📜

સમન્તકૂટવણ્ણના ¶

નમો તસ્સ ભગવતો અરહતો સમ્માસમ્બુદ્ધસ્સ

૧.

સતતવિતત કિત્તિં ધસ્તકન્દપ્પદપ્પં

તિભવહિતવિધાનં સબ્બલોકેકકેતું,

અમિતમતિમનગ્ઘં સન્તિદં મેરુસારં

સુગતમહમુદારં રૂપસારં નમામિ;

૨.

હતદુરિતતુસારં મોહપઙ્કોપતાપં

મનકમલવિકાસં જન્તુનં સેસકાનં,

કુમતિકુમુદનાસં બુદ્ધપુબ્બાચલગ્ગા

ઉદિતમહમુદારં ધમ્મભાનું નમામિ;

૩.

સકલવિમલસીલં ધુતપાપારિજાલં

સુરનરમહનીયં પાહુનેય્યાહુનેય્યં,

ઉજુપથપટિપન્નં પુઞ્ઞખેત્તં જનાનં

ગણમહમભિવન્દે સારદં સાદરેન;

૪.

ઇતિ કળિત પણામા હન્ત્વ સબ્બોપસગ્ગે

સુગતવિમલ પાદમ્ભોજસમ્પાત પૂતં,

સુમનસિખરિરાજં વણ્ણયિસ્સં સુરાનં

વસતિ મતુલમેતં સાધુજન્તુ સુણન્તુ;

૫.

સવણા લપના ચેવ સતિયા ચાપિ વન્દના,

યસ્સ સમ્મા સુખી હોતી નિબ્બાણઞ્ચાધિગચ્છતિ;

૬. ¶

તસ્મા સપ્પુરિસેહે’દં પત્થેન્તેહિ તિસમ્પદં,

સવણીયઞ્હિ સાધૂહિ અચિક્ખિત્તેન ચેતસા;

૭.

યો લોકતિલકો નાથો પૂરેત્વા દસ પારમી,

જાતોસિ તુસિતે કાયે સન્તુસિતો’તિ વિસ્સુતો;

૮.

આરાધિતો સુરાદીહિ કાલો મારિસ તે અયં,

તિણ્ણો તારયિમં લોકં બહૂ અપ્પરજક્ખકા;

૯.

એતદત્થાય તે વીર પૂરિતા દસ પારમી,

બાહું પિતુસ્સ પુત્તો’વ લોકો આલમ્બતે તુવં;

૧૦.

તેસં તં વચનં સુત્વા મહાસત્તો મહામતી,

વિલોકને વિલોકેત્વા પઞ્ચામલ વિલોચનો;

૧૧.

જમ્બુદીપગ્ગકમલે કણ્ણિકા’વ મનોરમા,

પુરી કપિળવત્થૂ’સિ વિસાણા’વ સુધાસિનં;

૧૨.

સિઙ્ગીનિક્ખમયાભાસ તુઙ્ગસિઙ્ગસમઙ્ગિતા,

મણિસીહપઞ્જરાકિણ્ણ પાસાદા યત્થ ભાસરે;

૧૩.

સઘને ગગને નિચ્ચં સતેરતસતાનિ’વ,

અનિલેરિતપજ્જોત સોણ્ણકેતુ અહૂ યહિં;

૧૪.

જનાનં નીલનેત્તેહિ વદનેહિ તુ યા પુરી,

મધુપાલિસમોનદ્ધ કઞ્જિની સિરિમાવહે;

૧૫.

રઙ્ગતુઙ્ગતુરઙ્ગેહિ ગજ્જિતેહિ ચ યા પુરી,

સઘોસુત્તુઙ્ગકલ્લોલ લોલસાગરસન્તિભા;

૧૬.

અવ્હમાના’વ દેવાનં પુરલખ્યા ભુજા ઇવ,

મન્દાનિલેરિતા તુઙ્ગ નાનારાગદ્ધજા યહિં;

૧૭.

નાનાવેસધરા યસ્મિં નાનાભૂસણ ભૂસિતા,

નાનાસમ્પત્તિસંયુત્તા નાનાવિજ્જાસુ પારગા;

૧૮. ¶

નવયોબ્બન ઉદ્દામા રૂપેન ચ મનોહરા,

સચ્ચેસુ નિરતા નિચ્ચં અનક્કુટ્ઠકુલા સિયું;

૧૯.

નિચ્ચં કીળા વિદદ્ધાહિ નરનારીહિ સેવિતા,

યા પુરી સાધુરૂપા’સિ મધુરાલાપિનીહિ ચ;

૨૦.

તસ્મિં સદ્ધાદયોપેત ઓક્કાકકુલકેતુકો,

સુદ્ધોદનવ્હયો આસી વિસ્સુતો ભુવનત્તયે;

૨૧.

યસ્સઙ્ઘિકમલે સબ્બ ભુભુજાનં મહીતલે,

કિરીટમણિહિઙ્ગાલિ કીળન્તી’વ નિરન્તરં;

૨૨.

યસ્સ પત્થટતેજેન પુરનેતાપિ દિવાકરો,

વહનીચ’મ્બરે લીલં ઓસધીપતિનો દિવા;

૨૩.

યસ્સ દાનપ્પવાહો તુ નાનાયાચક જન્તુનં,

મનોદધીસુ વેલન્તેતિક્કમન્તોવ સત્તતં;

૨૪.

મતિયા સુરમન્તીવ ધનેન ધનદો વિય,

રૂપેન કુસુમેસુ’વ યો જુમ્હતિ મહીતલે;

૨૫.

તસ્સાભિસિત્તા રજ્જેન મહામાયાતિ વિસ્સુતા,

ચન્દિકા વિય ચન્દસ્સ ગિરિરાજા’વ કપાલિતો;

૨૬.

લક્ખી’વ વાસુદેવસ્સ સીતા’વ રામરાજિનો,

મહેસીસિ વરારોહા સુન્દરી સુન્દરાધરા;

૨૭.

તસ્સા કુચ્છિકરણ્ડમ્હિ અનગ્ઘરતનં વિય,

ખત્તિંસાહિ નિમિત્તેહિ વિમ્હાપેન્તો સદેવકં;

૨૮.

સિતમ્બુજકરો સન્તો સિતેભચ્છાપકો વિય,

કત્વા પદક્ખિણં માતુ પટિસન્ધિમગણ્હિ સો;

૨૯.

દસેકાદસમાસેન તસ્સેવં આસિ ચેતના,

પસ્સિતું સકઞાતીનં ગન્ત્વાન નગરં તદા;

૩૦. ¶

નિવેદેત્વા તમત્થં સા રઞ્ઞો તેન સુસજ્જિતે,

સપરિચ્છદા તદા મગ્ગે ગચ્છન્તિ અન્તરાપથે;

૩૧.

દેવતાનં મનોનન્દકર નન્દન સન્નિભં,

દિસ્વાન લુમ્બિનિં નામ ઉય્યાનં મનનન્દનં;

૩૨.

તસ્મિં કીળિતુમુસ્સાહા પવિસિત્વાન તં વનં,

કીળન્તિ ઉપગન્ત્વાન મઙ્ગલં સાલપાદપં;

૩૩.

વિલોલ પલ્લવાકિણ્ણં સુફુલ્લકુસુમોનતં,

ગહેત્વા સાલસાખં સા સુરત્તકર પલ્લવા;

૩૪.

દેવેહિ ગહિતા’રક્ખા મહમાને સદેવકે,

જનેસિ તનયં માયા તત્રટ્ઠા લોકલોચનં;

૩૫.

બ્રહ્માનો લોકપાલા ચ મનુસ્સા કમતો તદા,

સોણ્ણજાલાજિનાદીહિ ગણ્હિંસુ જનનન્દનં;

૩૬.

મહિં પતિટ્ઠિતો ધીરો પસ્સિત્વાન તતો દિસા,

ઉત્તરાભિમુખો સત્તપદં ગણ્ત્વા’મ્બુજે ઠિતો;

૩૭.

દિસન્તમવલોકેત્વા સુફુલ્લમ્બુજલોચનો,

નિચ્છારેસાસભિં વાચં અગ્ગો સેટ્ઠો’તિઆદિના;

૩૮.

બ્રહ્મામરનરાદીહિ પૂજિતો ચ નમસ્સિતો,

કમેન અભિવડ્ઢન્તો જુણ્હપક્ખે સસી યથા;

૩૯.

બ્રહ્મૂનં છત્તછાયાય મન્દારકુસુમન્તરે,

સાનન્દામન્દદેવેહિ ધુતચામરમજ્ઝગો;

૪૦.

દિબ્બેહિ રૂપસદ્દેહિ ગન્ધેહિ ચ રસેહિ ચ,

ફોટ્ઠબ્બેહિ ચ દિબ્બેહિ મોદમાનો અનેકધા;

૪૧.

દિબ્બેહિ રમણીયેહિ નચ્ચેહિ વાદિતેહિ ચ,

પદાનેકસહસ્સેહિ થૂયમાનગુણાકરો;

૪૨. ¶

પત્વા સોળસમં વસ્સં ઞાતિસઙ્ઘસ્સ મજ્ઝગો,

દસ્સેત્વા’સેસસિપ્પં તં લોકે વિજ્જતિ યં તદા;

૪૩.

ઞાતિસઙ્ઘં પમોદેન્તો દેવે ચ મનુજે’પિ ચ,

લદ્ધા યસોધરં દેવિં’નુકૂલં જાતિજાતિયં;

૪૪.

સોણ્ણદપ્પણસઙ્કાસ સોમ્માનન વિભુસિતં,

નીલનીરજસઙ્કાસ વિસાલાયત લોચનં;

૪૫.

સિઙ્ગારમન્દિરદ્વારે ધજોપમભમુદ્વયં,

હેમકાહલસઙ્કાસ નાસિકં રૂપલક્ખિયા

૪૬.

નીલવેલ્લિતધમ્મિલ્લ જિમુતોભય કોટિયં,

નિચ્ચવિજ્જુલ્લતાચક્ક મનુઞ્ઞકણ્ણપાસકં;

૪૭.

સાતકુમ્ભનિભાભાસ પયોધરઘટદ્વં,

સુવણ્ણદ્દિતટાયાત નિજ્ઝરાકારહારકં

૪૮.

દેહદેવદ્દુમાલમ્બ પારોહાભભુજદ્વયં,

અઙ્ગુલીપલ્લવન્તમ્બુ બિન્દુચારુ નખાવલિં;

૪૯.

દેહમાલાલિમાલાભ રોમરાજિવિરાજિતં,

રૂપણ્ણવતરઙ્ગાહ વલિત્તય વિચિત્તકં;

૫૦.

સોણ્ણરમ્ભાસમાવટ્ટ પિણોરુદ્વય સુન્દરં,

સન્નિરકલિકાકાર ચારુજઙ્ઘા વિભૂસિતં;

૫૧.

પચ્ચક્ખરૂપલક્ખિઞ્ચ લીલાનિચય સન્નિભં,

ગુણાનમાકરં સાધુ વેલંવ રતિસાગરે;

૫૨.

કન્તો વસન્તરાજા’વ કન્દપ્પો’વ સુરૂપવા,

સસી’વ દસ્સનીયો ચ સૂરિયો વિય તેજવા;

૫૩.

અચલત્તેન મેરૂવ ગમ્ભીરેનણ્ણવો વિય,

બ્રહ્મસ્સરો પિયંવાદી પઞ્ગ્ઞાય ચ અનૂપમો;

૫૪. ¶

વસન્તો સો મહાવીરો પુરસ્મિં કપિલવ્હયે,

દિસ્વા નિમિત્તે ચતુરો ઉય્યાન ગમનઞ્જસે;

૫૫.

પબ્બજ્જાભિરતો નાથો ગન્ત્વા ઉય્યાનભૂમિયં,

સુફુલ્લચમ્પકાસોક નાગાદા’ગેહિ મણ્ડિતં;

૫૬.

ફુલ્લપઙ્કજ કળ્હાર જલાજલય સતાકુલં,

મન્દમન્દાનિલાયાત નાનામોદેહિ વાસિતં;

૫૭.

સરા સરં સમાયાત મધુબ્બત નિસેવિતં,

ફલપુપ્ફરસુદ્દામ દ્વિજ સઙ્ઘ નિકૂજિતં;

૫૮.

નચ્ચન્ત મત્તમોરાનં નિચ્ચં મણ્ડપસન્તિભં,

દિબ્બન્ત મિગસગ્ઘાનં કીળામણ્ડપ સન્નિભં;

૫૯.

સમીર સિસિરોદાર ધારાસીકર વારિહિ,

ધારામણ્ડપ પન્તીહિ જનાનન્દકરં વરં;

૬૦.

ઉય્યાનવનમાગમ્મ દેવરાજાવ નન્દનં,

કીળન્તો નિજપુત્તસ્સ સુત્વાન જાતસાસનં;

૬૧.

નિવત્તો વિસ્સકમ્મેન સહસ્સક્ખોવ ભૂસિતો,

પુરં પવિસમાનોવ કિસા ગોતમિ ભાસિતં;

૬૨.

સુત્વાન નિબ્બુતપદં તદા ચિત્તાનુકૂલકં,

સન્તુટ્ઠો સાનુરાગો ચ લક્ખગ્ઘં તારભાસુરં;

૬૩.

હારં તિસ્સાય પેસેત્વા ગન્ત્વાન સકમન્દિરં,

દેવરાજવિલાસેન નિસીદિ પવરાસને;

૬૪.

અથાગમ્મ તદા નેકનાટિકા પરિવારયું,

વજ્જન્તિ ભેરિયો તાસુ પગ્ગય્હ કાચિ નારિયો;

૬૫.

નાનાલયસમાકિણ્ણં ગીતં ગાયન્તિ કાચિ’પિ,

ધમન્તિ સુસિરં કાચિ કાચિ વાદેન્તિ તન્તિયો;

૬૬. ¶

ચારુ બિમ્બાધરારમ્મ પયોધરભરા સુભા,

વિસાલાયત નીલક્ખા સોમસોમ્માનના તદા;

૬૭.

નચ્ચન્તિ પુરતો તસ્સ ભેરિમણ્ડલ મજ્ઝગા,

દેવકઞ્ઞાવ રઙ્ગમ્હી રસભાવનિરન્તરં;

૬૮.

દિસ્વાન સો તમચ્છરિયં વિરત્તો વિસયે તદા,

ઉરત્તાળઞ્ચ અદ્દક્ખિ સબ્બન્તં ભેરિતાળનં;

૬૯.

પરિદેવં’ચુપટ્ઠાસિ ગીતં સંસારસાગરે,

વાયુવેગ વિકારં’વ નચ્ચં ચિન્તેસિ નાયકો;

૭૦.

’કદાહં ઘરમોસ્સજ્જ પબ્બજ્જાસિરિ મુબ્બહે?’

ઇચ્ચેવં ચિન્તયન્તો સો સુપન્તોવ સયી તહિં;

૭૧.

’યં નિસ્સાય મયં એત્થ નચ્ચગીતેસુ વ્યાવટા,

સો’યં’દાનિ સુપી’ અમ્હે કસ્સદાનિ કરોમ તં?;

૭૨.

ઇતિ ચિન્તિય તે તત્થ તુરિયેસુ સકે સકે,

આલમ્બા સયિતા કઞ્ઞા સુસઞ્ઞાઞ્ઞમનિસ્સિતા;

૭૩.

ખાદન્તિ કાચિ દન્તાનિ કાચિ લાલા વહન્તિયો,

કાચિ રુદન્તિયો તત્થ વિલપન્તિ અથા’પરા;

૭૪.

કાકચ્છન્તિ’પિ સેમ્હમ્પિ ગિલન્તિ ચ ચમન્તિ ચ,

કરોન્તિ નાદં નાસાય ઘરૂ’તિ ચ ખિપન્તિ ચ;

૭૫.

મુત્તયન્તિ તદા કાચિ રહસ્સં વિચરન્તિ ચ,

દુગ્ગન્ધં વાતિ તં ઠાનં સુસાનં આમકં યથા;

૭૬.

પબુદ્ધો અડ્ઢરત્તમ્હિ ગતે તત્થ નિસીદિય,

અદ્દક્ખિ તાસં નેકાનિ વિકારાનિ તહિં તદા;

૭૭.

તસ્સેવં પેક્ખમાનસ્સ ભવે સંવિગ્ગચેતસો,

આદિત્તંવ ઉપટ્ઠાસિ મને ખલુ ભવત્તયં;

૭૮. ¶

દાવાનલ સમાદિત્ત મહારઞ્ઞાયથા ગજો,

તથેવાસિ નરિન્દસ્સ ગેહતો ગમને મતી;

૭૯.

તતો વુટ્ઠાય સયના કરોન્તો અભિનિક્ખમં,

વિતક્કેસિ મહારાજા પસ્સિતું સકમત્રજં;

૮૦.

પવિસિત્વા તતો ગબ્ભં સનિકં સન્તમાનસો,

પસ્સિત્વા સહ પુત્તેન નિદ્દાયન્તિં યસોધરં;

૮૧.

ચિરાગતં મહાપેમં ધારયં સકમાનસે,

બુદ્ધો હુત્વાપિ’મં સક્કા પસ્સિતું ઇતિ ચિન્તિય;

૮૨.

ગતો નાથો તતો ઠાના બોધિયા બદ્ધમાનસો

તદહેવાસિ બુદ્ધોતિ કામુકો કો ન ચિન્તયે;

૮૩.

સિનેરુ મુદ્ધરન્તોવ પાદુદ્ધરિય નિક્ખમં,

છન્નમાહૂય આનીતં કન્થકં તુરગાધિપં;

૮૪.

અસ્સરાજં તમારુય્હ સહ છન્નેન રત્તિયં,

દેવેહિ વિવટદ્વરા પટિપજ્જિ મહાપથં;

૮૫.

ચક્કવાળેસુ નેકેસુ દેવતા સુસમાગતા,

દીપધૂપદ્ધજેહે ચ ગન્ધમાલેહિ પૂજયું;

૮૬.

પુરતો સટ્ઠીસહસ્સાનિ દણ્ડદીપાનિ ધારયું,

તથા દક્ખિણપસ્સમ્હિ વામપસ્સે ચ પચ્છતો;

૮૭.

ગગના પુપ્ફવસ્સાનિ વસ્સાપેસું છ દેવતા,

મન્દારવં કોકનદં સુગન્ધં ચિત્તપાટ લિં;

૮૮.

ચમ્પકા સોક પુન્નાગ નાગપૂગાગ સમ્ભવં,

માલતીવસ્સિકીયાદી નાનાવલ્લીહિ સમ્ભવં;

૮૯.

પદુમુપ્પલ કલહાર કુમુદાદ્યામ્બુ સમ્ભવં,

સુગન્ધમધુ મત્તાહિ છપ્પદાલીહિ કૂજિતં;

૯૦. ¶

પુપ્ફવસ્સં પવસ્સિત્થ તિંસયોજનમઞ્જસે,

પસત્તો તત્થ તુરગો દુક્ખતો અગમી તદા;

૯૧.

એવં પૂજાવિધાનેહિ ગન્ત્વા’નોમં મહાનદિં,

સિતસેકત સઙ્કિણ્ણં બહુમીનકુલાકુલં;

૯૨.

તીરટ્ઠો પસ્સિ સો ધીરો ગઙ્ગાનારિં રસાવહં,

કરોન્તિં વીચિબાભાતિ એણેપુપ્ફોપહારકં;

૯૩.

અસ્સેન તં મહાનોમં લઙ્ઘાપેત્વા મહામતી,

પરતીરે પતિટ્ઠાસિ વિમલે વાલુકા તલે;

૯૪.

પબ્બજિતું મયેત્થેવ યુત્તં નો મે પપઞ્ચિતું,

ઇતિ ચિન્તિય ઓભાય ધારિતાભરણાનિ સો;

૯૫.

છન્નસ્સ પટિયાદેત્વા કન્થકઞ્ચ હયાધિપં,

નિસિતં ખગ્ગમુગ્ગય્હ સમોલિં છિન્દિ કુન્તલં;

૯૬.

એવમાવજ્જયં નાથો સચે’હં સુગતો ભવે,

તિટ્ઠતુ ગગને ગન્ત્વા ઇતિ ઉક્ખિપિ ચ’મ્બરં;

૯૭.

તતો સક્કો મહગ્ઘેન મણિચઙ્ગોટકેન તં,

પટિગ્ગહેત્વા સિરસં નેત્વા દેવપુરં ચરં;

૯૮.

કારેત્વા મણિથૂપં સો નીધેત્વા તં સિરોરુહં,

અત્થાહં પતિમાનેતિ સહદેવેહિ નેકધા;

૯૯.

મહાબ્રહ્મોપનીતટ્ઠપરિક્ખારં મહામતી,

પટિગ્ગહેત્વા કાસાવં નિવત્થો પારુતો તદા;

૧૦૦.

પુબ્બે વિયમ્બરં ગય્હ અમ્બરે ખિપિ નાયકો,

પટિગ્ગહેત્વા તં બ્રહ્મા નેત્વા બ્રહ્મપુરં ચરં;

૧૦૧.

દ્વાદસયોજનુબ્બેધં કત્વા થૂપવરં સુભં,

તત્થ તં નિદહિત્વાન પણિપાતેતિ સબ્બદા;

૧૦૨. ¶

સમ્પુણ્ણ મનસઙ્કપ્પો પબ્બજ્જાસિરિ મુબ્બહં,

છાદેન્તો કામલેનેવ મરું ચઙક્કમિ નાયકો;

૧૦૩.

તતો અમ્બવનં ગન્ત્વા વિન્દન્તો પીતિજં સુખં,

વીતિનામયિ સત્તાહં રમ્મે પાદપમણ્ડપે;

૧૦૪.

તતો રાજગહં ગન્ત્વા પારુપિત્વા ચીવરં,

ગહેત્વા મણિવણ્ણં સો પત્તં કરતલમ્બુજા;

૧૦૫.

બત્તિંસ લક્ખણૂપેતો અનુબ્યઞ્જન મણ્ડિતો,

બ્રહ્મુજ્જુગત્તો ભગવા પુરસેટ્ઠમુપાગમિ;

૧૦૬.

વિસિખન્તરેન ગચ્છન્તં લોકેકનયનં જના,

દિસ્વા એવં વિચિન્તેસું નાયં યો સો જનાધિપો;

૧૦૭.

કામં પુરવધુસોમ્મ વત્તસમ્બન્ધકારણા,

ચન્દો’યમાગતો અજ્જ સકવેસેન નો મતિ;

૧૦૮.

સુત્વાન તં તદા કેચિ હસન્તા વચનન્તરં,

નાયં સસી સસઙેકા સો ભાનુમેસો’તિ નો મતિ;

૧૦૯.

બોધેતુમાગતો કામં પોરીનં વદનમ્બુજે,

સકીયેનેવ રૂપેન વિમ્હયં પોરિમાનુસે;

૧૧૦.

કિં ભો ઉમ્મત્તકા અત્થ એવં મા વદથા’ધુના,

સતરંસી ઉણ્હરંસી ન સો એસો અવિગ્ગહો;

૧૧૧.

કામેનાલસજન્તુહિ કીળિતું પુરમાગતો,

સરૂપેન ન નો અત્થિ સંસયો બલુ માનસે;

૧૧૨.

તેસં તં વચનં સુત્વા હસન્તા કેચિ જન્તુનો,

તુમ્હે ખલૂ ન જાનાથ સબાણે સધનૂ હિ સો;

૧૧૩.

ઇસ્સરો કન્તરૂપેન તુઙ્ગમન્દિરતા પુરં,

કેલાસો ઇતિ સમ્પત્તો જહાથ વિમતિં ઇધ;

૧૧૪. ¶

તેસમ્પિ વચનં સુત્વા હસન્તેકે જના તદા,

નાયં હરો તિનેત્તો સો કેસવેસો ઇધાગતો;

૧૧૫.

વિચિણન્તો સિરિં અજ્જ પુરસેટ્ઠમુપાગતં,

વેસેનઞ્ઞેન મઞ્ઞામ એત્થ નો નત્થિ સંસયો;

૧૧૬.

પહરિત્વા કરં કેચિ સુત્વા તં વચનં નરા,

હસન્તેવં તદાવોચું વાસુદેવો ન વે અયં;

૧૧૭.

કામં સરોજનાભો સો વામનો કણ્હવિગ્ગહો,

અયમઞ્ઞતરચણ્ણેન આગતો પાકસાસનો;

૧૧૮.

પુરં દેવપુરન્તેતં મઞ્ઞમાનો મહાજુતિં,

પસ્સિતુન્તિ પટિઞ્ઞાતો મા ભોન્તો વિલપન્તુ વે;

૧૧૯.

સુત્વા તેસં ગિરં કેચિ કેળિં કત્વાન નેકધા,

તુમ્હે સક્કં ન જાનાથ સો હિ ભો વજિરાયુધો;

૧૨૦.

