📜
намо тасса бхагавато арахато самма̄самбуддхасса
джина̄лан̇ка̄ра
пан̣а̄мадӣпанӣга̄тха̄
йо локаттха̄йа буддхо дханасутабхарийа̄ан̇гаджӣве чаджитва̄ пӯретва̄ а̄рамийо тидасаманупаме бодхипаккхӣйадхамме,
патва̄ бодхим̣ висуддхам̣ сакалагун̣ададам̣ сет̣т̣хабхӯто тилоке,
катва̄ дуккхасса антам̣ катасубхаджанатам̣ дуккхато мочайиттха.
натва̄на̄хам̣ джинантам̣ самупачитасубхам̣ саббалокекабандхум̣,
на̄ху йенапи тулйо кусаламахимато уттамо бхӯталоке тассева̄йам̣ увимхам̣ сувипуламамалам̣ бодхисамбха̄рабхӯтам̣,
хетум̣ хетва̄нурӯпам̣ сугатагатапхалам̣ бха̄сато ме сун̣а̄тха.
йога̄вачарасампаттидӣпанӣга̄тха̄
джа̄то йо наваме кхан̣е сутадхаро сӣлена суддхиндрийо сам̣са̄рам̣ айато бхаваккайакарам̣ дисва̄ сивам̣ кхемато,
там̣ сампа̄пакамаггадесакамуним̣ сампӯджайанто тато уддха̄нуссатибха̄вана̄дикамато сампа̄дайе там̣ сивам̣.
ваттхувисодханӣга̄тха̄
буддхоти ко буддхагун̣о ти ко со,
ачинтайа̄диттамупа̄гато йо;
анан̃н̃аса̄дха̄ран̣абхӯтаматтхам̣,
ака̄си ким̣ со кимавоча буддхо.
висуддхакхандхасанта̄но буддхоти нийамо като,
кхандхасанта̄насуддхӣ ту гун̣оти нийамо като.
ака̄си кичча̄ни динесу пан̃ча,
паса̄дайан̃чиддхибалена сена;
джана̄насесам̣ чарийа̄нукӯлам̣,
н̃атва̄навоча̄нусайаппаха̄нам̣.
анан̃н̃аса̄дха̄ран̣адӣпанӣга̄тха̄
аббхуггата̄ йасса гун̣а̄ ананта̄,
тибуддхакхеттекадива̄кароти;
джа̄на̄ти со локамимам̣ паран̃ча,
сачетанан̃чева ачетанан̃ча;
сакасса санта̄нагатам̣ паресам̣,
бйатӣтамаппаттакаматрабхӯтам̣.
анантасаттесу ча локадха̄тусу,
екова саббепи сама̄ на тена;
диса̄су пубба̄дису чаккава̄л̣а̄,
сахассасан̇кха̄йапи аппамеййа̄;
йе тесу дева̄ мануджа̄ ча брахма̄,
екаттха сан̇гамма хи мантайанта̄.
ана̄дика̄ла̄гатана̄марӯпинам̣,
йатха̄сакам̣ хетупхалаттавуттинам̣;
таббха̄вабха̄виттамасамбхун̣анта̄,
на̄на̄випалла̄саманупавит̣т̣ха̄.
каммаппаваттин̃ча пхалаппаваттим̣,
екаттана̄наттанирӣхадхамматам̣;
вин̃н̃аттисанта̄нагханена чханнато,
сиван̃джасам̣ но бхан̣итум̣ саматтха̄.
еко ва со сантикаро пабхан̇каро,
сан̇кха̄йа н̃еййа̄ни асесита̄ни;
тесан̃хи маджджхе парама̄самбхӣвадам̣,
сиван̃джасам̣ дӣпайитум̣ саматтхо.
со готамо сакйасуто муниндо,
саббасса локасса падӣпабхӯто;
анантасатте бхавабандханамха̄,
мочеси ка̄рун̃н̃апхала̄нупеккхӣ.
абхинӣха̄радӣпанӣга̄тха̄
вадетха тассӣдха анаппакам̣ гун̣ам̣,
на тена тулйо парамо ча виджджати;
ким̣ там̣ гун̣ам̣ там̣ садисена диннам̣,
сайам̣катам̣ кинну адхиччаладдхам̣.
на̄дхиччаладдхам̣ на ча пуббабуддха̄,
брахма̄динам̣ саммутийа̄ бахӯнам̣;
сайам̣катенева анопамена,
да̄на̄дина̄ ладдхамидам̣ випа̄кам̣.
ито чатуннам̣ асан̇кхийа̄нам̣,
сатам̣сахасса̄надхика̄наматтхаке;
каппе атӣтамхи сумедхата̄пасо,
веха̄йасам̣ гаччхати иддхийа̄ тада̄.
дипан̇каро на̄ма джино сасан̇гхо,
раммам̣ пурам̣ йа̄ти вирочама̄но;
мануссадевехибхипӯджийанто,
сахассарам̣си вийа бха̄н̣ума̄ набхе.
тассан̃джасам̣ ка̄тубахуссаха̄нам̣,
буддхоти сутва̄ сумано патӣто;
мамаджджа дехам̣ панимасса датва̄,
буддхо ахам̣ хессамана̄гатедисо.
тасмин̃джасе кандаратамхи пан̇ке,
катва̄на сетум̣ сайи со садехам̣;
буддхо айам̣ гаччхату пит̣т̣хийа̄ мамам̣,
бодхиссаче хессати ме ана̄гате.
уссӣсакам̣ йа̄ти джино хи тасса,
аджджха̄сайо сиджджхатимассана̄гате;
н̃атва̄на бйа̄ка̄си асесато хи,
буддхо айам̣ хессатина̄гатесу.
сутва̄на патто ва маха̄бхисекам̣,
ладдхам̣ ва бодхим̣ самануссаранто;
пӯджетва̄ йа̄те мунидевама̄нусе,
ут̣т̣ха̄йа со саммаси па̄рамӣ даса.
дал̣хам̣ гахетва̄ саматим̣сапа̄рамӣ,
сиккхаттайан̃часса джинасса сантике;
ка̄тум̣ саматтхо пи бхавасса па̄рам̣,
саттесу ка̄рун̃н̃абала̄ бхавам̣ гато.
уппаннуппаннаке со джинавараматуле пӯджайитва̄ асесам̣ буддхо есо хи осо бхавати нийамато бйа̄като техи техи тесам̣ тесам̣ джина̄нам̣ ачанаманупамам̣ пӯджайитва̄ сирена,
там̣ там̣ дуккхам̣ сахитва̄ сакалагун̣ададам̣ па̄рамӣ пӯрайиттха.
бодхисамбха̄радӣпанӣга̄тха̄
со дуккхакхиннаджанадассанадуккхакхинно,
ка̄рун̃н̃амева джаната̄йа ака̄си ниччам̣;
тесам̣ хи мочанамупа̄йамиданти н̃атва̄,
та̄дӣпара̄дхамапи аттани ропайӣ со.
да̄на̄динекаварапа̄рамиса̄гаресу,
ога̄л̣хата̄йапи падут̣т̣хаджанена диннам̣;
дуккхам̣ татха̄ атимахантатарампи кин̃чи,
на̄н̃н̃а̄си саттахитамевеа гавесайанто.
