📜

જિનચરિતય

નમો તસ્સ ભગવતો અરહતો સમ્માસમ્બુદ્ધસ્સ

.

ઉત્તમં ઉત્તમઙ્ગેન નમસ્સિત્વા મહેસિનો;

નિબ્બાણમધુદં પાદપઙ્કજં સજ્જનાલિનં.

.

મહામોહતમં લોકે ધંસેન્તં ધમ્મભાકરં;

પાતુભૂતં મહાતેજં ધમ્મરાજોદયાચલે.

.

જન્તુચિત્તસરે જાતં પસાદકુમુદં સદા;

બોધેન્તં સઙ્ઘવન્દઞ્ચ સિલોરુકિરણુજ્જલં.

.

તહિં, તહિં સુવિત્થિણ્ણં જિનસ્સ ચરિતં હિતં;

પવક્ખામિ સમાસેન સદા’નુસ્સરણત્થિકો.

.

પણિતં તં સરન્તાનં દુલ્લભમ્પિ સિવંપદં;

અદુલ્લભં ભવે ભોગપટિલાભમ્હિ કા કથા?

.

તસ્મા તં ભઞ્ઞમાનં મે ચિત્તવુત્તપદક્કમં;

સુન્દરં મધુરં સુદ્ધં સોતુસોતરસાયનં.

.

સોતહત્થપુટા સમ્મા ગહેત્વાન નિરન્તરં;

અજરામરમિ’ચ્છન્તા સાધવો પરિભુઞ્જથ.

.

કપ્પસતસહસ્સસ્સ ચતુન્નં ચા’પિ મત્થકે;

અસઙ્ખેય્યાનમા’વાસં સબ્બદા પુઞ્ઞકામિનં.

.

નાનારતનસમ્પન્નં નાનાજનસમાકુલં;

વિચિત્તાપણ સંકિણ્ણં તોરણ ગ્ઘિક ભૂસિતં.

૧૦.

યુત્તં દસહિ સદ્દેહિ દેવિન્દપુરસન્નિભં;

પુરં અમરસઙ્ખાતં અહોસી રુચિરં વરં.

૧૧.

તહિં બ્રાહ્મન્વયે જાતો સબ્બલોકાભિપૂજિતો;

મહાદયો મહાપઞ્ઞો અભિરૂપો મનોરમો.

૧૨.

સુમેધો નામ નામેન વેદસાગરપારગૂ;

કુમારો’સિ ગરૂનં સો અવસાને જિનંકુરો.

૧૩.

રાસિવડ્ઢકમચ્ચેન દસ્સિતં અમિતં ધનં;

અનેકસતગબ્ભેસુ નિચિતં તં ઉદિક્ખિય.

૧૪.

ધનસન્નિચયં કત્વા અહો મય્હં પિતાદયો;

ગતા માસકમે’કમ્પિ નેવા’દાય દિવં ઇતિ.

૧૫.

સંવેગમુ’પયાતો’વચીમન્તેસી’તિ ગુણાકરો;

ધનસારં ઇહં ગય્હ ગન્તું યુત્તન્તિ મે પન.

૧૬.

રહોગતો નિસીદિત્વા સુન્દરે નિજમન્દિરે;

દેહે દોસો ઉદિક્ખન્તો ઓવદન્તો’પિ અત્તનો.

૧૭.

ભેદનં તનુનોદુક્ખં દુક્ખો તસ્સો’દયો’પિ ચ;

જાતિધમ્મો જરાધમ્મો વ્યાધિધમ્મો અહં ઇતિ.

૧૮.

એવમા’દીહિ દેહસ્મિં દિસ્વા દોસે અનેકધા;

પુરે ભેરિં ચરાપેત્વા આરોચેત્વાન રાજિનો.

૧૯.

ભેરિનાદસુગન્ધેન યાચકાલિસમાગતે;

દાનકિઞ્જક્ખઓઘેન સત્તાહં પીનયી તતો.

૨૦.

દાનગ્ગહિમબિન્દૂનં નિપાતેના’પિ ધંસનં;

અયાતં તં વિલોકેત્વા રતનમ્બુજકાનનં.

૨૧.

રુદતો ઞાતિસઙ્ઘસ્સ જલિતાનલકાનના;

ગજિન્દો વિય ગેહમ્હા નિક્ખમિત્વા મનોરમા.

૨૨.

મહન્તં સો મહાવીરો ઉપગઞ્છિ હિમાલયં;

હરિચન્દનકપ્પૂરાગરુગન્ધેહિ વાસિતં.

૨૩.

સુફલ્લચમ્પકાસોકપાટલીતિલકેહિ ચ;

પૂગપુન્નાગનાગાદિપાદપેહિ ચ મણ્ડિતં.

૨૪.

સીહવ્યગ્ઘતરચ્છેહિ ઇભદીપિકપીહિ ચ;

તુરઙ્ગમાદિનેકેહિ મિગેહિ ચ સમાકુલં.

૨૫.

સાળિકારવિહંસેહિ હંસકોઞ્ચસુવેહિ ચ;

કપોતકરવીકાદિસકુન્તેહિ ચ કૂજિતં.

૨૬.

યક્ખરક્ખસગન્ધબ્બદેવદાનવકેહિ ચ;

સિદ્ધવિજ્જાધરાદીહિ ભૂતેહિ ચ નિસેવિતં.

૨૭.

મનોસીલિન્દનીલોરુચારુપબ્બતપન્તિહિ;

સજ્ઝુહેમાદિનેકેહિ ભૂધરેહિ ચ ભાસુરં.

૨૮.

સુવણ્ણમણિસોપાનનેકતિત્થસરેહિ ચ;

સોભિતં તત્થ કીળન્તનેકદેવઙ્ગનાહિ ચ.

૨૯.

સીતસીકરસઞ્છન્નનિજ્ઝરાનં સતેહિ ચ;

કિણ્ણરોરગરઙ્ગેહિ રમ્મેહિ વિરાજિતં.

૩૦.

સિખણ્ડિસણ્ડનચ્ચેહિ લતાનં મણ્ડપેહિ ચ;

સેતવાલુકસઞ્છન્નમાલકેહિ ચ મણ્ડિતં.

૩૧.

સુવણ્ણમણિમુત્તાદિ અનેકરતનાકરં;

ઇચ્છન્તાનં જનાલીનં પુઞ્ઞકિઞ્જક્ખમા’લયં.

૩૨.

તમ’જ્ઝોગય્હ સો ધીરો સહસ્સક્ખેન માપિતે;

દિસ્વા ઇસિપરિક્ખારે પણ્ણસાલવરે તહિં.

૩૩.

ઇસિવેસં ગહેત્વાન વિહરન્તો સમાહિતો;

સત્તાહ’બ્ભન્તરે પઞ્ચ અભિઞ્ઞ’ટ્ઠવિધા’પિ ચ.

૩૪.

ઉપ્પાદેત્વા સમાપત્તિસુખેને’ચ તપોધનો;

નભસા દિવસે’કસ્મિં ગચ્છન્તો જનતં ઇસિ.

૩૫.

સોધેન્તમ’ઞ્જસં દિસ્વા ઓતરિત્વા નભા તહિં;

ઇતિ તં જનતં પુચ્છિ કસ્મા સોધેથ અઞ્જસં.

૩૬.

સુમેધ ત્વં નજાનાસિ દીપઙ્કરતથાગતો;

સમ્બોધિમુ’ત્તમં પત્વા ધમ્મચક્કમ’નુત્તરં.

૩૭.

પવત્તેત્વાન લોકસ્સ કરોન્તો ધમ્મસઙ્ગહં;

રમ્મં રમ્મપુરં પત્વા વસતી’હ સુદસ્સને.

૩૮.

ભિક્ખુસતસહસ્સેહિ ચતૂહિ વિમલેહિ તં;

નિમન્તયિમ્હ દાનેન મયં લોકેકનાયક.

૩૯.

તસ્સ આગમનત્થાય મગ્ગં સોધેમ ચક્ખુમ;

ઇતિ સોતસ્સ સો તસ્સ સુખં દેન્તો જનો’બ્રવિં.

૪૦.

બુદ્ધો’તિ વચનં સુત્વા પીતિયો’દગ્ગમાનસો;

સકભાવેન સણ્ઠાતું નેવસક્ખિ ગુણાકરો.

૪૧.

તેના’રદ્ધઞ્જસા ધીરો યાચિત્વાન પદેસકં;

લભિત્વા વિસમં ઠાનં સમં કાતું સમારભિ.

૪૨.

ના’લઙ્કતેયેવ તહિં પદેસે,

લોકેકનાથો સનરામરેહિ;

સમ્પૂજિતો લોકહિતો મહેસિ,

વસીહિ સદ્ધિં પટિપજ્જિ મગ્ગં.

૪૩.

છબ્બણ્ણરંસિજાલેહિ પજ્જલન્તં તથાગતં;

આગચ્છન્તં તહિ દિસ્વા મોદમાનો વિચિન્તયિ.

૪૪.

યન્નૂનિ’મસ્સ ધીરસ્સ સેતું કત્વાન કદ્દમે;

સકત્તાનં નિપજ્જયે સસઙ્ઘસ્સ મહેસિનો.

૪૫.

દીઘરત્તામ’લં તં મે હિતાય ચ સુખાય ચ;

ઇચ્ચે’વં ચિન્તયિત્વાન નિપન્નો’સો જિનઙ્કુરો.

૪૬.

પબોધેત્વાન દિસ્વાન ચારુલોચનપઙ્કજે;

પુન’પે’વં વિચિન્તેસિ નિપન્નો ધિતિમા તહિં.

૪૭.

ઇચ્છેય્યં ચે’હમ’જ્જે’વ હન્ત્વા’નન્તરણે ભવે;

સઙ્ઘસ્સ નવકો હુત્વા પવિસેય્યં પુરં વરં.

૪૮.

કિમ’ઞ્ઞાતકવેસેન ક્લેસનિબ્બાપણેન મે;

અયં બુદ્ધો’વ’હં બુદ્ધો હુત્વા લોકે અનુત્તરો.

૪૯.

જનતં ધમ્મનાવાય તારેત્વાન ભવણ્ણવાવ;

નિબ્બાણપુરમા’નેત્વા સેય્યં મે પરિનિબ્બુતં.

૫૦.

ઇચ્ચે’વં ચિન્તયિત્વાન નિપન્નો કદ્દમે તહિં;

સુવણ્ણકદલિક્ખન્ધસન્નિભો સો’તિ સોભતિ.

૫૧.

છબ્બણ્ણરંસીહિ વિરાજમાનં,

દિસ્વા મનુઞ્ઞં સુગતત્તભાવં;

સઞ્જાતપીતીહિ ઉદગ્ગચિત્તો,

સમ્બોધિયા છન્દમ’કાસિ ધીરો.

૫૨.

આગન્ત્વાન તહિં ઠાનં ઇસિં પઙ્કે નિપન્નકં;

લોકસ્સ સેતુભૂતો’પિ સેતુભૂતં તમ’ત્તનો.

૫૩.

દિસ્વા ઉસ્સીસકે તસ્સ ઠત્વા લોકેકસેતુનો;

લોકેકલોચનો ધીરો દીપઙ્કરતથાગતો.

૫૪.

ગોતમો નામ નામેન સમ્બુદ્ધો’યં અનાગતે;

ભવિસ્સતીતિ વ્યાકાસિ સાવકે ચ પુરાદિકે.

૫૫.

ઇદં વત્વાન કત્વાન સસઙ્ઘો તં પદક્ખિણં;

પૂજેસિ અટ્ઠમુટ્ઠિહિ કુસુમેહિ ગુણપ્પિયો.

૫૬.

ઇતિ કાતૂન પાયાસિ સસઙ્ઘો લોકનાયકોવ;

રમ્મકં નામ નગરં રમ્મારામાલયાલયં

૫૭.

જિનસ્સ વચનં સુત્વા ઉટ્ઠહિત્વાન પઙ્કતો;

મુદિતો દેવસઙ્ઘેહિ કુસુમાદીહિ પૂજિતો.

૫૮.

પલ્લઙ્કમા’ભુજિત્વાન નિસીદિ કુસુમાસને;

મહાતપો મહાપઞ્ઞો સુમેધો દમિતિન્દ્રિયો.

૫૯.

દેવા દસસહસ્સેસુ ચક્કવાળેસુ મોદિતા;

અભિત્વવિંસુ તં ધીરં નિસિન્નં કુસુમાસને.

૬૦.

નિસિન્નો ઉપધારેસિ ધમ્મે બુદ્ધકરે તદા;

કિમુદ્ધં વા અધો વા’પિ દિસાસુ વિદિસાસુ ચ.

૬૧.

ઇચ્ચે’વં વિચિનન્તો સો સકલં ધમ્મધાતુકં;

અદ્દક્ખિ સકસન્તાને પઠમં દાનપારમિં.

૬૨.

એવમે’વં ગવેસન્તો ઉત્તરિં પારમી વિદૂ;

સબ્બા પારમિયો દિસ્વા અત્તનો ઞાણચક્ખુના.

૬૩.

સંસારે સંસરન્તો સો બહું દુક્ખં તિતિક્ખિય;

ગવેસન્તો’મતં સન્તો પૂરેત્વા દાનપારમિં.

૬૪.

સત્તનં કપ્પરુક્ખો’વ ચિન્તામણિ’વ કામદો;

ઇચ્છિતિચ્છિતમન્નાદિં દદન્તો દદતં વરો.

૬૫.

તારકાહિ બહું કત્વા નભે ચારુવિલોચને;

ઉપ્પાટેત્વા દદં ધીરો યાચકાનં પમોદિતો.

૬૬.

મહિયા પંસુતો ચા’પિ સમુદ્દોદકતો’ધિકં;

દદં સરીરમંસઞ્ચ લોહિતમ્પિ ચ અત્તનો.

૬૭.

મોલિના’લઙ્કતે સીસે’ધિકં કત્વા સિનેરુતો;

કમ્પયિત્વા મહિં દેન્તો સુતે ચા’પિ સકઙ્ગતાવ.

૬૮.

સીલનેક્કમ્મપઞ્ઞાદી પૂરેત્વા સબ્બપારમી;

વેસ્સન્તરત્તભાવે’ વમ્પત્વા તમ્ભા ચુતો પન.

૬૯.