એસો હિ ભો મહાબ્રહ્મા બ્રહ્મલોકા ઇધાગતો,

પમત્તા કિન્નુ વેદમ્હી બ્રહ્મબન્ધુ પુરે ઇધ;

૧૨૧.

અથેસં વચનં સુત્વા કેચિ પણ્ડિતજાતિકા,

નેતે ચન્દાદયો કામં મા મોહં ભો પકાસથ;

૧૨૨.

ચતુરાનનો મહાબ્રહ્મા સોમસોમ્માનનો અયં,

સમન્તપોત્થકો બ્રહ્મા પત્તહત્થો’યમબ્ભુતો;

૧૨૩.

કામં પારમિતાપુણ્ણ પસત્થો પુરિસો અયં,

નિચ્ચં વન્દથ પૂજેથ થોમેથેતં મહાજુતિં;

૧૨૪.

એવં વદન્તા સબ્બે તે નાગરા પુરિસુત્તમં,

ગન્ધપુપ્ફેહિ પુજેન્તા નમસ્સન્તા તમન્વગું;

૧૨૫.

નેત્તારિત્તેહિ પાજેન્તા મુનિનો રૂપસાગરે,

જન્તવો મનનાવાયો પારં પસ્સિંસુ નો તદા;

૧૨૬. ¶

તદા લોકેકનયનો સપદાનેન વીથિયં,

ચરં યાપનમત્તંવ લદ્ધાગમ્મ પુરા બહિ;

૧૨૭.

પણ્ડવં ગિરિમાસજ્જ તસ્સચ્છાયાય સો મુનિ;

સઙ્ઘાટિં પઞ્ઞપેત્વાન નિસજ્જ પુરિસાસભો;

૧૨૮.

અદિટ્ઠપુબ્બં દિસ્વાન પત્તે મિસ્સકભોજનં,

સઞ્જાતપટિકૂલો તં નુદિત્વા પચ્ચવેક્ખણા;

૧૨૯.

અમતં વિય તં ભુત્વા વિક્ખાલેત્વા મુખં દકા,

પત્તે વત્તં ચરિત્વાન મુહુત્તં તત્થ વિસ્સમિ;

૧૩૦.

પવત્તિં તં નિસામેત્વા બિમ્બિસારો નરિસ્સરો,

સીઘં તમુપગન્ત્વાન કતાનુઞ્ઞો નિસીદિય;

૧૩૧.

નિમન્તયિત્વા રજ્જેન અનિચ્છન્તે યતિસ્સરે,

અનુગ્ગહાય મે યુત્તં બુદ્ધભૂતેનિધાગમં;

૧૩૨.

એવં નિમન્તિતો તેનાધિવાસેત્વા મહામતી,

અગમાસુરુવેલાય મતુલોરુ પરક્કમો;

૧૩૩.

પધાનં પદહિત્વાન છબ્બસ્સમતિદુક્કરં,

પકાસેત્વાન લોકસ્સ મોક્ખં નત્થિતિ તેન સો;

૧૩૪.

તતોપ્પભુતિ વત્તન્તો મજ્ઝિમપ્પટિ પત્તિયં,

કાયસ્સાનુગ્ગહં કત્વા તતો સમ્પિણિતિ’ન્દ્રિયો;

૧૩૫.

મૂલે’જપાલનિગ્રોધપાદપસ્સ મહામુનિ,

નિસીદિ નિજસોભાહિ ઓભાસેન્તો દિસોદિસં;

૧૩૬.

તદા સેનાનિ નિગમે સુજાતા ખીર દાયિકા,

સમ્પુણ્ણમનસઙ્કપ્પા યાચિત્વા વટદેવતં;

૧૩૭.

ધીરં દેવોતિ મઞ્ઞન્તિ તુટ્ઠહટ્ઠા પમોદિતા,

હેમપાતિં સપાયાસં દત્વાન ઇદમ’બ્રુવિ;

૧૩૮. ¶

યથા મય્હં મહાદેવ ઇદ્ધા પત્થિત પત્થના,

તથેવ તવ સઙ્કપ્પો ખિપ્પમેવ સમિજ્ઝતુ;

૧૩૯.

ઇતિ વત્વાન વન્દિત્વા કત્વા ચ નં પદક્ખિણં,

પક્કન્તાય સુજાતાય ધીરો પાતિં સમાદિય;

૧૪૦.

ઉપગન્ત્વાનાતિરમ્મં નદિં સો નીલવાહિનિં,

સુપ્પતિટ્ઠિતનામમ્હિ નદીતિત્થે નિસીદિય;

૧૪૧.

ભુઞ્જિત્વા ઊનપણ્ણાસ પિણ્ડં કત્વાન ભોજનં,

વિસ્સજ્જેત્વા તતો પાતિં પટિસોતં નરાસભો;

૧૪૨.

તતો સાલવનુય્યાને વિસ્સમન્તો દિવાદિને,

દિસ્વાન સુપિને પઞ્ચ અત્થં તેસં વિચિન્તિય;

૧૪૩.

આબોધિમૂલતો મગ્ગે દેવેહિ સમલઙ્કતે,

મણિતોરણપાલીહિ પુણ્ણકુમ્ભદ્ધાજાદિહિ;

૧૪૪.

સાયણ્હસમયે નાથો ગચ્છન્તો બોધિ સન્તિકં,

દિસ્વાન સોત્થિયં નામ થૂયમાનં દિજુત્તમં;

૧૪૫.

તેન દિન્નટ્ઠ મુટ્ઠિન્તુ ગહેત્વા નીલસદ્દલં,

બોધિમૂલમુપાગમ્મ કત્વાન તં પદક્ખિણં;

૧૪૬.

અકાસિ તીણસન્થારં પાચીનાભિમુખં તદા,

તતો મહિં દ્વિધા કત્વા સમુટ્ઠાસિ મહાસનં;

૧૪૭.

ઉચ્ચં ચુદ્દસહત્થેન નાના ચિત્ત વિચિત્તિતં,

અભટ્ઠનહિત્થ તત્રટ્ઠો ઇચ્ચેવં દળ્હમાનસો;

૧૪૮.

કામં તચો નહારૂ ચ અટ્ઠિ ચ અવસિસ્સતુ,

ઉપસુસ્સતુ મે ગત્તે સબ્બન્તં મંસલોહિતં;

૧૪૯.

ન ઉટ્ઠહામબુજ્ઝિત્વા ન જહે વીરિયં મમ,

અધિટ્ઠહિત્વા એવં સો નિસીદિ વજિરાસને;

૧૫૦. ¶

અનતિક્કમં ઠપેત્વાન ચરણં ચરણુપરિ,

કમલં કમલેનેવ મણિબન્ધં વિધાય સો;

૧૫૧.

બાલાસોકદલાસત્ત પરં વા’સોકપલ્લવં,

નિધાય નયનાનત્દ પાણિં પાણિતલે જિનો;

૧૫૨.

યથા સઞ્ઝાઘનાલીઢ તુઙ્ગકઞ્ચન પબ્બતો,

સુરત્તચીવરચ્છન્ન ચારિગત્ત વિરાજિતો;

૧૫૩.

ઉદયાવલકોટિમ્હિ દિપ્પન્તોવ દિવાકરો

કન્ધરોપરિ દિપ્પન્ત મુખમણ્ડલમણ્ડિતો;

૧૫૪.

યથા ચામિકરબ્યમ્હે સુનીલં સીહપઞ્જરં,

અસમ્પકમ્પપમ્હેહિ પિહિતદ્ધસુલોચનો;

૧૫૫.

નીલુપ્પલકલાપંચ જનનેત્તાલિપાતનં,

સજ્ઝુદણ્ડસમાબદ્ધ બોધિક્ખન્ધમફસ્સિ સો;

૧૫૬.

નિસિન્નો બોધિતો છેજ્જ પવાળતરુણઙ્કુરા,

પતમાના સમન્તાસું તેજં વિય કુબુદ્ધીનં;

૧૫૭.

દેવા તત્થ સમાગઞ્જું ખિપ્પં દસસહસ્સિયં,

કમલાસનોરગા ચેવ સિદ્ધવિજ્જાધરાદયો

૧૫૮.

સહમ્પતિ મહાબ્રહ્મા બ્રહ્મસેનાપુરક્ખતો,

સિતાતપત્તં ધારેન્તો ઠીતો સમ્બુદ્ધ સન્તિકે;

૧૫૯.

વીસં રતન સતાયામં વિજયુત્તર નામકં,

સઙ્ખં ધમેન્તો અટ્ઠાસિ સાદરો પાકસાસનો;

૧૬૦.

સુયામો સહ સેનાય થોમયન્તો નરાધિપં,

મણિતાલવણ્ટં પગ્ગય્હ મન્દમન્દેન વીજતિ;

૧૬૧.

જિતકિત્તિ લતગ્ગમ્હિ સસ્સ પુપ્ફંચ પુપ્ફીતં,

વાળવિજનિમુગ્ગય્હ અટ્ઠા સન્તુસિતો તહિં;

૧૬૨. ¶

બેલુવં વીણમાદાય ગીતં નાનાલયાનુગં,

પઞ્ચસિખો ઠિતો તત્થ ગાયમાનો અનેકધા;

૧૬૩.

મહાકાલો’પિ નાગિન્દો નાગસઙ્ઘપુરક્ખતો,

થોમેન્તો તત્થ અટ્ઠાસિ નવારહગુણાદિહિ;

૧૬૪.

રઙ્ગભુમિં માપયિત્વા ગહેત્વાન વરઙ્ગના,

ઉપહારં કરોન્તટ્ઠા તિમ્બરૂ સૂરિયવચ્ચસા;

૧૬૫.

આગન્ત્વા સહ સેનાય સિતઙ્ગો સિતભુસનો,

ધતરટ્ઠો ઠિતો પુબ્બે આરક્ખં કુરુમાનકો;

૧૬૬.

પૂરેન્તો સકસેનાય દક્ખિણસ્સં વિરૂળ્હકો,

આરક્ખં કુરુમાનટ્ઠા નીલઙ્ગો નીલભુસનો;

૧૬૭.

વિરૂપક્ખો’પિ અટ્ઠાસિ પાલયં પચ્છિમં દિસં,

રત્તઙ્ગાભરણો વમ્મી નિજસેનાપુરક્ખતો;

૧૬૮.

ઉત્તરસ્સં સસેનાય આરક્ખં કુરુમાનકો,

સોણ્ણવણ્ણઙ્ગાભરણો અટ્ઠાસિ નરવાહનો;

૧૬૯.

કિમેત્થ બહુલાપેન જાતિક્ખેત્તમ્હિ દેવતા,

નાગતા નેવ વાહેસું સબ્બે એત્થે’વ ઓસટા;

૧૭૦.

ગગનાતોતિણ્ણકેતુ પાદેહિ પથવીતલે,

નાગાદયો ન ધુતાસું કેતુનં બહુ કા કથા;

૧૭૧.

ન ધૂતા ધજપાદેહિ વાયુતુદ્દામવુત્તિહિ,

તારકા ગગને બ્રૂમો કિન્નુ તત્થ ધજાલુતા;

૧૭૨.

પુબ્બદિસા ચક્કવાળ સિલાયુગ્ગતકેતુનં,

પાદાનિ પરભાગાદિ ચક્કવાળસિલન્વગું;

૧૭૩.

ચક્કવાળ મહામેરુ યુગન્ધર નગાદયો,

પુપ્ફાવતંસકા’વાસું નાનાવણ્ણેહિ સઙ્ખતા;

૧૭૪. ¶

વામામન્દમકરન્દ બિન્દુસન્દોહ સુન્દરં,

ઉલ્લોલ પદુમાકિણ્ણ વિતાનં વાસિ અમ્બરં;

૧૭૫.

ખિત્તસોગન્ધચુણ્ણાનિ દેવબ્રહ્માદિના તહિં,

વિતાનં વિય ખાયન્તિ ચક્કવાળગ્ગમણ્ડપે;

૧૭૬.

કપ્પૂરાગરુધૂપેહી તત્થ તત્થુગ્ગતેહિ મા,

કાલબ્ભકૂટચ્છન્નોવ આસિ મઞ્ઞં કથેમુ કિં;

૧૭૭.

જાતિક્ખેત્તેસુ દેવેહિ કતગ્ઘિકુસુમાદિના,

નોસીના ધરણી ભારા દિસેભાનં બલં અહો;

૧૭૮.

અમ્બરાલમ્બમાનાની પુપ્ફદામાનિ ભૂતલં,

આકડ્ઢનાય દેવેહિ બદ્ધરજ્જુવ ભાસરે

૧૭૯.

અઞ્ઞોઞ્ઞકરમુગ્ગય્હ ગગને સુરસુત્દરી,

પરિબ્ભમન્તા ગાયન્તિ તત્થ તત્થ મનોરમં;

૧૮૦.

ઉભો ભુજે વિકાસેત્વા મણ્ડિતં સુરસુત્દરી,

ભમન્તિ ભન્તભેણ્ડુવ તત્થ તત્થમ્બરે યુગા;

૧૮૧.

નીલુપ્પલકલાપાદી ગહેત્વાન સુરઙ્ગના,

ઠીતાસું પરિવારેત્વા પૂજમાના નરિસ્સરં;

૧૮૨.

રત્નપલ્લવકલહાર કમલુપ્પલ સઙ્ગતે,

સન્નીરકુસુમાકિણ્ણે પુણ્ણેસોગન્ધવારિહી;

૧૮૩.

કઞ્ચનાદિઘટે ગય્હ અમ્બરે સુરસુન્દરી,

કત્વાન સુગતં મજ્ઝે પૂજયિંસુ સમન્તતો

૧૮૪.

કઞ્ચનાદાસહત્થા ચ કાચી કઞ્ઞા તથા ઠિતા,

તાલવણ્ટે ગહેત્વાન ઠીતાસું કાચિ દેવતા;

૧૮૫.

કાચિ મઙ્ગલ સંયુત્ત વચના તવ પત્થના,

સમિજ્ઝતુતિ ઘોસેન્તી પરિવારેત્વા ઠિતા જિનં;

૧૮૬. ¶

સિરિવચ્છાદિ પગ્ગય્હ અટ્ઠમઙ્ગલમુત્તમં,

ઠિતાસું ગગને નારી પરિવારેત્વા મુનિસ્સરં;

૧૮૭.

નચ્ચન્તિ કેચિ કીળન્તિ સેલેન્તિ ચ લલન્તિ ચ,

વાદેન્તિ કેચિ ગાયન્તિ વેલુક્ખેપં કરોન્તિ ચ;

૧૮૮.

નેકપુપ્ફગ્ઘિપન્તી ચ તથા દીપગ્ઘિપન્તિ ચ,

મણિચામીકરાસજ્ઝુ અગ્ઘિકા પન્તિયો તથા;

૧૮૯.

આબ્રહ્મભવનુગ્ગમ્મ ચક્કવાળસમન્તતો,

તિટ્ઠન્તિ જલમાનાયો બુદ્ધસ્સ મઙ્ગલુસ્સવે;

૧૯૦.

સત્તરતનસમ્ભુતા નાના તોરણપન્તીયો,

હેમરમ્ભામયા ચાપિ તથા દુસ્સમયા સિયું;

૧૯૧.

નાનાવણ્ણેહિ નેકેહિ છત્તેહિ ચ નિરન્તરં,

ચક્કવાળોદરં આસિ સરંચ કમલાકુલં;

૧૯૨.

તત્થ તત્થુજ્જલાનેક યન્તદીપાવલી મહી,

તારકાજાલકાકિણ્ણ ગગનઙ્ગનસન્તિભા;

૧૯૩.

ધજન્તરિત છત્તા’સું ચક્કવાળગિરૂપરિ,

નિરન્તરા’સું તત્થેવ ઘટદીપા ચ તોરણ;

૧૯૪.

નાનાતુરિયનાદેહિ નાનાસઙ્ગીતિતાહિ ચ,

સાધુવાદેહિ નેકેહિ ચક્કવાળો ફુટો અહૂ;

૧૯૫.

અહો મહન્તતા તસ્સ બુદ્ધસ્સ કતમઙ્ગલે,

પૂજાવિસેસં તં કો હિ મુખેનેકેન ભાસતી;

૧૯૬.

ચતુમ્મુખો સહસ્સક્ખો દ્વિસહસ્સનયનો ફણી,

દસકણ્ઠો’પિ તં સબ્બં નેવ સક્કોન્તિ ભાસિતું;

૧૯૭.

એવં સુરાસુરબ્રહ્મ વેનતેય્યોરગાદિહિ,

નિરન્તરં કતાનેક મહામહ સમાકુલે;

૧૯૮. ¶

તસ્મિન્તુ વાસરે મારો પસ્સિત્વા ભુવનં ઇદં,

આમન્તેત્વા સાનુવરે આહેવં સકુતૂહલો;

૧૯૯.

સબ્બે દિબ્બવિમાના ભો સુઞ્ઞા દિસ્સન્તિ છડ્ડિતા,

પુરપાલમ્પહાપેત્વા ક્વ ગતા’સું સદેવકા;

૨૦૦.

કિમ્ભો માર ન જાનાસિ મત્તો સુત્તો’સિ અજ્જ કિં,

સુદ્ધોદનિય સિદ્ધત્થો માયાય તનયો અયં;

૨૦૧.

પુરેત્વા પારમી સબ્બા કત્વાન અભિનિક્ખમં,

બોધિમુલે નિસિન્નો સિ અજ્જ બુદ્ધો ભવામીતિ;

૨૦૨.

તસ્સ પૂજાવિધાનત્થં દસસહસ્સીસુ દેવતા,

સમાગતા હટ્ઠતુટ્ઠા કરોન્તજ્જ મહામહં;

૨૦૩.

કિન્નુ તે બધિરં સોતં કિન્નુ પરિહાયિ લોચનં,

ધજગ્ગા તે ન દિસ્સન્તિ ઉલ્લોલં તે ન સૂયતિ;

૨૦૪.

તેસં તં વચનં સુત્વા અન્તકો ખલુ પાપિમા,

દુક્ખિતો દુમ્મનો તેસં સોચન્તો ઇદમ્બ્રુવિ;

૨૦૫.

અહો વતા’તિપરિહાનિ સંસારસ્સ મહા અયં,

અસારો ખલુ સંસારો સિદ્ધત્થે વિભવં ગતે;

૨૦૬.

અહો વતા’તિ નટ્ઠમ્હા તિવટ્ટં પરિપુરિતં,

હોતિ ભો દહના દડ્ઢવનંવાતિ અલક્ખિકં;

૨૦૭.

નિરાલોકં તિલોકં ભો અસુરં વાસરં યથા,

પરિમોસરતનં હોતિ રજ્જં વેદં જગત્તયં;

૨૦૮.

મમેસ વિસયં હિત્વા યાતિ સિદ્ધત્થદારકો,

તેન યાતેન મગ્ગેન નિક્ખમન્તિ બહુજ્જના;

૨૦૯.

ભવન્તં ન કરોતેસો યાવ સુદ્ધોદનત્રજો,

એથ ગચ્છામ સિદ્ધત્થમસિદ્ધત્થં કરોમ ભો;

૨૧૦.

માપેથ ભેરવં વણ્ણં બીભચ્છં દુદ્દસં ખરં,

સદ્દેનેવ પલાપેથ તૂલભટ્ટંવ વાયુના;

૨૧૧. ¶

તસ્સ તં વચનં સુત્વા મારસેના સમાગમું,

નાનાવેસધરા હુત્વા નાનાયુધ સમઙ્ગિનો;

૨૧૨.

યોજનાનં તદા મારો દિયડ્ઢસતમુચ્ચતો,

ગિરિમેખલમારુય્હ સેનાય સહસા’ગમી;

૨૧૩.

દિસ્વાન દુરતો એત્તં દેવા મારં સવાહિનિં,

ભયટ્ટાપગમું ખિપ્પં ધાવમાના દિસોદિસં;

૨૧૪.

સંખિપ્પ ખિપ્પં સચ્છત્તં બ્રહ્મા ધાવિ પરમ્મુખો,

કત્વાન પિટ્ઠિયં સઙ્ખં સક્કો ધાવિ વિસઙ્કિતો;

૨૧૫.

મહાકાલો’પિ નાગિન્દો નિમુજ્જ મહિયં તદા,

વત્તદત્તકરો ભીરુ સકે નિપતિ મઞ્ચકે;

૨૧૬.

સં સં પૂજાવિધાનન્તુ છડ્ડેત્વાન સદેવકા,

ગતાસું સુઞ્ઞકં આસિ ચક્કવાળમિદં તદા;

૨૧૭.

નિસ્સિરીકં પદેસં તં અસોભં અસમઞ્જસં,

અહોસિ પતિતાનેક પૂજાભણ્ડસમાકુલં;

૨૧૮.

એકોવ તત્થ સુગતો નિસીદિ વજિરાસને,

પજ્જલં નિજસિરિયા સૂરિયોવ યુગન્ધરે;

૨૧૯.

અકમ્પો ચ અસન્ત્રાસી લોમહંસ વિવજ્જિતો,

અભીતો સીહરાજાવ મિગચ્છાપાનમગ્ગતો;

૨૨૦.

તતો ધમ્મિસ્સરસ્સગ્ગે દુન્નિમિત્તાનિ જાયરું,

અન્ધકારં દિસા આસું ધૂમકેતુ ચ અમ્બરે;

૨૨૧.

દિનં દુદ્દિનકં આસિ હતરંસિ દિવાકરો,

ઉક્કાપતો’પિ પઞ્ઞાયિ દિસાડાહોપપજ્જથ;

૨૨૨.

અઘને ગગને આસું ઇન્દચાપવિરજ્જુતી,

અનલાસનિયો’દિત્તા તત્થ તત્થ પતન્તી ચ

૨૨૩.

કાકોલસઙ્ઘા વસ્સિંસુ ઉણ્ણ સકુણકોસિયા,

ચરિંસુ અમ્બરે’પેતા કબન્ધા ચ ભયાવહા;

૨૨૪. ¶

સેનં સંવિદહિત્વાન તતો મારો અભિદ્દવિ,

આગન્ત્વા ચક્કવાળમ્હિ ઠિતો જિનમુદિક્ખિય;

૨૨૫.

એકકસ્સ મનુસ્સસ્સ સન્તિકોપગમં મમ,

ન યુત્તઞ્હિ ગજો યાતિ ગજં નો યાતિ કોત્થુકં;

૨૨૬.

નેતં ગરુ પલાપેતું કાલો ઇતિ વિચિન્તિય,

માપેસિ કુપિતો ખિપ્પં કપ્પનિલ સમાનિલં;

૨૨૭.

ખિપન્તો ગગને ખિપ્પં ઉદ્ધરિત્વા વનસ્પતી,

કત્વાન વનમુમ્મૂલં વિદ્ધંસેન્તો અસેસકં;

૨૨૮.

ચાલેત્વા તાલસાલાદિં લુઞ્ચિત્વા ગગને ખિપં,

પાતેન્તો ચક્કવાળન્તે વાજિસીહ ગજાદયો;

૨૨૯.

પહરિત્વા વિવત્તેત્વા ગિરિકૂટાનિ ઉક્ખિપં,

ભમયન્તો નભોમજ્ઝે ધાવતેવ તતો તતો;

૨૩૦.

સિલાહિ સિલાસઙ્ઘટ્ટ મહાનાદં પવત્તયં,

પાતેન્તો દહનઞ્ચાપિ ધૂમમમ્બર મુક્ખિપં;

૨૩૧.

ભમયન્તો ગહેત્વાન અમ્બરે છદનિટ્ઠિકા,

પાસાદે પરિવત્તેત્વા પહરન્તો નગાદિસુ;

૨૩૨.

ખનન્તો પથવિં પંસું ગહેત્વામ્બરમણ્ડલે,

બન્ધન્તોવ પરં ભુમિં ભિન્દન્તો તુઙ્ગપબ્બતે;

૨૩૩.

ભયાનકેન સદ્દેન ઉપગમ્મ મહામુનિં,

ચાલેતું નેવ સો સક્ખિ અંસુમત્તમ્પિ ચીવરે;

૨૩૪.

તદાસિ વિજયો તસ્સ સમ્બુદ્ધસ્સ સિરીમતો,

પઠમે મારયુદ્ધમ્હિ મારસ્સાસિ પરાજયો;

૨૩૫.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

ઇતિ પઠમો વિજયો.

૨૩૬. ¶

દિસ્વા નમુચિ ધીરસ્સ માલુતેનાનુપદ્દવં,

દુક્ખી ચ દુમ્મનો આસિ કોધેનાતુરમાનસો;

૨૩૭.

હોતુ દાનિ મહોઘેન પવાહેમિ ઇમં યતિં,

માપેત્વાન મહામેઘં સોચનાય અલં મમ;

૨૩૮.

ઇતિ ચિન્તિય સો મારો મહામેઘમમાપયિ,

દિસાસુમ્પિહિતા સબ્બા અન્ધકારો અવત્થરિ;

૨૩૯.

