑀦𑁆𑀢𑀺 𑀕𑀭𑀼𑀧𑀸𑀯𑀼𑀭𑀡𑀁. 𑀢𑀤𑀽𑀦𑀁 𑀯𑀸𑀢𑀺 𑀘𑀢𑀼𑀓𑁆𑀓𑀁𑀲𑀢𑁄 𑀊𑀦𑀓𑀁 𑀯𑀸. 𑀜𑀸𑀢𑀓𑀸𑀦𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀧𑀯𑀸𑀭𑀺𑀢𑀸𑀦𑀁 𑀲𑀗𑁆𑀕𑀳𑁄. 𑀬𑀣𑀸𑀳 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀜𑀸𑀢𑀓𑀸𑀦𑀁, 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 (𑀧𑀸𑀘𑀺. 𑁭𑁮𑁭). 𑀏𑀢𑁆𑀣 𑀘 ‘‘𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀫𑁆𑀧𑀻’’𑀢𑀺 𑀯𑀢𑁆𑀢𑀩𑁆𑀩𑀁 ‘‘𑀢𑀤𑀽𑀦𑀁 𑀯𑀸’’𑀢𑀺 𑀇𑀫𑀺𑀦𑀸 𑀘𑀢𑀼𑀓𑁆𑀓𑀁𑀲𑀽𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀧𑁆𑀧𑀫𑁂𑀯 𑀯𑀸’’𑀢𑀺 𑀇𑀫𑀺𑀦𑀸 𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑁂𑀧𑀺 𑀫𑀳𑀕𑁆𑀖𑀢𑀭𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀓𑀸𑀤𑀲𑀫𑀁.

𑁨𑁧𑁨𑁬-𑁭. ‘‘𑀮𑀳𑀼𑀧𑀸𑀯𑀼𑀭𑀡𑀁 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀘𑁂𑀢𑀸𑀧𑁂𑀦𑁆𑀢𑀺𑀬𑀸 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀧𑀭𑀫𑀁 𑀘𑁂𑀢𑀸𑀧𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁭𑁮𑁯) 𑀯𑀘𑀦𑀢𑁄 𑀮𑀳𑀼𑀧𑀸𑀯𑀼𑀭𑀡𑀦𑁆𑀢𑀺 𑀏𑀢𑁆𑀣 ‘‘𑀘𑁂𑀢𑀸𑀧𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀘 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀦𑁆𑀢𑀺 𑀏𑀢𑁆𑀣 ‘‘𑀘𑁂𑀢𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀘 𑀲𑁂𑀲𑁄. 𑀮𑀳𑀼𑀧𑀸𑀯𑀼𑀭𑀡𑀦𑁆𑀢𑀺 𑀉𑀡𑁆𑀳𑀓𑀸𑀮𑁂 𑀧𑀸𑀯𑀼𑀭𑀡𑀁. 𑀢𑀺𑀡𑁆𑀡𑀁 𑀧𑀽𑀭𑀡𑁄 𑀢𑁂𑀬𑁆𑀬𑁄, 𑀅𑀟𑁆𑀠𑁄 𑀢𑁂𑀬𑁆𑀬𑁄 𑀅𑀲𑁆𑀲𑀸𑀢𑀺 𑀅𑀟𑁆𑀠𑀢𑁂𑀬𑁆𑀬𑁄, 𑀅𑀟𑁆𑀠𑀢𑁂𑀬𑁆𑀬𑁄 𑀘 𑀲𑁄 𑀓𑀁𑀲𑁄 𑀘𑀸𑀢𑀺 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑁄, 𑀢𑀁 𑀅𑀕𑁆𑀖𑀢𑀻𑀢𑀺 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀁, 𑀤𑀲𑀓𑀳𑀸𑀧𑀡𑀕𑁆𑀖𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀓𑀢𑁄. 𑀬𑀁 𑀧𑀦 𑀧𑀸𑀯𑀼𑀭𑀡𑀁 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀓𑀁, 𑀢𑀁 𑀮𑀳𑀼𑀧𑀸𑀯𑀼𑀭𑀡𑀁 ¶ . 𑀢𑀢𑁄 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀓𑀢𑁄 𑀮𑀳𑀼𑀧𑀸𑀯𑀼𑀭𑀡𑀢𑁄. 𑀉𑀢𑁆𑀢𑀭𑀺𑀦𑁆𑀢𑀺 𑀅𑀢𑀺𑀭𑁂𑀓𑀁. 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀕𑁆𑀖𑀦𑀓𑀁 𑀬𑀁 𑀧𑀸𑀯𑀼𑀭𑀡𑀁 𑀬𑀸 𑀪𑀺𑀓𑁆𑀔𑀼𑀦𑀻 𑀘𑁂𑀢𑀸𑀧𑁂𑀢𑀺 ¶ , 𑀢𑀲𑁆𑀲 𑀧𑀸𑀯𑀼𑀭𑀡𑀲𑁆𑀲 𑀧𑀝𑀺𑀮𑀸𑀪𑁂 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

‘‘𑀅𑀦𑀦𑁆𑀢𑀭𑀲𑀫𑀁 𑀲𑁂𑀲’’𑀦𑁆𑀢𑀺 𑀇𑀤𑀁 𑀲𑀫𑀢𑁆𑀣𑁂𑀢𑀼𑀫𑀸𑀳 ‘‘𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸’’𑀢𑀺. 𑀯𑀺𑀲𑁂𑀲𑁄𑀬𑁂𑀯 𑀯𑀺𑀲𑁂𑀲𑀢𑀸.

𑀤𑁆𑀯𑀸𑀤𑀲𑀫𑀁.

𑁨𑁧𑁨𑁮. 𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀆𑀕𑀢𑁂𑀲𑀼 𑀲𑀫𑀢𑀺𑀁𑀲𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀓𑁂𑀲𑀜𑁆𑀘𑀺 𑀅𑀢𑁆𑀢𑀦𑁄 𑀅𑀯𑀘𑀦𑁂 𑀓𑀸𑀭𑀡𑀜𑁆𑀘 𑀅𑀯𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀯𑀼𑀢𑁆𑀢𑀸𑀦𑀁 𑀕𑀳𑀡𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀸𑀥𑀸𑀭𑀡𑀸𑀦𑀻’’𑀢𑀺𑀆𑀤𑀺. 𑀳𑀺 𑀬𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀦𑀺 𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑁂𑀲𑀸𑀦𑀺 𑀇𑀥 𑀯𑀼𑀢𑁆𑀢𑁂𑀳𑀺 𑀅𑀜𑁆𑀜𑀸𑀦𑀺, 𑀢𑀸𑀦𑀺 𑀅𑀝𑁆𑀞𑀸𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘𑁂𑀯 𑀇𑀥 𑀯𑀼𑀢𑁆𑀢𑀲𑀭𑀽𑀧𑀸𑀦𑀺 𑀤𑁆𑀯𑀸𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀘𑁂𑀢𑀺 𑀇𑀘𑁆𑀘𑁂𑀯𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀢𑀺𑀁𑀲𑁂𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀘𑀺𑀢𑁆𑀢𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁧𑁨𑁯-𑁩𑁦. 𑀏𑀯𑀁 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀤𑁆𑀥𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀮𑀲𑀼𑀡’’𑀦𑁆𑀢𑀺𑀆𑀤𑀺. 𑀮𑀲𑀼𑀡𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. ‘‘𑀮𑀲𑀼𑀡𑀁’’𑀇𑀢𑀺 𑀪𑀡𑁆𑀟𑀺𑀓𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁭𑁯𑁩-𑁭𑁯𑁫). 𑀘𑀢𑀼𑀧𑀜𑁆𑀘𑀫𑀺𑀜𑁆𑀚𑀸𑀤𑀺𑀧𑁆𑀧𑀪𑁂𑀤𑀁 𑀪𑀡𑁆𑀟𑀺𑀓𑀁 𑀮𑀲𑀼𑀡𑀁 𑀦𑀸𑀫, 𑀦 𑀢𑀢𑁄 𑀊𑀦𑀁. 𑀢𑁂𑀦𑀸𑀳 ‘‘𑀦 𑀏𑀓𑀤𑁆𑀯𑀺𑀢𑀺𑀫𑀺𑀜𑁆𑀚𑀓’’𑀦𑁆𑀢𑀺. 𑀧𑀓𑁆𑀓𑀮𑀲𑀼𑀡𑀢𑁄, 𑀲𑀻𑀳𑀴𑀤𑀻𑀧𑀲𑀫𑁆𑀪𑀯𑀢𑁄 𑀘 𑀯𑀺𑀲𑁂𑀲𑀫𑀸𑀳 ‘‘𑀆𑀫𑀓𑀁 𑀫𑀸𑀕𑀥𑀁𑀬𑁂𑀯𑀸’’𑀢𑀺. 𑀫𑀕𑀥𑁂𑀲𑀼 𑀚𑀸𑀢𑀁 𑀫𑀸𑀕𑀥𑀁, ‘‘𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀳 ‘‘𑀫𑀕𑀥𑀭𑀝𑁆𑀞𑁂 𑀚𑀸𑀢𑀮𑀲𑀼𑀡𑀫𑁂𑀯 ¶ 𑀳𑀺 𑀇𑀥 𑀮𑀲𑀼𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁫). 𑀢𑀁 ‘‘𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀅𑀚𑁆𑀛𑁄𑀳𑀸𑀭𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀚𑁆𑀛𑁄𑀳𑀸𑀭𑀯𑀲𑁂𑀦𑁂𑀯, 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂’’𑀢𑀺.

𑁨𑁧𑁩𑁧. 𑀢𑀤𑁂𑀯 ¶ 𑀯𑀓𑁆𑀔𑀢𑀺 ‘‘𑀤𑁆𑀯𑁂 𑀢𑀬𑁄’’𑀢𑀺𑀆𑀤𑀺𑀦𑀸. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀲𑀗𑁆𑀔𑀸𑀤𑀺𑀢𑁆𑀯𑀸𑀢𑀺 𑀕𑀮𑀩𑀺𑀮𑀁 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀤𑀦𑁆𑀢𑁂𑀳𑀺 𑀲𑀁𑀘𑀼𑀡𑁆𑀡𑀺𑀬𑀦𑁆𑀢𑀻 𑀔𑀸𑀤𑀺𑀢𑁆𑀯𑀸. 𑀅𑀚𑁆𑀛𑁄𑀳𑀭𑀢𑀺 𑀧𑀭𑀕𑀮𑀁 𑀓𑀭𑁄𑀢𑀺.

𑁨𑁧𑁩𑁨. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑀡𑁆𑀟𑀺𑀓𑀮𑀲𑀼𑀡𑁂. ‘‘𑀫𑀺𑀜𑁆𑀚𑀸𑀦𑀁 𑀕𑀡𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑀕𑀡𑀦𑀸𑀬𑁂𑀯 𑀤𑀻𑀧𑀺𑀢𑀸. 𑀬𑀣𑀸𑀳 ‘‘𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑁂𑀓𑀁 𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺𑀬𑀸 𑀧𑀦 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁫).

𑁨𑁧𑁩𑁩. 𑀲𑀪𑀸𑀯𑀢𑁄 𑀯𑀝𑁆𑀝𑀦𑁆𑀢𑁂𑀯𑀸𑀢𑀺 𑀬𑁄𑀚𑀦𑀸.

𑁨𑁧𑁩𑁫. 𑀬𑀣𑀸𑀯𑀼𑀢𑁆𑀢𑀧𑀮𑀡𑁆𑀟𑀼𑀓𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀸 𑀫𑀺𑀜𑁆𑀚𑀸’’𑀢𑀺𑀆𑀤𑀺. 𑀇𑀥 𑀫𑀺𑀜𑁆𑀚𑀸𑀦𑀁 𑀯𑀲𑁂𑀦𑁂𑀯 𑀦𑀸𑀦𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀡𑁆𑀡𑀯𑀲𑁂𑀦𑀸𑀧𑀺. 𑀬𑀣𑀸𑀳 ‘‘𑀧𑀮𑀡𑁆𑀟𑀼𑀓𑁄 𑀧𑀡𑁆𑀟𑀼𑀯𑀡𑁆𑀡𑁄 𑀳𑁄𑀢𑀺. 𑀪𑀜𑁆𑀚𑀦𑀓𑁄 𑀮𑁄𑀳𑀺𑀢𑀯𑀡𑁆𑀡𑁄. 𑀳𑀭𑀺𑀢𑀓𑁄 𑀳𑀭𑀺𑀢𑀧𑀡𑁆𑀡𑀯𑀡𑁆𑀡𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁭).

𑁨𑁧𑁩𑁬. ‘‘𑀲𑀸𑀴𑀯𑁂 𑀉𑀢𑁆𑀢𑀭𑀺𑀪𑀗𑁆𑀕𑀓𑁂’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀩𑀤𑀭𑀲𑀸𑀴𑀯𑀸𑀤𑀻𑀲𑀽’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁭) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀏𑀢𑁆𑀣 𑀩𑀤𑀭-𑀲𑀤𑁆𑀤𑁄 𑀲𑁂𑀲𑁄. 𑀩𑀤𑀭𑀲𑀸𑀴𑀯𑀁 𑀦𑀸𑀫 𑀩𑀤𑀭𑀨𑀮𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀘𑀼𑀡𑁆𑀡𑁂𑀢𑁆𑀯𑀸 𑀓𑀸𑀢𑀩𑁆𑀩𑀸 𑀔𑀸𑀤𑀦𑀻𑀬𑀯𑀺𑀓𑀢𑀺. 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀺𑀓𑀫𑁆𑀫𑀺𑀓𑀸 𑀕𑀳𑀺𑀢𑀸. 𑀬𑀣𑀸𑀳 ‘‘𑀉𑀫𑁆𑀫𑀢𑁆𑀢𑀺𑀓𑀸𑀬 𑀆𑀤𑀺𑀓𑀫𑁆𑀫𑀺𑀓𑀸𑀬𑀸’’𑀢𑀺 (𑀧𑀸𑀘𑀺. 𑁭𑁯𑁭).

𑀧𑀞𑀫𑀁.

𑁨𑁧𑁩𑁭. 𑀲𑀫𑁆𑀩𑀸𑀥𑁂𑀢𑀺 ¶ 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂. 𑀢𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀧𑀓𑀘𑁆𑀙𑁂𑀲𑀼 𑀫𑀼𑀢𑁆𑀢𑀲𑁆𑀲 𑀓𑀭𑀡𑁂𑀧𑀺 𑀯𑀸’’𑀢𑀺.

𑁨𑁧𑁩𑁮. 𑀅𑀲𑁆𑀲𑀸 𑀢𑀣𑀸 𑀧𑀸𑀘𑀺𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀮𑁄𑀫𑀕𑀡𑀦𑀸𑀬𑀸’’𑀢𑀺 𑀇𑀫𑀺𑀦𑀸 ‘‘𑀧𑀬𑁄𑀕𑀕𑀡𑀦𑀸𑀬𑀸’’𑀢𑀺 𑀇𑀤𑀫𑁂𑀯 𑀲𑀫𑀢𑁆𑀣𑀬𑀢𑀺.

𑁨𑁧𑁩𑁯. 𑀆𑀩𑀸𑀥𑁂𑀢𑀺 𑀓𑀡𑁆𑀟𑀼𑀆𑀤𑀺𑀓𑁂 𑀭𑁄𑀕𑁂. 𑀬𑀣𑀸𑀳 𑁋 ‘‘𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀺𑀆𑀩𑀸𑀥𑀧𑀘𑁆𑀘𑀬𑀸’’𑀢𑀺 ¶ (𑀧𑀸𑀘𑀺. 𑀅𑀝𑁆𑀞. 𑁮𑁦𑁧). 𑀫𑀕𑁆𑀕𑀲𑀁𑀯𑀺𑀥𑀸𑀦𑀲𑀫𑀸 𑀫𑀢𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀤𑀺𑀲𑀸 𑀫𑀢𑀸 𑀜𑀸𑀢𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀁.

𑁨𑁧𑁪𑁦. 𑀧𑀤𑀼𑀫𑀲𑁆𑀲 𑀯𑀸 𑀧𑀼𑀡𑁆𑀟𑀭𑀻𑀓𑀲𑁆𑀲 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀭𑁂𑀦𑀸𑀧𑀺 𑀓𑀸𑀫𑀭𑀸𑀕𑁂𑀦 𑀫𑀼𑀢𑁆𑀢𑀓𑀭𑀡𑀲𑁆𑀲 𑀢𑀮𑀖𑀸𑀢𑀦𑁂 𑀫𑀼𑀢𑁆𑀢𑀓𑀭𑀡𑀫𑁆𑀧𑀺 𑀧𑀳𑀸𑀭𑀤𑀸𑀦𑁂 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑁂𑀲𑀭𑁂𑀦𑀸𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀫𑀳𑀸𑀧𑀤𑀼𑀫𑀧𑀡𑁆𑀡𑁂𑀳𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀬𑀣𑀸𑀳 𑁋 ‘‘𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀢𑁆𑀢𑀁 𑀢𑀸𑀯 𑀫𑀳𑀦𑁆𑀢𑀁, 𑀓𑁂𑀲𑀭𑁂𑀦𑀸𑀧𑀺 𑀧𑀳𑀸𑀭𑀁 𑀤𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁦𑁩).

𑁨𑁧𑁪𑁧. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀼𑀢𑁆𑀢𑀓𑀭𑀡𑀢𑀮𑁂.

𑀢𑀢𑀺𑀬𑀁.

𑁨𑁧𑁪𑁨. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀸𑀫𑀭𑀸𑀕𑀧𑀭𑁂𑀢𑀸 𑀓𑀸𑀫𑀭𑀸𑀕𑁂𑀦 𑀧𑀻𑀴𑀺𑀢𑀸 𑀅𑀢𑁆𑀢𑀦𑁄 𑀩𑁆𑀬𑀜𑁆𑀚𑀦𑁂 𑀫𑀼𑀢𑁆𑀢𑀧𑀣𑁂 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑀺, 𑀦 𑀯𑀝𑁆𑀝𑀢𑀺 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀺-𑀲𑀤𑁆𑀤𑁂𑀦 ‘‘𑀓𑁂𑀲𑀭𑀫𑀢𑁆𑀢𑀫𑁆𑀧𑀺 𑀧𑀦 𑀧𑀯𑁂𑀲𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁧𑁨) 𑀅𑀝𑁆𑀞𑀓𑀣𑀸 𑀉𑀮𑁆𑀮𑀺𑀗𑁆𑀕𑀺𑀢𑀸.

𑁨𑁧𑁪𑁩-𑁪. 𑀬𑀤𑁆𑀬𑁂𑀯𑀁 ¶ ‘‘𑀚𑀢𑀼𑀫𑀝𑁆𑀞𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀁…𑀧𑁂… 𑀚𑀢𑀼𑀫𑀝𑁆𑀞𑀓’’𑀦𑁆𑀢𑀺. 𑀇𑀤𑀁 𑀚𑀢𑀼𑀫𑀝𑁆𑀞𑀓𑀁 𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀺𑀢𑁆𑀯𑀸 𑀥𑁄𑀯𑀺𑀢𑀼𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀫𑀓𑁆𑀔𑀺𑀓𑀸𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 ‘𑀓𑀲𑁆𑀲𑀺𑀤𑀁 𑀓𑀫𑁆𑀫’𑀦𑁆𑀢𑀺. 𑀲𑀸 𑀏𑀯𑀫𑀸𑀳 ‘𑀫𑀬𑁆𑀳𑀺𑀤𑀁 𑀓𑀫𑁆𑀫’𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸, 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀺𑀲𑁆𑀲𑀢𑀻’’𑀢𑀺 (𑀧𑀸𑀘𑀺. 𑁮𑁦𑁬) 𑀆𑀕𑀢𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀢𑀁 𑀯𑀺𑀦𑀸 𑀅𑀜𑁆𑀜𑀲𑁆𑀲 𑀯𑀝𑁆𑀝𑀓𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀢𑀼𑀫𑀝𑁆𑀞𑀓𑀁 𑀦𑀸𑀫 𑀚𑀢𑀼𑀦𑀸 𑀓𑀢𑁄 𑀫𑀝𑁆𑀞𑀤𑀡𑁆𑀟𑀓𑁄.

𑀤𑀡𑁆𑀟𑀦𑁆𑀢𑀺 ¶ 𑀏𑀢𑁆𑀣 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑀓𑀭𑀡𑀁 𑀧𑀯𑁂𑀲𑁂𑀢𑀻’’𑀢𑀺 (𑀧𑀸𑀘𑀺. 𑁮𑁦𑁮). 𑀏𑀢𑀫𑁆𑀧𑀺 𑀘 𑀅𑀢𑀺𑀫𑀳𑀦𑁆𑀢𑀁, 𑀓𑁂𑀲𑀭𑀫𑀢𑁆𑀢𑀫𑁆𑀧𑀺 𑀧𑀦 𑀧𑀯𑁂𑀲𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀏𑀯. 𑀏𑀴𑀸𑀮𑀼𑀓𑀦𑁆𑀢𑀺 𑀓𑀓𑁆𑀓𑀸𑀭𑀺𑀨𑀮𑀁 𑀯𑀸. 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀫𑀼𑀢𑁆𑀢𑀓𑀭𑀡𑁂.

𑁨𑁧𑁪𑁫. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀫𑀼𑀢𑁆𑀢𑀓𑀭𑀡𑀧𑁆𑀧𑀤𑁂𑀲𑁂 𑀚𑀸𑀢𑀯𑀡𑀸𑀤𑀺𑀫𑁆𑀳𑀺 𑀯𑀡𑀝𑁆𑀞𑀸𑀦𑀦𑀺𑀭𑀼𑀧𑀦𑀸𑀤𑀺𑀧𑀘𑁆𑀘𑀬𑀸.

𑀘𑀢𑀼𑀢𑁆𑀣𑀁.

𑁨𑁧𑁪𑁬. 𑀅𑀕𑁆𑀕𑀧𑀩𑁆𑀩𑀤𑁆𑀯𑀬𑀸𑀥𑀺𑀓𑀦𑁆𑀢𑀺 𑀅𑀕𑁆𑀕𑀧𑀩𑁆𑀩𑀤𑁆𑀯𑀬𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀥𑀺𑀓𑀁. 𑀬𑀣𑀸𑀳 ‘‘𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁮𑁧𑁨). 𑀤𑀓𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀺𑀬𑀸𑀢𑀺 𑀫𑀼𑀢𑁆𑀢𑀓𑀭𑀡𑀝𑁆𑀞𑀸𑀦𑁂 𑀥𑁄𑀯𑀦𑀁 𑀓𑀭𑁄𑀦𑁆𑀢𑀺𑀬𑀸. 𑀬𑀣𑀸𑀳 ‘‘𑀉𑀤𑀓𑀲𑀼𑀤𑁆𑀥𑀺𑀓𑀁 𑀦𑀸𑀫 𑀫𑀼𑀢𑁆𑀢𑀓𑀭𑀡𑀲𑁆𑀲 𑀥𑁄𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀘𑀺. 𑁮𑁧𑁨).

𑁨𑁧𑁪𑁭. ‘‘𑀢𑀻𑀡𑀻’’𑀢𑀺 ¶ 𑀇𑀫𑀺𑀦𑀸 𑀏𑀓𑀗𑁆𑀕𑀼𑀮𑀺𑀬𑀸 𑀧𑀩𑁆𑀩𑀤𑁆𑀯𑀬𑀲𑁆𑀲 𑀧𑀯𑁂𑀲𑁂𑀢𑁆𑀯𑀸 𑀥𑁄𑀯𑀦𑁂 𑀤𑁄𑀲𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀤𑀻𑀖𑀢𑁄𑀢𑀺 𑀅𑀗𑁆𑀕𑀼𑀮𑀺𑀬𑀸 𑀤𑀻𑀖𑀢𑁄. 𑀢𑀻𑀡𑀺 𑀧𑀩𑁆𑀩𑀸𑀦𑀺 𑀕𑀫𑁆𑀪𑀻𑀭𑀢𑁄 𑀫𑀼𑀢𑁆𑀢𑀓𑀭𑀡𑁂 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑀲𑀼𑀤𑁆𑀥𑀺𑀁 𑀆𑀤𑀺𑀬𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀪𑀯𑁂𑀢𑀺 𑀬𑁄𑀚𑀦𑀸.

𑁨𑁧𑁪𑁮. 𑀢𑀺𑀲𑁆𑀲𑁄, 𑀘𑀢𑀲𑁆𑀲𑁄 𑀯𑀸 𑀅𑀗𑁆𑀕𑀼𑀮𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀧𑀯𑁂𑀲𑀦𑁂 𑀏𑀓𑀧𑀩𑁆𑀩𑁂𑀧𑀺 𑀧𑀯𑀺𑀝𑁆𑀞𑁂 ‘‘𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫’’𑀦𑁆𑀢𑀺 𑀦𑀺𑀬𑀫𑀺𑀢𑀧𑁆𑀧𑀫𑀸𑀡𑀸𑀢𑀺𑀓𑁆𑀓𑀫𑀢𑁄 𑀆𑀳 ‘‘𑀏𑀓𑀧𑀩𑁆𑀩𑀫𑁆𑀧𑀺 𑀬𑀸 𑀧𑀦𑀸’’𑀢𑀺. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀘𑀢𑀼𑀦𑁆𑀦𑀁 𑀯𑀸𑀧𑀺 𑀅𑀗𑁆𑀕𑀼𑀮𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀯𑀸𑀧𑀺 𑀅𑀗𑁆𑀕𑀼𑀮𑀻𑀦𑀁 𑀏𑀓𑀧𑀩𑁆𑀩𑀫𑁆𑀧𑀺 𑀯𑀺𑀢𑁆𑀣𑀸𑀭𑀢𑁄 𑀧𑀯𑁂𑀲𑁂𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁧𑁪𑁯. 𑀇𑀢𑀻𑀢𑀺 𑀏𑀯𑀁. 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀸𑀢𑀺 𑀕𑀫𑁆𑀪𑀻𑀭𑀧𑀯𑁂𑀲𑀦𑀸𑀤𑀺𑀦𑀸 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦. 𑀅𑀪𑀺𑀩𑁆𑀬𑀢𑁆𑀢𑀢𑀭𑀁 𑀓𑀢𑁆𑀯𑀸𑀢𑀺 𑀲𑀼𑀧𑀸𑀓𑀝𑀢𑀭𑀁 𑀓𑀢𑁆𑀯𑀸. 𑀅𑀬𑀫𑀢𑁆𑀣𑁄𑀢𑀺 ‘‘𑀏𑀓𑀺𑀲𑁆𑀲𑀗𑁆𑀕𑀼𑀮𑀺𑀬𑀸 𑀢𑀻𑀡𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀅𑀬𑀫𑀢𑁆𑀣𑁄.

𑁨𑁧𑁫𑁦. 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀉𑀤𑀓𑀲𑀼𑀤𑁆𑀥𑀺𑀧𑀘𑁆𑀘𑀬𑁂 𑀧𑀦 𑀲𑀢𑀺𑀧𑀺 𑀨𑀲𑁆𑀲𑀲𑀸𑀤𑀺𑀬𑀦𑁂 ¶ 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺. 𑀅𑀥𑀺𑀓𑀫𑁆𑀧𑀻𑀢𑀺 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀢𑁄 𑀅𑀥𑀺𑀓𑀫𑁆𑀧𑀺. 𑀉𑀤𑀓𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀺𑀬𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑁨𑁧𑁫𑁧. 𑀢𑀣𑀸 𑀉𑀤𑀓𑀲𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑀻𑀦𑀁 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀁 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀫𑀁.

𑁨𑁧𑁫𑁨. 𑀪𑀼𑀜𑁆𑀚𑀢𑁄 𑀧𑀦 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑀼𑀜𑁆𑀚𑀢𑁄 𑀪𑀺𑀓𑁆𑀔𑀼𑀲𑁆𑀲. 𑀬𑀣𑀸𑀳 ‘‘𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀘𑀺. 𑁮𑁧𑁭). 𑀧𑀸𑀦𑀻𑀬𑀁 𑀯𑀸 𑀯𑀺𑀥𑀽𑀧𑀦𑀁 ¶ 𑀯𑀸𑀢𑀺 𑀯𑀓𑁆𑀔𑀫𑀸𑀦𑀁 𑀧𑀸𑀦𑀻𑀬𑀁, 𑀩𑀻𑀚𑀦𑀻𑀬𑀜𑁆𑀘. 𑀉𑀧𑀢𑀺𑀝𑁆𑀞𑁂𑀬𑁆𑀬𑀸𑀢𑀺 ‘‘𑀳𑀢𑁆𑀣𑀧𑀸𑀲𑁂 𑀢𑀺𑀝𑁆𑀞𑀢𑀻’’𑀢𑀺 (𑀧𑀸𑀘𑀺. 𑁮𑁧𑁭) 𑀯𑀘𑀦𑀢𑁄 𑀏𑀢𑁆𑀣 𑀉𑀧-𑀲𑀤𑁆𑀤𑁄 𑀳𑀢𑁆𑀣𑀧𑀸𑀲𑀲𑀗𑁆𑀔𑀸𑀢𑀁 𑀲𑀫𑀻𑀧𑀁 𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁧𑁫𑁩. 𑀯𑀢𑁆𑀣𑀓𑁄𑀡𑀸𑀤𑀺 𑀬𑀸 𑀓𑀸𑀘𑀺 ‘‘𑀩𑀻𑀚𑀦𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸, 𑀇𑀫𑀺𑀦𑀸 ‘‘𑀩𑀻𑀚𑀦𑀺𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀬 𑀕𑀳𑀺𑀢𑀘𑀻𑀯𑀭𑀓𑁄𑀡𑀧𑁆𑀧𑀓𑀸𑀭𑀁 𑀬𑀁 𑀓𑀺𑀜𑁆𑀘𑀺 ‘‘𑀩𑀻𑀚𑀦𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁨𑁧𑁫𑁪. ‘‘𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀘 𑀯𑀺𑀥𑀽𑀧𑀦𑁂𑀦 𑀘 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀅𑀘𑁆𑀘𑀸𑀯𑀤𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀧𑀲𑀸𑀤𑁂𑀢𑀺 ‘𑀫𑀸, 𑀪𑀕𑀺𑀦𑀺, 𑀏𑀯𑀭𑀽𑀧𑀁 𑀅𑀓𑀸𑀲𑀺, 𑀦𑁂𑀢𑀁 𑀓𑀧𑁆𑀧𑀢𑀻’𑀢𑀺. ‘𑀧𑀼𑀩𑁆𑀩𑁂 𑀫𑀁 𑀢𑁆𑀯𑀁 𑀏𑀯𑀜𑁆𑀘 𑀏𑀯𑀜𑁆𑀘 𑀓𑀭𑁄𑀲𑀺, 𑀇𑀤𑀸𑀦𑀺 𑀏𑀢𑁆𑀢𑀓𑀁 𑀦 𑀲𑀳𑀲𑀻’𑀢𑀺 𑀧𑀸𑀦𑀻𑀬𑀣𑀸𑀮𑀓𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀢𑁆𑀯𑀸 𑀯𑀺𑀥𑀽𑀧𑀦𑁂𑀦 𑀧𑀳𑀸𑀭𑀁 𑀅𑀤𑀸𑀲𑀻’’𑀢𑀺 (𑀧𑀸𑀘𑀺. 𑁮𑁧𑁫) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺 𑀪𑀺𑀓𑁆𑀔𑀽𑀳𑀺 𑀆𑀭𑁄𑀘𑀺𑀢𑁂 ‘‘𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀧𑀳𑀸𑀭𑀁 𑀤𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 (𑀧𑀸𑀘𑀺. 𑁮𑁧𑁫) 𑀯𑀢𑁆𑀯𑀸 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁧𑁬) 𑀯𑀼𑀢𑁆𑀢𑀢𑁆𑀢𑀸 𑀧𑀳𑀸𑀭𑀧𑀘𑁆𑀘𑀬𑀸 𑀦𑀼 𑀔𑁄𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀫𑀸𑀳 ‘‘𑀳𑀢𑁆𑀣𑀧𑀸𑀲𑁂 𑀇𑀥 𑀞𑀸𑀦𑀧𑀘𑁆𑀘𑀬𑀸𑀧𑀢𑁆𑀢𑀺 𑀤𑀻𑀧𑀺𑀢𑀸’’𑀢𑀺. 𑀏𑀢𑁆𑀣 𑀘 𑀆𑀲𑀼𑀫𑁆𑀪𑀺𑀢𑁆𑀯𑀸𑀢𑀺 𑀧𑀸𑀢𑁂𑀢𑁆𑀯𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑁆𑀲 𑀧𑀳𑀸𑀭𑁄 𑀤𑀸𑀢𑀩𑁆𑀩𑁄. 𑀬𑀸 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁨𑁦) 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 ¶ 𑀯𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀧𑀳𑀸𑀭𑀧𑀘𑁆𑀘𑀬𑀸 𑀯𑀼𑀢𑁆𑀢𑀁, 𑀔𑀦𑁆𑀥𑀓𑁂 𑀤𑀼𑀓𑁆𑀓𑀝𑀁 𑀯𑀺𑀲𑀼’’𑀦𑁆𑀢𑀺. 𑀇𑀫𑀺𑀦𑀸 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑁨𑁧𑁫𑁫. 𑀳𑀢𑁆𑀣𑀧𑀸𑀲𑀁 𑀚𑀳𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀪𑁄𑀚𑀦𑀁 𑀪𑀼𑀜𑁆𑀚𑀢𑁄’’𑀢𑀺 𑀘 𑀔𑀸𑀤𑀦𑀁 𑀔𑀸𑀤𑀢𑁄𑀢𑀺 𑀏𑀢𑁆𑀣 ‘‘𑀳𑀢𑁆𑀣𑀧𑀸𑀲𑁂’’𑀢𑀺 𑀘 𑀯𑀢𑁆𑀢𑀩𑁆𑀩𑀁 ¶ . 𑀪𑁄𑀚𑀦𑀁 𑀪𑀼𑀜𑁆𑀚𑀢𑁄 𑀳𑀢𑁆𑀣𑀧𑀸𑀲𑀁 𑀚𑀳𑀺𑀢𑁆𑀯𑀸 𑀉𑀧𑀢𑀺𑀝𑁆𑀞𑀦𑁆𑀢𑀺𑀬𑀸 𑀯𑀸 𑀔𑀸𑀤𑀦𑀁 𑀔𑀸𑀤𑀢𑁄 𑀳𑀢𑁆𑀣𑀧𑀸𑀲𑁂 𑀉𑀧𑀢𑀺𑀝𑁆𑀞𑀦𑁆𑀢𑀺𑀬𑀸 𑀯𑀸 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁧𑁫𑁬. 𑀤𑁂𑀢𑀻𑀢𑀺 𑀧𑀸𑀦𑀻𑀬𑀁 𑀯𑀸 𑀲𑀽𑀧𑀸𑀤𑀺𑀁 𑀯𑀸 ‘‘𑀇𑀫𑀁 𑀧𑀺𑀯𑀣, 𑀇𑀫𑀺𑀦𑀸 𑀪𑀼𑀜𑁆𑀚𑀣𑀸’’𑀢𑀺 𑀤𑁂𑀢𑀺. 𑀢𑀸𑀮𑀯𑀡𑁆𑀝𑀁 ‘‘𑀇𑀫𑀺𑀦𑀸 𑀩𑀻𑀚𑀦𑁆𑀢𑀸 𑀪𑀼𑀜𑁆𑀚𑀣𑀸’’𑀢𑀺 𑀤𑁂𑀢𑀺. 𑀤𑀸𑀧𑁂𑀢𑀻𑀢𑀺 𑀅𑀜𑁆𑀜𑁂𑀦 𑀉𑀪𑀬𑀫𑁆𑀧𑀺 𑀤𑀸𑀧𑁂𑀢𑀺. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀼𑀝𑁆𑀞𑀸𑀦𑀢𑁄 𑀏𑀴𑀓𑀮𑁄𑀫𑁂𑀦 𑀲𑀫𑀁 𑀫𑀢𑀦𑁆𑀢𑀺 𑀬𑁄𑀚𑀦𑀸.

𑀙𑀝𑁆𑀞𑀁.

𑁨𑁧𑁫𑁭. 𑀯𑀺𑀜𑁆𑀜𑀢𑁆𑀯𑀸𑀢𑀺 𑀲𑀬𑀁 𑀯𑀺𑀜𑁆𑀜𑀢𑁆𑀯𑀸, 𑀅𑀜𑁆𑀜𑀸𑀬 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸. ‘‘𑀯𑀺𑀜𑁆𑀜𑀢𑁆𑀯𑀸 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀸’’𑀢𑀺 (𑀧𑀸𑀘𑀺. 𑁮𑁨𑁧) 𑀳𑀺 𑀲𑀺𑀓𑁆𑀔𑀸𑀧𑀤𑀁. 𑀆𑀫𑀓𑀁 𑀥𑀜𑁆𑀜𑀦𑁆𑀢𑀺 𑀅𑀧𑀓𑁆𑀓𑀁 𑀅𑀪𑀝𑁆𑀞𑀁 𑀲𑀸𑀮𑀺𑀆𑀤𑀺𑀓𑀁 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁. 𑀬𑀣𑀸𑀳 𑁋 ‘‘𑀆𑀫𑀓𑀥𑀜𑁆𑀜𑀁 𑀦𑀸𑀫 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄 𑀓𑀗𑁆𑀕𑀼 𑀯𑀭𑀓𑁄 𑀓𑀼𑀤𑁆𑀭𑀽𑀲𑀓𑁄’’𑀢𑀺 (𑀧𑀸𑀘𑀺. 𑁮𑁨𑁨). 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀫𑀼𑀲𑀮𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸. 𑀬𑀤𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁨𑁧𑁫𑁮-𑁬𑁦. ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀇𑀤𑀁 𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫, 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀧𑀝𑀺𑀕𑁆𑀕𑀳𑀡𑁂𑀬𑁂𑀯 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁮𑁨𑁨) 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦 𑀓𑁂𑀯𑀮𑀁 𑀢𑀼 𑀥𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺. 𑀧𑀦𑀸𑀢𑀺 𑀅𑀧𑀺-𑀲𑀤𑁆𑀤𑀢𑁆𑀣𑁂, 𑀲𑀼𑀓𑁆𑀔𑀸𑀧𑀦𑁂𑀧𑀻𑀢𑀺 𑀅𑀢𑁆𑀣𑁄. 𑀪𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀯𑀤𑁆𑀤𑀮𑀺𑀤𑀺𑀯𑀲𑁂’’𑀢𑀺 𑀲𑁂𑀲𑁄. ‘‘𑀓𑀧𑀮𑁆𑀮𑀲𑀚𑁆𑀚𑀦𑁂 𑀉𑀤𑁆𑀥𑀦𑀲𑀚𑁆𑀚𑀦𑁂’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀤𑀩𑁆𑀩𑀺𑀲𑀚𑁆𑀚𑀦𑁂𑀢𑀺 𑀓𑀝𑀘𑁆𑀙𑀼𑀲𑀫𑁆𑀧𑀸𑀤𑀦𑁂. 𑀢𑀢𑁆𑀣 𑀓𑀧𑀮𑁆𑀮𑀓𑁂 𑀥𑀜𑁆𑀜𑀧𑀓𑁆𑀔𑀺𑀧𑀦𑁂𑀢𑀺 𑀬𑁄𑀚𑀦𑀸. ‘‘𑀖𑀝𑁆𑀝𑀦𑀓𑁄𑀝𑁆𑀝𑀦𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 ‘‘𑀖𑀝𑁆𑀝𑀓𑁄𑀝𑁆𑀝𑀦𑁂’’𑀢𑀺 𑀯𑀼𑀢𑁆𑀢𑀁.

𑁨𑁧𑁬𑁧-𑁩. 𑀧𑀫𑀸𑀡-𑀲𑀤𑁆𑀤𑀲𑁆𑀲 ¶ 𑀆𑀯𑀢𑁆𑀢𑀮𑀺𑀗𑁆𑀕𑀲𑀗𑁆𑀔𑁆𑀬𑀢𑁆𑀢𑀸 𑀆𑀳 ‘‘𑀪𑁄𑀚𑀦𑀜𑁆𑀘𑁂𑀯 𑀯𑀺𑀜𑁆𑀜𑀢𑁆𑀢𑀺𑀧𑀫𑀸𑀡’’𑀦𑁆𑀢𑀺 ¶ . 𑀆𑀯𑀢𑁆𑀢𑀮𑀺𑀗𑁆𑀕𑀲𑀗𑁆𑀔𑁆𑀬𑀢𑁆𑀢𑀁 𑀦𑀸𑀫 𑀦𑀺𑀬𑀢𑀮𑀺𑀗𑁆𑀕𑁂𑀓𑀢𑁆𑀢𑀩𑀳𑀼𑀢𑁆𑀢𑀁. 𑀢𑀣𑀸 𑀳𑁂𑀢𑁆𑀣 𑀧𑀫𑀸𑀡-𑀲𑀤𑁆𑀤𑁄 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀦𑀺𑀬𑀢𑁂𑀓𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀪𑁄𑀚𑀦𑀜𑁆𑀘𑁂𑀯 𑀯𑀺𑀜𑁆𑀜𑀢𑁆𑀢𑀺 𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀳𑀺 𑀬𑀲𑁆𑀫𑀸 𑀧𑀫𑀸𑀡𑀁, 𑀢𑀲𑁆𑀫𑀸 𑀲𑀬𑀁 𑀯𑀺𑀜𑁆𑀜𑀢𑁆𑀯𑀸 𑀯𑀸 𑀅𑀜𑁆𑀜𑀢𑁄 𑀪𑀚𑁆𑀚𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀅𑀜𑁆𑀜𑀸𑀬 𑀧𑀦 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀲𑀬𑀁 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀸 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀚𑁆𑀛𑁄𑀳𑀭𑀢𑀺, 𑀢𑀲𑁆𑀲𑀸 𑀅𑀚𑁆𑀛𑁄𑀳𑀸𑀭𑀧𑀬𑁄𑀕𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑀫𑀳𑀸𑀧𑀘𑁆𑀘𑀭𑀺𑀬𑀁 (𑀧𑀸𑀘𑀺. 𑀅𑀝𑁆𑀞. 𑁮𑁨𑁩) 𑀯𑀼𑀢𑁆𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀸𑀢𑀭𑀁 𑀯𑀸’’𑀢𑀺𑀆𑀤𑀺. 𑀫𑀸𑀢𑀭𑀁 𑀯𑀸𑀧𑀺 𑀬𑀸𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀦𑁂. 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀜𑀸𑀢𑀓𑀁 𑀯𑀸 𑀧𑀯𑀸𑀭𑀺𑀢𑀁 𑀯𑀸 𑀆𑀫𑀓𑀥𑀜𑁆𑀜𑀁 𑀬𑀸𑀘𑀺𑀢𑁆𑀯𑀸 𑀯𑀸 𑀅𑀜𑁆𑀜𑀸𑀬 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀬𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁧𑁬𑁪. 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁 𑀲𑀬𑀁 𑀯𑀸 𑀪𑀚𑁆𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀸 𑀅𑀜𑁆𑀜𑀸𑀬 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀬𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁧𑁬𑁫. 𑀅𑀜𑁆𑀜𑀸𑀬 𑀧𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁 𑀢𑀸𑀬 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀲𑀬𑀁 𑀓𑀢𑁆𑀯𑀸 𑀯𑀸 𑀅𑀚𑁆𑀛𑁄𑀳𑀭𑀦𑁆𑀢𑀺𑀬𑀸 𑀢𑀣𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀫𑀳𑀸𑀧𑀘𑁆𑀘𑀭𑀺𑀬𑀸𑀕𑀢𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀜𑁆𑀜𑀸𑀬 𑀯𑀺𑀜𑁆𑀜𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁨𑁨) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀜𑁆𑀜𑀸𑀬 𑀮𑀤𑁆𑀥𑀁 𑀆𑀫𑀓𑀁 𑀥𑀜𑁆𑀜𑀁 𑀢𑀸𑀬 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀲𑀬𑀁 𑀓𑀢𑁆𑀯𑀸 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁧𑁬𑁬-𑁭. 𑀲𑁂𑀤𑀓𑀫𑁆𑀫𑀸𑀤𑀺𑀅𑀢𑁆𑀣𑀸𑀬𑀸𑀢𑀺 ¶ 𑀯𑀸𑀢𑀭𑁄𑀕𑀸𑀤𑀺𑀦𑀸 𑀆𑀢𑀼𑀭𑀸𑀦𑀁 𑀲𑁂𑀤𑀦𑀸𑀤𑀺𑀧𑀝𑀺𑀓𑀸𑀭𑀢𑁆𑀣𑀸𑀬. 𑀇𑀥 ‘‘𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂𑀧𑀻’’𑀢𑀺 𑀲𑁂𑀲𑁄. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀲𑁂𑀲𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀫𑀼𑀕𑁆𑀕𑀫𑀸𑀲𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀓𑀸𑀤𑀻𑀦𑀁 𑀯𑀼𑀢𑁆𑀢𑀥𑀜𑁆𑀜𑀸𑀯𑀲𑁂𑀲𑀸𑀦𑀁 𑀯𑀺𑀜𑁆𑀜𑀢𑁆𑀢𑀺𑀬𑀸.

𑀲𑀸𑀮𑀺𑀆𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, 𑀅𑀦𑀸𑀫𑀸𑀲𑀢𑁆𑀢𑀸 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀜𑀸𑀢𑀓𑀸𑀦𑀫𑁆𑀧𑀻’’𑀢𑀺𑀆𑀤𑀺.

𑁨𑁧𑁬𑁮. 𑀮𑀤𑁆𑀥𑀦𑁆𑀢𑀺 ¶ 𑀮𑀩𑁆𑀪𑀫𑀸𑀦𑀁. 𑀦𑀯𑀓𑀫𑁆𑀫𑁂𑀲𑀽𑀢𑀺 𑀦𑀯𑀓𑀫𑁆𑀫𑀢𑁆𑀣𑀸𑀬, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀏𑀢𑁆𑀣 ‘‘𑀲𑀫𑁆𑀧𑀝𑀺𑀘𑁆𑀙𑀺𑀢𑀼’’𑀦𑁆𑀢𑀺 𑀲𑁂𑀲𑁄. ‘‘𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀩𑁆𑀪𑀫𑀸𑀦𑀁 𑀧𑀦 𑀦𑀯𑀓𑀫𑁆𑀫𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁨𑁩) 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀲𑀢𑁆𑀢𑀫𑀁.

𑁨𑁧𑁬𑁯. 𑀲𑀗𑁆𑀓𑀸𑀭𑀦𑁆𑀢𑀺 𑀓𑀘𑀯𑀭𑀁. 𑀯𑀺𑀖𑀸𑀲𑀓𑀁 𑀯𑀸𑀢𑀺 𑀉𑀘𑁆𑀙𑀺𑀝𑁆𑀞𑀓𑀫𑀘𑁆𑀙𑀓𑀡𑁆𑀝𑀓𑀫𑀁𑀲𑀝𑁆𑀞𑀺𑀘𑀮𑀓𑀫𑀼𑀔𑀥𑁄𑀯𑀦𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺. 𑀙𑀟𑁆𑀟𑁂𑀬𑁆𑀬 𑀯𑀸𑀢𑀺 𑀏𑀢𑁆𑀣 ‘‘𑀲𑀬’’𑀦𑁆𑀢𑀺 𑀲𑁂𑀲𑁄 ‘‘𑀙𑀟𑁆𑀟𑀸𑀧𑁂𑀬𑁆𑀬 𑀧𑀭𑁂𑀳𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀓𑀼𑀝𑁆𑀝𑀲𑁆𑀲 𑀢𑀺𑀭𑁄 𑀢𑀺𑀭𑁄𑀓𑀼𑀝𑁆𑀝𑀁, 𑀢𑀲𑁆𑀫𑀺𑀁, 𑀓𑀼𑀝𑁆𑀝𑀲𑁆𑀲 𑀧𑀭𑀪𑀸𑀕𑁂𑀢𑀺 𑀅𑀢𑁆𑀣𑁄. ‘‘𑀧𑀸𑀓𑀸𑀭𑁂𑀧𑀺 𑀅𑀬𑀁 𑀦𑀬𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀓𑀼𑀝𑁆𑀝𑀦𑁆𑀢𑀺 𑀯𑀸 𑀩𑁆𑀬𑀢𑀺𑀭𑀺𑀢𑁆𑀢𑀸 𑀪𑀺𑀢𑁆𑀢𑀺 𑀕𑀳𑁂𑀢𑀩𑁆𑀩𑀸.

𑁨𑁧𑁭𑁧. 𑀏𑀓𑀸𑀢𑀺 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺 𑀲𑁂𑀲𑁄. ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑁨𑁧𑁭𑁨. 𑀙𑀟𑁆𑀟𑀦𑁂𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀤𑀦𑁆𑀢𑀓𑀝𑁆𑀞𑀲𑁆𑀲 𑀙𑀟𑁆𑀟𑀦𑁂𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁧𑁭𑁩-𑁪. 𑀲𑀩𑁆𑀩𑀢𑁆𑀣𑀸𑀢𑀺 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀲𑀩𑁆𑀩𑁂𑀲𑀼 𑀯𑀺𑀓𑀧𑁆𑀧𑁂𑀲𑀼. 𑀅𑀦𑀸𑀧𑀢𑁆𑀢𑀺𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀯𑀮𑀜𑁆𑀚𑁂𑀧𑀻’’𑀢𑀺𑀆𑀤𑀺. 𑀅𑀯𑀮𑀜𑁆𑀚𑁂 𑀞𑀸𑀦𑁂 𑀅𑀦𑁄𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺𑀬𑀸𑀧𑀺 𑀯𑀸 𑀯𑀮𑀜𑁆𑀚𑁂 𑀞𑀸𑀦𑁂 𑀑𑀮𑁄𑀓𑁂𑀢𑁆𑀯𑀸𑀧𑀺 𑀯𑀸 𑀧𑀦 𑀙𑀟𑁆𑀟𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀙𑀟𑁆𑀟𑀦𑀁 𑀓𑁆𑀭𑀺𑀬𑀁. 𑀅𑀦𑁄𑀮𑁄𑀓𑀦𑀁 𑀅𑀓𑁆𑀭𑀺𑀬𑀁.

𑀅𑀝𑁆𑀞𑀫𑀁.

𑁨𑁧𑁭𑁫-𑁬. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀔𑁂𑀢𑁆𑀢𑁂 𑀯𑀸 𑀦𑀸𑀴𑀺𑀓𑁂𑀭𑀸𑀤𑀺𑀆𑀭𑀸𑀫𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀭𑁄𑀧𑀺𑀫𑁂 𑀳𑀭𑀺𑀢𑀝𑁆𑀞𑀸𑀦𑁂 𑀢𑀸𑀦𑀺 𑀯𑀺𑀖𑀸𑀲𑀼𑀘𑁆𑀘𑀸𑀭𑀲𑀗𑁆𑀓𑀸𑀭𑀫𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀯𑀢𑁆𑀣𑀽𑀦𑀺 𑀲𑀘𑁂 𑀲𑀬𑀁 𑀙𑀟𑁆𑀟𑁂𑀢𑀺 𑀯𑀸, 𑀢𑀣𑀸 𑀧𑀭𑁂 𑀙𑀟𑁆𑀟𑀸𑀧𑁂𑀢𑀺 𑀯𑀸, 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀦𑀬𑁄 ‘‘𑀏𑀓𑁂𑀓’’𑀫𑀺𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀧𑀓𑀸𑀭𑁄𑀢𑀺 𑀬𑁄𑀚𑀦𑀸.

𑁨𑁧𑁭𑁭-𑁮. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀳𑀭𑀺𑀢𑁂 𑀔𑁂𑀢𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀸 𑀯𑀸 𑀢𑀣𑀸 𑀳𑀭𑀺𑀢𑁂 𑀢𑀢𑁆𑀣 ¶ 𑀔𑁂𑀢𑁆𑀢𑁂 𑀉𑀘𑁆𑀙𑀼𑀆𑀤𑀻𑀦𑀺 𑀔𑀸𑀤𑀦𑁆𑀢𑀺 𑀔𑀸𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀻 𑀯𑀸 𑀬𑀤𑀺 𑀉𑀘𑁆𑀙𑀺𑀝𑁆𑀞𑀁 𑀉𑀤𑀓𑀁 𑀯𑀸 𑀘𑀮𑀓𑀸𑀤𑀺𑀁 𑀯𑀸 𑀙𑀟𑁆𑀟𑁂𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀘𑀮𑀓𑀁 𑀦𑀸𑀫 𑀯𑀫𑀺𑀓𑀭𑀁.

𑁨𑁧𑁭𑁯. 𑀢𑀸𑀤𑀺𑀲𑁂 𑀳𑀭𑀺𑀢𑁂 𑀞𑀸𑀦𑁂 𑀅𑀦𑁆𑀢𑀫𑀲𑁄 𑀫𑀢𑁆𑀣𑀓𑀙𑀺𑀦𑁆𑀦𑀁 𑀦𑀸𑀴𑀺𑀓𑁂𑀭𑀫𑁆𑀧𑀺 𑀚𑀮𑀁 𑀧𑀺𑀯𑀺𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁧𑁮𑁦. 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁.

𑁨𑁧𑁮𑁧. 𑀮𑀸𑀬𑀺𑀢𑀫𑁆𑀧𑀺 𑀔𑁂𑀢𑁆𑀢𑀁 𑀧𑀼𑀦 𑀭𑁄𑀳𑀡𑀢𑁆𑀣𑀸𑀬 𑀫𑀦𑀼𑀲𑁆𑀲𑀸 𑀭𑀓𑁆𑀔𑀦𑁆𑀢𑀺 𑀘𑁂, 𑀢𑀢𑁆𑀣 𑀢𑀲𑁆𑀫𑀺𑀁 𑀔𑁂𑀢𑁆𑀢𑁂 𑀯𑀺𑀖𑀸𑀲𑀼𑀘𑁆𑀘𑀸𑀭𑀸𑀤𑀻𑀦𑀺 𑀙𑀟𑁆𑀟𑁂𑀦𑁆𑀢𑀺𑀬𑀸 𑀅𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀬𑀣𑀸𑀯𑀢𑁆𑀣𑀼𑀓𑀫𑁂𑀯 𑀳𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 ¶ 𑀬𑁄𑀚𑀦𑀸. ‘‘𑀅𑀲𑁆𑀲𑀸 𑀬𑀣𑀸𑀯𑀢𑁆𑀣𑀼𑀓’’𑀦𑁆𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺.

𑁨𑁧𑁮𑁨. 𑀙𑀟𑁆𑀟𑀺𑀢𑁂 𑀔𑁂𑀢𑁆𑀢𑁂𑀢𑀺 𑀫𑀦𑀼𑀲𑁆𑀲𑁂𑀳𑀺 𑀉𑀤𑁆𑀥𑀝𑀲𑀲𑁆𑀲𑁂 𑀔𑁂𑀢𑁆𑀢𑁂. 𑀬𑀣𑀸𑀳 𑁋 ‘‘𑀫𑀦𑀼𑀲𑁆𑀲𑁂𑀲𑀼 𑀲𑀲𑁆𑀲𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀢𑁂𑀲𑀼 𑀙𑀟𑁆𑀟𑀺𑀢𑀔𑁂𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁩𑁦). 𑀏𑀯𑀁 𑀅𑀓𑀢𑁂𑀧𑀺 𑀔𑁂𑀢𑁆𑀢𑁂 𑀲𑀸𑀫𑀺𑀓𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸𑀳 ‘‘𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀻’’𑀢𑀺 (𑀧𑀸𑀘𑀺. 𑁮𑁩𑁨). 𑀇𑀥 𑀔𑁂𑀢𑁆𑀢𑀧𑀸𑀮𑀓𑀸, 𑀆𑀭𑀸𑀫𑀸𑀤𑀺𑀕𑁄𑀧𑀓𑀸 𑀘 𑀲𑀸𑀫𑀺𑀓𑀸 𑀏𑀯. 𑀲𑀗𑁆𑀖𑀲𑁆𑀲 𑀔𑁂𑀢𑁆𑀢𑁂, 𑀆𑀭𑀸𑀫𑁂 𑀘 𑀲𑀘𑁂 ‘‘𑀢𑀢𑁆𑀣 𑀓𑀘𑀯𑀭𑀁 𑀦 𑀙𑀟𑁆𑀟𑁂𑀢𑀩𑁆𑀩’’𑀦𑁆𑀢𑀺 𑀓𑀢𑀺𑀓𑀸 𑀦𑀢𑁆𑀣𑀺, 𑀪𑀺𑀓𑁆𑀔𑀼𑀲𑁆𑀲 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀪𑀺𑀓𑁆𑀔𑀼𑀦𑀻𑀦𑀁. 𑀢𑀸𑀲𑀁 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀼𑀢𑁆𑀢𑀦𑀬𑁂𑀦 𑀦 𑀯𑀝𑁆𑀝𑀢𑀺, 𑀦 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸𑀭𑀼𑀧𑁆𑀧𑀯𑀲𑁂𑀦 𑀓𑀸𑀢𑀩𑁆𑀩𑀦𑁆𑀢𑀺. 𑀲𑀩𑁆𑀩𑀦𑁆𑀢𑀺 𑀉𑀘𑁆𑀘𑀸𑀭𑀸𑀤𑀺 𑀘𑀢𑀼𑀩𑁆𑀩𑀺𑀥𑀁.

𑀦𑀯𑀫𑀁.

𑁨𑁧𑁮𑁩. 𑀏𑀢𑁆𑀣 ‘‘𑀦𑀘𑁆𑀘𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀦𑀘𑁆𑀘𑀁. 𑀕𑀻𑀢𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀕𑀻𑀢𑀁. 𑀯𑀸𑀤𑀺𑀢𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀯𑀸𑀤𑀺𑀢’’𑀦𑁆𑀢𑀺 (𑀧𑀸𑀘𑀺. 𑁮𑁩𑁫) 𑀯𑀘𑀦𑀢𑁄 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀲𑁂𑀲𑁄. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀬𑀁 𑀓𑀺𑀜𑁆𑀘𑀺 𑀦𑀘𑁆𑀘𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀕𑀻𑀢𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀦𑀘𑁆𑀘𑀦𑁆𑀢𑀺 𑀦𑀝𑀸𑀤𑀬𑁄 𑀯𑀸 𑀦𑀘𑁆𑀘𑀦𑁆𑀢𑀼 𑀲𑁄𑀡𑁆𑀟𑀸 𑀯𑀸, 𑀅𑀦𑁆𑀢𑀫𑀲𑁄 𑀫𑁄𑀭𑀲𑀼𑀓𑀫𑀓𑁆𑀓𑀝𑀸𑀤𑀬𑁄𑀧𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀦𑀘𑁆𑀘𑀫𑁂𑀯. 𑀬𑀁 𑀓𑀺𑀜𑁆𑀘𑀺 𑀕𑀻𑀢𑀦𑁆𑀢𑀺 𑀦𑀝𑀸𑀤𑀻𑀦𑀁 𑀯𑀸 𑀕𑀻𑀢𑀁 𑀳𑁄𑀢𑀼 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀁𑀳𑀺𑀢𑀁 𑀲𑀸𑀥𑀼𑀓𑀻𑀴𑀺𑀢𑀕𑀻𑀢𑀁 𑀯𑀸 𑀅𑀲𑀜𑁆𑀜𑀢𑀪𑀺𑀓𑁆𑀔𑀽𑀦𑀁 ¶ 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀯𑀸, 𑀲𑀩𑁆𑀩𑀫𑁆𑀧𑁂𑀢𑀁 𑀕𑀻𑀢𑀫𑁂𑀯. 𑀬𑀁 𑀓𑀺𑀜𑁆𑀘𑀺 𑀯𑀸𑀤𑀺𑀢𑀦𑁆𑀢𑀺 𑀖𑀦𑀸𑀤𑀺𑀯𑀸𑀤𑀦𑀻𑀬𑀪𑀡𑁆𑀟𑀯𑀸𑀤𑀺𑀢𑀁 𑀯𑀸 𑀳𑁄𑀢𑀼 𑀓𑀼𑀝𑀪𑁂𑀭𑀺𑀯𑀸𑀤𑀺𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀉𑀤𑀭𑀪𑁂𑀭𑀺𑀯𑀸𑀤𑀺𑀢𑀫𑁆𑀧𑀺 ¶ , 𑀲𑀩𑁆𑀩𑀫𑁆𑀧𑁂𑀢𑀁 𑀯𑀸𑀤𑀺𑀢𑀫𑁂𑀯. ‘‘𑀤𑀲𑁆𑀲𑀦𑀲𑀯𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦 ‘‘𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀬𑀣𑀸𑀲𑀓𑀁 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 ‘‘𑀤𑀲𑁆𑀲𑀦𑀢𑁆𑀣𑀸𑀬’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑁨𑁧𑁮𑁪. 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑁂𑀦 𑀲𑀳 𑀧𑀸𑀘𑀺𑀢𑁆𑀢𑀺𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀲𑁆𑀲𑀦𑀢𑁆𑀣𑀸𑀬 𑀦𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀕𑀻𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀯𑀸𑀤𑀺𑀢𑀲𑁆𑀲𑀸’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺.

𑁨𑁧𑁮𑁫. 𑀏𑀓𑀧𑀬𑁄𑀕𑁂𑀦𑀸𑀢𑀺 𑀏𑀓𑀤𑀺𑀲𑀸𑀯𑀮𑁄𑀓𑀦𑀧𑀬𑁄𑀕𑁂𑀦. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀜𑁆𑀜𑀲𑁆𑀫𑀺𑀫𑁆𑀧𑀺…𑀧𑁂… 𑀲𑀺𑀬𑀼’’𑀦𑁆𑀢𑀺. 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 ‘‘𑀦𑀘𑁆𑀘’’𑀦𑁆𑀢𑀺 𑀲𑁂𑀲𑁄. 𑀢𑁂𑀲𑀦𑁆𑀢𑀺 𑀬𑁂𑀲𑀁 𑀦𑀘𑁆𑀘𑀁 𑀧𑀲𑁆𑀲𑀢𑀺. 𑀧𑀺-𑀲𑀤𑁆𑀤𑁂𑀦 𑀯𑀸𑀤𑀺𑀢𑀫𑁆𑀧𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀣𑀸𑀳 ‘‘𑀢𑁂𑀲𑀁𑀬𑁂𑀯 𑀕𑀻𑀢𑀯𑀸𑀤𑀺𑀢𑀁 𑀲𑀼𑀡𑀸𑀢𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁩𑁬).

𑁨𑁧𑁮𑁬. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂.

𑁨𑁧𑁮𑁭. ‘‘𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑁄 𑀲𑀺𑀬𑀼’’𑀦𑁆𑀢𑀺 𑀇𑀤𑀫𑁂𑀯 𑀧𑀓𑀸𑀲𑁂𑀢𑀼𑀫𑀸𑀳 ‘‘𑀧𑀬𑁄𑀕𑀕𑀡𑀦𑀸𑀬𑁂𑀢𑁆𑀣, 𑀆𑀧𑀢𑁆𑀢𑀺𑀕𑀡𑀦𑀸 𑀲𑀺𑀬𑀸’’𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀦𑀸𑀦𑀸𑀤𑀺𑀲𑀸𑀪𑀸𑀕𑁂. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀁 𑀤𑀲𑁆𑀲𑀦𑀲𑀯𑀦𑁂 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀘𑁆𑀘𑀺𑀢𑀼’’𑀦𑁆𑀢𑀺𑀆𑀤𑀺.

𑁨𑁧𑁮𑁮. ‘‘𑀦𑀘𑁆𑀘 𑀇𑀢𑀻’’𑀢𑀺 𑀧𑀤𑀘𑁆𑀙𑁂𑀤𑁄, ‘‘𑀦𑀘𑁆𑀘𑀸𑀳𑀻’’𑀢𑀺𑀧𑀺 𑀧𑀸𑀞𑁄. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀪𑁂𑀭𑀺𑀲𑀤𑁆𑀤𑀧𑀽𑀚𑀁. 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀦𑁆𑀢𑀺 ‘‘𑀲𑀸𑀥𑀽’’𑀢𑀺 𑀅𑀥𑀺𑀯𑀸𑀲𑁂𑀢𑀼𑀁. 𑀇𑀫𑀲𑁆𑀲 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑀘𑁆𑀘𑀕𑀻𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁧𑁮𑁯-𑁯𑁦. 𑀲𑀩𑁆𑀩𑀢𑁆𑀣𑀸𑀢𑀺 𑀦𑀘𑁆𑀘𑀦𑀸𑀤𑀻𑀲𑀼 𑀲𑀩𑁆𑀩𑀢𑁆𑀣. 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸𑀢𑀺 𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀦𑀘𑁆𑀘𑀸𑀤𑀻𑀳𑀺 𑀉𑀧𑀳𑀸𑀭𑀁 𑀓𑀭𑁄𑀫𑀸𑀢𑀺. 𑀉𑀧𑀝𑁆𑀞𑀸𑀦𑀁 𑀧𑀲𑀢𑁆𑀣𑀦𑁆𑀢𑀺 𑀉𑀧𑀝𑁆𑀞𑀸𑀦𑀓𑀭𑀡𑀁 𑀦𑀸𑀫 𑀲𑀼𑀦𑁆𑀤𑀭𑀦𑁆𑀢𑀺.

𑀬𑀸 ¶ 𑀆𑀭𑀸𑀫𑁂𑀬𑁂𑀯 𑀘 𑀞𑀢𑁆𑀯𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸𑀢𑀺 𑀬𑁄𑀚𑀦𑀸, 𑀇𑀥 ‘‘𑀅𑀦𑁆𑀢𑀭𑀸𑀭𑀸𑀫𑁂 𑀯𑀸’’𑀢𑀺𑀆𑀤𑀺 ¶ 𑀲𑁂𑀲𑁄. ‘‘𑀆𑀭𑀸𑀫𑁂 𑀞𑀢𑁆𑀯𑀸 𑀅𑀦𑁆𑀢𑀭𑀸𑀭𑀸𑀫𑁂 𑀯𑀸 𑀩𑀳𑀺𑀆𑀭𑀸𑀫𑁂 𑀯𑀸 𑀦𑀘𑁆𑀘𑀸𑀤𑀻𑀦𑀺 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁩𑁭) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁. ‘‘𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀩𑁆𑀩𑁂𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼 𑀮𑀩𑁆𑀪𑀢𑀺. 𑀆𑀭𑀸𑀫𑁂 𑀞𑀢𑁆𑀯𑀸𑀢𑀺 𑀦 𑀓𑁂𑀯𑀮𑀁 𑀞𑀢𑁆𑀯𑀸𑀯, 𑀢𑀢𑁄 𑀕𑀦𑁆𑀢𑁆𑀯𑀸𑀧𑀺 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀳𑀺𑀧𑀺 𑀮𑀪𑀢𑀺. ‘‘𑀆𑀭𑀸𑀫𑁂 𑀞𑀺𑀢𑀸’’𑀢𑀺 (𑀧𑀸𑀘𑀺. 𑁮𑁩𑁭) 𑀧𑀦 𑀆𑀭𑀸𑀫𑀧𑀭𑀺𑀬𑀸𑀧𑀦𑁆𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀦𑀺𑀲𑀺𑀦𑁆𑀦𑀸𑀧𑀺 𑀦 𑀮𑀪𑁂𑀬𑁆𑀬𑀸𑀢𑀺 𑀕𑀡𑁆𑀞𑀺𑀧𑀤𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁨𑁧𑁯𑁧. 𑀬𑀸 𑀅𑀢𑁆𑀢𑀦𑁄 𑀞𑀺𑀢𑁄𑀓𑀸𑀲𑀁 𑀆𑀕𑀦𑁆𑀢𑁆𑀯𑀸 𑀧𑀬𑁄𑀚𑀺𑀢𑀁 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸𑀢𑀺 𑀬𑁄𑀚𑀦𑀸. 𑀞𑀺𑀢𑁄𑀓𑀸𑀲𑀦𑁆𑀢𑀺 𑀏𑀢𑁆𑀣 𑀕𑀢𑀺𑀦𑀺𑀯𑀢𑁆𑀢𑀺𑀲𑀸𑀫𑀜𑁆𑀜𑁂𑀦 𑀲𑀬𑀺𑀢𑀦𑀺𑀲𑀺𑀦𑁆𑀦𑀫𑁆𑀧𑀺 𑀕𑀬𑁆𑀳𑀢𑀺. 𑀢𑀣𑀸𑀭𑀽𑀧𑀸 𑀳𑀺 𑀓𑀸𑀭𑀡𑀸 𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀺𑀬𑀸 𑀯𑀸𑀧𑀻𑀢𑀺 𑀬𑁄𑀚𑀦𑀸. 𑀓𑀸𑀭𑀡𑀁 𑀦𑀸𑀫 𑀲𑀮𑀸𑀓𑀪𑀢𑁆𑀢𑀸𑀤𑀺𑀓𑀸𑀭𑀡𑀁. 𑀬𑀣𑀸𑀳 ‘‘𑀲𑀢𑀺 𑀓𑀭𑀡𑀻𑀬𑁂𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁩𑁭).

𑁨𑁧𑁯𑁨. 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻 𑀧𑀝𑀺𑀧𑀣𑁂 𑀦𑀘𑁆𑀘𑀁 𑀅𑀝𑁆𑀞𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀏𑀯𑀁 𑀧𑀲𑁆𑀲𑀦𑁆𑀢𑀺𑀬𑀸𑀧𑀺 𑀘 𑀢𑀣𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀬𑁄𑀚𑀦𑀸. 𑀧𑀝𑀺𑀧𑀣𑁂𑀢𑀺 𑀕𑀫𑀦𑀫𑀕𑁆𑀕𑀸𑀪𑀺𑀫𑀼𑀔𑁂. 𑀆𑀧𑀤𑀸𑀲𑀼𑀧𑀻𑀢𑀺 𑀢𑀸𑀤𑀺𑀲𑁂𑀦 𑀉𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑀸 𑀲𑀫𑀚𑁆𑀚𑀝𑁆𑀞𑀸𑀦𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀺𑀬𑀸 𑀯𑀸 𑀲𑀼𑀡𑀦𑁆𑀢𑀺𑀬𑀸 𑀯𑀸 𑀅𑀦𑀸𑀧𑀢𑁆𑀢𑀺.

𑁨𑁧𑁯𑁩. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀼𑀝𑁆𑀞𑀸𑀦𑀢𑁄 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀁 𑀫𑀢𑀁 ‘‘𑀲𑀫𑀸𑀦’’𑀦𑁆𑀢𑀺 𑀯𑀺𑀜𑁆𑀜𑀸𑀢𑀁.

𑀤𑀲𑀫𑀁.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.

𑁨𑁧𑁯𑁪-𑁫. 𑀇𑀥 ¶ 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀭𑀢𑁆𑀢𑀦𑁆𑀥𑀓𑀸𑀭𑀲𑁆𑀫𑀺𑀁 𑀅𑀧𑁆𑀧𑀤𑀻𑀧𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀏𑀓𑀺𑀓𑀸 𑀲𑀘𑁂 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀭𑀢𑁆𑀢𑀦𑁆𑀥𑀓𑀸𑀭𑀲𑁆𑀫𑀺𑀦𑁆𑀢𑀺 𑀭𑀢𑁆𑀢𑀺𑀬𑀁. 𑀭𑀢𑁆𑀢𑀺𑀧𑀭𑀺𑀬𑀸𑀬𑁄 𑀳𑀺 𑀭𑀢𑁆𑀢𑀦𑁆𑀥𑀓𑀸𑀭-𑀲𑀤𑁆𑀤𑁄. 𑀬𑀣𑀸𑀳 𑀧𑀤𑀪𑀸𑀚𑀦𑁂 ‘‘𑀭𑀢𑁆𑀢𑀦𑁆𑀥𑀓𑀸𑀭𑁂𑀢𑀺 𑀑𑀕𑁆𑀕𑀢𑁂 𑀲𑀽𑀭𑀺𑀬𑁂’’𑀢𑀺 (𑀧𑀸𑀘𑀺. 𑁮𑁪𑁦). 𑀅𑀧𑁆𑀧𑀤𑀻𑀧𑁂𑀢𑀺 𑀧𑀚𑁆𑀚𑁄𑀢𑀘𑀦𑁆𑀤𑀲𑀽𑀭𑀺𑀬𑀅𑀕𑁆𑀕𑀻𑀲𑀼 𑀏𑀓𑁂𑀦𑀸𑀧𑀺 𑀅𑀦𑁄𑀪𑀸𑀲𑀺𑀢𑁂, 𑀇𑀫𑀺𑀦𑀸 ¶ 𑀭𑀢𑁆𑀢𑀺𑀓𑁆𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑀺. ‘‘𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺 𑀇𑀫𑀺𑀦𑀸 𑀕𑀫𑀦𑀦𑀺𑀲𑀺𑀦𑁆𑀦𑀲𑀬𑀦𑀲𑀗𑁆𑀔𑀸𑀢𑀁 𑀇𑀭𑀺𑀬𑀸𑀧𑀣𑀢𑁆𑀢𑀺𑀓𑀜𑁆𑀘 𑀉𑀧𑀮𑀓𑁆𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀯𑀚𑀺𑀭𑀩𑀼𑀤𑁆𑀥𑀺𑀦𑀸 ‘‘𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀏𑀢𑁆𑀣 𑀞𑀸𑀦𑀸𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀇𑀭𑀺𑀬𑀸𑀧𑀣𑁄 𑀲𑀗𑁆𑀕𑀳𑀺𑀢𑁄, 𑀢𑀲𑁆𑀫𑀸 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁮𑁩𑁯 𑀣𑁄𑀓𑀁 𑀯𑀺𑀲𑀤𑀺𑀲𑀁). 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀲𑀦𑁆𑀢𑀺𑀝𑁆𑀞𑀺𑀢𑀼𑀁, 𑀲𑀮𑁆𑀮𑀧𑀺𑀢𑀼𑀜𑁆𑀘 𑀯𑀺𑀜𑁆𑀜𑀼𑀦𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁.

𑀭𑀳𑀲𑁆𑀲𑀸𑀤𑀯𑀲𑁂𑀦 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁 𑀲𑀫𑀸𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀺𑀬𑀸 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑁨𑁧𑁯𑁬-𑁭. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀘𑁂 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸 𑀲𑀮𑁆𑀮𑀧𑀢𑀺 𑀯𑀸, 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸 𑀲𑀮𑁆𑀮𑀧𑀢𑀺 𑀯𑀸, 𑀢𑀲𑁆𑀲𑀸 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀯𑀺𑀜𑁆𑀜𑀼𑀕𑁆𑀕𑀳𑀡𑁂𑀦 𑀅𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁧𑁯𑁮. 𑀅𑀜𑁆𑀜𑀯𑀺𑀳𑀺𑀢𑀸𑀬𑀸𑀢𑀺 𑀭𑀳𑁄𑀅𑀲𑁆𑀲𑀸𑀤𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀺𑀬𑀸. 𑀬𑀣𑀸𑀳 ‘‘𑀭𑀳𑁄𑀅𑀲𑁆𑀲𑀸𑀤𑀢𑁄 𑀅𑀜𑁆𑀜𑀯𑀺𑀳𑀺𑀢𑀸𑀯 𑀳𑀼𑀢𑁆𑀯𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁪𑁧). 𑀘𑀢𑀼𑀢𑁆𑀣𑁂𑀦, 𑀙𑀝𑁆𑀞𑁂𑀦 𑀘 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 ¶ 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁. 𑀲𑀦𑁆𑀢𑀺𑀝𑁆𑀞𑀦𑀲𑀮𑁆𑀮𑀧𑀦𑀯𑀲𑁂𑀦 𑀓𑁆𑀭𑀺𑀬𑀁. 𑀲𑀜𑁆𑀜𑀸𑀬 𑀯𑀺𑀫𑁄𑀓𑁆𑀔𑁄 𑀏𑀢𑀲𑁆𑀫𑀺𑀦𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀓𑀁.

𑀧𑀞𑀫𑀁.

𑁨𑁧𑁯𑁯. 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂𑀢𑀺 𑀓𑀼𑀝𑁆𑀝𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂. 𑀇𑀤𑀁 𑀯𑀘𑀦𑀁.

𑀤𑀼𑀢𑀺𑀬𑀁.

𑁨𑁨𑁦𑁦. 𑀢𑀢𑀺𑀬𑁂 ‘‘𑀅𑀚𑁆𑀛𑁄𑀓𑀸𑀲𑁂’’𑀢𑀺 𑀘 𑀘𑀢𑀼𑀢𑁆𑀣𑁂 ‘‘𑀭𑀣𑀺𑀓𑀸𑀬, 𑀩𑁆𑀬𑀽𑀳𑁂, 𑀲𑀺𑀗𑁆𑀖𑀸𑀝𑀓𑁂’’𑀢𑀺 𑀧𑀤𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀧𑀼𑀩𑁆𑀩𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀻’’𑀢𑀺. 𑀏𑀢𑁆𑀣 ‘‘𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀲𑁂𑀲𑁄. 𑀏𑀢𑁆𑀣 ¶ 𑀘 𑀭𑀣𑀺𑀓𑀸𑀬𑀸𑀢𑀺 𑀭𑀘𑁆𑀙𑀸𑀬. 𑀩𑁆𑀬𑀽𑀳𑁂𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑀭𑀘𑁆𑀙𑀸𑀬. 𑀲𑀺𑀗𑁆𑀖𑀸𑀝𑀓𑁂𑀢𑀺 𑀘𑀘𑁆𑀘𑀭𑁂 𑀑𑀓𑀸𑀲𑁂, 𑀢𑀺𑀓𑁄𑀡𑀁 𑀯𑀸 𑀘𑀢𑀼𑀓𑁄𑀡𑀁 𑀯𑀸 𑀫𑀕𑁆𑀕𑀲𑀫𑁄𑀥𑀸𑀦𑀝𑁆𑀞𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁨𑁨𑁦𑁧-𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁫𑁫) 𑀯𑀘𑀦𑀢𑁄 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀙𑀤𑀦𑀦𑁆𑀢𑁄 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀸 𑀅𑀦𑁄𑀯𑀲𑁆𑀲𑀓𑀧𑁆𑀧𑀤𑁂𑀲𑀁 𑀅𑀢𑀺𑀓𑁆𑀓𑀫𑁂𑀢𑀺, 𑀬𑀸 𑀘 𑀅𑀚𑁆𑀛𑁄𑀓𑀸𑀲𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀘𑁂 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑁂𑀢𑀺, 𑀢𑀲𑁆𑀲𑀸 𑀧𑀞𑀫𑁂 𑀧𑀤𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀤𑀼𑀢𑀺𑀬𑁂 𑀧𑀤𑁂 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸𑀢𑀺 𑀬𑁄𑀚𑀦𑀸. ‘‘𑀆𑀲𑀦𑁂’’𑀢𑀺 𑀇𑀫𑀺𑀦𑀸 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀸𑀭𑀳𑀫𑀸𑀲𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀬𑀣𑀸𑀳 𑁋 ‘‘𑀆𑀲𑀦𑀁 𑀦𑀸𑀫 𑀧𑀮𑁆𑀮𑀗𑁆𑀓𑀲𑁆𑀲 𑀑𑀓𑀸𑀲𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀘𑀺. 𑁮𑁫𑁬). 𑀅𑀦𑁄𑀯𑀲𑁆𑀲𑀧𑁆𑀧𑀤𑁂𑀲𑀦𑁆𑀢𑀺 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑀁. 𑀅𑀩𑁆𑀪𑁄𑀓𑀸𑀲𑁂 𑀆𑀧𑀢𑁆𑀢𑀺𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀧𑀘𑀸𑀭𑀫𑁆𑀧𑀺 𑀯𑀸 𑀲𑀘𑁂’’𑀢𑀺. 𑀉𑀧𑀘𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀁 ¶ 𑀧𑀤𑁂𑀲𑀁. 𑀬𑀣𑀸𑀳 𑀕𑀡𑁆𑀞𑀺𑀧𑀤𑁂 ‘‘𑀉𑀧𑀘𑀸𑀭𑁄 𑀤𑁆𑀯𑀸𑀤𑀲𑀳𑀢𑁆𑀣𑁄’’𑀢𑀺.

𑁨𑁨𑁦𑁩. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀤𑀼𑀓𑁆𑀓𑀝𑀁 𑀲𑀫𑀼𑀤𑀻𑀭𑀺𑀢’’𑀦𑁆𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀆𑀧𑀼𑀝𑁆𑀞𑁂 𑀅𑀦𑀸𑀧𑀼𑀝𑁆𑀞𑀲𑀜𑁆𑀜𑀸𑀬 𑀆𑀧𑀼𑀝𑁆𑀞𑁂 𑀯𑀺𑀘𑀺𑀓𑀺𑀘𑁆𑀙𑀢𑁄 𑀧𑀓𑁆𑀓𑀫𑀦𑁆𑀢𑀺𑀬𑀸 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀲𑀫𑁆𑀩𑀦𑁆𑀥𑀺𑀦𑀺𑀬𑀸 𑀲𑀫𑀸𑀦𑀢𑁆𑀢𑀸 ‘‘𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 ‘‘𑀯𑀺𑀘𑀺𑀓𑀺𑀘𑁆𑀙𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁨𑁦𑁪. 𑀕𑀺𑀮𑀸𑀦𑀸𑀬𑀸𑀢𑀺 𑀬𑀸 𑀢𑀸𑀤𑀺𑀲𑁂𑀦 𑀕𑁂𑀮𑀜𑁆𑀜𑁂𑀦 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀧𑀤𑀸𑀲𑀽𑀢𑀺 𑀖𑀭𑁂 𑀅𑀕𑁆𑀕𑀺 𑀉𑀝𑁆𑀞𑀺𑀢𑁄 𑀳𑁄𑀢𑀺 𑀘𑁄𑀭𑀸 𑀯𑀸, 𑀏𑀯𑀭𑀽𑀧𑁂 𑀉𑀧𑀤𑁆𑀤𑀯𑁂 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀧𑀜𑁆𑀘𑀫𑀁.

𑁨𑁨𑁦𑁫-𑁬. ‘‘𑀕𑀘𑁆𑀙𑀦𑁆𑀢𑀺𑀬𑀸 𑀯𑀚𑀦𑁆𑀢𑀺𑀬𑀸’’𑀢𑀺 𑀘 𑀦𑀺𑀲𑀻𑀤𑀦𑀦𑀺𑀧𑀚𑁆𑀚𑀦𑀸𑀯𑀲𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀸𑀘𑀺𑀢𑁆𑀢𑀺𑀬𑀁 𑀧𑀦 𑀧𑀘𑁆𑀙𑀸𑀪𑀢𑁆𑀢𑀁 𑀲𑀸𑀫𑀺𑀓𑁂 ‘‘𑀇𑀥 𑀦𑀺𑀲𑀻𑀤𑀸𑀫 𑀯𑀸 𑀲𑀬𑀸𑀫 𑀯𑀸’’𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑀺𑀧𑀦𑁆𑀦𑀧𑀘𑁆𑀘𑀬𑀸 ¶ 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀙𑀸𑀪𑀢𑁆𑀢𑀁 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀏𑀓𑀸 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺.

𑀬𑀣𑀸 𑀧𑀦 𑀢𑀢𑁆𑀣 𑀅𑀲𑀁𑀳𑀸𑀭𑀺𑀫𑁂 𑀅𑀦𑀸𑀧𑀢𑁆𑀢𑀺, 𑀏𑀯𑀫𑀺𑀥 𑀥𑀼𑀯𑀧𑀜𑁆𑀜𑀢𑁆𑀢𑁂 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺.

𑀙𑀝𑁆𑀞𑀁.

𑁨𑁨𑁦𑁭. 𑀢𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀦𑀢𑁄.

𑀅𑀝𑁆𑀞𑀫𑀁.

𑁨𑁨𑁦𑁮. 𑀬𑀸 ¶ 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀸𑀦𑀫𑁆𑀧𑀺 𑀯𑀸 𑀧𑀭𑀫𑁆𑀧𑀺 𑀯𑀸 𑀦𑀺𑀭𑀬𑀩𑁆𑀭𑀳𑁆𑀫𑀘𑀭𑀺𑀬𑁂𑀳𑀺 𑀅𑀪𑀺𑀲𑀧𑁂𑀬𑁆𑀬, 𑀢𑀲𑁆𑀲𑀸 𑀯𑀸𑀘𑀢𑁄 𑀯𑀸𑀘𑀢𑁄 𑀲𑀺𑀬𑀸 𑀧𑀸𑀘𑀺𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀪𑀺𑀲𑀧𑁂𑀬𑁆𑀬𑀸𑀢𑀺 𑀲𑀧𑀣𑀁 𑀓𑀭𑁂𑀬𑁆𑀬, ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀫𑀺, 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀯𑀸 ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀼, 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀢𑀽’’𑀢𑀺 𑀧𑀭𑀁 𑀯𑀸 ‘‘𑀕𑀺𑀳𑀺𑀦𑀻 𑀳𑁄𑀫𑀺, 𑀑𑀤𑀸𑀢𑀯𑀢𑁆𑀣𑀸 𑀳𑁄𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀯𑀸 ‘‘𑀕𑀺𑀳𑀺𑀦𑀻 𑀳𑁄𑀢𑀼, 𑀑𑀤𑀸𑀢𑀯𑀢𑁆𑀣𑀸 𑀳𑁄𑀢𑀽’’𑀢𑀺 𑀧𑀭𑀁 𑀯𑀸 𑀅𑀪𑀺𑀲𑀧𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁨𑁧𑁦. 𑀅𑀓𑁆𑀓𑁄𑀲𑀢𑀺 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀯𑁂𑀫𑀢𑀺𑀓𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀯𑀲𑁂𑀦. 𑀲𑁂𑀲𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬. 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸 𑀅𑀓𑁆𑀓𑁄𑀲𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀢𑀺𑀓𑀤𑀼𑀓𑁆𑀓𑀝𑀁.

𑁨𑁨𑁧𑁧. 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀦𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀤𑀦𑁆𑀢𑀻𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑀺𑀬𑀸. 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀺𑀬𑀸. 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 ‘𑀇𑀤𑀸𑀦𑀺𑀧𑀺 𑀢𑁆𑀯𑀁 𑀏𑀤𑀺𑀲𑀸, 𑀲𑀸𑀥𑀼 𑀯𑀺𑀭𑀫𑀲𑁆𑀲𑀼, 𑀦𑁄 𑀘𑁂 𑀯𑀺𑀭𑀫𑀲𑀺, 𑀅𑀤𑁆𑀥𑀸 𑀧𑀼𑀦 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀻’𑀢𑀺 𑀏𑀯𑀁 𑀅𑀦𑀼𑀲𑀸𑀲𑀦𑀺𑀬𑀁 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁭𑁮).

𑀦𑀯𑀫𑀁.

𑁨𑁨𑁧𑁨. 𑀯𑀥𑀺𑀢𑁆𑀯𑀸𑀢𑀺 ¶ 𑀲𑀢𑁆𑀣𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸. 𑀯𑀥𑀺𑀢𑁆𑀯𑀸 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀸𑀴𑀺𑀬𑀁 ‘‘𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸’’𑀢𑀺 (𑀧𑀸𑀘𑀺. 𑁮𑁮𑁦) 𑀯𑀼𑀢𑁆𑀢𑀁 𑀆𑀫𑁂𑀟𑀺𑀢𑀁 𑀲𑀽𑀘𑁂𑀢𑀺.

𑁨𑁨𑁧𑁩. 𑀏𑀢𑁆𑀣𑀸𑀢𑀺 ¶ 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑀦𑀸𑀫, 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑀤𑀲𑀫𑀁.

𑀅𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁨𑁨𑁧𑁪. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀕𑁆𑀕𑀸 𑀅𑀦𑀺𑀯𑀢𑁆𑀣𑀸 𑀅𑀧𑀸𑀭𑀼𑀢𑀸 𑀳𑀼𑀢𑁆𑀯𑀸 𑀦𑀳𑀸𑀬𑀢𑀺, 𑀅𑀲𑁆𑀲𑀸 𑀲𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀲𑁆𑀲 𑀦𑀳𑀸𑀦𑀲𑁆𑀲 𑀯𑁄𑀲𑀸𑀦𑁂 𑀧𑀭𑀺𑀬𑁄𑀲𑀸𑀦𑁂 𑀲𑀸 𑀪𑀺𑀓𑁆𑀔𑀼𑀦𑀻 𑀚𑀺𑀦𑀯𑀼𑀢𑁆𑀢𑀁 𑀚𑀺𑀦𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀜𑁆𑀜𑀢𑁆𑀢𑀁 𑀤𑁄𑀲𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀲𑀫𑀼𑀧𑁂𑀢𑀺 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀺 𑀤𑁄𑀲𑀦𑁆𑀢𑀺 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄 𑀓𑀢𑁄.

𑁨𑁨𑁧𑁫. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀢𑀺 𑀅𑀘𑁆𑀙𑀺𑀦𑁆𑀦𑀉𑀤𑀓𑀲𑀸𑀝𑀺𑀓𑀘𑀻𑀯𑀭𑀸. 𑀦𑀝𑁆𑀞𑀘𑀻𑀯𑀭𑀸𑀢𑀺 𑀘𑁄𑀭𑀸𑀤𑀻𑀳𑀺 𑀦𑀝𑁆𑀞𑀉𑀤𑀓𑀲𑀸𑀝𑀺𑀓𑀘𑀻𑀯𑀭𑀸. 𑀆𑀧𑀤𑀸𑀲𑀼 𑀯𑀸𑀢𑀺 ‘‘𑀫𑀳𑀕𑁆𑀖𑀁 𑀇𑀫𑀁 𑀤𑀺𑀲𑁆𑀯𑀸 𑀘𑁄𑀭𑀸𑀧𑀺 𑀳𑀭𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀯𑀸 𑀦𑀕𑁆𑀕𑀸𑀬 𑀦𑀳𑀸𑀬𑀦𑁆𑀢𑀺𑀬𑀸 𑀦 𑀤𑁄𑀲𑁄.

𑀧𑀞𑀫𑀁.

𑁨𑁨𑁧𑁬. 𑀤𑀼𑀢𑀺𑀬𑁂𑀢𑀺 ‘‘𑀉𑀤𑀓𑀲𑀸𑀝𑀺𑀓𑀁 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀭𑀬𑀫𑀸𑀦𑀸𑀬𑀸’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁮𑁮𑁮).

𑀤𑀼𑀢𑀺𑀬𑀁.

𑁨𑁨𑁧𑁭-𑁮. 𑀤𑀼𑀲𑁆𑀲𑀺𑀩𑁆𑀩𑀺𑀢𑀁 𑀘𑀻𑀯𑀭𑀦𑁆𑀢𑀺 𑀅𑀲𑀓𑁆𑀓𑀘𑁆𑀘𑀲𑀺𑀩𑁆𑀩𑀺𑀢𑀁 𑀘𑀻𑀯𑀭𑀁. 𑀯𑀺𑀲𑀺𑀩𑁆𑀩𑁂𑀢𑁆𑀯𑀸𑀢𑀺 𑀤𑀼𑀲𑁆𑀲𑀺𑀩𑁆𑀩𑀺𑀢𑀁 𑀧𑀼𑀦 𑀲𑀺𑀩𑁆𑀩𑀦𑀢𑁆𑀣𑀸𑀬 𑀲𑀬𑀁 𑀯𑀸 𑀯𑀺𑀕𑀢𑀲𑀺𑀩𑁆𑀩𑀦𑀁 𑀓𑀢𑁆𑀯𑀸. ‘‘𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀯𑀸 𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯𑀸 𑀯𑀸’’𑀢𑀺 (𑀧𑀸𑀘𑀺. 𑁮𑁯𑁩). 𑀅𑀦𑀦𑁆𑀢𑀭𑀸𑀬𑀸𑀢𑀺 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 ¶ 𑀅𑀜𑁆𑀜𑀢𑀭𑀦𑁆𑀢𑀭𑀸𑀬𑀭𑀳𑀺𑀢𑀸. 𑀢𑀁 𑀯𑀺𑀲𑀺𑀩𑁆𑀩𑀺𑀢𑀁, 𑀯𑀺𑀲𑀺𑀩𑁆𑀩𑀸𑀧𑀺𑀢𑀁 𑀯𑀸 𑀘𑀻𑀯𑀭𑀁. ‘‘𑀅𑀦𑀦𑁆𑀢𑀭𑀸𑀬𑀸 𑀢𑀁 ¶ 𑀧𑀘𑁆𑀙𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄 𑀓𑀢𑁄. 𑀦 𑀲𑀺𑀩𑁆𑀩𑁂𑀬𑁆𑀬𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀦 𑀲𑀺𑀩𑁆𑀩𑀸𑀧𑁂𑀬𑁆𑀬𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀦𑁂𑀯 𑀲𑀺𑀩𑁆𑀩𑁂𑀬𑁆𑀬, 𑀦 𑀲𑀺𑀩𑁆𑀩𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁯𑁩).

𑀘𑀢𑀼𑀧𑀜𑁆𑀘𑀸𑀳𑀦𑁆𑀢𑀺 𑀏𑀢𑁆𑀣 ‘‘𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 (𑀧𑀸𑀘𑀺. 𑁬𑁨-𑁬𑁪), 𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁫𑁧-𑁫𑁨) 𑀯𑀺𑀬 𑀅𑀧𑁆𑀧𑀲𑀗𑁆𑀔𑁆𑀬𑀸𑀬 𑀩𑀳𑀼𑀲𑀗𑁆𑀔𑁆𑀬𑀸𑀬𑀁 𑀅𑀦𑁆𑀢𑁄𑀕𑀥𑀢𑁆𑀢𑁂𑀧𑀺 𑀉𑀪𑀬𑀯𑀘𑀦𑀁 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀼𑀭𑁂𑀢𑀺 𑀲𑀺𑀩𑁆𑀩𑀦𑀼𑀲𑁆𑀲𑀸𑀳𑁂. 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁂.

𑁨𑁨𑁧𑁯. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀢𑀺 𑀢𑀻𑀲𑀼 𑀯𑀸𑀭𑁂𑀲𑀼 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀲𑁂𑀲𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬. 𑀢𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀯𑀸𑀭𑀢𑁆𑀢𑀬𑁂 𑀤𑀼𑀓𑁆𑀓𑀝𑀢𑁆𑀢𑀬𑀁.

𑁨𑁨𑁨𑁦. 𑀉𑀪𑀺𑀦𑁆𑀦𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀘𑀻𑀯𑀭𑀢𑁄 𑀅𑀜𑁆𑀜𑀲𑁆𑀫𑀺𑀁. 𑀅𑀦𑁆𑀢𑀭𑀸𑀬𑁂𑀧𑀺 𑀯𑀸 𑀲𑀢𑀻𑀢𑀺 𑀭𑀸𑀚𑀘𑁄𑀭𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀁 𑀤𑀲𑀦𑁆𑀦𑀁 𑀅𑀜𑁆𑀜𑀢𑀭𑁂 𑀲𑀢𑀺.

𑁨𑁨𑁨𑁧. ‘‘𑀥𑀼𑀭𑀦𑀺𑀓𑁆𑀔𑁂𑀧𑀦𑀁 𑀦𑀸𑀫, 𑀲𑀫𑀼𑀝𑁆𑀞𑀸𑀦𑀫𑀺𑀤𑀁 𑀫𑀢’’𑀦𑁆𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀬 ‘‘𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁯𑁩) 𑀯𑀼𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑁂𑀭𑀲𑀲𑀼 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀲𑀼 ‘‘𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀺𑀲𑀼𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑀁 𑀦𑀸𑀫 𑀦𑀢𑁆𑀣𑀺. 𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸, 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁, 𑀢𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀲𑀼 𑀅𑀦𑁆𑀢𑁄𑀕𑀥𑀫𑁂𑀯. 𑀢𑀲𑁆𑀫𑀸 ‘‘𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀤𑀁 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀲𑁆𑀲𑁂𑀯 𑀧𑀭𑀺𑀬𑀸𑀬𑁄𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀢𑀺𑀬𑀁.

𑁨𑁨𑁨𑁨. 𑀧𑀜𑁆𑀘 ¶ 𑀅𑀳𑀸𑀦𑀺 𑀧𑀜𑁆𑀘𑀸𑀳𑀁, 𑀧𑀜𑁆𑀘𑀸𑀳𑀫𑁂𑀯 𑀧𑀜𑁆𑀘𑀸𑀳𑀺𑀓𑀁. ‘‘𑀅𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀓𑀺𑀭𑀺𑀬𑀸𑀬 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 ‘‘𑀧𑀜𑁆𑀘𑀸𑀳𑀺𑀓’’𑀦𑁆𑀢𑀺 𑀘 ‘‘𑀲𑀗𑁆𑀖𑀸𑀝𑀺𑀘𑀸𑀭’’𑀦𑁆𑀢𑀺 𑀘 𑀉𑀧𑀬𑁄𑀕𑀢𑁆𑀣𑁂 𑀏𑀯 𑀉𑀧𑀬𑁄𑀕𑀯𑀘𑀦𑀁. 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀺, 𑀇𑀢𑀺 𑀯𑀓𑁆𑀔𑀫𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀫𑁂𑀯𑀸𑀥𑀺𑀯𑀘𑀦𑀁, 𑀲𑀗𑁆𑀖𑀸𑀝𑀻𑀦𑀁 ¶ 𑀘𑀸𑀭𑁄 𑀲𑀗𑁆𑀖𑀸𑀝𑀺𑀘𑀸𑀭𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀯𑀸 𑀑𑀢𑀸𑀧𑀦𑀯𑀲𑁂𑀦 𑀯𑀸 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀸𑀳𑀺𑀓𑀁 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀢𑀺 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀧𑀜𑁆𑀘 𑀘𑀻𑀯𑀭𑀸𑀦𑀺 𑀦𑁂𑀯 𑀦𑀺𑀯𑀸𑀲𑁂𑀢𑀺 𑀦 𑀧𑀸𑀭𑀼𑀧𑀢𑀺 𑀦 𑀑𑀢𑀸𑀧𑁂𑀢𑀺 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁮𑁯𑁯) 𑀯𑀘𑀦𑀢𑁄 𑀧𑀜𑁆𑀘𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀬𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀘𑀻𑀯𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀸𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺𑀆𑀤𑀺.

𑁨𑁨𑁨𑁩. 𑀢𑀺𑀘𑀻𑀯𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑀉𑀢𑁆𑀢𑀭𑀸𑀲𑀗𑁆𑀕𑀲𑀗𑁆𑀖𑀸𑀝𑀺𑀲𑀗𑁆𑀔𑀸𑀢𑀁 𑀢𑀺𑀘𑀻𑀯𑀭𑀜𑁆𑀘. 𑀲𑀁𑀓𑀘𑁆𑀘𑀻𑀢𑀺 𑀣𑀦𑀯𑁂𑀞𑀦𑀲𑀗𑁆𑀔𑀸𑀢𑀁 𑀘𑀻𑀯𑀭𑀜𑁆𑀘. 𑀤𑀓𑀲𑀸𑀝𑀻𑀢𑀺 𑀉𑀢𑀼𑀦𑀺𑀓𑀸𑀮𑁂 𑀦𑀺𑀯𑀸𑀲𑁂𑀢𑀩𑁆𑀩𑀉𑀤𑀓𑀲𑀸𑀝𑀺𑀘𑀻𑀯𑀭𑀜𑁆𑀘. 𑀇𑀢𑀺 𑀇𑀫𑁂 𑀧𑀜𑁆𑀘. 𑀧𑀜𑁆𑀘 𑀢𑀽𑀢𑀺 𑀧𑀜𑁆𑀘 𑀘𑀻𑀯𑀭𑀸𑀦𑀺 𑀦𑀸𑀫.

𑁨𑁨𑁨𑁪-𑁫. 𑀢𑀺𑀓𑀧𑀸𑀘𑀺𑀢𑁆𑀢𑀻𑀢𑀺 𑀧𑀜𑁆𑀘𑀸𑀳𑀸𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀸𑀢𑀺 𑀯𑀺𑀓𑀧𑁆𑀧𑀢𑁆𑀢𑀬𑁂 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀬𑀁 𑀳𑁄𑀢𑀺. 𑀧𑀜𑁆𑀘𑀸𑀳𑀸𑀦𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀸𑀯𑁂𑀫𑀢𑀺𑀓𑀸𑀦𑀁 𑀯𑀲𑁂𑀦 𑀤𑁆𑀯𑀺𑀓𑀤𑀼𑀓𑁆𑀓𑀝𑀁.

‘‘𑀧𑀜𑁆𑀘𑀫𑁂 𑀤𑀺𑀯𑀲𑁂’’𑀢𑀺𑀆𑀤𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑀲𑀦𑁆𑀤𑀲𑁆𑀲𑀦𑀁. 𑀦𑀺𑀲𑁂𑀯𑀢𑀻𑀢𑀺 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸. 𑀑𑀢𑀸𑀧𑁂𑀢𑀻𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀑𑀢𑀸𑀧𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀆𑀧𑀤𑀸𑀲𑀼𑀧𑀻𑀢𑀺 𑀫𑀳𑀕𑁆𑀖𑀁 𑀘𑀻𑀯𑀭𑀁, 𑀦 𑀲𑀓𑁆𑀓𑀸 𑀳𑁄𑀢𑀺 𑀘𑁄𑀭𑀪𑀬𑀸𑀤𑀻𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀏𑀯𑀭𑀽𑀧𑁂 𑀉𑀧𑀤𑁆𑀤𑀯𑁂 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀢𑁆𑀣𑀁.

𑁨𑁨𑁨𑁬. 𑀅𑀜𑁆𑀜𑀺𑀲𑁆𑀲𑀸 ¶ 𑀲𑀗𑁆𑀓𑀫𑁂𑀢𑀩𑁆𑀩𑀘𑀻𑀯𑀭𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑁂𑀢𑁆𑀯𑀸 𑀬𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸, 𑀅𑀜𑁆𑀜𑀺𑀲𑁆𑀲𑀸 𑀉𑀧𑀲𑀫𑁆𑀧𑀦𑁆𑀦𑀸𑀬 𑀲𑀦𑁆𑀢𑀓𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀢𑀲𑁆𑀲𑀸 𑀅𑀯𑀢𑁆𑀯𑀸 𑀆𑀤𑀸𑀬 𑀧𑀼𑀦 𑀢𑀲𑁆𑀲𑀸 𑀤𑀸𑀢𑀩𑁆𑀩𑀁, 𑀅𑀤𑀢𑁆𑀯𑀸 𑀬𑀸 𑀪𑀺𑀓𑁆𑀔𑀼𑀦𑀻 𑀧𑀝𑀺𑀲𑁂𑀯𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀗𑁆𑀓𑀫𑁂𑀢𑀩𑁆𑀩𑀘𑀻𑀯𑀭𑀁 𑀲𑀗𑁆𑀓𑀫𑀦𑀻𑀬’’𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀸 𑀏𑀢𑁂. 𑀬𑀣𑀸𑀳 ‘‘𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀦𑁆𑀢𑀺 𑀲𑀗𑁆𑀓𑀫𑁂𑀢𑀩𑁆𑀩𑀘𑀻𑀯𑀭𑀁, 𑀅𑀜𑁆𑀜𑀺𑀲𑁆𑀲𑀸 𑀲𑀦𑁆𑀢𑀓𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑀺𑀢𑀁 𑀧𑀼𑀦 𑀧𑀝𑀺𑀤𑀸𑀢𑀩𑁆𑀩𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁦𑁩).

𑁨𑁨𑁨𑁭. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀉𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸…𑀧𑁂… 𑀯𑁂𑀫𑀢𑀺𑀓𑀸 ¶ …𑀧𑁂… 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀁 𑀥𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁯𑁦𑁫) 𑀏𑀯𑀁 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀲𑁂𑀲𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬. ‘‘𑀢𑀺𑀓𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀜𑁆𑀘 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀧𑀤𑀸𑀲𑀽𑀢𑀺 𑀲𑀘𑁂 𑀅𑀧𑀸𑀭𑀼𑀢𑀁 𑀯𑀸 𑀅𑀦𑀺𑀯𑀢𑁆𑀣𑀁 𑀯𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀯𑀸.

𑁨𑁨𑁨𑁮. 𑀏𑀢𑀁 𑀲𑀫𑀼𑀝𑁆𑀞𑀸𑀦𑀁 𑀓𑀣𑀺𑀦𑁂𑀦 𑀢𑀼𑀮𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀕𑀳𑀡𑀁, 𑀧𑀭𑀺𑀪𑁄𑀕𑁄 𑀘 𑀓𑁆𑀭𑀺𑀬𑀁. 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑁆𑀭𑀺𑀬𑀁.

𑀧𑀜𑁆𑀘𑀫𑀁.

𑁨𑁨𑁨𑁯. 𑀮𑀪𑀺𑀢𑀩𑁆𑀩𑀁 𑀢𑀼 𑀘𑀻𑀯𑀭𑀦𑁆𑀢𑀺 𑀮𑀪𑀺𑀢𑀩𑁆𑀩𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀘𑀻𑀯𑀭𑀁. 𑀦𑀺𑀯𑀸𑀭𑁂𑀢𑀻𑀢𑀺 𑀬𑀣𑀸 𑀢𑁂 𑀤𑀸𑀢𑀼𑀓𑀸𑀫𑀸 𑀦 𑀤𑁂𑀦𑁆𑀢𑀺, 𑀏𑀯𑀁 𑀅𑀦𑁆𑀢𑀭𑀸𑀬𑀁 𑀧𑀭𑀓𑁆𑀓𑀫𑀢𑀺. 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂𑀢𑀺 𑀲𑀘𑁂 𑀢𑀲𑁆𑀲𑀸 𑀯𑀘𑀦𑁂𑀦 𑀢𑁂 𑀦 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁨𑁩𑁦. 𑀏𑀢𑁆𑀣 𑀧𑀞𑀫𑀁 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀡𑀲𑁆𑀲𑀸𑀢𑀺 𑀤𑁆𑀯𑁂 𑀢𑀬𑁄𑀯 𑀕𑀳𑁂𑀢𑀩𑁆𑀩𑀸. 𑀮𑀸𑀪𑁂𑀢𑀺 𑀏𑀢𑁆𑀣 ‘‘𑀦𑀺𑀯𑀸𑀭𑀺𑀢𑁂’’𑀢𑀺 𑀲𑁂𑀲𑁄. 𑀲𑀘𑁂 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀦𑀺𑀯𑀸𑀭𑁂𑀢𑀺, 𑀢𑀣𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑁄 𑀅𑀜𑁆𑀜𑀁. 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 ¶ 𑀬𑀁 𑀓𑀺𑀜𑁆𑀘𑀺 𑀣𑀸𑀮𑀓𑀸𑀤𑀻𑀦𑀁 𑀯𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁.

𑁨𑁨𑁩𑁧. 𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀓𑀺𑀢𑁆𑀢𑀓𑀁 𑀅𑀕𑁆𑀖𑀦𑀓𑀁 𑀤𑀸𑀢𑀼𑀓𑀸𑀫𑀢𑁆𑀣𑀸𑀢𑀺 𑀧𑀼𑀘𑁆𑀙𑀢𑀺, ‘𑀏𑀢𑁆𑀢𑀓𑀁 𑀦𑀸𑀫𑀸’𑀢𑀺 𑀯𑀤𑀦𑁆𑀢𑀺, ‘𑀆𑀕𑀫𑁂𑀣 𑀢𑀸𑀯, 𑀇𑀤𑀸𑀦𑀺 𑀯𑀢𑁆𑀣𑀼 𑀫𑀳𑀕𑁆𑀖𑀁, 𑀓𑀢𑀺𑀧𑀸𑀳𑁂𑀦 𑀓𑀧𑁆𑀧𑀸𑀲𑁂 𑀆𑀕𑀢𑁂 𑀲𑀫𑀕𑁆𑀖𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸. 𑀦 𑀤𑁄𑀲𑀢𑀸𑀢𑀺 𑀦 𑀤𑁄𑀲𑁄, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀁.

𑁨𑁨𑁩𑁨-𑁩. 𑀥𑀫𑁆𑀫𑀺𑀓𑀁 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑀺𑀬𑀫𑀸𑀦𑀁 𑀘𑀻𑀯𑀭𑀸𑀦𑀁 𑀯𑀺𑀪𑀗𑁆𑀕𑀁 𑀪𑀸𑀚𑀦𑀁 𑀬𑀸 𑀪𑀺𑀓𑁆𑀔𑀼𑀦𑀻 𑀧𑀝𑀺𑀲𑁂𑀥𑁂𑀬𑁆𑀬 𑀧𑀝𑀺𑀩𑀸𑀳𑁂𑀬𑁆𑀬, 𑀢𑀲𑁆𑀲𑀸 𑀏𑀯𑀁 𑀧𑀝𑀺𑀲𑁂𑀥𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀸𑀬 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀉𑀪𑁄 𑀯𑁂𑀫𑀢𑀺𑀓𑀸𑀬 𑀯𑀸𑀢𑀺 𑀉𑀪𑁄𑀲𑀼 𑀯𑁂𑀫𑀢𑀺𑀓𑀸𑀬. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀼-𑀲𑀤𑁆𑀤𑀮𑁄𑀧𑁄. 𑀥𑀫𑁆𑀫𑀺𑀓𑁂 𑀅𑀥𑀫𑁆𑀫𑀺𑀓𑁂 𑀘𑀻𑀯𑀭𑀯𑀺𑀪𑀗𑁆𑀕𑁂 𑀯𑁂𑀫𑀢𑀺𑀓𑀸𑀬 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 ¶ 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀥𑀫𑁆𑀫𑀺𑀓𑁂 𑀯𑁂𑀫𑀢𑀺𑀓𑀸 𑀧𑀝𑀺𑀩𑀸𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀺𑀓𑁂 𑀯𑁂𑀫𑀢𑀺𑀓𑀸 𑀧𑀝𑀺𑀩𑀸𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀏𑀓𑀺𑀲𑁆𑀲𑀸 𑀏𑀓𑀁 𑀲𑀸𑀝𑀓𑀁 𑀦𑀧𑁆𑀧𑀳𑁄𑀢𑀺, 𑀆𑀕𑀫𑁂𑀣 𑀢𑀸𑀯, 𑀓𑀢𑀺𑀧𑀸𑀳𑁂𑀦𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁄 𑀪𑀸𑀚𑁂𑀲𑁆𑀲𑀸𑀫𑀻’’𑀢𑀺 (𑀧𑀸𑀘𑀺. 𑁯𑁧𑁪) 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸.

𑀲𑀢𑁆𑀢𑀫𑀁.

𑁨𑁨𑁩𑁫-𑁬. 𑀦𑀺𑀯𑀸𑀲𑀦𑀼𑀧𑀕𑀁 𑀯𑀸 𑀢𑀣𑀸 𑀧𑀸𑀭𑀼𑀧𑀦𑀼𑀧𑀕𑀁 𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀓𑀢𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀘 𑀫𑀸𑀢𑀸𑀧𑀺𑀢𑀭𑁄𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 ¶ 𑀬𑀤𑀺 𑀤𑀤𑁂𑀬𑁆𑀬, 𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀧𑀭𑀺𑀬𑀸𑀧𑀼𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀧𑀺𑀢𑀭𑁄’’𑀢𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀸𑀢𑀸𑀧𑀺𑀢𑀭𑁄𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁨𑁨𑁩𑁭. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀢𑀸 𑀧𑀦 𑀧𑀸𑀘𑀺𑀢𑁆𑀢𑀺𑀬𑁄 𑀘𑀻𑀯𑀭𑀸𑀦𑀁 𑀕𑀡𑀦𑀸𑀬 𑀯𑀲𑁂𑀦 𑀕𑀡𑁂𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁨𑁨𑁩𑁮. 𑀢𑀸𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀓𑀸𑀮𑁄 𑀏𑀢𑀲𑁆𑀲𑀸𑀢𑀺 𑀢𑀸𑀯𑀓𑀸𑀮𑀺𑀓𑀁, 𑀘𑀻𑀯𑀭𑀁. ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀤𑀽𑀭𑀢𑁆𑀢𑀸 𑀧𑀼𑀦𑀧𑀺 ‘‘𑀅𑀜𑁆𑀜𑁂𑀲’’𑀦𑁆𑀢𑀺 𑀆𑀳, 𑀲𑁄𑀬𑁂𑀯𑀢𑁆𑀣𑁄.

𑀅𑀝𑁆𑀞𑀫𑀁.

𑁨𑁨𑁩𑁯. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 ‘‘𑀲𑀘𑁂 𑀫𑀬𑀁 𑀲𑀓𑁆𑀓𑁄𑀫, 𑀤𑀲𑁆𑀲𑀸𑀫 𑀓𑀭𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀤𑀼𑀩𑁆𑀩𑀮𑀸𑀬 𑀘𑀻𑀯𑀭𑀧𑀘𑁆𑀘𑀸𑀲𑀸𑀬 𑀘𑀻𑀯𑀭𑀲𑁆𑀲 𑀯𑀺𑀪𑀗𑁆𑀕𑀁 𑀦𑀺𑀲𑁂𑀥𑁂𑀢𑁆𑀯𑀸 𑀘𑀻𑀯𑀭𑁂 𑀓𑀸𑀮𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀲𑁆𑀲𑀸 𑀤𑁄𑀲𑀢𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀘𑀻𑀯𑀭𑁂 𑀓𑀸𑀮𑀦𑁆𑀢𑀺 ‘‘𑀘𑀻𑀯𑀭𑀓𑀸𑀮𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘𑀫𑀸𑀲𑀸’’𑀢𑀺 (𑀧𑀸𑀘𑀺. 𑁯𑁨𑁨) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 𑀘𑀻𑀯𑀭𑀓𑀸𑀮𑀁. 𑀅𑀢𑀺𑀓𑁆𑀓𑀫𑁂𑀬𑁆𑀬𑀸𑀢𑀺 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀁 𑀤𑀺𑀯𑀲𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀓𑀣𑀺𑀦𑀼𑀤𑁆𑀥𑀸𑀭𑀤𑀺𑀯𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀯𑀺𑀥𑀺𑀁 𑀅𑀢𑀺𑀓𑁆𑀓𑀸𑀫𑁂𑀬𑁆𑀬.

𑁨𑁨𑁪𑁦. ‘‘𑀅𑀤𑀼𑀩𑁆𑀩𑀮𑀘𑀻𑀯𑀭𑁂 ¶ 𑀤𑀼𑀩𑁆𑀩𑀮𑀘𑀻𑀯𑀭𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀲𑀼𑀤𑀼𑀩𑁆𑀩𑀮𑀦𑁆𑀢𑀺 𑀘𑁂𑀢𑀲𑀸𑀢𑀺 𑀏𑀢𑁆𑀣 𑀲𑀼-𑀲𑀤𑁆𑀤𑁄 𑀧𑀤𑀧𑀽𑀭𑀡𑁂. 𑀉𑀪𑁄𑀲𑀽𑀢𑀺 𑀤𑀼𑀩𑁆𑀩𑀮𑁂, 𑀅𑀤𑀼𑀩𑁆𑀩𑀮𑁂 𑀘. 𑀓𑀗𑁆𑀔𑀺𑀢𑀸𑀬 𑀯𑀸𑀢𑀺 𑀯𑁂𑀫𑀢𑀺𑀓𑀸𑀬 𑀯𑀸.

𑁨𑁨𑁪𑁧. 𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀓𑀺𑀜𑁆𑀘𑀸𑀧𑀺 ‘𑀦 𑀫𑀬𑀁 𑀅𑀬𑁆𑀬𑁂 𑀲𑀓𑁆𑀓𑁄𑀫𑀸’𑀢𑀺 𑀯𑀤𑀦𑁆𑀢𑀺, 𑀇𑀤𑀸𑀦𑀺 𑀧𑀦 𑀢𑁂𑀲𑀁 𑀓𑀧𑁆𑀧𑀸𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀺 ¶ , 𑀅𑀤𑁆𑀥𑀸 𑀤𑀲𑁆𑀲𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁨𑁧) 𑀏𑀯𑀁 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸.

𑀦𑀯𑀫𑀁.

𑁨𑁨𑁪𑁨. 𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 ‘‘𑀥𑀫𑁆𑀫𑀺𑀓𑁄 𑀦𑀸𑀫 𑀓𑀣𑀺𑀦𑀼𑀤𑁆𑀥𑀸𑀭𑁄 𑀲𑀫𑀕𑁆𑀕𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀤𑁆𑀥𑀭𑀢𑀻’’𑀢𑀺 (𑀧𑀸𑀘𑀺. 𑁯𑁨𑁯) 𑀯𑀼𑀢𑁆𑀢𑀁 𑀓𑀣𑀺𑀦𑀼𑀤𑁆𑀥𑀸𑀭𑀁.

𑁨𑁨𑁪𑁩. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀓𑀣𑀺𑀦𑀲𑁆𑀲. 𑀅𑀢𑁆𑀣𑀸𑀭𑀫𑀽𑀮𑀓𑁄 𑀆𑀦𑀺𑀲𑀁𑀲𑁄 𑀦𑀸𑀫 ‘‘𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄, 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁩𑁦𑁬) 𑀅𑀦𑀼𑀜𑁆𑀜𑀸𑀢𑁄 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀚𑁆𑀚𑀦𑀓𑀘𑀻𑀯𑀭𑀯𑀢𑁆𑀣𑀸𑀦𑀺𑀲𑀁𑀲𑁄. 𑀉𑀤𑁆𑀥𑀸𑀭𑀫𑀽𑀮𑀓𑁄 𑀦𑀸𑀫 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀓𑀸𑀭𑀸𑀧𑁂𑀦𑁆𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀤𑀺𑀬𑁆𑀬𑀫𑀸𑀦𑀘𑀻𑀯𑀭𑀯𑀢𑁆𑀣𑀸𑀦𑀺𑀲𑀁𑀲𑁄.

𑁨𑁨𑁪𑁫. 𑀲𑀫𑀸𑀦𑀺𑀲𑀁𑀲𑁄𑀧𑀻𑀢𑀺 𑀅𑀢𑁆𑀣𑀸𑀭𑀆𑀦𑀺𑀲𑀁𑀲𑁂𑀦 𑀲𑀫𑀸𑀦𑀺𑀲𑀁𑀲𑁄𑀧𑀺 𑀉𑀩𑁆𑀪𑀸𑀭𑁄. 𑀲𑀤𑁆𑀥𑀸𑀧𑀸𑀮𑀦𑀓𑀆𑀭𑀡𑀸𑀢𑀺 𑀧𑀲𑀸𑀤𑀸𑀦𑀼𑀭𑀓𑁆𑀔𑀦𑀢𑁆𑀣𑀸𑀬 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀆𑀦𑀺𑀲𑀁𑀲𑀁 𑀦𑀺𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀚𑀺𑀡𑁆𑀡𑀘𑀻𑀯𑀭𑁄, 𑀓𑀣𑀺𑀦𑀸𑀦𑀺𑀲𑀁𑀲𑀫𑀽𑀮𑀓𑁄 𑀫𑀳𑀸𑀮𑀸𑀪𑁄’’𑀢𑀺 𑀏𑀯𑀭𑀽𑀧𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸.

𑁨𑁨𑁪𑁬. 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑁂𑀲𑀁 𑀧𑀦 𑀯𑀺𑀦𑀺𑀘𑁆𑀙𑀬𑀚𑀸𑀢𑀁 𑀅𑀲𑁂𑀲𑁂𑀦 𑀲𑀩𑁆𑀩𑀸𑀓𑀸𑀭𑁂𑀦 𑀲𑀢𑁆𑀢𑀫𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀁 𑀫𑀢𑀁 ‘‘𑀲𑀤𑀺𑀲’’𑀦𑁆𑀢𑀺 𑀯𑀺𑀜𑁆𑀜𑀸𑀢𑀁. 𑀓𑀺𑀜𑁆𑀘𑀺𑀧𑀺 𑀅𑀧𑁆𑀧𑀓𑀫𑁆𑀧𑀺 𑀅𑀧𑀼𑀩𑁆𑀩𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁄 𑀅𑀜𑁆𑀜𑀁 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑀤𑀲𑀫𑀁.

𑀦𑀕𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑁨𑁨𑁪𑁭. ‘‘𑀬𑀸 ¶ ¶ 𑀧𑀦 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑁂𑀬𑁆𑀬𑀼𑀁, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁩𑁩) 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀸𑀬𑀸’’𑀢𑀺𑀆𑀤𑀺. 𑀏𑀓𑀸𑀬𑀸𑀢𑀺 𑀏𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸. 𑀅𑀧𑀭𑀸𑀢𑀺 𑀅𑀜𑁆𑀜𑀸 𑀉𑀧𑀲𑀫𑁆𑀧𑀦𑁆𑀦𑀸. 𑀦𑀺𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 ‘‘𑀏𑀓𑀫𑀜𑁆𑀘𑁂’’𑀢𑀺 𑀲𑁂𑀲𑁄. 𑀤𑁆𑀯𑁂𑀢𑀺 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄.

𑁨𑁨𑁪𑁮-𑁯. ‘‘𑀏𑀓𑀸𑀬 𑀘𑀸’’𑀢𑀺𑀆𑀤𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑀦𑀺𑀤𑁆𑀤𑁂𑀲𑁄. 𑀉𑀪𑁄 𑀯𑀸𑀧𑀺 𑀲𑀫𑀁 𑀦𑀺𑀲𑀻𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀴𑀓𑁂𑀦𑀸𑀢𑀺 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂𑀦.

𑀧𑀞𑀫𑀁.

𑁨𑁨𑁫𑁦-𑁧. 𑀧𑀸𑀯𑀸𑀭𑀓𑀝𑀲𑀸𑀭𑀸𑀤𑀺𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑁂𑀓𑀯𑀘𑀦𑀁. ‘‘𑀲𑀁𑀳𑀸𑀭𑀺𑀫𑁂𑀲𑀽’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀩𑀳𑀼𑀯𑀘𑀦𑀧𑁆𑀧𑀲𑀗𑁆𑀕𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦𑁂𑀢𑁆𑀣 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀸𑀯𑀸𑀭𑁄 𑀘 𑀓𑀝𑀲𑀸𑀭𑁄 𑀘 𑀢𑁂 𑀆𑀤𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀏𑀓𑀓𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀦𑀺𑀤𑀲𑁆𑀲𑀦𑀁. 𑀏𑀓𑀫𑁂𑀯 𑀏𑀓𑀓𑀁. 𑀲𑀁𑀳𑀸𑀭𑀺𑀫𑁂𑀲𑀼 𑀧𑀸𑀯𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀸𑀯𑀸𑀭𑁄𑀢𑀺 𑀓𑁄𑀚𑀯𑀸𑀤𑀬𑁄’’𑀢𑀺 𑀯𑀤𑀦𑁆𑀢𑀺. 𑀓𑀝𑀲𑀸𑀭𑁄𑀢𑀺 𑀓𑀝𑁄𑀬𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀲𑀬𑀦𑀸𑀭𑀳𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑁂𑀯𑀸𑀢𑀺 𑀬𑀁 𑀅𑀢𑁆𑀣𑀢𑀁, 𑀢𑁂𑀦𑁂𑀯. 𑀧𑀸𑀭𑀼𑀧𑀺𑀢𑁆𑀯𑀸 𑀲𑀘𑁂 𑀬𑀸 𑀧𑀦 𑀤𑁆𑀯𑁂 𑀲𑀳𑁂𑀯 𑀦𑀺𑀧𑀚𑁆𑀚𑀦𑁆𑀢𑀺, 𑀢𑀸𑀲𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀓𑀺𑀘𑁆𑀘𑁂 𑀏𑀓𑀲𑁆𑀲𑁂𑀯 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀓𑀲𑁆𑀲 𑀅𑀦𑁆𑀢𑀲𑁆𑀲 𑀅𑀢𑁆𑀣𑀭𑀡𑀜𑁆𑀘 𑀏𑀓𑀲𑁆𑀲 𑀅𑀦𑁆𑀢𑀲𑁆𑀲 𑀧𑀸𑀭𑀼𑀧𑀦𑀜𑁆𑀘 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸𑀳 ‘‘𑀲𑀁𑀳𑀸𑀭𑀺𑀫𑀸𑀦𑀁 𑀧𑀸𑀯𑀸𑀭𑀢𑁆𑀣𑀭𑀡𑀓𑀝𑀲𑀸𑀭𑀓𑀸𑀤𑀻𑀦𑀁 𑀏𑀓𑀁 𑀅𑀦𑁆𑀢𑀁 𑀅𑀢𑁆𑀣𑀭𑀺𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀢𑀼𑀯𑀝𑁆𑀝𑁂𑀦𑁆𑀢𑀻𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁩𑁭).

𑀏𑀓𑀲𑁆𑀫𑀺𑀁 𑀏𑀓𑀢𑁆𑀣𑀭𑀡𑁂 𑀯𑀸 𑀏𑀓𑀧𑀸𑀯𑀼𑀭𑀡𑁂 𑀯𑀸 𑀦𑀺𑀧𑀚𑁆𑀚𑀦𑁂 𑀲𑀢𑀺 𑀢𑀸𑀲𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀺𑀓𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 ¶ ‘‘𑀦𑀸𑀦𑀢𑁆𑀣𑀭𑀡𑀧𑀸𑀯𑀼𑀭𑀡𑁂 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀲𑀜𑁆𑀜𑀸…𑀧𑁂… 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁯𑁩𑁯) 𑀯𑀼𑀢𑁆𑀢𑀁 𑀤𑀼𑀓𑁆𑀓𑀝𑀤𑁆𑀯𑀬𑀁.

𑁨𑁨𑁫𑁨. 𑀯𑀯𑀢𑁆𑀣𑀸𑀦𑀁 𑀦𑀺𑀤𑀲𑁆𑀲𑁂𑀢𑁆𑀯𑀸𑀢𑀺 𑀫𑀚𑁆𑀛𑁂 𑀓𑀸𑀲𑀸𑀯𑀁 𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀁 𑀯𑀸 𑀅𑀦𑁆𑀢𑀫𑀲𑁄 𑀓𑀸𑀬𑀩𑀦𑁆𑀥𑀦𑀫𑁆𑀧𑀺 ¶ 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀺𑀥𑀸𑀦𑀁. 𑀆𑀤𑀺𑀦𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀯𑀕𑁆𑀕𑁂 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀦. 𑀢𑀼𑀮𑁆𑀬𑀦𑁆𑀢𑀺 𑀲𑀫𑀸𑀦𑀁.

𑀤𑀼𑀢𑀺𑀬𑀁.

𑁨𑁨𑁫𑁩. 𑀅𑀜𑁆𑀜𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸. 𑀅𑀨𑀸𑀲𑀼𑀓𑀸𑀭𑀡𑀸𑀢𑀺 𑀅𑀨𑀸𑀲𑀼𑀓𑀭𑀡𑀳𑁂𑀢𑀼. 𑀅𑀦𑀸𑀧𑀼𑀘𑁆𑀙𑀸𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀢𑀲𑁆𑀲𑀸 𑀧𑀼𑀭𑀢𑁄 𑀘 𑀘𑀗𑁆𑀓𑀫𑀦𑀸𑀤𑀬𑁄 𑀬𑀤𑀺 𑀓𑀭𑁂𑀬𑁆𑀬, 𑀏𑀯𑀁 𑀓𑀭𑁄𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀘𑀗𑁆𑀓𑀫𑀦𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀢𑀺𑀝𑁆𑀞𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀯𑀸 𑀉𑀤𑁆𑀤𑀺𑀲𑀸𑀧𑁂𑀢𑀺 𑀯𑀸 𑀲𑀚𑁆𑀛𑀸𑀬𑀁 𑀯𑀸 𑀓𑀭𑁄𑀢𑀻’’𑀢𑀺 (𑀧𑀸𑀘𑀺. 𑁯𑁪𑁩) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑁄.

𑁨𑁨𑁫𑁪. 𑀦𑀺𑀯𑀢𑁆𑀢𑀦𑀸𑀦𑀁 𑀕𑀡𑀦𑀸𑀬𑀸𑀢𑀺 𑀘𑀗𑁆𑀓𑀫𑀦𑁆𑀢𑀺𑀬𑀸 𑀘𑀗𑁆𑀓𑀫𑀲𑁆𑀲 𑀉𑀪𑀬𑀓𑁄𑀝𑀺𑀁 𑀧𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺𑀬𑀸 𑀦𑀺𑀯𑀢𑁆𑀢𑀦𑀕𑀡𑀦𑀸𑀬. 𑀧𑀬𑁄𑀕𑀢𑁄𑀬𑁂𑀯𑀸𑀢𑀺 𑀧𑀬𑁄𑀕𑀕𑀡𑀦𑀸𑀬𑁂𑀯, 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀕𑀡𑀦𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁄𑀲𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄.

𑁨𑁨𑁫𑁫. 𑀧𑀤𑀸𑀦𑀁 𑀕𑀡𑀦𑀸𑀯𑀲𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀬𑀣𑀸𑀳 ‘‘𑀧𑀤𑀸𑀤𑀺𑀕𑀡𑀦𑀸𑀬𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁪𑁩). 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀢𑀺 𑀯𑀺𑀓𑀧𑁆𑀧𑀢𑁆𑀢𑀬𑀲𑁆𑀲 𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀲𑁂𑀲𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬.

𑁨𑁨𑁫𑁬. 𑀦 ¶ 𑀘 𑀅𑀨𑀸𑀲𑀼𑀓𑀸𑀫𑀸𑀬𑀸𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀢𑁄 𑀘𑀗𑁆𑀓𑀫𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁨𑁫𑁭. 𑀓𑁆𑀭𑀺𑀬𑀸𑀓𑁆𑀭𑀺𑀬𑀦𑁆𑀢𑀺 𑀘𑀗𑁆𑀓𑀫𑀦𑀸𑀤𑀺𑀓𑀭𑀡𑀁 𑀓𑀺𑀭𑀺𑀬𑀁. 𑀆𑀧𑀼𑀘𑁆𑀙𑀸𑀬 𑀅𑀓𑀭𑀡𑀁 𑀅𑀓𑀺𑀭𑀺𑀬𑀁. 𑀧𑀸𑀧𑀫𑀸𑀦𑀲𑀦𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀁.

𑀢𑀢𑀺𑀬𑀁.

𑁨𑁨𑁫𑁮-𑁯. 𑀅𑀦𑀦𑁆𑀢𑀭𑀸𑀬𑀸𑀢𑀺 𑀯𑀓𑁆𑀔𑀫𑀸𑀦𑁂𑀲𑀼 𑀭𑀸𑀚𑀦𑁆𑀢𑀭𑀸𑀬𑀸𑀤𑀻𑀲𑀼 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀅𑀜𑁆𑀜𑀢𑀭𑀭𑀳𑀺𑀢𑀸 ¶ 𑀪𑀺𑀓𑁆𑀔𑀼𑀦𑀻. 𑀤𑀼𑀓𑁆𑀔𑀺𑀢𑀦𑁆𑀢𑀺 𑀕𑀺𑀮𑀸𑀦𑀁. 𑀬𑀣𑀸𑀳 ‘‘𑀤𑀼𑀓𑁆𑀔𑀺𑀢𑀸 𑀦𑀸𑀫 𑀕𑀺𑀮𑀸𑀦𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀘𑀺. 𑁯𑁪𑁮). 𑀲𑀳𑀚𑀻𑀯𑀺𑀦𑀺𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀁. 𑀬𑀣𑀸𑀳 ‘‘𑀲𑀳𑀚𑀻𑀯𑀺𑀦𑀻 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀻 𑀯𑀼𑀘𑁆𑀘𑀢𑀻’’𑀢𑀺. 𑀅𑀜𑁆𑀜𑀸𑀬 𑀯𑀸 𑀦𑀼𑀧𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬, 𑀲𑀸𑀫𑀡𑁂𑀭𑀺𑀬𑀸 𑀯𑀸 𑀕𑀺𑀳𑀺𑀦𑀺𑀬𑀸 𑀯𑀸 𑀉𑀧𑀝𑁆𑀞𑀸𑀦𑀁 𑀦 𑀓𑀸𑀭𑀸𑀧𑁂𑀬𑁆𑀬. 𑀦𑀼𑀧𑀝𑁆𑀞𑁂𑀬𑁆𑀬 𑀲𑀬𑀫𑁆𑀧𑀺 𑀯𑀸𑀢𑀺 𑀬𑀸 𑀉𑀧𑀝𑁆𑀞𑀸𑀦𑀁 𑀦 𑀓𑀭𑁂𑀬𑁆𑀬. 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀯𑀸𑀢𑀺 ‘‘𑀦𑁂𑀯 𑀉𑀧𑀝𑁆𑀞𑁂𑀲𑁆𑀲𑀸𑀫𑀺, 𑀦 𑀉𑀧𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑁂 𑀉𑀲𑁆𑀲𑀸𑀳𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀸𑀬.

𑀅𑀦𑁆𑀢𑁂𑀯𑀸𑀲𑀺𑀦𑀺𑀬𑀸 𑀯𑀸𑀧𑀻𑀢𑀺 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀦𑀺𑀲𑁆𑀲𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀲𑀼 𑀅𑀦𑁆𑀢𑁂𑀯𑀸𑀲𑀺𑀦𑀻𑀲𑀼 𑀅𑀜𑁆𑀜𑀢𑀭𑀸𑀬. 𑀇𑀢𑀭𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬.

𑁨𑁨𑁬𑁦. 𑀕𑀺𑀮𑀸𑀦𑀸𑀬𑀸𑀢𑀺 𑀲𑀬𑀁 𑀕𑀺𑀮𑀸𑀦𑀸𑀬. ‘‘𑀕𑀯𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀺𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄, 𑀅𑀜𑁆𑀜𑀁 𑀉𑀧𑀝𑁆𑀞𑀸𑀬𑀺𑀓𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀫𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀆𑀧𑀤𑀸𑀲𑀼 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀡𑁆𑀡𑀮𑁄𑀧𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀆𑀧𑀤𑀸𑀲𑀽𑀢𑀺 𑀢𑀣𑀸𑀭𑀽𑀧𑁂 𑀉𑀧𑀤𑁆𑀤𑀯𑁂 𑀲𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀦𑁄𑀤𑀬𑀦𑁆𑀢𑀺 ¶ 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀘𑀢𑀼𑀢𑁆𑀣𑀁.

𑁨𑁨𑁬𑁧-𑁨. 𑀧𑀼𑀕𑁆𑀕𑀮𑀺𑀓𑀲𑁆𑀲 𑀅𑀢𑁆𑀢𑀸𑀬𑀢𑁆𑀢𑀧𑀭𑀸𑀬𑀢𑁆𑀢𑀯𑀲𑁂𑀦 𑀅𑀦𑀺𑀬𑀫𑀺𑀢𑀢𑁆𑀢𑀸 ‘‘𑀲𑀓’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀫𑁂𑀢𑀺. 𑀲𑀓𑀁 𑀧𑀼𑀕𑁆𑀕𑀮𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀁. 𑀤𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀲𑁂𑀲𑁄. 𑀲𑀓𑀯𑀸𑀝𑀦𑁆𑀢𑀺 𑀧𑀭𑀺𑀯𑀢𑁆𑀢𑀓𑀤𑁆𑀯𑀸𑀭𑀓𑀯𑀸𑀝𑀲𑀳𑀺𑀢𑀁. 𑀉𑀧𑀲𑁆𑀲𑀬𑀦𑁆𑀢𑀺 𑀕𑁂𑀳𑀁. 𑀤𑁆𑀯𑀸𑀭𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑀩𑁆𑀪𑀧𑀫𑀼𑀔𑀸𑀦𑀁 𑀲𑀗𑁆𑀕𑀳𑁄, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀩𑀳𑀽𑀦𑀺𑀧𑀻𑀢𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀦𑀺𑀤𑀲𑁆𑀲𑀦𑀁. 𑀩𑀳𑀽𑀦𑀺𑀧𑀺 𑀤𑁆𑀯𑀸𑀭𑀸𑀦𑀺 𑀯𑀸 𑀩𑀳𑀽 𑀕𑀩𑁆𑀪𑁂 𑀯𑀸 𑀩𑀳𑀽𑀦𑀺 𑀧𑀫𑀼𑀔𑀸𑀦𑀺 𑀯𑀸. 𑀢𑀦𑁆𑀢𑀺 𑀬𑀲𑁆𑀲𑀸 𑀉𑀧𑀲𑁆𑀲𑀬𑁄 𑀤𑀺𑀦𑁆𑀦𑁄, 𑀢𑀁 𑀪𑀺𑀓𑁆𑀔𑀼𑀦𑀺𑀁. 𑀦𑀺𑀓𑁆𑀓𑀟𑁆𑀠𑀦𑁆𑀢𑀺𑀬𑀸𑀢𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸. 𑀢𑀲𑁆𑀲𑀸𑀢𑀺 𑀬𑀸 𑀦𑀺𑀓𑁆𑀓𑀟𑁆𑀠𑀢𑀺, 𑀢𑀲𑁆𑀲𑀸.

𑁨𑁨𑁬𑁩. 𑀏𑀢𑁆𑀣𑀸𑀢𑀺 𑀦𑀺𑀓𑁆𑀓𑀟𑁆𑀠𑀦𑁂. 𑀏𑀲𑁂𑀯 𑀦𑀬𑁄𑀢𑀺 ‘‘𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀻’’𑀢𑀺 𑀤𑀲𑁆𑀲𑀺𑀢𑀦𑀬𑁄. 𑀏𑀢𑁆𑀣 𑀧𑀬𑁄𑀕𑁄 𑀦𑀸𑀫 𑀆𑀡𑀸𑀧𑀦𑀁, 𑀇𑀫𑀺𑀦𑀸 ‘‘𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀅𑀦𑁂𑀓𑁂𑀲𑀼 𑀤𑁆𑀯𑀸𑀭𑁂𑀲𑀼 𑀅𑀢𑀺𑀓𑁆𑀓𑀸𑀫𑀺𑀢𑁂𑀲𑀼𑀧𑀺 𑀏𑀓𑀸𑀯 𑀆𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀁 (𑀧𑀸𑀘𑀺. 𑀅𑀝𑁆𑀞. 𑁯𑁪𑁩, 𑁯𑁫𑁨 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁨𑁬𑁪. 𑀢𑁂𑀲𑀼 ¶ 𑀯𑀺𑀦𑀺𑀘𑁆𑀙𑀬𑁂𑀲𑀼 𑀏𑀓𑀁 𑀯𑀺𑀦𑀺𑀘𑁆𑀙𑀬𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀢𑁆𑀢𑀓𑀸𑀯 𑀇𑀫𑀁 𑀤𑁆𑀯𑀸𑀭𑀸’’𑀢𑀺𑀆𑀤𑀺. 𑀤𑁆𑀯𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀤𑁆𑀯𑀸𑀭𑀕𑀡𑀦𑀸𑀧𑀢𑁆𑀢𑀺𑀬𑁄.

𑁨𑁨𑁬𑁫. 𑀅𑀓𑀯𑀸𑀝𑀫𑁆𑀳𑀸𑀢𑀺 𑀅𑀓𑀯𑀸𑀝𑀩𑀦𑁆𑀥𑀢𑁄 𑀉𑀧𑀲𑁆𑀲𑀬𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀲𑁂𑀲𑀸𑀬𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬. 𑀢𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀬, 𑀯𑁂𑀫𑀢𑀺𑀓𑀸𑀬, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸𑀬 𑀘 𑀯𑀲𑁂𑀦 𑀢𑀺𑀓𑀤𑀼𑀓𑁆𑀓𑀝𑀁. 𑀉𑀪𑀺𑀦𑁆𑀦𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁. 𑀧𑀭𑀺𑀓𑁆𑀔𑀸𑀭𑁂𑀲𑀽𑀢𑀺 𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀧𑀭𑀺𑀓𑁆𑀔𑀸𑀭𑁂𑀲𑀼 ¶ . 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀬𑁄𑀕𑁂𑀲𑀼, 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑁂𑀲𑀼, 𑀦𑀺𑀓𑁆𑀓𑀟𑁆𑀠𑀸𑀧𑀺𑀬𑀫𑀸𑀦𑁂𑀲𑀼 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁨𑁬𑁬. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑁂𑀦 𑀲𑀳 𑀲𑁂𑀲𑀁 𑀯𑀺𑀦𑀺𑀘𑁆𑀙𑀬𑀚𑀸𑀢𑀁 𑀅𑀲𑁂𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀲𑁆𑀫𑀸 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀁 𑀫𑀢𑀁 ‘‘𑀲𑀤𑀺𑀲’’𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀫𑀁.

𑁨𑁨𑁬𑁭. 𑀙𑀝𑁆𑀞𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀁𑀲𑀝𑁆𑀞𑀸 𑀯𑀺𑀳𑀭𑁂𑀬𑁆𑀬 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀢𑀺𑀓𑀸𑀬 (𑀧𑀸𑀘𑀺. 𑁯𑁫𑁬) 𑀦𑀺𑀤𑁆𑀤𑀺𑀝𑁆𑀞𑁂 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑁂. 𑀇𑀥 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑀣𑁂𑀢𑀩𑁆𑀩𑀁. 𑀅𑀭𑀺𑀝𑁆𑀞𑀲𑁆𑀲 𑀲𑀺𑀓𑁆𑀔𑀸𑀧𑀤𑁂𑀦𑀸𑀢𑀺 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑁂𑀦. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀫𑀼𑀝𑁆𑀞𑀸𑀦𑀸𑀤𑀺𑀓𑁄.

𑀙𑀝𑁆𑀞𑀁.

𑁨𑁨𑁬𑁮. 𑀲𑀸𑀲𑀗𑁆𑀓𑀲𑀫𑁆𑀫𑀢𑁂𑀢𑀺 𑀏𑀢𑁆𑀣 ‘‘𑀲𑀧𑁆𑀧𑀝𑀺𑀪𑀬𑁂’’𑀢𑀺 𑀲𑁂𑀲𑁄. 𑀉𑀪𑀬𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀦𑁆𑀢𑁄𑀭𑀝𑁆𑀞𑁂𑀢𑀺 𑀬𑀲𑁆𑀲 𑀯𑀺𑀚𑀺𑀢𑁂 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀯 𑀭𑀝𑁆𑀞𑁂. 𑀲𑀸𑀲𑀗𑁆𑀓𑀲𑀫𑁆𑀫𑀢𑁂 𑀲𑀧𑁆𑀧𑀝𑀺𑀪𑀬𑁂 𑀅𑀦𑁆𑀢𑁄𑀭𑀝𑁆𑀞𑁂 𑀲𑀢𑁆𑀣𑁂𑀦 𑀯𑀺𑀦𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁨𑁬𑁯. 𑀏𑀯𑀁 𑀘𑀭𑀦𑁆𑀢𑀺𑀬𑀸 𑀲𑀕𑀸𑀫𑀓𑀝𑁆𑀞𑀸𑀦𑁂 𑀕𑀸𑀫𑀦𑁆𑀢𑀭𑀧𑁆𑀧𑀯𑁂𑀲𑁂 𑀘 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀅𑀤𑁆𑀥𑀬𑁄𑀚𑀦𑁂 𑀘 𑀯𑀺𑀦𑀬𑀜𑁆𑀜𑀼𑀦𑀸 𑀪𑀺𑀓𑁆𑀔𑀼𑀦𑀸 𑀧𑀸𑀘𑀺𑀢𑁆𑀢𑀺𑀬𑀦𑀬𑁄 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀯𑀺𑀥𑀸𑀦𑀓𑁆𑀓𑀫𑁄 𑀜𑁂𑀬𑁆𑀬𑁄 𑀜𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁨𑁭𑁦. 𑀲𑀳 ¶ 𑀲𑀢𑁆𑀣𑁂𑀦 𑀘𑀭𑀦𑁆𑀢𑀺𑀬𑀸 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀔𑁂𑀫𑀝𑁆𑀞𑀸𑀦𑁂 𑀘𑀭𑀦𑁆𑀢𑀺𑀬𑀸, 𑀆𑀧𑀤𑀸𑀲𑀼 𑀯𑀸 𑀘𑀭𑀦𑁆𑀢𑀺𑀬𑀸 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀫𑀁.

𑁨𑁨𑁭𑁧. 𑀅𑀝𑁆𑀞𑀫𑁂 ¶ 𑀦𑀯𑀫𑁂 𑀯𑀸𑀧𑀻𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀢𑀺𑀭𑁄𑀭𑀝𑁆𑀞𑁂’’𑀢𑀺𑀆𑀤𑀺𑀓𑁂 (𑀧𑀸𑀘𑀺. 𑁯𑁬𑁬) 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑀘 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁭𑁦) 𑀯𑀼𑀢𑁆𑀢𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑀘. 𑀅𑀦𑀼𑀢𑁆𑀢𑀸𑀦𑀁 𑀦 𑀯𑀺𑀚𑁆𑀚𑀢𑀺, 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯, 𑀢𑀲𑁆𑀫𑀸 𑀏𑀢𑁆𑀣 𑀫𑀬𑀸 𑀦 𑀯𑀺𑀘𑀸𑀭𑀻𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀝𑁆𑀞𑀫𑀦𑀯𑀫𑀸𑀦𑀺.

𑁨𑁨𑁭𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀲𑁆𑀲𑀁𑀯𑀼𑀢𑁆𑀣𑀸 𑀘𑀸𑀭𑀺𑀓𑀁 𑀦 𑀧𑀓𑁆𑀓𑀫𑁂𑀬𑁆𑀬 𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺𑀧𑀺, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁭𑁪) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀸𑀘𑀺𑀢𑁆𑀢𑀻’’𑀢𑀺𑀆𑀤𑀺. 𑀅𑀳𑀁 𑀦 𑀕𑀫𑀺𑀲𑁆𑀲𑀸𑀫𑀺 𑀦 𑀧𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂 𑀓𑀢𑁂 𑀧𑀸𑀘𑀺𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀣𑀸𑀢𑀺 𑀧𑀸𑀘𑀺𑀢𑁆𑀢𑀺.

𑁨𑁨𑁭𑁩. 𑀯𑀲𑁆𑀲𑀁𑀯𑀼𑀢𑁆𑀣𑀸𑀬 𑀧𑀯𑀸𑀭𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀧𑀜𑁆𑀘 𑀬𑁄𑀚𑀦𑀸𑀦𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀅𑀧𑀺-𑀲𑀤𑁆𑀤𑀲𑁆𑀲 𑀲𑀫𑁆𑀪𑀸𑀯𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀙𑀲𑀽’’𑀢𑀺𑀆𑀤𑀺. 𑀇𑀥 𑀇𑀫𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀙𑀲𑀼 𑀬𑁄𑀚𑀦𑁂𑀲𑀼 𑀬𑀤𑀢𑁆𑀣𑀺 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀺𑀦𑁆𑀦𑀼 𑀦𑀸𑀫 𑀲𑀺𑀬𑀸, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀸𑀭𑁂𑀢𑁆𑀯𑀸 𑀙 𑀬𑁄𑀚𑀦𑀸𑀦𑀺 𑀕𑀘𑁆𑀙𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀯𑀸𑀢𑀺 𑀤𑀻𑀧𑁂𑀢𑀺.

𑁨𑁨𑁭𑁪. 𑀢𑀻𑀡𑀺 𑀬𑁄𑀚𑀦𑀸𑀦𑀺. 𑀢𑁂𑀦𑁂𑀯𑀸𑀢𑀺 𑀬𑁂𑀦 𑀕𑀢𑀸, 𑀢𑁂𑀦𑁂𑀯 𑀫𑀕𑁆𑀕𑁂𑀦. 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦𑀸𑀢𑀺 𑀕𑀢𑀫𑀕𑁆𑀕𑀢𑁄 𑀅𑀜𑁆𑀜𑁂𑀦 𑀧𑀣𑁂𑀦.

𑁨𑁨𑁭𑁫. 𑀤𑀲𑀯𑀺𑀥𑁂 𑀅𑀦𑁆𑀢𑀭𑀸𑀬𑀲𑁆𑀫𑀺𑀁 𑀲𑀢𑀻𑀢𑀺 𑀯𑀓𑁆𑀔𑀫𑀸𑀦𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺. 𑀢𑀲𑁆𑀲𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀆𑀧𑀤𑀸𑀲𑀽𑀢𑀺 𑀅𑀝𑁆𑀝𑀸𑀤𑀺𑀓𑀸𑀭𑀡𑁂𑀦 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀸𑀲𑀼 𑀆𑀧𑀤𑀸𑀲𑀼. 𑀕𑀺𑀮𑀸𑀦𑀸𑀬𑀸𑀢𑀺 𑀲𑀬𑀁 𑀕𑀺𑀮𑀸𑀦𑀸𑀬. 𑀤𑀼𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀮𑀸𑀪𑁂 𑀯𑀸 𑀅𑀧𑀓𑁆𑀓𑀫𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑁨𑁨𑁭𑁬. 𑀭𑀸𑀚𑀸 ¶ ¶ 𑀘 𑀘𑁄𑀭𑀸 𑀘 𑀅𑀫𑀦𑀼𑀲𑁆𑀲𑀸 𑀘 𑀅𑀕𑁆𑀕𑀺 𑀘 𑀢𑁄𑀬𑀜𑁆𑀘 𑀯𑀸𑀴𑀸 𑀘 𑀲𑀭𑀻𑀲𑀧𑀸 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀫𑀦𑀼𑀲𑁆𑀲𑁄𑀢𑀺 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀧𑀼𑀩𑁆𑀩𑀧𑀤𑀮𑁄𑀧𑁄 ‘‘𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁭𑁭) 𑀯𑀺𑀬. 𑀚𑀻𑀯𑀺𑀢𑀜𑁆𑀘 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂 𑀲𑀫𑀸𑀲𑁄, 𑀢𑀲𑁆𑀲 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲. 𑀅𑀦𑁆𑀢𑀭𑀸𑀬𑀸 𑀏𑀯 𑀅𑀦𑁆𑀢𑀭𑀸𑀬𑀺𑀓𑀸. 𑀏𑀢𑁂𑀲𑀁 𑀤𑀲𑀦𑁆𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀧𑀓𑁆𑀓𑀫𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀬𑀣𑀸𑀳 ‘‘𑀅𑀦𑁆𑀢𑀭𑀸𑀬𑁂𑀢𑀺 𑀤𑀲𑀯𑀺𑀥𑁂 𑀅𑀦𑁆𑀢𑀭𑀸𑀬𑁂. ‘𑀧𑀭𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑀸, 𑀦𑀤𑀺𑀧𑀽𑀭𑁄 𑀧𑀦 𑀆𑀕𑀢𑁄, 𑀘𑁄𑀭𑀸 𑀯𑀸 𑀫𑀕𑁆𑀕𑁂 𑀳𑁄𑀦𑁆𑀢𑀺, 𑀫𑁂𑀖𑁄 𑀯𑀸 𑀉𑀝𑁆𑀞𑀸𑀢𑀺, 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁭𑁬).

𑁨𑁨𑁭𑁭. 𑀅𑀧𑀓𑁆𑀓𑀫𑀦𑀁 𑀅𑀓𑁆𑀭𑀺𑀬𑀁. 𑀅𑀦𑀸𑀤𑀭𑀺𑀬𑁂𑀦 𑀆𑀧𑀚𑁆𑀚𑀦𑀢𑁄 𑀆𑀳 ‘‘𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺.

𑀤𑀲𑀫𑀁.

𑀢𑀼𑀯𑀝𑁆𑀝𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁨𑁨𑁭𑁮-𑁮𑁦. 𑀭𑀸𑀚𑀸𑀕𑀸𑀭𑀦𑁆𑀢𑀺 𑀭𑀜𑁆𑀜𑁄 𑀓𑀻𑀴𑀦𑀖𑀭𑀁. 𑀘𑀺𑀢𑁆𑀢𑀸𑀕𑀸𑀭𑀦𑁆𑀢𑀺 𑀓𑀻𑀴𑀦𑀘𑀺𑀢𑁆𑀢𑀲𑀸𑀮𑀁. 𑀆𑀭𑀸𑀫𑀦𑁆𑀢𑀺 𑀓𑀻𑀴𑀦𑀉𑀧𑀯𑀦𑀁. 𑀓𑀻𑀴𑀼𑀬𑁆𑀬𑀸𑀦𑀦𑁆𑀢𑀺 𑀓𑀻𑀴𑀦𑀢𑁆𑀣𑀸𑀬 𑀓𑀢𑀁 𑀉𑀬𑁆𑀬𑀸𑀦𑀁. 𑀓𑀻𑀴𑀸𑀯𑀸𑀧𑀺𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 (𑀧𑀸𑀘𑀺. 𑁯𑁭𑁯) 𑀧𑁄𑀓𑁆𑀔𑀭𑀡𑀻 𑀯𑀼𑀢𑁆𑀢𑀸, 𑀲𑀸 𑀧𑀦 𑀲𑀩𑁆𑀩𑀚𑀮𑀸𑀲𑀬𑀸𑀦𑀁 𑀓𑀻𑀴𑀸𑀬 𑀓𑀢𑀸𑀦𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀻𑀴𑀸𑀯𑀸𑀧𑀺’’𑀦𑁆𑀢𑀺, 𑀓𑀻𑀴𑀦𑀢𑁆𑀣𑀸𑀬 𑀓𑀢𑀯𑀸𑀧𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀦𑀸𑀦𑀸𑀓𑀸𑀭’’𑀦𑁆𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 ‘‘𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀓𑀸𑀭𑀁 𑀭𑀸𑀚𑀸𑀕𑀸𑀭𑀁 𑀘𑀺𑀢𑁆𑀢𑀸𑀕𑀸𑀭𑀁 𑀆𑀭𑀸𑀫𑀁 𑀓𑀻𑀴𑀼𑀬𑁆𑀬𑀸𑀦𑀁 𑀯𑀸 𑀓𑀻𑀴𑀸𑀯𑀸𑀧𑀺𑀁 𑀤𑀝𑁆𑀞𑀼𑀁 𑀕𑀘𑁆𑀙𑀦𑁆𑀢𑀻𑀦𑀁 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀏𑀓𑀢𑁄 𑀤𑀝𑁆𑀞𑀼𑀁 𑀕𑀘𑁆𑀙𑀦𑁆𑀢𑀻𑀦𑀁 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁 𑀫𑀼𑀦𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀧𑀻𑀢𑀺 ¶ 𑀭𑀸𑀚𑀸𑀕𑀸𑀭𑀸𑀤𑀻𑀦𑀺 𑀧𑀜𑁆𑀘𑀧𑀺. 𑀏𑀓𑀸𑀬𑁂𑀯 𑀧𑀸𑀘𑀺𑀢𑁆𑀢𑀺 𑀆𑀧𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸. 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀺 𑀘𑁂, 𑀧𑀸𑀝𑁂𑀓𑁆𑀓𑀸𑀧𑀢𑁆𑀢𑀺𑀬𑁄 𑀧𑀬𑁄𑀕𑀕𑀡𑀦𑀸𑀬 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑁨𑁨𑁮𑁧. 𑀕𑀫𑀦𑀩𑀸𑀳𑀼𑀮𑁆𑀮𑁂𑀦 𑀆𑀧𑀢𑁆𑀢𑀺𑀩𑀸𑀳𑀼𑀮𑁆𑀮𑀁 𑀧𑀓𑀸𑀲𑁂𑀢𑁆𑀯𑀸 𑀕𑀻𑀯𑀸𑀧𑀭𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀧𑀬𑁄𑀕𑀩𑀸𑀳𑀼𑀮𑁆𑀮𑁂𑀦𑀸𑀧𑀺 ¶ 𑀆𑀧𑀢𑁆𑀢𑀺𑀩𑀸𑀳𑀼𑀮𑁆𑀮𑀁 𑀧𑀓𑀸𑀲𑁂𑀢𑀼𑀫𑀸𑀳 ‘‘𑀧𑀬𑁄𑀕𑀩𑀳𑀼𑀢𑀸𑀬𑀸𑀧𑀺, 𑀧𑀸𑀘𑀺𑀢𑁆𑀢𑀺𑀩𑀳𑀼𑀢𑀸 𑀲𑀺𑀬𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀲𑀩𑁆𑀩𑀢𑁆𑀣.

𑁨𑁨𑁮𑁨. ‘‘𑀅𑀯𑀲𑁂𑀲𑁄𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀦𑀸𑀧𑀢𑁆𑀢𑀺 𑀘 𑀓𑀣𑀸𑀫𑀕𑁆𑀕𑁄 𑀘 𑀅𑀦𑀸𑀧𑀢𑁆𑀢𑀺𑀓𑀣𑀸𑀫𑀕𑁆𑀕𑁄, 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑁄 𑀅𑀦𑀸𑀧𑀢𑁆𑀢𑀺𑀓𑀣𑀸𑀫𑀕𑁆𑀕𑀯𑀺𑀦𑀺𑀘𑁆𑀙𑀬𑁄, ‘‘𑀅𑀦𑀸𑀧𑀢𑁆𑀢𑀺 𑀆𑀭𑀸𑀫𑁂 𑀞𑀺𑀢𑀸 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁄 (𑀧𑀸𑀘𑀺. 𑁯𑁮𑁧) 𑀅𑀦𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀘 𑀅𑀝𑁆𑀞𑀓𑀣𑀸𑀕𑀢𑁄 (𑀧𑀸𑀘𑀺. 𑀅𑀝𑁆𑀞. 𑁯𑁮𑁧) 𑀅𑀯𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑀘𑀸𑀢𑀺 𑀅𑀢𑁆𑀣𑁄. ‘‘𑀆𑀭𑀸𑀫𑁂 𑀞𑀺𑀢𑀸’’𑀢𑀺 𑀏𑀢𑁂𑀦 𑀅𑀚𑁆𑀛𑀸𑀭𑀸𑀫𑁂 𑀭𑀸𑀚𑀸𑀕𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀦𑀺 𑀧𑀲𑁆𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑀦𑀸𑀧𑀢𑁆𑀢𑀺𑀯𑀸𑀭𑁄 𑀤𑀲𑁆𑀲𑀺𑀢𑁄. 𑀏𑀢𑁂𑀦𑁂𑀯 𑀅𑀦𑁆𑀢𑁄𑀆𑀭𑀸𑀫𑁂 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀘𑁆𑀘𑀸𑀤𑀻𑀦𑀺 𑀯𑀺𑀬 𑀭𑀸𑀚𑀸𑀕𑀸𑀭𑀸𑀤𑀻𑀦𑀺𑀧𑀺 𑀧𑀲𑁆𑀲𑀺𑀢𑀼𑀁 𑀮𑀪𑀢𑀻𑀢𑀺𑀧𑀺 𑀲𑀺𑀤𑁆𑀥𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺𑀬𑀸 𑀫𑀕𑁆𑀕𑁂 𑀳𑁄𑀦𑁆𑀢𑀺, 𑀢𑀸𑀦𑀺 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀸 𑀧𑀯𑀺𑀲𑀺𑀢𑁆𑀯𑀸 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑁂 𑀅𑀦𑀸𑀧𑀢𑁆𑀢𑀺𑀯𑀸𑀭𑀸 𑀲𑀗𑁆𑀕𑀳𑀺𑀢𑀸. 𑀦𑀘𑁆𑀘𑀤𑀲𑁆𑀲𑀦…𑀧𑁂… 𑀲𑀳𑀸𑀢𑀺 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀯𑀺𑀦𑀺𑀘𑁆𑀙𑀬𑁂𑀦 𑀲𑀳 𑀦𑀘𑁆𑀘𑀤𑀲𑁆𑀲𑀦𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑁄𑀯.

𑀧𑀞𑀫𑀁.