ઉપ્પજ્જિત્વા સુરાવાસે સુન્દરે તુસિતે પુરે;

વસન્તો સુચિરં કાલં ભુત્વાના’તન્તસમ્પદં.

૭૦.

કતઞ્જલીહિ દેવેહિ યાચિતો દિપદુત્તમો;

સમ્બોધાય મહાવીર કાલો તુય્હન્તિઆદિના.

૭૧.

વિલોકેત્વાન કાલાદિં ઞત્વા કાલન્તિ બોધિયા;

પટિઞ્ઞં દેવસઙ્ઘસ્સ દત્વા નન્દનકાનનં.

૭૨.

ગન્ત્વાન દેવસઙ્ઘેહિ સુગતિં ગચ્છિ’તો ચુતો;

અભિત્થુતો મહાપઞ્ઞો ચવિત્વાન તતો ઇધ.

૭૩.

સુસજ્જિતઙ્ગોરુતુરઙ્ગમાકુલે,

વિચિત્તનાનાપણપણ્યસમ્પદે;

મનોરમુત્તુઙ્ગજિન્દરાજિતે,

વિભૂસિતે તોરણકેતુરાસિહિ.

૭૪.

અલઙ્કતટ્ટાલવિસાલમાલયે,

સુગોપુરે સુન્દરસુન્દરાલયે;

સુદસ્સનીયે કપિળવ્હયે પુરે,

પુરિન્દદસ્સા’પિ પુરસ્સ હાસકે.

૭૫.

ભૂપાલમોળિરતનાલિનિસેવિતઙ્ઘિ,

પઙ્કેરુહં વિમલનેકગુણાધિવાસં;

ઓક્કાકરાજકુલકેતુમનાથનાથં,

સુદ્ધોદનં નરપતિં પવરં પટિચ્ચ.

૭૬.

સો સજ્ઝુદામધવલામલદસ્સનીય,

સોણ્ડાય સંગહિતસેતવરારચિન્દં;

ચન્દાવદાતવરવારણરાજવણ્ણં,

સન્દસ્સયિત્વ સુપિનેન વિસાલપઞ્ઞો.

૭૭.

બિમ્બાધરાય વિકચુપ્પલલોચનાય,

દેવિન્દચાપરતિચડ્ઢનભૂલતાય;

સમ્પુણ્ણસોમ્મવિમલિન્દુવરાનનાય,

સોવણ્ણહંસયુગચારુપયોધરાય.

૭૮.

પાદારવિન્દકરપલ્લવસુન્દરાય,

સોવણ્ણવણ્ણતનુવણ્ણવિરાજિતાય;

સીલાદિનેક ગુણભૂસનભૂસિતાય,

માયાય રાજવનિતાયુ’પગઞ્છિ કુચ્છિં.

૭૯.

પટિસન્ધિક્ખણે તસ્સ જાતા’નેકવિધબ્ભુતા;

અથા’યં ગહિતારક્ખો નરેહિ અમરેહિ ચ.

૮૦.

મનુઞ્ઞરત્તમ્બુજકણ્ણિકાય,

મા’સીનસિઙ્ગીપટિમા’વ રમ્મા;

સુવણ્ણવણ્ણો દિપદાનમિન્દો,

પલ્લઙ્કમા’ભુઞ્છિય માતુગબ્ભે.

૮૧.

મણિમ્હિ વિપ્પસન્નમ્હિ રત્તસુત્તમિ’વા’વુતં;

માતુચિત્તમ્બુજં ધીરો બોધયન્તો પદિસ્સતિ.

૮૨.

દસમાસાવસાનમ્હિ દેવી રઞ્ઞો કથેસિ’દં;

મય્હં ઞાતિઘરં દેવ ગન્તુમિ’ચ્છામ’હં ઇતિ.

૮૩.

રઞ્ઞો’થ સમનુઞ્ઞતા ગચ્છન્તિ કુલમ’ત્તનો;

મહતા પરિહારેન દિબ્બઞ્જસ સમઞ્જસે.

૮૪.

સુરભિકુસુમસણ્ડાલઙ્કતસ્સાલસણ્ડં,

સમદહમરમાલાગીયમાનગ્ગનાદં;

નયનવિહગસઙ્ઘે અવ્હયન્તં’વ દિસ્વા,

વિપુલરતિનિવાસં લુમ્બિનીકાનનં તં.

૮૫.

વિપુલતરરતિં સા તમ્હિ કાતૂન રમ્મે,

અમરયુવતિલીલાચારુલીલાભિરામા;

વિકસિતવરસાલસ્સો’પગન્ત્વાન મૂલં,

સયમ’તિનમિતે કં સાલસાખં અગણ્હિ.

૮૬.

તસ્મિં ખણે કમ્મજમાલુત’સ્સા,

ચલિંસુ સાનીહિ પરિક્ખિપિત્વા;

દેવિં જનો તં અભિપાલયન્તો,

તમ્હા પટિક્કમ્મ સુસણ્ઠિતા’થ.

૮૭.

સગચારુહેમવલયાદિવિભૂસિતેન,

અચ્ચન્તતમ્બનખરંસિસમુજ્જલેન;

તુલાતિકોમલસુરત્તકરેન સાખં,

ઓલમ્બ તત્થ મજનેસિ ટ્ઠિતા’વ ધીરં.

૮૮.

સોવણ્ણવણ્ણતનુવણ્ણવિરાજમાનં,

નેત્તાભિરામમતુલં અતુલાય ગબ્ભા;

સમ્મા પસારિતકરઙ્ઘીયુગાભિરામં,

પઙ્કેરુહા કણકહંસમિ’વો’તરન્તં.

૮૯.

બ્રહ્મા મનગ્ઘરતિવડ્ઢનહેમજાલ,

મા’દાય તેન ઉપગમ્મ પટિગ્ગહેત્વા;

‘‘સમ્મોદ દેવિ અય મ’ગ્ગતરો સુતો તે,

જાતો’’તિ તાય પુરતો કથયિંસુ ઠત્વા.

૯૦.

જાયન્તિ સેસમનુજા મલમક્ખિતઙ્ગા,

જાતો પને’સ પવરો દિપદાનમિન્દો;

અચ્ચન્ત સણ્હમલકાસિકવત્થકમ્હિ,

નિક્ખિત્તનગ્ઘતરચારુમણી’વ સુદ્ધો.

૯૧.

એવ’મ્પિ સન્તે સભતો’પગન્ત્વા,

દ્વે વારિધારા સુભગસ્સ દેહે;

જનેત્તિદેહે’પિ ઉતું મનુઞ્ઞં,

ગાહાપયું મઙ્ગલકિચ્ચતાય.

૯૨.

તેસં કરં રતિકરા અજિનપ્પવેણી,

મા’દાય તેન ઉપગમ્મ પટિગ્ગહેસું;

દેવા દુકૂલમયચુમ્બટકેન વીરં,

તેસં કરં નરવરા નરસીહરાજં.

૯૩.

તેસં કરા રતિકરો વિમલો’વ ચન્દો,

ચક્કઙ્કિતોરુચરણેહિ મહીતલસ્મિં;

સમ્મા પતિટ્ઠિય પુરત્થિમકં દિસં સો,

ઓલોકયિત્થ કમલાયતલોચનેહિ.

૯૪.

એકઙ્ગના નેકસતાનિ ચક્ક,

વાળાન’હેસું સનરામરા’થ;

ધીરં સુગન્ધપ્પભૂતીહિ તેસુ,

સમ્પૂજયન્તા ઇદમ’બ્રવિંસુ.

૯૫.

નત્થે’ત્થ તુમ્હેહિ સમો સુધીસ,

એકો પુમા’પ’ગ્ગતરો કુતો’તિ;

એવં દિસા લોકિય લોકનાથો,

તપેક્ખમાનો સદિસ’મ્પિ એકં.

૯૬.

ઉત્તરા’ભિમુખો સત્તપદં ગન્ત્વા કથેસિ’દં,

‘‘અગ્ગો’હમસ્મિ લોકસ્સ જેટ્ઠો સેટ્ઠો’’તિઆદિકં.

૯૭.

અનઞ્ઞસાધારણનાદમુ’ત્તમં,

સુરાસુરબ્રહ્મનરિન્દપૂજિતં;

નરિન્દ’માદાય ગતો મહાજનો,

સુસજ્જિતં તં કપિળવ્હયં પુરં.

૯૮.

ભારાતિભારનગપાદપમેરુરાજં,

સબ્બ’મ્પિ સાગરજલં વહિતું સમત્થા;

જાતક્ખણે,પિ ગુણભારમ’સય્હમાના,

સઙ્કમ્પયી’વ પથવી પવરસ્સ તસ્સ.

૯૯.

રમિંસુ સોણા હરિણેહિ સદ્ધિં,

કાકા ઉલૂકેહિ મુદગ્ગુદગ્ગા;

સુપણ્ણરાજૂહિ મહોરગા ચ,

મજ્જારસઙ્ઘા’પિ ચ ઉન્દુરેહિ.

૧૦૦.

મિગા મિગિન્દેહિ સમાગમિંસુ,

પુત્તેહિ માતાપિતરો યથે’વ;

નાવા વિદેસ’મ્પિ ગતા સદેસં,

ગતા’ચ કણ્ડં સરભઙ્ગસત્થુ.

૧૦૧.

નાનાવિરાગુજ્જલપઙ્કજેહિ,

વિભૂસિતો સન્તતરઙ્ગમાલો;

મહણ્ણવો આસિ તહિં જલ’મ્પિ,

અચ્ચન્તસાતત્તમુ’પાગમાસિ.

૧૦૨.

સુફુલ્લઓલમ્બકપઙ્કજેહિ,

સમાકુલત્તં ગગનં અગઞ્છિ;

જહિંસુ પક્ખી ગમનં નભમ્હિ,

ઠિતા’ચ સિન્ધૂ’પિ અસન્દમાના.

૧૦૩.

અકાલમેઘપ્પિયસઙ્ગમેન,

મહીવધૂ સોમ્મતમા અહોસિ;

મરૂહિ વસ્સાપિતનેકપુપ્ફ,

વિભૂસિતેના’તિવિભૂસિતાવ.

૧૦૪.

સુફુલ્લમાલાભરણાભિરામા,

લતઙ્ગના’લિંગિતપાદપિન્દા;

સુગન્ધકિઞ્જક્ખવરમ્બરેહિ,

દિસઙ્ગનાયો અતિસોભયિંસુ.

૧૦૫.

સુગન્ધધૂપેહિ નભં અસેસં,

પવાસિતં રમ્મતરં અહોસિ;

સુરાસુરિન્દા છનવેસધારી,

સંગીતિયુત્તા વિચરિંસુ સબ્બે.

૧૦૬.

પિયંવદા સબ્બજના અહેસું,

દિસા અસેસા’પિ ચ વિપ્પસન્ના;

ગજા’તિગજ્જિંસુ નદિંસુ સીહા,

હેસારવો ચા’સિ તુરઙ્ગમાનં.

૧૦૭.

સવેણુવીણા સુરદુન્દુભી નભે,

સકં સકં ચારુસરમ્પમોચયું;

સપબ્બતિન્દપ્પુથુલોકધાતુયા,

ઉળારઓભાસવયો મનોરમો.

૧૦૮.

મનુઞ્ઞગન્ધો મુદુસીતલાનિલો,

સુખપ્પદં વાયિ અસેસજન્તુનો;

અનેકરોગાદુપપીળિતંગિનો,

તતો પમુત્તા સુખિનો સિયું જના.

૧૦૯.

વિજમ્ભમાનામિતવાળવીજનિપ્પ,

-ભાભિરામં ભુવનં અહોસિ.

મહિંહિ ભેત્વા ચુ’દકાનિ સન્દયું,

ગમિંસુ બુજ્જા ઉજુગત્તતં જના.

૧૧૦.

અન્ધા પઙ્ગુલનચ્ચાનિ લીલોપેતાનિ પેક્ખયું;

સુણિંસુ બધિરા મૂગ ગીતિયો’પિ મનોરમા.

૧૧૧.

સિતલત્તમુ’પાગઞ્છિ અવીચગ્ગિ’પિ તાવદે;

મોદિંસુ જલજા તસ્મિં જન્તવો પહસિંસુ ચ.

૧૧૨.

ખુપ્પિપાસાભિ ભૂતાનં પેતાનં આસિ ભોજનં;

લોકન્તરે’પિ આલોકો અન્ધકારનિરન્તરે.

૧૧૩.

અતિરેકતરા તારાવળિચન્દદિવાકરા;

વિરોચિંસુ નભે ભૂમિગતાનિ રતનાનિ ચ.

૧૧૪.

મહીતલાદયો ભેત્વા નિક્ખમ્મ ઉપરૂપરિ;

વિચિત્તપઞ્ચવણ્ણા’સું સુફુલ્લવિપુલમ્બુજા.

૧૧૫.

દુન્દુભાદી ચ’લઙ્કારા અવાદિત અઘટ્ટિતા;

અચ્ચન્તમધુરં નાદં પમુઞ્ચંસુ મહીતલે.

૧૧૬.

બદ્ધા સઙ્ખલિકાદીહિ મુઞ્ચિંસુ મનુજા તતો;

ભુવને ભવનદ્વારકવાટા વિવટા સયં.

૧૧૭.

‘‘પુરે કપિળવત્થુમ્હિ જાતો સુદ્ધોદનત્રજો;

નિસજ્જ બોધિમણ્ડે’તિ અયં બુદ્ધો ભવિસ્સતિ.’’

૧૧૮.

ચેલુક્ખેપાદયો ચા’પી પવત્તેન્તા પમોદિતા;

કીળિંસુ દેવસઙ્ઘા તે તાવતિંસાલયે તદા.

૧૧૯.

ઇદ્ધિમન્તો મહાપઞ્ઞો કાલદેવલતાપસો;

સુદ્ધોદનનરિન્દસ્સ ધીમતો સો કુલૂપગો.

૧૨૦.

ભોજનસ્સાવસાનમ્હિ તાવતિંસાલયં ગતો;

ગન્ત્વા દિવાવિહારાય નિસિન્નો ભવને તહિં.

૧૨૧.

છનવેસં ગહેત્વાન કીળન્તે તે ઉદિક્ખિય;

સન્તોસકારણં પુચ્છિ તેસં તે’પિ ન’મબ્રવું.

૧૨૨.