ઉપરૂપરિ ગુણા હુત્વા સહસ્સાનિ સતાનિ’પિ,

ધારાધરા મહાધારા વત્તયિંસુ સમન્તતો;

૨૪૦.

સોદામિનીસહસ્સેહિ વિનદ્ધંવ નભં અહૂ,

તત્થ તત્થ દિસાભાગે ઇન્દચાપા અવત્તથ;

૨૪૧.

મહારજતરજ્જૂહિ સિબ્બિતાવ નભાવની,

ધરાધરોરુધારાહિ નિરન્તરપવત્તિહિ;

૨૪૨.

તત્થ તત્થ પતન્તાનિ ઘોરાસનિસતા અહું,

મહાભીમ નભો ભેરિસ્સના આસું તહિં તહિં;

૨૪૩.

ઉદ્ધરન્તો મહાસેલે મહોઘો ચ તદુબ્ભવે,

કેલાસ સિખરાકાર એણેપુઞ્જે સમુબ્બહં;

૨૪૪.

મહાથૂપપ્પમાણાદિ મહાબુબ્બુલમુબ્બહં,

ગમ્ભીરો પુથુલો ચણ્ડો ઉપગમ્મ જિનન્તિકં;

૨૪૫.

સરીરે લોમમત્તમ્પિ તેમેતુમસમત્થકો,

ગતો મહોઘો બુદ્ધસ્સ’ભો’નુભાવમહન્તતા;

૨૪૬.

તદાસિ વિજયો તસ્સ સમ્બુદ્ધસ્સ સિરીમતો,

દુતિયે મારયુદ્ધમ્હિ મારસ્સાસી પરાજયો;

૨૪૭.

એવં મહાનુભાવોતિ મન્ત્વાન નર સારથિં,

નિચ્ચં વન્દથ પૂજેથ સો હિ વો સરણં સદા;

દુતિયો વિજયો.

૨૪૮. ¶

તતો મારો અસક્કોન્તો વસ્સોઘેન ઉપદ્દવં,

કાતું તસ્સ ઉસૂયાદિ કોપાકુલમનો તદા;

૨૪૯.

ભવતજ્જ કિમેતેન મારણે તસ્સ કિં ગરુ,

ઇદાનઙ્ગારવુટ્ઠીહિ ઝાપેમિ સહસા ઇમં;

૨૫૦.

ઇતિ ચિન્તિય સો મારો માપેત્વાઙ્ગાર વુટ્ઠિયો,

પેસેસિ નભસા તસ્સ સમ્બુદ્ધસ્સ ઉપન્તિકં;

૨૫૧.

મહાપબ્બતસઙ્કાસ જલિતઙ્ગાર રાસયો,

ધાવિંસુ નહસા તત્થ અચ્ચિમન્તો મહબ્ભયા;

૨૫૨.

ચિચ્ચિટાયન સદ્દેહિ પૂરયન્તો દિસન્તરં,

ધૂપાયન્તો ફુલિઙ્ગેહિ મારસ્સાપિ ભયાવહા;

૨૫૩.

ઉજ્જાલેન્તા મહારુક્ખે પબ્બતે’પિ ચ સમ્મુખે,

નરકોદરુગ્ગતા અગ્ગી રાસીવાતિ ભયાવહા;

૨૫૪.

ઉપગન્ત્વા મુહુત્તેન નિસિન્નં મુનિપુઙ્ગવં,

મધુમત્તાલિઝઙ્કાર નાદાકુલદિસામુખા;

૨૫૫.

પાતેન્તિ સતતામન્દ મકરન્દજ બિન્દવો,

માલાવતંસકા હુત્વા પાદમુલે પતિંસુ તા;

૨૫૬.

તદાસિ વિજયો તસ્સ સમ્બુદ્ધસ્સ સિરીમતો,

તતિયે માર યુદ્ધમ્હિ મારસ્સાસિ પરાજયો;

૨૫૭.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

તતિયો વિજયો.

૨૫૮.

તેનાનુપદ્દુતં બુદ્ધં પસ્સિત્વાન પજાપતિ,

દુક્ખિતો દુમ્મનો હુત્વા એવં ચિન્તેસિ દુમ્મતિ;

૨૫૯.

પાસાણવસ્સં માપેત્વા ચુણ્ણેત્વા પનિમં યતિં,

વિદ્ધંસેમીતિ ચિન્તેત્વા માપેસૂપલવસ્સકં;

૨૬૦. ¶

તસ્મિં વસ્સે’તિ બીભચ્છા ધૂમાયન્તા સજોતિકા,

જલિતઙ્ગારસઙ્કાસા પાસાણુચ્ચાવચા બહૂ;

૨૬૧.

કરાનઞ્ઞોઞ્ઞસઙ્ઘટ્ટા મહન્તં ભેરવં રવં,

દુદ્દિનં ધૂમજાલાહિ કુરુમાના સમન્તતો;

૨૬૨.

સત્થૂપગન્ત્વાભિમુખં સન્તમાલાગુલા વિય,

પતિંસુ સિરિપાદે તે અમન્દામોદવાહિનો;

૨૬૩.

તદાસિ વિજયો તસ્સ સમ્બુદ્ધસ્સ સિરીમતો,

ચતુત્થે મારયુદ્ધમ્હિ મારસ્સાસિ પરાજયો;

૨૬૪.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

ચતુત્થો વિજયો.

૨૬૫.

દિસ્વાનત્તમનો મારો દિત્તો કોધગ્ગિના તદા,

માપેત્વા’યુધવસ્સં સો પેસેસિ તદુપન્તિકં;

૨૬૬.

નેત્તિંસચ્છૂરિકા સત્તિ હેણ્ડિવાલ ગદાદયો,

તિણ્ગધારા પજ્જલિતા અચિરજ્જુતિ સન્નિભા;

૨૬૭.

યથા પુપ્ફોપહારોપગન્ત્વાન ગગનઙ્ગના,

એવં સમ્બુદ્ધપાદેસુ પતિંસુ પરિવત્તિતા;

૨૬૮.

તદાસિ વિજયો તસ્સ સમ્બુદ્ધસ્સ સિરીમતો,

પઞ્ચમે મારયુદ્ધમ્હિ મારસ્સાસિ પરાજયો;

૨૬૯.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

પઞ્ચમો વિજયો.

૨૭૦.

તં દિસ્વા પાપિમા કુદ્ધો યં યં તસ્સ કરોમ’હં,

તં તં’દાની ન સક્કોતિ કિઞ્ચિ કાકુમુ’પક્કમં;

૨૭૧. ¶

માપેસિ કુક્કુલં વસ્સં મારમીત’ધુના મુનિં,

સો’ગા’કાસા સમ્પદિત્તો ધૂમાયન્તોવ પજ્જલં;

૨૭૨.

જિનસ્સાભિમુખં ગન્ત્વા કુક્કુલો પરિવત્તિય,

ચન્દનસ્સ સિતબ્ભસ્સ ધૂલી હુત્વાન પગ્ઘરિ;

૨૭૩.

તદાસિ વિજયો તસ્સ સમ્બુદ્ધસ્સ સિરીમતો,

છટ્ઠે નમુચિ યુદ્ધમ્હિ મારસ્સાસી પરાજયો;

૨૭૪.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

છટ્ઠો વિજયો.

૨૭૫.

તતો દિસ્વાન તં કણ્હો કણ્હસેના પુરક્ખતો,

સઙ્કુદ્ધો પેસયિ તત્થ વસ્સં સો સિકતામયં;

૨૭૬.

ખદીરઙ્ગાર સઙ્કાસા વાલુકા ગગનાગતા,

ભસ્સન્તા જિનપાદન્તે વાસચુણ્ણત્તમાગતા;

૨૭૭.

તદાસિ વિજયો તસ્સ સમ્બુદ્ધસ્સ સિરીમતો,

સત્તમે મારયુદ્ધમ્હિ મારસ્સાસિ પરાજયો;

૨૭૮.

એવં મહાનુભાવોતિ મન્ત્વાન નર સારથિં,

નિચ્ચં વન્દથ પૂજેથ સો હિ વો સરણં સદા;

સત્તમો વિજયો.

૨૭૯.

તમ્પિ દિસ્વા અસજ્જન્તો અહિરી કોપકેતુકો,

માપેત્વા પલિપન્દાનિ તત્થ ઓસીદયામિ તં;

૨૮૦.

ઇતિ ચિન્તિય માપેત્વા પેસેસિ પલિપં ઘનં,

ધૂપાયન્તો પજ્જલન્તો ગન્ત્વા સો નભસા લહું;

૨૮૧.

સમ્બુદ્ધસિરિપાદમ્હિ સમ્પત્તો નિબ્બુતો તતો,

નાનાસુગન્ધસમ્ભુત ગન્ધકદ્દમતં ગતો;

૨૮૨. ¶

તદાસિ વિજયો તસ્સ સમ્બુદ્ધસ્સ સિરીમતો,

અટ્ઠમે મારયુદ્ધમ્હિ મારસ્સાસિ પરાજયો;

૨૮૩.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

૨૮૪.

ઓલોકેન્તો તતો મારો મારારિં સિરિયુજ્જલં,

દિસ્વા ચિત્તમ્પસાદેતુમસક્કોન્તો’તિ કોપવા;

૨૮૫.

અજ્જેતમન્ધકારસ્મિં પક્ખિપિત્વા પમોહિતું,

મય્હં ભારોતિ ચિન્તેત્વા માપેસિ તિમિરં ઘનં;

૨૮૬.

લોકન્તરેસુ સમ્ભુત તિમિસો’વ ભયાવહો,

ગન્ત્વાન ગગના સો હિ પત્વાન મુનિસન્તિકં;

૨૮૭.

યથા તિમિરમાયાતિ વિનાસં સુરિયુગ્ગતે,

એવમાસિ જિનગ્ગમ્હિ અન્ધકારો તથાવિધો;

૨૮૮.

તદાસિ વિજયો તસ્સ સમ્બુદ્ધસ્સ સિરીમતો,

નવમે મારયુદ્ધમ્હિ મારસ્સાસિ પરાજયો;

૨૮૯.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

નવમો વિજયો.

૨૯૦.

એવં નવહિ વુટ્ઠિહિ કત્વા મારો મહા ભવં,

ન તસ્સોપદ્દવં દિસ્વા દિત્તકોપાનલાકુલો;

૨૯૧.

ગહેત્વાન તતો ખિપ્પં ઠપિતં અત્તગુત્તિયા,

ચક્કાયુધં મહાતેજં કુપિતો ખિપિ વેગસા;

૨૯૨.

ધારાધરં તમુગ્ગય્હ કુદ્ધો પહરતે યદી,

કલીરંવ અસજ્જન્તો વિખણ્ડેતિ પજાપતિ;

૨૯૩.

તથેવ સો મહિં કુદ્ધો મારો ખિપતિ વેગવા,

ન ભવન્તોસધા પાણા વિસુસ્સન્તિ સરાદયો;

૨૯૪. ¶

તથેવ કુપિતો તેન ખિપતે સો મહમ્બુધિં,

વિલયં જલજા યન્તિ સુસ્સતે સો મહણ્ણવો;

૨૯૫.

એવં મહાનુભાવો સો ગચ્છન્તો જલમ્બરે,

પત્વાન પતિતો નાથં હુત્વાન પુપ્ફચુમ્બટં;

૨૯૬.

તદાસિ વિજયો તસ્સ સમ્બુદ્ધસ્સ સિરીમતો,

દસમે મારયુદ્ધમ્હિ મારસ્સાસિ પરાજયો;

૨૯૭.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

દસમો વિજયો.

૨૯૮.

ઇતિ કોપગ્ગિના દિત્તમનં મારં તદા જિનો,

કરુણાજલસેકેન નિબ્બાપેન્તો નિસીદિ સો;

૨૯૯.

એવં કત્વાપિ સો કુદ્ધો અલદ્ધવિજયો તદા,

આમન્તેસિ સકં સેનં પલયાનલભેરવં;

૩૦૦.

એથાસુ વત’રે મય્હં અસ્સવા મારકિઙ્કરા,

નાનાવેસધરા હોથ ધારેથ વિવિધાયુધે;

૩૦૧.

સદ્દેહેતં પલાપેથ યાથ ગણ્હથ બન્ધથ,

પાદે ગહેત્વા ખિપથ ચક્કવાળન્તરં ઇતો;

૩૦૨.

અથગા સહ વાચાહિ ભિંસા સા મારવાહિની,

તુરઙ્ગ વ્યગ્ઘ માતઙ્ગ સીહાદિરૂપ ભિંસના;

૩૦૩.

સા મારસ્સુભતો પસ્સે ચતુવીસતિયોજને,

ઠિતા પચ્છિમભાગમ્હી ચક્કવાળસિલાવધિં;

૩૦૪.

બહલત્તેન સા આસિ સમ્પુણ્ણ નવયોજના,

યક્ખ પેત પિસાચાદિ વેસેહિ ભયવાહિની;

૩૦૫.

સંવટ્ટ વાતસમ્પાત ખુભીતમ્બુધિનો વિય,

ઉલ્લોલ ભિમઘોસો તુ ગતો બ્રહ્મપુરાવધિં;

૩૦૬. ¶

દન્ત સઙ્ઘટ્ટ સઞ્જાત જાલામાલા સમાકુલા,

તેસંગારા’વ દિત્તાસું કોધુમ્મીલિત લોચના

૩૦૭.

વહન્તિ ધૂમક્ખન્ધાનિ મુખકોટર કોટિહી,

નીહટા નીહટા જિવ્હા સુભીમોરગતં ગતા;

૩૦૮.

ઉદ્ધરિત્વાન તાલાદિ કરિત્વાન સરાસને,

ભુજઙ્ગે ચ ગુણે કેચિ ગાળ્હમાકડ્ઢયન્તિ ચ;

૩૦૯.

પુણ્ડરીકચ્છ સીહાદી ખિપન્તાભિમુખે તદા,

ધાવન્તેકે સમુગ્ગય્હ પુરતો દિત્તપબ્બતે;

૩૧૦.

ભયાનકાતિ નેકાનિ સીસાનેક કલેબરે,

માપયિત્વાન પુરતો ધાવન્તિ કેચિ કિઙ્કરા;

૩૧૧.

સીસેન સીહસઙ્કાસા ગત્તેન મનુજોપમા,

બુદ્ધસ્સાભિમુખં કેચિ ધાવન્તિ માર કિઙ્કરા;

૩૧૨.

કણ્ઠીરવાકારદેહા મુખેન ખલુ રક્ખસા,

હુત્વાન અભિધાવન્તિ કેચિમારસ્સ કિઙ્કરા;

૩૧૩.

દણ્ડમાનવકા સીસભાગેના’તિભયાવહા,

ગત્તેન રક્ખસા હુત્વા કેચિ ધાવન્તિ કિઙકરા;

૩૧૪.

દીપચ્છેભ તુરઙ્ગાનં વ્યગ્ઘ ખગ્ગવિસાણિનં,

વરાહ મહિસાદીનં કણ્ણપાવુર ભોગિનં;

૩૧૫.

સીસાકાર મહાસીસે તબ્બિરુદ્ધે કલેબરે,

માપેત્વા અભિધાવન્તિ કેચિ મારસ્સ કિઙ્કરા;

૩૧૬.

આકડ્ઢેન્તા કપોલાનં કરસાખાહિ સમ્મુખે,

દસ્સયન્તા મહાદાઠં કેચેન્તિ મારકિઙ્કરા;

૩૧૭.

તિખિણગ્ગનખા કેચિ ફાલયન્તા સકોદરે,

અન્તે ગલે પિલન્ધિત્વા ધાવન્તિ કિઙ્કરાપરે;

૩૧૮.

ગિલન્તા કેચિ ફણિનો ઉગ્ગિરન્તા તથેવ ચ,

સીસ કન્ધર કણ્ણન્ત બાહુ અઙ્ગુલિ આદિસુ;

૩૧૯. ¶

સકલેસુ સરીરેસુ વિસધૂમગ્ગિ સઙ્કુલે,

ધારેન્તા’સિવિસે કેચિ ધાવન્ત્યગ્ગે ભયાવહા;

૩૨૦.

પદિત્તાયોગુલે ગય્હ ખિપન્તેકે અનેકધા,

દિત્તપબ્બતમુદ્ધચ્ચ કેચિ અગ્ગિકપાલકે,

ખિપન્ના અભિધાવન્તિ દટ્ઠોટ્ઠા ભીમલોચના;

૩૨૧.

લાલયન્તા સકા જિવ્હા ખન્ધે કત્વાન મુગ્ગરે,

મત્તભુજઙ્ગ વેસેન ધાવન્તિ અપરે ભટા;

૩૨૨.

પિબન્તા લોહિતાનેકે ખાદન્તા પિસિતે પરે,

પિસાચાવ’ચરું કેચિ મુનિરાજસ્સ અગ્ગતો;

૩૨૩.

ઉલ્લઙ્ઘન્તા ચ સેલેન્તા ધાવન્તા જલિતાયુધા,

ભિમવેસધરા યક્ખા કેચેન્તિ ભકુટીમુખા;

૩૨૪.

પણુણ્ણ સરવસ્સેહિ કુન્તતોમર વુટ્ઠિહિ,

ભેણ્ડિવાલા’સિચક્કેહિ નિબ્ભરાસિ દિગન્તરં;

૩૨૫.

યં દિટ્ઠ સુત મત્તેન મરણં ચિત્ત વિબ્ભમં,

યાતિ લોકો કથં કો તં નિસ્સેસં ભાસતે નરો;

૩૨૬.

નેકદન્તસહસ્સેહિ નિક્ખન્તગ્ગિસિખાયુતં,

દાનનિજ્ઝરસમ્પાતં ભીમગજ્જનગજ્જિતં;

૩૨૭.

નેકસત કરગ્ગેહિ ધતાયોલગુળાદિકં,

સન્નદ્ધં કવચાદીહિ ગિરિંચ ગિરિમેખલં;

૩૨૮.

આરૂળ્હો પાપિમા તત્થ ઉસ્સાપેત્વા જયદ્ધજં,

વિસાલાવત્ત દાઠગ્ગો ચિપિટગ્ગ ભગ્ગ નાસિકો;

૩૨૯.

દટ્ઠોટ્ઠ ભીમવદનો ભકુટી વલિ લલાટકો,

કોધાનલેહિ સન્દિદ્ધ મહક્ખો તમ્બદાઠીકો;

૩૩૦.

નીલપબ્બત સઙ્કાસ વિસમઙ્ગો મહોદરો,

ગોનસોરગ સપ્પાદિ અઙ્ગીકત સુભિંસનો;

૩૩૧. ¶

સહસ્સબાહું માપેત્વા છૂરિકા યટ્ઠિ સત્તિ ચ,

કોદણ્ડચણ્ડબાણે ચ ચક્ક કુન્તગદાદિ ચ;

૩૩૨.

સઙ્કુ વેતાલિકા ફરસુ પાસમુગ્ગર અઙ્કુસે,

ગહેત્વા કણયઞ્ચાથ તિસૂલ વજિરાયુધે;

૩૩૩.

પરિવત્તેસિ આકાસે તેસમઞ્ઞોઞ્ઞ ઘટ્ટના,

ઉગ્ગતેહિ ફુલિઙ્ગેહિ ધાવન્તેહિ સમન્તતો;

૩૩૪.

અગ્ગિ ચક્કપરીતંચ કુરુમાનો નિજં તનું,

આવહન્તો ભયં બ્રહ્મ સુર સિદ્ધાદીનં તદા,

સ મારસેનો સો મારો ભગવન્તમુપાગમિ;

૩૩૫.

ઉદયાવલકૂટમ્હિ ભાસન્તોવ પભાકરો,

સુપ્પતિટ્ઠિતમેરૂ’વ તિકૂટાચલ મુદ્ધનિ;

૩૩૬.

કત્વાન પિટ્ઠિતો બોધિં ભૂરુહં વજિરાસને,

નિસિન્નો ભગવા’તીવ નિચ્ચલો અતિરોચતિ;

૩૩૭.

અકમ્પો સો મુની એવમગ્ગે’કાસિ નિજં બલં,

સમ્મપ્પધાનસંયુત્તો દયામેત્તો મહેસિકો;

૩૩૮.

ચતુબુદ્ધભુમિસઙ્ખાત જયભુમિમુદિક્ખિય,

ચતુસ્સઙ્ગહવત્થૂનં યોજેત્વા દ્વારકોટ્ઠકે;

૩૩૯.

યોજેત્વાન થિરં તત્થ સદ્ધાદિબલકોટ્ઠકે,

સતિપટ્ઠાનપાકારે અભેજ્જિન્દ્રિય ગોપુરે;

૩૪૦.

થિરઞાણયુધાકિણ્ણે મેત્તા સન્નાહ વમ્મિતો,

અભીત ભારતી ભુરિ ભેરિસઙ્ખ પુરક્ખતો;

૩૪૧.

ચતુરઙ્ગવિરિયુત્તુઙ્ગ માતઙ્ગક્ખન્ધસઙ્ગતો,

પુઞ્ઞસમ્ભારભારેન કમ્પયં વસુધાતલં;

૩૪૨.

ચરિયત્તય સઙ્ખાત’મુસ્સાપિત જયદ્ધજો,

એવં વિધાય મારારિ મારસઙ્ગામ મણ્ડલં;

૩૪૩.

દાનાદયો મહાયોધે આહૂય સહજાતકે,

સુણાથ ભો ગિરં મય્હં ભવતજ્જ મહા ભવો;

૩૪૪. ¶

એથ યાથ સમગ્ગત્થ ન ઓસ્સક્કથ સુજ્ઝથ,

વિજેતું મારયુદ્ધમ્હી ન સક્કા’સેસજન્તુહિ;

૩૪૫.

અજ્જ ગચ્છતિ નિટ્ઠાનં સો ભો પારમિતાભટા,

સહુસ્સાહા મમગ્ગમ્હિ દસ્સેથ વીરિયં સકં;

૩૪૬.

અથ દાનભટો આહ અપ્ફોટં દિગુણં ભુજં,

પસ્સદાનિ મહાવીર બલં મે મારધંસને;

૩૪૭.

પરમત્થપારમિ યોધં તથે’વ ઉપપારમિં,

ઉભો પસ્સે કરિત્વાન સસેનો ધાવિ દપ્પવા;

૩૪૮.

તથેવ સીલનામવ્હો પારમીભટ’મુત્તમો,

નિક્ખમ્મ સહ સેનાય મારસેનમભિદ્દવી;

૩૪૯.

તથાનેક્ખમ્મનામોપિ સન્નદ્ધો’સભટો ભટો,

મારસેનામિગે હન્તું ધાવિ દીપી’વ સાહસો;

૩૫૦.

પઞ્ઞાયોધો’પિ ગચ્છન્તો સાટોપો ધાવિ દપ્પવા,

મારમેરુમહા અજ્જ સસેનુમ્મૂલયામિતિ;

૩૫૧.

વીરિયપારમિતા યોધો દટ્ઠોટ્ઠો ભીમગજ્જનો,

સોસેમિ મમ તેજેન વદં’ગા માર સાગરં;

૩૫૨.

ખન્તિસચ્ચવ્હયા ચેવ તતો’ધિટ્ઠાનકો ભટો,

આસુ ધાવિંસુ પાતેતું મારસ્સ મકરદ્ધજં;

૩૫૩.

મેત્તાનામો મહાયોધો મારો મય્હમલન્તિ’ગા,

ઉપેક્ખકો’પી સો યોધો મારસેનં પદાલિતું;

૩૫૪.

પેસેત્વેવં જિનો સેનં’સરીરં દળ્હવિક્કમં,

નિસિદિ તસ્સ તેજેન નિરુસ્સાહાસિ સા ચમૂ;

૩૫૫.

અહો ભો વિમ્હયં દાનિ સુણાથ મુનિનો મમ,

જેતિ એકો નિસિન્નોવ સમારં મારવાહિનિં;

૩૫૬.

કોપાનલેન સન્દિત્તં દુટ્ઠ રુટ્ઠં પજાપતિં,

અદુટ્ઠો જેતિ સમ્બુદ્ધો આનુભાવો હિ તાદિસો;

૩૫૭. ¶

દિત્તાયુધે ખિપન્તે’પિ વિજ્ઝન્તે વસવત્તિની,

નિરાયુધો’વ તં જેતિ આનુભાવો હિ તાદિસો;

૩૫૮.

સહાટોપં સહઙકારં મારં સાડમ્બરં તદા,

નિચ્ચલો જેતિ સમ્બુદ્ધો આનુભાવો હિ તાદિસો;

૩૫૯.

હત્થસ્સ રથપત્તીહિ ધાવન્તં તમિતોચિતો,

નિસિન્નોવ જિનો જેતિ આનુભાવો હિ તાદિસો;

૩૬૦.

ભાસન્તં નેકધા કણ્ણ કઠોર ગિરમન્તકં,

નિસ્સદ્દો જેતિ સમ્બુદ્ધો આનુભાવો હિ તાદિસો;

૩૬૧.

