📜

નમો તસ્સ ભગવતો અરહતો સમ્માસમ્બુદ્ધસ્સ

વિનયવિનિચ્છયટીકા

(પઠમો ભાગો)

ગન્થારમ્ભકથા

(ક)

આદિચ્ચવંસમ્બરપાતુભૂતં;

બ્યામપ્પભામણ્ડલદેવચાપં;

ધમ્મમ્બુનિજ્ઝાપિતપાપઘમ્મં;

વન્દામહં બુદ્ધ મહમ્બુવન્તં.

(ખ)

પસન્નગમ્ભીરપદાળિસોતં;

નાનાનયાનન્તતરઙ્ગમાલં;

સીલાદિખન્ધામિતમચ્છગુમ્બં;

વન્દામહં ધમ્મ મહાસવન્તિં.

(ગ)

સીલોરુવેલં ધુતસઙ્ખમાલં;

સન્તોસતોયં સમથૂમિચિત્તં;

પધાનકિચ્ચં અધિચિત્તસારં;

વન્દામહં સઙ્ઘ મહાસમુદ્દં.

(ઘ)

યે તન્તિધમ્મં મુનિરાજપુત્તા;

યાવજ્જકાલં પરિપાલયન્તા;

સંવણ્ણનં નિમ્મલમાનયિંસુ;

તે પુબ્બકે ચાચરિયે નમામિ.

(ઙ)

યો ધમ્મસેનાપતિતુલ્યનામો;

તથૂપમો સીહળદીપદીપો;

મમં મહાસામિમહાયતિન્દો;

પાપેસિ વુડ્ઢિં જિનસાસનમ્હિ.

(ચ)

ટીકા કતા અટ્ઠકથાય યેન;

સમન્તપાસાદિકનામિકાય;

અઙ્ગુત્તરાયટ્ઠકથાય ચેવ;

સત્થન્તરસ્સાપિ ચ જોતિસત્થં.

(છ)

નિકાયસામગ્ગિવિધાયકેન;

રઞ્ઞા પરક્કન્તિભુજેન સમ્મા;

લઙ્કિસ્સરેનાપિ કતોપહારં;

વન્દે ગરું ગારવભાજનં તં.

(જ)

નમસ્સમાનોહમલત્થમેવં;

વત્થુત્તયં વન્દિતવન્દનેય્યં;

યં પુઞ્ઞસન્દોહમમન્દભૂતં;

તસ્સાનુભાવેન હતન્તરાયો.

(ઝ)

યો બુદ્ધઘોસાચરિયાસભેન;

વિઞ્ઞુપ્પસત્થેનપિ સુપ્પસત્થો;

સો બુદ્ધદત્તાચરિયાભિધાનો;

મહાકવી થેરિયવંસદીપો.

(ઞ)

અકાસિ યં વિનયવિનિચ્છયવ્હયં;

સઉત્તરં પકરણમુત્તમં હિતં;

અપેક્ખતં વિનયનયેસુ પાટવં;

પુરાસિ યં વિવરણમસ્સ સીહળં.

(ટ)

યસ્મા ન દીપન્તરિકાનમત્થં;

સાધેતિ ભિક્ખૂનમસેસતો તં;

તસ્મા હિ સબ્બત્થ યતીનમત્થં;

આસીસમાનેન દયાલયેન.

(ઠ)

સુમઙ્ગલત્થેરવરેન યસ્મા;

સક્કચ્ચ કલ્યાણમનોરથેન;

નયઞ્ઞુનારઞ્ઞનિવાસિકેન;

અજ્ઝેસિતો સાધુગુણાકરેન.

(ડ)

આકઙ્ખમાનેન ચિરપ્પવત્તિં;

ધમ્મસ્સ ધમ્મિસ્સરદેસિતસ્સ;

ચોળપ્પદીપેન ચ બુદ્ધમિત્ત-

ત્થેરેન સદ્ધાદિગુણોદિતેન.

(ઢ)

તથા મહાકસ્સપઅવ્હયેન;

થેરેન સિક્ખાસુ સગારવેન;

કુદિટ્ઠિમત્તેભવિદારકેન;

સીહેન ચોળાવનિપૂજિતેન.

(ણ)

યો ધમ્મકિત્તીતિ પસત્થનામો;

તેનાપિ સદ્ધેન ઉપાસકેન;

સીલાદિનાનાગુણમણ્ડિતેન;

સદ્ધમ્મકામેનિધ પણ્ડિતેન.

(ત)

સદ્ધેન પઞ્ઞાણવતા વળત્તા-;

મઙ્ગલ્યવંસેન મહાયસેન;

આયાચિતો વાણિજભાણુનાપિ;

વરઞ્ઞુના સાધુગુણોદયેન.

(થ)

તસ્મા તમારોપિય પાળિભાસં;

નિસ્સાય પુબ્બાચરિયોપદેસં;

હિત્વા નિકાયન્તરલદ્ધિદોસં;

કત્વાતિવિત્થારનયં સમાસં.

(દ)

અવુત્તમત્થઞ્ચ પકાસયન્તો;

પાઠક્કમઞ્ચાપિ અવોક્કમન્તો;

સંવણ્ણયિસ્સામિ તદત્થસારં;

આદાય ગન્થન્તરતોપિ સારં.

(ધ)

ચિરટ્ઠિતિં પત્થયતા જનાનં;

હિતાવહસ્સામલસાસનસ્સ;

મયા સમાસેન વિધીયમાનં;

સંવણ્ણનં સાધુ સુણન્તુ સન્તોતિ.

ગન્થારમ્ભકથાવણ્ણના

૧-૫

. સુવિપુલામલસદ્ધાપઞ્ઞાદિગુણસમુદયાવહં સકલજનહિતેકહેતુજિનસાસનટ્ઠિતિમૂલભૂતં વિનયપ્પકરણમિદમારભન્તોયમાચરિયો પકરણારમ્ભે રતનત્તયપ્પણામપકરણાભિધાનાભિધેય્યકરણપ્પકારપયોજનનિમિત્તકત્તુપરિમાણાદીનિ દસ્સેતુમાહ ‘‘વન્દિત્વા’’તિઆદિ. તત્થ રતનત્તયં નામ.

‘‘ચિત્તીકતં મહગ્ઘઞ્ચ, અતુલં દુલ્લભદસ્સનં;

અનોમસત્તપરિભોગં, રતનં તેન વુચ્ચતી’’તિ. (દી. નિ. અટ્ઠ. ૨.૩૩; સં. નિ. અટ્ઠ. ૩.૫.૨૨૩; ખુ. પા. અટ્ઠ. ૬.૩; સુ. નિ. અટ્ઠ. ૧.૨૨૬; મહાનિ. અટ્ઠ. ૫૦) –

નિદ્દિટ્ઠસભાવં

‘‘બુદ્ધો સબ્બઞ્ઞુતઞ્ઞાણં, ધમ્મો લોકુત્તરો નવ;

સઙ્ઘો મગ્ગફલટ્ઠો ચ, ઇચ્ચેતં રતનત્તય’’ન્તિ. –

વિભાવિતપ્પભેદં સકલભવદુક્ખવિનિવારણં તિભવેનેકપટિસરણં વત્થુત્તયં.

તસ્સ પણામો નામ પણામકિરિયાનિપ્ફાદિકા ચેતના. સા તિવિધા કાયપણામો વચીપણામો મનોપણામોતિ. તત્થ કાયપણામો નામ રતનત્તયગુણાનુસ્સરણપુબ્બિકા અઞ્જલિકમ્માદિકાયકિરિયાવસપ્પવત્તિકા કાયવિઞ્ઞત્તિસમુટ્ઠાપિકા ચેતના. વચીપણામો નામ તથેવ પવત્તા નાનાવિધગુણવિસેસવિભાવનસભાવથોમનાકિરિયાવસપ્પવત્તિકા વચીવિઞ્ઞત્તિસમુટ્ઠાપિકા ચેતના. મનોપણામો નામ ઉભયવિઞ્ઞત્તિયો અસમુટ્ઠાપેત્વા કેવલં ગુણાનુસ્સરણેન ચિત્તસન્તાનસ્સ તન્નિન્નતપ્પોણતપ્પબ્ભારતાય ગારવબહુમાનનવસપ્પવત્તિસાધિકા ચેતના.

ઇમસ્સ તાવ રતનત્તયપણામસ્સ દસ્સનં યથાધિપ્પેતત્થસાધનત્થં. ગુણાતિસયયોગેન હિ પણામારહે રતનત્તયે કતો પણામો પુઞ્ઞવિસેસભાવતો ઇચ્છિતત્થાભિનિપ્ફત્તિવિબન્ધકેન ઉપઘાતકેન, ઉપપીળકેન ચ અપુઞ્ઞકમ્મેન ઉપનીયમાનસ્સ ઉપદ્દવજાલસ્સ વિનિવારણેન યથાલદ્ધસમ્પત્તિનિમિત્તકસ્સ પુઞ્ઞકમ્મસ્સ અનુબલપ્પદાનેન ચ તબ્બિપાકસન્તતિયા આયુસુખબલાદિવડ્ઢનેન ચ ચિરકાલપ્પવત્તિહેતુકોતિ યથાધિપ્પેતપકરણનિપ્ફત્તિનિબન્ધનકો હોતિ. અથાપિ સોતૂનઞ્ચ વન્દનીયવન્દનાપુબ્બકેનારમ્ભેન અનન્તરાયેન ઉગ્ગહણધારણાદિક્કમેન પકરણાવબોધપ્પયોજનસાધનત્થં. અપિચ સોતૂનમેવ વિઞ્ઞાતસત્થુકાનં ભગવતો યથાભૂતગુણવિસેસાનુસ્સવનેન સમુપજાતપ્પસાદાનં પકરણે ગારવુપ્પાદનત્થં, અવિઞ્ઞાતસત્થુકાનં પન પકરણસ્સ સ્વાખ્યાતતાય તપ્પભવે સત્થરિ ગારવુપ્પાદનત્થઞ્ચ સોતુજનાનુગ્ગહમેવ પધાનં કત્વા આચરિયેહિ ગન્થારમ્ભે થુતિપ્પણામપરિદીપકાનં ગાથાવાક્યાનં નિક્ખેપો વિધીયતિ. ઇતરથા વિનાપિ તન્નિક્ખેપં કાયમનોપણામેનાપિ યથાધિપ્પેતપ્પયોજનસિદ્ધિતો કિમેતેન ગન્થગારવકરેનાતિ અયમેત્થ સઙ્ખેપો. વિત્થારતો પન પણામપ્પયોજનં સારત્થદીપનિયાદીસુ (સારત્થ. ટી. ૧.ગન્થારમ્ભકથાવણ્ણના; વિ. વિ. ટી. ૨.ગન્થારમ્ભકથાવણ્ણના) દસ્સિતનયેનેવ ઞાતબ્બં.

અભિધાનકથનં પન વોહારસુખત્થં. અભિધેય્યસ્સ સમુદિતેન પકરણેન પટિપાદેતબ્બસ્સ કથનં પકરણસ્સ આરભિતબ્બસભાવદસ્સનત્થં. વિદિતાનિન્દિતસાત્થકસુકરાનુટ્ઠાનાભિ ધેય્યમેવ હિ પકરણં પરિક્ખકજના આરભિતબ્બં મઞ્ઞન્તીતિ. કરણપ્પકારસન્દસ્સનં સોતુજનસમુસ્સાહનત્થં. અનાકુલમસંકિણ્ણતાદિપ્પકારેન હિ વિરચિતં પકરણં સોતારો સોતુમુસ્સહન્તીતિ. પયોજનકથનં પન પકરણજ્ઝાયને સોતુજનસમુત્તેજનત્થં. અસતિ હિ પયોજનકથને અવિઞ્ઞાતપ્પયોજના અજ્ઝાયને બ્યાવટા ન હોન્તીતિ. નિમિત્તકથનં સરિક્ખકજનાનં પકરણે ગારવુપ્પાદનત્થં. પસત્થકારણુપ્પન્નેયેવ હિ પકરણે સરિક્ખકા ગારવં જનેન્તીતિ.

કત્તુકથનં પુગ્ગલગરુકસ્સ પકરણે ગારવો પુગ્ગલગારવેનપિ હોતૂતિ. પરિમાણકથનં અસજ્ઝાયનાદિપસુતાનં સમ્પહંસનત્થં. પકરણપરિમાણસ્સવનેન હિ તે સમ્પહટ્ઠા ‘‘કિત્તકમિદમપ્પકં ન ચિરેનેવ પરિસમાપેસ્સામા’’તિ સજ્ઝાયનાદીસુ વત્તન્તીતિ. આદિ-સદ્દેન સક્કચ્ચસવનનિયોજનં સઙ્ગહિતં, તં સબ્બસમ્પત્તિનિદાનસુતમયઞાણનિપ્ફાદનત્થં. અસક્કચ્ચં સુણમાનસ્સ ચ સવનાભાવતો તંહેતુકસ્સ સુતમયઞાણસ્સાપિ અભાવોતિ. તથા હિ વિક્ખિત્તચિત્તો પુગ્ગલો સબ્બસમ્પત્તિયા વુચ્ચમાનોપિ ‘‘ન મયા સુતં, પુન ભણિતબ્બ’’ન્તિ ભણતિ.

તત્થ પઠમગાથાયં તાવ ‘‘વન્દિત્વા’’તિ ઇમિના તિવિધોપિ પણામો અવિસેસતો દસ્સિતો. વિસેસતો પન ‘‘સેટ્ઠં, અપ્પટિપુગ્ગલં, ભવાભાવકરં, નિરઙ્ગણ’’ન્તિ ઇમેહિ ચતૂહિ પદેહિ વચીપણામો, ‘‘સિરસા’’તિ ઇમિના કાયપ્પણામો, ‘‘બુદ્ધં, ધમ્મં, ગણઞ્ચા’’તિ ઇમેહિ પન તીહિ પદેહિ પણામકિરિયાય કમ્મભૂતં રતનત્તયં દસ્સિતન્તિ દટ્ઠબ્બં.

‘‘વિનયસ્સવિનિચ્છય’’ન્તિ ઇમિના અભિધાનં દસ્સિતં અલુત્તસમાસેન વિનયવિનિચ્છયનામસ્સ દસ્સનતો. તસ્સ અન્વત્થભાવેન સદ્દપ્પવત્તિનિમિત્તભૂતં સકલેનાનેન પકરણેન પટિપાદેતબ્બમભિધેય્યમ્પિ તેનેવ દસ્સિતં. ‘‘સમાસેના’’તિ ચ ‘‘અનાકુલમસંકિણ્ણં, મધુરત્થપદક્કમ’’ન્તિ ચ એતેહિ કરણપ્પકારો દસ્સિતો. ‘‘હિતત્થાયા’’તિ ચ ‘‘પટુભાવકરં વિનયક્કમે’’તિ ચ ‘‘અપારં ઓતરન્તાન’’ન્તિઆદિના ચ પયોજનં. ‘‘ભિક્ખૂનં ભિક્ખુનીન’’ન્તિ ઇમિના બાહિરનિમિત્તં દસ્સિતં. અબ્ભન્તરનિમિત્તં પન બાહિરનિમિત્તભૂતભિક્ખુભિક્ખુનિવિસયા કરુણા, સા આચરિયસ્સ પકરણારમ્ભેનેવ વિઞ્ઞાયતીતિ વિસું ન વુત્તા. ‘‘પવક્ખામી’’તિ ઇમિના સમાનાધિકરણભાવેન લબ્ભમાનો ‘‘અહ’’ન્તિ સુદ્ધકત્તા સામઞ્ઞેન દસ્સિતો. વિસેસતો પન પકરણાવસાને –

‘‘રચિતો બુદ્ધદત્તેન, સુદ્ધચિત્તેન ધીમતા;

સુચિરટ્ઠિતિકામેન, સાસનસ્સ મહેસિનો’’તિ. (ઉ. વિ. ૯૬૧) –

ઇમાય ગાથાય ચેવ ‘‘ઇતિ તમ્બપણ્ણિયેન પરમવેય્યાકરણેન તિપિટકનયવિધિકુસલેન પરમકવિવરજન હદયપદુમવનવિકસનકરેન કવિવરાસભેન પરમરતિકરવરમધુરવચનુગ્ગારેન ઉરગપુરેન બુદ્ધદત્તેન રચિતોયં વિનયવિનિચ્છયો’’તિ (વિ. વિ. ૩૧૮૩) ઇમિના વાક્યેન ચ દસ્સિતો – ‘‘માદિસાપિ કવી હોન્તિ, બુદ્ધદત્તે દિવઙ્ગતે’’તિઆદિના પચ્છિમકેહિ ચ પસત્થતરેહિ કવિવરેહિ અભિત્થુતગુણો ભદન્તબુદ્ધદત્તાચરિયો વેદિતબ્બો. હેતુકત્તા ચ તત્થેવ વક્ખમાનો પકરણજ્ઝેસને કતાધીનો બુદ્ધસીહમહાથેરો, સો –

‘‘વુત્તસ્સ બુદ્ધસીહેન;

વિનયસ્સ વિનિચ્છયો;

બુદ્ધસીહં સમુદ્દિસ્સ;

મમ સદ્ધિવિહારિકં;

કતોયં પન ભિક્ખૂનં;

હિતત્થાય સમાસતો’’તિ. (વિ. વિ. ૩૧૭૭-૩૧૭૮) –

એવં દસ્સિતો.

ઉત્તરપ્પકરણસ્સ હેતુકત્તા પન સઙ્ઘપાલમહાથેરો, સોપિ –

‘‘ખન્તિસોરચ્ચસોસિલ્ય-બુદ્ધિસદ્ધાદયાદયો;

પતિટ્ઠિતા ગુણા યસ્મિં, રતનાનીવ સાગરે.

‘‘વિનયાચારયુત્તેન, તેન સક્કચ્ચ સાદરં;

યાચિતો સઙ્ઘપાલેન, થેરેન થિરચેતસા.

‘‘સુચિરટ્ઠિતિકામેન, વિનયસ્સ મહેસિનો;

ભિક્ખૂનં પાટવત્થાય, વિનયસ્સવિનિચ્છયે;

અકાસિં પરમં એતં, ઉત્તરં નામ નામતો’’તિ. (ઉ. વિ. ૯૬૫-૯૬૮) –

એવં દસ્સિતો. ન કેવલમેતે દ્વેયેવ મહાથેરા હેતુકત્તારો, અથ ખો મહાવંસાદીસુ –

‘‘બુદ્ધસ્સ વિય ગમ્ભીર-

ઘોસત્તા તં વિયાકરું;

‘બુદ્ધઘોસો’તિ યો સો હિ;

બુદ્ધો વિય મહીતલે’’તિ. –

આદિના નયેન અભિત્થુતગુણો તિપિટકપરિયત્તિયા અટ્ઠકથાકારો ભદન્તબુદ્ધઘોસાચરિયો ચ અનુસ્સુતિવસેન ‘‘હેતુકત્તા’’તિ વેદિતબ્બો.

