અઞ્ઞ > વંસ-ગન્થ-સઙ્ગહો

વિનયપિટકં, અભિધમ્મપિટકં સુત્તન્તપિટકન્તિ. તત્થ કતમં વિનય પિટકં? પારાજિકકણ્ડં, પાચિત્તિયકણ્ડં, મહાવગ્ગકણ્ડં, ચુલ્લવગ્ગકણ્ડં, પરિવારકણ્ડન્તિ. ઇમાનિ કણ્ડાનિ વિનયપિટકં નામ.

કતમં અભિધમ્મપિટકં? ધમ્મસઙ્ગણી-પકરણં, વિભઙ્ગ-પકરણં, ધાતુકથા-પકરણં, પુગ્ગલપઞ્ઞત્તિ-પકરણં, કથાવત્થુ-પકરણં, યમક-પકરણં, પટ્ઠાન-પકરણન્તિ. ઇમાનિ સત્ત પકરણાનિ અભિધમ્મપિટકં નામ. કતમં સુત્તન્તપિટકં? સીલક્ખન્ધવગ્ગાદિકં, અવસેસં બુદ્ધવચનં સુત્તન્તપિટકં નામ.

કથં નિકાયતો? નિકાયા પઞ્ચ વિધા હોન્તિ. દીઘનિકાયો, મજ્ઝિમનિકાયો, સંયુત્તનિકાયો, અઙ્ગુત્તરનિકાયો, ખુદ્દકનિકાયોતિ.

તત્થ કતમો દીઘ-નિકાયો? સીલક્ખન્ધવગ્ગો, મહાવગ્ગો, પાથિકવગ્ગોતિ, ઇમે તયો વગ્ગા દીઘનિકાયો નામ. ઇમેસુ તીસુ વગ્ગેસુ, ચતુતિંસ વગ્ગાનિ ચ હોન્તિ. [ચતુતિંસેવ સુત્તન્તા, સીલક્ખન્ધવગ્ગાદિકા, યસ્સ ભવન્તિ સો યેવ દીઘનિકાય નામ હોતિ.]

કતમો મજ્ઝિમનિકાયો? મૂલપણ્ણાસો, મજ્ઝિમપણ્ણાસો, ઉપરિપણ્ણાસોતિ, ઇમે તયો પણ્ણાસા મજ્ઝિમનિકાયો નામ. ઇમેસુ તીસુ પણ્ણાસેસુ દ્વેપઞ્ઞાસાધિક-સુત્ત-સતાનિ હોન્તિ [દિયડ્ઢસતસુત્તન્તા, દ્વિ સુત્તં યસ્સ સન્તિસો, મજ્ઝિમનિકાયો નામો મૂલપણ્ણાસમાદિ હોતિ.]

કતમો સંયુત્તનિકાયો? સગાથાવગ્ગો, નિદાનવગ્ગો, ખન્ધકવગ્ગો, સળાયતનવગ્ગો, મહાવગ્ગોતિ, ઇમે પઞ્ચ વગ્ગા સંયુત્તનિકાયો નામ. ઇમેસુ પઞ્ચસુ વગ્ગેસુ દ્વાસટ્ઠિસુત્તસત્તસતાધિકસત્ત-સુત્તસહસ્સાનિ હોન્તિ. [દ્વાસટ્ઠિ-સત્ત-સતાનિ, સત્તસહસ્સકાનિ ચ.] સુત્તાનિ યસ્સ હોન્તિ સો, સગાથાદિકવગ્ગકો, સંયુત્તનિકાયો નામો વેદિતબ્બો ચ વિઞ્ઞૂનાતિ.

કતમો અઙ્ગુત્તરનિકાયો? એક્કનિપાતો, દુક્કનિપાતો, તિક્કનિપાતો, ચતુક્કનિપાતો, પઞ્ચકનિપાતો, છક્કનિપાતો, સત્તકનિપાતો, અટ્ઠકનિપાતો, નવકનિપાતો, દસકનિપાતો, એકાદસનિપાતોતિ, ઇમે એકાદસ નિપાતા અઙ્ગુત્તરનિકાયો નામ. ઇમેસુ એકાદસ નિપાતેસુ સત્ત-પઞ્ઞાસ-પઞ્ચ-સતાધિકનવ-સુત્ત-સહસ્સાનિ હોન્તિ. [નવસુત્તસહસ્સાનિ, પઞ્ચસતમત્તાનિ ચ, સત્તપઞ્ઞાસાધિકાનિ, સુત્તાનિ યસ્સ હોન્તિ સો, અઙ્ગુત્તરનિકાયોતિ, એક્કનિપાતકાદિકોતિ.]

કતમો ખુદ્દકનિકાયો? ખુદ્દકપાઠો, ધમ્મપદં, ઉદાનં, ઇતિવુત્તકં, સુત્તનિપાતો, વિમાનવત્થુ, પેતવત્થુ, થેરકથા, થેરીકથા, જાતકં, મહાનિદ્દેસો, પટિસમ્ભિદામગ્ગો, અપદાનં, બુદ્ધવંસો, ચરિયાપિટકં, વિનયપિટકં, અભિધમ્મપિટકન્તિ. ઇમેસુ સત્તરસસુ ગન્થેસુ અનેકાનિ સુત્ત-સહસ્સાનિ હોન્તિ. [અનેકાનિ સુત્ત-સહસ્સાનિ, નિદ્દિટ્ઠાનિ મહેસિના, નિકાયે પઞ્ચમે ઇમે, ખુદ્દકે ઇતિ વિસુતેતિ.]

કથં અઙ્ગતો અઙ્ગહિ નવ વિધં હોતિ? સુત્તં, ગેય્યં, વેય્યાકરણં, ગાથા, ઉદાનં, ઇતિવુત્તકં, જાતકં, અબ્ભુતધમ્મં, વેદલ્લન્તિ, નવપ્પભેદં હોતિ. તત્થ ઉભતો વિભઙ્ગનિદ્દેસખન્ધકપરિવારા, સુત્તનિપાતે, મઙ્ગલસુત્ત, રતનસુત્ત, તુવટ્ટકસુત્તાનિ. અઞ્ઞમ્પિ સુત્તનામકં તથાગતવચનં, સુત્તન્તિ વેદિતબ્બં. સબ્બં સગાથકં ગેય્યન્તિ વેદિતબ્બં. વિસેસનસંયુત્તકે સકલોપિ સગાથકવગ્ગો, સકલં અભિધમ્મપિટકં નિગાથકઞ્ચ સુત્તયઞ્ચ અઞ્ઞમ્પિ અટ્ઠહિ અઙ્ગેહિ અસઙ્ગહિતં બુદ્ધવચનં તં વેય્યાકરણન્તિ વેદિતબ્બં. ધમ્મપદં, થેરકથા, થેરીકથા, સુત્તનિપાતે, નો સુત્તનામિકા સુદ્ધિકગાથા, ગાથાતિ વેદિતબ્બા. સોમનસ્સ ઞાણમયિકગાથા પટિક-સંયુત્તા દ્વે અસીતિસુત્તન્તા ઉદાનન્તિ વેદિતબ્બા. વુત્તઞ્હેતં ભગવતાતિઆદિનયપ્પવત્તા દસુત્તરસતસુત્તન્તા, ઇતિવુત્તકન્તિ વેદિતબ્બા. અપણ્ણકજાતકાદીનિ પઞ્ઞાસાદિકાનિ. પઞ્ચજાતકસતાનિ, જાતકન્તિ વેદિતબ્બં. ચત્તારો મે ભિક્ખવે અચ્છરિયા અભૂતધમ્મા, આનન્દેતિઆદિનયપ્પવત્તા સબ્બેપિ અચ્છરિય અભૂતધમ્મપટિસંયુત્તા સુત્તન્તા અભૂતધમ્મન્તિ વેદિતબ્બા. ચુલ્લવેદલ્લ, મહાવેદલ્લ, સમ્માદિટ્ઠિ, સક્કપઞ્હ, સઙ્ખારભાજનિય, મહાપુણ્ણમસુત્તન્તાદયો સબ્બેપિ વેદઞ્ચ તુટ્ઠિઞ્ચ લદ્ધા [પુચ્છ] લદ્ધા પુચ્છિતસુત્તન્તા, વેદલ્લન્તિ વેદિતબ્બા. કતમાનિ ચતુરાસીતિ ધમ્મક્ખન્ધસહસ્સાનિ દુજાનાનિ, ચતુરાસીતિ ધમ્મક્ખન્ધસહસ્સાનિ સચે વિત્થારેન કથિસ્સં અતિપપઞ્ચો ભવિસ્સતિ. તસ્મા નય વસેન કથિસ્સામિ. એકં વત્થુ, એકો ધમ્મક્ખન્ધો, એકં નિદાનં એકો ધમ્મક્ખન્ધો, એકં પઞ્હા પુચ્છન્તં એકો ધમ્મક્ખન્ધો, એકં પઞ્હા વિસજ્જનં એકો ધમ્મક્ખન્ધો, ચતુરાસીતિ ધમ્મક્ખન્ધસહસ્સાનિ કેન ભાસિતાનિ, કત્થ ભાસિતાનિ, કદા ભાસિતાનિ, કમારબ્ભ ભાસિતાનિ, કિમત્થં ભાસિતાનિ, કેન ધારિતાનિ, કેનાભતાનિ, કિમત્થં પરિયાપુણિતબ્બાનિ. તત્રાયં વિસજ્જના, કેન ભાસિતાનીતિ? બુદ્ધાનુ બુદ્ધેહિ ભાસિતાનિ. કત્થ ભાસિતાનીતિ? દેવેસુ ચ માનુસ્સેસુ ચ, ભાસિતાનિ. કદા ભાસિતાનીતિ? ભગવતો ધરમાનકાલે ચેવ પચ્છિમકાલે ચ ભાસિતાનિ. કતમારબ્ભ ભાસિતાનીતિ? પઞ્ચવગ્ગિયાદિકે વેનેય્ય બન્ધવે આરબ્ભ ભાસિતાનીતિ. કિમત્થં ભાસિતાનીતિ? તિવજ્જઞ્ચ અવજ્જઞ્ચ ઞત્વા વજ્જં પહાય અવજ્જે પટિપત્તિત્વા નિબ્બાનપરિયન્તે. દિટ્ઠ-ધમ્મિકસમ્પરાયિકત્થે સમ્પાપુણિતું.