𑁨𑁨𑁮𑁩. 𑀫𑀸𑀦𑀢𑁄 ¶ 𑀧𑀫𑀸𑀡𑀢𑁄 𑀅𑀢𑀻𑀢𑀸 𑀅𑀧𑁂𑀢𑀸 𑀫𑀸𑀦𑀸𑀢𑀻𑀢𑀸, 𑀆𑀲𑀦𑁆𑀤𑀻, 𑀢𑀁. 𑀯𑀸𑀴𑁂𑀳𑀺 𑀉𑀧𑁂𑀢𑁄 𑀯𑀸𑀴𑀽𑀧𑁂𑀢𑁄, 𑀧𑀮𑁆𑀮𑀗𑁆𑀓𑁄, 𑀢𑀁. ‘‘𑀆𑀲𑀦𑁆𑀤𑀻 𑀦𑀸𑀫 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀸 𑀯𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀢𑁄 𑀳𑁂𑀝𑁆𑀞𑀸 𑀅𑀝𑁆𑀝𑀦𑀺𑀬𑀸 𑀯𑀟𑁆𑀠𑀓𑀺𑀳𑀢𑁆𑀣𑀢𑁄 𑀉𑀘𑁆𑀘𑀢𑀭𑀧𑀸𑀤𑁄 𑀆𑀬𑀸𑀫𑀘𑀢𑀼𑀭𑀲𑁆𑀲𑁄 𑀫𑀜𑁆𑀘𑀧𑀻𑀞𑀯𑀺𑀲𑁂𑀲𑁄 𑀆𑀲𑀦𑁆𑀤𑀻 𑀦𑀸𑀫 𑀲𑀫𑀘𑀢𑀼𑀭𑀲𑁆𑀲𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀸𑀦𑀫𑁆𑀧𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. ‘‘𑀧𑀮𑁆𑀮𑀗𑁆𑀓𑁄 𑀦𑀸𑀫 𑀆𑀳𑀭𑀺𑀫𑁂𑀳𑀺 𑀯𑀸𑀴𑁂𑀳𑀺 𑀓𑀢𑁄’’𑀢𑀺 (𑀧𑀸𑀘𑀺. 𑁯𑁮𑁪) 𑀯𑀘𑀦𑀢𑁄 𑀧𑀫𑀸𑀡𑀬𑀼𑀢𑁆𑀢𑁄𑀧𑀺 𑀏𑀯𑀭𑀽𑀧𑁄 𑀦 𑀯𑀝𑁆𑀝𑀢𑀺. 𑀆𑀳𑀭𑀺𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀯𑀸𑀴𑀭𑀽𑀧𑀸𑀦𑀺 𑀆𑀳𑀭𑀺𑀫𑀯𑀸𑀴𑀸 𑀦𑀸𑀫, 𑀲𑀁𑀳𑀭𑀺𑀫𑀯𑀸𑀴𑀭𑀽𑀧𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸𑀦𑀸𑀢𑀻𑀢𑀁 𑀆𑀲𑀦𑁆𑀤𑀺𑀁 𑀯𑀸 𑀯𑀸𑀴𑀽𑀧𑁂𑀢𑀁 𑀧𑀮𑁆𑀮𑀗𑁆𑀓𑀁 𑀯𑀸 𑀲𑁂𑀯𑀦𑁆𑀢𑀻𑀦𑀁 𑀅𑀪𑀺𑀦𑀺𑀲𑀻𑀤𑀦𑁆𑀢𑀻𑀦𑀁, 𑀅𑀪𑀺𑀦𑀺𑀧𑀚𑁆𑀚𑀦𑁆𑀢𑀻𑀦𑀜𑁆𑀘 𑀬𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀢𑁆𑀣𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀆𑀳.

𑁨𑁨𑁮𑁪. 𑀢𑀸𑀲𑀁 𑀦𑀺𑀲𑀻𑀤𑀦𑀲𑁆𑀲𑀸𑀧𑀺 𑀦𑀺𑀧𑀚𑁆𑀚𑀦𑀲𑁆𑀲𑀸𑀧𑀺 𑀧𑀬𑁄𑀕𑀩𑀸𑀳𑀼𑀮𑁆𑀮𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀸𑀦𑀁 𑀕𑀡𑀦𑀸 𑀳𑁄𑀢𑀺 𑀇𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀏𑀯𑀁 𑀅𑀬𑀁 𑀕𑀡𑀦𑀸 𑀅𑀘𑁆𑀘𑀦𑁆𑀢𑀬𑀲𑁂𑀦 𑀅𑀦𑀦𑁆𑀢𑀧𑀭𑀺𑀯𑀸𑀭𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸𑀢𑀺 ¶ 𑀬𑁄𑀚𑀦𑀸. 𑀏𑀢𑁆𑀣 𑀘 𑀇𑀘𑁆𑀘𑁂𑀯𑀦𑁆𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂, 𑀏𑀯𑀁-𑀲𑀤𑁆𑀤𑁄 𑀇𑀤𑀫𑀢𑁆𑀣𑁂 𑀤𑀝𑁆𑀞𑀩𑁆𑀩𑁄.

𑁨𑁨𑁮𑁫. 𑀧𑀸𑀤𑁂 𑀆𑀲𑀦𑁆𑀤𑀺𑀬𑀸 𑀙𑁂𑀢𑁆𑀯𑀸𑀢𑀺 𑀆𑀲𑀦𑁆𑀤𑀺𑀬𑀸 𑀧𑀸𑀤𑁂 𑀧𑀫𑀸𑀡𑀢𑁄 𑀅𑀥𑀺𑀓𑀝𑁆𑀞𑀸𑀦𑀙𑀺𑀦𑁆𑀤𑀦𑁂𑀦 𑀙𑁂𑀢𑁆𑀯𑀸. 𑀧𑀮𑁆𑀮𑀗𑁆𑀓𑀲𑁆𑀲 𑀧𑀸𑀤𑁂 𑀯𑀸𑀴𑀓𑀸 𑀧𑀮𑁆𑀮𑀗𑁆𑀓𑀯𑀸𑀴𑀓𑀸, 𑀢𑁂 𑀳𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸, 𑀅𑀦𑀸𑀧𑀢𑁆𑀢𑀻𑀢𑀺 𑀲𑁂𑀯𑀦𑁆𑀢𑀻𑀦𑀁 𑀅𑀦𑀸𑀧𑀢𑁆𑀢𑀺.

𑀤𑀼𑀢𑀺𑀬𑀁.

𑁨𑁨𑁮𑁬-𑁭. 𑀙𑀦𑁆𑀦𑀦𑁆𑀢𑀺 𑀔𑁄𑀫𑀸𑀤𑀻𑀦𑀁 𑀙𑀦𑁆𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀜𑁆𑀜𑀢𑀭𑀁 𑀲𑀼𑀢𑁆𑀢𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀦𑀺𑀤𑀲𑁆𑀲𑀦𑀁. 𑀳𑀢𑁆𑀣𑀸𑀢𑀺 𑀳𑀢𑁆𑀣𑁂𑀦, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀅𑀜𑁆𑀘𑀺𑀢𑀦𑁆𑀢𑀺 𑀳𑀢𑁆𑀣𑀸𑀬𑀸𑀫𑁂𑀦 𑀆𑀓𑀟𑁆𑀠𑀺𑀢𑀁 ¶ . 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀅𑀜𑁆𑀙𑀺𑀢𑁂 𑀲𑀼𑀢𑁆𑀢𑀧𑁆𑀧𑀤𑁂𑀲𑁂. 𑀢𑀓𑁆𑀓𑀫𑁆𑀳𑀻𑀢𑀺 𑀓𑀦𑁆𑀢𑀦𑀲𑀽𑀘𑀺𑀫𑁆𑀳𑀺. 𑀯𑁂𑀞𑀺𑀢𑁂𑀢𑀺 𑀧𑀮𑀺𑀯𑁂𑀞𑀺𑀢𑁂.

𑀲𑀼𑀢𑁆𑀢𑀓𑀦𑁆𑀢𑀦𑀢𑁄 𑀲𑀩𑁆𑀩𑀧𑀼𑀩𑁆𑀩𑀧𑀬𑁄𑀕𑁂𑀲𑀽𑀢𑀺 𑀲𑀼𑀢𑁆𑀢𑀓𑀦𑁆𑀢𑀦𑀢𑁄 𑀧𑀼𑀩𑁆𑀩𑁂𑀲𑀼 𑀓𑀧𑁆𑀧𑀸𑀲𑀯𑀺𑀘𑀺𑀦𑀦𑀸𑀤𑀺𑀲𑀩𑁆𑀩𑀧𑀬𑁄𑀕𑁂𑀲𑀼. 𑀳𑀢𑁆𑀣𑀯𑀸𑀭𑀢𑁄𑀢𑀺 𑀳𑀢𑁆𑀣𑀯𑀸𑀭𑀕𑀡𑀦𑀸𑀬. 𑀬𑀣𑀸𑀳 ‘‘𑀓𑀧𑁆𑀧𑀸𑀲𑀯𑀺𑀘𑀺𑀦𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀳𑀢𑁆𑀣𑀯𑀸𑀭𑀕𑀡𑀦𑀸𑀬 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁮𑁮).

𑁨𑁨𑁮𑁮. 𑀓𑀦𑁆𑀢𑀺𑀢𑀁 𑀲𑀼𑀢𑁆𑀢𑀦𑁆𑀢𑀺 𑀧𑀞𑀫𑀫𑁂𑀯 𑀓𑀦𑁆𑀢𑀺𑀢𑀁 𑀤𑀲𑀺𑀓𑀲𑀼𑀢𑁆𑀢𑀸𑀤𑀺𑀁. 𑀧𑀼𑀦 𑀓𑀦𑁆𑀢𑀦𑁆𑀢𑀺𑀬𑀸𑀢𑀺 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀲𑀗𑁆𑀖𑀸𑀝𑁂𑀢𑁆𑀯𑀸 𑀧𑀼𑀦 𑀓𑀦𑁆𑀢𑀦𑁆𑀢𑀺𑀬𑀸.

𑀢𑀢𑀺𑀬𑀁.

𑁨𑁨𑁮𑁯. 𑀢𑀡𑁆𑀟𑀼𑀮𑀸𑀦𑀁 𑀓𑁄𑀝𑁆𑀝𑀦𑀁 𑀢𑀼 𑀆𑀤𑀺𑀁 𑀓𑀢𑁆𑀯𑀸 𑀕𑀺𑀳𑀻𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀺𑀬𑀸 𑀲𑀩𑁆𑀩𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁨𑁯𑁦. 𑀬𑀸𑀕𑀼𑀆𑀤𑀺𑀲𑀼 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀲𑀼 𑀢𑀤𑀸𑀥𑀸𑀭𑀸𑀦𑀺 𑀪𑀸𑀚𑀦𑀸𑀦𑀺 𑀕𑀡𑁂𑀢𑁆𑀯𑀸𑀯 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂, 𑀔𑀚𑁆𑀚𑀓𑀸𑀤𑀻𑀲𑀼 𑀭𑀽𑀧𑀸𑀦𑀁 𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀁 𑀧𑀭𑀺𑀤𑀻𑀧𑀬𑁂𑀢𑀺 𑀬𑁄𑀚𑀦𑀸. 𑀬𑀸𑀕𑀼𑀆𑀤𑀺𑀲𑀽𑀢𑀺 𑀏𑀢𑁆𑀣 ¶ 𑀆𑀤𑀺-𑀲𑀤𑁆𑀤𑁂𑀦 𑀪𑀢𑁆𑀢𑀲𑀽𑀧𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀔𑀚𑁆𑀚𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀘𑁆𑀙𑀫𑀁𑀲𑀸𑀤𑀺𑀉𑀢𑁆𑀢𑀭𑀺𑀪𑀗𑁆𑀕𑀸𑀦𑀁 𑀲𑀗𑁆𑀕𑀳𑁄.

𑁨𑁨𑁯𑁧. ‘‘𑀲𑀘𑁂𑀧𑀺 𑀫𑀸𑀢𑀸𑀧𑀺𑀢𑀭𑁄 𑀆𑀕𑀘𑁆𑀙𑀦𑁆𑀢𑀺, 𑀬𑀁𑀓𑀺𑀜𑁆𑀘𑀺 𑀩𑀻𑀚𑀦𑀺𑀁 𑀯𑀸 𑀲𑀫𑁆𑀫𑀚𑁆𑀚𑀦𑀺𑀤𑀡𑁆𑀟𑀁 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸𑀯 𑀬𑀁 𑀓𑀺𑀜𑁆𑀘𑀺 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀲𑀘𑁂𑀢𑀺 𑀏𑀢𑁆𑀣 ‘‘𑀫𑀸𑀢𑀸𑀧𑀺𑀢𑀭𑁄 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀲𑁂𑀲𑁄. 𑀅𑀢𑁆𑀢𑀦𑁄 𑀏𑀯𑀫𑀸𑀕𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 ¶ 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀓𑀸𑀭𑁂𑀢𑁆𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀅𑀜𑁆𑀜𑁂𑀲𑀁 𑀓𑀣𑀸𑀬𑁂𑀯 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑁨𑁨𑁯𑁨-𑁩. 𑀲𑀗𑁆𑀖𑀲𑁆𑀲 𑀬𑀸𑀕𑀼𑀧𑀸𑀦𑁂 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀗𑁆𑀖𑀪𑀢𑁆𑀢𑁂𑀧𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀳 ‘‘𑀬𑀸𑀕𑀼𑀧𑀸𑀦𑁂𑀢𑀺 𑀫𑀦𑀼𑀲𑁆𑀲𑁂𑀳𑀺 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀓𑀭𑀺𑀬𑀫𑀸𑀦𑁂 𑀬𑀸𑀕𑀼𑀧𑀸𑀦𑁂 𑀯𑀸 𑀲𑀗𑁆𑀖𑀪𑀢𑁆𑀢𑁂 𑀯𑀸 𑀢𑁂𑀲𑀁 𑀲𑀳𑀸𑀬𑀺𑀓𑀪𑀸𑀯𑁂𑀦 𑀬𑀁 𑀓𑀺𑀜𑁆𑀘𑀺 𑀧𑀘𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀘𑁂𑀢𑀺𑀬𑀧𑀽𑀚𑀸𑀬 𑀲𑀳𑀸𑀬𑀺𑀓𑀸 𑀳𑀼𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀧𑀽𑀚𑁂𑀢𑀺, 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁯𑁩).

𑀘𑀢𑀼𑀢𑁆𑀣𑀁.

𑁨𑁨𑁯𑁪. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 ‘𑀏𑀳𑀸𑀬𑁆𑀬𑁂 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻 𑀦𑁂𑀯 𑀯𑀽𑀧𑀲𑀫𑁂𑀬𑁆𑀬 𑀦 𑀯𑀽𑀧𑀲𑀫𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁯𑁫) 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀸𑀘𑀺𑀢𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁂’’𑀢𑀺𑀆𑀤𑀺. 𑀥𑀼𑀭𑀦𑀺𑀓𑁆𑀔𑁂𑀧𑁂𑀢𑀺 𑀦 𑀤𑀸𑀦𑀺 𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀺, 𑀅𑀜𑁆𑀜𑀸𑀳𑀺 𑀯𑀸 𑀦 𑀯𑀽𑀧𑀲𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀥𑀼𑀭𑀲𑁆𑀲 𑀉𑀲𑁆𑀲𑀸𑀳𑀲𑁆𑀲 𑀦𑀺𑀓𑁆𑀔𑁂𑀧𑁂 𑀧𑀸𑀘𑀺𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀘𑀻𑀯𑀭𑀲𑀺𑀩𑁆𑀩𑀦𑁂 𑀬𑀣𑀸 𑀧𑀜𑁆𑀘𑀸𑀳𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺, 𑀇𑀥 𑀧𑀦 𑀢𑀣𑀸 𑀏𑀓𑀸𑀳𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 𑀬𑁄𑀚𑀦𑀸.

𑁨𑁨𑁯𑁫. 𑀲𑁂𑀲𑀦𑁆𑀢𑀺 ‘‘𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀻 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀻’’𑀢𑀺𑀆𑀤𑀺𑀓𑀁 𑀯𑀺𑀦𑀺𑀘𑁆𑀙𑀬𑀚𑀸𑀢𑀁. 𑀢𑀢𑁆𑀣 𑀘𑀻𑀯𑀭𑀲𑀺𑀩𑁆𑀩𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀧𑀜𑁆𑀘𑀫𑀁.

𑁨𑁨𑁯𑁬-𑁭. 𑀬𑀸 ¶ ¶ 𑀧𑀦 𑀪𑀺𑀓𑁆𑀔𑀼𑀦𑀻 𑀕𑀺𑀳𑀻𑀦𑀁 𑀯𑀸 𑀲𑀳𑀥𑀫𑁆𑀫𑀺𑀓𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀩𑁆𑀩𑀸𑀚𑀺𑀓𑀸𑀦𑀁 𑀯𑀸 𑀤𑀦𑁆𑀢𑀧𑁄𑀦𑁄𑀤𑀓𑀁 𑀯𑀺𑀦𑀸 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀅𑀚𑁆𑀛𑁄𑀳𑀭𑀡𑀻𑀬𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀻𑀬𑀁 𑀯𑀸 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑀤𑀸𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁨𑁯𑁮-𑁯. 𑀇𑀥 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀫𑀼𑀦𑀺𑀦𑀸 𑀤𑀦𑁆𑀢𑀓𑀝𑁆𑀞𑁄𑀤𑀓𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀸𑀬𑀸𑀤𑀻𑀳𑀺 𑀲𑀬𑀁 𑀦 𑀤𑁂𑀢𑀺 𑀅𑀜𑁆𑀜𑁂𑀦 𑀤𑀸𑀧𑁂𑀢𑀺, 𑀢𑀲𑁆𑀲𑀸 𑀘 𑀓𑀸𑀬𑀸𑀤𑀻𑀳𑀺 𑀅𑀤𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀦𑁆𑀢𑀺𑀬𑀸𑀧𑀺 𑀬𑀸 𑀩𑀸𑀳𑀺𑀭𑀮𑁂𑀧𑀁 𑀯𑀸 𑀤𑁂𑀢𑀺, 𑀢𑀲𑁆𑀲𑀸𑀧𑀺 𑀉𑀫𑁆𑀫𑀢𑁆𑀢𑀺𑀓𑀸𑀬 𑀘 𑀦 𑀤𑁄𑀲𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀙𑀝𑁆𑀞𑀁.

𑁨𑁩𑁦𑁦-𑁧. 𑀆𑀯𑀲𑀣𑀘𑀻𑀯𑀭𑀦𑁆𑀢𑀺 ‘‘𑀉𑀢𑀼𑀦𑀺𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁. 𑀬𑀸 𑀪𑀺𑀓𑁆𑀔𑀼𑀦𑀻 𑀬𑀁 ‘‘𑀆𑀯𑀲𑀣𑀘𑀻𑀯𑀭’’𑀦𑁆𑀢𑀺 𑀦𑀺𑀬𑀫𑀺𑀢𑀁 𑀘𑀻𑀯𑀭𑀁, 𑀢𑀁 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀥𑁄𑀯𑀺𑀢𑁆𑀯𑀸 𑀅𑀦𑁆𑀢𑀫𑀲𑁄 𑀉𑀢𑀼𑀦𑀺𑀬𑀸 𑀲𑀸𑀫𑀡𑁂𑀭𑀸𑀬 𑀯𑀸 𑀅𑀤𑀢𑁆𑀯𑀸 𑀲𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 ‘‘𑀅𑀦𑀺𑀲𑁆𑀲𑀚𑁆𑀚𑀺𑀢𑁂 𑀅𑀦𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀸…𑀧𑁂… 𑀯𑁂𑀫𑀢𑀺𑀓𑀸…𑀧𑁂… 𑀦𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁦𑁦𑁬) 𑀯𑀼𑀢𑁆𑀢𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁦𑁨-𑁩. 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀦𑀺𑀲𑁆𑀲𑀚𑁆𑀚𑀺𑀢𑁂 𑀅𑀦𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀸𑀬 𑀯𑀸 𑀯𑁂𑀫𑀢𑀺𑀓𑀸𑀬 𑀯𑀸 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀤𑁆𑀯𑀺𑀓𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀸𑀲𑀁 𑀉𑀢𑀼𑀦𑀻𑀦𑀁 𑀅𑀪𑀸𑀯𑁂 𑀅𑀤𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀧𑀼𑀦 𑀧𑀭𑀺𑀬𑀬𑁂𑀢𑀺 𑀧𑀼𑀦 𑀉𑀢𑀼𑀦𑀺𑀯𑀸𑀭𑁂 𑀬𑀣𑀸𑀓𑀸𑀮𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀭𑀺𑀬𑀬𑁂𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁 ¶ . 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀝𑁆𑀞𑀘𑀻𑀯𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀆𑀧𑀤𑀸𑀲𑀼𑀧𑀻𑀢𑀺 𑀫𑀳𑀕𑁆𑀖𑀘𑀻𑀯𑀭𑀁 𑀲𑀭𑀻𑀭𑀢𑁄 𑀫𑁄𑀘𑁂𑀢𑁆𑀯𑀸 𑀲𑀼𑀧𑁆𑀧𑀝𑀺𑀲𑀸𑀫𑀺𑀢𑀫𑁆𑀧𑀺 𑀘𑁄𑀭𑀸 𑀳𑀭𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀫𑀁.

𑁨𑁩𑁦𑁪. 𑀲𑀓𑀯𑀸𑀝𑀓𑀁 ¶ 𑀯𑀺𑀳𑀸𑀭𑀦𑁆𑀢𑀺 𑀓𑀯𑀸𑀝𑀩𑀦𑁆𑀥𑀯𑀺𑀳𑀸𑀭𑀁, 𑀤𑁆𑀯𑀸𑀭𑀓𑀯𑀸𑀝𑀬𑀼𑀢𑁆𑀢𑀁 𑀲𑀼𑀕𑀼𑀢𑁆𑀢𑀲𑁂𑀦𑀸𑀲𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀓𑁆𑀔𑀦𑀢𑁆𑀣𑀸𑀬 𑀅𑀤𑀢𑁆𑀯𑀸𑀢𑀺 ‘‘𑀇𑀫𑀁 𑀚𑀕𑁆𑀕𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸.

𑁨𑁩𑁦𑁫-𑁬. ‘‘𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲𑀸, 𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀫𑁂𑀯 𑀧𑀓𑀸𑀲𑁂𑀢𑀼𑀫𑀸𑀳 ‘‘𑀅𑀢𑁆𑀢𑀦𑁄 𑀕𑀸𑀫𑀢𑁄’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀕𑀸𑀫𑀢𑁄𑀢𑀺 𑀅𑀢𑁆𑀢𑀦𑁄 𑀯𑀲𑀦𑀓𑀕𑀸𑀫𑀢𑁄. 𑀢𑀣𑀸 𑀇𑀢𑀭𑀲𑁆𑀲𑀸𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀉𑀧𑀘𑀸𑀭𑀁. 𑀢𑀦𑁆𑀢𑀺𑀆𑀤𑀺𑀧𑀤𑀢𑁆𑀢𑀬𑁂 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀧𑀞𑀫𑁂𑀦 𑀧𑀤𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀇𑀢𑀭𑀲𑁆𑀲 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀢𑀲𑁆𑀫𑀺𑀁 𑀉𑀧𑀘𑀸𑀭𑁂 𑀅𑀢𑀺𑀓𑁆𑀓𑀦𑁆𑀢𑁂 𑀤𑀼𑀓𑁆𑀓𑀝𑀁. 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀧𑀭𑀺𑀓𑁆𑀔𑁂𑀧𑁂, 𑀉𑀧𑀘𑀸𑀭𑁂 𑀲𑀫𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀘𑀺𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁦𑁭. 𑀅𑀓𑀯𑀸𑀝𑀩𑀦𑁆𑀥𑀦𑀲𑁆𑀫𑀺𑀁 𑀓𑀯𑀸𑀝𑀩𑀦𑁆𑀥𑀭𑀳𑀺𑀢𑁂 𑀯𑀺𑀳𑀸𑀭𑁂 𑀢𑀣𑀸 𑀅𑀦𑀺𑀲𑁆𑀲𑀚𑁆𑀚𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀁. 𑀚𑀕𑁆𑀕𑀺𑀓𑀁 𑀅𑀮𑀪𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀧𑀭𑀺𑀬𑁂𑀲𑀺𑀢𑁆𑀯𑀸’’𑀢𑀺 𑀲𑁂𑀲𑁄. 𑀚𑀕𑁆𑀕𑀺𑀓𑀦𑁆𑀢𑀺 𑀯𑀺𑀳𑀸𑀭𑀧𑀝𑀺𑀚𑀕𑁆𑀕𑀺𑀓𑀁.

𑁨𑁩𑁦𑁮. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑁂 𑀪𑀺𑀚𑁆𑀚𑀦𑁆𑀢𑁂 𑀆𑀯𑀸𑀲𑁂 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼. 𑀕𑀺𑀮𑀸𑀦𑀸𑀬𑀸𑀢𑀺 𑀯𑀘𑀻𑀪𑁂𑀤𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀬𑀸𑀢𑀺.

𑀅𑀝𑁆𑀞𑀫𑀁.

𑁨𑁩𑁦𑁯-𑁧𑁦. 𑀳𑀢𑁆𑀣𑀻 ¶ 𑀘 𑀅𑀲𑁆𑀲𑁄 𑀘 𑀭𑀣𑁄 𑀘 𑀳𑀢𑁆𑀣𑀺𑀅𑀲𑁆𑀲𑀭𑀣𑀸, 𑀢𑁂 𑀆𑀤𑀺 𑀬𑁂𑀲𑀁 𑀢𑁂 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀬𑁄, 𑀢𑁂𑀳𑀺. 𑀆𑀤𑀺-𑀲𑀤𑁆𑀤𑁂𑀦 𑀥𑀦𑀼 𑀣𑀭𑀽𑀢𑀺 𑀧𑀤𑀤𑁆𑀯𑀬𑀁 𑀕𑀳𑀺𑀢𑀁. 𑀲𑀁𑀬𑀼𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀤𑁂𑀳𑀺 𑀲𑀁𑀬𑁄𑀚𑀺𑀢𑀁, ‘‘𑀳𑀢𑁆𑀣𑀻𑀦𑀁 𑀲𑀺𑀧𑁆𑀧𑀁 𑀳𑀢𑁆𑀣𑀺𑀲𑀺𑀧𑁆𑀧’’𑀦𑁆𑀢𑀺𑀆𑀤𑀺𑀦𑀸 𑀓𑀢𑀲𑀫𑀸𑀲𑀦𑁆𑀢𑀺 𑀅𑀢𑁆𑀣𑁄, ‘‘𑀳𑀢𑁆𑀣𑀺𑀲𑀺𑀧𑁆𑀧𑀁 𑀅𑀲𑁆𑀲𑀲𑀺𑀧𑁆𑀧𑀁 𑀭𑀣𑀲𑀺𑀧𑁆𑀧𑀁 𑀥𑀦𑀼𑀲𑀺𑀧𑁆𑀧𑀁 𑀣𑀭𑀼𑀲𑀺𑀧𑁆𑀧’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀢𑁆𑀣𑀺𑀲𑀺𑀓𑁆𑀔𑀸𑀤𑀺𑀲𑀺𑀧𑁆𑀧𑀁 𑀲𑀦𑁆𑀤𑀻𑀧𑀓𑁄 𑀕𑀦𑁆𑀣𑁄 𑀯𑀘𑁆𑀘𑀯𑀸𑀘𑀓𑀸𑀦𑀁 𑀅𑀪𑁂𑀤𑁄𑀧𑀘𑀸𑀭𑁂𑀦 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀤𑀸𑀤𑀻𑀦𑀁 𑀯𑀲𑁂𑀦𑀺𑀥𑀸’’𑀢𑀺. 𑀧𑀭𑀽𑀧𑀖𑀸𑀢𑀓𑀁 𑀫𑀦𑁆𑀢𑀸𑀕𑀤𑀬𑁄𑀕𑀧𑁆𑀧𑀪𑁂𑀤𑀓𑀁 𑀓𑀺𑀜𑁆𑀘𑀻𑀢𑀺 𑀧𑀭𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑀁 𑀔𑀺𑀮𑀦𑀯𑀲𑀻𑀓𑀭𑀡𑀲𑁄𑀲𑀸𑀧𑀦𑀸𑀤𑀺𑀪𑁂𑀤𑀁 𑀆𑀣𑀩𑁆𑀩𑀡𑀫𑀦𑁆𑀢𑀜𑁆𑀘 𑀯𑀺𑀲𑀬𑁄𑀕𑀸𑀤𑀺𑀧𑁆𑀧𑀪𑁂𑀤𑀓𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 ¶ 𑀘 𑀔𑀺𑀮𑀦𑀫𑀦𑁆𑀢𑁄 𑀦𑀸𑀫 𑀤𑀸𑀭𑀼𑀲𑀸𑀭𑀔𑀺𑀮𑀁 𑀫𑀦𑁆𑀢𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀯𑁂𑀲𑁂𑀢𑁆𑀯𑀸 𑀫𑀸𑀭𑀡𑀫𑀦𑁆𑀢𑁄. 𑀯𑀲𑀻𑀓𑀭𑀡𑀫𑀦𑁆𑀢𑁄 𑀦𑀸𑀫 𑀧𑀭𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀓𑀫𑀦𑁆𑀢𑁄. 𑀲𑁄𑀲𑀸𑀧𑀦𑀓𑀫𑀦𑁆𑀢𑁄 𑀦𑀸𑀫 𑀧𑀭𑀲𑀭𑀻𑀭𑀁 𑀭𑀲𑀸𑀤𑀺𑀥𑀸𑀢𑀼𑀓𑁆𑀔𑀬𑁂𑀦 𑀲𑀼𑀓𑁆𑀔𑀪𑀸𑀯𑀁 𑀧𑀸𑀧𑀦𑀓𑀫𑀦𑁆𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀤𑁂𑀲𑁆𑀲𑀦𑀸𑀤𑀺𑀫𑀦𑁆𑀢𑀸𑀦𑀁 𑀲𑀗𑁆𑀕𑀳𑁄. 𑀯𑀺𑀤𑁂𑀲𑁆𑀲𑀦𑀁 𑀦𑀸𑀫 𑀫𑀺𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑁂𑀭𑀺𑀪𑀸𑀯𑀸𑀧𑀸𑀤𑀦𑀁. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀸 𑀪𑀺𑀓𑁆𑀔𑀼𑀦𑀻 𑀳𑀢𑁆𑀣𑀺…𑀧𑁂… 𑀓𑀺𑀜𑁆𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀧𑀤𑀸𑀤𑀻𑀦𑀁 𑀯𑀲𑁂𑀦 𑀧𑀭𑀺𑀬𑀸𑀧𑀼𑀡𑁂𑀬𑁆𑀬 𑀅𑀥𑀻𑀬𑁂𑀬𑁆𑀬 𑀘𑁂, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁧𑁧. 𑀮𑁂𑀔𑁂𑀢𑀺 𑀮𑀺𑀔𑀺𑀢𑀲𑀺𑀧𑁆𑀧𑁂. 𑀥𑀸𑀭𑀡𑀸𑀬 𑀘𑀸𑀢𑀺 𑀥𑀸𑀭𑀡𑀲𑀢𑁆𑀣𑁂, 𑀬𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀸 𑀩𑀳𑀽𑀦𑀺𑀧𑀺 𑀕𑀦𑁆𑀣𑀸𑀦𑀺 𑀥𑀸𑀭𑁂𑀦𑁆𑀢𑀺. 𑀕𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀕𑀼𑀢𑁆𑀢𑀢𑁆𑀣𑀸𑀬. 𑀧𑀭𑀺𑀢𑁆𑀢𑁂𑀲𑀼 𑀘 𑀲𑀩𑁆𑀩𑁂𑀲𑀽𑀢𑀺 𑀬𑀓𑁆𑀔𑀧𑀭𑀺𑀢𑁆𑀢𑀘𑁄𑀭𑀯𑀸𑀴𑀸𑀤𑀺𑀲𑀩𑁆𑀩𑁂𑀲𑀼 𑀧𑀭𑀺𑀢𑁆𑀢𑁂𑀲𑀼 𑀘.

𑀦𑀯𑀫𑀁.

𑁨𑁩𑁧𑁨. 𑀤𑀲𑀫𑁂𑀢𑀺 ¶ ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀁 𑀯𑀸𑀘𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁦𑁧𑁮) 𑀲𑀫𑀼𑀤𑁆𑀤𑀺𑀝𑁆𑀞𑁂 𑀤𑀲𑀫𑀲𑀺𑀓𑁆𑀔𑀸𑀧𑀤𑁂. 𑀇𑀤𑀁 𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀤𑀲𑀫𑀁.

𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁨𑁩𑁧𑁩. 𑀲𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀦𑁆𑀢𑀺 𑀬𑀢𑁆𑀣 𑀪𑀺𑀓𑁆𑀔𑀽 𑀭𑀼𑀓𑁆𑀔𑀫𑀽𑀮𑁂𑀧𑀺 𑀯𑀲𑀦𑁆𑀢𑀺, 𑀢𑀁 𑀧𑀤𑁂𑀲𑀁. 𑀚𑀸𑀦𑀺𑀢𑁆𑀯𑀸𑀢𑀺 ‘‘𑀲𑀪𑀺𑀓𑁆𑀔𑀼𑀓’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸. 𑀬𑀁 𑀓𑀺𑀜𑁆𑀘𑀻𑀢𑀺 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀆𑀭𑀸𑀫𑀺𑀓𑀁 𑀯𑀸 𑀬𑀁 𑀓𑀺𑀜𑁆𑀘𑀺.

𑁨𑁩𑁧𑁪-𑁫. ‘‘𑀲𑀪𑀺𑀓𑁆𑀔𑀼𑀓𑁄 𑀦𑀸𑀫 𑀆𑀭𑀸𑀫𑁄 𑀬𑀢𑁆𑀣 𑀪𑀺𑀓𑁆𑀔𑀽 𑀭𑀼𑀓𑁆𑀔𑀫𑀽𑀮𑁂𑀧𑀺 𑀯𑀲𑀦𑁆𑀢𑀻’’𑀢𑀺 (𑀧𑀸𑀘𑀺. 𑁧𑁦𑁨𑁫) 𑀯𑀘𑀦𑀢𑁄 𑀆𑀳 ‘‘𑀲𑀘𑁂 𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑁆𑀢𑀫𑀲𑁄 𑀭𑀼𑀓𑁆𑀔𑀫𑀽𑀮𑀲𑁆𑀲𑀧𑀺 𑀅𑀦𑀸𑀧𑀼𑀘𑁆𑀙𑀸 𑀲𑀘𑁂 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀲𑁆𑀲𑀸 𑀧𑀞𑀫𑁂 𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑁄𑀓𑁆𑀓𑀫𑁂 𑀯𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀧𑀸𑀤𑁂 𑀅𑀢𑀺𑀓𑁆𑀓𑀸𑀫𑀺𑀢𑁂 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁩𑁧𑁬. 𑀅𑀪𑀺𑀓𑁆𑀔𑀼𑀓𑁂 ¶ 𑀆𑀭𑀸𑀫𑁂 𑀲𑀪𑀺𑀓𑁆𑀔𑀽𑀢𑀺 𑀲𑀜𑁆𑀜𑀸𑀬 𑀉𑀪𑁄𑀲𑀼𑀧𑀺 𑀲𑀪𑀺𑀓𑁆𑀔𑀼𑀓𑀸𑀪𑀺𑀓𑁆𑀔𑀼𑀓𑁂𑀲𑀼 𑀆𑀭𑀸𑀫𑁂𑀲𑀼 𑀚𑀸𑀢𑀓𑀗𑁆𑀔𑀸𑀬 𑀲𑀜𑁆𑀚𑀸𑀢𑀯𑀺𑀘𑀺𑀓𑀺𑀘𑁆𑀙𑀸𑀬, 𑀯𑁂𑀫𑀢𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁧𑁭. 𑀲𑀻𑀲𑀸𑀦𑀼𑀮𑁄𑀓𑀺𑀓𑀸 𑀬𑀸 𑀪𑀺𑀓𑁆𑀔𑀼𑀦𑀻 𑀕𑀘𑁆𑀙𑀢𑀺, 𑀢𑀲𑁆𑀲𑀸 𑀘 𑀅𑀦𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸. 𑀏𑀯𑀫𑀼𑀧𑀭𑀺𑀧𑀺. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀢𑀸𑀲𑀁 𑀲𑀦𑁆𑀢𑀺𑀓𑀁 ‘‘𑀕𑀘𑁆𑀙𑀸𑀫𑀻’’𑀢𑀺 𑀕𑀘𑁆𑀙𑀢𑀺. 𑀬𑀣𑀸𑀳 ‘‘𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀧𑀞𑀫𑀢𑀭𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀯𑀸 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀺, 𑀢𑀢𑁆𑀣 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁦𑁨𑁭).

𑁨𑁩𑁧𑁮. ‘‘𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸’’𑀢𑀺 𑀯𑀘𑀦𑁂𑀦𑁂𑀯 𑀅𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀁 𑀓𑀺𑀜𑁆𑀘𑀺 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀆𑀭𑀸𑀫𑀫𑀚𑁆𑀛𑀢𑁄 𑀯𑀸 𑀫𑀕𑁆𑀕𑁄 𑀳𑁄𑀢𑀺, 𑀢𑁂𑀦 𑀕𑀘𑁆𑀙𑀦𑁆𑀢𑀺𑀬𑀸𑀧𑀺. 𑀆𑀧𑀤𑀸𑀲𑀽𑀢𑀺 𑀬𑁂𑀦 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀸 𑀳𑁄𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀯𑀺𑀲𑀦𑁆𑀢𑀺𑀬𑀸.

𑀧𑀞𑀫𑀁.

𑁨𑁩𑁨𑁦. 𑀅𑀓𑁆𑀓𑁄𑀲𑁂𑀬𑁆𑀬𑀸𑀢𑀺 𑀤𑀲𑀦𑁆𑀦𑀁 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑁆𑀫𑀼𑀔𑀸, 𑀧𑀭𑀫𑁆𑀫𑀼𑀔𑀸 𑀯𑀸 𑀅𑀓𑁆𑀓𑁄𑀲𑁂𑀬𑁆𑀬 𑀯𑀸. 𑀧𑀭𑀺𑀪𑀸𑀲𑁂𑀬𑁆𑀬 𑀯𑀸𑀢𑀺 𑀪𑀬’𑀫𑀲𑁆𑀲 𑀉𑀧𑀤𑀁𑀲𑁂𑀬𑁆𑀬 𑀯𑀸. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 ‘‘𑀉𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸…𑀧𑁂… 𑀯𑁂𑀫𑀢𑀺𑀓𑀸…𑀧𑁂… 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸 𑀅𑀓𑁆𑀓𑁄𑀲𑀢𑀺 𑀯𑀸 𑀧𑀭𑀺𑀪𑀸𑀲𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁦𑁩𑁧) 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀲𑁂𑀲𑁂𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂. 𑀢𑀺𑀓𑀤𑀼𑀓𑁆𑀓𑀝𑀁 𑀢𑀲𑁆𑀲𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁨𑁧. ‘‘𑀧𑀼𑀭𑀓𑁆𑀔𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀅𑀪𑀺𑀲𑀧𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁮𑁭𑁫) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀁.

𑁨𑁩𑁨𑁨-𑁩. 𑀲𑀗𑁆𑀖𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁. 𑀧𑀭𑀺𑀪𑀸𑀲𑁂𑀬𑁆𑀬𑀸𑀢𑀺 ‘‘𑀩𑀸𑀮𑀸 𑀏𑀢𑀸, 𑀅𑀩𑁆𑀬𑀢𑁆𑀢𑀸 𑀏𑀢𑀸, 𑀦𑁂𑀢𑀸 𑀚𑀸𑀦𑀦𑁆𑀢𑀺 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀤𑁄𑀲𑀁 𑀯𑀸 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀯𑀸 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸’’𑀢𑀺 (𑀧𑀸𑀘𑀺. 𑁧𑁦𑁩𑁫) 𑀆𑀕𑀢𑀦𑀬𑁂𑀦 ¶ 𑀧𑀭𑀺𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀸𑀬𑀸𑀢𑀺 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 ¶ 𑀯𑀸 𑀢𑀣𑁂𑀯 𑀇𑀢𑀭𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀸 𑀧𑀭𑀺𑀪𑀸𑀲𑀦𑁆𑀢𑀺𑀬𑀸 𑀢𑀲𑁆𑀲𑀸 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀢𑀺𑀬𑀁.

𑁨𑁩𑁨𑁪-𑁬. 𑀬𑀸 𑀦𑀺𑀫𑀦𑁆𑀢𑀦𑀧𑀯𑀸𑀭𑀡𑀸 𑀉𑀪𑁄𑀧𑀺 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁧𑁭-𑁨𑁧𑁯), 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁩𑁮-𑁨𑁩𑁯) 𑀘 𑀯𑀼𑀢𑁆𑀢𑀮𑀓𑁆𑀔𑀡𑀸, 𑀢𑀸𑀳𑀺 𑀉𑀪𑁄𑀳𑀺 𑀦𑀺𑀫𑀦𑁆𑀢𑀦𑀧𑀯𑀸𑀭𑀡𑀸𑀳𑀺 𑀬𑀸 𑀘 𑀪𑀺𑀓𑁆𑀔𑀼𑀦𑀻 𑀲𑀘𑁂 𑀦𑀺𑀫𑀦𑁆𑀢𑀺𑀢𑀸𑀧𑀺 𑀯𑀸 𑀧𑀯𑀸𑀭𑀺𑀢𑀸𑀧𑀺 𑀯𑀸 𑀪𑀯𑁂𑀬𑁆𑀬, 𑀲𑀸 𑀧𑀼𑀭𑁂𑀪𑀢𑁆𑀢𑀁 𑀬𑀸𑀕𑀼𑀜𑁆𑀘 𑀬𑀸𑀫𑀓𑀸𑀮𑀺𑀓𑀸𑀤𑀺𑀓𑀸𑀮𑀺𑀓𑀢𑁆𑀢𑀬𑀜𑁆𑀘 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀬𑀸𑀯𑀓𑀸𑀮𑀺𑀓𑀁 𑀅𑀚𑁆𑀛𑁄𑀳𑀭𑀡𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀘𑁂, 𑀢𑀲𑁆𑀲𑀸 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸, 𑀅𑀚𑁆𑀛𑁄𑀳𑀸𑀭𑀯𑀲𑁂𑀦 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀘 𑀦𑀺𑀫𑀦𑁆𑀢𑀺𑀢𑀸 𑀦𑀸𑀫 ‘‘𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑀸’’𑀢𑀺 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀮𑀓𑁆𑀔𑀡𑀸. 𑀧𑀯𑀸𑀭𑀡𑀸 𑀘 ‘‘𑀧𑀯𑀸𑀭𑀺𑀢𑁄 𑀦𑀸𑀫 𑀅𑀲𑀦𑀁 𑀧𑀜𑁆𑀜𑀸𑀬𑀢𑀺, 𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀺, 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀅𑀪𑀺𑀳𑀭𑀢𑀺, 𑀧𑀝𑀺𑀓𑁆𑀔𑁂𑀧𑁄 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀮𑀓𑁆𑀔𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁩𑁨𑁭. 𑀓𑀸𑀮𑀺𑀓𑀸𑀦𑀺 𑀘 𑀢𑀻𑀡𑁂𑀯𑀸𑀢𑀺 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀢𑀻𑀡𑀺 𑀓𑀸𑀮𑀺𑀓𑀸𑀦𑀺 𑀏𑀯.

𑁨𑁩𑁨𑁮-𑁯. 𑀦𑀺𑀫𑀦𑁆𑀢𑀺𑀢𑀧𑀯𑀸𑀭𑀺𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀫𑀦𑁆𑀢𑀺𑀢𑀸’’𑀢𑀺𑀆𑀤𑀺. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀺𑀫𑀦𑁆𑀢𑀺𑀢𑀸 𑀅𑀧𑁆𑀧𑀯𑀸𑀭𑀺𑀢𑀸 𑀲𑀘𑁂 𑀬𑀸𑀕𑀼𑀁 𑀧𑀺𑀯𑀢𑀺, 𑀯𑀝𑁆𑀝𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀫𑀺𑀓𑀲𑁆𑀲𑀸𑀢𑀺 𑀬𑁂𑀦 𑀦𑀺𑀫𑀦𑁆𑀢𑀺𑀢𑀸, 𑀢𑀲𑁆𑀲 𑀦𑀺𑀫𑀦𑁆𑀢𑀦𑀲𑀸𑀫𑀺𑀓𑀲𑁆𑀲𑁂𑀯. 𑀅𑀜𑁆𑀜𑀪𑁄𑀚𑀦𑀦𑁆𑀢𑀺 ¶ 𑀬𑁂𑀦 𑀦𑀺𑀫𑀦𑁆𑀢𑀺𑀢𑀸, 𑀢𑀢𑁄 𑀅𑀜𑁆𑀜𑀲𑁆𑀲 𑀪𑁄𑀚𑀦𑀁. 𑀲𑀘𑁂 𑀲𑀸 𑀪𑀼𑀜𑁆𑀚𑀢𑀺, 𑀢𑀣𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀓𑀸𑀮𑀺𑀓𑀸𑀦𑀺 𑀘 𑀢𑀻𑀡𑁂𑀯𑀸𑀢𑀺 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀢𑀻𑀡𑀺 𑀓𑀸𑀮𑀺𑀓𑀸𑀦𑁂𑀯. 𑀧𑀘𑁆𑀘𑀬𑁂 𑀲𑀢𑀻𑀢𑀺 𑀧𑀺𑀧𑀸𑀲𑀸𑀤𑀺𑀧𑀘𑁆𑀘𑀬𑁂 𑀲𑀢𑀺.

𑁨𑁩𑁩𑁦. 𑀇𑀫𑀲𑁆𑀲 ¶ 𑀲𑀺𑀓𑁆𑀔𑀸𑀧𑀤𑀲𑁆𑀲 𑀇𑀤𑀁 𑀲𑀫𑀼𑀝𑁆𑀞𑀸𑀦𑀁 𑀅𑀤𑁆𑀥𑀸𑀦𑁂𑀦 𑀢𑀼𑀮𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀯𑀸𑀭𑀺𑀢𑀸𑀬, 𑀅𑀧𑁆𑀧𑀯𑀸𑀭𑀺𑀢𑀸𑀬 𑀯𑀸 𑀦𑀺𑀫𑀦𑁆𑀢𑀺𑀢𑀸𑀬 𑀯𑀲𑁂𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀫𑀦𑁆𑀢𑀺𑀢𑀸’’𑀢𑀺𑀆𑀤𑀺. 𑀦𑀺𑀫𑀦𑁆𑀢𑀺𑀢𑀸 𑀧𑀦 𑀲𑀸𑀫𑀺𑀓𑀁 𑀅𑀦𑀸𑀧𑀼𑀘𑁆𑀙𑀸 𑀪𑀼𑀜𑁆𑀚𑀢𑀺 𑀘𑁂, 𑀢𑀲𑁆𑀲𑀸 𑀯𑀲𑁂𑀦 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀳𑁄𑀢𑀺. 𑀏𑀢𑁆𑀣 𑀪𑀼𑀜𑁆𑀚𑀦𑀁 𑀓𑁆𑀭𑀺𑀬𑀁. 𑀲𑀸𑀫𑀺𑀓𑀲𑁆𑀲 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑁆𑀭𑀺𑀬𑀁.

𑁨𑁩𑁩𑁧. ‘‘𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺𑀁 𑀧𑀯𑀸𑀭𑀺𑀢𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀬𑀸 𑀬𑀤𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸 𑀘 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀺𑀬𑀸𑀢𑀺 𑀅𑀯𑀲𑁆𑀲𑀁. 𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀯𑀸 𑀅𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀢𑀲𑁆𑀲𑀸 𑀧𑀭𑀺𑀪𑁄𑀕𑁂𑀦𑁂𑀯 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀯𑀲𑁆𑀲𑀁 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀁.

𑁨𑁩𑁩𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀼𑀮𑀫𑀘𑁆𑀙𑀭𑀺𑀦𑀻 𑀅𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁦𑁪𑁩) 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺𑀆𑀤𑀺. 𑀓𑀼𑀮𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀯𑀤𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀼𑀮𑀲𑁆𑀲 𑀲𑀦𑁆𑀢𑀺𑀓𑁂 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀮𑀲𑁆𑀲𑀸𑀯𑀡𑁆𑀡𑀦𑀁 𑀯𑀸𑀧𑀻𑀢𑀺 ‘‘𑀢𑀁 𑀓𑀼𑀮𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦’’𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀓𑀼𑀮𑀲𑁆𑀲 𑀅𑀯𑀡𑁆𑀡𑀁 𑀅𑀕𑀼𑀡𑀁 𑀯𑀤𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁩𑁩. 𑀲𑀦𑁆𑀢𑀁 ¶ 𑀪𑀸𑀲𑀦𑁆𑀢𑀺𑀬𑀸 𑀤𑁄𑀲𑀦𑁆𑀢𑀺 𑀅𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀓𑀼𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀲𑀦𑁆𑀢𑀁 𑀤𑁄𑀲𑀁 𑀆𑀤𑀻𑀦𑀯𑀁 𑀓𑀣𑁂𑀦𑁆𑀢𑀺𑀬𑀸.

𑀧𑀜𑁆𑀘𑀫𑀁.

𑁨𑁩𑁩𑁪-𑁫. 𑀑𑀯𑀸𑀤𑀤𑀸𑀬𑀓𑁄𑀢𑀺 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀸𑀤𑀁 𑀤𑁂𑀦𑁆𑀢𑁄. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺𑀬𑀸𑀢𑀺 𑀯𑀲𑁆𑀲𑀁 𑀯𑀲𑀦𑁆𑀢𑀺𑀬𑀸.

𑁨𑁩𑁩𑁬. 𑀪𑀺𑀓𑁆𑀔𑀽𑀢𑀺 𑀑𑀯𑀸𑀤𑀤𑀸𑀬𑀓𑀸 𑀪𑀺𑀓𑁆𑀔𑀽.

𑀙𑀝𑁆𑀞𑀁.

𑁨𑁩𑁩𑁮. 𑀬𑀸 ¶ 𑀲𑀸 𑀪𑀺𑀓𑁆𑀔𑀼𑀦𑀻 𑀯𑀲𑁆𑀲𑀁 𑀯𑀼𑀢𑁆𑀣𑀸 𑀧𑀼𑀭𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀯𑀼𑀢𑁆𑀣𑀸 𑀢𑀢𑁄 𑀅𑀦𑀦𑁆𑀢𑀭𑀁 𑀉𑀪𑀢𑁄𑀲𑀗𑁆𑀖𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 ‘‘𑀦𑀸𑀳𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺 𑀘𑁂𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀫𑀁.

𑁨𑁩𑁪𑁧. 𑀑𑀯𑀸𑀤𑀸𑀤𑀻𑀦𑀫𑀢𑁆𑀣𑀸𑀬𑀸𑀢𑀺 𑀅𑀝𑁆𑀞𑀕𑀭𑀼𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀫𑀢𑁆𑀣𑀸𑀬. 𑀆𑀤𑀺-𑀲𑀤𑁆𑀤𑁂𑀦 𑀉𑀧𑁄𑀲𑀣𑀧𑀼𑀘𑁆𑀙𑀦𑀧𑀯𑀸𑀭𑀡𑀸𑀦𑀁 𑀕𑀳𑀡𑀁.

𑁨𑁩𑁪𑁨. 𑀑𑀯𑀸𑀤𑀸𑀤𑀻𑀦𑀫𑀢𑁆𑀣𑀸𑀬 𑀅𑀕𑀫𑀦𑁂𑀦 𑀅𑀓𑁆𑀭𑀺𑀬𑀁. 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑀓𑀫𑁆𑀫𑀁.

𑀅𑀝𑁆𑀞𑀫𑀁.

𑁨𑁩𑁪𑁩. ‘‘𑀅𑀦𑁆𑀯𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸 𑀉𑀧𑁄𑀲𑀣𑀧𑀼𑀘𑁆𑀙𑀦𑀜𑁆𑀘 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘, 𑀢𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁦𑁫𑁯) 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀦𑀯𑀫𑀁.

𑁨𑁩𑁪𑁬-𑁭. 𑀧𑀲𑀸𑀔𑁄 ¶ 𑀦𑀸𑀫 𑀦𑀸𑀪𑀺𑀬𑀸 𑀳𑁂𑀝𑁆𑀞𑀸, 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀺 𑀧𑀤𑁂𑀲𑁄. 𑀢𑀣𑀸 𑀳𑀺 𑀬𑀲𑁆𑀫𑀸 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀺𑀬 𑀉𑀪𑁄 𑀊𑀭𑀽 𑀧𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸, 𑀢𑀲𑁆𑀫𑀸 𑀲𑁄 𑀧𑀲𑀸𑀔𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀧𑀲𑀸𑀔𑁂. 𑀲𑀜𑁆𑀚𑀸𑀢𑀦𑁆𑀢𑀺 𑀉𑀝𑁆𑀞𑀺𑀢𑀁. 𑀕𑀡𑁆𑀟𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀕𑀡𑁆𑀟𑀁. 𑀭𑀼𑀥𑀺𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀯𑀡𑀁. 𑀲𑀗𑁆𑀖𑀁 𑀯𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀯𑀸. 𑀕𑀡𑀁 𑀯𑀸𑀢𑀺 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀸. 𑀏𑀓𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀼𑀭𑀺𑀲𑁂𑀦𑀸’’𑀢𑀺 𑀲𑁂𑀲𑁄, 𑀲𑀳𑀢𑁆𑀣𑁂 𑀇𑀤𑀁 𑀓𑀭𑀡𑀯𑀘𑀦𑀁. 𑀬𑀣𑀸𑀳 ‘‘𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀏𑀓𑁂𑀦𑁂𑀓𑀸’’𑀢𑀺. 𑀧𑀼𑀭𑀺𑀲𑁄𑀢𑀺 𑀘 𑀫𑀦𑀼𑀲𑁆𑀲𑀧𑀼𑀭𑀺𑀲𑁄𑀯 𑀕𑀳𑁂𑀢𑀩𑁆𑀩𑁄.

𑀥𑁄𑀯𑀸𑀢𑀺 𑀏𑀢𑁆𑀣 𑀆𑀤𑀺-𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑁂𑀦 𑀇𑀢𑀺-𑀲𑀤𑁆𑀤𑁂𑀦 ‘‘𑀆𑀮𑀺𑀫𑁆𑀧𑀸𑀧𑁂𑀬𑁆𑀬 𑀯𑀸 𑀩𑀦𑁆𑀥𑀸𑀧𑁂𑀬𑁆𑀬 𑀯𑀸 𑀫𑁄𑀘𑀸𑀧𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁧𑁦𑁬𑁩) 𑀲𑀺𑀓𑁆𑀔𑀸𑀧𑀤𑀸𑀕𑀢𑀸𑀦𑀁 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀕𑀡𑁆𑀳𑀦𑀢𑁄 ‘‘𑀆𑀮𑀺𑀫𑁆𑀧 ¶ 𑀩𑀦𑁆𑀥 𑀫𑁄𑀘𑁂𑀳𑀻’’𑀢𑀺 𑀆𑀡𑀢𑁆𑀢𑀺𑀢𑁆𑀢𑀬𑀁 𑀲𑀗𑁆𑀕𑀳𑀺𑀢𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀤𑀼𑀓𑁆𑀓𑀝𑀸𑀦𑀺𑀘𑁆𑀙 𑀧𑀸𑀘𑀺𑀢𑁆𑀢𑀺𑀬𑁄 𑀙 𑀘𑀸’’𑀢𑀺.

𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀲𑀸𑀔𑁂 𑀚𑀸𑀢𑀁 𑀕𑀡𑁆𑀟𑀁 𑀯𑀸 𑀭𑀼𑀥𑀺𑀢𑀁 𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀏𑀓𑀺𑀓𑀸 ‘‘𑀪𑀺𑀦𑁆𑀤 𑀨𑀸𑀮𑁂𑀳𑀺 𑀥𑁄𑀯 𑀆𑀮𑀺𑀫𑁆𑀧 𑀩𑀦𑁆𑀥 𑀫𑁄𑀘𑁂𑀳𑀻’’𑀢𑀺 𑀲𑀩𑁆𑀩𑀸𑀦𑀺 𑀓𑀸𑀢𑀩𑁆𑀩𑀸𑀦𑀺 𑀆𑀡𑀸𑀧𑁂𑀢𑀺, 𑀢𑀲𑁆𑀲𑀸 𑀙 𑀤𑀼𑀓𑁆𑀓𑀝𑀸𑀦𑀺, 𑀓𑀢𑁂𑀲𑀼 𑀪𑀺𑀦𑁆𑀤𑀦𑀸𑀤𑀻𑀲𑀼 𑀙𑀲𑀼 𑀓𑀺𑀘𑁆𑀘𑁂𑀲𑀼 𑀢𑀲𑁆𑀲𑀸 𑀙 𑀧𑀸𑀘𑀺𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁪𑁮-𑁯. 𑀏𑀢𑁆𑀣𑀸𑀢𑀺 𑀕𑀡𑁆𑀟𑁂 𑀯𑀸 𑀯𑀡𑁂 𑀯𑀸. ‘‘𑀬𑀁 𑀓𑀸𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀢𑁆𑀯𑀁 𑀓𑀭𑁄𑀳𑀺’’𑀇𑀢𑀺 𑀲𑀘𑁂 𑀏𑀯𑀁 𑀬𑀸 𑀆𑀡𑀸𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸 𑀏𑀓𑀸𑀬 𑀆𑀡𑀸𑀧𑀦𑀯𑀸𑀘𑀸𑀬 𑀙 𑀤𑀼𑀓𑁆𑀓𑀝𑀸𑀦𑀺 𑀘 𑀧𑀸𑀘𑀺𑀢𑁆𑀢𑀺𑀬𑀘𑁆𑀙𑀓𑁆𑀓𑀜𑁆𑀘𑁂𑀢𑀺 𑀤𑁆𑀯𑀸𑀤𑀲𑀸𑀧𑀢𑁆𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸.

𑁨𑁩𑁫𑁧. 𑀆𑀧𑀼𑀘𑁆𑀙𑀺𑀢𑁆𑀯𑀸 ¶ 𑀯𑀸𑀢𑀺 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀤𑀼𑀢𑀺𑀬𑀦𑁆𑀢𑀺 𑀤𑀼𑀢𑀺𑀬𑀺𑀓𑀁. 𑀯𑀺𑀜𑁆𑀜𑀼𑀁 𑀤𑀼𑀢𑀺𑀬𑀁 𑀕𑀳𑁂𑀢𑁆𑀯𑀸𑀧𑀺 𑀯𑀸𑀢𑀺 𑀬𑁄𑀚𑀦𑀸.

𑀤𑀲𑀫𑀁.

𑀆𑀭𑀸𑀫𑀯𑀕𑁆𑀕𑁄 𑀙𑀝𑁆𑀞𑁄.

𑁨𑁩𑁫𑁩. ‘‘𑀕𑀡𑀧𑀭𑀺𑀬𑁂𑀲𑀦𑀸𑀤𑀺𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀦𑀢𑁆𑀣𑀁 𑀦𑀺𑀕𑁆𑀕𑀳𑀺𑀢𑀸𑀕𑀫𑁄. 𑀕𑀩𑁆𑀪𑀺𑀦𑀺𑀦𑁆𑀢𑀺 𑀆𑀧𑀦𑁆𑀦𑀲𑀢𑁆𑀢𑀁, 𑀓𑀼𑀘𑁆𑀙𑀺𑀧𑀯𑀺𑀝𑁆𑀞𑀲𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑀸. 𑀓𑀫𑁆𑀫𑀯𑀸𑀘𑀸𑀳𑀻𑀢𑀺 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺.

𑁨𑁩𑁫𑁪-𑁫. 𑀓𑀫𑁆𑀫𑀯𑀸𑀘𑀸𑀬 𑀑𑀲𑀸𑀦𑁂𑀢𑀺 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀧𑀭𑀺𑀬𑁄𑀲𑀸𑀦𑁂, 𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀕𑀩𑁆𑀪𑀺𑀦𑀺𑀲𑀜𑁆𑀜𑀸𑀬 𑀦 𑀘 𑀕𑀩𑁆𑀪𑀺𑀦𑀺𑀬𑀸𑀢𑀺 𑀅𑀕𑀩𑁆𑀪𑀺𑀦𑀺𑀬𑀸 𑀕𑀩𑁆𑀪𑀺𑀦𑀺𑀲𑀜𑁆𑀜𑀸𑀬 𑀘. 𑀉𑀪𑁄 𑀲𑀜𑁆𑀚𑀸𑀢𑀓𑀗𑁆𑀔𑀸𑀬𑀸𑀢𑀺 𑀉𑀪𑁄𑀲𑀼 𑀲𑀫𑀼𑀧𑁆𑀧𑀦𑁆𑀦𑀲𑀁𑀲𑀬𑀸𑀬, 𑀕𑀩𑁆𑀪𑀺𑀦𑀺𑀬𑀸, 𑀅𑀕𑀩𑁆𑀪𑀺𑀦𑀺𑀬𑀸 𑀘 𑀯𑁂𑀫𑀢𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦𑁂𑀢𑁆𑀣 𑀲𑀼-𑀲𑀤𑁆𑀤𑀮𑁄𑀧𑁄. 𑀢𑀣𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀆𑀘𑀭𑀺𑀦𑀺𑀬𑀸 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀸 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀢𑀲𑁆𑀲𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀦𑁆𑀢𑀺𑀬𑀸 ¶ 𑀆𑀘𑀭𑀺𑀦𑀺𑀬𑀸 𑀘. 𑀕𑀡𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀸𑀘𑀭𑀺𑀦𑀻𑀳𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑀺𑀕𑀡𑀲𑁆𑀲 𑀘. 𑀢𑀣𑀸 𑀤𑀼𑀓𑁆𑀓𑀝𑀁 𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑁨𑁩𑁫𑁬. ‘‘𑀤𑁆𑀯𑀻𑀲𑀼 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀤𑁆𑀯𑀻𑀲𑀽𑀢𑀺 𑀕𑀩𑁆𑀪𑀺𑀦𑀺𑀬𑀸, 𑀅𑀕𑀩𑁆𑀪𑀺𑀦𑀺𑀬𑀸 𑀘.

𑀧𑀞𑀫𑀁.

𑁨𑁩𑁫𑁭. 𑀤𑀼𑀢𑀺𑀬𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁦𑁭𑁩) 𑀲𑀺𑀓𑁆𑀔𑀸𑀧𑀤𑁂. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀸𑀬𑀦𑁆𑀢𑀻 ¶ 𑀦𑀸𑀫 𑀫𑀸𑀢𑀸 𑀯𑀸 𑀳𑁄𑀢𑀺 𑀥𑀸𑀢𑀺 𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀤𑀼𑀢𑀺𑀬𑀁.

𑁨𑁩𑁫𑁮. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀘𑁂 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀧𑀯𑀸𑀭𑀡𑀯𑀲𑁂𑀦 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀙𑀲𑀼 𑀥𑀫𑁆𑀫𑁂𑀲𑀽𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀲𑀼 𑀯𑀺𑀓𑀸𑀮𑀪𑁄𑀚𑀦𑀸𑀯𑁂𑀭𑀫𑀡𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼. 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀦𑁆𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁦𑁭𑁯) 𑀦𑀬𑁂𑀦 𑀅𑀦𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀁 𑀯𑀸 𑀏𑀯𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀧𑀺 𑀓𑀼𑀧𑀺𑀢𑀲𑀺𑀓𑁆𑀔𑀁 𑀯𑀸. 𑀲𑀺𑀓𑁆𑀔𑀫𑀸𑀦𑀁 𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀦𑀢𑁄 𑀯𑀸 𑀢𑁂 𑀯𑀸 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑁂 𑀥𑀫𑁆𑀫𑁂 𑀫𑀸𑀦𑀦𑀢𑁄 𑀏𑀯𑀁 𑀮𑀤𑁆𑀥𑀦𑀸𑀫𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬. 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺 𑀆𑀧𑀢𑁆𑀢𑀺 𑀲𑀺𑀬𑀸, 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁩𑁫𑁯. ‘‘𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀥𑀫𑁆𑀫𑀓𑀫𑁆𑀫𑁂 𑀲𑀢𑁆𑀣𑀼𑀦𑀸 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. ‘‘𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁦𑁮𑁨) 𑀏𑀯𑀁 𑀅𑀥𑀫𑁆𑀫𑁂 𑀧𑀦 𑀓𑀫𑁆𑀫𑀲𑁆𑀫𑀺𑀁 𑀲𑀢𑁆𑀣𑀼𑀦𑀸 𑀢𑀺𑀓𑀤𑀼𑀓𑁆𑀓𑀝𑀁 𑀤𑀻𑀧𑀺𑀢𑀁.

𑁨𑁩𑁬𑁦. 𑀅𑀔𑀡𑁆𑀟𑀢𑁄 ¶ 𑀔𑀡𑁆𑀟𑀁 𑀅𑀓𑀢𑁆𑀯𑀸.

𑁨𑁩𑁬𑁧. 𑀲𑀘𑁂 ¶ 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀧𑀩𑁆𑀩𑀚𑁆𑀚𑀸𑀬 𑀲𑀝𑁆𑀞𑀺𑀯𑀲𑁆𑀲𑀸𑀧𑀺 𑀳𑁄𑀢𑀺, 𑀢𑀲𑁆𑀲𑀸 𑀇𑀫𑀸 𑀙 𑀲𑀺𑀓𑁆𑀔𑀸𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀸 𑀧𑀤𑀸𑀢𑀩𑁆𑀩𑀸, 𑀇𑀫𑀸 𑀅𑀤𑀢𑁆𑀯𑀸 𑀦 𑀓𑀸𑀭𑀬𑁂 𑀦𑁂𑀯 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀢𑀢𑀺𑀬𑀁.

𑁨𑁩𑁬𑁨. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑀢𑁄 𑀅𑀜𑁆𑀜𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀥𑀸’’𑀢𑀺𑀆𑀤𑀺𑀦𑀸 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀇𑀥 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁬𑁩. 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀉𑀧𑀲𑀫𑁆𑀧𑀤𑀢𑁄 𑀧𑀞𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀬𑀸 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸 𑀳𑁄𑀢𑀺, 𑀲𑀸 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀲𑀘𑁂 𑀧𑀞𑀫𑀁 𑀅𑀤𑀺𑀦𑁆𑀦𑀸 𑀳𑁄𑀢𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀉𑀧𑀲𑀫𑁆𑀧𑀤𑀫𑀸𑀴𑀓𑁂𑀧𑀺 𑀧𑀤𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀬𑁄𑀚𑀦𑀸.

𑁨𑁩𑁬𑁪. 𑀢𑀢𑀺𑀬𑀜𑁆𑀘𑀸𑀢𑀺 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀜𑁆𑀘. 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 𑀇𑀤𑀁 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀞𑀫𑁂𑀦 𑀲𑀫𑀁 𑀜𑁂𑀬𑁆𑀬𑀦𑁆𑀢𑀺 𑀧𑀞𑀫𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀲𑀫𑀼𑀝𑁆𑀞𑀸𑀦𑀸𑀤𑀺𑀦𑀸 𑀯𑀺𑀦𑀺𑀘𑁆𑀙𑀬𑁂𑀦 𑀲𑀫𑀸𑀦𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀘𑀢𑀼𑀢𑁆𑀣𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀅𑀤𑀸𑀧𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑀦𑀯𑀲𑁂𑀦 𑀓𑁆𑀭𑀺𑀬𑀸𑀓𑁆𑀭𑀺𑀬𑀁 𑀳𑁄𑀢𑀺.

𑀘𑀢𑀼𑀢𑁆𑀣𑀁.

𑁨𑁩𑁬𑁫. 𑀕𑀺𑀳𑀺𑀕𑀢𑀦𑁆𑀢𑀺 𑀧𑀼𑀭𑀺𑀲𑀦𑁆𑀢𑀭𑀕𑀢𑀁, 𑀧𑀼𑀭𑀺𑀲𑀲𑀫𑀸𑀕𑀫𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀧𑀭𑀺𑀧𑀼𑀡𑁆𑀡𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀓𑀺𑀜𑁆𑀘𑀸𑀧𑀺 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸. 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸𑀢𑀺 𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑀸.

𑁨𑁩𑁬𑁬. 𑀲𑁂𑀲𑀦𑁆𑀢𑀺 ¶ ¶ 𑀯𑀼𑀢𑁆𑀢𑀁. 𑀅𑀲𑁂𑀲𑁂𑀦 𑀲𑀩𑁆𑀩𑀲𑁄.

𑀧𑀜𑁆𑀘𑀫𑀁.

𑁨𑁩𑁬𑁮. 𑀤𑀼𑀓𑁆𑀔𑀺𑀢𑀁 𑀲𑀳𑀚𑀻𑀯𑀺𑀦𑀺𑀦𑁆𑀢𑀺 𑀏𑀢𑁆𑀣 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀲𑁂𑀲𑁄. 𑀢𑀼𑀯𑀝𑁆𑀝𑀓𑀯𑀕𑁆𑀕𑀲𑁆𑀫𑀺𑀁 ‘‘𑀤𑀼𑀓𑁆𑀔𑀺𑀢𑀁 𑀲𑀳𑀚𑀻𑀯𑀺𑀦𑀺’’𑀦𑁆𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀬𑀼𑀢𑁆𑀢𑀁 𑀬𑀁 𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀁, 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀅𑀝𑁆𑀞𑀫𑀁 𑀲𑀫𑀁 𑀜𑁂𑀬𑁆𑀬𑀁, 𑀦 𑀯𑀺𑀲𑁂𑀲𑀢𑀸 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀝𑁆𑀞𑀫𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁦𑁮) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀲𑀳𑀚𑀻𑀯𑀺𑀦𑀺𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀁. 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀬𑀁 𑀉𑀤𑁆𑀤𑁂𑀲𑀸𑀤𑀻𑀳𑀺 𑀦𑀸𑀦𑀼𑀕𑁆𑀕𑀡𑁆𑀳𑁂𑀬𑁆𑀬. 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀸𑀢𑀺 ‘‘𑀇𑀫𑀺𑀲𑁆𑀲𑀸 𑀅𑀬𑁆𑀬𑁂 𑀉𑀤𑁆𑀤𑁂𑀲𑀸𑀤𑀻𑀦𑀺 𑀤𑁂𑀳𑀻’’𑀢𑀺 𑀏𑀯𑀁 𑀦 𑀅𑀜𑁆𑀜𑀸𑀬 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀬𑁆𑀬. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀝𑁆𑀞𑀫𑀁.

𑁨𑁩𑁬𑁯. 𑀬𑀸 𑀓𑀸𑀘𑀺 𑀪𑀺𑀓𑁆𑀔𑀼𑀦𑀻 𑀯𑀼𑀝𑁆𑀞𑀸𑀧𑀺𑀢𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬 𑀘𑁂, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺 𑀧𑀭𑀺𑀬𑀸𑀧𑀼𑀢𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸. 𑀯𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀼𑀝𑁆𑀞𑀸𑀧𑀺𑀢𑀸, 𑀧𑀯𑀢𑁆𑀢𑁂𑀢𑀺 𑀲𑀼𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀧𑀯𑀢𑁆𑀢𑀺𑀦𑀻, 𑀯𑀼𑀝𑁆𑀞𑀸𑀧𑀺𑀢𑀸 𑀘 𑀲𑀸 𑀧𑀯𑀢𑁆𑀢𑀺𑀦𑀻 𑀘𑀸𑀢𑀺 𑀯𑀼𑀝𑁆𑀞𑀸𑀧𑀺𑀢𑀧𑀯𑀢𑁆𑀢𑀺𑀦𑀻, 𑀉𑀧𑀚𑁆𑀛𑀸𑀬𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁, 𑀉𑀧𑀚𑁆𑀛𑀸𑀬𑀁. 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀘𑀼𑀡𑁆𑀡𑁂𑀦, 𑀫𑀢𑁆𑀢𑀺𑀓𑀸𑀬, 𑀤𑀦𑁆𑀢𑀓𑀝𑁆𑀞𑁂𑀦, 𑀫𑀼𑀔𑁄𑀤𑀓𑁂𑀦𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀓𑀭𑀡𑀻𑀬𑁂𑀦 𑀉𑀧𑀝𑁆𑀞𑀳𑁂𑀬𑁆𑀬.

𑁨𑁩𑁭𑁦. ‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀳𑀁 𑀦𑀸𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺 𑀘𑁂, 𑀏𑀯𑀁 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀲𑁆𑀫𑀺𑀁 𑀧𑀦 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁩𑁭𑁧. 𑀬𑀸 ¶ 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀧𑀚𑁆𑀛𑀸𑀬𑀁 𑀩𑀸𑀮𑀁 𑀯𑀸 𑀅𑀮𑀚𑁆𑀚𑀺𑀁 𑀯𑀸 𑀦𑀸𑀦𑀼𑀩𑀦𑁆𑀥𑀢𑀺, 𑀢𑀲𑁆𑀲𑀸, 𑀕𑀺𑀮𑀸𑀦𑀸𑀬 𑀯𑀸 𑀆𑀧𑀤𑀸𑀲𑀼 𑀯𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸 𑀦𑀸𑀦𑀼𑀩𑀦𑁆𑀥𑀦𑁆𑀢𑀺𑀬𑀸 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑁨𑁩𑁭𑁨. 𑀅𑀦𑀼𑀧𑀝𑁆𑀞𑀸𑀦𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀓𑁆𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺.

𑀦𑀯𑀫𑀁.

𑁨𑁩𑁭𑁩-𑁫. 𑀬𑀸 ¶ 𑀓𑀸𑀘𑀺 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺𑀧𑀺 𑀦 𑀕𑀘𑁆𑀙𑁂𑀬𑁆𑀬 𑀦 𑀘𑀜𑁆𑀜𑀁 𑀆𑀡𑀸𑀧𑁂𑀬𑁆𑀬 ‘‘𑀇𑀫𑀁, 𑀅𑀬𑁆𑀬𑁂, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀅𑀜𑁆𑀜𑀜𑁆𑀘 𑀦 𑀦𑀺𑀬𑁄𑀚𑁂𑀬𑁆𑀬 𑀘𑁂, 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀲𑁆𑀫𑀺𑀁 ‘‘𑀦 𑀤𑀸𑀦𑀺 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀅𑀜𑁆𑀜𑀜𑁆𑀘 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀦𑀺𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑁂 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁂 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀅𑀦𑁆𑀢𑀭𑀸𑀬𑀲𑁆𑀫𑀺𑀁 𑀲𑀢𑀺 𑀯𑀸 𑀤𑀼𑀢𑀺𑀬𑀁 𑀅𑀮𑀪𑀦𑁆𑀢𑀺𑀬𑀸 𑀯𑀸 𑀆𑀧𑀤𑀸𑀲𑀼 𑀯𑀸 𑀕𑀺𑀮𑀸𑀦𑀸𑀬 𑀯𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑀤𑀲𑀫𑀁.

𑀕𑀩𑁆𑀪𑀺𑀦𑀺𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁨𑁩𑁭𑁬. 𑀕𑀺𑀳𑀺𑀕𑀢𑁂𑀳𑀺 𑀢𑀻𑀳𑁂𑀯𑀸𑀢𑀺 𑀅𑀦𑀦𑁆𑀢𑀭𑁂 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 𑀕𑀺𑀳𑀺𑀕𑀢𑀧𑀤𑀬𑀼𑀢𑁆𑀢𑁂𑀳𑀺 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑁂𑀳𑀺 𑀢𑀻𑀳𑁂𑀯 𑀲𑀺𑀓𑁆𑀔𑀸𑀧𑀤𑁂𑀳𑀺. 𑀲𑀤𑀺𑀲𑀸𑀦𑀻𑀢𑀺 𑀇𑀥 𑀯𑀻𑀲𑀢𑀺𑀯𑀲𑁆𑀲𑀯𑀘𑀦𑀜𑁆𑀘 𑀓𑀼𑀫𑀸𑀭𑀺𑀪𑀽𑀢𑀯𑀘𑀦𑀜𑁆𑀘 𑀢𑀢𑁆𑀣 𑀤𑁆𑀯𑀸𑀤𑀲𑀯𑀲𑁆𑀲𑀯𑀘𑀦𑀜𑁆𑀘 𑀕𑀺𑀳𑀺𑀕𑀢𑀯𑀘𑀦𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀳𑀺 𑀯𑀺𑀦𑀺𑀘𑁆𑀙𑀬𑁂𑀳𑀺 𑀬𑀣𑀸𑀓𑁆𑀓𑀫𑀁 𑀲𑀤𑀺𑀲𑀸𑀦𑁂𑀯𑀸𑀢𑀺.

𑁨𑁩𑁭𑁭. 𑀫𑀳𑀽𑀧𑀧𑀤𑀸𑀢𑀺 𑀫𑀳𑀸 𑀉𑀧𑀧𑀤𑁄 𑀬𑀸𑀲𑀁 𑀲𑀺𑀓𑁆𑀔𑀫𑀸𑀦𑀸𑀦𑀁 𑀢𑀸 𑀫𑀳𑀽𑀧𑀧𑀤𑀸. 𑀉𑀧𑀧𑀤𑀁 𑀦𑀸𑀫 𑀧𑀤𑀸𑀦𑀫𑁂𑀯 𑀬𑀼𑀚𑁆𑀚𑀢𑀺, 𑀦 𑀅𑀢𑁆𑀣𑀸𑀦𑀦𑁆𑀢𑀺 ¶ ‘‘𑀬𑀸𑀲’’𑀦𑁆𑀢𑀺 𑀅𑀜𑁆𑀜𑀧𑀤𑁂𑀦 𑀲𑀺𑀓𑁆𑀔𑀫𑀸𑀦𑀸𑀤𑀺𑀧𑀤𑀸𑀦𑀁 𑀕𑀳𑀡𑀁, 𑀲𑀤𑁆𑀤𑀢𑁆𑀣𑀸𑀦𑀫𑀪𑁂𑀤𑁄𑀧𑀘𑀸𑀭𑀲𑁆𑀲 𑀧𑀦 𑀇𑀘𑁆𑀙𑀺𑀢𑀢𑁆𑀢𑀸 𑀲𑀺𑀓𑁆𑀔𑀫𑀸𑀦𑀧𑀤𑀕𑀳𑀺𑀢𑀸𑀦𑀫𑁂𑀢𑁆𑀣 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀫𑀳𑀸𑀲𑀺𑀓𑁆𑀔𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀺𑀢𑁄𑀢𑀺 𑀏𑀢𑁆𑀣 ‘‘𑀯𑀼𑀢𑁆𑀢𑀸’’𑀢𑀺 𑀲𑁂𑀲𑁄, 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 𑀢𑀺𑀲𑁆𑀲𑀦𑁆𑀦𑀁 𑀕𑀺𑀳𑀺𑀕𑀢𑀸𑀦𑀁 𑀧𑀼𑀭𑀺𑀫𑁂𑀲𑀼 𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀕𑀢𑀸 𑀤𑁆𑀯𑁂 𑀲𑀺𑀓𑁆𑀔𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀕𑀺𑀳𑀺𑀕𑀢𑀸𑀬 ‘‘𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸’’𑀢𑀺 𑀘 𑀓𑀼𑀫𑀸𑀭𑀺𑀪𑀽𑀢𑀸𑀬 ‘‘𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸’’𑀢𑀺 𑀘 𑀯𑀲𑁆𑀲𑀯𑀲𑁂𑀦 𑀦𑀸𑀦𑀸𑀓𑀭𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀸𑀳𑀺 𑀤𑁆𑀯𑀻𑀳𑀺 𑀫𑀳𑀸𑀲𑀺𑀓𑁆𑀔𑀫𑀸𑀦𑀸𑀬 𑀯𑀲𑁆𑀲𑀯𑀲𑁂𑀦𑁂𑀯 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀢𑀸 𑀯𑀻𑀲𑀢𑀺𑀯𑀲𑁆𑀲𑀸𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸’’𑀢𑀺, 𑀅𑀢𑀺𑀓𑁆𑀓𑀦𑁆𑀢𑀯𑀻𑀲𑀢𑀺𑀯𑀲𑁆𑀲𑀸 𑀫𑀳𑀸𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁩𑁭𑁮. 𑀢𑀸 𑀤𑁆𑀯𑁂 𑀫𑀳𑀸𑀲𑀺𑀓𑁆𑀔𑀫𑀸𑀦𑀸 𑀲𑀘𑁂 𑀕𑀺𑀳𑀺𑀕𑀢𑀸 𑀯𑀸 𑀳𑁄𑀦𑁆𑀢𑀼, 𑀦 𑀘 𑀧𑀼𑀭𑀺𑀲𑀕𑀢𑀸 𑀯𑀸 𑀳𑁄𑀦𑁆𑀢𑀼 ¶ , 𑀲𑀫𑁆𑀫𑀼𑀢𑀺𑀆𑀤𑀺𑀲𑀼 𑀓𑀫𑁆𑀫𑀯𑀸𑀘𑀸𑀬 ‘‘𑀲𑀺𑀓𑁆𑀔𑀫𑀸𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀲𑀫𑁆𑀫𑀼𑀢𑀺 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀸𑀢𑀩𑁆𑀩𑀸𑀬 𑀲𑀺𑀓𑁆𑀔𑀸𑀬 𑀲𑀫𑁆𑀫𑀼𑀢𑀺 𑀘𑁂𑀯 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀘. 𑀆𑀤𑀺-𑀲𑀤𑁆𑀤𑁂𑀦 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀕𑀳𑀺𑀢𑀁.

𑁨𑁩𑁭𑁯. 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀲𑀫𑁆𑀫𑀼𑀢𑀺𑀤𑀸𑀦𑀸𑀤𑀻𑀲𑀼 𑀜𑀢𑁆𑀢𑀺𑀬𑀸 𑀘 𑀓𑀫𑁆𑀫𑀯𑀸𑀘𑀸𑀬 𑀘 𑀯𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦 𑀢𑀸’’𑀢𑀺𑀆𑀤𑀺. 𑀢𑀸 𑀏𑀢𑀸 𑀉𑀪𑁄𑀧𑀺 𑀫𑀳𑀸𑀲𑀺𑀓𑁆𑀔𑀫𑀸𑀦𑀸 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺 𑀯𑀸 𑀢𑀣𑀸 ‘‘𑀕𑀺𑀳𑀺𑀕𑀢𑀸’’𑀢𑀺 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀦 𑀯𑀢𑁆𑀢𑀩𑁆𑀩𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀏𑀯𑀁 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸 𑀢𑀣𑀸 𑀘𑁂 𑀓𑀫𑁆𑀫𑀯𑀸𑀘𑀸 𑀯𑀼𑀘𑁆𑀘𑁂𑀬𑁆𑀬, 𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀥 𑀧𑀦-𑀲𑀤𑁆𑀤𑁄 𑀬𑀲𑁆𑀫𑀸-𑀧𑀤𑀢𑁆𑀣𑁄𑀢𑀺 𑀢𑀤𑀢𑁆𑀣𑀯𑀲𑁂𑀦 𑀬𑁄𑀚𑀦𑀸 𑀤𑀲𑁆𑀲𑀺𑀢𑀸.

𑁨𑁩𑁮𑁦. 𑀲𑀫𑁆𑀫𑀼𑀢𑀺𑀦𑁆𑀢𑀺 ¶ 𑀲𑀺𑀓𑁆𑀔𑀫𑀸𑀦𑀲𑀫𑁆𑀫𑀼𑀢𑀺𑀁. 𑀤𑀲𑀯𑀲𑁆𑀲𑀸𑀬𑀸𑀢𑀺 𑀏𑀢𑁆𑀣 ‘‘𑀕𑀺𑀳𑀺𑀕𑀢𑀸𑀬𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀕𑀺𑀳𑀺𑀕𑀢𑀸𑀬 𑀤𑀲𑀯𑀲𑁆𑀲𑀓𑀸𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁧𑁯). 𑀲𑁂𑀲𑀸𑀲𑀼𑀧𑀻𑀢𑀺 𑀏𑀓𑀸𑀤𑀲𑀯𑀲𑁆𑀲𑀓𑀸𑀮𑁂 𑀤𑀢𑁆𑀯𑀸 𑀢𑁂𑀭𑀲𑀯𑀲𑁆𑀲𑀓𑀸𑀮𑁂 𑀓𑀸𑀢𑀩𑁆𑀩𑀸, 𑀤𑁆𑀯𑀸𑀤𑀲, 𑀢𑁂𑀭𑀲, 𑀘𑀼𑀤𑁆𑀤𑀲, 𑀧𑀦𑁆𑀦𑀭𑀲, 𑀲𑁄𑀴𑀲, 𑀲𑀢𑁆𑀢𑀭𑀲, 𑀅𑀝𑁆𑀞𑀸𑀭𑀲𑀯𑀲𑁆𑀲𑀓𑀸𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀓𑀸𑀢𑀩𑁆𑀩𑀸𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲𑀯𑀲𑁆𑀲𑀧𑀭𑀺𑀬𑀦𑁆𑀢𑀸𑀲𑀼 𑀲𑁂𑀲𑀸𑀲𑀼𑀧𑀺 𑀲𑀺𑀓𑁆𑀔𑀫𑀸𑀦𑀸𑀲𑀼. 𑀅𑀬𑀁 𑀦𑀬𑁄𑀢𑀺 ‘‘𑀲𑀫𑁆𑀫𑀼𑀢𑀺𑀬𑀸 𑀤𑀺𑀦𑁆𑀦𑀲𑀁𑀯𑀘𑁆𑀙𑀭𑀢𑁄 𑀆𑀕𑀸𑀫𑀺𑀦𑀺 𑀤𑀼𑀢𑀺𑀬𑁂 𑀲𑀁𑀯𑀘𑁆𑀙𑀭𑁂 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 𑀅𑀬𑀁 𑀦𑀬𑁄. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀏𑀓𑀸𑀤𑀲𑀯𑀲𑁆𑀲𑀓𑀸𑀮𑁂 𑀤𑀢𑁆𑀯𑀸 𑀢𑁂𑀭𑀲𑀯𑀲𑁆𑀲𑀓𑀸𑀮𑁂 𑀓𑀸𑀢𑀩𑁆𑀩𑀸’’𑀢𑀺𑀆𑀤𑀺.

𑁨𑁩𑁮𑁧. ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺𑀧𑀺 ‘‘𑀕𑀺𑀳𑀺𑀕𑀢𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁨𑁩𑁮𑁨. 𑀬𑀸 𑀧𑀦 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀲𑀸𑀫𑀡𑁂𑀭𑀻 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀸, 𑀲𑀸 𑀓𑀫𑁆𑀫𑀯𑀸𑀘𑀸𑀬 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸, 𑀅𑀜𑁆𑀜𑀣𑀸 𑀧𑀦 𑀦 𑀯𑀢𑁆𑀢𑀩𑁆𑀩𑀸 ‘‘𑀕𑀺𑀳𑀺𑀕𑀢𑀸’’𑀢𑀺 𑀯𑀸 ‘‘𑀧𑀼𑀭𑀺𑀲𑀦𑁆𑀢𑀭𑀕𑀢𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀓𑀼𑀫𑀸𑀭𑀺𑀪𑀽𑀢𑀸 𑀧𑀦 ‘𑀕𑀺𑀳𑀺𑀕𑀢𑀸’𑀢𑀺 𑀦 𑀯𑀢𑁆𑀢𑀩𑁆𑀩𑀸, ‘𑀓𑀼𑀫𑀸𑀭𑀺𑀪𑀽𑀢𑀸’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸’’𑀢𑀺.

𑁨𑁩𑁮𑁩. 𑀏𑀢𑀸 𑀢𑀼 𑀧𑀦 𑀢𑀺𑀲𑁆𑀲𑁄𑀧𑀻𑀢𑀺 𑀫𑀳𑀸𑀲𑀺𑀓𑁆𑀔𑀫𑀸𑀦𑀸 𑀕𑀺𑀳𑀺𑀕𑀢𑀸, 𑀓𑀼𑀫𑀸𑀭𑀺𑀪𑀽𑀢𑀸𑀢𑀺 𑀯𑀼𑀢𑁆𑀢𑀸 𑀧𑀦 ¶ 𑀏𑀢𑀸 𑀢𑀺𑀲𑁆𑀲𑁄𑀧𑀺. 𑀅𑀧𑀺-𑀲𑀤𑁆𑀤𑁂𑀦 𑀕𑀺𑀳𑀺𑀕𑀢𑀸 𑀓𑀼𑀫𑀸𑀭𑀺𑀪𑀽𑀢𑀸 𑀤𑁆𑀯𑁂 𑀲𑀓𑀲𑀓𑀦𑀸𑀫𑁂𑀦𑀸𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀓𑀼𑀫𑀸𑀭𑀺𑀪𑀽𑀢𑀲𑀺𑀓𑁆𑀔𑀫𑀸𑀦𑀸𑀬𑀸’’𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀦 𑀯𑀝𑁆𑀝𑀢𑀻𑀢𑀺 𑀓𑁄𑀘𑀺 𑀫𑀜𑁆𑀜𑁂𑀬𑁆𑀬𑀸𑀢𑀺 ¶ 𑀆𑀳 ‘‘𑀦 𑀲𑀁𑀲𑀬𑁄’’𑀢𑀺. 𑀢𑀣𑀸 𑀯𑀢𑁆𑀢𑀩𑁆𑀩𑀢𑀸𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀤𑀸𑀦𑀢𑁄’’𑀢𑀺.

𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀺.

𑁨𑁩𑁮𑁪-𑁫. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀯 𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀏𑀯 𑀲𑀬𑀁 𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸 𑀧𑀭𑀁 𑀲𑀺𑀓𑁆𑀔𑀫𑀸𑀦𑀁 𑀲𑀘𑁂 𑀯𑀼𑀝𑁆𑀞𑀸𑀧𑁂𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀡𑀧𑀭𑀺𑀬𑁂𑀲𑀦𑀸𑀤𑀺𑀤𑀼𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀧𑀭𑀺𑀬𑁄𑀲𑀸𑀦𑁂𑀲𑀼 𑀆𑀧𑀦𑁆𑀦𑀸𑀦𑀁 𑀤𑀼𑀓𑁆𑀓𑀝𑀸𑀦𑀁 𑀅𑀦𑀦𑁆𑀢𑀭𑀁 𑀓𑀫𑁆𑀫𑀯𑀸𑀘𑀸𑀦𑀁 𑀑𑀲𑀸𑀦𑁂 𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸𑀬 𑀬𑁆𑀬𑀢𑀸𑀭𑀧𑁆𑀧𑀢𑁆𑀢𑀸𑀬 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺 𑀧𑀭𑀺𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸.

𑀘𑀢𑀼𑀢𑁆𑀣𑀁.

𑁨𑁩𑁮𑁬. 𑀧𑀜𑁆𑀘𑀫𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁪𑁨) 𑀲𑀺𑀓𑁆𑀔𑀸𑀧𑀤𑁂. 𑀓𑀸𑀬𑀘𑀺𑀢𑁆𑀢𑀯𑀸𑀘𑀸𑀘𑀺𑀢𑁆𑀢𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀯𑀲𑁂𑀦 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀓𑁆𑀭𑀺𑀬𑀸𑀓𑁆𑀭𑀺𑀬𑀦𑁆𑀢𑀺 𑀯𑀼𑀝𑁆𑀞𑀸𑀧𑀦𑀁 𑀓𑀺𑀭𑀺𑀬𑀁, 𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀅𑀕𑁆𑀕𑀳𑀡𑀁 𑀅𑀓𑀺𑀭𑀺𑀬𑀁.

𑀧𑀜𑁆𑀘𑀫𑀁.

𑁨𑁩𑁮𑁭. 𑀲𑀗𑁆𑀖𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦. 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀢𑀺 𑀅𑀮𑀚𑁆𑀚𑀺𑀪𑀸𑀯𑀸𑀤𑀺𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀅𑀮𑀁 𑀢𑀸𑀯𑀸𑀢𑀺 𑀏𑀢𑁆𑀣 ‘‘𑀢𑁂 𑀅𑀬𑁆𑀬𑁂’’𑀢𑀺 𑀲𑁂𑀲𑁄. 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 ‘‘𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸’’𑀢𑀺 𑀲𑁂𑀲𑁄. ‘‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀉𑀧𑀲𑀫𑁆𑀧𑀸𑀤𑀺𑀢𑁂𑀦𑀸’’𑀢𑀺 𑀯𑀸𑀭𑀺𑀢𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀯𑀸𑀭𑀡𑁂 𑀧𑀘𑁆𑀙𑀸 𑀔𑀻𑀬𑀢𑀺 ‘‘𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸, 𑀅𑀳𑀫𑁂𑀯 𑀦𑀽𑀦 𑀅𑀮𑀚𑁆𑀚𑀺𑀦𑀻’’𑀢𑀺𑀆𑀤𑀺𑀦𑀸 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑀺, 𑀤𑁄𑀲𑀢𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁮𑁮. 𑀙𑀦𑁆𑀤𑀤𑁄𑀲𑀸𑀤𑀻𑀳𑀺 ¶ 𑀓𑀭𑁄𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀧𑀓𑀢𑀺𑀬𑀸’’𑀢𑀺 𑀲𑁂𑀲𑁄. 𑀧𑀓𑀢𑀺𑀬𑀸 𑀙𑀦𑁆𑀤𑀤𑁄𑀲𑀸𑀤𑀻𑀳𑀺 𑀅𑀕𑀢𑀺𑀕𑀫𑀦𑁂𑀳𑀺 𑀦𑀺𑀯𑀸𑀭𑀡𑀁 𑀓𑀭𑁄𑀦𑁆𑀢𑀺𑀬𑀸 𑀲𑀘𑁂 𑀉𑀚𑁆𑀛𑀸𑀬𑀢𑀺, 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑀙𑀝𑁆𑀞𑀁.

𑁨𑁩𑁮𑁯-𑁯𑁦. 𑀮𑀤𑁆𑀥𑁂 ¶ 𑀘𑀻𑀯𑀭𑁂𑀢𑀺 𑀲𑀺𑀓𑁆𑀔𑀸𑀫𑀸𑀦𑀸𑀬 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀸𑀘𑀺𑀢𑁂 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀮𑀤𑁆𑀥𑁂. 𑀧𑀘𑁆𑀙𑀸𑀢𑀺 𑀘𑀻𑀯𑀭𑀮𑀸𑀪𑀢𑁄 𑀧𑀘𑁆𑀙𑀸. 𑀅𑀲𑀦𑁆𑀢𑁂 𑀅𑀦𑁆𑀢𑀭𑀸𑀬𑀺𑀓𑁂𑀢𑀺 𑀤𑀲𑀦𑁆𑀦𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂 𑀅𑀯𑀺𑀚𑁆𑀚𑀫𑀸𑀦𑁂. 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀺𑀦𑀸𑀳𑀦𑁆𑀢𑀺 𑀅𑀳𑀁 𑀢𑀁 𑀦 𑀲𑀫𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀦𑁂 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁩𑁯𑁧. 𑀇𑀤𑀦𑁆𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁. 𑀅𑀯𑀼𑀝𑁆𑀞𑀸𑀧𑀦𑁂𑀦 𑀅𑀓𑁆𑀭𑀺𑀬𑀁.

𑀲𑀢𑁆𑀢𑀫𑀁.

𑁨𑁩𑁯𑁨. 𑀅𑀝𑁆𑀞𑀫𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 ‘𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺 (𑀧𑀸𑀘𑀺. 𑁧𑁧𑁫𑁫) 𑀲𑀺𑀓𑁆𑀔𑀸𑀧𑀤𑀁. 𑀦𑀯𑀫𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁫𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂. ‘‘𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀇𑀤𑀁 𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀫𑀦𑁆𑀢𑀭𑁂𑀦 𑀯𑀺𑀦𑀺𑀘𑁆𑀙𑀬𑀲𑁆𑀲 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀉𑀢𑁆𑀢𑀸𑀦𑀫𑁂𑀯𑀺𑀤’’𑀦𑁆𑀢𑀺.

𑀲𑀤𑁆𑀤𑀢𑁆𑀣𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀭𑀺𑀲𑀲𑀁𑀲𑀝𑁆𑀞𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁂𑀦 𑀧𑀼𑀭𑀺𑀲𑁂𑀦 𑀅𑀦𑀦𑀼𑀮𑁄𑀫𑀺𑀓𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑁂𑀦 𑀲𑀁𑀲𑀝𑁆𑀞𑀁. 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀦𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑁂𑀦 𑀓𑀼𑀫𑀸𑀭𑁂𑀦 𑀢𑀣𑁂𑀯 𑀲𑀁𑀲𑀝𑁆𑀞𑀁. 𑀘𑀡𑁆𑀟𑀺𑀦𑁆𑀢𑀺 𑀓𑁄𑀥𑀦𑀁. 𑀲𑁄𑀓𑀸𑀯𑀸𑀲𑀦𑁆𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 ¶ 𑀆𑀕𑀘𑁆𑀙𑀫𑀸𑀦𑀸 𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑁄 𑀲𑁄𑀓𑀁 𑀧𑀯𑁂𑀲𑁂𑀢𑀻𑀢𑀺 𑀲𑁄𑀓𑀸𑀯𑀸𑀲𑀸, 𑀢𑀁 𑀲𑁄𑀓𑀸𑀯𑀸𑀲𑀁. 𑀅𑀣 𑀯𑀸 𑀖𑀭𑀁 𑀯𑀺𑀬 𑀖𑀭𑀲𑀸𑀫𑀺𑀓𑀸, 𑀅𑀬𑀫𑁆𑀧𑀺 𑀧𑀼𑀭𑀺𑀲𑀲𑀫𑀸𑀕𑀫𑀁 𑀅𑀮𑀪𑀫𑀸𑀦𑀸 𑀲𑁄𑀓𑀁 𑀆𑀯𑀺𑀲𑀢𑀺, 𑀇𑀢𑀺 𑀬𑀁 𑀆𑀯𑀺𑀲𑀢𑀺, 𑀲𑁆𑀯𑀸𑀲𑁆𑀲𑀸 𑀆𑀯𑀸𑀲𑁄 𑀳𑁄𑀢𑀻𑀢𑀺 𑀲𑁄𑀓𑀸𑀯𑀸𑀲𑀸. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀲𑁄𑀓𑀸𑀯𑀸𑀲𑀸 𑀦𑀸𑀫 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄𑀓𑀁 𑀆𑀯𑀺𑀲𑀢𑀻’’𑀢𑀺 (𑀧𑀸𑀘𑀺. 𑁧𑁧𑁬𑁦) 𑀤𑁆𑀯𑁂𑀥𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀭𑀽𑀧𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.

𑁨𑁩𑁯𑁩. ‘‘𑀦𑀢𑁆𑀣𑀺 𑀅𑀚𑀸𑀦𑀦𑁆𑀢𑀺𑀬𑀸’’𑀢𑀺 𑀧𑀘𑁆𑀙𑁂𑀤𑁄, 𑀲𑀺𑀓𑁆𑀔𑀫𑀸𑀦𑀸𑀬 𑀧𑀼𑀭𑀺𑀲𑀲𑀁𑀲𑀝𑁆𑀞𑀸𑀤𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀫𑀦𑀯𑀫𑀸𑀦𑀺.

𑁨𑁩𑁯𑁪. 𑀯𑀺𑀚𑀸𑀢𑀫𑀸𑀢𑀭𑀸 ¶ 𑀯𑀸 𑀚𑀦𑀓𑀧𑀺𑀢𑀭𑀸 𑀯𑀸 𑀲𑀸𑀫𑀺𑀦𑀸 𑀧𑀭𑀺𑀕𑁆𑀕𑀸𑀳𑀓𑀲𑀸𑀫𑀺𑀦𑀸 𑀯𑀸 𑀦𑀸𑀦𑀼𑀜𑁆𑀜𑀸𑀢𑀁 𑀉𑀧𑀲𑀫𑁆𑀧𑀤𑀢𑁆𑀣𑀸𑀬 𑀅𑀦𑀦𑀼𑀜𑁆𑀜𑀸𑀢𑀁 𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁩𑁯𑁫. 𑀦 𑀪𑀺𑀓𑁆𑀔𑀼𑀦𑀸𑀢𑀺 𑀪𑀺𑀓𑁆𑀔𑀼𑀦𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀲𑀓𑀺𑀫𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀪𑀺𑀓𑁆𑀔𑀼𑀦𑀻𑀳𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀩𑁆𑀩𑀚𑁆𑀚𑀸𑀓𑀸𑀮𑁂 𑀘 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀘, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀓𑀺𑀁 𑀆𑀧𑀼𑀘𑁆𑀙𑀺𑀢𑁂𑀧𑀺 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬𑁨).

𑁨𑁩𑁯𑁬-𑁭. 𑀅𑀢𑁆𑀣𑀺𑀢𑀦𑁆𑀢𑀺 𑀅𑀢𑁆𑀣𑀺𑀪𑀸𑀯𑀁. 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀯𑀸𑀘𑀢𑁄…𑀧𑁂… 𑀓𑀸𑀬𑀯𑀸𑀘𑀸𑀤𑀺𑀢𑁄𑀧𑀺 𑀘𑀸’’𑀢𑀺. 𑀓𑀣𑀁 𑀯𑀸𑀘𑀸𑀤𑀻𑀳𑀺 𑀘𑀢𑀽𑀳𑀺 𑀲𑀫𑀼𑀝𑁆𑀞𑀸𑀢𑀺? 𑀅𑀩𑁆𑀪𑀸𑀦𑀓𑀫𑁆𑀫𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀔𑀡𑁆𑀟𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑀸 ¶ ‘‘𑀧𑀓𑁆𑀓𑁄𑀲𑀣 𑀲𑀺𑀓𑁆𑀔𑀫𑀸𑀦𑀁, 𑀇𑀥𑁂𑀯 𑀦𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. ‘‘𑀉𑀧𑀲𑁆𑀲𑀬𑀢𑁄 𑀧𑀝𑁆𑀞𑀸𑀬 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀉𑀧𑀲𑀫𑁆𑀧𑀸𑀤𑀦𑀁 𑀓𑁆𑀭𑀺𑀬𑀁, 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑁆𑀭𑀺𑀬𑀁.

𑀤𑀲𑀫𑀁.

𑁨𑁩𑁯𑁮. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀸 𑀪𑀺𑀓𑁆𑀔𑀼𑀦𑀻 𑀧𑀸𑀭𑀺𑀯𑀸𑀲𑀺𑀓𑁂𑀦 𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀲𑀘𑁂 𑀯𑀼𑀝𑁆𑀞𑀸𑀧𑁂𑀢𑀺, 𑀢𑀲𑁆𑀲𑀸 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀸𑀭𑀺𑀯𑀸𑀲𑀺𑀓𑁂𑀦 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀧𑀸𑀭𑀺𑀯𑀸𑀲𑀺𑀬𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀁, 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺.

𑀢𑀢𑁆𑀣 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫 𑀪𑀺𑀓𑁆𑀔𑀽 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀅𑀣 𑀫𑁂𑀖𑁄 𑀯𑀸 𑀉𑀝𑁆𑀞𑀳𑀢𑀺, 𑀉𑀲𑁆𑀲𑀸𑀭𑀡𑀸 𑀯𑀸 𑀓𑀭𑀻𑀬𑀢𑀺, 𑀫𑀦𑀼𑀲𑁆𑀲𑀸 𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 ‘‘𑀅𑀦𑁄𑀓𑀸𑀲𑁄 𑀅𑀬𑀁, 𑀅𑀜𑁆𑀜𑀢𑁆𑀭 𑀕𑀘𑁆𑀙𑀸𑀫𑀸’’𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀦 ¶ 𑀪𑀺𑀓𑁆𑀔𑀽 ‘‘𑀉𑀧𑁄𑀲𑀣𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀬𑀸𑀯 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀅𑀚𑁆𑀛𑁂𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀲𑀘𑁂 ‘‘𑀘𑀸𑀢𑀼𑀤𑁆𑀤𑀲𑀺𑀓𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸, ‘‘𑀧𑀦𑁆𑀦𑀭𑀲𑁄’’𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁆𑀦𑀭𑀲𑀺𑀓𑀁 𑀓𑀸𑀢𑀼𑀁 ¶ 𑀦𑀺𑀲𑀺𑀦𑁆𑀦𑀸, 𑀧𑀸𑀝𑀺𑀧𑀤𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀁 𑀧𑀦 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀧𑀦 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫.

𑀧𑀼𑀦 𑀪𑀺𑀓𑁆𑀔𑀽 ‘‘𑀓𑀺𑀜𑁆𑀘𑀺𑀤𑁂𑀯 𑀅𑀩𑁆𑀪𑀸𑀦𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀭𑁂𑀓𑁄 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑀢𑀺 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀤𑀸𑀭𑀼𑀡𑀁, 𑀫𑀸 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺, 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑁋

‘‘𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀘𑁆𑀘𑀕𑀸’’𑀢𑀺. (𑀚𑀸. 𑁧.𑁧.𑁪𑁯) 𑁋

𑀯𑀢𑁆𑀯𑀸 ‘‘𑀓𑀺𑀁 𑀦𑀓𑁆𑀔𑀢𑁆𑀢𑁂𑀦, 𑀓𑀭𑁄𑀣𑀸’’𑀢𑀺 𑀯𑀤𑀢𑀺. 𑀇𑀤𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀜𑁆𑀘𑁂𑀯 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀜𑁆𑀘. 𑀏𑀢𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀦𑀸𑀳𑀭𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀸𑀭𑀺𑀯𑀸𑀲𑀺𑀓𑁂𑀦 𑀙𑀦𑁆𑀤𑀤𑀸𑀦𑁂𑀦𑀸’’𑀢𑀺.

𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀏𑀯𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁨𑁩𑁯𑁯. 𑀙𑀦𑁆𑀤𑀁 𑀅𑀯𑀺𑀳𑀸𑀬 𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀢𑀼 𑀬𑀣𑀸𑀦𑀺𑀲𑀺𑀦𑁆𑀦𑀸𑀬 𑀧𑀭𑀺𑀲𑀸𑀬 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀯𑀸-𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑁄.

𑀏𑀓𑀸𑀤𑀲𑀫𑀁.

𑁨𑁪𑁦𑁦. 𑀤𑁆𑀯𑀸𑀤𑀲𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁭𑁧) 𑀲𑀺𑀓𑁆𑀔𑀸𑀧𑀤𑁂. 𑀢𑁂𑀭𑀲𑁂𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁭𑁫) 𑀲𑀺𑀓𑁆𑀔𑀸𑀧𑀤𑁂.

𑀤𑁆𑀯𑀸𑀤𑀲𑀫𑀢𑁂𑀭𑀲𑀫𑀸𑀦𑀺.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁨𑁪𑁦𑁧. 𑀅𑀕𑀺𑀮𑀸𑀦𑀸𑀢𑀺 ¶ ¶ 𑀙𑀢𑁆𑀢𑀼𑀧𑀸𑀳𑀦𑁂𑀦 𑀯𑀽𑀧𑀲𑀫𑁂𑀢𑀩𑁆𑀩𑀭𑁄𑀕𑀭𑀳𑀺𑀢𑀸. 𑀬𑀣𑀸𑀳 ‘‘𑀅𑀕𑀺𑀮𑀸𑀦𑀸 𑀦𑀸𑀫 𑀬𑀲𑁆𑀲𑀸 𑀯𑀺𑀦𑀸 𑀙𑀢𑁆𑀢𑀼𑀧𑀸𑀳𑀦𑀸 𑀨𑀸𑀲𑀼 𑀳𑁄𑀢𑀻’’𑀢𑀺. 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀸 𑀘 𑀙𑀢𑁆𑀢𑀼𑀧𑀸𑀳𑀦𑀁. 𑀢𑀢𑁆𑀣 𑀙𑀢𑁆𑀢𑀁 𑀯𑀼𑀢𑁆𑀢𑀮𑀓𑁆𑀔𑀡𑀁, 𑀉𑀧𑀸𑀳𑀦𑀸 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑀸. 𑀥𑀸𑀭𑁂𑀬𑁆𑀬𑀸𑀢𑀺 𑀉𑀪𑀬𑀁 𑀏𑀓𑀢𑁄 𑀥𑀸𑀭𑁂𑀬𑁆𑀬. 𑀯𑀺𑀲𑀼𑀁 𑀥𑀸𑀭𑁂𑀦𑁆𑀢𑀺𑀬𑀸 𑀳𑀺 𑀤𑀼𑀓𑁆𑀓𑀝𑀁 𑀯𑀓𑁆𑀔𑀢𑀺.

𑁨𑁪𑁦𑁨. 𑀤𑀺𑀯𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀲𑀘𑁂 𑀥𑀸𑀭𑁂𑀢𑀻𑀢𑀺 𑀬𑁄𑀚𑀦𑀸.

𑁨𑁪𑁦𑁩. 𑀓𑀤𑁆𑀤𑀫𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀯𑀸𑀮𑀼𑀓𑀸𑀤𑀻𑀦𑀁 𑀕𑀳𑀡𑀁.

𑁨𑁪𑁦𑁪. 𑀲𑀘𑁂 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀺𑀲𑁆𑀯𑀸 𑀕𑀘𑁆𑀙𑀸𑀤𑀺𑀓𑀦𑁆𑀢𑀺 𑀙𑀢𑁆𑀢𑁂 𑀮𑀕𑁆𑀕𑀦𑀬𑁄𑀕𑁆𑀕𑀁 𑀦𑀻𑀘𑀢𑀭𑀁 𑀕𑀘𑁆𑀙𑀸𑀤𑀺𑀓𑀁 𑀤𑀺𑀲𑁆𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀕𑀼𑀫𑁆𑀩𑀸𑀤𑀻𑀦𑀁 𑀕𑀳𑀡𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀉𑀧𑀸𑀳𑀦𑀫𑀢𑁆𑀢𑀲𑁆𑀲𑁂𑀯 𑀥𑀸𑀭𑀡𑁂 𑀤𑀼𑀓𑁆𑀓𑀝𑀁.

𑁨𑁪𑁦𑁫. 𑀅𑀧𑀦𑀸𑀫𑁂𑀢𑁆𑀯𑀸𑀢𑀺 𑀲𑀻𑀲𑀢𑁄 𑀅𑀧𑀦𑀸𑀫𑁂𑀢𑁆𑀯𑀸. 𑀑𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀧𑀸𑀤𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸. 𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀧𑀼𑀦 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺.

𑁨𑁪𑁦𑁬. 𑀧𑀬𑁄𑀕𑀕𑀡𑀦𑀸𑀬𑁂𑀯𑀸𑀢𑀺 𑀙𑀢𑁆𑀢𑀼𑀧𑀸𑀳𑀦𑀲𑁆𑀲 𑀅𑀧𑀦𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀏𑀓𑀢𑁄 𑀥𑀸𑀭𑀡𑀧𑀬𑁄𑀕𑀕𑀡𑀦𑀸𑀬. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀕𑀺𑀮𑀸𑀦𑀸 𑀅𑀕𑀺𑀮𑀸𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀕𑀺𑀮𑀸𑀦𑀲𑀜𑁆𑀜𑀸 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁧𑁮𑁧) 𑀏𑀯𑀁 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. ‘‘𑀕𑀺𑀮𑀸𑀦𑀸 𑀅𑀕𑀺𑀮𑀸𑀦𑀲𑀜𑁆𑀜𑀸, 𑀕𑀺𑀮𑀸𑀦𑀸 𑀯𑁂𑀫𑀢𑀺𑀓𑀸, 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁧𑁮𑁨) 𑀏𑀯𑀁 𑀤𑁆𑀯𑀺𑀓𑀤𑀼𑀓𑁆𑀓𑀝𑀁 𑀢𑀣𑁂𑀯 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪𑁦𑁭. 𑀬𑀢𑁆𑀣 ¶ 𑀪𑀺𑀓𑁆𑀔𑀽 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀸 𑀦𑀺𑀯𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀆𑀭𑀸𑀫𑁂 𑀯𑀸 𑀉𑀧𑀘𑀸𑀭𑁂 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀸𑀫𑀲𑁆𑀲 𑀉𑀧𑀘𑀸𑀭𑁂 𑀯𑀸. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑀪𑁂𑀤𑀸𑀤𑀺𑀆𑀧𑀤𑀸𑀲𑀼.

𑀧𑀞𑀫𑀁.

𑁨𑁪𑁦𑁮. 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀏𑀢𑁆𑀣 ‘‘𑀅𑀕𑀺𑀮𑀸𑀦𑀸𑀬𑀸’’𑀢𑀺 𑀲𑁂𑀲𑁄, 𑀧𑀸𑀤𑁂𑀦 𑀕𑀦𑁆𑀢𑀼𑀁 𑀲𑀫𑀢𑁆𑀣𑀸𑀬 𑀅𑀕𑀺𑀮𑀸𑀦𑀸𑀬 ¶ 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀅𑀕𑀺𑀮𑀸𑀦𑀸 𑀦𑀸𑀫 𑀲𑀓𑁆𑀓𑁄𑀢𑀺 𑀧𑀤𑀲𑀸 𑀕𑀦𑁆𑀢𑀼’’𑀦𑁆𑀢𑀺 (𑀧𑀸𑀘𑀺. 𑁧𑁧𑁮𑁭). 𑀬𑀸𑀦𑀁 𑀦𑀸𑀫 𑀭𑀣𑀸𑀤𑀺, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀭𑀽𑀧𑀫𑁂𑀯.

𑁨𑁪𑁦𑁯. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑀪𑁂𑀤𑀸𑀤𑀺𑀆𑀧𑀤𑀸𑀲𑀼. 𑀙𑀢𑁆𑀢𑀼𑀧𑀸𑀳𑀦𑀲𑀺𑀓𑁆𑀔𑀸𑀧𑀤𑁂 𑀆𑀭𑀸𑀫𑁂, 𑀆𑀭𑀸𑀫𑀽𑀧𑀘𑀸𑀭𑁂 𑀘 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀥 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀢𑁆𑀣𑀸𑀧𑀺 𑀆𑀧𑀢𑁆𑀢𑀺𑀬𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀢𑀺𑀬𑀁.

𑁨𑁪𑁧𑁦. ‘‘𑀬𑀁 𑀓𑀺𑀜𑁆𑀘𑀺𑀧𑀺 𑀓𑀝𑀽𑀧𑀺𑀬’’𑀦𑁆𑀢𑀺 𑀇𑀤𑀁 ‘‘𑀲𑀗𑁆𑀖𑀸𑀡𑀺’’𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁. 𑀬𑀣𑀸𑀳 𑁋 ‘‘𑀲𑀗𑁆𑀖𑀸𑀡𑀺 𑀦𑀸𑀫 𑀬𑀸 𑀓𑀸𑀘𑀺 𑀓𑀝𑀽𑀧𑀕𑀸’’𑀢𑀺. 𑀲𑀗𑁆𑀖𑀸𑀡𑀺 𑀦𑀸𑀫 𑀫𑁂𑀔𑀮𑀸𑀤𑀺𑀓𑀝𑀺𑀧𑀺𑀴𑀦𑁆𑀥𑀦𑀁. 𑀓𑀝𑀽𑀧𑀺𑀬𑀦𑁆𑀢𑀺 𑀓𑀝𑀺𑀧𑁆𑀧𑀤𑁂𑀲𑁄𑀧𑀕𑀁.

𑁨𑁪𑁧𑁨. 𑀓𑀝𑀺𑀲𑀼𑀢𑁆𑀢𑀁 𑀦𑀸𑀫 𑀓𑀝𑀺𑀬𑀁 𑀧𑀺𑀴𑀦𑁆𑀥𑀦𑀭𑀚𑁆𑀚𑀼𑀲𑀼𑀢𑁆𑀢𑀓𑀁.

𑁨𑁪𑁧𑁩. 𑀇𑀥 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀁, 𑀇𑀤𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀮𑁄𑀓𑀯𑀚𑁆𑀚𑀁, 𑀇𑀢𑀺 𑀇𑀤𑀁 𑀉𑀪𑀬𑀫𑁂𑀯 𑀯𑀺𑀲𑁂𑀲𑀢𑀸 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀢𑁄 𑀇𑀫𑀲𑁆𑀲 𑀦𑀸𑀦𑀸𑀓𑀭𑀡𑀁.

𑀢𑀢𑀺𑀬𑀁.

𑁨𑁪𑁧𑁪. 𑀲𑀻𑀲𑀽𑀧𑀕𑀸𑀤𑀺𑀲𑀼 ¶ 𑀬𑀁 𑀓𑀺𑀜𑁆𑀘𑀺 𑀲𑀘𑁂 𑀬𑀸 𑀥𑀸𑀭𑁂𑀢𑀺, 𑀢𑀲𑁆𑀲𑀸 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀻𑀲𑀁 𑀉𑀧𑀕𑀘𑁆𑀙𑀢𑀻𑀢𑀺 𑀲𑀻𑀲𑀽𑀧𑀕𑀁, 𑀲𑀻𑀲𑁂 𑀧𑀺𑀴𑀦𑁆𑀥𑀦𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀕𑀻𑀯𑀽𑀧𑀕𑀸𑀤𑀻𑀦𑀁 𑀕𑀳𑀡𑀁. 𑀬𑀣𑀸𑀳 𑁋 ‘‘𑀇𑀢𑁆𑀣𑀸𑀮𑀗𑁆𑀓𑀸𑀭𑁄 𑀦𑀸𑀫 𑀲𑀻𑀲𑀽𑀧𑀕𑁄 𑀕𑀻𑀯𑀽𑀧𑀕𑁄 𑀳𑀢𑁆𑀣𑀽𑀧𑀕𑁄 𑀧𑀸𑀤𑀽𑀧𑀕𑁄 𑀓𑀝𑀽𑀧𑀕𑁄’’𑀢𑀺.

𑁨𑁪𑁧𑁫. 𑀦 𑀘 𑀤𑁄𑀲𑁄𑀢𑀺 𑀬𑁄𑀚𑀦𑀸. ‘‘𑀲𑀤𑀺𑀲𑀦𑁆𑀢𑀺 𑀧𑀭𑀺𑀤𑀻𑀧𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄.

𑀘𑀢𑀼𑀢𑁆𑀣𑀁.

𑁨𑁪𑁧𑁬. 𑀬𑁂𑀦 ¶ 𑀓𑁂𑀦𑀘𑀺 𑀕𑀦𑁆𑀥𑁂𑀦𑀸𑀢𑀺 𑀘𑀦𑁆𑀤𑀦𑀢𑀕𑀭𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀕𑀦𑁆𑀥𑀓𑀓𑁆𑀓𑁂𑀦. 𑀲𑀯𑀡𑁆𑀡𑀸𑀯𑀡𑁆𑀡𑀓𑁂𑀦 𑀘𑀸𑀢𑀺 𑀯𑀡𑁆𑀡𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀯𑀡𑁆𑀡𑀓𑀁, 𑀳𑀮𑀺𑀤𑁆𑀤𑀺𑀓𑀓𑁆𑀓𑀸𑀤𑀺, 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀩𑁆𑀩𑀝𑁆𑀝𑀦𑀧𑀘𑁆𑀘𑀬𑀸 𑀤𑀺𑀲𑁆𑀲𑀫𑀸𑀦𑁄 𑀯𑀡𑁆𑀡𑀯𑀺𑀲𑁂𑀲𑁄𑀢𑀺 𑀅𑀯𑀡𑁆𑀡𑀓𑀁, 𑀲𑀸𑀲𑀧𑀓𑀓𑁆𑀓𑀸𑀤𑀺, 𑀲𑀯𑀡𑁆𑀡𑀓𑀜𑁆𑀘 𑀅𑀯𑀡𑁆𑀡𑀓𑀜𑁆𑀘 𑀲𑀯𑀡𑁆𑀡𑀸𑀯𑀡𑁆𑀡𑀓𑀁, 𑀢𑁂𑀦 𑀲𑀯𑀡𑁆𑀡𑀸𑀯𑀡𑁆𑀡𑀓𑁂𑀦 𑀘. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀺𑀬𑀸 𑀦𑁆𑀳𑀸𑀦𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁪𑁧𑁭. 𑀲𑀩𑁆𑀩𑀧𑀬𑁄𑀕𑁂𑀢𑀺 𑀲𑀩𑁆𑀩𑀲𑁆𑀫𑀺𑀁 𑀧𑀼𑀩𑁆𑀩𑀧𑀬𑁄𑀕𑁂. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀤𑀤𑁆𑀤𑀼𑀓𑀼𑀝𑁆𑀞𑀸𑀤𑀺𑀭𑁄𑀕𑀧𑀘𑁆𑀘𑀬𑀸.

𑁨𑁪𑁧𑁮. 𑀙𑀝𑁆𑀞𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀸𑀲𑀺𑀢𑀓𑁂𑀦 𑀧𑀺𑀜𑁆𑀜𑀸𑀓𑁂𑀦 𑀦𑀳𑀸𑀬𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁨𑁦𑁩) 𑀲𑀺𑀓𑁆𑀔𑀸𑀧𑀤𑀁.

𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁨𑁪𑁧𑁯. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀘𑁂 𑀉𑀩𑁆𑀩𑀝𑁆𑀝𑀸𑀧𑁂𑀬𑁆𑀬 𑀯𑀸 𑀲𑀫𑁆𑀩𑀸𑀳𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀢𑀣𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁪𑁨𑁦. 𑀏𑀢𑁆𑀣 ¶ 𑀇𑀫𑀲𑁆𑀫𑀺𑀁 𑀉𑀩𑁆𑀩𑀝𑁆𑀝𑀦𑁂, 𑀲𑀫𑁆𑀩𑀸𑀳𑀦𑁂 𑀘 𑀳𑀢𑁆𑀣𑀁 𑀅𑀫𑁄𑀘𑁂𑀢𑁆𑀯𑀸 𑀉𑀩𑁆𑀩𑀝𑁆𑀝𑀦𑁂 𑀏𑀓𑀸 𑀆𑀧𑀢𑁆𑀢𑀺 𑀲𑀺𑀬𑀸, 𑀳𑀢𑁆𑀣𑀁 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀉𑀩𑁆𑀩𑀝𑁆𑀝𑀦𑁂 𑀧𑀬𑁄𑀕𑀕𑀡𑀦𑀸𑀬 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁪𑁨𑁧. 𑀆𑀧𑀤𑀸𑀲𑀽𑀢𑀺 𑀘𑁄𑀭𑀪𑀬𑀸𑀤𑀻𑀳𑀺 𑀲𑀭𑀻𑀭𑀓𑀫𑁆𑀧𑀦𑀸𑀤𑀻𑀲𑀼. 𑀕𑀺𑀮𑀸𑀦𑀸𑀬𑀸𑀢𑀺 𑀅𑀦𑁆𑀢𑀫𑀲𑁄 𑀫𑀕𑁆𑀕𑀕𑀫𑀦𑀧𑀭𑀺𑀲𑁆𑀲𑀫𑁂𑀦𑀸𑀧𑀺 𑀆𑀩𑀸𑀥𑀺𑀓𑀸𑀬.

𑁨𑁪𑁨𑁨. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 ‘‘𑀲𑀺𑀓𑁆𑀔𑀫𑀸𑀦𑀸𑀬𑀸’’𑀢𑀺 𑀘 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 ‘‘𑀲𑀸𑀫𑀡𑁂𑀭𑀺𑀬𑀸’’𑀢𑀺 𑀘 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 ‘‘𑀕𑀺𑀳𑀺𑀦𑀺𑀬𑀸’’𑀢𑀺 𑀘 𑀯𑀺𑀲𑁂𑀲𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑀲𑀢𑁆𑀢𑀫𑁂𑀦𑁂𑀯 𑀲𑀫𑀸𑀦𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀝𑁆𑀞𑀫𑀸𑀤𑀻𑀦𑀺 𑀢𑀻𑀡𑀺𑀧𑀻’’𑀢𑀺.

𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺.

𑁨𑁪𑁨𑁩. 𑀅𑀦𑁆𑀢𑁄𑀉𑀧𑀘𑀸𑀭𑀲𑁆𑀫𑀺𑀦𑁆𑀢𑀺 ¶ 𑀤𑁆𑀯𑀸𑀤𑀲𑀭𑀢𑀦𑀩𑁆𑀪𑀦𑁆𑀢𑀭𑁂. ‘‘𑀪𑀺𑀓𑁆𑀔𑀼𑀲𑁆𑀲 𑀧𑀼𑀭𑀢𑁄’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀧𑀼𑀭𑀢𑁄 𑀯𑀸 𑀳𑁄𑀢𑀼 𑀧𑀘𑁆𑀙𑀢𑁄 𑀯𑀸 𑀧𑀲𑁆𑀲𑀢𑁄 𑀯𑀸, 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲𑀭𑀢𑀦𑀩𑁆𑀪𑀦𑁆𑀢𑀭𑁂𑀢𑀺 𑀦𑀺𑀤𑀲𑁆𑀲𑀦𑀧𑀤𑀫𑁂𑀢𑀁. 𑀙𑀫𑀸𑀬𑀧𑀻𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸𑀧𑀺. 𑀬𑀸 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀯𑀝𑁆𑀝𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁪𑁨𑁪. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀦𑀸𑀧𑀼𑀘𑁆𑀙𑀺𑀢𑁂 𑀅𑀦𑀸𑀧𑀼𑀘𑁆𑀙𑀺𑀢𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀆𑀧𑀼𑀘𑁆𑀙𑀺𑀢𑀲𑀜𑁆𑀜𑀸𑀢𑀺 𑀢𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀆𑀧𑀼𑀘𑁆𑀙𑀺𑀢𑁂 𑀅𑀦𑀸𑀧𑀼𑀘𑁆𑀙𑀺𑀢𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀧𑀼𑀭𑀢𑁄 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀯𑀺𑀓𑀧𑁆𑀧𑀤𑁆𑀯𑀬𑁂 𑀤𑀼𑀓𑁆𑀓𑀝𑀤𑁆𑀯𑀬𑀁 𑀳𑁄𑀢𑀺. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑀪𑁂𑀤𑀸𑀤𑀺𑀆𑀧𑀤𑀸𑀲𑀼. 𑀆𑀧𑀼𑀘𑁆𑀙𑀺𑀢𑀼𑀜𑁆𑀘 𑀞𑀸𑀢𑀼𑀜𑁆𑀘 𑀅𑀲𑀓𑁆𑀓𑁄𑀦𑁆𑀢𑀺𑀬𑀸 𑀕𑀺𑀮𑀸𑀦𑀸𑀬.

𑁨𑁪𑁨𑁫. 𑀦𑀺𑀧𑀚𑁆𑀚𑀦𑀁 𑀓𑁆𑀭𑀺𑀬𑀁. 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑁆𑀭𑀺𑀬𑀁.

𑀏𑀓𑀸𑀤𑀲𑀫𑀁.

𑁨𑁪𑁨𑁬. 𑀑𑀓𑀸𑀲𑁄 ¶ 𑀓𑀢𑁄 𑀬𑁂𑀦 𑀲𑁄 𑀑𑀓𑀸𑀲𑀓𑀢𑁄, 𑀦 𑀑𑀓𑀸𑀲𑀓𑀢𑁄 𑀅𑀦𑁄𑀓𑀸𑀲𑀓𑀢𑁄, 𑀢𑀁, 𑀅𑀓𑀢𑁄𑀓𑀸𑀲𑀦𑁆𑀢𑀺 𑀅𑀢𑁆𑀣𑁄, ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀧𑀼𑀘𑁆𑀙𑀸𑀫𑀻’’𑀢𑀺 𑀅𑀢𑁆𑀢𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀦𑀬𑀸𑀤𑀻𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑀸𑀧𑀦𑀓𑀸𑀮𑁂 𑀅𑀥𑀺𑀯𑀸𑀲𑀦𑀯𑀲𑁂𑀦 𑀅𑀓𑀢𑁄𑀓𑀸𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁄𑀲𑀢𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺. 𑀏𑀓𑀲𑁆𑀫𑀺𑀁 𑀧𑀺𑀝𑀓𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀧𑀺𑀝𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀺𑀦𑀬𑁂 𑀘𑀸’’𑀢𑀺𑀆𑀤𑀺.

𑀧𑀼𑀘𑁆𑀙𑀦𑁆𑀢𑀺𑀬𑀸𑀧𑀺 𑀘𑀸𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 ‘‘𑀅𑀪𑀺𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑀺𑀬𑀸𑀧𑀻’’𑀢𑀺 𑀇𑀤𑀜𑁆𑀘 𑀅𑀦𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀘-𑀲𑀤𑁆𑀤𑁂𑀦 ‘‘𑀲𑀼𑀢𑁆𑀢𑀦𑁆𑀢𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀦𑀬𑀁 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀼𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀪𑀺𑀥𑀫𑁆𑀫𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀯𑀺𑀦𑀬𑀁 𑀯𑀸 𑀧𑀼𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀇𑀤𑀜𑁆𑀘 𑀲𑀗𑁆𑀕𑀳𑀺𑀢𑀁.

𑁨𑁪𑁨𑁭. 𑀅𑀦𑁄𑀤𑀺𑀲𑁆𑀲𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀧𑀼𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀅𑀦𑀺𑀬𑀫𑁂𑀢𑁆𑀯𑀸 𑀓𑁂𑀯𑀮𑀁 ‘‘𑀧𑀼𑀘𑁆𑀙𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀧𑀼𑀘𑁆𑀙𑀸𑀫𑀺 𑀅𑀬𑁆𑀬𑀸’’𑀢𑀺 𑀏𑀯𑀁 𑀯𑀢𑁆𑀯𑀸.

𑀤𑁆𑀯𑀸𑀤𑀲𑀫𑀁.

𑁨𑁪𑁨𑁮-𑁯. 𑀲𑀁𑀓𑀘𑁆𑀘𑀺𑀓𑀦𑁆𑀢𑀺 ¶ 𑀣𑀦𑀯𑁂𑀞𑀦𑀘𑀻𑀯𑀭𑀁, 𑀢𑀁 𑀧𑀦 𑀧𑀸𑀭𑀼𑀧𑀦𑁆𑀢𑀺𑀬𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀦𑀸𑀪𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺𑀬𑀸 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀢𑁂𑀦𑀸𑀳 𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀁 ‘‘𑀅𑀲𑀁𑀓𑀘𑁆𑀘𑀺𑀓𑀸𑀢𑀺 𑀅𑀥𑀓𑁆𑀔𑀓𑀉𑀩𑁆𑀪𑀦𑀸𑀪𑀺𑀫𑀡𑁆𑀟𑀮𑀲𑀗𑁆𑀔𑀸𑀢𑀲𑁆𑀲 𑀲𑀭𑀻𑀭𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀦𑀼𑀜𑁆𑀜𑀸𑀢𑀲𑀁𑀓𑀘𑁆𑀘𑀺𑀓𑀘𑀻𑀯𑀭𑀭𑀳𑀺𑀢𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀅𑀲𑀁𑀓𑀘𑁆𑀘𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). ‘‘𑀲𑀁𑀓𑀘𑁆𑀘𑀺𑀓𑀸𑀬 𑀧𑀫𑀸𑀡𑀁 𑀢𑀺𑀭𑀺𑀬𑀁 𑀤𑀺𑀬𑀟𑁆𑀠𑀳𑀢𑁆𑀣𑀦𑁆𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁧𑁨𑁨𑁪-𑁧𑁨𑁨𑁬) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. 𑀧𑀭𑀺𑀓𑁆𑀔𑁂𑀧𑁄𑀓𑁆𑀓𑀫𑁂𑀢𑀺 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄𑀧𑀯𑁂𑀲𑀦𑁂. 𑀉𑀧𑀘𑀸𑀭𑁄𑀓𑁆𑀓𑀫𑁂𑀧𑀻𑀢𑀺 ¶ 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀧𑀯𑁂𑀲𑀦𑁂𑀧𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀏𑀲𑁂𑀯 𑀦𑀬𑁄𑀢𑀺 ‘‘𑀧𑀞𑀫𑁂 𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀦𑀬𑁄 𑀫𑀢𑁄 𑀯𑀺𑀜𑁆𑀜𑀸𑀢𑁄𑀢𑀺 𑀅𑀢𑁆𑀣𑁄.

𑁨𑁪𑁩𑁦. 𑀆𑀧𑀤𑀸𑀲𑀼𑀧𑀻𑀢𑀺 𑀫𑀳𑀕𑁆𑀖𑀁 𑀳𑁄𑀢𑀺 𑀲𑀁𑀓𑀘𑁆𑀘𑀺𑀓𑀁, 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀘 𑀉𑀧𑀤𑁆𑀤𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺.

𑁨𑁪𑁩𑁧. 𑀲𑁂𑀲𑀦𑁆𑀢𑀺 𑀇𑀥 𑀲𑀭𑀽𑀧𑀢𑁄 𑀅𑀤𑀲𑁆𑀲𑀺𑀢𑀜𑁆𑀘. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑀸𑀢𑀺𑀓𑀸𑀧𑀤𑀪𑀸𑀚𑀦𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀲𑀼𑀦𑀺𑀧𑀼𑀡𑀲𑁆𑀫𑀺𑀁 𑀥𑀫𑁆𑀫𑀚𑀸𑀢𑀁, 𑀅𑀢𑁆𑀣𑀚𑀸𑀢𑀜𑁆𑀘 𑀯𑀺𑀪𑀸𑀯𑁂𑀢𑀺 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀧𑀓𑀸𑀲𑁂𑀢𑀻𑀢𑀺 𑀯𑀺𑀪𑀸𑀯𑀻, 𑀢𑁂𑀦 𑀯𑀺𑀪𑀸𑀯𑀺𑀦𑀸.

𑀢𑁂𑀭𑀲𑀫𑀁.

𑀙𑀢𑁆𑀢𑀼𑀧𑀸𑀳𑀦𑀯𑀕𑁆𑀕𑁄 𑀦𑀯𑀫𑁄.

𑀏𑀯𑀁 𑀦𑀯𑀳𑀺 𑀯𑀕𑁆𑀕𑁂𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀙𑀦𑁆𑀦𑀯𑀼𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀢𑁄 𑀧𑀭𑁂𑀲𑀼 𑀫𑀼𑀲𑀸𑀯𑀸𑀤𑀯𑀕𑁆𑀕𑀸𑀤𑀻𑀲𑀼 𑀲𑀢𑁆𑀢𑀲𑀼 𑀯𑀕𑁆𑀕𑁂𑀲𑀼 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀢𑀸𑀦𑀺 𑀇𑀥 𑀦 𑀤𑀲𑁆𑀲𑀺𑀢𑀸𑀦𑀺.

𑀲𑀩𑁆𑀩𑀸𑀦𑁂𑀯 𑀪𑀺𑀓𑁆𑀔𑀼𑀦𑀻𑀦𑀁 𑀔𑀼𑀤𑁆𑀤𑀓𑁂𑀲𑀼 𑀙𑀦𑁆𑀦𑀯𑀼𑀢𑀺, 𑀪𑀺𑀓𑁆𑀔𑀽𑀦𑀁 𑀤𑁆𑀯𑁂𑀦𑀯𑀼𑀢𑀻𑀢𑀺 𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀢𑀢𑁄 𑀧𑀭𑀁 𑀲𑀓𑀮𑀁 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑀁, 𑀧𑀭𑀫𑁆𑀧𑀭𑀪𑁄𑀚𑀦𑀁, 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀁, 𑀅𑀦𑀢𑀺𑀭𑀺𑀢𑁆𑀢𑁂𑀦 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑀡𑀁, 𑀧𑀡𑀻𑀢𑀪𑁄𑀚𑀦𑀯𑀺𑀜𑁆𑀜𑀢𑁆𑀢𑀺, 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀁, 𑀤𑀼𑀝𑁆𑀞𑀼𑀮𑁆𑀮𑀧𑀅𑀘𑁆𑀙𑀸𑀤𑀦𑀁, 𑀊𑀦𑀯𑀻𑀲𑀢𑀺𑀯𑀲𑁆𑀲𑀉𑀧𑀲𑀫𑁆𑀧𑀸𑀤𑀦𑀁, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀅𑀤𑁆𑀥𑀸𑀦𑀕𑀫𑀦𑀁, 𑀭𑀸𑀚𑀦𑁆𑀢𑁂𑀧𑀼𑀭𑀧𑁆𑀧𑀯𑁂𑀲𑀦𑀁 ¶ , 𑀲𑀦𑁆𑀢𑀁 ¶ 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁, 𑀦𑀺𑀲𑀻𑀤𑀦𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀦𑁆𑀢𑀺 𑀇𑀫𑀸𑀦𑀺 𑀩𑀸𑀯𑀻𑀲𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀢𑀜𑁆𑀘 𑀙𑀲𑀝𑁆𑀞𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀫𑀕𑁆𑀕𑁂𑀦 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀼𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁄 𑁋 𑀕𑀺𑀭𑀕𑁆𑀕𑀲𑀫𑀚𑁆𑀚𑀸, 𑀘𑀺𑀢𑁆𑀢𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀁, 𑀲𑀗𑁆𑀖𑀸𑀡𑀺, 𑀇𑀢𑁆𑀣𑀸𑀮𑀗𑁆𑀓𑀸𑀭𑁄, 𑀕𑀦𑁆𑀥𑀯𑀡𑁆𑀡𑀓𑁄, 𑀯𑀸𑀲𑀺𑀢𑀓𑀧𑀺𑀜𑁆𑀜𑀸𑀓𑁄, 𑀪𑀺𑀓𑁆𑀔𑀼𑀦𑀺𑀆𑀤𑀻𑀳𑀺 𑀉𑀫𑁆𑀫𑀤𑁆𑀤𑀦𑀧𑀭𑀺𑀫𑀤𑁆𑀤𑀦𑀸𑀦𑀻𑀢𑀺 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀘𑀺𑀢𑁆𑀢𑀓𑀸𑀦𑀺, 𑀮𑁄𑀓𑀯𑀚𑁆𑀚𑀸𑀦𑀺, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀅𑀘𑀺𑀢𑁆𑀢𑀓𑀸𑀦𑀺, 𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀅𑀓𑀼𑀲𑀮𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀮𑁄𑀓𑀯𑀚𑁆𑀚𑀸𑀦𑀺 𑀘𑁂𑀯 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀘. 𑀅𑀯𑀲𑁂𑀲𑀸𑀦𑀺 𑀅𑀘𑀺𑀢𑁆𑀢𑀓𑀸𑀦𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑁂𑀯. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀁, 𑀕𑀸𑀫𑀦𑁆𑀢𑀭𑀁, 𑀆𑀭𑀸𑀫𑀲𑀺𑀓𑁆𑀔𑀸𑀧𑀤𑀁, 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢, 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘, 𑀧𑀼𑀭𑀺𑀲𑀲𑀁𑀲𑀝𑁆𑀞𑀁, 𑀧𑀸𑀭𑀺𑀯𑀸𑀲𑀺𑀬𑀙𑀦𑁆𑀤𑀤𑀸𑀦𑀁, 𑀅𑀦𑀼𑀯𑀲𑁆𑀲𑀯𑀼𑀝𑁆𑀞𑀸𑀧𑀦𑀁, 𑀏𑀓𑀦𑁆𑀢𑀭𑀺𑀓𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑀺. 𑀅𑀯𑀲𑁂𑀲𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑁂𑀯𑀸𑀢𑀺.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀸𑀘𑀺𑀢𑁆𑀢𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸

𑁨𑁪𑁩𑁨. 𑀏𑀯𑀁 𑀧𑀸𑀘𑀺𑀢𑁆𑀢𑀺𑀬𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀕𑀺𑀮𑀸𑀦𑀸’’𑀢𑀺𑀆𑀤𑀺. 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 ¶ 𑀅𑀕𑀺𑀮𑀸𑀦𑀸 𑀲𑀬𑀁 𑀅𑀢𑁆𑀢𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀁 𑀲𑀧𑁆𑀧𑀺𑀁 𑀲𑀘𑁂 ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀕𑀡𑁆𑀳𑀢𑀺, 𑀢𑀲𑁆𑀲𑀸 𑀏𑀯𑀁 𑀕𑀳𑀡𑁂 𑀤𑀼𑀓𑁆𑀓𑀝𑀁 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀬𑀲𑁆𑀲𑀸 𑀯𑀺𑀦𑀸 𑀲𑀧𑁆𑀧𑀺𑀦𑀸 𑀨𑀸𑀲𑀼 𑀳𑁄𑀢𑀺, 𑀲𑀸 𑀅𑀕𑀺𑀮𑀸𑀦𑀸 𑀦𑀸𑀫. 𑀲𑀧𑁆𑀧𑀺𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀁 𑀧𑀸𑀴𑀺𑀆𑀕𑀢𑀁 𑀕𑁄𑀲𑀧𑁆𑀧𑀺𑀆𑀤𑀺𑀓𑀫𑁂𑀯.

𑁨𑁪𑁩𑁩. 𑀢𑀺𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺 𑀅𑀕𑀺𑀮𑀸𑀦𑀸 𑀅𑀕𑀺𑀮𑀸𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸, 𑀕𑀺𑀮𑀸𑀦𑀲𑀜𑁆𑀜𑀸𑀢𑀺 𑀢𑀻𑀲𑀼 ¶ 𑀯𑀺𑀓𑀧𑁆𑀧𑁂𑀲𑀼 𑀢𑀻𑀡𑀺 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀺. 𑀕𑀺𑀮𑀸𑀦𑀸 𑀤𑁆𑀯𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀕𑀺𑀮𑀸𑀦𑀸𑀬 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀕𑀺𑀮𑀸𑀦𑀸 𑀅𑀕𑀺𑀮𑀸𑀦𑀲𑀜𑁆𑀜𑀸, 𑀯𑁂𑀫𑀢𑀺𑀓𑀸 𑀯𑀸𑀢𑀺 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺.

𑁨𑁪𑁩𑁪-𑁫. 𑀕𑀺𑀮𑀸𑀦𑀸 𑀳𑀼𑀢𑁆𑀯𑀸 𑀲𑀧𑁆𑀧𑀺𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀯𑀽𑀧𑀲𑀦𑁆𑀢𑀕𑁂𑀮𑀜𑁆𑀜𑀸 𑀳𑀼𑀢𑁆𑀯𑀸 𑀲𑁂𑀯𑀦𑁆𑀢𑀺𑀬𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸𑀧𑀺 𑀘 𑀕𑀺𑀮𑀸𑀦𑀸𑀬 𑀅𑀯𑀲𑁂𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀯𑀸 𑀜𑀸𑀢𑀓𑀸𑀤𑀺𑀢𑁄 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀺𑀜𑁆𑀜𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺𑀬𑀸 𑀯𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀯𑀸 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀳𑀺𑀢𑀁 𑀪𑀼𑀜𑁆𑀚𑀦𑁆𑀢𑀺𑀬𑀸 𑀯𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀧𑀞𑀫𑀁.

𑁨𑁪𑁩𑁬. 𑀲𑁂𑀲𑁂𑀲𑀼 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀕𑀺𑀮𑀸𑀦𑀸 𑀢𑁂𑀮𑀁…𑀧𑁂… 𑀫𑀥𑀼𑀁…𑀧𑁂… 𑀨𑀸𑀡𑀺𑀢𑀁…𑀧𑁂… 𑀫𑀘𑁆𑀙𑀁…𑀧𑁂… 𑀫𑀁𑀲𑀁…𑀧𑁂… 𑀔𑀻𑀭𑀁…𑀧𑁂… 𑀤𑀥𑀺𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀝𑀺𑀤𑁂𑀲𑁂𑀢𑀩𑁆𑀩𑀁 𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀭𑀬𑁆𑀳𑀁 𑀅𑀬𑁆𑀬𑁂 𑀥𑀫𑁆𑀫𑀁 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 (𑀧𑀸𑀘𑀺. 𑁧𑁨𑁩𑁬) 𑀏𑀯𑀁 𑀤𑀼𑀢𑀺𑀬𑀸𑀤𑀻𑀲𑀼 𑀲𑀢𑁆𑀢𑀲𑀼 𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼. 𑀦𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀢𑀸𑀢𑀺 𑀢𑁂𑀮𑀸𑀤𑀺𑀧𑀤𑀸𑀦𑀺 𑀯𑀺𑀦𑀸 𑀅𑀜𑁆𑀜𑁄 𑀓𑁄𑀘𑀺 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁨𑁪𑁩𑁭. 𑀧𑀸𑀴𑀺𑀬𑀁 ¶ 𑀅𑀦𑀸𑀕𑀢𑁂𑀲𑀼 𑀲𑀩𑁆𑀩𑁂𑀲𑀼 𑀲𑀧𑁆𑀧𑀺𑀆𑀤𑀻𑀲𑀼 𑀅𑀝𑁆𑀞𑀲𑀼 𑀅𑀜𑁆𑀜𑀢𑀭𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀓𑀭𑀡𑀻𑀬𑀓𑀣𑀸𑀯𑀡𑁆𑀡𑀦𑀸

𑁨𑁪𑁩𑁮. 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸𑀦𑀺 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸𑀦𑀺 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀸𑀦𑁂𑀯𑀸𑀢𑀺 𑀢𑀤𑁂𑀯 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀲𑁂𑀔𑀺𑀬𑀸 𑀧𑀦 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺. 𑀬𑁂 𑀧𑀦 𑀧𑀜𑁆𑀘𑀲𑀢𑁆𑀢𑀢𑀺 ¶ 𑀲𑁂𑀔𑀺𑀬𑀸 𑀥𑀫𑁆𑀫𑀸 𑀧𑀸𑀝𑀺𑀤𑁂𑀲𑀦𑀻𑀬𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸, 𑀢𑁂𑀲𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄𑀯𑀸𑀢𑀺 𑀬𑁄𑀚𑀦𑀸, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄𑀯 𑀕𑀳𑁂𑀢𑀩𑁆𑀩𑁄, 𑀦 𑀧𑀼𑀦 𑀇𑀥 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀲𑀺𑀓𑁆𑀔𑀸𑀓𑀭𑀡𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁪𑁩𑁯-𑁪𑁦. 𑀲𑀯𑀺𑀪𑀗𑁆𑀕𑀸𑀦𑀁 𑀉𑀪𑀢𑁄𑀯𑀺𑀪𑀗𑁆𑀕𑀲𑀳𑀺𑀢𑀸𑀦𑀁 𑀉𑀪𑀢𑁄𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀓𑀣𑀸𑀲𑀸𑀭𑁄 𑀲𑀩𑁆𑀩𑀝𑁆𑀞𑀓𑀣𑀸𑀦𑀁 𑀲𑀸𑀭𑀪𑀽𑀢𑁄 𑀬𑁄 𑀲𑁄 𑀅𑀢𑁆𑀣𑁄 𑀯𑀺𑀲𑁂𑀲𑀢𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄. 𑀢𑀁 𑀲𑀩𑁆𑀩𑀁 𑀲𑀸𑀭𑀪𑀽𑀢𑀁 𑀅𑀢𑁆𑀣𑀁 𑀲𑀫𑀸𑀤𑀸𑀬 𑀬𑁄 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁄 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀳𑀺𑀢𑀢𑁆𑀣𑀸𑀬 𑀫𑀬𑀸 𑀓𑀢𑁄 𑀯𑀺𑀭𑀘𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪𑁪𑁧. 𑀦𑁄 𑀅𑀫𑁆𑀳𑀸𑀓𑀁 𑀧𑀝𑀺𑀪𑀸𑀡𑀚𑀁 𑀧𑀝𑀺𑀪𑀸𑀡𑀢𑁄 𑀚𑀸𑀢𑀁 𑀇𑀫𑀁 𑀢𑀼 𑀇𑀫𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀧𑀦 𑀬𑁂 𑀚𑀦𑁆𑀢𑀼𑀦𑁄 𑀲𑀢𑁆𑀢𑀸 𑀲𑀼𑀡𑀦𑁆𑀢𑀺 ¶ , 𑀢𑁂 𑀚𑀦𑁆𑀢𑀼𑀦𑁄 𑀚𑀦𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀳𑀺𑀢𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀧𑀓𑀸𑀲𑀓𑀢𑁆𑀢𑀸 𑀉𑀧𑀓𑀸𑀭𑀓𑁂 𑀲𑀼𑀫𑀢𑀲𑁆𑀲 𑀲𑁄𑀪𑀡𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀫𑀢𑀲𑁆𑀲, 𑀲𑁄𑀪𑀡𑁂𑀳𑀺 𑀯𑀸 𑀩𑀼𑀤𑁆𑀥𑀸𑀤𑀻𑀳𑀺 𑀫𑀢𑀲𑁆𑀲 𑀧𑀝𑀺𑀯𑀺𑀤𑁆𑀥𑀲𑁆𑀲 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀅𑀬𑀦𑁂 𑀅𑀜𑁆𑀚𑀲𑀪𑀽𑀢𑁂 𑀚𑀦𑀲𑁆𑀲 𑀢𑀸𑀬𑀦𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀧𑀸𑀬𑀪𑀬𑀦𑀺𑀯𑀸𑀭𑀡𑀝𑁆𑀞𑁂𑀦 𑀢𑀸𑀡𑀪𑀽𑀢𑁂 𑀯𑀺𑀦𑀬𑁂 𑀯𑀺𑀦𑀬𑀧𑀺𑀝𑀓𑁂 𑀧𑀓𑀢𑀜𑁆𑀜𑀼𑀦𑁄 𑀬𑀣𑀸𑀲𑀪𑀸𑀯𑀁 𑀚𑀸𑀦𑀦𑁆𑀢𑀸 𑀢𑀜𑁆𑀜𑀼𑀦𑁄 𑀪𑀯𑀦𑁆𑀢𑀺 𑀢𑀁 𑀢𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀁 𑀚𑀸𑀦𑀦𑁆𑀢𑀸 𑀪𑀯𑀦𑁆𑀢𑁂𑀯𑀸𑀢𑀺 𑀅𑀢𑁆𑀣𑁄.

𑁨𑁪𑁪𑁨. 𑀩𑀳𑀯𑁄 𑀲𑀸𑀭𑀪𑀽𑀢𑀸 𑀦𑀬𑀸 𑀏𑀢𑁆𑀣𑀸𑀢𑀺 𑀩𑀳𑀼𑀲𑀸𑀭𑀦𑀬𑁄, 𑀢𑀲𑁆𑀫𑀺𑀁 𑀩𑀳𑀼𑀲𑀸𑀭𑀦𑀬𑁂. 𑀧𑀭𑀫𑁂 𑀉𑀢𑁆𑀢𑀫𑁂 𑀯𑀺𑀦𑀬𑁂 𑀯𑀺𑀦𑀬𑀧𑀺𑀝𑀓𑁂 𑀯𑀺𑀲𑀸𑀭𑀤𑀢𑀁 𑀯𑁂𑀲𑀸𑀭𑀚𑁆𑀚𑀁 𑀅𑀲𑀁𑀳𑀻𑀭𑀜𑀸𑀡𑀁 𑀅𑀪𑀺𑀧𑀢𑁆𑀣𑀬𑀢𑀸 𑀯𑀺𑀲𑁂𑀲𑀢𑁄 𑀇𑀘𑁆𑀙𑀦𑁆𑀢𑁂𑀦 𑀩𑀼𑀤𑁆𑀥𑀺𑀫𑀢𑀸 𑀜𑀸𑀡𑀸𑀢𑀺𑀲𑀬𑀫𑀦𑁆𑀢𑁂𑀦 𑀬𑀢𑀺𑀦𑀸 𑀲𑀩𑁆𑀩𑀓𑀸𑀮𑀁 𑀢𑀺𑀯𑀺𑀥𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑁂 𑀅𑀲𑀺𑀣𑀺𑀮𑀧𑀯𑀢𑁆𑀢𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀇𑀫𑀲𑁆𑀫𑀺𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀭𑀫𑀸 𑀉𑀢𑁆𑀢𑀭𑀺𑀢𑀭𑀸 𑀫𑀳𑀢𑀻 𑀆𑀤𑀭𑀢𑀸 𑀓𑀭𑀡𑀻𑀬𑀢𑀫𑀸 𑀯𑀺𑀲𑁂𑀲𑁂𑀦 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁨𑁪𑁪𑁩. 𑀇𑀘𑁆𑀘𑁂𑀯𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀲𑀸𑀥𑀦𑁂 𑀯𑀺𑀦𑀬𑀧𑀺𑀝𑀓𑁂 𑀯𑁂𑀲𑀸𑀭𑀚𑁆𑀚𑀳𑁂𑀢𑀼𑀢𑀸𑀬 𑀇𑀫𑀲𑁆𑀲 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑁆𑀲 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸𑀧𑀺 𑀫𑀽𑀮𑀪𑀽𑀢𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀯𑀕𑀘𑁆𑀙𑀢𑀻’’𑀢𑀺𑀆𑀤𑀺.

𑀬𑁄 ¶ 𑀧𑀦 𑀪𑀺𑀓𑁆𑀔𑀼 𑀅𑀢𑁆𑀣𑀬𑀼𑀢𑁆𑀢𑀁 𑀫𑀳𑀢𑀸 𑀧𑀬𑁄𑀚𑀦𑀢𑁆𑀣𑁂𑀦, 𑀅𑀪𑀺𑀥𑁂𑀬𑁆𑀬𑀢𑁆𑀣𑁂𑀦 𑀘 𑀲𑀫𑀦𑁆𑀦𑀸𑀕𑀢𑀁 𑀇𑀫𑀁 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁 𑀅𑀯𑀕𑀘𑁆𑀙𑀢𑀺 𑀅𑀯𑁂𑀘𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺, 𑀲𑁄 𑀅𑀧𑀭𑀫𑁆𑀧𑀭𑀁 𑀫𑀭𑀡𑀸𑀪𑀸𑀯𑀸 𑀅𑀫𑀭𑀁 𑀚𑀭𑀸𑀬𑀸𑀪𑀸𑀯𑀸 𑀅𑀚𑀭𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀭𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀭𑀚𑀁 𑀅𑀦𑁂𑀓𑀧𑁆𑀧𑀓𑀸𑀭𑀭𑁄𑀕𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀢𑁆𑀢𑀸 𑀅𑀭𑀼𑀚𑀁 𑀲𑀦𑁆𑀢𑀺𑀧𑀤𑀁 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑀳𑁂𑀢𑀼𑀢𑁆𑀢𑀸 ¶ 𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀅𑀥𑀺𑀕𑀘𑁆𑀙𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀕𑀦𑁆𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀓𑀓𑀣𑀸

𑀫𑀳𑀸𑀯𑀕𑁆𑀕𑁄

𑀫𑀳𑀸𑀔𑀦𑁆𑀥𑀓𑀓𑀣𑀸

𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁨𑁪𑁪𑁪. 𑀇𑀘𑁆𑀘𑁂𑀯𑀁 ¶ ¶ 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀲𑁂𑀦 𑀯𑀺𑀪𑀗𑁆𑀕𑀤𑁆𑀯𑀬𑁂, 𑀢𑀤𑀝𑁆𑀞𑀓𑀣𑀸𑀬 𑀘 𑀆𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀔𑀦𑁆𑀥𑀓𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀲𑀻𑀮𑀓𑁆𑀔𑀦𑁆𑀥𑀸𑀤𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀬𑀼𑀢𑁆𑀢𑁂𑀦𑀸𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀕𑀼𑀡𑀭𑀸𑀲𑀻𑀳𑀺 𑀬𑀼𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦. 𑀲𑀼𑀪𑀓𑁆𑀔𑀦𑁆𑀥𑁂𑀦𑀸𑀢𑀺 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑀯𑀝𑁆𑀝𑀓𑁆𑀔𑀦𑁆𑀥𑀢𑀸𑀬 𑀲𑀼𑀪𑁄 𑀲𑀼𑀦𑁆𑀤𑀭𑁄 𑀔𑀦𑁆𑀥𑁄 𑀏𑀢𑀲𑁆𑀲𑀸𑀢𑀺 𑀲𑀼𑀪𑀓𑁆𑀔𑀦𑁆𑀥𑁄, 𑀪𑀕𑀯𑀸, 𑀢𑁂𑀦. 𑀇𑀫𑀺𑀦𑀸 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸𑀦𑀫𑁂𑀓𑀤𑁂𑀲𑀪𑀽𑀢𑀲𑁆𑀲 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑀢𑀸𑀮𑀓𑁆𑀔𑀡𑀲𑁆𑀲 𑀧𑀭𑀺𑀤𑀻𑀧𑀓𑁂𑀦 𑀯𑀘𑀦𑁂𑀦 𑀮𑀓𑁆𑀔𑀡𑀸𑀳𑀸𑀭𑀦𑀬𑁂𑀦 𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸𑀤𑀺𑀓𑀸 𑀲𑀩𑁆𑀩𑀸𑀧𑀺 𑀭𑀽𑀧𑀓𑀸𑀬𑀲𑀺𑀭𑀻 𑀲𑀦𑁆𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀔𑀦𑁆𑀥𑀓𑁂𑀢𑀺 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀔𑀦𑁆𑀥𑀓𑁄, 𑀔𑀦𑁆𑀥𑀸𑀦𑀁 𑀯𑀸 𑀓𑀸𑀬𑀦𑀢𑁄 𑀤𑀻𑀧𑀦𑀢𑁄 𑀔𑀦𑁆𑀥𑀓𑁄. ‘‘𑀔𑀦𑁆𑀥𑀸’’𑀢𑀺 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀺𑀯𑀺𑀦𑀬𑀓𑀫𑁆𑀫𑀲𑀗𑁆𑀔𑀸𑀢𑀸, 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀸 𑀘 𑀧𑀜𑁆𑀜𑀢𑁆𑀢𑀺𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 ‘‘𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀢𑁆𑀢𑀺𑀬𑀜𑁆𑀘 𑀔𑀦𑁆𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀤𑀸𑀭𑀼𑀓𑁆𑀔𑀦𑁆𑀥𑁄 (𑀲𑀁. 𑀦𑀺. 𑁪.𑁨𑁪𑁧) 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 (𑀧𑀝𑀺. 𑀫. 𑁧.𑁧𑁧𑁬) 𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁬.𑁩𑁭) 𑀯𑀺𑀬. 𑀅𑀧𑀺𑀘 𑀪𑀸𑀕𑀭𑀸𑀲𑀢𑁆𑀣𑀢𑀸 ¶ 𑀘𑁂𑀢𑁆𑀣 𑀬𑀼𑀚𑁆𑀚𑀢𑀺𑀬𑁂𑀯 𑀢𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀪𑀸𑀕𑀲𑁄, 𑀭𑀸𑀲𑀺𑀢𑁄 𑀘 𑀯𑀺𑀪𑀢𑁆𑀢𑀢𑁆𑀢𑀸. 𑀢𑀲𑁆𑀫𑀺𑀁 𑀔𑀦𑁆𑀥𑀓𑁂. 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀸𑀧𑁂𑀓𑁆𑀔𑀸𑀬 𑀧𑀜𑁆𑀘𑀲𑀢𑀺𑀓𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀤𑁆𑀯𑁂 𑀯𑀚𑁆𑀚𑁂𑀢𑁆𑀯𑀸 ¶ 𑀧𑀩𑁆𑀩𑀚𑁆𑀚𑀓𑁆𑀔𑀦𑁆𑀥𑀓𑀸𑀤𑀺𑀓𑁂 𑀪𑀺𑀓𑁆𑀔𑀼𑀦𑀺𑀔𑀦𑁆𑀥𑀓𑀧𑀭𑀺𑀬𑁄𑀲𑀸𑀦𑁂 𑀯𑀻𑀲𑀢𑀺𑀯𑀺𑀥𑁂 𑀔𑀦𑁆𑀥𑀓𑁂 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀲𑁆𑀲 𑀇𑀥 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀢𑀤𑁂𑀯 𑀲𑀦𑁆𑀥𑀸𑀬𑀸𑀳 ‘‘𑀔𑀦𑁆𑀥𑀓𑁂𑀧𑀺 𑀧𑀯𑀓𑁆𑀔𑀸𑀫𑀺, 𑀲𑀫𑀸𑀲𑁂𑀦 𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺.