મારોપાગમ્મ અટ્ઠાસિ લઙ્ઘિતું અસમત્થકો,

બુદ્ધતેજગ્ગિ પાકારં દિત્તમબ્ભુગ્ગતં થિરં;

૩૬૨.

તદાહ નમુચિ કુદ્ધો ભુજમુક્ખિપ્પ’મીદિસં,

ખિપ્પં સિદ્ધત્થ હે ગચ્છ સન્તકેદં મમાસનં;

૩૬૩.

નો ચે ગચ્છસિ તે હદયં ફાલેમિ નખસત્તિહિ,

વિચુણ્ણેમિ તુવં પાદે ગહેત્વા પથવીતલે;

૩૬૪.

પસ્સ મે મહતિં સેનં પસ્સ આયુધસઞ્ચયં,

તેન તં અભિમદ્દામિ તુવટં ગચ્છિદં મમ;

૩૬૫.

અથસ્સ વચનં સુત્વા જિનો’હ મધુરઙ્ગિરો,

કદા તે પૂરિતા માર પલ્લઙ્કત્થાય પારમી;

૩૬૬.

કદા અદાસિ સીસાદી દાનં સીલં કથં તવ,

તદત્થાય કથાપેહિ કે તે પચ્ચક્ખકારકા;

૩૬૭.

અથા’હ ફરુસો મારો નેતં ગરુ મુને મમ,

અયં સા પરિસા સબ્બા તસ્સ પચ્ચક્ખકારકં;

૩૬૮.

ઉગ્ઘોસેસિ મહાસેના પક્ખી’હન્તિ વિસું વિસું,

ભુમુદ્રિયન મત્તોવ તતો કોલાહલો અહુ;

૩૬૯.

અથાહ મારો સમણ અહં સક્ખિ કથાપયિં,

તવ કો સક્ખિ યજ્જત્થિ કથાપેહિ લહું મમ;

૩૭૦. ¶

અથાહ ભગવા તસ્સ ગમ્ભીરં મધુરં ગિરં,

નિચ્છારેન્તા મયૂરસ્સ સુનાદં ફણિનો યથા;

૩૭૧.

તવેવ મે ન સન્તીધ પચ્ચક્ખત્થં સચેતના,

અચેતનાવ મેદાનિ સન્તિ પચ્ચક્ખવાદિનો;

૩૭૨.

ઇતિ વત્વાન મારારિ સઞ્ત્ધા જિમૂત ગબ્ભતો,

નિક્ખન્ત વિજ્જુસઙ્કાસં કરં ચામીકરજ્જુતિં;

૩૭૩.

રત્ત ચીવરગબ્ભમ્હા નીહરિત્વા જિનો તદા,

ધરણ્યભિમુખં’કાસિ ઉદ્દિસ્સ ભુમિકામિનિં;

૩૭૪.

દાનમાનાદિકમ્મે મે કમ્પન્તી જાતિજાતિયં,

કિમજ્જ નિસ્સણાસી’તિ જિનો વાચમુદાહરી;

૩૭૫.

સક્ખિ’હન્તિ વદન્તીવ તતો ભુમિવરઙ્ગના,

સળિલાવનિપરિયન્તા ગજ્જન્તિ નચ્ચિ તાવદે;

૩૭૬.

મહી સાગર ઊમી’વ ઉટ્ઠાપેન્તિ મહૂમિયો,

છદ્ધા કમ્પિ કુલાલસ્સ ચક્કંવાતિ પરિબ્ભમિ;

૩૭૭.

હિમવા ગિરિરાજા ચ યુગન્ધર નગાદયો,

કૂટબાગા સમુક્ખિપ્પ નચ્ચિંસુ નટકા વિય;

૩૭૮.

દિસ્વા સુત્વા તમચ્છેરં ગયેનુબ્બિગ્ગ માનસા,

મારસેના પભિન્નાસિ ભિન્નવેલોવ સાગરો;

૩૭૯.

ભયેનટ્ટસ્સરા ભન્તા પતન્તઞ્ઞોઞ્ઞ ઘટ્ટના,

વિકિરિત્વા કચે પિટ્ઠે ધાવિંસુ મારકિઙ્કરા;

૩૮૦.

ગહિતાયુધાનિ છડ્ડેન્તા પિદહન્તાનનં કરા,

નિવત્થવત્થમત્તે’પિ ધાવિંસુ અનપેક્ખકા;

૩૮૧.

અઙ્ગુલિયો મુખે કેચિ પક્ખિપન્તિ રુદન્તિ ચ,

કેચિ વન્દન્તિ યાવન્તિ અભયં સામિ દેહિ નો;

૩૮૨.

સિદ્ધત્થો’યં જિતો કિન્નુ નિસ્સાસા રુદ્ધભાસના,

પિટ્ઠિપસ્સમુદિક્ખન્તિ ધાવિંસુ ચકિતા પરે;

૩૮૩. ¶

ગિરિમેખલો’પિ નાગિન્દો જન્નુકેન પતી તદા,

મારો’પિ પતિતો ખિપ્પં ધાવિત્વા’દસ્સનં ગતો;

૩૮૪.

તઙ્કણે ઉગ્ગતો આસિ સત્થુ કિત્તિ જયદ્ધજો,

અવહેન્તોવ સુરાદીનં બ્રહ્મલોકાવધિં ગતો;

૩૮૫.

તદાસિ વિજયો તસ્સ સમ્બુદ્ધસ્સ સિરીમતો,

ચરિમે મારયુદ્ધમ્હિ મારસ્સાસિ પરાજયો;

૩૮૬.

એવં મહાનુભાવોતિ મન્ત્વાન નરસારથિં,

નિચ્ચં વન્દથ પૂજેથ સો હિ વો સરણં સદા;

એકાદસમો વિજયો.

૩૮૭.

લદ્ધાભિવિજયે બુદ્ધે નિસિન્ને વજિરાસને,

પરિવારયું ગતાગમ્મ પુરે વિય સુરાદયો;

૩૮૮.

દેવા તે નિખિલા નેત્વા નાનાપૂજાવિધિં તતો,

સન્તુટ્ઠા મુનિનો’કાસું મહન્તં જયમઙ્ગલં;

૩૮૯.

સમ્પત્તાથ નિસાકન્તા માનેતુંચ મુનિસ્સરં,

પુબ્બાપરમ્બરે લગ્ગ સસીણક્કણ્ણ ભુસણ;

૩૯૦.

સુનીલાકાસ ધમ્મિલ્લે ધત્ત તારાલિમાલિકા,

વીજેન્તીવ દિસા બાહા ફુલ્લચૂતક ચામરે;

૩૯૧.

મલ્લિકા મુકુલાસત્ત સમ્મત્તાલિગણા તદા,

ધમેન્તા વિય સઙ્ખાનિ કૂજેન્તિ મધુરં ગિરં;

૩૯૨.

સામોદ મકરન્દેહિ મન્દમન્દાનિલાગતા,

સજુણ્હા જિનબિમ્બમ્હિ ઉતું ગાહેન્તિ સીતલં;

૩૯૩.

અવિજ્જાદિ મહામૂલં તિવટ્ટત્થિર ખન્ધકં,

સંસાર વિસરુક્ખં સો આરદ્ધુમ્મુલિતું તદા;

૩૯૪.

ભાવેન્તો પુરિમે યામે સરન્તો ખન્ધસન્તતિં,

પુબ્બેનિવાસાનુસ્સતિ ઞાણં લદ્ધા નરિસ્સરો;

૩૯૫. ¶

તથા મજ્ઝિમ યામમ્હિ દિબ્બચક્ખુ વિસોધના,

ચુતુપપાત ઞાણઞ્ચ અધિગંત્વાન સબ્બસો;

૩૯૬.

રત્તિયા પચ્છિમે યામે ચિન્તયન્તો જરાદયો,

વિપસ્સિત્વા નામરૂપે આરોપેત્વા તિલક્ખણં;

૩૯૭.

સમ્મસન્તો કિલેસેહિ વિવેચેત્વા સકં મનં,

આસવાનં ખયે ઞાણા લદ્ધા અગ્ગફલં તદા;

૩૯૮.

પત્તો નિબ્બાણનગરં બોજ્ઝઙ્ગ રતનિસ્સરો,

સદ્ધમ્મરાજા હુત્વાન પીતિવાચમુદાહરી;

૩૯૯.

અનેકજાતિ સંસારં સન્ધાવિસ્સં અનિબ્બિસં,

ગહકારકં ગવેસન્તો દુક્ખા જાતિ પુનપ્પુનં;

૪૦૦.

ગહકારક દિટ્ઠોસિ પુન ગેહં ન કાહસિ,

સબ્બા તે ફાસુકા ભગ્ગા ગહકૂટં વિસઙ્ખિતં,

વિસઙ્ખારગતં ચિત્તં તણ્હાનં ખયમજ્ઝગા;

૪૦૧.

ઇચ્ચેવ મગ્ગમતદાનવિધિપ્પવીણ,

કારુઞ્ઞપુઞ્ઞહદયેન મહોદયેન,

પત્વા ભવણ્ણવમપારમનન્તદુક્ખં,

યેનોચિતા પરમપારમિતા જિનેન;

૪૦૨.

યોચેવ સબ્બવિભવં પણુદિત્વ રજ્જં

નિક્ખમ્મ પત્વ ચલપત્તમહીરુહસ્સ,

મૂલે નિસજ્જ સબલં પબલઞ્ચ મારં,

પાપારયો ચ વિજિતો સ દદાતુ સન્તિં;

અભિસમ્બોધિ કથા.

૪૦૩.

તિલોકનાથો સુગતો તતો તદા

ઉદાનવાચં સમુદાહરિત્વા,

પલ્લઙ્કમાભુજ્જ દુમિન્દમૂલે

ચિન્તેસિ એવં વજિરાસનસ્મિં;

૪૦૪. ¶

દાનાદયો પારમિતા ચિનિત્વા

અસઙ્ખકપ્પાનિ ચ ખેપયિત્વા,

અસ્સેવ પલ્લઙ્કવરસ્સ હેતુ

સન્ધાવિતં તં ભજિતં વયજ્જ;

૪૦૫.

યાવસ્સુ પુણ્ણ મમ ચેતનાયો

તાવેત્થ અચ્છામિ ન વુટ્ઠહામિ,

મંત્વાન સો નેકસહસ્સસઙ્ખા

જિનો સમાપત્તિ વલઞ્જિ તત્થ;

૪૦૬.

દેવાતિદેવો તિભવેકનાથો

હતાવકાસો જિતપઞ્ચમારો,

પિતામહાદીહિ મહીયમાનો

ખેપેસિ સત્થા દિવસાનિ સત્ત;

ઇતિ પઠમ સત્તાહં.

૪૦૭.

યસ્માસનં નેવ જહાતિ તસ્મા

તિસન્ધિયુત્તેન નિસીદિતેવ,

અજ્જાપિ કત્તબ્બમનેન અત્થિ

દેવાનમિચ્છાસિ મનમ્હિ કઙ્ખા;

૪૦૮.

તેસં મનં સો મનસા વિદિત્વા

વિનોદનત્થં વિમતિન્તુ તેસં,

ઉટ્ઠાય તમ્હા નભમુપ્પતિત્વા

દસ્સેસિ તેસં મુનિપાટિહેરં;

૪૦૯.

વિનોદયિત્વા સુગતો તદેવં

સુધાસિનં ચેતસિ કઙ્ખરાસિં,

પલ્લઙ્કતો ઉત્તરપુબ્બકણ્ણં

આકાસતોરુય્હ જલં રવીવ;

૪૧૦.

જિનો દુમિન્દસ્સ ચ આસનસ્સ

બહૂપકારત્તમનુસ્સરન્તો,

ઠિતો પદં કિઞ્ચિ અકોપયન્તો

ઇતો ચિતો લોક ન મુજ્જહન્તો;

૪૧૧. ¶

નીલાયતક્ખામલકન્તિતોય

ધારાનિપાતેન દુમિન્દરાજં,

નિસિઞ્ચમાનો દિવસાનિ સત્ત

પૂજેસિ તં’નિમિસલોચનેહિ;

૪૧૨.

અજ્જાપિ તસ્મિં ધરણિપ્પદેસે

કતસ્સ થૂપસ્સ તદેવ નામં,

અહોસિ દેવા ચ નરો’રગા ચ

મહેન્તિ તે તેન દિવં પયન્તિ;

ઇતિ દુતિય સત્તાહં.

૪૧૩.

દેવા તતો દેવવરસ્સ તસ્સ

સુચઙ્કમં’કંસુ મણીહિ નાના,

પલ્લઙ્કતો ઠાનવરસ્સ મજ્ઝે

પુબ્બાપરાસાયનમન્તરાલે;

૪૧૪.

નરિન્દ નાગિન્દ સુરિન્દ પૂજિતો

છબ્બણ્ણરંસીહિ સમુજ્જલન્તો,

નીલમ્બરે તારકિતો સસી’વ

સો ચઙ્કમી સત્ત અહાનિ તત્થ;

૪૧૫.

અજ્જાપિ તસ્મિં ધરણિપ્પદેસે

કતસ્સ થૂપસ્સ તદેવ નામં,

અહોસિ દેવા ચ નરોરગા ચ

મહેન્તિ તે તેન દિવં પયન્તિ;

ઇતિ તતિય સત્તાહં.

૪૧૬.

તતો દુમિન્દસ્સ સુરાસુરિન્દા

મહીતલે પચ્છિમોત્તરાયં,

માપિંસુ નાનારતનાલયગ્ગં

નિસજ્જ પલ્લઙ્કવરે તહિં સો;

૪૧૭. ¶

સુદુદ્દસાગાધમપારપારં

સમન્તપટ્ઠાનતરઙ્ગભઙ્ગિં,

ધમ્મોદધિં ઞાણસુમેરુમત્થા

સાલોલયં ખેપયહાનિ સત્ત;

૪૧૮.

અજ્જાપિ તસ્મિં ધરણિપ્પદેસે

કતસ્સ થૂપસ્સ તદેવ નામં,

અહોસિ દેવા ચ નરોરગા ચ

મહેન્તિ તે તેન દિવં પયન્તિ;

ઇતિ ચતુત્થ સત્તાહં.

૪૧૯.

તતો જિનો ગન્ત્વ’જપાલમૂલે

વિમુત્તિજં સાદુફલં’નુભોન્તો,

સત્તાહમત્તં અતિવત્તયી સો

દેવાતિદેવો કરુણાગુણગ્ગો;

૪૨૦.

તદાગતા મારવધૂ મુનિત્દં

પલોભિતું યા પિતુનો સકાસા,

તાસં પયોગમ્પિધ બિન્દુમત્તં

કથીયતે તં સમુપાગતત્તા;

૪૨૧.

તદા સ મારો સમરે જિનેન

પરાજિતો સોચનકો’પગંત્વા,

પજ્ઝાયમાનો’થ અધોમુખો’ચ

નિસીદિ તુણ્હી વિલિખં છમાયં;

૪૨૨.

પરાજયં મય્હ મમેવ દોસો

ન તસ્સ કસ્માહમયં’ચ નાસિં,

સીસક્ખિમંસાદિ ચ પુત્તદારે

નાદન્તિ એવં મનસી કરોન્તો;

૪૨૩.

પવત્તિમેતં મકરદ્ધજસ્સ

સુત્વાન તણ્હા અરતી રગા ચ,

યત્થચ્છિ મારો પરિસોચયન્તો

તત્થાગમું તા ચકિતા ખણેન;

૪૨૪. ¶

દિસ્વાન તં તત્થ તથા નિસિન્નં

નિસ્સાસરુદ્ધં ગિરમુગ્ગિરન્તી,

તુસાર બિન્દુનિવહેહિ’સાર

પઙ્કેરુહાકાર વિસાલનેત્તા;

૪૨૫.

હા તાત હા તાત કિમાસિ તેદં

નટ્ઠન્નુ તે કિં વદ પત્થસી કિં,

કો તે દિસો કેન પરાજિતો’સિ

કિમાનયિસ્સામ હનામ કં નો;

૪૨૬.

કિમ્હોતિયોદાનિ ન પસ્સથેતં

સુદ્ધોદનીયં તતકિત્તિઘોસં,

મુખમ્હિ મય્હં મસિમક્ખયન્તં

અતિચ્ચ યન્તં વિસયં પસય્હ;

૪૨૭.

ન ભારિયા તાત મનુસ્સભૂતં

કત્તું વસં કો વસમેતિ નામ્હં,

તં રાગપાસેન ગજં’વ મત્તં

સુબન્ધકં બન્ધિય આનયેમ;

૪૨૮.

ન રાગપાસેન હિ આનનીયો

મારસ્સ ધેય્યં સમતિક્કમીવ,

અપેતરાગો અરહા અકમ્પો

સોવામ તસ્મા સુભગા તનુજા;

૪૨૯.

સચેતનો સો હિ મનુસ્સભુતો

અચેતનઞ્ચે સમુપાગમામ,

કરોમ તં નો વસગં કિમેત્થ

ચિત્તં બલં પસ્સથ નો ખણેન;

૪૩૦.

રૂપેન નેત્તં સુમનોહરેન

ગન્ધેન ઘાણં સવણં સરેન,

ફસ્સેન ગત્તં રસસા રસઞ્ઞં

મનઞ્ચ પાસેન ચ કામજેન

૪૩૧. ¶

સુબાહુપાસેન ચ તસ્સ ગીવં

બાહુદ્વયં ધારિતમાલદામા,

બન્ધિત્વદાનેવ તમા’નયામ

બલઞ્હિ નો પસ્સથ તાત’દાનિ;

૪૩૨.

વત્વાન એવં વચનં પિતુસ્સ

પણમ્મ પાદાનિ પગબ્ભિતન્તા,

યત્થચ્છિ મારારિ વિરોચમાનો

તત્થા’ગમું ખિપ્પમુદગ્ગચિત્તા;

૪૩૩.

સામોદમાલાકુલકેસભાર

પયોધરા કુઙક્કુમહારિહારા,

બિમ્બાધરા ચારુસભા પભાસા

ઉમ્માદયન્તી જનમાનસાનિ;

૪૩૪.

મુદ્ધેન મિસ્સં મધુરે નિમુગ્ગં

સ્નેહેન તિન્તં રસતો’નુવિદ્ધં,

ભાસિંસુ વાચં હદયઙ્ગમન્તા

વિલોકનેનેવ ધિતિં હરન્તી;

૪૩૫.

વસન્તકન્તો નવયોબ્બનો’સિ

સુવણ્ણવણ્ણો હદયઙ્ગમો’સિ

એકો નિસિન્નો’સિ વટસ્સ મૂલે

સિમન્તિની સામિ કુહિન્નુ તુય્હં;

૪૩૬.

તરઙ્ગહીનો’પિ તરઙ્ગમાલી

સસઙ્કહીના રજની ચ સામી,

હંસા’લિહીના સરસી સુફુલ્લા

નાભાતિ કન્તા વિરતો ધવો’પિ;

૪૩૭.

વસન્તકાલો ચ વનં સુફુલ્લં

નિસાકરાભા ભમરાલિગીતં,

સુગન્ધમન્દોપગતા સમીરા

વિરોચસિ ત્વમ્પિ ચ યોબ્બનેન;

૪૩૮. ¶

મયમ્પિ ચેત્થેવ સમાગતમ્હ

મનો’નુકૂલા ચ મનુઞ્ઞરૂપા,

કરોતિ કિંત્વ’જ્જ સકામદાહો

કામાકરો’દાનિ સમાગતો નો;

૪૩૯.

મા તેદિસં યોબ્બનરૂપસારં

સુવિગ્ગહં છાદય ચીવરેન,

તેનેવ નો નેત્તમનમ્હિ સામિ

મા દેહિ દાહં તવ દાસિભુતે;

૪૪૦.

નખંસુ સુત્તે’રુણપાનિપાદે

નેત્તિન્દનીલાનિ’વ આવુણન્તો,

ત્વમચ્છિ નો સામિ મુખમ્બુજેસુ

ન એન્તિ કિન્તે નયનાલિમાલા;

૪૪૧.

સુધાસિલાગીઞ્જક લોહદારુ

જાતેહિ ત્વં ધીર ન નિમ્મિતો’સિ,

રૂપી’સિ સોમ્મો’સિ તથાપિ સામિ

કિં કામરાગં મનસા નુદેસિ;

૪૪૨.

અયઞ્ચ બાલા ચતુરા રતીસુ

બાલેતિ કઙ્ખં જહ માનસમ્હિ,

કિં મઞ્જરી ભિજ્જતિ સમ્પફુલ્લા

મત્તાલિરાજે પરિચુમ્બમાને;

૪૪૩.

અયઞ્ચ રામા રમણીયરૂપા

પીણોરુગણ્ડા કુવમણ્ડલા ચ,

તં કામિનિં કામય ફુલ્લકઞ્જે

હંસો યથા કેસર સમ્પગિદ્ધો;

૪૪૪.

ચિન્તામણિં ભદ્દઘટઞ્ચ કપ્પ

તરું સમાપજ્જ દળિદ્દભાવા,

નાપેન્તિ સત્તા ખલુ દુબ્ભગત્તા

તથેવ નો’સી તવ પાદસેવા;

૪૪૫. ¶

એવઞ્હિ તા રઞ્જનમઞ્જુભાસા

સહસ્સમેકઞ્ચ સતાનિ અટ્ઠ,

વેસાનિ સમ્મા અભિનિમ્મિણિત્વા

પલોભયુન્તં બહૂધા મુનિન્દં;

તતો તણ્હા?.

૪૪૬.

યક્ખોસિ મત્તોસિ સિલામયોસિ

અચેતનોસા’થ અયોમયોસિ,

અવીતરાગઞ્હિ સચેતનઞ્ચે

અનેનુપાયેનુ’પસઙ્કમામ;

૪૪૭.

ફલેય્ય ખીપ્પં હદયઞ્હિ તસ્સ

ઉણ્હંવ રત્તં મુખતુ’ગ્ગમેય્ય,

સિયાવ ખિપ્પં અપિ ચિત્તખેપં

ઉમ્માદભાવંચ સ પાપુણેય્ય;

૪૪૮.

યથા પલુત્તો હરિતોપલમ્હિ

ખિત્તો નળો સુસ્સતિ આતપેન,

એવં વિસુસ્સેતિ વિસાદમેતિ

સો મુચ્છતિ મુય્હતિ દુક્ખમેતિ;

૪૪૯.

સોકાવકિણ્ણે નુ વનમ્હિ ઝાયસિ

વિત્તન્નુ જિતો ઉદ પત્થયાનો,

આગુન્નૂ ગામસ્મિં અકાસિ કિઞ્ચિ

જનેન કસ્મા ન કરોસિ સક્ખિં;

સત્થા?.

૪૫૦.

અત્થસ્સ પત્તિં હદયસ્સ સન્તિં

છેત્વાન સેનં પિયસાતરૂપં

એકો’હં ઝાયં સુખમનુબોધિં

જનેન તસ્મા ન કરોમ સક્ખિં;

ઇમા ¶ દ્વે પાલિયં?.

૪૫૧.

પલુટ્ઠગત્તં દહનેન મક્કટિં

સુસાનપેતિઞ્ચ જિગુચ્છનીયં,

જેગુચ્છિયં જઙ્ગમ મીળ્હરાસિં

દિસ્વાન કો તં વરયે સપઞ્ઞો;

અથ અરતિ?.

૪૫૨.

કથં વિહારી બહુલો ચ ભિક્ખુ

પઞ્ચોઘતિણ્ણે અતરીધ છટ્ઠં,

કથં ઝાયિં બહુલં કામસઞ્ઞા

પરિબાહિરા હોન્તિ અલદ્ધ યો તં;

સત્થા?.

૪૫૩.

પસ્સદ્ધકાયો સુવિમુત્તચિત્તો

અસઙ્ખરાનો સતિમા અનોકો,

અઞ્ઞાય ધમ્મં અવિતક્ક ઝાયી

ન કુપ્પતી નસ્સરતી ન થીનો;

૪૫૪.

એવં વિહારી બહુલો ચ ભિક્ખુ

પઞ્ચોઘતિણ્ણે અતરીધ છટ્ઠં,

એવં ઝાયિં બહુલં કામસઞ્ઞા

પરિબાહિરા હોન્તિ અલદ્ધ યો તં;

અથ રગા?.

૪૫૫.

અચ્છેચ્છિ તણ્હં ગણસઙ્ઘચારી

અદ્ધા તરિસ્સન્તી બહૂ ચ સદ્ધા,

બહું વતાયં જનત’મનોકો

અચ્છિજ્જ નેસ્સતિ મચ્ચુરાજસ્સ પારં;

સત્થા? ¶ .

૪૫૬.

નયન્તિ વે મહાવીરા સદ્ધમ્મેન તથાગતા,

ધમ્મેન નયમાનાનં કા ઉસૂયા વિજાનતં;

ઇમા પઞ્ચ પાલિયં?.

૪૫૭.