સુત્વા તં તત્તતો તમ્હા પીતિયો’દગ્ગમાનસો;

તાવદેવો’પગન્ત્વાન સુદ્ધોદનનિવેસનં.

૧૨૩.

પવિસિત્વા સુપઞ્ઞત્તે નિસિસ્સો આસને ઇસિ;

‘‘જાતો કિર મહારાજ પુત્તો તે નુત્તરો સુધિ.

૧૨૪.

દટ્ટ્ઠુ’મિચ્છામ’હં તં’’તિ આહ રાજા અલઙ્કતં;

આનાપેત્વા કુમારં તં વન્દાપેતુ’મુપાગમી.

૧૨૫.

કુમારભૂતસ્સ’પિ તાવદેવ ગુણાનુભાવેન મનોરમાનિ;

પાદારવિન્દા પરિવત્તિય’ગ્ગા પતિટ્ઠિતા મુદ્ધનિ તાપસસ્સ.

૧૨૬.

તેનત્તભાવેન નરુત્તમસ્સ,

ન વન્દિતબ્બો તિભવેપિ કોચિ;

તિલોકનાથસ્સ સચે હિ સીસં,

તપસ્સિનો પાદતલે ઠપેય્યં.

૧૨૭.

ફાલેય્યમુદ્ધા ખલુ તાપસસ્સ પગ્ગય્હ સો અઞ્જલિમુત્તમસ્સ;

અટ્ઠાસિ ધીરસ્સ ગુણણ્ણવસ્સ નાસેતુ’મત્તાન’મયુત્તકન્તિ.

૧૨૮.

દિસ્વાન તં અચ્છરિયં નરિન્દો દેવાતિદેવસ્સ સકત્રજસ્સ;

પાદારવિન્દાન’ભિવન્દિ તુટ્ઠો વિચિત્તચક્કઙ્કિતકોમલાનિ.

૧૨૯.

યદા’સિ રઞ્ઞો પુથુવપ્પમઙ્ગલં તદા પુરં દેવપુરં’વ સજ્જિતં;

વિભૂસિતા તા જનતા મનોરમા સમાગતા તસ્સ નિકેતમુત્તમં.

૧૩૦.

વિભૂસિતઙ્ગો જનતાહિ તાહિ સો પુરક્ખતો ભૂસનભૂસિતત્રજં;

તમા’દયિત્વા’તુલવપ્પમઙ્ગલં સુરિન્દલીલાય ગતો નરિસ્સરો.

૧૩૧.

નાનાવિરાગુજ્જલચારુસાનિ પરિક્ખિતે કમ્હિ ચ જમ્બુમૂલે;

સયાપયિત્વા બહિમઙ્ગલં તં ઉદિક્ખિતું ધાતિગણા ગમિંસુ.

૧૩૨.

સુવણ્ણતારાદિવિરાજમાન’વિતાનજોતુજ્જલજમ્બુમૂલે;

નિસજ્જ ધીરો સયને મનુઞ્ઞે’ઝાનં સમાપજ્જિ કતાવકાસો.

૧૩૩.

સુવણ્ણબિમ્બં વિય તં નિસિન્નં છાયઞ્ચ તસ્સા ઠિતમે’વ દિસ્વા;

તમબ્રવી ધાતિજનો’પગન્ત્વા ‘‘પુત્તસ્સ તે અબ્ભુતમી’દિસન્તિ.’’

૧૩૪.

વિસુદ્ધચન્દાનનભાસુરસ્સ સુત્વાન તં પઙ્કજલોચનસ્સ;

સવન્દનં મે દુતિય’ન્તિ વત્વા પુત્તસ્સ પાદે સિરસા’ભિવન્દિ.

૧૩૫.

તદઞ્ઞાનિપિ લોકસ્મિં જાતા’નેકવિધબ્ભુતા;

દસ્સિતા મે સમાસેન ગન્થવિત્થારભીરુના.

૧૩૬.

યસ્મિં વિચિત્તમણિમણ્ડિતમન્દિરાનં,

નાનાવિતાનસયનાસનમણ્ડિતાનં;

નિસ્સેણિ સેણિ પુથુભૂમિકભૂસિતાનં,

તિણ્ણં ઉતૂનમ’નુરૂપમ’લઙ્કતાનં.

૧૩૭.

સિઙ્ગેસુ રંસિનિકરા સુરમન્દિરાનં,

સિઙ્ગેસુ રંસિમપહાસકરા’વ નિચ્ચં;

આદિચ્ચરંસિ વિય પઙ્કજકાનનાનિ,

લોકાનનમ્બુજવનાનિ વિકાસયન્તિ.

૧૩૮.

નાના મણિવિચિત્તાહિ ભિત્તીતિ વનિતા સદા;

વિના’પિ દપ્પણચ્છાયં પસાધેન્તિ સકં તનું.

૧૩૯.

તેલાસનગસઙ્કાસં વિલોચનરસાયનં;

સુધાલઙ્કતપાકારવલયં યત્થ દિસ્સતે.

૧૪૦.

ઇન્દનીલોરુવલયં નાના રતનભૂસિતં;

દિસ્સતે’વ સદા યસ્મિં પરિખાનેકપઙ્કજા.

૧૪૧.

પત્વાન વુદ્ધિં વિપુલે મનુઞ્ઞે,

ભુત્વાન કામે ચ તહિં વસન્તો;

ગચ્છં તિલોકેકવિલોચનો સો,

ઉય્યાનકીળાય મહાપથમ્હિ.

૧૪૨.

કમેન જિણ્ણં બ્યધિતં મતઞ્ચ,

દિસ્વાન રૂપં તિભવે વિરત્તો;

મનોરમં પબ્બજિતઞ્ચ રૂપં,

કત્વા રતિં તમ્હિ ચતુત્થવારે.

૧૪૩.

સુફુલ્લનાનાતરુસણ્ડમણ્ડિતં સિખણ્ડિસણ્ડાદિદિજૂપકૂજિતં;

સુદસ્સનીયં વિય નન્દનં વનં મનોરમુય્યાનમ’ગા મહાયસો.

૧૪૪.

સુરઙ્ગના સુન્દરસુન્દરીનં મનોરમે વાદિતનચ્ચગીતે સુરિન્દલીલાય;

તહિં નરિન્દો રમિત્વ કામં દિપદાન’મિન્દો.

૧૪૫.

આભુજિત્વાન પલ્લઙ્કં નિસિન્નો રુચિરાસને;

કારાપેતુમ’ચિન્તેસિ દેહભૂસન’મત્તનો.

૧૪૬.

તસ્સ ચિત્તં વિદિત્વાન વિસ્સકમ્મસ્સિ’દંબ્રવી;

અલઙ્કરોહિ સિદ્ધત્થ’મિતિ દેવાનમિસ્સરો.

૧૪૭.

તેના’ણત્તો’પગન્ત્વાન વિસ્સકમ્મો યસસ્સિનો;

દસદુસ્સસહસ્સેહિ સીસં વેઠેસિ સોભનં.

૧૪૮.

તનું મનુઞ્ઞમ્પિ અકાસિ સોભનં,

અનઞ્ઞસાધારણલક્ખણુજ્જલં;

વિચિત્તનાનુત્તમભૂસનેહિ સો,

સુગન્ધિગન્ધુપ્પલચન્દનાદિના.

૧૪૯.

વિભૂસિતો તેન વિભૂસિતઙ્ગિના,

તહિં નિસિન્નો વિમલે સિલાતલે;

સુરઙ્ગનાસન્નિભસુન્દરીહિ સો,

પુરક્ખતો દેવપતીવ સોભતિ.

૧૫૦.

સુદ્ધોદનનરિન્દેન પેસિતં સાસનુત્તમં;

‘‘પુત્તો તે પુત્ત જાતો’’તિ સુત્વાન દીપદુત્તમો.

૧૫૧.

‘‘મમ’જ્જ બન્ધનં જાતં’’ઇતિ વત્વાન તાવદે;

સમિદ્ધં સબ્બકામેહિ અગમા સુન્દરં પુરં.

૧૫૨.

ઠિતા ઉપરિપાસાદે કિસાગોતમિ તં તદા;

રાજેન્તં સતરંસિ’ંવ રાજં દિસ્વા કથે સિ’દં.

૧૫૩.

‘‘યેસં સૂનુ અયં ધીરો યા ચ જાયા ઇમસ્સ તુ;

તે સબ્બે નિબ્બુતા નૂન સદા’નૂનગુણસ્સ વે’’.

૧૫૪.

ઇતી’દિસં ગિરં સુત્વા મનુઞ્ઞં તાય ભાસિતં;

સઞ્જાતપીતિયા પીનો ગચ્છમાનો સકાલયં.

૧૫૫.

સીતલં વિમલં હારિં હારં તં રતિવડ્ઢનં;

પેસેત્વા સન્તિકં તસ્સા ઓમુઞ્ચિત્વાન કણ્ઠતો.

૧૫૬.

પાસાદમ’ભિરૂહિત્વા વેજયન્તં’વ સુન્દરંવ;

નિપજ્જિ દેવરાજા’વ સયને સો મહારહે.

૧૫૭.

સુન્દરી તં પુરક્ખત્વા સુરસુન્દરિસન્નિભા;

પયોજયિંસુ નચ્ચાનિ ગીતાનિ વિવિધાનિ’પિ.

૧૫૮.

પબ્બજ્જાભિરતો ધીરો પઞ્ચકામે નિરાલયો;

તાદિસે નચ્ચગીતે’પિ ન રમિત્વા મનોરમે.

૧૫૯.

નિપન્નો વિસ્સમિત્વાન ઈસકં સયને તહિં;

પલ્લઙ્કમા’ભુજિત્વાન મહાવીરો મહીપતિ.

૧૬૦.

નિસિન્નો’વ’નેકપ્પકારં વિકારં,

પદિસ્વાન નિદ્દુપગાનં વધૂનં;

ગમિસ્સામિ’દાની’તિ ઉબ્બિગ્ગચિત્તો,

ભવે દ્વારમૂલં’પગન્ત્વાન રમ્મં.

૧૬૧.

ઠપેત્વાન સીસં સુભુમ્મારકસ્મિં,

સુણિસ્સામિ ધીરસ્સ સદ્દન્તિ તસ્મિં;

નિપન્નં સુદન્તં પસાદાવહન્તં,

સહાયં અમચ્ચં મહાપુઞ્ઞવન્તં.

૧૬૨.

અચ્છન્નસવનં છન્નં આમન્તેત્વા કથેસિ’દં;

‘‘આનેહિ ઇતિ કપ્પેત્વા કન્થકં નામ સિન્ધવં.’’

૧૬૩.

સો છન્નો પતિગણ્હિત્વા તં ગિરં તેન ભાસિતં;

તતો ગન્ત્વાન કપ્પેત્વા સીઘમા’નેસિ સિન્ધવં.

૧૬૪.

અભિનિક્ખમનં તસ્સ ઞત્વા વરતુરઙ્ગમો;

તેન સજ્જિયમાનો સો હેસારવમુ’દીરયિ.

૧૬૫.

પત્થરિત્વાન ગચ્છન્તં સદ્દં તં સકલં પુરં;

સબ્બે સુરગણા તસ્મિં સોતું ના’દંસુ કસ્સચિ.

૧૬૬.

અથ સો સજ્જનાનન્દો ઉત્તમં પુત્તમ’ત્તનો;

પસ્સિત્વા પઠમં ગન્ત્વા પચ્છા બુદ્ધો ભવામ’હં.

૧૬૭.

ચિન્તયિત્વાન એવ’મ્પિ ગન્ત્વા જાયાનિવેસનં;

ઠપેત્વા પાદદુ’મ્મારે ગીવં અન્તો પવેસિય.

૧૬૮.

કુસુમેહિ સમાકિણ્ણે દેવિન્દસયનૂપમે;

નિપન્નં માતુયા સદ્ધિં સયને સકમ’ત્રજં.

૧૬૯.

વિલોકેત્વાન ચિન્તેસિ ઇતિ લોકેકનાયકો;

સચા’હં દેવિયા બાહુમ’પનેત્વા મમ’ત્રજં.

૧૭૦.

ગણ્હિસ્સામ’ન્તરાય’મ્પિ કરેય્ય ગમનસ્સ મે;

પબુજ્ઝિત્વા મહન્તેન પેમેને’સા યસોધરા.

૧૭૧.

બુદ્ધો હુત્વા પુના’ગમ્મ પસ્સિસ્સામી’તિ અત્રજં;

નરાધિપો તદા તમ્હા પાસાદતલતો’તરિ.

૧૭૨.

પેસલાનનકરઙ્ઘિપઙ્કજા હાસફેનભમુવીચિભાસુરા;

નેત્તનીલકમલા યસોધરાકોમુદી’વ નયનાલિપત્થિતા.

૧૭૩.

સમત્થો અસ્સ કો તસ્સા જહિતું દેહસમ્પદં;

વિન્દમાનો વિના ધીરં ઠિતં પરમિમુદ્ધનિ.

૧૭૪.

‘‘અસ્સો સામિ મયાનીતો કાલં જાન રથેસભ’’;

ઇતિ અબ્રવિ છન્નો સો ભૂપાલસ્સ યસસ્સિનો.

૧૭૫.

મહીપતિ તદા સુત્વા છન્નેનો’દીરિતં ગિરં;

પાસાદા ઓતરિત્વાન ગન્ત્વા કન્થકસન્તિકં.

૧૭૬.

તસ્સિ’દં વચનં ભાસિ સબ્બસત્તહિતે રતો;

‘‘કન્થક’જ્જે’કરત્તિં મા તારેહિ’’ સનરામરં.

૧૭૭.

લોકમુ’ત્તારયિસ્સામિ બુદ્ધો હુત્વા અનુત્તરો;

ભવસાગરતો ઘોરજરાદિમકરાકરા.’’

૧૭૮.

ઇદં વત્વા તમા’રુય્હ સિન્ધવં સઙ્ખસન્નિભં;

ગાહાપેત્વાન છન્નેન સુદળ્હં તસ્સ વાલધિં.

૧૭૯.

પત્વાન સો મહાદ્વારસમીપં સમચિન્તયિ;

ભવેય્ય વિવટં દ્વારં યેન કેનચિ નો સચે.

૧૮૦.