𑁨𑁪𑁪𑁫. ‘‘𑀫𑀸𑀢𑀭𑀸 𑀧𑀺𑀢𑀭𑀸’’𑀢𑀺 𑀇𑀫𑀺𑀦𑀸 𑀚𑀦𑀓𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸. ‘‘𑀪𑀡𑁆𑀟𑀼𑀓𑀫𑁆𑀫𑀁, 𑀲𑀫𑀡𑀓𑀭𑀡𑀁, 𑀧𑀩𑁆𑀩𑀸𑀚𑀦𑀦𑁆𑀢𑀺 𑀘 𑀧𑀭𑀺𑀬𑀸𑀬-𑀲𑀤𑁆𑀤𑀸’’𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑀼𑀁 𑀪𑀡𑁆𑀟𑀼𑀓𑀫𑁆𑀫𑀸𑀬𑀸’’𑀢𑀺 (𑀫𑀳𑀸𑀯. 𑁯𑁮) 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁯𑁮) 𑀯𑀼𑀢𑁆𑀢𑀁. 𑀆𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀲𑀗𑁆𑀖’’𑀦𑁆𑀢𑀺 𑀲𑁂𑀲𑁄.

𑁨𑁪𑁪𑁬. 𑀯𑀸𑀯𑀝𑁄𑀢𑀺 𑀧𑀲𑀼𑀢𑁄, 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀦𑀬 𑀇𑀢𑀺 𑀘𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀢𑁆𑀣 𑀘 𑀢𑀺𑀥𑀸 𑀧𑀩𑁆𑀩𑀸𑀚𑀦𑀁 𑀯𑁂𑀤𑀺𑀢𑀩𑁆𑀩𑀁 𑀓𑁂𑀲𑀘𑁆𑀙𑁂𑀤𑀦𑀁, 𑀓𑀸𑀲𑀸𑀬𑀅𑀘𑁆𑀙𑀸𑀤𑀦𑀁, 𑀲𑀭𑀡𑀤𑀸𑀦𑀦𑁆𑀢𑀺, 𑀇𑀫𑀸𑀦𑀺 𑀢𑀻𑀡𑀺 𑀓𑀭𑁄𑀦𑁆𑀢𑁄 ‘‘𑀧𑀩𑁆𑀩𑀸𑀚𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀏𑀓𑀁, 𑀤𑁆𑀯𑁂 𑀯𑀸𑀧𑀺 𑀓𑀭𑁄𑀦𑁆𑀢𑁄 𑀢𑀣𑀸 𑀯𑁄𑀳𑀭𑀻𑀬𑀢𑀺𑀬𑁂𑀯. 𑀢𑀲𑁆𑀫𑀸 ‘‘𑀧𑀩𑁆𑀩𑀸𑀚𑁂𑀢𑁆𑀯𑀸𑀦𑀬𑀸’’𑀢𑀺 𑀇𑀫𑀺𑀦𑀸 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀆𑀦𑁂𑀳𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁨𑁪𑁪𑁭. 𑀅𑀯𑀼𑀢𑁆𑀢𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀅𑀦𑀼𑀬𑁆𑀬𑁄𑀚𑀺𑀢𑁄. 𑀲𑁄 𑀤𑀳𑀭𑁄 𑀲𑀘𑁂 𑀢𑀁 𑀲𑀬𑀫𑁂𑀯 𑀓𑁂𑀲𑀘𑁆𑀙𑁂𑀤𑀦𑀓𑀸𑀲𑀸𑀬𑀘𑁆𑀙𑀸𑀤𑀦𑁂𑀳𑀺 𑀧𑀩𑁆𑀩𑀸𑀚𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁪𑁪𑁮. 𑀢𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀲𑀫𑀻𑀧𑁂. 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀲𑀪𑀺𑀓𑁆𑀔𑀼𑀓𑁂 𑀯𑀺𑀳𑀸𑀭𑁂 𑀅𑀜𑁆𑀜𑀫𑁆𑀧𑀺 𑀪𑀺𑀓𑁆𑀔𑀼𑀁 ‘‘𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀘𑁆𑀙𑁂𑀤𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁨𑁪𑁫𑁦. ‘‘𑀧𑀼𑀭𑀺𑀲𑀁 ¶ 𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁄, 𑀧𑀩𑁆𑀩𑀸𑀚𑁂𑀢𑀺 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀲𑀭𑀡𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀸𑀫𑀡𑁂𑀭𑁄’’𑀢𑀺𑀆𑀤𑀺.

𑁨𑁪𑁫𑁧. 𑀉𑀪𑀺𑀦𑁆𑀦𑀫𑁆𑀧𑀺 𑀣𑁂𑀭𑀣𑁂𑀭𑀻𑀦𑀁 ‘‘𑀇𑀫𑁂𑀳𑀺 𑀘𑀻𑀯𑀭𑁂𑀳𑀺 𑀇𑀫𑀁 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀆𑀡𑀢𑁆𑀢𑀺𑀬𑀸 𑀲𑀸𑀫𑀡𑁂𑀭𑁄𑀧𑀺 ¶ 𑀯𑀸 𑀳𑁄𑀢𑀼, 𑀢𑀣𑀸 𑀲𑀸𑀫𑀡𑁂𑀭𑀻 𑀯𑀸 𑀳𑁄𑀢𑀼, 𑀢𑁂 𑀉𑀪𑁄 𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻 𑀓𑀸𑀲𑀸𑀬𑀸𑀦𑀺 𑀤𑀸𑀢𑀼𑀁 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁪𑁫𑁨-𑁪. 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 ‘‘𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀏𑀯𑀜𑁆𑀳𑀺 𑀓𑀢𑁆𑀯𑀸 𑀓𑁂𑀲𑀸𑀧𑀦𑀬𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀆𑀯𑀼𑀲𑁄, 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀳𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀳𑀻𑀢𑀺 𑀯𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀘𑀺𑀓𑁆𑀔𑀦𑁆𑀢𑁂𑀦 𑀘 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀅𑀲𑀼𑀘𑀺𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀪𑀸𑀯𑀁, 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀁 𑀯𑀸 𑀧𑀸𑀓𑀝𑀁 𑀓𑀭𑁄𑀦𑁆𑀢𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀓𑀺𑀫𑀢𑁆𑀣𑀫𑁂𑀯𑀁 𑀓𑀭𑀻𑀬𑀢𑀻𑀢𑀺 𑀘𑁂? 𑀲𑀘𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀧𑀸𑀧𑀼𑀡𑀦𑀢𑁆𑀣𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀬𑁂 𑀳𑀺 𑀓𑁂𑀘𑀺 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀲𑀩𑁆𑀩𑁂 𑀢𑁂 𑀏𑀯𑀭𑀽𑀧𑀁 𑀲𑀯𑀦𑀁 𑀮𑀪𑀺𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀆𑀘𑀭𑀺𑀬𑁂𑀦 𑀤𑀺𑀦𑁆𑀦𑀦𑀬𑀁 𑀦𑀺𑀲𑁆𑀲𑀸𑀬, 𑀦𑁄 𑀅𑀦𑀺𑀲𑁆𑀲𑀸𑀬, 𑀢𑀲𑁆𑀫𑀸𑀲𑁆𑀲 𑀆𑀤𑀺𑀢𑁄𑀯 𑀏𑀯𑀭𑀽𑀧𑀻 𑀓𑀣𑀸 𑀓𑀣𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪).

𑀏𑀢𑁂𑀦𑁂𑀯 𑀩𑁆𑀬𑀢𑀺𑀭𑁂𑀓𑀢𑁄 𑀇𑀢𑁄 𑀅𑀜𑁆𑀜𑀸 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀸 𑀦 𑀓𑀣𑁂𑀢𑀩𑁆𑀩𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀕𑁄𑀫𑀬𑀸𑀤𑀺𑀦𑀸𑀢𑀺 𑀕𑁄𑀫𑀬𑀘𑀼𑀡𑁆𑀡𑀸𑀤𑀺𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀫𑀢𑁆𑀢𑀺𑀓𑀸𑀤𑀻𑀦𑀁 𑀕𑀳𑀡𑀁. 𑀧𑀻𑀴𑀓𑀸 𑀯𑀸𑀢𑀺 𑀣𑀼𑀮𑁆𑀮𑀧𑀻𑀴𑀓𑀸 𑀯𑀸. 𑀓𑀘𑁆𑀙𑀼 𑀯𑀸𑀢𑀺 𑀲𑀼𑀔𑀼𑀫𑀓𑀘𑁆𑀙𑀼 𑀯𑀸. 𑀦𑀺𑀬𑀁𑀧𑀼𑀢𑁆𑀢𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁. ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀤𑀽𑀭𑀢𑁆𑀢𑀸 ‘‘𑀬𑀢𑀺𑀦𑀸’’𑀢𑀺 𑀆𑀳.

𑁨𑁪𑁫𑁫-𑁬. 𑀓𑀲𑁆𑀫𑀸 𑀧𑀦 𑀏𑀯𑀁 𑀦𑀳𑀸𑀧𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀢𑁆𑀢𑀓𑁂𑀦𑀸𑀧𑀻’’𑀢𑀺𑀆𑀤𑀺. 𑀲𑁄𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄. 𑀉𑀧𑀚𑁆𑀛𑀸𑀬𑀓𑀸𑀤𑀺𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀆𑀘𑀭𑀺𑀬𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀕𑀳𑀡𑀁. 𑀧𑀸𑀧𑀼𑀡𑀦𑁆𑀢𑀺 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀬𑀲𑁆𑀫𑀸-𑀧𑀤𑀢𑁆𑀣𑁂 𑀯𑀢𑁆𑀢𑀢𑀺. 𑀬𑀲𑁆𑀫𑀸 𑀏𑀢𑁆𑀢𑀓𑁂𑀦𑀸𑀧𑀺 𑀉𑀧𑀚𑁆𑀛𑀸𑀬𑀸𑀤𑀻𑀲𑀼 𑀲𑀕𑀸𑀭𑀯𑁄 𑀳𑁄𑀢𑀺, 𑀬𑀲𑁆𑀫𑀸 𑀘 𑀏𑀯𑀭𑀽𑀧𑀁 𑀉𑀧𑀓𑀸𑀭𑀁 𑀮𑀪𑀺𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀸 𑀉𑀧𑁆𑀧𑀦𑁆𑀦𑀁 𑀅𑀦𑀪𑀺𑀭𑀢𑀺𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀲𑀺𑀓𑁆𑀔𑀸𑀬𑁄 𑀧𑀭𑀺𑀧𑀽𑀭𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀉𑀧𑀓𑀸𑀭𑁄 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁪𑁫𑁮. 𑀏𑀓𑀢𑁄𑀢𑀺 𑀲𑀩𑁆𑀩𑀸𑀦𑀺 𑀘𑀻𑀯𑀭𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸.

𑁨𑁪𑁫𑁯. 𑀅𑀣𑀸𑀢𑀺 ¶ 𑀅𑀥𑀺𑀓𑀸𑀭𑀦𑁆𑀢𑀭𑀸𑀭𑀫𑁆𑀪𑁂 𑀦𑀺𑀧𑀸𑀢𑁄. 𑀢𑀲𑁆𑀲 𑀳𑀢𑁆𑀣𑁂 𑀅𑀤𑀢𑁆𑀯𑀸𑀧𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸𑀧𑀺 𑀲𑀬𑀫𑁂𑀯 𑀢𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀅𑀘𑁆𑀙𑀸𑀤𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁪𑁬𑁦. 𑀅𑀤𑀺𑀦𑁆𑀦𑀘𑀻𑀯𑀭𑀲𑁆𑀲 𑀅𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀅𑀧𑀦𑁂𑀢𑁆𑀯𑀸 𑀢𑀢𑁄 𑀲𑀩𑁆𑀩𑀁, 𑀧𑀼𑀦 𑀤𑀸𑀢𑀩𑁆𑀩𑀫𑁂𑀯 𑀢’’𑀦𑁆𑀢𑀺. 𑀢𑀢𑁄𑀢𑀺 𑀢𑀲𑁆𑀲 𑀲𑀭𑀻𑀭𑀢𑁄. 𑀢𑀦𑁆𑀢𑀺 𑀘𑀻𑀯𑀭𑀁.

𑁨𑁪𑁬𑁧-𑁨. 𑀏𑀢𑀤𑁂𑀯 𑀆𑀳 ‘‘𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺𑀦𑀸. 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁 𑀯𑀸𑀧𑀺 𑀘𑀻𑀯𑀭𑀁 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀺 𑀅𑀢𑁆𑀢𑀲𑀦𑁆𑀢𑀓𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀘𑀻𑀯𑀭𑁂 𑀓𑀸 𑀓𑀣𑀸 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀽𑀢𑀺 𑀬𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸. 𑀓𑀸𑀭𑀸𑀧𑁂𑀢𑁆𑀯𑀸𑀦 𑀉𑀓𑁆𑀓𑀼𑀝𑀺𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀸𑀢𑁆𑀯𑀢𑁆𑀣𑀸𑀦𑀼𑀕𑀢𑁄 𑀓𑀭𑁄𑀢𑀺-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, ‘‘𑀉𑀓𑁆𑀓𑀼𑀝𑀺𑀓’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪) 𑀅𑀝𑁆𑀞𑀓𑀣𑀸𑀧𑀸𑀞𑁄 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀇𑀥 𑀓-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑁄.

𑁨𑁪𑁬𑁪. 𑀏𑀓𑀧𑀤𑀁 ¶ 𑀯𑀸𑀧𑀻𑀢𑀺 𑀩𑀼𑀤𑁆𑀥𑀫𑀺𑀘𑁆𑀘𑀸𑀤𑀺𑀓𑀁 𑀏𑀓𑀫𑁆𑀧𑀺 𑀯𑀸 𑀧𑀤𑀁. 𑀏𑀓𑀓𑁆𑀔𑀭𑀫𑁆𑀧𑀺 𑀯𑀸𑀢𑀺 𑀩𑀼𑀓𑀸𑀭𑀸𑀤𑀺𑀅𑀓𑁆𑀔𑀭𑁂𑀲𑀼 𑀏𑀓𑀫𑁆𑀧𑀺 𑀯𑀸 𑀅𑀓𑁆𑀔𑀭𑀁. 𑀧𑀝𑀺𑀧𑀸𑀝𑀺𑀦𑁆𑀢𑀺 ‘‘𑀩𑀼𑀤𑁆𑀥’’𑀫𑀺𑀘𑁆𑀘𑀸𑀤𑀺𑀓𑀁 𑀧𑀤𑀧𑀦𑁆𑀢𑀺𑀁.

𑁨𑁪𑁬𑁫. 𑀅𑀓𑀢𑁆𑀢𑀩𑁆𑀩𑀧𑁆𑀧𑀓𑀸𑀭𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀬𑀤𑀺 𑀯𑀸’’𑀢𑀺𑀆𑀤𑀺. 𑀢𑀣𑀸 𑀲𑁂𑀲𑁂𑀲𑀽𑀢𑀺 𑀬𑀤𑀺 𑀯𑀸 ‘‘𑀥𑀫𑁆𑀫𑀁 𑀲𑀭𑀡’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀢𑀺, ‘‘𑀲𑀗𑁆𑀖𑀁 𑀲𑀭𑀡’’𑀦𑁆𑀢𑀺 𑀬𑀤𑀺 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀢𑀺, 𑀏𑀯𑀫𑁆𑀧𑀺 𑀢𑀻𑀡𑀺 𑀲𑀭𑀡𑀸𑀦𑀺 𑀅𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺.

𑁨𑁪𑁬𑁬. 𑀅𑀦𑀼𑀦𑀸𑀲𑀺𑀓𑀦𑁆𑀢𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸𑀯𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀸𑀩𑀤𑁆𑀥𑀸𑀦𑀺 𑀯𑀸 𑀧𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀤𑀧𑀝𑀺𑀧𑀸𑀝𑀺𑀢𑁄 𑀫-𑀓𑀸𑀭𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀲𑀫𑀬𑁂 𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀫𑀦𑁆𑀢𑀸𑀦𑀻𑀢𑀺 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀇𑀘𑁆𑀘𑀸𑀤𑀺𑀦𑀸 𑀫-𑀓𑀸𑀭𑀦𑁆𑀢𑀸𑀦𑀺. ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀕𑁆𑀕𑀳𑀺𑀢𑀦𑁆𑀢𑀫𑁂𑀯 𑀓𑀢𑁆𑀯𑀸 𑀦 𑀤𑀸𑀢𑀩𑁆𑀩𑀦𑁆𑀢𑀺 ‘‘𑀅𑀣𑀸’’𑀢𑀺 𑀆𑀳.

𑁨𑁪𑁬𑁭. 𑀲𑀼𑀤𑁆𑀥𑀺 𑀦𑀸𑀫 𑀆𑀘𑀭𑀺𑀬𑀲𑁆𑀲 𑀜𑀢𑁆𑀢𑀺𑀬𑀸, 𑀓𑀫𑁆𑀫𑀯𑀸𑀘𑀸𑀬 𑀘 𑀉𑀘𑁆𑀘𑀸𑀭𑀡𑀯𑀺𑀲𑀼𑀤𑁆𑀥𑀺. 𑀧𑀩𑁆𑀩𑀚𑁆𑀚𑀸𑀢𑀺 𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀧𑀩𑁆𑀩𑀚𑁆𑀚𑀸. 𑀉𑀪𑀢𑁄𑀲𑀼𑀤𑁆𑀥𑀺𑀬𑀸 𑀯𑀺𑀦𑀸𑀢𑀺 𑀉𑀪𑀢𑁄𑀲𑀼𑀤𑁆𑀥𑀺𑀁 𑀯𑀺𑀦𑀸 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻𑀦𑀁 ¶ 𑀉𑀪𑀺𑀦𑁆𑀦𑀁 𑀢𑀻𑀲𑀼 𑀲𑀭𑀡𑀢𑁆𑀢𑀬𑀤𑀸𑀦𑀕𑁆𑀕𑀳𑀡𑁂𑀲𑀼 𑀉𑀘𑁆𑀘𑀸𑀭𑀡𑀲𑀼𑀤𑁆𑀥𑀺𑀁 𑀯𑀺𑀦𑀸, 𑀏𑀓𑀲𑁆𑀲𑀸𑀧𑀺 𑀅𑀓𑁆𑀔𑀭𑀲𑁆𑀲 𑀯𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑁂 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁪𑁬𑁮-𑁯. ‘‘𑀧𑀩𑁆𑀩𑀚𑁆𑀚𑀸𑀕𑀼𑀡𑀫𑀺𑀘𑁆𑀙𑀢𑀸’’𑀢𑀺 𑀇𑀤𑀁 ‘‘𑀆𑀘𑀭𑀺𑀬𑁂𑀦, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀩𑁆𑀩𑀚𑁆𑀚𑀸𑀕𑀼𑀡𑀁 𑀇𑀘𑁆𑀙𑀦𑁆𑀢𑁂𑀦 𑀆𑀘𑀭𑀺𑀬𑁂𑀦, 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀕𑀼𑀡𑀁 𑀇𑀘𑁆𑀙𑀦𑁆𑀢𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀘 𑀩𑀼-𑀤𑁆𑀥-𑀓𑀸𑀭𑀸𑀤𑀬𑁄 𑀯𑀡𑁆𑀡𑀸 𑀩𑀼-𑀓𑀸𑀭 𑀥-𑀓𑀸𑀭𑀸𑀤𑀬𑁄 𑀯𑀡𑁆𑀡𑀸 𑀅𑀓𑁆𑀔𑀭𑀸 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀓𑀡𑁆𑀞𑀢𑀸𑀮𑀼𑀫𑀼𑀤𑁆𑀥𑀤𑀦𑁆𑀢𑀑𑀝𑁆𑀞𑀦𑀸𑀲𑀺𑀓𑀸𑀪𑁂𑀤𑀁 𑀞𑀸𑀦𑀲𑀫𑁆𑀧𑀤𑀜𑁆𑀘 ¶ 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀲𑀸𑀥𑀓𑀢𑀫𑀚𑀺𑀯𑁆𑀳𑀸𑀫𑀚𑁆𑀛𑀸𑀤𑀺𑀓𑀭𑀡𑀲𑀫𑁆𑀧𑀤𑀜𑁆𑀘 𑀅𑀳𑀸𑀧𑁂𑀦𑁆𑀢𑁂𑀦 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀇𑀤𑀫𑁂𑀯 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀓𑀯𑀡𑁆𑀡𑀯𑀺𑀦𑀸𑀲𑁂𑀦𑀸’’𑀢𑀺𑀆𑀤𑀺. 𑀳𑀺-𑀲𑀤𑁆𑀤𑁄 𑀬𑀲𑁆𑀫𑀸-𑀧𑀤𑀢𑁆𑀣𑁂, 𑀬𑀲𑁆𑀫𑀸 𑀏𑀓𑀲𑁆𑀲𑀸𑀧𑀺 𑀯𑀡𑁆𑀡𑀲𑁆𑀲 𑀯𑀺𑀦𑀸𑀲𑁂𑀦 𑀅𑀦𑀼𑀘𑁆𑀘𑀸𑀭𑀡𑁂𑀦 𑀯𑀸 𑀤𑀼𑀭𑀼𑀘𑁆𑀘𑀸𑀭𑀡𑁂𑀦 𑀯𑀸 𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪𑁭𑁦. 𑀬𑀤𑀺 𑀲𑀺𑀤𑁆𑀥𑀸𑀢𑀺 𑀲𑀸𑀲𑀗𑁆𑀓𑀯𑀘𑀦𑁂𑀦 𑀉𑀪𑀢𑁄𑀉𑀘𑁆𑀘𑀸𑀭𑀡𑀲𑀼𑀤𑁆𑀥𑀺𑀬𑀸 𑀤𑀼𑀓𑁆𑀓𑀭𑀢𑁆𑀢𑀁 𑀤𑀻𑀧𑁂𑀢𑁆𑀯𑀸 ‘‘𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀉𑀪𑀺𑀦𑁆𑀦𑀁 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑀼𑀲𑀺𑀝𑁆𑀞𑀺 𑀤𑀺𑀦𑁆𑀦𑀸 𑀳𑁄𑀢𑀺. 𑀲𑀭𑀡𑀕𑀫𑀦𑀢𑁄𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀯𑀺𑀬 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀦 𑀳𑁄𑀢𑀺, 𑀇𑀤𑀸𑀦𑀺𑀧𑀺 𑀲𑀭𑀡𑀕𑀫𑀦𑁂𑀦𑁂𑀯 𑀲𑀺𑀚𑁆𑀛𑀢𑀻𑀢𑀺 𑀤𑀻𑀧𑁂𑀢𑀺. 𑀳𑀺-𑀲𑀤𑁆𑀤𑁄 𑀧𑀲𑀺𑀤𑁆𑀥𑀺𑀬𑀁. 𑀬𑀣𑀸𑀳 𑁋

‘‘𑀬𑀲𑁆𑀫𑀸 𑀲𑀭𑀡𑀕𑀫𑀦𑁂𑀦 𑀉𑀧𑀲𑀫𑁆𑀧𑀤𑀸 𑀧𑀭𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀲𑀸 𑀏𑀢𑀭𑀳𑀺 𑀲𑀭𑀡𑀕𑀫𑀦𑀫𑀢𑁆𑀢𑁂𑀦𑁂𑀯 𑀦 𑀭𑀼𑀳𑀢𑀺. 𑀲𑀸𑀫𑀡𑁂𑀭𑀲𑁆𑀲 𑀧𑀩𑁆𑀩𑀚𑁆𑀚𑀸 𑀧𑀦 𑀬𑀲𑁆𑀫𑀸 𑀧𑀭𑀢𑁄𑀧𑀺 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚’𑀦𑁆𑀢𑀺 (𑀫𑀳𑀸𑀯. 𑁧𑁦𑁫) 𑀅𑀦𑀼𑀜𑁆𑀜𑀸𑀢𑀸 𑀏𑀯, 𑀢𑀲𑁆𑀫𑀸 𑀲𑀸 𑀏𑀢𑀭𑀳𑀺𑀧𑀺 𑀲𑀭𑀡𑀕𑀫𑀦𑀫𑀢𑁆𑀢𑁂𑀦𑁂𑀯 𑀭𑀼𑀳𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪).

𑀲𑀭𑀡𑀕𑀫𑀦𑀢𑁄 𑀏𑀯 𑀧𑀩𑁆𑀩𑀚𑁆𑀚𑀸 𑀬𑀤𑀺𑀧𑀺 𑀓𑀺𑀜𑁆𑀘𑀸𑀧𑀺 𑀲𑀺𑀤𑁆𑀥𑀸 𑀦𑀺𑀧𑁆𑀨𑀦𑁆𑀦𑀸, 𑀢𑀣𑀸𑀧𑀺 𑀅𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑀸 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮’’𑀦𑁆𑀢𑀺 𑀜𑀢𑁆𑀯𑀸 𑀧𑀭𑀺𑀧𑀽𑀭𑀡𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀸 𑀤𑀲 𑀲𑀻𑀮𑀸𑀦𑀺 𑀤𑀸𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀲𑀺𑀓𑁆𑀔𑀺𑀢𑀼𑀁. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻’’𑀢𑀺𑀆𑀤𑀺 (𑀫𑀳𑀸𑀯. 𑁧𑁦𑁬).

𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸.

𑁨𑁪𑁭𑁧. 𑀉𑀧𑀚𑁆𑀛𑀸𑀬𑀦𑁆𑀢𑀺 ¶ ¶ 𑀯𑀚𑁆𑀚𑀸𑀯𑀚𑁆𑀚𑁂 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀢𑀁, 𑀪𑀕𑀯𑀢𑀸 𑀯𑀼𑀢𑁆𑀢𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀭𑀺𑀧𑀼𑀡𑁆𑀡𑀤𑀲𑀯𑀲𑁆𑀲𑁄 𑀧𑀼𑀕𑁆𑀕𑀮𑁄. 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀆𑀬𑀸𑀘𑀦𑀸𑀬 𑀓𑀢𑀸𑀬 ‘‘𑀲𑀸𑀳𑀼, 𑀮𑀳𑀼, 𑀑𑀧𑀸𑀬𑀺𑀓𑀁, 𑀧𑀝𑀺𑀭𑀽𑀧𑀁, 𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀤𑁂𑀲𑀼 𑀅𑀜𑁆𑀜𑀢𑀭𑀁 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀉𑀪𑀬𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀧𑀺𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀭𑀚𑀫𑀺𑀯 𑀢𑀁 𑀕𑀳𑁂𑀢𑁆𑀯𑀸 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑁄𑀲𑁂𑀦 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀦𑀸𑀫.

𑀯𑀺𑀚𑁆𑀚𑀸𑀲𑀺𑀧𑁆𑀧𑀁, 𑀆𑀘𑀸𑀭𑀲𑀫𑀸𑀘𑀸𑀭𑀁 𑀯𑀸 𑀲𑀺𑀓𑁆𑀔𑀺𑀢𑀼𑀓𑀸𑀫𑁂𑀳𑀺 𑀆𑀤𑀭𑁂𑀦 𑀘𑀭𑀺𑀢𑀩𑁆𑀩𑁄 𑀉𑀧𑀝𑁆𑀞𑀸𑀢𑀩𑁆𑀩𑁄𑀢𑀺 𑀆𑀘𑀭𑀺𑀬𑁄, 𑀢𑀁, 𑀉𑀧𑀚𑁆𑀛𑀸𑀬𑁂 𑀯𑀼𑀢𑁆𑀢𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁄𑀬𑁂𑀯 𑀧𑀼𑀕𑁆𑀕𑀮𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀆𑀬𑀸𑀘𑀦𑀸𑀬 𑀓𑀢𑀸𑀬 ‘‘𑀲𑀸𑀳𑀽’’𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀅𑀜𑁆𑀜𑀢𑀭𑀁 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀧𑀺𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀼𑀢𑁆𑀢𑀝𑁆𑀞𑀸𑀦𑀺𑀬𑀁 𑀅𑀦𑁆𑀢𑁂𑀯𑀸𑀲𑀺𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀆𑀘𑀭𑀺𑀬𑁄 𑀦𑀸𑀫.

𑀏𑀢𑁆𑀣 𑀘 𑀲𑀸𑀳𑀽𑀢𑀺 𑀲𑀸𑀥𑀼. 𑀮𑀳𑀽𑀢𑀺 𑀅𑀕𑀭𑀼, 𑀫𑀫 𑀢𑀼𑀬𑁆𑀳𑀁 𑀉𑀧𑀚𑁆𑀛𑀸𑀬𑀪𑀸𑀯𑁂 𑀪𑀸𑀭𑀺𑀬𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀑𑀧𑀸𑀬𑀺𑀓𑀦𑁆𑀢𑀺 𑀉𑀧𑀸𑀬𑀧𑀝𑀺𑀲𑀁𑀬𑀼𑀢𑁆𑀢𑀁, 𑀢𑀁 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀁 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀢𑁆𑀯𑀁 𑀫𑁂 𑀇𑀢𑁄 𑀧𑀝𑁆𑀞𑀸𑀬 𑀪𑀸𑀭𑁄 𑀚𑀸𑀢𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀭𑀽𑀧𑀦𑁆𑀢𑀺 𑀅𑀦𑀼𑀭𑀽𑀧𑀁 𑀢𑁂 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦. 𑀲𑀫𑁆𑀧𑀸𑀤𑁂𑀳𑀻𑀢𑀺 𑀢𑀺𑀯𑀺𑀥𑀁 𑀲𑀺𑀓𑁆𑀔𑀁 𑀦𑀺𑀧𑁆𑀨𑀸𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦 𑀯𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑁂𑀦 𑀯𑀸. 𑀦𑀸𑀫𑀯𑀺𑀲𑁂𑀲𑀁 𑀯𑀺𑀦𑀸 𑀧𑀽𑀭𑁂𑀢𑀩𑁆𑀩𑀯𑀢𑁆𑀢𑀸𑀦𑀁 𑀲𑀫𑀢𑀸𑀬 𑀉𑀪𑁄𑀧𑀺 𑀏𑀓𑀢𑁄 𑀯𑀼𑀢𑁆𑀢𑀸.

𑀏𑀢𑀸𑀦𑀺 ¶ 𑀯𑀢𑁆𑀢𑀸𑀦𑀺 𑀉𑀧𑀚𑁆𑀛𑀸𑀬𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦, 𑀆𑀘𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀦𑀸𑀧𑀺 𑀏𑀯𑀫𑁂𑀯 𑀓𑀸𑀢𑀩𑁆𑀩𑀸𑀦𑁂𑀯𑀸𑀢𑀺. 𑀯𑀲𑀢𑀸𑀢𑀺 𑀯𑀲𑀦𑁆𑀢𑁂𑀦. 𑀧𑀺𑀬𑀲𑀻𑀮𑁂𑀦𑀸𑀢𑀺 𑀧𑀺𑀬𑀁 𑀲𑀻𑀮𑀫𑁂𑀢𑀲𑁆𑀲𑀸𑀢𑀺 𑀧𑀺𑀬𑀲𑀻𑀮𑁄, 𑀢𑁂𑀦, 𑀲𑀻𑀮𑀁 𑀧𑀭𑀺𑀧𑀽𑀭𑀺𑀢𑀼𑀓𑀸𑀫𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁪𑁭𑁨-𑁩. 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸’’𑀢𑀺 (𑀫𑀳𑀸𑀯. 𑁬𑁬) 𑀯𑀼𑀢𑁆𑀢𑀸 𑀧𑀼𑀩𑁆𑀩𑀓𑀺𑀭𑀺𑀬𑀸 𑀯𑀢𑁆𑀢𑀩𑁆𑀩𑀸. 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺 ¶ 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀢𑁆𑀣𑀸𑀬 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀘 𑀬𑀸𑀕𑀼𑀧𑀸𑀦𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑁂𑀯𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀦𑁆𑀢𑀺 𑀫𑀳𑀦𑁆𑀢𑀁, 𑀫𑀚𑁆𑀛𑀺𑀫𑀁, 𑀔𑀼𑀤𑁆𑀤𑀓𑀦𑁆𑀢𑀺 𑀢𑀻𑀡𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀉𑀧𑀦𑁂𑀢𑁆𑀯𑀸 𑀢𑀢𑁄 𑀬𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀕𑀡𑁆𑀳𑀸𑀢𑀺, 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑀫𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂 𑀅𑀦𑀺𑀬𑀫𑀁 𑀓𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀕𑀡𑁆𑀳𑀸𑀢𑀺, 𑀅𑀣 𑀬𑀸𑀤𑀺𑀲𑀁 𑀮𑀪𑀢𑀺, 𑀢𑀸𑀤𑀺𑀲𑀁 𑀤𑀸𑀢𑀩𑁆𑀩𑀁.

𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀫𑀼𑀔𑀥𑁄𑀯𑀦𑁄𑀤𑀓𑀁 𑀫𑀼𑀔𑁄𑀤𑀓𑀦𑁆𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀻𑀲𑀫𑀸𑀲𑁄, 𑀢𑀁 𑀤𑁂𑀦𑁆𑀢𑁂𑀦 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘 𑀉𑀤𑀓𑀁 𑀉𑀧𑀦𑁂𑀢𑁆𑀯𑀸 𑀢𑀢𑁄 𑀬𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀴𑀜𑁆𑀚𑁂𑀢𑀺, 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑀫𑁂𑀯 𑀫𑀼𑀔𑀥𑁄𑀯𑀦𑁄𑀤𑀓𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀅𑀦𑀺𑀬𑀫𑀁 𑀓𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀕𑀡𑁆𑀳𑀸𑀢𑀺, 𑀅𑀣 𑀬𑀸𑀤𑀺𑀲𑀁 𑀮𑀪𑀢𑀺, 𑀢𑀸𑀤𑀺𑀲𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀤𑀼𑀯𑀺𑀥𑀫𑁆𑀧𑀺 𑀯𑀴𑀜𑁆𑀚𑁂𑀢𑀺, 𑀤𑀼𑀯𑀺𑀥𑀫𑁆𑀧𑀺 𑀉𑀧𑀦𑁂𑀢𑀩𑁆𑀩𑀁. ‘‘𑀫𑀼𑀔𑁄𑀤𑀓𑀁 𑀫𑀼𑀔𑀥𑁄𑀯𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀝𑁆𑀞𑀸𑀦𑀸𑀦𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸𑀦𑀺. 𑀲𑀫𑁆𑀫𑀚𑁆𑀚𑀦𑁆𑀢𑁂𑀦 𑀘 𑀯𑀘𑁆𑀘𑀓𑀼𑀝𑀺𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀣𑁂𑀭𑁂 𑀯𑀘𑁆𑀘𑀓𑀼𑀝𑀺𑀁 𑀕𑀢𑁂 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀧𑀭𑀺𑀯𑁂𑀡𑀁 𑀅𑀲𑀼𑀜𑁆𑀜𑀁 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁬𑁪 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁.

𑀢𑀢𑁄 ¶ 𑀉𑀢𑁆𑀢𑀭𑀺𑀁 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀲𑁆𑀲 𑀓𑀸𑀮𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀆𑀘𑀭𑀺𑀬𑀲𑁆𑀲 𑀯𑀸. 𑀓𑀸𑀮𑁂𑀦𑀸𑀢𑀺 𑀬𑀸𑀕𑀼𑀧𑀸𑀦𑀓𑀸𑀮𑁂. 𑀇𑀥𑀸𑀧𑀺 ‘‘𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩’’𑀦𑁆𑀢𑀺 𑀲𑁂𑀲𑁄. 𑀬𑀣𑀸𑀳 ‘‘𑀣𑁂𑀭𑁂 𑀯𑀘𑁆𑀘𑀓𑀼𑀝𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑁂𑀬𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀲𑁆𑀲 ‘𑀲𑀘𑁂 𑀬𑀸𑀕𑀼 𑀳𑁄𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀯𑀢𑁆𑀢𑀁 𑀓𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁬𑁪).

𑀬𑀸𑀕𑀼 𑀢𑀲𑁆𑀲𑀼𑀧𑀦𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 ‘‘𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁬𑁬). 𑀲𑀗𑁆𑀖𑀢𑁄 𑀯𑀸𑀢𑀺 𑀲𑀮𑀸𑀓𑀸𑀤𑀺𑀯𑀲𑁂𑀦 𑀲𑀗𑁆𑀖𑀢𑁄 𑀮𑀩𑁆𑀪𑀫𑀸𑀦𑀸 𑀯𑀸. 𑀓𑀼𑀮𑀢𑁄𑀧𑀺 𑀯𑀸𑀢𑀺 𑀉𑀧𑀸𑀲𑀓𑀸𑀤𑀺𑀓𑀼𑀮𑀢𑁄 𑀯𑀸.

‘‘𑀧𑀢𑁆𑀢𑁂 𑀯𑀢𑁆𑀢𑀜𑁆𑀘 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 ‘‘𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁, 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁 ¶ . 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁬𑁬) 𑀆𑀕𑀢𑀯𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀤𑀺𑀯𑀸 𑀪𑀼𑀢𑁆𑀢𑀧𑀢𑁆𑀢𑁂𑀧𑀺 𑀓𑀸𑀢𑀩𑁆𑀩𑀁 𑀏𑀢𑁂𑀦𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀯𑀢𑁆𑀢𑀁 ‘‘𑀕𑀸𑀫𑀧𑁆𑀧𑀯𑁂𑀲𑀦𑁂’’𑀢𑀺 𑀇𑀤𑀁 ‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫𑀳𑀸𑀯. 𑁬𑁬) 𑀯𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁.

𑁨𑁪𑁭𑁪. 𑀘𑀻𑀯𑀭𑁂 𑀬𑀸𑀦𑀺 𑀯𑀢𑁆𑀢𑀸𑀦𑀻𑀢𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑀲𑁆𑀲 𑀘𑀻𑀯𑀭𑀤𑀸𑀦𑁂, 𑀧𑀝𑀺𑀦𑀺𑀯𑀢𑁆𑀢𑀲𑁆𑀲 𑀘𑀻𑀯𑀭𑀕𑁆𑀕𑀳𑀡𑀲𑀗𑁆𑀖𑀭𑀡𑀧𑀝𑀺𑀲𑀸𑀫𑀦𑁂𑀲𑀼 𑀫𑀳𑁂𑀲𑀺𑀦𑀸 𑀬𑀸𑀦𑀺 𑀯𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀘 𑀓𑀸𑀢𑀩𑁆𑀩𑀸𑀦𑀺. 𑀲𑁂𑀦𑀸𑀲𑀦𑁂 𑀢𑀣𑀸𑀢𑀺 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑀚𑁆𑀛𑀸𑀬𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 ¶ (𑀫𑀳𑀸𑀯. 𑁬𑁬) 𑀯𑀼𑀢𑁆𑀢𑀦𑀬𑁂𑀦 ‘‘𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑀺𑀢𑀁 𑀲𑁂𑀦𑀸𑀲𑀦𑀯𑀢𑁆𑀢𑀜𑁆𑀘.

𑀧𑀸𑀤𑀧𑀻𑀞𑀓𑀣𑀮𑀺𑀓𑀸𑀤𑀻𑀲𑀼 𑀢𑀣𑀸𑀢𑀺 𑀬𑁄𑀚𑀦𑀸. 𑀉𑀧𑀚𑁆𑀛𑀸𑀬𑁂 𑀕𑀸𑀫𑀢𑁄 𑀧𑀝𑀺𑀦𑀺𑀯𑀢𑁆𑀢𑁂 𑀘 𑀚𑀦𑁆𑀢𑀸𑀖𑀭𑁂 𑀘 ‘‘𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬) 𑀏𑀯𑀫𑀸𑀕𑀢𑀁 𑀯𑀢𑁆𑀢𑀜𑁆𑀘 𑀓𑀸𑀢𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀉𑀧𑀚𑁆𑀛𑀸𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺𑀯𑀢𑁆𑀢𑀁 (𑀫𑀳𑀸𑀯. 𑁬𑁬) 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁪𑁭𑁫. 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀢𑁆𑀢𑁂𑀲𑀼 𑀧𑀸𑀝𑀺𑀬𑁂𑀓𑁆𑀓𑀁 𑀤𑀲𑁆𑀲𑀺𑀬𑀫𑀸𑀦𑁂𑀲𑀼 𑀧𑀧𑀜𑁆𑀘𑁄𑀢𑀺 𑀔𑀦𑁆𑀥𑀓𑀁 𑀑𑀮𑁄𑀓𑁂𑀢𑁆𑀯𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀸𑀬 𑀕𑀡𑀦𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 ‘‘𑀏𑀯𑀫𑀸𑀤𑀻𑀦𑀻’’𑀢𑀺𑀆𑀤𑀺. 𑀭𑁄𑀕𑀢𑁄 𑀯𑀼𑀝𑁆𑀞𑀸𑀦𑀸𑀕𑀫𑀦𑀦𑁆𑀢𑀸𑀦𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀭𑁄𑀕𑀢𑁄 𑀯𑀼𑀝𑁆𑀞𑀸𑀦𑀸𑀕𑀫𑀦𑀧𑀭𑀺𑀬𑁄𑀲𑀸𑀦𑀸𑀦𑀺. 𑀲𑀢𑁆𑀢𑀢𑀺𑀁𑀲𑀲𑀢𑀁 𑀲𑀺𑀬𑀼𑀦𑁆𑀢𑀺 𑀲𑀢𑁆𑀢𑀢𑀺𑀁𑀲𑀸𑀥𑀺𑀓𑀲𑀢𑀯𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀢𑀸𑀦𑀺 𑀧𑀦 𑀯𑀢𑁆𑀢𑀸𑀦𑀺 𑀔𑀦𑁆𑀥𑀓𑀧𑀸𑀴𑀺𑀬𑀸 (𑀫𑀳𑀸𑀯. 𑁬𑁬) 𑀆𑀕𑀢𑀓𑁆𑀓𑀫𑁂𑀦 𑀏𑀯𑀁 𑀬𑀣𑀸𑀯𑀼𑀢𑁆𑀢𑀕𑀡𑀦𑀸𑀬 𑀲𑀫𑀸𑀦𑁂𑀢𑀩𑁆𑀩𑀸𑀦𑀺 𑁋 𑀤𑀦𑁆𑀢𑀓𑀝𑁆𑀞𑀤𑀸𑀦𑀁, 𑀫𑀼𑀔𑁄𑀤𑀓𑀤𑀸𑀦𑀁, 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼𑀬𑀸 𑀉𑀧𑀦𑀸𑀫𑀦𑀁, 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑀦𑀁, 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀲𑁆𑀲 𑀉𑀤𑁆𑀥𑀭𑀡𑀁, 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀦𑀺𑀯𑀸𑀲𑀦𑀤𑀸𑀦𑀁, 𑀧𑀝𑀺𑀦𑀺𑀯𑀸𑀲𑀦𑀧𑀝𑀺𑀕𑁆𑀕𑀳𑀡𑀁, 𑀓𑀸𑀬𑀩𑀦𑁆𑀥𑀦𑀤𑀸𑀦𑀁, 𑀲𑀕𑀼𑀡𑀁 𑀓𑀢𑁆𑀯𑀸 ¶ 𑀲𑀗𑁆𑀖𑀸𑀝𑀺𑀤𑀸𑀦𑀁, 𑀥𑁄𑀯𑀺𑀢𑁆𑀯𑀸 𑀲𑁄𑀤𑀓𑀧𑀢𑁆𑀢𑀲𑁆𑀲 𑀤𑀸𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 ¶ 𑀕𑀡𑁆𑀞𑀺𑀓𑀁 𑀧𑀭𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀕𑀫𑀦𑀁, 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑁂 𑀕𑀫𑀦𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀧𑀝𑀺𑀕𑁆𑀕𑀳𑀡𑀁, 𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸𑀑𑀧𑀸𑀢𑀦𑀁, 𑀉𑀧𑀚𑁆𑀛𑀸𑀬𑀲𑁆𑀲 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑀲𑁆𑀲 𑀘 𑀦𑀺𑀯𑀸𑀭𑀡𑀁, 𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀧𑀸𑀤𑁄𑀤𑀓𑀧𑀸𑀤𑀧𑀻𑀞𑀧𑀸𑀤𑀓𑀣𑀮𑀺𑀓𑀸𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀧𑀝𑀺𑀦𑀺𑀯𑀸𑀲𑀦𑀤𑀸𑀦𑀁, 𑀦𑀺𑀯𑀸𑀲𑀦𑀧𑀝𑀺𑀕𑁆𑀕𑀳𑀡𑀁, 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑀦𑀁, 𑀦𑁂𑀯 𑀉𑀡𑁆𑀳𑁂 𑀘𑀻𑀯𑀭𑀲𑁆𑀲 𑀦𑀺𑀤𑀳𑀦𑀁, 𑀫𑀚𑁆𑀛𑁂 𑀬𑀣𑀸 𑀪𑀗𑁆𑀕𑁄 𑀦 𑀳𑁄𑀢𑀺, 𑀏𑀯𑀁 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀲𑁆𑀲 𑀲𑀗𑁆𑀖𑀭𑀡𑀁, 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀲𑁆𑀲 𑀓𑀭𑀡𑀁, 𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀉𑀧𑀦𑀸𑀫𑀦𑀁, 𑀉𑀧𑀚𑁆𑀛𑀸𑀬𑀲𑁆𑀲 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑀁, 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑀦𑀁, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑀲𑁆𑀲 𑀦𑀺𑀤𑀳𑀦𑀁, 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑁋

𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀲𑁆𑀲 𑀉𑀤𑁆𑀥𑀭𑀡𑀁, 𑀧𑀸𑀤𑁄𑀤𑀓𑀧𑀸𑀤𑀧𑀻𑀞𑀧𑀸𑀤𑀓𑀣𑀮𑀺𑀓𑀸𑀦𑀁 𑀧𑀝𑀺𑀲𑀸𑀫𑀦𑀁, 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀦𑁆𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑁆𑀳𑀸𑀦𑀲𑁆𑀲 𑀧𑀝𑀺𑀬𑀸𑀤𑀦𑀁, 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀲𑁆𑀲 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀲𑁆𑀲 𑀧𑀝𑀺𑀬𑀸𑀤𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀲𑁆𑀲 ¶ 𑀲𑀦𑁆𑀦𑀬𑀦𑀁, 𑀫𑀢𑁆𑀢𑀺𑀓𑀸𑀢𑁂𑀫𑀦𑀁, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀉𑀧𑀚𑁆𑀛𑀸𑀬𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀘𑀼𑀡𑁆𑀡𑀤𑀸𑀦𑀁, 𑀫𑀢𑁆𑀢𑀺𑀓𑀸𑀤𑀸𑀦𑀁, 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁 𑁋

𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑁆𑀧𑀯𑁂𑀲𑁄, 𑀦 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀦𑀁, 𑀦 𑀦𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑁂𑀦 𑀧𑀝𑀺𑀩𑀸𑀳𑀦𑀁, 𑀚𑀦𑁆𑀢𑀸𑀖𑀭𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 ¶ 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑀁, 𑀉𑀤𑀓𑁂𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀓𑀭𑀡𑀁, 𑀦𑁆𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀲𑁆𑀲 𑀧𑀫𑀚𑁆𑀚𑀦𑀁, 𑀦𑀺𑀯𑀸𑀲𑀦𑀤𑀸𑀦𑀁, 𑀲𑀗𑁆𑀖𑀸𑀝𑀺𑀤𑀸𑀦𑀁, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀲𑁆𑀲 𑀧𑀜𑁆𑀜𑀸𑀧𑀦𑀁, 𑀧𑀸𑀤𑁄𑀤𑀓𑀧𑀸𑀤𑀧𑀻𑀞𑀧𑀸𑀤𑀓𑀣𑀮𑀺𑀓𑀸𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀁, 𑀉𑀧𑀚𑁆𑀛𑀸𑀬𑀲𑁆𑀲 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑀁, 𑀲𑀘𑁂 𑀉𑀤𑁆𑀤𑀺𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑁆𑀤𑀺𑀲𑀸𑀧𑀦𑀁, 𑀲𑀘𑁂 𑀧𑀭𑀺𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀺𑀧𑀼𑀘𑁆𑀙𑀦𑀁, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑀚𑁆𑀛𑀸𑀬𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀲𑁄𑀥𑀦𑀁, 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀲𑁆𑀲 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀲𑁆𑀲 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀫𑀜𑁆𑀘𑀲𑁆𑀲 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀻𑀞𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀧𑀻𑀞𑀲𑁆𑀲 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀻𑀞𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀫𑀜𑁆𑀘𑀧𑀝𑀺𑀧𑀸𑀤𑀓𑀸𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀔𑁂𑀴𑀫𑀮𑁆𑀮𑀓𑀲𑁆𑀲 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀅𑀧𑀲𑁆𑀲𑁂𑀦𑀨𑀮𑀓𑀲𑁆𑀲 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁, 𑀪𑀽𑀫𑀢𑁆𑀣𑀭𑀡𑀲𑁆𑀲 𑀬𑀣𑀸𑀧𑀜𑁆𑀜𑀢𑁆𑀢𑀲𑁆𑀲 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀦𑀁 ¶ , 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑀡𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸𑀦𑀁 𑀧𑀫𑀚𑁆𑀚𑀦𑀁, 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀦𑀁, 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀦𑀁, 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀧𑀫𑀚𑁆𑀚𑀦𑀁 ‘‘𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻’’𑀢𑀺, 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑀦𑀁, 𑀪𑀽𑀫𑀢𑁆𑀣𑀭𑀡𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑀦𑀁, 𑀫𑀜𑁆𑀘𑀧𑀝𑀺𑀧𑀸𑀤𑀓𑀸𑀦𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀝𑁆𑀞𑀸𑀦𑁂 𑀞𑀧𑀦𑀁, 𑀫𑀜𑁆𑀘𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀻𑀞𑀁 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑀦𑀁, 𑀧𑀻𑀞𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀻𑀞𑀁 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑀦𑀁, 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑀦𑀁, 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑀦𑀁, 𑀔𑁂𑀴𑀫𑀮𑁆𑀮𑀓𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀝𑁆𑀞𑀸𑀦𑁂 𑀞𑀧𑀦𑀁, 𑀅𑀧𑀲𑁆𑀲𑁂𑀦𑀨𑀮𑀓𑀲𑁆𑀲 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀝𑁆𑀞𑀸𑀦𑁂 𑀞𑀧𑀦𑀁, 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑁋

𑀧𑀢𑁆𑀢𑀁 ¶ 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 ¶ 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀲𑁆𑀲 𑀦𑀺𑀓𑁆𑀔𑀺𑀧𑀦𑀁, 𑀲𑀘𑁂 𑀧𑀼𑀭𑀢𑁆𑀣𑀺𑀫𑀸𑀬 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸𑀦𑀁 𑀯𑀸𑀢𑀧𑀸𑀦𑀸𑀦𑀁 𑀣𑀓𑀦𑀁, 𑀢𑀣𑀸 𑀧𑀘𑁆𑀙𑀺𑀫𑀸𑀦𑀁, 𑀢𑀣𑀸 𑀉𑀢𑁆𑀢𑀭𑀸𑀦𑀁, 𑀢𑀣𑀸 𑀤𑀓𑁆𑀔𑀺𑀡𑀸𑀦𑀁 𑀯𑀸𑀢𑀧𑀸𑀦𑀸𑀦𑀁 𑀣𑀓𑀦𑀁, 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸𑀦𑀁 𑀯𑀺𑀯𑀭𑀡𑀁, 𑀭𑀢𑁆𑀢𑀺𑀁 𑀣𑀓𑀦𑀁, 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸𑀦𑀁 𑀣𑀓𑀦𑀁, 𑀭𑀢𑁆𑀢𑀺𑀁 𑀯𑀺𑀯𑀭𑀡𑀁, 𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀲𑁆𑀲 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑀲𑁆𑀲 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀢𑀲𑁆𑀲𑀸 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀢𑀲𑁆𑀲𑀸 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀢𑀲𑁆𑀲𑀸 𑀲𑀫𑁆𑀫𑀚𑁆𑀚𑀦𑀁, 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀲𑁆𑀲 𑀉𑀧𑀝𑁆𑀞𑀸𑀧𑀦𑀁, 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀲𑁆𑀲 𑀉𑀧𑀝𑁆𑀞𑀸𑀧𑀦𑀁, 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀲𑁆𑀲 𑀆𑀲𑀺𑀜𑁆𑀘𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀽𑀧𑀓𑀸𑀲𑀦𑀁 𑀯𑀽𑀧𑀓𑀸𑀲𑀸𑀧𑀦𑀁 𑀯𑀸, 𑀥𑀫𑁆𑀫𑀓𑀣𑀸𑀬 𑀯𑀸 𑀢𑀲𑁆𑀲 𑀓𑀭𑀡𑀁, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀦𑁄𑀤𑀦𑀁 𑀯𑀺𑀦𑁄𑀤𑀸𑀧𑀦𑀁 𑀯𑀸, 𑀥𑀫𑁆𑀫𑀓𑀣𑀸𑀬 𑀯𑀸 𑀢𑀲𑁆𑀲 𑀓𑀭𑀡𑀁, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀯𑁂𑀘𑀦𑀁 𑀯𑀺𑀯𑁂𑀘𑀸𑀧𑀦𑀁 𑀯𑀸, 𑀥𑀫𑁆𑀫𑀓𑀣𑀸𑀬 𑀯𑀸 𑀢𑀲𑁆𑀲 𑀓𑀭𑀡𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 ¶ 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀅𑀩𑁆𑀪𑁂𑀬𑁆𑀬𑀸’’𑀢𑀺, 𑀲𑀘𑁂 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺, 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺 ¶ , 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀥𑁄𑀯𑀦𑀁 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 𑀯𑀸 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀓𑀭𑀡𑀁 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 𑀯𑀸 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀧𑀘𑀦𑀁 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 𑀯𑀸 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸’’𑀢𑀺, 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑁂𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀭𑀚𑀦𑀁 𑀉𑀲𑁆𑀲𑀼𑀓𑁆𑀓𑀓𑀭𑀡𑀁 𑀯𑀸 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸’’𑀢𑀺, 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀦𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀦𑀁, 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑀤𑀸𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁, 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀤𑀸𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑀤𑀸𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑀧𑀝𑀺𑀕𑁆𑀕𑀳𑀡𑀁, 𑀦 𑀏𑀓𑀘𑁆𑀘𑀲𑁆𑀲 𑀓𑁂𑀲𑀘𑁆𑀙𑁂𑀤𑀦𑀁, 𑀦 𑀏𑀓𑀘𑁆𑀘𑁂𑀦 𑀓𑁂𑀲𑀸𑀦𑀁 𑀙𑁂𑀤𑀸𑀧𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑀫𑁆𑀫𑀓𑀭𑀡𑀁, 𑀦 𑀏𑀓𑀘𑁆𑀘𑁂𑀦 𑀧𑀭𑀺𑀓𑀫𑁆𑀫𑀲𑁆𑀲 𑀓𑀸𑀭𑀸𑀧𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀁, 𑀦 𑀏𑀓𑀘𑁆𑀘𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲 ¶ 𑀓𑀸𑀭𑀸𑀧𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀕𑀫𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑀲𑁆𑀲 𑀆𑀤𑀸𑀦𑀁, 𑀦 𑀏𑀓𑀘𑁆𑀘𑀲𑁆𑀲 𑀧𑀺𑀡𑁆𑀟𑀧𑀸𑀢𑀲𑁆𑀲 𑀦𑀻𑀳𑀭𑀡𑀁, 𑀦 𑀏𑀓𑀘𑁆𑀘𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀭𑀸𑀧𑀦𑀁, 𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑀧𑁆𑀧𑀯𑁂𑀲𑀦𑀁, 𑀦 𑀲𑀼𑀲𑀸𑀦𑀕𑀫𑀦𑀁, 𑀦 𑀤𑀺𑀲𑀸𑀧𑀓𑁆𑀓𑀫𑀦𑀁, 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀦𑀁, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑀦𑀦𑁆𑀢𑀺 𑀢𑁂𑀲𑀼 𑀓𑀸𑀦𑀺𑀘𑀺 𑀯𑀢𑁆𑀢𑀸𑀦𑀺 𑀲𑀯𑀺𑀪𑀢𑁆𑀢𑀺𑀓𑀸𑀦𑀺, 𑀓𑀸𑀦𑀺𑀘𑀺 𑀅𑀯𑀺𑀪𑀢𑁆𑀢𑀺𑀓𑀸𑀦𑀺, 𑀢𑁂𑀲𑀼 𑀅𑀯𑀺𑀪𑀢𑁆𑀢𑀺𑀓𑀸𑀦𑀁 𑀯𑀺𑀪𑀸𑀕𑁂 𑀯𑀼𑀘𑁆𑀘𑀫𑀸𑀦𑁂 𑀬𑀣𑀸𑀯𑀼𑀢𑁆𑀢𑀕𑀡𑀦𑀸𑀬 𑀅𑀢𑀺𑀭𑁂𑀓𑀢𑀭𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀧𑀦 𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀺𑀡𑁆𑀟𑀯𑀲𑁂𑀦 𑀕𑀳𑁂𑀢𑁆𑀯𑀸 𑀬𑀣𑀸 𑀅𑀬𑀁 𑀕𑀡𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁪𑁭𑁬. 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀯𑀢𑁆𑀢’’𑀦𑁆𑀢𑀺 𑀲𑁂𑀲𑁄. 𑀅𑀦𑀸𑀤𑀭𑀯𑀲𑁂𑀦𑁂𑀯 𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑁂𑀦 𑀯𑀢𑁆𑀢𑀪𑁂𑀤𑁂𑀦 𑀯𑀢𑁆𑀢𑀸𑀓𑀭𑀡𑁂𑀦 𑀲𑀩𑁆𑀩𑀢𑁆𑀣 𑀲𑀢𑁆𑀢𑀢𑀺𑀁𑀲𑀸𑀥𑀺𑀓𑀲𑀢𑀧𑁆𑀧𑀪𑁂𑀤𑀝𑁆𑀞𑀸𑀦𑁂 𑀢𑀢𑁆𑀢𑀓𑀁𑀬𑁂𑀯 𑀤𑀼𑀓𑁆𑀓𑀝𑀁 𑀧𑀓𑀸𑀲𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁨𑁪𑁭𑁭. 𑀏𑀯𑀁 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀯𑀢𑁆𑀢𑀸𑀦𑀺 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀻𑀦𑀁 𑀓𑀸𑀢𑀩𑁆𑀩𑀯𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀧𑀚𑁆𑀛𑀸𑀬𑀲𑁆𑀲 𑀯𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀉𑀧𑀚𑁆𑀛𑀸𑀬𑀲𑁆𑀲 𑀯𑀢𑁆𑀢𑀸𑀦𑀻𑀢𑀺 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂 𑀓𑀢𑁆𑀢𑀩𑁆𑀩𑀢𑁆𑀢𑀸 𑀉𑀧𑀚𑁆𑀛𑀸𑀬𑀸𑀬𑀢𑁆𑀢𑀯𑀢𑁆𑀢𑀸𑀦𑀻𑀢𑀺 ¶ 𑀅𑀢𑁆𑀣𑁄. 𑀢𑀣𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀢𑀺 𑀬𑀣𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀧𑀚𑁆𑀛𑀸𑀬𑀲𑁆𑀲 𑀓𑀸𑀢𑀩𑁆𑀩𑀸𑀦𑀺, 𑀢𑀣𑀸 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀓𑀸𑀢𑀩𑁆𑀩𑀸𑀦𑀺.

𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀯𑀢𑁆𑀢𑁂𑀲𑀼 𑀕𑀸𑀫𑀧𑁆𑀧𑀯𑁂𑀲𑁂 𑀧𑀘𑁆𑀙𑀸𑀲𑀫𑀡𑁂𑀦 𑀳𑀼𑀢𑁆𑀯𑀸 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀕𑀫𑀦𑀁, 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸𑀑𑀧𑀸𑀢𑀦𑀁, 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑀲𑁆𑀲 𑀦𑀺𑀯𑀸𑀭𑀡𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀘𑀢𑁆𑀢𑀸𑀭𑀺 𑀯𑀢𑁆𑀢𑀸𑀦𑀺, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑀤𑀸𑀦𑀸𑀤𑀺𑀅𑀦𑀸𑀧𑀼𑀘𑁆𑀙𑀸𑀤𑀺𑀲𑀸𑀧𑀓𑁆𑀓𑀫𑀦𑀸𑀯𑀲𑀸𑀦𑀸𑀦𑀺 𑀯𑀻𑀲𑀢𑀺 𑀧𑀝𑀺𑀓𑁆𑀔𑁂𑀧𑀸 𑀘𑁂𑀢𑀺 𑀏𑀢𑀸𑀦𑀺 ¶ 𑀘𑀢𑀼𑀯𑀻𑀲𑀢𑀺 𑀯𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀢𑁂𑀭𑀲𑀸𑀥𑀺𑀓𑀲𑀢𑀯𑀢𑁆𑀢𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀲𑀢𑀁 𑀢𑁂𑀭𑀲 𑀳𑁄𑀦𑁆𑀢𑁂𑀯𑀸’’𑀢𑀺, 𑀢𑁂𑀭𑀲𑀸𑀥𑀺𑀓𑀲𑀢𑀯𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀧𑀺 𑀘 𑀓𑀸𑀢𑀩𑁆𑀩𑀯𑀢𑁆𑀢𑀸𑀦𑀺 𑀢𑀣𑀸 𑀢𑀢𑁆𑀢𑀓𑀸𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸.

𑁨𑁪𑁭𑁮. 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀓𑁆𑀓𑀦𑁆𑀢𑁂 𑀯𑀸𑀧𑀻’’𑀢𑀺𑀆𑀤𑀺. 𑀧𑀓𑁆𑀓𑀦𑁆𑀢𑁂 𑀯𑀸𑀧𑀺 𑀯𑀺𑀩𑁆𑀪𑀦𑁆𑀢𑁂 𑀯𑀸𑀧𑀺 𑀧𑀓𑁆𑀔𑀲𑀗𑁆𑀓𑀦𑁆𑀢𑁂 𑀯𑀸𑀧𑀺 𑀫𑀢𑁂 𑀯𑀸𑀧𑀺 𑀆𑀡𑀢𑁆𑀢𑀺𑀬𑀸 𑀯𑀸𑀧𑀺 𑀏𑀯𑀁 𑀧𑀜𑁆𑀘𑀥𑀸 𑀉𑀧𑀚𑁆𑀛𑀸𑀬𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀕𑀳𑀺𑀢𑁄 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀬𑁄𑀚𑀦𑀸. 𑀧𑀓𑁆𑀓𑀦𑁆𑀢𑁂𑀢𑀺 𑀢𑀤𑀳𑀼 𑀅𑀧𑀘𑁆𑀘𑀸𑀕𑀦𑁆𑀢𑀼𑀓𑀸𑀫𑀢𑀸𑀬 𑀤𑀺𑀲𑀁 𑀕𑀢𑁂. 𑀯𑀺𑀩𑁆𑀪𑀦𑁆𑀢𑁂𑀢𑀺 𑀕𑀺𑀳𑀺𑀪𑀸𑀯𑀁 𑀧𑀢𑁆𑀢𑁂. 𑀧𑀓𑁆𑀔𑀲𑀗𑁆𑀓𑀦𑁆𑀢𑀓𑁂𑀢𑀺 𑀢𑀺𑀢𑁆𑀣𑀺𑀬𑀸𑀬𑀢𑀦𑀁 𑀕𑀢𑁂. 𑀫𑀢𑁂𑀢𑀺 𑀓𑀸𑀮𑀓𑀢𑁂. 𑀆𑀡𑀢𑁆𑀢𑀺𑀬𑀸𑀢𑀺 𑀦𑀺𑀲𑁆𑀲𑀬𑀧𑀡𑀸𑀫𑀦𑁂𑀦.

𑁨𑁪𑁭𑁯-𑁮𑁦. 𑀆𑀘𑀭𑀺𑀬𑀫𑁆𑀳𑀸𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀕𑀳𑀺𑀢𑀦𑀺𑀲𑁆𑀲𑀬𑀲𑁆𑀲 𑀪𑁂𑀤𑀦𑀁 𑀙𑀥𑀸 𑀙𑀧𑁆𑀧𑀓𑀸𑀭𑁂𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑀣𑀦𑁆𑀢𑀺 𑀆𑀳 ‘‘𑀧𑀓𑁆𑀓𑀦𑁆𑀢𑁂 𑀘𑀸’’𑀢𑀺𑀆𑀤𑀺. 𑀢𑀁 𑀉𑀧𑀚𑁆𑀛𑀸𑀬𑀢𑁄 𑀦𑀺𑀲𑁆𑀲𑀬𑀪𑁂𑀤𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀲𑁂𑀲𑀁 𑀧𑀦 𑀲𑀬𑀫𑁂𑀯 𑀯𑀓𑁆𑀔𑀢𑀺 ‘‘𑀆𑀡𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸. 𑀆𑀡𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄 𑀧𑀦-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀉𑀪𑀺𑀦𑁆𑀦𑀫𑁆𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀦𑁂𑀧𑀺 𑀘𑀸𑀢𑀺 𑀆𑀘𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀧𑀡𑀸𑀫𑀦𑁂 𑀧𑀦 𑀉𑀪𑀺𑀦𑁆𑀦𑀁 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁𑀬𑁂𑀯 𑀅𑀜𑁆𑀜𑀫𑀜𑁆𑀜𑀦𑀺𑀭𑀸𑀮𑀬𑀪𑀸𑀯𑁂 𑀲𑀢𑀺 𑀦𑀺𑀲𑁆𑀲𑀬𑀪𑁂𑀤𑁄 𑀳𑁄𑀢𑀺, 𑀦 𑀏𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀤𑀴𑁆𑀳𑀻𑀓𑀭𑁄𑀢𑀺 ‘‘𑀏𑀓𑁂𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀏𑀓𑁂𑀓𑀲𑁆𑀲 𑀯𑀸 𑀉𑀪𑀺𑀦𑁆𑀦𑀁 𑀯𑀸 𑀆𑀮𑀬𑁂 𑀲𑀢𑀺 𑀦 𑀪𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋

‘‘𑀆𑀡𑀢𑁆𑀢𑀺𑀬𑀁 ¶ ¶ 𑀧𑀦 𑀲𑀘𑁂𑀧𑀺 𑀆𑀘𑀭𑀺𑀬𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀬 𑀧𑀡𑀸𑀫𑁂𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘 ‘𑀓𑀺𑀜𑁆𑀘𑀸𑀧𑀺 𑀫𑀁 𑀆𑀘𑀭𑀺𑀬𑁄 𑀧𑀡𑀸𑀫𑁂𑀢𑀺, 𑀅𑀣 𑀔𑁄 𑀳𑀤𑀬𑁂𑀦 𑀫𑀼𑀤𑀼𑀓𑁄’𑀢𑀺 𑀲𑀸𑀮𑀬𑁄𑀯 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺𑀬𑁂𑀯. 𑀲𑀘𑁂𑀧𑀺 𑀆𑀘𑀭𑀺𑀬𑁄 𑀲𑀸𑀮𑀬𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀺𑀭𑀸𑀮𑀬𑁄 ‘𑀦 𑀤𑀸𑀦𑀺 𑀇𑀫𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀫𑁆𑀧𑀺 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀉𑀪𑀺𑀦𑁆𑀦𑀁 𑀲𑀸𑀮𑀬𑀪𑀸𑀯𑁂 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺𑀬𑁂𑀯. 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁮𑁩).

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀆𑀘𑀭𑀺𑀬𑀸𑀡𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑀪𑁂𑀤𑁂𑀬𑁂𑀯 𑀤𑀲𑁆𑀲𑀺𑀢𑁄, 𑀦 𑀉𑀧𑀚𑁆𑀛𑀸𑀬𑀸𑀡𑀢𑁆𑀢𑀺𑀬𑀸. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 ‘‘𑀲𑀘𑁂𑀧𑀺 𑀆𑀘𑀭𑀺𑀬𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀬 𑀧𑀡𑀸𑀫𑁂𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀲𑁆𑀲 𑀆𑀡𑀢𑁆𑀢𑀺𑀬𑀫𑁆𑀧𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁪𑁮𑁧. 𑀏𑀯𑀁 𑀧𑀜𑁆𑀘 𑀲𑀸𑀥𑀸𑀭𑀡𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀅𑀲𑀸𑀥𑀸𑀭𑀡𑀗𑁆𑀕𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦-𑀕𑀢𑀲𑁆𑀲𑀸𑀧𑀺 𑀘 𑀪𑀺𑀚𑁆𑀚𑀢𑀻’’𑀢𑀺. 𑀢𑀢𑁆𑀣 𑀲𑀫𑁄𑀥𑀸𑀦𑀕𑀫𑀦𑀁 𑀲𑀭𑀽𑀧𑀢𑁄, 𑀧𑀪𑁂𑀤𑀢𑁄 𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀲𑁆𑀲𑀦𑀁 𑀲𑀯𑀦𑀜𑁆𑀘𑀸𑀢𑀺, 𑀲𑀫𑁄𑀥𑀸𑀦𑀁 𑀤𑁆𑀯𑀺𑀥𑀸 𑀫𑀢’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁮𑁩) 𑀕𑀳𑁂𑀢𑀩𑁆𑀩𑁄. 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀻𑀭𑀽𑀦𑀁 𑀅𑀦𑀼𑀕𑁆𑀕𑀳𑀸𑀬 𑀧𑀦 𑀇𑀥 𑀦 𑀯𑀺𑀢𑁆𑀣𑀸𑀭𑀺𑀢𑁄.

𑁨𑁪𑁮𑁨-𑁩. 𑀲𑀪𑀸𑀕𑁂 𑀤𑀸𑀬𑀓𑁂 𑀅𑀲𑀦𑁆𑀢𑁂 𑀅𑀤𑁆𑀥𑀺𑀓𑀲𑁆𑀲 𑀘 𑀕𑀺𑀮𑀸𑀦𑀲𑁆𑀲 𑀘 ‘‘𑀕𑀺𑀮𑀸𑀦𑁂𑀦 𑀫𑀁 𑀉𑀧𑀝𑁆𑀞𑀳𑀸’’𑀢𑀺 𑀬𑀸𑀘𑀺𑀢𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀘 𑀦𑀺𑀲𑁆𑀲𑀬𑀁 𑀯𑀺𑀦𑀸 𑀯𑀲𑀺𑀢𑀼𑀁 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸 ¶ . ‘‘𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁. 𑀇𑀫𑀺𑀦𑀸 𑀲𑀪𑀸𑀕𑁂 𑀦𑀺𑀲𑁆𑀲𑀬𑀤𑀸𑀬𑀓𑁂 𑀲𑀦𑁆𑀢𑁂 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦 𑀮𑀩𑁆𑀪𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀢𑁆𑀢𑀦𑁄 𑀯𑀦𑁂 𑀨𑀸𑀲𑀼𑀯𑀺𑀳𑀸𑀭𑀢𑀁 𑀚𑀸𑀦𑀢𑀸𑀢𑀺 𑀅𑀢𑁆𑀢𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀮𑀸𑀪𑀲𑁆𑀲 𑀯𑀦𑁂 𑀨𑀸𑀲𑀼𑀯𑀺𑀳𑀸𑀭𑀁 𑀚𑀸𑀦𑀦𑁆𑀢𑁂𑀦𑀧𑀺. ‘‘𑀲𑀪𑀸𑀕𑁂 𑀤𑀸𑀬𑀓𑁂 𑀅𑀲𑀦𑁆𑀢𑁂’’𑀢𑀺 𑀧𑀤𑀘𑁆𑀙𑁂𑀤𑁄. 𑀲𑀩𑁆𑀩𑀫𑁂𑀢𑀁 𑀯𑀺𑀥𑀸𑀦𑀁 𑀅𑀦𑁆𑀢𑁄𑀯𑀲𑁆𑀲𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀕𑀳𑁂𑀢𑀩𑁆𑀩𑁄.

𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀓𑀣𑀸𑀯𑀡𑁆𑀡𑀦𑀸.

𑁨𑁪𑁮𑁪. 𑀓𑀼𑀝𑁆𑀞𑀫𑀲𑁆𑀲 ¶ 𑀅𑀢𑁆𑀣𑀻𑀢𑀺 𑀓𑀼𑀝𑁆𑀞𑀻, 𑀢𑀁. ‘‘𑀕𑀡𑁆𑀟𑀺’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀭𑀢𑁆𑀢𑀲𑁂𑀢𑀸𑀤𑀺𑀪𑁂𑀤𑁂𑀦 𑀬𑁂𑀦 𑀓𑁂𑀦𑀘𑀺 𑀓𑀼𑀝𑁆𑀞𑁂𑀦 𑀯𑁂𑀯𑀡𑁆𑀡𑀺𑀬𑀁 𑀧𑀢𑁆𑀢𑀲𑀭𑀻𑀭𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

‘‘𑀭𑀢𑁆𑀢𑀓𑀼𑀝𑁆𑀞𑀁 𑀯𑀸 𑀳𑁄𑀢𑀼 𑀓𑀸𑀴𑀓𑀼𑀝𑁆𑀞𑀁 𑀯𑀸, 𑀬𑀁 𑀓𑀺𑀜𑁆𑀘𑀺 𑀓𑀺𑀝𑀺𑀪𑀤𑀤𑁆𑀤𑀼𑀓𑀘𑁆𑀙𑀼𑀆𑀤𑀺𑀧𑁆𑀧𑀪𑁂𑀤𑀫𑁆𑀧𑀺 𑀲𑀩𑁆𑀩𑀁 𑀓𑀼𑀝𑁆𑀞𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀺 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀳𑀺 𑀧𑀓𑀢𑀺𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀺. 𑀫𑀼𑀔𑁂, 𑀧𑀦 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑁂𑀲𑀼 𑀯𑀸 𑀲𑀘𑁂𑀧𑀺 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀦𑀔𑀧𑀺𑀝𑁆𑀞𑀺𑀢𑁄 𑀔𑀼𑀤𑁆𑀤𑀓𑀧𑀫𑀸𑀡𑀫𑁆𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀢𑀁 𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁂𑀦𑀸𑀧𑀺 𑀧𑀓𑀢𑀺𑀯𑀡𑁆𑀡𑁂 𑀚𑀸𑀢𑁂𑀬𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁮𑁮).

𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 ‘‘𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀕𑀡𑁆𑀟𑀺𑀦𑁆𑀢𑀺 ¶ 𑀫𑁂𑀤𑀕𑀡𑁆𑀟𑀸𑀤𑀺𑀕𑀡𑁆𑀟𑀪𑁂𑀤𑀯𑀦𑁆𑀢𑀁. 𑀬𑀣𑀸𑀳 ‘‘𑀫𑁂𑀤𑀕𑀡𑁆𑀟𑁄 𑀯𑀸 𑀳𑁄𑀢𑀼 𑀅𑀜𑁆𑀜𑁄 𑀯𑀸, 𑀬𑁄 𑀓𑁄𑀘𑀺 𑀓𑁄𑀮𑀝𑁆𑀞𑀺𑀫𑀢𑁆𑀢𑀓𑁄𑀧𑀺 𑀘𑁂 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁄 𑀕𑀡𑁆𑀟𑁄 𑀳𑁄𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺𑀆𑀤𑀺 (𑀫𑀳𑀸𑀯. 𑀅𑀝𑁆𑀞. 𑁮𑁮). 𑀓𑁄𑀮𑀝𑁆𑀞𑀻𑀢𑀺 𑀩𑀤𑀭𑀝𑁆𑀞𑀺. 𑀓𑀺𑀮𑀸𑀲𑀺𑀦𑁆𑀢𑀺 𑀓𑀺𑀮𑀸𑀲𑀯𑀦𑁆𑀢𑀁. 𑀬𑀣𑀸𑀳 𑁋 ‘‘𑀓𑀺𑀮𑀸𑀲𑁄𑀢𑀺 𑀦𑀪𑀺𑀚𑁆𑀚𑀦𑀓𑀁 𑀦𑀧𑀕𑁆𑀖𑀭𑀡𑀓𑀁 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀧𑀢𑁆𑀢𑀯𑀡𑁆𑀡𑀁 𑀓𑀼𑀝𑁆𑀞𑀁, 𑀬𑁂𑀦 𑀕𑀼𑀦𑁆𑀦𑀁 𑀯𑀺𑀬 𑀲𑀩𑀮𑀁 𑀲𑀭𑀻𑀭𑀁 𑀳𑁄𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁮𑁮). 𑀘-𑀲𑀤𑁆𑀤𑁄 𑀲𑀩𑁆𑀩𑁂𑀳𑀺 𑀉𑀧𑀬𑁄𑀕𑀯𑀦𑁆𑀢𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀲𑁄𑀲𑀺𑀦𑁆𑀢𑀺 𑀔𑀬𑀭𑁄𑀕𑀯𑀦𑁆𑀢𑀁. 𑀬𑀣𑀸𑀳 𑁋 ‘‘𑀲𑁄𑀲𑁄𑀢𑀺 𑀲𑁄𑀲𑀩𑁆𑀬𑀸𑀥𑀺. 𑀢𑀲𑁆𑀫𑀺𑀁 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁮𑁮). 𑀅𑀧𑀫𑀸𑀭𑀺𑀓𑀦𑁆𑀢𑀺 𑀅𑀧𑀫𑀸𑀭𑀯𑀦𑁆𑀢𑀁. 𑀬𑀣𑀸𑀳 𑁋 ‘‘𑀅𑀧𑀫𑀸𑀭𑁄𑀢𑀺 𑀧𑀺𑀢𑁆𑀢𑀼𑀫𑁆𑀫𑀸𑀭𑁄 𑀯𑀸 𑀬𑀓𑁆𑀔𑀼𑀫𑁆𑀫𑀸𑀭𑁄 𑀯𑀸. 𑀢𑀢𑁆𑀣 𑀧𑀼𑀩𑁆𑀩𑀯𑁂𑀭𑀺𑀓𑁂𑀦 𑀅𑀫𑀦𑀼𑀲𑁆𑀲𑁂𑀦 𑀕𑀳𑀺𑀢𑁄 𑀤𑀼𑀢𑁆𑀢𑀺𑀓𑀺𑀘𑁆𑀙𑁄 𑀳𑁄𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀦 𑀅𑀧𑀫𑀸𑀭𑁂 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺.

𑀭𑀸𑀚𑀪𑀝𑀦𑁆𑀢𑀺 𑀭𑀜𑁆𑀜𑁄 𑀪𑀢𑁆𑀢𑀯𑁂𑀢𑀦𑀪𑀝𑀁 𑀯𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀭𑀸𑀚𑀧𑀼𑀭𑀺𑀲𑀁. 𑀬𑀣𑀸𑀳 𑁋 ‘‘𑀅𑀫𑀘𑁆𑀘𑁄 𑀯𑀸 𑀳𑁄𑀢𑀼 𑀫𑀳𑀸𑀫𑀢𑁆𑀢𑁄 𑀯𑀸 𑀲𑁂𑀯𑀓𑁄 𑀯𑀸 𑀓𑀺𑀜𑁆𑀘𑀺 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀸 𑀅𑀧𑁆𑀧𑀢𑁆𑀢𑁄 𑀯𑀸, 𑀬𑁄 𑀓𑁄𑀘𑀺 𑀭𑀜𑁆𑀜𑁄 𑀪𑀢𑁆𑀢𑀯𑁂𑀢𑀦𑀪𑀝𑁄. 𑀲𑀩𑁆𑀩𑁄 ‘𑀭𑀸𑀚𑀪𑀝𑁄’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺. 𑀘𑁄𑀭𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀅𑀧𑁆𑀧𑀫𑀸𑀤𑀦𑀁 𑀕𑀸𑀫𑀖𑀸𑀢𑀧𑀦𑁆𑀣𑀖𑀸𑀢𑀸𑀤𑀺𑀓𑀫𑁆𑀫𑁂𑀦 𑀧𑀸𑀓𑀝𑀁 𑀘𑁄𑀭𑀜𑁆𑀘. 𑀮𑀺𑀔𑀺𑀢𑀓𑀦𑁆𑀢𑀺 𑀬𑀁 𑀓𑀜𑁆𑀘𑀺 𑀘𑁄𑀭𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀕𑀭𑀼𑀁 𑀭𑀸𑀚𑀸𑀧𑀭𑀸𑀥𑀁 𑀓𑀢𑁆𑀯𑀸 𑀧𑀮𑀸𑀢𑀁, 𑀭𑀸𑀚𑀸 𑀘 𑀦𑀁 𑀧𑀡𑁆𑀡𑁂 𑀯𑀸 𑀧𑁄𑀢𑁆𑀣𑀓𑁂 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑁄 ¶ 𑀬𑀢𑁆𑀣 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀸 ‘‘𑀳𑀢𑁆𑀣𑀧𑀸𑀤𑀸𑀤𑀻𑀦𑀺𑀲𑁆𑀲 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀤𑀡𑁆𑀟𑀁 𑀳𑀭𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀸 𑀮𑀺𑀔𑀸𑀧𑁂𑀢𑀺, 𑀏𑀯𑀭𑀽𑀧𑀁 𑀮𑀺𑀔𑀺𑀢𑀓𑀁.

‘‘𑀓𑀸𑀭𑀪𑁂𑀤𑀓’’𑀦𑁆𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄 𑀓𑀢𑁄. 𑀓𑀸𑀭𑀪𑁂𑀤𑀓𑀦𑁆𑀢𑀺 𑀤𑀸𑀢𑀩𑁆𑀩𑀓𑀭𑀲𑁆𑀲 𑀯𑀸 𑀓𑀢𑀘𑁄𑀭𑀓𑀫𑁆𑀫𑀲𑁆𑀲 𑀯𑀸 𑀓𑀸𑀭𑀡𑀸 ¶ 𑀓𑀸𑀭𑀸𑀖𑀭𑁂 𑀧𑀓𑁆𑀔𑀺𑀢𑁆𑀢𑁄 𑀯𑀸 𑀦𑀺𑀕𑀴𑀩𑀦𑁆𑀥𑀦𑀸𑀤𑀻𑀳𑀺 𑀩𑀤𑁆𑀥𑁄 𑀯𑀸, 𑀢𑀢𑁄 𑀲𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀏𑀯𑀭𑀽𑀧𑀁 𑀓𑀸𑀭𑀸𑀪𑁂𑀤𑀓𑀜𑁆𑀘. 𑀬𑀣𑀸𑀳 𑁋 ‘‘𑀓𑀸𑀭𑀸 𑀯𑀼𑀘𑁆𑀘𑀢𑀺 𑀩𑀦𑁆𑀥𑀦𑀸𑀕𑀸𑀭𑀁, 𑀇𑀥 𑀧𑀦 𑀅𑀦𑁆𑀤𑀼𑀩𑀦𑁆𑀥𑀦𑀁 𑀯𑀸 𑀳𑁄𑀢𑀼 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑀁 𑀯𑀸 𑀕𑀸𑀫𑀩𑀦𑁆𑀥𑀦𑀁 𑀯𑀸 𑀦𑀺𑀕𑀫𑀩𑀦𑁆𑀥𑀦𑀁 𑀯𑀸 𑀦𑀕𑀭𑀩𑀦𑁆𑀥𑀦𑀁 𑀯𑀸 𑀧𑀼𑀭𑀺𑀲𑀕𑀼𑀢𑁆𑀢𑀺 𑀯𑀸 𑀚𑀦𑀧𑀤𑀩𑀦𑁆𑀥𑀦𑀁 𑀯𑀸 𑀤𑀻𑀧𑀩𑀦𑁆𑀥𑀦𑀁 𑀯𑀸, 𑀬𑁄 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀧𑀲𑁆𑀲𑀫𑀸𑀦𑀸𑀦𑀁 𑀯𑀸 𑀅𑀧𑀲𑁆𑀲𑀫𑀸𑀦𑀸𑀦𑀁 𑀯𑀸 𑀧𑀮𑀸𑀬𑀢𑀺, 𑀲𑁄 ‘𑀓𑀸𑀭𑀸𑀪𑁂𑀤𑀓𑁄’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁯𑁨).

𑁨𑁪𑁮𑁫. 𑀓𑀲𑀸𑀳𑀢𑀦𑁆𑀢𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸 ‘‘𑀅𑀬𑀫𑁂𑀯 𑀢𑁂 𑀤𑀡𑁆𑀟𑁄 𑀳𑁄𑀢𑀽’’𑀢𑀺 𑀓𑀲𑀸𑀤𑀺𑀦𑀸 𑀤𑀺𑀦𑁆𑀦𑀧𑁆𑀧𑀳𑀸𑀭𑀁 𑀅𑀯𑀽𑀧𑀲𑀦𑁆𑀢𑀯𑀡𑀁. 𑀬𑀣𑀸𑀳 𑁋

‘‘𑀬𑁄 𑀯𑀘𑀦𑀧𑁂𑀲𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀳𑀜𑁆𑀜𑀢𑀺, 𑀦 𑀲𑁄 𑀓𑀢𑀤𑀡𑁆𑀟𑀓𑀫𑁆𑀫𑁄. 𑀬𑁄 𑀧𑀦 𑀓𑁂𑀡𑀺𑀬𑀸 𑀯𑀸 𑀅𑀜𑁆𑀜𑀣𑀸 𑀯𑀸 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘𑀅𑀬𑀫𑁂𑀯 𑀢𑁂 𑀤𑀡𑁆𑀟𑁄 𑀳𑁄𑀢𑀽’𑀢𑀺 𑀓𑀲𑀸𑀳𑀺 𑀳𑀜𑁆𑀜𑀢𑀺, 𑀅𑀬𑀁 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄. 𑀬𑁄 𑀘 𑀓𑀲𑀸𑀳𑀺 𑀯𑀸 𑀳𑀢𑁄 𑀳𑁄𑀢𑀼 𑀅𑀤𑁆𑀥𑀤𑀡𑁆𑀟𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀬𑀸𑀯 𑀅𑀮𑁆𑀮𑀯𑀡𑁄 𑀳𑁄𑀢𑀺, 𑀢𑀸𑀯 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁯𑁪).

𑀮𑀓𑁆𑀔𑀡𑀸𑀳𑀢𑀦𑁆𑀢𑀺 𑀏𑀓𑀁𑀲𑀁 𑀓𑀢𑁆𑀯𑀸 𑀧𑀸𑀭𑀼𑀢𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀧𑁆𑀧𑀝𑀺𑀘𑁆𑀙𑀸𑀤𑀦𑀻𑀬𑀝𑁆𑀞𑀸𑀦𑁂 𑀢𑀢𑁆𑀢𑁂𑀦 𑀮𑁄𑀳𑁂𑀦 𑀆𑀳𑀢𑀁 𑀅𑀲𑀘𑁆𑀙𑀯𑀺𑀪𑀽𑀢𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀬𑀣𑀸𑀳 𑁋

‘‘𑀬𑀲𑁆𑀲 𑀧𑀦 𑀦𑀮𑀸𑀝𑁂 𑀯𑀸 𑀉𑀭𑀸𑀤𑀻𑀲𑀼 𑀯𑀸 𑀢𑀢𑁆𑀢𑁂𑀦 𑀮𑁄𑀳𑁂𑀦 𑀮𑀓𑁆𑀔𑀡𑀁 𑀆𑀳𑀢𑀁 𑀳𑁄𑀢𑀺, 𑀲𑁄 𑀲𑀘𑁂 𑀪𑀼𑀚𑀺𑀲𑁆𑀲𑁄, 𑀬𑀸𑀯 𑀅𑀮𑁆𑀮𑀯𑀡𑁄 𑀳𑁄𑀢𑀺, 𑀢𑀸𑀯 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂𑀧𑀺𑀲𑁆𑀲 𑀯𑀡𑀸 𑀭𑀼𑀴𑁆𑀳𑀸 𑀳𑁄𑀦𑁆𑀢𑀺 𑀙𑀯𑀺𑀬𑀸 ¶ 𑀲𑀫𑀧𑀭𑀺𑀘𑁆𑀙𑁂𑀤𑀸, 𑀮𑀓𑁆𑀔𑀡𑀁 𑀧𑀦 𑀧𑀜𑁆𑀜𑀸𑀬𑀢𑀺, 𑀢𑀺𑀫𑀡𑁆𑀟𑀮𑀁 𑀦𑀺𑀯𑀢𑁆𑀣𑀲𑁆𑀲 𑀉𑀢𑁆𑀢𑀭𑀸𑀲𑀗𑁆𑀕𑁂 ¶ 𑀓𑀢𑁂 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀘𑁂 𑀳𑁄𑀢𑀺, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀘𑁂, 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁯𑁫).

𑀇𑀡𑀸𑀬𑀺𑀓𑀜𑁆𑀘𑀸𑀢𑀺 𑀫𑀸𑀢𑀸𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀳𑀺 𑀯𑀸 𑀅𑀢𑁆𑀢𑀦𑀸 𑀯𑀸 𑀕𑀳𑀺𑀢𑀇𑀡𑀁. 𑀬𑀣𑀸𑀳 𑁋

‘‘𑀇𑀡𑀸𑀬𑀺𑀓𑁄 𑀦𑀸𑀫 𑀬𑀲𑁆𑀲 𑀧𑀺𑀢𑀺𑀧𑀺𑀢𑀸𑀫𑀳𑁂𑀳𑀺 𑀯𑀸 𑀇𑀡𑀁 𑀕𑀳𑀺𑀢𑀁 𑀳𑁄𑀢𑀺, 𑀲𑀬𑀁 𑀯𑀸 𑀇𑀡𑀁 𑀕𑀳𑀺𑀢𑀁 𑀳𑁄𑀢𑀺, 𑀬𑀁 𑀯𑀸 𑀆𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀳𑀺 𑀓𑀺𑀜𑁆𑀘𑀺 𑀕𑀳𑀺𑀢𑀁 𑀳𑁄𑀢𑀺, 𑀲𑁄 𑀢𑀁 𑀇𑀡𑀁 𑀧𑀭𑁂𑀲𑀁 𑀥𑀸𑀭𑁂𑀢𑀻𑀢𑀺 𑀇𑀡𑀸𑀬𑀺𑀓𑁄. 𑀬𑀁 𑀧𑀦 𑀅𑀜𑁆𑀜𑁂 𑀜𑀸𑀢𑀓𑀸 𑀆𑀞𑀧𑁂𑀢𑁆𑀯𑀸 𑀓𑀺𑀜𑁆𑀘𑀺 𑀕𑀡𑁆𑀳𑀦𑁆𑀢𑀺, 𑀲𑁄 𑀦 𑀇𑀡𑀸𑀬𑀺𑀓𑁄. 𑀦 𑀳𑀺 𑀢𑁂 𑀢𑀁 𑀆𑀞𑀧𑁂𑀢𑀼𑀁 𑀇𑀲𑁆𑀲𑀭𑀸. 𑀢𑀲𑁆𑀫𑀸 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁯𑁬).

𑀤𑀸𑀲𑀦𑁆𑀢𑀺 𑀅𑀦𑁆𑀢𑁄𑀚𑀸𑀢𑁄, 𑀥𑀦𑀓𑁆𑀓𑀻𑀢𑁄, 𑀓𑀭𑀫𑀭𑀸𑀦𑀻𑀢𑁄, 𑀲𑀬𑀁 𑀯𑀸 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄𑀢𑀺 𑀘𑀢𑀼𑀦𑁆𑀦𑀁 𑀤𑀸𑀲𑀸𑀦𑀁 𑀅𑀜𑁆𑀜𑀢𑀭𑀁. 𑀤𑀸𑀲𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 (𑀫𑀳𑀸𑀯. 𑀅𑀝𑁆𑀞. 𑁯𑁭) 𑀯𑀺𑀢𑁆𑀣𑀸𑀭𑀢𑁄 𑀕𑀳𑁂𑀢𑀩𑁆𑀩𑁄. 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀓𑀼𑀝𑁆𑀞𑀺’’𑀦𑁆𑀢𑀺𑀆𑀤𑀻𑀳𑀺 𑀉𑀧𑀬𑁄𑀕𑀯𑀦𑁆𑀢𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁.

𑁨𑁪𑁮𑁬. 𑀳𑀢𑁆𑀣𑀘𑁆𑀙𑀺𑀦𑁆𑀦𑀦𑁆𑀢𑀺 𑀳𑀢𑁆𑀣𑀢𑀮𑁂 𑀯𑀸 𑀫𑀡𑀺𑀩𑀦𑁆𑀥𑁂 𑀯𑀸 𑀓𑀧𑁆𑀧𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀦𑁆𑀦𑀳𑀢𑁆𑀣𑀁. 𑀅𑀝𑁆𑀞𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑀣𑀸 𑀦𑀔𑀁 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀢𑀽𑀲𑀼 𑀅𑀗𑁆𑀕𑀼𑀝𑁆𑀞𑀓𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸 𑀲𑀩𑁆𑀩𑁂 𑀯𑀸 𑀬𑀲𑁆𑀲 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀏𑀯𑀭𑀽𑀧𑀁. 𑀧𑀸𑀤𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑀲𑁆𑀲 𑀅𑀕𑁆𑀕𑀧𑀸𑀤𑁂𑀲𑀼 𑀯𑀸 𑀕𑁄𑀧𑁆𑀨𑀓𑁂𑀲𑀼 𑀯𑀸 𑀚𑀗𑁆𑀖𑀸𑀬 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀸𑀤𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀳𑀢𑁆𑀣𑀧𑀸𑀤𑀙𑀺𑀦𑁆𑀦𑀲𑁆𑀲𑀸𑀧𑀺 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁧𑁯) 𑀆𑀕𑀢𑀢𑁆𑀢𑀸 𑀲𑁄𑀧𑀺 𑀇𑀥 𑀯𑀢𑁆𑀢𑀩𑁆𑀩𑁄, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀲𑁆𑀲 𑀤𑀼𑀓𑁆𑀓𑀝𑀯𑀢𑁆𑀣𑀼𑀢𑀸 𑀧𑀜𑁆𑀜𑀸𑀬𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀡𑁆𑀡𑀦𑀸𑀲𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑀦𑁆𑀢𑀺 ¶ 𑀏𑀢𑁆𑀣 ‘‘𑀓𑀡𑁆𑀡𑀘𑁆𑀙𑀺𑀦𑁆𑀦𑀁 𑀦𑀸𑀲𑀘𑁆𑀙𑀺𑀦𑁆𑀦𑀁 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀁 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦’’𑀦𑁆𑀢𑀺 𑀬𑁄𑀚𑀦𑀸. 𑀓𑀡𑁆𑀡𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑀲𑁆𑀲 𑀓𑀡𑁆𑀡𑀫𑀽𑀮𑁂 𑀯𑀸 𑀓𑀡𑁆𑀡𑀲𑀓𑁆𑀔𑀮𑀺𑀓𑀸𑀬 𑀯𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀓𑀡𑁆𑀡𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦 𑀓𑀡𑁆𑀡𑀸𑀯𑀝𑁆𑀝𑁂 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀲𑀓𑁆𑀓𑀸 𑀘 𑀳𑁄𑀦𑁆𑀢𑀺 𑀲𑀗𑁆𑀖𑀸𑀝𑁂𑀢𑀼𑀁, 𑀲𑁄 𑀓𑀡𑁆𑀡𑀁 𑀲𑀗𑁆𑀖𑀸𑀝𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀦𑀸𑀲𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑀲𑁆𑀲 𑀅𑀚𑀧𑀤𑀓𑁂 𑀯𑀸 𑀅𑀕𑁆𑀕𑁂 𑀯𑀸 𑀏𑀓𑀧𑀼𑀝𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀸𑀲𑀸 𑀙𑀺𑀦𑁆𑀦𑀸 𑀳𑁄𑀢𑀺. 𑀬𑀲𑁆𑀲 𑀧𑀦 𑀦𑀸𑀲𑀺𑀓𑀸 𑀲𑀓𑁆𑀓𑀸 𑀳𑁄𑀢𑀺 𑀲𑀦𑁆𑀥𑁂𑀢𑀼𑀁, 𑀲𑁄 ¶ 𑀢𑀁 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀤𑀼𑀪𑀬𑀘𑁆𑀙𑀺𑀦𑁆𑀦𑀁. 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀬𑀲𑁆𑀲 𑀦𑀔𑀲𑁂𑀲𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀸 𑀯𑀸 𑀩𑀳𑀽 𑀯𑀸 𑀅𑀗𑁆𑀕𑀼𑀮𑀺𑀬𑁄 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦 𑀲𑀼𑀢𑁆𑀢𑀢𑀦𑁆𑀢𑀼𑀫𑀢𑁆𑀢𑀫𑁆𑀧𑀺 𑀦𑀔𑀲𑁂𑀲𑀁 𑀧𑀜𑁆𑀜𑀸𑀬𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑀫𑁂𑀯 𑀘𑀸𑀢𑀺 𑀬𑀲𑁆𑀲 𑀓𑀡𑁆𑀟𑀭𑀦𑀸𑀫𑀓𑀸 𑀫𑀳𑀸𑀦𑁆𑀳𑀸𑀭𑀽 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀬𑁂𑀲𑀼 𑀏𑀓𑀲𑁆𑀲𑀸𑀧𑀺 𑀙𑀺𑀦𑁆𑀦𑀢𑁆𑀢𑀸 𑀅𑀕𑁆𑀕𑀧𑀸𑀤𑁂𑀦 𑀯𑀸 𑀘𑀗𑁆𑀓𑀫𑀢𑀺, 𑀫𑀽𑀮𑁂𑀦 𑀯𑀸 𑀘𑀗𑁆𑀓𑀫𑀢𑀺, 𑀦 𑀯𑀸 𑀧𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺.

𑁨𑁪𑁮𑁭. 𑀓𑀸𑀡𑀦𑁆𑀢𑀺 𑀧𑀲𑀦𑁆𑀦𑀦𑁆𑀥𑁄 𑀯𑀸 𑀳𑁄𑀢𑀼 𑀧𑀼𑀧𑁆𑀨𑀸𑀤𑀻𑀳𑀺 𑀯𑀸 𑀉𑀧𑀳𑀢𑀧𑀲𑀸𑀤𑁄, 𑀬𑁄 𑀤𑁆𑀯𑀻𑀳𑀺 𑀯𑀸 𑀏𑀓𑁂𑀦 𑀯𑀸 𑀅𑀓𑁆𑀔𑀺𑀦𑀸 𑀦 𑀧𑀲𑁆𑀲𑀢𑀺, 𑀢𑀁 𑀓𑀸𑀡𑀁. 𑀓𑀼𑀡𑀺𑀦𑁆𑀢𑀺 𑀳𑀢𑁆𑀣𑀓𑀼𑀡𑀻 𑀯𑀸 𑀧𑀸𑀤𑀓𑀼𑀡𑀻 𑀯𑀸 𑀅𑀗𑁆𑀕𑀼𑀮𑀺𑀓𑀼𑀡𑀻 𑀯𑀸, 𑀬𑀲𑁆𑀲 𑀏𑀢𑁂𑀲𑀼 𑀳𑀢𑁆𑀣𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀗𑁆𑀓𑀁 𑀧𑀜𑁆𑀜𑀸𑀬𑀢𑀺, 𑀲𑁄 𑀓𑀼𑀡𑀻. 𑀔𑀼𑀚𑁆𑀚𑀜𑁆𑀘𑀸𑀢𑀺 𑀬𑁄 𑀉𑀭𑀲𑁆𑀲 𑀯𑀸 𑀧𑀺𑀝𑁆𑀞𑀺𑀬𑀸 𑀯𑀸 𑀧𑀲𑁆𑀲𑀲𑁆𑀲 𑀯𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀔𑀼𑀚𑁆𑀚𑀲𑀭𑀻𑀭𑁄, 𑀢𑀁 𑀔𑀼𑀚𑁆𑀚𑀁. 𑀬𑀲𑁆𑀲 𑀧𑀦 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀈𑀲𑀓𑀁 𑀯𑀗𑁆𑀓𑀁, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀏𑀯 𑀳𑀺 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀅𑀯𑀲𑁂𑀲𑁄 𑀲𑀢𑁆𑀢𑁄 𑀅𑀔𑀼𑀚𑁆𑀚𑁄 𑀦𑀸𑀫 𑀦𑀢𑁆𑀣𑀺.

𑀯𑀸𑀫𑀦𑀦𑁆𑀢𑀺 𑀬𑁄 𑀚𑀗𑁆𑀖𑀯𑀸𑀫𑀦𑁄 𑀯𑀸 𑀓𑀝𑀺𑀯𑀸𑀫𑀦𑁄 𑀯𑀸 𑀉𑀪𑀬𑀯𑀸𑀫𑀦𑁄 𑀯𑀸, 𑀢𑀁. 𑀢𑀢𑁆𑀣 𑀚𑀗𑁆𑀖𑀯𑀸𑀫𑀦𑀲𑁆𑀲 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀓𑀸𑀬𑁄 ¶ 𑀭𑀲𑁆𑀲𑁄 𑀳𑁄𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀓𑀝𑀺𑀯𑀸𑀫𑀦𑀲𑁆𑀲 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀭𑀲𑁆𑀲𑁄 𑀳𑁄𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀉𑀪𑀬𑀯𑀸𑀫𑀦𑀲𑁆𑀲 𑀉𑀪𑁄𑀧𑀺 𑀓𑀸𑀬𑀸 𑀭𑀲𑁆𑀲𑀸 𑀳𑁄𑀦𑁆𑀢𑀺. 𑀬𑁂𑀲𑀁 𑀓𑀸𑀬𑀭𑀲𑁆𑀲𑀢𑁆𑀢𑀸 𑀪𑀽𑀢𑀸𑀦𑀁 𑀯𑀺𑀬 𑀧𑀭𑀺𑀯𑀝𑀼𑀫𑁄 𑀫𑀳𑀸𑀓𑀼𑀘𑁆𑀙𑀺𑀖𑀝𑀲𑀤𑀺𑀲𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀨𑀡𑀳𑀢𑁆𑀣𑀓𑀦𑁆𑀢𑀺 𑀬𑀲𑁆𑀲 𑀯𑀕𑁆𑀕𑀼𑀮𑀺𑀧𑀓𑁆𑀔𑀓𑀸 𑀯𑀺𑀬 𑀅𑀗𑁆𑀕𑀼𑀮𑀺𑀬𑁄 𑀲𑀫𑁆𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀢𑀁. 𑀏𑀢𑀁 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁂𑀦 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀬𑁄 𑀨𑀸𑀮𑁂𑀢𑁆𑀯𑀸 𑀲𑀩𑁆𑀩𑀁 𑀅𑀦𑁆𑀢𑀭𑀘𑀫𑁆𑀫𑀁 𑀅𑀧𑀦𑁂𑀢𑁆𑀯𑀸 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑀲𑁆𑀲𑀸𑀧𑀺 𑀙 𑀅𑀗𑁆𑀕𑀼𑀮𑀺𑀬𑁄 𑀳𑁄𑀦𑁆𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁂𑀦 𑀅𑀥𑀺𑀓𑀁 𑀅𑀗𑁆𑀕𑀼𑀮𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀔𑀜𑁆𑀚𑀦𑁆𑀢𑀺 𑀬𑁄 𑀦𑀢𑀚𑀸𑀡𑀼𑀓𑁄 𑀯𑀸 𑀪𑀺𑀦𑁆𑀦𑀚𑀗𑁆𑀖𑁄 𑀯𑀸 𑀫𑀚𑁆𑀛𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸 𑀓𑀼𑀡𑁆𑀟𑀧𑀸𑀤𑀓𑁄 𑀯𑀸 𑀧𑀺𑀝𑁆𑀞𑀺𑀧𑀸𑀤𑀫𑀚𑁆𑀛𑁂𑀦 𑀘𑀗𑁆𑀓𑀫𑀦𑁆𑀢𑁄 𑀅𑀕𑁆𑀕𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸 𑀓𑀼𑀡𑁆𑀟𑀧𑀸𑀤𑀓𑁄 𑀯𑀸 𑀧𑀺𑀝𑁆𑀞𑀺𑀧𑀸𑀤𑀕𑁆𑀕𑁂𑀦 𑀘𑀗𑁆𑀓𑀫𑀦𑁆𑀢𑁄 𑀅𑀕𑁆𑀕𑀧𑀸𑀤𑁂𑀦𑁂𑀯 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀡𑁆𑀳𑀺𑀓𑀸𑀬 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀸𑀤𑀲𑁆𑀲 𑀩𑀸𑀳𑀺𑀭𑀦𑁆𑀢𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀸𑀤𑀲𑁆𑀲 𑀅𑀩𑁆𑀪𑀦𑁆𑀢𑀭𑀦𑁆𑀢𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀕𑁄𑀧𑁆𑀨𑀓𑀸𑀦𑀁 𑀉𑀧𑀭𑀺 𑀪𑀕𑁆𑀕𑀢𑁆𑀢𑀸 𑀲𑀓𑀮𑁂𑀦 ¶ 𑀧𑀺𑀝𑁆𑀞𑀺𑀧𑀸𑀤𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀢𑁆𑀣 𑀦𑀢𑀚𑀸𑀡𑀼𑀓𑁄𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀆𑀦𑀢𑀧𑀸𑀤𑁄. 𑀧𑀓𑁆𑀔𑀳𑀢𑀦𑁆𑀢𑀺 𑀬𑀲𑁆𑀲 𑀏𑀓𑁄 𑀳𑀢𑁆𑀣𑁄 𑀯𑀸 𑀧𑀸𑀤𑁄 𑀯𑀸 𑀅𑀟𑁆𑀠𑀲𑀭𑀻𑀭𑀁 𑀯𑀸 𑀲𑀼𑀔𑀁 𑀦 𑀯𑀳𑀢𑀺.

𑀲𑀻𑀧𑀤𑀺𑀦𑁆𑀢𑀺 𑀪𑀸𑀭𑀧𑀸𑀤𑀁. 𑀬𑀲𑁆𑀲 𑀧𑀸𑀤𑁄 𑀣𑀽𑀮𑁄 𑀳𑁄𑀢𑀺 𑀲𑀜𑁆𑀚𑀸𑀢𑀧𑀻𑀴𑀓𑁄 𑀔𑀭𑁄, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀦 𑀢𑀸𑀯 𑀔𑀭𑀪𑀸𑀯𑀁 𑀕𑀡𑁆𑀳𑀸𑀢𑀺, 𑀲𑀓𑁆𑀓𑀸 𑀳𑁄𑀢𑀺 𑀉𑀧𑀦𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑀆𑀯𑀸𑀝𑁂 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑀯𑀸𑀮𑀺𑀓𑀸𑀬 𑀧𑀽𑀭𑁂𑀢𑁆𑀯𑀸 ¶ 𑀬𑀣𑀸 𑀲𑀺𑀭𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀚𑀗𑁆𑀖𑀸 𑀘 𑀢𑁂𑀮𑀦𑀸𑀴𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺, 𑀏𑀯𑀁 𑀫𑀺𑀮𑀸𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀧𑀸𑀤𑀁 𑀈𑀤𑀺𑀲𑀁 𑀓𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀼𑀦 𑀯𑀟𑁆𑀠𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂𑀦𑀸𑀧𑀺 𑀢𑀣𑀸 𑀓𑀢𑁆𑀯𑀸𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀧𑀸𑀧𑀭𑁄𑀕𑀺𑀦𑀦𑁆𑀢𑀺 𑀬𑁄 𑀅𑀭𑀺𑀲𑀪𑀕𑀦𑁆𑀤𑀭𑀧𑀺𑀢𑁆𑀢𑀲𑁂𑀫𑁆𑀳𑀓𑀸𑀲𑀲𑁄𑀲𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀭𑁄𑀕𑁂𑀦 𑀦𑀺𑀘𑁆𑀘𑀸𑀢𑀼𑀭𑁄 𑀅𑀢𑁂𑀓𑀺𑀘𑁆𑀙𑀭𑁄𑀕𑁄 𑀚𑁂𑀕𑀼𑀘𑁆𑀙𑁄 𑀅𑀫𑀦𑀸𑀧𑁄, 𑀢𑀁.

𑁨𑁪𑁮𑁮. 𑀚𑀭𑀸𑀬 𑀤𑀼𑀩𑁆𑀩𑀮𑀦𑁆𑀢𑀺 𑀬𑁄 𑀚𑀺𑀡𑁆𑀡𑀪𑀸𑀯𑁂𑀦 𑀤𑀼𑀩𑁆𑀩𑀮𑁄 𑀅𑀢𑁆𑀢𑀦𑁄 𑀘𑀻𑀯𑀭𑀭𑀚𑀦𑀸𑀤𑀺𑀓𑀫𑁆𑀫𑀫𑁆𑀧𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄, 𑀢𑀁. 𑀬𑁄 𑀧𑀦 𑀫𑀳𑀮𑁆𑀮𑀓𑁄𑀧𑀺 𑀩𑀮𑀯𑀸 𑀳𑁄𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀦𑁆𑀥𑀦𑁆𑀢𑀺 𑀚𑀘𑁆𑀘𑀦𑁆𑀥𑀁. 𑀧𑀥𑀺𑀭𑀜𑁆𑀘𑁂𑀯𑀸𑀢𑀺 𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀲𑀼𑀡𑀸𑀢𑀺, 𑀢𑀁. 𑀬𑁄 𑀧𑀦 𑀫𑀳𑀸𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀫𑁆𑀫𑀦𑀦𑁆𑀢𑀺 𑀬𑀲𑁆𑀲 𑀯𑀘𑀻𑀪𑁂𑀤𑁄 𑀯𑀢𑁆𑀢𑀢𑀺, 𑀲𑀭𑀡𑀕𑀫𑀦𑀁 𑀧𑀭𑀺𑀧𑀼𑀡𑁆𑀡𑀁 𑀪𑀸𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑀁 𑀫𑀫𑁆𑀫𑀦𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁄 𑀧𑀦 𑀲𑀭𑀡𑀕𑀫𑀦𑀫𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀪𑀸𑀲𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀯𑀸 𑀫𑀫𑁆𑀫𑀦𑀦𑁆𑀢𑀺 𑀔𑀮𑀺𑀢𑀯𑀘𑀦𑀁, 𑀬𑁄 𑀏𑀓𑀫𑁂𑀯 𑀅𑀓𑁆𑀔𑀭𑀁 𑀘𑀢𑀼𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀤𑀢𑀺, 𑀢𑀲𑁆𑀲𑁂𑀢𑀫𑀥𑀺𑀯𑀘𑀦𑀁. 𑀧𑀻𑀞𑀲𑀧𑁆𑀧𑀺𑀦𑁆𑀢𑀺 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑀁. 𑀫𑀽𑀕𑀦𑁆𑀢𑀺 𑀬𑀲𑁆𑀲 𑀯𑀘𑀻𑀪𑁂𑀤𑁄 𑀦𑀧𑁆𑀧𑀯𑀢𑁆𑀢𑀢𑀺.

𑁨𑁪𑁮𑁯. 𑀅𑀢𑁆𑀢𑀦𑁄 𑀯𑀺𑀭𑀽𑀧𑀪𑀸𑀯𑁂𑀦 𑀧𑀭𑀺𑀲𑀁 𑀤𑀽𑀲𑁂𑀦𑁆𑀢𑁂𑀦 𑀧𑀭𑀺𑀲𑀤𑀽𑀲𑀓𑁂 (𑀫𑀳𑀸𑀯. 𑀅𑀝𑁆𑀞. 𑁧𑁧𑁯) 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀢𑀺𑀤𑀻𑀖𑁄’’𑀢𑀺𑀆𑀤𑀺. 𑀅𑀢𑀺𑀤𑀻𑀖𑁄𑀢𑀺 𑀅𑀜𑁆𑀜𑁂𑀲𑀁 𑀲𑀻𑀲𑀧𑁆𑀧𑀫𑀸𑀡𑀦𑀸𑀪𑀺𑀧𑁆𑀧𑀤𑁂𑀲𑁄. 𑀅𑀢𑀺𑀭𑀲𑁆𑀲𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀉𑀪𑀬𑀯𑀸𑀫𑀦𑁄 𑀯𑀺𑀬 𑀅𑀢𑀺𑀭𑀲𑁆𑀲𑁄. 𑀅𑀢𑀺𑀓𑀸𑀴𑁄 𑀯𑀸𑀢𑀺 𑀛𑀸𑀧𑀺𑀢𑀔𑁂𑀢𑁆𑀢𑁂 𑀔𑀸𑀡𑀼𑀓𑁄 𑀯𑀺𑀬 𑀅𑀢𑀺𑀓𑀸𑀴𑀯𑀡𑁆𑀡𑁄. 𑀫𑀝𑁆𑀞𑀢𑀫𑁆𑀩𑀮𑁄𑀳𑀦𑀺𑀤𑀲𑁆𑀲𑀦𑁄 𑀅𑀘𑁆𑀘𑁄𑀤𑀸𑀢𑁄𑀧𑀺 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀤𑀥𑀺𑀢𑀓𑁆𑀓𑀸𑀤𑀻𑀳𑀺 𑀫𑀚𑁆𑀚𑀺𑀢𑀫𑀝𑁆𑀞𑀢𑀫𑁆𑀩𑀮𑁄𑀳𑀯𑀡𑁆𑀡𑁄 𑀅𑀢𑀻𑀯 𑀑𑀤𑀸𑀢𑀲𑀭𑀻𑀭𑁄𑀢𑀺 𑀅𑀢𑁆𑀣𑁄.

𑁨𑁪𑁯𑁦. 𑀅𑀢𑀺𑀣𑀽𑀮𑁄 ¶ 𑀯𑀸𑀢𑀺 𑀪𑀸𑀭𑀺𑀬𑀫𑀁𑀲𑁄 𑀫𑀳𑁄𑀤𑀭𑁄 𑀫𑀳𑀸𑀪𑀽𑀢𑀲𑀤𑀺𑀲𑁄. 𑀅𑀢𑀺𑀓𑀺𑀲𑁄𑀢𑀺 𑀫𑀦𑁆𑀤𑀫𑀁𑀲𑀮𑁄𑀳𑀺𑀢𑁄 ¶ 𑀅𑀝𑁆𑀞𑀺𑀲𑀺𑀭𑀸𑀘𑀫𑁆𑀫𑀲𑀭𑀻𑀭𑁄 𑀯𑀺𑀬. 𑀅𑀢𑀺𑀫𑀳𑀸𑀲𑀻𑀲𑁄 𑀯𑀸𑀢𑀺 𑀬𑁄𑀚𑀦𑀸. 𑀅𑀢𑀺𑀫𑀳𑀸𑀲𑀻𑀲𑁄 𑀯𑀸𑀢𑀺 𑀧𑀘𑁆𑀙𑀺𑀁 𑀲𑀻𑀲𑁂 𑀓𑀢𑁆𑀯𑀸 𑀞𑀺𑀢𑁄 𑀯𑀺𑀬. ‘‘𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁂𑀦 𑀅𑀲𑀳𑀺𑀢𑁂𑀦𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀅𑀲𑀳𑀺𑀢𑁂𑀦𑀸𑀢𑀺 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑁂𑀦. ‘‘𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁂𑀦𑀸’’𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀅𑀲𑀳𑀺𑀢𑁂𑀦 𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁄 𑀯𑀸 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑁂𑀦 𑀅𑀢𑀺𑀔𑀼𑀤𑁆𑀤𑀓𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑁨𑁪𑁯𑁧. 𑀓𑀼𑀝𑀓𑀼𑀝𑀓𑀲𑀻𑀲𑁄𑀢𑀺 𑀢𑀸𑀮𑀨𑀮𑀧𑀺𑀡𑁆𑀟𑀺𑀲𑀤𑀺𑀲𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀺𑀔𑀭𑀲𑀻𑀲𑀓𑁄𑀢𑀺 𑀉𑀤𑁆𑀥𑀁 𑀅𑀦𑀼𑀧𑀼𑀩𑁆𑀩𑀢𑀦𑀼𑀓𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀫𑀢𑁆𑀣𑀓𑀢𑁄 𑀲𑀁𑀓𑀼𑀝𑀺𑀓𑁄 𑀫𑀽𑀮𑀢𑁄 𑀯𑀺𑀢𑁆𑀣𑀢𑁄 𑀳𑀼𑀢𑁆𑀯𑀸 𑀞𑀺𑀢𑀧𑀩𑁆𑀩𑀢𑀲𑀺𑀔𑀭𑀲𑀤𑀺𑀲𑀲𑀻𑀲𑁄𑀢𑀺 𑀅𑀢𑁆𑀣𑁄. 𑀯𑁂𑀴𑀼𑀦𑀸𑀴𑀺𑀲𑀫𑀸𑀦𑁂𑀦𑀸𑀢𑀺 𑀫𑀳𑀸𑀯𑁂𑀴𑀼𑀧𑀩𑁆𑀩𑀲𑀤𑀺𑀲𑁂𑀦. 𑀲𑀻𑀲𑁂𑀦𑀸𑀢𑀺 𑀤𑀻𑀖𑀲𑀻𑀲𑁂𑀦. 𑀬𑀣𑀸𑀳 𑁋 ‘‘𑀦𑀸𑀴𑀺𑀲𑀻𑀲𑁄 𑀯𑀸 𑀫𑀳𑀸𑀯𑁂𑀴𑀼𑀧𑀩𑁆𑀩𑀲𑀤𑀺𑀲𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁯).

𑁨𑁪𑁯𑁨. 𑀓𑀧𑁆𑀧𑀲𑀻𑀲𑁄𑀧𑀻𑀢𑀺 𑀫𑀚𑁆𑀛𑁂 𑀤𑀺𑀲𑁆𑀲𑀫𑀸𑀦𑀆𑀯𑀸𑀝𑁂𑀦 𑀳𑀢𑁆𑀣𑀺𑀓𑀼𑀫𑁆𑀪𑀲𑀤𑀺𑀲𑁂𑀦 𑀤𑁆𑀯𑀺𑀥𑀸𑀪𑀽𑀢𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀩𑁆𑀪𑀸𑀭𑀲𑀻𑀲𑁄 𑀯𑀸𑀢𑀺 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀲𑁆𑀲𑁂𑀦 𑀑𑀡𑀢𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀯𑀡𑀲𑀻𑀲𑀓𑁄𑀢𑀺 𑀯𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑀻𑀲𑁄. 𑀓𑀡𑁆𑀡𑀺𑀓𑀓𑁂𑀲𑁄 𑀯𑀸𑀢𑀺 𑀧𑀸𑀡𑀓𑁂𑀳𑀺 𑀔𑀸𑀬𑀺𑀢𑀓𑁂𑀤𑀸𑀭𑁂 𑀲𑀲𑁆𑀲𑀲𑀤𑀺𑀲𑁂𑀳𑀺 𑀢𑀳𑀺𑀁 𑀢𑀳𑀺𑀁 𑀉𑀝𑁆𑀞𑀺𑀢𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀣𑀽𑀮𑀓𑁂𑀲𑁄𑀧𑀺 𑀯𑀸𑀢𑀺 𑀢𑀸𑀮𑀳𑀻𑀭𑀲𑀤𑀺𑀲𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁪𑁯𑁩. 𑀧𑀽𑀢𑀺𑀲𑀻𑀲𑁄𑀢𑀺 ¶ 𑀤𑀼𑀕𑁆𑀕𑀦𑁆𑀥𑀲𑀻𑀲𑁄. 𑀦𑀺𑀮𑁆𑀮𑁄𑀫𑀲𑀻𑀲𑁄 𑀯𑀸𑀢𑀺 𑀮𑁄𑀫𑀭𑀳𑀺𑀢𑀲𑀻𑀲𑁄. 𑀚𑀸𑀢𑀺𑀧𑀡𑁆𑀟𑀭𑀓𑁂𑀲𑀓𑁄𑀢𑀺 𑀚𑀸𑀢𑀺𑀨𑀮𑀺𑀢𑁂𑀳𑀺 𑀧𑀡𑁆𑀟𑀭𑀓𑁂𑀲𑁄 𑀯𑀸. 𑀚𑀸𑀢𑀺𑀬𑀸 𑀢𑀫𑁆𑀩𑀓𑁂𑀲𑁄 𑀯𑀸𑀢𑀺 𑀆𑀤𑀺𑀢𑁆𑀢𑁂𑀳𑀺 𑀯𑀺𑀬 𑀢𑀫𑁆𑀩𑀯𑀡𑁆𑀡𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀆𑀯𑀝𑁆𑀝𑀲𑀻𑀲𑀓𑁄𑀢𑀺 𑀕𑀼𑀦𑁆𑀦𑀁 𑀲𑀭𑀻𑀭𑁂 𑀆𑀯𑀝𑁆𑀝𑀲𑀤𑀺𑀲𑁂𑀳𑀺 𑀉𑀤𑁆𑀥𑀕𑁆𑀕𑁂𑀳𑀺 𑀓𑁂𑀲𑀸𑀯𑀝𑁆𑀝𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁪𑁯𑁪. 𑀲𑀻𑀲𑀮𑁄𑀫𑁂𑀓𑀩𑀤𑁆𑀥𑁂𑀳𑀺 𑀪𑀫𑀼𑀓𑁂𑀳𑀺 𑀬𑀼𑀢𑁄𑀧𑀻𑀢𑀺 𑀲𑀻𑀲𑀮𑁄𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀮𑁄𑀫𑁂𑀳𑀺 𑀪𑀫𑀼𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀫𑁆𑀩𑀤𑁆𑀥𑀪𑀫𑀼𑀓𑁄 𑀯𑀸𑀢𑀺 𑀏𑀓𑀸𑀩𑀤𑁆𑀥𑀉𑀪𑀬𑀪𑀫𑀼𑀓𑁄, 𑀫𑀚𑁆𑀛𑁂 𑀲𑀜𑁆𑀚𑀸𑀢𑀮𑁄𑀫𑁂𑀳𑀺 𑀪𑀫𑀼𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀮𑁆𑀮𑁄𑀫𑀪𑀫𑀼𑀓𑁄𑀧𑀺 𑀯𑀸𑀢𑀺 𑀪𑀫𑀼𑀮𑁄𑀫𑀭𑀳𑀺𑀢𑁄. 𑀦𑀺𑀮𑁆𑀮𑁄𑀫𑀪𑀫𑀼𑀓𑁄𑀧𑀺 𑀯𑀸𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁂𑀦 𑀫𑀓𑁆𑀓𑀝𑀪𑀫𑀼𑀓𑁄 𑀲𑀗𑁆𑀕𑀳𑀺𑀢𑁄.

𑁨𑁪𑁯𑁫. 𑀫𑀳𑀦𑁆𑀢𑀔𑀼𑀤𑁆𑀤𑀦𑁂𑀢𑁆𑀢𑁄 ¶ 𑀯𑀸𑀢𑀺 𑀏𑀢𑁆𑀣 𑀦𑁂𑀢𑁆𑀢-𑀲𑀤𑁆𑀤𑁄 𑀫𑀳𑀦𑁆𑀢𑀔𑀼𑀤𑁆𑀤-𑀲𑀤𑁆𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄, 𑀫𑀳𑀦𑁆𑀢𑀦𑁂𑀢𑁆𑀢𑁄 𑀯𑀸 𑀔𑀼𑀤𑁆𑀤𑀓𑀦𑁂𑀢𑁆𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀦𑁆𑀢𑀦𑁂𑀢𑁆𑀢𑁄 𑀯𑀸𑀢𑀺 𑀅𑀢𑀺𑀫𑀳𑀦𑁆𑀢𑁂𑀳𑀺 𑀦𑁂𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀔𑀼𑀤𑁆𑀤𑀓𑀦𑁂𑀢𑁆𑀢𑁄 𑀯𑀸𑀢𑀺 𑀫𑀳𑀺𑀁𑀲𑀘𑀫𑁆𑀫𑁂 𑀯𑀸𑀲𑀺𑀓𑁄𑀡𑁂𑀦 𑀧𑀳𑀭𑀺𑀢𑁆𑀯𑀸 𑀓𑀢𑀙𑀺𑀤𑁆𑀤𑀲𑀤𑀺𑀲𑁂𑀳𑀺 𑀅𑀢𑀺𑀔𑀼𑀤𑁆𑀤𑀓𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀯𑀺𑀲𑀫𑀮𑁄𑀘𑀦𑁄𑀢𑀺 𑀏𑀓𑁂𑀦 𑀫𑀳𑀦𑁆𑀢𑁂𑀦, 𑀏𑀓𑁂𑀦 𑀔𑀼𑀤𑁆𑀤𑀓𑁂𑀦 𑀅𑀓𑁆𑀔𑀺𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀓𑁂𑀓𑀭𑁄 𑀯𑀸𑀧𑀻𑀢𑀺 𑀢𑀺𑀭𑀺𑀬𑀁 𑀧𑀲𑁆𑀲𑀦𑁆𑀢𑁄. 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁂𑀦 𑀦𑀺𑀓𑁆𑀔𑀦𑁆𑀢𑀓𑁆𑀔𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀬𑀲𑁆𑀲 𑀓𑀓𑁆𑀓𑀝𑀓𑀲𑁆𑀲𑁂𑀯 𑀅𑀓𑁆𑀔𑀺𑀢𑀸𑀭𑀓𑀸 𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺. 𑀕𑀫𑁆𑀪𑀻𑀭𑀦𑁂𑀢𑁆𑀢𑁄𑀢𑀺 𑀬𑀲𑁆𑀲 𑀕𑀫𑁆𑀪𑀻𑀭𑁂 𑀉𑀤𑀧𑀸𑀦𑁂 𑀉𑀤𑀓𑀢𑀸𑀭𑀓𑀸 𑀯𑀺𑀬 𑀅𑀓𑁆𑀔𑀺𑀢𑀸𑀭𑀓𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑁆𑀣 𑀘 𑀉𑀤𑀓𑀢𑀸𑀭𑀓𑀸 𑀦𑀸𑀫 𑀉𑀤𑀓𑀧𑀼𑀩𑁆𑀩𑀼𑀴𑀁. 𑀅𑀓𑁆𑀔𑀺𑀢𑀸𑀭𑀓𑀸𑀢𑀺 𑀅𑀓𑁆𑀔𑀺𑀕𑁂𑀡𑁆𑀟𑀓𑀸. 𑀯𑀺𑀲𑀫𑀘𑀓𑁆𑀓𑀮𑁄𑀢𑀺 𑀏𑀓𑁂𑀦 𑀉𑀤𑁆𑀥𑀁, 𑀏𑀓𑁂𑀦 𑀅𑀥𑁄𑀢𑀺 𑀏𑀯𑀁 𑀯𑀺𑀲𑀫𑀚𑀸𑀢𑁂𑀳𑀺 𑀅𑀓𑁆𑀔𑀺𑀘𑀓𑁆𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁪𑁯𑁬. 𑀚𑀢𑀼𑀓𑀡𑁆𑀡𑁄 ¶ 𑀯𑀸𑀢𑀺 𑀅𑀢𑀺𑀔𑀼𑀤𑁆𑀤𑀺𑀓𑀸𑀳𑀺 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀫𑀽𑀲𑀺𑀓𑀓𑀡𑁆𑀡𑁄 𑀯𑀸𑀢𑀺 𑀫𑀽𑀲𑀺𑀓𑀸𑀦𑀁 𑀓𑀡𑁆𑀡𑀲𑀤𑀺𑀲𑁂𑀳𑀺 𑀓𑀡𑁆𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀳𑀢𑁆𑀣𑀺𑀓𑀡𑁆𑀡𑁄𑀧𑀺 𑀯𑀸𑀢𑀺 𑀅𑀦𑀦𑀼𑀭𑀽𑀧𑀸𑀳𑀺 𑀫𑀳𑀦𑁆𑀢𑀸𑀳𑀺 𑀳𑀢𑁆𑀣𑀺𑀓𑀡𑁆𑀡𑀲𑀤𑀺𑀲𑀸𑀳𑀺 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀙𑀺𑀤𑁆𑀤𑀫𑀢𑁆𑀢𑀓𑀓𑀡𑁆𑀡𑁄 𑀯𑀸𑀢𑀺 𑀬𑀲𑁆𑀲 𑀯𑀺𑀦𑀸 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀫𑁂𑀯 𑀳𑁄𑀢𑀺. 𑀅𑀯𑀺𑀤𑁆𑀥𑀓𑀡𑁆𑀡𑀓𑁄𑀢𑀺 𑀓𑀡𑁆𑀡𑀩𑀦𑁆𑀥𑀢𑁆𑀣𑀸𑀬 𑀅𑀯𑀺𑀤𑁆𑀥𑁂𑀦 𑀓𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁨𑁪𑁯𑁭. 𑀝𑀗𑁆𑀓𑀺𑀢𑀓𑀡𑁆𑀡𑁄 𑀯𑀸𑀢𑀺 𑀕𑁄𑀪𑀢𑁆𑀢𑀦𑀸𑀴𑀺𑀓𑀸𑀬 𑀅𑀕𑁆𑀕𑀲𑀤𑀺𑀲𑁂𑀳𑀺 𑀓𑀡𑁆𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀕𑁄𑀳𑀦𑀼𑀓𑁄𑀝𑀺𑀲𑀡𑁆𑀞𑀸𑀦𑁂𑀳𑀺 𑀓𑀡𑁆𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀽𑀢𑀺𑀓𑀡𑁆𑀡𑁄𑀧𑀺 𑀯𑀸𑀢𑀺 𑀲𑀤𑀸 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑁂𑀦 𑀓𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀽𑀢𑀺𑀓𑀡𑁆𑀡𑁄𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀓𑀡𑁆𑀡𑀪𑀕𑀦𑁆𑀤𑀭𑀺𑀓𑁄 𑀕𑀳𑀺𑀢𑁄. 𑀓𑀡𑁆𑀡𑀪𑀕𑀦𑁆𑀤𑀭𑀺𑀓𑁄𑀢𑀺 𑀦𑀺𑀘𑁆𑀘𑀧𑀽𑀢𑀺𑀦𑀸 𑀓𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀯𑀺𑀤𑁆𑀥𑀓𑀡𑁆𑀡𑁄 𑀧𑀭𑀺𑀲𑀤𑀽𑀲𑀓𑁄 𑀯𑀼𑀢𑁆𑀢𑁄, 𑀓𑀣𑀁 𑀬𑁄𑀦𑀓𑀚𑀸𑀢𑀻𑀦𑀁 𑀧𑀩𑁆𑀩𑀚𑁆𑀚𑀸𑀢𑀺 𑀆𑀳 ‘‘𑀬𑁄𑀦𑀓𑀸𑀤𑀺𑀧𑁆𑀧𑀪𑁂𑀤𑁄𑀧𑀺, 𑀦𑀸𑀬𑀁 𑀧𑀭𑀺𑀲𑀤𑀽𑀲𑀓𑁄’’𑀢𑀺, 𑀓𑀡𑁆𑀡𑀸𑀯𑁂𑀥𑀦𑀁 𑀬𑁄𑀦𑀓𑀸𑀦𑀁 𑀲𑀪𑀸𑀯𑁄, 𑀅𑀬𑀁 𑀬𑁄𑀦𑀓𑀸𑀤𑀺𑀧𑁆𑀧𑀪𑁂𑀤𑁄 𑀧𑀭𑀺𑀲𑀤𑀽𑀲𑀓𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁪𑁯𑁮. 𑀅𑀢𑀺𑀧𑀺𑀗𑁆𑀕𑀮𑀦𑁂𑀢𑁆𑀢𑁄𑀢𑀺 ¶ 𑀅𑀢𑀺𑀲𑀬𑁂𑀦 𑀧𑀺𑀗𑁆𑀕𑀮𑁂𑀳𑀺 𑀦𑁂𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀫𑀥𑀼𑀧𑀺𑀗𑁆𑀕𑀮𑀁 𑀧𑀦 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑁆𑀧𑀔𑀼𑀫𑀓𑁆𑀔𑀺 𑀯𑀸𑀢𑀺 𑀅𑀓𑁆𑀔𑀺𑀤𑀮𑀭𑁄𑀫𑁂𑀳𑀺 𑀯𑀺𑀭𑀳𑀺𑀢𑀅𑀓𑁆𑀔𑀺𑀓𑁄. 𑀧𑀔𑀼𑀫-𑀲𑀤𑁆𑀤𑁄 𑀳𑀺 𑀮𑁄𑀓𑁂 𑀅𑀓𑁆𑀔𑀺𑀤𑀮𑀭𑁄𑀫𑁂𑀲𑀼 𑀦𑀺𑀭𑀼𑀴𑁆𑀳𑁄. 𑀅𑀲𑁆𑀲𑀼𑀧𑀕𑁆𑀖𑀭𑀦𑁂𑀢𑁆𑀢𑁄 𑀯𑀸𑀢𑀺 𑀧𑀕𑁆𑀖𑀭𑀡𑀲𑁆𑀲𑀽𑀳𑀺 𑀦𑁂𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀓𑁆𑀓𑀧𑀼𑀧𑁆𑀨𑀺𑀢𑀮𑁄𑀘𑀦𑁄𑀢𑀺 𑀧𑀓𑁆𑀓𑀮𑁄𑀘𑀦𑁄 𑀧𑀼𑀧𑁆𑀨𑀺𑀢𑀮𑁄𑀘𑀦𑁄𑀢𑀺 𑀬𑁄𑀚𑀦𑀸. 𑀧𑀭𑀺𑀧𑀓𑁆𑀓𑀦𑁂𑀢𑁆𑀢𑁄 𑀲𑀜𑁆𑀚𑀸𑀢𑀧𑀼𑀧𑁆𑀨𑀦𑁂𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁪𑁯𑁯. 𑀫𑀳𑀸𑀦𑀸𑀲𑁄𑀢𑀺 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑀸𑀬 𑀫𑀳𑀢𑀺𑀬𑀸 𑀦𑀸𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀢𑀺𑀔𑀼𑀤𑁆𑀤𑀓𑀦𑀸𑀲𑀺𑀓𑁄𑀢𑀺 𑀢𑀣𑀸 ¶ 𑀅𑀢𑀺𑀔𑀼𑀤𑁆𑀤𑀺𑀓𑀸𑀬 𑀦𑀸𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀘𑀺𑀧𑀺𑀝𑀦𑀸𑀲𑁄 𑀯𑀸𑀢𑀺 𑀘𑀺𑀧𑀺𑀝𑀸𑀬 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸𑀬 𑀯𑀺𑀬 𑀅𑀮𑁆𑀮𑀺𑀦𑀸𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀘𑀺𑀧𑀺𑀝𑀦𑀸𑀲𑁄 𑀯𑀸𑀢𑀺 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀤𑀻𑀖𑀦𑀸𑀲𑀺𑀓𑁄 𑀲𑀗𑁆𑀕𑀬𑁆𑀳𑀢𑀺. 𑀲𑁄 𑀘 𑀲𑀼𑀓𑀢𑀼𑀡𑁆𑀟𑀲𑀤𑀺𑀲𑀸𑀬 𑀚𑀺𑀯𑁆𑀳𑀸𑀬 𑀮𑁂𑀳𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀬 𑀦𑀸𑀲𑀺𑀓𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀓𑀼𑀝𑀺𑀮𑀦𑀸𑀲𑀺𑀓𑁄𑀢𑀺 𑀫𑀼𑀔𑀫𑀚𑁆𑀛𑁂 𑀅𑀧𑁆𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀏𑀓𑀧𑀲𑁆𑀲𑁂 𑀞𑀺𑀢𑀦𑀸𑀲𑀺𑀓𑁄.

𑁨𑁫𑁦𑁦. 𑀦𑀺𑀘𑁆𑀘𑀯𑀺𑀲𑁆𑀲𑀯𑀦𑀸𑀲𑁄 𑀯𑀸𑀢𑀺 𑀦𑀺𑀘𑁆𑀘𑀧𑀕𑁆𑀖𑀭𑀺𑀢𑀲𑀺𑀗𑁆𑀖𑀸𑀡𑀺𑀓𑀦𑀸𑀲𑁄 𑀯𑀸. 𑀫𑀳𑀸𑀫𑀼𑀔𑁄𑀢𑀺 𑀬𑀲𑁆𑀲 𑀧𑀝𑀗𑁆𑀕𑀫𑀡𑁆𑀟𑀼𑀓𑀲𑁆𑀲𑁂𑀯 𑀫𑀼𑀔𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀳𑀦𑁆𑀢𑀁 𑀳𑁄𑀢𑀺, 𑀫𑀼𑀔𑀁 𑀧𑀦 𑀮𑀸𑀩𑀼𑀲𑀤𑀺𑀲𑀁 𑀅𑀢𑀺𑀔𑀼𑀤𑁆𑀤𑀓𑀁. 𑀧𑀝𑀗𑁆𑀕𑀫𑀡𑁆𑀟𑀼𑀓𑁄 𑀦𑀸𑀫 𑀫𑀳𑀸𑀫𑀼𑀔𑀫𑀡𑁆𑀟𑀼𑀓𑁄. 𑀯𑀗𑁆𑀓𑀪𑀺𑀦𑁆𑀦𑀫𑀼𑀔𑁄 𑀯𑀸𑀧𑀻𑀢𑀺 𑀏𑀢𑁆𑀣 ‘‘𑀯𑀗𑁆𑀓𑀫𑀼𑀔𑁄 𑀯𑀸 𑀪𑀺𑀦𑁆𑀦𑀫𑀼𑀔𑁄 𑀯𑀸𑀧𑀻’’𑀢𑀺 𑀬𑁄𑀚𑀦𑀸. 𑀯𑀗𑁆𑀓𑀫𑀼𑀔𑁄𑀢𑀺 𑀪𑀫𑀼𑀓𑀲𑁆𑀲, 𑀦𑀮𑀸𑀢𑀲𑁆𑀲 𑀯𑀸 𑀏𑀓𑀧𑀲𑁆𑀲𑁂 𑀦𑀺𑀦𑁆𑀦𑀢𑀸𑀬 𑀯𑀗𑁆𑀓𑀫𑀼𑀔𑁄. 𑀪𑀺𑀦𑁆𑀦𑀫𑀼𑀔𑁄 𑀯𑀸𑀢𑀺 𑀫𑀓𑁆𑀓𑀝𑀲𑁆𑀲𑁂𑀯 𑀪𑀺𑀦𑁆𑀦𑀫𑀼𑀔𑁄. 𑀫𑀳𑀸𑀑𑀝𑁆𑀞𑁄𑀧𑀺 𑀯𑀸𑀢𑀺 𑀉𑀓𑁆𑀔𑀮𑀺𑀫𑀼𑀔𑀯𑀝𑁆𑀝𑀺𑀲𑀤𑀺𑀲𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁫𑁦𑁧. 𑀢𑀦𑀼𑀓𑀑𑀝𑁆𑀞𑁄 𑀯𑀸𑀢𑀺 𑀪𑁂𑀭𑀺𑀘𑀫𑁆𑀫𑀲𑀤𑀺𑀲𑁂𑀳𑀺 𑀤𑀦𑁆𑀢𑁂 𑀧𑀺𑀤𑀳𑀺𑀢𑀼𑀁 𑀅𑀲𑀫𑀢𑁆𑀣𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀪𑁂𑀭𑀺𑀘𑀫𑁆𑀫𑀲𑀤𑀺𑀲𑁂𑀳𑀻𑀢𑀺 𑀪𑁂𑀭𑀺𑀫𑀼𑀔𑀘𑀫𑁆𑀫𑀲𑀤𑀺𑀲𑁂𑀳𑀺. 𑀢𑀦𑀼𑀓𑀑𑀝𑁆𑀞𑁄 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀫𑀳𑀸𑀥𑀭𑁄𑀝𑁆𑀞𑁄 𑀯𑀸 𑀢𑀦𑀼𑀓𑀉𑀢𑁆𑀢𑀭𑁄𑀝𑁆𑀞𑁄 𑀯𑀸 𑀢𑀦𑀼𑀓𑀅𑀥𑀭𑁄𑀝𑁆𑀞𑁄 𑀯𑀸𑀢𑀺 𑀢𑀬𑁄 𑀯𑀺𑀓𑀧𑁆𑀧𑀸 𑀲𑀗𑁆𑀕𑀳𑀺𑀢𑀸. 𑀯𑀺𑀧𑀼𑀮𑀼𑀢𑁆𑀢𑀭𑀑𑀝𑁆𑀞𑀓𑁄𑀢𑀺 𑀫𑀳𑀸𑀉𑀢𑁆𑀢𑀭𑁄𑀝𑁆𑀞𑁄. 𑀑𑀝𑁆𑀞𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀑𑀝𑁆𑀞𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀉𑀧𑁆𑀧𑀓𑁆𑀓𑀫𑀼𑀔𑁄𑀢𑀺 𑀧𑀓𑁆𑀓𑀫𑀼𑀔𑁄. 𑀏𑀴𑀫𑀼𑀔𑁄𑀧𑀺 𑀯𑀸𑀢𑀺 𑀦𑀺𑀘𑁆𑀘𑀧𑀕𑁆𑀖𑀭𑀡𑀫𑀼𑀔𑁄.

𑁨𑁫𑁦𑁨-𑁩. 𑀲𑀗𑁆𑀔𑀢𑀼𑀡𑁆𑀟𑁄𑀧𑀻𑀢𑀺 𑀩𑀳𑀺 𑀲𑁂𑀢𑁂𑀳𑀺 𑀅𑀦𑁆𑀢𑁄 𑀅𑀢𑀺𑀭𑀢𑁆𑀢𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀤𑀼𑀕𑁆𑀕𑀦𑁆𑀥𑀫𑀼𑀔𑁄𑀢𑀺 𑀤𑀼𑀕𑁆𑀕𑀦𑁆𑀥𑀓𑀼𑀡𑀧𑀫𑀼𑀔𑁄. 𑀫𑀳𑀸𑀤𑀦𑁆𑀢𑁄𑀧𑀻𑀢𑀺 𑀅𑀝𑁆𑀞𑀓𑀤𑀦𑁆𑀢𑀲𑀤𑀺𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 ¶ . 𑀅𑀘𑁆𑀘𑀦𑁆𑀢𑀦𑁆𑀢𑀺 𑀅𑀢𑀺𑀲𑀬𑁂𑀦. ‘‘𑀳𑁂𑀝𑁆𑀞𑀸 𑀉𑀧𑀭𑀺𑀢𑁄 𑀯𑀸𑀧𑀺, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑀓𑁄’’𑀢𑀺 𑀇𑀤𑀁 ‘‘𑀅𑀲𑀼𑀭𑀤𑀦𑁆𑀢𑀓𑁄’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁. 𑀅𑀲𑀼𑀭𑁄𑀢𑀺 𑀤𑀸𑀦𑀯𑁄. ‘‘𑀲𑀺𑀧𑁆𑀧𑀺𑀤𑀦𑁆𑀢𑁄 𑀯𑀸 𑀑𑀝𑁆𑀞𑀤𑀦𑁆𑀢𑁄 𑀯𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑁄. 𑀬𑀲𑁆𑀲 𑀧𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀑𑀝𑁆𑀞𑁂𑀳𑀺 𑀧𑀺𑀤𑀳𑀺𑀢𑀼𑀁, 𑀓𑀣𑁂𑀦𑁆𑀢𑀲𑁆𑀲𑁂𑀯 𑀧𑀜𑁆𑀜𑀸𑀬𑀢𑀺, 𑀦𑁄 𑀅𑀓𑀣𑁂𑀦𑁆𑀢𑀲𑁆𑀲, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀤𑀦𑁆𑀢𑁄𑀢𑀺 𑀤𑀦𑁆𑀢𑀭𑀳𑀺𑀢𑁄. 𑀧𑀽𑀢𑀺𑀤𑀦𑁆𑀢𑁄𑀢𑀺 𑀧𑀽𑀢𑀺𑀪𑀽𑀢𑁂𑀳𑀺 𑀤𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁫𑁦𑁪. ‘‘𑀅𑀢𑀺𑀔𑀼𑀤𑁆𑀤𑀓𑀤𑀦𑁆𑀢𑀓𑁄’’𑀢𑀺 𑀇𑀫𑀲𑁆𑀲 ‘‘𑀬𑀲𑁆𑀲𑀸’’𑀢𑀺𑀆𑀤𑀺 𑀅𑀧𑀯𑀸𑀤𑁄. 𑀬𑀲𑁆𑀲 𑀤𑀦𑁆𑀢𑀦𑁆𑀢𑀭𑁂 𑀓𑀸𑀴𑀓𑀤𑀦𑁆𑀢𑀲𑀦𑁆𑀦𑀺𑀪𑁄 ¶ 𑀓𑀮𑀦𑁆𑀤𑀓𑀤𑀦𑁆𑀢𑀲𑀤𑀺𑀲𑁄 𑀤𑀦𑁆𑀢𑁄 𑀲𑀼𑀔𑀼𑀫𑁄𑀯 𑀞𑀺𑀢𑁄 𑀘𑁂, 𑀢𑀁 𑀢𑀼 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀸𑀚𑁂𑀢𑀼𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀢𑀼-𑀲𑀤𑁆𑀤𑀢𑁆𑀣𑁄.

𑁨𑁫𑁦𑁫. 𑀬𑁄 𑀧𑁄𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀳𑀦𑀼𑀓𑁄𑀢𑀺 𑀕𑁄𑀳𑀦𑀼𑀲𑀤𑀺𑀲𑁂𑀦 𑀳𑀦𑀼𑀦𑀸 𑀲𑀫𑀦𑁆𑀦𑀸𑀕𑀢𑁄. ‘‘𑀭𑀲𑁆𑀲𑁂𑀦 𑀳𑀦𑀼𑀦𑀸 𑀬𑀼𑀢𑁄’’𑀢𑀺 𑀇𑀤𑀁 ‘‘𑀘𑀺𑀧𑀺𑀝𑀳𑀦𑀼𑀓𑁄 𑀯𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀧𑀤𑀁. 𑀬𑀣𑀸𑀳 𑁋 ‘‘𑀘𑀺𑀧𑀺𑀝𑀳𑀦𑀼𑀓𑁄 𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀯𑀺𑀬 𑀅𑀢𑀺𑀭𑀲𑁆𑀲𑁂𑀦 𑀳𑀦𑀼𑀓𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁯). 𑀘𑀺𑀧𑀺𑀝𑀳𑀦𑀼𑀓𑁄 𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 ‘‘𑀪𑀺𑀦𑁆𑀦𑀳𑀦𑀼𑀓𑁄 𑀯𑀸 𑀯𑀗𑁆𑀓𑀳𑀦𑀼𑀓𑁄 𑀯𑀸’’𑀢𑀺 𑀯𑀺𑀓𑀧𑁆𑀧𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁫𑁦𑁬. 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑁄 𑀯𑀸𑀧𑀻𑀢𑀺 𑀪𑀺𑀓𑁆𑀔𑀼𑀦𑀺𑀲𑀤𑀺𑀲𑀫𑀼𑀔𑁄. 𑀅𑀢𑀺𑀤𑀻𑀖𑀕𑀮𑁄𑀧𑀺 𑀯𑀸𑀢𑀺 𑀩𑀓𑀕𑀮𑀲𑀤𑀺𑀲𑁂𑀦 𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀢𑀺𑀭𑀲𑁆𑀲𑀕𑀮𑁄𑀧𑀺 𑀯𑀸𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀯𑀺𑀬 𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀺𑀦𑁆𑀦𑀕𑀮𑁄 𑀯𑀸 𑀕𑀡𑁆𑀟𑀕𑀮𑁄𑀧𑀺 𑀯𑀸𑀢𑀺 𑀬𑁄𑀚𑀦𑀸, 𑀪𑀺𑀦𑁆𑀦𑀕𑀮𑀝𑁆𑀞𑀺𑀓𑁄 𑀯𑀸 𑀕𑀡𑁆𑀟𑁂𑀦 𑀲𑀫𑀦𑁆𑀦𑀸𑀕𑀢𑀕𑀮𑁄𑀧𑀺 𑀯𑀸𑀢𑀺 𑀅𑀢𑁆𑀣𑁄.

𑁨𑁫𑁦𑁭. 𑀪𑀝𑁆𑀞𑀁𑀲𑀓𑀽𑀝𑁄 ¶ 𑀯𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀯𑀺𑀬 𑀪𑀝𑁆𑀞𑁂𑀦 𑀅𑀁𑀲𑀓𑀽𑀝𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀺𑀦𑁆𑀦𑀧𑀺𑀝𑁆𑀞𑀺 𑀯𑀸 𑀪𑀺𑀦𑁆𑀦𑀉𑀭𑁄𑀧𑀺 𑀯𑀸𑀢𑀺 𑀬𑁄𑀚𑀦𑀸, 𑀲𑀼𑀤𑀻𑀖𑀳𑀢𑁆𑀣𑁄 𑀯𑀸 𑀲𑀼𑀭𑀲𑁆𑀲𑀳𑀢𑁆𑀣𑁄 𑀯𑀸𑀢𑀺 𑀬𑁄𑀚𑀦𑀸, 𑀅𑀢𑀺𑀤𑀻𑀖𑀳𑀢𑁆𑀣𑁄 𑀯𑀸 𑀅𑀢𑀺𑀭𑀲𑁆𑀲𑀳𑀢𑁆𑀣𑁄 𑀯𑀸𑀢𑀺 𑀅𑀢𑁆𑀣𑁄. 𑀯𑀸-𑀲𑀤𑁆𑀤𑁂𑀦 𑀅𑀳𑀢𑁆𑀣𑀏𑀓𑀳𑀢𑁆𑀣𑀸𑀦𑀁 𑀕𑀳𑀡𑀁. 𑀓𑀘𑁆𑀙𑀼𑀲𑀫𑀸𑀬𑀼𑀢𑁄 𑀯𑀸 𑀓𑀡𑁆𑀟𑀼𑀲𑀫𑀸𑀬𑀼𑀢𑁄 𑀯𑀸𑀢𑀺 𑀬𑁄𑀚𑀦𑀸. 𑀯𑀸-𑀲𑀤𑁆𑀤𑁂𑀦 ‘‘𑀤𑀤𑁆𑀤𑀼𑀕𑀢𑁆𑀢𑁄 𑀯𑀸 𑀕𑁄𑀥𑀸𑀕𑀢𑁆𑀢𑁄 𑀯𑀸’’𑀢𑀺 𑀇𑀫𑁂 𑀤𑁆𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀕𑁄𑀥𑀸𑀕𑀢𑁆𑀢𑁄 𑀯𑀸𑀢𑀺 𑀬𑀲𑁆𑀲 𑀕𑁄𑀥𑀸𑀬 𑀯𑀺𑀬 𑀕𑀢𑁆𑀢𑀢𑁄 𑀘𑀼𑀡𑁆𑀡𑀸𑀦𑀺 𑀧𑀢𑀦𑁆𑀢𑀺.

𑁨𑁫𑁦𑁮. 𑀫𑀳𑀸𑀦𑀺𑀲𑀤𑀫𑀁𑀲𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀧𑀤𑀁 ‘‘𑀉𑀤𑁆𑀥𑀦𑀕𑁆𑀕𑀼𑀧𑀫𑀸𑀬𑀼𑀢𑁄’’𑀢𑀺. 𑀬𑀣𑀸𑀳 𑁋 ‘‘𑀫𑀳𑀸𑀆𑀦𑀺𑀲𑀤𑁄 𑀯𑀸 𑀉𑀤𑁆𑀥𑀦𑀓𑀽𑀝𑀲𑀤𑀺𑀲𑁂𑀳𑀺 𑀆𑀦𑀺𑀲𑀤𑀫𑀁𑀲𑁂𑀳𑀺 𑀅𑀘𑁆𑀘𑀼𑀕𑁆𑀕𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁯). 𑀫𑀳𑀸𑀦𑀺𑀲𑀤𑀫𑀁𑀲𑁄 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀪𑀝𑁆𑀞𑀓𑀝𑀺𑀓𑁄 𑀲𑀗𑁆𑀕𑀳𑀺𑀢𑁄. 𑀯𑀸𑀢𑀡𑁆𑀟𑀺𑀓𑁄𑀢𑀺 𑀅𑀡𑁆𑀟𑀓𑁄𑀲𑁂𑀲𑀼 𑀯𑀼𑀤𑁆𑀥𑀺𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀊𑀭𑀽𑀢𑀺 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑁂𑀳𑀺 𑀫𑀳𑀦𑁆𑀢𑁂𑀳𑀺 𑀲𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀗𑁆𑀖𑀝𑁆𑀝𑀦𑀓𑀚𑀸𑀡𑀼𑀓𑁄𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑁂𑀳𑀺 𑀚𑀸𑀡𑀽𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁫𑁦𑁯. 𑀪𑀺𑀦𑁆𑀦𑀚𑀸𑀡𑀽𑀢𑀺 𑀬𑀲𑁆𑀲 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀚𑀸𑀡𑀽 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀫𑀳𑀸𑀚𑀸𑀡𑀽𑀢𑀺 𑀫𑀳𑀦𑁆𑀢𑁂𑀦 ¶ 𑀚𑀸𑀡𑀼𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀤𑀻𑀖𑀚𑀗𑁆𑀖𑁄𑀢𑀺 𑀬𑀝𑁆𑀞𑀺𑀲𑀤𑀺𑀲𑀚𑀗𑁆𑀖𑁄. 𑀯𑀺𑀓𑀝𑁄 𑀯𑀸𑀢𑀺 𑀢𑀺𑀭𑀺𑀬𑀁 𑀕𑀫𑀦𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀩𑀳𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺. 𑀧𑀡𑁆𑀳𑁄 𑀯𑀸𑀢𑀺 𑀧𑀘𑁆𑀙𑀢𑁄 𑀧𑀭𑀺𑀯𑀢𑁆𑀢𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀺. ‘‘𑀧𑀦𑁆𑀢𑁄’’𑀢𑀺 𑀘 ‘‘𑀲𑀡𑁆𑀳𑁄’’𑀢𑀺 𑀘 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀉𑀩𑁆𑀩𑀤𑁆𑀥𑀧𑀺𑀡𑁆𑀟𑀺𑀓𑁄𑀢𑀺 𑀳𑁂𑀝𑁆𑀞𑀸 𑀑𑀭𑀼𑀴𑁆𑀳𑀸𑀳𑀺 𑀯𑀸 𑀉𑀧𑀭𑀺 𑀆𑀭𑀼𑀴𑁆𑀳𑀸𑀳𑀺 𑀯𑀸 𑀫𑀳𑀢𑀻𑀳𑀺 𑀚𑀗𑁆𑀖𑀧𑀺𑀡𑁆𑀟𑀺𑀓𑀸𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁫𑁧𑁦. 𑀬𑀝𑁆𑀞𑀺𑀚𑀗𑁆𑀖𑁄𑀢𑀺 ¶ 𑀬𑀝𑁆𑀞𑀺𑀲𑀤𑀺𑀲𑀸𑀬 𑀚𑀗𑁆𑀖𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀚𑀗𑁆𑀖𑁄𑀢𑀺 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑀸𑀬 𑀫𑀳𑀢𑀺𑀬𑀸 𑀚𑀗𑁆𑀖𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀧𑀸𑀤𑁄𑀧𑀺 𑀯𑀸𑀢𑀺 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑁂𑀳𑀺 𑀫𑀳𑀦𑁆𑀢𑁂𑀳𑀺 𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀧𑀺-𑀲𑀤𑁆𑀤𑁂𑀦 𑀣𑀽𑀮𑀚𑀗𑁆𑀖𑀧𑀺𑀡𑁆𑀟𑀺𑀓𑁄 𑀲𑀗𑁆𑀕𑀳𑀺𑀢𑁄, 𑀪𑀢𑁆𑀢𑀧𑀼𑀝𑀲𑀤𑀺𑀲𑀸𑀬 𑀣𑀽𑀮𑀸𑀬 𑀚𑀗𑁆𑀖𑀧𑀺𑀡𑁆𑀟𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀺𑀝𑁆𑀞𑀺𑀓𑀧𑀸𑀤𑁄 𑀯𑀸𑀢𑀺 𑀧𑀸𑀤𑀯𑁂𑀫𑀚𑁆𑀛𑀢𑁄 𑀉𑀝𑁆𑀞𑀺𑀢𑀚𑀗𑁆𑀖𑁄. 𑀫𑀳𑀸𑀧𑀡𑁆𑀳𑀺𑀧𑀺 𑀯𑀸𑀢𑀺 𑀅𑀦𑀦𑀼𑀭𑀽𑀧𑁂𑀳𑀺 𑀅𑀢𑀺𑀫𑀳𑀦𑁆𑀢𑁂𑀳𑀺 𑀧𑀡𑁆𑀳𑀻𑀳𑀺 𑀲𑀫𑀦𑁆𑀦𑀸𑀕𑀢𑁄.

𑁨𑁫𑁧𑁧. 𑀯𑀗𑁆𑀓𑀧𑀸𑀤𑁄𑀢𑀺 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀭𑀺𑀯𑀢𑁆𑀢𑀧𑀸𑀤𑀯𑀲𑁂𑀦 𑀤𑀼𑀯𑀺𑀥𑁄 𑀯𑀗𑁆𑀓𑀧𑀸𑀤𑁄. 𑀕𑀡𑁆𑀞𑀺𑀓𑀗𑁆𑀕𑀼𑀮𑀺𑀓𑁄𑀢𑀺 𑀲𑀺𑀗𑁆𑀕𑀺𑀯𑁂𑀭𑀨𑀡𑀲𑀤𑀺𑀲𑀸𑀳𑀺 𑀅𑀗𑁆𑀕𑀼𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. ‘‘𑀅𑀦𑁆𑀥𑀦𑀔𑁄 𑀯𑀸𑀧𑀻’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀧𑀤𑀁 ‘‘𑀓𑀸𑀴𑀧𑀽𑀢𑀺𑀦𑀔𑁄𑀧𑀺 𑀘𑀸’’𑀢𑀺. 𑀬𑀣𑀸𑀳 𑁋 ‘‘𑀅𑀦𑁆𑀥𑀦𑀔𑁄 𑀯𑀸 𑀓𑀸𑀴𑀯𑀡𑁆𑀡𑁂𑀳𑀺 𑀧𑀽𑀢𑀺𑀦𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁯).

𑁨𑁫𑁧𑁨. 𑀇𑀘𑁆𑀘𑁂𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀻𑀬𑀦𑀺𑀤𑀲𑁆𑀲𑀦𑀢𑁆𑀣𑁄𑀬𑀁 𑀦𑀺𑀧𑀸𑀢𑀲𑀫𑀼𑀤𑀸𑀬𑁄. 𑀅𑀗𑁆𑀕𑀯𑁂𑀓𑀮𑁆𑀮𑀢𑀸𑀬 𑀩𑀳𑀼𑀯𑀺𑀥𑀢𑁆𑀢𑀸 𑀅𑀦𑀯𑀲𑁂𑀲𑀁 𑀯𑁂𑀓𑀮𑁆𑀮𑀧𑁆𑀧𑀓𑀸𑀭𑀁 𑀲𑀗𑁆𑀕𑀡𑁆𑀳𑀺𑀢𑀼𑀫𑀸𑀳 ‘‘𑀇𑀘𑁆𑀘𑁂𑀯𑀫𑀸𑀤𑀺𑀓’’𑀦𑁆𑀢𑀺.

𑀧𑀭𑀺𑀲𑀤𑀽𑀲𑀓𑀓𑀣𑀸𑀯𑀡𑁆𑀡𑀦𑀸.