чхетва̄на сӣсам̣ хи сакам̣ даданто,
мам̣сам̣ пачитва̄на сакам̣ даданто;
со чаттагатто пан̣идха̄нака̄ле,
дут̣т̣хасса ким̣ дуссати чхеданена.
евам̣ анантамапи джа̄тисатесу дуккхам̣,
патва̄на саттахитамева гавесайанто;
дӣпан̇каре гахитасӣласама̄дхипан̃н̃ам̣,
па̄леси йа̄ва сакабодхитале сунит̣т̣хо.
йада̄бхинӣха̄рамака̄ сумедхо,
йада̄ ча маддим̣ адада̄ сивиндо;
еттхантаре джа̄тису кин̃чипекам̣,
нираттхакам̣ но агама̄си тасса.
маха̄самудде джалабиндутопи,
тадантре джа̄ти анаппака̄ ва;
нирантарам̣ пӯритапа̄рамӣнам̣,
катхам̣ пама̄н̣ам̣ упама̄ кухим̣ ва̄.
йо маггапассе мадхурамбабӣджам̣,
чха̄йа̄пхалаттха̄йа маха̄джана̄нам̣;
ропеси тасмим̣ хи кхан̣ева тена,
чха̄йа̄пхале пун̃н̃амаладдхамуддхам̣.
татхева сам̣са̄рапатхе джана̄нам̣,
хита̄йа аттанамабхиропитаккхан̣е;
сиддхам̣ ва пун̃н̃ӯпари тасса тасмим̣,
дханан̇гаджӣвам̣ пи харанти йе йе.
со са̄гаре джаладхикам̣ рухирам̣ ада̄си,
бхӯма̄пара̄джийа самам̣самада̄си да̄нам̣;
меруппама̄н̣амадхикан̃ча самол̣исӣсам̣,
кхе та̄рака̄дхикатарам̣ найанам̣ ада̄си.
габбхоккантидӣпанӣга̄тха̄
гамбхӣрапа̄нада̄на̄диса̄гаресу хи тха̄маса̄;
таранто маддида̄нена нит̣т̣ха̄петва̄на па̄рамӣ.
васанто тусӣте ка̄йе бодхипарипа̄кама̄гамма;
а̄йа̄чана̄йа ча дева̄нам̣ ма̄тугаббхамупа̄гами.
сато ча сампаджа̄но ча ма̄тукуччхимхи окками;
тасса оккантийам̣ сабба̄ дасасахассӣ пакампиттха.
тато пуббанимитта̄ни дваттим̣са̄ни тада̄ сийум̣;
тут̣т̣хахат̣т̣ха̄ ва са̄ ма̄та̄ путтам̣ пассати куччхийам̣.
виджа̄йанаман̇галадӣпанӣга̄тха̄
са̄ пун̣н̣агаббха̄ дасама̄сато парам̣,
гантва̄на пхуллам̣ варалумбинӣванам̣;
т̣хита̄ гахетва̄ вараса̄ласа̄кхам̣,
виджа̄йи там̣ путтаварам̣ сукхена.
тада̄ сахассӣдасалокадха̄тусу,
дева̄ ча на̄га̄ асура̄ ча йаккха̄;
на̄на̄диса̄ ман̇галачаккава̄л̣ам̣,
суман̇галам̣ ман̇галама̄гамим̣су.
анекаса̄кхан̃ча сахассаман̣д̣алам̣,
чхаттам̣ марӯ дха̄райуманталиккхе;
суван̣н̣адан̣д̣а̄ випатанти ча̄мара̄,
кхаджджим̣су бхерӣ ча надим̣су сан̇кха̄.
маленакена̄пи анӯпалитто,
т̣хито ва па̄да̄ни паса̄райанто;
катхӣ ва дхамма̄санатотаранто,
джа̄то йатха̄диччаваро набхамха̄.
кхӣн̣а̄сава̄ брахмаган̣опагантва̄,
суван̣н̣аджа̄лена пат̣иггахесум̣;
тато ча дева̄джиначаммакена,
тато дукӯлена ча там̣ манусса̄.
тесам̣ пи хаттха̄ варабхӯмийам̣ т̣хито,
диса̄ вилокеси сабба̄ самантато;
вадим̣су дева̄ пи ча брахмака̄йика̄,
тайа̄ само каттхачи наттхи уттаро.
гантва̄на уттарам̣ сатта падава̄рехи виккамо,
сӣхана̄дам̣ надӣ тесам̣ девата̄нам̣ хи са̄вайам̣.
тато путтам̣ гахетва̄на гата̄ ма̄та̄ сакан̇гхарам̣,
ма̄та̄ саттамийам̣ гантва̄ деапуттаттама̄гами.
те брахман̣а̄ пан̃чамийам̣ субхутта̄,
на̄мам̣ гахетум̣ варалаккхан̣а̄ни;
дисва̄на екан̇гулимуккхипим̣су,
буддхо айам̣ хессати вӣтара̄го.
джин̣н̣ан̃ча дисва̄ бйа̄дхикам̣ матан̃ча,
авха̄йитам̣ паббаджитан̃ча дисва̄;
оха̄йа паббаджджамупети ка̄ме,
буддхо айам̣ хессати вӣтара̄го.
ага̄рийасампаттидӣпанӣга̄тха̄
ка̄лаккамена чандо ва вад̣д̣ханто вад̣д̣хите куле,
пун̃н̃одайенуденто со бха̄н̣ума̄ вийа амбаре.
сиддхатхако хи сиддхаттхо ладдха̄ девим̣ йасодхарам̣,
чатта̄лӣсасахассехи пӯриттхӣхи пураккхито.
раммасураммасубхесу гхаресу,
тин̣н̣амутӯнамануччхавикесу;
диббасукхам̣ вийа бхун̃джи сукхам̣ со,
аччхарийаббхутара̄джавибхӯтим̣.
неккхаммаджджха̄сайадӣпанӣйамакага̄тха̄
намо тасса йато махимато йасса тамо на
дисва̄ нимитта̄ни мадаччхида̄ни,
тхӣнам̣ вирӯпа̄ни ратаччхида̄ни;
па̄па̄ни камма̄ни сукхаччхида̄ни,
ладдха̄ни н̃а̄н̣а̄ни бхаваччхида̄ни.
падиттагеха̄ вийа бхеравам̣ равам̣,
равам̣ саммут̣т̣ха̄йа гато махеси;
махесимолокийапуттаматтано,
таноси но пемамахогхаматтано.
умма̄раумма̄рагатуддхаритва̄,
падам̣ падам̣ йа̄танара̄сабхасса;
алам̣ алам̣ка̄ратарена гантум̣,
матӣ матӣветиманан̇габхан̇ге.
умма̄раумма̄рагато махеси,
анан̇габхан̇гам̣ самачинтайиттха;
ким̣ ме джара̄маччумукхе т̣хитасса,
на ме васе ка̄мавасе т̣хитасса.
