📜

નમો તસ્સ ભગવતો અરહતો સમ્માસમ્બુદ્ધસ્સ

સુત્તવન્દના

૧.

ધમ્મત્થ ¶ દેસના વેધ,

ચતુગમ્ભીર દુદ્દસં;

ધમ્મં લોકસ્સ દેસેન્તં,

ધમ્મરાજં નમામહં;

૨.

બુદ્ધો ¶ પચ્ચેકબુદ્ધો ચ,

અરહા ચક્કવત્તીતિ;

થૂપાથૂપારહં વન્દે,

ચતુથૂપારહેસુ તં;

૩.

પેતસેય્યો ¶ કામભોગી,

સીહસેય્યો તથાગતો;

સયન્તં ચતુસેય્યેસુ,

ચતુત્થેન નમે જિનં;

૪.

અણ્ડજા જલાબુજા ચ;

સંસેદજો પપાતિકા;

ચતુયોનિ પરિચ્છેદ,

ઞાણવન્તં નમે જિનં;

૫.

સુતબુદ્ધોનુબુદ્ધો ¶ ચ,

પચ્ચેકો જિનબુદ્ધોતિ;

ચતુત્થં ચતુબુદ્ધેસુ,

વન્દામિ લોકનાયકં;

૬.

રાહુગ્ગં ¶ અત્તભાગીનં,

મન્ધાતા કામભોગીનં;

મારો અધિપતેય્યાનં,

બુદ્ધો લોકે સદેવકે;

ચતુઅગ્ગ પઞ્ઞત્તીનં,

અગ્ગપત્તં નમે જિનં.

૭.

દાનં ¶ પિયકથા અત્થ,

ચરિયા સદિસત્તતા;

ચતુસઙ્ગહ વત્થૂહિ,

અસઙ્ખિયેસુ જાતિસુ;

લોકસ્સ સઙ્ગહેતારં,

વન્દામિ લોકનાયકં;

૮.

લોભો દોસો ચ મોહોતિ,

અન્તો પચ્ચત્થિકે તયો;

દુજ્જયે ¶ સબ્બવેરીહિ,

સઞ્જિતંપિ સુધિં નમે;

૯.

જાતિ પુઞ્ઞ મહત્તાનિ,

ગુણમહત્તમુત્તમં;

તિમહત્થેહિ સમ્પન્નં,

વન્દામિ લોકનાયકં;

૧૦.

હેતુ ¶ ફલ સમ્પદાયો,

સત્તુપકારસમ્પદા;

તિસમ્પદાહિ સમ્પન્નં,

વન્દામિ લોકનાયકં.

૧૧.

ઞાણપ્પહાનાનુભાવ,

સુરૂપકારસમ્પદા;

ચતુફલ સમ્પદાહિ,

તં સમ્પન્નં નમે જિનં.

૧૨.

આસયો ¶ ચ પયોગોતિ,

સત્તુપકાર સમ્પદા;

દુવિધા યસ્સ સમ્પન્ના,

સમ્મા મં પાતુ સો જિનો.

૧૩.

મહોસધે વેસ્સન્તરે,

પચ્છિમભવિકે તથા;

તિજાતીસુ નમે વાચં,

ભાસેન્તં જાયનક્ખણે.

૧૪.

નેમિમ્હિ ¶ સાધિને ચેવ,

મન્ધાતરિ ચ ગુત્તિલે;

ચતૂસુ મનુજત્તેન,

દેવલોકં ગતં નમે.

૧૫.

સઙ્ખારો રૂપવિકારો,

લક્ખણં વાનનિસ્સટં;

નિબ્બાનં ¶ પઞ્ઞત્તિચેતિ,

પઞ્ચ ઞેય્યન્તગું નમે.

૧૬.

પુત્ત દાર પરિચ્ચાગા,

રજ્જઙ્ગં જીવ ચાગીતિ;

પઞ્ચ મહાપરિચ્ચાગે,

કરં સુદુક્કરે નમે.

૧૭.