કેન ધારિતાનીતિ? અનુબુદ્ધેહિ ચેવ સિસ્સાનુસિસ્સેહિ ચ ધારિતાનિ. કેના ભતાનીતિ? આચરિય પરંપરેહિ આભતાનિ. કિમત્થં પરિયાપુણિતબ્બાનીતિ? વજ્જઞ્ચ અવજ્જઞ્ચ ઞત્વા વજ્જં પહાય અવજ્જે પટિપત્તિત્વા નિબ્બાનપરિયન્તે દિટ્ઠધમ્મિકસમ્પરાયિકત્થે, સંપાપુણિતું, યદેવં તાય નિબ્બાનપરિયન્તે દિટ્ઠધમ્મિકસમ્પરાયિકત્થે સાધિકાનિ હોન્તિ. તેવ તત્થ કેહિ અપ્પમત્તેન પરિયાપુણિતબ્બાનિ ધારેતબ્બાનિ ધારેતબ્બાનિ વાચેતબ્બાનિ સજ્ઝાયં કાતબ્બાનીતિ [ઇતિ ચુલ્લગન્થવંસે પિટકત્તય દીપકો નામ પઠમો પરિચ્છેદો.]

આચરિયો પન અત્થિ. પોરાણાચરિયા અત્થિ, અટ્ઠકથાચરિયા અત્થિ, ગન્થકારકાચરિયા અત્થિ, તિવિધનામિકાચરિયા. કતમે પોરાણાચરિયા? પઠમસઙ્ગાયનાયં પઞ્ચસતા ખીણાસવા પઞ્ચન્નં નિકાયાનં નામઞ્ચ અત્થઞ્ચ અધિપ્પાયઞ્ચ યદઞ્ચ બ્યઞ્જન સોધનઞ્ચ અવસેસં કિચ્ચં કરિંસુ. દુતિયસઙ્ગાયનાયં સત્તસતા ખીણાસવા તેસંયેવ સદ્દત્થાદિકં કિચ્ચં પુન કરિંસુ. તતિયસઙ્ગાયનાયં સહસ્સમત્તા ખીણાસવા તેસંયેવ સદ્દત્થાદિકં કિચ્ચં પુન કરિંસુ. ઇચ્ચેવં દ્વેસતાધિકા દ્વેસહસ્સ ખીણાસવા મહાકચ્ચાયનં ઠપેત્વા અવસેસા પોરાણાચરિયા નામ. યે પોરાણાચરિયા તેયેવ અટ્ઠકથાચરિયા નામ. કતમે ગન્થકારકાચરિયા? મહાઅટ્ઠકથિકાપેભદઅનેકાચરિયા ગન્થકારકાચરિયા નામ. કતમે તિવિધ નામાચરિયા મહાકચ્ચાયનો તિવિધનામં. કતમે ગન્થા મહાકચ્ચાયનેન કતા? કચ્ચાયનગન્થો, મહાનિરુત્તિગન્થો, ચુલ્લનિરુત્તિગન્થો, યમકગન્થો, નેત્તિગન્થો, પેટકોપદેસગન્થોતિ, ઇમે છ ગન્થા મહાકચ્ચાયનેન કતા. કતમે અનેકાચરિયેન કતા ગન્થા? મહાપચ્ચરિકાચરિયો મહાપચ્ચરિયં નામ ગન્થં અકાસિ. મહાકુરુન્દિકાચરિયો કુરુન્દિ નામ ગન્થં અકાસિ. અઞ્ઞતરો આચરિયો મહાપચ્ચરિય ગન્થસ્સ અટ્ઠકથં અકાસિ. અઞ્ઞતરો આચરિયો કુરુન્દિ ગન્થસ્સ અટ્ઠકથં અકાસિ, મહાબુદ્ધઘોસા નામચરિયો વિસુદ્ધિમગ્ગો દીઘનિકાયસ્સ સુમઙ્ગલવિલાસનિ નામ અટ્ઠકથા, મજ્ઝિમનિકાયસ્સ પપઞ્ચસૂદની નામ અટ્ઠકથા, સંયુત્તનિકાયસ્સ સારત્થપ્પકાસિની નામ અટ્ઠકથા, અઙ્ગુત્તરનિકાયસ્સ મનોરથપૂરણી નામ અટ્ઠકથા, પઞ્ચવિનય ગન્થાનં સમન્તપાસાદિકા નામ અટ્ઠકથા, સત્તન્નં અભિધમ્મગન્થાનં પરમત્થકથા નામ અટ્ઠકથા, પાતિમોક્ખ સંખાતાય માતિકાય કઙ્ખાવિતરણીતિ વિસુદ્ધિ નામ અટ્ઠકથા, ધમ્મપદસ્સ અટ્ઠકથા, જાતકસ્સ અટ્ઠકથા, ખુદ્દકપાઠસ્સ અટ્ઠકથા, સુત્તનિપાતસ્સ અટ્ઠકથા, અપદાનસ્સ અટ્ઠકથાતિ, ઇમે તેરસ ગન્થે અકાસિ. બુદ્ધદત્તોનામાચરિયો વિનય વિનિચ્છયો, ઉત્તરવિનિચ્છયો, અભિધમ્માવતારો, બુદ્ધવંસસ્સ મધુરત્થવિલાસિની નામ અટ્ઠકથાતિ, ઇમે ચત્તારો ગન્થે અકાસિ. આનન્દોનામાચરિયા સત્તાભિધમ્મગન્થટ્ઠકથાય મૂટીકં નામ ટીકં અકાસિ. ધમ્મપાલાચરિયો નેત્તિપ્પકરણટ્ઠકથા, ઇતિવુત્તકટ્ઠકથા, ઉદાનટ્ઠકથા, ચરિયાપિટકટ્ઠકથા, થેરકથટ્ઠકથા, થેરીકથટ્ઠકથા, વિમાનવત્થુસ્સ વિમલવિલાસિનિ નામ અટ્ઠકથા, પેતવત્થુસ્સ વિમલવિલાસિનિ નામ અટ્ઠકથા, વિસુદ્ધિમગ્ગસ્સ પરમત્થમઞ્જૂસા નામ ટીકા, દીઘનિકાયસ્સ અટ્ઠકથાદીનં ચતુન્નં અટ્ઠકથાનં લીનત્થપ્પકાસનિ નામ ટીકા, જાતકટ્ઠકથાય લીનત્થપ્પકાસનિ નામ ટીકા, નેત્તિપકરણટ્ઠકથાય ટીકા, બુદ્ધવંસટ્ઠકથાય પરમત્થદીપની નામ ટીકા, અભિધમ્મટ્ઠકથાયટીકા લીનત્થવણ્ણના નામ અનુટીકાતિ ઇમે ચુદ્દસ મત્તે ગન્થે અકાસિ.

દ્વે પુબ્બાચરિયાનામા ચરિયાનિરુત્તિ મઞ્જૂસં નામ ચુલ્લનિરુત્તિ ટીકઞ્ચ મહાનિરુત્તિ સઙ્ખેપઞ્ચ અકંસુ. મહાવજિરબુદ્ધિનામાચરિયો વિનયગણ્ઠિનામ પકરણં અકાસિ. દીપઙ્કરસઙ્ખાતો વિમલબુદ્ધિ નામાચરિયો મુખમત્તદીપની નામકં ન્યાસપ્પકરણં અકાસિ. ચુલ્લવજિરબુદ્ધિ નામાચરિયો અત્થબ્યાખ્યાનં નામ પકરણં અકાસિ.

દીપઙ્કરો નામાચરિયો રૂપસિદ્ધિ પકરણં, રૂપસિદ્ધિ ટીકં, સમ્પપઞ્ચ સુત્તઞ્ચેતિ તિવિધં પકરણં અકાસિ. આનન્દાચરિયસ્સ જેટ્ઠસિસ્સો ધમ્મપાલો નામાચરિયો સચ્ચસઙ્ખેપં નામ પકરણં અકાસિ. કસ્સપો નામાચરિયો મોહવિચ્છેદની, વિમતિચ્છેદની, દસબુદ્ધવંસો, અનાગતવંસોતિ, ચતુવિધં પકરણં અકાસિ.

મહાનામો નામાચરિયો, સદ્ધમ્મપકાસની નામ પટિસમ્ભિદામગ્ગસ્સ અટ્ઠકથં અકાસિ. દીપવંસો, થૂપવંસો, બોધિવંસો, ચૂલવંસો, મહાવંસો, પટિસમ્ભિદામગ્ગટ્ઠકથા ગણ્ઠિ ચેતિ ઇમે છ ગન્થા મહાનામાચરિ વિસું વિસું કતા.