ка̄мена ка̄мена на са̄дхйамоккхам̣,
ма̄нена ма̄нена маматтхи кин̃чи;
ма̄ро сасено хи ава̄ран̣ӣйо,
йантена уччхум̣ вийа маддатӣ мам̣.
а̄диттамуйа̄тапайа̄тамӯнам̣,
ата̄н̣а̄лен̣а̄саран̣е джане те;
дисва̄на дисва̄на сивам̣ майа̄ те,
ка̄мена ка̄мена катхам̣ винеййа.
виджджа̄виджджа̄йа чутан̃чупетам̣,
аса̄раса̄рӯпагатан̃джанам̣ джанам̣;
виджджа̄йавиджджа̄йа йуто чутохам̣,
пахоми та̄ретумасан̇гахо гато.
магганти но дит̣т̣хигата̄паваггам̣,
агга̄ ти тева̄ху джана̄ самагга̄;
наггам̣ ахо мохатамасса ваггам̣,
ваггам̣ ханисса̄ми тамаггамагга̄.
пасейхака̄рена асейхадуккхам̣,
джана̄ джанентӣха джана̄намева;
пасейхака̄рена̄ асейхадуккхам̣,
па̄пам̣ на джа̄нанти тато нида̄нам̣.
те огхайога̄савасам̣килеса̄,
тамева на̄сенти тато самут̣т̣хита̄;
екантикам̣ джа̄ти джара̄ ча маччу,
нирантарам̣ там̣ бйасанан̃чанекам̣.
чӣрам̣ килеса̄насамуджджалантам̣,
дисва̄на сатта̄нусайам̣ сайамбхӯ;
са̄дхеми бодхим̣ винайа̄ми сатте,
паччха̄пи пасса̄ми сутам̣ сутантам̣.
там̣ диббачаккам̣ кхурачаккама̄лам̣,
раджджам̣ саса̄раджджасамаджджамаджджам̣;
те бандхава̄ бандханама̄гата̄ паре,
суто пасӯтойаманан̇гадӯто.
самуджджалантам̣ васатӣ сатӣсирӣ,
сирӣсапа̄га̄рамидам̣ маха̄висам̣;
даддаллама̄на̄ йуватӣ ватӣма̄,
сакан̣т̣ака̄йева саман̃джасан̃джасе.
йасса̄ вира̄джитасирӣ сирийа̄пи наттхи,
тасса̄валокийа на титтиваса̄наматтхи;
гаччха̄ми ханда таванан̇га сираппабхедам̣,
маттебхакумбхупари сӣхавила̄сага̄мим̣.
бхо бхо анан̇гасучира пи панун̣н̣аба̄н̣а,
ба̄н̣а̄ни сам̣хара панун̣н̣амито ниродха;
родхена ча̄падагато манасо на соча,
сочам̣ таваппанавалокийа йа̄ми сантим̣.
ратӣ ратӣ ка̄магун̣е вивеке,
алам̣ алантева вичинтайанто;
манам̣ манан̇га̄лайасампада̄лайам̣,
тахим̣ тахим̣ дит̣т̣хаба̄ла̄ ва пакками.
па̄дуддха̄равимхайадӣпанӣга̄тха̄
йа̄ван̃чайам̣ рави чаратйачалена руддхе,
йа̄ван̃ча чаккаратанан̃ча пайа̄ти локе;
та̄виссаро набхачаро джитача̄туранто,
хитва̄ катхам̣ ну падамуддхари со нира̄со.
дӣпе маха̄ ча чатура̄дхикадвесахассе,
татра̄пи сет̣т̣хабхаджитам̣ вараджамбудӣпам̣;
бхӯна̄бхикам̣ капилаваттхупурам̣ сураммам̣,
хитва̄ катхам̣ ну падамуддхари со нира̄со.
н̃а̄тӣнасӣти кулато хи сахасса са̄кйе,
хаттхиссадхан̃н̃адханино виджита̄рисан̇гхе;
готтена готамабхавам̣ питаран̃джанаггам̣,
хитва̄ катхам̣ ну падамуддхари со нира̄со.
раммам̣ сураммавасатим̣ ратануджджалантам̣,
гимхепи вимхайакарам̣ сурамандира̄бхам̣;
усса̄питаддхаджапат̣а̄касита̄тапаттам̣,
хитва̄ катхам̣ ну падамуддхари со нира̄со.
сапоккхара̄ поккхаран̣ӣ чатассо,
супуппхита̄ мандирато саманта̄;
кока̄ надантӯпари кокана̄де,
хитва̄ катхам̣ ну падамуддхари со нира̄со.
саре сародже рудита̄л̣ипа̄л̣и,
самантато пассати пан̃джаран̃джаса̄;
дисва̄равинда̄ни мукха̄равиндам̣
на̄тхасса ладжджа̄ вийа сам̣куджанти.
мадхура̄ мадхура̄бхирута̄,
чарита̄ падуме падумел̣иган̣а̄;
васатим̣ адхуна̄ мадхуна̄,
акарум̣ джахитам̣ кимидам̣ патина̄.
тамха̄ расам̣ мадхукара̄ бхаванам̣ харитва̄,
нинна̄дино самадхурам̣ мадхурам̣ каронти;
на̄дена на̄даматириччупавӣн̣айанти,
наччанти та̄ сурапуре ван̣ита̄ ва та̄ва.
сан̃чодита̄ пӣн̣апайодхара̄дхара̄,
вира̄джита̄нан̇гаджамекхала̄кхала̄;
суран̇ган̣а̄ ван̇гаджапхассада̄ сада̄,
рама̄ рама̄пенти варан̇гада̄гада̄.
кара̄тиратта̄ ратираттара̄ма̄,
та̄л̣енти та̄л̣а̄вачаре саманта̄;
наччуггата̄некасахассахаттха̄,
саккопи ким̣ сакйасамоти чодайум̣.
виса̄ланетта̄ хасула̄ сумаджджха̄,
нимбаттханӣ вимхайагӣтасадда̄;
алан̇ката̄ малладхара̄ суваттха̄,
наччанти та̄л̣а̄вачарехи гхут̣т̣ха̄.
йа̄сам̣ хи локе упама̄ наттхи,
та̄сам̣ хи пхассесу катха̄вака̄са̄;
там̣ та̄дисам̣ ка̄маратим̣нубхонто,
хитва̄ катхам̣ ну падамуддхари со нира̄со.
па̄депа̄де валайавирава̄мекхала̄вӣн̣а̄на̄да̄,
гӣтам̣гӣтам̣ патиратикарам̣ га̄йатӣ га̄йатӣ са̄;
хаттхехаттхе валайачалита̄ самбхамам̣ самбхаманти,
дисва̄дисва̄ ити ратикарам̣ йа̄ти ха̄ха̄ кимӣха̄.
апунара̄ваттигаманадӣпанӣйамакага̄тха̄
анантака̄лопачитена тена,
пун̃н̃ена ниббаттавима̄найа̄не;
тасмим̣ дине джа̄тасутам̣ паджа̄патим̣,
хитва̄ гато со сугато гато ва.