વાલધિં ગહિતેનેવ સદ્ધિં છન્નેન કન્થકં,

નિપ્પીળયિત્વા સત્થીહિ ઇમમચ્ચુગ્ગતં સુભં;

ઉલ્લઙ્ઘિત્વાન પાકારં ગચ્છામી’તિ મહબ્બલો.

૧૮૧.

તથા થામબલૂપેતો છન્નો’પિ તુરગુત્તમો;

વિસું વિસું વિચિન્તેસું પાકારં સમતિક્કમં.

૧૮૨.

તસ્સ ચિત્તં વિદિત્વાન મોદિતા ગમને સુભે;

વિવરિંસુ તદા દ્વારં દ્વારે’ધિગ્ગહિતા સુરા.

૧૮૩.

તં સિદ્ધત્થમ’સિદ્ધત્થં કરિસ્સામી’તિ ચિન્તિય;

આગન્ત્વા તસ્સિ’દં ભાસિ અન્તલિક્ખે ટ્ઠિતન્તિકો.

૧૮૪.

‘‘મા નિક્ખમિ મહાવીર ઇતો તે સત્તમે દિને;

દિબ્બં તુ ચક્કરતનં અદ્ધા પાતુભવિસ્સતિ.’’

૧૮૫.

ઇચ્ચેવં વુચ્ચમાનો સો અન્તકેન મહાયસો;

‘‘કો’સિ ત્વમિ’તિ’’તં ભાસિ મારો ચ’ત્તાનમા’દિસિ.

૧૮૬.

‘‘મારજાનામ’હં મય્હં દિબ્બચક્કસ્સ સમ્ભવં;

ગચ્છ ત્વમિ’ધ મા તિટ્ઠ ન’મ્હિ રજ્જેનમત્થિકો.

૧૮૭.

સબ્બં દસસહસ્સિમ્પિ લોકધાતુમ’હં પન;

ઉન્નાદેત્વા ભવિસ્સામિ બુદ્ધો લોકેકનાયકો.’’

૧૮૮.

એવં વુત્તે મહાસત્તે અત્તનો ગિરમુ’ત્તરિં;

ગાહાપેતુમ’સક્કોન્તો તત્થે’વ’ન્તરધાયિ’સો.

૧૮૯.

પાપિમસ્સ ઇદં વત્વા ચક્કવત્તિસિરિમ્પિ ચ;

પહાય ખેપિણ્ડં’વ પચ્ચુસસમયે વસિં.

૧૯૦.

ગચ્છન્તમ’ભિપૂજેતું સમાગન્ત્વાન તાવદે;

રતનુક્કાસહસ્સાનિ ધારયન્તા મરૂ તહિં.

૧૯૧.

પચ્છતો પુરતો તસ્સ ઉભોપસ્સેસુ ગચ્છરે;

તથે’વ અભિપૂજેન્તા સુપણ્ણા ચ મહોરગા.

૧૯૨.

સુવિપુલસુરસેના ચારુલીલાભિરામા,

કુસુમસલિલધારા વસ્સયન્તા નભમ્હા;

ઇહહિ દસસહસ્સી ચક્કવાળા ગતા તા,

સુખુમતનુતમેતોદગ્ગુદગ્ગા ચરન્તિ.

૧૯૩.

યસ્મિં સુગન્ધવરપુપ્ફસુધૂપ ચુણ્ણ,

હેમદ્ધજપ્પભુતિભાસુરચારુમગ્ગે;

ગચ્છં મહાજવવરઙ્ગ તુરંગ રાજા,

ગન્તું ન સક્ખિ જવતો કુસુમાદિલગ્ગો.

૧૯૪.

ઇત્થં તમ્હિ પથે રમ્મે વત્તમાને મહામહે;

ગચ્છન્તો રત્તિસેસેન તિંસયોજનમઞ્જસે.

૧૯૫.

પત્વા’નોમાનદીતીરં પિટ્ઠિતો તુરગસ્સ સો;

ઓતરિત્વાન વિમલે સીતલે સિકતાતલે.

૧૯૬.

વિસ્સમિત્વા ઇદં વત્વા ‘‘ગચ્છાહી’તિ સકં પુરં;

આભરણાનિ આદિય છન્ને’મં ગુરગમ્પિ ચ.’’

૧૯૭.

ઠિતો તસ્મિં મહાવીરો અચ્ચન્ત નિસિતા’સિના;

સુગન્ધવાસિતં મોળિં છેત્વા’નુક્ખિપિ અમ્બરે.

૧૯૮.

ચારુહેમસુમુગ્ગેન કેસધાતું નભુગ્ગતં;

પૂજનત્થં સહસ્સક્ખો સિરસા સમ્પટિચ્છિય.

૧૯૯.

વિલોચનાનન્દકરિન્દનીલમયેહિ ચૂળામણિ ચેતિયં સો;

પતિટ્ઠપેસા’મલતાવતિંસે ઉબ્બેધતો યોજનમત્તમગ્ગા.

૨૦૦.

ઉત્તમટ્ઠપરિક્ખારં ધારેત્વા બ્રહ્મુનાભતં;

અમ્બરે’ચ પવિજ્ઝિત્થ વરં દુસ્સયુગમ્પિ ચ.

૨૦૧.

તમા’દાય મહાબ્રહ્મા બ્રહ્મલોકે મનોરમં;

દ્વાદસયોજનુબ્બેધં દુસ્સથૂપં અકારયિ.

૨૦૨.

નામેના’નુપિયં નામ ગન્ત્વા અમ્બવનં તહિં;

સત્તાહં વીતિનામેત્વા પબ્બજ્જાસુખતો તતો.

૨૦૩.

ગન્ત્વાને’કદિનેને’વ તિંસયોજનમઞ્જસં;

પત્વા રાજગહં ધીરો પિણ્ડાય ચરિ સુબ્બતો.

૨૦૪.

ઇન્દનીલસિલાયા’પિ કતા પાકારગોપુરા;

હેમચલા’વ દિસ્સન્તિ તસ્સા’ભાગિ તહિં તદા.

૨૦૫.

કો’યં સક્કો નુખો બ્રહ્મા મારો નાગો’તિઆદિના;

ભિય્યો કોતુહળપ્પત્તો પદિસ્વા તં મહાજનો.

૨૦૬.

પવિસિત્વા ગરહેતૂન ભત્તં યાપનમત્તકં;

યુગમત્તં’વ પેક્ખન્તો ગચ્છન્તો રાજવીથિયં.

૨૦૭.

મથિતં મેરુમન્થેન સમુદ્દ’વ મહાજનં;

તમ્હા સો આકુલી કત્વા ગન્ત્વા પણ્ડવપબ્બતં.

૨૦૮.

તતો તસ્સે’વ છાયાય ભૂમિભાગે મનોરમે;

નિસિન્નો મિસ્સકં ભત્તં પરિભુઞ્જિતુમા’રભિ.

૨૦૯.

પચ્ચવેક્ખણમત્તેન અન્તસપ્પં નિવારિસ;

દેહવમ્મિકતો ધીરો નિક્ખમન્તં મહબ્બલો.

૨૧૦.

ભુત્વાન બિમ્બિસારેન નરિન્દેન નરાસભો;

નિમન્તિનો’પિ રજ્જેન ઉપગન્ત્વાન’નેકધા.

૨૧૧.

પટિક્ખિપિય તં રજ્જં અથ તેના’ભિયાચિતો;

ધમ્મં દેસેહિ મય્હન્તિ બુદ્ધો હુત્વા અનુત્તરો.

૨૧૨.

દત્વા પટિઞ્ઞં મનુજાધિપસ્સ ધીરો’પગન્ત્વાન પધાનભૂમિં;

અનઞ્ઞસાધારણદુક્કરાનિ કત્વા તતો કિઞ્ચિ અપસ્સમાનો.

૨૧૩.

ઓળારિકન્નપાનાનિ ભુઞ્જિત્વા દેહસમ્પદં;

પત્વા’જપાલનિગ્રોધમૂલં પત્તો સુરો વિય.

૨૧૪.

પુરત્થા’ભિમુખો હુત્વા નિસિન્નો’સિ જુતિન્ધરો;

દેહવણ્ણેહિ નિગ્રોધો હેમવણ્ણો’સિ તસ્સ સો.

૨૧૫.

સમિદ્ધપત્થના એકા સુજાતા નામ સુન્દરી;

હેમપાતિં સપાયાસં સીસેના’દાય ઓનતા.

૨૧૬.

તસ્મિં અધિગ્ગહીતસ્સ રુક્ખદેવસ્સ તાવદે;

બલિં દમ્મી’તિ ગન્ત્વાન દિસ્વા તા દીપદુત્તમં.

૨૧૭.

દોવો’તિ સઞ્ઞાય ઉદગ્ગચિત્તા પાયાસપાતિં પવરસ્સ દત્વા;

‘‘આસિંસના ઇજ્ઝિયથા હિ મય્હં તુય્હમ્પિ સા સામિ સમિજ્ઝિતૂ’તિ.’’

૨૧૮.

ઇચ્ચે’વં વચનં વત્વા ગતા તમ્હા વરઙ્ગના;

અથ પાયાસપાતિં તં ગહેત્વા મુનિપુઙ્ગવો.

૨૧૯.

ગન્ત્વા નેરઞ્જરાતીરં ભૂત્વા તં વરભોજનં;

પટિસોતં પવિસ્સજ્જિ તસ્સા પાતિં મનોરમં.

૨૨૦.

જન્તાલિપાલિમનનેત્તવિલુમ્પમાનં,

સમ્ફુલ્લસાલવનરાજિવિરાજમાનં;

દેવિન્દનન્દનવનં’વ’ભિનન્દનીય,

મુ’ય્યાનમુ’ત્તમતરં પવરો’પગન્ત્વા.

૨૨૧.

કત્વા દિવાવિહારં સો સાયણ્હસમયે તહિં;

ગચ્છં કેસરલીલાય બોધિપાદપસન્તિકં.

૨૨૨.

બ્રહ્મસુરાસુરમહોરગપક્ખિરાજ,

સંસજ્જિતોરુવટુમે દિપદાનમિન્દો;

પાયાસિ સોત્થિયદ્વિજો તિણહારકો તં,

દિસ્વાન તસ્સ અદદા તિણમુટ્ઠિયો સો.

૨૨૩.

ઇન્દિવરારવિન્દાદિકુસુમાન’મ્બરા તહિં;

પતન્તી વુટ્ઠિધારા’વ ગચ્છન્તે દીપદુત્તમે.

૨૨૪.

ચારુચન્દનચુણ્ણાદિ’ધુપગન્ધેહિ નેકધા;

અનોકાસો’સિ આકાસો ગચ્છન્તે દીપદુત્તમે.

૨૨૫.

રતનુજ્જલછત્તેહિ ચારુહેમદ્ધજેહિ ચ;

અનોકાસો’સિ આકાસો ગચ્છન્તે દિપદુત્તમે.

૨૨૬.

વેલુક્ખેપસહસ્સેહિ કીળન્તેહિ મરૂહિ’પિ;

અનોકાસો’સિ આકાસો ગચ્છન્તે દિપદુત્તમે.

૨૨૭.

સુરદુન્દુભિવજ્જાનિ કરોન્તેહિ મરૂહિપિ;

અનોકાસો’સિ આકાસો ગચ્છન્તે દિપદુત્તમે.

૨૨૮.

સુરઙ્ગનાહિ સઙ્ગિતિં ગાયન્તિહિ’પિ’નેકધા;

અનોકાસો’સિ આકાસો ગચ્છન્તે દિપદુત્તમે.

૨૨૯.

મનોરમા કિણ્ણરકિણ્ણરઙ્ગના,

મનોરમઙ્ગા ઉરગોરગઙ્કના;

મનોરમા તમ્હિ ચ નચ્ચગીતિયો,

મનોરમા’નેકવિધા પવત્તયું.

૨૩૦.

તદા મહોઘે’વ મહામગેહિ,

પવત્તમાને ઇતિ સો મહાયસો;

તિણે ગહેત્વા તિભવેકનાયકો,

ઉપાગતો બોધિદુમિન્દસન્તિકં.

૨૩૧.

વિદ્દુમાસિતસેલગ્ગરજતાચલસન્નિભં;

કત્વા પદક્ખિણં બોધિપાદપં દિપદુત્તમો.

૨૩૨.

પુરત્થિમદિસાભાગે અચલે રણધંસકે;

મહીતલે ઠિતો ધીરો ચાલેસિ તિણમુટ્ઠિયો.

૨૩૩.

વિદ્દસહત્થમત્તો સો પલ્લઙ્કો આસિ તાવદે;

અથ નં અબ્ભુતં દિસ્વા મહાપઞ્ઞો વિચિન્તયિ.

૨૩૪.

‘‘મંસલોહિતમટ્ઠિ ચ નહારૂ ચ તચો ચ મે;

કામં સુસ્સતુ નેવા’હં જહામિ વીરિયં’’ઇતિ.

૨૩૫.

આભુજિત્વા મહાવીરો પલ્લઙ્કમ’પરાજિતં;

પાચિનાભિમુખો તસ્મિં નિસીદિ દીપદુત્તમો.

૨૩૬.

દેવદેવસ્સ દેવિન્દો સઙ્ખમા’દાય તાવદે;

વીસુત્તરસતુબ્બેધં ધમયન્તો તહિં ઠિતો.

૨૩૭.

દુતિયં પુણ્ણચન્દં’વ સેતચ્છત્તં તિયોજનં;

ધારયન્તો ઠિતો સમ્મા મહાબ્રહ્મા સહમ્પતિ.

૨૩૮.

ચારુચામરમા’દાય સુયામો’પિ સુરાધિપો;

વીજયન્તો ઠિતો તત્થ મન્દં મન્દં તિગાવુતં.

૨૩૯.

બેલુવં વીણમા’દાય સુરોપઞ્ચસિખવ્હયો;

નાનાવિધલયોપેતં વાદયન્તો તથા ઠિતો.

૨૪૦.

થુતિગીતાનિ ગાયન્તો નાટકીહિ પુરક્ખતો;

તથે’વ’ટ્ઠાસિ સો નાગરાજા કાલવ્હયો’પિ ચ.

૨૪૧.

ગહેત્વા હેમમઞ્જુસા સુરપુપ્ફેહિ પૂરિતા;

પૂજયન્તા’વ અટ્ઠંસુ બત્તિંસા’પિ કુમારિકા.

૨૪૨.