નવો મહાનામો નામાચરિયો નવં મહાવંસ નામ પકરણં અકાસિ. ઉપસેનો નામાચરિયો સદ્ધમ્મપજ્જોતિકં નામ મહાનિદ્દેસસ્સ અટ્ઠકથં અકાસિ. મોગ્ગલાનો નામાચરિયો મોગ્ગલાનબ્યાકરણં નામ પકરણં અકાસિ. સઙ્ઘરક્ખિતો નામાચરિયો, સુબોધાલઙ્કારં નામ પકરણં અકાસિ. વુત્તોદયકારો નામાચરિયો વુત્તોદયં નામ પકરણં અકાસિ. ધમ્મસિરિ નામાચરિયો ખુદ્દકસિક્ખં નામ પકરણં અકાસિ. પુરાણખુદ્દસિક્ખાય ટીકા, મૂલસિક્ખા ચેતિ, ઇમે દ્વે ગન્થા દ્વેહાચરિયેહિ વિસું વિસું કતા.

અનુરુદ્ધો નામાચરિયો પરમત્થવિનિચ્છયં, નામરૂપપરિચ્છેદં, અભિધમ્મત્થસઙ્ગહં ચેતિ તિવિધં પકરણં અકાસિ. ખેમો નામાચરિયો ખેમં નામ પકરણં અકાસિ. સારિપુત્તો નામાચરિયો વિનયટ્ઠકથાય સારત્થદીપની નામ ટીકં; વિનયસઙ્ગહપકરણં, વિનયસઙ્ગહસ્સટીકં; અઙ્ગુત્તરટ્ઠકથાય સારત્થમઞ્જૂસં નામ નવં ટીકં; પઞ્ચિકા ટીકઞ્ચેતિ, ઇમે પઞ્ચ ગન્થે અકાસિ. બુદ્ધનાગો નામાચરિયો વિનયત્થમઞ્જૂસં નામ કઙ્ખાવિતરણીયા ટીકં અકાસિ. નવો મોગ્ગલાનો નામાચરિયો અભિધાનપ્પદીપિકં નામ પકરણં અકાસિ. વાચિસ્સરો નામાચરિયો મહાસામિ નામ સુબોધાલઙ્કારસ્સ ટીકા, વુત્તોદય વિવરણં, સુમઙ્ગલપ્પસાદનિ નામ ખુદ્દસિક્ખાય ટીકા; સમ્બન્ધચિન્તા, સમ્બન્ધચિન્તાય ટીકા; બાલાવતારો, મોગ્ગલાનબ્યાકરણસ્સ પઞ્ચિકાય ટીકા; યોગવિનિચ્છયો, વિનયવિનિચ્છયસ્સ ટીકા, ઉત્તરવિનિચ્છયસ્સ ટીકા, નામરૂપ-પરિચ્છેદસ્સ વિભાગો, સદ્દત્થસ્સ પદરૂપવિભાવનં; ખેમસ્સ પકરણસ્સ ટીકા, સીમાલઙ્કારો, મૂલસિક્ખાય ટીકા, રૂપવિભાગો, પચ્ચયસઙ્ગહો, સચ્ચસઙ્ખેપસ્સ ટીકા ચેતિ, ઇમે અટ્ઠારસ ગન્થે અકાસિ.

સુમઙ્ગલો નામાચરિયો અભિધમ્માવતારસ્સટીકં, અભિધમ્મત્થસઙ્ગહસ્સટીકઞ્ચ દુવિધં પકરણં અકાસિ. બુદ્ધપિયો નામાચરિયો સારત્થસઙ્ગહં નામ પકરણં અકાસિ. ધમ્મકિત્તિ નામાચરિયો દન્તધાતુ પકરણં અકાસિ. મેધઙ્કરો નામાચરિયો જિનચરિતં નામ પકરણં અકાસિ. બુદ્ધરક્ખિતો નામાચરિયો જિનલઙ્કારં, જિનલઙ્કારસ્સ ટીકઞ્ચાતિ દુવિધં પકરણં અકાસિ. ઉપતિસ્સો નામાચરિયો અનાગતવંસસ્સ અટ્ઠકથં અકાસિ.

કઙ્ખાવિતરણીયા લીનત્થપ્પકાસિનિ, નિસન્દેહો, ધમ્માનુસારણી, ઞેય્યાસન્તતિ, ઞેય્યાસન્તતિયા ટીકા, સુમતાદાવતારો, લોકપઞ્ઞત્તિ પકરણં, તથાગતુપ્પત્તિ પકરણં, નલાટધાતુ વણ્ણના, સીહળવત્થુ, ધમ્મદીપકો, પટિપત્તિસઙ્ગહો, વિસુદ્ધિમગ્ગણ્ઠિ, અભિધમ્મગણ્ઠિ, નેત્તિપકરણગણ્ઠિ, વિસુદ્ધિમગ્ગચુલ્લનવટીકા, સોતબ્બમાલિની, પસાદજનની, ઓકાસલોકો, સુબોધાલઙ્કારસ્સ નવ ટીકા ચેતિ, ઇમે વીસતિ ગન્થા વીસતાચરિયેહિ વિસું વિસું કતા.

સદ્ધમ્મસિરિ નામાચરિયો સદ્દત્થભેદચિન્તા નામ પકરણં અકાસિ. દેવો નામાચરિયો સુમન કૂટવણ્ણનં નામ પકરણં અકાસિ. ચુલ્લબુદ્ધઘોસો નામાચરિયો સોતત્થકિનિદાનં નામ પકરણં અકાસિ. રટ્ઠપાલો નામાચરિયો મધુરસઙ્ગાહણીકિત્તિ નામ પકરણં અકાસિ. સુભૂતચન્દો નામાચરિયો લિઙ્ગત્થવિવરણ-પકરણં અકાસિ. અગ્ગવંસો નામાચરિયો સદ્દનીતિ પકરણં નામ અકાસિ. વજિરબુદ્ધિ નામાચરિયો મહાટીકં નામ ન્યાસપકરણટીકં અકાસિ. ગુણસાગરો નામાચરિયો મુખમત્તસારં, મુખમત્તસારસ્સ ટીકઞ્ચ દુવિધં પકરણં અકાસિ. અભયો નામાચરિયો સદ્દત્થભેદચિન્તાય મહાટીકં અકાસિ. ઞાણસાગરો નામાચરિયો લિઙ્ગત્થવિવરણપ્પકાસનં નામ પકરણં અકાસિ. અઞ્ઞતરો આચરિયો ગૂળત્થટીકં, બાલપ્પબોધનઞ્ચ દુવિધં પકરણં અકાસિ. અઞ્ઞતરો આચરિયો સદ્દત્થ-ભેદચિન્તાય મજ્ઝિમટીકં અકાસિ. ઉત્તમો નામાચરિયો બાલાવતારટીકં, લિઙ્ગત્થવિવરણટીકઞ્ચ દુવિધં પકરણં અકાસિ. અઞ્ઞતરો આચરિયો સદ્દત્થભેદચિન્તાય નવ-ટીકં અકાસિ. એકો અમચ્ચો અભિધાનપ્પદીપિકાયટીકં, ગણ્ઠિપકરણસ્સ દણ્ડીપ્પકરણસ્સ માગધભૂતં ટીકં, કોલદ્ધજનસ્સ સકટભાસાય કતટીકઞ્ચ તિવિધં પકરણં અકાસિ. ધમ્મસેનાપતિ નામાચરિયો કારિકં, એતિમાસપિદીપની, મનોહારઞ્ચ તિવિધં પકરણં અકાસિ. અઞ્ઞતરો આચરિયો કારિકાય ટીકં અકાસિ. અઞ્ઞતરો આચરિયો એતિમાસપિદીપિકાય ટીકં અકાસિ.

અઞ્ઞતરો આચરિયો સદ્દબિન્દુ નામ પકરણં અકાસિ. સદ્ધમ્મગુરુ નામાચરિયો સદ્દવુત્તિપ્પકાસકં નામ પકરણં અકાસિ. સારિપુત્તો નામાચરિયો સદ્દવુત્તિપ્પકાસકસ્સ ટીકં અકાસિ. અઞ્ઞતરો આચરિયો કચ્ચાયનસારં નામ પકરણં કચ્ચાયનસારસ્સ ટીકઞ્ચ દુવિધં પકરણં અકાસિ. નવો મેધઙ્કરો નામાચરિયો લોકદીપકસારં નામ પકરણં અકાસિ. અગ્ગપણ્ડિતો નામાચરિયો લોકુપ્પત્તિ નામ પકરણં અકાસિ. ચીવરો નામાચરિયો જઙ્ઘદાસકસ્સ ટીકં અકાસિ. માતિકત્થદીપની, અભિધમ્મત્થસઙ્ગહવણ્ણના, સીમાલઙ્કારસ્સટીકા, વિનયસમુટ્ઠાનદીપની ટીકા, ગણ્ઠિ સારો, પટ્ઠાનગણના નયો, સુત્તનિદ્દેસો, પાતિમોક્ખો, ચેતિ, ઇમે અટ્ઠ ગન્થે સદ્ધમ્મજોતિપાલાચરિયો અકાસિ. વિમલબુદ્ધિ નામાચરિયો અભિધમ્મ-પન્નરસટ્ઠાનં નામ પકરણં અકાસિ. નવો વિમલબુદ્ધિ નામાચરિયો સદ્દસારત્થજાલિની, સદ્દસારત્થજાલિનિયા ટીકા, વુત્તોદય ટીકા, પરમત્થમઞ્જૂસા નામ અભિધમ્મસઙ્ગહટીકાય અનુટીકા દસગણ્ઠિવણ્ણના, માગધભૂતાવિદગ્ગમુખમણ્ડનટીકા ચેતિ ઇમે છ ગન્થે અકાસિ. અઞ્ઞતરો આચરિયો પઞ્ચપકરણટીકાય નવાનુટીકં અકાસિ. અરિયવંસો નામાચરિયો અભિધમ્મસઙ્ગહ-ટીકાય [પરમત્થ] મણિસારમઞ્જૂસં નામ નવાનુટીકં અકાસિ. અભિધમ્મત્થસઙ્ગહસ્સ ટીકા, પેટકોપદેસસ્સ ટીકા, ચતુભાણવારસ્સ અટ્ઠકથા, મહાસારપકાસની, મહાદીપની, સારત્થદીપની ગતિ પકરણં, હત્થસારો, ભુમ્મસઙ્ગહો, ભુમ્મનિદ્દેસો, દસવત્થુકાયવિરતિટીકા, જોતના નિરુત્તિ, વિભત્તિકથા, કચ્ચાયનવિવરણા, સદ્ધમ્મમાલિની, પઞ્ચગતિ વણ્ણના, બાલચિત્તપબોધનં, ધમ્મચક્કસુત્તસ્સ નવટ્ઠકથા, દન્તધાતુ પકરણસ્સ ટીકા ચેતિ, ઇમે વીસતિ ગન્થા નાનાચરિયેહિ કતા, અઞ્ઞાનિ પન પકરણાનિ અત્થિ.