там̣ джӣвама̄нам̣ питаран̃ча ма̄тарам̣,
те н̃а̄таке та̄дисийо ча иттхийо;
те та̄дисе раммакаре никете,
хитва̄ гато со сугато гато ва.
кхоман̃ча паттун̣н̣адукӯлачӣнам̣,
сака̄сикам̣ са̄дхусугандхава̄ситам̣;
нива̄сито собхати ва̄саво ва,
хитва̄ гато со сугато гато ва.
видхиппака̄са̄ нидхийо чатассо,
самуггата̄ бхӯтадхара̄ васундхара̄;
сатта̄васатта̄васудха̄ судха̄са̄,
хитва̄ гато со сугато гато ва.
суван̣н̣атха̄ле сатара̄джике субхе,
са̄дхум̣ сугандхам̣ сучиса̄либходжанам̣;
бхутва̄ сава̄сӣхи вила̄синӣхи,
хитва̄ гата со сугато гато ва.
манун̃н̃агандхена асун̃н̃агандхо,
сугандхагандхена вилиттагатто;
сугандхава̄тена сувиджджитан̇го,
хитва̄ гато со сугато гато ва.
сулаккхан̣е хевабхилаккхитан̇го,
паса̄дхито девапаса̄дханена;
вирочама̄но самара̄джинӣхи,
хитва̄ гато со сугато гато ва.
на̄на̄сана̄ни сайана̄ни нивесана̄ни,
бха̄бха̄нибха̄ни ратана̄карасаннибха̄ни;
татруссита̄ни ратанаддхаджабхӯсита̄ни,
хитва̄ ва та̄ни химабиндусама̄ни та̄ни.
на̄на̄видхехи ратанехи самуджджалехи,
на̄рӣхи ниччамупага̄йитахаммийехи;
раджджехи чаккаратана̄дивибхӯситехи,
йа̄то тато хи махито пурисассарехи.
двипа̄дабйа̄сайамакага̄тха̄
йасодхарам̣ пӣн̣апайодхара̄дхарам̣,
анан̇гаран̇гаддхаджабхӯтаман̇гам̣;
деваччхара̄вуджджалитам̣ патиббатам̣,
хитва̄ гато со сугато ва нӯна.
сабха̄ваниччхандаматим̣ пабха̄ватим̣,
бхатто кусо сам̣хари бхаттака̄джам̣;
та̄йа̄бхирӯпам̣ пи йасодхарам̣ варам̣,
хитва̄ гато со сугато ва нӯна.
пуре пуре сан̃чари кхаггахаттхо,
варам̣ париттхӣнам̣ аниттхигандхо;
сирин̃ча рин̃ча̄пи на рин̃чи на̄рим̣,
хитва̄ниманда̄ни гато татха̄гато.
хариттачо ра̄габалена девийа̄,
аваттхалин̇гена на лин̇гануссари;
асеви ка̄мам̣ тамида̄ни ка̄мам̣,
хитва̄ гато со сугато ва нӯна.
апамеййакаппесу вивекасевӣ,
хитва̄ гато раджджасирим̣ вариттхим̣;
ан̣ум̣ калим̣ ван̣н̣айи там̣ пура̄н̣ам̣,
ваттхамхи чхиддам̣ вийа туннака̄ро.
татха̄ти мантва̄на ида̄нинан̇го,
йасодхарам̣ паггахито дхаджам̣ ва;
матто джитомхӣ ти паматтабандху,
на пасси н̃а̄н̣а̄санипа̄тамантарам̣.
дисва̄на дуккха̄наласамбхавам̣бхавам̣,
катва̄ тадуппа̄даканан̇габхан̇гам̣;
йасодхарам̣ пӣн̣апайодхара̄дхарам̣,
хитва̄ гато буддхабалаппадам̣ падам̣.
анантасатта̄наманантака̄ле,
манан̇гахетва̄на джито анан̇го;
пара̄джито нӯна хи екакасса,
татха̄гато со на пуна̄гато ва.
дисва̄на н̃а̄н̣а̄санипа̄тамантарам̣,
татха̄гато со на пуна̄гато ва;
татха̄гато со на пуна̄гато ва,
дисва̄нан̃а̄н̣а̄санипа̄тамантарам̣.
типа̄дабйа̄сайамакага̄тха̄
татха̄гатаччхерамахоси тасса,
татха̄ хима̄ропитада̄хасантим̣;
татха̄ хи ма̄ро пи тада̄ха сантим̣,
татха̄ хи ма̄ропи тада̄ хасантим̣.
па̄дабйа̄самаха̄йамакага̄тха̄
сака̄мада̄та̄ винайа̄манатагӯ,
сака̄мада̄та̄ винайа̄манантагӯ;
сака̄мада̄та̄ винайа̄манантагӯ,
сака̄мада̄та̄ винайа̄манантагӯ.
абйа̄пета̄дйантайамакага̄тха̄
равераверорабхима̄рабхераве,
равераверива бхераве раве;
раве раве сӯдитага̄раве раве,
равераведеси джинораве раве.
пат̣иломайамакага̄тха̄
лока̄йа̄татайа̄ ка̄ло висесам̣ на на сам̣севи,
висесам̣ на на сам̣севи лока̄ йа̄татайа̄ ка̄ло.
ра̄джара̄джайасопетависесам̣ рачитам̣ майа̄,
йа̄матам̣ чирасам̣севитапесо йаджара̄джара̄.
екат̣ха̄ника̄дийамакага̄тха̄
а̄кан̇кхаккха̄кан̇кхан̇га кан̇кха̄ган̇га̄кха̄гахака,
кан̇кха̄га̄хакакан̇кха̄гха ха̄ ха̄ кан̇кха̄ кахам̣ кахам̣.
аппагаббхо апагаббхо амохо ма̄ памохако,
маггамукхам̣ мокхама̄ха ма̄ха̄ мохамӯхаккхамам̣.
па̄па̄па̄пабхавам̣ пассам̣ па̄па̄пабхавуггато,
па̄па̄па̄пабхава̄сан̇га̄ па̄па̄па̄пабхава̄гато.
кусала̄кусалам̣ пассам̣ кусала̄кусалам̣ чаджи,
кусала̄кусала̄сан̇га кусала̄кусала̄ чуто.
аккхаруттарикайамакага̄тха̄
нона̄нино нанӯна̄ни нанена̄ни нана̄нино,
нунна̄нена̄ни нӯна на на̄нанам̣ на̄нанена но.
са̄ре сура̄суре са̄рӣ расаса̄расариссаро,
расаса̄рарасе са̄ри сура̄сурасарассире.
дева̄нам̣ нандано дево девадева на нанди но,
ведадӣнена ведана веди ведана ведино.
дева̄сане нисинно со девадево саса̄сане,
нисинна̄нам̣ садева̄нам̣ десеси дассана̄санам̣.
пахел̣ига̄тха̄
дасана̄вагато сан̃н̃о андхасса тамадо рави,
ат̣т̣хама̄пун̣н̣асан̇каппо па̄тванан̃н̃аманан̃н̃ива.
бйа̄пета̄дийамакага̄тха̄
екантамева сапараттхапаро махеси,
екантамева дасапа̄рамита̄балена;
екантамева хатама̄рабалена тена,
екантамева сувисуддхамалаттха бодхим̣.