સેન્દદેવસઙ્ઘેહિ તેહિ ઇત્થં મહામહે;

વત્તમાને તદા મારો પાપિમા ઇતિ ચિન્તયિ.

૨૪૩.

‘‘અતિક્કમિતુકામો’યં કુમારો વિસયં મમ;

સિદ્ધત્થો અથ સિદ્ધત્થં કરિસ્સામી’’તિ તાવદે.

૨૪૪.

માપેત્વ ભિંસનતરોરુસહસ્સબાહું,

સઙ્ગય્હ તેહિ જલિતા વિવિધાયુધાનિ;

આરુય્હ ચારુ દિરદં ગિરિમેખલાક્ખ્યં,

ચણ્ડં દિયડ્ઢસતયોજનમાયતં તં.

૨૪૫.

નાનાનનાય’નલવણ્ણસિરોરુહાય,

રત્તોરુવટ્ટબહિનિગ્ગતલોચનાય;

દટ્ઠોટ્ઠભિંસનમુખાયુ’રગબ્ભુજાય,

સેનાય સો પરિવુતો વિવિધાયુધાય.

૨૪૬.

તત્થો’પગમ્મ અતિભીમરમં રવન્તો,

સિદ્ધત્થમે’થ ઇતિ ગણ્હથ બન્ધથે’મં;

આણાપયં સુરગણં સહદસ્સનેન,

ચણ્ડાનીલુગ્ગતપિચું’વ પલાપયિત્થ.

૨૪૭.

ગમ્ભીરમેઘરવસન્તિભવણ્ડનાદં,

વાતંચ માપિય તતો સુભગસ્સ તસ્સ;

કણ્ણમ્પિ વીવરવરસ્સ મનોરમસ્સ,

નો આસિયેવ ચલિતું પભુ અન્તકોથ.

૨૪૮.

સંવટ્ટવુટ્ઠિજવસન્નિભભીમઘોર,

વસ્સં પવસ્સિય તતો’દકબિન્દુકમ્પિ;

નાસક્ખિ નેતુમ’તુલસ્સ સમીપકમ્પિ,

દિસ્વા તમ’બ્ભુતમ’થો’પિ સુદુમ્મુખો સો.

૨૪૯.

અચ્ચન્તભીમનળઅચ્ચિસમુજ્જલોરુ,

પાસાનભસ્મકલલાયુધવસ્સધારા;

અઙ્ગારપજ્જલિતવાલુકવસ્સધારા,

વસ્સાપયિત્થ સકલાનિ ઇમાનિ તાનિ.

૨૫૦.

મારાનુભાવબલતો નભતો’પગન્ત્વા,

પત્વાન પુઞ્ઞસિખરુગ્ગતસન્તિકં તુ;

માલાગુળપ્પભૂતિભાવગતાનિ’થાપિ,

લોકન્તરે’વ તિમિરં તિમિરં સુઘોરં.

૨૫૧.

માપેત્વ મોહતિમિરમ્પિ હતસ્સ તસ્સ,

દેહપ્પભાગિ સતરંસિસતોદિતં’વ;

જાતં મનોરમતરં અતિદસ્સનીય,

મા’લોકપુઞ્જમ’વલોકિય પાપધમ્મો.

૨૫૨.

કોપોપરત્તવદનો ભુકુટિપ્પવારા,

અચ્ચન્તભિંસનવિરૂપકવેસધારી;

અચ્ચન્તતિણ્હતરધારમસઙ્ગમે’વ,

ચક્કાયુધં ચરતરં અપિ મેરુરાજં.

૨૫૩.

સઙ્ખણ્ડયન્તમિ’વ થૂલકલીરકણ્ડં,

વિસ્સજ્જિ તેન’પિ ન કિઞ્ચિ ગુણાકરસ્સ;

કાતું પહુત્તમુ’પગઞ્છિ તતો તમે’તં,

ગન્ત્વા નભા કુસુમછત્તતમા’ગ સીસં.

૨૫૪.

વિસ્સજ્જિતા’પિ સેનાય સેલકૂટાનલાકુલા;

પગન્ત્વા નભસા માલાગુલત્તં સમુપાગતા.

૨૫૫.

તમ્પિ દિસ્વા સસોકો સો ગન્ત્વા ધીરસ્સ સન્તિકં;

પાપુણાતિ મમેવા’યં પલ્લઙ્કો અપરાજિતો.

૨૫૬.

ઇતો ઉટ્ઠહ પલ્લઙ્કા ઇતિ’ભાસિત્થ ધીમતો;

કતકલ્યાણકમ્મસ્સ પલ્લઙ્કત્થાય માર તે.

૨૫૭.

કો સક્ખી’તિ પવુત્તો સો ઇમે સબ્બે’તિ સક્ખિનો;

સેનાયા’ભિમુખં હત્થં પસારેત્વાન પાપિમા.

૨૫૮.

ઘોરનાદેન’હં સક્ખિ અહં સક્ખી’તિ તાય’પિ;

સક્ખિભાવં વદાપેત્વા તસ્સે’વં સમુદીરયિ.

૨૫૯.

કો તે સિદ્ધત્થ સક્ખી’તિ અથ તેના’તુલેન’પિ;

મમે’ત્થ સક્ખિનો માર નસન્તિ’તિ સચેતના.

૨૬૦.

રત્તમેઘોપનિક્ખન્તહેમવિજ્જુવભાસુરં;

નીહરિત્વા સુરત્તમ્ભા ચીવરા દક્ખિણં કરં.

૨૬૧.

ભૂમિયા’ભિમુખં કત્વા કસ્મા પારમિભૂમિયં;

ઉન્નાદેત્વા નિ’દાને’વં નિસ્સદ્દાસી’તિ ભૂમિયા.

૨૬૨.

મુઞ્ચાપિતે રવે નેકસતે મેઘરવે યથા;

બુદ્ધનાગબલા નાગં જાનૂહિ સુપપતિટ્ઠિતં.

૨૬૩.

દિસ્વાનિ’દાનિ ગણ્હાતિ’દાનિ ગણ્હાતિ ચિન્તિય;

સમ્ભિન્નદાઠસપ્પો’વ હતદપ્પો સુદુમ્મુખો.

૨૬૪.

પહાયા’યુધવત્થાનિ’લઙ્કારાનિ અનેકધા;

ચક્કવાળાવલા યાવ સસેનાય પલાયિ સો.

૨૬૫.

તં મારસેનં સભયં સસોકં પલાયમાનં ઇતિ દેવસઙ્ઘા;

દિસ્વાન મારસ્સ પરાજયો’યં જયો’તિ સિદ્ધત્થ કુમારકસ્સ.

૨૬૬.

સમ્મોદમાનં અભિપૂજયન્તા ધીરં સુગન્ધપ્પભૂતિહિ તસ્મિં;

પુના’ગતા નેકથુતીહિ સમ્મા ઉગ્ઘોસમાના છનવેસધારિ.

૨૬૭.

એવં મારબલં ધીરો વિદ્ધંસેત્વા મહબ્બલો;

આદિચ્ચે ધરમાને’વ નિસિન્નો અચલાસને.

૨૬૮.

યામસ્મિં પઠમે પુબ્બેનિવાસં ઞાણ’મુત્તમો;

વિસોધેત્વાન યામસ્મિં મજ્ઝિમે દિબ્બલોચનં.

૨૬૯.

સો પટિચ્ચસમુપ્પાદે અથ પચ્છિમયામકે;

ઓતારેત્વાન ઞાણંસં સમ્મસન્નો અનેકધા.

૨૭૦.

લોકધાતુસતં સમ્મા ઉન્નાદેત્વા’રુણોદયે;

બુદ્ધો હુત્વાન સમ્બુદ્ધોસમ્બુદ્ધજલોચનો.

૨૭૧.

‘‘અનેકજાતિસંસારં સન્ધાવિસ્સ’’ન્તિઆદિના;

ઉદાને’દં ઉદાનેસિ પીતિવેગેન સાદિસો.

૨૭૨.

સલ્લક્ખેત્વાગુણે તસ્સ પલ્લઙ્કસ્સ અનેકધા;

ના તાવ’ઉટ્ઠહિસ્સામિ ઇતો પલ્લઙ્કતો ઇતિ.

૨૭૩.

સમાપત્તી સમાપજ્જી અનેકસતકોટિયો;

સત્થા તત્થે’વ સત્તાહં નિસિન્નો અચલાસને.

૨૭૪.

અજ્જા’પિ નૂન ધીરસ્સ સિદ્ધત્થસ્સ યસસ્સિનો;

અત્થિ કત્તબ્બકિચ્ચઞ્હિ તસ્મા આસનમાલયં.

૨૭૫.

નજહાસી’તિ એકચ્ચદેવતાના’સિ સંસયં;

ઞત્વા તાસં વિતક્કં તં સમેતું સન્તમાનસો.

૨૭૬.

ઉટ્ઠાય હેમહંસો’વ હેમવણ્ણો પભઙ્કરો;

અબ્ભુગ્ગન્ત્વા નભં નાથો અકાસિ પાટિહારિયં.

૨૭૭.

વિતક્કમે’વં ઇમિના મરૂનં સમ્મુ’પસમ્મા’નિમિસેસિ બોધિં;

સમ્પૂજયન્તો નયનમ્બુજેહિ સત્તાહમ’ટ્ઠાસિ જયાસનઞ્ચ.

૨૭૮.

સુભાસુરસ્મિં રતનેહિ તસ્મિં સવઙ્કમન્તો વરચઙ્કમસ્મિં;

મનોરમસ્મિં રતનાલયેહિ’પિ વિસુદ્ધધમ્મં વિચિનં વિસુદ્ધો.

૨૭૯.

મૂલેજપાલતરુરાજવરસ્સ તસ્સ,

મારઙ્ગનાનમ’મલાનનપઙ્કજાનિ;

સમ્મા મિલાપિય તતો મુચલિન્દમૂલે,

ભોગિન્દચિત્તકુમુદાનિ પબોધયન્તો.

૨૮૦.

મૂલે’પિ રાજયતનસ્સ તસ્સ તસ્મિં સમાપત્તિસુખમ્પિ વિન્દં;

સંવીતિનામેસિ મનુઞ્ઞવણ્ણો એકૂનપઞ્ઞાસદિનાનિ ધીમા.

૨૮૧.

અનોતત્તોદકં દન્તકટ્ઠનાગલતામયં;

હરીટકાગદં ભુત્વા દેવિન્દેનાભતુત્તમં.

૨૮૨.

વાનિજેહિ સમાનીતં સમત્થમધુપિણ્ડિકં;

મહારાજૂપનીતમ્હિ પત્તમ્હિ પતિગણ્હિય.

૨૮૩.

ભોજનસ્સાવસાનમ્હિ જપાલતરુમૂલકં;

ગન્ત્વાધિગતધમ્મસ્સ ગમ્ભીરત્તમનુસ્સરિ.

૨૮૪.

મહીસન્ધારકો વારિક્ખન્ધસન્નિભકો અયં;

ગમ્ભીરોધિગતો ધમ્મો મયા સન્તો’તિઆદિના.

૨૮૫.

ધમ્મગમ્ભીરતં ધમ્મરાજસ્સ સરતો સતો;

આસેવં તક્કણં ધમ્મં ઇમં મે પટિવિજ્ઝિતું.

૨૮૬.

વાયમન્તો સમ્પત્તયાચકાનં મનોરમં;

કન્તેત્વા ઉત્તમઙ્ગઞ્ચ મોળિભૂસનભૂસિતં.

૨૮૭.

સુવઞ્જિતાનિ અક્ખિનિ ઉપ્પાટેત્વાન લોહિતં;

ગળતો નીહિરિત્વાન ભરિયં લાવણ્ણભાસુરં.

૨૮૮.

અત્રજઞ્ચ દદન્તેન કુલવંસપ્પદીપકં;

દાનં નામ ન દિન્નઞ્ચ નત્થિ સીલં અરક્ખિતં.

૨૮૯.

તથાહિ સઙ્ખપાલાદિઅત્તભાવેસુ જીવિતં;

મયા પરિચ્ચજન્તેન સીલભેદભયેન ચ.

૨૯૦.

ખન્તિવાદાદિકે નેકઅત્તભાવે અપૂરિતા;

છેજ્જાદિં પાપુનત્તેન પારમી નત્થિ કાચિ મે.

૨૯૧.

તસ્સ મે વિધમન્તસ્સ મારસેનં વસુન્ધરા;

ન કમ્પિત્થ અયં પુબ્બેનિવાસં સરતો’પિ ચ.

૨૯૨.

વિસોધેન્તસ્સ મે યામે મજ્ઝિમે દિબ્બલોચનં;

ન કમ્પિત્થ પકમ્પિત્થ પચ્છિમે પન યામકે.

૨૯૩.

પચ્ચયાકારઞાણં મે તાવદે પટિવિજ્ઝતો;

સાધુકારં દદન્તી’ચ મુઞ્ચમાના મહારવં.

૨૯૪.

સમ્પુણ્ણલાપૂ વિય કઞ્જિકાહિ,

તક્કેહિ પુણ્ણં વિય વાટિકા’વ;

સમ્મક્ખિતો’વ’ઞ્જનકેહિ હત્થો,

વસાહિ સમ્પીત પિલોતિકા’વ.

૨૯૫.

કિલેસપુઞ્જબ્ભરિતો કિલિટ્ઠો,

રાગેન રત્તો અપિ દેસદુટ્ઠો;

મોહેન મૂળ્હો’તિ મહબ્બલેન,

લોકો અવિજ્જાનિકરાકરો’યં.

૨૯૬.

કિન્નામ ધમ્મં પટિવિજ્ઝતે’તં,

અત્થો હિ કો તસ્સિ’તિ દેસનાય;

એવં નિરુસ્સાહમ’ગઞ્છિ નાથો,

પજાય ધમ્મામતપાનદાને.

૨૯૭.

નિચ્છારેત્વા મહાનાદં તતો બ્રહ્મા સહમ્પતી;

નસ્સતિ વત ભો લોકો ઇતિ લોકો વિનસ્સતિ.

૨૯૮.

બ્રહ્મસઙ્ઘં સમાદાય દેવસઙ્ઘઞ્ચ તાવદે;

લોકધાતુસતે સત્થુ સમીપં સમુપાગતો.

૨૯૯.