કતમાનિ સદ્ધમ્મો પાયનો, બાલપ્પબોધનપકરણસ્સ ટીકા ચ, જિનાલઙ્કારપકરણસ્સ નવટીકા ચ, લિઙ્ગત્થવિવરણં, લિઙ્ગવિનિચ્છયો; પાતિમોક્ખવિવરણં, પરમત્થકથાવિવરણં, સમન્તપાસાદિકા વિવરણં, ચતુભાણવારટ્ઠકથા વિવરણં, અભિધમ્મત્થસઙ્ગહવિવરણં, સચ્ચસઙ્ખેપવિવરણં, સદ્દત્થભેદચિન્તાવિવરણં, સદ્દવુત્તિવિવરણં, કચ્ચાયનસારવિવરણં, અભિધમ્મત્થસઙ્ગહસ્સ ટીકા વિવરણં, મહાવેસ્સન્તરાજાતકસ્સ વિવરણં, સક્કાભિમતં, મહાવેસ્સન્તરજાતકસ્સ નવટ્ઠકથા, પઠમ સંબોધિ, લોકનેત્તિ ચ, બુદ્ધઘોસાચરિયનિદાનં મિલિન્દપઞ્હા વણ્ણના, ચતુરા રક્ખા, ચતુરક્ખાય અટ્ઠકથા, સદ્દવુત્તિપકરણસ્સ નવટીકા, ઇચ્ચેવં પઞ્ચવીસતિ પમાણાનિ પકરણાનિ લઙ્કો દીપાદીસુટ્ઠાનેસુ પણ્ડિતેહિ કતાનિ અહેસું, સમ્બુદ્ધેગાથા ચ, નરદેવ નામ ગાથા ચ, દાતવે ચીરત્તિ ગાથા ચ, વીસતિ ઓવાદગાથા ચ, દાનસત્તરિ, સીલસત્તરિ, સપ્પાદાનવણ્ણના, અનન્તબુદ્ધવન્દનગાથા ચ, અટ્ઠવીસતિ બુદ્ધવન્દનગાથા ચ, અતીતાનાગતપચ્ચુપ્પન્નવન્દનગાથા ચ, અસીતિમહાસાવકવન્દનગાથા ચ, નવહારગુણવણ્ણના ચાતિ, ઇમે બુદ્ધપણામ-ગાથાદિકા ગાથા યો પણ્ડિતેહિ લઙ્કાદીપાદિસુટ્ઠાનેસુ કતા અહેસું [ઇતિ ચુલ્લગન્થવંસે ગન્થકારકાચરિય દીપકો નામ દુતિયો પરિચ્છેદો]

૩. આચરિયાનં સઞ્જાતટ્ઠાનપરિચ્છેદો

આચરિયેસુ ચ અત્થિ જમ્બુદીપિકાચરિયા અત્થિ, લઙ્કાદીપિકાચરિયા. કતમે જમ્બુદીપિકાચરિયા? કતમે લઙ્કાદીપિકાચરિયા? મહાકચ્ચાયનો જમ્બુદીપિકાચરિયો સો હિ અવન્તિરટ્ઠે ઉજ્જેની નગરે ચન્દપજ્જોતસ્સ નામ રઞ્ઞો પુરોહિતો હુત્વા કામાનં આદીનવં દિસ્વા, ઘરાવાસં પહાય સત્થુસાસને પબ્બજ્જિત્વા હેટ્ઠા વુત્તપ્પકારે ગન્થે અકાસિ. મહાઅટ્ઠકથાચરિયો જમ્બુદીપિકો, મહાપચ્ચરિકાચરિયો, મહાકુરુન્દિકાચરિયો, અઞ્ઞતરો આચરિયા દ્વેતિ ઇમે ચ ભૂવાચરિયા. લઙ્કાદીપિકાચરિયા નામ તે કિર બુદ્ધઘોસાચરિયસ્સ પૂરે ભૂતાચરિયે કાલે અહેસું. મહાબુદ્ધઘોસાચરિયો જમ્બુદીપિકો. સો કિર મગધરટ્ઠે ઘોસકગામે રઞ્ઞો પુરોહિતસ્સ કેસિ નામ બ્રાહ્મણસ્સ પુત્તો, સત્થુસાસને પબ્બજ્જિત્વા લઙ્કાદીપં ગતો હેટ્ઠા વુત્તપ્પકારે ગન્થે અકાસિ.

બુદ્ધદત્તાચરિયો, આનન્દાચરિયો, ધમ્મપાલાચરિયો, દ્વે બુબ્બાચરિયો, મહાવજિર-બુદ્ધાચરિયો, ચુલ્લવજિર-બુદ્ધાચરિયો, વિમલબુદ્ધસઙ્ખાતો દીપઙ્કરાચરિયો, ચુલ્લદીપઙ્કરાચરિયો, ચુલ્લધમ્મપાલાચરિયો, કસ્સપાચરિયોતિ ઇમે એકાદસચરિયા જમ્બુદીપિકા હેટ્ઠા વુત્તપકારે ગન્થે અકંસુ. મહાનામાચરિયો, અઞ્ઞતરાચરિયા, ચુલ્લમહાનામાચરિયો, ઉપસેનાચરિયો, મોગ્ગલાનાચરિયો, સઙ્ઘરક્ખિતાચરિયો, વુત્તોદયકારાચરિયો, ધમ્મસિરાચરિયો, અઞ્ઞતરા દ્વાચરિયા, અનુરુદ્ધાચરિયો, ખેમાચરિયો, સારિપુત્તાચરિયો, બુદ્ધનાગાચરિયો, ચુલ્લમોગ્ગલાનાચરિયો, વાચિસ્સવાચરિયો, સુમઙ્ગલાચરિયો, બુદ્ધપિયાચરિયો, ધમ્મકિત્તિ આચરિયો મેધઙ્કરાચરિયો, બુદ્ધરક્ખિતાચરિયો, ઉપતિસ્સા ચરિયો, અઞ્ઞતરા વીસતાચરિયા, સદ્ધમ્મસિરાચરિયો, દેવાચરિયો, ચુલ્લબુદ્ધઘોસાચરિયો, સારિપુત્તાચરિયો, રટ્ઠપાલાચરિયોતિ ઇમે દ્વે પઞ્ઞાસાચરિયા લઙ્કાદીપિકાચરિયા નામ. સુભૂતચન્દાચરિયો, અગ્ગવંસાચરિયો, નવો વજિરબુદ્ધાચરિયો, ગુણસાગરાચરિયો, અભયાચરિયો, ઞાણસાગરાચરિયો, અઞ્ઞતરા દ્વાચરિયા, ઉત્તમાચરિયો, અઞ્ઞતરો આચરિયો, અઞ્ઞતરો મહામચ્ચો, ધમ્મસેનાપતાચરિયો, અઞ્ઞતરા તયો આચરિયા, સદ્ધમ્મગુરુ આચરિયો, સારિપુત્તાચરિયો, અઞ્ઞતરો એકા આચરિયો, મેધઙ્કરાચરિયો, અગ્ગપણ્ડિતાચરિયો, ચીવરાચરિયો, સદ્ધમ્મજોતિપાલાચરિયો, વિમલબુદ્ધાચરિયોતિ ઇમે તેવીસતિ આચરિયા જમ્બુદીપિકા હેટ્ઠા વુત્તપ્પકારે ગન્થે પુક્કામ સઙ્ખાતે અરિમદ્દન નગરે અકંસુ.

નવોવિમલબુદ્ધાચરિયો જમ્બુદીપિકો હેટ્ઠા વુત્તપ્પકારે ગન્થે પંયનગરે અકાસિ. અઞ્ઞતરાચરિયો અરિયવંસાચરિયોતિ ઇમે દ્વાચરિયા જમ્બુદીપિકા હેટ્ઠા વુત્તપ્પકારે ગન્થે અતિ [નવિ] પુરે અકંસુ, અઞ્ઞતરા વીસતાચરિયા જમ્બુદીપિકા હેટ્ઠા વુત્તપ્પકારે ગન્થે કિઞ્ચિ પુરાદિઘરે અકંસુ.

[ઇતિ ચુલ્લગન્થવંસે આચરિયાનં સઞ્જાતટ્ઠાન દીપકો નામ તતિયો પરિચ્છેદો.]

ગન્થા પન સિયા આયાચનેન આચરિયેહિ કતા, સિયા અનાયાચનેન આચરિયેહિ કતા. કતમે ગન્થા આયાચનેન, કતમે અનાયાચનેન કતા? મહાકચ્ચાયન ગન્થો, મહાઅટ્ઠકથા ગન્થો, મહાપચ્ચરિય ગન્થો, મહાકુરુન્દિ ગન્થો, મહાપચ્ચરિયગન્થસ્સ અટ્ઠકથા ગન્થો, મહાકુરુન્દિ ગન્થસ્સ અટ્ઠકથા ગન્થોતિ. ઇમેહિ છ ગન્થેહિ અત્તનો મતિયા સાસનુગ્ગહનત્થાય સદ્ધમ્મઠિતિયા કતા.