સુત્વાન તં ધમ્મવરં જિનસ્સ

પમત્તબન્ધુસ્સ રગાદિરામા,

પલોભિતું ને’વ સમત્થકા તં

અગંસુ ખિપ્પં પિતુનો સકાસં;

૪૫૮.

મારો તદારા’વ સમેક્ખમાનો

દિસ્વાગતા કેવલમેવ તાયો,

મા કત્થ કામં મમ ભાસિતાનિ

કામત્થ પાતું મિગતણ્હિકાપં;

૪૫૯.

બાલા કુમુદનાળેહિ પબ્બતં અભિમન્થથ,

ગિરિં નખેન ખણથ અયો દન્તેહિ ખાદથ;

૪૬૦.

સેલંવ સિરસિ ઊહચ્ચ પાતાલે ગાધમેસથ,

ખાનુંવ ઉરસા’સજ્જ નિબ્બિજ્જાપેથ ગોતમા;

ઇમા દ્વે પાલિયં?.

૪૬૧.

વત્વાન એવં વિમનો સ મારો

સટીતુકો સમ્ભવનં પયાસિ,

સત્થાથ રાગા પરિમુત્તચિત્તો

જહાસિ તસ્મિં દિવસાનિ સત્ત;

૪૬૨.

અજ્જાપિ તં સાખિવરમ્પિતેન

’નુભુતમત્તેન મહેન્તિ સબ્બે,

તેનેવ તે સગ્ગગતા વિમાને

મોદન્તિ કામેહિ અનૂપમેહિ;

ઇતિ પઞ્ચમ સત્તાહં.

૪૬૩. ¶

તતો મુનિન્દો મુચલિન્દમૂલે

નિસીદિ ગન્ત્વા પવરાસનમ્હિ,

યુગન્ધરે બાલરવી’વ રંસિ

જાલાહિ લોકં પરિપૂરયન્તો;

૪૬૪.

અથાન મેઘો જલદા સતેહિ

પપૂરયં ખં થનયં સવિજ્જુ,

સસીતવાતો કિરમમ્બુધારં

વિરોચમાનો વિસકણ્ઠિકાહિ;

૪૬૫.

અમન્દનણ્દો મુચલિન્દભોગી

દિસ્વા મુનિન્દં મુચલિન્દમૂલે,

પરિક્ખિપિત્વાન વિસાલભોગા

છાદેત્વ સમ્મા સફણો ફણેન;

૪૬૬.

અજ્ઝેસિ સો તસ્સ અનુગ્ગહાય

નિસીદિ ગન્ત્વા ભુજગા’સનમ્હિ,

સત્થા તદા રૂપિયમન્દિરેવ

સત્તામહત્તં સુવિમુત્તચિત્તો;

૪૬૭.

અજ્જાપિ તં સાખિવરમ્પિ તેન

’નુભુતમત્તેન મહેન્તિ સબ્બે,

તેનેવ તે સગ્ગગતા વિમાને

મોદન્તિ કામેહિ અનૂપમેહિ;

ઇતિ છટ્ઠમ સત્તાહં.

૪૬૮.

તતો’પગન્ત્વા યતિરાજ રાજા

નિસીદિ રાજાયતનસ્સ મૂલે,

વિમુત્તિજં પીતિસુખં’નુભોન્તો

સત્તાહમત્તં કરુણાગુણગ્ગો;

૪૬૯.

અજ્જાપિ તં સાખિવરમ્પિ તેન

’નુભુતમત્તેન મહેન્તી સબ્બે,

તેનેવ તે સગ્ગગતા વિમાને

મોદન્તિ કામેહિ અનૂપમેહિ;

ઇતિ સત્તમ સત્તાહં.

૪૭૦. ¶

આહાર કિચ્ચાદિ વિવજ્જિતસ્સ

સુખાનુભોન્તસ્સ વિમુત્તિજાનિ,

સમ્પીણિતઙ્ગસ્સ જિનસ્સ તસ્સ

ઇચ્ચચ્ચગું સત્તદિનાનિ સત્ત;

૪૭૧.

દેવાનમિન્દેન તતો’પનીત

મુખોદકાદિમ્પરિભુઞ્જિયાન,

નિસિન્નમત્તે યતિરાજ રાજે

તત્થા’ગમું દ્વે વાણિજા ખણેન;

૪૭૨.

ઉસ્સાહિતા દેવવરેન સમ્મા

સાલોહિતા તસ્સ તપુસ્સ-ભલ્લિકા,

મન્થઞ્ચ સાદું મધુપિણ્ડિકઞ્ચ

આદાય નાથં ઇદમબ્રુવુન્તે;

૪૭૩.

ઇદઞ્હિ નો ધીર અનુગ્ગહાય

પટિગ્ગહેત્વ પરિભુઞ્જ દાનં,

હિતાય તં હોતિ સુખાય ચેવ

અનપ્પકપ્પેસુ અનાગતેસુ;

૪૭૪.

પટિગ્ગહેત્વા મુનિ દેવદિન્ન

પત્તેન પચ્ચગ્ઘસિલામયેન,

ભુત્વાન તેસં અનુમોદનત્થં

દેસેસિ ધમ્મં વરદં પસત્થં;

૪૭૫.

દ્વે ભાતિકા વાણીજકા જિનસ્સ

ધમ્મં સુણિત્વાન પસન્નચિત્તા,

દ્વે વાચિકોપાસકતં ગતાસું

યાચિંસુ તે તં પુન પૂજનીયં;

૪૭૬.

પરામસિત્વાન સિરં તતો સો

અદા જિનો કુન્તલ ધાતુમુટ્ઠિં,

તે તેન તુટ્ઠા સુમના પતીતા

મહિંસુ નેત્વા વિભવાનુરૂપં;

૪૭૭. ¶

સત્થા’થ ગન્ત્વા અજપાલમૂલે

સહસ્સ રંસીવ યુગન્ધરમ્હિ,

નિસજ્જ લોકં અનુલોકયન્તો

વિતક્કિ એવં મનસા વિતક્કં;

૪૭૮.

મયજ્ઝપન્નો વરધમ્મસારો

સસસ્સ સિન્ધૂ’વ અગાધપારો,

અબુદ્ધસત્તેહિ તમજ્જ કસ્સ

પકાસયિસ્સઞ્હિ જળો હિ લોકો;

૪૭૯.

દેસેમિ ચે ધમ્મવરં પણીતં

કિલન્તભાવોવ મમસ્સ અસ્મા,

કિમત્તદુક્ખે નિતિ ચિન્તયન્તો

નુય્યામમાકા મુનિ દેસનમ્હિ;

૪૮૦.

સહમ્પતી નામ તતો વિધાતા

સચેતસા તસ્સ મનં વિદિત્વા,

વિનસ્સતીદં ખલુ સબ્બલોકં

અદેસિતે તેનિ’તિ કમ્પમાનો;

૪૮૧.

સકાસમાગમ્મ જિનસ્સ તસ્સ

સગારવો બ્રહ્મગણેન તત્થ,

નિહચ્ચ જાનું પથવીતલમ્હિ

નમસ્સમાનો ઇદમબ્રૂવી સો;

૪૮૨.

ત્વં દેવદેવો સ સુમેધકાલે

પલોકિતં લોકમુદિક્ખમાનો,

વિહાય દીપઙ્કરપાદમૂલે

લદ્ધા’મતં તં કરુણાગુણેન;

૪૮૩.

પવિસ્સ સંસારવનં વિદુગ્ગં

મંસક્ખિસીસાદિમ’દાસિ દાનં,

વેદેસિ દુક્ખં અમિતં અસય્હં

તં તે પરત્થં’વ ન અત્તહેતું;

૪૮૪. ¶

સન્તીધ સત્તા ખલુ મન્દરાગા

ઞાતું સમત્થા સુગતસ્સ ધમ્મં,

આરાધિતો મે કરુણાગુણગ્ગો

દેસેહિ ધમ્મં અનુકમ્પમાનો;

૪૮૫.

કાલે વિકાસન્તિ ખરંસુ મિસ્સા

થલમ્બુજાતા કુસુમાનિ નાના,

તથે’વ તે ધમ્મકરાભિફુટ્ઠા

વિકાસમાયન્તી જના અનેકા

૪૮૬.

સમ્પન્ન વિજ્જાચરણો સતીમા

જુતિન્ધરો અન્તિમદેહધારી,

પટિગ્ગહેત્વાસ્સ નિમન્તણં સો

જનેસિ સત્તે કરુણા મનસ્મિં;

૪૮૭.

અપારુતા તેસં અમતસ્સ દ્વારા

યે સોતવન્તો પમુઞ્ચન્તુ સદ્ધં,

વિહિંસસઞ્ઞી પગુણં ન ભાસિં

ધમ્મં પણીતં મનુજેસુ બ્રહ્મે;

૪૮૮.

પટિગ્ગહેસીતિ ઉદગ્ગચિત્તો

અજ્ઝેસનં મે ચતુરાણનો સો,

નત્વાન નાથં સહપારિસજ્જો

પક્કામિ તમ્હા ભવનં ખણેન;

૪૮૯.

તતો જિનો તેન ગહિતનુઞ્ઞો

દેસેમિ કસ્સેતિ ઉદિક્ખમાનો,

આળાર-ઉદ્દે સમુદિક્ખ ધીરો,

મન્ત્વાન તેસં અચિરચ્ચુતિત્તં;

૪૯૦.

કહન્નુખો’હં વરધમ્મચક્કં

અઞ્ઞેન કેનાપિ અવત્તનીયં,

લોકસ્સ ચિન્તામણિસન્તિભગ્ગં

પવત્તયિસ્સન્તી વિચિન્તયન્તો;

૪૯૧. ¶

દિસ્વાન ભિક્ખૂ મુનિ પઞ્ચવગ્ગે

આદાય પત્તઞ્ચ તિચીવરઞ્ચ,

બારાણસીયં મિગદાયમેન્તો

અદ્ધાનમગ્ગં પટિપજ્જિ સત્થા;

૪૯૨.

તત્થામરબ્રહ્મગણેહિ પૂત

પથે ફણી પક્ખિ ચતુપ્પદા ચ,

આરઞ્ઞદેવા તરુપબ્બતા ચ

મહિંસુ નેકેહિ સુવિમ્હયેહિ;

૪૯૩.

તતોપગા સો મિગદાયમગ્ગે

દિસ્વા યતીસં યતયો’પગન્ત્વા,

અકંસુ વત્તં પટિપત્તિસારા

પવત્તયી તત્થ સ ધમ્મચક્કં;

૪૯૪.

અઞ્ઞાદિકોણ્ડઞ્ઞવસિપ્પધાના

કોટીનમટ્ઠારસ કઞ્જયોની,

અસીતિકોટી’પિ સુધાસિ સઙ્ઘા

અઞ્ઞાસુમગ્ગં કમતો તદા તે;

૪૯૫.

અતિચ્ચયાતમ્હિ નિદાઘકાલે

વસ્સાનકાલે સમુપાગતસ્મિં,

તત્થેવ વસ્સં ઉપગમ્મ ધીરો

તેમાસમત્તં અવસી વસીસો;

૪૯૬.

તતો યસં તસ્સ સહાયકેપિ

પતિટ્ઠપેત્વા અરહત્તમગ્ગે,

ભુતિં જનાનં અનુબ્રૂહયન્તો

વસ્સસ્સ અન્તં અકરી તહિં સો;

૪૯૭.

વસ્સચ્ચયે લોકવિદૂ મુનિન્દો

આમન્તયી તે યતયો સપુત્તે,

તે’થાગમું નિબ્બણથા કતઞ્જલી

’દમબ્રુવિ તેસમ’નન્ત પઞ્ઞો;

૪૯૮. ¶

ઉગ્ઘોસયન્તા મમ ધમ્મઘોસં

સમાહનન્તા મમ ધમ્મભેરિં,

સાધું ધમેન્તા મમ ધમ્મસઙ્ખં

ચરાથ તુમ્હે સનરામરાનં;

૪૯૯.

જયદ્ધજં મે ભુવનુક્ખિપન્તા

ઉસ્સાપયન્તા મમ ધમ્મકેતું,

અથુક્ખિપન્તા મમ ધમ્મકુન્તં

ચરાથ લોકેસુ સદેવકેસુ;

૫૦૦.

સુસજ્જિતત્તં અમતસ્સ મગ્ગં

સકણ્ટકત્તં નરકાયનસ્સ,

મારાનનસ્મિં મસિમક્ખિતત્તં

કથેથ લોકસ્સ સદેવકસ્સ;

૫૦૧.

બુદ્ધન્તરં સુપ્પિહિતં અચારં

પુરસ્સ મોક્ખસ્સ વિસાલદ્વારં,

અવાપુરી નો ભગવા’ધુના ભો

યથજ્જ સબ્બેતી નિવેદયવ્હો;

૫૦૨.

ઉપ્પન્નભાવં ભુવને મમજ્જ

તથેવ ધમ્મસ્સ ચ પાતુભાવં,

ઉપ્પન્નભાવઞ્ચ મમોરસાનં

પકાસયન્તા જગતિં ચરાથ;

૫૦૩.

વનમ્હિ પન્તે ગિરિગબ્ભરાયં

રુક્ખસ્સ મૂલે’પિ ચ સુઞ્ઞા’ગારે,

વસં યતત્તા મમ ધમ્મમગ્ગં

દેસેથ લોકે સનરામરાનં;

૫૦૪.

વત્વાન એવં યતયો દિસાસુ

પેસેત્વ નાથો ઉરુવેલગામી,

પટિપજ્જિ મગ્ગં અથ અન્તરાલે

કપ્પાસિકવ્હં વિપિનં પવિસ્સ;

૫૦૫. ¶

તસ્મિં રમન્તે સમતિંસમત્તે

રાજોરસે સો પવરો વિનેત્વા,

દત્વા’મતં ધમ્મમથુદ્દિસિત્વા

અગોરુવેલં ગજરાજગામી;

૫૦૬.

તત્થોરુવેલાધિકકસ્સપોતિ

પસિદ્ધનામસ્સ સસિસ્સકસ્સ,

અગ્ગં ફલં સો પરિપાવયન્તો

વસી વસન્તે વસીનં વરિટ્ઠો;

૫૦૭.

તદાહરું નેગમ નાગરા ચ

યઞ્ઞં મહાકસ્સપ તાપસસ્સ,

જિનો વિદિત્વાસ્સ મનં મનેન

વસી વિસું તસ્સ પસાદ હેતુ;

કથં?

૫૦૮.

ગન્ત્વાન ઉત્તરકુરું ભગવા તદાનિ

પિણ્ડઞ્ચરિત્વ રમણીય હિમાલયદ્દિં,

આગમ્મ સાદુરસ નીર ભરાભિરામે

’નોતત્તકે મુનિવરો પરિભુઞ્જિયાન;

૫૦૯.

ચિન્તેસિ એવમહમપ્પતરંવ કાલં

ઠસ્સામિ સાસન મમઞ્હિ અનાગતેસુ,

લઙ્કાતલે ભવતિ તત્થ ઇદાનિ યક્ખ

સમ્બાધમત્થિ મમ તત્થ ગતેસુ’દાનિ;

૫૧૦.

સબ્બા’મનુસ્સજ ભયં પવિનસ્સતી’તિ

મન્ત્વા તતો યતિવરો કરુણાય સત્તે,

સઞ્ઝાઘનેહિ પરિનદ્ધ રવીવ રત્ત

નિગ્રોધપક્ક સદિસં ચરપંસુકૂલં;

૫૧૧.

ધારેત્વ સેલમય સુન્દર પત્તહત્થો

છબ્બણ્ણરંસિ નિવહં દિસિ પૂરયન્તો,

સમ્બોધિતો નવમ ફુસ્સજ પુણ્ણમાયં

લઙ્કાતલં વિજયિતું નભસા’ગમાસિ;

૫૧૨. ¶

બ્રહ્માસુરામર ફણિ ગરુળા ચ સિદ્ધ

વિજ્જાધરાદિ જનતા સહપારિસજ્જા,

કેતા’તપત્ત ઘટ દીપુરુ તોરણેહિ

પૂજં અકંસુ મહતિં ગગનાયનમ્હિ;

૫૧૩.

લઙ્કઙ્ગના ઉરસિ ભાસુર તાર હાર

સઙ્કાસ સીતલ મનોહર નીર પૂરા,

તસ્મિં મહાદિપદ વાલુક નામ ગઙ્ગા

ભુમજ્ઝગાસિ જન નેત્ત હરાભિરામા;

૫૧૪.

તસ્સાવિદૂર સુચિ રમ્મતરે પદેસે

આયામતો મિતતિયોજન વિત્થતેન,

ચત્તારિ ગાવુતમિતં નયનાભિરામં

આસાર સીતજલ નિજ્ઝર ભુરિઘોસં;

૫૧૫.

મત્તાલિપાલિ ખગ ગીતિજ મિસ્સરાગં

સમ્મત્ત ચિત્ત મિગસઙ્ઘ નિસેવિતં તં,

નચ્ચન્ત નેકસિખિ સઙ્ગત પાદપિણ્ડં

ઉય્યાનમાસિ ઉરુનાગવનાભિધાનં;

૫૧૬.

રમ્મે તદા રતનદીપવરમ્હિ લઙ્કા

લોકાભિધાન હરિકણ્ડક યક્ખદાસે,

ઓદુમ્બરે સુમનકૂટક તણ્ડુલેય્યે

સેલેસુ મારગિરિ મિસ્સકરિટ્ઠનામે;

૫૧૭.

યે’ઞ્ઞેપિ સન્તિ ગિરયો વનરામણેય્યા

ગઙ્ગા નદી ગિરિગુહા સિકતાતલા ચ,

તત્થાવસન્તિ રહસા ફરુસાનિરુદ્દા

પાણાતિપાત નિરતા સઠકૂટ યક્ખા;

૫૧૮.

સઙ્ગમ્મ તે મહતિ નાગવનમ્હિ તમ્હિ

સમ્મન્તયિંસુ સભટા સહ પારિસજ્જા,

ત્વં કો’સિ રે! ઇતિ પરો અપરં ખરેન

તિક્ખેન વાદકણયેન અરુન્તુદન્તા;

૫૧૯. ¶

કુજ્ઝિંસુ તે અથિતરીતર કારણેન

વાક્યેન યુદ્ધ પરિરદ્ધ પગબ્ભિતત્તા,

સઙ્ખાભિતાપગ પતીવ’નવટ્ઠચિત્તા

સારમ્ભગબ્બિતમના પરિરાવયન્તિ;

૫૨૦.

તસ્મિં ખણે’ભિમતદો સુગતો નભમ્હિ

આગમ્મ તેસ’મનુકમ્પિત માનસેન,

ગોપાનસી સમ મનોહર રંસિમાલિ

તત્થચ્છિ ખે ગુણમણી મણિકણ્ણિકાવ;

૫૨૧.

તેસં જિનો કલહવૂપસમાય હેતુ

માપેસિ વુટ્ઠિ તિમિરા’નિલસીતભીતિં,

તત્થાસિ ગજ્જિતઘનો સુરચાપખિત્ત

ધારાસરેહિ વિતુદં નિસિવાર સઙ્ઘં;

૫૨૨.

અન્ધાવ તે ઘનતરે તિમિરે નિમુગ્ગા

મુળ્હા દિસઞ્ચ વિદિસં ન વિદિંસુ ભીતા,

ચણ્ડાનિલુદ્ધટ મહા ગિરિકૂટરુક્ખ

સમ્પાત ભીત રુદિતા ગતિમેસયન્તિ;

૫૨૩.

સીતેન તે અથ દિજે પરિકોટયન્તા

અઞ્ઞોઞ્ઞગત્તમવલમ્બ પરોદયિંસુ,

રૂપાનિ નેકભયદાનિ ચ ઘોસણાનિ

વત્તિંસુ તેન વિવિધં ભયમાસિ તેસં;

૫૨૪.

બુદ્ધાપિ દુક્ખિતમના પરદુક્ખકેન

કસ્મા કરોન્તિ અનયં’તિ ન ચિન્તનીયં,

લોકો હનાતિ વિટપિ ફલદાન હેતુ

સત્થેન સોમ રિપુગાહક વાસરમ્હિ;

૫૨૫.

સત્થા તતો તમનુદો સભયે સસોકે

દિસ્વાન ગુય્હક જને કરુણાયિતત્તો,

વુટ્ઠિં તમઞ્ચ પવનં પણુદિત્વ સબ્બં

દસ્સેસિ અત્તમખિલં દુમણીવ ખમ્હિ;

૫૨૬. ¶

દિસ્વાન તે મુનિવર’ઞ્જલિ પઙ્કજેહિ

સજ્જેત્વ સીસ સરસી ઇદમ’બ્રુવિંસુ,

યાચામ નો’ભયપદં ભવતો સકાસા

દાસેસુ ધીર કરુણં કરણીયમેવ;

૫૨૭.

એવં તદા’વચ જિનો મધુરસ્સરેન

આમન્ત તે નિસિચરે’વનતે સમેક્ખ,

તુમ્હે દદાથ યદિ ઠાનમમેકદેસં

સબ્બે અપેન્તી ઘનવાતજ સીતદુક્ખા;

૫૨૮.

યજ્જેવમીતિમ’પયાતિ કરોમ ભો તં

ગણ્હાહિ ધીર યદિ ઇચ્છસિ સબ્બદીપં,

વત્વાન તેહિ પરિદિન્ન છમાય મગ્ગો

ઓગમ્મ તત્થ પુથુ પત્થરિ ચમ્મ કણ્ડં;

૫૨૯.

તસ્મિં નિસજ્જ કસિણં સમાપજ્જ તેજો

જાલાકુલં જલિત મગ્ગીમમાપયી સો,

સો ધૂમકેતુ ગગનુગ્ગત તુઙ્ગસિઙ્ગો

સન્દડ્ઢયં ગિરિવનાનુ’રુઘોસયન્તો;

૫૩૦.

રુક્ખેહિ રુક્ખવન પબ્બત લઙ્ઘનેન

સાખામિગે ચ વિહગે અનુબન્ધયં’વ,

વેસ્સાનરો વનમરૂ મિગસૂકરે’પિ

સન્ધાવિ ગુય્હક જને ઇતિ ચિન્તયન્તો;

૫૩૧.

દિસ્વાન તત્થ પચુરાતન વિપ્ફુલિઙ્ગ

સમ્મિસ્સ જાલ દહનં ગુહકા સમેચ્ચ,

ધાવું વિકિણ્ણકચ બપ્પજલ’દ્દનેત્તા

દારત્તજેહિ સહિતા ગતિમેસમાના;

૫૩૨.

સમ્બુદ્ધતેજ પરિદડ્ઢ સરીરચિત્તા

આહચ્ચ સાગરતટં પરિધાવમાના,

તસ્મિમ્પિ તે પવિસિતું સરણં ન લદ્ધા

છમ્હિ તતો સપદિ સન્નિપતિંસુ સબ્બે;

૫૩૩. ¶

દિસ્વાન તે મુનિવરો સહયે સસોકે

રમ્મં તદા જલધિમજ્ઝગતં મહન્તં,

ઇદ્ધીહિ સેહિ ગિરિદીપમિ’ધાનયિત્વા

આરોપયિત્વ નિખિલે પુન તત્થ’કાસિ;

૫૩૪.

કત્વેવમે’સમસમો’પસમન્ત’મીતિં

તત્થેવ ભાસુરતરો ભગવા નિસીદિ,

બ્રહ્મામરા’સુરફણી ગરુળાદિ સિદ્ધા

સઙ્ગમ્મ’કંસુ મહતિં મહમ’ગ્ગરૂપં;

૫૩૫.

દેસેસિ સંસદિ જિનો સુતિસાધુ ધમ્મં

તસ્મિં સદાસવનુદં સિવદં જનાનં,

સુત્વાન નેકસતકોટિ પમાણ પાણા

લદ્ધા તદા સમભવું ચરધમ્મચક્ખું;

૫૩૬.

તસ્મિં દિને સુમનકૂટ વરાધિવાસો

તેજિદ્ધિબુદ્ધિવિભવો સુમનાભિધાનો,

દેવો પસન્નહદયો રતનત્તયમ્હિ

સમ્પાપુણિત્થ પઠમં ફલમુત્તમં સો;

૫૩૭.

ઉટ્ઠાય તુટ્ઠવદનો કતપઞ્જલીકો

મુગ્ગો જિનગ્ગ નખરંસિ પયોદધિમ્હિ

વન્દિત્વ એવમવચા’તુલ વીર ધીર

લોકગ્ગ પુગ્ગલ વરં દદ સામિ ધીસ;

૫૩૮.

દાસોસ્મિ તે ચરણ પઙ્કજ પૂજકોહં

સદ્ધાદયાદિ વિભવો તનયો’હમસ્મિ,

તુમ્હે વિના ખણલવં વસિતું ન ઇચ્છે

તસ્મા દદાતુ ભગવા મમ પૂજનીયં;

૫૩૯.