રૂપઞ્ચ ¶ વેદના સઞ્ઞા,

સઙ્ખારા વિઞ્ઞાણન્તિમે;

પઞ્ચક્ખન્ધે પરિજાનં,

તિપરિઞ્ઞાહિ તં નમે.

૧૮.

મનુસ્સ દેવ ગતિયો,

પેતો ચ નિરયો તથા;

તિરચ્છાનોતિ પઞ્ચેતા,

છિન્દન્તં ગતિયો નમે;

૧૯.

દેવપુત્તો ¶ કિલેસો ચ,

અભિસઙ્ખાર મારકો;

ખન્ધો મચ્ચૂતિ પઞ્ચેતે,

મારે વિજિતવં નમે.

૨૦.

પુરેભત્તં પચ્છાભત્તં,

પુરિમઞ્ચેવ મજ્ઝિમં;

પચ્છિમન્તિ સદા પઞ્ચ,

બુદ્ધકિચ્ચં કરં નમે.

૨૧.

રૂપા ¶ સદ્દા ગન્ધા રસા,

ફોટ્ઠબ્બા ચ મનોરમા;

પઞ્ચ કામગુણે હિત્વા,

ખેળંવ નિગ્ગતં નમે.

૨૨.

રાગસલ્લં ¶ દોસસલ્લં,

મોહા માનો ચ દિટ્ઠીતિ;

વન્દે વજ્જાતિવજ્જન્તં,

પઞ્ચસલ્લપનૂદનં.

૨૩.

દીઘો મજ્ઝિમ સંયુત્તા,

અઙ્ગુત્તરો ચ ખુદ્દકો;

ઇતિ પઞ્ચ નિકાયેહિ,

સુવિનેન્તં પજં નમે.

૨૪.

ઇસ્સરિયં ¶ યસો ધમ્મો,

કામો સિરી પયત્તીતિ;

ભગ્યેહિ છહિ સમ્પન્નં,

વન્દામિ લોકનાયકં.

૨૫.

પિયાપિયં ¶ ભૂતાભૂતં,

અત્થાનત્થં યથારહં;

મિસ્સા છસુ સુવાચંવ,

ભાસન્તં અત્થકં નમે.

૨૬.

અલસો ચ પમાદો ચ,

અનુટ્ઠાનં અસંયમો;

નિદ્દા તન્તીતિ છિદ્દેહિ,

છહિ મુત્તં સદા નમે.

૨૭.

મહાકરુણાસમાપત્તિ ¶ ,

યમકપ્પાટિહારિયં;

આસયાનુસયે ઞાણં,

ઇન્દ્રિયાન પરોપરે;

સબ્બઞ્ઞુતા નાવરણં,

છા સાધારણિકં નમે.

૨૮.

કામચ્છન્દો ¶ ચ બ્યાપાદો,

થિનમિદ્ધઞ્ચ સંસયો;

અવિજ્જુદ્ધચ્ચ કુક્કુચ્ચં,

છવિનીવરણં નમે.

૨૯.

ઇદ્ધિવિધં દિબ્બસોતં,

પરચિત્ત વિજાનના;

પુબ્બેનિવાસાનુસ્સતિ ¶ ,

દિબ્બચક્ખાસવક્ખયો;

છળભિઞ્ઞાહિ સમ્પન્નં,

વન્દામિ પુરિસુત્તમં.

૩૦.

નીલ પીતા ચ ઓદાતા,

મઞ્જિટ્ઠા ચ પભસ્સરા;

લોહિતાતિ છ રંસીહી,

વિજ્જોતન્તં સદા નમે.

૩૧.

અસ્સાદાદીનવો ¶ ચેવ,

નિસ્સરણફલં તથા;

ઉપાયાણત્તીતિ છધા,

સદ્ધમ્મદેસકં નમે.

૩૨.

રાગો ¶ દોસો ચ મોહો ચ,

વિતક્કચરિયા તથા;

સદ્ધા બુદ્ધીતિ ભાજેન્તં,

તા છળેચરિયા નમે.

૩૩.