બુદ્ધઘોસાચરિય ગન્થેસુ પન વિસુદ્ધિમગ્ગો, સઙ્ઘપાલેન નામ સઙ્ઘથેરેન આયાચિતેન બુદ્ધઘોસાચરિયેન કતો. દીઘનિકાયસ્સ અટ્ઠકથા ગન્થો દાઠા નામેન સઙ્ઘથેરેન આયાચિતેન બુદ્ધઘોસાચરિયેન કતો. મજ્ઝિમનિકાયસ્સ અટ્ઠકથા ગન્થો બુદ્ધમિત્તનામેન થેરેન આયાચિતેન બુદ્ધઘોસાચરિયેન કતો. સંયુત્તનિકાયસ્સ અટ્ઠકથા ગન્થો જોતિપાલેન નામ થેરેન આયાચિતેન બુદ્ધઘોસાચરિયેન કતો. અઙ્ગુત્તરનિકાયસ્સ અટ્ઠકથા ગન્થો ભદ્દન્તા નામ થેરેન સહઆજીવકેન ઉપાસકેન ચ આયાચિતેન બુદ્ધઘોસાચરિયેન કતો. સમન્તપાસાદિકા નામ અટ્ઠકથા ગન્થો બુદ્ધસિરિ નામેન થેરેન આયાચિતેન બુદ્ધઘોસાચરિયેન કતો. સત્તન્નં અભિધમ્મ-ગન્થાનં અટ્ઠકથા ગન્થો ચુલ્લબુદ્ધઘોસેન ભિક્ખુના આયાચિતેન બુદ્ધઘોસાચરિયેન કતો. ધમ્મપદસ્સઅટ્ઠકથા ગન્થો કુમારકસ્સપનામેન થેરેન આયાચિતેન બુદ્ધઘોસાચરિયેન કતો. જાતકસ્સઅટ્ઠકથા ગન્થો અત્થદસ્સી, બુદ્ધમિત્ત, બુદ્ધપિયદેવ સઙ્ખાતેહિ તીહિ થેરેહિ આયાચિતેન બુદ્ધઘોસાચરિયેન કતો. ખુદ્દકપાઠસ્સ અટ્ઠકથા ગન્થો, સુત્તનિપાતસ્સ અટ્ઠકથા ગન્થો અત્તનો મતિયા બુદ્ધઘોસાચરિયેન કતો. અપદાનસ્સ અટ્ઠકથા ગન્થો પઞ્ચનિકાય વિઞ્ઞૂહિ પઞ્ચહિ થેરેહિ આયાચિતેન બુદ્ધઘોસાચરિયેન કતો.

બુદ્ધઘોસાચરિય-ગન્થદીપના નિટ્ઠિતા.

બુદ્ધત્તાચરિય ગન્થેસુ પન વિનય-વિનિચ્છયગન્થો અત્તનો સિસ્સેન બુદ્ધસીહેન નામ થેરેન આયાચિતેન બુદ્ધત્તાચરિયા કતો. ઉત્તર-વિનિચ્છયગન્થો સઙ્ઘપાલેન નામેન થેરેન આયાચિતેન બુદ્ધદત્તાચરિયેન કતો. અભિધમ્માવતારો નામ ગન્થો અત્તનો સિસ્સેન સુમતિ થેરેન આયાચિતેન બુદ્ધદત્તાચરિયેન કતો. બુદ્ધવંસસ્સ અટ્ઠકથા ગન્થો તેનેવ બુદ્ધસીહનામ થેરેન આયાચિતેન બુદ્ધદત્તાચરિયેન કતો.

બુદ્ધદત્તાચરિય-ગન્થદીપના નિટ્ઠિતા.

અભિધમ્મકથાય મૂલટીકા નામ ટીકા ગન્થો બુદ્ધમિત્તા નામ થેરેન આયાચિતેન આનન્દાચરિયેન કતો.

નેત્તિપકરણસ્સ અટ્ઠકથા ગન્થો ધમ્મરક્ખિત નામ થેરેન આયાચિતેન ધમ્મપાલાચરિયેન કતો. ઇતિવુત્તકઅટ્ઠકથા ગન્થો, ઉદાનઅટ્ઠકથા ગન્થો, ચરિયાપિટકઅટ્ઠકથા ગન્થો, થેરકથાઅટ્ઠકથા ગન્થો, થેરિકથાઅટ્ઠકથા ગન્થો, વિમાનવત્થુઅટ્ઠકથા ગન્થો, પેતવત્થુઅટ્ઠકથા ગન્થો, ઇમે સત્ત ગન્થા અત્તનો મતિયા ધમ્મપાલાચરિયેન કતો. વિસુદ્ધિમગ્ગટીકા ગન્થો દાઠા નામેન નામ થેરેન આયાચિતેન ધમ્મપાલાચરિયેન કતો, દીઘનિકાય-અટ્ઠકથાદીનં ચતુન્નં અટ્ઠકથાનં ટીકા ગન્થો, અભિધમ્મટ્ઠકથાય અનુટીકા ગન્થો, નેત્તિપકરણટ્ઠકથાય ટીકા ગન્થો, બુદ્ધવંસટ્ઠકથાય ટીકા ગન્થો, જાતકટ્ઠકથાય ટીકા ગન્થો ચેતિ ઇમે પઞ્ચ ગન્થા અત્તનો મતિયા ધમ્મપાલાચરિયેન કતો.

ધમ્મપાલાચરિય-ગન્થદીપના નિટ્ઠિતા.

નિરુત્તિમઞ્જૂસા નામ ચુલ્લનિરુત્તિટીકા ગન્થો, મહાનિરુત્તિસઙ્ખેપો નામ ગન્થો ચ અત્તનો મતિયા પુબ્બાચરિયેહિ વિંસુ કતો.

પઞ્ચ વિનયપકરણાનં વિનયગણ્ઠિ નામ ગન્થો અત્તનો મતિયા મહાવજિરબુદ્ધાચરિયેન કતો. ન્યાસસઙ્ખાતો મુખમત્તદીપની નામ ગન્થો અત્તનો મતિયા વિમલબુદ્ધિ આચરિયેન કતો. અત્થબ્યક્ખ્યાનો નામ ગન્થો અત્તનો મતિયા ચુલ્લવજિરબુદ્ધાચરિયેન કતો. રૂપસિદ્ધિ તસ્સ ચ ગન્થસ્સ ટીકા ગન્થો સબ્બ પઞ્ચસુત્તઞ્ચ અત્તનો મતિયા દીપઙ્કરાચરિયેન કતો. સચ્ચસઙ્ખેપો નામ ગન્થો અત્તનો મતિયા ચુલ્લધમ્મપાલાચરિયેન કતો. મોહચ્છેદની ગન્થો, વિમતિચ્છેદની ગન્થો, દસ બુદ્ધવંસો, અનાગતવંસો ચ. અત્તનો મતિયા કસ્સપાચરિયેન કતો. પટિસમ્ભિદામગ્ગસ્સ અટ્ઠકથા ગન્થો મહાનામેન ઉપાસકેન આયાચિતેન મહાનામાચરિયેન કતો. દીપવંસો, થૂપવંસો, બોધિવંસો, ચુલ્લવંસો, પોરાણવંસો, મહાવંસો ચાતિ ઇમે છ ગન્થા અત્તનો મતિયા મહાનામાચરિયેહિ વિસું કતા. નવો મહાવંસગન્થો અત્તનો મતિયા ચુલ્લમહાનામાચરિયેન કતો. સદ્ધમ્મપજ્જોતિકા નામ મહાનિદ્દેસસ્સ અટ્ઠકથા ગન્થો દેવેન થેરેન આયાચિતેન ઉપસેનાચરિયેન કતો. મોગ્ગલાનબ્યાકરણગન્થે અત્તનો મતિયા મોગ્ગલાનાચરિયેન કતો. સુબોધાલઙ્કાર નામ ગન્થો અત્તનો મતિયા સઙ્ઘરક્ખિતાચરિયેન કતો. વુત્તોદય ગન્થો અત્તનો મતિયા વુત્તોદયકારાચરિયેન કતો. ખુદ્દસિક્ખા નામ ગન્થો અત્તનો મતિયા ધમ્મસિરાચરિયેન કતો. પોરાણખુદ્દસિક્ખા ટીકા ચ મૂલસિક્ખા ચાતિ, ઇમે દ્વે ગન્થે અત્તનો મતિયા અઞ્ઞતરેહિ દ્વિહાચરિયેહિ વિંસુ કતા.