કથં? અયં કિર ભદન્તબુદ્ધદત્તાચરિયો લઙ્કાદીપતો સજાતિભૂમિં જમ્બુદીપમાગચ્છન્તો ભદન્તબુદ્ધઘોસાચરિયં જમ્બુદીપવાસિકેહિ પટિપત્તિપરાયનેહિ યુત્તબ્યત્તગુણોપેતેહિ મહાથેરવરેહિ કતારાધનં સીહળટ્ઠકથં પરિવત્તેત્વા સકલજનસાધારણાય મૂલભાસાય તિપિટકપરિયત્તિયા અટ્ઠકથં લિખિતું લઙ્કાદીપં ગચ્છન્તં અન્તરામગ્ગે દિસ્વા સાકચ્છાય સમુપપરિક્ખિત્વા સબ્બલોકાતીતેન અસદિસેન પણ્ડિચ્ચગુણેન રતનનિધિદસ્સને પરમદલિદ્દો વિય બલવપરિતોસં પત્વા અટ્ઠકથમસ્સ કાતુકામતં ઞત્વા ‘‘તુમ્હે યથાધિપ્પેતપરિયન્તલિખિતમટ્ઠકથં અમ્હાકં પેસેથ, મયમસ્સા પકરણં લિખામા’’તિ તસ્સ સમ્મુખા પટિજાનિત્વા તેન ચ ‘‘સાધુ તથા કાતબ્બ’’ન્તિ અજ્ઝેસિતો અભિધમ્મટ્ઠકથાય અભિધમ્માવતારં, વિનયટ્ઠકથાય સઉત્તરં વિનયવિનિચ્છયપકરણઞ્ચ અકાસીતિ અનુસ્સુય્યતેતિ.

‘‘સમાસેના’’તિ ઇમિના ચ પરિમાણમ્પિ સામઞ્ઞેન દસ્સિતં વિત્થારપરિમાણે તસ્સ પરિમાણસામઞ્ઞસ્સ વિઞ્ઞાયમાનત્તા. વિસેસતો પન પરિચ્છેદપરિમાણં ગન્થપરિમાણન્તિ દુવિધં. તત્થ પરિચ્છેદપરિમાણં ઇમસ્મિં પકરણે કથાવોહારેન વુચ્ચતિ.

સેય્યથિદં? – પારાજિકકથા સઙ્ઘાદિસેસકથા અનિયતકથા નિસ્સગ્ગિયકથા પાચિત્તિયકથા પાટિદેસનીયકથા સેખિયકથાતિ ભિક્ખુવિભઙ્ગકથા સત્તવિધા, તતો અનિયતકથં વજ્જેત્વા તથેવ ભિક્ખુનિવિભઙ્ગકથા છબ્બિધા, મહાખન્ધકકથાદિકા ભિક્ખુનિક્ખન્ધકકથાવસાના વીસતિવિધા ખન્ધકકથા, કમ્મકથા, કમ્મવિપત્તિકથા, પકિણ્ણકવિનિચ્છયો, કમ્મટ્ઠાનભાવનાવિધાનન્તિ વિનયવિનિચ્છયે કથાપરિચ્છેદો સત્તતિંસ.

ઉત્તરપ્પકરણે ચ વુત્તનયેન ભિક્ખુવિભઙ્ગે સત્તવિધા કથા, ભિક્ખુનિવિભઙ્ગે છબ્બિધા, તદનન્તરા વિપત્તિકથા, અધિકરણપચ્ચયકથા, ખન્ધકપઞ્હાકથા, સમુટ્ઠાનસીસકથા, આપત્તિસમુટ્ઠાનકથા, એકુત્તરનયકથા, સેદમોચનકથા, વિભઙ્ગદ્વયનિદાનાદિકથા, સબ્બઙ્ગલક્ખણકથા, પરિવારસઙ્કલનકથાતિ છત્તિંસ કથાપરિચ્છેદા.

નિસ્સન્દેહે પન ‘‘અટ્ઠતિંસ કથાપરિચ્છેદા’’તિ વુત્તં, તં એકુત્તરનયે અદસ્સિતેહિપિ દ્વાદસકપન્નરસકનયેહિ સહ સોળસપરિચ્છેદે ગહેત્વા અપ્પકં ઊનમધિકં ગણનૂપગં ન હોતીતિ કત્વા વુત્તન્તિ દટ્ઠબ્બં. ઉભયત્થ કથાપરિચ્છેદપરિમાણં તેસત્તતિવિધં હોતિ. નિસ્સન્દેહે ‘‘પઞ્ચસત્તતિવિધા’’તિ વચને પરિહારો વુત્તનયોવ. ગન્થપરિમાણં પન વિનયવિનિચ્છયે અસીતિગન્થાધિકાનિ ચત્તારિ ગન્થસહસ્સાનિ, ઉત્તરે પઞ્ઞાસગન્થાધિકાનિ નવ ગન્થસતાનિ હોન્તિ. તેન વુત્તં ઉત્તરાવસાને –

‘‘ગાથા ચતુસહસ્સાનિ, સતઞ્ચ ઊનવીસતિ;

પરિમાણતોતિ વિઞ્ઞેય્યો, વિનયસ્સવિનિચ્છયો.

પઞ્ઞાસાધિકસઙ્ખાનિ, નવ ગાથાસતાનિ હિ;

ગણના ઉત્તરસ્સાયં, છન્દસાનુટ્ઠુભેન તૂ’’તિ. (ઉ. વિ. ૯૬૯-૯૭૦);

ઇચ્ચેવં વિનયવિનિચ્છયો ઉત્તરો ચાતિ દ્વે પકરણાનિ તિંસાધિકાનિ પઞ્ચગાથાસહસ્સાનિ. એત્થ ચ વિનયવિનિચ્છયો નામ ઉભતોવિભઙ્ગખન્ધકાગતવિનિચ્છયસઙ્ગાહકપકરણં. તતો પરં પરિવારત્થસઙ્ગાહકપકરણં ઉત્તરો નામ. તેનેવ વક્ખતિ –

‘‘યો મયા રચિતો સારો, વિનયસ્સવિનિચ્છયો;

તસ્સ દાનિ કરિસ્સામિ, સબ્બાનુત્તરમુત્તર’’ન્તિ. (ઉ. વિ. ૨)

તં કસ્મા ઉત્તરનામેન વોહરિયતીતિ? પઞ્હુત્તરવસેન ઠિતે પરિવારે તથેવ સઙ્ગહેતબ્બેપિ તેન પકારેન પારાજિકકથામત્તં દસ્સેત્વા –

‘‘ઇતો પટ્ઠાય મુઞ્ચિત્વા, પઞ્હાપુચ્છનમત્તકં;

વિસ્સજ્જનવસેનેવ, હોતિ અત્થવિનિચ્છયો’’તિ. (ઉ. વિ. ૧૪) –

વત્વા પઞ્હં પહાય તતો પટ્ઠાય ઉત્તરમત્તસ્સેવ દસ્સિતત્તા તથા વોહરીયન્તિ.

‘‘તસ્મા વિનયનૂપાય’’ન્તિઆદિના પન સોતુજનં સક્કચ્ચસવને નિયોજેતિ. સક્કચ્ચસવનપટિબદ્ધા હિ સબ્બાપિ લોકિયલોકુત્તરસમ્પત્તીતિ અયમેત્થ સમુદાયત્થો. અયં પન અવયવત્થો – સો યસ્મા અત્થયોજનક્કમેન પદયોજનં કત્વા વણ્ણિતે સુવિઞ્ઞેય્યો હોતિ, તસ્મા તથા પદયોજનં કત્વા અત્થવણ્ણનં કરિસ્સામ –

સેટ્ઠં અપ્પટિપુગ્ગલં બુદ્ધઞ્ચેવ ભવાભાવકરં ધમ્મઞ્ચેવ નિરઙ્ગણં ગણઞ્ચેવ સિરસા વન્દિત્વા ભિક્ખૂનં ભિક્ખુનીનઞ્ચ હિતત્થાય સમાસેન સમાહિતો વિનયસ્સવિનિચ્છયં વક્ખામીતિ યોજના.

તત્થ સેટ્ઠન્તિ સબ્બે ઇમે પસત્થા અયમેતેસં અતિસયેન પસત્થોતિ સેટ્ઠો. તથા હિ સો ભગવા ‘‘અહઞ્હિ બ્રાહ્મણ જેટ્ઠો સેટ્ઠો લોકસ્સા’’તિ (પારા. ૧૧) વેરઞ્જબ્રાહ્મણસ્સ અત્તનો જેટ્ઠસેટ્ઠભાવસ્સ પરિજાનનવિનિચ્છયહેતુભૂતાહિ ઝાનાદીહિ નિરતિસયગુણસમ્પત્તીહિ સમન્નાગતત્તા –

‘‘ત્વમેવ અસિ સમ્બુદ્ધો, તુવં સત્થા અનુત્તરો;

સદેવકસ્મિં લોકસ્મિં, નત્થિ તે પટિપુગ્ગલો. (દી. નિ. ૨.૩૭૦);

તુવં બુદ્ધો તુવં સત્થા, તુવં મારાભિભૂ મુનિ;

તુવં અનુસયે છેત્વા, તિણ્ણો તારેસિમં પજં.

ઉપધી તે સમતિક્કન્તા, આસવા તે પદાલિતા;

સીહોસિ અનુપાદાનો, પહીનભયભેરવો. (મ. નિ. ૨.૪૦૦; સુ. નિ. ૫૫૦-૫૫૧; થેરગા. ૮૩૯-૯૪૦);

મહાવીર મહાપઞ્ઞ, ઇદ્ધિયા યસસા જલ;

સબ્બવેરભયાતીત, પાદે વન્દામિ ચક્ખુમા’’તિ. (સં. નિ. ૧.૧૫૯; ધ. પ. અટ્ઠ. ૧.૫૬); –

આદીહી નાનાનયેહિ સદેવકેન લોકેન અભિત્થવિયતાય પસત્થતમો, તમેવ સેટ્ઠં પસત્થતમન્તિ અત્થો.

અપ્પટિપુગ્ગલન્તિ નત્થિ એતસ્સ પટિપુગ્ગલો અધિકો, સદિસો વાતિ અપ્પટિપુગ્ગલો. તથા હિ ગુણવસેન અનન્તાપરિમાણાસુ લોકધાતૂસુ અત્તના અધિકસ્સ, સદિસસ્સ વા પુગ્ગલસ્સ અભાવતો –

‘‘ન મે આચરિયો અત્થિ, સદિસો મે ન વિજ્જતિ;

સદેવકસ્મિં લોકસ્મિં, નત્થિ મે પટિપુગ્ગલો’’તિ. (મહાવ. ૧૧) –

અત્તનાવ અત્તનો અવિપરીતો અપ્પટિપુગ્ગલભાવો પટિઞ્ઞાતો, તસ્મા તં અપ્પટિપુગ્ગલં સબ્બલોકુત્તમન્તિ અત્થો.

બુદ્ધન્તિ અનન્તમપરિમેય્યં ઞેય્યમણ્ડલમનવસેસં બુદ્ધવાતિ બુદ્ધો, એતેન અનેકકપ્પકોટિસતસહસ્સં સમ્ભતપુઞ્ઞઞાણસમ્ભારાનુભાવસિદ્ધિધમ્મરૂપકાયસિરિવિલાસપટિમણ્ડિતો સદ્ધમ્મવરચક્કવત્તી સમ્માસમ્બુદ્ધો દસ્સિતો. અથ વા ચત્તારિ સચ્ચાનિ સયં વિચિતોપચિતપારમિતાપરિપાચિતેન સવાસનાનવસેસકિલેસપ્પહાયકેન સયમ્ભુઞાણેન બુજ્ઝીતિ બુદ્ધો. યથાહ –

‘‘અભિઞ્ઞેય્યં અભિઞ્ઞાતં, ભાવેતબ્બઞ્ચ ભાવિતં;

પહાતબ્બં પહીનં મે, તસ્મા બુદ્ધોસ્મિ બ્રાહ્મણા’’તિ. (મ. નિ. ૨.૩૯૨, ૩૯૯; સુ. નિ. ૫૬૩; થેરગા. ૮૨૮);

વિત્થારો પનસ્સ ‘‘બુજ્ઝિતા સચ્ચાનીતિ બુદ્ધો, બોધેતા પજાયાતિ બુદ્ધો’’તિઆદિના (મહાનિ. ૧૯૨; ચૂળનિ. પારાયનત્થુતિગાથાનિદ્દેસ ૯૭; પટિ. મ. ૧.૧૬૨) નિદ્દેસાદીસુ વુત્તનયેન વેદિતબ્બો. સદ્દસિદ્ધિ સાસનિકાનં અવગમનત્થે વત્તમાના બુધ-ધાતુતો ‘‘ભાવકમ્મેસુ ત’’ ઇતિ ઇતો તાતિવત્તમાને ‘‘બુધગમાદિત્થે કત્તરી’’તિ ઇમિના કચ્ચાયનસુત્તેન કત્તરિ તપ્પચ્ચયવિધાનતો વેદિતબ્બા. લોકિયાનં પન બોધનત્થધાતૂનમ્પિ ગમનત્થતાય વુત્તત્તા ગત્યત્થાકમ્મકાદિ સુત્તતો કત્તરિ ત-પ્પચ્ચયકરણેન વેદિતબ્બા.

અથ વા ધાતૂનં અનેકત્થતાય બુધ-ઇચ્ચયં ધાતુ જાગરણવિકસનત્થેસુ વત્તમાનો અકમ્મકોતિ ‘‘પબુદ્ધો પુરિસો, પબુદ્ધં પદુમ’’ન્તિઆદીસુ વિય બુદ્ધવા અઞ્ઞાણનિદ્દાવિગમેન ઞાણચક્ખૂનિ ઉમ્મીલન્તો પબુદ્ધો, ગુણેહિ વા વિકસિતોતિ કત્તરિ સિદ્ધેન બુદ્ધ-સદ્દેન ‘‘બુદ્ધો’’તિ તિભવનેકચૂળામણિપાદપઙ્કજરાગરતનો ભગવા લોકનાથો વુચ્ચતિ, ઇમસ્મિં પક્ખેપિ ગત્યત્થાદિસુત્તે અકમ્મકગ્ગહણેન પચ્ચયવિધાનં દટ્ઠબ્બં.

અથ વા સકમ્મકાનં ધાતૂનં કમ્મવચનિચ્છાય અભાવે અકમ્મકભાવતો ‘‘ફલં સયમેવ પક્ક’’ન્તિઆદીસુ વિય બોધનત્થેયેવ બુધ-ધાતુતો કત્તરિ વિધાનં સિજ્ઝતિ. અથ વા નીલગુણયોગેન પટાદીસુ નીલવોહારો વિય ભાવસાધનં બુદ્ધ-સદ્દં ગહેત્વા બુદ્ધગુણયોગતો ‘‘બુદ્ધો’’તિ વોહરીયતિ. એવમનેકધા સિદ્ધેન બુદ્ધ-સદ્દેન વુચ્ચમાનં તં ભગવન્તં તં ધમ્મરાજન્તિ અત્થો.

‘‘સેટ્ઠં અપ્પટિપુગ્ગલ’’ન્તિ પદદ્વયં ‘‘બુદ્ધ’’ન્તિ એતસ્સ વિસેસનં. એત્થ ચ ‘‘બુદ્ધં, સેટ્ઠં, અપ્પટિપુગ્ગલ’’ન્તિ ઇમેહિ તીહિ પદેહિ નયતો ‘‘ઇતિપિ સો ભગવા અરહં સમ્માસમ્બુદ્ધો’’તિઆદિના (દી. નિ. ૧.૧૫૭; ૩.૬; મ. નિ. ૧.૧૪૭, ૧૪૪; ૩.૪૩૪; સં. નિ. ૧.૨૪૯; ૫.૪૭૯; અ. નિ. ૫.૧૪, ૩૦; ૬.૨૫, ૨૬; નેત્તિ. ૯૩), ‘‘યો વદતં પવરો મનુજેસુ, સક્યમુની ભગવા કતકિચ્ચો’’તિઆદીહિ (વિ. વ. ૮૮૬) ચ અનેકેહિ સુત્તપદેહિ દસ્સિતદૂરાવિદૂરસન્તિકનિદાનહેતુફલસત્તોપકારાવત્થાધમ્મત્થ- લોકુદ્ધારત્તિકત્તયસઙ્ગહિતં સુપરિસુદ્ધં બુદ્ધગુણસમુદયં નિરવસેસં દસ્સેતિ. અયમેવ હિ બુદ્ધગુણાનં નિરવસેસતો દસ્સનૂપાયો, યદિદં નયદસ્સનં. ઇતરથા પટિપદવણ્ણનાય અપરિમિતાનં બુદ્ધગુણાનં કો હિ નામ સમત્થો પરિયન્તં ગન્તું. યથાહ –

‘‘બુદ્ધોપિ બુદ્ધસ્સ ભણેય્ય વણ્ણં;

કપ્પમ્પિ ચે અઞ્ઞમભાસમાનો;

ખીયેથ કપ્પો ચિરદીઘમન્તરે;

વણ્ણો ન ખીયેથ તથાગતસ્સા’’તિ. (દી. નિ. અટ્ઠ. ૩.૧૪૧; મ. નિ. અટ્ઠ. ૨.૪૨૫; ઉદા. અટ્ઠ. ૫૩; અપ. અટ્ઠ. ૨.૭.૨૦; બુ. વં. અટ્ઠ. ૪.૪; ચરિયા. અટ્ઠ. નિદાનકથા, પકિણ્ણકકથા; દી. નિ. ટી. ૧.ગન્થારમ્ભકથાવણ્ણના; મ. નિ. ટી. ૧.ગન્થારમ્ભકથાવણ્ણના; સં. નિ. ટી. ૧.૧.ગન્થારમ્ભકથાવણ્ણના; અ. નિ. ટી. ૧.૧.ગન્થારમ્ભકથાવણ્ણના; વજિર. ટી. ગન્થારમ્ભકથાવણ્ણના; સારત્થ. ટી. ૧.ગન્થારમ્ભકથાવણ્ણના; નેત્તિ. ટી. ગન્થારમ્ભકથાવણ્ણના);

એવમેતેહિ તીહિ પદેહિ નિરવસેસગુણસંકિત્તનથુતિયા વસેન ‘‘વન્દિત્વા’’તિ ઇમિના પણામસ્સ ચ વુત્તત્તા ઇમાય અડ્ઢગાથાય બુદ્ધરતનસઙ્ખાતપઠમવન્દનીયવત્થુવિસયા થુતિપણામસભાવા વન્દના દસ્સિતાતિ દટ્ઠબ્બં.

તદનન્તરં ધમ્મરતનસ્સ પણામં દસ્સેતુમાહ ‘‘ભવાભાવકરં ધમ્મ’’ન્તિ. એત્થ ભવ-સદ્દેન દ્વે ભવા વુત્તા કમ્મભવો, ઉપપત્તિભવોતિ. તત્થ કમ્મભવો ભવતિ એતસ્મા ફલન્તિ ‘‘ભવો’’તિ વુચ્ચતિ. વિપાકક્ખન્ધકટત્તારૂપસઙ્ખાતો પન ઉપપત્તિભવો અવિજ્જાતણ્હુપાદાનસઙ્ખારાદિસહકારિકારણયુત્તેન કુસલાકુસલચેતનાસઙ્ખાતકમ્મભવપચ્ચયેન યથારહં ભવતીતિ ‘‘ભવો’’તિ વુચ્ચતિ. સો પન કામભવરૂપભવઅરૂપભવસઞ્ઞીભવઅસઞ્ઞીભવનેવસઞ્ઞીનાસઞ્ઞીભવ- એકવોકારભવચતુવોકારભવપઞ્ચવોકારભવવસેન નવવિધો. એવમેતેસુ નવસુ ભવેસુ દસવિધોપિ ધમ્મો અત્તાનં ધારેન્તસ્સ પુગ્ગલસન્તાનસ્સ અનુપાદિસેસનિબ્બાનધાતુયા પરં અપ્પટિસન્ધિકતાસાધનેન ભવેસુ, ભવસ્સ વા અભાવં કરોતીતિ ભવાભાવકરો, તં, અપરાપરજાતિપ્પબન્ધસ્સ હેતુસમુગ્ઘાતેન અપ્પવત્તિધમ્મતાપાદકન્તિ અત્થો.