સુત્વાન તં ધિતિમતી પરિમજ્જ સીસં

સંસત્ત છપ્પદ સરોરુહ સન્નિભેન,

હત્થેન નીલ સક કુન્તલ ધાતુમુટ્ઠિં

દજ્જાથ સો મણિમયેન કરણ્ડકેન;

૫૪૦. ¶

પગ્ગય્હ બાહુયુગલેન ઠીતો નમિત્વા

મુદ્ધા દધાસિ મકુટં વિય પીણિતત્તો,

કત્વા’થ સો વર મહં તિદિવેહિ સદ્ધિ

’મપ્પેત્વ ધીર ફરિભુત્ત વસુન્ધરાયં;

૫૪૧.

સો’કાસિ નીલરતનેહિ મહારહેહિ

ઉબ્બેધતો રતન સત્ત પમાણ થૂપં,

નાથે ધરન્તસમયેવ પતિટ્ઠહી સો

થૂપો તિલોકસુખદો મણિ કામદો’વ;

૫૪૨.

પચ્છા તિલોકસરણે પરિનિબ્બુતમ્હિ

ખીણા સવો સમહિમો સરભુ યતિન્દો,

આદાય તં ચિતકતો જિનગીવધાતું

તસ્મિં નિધાય’કરિ બારસ હત્થથૂપં;

૫૪૩.

ચૂળાભયહ્વવનિપો સમયે’પરસ્મિં

બત્તિંસ હત્થમ’કરિયત્થ વરોરુથૂપં,

દુટ્ઠાદિગામણિ નુપો દમિળે હનન્તો

કારેસિ કઞ્ચુકમથો ચતુસટ્ઠિહત્થં;

૫૪૪.

એવં સ સીહલમહાસરમજઝરૂળ્હં

સેતમ્બુજં’વ મધુપાવલિ સેવનીયં,

ભુમઙ્ગના કરતલે સિતવિત્થલીલો

થૂપો દદાતુ મસમોપસમં જનાનં;

૫૪૫.

લઙ્કોપસગ્ગમ’વધૂય વિધાય ખેમં

લઙ્કં નિજાય વરકુન્તલ ધાતુયા તં,

કત્વાન ભાસુરતરં મુનિ મઙ્ગલાય

પાયાસિ તારક પથે’નુરુવેલમેવ;

૫૪૬.

તસ્મિં વિધાય બહુવિમ્હિત પાટિહેરં

ભેત્વા સસિસ્સકિ’સિનો પુન દિટ્ઠિજાલં,

દત્વાન નિબ્બુતિપદં સહસિસ્સકસ્સ

નિબ્બાણ સુન્દર પુરં પરિપૂરયિત્થ;

૫૪૭. ¶

તમ્હા વિકાસિત કુસેસય કાનનાભ

વીતાસવેહિ નિવુતો સુગતેભગામી,

પાયાસિ રાજગહ ગામી’મુદારમગ્ગં

વેનેય્ય જન્તુ કમલાકર ભાનુરૂપો;

૫૪૮.

તસ્મિં ગતે જિનવરે વર બિમ્બિસારો

પૂજં અકાસિ મહતિં સહ દેવતાહિ,

તસ્મિઞ્હિ સંસદિ લભિંસુ અનપ્પપાણા

મગ્ગે ફલે ચ સરણે ચ પતિટ્ઠહિંસુ

૫૪૯.

રાજા તતો વિપુલ વેલુવનાભિરામં

સાલઙ્કતં વિવિધ પાદપ મણ્ડપેહિ,

પાદાસિ દક્ખિણકરે જલપાતનેન

કત્વા ધરાધરધરં હિમવઞ્ચ કમ્પં;

૫૫૦.

તસ્મિં સમન્તનયનો નયનાભિરામો

ભુતિં જનસ્સ સતતં અભિવડ્ઢયન્તો,

ધમ્મમ્બુ વુટ્ઠિ નિકરં પરિવસ્સયન્તો

વસ્સં વસી અદુતિયો દુતિયમ્હિ વસ્સે;

૫૫૧.

દેવિન્દ મોલિ સમલઙ્કત પાદપિટ્ઠો

લોકસ્સ અત્થચરણે સતતાભિયુત્તો,

તત્થેવ સો હિ તતિયે’પિ ચતુત્થવસ્સે

વાસં અકાસિ સુગતો સિરિસન્તિવાસો;

૫૫૨.

લોકસ્સ ધમ્મ મ’મલં સતતં વહન્તો

સાવત્થિયં રુચિર જેતવને’ભિરામે,

વાસં અકાસિ સુખદો મુનિપઞ્ચમસ્મિં

વેનેય્ય સત્તસમયં સમુદિક્ખમાનો;

ઇતિ લઙ્કાય પઠમા’ગમનં.

૫૫૩.

અથ ભગવતિ તસ્મિં જેતનામે વનસ્મિં

નિવસતિ સતિલઙ્કા મઙ્ગલા’વાસરૂપા,

ઉપવનમિવ નાકે નન્દનં દેવતાનં

અમર ઉરગવાસા રમ્મરૂપા બભૂવ;

૫૫૪. ¶

તહિમતિ રુચિરસ્મિં વડ્ઢમાનાદિ સેલે

મધુર સલિલવાહે રમ્મકલ્યાણિકાદો,

ઉદધિ ભુજગવાસે નાગદીપન્તિકે ચ

મહતિ મહિમ યુત્તા નાગસઙ્ઘા વસન્તિ;

૫૫૫.

પચુર મહિમ યુત્તો વડ્ઢમાનાચલસ્મિં

અધિપતિ ભુજગાનં આસિ ચૂલોદરવ્હો,

મહુદર ઇતિ નામો નાગદીપોદધિમ્હિ

નિવસતિ અથ તેસં પબ્બતેય્યો’રગિન્દો;

૫૫૬.

ઇતર ભુજગ રઞ્ઞો ધીતરં નાગકઞ્ઞં

પિયતરમ’ભિરૂપં’કાસિ દારં તદા હિ,

અથ ચ દુહિતુયા સો દીયમાનં દદન્તો

રુચિર મણીમયગ્ઘં આસનઞ્ચાપદાસિ;

૫૫૭.

દુહિતરિ મતકાલે તે’થ પલ્લઙ્કહેતુ

જલજ થલજ નાગા યુદ્ધસજ્જા અહેસું,

અથ થલજ ભુજઙ્ગા ભઙ્ગકલ્લોલમાલા

સદિસ લૂલિત ચિત્તા ગબ્બિતેવં રવન્તિ;

૫૫૮.

કિમુ’દધિજ ફણીનં કિત્તિ સમ્પત્તિયા નો

અપિ યસપરિવારા કિં બલેનિદ્ધિયા કિં,

અહમહમીતિ ગબ્બા કિં કિમિસ્સાય તેસં

ભવતિ તિમિર’રીનં ભાનુમગ્ગુન્નતી કા;

૫૫૯.

અથ જલજ’લગદ્દા ગજ્જનં ગજ્જયન્તા

ભયજનક પગબ્ભા ફોટયન્તા ભૂજાનં,

અહમહ પભૂ રે!રે! પબ્બતેય્યાન’મેતં

પટુતરડસિતોટ્ઠા કક્ખ’ળેવં રવન્તિ;

૫૬૦.

પટુતર ગરુનાદા તાવ ગજ્જન્તિ દન્તી

નયન પથમુ’પેન્તે યાવ કણ્ઠિરવાનં,

તથરિવ થલજાતા જુમ્હયન્તા સમગ્ગા

નયન પથગતા નો સુઞ્ઞદપ્પા ભવન્તિ;

૫૬૧. ¶

ઇતિ તદુભયસેના ઘટ્ટયન્તા’ઞ્ઞમઞ્ઞં

વિવિધ પહરણ્હો ઉગ્ગિરન્તી ગિરન્તિ,

સતત ખુભિત વેલા સાગરૂમીવ ભન્તા

લુલિત લુલિત ચિત્તા યુદ્ધનિન્ના ઠિતાસું;

૫૬૨.

અથ તદહુ મુનિન્દો યામિનીયામ’મન્તે

પતિનિય મતિજાલં લોકમોલોકયન્તો,

સમર વસગતાનં ભોગીનં ભાવિભુતિં

તદુપરિ ચ’ભિવુદ્ધિં પસ્સિ લઙ્કાતલસ્સ;

૫૬૩.

અથ મુનિ મધુમાસે’પોસથે કાલપક્ખે

કત નિખિલ વિધાનો ગય્હ સઙ્ઘાટિકાદિં,

અનુગતિકમુદિક્ખં પઞ્ચનેત્તો સમન્તા

સુમન સુમન નામં પસ્સિ દેવં સમિદ્ધિં;

૫૬૪.

તદહુ સુમનદેવો જેતનામે સુરમ્મે

અધિવસતિ વિહારે દ્વારકોટ્ઠોપકટ્ઠે,

ઠિત વિટપ સમિદ્ધે ખીરિકાપાદપસ્મિં

સુગત મભિનમન્તો અન્વહં પૂજયન્તો;

૫૬૫.

તમસમ્મુનિ દિસ્વા’મન્તયિત્વા’ગતે તં

ઇદમવચ મયા ભો સદ્ધિમાગચ્છ લઙ્કં,

સહ તવ ભવનમ્હા પુબ્બવુત્થપ્પદેસે

તવ ભવતિ પતિટ્ઠા ભોગિનઞ્જા’ભિવુદ્ધિ;

૫૬૬.

અથ મુનિવચનં સો મુદ્ધનામ’ગ્ગહેત્વા

સમુદિતહદયો તં રુક્ખમુદ્ધચ્ચ મૂલા,

સુગતમુપરિ કત્વા ધારયન્તો સુફુલ્લં

બરિહિ બરિહિ છત્તાકારમાગા નભમ્હી;

૫૬૭.

દસબલ તનુભા’ભિસ્સઙ્ગમા સો દુમન્દો

તરલ મણીવ નાના’ભાહિ સમ્ભાવનીયો,

વિલસિત ઇવ સબ્બે રુક્ખસેલાદયો’પિ

અપગત સકવણ્ણાવણ્ણવન્તા વિરેજું;

૫૬૮. ¶

ખગ ભુજગ સુરાદિ મસ્સિતા છપ્પભાહિ

નિજપતિ નિજજાયા સ્વઞ્ઞમઞ્ઞાસુ મુય્હું,

અસિત ગગન મજ્ઝે સોભમાનો મુનિન્દો

વિતત વિવિધ રંસી રંસિમાલીવ ગઞ્છિ;

૫૬૯.

જલદ પટલ સણ્ડે વજ્ઝમુદ્દાળયિત્વા

બહિ વિલસિતકાયો સોમ્મદોસાકરો,વ

કતુપરિ તરુછાયો જોતમાનો સમાનો

ઉરગ સમરઠાનં ગન્થ્વા’કાસે નિસજ્જ;

૫૭૦.

ઘનતર તિમિરં સો ઇદ્ધિયા સઙ્ઘરિત્વા

તહિમતિરવ ભીમં ઘોરસંરમ્ભવન્તં,

અસનિ સત નિપાતં વસ્સધારા કરાલં

ઉરુતર તત મેઘં માપયી સીતવાતં;

૫૭૧.

ઇતિ તિભુવનનાથો દપ્પિતે નાગસઙ્ઘે

વિમદ કરણ હેતુ દસ્સયી ભેરવાની,

અથ’પગત પગબ્ભે તે વિદિત્વાન સત્થા

અપનુદિ ભયજાતં તઙ્ખણંયેવ તત્થ;

૫૭૨.

તરુણ તરણિસોભા કેતુમાલાવિલાસિં

સુભરુચિ મુખવન્દં લક્ખણાકિણ્ણગત્તં,

તિભવ વિભવદાયિં તં વિદિત્વાન નાગા

ચુતપહરણ હત્થા વન્દમાના મહિંસુ;

૫૭૩.

સિરસી નિહિતપાણી રત્તપઙ્કેરુહેહિ

વિકચ વદન નેત્તા’મન્દ કઞ્જુપ્પલેહિ,

સક સક ધત નાનાવણ્ણ વમ્માદિકેહિ

વિવિધ કુસુમવત્થા’મન્દ દીપદ્ધજેહિ;

૫૭૪.

ઉરગ ભવનવાસા નાગકઞ્ઞા સમેચ્ચ

કુચ કલસ સહસ્સં ધારયન્તિ સલીલં,

લલિત કણક વલ્લિ લીલમાધત્ત ગત્તા

થુતિ મુખર મુખા તા સાધુ કીળં અકંસુ;

૫૭૫. ¶

અથ મુનિ ઉરગાનં વિગ્ગહં તં સમેતું

સુતિમન કમનીયં નિચ્છરં બ્રહ્મઘોસં,

અજરમમર મગ્ગં સુપ્પસત્થં સુધિહિ

વરમતિ વરધમ્મં દેસયી નં ફણીનં;

૫૭૬.

ન ભો ભો સંસારે ખલુ ભવતિ સારં લવમ્પિ

વિસેસા તં સીતં જલિત દહને વિજ્જતિ કદા,

સદા રાગં રોગં બ્યધતિ જનતં નેકદુરિતં

તથાપા’યું પાતો રવિરભિમુખુસ્સાવ સદિસં;

૫૭૭.

સરીરો’યં બત્તિંસ વિધ કુણપો સાર રહિતો

પરિત્તં યોબ્બઞ્ઞં કુસુમ સદિસં નિગ્ગતસિરિ,

પહન્ત્વા ગન્તબ્બં ભવજ વિભવં સમ્ભતમિદં

અથેવં સન્તે ભો વરયતિ ભવં કો નુ હિ બુધો;

૫૭૮.

પલાસી મક્ખી કોધૂપહ મતો માનવિભવો

જનો’તીતો’તો ભો પયતિ નરકં દારુણતરં,

ફણી મજ્જારો સા ગુહક કપયો ભૂય બહુસો

વધેન્તઞ્ઞોઞ્ઞં તે નનુભવમિદં દુક્ખમ’નિસં;

૫૭૯.

પુરે કાકો’લુકા અથ વનભવા ફન્દન ઇસા

કરિત્વા’ટ્ઠાને’ઘં ચિરમનુભવું દુક્ખમનિસં,

અહો કપ્પટ્ઠન્તં સરથ દુરિતં વેરજમિદં

ન હેત્થસ્સાદો ભો’ણુમપિ કલહે મેત્તિમ’મતં;

૫૮૦.

બલં બાલાનં ભો સક સક વધાયેવ ભવતિ

અતીતેકા ખુદ્દા લટુકિકદિજા નટ્ઠતનયા,

ગજં બાલં મત્તં પવિધિ ન બલં હોતિ સરણં

અથટ્ઠાને કિં ભો કુરુથ વીરિયં ભુતિ હનનં;

૫૮૧.

ન દુક્ખં તેસં યે વિગત કલહા એકમનસા

અતીતે ભો લાપા અઘટિત માના પેય્યવચના,

સુખં વાસં’કાસું યદહનિ ભવું તે’થ વિધુરા

વસં વ્યાધસ્સાગું તદહનિ અહો!મેધગ બલં;

૫૮૨. ¶

ઇતિ તિખિણ સુધિમા કત્તુમેતે સમગ્ગે

અવદિ પવર ધમ્મં સાધુ વિઞ્ઞુપ્પસત્થં,

અથ મુદિતમના તે પીણિતા તસ્સ નાગા

મણિમયમ’તુલં તં આસનં પૂજયિંસુ;

૫૮૩.

અથ મુનિ ગગનમ્બોરુય્હ ભુમિપ્પદેસં

તરુણ રવિવ તસ્મિં આસને આસિ ભાસં,

અથ ભુજગગણા તે દિબ્બ ખજ્જાદિકેહિ

પરિવિસિય મુનિન્દં સાધુ ધમ્મં સુણિંસુ;

૫૮૪.

અથ જલ થલજાનં તત્થ યુદ્ધા’ગતાનં

અગણિત ભૂજગાનં’સીતિકોટી ભુજઙ્ગા,

વિમલ સરણસીલે સુપ્પતિટ્ઠા સુતુટ્ઠા

અકરુ’મતિમુળારં સત્થુ પૂજાવિધાનં;

૫૮૫.

અથ મહુદર રઞ્ગ્ઞો માતુલો નાગરાજા

મનિનયનકનામો રમ્મકળ્યાણદેસા,

ઉરગ સમર હેતૂ આગતો નાગદીપં

સુગતવર સરીરં દિસ્વ નત્વાલપેવં;

૫૮૬.

યદિ સુગત! ઇમં ત્વં નાગતો અસ્સ ઠાનં

મયમપગત પાણા હોમ ઝત્વા’ઞ્ઞમઞ્ઞં,

રુધિરવહ વિકિણ્ણો અસ્સ ભુમિપ્પદેસો

પસમિ દહન દિત્તં અમ્બુદેનેવ તં ત્વં;

૫૮૭.

મમ ભગવ! પુરામે દિટ્ઠપુબ્બં તવેતં

રુચિર સિરિસરીરં રંસિજાલા’ભિકિણ્ણં,

અપિ સુમધુર ધમ્મં દેસયન્તે સુરાનં

દસબલ સુતપુબ્બં આનુભાવઞ્ચ તુય્હં;

૫૮૮.

અહમસમ પુરે તે વિસ્સુતોયેવ દાસો

યદિ મનસિ દયા તે હોતિ દાસે પુના’પિ,

પવર રતનદીપે હોતિ કળ્યાણિગઙ્ગા

મમ વસતિ તહિં તં દટ્ઠુકામો’ભિયાચે;

૫૮૯. ¶

ઇતિ યતિપતિ તસ્સા’રાધનં પગ્ગહેત્વા

સક પરિચિત ભુમ્યા ચેતિયત્થં વિધાય,

મણિમય પરિભુત્તં આસનં ચા’પિ તેસં

સ સુમન તરુ રાજં પૂજનત્થં વિધાય;

૫૯૦.

દસબલ પરિભુત્તં સબ્બમેતં ભુજઙ્ગા

મણિરિવ રુચીદં તે ધાતુયોયેવ તસ્મા,

મહથ નમથ નિચ્ચં મંવ સગ્ગા’પવગ્ગં

દદતિ ઇતિ ચ વત્વા ઓવદિત્વાન સત્થા;

૫૯૧.

નભતલ’મુ’પગન્ત્વા દેવનાગે મહેન્તે

દિસિ દિસિ વિસરન્તો નીલપીતાદિ રંસિ,

મન નયન હરન્તો જન્તુનં લોકસારો

અગમિ રવિ’વ ખમ્હા જેતનામં વિહારં;

૫૯૨.

અથ મનુજમરાનં નત્તસિદ્ધાદિકાનં

સતત’મમત ધમ્મં દેસયન્તો ફણીનં,

વનભવન સુરમ્મે મઙ્કુલવ્હે નગિન્દે

અકરિ મુનિ નિવાસં છટ્ઠમે હાયનમ્હિ;

૫૯૩.

સુરપુરુપવને’થો પારિજાતસ્સ મૂલે

અરુણ મુદુસિલાયં ભાસમાનો મુનિન્દો

સુનિપુણ’મભિધમ્મં દેસયન્તો સુરાનં

અકરિ વરનિવાસં સત્તમે તત્થ વસ્સે;

૫૯૪.

અથ સુખદ મુનિન્દો જેતનામે વિહારે

અવસિ વિમલપઞ્ઞો અટ્ઠમે સારદસ્મિં,

અજર’મમર સન્તિં ફસમાનો પરેસં

વિવિધ નય વિચિત્તં દેસનં દેસયન્તો;

ઇતિ લઙ્કાય દુતિયાગમનં.

૫૯૫.

એવં જિનો જેતવને વસન્તો

નીસ્સાય સાવત્થિપુરં વિહાસિ,

સા કિદિસી આસિ પુરી તદાની

તં કીદિસં જેતવનં વિહારં;

૫૯૬. ¶

ભૂમઙ્ગનાયાહિત ઉત્તમઙ્ગે

ભાસન્ત નાનારતનાભિરામા,

વિસાલમોલીવ વિસાલભોગા

સા જમ્બુદીપમ્હી બભુવ રમ્મા;

૫૯૭.

સિરીનિકેતે સિરિમાવહન્તી

વિરાજતે યા વસુધા તલસ્મિં,

સા દેવરાજસ્સ’મરાવતી’વ

રઞ્ઞો કુવેરસ્સ’લકાવ રમ્મા;

૫૯૮.

સા પુઞ્ઞપઞ્ઞાલુ જનાધિવુત્થા

સોણ્ણાદિ પુણ્ણાપનાકિણ્ણવીથી,

ઉત્તુઙ્ગ માતઙ્ગ તુરઙ્ગ રઙ્ગા

સા રાજતે કઞ્ચન મન્દિરાલી;

૫૯૯.

રરાજ સા ભાસુર રાજપુત્તા

પુઞ્ઞઙ્ગનાલાસ વિલાસયન્તી,

વેદઙ્ગપારઙ્ગત વિપ્પચારા

દ્વિપઞ્ચ સદ્દેહિ ચ નિચ્ચઘોસા;

૬૦૦.

અનેકસિપ્પી સત સમ્પકિણ્ણા

નાનાદિસાહા’ગત સત્થવાહા,

પહુતખીણાસવપાદપૂતા

બભાસ સા મઙ્ગલ મન્દિરં’વ;

૬૦૧.

ભવન્તરે યો ચરિયં ચરન્તો

સુવો’પનિસ્સાય વસં ગુણેન,

યઞ્ઞઙ્ગસાખિં મતસીનપત્તં

અકા સમિદ્ધં ફલપલ્લવેહિ;

૬૦૨.

ઇદાનિ પત્વાન ભવસ્સ અન્તં

નિસ્સાય યં સો વસતે મુનિન્દો,

તસ્સા ગુણં કો હિ અસેસયિત્વા

કથેતિ સા વસ્સૂ’પમાય તસ્સા;

૬૦૩. ¶

તસ્સોપકટ્ઠે રતનંવ’નગ્ઘં

મનોહરો ઉત્તમસત્તસેવિ,

જનાનમાકખિઙતદો વિહારો

બભુવ જેતાદિ વનવ્હયેન;

૬૦૪.

સમફુલ્લ પુપ્ફરસ મોદિત છપ્પદાલી

ઝઙ્કાર નાદ પરિવાદિત તન્તિનાદા,

સમ્મત્ત’નન્ત દિજ કુજિત ગીતવન્તા

તિટ્ઠન્તિ યત્થ તરવો નટકાવ છેકા;

૬૦૫.

ખીરણ્ણવાહરિય ધોવિય ખીરનીરા

સોસેત્વ સજ્ઝુમલયે સસિકન્તિ મસ્સં

યત્થોકિરિત્વ તનિતા વિય વાલુકાયો

સા માલકાવલિ બભાસ પયોદધિ’વ;

૬૦૬.

વિજ્જોતમાન રતનપ્પમુખાનનમ્હિ

સોપાન માલ પદગણ્ઠિદુજેહિ હાસં,

કત્વેવ દેવભવનાનમહં વિરાગ

વન્તી’તિ ગન્ધકુટિ યત્થ પહાસયિત્થ;

૬૦૭.

કમ્માર ગગ્ગરિ મુખો’પરિ સમ્પપુણ્ણા

અઙ્ગાર કન્તર વિનિગ્ગત જાલકાવ,

સમ્બુદ્ધદેહ પરિનિગ્ગત રંસિમાલા

દાયગ્ગ નિગ્ગત કરા વિસરન્તિ યસ્મિં;

૬૦૮.

તુમ્હે સરાગ જનસઙ્ગમતો’તિ ગીતા

ધઞ્ઞા મયન્તી વિમલેહી સમઙ્ગિતત્તા,

તુટ્ઠાવ હાસ મકરા સુરપાદપાનં

રાજેન્તિ યત્થ યતિનિસ્સિત પાદપિન્દા;

૬૦૯.

પુન્નાગ નીપ વકુલ’જ્જુન રાજરુક્ખ

નાગા’ગ ચૂત યુગપત્તક ચમ્પકાનં,

પુપ્ફાભિકિણ્ણ ધરણી રતનેહિ નાના

પચ્છન્ન દિબ્બભવનં વિય ભાતિ યત્થ;

૬૧૦. ¶

બ્રહ્માસુરાસુર નરોરગ લિઙ્ગિસિદ્ધ

વિજ્જાધરાદિ જનતા કતવન્દનેહિ,

તેહેવ ઘુટ્ઠ થુતિમઙ્ગલ ગીતિકાહિ

યત્થોપગાન મનનેત્તગણા મુદેન્તિ;

૬૧૧.

નિગ્ઘોસિતામલ સુસીતલ નિજ્ઝરેહિ

સમ્મત્ત નેકદિજ ઘુટ્ઠ જલાસયેહિ,

કિઞ્જક્ખ પત્ત પરિકિણ્ણ સિલાતલેહિ

તુસ્સન્તિ યત્થ સતતં યતીનં મનાતિ;

૬૧૨.