маха̄падха̄надӣпанӣга̄тха̄
орохитотохитапа̄падхаммо,
чханнена са чханнахайена гантва̄;
аноматӣрамхи аномасатто,
аномапаббаджджамупа̄гато со.
нира̄мисам̣ пӣтисукхам̣ анӯпамам̣,
анӯпийе амбаване алаттха;
сарӯпасобха̄йа вирӯпасобхам̣,
сара̄джикам̣ ра̄джагахам̣ кариттха.
тато ал̣а̄ра ӯдаката̄паса̄нам̣,
джха̄ненасантут̣т̣хамано виха̄йа;
маха̄падха̄на̄йа урувелабхӯмим̣,
гато сикхаппаттамака̄си дуккарам̣.
на ка̄мато неватидуккарамхи,
саббан̃н̃ута̄ сиджджхати маджджхима̄йа;
н̃атва̄на там̣ пуббагун̣опаладдхам̣,
дхаммам̣ сама̄нетумага̄ субодхим̣.
ма̄рапара̄джайадӣпанӣга̄тха̄
тибуддхакхеттамхи тисетачхаттам̣,
ладдха̄на лока̄дхипатӣ бхавеййа;
гантва̄на бодхимхипара̄джита̄сане,
йуддха̄йа ма̄реначало нисӣди.
датва̄на мам̣сам̣ раджджам̣ пита̄ суддходано тада̄,
намассама̄но сираса̄ сетачхаттена пӯджайи.
сайам̣ на̄ра̄йанабало абхин̃н̃а̄балапа̄рагӯ,
джетум̣ саббасса локасса бодхиман̣д̣ам̣упа̄гами.
тада̄ васаваттӣра̄джа̄ чхака̄мавачариссаро,
сасена̄ва̄хано бодхиман̣д̣ам̣ йуддха̄йупа̄гами.
етха ган̣хатха бандхатха чхат̣т̣етха чет̣акам̣ имам̣,
мануссакалале джа̄то кимиханти на ман̃н̃ати.
джалантам̣ нававидхам̣ вассам̣ васса̄пети анаппакам̣,
дхӯмандхака̄рам̣ катва̄на па̄теси асинам̣ бахум̣.
чакка̄вудхам̣ кхипенто пи на̄саккхи кин̃чи ка̄таве,
гахетаббам̣ хи гахан̣ам̣ апассанто итибрави.
сиддхаттха касма̄ а̄си ну а̄сане мама сантаке,
ут̣т̣хехи а̄сана̄ но че пха̄леми хадайам̣ тава.
сапа̄дамӯле кӣл̣антам̣ пассанто тарун̣ам̣ сутам̣,
пита̄ вудиккхи там̣ ма̄рам̣ метта̄йанто дайапаро.
тада̄ со асамбхива̄чам̣ сӣхана̄дам̣ надӣ муни,
на джа̄на̄ти сайам̣ майхам̣ да̄сабха̄вапийам̣ кхал̣о.
йена кеначи каммена джа̄то девапуре варе,
сакам̣ гатим̣ аджа̄нанто локаджет̣т̣хоти ман̃н̃ати.
ананталокакха̄тумхи сатта̄нам̣ хи катам̣ субхам̣,
майхекапа̄рамийа̄ пи калам̣ наггхати сол̣асим̣.
тираччха̄но сасо хутва̄ дисва̄ йа̄чакама̄гатам̣,
пачитва̄на сакам̣ мам̣сам̣ патииоггимхи да̄таве.
евам̣ анантака̄лесу катам̣ дуккарака̄рикам̣,
ко хи на̄ма кареййан̃н̃о анумматто сачетано.
евам̣ анантапун̃н̃ехи сиддхам̣ дехамимам̣ пана,
йатха̄бхутам̣ аджа̄нанто мануссосӣ ти ман̃н̃ати.
на̄хам̣ мануссомануссо на брахма̄ на ча девата̄,
джара̄маран̣ам̣ локасса дассетум̣ панидха̄гато.
анупалитто локена джа̄тонантаджино ахам̣,
буддхо бодхитале хутва̄ та̄реми джанатам̣ бахум̣.
саманта̄ дхаджинам̣ дисва̄ йуддхам̣ ма̄рам̣ сава̄ханам̣,
йуддха̄йа паччугаччха̄ми ма̄ мам̣ т̣ха̄на̄ ача̄вайи.
йанте там̣ наппасахати сенам̣ локо садевако,
танте пан̃н̃а̄йа гаччха̄ми а̄мам̣ паттам̣ ва асмана̄.
иччханто са̄сапе габбхе чан̇кама̄ми ито чито,
иччханто локадха̄тумхи аттабха̄вена чха̄дайи.
ете саббе гахетва̄на чун̣н̣етум̣ аччхара̄йапи,
аттхи тха̄мам̣ балам̣ майхам̣ па̄н̣агха̄то на ват̣т̣ати.
имасса ган̣д̣уппа̄дасса а̄йудхена балена ким̣,
майхам̣ хи тена па̄пена салла̄по пи на йуджджати.
паллан̇кам̣ мама бха̄ва̄йа киматтхан̃н̃ена саккхина̄,
кампита̄ маддийа̄ да̄на̄ саккхи хоти айам̣ махӣ.
ити ватва̄ даккхин̣ам̣ ба̄хум̣ патхавийа̄ пан̣амайи,
тада̄ кампиттха патхавӣ маха̄гхосо аджа̄йатха.
патхавӣгхосена а̄ка̄се гаджджанто асани пхали,
тасмим̣ маджджхе гато ма̄ро сапарисо бхайатаджджито.
маха̄ва̄тасамуддхатабхасмам̣ ва викириййатха,
маха̄гхосо аджа̄йиттха сиддхатасса джайо ити.
абхисамбодхидӣпанӣга̄тха̄
пурато гаччхати чандо раджатачаккам̣ ва амбаре,
сахассарам̣си сурийо паччхименупагаччхати.
маджджхе бодхидумаччхатте паллан̇ке аппара̄джите,
паллан̇кена нисӣдитва̄ дхаммам̣ саммасате муни.
сакко тасмим̣ кхан̣е сан̇кхам̣ дхаманто абхидха̄вати,
брахма̄ тийоджанам̣ чхаттам̣ дха̄рети мунимуддхани.
ман̣ита̄лаван̣т̣ам̣ тусӣто суйа̄мо ва̄л̣абӣджаним̣,
на̄на̄ман̇галабхан̣д̣а̄ни гахито сесадевата̄.
евам̣ дасасахассамхи сакко брахма̄ ча девата̄,
сан̇кха̄дӣнӣ дхаманта̄ ча чаккава̄л̣амхи пӯрайум̣.
ман̇гала̄ни гахетва̄на тит̣т̣ханти ка̄чи девата̄,
дхаджама̄ла гахетва̄на татха̄ пун̣н̣агхат̣а̄дайо.
таттха наччанти га̄йанти сел̣енти ва̄дайанти ча,
дева̄ дасасахассамхи тут̣т̣хахат̣т̣ха̄ памодита̄.