ધમ્મન્તિ અત્તાનં ધારેન્તે ચતૂસુ અપાયેસુ, સંસારે ચ અપતમાને ધારેતીતિ ધમ્મો, સો ચતુમગ્ગફલનિબ્બાનસઙ્ખાતનવલોકુત્તરધમ્મો ચ તપ્પટિપાદકો નવઙ્ગસાસનાપરનામધેય્યચતુરાસીતિસહસ્સધમ્મક્ખન્ધપ્પભેદભિન્નો પરિયત્તિધમ્મો ચાતિ દસવિધો. સોપિ નિપ્પરિયાયધમ્મો, પરિયાયધમ્મો ચાતિ દુવિધો. તત્થ નિપ્પરિયાયધમ્મો નામ અપાયે, સંસારે વા પધાનહેતુભૂતાનં ઉદ્ધમ્ભાગિયાનં, ઓરમ્ભાગિયાનઞ્ચ દસન્નં સંયોજનાનં સમુચ્છિન્દનેન મગ્ગધમ્મો, તસ્સ તંકિચ્ચનિપ્ફત્તિનિમિત્તભાવેન નિબ્બાનધમ્મો ચાતિ પઞ્ચવિધોપિ નિપ્પરિયાયેન પુગ્ગલસન્તાનં ધારેતીતિ કત્વા ‘‘નિપ્પરિયાયધમ્મો’’તિ વુચ્ચતિ. ચત્તારિ પન સામઞ્ઞફલાનિ પટિપ્પસ્સદ્ધિપહાનેન મગ્ગાનુગુણપ્પવત્તિયા, પરિયત્તિ ચ મગ્ગનિબ્બાનાધિગમસ્સ મૂલકારણભાવતોતિ પઞ્ચવિધોપિ પરિયાયધમ્મો નામ.

એત્તાવતા ‘‘સ્વાક્ખાતો ભગવતા ધમ્મો’’તિઆદિના (સં. નિ. ૧.૨૪૯; અ. નિ. ૩.૭૬; દી. નિ. ૩.૬; અ. નિ. ૬.૧૦, ૨૫, ૨૬), ‘‘રાગવિરાગમનેજમસોક’’ન્તિઆદીહિ (વિ. વ. ૮૮૭) ચ સુત્તન્તેહિ વુત્તસ્સ, તદટ્ઠકથાદીસુ ચ વણ્ણિતસ્સ સરણાનુસ્સરણવસેનાપિ સગ્ગમોક્ખસમ્પત્તિપટિલાભકારણસ્સ અનવસેસસ્સ ધમ્મરતનગુણસ્સ નયતો ઉદ્દિટ્ઠત્તા ચ ‘‘વન્દિત્વા’’તિ ઇમિના પણામસ્સ દસ્સિતત્તા ચ ધમ્મરતનસઙ્ખાતસ્સ દુતિયસ્સ વન્દનીયસ્સ થુતિપણામસભાવા વન્દના દસ્સિતાતિ દટ્ઠબ્બં.

તદનન્તરં સઙ્ઘરતનસ્સ વન્દનાસન્દસ્સનત્થં વુત્તં ‘‘ગણઞ્ચેવ નિરઙ્ગણ’’ન્તિ. એત્થ ‘‘રાગો અઙ્ગણં દોસો અઙ્ગણં મોહો અઙ્ગણ’’ન્તિ (વિભ. ૯૨૪) વુત્તેહિ રાગાદિઅઙ્ગણેહિ તદઙ્ગવિક્ખમ્ભનસમુચ્છેદપટિપ્પસ્સદ્ધિનિસ્સરણવિમુત્તિવસેન નિગ્ગતો વિમુત્તોતિ નિરઙ્ગણો, તં નિરઙ્ગણં. અરિયવંસે સીલસમાધિપઞ્ઞાવિમુત્તિવિમુત્તિઞાણદસ્સનસઙ્ખાતેહિ ગુણગણેહિ ગણીયતીતિ ગણો, તં.

એત્તાવતા ‘‘સુપ્પટિપન્નો ભગવતો સાવકસઙ્ઘો’’તિઆદિના (સં. નિ. ૧.૨૪૯; અ. નિ. ૩.૭૬; દી. નિ. ૩.૬; અ. નિ. ૬.૧૦, ૨૫, ૨૬;), ‘‘યત્થ ચ દિન્નં મહપ્ફલમાહુ, ચતૂસુ સુચીસુ પુરિસયુગેસૂ’’તિઆદીહિ (વિ. વ. ૮૮૮) ચ તેહિ તેહિ સુત્તપદેહિ વુત્તાનં, તદટ્ઠકથાદીસુ ચ વણ્ણિતાનં વિમલાતુલનિખિલવિસાલપેસલસીલાદિનાનપ્પકારાનગ્ઘસઙ્ઘરતનગુણાનં સંકિત્તનસભાવાય થુતિયા ચ ‘‘વન્દિત્વા’’તિ એતેન યથાવુત્તસરૂપપભેદપણામસ્સ વુત્તત્તા ચ સઙ્ઘરતનસઙ્ખાતતતિયવન્દનીયવત્થુવિસયા થુતિપ્પણામસઙ્ખાતા વન્દના દસ્સિતાતિ વેદિતબ્બા. સિરસાતિ અત્તપ્પસાદગારવાવહન્તેન મુદ્ધના. વન્દિત્વાતિ પણમિત્વા થોમિત્વા વા.

એવં પઠમગાથાય વન્દનીયસ્સ રતનત્તયસ્સ થુતિપ્પણામસઙ્ખાતં વન્દનં દસ્સેત્વા તદનન્તરાય સન્દસ્સેતબ્બપયોજનાદિપટિપાદિકાય ગાથાય ‘‘ભિક્ખૂન’’ન્તિ ઇમિના કિઞ્ચાપિ સંસારે ભયં ઇક્ખતીતિ ‘‘ભિક્ખૂ’’તિ કલ્યાણપુથુજ્જનેન સદ્ધિં અટ્ઠ અરિયપુગ્ગલા વુચ્ચન્તિ, પાળિયં (પારા. ૪૪-૪૫; વિભ. ૫૧૦) પન ‘‘ભિન્નપટં ધારેતીતિ ભિક્ખુ, ભિક્ખનસીલોતિ ભિક્ખૂ’’તિઆદિના ભિક્ખુસદ્દસ્સ અત્થુદ્ધારવસેન નિબ્બચનન્તરાનિ દસ્સેત્વા પાતિમોક્ખસંવરસંવરણારહસ્સેવ અધિપ્પેતભાવં દસ્સેતું ‘‘સમગ્ગેન સઙ્ઘેન ઞત્તિચતુત્થેન કમ્મેન અકુપ્પેન ઠાનારહેન ઉપસમ્પન્નો, અયં ઇમસ્મિં અત્થે અધિપ્પેતો ભિક્ખૂ’’તિ દસ્સિતા સિક્ખાકામા સાસનાવચારા કુલપુત્તા ઇધાધિપ્પેતા, તેસં ભિક્ખૂનઞ્ચ. ભિક્ખુનીનઞ્ચાતિ અટ્ઠવાચિકઉપસમ્પદાકમ્મેન ઉભતોસઙ્ઘે ઉપસમ્પન્નાતાદિસાયેવ કુલધીતરો દસ્સિતા. એકતોપસમ્પન્નાપિ સામઞ્ઞેન ગય્હન્તિ. એકતોપસમ્પન્નાતિ ચ ભિક્ખુનિસઙ્ઘે ઉપસમ્પજ્જિત્વા યાવ ભિક્ખુસઙ્ઘે ન ઉપસમ્પજ્જન્તિ, તાવ, ભિક્ખુની ચ લિઙ્ગપરિવત્તનેન ભિક્ખુનિભાવપ્પત્તા અધિપ્પેતા, તાસં ભિક્ખુનીનઞ્ચ.

હિતત્થાયાતિ સબ્બસમ્પત્તિનિપ્ફાદકરણત્થાય હિનોતિ ગચ્છતિ યથાધિપ્પેતફલસાધને પવત્તતીતિ હિતન્તિ અરોગતાદિકારણં અમતોસધાદિ વુચ્ચતિ. ઇધ પન સગ્ગમોક્ખસમ્પત્તિસિદ્ધિકારણં પાતિમોક્ખસંવરસીલરક્ખનં વુચ્ચતિ, તદત્થાય.

સમાહિતો સમ્મા આહિતો પવત્તિતો વિનિચ્છયમગ્ગો એતેનાતિ ‘‘સમાહિતો’’તિ પકરણકારકો દસ્સિતો. અથ વા સમ્મા આહિતં વિનયવિનિચ્છયે ઠપિતં પવત્તિતં ચિત્તમેતસ્સાતિ ‘‘સમાહિતચિત્તો’’તિ વત્તબ્બે ઉત્તરપદલોપેન ‘‘સમાહિતો’’તિ વુત્તો. પરમગમ્ભીરસુદુત્તરવિનયપિટકત્થવિનિચ્છયે પવત્તનારહસ્સ ઇમિના વિસેસનેન અત્તનિ સમાહિતચિત્તપ્પવત્તિનિમિત્તભૂતો અત્તનો ઞાણસ્સ પદટ્ઠાનભૂતો સમાધિ દસ્સિતો તેન સમાધિના સમાહિતો હુત્વાતિ અત્થો.

પવક્ખામીતિ પકારેન વક્ખામિ, યેન પકારેન વિનયવિનિચ્છયે વુત્તે અજ્જતના મન્દસતિમતિવીરિયા પટિપજ્જનકા ગમ્ભીરતરં વિનયપિટકત્થવિનિચ્છયં સુખેન ઉગ્ગણ્હિતું, ધારેતુઞ્ચ સક્કોન્તિ, તાદિસેન પકારવિસેસેન વક્ખામીતિ અત્થો. સમાસેનાતિ સમસનં સંખિપનં સમાસો, તેન, સંખિત્તરુચિકાનમુગ્ઘાટિતઞ્ઞૂનં કતાધિકારાનં ઞાણુત્તરાનં પુગ્ગલાનઞ્ચ પપઞ્ચભીરુકાનં ગહણધારણે મન્દયન્તાનં મન્દબુદ્ધીનઞ્ચ ઉપકારકેન નાતિવિત્થારક્કમેનાતિ અત્થો. વિનયસ્સાતિ વિનયપિટકસ્સ. તઞ્હિ –

‘‘વિવિધવિસેસનયત્તા;

વિનયનતો ચેવ કાયવાચાનં;

વિનયત્થવિદૂહિ અયં;

વિનયો ‘વિનયો’તિ અક્ખાતો’’તિ. (દી. નિ. અટ્ઠ. ૧.પઠમસઙ્ગીતિકથા; પારા. અટ્ઠ. ૧.પઠમમહાસઙ્ગીતિકથા; ધ. સ. અટ્ઠ. નિદાનકથા) –

વુત્તેહિ અત્થવિસેસેહિ ‘‘વિનયો’’તિ વુચ્ચતિ. તસ્સ એવં સન્દસ્સિતસભાવસ્સ ‘‘વિનયો નામ સાસનસ્સ આયૂ’’તિ (દી. નિ. અટ્ઠ. ૧.પઠમસઙ્ગીતિકથા; પારા. અટ્ઠ. ૧.પઠમસઙ્ગીતિકથા; ખુ. પા. અટ્ઠ. ૫.પઠમમહાસઙ્ગીતિકથા) સઙ્ગીતિકારકેહિ મહાકસ્સપાદીહિ અભિત્થુતગુણસ્સ વિનયપિટકુત્તમસ્સ. વિનિચ્છયન્તિ વિસેસેન, વિવિધેન વા આકારેન વિપ્પટિપત્તિનીહરણવસેન ચીયતિ વિભજીયતીતિ ‘‘વિનિચ્છયો’’તિ લદ્ધનામં વિભજનં, વિનયવિનિચ્છયં નામ પકરણન્તિ વુત્તં હોતિ. ‘‘વિનયસ્સવિનિચ્છય’’ન્તિ ચ અલુત્તસમાસોયં ‘‘દેવાનંપિયતિસ્સો, કણ્ઠેકાળો’’તિઆદીસુ વિય.

એવં દુતિયગાથાય કત્તુનિમિત્તપયોજનાભિધાનાભિધેય્યપકરણપ્પકારેકદેસં દસ્સેત્વા સક્કચ્ચસવનકારણનિદસ્સનમુખેનાપિ પકરણપ્પકારાદિં દસ્સેતુમાહ ‘‘અનાકુલ’’મિચ્ચાદિ. તત્થ અનાકુલન્તિ નત્થિ એત્થ સદ્દતો, અત્થતો, વિનિચ્છયતો વા આકુલં પુબ્બાપરવિરોધો, મિસ્સતા વાતિ અનાકુલો, વિનયવિનિચ્છયો, તં વદતો મે નિબોધથાતિ સમ્બન્ધો. અસંકિણ્ણન્તિ નિકાયન્તરલદ્ધીહિ અસમ્મિસ્સં.

મધુરત્થપદક્કમન્તિ પદાનં કમો પદક્કમો, પદગતિ, સદ્દાનમુચ્ચારણન્તિ અત્થો. મધુરો અત્થો ચ પદક્કમો ચ યસ્સ સો મધુરત્થપદક્કમો, તં –

‘‘પદાસત્તં પદત્થાનં, મધુરત્થમુદીરિતં;

યેન મજ્જન્તિ ધીમન્તો, મધુનેવ મધુબ્બતા’’તિ. –

ઇમિના લક્ખણેન સદ્દાનમત્થાનઞ્ચ વસેન પદાસત્તાપરનામધેય્યમાધુરિયાલઙ્કારેન સમલઙ્કતત્તા મધુરત્થપદક્કમં.

પટુભાવકરન્તિ પટતિ ગચ્છતિ પજાનાતીતિ પટુ, પઞ્ઞવા, પટુનો ભાવો, સદ્દપ્પવત્તિનિમિત્તભૂતા પઞ્ઞા, તં પટુભાવં પઞ્ઞાવિસેસં કરોતિ જનેતીતિ પટુભાવકરો, તં, પઞ્ઞાવિસેસજનકન્તિ અત્થો. એતં વિનયસ્સ વિનિચ્છયન્તિ યોજના. પરમન્તિ ઉત્તમં. વિનયક્કમેતિ વિનયપિટકે, તદત્થે ચ, પવત્તિક્કમે પટુભાવકરન્તિ અત્થો.

એવં તતિયગાથાય પકરણગુણાપદેસેન સોતુજનં સમુસ્સાહેત્વા ઇદાનિ ‘‘અપાર’’ન્તિઆદિચતુત્થગાથાય પકરણઞ્ચ તન્નિસ્સયં વિનયપિટકઞ્ચ નાવાસાગરભાવેન દસ્સેત્વા તિરોભૂતોપમેય્યોપમાનભેદેન રૂપકાલઙ્કારેન પકરણગુણં પકાસેન્તો સોતુજનં સમુત્તેજેતિ. તત્થ અપારન્તિ નત્થિ પારં એતસ્સાતિ અપારો, વિનયસાગરો. સો હિ પુરિમબુદ્ધુપ્પાદેસુ સાસનં પસીદિત્વા વિનયપિટકે ઉગ્ગહણધારણપટિપાદનપટિપત્તિવસેન અકતાધિકારેહિ પુગ્ગલેહિ દુરધિગમનીયધમ્મત્થનિરુત્તિપટિભાનપરિયન્તતાય ‘‘અપારો’’તિ વુચ્ચતિ.

ઓતરન્તાનન્તિ સજ્ઝાયનસવનધારણાદિવસેન અજ્ઝોગાહન્તાનં. સારન્તિ નિબ્બાનસમ્પાપકભાવેન સારભૂતાય અરિયમગ્ગસમ્ભારાય પુબ્બભાગપટિપત્તિયા મૂલભૂતપાતિમોક્ખસંવરસઙ્ખાતસીલસારપ્પકાસકતાય સારં. વિનયસાગરન્તિ વિનયપિટકસઙ્ખાતં સાગરં. વિનયો હિ સિક્ખાપદપઞ્ઞત્તિયા કાલપ્પત્તજાનનસ્સાપિ ધમ્મસેનાપતિઆદીનમ્પિ અવિસયત્તા અતિગમ્ભીરાતિવિત્થિણ્ણભાવેન સાગરો વિયાતિ સાગરો, વિનયો ચ સો સાગરો ચાતિ વિનયસાગરો, તં, અગાધાપારગુણયોગતો સાગરોપમં વિનયપિટકન્તિ અત્થો.

દુતિયગાથાય ‘‘ભિક્ખૂનં ભિક્ખુનીન’’ન્તિ વત્વાપિ ‘‘હિતત્થાયા’’તિ ઇમિના સમ્બન્ધત્તા ચ વાક્યન્તરેહિ અન્તરિતભાવેન દૂરત્તા ચ તં અનાદિયિત્વા એત્થ વિનયસાગરજ્ઝોગાહનતદત્થપટિપજ્જનારહકત્તુવિસેસસન્દસ્સનત્થાય ‘‘ભિક્ખૂનં ભિક્ખુનીન’’ન્તિ પુન વુત્તન્તિ દટ્ઠબ્બં. નાવા વિય ભૂતો નાવાભૂતો, તં, નાવાટ્ઠાનિયં મહાનાવાસદિસન્તિ અત્થો. મનોરમન્તિ મનો રમતિ એત્થ, એતેનાતિ વા મનોરમો, તં, અજ્ઝાયનવોહારપસુતાનં પટિપત્તિપરાયનાનઞ્ચ સાધૂનં મનોરમન્તિ અત્થો.

એત્તાવતા પકરણગુણસંકિત્તનેન સોતુજનં સમુત્તેજેત્વા ઇદાનિ સક્કચ્ચસવને નિયોજેન્તો ‘‘તસ્મા વિનયનૂપાય’’ન્તિઆદિમાહ. તત્થ તસ્માતિ યસ્મા યથાવુત્તં અનાકુલતાદિવિવિધાનગ્ઘગુણાલઙ્કારપટિમણ્ડિતં, તેન હેતુનાતિ અત્થો. વિનયનૂપાયન્તિ વિવિધાકારેન, વિસેસનયતો વા કાયવાચાનં નયનં દમનં અકત્તબ્બતો નિવત્તેત્વા કત્તબ્બેસુ નિયોજનં વિનયનં, ઉપેચ્ચ તં ફલં આયતિ ઉપ્પજ્જતીતિ ઉપાયો, હેતુ, વિનયનસ્સ ઉપાયો વિનયનૂપાયો, તં, કાયજીવિતાનપેક્ખાનં સિક્ખાકામાનં પેસલાનં ભિક્ખૂનં ભિક્ખુનીનં કાયવાચાનં અનનુલોમિકવિપ્ફન્દિતાપનયનસઙ્ખાતદમનસ્સ કારણભૂતન્તિ વુત્તં હોતિ.