યો નેક કપ્પ સત સઞ્ચિત પુઞ્ઞરાસિ

હિત્વા’મિતં કપિલવત્થુ મહાસિરિમ્પિ,

આગમ્મ યત્થ નીરતો સુગતો મહેસિ

કો તત્થ ભુતિ મતુલં કથિકો કથેતિ;

૬૧૩.

તસ્મિં જિનો વસતિ જેતવને વિહારે

ઇન્દો યથા રુચિર નન્દન કાનનમ્હિ,

બ્રહ્મા’વ બ્રહ્મભવને સપિતામહેહિ

તારાવલી પરિવુતો ગગને’વ વન્દો;

૬૧૪.

તદાગમ્મ મહાનાગો મણિ અક્ખિકનામકો,

લઙ્કાતો જિનપાદસ્મિં ફણિં પચ્ચેદ’મબ્રુવિ;

૬૧૫.

સમ્બુદ્ધા ધીર લોકસ્મિં લોકસ્સત્થાભિવુદ્ધિયા,

જાયન્તિ સામિ તુમ્હાકં દયાયન્તો’ગધા મયં;

૬૧૬.

તેન મે દાસભુતસ્સ સંસારન્દુઘરા થિરા,

મુત્તિં યદિચ્છસે મય્હં ગહણીયં નિમન્તણં;

૬૧૭.

સુત્વાન તં મહાનાગો મહાનાગ નિમન્તણં,

પટિગ્ગહેસિ તં તુણ્હીભાવેન કરુણાય સો;

૬૧૮.

ઞત્વા તં સુમનો નાગો લહુમાગમ્મ સીહલં,

કળ્યાણાપગપસ્સમ્હિ મનોનન્દન ભુતલે;

૬૧૯.

સજ્ઝુ કમ્બુમણિ મુત્ત પવાલ વજિરામયે,

વહારહે મહાથૂને ઘટકાદિં નિધાપિય;

૬૨૦. ¶

દત્વા તુલાદયો સેસ મન્દિરઙ્ગે તથેવ ચ,

વિટઙ્ક વ્યાલ સીહાદિ પન્તિયો’પિ તથેવહિ;

૬૨૧.

સાતકુમ્હમયા’નેક ચિત્તેહિ સાધુ ચિત્તિતં,

નિમ્માય ગોપાનસિયો પક્ખપાસે ચ કણ્ણિકં;

૬૨૨.

સિઙ્ગિ નિક્ખેન સિઙ્ગઞ્ચ છદનિન્દમણીહિ ચ,

સોણ્ણ કિઙ્કિણિ માલાયો કણ્ણમાલા ચ માપિય;

૬૨૩.

ચિત્તવિતાનં બન્ધિત્વા મુત્તોલમ્બે તહિં તહિં,

કત્વાન ગન્ધદામેહિ પુપ્ફદામેહિ સઙ્કુલં;

૬૨૪.

ઇન્દનીલમયં ભુમિ મજ્ઝે’નગ્ઘ મહાસનં,

માપેસિ પરિતો સેસ ભિક્ખૂનઞ્ચ સુભાસને;

૬૨૫.

રતનેહે’વાપસ્સયે વેદિકા એળિકામયે,

મુત્તા વાલુક સઙ્કિણ્ણં માલકઞ્ચ મનોરમં;

૬૨૬.

સત્ત રતન સમ્ભુત તોરણૂ’પરિ તોરણે,

સન્તીર કુસુમા’કિણ્ણ હાટકાદિ ઘટાકુલં;

૬૨૭.

નેક રાગદ્ધજાકિણ્ણ વિતાન સમલઙ્કતં,

દીપ ધૂપાલિ સઙ્કિણ્ણ ગન્ધપુપ્ફ સમાકુલં;

૬૨૮.

એવમાદિહિ નેકેહિ વણ્ણેહિ સમલઙ્કતં,

માપેત્વા મણ્ડપં સેટ્ઠં દેવમણ્ડપ સન્તિભં;

૬૨૯.

સીત વાલુક સઞ્છન્નં મુદુ પાદપટત્થતં,

માપેત્વેવં મહામગ્ગં સુરઞ્જસ સમઞ્જસં;

૬૩૦.

સઞ્ચિનિત્વાન તે નાગા ખજ્જ ભોજ્જ ફલાફલે,

દિબ્બન્નપાને પચુરે પટિમગ્ગં ગમું તદા;

૬૩૧.

તતો કારુણિકો નાથો બોધિતો અટ્ઠમે સમે,

વેસાખ પુણ્ણમાસિમ્હિ સન્નિપાતિય સાવકે;

૬૩૨.

એથજ્જ ભિક્ખવો લઙ્કં નાગાનં’નુગ્ગહાય ભો,

મણિઅક્ખિકો નિમન્તેસિ પસન્નો બુદ્ધસાસને;

૬૩૩.

સુત્વાન વચનં તસ્સ સમ્બુદ્ધસ્સ સિરીમતો,

અસ્સવા પેસલા ભિક્ખૂ પચ્ચસ્સોસું સમાહિતા;

૬૩૪. ¶

સારિપુત્તો તતો થેરો પઞ્ઞાય’ગ્ગ ધુરન્ધરો,

પત્તચીવરમા’દાય અગમા જિનુ’પન્તિકં;

૬૩૫.

મોગ્ગલ્લાનો મહાથેરો દુતિયો અગ્ગસાવકો,

પત્તચીવરમાદાય સોપાગ જિન સન્તિકં;

૬૩૬.

ધૂતપાપો ધુતઙ્ગગ્ગો મહાકસ્સપ નામકો,

પત્તચીવરમાદાય આગમા જિનસન્તિકં;

૬૩૭.

સાસને વિનયઞ્ઞ નમગ્ગો’ પાલિવ્હયો યત,

પત્તચીવરમાદાય જિનન્તિકમુ’પાગમિ;

૬૩૮.

દિબ્બચક્ખૂનમગ્ગો યો રુદ્ધપાપારિ દપ્પકો,

થેરો’નુરુદ્ધો વરદો સોપાગ મુનિસન્તિકં;

૬૩૯.

મણિવ કામદો કામમુ’પવાનો’તિ વિસ્સુતો,

ઞાણી ગણી દક્ખિણેય્યો થેરોપાગ જિનન્તિકં;

૬૪૦.

બક્કુલો વિમલો સીલ સમાધાદિ ગુણાકરો,

આગતો સપરિક્ખારો ભિક્ખૂનં સમિતિં તદા;

૬૪૧.

બુદ્ધસાસન ધોરય્હો થેરો અઙ્ગુલિમાલકો,

સહા’ગન્તું મુનિન્દેન સન્નદ્ધો સહસા ગતો;

૬૪૨.

સાસનોદય સેલગ્ગે સૂરિયો વિય ભાતિ યો,

સો’યં રાહુલથેરો’પિ લહુ’ગા પિતુ સન્તિકં;

૬૪૩.

ભદ્દાચારો ભદ્દિયવ્હો થેરો ભદ્દઘટો વિય,

પાકટો ભુવને સો’પિ ગતો સમ્બુદ્ધ સન્તિકં;

૬૪૪.

દેવદ્દુમો’વ લોકસ્સ યો દદાતિ’ચ્છિતિ’ચ્છિતં,

જિનોરસોપિ સેલવ્હો ગતો સમ્બુદ્ધસન્તિકં;

૬૪૫.

યામિની સામિકો’વાતિ ભાતિ યો સાસનમ્બરે,

મહાનામ મહાથેરો સોપાગ મુનિસન્તિકં;

૬૪૬.

મનોસિલાતલગ્ગમ્હિ જુમ્હમાનો’વ કેસરી,

સુભુતિવ્હ મહાથેરો બુદ્ધુપન્તિક માગતો;

૬૪૭.

બુદ્ધસાસન છદ્દન્ત સરસી સારસો વિય,

વિસ્સુતો તિસ્સથેરો’પિ ગતો ભિક્ખુસમાગમં;

૬૪૮. ¶

જિનસાસન સમ્ફુલ્લસરસીરુહ મજ્ઝગો,

મધુબ્બત નિભો રાધથેરો’પિ સહસા ગતો;

૬૪૯.

ભગુ દબ્બોપ’સેનો ચ કોણ્ડઞ્ઞ’સ્સજિ સીવલિ,

એતે જિનત્રજા થેરા ગતાસું મુનિસન્તિકં;

૬૫૦.

કુમારકસ્સપો પુણ્ણોસોણોસોભિત રેવતા,

થેરાપેતે અભિઞ્ઞાતા ગતાસું સત્થુસન્તિકં;

૬૫૧.

વઙ્ગીસો સાગતો નન્દો ભારદ્વાજો ગવમ્પતિ,

પત્તચીવરમાદાય ગતાસું જિનસન્તિકં;

૬૫૨.

એવમાદિ મહાનાગા પઞ્ચસત જિનોરસા,

સમાગઞ્છું સહાગન્તું મુનિના લોકસામિનં;

૬૫૩.

તતો સો જગદાનન્દો કરુણાયાભિરાધિતો,

મેરું પરિક્ખિપન્તોવ અનેકજ્જુતિ વિજ્જુયા;

૬૫૪.

નિવાસેત્વા સુદ્ધરંસિ વિસરન્તરવાસકં,

તસ્સૂપરિ જિનો રત્તં બન્ધિત્વા કાયબન્ધં;

૬૫૫.

અચ્ચુગ્ગતં મહાથૂપં ચારુ ચામીકરજ્જુતિં,

પટિચ્છાદયમાનોવ રત્તકમ્બલ કઞ્ચુના;

૬૫૬.

વણ્ણ નિગ્રોધપક્કંવ સુરત્તં પંસુકુલિકં,

સઙ્ઘાટિયા કરિત્વાન સગુણં ઉત્તરીયકં;

૬૫૭.

હુત્વાન સુપટિચ્છન્તો પારુપિત્વાન સાધુકં,

પત્તત્થાય પસારેસિ જાલાકુલકરઞ્જિનો;

૬૫૮.

લોકનાથપ્પભાવેન તતો પત્તમધુબ્બતો,

પાણિ સરોરુહસ્સન્તો સમ્પત્તોસિ તમગ્ગહિ;

૬૫૯.

તતો સસિસ્સકો નાથો ઉગ્ગન્ત્વા ગગનઙ્ગનં,

નાનાવણ્ણમ્બુદે તત્થ મદ્દન્તો ગન્તુમારહભિ;

૬૬૦.

તતો સમ્બુદ્ધ દેહસ્મા નિક્ખન્તાસું છ રંસિયો,

હેમકણ્ણિકતો યાત મણિગોપાનસી યથા;

૬૬૧.

બાણિન્દીવર પુપ્ફેહિ મેવ’કિન્દમણિહિ ચ,

છાદેન્તિ વિય નક્ખત્તા નીલં’સુ મુનિદેહતો;

૬૬૨. ¶

ચમ્પકુદ્દાલમાલાભી હેમચુણ્ણમ્બરેહિ ચ,

પૂરયન્તિ વિયાસઙ્ગ પીતંસૂ જિનદેહતો;

૬૬૩.

ભણ્ડીપુપ્ફકદમ્બેહિ લોહિતઙ્કમણિહિ ચ,

લોહિતાભા પપૂરેન્તિ દિસા’ગા મુનિદેહતો;

૬૬૪.

હાર મલ્લિક માલાહિ સોમંસુ ફલિકાદિહિ,

પૂરયન્તિ વિયાસઙ્ગ ઓદાતા મુનિદેહતો;

૬૬૫.

પિઞ્જુમઞ્જેટ્ઠરાસીહિ પદુમાભમણીહિ ચ,

દિસં છાદયમાનાગા મઞ્જિટ્ઠાભા જિનઙ્ગતો;

૬૬૬.

નેકિન્દચાપ કિણ્ણંવ દિવસં રતનુત્થતં,

ચિત્તપટંવ મુઞ્ચન્તં મિસ્સાભાગા જિનઙ્ગતો;

૬૬૭.

ગિરિકૂટ કૂટાગાર મત્તા છબ્બણ્ણ રંસિયો,

આવેલવેલા ધાવન્તિ દિપ્પમાનેતરેતરા;

૬૬૮.

ગચ્છમાના’હનિત્વાન ચક્કવાળ સિલુચ્ચયે,

ઉગ્ગન્ત્વા પરતો યન્તી નીર નિજ્ઝર સન્નીભા;

૬૬૯.

સમ્મુખે સમ્મુખે તાયો રુક્ખપબ્બત આદયો,

કારયન્તા સકં વણ્ણં ધાવન્તા’પિ ચ સિન્ધવો;

૬૭૦.

ઉદ્ધમુગ્ગતરંસીહિ રઞ્જિતા જલદા તદા,

નાનાવણ્ણે પુનેવાસિ નૂતનો રવિમણ્ડલો;

૬૭૧.

જિનપ્પહા પવાહેસુ નિમુગ્ગા દેવતા ગતા,

પૂજેતુંવ નિજત્તેહિ નાનાવણ્ણા સિયું તદા;

૬૭૨.

પવિટ્ઠા બુદ્ધરંસીનમન્તરં દેવધીતરો,

અસઞ્જાનીય મુય્હિંસુ મુહુત્તં અત્તનો ધવં;

૬૭૩.

સુરા સુરોરગ બ્રહ્મ સિદ્ધ વિજ્જાધરાદયો,

ચામરચ્છત્તકેતુહિ પૂજયન્તા જિનન્ત્વગું;

૬૭૪.

અગ્ઘિકં પન્તિયો કેચિ તોરણૂપરિ તોરણે,

ઘટદીપાલિયો તન્થ કરોન્તિ અભિતો’ભિતો;

૬૭૫.

પાદપટે પત્થરન્તિ વિતત્વન્તિ વિતાનકે,

તત્થૂપરિ અનેકાની કુસુમાનો’કિરન્તિ ચ;

૬૭૬. ¶

કતમં દેવલોકન્નુયાતિ લોકગ્ગનાયકો,

યાતિ કિં બુહ્મલોકન્નુ અમ્હાકં ભવનન્નુ ખો;

૬૭૭.

કત્થ નુ ખો દેવદેવો કસ્સનુગ્ગહબુદ્ધીયા,

યાતી’તિ કઙ્ખિતા કેચિ સંસરન્તિ ઇતોચિતો;

૬૭૮.

માપેત્વા અભિતો મગ્ગે મણ્ડપે રતનામયે,

સયનાસનં પઞ્ઞપેત્વા કાચિ તિટ્ઠન્તિ દેવતા;

૬૭૯.

તહિં તહિં પટ્ઠપેન્તા સુધન્ત મધુરોદકં,

યાવમાના જિનં કેચિ તિટ્ઠન્તિ ચ મહન્તિ ચ;

૬૮૦.

એવં મહામહે નાથો વત્તમાને અનૂપમે,

જલં સમ્બુદ્ધસિરિયા નૂતનો સૂરિયો વિય;

૬૮૧.

બ્રહ્મસેનાભિતો યાન બ્રહ્માવાથ સહમ્પતિ,

સુરસેનાભિતો યાન સક્કોવ સમલઙ્કતો;

૬૮૨.

ગગાલિમભિતો યાન ગહઙ્ગા મણિ સન્નિભો,

ધતરટ્ઠખગિન્દોવ હંસસેનાલિ પુબ્બગો;

૬૮૩.

અપેત રાગદોસેહિ વીતમોહેહિ સબ્બસો,

પટિસમ્ભિદત્ત સમ્પત્ત સાવકેહિ અનુગ્ગતો;

૬૮૪.

યેસં યેસં મનસ્મિં યં યમત્થિ કિઞ્ચિ સંસયં,

તેસં તં તં પણુદેન્તો દેસનાય સુધાસિનં;

૬૮૫.

તત્થ તત્થાનુરૂપેન પાટિહારિય કમ્બુના,

લોકસ્સ નયનાલી સો તોસસ્સુસુ નિમુજ્જયં;

૬૮૬.

સમ્પત્તો’લઙ્કતં લઙ્કમથાગુ ફણિનો તદા,

પટિમગ્ગં કરોન્તા તે તત્થ તત્થ મહામહં;

૬૮૭.

ઉરગાનમન્તરે દેવા બ્રહ્માસું તેસમન્તરે,

એવં સમ્મિસ્સકો લોકે બ્રહ્મલોકા પપૂરયિ;

૬૮૮.

યે પસ્સન્તિ જિનં તત્થ સસિસ્સં સિરિયા જલં,

સુલદ્ધા તેહિ નેત્તાનિ તેસમક્ખીનિ લોચના;

૬૮૯.

યે સુણન્તિ તદા ધમ્મં ધમ્મિસ્સર પભાવિતં,

સુલદ્ધા તેહિ સોતાનિ તેસં સોતાનિ સોતકા;

૬૯૦. ¶

યે લપન્તિ તદા બુદ્ધગુણઞ્હિ ગુણભૂસણા,

સુલદ્ધા તેહિ વે જિવ્હા તેસં જિવ્હા રસઞ્ઞકા

૬૯૧.

યે વન્દન્તિ જિનં યન્તં સસઙ્ઘં ગગનઙ્ગને,

સુલદ્ધા તેહિ હત્થાનિ તેસંયેવ ભુજા ભુજા;

૬૯૨.

તદા તથાગતં દિસ્વા યે સન્તુટ્ઠા તથાગતં,

તથાગતાનં સબ્બેસં યો તોસો હોતુ સબ્બદા;

૬૯૩.

ગતો કલ્યાણીયં નાથો મહેન્તેવં સદેવકે,

તેસં પૂજાવિધાનં કો મુખેનેકેન ભાસતિ;

૬૯૪.

તતો ગઙ્ગા મનુઞ્ઞઞ્હિ સમ્પત્તં તં સપુત્તકં,

તરઙ્ગ મુદુ બાહાહિ ગહેત્વા ચરણમ્બુજે;

૬૯૫.

પાદે પક્ખાલયિ સમ્મા ફેણ પુપ્ફુપહારિકા,

તતો તતોતું ગણ્હિત્વા અકા દેહસ્સનુગ્ગહં;

૬૯૬.

તતો સો યાચિતો સત્થા નાગસઙ્ઘેહિ વન્દિય,

અગમા મણ્ડપં રમ્મં મનોનન્દનમાવહં;

૬૯૭.

ગન્ત્વા મણ્ડપ મજ્ઝમ્હિ બુદ્ધારહ મહાસને,

નિસીદોભાસયં આસા રવીવ ઉદયાવલે;

૬૯૮.

તતો ભિક્ખુ નિસીદિંસુ પત્ત પત્તાસને તદા,

બભાસ મણ્ડપં’તીવ સરંવ પદુમાકુલં;

૬૯૯.

જનનેત્તાલિનો’ગમ્મ વસી સોમ્મમુખમ્બુજે,

પતન્તા કુસલામોદે ગણ્હન્તા તિત્તિનો ગતા;

૭૦૦.

તથા સભિક્ખુકા નાગા મુનિનો રૂપસાગરે,

નેત્તિન્દ મણિનાવાહિ પારં ગન્તું ન તે પભુ;

૭૦૧.

તતો સસઙ્ઘં સુગતં સજનો મણિ અક્ખિકો,

સક્કચ્ચં સકહત્થેહિ અન્નપાનેન તપ્પયી;

૭૦૨.

અથોનીત પત્તપાણિમ’ચ્ચયિત્વા તથાગતં,

ભત્તિનિન્નો નિમન્તેસિ દેસનત્થાનુમોદનં;

૭૦૩.

તતો બ્રહ્મસ્સરો સત્થા નિચ્છરં બ્રહ્મઘોસનં,

વિઞ્ઞાપેન્તો જને સબ્બે સકસદ્દેન દેસનં;

૭૦૪.

દેસેસ્વેવં જિનો ધમ્મ’મનિલાસનકાદિનં,

પીતિપામોજ્જ જનનં નિબ્બાણામત’માવહં;

૭૦૫.

ભો ભો સુણાથ ભુજગા ભવસાગરમ્હિ

પાપારિનક્કમકરાકુલ દુગ્ગમમ્હિ,

મગ્ગા જના ખલુ લભન્તિ કદા પતિટ્ઠં,

ઓહાય બુદ્ધથિરસારતરિં વિસાલં;

૭૦૬.

લદ્ધાન દુલ્લભતરં મુનિપાતુભૂત

કાલં ચિરેન ભુજગા ન પમાદયિત્થ,

જાતી જરા મરણ દુક્ખ પરિદ્દવા ચ

સંસારિકસ્સ ન તતોપ’ગતસ્સ હોતિ;

૭૦૭.

તારુઞ્ઞમમ્બુજસિરિંવ પરિત્તકાલં

પાણં તુસારલવ’સારતરં જનાનં,

ભોગં દધાતિ જલધિમ્હિ તરઙ્ગભઙ્ગિં

નિચ્ચં મનો દહતિ સોકસિખીભિ નાના;

૭૦૮.

કત્વાન રાગમિસયો’પિ ખગા દુપઞ્ઞા

થિરૂપિ નારિકુસુમેસુપિ રૂપગિદ્ધા,

પત્તા’નયં ખલુ પુરે પરિહીન ઝાના

રૂપે ન રજ્જથ તતો ખલુ સાધુપઞ્ઞા;

૭૦૯.

સદ્દાનુરાગમનુગોપિ પુરે સિખણ્ડી

સુત્વાન મોરિ મધુરં ગિરમઞ્જિતઙ્ગો,

વ્યાધસ્સ હત્થમગમાસિ ભવેસુ તસ્મા

નત્થેવ સદ્દસમદુક્ખકરં જનાનં;

૭૧૦.

ઓહાય નેકકુસુમેસુ પરાગરાગં

મત્તેભકુમ્ભ મગમા મદગન્ધલુદ્ધો,

ભિઙ્ગો પભગ્ગ તનુકો કરિકણ્ણતાલા

નત્થેવ ગન્ધસદિસં તિભવેસુ પાસં;

૭૧૧.

ગમ્ભીર નીરધિભવો પવુરાસનો’પિ

મિચ્છો ગિલિત્વ બલિસં રસગેધહેતુ,

પપ્પોતિ દુક્ખમતુલં ન રસેસુ સાત

મત્થિતિ મન્ત્વ પજભાથ રસેસુ ગેધં;

૭૧૨. ¶

ભો બુહ્મલોકા’ગત સુદ્ધસત્તો

બુદ્ધત્તમેવ નિયતો અપિ બોધિસત્તો,

થિસઙ્ગમાય પરિહાયિ સરજ્જતો’પિ

તસ્મા હિ ફસ્સસદિસો અનયો નવત્થિ;

૭૧૩.

ભેરણ્ડ પેલક કપુ’દ્દક હેતુહીન

સત્તાપિ દાનરુચિ દાનમણિપ્પભાવા,

પત્તા’પવગ્ગ વરસારપુરં ભુજઙ્ગા

કો નપ્પદાતિ ધનિકો સિવ’મેસમાનો;

૭૧૪.

પાલેત્વ સીલમ’મલં વિસકણ્ઠિકાપિ

ઇન્દસ્સ નન્દનવને’સિ પિયા મહેસી,

તસ્મા પસત્થવિભવં યદિ પત્થયવ્હો

પાલેથ સીલમ’મલં ખલુ જિવિતં’વ;

૭૧૫.

સગ્ગો વિસાલ રતનાલય સમ્પકિણ્ણો

સાનન્દ’મન્દ સુરસુન્દરિ સુન્દરો સો,

ફુલ્લમ્બુજાકર વનાદિહિ નન્દનીયો

તત્થામરા વિય’મરા’વિરતં રમન્તિ;

૭૧૬.

તમ્હાપિ ભો રુચિર બ્રહ્મનિકાય ભુતિ

રમ્મા તતોપિ મહિતં અમતં વરિટ્ઠં,

તસ્માત્તકામ નિરતા જનતા સપઞ્ઞા

તણ્હક્ખયાય સતતં વીરિયં કરોથ;

૭૧૭.

એવં સદ્ધમ્મમગ્ગં વરમતિ સુગતો દેસયિ પન્નગાનં

સુત્વા તે સમ્પહટ્ઠા મહમહમકરું નિજ્જરાદીહિ સદ્ધિં,

તેસં વે દેસનાયં સુરવિટપિ સમા સાત્થિકા તત્થ જાતા

સો નાથો તઞ્ચ ધમ્મં ભગવતિ તનયા તે ચ વો પાલયન્તુ

કલ્યાણિ દેસાગમનં.

૭૧૮. ¶

નગાધિરાજે સુમનાભિધાને

વસં સુમેધો સુમનાભિધાનો,

દેવો તદા’ગમ્મ સપારિસજ્જો

કલ્યાણિયં તત્થ ફણીહિ સદ્ધિં;

૭૧૯.

દત્વા’પવગ્ગસ્સ નિદાનદાનં

સુત્વાન ધમ્મં સુતિસીતિભુતં,

પહટ્ઠચિત્તો ઉપગમ્મ બુદ્ધં

નત્વાહ એવં કતપઞ્જલીકો;

૭૨૦.