дхамма̄матарасасса̄дам̣ лабхисса̄масса сантике,
найана̄матарасасса̄дам̣ па̄т̣иха̄рийан̃ча пасситум̣.
джа̄рамаран̣аканта̄ра̄ сокопа̄йа̄сасаллато,
мочеси ка̄мапа̄самха̄ десенто аматам̣ падам̣.
ити тут̣т̣хехи девехи пӯджийанто нара̄сабхо,
кин̃чи пӯджам̣ ачинтенто чинтенто дхаммамуттамам̣.
саббаттхаса̄дхито санто сиддхаттхо аппара̄джито,
чаккава̄л̣асила̄са̄н̣ипа̄ка̄рехи манораме.
та̄ра̄ман̣икхачита̄ка̄савита̄не чандадӣпаке,
ма̄на̄ратамападжджоте ма̄ла̄гандха̄дипӯджите.
диббехи чхан̣абхерӣхи гхут̣т̣хе ман̇галагӣтийа̄,
чаккава̄л̣е суппа̄са̄де бодхиман̣д̣амаха̄тале.
бодхируккхаман̣иччхатте паллан̇ке аппара̄джите,
ниссинно пат̣хаме йа̄ме пуримам̣ джа̄тимануссари.
намарӯпа̄мануппатти судит̣т̣ха̄ хоти тенидха̄,
сакка̄тадит̣т̣хи тенасса пахӣна̄ хоти саббасо.
тато хи дутийе йа̄ме йатха̄йаммупаге сари,
судит̣т̣хам̣ хоти тенасса каммаклесехи самбхавам̣.
кан̇кха̄витаран̣ӣ на̄ма н̃а̄н̣антам̣ самупа̄гатам̣,
тенасеса пахӣйиттха кан̇кха̄ сол̣асадха̄ т̣хита̄.
тато со татийе йа̄ме два̄дасан̇ге асесато,
со пат̣иччасамуппа̄де н̃а̄н̣амота̄райӣ муни.
авиджджава̄дйа̄нуломена джара̄дипат̣иломато,
саммасанто йатха̄бхӯтам̣ н̃а̄н̣адассанама̄гами.
каппакот̣исатена̄пи аппамеййесу джа̄тису,
лобхам̣ асесада̄нена вина̄сенто пунаппунам̣.
сӣлена кхантиметта̄йа кокхадосам̣ нива̄реси,
пан̃н̃а̄йа мохам̣ чхетва̄на миччха̄дит̣т̣хи татхева ча.
гарӯпасевана̄дӣхи вичикиччхам̣ винодайам̣,
ма̄нуддхаччам̣ виноденто куле джет̣т̣хопача̄йина̄.
неккхаммена вина̄сенто ка̄мара̄гам̣ пунаппунам̣,
саччена висам̣ва̄дам̣ косаджджам̣ вӣрийена ча.
евам̣ да̄на̄дина̄ там̣ там̣ килесан̇гам̣ винодайам̣,
сувад̣д̣хита̄ маха̄пан̃н̃а̄ катхам̣ сантим̣ на рӯхати.
судуккарам̣ каритва̄на да̄на̄дипаччайам̣ пуре,
на кин̃чи бхавасампаттим̣ паттхеси бодхимуттамам̣.
пан̣идха̄намха̄ пат̣т̣ха̄йа катам̣ пун̃н̃ан̃ча паттханам̣,
еккаттха да̄ни сампаттим̣ дети бодхим̣ асам̣сайам̣.
тато со саббасан̇кха̄ре аниччадуккханаттато,
саммасантонуломена нибба̄нам̣ самупа̄гами.
сава̄сане килесе со джха̄пентонуматтам̣ пи ча,
арахаттаппаттийа̄ суддхо буддхо бодхитале аху.
патто виметтим̣ варасетачхаттам̣,
со пӣтивегена уда̄нудӣрайи;
чхетва̄на ма̄ре виджита̄рисан̇гхо,
тибуддхакхеттекадива̄каро аху.
ра̄джа̄дхира̄джа̄ варамевама̄си,
тичхаттадха̄ри варадхаммара̄джа̄;
маха̄сахассам̣ пи ча локадха̄тум̣,
сарена вин̃н̃а̄пайитум̣ саматтхо.
буддхо лока̄локе локе,
джа̄то сатто конумматто;
суддхам̣ буддхам̣ огха̄ тин̣н̣ам̣,
саддхо пан̃н̃о ко но ванде.
бхаджитам̣ чаджитам̣ паванам̣ бхаванам̣,
джахитам̣ гахитам̣ самалам̣ амалам̣;
сугатам̣ агатам̣ сугатим̣ агатим̣,
намитам̣ амитам̣ наматим̣ суматим̣.
дхаммачаккапаваттанадӣпанӣга̄тха̄
самма̄самбодхин̃а̄нам̣ хатасакаламалам̣ суддхато ча̄тисуддхам̣,
аддха̄ ладдха̄ суладдхам̣ ватамити сататам̣ чинтайанто субодхим̣;
сатта̄хам̣ саттамевам̣ вивидхапхаласукхам̣ витина̄меси ка̄лам̣,
брахмена̄йа̄чито со исипатанаване ваттайӣ дхаммачаккам̣.
па̄т̣иха̄рийадӣпанӣга̄тха̄
брахмасса саддам̣ каравӣкабха̄н̣им̣,
йатхиччхитам̣ са̄вайитум̣ саматтхам̣;
саччам̣ пийам̣ бхӯтахитам̣ вадантам̣,
на пӯджайе ко хи наро сачетано.
иддхи ча а̄десана̄нуса̄санӣ,
па̄т̣ихӣре бхагава̄ васӣ аху;
катва̄на аччхерасупа̄т̣ихӣрам̣,
десеси дхаммам̣ анукампимам̣ паджам̣.
навагун̣адӣпанӣга̄тха̄
евам̣ хи буддхаттамупа̄гато со,
десеси дхаммам̣ санара̄мара̄нам̣;
на̄на̄найехӣбхисамеси сатте,
тасма̄ хи джха̄то тибхавесу на̄тхо.
аддха̄ ладдха̄ дхамма̄локам̣,
дит̣т̣ха̄ патта̄ н̃а̄та̄ саччам̣;
тин̃н̃а̄ра̄га̄досамоха̄,
тхомесум̣ те дева̄ брахма̄.
мунира̄джаваро нарара̄джаваро,
дивидеваваро сучибрахмаваро;
сакапа̄пахаро парапа̄пахаро,
сакавуд̣д̣хикаро паравуд̣д̣хикаро.
санара̄марубрахмаган̣ебхи рута̄,
араха̄дигун̣а̄ випула̄ вимала̄;
навадха̄ васудха̄гаган̣е,
сакале тидиве тибхаве висат̣а̄.
йе писса те бхагавато ча ачинтийа̄дӣ,
суддха̄тисуддхатарабуддхагун̣а̄ хи саббе;
сан̇кхепато нававидхесу падесу кхитта̄,
ваккха̄ми да̄ни араха̄дигун̣е ахам̣ пи.