એત્તાવતા અત્તના કત્તુમિચ્છિતે પકરણે પણ્ડિતાનં પવત્તિહેતુભૂતાનં અનાકુલતાદિગુણાનં વિભાવનવસેન ‘‘અનાકુલ’’ન્તિઆદિવિસેસનાનિ વત્વા ઇદાનિ સક્કચ્ચસવનાવબોધે વિસયં વિસેસિતબ્બં દસ્સેતુમાહ ‘‘વિનયસ્સવિનિચ્છય’’ન્તિ. એત્થ ચ દુતિયગાથાય ‘‘વિનયસ્સવિનિચ્છય’’ન્તિ ‘‘પવક્ખામી’’તિ કિરિયાય કમ્મદસ્સનવસેન વુત્તં, તં ઇધ આનેત્વા સમ્બન્ધિયમાનમ્પિ દૂરસમ્બન્ધં હોતીતિ તમનાનેત્વા ‘‘નિબોધથા’’તિ ઇમિસ્સા કિરિયાય કમ્મસન્દસ્સનત્થં ‘‘વિનયસ્સવિનિચ્છય’’ન્તિ વુત્તત્તા પુનરુત્તિદોસાભાવોતિ દટ્ઠબ્બં.

અવિક્ખિત્તેન ચિત્તેનાતિ એત્થ વિવિધે આરમ્મણે ખિત્તં પેસિતં વિક્ખિત્તં, ઉદ્ધચ્ચવિચિકિચ્છાદિપરેતં અસમાહિતં ચિત્તં, ન વિક્ખિત્તં અવિક્ખિત્તં, તપ્પટિપક્ખં સમાહિતં કુસલચિત્તં, તેન, એતસ્સ પકરણુત્તમસ્સ સવનાદિબ્યાપારં વિના નાનારમ્મણેસુ પવત્તિવસેન વિક્ખેપમનાપન્નેન સમાહિતેન ચિત્તેનાતિ અત્થો. ‘‘અવિક્ખિત્તેન…પે… નિબોધથા’’તિ વદન્તેન ચ ‘‘અવિક્ખિત્તસ્સાયં ધમ્મો, નાયં ધમ્મો વિક્ખિત્તસ્સા’’તિ વચનતો વિક્ખિત્તસ્સ ધમ્મેસુ દાયાદાભાવતો અત્તનો પકરણત્થભૂતાય અધિસીલસિક્ખાય સમ્માપટિપજ્જનાપદેસો કતો હોતિ.

વદતો મેતિ એત્થ ‘‘ગારવેન ચા’’તિ પાઠસેસો. તત્થાયમત્થો – ભાસમાને મયિ ગારવેન, યથાવુત્તેન કારણેન ચાતિ સામિભુમ્માનમવિસેસતાય ‘‘મે’’તિ સામિવચનસ્સ ‘‘મયી’’તિ અત્થસમ્ભવતો અયમત્થો વુત્તો. પકરણસ્સ અનાકુલતાદિગુણસમન્નાગતત્તા ચ વત્તરિ મયિ ગારવેન ચ સમાહિતેન ચેતસાતિ અધિપ્પાયો. નિબોધથાતિ વાક્યત્થપદત્થં સન્ધાયભાસિતત્થભાવત્થાદિવસેન નિસેસતો બોધથ, સક્કચ્ચં સુત્વા વિનયવિનિચ્છયં બુજ્ઝથ વિજાનાથાતિ અત્થો, ચિન્તાભાવનામયઞાણાનં મૂલભૂતપકરણવિસયં સુતમયઞાણં નિપ્ફાદેથાતિ અધિપ્પાયો.

ગન્થારમ્ભકથાવણ્ણના નિટ્ઠિતા.

ભિક્ખુવિભઙ્ગો

પારાજિકકથા

પઠમપારાજિકકથાવણ્ણના

૬. એવં પઞ્ચહિ ગાથાહિ રતનત્તયપણામાદિં દસ્સેત્વા ઇદાનિ યથાપટિઞ્ઞાતવિનિચ્છયં દસ્સેતુમાહ ‘‘તિવિધે’’તિઆદિ. તત્થ ‘‘તિવિધે’’તિઆદિના પઠમપારાજિકસિક્ખાપદવિનિચ્છયં દસ્સેતિ. તિવિધેતિ વચ્ચપસ્સાવમુખમગ્ગાનં વસેન તિપ્પકારે મગ્ગેતિ ઇમિના સમ્બન્ધો. તિલમત્તમ્પીતિ તિલબીજમત્તમ્પિ અઙ્ગજાતન્તિ સમ્બન્ધો. મગ્ગેતિ વચ્ચપસ્સાવાનં નિક્ખમનદ્વારતાય, અન્નપાનપિત્તસેમ્હાદીનં પવેસનનિક્ખમનદ્વારતાય ચ મગ્ગવોહારગતે સરીરપ્પદેસે, અલ્લોકાસેતિ સમ્બન્ધો. ‘‘મગ્ગેસુ તિલમત્તમ્પિ, તીસુ સેવનચેતનો’’તિ વત્તબ્બેપિ ‘‘તિવિધે’’તિ પકારવાચિવિધસદ્દોપાદાનેન સજાતિસઙ્ગહવસેન તીહિ રાસીહિ સઙ્ગહેત્વા પભેદવસેન તિંસવિધો મગ્ગો દસ્સિતો હોતિ.

સેય્યથિદં? પારાજિકવત્થુભૂતમુખાદિમગ્ગાનં નિસ્સયભૂતે સત્તે દસ્સેતું ‘‘તિસ્સો ઇત્થિયો મનુસ્સિત્થી અમનુસ્સિત્થી તિરચ્છાનગતિત્થી’’તિઆદિના (પારા. ૫૬) નયેન પાળિયં દસ્સિતમનુસ્સામનુસ્સતિરચ્છાનગતિત્થીનં પચ્ચેકં તિણ્ણં મગ્ગાનં વસેન નવ મગ્ગા, તથેવ દસ્સિતાનં તિણ્ણં ઉભતોબ્યઞ્જનકાનં વસેન નવ મગ્ગા, તિણ્ણં પન પણ્ડકાનં મુખમગ્ગવચ્ચમગ્ગાનં વસેન પચ્ચેકં દ્વે દ્વે મગ્ગાતિ છ મગ્ગા, તથા તિણ્ણં પન પુરિસાનન્તિ એવં તિંસવિધો હોતિ.

સેવનચેતનોતિ સેવને મેથુનપયોગે ચેતના અસ્સાતિ વિગ્ગહો, મેથુનરાગૂપસંહિતાય ચેતનાય સમન્નાગતોતિ અત્થો. અલ્લોકાસેતિ તિંસમગ્ગાનમઞ્ઞતરે મગ્ગે પકતિવાતેન અસંફુટ્ઠે અલ્લપદેસે, ઇમિના બાહિરં પારાજિકક્ખેત્તં ન હોતીતિ દીપેતિ. વિસેસનસ્સ વિસેસાપેક્ખત્તા દુતિયગાથાય ‘‘સસિક્ખો સો’’તિ પદદ્વયં આહરિત્વા ‘‘સેવનચેતનો સસિક્ખો સો ભિક્ખૂ’’તિ યોજેતબ્બં.

અઙ્ગે સરીરે જાતન્તિ અઙ્ગજાતં, પુરિસનિમિત્તં. સતિપિ અવસેસસરીરાવયવાનં તથાભાવે રુળ્હિવસેન તદેવ તથા વુત્તં. પવેસેન્તોતિ દ્વયંદ્વયસમાપત્તિસઙ્ખાતકાયિકકિરિયં નિપ્ફાદેન્તો. પરાજિતોતિ દુલ્લભાય ખણસમ્પત્તિયા લદ્ધબ્બતો દુલ્લભા લોકિયલોકુત્તરગુણસમ્પત્તિસુખતો પરિહાપેત્વા કિલેસસપત્તેહિ પરાજયમાપાદિતોતિ અત્થો.

અયમેત્થ યોજના – સસિક્ખો સેવનચેતનો તિવિધે મગ્ગે અલ્લોકાસે અઙ્ગજાતં તિલમત્તમ્પિ પવેસેન્તો સો ભિક્ખુ પરાજિતો હોતીતિ. એત્તાવતા –

‘‘યો પન ભિક્ખુ ભિક્ખૂનં સિક્ખાસાજીવસમાપન્નો સિક્ખં અપચ્ચક્ખાય દુબ્બલ્યં અનાવિકત્વા મેથુનં ધમ્મં પટિસેવેય્ય, અન્તમસો તિરચ્છાનગતાયપિ, પારાજિકો હોતિ અસંવાસો’’તિ (પારા. ૪૪) –

ભગવતા પઞ્ઞત્તસિક્ખાપદં સઙ્ગહિતન્તિ દટ્ઠબ્બં.

૭. એવં ઇમિસ્સા ગાથાય અત્તૂપક્કમમૂલકં પારાજિકં દસ્સેત્વા ઇદાનિ ‘‘ભિક્ખુપચ્ચત્થિકા મનુસ્સિત્થિં ભિક્ખુસ્સ સન્તિકે આનેત્વા વચ્ચમગ્ગેન (પારા. ૫૮) અઙ્ગજાતે અભિનિસીદેન્તી’’તિઆદિનયપ્પવત્તં પરોપક્કમમૂલકં પારાજિકઞ્ચ દસ્સેતુમાહ ‘‘પવેસન’’ન્તિઆદિ. તત્થ પવેસનન્તિ ભિક્ખુપચ્ચત્થિકેહિ સુત્તપમત્તાદિમનુસ્સિત્થિઆદીનમઞ્ઞતરં આનેત્વા યથાવુત્તમગ્ગાનમઞ્ઞતરં મગ્ગં યથા પવિસતિ, તથા ભિક્ખુનો અઙ્ગજાતે અભિનિસીદાપને સમ્ભવન્તં મગ્ગપ્પવેસનમાહ. પવેસનં સાદિયન્તો સસિક્ખો સોતિ યોજના. એત્થ ‘‘પવેસનં સાદિયતિ અધિવાસેતિ, તસ્મિં ખણે સેવનચિત્તં ઉપટ્ઠાપેતી’’તિ (પારા. અટ્ઠ. ૧.૫૮) અટ્ઠકથાવચનતો અગ્ગતો યાવ મૂલં પવેસેન્તેસુ અસ્સાદચિત્તં ઉપટ્ઠાપેન્તો તઙ્ખણેયેવ સાસનતો ચુતોતિ અત્થો. પવિટ્ઠન્તિઆદીસુ પદેસુપિ એવમેવ યોજના.

પવિટ્ઠન્તિ પવિટ્ઠક્ખણો. ‘‘પવિટ્ઠ’’ન્તિઆદિના તાય તાય કિરિયાય ઉપલક્ખિતો ખણો ગહેતબ્બો. તેનેવેત્થ અચ્ચન્તસંયોગે ઉપયોગવચનં કતં. ઠિતન્તિ એત્થ ‘‘સુક્કવિસ્સટ્ઠિસમયે’’તિ અટ્ઠકથાવચનસ્સ સબ્બથા બ્યાપારરહિતં કાલં સન્ધાય વુત્તત્તા સુક્કવિસ્સટ્ઠિસમયોપિ ગહેતબ્બો. તેનેવ ગણ્ઠિપદે વુત્તનયેન પવિટ્ઠસ્સ ચ યાવ ઉદ્ધરણારમ્ભો, તાવ સમ્ભવન્તો ઠિતકાલોપિ ગહેતબ્બો. ઉદ્ધરણન્તિ નીહરણકાલો.

વાતિ વિકપ્પે, અપીતિ સમુચ્ચયે, સો વા-સદ્દેન વિકપ્પિતાનં પક્ખાનં તુલ્યબલતં જોતેતિ. ઇતિ ઇમેહિ દ્વીહિપિ ‘‘સો ચે પવેસનં સાદિયતિ, પવિટ્ઠં સાદિયતી’’તિઆદિના (પારા. ૫૮) પાળિયં આગતનયેન લબ્ભમાનં પવેસનાદિએકક્ખણમ્પિ સાદિયનપચ્ચયા આપજ્જમાનં પારાજિકં દસ્સેતિ. સસિક્ખોતિ સિક્ખાય સહ વત્તતીતિ સસિક્ખો, અપચ્ચક્ખાતસિક્ખોતિ અત્થો. સાદિયન્તોતિ સેવનચિત્તં ઉપટ્ઠાપેન્તો. સો ભિક્ખુ. ઠપેત્વા કિરિયન્તિ અત્તૂપક્કમનં વિના. ચુતોતિ ‘‘ભિક્ખુપચ્ચત્થિકેહિ કતમિદં, ન મયા’’તિ લેસેન ન મુચ્ચતિ, સાદિયનચિત્તે સતિ સાસનતો ચુતોયેવ હોતીતિ અધિપ્પાયો.

એત્થ ચ સસિક્ખોતિ ઇદં ‘‘સિક્ખં અપચ્ચક્ખાય દુબ્બલ્યં અનાવિકત્વા’’તિ (પારા. ૪૪) સિક્ખાપદપાઠસ્સ અત્થદસ્સનવસેન નિદ્દિટ્ઠં. તસ્સ પદભાજને (પારા. ૪૫), તદટ્ઠકથાય ચ વિભત્તં સિક્ખાપચ્ચક્ખાનં સઙ્ખેપતો એવં વેદિતબ્બં – ચિત્તખેત્તકાલપયોગપુગ્ગલવિજાનનવસેન સિક્ખાપચ્ચક્ખાનં હોતિ, ન તદભાવેન. ઉપસમ્પન્નભાવતો ચવિતુકામતાચિત્તેનેવ હિ સિક્ખાપચ્ચક્ખાનં હોતિ, ન દવા વા રવા વા વદન્તસ્સ. એવં ચિત્તવસેન સિક્ખાપચ્ચક્ખાનં હોતિ, ન તદભાવેન.

તથા ‘‘બુદ્ધં પચ્ચક્ખામિ, ધમ્મં પચ્ચક્ખામિ, સઙ્ઘં પચ્ચક્ખામિ, સિક્ખં, વિનયં, પાતિમોક્ખં, ઉદ્દેસં, ઉપજ્ઝાયં, આચરિયં, સદ્ધિવિહારિકં, અન્તેવાસિકં, સમાનુપજ્ઝાયકં, સમાનાચરિયકં, સબ્રહ્મચારિં પચ્ચક્ખામી’’તિ એવં વુત્તાનં બુદ્ધાદીનં ચતુદ્દસન્નં, ‘‘ગિહીતિ મં ધારેહિ, ઉપાસકો, આરામિકો, સામણેરો, તિત્થિયો, તિત્થિયસાવકો, અસ્સમણો, અસક્યપુત્તિયોતિ મં ધારેહી’’તિ એવં વુત્તાનં ગિહિઆદીનં અટ્ઠન્નઞ્ચાતિ ઇમેસં બાવીસતિયા ખેત્તપદાનં યસ્સ કસ્સચિ સવેવચનસ્સ વસેન તેસુ યં કિઞ્ચિ વત્તુકામસ્સ યં કિઞ્ચિ વદતો સિક્ખાપચ્ચક્ખાનં હોતિ, ન રુક્ખાદીનં અઞ્ઞતરસ્સ નામં ગહેત્વા સિક્ખં પચ્ચક્ખન્તસ્સ. એવં ખેત્તવસેન સિક્ખાપચ્ચક્ખાનં હોતિ, ન તદભાવેન.

તત્થ યદેતં ‘‘પચ્ચક્ખામી’’તિ ચ ‘‘મં ધારેહી’’તિ ચાતિ વુત્તં વત્તમાનકાલવચનં, યાનિ ચ ‘‘અલં મે બુદ્ધેન, કિં નુ મે બુદ્ધેન, ન મમત્થો બુદ્ધેન, સુમુત્તાહં બુદ્ધેના’’તિઆદિના નયેન આખ્યાતવસેન કાલં અનામસિત્વા પુરિમેહિ ચુદ્દસહિ પદેહિ સદ્ધિં યોજેત્વા વુત્તાનિ ‘‘અલં મે’’તિઆદીનિ ચત્તારિ પદાનિ, તેસંયેવ સવેવચનાનં વસેન પચ્ચક્ખાનં હોતિ, ન ‘‘પચ્ચક્ખાસિ’’ન્તિ વા ‘‘પચ્ચક્ખિસ્સ’’ન્તિ વા ‘‘મં ધારેસી’’તિ વા ‘‘મં ધારેસ્સતી’’તિ વા ‘‘યં નૂનાહં પચ્ચક્ખેય્ય’’ન્તિ વાતિઆદીનિ અતીતાનાગતપરિકપ્પવચનાનિ ભણન્તસ્સ. એવં વત્તમાનકાલવસેન ચેવ અનામટ્ઠકાલવસેન ચ પચ્ચક્ખાનં હોતિ, ન તદભાવેન.

પયોગો પન દુવિધો કાયિકો ચ વાચસિકો ચ. તત્થ ‘‘બુદ્ધં પચ્ચક્ખામી’’તિઆદિના નયેન યાય કાયચિ ભાસાય વચીભેદં કત્વા વાચસિકપયોગેનેવ પચ્ચક્ખાનં હોતિ, ન અક્ખરલિખનં વા હત્થમુદ્દાદિદસ્સનં વા કાયપયોગં કરોન્તસ્સ. એવં વાચસિકપયોગેનેવ પચ્ચક્ખાનં હોતિ, ન તદભાવેન.

પુગ્ગલો પન દુવિધો યો ચ પચ્ચક્ખાતિ, યસ્સ ચ પચ્ચક્ખાતિ. તત્થ યો પચ્ચક્ખાતિ, સો સચે ઉમ્મત્તકખિત્તચિત્તવેદનટ્ટાનં અઞ્ઞતરો ન હોતિ. યસ્સ પન પચ્ચક્ખાતિ, સો સચે મનુસ્સજાતિકો હોતિ, ન ચ ઉમ્મત્તકાદીનં અઞ્ઞતરો, સમ્મુખીભૂતો ચ સિક્ખાપચ્ચક્ખાનં હોતિ. ન હિ અસમ્મુખીભૂતસ્સ દૂતેન વા પણ્ણેન વા આરોચનં રુહતિ. એવં યથાવુત્તસ્સ પુગ્ગલસ્સ વસેન પચ્ચક્ખાનં હોતિ, ન તદભાવેન.