𑁨𑁫𑁧𑁪. 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 ‘‘𑀲𑀸𑀫𑀡𑁂𑀭𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺. 𑀅𑀦𑁆𑀢𑁄 𑀦𑀺𑀓𑁆𑀔𑀺𑀧𑀢𑁄𑀢𑀺 𑀑𑀯𑀭𑀓𑀸𑀤𑀻𑀦𑀁 𑀅𑀦𑁆𑀢𑁄 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲. 𑀲𑀩𑁆𑀩𑀧𑀬𑁄𑀕𑁂𑀲𑀽𑀢𑀺 𑀧𑀢𑁆𑀢𑀘𑀻𑀯𑀭𑀲𑁆𑀲 𑀆𑀫𑀲𑀦𑀸𑀤𑀺𑀲𑀩𑁆𑀩𑀧𑀬𑁄𑀕𑁂𑀲𑀼.

𑁨𑁫𑁧𑁫-𑁬. 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀤𑀡𑁆𑀟𑀓𑀫𑁆𑀫𑀁 𑀬𑁄𑀚𑁂𑀢𑁆𑀯𑀸. 𑀤𑀡𑁆𑀟𑁂𑀦𑁆𑀢𑀺 𑀯𑀺𑀦𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀡𑁆𑀟𑁄, 𑀲𑁄𑀬𑁂𑀯 𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀦𑁆𑀢𑀺 ¶ 𑀤𑀡𑁆𑀟𑀓𑀫𑁆𑀫𑀁, 𑀆𑀯𑀭𑀡𑀸𑀤𑀺. 𑀅𑀦𑀸𑀘𑀸𑀭𑀲𑁆𑀲 𑀤𑀼𑀩𑁆𑀩𑀘𑀲𑀸𑀫𑀡𑁂𑀭𑀲𑁆𑀲 𑀓𑁂𑀯𑀮𑀁 ¶ 𑀳𑀺𑀢𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀁 𑀬𑁄𑀚𑁂𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀯𑀸-𑀲𑀤𑁆𑀤𑁂𑀦 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀤𑀡𑁆𑀟𑀓𑀫𑁆𑀫𑁂 𑀆𑀳𑀝𑁂 𑀢𑁆𑀯𑀁 𑀇𑀤𑀁 𑀮𑀘𑁆𑀙𑀲𑀺’’ 𑀇𑀢𑀺 𑀪𑀸𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀓𑀺𑀭𑀸𑀢𑀺 𑀧𑀤𑀧𑀽𑀭𑀡𑀢𑁆𑀣𑁂 𑀦𑀺𑀧𑀸𑀢𑁄.

𑁨𑁫𑁧𑁭. 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀤𑀡𑁆𑀟𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀭𑀸𑀥𑀸𑀦𑀼𑀭𑀽𑀧𑁂𑀦𑀸’’𑀢𑀺𑀆𑀤𑀺. 𑀢𑀁 𑀅𑀧𑀭𑀸𑀥𑀸𑀦𑀼𑀭𑀽𑀧𑀤𑀡𑁆𑀟𑀓𑀫𑁆𑀫𑀁 𑀦𑀸𑀫 𑀯𑀸𑀮𑀺𑀓𑀸𑀲𑀮𑀺𑀮𑀸𑀤𑀻𑀦𑀁 𑀆𑀳𑀭𑀸𑀧𑀦𑀫𑁂𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁂𑀦 𑀤𑀸𑀭𑀼𑀆𑀤𑀻𑀦𑀁 𑀆𑀳𑀭𑀸𑀧𑀦𑀁 𑀕𑀡𑁆𑀳𑀸𑀢𑀺. 𑀢𑀜𑁆𑀘 𑀔𑁄 ‘‘𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀓𑀫𑁆𑀧𑀸𑀬, 𑀦 ‘‘𑀦𑀲𑁆𑀲𑀺𑀲𑁆𑀲𑀢𑀺 𑀯𑀺𑀩𑁆𑀪𑀫𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀸𑀧𑀚𑁆𑀛𑀸𑀲𑀬𑁂𑀦.

𑁨𑁫𑁧𑁮-𑁯. 𑀅𑀓𑀢𑁆𑀢𑀩𑁆𑀩𑀁 𑀤𑀡𑁆𑀟𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀻𑀲𑁂 𑀯𑀸’’𑀢𑀺𑀆𑀤𑀺. 𑀲𑀻𑀲𑁂 𑀯𑀸𑀢𑀺 𑀏𑀢𑁆𑀣 ‘‘𑀲𑀸𑀫𑀡𑁂𑀭𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀮𑀩𑁆𑀪𑀢𑀺. 𑀧𑀸𑀲𑀸𑀡𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀝𑁆𑀞𑀓𑀸𑀤𑀻𑀦𑀁 𑀕𑀳𑀡𑀁. 𑀲𑀸𑀫𑀡𑁂𑀭𑀁 𑀉𑀡𑁆𑀳𑁂 𑀧𑀸𑀲𑀸𑀡𑁂 𑀦𑀺𑀧𑀚𑁆𑀚𑀸𑀧𑁂𑀢𑀼𑀁 𑀯𑀸 𑀉𑀡𑁆𑀳𑀸𑀬 𑀪𑀽𑀫𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀢𑀼𑀁 𑀯𑀸 𑀉𑀤𑀓𑀁 𑀧𑀯𑁂𑀲𑁂𑀢𑀼𑀁 𑀯𑀸 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀤𑀡𑁆𑀟𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀇𑀥𑀸’’𑀢𑀺𑀆𑀤𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀤𑀡𑁆𑀟𑀓𑀫𑁆𑀫𑀸𑀥𑀺𑀓𑀸𑀭𑁂. 𑀆𑀯𑀭𑀡𑀫𑀢𑁆𑀢𑀦𑁆𑀢𑀺 ‘‘𑀫𑀸 𑀇𑀥 𑀧𑀸𑀯𑀺𑀲𑀻’’𑀢𑀺 𑀦𑀺𑀯𑀸𑀭𑀡𑀫𑀢𑁆𑀢𑀁. 𑀧𑀓𑀸𑀲𑀺𑀢𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀯𑀸 𑀯𑀲𑀢𑀺, 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀆𑀯𑀭𑀡𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁦𑁭) 𑀪𑀸𑀲𑀺𑀢𑀁.

‘‘𑀬𑀢𑁆𑀣 𑀯𑀸 𑀯𑀲𑀢𑀺, 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺 𑀬𑀢𑁆𑀣 𑀯𑀲𑀢𑀺 𑀯𑀸 𑀧𑀯𑀺𑀲𑀢𑀺 𑀯𑀸, 𑀉𑀪𑀬𑁂𑀦𑀸𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀜𑁆𑀘 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀜𑁆𑀘 𑀯𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁦𑁭) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀬𑀸𑀯 𑀬𑁄𑀚𑀺𑀢𑀁 ¶ 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀸𑀯 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀧𑀭𑀺𑀯𑁂𑀡𑀁 𑀯𑀸 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀁 𑀯𑀸 𑀧𑀯𑀺𑀲𑀺𑀢𑀼𑀁 𑀅𑀤𑀢𑁆𑀯𑀸 𑀦𑀺𑀯𑀸𑀭𑀡𑀁 𑀆𑀯𑀭𑀡𑀁 𑀦𑀸𑀫. 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀢𑀦𑁄’’𑀢𑀺 𑀯𑀘𑀦𑀁 𑀬𑁂 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺, 𑀢𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀇𑀤𑀁 𑀬𑀲𑁆𑀲 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀺. 𑀓𑁂𑀘𑀺 𑀉𑀪𑀬𑀣𑀸𑀧𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀉𑀪𑀬𑀢𑁆𑀣𑀸𑀧𑀺 𑀆𑀯𑀭𑀡𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀬𑀫𑁂𑀢𑁆𑀣 𑀬𑀼𑀢𑁆𑀢𑀢𑀭𑀁, 𑀢𑀁 𑀕𑀳𑁂𑀢𑀩𑁆𑀩𑀁.

𑀦𑀺𑀯𑀸𑀭𑀡𑀓𑀣𑀸𑀯𑀡𑁆𑀡𑀦𑀸.

𑁨𑁫𑁨𑁦. 𑀧𑀓𑁆𑀔𑁄 ¶ 𑀘 𑀑𑀧𑀓𑁆𑀓𑀫𑀺𑀓𑁄 𑀘 𑀆𑀲𑀺𑀢𑁆𑀢𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀘 ‘‘𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀬𑀣𑀸 𑀉𑀧𑁄𑀲𑀣𑀤𑀺𑀦𑁂 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 ‘‘𑀉𑀧𑁄𑀲𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀫𑀸𑀲𑀲𑁆𑀲 𑀧𑀓𑁆𑀔𑁂 𑀧𑀡𑁆𑀟𑀓𑀪𑀸𑀯𑀫𑀸𑀧𑀚𑁆𑀚𑀦𑁆𑀢𑁄 ‘‘𑀧𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀧𑀓𑁆𑀔𑀧𑀡𑁆𑀟𑀓𑁄 𑀧𑀓𑁆𑀔𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀪𑀻𑀫𑀲𑁂𑀦𑁄 𑀪𑀻𑀫𑁄’’𑀢𑀺. 𑀇𑀤𑀜𑁆𑀘 𑀧𑀸𑀧𑀸𑀦𑀼𑀪𑀸𑀯𑁂𑀦 𑀓𑀡𑁆𑀳𑀧𑀓𑁆𑀔𑁂𑀬𑁂𑀯 𑀧𑀡𑁆𑀟𑀓𑀪𑀸𑀯𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀅𑀥𑀺𑀯𑀘𑀦𑀁. 𑀬𑀣𑀸𑀳 ‘‘𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀸𑀯𑁂𑀦 𑀓𑀸𑀴𑀧𑀓𑁆𑀔𑁂 𑀓𑀸𑀴𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀦𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁦𑁯).

𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀺, 𑀅𑀬𑀁 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄. 𑀬𑀲𑁆𑀲 𑀧𑀭𑁂𑀲𑀁 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀅𑀲𑀼𑀘𑀺𑀦𑀸 𑀆𑀲𑀺𑀢𑁆𑀢𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀆𑀲𑀺𑀢𑁆𑀢𑀧𑀡𑁆𑀟𑀓𑁄. 𑀉𑀲𑀽𑀬𑀓𑁄𑀢𑀺 𑀬𑀲𑁆𑀲 𑀧𑀭𑁂𑀲𑀁 𑀅𑀚𑁆𑀛𑀸𑀘𑀸𑀭𑀁 𑀧𑀲𑁆𑀲𑀢𑁄 𑀉𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀉𑀲𑀽𑀬𑀧𑀡𑁆𑀟𑀓𑁄. 𑀬𑁄 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀅𑀪𑀸𑀯𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀦𑀧𑀼𑀁𑀲𑀓𑀧𑀡𑁆𑀟𑀓𑁄.

𑁨𑁫𑁨𑁧. 𑀢𑁂𑀲𑀽𑀢𑀺 ¶ 𑀢𑁂𑀲𑀼 𑀧𑀜𑁆𑀘𑀲𑀼 𑀧𑀡𑁆𑀟𑀓𑁂𑀲𑀼. ‘‘𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀬𑀲𑁆𑀫𑀺𑀁𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁦𑁯) 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀺𑀡𑁆𑀡𑀁 𑀦𑀺𑀯𑀸𑀭𑀺𑀢𑀸’’𑀢𑀺 𑀇𑀤𑀁 𑀢𑀲𑁆𑀲 𑀧𑀡𑁆𑀟𑀓𑀲𑁆𑀲 𑀧𑀡𑁆𑀟𑀓𑀧𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁨𑁫𑁨𑁨. ‘‘𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀇𑀤𑀁 𑀮𑀺𑀗𑁆𑀕𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀲𑁄𑀧𑀺 𑀮𑀺𑀗𑁆𑀕𑀦𑀸𑀲𑀦𑁂𑀦𑁂𑀯 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁦𑁯). 𑀏𑀲 𑀦𑀬𑁄 𑀉𑀧𑀭𑀺𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼.

𑀧𑀡𑁆𑀟𑀓𑀓𑀣𑀸𑀯𑀡𑁆𑀡𑀦𑀸.

𑁨𑁫𑁨𑁩. 𑀣𑁂𑀦𑁂𑀢𑀻𑀢𑀺 𑀣𑁂𑀦𑁄, 𑀮𑀺𑀗𑁆𑀕𑀲𑁆𑀲 𑀧𑀩𑁆𑀩𑀚𑀺𑀢𑀯𑁂𑀲𑀲𑁆𑀲 𑀣𑁂𑀦𑁄 𑀮𑀺𑀗𑁆𑀕𑀣𑁂𑀦𑁄. 𑀲𑀁𑀯𑀸𑀲𑀲𑁆𑀲 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑀲𑁆𑀲 𑀣𑁂𑀦𑁄 𑀲𑀁𑀯𑀸𑀲𑀣𑁂𑀦𑁄. 𑀢𑀤𑀼𑀪𑀬𑀲𑁆𑀲 𑀘𑀸𑀢𑀺 𑀢𑀲𑁆𑀲 𑀮𑀺𑀗𑁆𑀕𑀲𑁆𑀲, 𑀲𑀁𑀯𑀸𑀲𑀲𑁆𑀲 𑀘 𑀉𑀪𑀬𑀲𑁆𑀲 𑀣𑁂𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀢𑀺𑀯𑀺𑀥𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁨𑁫𑁨𑁪-𑁬. 𑀢𑀢𑁆𑀣 𑀢𑁂𑀲𑀼 𑀢𑀻𑀲𑀼 𑀣𑁂𑀬𑁆𑀬𑀲𑀁𑀯𑀸𑀲𑀓𑁂𑀲𑀼 𑀬𑁄 𑀲𑀬𑀫𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀦 𑀕𑀡𑁆𑀳𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀫𑁆𑀧𑀺 𑀦𑁂𑀯 𑀕𑀡𑁆𑀳𑀢𑀺, 𑀅𑀧𑀺-𑀲𑀤𑁆𑀤𑁂𑀦 𑀆𑀲𑀦𑁂𑀦 𑀦𑁂𑀯 𑀧𑀝𑀺𑀩𑀸𑀳𑀢𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 ¶ 𑀦𑁂𑀯 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀲𑀗𑁆𑀕𑀡𑁆𑀳𑀦𑀢𑁄 𑀢𑀤𑀼𑀪𑀬𑀫𑁆𑀧𑀺 𑀦 𑀓𑀭𑁄𑀢𑀺, 𑀅𑀬𑀁 𑀮𑀺𑀗𑁆𑀕𑀫𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀯𑁂𑀲𑀫𑀢𑁆𑀢𑀲𑁆𑀲 𑀣𑁂𑀦𑀢𑁄 𑀘𑁄𑀭𑀺𑀓𑀸𑀬 𑀕𑀳𑀡𑀢𑁄 𑀮𑀺𑀗𑁆𑀕𑀢𑁆𑀣𑁂𑀦𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑀬𑁄 𑀘 𑀧𑀩𑁆𑀩𑀚𑀺𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁆𑀳𑀢𑀺, 𑀲𑁄 𑀬𑀣𑀸𑀯𑀼𑀟𑁆𑀠𑀯𑀦𑁆𑀤𑀦𑀸𑀤𑀺𑀓𑀁 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀯 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀫𑀢𑁄𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀓𑀺𑀭𑀺𑀬𑀪𑁂𑀤𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘𑀲𑀁𑀯𑀸𑀲𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦).

𑀯𑀼𑀢𑁆𑀢𑀦𑀬𑁄𑀬𑁂𑀯𑀸𑀢𑀺 ¶ 𑀉𑀪𑀺𑀦𑁆𑀦𑀁 𑀧𑀘𑁆𑀘𑁂𑀓𑀁 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀏𑀢𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀬𑀁 𑀢𑀺𑀯𑀺𑀥𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄, 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀣𑁂𑀬𑁆𑀬𑀲𑀁𑀯𑀸𑀲𑀮𑀓𑁆𑀔𑀡𑀁 𑀦𑀺𑀬𑀫𑁂𑀢𑀼𑀁 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦) 𑀯𑀼𑀢𑁆𑀢𑀕𑀸𑀣𑀸𑀤𑁆𑀯𑀬𑀁 𑀉𑀤𑀸𑀳𑀭𑀦𑁆𑀢𑁄 𑀆𑀳 ‘‘𑀬𑀣𑀸𑀳 𑀘𑀸’’𑀢𑀺. 𑀬𑀣𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀕𑀸𑀣𑀸𑀤𑁆𑀯𑀬𑀫𑀸𑀳, 𑀢𑀣𑀸𑀬𑀫𑀢𑁆𑀣𑁄 𑀩𑁆𑀬𑀢𑀺𑀭𑁂𑀓𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫𑁨𑁭-𑁮. 𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭-𑀭𑁄𑀕𑀯𑁂𑀭𑀺𑀪𑀬𑁂𑀳𑀺 𑀯𑀸𑀢𑀺 𑀏𑀢𑁆𑀣 𑀪𑀬-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀭𑀸𑀚𑀪𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦𑀸’’𑀢𑀺𑀆𑀤𑀺𑀦𑀸. 𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀯𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀘𑁆𑀘𑀢𑁆𑀢𑀘𑀻𑀯𑀭𑀁 𑀧𑀼𑀦 𑀯𑀺𑀳𑀸𑀭𑀁 𑀆𑀳𑀭𑀡𑀢𑁆𑀣𑀸𑀬. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀢𑀸𑀬 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀬𑁄 𑀳𑀺 𑀭𑀸𑀚𑀪𑀬𑀸𑀤𑀻𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀯𑀲𑀺𑀢𑀼𑀓𑀸𑀫𑀢𑀸𑀬 𑀮𑀺𑀗𑁆𑀕𑀁 𑀕𑀡𑁆𑀳𑀸𑀢𑀺, 𑀲𑁄 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀮𑀺𑀗𑁆𑀕𑀕𑁆𑀕𑀳𑀡𑁂𑀦𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀢𑀸𑀤𑀺𑀲𑁂𑀦 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀢𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀳𑁄𑀢𑀺. 𑀢𑁂𑀦𑁂𑀯 ‘‘𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀸𑀦𑀁 ‘𑀕𑀺𑀳𑀻 𑀫𑀁 𑀲𑀫𑀡𑁄𑀢𑀺 𑀚𑀸𑀦𑀦𑁆𑀢𑀽’𑀢𑀺 𑀯𑀜𑁆𑀘𑀦𑀸𑀘𑀺𑀢𑁆𑀢𑁂 𑀲𑀢𑀺𑀧𑀺 𑀪𑀺𑀓𑁆𑀔𑀽𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀸 𑀤𑁄𑀲𑁄 𑀦 𑀚𑀸𑀢𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀓𑁂𑀘𑀺 ¶ 𑀧𑀦 ‘‘𑀯𑀽𑀧𑀲𑀦𑁆𑀢𑀪𑀬𑀢𑀸 𑀇𑀥 𑀲𑀼𑀤𑁆𑀥𑀘𑀺𑀢𑁆𑀢𑀢𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑁄 𑀯𑀽𑀧𑀲𑀦𑁆𑀢𑀪𑀬𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀯𑀺𑀜𑁆𑀜𑀸𑀬𑀫𑀸𑀦𑁂 𑀅𑀯𑀽𑀧𑀲𑀦𑁆𑀢𑀪𑀬𑀲𑁆𑀲 𑀲𑀁𑀯𑀸𑀲𑀲𑀸𑀤𑀺𑀬𑀦𑁂𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑀢𑀸 ¶ 𑀦 𑀳𑁄𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀅𑀝𑁆𑀞𑀓𑀣𑀸𑀬𑀁 𑀅𑀯𑀽𑀧𑀲𑀦𑁆𑀢𑀪𑀬𑀲𑁆𑀲 𑀲𑀁𑀯𑀸𑀲𑀲𑀸𑀤𑀺𑀬𑀦𑁂 𑀅𑀣𑁂𑀬𑁆𑀬𑀲𑀁𑀯𑀸𑀲𑀓𑀢𑀸 𑀤𑀲𑁆𑀲𑀺𑀢𑀸. ‘‘𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄’’𑀢𑀺 𑀘 𑀇𑀫𑀺𑀦𑀸 𑀅𑀯𑀽𑀧𑀲𑀦𑁆𑀢𑀪𑀬𑁂𑀦𑀸𑀧𑀺 𑀲𑀁𑀯𑀸𑀲𑀁 𑀅𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀯𑀲𑀺𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀲𑀁𑀯𑀸𑀲𑀁 𑀧𑀭𑀺𑀳𑀭𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 ‘𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄’𑀢𑀺 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀫𑀸 𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀢𑀸 𑀘𑁂𑀢𑁆𑀣 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀢𑀸𑀯 𑀏𑀲 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀦𑀬𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀣𑁂𑀬𑁆𑀬𑀲𑀁𑀯𑀸𑀲𑀓𑀓𑀣𑀸𑀯𑀡𑁆𑀡𑀦𑀸.

𑁨𑁫𑁨𑁯-𑁩𑁦. 𑀬𑁄 𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 ‘‘𑀅𑀳𑀁 𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀮𑀺𑀗𑁆𑀕𑁂𑀦𑁂𑀯 𑀅𑀢𑁆𑀢𑀦𑁄 𑀪𑀺𑀓𑁆𑀔𑀼𑀯𑁂𑀲𑁂𑀦𑁂𑀯 𑀢𑀺𑀢𑁆𑀣𑀺𑀬𑀸𑀦𑀁 𑀉𑀧𑀲𑁆𑀲𑀬𑀁 𑀬𑀸𑀢𑀺 𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀺𑀢𑁆𑀣𑀺𑀬𑁂𑀲𑀼 𑀧𑀓𑁆𑀓𑀦𑁆𑀢𑀓𑁄 𑀧𑀯𑀺𑀝𑁆𑀞𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄. 𑀢𑁂𑀲𑀁 𑀮𑀺𑀗𑁆𑀕𑁂 𑀦𑀺𑀲𑁆𑀲𑀺𑀢𑁂𑀢𑀺 𑀢𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑁂𑀲𑁂 𑀕𑀳𑀺𑀢𑁂.

𑁨𑁫𑁩𑁧. ‘‘𑀅𑀳𑀁 𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀓𑀼𑀲𑀘𑀻𑀭𑀸𑀤𑀺𑀓𑀁 𑀬𑁄 𑀲𑀬𑀫𑁂𑀯 𑀦𑀺𑀯𑀸𑀲𑁂𑀢𑀺, 𑀲𑁄𑀧𑀺 𑀧𑀓𑁆𑀓𑀦𑁆𑀢𑀓𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁨𑁫𑁩𑁨-𑁪. 𑀦𑀕𑁆𑀕𑁄 ¶ 𑀢𑁂𑀲𑀁 𑀆𑀚𑀻𑀯𑀓𑀸𑀤𑀻𑀦𑀁 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑁂𑀲𑁂 𑀮𑀼𑀜𑁆𑀘𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁄 𑀓𑁂𑀲𑁂 𑀮𑀼𑀜𑁆𑀘𑀸𑀧𑁂𑀢𑀺. 𑀢𑁂𑀲𑀁 𑀯𑀢𑀸𑀦𑀺 𑀆𑀤𑀺𑀬𑀢𑀺 𑀯𑀸𑀢𑀺 𑀬𑁄𑀚𑀦𑀸. 𑀯𑀢𑀸𑀦𑀺 𑀆𑀤𑀺𑀬𑀢𑀻𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀦𑀺 𑀯𑀸 𑀯𑀢𑀸𑀦𑀺 𑀆𑀤𑀺𑀬𑀢𑀺. 𑀢𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀫𑁄𑀭𑀧𑀺𑀜𑁆𑀙𑀸𑀤𑀺𑀓𑀁 𑀮𑀺𑀗𑁆𑀕𑀁 𑀲𑀜𑁆𑀜𑀸𑀡𑀁 𑀲𑀘𑁂 𑀕𑀡𑁆𑀳𑀸𑀢𑀺 𑀯𑀸 𑀢𑁂𑀲𑀁 𑀧𑀩𑁆𑀩𑀚𑁆𑀚𑀁, 𑀮𑀤𑁆𑀥𑀺𑀫𑁂𑀯 𑀯𑀸 𑀲𑀸𑀭𑀢𑁄 𑀯𑀸 𑀏𑀢𑀺 𑀉𑀧𑀕𑀘𑁆𑀙𑀢𑀺 𑀯𑀸𑀢𑀺 𑀬𑁄𑀚𑀦𑀸. ‘‘𑀅𑀬𑀁 𑀧𑀩𑁆𑀩𑀚𑁆𑀚𑀸 𑀲𑁂𑀝𑁆𑀞𑀸𑀢𑀺 𑀲𑁂𑀝𑁆𑀞𑀪𑀸𑀯𑀁 𑀯𑀸 𑀉𑀧𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀏𑀲 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺 𑀏𑀯, 𑀦 𑀧𑀦 𑀯𑀺𑀫𑀼𑀘𑁆𑀘𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀪𑀸𑀯𑀢𑁄. 𑀦𑀕𑁆𑀕𑀲𑁆𑀲 𑀕𑀘𑁆𑀙𑀢𑁄𑀢𑀺 ‘‘𑀆𑀚𑀻𑀯𑀓𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀓𑀸𑀲𑀸𑀬𑀸𑀤𑀻𑀦𑀺 𑀅𑀦𑀸𑀤𑀸𑀬 𑀦𑀕𑁆𑀕𑀲𑁆𑀲 𑀆𑀚𑀻𑀯𑀓𑀸𑀦𑀁 𑀉𑀧𑀲𑀁𑀕𑀘𑁆𑀙𑀢𑁄.

𑁨𑁫𑁩𑁫. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 ¶ 𑀅𑀦𑀼𑀧𑀲𑀫𑁆𑀧𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑁄, 𑀦𑁄 𑀉𑀧𑀲𑀫𑁆𑀧𑀦𑁆𑀦𑀯𑀲𑁂𑀦. 𑀇𑀫𑀺𑀦𑀸 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀓𑀽𑀝𑀯𑀲𑁆𑀲𑀁 𑀕𑀡𑁆𑀳𑀦𑁆𑀢𑁄𑀧𑀺 𑀅𑀲𑁆𑀲𑀫𑀡𑁄 𑀦 𑀳𑁄𑀢𑀺. 𑀮𑀺𑀗𑁆𑀕𑁂 𑀲𑀉𑀲𑁆𑀲𑀸𑀳𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀤𑀻𑀦𑀺 𑀕𑀡𑁂𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀻𑀧𑁂𑀢𑀺. 𑀢𑀣𑀸 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. ‘‘𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀘 ‘‘𑀲𑀸𑀫𑀡𑁂𑀭𑁄 𑀲𑀮𑀺𑀗𑁆𑀕𑁂𑀦 𑀢𑀺𑀢𑁆𑀣𑀸𑀬𑀢𑀦𑀁 𑀕𑀢𑁄𑀧𑀺 𑀧𑀼𑀦 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀺.

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀲𑁆𑀲 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀧𑀩𑁆𑀩𑀸𑀚𑀺𑀢𑁄𑀧𑀺 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀸𑀤𑀺𑀢𑁄 𑀘 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀢𑀓𑀸𑀦𑀺 𑀤𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀉𑀧𑀦𑁂𑀢𑀩𑁆𑀩𑁄. 𑀅𑀬𑀫𑀢𑁆𑀣𑁄 𑀘 ‘‘𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀪𑀺𑀓𑁆𑀔𑀯𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 ¶ 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁦) 𑀧𑀸𑀴𑀺𑀢𑁄 𑀘 ‘‘𑀲𑁄 𑀦 𑀓𑁂𑀯𑀮𑀁 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀅𑀣 𑀔𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀧𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸𑀯𑀡𑁆𑀡𑀦𑀸.

𑁨𑁫𑁩𑁬. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀥𑀺𑀓𑀸𑀭𑁂. 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑁄 𑀅𑀜𑁆𑀜𑀲𑁆𑀲 𑀢𑀺𑀭𑀘𑁆𑀙𑀸𑀦𑀕𑀢𑁂𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬𑀓𑁆𑀔𑁄 𑀲𑀓𑁆𑀓𑁄𑀧𑀺 𑀯𑀸’’𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. ‘‘𑀢𑀺𑀭𑀘𑁆𑀙𑀸𑀦𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁧) 𑀯𑀘𑀦𑀢𑁄 𑀧𑀩𑁆𑀩𑀚𑁆𑀚𑀸𑀧𑀺 𑀉𑀧𑀮𑀓𑁆𑀔𑀡𑀢𑁄 𑀦𑀺𑀯𑀸𑀭𑀺𑀢𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑁄 𑀘 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁧) 𑀯𑀼𑀢𑁆𑀢𑀁.

𑀢𑀺𑀭𑀘𑁆𑀙𑀸𑀦𑀓𑀣𑀸𑀯𑀡𑁆𑀡𑀦𑀸.

𑁨𑁫𑁩𑁭. 𑀧𑀜𑁆𑀘𑀸𑀦𑀦𑁆𑀢𑀭𑀺𑀓𑁂 𑀧𑁄𑀲𑁂𑀢𑀺 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀲𑀗𑁆𑀖𑀪𑁂𑀤𑀓𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂.

𑀢𑀢𑁆𑀣 ¶ 𑀫𑀸𑀢𑀼𑀖𑀸𑀢𑀓𑁄 (𑀫𑀳𑀸𑀯. 𑀅𑀝𑁆𑀞. 𑁧𑁧𑁨) 𑀦𑀸𑀫 𑀬𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀚𑀦𑀺𑀓𑀸 𑀫𑀸𑀢𑀸 𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯 𑀲𑀢𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸, 𑀅𑀬𑀁 𑀆𑀦𑀦𑁆𑀢𑀭𑀺𑀬𑁂𑀦 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑁂𑀦 𑀫𑀸𑀢𑀼𑀖𑀸𑀢𑀓𑁄, 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀬𑁂𑀦 𑀧𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸𑀧𑀺 𑀅𑀚𑀦𑀺𑀓𑀸 𑀧𑁄𑀲𑀸𑀯𑀦𑀺𑀓𑀫𑀸𑀢𑀸 𑀯𑀸 𑀘𑀽𑀴𑀫𑀸𑀢𑀸 𑀯𑀸 𑀫𑀳𑀸𑀫𑀸𑀢𑀸 𑀯𑀸 𑀚𑀦𑀺𑀓𑀸𑀧𑀺 𑀯𑀸 𑀦𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 ¶ 𑀫𑀸𑀢𑀸𑀖𑀸𑀢𑀺𑀢𑀸, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀦 𑀘 𑀆𑀦𑀦𑁆𑀢𑀭𑀺𑀬𑁄 𑀳𑁄𑀢𑀺. 𑀬𑁂𑀦 𑀲𑀬𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀲𑁄𑀧𑀺 𑀆𑀦𑀦𑁆𑀢𑀭𑀺𑀬𑁄 𑀦 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯. 𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂𑀧𑀺 𑀳𑀺 𑀯𑁂𑀲𑀺𑀬𑀸 𑀧𑀼𑀢𑁆𑀢𑁄 𑀳𑁄𑀢𑀺, ‘‘𑀅𑀬𑀁 𑀫𑁂 𑀧𑀺𑀢𑀸’’𑀢𑀺 𑀦 𑀚𑀸𑀦𑀸𑀢𑀺, 𑀬𑀲𑁆𑀲 𑀲𑀫𑁆𑀪𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀲𑁄 𑀘𑁂 𑀅𑀦𑁂𑀦 𑀖𑀸𑀢𑀺𑀢𑁄, ‘‘𑀧𑀺𑀢𑀼𑀖𑀸𑀢𑀓𑁄’’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺.

𑀅𑀭𑀳𑀦𑁆𑀢𑀖𑀸𑀢𑀓𑁄𑀧𑀺 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀚𑀸𑀢𑀺𑀬𑀜𑁆𑀳𑀺 𑀅𑀦𑁆𑀢𑀫𑀲𑁄 𑀅𑀧𑀩𑁆𑀩𑀚𑀺𑀢𑀫𑁆𑀧𑀺 𑀔𑀻𑀡𑀸𑀲𑀯𑀁 𑀤𑀸𑀭𑀓𑀁 𑀯𑀸 𑀤𑀸𑀭𑀺𑀓𑀁 𑀯𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀅𑀭𑀳𑀦𑁆𑀢𑀖𑀸𑀢𑀓𑁄𑀯 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺, 𑀧𑀩𑁆𑀩𑀚𑁆𑀚𑀸 𑀘𑀲𑁆𑀲 𑀯𑀸𑀭𑀺𑀢𑀸. 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀧𑀦 𑀅𑀭𑀳𑀦𑁆𑀢𑀁, 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀯𑀸 𑀅𑀯𑀲𑁂𑀲𑀁 𑀅𑀭𑀺𑀬𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀬𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀧𑀺𑀲𑁆𑀲 𑀦 𑀯𑀸𑀭𑀺𑀢𑀸, 𑀓𑀫𑁆𑀫𑀁 𑀧𑀦 𑀩𑀮𑀯𑀁 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑁄 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀬𑁄 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁.

𑀬𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀯𑀥𑀓𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀓𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀬𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦𑀸𑀫, 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸. 𑀬𑁄 𑀧𑀦 𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀚𑀻𑀯𑀓𑁄 𑀯𑀺𑀬 𑀲𑀢𑁆𑀣𑁂𑀦 𑀨𑀸𑀮𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀁 𑀓𑀭𑁄𑀢𑀺, 𑀩𑀳𑀼𑀁 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀺.

𑀬𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀅𑀬𑀁 𑀲𑀗𑁆𑀖𑀪𑁂𑀤𑀓𑁄 𑀦𑀸𑀫, 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸. ‘‘𑀫𑀸𑀢𑀼𑀖𑀸𑀢𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 ¶ 𑀦𑀸𑀲𑁂𑀢𑀩𑁆𑀩𑁄’’𑀢𑀺𑀆𑀤𑀺𑀓𑀸𑀬 (𑀫𑀳𑀸𑀯. 𑁧𑁧𑁨) 𑀧𑀸𑀴𑀺𑀬𑀸 𑀉𑀧𑀲𑀫𑁆𑀧𑀤𑀸𑀧𑀝𑀺𑀓𑁆𑀔𑁂𑀧𑁄 𑀧𑀩𑁆𑀩𑀚𑁆𑀚𑀸𑀧𑀝𑀺𑀓𑁆𑀔𑁂𑀧𑀲𑁆𑀲 𑀉𑀧𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺.

𑀉𑀪𑀢𑁄𑀩𑁆𑀬𑀜𑁆𑀚𑀦𑀜𑁆𑀘𑁂𑀯 ¶ 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀜𑁆𑀘 𑀢𑀣𑀸 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀢𑁄𑀩𑁆𑀬𑀜𑁆𑀚𑀦𑀦𑁆𑀢𑀺 𑀓-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀉𑀪𑀢𑁄 𑀩𑁆𑀬𑀜𑁆𑀚𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄. 𑀲𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺.

𑀢𑀢𑁆𑀣 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 (𑀫𑀳𑀸𑀯. 𑀅𑀝𑁆𑀞. 𑁧𑁧𑁬) 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀻𑀲𑀼 𑀧𑀼𑀭𑀺𑀲𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀜𑁆𑀘 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀜𑁆𑀘 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀁 𑀦 𑀕𑀡𑁆𑀳𑀸𑀢𑀺, 𑀧𑀭𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀇𑀫𑀲𑁆𑀲 𑀧𑀦 𑀤𑀼𑀯𑀺𑀥𑀲𑁆𑀲𑀸𑀧𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲𑀦𑁂𑀯 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀺, 𑀦 𑀉𑀧𑀲𑀫𑁆𑀧𑀤𑀸𑀢𑀺 𑀇𑀤𑀫𑀺𑀥 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀬𑁄 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 (𑀫𑀳𑀸𑀯. 𑀅𑀝𑁆𑀞. 𑁧𑁧𑁫) 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑀽𑀲𑁂𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀦𑀸𑀫, 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸. 𑀬𑁄 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂𑀦 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀯𑀸𑀭𑀺𑀢𑀸. 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀓𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀤𑀽𑀲𑁂𑀦𑁆𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄𑀬𑁂𑀯. 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 ¶ 𑀓𑀢𑁆𑀯𑀸 𑀇𑀘𑁆𑀙𑀫𑀸𑀦𑀁 𑀤𑀽𑀲𑁂𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀺𑀳𑀺𑀪𑀸𑀯𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀺. 𑀲𑀓𑀺𑀁 𑀲𑀻𑀮𑀯𑀺𑀧𑀦𑁆𑀦𑀁 𑀧𑀦 𑀧𑀘𑁆𑀙𑀸 𑀤𑀽𑀲𑁂𑀦𑁆𑀢𑁄 𑀦𑁂𑀯 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀉𑀧𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀺.

𑁨𑁫𑁩𑁮. 𑀧𑀸𑀴𑀺𑀅𑀝𑁆𑀞𑀓𑀣𑀸𑀯𑀺𑀫𑀼𑀢𑁆𑀢𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀢𑁄’’𑀢𑀺𑀆𑀤𑀺. ‘‘𑀏𑀓𑀢𑁄’’𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀕𑀳𑀡𑀁 𑀪𑀯𑁂𑀬𑁆𑀬𑀸𑀢𑀺 𑀢𑀁 𑀧𑀭𑀺𑀯𑀚𑁆𑀚𑁂𑀢𑀼𑀁 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀢𑀼 𑀲𑀦𑁆𑀢𑀺𑀓𑁂’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀢𑀁𑀤𑀽𑀲𑀓𑀲𑁆𑀲 𑀪𑀩𑁆𑀩𑀢𑀁 𑀤𑀻𑀧𑁂𑀢𑀺. 𑀲𑁄 𑀦𑁂𑀯 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀲𑀺𑀬𑀸, ‘‘𑀉𑀧𑀲𑀫𑁆𑀧𑀤𑀁 𑀮𑀪𑀢𑁂𑀯 𑀘 𑀧𑀩𑁆𑀩𑀚𑁆𑀚𑀁, 𑀲𑀸 𑀘 𑀦𑁂𑀯 𑀧𑀭𑀸𑀚𑀺𑀢𑀸’’𑀢𑀺 𑀇𑀤𑀁 𑀤𑀼𑀢𑀺𑀬𑀕𑀸𑀣𑀸𑀬 𑀇𑀥𑀸𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀓𑁂𑀯𑀮𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀼𑀢𑁆𑀢𑀁. ‘‘𑀲𑀸 𑀘 𑀦𑁂𑀯 𑀧𑀭𑀸𑀚𑀺𑀢𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀘 𑀧𑀼𑀦 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀬 𑀪𑀩𑁆𑀩𑀢𑀁 ¶ 𑀤𑀻𑀧𑁂𑀢𑀺. 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀕𑀡𑁆𑀞𑀺𑀧𑀤𑁂𑀧𑀺 𑀯𑀼𑀢𑁆𑀢𑁄𑀬𑁂𑀯 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁 𑀤𑀽𑀲𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀮𑀪𑀢𑀺, 𑀲𑀸 𑀘 𑀧𑀸𑀭𑀸𑀚𑀺𑀓𑀸 𑀦 𑀳𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑁨𑁫𑁩𑁯. ‘‘𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀻𑀲𑀼 𑀘 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀦𑁂𑀯 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀉𑀧𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁫) 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀤𑀽𑀲𑀓𑁄’’𑀢𑀺. ‘‘𑀉𑀧𑀲𑀫𑁆𑀧𑀤𑀁 𑀮𑀪𑀢𑁂𑀯 𑀘 𑀧𑀩𑁆𑀩𑀚𑁆𑀚’’𑀦𑁆𑀢𑀺 𑀇𑀤𑀁 𑀬𑀣𑀸𑀞𑀸𑀦𑁂𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀸 𑀘 𑀦𑁂𑀯 𑀧𑀭𑀸𑀚𑀺𑀢𑀸𑀢𑀺 𑀇𑀤𑀁 𑀧𑀦 𑀅𑀝𑁆𑀞𑀓𑀣𑀸𑀬 𑀅𑀦𑀸𑀕𑀢𑀢𑁆𑀢𑀸 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀯𑀺𑀓𑀧𑁆𑀧𑀸𑀪𑀸𑀯𑀸 𑀘 𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀲𑀢𑀺 𑀳𑀺 𑀉𑀧𑀲𑀫𑁆𑀧𑀦𑁆𑀦𑀯𑀺𑀓𑀧𑁆𑀧𑁂 𑀧𑀭𑀸𑀚𑀺𑀢𑀯𑀺𑀓𑀧𑁆𑀧𑀸𑀲𑀗𑁆𑀕𑀳𑁄 𑀧𑀝𑀺𑀲𑁂𑀥𑁄 𑀦𑀺𑀭𑀢𑁆𑀣𑀓𑁄𑀢𑀺 𑀲𑀸 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀦𑀁 𑀪𑀩𑁆𑀩𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀫𑁂 ¶ 𑀧𑀦 𑀧𑀡𑁆𑀟𑀓𑀸𑀤𑀬𑁄 𑀏𑀓𑀸𑀤𑀲 𑀧𑀼𑀕𑁆𑀕𑀮𑀸 ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁦𑁯) 𑀅𑀪𑀩𑁆𑀩𑀸𑀬𑁂𑀯, 𑀦𑁂𑀲𑀁 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀭𑀼𑀳𑀢𑀺, 𑀢𑀲𑁆𑀫𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀚𑀸𑀦𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁄, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀅𑀚𑀸𑀦𑀺𑀢𑁆𑀯𑀸𑀧𑀺 𑀧𑀩𑁆𑀩𑀸𑀚𑀺𑀢𑀸, 𑀉𑀧𑀲𑀫𑁆𑀧𑀸𑀤𑀺𑀢𑀸 𑀘 𑀚𑀸𑀦𑀺𑀢𑁆𑀯𑀸 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑀸.

𑀏𑀓𑀸𑀤𑀲𑀅𑀪𑀩𑁆𑀩𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸.

𑁨𑁫𑁪𑁦. 𑀦𑀽𑀧𑀲𑀫𑁆𑀧𑀸𑀤𑀦𑀻𑀬𑁄𑀯𑀸𑀢𑀺 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀯. 𑀅𑀦𑀼𑀧𑀚𑁆𑀛𑀸𑀬𑀓𑁄𑀢𑀺 𑀅𑀲𑀦𑁆𑀦𑀺𑀳𑀺𑀢𑀉𑀧𑀚𑁆𑀛𑀸𑀬𑁄 𑀯𑀸 𑀅𑀕𑁆𑀕𑀳𑀺𑀢𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑁄 𑀯𑀸. 𑀓𑀭𑁄𑀢𑁄𑀢𑀺 𑀅𑀦𑀼𑀧𑀚𑁆𑀛𑀸𑀬𑀓𑀁 𑀉𑀧𑀲𑀫𑁆𑀧𑀸𑀤𑀬𑀢𑁄. 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀆𑀘𑀭𑀺𑀬𑀲𑁆𑀲 𑀘 𑀕𑀡𑀲𑁆𑀲 𑀘 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀺. 𑀦 𑀓𑀼𑀧𑁆𑀧𑀢𑀺 𑀲𑀘𑁂 𑀓𑀢𑀦𑁆𑀢𑀺 𑀲𑀘𑁂 𑀅𑀦𑀼𑀧𑀚𑁆𑀛𑀸𑀬𑀓𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀓𑀢𑀁 𑀪𑀯𑁂𑀬𑁆𑀬, 𑀢𑀁 𑀦 𑀓𑀼𑀧𑁆𑀧𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀓𑀢𑀢𑁆𑀢𑀸.

𑁨𑁫𑁪𑁧. 𑀏𑀓𑁂𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. ‘‘𑀦 𑀕𑀳𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬 𑀤𑀴𑁆𑀳𑀁 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀁 𑀯𑀘𑀦𑀁. 𑀏𑀢𑁆𑀣 𑀘 𑀉𑀧𑀚𑁆𑀛𑀸𑀬𑁂 𑀅𑀲𑀦𑁆𑀦𑀺𑀳𑀺𑀢𑁂𑀧𑀺 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑁂 𑀅𑀓𑀢𑁂𑀧𑀺 𑀓𑀫𑁆𑀫𑀯𑀸𑀘𑀸𑀬𑀁 𑀧𑀦 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀁 𑀓𑀢𑀁𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 ‘‘𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀲𑀫𑁆𑀪𑀯𑀢𑁄 𑀓𑀫𑁆𑀫𑀁 𑀓𑀼𑀧𑁆𑀧𑁂𑀬𑁆𑀬. 𑀢𑁂𑀦𑁂𑀯 ‘‘𑀉𑀧𑀚𑁆𑀛𑀸𑀬𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀉𑀧𑀚𑁆𑀛𑀁 𑀅𑀕𑁆𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁭) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑀣𑀸 𑀘 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀲𑁆𑀲 ¶ 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀓𑀫𑁆𑀫𑀯𑀸𑀘𑀸𑀬𑀁 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀅𑀲𑀦𑁆𑀢𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀏𑀯𑀁 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑁂𑀯𑀮𑀁 𑀲𑀦𑁆𑀢𑀧𑀤𑀦𑀻𑀳𑀸𑀭𑁂𑀦 𑀓𑀫𑁆𑀫𑀯𑀸𑀘𑀸𑀬 ¶ 𑀓𑀢𑀸𑀬 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀦 𑀓𑀼𑀧𑁆𑀧𑀢𑀺 𑀲𑀘𑁂 𑀓𑀢’’𑀦𑁆𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀚𑁆𑀛𑀸𑀬𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁧𑁭) 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 ‘‘𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸, 𑀓𑀫𑁆𑀫𑀯𑀺𑀧𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀘 𑀅𑀲𑀫𑁆𑀪𑀯𑀢𑁄 ‘‘𑀦 𑀕𑀳𑁂𑀢𑀩𑁆𑀩𑀫𑁂𑀯 𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑁂𑀲𑁂𑀲𑀼 𑀲𑀩𑁆𑀩𑀢𑁆𑀣𑀧𑀻𑀢𑀺 𑀲𑀗𑁆𑀖𑀕𑀡𑀧𑀡𑁆𑀟𑀓𑀣𑁂𑀬𑁆𑀬𑀲𑀁𑀯𑀸𑀲𑀓𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀢𑀺𑀭𑀘𑁆𑀙𑀸𑀦𑀕𑀢𑀫𑀸𑀢𑀼𑀧𑀺𑀢𑀼𑀅𑀭𑀳𑀦𑁆𑀢𑀖𑀸𑀢𑀓𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑀗𑁆𑀖𑀪𑁂𑀤𑀓𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑀗𑁆𑀔𑀸𑀢𑁂𑀳𑀺 𑀉𑀧𑀚𑁆𑀛𑀸𑀬𑁂𑀳𑀺 𑀉𑀧𑀲𑀫𑁆𑀧𑀸𑀤𑀺𑀢𑁂𑀲𑀼 𑀲𑀩𑁆𑀩𑁂𑀲𑀼 𑀢𑁂𑀭𑀲𑀲𑀼 𑀯𑀺𑀓𑀧𑁆𑀧𑁂𑀲𑀼. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺. 𑀦 𑀓𑁂𑀯𑀮𑀁 𑀏𑀢𑁂𑀲𑀼𑀬𑁂𑀯 𑀢𑁂𑀭𑀲𑀲𑀼, 𑀅𑀣 ‘‘𑀅𑀧𑀢𑁆𑀢𑀓𑀅𑀘𑀻𑀯𑀭𑀓𑀅𑀘𑀻𑀯𑀭𑀧𑀢𑁆𑀢𑀓𑀬𑀸𑀘𑀺𑀢𑀓𑀧𑀢𑁆𑀢𑀬𑀸𑀘𑀺𑀢𑀓𑀘𑀻𑀯𑀭𑀬𑀸𑀘𑀺𑀢𑀓𑀧𑀢𑁆𑀢𑀘𑀻𑀯𑀭𑀓𑀸’’𑀢𑀺 𑀏𑀢𑁂𑀲𑀼 𑀙𑀲𑀼 𑀯𑀺𑀓𑀧𑁆𑀧𑁂𑀲𑀼 𑀅𑀬𑀁 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄𑀢𑀺. 𑀲𑁂𑀲-𑀕𑁆𑀕𑀳𑀡𑁂𑀦 𑀏𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀧𑀢𑁆𑀢𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁧𑁮). 𑀅𑀬𑀁 𑀦𑀬𑁄𑀢𑀺 ‘‘𑀦 𑀓𑀼𑀧𑁆𑀧𑀢𑀺 𑀲𑀘𑁂 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑀬𑁄.

𑁨𑁫𑁪𑁨. 𑀧𑀜𑁆𑀘𑀯𑀻𑀲𑀢𑀻𑀢𑀺 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸, 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀘𑀸𑀢𑀺 𑀧𑀜𑁆𑀘𑀯𑀻𑀲𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀦, 𑀪𑀺𑀓𑁆𑀔𑀯𑁂, 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁯𑁯). 𑀑𑀲𑀸𑀭𑁄𑀢𑀺 𑀉𑀧𑀲𑀫𑁆𑀧𑀤𑀸𑀲𑀗𑁆𑀔𑀸𑀢𑁄 𑀑𑀲𑀸𑀭𑁄. 𑀢𑁂𑀦𑁂𑀯 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 ‘‘𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀏𑀓𑀘𑁆𑀘𑁄 𑀲𑁄𑀲𑀸𑀭𑀺𑀢𑁄’’𑀢𑀺𑀆𑀤𑀺𑀧𑀸𑀞𑀲𑁆𑀲 (𑀫𑀳𑀸𑀯. 𑁩𑁯𑁬) 𑀅𑀝𑁆𑀞𑀓𑀣𑀸𑀬𑀁 ‘‘𑀑𑀲𑀸𑀭𑁂𑀢𑀻𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀲𑁂𑀦 ¶ 𑀧𑀯𑁂𑀲𑁂𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁯𑁬) 𑀯𑀼𑀢𑁆𑀢𑀁. ‘‘𑀦𑀸𑀲𑀦𑀸𑀭𑀳𑁄’’𑀢𑀺 𑀇𑀫𑀺𑀦𑀸 ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁦𑁯) 𑀉𑀧𑀲𑀫𑁆𑀧𑀸𑀤𑀺𑀢𑀲𑁆𑀲𑀸𑀧𑀺 𑀲𑁂𑀢𑀓𑀸𑀦𑀺 𑀤𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀸𑀧𑁂𑀢𑀩𑁆𑀩𑀢𑀁 𑀤𑀻𑀧𑁂𑀢𑀺.

𑁨𑁫𑁪𑁩. 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺 ¶ 𑀩𑀸𑀢𑁆𑀢𑀺𑀁𑀲𑀸𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑁋

‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀲𑁄𑀲𑀸𑀭𑀺𑀢𑁄. 𑀧𑀸𑀤𑀘𑁆𑀙𑀺𑀦𑁆𑀦𑁄…𑀧𑁂… 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄… 𑀓𑀡𑁆𑀡𑀘𑁆𑀙𑀺𑀦𑁆𑀦𑁄… 𑀦𑀸𑀲𑀘𑁆𑀙𑀺𑀦𑁆𑀦𑁄… 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄… 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄… 𑀅𑀴𑀘𑁆𑀙𑀺𑀦𑁆𑀦𑁄… 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄… 𑀨𑀡𑀳𑀢𑁆𑀣𑀓𑁄… 𑀔𑀼𑀚𑁆𑀚𑁄… 𑀯𑀸𑀫𑀦𑁄… 𑀕𑀮𑀕𑀡𑁆𑀟𑀻… 𑀮𑀓𑁆𑀔𑀡𑀸𑀳𑀢𑁄… 𑀓𑀲𑀸𑀳𑀢𑁄… 𑀮𑀺𑀔𑀺𑀢𑀓𑁄… 𑀲𑀻𑀧𑀤𑀺𑀓𑁄… 𑀧𑀸𑀧𑀭𑁄𑀕𑀻… 𑀧𑀭𑀺𑀲𑀤𑀽𑀲𑀓𑁄… 𑀓𑀸𑀡𑁄… 𑀓𑀼𑀡𑀻… 𑀔𑀜𑁆𑀚𑁄… 𑀧𑀓𑁆𑀔𑀳𑀢𑁄… 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄… 𑀚𑀭𑀸𑀤𑀼𑀩𑁆𑀩𑀮𑁄… 𑀅𑀦𑁆𑀥𑁄… 𑀫𑀽𑀕𑁄… 𑀧𑀥𑀺𑀭𑁄… 𑀅𑀦𑁆𑀥𑀫𑀽𑀕𑁄… 𑀅𑀦𑁆𑀥𑀧𑀥𑀺𑀭𑁄… 𑀫𑀽𑀕𑀧𑀥𑀺𑀭𑁄… 𑀅𑀦𑁆𑀥𑀫𑀽𑀕𑀧𑀥𑀺𑀭𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀲𑁄𑀲𑀸𑀭𑀺𑀢𑁄’’𑀢𑀺 (𑀫𑀳𑀸𑀯. 𑁩𑁯𑁬) 𑀩𑀸𑀢𑁆𑀢𑀺𑀁𑀲.

𑀓𑀼𑀝𑁆𑀞𑀺𑀆𑀤𑀺 𑀘 𑀢𑁂𑀭𑀲𑀸𑀢𑀺 𑀫𑀳𑀸𑀔𑀦𑁆𑀥𑀓𑁂 𑀆𑀕𑀢𑀸 𑁋

‘‘𑀓𑀼𑀝𑁆𑀞𑀺𑀁 𑀕𑀡𑁆𑀟𑀺𑀁 𑀓𑀺𑀮𑀸𑀲𑀺𑀜𑁆𑀘, 𑀲𑁄𑀲𑀺𑀜𑁆𑀘 𑀅𑀧𑀫𑀸𑀭𑀺𑀓𑀁;

𑀢𑀣𑀸 𑀭𑀸𑀚𑀪𑀝𑀁 𑀘𑁄𑀭𑀁, 𑀮𑀺𑀔𑀺𑀢𑀁 𑀓𑀸𑀭𑀪𑁂𑀤𑀓𑀁.

‘‘𑀓𑀲𑀸𑀳𑀢𑀁 𑀦𑀭𑀜𑁆𑀘𑁂𑀯, 𑀧𑀼𑀭𑀺𑀲𑀁 𑀮𑀓𑁆𑀔𑀡𑀸𑀳𑀢𑀁;

𑀇𑀡𑀸𑀬𑀺𑀓𑀜𑁆𑀘 𑀤𑀸𑀲𑀜𑁆𑀘, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺. 𑁋

𑀬𑀣𑀸𑀯𑀼𑀢𑁆𑀢𑀸 𑀢𑁂𑀭𑀲.

𑀏𑀯𑀫𑁂𑀢𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀼𑀢𑁆𑀢𑀸. 𑀢𑁂𑀲𑀼 𑀓𑀲𑀸𑀳𑀢𑀮𑀓𑁆𑀔𑀡𑀸𑀳𑀢𑀮𑀺𑀔𑀺𑀢𑀓𑀸𑀦𑀁 𑀢𑀺𑀡𑁆𑀡𑀁 𑀉𑀪𑀬𑀢𑁆𑀣 𑀆𑀕𑀢𑀢𑁆𑀢𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑁂𑀯 𑀤𑀝𑁆𑀞𑀩𑁆𑀩𑀸.

‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀩𑀸𑀢𑁆𑀢𑀺𑀁𑀲 ¶ , 𑀓𑀼𑀝𑁆𑀞𑀺𑀆𑀤𑀺 𑀘 𑀢𑁂𑀭𑀲𑀸’’𑀢𑀺 𑀬𑁂 𑀧𑀼𑀕𑁆𑀕𑀮𑀸 𑀯𑀼𑀢𑁆𑀢𑀸, 𑀢𑁂𑀲𑀁. 𑀑𑀲𑀸𑀭𑁄 𑀅𑀧𑁆𑀧𑀢𑁆𑀢𑁄𑀢𑀺 𑀉𑀧𑀲𑀫𑁆𑀧𑀤𑀸𑀅𑀦𑀦𑀼𑀭𑀽𑀧𑀸𑀢𑀺 𑀅𑀢𑁆𑀣𑁄. 𑀓𑀢𑁄 𑀘𑁂𑀢𑀺 𑀅𑀓𑀢𑁆𑀢𑀩𑁆𑀩𑀪𑀸𑀯𑀫𑀲𑀮𑁆𑀮𑀓𑁆𑀔𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀤𑀺 𑀉𑀧𑀲𑀫𑁆𑀧𑀤𑀸𑀲𑀗𑁆𑀔𑀸𑀢𑁄 𑀑𑀲𑀸𑀭𑁄 𑀓𑀢𑁄 𑀪𑀯𑁂𑀬𑁆𑀬. 𑀭𑀽𑀳𑀢𑀻𑀢𑀺 𑀲𑀺𑀚𑁆𑀛𑀢𑀺, 𑀢𑁂 𑀧𑀼𑀕𑁆𑀕𑀮𑀸 𑀉𑀧𑀲𑀫𑁆𑀧𑀦𑁆𑀦𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑀸𑀤𑀬𑁄 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀬𑀣𑀸𑀳 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ¶ 𑁋 ‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀧𑀦 𑀤𑁆𑀯𑀢𑁆𑀢𑀺𑀁𑀲 𑀲𑀼𑀑𑀲𑀸𑀭𑀺𑀢𑀸, 𑀉𑀧𑀲𑀫𑁆𑀧𑀸𑀤𑀺𑀢𑀸 𑀉𑀧𑀲𑀫𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀦 𑀢𑁂 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸, 𑀧𑀦 𑀓𑀸𑀭𑀓𑀲𑀗𑁆𑀖𑁄 𑀘 𑀲𑀸𑀢𑀺𑀲𑀸𑀭𑀸, 𑀦 𑀓𑁄𑀘𑀺 𑀆𑀧𑀢𑁆𑀢𑀺𑀢𑁄 𑀫𑀼𑀘𑁆𑀘𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁯𑁬).

𑁨𑁫𑁪𑁪-𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁, 𑀢𑀜𑁆𑀘 𑀔𑁄 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 (𑀫𑀳𑀸𑀯. 𑁧𑁨𑁩) 𑀯𑀘𑀦𑀢𑁄 𑀲𑀘𑁂 𑀢𑀬𑁄 𑀆𑀘𑀭𑀺𑀬𑀸 𑀏𑀓𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑀸 𑀏𑀓𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀢𑀺𑀡𑁆𑀡𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀓𑀫𑁆𑀫𑀯𑀸𑀘𑀁 𑀏𑀓𑀓𑁆𑀔𑀡𑁂 𑀯𑀢𑁆𑀯𑀸 𑀢𑀬𑁄 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀽𑀧𑀚𑁆𑀛𑀸𑀬𑀓𑁄 𑀳𑁄𑀢𑀻’’𑀢𑀺𑀆𑀤𑀺.

‘‘𑀢𑀬𑁄’’𑀢𑀺 𑀇𑀤𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦’’𑀦𑁆𑀢𑀺 (𑀫𑀳𑀸𑀯. 𑁧𑁨𑁩) 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀓𑀢𑁄𑀢𑀺 𑀏𑀓𑀓𑁆𑀔𑀡𑁂. 𑀅𑀦𑀼𑀲𑀸𑀯𑀦𑀦𑁆𑀢𑀺 𑀓𑀫𑁆𑀫𑀯𑀸𑀘𑀁. 𑀑𑀲𑀸𑀭𑁂𑀢𑁆𑀯𑀸𑀢𑀺 𑀯𑀢𑁆𑀯𑀸. 𑀓𑀫𑁆𑀫𑀦𑁆𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁. 𑀦 𑀘 𑀓𑀼𑀧𑁆𑀧𑀢𑀻𑀢𑀺 𑀦 𑀯𑀺𑀧𑀚𑁆𑀚𑀢𑀺. 𑀓𑀧𑁆𑀧𑀢𑀻𑀢𑀺 𑀅𑀯𑀺𑀧𑀚𑁆𑀚𑀦𑀢𑁄 𑀏𑀯𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁫𑁪𑁬-𑁭. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁩) 𑀯𑀘𑀦𑀢𑁄 𑀲𑀘𑁂 𑀏𑀓𑁄 𑀆𑀘𑀭𑀺𑀬𑁄 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀘 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀲𑀗𑁆𑀖𑀭𑀓𑁆𑀔𑀺𑀢𑁄 𑀘 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀁 ¶ 𑀧𑀘𑁆𑀘𑁂𑀓𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀤𑁆𑀯𑁂 𑀢𑀬𑁄𑀧𑀺 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀓𑀽𑀧𑀚𑁆𑀛𑀸𑀬𑀓𑁄 𑀳𑁄𑀢𑀻’’𑀢𑀺𑀆𑀤𑀺.

𑀉𑀧𑀲𑀫𑁆𑀧𑀤𑀁 𑀅𑀧𑁂𑀓𑁆𑀔𑀦𑁆𑀢𑀻𑀢𑀺 ‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸’’𑀢𑀺 𑀉𑀧𑀲𑀫𑁆𑀧𑀚𑁆𑀚𑀦𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀦𑀸𑀫𑀦𑁆𑀢𑀺 𑀢𑁂𑀲𑀁 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀸𑀦𑀜𑁆𑀘𑁂𑀯 𑀉𑀧𑀚𑁆𑀛𑀸𑀬𑀸𑀦𑀜𑁆𑀘 𑀦𑀸𑀫𑀁. 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑁂𑀢𑁆𑀯𑀸𑀢𑀺 𑀬𑁄𑀚𑀦𑀸, ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑀯𑀸𑀘𑀸𑀬𑀁 𑀲𑀓𑀝𑁆𑀞𑀸𑀦𑁂 𑀯𑀢𑁆𑀯𑀸 𑀲𑀸𑀯𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀢𑀺 𑀏𑀓𑁂𑀦 𑀆𑀘𑀭𑀺𑀬𑁂𑀦. 𑀏𑀓𑀢𑁄𑀢𑀺 𑀤𑁆𑀯𑁂 𑀢𑀬𑁄 𑀚𑀦𑁂 𑀏𑀓𑀢𑁄 𑀓𑀢𑁆𑀯𑀸. 𑀅𑀦𑀼𑀲𑀸𑀯𑁂𑀢𑁆𑀯𑀸𑀢𑀺 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸. 𑀓𑀢𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁.

𑁨𑁫𑁪𑁮. 𑀅𑀜𑁆𑀜𑀫𑀜𑁆𑀜𑀸𑀦𑀼𑀲𑀸𑀯𑁂𑀢𑁆𑀯𑀸𑀢𑀺 ¶ 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀸𑀫𑀁 𑀅𑀦𑀼𑀲𑀸𑀯𑁂𑀢𑁆𑀯𑀸, 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁫𑁪𑁯. 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀼𑀫𑀦𑁄’’𑀢𑀺𑀆𑀤𑀺. 𑀲𑀼𑀫𑀦𑁄𑀢𑀺 𑀆𑀘𑀭𑀺𑀬𑁄. 𑀢𑀺𑀲𑁆𑀲𑀣𑁂𑀭𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲. 𑀲𑀺𑀲𑁆𑀲𑀓𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁. 𑀅𑀦𑀼𑀲𑀸𑀯𑁂𑀢𑀻𑀢𑀺 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺. 𑀢𑀺𑀲𑁆𑀲𑁄𑀢𑀺 𑀧𑀞𑀫𑀁 𑀉𑀧𑀚𑁆𑀛𑀸𑀬𑀪𑀽𑀢𑀲𑁆𑀲 𑀕𑀳𑀡𑀁. 𑀲𑀼𑀫𑀦𑀣𑁂𑀭𑀲𑁆𑀲𑀸𑀢𑀺 𑀧𑀞𑀫𑀁 𑀆𑀘𑀭𑀺𑀬𑀢𑁆𑀣𑁂𑀭𑀫𑀸𑀳. 𑀇𑀫𑁂 𑀤𑁆𑀯𑁂 𑀏𑀓𑀲𑀻𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀓𑁆𑀔𑀡𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀓𑀫𑁆𑀫𑀯𑀸𑀘𑀁 𑀯𑀤𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀝𑀺𑀘𑁆𑀘 𑀉𑀧𑀚𑁆𑀛𑀸𑀬𑀸𑀧𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀝𑀺𑀘𑁆𑀘 𑀆𑀘𑀭𑀺𑀬𑀸𑀧𑀺 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑀡𑀧𑀽𑀭𑀓𑀸 𑀘 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀲𑀘𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀦𑀸𑀦𑀸𑀉𑀧𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀺 ¶ , 𑀅𑀜𑁆𑀜𑀫𑀜𑁆𑀜𑀜𑁆𑀘 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁨𑁩).

𑁨𑁫𑁫𑁦. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀉𑀧𑀲𑀫𑁆𑀧𑀤𑀸𑀥𑀺𑀓𑀸𑀭𑁂. 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 ‘‘𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’’𑀢𑀺 (𑀫𑀳𑀸𑀯. 𑁧𑁨𑁩) 𑀧𑀝𑀺𑀲𑀺𑀤𑁆𑀥𑀸. 𑀮𑁄𑀓𑀺𑀬𑁂𑀳𑀺 𑀆𑀤𑀺𑀘𑁆𑀘𑀧𑀼𑀢𑁆𑀢𑁄 𑀫𑀦𑀽𑀢𑀺 𑀬𑁄 𑀧𑀞𑀫𑀓𑀧𑁆𑀧𑀺𑀓𑁄 𑀫𑀦𑀼𑀲𑁆𑀲𑀸𑀦𑀁 𑀆𑀤𑀺𑀭𑀸𑀚𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀯𑀁𑀲𑁂 𑀚𑀸𑀢𑀢𑁆𑀢𑀸 𑀆𑀤𑀺𑀘𑁆𑀘𑁄 𑀩𑀦𑁆𑀥𑀼 𑀏𑀢𑀲𑁆𑀲𑀸𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀪𑀕𑀯𑀸, 𑀢𑁂𑀦.

𑀫𑀳𑀸𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁫𑁫𑁧-𑁨. 𑀬𑀸 𑀏𑀓𑀸𑀤𑀲𑀳𑀺 𑀲𑀻𑀫𑀸𑀯𑀺𑀧𑀢𑁆𑀢𑀻𑀳𑀺 𑀯𑀚𑁆𑀚𑀺𑀢𑀸 𑀢𑀺𑀲𑀫𑁆𑀧𑀢𑁆𑀢𑀺𑀲𑀁𑀬𑀼𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀖𑀝𑁂𑀢𑁆𑀯𑀸 𑀲𑀫𑁆𑀫𑀢𑀸, 𑀲𑀸 𑀅𑀬𑀁 𑀩𑀤𑁆𑀥𑀲𑀻𑀫𑀸 𑀦𑀸𑀫 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀢𑀺𑀔𑀼𑀤𑁆𑀤𑀓𑀸, 𑀅𑀢𑀺𑀫𑀳𑀢𑀻, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸, 𑀙𑀸𑀬𑀸𑀦𑀺𑀫𑀺𑀢𑁆𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸, 𑀦𑀤𑀺𑀬𑀸 𑀲𑀫𑁆𑀫𑀢𑀸, 𑀲𑀫𑀼𑀤𑁆𑀤𑁂 𑀲𑀫𑁆𑀫𑀢𑀸, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸𑀢𑀺 ‘‘𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺 ¶ (𑀧𑀭𑀺. 𑁪𑁮𑁬) 𑀯𑀘𑀦𑀢𑁄 𑀇𑀫𑀸 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀦𑀸𑀫, 𑀯𑀺𑀧𑀦𑁆𑀦𑀲𑀻𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀅𑀢𑀺𑀔𑀼𑀤𑁆𑀤𑀓𑀸 𑀦𑀸𑀫 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀢𑀺𑀫𑀳𑀢𑀻 𑀦𑀸𑀫 𑀬𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑁂𑀦𑀸𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑀢𑀸. 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀅𑀖𑀝𑀺𑀢𑀦𑀺𑀫𑀺𑀢𑁆𑀢𑀸 𑀯𑀼𑀘𑁆𑀘𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀤𑀓𑁆𑀔𑀺𑀡𑀸𑀬, 𑀧𑀘𑁆𑀙𑀺𑀫𑀸𑀬, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀼𑀩𑁆𑀩𑀓𑀺𑀢𑁆𑀢𑀺𑀢𑀁 ¶ 𑀧𑀝𑀺𑀓𑀺𑀢𑁆𑀢𑁂𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀅𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀲𑀘𑁂 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀆𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀅𑀧𑀭𑀸𑀧𑀺 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀁 𑀢𑀘𑀲𑀸𑀭𑀭𑀼𑀓𑁆𑀔𑀁 𑀯𑀸 𑀔𑀸𑀡𑀼𑀓𑀁 𑀯𑀸 𑀧𑀁𑀲𑀼𑀧𑀼𑀜𑁆𑀚𑀯𑀸𑀮𑀺𑀓𑀸𑀧𑀼𑀜𑁆𑀚𑀸𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀅𑀦𑁆𑀢𑀭𑀸 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸. 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀦𑀸𑀫 𑀧𑀩𑁆𑀩𑀢𑀘𑁆𑀙𑀸𑀬𑀸𑀤𑀻𑀦𑀁 𑀬𑀁 𑀓𑀺𑀜𑁆𑀘𑀺 𑀙𑀸𑀬𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸. 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀸𑀦𑀺 𑀅𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸. 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸 𑀦𑀸𑀫 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀺𑀢𑁂𑀦 𑀲𑀫𑁆𑀫𑀢𑀸.

𑀦𑀤𑀺𑀬𑀸 𑀲𑀫𑀼𑀤𑁆𑀤𑁂 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸 𑀦𑀸𑀫 𑀏𑀢𑁂𑀲𑀼 𑀦𑀤𑀺𑀆𑀤𑀻𑀲𑀼 𑀲𑀫𑁆𑀫𑀢𑀸. 𑀲𑀸 𑀳𑀺 𑀏𑀯𑀁 𑀲𑀫𑁆𑀫𑀢𑀸𑀧𑀺 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁮) 𑀯𑀘𑀦𑀢𑁄 𑀅𑀲𑀫𑁆𑀫𑀢𑀸𑀯 𑀳𑁄𑀢𑀺. 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑁄𑀭𑀸𑀡𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀅𑀫𑁆𑀩𑁄 𑀘𑁂𑀯 𑀚𑀫𑁆𑀩𑀽 𑀘𑀸𑀢𑀺 𑀤𑁆𑀯𑁂 𑀭𑀼𑀓𑁆𑀔𑀸 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀯𑀺𑀝𑀧𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀫𑁆𑀩𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀚𑀫𑁆𑀩𑀽, 𑀯𑀺𑀳𑀸𑀭𑀲𑀻𑀫𑀸 𑀘 𑀚𑀫𑁆𑀩𑀼𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀅𑀫𑁆𑀩𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀤𑁆𑀥𑀸 𑀳𑁄𑀢𑀺, 𑀅𑀣 𑀧𑀘𑁆𑀙𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀯𑀺𑀳𑀸𑀭𑁂 𑀓𑀢𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸 𑀪𑀺𑀓𑁆𑀔𑀽 𑀢𑀁 𑀅𑀫𑁆𑀩𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀚𑀫𑁆𑀩𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀦𑁆𑀥𑀦𑁆𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀦𑀸 𑀳𑁄𑀢𑀺. 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑀭𑁂𑀲𑀁 𑀩𑀤𑁆𑀥𑀲𑀻𑀫𑀁 𑀲𑀓𑀮𑀁 𑀯𑀸 𑀢𑀲𑁆𑀲𑀸 𑀧𑀤𑁂𑀲𑀁 𑀯𑀸 𑀅𑀦𑁆𑀢𑁄 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀻𑀫𑀸𑀬 𑀲𑀻𑀫𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺. 𑀇𑀢𑀺 𑀇𑀫𑀸𑀳𑀺 𑀏𑀓𑀸𑀤𑀲𑀳𑀺 𑀯𑀺𑀧𑀢𑁆𑀢𑀺𑀲𑀻𑀫𑀸𑀳𑀺 𑀯𑀚𑁆𑀚𑀺𑀢𑀸𑀢𑀺 𑀅𑀢𑁆𑀣𑁄.

𑀢𑀺𑀲𑀫𑁆𑀧𑀢𑁆𑀢𑀺𑀲𑀁𑀬𑀼𑀢𑀸𑀢𑀺 ¶ 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺, 𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺, 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀻𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 ¶ 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 ‘‘𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁, 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁, 𑀯𑀦𑀦𑀺𑀫𑀺𑀢𑁆𑀢𑀁, 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁, 𑀫𑀕𑁆𑀕𑀦𑀺𑀫𑀺𑀢𑁆𑀢𑀁, 𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑀁, 𑀦𑀤𑀺𑀦𑀺𑀫𑀺𑀢𑁆𑀢𑀁, 𑀉𑀤𑀓𑀦𑀺𑀫𑀺𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁮) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀬𑀣𑀸𑀮𑀤𑁆𑀥𑀸𑀦𑀺 𑀦𑀺𑀫𑀺𑀢𑁆𑀢𑀼𑀧𑀕𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀩𑁆𑀩𑀢𑁄, 𑀪𑀦𑁆𑀢𑁂, 𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑀸 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸.

𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀬𑀸𑀯𑀢𑀺𑀓𑀸 𑀢𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀩𑀤𑁆𑀥𑀲𑀻𑀫𑀁 𑀯𑀸 𑀦𑀤𑀺𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀯𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀢𑁆𑀯𑀸, 𑀙𑀦𑁆𑀤𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀲𑀫𑁆𑀫𑀢𑀸.

𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁯) 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑀸. 𑀏𑀯𑀁 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀖𑀝𑁂𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁫𑁫𑁩-𑁪. 𑀔𑀡𑁆𑀟𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀸 𑀆𑀤𑀬𑁄 𑀆𑀤𑀺𑀪𑀽𑀢𑀸, 𑀆𑀤𑀺𑀫𑁆𑀳𑀺 𑀯𑀸 𑀬𑀸𑀲𑀁 𑀲𑀻𑀫𑀸𑀦𑀁 𑀢𑀸 𑀔𑀡𑁆𑀟𑀲𑀫𑀸𑀦𑀲𑀁𑀯𑀸𑀲𑀸𑀯𑀺𑀧𑁆𑀧𑀯𑀸𑀲𑀸𑀤𑀻, 𑀢𑀸𑀲𑀁, 𑀢𑀸𑀳𑀺 𑀯𑀸 𑀧𑀪𑁂𑀤𑁄 𑀔𑀡𑁆𑀟𑀲𑀫𑀸𑀦𑀲𑀁𑀯𑀸𑀲𑀸𑀤𑀺𑀪𑁂𑀤𑁄, 𑀢𑀢𑁄 𑀔𑀡𑁆𑀟𑀲𑀫𑀸𑀦𑀲𑀁𑀯𑀸𑀲𑀸𑀤𑀺𑀪𑁂𑀤𑀢𑁄, 𑀔𑀡𑁆𑀟𑀲𑀻𑀫𑀸, 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀇𑀫𑀸𑀲𑀁 𑀲𑀻𑀫𑀸𑀦𑀁 𑀏𑀢𑀸𑀳𑀺 𑀯𑀸 𑀓𑀭𑀡𑀪𑀽𑀢𑀸𑀳𑀺, 𑀳𑁂𑀢𑀼𑀪𑀽𑀢𑀸𑀳𑀺 𑀯𑀸 𑀚𑀸𑀢𑁂𑀦 𑀯𑀺𑀪𑀸𑀕𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀦𑀲𑀁𑀯𑀸𑀲𑀸𑀯𑀺𑀧𑁆𑀧𑀯𑀸𑀲𑀸𑀦𑀫𑀦𑁆𑀢𑀭𑁂 𑀔𑀡𑁆𑀟𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀢𑀸𑀳𑀺 𑀅𑀲𑀗𑁆𑀓𑀭𑀸 ¶ 𑀲𑀻𑀫𑀸 𑀔𑀡𑁆𑀟𑀲𑀻𑀫𑀸 𑀦𑀸𑀫. 𑀲𑀫𑀸𑀦𑀲𑀁𑀯𑀸𑀲𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀉𑀧𑁄𑀲𑀣𑀸𑀤𑀺𑀓𑁄 𑀲𑀁𑀯𑀸𑀲𑁄 𑀏𑀢𑁆𑀣 𑀓𑀭𑀻𑀬𑀢𑀻𑀢𑀺 𑀲𑀫𑀸𑀦𑀲𑀁𑀯𑀸𑀲𑀸 𑀦𑀸𑀫. 𑀅𑀯𑀺𑀧𑁆𑀧𑀯𑀸𑀲𑀸𑀬 𑀮𑀓𑁆𑀔𑀡𑀁 ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀢𑀺. 𑀇𑀢𑀺 𑀩𑀤𑁆𑀥𑀸 𑀢𑀺𑀥𑀸 𑀯𑀼𑀢𑁆𑀢𑀸𑀢𑀺 𑀏𑀯𑀁 𑀩𑀤𑁆𑀥𑀲𑀻𑀫𑀸 𑀢𑀺𑀧𑁆𑀧𑀪𑁂𑀤𑀸 𑀯𑀼𑀢𑁆𑀢𑀸.

𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀲𑀢𑁆𑀢𑀦𑁆𑀦𑀁 𑀅𑀩𑁆𑀪𑀦𑁆𑀢𑀭𑀸𑀦𑀁 𑀲𑀫𑀸𑀳𑀸𑀭𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀢𑀢𑁄𑀧𑀺 𑀘. 𑀅𑀩𑀤𑁆𑀥𑀸𑀧𑀺 𑀢𑀺𑀯𑀺𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀢𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀼. 𑀕𑀸𑀫𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀩𑁆𑀩𑀤𑀺𑀲𑀸𑀲𑀼 𑀲𑀻𑀫𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀧𑀤𑁂𑀲𑀲𑁆𑀲 𑀏𑀢𑁆𑀢𑀓𑁄 𑀓𑀭𑁄’’𑀢𑀺 𑀏𑀯𑀁 𑀓𑀭𑁂𑀦 𑀦𑀺𑀬𑀫𑀺𑀢𑁄 𑀕𑀸𑀫𑀧𑁆𑀧𑀤𑁂𑀲𑁄. 𑀬𑀣𑀸𑀳 𑁋 ‘‘𑀬𑀢𑁆𑀢𑀓𑁂 𑀧𑀤𑁂𑀲𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀪𑁄𑀚𑀓𑀸 𑀩𑀮𑀺𑀁 𑀳𑀭𑀦𑁆𑀢𑀺 ¶ , 𑀲𑁄 𑀧𑀤𑁂𑀲𑁄 𑀅𑀧𑁆𑀧𑁄 𑀯𑀸 𑀳𑁄𑀢𑀼 𑀫𑀳𑀦𑁆𑀢𑁄 𑀯𑀸, ‘𑀕𑀸𑀫𑀲𑀻𑀫𑀸’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀓𑁆𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁 ‘𑀅𑀬𑀁 𑀯𑀺𑀲𑀼𑀁 𑀕𑀸𑀫𑁄 𑀳𑁄𑀢𑀽’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭).

‘‘𑀕𑀸𑀫𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀇𑀫𑀺𑀦𑀸 𑀘 𑀦𑀕𑀭𑀧𑀭𑀺𑀘𑁆𑀙𑁂𑀤𑁄 𑀘 𑀲𑀗𑁆𑀕𑀳𑀺𑀢𑁄. 𑀬𑀣𑀸𑀳 𑁋 ‘‘𑀕𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀕𑀭𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭). 𑀦𑀺𑀕𑀫𑀲𑀻𑀫𑀸𑀬 𑀯𑀺𑀲𑀼𑀁𑀬𑁂𑀯 𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲𑀸 𑀇𑀥 𑀲𑀗𑁆𑀕𑀳𑁄 𑀦 𑀯𑀢𑁆𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀧𑀸𑀴𑀺𑀬𑀁 ‘‘𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀬𑀸 𑀢𑀲𑁆𑀲 𑀯𑀸 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸, 𑀦𑀺𑀕𑀫𑀲𑁆𑀲 𑀯𑀸 𑀦𑀺𑀕𑀫𑀲𑀻𑀫𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀼𑀧𑁄𑀲𑀣𑀸’’𑀢𑀺 (𑀫𑀳𑀸𑀯. 𑁧𑁪𑁭). 𑀇𑀫𑀺𑀲𑁆𑀲𑀸 𑀯𑀺𑀲𑀼𑀁𑀬𑁂𑀯 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀲𑀻𑀫𑀸𑀮𑀓𑁆𑀔𑀡𑁂𑀦𑁂𑀯 𑀉𑀧𑀮𑀓𑁆𑀔𑀺𑀢𑀸.

𑁨𑁫𑁫𑁫. ‘‘𑀚𑀸𑀢𑀲𑁆𑀲𑀭𑁂’’𑀢𑀺𑀆𑀤𑀻𑀲𑀼 𑀚𑀸𑀢𑀲𑁆𑀲𑀭𑀸𑀤𑀻𑀦𑀁 𑀮𑀓𑁆𑀔𑀡𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀬𑁄 𑀧𑀦 𑀓𑁂𑀦𑀘𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄 𑀲𑀬𑀁𑀚𑀸𑀢𑁄 𑀲𑁄𑀩𑁆𑀪𑁄 𑀲𑀫𑀦𑁆𑀢𑀢𑁄 𑀆𑀕𑀢𑁂𑀦 𑀉𑀤𑀓𑁂𑀦 𑀧𑀽𑀭𑀺𑀢𑁄 ¶ 𑀢𑀺𑀝𑁆𑀞𑀢𑀺, 𑀬𑀢𑁆𑀣 𑀦𑀤𑀺𑀬𑀁 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀬𑀁 𑀚𑀸𑀢𑀲𑁆𑀲𑀭𑁄 𑀦𑀸𑀫. 𑀬𑁄𑀧𑀺 𑀦𑀤𑀺𑀁 𑀯𑀸 𑀲𑀫𑀼𑀤𑁆𑀤𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑁂𑀦 𑀔𑀡𑀺𑀢𑁄 𑀲𑁄𑀩𑁆𑀪𑁄 𑀏𑀢𑀁 𑀮𑀓𑁆𑀔𑀡𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀚𑀸𑀢𑀲𑁆𑀲𑀭𑁄𑀬𑁂𑀯. 𑀲𑀫𑀼𑀤𑁆𑀤𑁄 𑀧𑀸𑀓𑀝𑁄𑀬𑁂𑀯.

𑀬𑀲𑁆𑀲𑀸 𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁 𑀓𑀸𑀮𑁂 𑀅𑀦𑁆𑀯𑀟𑁆𑀠𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀅𑀦𑀼𑀧𑀜𑁆𑀘𑀸𑀳𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀮𑀸𑀳𑀓𑁂𑀲𑀼 𑀯𑀺𑀕𑀢𑀫𑀢𑁆𑀢𑁂𑀲𑀼 𑀲𑁄𑀢𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀅𑀬𑀁 𑀦𑀤𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀬𑀲𑁆𑀲𑀸 𑀧𑀦 𑀈𑀤𑀺𑀲𑁂 𑀲𑀼𑀯𑀼𑀝𑁆𑀞𑀺𑀓𑀸𑀮𑁂 𑀯𑀲𑁆𑀲𑀸𑀦𑀲𑁆𑀲 𑀘𑀢𑀼𑀫𑀸𑀲𑁂 𑀲𑁄𑀢𑀁 𑀦 𑀧𑀘𑁆𑀙𑀺𑀚𑁆𑀚𑀢𑀺, 𑀬𑀢𑁆𑀣 𑀢𑀺𑀢𑁆𑀣𑁂𑀦 𑀯𑀸 𑀅𑀢𑀺𑀢𑁆𑀣𑁂𑀦 𑀯𑀸 𑀲𑀺𑀓𑁆𑀔𑀸𑀓𑀭𑀡𑀻𑀬𑁂 𑀆𑀕𑀢𑀮𑀓𑁆𑀔𑀡𑁂𑀦 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀺, 𑀅𑀬𑀁 𑀲𑀫𑀼𑀤𑁆𑀤𑀁 𑀯𑀸 𑀧𑀯𑀺𑀲𑀢𑀼 𑀢𑀴𑀸𑀓𑀁 𑀯𑀸, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀦𑀤𑀻 𑀦𑀸𑀫.

𑀲𑀫𑀦𑁆𑀢𑀢𑁄𑀢𑀺 𑀲𑀫𑀦𑁆𑀢𑀸. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀉𑀤𑀓𑀼𑀓𑁆𑀔𑁂𑀧𑁄𑀢𑀺 𑀯𑀓𑁆𑀔𑀫𑀸𑀦𑁂𑀦 𑀦𑀬𑁂𑀦 𑀣𑀸𑀫𑀧𑁆𑀧𑀫𑀸𑀡𑁂𑀦 𑀔𑀺𑀢𑁆𑀢𑀲𑁆𑀲 𑀉𑀤𑀓𑀲𑁆𑀲 𑀯𑀸 𑀯𑀸𑀮𑀼𑀓𑀸𑀬 𑀯𑀸 𑀧𑀢𑀺𑀢𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀦𑁆𑀢𑁄𑀧𑀤𑁂𑀲𑁄. 𑀬𑀣𑀸 𑀅𑀓𑁆𑀔𑀥𑀼𑀢𑁆𑀢𑀸 𑀤𑀸𑀭𑀼𑀕𑀼𑀴𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀉𑀤𑀓𑀁 𑀯𑀸 𑀯𑀸𑀮𑀼𑀓𑀁 𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀺𑀢𑀩𑁆𑀩𑀁, 𑀢𑀢𑁆𑀣 𑀬𑀢𑁆𑀣 𑀏𑀯𑀁 𑀔𑀺𑀢𑁆𑀢𑀁 𑀉𑀤𑀓𑀁 𑀯𑀸 ¶ 𑀯𑀸𑀮𑀼𑀓𑀸 𑀯𑀸 𑀧𑀢𑀢𑀺, 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑁄 𑀦𑀸𑀫𑀸𑀢𑀺. 𑀉𑀤𑀓𑀼𑀓𑁆𑀔𑁂𑀧𑀲𑀜𑁆𑀜𑀺𑀢𑁄𑀢𑀺 ‘‘𑀉𑀤𑀓𑀼𑀓𑁆𑀔𑁂𑀧𑁄’’𑀢𑀺 𑀲𑀮𑁆𑀮𑀓𑁆𑀔𑀺𑀢𑁄.

𑁨𑁫𑁫𑁬. 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀕𑀸𑀫𑀭𑀳𑀺𑀢𑁂 𑀫𑀳𑀸𑀅𑀭𑀜𑁆𑀜𑁂. 𑀲𑀫𑀦𑁆𑀢𑀢𑁄 𑀲𑀢𑁆𑀢𑁂𑀯𑀩𑁆𑀪𑀦𑁆𑀢𑀭𑀸𑀢𑀺 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀢𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑁂𑀯 𑀅𑀩𑁆𑀪𑀦𑁆𑀢𑀭𑀸 𑀬𑀲𑁆𑀲𑀸 𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑁄, 𑀅𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀦𑀸𑀫𑀺𑀓𑀸 𑀲𑀻𑀫𑀸 𑀦𑀸𑀫.

𑁨𑁫𑁫𑁭. 𑀕𑀼𑀴𑀼𑀓𑁆𑀔𑁂𑀧𑀦𑀬𑁂𑀦𑀸𑀢𑀺 ¶ 𑀅𑀓𑁆𑀔𑀥𑀼𑀢𑁆𑀢𑀓𑀸𑀦𑀁 𑀤𑀸𑀭𑀼𑀕𑀼𑀴𑀼𑀓𑁆𑀔𑀺𑀧𑀦𑀸𑀓𑀸𑀭𑁂𑀦. 𑀉𑀤𑀓𑀼𑀓𑁆𑀔𑁂𑀧𑀓𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑀲𑀤𑀺𑀲𑀯𑀲𑁂𑀦.

𑁨𑁫𑁫𑁮. 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀯𑀟𑁆𑀠𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀩𑁆𑀪𑀦𑁆𑀢𑀭𑀽𑀤𑀓𑀼𑀓𑁆𑀔𑁂𑀧𑀸, 𑀞𑀺𑀢𑁄𑀓𑀸𑀲𑀸 𑀧𑀭𑀁 𑀲𑀺𑀬𑀼’’𑀦𑁆𑀢𑀺. 𑀞𑀺𑀢𑁄𑀓𑀸𑀲𑀸 𑀧𑀭𑀦𑁆𑀢𑀺 𑀧𑀭𑀺𑀲𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀭𑀁, 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀘 𑀫𑀺𑀦𑀺𑀢𑀩𑁆𑀩𑀸, 𑀉𑀤𑀓𑀼𑀓𑁆𑀔𑁂𑀧𑁄 𑀘 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁫𑁫𑁯-𑁬𑁦. 𑀅𑀦𑁆𑀢𑁄𑀧𑀭𑀺𑀘𑁆𑀙𑁂𑀤𑁂𑀢𑀺 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂𑀳𑀺 𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀲𑁆𑀲 𑀅𑀦𑁆𑀢𑁄. 𑀳𑀢𑁆𑀣𑀧𑀸𑀲𑀁 𑀯𑀺𑀳𑀸𑀬 𑀞𑀺𑀢𑁄 𑀯𑀸 𑀧𑀭𑀁 𑀢𑀢𑁆𑀢𑀓𑀁 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑁆𑀫 𑀞𑀺𑀢𑁄 𑀯𑀸𑀢𑀺 𑀬𑁄𑀚𑀦𑀸, 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑀁 𑀏𑀓𑀁 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀏𑀯 𑀯𑀸 𑀅𑀦𑀢𑀺𑀓𑁆𑀓𑀫𑁆𑀫 𑀞𑀺𑀢𑁄𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀁 𑀯𑀺𑀓𑁄𑀧𑁂𑀢𑀻𑀢𑀺 𑀅𑀦𑁆𑀢𑁄 𑀞𑀺𑀢𑁄 𑀓𑀫𑁆𑀫𑀲𑁆𑀲 𑀯𑀕𑁆𑀕𑀪𑀸𑀯𑀓𑀭𑀡𑀢𑁄, 𑀩𑀳𑀺 𑀢𑀢𑁆𑀢𑀓𑀁 𑀧𑀤𑁂𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀅𑀜𑁆𑀜𑀲𑁆𑀲 𑀲𑀗𑁆𑀖𑀲𑁆𑀲 𑀕𑀡𑀧𑀽𑀭𑀡𑀪𑀸𑀯𑀁 𑀕𑀘𑁆𑀙𑀦𑁆𑀢𑁄 𑀲𑀻𑀫𑀸𑀬 𑀲𑀗𑁆𑀓𑀭𑀪𑀸𑀯𑀓𑀭𑀡𑁂𑀦 𑀓𑀫𑁆𑀫𑀁 𑀯𑀺𑀓𑁄𑀧𑁂𑀢𑀺. 𑀇𑀢𑀺 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀦𑀬𑁄, 𑀢𑀲𑁆𑀫𑀸 𑀲𑁄 𑀅𑀦𑁆𑀢𑁄𑀲𑀻𑀫𑀸𑀬 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀸𑀢𑀩𑁆𑀩𑁄, 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀢𑁄 𑀩𑀳𑀺 𑀯𑀸 𑀓𑀸𑀢𑀩𑁆𑀩𑁄. 𑀢𑀢𑁆𑀢𑀓𑀁 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀬𑀣𑀸𑀞𑀺𑀢𑁄𑀯 𑀲𑀘𑁂 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀕𑀡𑀧𑀽𑀭𑀓𑁄 𑀦 𑀳𑁄𑀢𑀺, 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁨𑁫𑁬𑁧-𑁨. 𑀲𑀡𑁆𑀞𑀸𑀦𑀦𑁆𑀢𑀺 𑀢𑀺𑀓𑁄𑀝𑀺𑀲𑀡𑁆𑀞𑀸𑀦𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀩𑁆𑀩𑀢𑀸𑀤𑀺𑀦𑀺𑀫𑀺𑀢𑁆𑀢𑀁. 𑀤𑀺𑀲𑀓𑀺𑀢𑁆𑀢𑀦𑀦𑁆𑀢𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀤𑀺𑀲𑀸𑀓𑀺𑀢𑁆𑀢𑀦𑀁. 𑀧𑀫𑀸𑀡𑀦𑁆𑀢𑀺 𑀢𑀺𑀬𑁄𑀚𑀦𑀧𑀭𑀫𑀁 𑀧𑀫𑀸𑀡𑀁 ¶ . 𑀲𑁄𑀥𑁂𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀲𑀻𑀫𑀁 𑀩𑀦𑁆𑀥𑀢𑀺, 𑀢𑀢𑁆𑀣 𑀯𑀲𑀦𑁆𑀢𑁂 ¶ 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀽 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀯𑀲𑀦𑁆𑀢𑁂 𑀲𑀻𑀫𑀸𑀬 𑀩𑀳𑀺 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸, 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀯𑀲𑀦𑁆𑀢𑁂 𑀳𑀢𑁆𑀣𑀧𑀸𑀲𑀁 𑀉𑀧𑀦𑁂𑀢𑀩𑁆𑀩𑁂 𑀳𑀢𑁆𑀣𑀧𑀸𑀲𑀁 𑀦𑁂𑀢𑁆𑀯𑀸 𑀅𑀯𑀲𑁂𑀲𑁂 𑀩𑀳𑀺𑀲𑀻𑀫𑀸𑀬 𑀓𑀢𑁆𑀯𑀸 𑀲𑀩𑁆𑀩𑀫𑀕𑁆𑀕𑁂𑀲𑀼 𑀆𑀭𑀓𑁆𑀔𑀁 𑀯𑀺𑀤𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀫𑀦𑁆𑀢𑀺 𑀔𑀡𑁆𑀟𑀲𑀻𑀫𑀁.

𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀢𑀺𑀓𑁄𑀡’’𑀦𑁆𑀢𑀺𑀆𑀤𑀺. 𑀧𑀡𑀯𑀽𑀧𑀫𑀦𑁆𑀢𑀺 𑀧𑀡𑀯𑀲𑀡𑁆𑀞𑀸𑀦𑀁 𑀫𑀚𑁆𑀛𑁂 𑀲𑀁𑀔𑀺𑀢𑁆𑀢𑀁 𑀉𑀪𑀬𑀓𑁄𑀝𑀺𑀬𑀸 𑀯𑀺𑀢𑁆𑀣𑀢𑀁. ‘‘𑀯𑀺𑀢𑀸𑀦𑀸𑀓𑀸𑀭𑀁 𑀥𑀦𑀼𑀓𑀸𑀓𑀸𑀭’’𑀦𑁆𑀢𑀺 𑀆𑀓𑀸𑀭-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀥𑀦𑀼𑀓𑀸𑀓𑀸𑀭𑀦𑁆𑀢𑀺 𑀆𑀭𑁄𑀧𑀺𑀢𑀥𑀦𑀼𑀲𑀡𑁆𑀞𑀸𑀦𑀁, ‘‘𑀫𑀼𑀤𑀺𑀗𑁆𑀕𑀽𑀧𑀫𑀁 𑀲𑀓𑀝𑀽𑀧𑀫’’𑀦𑁆𑀢𑀺 𑀉𑀧𑀫𑀸-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀫𑀼𑀤𑀺𑀗𑁆𑀕𑀽𑀧𑀫𑀦𑁆𑀢𑀺 𑀫𑀚𑁆𑀛𑁂 𑀯𑀺𑀢𑁆𑀣𑀢𑀁 𑀉𑀪𑀬𑀓𑁄𑀝𑀺𑀬𑀸 𑀢𑀦𑀼𑀓𑀁 𑀢𑀼𑀭𑀺𑀬𑀯𑀺𑀲𑁂𑀲𑀁 𑀫𑀼𑀤𑀺𑀗𑁆𑀕𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀸𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁨𑁫𑁬𑁩. 𑀧𑀩𑁆𑀩𑀢𑀸𑀤𑀺𑀦𑀺𑀫𑀺𑀢𑁆𑀢𑀼𑀧𑀕𑀦𑀺𑀫𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀩𑁆𑀩𑀢’’𑀦𑁆𑀢𑀺𑀆𑀤𑀺. 𑀇𑀢𑀺 𑀅𑀝𑁆𑀞 𑀦𑀺𑀫𑀺𑀢𑁆𑀢𑀸𑀦𑀺 𑀤𑀻𑀧𑀬𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀭𑁂𑀯𑀁 𑀲𑀗𑁆𑀔𑁂𑀧𑀢𑁄 𑀦𑀺𑀫𑀺𑀢𑁆𑀢𑀼𑀧𑀕𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀼𑀤𑁆𑀥𑀧𑀁𑀲𑀼𑀲𑀼𑀤𑁆𑀥𑀧𑀸𑀲𑀸𑀡𑀉𑀪𑀬𑀫𑀺𑀲𑁆𑀲𑀓𑀯𑀲𑁂𑀦 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀢𑀺𑀯𑀺𑀥𑁄𑀧𑀺 𑀳𑀺 𑀧𑀩𑁆𑀩𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀦𑀺𑀫𑀺𑀢𑁆𑀢𑀼𑀧𑀕𑁄, 𑀢𑀢𑁄 𑀑𑀫𑀓𑀢𑀭𑁄 𑀦 𑀯𑀝𑁆𑀝𑀢𑀺. 𑀅𑀦𑁆𑀢𑁄𑀲𑀸𑀭𑁂𑀳𑀺 𑀯𑀸 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑁂𑀳𑀺 𑀯𑀸 𑀭𑀼𑀓𑁆𑀔𑁂𑀳𑀺 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀫𑁆𑀧𑀺 𑀯𑀦𑀁 𑀦𑀺𑀫𑀺𑀢𑁆𑀢𑀼𑀧𑀕𑀁, 𑀢𑀢𑁄 𑀊𑀦𑀢𑀭𑀁 𑀦 𑀯𑀝𑁆𑀝𑀢𑀺. 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑁂 𑀅𑀬𑀕𑀼𑀴𑀫𑁆𑀧𑀺 𑀧𑀸𑀲𑀸𑀡𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀬𑁄 𑀓𑁄𑀘𑀺 𑀧𑀸𑀲𑀸𑀡𑁄 𑀉𑀓𑁆𑀓𑀁𑀲𑁂𑀦 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀑𑀫𑀓𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑀭𑀺𑀫𑀸𑀡𑁄 𑀦𑀺𑀫𑀺𑀢𑁆𑀢𑀼𑀧𑀕𑁄, 𑀦 𑀢𑀢𑁄 𑀔𑀼𑀤𑁆𑀤𑀓𑀢𑀭𑁄. 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀧𑀦 𑀅𑀢𑀺𑀫𑀳𑀦𑁆𑀢𑁄𑀧𑀺 𑀯𑀝𑁆𑀝𑀢𑀺. 𑀭𑀼𑀓𑁆𑀔𑁄 𑀚𑀻𑀯𑀦𑁆𑀢𑁄𑀬𑁂𑀯 𑀅𑀦𑁆𑀢𑁄𑀲𑀸𑀭𑁄 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀅𑀦𑁆𑀢𑀫𑀲𑁄 𑀉𑀩𑁆𑀩𑁂𑀥𑀢𑁄 𑀅𑀝𑁆𑀞𑀗𑁆𑀕𑀼𑀮𑁄 ¶ 𑀧𑀭𑀺𑀡𑀸𑀳𑀢𑁄 𑀲𑀽𑀘𑀺𑀤𑀡𑁆𑀟𑀧𑁆𑀧𑀫𑀸𑀡𑁄𑀧𑀺 𑀦𑀺𑀫𑀺𑀢𑁆𑀢𑀼𑀧𑀕𑁄, 𑀦 𑀢𑀢𑁄 𑀑𑀭𑀁 𑀯𑀝𑁆𑀝𑀢𑀺. 𑀫𑀕𑁆𑀕𑁄 𑀚𑀗𑁆𑀖𑀫𑀕𑁆𑀕𑁄 𑀯𑀸 𑀳𑁄𑀢𑀼 𑀲𑀓𑀝𑀫𑀕𑁆𑀕𑁄 𑀯𑀸, 𑀬𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀕𑀘𑁆𑀙𑀢𑀺, 𑀢𑀸𑀤𑀺𑀲𑁄 𑀚𑀗𑁆𑀖𑀲𑀓𑀝𑀲𑀢𑁆𑀣𑁂𑀳𑀺 𑀯𑀴𑀜𑁆𑀚𑀺𑀬𑀫𑀸𑀦𑁄𑀬𑁂𑀯 𑀦𑀺𑀫𑀺𑀢𑁆𑀢𑀼𑀧𑀕𑁄, 𑀅𑀯𑀴𑀜𑁆𑀚𑁄 𑀦 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀢𑀁𑀤𑀺𑀯𑀲𑀁 𑀚𑀸𑀢𑁄 𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑁄 𑀕𑁄𑀯𑀺𑀲𑀸𑀡𑀫𑀢𑁆𑀢𑁄𑀧𑀺 𑀯𑀫𑁆𑀫𑀺𑀓𑁄 𑀦𑀺𑀫𑀺𑀢𑁆𑀢𑀼𑀧𑀕𑁄, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. 𑀉𑀤𑀓𑀁 𑀬𑀁 𑀅𑀲𑀦𑁆𑀤𑀫𑀸𑀦𑀁 𑀆𑀯𑀸𑀝𑀧𑁄𑀓𑁆𑀔𑀭𑀡𑀺𑀢𑀴𑀸𑀓𑀚𑀸𑀢𑀲𑁆𑀲𑀭𑀮𑁄𑀡𑀺𑀲𑀫𑀼𑀤𑁆𑀤𑀸𑀤𑀻𑀲𑀼 𑀞𑀺𑀢𑀁, 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀁𑀬𑁂𑀯 𑀧𑀣𑀯𑀺𑀬𑀁 𑀔𑀢𑁂 𑀆𑀯𑀸𑀝𑁂 𑀖𑀝𑁂𑀳𑀺 𑀆𑀳𑀭𑀺𑀢𑁆𑀯𑀸 𑀧𑀽𑀭𑀺𑀢𑀫𑁆𑀧𑀺 𑀬𑀸𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀸 𑀲𑀡𑁆𑀞𑀳𑀦𑀓𑀁 𑀦𑀺𑀫𑀺𑀢𑁆𑀢𑀼𑀧𑀕𑀁, 𑀇𑀢𑀭𑀁 𑀲𑀦𑁆𑀤𑀫𑀸𑀦𑀓𑀁, 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀸𑀮𑀁 ¶ 𑀅𑀢𑀺𑀝𑁆𑀞𑀦𑁆𑀢𑀁, 𑀪𑀸𑀚𑀦𑀕𑀢𑀁 𑀯𑀸 𑀦 𑀯𑀝𑁆𑀝𑀢𑀺. 𑀬𑀸 𑀅𑀩𑀤𑁆𑀥𑀲𑀻𑀫𑀸𑀮𑀓𑁆𑀔𑀡𑁂 𑀦𑀤𑀻 𑀯𑀼𑀢𑁆𑀢𑀸, 𑀲𑀸 𑀦𑀺𑀫𑀺𑀢𑁆𑀢𑀼𑀧𑀕𑀸, 𑀅𑀜𑁆𑀜𑀸 𑀦 𑀯𑀝𑁆𑀝𑀢𑀻𑀢𑀺.

𑁨𑁫𑁬𑁪. 𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀻𑀡𑀻𑀢𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀤𑀲𑁆𑀲𑀦𑀁, 𑀇𑀫𑀺𑀦𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑀺𑀫𑀺𑀢𑁆𑀢𑀸𑀦𑀺 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀳 𑁋 ‘‘𑀲𑀸 𑀏𑀯𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀩𑀚𑁆𑀛𑀫𑀸𑀦𑀸 𑀏𑀓𑁂𑀦, 𑀤𑁆𑀯𑀻𑀳𑀺 𑀯𑀸 𑀦𑀺𑀫𑀺𑀢𑁆𑀢𑁂𑀳𑀺 𑀅𑀩𑀤𑁆𑀥𑀸 𑀳𑁄𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮). 𑀲𑀢𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀸𑀬𑀁 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀯𑀻𑀲𑀢𑀺𑀬𑀸, 𑀢𑀺𑀁𑀲𑀸𑀬 𑀯𑀸 𑀦𑀺𑀫𑀺𑀢𑁆𑀢𑁂𑀳𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑁨𑁫𑁬𑁫. 𑀢𑀺𑀬𑁄𑀚𑀦𑀁 𑀧𑀭𑀁 𑀉𑀓𑁆𑀓𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄 𑀏𑀢𑀺𑀲𑁆𑀲𑀸𑀢𑀺 𑀢𑀺𑀬𑁄𑀚𑀦𑀧𑀭𑀸. ‘‘𑀯𑀻𑀲𑀢𑀻’’𑀢𑀺𑀆𑀤𑀻𑀦𑀁 𑀲𑀗𑁆𑀔𑁆𑀬𑀸𑀦𑁂, 𑀲𑀗𑁆𑀔𑁆𑀬𑁂𑀬𑁆𑀬𑁂 𑀘 𑀯𑀢𑁆𑀢𑀦𑀢𑁄 𑀇𑀥 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀫𑀸𑀦𑀁 𑀯𑀻𑀲𑀢𑀺-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽𑀦𑀦𑁆𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀏𑀓𑀯𑀻𑀲𑀢𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀧𑀭𑀫𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀲𑁆𑀲 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀦𑀁 𑀏𑀓𑀯𑀻𑀲𑀢𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀇𑀤𑀜𑁆𑀘 ¶ 𑀦𑀺𑀲𑀺𑀦𑁆𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀳𑀺 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀢𑀓𑁂 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁨𑁫𑁬𑁬. 𑀬𑀸 𑀉𑀓𑁆𑀓𑀝𑁆𑀞𑀸𑀬𑀧𑀺 𑀬𑀸 𑀘 𑀳𑁂𑀝𑁆𑀞𑀺𑀫𑀸𑀬𑀧𑀺 𑀓𑁂𑀲𑀕𑁆𑀕𑀫𑀢𑁆𑀢𑀢𑁄𑀧𑀺 𑀅𑀥𑀺𑀓𑀸 𑀯𑀸 𑀊𑀦𑀸 𑀯𑀸, 𑀏𑀢𑀸 𑀤𑁆𑀯𑁂𑀧𑀺 𑀲𑀻𑀫𑀸𑀬𑁄 ‘‘𑀅𑀲𑀻𑀫𑀸’’𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁨𑁫𑁬𑁭. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀧𑀼𑀩𑁆𑀩𑀤𑀺𑀲𑀸𑀦𑀼𑀤𑀺𑀲𑀸𑀤𑀻𑀲𑀼 𑀧𑀭𑀺𑀢𑁄 𑀲𑀩𑁆𑀩𑀤𑀺𑀲𑀸𑀲𑀼 𑀬𑀣𑀸𑀮𑀤𑁆𑀥𑀁 𑀦𑀺𑀫𑀺𑀢𑁆𑀢𑁄𑀧𑀕𑀁 𑀲𑀩𑁆𑀩𑀦𑀺𑀫𑀺𑀢𑁆𑀢𑀁 ‘‘𑀯𑀺𑀦𑀬𑀥𑀭𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 ‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’𑀦𑁆𑀢𑀺? ‘𑀧𑀩𑁆𑀩𑀢𑁄, 𑀪𑀦𑁆𑀢𑁂’𑀢𑀺. 𑀧𑀼𑀦 𑀯𑀺𑀦𑀬𑀥𑀭𑁂𑀦 ‘𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀖𑀝𑁂𑀢𑁆𑀯𑀸 𑀓𑀺𑀢𑁆𑀢𑁂𑀢𑁆𑀯𑀸. 𑀜𑀢𑁆𑀢𑀺 𑀤𑀼𑀢𑀺𑀬𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀭𑀳𑀢𑀺 𑀧𑀳𑁄𑀢𑀺 𑀯𑀺𑀦𑀬𑀥𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫𑁬𑁮. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀦𑀬𑁂𑀦 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀁 𑀧𑀞𑀫𑀁 𑀩𑀦𑁆𑀥𑀺𑀢𑁆𑀯𑀸. 𑀅𑀦𑀦𑁆𑀢𑀭𑀦𑁆𑀢𑀺 𑀓𑀺𑀘𑁆𑀘𑀦𑁆𑀢𑀭𑁂𑀦 𑀩𑁆𑀬𑀯𑀳𑀺𑀢𑀁 𑀅𑀓𑀢𑁆𑀯𑀸, 𑀓𑀸𑀮𑀓𑁆𑀔𑁂𑀧𑀁 𑀅𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀓𑀸𑀫𑀸𑀦𑀁 ¶ 𑀧𑀘𑁆𑀘𑀢𑁆𑀢𑀺𑀓𑀸𑀦𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀲𑀫𑁆𑀫𑀼𑀢𑀺𑀢𑁄 𑀧𑀘𑁆𑀙𑀸. 𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀬𑀸 𑀩𑀤𑁆𑀥𑀸, 𑀲𑀸 ‘‘𑀅𑀯𑀺𑀧𑁆𑀧𑀯𑀸𑀲𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀬𑀸 𑀩𑀤𑁆𑀥𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 ¶ 𑀏𑀓𑀼𑀧𑁄𑀲𑀣𑀸…𑀧𑁂… 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀼𑀢𑁆𑀢𑀦𑀬𑁂𑀦 𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀬𑀸 𑀩𑀤𑁆𑀥𑀸. 𑀲𑀸 𑀅𑀯𑀺𑀧𑁆𑀧𑀯𑀸𑀲𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀦𑀺𑀫𑀺𑀢𑁆𑀢𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀢𑀣𑀸 𑀯𑀼𑀘𑁆𑀘𑀢𑀺, ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁫𑁬𑁯. ‘‘𑀬𑀸 𑀓𑀸𑀘𑀺 𑀦𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀦𑀤𑀻 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 ‘𑀏𑀢𑀁 𑀩𑀤𑁆𑀥𑀲𑀻𑀫𑀁 𑀓𑀭𑁄𑀫𑀸’𑀢𑀺 𑀓𑀢𑀸𑀧𑀺 𑀅𑀲𑀻𑀫𑀸𑀯 𑀳𑁄𑀢𑀻’’𑀢𑀺𑀆𑀤𑀺𑀓𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀅𑀝𑁆𑀞𑀓𑀣𑀸𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀤𑀻…𑀧𑁂… 𑀦 𑀯𑁄𑀢𑁆𑀣𑀭𑀢𑀻’’𑀢𑀺, 𑀦 𑀧𑀢𑁆𑀣𑀭𑀢𑀺 𑀲𑀻𑀫𑀸𑀪𑀸𑀯𑁂𑀦 𑀩𑁆𑀬𑀸𑀧𑀺𑀦𑀻 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀢𑀺 𑀬𑁂𑀦 𑀦 𑀯𑁄𑀢𑁆𑀣𑀭𑀢𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀅𑀩𑁆𑀭𑀯𑀻𑀢𑀺 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁭) 𑀅𑀯𑁄𑀘.

𑀲𑀻𑀫𑀸𑀓𑀣𑀸𑀯𑀡𑁆𑀡𑀦𑀸.

𑁨𑁫𑁭𑁦. 𑀅𑀝𑁆𑀞𑀫𑀺𑀬𑀸𑀧𑀺 𑀉𑀧𑁄𑀲𑀣𑀯𑁄𑀳𑀸𑀭𑀢𑁆𑀢𑀸 𑀤𑀺𑀦𑀯𑀲𑁂𑀦 𑀉𑀧𑁄𑀲𑀣𑀸𑀦𑀁 𑀅𑀢𑀺𑀭𑁂𑀓𑀢𑁆𑀢𑁂𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑁂𑀬𑁂𑀯 𑀉𑀧𑁄𑀲𑀣𑁂 𑀕𑀳𑁂𑀢𑁆𑀯𑀸 𑀆𑀳 ‘‘𑀦𑀯𑁂𑀯𑀸’’𑀢𑀺.

𑁨𑁫𑁭𑁧-𑁩. 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀘𑀸𑀢𑀼𑀤𑁆𑀤𑀲𑁄…𑀧𑁂… 𑀓𑀫𑁆𑀫𑁂𑀦𑀼𑀧𑁄𑀲𑀣𑀸’’𑀢𑀺. 𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑁄 𑀘𑀸𑀢𑀼𑀤𑁆𑀤𑀲𑁄. 𑀧𑀦𑁆𑀦𑀭𑀲𑀦𑁆𑀦𑀁 𑀧𑀽𑀭𑀡𑁄 𑀧𑀦𑁆𑀦𑀭𑀲𑁄. 𑀬𑀤𑀸 𑀧𑀦 𑀓𑁄𑀲𑀫𑁆𑀩𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁫𑁧 𑀆𑀤𑀬𑁄) 𑀆𑀕𑀢𑀦𑀬𑁂𑀦 𑀪𑀺𑀦𑁆𑀦𑁂 𑀲𑀗𑁆𑀖𑁂 𑀑𑀲𑀸𑀭𑀺𑀢𑁂 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀢𑀤𑀸 ‘‘𑀢𑀸𑀯𑀤𑁂𑀯 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁪𑁭𑁫) 𑀯𑀘𑀦𑀢𑁄 𑀞𑀧𑁂𑀢𑁆𑀯𑀸 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑁂 ¶ 𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀤𑀺𑀯𑀲𑁄 𑀲𑀸𑀫𑀕𑁆𑀕𑀻 𑀉𑀧𑁄𑀲𑀣𑁄𑀢𑀺. 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀘𑀸𑀢𑀼𑀤𑁆𑀤𑀲𑁄, 𑀧𑀦𑁆𑀦𑀭𑀲𑁄, 𑀲𑀸𑀫𑀕𑁆𑀕𑀻 𑀘 𑀉𑀧𑁄𑀲𑀣𑁄𑀢𑀺 𑀏𑀢𑁂 𑀢𑀬𑁄𑀧𑀺 𑀉𑀧𑁄𑀲𑀣𑀸 𑀤𑀺𑀯𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸 𑀤𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀲𑀗𑁆𑀖𑁂𑀉𑀧𑁄𑀲𑀣𑁄𑀢𑀺 ¶ 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀉𑀧𑁄𑀲𑀣𑁄. 𑀕𑀡𑁂𑀧𑀼𑀕𑁆𑀕𑀮𑀼𑀧𑁄𑀲𑀣𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀥𑁆𑀬𑀲𑀸𑀥𑀦𑀮𑀓𑁆𑀔𑀡𑀲𑁆𑀲 𑀲𑀫𑁆𑀩𑀦𑁆𑀥𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀲𑀗𑁆𑀖𑁂’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄. 𑀉𑀧𑁄𑀲𑀣𑁄 𑀲𑀸𑀥𑁆𑀬𑁄 𑀓𑀫𑁆𑀫𑀪𑀸𑀯𑀢𑁄, 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸 𑀲𑀸𑀥𑀦𑀁 𑀓𑀸𑀭𑀓𑀪𑀸𑀯𑀢𑁄.

𑀲𑀼𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑁄, 𑀲𑀼𑀢𑁆𑀢𑀼𑀤𑁆𑀤𑁂𑀲𑁄𑀢𑀺 𑀅𑀪𑀺𑀥𑀸𑀦𑀁 𑀦𑀸𑀫𑀁 𑀬𑀲𑁆𑀲 𑀲𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑀸𑀪𑀺𑀥𑀸𑀦𑁄. 𑀓𑀫𑁆𑀫𑁂𑀦𑀸𑀢𑀺 𑀓𑀺𑀘𑁆𑀘𑀯𑀲𑁂𑀦.

𑁨𑁫𑁭𑁪. ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀸𑀘𑁆𑀘𑀮𑀺𑀗𑁆𑀕𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀯𑀸𑀘𑁆𑀘𑀮𑀺𑀗𑁆𑀕𑀸 𑀳𑀺 𑀢𑀩𑁆𑀩𑀸𑀤𑀬𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀧𑀸𑀭𑀺𑀲𑀼𑀤𑁆𑀥𑀺 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑁂𑀦 𑀬𑁄𑀚𑁂𑀢𑀩𑁆𑀩𑀸.

𑁨𑁫𑁭𑁫. 𑀯𑀼𑀢𑁆𑀢𑀸𑀢𑀺 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸, 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀧𑀞𑀫𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁫𑁦) 𑀤𑁂𑀲𑀺𑀢𑀸, 𑀲𑀬𑀜𑁆𑀘 𑀢𑁂𑀲𑀜𑁆𑀘 𑀉𑀤𑁆𑀤𑁂𑀲𑁂 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀤𑀸𑀦’’𑀦𑁆𑀢𑀺𑀆𑀤𑀺. 𑀲𑀸𑀯𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀢𑁂𑀦𑀸’’𑀢𑀺 𑀲𑁂𑀲𑁄. 𑀲𑁂𑀲𑀓𑀦𑁆𑀢𑀺 𑀅𑀦𑀼𑀤𑁆𑀤𑀺𑀝𑁆𑀞𑀝𑁆𑀞𑀸𑀦𑀁 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄…𑀧𑁂… 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻𑀢𑀺 𑀇𑀫𑀁 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘𑀉𑀤𑁆𑀤𑀺𑀝𑁆𑀞𑀁 𑀔𑁄 ¶ 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀁, 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀺 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸, 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’𑀢𑀺 𑀯𑀢𑁆𑀯𑀸 ‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀁. 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀺 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸…𑀧𑁂… 𑀅𑀯𑀺𑀯𑀤𑀫𑀸𑀦𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁫𑁦) 𑁋

𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁.

𑁨𑁫𑁭𑁬. 𑀲𑁂𑀲𑁂𑀲𑀼𑀧𑀻𑀢𑀺 𑀉𑀤𑁆𑀤𑀺𑀝𑁆𑀞𑀸𑀧𑁂𑀓𑁆𑀔𑀸𑀬 𑀲𑁂𑀲𑁂𑀲𑀼 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀻𑀲𑀼𑀧𑀺. ‘‘𑀅𑀬𑀫𑁂𑀯 𑀦𑀬𑁄 𑀜𑁂𑀬𑁆𑀬𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀯𑀺𑀢𑁆𑀣𑀸𑀭𑁂𑀦𑁂𑀯 𑀧𑀜𑁆𑀘𑀫𑁄’’𑀢𑀺 𑀯𑀘𑀦𑀢𑁄 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑁂 ‘‘𑀲𑀸𑀯𑁂𑀢𑀩𑁆𑀩𑀁 𑀢𑀼 𑀲𑁂𑀲𑀓’’𑀦𑁆𑀢𑀺 𑀅𑀬𑀁 𑀦𑀬𑁄 𑀦 𑀮𑀩𑁆𑀪𑀢𑀺. ‘‘𑀲𑀸𑀯𑁂𑀢𑀩𑁆𑀩𑀁 𑀢𑀼 𑀲𑁂𑀲𑀓’’𑀦𑁆𑀢𑀺 𑀯𑀘𑀦𑀢𑁄 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀻𑀲𑀼 𑀬𑀲𑁆𑀫𑀺𑀁 𑀯𑀺𑀧𑁆𑀧𑀓𑀢𑁂 𑀅𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀧𑀦 ¶ 𑀅𑀦𑀼𑀤𑁆𑀤𑀺𑀝𑁆𑀞𑁂 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀅𑀦𑀺𑀬𑀢𑀼𑀤𑁆𑀤𑁂𑀲𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸 ‘‘𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀘𑀢𑁆𑀢𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀤𑁂𑀲𑀸 𑀦𑀯𑀺𑀫𑁂 𑀧𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄𑀢𑀺 𑀉𑀪𑀢𑁄𑀧𑀸𑀢𑀺𑀫𑁄𑀓𑁆𑀔𑁂 𑀇𑀫𑁂 𑀦𑀯 𑀉𑀤𑁆𑀤𑁂𑀲𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁨𑁫𑁭𑁭. 𑀉𑀧𑁄𑀲𑀣𑁂𑀢𑀺 𑀲𑀗𑁆𑀖𑀼𑀧𑁄𑀲𑀣𑁂. 𑀅𑀦𑁆𑀢𑀭𑀸𑀬𑀦𑁆𑀢𑀺 𑀭𑀸𑀚𑀦𑁆𑀢𑀭𑀸𑀬𑀸𑀤𑀺𑀓𑀁 𑀤𑀲𑀯𑀺𑀥𑀁 𑀅𑀦𑁆𑀢𑀭𑀸𑀬𑀁. 𑀬𑀣𑀸𑀳 𑁋 ‘‘𑀭𑀸𑀚𑀦𑁆𑀢𑀭𑀸𑀬𑁄 𑀘𑁄𑀭𑀦𑁆𑀢𑀭𑀸𑀬𑁄 𑀅𑀕𑁆𑀬𑀦𑁆𑀢𑀭𑀸𑀬𑁄 𑀉𑀤𑀓𑀦𑁆𑀢𑀭𑀸𑀬𑁄 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄 𑀯𑀸𑀴𑀦𑁆𑀢𑀭𑀸𑀬𑁄 𑀲𑀭𑀻𑀲𑀧𑀦𑁆𑀢𑀭𑀸𑀬𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄’’𑀢𑀺 (𑀫𑀳𑀸𑀯. 𑁧𑁫𑁦).

𑀢𑀢𑁆𑀣 𑀲𑀘𑁂 𑀪𑀺𑀓𑁆𑀔𑀽𑀲𑀼 ‘‘𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁫𑁦) 𑀦𑀺𑀲𑀺𑀦𑁆𑀦𑁂𑀲𑀼 𑀭𑀸𑀚𑀸 𑀆𑀕𑀘𑁆𑀙𑀢𑀺, 𑀅𑀬𑀁 𑀭𑀸𑀚𑀦𑁆𑀢𑀭𑀸𑀬𑁄. 𑀘𑁄𑀭𑀸 𑀆𑀕𑀘𑁆𑀙𑀦𑁆𑀢𑀺 ¶ , 𑀅𑀬𑀁 𑀘𑁄𑀭𑀦𑁆𑀢𑀭𑀸𑀬𑁄. 𑀤𑀯𑀤𑀸𑀳𑁄 𑀆𑀕𑀘𑁆𑀙𑀢𑀺 𑀯𑀸, 𑀆𑀯𑀸𑀲𑁂 𑀯𑀸 𑀅𑀕𑁆𑀕𑀺 𑀉𑀝𑁆𑀞𑀳𑀢𑀺, 𑀅𑀬𑀁 𑀅𑀕𑁆𑀬𑀦𑁆𑀢𑀭𑀸𑀬𑁄. 𑀫𑁂𑀖𑁄 𑀯𑀸 𑀉𑀝𑁆𑀞𑁂𑀢𑀺, 𑀑𑀖𑁄 𑀯𑀸 𑀆𑀕𑀘𑁆𑀙𑀢𑀺, 𑀅𑀬𑀁 𑀉𑀤𑀓𑀦𑁆𑀢𑀭𑀸𑀬𑁄. 𑀩𑀳𑀽 𑀫𑀦𑀼𑀲𑁆𑀲𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼𑀁 𑀬𑀓𑁆𑀔𑁄 𑀕𑀡𑁆𑀳𑀸𑀢𑀺, 𑀅𑀬𑀁 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄. 𑀩𑁆𑀬𑀕𑁆𑀖𑀸𑀤𑀬𑁄 𑀘𑀡𑁆𑀟𑀫𑀺𑀕𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀯𑀸𑀴𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼𑀁 𑀲𑀧𑁆𑀧𑀸𑀤𑀬𑁄 𑀟𑀁𑀲𑀦𑁆𑀢𑀺, 𑀅𑀬𑀁 𑀲𑀭𑀻𑀲𑀧𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀯𑁂𑀭𑀺𑀦𑁄 𑀯𑀸 𑀢𑀁 𑀫𑀸𑀭𑁂𑀢𑀼𑀁 𑀕𑀡𑁆𑀳𑀦𑁆𑀢𑀺, 𑀅𑀬𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀫𑀦𑀼𑀲𑁆𑀲𑀸 𑀏𑀓𑀁 𑀯𑀸 𑀩𑀳𑀼𑀁 𑀯𑀸 𑀪𑀺𑀓𑁆𑀔𑀽 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀓𑀸𑀫𑀸 𑀕𑀡𑁆𑀳𑀦𑁆𑀢𑀺, 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄.

‘‘𑀘𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀸𑀬𑀲𑀜𑁆𑀜𑀺𑀦𑀸 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑁂 𑀅𑀓𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀦𑀼𑀤𑁆𑀤𑁂𑀲𑁄𑀢𑀺 𑀯𑀺𑀢𑁆𑀣𑀸𑀭𑁂𑀦 𑀅𑀦𑀼𑀤𑁆𑀤𑁂𑀲𑁄. 𑀦𑀺𑀯𑀸𑀭𑀺𑀢𑁄𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁫𑁦) 𑀧𑀝𑀺𑀲𑀺𑀤𑁆𑀥𑁄. 𑀇𑀫𑀺𑀦𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁫𑁦) 𑀇𑀤𑀫𑁆𑀧𑀺 𑀯𑀺𑀪𑀸𑀯𑀺𑀢𑀁 𑀳𑁄𑀢𑀺.

𑁨𑁫𑁭𑁮. 𑀢𑀲𑁆𑀲𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲. 𑀇𑀲𑁆𑀲𑀭𑀡𑀲𑁆𑀲 𑀳𑁂𑀢𑀼𑀫𑀸𑀳 ‘‘‘𑀣𑁂𑀭𑀸𑀥𑁂𑀬𑁆𑀬’𑀦𑁆𑀢𑀺 𑀧𑀸𑀞𑀢𑁄’’𑀢𑀺. 𑀣𑁂𑀭𑀸𑀥𑁂𑀬𑁆𑀬𑀦𑁆𑀢𑀺 𑀣𑁂𑀭𑀸𑀥𑀻𑀦𑀁, 𑀣𑁂𑀭𑀸𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀞𑀢𑁄𑀢𑀺 𑀧𑀸𑀴𑀺𑀯𑀘𑀦𑀢𑁄. ‘‘𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄, 𑀢𑀲𑁆𑀲𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 (𑀫𑀳𑀸𑀯. 𑁧𑁫𑁫) 𑀯𑀘𑀦𑀢𑁄 𑀆𑀳 ‘‘𑀅𑀯𑀢𑁆𑀢𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀅𑀯𑀢𑁆𑀢𑀦𑁆𑀢𑁂𑀦𑀸𑀢𑀺 𑀅𑀦𑁆𑀢𑀫𑀲𑁄 𑀤𑁆𑀯𑁂𑀧𑀺 𑀉𑀤𑁆𑀤𑁂𑀲𑁂 𑀉𑀤𑁆𑀤𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦. 𑀣𑁂𑀭𑁂𑀦 𑀬𑁄 ¶ 𑀅𑀚𑁆𑀛𑀺𑀝𑁆𑀞𑁄, 𑀏𑀯𑀫𑀚𑁆𑀛𑀺𑀝𑁆𑀞𑀲𑁆𑀲 𑀬𑀲𑁆𑀲 𑀧𑀦 𑀣𑁂𑀭𑀲𑁆𑀲, 𑀦𑀯𑀲𑁆𑀲, 𑀫𑀚𑁆𑀛𑀺𑀫𑀲𑁆𑀲 𑀯𑀸 𑀲𑁄 𑀧𑀸𑀢𑀺𑀫𑁄𑀓𑁆𑀔𑁄 ¶ 𑀯𑀢𑁆𑀢𑀢𑀺 𑀧𑀕𑀼𑀡𑁄 𑀳𑁄𑀢𑀺, 𑀲𑁄 𑀇𑀲𑁆𑀲𑀭𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀚𑁆𑀛𑀺𑀝𑁆𑀞𑁄𑀢𑀺 ‘‘𑀢𑁆𑀯𑀁, 𑀆𑀯𑀼𑀲𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀸’’𑀢𑀺 𑀆𑀡𑀢𑁆𑀢𑁄, 𑀇𑀫𑀺𑀦𑀸 𑀅𑀦𑀸𑀡𑀢𑁆𑀢𑀲𑁆𑀲 𑀉𑀤𑁆𑀤𑀺𑀲𑀺𑀢𑀼𑀁 𑀲𑀸𑀫𑀢𑁆𑀣𑀺𑀬𑀸 𑀲𑀢𑀺𑀧𑀺 𑀅𑀦𑀺𑀲𑁆𑀲𑀭𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀘𑁂 𑀣𑁂𑀭𑀲𑁆𑀲 𑀧𑀜𑁆𑀘 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀧𑀦 𑀅𑀔𑀡𑁆𑀟𑀸 𑀲𑀼𑀯𑀺𑀲𑀤𑀸 𑀯𑀸𑀘𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀣𑁂𑀭𑀸𑀬𑀢𑁆𑀢𑁄𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀘𑁂 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀯𑀺𑀲𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑁆𑀬𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑁆𑀢𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁫𑁫).

𑁨𑁫𑁭𑁯. 𑀉𑀤𑁆𑀤𑀺𑀲𑀦𑁆𑀢𑁂𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑁂. 𑀲𑀫𑀸 𑀯𑀸𑀢𑀺 𑀆𑀯𑀸𑀲𑀺𑀓𑁂𑀳𑀺 𑀕𑀡𑀦𑁂𑀦 𑀲𑀫𑀸 𑀯𑀸. 𑀅𑀧𑁆𑀧𑀸 𑀯𑀸𑀢𑀺 𑀊𑀦𑀸 𑀯𑀸. 𑀆𑀕𑀘𑁆𑀙𑀦𑁆𑀢𑀺 𑀲𑀘𑁂 𑀧𑀦𑀸𑀢𑀺 𑀲𑀘𑁂 𑀧𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺. 𑀲𑁂𑀲𑀓𑀦𑁆𑀢𑀺 𑀅𑀦𑀼𑀤𑁆𑀤𑀺𑀝𑁆𑀞𑀝𑁆𑀞𑀸𑀦𑀁.

𑁨𑁫𑁮𑁦. 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀢𑀺 𑀉𑀤𑁆𑀤𑀺𑀝𑁆𑀞𑀓𑁆𑀔𑀡𑁂𑀬𑁂𑀯 𑀓𑀣𑀸𑀭𑀫𑁆𑀪𑀢𑁄 𑀧𑀼𑀩𑁆𑀩𑀫𑁂𑀯. ‘‘𑀯𑀸’’𑀢𑀺 𑀇𑀤𑀁 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀇𑀫𑀺𑀦𑀸 𑀅𑀯𑀼𑀢𑁆𑀢𑀁 ‘‘𑀅𑀯𑀼𑀝𑁆𑀞𑀺𑀢𑀸𑀬 𑀯𑀸’’𑀢𑀺 𑀇𑀫𑀁 𑀯𑀺𑀓𑀧𑁆𑀧𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬𑀸𑀢𑀺 𑀘 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀅𑀜𑁆𑀜𑀫𑀜𑁆𑀜𑀁 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑀸𑀬𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀸𑀬𑀸𑀢𑀺 𑀏𑀢𑁆𑀣 ‘‘𑀏𑀓𑀘𑁆𑀘𑀸𑀬𑀸’’𑀢𑀺 𑀘 ‘‘𑀲𑀩𑁆𑀩𑀸𑀬𑀸’’𑀢𑀺 𑀘 𑀲𑁂𑀲𑁄. 𑀪𑀺𑀓𑁆𑀔𑀽𑀦𑀁 𑀏𑀓𑀘𑁆𑀘𑀸𑀬 𑀧𑀭𑀺𑀲𑀸𑀬 𑀯𑀼𑀝𑁆𑀞𑀺𑀢𑀸𑀬 𑀯𑀸 𑀲𑀩𑁆𑀩𑀸𑀬 𑀧𑀭𑀺𑀲𑀸𑀬 𑀯𑀼𑀝𑁆𑀞𑀺𑀢𑀸𑀬 𑀯𑀸𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀆𑀯𑀸𑀲𑀺𑀓𑀸𑀦𑀁. 𑀫𑀽𑀮𑁂𑀢𑀺 𑀲𑀦𑁆𑀢𑀺𑀓𑁂. 𑀧𑀸𑀭𑀺𑀲𑀼𑀤𑁆𑀥𑀺 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂…𑀧𑁂… 𑀆𑀕𑀘𑁆𑀙𑀦𑁆𑀢𑀺 𑀩𑀳𑀼𑀢𑀭𑀸, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂 𑀩𑀳𑀽’’𑀢𑀺. 𑀏𑀢𑁆𑀣 ‘‘𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀲𑁂𑀲𑁄. 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 ¶ 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑁋

‘‘𑀧𑀦𑁆𑀦𑀭𑀲𑁄𑀯𑀸𑀲𑀺𑀓𑀸𑀦𑀁, 𑀇𑀢𑀭𑀸𑀦𑀁 𑀲𑀘𑁂𑀢𑀭𑁄;

𑀲𑀫𑀸𑀦𑁂𑀢𑀭𑁂𑀦𑀼𑀯𑀢𑁆𑀢𑀦𑁆𑀢𑀼, 𑀧𑀼𑀭𑀺𑀫𑀸𑀦𑀁 𑀲𑀘𑁂𑀥𑀺𑀓𑀸;

𑀧𑀼𑀭𑀺𑀫𑀸 𑀅𑀦𑀼𑀯𑀢𑁆𑀢𑀦𑁆𑀢𑀼, 𑀢𑁂𑀲𑀁 𑀲𑁂𑀲𑁂𑀧𑁆𑀬𑀬𑀁 𑀦𑀬𑁄.

‘‘𑀧𑀸𑀝𑀺𑀧𑀤𑁄𑀯𑀸𑀲𑀺𑀓𑀸𑀦𑀁 ¶ ,

𑀇𑀢𑀭𑀸𑀦𑀁 𑀉𑀧𑁄𑀲𑀣𑁄;

𑀲𑀫𑀣𑁄𑀓𑀸𑀦𑀁 𑀲𑀸𑀫𑀕𑁆𑀕𑀺𑀁,

𑀫𑀽𑀮𑀝𑁆𑀞𑀸 𑀤𑁂𑀦𑁆𑀢𑀼 𑀓𑀸𑀫𑀢𑁄.

𑀩𑀳𑀺 𑀕𑀦𑁆𑀢𑁆𑀯𑀸𑀦 𑀓𑀸𑀢𑀩𑁆𑀩𑁄,

𑀦𑁄 𑀘𑁂 𑀤𑁂𑀦𑁆𑀢𑀺 𑀉𑀧𑁄𑀲𑀣𑁄;

𑀤𑁂𑀬𑁆𑀬𑀸𑀦𑀺𑀘𑁆𑀙𑀸𑀬 𑀲𑀸𑀫𑀕𑁆𑀕𑀻,

𑀩𑀳𑀽𑀲𑀼 𑀩𑀳𑀺 𑀯𑀸 𑀯𑀚𑁂.

‘‘𑀧𑀸𑀝𑀺𑀧𑀤𑁂𑀕𑀦𑁆𑀢𑀼𑀓𑀸𑀦𑀁, 𑀏𑀯𑀫𑁂𑀯 𑀅𑀬𑀁 𑀦𑀬𑁄;

𑀲𑀸𑀯𑁂𑀬𑁆𑀬 𑀲𑀼𑀢𑁆𑀢𑀁 𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀸𑀯𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺.

𑁨𑁫𑁮𑁧. 𑀯𑀺𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸𑀢𑀺 𑀆𑀡𑀢𑁆𑀢𑀲𑁆𑀲, 𑀇𑀫𑀺𑀦𑀸 𑀇𑀢𑀭𑁂𑀲𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀥 ‘‘𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀲𑁂𑀲𑁄. 𑀣𑁂𑀭𑁂𑀦 𑀆𑀡𑀸𑀧𑁂𑀦𑁆𑀢𑁂𑀦 ‘‘𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀸 𑀲𑀤𑀸𑀓𑀸𑀮𑀫𑁂𑀯 𑀏𑀓𑁄 𑀯𑀸 𑀪𑀸𑀭𑀦𑀺𑀢𑁆𑀣𑀭𑀡𑀓𑁄 𑀯𑀸 𑀲𑀭𑀪𑀸𑀡𑀓𑀥𑀫𑁆𑀫𑀓𑀣𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀯𑀸 𑀦 𑀉𑀧𑁄𑀲𑀣𑀸𑀕𑀸𑀭𑀲𑀫𑁆𑀫𑀚𑁆𑀚𑀦𑀢𑁆𑀣𑀁 𑀆𑀡𑀸𑀧𑁂𑀢𑀩𑁆𑀩𑁄, 𑀅𑀯𑀲𑁂𑀲𑀸 𑀧𑀦 𑀯𑀸𑀭𑁂𑀦 𑀆𑀡𑀸𑀧𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁫𑁯) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀺𑀥𑀺𑀦𑀸 𑀆𑀡𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀆𑀡𑀢𑁆𑀢𑁄 𑀲𑀫𑁆𑀫𑀚𑁆𑀚𑀦𑀺𑀁 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀦 𑀮𑀪𑀢𑀺, 𑀲𑀸𑀔𑀸𑀪𑀗𑁆𑀕𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺.

𑀆𑀲𑀦𑀧𑀜𑁆𑀜𑀸𑀧𑀦𑀸𑀡𑀢𑁆𑀢𑀺𑀬𑀫𑁆𑀧𑀺 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀡𑀸𑀧𑁂𑀢𑀩𑁆𑀩𑁄. 𑀆𑀡𑀸𑀧𑁂𑀦𑁆𑀢𑁂𑀦 𑀘 𑀲𑀘𑁂 𑀉𑀧𑁄𑀲𑀣𑀸𑀕𑀸𑀭𑁂 𑀆𑀲𑀦𑀸𑀦𑀺 𑀦𑀢𑁆𑀣𑀺, 𑀲𑀗𑁆𑀖𑀺𑀓𑀸𑀯𑀸𑀲𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀧𑀜𑁆𑀜𑀧𑁂𑀢𑁆𑀯𑀸 𑀧𑀼𑀦 𑀆𑀳𑀭𑀺𑀢𑀩𑁆𑀩𑀸𑀦𑀺. 𑀆𑀲𑀦𑁂𑀲𑀼 𑀅𑀲𑀢𑀺 𑀓𑀝𑀲𑀸𑀭𑀓𑁂𑀧𑀺 𑀢𑀝𑁆𑀝𑀺𑀓𑀸𑀬𑁄𑀧𑀺 𑀧𑀜𑁆𑀜𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀝𑁆𑀝𑀺𑀓𑀸𑀲𑀼𑀧𑀺 𑀅𑀲𑀢𑀺 𑀲𑀸𑀔𑀸𑀪𑀗𑁆𑀕𑀸𑀦𑀺 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀺, 𑀓𑀧𑁆𑀧𑀺𑀬𑀓𑀸𑀭𑀓𑀁 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺.

𑀧𑀤𑀻𑀧𑀓𑀭𑀡𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀡𑀸𑀧𑁂𑀢𑀩𑁆𑀩𑁄. 𑀆𑀡𑀸𑀧𑁂𑀦𑁆𑀢𑁂𑀦 𑀘 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀢𑁂𑀮𑀁 𑀯𑀸 𑀯𑀝𑁆𑀝𑀺 𑀯𑀸 𑀓𑀧𑀮𑁆𑀮𑀺𑀓𑀸 𑀯𑀸 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀢𑁂𑀮𑀸𑀤𑀻𑀦𑀺 𑀦𑀢𑁆𑀣𑀺 ¶ , 𑀪𑀺𑀓𑁆𑀔𑀸𑀘𑀸𑀭𑁂𑀦𑀧𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀦𑀺. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺. 𑀅𑀧𑀺𑀘 𑀓𑀧𑀸𑀮𑁂 𑀅𑀕𑁆𑀕𑀺𑀧𑀺 𑀚𑀸𑀮𑁂𑀢𑀩𑁆𑀩𑁄.

𑁨𑁫𑁮𑁨. 𑀤𑀻𑀧𑀦𑁆𑀢𑀺 𑀏𑀢𑁆𑀣 ‘‘𑀚𑀸𑀮𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀅𑀣 𑀯𑀸 ‘‘𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘 𑀬𑁄𑀚𑁂𑀢𑀩𑁆𑀩𑀁. 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀕𑀡𑀜𑀢𑁆𑀢𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀓𑀢𑁆𑀢𑀩𑁆𑀩𑁄 𑀢𑀻𑀳𑀼𑀧𑁄𑀲𑀣𑁄𑀢𑀺 𑀢𑀻𑀳𑀺 𑀪𑀺𑀓𑁆𑀔𑀽𑀳𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀢𑀻𑀲𑀼 𑀣𑁂𑀭𑁂𑀦 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀤𑁆𑀯𑁂 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀢𑁆𑀢𑀩𑁆𑀩𑁄 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄, ‘𑀧𑀭𑀺𑀲𑀼𑀤𑁆𑀥𑁄’𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 (𑀫𑀳𑀸𑀯. 𑁧𑁬𑁮). 𑀤𑀼𑀢𑀺𑀬𑁂𑀦, 𑀢𑀢𑀺𑀬𑁂𑀦 𑀘 𑀬𑀣𑀸𑀓𑁆𑀓𑀫𑀁 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂, ‘𑀧𑀭𑀺𑀲𑀼𑀤𑁆𑀥𑁄’𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀢𑁆𑀢𑀩𑁆𑀩𑀁.

𑁨𑁫𑁮𑁩. 𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀻𑀦𑀺 𑀓𑀢𑁆𑀯𑀸 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀣𑁂𑀭𑁂𑀦 𑀦𑀯𑁄 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀫𑁂𑀯 𑀯𑀢𑁆𑀢𑀩𑁆𑀩𑁄 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀆𑀯𑀼𑀲𑁄 ¶ , ‘𑀧𑀭𑀺𑀲𑀼𑀤𑁆𑀥𑁄’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 (𑀫𑀳𑀸𑀯. 𑁧𑁬𑁮), 𑀦𑀯𑁂𑀦 𑀣𑁂𑀭𑁄𑀧𑀺 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀪𑀦𑁆𑀢𑁂, ‘𑀧𑀭𑀺𑀲𑀼𑀤𑁆𑀥𑁄’𑀢𑀺 𑀫𑀁 𑀥𑀸𑀭𑁂𑀣𑀸’’𑀢𑀺 (𑀫𑀳𑀸𑀯. 𑁧𑁬𑁮) 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑁂 𑀜𑀢𑁆𑀢𑀺𑀬𑀸 𑀅𑀝𑁆𑀞𑀧𑀦𑀜𑁆𑀘 ‘‘𑀥𑀸𑀭𑁂𑀳𑀻’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀘𑀸𑀢𑀺 𑀏𑀢𑁆𑀢𑀓𑁄𑀯 𑀯𑀺𑀲𑁂𑀲𑁄𑀢𑀺 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑁂𑀦 𑀓𑀸𑀢𑀩𑁆𑀩𑀁 𑀉𑀧𑁄𑀲𑀣𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀫𑀸𑀧𑁂𑀢𑁆𑀯𑀸, 𑀅𑀥𑀺𑀝𑁆𑀞𑁂𑀬𑁆𑀬 𑀧𑀦𑁂𑀓𑀓𑁄’’𑀢𑀺. 𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 ‘‘𑀅𑀚𑁆𑀚 𑀫𑁂 𑀉𑀧𑁄𑀲𑀣𑁄, 𑀧𑀦𑁆𑀦𑀭𑀲𑁄’𑀢𑀺 𑀯𑀸 ‘𑀘𑀸𑀢𑀼𑀤𑁆𑀤𑀲𑁄’𑀢𑀺 𑀯𑀸 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑁂𑀬𑁆𑀬. 𑀅𑀲𑁆𑀲𑀸𑀢𑀺 𑀅𑀯𑀲𑀸𑀦𑁂 𑀯𑀼𑀢𑁆𑀢𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄. 𑀬𑀣𑀸𑀯𑀼𑀢𑁆𑀢𑁄 𑀲𑀗𑁆𑀖𑁄𑀧𑀺 𑀢𑀬𑁄𑀧𑀺 𑀤𑁆𑀯𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀜𑁆𑀜𑀸𑀢𑀁 𑀉𑀧𑁄𑀲𑀣𑀁 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀲𑀘𑁂 𑀦 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯 𑀆𑀧𑀢𑁆𑀢𑀺𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁫𑁮𑁪-𑁫. 𑀇𑀤𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑀓𑀫𑁆𑀫𑀸𑀦𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀉𑀧𑁄𑀲𑀣𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪𑁯) 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀥𑀫𑁆𑀫𑁂𑀦 𑀘 𑀯𑀕𑁆𑀕𑁂𑀦𑀸’’𑀢𑀺𑀆𑀤𑀺. 𑀅𑀥𑀫𑁆𑀫𑁂𑀦 𑀯𑀕𑁆𑀕𑁂𑀦 𑀓𑀫𑁆𑀫𑀁, 𑀅𑀥𑀫𑁆𑀫𑀢𑁄 𑀲𑀫𑀕𑁆𑀕𑁂𑀦 𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑁂𑀦 𑀓𑀫𑁆𑀫𑀁, 𑀥𑀫𑁆𑀫𑀢𑁄 𑀲𑀫𑀕𑁆𑀕𑁂𑀦 𑀓𑀫𑁆𑀫𑀦𑁆𑀢𑀺 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁄𑀲𑀣𑀲𑁆𑀲 𑀓𑀫𑁆𑀫𑀸𑀦𑀻𑀢𑀺 𑀚𑀺𑀦𑁄 𑀅𑀩𑁆𑀭𑀯𑀻𑀢𑀺 𑀬𑁄𑀚𑀦𑀸. 𑀘𑀢𑀽𑀲𑁆𑀯𑀧𑀺 𑀧𑀦𑁂𑀢𑁂𑀲𑀽𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀧𑀦. 𑀘𑀢𑀼𑀢𑁆𑀣𑀦𑁆𑀢𑀺 ‘‘𑀲𑀫𑀕𑁆𑀕𑁂𑀦 𑀘 𑀥𑀫𑁆𑀫𑀢𑁄’’𑀢𑀺 𑀯𑀼𑀢𑁆𑀢𑀁 𑀘𑀢𑀼𑀢𑁆𑀣𑀁 𑀉𑀧𑁄𑀲𑀣𑀓𑀫𑁆𑀫𑀁 ‘‘𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑁨𑁫𑁮𑁬-𑁭. 𑀢𑀸𑀦𑀺 ¶ 𑀓𑀫𑁆𑀫𑀸𑀦𑀺 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀅𑀥𑀫𑁆𑀫𑁂𑀦𑀺𑀥𑀸’’𑀢𑀺𑀆𑀤𑀺. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀏𑀢𑁆𑀣 𑀏𑀢𑁂𑀲𑀼 𑀘𑀢𑀽𑀲𑀼 𑀉𑀧𑁄𑀲𑀣𑁂𑀲𑀼. 𑀅𑀥𑀫𑁆𑀫𑁂𑀦 𑀯𑀕𑁆𑀕𑁄 𑀉𑀧𑁄𑀲𑀣𑁄 𑀓𑀢𑀫𑁄𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀧𑀼𑀘𑁆𑀙𑀸. 𑀬𑀢𑁆𑀣 𑀬𑀲𑁆𑀲𑀁 𑀏𑀓𑀲𑀻𑀫𑀸𑀬𑀁 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄 𑀯𑀲𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀭 ¶ 𑀏𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀦𑀬𑀺𑀢𑁆𑀯𑀸 𑀢𑁂 𑀢𑀬𑁄 𑀚𑀦𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺 𑀘𑁂, 𑀏𑀯𑀁 𑀓𑀢𑁄 𑀉𑀧𑁄𑀲𑀣𑁄 𑀅𑀥𑀫𑁆𑀫𑁄 𑀯𑀕𑁆𑀕𑀼𑀧𑁄𑀲𑀣𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸, 𑀏𑀓𑀲𑀻𑀫𑀝𑁆𑀞𑁂𑀳𑀺 𑀘𑀢𑀽𑀳𑀺 𑀲𑀗𑁆𑀖𑀼𑀧𑁄𑀲𑀣𑁂 𑀓𑀸𑀢𑀩𑁆𑀩𑁂 𑀕𑀡𑀼𑀧𑁄𑀲𑀣𑀲𑁆𑀲 𑀓𑀢𑀢𑁆𑀢𑀸 𑀅𑀥𑀫𑁆𑀫𑁄 𑀘 𑀲𑀗𑁆𑀖𑀫𑀚𑁆𑀛𑀁 𑀯𑀺𑀦𑀸 𑀕𑀡𑀫𑀚𑁆𑀛𑀁 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀕𑀫𑀦𑀢𑁄 𑀢𑀲𑁆𑀲 𑀳𑀢𑁆𑀣𑀧𑀸𑀲𑀁 𑀅𑀦𑀼𑀧𑀕𑀫𑀦𑁂𑀦 𑀯𑀕𑁆𑀕𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁮𑁮. 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑁄𑀢𑀺 𑀏𑀢𑁆𑀣 ‘‘𑀉𑀧𑁄𑀲𑀣𑁄 𑀓𑀢𑀫𑁄’’𑀢𑀺 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀦𑁄 𑀏𑀓𑀢𑁄’’𑀢𑀺 𑀧𑀤𑀘𑁆𑀙𑁂𑀤𑁄. ‘‘𑀳𑁄𑀢𑀺 𑀅𑀥𑀫𑁆𑀫𑀺𑀓𑁄’’𑀢𑀺 𑀧𑀤𑀘𑁆𑀙𑁂𑀤𑁄. 𑀘𑀢𑀽𑀳𑀺 𑀲𑀫𑀕𑁆𑀕𑁂𑀳𑀺 𑀲𑀗𑁆𑀖𑀼𑀧𑁄𑀲𑀣𑁂 𑀓𑀸𑀢𑀩𑁆𑀩𑁂 𑀕𑀡𑀼𑀧𑁄𑀲𑀣𑀓𑀭𑀡𑀁 𑀅𑀥𑀫𑁆𑀫𑁄, 𑀳𑀢𑁆𑀣𑀧𑀸𑀲𑀼𑀧𑀕𑀫𑀦𑀢𑁄 𑀲𑀫𑀕𑁆𑀕𑁄 𑀳𑁄𑀢𑀺.

𑁨𑁫𑁮𑁯-𑁯𑁦. 𑀬𑁄 𑀉𑀧𑁄𑀲𑀣𑁄 𑀥𑀫𑁆𑀫𑁂𑀦 𑀯𑀕𑁆𑀕𑁄 𑀳𑁄𑀢𑀺, 𑀲𑁄 𑀓𑀢𑀫𑁄𑀢𑀺 𑀬𑁄𑀚𑀦𑀸. 𑀬𑀢𑁆𑀣 𑀬𑀲𑁆𑀲𑀁 𑀏𑀓𑀲𑀻𑀫𑀸𑀬𑀁 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀼𑀦𑁄 𑀯𑀲𑀦𑁆𑀢𑀺, 𑀢𑀢𑁆𑀭 𑀏𑀓𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀦𑀬𑀺𑀢𑁆𑀯𑀸 𑀢𑁂 𑀢𑀬𑁄 𑀚𑀦𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑁂 𑀘𑁂, 𑀥𑀫𑁆𑀫𑁂𑀦 𑀯𑀕𑁆𑀕𑁄 𑀉𑀧𑁄𑀲𑀣𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀲𑀻𑀫𑀝𑁆𑀞𑁂𑀳𑀺 𑀘𑀢𑀽𑀳𑀺 𑀲𑀗𑁆𑀖𑀼𑀧𑁄𑀲𑀣𑀲𑁆𑀲 𑀓𑀢𑀢𑁆𑀢𑀸 𑀥𑀫𑁆𑀫𑁄, 𑀏𑀓𑀲𑁆𑀲 𑀳𑀢𑁆𑀣𑀧𑀸𑀲𑀁 𑀅𑀦𑀼𑀧𑀕𑀫𑀦𑁂𑀦 𑀯𑀕𑁆𑀕𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁫𑁯𑁧. 𑀬𑁄 𑀥𑀫𑁆𑀫𑀢𑁄 𑀲𑀫𑀕𑁆𑀕𑁄, 𑀲𑁄 𑀓𑀢𑀫𑁄𑀢𑀺 𑀬𑁄𑀚𑀦𑀸. 𑀇𑀥 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀼𑀦𑁄 𑀏𑀓𑀢𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺 𑀘𑁂, 𑀅𑀬𑀁 𑀥𑀫𑁆𑀫𑀢𑁄 𑀲𑀫𑀕𑁆𑀕𑁄 𑀉𑀧𑁄𑀲𑀣𑁄𑀢𑀺 𑀫𑀢𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀬𑁄𑀚𑀦𑀸. 𑀘𑀢𑀽𑀳𑀺 𑀲𑀗𑁆𑀖𑀼𑀧𑁄𑀲𑀣𑀲𑁆𑀲 𑀓𑀢𑀢𑁆𑀢𑀸 𑀥𑀫𑁆𑀫𑁄, 𑀏𑀓𑀲𑁆𑀲𑀸𑀧𑀺 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀦𑁂𑀦 𑀲𑀫𑀕𑁆𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫𑁯𑁨. 𑀯𑀕𑁆𑀕𑁂 𑀲𑀗𑁆𑀖𑁂 𑀯𑀕𑁆𑀕𑁄𑀢𑀺 𑀲𑀜𑁆𑀜𑀺𑀦𑁄, 𑀲𑀫𑀕𑁆𑀕𑁂 𑀘 𑀲𑀗𑁆𑀖𑁂 𑀯𑀕𑁆𑀕𑁄𑀢𑀺 𑀲𑀜𑁆𑀜𑀺𑀦𑁄 𑀉𑀪𑀬𑀢𑁆𑀣 𑀯𑀺𑀫𑀢𑀺𑀲𑁆𑀲 𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁫𑁯𑁩. 𑀪𑁂𑀤𑀸𑀥𑀺𑀧𑁆𑀧𑀸𑀬𑀢𑁄𑀢𑀺 ¶ ‘‘𑀦𑀲𑁆𑀲𑀦𑁆𑀢𑁂𑀢𑁂, 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀏𑀯𑀁 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸𑀬 ‘‘𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺 ¶ 𑀅𑀓𑀼𑀲𑀮𑀩𑀮𑀯𑀢𑀸𑀬 𑀘 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺. 𑀬𑀣𑀸𑀳 𑁋 ‘‘𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀧𑀦𑁆𑀦𑀭𑀲𑀓𑁂 𑀅𑀓𑀼𑀲𑀮𑀩𑀮𑀯𑀢𑀸𑀬 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁭𑁬). 𑀯𑀕𑁆𑀕𑁂 𑀯𑀸 𑀲𑀫𑀕𑁆𑀕𑁂 𑀯𑀸 𑀲𑀗𑁆𑀖𑁂 𑀲𑀫𑀕𑁆𑀕𑁄 𑀇𑀢𑀺 𑀲𑀜𑁆𑀜𑀺𑀦𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀯𑀲𑁂𑀲𑁄 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑁄 𑀧𑀯𑀸𑀭𑀡𑀯𑀺𑀦𑀺𑀘𑁆𑀙𑀬𑀸𑀯𑀲𑀸𑀦𑁂 ‘‘𑀧𑀸𑀭𑀺𑀲𑀼𑀤𑁆𑀥𑀺𑀧𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀳𑀺 (𑀯𑀺. 𑀯𑀺. 𑁨𑁬𑁪𑁨) 𑀏𑀓𑀢𑁄 𑀯𑀢𑁆𑀢𑀼𑀫𑀺𑀘𑁆𑀙𑀦𑁆𑀢𑁂𑀦 𑀦 𑀯𑀼𑀢𑁆𑀢𑁄.

𑁨𑁫𑁯𑁪-𑁫. ‘‘𑀉𑀓𑁆𑀔𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺𑀓𑀸𑀦𑀺 𑀓𑀭𑀡𑀯𑀘𑀦𑀦𑁆𑀢𑀸𑀦𑀺 𑀧𑀤𑀸𑀦𑀺 ‘‘𑀲𑀳𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 ‘‘𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀧𑀤𑁂𑀦 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀉𑀓𑁆𑀔𑀺𑀢𑁆𑀢𑁂𑀦𑀸𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄𑀢𑀺 𑀢𑀺𑀯𑀺𑀥𑁂𑀦 𑀉𑀓𑁆𑀔𑀺𑀢𑁆𑀢𑁂𑀦. 𑀏𑀢𑁂𑀲𑀼 𑀳𑀺 𑀢𑀺𑀯𑀺𑀥𑁂 𑀉𑀓𑁆𑀔𑀺𑀢𑁆𑀢𑀓𑁂 𑀲𑀢𑀺 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀲𑀗𑁆𑀖𑁄 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺.

‘‘𑀕𑀳𑀝𑁆𑀞𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀺𑀢𑁆𑀣𑀺𑀬𑁄𑀧𑀺 𑀲𑀗𑁆𑀕𑀳𑀺𑀢𑁄. 𑀲𑁂𑀲𑁂𑀳𑀺 𑀲𑀳𑀥𑀫𑁆𑀫𑀺𑀳𑀻𑀢𑀺 𑀪𑀺𑀓𑁆𑀔𑀼𑀦𑀻, 𑀲𑀺𑀓𑁆𑀔𑀫𑀸𑀦𑀸, 𑀲𑀸𑀫𑀡𑁂𑀭𑁄, 𑀲𑀸𑀫𑀡𑁂𑀭𑀻𑀢𑀺 𑀘𑀢𑀽𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺. 𑀘𑀼𑀢𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁂𑀳𑀻𑀢𑀺 𑀏𑀢𑁆𑀣 𑀘𑀼𑀢𑁄 𑀘 𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀘𑀼𑀢𑁄 𑀦𑀸𑀫 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄. 𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄 𑀦𑀸𑀫 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄.

𑀏𑀓𑀸𑀤𑀲𑀳𑀻𑀢𑀺 𑀧𑀡𑁆𑀟𑀓𑁄, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀲𑀗𑁆𑀖𑀪𑁂𑀤𑀓𑁄 ¶ , 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀅𑀪𑀩𑁆𑀩𑁂𑀳𑀺.

𑀲𑀪𑀸𑀕𑀸𑀧𑀢𑁆𑀢𑀺𑀓𑁂𑀦 𑀯𑀸 𑀲𑀳 𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄, 𑀧𑀸𑀭𑀺𑀯𑀼𑀢𑁆𑀣𑁂𑀦 𑀙𑀦𑁆𑀤𑁂𑀦 𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄, 𑀓𑀭𑁄𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀉𑀓𑁆𑀔𑀺𑀢𑁆𑀢𑀯𑀚𑁆𑀚𑀺𑀢𑁂𑀲𑀼 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀤𑀼𑀓𑁆𑀓𑀝𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀬𑀁 𑀤𑁆𑀯𑁂𑀧𑀺 𑀚𑀦𑀸 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀦𑀸 𑀲𑀪𑀸𑀕𑀯𑀢𑁆𑀣𑀼𑀦𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀭𑀽𑀧𑀸 𑀯𑀢𑁆𑀣𑀼𑀲𑀪𑀸𑀕𑀸 ‘𑀲𑀪𑀸𑀕𑀸’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁬𑁯) 𑀯𑀘𑀦𑀢𑁄 ‘‘𑀲𑀪𑀸𑀕𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀣𑀼𑀲𑀪𑀸𑀕𑀸𑀧𑀢𑁆𑀢𑀺𑀬𑁂𑀯 𑀕𑀳𑁂𑀢𑀩𑁆𑀩𑀸.