પરમત્થવિનિચ્છયં નામ ગન્થો સઙ્ઘરક્ખિતેન થેરેન આયાચિતેન અનુરુદ્ધાચરિયેન કતો. નામરૂપ-પરિચ્છેદો નામ ગન્થો અત્તનો મતિયા અનુરુદ્ધાચરિયેન કતો. અભિધમ્મત્થસઙ્ગહં નામ ગન્થો નમ્મ નામેન ઉપાસકેન આયાચિતેન અનુરુદ્ધાચરિયેન કતો. ખેમો નામ ગન્થો અત્તનો મતિયા ખેમાચરિયેન કતો. સારત્થદીપની નામ વિનયટ્ઠકથાય ટીકા ગન્થો, વિનયસઙ્ગહં, વિનયસઙ્ગહસ્સ ટીકા ગન્થો, અઙ્ગુત્તરટ્ઠકથાય નવો ટીકા ગન્થોતિ ઇમે ચત્તારો ગન્થા પરક્કમબાહુ નામેન લઙ્કાદીપિસ્સરેન રઞ્ઞા આયાચિતેન સારિપુત્તાચરિયેન કતો. સકટસદ્દસત્થસ્સ પઞ્ચિકાય ટીકા ગન્થો અત્તનો મતિયા સારિપુત્તાચરિયેન કતો. કઙ્ખાવિતરણિયા વિનયત્થમઞ્જૂસા નામ ટીકા ગન્થો સુમેધા નામથેરેન આયાચિતેન બુદ્ધનાગાચરિયેન કતો. અભિધાનપ્પદીપિકો નામ ગન્થો અત્તનો મતિયા ચૂલમોગ્ગલાનાચરિયેન કતો. સુબોધાલઙ્કારસ્સ મહાસામિ નામ ટીકા, વુત્તોદય વિવરણઞ્ચાતિ ઇમે દ્વે ગન્થા અત્તનો મતિયા વાચિસ્સરેન કતા. ખુદ્દસિક્ખાય સુમઙ્ગલપ્પસાદનિ નામ નવો ટીકા ગન્થો સુમઙ્ગલેન આયાચિતેન નવાચિસ્સરેન કતો. સમ્બન્ધચિન્તાટીકા બાલાવતારો, મોગ્ગલાનબ્યાકરણસ્સ ટીકા ચાતિ ઇમે તયો ગન્થા, સુમઙ્ગલ, બુદ્ધમિત્ત, મહાકસ્સપ સઙ્ખાતેહિ તીહિ થેરેહિ ચ, ધમ્મકિત્તિ નામ ઉપાસકેન, વાનિજ્જા ભાતુ ઉપાસકેન ચ આયાચિતેન વાચિસ્સરેન કતો. નામરૂપપરિચ્છેદસ્સ વિભાગો, સદ્દત્થસ્સ પદરૂપ-વિભાવનં, ખેમપકરણસ્સ ટીકા, સીમાલઙ્કારો, મૂલસિક્ખાય ટીકા, રૂપવિભાગો, પચ્ચયસઙ્ગહો ચાતિ ઇમે સત્ત ગન્થા અત્તનો મતિયા વાચિસ્સરેન કતા. સચ્ચસઙ્ખેપસ્સ ટીકા ગન્થો સારિપુત્ત-નામેન થેરેન આયાચિતેન વાચિસ્સરેન કતો. અભિધમ્માવતારસ્સ ટીકા, અભિધમ્મત્થસઙ્ગહસ્સ ટીકા ચાતિ ઇમે દ્વે ગન્થા અત્તનો મતિયા સુમઙ્ગલાચરિયેન કતા. સારત્થસઙ્ગહં નામ ગન્થો અત્તનો મતિયા બુદ્ધપ્પિયેન કતો દન્તધાતુવણ્ણના નામ પકરણં

લઙ્કાદીપિસ્સરસ્સ રઞ્ઞો સેનાપતિના આયાચિતેન ધમ્મકિત્તિનામાચરિયેન કતં. જિનચરિતં નામ પકરણં અત્તનો મતિયા મેધઙ્કરાચરિયેન કતં. જિનાલઙ્કારો, જિનાલઙ્કારસ્સ ટીકા અત્તનો મતિયા બુદ્ધરક્ખિતાચરિયેન કતો. અમતધરસ્સ નામ અનાગતવંસસ્સ અત્તનો મતિયા અટ્ઠકથા ઉપતિસ્સાચરિયેન કતા. કઙ્ખાવિતરણીયા લીનત્થપકાસિની, નિસન્દેહો, ધમ્માનુસારણી, ઞેય્યા-સન્તતિ, ઞેય્યા-સન્તતિયા ટીકા, સુમતાવતારો, લોકપઞ્ઞત્તિ પકરણં, તથાગતુપ્પત્તિ પકરણં, નલાટધાતુવણ્ણના, સીહળવત્થુ, ધમ્મદીપકો પટિપત્તિ સઙ્ગહો, વિસુદ્ધિમગ્ગસ્સ ગણ્ઠિ, અભિધમ્મગણ્ઠિ, નેત્તિપકરણગણ્ઠિ, વિસુદ્ધિમગ્ગચૂલ-નવટીકા, સોતબ્બમાલિની, પસાદજનની, ઓકસ્સલોકો, સુબોધાલઙ્કારસ્સ નવ ટીકા ચેતિ, ઇમે વીસતિ ગન્થા અત્તનો મતિયા વીસતાચરિયેહિ વિંસુ વિંસુ કતા.

સદ્દત્થ ભેદચિન્તા નામ પકરણં અત્તનો મતિયા સદ્ધમ્મસિરિનામાચરિયેન કતં. સુમન-કૂટવણ્ણનં નામ પકરણં, રાહુલા નામ થેરેન આયાચિતેન વાચિસ્સરેનદેવથેરેન કતં. સોતત્થ કિં મહાનિદાનં નામ પકરણં અત્તનો મતિયા ચુલ્લબુદ્ધઘોસાચરિયેન કતં. મધુરસઙ્ગાહનિ નામ પકરણં અત્તનો મતિયા રટ્ઠપાલાચરિયેન કતં. લિઙ્ગત્થવિવરણં નામ પકરણં અત્તનો મતિયા સુભૂતચન્દાચરિયેન કતં. સદ્દનીતિપકરણં અત્તનો મતિયા અગ્ગવંસાચરિયેન કતં. ન્યાસપકરણસ્સ મહાટીકા નામ ટીકા અત્તનો મતિયા વજિરબુદ્ધાચરિયેન કતા. મુખમત્તસારો અત્તનો મતિયા ગુણસાગરાચરિયેન કતો. મુખમત્તસારસ્સ ટીકા સુતસમ્પન્ન નામેન ધમ્મરાજિનો ગુરુના સઙ્ઘથેરેન આયાચિતેન ગુણસાગરાચરિયેન કતા. સદ્દત્થભેદચિન્તાય મહાટીકા અત્તનો મતિયા અભયાચરિયેન કતા. લિઙ્ગત્થવિવરણપ્પકાસકં નામ પકરણં અત્તનો મતિયા ઞાણસાગરાચરિયેન કતં. ગુળ્હત્થસ્સ ટીકા બાલપ્પબોધનઞ્ચ દુવિધં પકરણં અત્તનો મતિયા અઞ્ઞતરાચરિયેન કતં. સદ્દત્થભેદચિન્તાય મજ્ઝિમટીકા અત્તનો મતિયા અઞ્ઞતરાચરિયેન કતા. બાલાવતારસ્સ ટીકા, લિઙ્ગત્થવિવરણા ટીકા ચ અત્તનો મતિયા ઉત્તમાચરિયેન કતા. સદ્દત્થભેદચિન્તાય નવ ટીકા અત્તનો મતિયા અઞ્ઞતરાચરિયેન કતા. અભિધાનપ્પદીપિકાય ટીકા દણ્ડીપકરણસ્સ મગઘ-ભૂતા ટીકા ચાતિ દુવિધા ટીકાયો અત્તનો મતિ, સીહસૂર નામ રઞ્ઞો એકેન અમચ્ચેન કતા. કોલદ્ધજનસ્સટીકા પાસાદિકેન નામ થેરેન આયાચિતેન તેનેવ મહામચ્ચેન કતા. કારિકં નામ પકરણં ઞાણગમ્ભીરનામેન ભિક્ખુના આયાચિતેન ધમ્મસેનાપતાચરિયેન કતં. એતિમાસમિદીપની [વા એતિમાસમિદીપિકા] નામ પકરણં મનોહારઞ્ચ અત્તનો મતિયા તેનેવ ધમ્મસેનાપતાચરિયેન કતં. કારિકાય ટીકા અત્તનો મતિયા અઞ્ઞતરાચરિયેન કતા. એતિમાસમિદીપિકાય ટીકા અત્તનો મતિયા અઞ્ઞતરાચરિયેન કતા.

સદ્દબિન્દુપકરણં અત્તનો મતિયા ધમ્મરાજસ્સ ગુરુના અઞ્ઞતરાચરિયેન કતં. સદ્દવુત્તિપ્પકાસકં નામ પકરણં અઞ્ઞતરેન ભિક્ખુના આયાચિતેન સદ્ધમ્મગુરુ નામાચરિયેન કતં. સદ્દવુત્તિપ્પકાસકસ્સ ટીકા અત્તનો મતિયા સારિપુત્તાચરિયેન કતા.

કચ્ચાયન સારો ચ કચ્ચાયનસારસ્સ ટીકા ચાતિ દુવિધં પકરણં અત્તનો મતિયા અઞ્ઞતરાચરિયેન કતં. લોકદીપકસારં નામ પકરણં અત્તનો મતિયા નવેનમેધઙ્કરાચરિયેન કતં. લોકુપ્પત્તિપકરણં અત્તનો મતિયા અગ્ગપણ્ડિતાચરિયેન કતં. જઙ્ઘદાસકસ્સ ટીકા ભૂતા મગધટીકા અત્તનો મતિયા ચીવરાચરિયેન કતા. માતિકત્થદીપની, અભિધમ્મત્થસઙ્ગહવણ્ણના, સીમાલઙ્કારસ્સટીકા, ગણ્ઠિસારો, પટ્ઠાનગણનાનયો ચાતિ ઇમે પઞ્ચ પકરણાનિ અત્તનો મતિયા સદ્ધમ્મજોતિપાલાચરિયેન કતાનિ. સઙ્ખેપવણ્ણના પરક્કમબાહુ-નામેન જમ્બુદીપિસ્સરેન રઞ્ઞો આયાચિતે તેનેવ સદ્ધમ્મજોતિપાલાચરિયેન કતા. કચ્ચાયનસ્સ સુત્તનિદ્દેસો અત્તનો સિસ્સેન ધમ્મચારિના થેરેન આયાચિતેન સદ્ધમ્મજોતિપાલાચરિયેન કતો. વિનયસમુટ્ઠાનદીપની નામ પકરણં, અત્તનો ગુરુના સઙ્ઘથેરેન આયાચિતેન સદ્ધમ્મ-જોતિપાલાચરિયેન કતં.