વિજાનનમ્પિ નિયમિતાનિયમિતવસેન દુવિધં. તત્થ યસ્સ, યેસં વા નિયમેત્વા ‘‘ઇમસ્સ, ઇમેસં વા આરોચેમી’’તિ વદતિ. સચે તે યથા પકતિયા લોકે મનુસ્સા વચનં સુત્વા આવજ્જનસમયે જાનન્તિ, એવં તસ્સ વચનાનન્તરમેવ તસ્સ ‘‘અયં ઉક્કણ્ઠિતો’’તિ વા ‘‘ગિહિભાવં પત્થયતી’’તિ વા યેન કેનચિ આકારેન સિક્ખાપચ્ચક્ખાનભાવં જાનન્તિ, પચ્ચક્ખાતાવ હોતિ સિક્ખા. અથ અપરભાગે ‘‘કિં ઇમિના વુત્ત’’ન્તિ ચિન્તેત્વા જાનન્તિ, અઞ્ઞે વા જાનન્તિ, અપચ્ચક્ખાતાવ હોતિ સિક્ખા. અનિયમેત્વા આરોચેન્તસ્સ પન સચે વુત્તનયેન યો કોચિ મનુસ્સજાતિકો વચનત્થં જાનાતિ, પચ્ચક્ખાતાવ હોતિ સિક્ખા. એવં વિજાનનવસેન પચ્ચક્ખાનં હોતિ, ન તદભાવેન. યો પન અન્તમસો દવાયપિ પચ્ચક્ખાતિ, તેન અપચ્ચક્ખાતાવ હોતિ સિક્ખા.

ઇતિ ઇમેસં વુત્તપ્પકારાનં ચિત્તાદીનં વસેન અપચ્ચક્ખાતસિક્ખો ‘‘સસિક્ખો’’તિ વુત્તો.

૮-૧૦. ‘‘ઇદાનિ સન્થતેન સન્થતસ્સ ઘટ્ટને ઉપાદિન્નકઘટ્ટનાભાવતો દોસો નત્થી’’તિ પાપભિક્ખૂનં લેસકપ્પનં પટિક્ખિપિતું ‘‘ભિક્ખુપચ્ચત્થિકા મનુસ્સિત્થિં ભિક્ખુસ્સ સન્તિકે આનેત્વા વચ્ચમગ્ગેન, પસ્સાવમગ્ગેન, મુખેન અઙ્ગજાતં અભિનિસીદેન્તિ સન્થતાય અસન્થતસ્સા’’તિઆદિના (પારા. ૬૧) નયેન પાળિયં વુત્તસન્થતવારાનમત્થં સઙ્ગણ્હન્તો આહ ‘‘સન્થતેના’’તિઆદિ. તત્થ સન્થતેનાતિ ચમ્મચોળતિપુપટ્ટાદીહિ પટિચ્છાદિતેન. ‘‘પવેસેન્તો’’તિ ઇમિના સન્થતવારસ્સ પરોપક્કમં નિસ્સાય દસ્સનમુપલક્ખણન્તિ અત્તૂપક્કમેપિ યોજેતબ્બતં દસ્સેતિ, તસ્સ વક્ખમાનેન ‘‘પરાજિતો’’તિ ઇમિના સમ્બન્ધો. ‘‘તથેવા’’તિ ઇમિના પવેસેન્તોતિઆદિપ્પકારં પરામસતિ.

એવં પવેસેન્તો કદા પરાજિતો હોતીતિ આહ ‘‘ઉપાદિન્નેના’’તિઆદિ. એત્થ ઉપાદિન્નેનાતિ તણ્હાદિટ્ઠીહિ ઉપેતેન કમ્મુના અત્તનો ફલભાવેનેવ આદિન્નં ગહિતન્તિ ઉપાદિન્નં, એતેન અત્તનો અઙ્ગજાતસ્સ, વત્થુપુગ્ગલાનં મગ્ગસ્સ ચ ઘટ્ટનટ્ઠાનગતં કાયપ્પસાદં દસ્સેતિ. ઇમિનાવ અઙ્ગજાતગતં અનટ્ઠકાયપ્પસાદં ચમ્મખિલં, પિળકાદિ ચ ગહેતબ્બં. ‘‘ઉપાદિન્નકં નામ કાયિન્દ્રિય’’ન્તિ ગણ્ઠિપદે વુત્તં. તબ્બિપરિયાયેન ‘‘અનુપાદિન્નક’’ન્તિ તપ્પટિચ્છાદકં ચોળાદિ વુત્તં. ઉપાદિન્નેન ઉપાદિન્ને, અનુપાદિન્ને વા પારાજિકક્ખેત્તે ઘટ્ટિતે, અનુપાદિન્નકેન વા ઉપાદિન્ને અનુપાદિન્ને વા પારાજિકક્ખેત્તે ઘટ્ટિતેતિ યોજના. એત્થ ચ કરણવચનન્તાનિ પદાનિ ‘‘અઙ્ગજાતેના’’તિ ઇમસ્સ વિસેસનાનિ.

એત્તાવતા સન્થતચતુક્કવસેન અત્તૂપક્કમે સતિ પારાજિકક્ખેત્તે પારાજિકં દસ્સેત્વા ઇદાનિ પરૂપક્કમેપિ દસ્સેતુમાહ ‘‘સચે’’તિઆદિ. એત્થાતિ એતેસુ ચતૂસુ વિકપ્પેસુ. પારાજિકક્ખેત્તે પવિટ્ઠે તૂતિ એત્થ તુ-સદ્દેન પવેસનટ્ઠિતુદ્ધારક્ખણત્તયં સમુચ્ચિનોતિ. યંતં-સદ્દાનં નિચ્ચસમ્બન્ધત્તા હિ ‘‘સો’’તિ તં-સદ્દોપાદાને ‘‘યો’’તિ યં-સદ્દોપિ અજ્ઝાહરિતબ્બો, સામત્થિયેન સમ્પિણ્ડનત્થો અપિસદ્દો ચ. અયમેત્થ અત્થયોજના – ભિક્ખુપચ્ચત્થિકેહિ આનેત્વા ભિક્ખુનો અઙ્ગજાતે અભિનિસીદાપિતમનુસ્સિત્થિઆદીનં તીસુ મગ્ગેસુ અઞ્ઞતરમગ્ગસઙ્ખાતં પારાજિકક્ખેત્તં પવિટ્ઠે વા તુ-સદ્દેન સમ્પિણ્ડિતપવેસનટ્ઠિતુદ્ધારાનમઞ્ઞતરક્ખણે વા સચે યો સાદિયતિ, સપ્પમુખાદિપ્પવેસનકાલે વિય અનુત્તસિત્વા કામરાગપિપાસાભિભૂતો યદિ સાદિયતિ, સોપિ ભિક્ખુ પરાજિતો હોતીતિ યોજના. ‘‘સચે સાદિયતી’’તિ ઇમિના સાસઙ્કવચનેન ન સાદિયતિ, અનાપત્તીતિ સૂચિતં હોતિ.

‘‘પારાજિકક્ખેત્તે’’તિ ઇમિના બ્યવચ્છિન્ને અઞ્ઞસ્મિં ઠાને વીતિક્કમન્તસ્સ ઇમસ્મિંયેવ વિકપ્પે સમ્ભવન્તિયો ઇતરાપત્તિયો દસ્સેતુમાહ ‘‘ખેત્તે’’તિઆદિ. ‘‘એત્થા’’તિ આનેત્વા સમ્બન્ધનીયં. ‘‘ખેત્તે’’તિ સામઞ્ઞનિદ્દેસેપિ હેટ્ઠા ‘‘પારાજિકક્ખેત્તે’’તિ વિસેસિતત્તા, ઉપરિથુલ્લચ્ચયાદીનઞ્ચ વિધીયમાનત્તા અઞ્ઞથાનુપપત્તિલક્ખણાય સામત્થિયા થુલ્લચ્ચયદુક્કટાનં ખેત્તેતિ અયમત્થો લબ્ભતિ. ‘‘કણ્ણચ્છિદ્દક્ખિનાસાસૂ’’તિઆદિના નયેન વક્ખમાનેસુ જીવમાનકસરીરગતથુલ્લચ્ચયદુક્કટક્ખેત્તેસૂતિ વુત્તં હોતિ.

ઇમેસુ દ્વીસુ ખેત્તેસુ ‘‘સન્થતાદિના સન્થતાદિં પવેસેન્તસ્સ ઉપાદિન્નાદીહિ ઉપાદિન્નાદીનં ઘટ્ટને અધિવાસેન્તસ્સ અનાપત્તી’’તિ વત્તુમસક્કુણેય્યતાય પારાજિકક્ખેત્તે વુત્તસબ્બવિકપ્પે એત્થ યોજેન્તેહિ એવં યોજેતબ્બં – થુલ્લચ્ચયક્ખેત્તે સન્થતે વા અસન્થતે વા સન્થતેન વા અસન્થતેન વા અઙ્ગજાતેન સેવન્તસ્સ ઉપાદિન્ને વા અનુપાદિન્ને વા ઉપાદિન્નેન, તથા અનુપાદિન્નેન વા ઘટ્ટિતે થુલ્લચ્ચયં તસ્સ વિનિદ્દિસેતિ. એવં દુક્કટક્ખેત્તે સન્થતે વા…પે… ઘટ્ટિતે દુક્કટઞ્ચ તસ્સ વિનિદ્દિસેતિ યોજેતબ્બં.

ઇહ સબ્બત્થ તીસુપિ ખેત્તેસુ ઉપાદિન્ન-સદ્દેન અનટ્ઠકાયપ્પસાદં અઙ્ગજાતઞ્ચ તત્થજાતચમ્મખિલપિળકા ચ ગય્હન્તિ, દુક્કટક્ખેત્તે પન અઙ્ગુલિઆદિઇતરાવયવાપિ. તીસુપિ ખેત્તેસુ અનુપાદિન્ન-સદ્દેન અઙ્ગજાતાદિપટિચ્છાદિતવત્થાદયો ચ ગય્હન્તિ, દુક્કટક્ખેત્તે પન નિમિત્તે નટ્ઠકાયપ્પસાદચમ્મખિલપિળકરોમાદીનિ. ઇમાનિ ચ અનુપાદિન્નાનિ. અઙ્ગજાતેતરોપાદિન્નાવયવે ચ તીસુપિ ખેત્તેસુ પવેસેન્તસ્સ દુક્કટમેવ.

૧૧. એત્તાવતા જીવમાનસરીરે સન્થતાસન્થતવસેન પચ્ચેકં તિવિધેસુપિ પારાજિકથુલ્લચ્ચયદુક્કટક્ખેત્તેસુ સન્થતાસન્થતવસેનેવ દુવિધેન નિમિત્તેન સેવન્તસ્સ પરોપક્કમે સતિ સાદિયન્તસ્સ લબ્ભમાનપારાજિકથુલ્લચ્ચયદુક્કટાપત્તિયો યથાસમ્ભવં દસ્સેત્વા ઇદાનિ ‘‘મતસરીરે પન તથા તથા સેવન્તાનં દોસો નત્થી’’તિ પાપભિક્ખૂનં લેસોકાસપટિબાહનત્થં પાળિયં દસ્સિતેસુ યથાવુત્તેસુ તીસુ ખેત્તેસુ લબ્ભમાના તિસ્સો આપત્તિયો દસ્સેતુમાહ ‘‘મતે’’તિઆદિ.

તત્થ ‘‘મતે’’તિ એતસ્સ ‘‘મનુસ્સિત્થિઆદીનં સરીરે’’તિ અજ્ઝાહરિત્વા અત્થયોજના કાતબ્બા. ઇમિના ‘‘અક્ખાયિતે’’તિઆદિના દસ્સિતાનં નિમિત્તાનં નિસ્સયં દસ્સિતં હોતિ. ‘‘નિમિત્તમત્તં સેસેત્વા’’તિઆદિના નયેન વક્ખમાનગાથાયં વિય સકલસરીરે ખાદિતેપિ નિમિત્તસ્સ વિજ્જમાનાવિજ્જમાનભાવોયેવ આપત્તિયાભાવાભાવસ્સ પમાણન્તિ ‘‘અક્ખાયિતે’’તિ એતેન ‘‘મતે’’તિ એતં અવિસેસેત્વા ‘‘નિમિત્તે’’તિ અજ્ઝાહરિત્વા તં તેન વિસેસિતબ્બં. અથ વા ‘‘નિમિત્તમત્ત’’ન્તિઆદિના વક્ખમાનગાથાય ‘‘નિમિત્તે’’તિ પદં આનેત્વા યોજેતબ્બં.

અક્ખાયિતેતિ સબ્બથા અક્ખાયિતે પારાજિકવત્થુભૂતે નિમિત્તે. યેભુય્યક્ખાયિતેપિ ચાતિ કિઞ્ચિ કિઞ્ચિ ખાદિત્વા બહુકાવસિટ્ઠે નિમિત્તે. ‘‘યસ્સ ચતૂસુ ભાગેસુ તિભાગમત્તં ખાદિતં, તં નિમિત્તં યેભુય્યક્ખાયિતં નામા’’તિ વદન્તિ. મેથુનન્તિ રાગપરિયુટ્ઠાનેન સદિસભાવાપત્તિયા મિથુનાનં ઇદં મેથુનં, મતિત્થિઆદીનં રાગપરિયુટ્ઠાનેન સદિસત્તાભાવેપિ તત્થ વીતિક્કમો રુળ્હિયા ‘‘મેથુન’’ન્તિ વુચ્ચતિ.

પારાજિકોતિપરાજિતો, પરાજયમાપન્નોતિ અત્થો. અયઞ્હિ પારાજિક-સદ્દો સિક્ખાપદાપત્તિપુગ્ગલેસુ વત્તતિ. તત્થ ‘‘અટ્ઠાનમેતં આનન્દ અનવકાસો, યં તથાગતો વજ્જીનં વા વજ્જિપુત્તકાનં વા કારણા સાવકાનં પારાજિકં સિક્ખાપદં પઞ્ઞત્તં સમૂહનેય્યા’’તિ (પારા. ૪૩) એવં સિક્ખાપદે વત્તમાનો વેદિતબ્બો. ‘‘આપત્તિ ત્વં ભિક્ખુ આપન્નો પારાજિક’’ન્તિ (પારા. ૬૭) આપત્તિયા. ‘‘ન મયં પારાજિકા, યો અવહટો, સો પારાજિકો’’તિ (પારા. ૧૫૫) એવં પુગ્ગલે. ‘‘પારાજિકેન ધમ્મેન અનુદ્ધંસેય્યા’’તિઆદીસુ (પારા. ૩૮૪) પન ધમ્મે વત્તતીતિ વદન્તિ. યસ્મા પન તત્થ ધમ્મોતિ કત્થચિ આપત્તિ, કત્થચિ સિક્ખાપદમેવ અધિપ્પેતં, તસ્મા સો વિસું ન વત્તબ્બો.

તત્થ સિક્ખાપદં યો તં અતિક્કમતિ તં પરાજેતિ, તસ્મા ‘‘પારાજિક’’ન્તિ વુચ્ચતિ. આપત્તિ પન યો નં અજ્ઝાપજ્જતિ તં પરાજેતિ, તસ્મા ‘‘પારાજિકા’’તિ વુચ્ચતિ. પુગ્ગલો યસ્મા પરાજિતો પરાજયમાપન્નો, તસ્મા ‘‘પારાજિકો’’તિ વુચ્ચતિ. સિક્ખાપદાપત્તીસુ પારાજિક-સદ્દો પરાજેતીતિ ‘‘પારાજિકો’’તિ કત્તુસાધનો, પુગ્ગલે પન પરાજીયતીતિ કમ્મસાધનોતિ વેદિતબ્બો. ‘‘નરો’’તિ ઇમિના પુબ્બે વુત્તભિક્ખુયેવ અધિપ્પેતો. સામઞ્ઞજોતના વિસેસે અવતિટ્ઠતીતિ.

૧૨. યેભુય્યક્ખાયિતેતિ ચતૂસુ કોટ્ઠાસેસુ એકકોટ્ઠાસાવસેસં કત્વા ખાદિતે. ઉપડ્ઢક્ખાયિતેતિ સમભાગાવસેસં ખાદિતે. થૂલો અચ્ચયો થુલ્લચ્ચયો, સોયેવ આપજ્જીયતીતિ આપત્તીતિ થુલ્લચ્ચયાપત્તિ. પાચિત્તિયાદયો સન્ધાયેત્થ થુલ્લચ્ચયવોહારો, ન પારાજિકસઙ્ઘાદિસેસેતિ દટ્ઠબ્બં. સેસેતિ અવસેસે ઉપકચ્છકાદીસુ. વુત્તઞ્હિ અટ્ઠકથાયં ‘‘અવસેસસરીરે ઉપકચ્છકાદીસુ દુક્કટ’’ન્તિ (પારા. અટ્ઠ. ૧.૫૯-૬૦). દુટ્ઠુ કતન્તિ દુક્કટં, દુક્કટ-સદ્દો નિયતનપુંસકત્તા ઇત્થિલિઙ્ગસ્સાપિ આપત્તિ-સદ્દસ્સ સલિઙ્ગેન વિસેસનં હોતિ.

૧૩. નિમિત્તમત્તં સેસેત્વા ખાયિતેપીતિ એત્થ તિણ્ણમઞ્ઞતરં નિમિત્તં સેસેત્વા સકલસરીરે ખાદિતેપિ. પિ-સદ્દો બ્યતિરેકે, પગેવ ઇતરેતિ દીપેતિ. તસ્મિં નિમિત્તે અક્ખાયિતે વા યેભુય્યક્ખાયિતે વાતિ દ્વિધા વુત્તેસુ તીસુ નિમિત્તેસુ અઞ્ઞતરસ્મિં નિમિત્તે મેથુનં સેવતોપિ પરાજયો પારાજિકાપત્તિ હોતીતિ અધિપ્પાયો. સેવતોપીતિ એત્થ પિ-સદ્દો અપેક્ખાયં. તસ્મા ન કેવલં હેટ્ઠા વુત્તાનમેવાતિ અપેક્ખતિ. સન્થતાદયો વિકપ્પા યથાવુત્તનયેન એત્થાપિ યોજેતબ્બા.

૧૪. ‘‘ઉદ્ધુમાતાદિસમ્પત્તે’’તિ એત્થ ‘‘યદા પન સરીરં ઉદ્ધુમાતકં હોતિ કુથિતં નીલમક્ખિકાસમાકિણ્ણં કિમિકુલસમાકુલં નવહિ વણમુખેહિ પગ્ઘરિતપુબ્બકુણપભાવેન ઉપગન્તુમ્પિ અસક્કુણેય્યં, તદા પારાજિકવત્થુઞ્ચ થુલ્લચ્ચયવત્થુઞ્ચ જહતિ, તાદિસે સરીરે યત્થ કત્થચિ ઉપક્કમતો દુક્કટમેવા’’તિ (પારા. અટ્ઠ. ૧.૫૯-૬૦) અટ્ઠકથાવચનતો સબ્બત્થાપિ ચાતિ અક્ખાયિતાદિસબ્બવિકપ્પોપગતાનિ પારાજિકથુલ્લચ્ચયદુક્કટક્ખેત્તાનિ ગહિતાનીતિ દટ્ઠબ્બં. તત્થાપિ વીતિક્કમો અનાપત્તિ ન હોતીતિ દસ્સેતુમાહ ‘‘દુક્કટ’’ન્તિ. ‘‘ખાયિતક્ખાયિત’’ન્તિઆદીસુ ખાયિતક્ખાયિતઞ્ચ નામેતં સબ્બં મતસરીરકેયેવ વેદિતબ્બં, ન જીવમાનેતિ યોજેતબ્બં.