𑀉𑀧𑁄𑀲𑀣𑀤𑀺𑀯𑀲𑁂 𑀲𑀩𑁆𑀩𑁄𑀯 𑀲𑀗𑁆𑀖𑁄 𑀲𑀘𑁂 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺,

‘‘𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 ‘𑀕𑀘𑁆𑀙𑀸𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀕𑀘𑁆𑀙, 𑀫𑀬𑀁 𑀢𑁂 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 ‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀬𑀤𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀼𑀤𑁆𑀥𑀁 𑀅𑀦𑀸𑀧𑀢𑁆𑀢𑀺𑀓𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁧𑁭𑁧) 𑀘,

𑀯𑁂𑀫𑀢𑀺𑀓𑁄 𑀘𑁂 𑀳𑁄𑀢𑀺,

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 ¶ 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁧𑁭𑁧) 𑀘,

𑀯𑀼𑀢𑁆𑀢𑀦𑀬𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄.

𑀏𑀢𑁆𑀣 𑀘 𑀲𑀚𑁆𑀛𑀼𑀓𑀦𑁆𑀢𑀺 𑀢𑀤𑀳𑁂𑀯𑀸𑀕𑀫𑀦𑀢𑁆𑀣𑀸𑀬. 𑀕𑀡𑀼𑀧𑁄𑀲𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀕𑀡𑁆𑀞𑀺𑀧𑀤𑁂 ‘‘𑀬𑀣𑀸 𑀲𑀗𑁆𑀖𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀼𑀤𑁆𑀥𑀁 𑀅𑀮𑀪𑀺𑀢𑁆𑀯𑀸 ‘𑀬𑀤𑀸 𑀲𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀺, 𑀏𑀯𑀁 𑀤𑁆𑀯𑀻𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀆𑀭𑁄𑀘𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁂𑀦𑀸𑀧𑀺 ‘𑀧𑀭𑀺𑀲𑀼𑀤𑁆𑀥𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀓𑀺𑀭𑀸’’𑀢𑀺. 𑀓𑀺𑀭𑀸𑀢𑀺 𑀘𑁂𑀢𑁆𑀣 𑀅𑀦𑀼𑀲𑁆𑀲𑀯𑀢𑁆𑀣𑁂 𑀤𑀝𑁆𑀞𑀩𑁆𑀩𑁄, 𑀦 𑀧𑀦𑀸𑀭𑀼𑀘𑀺𑀬𑀁.

𑀧𑀸𑀭𑀺𑀯𑀼𑀢𑁆𑀣𑁂𑀦 𑀙𑀦𑁆𑀤𑁂𑀦𑀸𑀢𑀺 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑁂𑀦𑀧𑀺 ‘‘𑀅𑀲𑀼𑀪𑀮𑀓𑁆𑀔𑀡𑀢𑀸𑀤𑀺𑀦𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁆𑀲𑀝𑁆𑀞𑁂 𑀙𑀦𑁆𑀤𑁂 𑀲𑀘𑁂 𑀧𑀼𑀦 𑀓𑀭𑀺𑀲𑁆𑀲𑀢𑀺, 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀳𑀭𑀺𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀏𑀢𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀦𑀸𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁬𑁭).

𑁨𑁫𑁯𑁬. 𑀅𑀤𑁂𑀲𑁂𑀢𑁆𑀯𑀸 ¶ 𑀧𑀦𑀸𑀧𑀢𑁆𑀢𑀺𑀦𑁆𑀢𑀺 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀅𑀤𑁂𑀲𑁂𑀢𑁆𑀯𑀸. 𑀦𑀸𑀯𑀺𑀓𑀢𑁆𑀯𑀸𑀦 𑀯𑁂𑀫𑀢𑀺𑀦𑁆𑀢𑀺 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀫𑀢𑀺𑀁 𑀅𑀦𑀸𑀭𑁄𑀘𑁂𑀢𑁆𑀯𑀸. ‘‘𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄𑀢𑀺 𑀏𑀢𑁆𑀣 𑀲𑀘𑁂 𑀧𑀦𑁂𑀲 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦 𑀳𑁄𑀢𑀺, 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸𑀯 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁬𑁯) 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀤𑁂𑀲𑀦𑀸𑀯𑀺𑀥𑀺 𑁋 𑀲𑀘𑁂 𑀫𑁂𑀖𑀘𑁆𑀙𑀦𑁆𑀦𑁂 𑀲𑀽𑀭𑀺𑀬𑁂 ‘‘𑀓𑀸𑀮𑁄 𑀦𑀼 𑀔𑁄, 𑀯𑀺𑀓𑀸𑀮𑁄’’𑀢𑀺 ¶ 𑀯𑁂𑀫𑀢𑀺𑀓𑁄 𑀪𑀼𑀜𑁆𑀚𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀅𑀳𑀁, 𑀪𑀦𑁆𑀢𑁂, 𑀯𑁂𑀫𑀢𑀺𑀓𑁄 𑀪𑀼𑀜𑁆𑀚𑀺𑀁, 𑀲𑀘𑁂 𑀓𑀸𑀮𑁄 𑀅𑀢𑁆𑀣𑀺, 𑀲𑀫𑁆𑀩𑀳𑀼𑀮𑀸 𑀤𑀼𑀓𑁆𑀓𑀝𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄𑀫𑁆𑀳𑀺. 𑀦𑁄 𑀘𑁂 𑀅𑀢𑁆𑀣𑀺, 𑀲𑀫𑁆𑀩𑀳𑀼𑀮𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀏𑀯𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀬𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑁆𑀩𑀳𑀼𑀮𑀸 𑀤𑀼𑀓𑁆𑀓𑀝𑀸 𑀯𑀸 𑀧𑀸𑀘𑀺𑀢𑁆𑀢𑀺𑀬𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄, 𑀢𑀸 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀸𑀧𑀢𑁆𑀢𑀻𑀲𑀽𑀢𑀺.

𑀕𑀡𑁆𑀞𑀺𑀧𑀤𑁂𑀲𑀼 𑀧𑀦𑁂𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁭𑁦) 𑀯𑀘𑀦𑀢𑁄 𑀬𑀸𑀯 𑀦𑀺𑀩𑁆𑀩𑁂𑀫𑀢𑀺𑀓𑁄 𑀦 𑀳𑁄𑀢𑀺, 𑀢𑀸𑀯 𑀲𑀪𑀸𑀕𑀸𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀅𑀜𑁆𑀜𑁂𑀲𑀜𑁆𑀘 𑀓𑀫𑁆𑀫𑀸𑀦𑀁 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺. ‘‘𑀧𑀼𑀦 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀫𑁂𑀯𑀸’’𑀢𑀺 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀺, 𑀤𑁂𑀲𑀺𑀢𑁂 𑀧𑀦 𑀦 𑀤𑁄𑀲𑁄. ‘‘𑀇𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 (𑀫𑀳𑀸𑀯. 𑁧𑁭𑁦) 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑁨𑁫𑁯𑁭. 𑀉𑀧𑁄𑀲𑀣𑁂𑀢𑀺 𑀤𑀺𑀦𑀓𑀸𑀭𑀓𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦 𑀧𑀦𑁆𑀦𑀭𑀲𑀻, 𑀲𑀗𑁆𑀖𑀼𑀧𑁄𑀲𑀣𑁄, 𑀲𑀼𑀢𑁆𑀢𑀼𑀤𑁆𑀤𑁂𑀲𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀉𑀧𑁄𑀲𑀣𑁂. 𑀲𑀪𑀺𑀓𑁆𑀔𑀼𑀫𑁆𑀳𑀸 𑀘 𑀆𑀯𑀸𑀲𑀸𑀢𑀺 ‘‘𑀬𑀲𑁆𑀫𑀺𑀁 𑀉𑀧𑁄𑀲𑀣𑁂 𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸. 𑀇𑀥 ‘‘𑀅𑀦𑀸𑀯𑀸𑀲𑀸’’𑀢𑀺 𑀲𑁂𑀲𑁄. 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸𑀢𑀺 𑀏𑀢𑁆𑀣 ‘‘𑀅𑀪𑀺𑀓𑁆𑀔𑀼𑀓𑁄 𑀯𑀸 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺 𑀲𑀪𑀺𑀓𑁆𑀔𑀼𑀓𑁄 𑀯𑀸’’𑀢𑀺 𑀘 ¶ 𑀦 𑀕𑀦𑁆𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸’’𑀢𑀺 𑀘 𑀲𑁂𑀲𑁄. ‘‘𑀅𑀦𑀸𑀯𑀸𑀲𑁄’’𑀢𑀺 𑀉𑀤𑁄𑀲𑀺𑀢𑀸𑀤𑀬𑁄 𑀯𑀼𑀢𑁆𑀢𑀸. 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀫𑁆𑀳𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀯𑀸 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺 𑀲𑀪𑀺𑀓𑁆𑀔𑀼𑀓𑁄 𑀯𑀸 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸 𑀓𑀼𑀤𑀸𑀘𑀦𑀁 𑀓𑀤𑀸𑀘𑀺𑀧𑀺 𑀦 𑀕𑀦𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁫𑁯𑁮. 𑀬𑀲𑁆𑀫𑀺𑀁 ¶ 𑀆𑀯𑀸𑀲𑁂 𑀧𑀦 𑀉𑀧𑁄𑀲𑀣𑁂 𑀓𑀺𑀘𑁆𑀘𑀁 𑀲𑀘𑁂 𑀯𑀢𑁆𑀢𑀢𑀺, 𑀲𑁄 𑀆𑀯𑀸𑀲𑁄 ‘‘𑀲𑀪𑀺𑀓𑁆𑀔𑀼𑀓𑁄 𑀦𑀸𑀫𑀸’’𑀢𑀺 𑀧𑀓𑀸𑀲𑀺𑀢𑁄𑀢𑀺 𑀬𑁄𑀚𑀦𑀸, 𑀇𑀫𑀺𑀦𑀸 𑀲𑀘𑁂 𑀬𑀢𑁆𑀣 𑀉𑀧𑁄𑀲𑀣𑁄 𑀦 𑀯𑀢𑁆𑀢𑀢𑀺, 𑀲𑁄 𑀲𑀦𑁆𑀢𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀅𑀪𑀺𑀓𑁆𑀔𑀼𑀓𑁄 𑀦𑀸𑀫𑀸𑀢𑀺 𑀤𑀻𑀧𑁂𑀢𑀺.

𑁨𑁫𑁯𑁯. 𑀉𑀧𑁄𑀲𑀣𑀲𑁆𑀲 𑀧𑀬𑁄𑀚𑀦𑀁, 𑀢𑀧𑁆𑀧𑀲𑀗𑁆𑀕𑁂𑀦 𑀧𑀯𑀸𑀭𑀡𑀸𑀬 𑀘 𑀦𑀺𑀤𑁆𑀥𑀸𑀭𑁂𑀢𑀼𑀓𑀸𑀫𑀢𑀸𑀬𑀸𑀳 ‘‘𑀉𑀧𑁄𑀲𑀣𑁄 𑀓𑀺𑀫𑀢𑁆𑀣𑀸𑀬𑀸’’𑀢𑀺𑀆𑀤𑀺.

𑁨𑁬𑁦𑁦. 𑀧𑀝𑀺𑀓𑁆𑀓𑁄𑀲𑁂𑀬𑁆𑀬𑀸𑀢𑀺 𑀦𑀺𑀯𑀸𑀭𑁂𑀬𑁆𑀬. 𑀅𑀤𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 ‘‘𑀓𑁄𑀧𑁂𑀢𑀼𑀁 𑀥𑀫𑁆𑀫𑀺𑀓𑀁 𑀓𑀫𑁆𑀫’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁨𑁬𑁦𑁧. 𑀲𑁄 𑀘𑀸𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀘𑀢𑀼𑀯𑀕𑁆𑀕𑀸𑀤𑀺𑀧𑁆𑀧𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑁄 𑀲𑁄 𑀲𑀗𑁆𑀖𑁄 𑀘. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀁 𑀯𑀲𑁂𑀦 𑀧𑀭𑀺𑀤𑀻𑀧𑀺𑀢𑁄, 𑀦 𑀙𑀩𑁆𑀩𑀕𑁆𑀕𑀸𑀤𑀻𑀦𑀁 𑀓𑀸𑀢𑀼𑀁 𑀅𑀬𑀼𑀢𑁆𑀢𑀢𑀸𑀤𑀲𑁆𑀲𑀦𑀯𑀲𑁂𑀦.

𑁨𑁬𑁦𑁨. 𑀘𑀢𑀼𑀯𑀕𑁆𑀕𑀸𑀤𑀺𑀪𑁂𑀤𑀦𑀺𑀩𑀦𑁆𑀥𑀦𑀁 𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀯𑀸𑀭𑀡’’𑀦𑁆𑀢𑀺𑀆𑀤𑀺. 𑀧𑀯𑀸𑀭𑀡𑀜𑁆𑀘 𑀢𑀣𑀸 𑀅𑀩𑁆𑀪𑀸𑀦𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀞𑀧𑁂𑀢𑁆𑀯𑀸 𑀘𑀢𑀼𑀯𑀕𑁆𑀕𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁦𑁩. 𑀫𑀚𑁆𑀛𑀤𑁂𑀲𑁂 ¶ 𑀉𑀧𑀲𑀫𑁆𑀧𑀤𑀸 𑀫𑀚𑁆𑀛𑀤𑁂𑀲𑀽𑀧𑀲𑀫𑁆𑀧𑀤𑀸, 𑀢𑀁. 𑀅𑀩𑁆𑀪𑀸𑀦𑀁, 𑀫𑀚𑁆𑀛𑀤𑁂𑀲𑀽𑀧𑀲𑀫𑁆𑀧𑀤𑀜𑁆𑀘 𑀯𑀺𑀦𑀸 𑀧𑀜𑁆𑀘𑀯𑀕𑁆𑀕𑁂𑀦 𑀲𑀩𑁆𑀩𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁦𑁪. 𑀓𑀺𑀜𑁆𑀘𑀺𑀧𑀺 𑀓𑀫𑁆𑀫𑀁 𑀦 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸, 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀢𑁆𑀣𑀁 𑀕𑀫𑀬𑀦𑁆𑀢𑀻𑀢𑀺. 𑀯𑀻𑀲𑀢𑀺𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀓𑀫𑁆𑀫𑀸𑀦𑀁 𑀓𑀢𑁆𑀢𑀩𑁆𑀩𑀪𑀸𑀯𑁂 𑀓𑀺𑀫𑀢𑁆𑀣𑀁 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑀲𑁆𑀲 𑀕𑀳𑀡𑀦𑁆𑀢𑀺 𑀆𑀳 ‘‘𑀊𑀦𑁂 𑀤𑁄𑀲𑁄𑀢𑀺 𑀜𑀸𑀧𑁂𑀢𑀼𑀁, 𑀦𑀸𑀥𑀺𑀓𑁂 𑀅𑀢𑀺𑀭𑁂𑀓𑀢𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑁂 𑀘𑀢𑀼𑀩𑁆𑀩𑀺𑀥𑁂 𑀲𑀗𑁆𑀖𑁂 𑀕𑀡𑀦𑀢𑁄 𑀊𑀦𑁂 𑀤𑁄𑀲𑁄 𑀳𑁄𑀢𑀺, 𑀅𑀥𑀺𑀓𑁂 𑀤𑁄𑀲𑁄 𑀦 𑀳𑁄𑀢𑀻𑀢𑀺 𑀜𑀸𑀧𑁂𑀢𑀼𑀁 𑀅𑀢𑀺𑀭𑁂𑀓𑀢𑀸 𑀤𑀲𑁆𑀲𑀺𑀢𑀸, 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀖𑁄 𑀤𑀲𑁆𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁬𑁦𑁫. 𑀘𑀢𑀼𑀯𑀕𑁆𑀕𑁂𑀦 𑀓𑀢𑁆𑀢𑀩𑁆𑀩𑁂 𑀧𑀓𑀢𑀢𑁆𑀢𑀸𑀯 𑀘𑀢𑁆𑀢𑀸𑀭𑁄 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀤𑀻𑀧𑀺𑀢𑀸𑀢𑀺 𑀬𑁄𑀚𑀦𑀸. 𑀲𑁂𑀲𑀸 ¶ 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸𑀢𑀺 𑀲𑁂𑀲𑁄. 𑀧𑀓𑀢𑀢𑁆𑀢𑀸𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑀸 𑀘𑁂𑀯 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀦𑀚𑁆𑀛𑀸𑀧𑀦𑁆𑀦𑀸 𑀘 𑀕𑀳𑁂𑀢𑀩𑁆𑀩𑀸. 𑀲𑁂𑀲𑁂𑀲𑀼 𑀘𑀸𑀢𑀺 𑀧𑀜𑁆𑀘𑀯𑀕𑁆𑀕𑀸𑀤𑀻𑀲𑀼𑀧𑀺.

𑁨𑁬𑁦𑁬. 𑀘𑀢𑀼𑀯𑀕𑁆𑀕𑀸𑀤𑀺𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀅𑀲𑀁𑀯𑀸𑀲𑀧𑀼𑀕𑁆𑀕𑀮𑀁 𑀕𑀡𑀧𑀽𑀭𑀁 𑀓𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀦 𑀓𑁂𑀯𑀮𑀁 𑀤𑀼𑀓𑁆𑀓𑀝𑀫𑁂𑀯, 𑀓𑀢𑀜𑁆𑀘 𑀓𑀫𑁆𑀫𑀁 𑀓𑀼𑀧𑁆𑀧𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁦𑁭. 𑀧𑀭𑀺𑀯𑀸𑀲𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀤𑀻𑀦𑀁 𑀕𑀳𑀡𑀁. 𑀢𑀢𑁆𑀭𑀝𑁆𑀞𑀦𑁆𑀢𑀺 𑀧𑀭𑀺𑀯𑀸𑀲𑀸𑀤𑀻𑀲𑀼 𑀞𑀺𑀢𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀓𑀢𑀁 𑀓𑀼𑀧𑁆𑀧𑀢𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀁 𑀅𑀦𑀼𑀯𑀢𑁆𑀢𑁂𑀢𑀺. 𑀲𑁂𑀲𑀁 𑀢𑀽𑀢𑀺 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀢𑁄 𑀅𑀜𑁆𑀜𑀁 𑀧𑀦 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀁 ¶ . 𑀯𑀝𑁆𑀝𑀢𑀻𑀢𑀺 𑀢𑁂 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁦𑁮. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀯𑀼𑀢𑁆𑀢𑀸𑀢𑀺 𑀲𑁂𑀲𑁄. 𑀧𑀘𑁆𑀙𑀺𑀫𑀸 𑀘𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀯𑀲𑁆𑀲𑀽𑀧𑀕𑀫𑀦𑀸. 𑀆𑀮𑀬𑁄, 𑀯𑀘𑀻𑀪𑁂𑀤𑁄 𑀯𑀸 𑀓𑀸𑀢𑀩𑁆𑀩𑁄 𑀉𑀧𑀕𑀘𑁆𑀙𑀢𑀸𑀢𑀺 𑀇𑀫𑀺𑀦𑀸 𑀯𑀲𑁆𑀲𑀽𑀧𑀕𑀫𑀦𑀧𑁆𑀧𑀓𑀸𑀭𑁄 𑀤𑀲𑁆𑀲𑀺𑀢𑁄. 𑀉𑀧𑀕𑀘𑁆𑀙𑀢𑀸 𑀆𑀮𑀬𑁄 𑀓𑀢𑁆𑀢𑀩𑁆𑀩𑁄, 𑀯𑀘𑀻𑀪𑁂𑀤𑁄 𑀯𑀸 𑀓𑀢𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀕𑀘𑁆𑀙𑀦𑁆𑀢𑁂𑀦 𑀘 𑀲𑁂𑀦𑀸𑀲𑀦𑁂 𑀅𑀲𑀢𑀺 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀁 𑀯𑀸 𑀓𑀸𑀢𑀩𑁆𑀩𑀁, 𑀲𑁂𑀦𑀸𑀲𑀦𑁂 𑀲𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀘 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀘 𑀯𑀘𑀻𑀪𑁂𑀤𑁄 𑀯𑀸 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁬𑁦𑁯. 𑀚𑀸𑀦𑀁 𑀯𑀲𑁆𑀲𑀽𑀧𑀕𑀫𑀦𑀁 𑀅𑀦𑀼𑀧𑀕𑀘𑁆𑀙𑀢𑁄 𑀯𑀸𑀧𑀻𑀢𑀺 𑀬𑁄𑀚𑀦𑀸. 𑀢𑁂𑀫𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀧𑀼𑀭𑀺𑀫𑀁 𑀯𑀸 𑀧𑀘𑁆𑀙𑀺𑀫𑀁 𑀯𑀸’’𑀢𑀺 𑀲𑁂𑀲𑁄. 𑀘𑀭𑀦𑁆𑀢𑀲𑁆𑀲𑀸𑀧𑀻𑀢𑀺 𑀏𑀢𑁆𑀣 ‘‘𑀘𑀸𑀭𑀺𑀓’’𑀦𑁆𑀢𑀺 𑀲𑁂𑀲𑁄. 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸𑀯 𑀘𑀸𑀭𑀺𑀓𑀁 𑀘𑀭𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀫𑀸𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸, 𑀬𑁄 𑀧𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁫).

𑁨𑁬𑁧𑁦. 𑀭𑀼𑀓𑁆𑀔𑀲𑁆𑀲 ¶ 𑀲𑀼𑀲𑀺𑀭𑁂𑀢𑀺 𑀏𑀢𑁆𑀣 ‘‘𑀲𑀼𑀤𑁆𑀥𑁂’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀭𑀼𑀓𑁆𑀔𑀲𑀼𑀲𑀺𑀭𑁂𑀢𑀺 𑀏𑀢𑁆𑀣 𑀲𑀼𑀤𑁆𑀥𑁂 𑀭𑀼𑀓𑁆𑀔𑀲𑀼𑀲𑀺𑀭𑁂𑀬𑁂𑀯 𑀦 𑀯𑀝𑁆𑀝𑀢𑀺, 𑀫𑀳𑀦𑁆𑀢𑀲𑁆𑀲 𑀧𑀦 𑀭𑀼𑀓𑁆𑀔𑀲𑀼𑀲𑀺𑀭𑀲𑁆𑀲 𑀅𑀦𑁆𑀢𑁄 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 ¶ 𑀓𑀢𑁆𑀯𑀸 𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀭𑀼𑀓𑁆𑀔𑀲𑁆𑀲 𑀲𑀼𑀲𑀺𑀭𑁂’’𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑁂𑀓𑀤𑁂𑀲𑁄 𑀯𑀺𑀝𑀧𑁄𑀧𑀺 𑀲𑀗𑁆𑀕𑀳𑀺𑀢𑁄, 𑀲𑁄𑀧𑀺 𑀲𑀼𑀤𑁆𑀥𑁄𑀯 𑀦 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀭𑀼𑀓𑁆𑀔𑀯𑀺𑀝𑀪𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀲𑀼𑀤𑁆𑀥𑁂 𑀯𑀺𑀝𑀧𑀫𑀢𑁆𑀢𑁂 𑀦 𑀯𑀝𑁆𑀝𑀢𑀺, 𑀫𑀳𑀸𑀯𑀺𑀝𑀧𑁂 𑀧𑀦 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁩).

‘‘𑀙𑀢𑁆𑀢𑁂𑀢𑀺 𑀏𑀢𑁆𑀣𑀸𑀧𑀺 𑀘𑀢𑀽𑀲𑀼 𑀣𑀫𑁆𑀪𑁂𑀲𑀼 𑀙𑀢𑁆𑀢𑀁 𑀞𑀧𑁂𑀢𑁆𑀯𑀸 𑀆𑀯𑀭𑀡𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀙𑀢𑁆𑀢𑀓𑀼𑀝𑀺𑀓𑀸 𑀦𑀸𑀫𑁂𑀲𑀸 𑀳𑁄𑀢𑀺. 𑀘𑀸𑀝𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀫𑀳𑀦𑁆𑀢𑁂𑀦 𑀓𑀧𑀮𑁆𑀮𑁂𑀦 𑀙𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀓𑀼𑀝𑀺𑀁 𑀓𑀢𑁆𑀯𑀸𑀯 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀏𑀯𑀫𑀓𑀢𑀸𑀲𑀼 𑀲𑀼𑀤𑁆𑀥𑀙𑀢𑁆𑀢𑀘𑀸𑀝𑀻𑀲𑀼 𑀦𑀺𑀯𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀙𑀯𑀓𑀼𑀝𑀻𑀢𑀺 𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀬𑁄 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀙𑀯𑀓𑀼𑀝𑀺𑀓𑀸 𑀦𑀸𑀫 𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀺𑀪𑁂𑀤𑀸 𑀓𑀼𑀝𑀺, 𑀢𑀢𑁆𑀣 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁩).

𑀲𑀼𑀲𑀸𑀦𑁂 𑀧𑀦 𑀅𑀜𑁆𑀜𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀙𑀯𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀸𑀬, 𑀅𑀝𑁆𑀞𑀺𑀓𑀸𑀦𑀜𑁆𑀘 𑀅𑀢𑁆𑀣𑀸𑀬 𑀓𑀼𑀝𑀺𑀓𑀸 𑀓𑀭𑀻𑀬𑀢𑀻’’𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀙𑀯𑀓𑀼𑀝𑀺 𑀯𑀼𑀢𑁆𑀢𑀸. ‘‘𑀝𑀗𑁆𑀓𑀺𑀢𑀫𑀜𑁆𑀘𑁄𑀢𑀺 𑀓𑀲𑀺𑀓𑀼𑀝𑀺𑀓𑀸𑀧𑀸𑀲𑀸𑀡𑀖𑀭𑀦𑁆𑀢𑀺 𑀮𑀺𑀔𑀺𑀢’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁨𑁦𑁩) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. 𑀘𑀢𑀼𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀧𑀸𑀲𑀸𑀡𑀁 𑀅𑀢𑁆𑀣𑀭𑀺𑀢𑁆𑀯𑀸 𑀓𑀢𑁄 𑀕𑁂𑀳𑁄𑀧𑀺 ‘‘𑀝𑀗𑁆𑀓𑀺𑀢𑀫𑀜𑁆𑀘𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑀻𑀖𑁂 𑀫𑀜𑁆𑀘𑀧𑀸𑀤𑁂 𑀫𑀚𑁆𑀛𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀫𑀜𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀢𑀲𑁆𑀲 𑀇𑀤𑀁 𑀉𑀧𑀭𑀺, 𑀇𑀤𑀁 𑀳𑁂𑀝𑁆𑀞𑀸𑀢𑀺 𑀦𑀢𑁆𑀣𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀣𑀢𑁄𑀧𑀺 𑀢𑀸𑀤𑀺𑀲𑁄𑀯 𑀳𑁄𑀢𑀺, 𑀢𑀁 𑀲𑀼𑀲𑀸𑀦𑁂, 𑀤𑁂𑀯𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑀺, 𑀅𑀬𑀫𑁆𑀧𑀺 𑀝𑀗𑁆𑀓𑀺𑀢𑀫𑀜𑁆𑀘𑁄 𑀦𑀸𑀫.

𑁨𑁬𑁧𑁧. ‘‘𑀲𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂, 𑀲𑀭𑀻𑀭𑀸𑀨𑀸𑀲𑀼𑀢𑀸𑀬 𑀯𑀸’’𑀢𑀺 𑀅𑀯𑀲𑁂𑀲𑀦𑁆𑀢𑀭𑀸𑀬𑀸𑀦𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀅𑀦𑁆𑀢𑀭𑀸𑀬𑁄’’𑀢𑀺 𑀇𑀫𑀺𑀦𑀸 𑀭𑀸𑀚𑀦𑁆𑀢𑀭𑀸𑀬𑀸𑀤𑀺 𑀤𑀲𑀯𑀺𑀥𑁄 𑀕𑀳𑁂𑀢𑀩𑁆𑀩𑁄.

𑁨𑁬𑁧𑁨-𑁪. ‘‘𑀅𑀦𑀼𑀚𑀸𑀦𑀸𑀫𑀺 ¶ , 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀫𑀸𑀢𑀼𑀬𑀸 𑀘 𑀧𑀺𑀢𑀼𑀲𑁆𑀲 𑀘𑀸’’𑀢𑀺 (𑀫𑀳𑀸𑀯. 𑁧𑁯𑁮) 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀸𑀢𑀸𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺.

𑀫𑀸𑀢𑀸𑀧𑀺𑀢𑀽𑀦𑀁 ¶ 𑀤𑀲𑁆𑀲𑀦𑀢𑁆𑀣𑀁, 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀯𑀸 𑀦𑁂𑀲𑀁 𑀅𑀢𑁆𑀣𑁂 𑀲𑀢𑀺 𑀯𑀸 𑀦𑁂𑀲𑀁 𑀅𑀦𑁆𑀢𑀭𑁂 𑀕𑀺𑀮𑀸𑀦𑀁 𑀤𑀝𑁆𑀞𑀼𑀁 𑀯𑀸 𑀢𑀤𑀼𑀧𑀝𑁆𑀞𑀸𑀓𑀸𑀦𑀁 𑀪𑀢𑁆𑀢𑀸𑀤𑀺𑀁 𑀧𑀭𑀺𑀬𑁂𑀲𑀦𑀢𑁆𑀣𑀁 𑀯𑀸 𑀦𑁂𑀲𑀁 𑀪𑀢𑁆𑀢𑀸𑀤𑀺𑀁 𑀧𑀭𑀺𑀬𑁂𑀲𑀦𑀢𑁆𑀣𑀁 𑀯𑀸 𑀢𑀣𑀸 𑀦𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑀁 𑀅𑀦𑀪𑀺𑀭𑀢𑀁 𑀉𑀓𑁆𑀓𑀡𑁆𑀞𑀺𑀢𑀁 𑀅𑀳𑀁 𑀕𑀦𑁆𑀢𑁆𑀯𑀸 𑀯𑀽𑀧𑀓𑀸𑀲𑁂𑀲𑁆𑀲𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀸𑀫𑀺 𑀯𑀸 𑀥𑀫𑁆𑀫𑀓𑀣𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀸 𑀢𑀲𑁆𑀲 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀉𑀝𑁆𑀞𑀺𑀢𑀁 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀁 𑀯𑀺𑀯𑁂𑀘𑁂𑀲𑁆𑀲𑀸𑀫𑀺 𑀯𑀸 𑀯𑀺𑀯𑁂𑀘𑀸𑀧𑁂𑀲𑁆𑀲𑀸𑀫𑀺 𑀯𑀸 𑀥𑀫𑁆𑀫𑀓𑀣𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀸 𑀢𑀣𑀸 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻𑀢𑀺 𑀯𑀸 𑀯𑀺𑀦𑁄𑀤𑀸𑀧𑁂𑀲𑁆𑀲𑀸𑀫𑀻𑀢𑀺 𑀯𑀸 𑀥𑀫𑁆𑀫𑀓𑀣𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀸 𑀏𑀯𑀁 𑀯𑀺𑀦𑀬𑀜𑁆𑀜𑀼𑀦𑀸 𑀪𑀺𑀓𑁆𑀔𑀼𑀦𑀸 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀅𑀧𑁂𑀲𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁, 𑀧𑀕𑁂𑀯 𑀧𑀳𑀺𑀢𑁂𑀢𑀺 𑀬𑁄𑀚𑀦𑀸.

𑀪𑀢𑁆𑀢𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀪𑁂𑀲𑀚𑁆𑀚𑀧𑀭𑀺𑀬𑁂𑀲𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀳 𑁋 ‘‘𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀯𑀽𑀧𑀓𑀸𑀲𑁂𑀲𑁆𑀲𑀦𑁆𑀢𑀺 𑀬𑀢𑁆𑀣 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀯𑀺𑀦𑁄𑀤𑁂𑀲𑁆𑀲𑀸𑀫𑀳𑀦𑁆𑀢𑀺 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ‘𑀅𑀳𑀜𑁆𑀳𑀺 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀧𑀭𑀺𑀯𑀸𑀲𑀸𑀭𑀳𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 ¶ 𑀪𑀺𑀓𑁆𑀔𑀽𑀦𑀁 𑀆𑀕𑀢’𑀦𑁆𑀢𑀺. 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺, 𑀧𑀕𑁂𑀯 𑀧𑀳𑀺𑀢𑁂 ‘𑀧𑀭𑀺𑀯𑀸𑀲𑀤𑀸𑀦𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀯𑀸 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺 𑀯𑀸 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀬𑀁 (𑀫𑀳𑀸𑀯. 𑁧𑁯𑁩) 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀘𑁆𑀙𑀦𑁆𑀢𑁂𑀦 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑁂𑀦𑁂𑀯 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀙𑀺𑀦𑁆𑀦𑀯𑀲𑁆𑀲𑁄 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺.

𑁨𑁬𑁧𑁫. ‘‘𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀁 𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀲𑁆𑀲𑀁 𑀉𑀧𑀕𑀢𑁂𑀦𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀸𑀳𑀓𑀺𑀘𑁆𑀘𑀸𑀥𑀺𑀓𑀸𑀭𑁂. 𑀅𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁬𑁧𑁬. ‘‘𑀅𑀲𑀼𑀓𑀁 𑀦𑀸𑀫 𑀤𑀺𑀯𑀲’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀫𑀦𑁆𑀢𑀦𑀸𑀓𑀸𑀭𑀁 𑀯𑀓𑁆𑀔𑀢𑀺. 𑀧𑀼𑀩𑁆𑀩𑀦𑁆𑀢𑀺 𑀧𑀞𑀫𑀁. 𑀯𑀝𑁆𑀝𑀢𑀻𑀢𑀺 ¶ 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀲𑀘𑁂 𑀏𑀓𑀲𑁆𑀫𑀺𑀁 𑀫𑀳𑀸𑀯𑀸𑀲𑁂 𑀧𑀞𑀫𑀁𑀬𑁂𑀯 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 ‘𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’𑀦𑁆𑀢𑀺, 𑀦𑀺𑀫𑀦𑁆𑀢𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯). ‘‘𑀉𑀧𑀸𑀲𑀓𑁂𑀳𑀺 ‘𑀇𑀫𑀲𑁆𑀫𑀺𑀁 𑀦𑀸𑀫 𑀤𑀺𑀯𑀲𑁂 𑀤𑀸𑀦𑀸𑀤𑀻𑀦𑀺 𑀓𑀭𑁄𑀫, 𑀲𑀩𑁆𑀩𑁂 𑀏𑀯 𑀲𑀦𑁆𑀦𑀺𑀧𑀢𑀦𑁆𑀢𑀽’𑀢𑀺 𑀓𑀢𑀺𑀓𑀸𑀬𑀧𑀺 𑀓𑀢𑀸𑀬 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀫𑀦𑁆𑀢𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻’’𑀢𑀺 𑀓𑁂𑀘𑀺.

𑁨𑁬𑁧𑁭. 𑀪𑀡𑁆𑀟𑀓𑀦𑁆𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑀪𑀡𑁆𑀟𑀁. 𑀦 𑀯𑀝𑁆𑀝𑀢𑀻𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀳𑀺𑀡𑀦𑁆𑀢𑀻𑀢𑀺 𑀘𑀻𑀯𑀭𑀥𑁄𑀯𑀦𑀸𑀤𑀺𑀓𑀫𑁆𑀫𑁂𑀦 𑀧𑀳𑀺𑀡𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀆𑀡𑀢𑁆𑀢𑀺𑀬𑁂𑀦 𑀓𑁂𑀦𑀘𑀺 𑀅𑀦𑀯𑀚𑁆𑀚𑀓𑀺𑀘𑁆𑀘𑁂𑀦 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸𑀯 𑀤𑀻𑀧𑀺𑀢𑀁 𑀳𑁄𑀢𑀺.

𑁨𑁬𑁧𑁮. 𑀉𑀤𑁆𑀤𑁂𑀲𑀸𑀤𑀻𑀦𑀫𑀢𑁆𑀣𑀸𑀬𑀸𑀢𑀺 ¶ 𑀧𑀸𑀴𑀺𑀯𑀸𑀘𑀦𑀸𑀦𑀺 𑀲𑀦𑁆𑀥𑀸𑀬. 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀧𑀼𑀘𑁆𑀙𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀭𑀽𑀦𑀦𑁆𑀢𑀺 𑀅𑀕𑀺𑀮𑀸𑀦𑀸𑀦𑀫𑁆𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁. 𑀕𑀦𑁆𑀢𑀼𑀁 𑀮𑀪𑀢𑀻𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀮𑀪𑀢𑀺. 𑀧𑀼𑀕𑁆𑀕𑀮𑁄𑀢𑀺 𑀧𑀓𑀭𑀡𑀢𑁄 𑀪𑀺𑀓𑁆𑀔𑀼𑀁𑀬𑁂𑀯 𑀕𑀡𑁆𑀳𑀸𑀢𑀺.

𑁨𑁬𑁧𑁯. 𑀆𑀘𑀭𑀺𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀉𑀧𑀚𑁆𑀛𑀸𑀬𑁂𑀦 𑀦𑀺𑀯𑀸𑀭𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀘𑁂 𑀧𑀦 𑀦𑀁 𑀆𑀘𑀭𑀺𑀬𑁄 ‘𑀅𑀚𑁆𑀚 𑀫𑀸 𑀕𑀘𑁆𑀙𑀸’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯) 𑀅𑀝𑁆𑀞𑀓𑀣𑀸𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀢𑁆𑀢𑀺𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀺𑀢𑀸’’𑀢𑀺. 𑀭𑀢𑁆𑀢𑀺𑀘𑁆𑀙𑁂𑀤𑁂𑀢𑀺 𑀯𑀲𑁆𑀲𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀁. ‘‘𑀭𑀢𑁆𑀢𑀺𑀘𑁆𑀙𑁂𑀤𑁂’’𑀢𑀺 𑀲𑀩𑁆𑀩𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀁 𑀦𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯 𑀧𑀼𑀦 𑀆𑀕𑀘𑁆𑀙𑀦𑁆𑀢𑀁 𑀲𑀘𑁂 𑀆𑀘𑀭𑀺𑀬𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 ‘‘𑀅𑀚𑁆𑀚 𑀫𑀸 𑀕𑀘𑁆𑀙𑀸’’𑀢𑀺 𑀯𑀤𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀯𑀲𑁆𑀲𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀲𑀢𑁆𑀢𑀸𑀳𑀲𑁆𑀲 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑀺𑀢𑀢𑁆𑀢𑀸.

𑁨𑁬𑁨𑁦. 𑀬𑀲𑁆𑀲 𑀓𑀲𑁆𑀲𑀘𑀺 𑀜𑀸𑀢𑀺𑀲𑁆𑀲𑀸𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀜𑁆𑀜𑀲𑁆𑀲 𑀜𑀸𑀢𑀺𑀚𑀦𑀲𑁆𑀲. ‘‘𑀕𑀘𑁆𑀙𑀢𑁄 𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑁂𑀲𑀜𑀸𑀢𑀺𑀓𑁂𑀳𑀺 ‘‘𑀫𑀬𑀁 𑀕𑀺𑀮𑀸𑀦𑀸 𑀪𑀤𑀦𑁆𑀢𑀸𑀦𑀁 𑀆𑀕𑀫𑀦𑀁 𑀇𑀘𑁆𑀙𑀸𑀫𑀸’’𑀢𑀺 𑀘 ‘‘𑀉𑀧𑀝𑁆𑀞𑀸𑀓𑀓𑀼𑀮𑁂𑀳𑀺 𑀤𑀸𑀦𑀁 𑀤𑀲𑁆𑀲𑀸𑀫, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫, 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀁 𑀇𑀘𑁆𑀙𑀸𑀫𑀸’’𑀢𑀺 𑀘 𑀏𑀯𑀁 𑀓𑀢𑁆𑀢𑀩𑁆𑀩𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀤𑀽𑀢𑁂 𑀯𑀸 𑀧𑁂𑀲𑀺𑀢𑁂 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑁄 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀜𑁆𑀘 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀜𑀸𑀢𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺…𑀧𑁂… 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂’’𑀢𑀺 (𑀫𑀳𑀸𑀯. 𑁧𑁯𑁯) 𑀘 ¶ ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺…𑀧𑁂… 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 ¶ 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼𑀦𑁆𑀢𑀺. 𑀕𑀦𑁆𑀢𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂’’𑀢𑀺 (𑀫𑀳𑀸𑀯. 𑁧𑁮𑁮) 𑀘.

𑁨𑁬𑁨𑁧. ‘‘𑀅𑀳𑀁 𑀕𑀸𑀫𑀓𑀁 𑀕𑀦𑁆𑀢𑁆𑀯𑀸 𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀘𑁆𑀙𑀁 𑀆𑀕𑀘𑁆𑀙𑀦𑁆𑀢𑁄 𑀲𑀘𑁂 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑁂𑀯, 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀘𑁂 𑀅𑀭𑀼𑀡𑀼𑀕𑁆𑀕𑀫𑀦𑀁 𑀳𑁄𑀢𑀺, 𑀯𑀲𑁆𑀲𑀘𑁆𑀙𑁂𑀤𑁄𑀧𑀺 𑀦 𑀳𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑀤𑀼𑀓𑁆𑀓𑀝𑀜𑁆𑀘 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁬𑁨𑁨. 𑀯𑀚𑁂𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁩) 𑀕𑁄𑀧𑀸𑀮𑀓𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑁂. 𑀲𑀢𑁆𑀣𑁂𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀸𑀦𑀁 𑀲𑀦𑁆𑀦𑀺𑀯𑀺𑀝𑁆𑀞𑁄𑀓𑀸𑀲𑁂. 𑀢𑀻𑀲𑀼 𑀞𑀸𑀦𑁂𑀲𑀼 𑀪𑀺𑀓𑁆𑀔𑀼𑀦𑁄, 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀦𑀢𑁆𑀣𑀺 𑀆𑀧𑀢𑁆𑀢𑀺, 𑀢𑁂𑀳𑀺 𑀯𑀺𑀬𑀼𑀜𑁆𑀚𑀺𑀢𑁆𑀯𑀸 𑀕𑀫𑀦𑁂 𑀧𑀦 𑀆𑀧𑀢𑁆𑀢𑀺𑀬𑁂𑀯, 𑀧𑀯𑀸𑀭𑁂𑀢𑀼𑀜𑁆𑀘 𑀦 𑀮𑀪𑀢𑀺.

𑀯𑀚𑀸𑀤𑀻𑀲𑀼 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀸𑀲𑀓𑀸 𑀯𑀢𑁆𑀢𑀩𑁆𑀩𑀸 ‘‘𑀓𑀼𑀝𑀺𑀓𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀘𑁂 𑀓𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀦𑁄 𑀘𑁂 𑀤𑁂𑀦𑁆𑀢𑀺, 𑀲𑀸𑀮𑀸𑀲𑀗𑁆𑀔𑁂𑀧𑁂𑀦 𑀞𑀺𑀢𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀉𑀧𑀕𑀦𑁆𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀆𑀮𑀬𑁄 𑀓𑀸𑀢𑀩𑁆𑀩𑁄. 𑀲𑀢𑁆𑀣𑁂 𑀧𑀦 𑀓𑀼𑀝𑀺𑀓𑀸𑀤𑀻𑀦𑀁 𑀅𑀪𑀸𑀯𑁂 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀮𑀬𑀓𑀭𑀡𑀫𑀢𑁆𑀢𑀫𑁂𑀯 𑀯𑀝𑁆𑀝𑀢𑀺. 𑀆𑀮𑀬𑁄 𑀦𑀸𑀫 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀁.

𑀲𑀘𑁂 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀬𑁂𑀯 𑀲𑀢𑁆𑀣𑁂 𑀧𑀯𑀸𑀭𑀡𑀤𑀺𑀯𑀲𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣 𑀲𑀢𑁆𑀣𑁄 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀪𑀺𑀓𑁆𑀔𑀼𑀦𑀸 𑀧𑀢𑁆𑀣𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑀺𑀓𑁆𑀓𑀫𑀢𑀺. 𑀧𑀢𑁆𑀣𑀺𑀢𑀝𑁆𑀞𑀸𑀦𑁂 ¶ 𑀯𑀲𑀺𑀢𑁆𑀯𑀸 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣𑀸𑀧𑀺 𑀲𑀢𑁆𑀣𑁄 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀅𑀦𑁆𑀢𑀭𑀸 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀢𑀺𑀝𑁆𑀞𑀢𑀺 𑀯𑀸 𑀯𑀺𑀧𑁆𑀧𑀓𑀺𑀭𑀢𑀺 𑀯𑀸, 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀓𑀼𑀝𑀺𑀬𑀁𑀬𑁂𑀯 𑀉𑀧𑀕𑀦𑁆𑀢𑀩𑁆𑀩𑀁. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑁂 𑀆𑀮𑀬𑁄 𑀓𑀸𑀢𑀩𑁆𑀩𑁄 ¶ . 𑀲𑀘𑁂 𑀅𑀦𑁆𑀢𑁄𑀢𑁂𑀫𑀸𑀲𑀁 𑀦𑀸𑀯𑀸 𑀲𑀫𑀼𑀤𑁆𑀤𑁂𑀬𑁂𑀯 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣 𑀦𑀸𑀯𑀸 𑀓𑀽𑀮𑀁 𑀮𑀪𑀢𑀺, 𑀲𑀬𑀜𑁆𑀘 𑀧𑀭𑀢𑁄 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀯𑀸𑀬 𑀮𑀤𑁆𑀥𑀕𑀸𑀫𑁂𑀬𑁂𑀯 𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀦𑀸𑀯𑀸 𑀅𑀦𑀼𑀢𑀻𑀭𑀫𑁂𑀯 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼 𑀘 𑀧𑀞𑀫𑀁 𑀮𑀤𑁆𑀥𑀕𑀸𑀫𑁂𑀬𑁂𑀯 𑀯𑀲𑀺𑀢𑀼𑀓𑀸𑀫𑁄, 𑀦𑀸𑀯𑀸 𑀕𑀘𑁆𑀙𑀢𑀼, 𑀪𑀺𑀓𑁆𑀔𑀼𑀦𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁.

𑀇𑀢𑀺 𑀯𑀚𑁂, 𑀲𑀢𑁆𑀣𑁂, 𑀦𑀸𑀯𑀸𑀬𑀦𑁆𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺, 𑀧𑀯𑀸𑀭𑁂𑀢𑀼𑀜𑁆𑀘 𑀮𑀪𑀢𑀺.

𑁨𑁬𑁨𑁩. 𑀲𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀢𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀊𑀦𑀢𑁆𑀢𑁂 𑀲𑀢𑀺. 𑀲𑀭𑀻𑀭𑀸𑀨𑀸𑀲𑀼𑀢𑀸𑀬 𑀯𑀸𑀢𑀺 𑀲𑀭𑀻𑀭𑀲𑁆𑀲 𑀅𑀨𑀸𑀲𑀼𑀢𑀸𑀬 𑀆𑀩𑀸𑀥𑁂 𑀯𑀸 𑀲𑀢𑀺. 𑀯𑀲𑁆𑀲𑀁 𑀙𑁂𑀢𑁆𑀯𑀸𑀧𑀺 𑀧𑀓𑁆𑀓𑀫𑁂𑀢𑀺 𑀯𑀲𑁆𑀲𑀘𑁆𑀙𑁂𑀤𑀁 𑀓𑀢𑁆𑀯𑀸𑀧𑀺 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀅𑀧𑀺-𑀲𑀤𑁆𑀤𑁂𑀦 𑀯𑀲𑁆𑀲𑀁 𑀅𑀙𑁂𑀢𑁆𑀯𑀸 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑁂 𑀲𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁬𑁨𑁪. 𑀬𑁂𑀦 𑀓𑁂𑀦𑀦𑁆𑀢𑀭𑀸𑀬𑁂𑀦𑀸𑀢𑀺 𑀭𑀸𑀚𑀦𑁆𑀢𑀭𑀸𑀬𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦. 𑀬𑁄 𑀪𑀺𑀓𑁆𑀔𑀼 𑀯𑀲𑁆𑀲𑀁 𑀦𑁄𑀧𑀕𑀢𑁄, 𑀢𑁂𑀦𑀸𑀧𑀺 𑀙𑀺𑀦𑁆𑀦𑀯𑀲𑁆𑀲𑁂𑀦 𑀯𑀸𑀧𑀺 𑀤𑀼𑀢𑀺𑀬𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁨𑁬𑁨𑁫-𑁬. 𑀲𑀢𑁆𑀢𑀸𑀳𑀦𑁆𑀢𑀺 ¶ 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. ‘‘𑀯𑀻𑀢𑀺𑀦𑀸𑀫𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀉𑀧𑀕𑀦𑁆𑀢𑁆𑀯𑀸𑀧𑀺 𑀯𑀸 𑀩𑀳𑀺𑀤𑁆𑀥𑀸 𑀏𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑀺 𑀘𑁂. 𑀬𑁄 𑀕𑀘𑁆𑀙𑀢𑀺, 𑀬𑁄 𑀘 𑀯𑀻𑀢𑀺𑀦𑀸𑀫𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀧𑀼𑀭𑀺𑀫𑀸𑀧𑀺 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀦𑀼𑀧𑀕𑀢𑀢𑁆𑀢𑀸, 𑀙𑀺𑀦𑁆𑀦𑀯𑀲𑁆𑀲𑀢𑁆𑀢𑀸 𑀘 𑀧𑀼𑀭𑀺𑀫𑀸𑀧𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀦 𑀯𑀺𑀚𑁆𑀚𑀢𑀺 𑀦 𑀮𑀪𑀢𑀺. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀬𑀣𑀸𑀓𑁆𑀓𑀫𑀁 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀘 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑁆𑀲𑀯𑁂 𑀘 𑀪𑀺𑀓𑁆𑀔𑀼𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀇𑀥 𑀯𑀲𑁆𑀲𑀁 𑀯𑀲𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀁𑀯𑀸𑀤𑁂 𑀅𑀲𑀘𑁆𑀘𑀸𑀧𑀦𑁂 𑀆𑀧𑀢𑁆𑀢𑀺 𑀳𑁄𑀢𑀺. 𑀓𑀢𑀫𑀸𑀢𑀺 𑀆𑀳 ‘‘𑀤𑀼𑀓𑁆𑀓𑀝’’𑀦𑁆𑀢𑀺. 𑀦 𑀓𑁂𑀯𑀮𑀁 𑀏𑀢𑀲𑁆𑀲𑁂𑀯 𑀯𑀺𑀲𑀁𑀯𑀸𑀤𑁂 𑀆𑀧𑀢𑁆𑀢𑀺 𑀳𑁄𑀢𑀺, 𑀅𑀣 𑀔𑁄 𑀇𑀢𑀭𑁂𑀲𑀫𑁆𑀧𑀺 𑀧𑀝𑀺𑀲𑁆𑀲𑀯𑀸𑀦𑀁 𑀯𑀺𑀲𑀁𑀯𑀸𑀤𑁂 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 ‘𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑁆𑀲𑀁 𑀯𑀲𑀣𑀸’𑀢𑀺 𑀏𑀢𑀲𑁆𑀲𑁂𑀯 𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀆𑀧𑀢𑁆𑀢𑀺, ‘𑀇𑀫𑀁 ¶ 𑀢𑁂𑀫𑀸𑀲𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀉𑀪𑁄𑀧𑀺 𑀫𑀬𑀁 𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀏𑀓𑀢𑁄𑀯 𑀉𑀤𑁆𑀤𑀺𑀲𑀸𑀧𑁂𑀲𑁆𑀲𑀸𑀫𑀸’𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁭). 𑀢𑀜𑁆𑀘 𑀔𑁄 𑀧𑀝𑀺𑀲𑁆𑀲𑀯𑀓𑀸𑀮𑁂 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀘𑁆𑀙𑀸 𑀯𑀺𑀲𑀁𑀯𑀸𑀤𑀦𑀧𑀘𑁆𑀘𑀬𑀸 𑀳𑁄𑀢𑀺. 𑀧𑀞𑀫𑀁 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀦 𑀧𑀝𑀺𑀲𑁆𑀲𑀯𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀯𑀺𑀲𑀁𑀯𑀸𑀤𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀺.

𑁨𑁬𑁨𑁭. ‘‘𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁭) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄, ‘‘𑀓𑁄 𑀯𑀸𑀤𑁄 𑀯𑀲𑀺𑀢𑁆𑀯𑀸 𑀩𑀳𑀺 𑀕𑀘𑁆𑀙𑀢𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ¶ 𑀘 ‘‘𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀦𑀸𑀭𑀼𑀡’’𑀦𑁆𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀦𑀸𑀭𑀼𑀡’’𑀦𑁆𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀕𑀳𑁂𑀢𑀩𑁆𑀩𑁄.

𑁨𑁬𑁨𑁮. 𑀯𑀲𑀺𑀢𑁆𑀯𑀸𑀢𑀺 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸. 𑀬𑀣𑀸 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀕𑀢𑀝𑁆𑀞𑀸𑀦𑀢𑁄 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀆𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁧) 𑀅𑀝𑁆𑀞𑀓𑀣𑀸𑀯𑀘𑀦𑀁 𑀲𑀢𑁆𑀢𑀫𑀸𑀭𑀼𑀡𑁂𑀦 𑀧𑀝𑀺𑀩𑀤𑁆𑀥𑀤𑀺𑀯𑀲𑀁 𑀲𑀢𑁆𑀢𑀫𑁂𑀦 𑀅𑀭𑀼𑀡𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑀅𑀭𑀼𑀡𑀩𑁆𑀪𑀦𑁆𑀢𑀭𑁂 𑀅𑀦𑀸𑀕𑀦𑁆𑀢𑁆𑀯𑀸 𑀅𑀝𑁆𑀞𑀫𑀁 𑀅𑀭𑀼𑀡𑀁 𑀩𑀳𑀺 𑀉𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀤𑀲𑁆𑀲𑀦𑀧𑀭𑀁, 𑀦 𑀲𑀢𑁆𑀢𑀫𑀅𑀭𑀼𑀡𑀲𑁆𑀲𑁂𑀯 𑀢𑀢𑁆𑀣 𑀉𑀝𑁆𑀞𑀸𑀧𑁂𑀢𑀩𑁆𑀩𑀪𑀸𑀯𑀤𑀲𑁆𑀲𑀦𑀧𑀭𑀦𑁆𑀢𑀺 𑀕𑀳𑁂𑀢𑀩𑁆𑀩𑀁 𑀲𑀺𑀓𑁆𑀔𑀸𑀪𑀸𑀚𑀦𑀅𑀝𑁆𑀞𑀓𑀣𑀸𑀬, 𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀲𑀼 𑀘 𑀢𑀣𑀸 𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸.

𑁨𑁬𑁨𑁯. ‘‘𑀦𑁄𑀧𑁂𑀢𑀺 𑀅𑀲𑀢𑀺𑀬𑀸’’𑀢𑀺 𑀧𑀤𑀘𑁆𑀙𑁂𑀤𑁄, 𑀦𑁄𑀧𑁂𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀻𑀪𑁂𑀤𑁂𑀦 𑀦 𑀉𑀧𑀕𑀘𑁆𑀙𑀢𑀺.

𑁨𑁬𑁩𑁦. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀫𑀸𑀳 ‘‘𑀦 𑀤𑁄𑀲𑁄 𑀓𑁄𑀘𑀺 𑀯𑀺𑀚𑁆𑀚𑀢𑀻’’𑀢𑀺.

𑁨𑁬𑁩𑁧. ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀘𑀦𑁂 𑀦𑀺𑀘𑁆𑀙𑀸𑀭𑀺𑀢𑁂 𑀏𑀯 𑀯𑀲𑁆𑀲𑀁 𑀉𑀧𑀕𑀢𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀦𑀺𑀘𑁆𑀙𑀸𑀭𑀺𑀢𑁂𑀯 𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀇𑀤𑀁 𑀉𑀓𑁆𑀓𑀁𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀓𑀺𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀦𑀺𑀘𑁆𑀙𑀸𑀭𑀺𑀢𑁂𑀧𑀺 𑀯𑀲𑁆𑀲𑀽𑀧𑀕𑀢𑁄 𑀦𑀸𑀫 𑀳𑁄𑀢𑀻𑀢𑀺. 𑀬𑀣𑀸𑀳 𑁋 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 ¶ 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻𑀢𑀺 𑀲𑀓𑀺𑀁 𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪).

𑁨𑁬𑁩𑁨. 𑀦𑀯𑀫𑀺𑀢𑁄 ¶ 𑀧𑀝𑁆𑀞𑀸𑀬 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀘𑁆𑀙𑀢𑀼 𑀯𑀸 𑀫𑀸 𑀯𑀸, 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁭) 𑀅𑀝𑁆𑀞𑀓𑀣𑀸𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀤𑀺𑀁 𑀢𑀼 𑀦𑀯𑀫𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀦𑀯𑀫𑀺𑀁 𑀧𑀪𑀼𑀢𑀺 𑀆𑀤𑀺𑀁 𑀓𑀢𑁆𑀯𑀸, 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦𑁂𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀯𑀸𑀭𑀡𑀤𑀺𑀯𑀲𑁂𑀧𑀺 𑀢𑀤𑀳𑁂𑀯 𑀆𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑀁 𑀧𑀯𑀸𑀭𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁂𑀦 𑀮𑀩𑁆𑀪𑀫𑀸𑀦𑁂𑀦 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀧𑀯𑀸𑀭𑁂𑀢𑁆𑀯𑀸 𑀧𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀧𑀯𑀸𑀭𑀡𑀸𑀬 𑀢𑀁𑀤𑀺𑀯𑀲𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸’’𑀢𑀺 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁨𑁦𑁭) 𑀳𑀺 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. 𑀲𑁄 𑀧𑀘𑁆𑀙𑀸 𑀆𑀕𑀘𑁆𑀙𑀢𑀼 𑀯𑀸 𑀫𑀸 𑀯𑀸, 𑀤𑁄𑀲𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁩𑁩. ‘‘𑀧𑀯𑀸𑀭𑀡𑀸’’𑀢𑀺 𑀇𑀤𑀁 ‘‘𑀘𑀸𑀢𑀼𑀤𑁆𑀤𑀲𑀻’’𑀢𑀺𑀆𑀤𑀻𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀦𑁂 𑀓𑀸𑀢𑀩𑁆𑀩𑀸 𑀧𑀯𑀸𑀭𑀡𑀸 𑀅𑀪𑁂𑀤𑁄𑀧𑀘𑀸𑀭𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀲𑀸𑀫𑀕𑁆𑀕𑀻 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀲𑀭𑀽𑀧𑀸𑀯. 𑀲𑀸𑀫𑀕𑁆𑀕𑀺𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑁂𑀳𑀺 𑀘 𑀧𑀞𑀫𑀁 𑀧𑀯𑀸𑀭𑀡𑀁 𑀞𑀧𑁂𑀢𑁆𑀯𑀸 𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀧𑀼𑀡𑁆𑀡𑀫𑀸 𑀏𑀢𑁆𑀣𑀦𑁆𑀢𑀭𑁂 𑀓𑀸𑀢𑀩𑁆𑀩𑀸, 𑀢𑀢𑁄 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸 𑀦 𑀯𑀝𑁆𑀝𑀢𑀺. 𑀢𑁂𑀯𑀸𑀘𑀻 𑀤𑁆𑀯𑁂𑀓𑀯𑀸𑀘𑀻𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂…𑀧𑁂… 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬, 𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬, 𑀏𑀓𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀢𑀁 𑀢𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑀸 𑀧𑀯𑀸𑀭𑀡𑀸 𑀯𑀼𑀘𑁆𑀘𑀢𑀺.

𑁨𑁬𑁩𑁪. 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸, 𑀅𑀦𑁆𑀢𑁂𑀦𑁂𑀯 𑀧𑀯𑀸𑀭𑀬𑁂𑀢𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀓𑀫𑁆𑀫𑀸𑀦𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁…𑀧𑁂… 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫’’𑀦𑁆𑀢𑀺 (𑀫𑀳𑀸𑀯. 𑁨𑁧𑁨) 𑀯𑀢𑁆𑀯𑀸 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂 ¶ , 𑀬𑀤𑀺𑀤𑀁 𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀦, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀁 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩𑀁…𑀧𑁂… 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀤𑀺𑀤𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀧𑀯𑀸𑀭𑀡𑀓𑀫𑁆𑀫𑀁, 𑀏𑀯𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑀡𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁨𑁧𑁨) 𑀢𑀻𑀡𑀺 ¶ 𑀅𑀓𑀢𑁆𑀢𑀩𑁆𑀩𑀸𑀦𑀺 𑀧𑀯𑀸𑀭𑀡𑀓𑀫𑁆𑀫𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀢𑀼𑀁 𑀅𑀦𑀼𑀜𑁆𑀜𑀸𑀢𑁂𑀦 𑀘𑀢𑀼𑀢𑁆𑀣𑁂𑀦 𑀧𑀯𑀸𑀭𑀡𑀓𑀫𑁆𑀫𑁂𑀦 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀯𑀺𑀪𑀸𑀕𑁂𑀓𑀤𑁂𑀲𑀁 ‘‘𑀧𑀜𑁆𑀘 𑀬𑀲𑁆𑀫𑀺𑀁 𑀧𑀦𑀸𑀯𑀸𑀲𑁂’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀢𑀺.

𑁨𑁬𑁩𑁫. 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀫𑀸𑀧𑁂𑀢𑁆𑀯𑀸𑀢𑀺 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀧𑀯𑀸𑀭𑀡𑀸𑀬 𑀏𑀢𑀸𑀦𑀺, ‘𑀧𑀼𑀩𑁆𑀩𑀓𑀭𑀡’𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀧𑀯𑀸𑀭𑀡𑀸𑀬 𑀏𑀢𑀸𑀦𑀺, ‘𑀧𑀼𑀩𑁆𑀩𑀓𑀺𑀘𑁆𑀘’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀯𑀼𑀢𑁆𑀢𑀁 𑀦𑀯𑀯𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸.

𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀺𑀢𑁂𑀢𑀺 𑁋

‘‘𑀧𑀯𑀸𑀭𑀡𑀸 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸,

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺,

‘𑀧𑀢𑁆𑀢𑀓𑀮𑁆𑀮’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀯𑀼𑀢𑁆𑀢𑁂 𑀘𑀢𑀼𑀩𑁆𑀩𑀺𑀥𑁂 𑀧𑀢𑁆𑀢𑀓𑀮𑁆𑀮𑁂 𑀲𑀫𑁄𑀥𑀸𑀦𑀺𑀢𑁂 𑀧𑀭𑀺𑀲𑀫𑀸𑀧𑀺𑀢𑁂.

𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚 𑀧𑀯𑀸𑀭𑀡𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁨𑁧𑁦) 𑀏𑀯𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀘 ‘‘𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀘 𑀤𑀸𑀦𑀸𑀤𑀺𑀓𑀭𑀡𑁂𑀦 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀺𑀬𑀸 𑀔𑁂𑀧𑀺𑀢𑀸𑀬 𑀘 𑀭𑀸𑀚𑀸𑀤𑀺𑀅𑀦𑁆𑀢𑀭𑀸𑀬𑁂 𑀲𑀢𑀺 𑀘 𑀢𑀤𑀦𑀼𑀭𑀽𑀧𑀢𑁄 ‘‘𑀤𑁆𑀯𑁂𑀯𑀸𑀘𑀺𑀓𑀁, 𑀏𑀓𑀯𑀸𑀘𑀺𑀓𑀁, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀘 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 ¶ , 𑀢𑀸𑀲𑀁 𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄𑀬𑁂𑀯. 𑀬𑀣𑀸𑀳 𑁋

‘‘𑀏𑀯𑀜𑁆𑀳𑀺 ¶ 𑀯𑀼𑀢𑁆𑀢𑁂 𑀢𑁂𑀯𑀸𑀘𑀺𑀓𑀜𑁆𑀘 𑀤𑁆𑀯𑁂𑀯𑀸𑀘𑀺𑀓𑀜𑁆𑀘 𑀏𑀓𑀯𑀸𑀘𑀺𑀓𑀜𑁆𑀘 𑀧𑀯𑀸𑀭𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀫𑀸𑀦𑀯𑀲𑁆𑀲𑀺𑀓𑀁 𑀦 𑀯𑀝𑁆𑀝𑀢𑀺. ‘𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’𑀢𑀺 𑀯𑀼𑀢𑁆𑀢𑁂 𑀧𑀦 𑀢𑁂𑀯𑀸𑀘𑀺𑀓𑀫𑁂𑀯 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀦 𑀯𑀝𑁆𑀝𑀢𑀺, ‘𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’𑀢𑀺 𑀯𑀼𑀢𑁆𑀢𑁂 𑀤𑁆𑀯𑁂𑀯𑀸𑀘𑀺𑀓𑀜𑁆𑀘 𑀢𑁂𑀯𑀸𑀘𑀺𑀓𑀜𑁆𑀘 𑀯𑀝𑁆𑀝𑀢𑀺, 𑀏𑀓𑀯𑀸𑀘𑀺𑀓𑀜𑁆𑀘 𑀲𑀫𑀸𑀦𑀯𑀲𑁆𑀲𑀺𑀓𑀜𑁆𑀘 𑀦 𑀯𑀝𑁆𑀝𑀢𑀺. ‘𑀏𑀓𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’𑀢𑀺 𑀯𑀼𑀢𑁆𑀢𑁂 𑀧𑀦 𑀏𑀓𑀯𑀸𑀘𑀺𑀓𑀤𑁆𑀯𑁂𑀯𑀸𑀘𑀺𑀓𑀢𑁂𑀯𑀸𑀘𑀺𑀓𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀲𑀫𑀸𑀦𑀯𑀲𑁆𑀲𑀺𑀓𑀫𑁂𑀯 𑀦 𑀯𑀝𑁆𑀝𑀢𑀺. ‘𑀲𑀫𑀸𑀦𑀯𑀲𑁆𑀲𑀺𑀓’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁧𑁦).

𑀓𑀸𑀢𑀩𑁆𑀩𑀸𑀢𑀺 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀲𑀗𑁆𑀖𑀁, 𑀆𑀯𑀼𑀲𑁄, 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀆𑀯𑀼𑀲𑁄, 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸…𑀧𑁂… 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 (𑀫𑀳𑀸𑀯. 𑁨𑁧𑁦) 𑀯𑀼𑀢𑁆𑀢𑀦𑀬𑁂𑀦 𑀓𑀸𑀢𑀩𑁆𑀩𑀸. 𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸…𑀧𑁂… 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻𑀢𑀺 (𑀫𑀳𑀸𑀯. 𑁨𑁧𑁦) 𑀯𑀼𑀢𑁆𑀢𑀦𑀬𑁂𑀦 𑀓𑀸𑀢𑀩𑁆𑀩𑀸.

𑁨𑁬𑁩𑁬. 𑀣𑁂𑀭𑁂𑀲𑀼 𑀧𑀯𑀸𑀭𑁂𑀦𑁆𑀢𑁂𑀲𑀼 𑀬𑁄 𑀧𑀦 𑀦𑀯𑁄, 𑀲𑁄 𑀲𑀬𑀁 𑀬𑀸𑀯 𑀧𑀯𑀸𑀭𑁂𑀢𑀺, 𑀢𑀸𑀯 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁨𑁬𑁩𑁭. 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄𑀧𑀺 𑀯𑀸 𑀏𑀓𑀸𑀯𑀸𑀲𑁂 𑀏𑀓𑀲𑀻𑀫𑀸𑀬𑀁 𑀯𑀲𑀦𑁆𑀢𑀺 𑀘𑁂, 𑀜𑀢𑁆𑀢𑀺𑀁 𑀯𑀢𑁆𑀯𑀸 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑁄, 𑀅𑀚𑁆𑀚 𑀧𑀯𑀸𑀭𑀡𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁧𑁬) 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸.

𑀧𑀯𑀸𑀭𑁂𑀬𑁆𑀬𑀼𑀦𑁆𑀢𑀺 ¶ 𑀏𑀢𑁆𑀣 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑁂 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀪𑀺𑀓𑁆𑀔𑀽 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 (𑀫𑀳𑀸𑀯. 𑁨𑁧𑁬) 𑀧𑀯𑀸𑀭𑁂𑀢𑀩𑁆𑀩𑀁. 𑀦𑀯𑁂𑀦𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ¶ , 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀸𑀭𑁂𑀢𑀩𑁆𑀩𑀁.

𑁨𑁬𑁩𑁮. 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀬𑁆𑀬𑀼𑀁, 𑀯𑀺𑀦𑀸 𑀜𑀢𑁆𑀢𑀺𑀁 𑀤𑀼𑀯𑁂 𑀚𑀦𑀸. 𑀢𑁂𑀲𑀼 𑀣𑁂𑀭𑁂𑀦 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 (𑀫𑀳𑀸𑀯. 𑁨𑁧𑁭) 𑀧𑀯𑀸𑀭𑁂𑀢𑀩𑁆𑀩𑀁. 𑀦𑀯𑁂𑀦𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺…𑀧𑁂… 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀅𑀳𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀸𑀭𑁂𑀢𑀩𑁆𑀩𑀁.

𑀅𑀥𑀺𑀝𑁆𑀞𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀫𑀸𑀧𑁂𑀢𑁆𑀯𑀸 ‘‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸 𑀘𑀸𑀢𑀼𑀤𑁆𑀤𑀲𑀻’’𑀢𑀺 𑀯𑀸 ‘‘𑀧𑀦𑁆𑀦𑀭𑀲𑀻’’𑀢𑀺 𑀯𑀸 𑀯𑀢𑁆𑀯𑀸 ‘‘𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑁂𑀬𑁆𑀬 ¶ . 𑀬𑀣𑀸𑀳 ‘‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸𑀢𑀺 𑀏𑀢𑁆𑀣 𑀲𑀘𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀢𑀺, ‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸 𑀘𑀸𑀢𑀼𑀤𑁆𑀤𑀲𑀻’𑀢𑀺, 𑀲𑀘𑁂 𑀧𑀦𑁆𑀦𑀭𑀲𑀺𑀓𑀸, ‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻’𑀢𑀺 𑀏𑀯𑀁 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁧𑁮), 𑀇𑀫𑀺𑀦𑀸 𑀲𑀩𑁆𑀩𑀲𑀗𑁆𑀕𑀸𑀳𑀸𑀤𑀺𑀜𑀢𑁆𑀢𑀻𑀲𑀼 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑁄 𑀲𑁄 𑀯𑁄𑀳𑀸𑀭𑁄 𑀓𑀸𑀢𑀩𑁆𑀩𑁄𑀢𑀺 𑀤𑀻𑀧𑀺𑀢𑀫𑁂𑀯.

𑀲𑁂𑀲𑀸 𑀲𑀗𑁆𑀖𑀧𑀯𑀸𑀭𑀡𑀸𑀢𑀺 𑀧𑀜𑁆𑀘𑀳𑀺, 𑀅𑀢𑀺𑀭𑁂𑀓𑁂𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀸 𑀧𑀯𑀸𑀭𑀡𑀸 𑀲𑀗𑁆𑀖𑀧𑀯𑀸𑀭𑀡𑀸.

𑁨𑁬𑁩𑁯. 𑀧𑀯𑀸𑀭𑀺𑀢𑁂𑀢𑀺 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁂. 𑀅𑀦𑀸𑀕𑀢𑁄𑀢𑀺 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀧𑀼𑀭𑀺𑀫𑀺𑀓𑀸𑀬 𑀘 𑀧𑀘𑁆𑀙𑀺𑀫𑀺𑀓𑀸𑀬 𑀘 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀅𑀦𑀼𑀧𑀕𑀢𑁄. 𑀅𑀯𑀼𑀢𑁆𑀣𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀔𑀼𑀤𑁆𑀤𑀲𑀺𑀓𑁆𑀔𑀸𑀯𑀡𑁆𑀡𑀦𑀸𑀬 ‘‘𑀅𑀯𑀼𑀢𑁆𑀣𑁄𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑁄 𑀅𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 ‘𑀅𑀯𑀼𑀢𑁆𑀣𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀢𑁂𑀲𑀁 𑀲𑀦𑁆𑀢𑀺𑀓𑁂’’𑀢𑀺 𑀲𑁂𑀲𑁄.

𑁨𑁬𑁪𑁦-𑁧. 𑀬𑀲𑁆𑀫𑀺𑀁 ¶ 𑀧𑀦𑀸𑀯𑀸𑀲𑁂 𑀧𑀜𑁆𑀘 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄 𑀯𑀸 𑀲𑀫𑀡𑀸 𑀯𑀲𑀦𑁆𑀢𑀺, 𑀢𑁂 𑀢𑀢𑁆𑀣 𑀏𑀓𑁂𑀓𑀲𑁆𑀲 𑀧𑀯𑀸𑀭𑀡𑀁 𑀳𑀭𑀺𑀢𑁆𑀯𑀸𑀦 𑀲𑀘𑁂 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑀲𑁂𑀲𑀦𑁆𑀢𑀺 ‘‘𑀅𑀥𑀫𑁆𑀫𑁂𑀦 𑀲𑀫𑀕𑁆𑀕’’𑀦𑁆𑀢𑀺𑀆𑀤𑀺𑀓𑀁 𑀯𑀺𑀦𑀺𑀘𑁆𑀙𑀬𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀯𑀸𑀭𑀡𑀸𑀥𑀺𑀓𑀸𑀭𑁂. 𑀩𑀼𑀥𑁄𑀢𑀺 𑀯𑀺𑀦𑀬𑀥𑀭𑁄. 𑀉𑀧𑁄𑀲𑀣𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀉𑀧𑁄𑀲𑀣𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀓𑁆𑀓𑀫𑁂𑀦. 𑀦𑀬𑁂𑀢𑀺 𑀚𑀸𑀦𑁂𑀬𑁆𑀬.

𑁨𑁬𑁪𑁨. 𑀲𑀫𑁆𑀧𑀸𑀤𑁂𑀢𑀢𑁆𑀢𑀦𑁄 𑀲𑀼𑀘𑀺𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀁 𑀲𑀫𑁆𑀧𑀸𑀤𑁂𑀢𑀺. 𑀲𑀩𑁆𑀩𑀁 𑀲𑀸𑀥𑁂𑀢𑀻𑀢𑀺 𑀉𑀧𑁄𑀲𑀣𑀸𑀤𑀺𑀲𑀩𑁆𑀩𑀁 𑀓𑀫𑁆𑀫𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀦𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀁 𑀦 𑀦𑀺𑀧𑁆𑀨𑀸𑀤𑁂𑀢𑀺.

𑁨𑁬𑁪𑁩. 𑀢𑀲𑁆𑀫𑀸𑀢𑀺 ¶ 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀲𑀼𑀘𑀺𑀁 𑀦 𑀲𑀸𑀥𑁂𑀢𑀺, 𑀢𑀲𑁆𑀫𑀸. 𑀉𑀪𑀺𑀦𑁆𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘 𑀲𑀗𑁆𑀖𑀲𑁆𑀲 𑀘. 𑀓𑀺𑀘𑁆𑀘𑀲𑀺𑀤𑁆𑀥𑀢𑁆𑀣𑀫𑁂𑀯𑀺𑀥𑀸𑀢𑀺 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀦𑀺𑀧𑁆𑀧𑀚𑁆𑀚𑀦𑀢𑁆𑀣𑀁 𑀇𑀥 𑀇𑀫𑀲𑁆𑀫𑀺𑀁 𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀧𑀓𑀭𑀡𑁂. 𑀧𑀸𑀭𑀺𑀲𑀼𑀤𑁆𑀥𑀺𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀧𑀯𑀸𑀭𑀡𑀸 𑀲𑀗𑁆𑀕𑀳𑀺𑀢𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀙𑀦𑁆𑀤𑀁 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸, 𑀕𑀳𑁂𑀢𑁆𑀯𑀸 𑀯𑀸 𑀧𑀯𑀸𑀭𑀡’’𑀦𑁆𑀢𑀺.

𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀤𑁂𑀦𑁆𑀢𑁂𑀦 𑀲𑀘𑁂 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀙𑀦𑁆𑀤𑀸𑀤𑀺𑀳𑀸𑀭𑀓𑁄 𑀪𑀺𑀓𑁆𑀔𑀼 𑀯𑀢𑁆𑀢𑀩𑁆𑀩𑁄 ‘‘𑀙𑀦𑁆𑀤𑀁 𑀤𑀫𑁆𑀫𑀺, 𑀙𑀦𑁆𑀤𑀁 𑀫𑁂 𑀳𑀭, 𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 (𑀫𑀳𑀸𑀯. 𑁧𑁬𑁫), ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 (𑀫𑀳𑀸𑀯. 𑁧𑁬𑁪), ‘‘𑀧𑀯𑀸𑀭𑀡𑀁 𑀤𑀫𑁆𑀫𑀺, 𑀧𑀯𑀸𑀭𑀡𑀁 𑀫𑁂 𑀳𑀭, 𑀧𑀯𑀸𑀭𑀡𑀁 𑀫𑁂 𑀆𑀭𑁄𑀘𑁂𑀳𑀺, 𑀫𑀫𑀢𑁆𑀣𑀸𑀬 𑀧𑀯𑀸𑀭𑁂𑀳𑀻’’𑀢𑀺 (𑀫𑀳𑀸𑀯. 𑁨𑁧𑁩).

𑁨𑁬𑁪𑁪. ‘‘𑀙𑀦𑁆𑀤𑁄 𑀏𑀓𑁂𑀦𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀓𑁂𑀦 𑀩𑀳𑀽𑀦𑀫𑁆𑀧𑀺 𑀙𑀦𑁆𑀤𑁄 𑀳𑀸𑀢𑀩𑁆𑀩𑁄, 𑀢𑀣𑀸 𑀧𑀸𑀭𑀺𑀲𑀼𑀤𑁆𑀥𑀺 𑀳𑀸𑀢𑀩𑁆𑀩𑀸. 𑀧𑀺-𑀲𑀤𑁆𑀤𑁂𑀦 𑀧𑀯𑀸𑀭𑀡𑀸 𑀳𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀧𑀭𑀫𑁆𑀧𑀭𑀸𑀳𑀝𑁄 𑀙𑀦𑁆𑀤𑁄𑀢𑀺 𑀩𑀳𑀽𑀦𑀁 𑀯𑀸 𑀏𑀓𑀲𑁆𑀲 𑀯𑀸 𑀙𑀦𑁆𑀤𑀸𑀤𑀺𑀳𑀸𑀭𑀓𑀲𑁆𑀲 𑀳𑀢𑁆𑀣𑀢𑁄 𑀅𑀦𑁆𑀢𑀭𑀸 𑀅𑀜𑁆𑀜𑁂𑀦 𑀕𑀳𑀺𑀢𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸. 𑀯𑀺𑀲𑀼𑀤𑁆𑀥𑀺𑀬𑀸 𑀦 𑀕𑀘𑁆𑀙𑀢𑀺 𑀅𑀦𑀯𑀚𑁆𑀚𑀪𑀸𑀯𑀸𑀬 𑀦 𑀧𑀸𑀧𑀼𑀡𑀸𑀢𑀺 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀙𑀦𑁆𑀤𑀸𑀤𑀻𑀦𑀁 𑀲𑀗𑁆𑀖𑀫𑀚𑁆𑀛𑀁 𑀅𑀕𑀫𑀦𑁂𑀦 𑀯𑀕𑁆𑀕𑀪𑀸𑀯𑀓𑀭𑀡𑀢𑁄.

𑀏𑀢𑁆𑀣 𑀘 𑀬𑀣𑀸 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀯𑀮𑀬𑀁 𑀤𑀼𑀢𑀺𑀬𑀯𑀮𑀬𑀁 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀁, 𑀏𑀯𑀫𑀺𑀫𑁂𑀧𑀺 𑀙𑀦𑁆𑀤𑀸𑀤𑀬𑁄 𑀤𑀸𑀬𑀓𑁂𑀦 𑀬𑀲𑁆𑀲 𑀤𑀺𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀻𑀢𑀺 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀲𑀤𑀺𑀲𑀢𑁆𑀢𑀸 ¶ ‘‘𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀲𑀗𑁆𑀔𑀮𑀺𑀓𑀸𑀦𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁬𑁪𑁫-𑁬. 𑀙𑀦𑁆𑀤𑀁 ¶ 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀕𑀳𑁂𑀢𑁆𑀯𑀸 𑀙𑀦𑁆𑀤𑀸𑀤𑀺𑀳𑀸𑀭𑀓𑁄 𑀲𑀗𑁆𑀖𑀫𑀧𑁆𑀧𑀢𑁆𑀯𑀸 𑀲𑀘𑁂 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀧𑀝𑀺𑀚𑀸𑀦𑁂𑀬𑁆𑀬 𑀯𑀸 𑀯𑀺𑀩𑁆𑀪𑀫𑁂𑀬𑁆𑀬 𑀯𑀸 𑀫𑀭𑁂𑀬𑁆𑀬 𑀯𑀸, 𑀢𑀁 𑀲𑀩𑁆𑀩𑀁 𑀙𑀦𑁆𑀤𑀸𑀤𑀺𑀪𑀸𑀯𑀁 𑀦𑀸𑀳𑀝𑀁 𑀳𑁄𑀢𑀺, 𑀲𑀗𑁆𑀖𑀁 𑀧𑀢𑁆𑀯𑀸 𑀏𑀯𑀁 𑀲𑀺𑀬𑀸 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑁄, 𑀯𑀺𑀩𑁆𑀪𑀦𑁆𑀢𑁄, 𑀓𑀸𑀮𑀓𑀢𑁄 𑀯𑀸 𑀪𑀯𑁂𑀬𑁆𑀬, 𑀢𑀁 𑀲𑀩𑁆𑀩𑀁 𑀳𑀝𑀁 𑀆𑀦𑀻𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀯𑀸 𑀧𑀝𑀺𑀚𑀸𑀦𑁂𑀬𑁆𑀬𑀸𑀢𑀺 ‘‘𑀅𑀳𑀁 𑀲𑀸𑀫𑀡𑁂𑀭𑁄’’𑀢𑀺𑀆𑀤𑀺𑀦𑀸 𑀪𑀽𑀢𑀁 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀓𑀣𑁂𑀬𑁆𑀬, 𑀧𑀘𑁆𑀙𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀕𑀳𑀺𑀢𑁄.

𑁨𑁬𑁪𑁭. 𑀲𑀗𑁆𑀖𑀁 𑀧𑀢𑁆𑀯𑀸𑀢𑀺 𑀅𑀦𑁆𑀢𑀫𑀲𑁄 𑀢𑀁𑀢𑀁𑀓𑀫𑁆𑀫𑀧𑁆𑀧𑀢𑁆𑀢𑀲𑁆𑀲 𑀘𑀢𑀼𑀯𑀕𑁆𑀕𑀸𑀤𑀺𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑀁 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀫𑀢𑁆𑀢𑁄𑀢𑀺 𑀧𑀫𑀸𑀤𑀁 𑀲𑀢𑀺𑀲𑀫𑁆𑀫𑁄𑀲𑀁 𑀧𑀢𑁆𑀢𑁄. 𑀲𑀼𑀢𑁆𑀢𑁄𑀢𑀺 𑀦𑀺𑀤𑁆𑀤𑀽𑀧𑀕𑀢𑁄. 𑀔𑀺𑀢𑁆𑀢𑀘𑀺𑀢𑁆𑀢𑀓𑁄𑀢𑀺 𑀬𑀓𑁆𑀔𑀸𑀤𑀻𑀳𑀺 𑀯𑀺𑀓𑁆𑀔𑁂𑀧𑀫𑀸𑀧𑀸𑀤𑀺𑀢𑀘𑀺𑀢𑁆𑀢𑁄. 𑀦𑀸𑀭𑁄𑀘𑁂𑀢𑀻𑀢𑀺 𑀅𑀢𑁆𑀢𑀦𑁄 𑀙𑀦𑁆𑀤𑀸𑀤𑀻𑀦𑀁 𑀆𑀳𑀝𑀪𑀸𑀯𑀁 𑀏𑀓𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀦 𑀓𑀣𑁂𑀢𑀺. 𑀲𑀜𑁆𑀘𑀺𑀘𑁆𑀘𑀸𑀢𑀺 𑀲𑀜𑁆𑀘𑁂𑀢𑁂𑀢𑁆𑀯𑀸 𑀚𑀸𑀦𑀦𑁆𑀢𑁄𑀬𑁂𑀯 𑀅𑀦𑀸𑀤𑀭𑀺𑀬𑁄 𑀦𑀸𑀭𑁄𑀘𑁂𑀢𑀺, 𑀤𑀼𑀓𑁆𑀓𑀝𑀁 𑀳𑁄𑀢𑀺.

𑁨𑁬𑁪𑁮. 𑀬𑁂 𑀢𑁂𑀢𑀺 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀯𑀸 𑀦𑀯𑀸 𑀯𑀸 𑀫𑀚𑁆𑀛𑀺𑀫𑀸 𑀯𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀳𑀘𑀭𑀺𑀬𑁂𑀦 𑀲𑀫𑀣𑁄𑀧𑀺 𑀕𑀬𑁆𑀳𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘 𑀇𑀥 𑀢𑀭𑀼𑀡𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀸𑀢𑀺 𑀏𑀢𑁆𑀣 𑀢𑀭𑀼𑀡𑀸𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀭𑀢𑁆𑀢𑀺𑀦𑁆𑀤𑀺𑀯𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀢𑀦𑁆𑀤𑀺𑀢𑀸𑀢𑀺 𑀅𑀦𑀮𑀲𑀸.

‘‘𑀭𑀢𑁆𑀢𑀺𑀦𑁆𑀤𑀺𑀯’’𑀦𑁆𑀢𑀺 𑀏𑀢𑁆𑀣 𑀭𑀢𑁆𑀢𑀺-𑀲𑀤𑁆𑀤𑁂𑀦 𑀭𑀢𑁆𑀢𑀺𑀬𑀸𑀬𑁂𑀯 𑀕𑀳𑀡𑀁, 𑀉𑀤𑀸𑀳𑀼 𑀏𑀓𑀤𑁂𑀲𑀲𑁆𑀲𑀸𑀢𑀺 𑀆𑀳 ‘‘𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢’’𑀦𑁆𑀢𑀺. 𑀧𑀼𑀩𑁆𑀩𑀸 𑀘 𑀲𑀸 𑀭𑀢𑁆𑀢𑀺 𑀘𑀸𑀢𑀺 𑀧𑀼𑀩𑁆𑀩𑀭𑀢𑁆𑀢𑀺, 𑀧𑀞𑀫𑀬𑀸𑀫𑁄, 𑀅𑀧𑀭𑀸 𑀘 ¶ 𑀲𑀸 𑀭𑀢𑁆𑀢𑀺 𑀘𑀸𑀢𑀺 𑀅𑀧𑀭𑀭𑀢𑁆𑀢𑀺, 𑀧𑀘𑁆𑀙𑀺𑀫𑀬𑀸𑀫𑁄, 𑀧𑀼𑀩𑁆𑀩𑀭𑀢𑁆𑀢𑀺 𑀘 𑀅𑀧𑀭𑀭𑀢𑁆𑀢𑀺 𑀘𑀸𑀢𑀺 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂 𑀲𑀫𑀸𑀲𑀦𑁆𑀢𑁂 𑀅-𑀓𑀸𑀭𑀧𑀘𑁆𑀘𑀬𑀁 𑀓𑀢𑁆𑀯𑀸 ‘‘𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀫𑀚𑁆𑀛𑀺𑀫𑀬𑀸𑀫𑁂 𑀓𑀸𑀬𑀤𑀭𑀣𑀯𑀽𑀧𑀲𑀫𑀦𑀢𑁆𑀣𑀸𑀬 𑀲𑀼𑀧𑀦𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀦𑀺𑀭𑀦𑁆𑀢𑀭𑀪𑀸𑀯𑀦𑀸𑀦𑀼𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸 𑀧𑀭𑀸𑀬𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀧𑀭𑀁 ¶ 𑀅𑀬𑀦𑀁 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀭𑀸𑀬𑀦𑀸, 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁬𑁪𑁯. 𑀮𑀤𑁆𑀥𑁄 𑀨𑀸𑀲𑀼𑀯𑀺𑀳𑀸𑀭𑁄 𑀬𑁂𑀳𑀺 𑀢𑁂 𑀮𑀤𑁆𑀥𑀨𑀸𑀲𑀼𑀯𑀺𑀳𑀸𑀭𑀸, 𑀢𑁂𑀲𑀁. 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀘 𑀲𑀼𑀔𑀯𑀺𑀳𑀸𑀭𑀲𑁆𑀲 𑀫𑀽𑀮𑀓𑀸𑀭𑀡𑀢𑁆𑀢𑀸 𑀢𑀭𑀼𑀡𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀧𑀝𑀺𑀮𑀤𑁆𑀥𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀬𑀸 𑀦 𑀧𑀭𑀺𑀳𑀸𑀦𑀺𑀢𑀺 𑀧𑀭𑀺𑀳𑀸𑀦𑀺 𑀦𑀸𑀫 𑀏𑀯𑀁 𑀓𑀢𑁂 𑀦 𑀪𑀯𑁂𑀬𑁆𑀬.

𑀓𑀢𑁆𑀢𑀺𑀓𑀫𑀸𑀲𑀓𑁂𑀢𑀺 𑀘𑀻𑀯𑀭𑀫𑀸𑀲𑀲𑀗𑁆𑀔𑀸𑀢𑁂 𑀓𑀢𑁆𑀢𑀺𑀓𑀫𑀸𑀲𑁂 𑀧𑀯𑀸𑀭𑀡𑀸𑀬 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀲𑀗𑁆𑀕𑀸𑀳𑁄’’𑀢𑀺 𑀤𑀻𑀖𑁄 𑀓𑀢𑁄, 𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

‘‘𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀘 𑀦𑀸𑀫𑀸𑀬𑀁 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀣𑀸𑀫𑀕𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀘 𑀦 𑀤𑀸𑀢𑀩𑁆𑀩𑁄. 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀦𑁄 𑀧𑀦 𑀲𑀩𑁆𑀩𑁂 𑀯𑀸 𑀳𑁄𑀦𑁆𑀢𑀼, 𑀉𑀧𑀟𑁆𑀠𑀸 𑀯𑀸, 𑀏𑀓𑀧𑀼𑀕𑁆𑀕𑀮𑁄 𑀯𑀸, 𑀏𑀓𑀲𑁆𑀲𑀧𑀺 𑀯𑀲𑁂𑀦 𑀤𑀸𑀢𑀩𑁆𑀩𑁄𑀬𑁂𑀯. 𑀤𑀺𑀦𑁆𑀦𑁂 𑀧𑀯𑀸𑀭𑀡𑀸𑀲𑀗𑁆𑀕𑀳𑁂 𑀅𑀦𑁆𑀢𑁄𑀯𑀲𑁆𑀲𑁂 𑀧𑀭𑀺𑀳𑀸𑀭𑁄𑀯 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸 𑀢𑁂𑀲𑀁 𑀲𑁂𑀦𑀸𑀲𑀦𑀁 𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺. 𑀢𑁂𑀳𑀺𑀧𑀺 𑀙𑀺𑀦𑁆𑀦𑀯𑀲𑁆𑀲𑁂𑀳𑀺 𑀦 𑀪𑀯𑀺𑀢𑀩𑁆𑀩𑀁, 𑀧𑀯𑀸𑀭𑁂𑀢𑁆𑀯𑀸 𑀧𑀦 𑀅𑀦𑁆𑀢𑀭𑀸𑀧𑀺 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁 𑀮𑀪𑀦𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁧).

𑀧𑀯𑀸𑀭𑀡𑀸𑀲𑀗𑁆𑀕𑀳𑀲𑁆𑀲 ¶ 𑀤𑀸𑀦𑀧𑁆𑀧𑀓𑀸𑀭𑁄 𑀧𑀦 𑀧𑀸𑀴𑀺𑀢𑁄 𑀕𑀳𑁂𑀢𑀩𑁆𑀩𑁄.

𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀘𑀫𑁆𑀫𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁫𑁦. 𑀏𑀴𑀓𑀸 𑀘 𑀅𑀚𑀸 𑀘 𑀫𑀺𑀕𑀸 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀧𑀲𑀽𑀦𑀁 𑀤𑁆𑀯𑀦𑁆𑀤𑁂 𑀏𑀓𑀢𑁆𑀢𑀦𑀧𑀼𑀁𑀲𑀓𑀢𑁆𑀢𑀲𑁆𑀲 𑀯𑀺𑀪𑀸𑀲𑀺𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀏𑀴𑀓𑀸𑀦𑀜𑁆𑀘 𑀅𑀚𑀸𑀦𑀜𑁆𑀘 𑀫𑀺𑀕𑀸𑀦𑀁 𑀭𑁄𑀳𑀺𑀢𑁂𑀡𑀺𑀓𑀼𑀭𑀼𑀗𑁆𑀕𑀸𑀦𑀜𑁆𑀘. 𑀧𑀲𑀤𑀸 𑀘 𑀫𑀺𑀕𑀫𑀸𑀢𑀸 𑀘 𑀧𑀲𑀤𑀫𑀺𑀕𑀫𑀸𑀢𑀸, ‘‘𑀧𑀲𑀤𑀫𑀺𑀕𑀫𑀸𑀢𑀼𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀧𑀲𑀤’’𑀦𑁆𑀢𑀺 𑀦𑀺𑀕𑁆𑀕𑀳𑀺𑀢𑀸𑀕𑀫𑁄. 𑀧𑀲𑀤𑀫𑀺𑀕𑀫𑀸𑀢𑀼𑀬𑀸 𑀘 𑀘𑀫𑁆𑀫𑀁 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀫𑀺𑀕𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀕𑀳𑀺𑀢𑀸𑀦𑀫𑁂𑀯𑁂𑀢𑁆𑀣 𑀯𑀺𑀪𑀸𑀕𑀤𑀲𑁆𑀲𑀦𑀁 ‘‘𑀭𑁄𑀳𑀺𑀢𑁂𑀡𑀻’’𑀢𑀺𑀆𑀤𑀺. 𑀭𑁄𑀳𑀺𑀢𑀸𑀤𑀬𑁄 𑀫𑀺𑀕𑀯𑀺𑀪𑀸𑀕𑀯𑀺𑀲𑁂𑀲𑀸.

𑁨𑁬𑁫𑁧. 𑀏𑀢𑁂𑀲𑀁 ¶ 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀸𑀦𑀁 𑀘𑀫𑁆𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀘𑀫𑁆𑀫𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀦𑁆𑀢𑀺 𑀘 𑁋

‘‘𑀫𑀓𑁆𑀓𑀝𑁄 𑀓𑀸𑀴𑀲𑀻𑀳𑁄 𑀘, 𑀲𑀭𑀪𑁄 𑀓𑀤𑀮𑀻𑀫𑀺𑀕𑁄;

𑀬𑁂 𑀘 𑀯𑀸𑀴𑀫𑀺𑀕𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁨𑁫𑁯) 𑁋

𑀅𑀝𑁆𑀞𑀓𑀣𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀁 𑀘𑀫𑁆𑀫𑀫𑀸𑀳. 𑀫𑀓𑁆𑀓𑀝𑁄 𑀦𑀸𑀫 𑀲𑀸𑀔𑀫𑀺𑀕𑁄. 𑀓𑀸𑀴𑀲𑀻𑀳𑁄 𑀦𑀸𑀫 𑀫𑀳𑀸𑀫𑀼𑀔𑀯𑀸𑀦𑀭𑀚𑀸𑀢𑀺𑀓𑁄. 𑀯𑀸𑀴𑀫𑀺𑀕𑀸 𑀦𑀸𑀫 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄. 𑀬𑀣𑀸𑀳 𑁋 ‘‘𑀢𑀢𑁆𑀣 𑀯𑀸𑀴𑀫𑀺𑀕𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀅𑀘𑁆𑀙𑀢𑀭𑀘𑁆𑀙𑀸, 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀬𑁂𑀯, 𑀬𑁂𑀲𑀁 𑀧𑀦 𑀘𑀫𑁆𑀫𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑁆𑀢𑀫𑀲𑁄 𑀕𑁄𑀫𑀳𑀺𑀁𑀲𑀲𑁆𑀲𑀫𑀺𑀴𑀸𑀭𑀸𑀤𑀬𑁄𑀧𑀺 𑀲𑀩𑁆𑀩𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘𑀯𑀸𑀴𑀫𑀺𑀕𑀸’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀣𑀯𑀺𑀓𑀸 ¶ 𑀘 𑀉𑀧𑀸𑀳𑀦𑀸 𑀘 𑀣𑀯𑀺𑀓𑁄𑀧𑀸𑀳𑀦𑀁. 𑀅𑀫𑀸𑀦𑀼𑀲𑀁 𑀫𑀦𑀼𑀲𑁆𑀲𑀘𑀫𑁆𑀫𑀭𑀳𑀺𑀢𑀁 𑀲𑀩𑁆𑀩𑀁 𑀘𑀫𑁆𑀫𑀁 𑀣𑀯𑀺𑀓𑁄𑀧𑀸𑀳𑀦𑁂 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀣𑀯𑀺𑀓𑀸𑀢𑀺 𑀉𑀧𑀸𑀳𑀦𑀸𑀤𑀺𑀓𑁄𑀲𑀓𑀲𑁆𑀲 𑀕𑀳𑀡𑀁. 𑀬𑀣𑀸𑀳 ‘‘𑀫𑀦𑀼𑀲𑁆𑀲𑀘𑀫𑁆𑀫𑀁 𑀞𑀧𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀘𑀫𑁆𑀫𑁂𑀦 𑀉𑀧𑀸𑀳𑀦𑀸 𑀯𑀝𑁆𑀝𑀢𑀺. 𑀉𑀧𑀸𑀳𑀦𑀸𑀓𑁄𑀲𑀓𑀲𑀢𑁆𑀣𑀓𑀓𑁄𑀲𑀓𑀓𑀼𑀜𑁆𑀚𑀺𑀓𑀸𑀓𑁄𑀲𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁫𑁯).

𑁨𑁬𑁫𑁨. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦’’𑀦𑁆𑀢𑀺 (𑀫𑀳𑀸𑀯. 𑁨𑁫𑁯) 𑀯𑀘𑀦𑀢𑁄 ‘‘𑀯𑀝𑁆𑀝𑀦𑁆𑀢𑀺 𑀫𑀚𑁆𑀛𑀺𑀫𑁂 𑀤𑁂𑀲𑁂, 𑀦 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑁂 𑀤𑁂𑀲𑁂𑀢𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁂 𑀫𑀚𑁆𑀛𑀺𑀫𑀤𑁂𑀲𑁂. 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀢𑀺 𑀘𑀢𑀼𑀧𑀝𑀮𑀢𑁄 𑀧𑀝𑁆𑀞𑀸𑀬 𑀩𑀳𑀼𑀧𑀝𑀮𑀸 𑀉𑀧𑀸𑀳𑀦𑀸. 𑀬𑀣𑀸𑀳 𑁋 ‘‘𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀢𑀺 𑀘𑀢𑀼𑀧𑀝𑀮𑀢𑁄 𑀧𑀝𑁆𑀞𑀸𑀬 𑀯𑀼𑀘𑁆𑀘𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁫). 𑀫𑀚𑁆𑀛𑀺𑀫𑀤𑁂𑀲𑁂 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀢𑁄𑀆𑀭𑀸𑀫𑁂𑀢𑀺 𑀏𑀢𑁆𑀣 𑀧𑀓𑀭𑀡𑀢𑁄 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀮𑀩𑁆𑀪𑀢𑀺, 𑀕𑀺𑀮𑀸𑀦𑀸𑀦𑀫𑀺𑀢𑀭𑁂𑀲𑀜𑁆𑀘 𑀲𑀩𑁆𑀩𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀧𑀺 𑀘𑀸𑀢𑀺 𑀅𑀦𑁆𑀢𑁄𑀆𑀭𑀸𑀫𑁂, 𑀩𑀳𑀺 𑀘𑀸𑀢𑀺 𑀲𑀩𑁆𑀩𑀢𑁆𑀣𑀸𑀧𑀺. 𑀭𑁄𑀕𑀺𑀦𑁄𑀢𑀺 𑀕𑀺𑀮𑀸𑀦𑀲𑁆𑀲 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁫𑁩. 𑀧𑀼𑀝𑀩𑀤𑁆𑀥𑀸 𑀔𑀮𑁆𑀮𑀓𑀩𑀤𑁆𑀥𑀸𑀘𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀲𑁂𑀲𑁄 𑀧𑀦𑁂𑀢𑀸𑀲𑀁 𑀅𑀝𑁆𑀞𑀓𑀣𑀸𑀬𑀫𑁂𑀯 ¶ 𑀯𑀼𑀢𑁆𑀢𑁄 ‘‘𑀧𑀼𑀝𑀩𑀤𑁆𑀥𑀸𑀢𑀺 𑀬𑁄𑀦𑀓𑀉𑀧𑀸𑀳𑀦𑀸 𑀯𑀼𑀘𑁆𑀘𑀢𑀺, 𑀬𑀸 𑀬𑀸𑀯𑀚𑀗𑁆𑀖𑀢𑁄 𑀲𑀩𑁆𑀩𑀧𑀸𑀤𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀔𑀮𑁆𑀮𑀓𑀩𑀤𑁆𑀥𑀸𑀢𑀺 𑀧𑀡𑁆𑀳𑀺𑀧𑀺𑀥𑀸𑀦𑀢𑁆𑀣𑀁 𑀢𑀮𑁂 𑀔𑀮𑁆𑀮𑀓𑀁 𑀩𑀦𑁆𑀥𑀺𑀢𑁆𑀯𑀸 𑀓𑀢𑀸’’𑀢𑀺. 𑀧𑀸𑀮𑀺𑀕𑀼𑀡𑁆𑀞𑀺𑀫𑀸 𑀘 ‘‘𑀧𑀮𑀺𑀕𑀼𑀡𑁆𑀞𑀺𑀢𑁆𑀯𑀸 𑀓𑀢𑀸, 𑀬𑀸 𑀉𑀧𑀭𑀺 𑀧𑀸𑀤𑀫𑀢𑁆𑀢𑀫𑁂𑀯 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀦 𑀚𑀗𑁆𑀖’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀸𑀯. 𑀢𑀽𑀮𑀧𑀼𑀡𑁆𑀡𑀸𑀢𑀺 𑀢𑀽𑀮𑀧𑀺𑀘𑀼𑀦𑀸 𑀧𑀽𑀭𑁂𑀢𑁆𑀯𑀸 𑀓𑀢𑀸.

𑀲𑀩𑁆𑀩𑀸𑀯 ¶ 𑀦𑀻𑀮𑀸 𑀲𑀩𑁆𑀩𑀦𑀻𑀮𑀸, 𑀲𑀸 𑀆𑀤𑀺 𑀬𑀸𑀲𑀁 𑀢𑀸 𑀲𑀩𑁆𑀩𑀦𑀻𑀮𑀸𑀤𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀸𑀦𑀸𑀫𑀭𑀢𑁆𑀢𑀧𑀭𑀺𑀬𑀦𑁆𑀢𑀸𑀦𑀁 𑀕𑀳𑀡𑀁. 𑀏𑀢𑀸𑀲𑀁 𑀲𑀭𑀽𑀧𑀁 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁 ‘‘𑀦𑀻𑀮𑀺𑀓𑀸 𑀉𑀫𑀸𑀧𑀼𑀧𑁆𑀨𑀯𑀡𑁆𑀡𑀸 𑀳𑁄𑀢𑀺, 𑀧𑀻𑀢𑀺𑀓𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀸, 𑀮𑁄𑀳𑀺𑀢𑀺𑀓𑀸 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀸, 𑀫𑀜𑁆𑀚𑀺𑀝𑁆𑀞𑀺𑀓𑀸 𑀫𑀜𑁆𑀚𑀺𑀝𑁆𑀞𑀯𑀡𑁆𑀡𑀸 𑀏𑀯, 𑀓𑀡𑁆𑀳𑀸 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸, 𑀫𑀳𑀸𑀭𑀗𑁆𑀕𑀭𑀢𑁆𑀢𑀸 𑀲𑀢𑀧𑀤𑀺𑀧𑀺𑀝𑁆𑀞𑀺𑀯𑀡𑁆𑀡𑀸, 𑀫𑀳𑀸𑀦𑀸𑀫𑀭𑀢𑁆𑀢𑀸 𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸 𑀳𑁄𑀢𑀺 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘𑀧𑀤𑀼𑀫𑀧𑀼𑀧𑁆𑀨𑀯𑀡𑁆𑀡𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁬). 𑀲𑀩𑁆𑀩𑀦𑀻𑀮𑀸𑀤𑀬𑁄𑀧𑀺 𑀘𑀸𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀦𑀻𑀮𑀸𑀤𑀺𑀯𑀤𑁆𑀥𑀺𑀓𑀸𑀦𑀁 𑀕𑀳𑀡𑀁.

𑁨𑁬𑁫𑁪. 𑀘𑀺𑀢𑁆𑀭𑀸𑀢𑀺 𑀯𑀺𑀘𑀺𑀢𑁆𑀭𑀸. 𑀫𑁂𑀡𑁆𑀟𑀯𑀺𑀲𑀸𑀡𑀽𑀧𑀫𑀯𑀤𑁆𑀥𑀺𑀓𑀸𑀢𑀺 𑀫𑁂𑀡𑁆𑀟𑀸𑀦𑀁 𑀯𑀺𑀲𑀸𑀡𑀲𑀤𑀺𑀲𑀯𑀤𑁆𑀥𑀺𑀓𑀸, 𑀓𑀡𑁆𑀡𑀺𑀓𑀝𑁆𑀞𑀸𑀦𑁂 𑀫𑁂𑀡𑁆𑀟𑀲𑀺𑀗𑁆𑀕𑀲𑀡𑁆𑀞𑀸𑀦𑁂 𑀯𑀤𑁆𑀥𑁂 𑀬𑁄𑀚𑁂𑀢𑁆𑀯𑀸 𑀓𑀢𑀸𑀢𑀺 𑀅𑀢𑁆𑀣𑁄. ‘‘𑀫𑁂𑀡𑁆𑀟𑀯𑀺𑀲𑀸𑀡𑀽𑀧𑀫𑀯𑀤𑁆𑀥𑀺𑀓𑀸’’𑀢𑀺 𑀇𑀤𑀁 𑀅𑀚𑀯𑀺𑀲𑀸𑀡𑀽𑀧𑀫𑀯𑀤𑁆𑀥𑀺𑀓𑀸𑀦𑀁 𑀉𑀧𑀮𑀓𑁆𑀔𑀡𑀁. 𑀫𑁄𑀭𑀲𑁆𑀲 𑀧𑀺𑀜𑁆𑀙𑁂𑀦 𑀧𑀭𑀺𑀲𑀺𑀩𑁆𑀩𑀺𑀢𑀸𑀢𑀺 𑀢𑀮𑁂𑀲𑀼 𑀯𑀸 𑀯𑀤𑁆𑀥𑁂𑀲𑀼 𑀯𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀲𑀼𑀢𑁆𑀢𑀓𑀲𑀤𑀺𑀲𑁂𑀳𑀺 𑀧𑀭𑀺𑀲𑀺𑀩𑁆𑀩𑀺𑀢𑀸. 𑀉𑀧𑀸𑀳𑀦𑀸 𑀦 𑀘 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁫𑁫. 𑀫𑀚𑁆𑀚𑀸𑀭𑀸𑀢𑀺 𑀩𑀺𑀴𑀸𑀭𑀸. 𑀓𑀸𑀴𑀓𑀸 𑀭𑀼𑀓𑁆𑀔𑀓𑀡𑁆𑀝𑀓𑀸. 𑀊𑀮𑀽𑀓𑀸 𑀧𑀓𑁆𑀔𑀺𑀩𑀺𑀴𑀸𑀮𑀸. 𑀲𑀻𑀳𑀸𑀢𑀺 𑀓𑁂𑀲𑀭𑀲𑀻𑀳𑀸𑀤𑀬𑁄 𑀲𑀻𑀳𑀸. 𑀉𑀤𑁆𑀤𑀸𑀢𑀺 𑀘𑀢𑀼𑀧𑁆𑀧𑀤𑀚𑀸𑀢𑀺𑀓𑀸. 𑀤𑀻𑀧𑀻 𑀲𑀤𑁆𑀤𑀮𑀸. 𑀅𑀚𑀺𑀦𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀺𑀓𑀲𑁆𑀲. 𑀧𑀭𑀺𑀓𑁆𑀔𑀝𑀸𑀢𑀺 𑀉𑀧𑀸𑀳𑀦𑀧𑀭𑀺𑀬𑀦𑁆𑀢𑁂 𑀘𑀻𑀯𑀭𑁂 𑀅𑀦𑀼𑀯𑀸𑀢𑀁 𑀯𑀺𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀫𑁆𑀫𑀁 𑀬𑁄𑀚𑁂𑀢𑁆𑀯𑀸 𑀓𑀢𑀸.

𑁨𑁬𑁫𑁬. 𑀲𑀘𑁂 𑀈𑀤𑀺𑀲𑀸 𑀉𑀧𑀸𑀳𑀦𑀸 𑀮𑀪𑀦𑁆𑀢𑀺, 𑀢𑀸𑀲𑀁 𑀯𑀴𑀜𑁆𑀚𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀝𑀸𑀤𑀺𑀁 𑀅𑀧𑀦𑁂𑀢𑁆𑀯𑀸’’𑀢𑀺𑀆𑀤𑀺. 𑀧𑀼𑀝𑀸𑀤𑀺𑀁 𑀲𑀩𑁆𑀩𑀲𑁄 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀅𑀧𑀦𑁂𑀢𑁆𑀯𑀸 𑀯𑀸 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀏𑀯𑀫𑀓𑀢𑁆𑀯𑀸 𑀮𑀤𑁆𑀥𑀦𑀻𑀳𑀸𑀭𑁂𑀦𑁂𑀯 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑀣𑀸𑀳 𑁋 ‘‘𑀏𑀢𑀸𑀲𑀼 𑀬𑀁 𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀲𑀘𑁂 ¶ 𑀢𑀸𑀦𑀺 𑀔𑀮𑁆𑀮𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀴𑀜𑁆𑀚𑀺𑀢𑀼𑀁, 𑀯𑀴𑀜𑁆𑀚𑁂𑀢𑀩𑁆𑀩𑀸, 𑀢𑁂𑀲𑀼 𑀧𑀦 𑀲𑀢𑀺 𑀯𑀴𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁬).

𑀯𑀡𑁆𑀡𑀪𑁂𑀤𑀁 ¶ 𑀢𑀣𑀸 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀏𑀓𑀤𑁂𑀲𑁂𑀦𑀸’’𑀢𑀺 𑀲𑁂𑀲𑁄. ‘‘𑀲𑀩𑁆𑀩𑀲𑁄 𑀯𑀸’’𑀢𑀺 𑀆𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄 𑀯𑀸 𑀏𑀓𑀤𑁂𑀲𑁂𑀦 𑀯𑀸 𑀯𑀡𑁆𑀡𑀪𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑀦𑀻𑀮𑀸𑀤𑀬𑁄 𑀉𑀧𑀸𑀳𑀦𑀸 𑀥𑀸𑀭𑁂𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑀣𑀸 𑀅𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑀣𑀸𑀳 ‘‘𑀏𑀢𑀸𑀲𑀼 𑀬𑀁 𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀭𑀚𑀦𑀁 𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑁆𑀯𑀸 𑀯𑀡𑁆𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀪𑀺𑀦𑁆𑀦𑁂 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺. 𑀦𑀻𑀮𑀯𑀤𑁆𑀥𑀺𑀓𑀸𑀤𑀬𑁄𑀧𑀺 𑀯𑀡𑁆𑀡𑀪𑁂𑀤𑀁 𑀓𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀸.

𑁨𑁬𑁫𑁭. 𑀢𑀢𑁆𑀣 𑀞𑀸𑀦𑁂 𑀧𑀲𑁆𑀲𑀸𑀯𑀧𑀸𑀤𑀼𑀓𑀸, 𑀯𑀘𑁆𑀘𑀧𑀸𑀤𑀼𑀓𑀸, 𑀆𑀘𑀫𑀦𑀧𑀸𑀤𑀼𑀓𑀸𑀢𑀺 𑀢𑀺𑀲𑁆𑀲𑁄 𑀧𑀸𑀤𑀼𑀓𑀸𑀬𑁄 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀧𑀺 𑀧𑀸𑀤𑀼𑀓𑀸 𑀢𑀸𑀮𑀧𑀢𑁆𑀢𑀺𑀓𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀲𑀗𑁆𑀓𑀫𑀦𑀻𑀬𑀸 𑀧𑀸𑀤𑀼𑀓𑀸 𑀥𑀸𑀭𑁂𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁫𑁮. 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀉𑀘𑁆𑀘𑀸𑀲𑀬𑀦𑀲𑀜𑁆𑀜𑀺𑀢𑀁 𑀆𑀲𑀦𑁆𑀤𑀺𑀜𑁆𑀘𑁂𑀯 𑀧𑀮𑁆𑀮𑀗𑁆𑀓𑀜𑁆𑀘 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀆𑀲𑀦𑁆𑀤𑀻 𑀯𑀼𑀢𑁆𑀢𑀮𑀓𑁆𑀔𑀡𑀸𑀯. 𑀧𑀮𑁆𑀮𑀗𑁆𑀓𑁄𑀢𑀺 𑀧𑀸𑀤𑁂𑀲𑀼 𑀆𑀳𑀭𑀺𑀫𑀸𑀦𑀺 𑀯𑀸𑀴𑀭𑀽𑀧𑀸𑀦𑀺 𑀞𑀧𑁂𑀢𑁆𑀯𑀸 𑀓𑀢𑁄, 𑀏𑀓𑀲𑁆𑀫𑀺𑀁𑀬𑁂𑀯 𑀤𑀸𑀭𑀼𑀫𑁆𑀳𑀺 𑀓𑀝𑁆𑀞𑀓𑀫𑁆𑀫𑀯𑀲𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸𑀦𑀺 𑀅𑀲𑀁𑀳𑀸𑀭𑀺𑀫𑀸𑀦𑀺 𑀢𑀢𑁆𑀭𑀝𑁆𑀞𑀸𑀦𑁂𑀯 𑀯𑀸𑀴𑀭𑀽𑀧𑀸𑀦𑀺 𑀬𑀲𑁆𑀲 𑀧𑀸𑀤𑁂𑀲𑀼 𑀲𑀦𑁆𑀢𑀺, 𑀏𑀯𑀭𑀽𑀧𑁄 𑀧𑀮𑁆𑀮𑀗𑁆𑀓𑁄 𑀓𑀧𑁆𑀧𑀢𑀻𑀢𑀺 ‘‘𑀆𑀳𑀭𑀺𑀫𑁂𑀦𑀸’’𑀢𑀺 𑀇𑀫𑀺𑀦𑀸𑀯 𑀤𑀻𑀧𑀺𑀢𑀁. ‘‘𑀅𑀓𑀧𑁆𑀧𑀺𑀬𑀭𑀽𑀧𑀓𑀢𑁄 𑀅𑀓𑀧𑁆𑀧𑀺𑀬𑀫𑀜𑁆𑀘𑁄 𑀧𑀮𑁆𑀮𑀗𑁆𑀓𑁄’’𑀢𑀺 𑀳𑀺 𑀲𑀸𑀭𑀲𑀫𑀸𑀲𑁂 𑀯𑀼𑀢𑁆𑀢𑀁.

𑁨𑁬𑁫𑁯. 𑀕𑁄𑀦𑀓𑀦𑁆𑀢𑀺 𑀤𑀻𑀖𑀮𑁄𑀫𑀓𑀫𑀳𑀸𑀓𑁄𑀚𑀯𑀁. 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀓𑀺𑀭 𑀢𑀲𑁆𑀲 𑀮𑁄𑀫𑀸𑀦𑀺, 𑀓𑀸𑀴𑀯𑀡𑁆𑀡𑀜𑁆𑀘 𑀳𑁄𑀢𑀺. ‘‘𑀘𑀢𑀼𑀭𑀗𑁆𑀕𑀼𑀮𑀢𑁄 𑀊𑀦𑀓𑀧𑁆𑀧𑀫𑀸𑀡𑀮𑁄𑀫𑁄 𑀓𑁄𑀚𑀯𑁄 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀼𑀢𑁆𑀢𑀓𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀞𑀢𑁆𑀯𑀸 𑀦𑀘𑁆𑀘𑀦𑀬𑁄𑀕𑁆𑀕𑀁 ¶ 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀘𑀺𑀢𑁆𑀢𑀦𑁆𑀢𑀺 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑀸𑀤𑀺𑀓𑀯𑀺𑀘𑀺𑀢𑁆𑀭𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀧𑀝𑀺𑀓𑀦𑁆𑀢𑀺 𑀉𑀡𑁆𑀡𑀸𑀫𑀬𑀁 𑀲𑁂𑀢𑀢𑁆𑀣𑀭𑀡𑀁. 𑀧𑀝𑀮𑀺𑀓𑀦𑁆𑀢𑀺 𑀖𑀦𑀧𑀼𑀧𑁆𑀨𑀓𑀁 𑀉𑀡𑁆𑀡𑀸𑀫𑀬𑀁 𑀮𑁄𑀳𑀺𑀢𑀢𑁆𑀣𑀭𑀡𑀁, 𑀬𑁄 ‘‘𑀆𑀫𑀮𑀓𑀧𑀢𑁆𑀢𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀏𑀓𑀦𑁆𑀢𑀮𑁄𑀫𑀺𑀦𑁆𑀢𑀺 𑀉𑀪𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀯𑀺𑀓𑀢𑀺𑀦𑁆𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑀯𑀺𑀘𑀺𑀢𑁆𑀭𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. ‘‘𑀏𑀓𑀦𑁆𑀢𑀮𑁄𑀫𑀻𑀢𑀺 𑀏𑀓𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 𑀤𑀻𑀖𑀦𑀺𑀓𑀸. 𑀢𑀽𑀮𑀺𑀓𑀦𑁆𑀢𑀺 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀺𑀢𑀽𑀮𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀢𑀽𑀮𑀸𑀦𑀁 𑀅𑀜𑁆𑀜𑀢𑀭𑀧𑀼𑀡𑁆𑀡𑀁 𑀧𑀓𑀢𑀺𑀢𑀽𑀮𑀺𑀓𑀁. 𑀉𑀤𑁆𑀤𑀮𑁄𑀫𑀺𑀓𑀦𑁆𑀢𑀺 𑀏𑀓𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. ‘‘𑀉𑀤𑁆𑀤𑀮𑁄𑀫𑀻𑀢𑀺 𑀉𑀪𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀏𑀓𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ¶ 𑀯𑀼𑀢𑁆𑀢𑀁. 𑀲𑀸𑀭𑀲𑀫𑀸𑀲𑁂 𑀧𑀦 ‘‘𑀉𑀤𑁆𑀤𑀮𑁄𑀫𑀻𑀢𑀺 𑀏𑀓𑀢𑁄 𑀉𑀕𑁆𑀕𑀢𑀧𑀼𑀧𑁆𑀨𑀁. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀉𑀪𑀢𑁄 𑀉𑀕𑁆𑀕𑀢𑀧𑀼𑀧𑁆𑀨’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁬𑁬𑁦. 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. ‘‘𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀦𑁆𑀢𑀺 𑀓𑁄𑀲𑁂𑀬𑁆𑀬𑀓𑀲𑀝𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁫) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀓𑀦𑁆𑀢𑀺𑀢𑀓𑁄𑀲𑁂𑀬𑁆𑀬𑀧𑀼𑀝𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑀺𑀬𑀲𑀼𑀢𑁆𑀢𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀁 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀁 𑀧𑀦 𑀯𑀝𑁆𑀝𑀢𑀺.

𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑁆𑀣 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁 𑀲𑀩𑁆𑀩𑀸𑀦𑁂𑀯 𑀕𑁄𑀦𑀓𑀸𑀤𑀻𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀦 𑀯𑀝𑁆𑀝𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓’’𑀦𑁆𑀢𑀺 𑀏𑀢𑁂𑀦 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀸𑀧𑀺 𑀢𑀽𑀮𑀺𑀓𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀬𑀸𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺, 𑀢𑀸𑀦𑀺 𑀪𑀽𑀫𑀢𑁆𑀣𑀭𑀡𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁 𑀫𑀜𑁆𑀘𑀸𑀤𑀻𑀲𑀼 𑀘 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 ¶ 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀕𑀭𑀼𑀓𑁂 𑀞𑀸𑀢𑀩𑁆𑀩𑀢𑁆𑀢𑀸 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀢𑁆𑀢𑀦𑁆𑀢𑀺𑀓𑀤𑁂𑀲𑀦𑀸𑀬𑀁 𑀧𑀦 𑀕𑀳𑀝𑁆𑀞𑀸𑀦𑀫𑁆𑀧𑀺 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁…𑀧𑁂… 𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀅𑀧𑀭𑁂.

𑀳𑀢𑁆𑀣𑀺𑀅𑀲𑁆𑀲𑀭𑀣𑀢𑁆𑀣𑀭𑀦𑁆𑀢𑀺 𑀳𑀢𑁆𑀣𑀺𑀧𑀺𑀝𑁆𑀞𑁂 𑀅𑀢𑁆𑀣𑀭𑀺𑀢𑀁 𑀅𑀢𑁆𑀣𑀭𑀡𑀁 𑀳𑀢𑁆𑀣𑀢𑁆𑀣𑀭𑀡𑀁 𑀦𑀸𑀫. 𑀅𑀲𑁆𑀲𑀭𑀣𑀢𑁆𑀣𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀤𑀮𑀺𑀫𑀺𑀕𑀧𑀯𑀭-𑀧𑀘𑁆𑀘𑀢𑁆𑀣𑀭𑀡𑀓𑀫𑁆𑀧𑀺 𑀘𑀸𑀢𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀓𑀢𑀁 𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀭 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀧𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀧𑀺-𑀲𑀤𑁆𑀤𑁂𑀦 𑀅𑀚𑀺𑀦𑀧𑁆𑀧𑀯𑁂𑀡𑀻 𑀕𑀳𑀺𑀢𑀸. 𑀅𑀚𑀺𑀦𑀧𑁆𑀧𑀯𑁂𑀡𑀻 𑀦𑀸𑀫 𑀅𑀚𑀺𑀦𑀘𑀫𑁆𑀫𑁂𑀳𑀺 𑀫𑀜𑁆𑀘𑀧𑀫𑀸𑀡𑁂𑀦 𑀲𑀺𑀩𑁆𑀩𑁂𑀢𑁆𑀯𑀸 𑀓𑀢𑀸 𑀧𑀯𑁂𑀡𑀻. 𑀢𑀸𑀦𑀺 𑀓𑀺𑀭 𑀘𑀫𑁆𑀫𑀸𑀦𑀺 𑀲𑀼𑀔𑀼𑀫𑀢𑀭𑀸𑀦𑀺, 𑀢𑀲𑁆𑀫𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀦𑀺 𑀓𑀢𑁆𑀯𑀸 𑀲𑀺𑀩𑁆𑀩𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑁆𑀧𑀯𑁂𑀡𑀻’’𑀢𑀺.

𑁨𑁬𑁬𑁧. 𑀭𑀢𑁆𑀢𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸𑀢𑀺 𑀓𑀼𑀲𑀼𑀫𑁆𑀪𑀸𑀤𑀺𑀭𑀢𑁆𑀢𑀲𑁆𑀲 𑀮𑁄𑀳𑀺𑀢𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀢𑀁 𑀲𑀬𑀦𑀸𑀲𑀦𑀜𑁆𑀘. 𑀓𑀲𑀸𑀯𑀭𑀢𑁆𑀢𑀯𑀺𑀢𑀸𑀦𑀲𑁆𑀲 𑀧𑀦 𑀳𑁂𑀝𑁆𑀞𑀸 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀳𑁂𑀝𑁆𑀞𑀸 𑀅𑀓𑀧𑁆𑀧𑀺𑀬𑁂’’𑀢𑀺𑀆𑀤𑀺.

𑀤𑁆𑀯𑀺𑀥𑀸 ¶ 𑀭𑀢𑁆𑀢𑀽𑀧𑀥𑀸𑀦𑀓𑀦𑁆𑀢𑀺 𑀲𑀻𑀲𑀧𑀲𑁆𑀲𑁂, 𑀧𑀸𑀤𑀧𑀲𑁆𑀲𑁂 𑀘𑀸𑀢𑀺 𑀉𑀪𑀢𑁄𑀧𑀲𑁆𑀲𑁂 𑀧𑀜𑁆𑀜𑀢𑁆𑀢𑀭𑀢𑁆𑀢𑀩𑀺𑀩𑁆𑀩𑁄𑀳𑀦𑀯𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁. 𑀇𑀤𑀁 𑀲𑀩𑁆𑀩𑀁 𑀅𑀓𑀧𑁆𑀧𑀺𑀬𑀁 𑀧𑀭𑀺𑀪𑀼𑀜𑁆𑀚𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺. ‘‘𑀬𑀁 𑀧𑀦 𑀏𑀓𑀫𑁂𑀯 𑀉𑀧𑀥𑀸𑀦𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀢𑁆𑀢𑀁 𑀯𑀸 𑀳𑁄𑀢𑀺 𑀧𑀤𑀼𑀫𑀯𑀡𑁆𑀡𑀁 𑀯𑀸 𑀯𑀺𑀘𑀺𑀢𑁆𑀭𑀁 𑀯𑀸, 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀁, 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁫𑁪) 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀦𑁂𑀯 𑀩𑁆𑀬𑀢𑀺𑀭𑁂𑀓𑀢𑁄 𑀯𑀼𑀢𑁆𑀢𑁄 𑀳𑁄𑀢𑀺. ‘‘𑀬𑁂𑀪𑀼𑀬𑁆𑀬𑀭𑀢𑁆𑀢𑀸𑀦𑀺𑀧𑀺 𑀤𑁆𑀯𑁂 𑀩𑀺𑀩𑁆𑀩𑁄𑀳𑀦𑀸𑀦𑀺 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀬𑁂𑀪𑀼𑀬𑁆𑀬𑁂𑀦 𑀭𑀢𑁆𑀢𑀯𑀺𑀢𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀏𑀢𑁆𑀣 ¶ 𑀘 𑀓𑀺𑀜𑁆𑀘𑀸𑀧𑀺 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀅𑀮𑁄𑀳𑀺𑀢𑀓𑀸𑀦𑀺 𑀤𑁆𑀯𑁂𑀧𑀺 𑀯𑀝𑁆𑀝𑀦𑁆𑀢𑀺𑀬𑁂𑀯, 𑀢𑀢𑁄 𑀉𑀢𑁆𑀢𑀭𑀺 𑀮𑀪𑀺𑀢𑁆𑀯𑀸 𑀅𑀜𑁆𑀜𑁂𑀲𑀁 𑀤𑀸𑀢𑀩𑁆𑀩𑀸𑀦𑀺, 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀜𑁆𑀘𑁂 𑀢𑀺𑀭𑀺𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀮𑀪𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀅𑀕𑀺𑀮𑀸𑀦𑀲𑁆𑀲 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀤𑁆𑀯𑀬𑀫𑁂𑀯 𑀯𑀝𑁆𑀝𑀢𑀺, 𑀕𑀺𑀮𑀸𑀦𑀲𑁆𑀲 𑀩𑀺𑀩𑁆𑀩𑁄𑀳𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭) 𑀯𑀼𑀢𑁆𑀢𑀢𑁆𑀢𑀸 𑀕𑀺𑀮𑀸𑀦𑁄𑀬𑁂𑀯 𑀫𑀜𑁆𑀘𑁂 𑀢𑀺𑀭𑀺𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀮𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁬𑁬𑁨. 𑀉𑀤𑁆𑀥𑀁 𑀲𑁂𑀢𑀯𑀺𑀢𑀸𑀦𑀫𑁆𑀧𑀺 𑀳𑁂𑀝𑁆𑀞𑀸 𑀅𑀓𑀧𑁆𑀧𑀺𑀬𑁂 𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀦𑁆𑀢𑀺 𑀅𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂.

𑁨𑁬𑁬𑁩. ‘‘𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀲𑀦𑁆𑀤𑀸𑀤𑀺𑀢𑁆𑀢𑀬𑀲𑁆𑀲 𑀯𑀝𑁆𑀝𑀦𑀸𑀓𑀸𑀭𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀦𑁆𑀢𑀺 𑀕𑁄𑀦𑀓𑀸𑀤𑀺 𑀤𑁆𑀯𑀺𑀥𑀸𑀭𑀢𑁆𑀢𑀽𑀧𑀥𑀸𑀦𑀓𑀧𑀭𑀺𑀬𑀦𑁆𑀢𑀁 𑀲𑀩𑁆𑀩𑀁. 𑀕𑀺𑀳𑀺𑀲𑀦𑁆𑀢𑀓𑀦𑁆𑀢𑀺 𑀕𑀺𑀳𑀻𑀦𑀁 𑀲𑀦𑁆𑀢𑀓𑀁 𑀢𑁂𑀳𑀺𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑁂𑀦 𑀯𑀸 𑀢𑁂𑀲𑀁 𑀆𑀡𑀢𑁆𑀢𑀺𑀬𑀸 𑀯𑀸 𑀧𑀜𑁆𑀜𑀢𑁆𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀮𑀪𑀢𑁂𑀢𑀺 𑀦𑀺𑀲𑀻𑀤𑀺𑀢𑀼𑀁 𑀮𑀪𑀢𑀺.

𑁨𑁬𑁬𑁪. 𑀢𑀁 𑀓𑀢𑁆𑀣 𑀮𑀪𑀢𑀻𑀢𑀺 𑀧𑀤𑁂𑀲𑀦𑀺𑀬𑀫𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀥𑀫𑁆𑀫𑀸𑀲𑀦𑁂’’𑀢𑀺𑀆𑀤𑀺. 𑀥𑀫𑁆𑀫𑀸𑀲𑀦𑁂𑀢𑀺 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀤𑀺 𑀥𑀫𑁆𑀫𑀸𑀲𑀦𑁂 𑀲𑀗𑁆𑀖𑀺𑀓𑀫𑁆𑀧𑀺 𑀕𑁄𑀦𑀓𑀸𑀤𑀺𑀁 𑀪𑀺𑀓𑁆𑀔𑀽𑀳𑀺 𑀅𑀦𑀸𑀡𑀢𑁆𑀢𑀸 𑀆𑀭𑀸𑀫𑀺𑀓𑀸𑀤𑀬𑁄 𑀲𑀬𑀫𑁂𑀯 𑀧𑀜𑁆𑀜𑀸𑀧𑁂𑀦𑁆𑀢𑀺 𑀘𑁂𑀯 𑀦𑀻𑀳𑀭𑀦𑁆𑀢𑀺 𑀘, 𑀏𑀢𑀁 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑀁 𑀦𑀸𑀫. 𑀇𑀫𑀺𑀦𑀸 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸 𑁫𑁬 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁. 𑀪𑀢𑁆𑀢𑀕𑁆𑀕𑁂 𑀯𑀸𑀢𑀺 𑀯𑀺𑀳𑀸𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑁂𑀲𑀦𑀝𑁆𑀞𑀸𑀦𑁂 ¶ 𑀯𑀸 𑀪𑁄𑀚𑀦𑀲𑀸𑀮𑀸𑀬𑀁 𑀯𑀸. 𑀅𑀧𑀺𑀲𑀤𑁆𑀤𑁂𑀦 𑀕𑀺𑀳𑀻𑀦𑀁 𑀕𑁂𑀳𑁂𑀧𑀺 𑀢𑁂𑀳𑀺 𑀧𑀜𑁆𑀜𑀢𑁆𑀢𑁂 𑀕𑁄𑀦𑀓𑀸𑀤𑀺𑀫𑁆𑀳𑀺 𑀦𑀺𑀲𑀻𑀤𑀺𑀢𑀼𑀁 ¶ 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀥𑀫𑁆𑀫𑀸𑀲𑀦𑀸𑀤𑀺𑀧𑀤𑁂𑀲𑀦𑀺𑀬𑀫𑀦𑁂𑀦 𑀢𑀢𑁄 𑀅𑀜𑁆𑀜𑀢𑁆𑀣 𑀕𑀺𑀳𑀺𑀧𑀜𑁆𑀜𑀢𑁆𑀢𑁂𑀧𑀺 𑀢𑀢𑁆𑀣 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀜𑁆𑀜𑀸𑀬𑀢𑀺.

𑀪𑀽𑀫𑀢𑁆𑀣𑀭𑀡𑀓𑁂𑀢𑀺 𑀏𑀢𑁆𑀣 ‘‘𑀓𑀢𑁂’’𑀢𑀺 𑀲𑁂𑀲𑁄. 𑀢𑀢𑁆𑀣𑀸𑀢𑀺 𑀲𑀗𑁆𑀖𑀺𑀓𑁂 𑀯𑀸 𑀕𑀺𑀳𑀺𑀲𑀦𑁆𑀢𑀓𑁂 𑀯𑀸 𑀕𑁄𑀦𑀓𑀸𑀤𑀺𑀫𑁆𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀅𑀦𑀸𑀡𑀢𑁆𑀢𑁂𑀳𑀺 𑀕𑀺𑀳𑀻𑀳𑀺 𑀏𑀯 𑀪𑀽𑀫𑀢𑁆𑀣𑀭𑀡𑁂 𑀓𑀢𑁂. 𑀲𑀬𑀺𑀢𑀼𑀦𑁆𑀢𑀺 𑀉𑀧𑀭𑀺 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀺-𑀲𑀤𑁆𑀤𑁂𑀦 𑀦𑀺𑀲𑀻𑀤𑀺𑀢𑀼𑀫𑁆𑀧𑀺 𑀯𑀸𑀢𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. ‘‘𑀪𑀽𑀫𑀢𑁆𑀣𑀭𑀡𑀓𑁂’’𑀢𑀺 𑀇𑀫𑀺𑀦𑀸 𑀕𑀺𑀳𑀻𑀳𑀺 𑀏𑀯 𑀫𑀜𑁆𑀘𑀸𑀤𑀻𑀲𑀼 𑀲𑀬𑀦𑀢𑁆𑀣𑀁 𑀅𑀢𑁆𑀣𑀢𑁂 𑀉𑀧𑀭𑀺 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀲𑀬𑀺𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑀘𑀫𑁆𑀫𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁬𑁫. 𑀕𑀳𑀧𑀢𑀺𑀲𑁆𑀲 𑀪𑀽𑀫𑀺, 𑀲𑀫𑁆𑀫𑀼𑀢𑀺𑀪𑀽𑀫𑀺, 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸𑀪𑀽𑀫𑀺, 𑀕𑁄𑀦𑀺𑀲𑀸𑀤𑀺𑀪𑀽𑀫𑀻𑀢𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀘𑀢𑀲𑁆𑀲𑁄 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺 𑀬𑁄𑀚𑀦𑀸.

𑁨𑁬𑁬𑁬. 𑀓𑀣𑀁 𑀓𑀧𑁆𑀧𑀺𑀬𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀁 𑀕𑁄𑀦𑀺𑀲𑀸𑀤𑀺𑀓𑀁 𑀕𑀳𑀧𑀢𑀺𑀁 𑀲𑀫𑁆𑀫𑀼𑀢𑀺’’𑀦𑁆𑀢𑀺 (𑀫𑀳𑀸𑀯. 𑁨𑁯𑁫) 𑀏𑀯𑀁 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀉𑀤𑁆𑀥𑀭𑀺𑀢𑁆𑀯𑀸 𑀢𑀸𑀲𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺. 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀯𑀸𑀲𑀢𑁆𑀣𑀸𑀬 𑀓𑀢𑀁 𑀕𑁂𑀳𑀁 𑀯𑀸 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁 𑀯𑀸𑀲𑀢𑁆𑀣𑀸𑀬 𑀓𑀢𑀁 𑀕𑁂𑀳𑀁 𑀯𑀸𑀢𑀺 𑀬𑁄𑀚𑀦𑀸. 𑀓𑀧𑁆𑀧𑀺𑀬𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀧𑁆𑀧𑀺𑀬𑀝𑁆𑀞𑀸𑀦𑀁 𑀓𑀢𑁆𑀢𑀩𑁆𑀩𑀁. 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑀦𑁆𑀢𑀺 𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀸𑀤𑀺𑀮𑀓𑁆𑀔𑀡𑁂𑀦 𑀲𑀳𑀲𑁂𑀬𑁆𑀬𑀸𑀭𑀳𑀁.

𑁨𑁬𑁬𑁭. 𑀇𑀤𑀸𑀦𑀺 ¶ 𑀘𑀢𑀲𑁆𑀲𑁄𑀧𑀺 𑀪𑀽𑀫𑀺𑀬𑁄 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀅𑀢𑁆𑀣𑀸𑀬 𑀤𑀺𑀦𑁆𑀦𑀁 𑀯𑀸 𑀢𑁂𑀲𑀁 𑀲𑀦𑁆𑀢𑀓𑀁 𑀯𑀸 𑀬𑀁 𑀕𑁂𑀳𑀁, 𑀇𑀤𑀁 𑀏𑀯 𑀕𑀳𑀧𑀢𑀺𑀪𑀽𑀫𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁨𑁬𑁬𑁮. 𑀬𑀸 𑀧𑀦 𑀓𑀼𑀝𑀺 𑀲𑀗𑁆𑀖𑁂𑀦 𑀲𑀫𑁆𑀫𑀢𑀸 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬, 𑀲𑀸 𑀲𑀫𑁆𑀫𑀼𑀢𑀺𑀓𑀸 𑀦𑀸𑀫. 𑀢𑀲𑁆𑀲𑀸 𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀓𑀫𑁆𑀫𑀯𑀸𑀘𑀁 𑀅𑀯𑀢𑁆𑀯𑀸 𑀅𑀧𑀮𑁄𑀓𑀦𑀁 𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑁂𑀯𑀸𑀢𑀺 𑀬𑁄𑀚𑀦𑀸.

𑁨𑁬𑁬𑁯-𑁭𑁦. 𑀧𑀞𑀫𑀇𑀝𑁆𑀞𑀓𑀸𑀬 ¶ 𑀯𑀸 𑀧𑀞𑀫𑀧𑀸𑀲𑀸𑀡𑀲𑁆𑀲 𑀯𑀸 𑀧𑀞𑀫𑀢𑁆𑀣𑀫𑁆𑀪𑀲𑁆𑀲 𑀯𑀸 𑀆𑀤𑀺-𑀕𑁆𑀕𑀳𑀡𑁂𑀦 𑀧𑀞𑀫𑀪𑀺𑀢𑁆𑀢𑀺𑀧𑀸𑀤𑀲𑁆𑀲 𑀯𑀸 𑀞𑀧𑀦𑁂 𑀧𑀭𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀦𑁆𑀢𑁂𑀲𑀼 𑀲𑀫𑀦𑁆𑀢𑀢𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀅𑀪𑀺𑀓𑁆𑀔𑀡𑀁 𑀯𑀤𑀦𑁆𑀢𑁂𑀳𑀺 𑀆𑀫𑀲𑀺𑀢𑁆𑀯𑀸 𑀯𑀸 𑀲𑀬𑀫𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀇𑀝𑁆𑀞𑀓𑀸 𑀞𑀧𑁂𑀬𑁆𑀬 𑀧𑀸𑀲𑀸𑀡𑁄 𑀯𑀸 𑀣𑀫𑁆𑀪𑁄 𑀯𑀸 𑀪𑀺𑀢𑁆𑀢𑀺𑀧𑀸𑀤𑁄 𑀯𑀸 𑀞𑀧𑁂𑀬𑁆𑀬 𑀞𑀧𑁂𑀢𑀩𑁆𑀩𑁄, 𑀅𑀬𑀁 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀓𑀼𑀝𑀻𑀢𑀺 𑀬𑁄𑀚𑀦𑀸.

𑁨𑁬𑁭𑁧. 𑀇𑀝𑁆𑀞𑀓𑀸𑀤𑀺𑀧𑀢𑀺𑀝𑁆𑀞𑀸𑀦𑀦𑁆𑀢𑀺 𑀧𑀞𑀫𑀺𑀝𑁆𑀞𑀓𑀸𑀤𑀻𑀦𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀦𑀁. 𑀯𑀤𑀢𑀦𑁆𑀢𑀺 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀤𑀦𑁆𑀢𑀸𑀦𑀁. 𑀲𑀫𑀓𑀸𑀮𑀁 𑀢𑀼 𑀯𑀝𑁆𑀝𑀢𑀻𑀢𑀺 𑀏𑀓𑀓𑀸𑀮𑀁 𑀯𑀝𑁆𑀝𑀢𑀺, 𑀇𑀫𑀺𑀦𑀸 ‘‘𑀲𑀘𑁂 𑀳𑀺 𑀅𑀦𑀺𑀝𑁆𑀞𑀺𑀢𑁂 𑀯𑀘𑀦𑁂 𑀣𑀫𑁆𑀪𑁄 𑀧𑀢𑀺𑀝𑁆𑀞𑀸𑀢𑀺, 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀸 𑀢𑀲𑁆𑀫𑀺𑀁 𑀯𑀘𑀦𑀁 𑀦𑀺𑀝𑁆𑀞𑀸𑀢𑀺, 𑀅𑀓𑀢𑀸 𑀳𑁄𑀢𑀺 𑀓𑀧𑁆𑀧𑀺𑀬𑀓𑀼𑀝𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀅𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑀲𑀽𑀘𑀺𑀢𑁄.

𑁨𑁬𑁭𑁨. 𑀆𑀭𑀸𑀫𑁄 𑀲𑀓𑀮𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀬𑁂𑀪𑀼𑀬𑁆𑀬𑀢𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸𑀢𑀺 𑀤𑀼𑀯𑀺𑀥𑁄𑀧𑀺 𑀯𑀺𑀜𑁆𑀜𑀽𑀳𑀺 𑀯𑀺𑀦𑀬𑀥𑀭𑁂𑀳𑀺 ¶ ‘‘𑀕𑁄𑀦𑀺𑀲𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀯𑁂𑀲𑀦𑀺𑀯𑀸𑀭𑀡𑀸𑀪𑀸𑀯𑁂𑀦 𑀧𑀯𑀺𑀝𑁆𑀞𑀸𑀦𑀁 𑀕𑀼𑀦𑁆𑀦𑀁 𑀦𑀺𑀲𑀚𑁆𑀚𑀸𑀬𑁄𑀕𑀢𑁄 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁭𑁩. 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀢𑁆𑀣 𑀧𑀓𑁆𑀓𑀜𑁆𑀘𑀸’’𑀢𑀺𑀆𑀤𑀺. 𑀆𑀫𑀺𑀲𑀦𑁆𑀢𑀺 𑀧𑀼𑀭𑀺𑀫𑀓𑀸𑀮𑀺𑀓𑀤𑁆𑀯𑀬𑀁. ‘‘𑀆𑀫𑀺𑀲’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀭𑀸𑀫𑀺𑀲𑀁 𑀇𑀢𑀭𑀓𑀸𑀮𑀺𑀓𑀤𑁆𑀯𑀬𑀁 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀯𑀼𑀢𑁆𑀣𑀫𑁆𑀧𑀺 𑀧𑀓𑁆𑀓𑀫𑁆𑀧𑀺 𑀓𑀧𑁆𑀧𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁬𑁭𑁪-𑁫. 𑀇𑀫𑀸 𑀓𑀧𑁆𑀧𑀺𑀬𑀓𑀼𑀝𑀺𑀬𑁄 𑀓𑀤𑀸 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀬𑀸 𑀲𑀸’’𑀢𑀺𑀆𑀤𑀺. 𑀬𑀸 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀬𑁂𑀲𑀼 𑀣𑀫𑁆𑀪𑀸𑀤𑀻𑀲𑀼 𑀅𑀥𑀺𑀝𑁆𑀞𑀺𑀢𑀸, 𑀲𑀸 𑀢𑁂𑀲𑀼 𑀣𑀫𑁆𑀪𑀸𑀤𑀻𑀲𑀼 𑀅𑀧𑀦𑀻𑀢𑁂𑀲𑀼 𑀢𑀤𑀜𑁆𑀜𑁂𑀲𑀼𑀧𑀺 𑀣𑀫𑁆𑀪𑀸𑀤𑀻𑀲𑀼 𑀢𑀺𑀝𑁆𑀞𑀢𑀻𑀢𑀺 𑀬𑁄𑀚𑀦𑀸.

𑀲𑀩𑁆𑀩𑁂𑀲𑀼 𑀣𑀫𑁆𑀪𑀸𑀤𑀻𑀲𑀼 𑀅𑀧𑀦𑀻𑀢𑁂𑀲𑀼 𑀲𑀸 𑀚𑀳𑀺𑀢𑀯𑀢𑁆𑀣𑀼𑀓𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀕𑁄𑀦𑀺𑀲𑀸𑀤𑀺𑀓𑀼𑀝𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀢𑀺𑀆𑀤𑀻𑀳𑀺 𑀚𑀳𑀺𑀢𑀯𑀢𑁆𑀣𑀼𑀓𑀸 𑀲𑀺𑀬𑀸. 𑀧𑀭𑀺𑀓𑁆𑀔𑀺𑀢𑁆𑀢𑀸𑀢𑀺 𑀘 ‘‘𑀆𑀭𑀸𑀫𑁄 𑀧𑀦 𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀓𑀼𑀭𑀼𑀦𑁆𑀤𑀺𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀢𑁆𑀢𑀸 𑀦 𑀓𑁂𑀯𑀮𑀁 𑀲𑀩𑁆𑀩𑀧𑀭𑀺𑀓𑁆𑀔𑀺𑀢𑁆𑀢𑀸𑀯, 𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺 𑀬𑁂𑀪𑀼𑀬𑁆𑀬𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺 𑀕𑀳𑁂𑀢𑀩𑁆𑀩𑀸.

𑀲𑁂𑀲𑀸𑀢𑀺 ¶ 𑀕𑀳𑀧𑀢𑀺𑀲𑀫𑁆𑀫𑀼𑀢𑀺𑀓𑀼𑀝𑀺𑀬𑁄. 𑀙𑀤𑀦𑀦𑀸𑀲𑀢𑁄 𑀚𑀳𑀺𑀢𑀯𑀢𑁆𑀣𑀼𑀓𑀸 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀙𑀤𑀦𑀦𑀸𑀲𑀢𑁄𑀢𑀺 𑀏𑀢𑁆𑀣 ‘‘𑀕𑁄𑀧𑀸𑀦𑀲𑀺𑀫𑀢𑁆𑀢𑀁 𑀞𑀧𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀲𑀘𑁂 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀏𑀓𑀫𑁆𑀧𑀺 𑀧𑀓𑁆𑀔𑀧𑀸𑀲𑀫𑀡𑁆𑀟𑀮𑀁 𑀅𑀢𑁆𑀣𑀺, 𑀭𑀓𑁆𑀔𑀢𑀺. 𑀬𑀢𑁆𑀭 𑀧𑀦𑀺𑀫𑀸 𑀘𑀢𑀲𑁆𑀲𑁄𑀧𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀦𑀢𑁆𑀣𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀁? 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑁨𑁬𑁭𑁬. 𑀪𑀺𑀓𑁆𑀔𑀼𑀁 ¶ 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀳𑁄 𑀘 𑀢𑁂𑀲𑀁 𑀲𑀦𑁆𑀦𑀺𑀥𑀺 𑀘 𑀢𑁂𑀲𑀁 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁭𑁭. 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀁 𑀲𑀗𑁆𑀖𑀺𑀓𑀫𑁆𑀧𑀺 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀅𑀦𑁆𑀢𑁄𑀧𑀓𑁆𑀓𑀜𑁆𑀘 𑀪𑀺𑀓𑁆𑀔𑀼𑀲𑁆𑀲 𑀦 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀁 𑀲𑀗𑁆𑀖𑀺𑀓𑀫𑁆𑀧𑀺 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀅𑀦𑁆𑀢𑁄𑀧𑀓𑁆𑀓𑀜𑁆𑀘 𑀪𑀺𑀓𑁆𑀔𑀼𑀦𑀺𑀬𑀸 𑀦 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀉𑀪𑀺𑀦𑁆𑀦𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁭𑁮. 𑀅𑀓𑀧𑁆𑀧𑀓𑀼𑀝𑀺𑀬𑀸𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀸, ‘‘𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀬 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀦𑀁 𑀕𑀳𑀡𑀁.

𑁨𑁬𑁭𑁯. 𑀢𑁂𑀳𑁂𑀯 𑀅𑀦𑁆𑀢𑁄𑀯𑀼𑀢𑁆𑀣𑁂𑀳𑀺 𑀲𑀧𑁆𑀧𑀺𑀆𑀤𑀻𑀳𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀳𑀺 𑀲𑀳 𑀪𑀺𑀓𑁆𑀔𑀼𑀦𑀸 𑀧𑀓𑁆𑀓𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁 𑀦𑀺𑀭𑀸𑀫𑀺𑀲𑀁 𑀲𑀢𑁆𑀢𑀸𑀳𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑁂𑀯𑀸𑀢𑀺 𑀬𑁄𑀚𑀦𑀸.

𑁨𑁬𑁮𑁦. 𑀧𑀓𑁆𑀓𑀁 𑀲𑀸𑀫𑀁𑀧𑀓𑁆𑀓𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁 𑀲𑀘𑁂 𑀆𑀫𑀺𑀲𑀲𑀁𑀲𑀝𑁆𑀞𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀪𑀼𑀜𑁆𑀚𑀢𑀺, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀲𑀸𑀫𑀁𑀧𑀓𑁆𑀓𑀜𑁆𑀘 𑀪𑀼𑀜𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀬𑀸𑀯𑀚𑀻𑀯𑀺𑀓𑀲𑁆𑀲 𑀆𑀫𑀺𑀲𑀲𑀁𑀲𑀝𑁆𑀞𑀲𑁆𑀲 𑀆𑀫𑀺𑀲𑀕𑀢𑀺𑀓𑀢𑁆𑀢𑀸 ‘‘𑀅𑀦𑁆𑀢𑁄𑀯𑀼𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁬𑁮𑁨. 𑀉𑀤𑀓𑀁 𑀦 𑀳𑁄𑀢𑀺 𑀓𑀸𑀮𑀺𑀓𑀁 𑀘𑀢𑀽𑀲𑀼 𑀓𑀸𑀮𑀺𑀓𑁂𑀲𑀼 𑀅𑀲𑀗𑁆𑀕𑀳𑀺𑀢𑀢𑁆𑀢𑀸.

𑁨𑁬𑁮𑁩. 𑀢𑀺𑀓𑀸𑀮𑀺𑀓𑀸 𑀬𑀸𑀯𑀓𑀸𑀮𑀺𑀓𑀸 𑀬𑀸𑀫𑀓𑀸𑀮𑀺𑀓𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀢𑀺 𑀢𑀬𑁄 𑀓𑀸𑀮𑀺𑀓𑀸 𑀧𑀝𑀺𑀕𑁆𑀕𑀳𑀯𑀲𑁂𑀦𑁂𑀯 ¶ 𑀅𑀢𑁆𑀢𑀦𑁄 ¶ 𑀅𑀢𑁆𑀢𑀦𑁄 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀼𑀢𑁆𑀢𑀸 𑀤𑁄𑀲𑀓𑀭𑀸 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀢𑁆𑀢𑀸 𑀅𑀪𑀼𑀢𑁆𑀢𑀫𑁆𑀧𑀺 𑀤𑁄𑀲𑀓𑀭𑀦𑁆𑀢𑀺 𑀬𑁄𑀚𑀦𑀸.

‘‘𑀪𑀼𑀢𑁆𑀢𑀸 𑀤𑁄𑀲𑀓𑀭𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀓𑀸𑀮𑀺𑀓𑀤𑁆𑀯𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀮𑀸𑀢𑀺𑀓𑁆𑀓𑀫𑀦𑀫𑀢𑁆𑀢𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦 𑀳𑁄𑀢𑀺, 𑀪𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀅𑀧𑀭𑀺𑀪𑀼𑀢𑁆𑀢𑀫𑁆𑀧𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀲𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀬𑁂𑀯 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀪𑀼𑀢𑁆𑀢𑀁 𑀢𑀢𑀺𑀬𑀫𑁆𑀧𑀺 𑀘𑀸’’𑀢𑀺. 𑀘-𑀲𑀤𑁆𑀤𑁄 𑀢𑀼-𑀲𑀤𑁆𑀤𑀢𑁆𑀣𑁂. 𑀬𑀸𑀯𑀚𑀻𑀯𑀺𑀓𑀁 𑀧𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀇𑀢𑀭𑀓𑀸𑀮𑀺𑀓𑀲𑀁𑀲𑀕𑁆𑀕𑀁 𑀯𑀺𑀦𑀸 𑀤𑁄𑀲𑀓𑀭𑀁 𑀦 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁.

𑁨𑁬𑁮𑁪. 𑀅𑀫𑁆𑀩𑀸𑀤𑀬𑁄 𑀲𑀤𑁆𑀤𑀸 𑀭𑀼𑀓𑁆𑀔𑀸𑀦𑀁 𑀦𑀸𑀫𑀪𑀽𑀢𑀸 𑀢𑀁𑀢𑀁𑀨𑀮𑁂𑀧𑀺 𑀯𑀢𑁆𑀢𑀫𑀸𑀦𑀸 𑀇𑀥 𑀉𑀧𑀘𑀸𑀭𑀯𑀲𑁂𑀦 𑀢𑀚𑁆𑀚𑁂 𑀧𑀸𑀦𑀓𑁂 𑀯𑀼𑀢𑁆𑀢𑀸, 𑀢𑁂𑀦𑁂𑀯𑀸𑀳 ‘‘𑀧𑀸𑀦𑀓𑀁 𑀫𑀢’’𑀦𑁆𑀢𑀺. 𑀘𑁄𑀘𑀁 𑀅𑀝𑁆𑀞𑀺𑀓𑀓𑀤𑀮𑀺𑀧𑀸𑀦𑀁. 𑀫𑁄𑀘𑀁 𑀇𑀢𑀭𑀓𑀤𑀮𑀺𑀧𑀸𑀦𑀁. 𑀫𑀥𑀽𑀢𑀺 𑀫𑀼𑀤𑁆𑀤𑀺𑀓𑀨𑀮𑀸𑀦𑀁 𑀭𑀲𑀁. 𑀫𑀼𑀤𑁆𑀤𑀺𑀓𑀸𑀢𑀺 𑀲𑀻𑀢𑁄𑀤𑀓𑁂 𑀫𑀤𑁆𑀤𑀺𑀢𑀸𑀦𑀁 𑀫𑀼𑀤𑁆𑀤𑀺𑀓𑀨𑀮𑀸𑀦𑀁 𑀧𑀸𑀦𑀁. ‘‘𑀲𑀸𑀮𑀽𑀓𑀧𑀸𑀦𑀦𑁆𑀢𑀺 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀲𑀸𑀮𑀽𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦’’𑀦𑁆𑀢𑀺 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀘 𑀲𑀸𑀮𑀽𑀓-𑀲𑀤𑁆𑀤𑀲𑁆𑀲 𑀤𑀻𑀖𑀯𑀲𑁂𑀦 𑀲𑀁𑀬𑁄𑀕𑀤𑀲𑁆𑀲𑀦𑀢𑁄 ‘‘𑀲𑀸𑀮𑀼 𑀨𑀸𑀭𑀼𑀲𑀓𑀜𑁆𑀘𑀸’’𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄 𑀓𑀢𑁄.

𑀲𑀸𑀮𑀽𑀓𑀁 𑀓𑀼𑀫𑀼𑀤𑀼𑀧𑁆𑀧𑀮𑀸𑀦𑀁 𑀨𑀮𑀭𑀲𑀁. 𑀔𑀼𑀤𑁆𑀤𑀲𑀺𑀓𑁆𑀔𑀸𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀲𑀸𑀮𑀽𑀓𑀧𑀸𑀦𑀁 𑀦𑀸𑀫 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀓𑀺𑀜𑁆𑀚𑀓𑁆𑀔𑀭𑁂𑀡𑀽𑀳𑀺 𑀓𑀢𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀨𑀸𑀭𑀼𑀲𑀓’𑀦𑁆𑀢𑀺𑀆𑀤𑀻𑀲𑀼 𑀏𑀓𑁄 𑀭𑀼𑀓𑁆𑀔𑁄’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀲𑁆𑀲 𑀨𑀮𑀭𑀲𑁄 𑀨𑀸𑀭𑀼𑀲𑀓𑀁 𑀦𑀸𑀫. 𑀏𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀨𑀮𑀸𑀦𑀁 𑀭𑀲𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀯𑀝𑁆𑀝𑀢𑀺, 𑀲𑀻𑀢𑀼𑀤𑀓𑁂 𑀫𑀤𑁆𑀤𑀺𑀢𑁄 𑀧𑀲𑀦𑁆𑀦𑁄 𑀦𑀺𑀓𑁆𑀓𑀲𑀝𑁄𑀯 𑀯𑀝𑁆𑀝𑀢𑀺, 𑀉𑀤𑀓𑁂𑀦 𑀧𑀦 𑀅𑀲𑀫𑁆𑀪𑀺𑀦𑁆𑀦𑁄 𑀭𑀲𑁄 𑀬𑀸𑀯𑀓𑀸𑀮𑀺𑀓𑁄.

𑁨𑁬𑁮𑁫. 𑀨𑀮𑀦𑁆𑀢𑀺 ¶ 𑀅𑀫𑁆𑀩𑀸𑀤𑀺𑀨𑀮𑀁. 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑁄𑀢𑀺 𑀧𑀸𑀦𑀯𑀢𑁆𑀣𑀼𑀓𑀸𑀦𑀁 𑀨𑀮𑀸𑀦𑀁 𑀧𑀝𑀺𑀕𑁆𑀕𑀳𑁄. 𑀯𑀲𑀢𑀺 𑀏𑀢𑁆𑀣 𑀧𑀸𑀦𑀦𑁆𑀢𑀺 𑀯𑀢𑁆𑀣𑀼, 𑀨𑀮𑀁, 𑀯𑀢𑁆𑀣𑀼𑀦𑀸 𑀲𑀳 𑀯𑀝𑁆𑀝𑀢𑀻𑀢𑀺 𑀲𑀯𑀢𑁆𑀣𑀼𑀓𑀁, 𑀧𑀸𑀦𑀁, 𑀲𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀕𑁆𑀕𑀳𑁄 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑁄. 𑀲𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀕𑁆𑀕𑀳𑀁 𑀦𑀸𑀫 𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀸𑀦𑀯𑀢𑁆𑀣𑀼𑀓𑀸𑀦𑀁 𑀨𑀮𑀸𑀦𑀁 𑀧𑀝𑀺𑀕𑁆𑀕𑀳𑁄’’𑀢𑀺.

𑁨𑁬𑁮𑁬. ‘‘𑀲𑀼𑀓𑁄𑀝𑁆𑀝𑁂𑀢𑁆𑀯𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀅𑀫𑁆𑀩𑀧𑀓𑁆𑀓’’𑀦𑁆𑀢𑀺 𑀆𑀫𑀓𑀫𑁂𑀯 𑀅𑀫𑁆𑀩𑀨𑀮𑀁 𑀯𑀼𑀘𑁆𑀘𑀢𑀺 ¶ . 𑀉𑀤𑀓𑁂𑀢𑀺 𑀲𑀻𑀢𑁄𑀤𑀓𑁂. 𑀧𑀭𑀺𑀲𑁆𑀲𑀯𑀁 𑀧𑀭𑀺𑀲𑁆𑀲𑀸𑀯𑀺𑀢𑀁. 𑀓𑀢𑁆𑀯𑀸𑀢𑀺 𑀫𑀥𑀼𑀆𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸. 𑀬𑀣𑀸𑀳 𑁋 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀫𑀥𑀼𑀲𑀓𑁆𑀓𑀭𑀓𑀧𑁆𑀧𑀽𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀓𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦). 𑀧𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 ‘‘𑀏𑀯𑀁 𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑀸𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺𑀬𑁂𑀯. 𑀏𑀲 𑀦𑀬𑁄 𑀲𑀩𑁆𑀩𑀧𑀸𑀦𑁂𑀲𑀽’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄.