સત્તપકરણાનિ પન તેન પુક્કામનગરે કતાનિ. સઙ્ખેપવણ્ણનાવ લઙ્કાદીપે કતા. અભિધમ્મ-પન્નરસટ્ઠાનવણ્ણાનં નામ પકરણં અત્તનો મતિયા નવેન-વિમલબુદ્ધાચરિયેન કતા. સદ્દસારત્થજાલિની નામ પકરણં અત્તનો મતિયા નવેન-વિમલબુદ્ધાચરિયેન કતં. સદ્દસારત્થ-જાલિનિયા ટીકા, પંયનગરે રઞ્ઞો ગુરુના સઙ્ઘરાજેન આયાચિતેન તેનેવ નવેન વિમલબુદ્ધાચરિયેન કતા. વુત્તોદયસ્સ ટીકા, અભિધમ્મસઙ્ગહસ્સ ટીકાય પરમત્થમઞ્જૂસા નામ અનુટીકા, દસગણ્ઠિવણ્ણનં નામ પકરણં, મગધભૂતવિદગ્ગમુખમણ્ડનિયાટીકા ચાતિ ઇમાનિ ચત્તારિ પકરણાનિ અત્તનો મતિયા તેનેવ નવેન વિમલબુદ્ધાચરિયેન કતાનિ.

પઞ્ચપકરણટીકાય નવાનુટીકા અત્તનો મતિયા અઞ્ઞતરો ચરિયેન કતા. અભિધમ્મસઙ્ગહસ્સ નવટીકા અત્તનો મતિયા અઞ્ઞતરાચરિયેન કતા. અભિધમ્મત્થસઙ્ગહટીકાય [મણિ] મઞ્જૂસા [મણિસારમઞ્જૂસા] નામ નવાનુટીકા અત્તનો મતિયા અરિયવંસાચરિયેન કતા.

પેટકોપદેસસ્સ ટીકા અત્તનો મતિયા ઉદુમ્બરિનામાચરિયેન પુક્કામનગરે કતા. ચતુભાણવારસ્સ અટ્ઠકથા, મહાસારપકાસિનિ, મહાદીપની, સારત્થદીપની, ગતિપકરણં, હત્થાસારો, ભુમ્મસઙ્ગહો, ભુમ્મનિદ્દેસો, દસવત્થુકાયવિરતિટીકા, ચોદનાનિરુત્તિ, વિભત્તિકથા, સદ્ધમ્મમાલિનિ, પઞ્ચગતિવણ્ણના, બાલચિત્ત-પબોધનં, ધમ્મચક્કસુત્તસ્સ નવટ્ઠકથા, દન્તધાતુ-પકરણસ્સ ટીકા ચ સદ્ધમ્મોપાયનો બાલપ્પબોધનટીકા ચ, જિનાલઙ્કારસ્સ નવટીકા ચ, લિઙ્ગત્થ-વિવરણં, લિઙ્ગત્થ-વિનિચ્છયો, પાતિમોક્ખવિવરણં, પરમત્થકથાવિવરણં, સમન્તપાસાદિકવિવરણં, ચતુભાણવારટ્ઠકથા વિવરણં, અભિધમ્મસઙ્ગહવિવરણં, સચ્ચસઙ્ખેપવિવરણં, સદ્દત્થભેદચિન્તાવિવરણં, સદ્દવુત્તિવિવરણં, કચ્ચાયનસારવિવરણં, કચ્ચાયનવિવરણં, અભિધમ્મસઙ્ગહસ્સટીકાવિવરણં, મહાવેસ્સન્તરજાતકસ્સ વિવરણં, સક્કાભિમતં, મહાવેસ્સન્તરજાતકસ્સ નવટ્ઠકથા, પઠમ-સમ્બોધિ ચ લોકનેત્તિ, બુદ્ધઘોસાચરિયનિદાનં, મિલિન્દ-પઞ્હો વણ્ણના, ચતુરારક્ખા, ચતુરારક્ખાયઅટ્ઠકથા, સદ્દવુત્તિપ્પકરણસ્સ નવટીકા ચાતિ ઇમાનિ, તિચત્તાલીસ પકરણાનિ અત્તનો મતિયા સાસનસ્સ જાતિયા સદ્ધમ્મસ્સ ઠિતિયા ચ લઙ્કાદીપાદીસુ વિંસુ વિંસુ કતાનિ.

સમ્બુદ્ધે ગાથા ચ…પે… નવહારગુણવણ્ણના ચાતિ ઇમે બુદ્ધપણામાદિકા ગાથાયો. અત્તનો અત્તનો બુદ્ધગુણપકાસનત્થાય અત્તનો ચ પરે ચ અનન્તપઞ્ઞાપવત્તનત્થાય ચ પણ્ડિતેહિ લઙ્કાદીપાદીસુ વિંસુ વિંસુ કતા.

[ઇતિ ચુલ્લ-ગન્થવંસે આયાચકાચરિયદીપકો નામ ચતુત્થો પરિચ્છેદો.]

નામં આરોપનં પોત્થકં ગન્થકારસ્સ ચ. લેખંલેખાપનઞ્ચેવ, વદામિ તદનન્તરન્તિ. તત્થ ચતુરાસીતિયા ધમ્મક્ખન્ધસહસ્સાનિ પિટક, નિકાયઙ્ગ, વગ્ગ, નિપાતાદિકં નામં, કેનારોપિતં, કત્થ આરોપિતં, કદા આરોપિતં, કિમત્થં આરોપિતન્તિ? તત્રાયં પિવિસજ્જનાકેન આરોપિતન્તિ પઞ્ચસતખીણાસવેહિ આરોપિતં. તેહિ સબ્બબુદ્ધવચનં સઙ્ગાયન્તિ, ઇદં પિટકં, અયં નિકાયો, ઇદં અઙ્ગં, અયં વગ્ગો, અયં નિપાતોતિ. એવમાદિકં નામં આરોપેન્તિ. કત્થ આરોપિતન્તિ? રાજગહે વેભારપબ્બતસ્સ પાદે ધમ્મમણ્ડપ્પે આરોપિતં. કદા આરોપિતન્તિ? ભગવતો પરિનિબ્બુતે પઠમસઙ્ગાયનકાલે આરોપિતં. કિમત્થં આરોપિતન્તિ? ધમ્મક્ખન્ધાનં વોહારસુખત્થાય સુખધારણત્થાય ચ આરોપિતં. સઙ્ગીતિકાલે પઞ્ચસતા ખીણાસવા તેસઞ્ચ ધમ્મક્ખન્ધાનં નામ વગ્ગનિપાતતો. ઇમસ્સ ધમ્મક્ખન્ધસ્સ અયં નામો હોતુ, ઇમસ્સ ચ પકરણસ્સ અયં નામોતિ, અબ્રવું સબ્બં નામાદિકં કિચ્ચં અકંસુ. તે ખીણાસવા, યદિ નામાદિકં કિચ્ચં અકતં ન સુપાકતં તસ્મા વોહારસુખત્થાયનામાદિકં કિચ્ચં કતં અનાગતે પનત્થાય નામાદિકં પવત્તિતં અસઞ્જાતનામો ન સુટ્ઠુ પાકતો સબ્બસો ભવેતિ. ધમ્મક્ખન્ધાનં નામ દીપના નિટ્ઠિતા.

ચતુરાસીતિ ધમ્મક્ખન્ધસહસ્સાનિ કેન પોત્થકે આરોપિતાનિ, કદા આરોપિતાનિ, કિમત્થં આરોપિતાનીતિ. તત્રાયં વિસજ્જના કેનારોપિતાનિતિ? ખીણાસવમહાનાગેહિ આરોપિતાનિ. કત્થ આરોપિતાનીતિ? લઙ્કાદીપે આરોપિતાનિ. કદા આરોપિતાનીતિ? સદ્ધાતિસ્સસ્સરાજિનો પુત્તસ્સ વટ્ટગામનિ રાજસ્સ કાલે આરોપિતાનિ. કિમત્થં આરોપિતાનીતિ? ધમ્મક્ખન્ધાનં અવિધંસનત્થાય સદ્ધમ્મટ્ઠિતિયા ચ આરોપિતાનિ.

ધરમાનો હિ ભગવા, અમ્હાકં સુગતોધીરો;

નિકાયે પઞ્ચદેસેતિ, યાવ નિબ્બાનગમના.

સબ્બેપિ તે ભિક્ખુ આદિ, મનસા વચસાહારો;

સબ્બે ચ વાચુગ્ગતા હોન્તિ, મહાપઞ્ઞાસતિવરા.

નિબ્બૂતે લોકનાથમ્હિ, તતો વસ્સસતં ભવે;

અરિયાનરિયા ચાપિ ચ, સબ્બે વાચુગ્ગતા ધુવં.

તતો પરં અટ્ઠરસં, દ્વિસતંવસ્સ ગણનં;

સબ્બે પુથુજ્જના ચેવ, અરિયા ચ સબ્બેપિતે.

મનસાવચસાયેવ, વાચુગ્ગતાવ સબ્બદા;

દુટ્ઠગામણિરઞ્ઞો ચ, કાલે વાચુગ્ગતા ધુવં.

અરિયાનરિયાપિ ચ, નિકાયે ધારણાસદા;

તતો પરમ્હિ રાજા ચ, તતો ચુતો ચ તુસિતે.

ઉપ્પજ્જિ દેવ લોકે સો, દેવેહિ પરિવારિતો;

સદ્ધા તિસ્સોતિ નામેન, તસ્સ કનિટ્ઠકો હિતો.