રજતં કનકં મુત્તા,

મણિ વેળુરિયાનિ ચ;

વજિરઞ્ચ પવાળન્તિ,

સેટ્ઠિ સત્તધનો વિય.

૩૪.

સદ્ધાસીલં સુતંચાગો,

હિરી ઓત્તપ્પિયં ધનં,

પઞ્ઞાધનન્તિ સમ્બુદ્ધં,

વન્દે સત્તમહાધનં.

૩૫.

ચક્કં ¶ હત્થિ અસ્સો મણિ,

ગહપતિત્થિયો તથા;

સુપરિણાયકોચાતિ,

સત્તરતનો ચક્કવત્તીવ.

૩૬.

સતિ ધમ્મવિચયો ચ,

તથેવ વીરિયં પીતિ;

પસ્સદ્ધિ ¶ સમાધુપેક્ખા,

સદ્ધમ્મ ચક્કવત્તિકં;

સત્ત બોજ્ઝઙ્ગરતનં,

નમામિ પુરિસુત્તમં.

૩૭.

યુગન્ધરો ¶ ઈસધરો,

કરવીકો સુદસ્સનો;

નેમિન્ધરો વિનતકો,

અસ્સકણ્ણો મહાનગે;

સત્તેતે હત્થરૂપંવ,

સમ્પસ્સન્તં જિનં નમે.

૩૮.

કણ્ણમુણ્ડો અનોતત્તો,

કુણાલો રથકારકો;

સીહપ્પપાત છદ્દન્તા,

મન્દાકિની મહાસરે;

સત્તેતે ¶ સબ્બથા પસ્સં,

દિટ્ઠેવ પાતિકં નમે.

૩૯.

મનુસ્સત્તં લિઙ્ગસમ્પત્તિ,

હેતુ સત્થારદસ્સનં;

પબ્બજ્જા ગુણસમ્પત્તિ,

અધિકારો ચ છન્દતા;

અટ્ઠધમ્મ સમોધાના,

ભિનીહારન્તગું નમે.

૪૦.

વિસટ્ઠં ¶ મઞ્જુ વિઞ્ઞેય્યં,

સવનીયાવિસારિણા;

ગમ્ભીરો બિન્દુનિન્નાદો,

અટ્ઠઙ્ગિકસરં નમે.

૪૧.

ચત્તારિ ¶ રૂપઝાનાનિ,

તથેવારૂપઝાનાનિ;

તા સમાપત્તિયો અટ્ઠ,

સેવન્તં રુચિયા નમે.

૪૨.

અણિમા લઙ્ઘિમા કમ્મં,

મહિમા પત્તિમા તથા;

ઈસિતા ¶ વસિતા ચેવ,

યત્થકામાવસાયિતા;

અટ્ઠિસ્સરિય પુણ્ણત્તા,

ઇસ્સરાતિસ્સરં નમે.

૪૩.

મનોમયિદ્ધિઞાણઞ્ચ ¶ ,

છળભિઞ્ઞા વિપસ્સના;

અટ્ઠવિજ્જાહિ સમ્પન્નં,

વન્દે તિલોકકેતુકં.

૪૪.

જાતિ જરા રુજા કાલો,

ચતુરાપાયદુક્ખાતિ;

અટ્ઠ સંવેગવત્થૂનિ,

ભાસન્તં વિવિધં નમે.

૪૫.

સુત્તઙ્ગં ¶ વેય્યાકરણં,

ગેય્યં ગાથા ચ જાતકં;

અબ્ભૂતધમ્મ વેદલ્લા,

ઉદાનમિતિ વુત્તકં;

નવઙ્ગં સબ્બલોકસ્સ,

દદન્તં સાસનં નમે.

૪૬.

યા ¶ સમાપત્તિયો અટ્ઠ,

નિરોધો ચાતિ તે નવ,

અનુપુબ્બવિહારે તં,

સેવન્તં રુચિયા નમે.

૪૭.

એકત્તઞ્ચેવ નાનત્તં,

કાયસઞ્ઞીહિ યોગતો,

ચત્તારો તથારુપ્પા ચ,

અસઞ્ઞીચાતિ તે નવ,

સત્તવાસે વિભજિત્વા,

પકાસેન્તં નમે જિનં.