૧૫. જીવમાને કથન્તિ આહ ‘‘છિન્દિત્વા પના’’તિઆદિ. તત્થ વણસઙ્ખેપતોતિ વણસઙ્ગહતો. તસ્મિન્તિ યત્થ ઠિતં નિમિત્તં ઉપ્પાટિતં, તસ્મિં પદેસે. એત્થ દુતિયો પન-સદ્દો ઇધ અદસ્સિતં અટ્ઠકથાયં આગતનયેન વિઞ્ઞાયમાનં અત્થવિસેસં જોતેતિ. અટ્ઠકથાયહિ ‘‘યદિપિ નિમિત્તં સબ્બસો ખાયિતં, છવિચમ્મમ્પિ નત્થિ, નિમિત્તસણ્ઠાનં પઞ્ઞાયતિ, પવેસનં જાયતિ, પારાજિકમેવા’’તિ એવં અજીવમાને વુત્તવિનિચ્છયાનુસારેન જીવમાનેપિ છવિચમ્મમત્તં ચે સબ્બસો ઉપ્પાટિતં, નિમિત્તસણ્ઠાનં પઞ્ઞાયતિ, પવેસનક્ખમં હોતિ, તત્થ સેવન્તસ્સ પારાજિકમેવાતિ વિઞ્ઞાયમાનમત્થં જોતેતીતિ વુત્તં હોતિ.

૧૬. તતો નિમિત્તતોતિ સમ્બન્ધો. પતિતાયાતિ પતિતાયં, અયમેવ વા પાઠો. નિમિત્તતોતિ નિમિત્તપ્પદેસતો પતિતાયં મંસપેસિયન્તિ સમ્બન્ધો. છિન્દિત્વા વા તચ્છેત્વા વા પતિતાયં તસ્સં નિમિત્તમંસપેસિયન્તિ અત્થો. મેથુનરાગેન ઉપક્કમન્તસ્સ દુક્કટં વિનિદ્દિસેતિ યોજના.

૧૭. ‘‘નખપિટ્ઠિપ્પમાણેપી’’તિઆદિગાથાય ‘‘છિન્દિત્વા’’તિઆદિકા અટ્ઠકથા આનેત્વા સમ્બન્ધિતબ્બા. સતીતિ એત્થ ‘‘અવસિટ્ઠે’’તિ પાઠસેસો. જીવમાનેતિ એત્થ ‘‘સરીરે’’તિ પાઠસેસો. જીવમાનસરીરે પન છિન્દિત્વા તચ્છેત્વા નિમિત્તે ઉપ્પાટિતે નખપિટ્ઠિપ્પમાણેપિ મંસે, ન્હારુમ્હિ વા અવસિટ્ઠે સતિ મેથુનં પટિસેવન્તો પરાજિતોતિ યોજના.

૧૮. ‘‘કણ્ણચ્છિદ્દક્ખી’’તિ ગાથાય ‘‘જીવમાને’’તિ આનેત્વા સમ્બન્ધિતબ્બં, ‘‘સરીરે’’તિ પાઠસેસો. ‘‘અસ્સગોમહિસાદીન’’ન્તિઆદિના અસ્સાદીનં વક્ખમાનત્તા પારિસેસતો ‘‘મનુસ્સાન’’ન્તિ લબ્ભતિ. મનુસ્સાનં જીવમાનસરીરે કણ્ણ…પે… વણેસુ વાતિ યોજના. વત્થિકોસેતિ મુત્તપથબ્ભન્તરે. વણેસુ વાતિ સત્થકાદીહિ કતવણેસુ. અઙ્ગજાતન્તિ તિલમત્તમ્પિ અઙ્ગજાતેકદેસં. રાગાતિ મેથુનરાગેન.

૧૯. અવસેસસરીરસ્મિન્તિ કણ્ણચ્છિદ્દાદિયથાવુત્તસરીરાવયવવજ્જિતસરીરપ્પદેસે. તેનાહ ‘‘ઉપકચ્છૂરુકાદિસૂ’’તિ ઉપકચ્છં નામ બાહુમૂલન્તરં. ઊરુકાદિસૂતિ ઊરુવેમજ્ઝાદીસુ. આદિ-સદ્દેન વુત્તાવસેસં સરીરપ્પદેસં સઙ્ગણ્હાતિ. ‘‘અઙ્ગજાત’’ન્તિ આનેત્વા સમ્બન્ધિતબ્બં. ‘‘પવેસેત્વા’’તિ સામત્થિયા લબ્ભતિ, અઙ્ગજાતં તિલબીજમત્તં પવેસેત્વાતિ વુત્તં હોતિ. વસા મેથુનરાગસ્સ સેવમાનસ્સાતિ મેથુનરાગેન વીતિક્કમન્તસ્સાતિ અત્થો. ‘‘સન્થતેના’’તિઆદિના વુત્તપ્પકારો એત્થાપિ યોજેતબ્બો.

૨૦. અસ્સગોમહિસાદીનન્તિ આદિ-સદ્દેન ગોકણ્ણગવજાદયો સઙ્ગહિતા. અસ્સાદયો પાકટાયેવ. ‘‘મતાન’’ન્તિ વક્ખમાનત્તા ‘‘જીવમાનાન’’ન્તિ સામત્થિયા લબ્ભતિ. સેવન્તિ ‘‘વસા મેથુનરાગસ્સા’’તિ અનુવત્તમાનત્તા મેથુનરાગવસેન તિલબીજમત્તમ્પિ અઙ્ગજાતપ્પદેસં પવેસેન્તો થુલ્લચ્ચયં ફુસેતિ યોજના. એત્થ ચ ‘‘ઓટ્ઠગદ્રભદન્તીનં, અસ્સગોમહિસાદિન’’ન્તિ પાઠેન ભવિતબ્બં. એવઞ્હિ સતિ અટ્ઠકથાવસાને નિદ્દિટ્ઠેન પકારત્થવાચિના આદિ-સદ્દેન થુલ્લચ્ચયવીતિક્કમારહનાસાવત્થિકોસવન્તો અવુત્તા સબ્બેપિ સત્તા ગય્હન્તિ. ‘‘અસ્સગોમહિસાદીન’’ન્તિ પઠમપાદાવસાને નિદ્દિટ્ઠેન આદિ-સદ્દેન ઓટ્ઠગદ્રભદન્તીનમ્પિ સઙ્ગહો હોતીતિ તેસં પુનવચનં નિરત્થકં સિયાતિ.

૨૧. તથા સેવમાનસ્સ દુક્કટન્તિ સમ્બન્ધો. સબ્બતિરચ્છાનન્તિ તિરિયં અઞ્ચન્તિ વડ્ઢન્તીતિ તિરચ્છા, સબ્બે ચ તે તિરચ્છાચાતિ સબ્બતિરચ્છા, તેસં સબ્બતિરચ્છાનં. ‘‘તથા’’તિ ઇમિના ‘‘વસા મેથુનરાગસ્સા’’તિઆદીનં પરામટ્ઠત્તા સબ્બતિરચ્છાનાનં અક્ખિઆદીસુ તિલબીજમત્તમ્પિ અઙ્ગજાતપ્પદેસં મેથુનરાગેન પવેસેન્તસ્સ દુક્કટન્તિ વુત્તં હોતિ. એત્થાપિ સન્થતાદિવિકપ્પે નિદ્દોસભાવો ન સક્કા વત્તુન્તિ તમ્પિ યોજેતબ્બં.

૨૨. એવં તિરચ્છાનાનં જીવમાનકસરીરે લબ્ભમાના આપત્તિયો દસ્સેત્વા તેસંયેવ મતસરીરેપિ સમ્ભવનકઆપત્તિયો દસ્સેતુમાહ ‘‘તેસ’’ન્તિઆદિ. ‘‘તેસ’’ન્તિ ઇમિના મનુસ્સતિરચ્છાનગતાનં ગહણન્તિ વદન્તિ. મનુસ્સાનં મતામતસરીરે પારાજિકથુલ્લચ્ચયદુક્કટક્ખેત્તેસુ તિસ્સન્નં આપત્તીનં દસ્સિતત્તા, પુન ગહણે પયોજનાભાવા તે વજ્જેત્વા અનુવત્તમાનસબ્બતિરચ્છાનન્તિ ઇમિના યોજેતબ્બં, તેસં સબ્બતિરચ્છાનગતાનન્તિ અત્થો. અલ્લસરીરેસૂતિ ઉદ્ધુમાતકાદિભાવમસમ્પત્તેસુ અલ્લમતસરીરેસુ તિવિધે ખેત્તસ્મિં અસન્થતે, સન્થતે વા સતિ મેથુનરાગસ્સ વસા સેવતો તિવિધાપિ આપત્તિ સિયાતિ અનુવત્તમાનપદેહિ સહ યોજના.

તિવિધે ખેત્તસ્મિન્તિ મતમનુસ્સસરીરે વુત્તનયેન અક્ખાયિતયેભુય્યક્ખાયિતભેદે મગ્ગત્તયસઙ્ખાતે પારાજિકક્ખેત્તે ચ યેભુય્યક્ખાયિતઉપડ્ઢક્ખાયિતભેદે તસ્મિંયેવ મગ્ગત્તયસઙ્ખાતે ચ, અક્ખાયિતયેભુય્યક્ખાયિતભેદે કણ્ણચ્છિદ્દક્ખિનાસાવત્થિકોસવણસઙ્ખાતે ચ થુલ્લચ્ચયક્ખેત્તે ઉપડ્ઢક્ખાયિતયેભુય્યક્ખાયિતભેદે તસ્મિંયેવ કણ્ણચ્છિદ્દક્ખિનાસાવત્થિકોસવણસઙ્ખાતે ચ, અક્ખાયિતયેભુય્યક્ખાયિતઉપડ્ઢક્ખાયિત યેભુય્યક્ખાયિતભેદે અવસેસસરીરસઙ્ખાતે દુક્કટક્ખેત્તે ચાતિ તિવિધેપિ ખેત્તે. સતીતિ વિજ્જમાને. સન્થતે વા અસન્થતે વા મેથુનરાગસ્સ વસા સેવતો યથારહં પારાજિકથુલ્લચ્ચયદુક્કટસઙ્ખાતા તિવિધા આપત્તિ ભવેય્યાતિ અત્થો.

એતેસમેવ ચ ઉદ્ધુમાતાદિભાવં સમ્પત્તે સરીરે સન્થતાદિવુત્તવિકપ્પયુત્તેસુ તીસુ મગ્ગેસુ યત્થ કત્થચિ મેથુનરાગેન સેવતો આપજ્જિતબ્બદુક્કટઞ્ચ ઉદ્ધુમાતાદિસમ્પત્તે સબ્બત્થાપિ ચ દુક્કટન્તિ મનુસ્સસરીરે વુત્તનયેન વિઞ્ઞાતું સક્કાતિ ઇમસ્મિં તિરચ્છાનગતસરીરે વિસેસમત્તં દસ્સેતું ‘‘તેસં અલ્લસરીરેસૂ’’તિઆદીનં વુત્તત્તા દુક્કટં પુબ્બે વુત્તનયેન વેદિતબ્બં. યથાહ અટ્ઠકથાયં ‘‘કુથિતકુણપે પન પુબ્બે વુત્તનયેનેવ સબ્બત્થ દુક્કટ’’ન્તિ.

૨૩. બહિ છુપન્તસ્સાતિ યોજના. નિમિત્તં મુત્તકરણં. ‘‘ઇત્થિયા’’તિ સામઞ્ઞેન વુત્તેપિ ચતુત્થગાથાય ‘‘તિરચ્છાનગતિત્થિયા’’તિ વક્ખમાનત્તા પારિસેસતો ઇમિના મનુસ્સામનુસ્સિત્થીનમેવ ગહણં, ઇમિના અમનુસ્સિત્થિયાપિ ગહણસ્સ. ઇમિસ્સાનન્તરગાથાય ઇતો ‘‘ઇત્થિયા’’તિ અનુવત્તિતે તત્રાપિ અમનુસ્સિત્થિયાપિ ગહણં સિયાતિ તમ્પિ વજ્જેત્વા કાયસંસગ્ગસઙ્ઘાદિસેસસ્સ વત્થુભૂતં મનુસ્સિત્થિમેવ દસ્સેતું તત્થ વુત્તં ‘‘ઇત્થિયા’’તિઅધિકવચનમેવ ઞાપકન્તિ વેદિતબ્બં.

મહાઅટ્ઠકથાયં (પારા. અટ્ઠ. ૧.૫૯-૬૦) ‘‘ઇત્થિનિમિત્તં મેથુનરાગેન મુખેન છુપતિ, થુલ્લચ્ચય’’ન્તિ સામઞ્ઞેન વુત્તત્તા ચ ધમ્મક્ખન્ધકે ‘‘ન ચ ભિક્ખવે રત્તચિત્તેન અઙ્ગજાતં છુપિતબ્બં, યો છુપેય્ય, આપત્તિ થુલ્લચ્ચયસ્સા’’તિ (મહાવ. ૨૫૨) સામઞ્ઞવચનતો ચ ઉદ્ધુમાતાદિભાવમસમ્પત્તાય અલ્લમતમનુસ્સિત્થિયા ચ અક્ખાયિતે વા યેભુય્યક્ખાયિતે વા નિમિત્તે સતિ પારાજિકવત્થુભાવતો તત્થાપિ બહિ છુપન્તસ્સ થુલ્લચ્ચયન્તિ અયમત્થોપિ મતામતવિસેસં અકત્વા ‘‘ઇત્થિયા’’તિ ઇમિનાવ સામઞ્ઞવચનેન ગહેતબ્બો.

૨૪. નિમિત્તેનાતિ અત્તનો અઙ્ગજાતેન. મુખેનાતિ પકતિમુખેન. નિમિત્તં ઇત્થિયાતિ જીવમાનકમનુસ્સિત્થિયા અઙ્ગજાતં. યસ્મા પન કાયસંસગ્ગસિક્ખાપદવિનીતવત્થૂસુ મતિત્થિવત્થુમ્હિ મતિત્થિયા સરીરે કાયસંસગ્ગરાગેન યો છુપતિ, તસ્સ ‘‘અનાપત્તિ ભિક્ખુ સઙ્ઘાદિસેસસ્સ, આપત્તિ થુલ્લચ્ચયસ્સા’’તિ (પારા. ૨૮૧) વુત્તત્તા મતમનુસ્સિત્થી ન ગહેતબ્બા. તથેવ યક્ખિવત્થુમ્હિ કાયસંસગ્ગરાગેન યક્ખિનિયા સરીરં યેન ફુટ્ઠં, તસ્સ ‘‘અનાપત્તિ ભિક્ખુ સઙ્ઘાદિસેસસ્સ, આપત્તિ થુલ્લચ્ચયસ્સા’’તિ વુત્તત્તા, ઇધેવ ઉપરિ દુતિયસઙ્ઘાદિસેસે ‘‘પણ્ડકે યક્ખિપેતીસુ, તસ્સ થુલ્લચ્ચયં સિયા’’તિ (વિ. વિ. ૩૪૧) વક્ખમાનત્તા ચ અમનુસ્સિત્થીપિ ન ગહેતબ્બા. તેન વુત્તં ‘‘જીવમાનકમનુસ્સિત્થિયા અઙ્ગજાત’’ન્તિ. અન્તો પવેસેતુકામતાય સતિ કાયસંસગ્ગરાગાસમ્ભવતો ‘‘કાયસંસગ્ગરાગેના’’તિ ઇમિના ચ બહિ છુપિતુકામતા વિઞ્ઞાયતીતિ ‘‘બહી’’તિ અનુવત્તનં વિનાપિ તદત્થો લબ્ભતિ. ગરુકન્તિ સઙ્ઘાદિસેસો.

૨૫. તથેવ બહિ છુપન્તસ્સાતિ યોજના, અન્તો અપ્પવેસેત્વા બહિયેવ છુપન્તસ્સાતિ વુત્તં હોતિ. ઉભયરાગેનાતિ કાયસંસગ્ગરાગેન, મેથુનરાગેન વા. પુરિસસ્સાપીતિ જીવમાનકપુરિસસ્સપિ. પિ-સદ્દો ન કેવલં વુત્તનયેન ઇત્થિયા નિમિત્તં ફુસન્તસ્સેવ આપત્તિ, અથ ખો પુરિસસ્સાપીતિ દીપેતિ. ‘‘નિમિત્ત’’ન્તિ મુત્તકરણમેવ વુચ્ચતિ. ‘‘જીવમાનકપુરિસસ્સા’’તિ અયં વિસેસો કુતો લબ્ભતીતિ ચે? ‘‘કાયસંસગ્ગરાગેન વા મેથુનરાગેન વા જીવમાનકપુરિસસ્સ વત્થિકોસં અપ્પવેસેન્તો નિમિત્તેન નિમિત્તં છુપતિ, દુક્કટ’’ન્તિ ઇતો અટ્ઠકથાવચનતો (પારા. અટ્ઠ. ૧.૫૯-૬૦) લબ્ભતિ.

૨૬. અચિરવતિતરન્તાનં ગુન્નં પિટ્ઠિં અભિરુહન્તા છબ્બગ્ગિયા ભિક્ખૂ મેથુનરાગેન અઙ્ગજાતેન અઙ્ગજાતં છુપિંસૂતિ ઇમસ્મિં વત્થુમ્હિ ‘‘ન ચ ભિક્ખવે રત્તચિત્તેન અઙ્ગજાતં છુપિતબ્બં, યો છુપેય્ય, આપત્તિ થુલ્લચ્ચયસ્સા’’તિ (મહાવ. ૨૫૨) આગતનયં દસ્સેતુમાહ ‘‘નિમિત્તેના’’તિઆદિ. એત્થાપિ ‘‘તથા’’તિ ઇમસ્સાનુવત્તનતો ‘‘બહી’’તિ લબ્ભતિ. અત્તનો નિમિત્તેન તિરચ્છાનગતિત્થિયા નિમિત્તં મેથુનરાગતો બહિ છુપન્તસ્સ થુલ્લચ્ચયં હોતીતિ યોજના.

૨૭. ‘‘મેથુનરાગતો’’તિ ઇમિના બ્યવચ્છિન્નમત્થં દસ્સેતુમાહ ‘‘કાયસંસગ્ગરાગેના’’તિઆદિ. એત્થાપિ ‘‘કાયસંસગ્ગરાગેના’’તિવચનસામત્થિયા બહિ છુપનં વેદિતબ્બં. નિમિત્તસ્સાતિ પસ્સાવમગ્ગસ્સ. છુપનેતિ ફુસને.

૨૮. તમાવટ્ટકતેતિ એત્થ ‘‘તં આવટ્ટકતે’’તિ પદચ્છેદો. આવટ્ટકતેતિ વિવટે. ‘‘મુખે’’તિ સમ્બન્ધિસદ્દત્તા, અઞ્ઞસ્સ સમ્બન્ધિનો ચ અનિદ્દિટ્ઠત્તા સુતાનુલોમિકાનં સુતસમ્બન્ધસ્સેવ બલવત્તા ચ પુરિમાનન્તરગાથાય ‘‘તિરચ્છાનગતિત્થિયા મુખે’’તિ કિઞ્ચાપિ સુતસ્સેવ સમ્બન્ધો વિઞ્ઞાયતિ, તથાપિ ઇમાય ગાથાય વિનીતવત્થુમ્હિ (પારા. ૭૩) ‘‘અઞ્ઞતરો ભિક્ખુ સિવથિકં ગન્ત્વા છિન્નસીસં પસ્સિત્વા વટ્ટકતે મુખે અચ્છુપન્તં અઙ્ગજાતં પવેસેસી’’તિ દસ્સિતછિન્નસીસવત્થુસ્સ સઙ્ગહિતત્તા મનુસ્સમુખમેવ ગહેતબ્બં સિયા. તિરચ્છાનગતાનં, પન અમનુસ્સાનઞ્ચ મુખે તથા પવેસો નિદ્દોસોતિ વત્તુમસક્કુણેય્યત્તા તત્થાપિ ઇદમેવ ઉપલક્ખણન્તિ પારાજિકપ્પહોનકાનં સબ્બેસં મુખેતિ દટ્ઠબ્બં. તં અઙ્ગજાતં. તત્થ આવટ્ટકતે પારાજિકપ્પહોનકાનં મુખે આકાસગતં કત્વા કત્થચિ અફુસાપેત્વા નીહરન્તસ્સ ઉક્ખિપન્તસ્સ દુક્કટન્તિ યોજના. અથ વા તિરચ્છાનાનં આવટ્ટકતે મુખેતિ યોજેત્વા તદઞ્ઞસઙ્ગહો ઉપલક્ખણવસેન કાતબ્બો.