ગન્ત્વા મહીતલે જાનું નિહચ્ચ સિરસઞ્જલિં;

પગ્ગય્હ ‘‘ભગવા ધમ્મં દેસેતુ’’ ઇતિઆદિના.

૩૦૦.

યાચિતો તેન સમ્બુદ્ધરવિન્દવદનો જિનો;

લોકધાતુસતં બુદ્ધચક્ખુના’લોકયં તદા.

૩૦૧.

તસ્મિં અપ્પરજક્ખાદિમચ્ચા દિસ્વા’તિ એત્તકા;

વિભજિત્વા’થ તે સત્તે ભબ્બાભબ્બવસેન સો.

૩૦૨.

અભબ્બે પરિવજ્જેત્વા ભબ્બે’વા’દાય બુદ્ધિયા;

ઉપનેતુ જનો’દાનિ સદ્ધાભાજનમ’ત્તનો.

૩૦૩.

પૂરેસ્સામી’તિ તં તસ્સ સદ્ધમ્મામતદાનતો;

વિસ્સજ્જિ બ્રહ્મસઙ્ઘસ્સ વચનામતરંસિયો.

૩૦૪.

તતોજપાલોદયપબ્બતોદિતો,

મહપ્પભો બુદ્ધદિવાકરો નભે;

મણિપ્પભાસન્નિભભાસુરપ્પભો,

પમોચયં ભાસુરબુદ્ધરંસિયો.

૩૦૫.

પમોદયન્તો ઉપકાદયો તદા,

કમેન અટ્ઠારસયોજનઞ્જસં;

અતિક્કમિત્વાન સુફુલ્લપાદપે,

વિજમ્ભમાનાલિગણાભિકૂજિતં.

૩૦૬.

નિરન્તરં નેકદિજુપકૂજિતં સુફ્રલ્લપઙ્કેરુહ ગન્ધવાસિતં ગતો;

યસસ્સી મિગદાયમુત્તમં તહિં તપસ્સી અથ પઞ્ચવગ્ગિયા.

૩૦૭.

દેવાતિદેવં તિભવેકનાથં,

લોકન્તદસ્સિં સુગતં સુગત્તં;

દિસ્વાન ધીરં મુનિસીહરાજં,

કુમન્તણં તે ઇતિ મન્તયિંસુ.

૩૦૮.

‘‘ભુત્વાન ઓળારિકઅન્નપાનં,

સુવણ્ણવણ્ણો પરિપુણ્ણકાયો;

એતા’વુસો’યં સમણો ઇમસ્સ,

કરોમ ના’મ્હે અભિવાદનાદિં.

૩૦૯.

અયં વિસાલન્વયતો સસૂતો,

સમ્ભાવનીયો ભુવિ કેતુભૂતો;

પટિગ્ગહેતું’રહતા’સનં તુ,

તસ્મા’સનં’યેવિ’તિ પઞ્ઞપેમ.’’

૩૧૦.

ઞત્વા’થ ભગવા તેસં વિતક્કં તિક્ખબુદ્ધિયા;

મેત્તાનિલકદમ્બેહિ માનકેતું પધંસયી.

૩૧૧.

સમત્થા નહિ સણ્ઠાતું સકાય કતિકાય તે;

અકંસુ લોકનાથસ્સ વન્દનાદીનિ ધીમતો.

૩૧૨.

બુદ્ધભાવં અજાનન્તા મુનયો મુનિરાજિનો;

આવુસો વાદતો તસ્સ કેવલં સમુદીરયું.

૩૧૩.

અથ લોકવિદૂ લોકનાથો તેસમુ‘‘દીરથ;

આવુસોવાદતો નેવ સત્થુનો’’ સમુદીરયિ.

૩૧૪.

‘‘ભિક્ખવે અરહં સમ્મા સમ્બુદ્ધો’તિ તથાગતો’’;

બુદ્ધભાવં પકાસેત્વા અત્તનો તેસમુ’ત્તમો.

૩૧૫.

નિસિન્નો તેહિ પઞ્ઞત્તે દસ્સનેય્યુત્તમાસને;

બ્રહ્મનાદેન તે થેરે સીલભૂસનભૂસિતે.

૩૧૬.

આમન્તેત્વાન બ્રહ્માનં નેકકોટિપુરક્ખતો;

ધમ્મચક્કં પવત્તેન્તો દેસનારંસિના તદા.

૩૧૭.

મોહન્ધકારરાસિમ્પિ હન્ત્વા લોકે મનોરમં;

ધમ્માલોકં પદસ્સેત્વા વેનેય્યમ્બુજબુદ્ધિયા.

૩૧૮.

મિગકાનનસઙ્ખાતો રણભૂમિતલે ઇતિ;

રાજા મહાનુભાવો’વધમ્મરાજા વિસારદો.

૩૧૯.

દેસનાસિં સમાદાય ધીભુજેન મનોરમં;

વેનેય્યજનબન્ધુનં મહાનત્થકરં સદા.

૩૨૦.

કિલેસારી પદાળેત્વા સદ્ધમ્મજયદુન્દુભિં;

પહરિત્વાન સદ્ધમ્મજયકેતું સુદુજ્જયં.

૩૨૧.

ઉસ્સાપેત્વાન સદ્ધમ્મજયત્થુણુત્તમં સુભં;

પતિટ્ઠાપિય લોકેકરાજા હુત્વા સિવઙ્કરો.

૩૨૨.

પમોચેત્વાન જનતં બ્રહાસંસારબન્ધના;

નિબ્બાણનગરં નેતુકામો લોકહિતે રતો.

૩૨૩.

સુવણ્ણાચલકૂટં’વ જઙ્ગમં ચારુદસ્સનં;

પત્વો’રુવેલગામિં તં અઞ્જસં’વ સુરઞ્જસં.

૩૨૪.

ભદ્દવગ્ગિયભૂપાલકુમારે તિંસમત્તકે;

મગ્ગત્તયામતરસં પાયેન્વા રસમુ’ત્તમં.

૩૨૫.

પબ્બજ્જમુ’ત્તમં દત્વા લોકસ્સ’ત્થાય ભિક્ખવો;

ઉય્યોજેત્વાન સમ્બુદ્ધો ચારિકં ચરથા’તિ તે.

૩૨૬.

ગન્ત્વો’રુવેલં જટિલાનમ’ન્તો-

જટા ચ છેત્વાન જટા બહિદ્ધા;

પાપેત્વ અગ્ગઞ્જસમુ’ત્તમો તે,

પુરક્ખતો ઇન્દુ’વ તારકાભિ.

૩૨૭.

પુરક્ખતો તેહિ અનાસવેહિ,

છબ્બણ્ણરંસાભરનુત્તમેહિ;

દિસઙ્ગનાયો અતિસોભયન્તો,

પક્ખીનમક્ખીનિ’પિ પીણયન્તો.

૩૨૮.

દિન્નં પટિઞ્ઞં સમનુસ્સરન્તો,

તં બિમ્બિસારસ્સ મહાયસસ્સ;

મોચેતુકામો વરરાજવંસં,

ધજૂપમાનસ્સ ગુણાલયસ્સ.

૩૨૯.

સિખણ્ડિમણ્ડલારદ્ધનચ્ચં લટ્ઠિવનવ્હયં;

ઉય્યાનમ’ગમા નેકતરુસણ્ડાભિમણ્ડિતં.

૩૩૦.

બિમ્બિસારનરિન્દો સો’ગતભાવં મહેસિનો;

સુણિત્વા પીતિપામોજ્જભૂસનેન વિભૂસિતો.

૩૩૧.

તમુ’ય્યાનુ’પગન્ત્વાન મહામચ્ચપુરક્ખતો;

સત્થુપાદારવિન્દેહિ સોભયન્તો સિરોરુહે.

૩૩૨.

નિસિન્નો બિમ્બિસારં તં સદ્ધમ્મઅમતમ્બુના;

દેવિન્દગીયમાનગ્ગવણ્ણો વણ્ણાભિરાજિતો.

૩૩૩.

દેવદાનવભોગિન્દપૂજિતો સો મહાયસો;

રમ્મં રાજગહં ગન્ત્વા દેવિન્દપુરસન્નિભં.

૩૩૪.

નરિન્દગેહં આનીતો નરિન્દેન સરાસભો;

ભોજનસ્સા’વસાનમ્હિ ચાલયન્તો મહામહિં.

૩૩૫.

પતિગણ્હિય સમ્ફુલ્લતરુરાજવિરાજિતં;

રમ્મં વેલુવનારામં વિલોચન રસાયનં.

૩૩૬.

સિતપુલિનસમૂહચ્છન્નભાલઙ્કતસ્મિં,

સુરભિકુસુમગન્ધાકિણ્ણમન્દાનિલસ્મિં;

વિવિધકમલમાલાલઙ્કતમ્બાસયસ્મિં,

વિપુલવિમલતસ્મિં વલ્લિયામણ્ડપસ્મિં.

૩૩૭.

સુરનરમહનીયો ચારુપાદારવિન્દો,

વિમલકમલનેત્તો કુન્દદન્તાભિરામો;

ગુણરતનસમુદ્દો નાથનાથો મુનિન્દો,

કણકકિરણસોભો સોમસોમ્માનનો સો.

૩૩૮.

વિમલપવરસીલક્ખન્ધવારઞ્ચ કત્વા,

રુચિરવરસમાધીકુન્તમુ‘‘સ્સાપયિત્વા;

તિખિણતરસુભગ્ગં બુદ્ધઞાણોરુકણ્ડં,

વિહરતિ ભમયન્તો કામમ’ગ્ગા વિહારા.

૩૩૯.

તદા સુદ્ધોદનો રાજા‘‘પુત્તો સમ્બોધિમુત્તમં;

પત્વા પવત્તસદ્ધમ્મચક્કો લોકહિતાય મે.

૩૪૦.

રાજગહં’ચ નિસ્સાય રમ્મે વેલુવને’ધુના;

વસતી‘‘તિ સુણિત્વાન બુદ્ધભૂતં સકત્રજં.

૩૪૧.

દટ્ઠુકામો નવક્ખત્તું નવામચ્ચે મહેસિનો;

નવયોધસહસ્સેહિ સદ્ધિં પેસેસિ સન્તિકં.

૩૪૨.

ગન્ત્વા તે ધમ્મરાજસ્સ સુત્વા’નોપમદેસનં;

ઉત્તમત્થં લભિત્વાન સાસનમ્પિ નપેસયું.

૩૪૩.

તેસ્વે’કમ્પિ અપસ્સન્તો કાલુદાયિં સુભારતિં;

આમન્તેત્વા મહામચ્ચં પબ્બજ્જાભિરતં સદા.

૩૪૪.

‘‘સુગત્તરતનં નેત્વા મમ નેત્તરસાયનં;

યેન કેનચુ’પાયેન કરોહી’’તિ તમ’બ્રવી.

૩૪૫.

અથ યોધસહસ્સેન તમ્પિ પેસેસિ સો’પિ ચ;

ગન્ત્વા સપરિસો સત્થુ સુત્વા સુન્દરદેસનં.

૩૪૬.

અરહત્તઞ્જસં પત્વા પબ્બજિત્વા નરાસભં;

નમસ્સન્તો સ સમ્બુદ્ધં પગ્ગય્હ સિરસઞ્જલિં.

૩૪૭.

‘‘વસન્તકાલજ્જનીતાતિરત્તવણ્ણાભિરામઙ્કુરપલ્લવાનિ;

સુનીલવણ્ણુજ્જલપત્તયુત્તા સાખાસહસ્સાનિ મનોરમાનિ.

૩૪૮.

વિસિટ્ઠગન્ધાકુલફાલિફુલ્લનાનાવિચિત્તાનિ મહીરુહાનિ;

સુચિત્તનાનામિગપક્ખિસઙ્ઘસઙ્ગીયમાનુત્તમકાનનાનિ.

૩૪૯.

સુનીલસાતોદકપૂરિતાનિ સુનાદિકાદમ્બકદમ્બકાનિ;

સુગન્ધેન્દીવરકલ્લહારા રવિન્દરત્તમ્બુજભૂસિતાનિ.

૩૫૦.

તીરન્તરે જાતદુમેસુ પુપ્ફકિઞ્જક્ખરાજીહિ વિરાજિતાનિ;

મુત્તાતિસેતામલસેકતાનિ રમ્માનિ નેકાનિ જલાસયાનિ.

૩૫૧.

મનુઞ્ઞવેળુરિયકઞ્ચુકાનિવગુણ્ઠિતાનિ’ચ સુસદ્દલેહિ;

સુનીલભૂતાનિ મહીતલાનિ નભાનિ મન્દાનિલ સઙ્કુલાનિ.

૩૫૨.

અનન્તભોગેહિ જનેહિ ફીતં,

સુરાજધાનિં કપિળાભિધાનિં;

ગન્તું ભદન્તે સમયો’’તિઆદિં,

સંવણ્ણિ વણ્ણં ગમનઞ્જસસ્સ.

૩૫૩.

સુવણ્ણનં તં સુગતો સુણિત્વા,

‘‘વણ્ણેસિ વણ્ણં ગમનસ્સુ’દાયિ;

કિન્નૂ‘‘તિ ભાસિત્થ તતો ઉદાયિ,

કથેસિ’દં તસ્સ સિવઙ્કરસ્સ.

૩૫૪.

‘‘ભન્તે પિતા દસ્સનમિ’ચ્છતે તે,

સુદ્ધોદનો રાજવરો યસસ્સી;

તથાગતો લોકહિતેકનાથો,

કરોતુ સઞ્ઞાતકસઙ્ગહન્તિ.’’

૩૫૫.

સુણિત્વા મધુરં તસ્સ ગિરં લોકહિતે રતો;

‘‘સાધુ’દાયિ કરિસ્સામિ ઞાતકાનન્તિ સઙ્ગહં.’’

૩૫૬.

જઙ્ગમો હેમમેરૂ’વ રત્તકમ્બલલઙ્કતો;

વિમલો પુણ્ણચન્દો’વ તારકાપરિવારિતો.

૩૫૭.

સદ્ધિં વીસસહસ્સેહિ સન્તચિત્તેહિ તાદિહિ;

ગચ્છન્તો સિરિસમ્પન્નો અઞ્જસે સટ્ઠિયોજને.

૩૫૮.