йо чӣдха джа̄то арахам̣ нира̄со,
самма̄бхисамбуддхасамантачаккху;
сампаннавиджджа̄чаран̣огхатин̣н̣о,
самма̄гато со сугато гато ва.
аведи со локамимам̣ паран̃ча,
амуттаро са̄ратхидаммасатте;
садевака̄нам̣ варасаттхукиччам̣,
ака̄си буддхо бхагава̄ висуддхо.
гун̣адӣпанӣга̄тха̄
на тасса адит̣т̣ханамидхаттхи кин̃чи,
ато авин̃н̃а̄тамаджа̄нитаббам̣;
саббам̣ абхин̃н̃а̄си йадаттхи н̃еййам̣,
татха̄гато тена самантачаккху.
ити махитамананта̄киттисамбха̄раса̄рам̣,
сакаладасасахассӣлокадха̄тумхи ниччам̣;
упачитасубхахетупайута̄нантака̄лам̣,
тадиха сугатабодхиса̄дхукам̣ чинтанӣйам̣;
таккабйа̄каран̣ан̃ча дхаммавинайам̣ сутва̄ пи йо пан̃н̃ава̄,
тена̄йам̣ сучиса̄рабхӯтавачанам̣ вин̃н̃а̄йате кевалам̣;
хетун̃ча̄пи пхалена тена сапхалам̣ сампассама̄но тато бодхим̣ саддахатева тасса махата̄ва̄йамато самбхавам̣.
йо саддаханто пана тасса бодхим̣,
вутта̄нуса̄рена гун̣ераха̄дӣ;
катхети чинтенти ча со мухуттам̣,
оха̄йа па̄па̄ни упети сантим̣.
саддхеййа̄ те чинтеййа̄ те,
вандеййа̄ те пӯджеййа̄те;
буддхолока̄локе локе,
джа̄те нетам̣ паттхентена.
пӯджа̄нидха̄надӣпанӣга̄тха̄
тасама̄ хи джа̄товаракамхи тасса,
а̄йаттаке ман̇галачаккава̄л̣е;
бхӯтехи ваттхӯхи манорамехи,
пӯджеми там̣ пӯджитпӯджитам̣ пуре.
сохам̣ аджджа панетасмим̣ чаккава̄л̣амхи пуппхите,
тхаладже джаладже ва̄пи сугандхе ча агандхаке.
мануссесу анекаттха тал̣а̄куййа̄нава̄пису,
паване химавантасмим̣ таттха сатта маха̄саре.
париттадӣпе двисахассе маха̄дӣпе супуппхите,
саттапарибхан̣д̣аселесу синерупаббатуттаме.
кумудуппалака̄дӣни на̄га̄нам̣ бхаванесупи,
па̄т̣ала̄дӣни пуппха̄ни асура̄нам̣ хи а̄лайе.
ковил̣а̄ра̄дика̄ни ту девата̄нам̣ хи а̄лайе,
евама̄дӣ анекаттха пуппхите дхаран̣ӣрухе.
чампака̄ салала̄ нимба̄ на̄гапунна̄гакетака̄,
вассика̄ маллика̄ са̄ла̄ ковил̣а̄ра̄ ча па̄т̣али.
индӣвара̄ асока̄ ча кан̣ика̄ра̄ ча макула̄,
падума̄ пун̣д̣арика̄ ча согандхикумудуппала̄.
ете чан̃н̃е ча руккха̄ ча валлийо ча̄пи пуппхита̄,
сугандха̄ сукхасампхасса̄ на̄на̄ван̣н̣анибха̄ субха̄.
вичитра̄ нӣла̄нека̄ни пӣта̄ лохитака̄ни ча,
ка̄л̣а̄ сета̄ ча ман̃джат̣т̣ха некаван̣н̣а̄ супуппхита̄.
собхате паббате хет̣т̣ха̄ сарехи ванара̄джихи,
сандама̄на̄хи ган̇га̄хи химава̄ ратана̄каро.
паттакин̃джаккхарен̣ӯхи окин̣н̣ам̣ хоти там̣ ванам̣,
бхамара̄ пуппхагандхехи саманта̄ абхина̄дита̄.
атхетта сакун̣а̄ санти диджа̄ ман̃джуссара̄ субха̄,
кӯджантамупакӯджанти утусампуппхите думе.
ниччхара̄нам̣ нипа̄тена паббата̄ абхина̄дита̄,
пан̃чан̇гика̄ни тӯрийа̄ни дибба̄ни вийа суййаре.
таттха наччанти тасмим̣ джалантаггисикхӯпама̄,
тасмим̣ хи киннара̄ киччам̣ падӣпена карӣйати.
мутта̄джа̄ла̄ва диссанти ниччхара̄нам̣ хи па̄така̄,
паджджаланта̄ ва тит̣т̣ханти ман̣ивел̣урийа̄дайо.
ка̄л̣а̄нуса̄ри таггарам̣ каппӯрам̣ харичанданам̣,
сакун̣а̄нам̣ хи саддена майӯра̄нам̣ хи кекайа̄.
бхамара̄нам̣ хи нинна̄да̄ кон̃чана̄дена хаттхинам̣,
виджамбхитена ва̄л̣а̄нам̣ киннара̄нам̣ хи гӣтийа̄;
паббата̄нам̣ хи обха̄са̄ ман̣ӣнам̣ джотийа̄пи ча,
вичитраббхавита̄нехи дума̄нам̣ пуппхадхӯпийа̄;
евам̣ саббан̇гасампаннам̣ ким̣ сийа̄ нанданам̣ ванам̣.
евам̣ сусампхуллаванам̣ хи йам̣ йам̣,
тахим̣ тахим̣ пуппхитапуппхитам̣ субхам̣;
ма̄лам̣ сусаддан̃ча манун̃н̃агандхам̣,
пӯджеми там̣ пӯджитапӯджитам̣ пура̄.
на̄галоке мануссе ча деве брахме ча йам̣ сийа̄,
са̄муддикам̣ бхӯмигатам̣ а̄ка̄сат̣т̣хан̃ча йам̣ дхамам̣.
раджатам̣ джа̄тарӯпан̃ча мутта̄ вел̣урийа̄ ман̣и,
маса̄рагаллам̣ пхаликам̣ лохитан̇гам̣ пава̄л̣акам̣.
йо со анантакаппесу пӯретва̄ дасапа̄рамӣ,
буддхо бодхеси сатта̄нам̣ тасса пӯджеми там̣ дханам̣.
кхомам̣ косеййам̣ каппа̄сам̣ са̄н̣ам̣ бхан̇ган̃ча камбалам̣,
дукӯла̄ни ча дибба̄ни дусса̄ни вивидха̄ни те.
анантаваттхада̄нена хироттаппа̄дисам̣варам̣,
йасса сиддхам̣ сийа̄ тасса дусса̄ни пуджайа̄махам̣.
паване джа̄таруккха̄нам̣ на̄на̄пхаларасуттамам̣,
амба̄ капит̣т̣ха̄ панса̄ чочамоча̄динаппака̄.
тасмим̣ гандхарасам̣ оджам̣ буддхасет̣т̣хасса пӯджитам̣,
ванда̄ми сираса̄ ниччам̣ виппасаннена четаса̄.