૪૮.

સેય્યસ્સ ¶ સદિસો સેય્યો,

હીનોતિ તિવિધો વિધો,

તથા સદિસહીનાનં,

નવવિધે નુદં નમે.

૪૯.

અનત્થં ¶ મે ચરતિ ચ,

તથા ચરિ ચરિસ્સતિ,

મિત્તસ્સ અરિનોત્વત્થં,

નવાઘાતે જહં નમે.

૫૦.

દાનં સીલઞ્ચ નિક્ખમં,

પઞ્ઞા વીરિયપઞ્ચમં,

ખન્તી ¶ સચ્ચમધિટ્ઠાનં,

મેત્તુપેક્ખાતિ તાદસ,

પૂરેત્વા પારમી વન્દે,

સમ્માસમ્બોધિમજ્ઝવં;

૫૧.

કાળાવકઞ્ચ ગઙ્ગેય્યં,

પણ્ડરં તમ્બ પિઙ્ગલં,

ગન્ધ મઙ્ગલ હેમઞ્ચ,

ઉપોસથ છદ્દન્તિમે.

૫૨.

ધારેતિ દસપોસાનં,

નાગો કાળાવકો બલં;

સહસ્સકોટિપોસાનં ¶ ;

છદ્દન્તોવારનુત્તમો.

૫૩.

દસ સહસ્સકોટીનં,

પોસાનં બલધારણં;

છદ્દન્તાનં દસન્નઞ્ચ,

દસકાયબલં નમે.

૫૪.

ઠાનાઠાને ¶ વિપાકે ચ,

મગ્ગે સબ્બત્થગામિનં;

નાનાધાતૂસુ લોકેસુ,

અધિમુત્તિમ્હિ પાણિનં;

૫૫.

પરોપરિયત્તે ઞાણં,

ઇન્દ્રિયાનઞ્ચ પાણિનં;

ઝાનાદીસુ ઞાણં પુબ્બે,

નિવાસે દિબ્બચક્ખુ ચ;

આસવક્ખયઞાણન્તિ,

દસબલઞાણં નમે.

૫૬.

મૂલગન્ધો ¶ સારો ફેગ્ગુ,

તચો પપટિકો રસો;

પત્તં પુપ્ફં ફલઞ્ચેવ,

ગન્ધગન્ધોતિ સંવરં;

સુગન્ધં દસગન્ધેહિ,

વિલિમ્પન્તં સદા નમે.

૫૭.

સમાધિ ¶ ઞાણવિપ્ફારા,

અધિટ્ઠાનં વિકુબ્બના;

મનોમયારિયા ઇદ્ધિ,

તથા કમ્મવિપાકજા.

૫૮.

વિજ્જામયા પુઞ્ઞવતો;

પયોગ પચ્ચયિદ્ધિતિ;

અગ્ગપત્ત દસિદ્ધીનં,

પાટિહેરં કરં નમે.

૫૯.

મુત્તા ¶ મણિ વેળુરિયં,

સઙ્ખો સલ્લો પવાળકં;

સુવણ્ણં રજતં લોહિ,

તઙ્કો મસારગલ્લન્તિ;

દસધા ¶ રતનેહિગ્ગં,

ભોગિં પઞ્ઞામણિં નમે.

૬૦.

સિથિલં ધનિતં દીઘં,

રસ્સઞ્ચ ગરુકં લહુ;

નિગ્ગહિતં વિમુત્તઞ્ચ,

સમ્બન્ધઞ્ચ વવત્થિતં;

વિવરન્તં નમે ધમ્મં,

દસબ્યઞ્જનભેદિતં.

૬૧.

પસાદોજો ¶ મધુરતા,

સમતા સુખુમાલતા;

સિલેસોદારતા કન્તિ,

અત્થબ્યત્તિ સમાધયો;

દસ સદ્દગુણોપેતં,

ધમ્મં પાતુ કરં નમે.

૬૨.