દિને દિને વસિત્વાન યોજને યોજને જિનો;

દ્વીહિ માસેહિ સમ્પત્તો બુદ્ધો જાતપુરં વરં.

૩૫૯.

બુદ્ધં વિસુદ્ધકમલાનનસોભમાનં,

બાલંસુમાલિસતભાનુસમાનભાનું;

ચક્કઙ્કિતોરુચરણં ચરણાધિવાસં,

લોકત્તયેકસરણં અરણગ્ગકાયં.

૩૬૦.

સમ્પુણ્ણહેમઘટતોરણધૂમગન્ધ,

માલેહિ વેણુપણવાદિહિ દુન્દુભીહિ;

ચિત્તેહિ છત્તધજચામરવીજનીહિ,

સુદ્ધોદનાદિવનિપા અભિપૂજયિંસૂ.

૩૬૧.

સુસજ્જિતં પુરં પત્વા મુનિન્દો તં મનોરમં;

સુગન્ધિપુપ્ફકિઞ્જક્ખાલઙ્કતોરુતલાકુલં.

૩૬૨.

સુફુલ્લજલજાકિણ્ણ અચ્છોદકજલાલયં;

મયૂરમણ્ડલારદ્ધ રઙ્ગેહિ ચ વિરાજિતં.

૩૬૩.

ચારુચઙ્કમપાસાદ લતામણ્ડપમણ્ડિતં;

પાવેક્ખિ પવરો રમ્મં નિગ્રોધારામમુત્તમં.

૩૬૪.

‘‘અમ્હાકમે’સસિદ્ધત્થો પુત્તો નત્તો’તિ’’આદિના;

ચિન્તયિત્વાન સઞ્જાતમાનસત્થદ્ધસાકિયા.

૩૬૫.

દહરે દહરે રાજ કુમારે ઇદમ’બ્રવું;

‘‘તુમ્હે વન્દથ સિદ્ધત્થં નવન્દામ મયન્તિ તં.’’

૩૬૬.

ઇદં વત્વા નિસીદિંસુ કત્વા તે પુરતો તતો;

અદન્તદમકો દન્તો તિલોકેકવિલોચનો.

૩૬૭.

તેસં અજ્ઝાસયં ઞત્વા ‘‘ન મં વન્દન્તિ ઞાતયો;

હન્દ વન્દાપયિસ્સામિ’દાનિ નેસન્તિ’’ તાવદે.

૩૬૮.

અભિઞ્ઞા પાદકજ્ઝાનં સમાપજ્જિત્વા ઝાનતો;

વુટ્ઠાય હેમહંસો’વ હેમવણ્ણો પભઙ્કરો.

૩૬૯.

અબ્ભુગ્ગન્ત્વા નભં સબ્બસત્તનેત્તરસાયનં;

ગણ્ડમ્બરુક્ખમૂલસ્મિં પાટિહારિયસન્નિભં.

૩૭૦.

અસાધારણમ’ઞ્ઞેસં પાટિહારિયમુ’ત્તમં;

રમનીયતરે તસ્મિં અકાસિ મુનિપુઙ્ગવો.

૩૭૧.

દિસ્વા તમ’બ્ભુતં રાજા સુદ્ધોદનોનરાસભો;

સઞ્જાતપીતિપામોજ્જો સક્યવંસેકનાયકો.

૩૭૨.

સત્થુપાદારવિન્દેહિ સકે ચારુસિરોરુહે;

ભૂસિતે’કાસિ તે સબ્બે સાકિય’ અકરું તથા.

૩૭૩.

ધીરો પોક્ખરવસ્સસ્સ અવસાને મનોરમં;

ધમ્મવસ્સં પવસ્સેત્વા સત્તચિત્તાવનુગ્ગતં.

૩૭૪.

મહામોહરજં હન્ત્વા સસઙ્ઘો દુતિયે દિને;

પવેક્ખિ સપદાનેન પિણ્ડાય પુરમુ’ત્તમં.

૩૭૫.

તસ્સ પાદારવિન્દાનિ’રવિન્દાનિ અનેકધા;

ઉગ્ગન્ત્વા પતિગણ્હિંસુ અક્કન્તક્કન્તઠાનતો.

૩૭૬.

દેહજોતિકદમ્બેહિ ગોપુરટ્ટાલમન્દિરા;

પિઞ્જરત્તં ગતા તસ્મિં પાકારપ્પભૂતિ તદા.

૩૭૭.

ચરન્તં પવિસિત્વાન પિણ્ડાય પુરવીથિયં;

લોકાલોકકરં વીરં સન્તં દન્તં પભઙ્કરં.

૩૭૮.

પસાદજનકે રમ્મે પાસાદે સા યસોધરા;

સીહપઞ્જરતો દિસ્વા ઠિતા પેમપરાયણા.

૩૭૯.

ભૂસને મણિરંસીહિ ભાસુરં રાહુલં વરં;

આમન્તેત્વા પદસ્સેત્વા ‘‘તુય્હમે’સો પિતા’’તિ તં.

૩૮૦.

નિકેતમુ’પસઙ્કમ્મ સુદ્ધોદનયસસ્સિનો;

વન્દિત્વા તમ’નેકાહિ ઇત્થીહિ પરિવારિતા.

૩૮૧.

‘‘દેવ દેવિન્દલીલાય પુત્તો તે’ધ પુરે પુરે;

ચરિત્વા ચરતે’દાનિ પિણ્ડાયા’તિ ઘરે ઘરે’’.

૩૮૨.

પવેદેસિ પવેદેત્વા’ગમા મન્દિરમ’ત્તનો;

આનન્દજલસન્દોહ પૂરિતો’રુચિલોચના.

૩૮૩.

તતો સેસનરિન્દાનં ઇન્દો ઇન્દોવ લઙ્કતો;

કમ્પમાનો પગન્ત્વાન વેગેન જિનસન્તિકં.

૩૮૪.

‘‘સક્યપુઙ્ગવ તે ને’સ વંસો મા ચર મા ચર;

વંસે પુત્તે’કરાજા’પિ ન પિણ્ડાય ચરી પુરે.’’

૩૮૫.

ઇતિ વુત્તે નરિન્દેન મુનિન્દો ગુણસેખરો;

‘‘તુય્હમે’સો મહારાજ વંસો મય્હં પન’ન્વયો.

૩૮૬.

બુદ્ધવંસો’’તિ સમ્બુદ્ધવંસં તસ્સ પકાસયી;

અથો તસ્મિં ઠિતોયેવ દેસેન્તો ધમ્મમુ’ત્તરિં.

૩૮૭.

‘‘ઉત્તિટ્ઠે નપ્પમજ્જેય્ય ધમ્મમિ’’ચ્ચાદિમુ’ત્તમં;

ગાથં મનોરમં વત્વા સોતૂનં સિવમા’વહં.

૩૮૮.

દસ્સનગ્ગરસં દત્વા સન્તપ્પેત્વા તમુ’ત્તમો;

તેના’ભિયાચિતો તસ્સ નિકેતં સમુપાગતો.

૩૮૯.

સદ્ધિં વિસસહસ્સેહિ તાદીહિ દિપદુત્તમં;

મધુરોદનપાનેન સન્તપ્પેત્વા મહીપતિ.

૩૯૦.

ચુળામણીમરીચીહિ પિઞ્જરઞ્જલિકેહિ તં;

રાજુહિ સહ વન્દિત્વા નિસીદિ જિનસન્તિકે.

૩૯૧.

તા’પિ નેકસતા ગન્ત્વા સુન્દરા રાજસુન્દરી;

નરિન્દેન અનુઞ્ઞાતા નિસિદિંસુ તહિં તદા.

૩૯૨.

દેસેત્વા મધુરં ધમ્મં તિલોકતિલકો જિનો;

અહમ્પ’જ્જ ન ગચ્છેય્યં સવે બિમ્બાય મન્દિરં.

૩૯૩.

દયાય હદયં તસ્સા ફાલેય્યા’તિ દયાલયો;

સાવકગ્ગયુગં ગય્હ મન્દિરં પિતરા ગતો.

૩૯૪.

નિસીદિ પવિસિત્વાન બુદ્ધો બુદ્ધાસને તહિં;

છબ્બણ્ણરંસિજાલેહિ ભાસુરન્તો’વ ભાનુમા.

૩૯૫.

મનોસિલાચુણ્ણસમાનદેહમરીવિજાલેહિ વિરાજમાના;

પકમ્પિતા હેમલતા’વ બિમ્બા બિમ્બધરા સત્થુ સમીપ’માગ.

૩૯૬.

સત્થુ પાદેસુ સમ્ફસ્સસીતલુત્તમવારિના;

નિબ્બાપેસિ મહાસોકપાવકં હદયિન્ધને.

૩૯૭.

રાજા સત્થુ પવેદેસિ બિમ્બાયા’તિ બહું ગુણં;

મુનિન્દો’પિ પકાસેસિ ચન્દકિણ્ણરજાતકં.

૩૯૮.

તદા નન્દકુમારસ્સ સમ્પત્તે મઙ્ગલત્તયે;

વિવાહો અભિસેકો ચ ઇતિ ગેહપ્પવેસનં.

૩૯૯.

મઙ્ગલાનં પુરેયેવ પબ્બાજેસિ પભઙ્કરો;

અનિચ્છન્તં’વ નેત્વા તં આરામં રમ્મમુત્તમં.

૪૦૦.

અત્તાનમ’નુગચ્છન્તં દાયજ્જત્થં સકત્રજં;

કુમારં રાહુલં ચા’પિ કુમારાભરણુજ્જલં.

૪૦૧.

‘‘સુખા’વ છાયા તે મે’’તિ ઉગ્ગિરન્તં ગિરં પિયં;

‘‘દાયજ્જં મે દદાહી’તિ દાયજ્જં મે દદાહિ ચ’’.

૪૦૨.

આરામમેવ નેત્વાન પબ્બાજેસિ નિરુત્તરં;

સદ્ધમ્મરતનં દત્વા દાયજ્જં તસ્સ ધીમતો.

૪૦૩.

નિક્ખમ્મ તમ્હા સુગતંસુમાલિ તહિં જન્તુસરોરુહાનિ;

સદ્ધમ્મરંસીહિ વિકાસયન્તો ઉપાગતો રાજગહં પુના’પિ.

૪૦૪.

કુસુમાકુલ સુન્દરતરુપવને પદુમુપ્પલ ભાસુરસરનિકરે;

પુથુચઙ્કમમણ્ડિતસિતસિકતે સુભસીતવને વિહરતિ સુગતો.

૪૦૫.

તદા સુદત્તવ્હયસેટ્ઠિસેટ્ઠો,

બહૂહિ ભણ્ડં સકટેહિ ગય્હ;

સાવત્થિતો રાજગહે મનુઞ્ઞે,

સહાયસેટ્ઠિસ્સ ઘરૂ’પગન્ત્વા.

૪૦૬.

તેને’વ વુત્તો સુભગેન બુદ્ધો,

જાતો’તિ લોકે દિપદાનમિન્દો;

સઞ્જાતપીતીહિ ઉદગ્ગચિત્તો,

રત્તિં પભાતં ઇતિ મઞ્ઞમાનો.

૪૦૭.

નિક્ખમ્મ તમ્હા વિગતન્ધકારે,

દેવાનુભાવેન મહાપથમ્હિ;

ગન્ત્વાન તં સીતવનં સુરમ્મં,

સમ્પુણ્ણ ચન્દં’વ વિરાજમાનં.

૪૦૮.

તં દીપરુક્ખં વિય પજ્જલન્તં,

વિલોચનાનન્દકરં મહેસિં;

દિસ્વાન તસ્સુ’ત્તમપાદરાગં,

પટિગ્ગહેત્વા સિરસા સુધીમા.

૪૦૯.

ગમ્ભીરં નિપુણં ધમ્મં સુણિત્વા વિમલં વરં;

સોતાપત્તિફલ’મ્પત્વા સહસ્સનય મણ્ડિતં.

૪૧૦.

નિમન્તેત્વાન સમ્બુદ્ધં સસઙ્ઘં લોકનાયકં;

વણ્ણગન્ધરસૂપેતં દત્વા દાનં સુખાવહં.

૪૧૧.

સત્થુ આગમનત્થાય સાવત્થિનગરં વરં;

પટિઞ્ઞં સો ગહેત્વાન ગચ્છન્તો અન્તરાપથે.

૪૧૨.

યોજને યોજને વારુ ચિત્તકમ્મસમુજ્જલે;

વિહારે પવરે દત્વા કારાપેત્વા બહું ધનં.

૪૧૩.

સાવત્થિં પુન’રાગન્ત્વા પાસાદસતમણ્ડિતં;

તોરણઙ્ઘિકપાકારગોપુરાદિવિરાજિતં.

૪૧૪.

પુરં અપહસન્તં’વ દેવિન્દસ્સા’પિ સબ્બદા;

સબ્બસમ્પત્તિસમ્પન્નં નચ્ચગીતાદિસોભિતં.

૪૧૫.

કસ્મિં સો વિહરેય્યા’તિ ભગવા લોકનાયકો;

સમન્તાનુવિલોકેન્તો વિહારારહભૂમિકં.

૪૧૬.

જેતરાજકુમારસ્સ ઉય્યાનં નન્દનોપમં;

છાયૂદકાદિસમ્પન્નં ભૂમિભાગં ઉદિક્ખિય.

૪૧૭.

હિરઞ્ઞકોટિસન્થારવસેને’વ મહાયસો;

કિણિત્વા પવરે તમ્હિ નરામરમનોહરે.

૪૧૮.

નિચ્ચં કિઙ્કિણિજાલનાદરુચિરં સિઙ્ગીવ સિઙ્ગાકુલં,

રમ્મંનેકમણીહિ છન્નછદનં આમુત્તમુત્તાવલિં;

નાનારાગવિતાન ભાસુરતરં પુપ્ફાદિના’લઙ્કત,

ચિત્રં ગન્ધકુટિં વરં સુવિપુલં કારેસિ ભૂસેખરં.

૪૧૯.

જિનત્રજાનમ્પિ વિસાલમાલયં,

વિતાનનાનાસયનાસનુજ્જલં;

સુમણ્ડિતં મણ્ડપવઙ્કમાદિના,

વિલુમ્પમાનં મનલોચનં સદા.

૪૨૦.