пӯджеми пат̣хамам̣ тасса пан̣идха̄нам̣ ачинтийам̣,
чаккава̄л̣амхи саббехи виджджама̄нехи ваттхухи.
дасаннам̣ па̄рамӣнанту пӯритат̣т̣ха̄намуттамам̣,
тато са̄лаване рамме джа̄тат̣т̣ха̄нам̣ чаримакам̣.
чхаббаса̄ни падха̄насмим̣ каран̣ам̣ дуккарака̄рикам̣,
аппара̄джитапаллан̇кам̣ буддхам̣ буддхагун̣ам̣ наме.
чуддаса буддхан̃а̄н̣а̄ни ат̣т̣харса а̄вен̣икам̣,
пӯджеми дасабалан̃а̄н̣ам̣ чатувеса̄раджджамуттамам̣.
а̄сайа̄нусайан̃а̄н̣ам̣ индрийа̄нам̣ паропарам̣,
йамакапа̄т̣ихӣран̃ча н̃а̄н̣ам̣ саббан̃н̃утам̣ пи ча.
маха̄карун̣а̄паттин̃а̄н̣ам̣ ана̄варан̣мити ча,
чха аса̄дха̄ран̣а̄нете н̃атва̄на пӯджайа̄махам̣.
тато ча саттасатта̄хе дхаммасаммаситам̣ наме,
брахмуна̄ йа̄читат̣т̣ха̄нам̣ дхаммам̣ десайитум̣ варам̣.
исипатане мигада̄йе дхаммачаккапаваттанам̣,
тато вел̣увана̄ра̄ме васитат̣ха̄нан̃ча пӯджайе.
тато джетаванам̣ раммам̣ чиравуттхам̣ махесина̄,
аса̄дха̄ран̣аман̃н̃есам̣ йамакапа̄т̣ихарийам̣.
па̄риччхаттакамӯламхи абхидхамман̃ча десанам̣,
сан̇кассанагарадва̄ре деворохан̣акам̣ пи ча.
тато ча химавантасмим̣ маха̄самайадесанам̣,
вутта̄нета̄ни т̣ха̄на̄ни натва̄на пуджайа̄махам̣.
чатура̄сӣтисахассехи дхаммаккхандхехи сан̇гахам̣,
пит̣акаттайам̣ йатха̄вуттавидхина̄ пӯджайа̄махам̣.
ма̄расса аттано а̄йусан̇кха̄росаджджанам̣ наме,
кусина̄ра̄йа малла̄нам̣ йамакаса̄ламантаре.
пан̣идха̄намхи пат̣т̣ха̄йа катам̣ киччам̣ асесато,
нит̣т̣хапетва̄на со саббам̣ паринибба̄йина̄саво.
евам̣ нибба̄йама̄насса катакиччасса та̄дино,
чирагата̄ маха̄карун̣а̄ на нибба̄йиттха кин̃чипи.
сва̄йам̣ дхаммо винайо ча десито са̄дхукам̣ майа̄,
мамаччайена со саттха̄ дха̄ту ча̄пи сарӣраджа̄.
аппара̄джитапаллан̇кам̣ бодхируккхан̃ча уттамам̣,
мамаччайена саттха̄ ти ануджа̄ни маха̄муни.
мама т̣хане т̣хапетва̄на дха̄тубодхин̃ча пӯджитам̣,
ануджа̄на̄ми тумха̄кам̣ са̄дханаттхам̣ сиван̃джасам̣.
тасма̄ хи тасса саддхаммам̣ угган̣хитва̄ йатха̄татхам̣,
йо десети самбуддхо ти натва̄на пӯджайа̄махам̣.
тасма̄ са̄сапаматтам̣ пи джинадха̄тум̣ асесийа,
виттхинначаккава̄л̣амхи натва̄на пӯджайа̄махам̣.
парампара̄бхата̄нам̣ хи имамха̄ боддхируккхато,
саббесам̣ бодхируккха̄нам̣ натва̄на пӯджайа̄махам̣.
йам̣ йам̣ парибхун̃джи бхагава̄ паттачӣварама̄дикам̣,
саббам̣ парибхогадха̄тум̣ натва̄на пӯджайа̄махам̣.
йаттха каттхачи сайито а̄синно чан̇камепи ва̄,
па̄далан̃чханкам̣ катва̄ т̣хито натва̄на пӯджайе.
на сан̃джа̄нанти йе буддхам̣ еварӯпо ти н̃а̄тве,
катам̣ там̣ пат̣имам̣ саббам̣ натва̄на пӯджайа̄махам̣.
евам̣ буддхан̃ча дхамман̃ча сан̇гхан̃ча ануттарам̣,
чаккава̄л̣амхи саббехи ваттхӯхи пӯджайа̄махам̣.
паттхана̄дӣпанӣга̄тха̄
асмим̣ ча пуббепи ча аттабха̄ве,
саббехи пун̃н̃ехи майа̄ катехи;
пӯджа̄видха̄нехи ча сан̃н̃амехи,
бхаве бхаве пеманийо бхавеййам̣.
саддха̄ хироттаппабахуссутаттам̣,
параккамо чева сатиссама̄дхи;
ниббедхабха̄гӣ ваджирӯпама̄ти,
пан̃н̃а̄ ча ме сиджджхату йа̄ва бодхим̣.
ра̄ган̃ча досан̃ча паха̄йа мохам̣,
дит̣т̣хин̃ча ма̄нам̣ вичикиччхитан̃ча;
маччхереисса̄малавиппахӣно,
ануддхато аччапало бхавеййам̣.
бхавеййахам̣ кеначи наппасейхо,
бхого ча диннехи пат̣ехи;
бхого ча ка̄йо ча мамеса ладдхо,
парӯпака̄ра̄йа бхавеййам̣ нӯна.
дхаммена̄ ма̄ла̄питаро бхареййам̣,
вуд̣д̣хапача̄йӣ ча бахӯпака̄рӣ;
н̃а̄тӣсу миттесу сапаттакесу,
вуд̣д̣хим̣ кареййам̣ хитаматтано ча.
меттеййана̄тхам̣ упасан̇камитва̄,
тассаттабха̄вам̣ абхипӯджайитва̄;
ладдха̄на веййа̄каран̣ам̣ анӯнам̣,
буддхо айам̣ хессатина̄гатесу.
локена кена̄пи анупалитто,
да̄не рато сӣлагун̣е суса̄н̣т̣хито;
неккхаммабха̄ги варан̃а̄н̣ала̄бхӣ,
бхавеййахам̣ тха̄мабалупапанно.
сӣсам̣ самам̣самам̣ мама хаттхапа̄де,
сам̣чхинадама̄непи кареййакхантим̣;
сачче т̣хито ка̄лумадхит̣т̣хите ва,
метта̄йупеккха̄йа йуто бхавеййам̣.
маха̄паричча̄гам̣ катва̄ пан̃ча,
самбодхимаггам̣ авира̄дхайанто;
чхетва̄ килесе читапан̃чама̄ро,
буддхо бхависса̄ми ана̄гатесу.