૨૯. તથાતિ ‘‘આકાસગતં કત્વા’’તિ યથાવુત્તપ્પકારં પરામસતિ. ચતૂહિ પસ્સેહીતિ સહત્થે કરણવચનં. ‘‘પસ્સેહી’’તિ સમ્બન્ધિસદ્દત્તા ‘‘નિમિત્તસ્સા’’તિ સામત્થિયા લબ્ભતિ. ‘‘ઇત્થિયા’’તિ સામઞ્ઞસદ્દત્તા ‘‘સબ્બસ્સા’’તિ પાઠસેસો. જાતિવાચકત્તા એકવચનં. ‘‘ચતૂહિ પસ્સેહિ, હેટ્ઠિમત્તલ’’ન્તિ ચ ઇમેસં સમ્બન્ધિપદસ્સ અનિદ્દેસેપિ મેથુનપારાજિકાધિકારત્તા ચ સન્થતચતુક્કસ્સ અટ્ઠકથાવસાને ઇમાય ગાથાય સઙ્ગહિતસ્સ ઇમસ્સ વિનિચ્છયસ્સ પરિયોસાને ‘‘યથા ચ ઇત્થિનિમિત્તે વુત્તં, એવં સબ્બત્થ લક્ખણં વેદિતબ્બ’’ન્તિ (પારા. અટ્ઠ. ૧.૬૧-૬૨) નિમિત્તવિનિચ્છયસ્સાતિદેસસ્સ કતત્તા ચ સામત્થિયેન ‘‘નિમિત્તસ્સા’’તિ લબ્ભતિ. ઇદમેવ ‘‘પવેસેત્વા’’તિ એતસ્સ આધારવસેન ગહેતબ્બં. ‘‘અઙ્ગજાત’’ન્તિ અનુવત્તતિ.

એવં વાક્યં પૂરેત્વા ‘‘યથા આવટ્ટકતે મુખે અઙ્ગજાતં પવેસેત્વા તમાકાસગતં કત્વા નીહરન્તસ્સ દુક્કટં, તથા સબ્બસ્સા ઇત્થિયા નિમિત્તે પસ્સાવમગ્ગસઙ્ખાતે અઙ્ગજાતં પવેસેત્વા તસ્સ ચતૂહિ પસ્સેહિ સહ હેટ્ઠિમત્તલં ચત્તારો પસ્સે, હેટ્ઠિમત્તલઞ્ચ અચ્છુપન્તં આકાસગતં કત્વા નીહરન્તસ્સ દુક્કટ’’ન્તિ યોજેત્વા અત્થો વત્તબ્બો.

૩૦. ઉપ્પાટિતોટ્ઠમંસેસૂતિ ઉપ્પાટિતં ઓટ્ઠમંસં યેસન્તિ વિગ્ગહો. તેસુ દન્તેસુ. બહિનિક્ખન્તકેસુ વાતિ પકતિયા ઓટ્ઠમંસતો બહિ નિક્ખમિત્વા ઠિતેસુ વા દન્તેસુ. વાયમન્તસ્સાતિ અઙ્ગજાતેન છુપન્તસ્સ.

૩૧. અટ્ઠિસઙ્ઘટ્ટનં કત્વાતિ નિમિત્તમંસસન્નિસ્સયાનિ અટ્ઠીનિ સઙ્ઘટ્ટેત્વા. મગ્ગેતિ અટ્ઠિસઙ્ઘાતમયે મગ્ગે. દુવિધરાગતોતિ મેથુનરાગેન વા કાયસંસગ્ગરાગેન વા. વાયમન્તસ્સાતિ અઙ્ગજાતં પવેસેત્વા ચારેન્તસ્સ.

૩૨. આલિઙ્ગન્તસ્સાતિ પરિસ્સજન્તસ્સ. હત્થગાહાદીસુ હત્થો નામ કપ્પરતો પટ્ઠાય યાવ અગ્ગનખા. હત્થસ્સ, તપ્પટિબન્ધસ્સ ચ ગહણં હત્થગ્ગાહો. અવસેસસરીરસ્સ, તપ્પટિબન્ધસ્સ ચ પરામસનં પરામાસો. નિસ્સન્દેહે પન ‘‘માતુગામસ્સ સરીરસ્સ વા તપ્પટિબન્ધસ્સ વા હત્થેન ગહણં હત્થગ્ગાહો’’તિ વુત્તં, તં અટ્ઠકથાય ન સમેતિ. તસ્મા યથાવુત્તનયસ્સેવ અટ્ઠકથાસુ આગતત્તા સોયેવ સારતો પચ્ચેતબ્બો. પરામસેપિ ‘‘હત્થેન સરીરસ્સ, તપ્પટિબન્ધસ્સ ચ પરામસન’’ન્તિ યં તત્થ વુત્તં, તમ્પિ ન યુજ્જતિ. અવસેસસરીરાવયવેનાપિ પરામસતો દુક્કટમેવ હોતીતિ. ચુમ્બનાદીસૂતિ આદિ-સદ્દેન વેણિગ્ગાહાદિં સઙ્ગણ્હાતિ. ‘‘અયં નયો’’તિ એતેન ‘‘ઇત્થિયા મેથુનરાગેન હત્થગ્ગાહાદીસુ દુક્કટ’’ન્તિ ઇમમત્થં અતિદિસતિ.

૩૩. મનુસ્સામનુસ્સેહિ અઞ્ઞેસુ તિરચ્છાનગતેસુ હેટ્ઠિમપરિચ્છેદેન મેથુનધમ્મપારાજિકવત્થુભૂતે સત્તે દસ્સેતુમાહ ‘‘અપદે’’તિઆદિ. ‘‘અપદે, દ્વિપદે, ચતુપ્પદે’’તિ ઇમેહિ વિસેસનેહિ વિસેસિતબ્બં ‘‘સત્તનિકાયે’’તિ ઇદં વત્તબ્બં. અપદે સત્તનિકાયે. અહયોતિ થલચરેસુ ઉક્કટ્ઠપરિચ્છેદતો હત્થિગિલનકે અજગરે ઉપાદાય હેટ્ઠિમપરિચ્છેદેન નાગા ચ. મચ્છાતિ જલજેસુ ઉપરિમકોટિયા પઞ્ચસતયોજનિકાનિ તિમિરપિઙ્ગલાદિમચ્છે ઉપાદાય હેટ્ઠિમન્તતો પાઠીનપાવુસાદયો મચ્છા ચ. દ્વિપદે સત્તનિકાયે. કપોતાતિ ઉપરિમકોટિયા ગરુળે ઉપાદાય હેટ્ઠિમન્તતો કપોતાકપોતપક્ખી ચ. પારાવતાતિ કેચિ. ચતુપ્પદે સત્તનિકાયે. ગોધાતિ ઉપરિમકોટિયા હત્થિં ઉપાદાય હેટ્ઠિમન્તતો ગોધા ચાતિ ઇમે સત્તા. હેટ્ઠાતિ હેટ્ઠિમપરિચ્છેદતો. પારાજિકસ્સવત્થૂતિ મેથુનધમ્મપારાજિકસ્સ વત્થૂનીતિ પાઠસેસો.

૩૪. સેવેતુકામતા મેથુનસેવાય તણ્હા, તાય મેથુનરાગસઙ્ખાતાય સમ્પયુત્તં ચિત્તં સેવેતુકામતાચિત્તં. મગ્ગેતિ વચ્ચમગ્ગાદીનં અઞ્ઞતરે મગ્ગે. મગ્ગસ્સ અત્તનો મુત્તકરણસ્સ પવેસનં. પબ્બજ્જાય, પાતિમોક્ખસંવરસીલસ્સ વા અન્તે વિનાસે ભવોતિ અન્તિમો, પારાજિકાપન્નો પુગ્ગલો, તસ્સ વત્થુ અન્તિમભાવસ્સ કારણત્તા પારાજિકાપત્તિ અન્તિમવત્થૂતિ વુચ્ચતિ, તદેવ પઠમં ચતુન્નં પારાજિકાનં આદિમ્હિ દેસિતત્તા પઠમન્તિમવત્થુ, તસ્સ પઠમન્તિમવત્થુનો, પઠમપારાજિકસ્સાતિ વુત્તં હોતિ.

૩૫. સામન્તા આપત્તિસમીપે ભવં સામન્તં, પારાજિકાપત્તિયા સમીપે પુબ્બભાગે ભવન્તિ અત્થો. સેસાનં પન તિણ્ણમ્પીતિ અવસેસાનં અદિન્નાદાનાદીનં તિણ્ણં પારાજિકધમ્માનં. થુલ્લચ્ચયં સામન્તમિતિ ઉદીરિતન્તિ સમ્બન્ધો. કથમુદીરિતં? ‘‘ફન્દાપેતિ, આપત્તિ થુલ્લચ્ચયસ્સા’’તિ (પારા. ૯૪) દુતિયે, ‘‘મનુસ્સં ઉદ્દિસ્સ ઓપાતં ખણતિ, પતિત્વા દુક્ખવેદનં ઉપ્પાદેતિ, આપત્તિ થુલ્લચ્ચયસ્સા’’તિ, તતિયે, ‘‘પટિવિજાનન્તસ્સ આપત્તિ પારાજિકસ્સ, અપ્પટિવિજાનન્તસ્સ આપત્તિ થુલ્લચ્ચયસ્સા’’તિ (પારા. ૨૧૫) ચતુત્થે સમુદીરિતં.

એત્થ ચ ચતુત્થપારાજિકસ્સ થુલ્લચ્ચયાપત્તિયા સામન્તાપત્તિભાવો યસ્સ ઉત્તરિમનુસ્સધમ્મં સમુલ્લપતિ, સો યાવ ન પટિવિજાનાતિ, તાવ સમુલ્લપનપચ્ચયા થુલ્લચ્ચયાપત્તિસમ્ભાવે, સમુલ્લપિતે તસ્મિં સમુલ્લપિતમત્થે પટિવિજાનન્તે પારાજિકાપત્તિસમ્ભાવે ચ યુજ્જતિ. સો ચ ‘‘અપ્પટિવિજાનન્તસ્સ વુત્તે થુલ્લચ્ચય’’ન્તિ ઇમિનાવ સઙ્ગહિતોતિ દટ્ઠબ્બં.

૩૬. અજાનન્તસ્સ વાતૂપત્થદ્ધં અઙ્ગજાતં દિસ્વા અત્તનો રુચિયા વીતિક્કમં કત્વા માતુગામેસુ ગચ્છન્તેસુ અજાનમાનસ્સ, મહાવને દિવા નિદ્દુપગતભિક્ખુનો વિય પરેહિ કિરિયમાનં અજાનન્તસ્સાતિ વુત્તં હોતિ. તથેવાતિ ઇમિના ‘‘અનાપત્તીતિ ઞાતબ્બ’’ન્તિ ઇદમાકડ્ઢતિ. અસ્સાદિયન્તસ્સાતિ ભિક્ખુપચ્ચત્થિકેસુ અભિભવિત્વા વીતિક્કમં કરોન્તેસુ ચ કારાપેન્તેસુ ચ, સપ્પમુખં પવિટ્ઠકાલે વિય ઉત્તસિત્વા અનધિવાસેન્તસ્સ ચ, મહાવને દિવાવિહારોપગતભિક્ખુનો વિય પરોપક્કમં ઞત્વાપિ કાયે આદિત્તઅગ્ગિના વિય ઉત્તસિત્વા અનધિવાસેન્તસ્સાતિ અત્થો. ‘‘અજાનન્તસ્સા’’તિ એત્થ અપિ-સદ્દો યોજેતબ્બો. બુદ્ધસાસને ખીરસાગરસલિલનિમ્મલે સબ્બપઠમં પાતુભૂતત્તા આદિ ચ તં વીતિક્કમસઙ્ખાતં કમ્મઞ્ચાતિ આદિકમ્મં, તં એતસ્સ અત્થીતિ આદિકમ્મી, એત્થ સુદિન્નો ભિક્ખુ, તસ્સ આદિકમ્મિનોતિ ગહેતબ્બો. ઉપરિપિ ઇમેસં પદાનં આગતાગતટ્ઠાને ઇમિનાવ નયેન અત્થો વેદિતબ્બો. ઇધ ચ ઉપરિ સબ્બસિક્ખાપદેસુ ચ નિદાનાદિવસેન સત્તરસવિધો સાધારણવિનિચ્છયો પકિણ્ણકે સઙ્ખેપતો, ઉત્તરે વિત્થારતો ચ આવિ ભવિસ્સતિ. તસ્મા એત્થ ન દસ્સિતોતિ વેદિતબ્બં.

૩૭-૩૮. વિનયેતિ વિનયપિટકે. અનયૂપરમેતિ નેતિ પાપેતિ સીલસમ્પદં સમાધિસમ્પદં પઞ્ઞાસમ્પદઞ્ચાતિ નયો, કાયવચીદ્વારેહિ અવીતિક્કમસઙ્ખાતો સંવરો, તપ્પટિપક્ખો અસંવરો અનયો નામ, તસ્સ ઉપરમો નિવત્તિ એત્થાતિ અનયૂપરમો, વિનયો, તત્થ અનયૂપરમે વિનયે.

તતો એવ પરમે ઉક્કટ્ઠે. અનયસ્સ વા ઉપરમે નિવત્તને પરમે ઉક્કટ્ઠેતિ ગહેતબ્બં. પરા ઉત્તમા મા સાસનસિરી એત્થાતિ પરમો, વિનયોતિ એવમ્પિ ગહેતબ્બં. ‘‘વિનયો નામ સાસનસ્સ આયૂ’’તિ (દી. નિ. અટ્ઠ. ૧.પઠમસઙ્ગીતિકથા; પારા. અટ્ઠ. ૧.પઠમસઙ્ગીતિકથા; ખુ. પા. અટ્ઠ. ૫.મહાસઙ્ગીતિકથા; થેરગા. અટ્ઠ. ૧.૨૫૧) વચનતો ઉત્તમસાસનસમ્પત્તિયુત્તેતિ અત્થો.

સુજનસ્સાતિ સોભણો જનો સુજનો, સિક્ખાકામો અધિસીલસિક્ખાય સોભમાનો પિયસીલો કુલપુત્તો, તસ્સ નયને નયનૂપમે વિનયેતિ સમ્બન્ધો. અનયૂપરમત્તા, પરમત્તા ચ સુજનસ્સ કુલપુત્તસ્સ નયને નયનૂપમે. સુખાનયનેતિ લોકિયલોકુત્તરભેદં સુખં આનેતીતિ સુખાનયનં, તસ્મિં. ઇદઞ્ચ ‘‘નયને’’તિ એતસ્સ વિસેસનં.

એતં વિસેસનં કિમત્થન્તિ ચે? ઉપમાભાવેન ગહિતપકતિનયનતો ઇધ સમ્ભવન્તં વિસેસં દસ્સેતુન્તિ વેદિતબ્બં. કતરો સો વિસેસોતિ ચે? પકતિનયનં રાગદોસાદિકિલેસૂપનિસ્સયો હુત્વા દિટ્ઠધમ્મિકસમ્પરાયિકદુક્ખસ્સ ચ પચ્ચયો હોતિ. ઇદં પન વિનયનયનં ઇમસ્સ કુલપુત્તસ્સ એવં અહુત્વા એકંસેન મોક્ખાવહનસુખસ્સેવ પચ્ચયો હોતીતિ ઇમસ્સ વિસેસસ્સ દસ્સનત્થં. યથા વિનયમવિરાધેત્વા પટિપજ્જનેન સિજ્ઝનકસીલસંવરમૂલકઅવિપ્પટિસારાદિઅનુપાદિસેસપરિનિબ્બાનાવસા- નફલસમ્પત્તિવસેન ઉપ્પજ્જનકલોકિયલોકુત્તરસુખાવહને વિનયેતિ વુત્તં હોતિ.

પધાનરતોતિ એત્થ ‘‘અપી’’તિ પાઠસેસો. પધાને વિનયાભિયોગે રતોપિ, વિનયે અજ્ઝાયનસવનચિન્તનાદિવસેન વાયમન્તોપીતિ અત્થો. અથ વા ‘‘વિરાગો સેટ્ઠો ધમ્માન’’ન્તિ (ધ. પ. ૨૭૩; નેત્તિ. ૧૭૦; કથા. ૮૭૨) વચનતો પધાનં નિબ્બાનં, તસ્મિં રતોતિ અત્થો. સારમતેતિ ‘‘સાર’’ન્તિ અધિમતે. અથ વા સારં અફેગ્ગુમતં મહાવિહારવાસીનં આચરિયમતં એત્થાતિ ‘‘સારમતો’’તિ વિનયવિનિચ્છયો વુત્તો, તસ્મિં. ઇધાતિ ઇમસ્મિં વિનયવિનિચ્છયે. રતોતિ અચ્ચન્તાભિરતો. ‘‘ન રતો’’તિ એત્થ ન-કારં ‘‘રમતે’’તિ ઓસાનપદેન યોજેત્વા યો પન ન રમતેતિ સમ્બન્ધો.

થેરનવમજ્ઝિમભિક્ખુભિક્ખુનીનં અન્તરે યો પન પુગ્ગલો નિચ્ચપરિવત્તનસવનાનુસ્સરણચિન્તનવસેન ન રમતે ન કીળતિ, સો પુગ્ગલો વિનયે પધાનરતોપિ વિનયપિટકે અજ્ઝયનસવનાદિવસેન યુત્તપયુત્તોપિ પટુ હોતિ કિં, ન હોતેવાતિ દસ્સેતિ. વિનયપિટકે પાટવમાકઙ્ખન્તેહિ પઠમં તાવેત્થ સક્કચ્ચં અભિયોગો કાતબ્બોતિ અધિપ્પાયો.