લોભો ¶ દોસો મોહો માનો,

ઉદ્ધચ્ચં દિટ્ઠિ સંસયો;

અહિરિકમનોત્તપ્પં,

થિનન્તિ સબ્બ દાહકે;

કિલેસે દસ તે સદ્ધિં,

વાસનાય જહં નમે.

૬૩.

સતેરા ¶ દણ્ડમણિકા,

મચ્છવિલોલગગ્ગરા;

સુક્ખાસનિ કપિસિસા,

વિચક્કા સઞ્ઞ કુક્કુટા;

નવાસનીહિ ફાલેન્તં,

તિબ્બં પઞ્ઞાસનિં નમે.

૬૪.

રોદના ¶ કોધાવુધો ચ,

ઉજ્ઝન્તિસ્સરિયં તથા;

પટિસઙ્ખાનં,

ખન્તિ અટ્ઠબલેસુ તં;

પથવીસદિસં વન્દે,

અટ્ઠમેન વિનાયકં.

૬૫.

કામરોગો ¶ ચ પટિઘો,

માનો દિટ્ઠિ ચ સંસયો;

ભવરાગો અવિજ્જાતિ,

સત્તાનુસયિનં નમે.

૬૬.

તિત્થિયાપકતિમહાસાવકા,

અગ્ગસાવકા પચ્ચેકબુદ્ધસમ્બુદ્ધા;

વિસિટ્ઠં ¶ સબ્બથા છસુ,

પુબ્બે નિવાસ વિઞ્ઞૂસુ;

તિલોકમકુટં નમે.

૬૭.

બુદ્ધચક્ખુ સમન્તા ચ,

ઞાણં યં દિબ્બચક્ખુ ચ;

ધમ્મોતિ પઞ્ચ ચક્ખૂહિ,

દસ્સાવિં મારજિં નમે.

૬૮.

ખુદ્દકા ¶ ખણિકા ઓક્કન્તિકા ચ,

ફરણા તથા ઉબ્બેગા;

પઞ્ચ પીતીહિ પિનેન્તં,

રુચિયા ચ નમામહં.

૬૯.

દુક્ખં સમુદયસચ્ચં,

નિરોધો મગ્ગસચ્ચકં;

ચતુસચ્ચમભિજાનં ¶ ,

ચતુકિચ્ચેહિ તં નમે.

૭૦.

પીળના સઙ્ખતત્થો ચ,

તપો વિપરિણામના;

દુક્ખસચ્ચં ચતુક્કેહિ,

વિભત્તાવિં મુનિં નમે.

૭૧.

આયૂહનં ¶ નિદાનઞ્ચ,

સંયોગો પલિબોધનં;

ચતુક્કેહિ સમુદયં,

વિભત્તાવિં મુનિં નમે.

૭૨.

નિસ્સરણઞ્ચ વિવેકો,

અસઙ્ખતામતં તથા;

નિરોધઞ્ચ ચતુક્કેહિ,

વિભત્તાવિં મુનિં નમે.

૭૩.

નિય્યાનિકો ¶ ચ હેત્વત્થો,

દસ્સનાધિપતેય્યકં;

મગ્ગસચ્ચં ચતુક્કેહિ,

વિભત્તાવિં મુનિં નમે.

૭૪.

સત્થકો ¶ ચ અસમ્મોહો,

સપ્પાયો ચેવ ગોચરો;

ચતુસમ્પજઞ્ઞા વિના,

ભાવિં નમે તથાગતં.

૭૫.

પહિનાખિલ દુક્ખાહં,

ભવસાગર પારગું;

વન્દે સારગુણોપેતં,

તેનમ્હિ ભવપારગો.

૭૬.

રૂપારૂપવિલાસગ્ગ ¶ ,

રૂપાચિન્તેય્ય સંયુત્તં;

વન્દે સારગુણોપેતં,

તેનમ્હાતુલરૂપવા.

૭૭.

ઇદ્ધિ ¶ ઇદ્ધિ વિલાસગ્ગ,

ઇદ્ધિ ચિન્તેય્ય સંયુત્તં;

વન્દે સારગુણેપેતં,

તેનમ્હા તુલઇદ્ધિમા.