𑁨𑁬𑁮𑁭. 𑀲𑁂𑀲𑀧𑀸𑀦𑀓𑁂𑀲𑀼𑀧𑀻𑀢𑀺 𑀚𑀫𑁆𑀩𑀼𑀧𑀸𑀦𑀓𑀸𑀤𑀻𑀲𑀼𑀧𑀺.

𑁨𑁬𑁮𑁮. 𑀉𑀘𑁆𑀙𑀼𑀭𑀲𑁄 𑀅𑀦𑁆𑀢𑁄𑀕𑀥𑀢𑁆𑀢𑀸 𑀇𑀥 𑀯𑀼𑀢𑁆𑀢𑁄, 𑀦 𑀧𑀦 𑀬𑀸𑀫𑀓𑀸𑀮𑀺𑀓𑀢𑁆𑀢𑀸, 𑀲𑁄 𑀧𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀬𑁂𑀯.

𑁨𑁬𑁮𑁯. 𑀫𑀥𑀼𑀓𑀲𑁆𑀲 𑀭𑀲𑀦𑁆𑀢𑀺 𑀫𑀥𑀼𑀓𑀧𑀼𑀧𑁆𑀨𑀲𑁆𑀲 𑀭𑀲𑀁. 𑀏𑀢𑁆𑀣 𑀫𑀥𑀼𑀓𑀧𑀼𑀧𑁆𑀨𑀭𑀲𑁄 𑀅𑀕𑁆𑀕𑀺𑀧𑀸𑀓𑁄 𑀯𑀸 𑀳𑁄𑀢𑀼 𑀆𑀤𑀺𑀘𑁆𑀘𑀧𑀸𑀓𑁄 𑀯𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺. 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀬𑀁 𑀧𑀸𑀦𑀁 𑀕𑀳𑁂𑀢𑁆𑀯𑀸 𑀫𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀺. 𑀫𑀥𑀼𑀓𑀧𑀼𑀧𑁆𑀨𑀁 𑀧𑀦 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸 𑀪𑀚𑁆𑀚𑀺𑀢𑀁 𑀯𑀸 𑀢𑁂𑀦 𑀓𑀢𑀨𑀸𑀡𑀺𑀢𑀁 𑀯𑀸 𑀬𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀦 𑀓𑀭𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀭𑁂𑀪𑀢𑁆𑀢𑀁 𑀯𑀝𑁆𑀝𑀢𑀺.

𑀧𑀓𑁆𑀓𑀟𑀸𑀓𑀭𑀲𑀦𑁆𑀢𑀺 ¶ 𑀧𑀓𑁆𑀓𑀲𑁆𑀲 𑀬𑀸𑀯𑀓𑀸𑀮𑀺𑀓𑀲𑁆𑀲 𑀭𑀲𑀁. 𑀲𑀩𑁆𑀩𑁄 𑀧𑀢𑁆𑀢𑀭𑀲𑁄 𑀬𑀸𑀫𑀓𑀸𑀮𑀺𑀓𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀸𑀯𑀓𑀸𑀮𑀺𑀓𑀧𑀢𑁆𑀢𑀸𑀦𑀜𑁆𑀳𑀺 𑀧𑀼𑀭𑁂𑀪𑀢𑁆𑀢𑀁𑀬𑁂𑀯 𑀭𑀲𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀇𑀫𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁬𑁯𑁦. 𑀲𑀸𑀦𑀼𑀮𑁄𑀫𑀸𑀦𑀁 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀨𑀮𑀚𑀁 𑀭𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀨𑀮𑀚𑁄 𑀭𑀲𑁄 𑀯𑀺𑀓𑀸𑀮𑁂 𑀬𑀸𑀫𑀲𑀜𑁆𑀜𑀺𑀢𑁂 𑀅𑀦𑀼𑀮𑁄𑀫𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑁄𑀢𑀺 𑀬𑁄𑀚𑀦𑀸.

𑁨𑁬𑁯𑁧. 𑀬𑀸𑀯𑀓𑀸𑀮𑀺𑀓𑀧𑀢𑁆𑀢𑀸𑀦𑀁 𑀲𑀻𑀢𑀼𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑁄 𑀭𑀲𑁄𑀧𑀺 𑀅𑀧𑀓𑁆𑀓𑁄, 𑀆𑀤𑀺𑀘𑁆𑀘𑀧𑀸𑀓𑁄𑀧𑀺 𑀯𑀺𑀓𑀸𑀮𑁂 𑀧𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁬𑁯𑁨-𑁩. 𑀲𑀢𑁆𑀢𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀸𑀮𑀜𑁆𑀘𑀦𑀸𑀴𑀺𑀓𑁂𑀭𑀜𑁆𑀘𑀸’’𑀢𑀺𑀆𑀤𑀺. 𑀅𑀧𑀭𑀡𑁆𑀡𑀁 ¶ 𑀫𑀼𑀕𑁆𑀕𑀸𑀤𑀺. ‘‘𑀲𑀢𑁆𑀢𑀥𑀜𑁆𑀜𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀏𑀢𑁂𑀲𑀁 𑀭𑀲𑁄 𑀬𑀸𑀯𑀓𑀸𑀮𑀺𑀓𑁄 𑀬𑀸𑀫𑀓𑀸𑀮𑀲𑀗𑁆𑀔𑀸𑀢𑁂 𑀯𑀺𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁬𑁯𑁫. 𑀏𑀯𑀫𑀸𑀤𑀻𑀦𑀁 𑀔𑀼𑀤𑁆𑀤𑀓𑀸𑀦𑀁 𑀨𑀮𑀸𑀦𑀁 𑀭𑀲𑁄 𑀧𑀦 𑀅𑀝𑁆𑀞𑀧𑀸𑀦𑀸𑀦𑀼𑀮𑁄𑀫𑀢𑁆𑀢𑀸 𑀅𑀦𑀼𑀮𑁄𑀫𑀺𑀓𑁂 𑀬𑀸𑀫𑀓𑀸𑀮𑀺𑀓𑀸𑀦𑀼𑀮𑁄𑀫𑀺𑀓𑁂 𑀦𑀺𑀤𑁆𑀤𑀺𑀝𑁆𑀞𑁄 𑀓𑀣𑀺𑀢𑁄𑀢𑀺 𑀬𑁄𑀚𑀦𑀸.

𑁨𑁬𑁯𑁬. 𑀇𑀥 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀸𑀦𑀼𑀮𑁄𑀫𑀲𑁆𑀲 𑀥𑀜𑁆𑀜𑀲𑁆𑀲 𑀨𑀮𑀚𑀁 𑀭𑀲𑀁 𑀞𑀧𑁂𑀢𑁆𑀯𑀸 𑀅𑀬𑀸𑀫𑀓𑀸𑀮𑀺𑀓𑁄 𑀅𑀜𑁆𑀜𑁄 𑀨𑀮𑀭𑀲𑁄 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸, 𑀲𑀩𑁆𑀩𑁄 𑀬𑀸𑀫𑀓𑀸𑀮𑀺𑀓𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀓𑀣𑀺𑀦𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁬𑁯𑁭. 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 ¶ 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀬𑀸𑀯 𑀫𑀳𑀸𑀧𑀯𑀸𑀭𑀡𑀸, 𑀢𑀸𑀯 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀦𑁆𑀦𑀁 𑀆𑀦𑀺𑀲𑀁𑀲𑀸𑀦𑀁 𑀯𑀓𑁆𑀔𑀫𑀸𑀦𑀸𑀦𑀁 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀆𑀦𑀺𑀲𑀁𑀲𑀸𑀦𑀁 𑀧𑀝𑀺𑀮𑀸𑀪𑀓𑀸𑀭𑀡𑀸 𑀫𑀼𑀦𑀺𑀧𑀼𑀗𑁆𑀕𑀯𑁄 𑀲𑀩𑁆𑀩𑁂𑀲𑀁 𑀅𑀕𑀸𑀭𑀺𑀓𑀸𑀤𑀺𑀫𑀼𑀦𑀻𑀦𑀁 𑀲𑀓𑀮𑀕𑀼𑀡𑀕𑀡𑁂𑀳𑀺 𑀉𑀢𑁆𑀢𑀫𑁄 𑀪𑀕𑀯𑀸 𑀓𑀣𑀺𑀦𑀢𑁆𑀣𑀸𑀭𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁦𑁬) 𑀅𑀩𑁆𑀭𑁆𑀯𑀺 𑀓𑀣𑁂𑀲𑀻𑀢𑀺 𑀬𑁄𑀚𑀦𑀸.

𑀏𑀢𑁆𑀣𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀺, 𑀓𑁂 𑀦 𑀮𑀪𑀦𑁆𑀢𑀻𑀢𑀺? 𑀕𑀡𑀦𑀯𑀲𑁂𑀦 𑀢𑀸𑀯 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘 𑀚𑀦𑀸 𑀮𑀪𑀦𑁆𑀢𑀺, 𑀉𑀤𑁆𑀥𑀁 𑀲𑀢𑀲𑀳𑀲𑁆𑀲𑀫𑁆𑀧𑀺, 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀮𑀪𑀦𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀇𑀤𑀁 𑀅𑀝𑁆𑀞𑀓𑀣𑀸𑀬 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀯𑀼𑀢𑁆𑀣𑀯𑀲𑁆𑀲𑀯𑀲𑁂𑀦 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀮𑀪𑀦𑁆𑀢𑀺, 𑀙𑀺𑀦𑁆𑀦𑀯𑀲𑁆𑀲𑀸 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀯𑀸 𑀦 𑀮𑀪𑀦𑁆𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀇𑀤𑀁 𑀅𑀝𑁆𑀞𑀓𑀣𑀸𑀬 𑀆𑀦𑀺𑀲𑀁𑀲𑀮𑀸𑀪𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀓𑀫𑁆𑀫𑀁.

𑀇𑀤𑀸𑀦𑀺 𑀢𑀤𑀼𑀪𑀬𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺 𑁋

‘‘𑀧𑀼𑀭𑀺𑀫𑀺𑀓𑀸𑀬 ¶ 𑀉𑀧𑀕𑀢𑀸𑀦𑀁 𑀧𑀦 𑀲𑀩𑁆𑀩𑁂 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀆𑀦𑀺𑀲𑀁𑀲𑀁 𑀦 𑀮𑀪𑀦𑁆𑀢𑀺, 𑀆𑀦𑀺𑀲𑀁𑀲𑁄 𑀇𑀢𑀭𑁂𑀲𑀁𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀘𑀢𑁆𑀢𑀸𑀭𑁄 𑀯𑀸 𑀳𑁄𑀦𑁆𑀢𑀺, 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀏𑀓𑁄 𑀯𑀸, 𑀇𑀢𑀭𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀅𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀉𑀧𑀕𑀢𑀸, 𑀏𑀓𑁄 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀲𑀸𑀫𑀡𑁂𑀭𑁄, 𑀲𑁄 𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀕𑀡𑀧𑀽𑀭𑀓𑁄 𑀘𑁂𑀯 𑀳𑁄𑀢𑀺, 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀺 ¶ . 𑀢𑀬𑁄 𑀪𑀺𑀓𑁆𑀔𑀽 𑀤𑁆𑀯𑁂 𑀲𑀸𑀫𑀡𑁂𑀭𑀸, 𑀤𑁆𑀯𑁂 𑀪𑀺𑀓𑁆𑀔𑀽 𑀢𑀬𑁄 𑀲𑀸𑀫𑀡𑁂𑀭𑀸, 𑀏𑀓𑁄 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀓𑀣𑀺𑀦𑀢𑁆𑀣𑀸𑀭𑀓𑀼𑀲𑀮𑀸 𑀦 𑀳𑁄𑀦𑁆𑀢𑀺, 𑀅𑀢𑁆𑀣𑀸𑀭𑀓𑀼𑀲𑀮𑀸 𑀔𑀦𑁆𑀥𑀓𑀪𑀸𑀡𑀓𑀢𑁆𑀣𑁂𑀭𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀦𑁂𑀢𑀩𑁆𑀩𑀸, 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀤𑀸𑀦𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀆𑀦𑀺𑀲𑀁𑀲𑁄 𑀧𑀦 𑀇𑀢𑀭𑁂𑀲𑀁𑀬𑁂𑀯 𑀳𑁄𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬).

𑀓𑀣𑀺𑀦𑀁 𑀓𑁂𑀦 𑀤𑀺𑀦𑁆𑀦𑀁 𑀯𑀝𑁆𑀝𑀢𑀻𑀢𑀺? 𑀬𑁂𑀦 𑀓𑁂𑀦𑀘𑀺 𑀤𑁂𑀯𑁂𑀦 𑀯𑀸 𑀫𑀦𑀼𑀲𑁆𑀲𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑁂𑀦 𑀤𑀺𑀦𑁆𑀦𑀁 𑀯𑀝𑁆𑀝𑀢𑀺. 𑀓𑀣𑀺𑀦𑀤𑀸𑀬𑀓𑀲𑁆𑀲 𑀯𑀢𑁆𑀢𑀁 𑀅𑀢𑁆𑀣𑀺, 𑀲𑀘𑁂 𑀲𑁄 𑀢𑀁 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀢𑀺 ‘‘𑀪𑀦𑁆𑀢𑁂, 𑀓𑀣𑀁 𑀓𑀣𑀺𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺, 𑀢𑀲𑁆𑀲 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀧𑁆𑀧𑀳𑁄𑀦𑀓𑀁 𑀲𑀽𑀭𑀺𑀬𑀼𑀕𑁆𑀕𑀫𑀦𑀲𑀫𑀬𑁂 𑀯𑀢𑁆𑀣𑀁 ‘𑀓𑀣𑀺𑀦𑀘𑀻𑀯𑀭𑀁 𑀤𑁂𑀫𑀸’𑀢𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀲 𑀧𑀭𑀺𑀓𑀫𑁆𑀫𑀢𑁆𑀣𑀁 𑀏𑀢𑁆𑀢𑀓𑀸 𑀦𑀸𑀫 𑀲𑀽𑀘𑀺𑀬𑁄, 𑀏𑀢𑁆𑀢𑀓𑀁 𑀲𑀼𑀢𑁆𑀢𑀁, 𑀏𑀢𑁆𑀢𑀓𑀁 𑀭𑀚𑀦𑀁, 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀜𑁆𑀘 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀓𑀣𑀺𑀦𑀢𑁆𑀣𑀸𑀭𑀓𑁂𑀦𑀸𑀧𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀦𑁆𑀢𑁂𑀦 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀦𑁆𑀢𑀯𑀸𑀬𑀕𑁂𑀳𑀢𑁄 𑀳𑀺 𑀆𑀪𑀢𑀲𑀦𑁆𑀢𑀸𑀦𑁂𑀦𑁂𑀯 𑀔𑀮𑀺𑀫𑀓𑁆𑀔𑀺𑀢𑀲𑀸𑀝𑀓𑁄𑀧𑀺 𑀦 𑀯𑀝𑁆𑀝𑀢𑀺, 𑀫𑀮𑀻𑀦𑀲𑀸𑀝𑀓𑁄𑀧𑀺 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀓𑀣𑀺𑀦𑀢𑁆𑀣𑀸𑀭𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀲𑀼𑀤𑁆𑀥𑀁 𑀥𑁄𑀯𑀺𑀢𑁆𑀯𑀸 𑀲𑀽𑀘𑀺𑀆𑀤𑀻𑀦𑀺 𑀘𑀻𑀯𑀭𑀓𑀫𑁆𑀫𑀽𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀩𑀳𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀢𑀤𑀳𑁂𑀯 𑀲𑀺𑀩𑁆𑀩𑀺𑀢𑁆𑀯𑀸 𑀦𑀺𑀝𑁆𑀞𑀺𑀢𑀲𑀽𑀘𑀺𑀓𑀫𑁆𑀫𑀁 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀲𑀘𑁂 𑀢𑀲𑁆𑀫𑀺𑀁 𑀅𑀦𑀢𑁆𑀣𑀢𑁂𑀬𑁂𑀯 𑀅𑀜𑁆𑀜𑁄 𑀓𑀣𑀺𑀦𑀲𑀸𑀝𑀓𑀁 𑀅𑀢𑁆𑀣𑀭𑀺𑀢𑀩𑁆𑀩𑀓𑀁 𑀆𑀳𑀭𑀢𑀺, 𑀅𑀜𑁆𑀜𑀸𑀦𑀺 𑀘 𑀩𑀳𑀽𑀦𑀺 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀤𑁂𑀢𑀺, 𑀬𑁄 ¶ 𑀆𑀦𑀺𑀲𑀁𑀲𑀁 𑀩𑀳𑀼𑀁 𑀤𑁂𑀢𑀺, 𑀢𑀲𑁆𑀲 𑀲𑀦𑁆𑀢𑀓𑁂𑀦𑁂𑀯 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀇𑀢𑀭𑁄 𑀬𑀣𑀸 𑀢𑀣𑀸 𑀑𑀯𑀤𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄.

𑀓𑀣𑀺𑀦𑀁 𑀧𑀦 𑀓𑁂𑀦 𑀅𑀢𑁆𑀣𑀭𑀺𑀢𑀩𑁆𑀩𑀁? 𑀬𑀲𑁆𑀲 𑀲𑀗𑁆𑀖𑁄 𑀓𑀣𑀺𑀦𑀘𑀻𑀯𑀭𑀁 𑀤𑁂𑀢𑀺. 𑀲𑀗𑁆𑀖𑁂𑀦 𑀧𑀦 𑀓𑀲𑁆𑀲 𑀤𑀸𑀢𑀩𑁆𑀩𑀁? 𑀬𑁄 𑀚𑀺𑀡𑁆𑀡𑀘𑀻𑀯𑀭𑁄 𑀳𑁄𑀢𑀺. 𑀲𑀘𑁂 𑀩𑀳𑀽 𑀚𑀺𑀡𑁆𑀡𑀘𑀻𑀯𑀭𑀸 𑀳𑁄𑀦𑁆𑀢𑀺, 𑀯𑀼𑀟𑁆𑀠𑀲𑁆𑀲 𑀤𑀸𑀢𑀩𑁆𑀩𑀁. 𑀯𑀼𑀟𑁆𑀠𑁂𑀲𑀼𑀧𑀺 𑀬𑁄 𑀫𑀳𑀸𑀧𑀭𑀺𑀯𑀸𑀭𑁄 𑀢𑀤𑀳𑁂𑀯 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀢𑁆𑀣𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀯𑀼𑀟𑁆𑀠𑁄 ¶ 𑀦 𑀲𑀓𑁆𑀓𑁄𑀢𑀺, 𑀦𑀯𑀓𑀢𑀭𑁄 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀅𑀧𑀺 𑀘 𑀲𑀗𑁆𑀖𑁂𑀦 𑀫𑀳𑀸𑀣𑁂𑀭𑀲𑁆𑀲 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀕𑀡𑁆𑀳𑀣, 𑀫𑀬𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀻𑀲𑀼 𑀘𑀻𑀯𑀭𑁂𑀲𑀼 𑀬𑀁 𑀚𑀺𑀡𑁆𑀡𑀁 𑀳𑁄𑀢𑀺, 𑀢𑀤𑀢𑁆𑀣𑀸𑀬 𑀤𑀸𑀢𑀩𑁆𑀩𑀁. 𑀧𑀓𑀢𑀺𑀬𑀸 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀤𑀼𑀧𑀝𑁆𑀝𑀢𑁆𑀣𑀸𑀬𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺𑀲𑁆𑀲 𑀏𑀓𑀧𑀝𑁆𑀝𑀘𑀻𑀯𑀭𑀁 𑀖𑀦𑀁 𑀳𑁄𑀢𑀺, 𑀓𑀣𑀺𑀦𑀲𑀸𑀝𑀓𑁄 𑀘 𑀧𑁂𑀮𑀯𑁄, 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀤𑀼𑀧𑀝𑁆𑀝𑀧𑁆𑀧𑀳𑁄𑀦𑀓𑀫𑁂𑀯 𑀤𑀸𑀢𑀩𑁆𑀩𑀁. ‘‘𑀅𑀳𑀁 𑀅𑀮𑀪𑀦𑁆𑀢𑁄 𑀏𑀓𑀧𑀝𑁆𑀝𑀁 𑀧𑀸𑀭𑀼𑀧𑀸𑀫𑀻’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀧𑀝𑁆𑀝𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀧𑀦 𑀮𑁄𑀪𑀧𑀓𑀢𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁. 𑀢𑁂𑀦𑀸𑀧𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 ‘‘𑀧𑀘𑁆𑀙𑀸 𑀯𑀺𑀲𑀺𑀩𑁆𑀩𑀺𑀢𑁆𑀯𑀸 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦 𑀕𑀳𑁂𑀢𑀩𑁆𑀩𑀁.

𑀬𑀲𑁆𑀲 𑀧𑀦 𑀤𑀺𑀬𑁆𑀬𑀢𑀺, 𑀢𑀲𑁆𑀲 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 ¶ 𑀇𑀫𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲, 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁩𑁦𑁭) 𑁋

𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀩𑁆𑀩𑀦𑁆𑀢𑀺 𑀏𑀯𑀁 𑀤𑀺𑀦𑁆𑀦𑀁.

𑁨𑁬𑁯𑁮-𑁯. 𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑀸𑀤𑀺-𑀘𑀢𑀼𑀯𑀻𑀲𑀢𑀺𑀯𑀚𑁆𑀚𑀺𑀢𑀦𑁆𑀢𑀺 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 ‘‘𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 (𑀫𑀳𑀸𑀯. 𑁩𑁦𑁮) 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑀸𑀤𑀻𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀯𑀚𑁆𑀚𑀺𑀢𑀁. 𑀘𑀻𑀯𑀭𑀦𑁆𑀢𑀺 ‘‘𑀅𑀳𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 (𑀫𑀳𑀸𑀯. 𑁩𑁦𑁯) 𑀧𑀸𑀴𑀺𑀬𑀁 ¶ 𑀆𑀕𑀢𑀸𑀦𑀁 𑀲𑁄𑀴𑀲𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀬𑀼𑀢𑁆𑀢𑀁 𑀓𑀢𑀧𑀭𑀺𑀬𑁄𑀲𑀺𑀢𑀁 𑀤𑀺𑀦𑁆𑀦𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀘𑀻𑀯𑀭𑀁. 𑀢𑁂 𑀧𑀦 𑀘𑀢𑀼𑀯𑀻𑀲𑀢𑀺 𑀆𑀓𑀸𑀭𑀸, 𑀲𑁄𑀴𑀲𑀸𑀓𑀸𑀭𑀸 𑀘 𑀧𑀸𑀴𑀺𑀢𑁄 (𑀫𑀳𑀸𑀯. 𑁩𑁦𑁮), 𑀅𑀝𑁆𑀞𑀓𑀣𑀸𑀢𑁄 (𑀫𑀳𑀸𑀯. 𑀅𑀝𑁆𑀞. 𑁩𑁦𑁮) 𑀘 𑀕𑀳𑁂𑀢𑀩𑁆𑀩𑀸. 𑀕𑀦𑁆𑀣𑀕𑀸𑀭𑀯𑀧𑀭𑀺𑀳𑀸𑀭𑀢𑁆𑀣𑀫𑀺𑀥 𑀦 𑀯𑀼𑀢𑁆𑀢𑀸.

𑀪𑀺𑀓𑁆𑀔𑀼𑀦𑀸 𑀯𑀓𑁆𑀔𑀫𑀸𑀦𑁂 𑀅𑀝𑁆𑀞𑀥𑀫𑁆𑀫𑁂 𑀚𑀸𑀦𑀦𑁆𑀢𑁂𑀦 𑀅𑀢𑁆𑀣𑀭𑀓𑁂𑀦 𑀆𑀤𑀸𑀬 𑀕𑀳𑁂𑀢𑁆𑀯𑀸 𑀧𑀼𑀭𑀸𑀡𑀓𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀘𑀻𑀯𑀭𑁂𑀦 𑀏𑀓𑀦𑀸𑀫𑀓𑀁 𑀧𑀼𑀭𑀸𑀡𑀘𑀻𑀯𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀅𑀢𑁆𑀣𑀭𑀺𑀢𑀩𑁆𑀩𑀁 𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀼𑀭𑀸𑀡𑀧𑀘𑁆𑀘𑀼𑀤𑁆𑀥𑀝𑀘𑀻𑀯𑀭𑀲𑁆𑀲 𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀯 𑀢𑀁 𑀅𑀦𑁆𑀢𑀭𑀯𑀸𑀲𑀓𑀁 𑀘𑁂, ‘‘𑀇𑀫𑀺𑀦𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀺’’𑀇𑀢𑀺 𑀯𑀘𑀲𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀘𑁂 𑀉𑀢𑁆𑀢𑀭𑀸𑀲𑀗𑁆𑀕𑁄 𑀳𑁄𑀢𑀺, ‘‘𑀇𑀫𑀺𑀦𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀺’’, 𑀲𑀘𑁂 𑀲𑀗𑁆𑀖𑀸𑀝𑀺 𑀳𑁄𑀢𑀺, ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁨𑁭𑁦𑁦-𑁧. 𑀇𑀘𑁆𑀘𑁂𑀯𑀁 ¶ 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦𑀯𑀓𑁂𑀦 𑀓𑀣𑀺𑀦𑀘𑀻𑀯𑀭𑀁 𑀆𑀤𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑁆𑀫 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀣’’𑀇𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁭𑁦𑁨. 𑀅𑀦𑀼𑀫𑁄𑀤𑀓𑁂𑀲𑀼 𑀘 𑀣𑁂𑀭𑁂𑀳𑀺 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀦𑀯𑁂𑀦 𑀧𑀦 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀫𑀻’’𑀢𑀺 𑀇𑀢𑀺 𑀧𑀼𑀦 𑀈𑀭𑀬𑁂 𑀓𑀣𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀕𑀸𑀣𑀸𑀬 𑀧𑀦 𑀅𑀦𑀼𑀫𑁄𑀤𑀦𑀧𑀸𑀞𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀫𑀼𑀔𑁂𑀦 ‘‘𑀲𑀼𑀅𑀢𑁆𑀣𑀢𑀁 𑀢𑀬𑀸 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀁, 𑀦 𑀧𑀸𑀞𑀓𑁆𑀓𑀫𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀣𑀸𑀭𑀓𑁂𑀲𑀼 𑀘 𑀅𑀦𑀼𑀫𑁄𑀤𑀓𑁂𑀲𑀼 𑀘 𑀦𑀯𑁂𑀳𑀺 𑀯𑀼𑀟𑁆𑀠𑀸𑀦𑀁 𑀯𑀘𑀦𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀯𑀼𑀟𑁆𑀠𑁂𑀳𑀺 𑀦𑀯𑀸𑀦𑀁 𑀯𑀘𑀦𑀓𑁆𑀓𑀫𑁄 𑀧𑀦 𑀢𑀤𑀦𑀼𑀲𑀸𑀭𑁂𑀦 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄𑀢𑀺 𑀕𑀸𑀣𑀸𑀲𑀼 𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀸𑀭𑀓𑁂𑀦 𑀣𑁂𑀭𑁂𑀦 𑀯𑀸 𑀦𑀯𑁂𑀦 𑀯𑀸 𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀘𑀦𑀓𑁆𑀓𑀫𑁄 𑀘 𑀕𑀡𑀧𑀼𑀕𑁆𑀕𑀮𑁂𑀳𑀺 𑀅𑀢𑁆𑀣𑀸𑀭𑀓𑀲𑁆𑀲 𑀯𑀘𑀦𑀓𑁆𑀓𑀫𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀭𑀳𑀁 𑀬𑁄𑀚𑁂𑀢𑀼𑀁 𑀲𑀓𑁆𑀓𑀸𑀢𑀺 𑀦 𑀯𑀼𑀢𑁆𑀢𑁄.

𑀏𑀯𑀁 𑀅𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀲𑀘𑁂 𑀓𑀣𑀺𑀦𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀆𑀪𑀢𑀁 𑀆𑀦𑀺𑀲𑀁𑀲𑀁 𑀤𑀸𑀬𑀓𑀸 ‘‘𑀬𑁂𑀦 𑀅𑀫𑁆𑀳𑀸𑀓𑀁 ¶ 𑀓𑀣𑀺𑀦𑀁 𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀘 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀺𑀲𑁆𑀲𑀭𑁄. 𑀅𑀣 𑀅𑀯𑀺𑀘𑀸𑀭𑁂𑀢𑁆𑀯𑀸𑀯 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀇𑀲𑁆𑀲𑀭𑁄. 𑀢𑀲𑁆𑀫𑀸 𑀲𑀘𑁂 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀲𑁂𑀲𑀘𑀻𑀯𑀭𑀸𑀦𑀺𑀧𑀺 𑀤𑀼𑀩𑁆𑀩𑀮𑀸𑀦𑀺 𑀳𑁄𑀦𑁆𑀢𑀺, 𑀲𑀗𑁆𑀖𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀯𑀢𑁆𑀣𑀸𑀦𑀺 𑀤𑀸𑀢𑀩𑁆𑀩𑀸𑀦𑀺, 𑀓𑀫𑁆𑀫𑀯𑀸𑀘𑀸𑀬 𑀧𑀦 𑀏𑀓𑀸𑀬𑁂𑀯 𑀯𑀝𑁆𑀝𑀢𑀺. 𑀅𑀯𑀲𑁂𑀲𑁂 ¶ 𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀺, 𑀞𑀺𑀢𑀺𑀓𑀸𑀬 𑀅𑀪𑀸𑀯𑁂 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀸𑀦𑀺, 𑀕𑀭𑀼𑀪𑀡𑁆𑀟𑀁 𑀦 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀏𑀓𑀲𑀻𑀫𑀸𑀬 𑀩𑀳𑀽 𑀯𑀺𑀳𑀸𑀭𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀏𑀓𑀢𑁆𑀣 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁨𑁭𑁦𑁩. ‘‘𑀓𑀣𑀺𑀦𑀲𑁆𑀲 𑀘 𑀓𑀺𑀁 𑀫𑀽𑀮’’𑀦𑁆𑀢𑀺𑀆𑀤𑀻𑀦𑀺 𑀲𑀬𑀫𑁂𑀯 𑀯𑀺𑀯𑀭𑀺𑀲𑁆𑀲𑀢𑀺.

𑁨𑁭𑁦𑁬. 𑀅𑀝𑁆𑀞𑀥𑀫𑁆𑀫𑀼𑀤𑁆𑀤𑁂𑀲𑀕𑀸𑀣𑀸𑀬 𑀧𑀼𑀩𑁆𑀩𑀓𑀺𑀘𑁆𑀘𑀁 𑀧𑀼𑀩𑁆𑀩-𑀯𑀘𑀦𑁂𑀦𑁂𑀯 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀧𑀘𑁆𑀘𑀼𑀤𑁆𑀥𑀸𑀭’’𑀇𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀘𑁆𑀘𑀼𑀤𑁆𑀥𑀭’’𑀇𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀧𑀘𑁆𑀘𑀼𑀤𑁆𑀥𑀸𑀭𑁄’’𑀢𑀺. 𑀅𑀥𑀺𑀝𑁆𑀞𑀳𑀦𑀁 𑀅𑀥𑀺𑀝𑁆𑀞𑀸𑀦𑀁. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀘 𑀅𑀥𑀺𑀝𑁆𑀞𑀸𑀦𑀜𑁆𑀘 𑀧𑀘𑁆𑀘𑀼𑀤𑁆𑀥𑀭𑀸𑀥𑀺𑀝𑁆𑀞𑀸𑀦𑀸. 𑀇𑀢𑀭𑀻𑀢𑀭𑀬𑁄𑀕𑁂𑀦 𑀤𑁆𑀯𑀦𑁆𑀤𑀲𑀫𑀸𑀲𑁄. 𑀅𑀢𑁆𑀣𑀸𑀭𑁄𑀢𑀺 𑀏𑀢𑁆𑀣 ‘‘𑀓𑀣𑀺𑀦𑀢𑁆𑀣𑀸𑀭𑁄’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺.

‘‘𑀫𑀸𑀢𑀺𑀓𑀸’’𑀢𑀺 𑀇𑀫𑀺𑀦𑀸 ‘‘𑀅𑀝𑁆𑀞 𑀓𑀣𑀺𑀦𑀼𑀩𑁆𑀪𑀸𑀭𑀫𑀸𑀢𑀺𑀓𑀸’’𑀢𑀺 𑀧𑀓𑀭𑀡𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸𑀳 𑁋 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺 (𑀫𑀳𑀸𑀯. 𑁩𑁧𑁦). 𑀫𑀸𑀢𑀺𑀓𑀸𑀢𑀺 𑀫𑀸𑀢𑀭𑁄 𑀚𑀦𑁂𑀢𑁆𑀢𑀺𑀬𑁄, 𑀓𑀣𑀺𑀦𑀼𑀩𑁆𑀪𑀸𑀭𑀁 𑀏𑀢𑀸 𑀅𑀝𑁆𑀞 𑀚𑀦𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀸𑀭𑁄𑀢𑀺 𑀓𑀣𑀺𑀦𑀲𑁆𑀲 𑀉𑀤𑁆𑀥𑀸𑀭𑁄. 𑀆𑀦𑀺𑀲𑀁𑀲𑀸𑀢𑀺 𑀏𑀢𑁆𑀣 ‘‘𑀓𑀣𑀺𑀦𑀲𑁆𑀲𑀸’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀓𑀣𑀺𑀦𑀲𑁆𑀲 𑀆𑀦𑀺𑀲𑀁𑀲𑀸𑀢𑀺 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀫𑀳𑀸𑀯. 𑁩𑁦𑁬). ‘‘𑀆𑀦𑀺𑀲𑀁𑀲𑁂𑀦𑀸’’𑀢𑀺𑀧𑀺 𑀧𑀸𑀞𑁄. 𑀆𑀦𑀺𑀲𑀁𑀲𑁂𑀦 𑀲𑀳 𑀇𑀫𑁂 𑀅𑀝𑁆𑀞 𑀥𑀫𑁆𑀫𑀸𑀢𑀺 𑀬𑁄𑀚𑀦𑀸.

𑁨𑁭𑁦𑁭. ‘‘𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑀸𑀤𑀺-𑀘𑀢𑀼𑀯𑀻𑀲𑀢𑀺𑀯𑀚𑁆𑀚𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀓𑀢𑀧𑀭𑀺𑀬𑁄𑀲𑀺𑀢𑀁 𑀘𑀻𑀯𑀭𑀁 𑀘𑁂 𑀮𑀤𑁆𑀥𑀁, 𑀢𑀢𑁆𑀣 ¶ 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀘𑁂 𑀅𑀓𑀢𑀲𑀺𑀩𑁆𑀩𑀦𑀸𑀤𑀺𑀓𑀫𑁆𑀫𑀁 𑀯𑀢𑁆𑀣𑀫𑁂𑀯 𑀮𑀤𑁆𑀥𑀁, 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀧𑀼𑀩𑁆𑀩𑀓𑀺𑀘𑁆𑀘𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀥𑁄𑀯𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀥𑁄𑀯𑀦𑀦𑁆𑀢𑀺 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀲𑁂𑀢𑀪𑀸𑀯𑀓𑀭𑀡𑀁. 𑀯𑀺𑀘𑀸𑀭𑁄𑀢𑀺 ‘‘𑀧𑀜𑁆𑀘𑀓𑀁 𑀯𑀸 𑀲𑀢𑁆𑀢𑀓𑀁 𑀯𑀸 𑀦𑀯𑀓𑀁 𑀯𑀸 𑀏𑀓𑀸𑀤𑀲𑀓𑀁 ¶ 𑀯𑀸 𑀳𑁄𑀢𑀽’’𑀢𑀺 𑀯𑀺𑀘𑀸𑀭𑀡𑀁. 𑀙𑁂𑀤𑀦𑀦𑁆𑀢𑀺 𑀬𑀣𑀸𑀯𑀺𑀘𑀸𑀭𑀺𑀢𑀲𑁆𑀲 𑀯𑀢𑁆𑀣𑀲𑁆𑀲 𑀙𑁂𑀤𑀦𑀁. 𑀩𑀦𑁆𑀥𑀦𑀦𑁆𑀢𑀺 𑀫𑁄𑀖𑀲𑀼𑀢𑁆𑀢𑀓𑀸𑀭𑁄𑀧𑀦𑀁. 𑀲𑀺𑀩𑁆𑀩𑀦𑀦𑁆𑀢𑀺 𑀲𑀩𑁆𑀩𑀲𑀽𑀘𑀺𑀓𑀫𑁆𑀫𑀁. 𑀭𑀚𑀦𑀦𑁆𑀢𑀺 𑀭𑀚𑀦𑀓𑀫𑁆𑀫𑀁. 𑀓𑀧𑁆𑀧𑀦𑁆𑀢𑀺 𑀓𑀧𑁆𑀧𑀩𑀺𑀦𑁆𑀤𑀼𑀤𑀸𑀦𑀁. ‘‘𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀇𑀤𑀁 𑀲𑀩𑁆𑀩𑀁 𑀓𑀣𑀺𑀦𑀢𑁆𑀣𑀸𑀭𑀲𑁆𑀲 𑀧𑀞𑀫𑀫𑁂𑀯 𑀓𑀢𑁆𑀢𑀩𑁆𑀩𑀢𑁆𑀢𑀸.

𑁨𑁭𑁦𑁮. 𑀅𑀦𑁆𑀢𑀭𑀯𑀸𑀲𑀓𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀲𑀗𑁆𑀖𑀸𑀝𑀺, 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀅𑀣𑁄 𑀅𑀦𑁆𑀢𑀭𑀯𑀸𑀲𑀓𑁄𑀢𑀺 𑀏𑀲𑀫𑁂𑀯 𑀢𑀼 𑀧𑀘𑁆𑀘𑀼𑀤𑁆𑀥𑀸𑀭𑁄𑀧𑀺 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀅𑀢𑁆𑀣𑀸𑀭𑁄𑀧𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁨𑁭𑁦𑁯. 𑀅𑀝𑁆𑀞𑀫𑀸𑀢𑀺𑀓𑀸 (𑀫𑀳𑀸𑀯. 𑁩𑁧𑁦-𑁩𑁧𑁧; 𑀧𑀭𑀺. 𑁪𑁧𑁫; 𑀫𑀳𑀸𑀯. 𑀅𑀝𑁆𑀞. 𑁩𑁧𑁦-𑁩𑁧𑁧) 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀓𑁆𑀓𑀫𑀦𑀜𑁆𑀘𑀸’’𑀢𑀺𑀆𑀤𑀺. 𑀧𑀓𑁆𑀓𑀫𑀦𑀁 𑀅𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀧𑀓𑁆𑀓𑀫𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀝𑁆𑀞𑀺𑀫𑀸𑀢𑀺 𑀏𑀢𑁆𑀣 ‘‘𑀫𑀸𑀢𑀺𑀓𑀸’’𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. 𑀇𑀫𑀸 𑀅𑀝𑁆𑀞 𑀫𑀸𑀢𑀺𑀓𑀸𑀢𑀺 𑀬𑁄𑀚𑀦𑀸.

𑁨𑁭𑁧𑁦. 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀫𑀸𑀳 ‘‘𑀓𑀢𑀘𑀻𑀯𑀭𑀫𑀸𑀤𑀸𑀬𑀸’’𑀢𑀺𑀆𑀤𑀺. ‘‘𑀓𑀢𑀘𑀻𑀯𑀭𑀫𑀸𑀤𑀸𑀬𑀸’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. ‘‘𑀆𑀯𑀸𑀲𑁂 𑀦𑀺𑀭𑀧𑁂𑀓𑁆𑀔𑀓𑁄’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑁄 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. 𑀏𑀢𑁆𑀣 𑀲𑀩𑁆𑀩𑀯𑀸𑀓𑁆𑀬𑁂𑀲𑀼 ‘‘𑀅𑀢𑁆𑀣𑀢𑀓𑀣𑀺𑀦𑁄 𑀬𑁄 𑀪𑀺𑀓𑁆𑀔𑀼 𑀲𑀘𑁂 𑀧𑀓𑁆𑀓𑀫𑀢𑀻’’𑀢𑀺 𑀲𑁂𑀲𑁄. 𑀅𑀢𑀺𑀓𑁆𑀓𑀦𑁆𑀢𑀸𑀬 𑀲𑀻𑀫𑀸𑀬𑀸𑀢𑀺 𑀯𑀺𑀳𑀸𑀭𑀲𑀻𑀫𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀬. 𑀳𑁄𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀢𑀺 𑀏𑀢𑁆𑀣 ‘‘𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀲𑁂𑀲𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀓𑁆𑀓𑀫𑀦𑀦𑁆𑀢𑀺𑀓𑀸 𑀦𑀸𑀫 𑀫𑀸𑀢𑀺𑀓𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁨𑁭𑁧𑁧-𑁨. 𑀆𑀦𑀺𑀲𑀁𑀲𑀁 ¶ 𑀦𑀸𑀫 𑀯𑀼𑀢𑁆𑀣𑀯𑀲𑁆𑀲𑁂𑀦 𑀮𑀤𑁆𑀥𑀁 𑀅𑀓𑀢𑀲𑀽𑀘𑀺𑀓𑀫𑁆𑀫𑀯𑀢𑁆𑀣𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀓𑀭𑁄𑀢𑀻’’𑀢𑀺𑀆𑀤𑀺. ‘‘𑀯𑀺𑀳𑀸𑀭𑁂 𑀅𑀦𑀧𑁂𑀓𑁆𑀔𑀓𑁄’’𑀢𑀺 𑀇𑀫𑀺𑀦𑀸 𑀏𑀢𑁆𑀣 𑀧𑀞𑀫𑀁 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. 𑀲𑀼𑀔𑀯𑀺𑀳𑀭𑀡𑀁 𑀧𑀬𑁄𑀚𑀦𑀫𑀲𑁆𑀲𑀸𑀢𑀺 𑀲𑀼𑀔𑀯𑀺𑀳𑀸𑀭𑀺𑀓𑁄, 𑀯𑀺𑀳𑀸𑀭𑁄𑀢𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄𑀯 𑀢𑀁 𑀘𑀻𑀯𑀭𑀁 𑀬𑀤𑀺 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀦𑀺𑀝𑁆𑀞𑀺𑀢𑁂 𑀦𑀺𑀝𑁆𑀞𑀸𑀦𑀦𑁆𑀢𑀸 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀦𑀺𑀝𑁆𑀞𑀺𑀢𑁂𑀘𑀻𑀯𑀭𑁂’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄.

𑁨𑁭𑁧𑁩. 𑀢𑀫𑀲𑁆𑀲𑀫𑀦𑁆𑀢𑀺 𑀢𑀁 𑀯𑀼𑀢𑁆𑀣𑀯𑀲𑁆𑀲𑀸𑀯𑀸𑀲𑀁. 𑀥𑀼𑀭𑀦𑀺𑀓𑁆𑀔𑁂𑀧𑁂𑀢𑀺 𑀉𑀪𑀬𑀥𑀼𑀭𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀓𑁆𑀔𑀡𑁂. 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦𑀸𑀫 𑀥𑀼𑀭𑀦𑀺𑀓𑁆𑀔𑁂𑀧𑁄. 𑀏𑀢𑁆𑀣 𑀧𑀮𑀺𑀩𑁄𑀥𑀤𑁆𑀯𑀬𑀲𑁆𑀲 𑀏𑀓𑀓𑁆𑀔𑀡𑁂𑀬𑁂𑀯 𑀉𑀧𑀘𑁆𑀙𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 ¶ 𑀯𑀼𑀢𑁆𑀢𑁄 ‘‘𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁂 𑀤𑁆𑀯𑁂𑀧𑀺 𑀧𑀮𑀺𑀩𑁄𑀥𑀸 ‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁, 𑀦 𑀧𑀘𑁆𑀘𑁂𑀲𑁆𑀲’𑀦𑁆𑀢𑀺 𑀘𑀺𑀦𑁆𑀢𑀺𑀢𑀫𑀢𑁆𑀢𑁂𑀬𑁂𑀯 𑀏𑀓𑀢𑁄 𑀙𑀺𑀚𑁆𑀚𑀦𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁧𑁧).

𑁨𑁭𑁧𑁪. 𑀓𑀣𑀺𑀦𑀘𑁆𑀙𑀸𑀤𑀦𑀦𑁆𑀢𑀺 𑀓𑀣𑀺𑀦𑀸𑀦𑀺𑀲𑀁𑀲𑀁 𑀘𑀻𑀯𑀭𑀯𑀢𑁆𑀣𑀼𑀁. 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀦 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀺. 𑀓𑀭𑁄𑀦𑁆𑀢𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 ‘‘𑀘𑀻𑀯𑀭’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. ‘‘𑀓𑀣𑀺𑀦𑀘𑁆𑀙𑀸𑀤𑀦’’𑀦𑁆𑀢𑀺 𑀇𑀤𑀁 𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀦𑀝𑁆𑀞𑀦𑁆𑀢𑀺 𑀘𑁄𑀭𑁂𑀳𑀺 𑀳𑀝𑀢𑁆𑀢𑀸 𑀯𑀸 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀤𑀺𑀢𑀢𑁆𑀢𑀸 𑀯𑀸 𑀦𑀝𑁆𑀞𑀁. 𑀤𑀟𑁆𑀠𑀁 𑀯𑀸𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁 𑀯𑀸. 𑀦𑀸𑀲𑀦𑀦𑁆𑀢𑀺𑀓𑀸𑀢𑀺 𑀏𑀯𑀁 𑀘𑀻𑀯𑀭𑀲𑁆𑀲 𑀦𑀸𑀲𑀦𑀦𑁆𑀢𑁂 𑀮𑀩𑁆𑀪𑀫𑀸𑀦𑀸 𑀅𑀬𑀁 𑀫𑀸𑀢𑀺𑀓𑀸 𑀦𑀸𑀲𑀦𑀦𑁆𑀢𑀺𑀓𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀞𑀫𑀁 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. ‘‘𑀓𑀭𑁄𑀦𑁆𑀢𑀲𑁆𑀲𑁂𑀯𑀸’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀁 𑀘𑀻𑀯𑀭𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄.

𑁨𑁭𑁧𑁫. 𑀮𑀤𑁆𑀥𑀸𑀦𑀺𑀲𑀁𑀲𑁄𑀢𑀺 𑀮𑀤𑁆𑀥𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑁄. 𑀆𑀦𑀺𑀲𑀁𑀲𑁂 𑀘𑀻𑀯𑀭𑁂 𑀲𑀸𑀧𑁂𑀓𑁆𑀔𑁄 𑀅𑀧𑁂𑀓𑁆𑀔𑀯𑀸 𑀩𑀳𑀺𑀲𑀻𑀫𑀕𑀢𑁄 𑀯𑀲𑁆𑀲𑀁𑀯𑀼𑀢𑁆𑀣𑀲𑀻𑀫𑀸𑀬 ¶ 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀭𑁄𑀢𑀺, 𑀲𑁄 𑀓𑀢𑀘𑀻𑀯𑀭𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀅𑀦𑁆𑀢𑀭𑀸 𑀉𑀩𑁆𑀪𑀸𑀭𑀁 𑀲𑀼𑀡𑀸𑀢𑀺 𑀘𑁂, 𑀲𑀯𑀦𑀦𑁆𑀢𑀺𑀓𑀸 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀩𑀳𑀺𑀲𑀻𑀫𑀕𑀢𑁄’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. 𑀏𑀢𑁆𑀣 ‘‘𑀓𑀢𑀘𑀻𑀯𑀭𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀻𑀯𑀭𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄 𑀧𑀞𑀫𑀁 𑀳𑁄𑀢𑀺, 𑀇𑀢𑀭𑁄 𑀧𑀦 ‘‘𑀲𑀳 𑀲𑀯𑀦𑁂𑀦 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁧𑁧) 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀙𑀸 𑀳𑁄𑀢𑀺.

𑁨𑁭𑁧𑁬-𑁭. 𑀘𑀻𑀯𑀭𑀸𑀲𑀸𑀬 𑀯𑀲𑁆𑀲𑀁𑀯𑀼𑀢𑁆𑀣𑁄 𑀆𑀯𑀸𑀲𑀢𑁄 𑀧𑀓𑁆𑀓𑀦𑁆𑀢𑁄 ‘‘𑀢𑀼𑀬𑁆𑀳𑀁 𑀘𑀻𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁄 𑀩𑀳𑀺𑀲𑀻𑀫𑀕𑀢𑁄 𑀧𑀦 𑀲𑀯𑀢𑀺, 𑀧𑀼𑀦 ‘‘𑀢𑀯 𑀘𑀻𑀯𑀭𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀼𑀢𑁆𑀢𑁄 𑀆𑀲𑀸𑀬 𑀙𑀺𑀦𑁆𑀦𑀫𑀢𑁆𑀢𑀸𑀬 𑀘𑀻𑀯𑀭𑁂 𑀧𑀘𑁆𑀘𑀸𑀲𑀸𑀬 𑀉𑀧𑀘𑁆𑀙𑀺𑀦𑁆𑀦𑀫𑀢𑁆𑀢𑀸𑀬 𑀆𑀲𑀸𑀯𑀘𑁆𑀙𑁂𑀤𑀺𑀓𑀸 𑀦𑀸𑀫 𑀫𑀸𑀢𑀺𑀓𑀸𑀢𑀺 𑀫𑀢𑀸 𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀆𑀲𑀸𑀯𑀘𑁆𑀙𑀸𑀤𑀺𑀓𑁂 𑀓𑀣𑀺𑀦𑀼𑀩𑁆𑀪𑀸𑀭𑁂 𑀆𑀯𑀸𑀲𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺, 𑀘𑀻𑀯𑀭𑀸𑀲𑀸𑀬 𑀉𑀧𑀘𑁆𑀙𑀺𑀦𑁆𑀦𑀸𑀬 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑁨𑁭𑁧𑁮-𑁨𑁦. 𑀬𑁄 𑀯𑀲𑁆𑀲𑀁𑀯𑀼𑀢𑁆𑀣𑀯𑀺𑀳𑀸𑀭𑀫𑁆𑀳𑀸 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀢𑁄 𑀳𑁄𑀢𑀺, 𑀲𑁄 𑀆𑀕𑀘𑁆𑀙𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀣𑀺𑀦𑀼𑀤𑁆𑀥𑀸𑀭𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀢𑀲𑁆𑀲 𑀲𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀫𑀢𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁂 𑀓𑀣𑀺𑀦𑀼𑀩𑁆𑀪𑀸𑀭𑁂 𑀘𑀻𑀯𑀭𑀧𑀮𑀺𑀩𑁄𑀥𑁄 𑀧𑀞𑀫𑀁 𑀙𑀺𑀚𑁆𑀚𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑁂 𑀆𑀯𑀸𑀲𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺.

𑀏𑀢𑁆𑀣 ¶ 𑀘 ‘‘𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀦𑀸𑀫 𑀘𑀻𑀯𑀭𑀓𑀸𑀮𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑀁. ‘‘𑀩𑀳𑀺𑀲𑀻𑀫𑀸𑀬𑀁 𑀘𑀻𑀯𑀭𑀓𑀸𑀮𑀲𑀫𑀬𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯. 𑁩𑁧𑁧) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁. ‘‘𑀆𑀕𑀘𑁆𑀙𑀁 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀢𑀤𑀼𑀤𑁆𑀥𑀸𑀭𑀫𑀢𑀺𑀓𑁆𑀓𑀫𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀲𑀗𑁆𑀖𑁂𑀦 ¶ 𑀓𑀭𑀺𑀬𑀫𑀸𑀦𑀁 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀆𑀕𑀘𑁆𑀙𑀦𑁆𑀢𑁄 𑀯𑀺𑀳𑀸𑀭𑀲𑀻𑀫𑀁 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀓𑀣𑀺𑀦𑀼𑀩𑁆𑀪𑀸𑀭𑀲𑁆𑀲 𑀚𑀸𑀢𑀢𑁆𑀢𑀸 𑀢𑀁 𑀦 𑀲𑀫𑁆𑀪𑀼𑀡𑁂𑀬𑁆𑀬, 𑀢𑀲𑁆𑀲𑁂𑀯𑀁 𑀲𑀻𑀫𑀫𑀢𑀺𑀓𑁆𑀓𑀦𑁆𑀢𑀲𑁆𑀲𑁂𑀯 𑀲𑀢𑁄 𑀧𑀼𑀦 𑀆𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀚𑀸𑀢𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀁 𑀆𑀤𑀸𑀬 𑀲𑀘𑁂 𑀆𑀯𑀸𑀲𑁂 𑀲𑀸𑀧𑁂𑀓𑁆𑀔𑁄𑀯 𑀕𑀢𑁄 𑀳𑁄𑀢𑀺, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀓𑀣𑀺𑀦𑀲𑁆𑀲 𑀅𑀦𑁆𑀢𑀭𑀼𑀩𑁆𑀪𑀸𑀭𑀫𑁂𑀯 𑀲𑀫𑁆𑀪𑀼𑀡𑀸𑀢𑀺 𑀘𑁂 𑀬𑀤𑀺 𑀧𑀸𑀧𑀼𑀡𑁂𑀬𑁆𑀬, 𑀢𑀲𑁆𑀲 𑀲𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀳𑁄𑀢𑀺, 𑀲𑁄 ‘‘𑀲𑀳𑀼𑀩𑁆𑀪𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀲𑀳𑀼𑀩𑁆𑀪𑀸𑀭𑁂 𑀤𑁆𑀯𑁂 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀙𑀺𑀚𑁆𑀚𑀦𑁆𑀢𑀺.

𑁨𑁭𑁨𑁧. ‘‘𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀲𑀻𑀫𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀓𑀫𑀦𑀜𑁆𑀘 𑀦𑀺𑀝𑁆𑀞𑀸𑀦𑀜𑁆𑀘 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘 𑀲𑀻𑀫𑀢𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁂𑀦 𑀲𑀳 𑀇𑀫𑁂 𑀘𑀢𑁆𑀢𑀸𑀭𑁄 𑀓𑀣𑀺𑀦𑀼𑀩𑁆𑀪𑀸𑀭𑀸 𑀧𑀼𑀕𑁆𑀕𑀮𑀸𑀥𑀻𑀦𑀸 𑀧𑀼𑀕𑁆𑀕𑀮𑀸𑀬𑀢𑁆𑀢𑀸 𑀲𑀳𑀼𑀩𑁆𑀪𑀸𑀭𑀲𑀗𑁆𑀔𑀸𑀢𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑁄 𑀲𑀗𑁆𑀖𑀸𑀥𑀻𑀦𑁄𑀢𑀺 𑀬𑁄𑀚𑀦𑀸. ‘‘𑀅𑀦𑁆𑀢𑀭𑀼𑀩𑁆𑀪𑀭𑁄’’𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁.

𑁨𑁭𑁨𑁨. 𑀦𑀸𑀲𑀦𑀦𑁆𑀢𑀺 𑀦𑀸𑀲𑀦𑀦𑁆𑀢𑀺𑀓𑁄. 𑀲𑀯𑀦𑀦𑁆𑀢𑀺 𑀲𑀯𑀦𑀦𑁆𑀢𑀺𑀓𑁄. 𑀆𑀲𑀸𑀯𑀘𑁆𑀙𑁂𑀤𑀺𑀓𑀸𑀧𑀺 𑀘𑀸𑀢𑀺 𑀢𑀬𑁄𑀧𑀺 𑀓𑀣𑀺𑀦𑀼𑀩𑁆𑀪𑀸𑀭𑀸. 𑀦 𑀢𑀼 𑀲𑀗𑁆𑀖𑀸 𑀦 𑀪𑀺𑀓𑁆𑀔𑀼𑀢𑁄𑀢𑀺 𑀲𑀗𑁆𑀖𑀢𑁄𑀧𑀺 𑀦 𑀳𑁄𑀦𑁆𑀢𑀺, 𑀧𑀼𑀕𑁆𑀕𑀮𑀢𑁄𑀧𑀺 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑁆𑀲 𑀯𑀺𑀦𑀸𑀲𑁄 𑀲𑀗𑁆𑀖𑀲𑁆𑀲 𑀯𑀸 𑀘𑀻𑀯𑀭𑀲𑀸𑀫𑀺𑀓𑀲𑁆𑀲 𑀯𑀸 𑀧𑀬𑁄𑀕𑁂𑀦 𑀦 𑀚𑀸𑀢𑁄𑀢𑀺 𑀦𑀸𑀲𑀦𑀓𑁄 𑀢𑀸𑀯 𑀓𑀣𑀺𑀦𑀼𑀩𑁆𑀪𑀸𑀭𑁄 𑀉𑀪𑀢𑁄𑀧𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄. 𑀲𑀯𑀦𑀜𑁆𑀘 𑀉𑀪𑀬𑁂𑀲𑀁 𑀧𑀬𑁄𑀕𑀢𑁄 𑀦 𑀚𑀸𑀢𑀦𑁆𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀢𑀣𑀸 𑀆𑀲𑀸𑀯𑀘𑁆𑀙𑁂𑀤𑀺𑀓𑀸𑀧𑀺.

𑁨𑁭𑁨𑁩. 𑀆𑀯𑀸𑀲𑁄𑀬𑁂𑀯 𑀧𑀮𑀺𑀩𑁄𑀥𑁄𑀢𑀺 𑀯𑀺𑀕𑁆𑀕𑀳𑁄. 𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑁂𑀢𑀺 𑀏𑀢𑁆𑀣 𑀘𑀻𑀯𑀭𑁂𑀢𑀺 𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀦𑀺𑀫𑀺𑀢𑁆𑀢𑀢𑁆𑀣𑁂 ¶ 𑀪𑀼𑀫𑁆𑀫𑀁, 𑀘𑀻𑀯𑀭𑀦𑀺𑀫𑀺𑀢𑁆𑀢𑀧𑀮𑀺𑀩𑁄𑀥𑁄𑀢𑀺 𑀅𑀢𑁆𑀣𑁄, 𑀘𑀻𑀯𑀭𑀲𑀗𑁆𑀔𑀸𑀢𑁄 𑀧𑀮𑀺𑀩𑁄𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀘𑁆𑀘𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀤𑁄𑀲𑀯𑀺𑀫𑀼𑀢𑁆𑀢𑀁 𑀅𑀢𑁆𑀣𑀁 𑀯𑀤𑀢𑀺 𑀲𑀻𑀮𑁂𑀦𑀸𑀢𑀺 𑀬𑀼𑀢𑁆𑀢𑀫𑀼𑀢𑁆𑀢𑀢𑁆𑀣𑀯𑀸𑀤𑀻, 𑀢𑁂𑀦.

𑁨𑁭𑁨𑁪. 𑀅𑀝𑁆𑀞𑀦𑁆𑀦𑀁 ¶ 𑀫𑀸𑀢𑀺𑀓𑀸𑀦𑀦𑁆𑀢𑀺 𑀩𑀳𑀺𑀲𑀻𑀫𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄 𑀲𑀢𑁆𑀢 𑀫𑀸𑀢𑀺𑀓𑀸, 𑀩𑀳𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀲𑀫𑁆𑀪𑀼𑀡𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄 𑀲𑀳𑀼𑀩𑁆𑀪𑀸𑀭𑁄𑀢𑀺 𑀇𑀫𑀸𑀲𑀁 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦 𑀘. 𑀅𑀦𑁆𑀢𑀭𑀼𑀩𑁆𑀪𑀸𑀭𑀢𑁄𑀧𑀺 𑀯𑀸𑀢𑀺 𑀩𑀳𑀺𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑁂𑀦 𑀉𑀩𑁆𑀪𑀸𑀭𑀓𑀣𑀺𑀦𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑀢𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑀢𑁄 𑀘𑀸𑀢𑀺 𑀫𑀳𑁂𑀲𑀺𑀦𑀸 𑀓𑀣𑀺𑀦𑀲𑁆𑀲 𑀤𑀼𑀯𑁂 𑀉𑀩𑁆𑀪𑀸𑀭𑀸𑀧𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀩𑀳𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 𑀆𑀕𑀢𑀲𑁆𑀲 𑀯𑀲𑁂𑀦 𑀲𑀳𑀼𑀩𑁆𑀪𑀸𑀭𑁄, 𑀩𑀳𑀺𑀲𑀻𑀫𑀁 𑀆𑀕𑀢𑀸𑀦𑀁 𑀯𑀲𑁂𑀦 𑀅𑀦𑁆𑀢𑀭𑀼𑀩𑁆𑀪𑀸𑀭𑁄𑀢𑀺 𑀏𑀓𑁄𑀬𑁂𑀯 𑀉𑀩𑁆𑀪𑀸𑀭𑁄 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀯𑀺𑀲𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑁂𑀯 𑀫𑀸𑀢𑀺𑀓𑀸 𑀧𑀸𑀴𑀺𑀬𑀁 (𑀫𑀳𑀸𑀯. 𑁩𑁧𑁦) 𑀯𑀺𑀪𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁨𑁫. 𑀅𑀦𑀸𑀫𑀦𑁆𑀢𑀘𑀸𑀭𑁄 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 ‘‘𑀅𑀦𑀸𑀫𑀦𑁆𑀢𑀸’’ 𑀇𑀢𑀺 𑀯𑀼𑀢𑁆𑀢𑁄. 𑀬𑀸𑀯 𑀓𑀣𑀺𑀦𑀁 𑀦 𑀉𑀤𑁆𑀥𑀭𑀻𑀬𑀢𑀺, 𑀢𑀸𑀯 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀘𑀭𑀡𑀁 𑀓𑀧𑁆𑀧𑀺𑀲𑁆𑀲𑀢𑀺, 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀫𑀸𑀤𑀸𑀦𑀘𑀸𑀭𑁄 ‘‘𑀅𑀲𑀫𑀸𑀤𑀸𑀦’’𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑁄. 𑀅𑀲𑀫𑀸𑀤𑀸𑀦𑀘𑀸𑀭𑁄𑀢𑀺 𑀢𑀺𑀘𑀻𑀯𑀭𑀁 𑀅𑀲𑀫𑀸𑀤𑀸𑀬 𑀘𑀭𑀡𑀁, 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄 𑀓𑀧𑁆𑀧𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

‘‘𑀕𑀡𑀢𑁄’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀕𑀡𑀪𑁄𑀚𑀦𑀁 𑀤𑀲𑁆𑀲𑀺𑀢𑀁. 𑀕𑀡𑀪𑁄𑀚𑀦𑀫𑁆𑀧𑀺 𑀓𑀧𑁆𑀧𑀺𑀲𑁆𑀲𑀢𑀺, 𑀢𑀁 𑀲𑀭𑀽𑀧𑀢𑁄 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑁂 𑀯𑀼𑀢𑁆𑀢𑀁.

‘‘𑀬𑀸𑀯𑀤𑀢𑁆𑀣𑀺𑀓’’𑀦𑁆𑀢𑀺 ¶ 𑀇𑀫𑀺𑀦𑀸 𑀬𑀸𑀯𑀤𑀢𑁆𑀣𑀘𑀻𑀯𑀭𑀁 𑀯𑀼𑀢𑁆𑀢𑀁. 𑀬𑀸𑀯𑀤𑀢𑁆𑀣𑀘𑀻𑀯𑀭𑀦𑁆𑀢𑀺 𑀬𑀸𑀯𑀢𑀓𑁂𑀦 𑀘𑀻𑀯𑀭𑁂𑀦 𑀅𑀢𑁆𑀣𑁄, 𑀢𑀸𑀯𑀢𑀓𑀁 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀁 𑀓𑀧𑁆𑀧𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

‘‘𑀢𑀢𑁆𑀣 𑀬𑁄 𑀘𑀻𑀯𑀭𑀼𑀧𑁆𑀧𑀸𑀤𑁄’’𑀢𑀺 𑀇𑀫𑀺𑀦𑀸 ‘‘𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄’’𑀢𑀺 (𑀫𑀳𑀸𑀯. 𑁩𑁦𑁬) 𑀯𑀼𑀢𑁆𑀢𑁄 𑀆𑀦𑀺𑀲𑀁𑀲𑁄 𑀤𑀲𑁆𑀲𑀺𑀢𑁄. 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄𑀢𑀺 𑀢𑀢𑁆𑀣 𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀁 𑀫𑀢𑀓𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀲𑀗𑁆𑀖𑀲𑁆𑀲 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀲𑀗𑁆𑀖𑀺𑀓𑁂𑀦 𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀆𑀪𑀢𑀁 𑀯𑀸, 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀬𑀁 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀫𑁂 𑀧𑀜𑁆𑀘 𑀓𑀣𑀺𑀦𑀸𑀦𑀺𑀲𑀁𑀲𑀸 𑀘 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀣𑀺𑀦𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀘𑀻𑀯𑀭𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁭𑁨𑁬-𑁭. 𑀘𑀻𑀯𑀭𑀁 ¶ 𑀉𑀧𑁆𑀧𑀚𑁆𑀚𑀢𑀺 𑀏𑀢𑀸𑀲𑀽𑀢𑀺 ‘‘𑀉𑀧𑁆𑀧𑀸𑀤𑀸’’𑀢𑀺 𑀚𑀦𑀺𑀓𑀸𑀯 𑀯𑀼𑀘𑁆𑀘𑀦𑁆𑀢𑀺, 𑀘𑀻𑀯𑀭𑀯𑀢𑁆𑀣𑀧𑀭𑀺𑀮𑀸𑀪𑀓𑁆𑀔𑁂𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀻𑀯𑀭𑀸𑀦𑀁 𑀧𑀝𑀺𑀮𑀸𑀪𑀸𑀬 𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀺𑀫𑀸 𑀪𑀺𑀓𑁆𑀔𑀯𑁂 𑀫𑀸𑀢𑀺𑀓𑀸𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯). 𑀘𑀻𑀯𑀭𑀫𑀸𑀢𑀺𑀓𑀸𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀳𑁂𑀢𑀼𑀪𑀽𑀢𑀫𑀸𑀢𑀭𑁄. 𑀢𑁂𑀦𑀸𑀳 𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 ‘‘𑀫𑀸𑀢𑀺𑀓𑀸𑀢𑀺 𑀫𑀸𑀢𑀭𑁄, 𑀚𑀦𑁂𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁧𑁦). 𑀫𑀸𑀢𑀺𑀓𑀸𑀢𑀺 𑀘𑁂𑀢𑁆𑀣 𑀘𑀻𑀯𑀭𑀤𑀸𑀦𑀫𑀥𑀺𑀧𑁆𑀧𑁂𑀢𑀁. 𑀬𑀣𑀸𑀳 ‘‘𑀲𑀻𑀫𑀸𑀬 𑀤𑀸𑀦𑀁 𑀏𑀓𑀸 𑀫𑀸𑀢𑀺𑀓𑀸, 𑀓𑀢𑀺𑀓𑀸𑀬 𑀤𑀸𑀦𑀁 𑀤𑀼𑀢𑀺𑀬𑀸’’𑀢𑀺𑀆𑀤𑀺. 𑀲𑀻𑀫𑀸𑀬 𑀤𑁂𑀢𑀺, 𑀓𑀢𑀺𑀓𑀸𑀬 𑀤𑁂𑀢𑀺, 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀤𑁂𑀢𑀺, 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀉𑀪𑀢𑁄𑀲𑀗𑁆𑀖𑁂 𑀤𑁂𑀢𑀺, 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀆𑀤𑀺𑀲𑁆𑀲 𑀤𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺. ‘‘𑀇𑀫𑀸 𑀧𑀦 𑀅𑀝𑁆𑀞 𑀫𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀫𑁂𑀯 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁.

𑁨𑁭𑁨𑁮. 𑀢𑀢𑁆𑀣𑀸𑀢𑀺 ¶ 𑀢𑀸𑀲𑀼 𑀅𑀝𑁆𑀞𑀫𑀸𑀢𑀺𑀓𑀸𑀲𑀼. 𑀲𑀻𑀫𑀸𑀬 𑀤𑁂𑀢𑀻𑀢𑀺 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀦𑁆𑀢𑁄 𑀲𑀻𑀫𑀸𑀬 𑀤𑁂𑀢𑀺, 𑀏𑀯𑀁 𑀤𑀺𑀦𑁆𑀦𑀁 𑀅𑀦𑁆𑀢𑁄𑀲𑀻𑀫𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀯𑀡𑁆𑀡𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀦𑁆𑀢𑁄𑀲𑀻𑀫𑀕𑀢𑁂𑀳𑀻𑀢𑀺 𑀤𑀸𑀬𑀓𑁄 𑀬𑀁 𑀲𑀻𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀏𑀯𑀫𑀸𑀳, 𑀢𑀲𑁆𑀲𑀸 𑀲𑀻𑀫𑀸𑀬 𑀅𑀦𑁆𑀢𑁄𑀕𑀢𑁂𑀳𑀺 𑀲𑀩𑁆𑀩𑁂𑀳𑀺. 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀢𑀁 𑀘𑀻𑀯𑀭𑀁 𑀪𑀸𑀚𑁂𑀢𑀩𑁆𑀩𑀁. 𑀯𑀭𑀯𑀡𑁆𑀡𑀺𑀦𑀸𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀲𑀓𑀮𑀮𑁄𑀓𑀩𑁆𑀬𑀸𑀧𑀺𑀕𑀼𑀡𑀸𑀢𑀺𑀲𑀬𑀬𑀼𑀢𑁆𑀢𑁂𑀦 𑀩𑁆𑀬𑀸𑀫𑀧𑁆𑀧𑀪𑀸𑀬, 𑀙𑀩𑁆𑀩𑀡𑁆𑀡𑀸𑀦𑀁 𑀭𑀁𑀲𑀻𑀦𑀜𑁆𑀘 𑀯𑀲𑁂𑀦 𑀉𑀢𑁆𑀢𑀫𑀧𑁆𑀧𑀪𑀸𑀢𑀺𑀲𑀬𑀬𑀼𑀢𑁆𑀢𑁂𑀦 𑀯𑀭𑀯𑀡𑁆𑀡𑀺𑀦𑀸 𑀯𑀡𑁆𑀡𑀺𑀢𑀁 𑀓𑀣𑀺𑀢𑀁. 𑀅𑀬𑀫𑁂𑀢𑁆𑀣 𑀧𑀤𑀯𑀡𑁆𑀡𑀦𑀸, 𑀅𑀬𑀁 𑀧𑀦 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀻𑀫𑀸𑀬 𑀤𑁂𑀢𑀻𑀢𑀺 𑀏𑀢𑁆𑀣 𑀢𑀸𑀯 𑀔𑀡𑁆𑀟𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀮𑀸𑀪𑀲𑀻𑀫𑀸 𑀕𑀸𑀫𑀲𑀻𑀫𑀸 𑀦𑀺𑀕𑀫𑀲𑀻𑀫𑀸 𑀦𑀕𑀭𑀲𑀻𑀫𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀚𑀦𑀧𑀤𑀲𑀻𑀫𑀸 𑀭𑀝𑁆𑀞𑀲𑀻𑀫𑀸 𑀭𑀚𑁆𑀚𑀲𑀻𑀫𑀸 𑀤𑀻𑀧𑀲𑀻𑀫𑀸 𑀘𑀓𑁆𑀓𑀯𑀸𑀴𑀲𑀻𑀫𑀸 𑀇𑀢𑀺 𑀧𑀦𑁆𑀦𑀭𑀲 𑀲𑀻𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀔𑀡𑁆𑀟𑀲𑀻𑀫𑀸 𑀲𑀻𑀫𑀸𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀉𑀧𑀘𑀸𑀭𑀲𑀻𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁄𑀢𑀺. 𑀅𑀧𑀺𑀘 𑀪𑀺𑀓𑁆𑀔𑀽𑀦𑀁 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄 𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑁄𑀚𑀦𑀲𑀸𑀮𑀢𑁄 𑀯𑀸 𑀦𑀺𑀩𑀤𑁆𑀥𑀯𑀲𑀦𑀓𑀆𑀯𑀸𑀲𑀢𑁄 𑀯𑀸 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦 𑀆𑀯𑀸𑀲𑁂𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀺, 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 𑀧𑀭𑀺𑀳𑀸𑀬𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀪𑀺𑀓𑁆𑀔𑀽𑀲𑀼𑀧𑀺 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 ¶ 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀯 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀮𑀸𑀪𑁄 𑀧𑀸𑀧𑀼𑀡𑀸𑀢𑀺. 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀫𑁂𑀯.

𑀮𑀸𑀪𑀲𑀻𑀫𑀸 ¶ 𑀦𑀸𑀫 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀜𑁆𑀜𑀸𑀢𑀸, 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸, 𑀅𑀧𑀺𑀘 𑀔𑁄 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀕𑀸𑀯𑀼𑀢𑀁 𑀯𑀸 𑀅𑀟𑁆𑀠𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀮𑀸𑀪𑀲𑀻𑀫𑀸’’𑀢𑀺 𑀦𑀸𑀫𑀮𑀺𑀔𑀺𑀢𑀓𑁂 𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 ‘‘𑀬𑀁 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀢𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀲𑀻𑀫𑀁 𑀞𑀧𑁂𑀦𑁆𑀢𑀺, 𑀅𑀬𑀁 𑀮𑀸𑀪𑀲𑀻𑀫𑀸 𑀦𑀸𑀫. 𑀕𑀸𑀫𑀦𑀺𑀕𑀫𑀦𑀕𑀭𑀅𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀧𑀺 𑀯𑀼𑀢𑁆𑀢𑀸 𑀏𑀯.

𑀚𑀦𑀧𑀤𑀲𑀻𑀫𑀸 𑀦𑀸𑀫 𑀓𑀸𑀲𑀺𑀓𑁄𑀲𑀮𑀭𑀝𑁆𑀞𑀸𑀤𑀻𑀦𑀁 𑀅𑀦𑁆𑀢𑁄 𑀩𑀳𑀽 𑀚𑀦𑀧𑀤𑀸 𑀳𑁄𑀦𑁆𑀢𑀺, 𑀏𑀢𑁆𑀣 𑀏𑀓𑁂𑀓𑁄 𑀚𑀦𑀧𑀤𑀧𑀭𑀺𑀘𑁆𑀙𑁂𑀤𑁄 𑀚𑀦𑀧𑀤𑀲𑀻𑀫𑀸. 𑀭𑀝𑁆𑀞𑀲𑀻𑀫𑀸 𑀦𑀸𑀫 𑀓𑀸𑀲𑀺𑀓𑁄𑀲𑀮𑀸𑀤𑀺𑀭𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀭𑀚𑁆𑀚𑀲𑀻𑀫𑀸 𑀦𑀸𑀫 𑀫𑀳𑀸𑀘𑁄𑀴𑀪𑁄𑀕𑁄 𑀓𑁂𑀭𑀴𑀪𑁄𑀕𑁄𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀤𑀻𑀧𑀲𑀻𑀫𑀸 𑀦𑀸𑀫 𑀲𑀫𑀼𑀤𑁆𑀤𑀦𑁆𑀢𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀫𑀳𑀸𑀤𑀻𑀧𑀸 𑀘 𑀅𑀦𑁆𑀢𑀭𑀤𑀻𑀧𑀸 𑀘. 𑀘𑀓𑁆𑀓𑀯𑀸𑀴𑀲𑀻𑀫𑀸 𑀦𑀸𑀫 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀸.

𑀏𑀯𑀫𑁂𑀢𑀸𑀲𑀼 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀲𑀗𑁆𑀖𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀣𑁂𑀯 𑀲𑀻𑀫𑀸𑀬 𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀔𑀡𑁆𑀟𑀲𑀻𑀫𑀕𑀢𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁. 𑀢𑁂𑀲𑀁𑀬𑁂𑀯 𑀳𑀺 𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀜𑁆𑀜𑁂𑀲𑀁 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀸 𑀉𑀧𑀘𑀸𑀭𑀲𑀻𑀫𑀸𑀬 𑀯𑀸 𑀞𑀺𑀢𑀸𑀦𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀺. 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂 𑀧𑀦 𑀭𑀼𑀓𑁆𑀔𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀞𑀺𑀢𑀲𑁆𑀲 𑀳𑁂𑀝𑁆𑀞𑀸 𑀯𑀸 𑀧𑀣𑀯𑀺𑀬𑀸 𑀯𑁂𑀫𑀚𑁆𑀛𑀁 𑀕𑀢𑀲𑁆𑀲 𑀧𑀸𑀧𑀼𑀡𑀸𑀢𑀺𑀬𑁂𑀯.

‘‘𑀇𑀫𑀺𑀲𑁆𑀲𑀸 𑀉𑀧𑀘𑀸𑀭𑀲𑀻𑀫𑀸𑀬 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. ‘‘𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀮𑀸𑀪𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀸𑀲𑀼 𑀲𑀻𑀫𑀸𑀲𑀼 𑀅𑀦𑁆𑀢𑁄𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀕𑀸𑀫𑀲𑀻𑀫𑀸𑀤𑀻𑀲𑀼 𑀤𑀺𑀦𑁆𑀦𑀁 ¶ 𑀢𑀸𑀲𑀁 𑀲𑀻𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀩𑀤𑁆𑀥𑀲𑀻𑀫𑀸𑀬 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀢𑁆𑀣 𑀅𑀦𑁆𑀢𑁄𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀚𑀦𑀧𑀤𑀭𑀝𑁆𑀞𑀭𑀚𑁆𑀚𑀤𑀻𑀧𑀘𑀓𑁆𑀓𑀯𑀸𑀴𑀲𑀻𑀫𑀸𑀲𑀼𑀧𑀺 𑀕𑀸𑀫𑀲𑀻𑀫𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 ¶ 𑀧𑀦 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑁄 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀢𑁄 𑀏𑀓𑁄𑀧𑀺 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀲𑀘𑁂𑀧𑀺 𑀢𑀢𑁆𑀭𑁂𑀯 𑀏𑀓𑁄 𑀲𑀪𑀸𑀕𑀪𑀺𑀓𑁆𑀔𑀼 𑀲𑀪𑀸𑀕𑀸𑀦𑀁 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀏𑀯𑀁 𑀢𑀸𑀯 𑀬𑁄 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀲 𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁄 𑀧𑀦 ‘‘𑀅𑀲𑀼𑀓𑀲𑀻𑀫𑀸𑀬𑀸’’𑀢𑀺 𑀯𑀢𑁆𑀢𑀼𑀁 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 ‘‘𑀲𑀻𑀫𑀸’’𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀚𑀸𑀦𑀦𑁆𑀢𑁄 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀯𑀸 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀸 𑀪𑀡𑀢𑀺, 𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀻𑀫𑀸 𑀦𑀸𑀫 𑀩𑀳𑀼𑀯𑀺𑀥𑀸, 𑀓𑀢𑀭𑀁 𑀲𑀻𑀫𑀁 𑀲𑀦𑁆𑀥𑀸𑀬 𑀪𑀡𑀲𑀻’’𑀢𑀺, 𑀲𑀘𑁂 𑀯𑀤𑀢𑀺 ‘‘𑀅𑀳𑀁 ‘𑀅𑀲𑀼𑀓𑀲𑀻𑀫𑀸’𑀢𑀺 𑀦 𑀚𑀸𑀦𑀸𑀫𑀺, 𑀲𑀻𑀫𑀝𑁆𑀞𑀓𑀲𑀗𑁆𑀖𑁄 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀢𑀽’’𑀢𑀺, 𑀓𑀢𑀭𑀲𑀻𑀫𑀸𑀬 𑀪𑀸𑀚𑁂𑀢𑀩𑁆𑀩𑀁? 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀓𑀺𑀭𑀸𑀳 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑀸’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀢𑀺𑀬𑁄𑀚𑀦𑀸𑀧𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀺𑀬𑁄𑀚𑀦𑁂 𑀞𑀺𑀢𑀸 𑀮𑀸𑀪𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀕𑀫𑀺𑀓𑁄 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀲𑁆𑀲 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀭𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀓𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺.

𑁨𑁭𑁨𑁯. 𑀬𑁂 ¶ 𑀯𑀺𑀳𑀸𑀭𑀸 𑀲𑀗𑁆𑀖𑁂𑀦 𑀓𑀢𑀺𑀓𑀸𑀬 𑀏𑀓𑀮𑀸𑀪𑀓𑀸 𑀲𑀫𑀸𑀦𑀮𑀸𑀪𑀓𑀸 𑀏𑀢𑁆𑀣 𑀏𑀢𑁂𑀲𑀼 𑀯𑀺𑀳𑀸𑀭𑁂𑀲𑀼 𑀤𑀺𑀦𑁆𑀦𑀁 ‘‘𑀓𑀢𑀺𑀓𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀳 𑀪𑀸𑀚𑁂𑀢𑀩𑁆𑀩𑀁 𑀘𑀻𑀯𑀭𑀁 𑀓𑀢𑀺𑀓𑀸𑀬 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀓𑀢𑀺𑀓𑀸 𑀦𑀸𑀫 𑀲𑀫𑀸𑀦𑀮𑀸𑀪𑀓𑀢𑀺𑀓𑀸, 𑀢𑀢𑁆𑀭𑁂𑀯𑀁 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸 𑁋 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀁 𑀯𑀺𑀳𑀸𑀭𑀁 𑀲𑀗𑁆𑀕𑀡𑁆𑀳𑀺𑀢𑀼𑀓𑀸𑀫𑀸 𑀲𑀫𑀸𑀦𑀮𑀸𑀪𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀅𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀧𑁄𑀭𑀸𑀡𑀓𑁄’’𑀢𑀺 𑀯𑀸 ‘‘𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄’’𑀢𑀺 𑀯𑀸 ‘‘𑀅𑀧𑁆𑀧𑀮𑀸𑀪𑁄’’𑀢𑀺 𑀯𑀸 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀢𑀁 𑀯𑀺𑀳𑀸𑀭𑀁 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀮𑀸𑀪𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀧𑀺 𑀇𑀥 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀧𑀺 𑀲𑀗𑁆𑀖𑁂𑀦 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀇𑀥 ¶ 𑀦𑀺𑀲𑀺𑀦𑁆𑀦𑁄𑀧𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀮𑀸𑀪𑁂 𑀪𑀸𑀚𑀺𑀬𑀫𑀸𑀦𑁂 𑀇𑀢𑀭𑀲𑁆𑀫𑀺𑀁 𑀞𑀺𑀢𑀲𑁆𑀲 𑀪𑀸𑀕𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀏𑀓𑁂𑀦 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀩𑀳𑀽𑀧𑀺 𑀆𑀯𑀸𑀲𑀸 𑀏𑀓𑀮𑀸𑀪𑀸 𑀓𑀸𑀢𑀩𑁆𑀩𑀸𑀢𑀺.

𑁨𑁭𑁩𑁦. 𑀘𑀻𑀯𑀭𑀤𑀸𑀬𑀓𑁂𑀦 𑀥𑀼𑀯𑀓𑀸𑀭𑀸 𑀧𑀸𑀓𑀯𑀢𑁆𑀢𑀸𑀤𑀺𑀦𑀺𑀘𑁆𑀘𑀲𑀓𑁆𑀓𑀸𑀭𑀸 𑀬𑀢𑁆𑀣 𑀲𑀗𑁆𑀖𑀲𑁆𑀲 𑀓𑁆𑀭𑀻𑀬𑀦𑁆𑀢𑀺 𑀓𑀭𑀻𑀬𑀦𑁆𑀢𑀺 𑀢𑀢𑁆𑀣 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑁂𑀦𑁂𑀯 𑀤𑀸𑀬𑀓𑁂𑀦 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀺𑀳𑀸𑀭𑀁 ‘‘𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀤𑀺𑀦𑁆𑀦’’𑀦𑁆𑀢𑀺 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀲𑁆𑀲 𑀘𑀻𑀯𑀭𑀤𑀸𑀬𑀓𑀲𑁆𑀲 𑀲𑀦𑁆𑀢𑀓𑀁 𑀲𑀗𑁆𑀖𑀲𑁆𑀲 𑀧𑀸𑀓𑀯𑀢𑁆𑀢𑀁 𑀯𑀸 𑀯𑀢𑁆𑀢𑀢𑀺, 𑀬𑀲𑁆𑀫𑀺𑀁 𑀯𑀸 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀲𑀤𑀸 𑀕𑁂𑀳𑁂 𑀪𑁄𑀚𑁂𑀢𑀺, 𑀬𑀢𑁆𑀣 𑀯𑀸 𑀢𑁂𑀦 𑀆𑀯𑀸𑀲𑁄 𑀓𑀸𑀭𑀺𑀢𑁄, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦𑀺𑀩𑀤𑁆𑀥𑀸𑀦𑀺, 𑀬𑁂𑀦 𑀧𑀦 𑀲𑀓𑀮𑁄𑀧𑀺 𑀯𑀺𑀳𑀸𑀭𑁄 ¶ 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀇𑀫𑁂 𑀥𑀼𑀯𑀓𑀸𑀭𑀸 𑀦𑀸𑀫. 𑀢𑀲𑁆𑀫𑀸 𑀲𑀘𑁂 𑀲𑁄 ‘‘𑀬𑀢𑁆𑀣 𑀫𑀬𑁆𑀳𑀁 𑀥𑀼𑀯𑀓𑀸𑀭𑀸 𑀓𑀭𑀻𑀬𑀦𑁆𑀢𑀺, 𑀏𑀢𑁆𑀣 𑀤𑀫𑁆𑀫𑀻’’𑀢𑀺 𑀯𑀸 ‘‘𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀸 𑀪𑀡𑀢𑀺, 𑀩𑀳𑀽𑀲𑀼 𑀘𑁂𑀧𑀺 𑀞𑀸𑀦𑁂𑀲𑀼 𑀥𑀼𑀯𑀓𑀸𑀭𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺.

𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀢𑁆𑀢𑀩𑁆𑀩𑀁 ‘‘𑀢𑀼𑀫𑁆𑀳𑀸𑀓𑀁 𑀥𑀼𑀯𑀓𑀸𑀭𑁂 𑀏𑀓𑀢𑁆𑀣 𑀪𑀺𑀓𑁆𑀔𑀽 𑀩𑀳𑀽, 𑀏𑀓𑀢𑁆𑀣 𑀅𑀧𑁆𑀧𑀓𑀸’’𑀢𑀺, 𑀲𑀘𑁂 ‘‘𑀪𑀺𑀓𑁆𑀔𑀼𑀕𑀡𑀦𑀸𑀬 𑀕𑀡𑁆𑀳𑀣𑀸’’𑀢𑀺 𑀪𑀡𑀢𑀺, 𑀢𑀣𑀸 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀯𑀢𑁆𑀣𑀪𑁂𑀲𑀚𑁆𑀚𑀸𑀤𑀺 𑀅𑀧𑁆𑀧𑀓𑀫𑁆𑀧𑀺 𑀲𑀼𑀔𑁂𑀦 𑀪𑀸𑀚𑀻𑀬𑀢𑀺, 𑀬𑀤𑀺 𑀧𑀦 𑀫𑀜𑁆𑀘𑁄 𑀯𑀸 𑀧𑀻𑀞𑀓𑀁 𑀯𑀸 𑀏𑀓𑀫𑁂𑀯 𑀳𑁄𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑀲𑁆𑀲 𑀯𑀸 𑀯𑀺𑀳𑀸𑀭𑀲𑁆𑀲 𑀏𑀓𑀯𑀺𑀳𑀸𑀭𑁂𑀧𑀺 𑀯𑀸 𑀬𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑁄 𑀯𑀺𑀘𑀸𑀭𑁂𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂 ‘‘𑀅𑀲𑀼𑀓𑀪𑀺𑀓𑁆𑀔𑀼 𑀕𑀡𑁆𑀳𑀢𑀽’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺.

𑀅𑀣 ‘‘𑀫𑀬𑁆𑀳𑀁 𑀥𑀼𑀯𑀓𑀸𑀭𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀘𑀸𑀭𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀲𑀗𑁆𑀖𑀲𑁆𑀲𑀧𑀺 𑀯𑀺𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀧𑀦 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀬𑀢𑁆𑀣 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀪𑀡𑁆𑀟𑀁 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀦𑁆𑀢𑀺.

𑁨𑁭𑁩𑁧. 𑀲𑀗𑁆𑀖𑀲𑁆𑀲 𑀧𑀦 𑀬𑀁 𑀤𑀺𑀦𑁆𑀦𑀦𑁆𑀢𑀺 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀬𑀁 𑀘𑀻𑀯𑀭𑀁 𑀤𑀺𑀦𑁆𑀦𑀁. ‘‘𑀲𑀫𑁆𑀫𑀼𑀔𑀻𑀪𑀽𑀢𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑁂𑀦 𑀭𑀲𑁆𑀲𑀢𑁆𑀢𑀁. 𑀲𑀫𑁆𑀫𑀼𑀔𑀺𑀪𑀽𑀢𑁂𑀦𑀸𑀢𑀺 𑀘 ¶ 𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑁂𑀦. 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁. 𑀇𑀤𑀫𑁂𑀢𑁆𑀣 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁. 𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑀤𑀸𑀬𑀓𑁂𑀦 ¶ 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑁂𑀲𑀼 𑀪𑀸𑀚𑀺𑀬𑀫𑀸𑀦𑁂𑀲𑀼 𑀲𑀻𑀫𑀝𑁆𑀞𑀲𑁆𑀲 𑀅𑀲𑀫𑁆𑀧𑀢𑁆𑀢𑀲𑁆𑀲𑀧𑀺 𑀪𑀸𑀕𑀁 𑀕𑀡𑁆𑀳𑀦𑁆𑀢𑁄 𑀦 𑀯𑀸𑀭𑁂𑀢𑀩𑁆𑀩𑁄. 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀯𑀢𑁆𑀣𑁂𑀲𑀼 𑀤𑀺𑀬𑁆𑀬𑀫𑀸𑀦𑁂𑀲𑀼 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀺𑀬𑁆𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀁.

‘‘𑀅𑀲𑀼𑀓𑀯𑀺𑀳𑀸𑀭𑁂 𑀓𑀺𑀭 𑀩𑀳𑀼𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀫𑁂𑀯. ‘‘𑀩𑀳𑀺 𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀤𑀸𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑀁.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀤𑀲 𑀯𑀢𑁆𑀣𑀸𑀦𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀪𑀸𑀚𑁂𑀢𑀩𑁆𑀩𑀸𑀦𑀺. 𑀲𑀘𑁂 ‘‘𑀲𑀩𑁆𑀩𑀸𑀦𑁂𑀯 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑀼𑀧𑁆𑀧𑀸𑀧𑀺𑀢𑀸𑀦𑀺 𑀘𑁂𑀯 𑀤𑀼𑀕𑁆𑀕𑀳𑀺𑀢𑀸𑀦𑀺 𑀘, 𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀏𑀓𑀁 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀲𑁂𑀲𑀸𑀦𑀺 ‘‘𑀇𑀫𑀸𑀦𑀺 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀏𑀓𑀫𑁂𑀯 𑀯𑀢𑁆𑀣𑀁 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀆𑀳𑀭𑀦𑁆𑀢𑀺, 𑀅𑀪𑀸𑀚𑁂𑀢𑁆𑀯𑀸𑀯 ‘‘𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀤𑀼𑀧𑁆𑀧𑀸𑀧𑀺𑀢𑀜𑁆𑀘𑁂𑀯 𑀤𑀼𑀕𑁆𑀕𑀳𑀺𑀢𑀜𑁆𑀘, 𑀲𑀢𑁆𑀣𑀓𑁂𑀦, 𑀧𑀦 𑀳𑀮𑀺𑀤𑁆𑀤𑀺𑀆𑀤𑀺𑀦𑀸 𑀯𑀸 𑀮𑁂𑀔𑀁 𑀓𑀢𑁆𑀯𑀸 𑀏𑀓𑀁 ¶ 𑀓𑁄𑀝𑁆𑀞𑀸𑀲𑀁 ‘‘𑀇𑀫𑀁 𑀞𑀸𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀸𑀧𑁂𑀢𑁆𑀯𑀸 𑀲𑁂𑀲𑀁 ‘‘𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀧𑀦 𑀯𑀢𑁆𑀣𑀲𑁆𑀲𑁂𑀯 𑀧𑀼𑀧𑁆𑀨𑀁 𑀯𑀸 𑀯𑀮𑀺 𑀯𑀸, 𑀢𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀏𑀓𑀁 𑀢𑀦𑁆𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀤𑀢𑁆𑀯𑀸 𑀲𑁂𑀲𑀁 ‘‘𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀯𑀝𑁆𑀝𑀢𑀺. 𑀔𑀡𑁆𑀟𑀁 𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀸𑀚𑀺𑀬𑀫𑀸𑀦𑀁 𑀯𑀝𑁆𑀝𑀢𑀺𑀬𑁂𑀯.

𑀏𑀓𑀪𑀺𑀓𑁆𑀔𑀼𑀓𑁂 ¶ 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀘𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁄 𑀪𑀺𑀓𑁆𑀔𑀼 ‘‘𑀲𑀩𑁆𑀩𑀸𑀦𑀺 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀸𑀦𑀺, 𑀞𑀺𑀢𑀺𑀓𑀸 𑀧𑀦 𑀦 𑀢𑀺𑀝𑁆𑀞𑀢𑀺. 𑀲𑀘𑁂 𑀏𑀓𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀞𑀺𑀢𑀺𑀓𑀸𑀬 𑀅𑀝𑁆𑀞𑀺𑀢𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀞𑀺𑀢𑀸𑀬 𑀞𑀺𑀢𑀺𑀓𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀦𑀯𑀓𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺. 𑀲𑀘𑁂 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀉𑀤𑁆𑀥𑀁 𑀆𑀭𑁄𑀳𑀢𑀺. 𑀅𑀣 𑀅𑀜𑁆𑀜𑁄 𑀦𑀢𑁆𑀣𑀺, 𑀧𑀼𑀦 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀗𑁆𑀖𑀁 𑀆𑀫𑀲𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀦 𑀧𑀦 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀬𑀁 𑀧𑀦 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑁂𑀢𑀺, 𑀢𑀁 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁 𑀦𑀸𑀫 𑀯𑀝𑁆𑀝𑀢𑀺. 𑀧𑀁𑀲𑀼𑀓𑀽𑀮𑀁 𑀧𑀦 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀼𑀢𑀗𑁆𑀕𑀁 𑀦 𑀪𑀺𑀚𑁆𑀚𑀢𑀺. ‘‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀇𑀤𑀁 𑀯𑀢𑁆𑀣𑀁 𑀲𑀗𑁆𑀖𑀲𑁆𑀲 𑀤𑁂𑀫, 𑀇𑀫𑀺𑀦𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀸𑀤𑀻𑀦𑀺 ¶ 𑀓𑀭𑁄𑀣𑀸’’𑀢𑀺 𑀤𑀺𑀦𑁆𑀦𑀫𑁆𑀧𑀺 𑀯𑀝𑁆𑀝𑀢𑀺.

𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑀺𑀦𑁆𑀦𑀸𑀦𑀺 𑀩𑀳𑀽𑀦𑀺𑀧𑀺 𑀳𑁄𑀦𑁆𑀢𑀺, 𑀘𑀻𑀯𑀭𑀢𑁆𑀣𑀸𑀬𑀧𑀺 𑀧𑀳𑁄𑀦𑁆𑀢𑀺, 𑀢𑀢𑁄 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑀗𑁆𑀖𑁄 𑀪𑀸𑀚𑀺𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀪𑀸𑀚𑁂𑀢𑀺, 𑀢𑀢𑁄 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀸𑀫𑀺𑀓𑁂𑀳𑀺 𑀯𑀺𑀘𑀸𑀭𑀺𑀢𑀫𑁂𑀯 𑀳𑀺 𑀯𑀝𑁆𑀝𑀢𑀺, 𑀦 𑀇𑀢𑀭𑀁.

‘‘𑀧𑀁𑀲𑀼𑀓𑀽𑀮𑀺𑀓𑀲𑀗𑁆𑀖𑀲𑁆𑀲 𑀥𑀫𑁆𑀫𑀓𑀭𑀡𑀅𑀁𑀲𑀩𑀤𑁆𑀥𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀁 𑀢𑀢𑁆𑀣 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀢𑀁 𑀘𑀻𑀯𑀭𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀢𑁆𑀢𑀁 𑀲𑀗𑁆𑀖𑀲𑁆𑀲 𑀤𑁂𑀦𑁆𑀢𑀺, 𑀧𑀁𑀲𑀼𑀓𑀽𑀮𑀺𑀓𑁂𑀳𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 𑀧𑀦 𑀩𑀳𑀺 𑀉𑀧𑀘𑀸𑀭𑀲𑀻𑀫𑀸𑀬 𑀅𑀤𑁆𑀥𑀸𑀦𑀧𑀝𑀺𑀧𑀦𑁆𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀲𑀗𑁆𑀖𑀦𑀯𑀓𑀲𑁆𑀲 𑀯𑀸 𑀆𑀭𑁄𑀘𑁂𑀢𑀺, 𑀲𑀘𑁂𑀧𑀺 𑀬𑁄𑀚𑀦𑀁 𑀨𑀭𑀺𑀢𑁆𑀯𑀸 𑀧𑀭𑀺𑀲𑀸 𑀞𑀺𑀢𑀸 𑀳𑁄𑀢𑀺, 𑀏𑀓𑀸𑀩𑀤𑁆𑀥𑀸 ¶ 𑀘𑁂, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂 𑀧𑀦 𑀤𑁆𑀯𑀸𑀤𑀲𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀲𑀁 𑀅𑀲𑀫𑁆𑀧𑀢𑁆𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺.

𑁨𑁭𑁩𑁨. 𑀇𑀤𑀸𑀦𑀺 ‘‘𑀉𑀪𑀢𑁄𑀲𑀗𑁆𑀖𑁂 𑀤𑁂𑀢𑀻’’𑀢𑀺 𑀫𑀸𑀢𑀺𑀓𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀉𑀪𑀢𑁄𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲𑀸’’𑀢𑀺𑀆𑀤𑀺. 𑀉𑀪𑀢𑁄𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀜𑁆𑀘 𑀉𑀤𑁆𑀤𑀺𑀲𑀺𑀢𑁆𑀯𑀸. 𑀤𑁂𑀢𑀻𑀢𑀺 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺 𑀤𑁂𑀢𑀺. ‘‘𑀩𑀳𑀼 𑀯𑀸’’𑀢𑀺 𑀏𑀢𑁆𑀣 ‘‘𑀩𑀳𑀽 𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀢𑁆𑀢𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽 𑀣𑁄𑀓𑀸 𑀯𑀸 𑀳𑁄𑀦𑁆𑀢𑀼 𑀩𑀳𑀽 𑀯𑀸, 𑀧𑀼𑀕𑁆𑀕𑀮𑀕𑁆𑀕𑁂𑀦 𑀅𑀓𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑀯𑀲𑁂𑀦 𑀲𑀫𑀪𑀸𑀕𑁄𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀭𑀸𑀬𑀁 ¶ 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀤𑁆𑀯𑁂𑀥𑀸𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀤𑀫𑁆𑀫𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀤𑁆𑀯𑁂 𑀪𑀸𑀕𑁂 𑀲𑀫𑁂 𑀓𑀢𑁆𑀯𑀸 𑀏𑀓𑁄 𑀤𑀸𑀢𑀩𑁆𑀩𑁄.

‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀤𑀲 𑀤𑀲 𑀪𑀺𑀓𑁆𑀔𑀽, 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀳𑁄𑀦𑁆𑀢𑀺, 𑀏𑀓𑀯𑀻𑀲𑀢𑀺 𑀧𑀝𑀺𑀯𑀻𑀲𑁂 𑀓𑀢𑁆𑀯𑀸 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲 𑀤𑀸𑀢𑀩𑁆𑀩𑁄, 𑀤𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀤𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲. 𑀬𑁂𑀦 𑀧𑀼𑀕𑁆𑀕𑀮𑀺𑀓𑁄 𑀮𑀤𑁆𑀥𑁄, 𑀲𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑀼𑀁 𑀮𑀪𑀢𑀺. 𑀓𑀲𑁆𑀫𑀸? 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸.

‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀗𑁆𑀖𑀢𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀓𑁄𑀝𑁆𑀞𑀸𑀲𑀲𑀫𑁄𑀯 𑀓𑁄𑀝𑁆𑀞𑀸𑀲𑁄 𑀳𑁄𑀢𑀺.

‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑁆𑀯𑀸𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑀲 𑀪𑀺𑀓𑁆𑀔𑀽𑀦𑀁, 𑀤𑀲 𑀪𑀺𑀓𑁆𑀔𑀼𑀦𑀻𑀦𑀁, 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲, 𑀏𑀓𑁄 𑀘𑁂𑀢𑀺𑀬𑀲𑁆𑀲 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀼𑀦 𑀕𑀳𑁂𑀢𑀼𑀁 𑀮𑀪𑀢𑀺. 𑀘𑁂𑀢𑀺𑀬𑀲𑁆𑀲 𑀏𑀓𑁄𑀬𑁂𑀯.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ¶ 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 ¶ 𑀦 𑀮𑀪𑀢𑀺, 𑀧𑀸𑀧𑀼𑀡𑀦𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀮𑀪𑀢𑀺. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀏𑀓𑀁 𑀘𑁂𑀢𑀺𑀬𑀲𑁆𑀲 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁.

‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀧𑀼𑀕𑁆𑀕𑀮𑀕𑀡𑀦𑀸𑀬 𑀏𑀯 𑀯𑀺𑀪𑀚𑀺𑀢𑀩𑁆𑀩𑀁.

‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦𑀢𑁆𑀣𑀺, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀏𑀯 𑀪𑀸𑀚𑁂𑀢𑀩𑁆𑀩𑀁. 𑀬𑀣𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀬𑁄 𑀦𑀻𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀦𑁂𑀢𑀩𑁆𑀩𑁄.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, 𑀯𑀲𑁆𑀲𑀕𑁆𑀕𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀯𑀺𑀲𑀼𑀁 𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲.

‘‘𑀪𑀺𑀓𑁆𑀔𑀽𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺.

‘‘𑀪𑀺𑀓𑁆𑀔𑀽𑀦𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀮𑀩𑁆𑀪𑀢𑀺.

‘‘𑀪𑀺𑀓𑁆𑀔𑀽𑀦𑀜𑁆𑀘 ¶ 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀯𑀺𑀲𑀼𑀁 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀼𑀩𑁆𑀩𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺, 𑀪𑀕𑀯𑀸 𑀫𑀚𑁆𑀛𑁂 𑀦𑀺𑀲𑀻𑀤𑀢𑀺, 𑀤𑀓𑁆𑀔𑀺𑀡𑀢𑁄 𑀪𑀺𑀓𑁆𑀔𑀽, 𑀯𑀸𑀫𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀪𑀕𑀯𑀸 𑀉𑀪𑀺𑀦𑁆𑀦𑀁 𑀲𑀗𑁆𑀖𑀢𑁆𑀣𑁂𑀭𑁄, 𑀢𑀤𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀧𑀘𑁆𑀘𑀬𑁂 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀸𑀧𑁂𑀢𑀺. 𑀏𑀢𑀭𑀳𑀺 𑀧𑀦 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀲𑀥𑀸𑀢𑀼𑀓𑀁 𑀧𑀝𑀺𑀫𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺, 𑀧𑀝𑀺𑀫𑀸𑀬 𑀯𑀸 ¶ 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀭𑀢𑁄 𑀆𑀥𑀸𑀭𑀓𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀤𑁂𑀫𑀸’’𑀢𑀺 𑀢𑀢𑁆𑀣 𑀬𑀁 𑀧𑀞𑀫𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀦𑁆𑀢𑀺, 𑀯𑀺𑀳𑀸𑀭𑀁 𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀤𑀁 𑀘𑁂𑀢𑀺𑀬𑀲𑁆𑀲 𑀤𑁂𑀫𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀜𑁆𑀘 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀘 𑀤𑁂𑀦𑁆𑀢𑀺, 𑀢𑀢𑁆𑀣 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀢𑀸𑀯 𑀘𑁂𑀢𑀺𑀬𑁂 𑀆𑀭𑁄𑀧𑁂𑀢𑀩𑁆𑀩𑀸𑀦𑀺, 𑀯𑀢𑁆𑀣𑁂𑀳𑀺 𑀧𑀝𑀸𑀓𑀸, 𑀢𑁂𑀮𑁂𑀦 𑀧𑀤𑀻𑀧𑀸 𑀓𑀸𑀢𑀩𑁆𑀩𑀸. 𑀧𑀺𑀡𑁆𑀟𑀧𑀸𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀧𑀦 𑀬𑁄 𑀦𑀺𑀩𑀤𑁆𑀥𑀁 𑀘𑁂𑀢𑀺𑀬𑀲𑁆𑀲 𑀚𑀕𑁆𑀕𑀓𑁄 𑀳𑁄𑀢𑀺 𑀧𑀩𑁆𑀩𑀚𑀺𑀢𑁄 𑀯𑀸 𑀕𑀳𑀝𑁆𑀞𑁄 𑀯𑀸, 𑀢𑀲𑁆𑀲 𑀤𑀸𑀢𑀩𑁆𑀩𑀸𑀦𑀺. 𑀦𑀺𑀩𑀤𑁆𑀥𑀚𑀕𑁆𑀕𑀓𑁂 𑀅𑀲𑀢𑀺 𑀆𑀳𑀝𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸𑀧𑀺 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀼 𑀘 𑀬𑀁 𑀓𑀺𑀜𑁆𑀘𑀺 ‘‘𑀇𑀤𑀁 𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀲𑁆𑀲 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀤𑀽𑀭𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀽𑀚𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀁 𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀳𑀁 𑀧𑀺𑀡𑁆𑀟𑀸𑀬 𑀘𑀭𑀸𑀫𑀺, 𑀆𑀲𑀦𑀲𑀸𑀮𑀸𑀬 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑁂 𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀢𑀼𑀬𑁆𑀳𑀁𑀬𑁂𑀯 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀧𑀦 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀯 𑀓𑀸𑀮𑁄 𑀉𑀧𑀓𑀝𑁆𑀞𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁭𑁩𑁩. 𑀬𑀁 𑀧𑀦 𑀘𑀻𑀯𑀭𑀁 ‘‘𑀬𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀢𑁆𑀣𑀲𑁆𑀲 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀆𑀯𑀸𑀲𑁂 𑀯𑀼𑀢𑁆𑀣𑀯𑀲𑁆𑀲𑁂𑀦 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀢𑀁 𑀘𑀻𑀯𑀭𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀯𑀡𑁆𑀡𑀺𑀢𑀁 𑀤𑁂𑀲𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁𑀯𑀼𑀢𑁆𑀣𑀸, 𑀬𑀢𑁆𑀢𑀓𑀸 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁, 𑀅𑀜𑁆𑀜𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀲𑁆𑀲𑀸𑀧𑀺 ¶ 𑀲𑀢𑀺 𑀕𑀸𑀳𑀓𑁂 ¶ 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀅𑀦𑁆𑀢𑁄𑀳𑁂𑀫𑀦𑁆𑀢𑁂 𑀏𑀯𑀜𑁆𑀘 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻𑀢𑀺 𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦𑁂𑀢𑀁 𑀅𑀯𑀺𑀘𑀸𑀭𑀺𑀢𑀁.

𑀲𑀘𑁂 𑀧𑀦 𑀩𑀳𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁄 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀲𑀫𑁆𑀧𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀅𑀣 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀤𑀢𑀺, 𑀢𑀢𑁆𑀭 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁂𑀯 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀤𑀢𑀺, 𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁𑀬𑁂𑀯 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀙𑀺𑀦𑁆𑀦𑀯𑀲𑁆𑀲𑀸 𑀦 𑀮𑀪𑀦𑁆𑀢𑀺, 𑀯𑀲𑁆𑀲𑀁 𑀯𑀲𑀦𑁆𑀢𑀸𑀯 𑀮𑀪𑀦𑁆𑀢𑀺. 𑀘𑀻𑀯𑀭𑀫𑀸𑀲𑁂 𑀧𑀦 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀜𑁆𑀘 𑀙𑀺𑀦𑁆𑀦𑀯𑀲𑁆𑀲𑀸𑀦𑀜𑁆𑀘 𑀦 𑀧𑀸𑀧𑀼𑀡𑀸𑀢𑀺.

𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄, 𑀢𑀸𑀯 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀯𑀸 𑀳𑁄𑀢𑀼 𑀅𑀦𑀢𑁆𑀣𑀢𑀁 𑀯𑀸, 𑀅𑀢𑀻𑀢𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑁂 𑀧𑀦 𑀫𑀸𑀢𑀺𑀓𑀸 𑀆𑀭𑁄𑀧𑁂𑀢𑀩𑁆𑀩𑀸 ‘‘𑀅𑀢𑀻𑀢𑀯𑀲𑁆𑀲𑀸𑀯𑀸𑀲𑀲𑁆𑀲 𑀧𑀜𑁆𑀘 𑀫𑀸𑀲𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀅𑀦𑀸𑀕𑀢𑁂 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀪𑀯𑀺𑀲𑁆𑀲𑀢𑀺, 𑀓𑀢𑀭𑀯𑀲𑁆𑀲𑀸𑀯𑀸𑀲𑀲𑁆𑀲 𑀤𑁂𑀲𑀻’’𑀢𑀺. 𑀲𑀘𑁂 ‘‘𑀅𑀢𑀻𑀢𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁 𑀅𑀦𑁆𑀢𑁄𑀯𑀲𑁆𑀲𑀁 𑀯𑀼𑀢𑁆𑀣𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀸𑀦𑀫𑁆𑀧𑀺 𑀲𑀪𑀸𑀕𑀸 𑀕𑀡𑁆𑀳𑀺𑀢𑀼𑀁 𑀮𑀪𑀦𑁆𑀢𑀺.

𑀲𑀘𑁂 ‘‘𑀅𑀦𑀸𑀕𑀢𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀳𑁂𑀢𑀩𑁆𑀩𑀁. 𑀅𑀣 ‘‘𑀅𑀕𑀼𑀢𑁆𑀢𑁄 𑀯𑀺𑀳𑀸𑀭𑁄, 𑀘𑁄𑀭𑀪𑀬𑀁 𑀅𑀢𑁆𑀣𑀺, 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀕𑀡𑁆𑀳𑀺𑀢𑁆𑀯𑀸 𑀯𑀸 𑀆𑀳𑀺𑀡𑁆𑀟𑀺𑀢𑀼’’𑀦𑁆𑀢𑀺 ¶ 𑀯𑀼𑀢𑁆𑀢𑁂 ‘‘𑀲𑀫𑁆𑀧𑀢𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺 ‘‘𑀇𑀢𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀦 𑀤𑀺𑀦𑁆𑀦𑀁, 𑀢𑀁 𑀤𑀫𑁆𑀫𑀻’’𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀢𑁂 𑀤𑀺𑀲𑀸𑀧𑀓𑁆𑀓𑀦𑁆𑀢𑀸, 𑀅𑀜𑁆𑀜𑁄 𑀯𑀺𑀲𑁆𑀲𑀸𑀲𑀺𑀓𑁄 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀅𑀣 𑀏𑀓𑁄𑀬𑁂𑀯 𑀅𑀯𑀲𑀺𑀝𑁆𑀞𑁄, 𑀲𑁂𑀲𑀸 𑀓𑀸𑀮𑀓𑀢𑀸, 𑀲𑀩𑁆𑀩𑀁 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀦𑁆𑀢𑀺.

𑁨𑁭𑁩𑁪. 𑀬𑀸𑀕𑀼𑀬𑀸 𑀧𑀦 𑀧𑀻𑀢𑀸𑀬 𑀯𑀸 𑀪𑀢𑁆𑀢𑁂 𑀯𑀸 𑀪𑀼𑀢𑁆𑀢𑁂 𑀲𑀘𑁂 𑀧𑀦 𑀆𑀤𑀺𑀲𑁆𑀲 ‘‘𑀬𑁂𑀦 𑀫𑁂 𑀬𑀸𑀕𑀼 𑀧𑀻𑀢𑀸, 𑀢𑀲𑁆𑀲 𑀤𑀫𑁆𑀫𑀺, 𑀬𑁂𑀦 𑀫𑁂 𑀪𑀢𑁆𑀢𑀁 𑀪𑀼𑀢𑁆𑀢𑀁, 𑀢𑀲𑁆𑀲 𑀤𑀫𑁆𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘𑀻𑀯𑀭𑀁 𑀤𑁂𑀢𑀺, 𑀯𑀺𑀦𑀬𑀥𑀭𑁂𑀦 ¶ 𑀢𑀢𑁆𑀣 𑀢𑀢𑁆𑀣𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 𑀔𑀸𑀤𑀦𑀻𑀬𑀘𑀻𑀯𑀭𑀲𑁂𑀦𑀸𑀲𑀦𑀪𑁂𑀲𑀚𑁆𑀚𑀸𑀤𑀻𑀲𑀼.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀪𑀺𑀓𑁆𑀔𑀽 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 𑀯𑀸 𑀬𑀸𑀕𑀼𑀬𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀖𑀭𑀁 𑀧𑀯𑀺𑀝𑁆𑀞𑀸𑀦𑀁 𑀬𑀸𑀕𑀼𑀁 𑀤𑁂𑀢𑀺, 𑀬𑀸𑀕𑀼𑀁 𑀤𑀢𑁆𑀯𑀸 𑀧𑀻𑀢𑀸𑀬 𑀬𑀸𑀕𑀼𑀬𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀦𑁆𑀢𑀺, 𑀬𑁂𑀳𑀺 𑀧𑀦 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀖𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀯𑀸 𑀖𑀭𑀁 𑀧𑀯𑀺𑀝𑁆𑀞𑁂𑀳𑀺 𑀯𑀸 𑀬𑀸𑀕𑀼 𑀮𑀤𑁆𑀥𑀸, 𑀬𑁂𑀲𑀁 𑀯𑀸 𑀆𑀲𑀦𑀲𑀸𑀮𑀢𑁄 𑀧𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀦𑀻𑀢𑀸, 𑀬𑁂 𑀯𑀸 𑀣𑁂𑀭𑁂𑀳𑀺 𑀧𑁂𑀲𑀺𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀦𑁆𑀢𑀺.

𑀲𑀘𑁂 𑀧𑀦 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀩𑀳𑀽 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀜𑁆𑀘 𑀩𑀳𑀺𑀕𑁂𑀳𑀜𑁆𑀘 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀤𑀸𑀬𑀓𑁄 𑀘 𑀏𑀯𑀁 𑀯𑀤𑀢𑀺 ‘‘𑀦𑀺𑀫𑀦𑁆𑀢𑀺𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀦𑀺𑀫𑀦𑁆𑀢𑀺𑀢𑀸 𑀯𑀸, 𑀬𑁂𑀲𑀁 𑀫𑀬𑀸 𑀬𑀸𑀕𑀼 𑀤𑀺𑀦𑁆𑀦𑀸, 𑀲𑀩𑁆𑀩𑁂𑀲𑀁 𑀇𑀫𑀸𑀦𑀺 𑀯𑀢𑁆𑀣𑀸𑀦𑀺 𑀳𑁄𑀦𑁆𑀢𑀽’’𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀦𑁆𑀢𑀺. 𑀬𑁂𑀳𑀺 𑀧𑀦 𑀣𑁂𑀭𑀸𑀦𑀁 𑀳𑀢𑁆𑀣𑀢𑁄 𑀬𑀸𑀕𑀼 ¶ 𑀮𑀤𑁆𑀥𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀅𑀣 𑀲𑁄 ‘‘𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀲𑀩𑁆𑀩𑁂𑀲𑀁 𑀳𑁄𑀦𑁆𑀢𑀽’’𑀢𑀺 𑀯𑀤𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀦𑁆𑀢𑀺. 𑀪𑀢𑁆𑀢𑀔𑀸𑀤𑀦𑀻𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀻𑀯𑀭𑁂 𑀯𑀸𑀢𑀺 𑀧𑀼𑀩𑁆𑀩𑁂𑀧𑀺 𑀬𑁂𑀦 𑀯𑀲𑁆𑀲𑀁 𑀯𑀸𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑀺𑀦𑁆𑀦𑀧𑀼𑀩𑁆𑀩𑀁 𑀳𑁄𑀢𑀺, 𑀲𑁄 𑀘𑁂 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀯𑀤𑀢𑀺 ‘‘𑀬𑁂𑀲𑀁 𑀫𑀬𑀸 𑀧𑀼𑀩𑁆𑀩𑁂 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑁂𑀲𑀁𑀬𑁂𑀯 𑀇𑀫𑀁 𑀘𑀻𑀯𑀭𑀁 𑀯𑀸 𑀲𑀼𑀢𑁆𑀢𑀁 𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀸 𑀳𑁄𑀦𑁆𑀢𑀽’’𑀢𑀺, 𑀲𑀩𑁆𑀩𑀁 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀸𑀢𑀺.

𑀲𑁂𑀦𑀸𑀲𑀦𑁂 𑀯𑀸𑀢𑀺 ‘‘𑀬𑁄 𑀫𑀬𑀸 𑀓𑀸𑀭𑀺𑀢𑁂 𑀯𑀺𑀳𑀸𑀭𑁂 𑀯𑀸 𑀧𑀭𑀺𑀯𑁂𑀡𑁂 𑀯𑀸 𑀯𑀲𑀢𑀺, 𑀢𑀲𑁆𑀲𑀺𑀤𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑁂𑀯 𑀳𑁄𑀢𑀺.

𑀪𑁂𑀲𑀚𑁆𑀚𑁂 𑀯𑀸𑀢𑀺 ‘‘𑀫𑀬𑀁 𑀓𑀸𑀮𑁂𑀦 𑀓𑀸𑀮𑀁 𑀣𑁂𑀭𑀸𑀦𑀁 𑀲𑀧𑁆𑀧𑀺𑀆𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀤𑁂𑀫, 𑀬𑁂𑀳𑀺 𑀢𑀸𑀦𑀺 𑀮𑀤𑁆𑀥𑀸𑀦𑀺, 𑀢𑁂𑀲𑀁𑀬𑁂𑀯𑀺𑀤𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁𑀬𑁂𑀯 𑀳𑁄𑀢𑀻𑀢𑀺.

𑁨𑁭𑁩𑁫. 𑀤𑀻𑀬𑀢𑁂𑀢𑀺 𑀤𑀸𑀦𑀦𑁆𑀢𑀺 𑀓𑀫𑁆𑀫𑀲𑀸𑀥𑀦𑁂𑀦 𑀘𑀻𑀯𑀭𑀁 𑀯𑀼𑀘𑁆𑀘𑀢𑀺. 𑀬𑀁-𑀲𑀤𑁆𑀤𑁂𑀦 𑀘𑀻𑀯𑀭𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸 𑀢𑀁-𑀲𑀤𑁆𑀤𑁂𑀦𑀸𑀧𑀺 𑀢𑀤𑁂𑀯 𑀧𑀭𑀸𑀫𑀲𑀺𑀢𑀩𑁆𑀩𑀦𑁆𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 ‘‘𑀇𑀫𑀁 ¶ 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑁂𑀢𑀺, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀺. 𑀲𑀘𑁂 𑀧𑀦 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀜𑁆𑀘 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀏𑀯𑀁 𑀯𑀤𑀢𑀺, 𑀣𑁂𑀭𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀲𑀸𑀧𑀺 𑀧𑀸𑀧𑀼𑀡𑀸𑀢𑀺. ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺.

𑁨𑁭𑁩𑁭. 𑀯𑀤𑀢𑀺𑀘𑁆𑀘𑁂𑀯𑀫𑁂𑀯 ¶ 𑀘𑁂𑀢𑀺 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀤𑀢𑀺 𑀘𑁂. 𑀢𑀦𑁆𑀢𑀺 𑀢𑀁 𑀧𑀭𑀺𑀓𑁆𑀔𑀸𑀭𑀁. 𑀢𑁂𑀲𑀦𑁆𑀢𑀺 𑀫𑀸𑀢𑀼𑀆𑀤𑀻𑀦𑀁. 𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁩𑁮. ‘‘𑀧𑀜𑁆𑀘𑀦𑁆𑀦𑀁…𑀧𑁂… 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀕𑀸𑀣𑀸𑀤𑁆𑀯𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑀢𑁆𑀣𑀁 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁. 𑀅𑀘𑁆𑀘𑀬𑁂𑀢𑀺 𑀓𑀸𑀮𑀓𑀺𑀭𑀺𑀬𑀸𑀬. 𑀤𑀸𑀦𑀦𑁆𑀢𑀺 ‘‘𑀫𑀬𑀺 𑀓𑀸𑀮𑀓𑀢𑁂 𑀇𑀫𑀁 𑀧𑀭𑀺𑀓𑁆𑀔𑀸𑀭𑀁 𑀢𑀼𑀬𑁆𑀳𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀘𑁆𑀘𑀚𑀦𑀁. 𑀓𑀺𑀜𑁆𑀘𑀺𑀧𑀻𑀢𑀺 𑀅𑀦𑁆𑀢𑀫𑀲𑁄 𑀤𑀦𑁆𑀢𑀓𑀝𑁆𑀞𑀫𑁆𑀧𑀺. 𑀕𑀺𑀳𑀻𑀦𑀁 𑀧𑀦 𑀤𑀸𑀦𑀁 𑀢𑀣𑀸 𑀤𑀸𑀬𑀓𑀸𑀦𑀁 𑀕𑀺𑀳𑀻𑀦𑀫𑁂𑀯 𑀅𑀘𑁆𑀘𑀬𑁂 𑀭𑀽𑀳𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁩𑁯. 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑁂 𑀓𑀸𑀮𑀁 𑀓𑀭𑁄𑀢𑀺, 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸 𑀧𑀭𑀺𑀓𑁆𑀔𑀸𑀭𑀸 𑀪𑀺𑀓𑁆𑀔𑀽𑀦𑀁𑀬𑁂𑀯 𑀲𑀦𑁆𑀢𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀓𑀸𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀓𑀸 𑀓𑀸𑀮𑀓𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸.

𑁨𑁭𑁪𑁦. 𑀲𑀸𑀫𑀡𑁂𑀭𑀻 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 ‘‘𑀲𑀺𑀓𑁆𑀔𑀫𑀸𑀦𑀸 𑀯𑀸’’𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀳𑀸𑀭𑀲𑁆𑀫𑀺𑀁 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑁂. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀸𑀫𑀡𑁂𑀭𑀺𑀬𑀸 𑀯𑀸 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀧𑀭𑀺𑀓𑁆𑀔𑀸𑀭𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀦𑁆𑀢𑀓𑀸𑀢𑀺 𑀏𑀢𑁆𑀣𑀸𑀧𑀺 𑀪𑀺𑀓𑁆𑀔𑀽𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁨𑁭𑁪𑁧. 𑀤𑁂𑀳𑀺 𑀦𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀇𑀫𑀁 𑀘𑀻𑀯𑀭’’𑀦𑁆𑀢𑀺 𑀧𑀓𑀭𑀡𑀢𑁄 𑀮𑀩𑁆𑀪𑀢𑀺. ‘‘𑀇𑀫𑀁 𑀘𑀻𑀯𑀭𑀁 𑀦𑁂𑀢𑁆𑀯𑀸 𑀅𑀲𑀼𑀓𑀲𑁆𑀲 𑀤𑁂𑀳𑀻’’𑀢𑀺 𑀬𑀁 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑀁 𑀢𑀲𑁆𑀲 𑀧𑀼𑀭𑀺𑀫𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀺. ‘‘𑀇𑀤𑀁 𑀘𑀻𑀯𑀭𑀁 ¶ 𑀅𑀲𑀼𑀓𑀲𑁆𑀲 𑀤𑀫𑁆𑀫𑀻’’𑀢𑀺 𑀬𑀁 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑀁 𑀬𑀲𑁆𑀲 𑀧𑀳𑀺𑀬𑁆𑀬𑀢𑀺, 𑀢𑀲𑁆𑀲 𑀧𑀘𑁆𑀙𑀺𑀫𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁪𑁨. 𑀬𑀣𑀸𑀯𑀼𑀢𑁆𑀢𑀯𑀘𑀦𑀧𑁆𑀧𑀓𑀸𑀭𑀸𑀦𑀼𑀭𑀽𑀧𑁂𑀦 ¶ 𑀲𑀸𑀫𑀺𑀓𑁂 𑀜𑀢𑁆𑀯𑀸 𑀲𑀸𑀫𑀺𑀓𑁂𑀲𑀼 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀢𑁂𑀲𑀼 𑀫𑀢𑁂𑀲𑀼 𑀫𑀢𑀓𑀘𑀻𑀯𑀭𑀫𑁆𑀧𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀏𑀯’’𑀦𑁆𑀢𑀺𑀆𑀤𑀺. ‘‘𑀫𑀢𑀲𑁆𑀲 𑀯𑀸 𑀅𑀫𑀢𑀲𑁆𑀲 𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀯𑀺𑀲𑁆𑀲𑀸𑀲𑀁 𑀯𑀸𑀧𑀺 𑀕𑀡𑁆𑀳𑁂𑀬𑁆𑀬𑀸𑀢𑀺 𑀚𑀻𑀯𑀦𑁆𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀁 𑀕𑀡𑁆𑀳𑁂𑀬𑁆𑀬. 𑀕𑀡𑁆𑀳𑁂 𑀫𑀢𑀓𑀘𑀻𑀯𑀭𑀦𑁆𑀢𑀺 𑀫𑀢𑀲𑁆𑀲 𑀘𑀻𑀯𑀭𑀁 𑀫𑀢𑀓𑀧𑀭𑀺𑀓𑁆𑀔𑀸𑀭𑀦𑀻𑀳𑀸𑀭𑁂𑀦 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬.

𑁨𑁭𑁪𑁩. 𑀭𑀚𑀢𑁂 𑀅𑀦𑁂𑀦𑀸𑀢𑀺 𑀭𑀚𑀦𑀦𑁆𑀢𑀺 𑀫𑀽𑀮𑀸𑀤𑀺𑀲𑀩𑁆𑀩𑀫𑀸𑀳. 𑀯𑀦𑁆𑀢𑀤𑁄𑀲𑁂𑀦𑀸𑀢𑀺 𑀲𑀯𑀸𑀲𑀦𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀤𑁄𑀲𑁂𑀦. 𑀢𑀸𑀤𑀺𑀦𑀸𑀢𑀺 𑀭𑀽𑀧𑀸𑀤𑀻𑀲𑀼 𑀙𑀴𑀸𑀭𑀫𑁆𑀫𑀡𑁂𑀲𑀼 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀏𑀓𑀲𑀤𑀺𑀲𑁂𑀦.

𑁨𑁭𑁪𑁪-𑁫. ‘‘𑀫𑀽𑀮𑁂’’𑀢𑀺𑀆𑀤𑀻𑀲𑀼 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀫𑀽𑀮𑀭𑀚𑀦𑁂 𑀳𑀮𑀺𑀤𑁆𑀤𑀺𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀫𑀽𑀮𑀭𑀚𑀦𑀁 𑀯𑀝𑁆𑀝𑀢𑀺. 𑀔𑀦𑁆𑀥𑁂𑀲𑀼 𑀭𑀚𑀦𑁂𑀲𑀼 𑀫𑀜𑁆𑀚𑁂𑀝𑁆𑀞𑀜𑁆𑀘 𑀢𑀼𑀗𑁆𑀕𑀳𑀸𑀭𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀔𑀦𑁆𑀥𑀭𑀚𑀦𑀁 𑀯𑀝𑁆𑀝𑀢𑀺. 𑀧𑀢𑁆𑀢𑁂𑀲𑀼 𑀭𑀚𑀦𑁂𑀲𑀼 𑀅𑀮𑁆𑀮𑀺𑀬𑀸 𑀧𑀢𑁆𑀢𑀁 𑀢𑀣𑀸 𑀦𑀻𑀮𑀺𑀬𑀸 𑀧𑀢𑁆𑀢𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀢𑁆𑀢𑀭𑀚𑀦𑀁 𑀯𑀝𑁆𑀝𑀢𑀺. 𑀧𑀼𑀧𑁆𑀨𑀭𑀚𑀦𑁂𑀲𑀼 𑀓𑀼𑀲𑀼𑀫𑁆𑀪𑀜𑁆𑀘 𑀓𑀺𑀁𑀲𑀼𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀼𑀧𑁆𑀨𑀭𑀚𑀦𑀁 𑀯𑀝𑁆𑀝𑀢𑀺. 𑀢𑀘𑀭𑀚𑀦𑁂 𑀮𑁄𑀤𑁆𑀤𑀜𑁆𑀘 𑀓𑀡𑁆𑀟𑀼𑀮𑀜𑁆𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀢𑀘𑀭𑀚𑀦𑀁 𑀯𑀝𑁆𑀝𑀢𑀺. 𑀨𑀮𑀭𑀚𑀦𑀁 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀫𑀜𑁆𑀚𑁂𑀝𑁆𑀞𑀦𑁆𑀢𑀺 𑀏𑀓𑁄 𑀲𑀓𑀡𑁆𑀝𑀓𑀭𑀼𑀓𑁆𑀔𑁄, 𑀯𑀮𑁆𑀮𑀺𑀯𑀺𑀲𑁂𑀲𑁄 𑀘, 𑀬𑀲𑁆𑀲 𑀭𑀚𑀦𑀁 𑀫𑀜𑁆𑀚𑁂𑀝𑁆𑀞𑀩𑀻𑀚𑀯𑀡𑁆𑀡𑀁 𑀳𑁄𑀢𑀺. 𑀫𑀜𑁆𑀚𑁂𑀝𑁆𑀞𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑀯𑀡𑁆𑀡𑁄𑀢𑀺 𑀲𑁄 𑀇𑀥 𑀦 𑀕𑀳𑁂𑀢𑀩𑁆𑀩𑁄 𑀭𑀚𑀦𑀸𑀥𑀺𑀓𑀸𑀭𑀢𑁆𑀢𑀸. 𑀢𑀼𑀗𑁆𑀕𑀳𑀸𑀭𑀓𑁄 𑀦𑀸𑀫 𑀏𑀓𑁄 𑀲𑀓𑀡𑁆𑀝𑀓𑀭𑀼𑀓𑁆𑀔𑁄, 𑀬𑀲𑁆𑀲 𑀭𑀚𑀦𑀁 𑀳𑀭𑀺𑀢𑀸𑀮𑀯𑀡𑁆𑀡𑀁 𑀳𑁄𑀢𑀺. 𑀅𑀮𑁆𑀮𑀻𑀢𑀺 𑀘𑀼𑀮𑁆𑀮𑀢𑀸𑀧𑀺𑀜𑁆𑀙𑀭𑀼𑀓𑁆𑀔𑁄, 𑀬𑀲𑁆𑀲 𑀧𑀡𑁆𑀡𑀭𑀚𑀦𑀁 𑀳𑀮𑀺𑀤𑁆𑀤𑀺𑀯𑀡𑁆𑀡𑀁 𑀳𑁄𑀢𑀺. 𑀦𑀻𑀮𑀻𑀢𑀺 𑀕𑀘𑁆𑀙𑀯𑀺𑀲𑁂𑀲𑁄, 𑀬𑀲𑁆𑀲 𑀧𑀦 𑀭𑀚𑀦𑀁 𑀦𑀻𑀮𑀯𑀡𑁆𑀡𑀁 𑀳𑁄𑀢𑀺. 𑀓𑀺𑀁𑀲𑀼𑀓𑀁 𑀦𑀸𑀫 𑀯𑀮𑁆𑀮𑀺𑀓𑀺𑀁𑀲𑀼𑀓𑀧𑀼𑀧𑁆𑀨𑀁, 𑀬𑀲𑁆𑀲 𑀭𑀚𑀦𑀁 𑀮𑁄𑀳𑀺𑀢𑀯𑀡𑁆𑀡𑀁 𑀳𑁄𑀢𑀺.

𑁨𑁭𑁪𑁬. 𑀓𑀺𑀮𑀺𑀝𑁆𑀞𑀲𑀸𑀝𑀓𑀦𑁆𑀢𑀺 ¶ 𑀫𑀮𑀻𑀦𑀲𑀸𑀝𑀓𑀁. 𑀥𑁄𑀯𑀺𑀢𑀼𑀦𑁆𑀢𑀺 𑀏𑀓𑀯𑀸𑀭𑀁 𑀥𑁄𑀯𑀺𑀢𑀼𑀁. 𑀅𑀮𑁆𑀮𑀺𑀬𑀸 𑀥𑁄𑀢𑀁 𑀓𑀺𑀭 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺.

𑁨𑁭𑁪𑁭. 𑀘𑀻𑀯𑀭𑀸𑀦𑀁 ¶ 𑀓𑀣𑀸 𑀲𑁂𑀲𑀸𑀢𑀺 𑀪𑁂𑀤𑀓𑀸𑀭𑀡𑀧𑁆𑀧𑀓𑀸𑀭𑀓𑀣𑀸𑀤𑀺𑀓𑀸 𑀇𑀥 𑀅𑀯𑀼𑀢𑁆𑀢𑀓𑀣𑀸. 𑀧𑀞𑀫𑁂 𑀓𑀣𑀺𑀦𑁂 𑀯𑀼𑀢𑁆𑀢𑀸𑀢𑀺 𑀲𑁂𑀲𑁄. 𑀯𑀺𑀪𑀸𑀯𑀺𑀦𑀸𑀢𑀺 𑀔𑀦𑁆𑀥𑀓𑀪𑀸𑀡𑀓𑁂𑀦.

𑀘𑀻𑀯𑀭𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀇𑀢𑀺 𑀯𑀺𑀦𑀬𑀢𑁆𑀣𑀲𑀸𑀭𑀲𑀦𑁆𑀤𑀻𑀧𑀦𑀺𑀬𑀸 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸𑀬

𑀫𑀳𑀸𑀯𑀕𑁆𑀕𑀯𑀺𑀦𑀺𑀘𑁆𑀙𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀽𑀴𑀯𑀕𑁆𑀕𑁄

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁭𑁪𑁮. 𑀏𑀯𑀁 ¶ ¶ 𑀫𑀳𑀸𑀯𑀕𑁆𑀕𑀯𑀺𑀦𑀺𑀘𑁆𑀙𑀬𑀁 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀘𑀽𑀴𑀯𑀕𑁆𑀕𑀸𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀚𑁆𑀚𑀦𑀻𑀬’’𑀦𑁆𑀢𑀺𑀆𑀤𑀺. 𑀢𑀚𑁆𑀚𑀦𑀻𑀬𑀦𑁆𑀢𑀺 𑀓𑀮𑀳𑀓𑀸𑀭𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀢𑁄 𑀯𑀺𑀭𑀫𑀦𑀢𑁆𑀣𑀸𑀬 𑀦𑀺𑀕𑁆𑀕𑀳𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀜𑁆𑀘. 𑀦𑀺𑀬𑀲𑁆𑀲𑀦𑁆𑀢𑀺 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀆𑀧𑀢𑁆𑀢𑀺𑀩𑀳𑀼𑀮𑀲𑁆𑀲 𑀅𑀦𑀧𑀤𑀸𑀦𑀲𑁆𑀲 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀳𑀯𑀲𑁂𑀦 𑀦𑀺𑀲𑁆𑀲𑀸𑀬 𑀯𑀲𑀦𑀢𑁆𑀣𑀸𑀬 𑀓𑀸𑀢𑀼𑀁 𑀅𑀦𑀼𑀜𑁆𑀜𑀸𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁 𑀦𑀺𑀬𑀲𑁆𑀲𑀓𑀫𑁆𑀫𑀜𑁆𑀘.

𑀧𑀩𑁆𑀩𑀸𑀚𑀦𑁆𑀢𑀺 𑀓𑀼𑀮𑀤𑀽𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀢𑁆𑀣 𑀢𑁂𑀦 𑀓𑀼𑀮𑀤𑀽𑀲𑀦𑀁 𑀓𑀢𑀁, 𑀢𑀢𑁆𑀣 𑀦 𑀮𑀪𑀺𑀢𑀩𑁆𑀩𑀆𑀯𑀸𑀲𑀢𑁆𑀣𑀸𑀬 𑀦𑀺𑀕𑁆𑀕𑀳𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀜𑁆𑀘. 𑀧𑀝𑀺𑀲𑀸𑀭𑀡𑀦𑁆𑀢𑀺 𑀲𑀤𑁆𑀥𑀲𑁆𑀲 𑀉𑀧𑀸𑀲𑀓𑀲𑁆𑀲 𑀤𑀸𑀬𑀓𑀲𑁆𑀲 𑀓𑀸𑀭𑀓𑀲𑁆𑀲 𑀲𑀗𑁆𑀖𑀼𑀧𑀝𑁆𑀞𑀸𑀓𑀲𑁆𑀲 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁𑀔𑀫𑀸𑀧𑀦𑀢𑁆𑀣𑀸𑀬 𑀦𑀺𑀕𑁆𑀕𑀳𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀜𑁆𑀘.

𑀢𑀺𑀯𑀺𑀥𑀼𑀓𑁆𑀔𑁂𑀧𑀦𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀘 𑀢𑀢𑁄 𑀑𑀭𑀫𑀺𑀢𑀼𑀁 𑀦𑀺𑀕𑁆𑀕𑀳𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀁 𑀢𑀺𑀯𑀺𑀥𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀜𑁆𑀘𑀸𑀢𑀺. 𑀤𑀻𑀧𑀬𑁂𑀢𑀺 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀯𑀼𑀢𑁆𑀢𑀦𑀬𑁂𑀦 𑀧𑀓𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀸𑀦𑀁 𑀑𑀲𑀸𑀭𑀡𑀦𑀺𑀲𑁆𑀲𑀸𑀭𑀡𑀯𑀲𑁂𑀦 𑀧𑀘𑁆𑀘𑁂𑀓𑀁 𑀤𑀼𑀯𑀺𑀥𑀢𑁆𑀢𑁂𑀧𑀺 𑀢𑀁 𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 ¶ 𑀚𑀸𑀢𑀺𑀯𑀲𑁂𑀦 ‘‘𑀲𑀢𑁆𑀢 𑀓𑀫𑁆𑀫𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀤𑀲𑁆𑀲𑀺𑀢𑁄 𑀧𑀦𑁂𑀢𑁂𑀲𑀁 ¶ 𑀯𑀺𑀲𑁂𑀲𑁄 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀺𑀢𑁆𑀣𑀸𑀭𑁄 𑀧𑀦𑁂𑀲𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁭𑁪𑁯. 𑀔𑀦𑁆𑀥𑀓𑁂 𑀓𑀫𑁆𑀫𑀲𑀗𑁆𑀔𑀸𑀢𑁂 𑀔𑀦𑁆𑀥𑀓𑁂 𑀆𑀕𑀢𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺. 𑀢𑀤𑀦𑀦𑁆𑀢𑀭𑁂𑀢𑀺 𑀢𑀲𑁆𑀲 𑀓𑀫𑁆𑀫𑀓𑁆𑀔𑀦𑁆𑀥𑀓𑀲𑁆𑀲 𑀅𑀦𑀦𑁆𑀢𑀭𑁂. 𑀔𑀦𑁆𑀥𑀓𑁂𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂. 𑀦𑀯 𑀅𑀥𑀺𑀓𑀸𑀦𑀺 𑀬𑁂𑀲𑀁 𑀢𑁂 𑀦𑀯𑀸𑀥𑀺𑀓𑀸𑀦𑀺 𑀢𑀺𑀁𑀲𑁂𑀯 𑀯𑀢𑁆𑀢𑀸𑀦𑀺, 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀢𑀸𑀯 𑁋

‘‘𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸, 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸, 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸, 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀆𑀲𑀦𑀸𑀪𑀺𑀳𑀸𑀭𑁄 𑀲𑁂𑀬𑁆𑀬𑀸𑀪𑀺𑀳𑀸𑀭𑁄 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩𑀁, 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀩𑁆𑀩𑁄, 𑀦 𑀕𑀺𑀳𑀺𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀤𑁆𑀥𑀚𑁄 𑀥𑀸𑀭𑁂𑀢𑀩𑁆𑀩𑁄, 𑀦 𑀢𑀺𑀢𑁆𑀣𑀺𑀬𑀸 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀽 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 ¶ 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀸𑀤𑁂𑀢𑀩𑁆𑀩𑁄 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸, 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁫𑁧) 𑁋

𑀏𑀯𑀁 ¶ 𑀘𑁂𑀢𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑁂𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺, 𑀔𑀦𑁆𑀥𑀓𑁂 𑀓𑀫𑁆𑀫𑀲𑀜𑁆𑀜𑀺𑀢𑁂’’𑀢𑀺.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁭𑁬-𑁮𑁨) 𑁋

‘‘𑀧𑀸𑀭𑀺𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸, 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀭𑀺𑀯𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺, 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸, 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸, 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀁.

‘‘𑀦 ¶ , 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁, 𑀦 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀬𑁄 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀆𑀲𑀦𑀧𑀭𑀺𑀬𑀦𑁆𑀢𑁄 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑁄 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀲𑁆𑀲 𑀧𑀤𑀸𑀢𑀩𑁆𑀩𑁄, 𑀢𑁂𑀦 𑀘 𑀲𑁄 𑀲𑀸𑀤𑀺𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀭𑁂𑀲𑀫𑀡𑁂𑀦 𑀯𑀸 𑀧𑀘𑁆𑀙𑀸𑀲𑀫𑀡𑁂𑀦 𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄 ‘𑀫𑀸 𑀫𑀁 𑀚𑀸𑀦𑀺𑀁𑀲𑀽’𑀢𑀺.

‘‘𑀧𑀸𑀭𑀺𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁, 𑀉𑀧𑁄𑀲𑀣𑁂 𑀆𑀭𑁄𑀘𑁂𑀢𑀩𑁆𑀩𑀁, 𑀧𑀯𑀸𑀭𑀡𑀸𑀬 𑀆𑀭𑁄𑀘𑁂𑀢𑀩𑁆𑀩𑀁, 𑀲𑀘𑁂 𑀕𑀺𑀮𑀸𑀦𑁄 𑀳𑁄𑀢𑀺, 𑀤𑀽𑀢𑁂𑀦𑀧𑀺 𑀆𑀭𑁄𑀘𑁂𑀢𑀩𑁆𑀩𑀁.

‘‘𑀦 ¶ , 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 ¶ 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 ¶ 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 ¶ 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸. 𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀦𑀸𑀦𑀸𑀲𑀁𑀯𑀸𑀲𑀓𑀸 𑀅𑀜𑁆𑀜𑀢𑁆𑀭 𑀧𑀓𑀢𑀢𑁆𑀢𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 ¶ 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 ¶ 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀅𑀦𑀸𑀯𑀸𑀲𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀅𑀦𑀸𑀯𑀸𑀲𑁄 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀕𑀦𑁆𑀢𑀩𑁆𑀩𑁄 ¶ , 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀯𑀸 𑀅𑀦𑀸𑀯𑀸𑀲𑀸 𑀯𑀸 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀬𑀢𑁆𑀣𑀲𑁆𑀲𑀼 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀸 𑀬𑀁 𑀚𑀜𑁆𑀜𑀸 ‘𑀲𑀓𑁆𑀓𑁄𑀫𑀺 𑀅𑀚𑁆𑀚𑁂𑀯 𑀕𑀦𑁆𑀢𑀼’𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 ¶ 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀢𑀩𑁆𑀩𑁄, 𑀦 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁…𑀧𑁂… 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀅𑀦𑀸𑀯𑀸𑀲𑁂 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀦 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀏𑀓𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩𑀁.

‘‘𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑁄 ¶ 𑀘𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀢𑀁𑀯𑀻𑀲𑁄 𑀅𑀩𑁆𑀪𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺 (𑀘𑀽𑀴𑀯. 𑁭𑁬-𑁮𑁨) 𑁋

𑀏𑀯𑀁 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀘𑀢𑀼𑀦𑀯𑀼𑀢𑀺 𑀯𑀢𑁆𑀢𑀸𑀦𑀺.

𑀲𑀸 𑀘 𑀦𑁂𑀲𑀁 𑀘𑀢𑀼𑀦𑀯𑀼𑀢𑀺𑀲𑀗𑁆𑀔𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀦𑀉𑀧𑀲𑀫𑁆𑀧𑀸𑀤𑀦𑀸𑀤𑀺𑀦𑀓𑀫𑁆𑀫𑀺𑀓𑀕𑀭𑀳𑀧𑀭𑀺𑀬𑁄𑀲𑀸𑀦𑀸𑀦𑀺 𑀦𑀯 𑀯𑀢𑁆𑀢𑀸𑀦𑀺, 𑀢𑀢𑁄 𑀧𑀓𑀢𑀢𑁆𑀢𑀲𑁆𑀲 𑀉𑀧𑁄𑀲𑀣𑀝𑁆𑀞𑀧𑀦𑀸𑀤𑀺𑀪𑀺𑀓𑁆𑀔𑀽𑀳𑀺𑀲𑀫𑁆𑀧𑀬𑁄𑀚𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀅𑀝𑁆𑀞, 𑀢𑀢𑁄 𑀦𑀧𑀼𑀭𑀢𑁄𑀕𑀫𑀦𑀸𑀤𑀻 𑀧𑀜𑁆𑀘, 𑀦𑀧𑀼𑀭𑁂𑀕𑀫𑀦𑀸𑀤𑀻 𑀘𑀢𑁆𑀢𑀸𑀭𑀺, 𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑀦𑀸𑀤𑀻 𑀘𑀢𑁆𑀢𑀸𑀭𑀻𑀢𑀺 𑀢𑀺𑀁𑀲, 𑀲𑀪𑀺𑀓𑁆𑀔𑀼𑀓𑀸𑀯𑀸𑀲𑀸𑀤𑀺𑀢𑁄 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀸𑀤𑀺𑀕𑀫𑀦𑀧𑀅𑀲𑀁𑀬𑀼𑀢𑁆𑀢𑀸𑀦𑀺 𑀢𑀻𑀡𑀺 𑀦𑀯𑀓𑀸𑀦𑀺 𑀘𑀸𑀢𑀺 𑀲𑀢𑁆𑀢𑀧𑀜𑁆𑀜𑀸𑀲, 𑀢𑀢𑁄 𑀦𑀧𑀓𑀢𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑀯𑀸𑀲𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀏𑀓𑀸𑀤𑀲, 𑀢𑀢𑁄 𑀦𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑁂𑀳𑀺 ¶ 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑀯𑀸𑀲𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀘𑁆𑀘𑁂𑀓𑀁 𑀏𑀓𑀸𑀤𑀲 𑀓𑀢𑁆𑀯𑀸 𑀧𑀜𑁆𑀘𑀧𑀜𑁆𑀜𑀸𑀲𑀸𑀬 𑀯𑀢𑁆𑀢𑁂𑀲𑀼 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀸𑀦𑀁 𑀢𑀺𑀡𑁆𑀡𑀁 𑀲𑀫𑀸𑀦𑀢𑁆𑀢𑀸 𑀢𑁂𑀲𑀼 𑀏𑀓𑀁 𑀏𑀓𑀸𑀤𑀲𑀓𑀁, 𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀢𑁆𑀢𑀸 𑀢𑁂𑀲𑀼 𑀏𑀓𑀁 𑀏𑀓𑀸𑀤𑀲𑀓𑀦𑁆𑀢𑀺 𑀤𑀼𑀯𑁂 𑀏𑀓𑀸𑀤𑀲𑀓𑀸𑀦𑀺, 𑀅𑀦𑁆𑀢𑁂 𑀧𑀸𑀭𑀺𑀯𑀸𑀲𑀺𑀓𑀘𑀢𑀼𑀢𑁆𑀣𑀲𑁆𑀲 𑀲𑀗𑁆𑀖𑀲𑁆𑀲 𑀧𑀭𑀺𑀯𑀸𑀲𑀸𑀤𑀺𑀤𑀸𑀦𑀘𑀢𑀼𑀓𑁆𑀓𑁂 𑀕𑀡𑀧𑀽𑀭𑀡𑀢𑁆𑀣𑀤𑁄𑀲𑀢𑁄 𑀦𑀺𑀯𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀻𑀢𑀺 𑀘𑀢𑀼𑀦𑀯𑀼𑀢𑀺 𑀯𑀢𑁆𑀢𑀸𑀦𑀺. 𑀢𑀸𑀦𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑀸𑀦𑀺 𑀦𑀸𑀫. 𑀆𑀤𑀺𑀢𑁄 𑀦𑀯, 𑀉𑀧𑁄𑀲𑀣𑀝𑁆𑀞𑀧𑀦𑀸𑀤𑀻𑀦𑀺 𑀅𑀝𑁆𑀞, 𑀧𑀓𑀢𑀢𑁆𑀢𑁂𑀦 𑀏𑀓𑀘𑁆𑀙𑀦𑁆𑀦𑀯𑀸𑀲𑀸𑀤𑀻 𑀘𑀢𑁆𑀢𑀸𑀭𑀺 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀯𑀢𑁆𑀢𑀸𑀦𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀕𑀳𑀺𑀢𑀢𑁆𑀢𑀸 𑀇𑀥 𑀕𑀡𑀦𑀸𑀬 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀲𑁂𑀲𑁂𑀲𑀼 𑀢𑁂𑀲𑀢𑁆𑀢𑀢𑀺𑀬𑀸 𑀯𑀢𑁆𑀢𑁂𑀲𑀼 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀳𑀺 𑀏𑀓𑀘𑁆𑀙𑀦𑁆𑀦𑁂 𑀯𑀸𑀲𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀤𑁆𑀯𑀸𑀯𑀻𑀲𑀢𑀺 𑀯𑀢𑁆𑀢𑀸𑀦𑀺 𑀧𑀓𑀢𑀢𑁆𑀢𑁂𑀳𑀺 𑀲𑀫𑀸𑀦𑀢𑁆𑀢𑀸 𑀢𑀸𑀦𑀺 𑀘 ‘‘𑀕𑀦𑁆𑀢𑀩𑁆𑀩𑁄 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀓𑀁 𑀦𑀯𑀓𑀁 𑀢𑀣𑀸 ¶ 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀧𑀭𑀁, 𑀦 𑀆𑀯𑀸𑀲𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀤𑀲𑁆𑀲𑀦𑀧𑀭𑀦𑁆𑀢𑀺 𑀢𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑁂𑀲𑀼 𑀧𑀸𑀭𑀺𑀯𑀸𑀲𑀺𑀓𑀘𑀢𑀉𑀢𑁆𑀣𑀸𑀤𑀺𑀓𑀫𑁆𑀫𑀘𑀢𑀼𑀓𑁆𑀓𑀁 𑀕𑀭𑀼𑀓𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀸𑀬 𑀕𑀡𑀧𑀽𑀭𑀡𑀢𑁆𑀣𑀲𑀸𑀫𑀜𑁆𑀜𑁂𑀦 𑀏𑀓𑀁 𑀓𑀢𑁆𑀯𑀸 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀕𑀡𑀺𑀢𑀸𑀦𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀯𑀸𑀥𑀺𑀓𑀸𑀦𑀺 𑀢𑀺𑀁𑀲𑁂𑀯, 𑀔𑀦𑁆𑀥𑀓𑁂 𑀢𑀤𑀦𑀦𑁆𑀢𑀭𑁂’’𑀢𑀺.

𑁨𑁭𑁫𑁦. 𑀇𑀫𑀸𑀦𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀯𑀢𑁆𑀢𑀸𑀦𑀺 𑀧𑀼𑀭𑀺𑀫𑁂𑀳𑀺 𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀲𑀻𑀢𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀁 𑀲𑀩𑁆𑀩𑀸𑀦𑀺…𑀧𑁂… 𑀕𑀳𑀺𑀢𑀸𑀕𑀳𑀡𑁂𑀦 𑀢𑀽’’𑀢𑀺.

𑀏𑀯𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂𑀲𑀼 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀸𑀦𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀕𑀳𑀺𑀢𑀸𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀫𑁂𑀢𑁆𑀣 𑀤𑁆𑀯𑀸𑀲𑀻𑀢𑀺𑀓𑁆𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀆𑀕𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸𑀬𑀁 𑀧𑀦 𑁋

‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 (𑀘𑀽𑀴𑀯. 𑁭𑁫) 𑀆𑀭𑀪𑀺𑀢𑁆𑀯𑀸 ‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’𑀦𑁆𑀢𑀺 (𑀘𑀽𑀴𑀯. 𑁭𑁬-𑁮𑁧) 𑀯𑀼𑀢𑁆𑀢𑀸𑀯𑀲𑀸𑀦𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑁂𑀦 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀫𑀸𑀦𑀢𑁆𑀢𑀸𑀭𑀳𑁂𑀦, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩’𑀦𑁆𑀢𑀺𑀆𑀤𑀻𑀦𑀁 (𑀘𑀽𑀴𑀯. 𑁮𑁨) 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀢𑁂 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 ¶ 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑀺𑀢𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺 𑀯𑀢𑁆𑀢𑀸𑀦𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀢𑁆𑀢𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁 ‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 ¶ …𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’𑀦𑁆𑀢𑀺 (𑀘𑀽𑀴𑀯. 𑁫𑁧) 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑀸𑀤𑀺𑀬𑀦𑀁 𑀏𑀓𑀁, ‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄’𑀢𑀺𑀆𑀤𑀻𑀦𑀺 𑀘 𑀤𑀲𑀸𑀢𑀺 𑀏𑀯𑀫𑁂𑀢𑀸𑀦𑀺 𑀤𑁆𑀯𑀸𑀲𑀻𑀢𑀺 𑀳𑁄𑀦𑁆𑀢𑀺. 𑀏𑀢𑁂𑀲𑁆𑀯𑁂𑀯 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀯𑀢𑁆𑀢𑀸𑀦𑀺, 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺 𑀏𑀯𑀸’’𑀢𑀺 (𑀫. 𑀦𑀺. 𑀝𑀻. 𑁨.𑁨𑁫; 𑀲𑀸𑀭𑀢𑁆𑀣. 𑀝𑀻. 𑁨.𑁩𑁯; 𑀯𑀺. 𑀯𑀺. 𑀝𑀻. 𑁧.𑁩𑁯) 𑁋

𑀯𑀼𑀢𑁆𑀢𑀁. 𑀏𑀢𑀸𑀦𑀺 𑀧𑀦 𑀯𑀢𑁆𑀢𑀸𑀦𑀺 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂, 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀸𑀮𑁂 𑀘 𑀘𑀭𑀺𑀢𑀩𑁆𑀩𑀸𑀦𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀸𑀦𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀸𑀤𑀻𑀦𑀁 𑀘𑀼𑀤𑁆𑀤𑀲𑀫𑀳𑀸𑀯𑀢𑁆𑀢𑀸𑀦𑀁 𑀯𑀓𑁆𑀔𑀫𑀸𑀦𑀢𑁆𑀢𑀸.

𑁨𑁭𑁫𑁧. 𑀇𑀤𑀸𑀦𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀁, 𑀯𑀢𑁆𑀢𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀭𑀺𑀯𑀸𑀲𑀜𑁆𑀘 𑀯𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺. 𑀧𑀭𑀺𑀯𑀸𑀲𑀜𑁆𑀘 𑀯𑀢𑁆𑀢𑀜𑁆𑀘 𑀲𑀫𑀸𑀤𑀺𑀦𑁆𑀦𑀲𑁆𑀲𑀸𑀢𑀺 ‘‘𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀧𑀭𑀺𑀯𑀸𑀲𑀜𑁆𑀘 ‘‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀢𑁆𑀢𑀜𑁆𑀘 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀲𑁆𑀲. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁨𑁭𑁫𑁨. 𑀲𑀳𑀯𑀸𑀲𑀸𑀤𑀬𑁄 ‘‘𑀏𑀓𑀘𑁆𑀙𑀦𑁆𑀦𑁂’’𑀢𑀺𑀆𑀤𑀺𑀦𑀸 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀲𑀳𑀯𑀸𑀲𑁄, 𑀯𑀺𑀦𑀸𑀯𑀸𑀲𑁄, 𑀅𑀦𑀸𑀭𑁄𑀘𑀦𑀫𑁂𑀯 𑀘𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁫𑁩. 𑀉𑀤𑀓𑀧𑀸𑀢𑁂𑀦 𑀲𑀫𑀦𑁆𑀢𑀸 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂𑀦. 𑀏𑀓𑀘𑁆𑀙𑀦𑁆𑀦𑁂𑀢𑀺 𑀏𑀓𑀘𑁆𑀙𑀦𑁆𑀦𑁂 𑀧𑀭𑀺𑀘𑁆𑀙𑀦𑁆𑀦𑁂 𑀯𑀸 𑀅𑀧𑀭𑀺𑀘𑁆𑀙𑀦𑁆𑀦𑁂 𑀯𑀸 𑀆𑀯𑀸𑀲𑁂. 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀳 𑀉𑀓𑁆𑀔𑀺𑀢𑁆𑀢𑀲𑁆𑀲 𑀦𑀺𑀯𑀸𑀲𑁄 ¶ 𑀦𑀺𑀯𑀸𑀭𑀺𑀢𑁄𑀢𑀺 𑀬𑁄𑀚𑀦𑀸. ‘‘𑀦𑀺𑀯𑀸𑀭𑀺𑀢𑁄’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁭𑁫𑁪. 𑀅𑀦𑁆𑀢𑁄𑀬𑁂𑀯𑀸𑀢𑀺 𑀏𑀓𑀘𑁆𑀙𑀦𑁆𑀦𑀲𑁆𑀲 𑀆𑀯𑀸𑀲𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑁄𑀬𑁂𑀯. ‘‘𑀦 𑀮𑀩𑁆𑀪𑀢𑀻’’𑀢𑀺 𑀇𑀫𑀺𑀦𑀸 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

𑁨𑁭𑁫𑁫. 𑀫𑀳𑀸𑀅𑀝𑁆𑀞𑀓𑀣𑀸𑀤𑀺𑀲𑀽𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀓𑀧𑀸𑀭𑀺𑀯𑀸𑀲𑀺𑀓𑀸𑀦𑀁. 𑀇𑀢𑀺 𑀅𑀯𑀺𑀲𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸.

𑁨𑁭𑁫𑁬. 𑀇𑀫𑀺𑀦𑀸 𑀲𑀳𑀯𑀸𑀲𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑀜𑁆𑀘 𑀤𑀼𑀓𑁆𑀓𑀝𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀯𑀺𑀦𑀸𑀯𑀸𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀪𑀺𑀓𑁆𑀔𑀼𑀓𑁂 𑀧𑀦𑀸𑀯𑀸𑀲𑁂’’𑀢𑀺. 𑀆𑀯𑀸𑀲𑁂𑀢𑀺 𑀯𑀲𑀦𑀢𑁆𑀣𑀸𑀬 𑀓𑀢𑀲𑁂𑀦𑀸𑀲𑀦𑁂. 𑀅𑀦𑀸𑀯𑀸𑀲𑁂𑀢𑀺 𑀯𑀸𑀲𑀢𑁆𑀣𑀸𑀬 𑀅𑀓𑀢𑁂 𑀘𑁂𑀢𑀺𑀬𑀖𑀭𑁂 𑀯𑀸 𑀩𑁄𑀥𑀺𑀖𑀭𑁂 𑀯𑀸 𑀲𑀫𑁆𑀫𑀚𑁆𑀚𑀦𑀺𑀅𑀝𑁆𑀝𑀓𑁂 𑀯𑀸 𑀤𑀸𑀭𑀼𑀅𑀝𑁆𑀝𑀓𑁂 𑀯𑀸 𑀧𑀸𑀦𑀻𑀬𑀫𑀸𑀴𑁂 𑀯𑀸 𑀯𑀘𑁆𑀘𑀓𑀼𑀝𑀺𑀬𑀁 𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀯𑀭𑀽𑀧𑁂 𑀞𑀸𑀦𑁂. 𑀯𑀺𑀧𑁆𑀧𑀯𑀸𑀲𑀁 𑀯𑀲𑀦𑁆𑀢𑀲𑁆𑀲𑀸𑀢𑀺 𑀧𑀓𑀢𑀢𑁆𑀢𑁂𑀦 𑀯𑀺𑀦𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀲𑁆𑀲. 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀺.