તતો લદ્ધરટ્ઠો હોતિ, બુદ્ધસાસનપાલકો.

તદા કાલે ભિક્ખૂ આસું, સબ્બે વાચુગ્ગતા સદા;

નિકાયે પઞ્ચવેધેવ, યાવ રઞ્ઞો ચ ધારણા;

તતો ચુતો સો રાજા ચ, તુસ્સીતે ઉપપજ્જતિ;

દેવલોકેટ્ઠિતો સન્તો, તદા વાચુગ્ગતા તતો.

તસ્સ પુત્તાપિ અહેસું, અનેકા વરજ્જં ગતા;

અનુક્કમેન ચુતતે, દેવલોકં ગતા ધુવં;

તદાપિતે સબ્બે ભિક્ખૂ, વાચુગ્ગતાવ સબ્બદા;

નિકાયે પઞ્ચવિધેવ, ધારણાવસતિમતા.

તતો પરં પોત્થકેસુ, નિકાયા પઞ્ચ પિટ્ઠિતા;

તદા અટ્ઠકથા ટીકા, સબ્બે ગન્થા પોત્થકે ગતા;

સબ્બે પોત્થેસુ યે ગન્થા, પાળિ અટ્ઠકથા ટીકા;

સંટ્ઠિતાસં ઠિતા હોન્તિ, સબ્બેપિ નો ન સન્તિતે.

તદા તે પોત્થકેયેવ, નિકાયા પિઠિતા ખિલા;

તદા અટ્ઠકથાદીનિ, ભવન્તીતિ વદન્તિ ચ.

લઙ્કાદીપસ્સ રઞ્ઞોવ, સદ્ધા તિસ્સસ્સ રાજિનો.

પુત્તકો લઙ્કાદીપસ્સ, ઇસ્સરો ધમ્મિકો વરો;

તદા ખીણાસવા સબ્બે, ઓલોકેન્તિ અનગતે.

ખીણાસવા પસ્સન્તિ તે, દુપઞ્ઞેવ પુથુજ્જને;

સબ્બેપિ તે ભિક્ખૂ આસું, બહુંતરા પુથુજ્જના;

ન સક્ખિસ્સન્તિ તે પઞ્ચ, નિકાયે વાચુગ્ગતં ઇતિ;

પોત્થકેસુ સબ્બે પઞ્ચ, આરોપેન્તિ ખીણાસવા.

સદ્ધમ્મટ્ઠિતિ ચિરત્તાય, જનાનં પુઞ્ઞત્થાય ચ;

તતો પટ્ઠાયતે સબ્બે, નિકાયા હોન્તિ પોત્થકે;

અટ્ઠકથા ટીકા સબ્બે, તે હોન્તિ પોત્થકેટ્ઠિતા.

તતો પટ્ઠાયતે સબ્બે, ભિક્ખુ આદિ મહાગણા;

પોત્થકેસુ ઠિતેયેવ, સબ્બે પસ્સન્તિ સબ્બદા.

[પોત્થકે આરોપન દીપકા નિટ્ઠિતા.]

યો કોચિ પણ્ડિતો ધીરો, અટ્ઠકથાદિકં ગન્થં કરોતિ વા કારાપેતિ વા, તસ્સ અનન્તકો હોતિ પુઞ્ઞસંચયો, અનન્તકો હોતિ પુઞ્ઞાનિસંસો. ચતુરાસીતિ ચેતિયસહસ્સ કરણસદિસો, ચતુરાસીતિ બુદ્ધરૂપસહસ્સ કરણસદિસો, ચતુરાસીતિ બોધિરુક્ખસહસ્સરોપનસદિસો, ચતુરાસીતિ વિહારસહસ્સ કરણસદિસો, યો ચ બુદ્ધવચનમઞ્જૂસં કરોતિ વા કારાપેતિ વા, યો ચ બુદ્ધવચનં મણ્ડનં કરોતિ વા કારાપેતિ વા, યો ચ બુદ્ધવચનં લેખં કરોતિ વા કારાપેતિ વા, યો ચ પોત્થકં વા, યો ચ પોત્થકમૂલં વા, દેતિ વા દાપેતિ વા, યો ચ તેલં વા ચુણ્ણં વા, ધઞ્ઞં વા પોત્થકભઞ્જનત્થાય યં કિઞ્ચિ નિત્થં વા પોત્થકછિદ્દે આવુનત્થાય, યં કિઞ્ચિ સુત્તં વા કટ્ઠફલકદ્વયં વા પોત્થકં પુટનત્થાય યં કિઞ્ચિ વત્થં વા, પોત્થક-બન્ધનત્થાય, યં કિઞ્ચિ યોત્તં વા પોત્થકલાપ પૂટનત્થાય યં કિઞ્ચિ થવિકં દેતિ વા દાપેતિ વા.

યો ચ હરિતાલેન વા મનોસિલાય વા, સુવણ્ણેન વા રજતેન વા પોત્થકમણ્ડનં વા કટ્ઠફલકમણ્ડનં વા કરોતિ વા કારાપેતિ વા, તસ્સ અનન્તકો હોતિ પુઞ્ઞસંચયો, અનન્તકો હોતિ પુઞ્ઞાનિસંસો. ચતુરાસીતિ ચેતિયસહસ્સ કરણસદિસો, ચતુરાસીતિ વિહારસહસ્સ કરણસદિસો.

ભવે નિબ્બત્તમાનો સો, સીલગુણમુપાગતા;

મહા તેજો સદા હોતિ, સીહનાદો વિસારદો.

આયુવણ્ણબલુપ્પેતો, ધમ્મકામો ભવે સદ્દા;

દેવમનુસ્સલોકેસુ, મહેસક્ખો અનામયો.

ભવે નિબ્બત્તમાનો સો, પઞ્ઞવા સુસમાહિતો;

અધિપચ્ચ પરિવારો, સબ્બસુખાધિ ગચ્છતિ.

સદ્દોહીરિમા વદઞ્ઞૂ, સંવિગ્ગ માનસો ભવે;

અઙ્ગપચ્ચઙ્ગ સમ્પન્નો, આરોહ પરિણાહવા.

સબ્બે સત્તાપિ યો લોકે, સબ્બત્થ પૂજિતાભવે;

દેવમનુસ્સ સઞ્ચરો, મિત્તસહાય પાલિતો.

દેવમનુસ્સ સમ્પત્તિં, અનુભોતિ પુનપ્પુનં;

અરહત્ત ફલં પત્તો, નિબ્બાનં પાપુણિસ્સતિ.

પટિસમ્ભિદા ચતસ્સો, અભિઞ્ઞા છબ્બિધે વરે;

વિમોક્ખે અટ્ઠકે સેટ્ઠે, ગમિસ્સતિ અનાગતે.

તસ્માહિ પણ્ડિતો પોસો, સંપસ્સં હિત મત્તનો;

કારેય્ય સામ ગન્થે ચ, અઞ્ઞે ચાપિ કારાપયે.

પોત્થકે ચ ઠિતે ગન્થે, પાળિ અટ્ઠકથાદિકે;

ધમ્મમઞ્જૂસા ગન્થે ચ, લેખં કરે કારાપયે.

પોત્થકં પોત્થકમૂલઞ્ચ, તેસં ચુલ્લથૂસમ્પિ ચ;

પિલોતિકાદિકં સુત્તં, કટ્ઠફલદ્વયમ્હિ ચ.

ધમ્મબન્ધનત્થાય ચ, યં કિઞ્ચિ મહગ્ઘં વત્થં;

ધમ્મબન્ધનયોત્તઞ્ચ, યં કિઞ્ચિ થવિકમ્પિ ચ.

દદેય્ય ધમ્મખેત્તમ્હિ, વિપ્પસ્સન્નેન ચેતસા;

અઞ્ઞો ચાપિ દજ્જાપેય્ય, મિત્તસહાયબન્ધવેતિ.

ગન્થાકરલેખલેખાપનાનિસંસ દીપના નિટ્ઠિતા.

[ઇતિ ચૂલગન્થવંસે પકિણ્ણકદીપકો નામ પઞ્ચમો પરિચ્છેદો.]

સોહં હંસારટ્ઠ જાતો, નન્તપઞ્ઞોતિ વિસ્સુતો

સદ્ધા સીલ વીરપ્પેતો, ધમ્મરસં ગવેસનો.

સોહં તતો ગન્ત્વા ચિમં, જિન નવં યં પૂરં;

સબ્બ ધમ્મં વિચિનન્તો, વીસતિ વસ્સમાગતો.

સબ્બ ધમ્મં વિસ્સેજ્જેન્તો, કિકારે નેવ ભિક્ખુનો;

છ વસ્સાનં ગણં ભિત્વા, કામાનં અભિમદ્દનં.

સન્તિ સભા ચ નિબ્બાનં, ગવેસિઞ્ચ પુનપ્પુનં;

વસન્તોહં, વનારમ્મં, પિટકત્તય સઙ્ગહં;

ગન્થવંસં ઇમં ખુદ્દં, અરિયસઙ્ઘદાસકન્તિ.

ઇતિ પામોજ્જત્થાય અરઞ્ઞવાસિના, નન્દપઞ્ઞાચરિયેન કતો ચૂળગન્થવંસો નિટ્ઠિતો.

ધમ્મવટંસકનામેન વિસુતો થેરો, યં પકરણં લિક્ખિતં તં પરિપુણ્ણં તેન પુઞ્ઞેન તં પિટકં પરિસિપ્પં પરિનિટ્ઠિતં.

મમેવ સિસ્સસમૂહાનઞ્ચ પરિસિપ્પં પરિનિટ્ઠિતં. તવે સિસ્સાનૂ સિસ્સાનિ ચ, પરિસિપ્પં પરિનિટ્ઠિતં.