૭૮.

વાચા વાચા વિલાસગ્ગ,

વાચા ચિન્તેય્ય સંયુત્તં;

વન્દે સારગુણોપેતં,

તેનમ્હા તુલવાચકો.

૭૯.

ઞાણ ¶ ઞાણ વિલાસગ્ગ,

ઞાણાચિન્તેય્ય સંયુત્તં;

વન્દે સારગુણોપેતં,

તેનમ્હા તુલઞાણવા.

૮૦.

સજ્ઝં હેમઞ્ચ રતનં,

ગેહં વત્થઞ્ચ ભોજનં;

તદઞ્ઞેપિ ¶ યથાચિત્તં,

માપેય્યાહં નમે જિનં.

૮૧.

સજ્ઝં હેમઞ્ચ રતનં,

ગેહં વત્થઞ્ચ ભોજનં;

તદઞ્ઞેપિ યથાચિત્તં,

માપેય્યં કમ્મજિદ્ધિયા.

૮૨.

સત્તબોજ્ઝઙ્ગ ¶ રતનો,

સદ્ધાદિરતનો મુનિ;

સતિપ્પભુતિરતનો,

વન્દે તં પુરિસુત્તમં.

૮૩.

ચક્કાદિસત્તરતનં,

મુત્તાદિરતનં સુભં;

વત્થપ્પભુતિરતનં,

છન્દક્ખણે લભામહં.

૮૪.

સમ્પુણ્ણચિત્તસઙ્કપ્પો ¶ ,

યથાકઙ્ખિતમાપકો,

કેનચિનભિભૂતો યો,

સબ્બાભિભૂ નમે જિનં.

૮૫.

સમ્પુણ્ણચિત્તસઙ્કપ્પો ¶ ,

યથાકઙ્ખિતમાપકો,

કેનચિનભિભૂતમ્હિ,

સબ્બાભિભૂ ભવે ભવે.

૮૬.

દસ છદ્દન્તરાજાવ,

દસ કાયબલો મુનિ;

દસ ઞાણબ્બલોતુલ્યો,

વન્દે તં સમણુત્તમં.

૮૭.

અતિકાયજવો ¶ બુદ્ધો,

રઞ્ઞાજવનહંસતો;

કા કથા ઞાણવેગસ્સ,

વન્દે તં સમણુત્તમં.

૮૮.

છદ્દન્તનાગરાજાવ,

ભવે ભવે મહબ્બલો;

રાજાજવનહંસોવ,

પરમગ્ગજવો ભવે.

૮૯.

ઉદકા ¶ કાસચારી ચ,

મહિનિમુજ્જકો જિનો;

માપકો ચ યથા ચિત્તં,

વન્દે તં ઞેય્યપારગું.

૯૦.

ઉદકા કાસચારી ચ,

મહિનિમુજ્જકો ભવે;

માપકો ચ યથાચિત્તં,

ભવસો કમ્મજિદ્ધિયા.

૯૧.

ગામે ¶ વને ચ સબ્બત્થ,

દેવેહિ મનુસ્સેહિ ચ;

આભતાનન્તલાભસ્સ,

સદા યસ્સ મહેસિનો;

પત્તલાભગ્ગતં લોકં,

તં વન્દે મુનિપુઙ્ગવં.

૯૨.

ગામે ¶ વને ચ સબ્બત્થ,

દેવેહિ મનુસ્સેહિ ચ;

આભતા નન્તલાભો મે,

સદા હોતુ ભવાભવે.

૯૩.

પુઞ્ઞસ્સિમસ્સ તેજેન,

યથા ચિત્તં સમિજ્ઝતુ;

સબ્બિચ્છા ¶ સબ્બચિન્તા ચ,

ખિપ્પં મે જાતિજાતિયં.

૯૪.

નત્થીતિ વચનં દુક્ખં,

દેહીતિ વચનં તથા;

તસ્મા નત્થીતિ દેહીતિ,

મા મે હોતુ ભવાભવે.

૯૫.