𑁨𑁭𑁫𑁭. 𑀏𑀯𑀁 𑀯𑀺𑀧𑁆𑀧𑀯𑀸𑀲𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑀤𑀼𑀓𑁆𑀓𑀝𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀅𑀦𑀸𑀭𑁄𑀘𑀦𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀸𑀭𑀺𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸𑀦𑀸𑀢𑀺 𑀆𑀓𑀸𑀲𑁂𑀦𑀸𑀧𑀺 𑀕𑀘𑁆𑀙𑀦𑁆𑀢𑀁 𑀲𑀫𑀸𑀦𑀲𑀁𑀯𑀸𑀲𑀓𑀁 𑀆𑀕𑀦𑁆𑀢𑀼𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸. 𑀢𑀗𑁆𑀔𑀡𑁂𑀢𑀺 𑀢𑀲𑁆𑀫𑀺𑀁 𑀤𑀺𑀝𑁆𑀞𑀓𑁆𑀔𑀡𑁂𑀬𑁂𑀯. ‘‘𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀏𑀯 𑀏𑀢𑀲𑁆𑀲𑀸’’𑀢𑀺 𑀧𑀤𑀘𑁆𑀙𑁂𑀤𑁄. 𑀏𑀯𑀓𑀸𑀭𑁂𑀦 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀉𑀪𑀬𑀁 𑀏𑀢𑀲𑁆𑀲 𑀳𑁄𑀢𑀻𑀢𑀺 𑀤𑀻𑀧𑁂𑀦𑁆𑀢𑁂𑀦 𑀅𑀤𑀺𑀝𑁆𑀞𑁄 𑀘𑁂, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀻𑀢𑀺 𑀜𑀸𑀧𑁂𑀢𑀺. 𑀬𑀣𑀸𑀳 𑁋 ‘‘𑀲𑁄𑀧𑀺𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀁 𑀓𑀭𑁄𑀢𑀺, 𑀅𑀜𑁆𑀜𑀸𑀢𑀢𑁆𑀢𑀸 𑀧𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁 𑀦𑀢𑁆𑀣𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁭𑁫). 𑀦𑀸𑀦𑀸𑀲𑀁𑀯𑀸𑀲𑀓𑁂𑀦 ¶ 𑀲𑀳 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀲 𑀅𑀦𑀸𑀭𑁄𑀘𑀦𑁂𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦 𑀳𑁄𑀢𑀺.

𑁨𑁭𑁫𑁮-𑁯. 𑀧𑀸𑀭𑀺𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀢𑁆𑀣 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀞𑀺𑀢𑁄, 𑀢𑀢𑁆𑀣𑁂𑀯 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀢𑁆𑀯𑀸 𑀬𑀣𑀸𑀯𑀼𑀟𑁆𑀠𑀁 𑀧𑀓𑀢𑀢𑁆𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀧𑁄𑀲𑀣𑀧𑀯𑀸𑀭𑀡’’𑀦𑁆𑀢𑀺𑀆𑀤𑀺. 𑀉𑀧𑁄𑀲𑀣𑀧𑀯𑀸𑀭𑀡𑀁 𑀬𑀣𑀸𑀯𑀼𑀟𑁆𑀠𑀁 𑀓𑀸𑀢𑀼𑀁 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀤𑁂𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸’’𑀢𑀺 𑀲𑁂𑀲𑁄. 𑀲𑀗𑁆𑀖𑀤𑀸𑀬𑀓𑀸𑀢𑀺 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄. 𑀲𑀗𑁆𑀖𑀲𑁆𑀲 𑀏𑀓𑀢𑁆𑀢𑁂𑀧𑀺 𑀕𑀭𑀽𑀲𑀼 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. ‘‘𑀤𑁂𑀢𑀺 𑀘𑁂 𑀲𑀗𑁆𑀖𑀤𑀸𑀬𑀓𑁄’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀤𑁂𑀦𑁆𑀢𑁄 𑀲𑀗𑁆𑀖𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑁂𑀢𑀺 𑀘𑁂, 𑀧𑀸𑀭𑀺𑀯𑀸𑀲𑀺𑀓𑁄 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀮𑀪𑀢𑀻𑀢𑀺 𑀬𑁄𑀚𑀦𑀸.

𑀑𑀡𑁄𑀚𑀦𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀁, 𑀲𑀗𑁆𑀖𑀢𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁 𑀯𑀸 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀁 𑀅𑀢𑁆𑀢𑀦𑁄 ¶ 𑀧𑀼𑀕𑁆𑀕𑀮𑀺𑀓𑀪𑀢𑁆𑀢𑀧𑀘𑁆𑀘𑀸𑀲𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀅𑀚𑁆𑀚 𑀪𑀢𑁆𑀢𑀧𑀘𑁆𑀘𑀸𑀲𑀸 𑀅𑀢𑁆𑀣𑀺, 𑀲𑁆𑀯𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀗𑁆𑀖𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀢𑁆𑀢𑀦𑁆𑀢𑀺 𑀆𑀕𑀢𑀸𑀕𑀢𑁂𑀳𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀁. 𑀢𑀣𑀸 𑀧𑀸𑀭𑀺𑀯𑀸𑀲𑀺𑀓𑁄 𑀬𑀣𑀸𑀯𑀼𑀟𑁆𑀠𑀁 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀇𑀫𑁂 𑀧𑀜𑁆𑀘𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑀬𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀘𑀽𑀴𑀯. 𑀅𑀝𑁆𑀞. 𑁭𑁫) 𑁋 𑀉𑀧𑁄𑀲𑀣𑀧𑀯𑀸𑀭𑀡𑁂 𑀢𑀸𑀯 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀳𑀢𑁆𑀣𑀧𑀸𑀲𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀧𑀸𑀴𑀺𑀬𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀴𑀺𑀁 𑀯𑀺𑀳𑀸𑀬 𑀳𑀢𑁆𑀣𑀧𑀸𑀲𑀁 𑀅𑀫𑀼𑀜𑁆𑀘𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁂 𑀓𑀭𑀺𑀬𑀫𑀸𑀦𑁂 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 ¶ 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀯. 𑀧𑀯𑀸𑀭𑀡𑀸𑀬𑀧𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑀺𑀬𑀫𑀸𑀦𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀑𑀡𑁄𑀚𑀦𑁂 𑀲𑀘𑁂 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀤𑁆𑀯𑁂 𑀢𑀻𑀡𑀺 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀅𑀜𑁆𑀜𑀸 𑀘𑀲𑁆𑀲 𑀧𑀼𑀕𑁆𑀕𑀮𑀺𑀓𑀪𑀢𑁆𑀢𑀧𑀘𑁆𑀘𑀸𑀲𑀸 𑀳𑁄𑀢𑀺, 𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀕𑀳𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀳𑁂𑀝𑁆𑀞𑀸 𑀕𑀸𑀳𑁂𑀣, 𑀅𑀚𑁆𑀚 𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀸 𑀅𑀢𑁆𑀣𑀺, 𑀲𑁆𑀯𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺, 𑀏𑀯𑀁 𑀢𑀸𑀦𑀺 𑀧𑀼𑀦𑀤𑀺𑀯𑀲𑁂𑀲𑀼 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. ‘‘𑀧𑀼𑀦𑀤𑀺𑀯𑀲𑁂 𑀲𑀩𑁆𑀩𑀧𑀞𑀫𑀁 𑀏𑀢𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀦 𑀕𑀡𑁆𑀳𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀼𑀦𑀤𑀺𑀯𑀲𑁂 𑀦 𑀮𑀪𑀢𑀺. 𑀇𑀤𑀁 𑀑𑀡𑁄𑀚𑀦𑀁 𑀦𑀸𑀫 𑀧𑀸𑀭𑀺𑀯𑀸𑀲𑀺𑀓𑀲𑁆𑀲𑁂𑀯 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀢𑁆𑀢𑀕𑁆𑀕𑁂 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀦 𑀯𑀸, 𑀢𑀲𑁆𑀫𑀸 ‘‘𑀲𑁄 𑀪𑀺𑀓𑁆𑀔𑀸𑀳𑀸𑀭𑁂𑀦 𑀫𑀸 𑀓𑀺𑀮𑀫𑀺𑀢𑁆𑀣𑀸’’𑀢𑀺 𑀇𑀤𑀫𑀲𑁆𑀲 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁.

𑀪𑀢𑁆𑀢𑁂 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀁 𑀬𑀣𑀸𑀯𑀼𑀟𑁆𑀠𑀁 𑀮𑀪𑀢𑀺, 𑀧𑀸𑀴𑀺𑀬𑀸 𑀧𑀦 𑀕𑀦𑁆𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀦 𑀮𑀪𑀢𑀺. 𑀢𑀲𑁆𑀫𑀸 𑀧𑀸𑀴𑀺𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀬𑀣𑀸 𑀲𑁂𑀦𑁄 𑀦𑀺𑀧𑀢𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀏𑀯𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀳𑀺 𑀆𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀲𑀬𑀫𑁂𑀯 𑀆𑀳𑀭𑀦𑁆𑀢𑀺, 𑀯𑀝𑁆𑀝𑀢𑀺. 𑀭𑀜𑁆𑀜𑁄 𑀫𑀳𑀸𑀧𑁂𑀴𑀪𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑁂 𑀧𑀦 𑀲𑀘𑁂 𑀑𑀡𑁄𑀚𑀦𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀓𑁆𑀔𑀺𑀢𑁆𑀢𑁂 𑀧𑀺𑀡𑁆𑀟𑁂 ‘‘𑀅𑀚𑁆𑀚 𑀫𑁂 𑀪𑀢𑁆𑀢𑀁 𑀅𑀢𑁆𑀣𑀺, 𑀲𑁆𑀯𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀧𑀼𑀦𑀤𑀺𑀯𑀲𑁂 𑀤𑁆𑀯𑁂 𑀧𑀺𑀡𑁆𑀟𑁂 𑀮𑀪𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁭𑁫) 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺𑀧𑀺 ¶ 𑀧𑀸𑀴𑀺𑀢𑁄 𑀑𑀲𑀓𑁆𑀓𑀺𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀢𑁆𑀣 𑀧𑀦 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀺 ¶ , 𑀢𑀢𑁆𑀣 𑀲𑀸𑀫𑀡𑁂𑀭𑀸𑀦𑀁 𑀚𑁂𑀝𑁆𑀞𑀓𑁂𑀦 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑀦𑀯𑀓𑁂𑀦 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀲𑀫𑀣𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁭𑁬𑁦. 𑀇𑀤𑀸𑀦𑀺 𑀲𑀫𑀣𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 𑀬𑁂𑀲𑀼 𑀅𑀥𑀺𑀓𑀭𑀡𑁂𑀲𑀼 𑀲𑀦𑁆𑀢𑁂𑀲𑀼 𑀲𑀫𑀣𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀯𑀸𑀤𑀸𑀥𑀸𑀭𑀢𑀸’’𑀢𑀺𑀆𑀤𑀺. 𑀯𑀺𑀯𑀸𑀤𑀸𑀥𑀸𑀭𑀢𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀆𑀧𑀢𑁆𑀢𑀸𑀥𑀸𑀭𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀥𑀸𑀭𑀢𑀸𑀢𑀺 𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑁄. 𑀆𑀥𑀸𑀭𑀻𑀬𑀢𑀺 𑀅𑀪𑀺𑀪𑀼𑀬𑁆𑀬𑀢𑀺 𑀯𑀽𑀧𑀲𑀫𑁆𑀫𑀢𑀺 𑀲𑀫𑀣𑁂𑀳𑀻𑀢𑀺 𑀆𑀥𑀸𑀭𑁄, 𑀯𑀺𑀯𑀸𑀤𑁄 𑀘 𑀲𑁄 𑀆𑀥𑀸𑀭𑁄 𑀘𑀸𑀢𑀺 𑀯𑀺𑀯𑀸𑀤𑀸𑀥𑀸𑀭𑁄, 𑀲𑁄 𑀏𑀯 𑀯𑀺𑀯𑀸𑀤𑀸𑀥𑀸𑀭𑀢𑀸. 𑀏𑀯𑀫𑀸𑀥𑀸𑀭𑀸𑀥𑀺𑀓𑀭𑀡-𑀲𑀤𑁆𑀤𑀸𑀦𑀁 𑀯𑀺𑀯𑀸𑀤𑀸𑀤𑀺𑀲𑀤𑁆𑀤𑁂𑀳𑀺 𑀲𑀳 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀥𑀺𑀓𑀭𑀻𑀬𑀢𑀺 𑀅𑀪𑀺𑀪𑀼𑀬𑁆𑀬𑀢𑀺 𑀯𑀽𑀧𑀲𑀫𑁆𑀫𑀢𑀺 𑀲𑀫𑀣𑁂𑀳𑀻𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀤𑀺𑀘𑀢𑀼𑀩𑁆𑀩𑀺𑀥𑀫𑁂𑀯 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑀁. 𑀅𑀬𑀫𑀢𑁆𑀣𑁄 ‘‘𑀏𑀢𑁂𑀲𑀁 𑀢𑀼 𑀘𑀢𑀼𑀦𑁆𑀦𑀫𑁆𑀧𑀺, 𑀲𑀫𑀢𑁆𑀢𑀸 𑀲𑀫𑀣𑀸 𑀫𑀢𑀸’’𑀢𑀺 𑀯𑀓𑁆𑀔𑀫𑀸𑀦𑁂𑀦 𑀯𑀺𑀜𑁆𑀜𑀸𑀬𑀢𑀺.

𑁨𑁭𑁬𑁧. 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀘 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 ‘𑀥𑀫𑁆𑀫𑁄’𑀢𑀺 𑀯𑀸 ‘𑀅𑀥𑀫𑁆𑀫𑁄’𑀢𑀺 𑀯𑀸’’𑀢𑀺 (𑀘𑀽𑀴𑀯. 𑁨𑁧𑁫) 𑀅𑀝𑁆𑀞𑀸𑀭𑀲 𑀪𑁂𑀤𑀓𑀸𑀭𑀓𑀯𑀢𑁆𑀣𑀽𑀦𑀺 𑀘 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀢𑁂𑀲𑀼 𑀘𑀢𑀽𑀲𑀼 𑀅𑀥𑀺𑀓𑀭𑀡𑁂𑀲𑀼 𑀯𑀺𑀯𑀸𑀤𑁄 𑀅𑀥𑀺𑀓𑀭𑀡𑀲𑀗𑁆𑀔𑀸𑀢𑁄 𑀏𑀢𑀸𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀺𑀢𑁄 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁨𑁭𑁬𑁨. 𑀯𑀺𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄𑀯𑀸𑀢𑀺 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 ¶ 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸’’𑀢𑀺 (𑀘𑀽𑀴𑀯. 𑁨𑁧𑁫) 𑀯𑀼𑀢𑁆𑀢𑀸 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄. 𑀤𑀺𑀝𑁆𑀞𑀸𑀤𑀻𑀦𑀁 𑀅𑀦𑀼𑀕𑀦𑁆𑀢𑁆𑀯𑀸 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀻𑀳𑀺 𑀯𑀤𑀦𑀁 𑀘𑁄𑀤𑀦𑀸 𑀅𑀦𑀼𑀯𑀸𑀤𑁄. 𑀉𑀧𑀸𑀕𑀢𑁄𑀢𑀺 𑀦𑀺𑀲𑁆𑀲𑀺𑀢𑁄, 𑀅𑀦𑀼𑀯𑀸𑀤𑁄 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀢𑀢𑁆𑀣𑀸’’𑀢𑀺 𑀧𑀞𑀫𑀫𑁂𑀯 𑀦𑀺𑀤𑁆𑀥𑀸𑀭𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀧𑀼𑀦𑀯𑀘𑀦𑁂 𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀺, ‘‘𑀲𑀫𑁆𑀪𑀯𑀸’’𑀢𑀺 𑀯𑀘𑀦𑀲𑁆𑀲𑀸𑀧𑀺 𑀦 𑀓𑁄𑀘𑀺 𑀅𑀢𑁆𑀣𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 ‘‘𑀆𑀧𑀢𑁆𑀢𑀸𑀥𑀸𑀭𑀢𑀸 𑀢𑀢𑁆𑀣, 𑀲𑀢𑁆𑀢𑀆𑀧𑀢𑁆𑀢𑀺𑀲𑀫𑁆𑀪𑀯𑀸’’𑀢𑀺 𑀧𑀸𑀞𑁄 𑀦 𑀬𑀼𑀚𑁆𑀚𑀢𑀺, ‘‘𑀆𑀧𑀢𑁆𑀢𑀸𑀥𑀸𑀭𑀢𑀸 𑀦𑀸𑀫, 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀫𑀢𑀸’’𑀢𑀺 𑀧𑀸𑀞𑁄 ¶ 𑀬𑀼𑀢𑁆𑀢𑀢𑀭𑁄, 𑀆𑀧𑀢𑁆𑀢𑀸𑀥𑀸𑀭𑀢𑀸 𑀦𑀸𑀫 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀦𑀸𑀫 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀫𑀢𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀅𑀢𑁆𑀣𑁄.

𑁨𑁭𑁬𑁩. 𑀲𑀗𑁆𑀖𑀓𑀺𑀘𑁆𑀘𑀸𑀦𑀺 𑀦𑀺𑀲𑁆𑀲𑀸𑀬𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀉𑀧𑀸𑀤𑀸𑀬 𑀓𑀺𑀘𑁆𑀘𑀸𑀥𑀺𑀓𑀭𑀡𑀸𑀪𑀺𑀥𑀸𑀦𑀁 𑀲𑀺𑀬𑀸, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀁 𑀢𑀼 𑀘𑀢𑀼𑀦𑁆𑀦𑀫𑁆𑀧𑀻𑀢𑀺 𑀏𑀢𑁂𑀲𑀁 𑀧𑀦 𑀘𑀢𑀼𑀦𑁆𑀦𑀫𑁆𑀧𑀺 𑀅𑀥𑀺𑀓𑀭𑀡𑀸𑀦𑀁. 𑀲𑀫𑀢𑁆𑀢𑀸𑀢𑀺 𑀯𑀽𑀧𑀲𑀫𑀳𑁂𑀢𑀼𑀢𑁆𑀢𑀸. 𑀲𑀫𑀣𑀸 𑀫𑀢𑀸𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀬𑁄 𑀲𑀢𑁆𑀢 𑀅𑀥𑀺𑀓𑀭𑀡𑀲𑀫𑀣𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀥𑀺𑀓𑀭𑀡𑀸𑀦𑀺 𑀲𑀫𑁂𑀦𑁆𑀢𑀺, 𑀲𑀫𑁆𑀫𑀦𑁆𑀢𑀺 𑀯𑀸 𑀏𑀢𑁂𑀳𑀻𑀢𑀺 ‘‘𑀲𑀫𑀣𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 ‘‘𑀲𑀫𑀢𑁆𑀢𑀸 𑀲𑀫𑀣𑀸 𑀫𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑀣-𑀲𑀤𑁆𑀤𑀲𑁆𑀲 𑀅𑀦𑁆𑀯𑀢𑁆𑀣𑀁 𑀤𑀻𑀧𑁂𑀢𑀺.

𑁨𑁭𑁬𑁪-𑁫. 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺. ‘‘𑀯𑀺𑀦𑀬𑁄’’𑀢𑀺 𑀇𑀤𑀁 𑀲𑀫𑁆𑀫𑀼𑀔𑀸𑀤𑀺𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄’’𑀢𑀺. ‘‘𑀧𑀝𑀺𑀜𑁆𑀜𑀸𑀯𑀺𑀦𑀬𑁄’’𑀢𑀺 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀫𑁄 𑀯𑀺𑀦𑀬𑁄𑀢𑀺 𑀲𑀫𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀇𑀫𑁂 𑀲𑀢𑁆𑀢 𑀲𑀫𑀣𑀸 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁨𑁭𑁬𑁬. 𑀘𑀢𑀽𑀲𑀼 ¶ 𑀅𑀥𑀺𑀓𑀭𑀡𑁂𑀲𑀼 𑀬𑀁 𑀅𑀥𑀺𑀓𑀭𑀡𑀁 𑀬𑀢𑁆𑀢𑀓𑁂𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺, 𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀯𑀸𑀤𑁄’’𑀢𑀺𑀆𑀤𑀺.

𑁨𑁭𑁬𑁭-𑁯. ‘‘𑀯𑀺𑀯𑀸𑀤𑁄’’𑀢𑀺𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀙𑀝𑁆𑀞𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀏𑀢𑁂𑀲𑀼 𑀘𑀢𑀽𑀲𑀼 𑀅𑀥𑀺𑀓𑀭𑀡𑁂𑀲𑀼, 𑀲𑀫𑀣𑁂𑀲𑀼 𑀘 𑀓𑀺𑀁 𑀓𑁂𑀦 𑀲𑀫𑁆𑀫𑀢𑀻𑀢𑀺 𑀘𑁂? 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀙𑀝𑁆𑀞𑁂𑀦 𑀬𑁂𑀪𑀼𑀬𑁆𑀬𑀲𑀺𑀓𑀸𑀬, 𑀧𑀞𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺. 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬 𑀥𑀫𑁆𑀫𑀯𑀸𑀤𑀺𑀦𑁄 𑀩𑀳𑀼𑀢𑀭𑀸, 𑀏𑀲𑀸 𑀬𑁂𑀪𑀼𑀬𑁆𑀬𑀲𑀺𑀓𑀸. ‘‘𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸’’𑀢𑀺 (𑀘𑀽𑀴𑀯. 𑁨𑁨𑁯, 𑁨𑁩𑁪, 𑁨𑁩𑁬, 𑁨𑁩𑁭, 𑁨𑁪𑁨) 𑀯𑀼𑀢𑁆𑀢𑀸𑀦𑀁 𑀲𑀗𑁆𑀖𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀕𑀡𑀧𑀼𑀕𑁆𑀕𑀮𑁂𑀳𑀺 𑀲𑀫𑀺𑀬𑀫𑀸𑀦𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀁 𑀯𑀺𑀦𑀸 𑀇𑀢𑀭𑁂𑀳𑀺 𑀢𑀻𑀳𑀺 𑀯𑀸 𑀲𑀫𑁆𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣 𑀘 𑀓𑀸𑀭𑀓𑀲𑀗𑁆𑀖𑀲𑁆𑀲 𑀲𑀗𑁆𑀖𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀲𑀫𑁂𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀦𑁄 ¶ 𑀪𑀽𑀢𑀢𑀸 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀬𑀣𑀸 𑀢𑀁 𑀲𑀫𑁂𑀢𑀩𑁆𑀩𑀁, 𑀢𑀣𑁂𑀯𑀲𑁆𑀲 𑀲𑀫𑀦𑀁 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸.

‘‘𑀅𑀦𑀼𑀯𑀸𑀤𑁄 𑀘𑀢𑀽𑀳𑀺𑀧𑀻’’𑀢𑀺 𑀉𑀤𑁆𑀤𑀺𑀝𑁆𑀞𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀼𑀔𑀸’’𑀢𑀺𑀆𑀤𑀺. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀻𑀳𑀺 𑀢𑀻𑀳𑀺𑀧𑀻𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀢𑀺𑀯𑀺𑀦𑀬𑀅𑀫𑀽𑀴𑁆𑀳𑀯𑀺𑀦𑀬𑁂𑀳𑀺 𑀢𑀻𑀳𑀺𑀧𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀢𑀻𑀳𑀺, 𑀢𑀣𑀸 𑀧𑀜𑁆𑀘𑀫𑁂𑀦 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀲𑀫𑀣𑁂𑀦𑀸𑀧𑀺 𑀅𑀦𑀼𑀯𑀸𑀤𑁄 𑀲𑀫𑁆𑀫𑀢𑀺, 𑀧𑀕𑁂𑀯 𑀘𑀢𑀽𑀳𑀻𑀢𑀺 𑀅𑀢𑁆𑀣𑁄.

𑀬𑁄 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀓𑀢𑁆𑀢𑀩𑁆𑀩𑀢𑁄 ‘‘𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸’’𑀢𑀺 𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 ¶ 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑀺𑀬 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀓𑀢𑀸 𑀅𑀫𑀽𑀮𑀺𑀓𑀸 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦, 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀬 𑀓𑀫𑁆𑀫𑀯𑀸𑀘𑀸𑀬 𑀤𑀺𑀦𑁆𑀦𑁂𑀦 𑀲𑀢𑀺𑀯𑀺𑀦𑀬𑁂𑀦 𑀘 𑀲𑀫𑁆𑀫𑀢𑀺. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀢𑀸 𑀆𑀧𑀢𑁆𑀢𑀺𑀘𑁄𑀤𑀦𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀣𑁂𑀯 𑀤𑀺𑀦𑁆𑀦𑁂𑀦 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀲𑀫𑁆𑀫𑀢𑀺. 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑀲𑁆𑀲 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀩𑀳𑀼𑀮𑀸𑀧𑀢𑁆𑀢𑀺𑀘𑁄𑀤𑀦𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑁂𑀯 𑀢𑀣𑁂𑀯 𑀧𑀓𑀢𑁂𑀦 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑁂𑀦 𑀘 𑀯𑀽𑀧𑀲𑀫𑁆𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀆𑀧𑀢𑁆𑀢𑀺 𑀧𑀦 𑀢𑀻𑀳𑁂𑀯𑀸’’𑀢𑀺 𑀉𑀤𑁆𑀤𑁂𑀲𑀲𑁆𑀲 𑀦𑀺𑀤𑁆𑀤𑁂𑀲𑀫𑀸𑀳 ‘‘𑀲𑀫𑁆𑀫𑀼𑀔𑁂𑀦𑀸’’𑀢𑀺𑀆𑀤𑀺. 𑀲𑀫𑁆𑀫𑀼𑀔𑁂𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦, 𑀧𑀝𑀺𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀸 𑀇𑀫𑁂𑀳𑀺 𑀢𑀻𑀳𑀺 𑀏𑀯 𑀲𑀫𑀣𑁂𑀳𑀺 𑀲𑀸 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀉𑀧𑀲𑀫𑀁 𑀬𑀸𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂𑀦 ‘‘𑀧𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀆𑀧𑀢𑁆𑀢𑀺𑀁 𑀤𑁂𑀲𑁂𑀦𑁆𑀢𑁂𑀦 ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀢𑀺𑀡𑀯𑀢𑁆𑀣𑀸𑀭𑀓𑀁 𑀧𑀦 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀢𑀻𑀳𑁂𑀯 𑀲𑀫𑀣𑁂𑀳𑀻𑀢𑀺 𑀏𑀢𑁆𑀣 𑀕𑀭𑀼𑀓𑀸𑀧𑀢𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦, 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺, 𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀗𑁆𑀖𑁂 𑀯𑀸 𑀕𑀡𑁂 𑀯𑀸 𑀧𑀼𑀕𑁆𑀕𑀮𑁂 𑀯𑀸 𑀤𑁂𑀲𑀦𑀸𑀬 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑁂𑀯 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀓𑁄𑀲𑀫𑁆𑀩𑀓𑀸𑀦𑀁 𑀯𑀺𑀕𑁆𑀕𑀳𑀲𑀤𑀺𑀲𑀁 𑀫𑀳𑀸𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑁂𑀳𑀺 𑀆𑀧𑀦𑁆𑀦𑀸 𑀅𑀦𑁂𑀓𑀯𑀺𑀥𑀸 𑀆𑀧𑀢𑁆𑀢𑀺𑀬𑁄 𑀲𑀘𑁂 𑀳𑁄𑀦𑁆𑀢𑀺, 𑀢𑀸𑀲𑀼 𑀯𑀓𑁆𑀔𑀫𑀸𑀦𑀲𑀭𑀽𑀧𑀁 𑀣𑀼𑀮𑁆𑀮𑀯𑀚𑁆𑀚𑀸𑀤𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘 𑀲𑀫𑁆𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑀺𑀘𑁆𑀘𑀁 ¶ 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁭𑁦. 𑀬𑁂𑀪𑀼𑀬𑁆𑀬𑀲𑀺𑀓𑀓𑀫𑁆𑀫𑁂𑀢𑀺 ¶ 𑀏𑀢𑁆𑀣 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀲𑀮𑀸𑀓𑀁 𑀕𑀸𑀳𑀬𑁂𑀢𑀺 𑀯𑀺𑀦𑀺𑀘𑁆𑀙𑀬𑀓𑀸𑀭𑀓𑁂 𑀲𑀗𑁆𑀖𑁂 𑀥𑀫𑁆𑀫𑀯𑀸𑀤𑀻𑀦𑀁 𑀩𑀳𑀼𑀢𑁆𑀢𑀁 𑀯𑀸 𑀅𑀧𑁆𑀧𑀢𑀭𑀢𑁆𑀢𑀁 𑀯𑀸 𑀚𑀸𑀦𑀺𑀢𑀼𑀁 𑀯𑀓𑁆𑀔𑀫𑀸𑀦𑁂𑀦 𑀦𑀬𑁂𑀦 𑀲𑀮𑀸𑀓𑀁 𑀕𑀸𑀳𑀸𑀧𑁂𑀬𑁆𑀬. 𑀩𑀼𑀥𑁄𑀢𑀺 ‘‘𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺. ‘‘𑀕𑀽𑀴𑁆𑀳𑁂𑀦𑀸’’𑀢𑀺𑀆𑀤𑀺𑀦𑀸 𑀲𑀮𑀸𑀓𑀕𑁆𑀕𑀸𑀳𑀧𑁆𑀧𑀓𑀸𑀭𑁄 𑀤𑀲𑁆𑀲𑀺𑀢𑁄. 𑀓𑀡𑁆𑀡𑀚𑀧𑁆𑀧𑁂𑀦𑀸𑀢𑀺 𑀏𑀢𑁆𑀣 𑀓𑀡𑁆𑀡𑁂 𑀚𑀧𑁆𑀧𑁄 𑀬𑀲𑁆𑀫𑀺𑀁 𑀲𑀮𑀸𑀓𑀕𑁆𑀕𑀸𑀳𑀧𑀬𑁄𑀕𑁂𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀕𑀽𑀴𑁆𑀳𑀲𑀮𑀸𑀓𑀕𑁆𑀕𑀸𑀳𑁄 𑀦𑀸𑀫 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀸 𑀘 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀸 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀘𑀻𑀯𑀭𑀓𑀡𑁆𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀕𑁆𑀕𑀮𑀸𑀦𑀁 𑀲𑀦𑁆𑀢𑀺𑀓𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀮𑀸𑀓𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀢𑁄 𑀢𑀯 𑀭𑀼𑀘𑁆𑀘𑀦𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀭𑀳𑁄 𑀞𑀢𑁆𑀯𑀸 𑀕𑀸𑀳𑀸𑀧𑀦𑀁. 𑀯𑀺𑀯𑀝𑀓𑀁 𑀦𑀸𑀫 𑀥𑀫𑁆𑀫𑀯𑀸𑀤𑀻𑀦𑀁 𑀩𑀳𑀼𑀪𑀸𑀯𑀁 𑀜𑀢𑁆𑀯𑀸 𑀲𑀩𑁆𑀩𑁂𑀲𑀼 𑀚𑀸𑀦𑀦𑁆𑀢𑁂𑀲𑀼 𑀧𑀼𑀕𑁆𑀕𑀮𑀸𑀦𑀁 𑀲𑀦𑁆𑀢𑀺𑀓𑀁 𑀕𑀸𑀳𑀸𑀧𑀦𑀁. 𑀓𑀡𑁆𑀡𑀚𑀧𑁆𑀧𑀦𑀁 𑀦𑀸𑀫 𑀏𑀯𑀫𑁂𑀯 𑀓𑀡𑁆𑀡𑀫𑀽𑀮𑁂 𑀭𑀳𑁄 𑀞𑀢𑁆𑀯𑀸 𑀕𑀸𑀳𑀸𑀧𑀦𑀁.

𑁨𑁭𑁭𑁧. 𑀅𑀮𑀚𑁆𑀚𑀼𑀲𑁆𑀲𑀤𑁂𑀢𑀺 𑀏𑀢𑁆𑀣 ‘‘𑀲𑀗𑁆𑀖𑁂’’𑀢𑀺 𑀲𑁂𑀲𑁄. 𑀮𑀚𑁆𑀚𑀺𑀲𑀼 𑀩𑀸𑀮𑁂𑀲𑀽𑀢𑀺 𑀏𑀢𑁆𑀣𑀸𑀧𑀺 ‘‘𑀉𑀲𑁆𑀲𑀤𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑀁.

𑁨𑁭𑁭𑁨. 𑀲𑀓𑁂𑀦 𑀓𑀫𑁆𑀫𑀼𑀦𑀸𑀬𑁂𑀯𑀸𑀢𑀺 𑀅𑀢𑁆𑀢𑀦𑁄 𑀬𑀁 𑀓𑀺𑀘𑁆𑀘𑀁, 𑀢𑁂𑀦𑁂𑀯𑀸𑀢𑀺.

𑁨𑁭𑁭𑁩-𑁫. ‘‘𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺 ‘‘𑀅𑀮𑀚𑁆𑀚𑀻, 𑀮𑀚𑁆𑀚𑀻, 𑀩𑀸𑀮𑁄’’𑀢𑀺 𑀚𑀸𑀦𑀦𑀲𑁆𑀲 𑀳𑁂𑀢𑀼𑀪𑀽𑀢𑀓𑀫𑁆𑀫𑀤𑀲𑁆𑀲𑀦𑀁. 𑀤𑀼𑀘𑁆𑀘𑀺𑀦𑁆𑀢𑀺𑀢𑁄𑀢𑀺 𑀅𑀪𑀺𑀚𑁆𑀛𑀸𑀤𑀺𑀢𑀺𑀯𑀺𑀥𑀫𑀦𑁄𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀤𑀼𑀝𑁆𑀞𑀼 𑀘𑀺𑀦𑁆𑀢𑁂𑀦𑁆𑀢𑁄. 𑀤𑀼𑀩𑁆𑀪𑀸𑀲𑀻𑀢𑀺 𑀫𑀼𑀲𑀸𑀯𑀸𑀤𑀸𑀤𑀺𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀤𑀼𑀝𑁆𑀞𑀼 𑀪𑀸𑀲𑀦𑀲𑀻𑀮𑁄. 𑀤𑀼𑀓𑁆𑀓𑀝𑀓𑀸𑀭𑀺𑀓𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀓𑀸𑀬𑀤𑁆𑀯𑀸𑀭𑁂 ¶ 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀓𑀼𑀘𑁆𑀙𑀺𑀢𑀓𑀫𑁆𑀫𑀲𑁆𑀲 𑀓𑀭𑀡𑀲𑀻𑀮𑁄. 𑀇𑀢𑀺 𑀮𑀓𑁆𑀔𑀡𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀮𑀚𑁆𑀚𑀻𑀮𑀚𑁆𑀚𑀻𑀩𑀸𑀮𑀮𑀓𑁆𑀔𑀡𑀁 𑀦𑀺𑀕𑀫𑁂𑀢𑀺.

𑁨𑁭𑁭𑁬. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸’’𑀢𑀺𑀆𑀤𑀺𑀕𑀸𑀣𑀸𑀳𑀺 𑀦𑀺𑀤𑁆𑀤𑀺𑀝𑁆𑀞𑀫𑁂𑀯 𑀅𑀢𑁆𑀣𑀁 𑀦𑀺𑀕𑀫𑁂𑀢𑀼𑀫𑀸𑀳 ‘‘𑀢𑀺𑀥𑀸’’𑀢𑀺𑀆𑀤𑀺. 𑀢𑀺𑀥𑀸𑀲𑀮𑀸𑀓𑀕𑀸𑀳𑁂𑀦𑀸𑀢𑀺 𑀢𑀺𑀯𑀺𑀥𑀲𑁆𑀲 𑀲𑀮𑀸𑀓𑀕𑀸𑀳𑀲𑁆𑀲 𑀅𑀜𑁆𑀜𑀢𑀭𑁂𑀦. 𑀩𑀳𑀼𑀓𑀸 𑀥𑀫𑁆𑀫𑀯𑀸𑀤𑀺𑀦𑁄 𑀬𑀤𑀺 𑀲𑀺𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀯𑀽𑀧𑀲𑀫𑀦’’𑀦𑁆𑀢𑀺 𑀲𑁂𑀲𑁄.

𑁨𑁭𑁭𑁭. 𑀬𑁄 ¶ 𑀧𑀼𑀕𑁆𑀕𑀮𑁄 𑀅𑀮𑀚𑁆𑀚𑀻 𑀘 𑀳𑁄𑀢𑀺 𑀲𑀸𑀦𑀼𑀯𑀸𑀤𑁄 𑀘 𑀓𑀫𑁆𑀫𑀢𑁄 𑀓𑀸𑀬𑀓𑀫𑁆𑀫𑀢𑁄, 𑀯𑀘𑀻𑀓𑀫𑁆𑀫𑀢𑁄 𑀘 𑀅𑀲𑀼𑀘𑀺 𑀘 𑀲𑀫𑁆𑀩𑀼𑀤𑁆𑀥𑀚𑀺𑀕𑀼𑀘𑁆𑀙𑀦𑀻𑀬𑁄𑀢𑀺 𑀅𑀢𑁆𑀣𑁄. 𑀲𑁄 𑀏𑀯𑀁𑀯𑀺𑀥𑁄 𑀧𑀸𑀧𑀧𑀼𑀕𑁆𑀕𑀮𑁄 𑀢𑀲𑁆𑀲 𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀲𑁆𑀲 𑀬𑁄𑀕𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀦𑀼𑀯𑀸𑀤𑁄𑀢𑀺 𑀏𑀢𑁆𑀣 𑀅𑀦𑀼𑀯𑀸𑀤𑁄 𑀦𑀸𑀫 𑀘𑁄𑀤𑀦𑀸, 𑀲𑀳 𑀅𑀦𑀼𑀯𑀸𑀤𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀦𑀼𑀯𑀸𑀤𑁄, 𑀧𑀸𑀧𑀕𑀭𑀳𑀺𑀢𑀧𑀼𑀕𑁆𑀕𑀮𑁂𑀳𑀺 𑀓𑀸𑀢𑀩𑁆𑀩𑀘𑁄𑀤𑀦𑀸𑀬 𑀅𑀦𑀼𑀭𑀽𑀧𑁄𑀢𑀺 𑀅𑀢𑁆𑀣𑁄.

𑁨𑁭𑁭𑁮-𑁯. 𑀪𑀡𑁆𑀟𑀦𑁂𑀢𑀺 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁂. 𑀓𑀮𑀳𑁂𑀢𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑁂 𑀳𑀢𑁆𑀣𑀧𑀭𑀸𑀫𑀲𑀸𑀤𑀺𑀓𑁂 𑀓𑀮𑀳𑁂 𑀘. 𑀯𑀺𑀯𑀸𑀤𑀫𑁆𑀳𑀺 𑀅𑀦𑀧𑁆𑀧𑀓𑁂𑀢𑀺 𑀩𑀳𑀼𑀯𑀺𑀥𑁂 𑀯𑀺𑀯𑀸𑀤𑁂 𑀚𑀸𑀢𑁂. 𑀩𑀳𑀼𑀅𑀲𑁆𑀲𑀸𑀫𑀡𑁂 𑀘𑀺𑀡𑁆𑀡𑁂𑀢𑀺 𑀲𑀫𑀡𑀸𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑁂 𑀦𑀸𑀦𑀧𑁆𑀧𑀓𑀸𑀭𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑁂 𑀘 𑀓𑀢𑁂. 𑀅𑀦𑀕𑁆𑀕𑁂𑀢𑀺 𑀅𑀦𑀦𑁆𑀢𑁂. 𑀪𑀲𑁆𑀲𑀓𑁂𑀢𑀺 𑀓𑀼𑀘𑁆𑀙𑀺𑀢𑁂 𑀅𑀫𑀦𑀸𑀧𑀯𑀘𑀦𑁂 𑀘𑀺𑀡𑁆𑀡𑁂𑀢𑀺 𑀬𑁄𑀚𑀦𑀸, 𑀪𑀸𑀲𑀺𑀢𑁂𑀢𑀺 𑀅𑀢𑁆𑀣𑁄. 𑀕𑀯𑁂𑀲𑀦𑁆𑀢𑀦𑁆𑀢𑀺 𑀕𑀯𑁂𑀲𑀺𑀬𑀫𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀦𑁆𑀢𑀺 𑀲𑁂𑀲𑁄. 𑀯𑀸𑀴𑀦𑁆𑀢𑀺 𑀘𑀡𑁆𑀟𑀁. 𑀓𑀓𑁆𑀔𑀴𑀦𑁆𑀢𑀺 𑀆𑀲𑀚𑁆𑀚𑀁. 𑀓𑀸𑀢𑀩𑁆𑀩𑀦𑁆𑀢𑀺 𑀯𑀽𑀧𑀲𑀫𑁂𑀢𑀩𑁆𑀩𑀁.

𑁨𑁭𑁮𑁦-𑁨. 𑀬𑀣𑀸 𑀘 𑀯𑀽𑀧𑀲𑀫𑁆𑀫𑀢𑀺, 𑀢𑀣𑀸 𑀢𑀺𑀡𑀯𑀢𑁆𑀣𑀸𑀭𑀓𑁂 𑀲𑀼𑀤𑁆𑀥𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀣𑀼𑀮𑁆𑀮𑀯𑀚𑁆𑀚𑀦𑁆𑀢𑀺 ¶ 𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘. 𑀕𑀺𑀳𑀻𑀳𑀺 𑀧𑀝𑀺𑀲𑀁𑀬𑀼𑀢𑀦𑁆𑀢𑀺 𑀕𑀺𑀳𑀻𑀦𑀁 𑀚𑀸𑀢𑀺𑀆𑀤𑀻𑀳𑀺 𑀧𑀸𑀴𑀺𑀬𑀸 𑀆𑀕𑀢𑁂𑀳𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺, 𑀅𑀝𑁆𑀞𑀓𑀣𑀸𑀕𑀢𑁂𑀳𑀺 𑀘 𑀢𑀤𑀜𑁆𑀜𑁂𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀔𑀼𑀁𑀲𑀦𑀯𑀫𑁆𑀪𑀦𑀧𑀘𑁆𑀘𑀬𑀸 𑀘 𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑀧𑀘𑁆𑀘𑀬𑀸 𑀘 𑀆𑀧𑀦𑁆𑀦𑀸𑀧𑀢𑁆𑀢𑀺𑀁. 𑀏𑀲𑀸 𑀏𑀯 𑀳𑀺 𑀆𑀧𑀢𑁆𑀢𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀦𑀸𑀫 𑀧𑀭𑀺𑀯𑀸𑀭𑁂 ‘‘𑀅𑀢𑁆𑀣𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸, 𑀅𑀢𑁆𑀣𑀺 𑀦𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 𑀤𑀼𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀥𑀫𑁆𑀫𑀢𑁆𑀣𑁂𑀭𑀲𑁆𑀲 𑀆𑀧𑀢𑁆𑀢𑀺, 𑀬𑀸 𑀘 𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂 𑀆𑀧𑀢𑁆𑀢𑀺. 𑀅𑀯𑀲𑁂𑀲𑀸 𑀦𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁧) 𑀯𑀘𑀦𑀢𑁄.

𑀲𑀼𑀥𑀫𑁆𑀫𑀢𑁆𑀣𑁂𑀭𑀲𑁆𑀲 𑀆𑀧𑀢𑁆𑀢𑀻𑀢𑀺 𑀘 𑀢𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀔𑀼𑀁𑀲𑀦𑀯𑀫𑁆𑀪𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀸 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀺𑀪𑀸𑀕𑀕𑀢𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀇𑀤𑀜𑁆𑀘 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀢𑀲𑁆𑀫𑀸 𑀇𑀢𑀭𑁂𑀳𑀺𑀧𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀕𑀺𑀳𑀺𑀁 𑀔𑀼𑀁𑀲𑁂𑀦𑁆𑀢𑀸𑀦𑀁 𑀯𑀫𑁆𑀪𑁂𑀦𑁆𑀢𑀸𑀦𑀁 𑀇𑀢𑀭𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀸 𑀆𑀧𑀢𑁆𑀢𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀦𑁆𑀢𑁂𑀦 𑀤𑀲𑁆𑀲𑀦𑀽𑀧𑀘𑀸𑀭𑀁 𑀅𑀯𑀺𑀚𑀳𑀸𑀧𑁂𑀢𑁆𑀯𑀸 𑀲𑀯𑀦𑀽𑀧𑀘𑀸𑀭𑀁 𑀚𑀳𑀸𑀧𑁂𑀢𑁆𑀯𑀸 𑀏𑀓𑀁𑀲𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀲𑀸 𑀆𑀧𑀢𑁆𑀢𑀺 𑀤𑁂𑀲𑀸𑀧𑁂𑀢𑀩𑁆𑀩𑀸.

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀺𑀓𑀦𑁆𑀢𑀺 ¶ 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑁄 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀺𑀓𑁄, 𑀢𑀁, 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁂 𑀧𑀦 ‘𑀦 𑀫𑁂𑀢𑀁 𑀔𑀫𑀢𑀻’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁧𑁪) 𑀬𑁂 𑀧𑀼𑀕𑁆𑀕𑀮𑀸 𑀤𑀲𑁆𑀲𑀺𑀢𑀸, 𑀢𑁂𑀲𑀫𑀜𑁆𑀜𑀢𑀭𑀲𑁆𑀲𑁂𑀯 𑀕𑀳𑀡𑀁.

𑀬𑁄𑀢𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀫𑀳𑀦𑁆𑀢𑀁 𑀯𑀺𑀕𑁆𑀕𑀳𑀁 𑀓𑀢𑁆𑀯𑀸 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀬𑁄 𑀪𑀺𑀓𑁆𑀔𑀼. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀓𑀸𑀭𑀓𑁂 𑀪𑀺𑀓𑁆𑀔𑀼𑀲𑀫𑀽𑀳𑁂. 𑀦 𑀳𑁄𑀢𑀻𑀢𑀺 𑀙𑀦𑁆𑀤𑀁 𑀤𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀧𑀭𑀺𑀲𑀁 𑀅𑀦𑀸𑀕𑀢𑀢𑁆𑀢𑀸 𑀦 𑀲𑀁𑀯𑀺𑀚𑁆𑀚𑀢𑀺. 𑀢𑀜𑁆𑀘 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸.

𑀢𑀺𑀡𑀯𑀢𑁆𑀣𑀸𑀭𑀓𑁂 ¶ 𑀓𑀢𑁂 𑀲𑀢𑀺 𑀬𑀸𑀯 𑀉𑀧𑀲𑀫𑁆𑀧𑀤𑀫𑀸𑀴𑀢𑁄 𑀧𑀪𑀼𑀢𑀺 𑀆𑀧𑀦𑁆𑀦𑀸𑀬 𑀲𑁂𑀲𑀸𑀬 𑀆𑀧𑀢𑁆𑀢𑀺𑀬𑀸 𑀦𑀺𑀭𑀸𑀧𑀢𑁆𑀢𑀺 𑀳𑀼𑀢𑁆𑀯𑀸 𑀲𑀼𑀤𑁆𑀥𑁄 𑀳𑁄𑀢𑀺 𑀲𑀗𑁆𑀖𑁄𑀢𑀺 𑀬𑁄𑀚𑀦𑀸.

𑀲𑀫𑀣𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁭𑁮𑁩. 𑀓𑀼𑀝𑁆𑀝𑁂𑀢𑀺 𑀇𑀝𑁆𑀞𑀓𑀸𑀲𑀺𑀮𑀸𑀤𑀸𑀭𑀼𑀓𑀼𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀅𑀝𑁆𑀝𑀸𑀦𑁂𑀢𑀺 𑀏𑀢𑁆𑀣 𑀅𑀝𑁆𑀝𑀸𑀦𑀁 𑀦𑀸𑀫 𑀭𑀼𑀓𑁆𑀔𑁂 𑀨𑀮𑀓𑀁 𑀯𑀺𑀬 𑀢𑀘𑁆𑀙𑁂𑀢𑁆𑀯𑀸 𑀅𑀝𑁆𑀞𑀧𑀤𑀸𑀓𑀸𑀭𑁂𑀦 𑀭𑀸𑀚𑀺𑀬𑁄 𑀙𑀺𑀦𑁆𑀤𑀺𑀢𑁆𑀯𑀸 𑀦𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀡𑀦𑁆𑀢𑀺, 𑀢𑀢𑁆𑀣 𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 𑀓𑀸𑀬𑀁 𑀖𑀁𑀲𑀦𑁆𑀢𑀺.

𑁨𑁭𑁮𑁪. 𑀕𑀦𑁆𑀥𑀩𑁆𑀩𑀳𑀢𑁆𑀣𑁂𑀦𑀸𑀢𑀺 𑀦𑀳𑀸𑀦𑀢𑀺𑀢𑁆𑀣𑁂 𑀞𑀧𑀺𑀢𑁂𑀦 𑀤𑀸𑀭𑀼𑀫𑀬𑀳𑀢𑁆𑀣𑁂𑀦. 𑀢𑁂𑀦 𑀓𑀺𑀭 𑀘𑀼𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸𑀢𑀺 𑀓𑀼𑀭𑀼𑀯𑀺𑀦𑁆𑀤𑀓𑀧𑀸𑀲𑀸𑀡𑀘𑀼𑀡𑁆𑀡𑀸𑀦𑀺 𑀮𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀢𑀕𑀼𑀴𑀺𑀓𑀓𑀮𑀸𑀧𑀓𑁄 𑀯𑀼𑀘𑁆𑀘𑀢𑀺, 𑀢𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀫𑀮𑁆𑀮𑀓𑁂𑀦𑀸𑀢𑀺 𑀫𑀓𑀭𑀤𑀦𑁆𑀢𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦 𑀓𑀢𑁂𑀦 𑀫𑀮𑁆𑀮𑀓𑁂𑀦, 𑀇𑀤𑀁 𑀕𑀺𑀮𑀸𑀦𑀲𑁆𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀫𑀜𑁆𑀜𑀜𑁆𑀘 𑀓𑀸𑀬𑀢𑁄𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑁂𑀦 𑀖𑀁𑀲𑁂𑀬𑁆𑀬.

𑁨𑁭𑁮𑁫. 𑀅𑀓𑀢𑀁 𑀫𑀮𑁆𑀮𑀓𑀁 𑀦𑀸𑀫 𑀫𑀓𑀭𑀤𑀦𑁆𑀢𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀁, 𑀇𑀤𑀁 𑀅𑀕𑀺𑀮𑀸𑀦𑀲𑁆𑀲 𑀦 𑀯𑀝𑁆𑀝𑀢𑀺.

𑁨𑁭𑁮𑁬. 𑀓𑀧𑀸𑀮𑀺𑀝𑁆𑀞𑀓𑀔𑀡𑁆𑀟𑀸𑀦𑀻𑀢𑀺 𑀓𑀧𑀸𑀮𑀔𑀡𑁆𑀟𑀇𑀝𑁆𑀞𑀓𑀔𑀡𑁆𑀟𑀸𑀦𑀺. 𑀲𑀩𑁆𑀩𑀲𑁆𑀲𑀸𑀢𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑀲𑁆𑀲 ¶ 𑀲𑀭𑀻𑀭𑁂 𑀖𑀁𑀲𑀺𑀢𑁆𑀯𑀸 𑀉𑀩𑁆𑀩𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀧𑀼𑀣𑀼𑀧𑀸𑀡𑀺𑀓’’𑀦𑁆𑀢𑀺 𑀳𑀢𑁆𑀣𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲 𑀳𑀢𑁆𑀣𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. ‘‘𑀯𑀢𑁆𑀣𑀯𑀝𑁆𑀝𑀻’’𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀉𑀓𑁆𑀓𑀸𑀲𑀺𑀓𑀲𑁆𑀲 ¶ 𑀧𑀭𑀺𑀬𑀸𑀬𑀁, 𑀢𑀲𑁆𑀫𑀸 𑀦𑀳𑀸𑀬𑀦𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀳𑀸𑀦𑀲𑀸𑀝𑀓𑀯𑀝𑁆𑀝𑀺𑀬𑀸𑀧𑀺 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁭𑁮𑁭. 𑀨𑁂𑀡𑀓𑀁 𑀦𑀸𑀫 𑀲𑀫𑀼𑀤𑁆𑀤𑀨𑁂𑀡𑀁. 𑀓𑀣𑀮𑀦𑁆𑀢𑀺 𑀓𑀧𑀸𑀮𑀔𑀡𑁆𑀟𑀁. 𑀧𑀸𑀤𑀖𑀁𑀲𑀦𑁂 𑀯𑀼𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀓𑀢𑀓𑀁 𑀦𑀸𑀫 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑀁 𑀧𑀸𑀤𑀖𑀁𑀲𑀦𑀢𑁆𑀣𑀁 𑀓𑀡𑁆𑀝𑀓𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀁, 𑀏𑀢𑀁 𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀼𑀁, 𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁭𑁮𑁮. 𑀬𑀁 𑀓𑀺𑀜𑁆𑀘𑀺𑀧𑀺 𑀅𑀮𑀗𑁆𑀓𑀸𑀭𑀦𑁆𑀢𑀺 𑀳𑀢𑁆𑀣𑀽𑀧𑀕𑀸𑀤𑀺𑀅𑀮𑀗𑁆𑀓𑀸𑀭𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀅𑀮𑀗𑁆𑀓𑀸𑀭𑀁.

𑁨𑁭𑁮𑁯. 𑀑𑀲𑀡𑁆𑀞𑁂𑀬𑁆𑀬𑀸𑀢𑀺 𑀅𑀮𑀗𑁆𑀓𑀸𑀭𑀢𑁆𑀣𑀁 𑀲𑀗𑁆𑀔𑀭𑁄𑀦𑁆𑀢𑁄 𑀦𑀫𑁂𑀬𑁆𑀬. 𑀳𑀢𑁆𑀣𑀨𑀡𑀓𑁂𑀦𑀸𑀢𑀺 𑀳𑀢𑁆𑀣𑁂𑀦𑁂𑀯 𑀨𑀡𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸 𑀅𑀗𑁆𑀕𑀼𑀮𑀻𑀳𑀺 𑀑𑀲𑀡𑁆𑀞𑁂𑀦𑁆𑀢𑀺. 𑀨𑀡𑀓𑁂𑀦𑀸𑀢𑀺 𑀤𑀦𑁆𑀢𑀫𑀬𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺. 𑀓𑁄𑀘𑁆𑀙𑁂𑀦𑀸𑀢𑀺 𑀉𑀲𑀺𑀭𑀫𑀬𑁂𑀦 𑀯𑀸 𑀫𑀼𑀜𑁆𑀚𑀧𑀩𑁆𑀩𑀚𑀫𑀬𑁂𑀦 𑀯𑀸 𑀓𑁄𑀘𑁆𑀙𑁂𑀦.

𑁨𑁭𑁯𑁦. 𑀲𑀺𑀢𑁆𑀣𑀢𑁂𑀮𑁄𑀤𑀢𑁂𑀮𑁂𑀳𑀻𑀢𑀺 𑀲𑀺𑀢𑁆𑀣𑀢𑁂𑀮𑀜𑁆𑀘 𑀉𑀤𑀓𑀢𑁂𑀮𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀢𑁂𑀳𑀺. 𑀢𑀢𑁆𑀣 𑀲𑀺𑀢𑁆𑀣𑀢𑁂𑀮𑀁 𑀦𑀸𑀫 𑀫𑀥𑀼𑀲𑀺𑀢𑁆𑀣𑀓𑀦𑀺𑀬𑁆𑀬𑀸𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀓𑁆𑀓𑀡𑀁. 𑀘𑀺𑀓𑁆𑀓𑀡𑀁 𑀦𑀸𑀫 𑀦𑀺𑀬𑁆𑀬𑀸𑀲𑀁. 𑀉𑀤𑀓𑀢𑁂𑀮𑀁 𑀦𑀸𑀫 𑀉𑀤𑀓𑀫𑀺𑀲𑁆𑀲𑀓𑀁 𑀢𑁂𑀮𑀁. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀲𑀺𑀝𑁆𑀞𑀸’’𑀢𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀅𑀦𑀼𑀮𑁄𑀫𑀦𑀺𑀧𑀸𑀢𑀢𑁆𑀣𑀦𑁆𑀢𑀺 𑀦𑀮𑀸𑀝𑀸𑀪𑀺𑀫𑀼𑀔𑀁 𑀅𑀦𑀼𑀮𑁄𑀫𑁂𑀦 𑀧𑀸𑀢𑀦𑀢𑁆𑀣𑀁. 𑀉𑀤𑁆𑀥𑀮𑁄𑀫𑁂𑀦𑀸𑀢𑀺 𑀉𑀤𑁆𑀥𑀕𑁆𑀕𑀁 𑀳𑀼𑀢𑁆𑀯𑀸 𑀞𑀺𑀢𑀮𑁄𑀫𑁂𑀦.

𑁨𑁭𑁯𑁧. 𑀳𑀢𑁆𑀣𑀁 𑀢𑁂𑀮𑁂𑀦 𑀢𑁂𑀫𑁂𑀢𑁆𑀯𑀸𑀢𑀺 𑀓𑀭𑀢𑀮𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸. 𑀲𑀺𑀭𑁄𑀭𑀼𑀳𑀸 𑀓𑁂𑀲𑀸. 𑀉𑀡𑁆𑀳𑀸𑀪𑀺𑀢𑀢𑁆𑀢𑀲𑁆𑀲𑀸𑀢𑀺 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑀲𑀺𑀭𑀲𑁆𑀲. 𑀅𑀮𑁆𑀮𑀳𑀢𑁆𑀣𑁂𑀦 𑀲𑀺𑀭𑁄𑀭𑀼𑀳𑁂 𑀧𑀼𑀜𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁯𑁨. 𑀆𑀤𑀸𑀲𑁂 ¶ 𑀉𑀤𑀧𑀢𑁆𑀢𑁂 𑀯𑀸𑀢𑀺 𑀏𑀢𑁆𑀣 𑀓𑀁𑀲𑀧𑀢𑁆𑀢𑀸𑀤𑀻𑀦𑀺𑀧𑀺, 𑀬𑁂𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀸𑀦𑀺 𑀆𑀤𑀸𑀲𑀲𑀗𑁆𑀔𑀫𑁂𑀯 𑀕𑀘𑁆𑀙𑀦𑁆𑀢𑀺, 𑀓𑀜𑁆𑀚𑀺𑀬𑀸𑀤𑀻𑀦𑀺𑀧𑀺 𑀘 𑀉𑀤𑀧𑀢𑁆𑀢𑀲𑀗𑁆𑀔𑀫𑁂𑀯, 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁭𑁯𑁩. 𑀬𑁂𑀦 ¶ 𑀳𑁂𑀢𑀼𑀦𑀸 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀜𑁆𑀙𑀯𑀺’’𑀦𑁆𑀢𑀺𑀆𑀤𑀺. 𑀆𑀩𑀸𑀥𑀧𑀘𑁆𑀘𑀬𑀸 ‘‘𑀫𑁂 𑀫𑀼𑀔𑁂 𑀯𑀡𑁄 𑀲𑀜𑁆𑀙𑀯𑀺 𑀦𑀼 𑀔𑁄, 𑀉𑀤𑀸𑀳𑀼 𑀦 𑀲𑀜𑁆𑀙𑀯𑀻’’𑀢𑀺 𑀫𑀼𑀔𑀁 𑀤𑀝𑁆𑀞𑀼𑀜𑁆𑀘 ‘‘𑀅𑀳𑀁 𑀚𑀺𑀡𑁆𑀡𑁄 𑀦𑀼 𑀔𑁄, 𑀉𑀤𑀸𑀳𑀼 𑀦𑁄’’𑀢𑀺 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀚𑀸𑀦𑀦𑀢𑁆𑀣𑀜𑁆𑀘 𑀫𑀼𑀔𑀁 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁯𑁪. 𑀦𑀘𑁆𑀘𑀁 𑀯𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀦𑀘𑁆𑀘𑀁 𑀅𑀦𑁆𑀢𑀫𑀲𑁄 𑀫𑁄𑀭𑀦𑀘𑁆𑀘𑀫𑁆𑀧𑀺. 𑀕𑀻𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀦𑀝𑀕𑀻𑀢𑀁 𑀯𑀸 𑀲𑀸𑀥𑀼𑀕𑀻𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀤𑀦𑁆𑀢𑀕𑀻𑀢𑀫𑁆𑀧𑀺, 𑀬𑀁 ‘‘𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀑𑀓𑀽𑀚𑀦𑁆𑀢𑀸 𑀓𑀭𑁄𑀦𑁆𑀢𑀺, 𑀏𑀢𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀯𑀸𑀤𑀺𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀯𑀸𑀤𑀺𑀢𑀁. 𑀤𑀝𑁆𑀞𑀼𑀁 𑀯𑀸 𑀧𑀦 𑀲𑁄𑀢𑀼𑀁 𑀯𑀸𑀢𑀺 𑀦𑀘𑁆𑀘𑀁 𑀤𑀝𑁆𑀞𑀼𑀁 𑀯𑀸 𑀕𑀻𑀢𑀁 𑀯𑀸𑀤𑀺𑀢𑀁 𑀲𑁄𑀢𑀼𑀁 𑀯𑀸.

𑁨𑁭𑁯𑁫. 𑀲𑀬𑀁 𑀦𑀘𑁆𑀘𑀦𑁆𑀢𑀲𑁆𑀲 𑀯𑀸 𑀦𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀕𑀸𑀬𑀦𑁆𑀢𑀲𑁆𑀲 𑀯𑀸 𑀕𑀸𑀬𑀸𑀧𑁂𑀦𑁆𑀢𑀲𑁆𑀲 𑀯𑀸 𑀯𑀸𑀤𑁂𑀦𑁆𑀢𑀲𑁆𑀲 𑀯𑀸 𑀯𑀸𑀤𑀸𑀧𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀫𑁂𑀯 𑀅𑀝𑁆𑀞𑀓𑀣𑀸𑀬 (𑀘𑀽𑀴𑀯. 𑀅𑀝𑁆𑀞. 𑁨𑁪𑁮) 𑀯𑀼𑀢𑁆𑀢𑀦𑁆𑀢𑀺 𑀢𑀤𑁂𑀓𑀤𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀤𑀝𑁆𑀞𑀼𑀫𑀦𑁆𑀢𑀫𑀲𑁄’’𑀢𑀺𑀆𑀤𑀺.

𑁨𑁭𑁯𑁬. 𑀲𑀼𑀡𑀸𑀢𑀻𑀢𑀺 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸. 𑀧𑀲𑁆𑀲𑀢𑀻𑀢𑀺 𑀦𑀘𑁆𑀘𑀁 𑀧𑀲𑁆𑀲𑀢𑀺.

𑁨𑁭𑁯𑁭. 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 ‘‘𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀲𑁄. ‘‘𑀦𑀘𑁆𑀘𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀕𑀻𑀢𑀁, 𑀯𑀸𑀤𑀺𑀢𑀁 𑀯𑀸 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀢𑁄 𑀯𑀸𑀧𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁯𑁮. 𑀉𑀝𑁆𑀞𑀳𑀺𑀢𑁆𑀯𑀸𑀦 𑀕𑀘𑁆𑀙𑀢𑁄𑀢𑀺 ‘‘𑀦𑀘𑁆𑀘𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺, ‘‘𑀕𑀻𑀢𑀁, 𑀯𑀸𑀤𑀺𑀢𑀁 𑀯𑀸 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 ¶ 𑀢𑀁 𑀢𑀁 𑀤𑀺𑀲𑀁 𑀕𑀘𑁆𑀙𑀢𑁄 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀯𑀻𑀣𑀺𑀬𑀁 𑀞𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀧𑀲𑁆𑀲𑀢𑁄𑀧𑀺 𑀘 𑀆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁭𑁯𑁯. 𑀤𑀻𑀖𑀸𑀢𑀺 𑀤𑁆𑀯𑀗𑁆𑀕𑀼𑀮𑀢𑁄 𑀤𑀻𑀖𑀸. 𑀦 𑀥𑀸𑀭𑁂𑀬𑁆𑀬𑀸𑀢𑀺 𑀦 𑀥𑀸𑀭𑁂𑀢𑀩𑁆𑀩𑀸. 𑀤𑁆𑀯𑀗𑁆𑀕𑀼𑀮𑀁 𑀯𑀸 𑀤𑀼𑀫𑀸𑀲𑀁 𑀯𑀸𑀢𑀺 𑀏𑀢𑁆𑀣 𑀤𑁆𑀯𑁂 𑀅𑀗𑁆𑀕𑀼𑀮𑀸𑀦𑀺 𑀧𑀭𑀺𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀤𑁆𑀯𑀗𑁆𑀕𑀼𑀮𑁄, 𑀓𑁂𑀲𑁄. 𑀤𑁆𑀯𑁂 𑀫𑀸𑀲𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀤𑀼𑀫𑀸𑀲𑁄. 𑀓𑁂𑀲𑀁 𑀥𑀸𑀭𑁂𑀦𑁆𑀢𑁄 𑀤𑁆𑀯𑀗𑁆𑀕𑀼𑀮𑀁 𑀯𑀸 𑀥𑀸𑀭𑁂𑀬𑁆𑀬 𑀤𑀼𑀫𑀸𑀲𑀁 𑀯𑀸. 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀻𑀢𑀺 𑀢𑀢𑁄 𑀤𑁆𑀯𑀗𑁆𑀕𑀼𑀮𑀢𑁄 𑀯𑀸 𑀤𑀼𑀫𑀸𑀲𑀢𑁄 𑀯𑀸 𑀓𑁂𑀲𑀢𑁄 𑀉𑀤𑁆𑀥𑀁 𑀓𑁂𑀲𑀁 𑀥𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀣 ¶ 𑀯𑀸 𑀤𑁆𑀯𑁂 𑀅𑀗𑁆𑀕𑀼𑀮𑀸𑀦𑀺 𑀲𑀫𑀸𑀳𑀝𑀸𑀦𑀺 𑀤𑁆𑀯𑀗𑁆𑀕𑀼𑀮𑀁, 𑀤𑁆𑀯𑁂 𑀫𑀸𑀲𑀸 𑀲𑀫𑀸𑀳𑀝𑀸 𑀤𑀼𑀫𑀸𑀲𑀁, 𑀉𑀪𑀬𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀓𑁂𑀲𑁂 𑀥𑀸𑀭𑁂𑀦𑁆𑀢𑁄 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀁 𑀯𑀸 𑀥𑀸𑀭𑁂𑀬𑁆𑀬 𑀤𑀼𑀫𑀸𑀲𑀫𑀢𑁆𑀢𑀁 𑀯𑀸, 𑀢𑀢𑁄 𑀓𑀸𑀮𑀧𑀭𑀺𑀫𑀸𑀡𑀢𑁄 𑀉𑀤𑁆𑀥𑀁 𑀓𑁂𑀲𑁂 𑀥𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀓𑁂𑀲𑁂 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂 𑀤𑁆𑀯𑀗𑁆𑀕𑀼𑀮𑁂 𑀧𑀸𑀧𑀼𑀡𑀦𑁆𑀢𑀺, 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂𑀬𑁂𑀯 𑀙𑀺𑀦𑁆𑀤𑀺𑀢𑀩𑁆𑀩𑀸. 𑀤𑁆𑀯𑀗𑁆𑀕𑀼𑀮𑁂 𑀳𑀺 𑀅𑀢𑀺𑀓𑁆𑀓𑀫𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀤𑀻𑀖𑀸, 𑀤𑁆𑀯𑁂𑀫𑀸𑀲𑀢𑁄 𑀏𑀓𑀤𑀺𑀯𑀲𑀫𑁆𑀧𑀺 𑀅𑀢𑀺𑀓𑁆𑀓𑀫𑁂𑀢𑀼𑀁 𑀦 𑀮𑀪𑀢𑀺𑀬𑁂𑀯. 𑀏𑀯𑀫𑀬𑀁 𑀉𑀪𑀬𑁂𑀦𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀯𑀼𑀢𑁆𑀢𑁄, 𑀢𑀢𑁄 𑀑𑀭𑀁 𑀧𑀦 𑀦𑀯𑀝𑁆𑀝𑀦𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺.

𑁨𑁮𑁦𑁦. 𑀤𑀻𑀖𑁂 𑀦𑀔𑁂, 𑀤𑀻𑀖𑀸𑀦𑀺 𑀦𑀸𑀲𑀺𑀓𑀮𑁄𑀫𑀸𑀦𑀺 𑀘 𑀦 𑀥𑀸𑀭𑀬𑁂𑀢𑀺 𑀬𑁄𑀚𑀦𑀸, 𑀦 𑀥𑀸𑀭𑁂𑀬𑁆𑀬, 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀯𑀻𑀲𑀢𑀺𑀬𑀸 𑀦𑀔𑀸𑀦𑀁 𑀫𑀝𑁆𑀞𑀁 𑀮𑀺𑀔𑀺𑀢𑀫𑀝𑁆𑀞𑀪𑀸𑀯𑀁 𑀓𑀸𑀢𑀼𑀁 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀲𑀢𑁆𑀣𑀓𑁂𑀦 𑀢𑀘𑁆𑀙𑁂𑀢𑁆𑀯𑀸 𑀘𑀼𑀡𑁆𑀡𑀓𑁂𑀦 𑀧𑀫𑀚𑁆𑀚𑀺𑀢𑁆𑀯𑀸 𑀨𑀮𑀺𑀓𑀫𑀡𑀻𑀦𑀁 𑀯𑀺𑀬 𑀉𑀚𑁆𑀚𑀮𑀓𑀭𑀡𑀁 𑀮𑀺𑀔𑀺𑀢𑀫𑀝𑁆𑀞𑀁 𑀦𑀸𑀫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀮𑀫𑀢𑁆𑀢𑀁 𑀅𑀧𑀓𑀟𑁆𑀠𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁪) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀫𑀼𑀕𑁆𑀕𑀨𑀮𑀢𑀘𑀸𑀤𑀻𑀳𑀺 𑀦𑀔𑀫𑀮𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁦𑁧. 𑀓𑀧𑁆𑀧𑀸𑀧𑁂𑀬𑁆𑀬 ¶ 𑀯𑀺𑀲𑀼𑀁 𑀫𑀲𑁆𑀲𑀼𑀦𑁆𑀢𑀺 𑀬𑁄 𑀓𑁂𑀲𑀘𑁆𑀙𑀺𑀦𑁆𑀦𑁄 𑀯𑀺𑀲𑀼𑀁 𑀫𑀲𑁆𑀲𑀼𑀁 𑀓𑀧𑁆𑀧𑀸𑀧𑁂𑀬𑁆𑀬. 𑀤𑀸𑀞𑀺𑀓𑀁 𑀞𑀧𑁂𑀬𑁆𑀬𑀸𑀢𑀺 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀫𑀲𑁆𑀲𑀼𑀁 𑀅𑀓𑀧𑁆𑀧𑀸𑀧𑁂𑀢𑁆𑀯𑀸 𑀯𑀺𑀲𑀼𑀁 𑀞𑀧𑁂𑀬𑁆𑀬. 𑀲𑀫𑁆𑀩𑀸𑀥𑁂𑀢𑀺 𑀉𑀧𑀓𑀘𑁆𑀙𑀓𑀫𑀼𑀢𑁆𑀢𑀓𑀭𑀡𑀲𑀗𑁆𑀔𑀸𑀢𑁂 𑀲𑀫𑁆𑀩𑀸𑀥𑀝𑁆𑀞𑀸𑀦𑁂. 𑀮𑁄𑀫𑀁 𑀲𑀁𑀳𑀭𑀸𑀧𑁂𑀬𑁆𑀬𑀯𑀸𑀢𑀺 𑀲𑀢𑁆𑀣𑁂𑀦 𑀯𑀸 𑀲𑀡𑁆𑀟𑀸𑀲𑁂𑀦 𑀯𑀸 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀧𑀭𑁂𑀦 𑀙𑀺𑀦𑁆𑀤𑀸𑀧𑁂𑀬𑁆𑀬, 𑀲𑀬𑀁 𑀯𑀸 𑀙𑀺𑀦𑁆𑀤𑁂𑀬𑁆𑀬. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁫) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑀫𑁆𑀩𑀸𑀥𑁂 𑀕𑀡𑁆𑀟𑀧𑀺𑀴𑀓𑀯𑀡𑀸𑀤𑀺𑀓𑁂 𑀆𑀩𑀸𑀥𑁂 𑀲𑀢𑀺 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁦𑁨. 𑀅𑀕𑀺𑀮𑀸𑀦𑀲𑁆𑀲 𑀙𑀺𑀦𑁆𑀤𑀢𑁄 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀢𑀣𑀸 𑀓𑀢𑁆𑀢𑀭𑀺𑀬𑀸 𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮𑁦𑁩. 𑀲𑁂𑀲𑀗𑁆𑀕𑀙𑁂𑀤𑀦𑁂𑀢𑀺 𑀅𑀗𑁆𑀕𑀼𑀮𑀺𑀬𑀸𑀤𑀺𑀅𑀯𑀲𑁂𑀲𑀲𑀭𑀻𑀭𑀸𑀯𑀬𑀯𑀸𑀦𑀁 𑀙𑁂𑀤𑀦𑁂. 𑀅𑀢𑁆𑀢𑀯𑀥𑁂𑀢𑀺 𑀅𑀢𑁆𑀢𑀼𑀧𑀓𑁆𑀓𑀫𑁂𑀦 𑀯𑀸 𑀆𑀡𑀢𑁆𑀢𑀺𑀬𑀸 𑀉𑀧𑀓𑁆𑀓𑀫𑁂𑀦 𑀯𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀸𑀲𑁂.

𑁨𑁮𑁦𑁪. 𑀅𑀗𑁆𑀕𑀦𑁆𑀢𑀺 𑀅𑀗𑁆𑀕𑀚𑀸𑀢𑀢𑁄 𑀅𑀯𑀲𑁂𑀲𑀁 𑀲𑀭𑀻𑀭𑀸𑀯𑀬𑀯𑀁. 𑀅𑀳𑀺𑀓𑀻𑀝𑀸𑀤𑀺𑀤𑀝𑁆𑀞𑀲𑁆𑀲 𑀢𑀧𑁆𑀧𑀝𑀺𑀓𑀸𑀭𑀯𑀲𑁂𑀦 ¶ 𑀅𑀗𑁆𑀕𑀁 𑀙𑀺𑀦𑁆𑀤𑀢𑁄 𑀦 𑀤𑁄𑀲𑁄. 𑀢𑀸𑀤𑀺𑀲𑀸𑀩𑀸𑀥𑀧𑀘𑁆𑀘𑀬𑀸 𑀢𑀧𑁆𑀧𑀝𑀺𑀓𑀸𑀭𑀯𑀲𑁂𑀦 𑀅𑀗𑁆𑀕𑀁 𑀙𑀺𑀦𑁆𑀤𑀢𑁄 𑀦 𑀤𑁄𑀲𑁄. 𑀮𑁄𑀳𑀺𑀢𑀁 𑀫𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀦 𑀤𑁄𑀲𑁄𑀢𑀺 𑀬𑁄𑀚𑀦𑀸.

𑁨𑁮𑁦𑁫. 𑀅𑀧𑀭𑀺𑀲𑁆𑀲𑀸𑀯𑀦𑁄 𑀪𑀺𑀓𑁆𑀔𑀼 𑀲𑀘𑁂 𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀤𑀼𑀓𑁆𑀓𑀝𑀁. 𑀫𑀕𑁆𑀕𑁂 𑀅𑀤𑁆𑀥𑀸𑀦𑁂 𑀢𑀁 𑀧𑀭𑀺𑀲𑁆𑀲𑀸𑀯𑀦𑀁 𑀬𑀸𑀘𑀫𑀸𑀦𑀲𑁆𑀲 𑀬𑁄 𑀦 𑀤𑀤𑀸𑀢𑀺, 𑀢𑀲𑁆𑀲 𑀅𑀤𑀤𑀢𑁄 𑀅𑀤𑁂𑀦𑁆𑀢𑀲𑁆𑀲𑀸𑀧𑀺 𑀢𑀣𑁂𑀯 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀬𑁄 𑀧𑀦 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑀺𑀲𑁆𑀲𑀸𑀯𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀬𑀸𑀘𑀢𑀺, 𑀢𑀲𑁆𑀲 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑀁.

𑁨𑁮𑁦𑁬. ‘‘𑀦𑀕𑁆𑀕𑁄’’𑀢𑀺 ¶ 𑀧𑀤𑀁 ‘‘𑀦 𑀪𑀼𑀜𑁆𑀚𑁂’’𑀢𑀺𑀆𑀤𑀺 𑀓𑀺𑀭𑀺𑀬𑀸𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀦 𑀪𑀼𑀜𑁆𑀚𑁂𑀢𑀺 𑀪𑀢𑁆𑀢𑀸𑀤𑀺𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀦 𑀪𑀼𑀜𑁆𑀚𑁂𑀬𑁆𑀬. 𑀦 𑀧𑀺𑀯𑁂𑀢𑀺 𑀬𑀸𑀕𑀼𑀆𑀤𑀺𑀁 𑀧𑀸𑀢𑀩𑁆𑀩𑀁 𑀦 𑀧𑀺𑀯𑁂𑀬𑁆𑀬. 𑀦 𑀘 𑀔𑀸𑀤𑁂𑀢𑀺 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀓𑀁 𑀔𑀸𑀤𑀦𑀻𑀬𑀁 𑀦 𑀔𑀸𑀤𑁂𑀬𑁆𑀬. 𑀦 𑀲𑀸𑀬𑀬𑁂𑀢𑀺 𑀨𑀸𑀡𑀺𑀢𑀸𑀤𑀺𑀓𑀁 𑀲𑀸𑀬𑀺𑀢𑀩𑁆𑀩𑀜𑁆𑀘 𑀦 𑀲𑀸𑀬𑁂𑀬𑁆𑀬 𑀦 𑀮𑀺𑀳𑁂𑀬𑁆𑀬. 𑀦 𑀤𑀤𑁂𑀢𑀺 𑀅𑀜𑁆𑀜𑀲𑁆𑀲 𑀪𑀢𑁆𑀢𑀸𑀤𑀺𑀁 𑀓𑀺𑀜𑁆𑀘𑀺 𑀦 𑀤𑀤𑁂𑀬𑁆𑀬. 𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀢𑀣𑀸 𑀲𑀬𑀁 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀦 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬. 𑀅𑀜𑁆𑀚𑀲𑀁 𑀫𑀕𑁆𑀕𑀁.

𑁨𑁮𑁦𑁭. 𑀧𑀭𑀺𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀺𑀧𑀭𑀺𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀓𑀸𑀭𑀬𑁂𑀢𑀺 𑀲𑀬𑀁 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀺𑀧𑀭𑀺𑀓𑀫𑁆𑀫𑀁 𑀦 𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁮𑁦𑁮. 𑀧𑀺𑀝𑁆𑀞𑀺𑀓𑀫𑁆𑀫𑀸𑀤𑀺𑀓𑁂 𑀧𑀭𑀺𑀓𑀫𑁆𑀫𑁂 𑀚𑀦𑁆𑀢𑀸𑀖𑀭𑀸𑀤𑀺𑀓𑀸 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀻 𑀯𑀼𑀢𑁆𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺𑀁 𑀉𑀤𑀓𑀧𑀝𑀺𑀘𑁆𑀙𑀸𑀤𑀺𑀁 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺 (𑀘𑀽𑀴𑀯. 𑁨𑁬𑁧) 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀧𑀝𑀺𑀘𑁆𑀙𑀸𑀤𑁂𑀢𑀺 𑀳𑀺𑀭𑀺𑀓𑁄𑀧𑀺𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀺, 𑀚𑀦𑁆𑀢𑀸𑀖𑀭𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺. 𑀉𑀤𑀓𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀉𑀤𑀓𑀧𑀝𑀺𑀘𑁆𑀙𑀸𑀤𑀺. 𑀯𑀢𑁆𑀣𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺. ‘‘𑀲𑀩𑁆𑀩𑀢𑁆𑀣 𑀧𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀇𑀢𑀭𑀧𑀝𑀺𑀘𑁆𑀙𑀸𑀤𑀺𑀤𑁆𑀯𑀬𑀁 𑀧𑀭𑀺𑀓𑀫𑁆𑀫𑁂𑀬𑁂𑀯 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀪𑁄𑀚𑀦𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑁂𑀲𑀼.

𑁨𑁮𑁦𑁯. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑁂𑀴𑀸𑀬𑀦𑁆𑀢𑀺 𑀢𑀫𑁆𑀩𑀮𑁄𑀳𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀓𑀸𑀴𑀮𑁄𑀳𑀲𑀼𑀯𑀡𑁆𑀡𑀭𑀚𑀢𑀸𑀤𑀻𑀳𑀺 𑀓𑀢𑀸𑀬 𑀯𑀸 𑀤𑀸𑀭𑀼𑀫𑀬𑀸𑀬 𑀯𑀸 𑀬𑀸𑀬 𑀓𑀸𑀬𑀘𑀺 𑀧𑁂𑀴𑀸𑀬 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂. 𑀪𑀼𑀜𑁆𑀚𑀺𑀢𑀼𑀁 𑀦 𑀘 𑀯𑀝𑁆𑀝𑀢𑀻𑀢𑀺 𑀪𑀸𑀚𑀦𑀁 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀁 𑀦𑀸𑀫 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀓𑀢𑀸𑀬 𑀧𑁂𑀴𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁, ‘𑀦 𑀪𑀺𑀓𑁆𑀔𑀯𑁂 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀪𑀼𑀜𑁆𑀚𑀺𑀢𑀩𑁆𑀩’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ¶ 𑀧𑀦 ¶ 𑀤𑀸𑀭𑀼𑀫𑀬𑀸𑀧𑀺 𑀦 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁬𑁪). ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀫𑀴𑁄𑀭𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁬𑁪) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀫𑀴𑁄𑀭𑀺𑀓𑀸𑀬 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀫𑀴𑁄𑀭𑀺𑀓𑀸’’𑀢𑀺 𑀘 𑀤𑀡𑁆𑀟𑀸𑀥𑀸𑀭𑀓𑁄 𑀯𑀼𑀘𑁆𑀘𑀢𑀺, 𑀬𑀁 𑀢𑀬𑁄, 𑀘𑀢𑁆𑀢𑀸𑀭𑁄, 𑀩𑀳𑀽 𑀯𑀸 𑀤𑀡𑁆𑀟𑀓𑁂 𑀉𑀧𑀭𑀺 𑀘 𑀳𑁂𑀝𑁆𑀞𑀸 𑀘 𑀯𑀺𑀢𑁆𑀣𑀢𑀁 𑀫𑀚𑁆𑀛𑁂 𑀲𑀗𑁆𑀓𑀼𑀘𑀺𑀢𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀆𑀥𑀸𑀭𑀓𑀁 𑀓𑀭𑁄𑀦𑁆𑀢𑀺. 𑀬𑀝𑁆𑀞𑀺𑀆𑀥𑀸𑀭𑀓𑀧𑀡𑁆𑀡𑀸𑀥𑀸𑀭𑀓𑀧𑀘𑁆𑀙𑀺𑀓𑀧𑀺𑀝𑁆𑀞𑀖𑀝𑀓𑀓𑀯𑀸𑀝𑀓𑀸𑀤𑀺𑀪𑀸𑀚𑀦𑀫𑀼𑀔𑀉𑀤𑀼𑀓𑁆𑀔𑀮𑀸𑀤𑀻𑀦𑀺𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀬𑀝𑁆𑀞𑀺𑀆𑀥𑀸𑀭𑀓𑁄𑀢𑀺 𑀬𑀝𑁆𑀞𑀺𑀁𑀬𑁂𑀯 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀩𑀦𑁆𑀥𑀻𑀓𑀢𑀆𑀥𑀸𑀭𑀓𑁄.

𑀏𑀓𑀪𑀸𑀚𑀦𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀪𑁄𑀚𑀦𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄 ‘‘𑀪𑀼𑀜𑁆𑀚𑀢𑁄 𑀏𑀓𑀪𑀸𑀚𑀦𑁂’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀢𑀲𑁆𑀲𑀸𑀧𑀺 𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀏𑀓𑀢𑁄’’𑀢𑀺. ‘‘𑀪𑀼𑀜𑁆𑀚𑀢𑁄’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁. 𑀏𑀓𑀢𑁄 𑀏𑀓𑀪𑀸𑀚𑀦𑁂 𑀬𑀸𑀕𑀼𑀆𑀤𑀺𑀧𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑀣𑀸𑀮𑀓𑁂 𑀧𑀸𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁨𑁬𑁪). 𑀅𑀣 𑀯𑀸 𑀪𑀼𑀜𑁆𑀚𑀢𑁄𑀢𑀺 𑀅𑀚𑁆𑀛𑁄𑀳𑀸𑀭𑀲𑀸𑀫𑀜𑁆𑀜𑁂𑀦 𑀧𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀪𑀸𑀚𑀦𑀢𑁄 𑀨𑀮𑀁 𑀯𑀸 𑀧𑀽𑀯𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀇𑀢𑀭𑀲𑁆𑀲 𑀲𑁂𑀲𑀓𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀢𑀭𑀲𑁆𑀲𑀸𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀼𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁨𑁮𑁧𑁦. 𑀬𑁂 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀪𑀺𑀓𑁆𑀔𑀽 𑀏𑀓𑀧𑀸𑀯𑀼𑀭𑀡𑀸 𑀯𑀸 𑀏𑀓𑀢𑁆𑀣𑀭𑀡𑀸 𑀯𑀸 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸 𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀜𑁆𑀘, 𑀬𑁂 𑀏𑀓𑀫𑀜𑁆𑀘𑁂𑀧𑀺 𑀏𑀓𑀢𑁄 𑀦𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀜𑁆𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁧𑁧. 𑀲𑀗𑁆𑀖𑀸𑀝𑀺𑀧𑀮𑁆𑀮𑀢𑁆𑀣𑀺𑀓𑀫𑀼𑀧𑀸𑀕𑀢𑁄𑀢𑀺 𑀏𑀢𑁆𑀣 𑀲𑀗𑁆𑀖𑀸𑀝𑀻𑀢𑀺 𑀲𑀗𑁆𑀖𑀸𑀝𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀫𑀸𑀳. 𑀲𑀗𑁆𑀖𑀸𑀝𑀺𑀧𑀮𑁆𑀮𑀢𑁆𑀣𑀺𑀓𑀁 𑀉𑀧𑀕𑀢𑁂𑀦 𑀬𑀼𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀯𑀺𑀳𑀸𑀭𑁂 ¶ 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀦 𑀦𑀺𑀲𑀻𑀤𑁂𑀬𑁆𑀬. ‘‘𑀲𑀗𑁆𑀖𑀸𑀝𑀻𑀢𑀺 𑀦𑀸𑀫𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀯𑁄𑀳𑀸𑀭𑀧𑁆𑀧𑀢𑁆𑀢𑀫𑀥𑀺𑀝𑁆𑀞𑀺𑀢𑀘𑀻𑀯𑀭𑀁 ‘𑀲𑀗𑁆𑀖𑀸𑀝𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑁂, 𑀔𑀼𑀤𑁆𑀤𑀲𑀺𑀓𑁆𑀔𑀸𑀯𑀡𑁆𑀡𑀦𑀸𑀬𑀫𑁆𑀧𑀺 ‘‘𑀲𑀗𑁆𑀖𑀸𑀝𑀺𑀬𑀸 𑀦 𑀧𑀮𑁆𑀮𑀢𑁆𑀣𑁂𑀢𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂𑀦 𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀧𑀮𑁆𑀮𑀢𑁆𑀣𑀺𑀓𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀦𑁆𑀢𑁄𑀕𑀸𑀫𑁂 𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑁂𑀦 𑀅𑀥𑀺𑀝𑁆𑀞𑀺𑀢𑀁 𑀲𑀗𑁆𑀖𑀸𑀝𑀺𑀁 𑀯𑀺𑀦𑀸 𑀲𑁂𑀲𑀘𑀻𑀯𑀭𑁂𑀳𑀺 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀓𑀺𑀜𑁆𑀘𑀺 ¶ 𑀓𑀻𑀴𑀁 𑀦 𑀓𑀻𑀴𑁂𑀬𑁆𑀬𑀸𑀢𑀺 𑀚𑀼𑀢𑀓𑀻𑀴𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀻𑀴𑀺𑀓𑀁 𑀦 𑀓𑀻𑀴𑁂𑀬𑁆𑀬. 𑀦 𑀘 𑀕𑀸𑀳𑀬𑁂𑀢𑀺 𑀦 𑀘 𑀕𑀸𑀳𑀸𑀧𑁂𑀬𑁆𑀬, 𑀦 𑀳𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁮𑁧𑁨. 𑀤𑀸𑀞𑀺𑀓𑀸𑀬𑀧𑀻𑀢𑀺 𑀫𑀲𑁆𑀲𑀼𑀫𑁆𑀳𑀺. 𑀉𑀕𑁆𑀕𑀢𑀦𑁆𑀢𑀺 𑀏𑀢𑁆𑀣 ‘‘𑀩𑀻𑀪𑀘𑁆𑀙’’𑀦𑁆𑀢𑀺 𑀲𑁂𑀲𑁄. 𑀅𑀜𑁆𑀜𑀦𑁆𑀢𑀺 𑀅𑀧𑀮𑀺𑀢𑀁. 𑀢𑀸𑀤𑀺𑀲𑀦𑁆𑀢𑀺 𑀩𑀻𑀪𑀘𑁆𑀙𑀁.

𑁨𑁮𑁧𑁩. ‘‘𑀅𑀕𑀺𑀮𑀸𑀦𑁄’’𑀢𑀺 𑀇𑀫𑀺𑀦𑀸 𑀕𑀺𑀮𑀸𑀦𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀥𑀸𑀭𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁂𑀦 𑀅𑀕𑀺𑀮𑀸𑀦𑀲𑁆𑀲𑀧𑀺 𑀧𑀭𑀁 𑀥𑀸𑀭𑀸𑀧𑀦𑁂, 𑀧𑀭𑀲𑁆𑀲 𑀥𑀸𑀭𑀡𑀲𑀸𑀤𑀺𑀬𑀦𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀅𑀢𑁆𑀢𑀦𑁄 𑀕𑀼𑀢𑁆𑀢𑀢𑁆𑀣𑀁, 𑀘𑀻𑀯𑀭𑀸𑀤𑀻𑀦𑀁 𑀕𑀼𑀢𑁆𑀢𑀢𑁆𑀣𑀜𑁆𑀘 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀘𑀽𑀴𑀯. 𑀅𑀝𑁆𑀞. 𑁨𑁭𑁦) 𑁋 𑀬𑀲𑁆𑀲 𑀓𑀸𑀬𑀤𑀸𑀳𑁄 𑀯𑀸 𑀧𑀺𑀢𑁆𑀢𑀓𑁄𑀧𑁄 𑀯𑀸 𑀳𑁄𑀢𑀺, 𑀘𑀓𑁆𑀔𑀼 𑀯𑀸 𑀤𑀼𑀩𑁆𑀩𑀮𑀁, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀆𑀩𑀸𑀥𑁄 𑀯𑀺𑀦𑀸 𑀙𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀙𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀸𑀴𑀫𑀺𑀕𑀘𑁄𑀭𑀪𑀬𑁂𑀲𑀼 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀁, 𑀯𑀲𑁆𑀲𑁂 𑀧𑀦 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀺. 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀧𑀦 𑀲𑀩𑁆𑀩𑀢𑁆𑀣𑁂𑀯 𑀯𑀝𑁆𑀝𑀢𑀺. ‘‘𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀦𑀸𑀫 𑀢𑀸𑀮𑀧𑀢𑁆𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀦𑁆𑀢𑀺.

𑁨𑁮𑁧𑁪. 𑀳𑀢𑁆𑀣𑀺𑀲𑁄𑀡𑁆𑀟𑀸𑀓𑀸𑀭𑁄 𑀅𑀪𑁂𑀤𑁄𑀧𑀘𑀸𑀭𑁂𑀦 ‘‘𑀳𑀢𑁆𑀣𑀺𑀲𑁄𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑁄. 𑀏𑀯𑀫𑀼𑀧𑀭𑀺𑀧𑀺. 𑀘𑀻𑀯𑀭𑀲𑁆𑀲 𑀦𑀸𑀫𑀥𑁂𑀬𑁆𑀬𑀁 ‘‘𑀯𑀲𑀦’’𑀦𑁆𑀢𑀺 ¶ 𑀇𑀤𑀁. ‘‘𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀧𑀤𑀤𑁆𑀯𑀬𑀜𑁆𑀘 ‘‘𑀳𑀢𑁆𑀣𑀺𑀲𑁄𑀡𑁆𑀟’’𑀦𑁆𑀢𑀺𑀆𑀤𑀻𑀳𑀺 𑀲𑀩𑁆𑀩𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀯𑁂𑀮𑁆𑀮𑀺𑀬𑀦𑁆𑀢𑀺 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀲𑀁-𑀲𑀤𑁆𑀤𑀮𑁄𑀧𑁄, 𑀲𑀁𑀯𑁂𑀮𑁆𑀮𑀺𑀬𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀳𑀢𑁆𑀣𑀺𑀲𑁄𑀡𑁆𑀟𑀁 (𑀘𑀽𑀴𑀯. 𑀅𑀝𑁆𑀞. 𑁨𑁮𑁦) 𑀦𑀸𑀫 𑀦𑀸𑀪𑀺𑀫𑀽𑀮𑀢𑁄 𑀳𑀢𑁆𑀣𑀺𑀲𑁄𑀡𑁆𑀟𑀲𑀡𑁆𑀞𑀸𑀦𑀁 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀁 𑀘𑁄𑀴𑀺𑀓𑀺𑀢𑁆𑀣𑀻𑀦𑀁 𑀦𑀺𑀯𑀸𑀲𑀦𑀁 𑀯𑀺𑀬. 𑀘𑀢𑀼𑀓𑁆𑀓𑀡𑁆𑀡𑀁 𑀦𑀸𑀫 𑀉𑀧𑀭𑀺𑀢𑁄 𑀤𑁆𑀯𑁂, 𑀳𑁂𑀝𑁆𑀞𑀢𑁄 𑀤𑁆𑀯𑁂𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀓𑀡𑁆𑀡𑁂 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀫𑀘𑁆𑀙𑀯𑀸𑀴𑀓𑀁 𑀦𑀸𑀫 𑀏𑀓𑀢𑁄 𑀤𑀲𑀦𑁆𑀢𑀁 𑀏𑀓𑀢𑁄 𑀧𑀸𑀲𑀦𑁆𑀢𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀲𑀁𑀯𑁂𑀮𑁆𑀮𑀺𑀬𑀦𑁆𑀢𑀺 𑀫𑀮𑁆𑀮𑀓𑀫𑁆𑀫𑀓𑀸𑀭𑀸𑀤𑀬𑁄 𑀯𑀺𑀬 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀸𑀲𑀦𑀁. 𑀢𑀸𑀮𑀯𑀡𑁆𑀝𑀓𑀁 𑀦𑀸𑀫 𑀢𑀸𑀮𑀯𑀡𑁆𑀝𑀸𑀓𑀸𑀭𑁂𑀦 𑀲𑀸𑀝𑀓𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑀦𑀁. 𑀘-𑀲𑀤𑁆𑀤𑁂𑀦 𑀲𑀢𑀯𑀮𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑀯𑀮𑀺𑀓𑀁 𑀦𑀸𑀫 𑀤𑀻𑀖𑀲𑀸𑀝𑀓𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀑𑀪𑀜𑁆𑀚𑀺𑀢𑁆𑀯𑀸 𑀑𑀯𑀝𑁆𑀝𑀺𑀓𑀁 𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀣𑀁, 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀯𑀸 𑀦𑀺𑀭𑀦𑁆𑀢𑀭𑀁 𑀯𑀮𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀲𑀘𑁂 𑀧𑀦 𑀚𑀸𑀡𑀼𑀢𑁄 𑀧𑀝𑁆𑀞𑀸𑀬 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀯𑀮𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀯𑀝𑁆𑀝𑀢𑀺. 𑀏𑀯𑀁 𑀦𑀺𑀯𑀸𑀲𑁂𑀢𑀼𑀁 𑀕𑀺𑀮𑀸𑀦𑀲𑁆𑀲𑀧𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲𑀧𑀺 𑀦 𑀯𑀝𑁆𑀝𑀢𑀺.

𑀬𑀫𑁆𑀧𑀺 ¶ 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁄𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑁂𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀢𑀣𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀺 𑀅𑀧𑀭𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀕𑀺𑀮𑀸𑀦𑁄 𑀧𑀦 𑀅𑀦𑁆𑀢𑁄𑀓𑀸𑀲𑀸𑀯𑀲𑁆𑀲 𑀑𑀯𑀝𑁆𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀭𑀁 𑀉𑀧𑀭𑀺 𑀦𑀺𑀯𑀸𑀲𑁂𑀢𑀼𑀁 𑀮𑀪𑀢𑀺. 𑀅𑀕𑀺𑀮𑀸𑀦𑁂𑀦 𑀤𑁆𑀯𑁂 𑀦𑀺𑀯𑀸𑀲𑁂𑀦𑁆𑀢𑁂𑀦 𑀲𑀕𑀼𑀡𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀸𑀦𑀺. 𑀇𑀢𑀺 𑀬𑀜𑁆𑀘 𑀇𑀥 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀬𑀜𑁆𑀘 𑀲𑁂𑀔𑀺𑀬𑀯𑀡𑁆𑀡𑀦𑀸𑀬𑀁, 𑀢𑀁 𑀲𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑀁 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁄 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀺.

𑁨𑁮𑁧𑁫. 𑀕𑀺𑀳𑀺𑀧𑀸𑀭𑀼𑀧𑀦𑀦𑁆𑀢𑀺 ¶ ‘‘𑀲𑁂𑀢𑀧𑀝𑀧𑀸𑀭𑀼𑀢𑀁 (𑀘𑀽𑀴𑀯. 𑀅𑀝𑁆𑀞. 𑁨𑁮𑁦) 𑀧𑀭𑀺𑀩𑁆𑀩𑀸𑀚𑀓𑀧𑀸𑀭𑀼𑀢𑀁 𑀏𑀓𑀲𑀸𑀝𑀓𑀧𑀸𑀭𑀼𑀢𑀁 𑀲𑁄𑀡𑁆𑀟𑀧𑀸𑀭𑀼𑀢𑀁 𑀅𑀦𑁆𑀢𑁂𑀧𑀼𑀭𑀺𑀓𑀧𑀸𑀭𑀼𑀢𑀁 𑀫𑀳𑀸𑀚𑁂𑀝𑁆𑀞𑀓𑀧𑀸𑀭𑀼𑀢𑀁 𑀓𑀼𑀝𑀺𑀧𑀯𑁂𑀲𑀓𑀧𑀸𑀭𑀼𑀢𑀁 𑀩𑁆𑀭𑀸𑀳𑁆𑀫𑀡𑀧𑀸𑀭𑀼𑀢𑀁 𑀧𑀸𑀴𑀺𑀓𑀸𑀭𑀓𑀧𑀸𑀭𑀼𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀭𑀺𑀫𑀡𑁆𑀟𑀮𑀮𑀓𑁆𑀔𑀡𑀢𑁄 𑀅𑀜𑁆𑀜𑀣𑀸 𑀧𑀸𑀭𑀼𑀢𑀁, 𑀲𑀩𑁆𑀩𑀫𑁂𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫. 𑀢𑀲𑁆𑀫𑀸 𑀬𑀣𑀸 𑀲𑁂𑀢𑀧𑀝𑀸 𑀅𑀟𑁆𑀠𑀧𑀸𑀮𑀓𑀦𑀺𑀕𑀡𑁆𑀞𑀸 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀏𑀓𑀘𑁆𑀘𑁂 𑀧𑀭𑀺𑀩𑁆𑀩𑀸𑀚𑀓𑀸 𑀉𑀭𑀁 𑀯𑀺𑀯𑀭𑀺𑀢𑁆𑀯𑀸 𑀤𑁆𑀯𑀻𑀲𑀼 𑀅𑀁𑀲𑀓𑀽𑀝𑁂𑀲𑀼 𑀧𑀸𑀯𑀼𑀭𑀡𑀁 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀏𑀓𑀲𑀸𑀝𑀓𑀸 𑀫𑀦𑀼𑀲𑁆𑀲𑀸 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀏𑀓𑁂𑀦𑀦𑁆𑀢𑁂𑀦 𑀧𑀺𑀝𑁆𑀞𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀉𑀪𑁄𑀲𑀼 𑀅𑀁𑀲𑀓𑀽𑀝𑁂𑀲𑀼 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀲𑀸𑀝𑀓𑁂𑀦 𑀕𑀻𑀯𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀉𑀪𑁄 𑀅𑀦𑁆𑀢𑁂 𑀉𑀤𑀭𑁂 𑀯𑀸 𑀑𑀮𑀫𑁆𑀩𑁂𑀦𑁆𑀢𑀺, 𑀧𑀺𑀝𑁆𑀞𑀺𑀬𑀁 𑀯𑀸 𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀬𑁄 𑀅𑀓𑁆𑀔𑀺𑀢𑀸𑀭𑀓𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀑𑀕𑀼𑀡𑁆𑀞𑀺𑀓𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀫𑀳𑀸𑀚𑁂𑀝𑁆𑀞𑀸 𑀤𑀻𑀖𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀓𑀮𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀓𑀲𑁆𑀲𑀓𑀸 𑀔𑁂𑀢𑁆𑀢𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀸 𑀲𑀸𑀝𑀓𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀉𑀧𑀓𑀘𑁆𑀙𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀉𑀪𑀺𑀦𑁆𑀦𑀁 𑀉𑀧𑀓𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂𑀦 𑀲𑀸𑀝𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀁𑀲𑀓𑀽𑀝𑁂𑀲𑀼 𑀧𑀓𑁆𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀧𑀸𑀴𑀺𑀓𑀸𑀭𑀓𑁄 𑀪𑀺𑀓𑁆𑀔𑀼 𑀏𑀓𑀁𑀲𑀧𑀸𑀭𑀼𑀧𑀦𑁂𑀦 𑀧𑀸𑀭𑀼𑀢𑀁 𑀯𑀸𑀫𑀩𑀸𑀳𑀁 𑀯𑀺𑀯𑀭𑀺𑀢𑁆𑀯𑀸 𑀘𑀻𑀯𑀭𑀁 𑀅𑀁𑀲𑀓𑀽𑀝𑀁 𑀆𑀭𑁄𑀧𑁂𑀢𑀺, 𑀏𑀯𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀏𑀢𑁂, 𑀅𑀜𑁆𑀜𑁂 𑀘 𑀏𑀯𑀭𑀽𑀧𑁂 𑀧𑀸𑀭𑀼𑀧𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑀁 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀢𑀣𑀸 𑀅𑀧𑀸𑀭𑀼𑀧𑀺𑀢𑁆𑀯𑀸 𑀆𑀭𑀸𑀫𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀅𑀦𑀸𑀤𑀭𑁂𑀦 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀭𑀺𑀫𑀡𑁆𑀟𑀮𑀢𑁄 𑀯𑀺𑀫𑀼𑀢𑁆𑀢𑀮𑀓𑁆𑀔𑀡𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑀮𑀓𑁆𑀔𑀡𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀅𑀢𑁆𑀣𑁄.

𑁨𑁮𑁧𑁬. 𑀮𑁄𑀓𑀸𑀬𑀢𑀁 𑀦 𑀯𑀸𑀘𑁂𑀬𑁆𑀬𑀸𑀢𑀺 ‘‘𑀲𑀩𑁆𑀩𑀁 𑀉𑀘𑁆𑀙𑀺𑀝𑁆𑀞𑀁, 𑀲𑀩𑁆𑀩𑀁 𑀅𑀦𑀼𑀘𑁆𑀙𑀺𑀝𑁆𑀞𑀁, 𑀲𑁂𑀢𑁄 𑀓𑀸𑀓𑁄, 𑀓𑀸𑀴𑁄 𑀩𑀓𑁄 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀓𑀸𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀲𑀢𑁆𑀣𑀁 ¶ 𑀅𑀜𑁆𑀜𑁂𑀲𑀁 𑀦 𑀯𑀸𑀘𑁂𑀬𑁆𑀬. 𑀦 𑀘 𑀢𑀁 𑀧𑀭𑀺𑀬𑀸𑀧𑀼𑀡𑁂𑀢𑀺 𑀢𑀁 𑀮𑁄𑀓𑀸𑀬𑀢𑀁 𑀦 𑀘 𑀧𑀭𑀺𑀬𑀸𑀧𑀼𑀡𑁂𑀬𑁆𑀬 𑀦 ¶ 𑀉𑀕𑁆𑀕𑀡𑁆𑀳𑁂𑀬𑁆𑀬. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀢𑀺 𑀳𑀢𑁆𑀣𑀺𑀲𑀺𑀧𑁆𑀧𑀅𑀲𑁆𑀲𑀲𑀺𑀧𑁆𑀧𑀥𑀦𑀼𑀲𑀺𑀧𑁆𑀧𑀸𑀤𑀺𑀓𑀸 𑀧𑀭𑁄𑀧𑀖𑀸𑀢𑀓𑀭𑀸 𑀯𑀺𑀚𑁆𑀚𑀸 𑀘. 𑀪𑀺𑀓𑁆𑀔𑀼𑀦𑀸 𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸, 𑀦 𑀯𑀸𑀘𑁂𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁨𑁮𑁧𑁭. 𑀲𑀩𑁆𑀩𑀸𑀘𑀸𑀫𑀭𑀺𑀩𑀻𑀚𑀦𑀻𑀢𑀺 𑀲𑁂𑀢𑀸𑀤𑀺𑀯𑀡𑁆𑀡𑁂𑀳𑀺 𑀲𑀩𑁆𑀩𑁂𑀳𑀺 𑀘𑀫𑀭𑀯𑀸𑀮𑁂𑀳𑀺 𑀓𑀢𑀸 𑀩𑀻𑀚𑀦𑀻. 𑀦 𑀘𑀸𑀮𑀺𑀫𑁆𑀧𑁂𑀬𑁆𑀬 𑀤𑀸𑀬𑀁 𑀯𑀸𑀢𑀺 𑀤𑀯𑀟𑀸𑀳𑀸𑀤𑀺𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀸𑀬 𑀅𑀦𑀼𑀜𑁆𑀜𑀸𑀢𑀁 𑀧𑀝𑀕𑁆𑀕𑀺𑀤𑀸𑀦𑀓𑀸𑀭𑀡𑀁 𑀯𑀺𑀦𑀸 𑀅𑀭𑀜𑁆𑀜𑀁 𑀅𑀕𑁆𑀕𑀺𑀦𑀸 𑀦 𑀆𑀮𑀺𑀫𑁆𑀧𑁂𑀬𑁆𑀬. 𑀤𑀯𑀟𑀸𑀳𑁂 𑀧𑀦 𑀆𑀕𑀘𑁆𑀙𑀦𑁆𑀢𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀲𑀢𑀺 𑀧𑀝𑀕𑁆𑀕𑀺𑀁 𑀤𑀸𑀢𑀼𑀁, 𑀅𑀧𑁆𑀧𑀳𑀭𑀺𑀢𑀓𑀭𑀡𑁂𑀦 𑀯𑀸 𑀧𑀭𑀺𑀔𑀸𑀔𑀡𑀦𑁂𑀦 𑀯𑀸 𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼𑀁, 𑀲𑁂𑀦𑀸𑀲𑀦𑀁 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀅𑀕𑁆𑀕𑀺𑀁 𑀅𑀮𑁆𑀮𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀢𑀼𑀜𑁆𑀘 𑀮𑀪𑀢𑀺. 𑀉𑀤𑀓𑁂𑀦 𑀧𑀦 𑀓𑀧𑁆𑀧𑀺𑀬𑁂𑀦𑁂𑀯 𑀮𑀪𑀢𑀺, 𑀦𑁂𑀢𑀭𑁂𑀦. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀧𑀦 𑀲𑀢𑀺 𑀢𑁂𑀦𑁂𑀯 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀫𑀼𑀔𑀁 𑀦 𑀘 𑀮𑀜𑁆𑀚𑁂𑀢𑀺 𑀫𑀦𑁄𑀲𑀺𑀮𑀸𑀤𑀺𑀦𑀸 𑀫𑀼𑀔𑀁 𑀦 𑀮𑀺𑀫𑁆𑀧𑁂𑀬𑁆𑀬, 𑀢𑀺𑀮𑀓𑁂𑀦 𑀅𑀗𑁆𑀕𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁨𑁮𑁧𑁮. 𑀉𑀪𑀢𑁄𑀓𑀸𑀚𑀦𑁆𑀢𑀺 𑀉𑀪𑀢𑁄𑀓𑁄𑀝𑀺𑀬𑀸 𑀪𑀸𑀭𑀯𑀳𑀦𑀓𑁄𑀝𑀺𑀓𑀸𑀚𑀁. 𑀅𑀦𑁆𑀢𑀭𑀓𑀸𑀚𑀓𑀦𑁆𑀢𑀺 𑀉𑀪𑀬𑀓𑁄𑀝𑀺𑀬𑀸 𑀞𑀺𑀢𑀯𑀸𑀳𑀓𑁂𑀳𑀺 𑀯𑀳𑀺𑀢𑀩𑁆𑀩𑀁 𑀫𑀚𑁆𑀛𑁂𑀪𑀸𑀭𑀬𑀼𑀢𑁆𑀢𑀓𑀸𑀚𑀁. 𑀲𑀻𑀲𑀓𑁆𑀔𑀦𑁆𑀥𑀓𑀝𑀺𑀪𑀸𑀭𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸𑀯.

𑁨𑁮𑁧𑁯. 𑀬𑁄 𑀪𑀺𑀓𑁆𑀔𑀼 𑀯𑀟𑁆𑀠𑀓𑀺𑀅𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀁 𑀯𑀸 𑀢𑁂𑀦𑁂𑀯 𑀅𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀧𑀘𑁆𑀙𑀺𑀫𑀁 𑀯𑀸 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀢𑀺, 𑀏𑀯𑀁 𑀔𑀸𑀤𑀢𑁄 𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁨𑁦. 𑀓𑀺𑀘𑁆𑀘𑁂 𑀲𑀢𑀺𑀧𑀻𑀢𑀺 𑀲𑀼𑀓𑁆𑀔𑀓𑀝𑁆𑀞𑀸𑀤𑀺𑀕𑁆𑀕𑀳𑀡𑀓𑀺𑀘𑁆𑀘𑁂 𑀧𑀦 𑀲𑀢𑀺. 𑀧𑁄𑀭𑀺𑀲𑀦𑁆𑀢𑀺 𑀧𑀼𑀭𑀺𑀲𑀧𑁆𑀧𑀫𑀸𑀡𑀁, 𑀩𑁆𑀬𑀸𑀫𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀫𑀺𑀕𑀸𑀤𑀬𑁄 𑀯𑀸 𑀤𑀺𑀲𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑁄 𑀯𑀸 𑀤𑀺𑀲𑀸 𑀑𑀮𑁄𑀓𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀯𑀟𑀸𑀳𑀁 𑀯𑀸 𑀉𑀤𑀓𑁄𑀖𑀁 𑀯𑀸 𑀆𑀕𑀘𑁆𑀙𑀦𑁆𑀢𑀁 ¶ 𑀤𑀺𑀲𑁆𑀯𑀸 𑀯𑀸 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼. 𑀯𑀝𑁆𑀝𑀢𑁂𑀯𑀸𑀪𑀺𑀭𑀽𑀳𑀺𑀢𑀼𑀦𑁆𑀢𑀺 𑀅𑀢𑀺𑀉𑀘𑁆𑀘𑀫𑁆𑀧𑀺 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯.

𑁨𑁮𑁨𑁧. 𑀲𑀘𑁂 𑀅𑀓𑀮𑁆𑀮𑀓𑁄 𑀕𑀺𑀮𑀸𑀦𑁄 𑀦 𑀲𑀺𑀬𑀸, 𑀮𑀲𑀼𑀡𑀁 𑀫𑀸𑀕𑀥𑀁 𑀆𑀫𑀓𑀁 𑀪𑀡𑁆𑀟𑀺𑀓𑀮𑀲𑀼𑀡𑀁 𑀦 𑀘 𑀔𑀸𑀤𑁂𑀬𑁆𑀬 𑀦𑁂𑀯 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀪𑀡𑁆𑀟𑀺𑀓𑀮𑀲𑀼𑀡𑀁 𑀦𑀸𑀫 𑀘𑀢𑀼𑀫𑀺𑀜𑁆𑀚𑀢𑁄 𑀧𑀝𑁆𑀞𑀸𑀬 𑀩𑀳𑀼𑀫𑀺𑀜𑁆𑀚𑀁. 𑀧𑀮𑀡𑁆𑀟𑀼𑀓𑀪𑀜𑁆𑀚𑀦𑀓𑀸𑀤𑀺𑀮𑀲𑀼𑀡𑁂 𑀫𑀕𑀥𑁂𑀲𑀼 𑀚𑀸𑀢𑀢𑁆𑀢𑁂𑀧𑀺 𑀦 𑀤𑁄𑀲𑁄. 𑀮𑀲𑀼𑀡𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀬𑁂𑀯. 𑀕𑀺𑀮𑀸𑀦𑀲𑁆𑀲 𑀧𑀦 𑀮𑀲𑀼𑀡𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸𑀳 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀮𑀲𑀼𑀡𑀁 𑀔𑀸𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁯). 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀬𑀲𑁆𑀲 𑀆𑀩𑀸𑀥𑀲𑁆𑀲 𑀮𑀲𑀼𑀡𑀁 ¶ 𑀪𑁂𑀲𑀚𑁆𑀚𑀁 𑀳𑁄𑀢𑀺, 𑀢𑀧𑁆𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀲𑀗𑁆𑀕𑀻𑀢𑀺𑀢𑁆𑀢𑀬𑀸𑀭𑀼𑀴𑁆𑀳𑀸 𑀧𑀺𑀝𑀓𑀢𑁆𑀢𑀬𑀧𑀸𑀴𑀺. 𑀅𑀜𑁆𑀜𑀣𑀸𑀢𑀺 𑀲𑀓𑁆𑀓𑀝𑀸𑀤𑀺𑀔𑀮𑀺𑀢𑀯𑀘𑀦𑀫𑀬𑀁 𑀯𑀸𑀘𑀦𑀸𑀫𑀕𑁆𑀕𑀁 𑀦 𑀭𑁄𑀧𑁂𑀢𑀩𑁆𑀩𑀁, 𑀢𑀣𑀸 𑀦 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁮𑁨𑁨. 𑀔𑀺𑀧𑀺𑀢𑁂𑀢𑀺 𑀬𑁂𑀦 𑀓𑁂𑀦𑀘𑀺 𑀔𑀺𑀧𑀺𑀢𑁂. ‘‘𑀚𑀻𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀸 𑀔𑀺𑀧𑀺𑀢𑁂 𑀕𑀺𑀳𑀺𑀦𑀸 ‘‘𑀚𑀻𑀯𑀣𑀸’’𑀢𑀺 𑀯𑀼𑀢𑁆𑀢𑁂𑀦 𑀧𑀼𑀦 ‘‘𑀘𑀺𑀭𑀁 𑀚𑀻𑀯𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀘𑀺𑀭’’𑀦𑁆𑀢𑀺 𑀧𑀤𑁂 𑀲𑀢𑀺𑀧𑀺 𑀯𑀝𑁆𑀝𑀢𑀺.

𑁨𑁮𑁨𑁩. 𑀆𑀓𑁄𑀝𑁂𑀦𑁆𑀢𑀲𑁆𑀲𑀸𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑀸𑀤𑀻𑀳𑀺 𑀯𑀸 𑀧𑀳𑀭𑀦𑁆𑀢𑀲𑁆𑀲. 𑀧𑀼𑀧𑁆𑀨𑀲𑀁𑀓𑀺𑀡𑁆𑀡𑁂𑀢𑀺 𑀧𑀼𑀧𑁆𑀨𑀲𑀦𑁆𑀣𑀢𑁂.

𑁨𑁮𑁨𑁪. 𑀦𑁆𑀳𑀸𑀧𑀺𑀢𑀸 𑀧𑀼𑀩𑁆𑀩𑀓𑀸 𑀏𑀢𑀲𑁆𑀲𑀸𑀢𑀺 𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄, 𑀦𑁆𑀳𑀸𑀧𑀺𑀢𑀚𑀸𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀔𑀼𑀭𑀪𑀡𑁆𑀟𑀦𑁆𑀢𑀺 𑀦𑁆𑀳𑀸𑀧𑀺𑀢𑀧𑀭𑀺𑀓𑁆𑀔𑀸𑀭𑀁. 𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀦 𑀧𑀭𑀺𑀳𑀭𑁂𑀬𑁆𑀬. 𑀲𑀘𑁂 𑀬𑁄 𑀦𑁆𑀳𑀸𑀧𑀺𑀢𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀔𑀼𑀭𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦 𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲 𑀳𑀢𑁆𑀣𑀢𑁄 𑀕𑀳𑁂𑀢𑁆𑀯𑀸 𑀓𑁂𑀲𑀘𑁆𑀙𑁂𑀤𑀸𑀤𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀡𑁆𑀡𑀻𑀢𑀺 𑀓𑁂𑀲𑀓𑀫𑁆𑀩𑀮𑀁 𑀯𑀺𑀦𑀸 𑀉𑀡𑁆𑀡𑀫𑀬𑀸 𑀧𑀸𑀯𑀼𑀭𑀡𑀚𑀸𑀢𑀺. ‘‘𑀕𑁄𑀦𑀓𑀁 ¶ 𑀓𑀼𑀢𑁆𑀢𑀓𑀁 𑀘𑀺𑀢𑁆𑀢𑀓’’𑀫𑀺𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀪𑁂𑀤𑀯𑀦𑁆𑀢𑀢𑀸𑀬 𑀆𑀳 ‘‘𑀲𑀩𑁆𑀩𑀸’’𑀢𑀺. 𑀉𑀡𑁆𑀡𑀫𑀬𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀩𑀸𑀳𑀺𑀭𑀮𑁄𑀫𑀺𑀓𑀸’’𑀢𑀺. 𑀬𑀣𑀸𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀭𑀮𑁄𑀫𑀻 𑀉𑀡𑁆𑀡𑀻𑀥𑀸𑀭𑁂𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁨𑁪𑁯). 𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀉𑀡𑁆𑀡𑀮𑁄𑀫𑀸𑀦𑀺 𑀩𑀳𑀺 𑀓𑀢𑁆𑀯𑀸 𑀉𑀡𑁆𑀡𑀧𑀸𑀯𑀸𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀮𑁄𑀫𑀸𑀦𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁪𑁯).

𑁨𑁮𑁨𑁫. 𑀅𑀗𑁆𑀕𑀭𑀸𑀕𑀁 𑀦𑀸𑀫 𑀓𑀼𑀗𑁆𑀓𑀼𑀫𑀸𑀤𑀺. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀩𑁆𑀪𑀜𑁆𑀚𑀦𑁆𑀢𑀲𑁆𑀲. 𑀅𑀓𑀸𑀬𑀩𑀦𑁆𑀥𑀦𑀲𑁆𑀲 𑀕𑀸𑀫𑀁 𑀧𑀯𑀺𑀲𑀢𑁄𑀧𑀺 𑀤𑀼𑀓𑁆𑀓𑀝𑀁 𑀲𑀫𑀼𑀤𑀻𑀭𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀅𑀲𑀢𑀺𑀬𑀸 𑀅𑀩𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂𑀦 𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣 𑀩𑀦𑁆𑀥𑀺𑀢𑀩𑁆𑀩𑀁. ‘‘𑀆𑀲𑀦𑀲𑀸𑀮𑀸𑀬 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀺𑀢𑁆𑀯𑀸 𑀬𑀸𑀯 𑀦 𑀩𑀦𑁆𑀥𑀢𑀺, 𑀦 𑀢𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁.

𑁨𑁮𑁨𑁬. 𑀲𑀩𑁆𑀩𑀁 𑀆𑀬𑀼𑀥𑀁 𑀯𑀺𑀦𑀸 𑀲𑀩𑁆𑀩𑀁 𑀮𑁄𑀳𑀚𑀁 𑀮𑁄𑀳𑀫𑀬𑀪𑀡𑁆𑀟𑀜𑁆𑀘 𑀧𑀢𑁆𑀢𑀁, 𑀲𑀗𑁆𑀓𑀫𑀦𑀻𑀬𑀧𑀸𑀤𑀼𑀓𑀁, 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀧𑀮𑁆𑀮𑀗𑁆𑀓𑀁, 𑀆𑀲𑀦𑁆𑀤𑀺𑀜𑁆𑀘 𑀯𑀺𑀦𑀸 𑀲𑀩𑁆𑀩𑀁 𑀤𑀸𑀭𑀼𑀚𑀁 𑀤𑀸𑀭𑀼𑀫𑀬𑀪𑀡𑁆𑀟𑀜𑁆𑀘 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀢𑀓𑀁 ¶ , 𑀓𑀼𑀫𑁆𑀪𑀓𑀸𑀭𑀺𑀓𑀁 𑀥𑀦𑀺𑀬𑀲𑁆𑀲𑁂𑀯 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀜𑁆𑀘 𑀯𑀺𑀦𑀸 𑀲𑀩𑁆𑀩𑀁 𑀫𑀢𑁆𑀢𑀺𑀓𑀸𑀫𑀬𑀁 𑀪𑀡𑁆𑀟𑀜𑁆𑀘 𑀓𑀧𑁆𑀧𑀺𑀬𑀦𑁆𑀢𑀺 𑀬𑁄𑀚𑀦𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁮𑁨𑁭. 𑀆𑀲𑀦𑁆𑀤𑀺𑀓𑁄𑀢𑀺 𑀘𑀢𑀼𑀭𑀲𑁆𑀲𑀧𑀻𑀞𑀁. 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑁄𑀢𑀺 𑀳𑁂𑀝𑁆𑀞𑀸 𑀅𑀝𑀦𑀺𑀬𑀸 𑀯𑀟𑁆𑀠𑀓𑀺𑀳𑀢𑁆𑀣𑀢𑁄 𑀉𑀘𑁆𑀘𑀢𑀭𑀧𑁆𑀧𑀫𑀸𑀡𑀧𑀸𑀤𑀓𑁄. 𑀏𑀓𑀧𑀲𑁆𑀲𑀢𑁄 𑀤𑀻𑀖𑁄 𑀧𑀦 𑀉𑀘𑁆𑀘𑀧𑀸𑀤𑀓𑁄 𑀦 𑀯𑀝𑁆𑀝𑀢𑀺. 𑀬𑀣𑀸𑀳 ¶ 𑁋 ‘‘𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓𑀦𑁆𑀢𑀺 𑀯𑀘𑀦𑀢𑁄 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀫𑁂𑀯 𑀳𑀺 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀧𑀸𑀤𑀓𑀁 𑀦 𑀯𑀝𑁆𑀝𑀢𑀺, 𑀘𑀢𑀼𑀭𑀲𑁆𑀲𑀆𑀲𑀦𑁆𑀤𑀺𑀓𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭).

𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑁄’’𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀧𑀜𑁆𑀘𑀗𑁆𑀕𑀧𑀻𑀞𑀦𑁆𑀢𑀺 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀅𑀧𑀲𑁆𑀲𑁂𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀗𑁆𑀕𑁂𑀳𑀺 𑀬𑀼𑀢𑁆𑀢𑀧𑀻𑀞𑀁. 𑀲𑀢𑁆𑀢𑀗𑁆𑀕𑀦𑁆𑀢𑀺 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑁂 𑀬𑁄𑀚𑁂𑀢𑁆𑀯𑀸 𑀓𑀢𑀁. 𑀢𑀜𑁆𑀳𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺, 𑀢𑀻𑀳𑀺 𑀅𑀧𑀲𑁆𑀲𑁂𑀳𑀺 𑀘 𑀬𑀼𑀢𑁆𑀢𑀢𑁆𑀢𑀸 ‘‘𑀲𑀢𑁆𑀢𑀗𑁆𑀕𑀧𑀻𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀫𑀜𑁆𑀘𑁂𑀧𑀺. 𑀬𑀣𑀸𑀳 𑁋 ‘‘𑀲𑀢𑁆𑀢𑀗𑁆𑀕𑁄 𑀦𑀸𑀫 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀓𑀢𑀫𑀜𑁆𑀘𑁄, 𑀅𑀬𑀫𑁆𑀧𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭).

𑁨𑁮𑁨𑁮. 𑀢𑀽𑀮𑁄𑀦𑀤𑁆𑀥𑀸𑀢𑀺 𑀉𑀧𑀭𑀺 𑀢𑀽𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀤𑁆𑀥𑀸. 𑀖𑀭𑁂𑀬𑁂𑀯𑀸𑀢𑀺 𑀕𑀺𑀳𑀻𑀦𑀁 𑀕𑁂𑀳𑁂𑀬𑁂𑀯 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀬𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀲𑀻𑀲𑀧𑀸𑀤𑀽𑀧𑀥𑀸𑀦𑀦𑁆𑀢𑀺 𑀲𑀻𑀲𑀽𑀧𑀥𑀸𑀦𑀜𑁆𑀘𑁂𑀯 𑀧𑀸𑀤𑀽𑀧𑀥𑀸𑀦𑀜𑁆𑀘. 𑀘-𑀲𑀤𑁆𑀤𑁄 𑀧𑀺-𑀲𑀤𑁆𑀤𑀢𑁆𑀣𑁂 𑀲𑁄 ‘‘𑀅𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀢𑁂𑀦 𑀅𑀕𑀺𑀮𑀸𑀦𑀲𑁆𑀲𑀸𑀧𑀺 𑀢𑀸𑀯 𑀯𑀝𑁆𑀝𑀢𑀺, 𑀧𑀕𑁂𑀯 𑀕𑀺𑀮𑀸𑀦𑀲𑁆𑀲𑀸𑀢𑀺 𑀤𑀻𑀧𑁂𑀢𑀺.

𑁨𑁮𑁨𑁯. 𑀦 𑀓𑁂𑀯𑀮𑀁 𑀕𑀺𑀮𑀸𑀦𑀲𑁆𑀲 𑀲𑀻𑀲𑀧𑀸𑀤𑀽𑀧𑀥𑀸𑀦𑀫𑁂𑀯 𑀯𑀝𑁆𑀝𑀢𑀺, 𑀅𑀣 𑀔𑁄 𑀇𑀤𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀦𑁆𑀣𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀉𑀧𑀥𑀸𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀩𑀳𑀽 𑀉𑀧𑀥𑀸𑀦𑀸𑀦𑀺 𑀅𑀢𑁆𑀣𑀭𑀺𑀢𑁆𑀯𑀸. 𑀢𑀢𑁆𑀣 𑀘𑀸𑀢𑀺 𑀢𑀲𑁆𑀫𑀺𑀁 𑀉𑀧𑀥𑀸𑀦𑀲𑀦𑁆𑀣𑀭𑁂. 𑀧𑀘𑁆𑀘𑀢𑁆𑀣𑀭𑀡𑀓𑀁 𑀤𑀢𑁆𑀯𑀸𑀢𑀺 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀓𑀁 𑀅𑀢𑁆𑀣𑀭𑀺𑀢𑁆𑀯𑀸.

𑁨𑁮𑁩𑁦. 𑀢𑀺𑀭𑀺𑀬𑀦𑁆𑀢𑀺 ¶ 𑀯𑀺𑀢𑁆𑀣𑀸𑀭𑀢𑁄. 𑀫𑀼𑀝𑁆𑀞𑀺𑀭𑀢𑀦𑀦𑁆𑀢𑀺 𑀧𑀸𑀓𑀢𑀺𑀓𑀫𑀼𑀝𑁆𑀞𑀺𑀓𑀭𑀢𑀦𑀁. 𑀢𑀁 𑀧𑀦 𑀯𑀟𑁆𑀠𑀓𑀻𑀦𑀁 𑀯𑀺𑀤𑀢𑁆𑀣𑀺𑀫𑀢𑁆𑀢𑀁. 𑀫𑀺𑀢𑀦𑁆𑀢𑀺 𑀧𑀸𑀓𑀝𑀺𑀢𑀁 𑀧𑀫𑀸𑀡𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀫𑀢’’𑀦𑁆𑀢𑀺 ¶ 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀕𑀳𑁂𑀢𑀩𑁆𑀩𑁄. 𑀤𑀻𑀖𑀢𑁄𑀢𑀺 𑀩𑀺𑀫𑁆𑀩𑁄𑀳𑀦𑀲𑁆𑀲 𑀤𑀻𑀖𑀢𑁄. 𑀤𑀺𑀬𑀟𑁆𑀠𑀦𑁆𑀢𑀺 𑀤𑀺𑀬𑀟𑁆𑀠𑀳𑀢𑁆𑀣𑀁 𑀯𑀸 𑀤𑁆𑀯𑀺𑀳𑀢𑁆𑀣𑀁 𑀯𑀸 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀫𑁂𑀯 𑀳𑀺 ‘‘𑀲𑀻𑀲𑀧𑁆𑀧𑀫𑀸𑀡𑀩𑀺𑀫𑁆𑀩𑁄𑀳𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀬𑀣𑀸𑀳 𑁋

‘‘𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀺𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺. 𑀤𑀻𑀖𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀯𑀸 𑀤𑁆𑀯𑀺𑀭𑀢𑀦𑀁 𑀯𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀲𑀻𑀲𑀧𑁆𑀧𑀫𑀸𑀡𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀇𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀧𑀦 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭).

𑁨𑁮𑁩𑁧. 𑀘𑁄𑀴𑀦𑁆𑀢𑀺 𑀧𑀺𑀮𑁄𑀢𑀺𑀓𑀸. 𑀧𑀡𑁆𑀡𑀦𑁆𑀢𑀺 𑀭𑀼𑀓𑁆𑀔𑀮𑀢𑀸𑀦𑀁 𑀧𑀡𑁆𑀡𑀁. 𑀉𑀡𑁆𑀡𑀸𑀢𑀺 𑀏𑀴𑀓𑀸𑀤𑀻𑀦𑀁 𑀮𑁄𑀫𑀁. 𑀢𑀺𑀡𑀦𑁆𑀢𑀺 𑀤𑀩𑁆𑀩𑀢𑀺𑀡𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀢𑀺𑀡𑀁. 𑀯𑀸𑀓𑀦𑁆𑀢𑀺 𑀓𑀤𑀮𑀺𑀅𑀓𑁆𑀓𑀫𑀓𑀘𑀺𑀯𑀸𑀓𑀸𑀤𑀺𑀓𑀁. 𑀏𑀢𑁂𑀳𑀺 𑀧𑀜𑁆𑀘𑀳𑀺 𑀧𑀽𑀭𑀺𑀢𑀸 𑀪𑀺𑀲𑀺𑀬𑁄 𑀢𑀽𑀮𑀸𑀦𑀁 𑀕𑀡𑀦𑀸𑀯𑀲𑀸 𑀳𑁂𑀢𑀼𑀕𑀩𑁆𑀪𑀸𑀦𑀁 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀕𑀩𑁆𑀪𑀸𑀦𑀁 𑀕𑀡𑀦𑀸𑀯𑀲𑁂𑀦 𑀧𑀜𑁆𑀘 𑀪𑀸𑀲𑀺𑀢𑀸𑀢𑀺 𑀬𑁄𑀚𑀦𑀸.

𑁨𑁮𑁩𑁨. 𑀩𑀺𑀫𑁆𑀩𑁄𑀳𑀦𑀕𑀩𑁆𑀪𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀲𑀻’’𑀢𑀺𑀆𑀤𑀺. 𑀧𑀜𑁆𑀘𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀘𑁄𑀴𑀸𑀤𑀺𑀧𑀜𑁆𑀘𑁂𑀯. 𑀢𑀣𑀸 𑀢𑀽𑀮𑀸𑀦𑀺 𑀢𑀻𑀡𑀺𑀧𑀻𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀢𑀽𑀮𑀸𑀦𑀺 𑀭𑀼𑀓𑁆𑀔𑀢𑀽𑀮𑀁 𑀮𑀢𑀸𑀢𑀽𑀮𑀁 𑀧𑁄𑀝𑀓𑀺𑀢𑀽𑀮’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀅𑀦𑀼𑀜𑁆𑀜𑀸𑀢𑀸𑀦𑀺 𑀢𑀻𑀡𑀺𑀧𑀺 𑀢𑀽𑀮𑀸𑀦𑀺. 𑀏𑀢𑁆𑀣 𑀘 𑀭𑀼𑀓𑁆𑀔𑀢𑀽𑀮𑀁 𑀦𑀸𑀫 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀭𑀼𑀓𑁆𑀔𑀸𑀦𑀁 𑀢𑀽𑀮𑀁. 𑀮𑀢𑀸𑀢𑀽𑀮𑀁 𑀦𑀸𑀫 𑀔𑀻𑀭𑀯𑀮𑁆𑀮𑀺𑀆𑀤𑀻𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀯𑀮𑁆𑀮𑀻𑀦𑀁 𑀢𑀽𑀮𑀁. 𑀧𑁄𑀝𑀓𑀺𑀢𑀽𑀮𑀁 𑀦𑀸𑀫 𑀧𑁄𑀝𑀓𑀺𑀢𑀺𑀡𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦𑀁 𑀅𑀦𑁆𑀢𑀫𑀲𑁄 𑀉𑀘𑁆𑀙𑀼𑀦𑀴𑀸𑀤𑀻𑀦𑀫𑁆𑀧𑀺 𑀢𑀽𑀮𑀁. 𑀮𑁄𑀫𑀸𑀦𑀺 𑀫𑀺𑀕𑀧𑀓𑁆𑀔𑀻𑀦𑀦𑁆𑀢𑀺 𑀲𑀻𑀳𑀸𑀤𑀺𑀘𑀢𑀼𑀧𑁆𑀧𑀤𑀸𑀦𑀁, 𑀫𑁄𑀭𑀸𑀤𑀺𑀧𑀓𑁆𑀔𑀻𑀦𑀁 𑀮𑁄𑀫𑀸𑀦𑀺. 𑀇𑀫𑁂𑀢𑀺 𑀪𑀺𑀲𑀺𑀕𑀩𑁆𑀪𑀸𑀤𑀬𑁄 𑀇𑀫𑁂 𑀤𑀲 𑀩𑀺𑀫𑁆𑀩𑁄𑀳𑀦𑀲𑁆𑀲 𑀕𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮𑁩𑁩. 𑀏𑀯𑀁 ¶ 𑀓𑀧𑁆𑀧𑀺𑀬𑀁 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀕𑀩𑁆𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀓𑀧𑁆𑀧𑀺𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀦𑀼𑀲𑁆𑀲𑀮𑁄𑀫’’𑀦𑁆𑀢𑀺𑀆𑀤𑀺. 𑀮𑁄𑀫𑁂𑀲𑀼 𑀫𑀦𑀼𑀲𑁆𑀲𑀮𑁄𑀫𑀜𑁆𑀘 𑀧𑀼𑀧𑁆𑀨𑁂𑀲𑀼 𑀩𑀓𑀼𑀮𑀧𑀺𑀬𑀗𑁆𑀕𑀼𑀧𑀼𑀧𑁆𑀨𑀸𑀤𑀺𑀓𑀁 𑀲𑀩𑁆𑀩𑀁 𑀧𑀼𑀧𑁆𑀨𑀜𑁆𑀘 𑀧𑀡𑁆𑀡𑁂𑀲𑀼 ¶ 𑀘 𑀲𑀼𑀤𑁆𑀥𑀁 𑀓𑁂𑀯𑀮𑀁 𑀢𑀫𑀸𑀮𑀧𑀢𑁆𑀢𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀼𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀢𑀫𑀸𑀮𑀧𑀢𑁆𑀢𑀁 𑀲𑁂𑀲𑀕𑀩𑁆𑀪𑁂𑀳𑀺 𑀫𑀺𑀲𑁆𑀲𑀁 𑀯𑀝𑁆𑀝𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀻𑀧𑁂𑀢𑀺.

𑁨𑁮𑁩𑁪. 𑀫𑀲𑀽𑀭𑀓𑁂𑀢𑀺 𑀘𑀫𑁆𑀫𑀙𑀯𑀺𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂.

𑁨𑁮𑁩𑁫. ‘‘𑀲𑀼𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑀺𑀢𑀫𑁂𑀯𑀢𑁆𑀣𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀫𑀺𑀲𑁆𑀲’’𑀦𑁆𑀢𑀺𑀆𑀤𑀺.

𑁨𑁮𑁩𑁬. 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀕𑀡𑁆𑀟𑀼𑀧𑁆𑀧𑀸𑀤𑀲𑁆𑀲𑀸𑀧𑀺. 𑀓𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀝𑁆𑀞𑀓𑀫𑁆𑀫𑀸𑀤𑀺𑀯𑀲𑁂𑀦 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀯𑀸.

𑁨𑁮𑁩𑁭. 𑀚𑀸𑀢𑀓𑀦𑁆𑀢𑀺 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀺𑀚𑀸𑀢𑀓𑀜𑁆𑀘. 𑀯𑀢𑁆𑀣𑀼𑀦𑁆𑀢𑀺 𑀯𑀺𑀫𑀸𑀦𑀯𑀢𑁆𑀣𑀼𑀆𑀤𑀺𑀓𑀁 𑀧𑀲𑀸𑀤𑀚𑀦𑀓𑀁 𑀯𑀸 𑀧𑁂𑀢𑀯𑀢𑁆𑀣𑀼𑀆𑀤𑀺𑀓𑀁 𑀲𑀁𑀯𑁂𑀕𑀚𑀦𑀓𑀁 𑀯𑀸 𑀯𑀢𑁆𑀣𑀼𑀁. 𑀯𑀸-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀕𑀢𑀁 𑀇𑀥 𑀤𑀲𑁆𑀲𑀺𑀢𑀧𑀓𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑁂𑀳𑀺 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀢𑁂𑀦 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀫𑁂𑀯 𑀯𑀝𑁆𑀝𑀢𑀺, 𑀦 𑀲𑀬𑀁 𑀓𑀸𑀢𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀲𑀬𑀁 𑀓𑀸𑀢𑀼𑀫𑁆𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀧𑀕𑁂𑀯 𑀓𑀸𑀭𑀸𑀧𑁂𑀢𑀼𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁮𑁩𑁮. 𑀬𑁄 𑀧𑀦 𑀪𑀺𑀓𑁆𑀔𑀼 𑀤𑁆𑀯𑀻𑀳𑀺 𑀯𑀲𑁆𑀲𑁂𑀳𑀺 𑀯𑀸 𑀏𑀓𑁂𑀦 𑀯𑀸 𑀯𑀲𑁆𑀲𑁂𑀦 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀼𑀟𑁆𑀠𑀢𑀭𑁄 𑀯𑀸 𑀳𑁄𑀢𑀺 𑀤𑀳𑀭𑀢𑀭𑁄 𑀯𑀸, 𑀲𑁄 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑀸𑀦𑀸𑀲𑀦𑀺𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁩𑁯. ‘‘𑀲𑀢𑁆𑀢𑀯𑀲𑁆𑀲𑁂𑀦 𑀧𑀜𑁆𑀘𑀯𑀲𑁆𑀲𑁄’’𑀢𑀺 𑀇𑀤𑀁 𑀤𑁆𑀯𑀻𑀳𑀺 𑀯𑀲𑁆𑀲𑁂𑀳𑀺 𑀯𑀼𑀟𑁆𑀠𑀦𑀯𑀓𑀸𑀦𑀁 𑀲𑀫𑀸𑀦𑀸𑀲𑀦𑀺𑀓𑀢𑁆𑀢𑁂 𑀉𑀤𑀸𑀳𑀭𑀡𑀁. ‘‘𑀙 ¶ 𑀯𑀲𑁆𑀲𑁂𑀦 𑀧𑀜𑁆𑀘𑀯𑀲𑁆𑀲𑁄’’𑀢𑀺 𑀇𑀤𑀁 𑀏𑀓𑀯𑀲𑁆𑀲𑁂𑀦 𑀯𑀼𑀟𑁆𑀠𑀦𑀯𑀓𑀸𑀦𑀁 𑀲𑀫𑀸𑀦𑀸𑀲𑀦𑀺𑀓𑀢𑁆𑀢𑁂 𑀉𑀤𑀸𑀳𑀭𑀡𑀁.

𑁨𑁮𑁪𑁦. 𑀬𑀁 𑀢𑀺𑀡𑁆𑀡𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀺, 𑀢𑀁 𑀳𑁂𑀝𑁆𑀞𑀸 𑀤𑀻𑀖𑀸𑀲𑀦𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀲𑀫𑀸𑀦𑀸𑀲𑀦𑀺𑀓𑀸 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀜𑁆𑀘𑀁 𑀪𑀺𑀦𑁆𑀤𑀺𑀁𑀲𑀼, 𑀧𑀻𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀻𑀞𑀁 𑀪𑀺𑀦𑁆𑀤𑀺𑀁𑀲𑀽’’𑀢𑀺 (𑀘𑀽𑀴𑀯. 𑁩𑁨𑁦) 𑀆𑀭𑁄𑀧𑀺𑀢𑁂 𑀯𑀢𑁆𑀣𑀼𑀫𑁆𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀼𑀯𑀕𑁆𑀕𑀲𑁆𑀲 𑀫𑀜𑁆𑀘𑀁 𑀤𑀼𑀯𑀕𑁆𑀕𑀲𑁆𑀲 𑀧𑀻𑀞’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀤𑁆𑀯𑁂’’𑀢𑀺 𑀲𑀫𑀸𑀦𑀸𑀲𑀦𑀺𑀓𑁂 𑀤𑁆𑀯𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁮𑁪𑁧. 𑀉𑀪𑀢𑁄𑀩𑁆𑀬𑀜𑁆𑀚𑀦𑀁 ¶ , 𑀇𑀢𑁆𑀣𑀺𑀁, 𑀧𑀡𑁆𑀟𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀳𑀺𑀧𑀺 𑀕𑀳𑀝𑁆𑀞𑁂𑀳𑀺, 𑀧𑀩𑁆𑀩𑀚𑀺𑀢𑁂𑀳𑀺 𑀯𑀸 𑀧𑀼𑀭𑀺𑀲𑁂𑀳𑀺 𑀲𑀳 𑀤𑀻𑀖𑀸𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀬𑁄𑀚𑀦𑀸. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀲𑀸𑀫𑀺𑀯𑀘𑀦𑀦𑁆𑀢𑁄 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀢𑁄 ‘‘𑀲𑀩𑁆𑀩𑁂𑀳𑀺𑀧𑀻’’𑀢𑀺 𑀓𑀭𑀡𑀯𑀘𑀦𑀦𑁆𑀢𑁄𑀯 𑀧𑀸𑀞𑁄 𑀬𑀼𑀢𑁆𑀢𑀢𑀭𑁄. 𑀓𑀭𑀡𑀯𑀘𑀦𑀧𑁆𑀧𑀲𑀗𑁆𑀕𑁂 𑀯𑀸 𑀲𑀸𑀫𑀺𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 ‘‘𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀢𑀁 𑀲𑀁𑀳𑀸𑀭𑀺𑀫𑀁 𑀯𑀸 𑀳𑁄𑀢𑀼 𑀅𑀲𑀁𑀳𑀸𑀭𑀺𑀫𑀁 𑀯𑀸, 𑀢𑀣𑀸𑀭𑀽𑀧𑁂 𑀅𑀧𑀺 𑀨𑀮𑀓𑀔𑀡𑁆𑀟𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀧𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦).

𑁨𑁮𑁪𑁨. 𑀧𑀼𑀭𑀺𑀫𑀺𑀓𑁄𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑁂𑀦 ‘‘𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁧𑁭) 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀭𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼𑀁, 𑀲𑁂𑀬𑁆𑀬𑀸 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁧𑁮) 𑀦𑀬𑁂𑀦 𑀅𑀦𑀼𑀜𑁆𑀜𑀸𑀢𑀦𑀺𑀬𑀸𑀫𑁂𑀦𑁂𑀯 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀦𑀁 𑀧𑀼𑀭𑀺𑀫𑀺𑀓𑁄 𑀦𑀸𑀫 𑀲𑁂𑀦𑀸𑀲𑀦𑀕𑁆𑀕𑀸𑀳𑁄. 𑀏𑀯𑀫𑁂𑀯 𑀧𑀘𑁆𑀙𑀺𑀫𑀺𑀓𑀸𑀬 ¶ 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀦𑀁 𑀧𑀘𑁆𑀙𑀺𑀫𑀺𑀓𑁄 𑀦𑀸𑀫. 𑀏𑀯𑀫𑁂𑀯 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀅𑀦𑀦𑁆𑀢𑀭𑀤𑀺𑀯𑀲𑁂 ‘‘𑀪𑀦𑁆𑀢𑁂, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀲𑁂𑀦𑀸𑀲𑀦𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀦𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀦𑀸𑀫. 𑀧𑀓𑀸𑀲𑀺𑀢𑁄 ‘‘𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸𑀧𑀼𑀭𑀺𑀫𑀺𑀓𑁄 𑀕𑀸𑀳𑀸𑀧𑁂𑀢𑀩𑁆𑀩𑁄, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀺𑀓𑁄 𑀕𑀸𑀳𑁂𑀢𑀩𑁆𑀩𑁄, 𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁩𑁧𑁮) 𑀯𑀼𑀢𑁆𑀢𑁄.

𑁨𑁮𑁪𑁩. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀼𑀩𑁆𑀩𑀸𑀭𑀼𑀡𑀸’’𑀢𑀺𑀆𑀤𑀺. 𑀇𑀥 𑀧𑀸𑀝𑀺𑀧𑀤𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀸 𑀘𑁂𑀯 𑀫𑀳𑀸𑀧𑀯𑀸𑀭𑀡𑀸𑀬 𑀅𑀦𑀦𑁆𑀢𑀭𑀤𑀺𑀯𑀲𑁄 𑀘. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀸𑀝𑀺𑀧𑀤𑀤𑀺𑀯𑀲𑀸𑀦𑀁 𑀅𑀭𑀼𑀡𑁄 𑀧𑀼𑀩𑁆𑀩𑀸𑀭𑀼𑀡𑁄 𑀦𑀸𑀫. 𑀢𑁂 𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑁆𑀫 𑀤𑀼𑀢𑀺𑀬𑀢𑀺𑀣𑀺𑀧𑀝𑀺𑀩𑀤𑁆𑀥𑁄 𑀅𑀭𑀼𑀡𑁄 𑀧𑀼𑀦𑀸𑀭𑀼𑀡𑁄 𑀦𑀸𑀫. 𑀇𑀤𑀦𑁆𑀢𑀺 𑀉𑀪𑀬𑀸𑀭𑀼𑀡𑀸𑀦𑀦𑁆𑀢𑀭𑀁. 𑀲𑁂𑀦𑀸𑀲𑀦𑀕𑀸𑀳𑀓𑀲𑁆𑀲𑀸𑀢𑀺 𑀏𑀢𑁆𑀣 𑀲𑀓𑀢𑁆𑀣𑁂 𑀓-𑀧𑀘𑁆𑀘𑀬𑁄, 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀇𑀤𑀜𑁆𑀳𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀔𑁂𑀢𑁆𑀢’’𑀦𑁆𑀢𑀺. 𑀯𑀲𑁆𑀲𑀽𑀧𑀕𑀢𑁂 𑀯𑀲𑁆𑀲𑀽𑀧𑀕𑀫𑁂 𑀓𑀸𑀢𑀩𑁆𑀩𑁂 𑀲𑀢𑀺, 𑀲𑀸𑀥𑁂𑀢𑀩𑁆𑀩𑀧𑀬𑁄𑀚𑀦𑁂 𑀪𑀼𑀫𑁆𑀫𑀁. 𑀯𑀲𑁆𑀲𑀽𑀧𑀕𑀢𑁂𑀢𑀺 𑀯𑀸 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀧𑀼𑀭𑀺𑀫𑀺𑀓𑀸𑀬, 𑀳𑀺 𑀧𑀘𑁆𑀙𑀺𑀫𑀺𑀓𑀸𑀬 𑀘 𑀯𑀲𑁆𑀲𑀽𑀧𑀕𑀫𑀦𑀲𑁆𑀲 𑀢𑀁 𑀢𑀤𑀳𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀺𑀫𑀺𑀢𑁆𑀢𑀁, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀧𑀦 𑀆𑀕𑀫𑀺𑀦𑁄 𑀯𑀲𑁆𑀲𑀽𑀧𑀕𑀫𑀦𑀲𑁆𑀲𑀸𑀢𑀺 𑀏𑀯𑀁 𑀢𑀺𑀯𑀺𑀥𑁄𑀧𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀯𑀲𑁆𑀲𑀽𑀧𑀕𑀫𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺.

𑁨𑁮𑁪𑁪. 𑀧𑀸𑀝𑀺𑀧𑀤𑀤𑀺𑀯𑀲𑀲𑁆𑀲 ¶ 𑀅𑀭𑀼𑀡𑁂 𑀉𑀕𑁆𑀕𑀢𑁂𑀬𑁂𑀯 𑀲𑁂𑀦𑀸𑀲𑀦𑁂 𑀧𑀦 𑀕𑀸𑀳𑀺𑀢𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀲𑀘𑁂 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀁 𑀲𑁂𑀦𑀸𑀲𑀦𑀁 𑀬𑀸𑀘𑀢𑀺, 𑀲𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁂𑀦 ¶ ‘‘𑀲𑁂𑀦𑀸𑀲𑀦𑀁 𑀕𑀸𑀳𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁮𑁪𑁫. 𑀯𑀲𑁆𑀲𑀸𑀯𑀸𑀲𑀲𑁆𑀲 𑀇𑀤𑀁 𑀯𑀲𑁆𑀲𑀸𑀯𑀸𑀲𑀺𑀓𑀁, 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀤𑀸𑀢𑀩𑁆𑀩𑀘𑀻𑀯𑀭𑀁, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 ‘‘𑀯𑀲𑁆𑀲𑀯𑀸𑀲𑀺𑀓’’𑀦𑁆𑀢𑀺 𑀭𑀲𑁆𑀲𑀢𑁆𑀢𑀁. 𑀲𑀗𑁆𑀖𑀺𑀓𑀁 𑀅𑀧𑀮𑁄𑀓𑁂𑀢𑁆𑀯𑀸 𑀕𑀳𑀺𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀘𑀻𑀯𑀭𑀁 𑀲𑀘𑁂 𑀢𑀢𑁆𑀭𑀚𑀁 𑀢𑀢𑁆𑀭𑀼𑀧𑁆𑀧𑀸𑀤𑀁 𑀳𑁄𑀢𑀺, 𑀅𑀦𑁆𑀢𑁄𑀯𑀲𑁆𑀲𑁂 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑁂𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀭𑀚𑀁 𑀲𑀘𑁂’’𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀤𑀸𑀬𑀓𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀦 𑀮𑀪𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀣𑀸𑀳 𑁋 ‘‘𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀦 𑀮𑀪𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮).

𑁨𑁮𑁪𑁬-𑁮. 𑀲𑀘𑁂 𑀯𑀼𑀢𑁆𑀣𑀯𑀲𑁆𑀲𑁄 𑀬𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑀳𑀢𑁆𑀣𑀢𑁄 𑀓𑀺𑀜𑁆𑀘𑀺 𑀢𑀺𑀘𑀻𑀯𑀭𑀸𑀤𑀺𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀼𑀮𑁂 𑀫𑀬𑁆𑀳𑀁 𑀕𑀳𑀺𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁 𑀕𑀡𑁆𑀳’’ 𑀇𑀢𑀺 𑀏𑀯𑀁 𑀯𑀢𑁆𑀯𑀸 𑀢𑀲𑁆𑀲 𑀆𑀯𑀸𑀲𑀺𑀓𑀲𑁆𑀲 𑀤𑀢𑁆𑀯𑀸 𑀤𑀺𑀲𑀁 𑀕𑀘𑁆𑀙𑀢𑀺 𑀧𑀓𑁆𑀓𑀫𑀢𑀺, 𑀲𑁄 𑀢𑀢𑁆𑀣 𑀕𑀢𑀝𑁆𑀞𑀸𑀦𑁂 𑀲𑀘𑁂 𑀉𑀧𑁆𑀧𑀩𑁆𑀩𑀚𑀢𑀺 𑀕𑀺𑀳𑀻 𑀳𑁄𑀢𑀺, 𑀢𑀲𑁆𑀲 𑀤𑀺𑀲𑀁𑀕𑀢𑀲𑁆𑀲 𑀲𑀫𑁆𑀧𑀢𑁆𑀢𑀁 𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀢𑁂𑀦 𑀢𑀣𑀸 𑀤𑀺𑀦𑁆𑀦𑀫𑁆𑀧𑀺 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀕𑀳𑁂𑀢𑀼𑀁 𑀦 𑀮𑀪𑀢𑀺, 𑀢𑀲𑁆𑀲 𑀧𑀸𑀧𑀺𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁 𑀲𑀗𑁆𑀖𑀺𑀓𑀁𑀬𑁂𑀯 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑁄 𑀪𑀺𑀓𑁆𑀔𑀼 𑀯𑀺𑀩𑁆𑀪𑀫𑀢𑀺, 𑀲𑀗𑁆𑀖𑀲𑁆𑀲𑁂𑀯𑁂𑀢’’𑀦𑁆𑀢𑀺.

𑁨𑁮𑁪𑁯. 𑀢𑀲𑁆𑀫𑀺𑀁 𑀓𑀼𑀮𑁂 𑀤𑀸𑀬𑀓𑁂 𑀫𑀦𑀼𑀲𑁆𑀲𑁂 𑀲𑀫𑁆𑀫𑀼𑀔𑀸 𑀘𑁂 𑀧𑀝𑀺𑀘𑁆𑀙𑀸𑀧𑁂𑀢𑀺, 𑀢𑀲𑁆𑀲 𑀤𑀺𑀲𑀁𑀕𑀫𑀺𑀲𑁆𑀲 𑀲𑀫𑁆𑀧𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁 𑀆𑀯𑀸𑀲𑀺𑀓𑁄 𑀮𑀪𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁫𑁦. 𑀢𑀢𑁆𑀣 𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀯𑀺𑀳𑀸𑀭𑁄 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀸𑀲𑀸𑀤𑀸𑀤𑀺𑀲𑁂𑀦𑀸𑀲𑀦𑀁. 𑀯𑀢𑁆𑀣𑀽𑀦𑀺 𑀤𑀼𑀯𑀺𑀥𑀲𑁆𑀲𑀧𑀻𑀢𑀺 𑀆𑀭𑀸𑀫𑀯𑀢𑁆𑀣𑀼, 𑀯𑀺𑀳𑀸𑀭𑀯𑀢𑁆𑀣𑀽𑀢𑀺 𑀤𑀼𑀯𑀺𑀥𑀲𑁆𑀲 𑀯𑀢𑁆𑀣𑀽𑀦𑀺 ¶ 𑀘. 𑀆𑀭𑀸𑀫𑀯𑀢𑁆𑀣𑀼 𑀦𑀸𑀫 𑀢𑁂𑀲𑀁𑀬𑁂𑀯 𑀆𑀭𑀸𑀫𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄𑀓𑀸𑀲𑁄, 𑀢𑁂𑀲𑀼 𑀯𑀸 𑀆𑀭𑀸𑀫𑁂𑀲𑀼 𑀯𑀺𑀦𑀝𑁆𑀞𑁂𑀲𑀼 𑀢𑁂𑀲𑀁 𑀧𑁄𑀭𑀸𑀡𑀓𑀪𑀽𑀫𑀺𑀪𑀸𑀕𑁄. 𑀯𑀺𑀳𑀸𑀭𑀯𑀢𑁆𑀣𑀼 𑀦𑀸𑀫 𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄. 𑀪𑀺𑀲𑀺 𑀦𑀸𑀫 𑀉𑀡𑁆𑀡𑀪𑀺𑀲𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀸. 𑀩𑀺𑀫𑁆𑀩𑁄𑀳𑀦𑀁 𑀦𑀸𑀫 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀩𑀺𑀫𑁆𑀩𑁄𑀳𑀦𑀸𑀦𑀁 𑀅𑀜𑁆𑀜𑀢𑀭𑀁. 𑀫𑀜𑁆𑀘𑀁 𑀦𑀸𑀫 𑀫𑀲𑀸𑀭𑀓𑁄 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄, 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀇𑀫𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀜𑁆𑀘𑀸𑀦𑀁 𑀅𑀜𑁆𑀜𑀢𑀭𑀁. 𑀧𑀻𑀞𑀁 𑀦𑀸𑀫 𑀫𑀲𑀸𑀭𑀓𑀸𑀤𑀻𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀧𑀻𑀞𑀸𑀦𑀁 𑀅𑀜𑁆𑀜𑀢𑀭𑀁.

𑁨𑁮𑁫𑁧. 𑀮𑁄𑀳𑀓𑀼𑀫𑁆𑀪𑀻 ¶ 𑀦𑀸𑀫 𑀓𑀸𑀴𑀮𑁄𑀳𑁂𑀦 𑀯𑀸 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀸 𑀓𑀼𑀫𑁆𑀪𑀻. 𑀓𑀝𑀸𑀳𑁄 𑀧𑀸𑀓𑀝𑁄𑀯. ‘‘𑀪𑀸𑀡𑀓’’𑀦𑁆𑀢𑀺 𑀅𑀮𑀜𑁆𑀚𑀭𑁄 𑀯𑀼𑀘𑁆𑀘𑀢𑀺. 𑀅𑀮𑀜𑁆𑀚𑀭𑁄𑀢𑀺 𑀘 𑀩𑀳𑀼𑀉𑀤𑀓𑀕𑀡𑁆𑀳𑀦𑀺𑀓𑀸 𑀫𑀳𑀸𑀘𑀸𑀝𑀺, 𑀚𑀮𑀁 𑀕𑀡𑁆𑀳𑀺𑀢𑀼𑀁 𑀅𑀮𑀦𑁆𑀢𑀺 𑀅𑀮𑀜𑁆𑀚𑀭𑁄. ‘‘𑀯𑀝𑁆𑀝𑀘𑀸𑀝𑀺 𑀯𑀺𑀬 𑀳𑀼𑀢𑁆𑀯𑀸 𑀣𑁄𑀓𑀁 𑀤𑀻𑀖𑀫𑀼𑀔𑁄 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀯𑀸𑀭𑀓𑁄𑀢𑀺 𑀖𑀝𑁄. 𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀲𑁆𑀲𑀸 𑀤𑀸𑀮𑀦𑀢𑁄 𑀯𑀺𑀤𑀸𑀭𑀡𑀢𑁄 ‘‘𑀓𑀼𑀤𑀸𑀮𑁄’’𑀢𑀺 𑀅𑀬𑁄𑀫𑀬𑀉𑀧𑀓𑀭𑀡𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺.

𑁨𑁮𑁫𑁨. 𑀯𑀮𑁆𑀮𑀺𑀯𑁂𑀴𑀼𑀆𑀤𑀻𑀲𑀼 𑀯𑁂𑀴𑀽𑀢𑀺 𑀫𑀳𑀸𑀯𑁂𑀡𑀼. 𑀢𑀺𑀡𑀦𑁆𑀢𑀺 𑀕𑁂𑀳𑀘𑁆𑀙𑀸𑀤𑀦𑀁 𑀢𑀺𑀡𑀁. 𑀧𑀡𑁆𑀡𑀁 𑀢𑀸𑀮𑀧𑀡𑁆𑀡𑀸𑀤𑀺𑀓𑀁. 𑀫𑀼𑀜𑁆𑀚𑀦𑁆𑀢𑀺 𑀫𑀼𑀜𑁆𑀚𑀢𑀺𑀡𑀁. 𑀧𑀩𑁆𑀩𑀚𑀦𑁆𑀢𑀺 𑀧𑀩𑁆𑀩𑀚𑀢𑀺𑀡𑀁, 𑀫𑀢𑁆𑀢𑀺𑀓𑀸 𑀧𑀓𑀢𑀺𑀫𑀢𑁆𑀢𑀺𑀓𑀸 𑀯𑀸 𑀕𑁂𑀭𑀼𑀓𑀸𑀤𑀺𑀧𑀜𑁆𑀘𑀯𑀡𑁆𑀡𑀸 𑀯𑀸 𑀫𑀢𑁆𑀢𑀺𑀓𑀸. 𑀆𑀳 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑁄.