ન વે ફણીનં નપિ માનુસાનં

નાનિમ્મિસાનં ન પિતામહાનં,

હિતત્થ મેવાખિલ લોકનાથા

જાયન્તી લોકે કરુણાગુણગ્ગા;

૭૨૧.

અન્તોગધા નૂન મયમ્પિ તુય્હં

દયાય તસ્મા ફણીનં વિમેસં,

કરોહિ મય્હં ભવનમ્હિ ધીર

પાદં’સુના’તીવ પવિત્તરૂપં;

૭૨૨.

યો’યં નગો દિસ્સતિ’તો પુરત્થ

ભુમઙ્ગના મોલિસિરિં વહન્તો,

સમન્તકૂટોતિ સમન્તચક્ખુ

જાનાતિ લોકો વસતિં મમેતં;

૭૨૩.

યો નીલ નાના વનરાજિ રાજિતો

આસાર ધારા ગિરિ નિજ્ઝરાકુલો,

આપીત નીલારુણ પલ્લવાવલી

જિમૂતકૂટો વિય ભાતિ ઉગ્ગતો;

૭૨૪.

યો સિન્ધુવારિં ઉરસા પભેજ્જ

આગમ્મ તે પાદપણામ હેતુ,

વિજ્જોતમાનો વિયચક્કપાણિ

મહાતિ તુઙ્ગગ્ગ ધરાધરિન્દો;

૭૨૫. ¶

ગઙ્ગાવધૂ કુટકિરીટધારી

સામન્ત સેલિન્દ ચમૂપતીકો,

યો’યં ધરાધાર મહામહીપો

ર રાજ લઙ્કા નગરઙ્ગણમ્હિ;

૭૨૬.

પારોહ દન્તો ચિતકૂટ કુમ્ભો

અનેક સોણ્ડિક્ખ સવન્તિ હત્થો,

યો નિજ્ઝરાસાર મદપ્પવાહો

ગજોરિવા’ભાતિ સુરાધિપસ્સ;

૭૨૭.

સમ્ફૂલ્લ પુપ્ફત્થબકા’નપત્તા

સત્ધત્ત રત્તઙ્કુરમોલિમાલા,

કન્તાલતા’લિઙ્ગિત ખન્ધદેહા

તિટ્ઠન્તિ ભૂપાવ યહિં કુજિન્દા;

૭૨૮.

સિદ્ધઙ્ગના રત્તપદમ્બુજાલી

સમ્હિન્ન હત્થાભરણાલિ યુત્તા,

કેકીકલાપુપ્પલ માલમાલી

સિલાતલાકઞ્જ નિભન્તિ યત્થ;

૭૨૯.

મઙ્ગુર પાઠીન સવઙ્ક સિઙ્ગુ

રોહિચ્ચ મુઞ્જા?મર પાવુસેહિ,

કુલીરનક્કાદ’નિમેસકેહિ

નિકીળીતં દદ્દર રત્તપેહિ;

૭૩૦.

નિચ્ચઞ્હિ સંરાવ વિરાચિતાનં

બલાક કાદમ્બ કદમ્બકાનં,

આપાનસાલા વિય સારસાનં

હંસાલિનં મઙ્ગલ વાસભૂતં;

૭૩૧.

નિરન્તરામોદ મુદાવગેહિ

સુફુલ્લ કોકાસ’રવિન્દકેહિ,

સોગન્ધિ’કિન્દીવર કેરવેહિ

કિઞ્જક્ખ છન્નણ્ણતલેહિ ચિત્તં;

૭૩૨. ¶

સીતચ્છ સાતોદક સમ્પપુણ્ણ

સરોજિની લઙ્કત ભુમિભાગો,

યો’યં પુરે ભાતિ મનુઞ્ઞરૂપો

સમન્તકૂટો સ સમન્તકૂટો;

૭૩૩.

દલિત વિપિનસણ્ડા યત્થ સેલે સમન્તા

સમુપગત જનાનં ચિત્તમામોદયન્તિ,

મધુક વટ કરેરિ બોધિ જમ્બીર ભલ્લિ

ખદિર’ભય કદમ્બા ફુલ્લ સેલ્લૂ પલાસા;

૭૩૪.

પણસ’મત પિલક્ખા કણ્હવણ્ટ’ક્ખ ચિઞ્ચા

લબુજ બદરિ નીપા ફન્દનિ’ન્દીવરાવ

મકુલ’સન પિયાલા ગદ્દભણ્ડ’જ્જુના ચ

કમુક સલ્લ તિન્દુ’દુમ્બરમ્બસ્સ’કણ્ણા;

૭૩૫.

પુન્નાગ ચમ્પક દુમુપ્પલ દાડિમા ચ

ખજ્જૂરિ તાલ ગિરિમલ્લિક’સોક તાલા,

હિન્તાલ નાગ નિવુલા યુગપત્ત’રિટ્ઠ

સેતમ્બ એરવતકાપિ ચ કેતકા ચ

૭૩૬.

સમફુલ્લભણ્ડિ સુમન’જ્જક યૂથિકા ચ

વાસન્તિ ચિત્તક જપા રવિમાલતી ચ,

કુન્દસ્સ’મારક કુરણ્ડક બીજપૂર

સેફાલિકા ચ તિણસૂલ સમીરણા ચ;

૭૩૭.

વોચુ’ચ્જુ કીચક હલિદ્દિ વિળઙ્ગિ બિમ્બિ

નીલી વચા’તિવિસાલાબુ ચ નાગવલ્લી,

વલ્લીહ સારદ’પરાજિતવારુ’સીરા

ફલાદિ નેક વનરાજિ વિરાજિતો સો;

૭૩૮.

તિટ્ઠન્તિ કેચિ તરવો સુરભિં કિરન્તા

તત્થેવ કેચિ ફલિતા મધુરપ્ફલાનિ,

અન્દોલિતા ફલિતપલ્લવિતા લતાયો

સન્ધારયં વિટપ જત્તુસુ ભન્તિ કેચિ;

૭૩૯. ¶

સામન્તગે જનગણે સતતં દુમિન્દા

સમ્પીણયન્તિ દલિતા ફલિનો ચ યસ્મિં,

તે અવ્હયન્તિ વિય લોચન ગોચરેહિ

વાતે’રિતેહિ તરુણારુણ પલ્લવેહિ;

૭૪૦.

તસ્મિં વને વનસુરા નિજવસુન્દરીહિ

રમ્મે સિલાતલદહે સિકતાતલે ચ,

નચ્ચન્તિ તન્તિ તુરિયાનિ ચ વાદયન્તિ

ગાયન્તિ માલભરિનો સતતં પતીતા;

૭૪૧.

સિદ્ધા ચ સિદ્ધવનિતા હિ તહિં તહિં તે

દિબ્બન્તિ પુપ્ફફલ પત્તરસાહિનન્દિ,

અચ્છન્તિ તત્થ ગિરિપાદપ રામણેય્યે

યોગેહિ સઙ્ગત મના બહિતાપસાપિ;

૭૪૨.

તસ્મિં વને હરિણ રોહિત પુણ્ડરીક

ગોકણ્ણ સલ્લ સસ જમ્બુક સૂકરા ચ,

સાખામિગે’ણિવગ બબ્બુ રુરૂ કુરુઙ્ગ

ગોધા’ખુ પમ્પક કપી ગવયા ચ’નેકા;

૭૪૩.

તે વગ્ગ વગ્ગ ચરિનો હયમારકાદી

નાના ચતુપ્પદગણા મુદિતા વસન્તિ,

પક્ખીપિ કોસિય કપોતક નીલગીવ

ધઙ્કા’ટ લાપ પરપુટ્ઠ મધુબ્બતાવ;

૭૪૪.

નિજ્જિવ્હ દિન્દિહ ચકોરક સાળિકા ચ

ચક્કવ્હ કીર કુરરા કુલલા ચ કઙ્કા,

ચિત્રચ્છદા મધુર કૂજક નેકપક્ખી

સઙ્ગમ્મ યત્થ નિવસન્તિ મનુઞ્ઞરૂપા;

૭૪૫.

તેસં વનન્તમથ નાટકમણ્ડલા’ચ

ગીતાલયં વિય અહોસિ ચ ગાયકાનં,

આપાનભુમિ સદિસં મિગપક્ખિકાનં

નિચ્ચુસ્સવં રતિકરં નયનાભિરામં;

૭૪૬. ¶

એવં વિધો વિપિનરાજિ વિરાજિતેહિ

કૂટેહિ નેકસુર સુન્દરિ મણ્ડિતેહિ,

અત્યુચ્ચ નીલસિખિગીવ સમાન વણ્ણો

એસો સમન્તગિરિ મે વસતી મુનિન્દ;

૭૪૭.

એવં પતીત મનસો સુમનાભિધાનો

વત્વાન નત્વમસમં ગમનોપયુત્તં,

કાસાથ સોપિ મુનિ તસ્સ વચં પટિચ્ચ

સબ્ભિક્ખુ નિક્ખમિ જિનો ગગનાયનમ્હિ;

૭૪૮.

નિચ્ચેતનાપિ ગિરિપાદપ આદયોપિ

નાગા સુપણ્ણ મિગ પક્ખિક હેતુકાપિ,

વિજ્જાધરામર’સુરા ચતુરાણનાપિ

સઙ્ગમ્મ’કંસુ સુમના મહમબ્ભુતં તે;

૭૪૯.

મુનિન્દે પયન્તે સમિદ્ધં તિલોકં

ગિરિન્દાભિનન્દા દુમિન્દા પબુદ્ધા,

મિગિન્દા સુતુટ્ઠા ખગિન્દા સુઘુટ્ઠા

પવુટ્ઠો મહિન્દો પણટ્ઠો નિદાઘો;

૭૫૦.

ગચ્છન્તે ગગનાયનેન સુગતે ભાનુ’સિ સન્તો તદા

વારેસું સૂરિયાતપઞ્ચ જલદા સિઞ્જિંસુ ભુમ્યા જલં,

મન્દામન્દ સુગન્ધ મુદ્ધ પવનો પાપેતિ સિતં સુખં,

દેવાદિ ધજ છત્ત ચામરકરા પૂજેન્તિ માનેન્તિ ચ;

૭૫૧.

સન્નીર હિન્તાલ’ગ સિન્દિ પૂગ

તાલમ્બસાલાદિ મહીરુહિત્દા,

તિટ્ઠન્તિ તે ચામરહત્થકા’વ

પુપ્ફેહિ છન્નો ગગનઙ્ગનોપિ;

૭૫૨.

અનેન વિધિના જગદેક નાથો

પવત્તમાનેસુ મહામહેસુ,

દિસઞ્ચ વિદિસં પરિપૂરયન્તો

જબ્બણ્ણરંસીહિ અગા નગિન્દં;

૭૫૩. ¶

તસ્મિં સમન્તનગમુદ્ધનિ લોકનાથો

છબ્બણ્ણરંસિ નિકરં દિસિ પત્થરન્તો,

ભિક્ખૂહિ સો પરિવુતો પરસાગરન્તં

ઓલોકયં ઠિતિમકાસિ અઅનોમવણ્ણો;

૭૫૪.

લઙ્કાવધૂ સુમનકૂટ કિરીટ કૂટં

સજ્જેસિ’નગ્ઘ જન રાજ મણી મહન્તો,

ઇચ્છત્થદં સિવદમપ્પટિમં તિલોકે

તં’દાનિ ભો ભજથ સેવથ સબ્બકાલં;

૭૫૫.

કાસું તદા સુરવરા સુરસુન્દરીહિ

લઙ્કાય સેલસિખરેસુ મહાસમજ્જં,

વજ્જિંસુ ભેરિ વિકતી સયમેવ સબ્બા

ભસ્સિંસુ દિબ્બકુસુમાભરણા નભમ્હા;

૭૫૬.

લઙ્કમ્બરં નિખિલમાસિ ચ છત્તછત્તં

નાના વિરાગ ધજ કેતુ સમાકુલઞ્ચ,

નાનાસુગન્ધ કુસુમાદિ દિસન્તરાલં,

નાનગ્ઘિકાવલિ વિરાજિત મન્તળિક્ખં;

૭૫૭.

તસ્મિં દિને’સિ રતનં મણિતોરણેહિ

દીપાલિ પુણ્ણઘટપન્તીહિ દસ્સનીયં,

સમ્બુદ્ધ દેહપરિતોગત છપ્પભાહિ

રત્તં નભાવનિ ચરાચર સબ્બદબ્બં;

૭૫૮.

માલાવતંસ સમકા ગિરયો સમન્તા

હુત્વા નમન્તિ ચ ભમન્તિ સચેતના’વ,

સબ્બેપિ તત્થ તરવોચ લતાદયો ચ

નચ્ચન્તિ દિબ્બનટકા વિય ઓનતગ્ગા;

૭૫૯.

એવં તદા મહત વિમ્હય પાટિહેરે

બુદ્ધાનુભાવ જનિતે ઇધ વત્તમાને,

તત્વાન ધીરચરણં સમનો સુધાસી

એવં વદી પરમ પિતિમનો ઉદગ્ગો;

૭૬૦. ¶

યે તે મુદુ કોમલ રત્તપાદા

સુરત્ત ફુલ્લમ્બુરુહોપમાના,

વટ્ટાનુપુબ્બાયત અઙ્ગુલિકા

સુતમ્બતુઙ્ગગ્ગ નખાવલીકા;

૭૬૧.

સુવણ્ણકુમ્મુ’ન્નત પાદપિટ્ઠિ

નિગુળ્હ ગોપ્ફાયત પણ્હિભાગા

સમચ્છમાયં સકલં પતિટ્ઠિતા

ન લિમ્પતે સુચ્છવિતા રજાદિ;

૭૬૨.

સમ્મત્ત હત્થોસભ હંસ સીહ

સમાન લીલાય યહિં પયાતિ,

નિન્નુન્નતા ભેરિતલા’વ ભુમિ

હોતાથ પુપ્ફાદિ સુમણ્ડિતા ચ;

૭૬૩.

અપેન્તિ મગ્ગા સયમેવ ખાણુ

સકણ્ટમૂલા કઠલા ચ સબ્બે,

ગમ્ભીર નીરાપગ પઙ્કદુગ્ગા

હિત્વા સભાવં રમણીયમેન્તિ;

૭૬૪.

વજન્તિ ભુમિં ગિરયો પુરત્થ

પસારિતે પાદવરે જિનસ્સ,

નિબ્બાતિ અગ્ગી નરકોદરેપિ

ગણ્હન્તિ પાદે પદુમાદયો ચ;

૭૬૫.

ઇદઞ્હિ તે પાદતલે યતીસ

સનાભિ નેમિ ઘટિકાવલીહિ,

સુસણ્ઠિતં ચા’રસહસ્સવન્તં

સન્દિસ્સતે ચક્કવરં મહન્તં;

૭૬૬.

તમેવ ચક્કં પરિવારયિત્વા

સિરિવચ્છ સોવત્થિ’વતંસકા ચ,

પાસાદ ભદ્રાસન પુણ્ણપાતિ

સિતાતપત્તાસિ મયૂરહત્થા;

૭૬૭. ¶

નીલાદિભેદા કમલુપ્પલા ચ

સમેરુ સત્તદ્દિ મહાસમુદ્દા,

સત્તાપગા સત્ત મહાસરા ચ

હિમાલયો ચક્કવાળદ્દિકો ચ;

૭૬૮.

ચન્દક્કતારા ચ છદેવલોકા

પિતામહાવાસ મનુસ્સલોકં,

સુવણ્ણ નાવા સિવિકા ચ સઙ્ખં

કેલાસસેલં ધજતોરણા ચ;

૭૬૯.

ચિન્તામણુણ્હીસ સવચ્છ ધેનૂ

મીનદ્વયં ચક્કવત્તિ સસેનો,

સીહ’સ્સ માતઙ્ગ વિયગ્ઘરાજા

હંસોસભો કિમ્પુરિસો મયૂરો;

૭૭૦.

કોઞ્ચા ચ એરાવણ હત્થિરાજા

સચક્કવાકા મકરાદયો ચ,

નાના મહામઙ્ગલ લક્ખણા તે

વિરોચમાના વિલસન્તિ નિચ્ચં;

૭૭૧.

જાતક્ખણે યસ્સ મહિં પભેજ્જ

વિસાલ સત્તુદ્દય પઙ્કજાનિ,

પટિગ્ગહેસું ચરણાનિ યાનિ

તે તાનિમાનચ્છરિયાનિ લોકે;

૭૭૨.

વન્દાપનત્થાયુ’પનીતકાલે

પિતૂહિ તે દેવલ તાપસિન્દં,

પાદાનિ ગન્ત્વાન જટાસુ તસ્સ

આસું તવે’તઙ્ઘિયુગં અહો ભો;

૭૭૩.

સુદ્ધોદનવ્હસ્સ નરાધિપસ્સ

સન્તોસ તોયેહિ પપૂરિતસ્સ,

સિરો વિસુદ્ધમ્બુ રુહાકરસ્સ

સરોરુ હાસું ચરણાનિ તુય્હં;

૭૭૪. ¶

યે ચઙ્કમે ચઙ્કમણાવસાને

ઓનમ્મ મેરૂદય પબ્બનિણ્દા,

પટિગ્ગહેસું ચરણાનિ યાનિ

તે તાનિમા’નચ્છરિયાનિ લોકે;

૭૭૫.

યં વન્દમાનો તિદિવાધિપો સો

યસ્સાનુભાવેન ગતાયુકોપિ,

સકિયઠાને’સિનપુનાપિ તે’વં

પાદમ્બુજં ધીર!મહાનુભાવં;

૭૭૬.

દેહીનમગ્ગોપિ નિસાકરારિ

માનુન્નતો સો સયિતસ્સ તુય્હં,

પાદસ્સ અન્તમ્પિ ન સક્ખિ દટ્ઠું

અચ્છેર રૂપં ઇદમઙ્ઘિકઞ્જં;

૭૭૭.

ગઙ્ગાય ગઙ્ગાપતિ સન્નિધાને

તીરે તદા નમ્મદ જિમ્હગસ્સ,

પાદસ્સ લઞ્છં અકરી મુનિન્દ

મય્હં’પિ હોતં કરુણા તવેસા;

૭૭૮.

આરાધિતો સચ્ચક તાપસેન

અકા તુવં સચ્ચક બદ્ધસેલે,

પાદસ્સ લઞ્છં જગતો હિતાય

મય્હમ્પિ હોતં તમનુગ્ગહન્તે;

૭૭૯.

સુત્વાન નાથો ગિરમેતમસ્સ

પસ્સં મહાભુતિ’મનાગતેસુ,

લોકસ્સ લોકેહિ મહીય માનો

અકાસિ વામેન પદેન લઞ્છં;

૭૮૦.

સમ્બોધિતો અટ્ઠમ સારદસ્મિં

વેસાખમાસે મુણિ પુણ્ણમાયં,

પાદસ્સ’ભિઞ્ઞાણમકા’પરણ્હે

સદેવકે સસ્સમણે મહેન્તે;

૭૮૧. ¶

પતઙક્ગિકા સિત્થક મત્થકમ્હિ

યથઙ્કિતા ખત્તિય મુદ્દિકાય,

આસેવ’મેવં જિનપાદલઞ્છં

સમન્તકૂટમ્હિ નમસ્સનીયં;

૭૮૨.

અકાલમેઘો ચ તતો પવસ્સિ

વસ્સિંસુ નાનારતનાનિ ખમ્હા,

તથા પરિતો કુસુમમ્બરાનિ

સુવણ્ણચુણ્ણાનિ જિનેકવણ્ણા;

૭૮૩.

તતો’પગન્ત્વા સુગતેભગામી

તસ્મિં નિતમ્બે ગિરિગબ્ભરાયં,

દિવાવિહારાય નિસીદિ યત્થ

સુપાકટં તં ભગવાગુહા’તિ;

૭૮૪.

તતોરહન્તા સુગતોરસા તે

ગન્ધાદિના સાધુ મહેત્વ સબ્બે,

વન્દિત્વ કત્વાન પદક્ખિણન્તં

તહં તહં’કંસુ દિવાવિહારં;

૭૮૫.

લતઙ્ગનાયો વિટપીધવાન

માલમ્બ સાખાપુથુલં’સપસ્સે,

સુફુલ્લ નમઞ્જૂકર મઞ્જરીહિ

નમસ્સમાના’વ સદોનતગ્ગા;

૭૮૬.

તિટ્ઠન્તિ રુક્ખા નટકા’વ તત્થ

સુફુલ્લ સાખાકર’મુક્ખિપિત્વા,

નમસ્સમાના વિય ઓનતગ્ગા

વત્તન્તિ માનચ્છરિયાનિ નિચ્ચં;

૭૮૭.

તથેવ ઉચ્ચાવચ પબ્બતા ચ

નમસ્સમાના વિય પાદલઞ્છં,

તિટ્ઠન્તિ નિન્નગ્ગ સિખા સમન્તા

ઇદમ્પિ નિચ્ચબભુતમેવ તત્થ;

૭૮૮. ¶

તસ્મિં નગે પાદવરઙ્કિતસ્મિં

ખલમણ્ડલોકાસ પદેસમત્તે,

સમોસરન્તે બહુકે જનેપિ

હોતેવ ઓકાસમ,હો પદઙ્કં;

૭૮૯.

સમોસરિત્વાન મહેત્વ સત્તે

નિક્ખન્તમત્તે જલદા સમેચ્ચ,

સોધેન્તિ માલ’મ્બુવહેહિ સાધુ

ઇદમ્પિ નિચ્ચબ્ભુતમેવ તત્થ;

૭૯૦.

પાદેન ફુટ્ઠસ્સ સિલાતલસ્સ

એતાદિસાનચ્છરિયાનિ હોન્તિ,

લોકેકનાથસ્સ અનાસવસ્સ

મહબ્ભુતં કોનુ કથં ભણેય્ય;

૭૯૧.

દિવાવિહારં ભગવા સસઙ્ઘો

કત્વાન તસ્મિં પન કિઞ્ચિકાલં,

મહીયમાનેસુ સદેવકેસુ

તતો ગતો રોહણમમ્બરમ્હા;

૭૯૨.

તસ્મિં સસઙ્ઘો મુનિ દીઘવાપિયં

થૂપસ્સ ઠાને પરમાય ભુમિયા,

ગરું કરોન્તો પન તં મહીતલં

નિરોધભાવેન નિસીદિ સત્રજો;

૭૯૩.

તતો’નુરાધં ભગવા નભમ્હા

ગન્ત્વાન બોધિટ્ઠિતભુમિયા ચ,

ઠાને મહામઙ્ગલચેતિયસ્સ

તથેવ અક્ખન્તિનહિતસ્સ ઠાને;

૭૯૪.

નિસીદિ પત્વાન નિરાધપીતિં

સસાવકો પેક્ખમ’નાગતદ્ધં,

પતિટ્ઠિતા મે પન બોધિધાતુ

કરોન્તિ લોકે’તિ જનસ્સ વુદ્ધિં;

૭૯૫. ¶

વુટ્ઠાય તુટ્ઠો ભગવા નિરોધા

ગતો સિલાથૂપવરસ્સ ઠાનં,

ઠિતો તહિં ધમ્મમથુદ્દિસિત્વા

ગતો નભા જેતવનં સુરમ્મં;

૭૯૬.

એવં સો ધમ્મરાજા જનહિતવિહિતો વીત દોસારિવગ્ગો

લઙ્કારામાય રમ્મે સુમનગિરિસિરે’કાસિ યં પાદલઞ્છં

તં વો સગ્ગા’પવગ્ગં દદતિ મુનિસમં ચિત્ત મત્તે પસન્ને

તસ્મા ભો!ભો! પહટ્ઠા નમથ મહથ તં સાધુ સાધુપ્પસત્થં;

ઇતિ સમન્તકૂટ વણ્ણના નિટ્ઠિતા.

ગ્રન્થ સમાપ્તિય.

૧.

અનન્તરા સમત્તાયં સુમણદ્દિસુ વણ્ણના,

તથેવ સાધૂ સઙ્કપ્પા ખિપ્પં પપ્પોન્તુ પાણિનં;

૨.

યો યાચિતો’રઞ્ઞવાસી ગુણાધાર સુધીમતા,

રાહુલત્થેરનામેન વિસ્સુતેન મહીતલે;

૩.

ભુવનોદરમ્હિ પઞ્ઞાતો રવીવમ્બર મણ્ડલે,

અરઞ્ઞરતનાનન્દ મહાથેરો મહાગણી;

૪.

જીવિતં વિય યો સત્થુસાસનસ્સ મહાકવી,

સારો સુપ્પટિપત્તીસુ સત્થસાગર પારગો;

૫.

તસ્સ સિસ્સો’સિ યો વિપ્પગામ વંસેક કેતુકો

ઞાતાગમો’રઞ્ઞવાસી સીલાદિ ગુણભૂસણો;

૬.

યો’કા સીહલભાસાય સીહલં સદ્દલક્ખણં,

તેન વેદેહથેરેન કતાયમ્પિયસીલિના;

સિદ્ધિરત્થુ.