સબ્બં ¶ પરવસં દુક્ખં,

સબ્બમિસ્સરિયં સુખં;

સબ્બં પરવસમત્થુ,

સબ્બમિસ્સરિયં ભવે.

૯૬.

વિતક્કેન્તો ભજ્જકાયો,

સબ્બાવુધ વારણો ચ;

છદ્દન્ત વારણબલો,

ભવેય્યં જાતિજા તિયં.

૯૭.

સુભલક્ખણસમ્પન્નો ¶ ,

સુવણ્ણવણ્ણવા ભવે;

બ્રહ્મસ્સરો કરવિક,

ભાણી ચ જાતિજાતિયં.

૯૮.

ભૂરિમપઞ્ઞો સિપ્પાનં,

સબ્બેસં કુસલો ભવે;

વિસજ્જેતું સમત્થોવ,

સબ્બપુચ્છાનં ઠાનસો.

૯૯.

વેરાધંસીય ¶ ભોગા ચ,

અનન્તાખીણ ભોગવા;

અનન્તાભજ્જ પરિસો,

ભવસો પાપુણે સિવં.

૧૦૦.

મા ¶ નસ્સેય્યં પસય્હેય્યં,

ઉસ્સુક્કેહિ પ્યહં સહ;

પઞ્ચવેરેહિ કોટીહિ,

ભણ્ડં વા અકાતુકામિતં.

૧૦૧.

મેઘં વાતઞ્ચ રતનં,

ધઞ્ઞં વત્થઞ્ચ ભોજનં;

સબ્બિચ્છિતં તદઞ્ઞમ્પિ,

માપેય્યં કમ્મજિદ્ધિયા.

૧૦૨.

પુઞ્ઞેનેતેન ¶ નિબ્બાનં,

સન્તં પપ્પોમિ તાવતા;

ભવેય્યં સબ્બજાતીસુ,

ચતુસમ્પત્તિયા સદા;

ચતુચક્કેન સમ્પન્નો,

સદ્ધમ્મેહિ ચ સત્તહિ.

૧૦૩.

સમ્માદિટ્ઠિ ¶ વસુપેતે,

કુલમ્હિ સેટ્ઠસમ્મતે,

સબ્બસક્કત સંસુદ્ધે;

ભવે તિહેતુસન્ધિકો.

૧૦૪.

ઘાસચ્છાદનં ભોગઞ્ચ,

નેવ હત્થેન કાતુન,

ભુઞ્જેય્યમિદ્ધિયાત્વેવ,

માપેત્વા યાવદત્થકં.

૧૦૫.

મનુસ્સાનં ¶ અતિક્કમ્મ,

દેવાનં વિય ભોજનં,

વત્થં ભોગો ચ મે હોન્તુ,

પરિવારાતિસુન્દરા.

૧૦૬.

દસાસુત્તંપિ મે ભોગં,

પઞ્ચવેરા ભવે ભવે;

માગણ્હેય્યુઞ્ચ નસ્સેય્યું,

અસોકો ભોગહેતુમે.

૧૦૭.

સબ્બઙ્ગસુભ ¶ સમ્પન્નો,

સિઙ્ગીનિક્ખ સવણ્ણ વા;

બાત્તિંસ લક્ખણૂપેતો,

અતપ્પન રૂપ વા ભવે.

૧૦૮.

કાયો ચન્દનગન્ધો ચ,

મુખં ઉપ્પલગન્ધિકં;

અટ્ઠઙ્ગિકો ¶ કરવિક,

મઞ્જૂઘોસો ચ મે હોતુ.

૧૦૯.

તિક્ખ ગમ્ભીર પઞ્ઞો ચ,

હાસાતિજવપઞ્ઞવા,

ભૂરિ નિબ્બેધ પઞ્ઞો ચ;

સબ્બપઞ્હવિસજ્જનો.

૧૧૧.

અન્તો ¶ સોળસવસ્સસ્સ,

તિપેટકધરો ભવે;

સબ્બકમ્મેસુ સિપ્પેસુ,

વિજ્જાઠાનેસુ પારગૂ.