𑁨𑁮𑁫𑁩. 𑀤𑁆𑀯𑁂𑀢𑀺 𑀧𑀞𑀫𑀤𑀼𑀢𑀺𑀬𑀕𑀭𑀼𑀪𑀡𑁆𑀟𑀸𑀦𑀺. 𑀤𑁆𑀯𑀻𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 ‘‘𑀆𑀭𑁄𑀫𑁄, 𑀆𑀭𑀸𑀫𑀯𑀢𑁆𑀣𑀼, 𑀇𑀤𑀁 𑀧𑀞𑀫𑀁. 𑀯𑀺𑀳𑀸𑀭𑁄, 𑀯𑀺𑀳𑀸𑀭𑀯𑀢𑁆𑀣𑀼, 𑀇𑀤𑀁 𑀤𑀼𑀢𑀺𑀬’’𑀦𑁆𑀢𑀺 (𑀘𑀽𑀴𑀯. 𑁩𑁨𑁧-𑁩𑁨𑁨) 𑀯𑀼𑀢𑁆𑀢𑀢𑁆𑀢𑀸. 𑀘𑀢𑀼𑀲𑀗𑁆𑀕𑀳𑀦𑁆𑀢𑀺 𑀘𑀢𑀽𑀳𑀺 𑀪𑀺𑀲𑀺𑀆𑀤𑀻𑀳𑀺 ¶ 𑀲𑀗𑁆𑀕𑀳𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀦𑀯𑀓𑁄𑀝𑁆𑀞𑀸𑀲𑀦𑁆𑀢𑀺 𑀮𑁄𑀳𑀓𑀼𑀫𑁆𑀪𑀺𑀆𑀤𑀬𑁄 𑀦𑀯 𑀓𑁄𑀝𑁆𑀞𑀸𑀲𑀸 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀅𑀝𑁆𑀞𑀥𑀸 𑀯𑀮𑁆𑀮𑀺𑀆𑀤𑀻𑀳𑀺 𑀅𑀝𑁆𑀞𑀳𑀺 𑀧𑀓𑀸𑀭𑁂𑀳𑀺.

𑁨𑁮𑁫𑁪. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂. 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀕𑀭𑀼𑀪𑀡𑁆𑀟𑀕𑀡𑀦𑀸𑀦𑀁 𑀧𑀺𑀡𑁆𑀟𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀁 𑀕𑀭𑀼𑀪𑀡𑁆𑀟𑀁 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄 𑀦𑀸𑀣𑁄 𑀧𑀓𑀸𑀲𑀬𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘 𑀦𑀺𑀫𑁆𑀫𑀮𑀸𑀦𑀺 𑀮𑁄𑀘𑀦𑀸𑀦𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀫𑀁𑀲𑀤𑀺𑀩𑁆𑀩𑀥𑀫𑁆𑀫𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀼𑀯𑀲𑁂𑀦 𑀧𑀜𑁆𑀘𑀯𑀺𑀥𑀯𑀺𑀧𑁆𑀧𑀲𑀦𑁆𑀦𑀮𑁄𑀘𑀦𑁄𑀢𑀺 𑀅𑀢𑁆𑀣𑁄.

𑁨𑁮𑁫𑁫. 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄𑀢𑀺 𑀇𑀲𑁆𑀲𑀭𑀯𑀢𑀸𑀬 𑀧𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀯𑀺𑀪𑀸𑀚𑁂𑀦𑁆𑀢𑁄𑀢𑀺 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑁂𑀢𑁆𑀯𑀸 𑀯𑀺𑀪𑀸𑀚𑁂𑀦𑁆𑀢𑁄. 𑀇𑀤𑀜𑁆𑀳𑀺 𑀲𑀩𑁆𑀩𑀫𑁆𑀧𑀺 𑀕𑀭𑀼𑀪𑀡𑁆𑀟𑀁 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁨𑁧) ‘‘𑀅𑀯𑀺𑀲𑁆𑀲𑀚𑁆𑀚𑀺𑀬𑀁. 𑀓𑀺𑀝𑀸𑀕𑀺𑀭𑀺𑀯𑀢𑁆𑀣𑀼𑀫𑁆𑀳𑀺 (𑀘𑀽𑀴𑀯. 𑁩𑁨𑁨) 𑀅𑀯𑁂𑀪𑀗𑁆𑀕𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀉𑀪𑀬𑀢𑁆𑀣 𑀆𑀕𑀢𑀯𑁄𑀳𑀸𑀭𑀪𑁂𑀤𑀤𑀲𑁆𑀲𑀦𑀫𑀼𑀔𑁂𑀦 𑀢𑀢𑁆𑀣 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂’’𑀢𑀺. 𑀧𑀭𑀺𑀯𑀸𑀭𑁂 𑀧𑀦 𑁋

𑀅𑀯𑀺𑀲𑁆𑀲𑀚𑁆𑀚𑀺𑀬𑀁 ¶ 𑀅𑀯𑁂𑀪𑀗𑁆𑀕𑀺𑀬𑀁, 𑀧𑀜𑁆𑀘 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸;

𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸𑀢𑀺. (𑀧𑀭𑀺. 𑁪𑁭𑁯) 𑁋

𑀆𑀕𑀢𑀁. 𑀢𑀲𑁆𑀫𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀅𑀯𑁂𑀪𑀗𑁆𑀕𑀺𑀬𑀜𑁆𑀘, 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲, 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁨𑁮𑁫𑁬. 𑀪𑀺𑀓𑁆𑀔𑀼𑀦𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀕𑀭𑀼𑀪𑀡𑁆𑀟𑀁 𑀢𑀼 𑀯𑀺𑀲𑁆𑀲𑀚𑁆𑀚𑀺𑀢𑀁 𑀅𑀯𑀺𑀲𑁆𑀲𑀝𑁆𑀞𑀫𑁂𑀯 𑀳𑁄𑀢𑀺, 𑀯𑀺𑀪𑀢𑁆𑀢𑀜𑁆𑀘 𑀅𑀯𑀺𑀪𑀸𑀚𑀺𑀢𑀫𑁂𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁫𑁭. 𑀏𑀢𑁆𑀣 ¶ 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀕𑀭𑀼𑀪𑀡𑁆𑀟𑁂𑀲𑀼 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀅𑀕𑀭𑀼𑀪𑀡𑁆𑀟𑀓𑀁 𑀓𑀺𑀜𑁆𑀘𑀺 𑀦 𑀘 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀘𑀢𑀼𑀢𑁆𑀣𑁂 𑀧𑀦 𑀕𑀭𑀼𑀪𑀡𑁆𑀟𑁂 𑀅𑀝𑁆𑀞𑀓𑀣𑀸𑀬 ‘‘𑀮𑁄𑀳𑀓𑀼𑀫𑁆𑀪𑀻, 𑀮𑁄𑀳𑀪𑀸𑀡𑀓𑀁, 𑀮𑁄𑀳𑀓𑀝𑀸𑀳𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀦𑁆𑀢𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀔𑀼𑀤𑁆𑀤𑀓𑀸𑀦𑀺 𑀯𑀸, 𑀅𑀦𑁆𑀢𑀫𑀲𑁄 𑀧𑀲𑀢𑀫𑀢𑁆𑀢𑀉𑀤𑀓𑀕𑀡𑁆𑀳𑀦𑀓𑀸𑀦𑀺𑀧𑀺 𑀕𑀭𑀼𑀪𑀡𑁆𑀟𑀸𑀦𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀮𑁄𑀳𑀓𑀼𑀫𑁆𑀪𑀻’’𑀢𑀺𑀆𑀤𑀺.

𑁨𑁮𑁫𑁮. 𑀇𑀤𑀁 𑀢𑀺𑀯𑀺𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀤𑀕𑀡𑁆𑀳𑀦𑀓𑁄𑀢𑀺 𑀏𑀢𑁆𑀣 𑀧𑀸𑀤𑁄 𑀦𑀸𑀫 𑀫𑀕𑀥𑀦𑀸𑀴𑀺𑀬𑀸 𑀧𑀜𑁆𑀘𑀦𑀸𑀴𑀺𑀫𑀢𑁆𑀢𑀕𑀡𑁆𑀳𑀦𑀓𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀪𑀸𑀚𑀦𑀸𑀦𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀸 𑀲𑀻𑀳𑀴𑀤𑀻𑀧𑁂 𑀬𑁂𑀪𑀼𑀬𑁆𑀬𑁂𑀦 𑀢𑁂𑀦𑁂𑀯 𑀧𑀸𑀤𑁂𑀦 𑀫𑀺𑀦𑀦𑁆𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀻𑀳𑀴𑀤𑀻𑀧𑁂 𑀧𑀸𑀤𑀕𑀡𑁆𑀳𑀦𑀓𑁄 𑀪𑀸𑀚𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑀼𑀢𑁆𑀢𑀁. 𑀮𑁄𑀳𑀯𑀸𑀭𑀓𑁄𑀢𑀺 𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀓𑀢𑁄. 𑀪𑀸𑀚𑀺𑀬𑁄𑀢𑀺 𑀪𑀸𑀚𑁂𑀢𑀩𑁆𑀩𑁄.

𑁨𑁮𑁫𑁯. 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀢𑀢𑁄 𑀧𑀸𑀤𑀕𑀡𑁆𑀳𑀦𑀓𑀯𑀸𑀭𑀓𑀢𑁄 𑀉𑀤𑁆𑀥𑀁 𑀅𑀥𑀺𑀓𑀁 𑀕𑀡𑁆𑀳𑀦𑀓𑁄. 𑀏𑀯𑀁 𑀧𑀸𑀴𑀺𑀆𑀕𑀢𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀕𑀢𑀸𑀦𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀗𑁆𑀕𑀸𑀭𑀸𑀤𑀻𑀦𑀻’’𑀢𑀺𑀆𑀤𑀺. 𑀪𑀺𑀗𑁆𑀕𑀸𑀭𑁄 𑀦𑀸𑀫 𑀉𑀓𑁆𑀔𑀺𑀢𑁆𑀢𑀳𑀢𑁆𑀣𑀺𑀲𑁄𑀡𑁆𑀟𑀸𑀓𑀸𑀭𑁂𑀦 𑀓𑀢𑀚𑀮𑀦𑀺𑀕𑁆𑀕𑀫𑀓𑀡𑁆𑀡𑀺𑀓𑁄 𑀉𑀘𑁆𑀘𑀕𑀻𑀯𑁄 𑀫𑀳𑀸𑀫𑀼𑀔𑀉𑀤𑀓𑀪𑀸𑀚𑀦𑀯𑀺𑀲𑁂𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀕𑀢𑀸𑀦𑀺 ‘‘𑀧𑀝𑀺𑀕𑁆𑀕𑀳𑀉𑀴𑀼𑀗𑁆𑀓𑀤𑀩𑁆𑀩𑀺𑀓𑀝𑀘𑁆𑀙𑀼𑀧𑀸𑀢𑀺𑀢𑀝𑁆𑀝𑀓𑀲𑀭𑀓𑀲𑀫𑀼𑀕𑁆𑀕𑀅𑀗𑁆𑀕𑀸𑀭𑀓𑀧𑀮𑁆𑀮𑀥𑀽𑀫𑀓𑀝𑀘𑁆𑀙𑀼𑀆𑀤𑀻𑀦𑀺 𑀔𑀼𑀤𑁆𑀤𑀓𑀸𑀦𑀺 𑀯𑀸 𑀫𑀳𑀦𑁆𑀢𑀸𑀦𑀺 𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑀼𑀢𑁆𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀸𑀦𑀻𑀢𑀺 𑀔𑀼𑀤𑁆𑀤𑀓𑀸𑀦𑀺 𑀯𑀸 𑀫𑀳𑀦𑁆𑀢𑀸𑀦𑀺 𑀯𑀸.

𑁨𑁮𑁬𑁦. 𑀢𑀫𑁆𑀩𑀣𑀸𑀮𑀓𑀸 ¶ 𑀅𑀬𑀣𑀸𑀮𑀓𑀸 𑀪𑀸𑀚𑁂𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀞𑀧𑁂𑀢𑁆𑀯𑀸 𑀧𑀦 𑀪𑀸𑀚𑀦𑀯𑀺𑀓𑀢𑀺𑀁 ¶ 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀓𑀧𑁆𑀧𑀺𑀬𑀮𑁄𑀳𑀪𑀡𑁆𑀟𑁂 𑀅𑀜𑁆𑀚𑀦𑀻 𑀅𑀜𑁆𑀚𑀦𑀺𑀲𑀮𑀸𑀓𑀸 𑀓𑀡𑁆𑀡𑀫𑀮𑀳𑀭𑀡𑀻 𑀲𑀽𑀘𑀺 𑀧𑀡𑁆𑀡𑀲𑀽𑀘𑀺 𑀔𑀼𑀤𑁆𑀤𑀓𑁄 𑀧𑀺𑀧𑁆𑀨𑀮𑀓𑁄 𑀔𑀼𑀤𑁆𑀤𑀓𑀁 𑀆𑀭𑀓𑀡𑁆𑀝𑀓𑀁 𑀓𑀼𑀜𑁆𑀘𑀺𑀓𑀸 𑀢𑀸𑀴𑀁 𑀓𑀢𑁆𑀢𑀭𑀬𑀝𑁆𑀞𑀺𑀯𑁂𑀥𑀓𑁄 𑀦𑀢𑁆𑀣𑀼𑀤𑀸𑀦𑀁 𑀪𑀺𑀦𑁆𑀤𑀺𑀯𑀸𑀮𑁄 𑀮𑁄𑀳𑀓𑀽𑀝𑁄 𑀮𑁄𑀳𑀓𑀼𑀝𑁆𑀝𑀺 𑀮𑁄𑀳𑀕𑀼𑀴𑁄 𑀮𑁄𑀳𑀧𑀺𑀡𑁆𑀟𑀺 𑀮𑁄𑀳𑀅𑀭𑀡𑀻 𑀘𑀓𑁆𑀓𑀮𑀺𑀓𑀁 𑀅𑀜𑁆𑀜𑀫𑁆𑀧𑀺 𑀯𑀺𑀧𑁆𑀧𑀓𑀢𑀁 𑀮𑁄𑀳𑀪𑀡𑁆𑀟𑀁 𑀪𑀸𑀚𑀺𑀬’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑀘𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀥𑀽𑀫𑀦𑁂𑀢𑁆𑀢𑀦𑁆𑀢𑀺 𑀥𑀽𑀫𑀦𑀸𑀴𑀺𑀓𑀸. 𑀆𑀤𑀺-𑀲𑀤𑁆𑀤𑁂𑀦 ‘‘𑀨𑀸𑀮𑀤𑀻𑀧𑀭𑀼𑀓𑁆𑀔𑀤𑀻𑀧𑀓𑀧𑀮𑁆𑀮𑀓𑀑𑀮𑀫𑁆𑀩𑀓𑀤𑀻𑀧𑀓𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀭𑀽𑀧𑀓𑀸𑀦𑀺 𑀧𑀦 𑀅𑀜𑁆𑀜𑀸𑀦𑀺 𑀯𑀸 𑀪𑀺𑀢𑁆𑀢𑀺𑀘𑁆𑀙𑀤𑀦𑀓𑀯𑀸𑀝𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀸𑀦𑀺 𑀅𑀦𑁆𑀢𑀫𑀲𑁄 𑀮𑁄𑀳𑀔𑀺𑀮𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸𑀦𑀺 𑀮𑁄𑀳𑀪𑀡𑁆𑀟𑀸𑀦𑀺 𑀕𑀭𑀼𑀪𑀡𑁆𑀟𑀸𑀦𑀺𑀬𑁂𑀯 𑀳𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑀼𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁮𑁬𑁧. 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀫𑁆𑀧𑀺 𑀢𑀁 𑀮𑁄𑀳𑀪𑀡𑁆𑀟𑀁 𑀓𑀺𑀜𑁆𑀘𑀺𑀧𑀺 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁬𑁨. 𑀓𑀁𑀲𑀯𑀝𑁆𑀝𑀮𑁄𑀳𑀸𑀦𑀁 𑀯𑀺𑀓𑀸𑀭𑀪𑀽𑀢𑀸𑀦𑀺 𑀢𑀫𑁆𑀩𑀫𑀬𑀪𑀸𑀚𑀦𑀸𑀦𑀺𑀧𑀺 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀲𑀩𑁆𑀩𑀲𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁬𑁩. 𑀏𑀲𑁂𑀯 𑀦𑀬𑁄𑀢𑀺 ‘‘𑀦 𑀧𑀼𑀕𑁆𑀕𑀮𑀺𑀓𑀪𑁄𑀕𑁂𑀦𑀸’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀦𑀬𑁄. 𑀲𑀗𑁆𑀖𑀺𑀓𑁂𑀲𑀼 𑀯𑀸 𑀕𑀺𑀳𑀻𑀦𑀁 𑀲𑀦𑁆𑀢𑀓𑁂𑀲𑀼 𑀯𑀸 𑀬𑀣𑀸𑀯𑀼𑀢𑁆𑀢𑀪𑀡𑁆𑀟𑁂𑀲𑀼 𑀧𑀭𑀺𑀪𑁄𑀕𑀧𑀘𑁆𑀘𑀬𑀸 𑀤𑁄𑀲𑁄 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀓𑀁𑀲𑀮𑁄𑀳𑀸𑀤𑀺𑀪𑀸𑀚𑀦𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁆𑀧𑀺 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀺, 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. ‘‘𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦𑁂𑀯 ¶ 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀘𑁂 𑀆𑀭𑀸𑀫𑀺𑀓𑀸𑀤𑀬𑁄 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀝𑀺𑀤𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁮𑁬𑁪. 𑀔𑀻𑀭𑀧𑀸𑀲𑀸𑀡𑀦𑁆𑀢𑀺 𑀫𑀼𑀤𑀼𑀓𑀸 𑀧𑀸𑀡𑀚𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀕𑀡𑁆𑀞𑀺𑀧𑀤𑁂 ‘‘𑀔𑀻𑀭𑀧𑀸𑀲𑀸𑀡𑁄 𑀦𑀸𑀫 𑀫𑀼𑀤𑀼𑀓𑁄 𑀧𑀸𑀲𑀸𑀡𑁄’’𑀢𑀺. 𑀕𑀭𑀼𑀓𑀦𑁆𑀢𑀺 𑀕𑀭𑀼𑀪𑀡𑁆𑀟𑀁. 𑀢𑀝𑁆𑀝𑀓𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀭𑀓𑀸𑀤𑀻𑀦𑀁 ¶ 𑀲𑀗𑁆𑀕𑀳𑁄. 𑀖𑀝𑀓𑁄𑀢𑀺 𑀔𑀻𑀭𑀧𑀸𑀲𑀸𑀡𑀫𑀬𑁄𑀬𑁂𑀯 𑀯𑀸𑀭𑀓𑁄. ‘‘𑀧𑀸𑀤𑀕𑀡𑁆𑀳𑀦𑀢𑁄 𑀉𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀤𑀕𑀡𑁆𑀳𑀦𑀓𑁄 𑀅𑀕𑀭𑀼𑀪𑀡𑁆𑀟𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁮𑁬𑁫. ‘‘𑀲𑀼𑀯𑀡𑁆𑀡𑀭𑀚𑀢𑀳𑀸𑀭𑀓𑀽𑀝𑀚𑀸𑀢𑀺𑀨𑀮𑀺𑀓𑀪𑀸𑀚𑀦𑀸𑀦𑀺 𑀕𑀺𑀳𑀺𑀯𑀺𑀓𑀢𑀸𑀦𑀺𑀧𑀺 𑀦 𑀯𑀝𑁆𑀝𑀦𑁆𑀢𑀺, 𑀧𑀕𑁂𑀯 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀺𑀗𑁆𑀕𑀻’’𑀢𑀺𑀆𑀤𑀺. 𑀲𑀺𑀗𑁆𑀕𑀻𑀢𑀺 𑀲𑀼𑀯𑀡𑁆𑀡𑀁. 𑀲𑀚𑁆𑀛𑀼 𑀭𑀚𑀢𑀁. 𑀳𑀸𑀭𑀓𑀽𑀝𑀁 𑀦𑀸𑀫 𑀲𑀼𑀯𑀡𑁆𑀡𑀯𑀡𑁆𑀡𑀁 𑀮𑁄𑀳𑀚𑀸𑀢𑀁. 𑀨𑀮𑀺𑀓𑁂𑀦 𑀉𑀩𑁆𑀪𑀯𑀁 𑀚𑀸𑀢𑀁, 𑀨𑀮𑀺𑀓𑀫𑀬𑀁 𑀪𑀸𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀺𑀳𑀻𑀦𑀁 𑀲𑀦𑁆𑀢𑀓𑀸𑀦𑀺𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀕𑀺𑀳𑀺𑀯𑀺𑀓𑀢𑀧𑀭𑀺𑀪𑁄𑀕𑁂𑀦𑀸𑀧𑀺 𑀢𑀸𑀯 𑀦 𑀯𑀝𑁆𑀝𑀦𑁆𑀢𑀺, 𑀧𑀕𑁂𑀯 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸𑀢𑀺 𑀤𑀻𑀧𑁂𑀢𑀺. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀦 𑀆𑀫𑀸𑀲𑀫𑁆𑀧𑀺 𑀅𑀦𑀸𑀫𑀸𑀲𑀫𑁆𑀧𑀺 𑀲𑀩𑁆𑀩𑀁 𑀯𑀝𑁆𑀝𑀢𑀺.

𑁨𑁮𑁬𑁬. 𑀔𑀼𑀤𑁆𑀤𑀸𑀢𑀺 𑀬𑀸𑀬 𑀯𑀸𑀲𑀺𑀬𑀸 𑀞𑀧𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀁 𑀯𑀸 𑀉𑀘𑁆𑀙𑀼𑀢𑀘𑁆𑀙𑀦𑀁 𑀯𑀸 𑀅𑀜𑁆𑀜𑀁 𑀫𑀳𑀸𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀭𑀽𑀧𑀸 𑀔𑀼𑀤𑁆𑀤𑀓𑀸 𑀯𑀸𑀲𑀺 𑀪𑀸𑀚𑀦𑀻𑀬𑀸. 𑀫𑀳𑀢𑁆𑀢𑀭𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀫𑀸𑀡𑀸𑀬 𑀯𑀸𑀲𑀺𑀬𑀸 𑀫𑀳𑀦𑁆𑀢𑀢𑀭𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀓𑀢𑀯𑀸𑀲𑀺 𑀕𑀭𑀼𑀪𑀡𑁆𑀟𑀁. 𑀯𑁂𑀚𑁆𑀚𑀸𑀦𑀁 𑀲𑀺𑀭𑀸𑀯𑁂𑀥𑀦𑀓𑀫𑁆𑀧𑀺 𑀘 𑀨𑀭𑀲𑀼 𑀢𑀣𑀸 𑀕𑀭𑀼𑀪𑀡𑁆𑀟𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁬𑁭. 𑀓𑀼𑀞𑀸𑀭𑀻𑀢𑀺 ¶ 𑀏𑀢𑁆𑀣 𑀨𑀭𑀲𑀼𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀬𑀸 𑀧𑀦 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸, 𑀅𑀬𑀁 𑀅𑀦𑀸𑀫𑀸𑀲𑀸. 𑀓𑀼𑀤𑀸𑀮𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀺. 𑀲𑀺𑀔𑀭𑀦𑁆𑀢𑀺 𑀥𑀦𑀼𑀭𑀚𑁆𑀚𑀼𑀢𑁄 𑀦𑀸𑀫𑁂𑀢𑁆𑀯𑀸 𑀤𑀸𑀭𑀼𑀆𑀤𑀻𑀦𑀁 𑀯𑀺𑀚𑁆𑀛𑀦𑀓𑀓𑀡𑁆𑀝𑀓𑁄. 𑀢𑁂𑀦𑁂𑀯𑀸𑀢𑀺 𑀦𑀺𑀔𑀸𑀤𑀦𑁂𑀦𑁂𑀯.

𑁨𑁮𑁬𑁮. 𑀦𑀺𑀔𑀸𑀤𑀦𑀲𑁆𑀲 𑀪𑁂𑀤𑀯𑀦𑁆𑀢𑀢𑀸𑀬 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀘𑀢𑀼𑀭𑀲𑁆𑀲𑀫𑀼𑀔𑀁 𑀤𑁄𑀡𑀺𑀫𑀼𑀔’’𑀦𑁆𑀢𑀺. 𑀤𑁄𑀡𑀺𑀫𑀼𑀔𑀦𑁆𑀢𑀺 𑀤𑁄𑀡𑀺 𑀯𑀺𑀬 𑀉𑀪𑀬𑀧𑀲𑁆𑀲𑁂𑀦 𑀦𑀸𑀫𑀺𑀢𑀫𑀼𑀔𑀁. 𑀯𑀗𑁆𑀓𑀦𑁆𑀢𑀺 𑀅𑀕𑁆𑀕𑀢𑁄 𑀦𑀸𑀫𑁂𑀢𑁆𑀯𑀸 𑀓𑀢𑀦𑀺𑀔𑀸𑀤𑀦𑀁. 𑀧𑀺-𑀲𑀤𑁆𑀤𑁂𑀦 𑀉𑀚𑀼𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀘𑀸𑀢𑀺 𑀢𑀲𑁆𑀫𑀺𑀁 𑀦𑀺𑀔𑀸𑀤𑀦𑁂. 𑀲𑀤𑀡𑁆𑀟𑀁 𑀔𑀼𑀤𑁆𑀤𑀓𑀜𑁆𑀘 𑀦𑀺𑀔𑀸𑀤𑀦𑀁 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀤𑀡𑁆𑀟𑀁 𑀔𑀼𑀤𑁆𑀤𑀓’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀦𑀤𑁆𑀯𑀬𑁂𑀦 𑀅𑀤𑀡𑁆𑀟𑀁 𑀨𑀮𑀫𑀢𑁆𑀢𑀁 𑀲𑀺𑀧𑀸𑀝𑀺𑀓𑀸𑀬 𑀞𑀧𑁂𑀢𑁆𑀯𑀸 𑀧𑀭𑀺𑀳𑀭𑀡𑀬𑁄𑀕𑁆𑀕𑀁 𑀲𑀫𑁆𑀫𑀚𑁆𑀚𑀦𑀺𑀤𑀡𑁆𑀟𑀯𑁂𑀥𑀦𑀓𑀁 𑀦𑀺𑀔𑀸𑀤𑀦𑀁 𑀅𑀕𑀭𑀼𑀪𑀡𑁆𑀟𑀁, 𑀢𑀢𑁄 𑀫𑀳𑀦𑁆𑀢𑀁 𑀦𑀺𑀔𑀸𑀤𑀦𑀁 𑀅𑀤𑀡𑁆𑀟𑀫𑁆𑀧𑀺 𑀕𑀭𑀼𑀪𑀡𑁆𑀟𑀦𑁆𑀢𑀺 𑀤𑀻𑀧𑁂𑀢𑀺. 𑀬𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀯𑀺𑀳𑀸𑀭𑁂 𑀯𑀸𑀲𑀺𑀆𑀤𑀻𑀦𑀺 𑀤𑀺𑀦𑁆𑀦𑀸𑀦𑀺 𑀘 𑀳𑁄𑀦𑁆𑀢𑀺, 𑀢𑁂 𑀘𑁂 𑀖𑀭𑁂 𑀤𑀟𑁆𑀠𑁂 𑀯𑀸 𑀘𑁄𑀭𑁂𑀳𑀺 𑀯𑀸 𑀯𑀺𑀮𑀼𑀢𑁆𑀢𑁂 ‘‘𑀤𑁂𑀣 𑀦𑁄, 𑀪𑀦𑁆𑀢𑁂, 𑀉𑀧𑀓𑀭𑀡𑁂 ¶ 𑀧𑀼𑀦 𑀧𑀸𑀓𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀤𑀸𑀢𑀩𑁆𑀩𑀸. 𑀲𑀘𑁂 𑀆𑀳𑀭𑀦𑁆𑀢𑀺, 𑀦 𑀯𑀸𑀭𑁂𑀢𑀩𑁆𑀩𑀸, 𑀅𑀦𑀸𑀳𑀭𑀦𑁆𑀢𑀸𑀧𑀺 𑀦 𑀘𑁄𑀤𑁂𑀢𑀩𑁆𑀩𑀸.

𑁨𑁮𑁬𑁯. ‘‘𑀓𑀫𑁆𑀫𑀸𑀭𑀢𑀝𑁆𑀝𑀓𑀸𑀭𑀘𑀼𑀦𑁆𑀤𑀓𑀸𑀭𑀦𑀴𑀓𑀸𑀭𑀫𑀡𑀺𑀓𑀸𑀭𑀧𑀢𑁆𑀢𑀩𑀦𑁆𑀥𑀓𑀸𑀦𑀁 𑀅𑀥𑀺𑀓𑀭𑀡𑀺𑀫𑀼𑀝𑁆𑀞𑀺𑀓𑀲𑀡𑁆𑀟𑀸𑀲𑀢𑀼𑀮𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀮𑁄𑀳𑀫𑀬𑀉𑀧𑀓𑀭𑀡𑀸𑀦𑀺 𑀲𑀗𑁆𑀖𑁂 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀸𑀦𑀺. 𑀢𑀺𑀧𑀼𑀓𑁄𑀝𑁆𑀝𑀓𑀲𑀼𑀯𑀡𑁆𑀡𑀓𑀸𑀭𑀘𑀫𑁆𑀫𑀓𑀸𑀭𑀉𑀧𑀓𑀭𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀺𑀧𑀼𑀓𑁄𑀝𑁆𑀝𑀓𑀉𑀧𑀓𑀭𑀡𑁂𑀲𑀼𑀧𑀺 𑀢𑀺𑀧𑀼𑀘𑁆𑀙𑁂𑀤𑀦𑀲𑀢𑁆𑀣𑀓𑀁, 𑀲𑀼𑀯𑀡𑁆𑀡𑀓𑀸𑀭𑀉𑀧𑀓𑀭𑀡𑁂𑀲𑀼 𑀲𑀼𑀯𑀡𑁆𑀡𑀘𑁆𑀙𑁂𑀤𑀦𑀲𑀢𑁆𑀣𑀓𑀁, 𑀘𑀫𑁆𑀫𑀓𑀸𑀭𑀉𑀧𑀓𑀭𑀡𑁂𑀲𑀼 𑀓𑀢𑀧𑀭𑀺𑀓𑀫𑁆𑀫𑀘𑀫𑁆𑀫𑀙𑀺𑀦𑁆𑀤𑀦𑀓𑀁 𑀔𑀼𑀤𑁆𑀤𑀓𑀲𑀢𑁆𑀣𑀦𑁆𑀢𑀺 𑀇𑀫𑀸𑀦𑀺 𑀪𑀸𑀚𑀦𑀻𑀬𑀪𑀡𑁆𑀟𑀸𑀦𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑁂𑀓𑀤𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀼𑀝𑁆𑀞𑀺𑀓’’𑀦𑁆𑀢𑀺𑀆𑀤𑀺 ¶ . 𑀢𑀼𑀮𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀓𑀢𑁆𑀢𑀭𑀺𑀆𑀤𑀺𑀉𑀧𑀓𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁮𑁭𑁦. ‘‘𑀦𑀳𑀸𑀧𑀺𑀢𑀢𑀼𑀦𑁆𑀦𑀓𑀸𑀭𑀸𑀦𑀁 𑀉𑀧𑀓𑀭𑀡𑁂𑀲𑀼𑀧𑀺 𑀞𑀧𑁂𑀢𑁆𑀯𑀸 𑀫𑀳𑀸𑀓𑀢𑁆𑀢𑀭𑀺𑀁, 𑀫𑀳𑀸𑀲𑀡𑁆𑀟𑀸𑀲𑀁, 𑀫𑀳𑀸𑀧𑀺𑀧𑁆𑀨𑀮𑀓𑀜𑁆𑀘 𑀲𑀩𑁆𑀩𑀁 𑀪𑀸𑀚𑀦𑀻𑀬𑀁. 𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺 𑀕𑀭𑀼𑀪𑀡𑁆𑀟𑀸𑀦𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀅𑀝𑁆𑀞𑀓𑀣𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑁆𑀳𑀸𑀧𑀺𑀢𑀓𑀲𑁆𑀲𑀸’’𑀢𑀺𑀆𑀤𑀺. 𑀦𑁆𑀳𑀸𑀧𑀺𑀢𑀓𑀲𑁆𑀲 𑀉𑀧𑀓𑀭𑀡𑁂𑀲𑀼 𑀲𑀡𑁆𑀟𑀸𑀲𑁄, 𑀫𑀳𑀢𑁆𑀢𑀭𑀻 𑀓𑀢𑁆𑀢𑀭𑀻 𑀘 𑀢𑀼𑀦𑁆𑀦𑀓𑀸𑀭𑀸𑀦𑀜𑁆𑀘 𑀉𑀧𑀓𑀭𑀡𑁂𑀲𑀼 𑀫𑀳𑀢𑁆𑀢𑀭𑀻 𑀓𑀢𑁆𑀢𑀭𑀻 𑀘 𑀫𑀳𑀸𑀧𑀺𑀧𑁆𑀨𑀮𑀓𑀜𑁆𑀘 𑀕𑀭𑀼𑀪𑀡𑁆𑀟𑀓𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁭𑁧. 𑀏𑀢𑁆𑀢𑀸𑀯𑀢𑀸 𑀘𑀢𑀼𑀢𑁆𑀣𑀕𑀭𑀼𑀪𑀡𑁆𑀟𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀘𑀫𑀕𑀭𑀼𑀪𑀡𑁆𑀟𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀮𑁆𑀮𑀻’’𑀢𑀺𑀆𑀤𑀺. 𑀯𑁂𑀢𑁆𑀢𑀮𑀢𑀸𑀤𑀺𑀓𑀸 𑀯𑀮𑁆𑀮𑀺 𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀸 𑀯𑀸 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀪𑀽𑀫𑀺𑀬𑀁 𑀚𑀸𑀢𑀸, 𑀭𑀓𑁆𑀔𑀺𑀢𑀸 𑀕𑁄𑀧𑀺𑀢𑀸 𑀯𑀸 𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀟𑁆𑀠𑀩𑀸𑀳𑀽𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀅𑀟𑁆𑀠𑀩𑀸𑀳𑀼 𑀦𑀸𑀫 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀘𑁂 𑀲𑀸 𑀯𑀮𑁆𑀮𑀺 𑀲𑀗𑁆𑀖𑀓𑀫𑁆𑀫𑁂, 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑀸 𑀳𑁄𑀢𑀺, 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀭𑀓𑁆𑀔𑀺𑀢𑀸 𑀧𑀦 𑀕𑀭𑀼𑀪𑀡𑁆𑀟𑀫𑁂𑀯 𑀦 𑀳𑁄𑀢𑀺.

𑁨𑁮𑁭𑁨. 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑁆𑀢𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀘𑀫𑁆𑀫𑀫𑀬𑀸 𑀭𑀚𑁆𑀚𑀼𑀓𑀸 𑀯𑀸 𑀬𑁄𑀢𑁆𑀢𑀸𑀦𑀺 𑀯𑀸 𑀯𑀸𑀓𑁂 𑀘 𑀦𑀸𑀴𑀺𑀓𑁂𑀭𑀳𑀻𑀭𑁂 𑀘 𑀯𑀝𑁆𑀝𑁂𑀢𑁆𑀯𑀸 𑀓𑀢𑀸 𑀏𑀓𑀯𑀝𑁆𑀝𑀸 𑀯𑀸 𑀤𑁆𑀯𑀺𑀯𑀝𑁆𑀝𑀸 𑀯𑀸 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁. 𑀲𑀼𑀢𑁆𑀢𑀁 𑀧𑀦 𑀅𑀯𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀁, 𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀸 𑀘 𑀪𑀸𑀚𑀦𑀻𑀬𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀆𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀼𑀢𑁆𑀢𑀯𑀸𑀓𑀸𑀤𑀺𑀦𑀺𑀩𑁆𑀩𑀢𑁆𑀢𑀸’’𑀢𑀺𑀆𑀤𑀺. 𑀯𑀸𑀓𑀸𑀤𑀻𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀘𑀫𑁆𑀫𑀸𑀦𑀁 𑀕𑀳𑀡𑀁. 𑀦𑀸𑀢𑀺𑀤𑀻𑀖𑀸 𑀭𑀚𑁆𑀚𑀼𑀓𑀸. 𑀅𑀢𑀺𑀤𑀻𑀖𑀁 𑀬𑁄𑀢𑁆𑀢𑀓𑀁.

𑁨𑁮𑁭𑁩. 𑀦𑀸𑀴𑀺𑀓𑁂𑀭𑀲𑁆𑀲 ¶ 𑀳𑀻𑀭𑁂 𑀯𑀸 𑀫𑀓𑀘𑀺𑀯𑀸𑀓𑁂 𑀯𑀸 𑀯𑀝𑁆𑀝𑁂𑀢𑁆𑀯𑀸 𑀓𑀢𑀸 𑀏𑀓𑀯𑀝𑁆𑀝𑀸𑀧𑀺 𑀕𑀭𑀼𑀪𑀡𑁆𑀟𑀓𑀦𑁆𑀢𑀺 𑀬𑁄𑀚𑀦𑀸. 𑀬𑁂𑀳𑀺 𑀧𑀦𑁂𑀢𑀸𑀦𑀺 𑀭𑀚𑁆𑀚𑀼𑀓𑀬𑁄𑀢𑁆𑀢𑀸𑀤𑀻𑀦𑀺 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀅𑀢𑁆𑀢𑀦𑁄 𑀓𑀭𑀡𑀻𑀬𑁂𑀦 𑀳𑀭𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸.

𑁨𑁮𑁭𑁪. 𑀯𑀟𑁆𑀠𑀓𑀺𑀅𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀸𑀬𑀢𑁄 𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄 𑀧𑀭𑀺𑀡𑀸𑀳𑀢𑁄 𑀲𑀻𑀳𑀴𑀤𑀻𑀧𑁂 𑀮𑁂𑀔𑀓𑀸𑀦𑀁 𑀮𑁂𑀔𑀦𑀺𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀯𑀸 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀯𑁂𑀴𑀼 𑀕𑀭𑀼𑀪𑀡𑁆𑀟𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀬𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀬𑀸 𑀅𑀕𑁆𑀕𑀧𑁆𑀧𑀫𑀸𑀡𑀁, 𑀇𑀤𑀁 𑀲𑀻𑀳𑀴𑀤𑀻𑀧𑁂 𑀮𑁂𑀔𑀓𑀸𑀦𑀁 𑀮𑁂𑀔𑀦𑀺𑀲𑀽𑀘𑀺𑀬𑀸 𑀧𑀫𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑁄 𑀘 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑁄 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁭𑁫. 𑀤𑀡𑁆𑀟𑁄 𑀘 𑀲𑀮𑀸𑀓𑀸 𑀘 𑀤𑀡𑁆𑀟𑀲𑀮𑀸𑀓𑀸, 𑀙𑀢𑁆𑀢𑀲𑁆𑀲 𑀤𑀡𑁆𑀟𑀲𑀮𑀸𑀓𑀸𑀢𑀺 𑀯𑀺𑀕𑁆𑀕𑀳𑁄. 𑀙𑀢𑁆𑀢𑀤𑀡𑁆𑀟𑁄 𑀦𑀸𑀫 𑀙𑀢𑁆𑀢𑀧𑀺𑀡𑁆𑀟𑀺. 𑀙𑀢𑁆𑀢𑀲𑀮𑀸𑀓𑀸𑀢𑀺 𑀙𑀢𑁆𑀢𑀧𑀜𑁆𑀚𑀭𑀲𑀮𑀸𑀓𑀸. 𑀤𑀡𑁆𑀟𑁄𑀢𑀺 𑀉𑀧𑀸𑀳𑀦𑀤𑀡𑁆𑀟𑀓𑁄. ‘‘𑀤𑀡𑁆𑀟𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀕𑀢𑁂𑀲𑀼 𑀲𑀭𑀽𑀧𑁂𑀦 𑀇𑀥𑀸𑀯𑀼𑀢𑁆𑀢𑁄 𑀉𑀧𑀸𑀳𑀦𑀤𑀡𑁆𑀟𑁄𑀬𑁂𑀯 𑀲𑀸𑀫𑀜𑁆𑀜𑀯𑀘𑀦𑁂𑀦 𑀧𑀸𑀭𑀺𑀲𑁂𑀲𑀢𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀤𑀟𑁆𑀠𑀕𑁂𑀳𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀦 𑀯𑀸𑀭𑁂𑀢𑀩𑁆𑀩𑀸.

𑁨𑁮𑁭𑁬. 𑀫𑀼𑀜𑁆𑀚𑀸𑀤𑀻𑀲𑀼 𑀕𑁂𑀳𑀘𑁆𑀙𑀤𑀦𑀸𑀭𑀳𑁂𑀲𑀼 𑀢𑀺𑀡𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀫𑀼𑀝𑁆𑀞𑀺𑀫𑀢𑁆𑀢𑀁 𑀢𑀺𑀡𑀁 𑀯𑀸 𑀕𑁂𑀳𑀘𑁆𑀙𑀤𑀦𑀸𑀭𑀳𑀁 𑀢𑀸𑀮𑀧𑀡𑁆𑀡𑀸𑀤𑀺 𑀏𑀓𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀢𑀢𑁆𑀣 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀚𑀸𑀢𑀁 𑀯𑀸 𑀕𑀭𑀼𑀪𑀡𑁆𑀟𑀁 𑀲𑀺𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀢𑀢𑁆𑀣 𑀫𑀼𑀝𑁆𑀞𑀺𑀫𑀢𑁆𑀢𑀁 𑀦𑀸𑀫 𑀓𑀭𑀴𑀫𑀢𑁆𑀢𑀁. 𑀇𑀤𑀜𑁆𑀘 𑀓𑀭𑀴𑀁 𑀓𑀢𑁆𑀯𑀸 𑀙𑀸𑀤𑁂𑀦𑁆𑀢𑀸𑀦𑀁 𑀙𑀤𑀦𑀓𑀭𑀴𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀢𑀸𑀮𑀧𑀡𑁆𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀺𑀕𑁂𑀳𑀘𑁆𑀙𑀤𑀦𑀧𑀡𑁆𑀡𑀸𑀦𑀁 𑀕𑀳𑀡𑀁. 𑀢𑀫𑁆𑀧𑀺 𑀫𑀼𑀜𑁆𑀚𑀸𑀤𑀺 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀤𑀟𑁆𑀠𑀕𑁂𑀳𑀫𑀦𑀼𑀲𑁆𑀲𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀦 𑀯𑀸𑀭𑁂𑀢𑀩𑁆𑀩𑀸𑀢𑀺.

𑁨𑁮𑁭𑁭-𑁮. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀢𑀺 ¶ 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄. 𑀓𑁂𑀘𑀺 ‘‘𑀧𑀼𑀣𑀼𑀮𑀢𑁄’’𑀢𑀺 𑀯𑀤𑀦𑁆𑀢𑀺. 𑀭𑀺𑀢𑁆𑀢𑀧𑁄𑀢𑁆𑀣𑀓𑁄𑀢𑀺 𑀮𑁂𑀔𑀸𑀳𑀺 𑀲𑀼𑀜𑁆𑀜𑀧𑁄𑀢𑁆𑀣𑀓𑁄, 𑀦 𑀮𑀺𑀔𑀺𑀢𑀧𑁄𑀢𑁆𑀣𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄’’𑀢𑀺 ¶ 𑀇𑀫𑀺𑀦𑀸 𑀅𑀝𑁆𑀞𑀗𑁆𑀕𑀼𑀮𑀢𑁄 𑀊𑀦𑀧𑁆𑀧𑀫𑀸𑀡𑁄 𑀪𑀸𑀚𑀺𑀬𑁄, ‘‘𑀭𑀺𑀢𑁆𑀢𑀧𑁄𑀢𑁆𑀣𑀓𑁄’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄𑀧𑀺 𑀮𑀺𑀔𑀺𑀢𑀧𑁄𑀢𑁆𑀣𑀓𑁄 𑀪𑀸𑀚𑀺𑀬𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀫𑀢𑁆𑀢𑀺𑀓𑀸 𑀧𑀓𑀢𑀺𑀫𑀢𑁆𑀢𑀺𑀓𑀸 𑀯𑀸 𑀳𑁄𑀢𑀼 𑀧𑀜𑁆𑀘𑀯𑀡𑁆𑀡𑀸 𑀯𑀸 𑀲𑀼𑀥𑀸 𑀯𑀸 𑀲𑀚𑁆𑀚𑀼𑀭𑀲𑀓𑀗𑁆𑀕𑀼𑀝𑁆𑀞𑀲𑀺𑀮𑁂𑀲𑀸𑀤𑀻𑀲𑀼 𑀯𑀸 𑀬𑀁 𑀓𑀺𑀜𑁆𑀘𑀺 𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀆𑀦𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀁 𑀢𑀢𑁆𑀣𑀚𑀸𑀢𑀓𑀁 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀢𑀸𑀮𑀨𑀮𑀧𑀓𑁆𑀓𑀫𑀢𑁆𑀢𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀅𑀝𑁆𑀞𑀓𑀣𑀸𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀢𑁆𑀢𑀺𑀓𑀸’’𑀢𑀺𑀆𑀤𑀺. 𑀧𑀸𑀓𑀢𑀺𑀓𑀸 𑀯𑀸 𑀲𑁂𑀢𑀕𑁂𑀭𑀼𑀓𑀸𑀤𑀺𑀧𑀜𑁆𑀘𑀯𑀡𑁆𑀡𑀸 𑀯𑀸𑀧𑀺 𑀫𑀢𑁆𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀲𑀺𑀮𑁂𑀲𑁄 𑀦𑀸𑀫 𑀓𑀩𑀺𑀝𑁆𑀞𑀸𑀤𑀺𑀲𑀺𑀮𑁂𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀲𑀚𑁆𑀚𑀼𑀭𑀲𑀓𑀗𑁆𑀕𑀼𑀝𑁆𑀞𑀸𑀤𑀻𑀦𑀁 𑀕𑀳𑀡𑀁. 𑀢𑀸𑀮𑀧𑀓𑁆𑀓𑀧𑀫𑀸𑀡𑀦𑁆𑀢𑀺 𑀏𑀓𑀝𑁆𑀞𑀺𑀢𑀸𑀮𑀨𑀮𑀧𑀫𑀸𑀡𑀸𑀧𑀺. 𑀢𑀫𑁆𑀧𑀺 𑀫𑀢𑁆𑀢𑀺𑀓𑀸𑀤𑀺 𑀲𑀗𑁆𑀖𑀓𑀫𑁆𑀫𑁂, 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀦𑀺𑀝𑁆𑀞𑀺𑀢𑁂 𑀅𑀢𑀺𑀭𑁂𑀓𑀁 𑀧𑀼𑀕𑁆𑀕𑀮𑀺𑀓𑀓𑀫𑁆𑀫𑁂 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁭𑁯-𑁮𑁦. ‘‘𑀯𑁂𑀴𑀼𑀆𑀤𑀺𑀓’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀭𑀓𑁆𑀔𑀺𑀢𑀁 𑀕𑁄𑀧𑀺𑀢𑀁 𑀯𑀸𑀧𑀺 𑀕𑀡𑁆𑀳𑀢𑀸 𑀲𑀫𑀓𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀣𑀸𑀯𑀭𑀁 𑀅𑀦𑁆𑀢𑀫𑀲𑁄 𑀢𑀁𑀅𑀕𑁆𑀖𑀦𑀓𑀁 𑀯𑀸𑀮𑀺𑀓𑀫𑁂𑀯 𑀯𑀸 𑀤𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀯𑁂𑀴𑀼𑀁 𑀕𑀡𑁆𑀳𑀦𑁆𑀢𑁂𑀦 𑀲𑀫𑀓𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀣𑀸𑀯𑀭𑀁 𑀅𑀦𑁆𑀢𑀫𑀲𑁄 𑀢𑀁𑀅𑀕𑁆𑀖𑀦𑀓𑀯𑀸𑀮𑀺𑀓𑀸𑀬𑀧𑀺 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀨𑀸𑀢𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀦 𑀢𑀢𑁆𑀣𑁂𑀯 𑀯𑀴𑀜𑁆𑀚𑁂𑀢𑀩𑁆𑀩𑁄, 𑀕𑀫𑀦𑀓𑀸𑀮𑁂 𑀲𑀗𑁆𑀖𑀺𑀓𑁂 𑀆𑀯𑀸𑀲𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀕𑀳𑁂𑀢𑁆𑀯𑀸 𑀕𑀢𑁂𑀦 ¶ 𑀧𑀦 𑀧𑀳𑀺𑀡𑀺𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀤𑁂𑀲𑀦𑁆𑀢𑀭𑀕𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑁂𑀴𑀼𑀫𑁆𑀳𑀺𑀬𑁂𑀯 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀇𑀥 𑀧𑀦 ‘‘𑀯𑀮𑁆𑀮𑀺𑀯𑁂𑀴𑀸𑀤𑀺𑀓𑀁 𑀓𑀺𑀜𑁆𑀘𑀻’’𑀢𑀺 𑀯𑀮𑁆𑀮𑀺𑀆𑀤𑀻𑀦𑀫𑁆𑀧𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀯𑀮𑁆𑀮𑀺𑀆𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁮𑁮𑁧. 𑀅𑀜𑁆𑀚𑀦𑀦𑁆𑀢𑀺 𑀲𑀺𑀮𑀸𑀫𑀬𑁄. 𑀏𑀯𑀁 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺.

𑁨𑁮𑁮𑁨. 𑀤𑀸𑀭𑀼𑀪𑀡𑁆𑀟𑁂 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀧𑀭𑀺𑀡𑀸𑀳𑀢𑁄 𑀬𑀣𑀸𑀯𑀼𑀢𑁆𑀢 𑀲𑀽𑀘𑀺𑀤𑀡𑁆𑀟𑀧𑁆𑀧𑀫𑀸𑀡𑀓𑁄 𑀅𑀝𑁆𑀞𑀗𑁆𑀕𑀼𑀮𑀤𑀻𑀖𑁄 𑀬𑁄 𑀓𑁄𑀘𑀺 𑀤𑀸𑀭𑀼𑀪𑀡𑁆𑀟𑀓𑁄 𑀤𑀸𑀭𑀼𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀯𑀸 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁮𑁩. 𑀏𑀯𑀁 ¶ 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬 𑀆𑀕𑀢𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀬 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀆𑀕𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀲𑀦𑁆𑀤𑀺𑀓𑀲𑀢𑁆𑀢𑀗𑁆𑀕𑀸 𑀯𑀼𑀢𑁆𑀢𑀮𑀓𑁆𑀔𑀡𑀸𑀯. ‘‘𑀪𑀤𑁆𑀤𑀧𑀻𑀞’’𑀦𑁆𑀢𑀺 𑀯𑁂𑀢𑁆𑀢𑀫𑀬𑀁 𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀧𑀻𑀞𑀺𑀓𑀸𑀢𑀺 𑀧𑀺𑀮𑁄𑀢𑀺𑀓𑀸𑀩𑀤𑁆𑀥𑀧𑀻𑀞𑀫𑁂𑀯.

𑁨𑁮𑁮𑁪. 𑀏𑀴𑀓𑀧𑀸𑀤𑀧𑀻𑀞𑀁 𑀦𑀸𑀫 𑀤𑀸𑀭𑀼𑀧𑀝𑁆𑀝𑀺𑀓𑀸𑀬 𑀉𑀧𑀭𑀺 𑀧𑀸𑀤𑁂 𑀞𑀧𑁂𑀢𑁆𑀯𑀸 𑀪𑁄𑀚𑀦𑀧𑀮𑁆𑀮𑀗𑁆𑀓𑀁 𑀯𑀺𑀬 𑀓𑀢𑀧𑀻𑀞𑀁 𑀯𑀼𑀘𑁆𑀘𑀢𑀺. ‘‘𑀆𑀫𑀮𑀓𑀯𑀝𑁆𑀝𑀓𑀧𑀻𑀞’’𑀦𑁆𑀢𑀺 𑀏𑀢𑀲𑁆𑀲 ‘‘𑀆𑀫𑀡𑁆𑀟𑀓𑀯𑀝𑁆𑀝𑀓’’𑀦𑁆𑀢𑀺 𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀉𑀪𑀬𑁂𑀦𑀸𑀧𑀺 𑀆𑀫𑀮𑀓𑀸𑀓𑀸𑀭𑁂𑀦 𑀬𑁄𑀚𑀺𑀢𑀁 𑀩𑀳𑀼𑀧𑀸𑀤𑀓𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀣𑀸𑀫𑀡𑁆𑀟𑀓𑀧𑀻𑀞𑀓’’𑀦𑁆𑀢𑀺 𑀧𑀸𑀞𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀫𑀡𑁆𑀟𑀓-𑀲𑀤𑁆𑀤𑀧𑀬𑁄𑀕𑁄. 𑀓𑁄𑀘𑁆𑀙𑀁 𑀪𑀽𑀢𑀕𑀸𑀫𑀯𑀕𑁆𑀕𑁂 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀲𑀭𑀽𑀧𑀁. 𑀧𑀮𑀸𑀮𑀧𑀻𑀞𑀦𑁆𑀢𑀺 𑀦𑀺𑀧𑀚𑁆𑀚𑀦𑀢𑁆𑀣𑀸𑀬 𑀓𑀢𑀸 𑀧𑀮𑀸𑀮𑀪𑀺𑀲𑀺, 𑀇𑀫𑀺𑀦𑀸 𑀓𑀤𑀮𑀺𑀧𑀢𑁆𑀢𑀸𑀤𑀺𑀫𑀬𑀧𑀻𑀞𑀫𑁆𑀧𑀺 𑀉𑀧𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀁. 𑀬𑀣𑀸𑀳 𑁋 ‘‘𑀧𑀮𑀸𑀮𑀧𑀻𑀞𑁂𑀦 𑀘𑁂𑀢𑁆𑀣 𑀓𑀤𑀮𑀺𑀧𑀢𑁆𑀢𑀸𑀤𑀺𑀧𑀻𑀞𑀸𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧). 𑀥𑁄𑀯𑀦𑁂 ¶ 𑀨𑀮𑀓𑀦𑁆𑀢𑀺 𑀘𑀻𑀯𑀭𑀥𑁄𑀯𑀦𑀨𑀮𑀓𑀁, 𑀥𑁄𑀯𑀦𑀸𑀤𑀺𑀲𑀤𑁆𑀤𑀸𑀦𑀁 𑀯𑀺𑀬𑁂𑀢𑁆𑀣 𑀯𑀺𑀪𑀢𑁆𑀢𑀺𑀅𑀮𑁄𑀧𑁄. 𑀇𑀫𑁂𑀲𑀼 𑀢𑀸𑀯 𑀬𑀁 𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀁 𑀯𑀸 𑀳𑁄𑀢𑀼 𑀫𑀳𑀦𑁆𑀢𑀁 𑀯𑀸, 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀩𑁆𑀬𑀕𑁆𑀖𑀘𑀫𑁆𑀫𑀑𑀦𑀤𑁆𑀥𑀫𑁆𑀧𑀺 𑀯𑀸𑀴𑀭𑀽𑀧𑀧𑀭𑀺𑀓𑁆𑀔𑀺𑀢𑁆𑀢𑀁 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀘𑁆𑀙𑀁 𑀕𑀭𑀼𑀪𑀡𑁆𑀟𑀫𑁂𑀯.

𑁨𑁮𑁮𑁫. 𑀪𑀡𑁆𑀟𑀺𑀓𑀸𑀢𑀺 𑀤𑀡𑁆𑀟𑀓𑀝𑁆𑀞𑀘𑁆𑀙𑁂𑀤𑀦𑀪𑀡𑁆𑀟𑀺𑀓𑀸. 𑀫𑀼𑀕𑁆𑀕𑀭𑁄𑀢𑀺 𑀤𑀡𑁆𑀟𑀫𑀼𑀕𑁆𑀕𑀭𑁄. 𑀤𑀡𑁆𑀟𑀫𑀼𑀕𑁆𑀕𑀭𑁄 𑀦𑀸𑀫 𑀬𑁂𑀦 𑀭𑀚𑀺𑀢𑀘𑀻𑀯𑀭𑀁 𑀧𑁄𑀣𑁂𑀦𑁆𑀢𑀺. 𑀯𑀢𑁆𑀣𑀖𑀝𑁆𑀝𑀦𑀫𑀼𑀕𑁆𑀕𑀭𑁄𑀢𑀺 𑀘𑀻𑀯𑀭𑀖𑀝𑁆𑀝𑀦𑀫𑀼𑀕𑁆𑀕𑀭𑁄, 𑀬𑁂𑀦 𑀅𑀦𑀼𑀯𑀸𑀢𑀸𑀤𑀺𑀁 𑀖𑀝𑁆𑀝𑁂𑀦𑁆𑀢𑀺. 𑀅𑀫𑁆𑀩𑀡𑀦𑁆𑀢𑀺 𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀺𑀲𑀤𑀺𑀲𑀁 𑀓𑀢𑀧𑀸𑀦𑀻𑀬𑀪𑀸𑀚𑀦𑀁. 𑀫𑀜𑁆𑀚𑀽𑀲𑀸 𑀦𑀸𑀫 𑀤𑁄𑀡𑀺𑀧𑁂𑀴𑀸. 𑀦𑀸𑀯𑀸 𑀧𑁄𑀢𑁄. 𑀭𑀚𑀦𑀤𑁄𑀡𑀺𑀓𑀸 𑀦𑀸𑀫 𑀬𑀢𑁆𑀣 𑀘𑀻𑀯𑀭𑀁 𑀭𑀚𑀦𑁆𑀢𑀺, 𑀧𑀓𑁆𑀓𑀭𑀚𑀦𑀁 𑀯𑀸 𑀆𑀓𑀺𑀭𑀦𑁆𑀢𑀺.

𑁨𑁮𑁮𑁬. 𑀉𑀴𑀼𑀗𑁆𑀓𑁄𑀢𑀺 𑀦𑀸𑀴𑀺𑀓𑁂𑀭𑀨𑀮𑀓𑀝𑀸𑀳𑀸𑀤𑀺𑀫𑀬𑁄 𑀉𑀴𑀼𑀗𑁆𑀓𑁄. 𑀉𑀪𑀬𑀁 𑀧𑀺𑀥𑀸𑀦𑀲𑀫𑀓𑁄 𑀲𑀫𑀼𑀕𑁆𑀕𑁄. ‘‘𑀔𑀼𑀤𑁆𑀤𑀓𑁄 𑀧𑀭𑀺𑀯𑀺𑀥𑀦𑁄 𑀓𑀭𑀡𑁆𑀟’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀭𑀡𑁆𑀟𑁄 𑀘 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀓𑀝𑀘𑁆𑀙𑀽𑀢𑀺 𑀤𑀩𑁆𑀩𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀦𑀻𑀬𑀲𑀭𑀸𑀯𑀧𑀸𑀦𑀻𑀬𑀲𑀗𑁆𑀔𑀸𑀤𑀻𑀦𑀁 𑀕𑀳𑀡𑀁.

𑁨𑁮𑁮𑁭. 𑀕𑁂𑀳𑀲𑀫𑁆𑀪𑀸𑀭𑀦𑁆𑀢𑀺 𑀕𑁂𑀳𑁄𑀧𑀓𑀭𑀡𑀁. 𑀣𑀫𑁆𑀪𑀢𑀼𑀮𑀸𑀲𑁄𑀧𑀸𑀦𑀨𑀮𑀓𑀸𑀤𑀺 𑀤𑀸𑀭𑀼𑀫𑀬𑀁, 𑀧𑀸𑀲𑀸𑀡𑀫𑀬𑀫𑁆𑀧𑀺 𑀇𑀫𑀺𑀦𑀸𑀯 𑀕𑀳𑀺𑀢𑀁. 𑀓𑀧𑁆𑀧𑀺𑀬𑀘𑀫𑁆𑀫𑀦𑁆𑀢𑀺 ‘‘𑀏𑀴𑀓𑀸𑀚𑀫𑀺𑀕𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀯𑀺. 𑀯𑀺. 𑁨𑁬𑁫𑁦) 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀁 𑀓𑀧𑁆𑀧𑀺𑀬𑀘𑀫𑁆𑀫𑀁. 𑀢𑀩𑁆𑀩𑀺𑀧𑀭𑀺𑀬𑀸𑀬𑀁 𑀅𑀓𑀧𑁆𑀧𑀺𑀬𑀁. 𑀅𑀪𑀸𑀚𑀺𑀬𑀁 𑀕𑀭𑀼𑀪𑀡𑁆𑀟𑀢𑁆𑀢𑀸. 𑀪𑀽𑀫𑀢𑁆𑀣𑀭𑀡𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁮𑁮𑁮. 𑀅𑀝𑁆𑀞𑀓𑀣𑀸𑀬𑀁 ¶ ‘‘𑀏𑀴𑀓𑀘𑀫𑁆𑀫𑀁 𑀧𑀦 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀢𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀏𑀴𑀘𑀫𑁆𑀫𑀁 𑀕𑀭𑀼𑀁 𑀯𑀼𑀢𑁆𑀢’’𑀦𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀲𑀩𑁆𑀩𑀁 𑀫𑀜𑁆𑀘𑀧𑁆𑀧𑀫𑀸𑀡𑀁 𑀘𑀫𑁆𑀫𑀁 𑀕𑀭𑀼𑀪𑀡𑁆𑀟’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) ¶ 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑁂𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀏𑀓𑁂, ‘‘𑀦𑁄’’𑀢𑀺 𑀅𑀧𑀭𑁂, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀫𑀜𑁆𑀘𑀧𑁆𑀧𑀫𑀸𑀡𑀦𑁆𑀢𑀺 𑀘 𑀧𑀫𑀸𑀡𑀬𑀼𑀢𑁆𑀢𑀁 𑀫𑀜𑁆𑀘𑀁. 𑀧𑀫𑀸𑀡𑀬𑀼𑀢𑁆𑀢𑀫𑀜𑁆𑀘𑁄 𑀦𑀸𑀫 𑀬𑀲𑁆𑀲 𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀢𑀺𑀭𑀺𑀬𑀜𑁆𑀘 𑀢𑀤𑀼𑀧𑀟𑁆𑀠𑀁. 𑀉𑀤𑁆𑀥𑀁 𑀫𑀼𑀔𑀫𑀲𑁆𑀲𑀸𑀢𑀺 𑀉𑀤𑀼𑀓𑁆𑀔𑀮𑀁. 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀲𑀮𑀁, 𑀲𑀼𑀧𑁆𑀧𑀁, 𑀦𑀺𑀲𑀤𑀁, 𑀦𑀺𑀲𑀤𑀧𑁄𑀢𑁄, 𑀧𑀸𑀲𑀸𑀡𑀤𑁄𑀡𑀺, 𑀧𑀸𑀲𑀸𑀡𑀓𑀝𑀸𑀳𑀜𑁆𑀘 𑀲𑀗𑁆𑀕𑀳𑀺𑀢𑀁. 𑀧𑁂𑀲𑀓𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀫𑁆𑀫𑀓𑀸𑀭𑀸𑀤𑀻𑀦𑀁 𑀕𑀳𑀡𑀁. 𑀢𑀼𑀭𑀺𑀯𑁂𑀫𑀸𑀤𑀺 𑀧𑁂𑀲𑀓𑀸𑀭𑀪𑀡𑁆𑀟𑀜𑁆𑀘 𑀪𑀲𑁆𑀢𑀸𑀤𑀺 𑀘𑀫𑁆𑀫𑀓𑀸𑀭𑀪𑀡𑁆𑀟𑀜𑁆𑀘 𑀓𑀲𑀺𑀪𑀡𑁆𑀟𑀜𑁆𑀘 𑀬𑀼𑀕𑀦𑀗𑁆𑀕𑀮𑀸𑀤𑀺 𑀲𑀗𑁆𑀖𑀺𑀓𑀁 𑀲𑀗𑁆𑀖𑀲𑀦𑁆𑀢𑀓𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁮𑁯. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀲𑀗𑁆𑀖𑀺𑀓’’𑀦𑁆𑀢𑀺 𑀇𑀤𑀁 𑀧𑀘𑁆𑀘𑀸𑀫𑀲𑀢𑀺. 𑀆𑀥𑀸𑀭𑀓𑁄𑀢𑀺 𑀧𑀢𑁆𑀢𑀸𑀥𑀸𑀭𑁄. 𑀢𑀸𑀮𑀯𑀡𑁆𑀝𑀦𑁆𑀢𑀺 𑀢𑀸𑀮𑀯𑀡𑁆𑀝𑁂𑀳𑀺 𑀓𑀢𑀁. 𑀯𑁂𑀴𑀼𑀤𑀦𑁆𑀢𑀯𑀺𑀮𑀻𑀯𑁂𑀳𑀺 𑀯𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀯𑀸 𑀘𑀫𑁆𑀫𑀯𑀺𑀓𑀢𑀻𑀳𑀺 𑀯𑀸 𑀓𑀢𑀫𑁆𑀧𑀺 𑀢𑀁𑀲𑀤𑀺𑀲𑀁 ‘‘𑀢𑀸𑀮𑀯𑀡𑁆𑀝’’𑀦𑁆𑀢𑁂𑀯 𑀯𑀼𑀘𑁆𑀘𑀢𑀺. 𑀯𑀝𑁆𑀝𑀯𑀺𑀥𑀽𑀧𑀦𑀸𑀦𑀁 𑀢𑀸𑀮𑀯𑀡𑁆𑀝𑁂𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀩𑀻𑀚𑀦𑀻’’𑀢𑀺 𑀘𑀢𑀼𑀭𑀲𑁆𑀲𑀯𑀺𑀥𑀽𑀧𑀦𑀜𑁆𑀘 𑀓𑁂𑀢𑀓𑀧𑀸𑀭𑁄𑀳𑀓𑀼𑀦𑁆𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀤𑀦𑁆𑀢𑀫𑀬𑀯𑀺𑀲𑀸𑀡𑀫𑀬𑀤𑀡𑁆𑀟𑀓𑀫𑀓𑀲𑀩𑀻𑀚𑀦𑀻 𑀘 𑀯𑀼𑀘𑁆𑀘𑀢𑀺. 𑀧𑀘𑁆𑀙𑀺 𑀧𑀸𑀓𑀝𑀸𑀬𑁂𑀯. 𑀧𑀘𑁆𑀙𑀺𑀢𑁄 𑀔𑀼𑀤𑁆𑀤𑀓𑁄 𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑁄 𑀪𑀸𑀚𑀦𑀯𑀺𑀲𑁂𑀲𑁄 𑀘𑀗𑁆𑀓𑁄𑀝𑀓𑀁. 𑀲𑀩𑁆𑀩𑀸 𑀲𑀫𑁆𑀫𑀚𑁆𑀚𑀦𑀻𑀢𑀺 𑀦𑀸𑀴𑀺𑀓𑁂𑀭𑀳𑀻𑀭𑀸𑀤𑀻𑀳𑀺 𑀩𑀤𑁆𑀥𑀸 𑀬𑀝𑁆𑀞𑀺𑀲𑀫𑁆𑀫𑀚𑁆𑀚𑀦𑀻, 𑀫𑀼𑀝𑁆𑀞𑀺𑀲𑀫𑁆𑀫𑀚𑁆𑀚𑀦𑀻𑀢𑀺 𑀤𑀼𑀯𑀺𑀥𑀸 𑀧𑀭𑀺𑀯𑁂𑀡𑀗𑁆𑀕𑀡𑀸𑀤𑀺𑀲𑀫𑁆𑀫𑀚𑁆𑀚𑀦𑀻 𑀘 𑀢𑀣𑁂𑀯 𑀤𑀼𑀯𑀺𑀥𑀸 𑀔𑀚𑁆𑀚𑀽𑀭𑀺𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀻𑀳𑀺 𑀩𑀤𑁆𑀥𑀸 𑀕𑁂𑀳𑀲𑀫𑁆𑀫𑀚𑁆𑀚𑀦𑀻 𑀘𑀸𑀢𑀺 𑀲𑀩𑁆𑀩𑀸𑀧𑀺 𑀲𑀫𑁆𑀫𑀚𑁆𑀚𑀦𑀻 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺.

𑁨𑁮𑁯𑁦. 𑀘𑀓𑁆𑀓𑀬𑀼𑀢𑁆𑀢𑀓𑀬𑀸𑀦𑀦𑁆𑀢𑀺 𑀳𑀢𑁆𑀣𑀯𑀝𑁆𑀝𑀓𑀲𑀓𑀝𑀸𑀤𑀺𑀬𑀼𑀢𑁆𑀢𑀬𑀸𑀦𑀜𑁆𑀘.

𑁨𑁮𑁯𑁧. 𑀙𑀢𑁆𑀢𑀦𑁆𑀢𑀺 𑀧𑀡𑁆𑀡𑀓𑀺𑀮𑀜𑁆𑀚𑀲𑁂𑀢𑀘𑁆𑀙𑀢𑁆𑀢𑀯𑀲𑁂𑀦 𑀢𑀺𑀯𑀺𑀥𑀁 𑀙𑀢𑁆𑀢𑀁. 𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀢𑀸𑀮𑀧𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀲𑀸𑀡𑀪𑀸𑀚𑀦𑀜𑁆𑀘 𑀢𑀼𑀫𑁆𑀩𑀪𑀸𑀚𑀦𑀜𑁆𑀘𑀸𑀢𑀺 ¶ 𑀯𑀺𑀕𑁆𑀕𑀳𑁄, 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑀸𑀕𑀫𑁄 𑀘. 𑀯𑀺𑀲𑀸𑀡𑀫𑀬𑀁, 𑀪𑀸𑀚𑀦𑀁 𑀢𑀼𑀫𑁆𑀩𑀫𑀬𑀁 𑀪𑀸𑀚𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀥 ‘‘𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡’’𑀦𑁆𑀢𑀺 𑀲𑁂𑀲𑁄. 𑀅𑀭𑀡𑀻 𑀅𑀭𑀡𑀺𑀲𑀳𑀺𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀆𑀫𑀮𑀓𑀢𑀼𑀫𑁆𑀩𑀁 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀬𑀸 𑀤𑀡𑁆𑀟𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀳𑀼 𑀅𑀕𑀭𑀼𑀪𑀡𑁆𑀟𑀁, 𑀪𑀸𑀚𑀦𑀻𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀁 𑀕𑀭𑀼𑀪𑀡𑁆𑀟𑀁.

𑁨𑁮𑁯𑁨. 𑀯𑀺𑀲𑀸𑀡𑀦𑁆𑀢𑀺 ¶ 𑀕𑁄𑀯𑀺𑀲𑀸𑀡𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀯𑀺𑀲𑀸𑀡𑀁. 𑀅𑀢𑀘𑁆𑀙𑀺𑀢𑀁 𑀬𑀣𑀸𑀕𑀢𑀫𑁂𑀯 𑀪𑀸𑀚𑀦𑀻𑀬𑀁. 𑀅𑀦𑀺𑀝𑁆𑀞𑀺𑀢𑀁 𑀫𑀜𑁆𑀘𑀧𑀸𑀤𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀻𑀬𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸𑀳 𑁋 ‘‘𑀫𑀜𑁆𑀘𑀧𑀸𑀤𑁄 𑀫𑀜𑁆𑀘𑀅𑀝𑀦𑀻 𑀧𑀻𑀞𑀧𑀸𑀤𑁄 𑀧𑀻𑀞𑀅𑀝𑀦𑀻 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀁 𑀤𑀡𑁆𑀟𑁄𑀢𑀺 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀺𑀧𑁆𑀧𑀓𑀢𑀢𑀘𑁆𑀙𑀦𑀓𑀫𑁆𑀫𑀁 𑀅𑀦𑀺𑀝𑁆𑀞𑀺𑀢𑀫𑁂𑀯 𑀪𑀸𑀚𑀦𑀻𑀬𑀁, 𑀢𑀘𑁆𑀙𑀺𑀢𑀫𑀝𑁆𑀞𑀁 𑀧𑀦 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧).

𑁨𑁮𑁯𑁩. 𑀦𑀺𑀝𑁆𑀞𑀺𑀢𑁄 𑀢𑀘𑁆𑀙𑀺𑀢𑁄 𑀯𑀸𑀧𑀻𑀢𑀺 𑀢𑀘𑁆𑀙𑀺𑀢𑀦𑀺𑀝𑁆𑀞𑀺𑀢𑁄𑀧𑀺. 𑀯𑀺𑀥𑁄𑀢𑀺 𑀓𑀸𑀬𑀩𑀦𑁆𑀥𑀦𑁂 𑀅𑀦𑀼𑀜𑁆𑀜𑀸𑀢𑀯𑀺𑀥𑁄. 𑀳𑀺𑀗𑁆𑀕𑀼𑀓𑀭𑀡𑁆𑀟𑀓𑁄𑀢𑀺 𑀳𑀺𑀗𑁆𑀕𑀼𑀫𑀬𑁄 𑀯𑀸 𑀢𑀤𑀸𑀥𑀸𑀭𑁄 𑀯𑀸 𑀓𑀭𑀡𑁆𑀟𑀓𑁄. 𑀅𑀜𑁆𑀚𑀦𑀻𑀢𑀺 𑀅𑀜𑁆𑀚𑀦𑀦𑀸𑀴𑀺𑀓𑀸 𑀘 𑀅𑀜𑁆𑀚𑀦𑀓𑀭𑀡𑁆𑀟𑀓𑁄 𑀘. 𑀲𑀮𑀸𑀓𑀸𑀬𑁄𑀢𑀺 𑀅𑀜𑁆𑀚𑀦𑀺𑀲𑀮𑀸𑀓𑀸. 𑀉𑀤𑀧𑀼𑀜𑁆𑀙𑀦𑀻𑀢𑀺 𑀳𑀢𑁆𑀣𑀺𑀤𑀦𑁆𑀢𑀯𑀺𑀲𑀸𑀡𑀸𑀤𑀺𑀫𑀬𑀸 𑀉𑀤𑀓𑀧𑀼𑀜𑁆𑀙𑀦𑀻. 𑀇𑀤𑀁 𑀲𑀩𑁆𑀩𑀁 𑀪𑀸𑀚𑀦𑀻𑀬𑀫𑁂𑀯.

𑁨𑁮𑁯𑁪. 𑀧𑀭𑀺𑀪𑁄𑀕𑀸𑀭𑀳𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀬𑁄𑀕𑁆𑀕𑀁. 𑀓𑀼𑀮𑀸𑀮𑀪𑀡𑁆𑀟𑀦𑁆𑀢𑀺 𑀖𑀝𑀧𑀺𑀞𑀭𑀸𑀤𑀺𑀓𑀼𑀫𑁆𑀪𑀓𑀸𑀭𑀪𑀡𑁆𑀟𑀫𑁆𑀧𑀺. 𑀧𑀢𑁆𑀢𑀗𑁆𑀕𑀸𑀭𑀓𑀝𑀸𑀳𑀦𑁆𑀢𑀺 𑀧𑀢𑁆𑀢𑀓𑀝𑀸𑀳𑀁, 𑀅𑀗𑁆𑀕𑀸𑀭𑀓𑀝𑀸𑀳𑀜𑁆𑀘. 𑀥𑀽𑀫𑀤𑀸𑀦𑀁 𑀦𑀸𑀴𑀺𑀓𑀸. 𑀓𑀧𑀮𑁆𑀮𑀺𑀓𑀸𑀢𑀺 𑀤𑀻𑀧𑀓𑀧𑀮𑁆𑀮𑀺𑀓𑀸.

𑁨𑁮𑁯𑁫. 𑀣𑀼𑀧𑀺𑀓𑀸𑀢𑀺 𑀧𑀸𑀲𑀸𑀤𑀸𑀤𑀺𑀣𑀼𑀧𑀺𑀓𑀸. 𑀤𑀻𑀧𑀭𑀼𑀓𑁆𑀔𑁄𑀢𑀺 𑀧𑀤𑀻𑀧𑀸𑀥𑀸𑀭𑁄. 𑀘𑀬𑀦𑀘𑁆𑀙𑀤𑀦𑀺𑀝𑁆𑀞𑀓𑀸𑀢𑀺 𑀧𑀸𑀓𑀸𑀭𑀘𑁂𑀢𑀺𑀬𑀸𑀤𑀻𑀦𑀁 𑀘𑀬𑀦𑀺𑀝𑁆𑀞𑀓𑀸 ¶ 𑀘 𑀕𑁂𑀳𑀸𑀤𑀻𑀦𑀁 𑀙𑀤𑀦𑀺𑀝𑁆𑀞𑀓𑀸 𑀘. 𑀲𑀩𑁆𑀩𑀫𑁆𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀅𑀦𑀯𑀲𑁂𑀲𑀁 𑀧𑀭𑀺𑀓𑁆𑀔𑀸𑀭𑀁.

𑁨𑁮𑁯𑁬. 𑀓𑀜𑁆𑀘𑀦𑀓𑁄𑀢𑀺 𑀲𑀭𑀓𑁄. 𑀖𑀝𑀓𑁄𑀢𑀺 𑀧𑀸𑀤𑀕𑀡𑁆𑀳𑀦𑀓𑀢𑁄 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑁄 𑀖𑀝𑀓𑁄. ‘‘𑀬𑀣𑀸 𑀘 𑀫𑀢𑁆𑀢𑀺𑀓𑀸𑀪𑀡𑁆𑀟𑁂, 𑀏𑀯𑀁 𑀮𑁄𑀳𑀪𑀡𑁆𑀟𑁂𑀧𑀺 𑀓𑀼𑀡𑁆𑀟𑀺𑀓𑀸 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀅𑀝𑁆𑀞𑀓𑀣𑀸𑀦𑀬𑀁 𑀲𑀗𑁆𑀕𑀳𑁂𑀢𑀼𑀫𑀸𑀳 ‘‘𑀮𑁄𑀳𑀪𑀡𑁆𑀟𑁂𑀧𑀺 𑀓𑀼𑀡𑁆𑀟𑀺𑀓𑀸𑀧𑀺 𑀘 𑀪𑀸𑀚𑀺𑀬𑀸’’𑀢𑀺.

𑁨𑁮𑁯𑁭. 𑀕𑀭𑀼 𑀦𑀸𑀫 𑀧𑀘𑁆𑀙𑀺𑀫𑀁 𑀕𑀭𑀼𑀪𑀡𑁆𑀟𑀢𑁆𑀢𑀬𑀁. 𑀣𑀸𑀯𑀭𑀁 𑀦𑀸𑀫 𑀧𑀼𑀭𑀺𑀫𑀤𑁆𑀯𑀬𑀁. 𑀲𑀗𑁆𑀖𑀲𑁆𑀲𑀸𑀢𑀺 𑀲𑀗𑁆𑀖𑁂𑀦. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀼𑀕𑁆𑀕𑀮𑀺𑀓𑀸𑀤𑀻𑀳𑀺 𑀢𑀸𑀤𑀺𑀲𑁂𑀳𑀺 𑀢𑁂𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀢𑀢𑁆𑀭𑀸𑀬𑀁 𑀧𑀭𑀺𑀯𑀢𑁆𑀢𑀦𑀦𑀬𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑁋 𑀲𑀗𑁆𑀖𑀲𑁆𑀲 𑀦𑀸𑀴𑀺𑀓𑁂𑀭𑀸𑀭𑀸𑀫𑁄 𑀤𑀽𑀭𑁂 𑀳𑁄𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑀸 𑀢𑀁 𑀩𑀳𑀼𑀢𑀭𑀁 𑀔𑀸𑀤𑀦𑁆𑀢𑀺, 𑀢𑀢𑁄 𑀲𑀓𑀝𑀯𑁂𑀢𑀦𑀁 𑀤𑀢𑁆𑀯𑀸 𑀅𑀧𑁆𑀧𑀫𑁂𑀯 𑀆𑀳𑀭𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀧𑀦 𑀢𑀲𑁆𑀲 𑀆𑀭𑀸𑀫𑀲𑁆𑀲 𑀅𑀯𑀺𑀤𑀽𑀭𑀕𑀸𑀫𑀯𑀸𑀲𑀻𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀲𑁆𑀲 𑀲𑀫𑀻𑀧𑁂 𑀆𑀭𑀸𑀫𑁄 𑀳𑁄𑀢𑀺, 𑀢𑁂 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂𑀦 𑀆𑀭𑀸𑀫𑁂𑀦 ¶ 𑀢𑀁 𑀆𑀭𑀸𑀫𑀁 𑀬𑀸𑀘𑀦𑁆𑀢𑀺, 𑀲𑀗𑁆𑀖𑁂𑀦 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂𑀧𑀺 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀲𑀳𑀲𑁆𑀲𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀘𑀲𑀢𑀸𑀦𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀆𑀭𑀸𑀫𑁄 𑀔𑀼𑀤𑁆𑀤𑀓𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀬𑀁 𑀔𑀼𑀤𑁆𑀤𑀓𑁄, 𑀅𑀣 𑀔𑁄 𑀇𑀢𑀭𑀢𑁄 𑀩𑀳𑀼𑀢𑀭𑀁 𑀆𑀬𑀁 𑀤𑁂𑀢𑀺. 𑀲𑀘𑁂𑀧𑀺 𑀲𑀫𑀓𑀫𑁂𑀯 𑀤𑁂𑀢𑀺, 𑀏𑀯𑀫𑁆𑀧𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀕𑀳𑁂𑀢𑀩𑁆𑀩𑀫𑁂𑀯.

𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀅𑀢𑀺𑀭𑁂𑀓𑀁 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀳𑁄𑀢𑀼, 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀦 𑀕𑀡𑁆𑀳𑀦𑁆𑀢𑀺, 𑀦 ¶ 𑀘𑀺𑀭𑀲𑁆𑀲𑁂𑀯 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀯. 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀪𑀺𑀓𑁆𑀔𑀽𑀦𑀁 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺. ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀆𑀭𑀸𑀫𑁂𑀦 𑀆𑀭𑀸𑀫𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁄𑀧𑀺 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀆𑀭𑀸𑀫𑀯𑀢𑁆𑀣𑀼𑀦𑀸 𑀘 𑀫𑀳𑀦𑁆𑀢𑁂𑀦 𑀯𑀸 𑀔𑀼𑀤𑁆𑀤𑀓𑁂𑀦 𑀯𑀸 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀽𑀦𑀺.

𑀓𑀣𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄? 𑀲𑀗𑁆𑀖𑀲𑁆𑀲 𑀅𑀦𑁆𑀢𑁄𑀕𑀸𑀫𑁂 𑀕𑁂𑀳𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀫𑀚𑁆𑀛𑁂 𑀧𑀸𑀲𑀸𑀤𑁄, 𑀉𑀪𑁄𑀧𑀺 𑀅𑀕𑁆𑀖𑁂𑀦 𑀲𑀫𑀓𑀸, 𑀲𑀘𑁂 𑀫𑀦𑀼𑀲𑁆𑀲𑀸 𑀢𑁂𑀦 𑀧𑀸𑀲𑀸𑀤𑁂𑀦 𑀢𑀁 𑀕𑁂𑀳𑀁 𑀬𑀸𑀘𑀦𑁆𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀘𑁂 𑀫𑀳𑀕𑁆𑀖𑀢𑀭𑀁 𑀕𑁂𑀳𑀁 𑀳𑁄𑀢𑀺, ‘‘𑀫𑀳𑀕𑁆𑀖𑀢𑀭𑀁 𑀅𑀫𑁆𑀳𑀸𑀓𑀁 𑀕𑁂𑀳’’𑀦𑁆𑀢𑀺 𑀯𑀼𑀢𑁆𑀢𑁂 𑀘 ‘‘𑀓𑀺𑀜𑁆𑀘𑀸𑀧𑀺 𑀫𑀳𑀕𑁆𑀖𑀢𑀭𑀁, 𑀧𑀩𑁆𑀩𑀚𑀺𑀢𑀸𑀦𑀁 𑀧𑀦 𑀅𑀲𑀸𑀭𑀼𑀧𑁆𑀧𑀁, 𑀦 𑀲𑀓𑁆𑀓𑀸 𑀢𑀢𑁆𑀣 𑀧𑀩𑁆𑀩𑀚𑀺𑀢𑁂𑀳𑀺 𑀯𑀲𑀺𑀢𑀼𑀁, 𑀇𑀤𑀁 𑀧𑀦 𑀲𑀸𑀭𑀼𑀧𑁆𑀧𑀁, 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀫𑀳𑀕𑁆𑀖𑀁 𑀳𑁄𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀕𑁂𑀳𑀁 𑀫𑀳𑀕𑁆𑀖’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁄𑀧𑀺 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀘 𑀫𑀳𑀕𑁆𑀖𑁂𑀦 𑀯𑀸 𑀅𑀧𑁆𑀧𑀕𑁆𑀖𑁂𑀦 𑀯𑀸 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀽𑀦𑀺. 𑀏𑀯𑀁 𑀢𑀸𑀯 𑀣𑀸𑀯𑀭𑁂𑀦 𑀣𑀸𑀯𑀭𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑁂 𑀧𑀦 𑀫𑀜𑁆𑀘𑀧𑀻𑀞𑀁 𑀫𑀳𑀦𑁆𑀢𑀁 𑀯𑀸 𑀳𑁄𑀢𑀼 𑀔𑀼𑀤𑁆𑀤𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 ¶ 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀲𑀘𑁂𑀧𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀜𑁆𑀘𑀲𑀢𑀁 𑀯𑀸 𑀫𑀜𑁆𑀘𑀲𑀳𑀲𑁆𑀲𑀁 𑀯𑀸 ¶ 𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑀸, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀦 𑀤𑀸𑀢𑀩𑁆𑀩𑀸. 𑀅𑀢𑀺𑀭𑁂𑀓𑀫𑀜𑁆𑀘𑁂 𑀪𑀡𑁆𑀟𑀸𑀕𑀸𑀭𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀩𑀳𑀺𑀲𑀻𑀫𑀸𑀬 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀫𑀜𑁆𑀘𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀘𑁂 𑀩𑀳𑀽 𑀫𑀜𑁆𑀘𑀸 𑀳𑁄𑀦𑁆𑀢𑀺, 𑀫𑀜𑁆𑀘𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀢𑁆𑀣 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑁄. 𑀫𑀳𑀕𑁆𑀖𑁂𑀦 𑀲𑀢𑀕𑁆𑀖𑀦𑀓𑁂𑀦, 𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸 𑀫𑀜𑁆𑀘𑁂𑀦 𑀅𑀜𑁆𑀜𑀁 𑀫𑀜𑁆𑀘𑀲𑀢𑀁 𑀮𑀪𑀢𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀁 𑀫𑀜𑁆𑀘𑁂𑀦 𑀫𑀜𑁆𑀘𑁄𑀬𑁂𑀯, 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀏𑀲 𑀦𑀬𑁄 𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂𑀲𑀼𑀧𑀺 𑀏𑀢𑁂𑀲𑀼 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀓𑀧𑁆𑀧𑀺𑀬𑀁 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀓𑀧𑁆𑀧𑀺𑀬𑀁 𑀯𑀸 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀼𑀢𑁆𑀢𑀯𑀢𑁆𑀣𑀽𑀦𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀅𑀕𑀭𑀼𑀪𑀡𑁆𑀟𑀼𑀧𑀕𑀁 𑀧𑀦 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑁨𑁮𑁯𑁮. 𑀪𑀺𑀓𑁆𑀔𑀼 𑀅𑀥𑁄𑀢𑁂𑀦 𑀧𑀸𑀤𑁂𑀦, 𑀅𑀮𑁆𑀮𑀧𑀸𑀤𑁂𑀦 𑀯𑀸 𑀲𑁂𑀦𑀸𑀲𑀦𑀁 𑀦𑀓𑁆𑀓𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀬𑀦𑁆𑀢𑀺 𑀏𑀢𑁆𑀣, 𑀆𑀲𑀦𑁆𑀢𑀺 𑀘𑀸𑀢𑀺 𑀲𑀬𑀦𑀸𑀲𑀦𑀁, 𑀧𑀭𑀺𑀓𑀫𑁆𑀫𑀓𑀢𑀪𑀽𑀫𑀢𑁆𑀣𑀭𑀡𑀸𑀤𑀺. 𑀅𑀮𑁆𑀮𑀧𑀸𑀤𑁂𑀦 𑀯𑀸𑀢𑀺 𑀬𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀦 𑀢𑀺𑀦𑁆𑀢𑀧𑀸𑀤𑁂𑀦. 𑀬𑀣𑀸𑀳 𑁋 ‘‘𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀻𑀢𑀺 𑀬𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀳𑀺 𑀧𑀸𑀤𑁂𑀳𑀺 𑀧𑀭𑀺𑀪𑀡𑁆𑀟𑀓𑀢𑀪𑀽𑀫𑀺 𑀯𑀸 𑀲𑁂𑀦𑀸𑀲𑀦𑀁 𑀯𑀸 𑀦 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀤𑀓𑀲𑀺𑀦𑁂𑀳𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀉𑀤𑀓𑀁, 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁪). 𑀲𑀉𑀧𑀸𑀳𑀦𑁄𑀢𑀺 𑀏𑀢𑁆𑀣 ‘‘𑀥𑁄𑀢𑀧𑀸𑀤𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀤𑁂 𑀧𑀝𑀺𑀫𑀼𑀓𑁆𑀓𑀸𑀳𑀺 𑀉𑀧𑀸𑀳𑀦𑀸𑀳𑀺 𑀲𑀉𑀧𑀸𑀳𑀦𑁄 𑀪𑀺𑀓𑁆𑀔𑀼 𑀥𑁄𑀢𑀧𑀸𑀤𑀓𑀁 𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀢𑀣𑁂𑀯 𑀦 𑀅𑀓𑁆𑀓𑀫𑁂𑀢𑀺 𑀬𑁄𑀚𑀦𑀸.

𑁨𑁮𑁯𑁯. 𑀧𑀭𑀺𑀓𑀫𑁆𑀫𑀓𑀢𑀸𑀬𑀸𑀢𑀺 ¶ 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀸𑀬. 𑀦𑀺𑀝𑁆𑀞𑀼𑀪𑀦𑁆𑀢𑀲𑁆𑀲𑀸𑀢𑀺 𑀔𑁂𑀴𑀁 𑀧𑀸𑀢𑁂𑀦𑁆𑀢𑀲𑁆𑀲. 𑀧𑀭𑀺𑀓𑀫𑁆𑀫𑀓𑀢𑀁 𑀪𑀺𑀢𑁆𑀢𑀺𑀦𑁆𑀢𑀺 𑀲𑁂𑀢𑀪𑀺𑀢𑁆𑀢𑀺𑀁 𑀯𑀸 𑀘𑀺𑀢𑁆𑀢𑀓𑀫𑁆𑀫𑀓𑀢𑀁 𑀯𑀸 𑀪𑀺𑀢𑁆𑀢𑀺𑀁. 𑀦 𑀓𑁂𑀯𑀮𑀜𑁆𑀘 𑀪𑀺𑀢𑁆𑀢𑀺𑀫𑁂𑀯, 𑀤𑁆𑀯𑀸𑀭𑀫𑁆𑀧𑀺 𑀯𑀸𑀢𑀧𑀸𑀦𑀫𑁆𑀧𑀺 𑀅𑀧𑀲𑁆𑀲𑁂𑀦𑀨𑀮𑀓𑀫𑁆𑀧𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑀫𑁆𑀧𑀺 𑀭𑀼𑀓𑁆𑀔𑀢𑁆𑀣𑀫𑁆𑀪𑀫𑁆𑀧𑀺 𑀘𑀻𑀯𑀭𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑀲𑁆𑀲𑀬𑀺𑀢𑀼𑀁 𑀦 𑀮𑀪𑀢𑀺𑀬𑁂𑀯. ‘‘𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀬𑁄 𑀧𑀦 𑀅𑀧𑀭𑀺𑀓𑀫𑁆𑀫𑀓𑀢𑀸𑀧𑀺 𑀅𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁨𑁯𑁦𑁧. 𑀦𑀺𑀤𑁆𑀤𑀸𑀬𑀢𑁄 ¶ 𑀢𑀲𑁆𑀲 𑀓𑁄𑀘𑀺 𑀲𑀭𑀻𑀭𑀸𑀯𑀬𑀯𑁄 𑀧𑀘𑁆𑀘𑀢𑁆𑀣𑀭𑀡𑁂 𑀲𑀗𑁆𑀓𑀼𑀝𑀺𑀢𑁂 𑀲𑀳𑀲𑀸 𑀬𑀤𑀺 𑀫𑀜𑁆𑀘𑀁 𑀨𑀼𑀲𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸.

𑁨𑁯𑁦𑁨. 𑀮𑁄𑀫𑁂𑀲𑀼 𑀫𑀜𑁆𑀘𑀁 𑀨𑀼𑀲𑀦𑁆𑀢𑁂𑀲𑀼. 𑀳𑀢𑁆𑀣𑀧𑀸𑀤𑀸𑀦𑀁 𑀢𑀮𑁂𑀦 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀦𑁆𑀢𑀲𑁆𑀲 𑀓𑀸𑀬𑁂 𑀧𑀝𑀺𑀳𑀜𑁆𑀜𑀢𑀺, 𑀅𑀦𑀸𑀧𑀢𑁆𑀢𑀺.

‘‘𑀤𑀸𑀬𑀓𑁂𑀳𑀺 ‘𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀤𑀺𑀦𑁆𑀦𑀲𑁂𑀦𑀸𑀲𑀦𑀁, 𑀫𑀜𑁆𑀘𑀧𑀻𑀞𑀸𑀤𑀺𑀜𑁆𑀘 𑀤𑀸𑀬𑀓𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀫𑀸𑀢𑀺𑀓𑀝𑁆𑀞𑀓𑀣𑀸𑀬 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀢𑁆𑀢𑀸 𑀢𑀣𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. ‘‘𑀇𑀫𑀁 𑀫𑀜𑁆𑀘𑀧𑀻𑀞𑀸𑀤𑀺𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀦 𑀪𑀸𑀚𑁂𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸. ‘‘𑀇𑀫𑀁 𑀫𑀜𑁆𑀘𑀧𑀻𑀞𑀸𑀤𑀺𑀁 𑀪𑀤𑀦𑁆𑀢𑀸𑀦𑀁 𑀯𑀲𑁆𑀲𑀕𑁆𑀕𑁂𑀦 𑀕𑀡𑁆𑀳𑀺𑀢𑀼𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀢𑀺𑀧𑀺 𑀕𑀭𑀼𑀪𑀡𑁆𑀟𑀪𑀸𑀯𑁂 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀮𑀩𑁆𑀪𑀢𑀺. ‘‘𑀇𑀫𑀁 𑀫𑀜𑁆𑀘𑀧𑀻𑀞𑀁 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑀼𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀯𑀲𑁆𑀲𑀕𑁆𑀕𑁂𑀦 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀯𑀲𑁆𑀲𑀕𑁆𑀕𑁂𑀦 𑀪𑀸𑀚𑀦𑀁 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀲𑀗𑁆𑀖𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸. ‘‘𑀲𑀗𑁆𑀖𑀲𑁆𑀲 𑀇𑀫𑀁 𑀫𑀜𑁆𑀘𑀧𑀻𑀞𑀁 𑀯𑀲𑁆𑀲𑀕𑁆𑀕𑁂𑀦 𑀕𑀡𑁆𑀳𑀺𑀢𑀼𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺 𑀧𑀞𑀫𑀁 𑀲𑀗𑁆𑀖𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 ¶ 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀫𑀸𑀢𑀺𑀓𑀝𑁆𑀞𑀓𑀣𑀸 𑀕𑀡𑁆𑀞𑀺𑀧𑀤𑁂𑀬𑁂𑀯 𑀯𑀼𑀢𑁆𑀢𑁄.

𑁨𑁯𑁦𑁩-𑁪. 𑀉𑀤𑁆𑀤𑁂𑀲𑀪𑀢𑁆𑀢𑀯𑀺𑀦𑀺𑀘𑁆𑀙𑀬𑁂𑀓𑀤𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀳𑀲𑁆𑀲𑀕𑁆𑀖𑀦𑀓𑁄’’𑀢𑀺𑀆𑀤𑀺. 𑀲𑀳𑀲𑁆𑀲𑀕𑁆𑀖𑀦𑀓𑁄 𑀲𑀘𑀻𑀯𑀭𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀁 𑀪𑀺𑀓𑁆𑀔𑀼𑀁 𑀧𑀢𑁆𑀢𑁄, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀘 ‘‘𑀏𑀯𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀁 𑀪𑀺𑀓𑁆𑀔𑀼𑀁 𑀧𑀢𑁆𑀢𑁄’’𑀢𑀺 𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑁄𑀧𑀺 𑀘 𑀳𑁄𑀢𑀺, 𑀢𑀢𑁄 𑀲𑀝𑁆𑀞𑀺𑀯𑀲𑁆𑀲𑀸𑀦𑀫𑀘𑁆𑀘𑀬𑁂 𑀢𑀸𑀤𑀺𑀲𑁄 𑀲𑀳𑀲𑁆𑀲𑀕𑁆𑀖𑀦𑀓𑁄 𑀲𑀘𑀻𑀯𑀭𑁄 𑀓𑁄𑀘𑀺 𑀧𑀺𑀡𑁆𑀟𑀧𑀸𑀢𑁄 𑀲𑀘𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀩𑀼𑀥𑁄 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀪𑀺𑀓𑁆𑀔𑀼 𑀅𑀯𑀲𑁆𑀲𑀺𑀓𑀝𑁆𑀞𑀺𑀢𑀺𑀓𑀸𑀬 𑀅𑀤𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀺𑀓𑀝𑁆𑀞𑀺𑀢𑀺𑀓𑀸𑀬 𑀤𑀤𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁨𑁯𑁦𑁫. 𑀉𑀤𑁆𑀤𑁂𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸. 𑀚𑀸𑀢𑁄 𑀘𑁂 𑀲𑀸𑀫𑀡𑁂𑀭𑀓𑁄𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀸𑀤𑀺𑀯𑀲𑁂𑀦 𑀲𑀘𑁂 𑀲𑀸𑀫𑀡𑁂𑀭𑁄 𑀚𑀸𑀢𑁄. 𑀢𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀕𑀳𑀺𑀢𑀁 𑀢𑀤𑁂𑀯 𑀉𑀤𑁆𑀤𑁂𑀲𑀪𑀢𑁆𑀢𑀁. 𑀲𑀸𑀫𑀡𑁂𑀭𑀲𑁆𑀲 𑀧𑀸𑀴𑀺𑀬𑀸𑀢𑀺 𑀲𑀸𑀫𑀡𑁂𑀭𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀧𑀘𑁆𑀙𑀸 𑀕𑀳𑁂𑀢𑀼𑀁 𑀮𑀪𑀢𑀺.

𑁨𑁯𑁦𑁬. 𑀬𑁄 ¶ 𑀲𑀸𑀫𑀡𑁂𑀭𑁄 𑀲𑀫𑁆𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 ‘‘𑀲𑁆𑀯𑁂 𑀉𑀤𑁆𑀤𑁂𑀲𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀚𑁆𑀚 𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀞𑀺𑀢𑀺𑀓𑀸 𑀅𑀢𑀻𑀢𑀸 𑀲𑀺𑀬𑀸𑀢𑀺 𑀬𑁄𑀚𑀦𑀸, 𑀲𑁆𑀯𑁂 𑀧𑀸𑀧𑁂𑀢𑀩𑁆𑀩𑀸 𑀲𑀸𑀫𑀡𑁂𑀭𑀝𑁆𑀞𑀺𑀢𑀺𑀓𑀸 𑀅𑀚𑁆𑀚 𑀉𑀧𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀪𑀢𑁆𑀢𑀁 𑀦 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁦𑁭. 𑀉𑀤𑁆𑀤𑁂𑀲𑀪𑀢𑁆𑀢𑀸𑀦𑀦𑁆𑀢𑀭𑀁 𑀲𑀮𑀸𑀓𑀪𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀲𑀘𑁂 𑀲𑀮𑀸𑀓𑀸 𑀮𑀤𑁆𑀥𑀸, 𑀢𑀁𑀤𑀺𑀦𑁂 𑀪𑀢𑁆𑀢𑀁 𑀦 𑀮𑀤𑁆𑀥𑀁, 𑀧𑀼𑀦𑀤𑀺𑀦𑁂 𑀢𑀲𑁆𑀲 𑀪𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀦 𑀲𑀁𑀲𑀬𑁄 ‘‘𑀕𑀳𑁂𑀢𑀩𑁆𑀩𑀁 ¶ 𑀦𑀼 𑀔𑁄, 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀁𑀲𑀬𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁯𑁦𑁮. 𑀉𑀢𑁆𑀢𑀭𑀺 𑀉𑀢𑁆𑀢𑀭𑀁 𑀅𑀢𑀺𑀭𑁂𑀓𑀁 𑀪𑀗𑁆𑀕𑀁 𑀩𑁆𑀬𑀜𑁆𑀚𑀦𑀁 𑀏𑀢𑀲𑁆𑀲𑀸𑀢𑀺 𑀉𑀢𑁆𑀢𑀭𑀺𑀪𑀗𑁆𑀕𑀁, 𑀢𑀲𑁆𑀲, 𑀅𑀢𑀺𑀭𑁂𑀓𑀩𑁆𑀬𑀜𑁆𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀓𑀘𑀭𑀲𑁆𑀲𑀸𑀢𑀺 𑀏𑀓𑀘𑀸𑀭𑀺𑀓𑀲𑁆𑀲. 𑀲𑀮𑀸𑀓𑀸𑀬𑁂𑀯 𑀲𑀮𑀸𑀓𑀺𑀓𑀸.

𑁨𑁯𑁦𑁯. 𑀉𑀢𑁆𑀢𑀭𑀺𑀪𑀗𑁆𑀕𑀫𑁂𑀯 𑀉𑀢𑁆𑀢𑀭𑀺𑀪𑀗𑁆𑀕𑀓𑀁.

𑁨𑁯𑁧𑁦. 𑀬𑁂𑀦 𑀬𑁂𑀦 𑀳𑀻𑀢𑀺 𑀕𑀸𑀳𑀺𑀢𑀲𑀮𑀸𑀓𑁂𑀦 𑀬𑁂𑀦 𑀬𑁂𑀦 𑀪𑀺𑀓𑁆𑀔𑀼𑀦𑀸. 𑀬𑀁 𑀬𑀦𑁆𑀢𑀺 𑀪𑀢𑁆𑀢𑀩𑁆𑀬𑀜𑁆𑀚𑀦𑁂𑀲𑀼 𑀬𑀁 𑀬𑀁 𑀪𑀢𑁆𑀢𑀁 𑀯𑀸 𑀬𑀁 𑀬𑀁 𑀩𑁆𑀬𑀜𑁆𑀚𑀦𑀁 𑀯𑀸.

𑁨𑁯𑁧𑁧. 𑀲𑀗𑁆𑀖𑀼𑀤𑁆𑀤𑁂𑀲𑀸𑀤𑀺𑀓𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀺𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀫𑀦𑁆𑀢𑀦𑀁, 𑀲𑀮𑀸𑀓𑀁, 𑀧𑀓𑁆𑀔𑀺𑀓𑀁, 𑀉𑀧𑁄𑀲𑀣𑀺𑀓𑀁, 𑀧𑀸𑀝𑀺𑀧𑀤𑀺𑀓𑀦𑁆𑀢𑀺 𑀧𑀜𑁆𑀘 𑀪𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀺.

𑀢𑀢𑁆𑀣 𑀲𑀩𑁆𑀩𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀲𑀗𑁆𑀖𑀪𑀢𑁆𑀢𑀁 𑀦𑀸𑀫. ‘‘𑀲𑀗𑁆𑀖𑀢𑁄 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀉𑀤𑁆𑀤𑁂𑀲𑀪𑀢𑁆𑀢𑀁. ‘‘𑀲𑀗𑁆𑀖𑀢𑁄 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀦𑀺𑀫𑀦𑁆𑀢𑀦𑀁 𑀦𑀸𑀫. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀸𑀫𑁂𑀦 𑀲𑀮𑀸𑀓𑀕𑀸𑀳𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀁 𑀲𑀮𑀸𑀓𑀪𑀢𑁆𑀢𑀁 𑀦𑀸𑀫. 𑀘𑀸𑀢𑀼𑀤𑁆𑀤𑀲𑀺𑀬𑀁 𑀤𑀺𑀦𑁆𑀦𑀁 𑀧𑀓𑁆𑀔𑀺𑀓𑀁. 𑀉𑀧𑁄𑀲𑀣𑁂 𑀤𑀺𑀦𑁆𑀦𑀁 𑀉𑀧𑁄𑀲𑀣𑀺𑀓𑀁. 𑀧𑀸𑀝𑀺𑀧𑀤𑁂 𑀤𑀺𑀦𑁆𑀦𑀁 𑀧𑀸𑀝𑀺𑀧𑀤𑀺𑀓𑀁. 𑀢𑀁𑀢𑀁𑀦𑀸𑀫𑁂𑀦 𑀤𑀺𑀦𑁆𑀦𑀫𑁂𑀯 𑀢𑀣𑀸 𑀢𑀣𑀸 𑀯𑁄𑀳𑀭𑀻𑀬𑀢𑀺. 𑀏𑀢𑁂𑀲𑀁 𑀧𑀦 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀅𑀪𑀺𑀮𑀓𑁆𑀔𑀺𑀢𑁂𑀲𑀽’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫 𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀆𑀕𑀦𑁆𑀢𑀼𑀓𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑀫𑀺𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑀢𑁆𑀢𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀦𑁆𑀢𑀺 ¶ 𑀢𑀻𑀡𑀺 𑀕𑀳𑀺𑀢𑀸𑀦𑀺. 𑀆𑀕𑀦𑁆𑀢𑀼𑀓𑀸𑀦𑀁 𑀤𑀺𑀦𑁆𑀦𑀁 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼.

𑁨𑁯𑁧𑁨. 𑀯𑀺𑀳𑀸𑀭𑀦𑁆𑀢𑀺 ¶ 𑀯𑀺𑀳𑀸𑀭𑀪𑀢𑁆𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀯𑀺𑀳𑀸𑀭𑁂 𑀢𑀢𑁆𑀭𑀼𑀧𑁆𑀧𑀸𑀤𑀪𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀸𑀭𑀪𑀢𑁆𑀢𑀦𑁆𑀢𑀺 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 ‘‘𑀯𑀸𑀭𑁂𑀦 𑀪𑀺𑀓𑁆𑀔𑀽 𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀥𑀼𑀭𑀕𑁂𑀳𑀢𑁄 𑀧𑀝𑁆𑀞𑀸𑀬 𑀤𑀺𑀦𑁆𑀦𑀁. 𑀦𑀺𑀘𑁆𑀘𑀦𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀜𑁆𑀘 𑀢𑀣𑀸 𑀯𑀢𑁆𑀯𑀸𑀯 𑀤𑀺𑀦𑁆𑀦𑀁. 𑀓𑀼𑀝𑀺𑀪𑀢𑁆𑀢𑀁 𑀦𑀸𑀫 𑀲𑀗𑁆𑀖𑀲𑁆𑀲 𑀆𑀯𑀸𑀲𑀁 𑀓𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀤𑀺𑀦𑁆𑀦𑀁. 𑀧𑀦𑁆𑀦𑀭𑀲𑀯𑀺𑀥𑀁 𑀲𑀩𑁆𑀩𑀫𑁂𑀯 𑀪𑀢𑁆𑀢𑀁 𑀇𑀥 𑀇𑀫𑀲𑁆𑀫𑀺𑀁 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀉𑀤𑁆𑀤𑀺𑀝𑁆𑀞𑀁 𑀓𑀣𑀺𑀢𑀁. 𑀏𑀢𑁂𑀲𑀁 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑁄 𑀅𑀢𑁆𑀣𑀺𑀓𑁂𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀕𑀳𑁂𑀢𑀩𑁆𑀩𑁄.

𑁨𑁯𑁧𑁩. 𑀧𑀘𑁆𑀘𑀬𑀪𑀸𑀚𑀦𑁂 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀸𑀤𑀻𑀦𑀯𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀬𑀪𑀸𑀚𑀦𑀓𑀁 𑀅𑀦𑀼𑀲𑀸𑀲𑀦𑁆𑀢𑁄 𑀆𑀳 ‘‘𑀧𑀸𑀴𑀺’’𑀦𑁆𑀢𑀺𑀆𑀤𑀺.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸.

𑀯𑀢𑁆𑀢𑀓𑁆𑀔𑀦𑁆𑀥𑀓𑀓𑀣𑀸𑀯𑀡𑁆𑀡𑀦𑀸

𑁨𑁯𑁧𑁪-𑁫. 𑀆𑀕𑀦𑁆𑀢𑀼𑀓𑁄 𑀘 𑀆𑀯𑀸𑀲𑀺𑀓𑁄 𑀘 𑀧𑀺𑀡𑁆𑀟𑀘𑀸𑀭𑀺𑀓𑁄 𑀘 𑀲𑁂𑀦𑀸𑀲𑀦𑀜𑁆𑀘 𑀆𑀭𑀜𑁆𑀜𑀓𑁄 𑀘 𑀅𑀦𑀼𑀫𑁄𑀤𑀦𑀸 𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀢𑀸𑀲𑀼 𑀯𑀢𑁆𑀢𑀸𑀦𑀺, 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑀲𑀫𑀸𑀲𑀲𑁆𑀲 𑀉𑀢𑁆𑀢𑀭𑀧𑀤𑀮𑀺𑀗𑁆𑀕𑀢𑁆𑀢𑀸 𑀇𑀢𑁆𑀣𑀺 𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀪𑀢𑁆𑀢𑁂 𑀪𑀢𑁆𑀢𑀕𑁆𑀕𑁂, 𑀉𑀢𑁆𑀢𑀭𑀧𑀤𑀮𑁄𑀧𑁄. ‘‘𑀪𑀢𑁆𑀢𑁂’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 ‘‘𑀯𑀢𑁆𑀢𑀸𑀦𑀻’’𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁.

𑀆𑀘𑀭𑀺𑀬𑁄 𑀘 𑀉𑀧𑀚𑁆𑀛𑀸𑀬𑀓𑁄 𑀘 𑀲𑀺𑀲𑁆𑀲𑁄 𑀘 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀘, 𑀢𑁂𑀲𑀁 𑀯𑀢𑁆𑀢𑀸𑀦𑀻𑀢𑀺 𑀯𑀺𑀕𑁆𑀕𑀳𑁄. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀯𑀬𑀯𑀪𑁂𑀤𑁂𑀳𑀺. 𑀘𑀢𑀼𑀤𑁆𑀤𑀲𑁂𑀯𑀸𑀢𑀺 𑀅𑀯𑀬𑀯𑀪𑁂𑀤𑁂𑀳𑀺 𑀩𑀳𑀼𑀯𑀺𑀥𑀸𑀦𑀺𑀧𑀺 𑀯𑀢𑁆𑀢𑀸𑀦𑀺 𑀯𑀺𑀲𑀬𑀪𑁂𑀤𑁂𑀦 𑀘𑀼𑀤𑁆𑀤𑀲 𑀏𑀯 𑀯𑀼𑀢𑁆𑀢𑀸𑀦𑀺. 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁂𑀦𑀸𑀢𑀺 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 ¶ . 𑀯𑀺𑀦𑀸𑀬𑀓𑁂𑀦𑀸𑀢𑀺 𑀲𑀢𑁆𑀢𑁂 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀅𑀦𑀼𑀢𑁆𑀢𑀭𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀪𑀸𑀯𑁂𑀦 𑀤𑀫𑁆𑀫𑀤𑁂𑀯𑀩𑁆𑀭𑀳𑁆𑀫𑀦𑀸𑀕𑀸𑀤𑀺𑀓𑁂 𑀲𑀢𑁆𑀢𑁂 𑀦𑀸𑀦𑀸𑀯𑀺𑀥𑁂𑀦 𑀯𑀺𑀦𑀬𑀦𑀼𑀧𑀸𑀬𑁂𑀦 𑀤𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀺𑀕𑀢𑁄 𑀦𑀸𑀬𑀓𑁄 𑀅𑀲𑁆𑀲𑀸𑀢𑀺 𑀯𑀺𑀦𑀸𑀬𑀓𑁄, 𑀢𑁂𑀦.

𑁨𑁯𑁧𑁬. 𑀆𑀭𑀸𑀫𑀦𑁆𑀢𑀺 ¶ 𑀏𑀢𑁆𑀣 𑀢𑀁𑀲𑀫𑀻𑀧𑁂 𑀢𑀩𑁆𑀩𑁄𑀳𑀸𑀭𑁄. 𑀬𑀣𑀸𑀳 ‘‘𑀇𑀤𑀸𑀦𑀺 ‘𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀲𑀻𑀫𑀲𑀫𑀻𑀧𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀁 𑀧𑀢𑁆𑀯𑀸 𑀉𑀧𑀸𑀳𑀦𑀸𑀑𑀫𑀼𑀜𑁆𑀘𑀦𑀸𑀤𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁭). ‘‘𑀧𑀦 𑀅𑀧𑀦𑁂𑀢𑀩𑁆𑀩’’𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀫𑀼𑀜𑁆𑀘𑀺𑀢𑀩𑁆𑀩𑀸𑀢𑀺 𑀉𑀧𑀸𑀳𑀦𑀸 𑀧𑀸𑀤𑀢𑁄 𑀅𑀧𑀦𑁂𑀢𑀩𑁆𑀩𑀸.

𑁨𑁯𑁧𑁭. 𑀑𑀕𑀼𑀡𑁆𑀞𑀦𑀦𑁆𑀢𑀺 𑀲𑀲𑀻𑀲𑀧𑀸𑀭𑀼𑀧𑀦𑀁. 𑀲𑀻𑀲𑁂 𑀘𑀻𑀯𑀭𑀫𑁂𑀯 𑀯𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑁂𑀦. 𑀧𑀸𑀦𑀻𑀬𑀯𑀸𑀭𑀺𑀦𑀸𑀢𑀺 𑀧𑀸𑀢𑀩𑁆𑀩𑀚𑀮𑁂𑀦.

𑁨𑁯𑁧𑁮. 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀯𑀲𑁆𑀲𑀕𑀡𑀦𑀁 𑀧𑀼𑀘𑁆𑀙𑀺𑀢𑁆𑀯𑀸. 𑀯𑀺𑀳𑀸𑀭𑁂 𑀯𑀼𑀟𑁆𑀠𑀪𑀺𑀓𑁆𑀔𑀼𑀦𑁄 𑀆𑀕𑀦𑁆𑀢𑀼𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀦𑁆𑀤𑀺𑀢𑀩𑁆𑀩𑀸𑀯. 𑀓𑀸𑀮𑁂𑀢𑀺 𑀓𑀸𑀮𑀲𑁆𑀲𑁂𑀯. 𑀢𑁂𑀦 𑀆𑀕𑀦𑁆𑀢𑀼𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑁂𑀦𑀸𑀲𑀦𑀁 ‘‘𑀫𑀬𑁆𑀳𑀁 𑀓𑀢𑀭𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀜𑁆𑀘𑀸𑀢𑀺 𑀬𑁄𑀚𑀦𑀸.

𑁨𑁯𑁧𑁯. ‘‘𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 ‘‘𑀯𑀘𑁆𑀘𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀓𑁂𑀳𑀺 𑀲𑀩𑁆𑀩𑁂𑀳𑀺 𑀉𑀧𑀬𑁄𑀕𑀦𑁆𑀢𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀸𑀦𑀻𑀬𑀫𑁂𑀯 𑀘𑀸𑀢𑀺 ‘‘𑀓𑀺𑀁 𑀇𑀫𑀺𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀧𑀸𑀦𑀻𑀬𑀫𑁂𑀯 𑀧𑀺𑀯𑀦𑁆𑀢𑀺, 𑀉𑀤𑀸𑀳𑀼 𑀦𑀳𑀸𑀦𑀸𑀤𑀺𑀧𑀭𑀺𑀪𑁄𑀕𑀫𑁆𑀧𑀺 𑀓𑀭𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁭) 𑀅𑀝𑁆𑀞𑀓𑀣𑀸𑀕𑀢𑀦𑀬𑁂𑀦 𑀧𑀸𑀦𑀻𑀬𑀜𑁆𑀘. 𑀢𑀣𑀸 𑀧𑀭𑀺𑀪𑁄𑀚𑀦𑀻𑀬𑀜𑁆𑀘. 𑀲𑀗𑁆𑀖𑀓𑀢𑀺𑀓𑀦𑁆𑀢𑀺 ‘‘𑀓𑁂𑀲𑀼𑀘𑀺 𑀞𑀸𑀦𑁂𑀲𑀼 𑀯𑀸𑀴𑀫𑀺𑀕𑀸 𑀯𑀸 𑀅𑀫𑀦𑀼𑀲𑁆𑀲𑀸 𑀯𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀓𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀕𑀢𑀦𑀬𑁂𑀦 𑀲𑀗𑁆𑀖𑀲𑁆𑀲 𑀓𑀢𑀺𑀓𑀲𑀡𑁆𑀞𑀸𑀦𑀜𑁆𑀘. 𑀕𑁄𑀘𑀭𑀸𑀤𑀺𑀓𑀦𑁆𑀢𑀺 ¶ 𑀏𑀢𑁆𑀣 𑀘 ‘‘𑀕𑁄𑀘𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 ‘𑀕𑁄𑀘𑀭𑀕𑀸𑀫𑁄 𑀆𑀲𑀦𑁆𑀦𑁂, 𑀉𑀤𑀸𑀳𑀼 𑀤𑀽𑀭𑁂, 𑀓𑀸𑀮𑀲𑁆𑀲𑁂𑀯 𑀘 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀉𑀤𑀸𑀳𑀼 𑀦𑁄’𑀢𑀺 𑀏𑀯𑀁 𑀪𑀺𑀓𑁆𑀔𑀸𑀘𑀸𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁭) 𑀯𑀼𑀢𑁆𑀢𑀦𑀬𑁂𑀦 𑀕𑁄𑀘𑀭𑀜𑁆𑀘. 𑀆𑀤𑀺-𑀲𑀤𑁆𑀤𑁂𑀦 𑀅𑀕𑁄𑀘𑀭𑀁 𑀕𑀳𑀺𑀢𑀁. ‘‘𑀅𑀕𑁄𑀘𑀭𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀸 𑀕𑀸𑀫𑁄 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑁄 𑀯𑀸 𑀕𑀸𑀫𑁄, 𑀬𑀢𑁆𑀣 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀪𑀺𑀓𑁆𑀔𑀸 𑀤𑀺𑀬𑁆𑀬𑀢𑀺, 𑀲𑁄𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁭) 𑀯𑀼𑀢𑁆𑀢𑀦𑀬𑁂𑀦 𑀅𑀕𑁄𑀘𑀭𑀜𑁆𑀘.

𑁨𑁯𑁨𑁦. 𑀏𑀯𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀯𑀸𑀲𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀼𑀟𑁆𑀠’’𑀦𑁆𑀢𑀺𑀆𑀤𑀺. 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀜𑁆𑀘 𑀘𑀻𑀯𑀭𑀜𑁆𑀘 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄.

𑁨𑁯𑁨𑁧. 𑀢𑀲𑁆𑀲𑀸𑀢𑀺 ¶ 𑀆𑀕𑀦𑁆𑀢𑀼𑀓𑀲𑁆𑀲. 𑀧𑀸𑀤𑁄𑀤𑀓𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀥𑁄𑀢𑀸𑀥𑁄𑀢𑀧𑀸𑀤𑀸 𑀬𑀢𑁆𑀣 𑀞𑀧𑀻𑀬𑀦𑁆𑀢𑀺, 𑀢𑀁 𑀧𑀸𑀤𑀧𑀻𑀞𑀁, 𑀧𑀸𑀤𑀓𑀣𑀮𑀺𑀓𑀜𑁆𑀘 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀏𑀢𑀁 𑀕𑀳𑀺𑀢𑀁. 𑀧𑀼𑀘𑁆𑀙𑀺𑀢𑀩𑁆𑀩𑀜𑁆𑀘 𑀯𑀸𑀭𑀺𑀦𑀸𑀢𑀺 ‘‘𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑁆𑀢𑁂𑀦 𑀲𑀘𑁂 𑀲𑀓𑀺𑀁 𑀆𑀦𑀻𑀢𑀁 𑀧𑀸𑀦𑀻𑀬𑀁 𑀲𑀩𑁆𑀩𑀁 𑀧𑀺𑀯𑀢𑀺, ‘𑀧𑀼𑀦 𑀆𑀦𑁂𑀫𑀻’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀇𑀥 𑀘-𑀲𑀤𑁆𑀤𑁂𑀦 𑁋

‘‘𑀅𑀧𑀺𑀘 𑀩𑀻𑀚𑀦𑁂𑀦𑀧𑀺 𑀩𑀻𑀚𑀺𑀢𑀩𑁆𑀩𑁄, 𑀩𑀻𑀚𑀦𑁆𑀢𑁂𑀦 𑀲𑀓𑀺𑀁 𑀧𑀸𑀤𑀧𑀺𑀝𑁆𑀞𑀺𑀬𑀁 𑀩𑀻𑀚𑀺𑀢𑁆𑀯𑀸 𑀲𑀓𑀺𑀁 𑀫𑀚𑁆𑀛𑁂, 𑀲𑀓𑀺𑀁 𑀲𑀻𑀲𑁂 𑀩𑀻𑀚𑀺𑀢𑀩𑁆𑀩𑀁, ‘𑀅𑀮𑀁 𑀳𑁄𑀢𑀽’𑀢𑀺 𑀯𑀼𑀢𑁆𑀢𑁂𑀦 𑀢𑀢𑁄 𑀫𑀦𑁆𑀤𑀢𑀭𑀁 𑀩𑀻𑀚𑀺𑀢𑀩𑁆𑀩𑀁. 𑀧𑀼𑀦 ‘𑀅𑀮’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀢𑀢𑁄 𑀫𑀦𑁆𑀤𑀢𑀭𑀁 𑀩𑀻𑀚𑀺𑀢𑀩𑁆𑀩𑀁. 𑀢𑀢𑀺𑀬𑀯𑀸𑀭𑀁 𑀯𑀼𑀢𑁆𑀢𑁂𑀦 𑀩𑀻𑀚𑀦𑀻 𑀞𑀧𑁂𑀢𑀩𑁆𑀩𑀸. 𑀧𑀸𑀤𑀸𑀧𑀺𑀲𑁆𑀲 𑀥𑁄𑀯𑀺𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑁄 𑀢𑁂𑀮𑀁 𑀅𑀢𑁆𑀣𑀺, 𑀢𑁂𑀦 𑀫𑀓𑁆𑀔𑁂𑀢𑀩𑁆𑀩𑀸. 𑀦𑁄 𑀘𑁂 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀓𑁂𑀦 𑀫𑀓𑁆𑀔𑁂𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁫𑁯) 𑁋

𑀯𑀼𑀢𑁆𑀢𑀯𑀢𑁆𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁯𑁨𑁨-𑁩. 𑀯𑀦𑁆𑀤𑁂𑀬𑁆𑀬𑁄𑀢𑀺 ¶ 𑀯𑀼𑀟𑁆𑀠𑀸𑀕𑀦𑁆𑀢𑀼𑀓𑁄 𑀯𑀦𑁆𑀤𑀺𑀢𑀩𑁆𑀩𑁄. 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺 ‘‘𑀓𑀢𑁆𑀣 𑀫𑀬𑁆𑀳𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, ‘‘𑀏𑀢𑀁 𑀲𑁂𑀦𑀸𑀲𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀢𑁆𑀢𑀩𑁆𑀩𑁄’’𑀢𑀺 𑀇𑀤𑀁 ‘‘𑀅𑀚𑁆𑀛𑀸𑀯𑀼𑀢𑁆𑀣𑀫𑀯𑀼𑀢𑁆𑀣’’𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀢𑀁𑀢𑀁𑀮𑀺𑀗𑁆𑀕𑀯𑀘𑀦𑀸𑀦𑀼𑀭𑀽𑀧𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀚𑁆𑀛𑀸𑀯𑀼𑀢𑁆𑀣𑀦𑁆𑀢𑀺 𑀧𑀜𑁆𑀜𑀢𑁆𑀢𑀲𑁂𑀦𑀸𑀲𑀦𑀲𑁆𑀲 𑀪𑀺𑀓𑁆𑀔𑀽𑀳𑀺 𑀧𑀞𑀫𑀁 𑀯𑀼𑀢𑁆𑀣𑀪𑀸𑀯𑀁. 𑀅𑀯𑀼𑀢𑁆𑀣𑀁 𑀯𑀸𑀢𑀺 𑀘𑀻𑀯𑀭𑀓𑀸𑀮𑀁 𑀢𑀲𑁆𑀫𑀺𑀁 𑀪𑀺𑀓𑁆𑀔𑀽𑀳𑀺 𑀅𑀦𑀚𑁆𑀛𑀸𑀯𑀼𑀢𑁆𑀣𑀪𑀸𑀯𑀁 𑀯𑀸. 𑀕𑁄𑀘𑀭𑀸𑀕𑁄𑀘𑀭𑀁 𑀯𑀼𑀢𑁆𑀢𑀫𑁂𑀯.

𑀲𑁂𑀓𑁆𑀔𑀓𑀼𑀮𑀸𑀦𑀺 𑀘𑀸𑀢𑀺 𑀮𑀤𑁆𑀥𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀓𑀸𑀦𑀺 𑀓𑀼𑀮𑀸𑀦𑀺 𑀘 𑀯𑀢𑁆𑀢𑀩𑁆𑀩𑀸𑀦𑀺. ‘‘𑀧𑀯𑁂𑀲𑁂 𑀦𑀺𑀓𑁆𑀔𑀫𑁂 𑀓𑀸𑀮𑁄’’𑀢𑀺 𑀇𑀤𑀁 ‘‘𑀲𑀗𑁆𑀖𑀓𑀢𑀺𑀓’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀸𑀦𑀻𑀬𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀪𑁄𑀚𑀦𑀻𑀬𑀓𑀢𑁆𑀢𑀭𑀬𑀝𑁆𑀞𑀻𑀦𑀁 𑀆𑀘𑀺𑀓𑁆𑀔𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁯𑁨𑁪. 𑀬𑀣𑀸𑀦𑀺𑀲𑀺𑀦𑁆𑀦𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀲𑀺𑀦𑁆𑀦𑁂𑀦. 𑀅𑀲𑁆𑀲𑀸𑀢𑀺 𑀦𑀯𑀓𑀲𑁆𑀲.

𑁨𑁯𑁨𑁫. ‘‘𑀅𑀢𑁆𑀭 𑀧𑀢𑁆𑀢𑀁 𑀞𑀧𑁂𑀳𑀺, 𑀇𑀤𑀫𑀸𑀲𑀦𑀁 𑀦𑀺𑀲𑀻𑀤𑀸𑀳𑀻’’𑀢𑀺 𑀇𑀘𑁆𑀘𑁂𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀤𑁂𑀬𑁆𑀬𑀁 𑀲𑁂𑀦𑀸𑀲𑀦𑀫𑁆𑀧𑀺 𑀘𑀸𑀢𑀺 𑀲𑁂𑀦𑀸𑀲𑀦𑀜𑁆𑀘 𑀤𑀸𑀢𑀩𑁆𑀩𑀁. 𑀘-𑀲𑀤𑁆𑀤𑁂𑀦 ‘‘𑀅𑀯𑀼𑀢𑁆𑀣𑀁 𑀯𑀸 𑀅𑀚𑁆𑀛𑀸𑀯𑀼𑀢𑁆𑀣𑀁 ¶ 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀫𑀳𑀸𑀆𑀯𑀸𑀲𑁂𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀁 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺.

𑁨𑁯𑁨𑁬. ‘‘𑀫𑀸𑀢𑀺𑀓𑀸𑀬 𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦𑁂𑀯 𑀯𑀢𑁆𑀢𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀉𑀤𑀸𑀳𑀼 𑀬𑀣𑀸𑀦𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀓𑁄𑀘𑀺 𑀫𑀜𑁆𑀜𑁂𑀬𑁆𑀬𑀸𑀢𑀺 𑀫𑀸𑀢𑀺𑀓𑀸𑀓𑁆𑀓𑀫𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀬𑀣𑀸𑀦𑀼𑀧𑁆𑀧𑀢𑁆𑀢𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 𑀫𑀸𑀢𑀺𑀓𑀸𑀓𑁆𑀓𑀫𑀫𑀦𑀸𑀤𑀺𑀬𑀺𑀢𑁆𑀯𑀸 𑀕𑀫𑀺𑀓𑀯𑀢𑁆𑀢𑀁 𑀆𑀭𑀤𑁆𑀥𑀁. 𑀅𑀣 𑀯𑀸 𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀓𑀢𑁆𑀢𑀸 𑀲𑀤𑁆𑀤𑀧𑀬𑁄𑀕𑀲𑁆𑀲 ¶ 𑀫𑀸𑀢𑀺𑀓𑀸𑀓𑁆𑀓𑀫𑀫𑀦𑀸𑀤𑀺𑀬𑀺𑀢𑁆𑀯𑀸 𑀬𑀣𑀺𑀘𑁆𑀙𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀤𑀸𑀭𑀼𑀫𑀢𑁆𑀢𑀺𑀓𑀪𑀡𑁆𑀟𑀸𑀦𑀻𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀘𑁂𑀯 𑀭𑀚𑀦𑀪𑀸𑀚𑀦𑀸𑀦𑀺 𑀘. 𑀧𑀝𑀺𑀲𑀸𑀫𑁂𑀢𑁆𑀯𑀸𑀢𑀺 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸. 𑀆𑀯𑀲𑀣𑀫𑁆𑀧𑀺 𑀣𑀓𑁂𑀢𑁆𑀯𑀸𑀢𑀺 𑀆𑀯𑀲𑀣𑁂 𑀤𑁆𑀯𑀸𑀭𑀓𑀯𑀸𑀝𑀸𑀤𑀻𑀦𑀺 𑀘 𑀣𑀓𑁂𑀢𑁆𑀯𑀸.

𑁨𑁯𑁨𑁭. 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀻𑀢𑀺 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸 𑀆𑀭𑀸𑀫𑀺𑀓𑀲𑁆𑀲 𑀯𑀸 ‘‘𑀇𑀫𑀁 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀯𑀸. 𑀧𑀼𑀘𑁆𑀙𑀺𑀢𑀩𑁆𑀩𑁂 𑀅𑀲𑀦𑁆𑀢𑁂𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀧𑀦-𑀲𑀤𑁆𑀤𑀢𑁆𑀣𑁄. 𑀕𑁄𑀧𑁂𑀢𑁆𑀯𑀸 𑀯𑀸𑀧𑀺 𑀲𑀸𑀥𑀼𑀓𑀦𑁆𑀢𑀺 ‘‘𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀫𑀜𑁆𑀘𑀁 𑀧𑀜𑁆𑀜𑀧𑁂𑀢𑁆𑀯𑀸 𑀫𑀜𑁆𑀘𑁂 𑀫𑀜𑁆𑀘𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁬𑁦) 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑁨𑁯𑁨𑁮. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀳𑀲𑀸’’𑀢𑀺𑀆𑀤𑀺. 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀖𑀭𑀁 𑀧𑀯𑀺𑀲𑀦𑁆𑀢𑁄 𑀲𑀳𑀲𑀸 𑀦 𑀧𑀯𑀺𑀲𑁂 𑀲𑀻𑀖𑀁 𑀦 𑀧𑀯𑀺𑀲𑁂𑀬𑁆𑀬, 𑀦𑀺𑀓𑁆𑀔𑀫𑀦𑁆𑀢𑁄 𑀲𑀳𑀲𑀸 𑀦 𑀦𑀺𑀓𑁆𑀔𑀫𑁂 𑀲𑀻𑀖𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬, 𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑁂𑀦 𑀧𑀯𑀺𑀲𑁂𑀬𑁆𑀬, 𑀦𑀺𑀓𑁆𑀔𑀫𑁂𑀬𑁆𑀬 𑀘. 𑀧𑀺𑀡𑁆𑀟𑀘𑀸𑀭𑀺𑀦𑀸 𑀪𑀺𑀓𑁆𑀔𑀼𑀦𑀸 𑀕𑁂𑀳𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂𑀦 𑀅𑀢𑀺𑀤𑀽𑀭𑁂 𑀦 𑀞𑀸𑀢𑀩𑁆𑀩𑀁 𑀦𑀺𑀩𑁆𑀩𑀓𑁄𑀲𑀢𑁄 𑀅𑀢𑀺𑀤𑀽𑀭𑀝𑁆𑀞𑀸𑀦𑁂 𑀦 𑀞𑀸𑀢𑀩𑁆𑀩𑀁. 𑀅𑀘𑁆𑀘𑀸𑀲𑀦𑁆𑀦𑁂 𑀦 𑀞𑀸𑀢𑀩𑁆𑀩𑀁 𑀦𑀺𑀩𑁆𑀩𑀓𑁄𑀲𑀢𑁄 𑀆𑀲𑀦𑁆𑀦𑀢𑀭𑁂 𑀞𑀸𑀦𑁂 𑀦 𑀞𑀸𑀢𑀩𑁆𑀩𑀁.

𑁨𑁯𑁨𑁯. 𑀉𑀘𑁆𑀘𑀸𑀭𑁂𑀢𑁆𑀯𑀸𑀢𑀺 𑀉𑀧𑀦𑀸𑀫𑁂𑀢𑁆𑀯𑀸. 𑀪𑀸𑀚𑀦𑀦𑁆𑀢𑀺 𑀧𑀢𑁆𑀢𑀁. 𑀤𑀓𑁆𑀔𑀺𑀡𑁂𑀦 𑀧𑀡𑀸𑀫𑁂𑀢𑁆𑀯𑀸𑀢𑀺 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀉𑀧𑀦𑀸𑀫𑁂𑀢𑁆𑀯𑀸. 𑀪𑀺𑀓𑁆𑀔𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀏𑀢𑁆𑀣 ‘‘𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀲𑁂𑀲𑁄. 𑀬𑀣𑀸𑀳 𑁋 ‘‘𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁩𑁬𑁬).

𑁨𑁯𑁩𑁦. 𑀲𑀽𑀧𑀁 𑀤𑀸𑀢𑀼𑀓𑀸𑀫𑀸 𑀯𑀸 𑀅𑀤𑀸𑀢𑀼𑀓𑀸𑀫𑀸 𑀯𑀸 𑀇𑀢𑀺 𑀫𑀼𑀳𑀼𑀢𑁆𑀢𑀓𑀁 𑀲𑀮𑁆𑀮𑀓𑁆𑀔𑁂𑀬𑁆𑀬 𑀢𑀺𑀝𑁆𑀞𑁂𑀬𑁆𑀬. 𑀅𑀦𑁆𑀢𑀭𑀸𑀢𑀺 ¶ 𑀪𑀺𑀓𑁆𑀔𑀸𑀤𑀸𑀦𑀲𑀫𑀬𑁂. 𑀦 ¶ 𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀢𑀺 𑀇𑀢𑁆𑀣𑀻 𑀯𑀸 𑀳𑁄𑀢𑀼 𑀧𑀼𑀭𑀺𑀲𑁄 𑀯𑀸, 𑀪𑀺𑀓𑁆𑀔𑀸𑀤𑀸𑀦𑀲𑀫𑀬𑁂 𑀫𑀼𑀔𑀁 𑀦 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺.

𑁨𑁯𑁩𑁧. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀆𑀭𑀜𑁆𑀜𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀸𑀦𑀻𑀬𑀸𑀤𑀻’’𑀢𑀺𑀆𑀤𑀺. 𑀧𑀸𑀦𑀻𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀪𑁄𑀚𑀦𑀻𑀬𑀅𑀕𑁆𑀕𑀺𑀅𑀭𑀡𑀺𑀲𑀳𑀺𑀢𑀓𑀢𑁆𑀢𑀭𑀬𑀝𑁆𑀞𑀻𑀦𑀁 𑀕𑀳𑀡𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀦𑁆𑀢𑀺 𑀲𑀘𑁂 𑀪𑀸𑀚𑀦𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀺, 𑀧𑀸𑀦𑀻𑀬𑀫𑁂𑀯 𑀧𑀭𑀺𑀪𑁄𑀚𑀦𑀻𑀬𑀫𑁆𑀧𑀺 𑀓𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀪𑀸𑀚𑀦𑀁 𑀅𑀮𑀪𑀦𑁆𑀢𑁂𑀦 𑀯𑁂𑀴𑀼𑀦𑀸𑀴𑀺𑀓𑀸𑀬𑀧𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀬𑀣𑀸 𑀲𑀫𑀻𑀧𑁂 𑀔𑀼𑀤𑁆𑀤𑀓𑀆𑀯𑀸𑀝𑁄 𑀳𑁄𑀢𑀺, 𑀏𑀯𑀁 𑀓𑀸𑀢𑀩𑁆𑀩𑀁. 𑀅𑀭𑀡𑀺𑀲𑀳𑀺𑀢𑁂 𑀅𑀲𑀢𑀺 𑀅𑀕𑁆𑀕𑀺𑀁 𑀅𑀓𑀸𑀢𑀼𑀫𑁆𑀧𑀺 𑀘 𑀯𑀝𑁆𑀝𑀢𑀺. 𑀬𑀣𑀸 𑀘 𑀆𑀭𑀜𑁆𑀜𑀺𑀓𑀲𑁆𑀲, 𑀏𑀯𑀁 𑀓𑀦𑁆𑀢𑀸𑀭𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀕𑀡𑀯𑀸𑀲𑀺𑀦𑁄 𑀧𑀦 𑀢𑁂𑀦 𑀯𑀺𑀦𑀸𑀧𑀺 𑀯𑀝𑁆𑀝𑀢𑀻𑀢𑀺.

𑀦𑀓𑁆𑀔𑀢𑁆𑀢𑀦𑁆𑀢𑀺 𑀅𑀲𑁆𑀲𑀬𑀼𑀚𑀸𑀤𑀺𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀁 𑀦𑀓𑁆𑀔𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑁂𑀦 𑀬𑁄𑀕𑁄 𑀘𑀸’’𑀢𑀺, 𑀢𑁂𑀦 𑀦𑀓𑁆𑀔𑀢𑁆𑀢𑁂𑀦 𑀘𑀦𑁆𑀤𑀲𑁆𑀲 𑀬𑁄𑀕𑁄 𑀜𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀚𑀸𑀦𑀺𑀢𑀩𑁆𑀩𑀸 𑀤𑀺𑀲𑀸𑀧𑀺 𑀘𑀸𑀢𑀺 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁂𑀦 𑀅𑀝𑁆𑀞𑀧𑀺 𑀤𑀺𑀲𑀸 𑀅𑀲𑀫𑁆𑀫𑁄𑀳𑀢𑁄 𑀚𑀸𑀦𑀺𑀢𑀩𑁆𑀩𑀸.

𑁨𑁯𑁩𑁨. 𑀅𑀜𑁆𑀜𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀘𑁆𑀘𑀧𑀲𑁆𑀲𑀸𑀯𑀢𑀺𑀢𑁆𑀣𑀸𑀦𑀻’’𑀢𑀺𑀆𑀤𑀺. 𑀧𑀝𑀺𑀧𑀸𑀝𑀺𑀬𑀸 𑀪𑀯𑀦𑁆𑀢𑀻𑀢𑀺 𑀕𑀢𑀸𑀦𑀼𑀓𑁆𑀓𑀫𑁂𑀦 𑀲𑁂𑀯𑀺𑀢𑀩𑁆𑀩𑀸 𑀪𑀯𑀦𑁆𑀢𑀺. 𑀬𑀣𑀸𑀳 𑁋 ‘‘𑀯𑀘𑁆𑀘𑀓𑀼𑀝𑀺𑀬𑀁, 𑀧𑀲𑁆𑀲𑀸𑀯𑀝𑁆𑀞𑀸𑀦𑁂, 𑀦𑁆𑀳𑀸𑀦𑀢𑀺𑀢𑁆𑀣𑁂𑀢𑀺 𑀢𑀻𑀲𑀼𑀧𑀺 𑀆𑀕𑀢𑀧𑀝𑀺𑀧𑀸𑀝𑀺𑀬𑁂𑀯 𑀧𑀫𑀸𑀡’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁭𑁩). 𑀬𑀣𑀸𑀯𑀼𑀟𑁆𑀠𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀕𑀢𑀧𑀝𑀺𑀧𑀸𑀝𑀺𑀁 𑀯𑀺𑀦𑀸 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸 𑀓𑀭𑁄𑀦𑁆𑀢𑀲𑁆𑀲.

𑁨𑁯𑁩𑁩. 𑀯𑀘𑁆𑀘𑀓𑀼𑀝𑀺𑀁 ¶ 𑀧𑀯𑀺𑀲𑀦𑁆𑀢𑁄 𑀲𑀳𑀲𑀸 𑀦 𑀧𑀯𑀺𑀲𑁂𑀬𑁆𑀬. 𑀉𑀩𑁆𑀪𑀚𑀺𑀢𑁆𑀯𑀸𑀢𑀺 𑀘𑀻𑀯𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸.

𑁨𑁯𑁩𑁪. 𑀦𑀺𑀢𑁆𑀣𑀼𑀦𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀘𑁆𑀘𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀯𑀘𑁆𑀘𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀫𑀦𑁂𑀦 𑀉𑀧𑀳𑀢𑁄 𑀳𑀼𑀢𑁆𑀯𑀸 𑀦𑀺𑀢𑁆𑀣𑀼𑀦𑀢𑀺 𑀘𑁂, 𑀦 𑀤𑁄𑀲𑁄’’𑀢𑀺 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀁. 𑀤𑀡𑁆𑀟𑀓𑀝𑁆𑀞𑀁 𑀔𑀸𑀤𑀢𑁄 𑀯𑀘𑁆𑀘𑀁 𑀓𑀭𑁄𑀢𑁄 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁯𑁩𑁬. 𑀔𑀭𑁂𑀦𑀸𑀢𑀺 𑀨𑀭𑀼𑀲𑁂𑀦 𑀯𑀸 𑀨𑀸𑀮𑀺𑀢𑀓𑀝𑁆𑀞𑁂𑀦 𑀯𑀸 𑀕𑀡𑁆𑀞𑀺𑀓𑁂𑀦 𑀯𑀸 𑀓𑀡𑁆𑀝𑀓𑁂𑀦 𑀯𑀸 𑀲𑀼𑀲𑀺𑀭𑁂𑀦 ¶ 𑀯𑀸 𑀧𑀽𑀢𑀺𑀦𑀸 𑀯𑀸 𑀤𑀡𑁆𑀟𑁂𑀦 𑀦 𑀅𑀯𑀮𑁂𑀔𑁂𑀬𑁆𑀬 𑀦 𑀧𑀼𑀜𑁆𑀙𑁂𑀬𑁆𑀬. 𑀦 𑀓𑀝𑁆𑀞𑀁 𑀯𑀘𑁆𑀘𑀓𑀽𑀧𑀓𑁂 𑀙𑀟𑁆𑀟𑁂𑀬𑁆𑀬𑀸𑀢𑀺 𑀢𑀁 𑀓𑀝𑁆𑀞𑀁 𑀯𑀘𑁆𑀘𑀓𑀽𑀧𑁂 𑀦 𑀙𑀟𑁆𑀟𑁂𑀬𑁆𑀬. 𑀧𑀲𑁆𑀲𑀸𑀯𑀤𑁄𑀡𑀺𑀬𑀸 𑀔𑁂𑀴𑀁 𑀦 𑀧𑀸𑀢𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁨𑁯𑁩𑁭. 𑀧𑀸𑀤𑀼𑀓𑀸𑀲𑀽𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀧𑀸𑀤𑀼𑀓𑀸𑀲𑀼. 𑀦𑀺𑀓𑁆𑀔𑀫𑀦𑁂 𑀦𑀺𑀓𑁆𑀔𑀫𑀦𑀓𑀸𑀮𑁂. 𑀢𑀢𑁆𑀣𑁂𑀯𑀸𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀧𑀸𑀤𑀼𑀓𑀸𑀲𑁆𑀯𑁂𑀯. 𑀧𑀝𑀺𑀘𑁆𑀙𑀸𑀤𑁂𑀬𑁆𑀬𑀸𑀢𑀺 𑀉𑀓𑁆𑀔𑀺𑀢𑁆𑀢𑀁 𑀘𑀻𑀯𑀭𑀁 𑀑𑀢𑀸𑀭𑁂𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑁂𑀬𑁆𑀬.

𑁨𑁯𑁩𑁮. 𑀬𑁄 𑀯𑀘𑁆𑀘𑀁 𑀓𑀢𑁆𑀯𑀸 𑀲𑀮𑀺𑀮𑁂 𑀲𑀢𑀺 𑀲𑀘𑁂 𑀦𑀸𑀘𑀫𑁂𑀬𑁆𑀬 𑀉𑀤𑀓𑀓𑀺𑀘𑁆𑀘𑀁 𑀦 𑀓𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀉𑀤𑁆𑀤𑀺𑀝𑁆𑀞𑀦𑁆𑀢𑀺 𑀬𑁄𑀚𑀦𑀸. 𑀫𑁄𑀳𑀦𑀸𑀲𑀺𑀦𑀸𑀢𑀺 𑀲𑀯𑀸𑀲𑀦𑀲𑁆𑀲 𑀫𑁄𑀳𑀲𑁆𑀲, 𑀢𑁂𑀦 𑀲𑀳𑀚𑁂𑀓𑀝𑁆𑀞𑀧𑀳𑀸𑀦𑁂𑀓𑀝𑁆𑀞𑀸𑀦𑀁 𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀜𑁆𑀘 𑀧𑀳𑀸𑀬𑀺𑀦𑀸 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀸 𑀫𑀼𑀦𑀺𑀦𑀸 𑀲𑀩𑁆𑀩𑀜𑁆𑀜𑀼𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. ‘‘𑀲𑀮𑀺𑀮𑁂 𑀲𑀢𑀻’’𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀦𑀺𑀤𑁆𑀤𑁄𑀲𑀢𑀁 𑀤𑀻𑀧𑁂𑀢𑀺. 𑀬𑀣𑀸𑀳 𑁋

‘‘𑀲𑀢𑀺 𑀉𑀤𑀓𑁂𑀢𑀺 𑀏𑀢𑁆𑀣 𑀲𑀘𑁂 𑀉𑀤𑀓𑀁 𑀅𑀢𑁆𑀣𑀺, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀧𑀦 𑀦𑀢𑁆𑀣𑀺, 𑀪𑀸𑀚𑀦𑁂𑀦 𑀦𑀻𑀳𑀭𑀺𑀢𑁆𑀯𑀸 𑀆𑀘𑀫𑀺𑀢𑀩𑁆𑀩𑀁. 𑀪𑀸𑀚𑀦𑁂 𑀅𑀲𑀢𑀺 𑀧𑀢𑁆𑀢𑁂𑀦 𑀦𑀻𑀳𑀭𑀺𑀢𑀩𑁆𑀩𑀁. 𑀧𑀢𑁆𑀢𑁂𑀧𑀺 𑀅𑀲𑀢𑀺 𑀅𑀲𑀦𑁆𑀢𑀁 𑀦𑀸𑀫 𑀳𑁄𑀢𑀺. ‘𑀇𑀤𑀁 𑀅𑀢𑀺𑀯𑀺𑀯𑀝𑀁, 𑀧𑀼𑀭𑀢𑁄 𑀅𑀜𑁆𑀜𑀁 ¶ 𑀉𑀤𑀓𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀕𑀢𑀲𑁆𑀲 𑀉𑀤𑀓𑀁 𑀅𑀮𑀪𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀳𑁄𑀢𑀺, 𑀓𑀝𑁆𑀞𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀅𑀦𑀼𑀫𑁄𑀤𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁭𑁩).

𑁨𑁯𑁩𑁯. 𑀲𑀲𑀤𑁆𑀤𑀦𑁆𑀢𑀺 𑀉𑀤𑀓𑀲𑀤𑁆𑀤𑀁 𑀓𑀢𑁆𑀯𑀸. ‘‘𑀧𑀸𑀲𑀸𑀡𑀸𑀤𑀺𑀝𑁆𑀞𑀸𑀦𑁂 𑀧𑀳𑀭𑀺𑀢𑁆𑀯𑀸 𑀉𑀤𑀓𑀁 𑀲𑀤𑁆𑀤𑀸𑀬𑀢𑀺 𑀘𑁂, 𑀦 𑀤𑁄𑀲𑁄’’𑀢𑀺 𑀲𑀺𑀓𑁆𑀔𑀸𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑀁. 𑀘𑀧𑀼 𑀘𑀧𑀽𑀢𑀺 𑀘𑀸𑀢𑀺 𑀢𑀸𑀤𑀺𑀲𑀁 𑀅𑀦𑀼𑀓𑀭𑀡𑀁 𑀓𑀢𑁆𑀯𑀸 𑀦𑀸𑀘𑀫𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀆𑀘𑀫𑀺𑀢𑁆𑀯𑀸𑀢𑀺 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸. 𑀲𑀭𑀸𑀯𑁂 𑀆𑀘𑀫𑀦𑀪𑀸𑀚𑀦𑁂 𑀉𑀤𑀓𑀁 𑀦 𑀲𑁂𑀲𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸, 𑀇𑀤𑀁 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀆𑀘𑀫𑀦𑀲𑀭𑀸𑀯𑀓𑁂𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀭 𑀳𑀺 𑀅𑀜𑁆𑀜𑁂 𑀅𑀜𑁆𑀜𑁂 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀉𑀤𑀓𑀁 𑀦 𑀲𑁂𑀲𑁂𑀢𑀩𑁆𑀩𑀁. 𑀬𑀁 𑀧𑀦 𑀲𑀗𑁆𑀖𑀺𑀓𑁂𑀧𑀺 𑀯𑀺𑀳𑀸𑀭𑁂 𑀏𑀓𑀤𑁂𑀲𑁂 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬 𑀓𑀢𑀁 𑀞𑀸𑀦𑀁 𑀳𑁄𑀢𑀺 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀯𑀸, 𑀢𑀲𑁆𑀫𑀺𑀁 𑀯𑀝𑁆𑀝𑀢𑀺. 𑀯𑀺𑀭𑁂𑀘𑀦𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀯𑀺𑀲𑀦𑁆𑀢𑀲𑁆𑀲𑀸𑀧𑀺 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁭𑁪).

𑁨𑁯𑁪𑁦. 𑀊𑀳𑀢𑀫𑁆𑀧𑀻𑀢𑀺 𑀅𑀜𑁆𑀜𑁂𑀦 𑀯𑀸 𑀅𑀢𑁆𑀢𑀦𑀸 𑀯𑀸 𑀅𑀲𑀜𑁆𑀘𑀺𑀘𑁆𑀘 𑀊𑀳𑀢𑀁 𑀫𑀮𑁂𑀦 𑀤𑀽𑀲𑀺𑀢𑀝𑁆𑀞𑀸𑀦𑀁. 𑀅𑀥𑁄𑀯𑀺𑀢𑁆𑀯𑀸𑀢𑀺 ¶ 𑀚𑀮𑁂 𑀲𑀢𑀺 𑀅𑀲𑁄𑀥𑁂𑀢𑁆𑀯𑀸 𑀚𑀮𑁂 𑀅𑀲𑀢𑀺 𑀓𑀝𑁆𑀞𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀬𑀣𑀸𑀳 𑁋 ‘‘𑀉𑀤𑀓𑀁 𑀅𑀢𑁆𑀣𑀺 𑀪𑀸𑀚𑀦𑀁 𑀦𑀢𑁆𑀣𑀺, 𑀅𑀲𑀦𑁆𑀢𑀁 𑀦𑀸𑀫 𑀳𑁄𑀢𑀺, 𑀪𑀸𑀚𑀦𑀁 𑀅𑀢𑁆𑀣𑀺 𑀉𑀤𑀓𑀁 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀅𑀲𑀦𑁆𑀢𑀁, 𑀉𑀪𑀬𑁂 𑀧𑀦 𑀅𑀲𑀢𑀺 𑀅𑀲𑀦𑁆𑀢𑀫𑁂𑀯, 𑀓𑀝𑁆𑀞𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁭𑁪). 𑀉𑀓𑁆𑀮𑀸𑀧𑀸𑀧𑀺 𑀲𑀘𑁂 𑀳𑁄𑀦𑁆𑀢𑀻𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀦𑀺 𑀲𑀘𑁂 𑀓𑀘𑀯𑀭𑀸𑀓𑀺𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. ‘‘𑀅𑀲𑁂𑀲𑀢𑁄 𑀲𑁄𑀥𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀢𑀢𑁄 𑀓𑀲𑁆𑀲𑀘𑀺 𑀓𑀘𑀯𑀭𑀲𑁆𑀲 ¶ 𑀅𑀧𑀦𑀬𑀦𑀁 𑀲𑁄𑀥𑀦𑀁 𑀦𑀸𑀫 𑀦 𑀳𑁄𑀢𑀺, 𑀦𑀺𑀲𑁆𑀲𑁂𑀲𑀓𑀘𑀯𑀭𑀸𑀧𑀦𑀬𑀦𑀫𑁂𑀯 𑀲𑁄𑀥𑀦𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁯𑁪𑁧. 𑀧𑀺𑀞𑀭𑁄𑀢𑀺 𑀅𑀯𑀮𑁂𑀔𑀦𑀓𑀝𑁆𑀞𑀦𑀺𑀓𑁆𑀔𑁂𑀧𑀦𑀪𑀸𑀚𑀦𑀁. 𑀓𑀼𑀫𑁆𑀪𑀻 𑀘𑁂 𑀭𑀺𑀢𑁆𑀢𑀸𑀢𑀺 𑀆𑀘𑀫𑀦𑀓𑀼𑀫𑁆𑀪𑀻 𑀲𑀘𑁂 𑀢𑀼𑀘𑁆𑀙𑀸.

𑁨𑁯𑁪𑁨. 𑀏𑀯𑀁 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀦𑀸𑀲𑀦𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀦𑀚𑁆𑀛𑀺𑀝𑁆𑀞𑁄’’𑀢𑀺𑀆𑀤𑀺. 𑀅𑀦𑀚𑁆𑀛𑀺𑀝𑁆𑀞𑁄𑀢𑀺 𑀅𑀦𑀦𑀼𑀜𑁆𑀜𑀸𑀢𑁄.

𑁨𑁯𑁪𑁩. 𑀯𑀼𑀟𑁆𑀠𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀯𑀼𑀟𑁆𑀠𑀢𑀭𑀸𑀕𑀫𑁂𑀢𑀺 𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀢𑀼𑀫𑀸𑀭𑀤𑁆𑀥𑁄, 𑀢𑀢𑁄𑀧𑀺 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑁂 𑀲𑀢𑀺.

𑁨𑁯𑁪𑁪. 𑀏𑀓𑀯𑀺𑀳𑀸𑀭𑀲𑁆𑀫𑀺𑀦𑁆𑀢𑀺 𑀏𑀓𑀲𑁆𑀫𑀺𑀁 𑀕𑁂𑀳𑁂. ‘‘𑀅𑀦𑀸𑀧𑀼𑀘𑁆𑀙𑀸’’𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑁂𑀳𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑁨𑁯𑁪𑁫. 𑀧𑀞𑀫𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀟𑁆𑀠𑀸𑀦𑀁 𑀲𑀦𑁆𑀦𑀺𑀥𑀸𑀦𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀇𑀤𑀸𑀦𑀺 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦𑀸𑀧𑀺 𑀢𑀲𑁆𑀲 𑀓𑀸𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦𑀧𑀺 ‘‘𑀦 𑀘 𑀥𑀫𑁆𑀫𑁄 𑀓𑀣𑁂𑀢𑀩𑁆𑀩𑁄’’𑀢𑀺 𑀆𑀳. 𑀥𑀫𑁆𑀫𑀘𑀓𑁆𑀔𑀼𑀦𑀸𑀢𑀺 𑀥𑀫𑁆𑀫𑀮𑁄𑀘𑀦𑁂𑀦 𑀥𑀫𑁆𑀫𑀕𑀭𑀼𑀓𑁂𑀦, 𑀇𑀫𑀺𑀦𑀸 𑀅𑀢𑀸𑀤𑀺𑀲𑀲𑁆𑀲 𑀓𑀢𑁄 𑀯𑀸𑀭𑁄 𑀦𑀺𑀭𑀢𑁆𑀣𑀓𑁄𑀢𑀺 𑀤𑀻𑀧𑁂𑀢𑀺.

𑁨𑁯𑁪𑁬. 𑀓𑀸𑀢𑀩𑁆𑀩𑁄𑀢𑀺 𑀚𑀸𑀮𑁂𑀢𑀩𑁆𑀩𑁄. 𑀲𑁄𑀢𑀺 𑀤𑀻𑀧𑁄. ‘‘𑀤𑁆𑀯𑀸𑀭𑀁 𑀦𑀸𑀫 𑀬𑀲𑁆𑀫𑀸 𑀫𑀳𑀸𑀯𑀴𑀜𑁆𑀚𑀁, 𑀢𑀲𑁆𑀫𑀸 𑀢𑀢𑁆𑀣 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁬𑁯) 𑀯𑀘𑀦𑀢𑁄 𑀢𑀁 𑀅𑀯𑀢𑁆𑀯𑀸 𑀆𑀧𑀢𑁆𑀢𑀺𑀓𑁆𑀔𑁂𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺, 𑀣𑀓𑁂𑀬𑁆𑀬 𑀯𑀺𑀯𑀭𑁂𑀬𑁆𑀬 𑀦𑁄’’𑀢𑀺.

𑁨𑁯𑁪𑁭. 𑀯𑀼𑀟𑁆𑀠𑀢𑁄 ¶ 𑀧𑀭𑀺𑀯𑀢𑁆𑀢𑀬𑁂𑀢𑀺 𑀬𑁂𑀦 𑀯𑀼𑀟𑁆𑀠𑁄, 𑀢𑀢𑁄 𑀧𑀭𑀺𑀯𑀢𑁆𑀢𑀬𑁂, 𑀧𑀺𑀝𑁆𑀞𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀯𑀼𑀟𑁆𑀠𑀸𑀪𑀺𑀫𑀼𑀔𑁄 𑀢𑁂𑀦 𑀧𑀭𑀺𑀯𑀢𑁆𑀢𑀬𑁂𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀓𑀡𑁆𑀡𑁂𑀦 𑀯𑀸 𑀓𑀸𑀬𑁂𑀦 𑀯𑀸 𑀢𑀁 𑀯𑀼𑀟𑁆𑀠𑀁 𑀦 𑀘 𑀖𑀝𑁆𑀝𑀬𑁂.