અથાપિ સણ્હામલસેતવાલુકં,

સવેદિકાચારુવિસાલમાલકં;

જલાસયં સાત’તિસીતલોદકં,

સુગન્ધિસોગન્ધિકપઙ્કજાકુલં.

૪૨૧.

સુફુલ્લસાલાસનસોગનાગ,

પુન્નાગપૂગાદિવિરાજમાનં;

મનોરમં જેતવનાભિધાનં,

કારાપયી સેટ્ઠિ વિહારસેટ્ઠં.

૪૨૨.

વિસાલકેલાસધરાધરુત્તમા-

ભિરામપાકારફનિન્દગોપિતો;

જનસ્સ સબ્બાભિમનત્થસાધકો,

વિહારચિન્તામણિ સો વિરાજિતે.

૪૨૩.

તતો આગમનત્થાય મુનિન્દં નાથપિણ્ડિકો;

દૂતં પાહેસિ સો સત્થા સુત્વા દૂતસ્સ સાસનં.

૪૨૪.

મહતા ભિક્ખુસઙ્ઘેન તદા તમ્હા પુરક્ખતો;

નિક્ખમિત્વા’નુપુબ્બેન પત્તો સાવત્થિમુત્તમં.

૪૨૫.

સમુજ્જલાનિ નેકાનિ ધજાનાદાય સુન્દરા;

કુમારા પુરતો સત્થુ નિક્ખમિંસુ સુરા યથા.

૪૨૬.

નિક્ખમિંસુ તતો તેસં પચ્છતો તરુણઙ્ગના;

ચારુપુણ્ણઘટાદાય દેવકઞ્ઞા યથા તથા.

૪૨૭.

પુણ્ણપાતિં ગહેત્વાન સેટ્ઠિનો ભરિયા તથા;

સદ્ધિં નેકસતિત્થિહિ નેકાલઙ્કારલઙ્કતા.

૪૨૮.

મહાસેટ્ઠિ મહાસેટ્ઠિસતેહિ સહ નાયકં;

અબ્ભુગ્ગઞ્છિ મહાવીરં પૂજિતો તેહિ નેકધા.

૪૨૯.

છબ્બણ્ણરંસીહિ મનોરમેહિ,

પુરં વરં પિઞ્જરવણ્ણભાવં;

નેન્તો મુનિન્દો સુગતો સુગત્તો,

ઉપાવિસી જેતવનં વિહારં.

૪૩૦.

ચાતુદ્દિસસ્સ સઙ્ઘસ્સ સમ્બુદ્ધપમુખસ્સ’હં;

ઇમં દમ્મિ વિહારન્તિ સત્થુ ચારુકરમ્બુજે.

૪૩૧.

સુગન્ધવાસિતં વારિં હેમભિઙ્કારતો વરં;

આકિરિત્વા અદા રમ્મં વિહારં ચારુદસ્સનં.

૪૩૨.

સુરમ્મં વિહારં પટિગ્ગયહ સેટ્ઠં,

અનગ્ઘે વિચિત્તાસનસ્મિં નિસિન્નો;

જનિન્દાનમિન્દો તિલોકેકનેત્તો,

તિલોકપ્પસાદાવહં તં મનુઞ્ઞં.

૪૩૩.

ઉદારાનિસંસં વિહારપ્પદાને,

અનાથપ્પદાનેન નાથસ્સ તસ્સ;

સુદત્તાભિધાનસ્સ સેટ્ઠિસ્સ સત્થા,

યસસ્સી હિતેસી મહેસી અદેસી.

૪૩૪.

ઉદારાનિસંસં વિહારપ્પદાને,

કથેતું સમત્થો વિના ભૂરિપઞ્ઞં;

તિલોકેકનાથં નરો કોસિ યુત્તો,

મુખાનં સહસ્સેહિ નેકેહિ ચા’પિ.

૪૩૫.

ઇતિ વિપુલયસો સો તસ્સ ધમ્મં કથેત્વા,

અપિ સકલજનાનં માનસે તોસયન્તો;

પરમમધુરનાદં ધમ્મભેરિં મહન્તં,

વિહરતિ પહરન્તો તત્થ તત્થૂપગન્ત્વા.

૪૩૬.

એવં તિલોકહિતદેન મહાદયેન,

લોકુત્તમેન પરિભુત્તપદેસપન્તિં;

નિચ્ચંસુરાસુરમહોરગરક્ખસાદિ,

સમ્પૂજિતં અહમિ’દાનિ નિદસ્સસિસ્સં.

૪૩૭.

સદ્ધમ્મરંસિનિકરેહિ જિનંસુમાલિ,

વેનેય્યપઙ્કજવનાનિ વિકાસયન્તો;

વાસં અકાસિ પવરો પઠમમ્હિ વસ્સે,

બારાણસિમ્હિ નગરે મિગકાનનમ્હિ.

૪૩૮.

નાનાપ્પકારરતનાપણપન્તિવીથિ,

રમ્મે પુરે પવરરાજગહાભિધાને;

વાસં અકાસિ દુતિયે તતિયે ચતુત્થે,

વસ્સેપિ કન્તતરવેલુવનેવ નાથો.

૪૩૯.

ભૂપાલમોળિમણિરંસિવિરાજમાનં,

વેસાલિનામવિદિતં નગરં સુરમ્મં;

નિસ્સાય સક્યમુનિકેસરિ પઞ્ચમમ્હી,

વસ્સમ્હિ વાસમકરિત્થ મહાવનસ્મિં.

૪૪૦.

ફુલ્લાતિનીલવિમલુપ્પલચારુનેત્તો,

સિંગીસમાનતનુજોતિહિ જોતમાનો;

બુદ્ધો અનન્તગુણસન્નિધિ છટ્ઠવસ્સે,

વાસં અકા વિપુલમઙ્કુલ પબ્બતસ્મિં.

૪૪૧.

ગમ્ભીરદુદ્દસતરં મધુરં મરૂનં,

દેસેત્વ ધમ્મમતુલો સિરિસન્નિવાસો;

દેવિન્દસીતલવિસાલસિલાસનસ્મિં,

વસ્સમ્હિ વાસમ’કરી મુનિ સત્તમમ્હિ.

૪૪૨.

ફુલ્લારવિન્દચરણો ચરણાધિવાસો,

સો સુંસુમારગિરિનામધરાધરમ્હિ;

વાસં અકા પરમમારજિ અટ્ઠમસ્મિં,

વસ્સમ્હિ કન્તરભેસકલાવનમ્હિ.

૪૪૩.

નાનામતાતિબહુતિત્થિયસપ્પદપ્પં,

હન્ત્વા તિલોકતિલકો નવમમ્હિ વસ્સે;

વાસં અકાસિ રુચિરે અતિદસ્સનીયે,

કોસમ્બિસિમ્બલિવને જિનપક્ખિરાજા.

૪૪૪.

તેસં મહન્તકલહં સમિતું યતીનં,

નિસ્સાય વારણવરં દસમમ્હિ વસ્સે;

પુપ્ફાભિકિણ્ણવિપુલામલકાનનસ્મિં,

વાસં અકા મુનિવરો વરપારલેય્યો.

૪૪૫.

ધમ્મામતેન જનતં અજરામરત્તં,

નેન્તો વિલોચનમનોહરસુદ્ધદન્તો;

નાલાભિધાનદિજગામવરે મુનિન્દો,

વાસં અકા અમિતબુદ્ધિ દસેકવસ્સે.

૪૪૬.

વેરઞ્જ ચારુદિજગામસમીપભૂતે,

આરામકે સુરભિપુપ્ફફલાભિરામે;

સબ્બઞ્ઞુ સક્યમુનિ બારસમમ્હિ વસ્સે,

વાસં અકાસિ પુચિમન્દદુમિન્દમૂલે.

૪૪૭.

ફુલ્લારવિન્દવદનો રચિચારુસોભો,

લોકસ્સ અત્થચરિયાય દયાધિવાસો;

વાસં અકા રુચિરચાલિયપબ્બતસ્મિં,

વીરો તિલોકગરુ તેરસમમ્હિ વસ્સે.

૪૪૮.

બન્ધૂકપુપ્ફસમપાદકરાભિરામો,

ધમ્મિસ્સરો પવરજેતવને સુરમ્મે;

ધીરો મહિદ્ધિ મુનિ ચુદ્દસમમ્હિ વસ્સે,

વાસં અકા સકલસત્તહિતેસુ યુત્તો.

૪૪૯.

વેનેય્યબન્ધુવનરાગગજે વિહન્ત્વા,

વસ્સમ્હિ પઞ્ચદસમે મુનિસીહરાજા;

વાસં અકા કપિલવત્થુધરાધરોરુ,

નિગ્રોધરામરમણીયમણિગ્ગુહાયં.

૪૫૦.

યક્ખમ્પિ કક્ખલતરં સુવિનીતભાવં,

નેત્વા પુરે વરતમાલવકાભિધાને;

વસ્મમ્હિ વાસમકરી દસછટ્ઠમમ્હિ,

નેન્તો જનં બહુતરમ્પિ ચ સન્તિમગ્ગં.

૪૫૧.

પાકારગોપુરનિકેતનતોરણાદિ,

નેત્તાભિરામવરરાજગહે મહેસિ;

વાસં અકાનધિવરો દસસત્તમમ્હિ,

વસ્સમ્હિ પત્થયસો ભુવનત્તયસ્મિં.

૪૫૨.

ધમ્મોસધેન મધુરેન સુખાવહેન,

લોકસ્સ ઘોરતરરાગરજં વિહન્ત્વા;

વસ્સમ્હિ વાસમકરી દસઅટ્ઠમસ્મિં,

અઙ્ગીરસો પવરચાલિયપબ્બતસ્મિં.

૪૫૩.

વેનય્યબન્ધુજનમોહરિપું ઉળારં,

હન્ત્વાન ધમ્મઅસિના વરધમ્મરાજા;

એકૂનવીસતિમકે પુન તત્થ વસ્સે,

વાસં અકા મધુરભારતિ લોકનાથો.

૪૫૪.

સુદ્ધાસયો પવરરાજગહે વિચિત્તે,

વાસં અકાસિ સમવીસતિમમ્હિ વસ્સે;

લોકસ્સ અત્થચરણે સુભકપ્પરુક્ખો,

ચિન્તામણિપ્પવરભદ્દઘટો મુનિન્દો.

૪૫૫.

એવં તિલોકમહિતો અનિબદ્ધવાસં,

કત્વા ચરમ્પઠમબોધિયુદારપઞ્ઞો;

છબ્બણ્ણરંસિસમુપેતવિચિત્તદેહો,

લોકેકબન્ધુ ભગવા અવસેસકાલે.

૪૫૬.

સાવત્થિયં પવરજેતવને ચ રમ્મે,

દિબ્બાલયે ચ સમલઙ્કતપુબ્બરામે;

વાસં અકાસિ મુનિ વીસતિપઞ્ચવસ્સે,

લોકાભિવુદ્ધિનિરતો સુખસન્નિવાસો.

૪૫૭.

ઇતિ અમિતદયો યો પઞ્ચતાળીસવસ્સે,

મનુજમનવનસ્મિં જાતરાગગ્ગિરાસિં;

પરમમધુરધમ્મમ્બુહિ નિબ્બાપયન્તો,

અવસિ સમુનિમેઘો લોકસન્તિં કરોતુ!

૪૫૮.

પઞ્ઞાવરઙ્ગના મય્હં સઞ્જાતા મનમન્દિરે;

તોસયન્તી સબ્બજનં વુદ્ધિં ગચ્છતુ સબ્બદા.

૪૫૯.

ચિતં યં રચયન્તેન જિનસ્સ ચરિતં મયા;

પુઞ્ઞં તસ્સાનુભાવેન સમ્પત્તો તુસિતાલયં.

૪૬૦.

મેત્તેય્યલોકનાથસ્સ સુણન્તો ધમ્મદેસનં;

તેન સદ્ધિં ચિરં કાલં વિન્દન્તો મહતિં સિરિં.

૪૬૧.

બુદ્ધે જાતે મહાસત્તોરમ્મે કેતુમનીપુરે;

રાજવંસે જનીત્વાન તિહેતુપટિસન્ધિકો.

૪૬૨.

ચિવરં પિણ્ડપાતઞ્ચ અનગ્ઘં વિપુલં વરં;

સેનાસનઞ્ચ ભેસજ્જં દત્વા તસ્સ મહેસિનો.

૪૬૩.

સાસને પબ્બજિત્વાન જોતેન્તો તમનુત્તરં;

ઇદ્ધિમા સતિમા સમ્મા ધારેન્તો પિટકત્તયં.

૪૬૪.

વ્યાકતો તેન બુદ્ધો યં હેસ્સતીતિ અનાગતે;

ઉપ્પન્નુપ્પન્નબુદ્ધાનં દાનં દત્વા સુખાવહં.

૪૬૫.

સંસારે સંસરન્તો હિ કપ્પરુક્ખો ચ પાણિનં;

ઇચ્છિતિચ્છિતમન્નાદિં દદન્તો મધુરં ચરં.

૪૬૬.

મંસલોહિતનેત્તાદિં દદં ચિત્તસમાહિતો;

સીલનેક્ખમ્મપઞ્ઞાદિં પૂરેન્તો સબ્બપારમિં.

૪૬૭.

પારમિસિખરં પત્વા બુદ્ધો હુત્વા અનુત્તરો;

દેસેત્વા મધુરં ધમ્મં જન્તૂનં સિવમાવહં.

૪૬૮.

સબ્બં સદેવકં લોકં બ્રહાસંસારબન્ધના;

મોચયિત્વા વરં ખેમં પાપુણ્યેં સિવં પુરં.

૪૬૯.

લઙ્કાલઙ્કાર ભૂતેન ભૂપાલન્વયકેતુના;

વિજયબાહુના રઞ્ઞા સકનામેન કારિતે.

૪૭૦.

સતોયાસયપાકાર ગોપુરાદિવિરાજિતે;

પરિવેણવરે રમ્મે વસતા સન્તવુત્તિના.

૪૭૧.

મેધઙ્કરાભિધાનેન દયાવાસેન ધીમતા;

થેરેન રચિતં એતં સબ્ભ સંસેવિતં સદા.

૪૭૨.

ભવે ભવે’ધ ગાથાનં તેસત્તતિ ચતુસ્સતં;

ગન્થતો પઞ્ચપઞ્ઞાસા-ધિકં પઞ્ચસતં ઇતિ.