ઇમમેવત્થં આનિસંસપારંપરિયપયોજનેન સહ દસ્સેતુમાહ ‘‘ઇમ’’ન્તિઆદિ. ઇમન્તિ વુચ્ચમાનં વિનયવિનિચ્છયં, ‘‘અવેદી’’તિ ઇમિના સમ્બન્ધો. ‘‘યો’’તિ પાઠસેસો. યો કુલપુત્તો સતિસમ્પજઞ્ઞસદ્ધાસમ્પન્નો ઇમં વિનયવિનિચ્છયં સમ્મા અવેદિ અઞ્ઞાસિ. કિં ભૂતન્તિ આહ ‘‘હિતવિભાવન’’ન્તિ. લોકિયલોકુત્તરસમ્પત્તિયા મૂલસાધનત્તા સીલમિધ હિતં નામ, તં વિભાવેતિ પકાસેતીતિ હિતવિભાવનોતિ વિગ્ગહો. ‘‘સીલે પતિટ્ઠાય…પે… વિજટયે જટ’’ન્તિ (સં. નિ. ૧.૨૩, ૧૯૨; મિ. પ. ૨.૧.૯) વુત્તત્તા સબ્બકિલેસજટાવિજટનલોકુત્તરઞાણસ્સ પદટ્ઠાનસોપચારસાભિઞ્ઞારૂપારૂપઅટ્ઠસમાધીનં પદટ્ઠાનતાય સબ્બલોકિયલોકુત્તરગુણસમ્પદાનં મૂલભૂતેસુ ચતુપારિસુદ્ધિસીલેસુ પધાનં પાતિમોક્ખસંવરસીલં, તપ્પકાસકત્તા અયં વિનયવિનિચ્છયો ‘‘હિતવિભાવનો’’તિ વુત્તો.

ભાવનન્તિ ભાવીયતિ પુનપ્પુનં ચેતસિ નિવેસીયતીતિ ભાવનો, ભાવનીયોતિ વુત્તં હોતિ. હિતવિભાવકત્તાયેવ હિતત્થીહિ પુનપ્પુનં ચિત્તે વાસેતબ્બોતિ વુત્તં હોતિ, તં એવંવિધં વિનયવિનિચ્છયં. સુરસમ્ભવન્તિ રસીયતિ અસ્સાદીયતીતિ રસો, સદ્દરસો અત્થરસો કરુણાદિરસો વિમુત્તિરસો ચ, સોભણો રસો એતસ્સાતિ સુરસો, વિનયવિનિચ્છયો, તં સુરસં. ભવં ભવન્તં, સન્તન્તિ વુત્તં હોતિ, સુરસં સમાનં, સુરસં ભૂતન્તિ અત્થો. કિં વુત્તં હોતિ? ‘‘સિલેસો પસાદો સમતા મધુરતા સુખુમાલતા અત્થબ્યત્તિ ઉદારતા ઓજો કન્તિ સમાધી’’તિ એવં વુત્તેહિ કવિજનેહિ અસ્સાદેતબ્બસિલેસાદિદસવિધસદ્દજીવિતગુણસઙ્ખાતસદ્દરસસમ્પત્તીહિ ચ સભાવાખ્યાનં ઉપમા રૂપકં દીપકં આવુત્તીતિ એવમાદિક્કમનિદ્દિટ્ઠપઞ્ચતિંસઅત્થાલઙ્કારેસુ અનુરૂપસભાવાખ્યાનાદિપ્પધાનઅત્થાલઙ્કારસઙ્ખાતઅત્થરસસમ્પત્તીહિ ચ યથાસમ્ભવં પકાસિતબ્બકરુણારસઅબ્ભુતરસસન્તરસાદીહિ ચ યુત્તત્તા સુરસં ઇમં વિનયવિનિચ્છયન્તિ વુત્તં હોતિ.

અથ વા ઇમિના પકરણેન પધાનતો વિધીયમાનપાતિમોક્ખસંવરસીલસ્સ એકન્તેન સમાધિસંવત્તનિકત્તા સમાધિસ્સ ચ પઞ્ઞાય પદટ્ઠાનત્તા પઞ્ઞાય ચ નિબ્બાનપાપનતો મૂલકારણં હુત્વા કમેન નિબ્બાનામતફલરસસમ્પદાયકં ઇમં વિનયવિનિચ્છયં પરમસ્સાદનીયરૂપેન ધિતિવિમુત્તિરસેન સુરસભૂતન્તિ વુત્તં હોતીતિ ચ વેદિતબ્બં. સમ્ભવન્તિ એત્થ સં વુચ્ચતિ સુખં કાયિકં ચેતસિકઞ્ચ, તં ભવતિ એતસ્માતિ સમ્ભવો, વિનયવિનિચ્છયો, તં, કાયચિત્તસુખાનં મૂલકારણભૂતં, વુત્તનયેન સુરસત્તા ચ યથાવુત્તરસસમ્પદસારમહુસ્સવેન સમ્ભૂતમાનસિકસુખસ્સ, તંસમુટ્ઠાનરૂપનિસ્સયકાયિકસુખસ્સ ચ પભવભૂતન્તિ અત્થો. એત્તાવતા ઇમસ્સ વિનયવિનિચ્છયસ્સ સમ્મા વિઞ્ઞાતબ્બતાય કારણં દસ્સિતં હોતિ.

એવં નાનાગુણરતનાકરં ઇમં વિનયવિનિચ્છયં સમ્પજાનન્તો સો કુલપુત્તો કિં હોતીતિ ચે? પાલિના ઉપાલિના સમો ભવતિ. પાલિનાતિ સાસનં પાલેતીતિ ‘‘પાલો’’તિ વિનયો વુચ્ચતિ, વુત્તઞ્હિ ‘‘વિનયો નામ સાસનસ્સ આયૂ’’તિ (દી. નિ. અટ્ઠ. ૧.પઠમસઙ્ગીતિકથા; પારા. અટ્ઠ. ૧.પઠમસઙ્ગીતિકથા; ખુ. પા. અટ્ઠ. ૫.મહાસઙ્ગીતિકથા; થેરગા. અટ્ઠ. ૧.૨૫૧) સો અસ્સ અત્થીતિ પાલી, પરિયત્તિપટિપત્તિપટિવેધવસેન તિવિધસાસનસ્સ જીવિતભૂતવિનયપઞ્ઞત્તિસઙ્ખાતસાસનધરત્તા ‘‘પાલી’’તિ લદ્ધનામેન ઉપાલિના, ‘‘એતદગ્ગં ભિક્ખવે મમ સાવકાનં ભિક્ખૂનં વિનયધરાનં યદિદં ઉપાલી’’તિ (અ. નિ. ૧.૨૧૯, ૨૨૮) ચતુપરિસમજ્ઝે નિસિન્નેન સદ્ધમ્મવરચક્કવત્તિના સમ્માસમ્બુદ્ધેન મુખપદુમં વિકાસેત્વા પકાસિતએતદગ્ગટ્ઠાનેન વિસેસતો સાયનરક્ખનકભાવેન પટિલદ્ધપાલીતિનામધેય્યેન ઉપાલિમહાથેરેન સમો હોતીતિ વુત્તં હોતિ.

કસ્મિં વિસયે સમો ભવતીતિ ચે? સાસને. સાસનેતિ યથાવુત્તે તિવિધે સાસને, તત્રાપિ થાવરજઙ્ગમસકલવત્થુવિત્થારાધરમણ્ડલસદિસે પટિપત્તિપટિવેધદ્વયધારે પરિયત્તિસાસને, તત્થાપિ વિનયકથાધિકારત્તા લબ્ભમાને વિનયપિટકસઙ્ખાતપરિયત્તિસાસનેકદેસે સમો ભવતીતિ અત્થો.

કિંભૂતે સાસને? મારબલિસાસને. મારસ્સ બલિ મારબલિ, મારગોચરો, તસ્સ સાસનં હિંસકં મારબલિસાસનં, તસ્મિં. ખન્ધાદીસુ પઞ્ચસુ મારેસુ પધાનભૂતકામરાગાદિપભવકિલેસમારસ્સ ગોચરભાવેન બલિસઙ્ખાતઇત્થિસરીરાદિનિસ્સયફોટ્ઠબ્બાદિવિસયસ્સ પરિચ્ચજાપનત્થં ‘‘યો પન ભિક્ખુ…પે… અસંવાસો’’તિઆદિના (પારા. ૪૪) નયેન વુત્તત્તા તસ્સ મારબલિસ્સ હિંસકં હોતીતિ મારબલિસાસનનામધેય્યવિનયપઞ્ઞત્તિસઙ્ખાતસાસનેતિ અત્થો.

અથ વા ‘‘બળિસેનપિ જાલેન, હત્થેન કુમિનેન વા’’તિ ઉદકટ્ઠકથાય વક્ખમાનત્તા બળિસ-સદ્દેન મચ્છમારણકણ્ટકમાહ, તં મારસ્સ બળિસં અસતિ ખિપતિ વજ્જેતીતિ મારબળિસાસનં, તસ્મિં, ‘‘સમન્તપાસો મારસ્સા’’તિ વુત્તત્તા સંસારસાગરે પરિવત્તમાનકસંકિલેસદાસપુથુજ્જનસઙ્ખાતમચ્છે ગણ્હિતું મારમહાકેવટ્ટેન પક્ખિત્તબળિસસઙ્ખાતઇત્થિરૂપસદ્દાદિપઞ્ચકામગુણા- મિસાવુતકામરાગાદિકિલેસમહાબળિસં તદઙ્ગપ્પહાનવીતિક્કમપ્પહાનાદિવસેન પજહન્તે વિનયપઞ્ઞત્તિસઙ્ખાતે સાસનેતિ અધિપ્પાયો.

એત્થ ચ સારમતે ઇધ ઇમસ્મિં વિનયવિનિચ્છયે યો પન ન રમતે, સો પુગ્ગલો અનયૂપરમે તતો એવ પરમે ઉત્તમે સુજનસ્સ સુખાનયને નયને નયનુપમે વિનયે રતો અભિરતો પધાનરતોપિ વિનયે અજ્ઝાયનાદીસુ યોગમાપજ્જન્તોપિ પટુ હોતિ પટુતરો હોતિ કિં, ન હોતેવ. તસ્મા વિનયે પાટવત્થિના એત્થેવ સક્કચ્ચાભિયોગો કાતબ્બોતિ સઙ્ખેપતો સાધિપ્પાયા અત્થયોજના વેદિતબ્બા. અથ વા પધાને ચતુબ્બિધે સમ્મપ્પધાને વીરિયે રતો અભિરતો યો પન નરો સારમતે ઇધ ઇમસ્મિં વિનયવિનિચ્છયે યતો રમતે, અતો તસ્મા સો અનયૂપરમે સુજનસ્સ સુખાનયને વિનયે પટુ હોતિ કુસલો હોતીતિ યોજનાતિ નો ખન્તિ.

હિતવિભાવનં હિતપ્પકાસકં ભાવનં ભાવનીયં આસેવિતબ્બં સુરસમ્ભવં સુરસં સમાનં સુરસં ભૂતં સમ્ભવં સુખહેતુકં ઇમં વિનયવિનિચ્છયં યો અવેદિ અઞ્ઞાસિ, સો પુગ્ગલો મારબળિસાસને મારવિસયપ્પહાનકરે, અથ વા મારબળિસસ્સ મારસ્સ વત્થુકામામિસાવુતકિલેસકામબળિસસ્સ અસને વજ્જમાને સાસને તિવિધેપિ જિનસાસને, તત્થાપિ પટિપત્તિપટિવેધાનં પતિટ્ઠાનભૂતે પરિયત્તિસાસને, તત્રાપિ સકલસાસનસ્સ જીવિતસમાને વિનયપઞ્ઞત્તિસઙ્ખાતપરિયત્તિસાસનેકદેસે પાલિના વિનયપરિયત્તિયં એતદગ્ગે ઠપનેન સાસનપાલને તંમૂલભાવતો પાલસઙ્ખાતવિનયપરિયત્તિયા પસત્થતરેન ઉપાલિના ઉપાલિમહાથેરેન સમો ભવતીતિ યોજના.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

પઠમપારાજિકકથાવણ્ણના નિટ્ઠિતા.

દુતિયપારાજિકકથાવણ્ણના

૩૯. ઇદાનિ દુતિયં પારાજિકવિનિચ્છયં દસ્સેતુમાહ ‘‘આદિયન્તો’’તિઆદિ. તત્થ ‘‘થેય્યચિત્તેના’’તિ પાઠસેસો. સો ચ પચ્ચત્તેકવચનન્તેહિ સબ્બપદેહિ યોજેતબ્બો, થેય્યચિત્તેન આદિયન્તો પરાજિતોતિ સમ્બન્ધો. પરસન્તકં આરામાદિં અભિયુઞ્જિત્વા સામિકં પરાજેત્વા થેય્યચિત્તેન ગણ્હન્તો તદત્થાય કતે પુબ્બપયોગે દુક્કટં, સામિકસ્સ વિમતુપ્પાદને થુલ્લચ્ચયઞ્ચ આપજ્જિત્વા તસ્સ ચ અત્તનો ચ ધુરનિક્ખેપેન પાતિમોક્ખસંવરસીલસમ્પત્તિયા અદાયાદો હુત્વા પરાજિતો હોતીતિ વુત્તં હોતિ.

‘‘તથા’’તિ ચ ‘‘અપી’’તિ ચ ‘‘પરાજિતો’’તિ ચ ‘‘થેય્યચિત્તેના’’તિ ઇમિના સહ એકતો કત્વા ‘‘હરન્તો’’તિઆદીહિ ચતૂહિપિ પદેહિ યોજેતબ્બં. થેય્યચિત્તેન હરન્તોપિ તથા પરાજિતોતિ યોજના સીસાદીહિ પરસન્તકં ભણ્ડં હરન્તો થેય્યચિત્તેન ભણ્ડસ્સ આમસને દુક્કટઞ્ચ ફન્દાપને થુલ્લચ્ચયઞ્ચ આપજ્જિત્વા સીસતો ખન્ધોહરણાદિપયોગં કરોન્તોપિ તથા પરાજિતો હોતીતિ અત્થો.

થેય્યચિત્તેન અવહરન્તોપિ તથા પરાજિતોતિ યોજના. અયં પનેત્થ અત્થો – અઞ્ઞેહિ સઙ્ગોપનાદિં સન્ધાય અત્તનિ ઉપનિક્ખિત્તભણ્ડં ‘‘દેહિ મે ભણ્ડ’’ન્તિ ચોદિયમાનો ‘‘ન મયા ગહિત’’ન્તિઆદિના મુસા વત્વા થેય્યચિત્તેન ગણ્હન્તોપિ તસ્સ વિમતુપ્પાદને થુલ્લચ્ચયમાપજ્જિત્વા તથેવ ધુરનિક્ખેપેન પરાજિતો હોતીતિ. ‘‘નાહં અગ્ગહેસિ’’ન્તિઆદિના અવજાનિત્વા પટિક્ખિપિત્વા હરન્તો ‘‘અવહરન્તો’’તિ વુત્તો.

થેય્યચિત્તેન ઇરિયાપથં વિકોપેન્તોપિ તથા પરાજિતોતિ યોજના. યં પન અઞ્ઞેસં ભણ્ડહરણકમનુસ્સાદીનમઞ્ઞતરં ‘‘તેન ભણ્ડેન સહ ગણ્હામી’’તિ ભણ્ડં હરન્તં થેય્યચિત્તેન નિવારેત્વા અત્તના ઇચ્છિતદિસાભિમુખં કત્વા તસ્સ પકતિઇરિયાપથં વિકોપેન્તોપિ પઠમપાદુદ્ધારેન થુલ્લચ્ચયમાપજ્જિત્વા દુતિયપદવારાતિક્કમેન તથેવ પરાજિતો હોતીતિ અત્થો.

થેય્યચિત્તેન ઠાના ચાવેન્તોપિ તથા પરાજિતોતિ યોજના. થલાદીસુ ઠિતં ભણ્ડં થેય્યચિત્તેન અવહરિતુકામતાય ઠિતટ્ઠાનતો અપનેન્તોપિ દુતિયપરિયેસનાદીસુ આમસનાવસાનેસુ સબ્બેસુપિ પયોગેસુ દુક્કટાનિ ચ ફન્દાપને થુલ્લચ્ચયઞ્ચ આપજ્જિત્વા ઉપરિ વક્ખમાનપ્પકારેસુ વિય ઠિતટ્ઠાનતો કેસગ્ગમત્તમ્પિ અપનેન્તો તથેવ પરાજિતો હોતીતિ અત્થો.

એવમેતાય ગાથાય ‘‘આદિયેય્ય હરેય્ય અવહરેય્ય ઇરિયાપથં વિકોપેય્ય ઠાનાચાવેય્ય સઙ્કેતં વીતિનામેય્યા’’તિ (પારા. ૯૨) પદભાજનાગતેસુ છસુ પદેસુ આદો પઞ્ચ પદાનિ સઙ્ગહેત્વા છટ્ઠં પદં કસ્મા ન સઙ્ગહિતન્તિ ચે? અયં ગાથા ન તંપદભાજનં દસ્સેતું વુત્તા, અથ ખો તેસં પદાનં વિનિચ્છયં સન્ધાય અટ્ઠકથાસુ (પારા. અટ્ઠ. ૧.૯૨) વુત્તપઞ્ચવીસતિઅવહારે દસ્સેતું તદવયવભૂતપઞ્ચપઞ્ચકાનિ દસ્સેતુકામેન વુત્તા, તસ્મા એત્થ છટ્ઠં પદં ન વુત્તન્તિ દટ્ઠબ્બં. અથ વા વક્ખમાને તતિયપઞ્ચકે નિસ્સગ્ગિયાવહારપદેન, પઞ્ચમપઞ્ચકે પરિકપ્પાવહારપદેન ચ સઙ્ગય્હમાનત્તા એત્થ નાનેકભણ્ડપઞ્ચકદ્વયં અસઙ્કરતો દસ્સેતું છટ્ઠં પદં ન ગહિતન્તિ વેદિતબ્બં.

૪૦. ઇમસ્મિં અદિન્નાદાનપારાજિકે વત્થુમ્હિ ઓતિણ્ણે કત્તબ્બવિનિચ્છયસ્સ પઞ્ચવીસતિઅવહારાનં અઙ્ગાનિ હોન્તિ, તે ચ નાનાભણ્ડપઞ્ચકં એકભણ્ડપઞ્ચકં સાહત્થિકપઞ્ચકં પુબ્બપયોગપઞ્ચકં થેય્યાવહારપઞ્ચકન્તિ નિદ્દિટ્ઠા પઞ્ચપઞ્ચકભેદા, તત્થ ઇમાય ગાથાય નાનેકભણ્ડપઞ્ચકદ્વયપ્પભેદે દસ અવહારે સઙ્ગહેત્વા અવસેસપઞ્ચકત્તયં દસ્સેતું ‘‘તત્થા’’તિ આરદ્ધં. તત્થ તત્થાતિ તિસ્સં ગાથાયં. નાનેકભણ્ડાનન્તિ નાના, એકો ચ ભણ્ડો યેસન્તિ વિગ્ગહો. સવિઞ્ઞાણકઅવિઞ્ઞાણકભણ્ડવસેન નાનાભણ્ડપઞ્ચકઞ્ચ સવિઞ્ઞાણકભણ્ડવસેનેવ એકભણ્ડપઞ્ચકઞ્ચ વેદિતબ્બં. પઞ્ચ પરિમાણા યેસન્તે પઞ્ચકા, તેસં. અવહારાતિ અવહરણાનિ, ચોરકમ્માનીતિ વુત્તં હોતિ. એતેતિ અનન્તરગાથાય ‘‘આદિયન્તો’’તિઆદિના નિદ્દિટ્ઠા આદિયન્તાદયો. પટિપત્તિસન્તાને વિસેસં વિનિચ્છયં ભાવેતિ ઉપ્પાદેતીતિ વિભાવી, વિનયધરો, તેન વિભાવિના. વિઞ્ઞાતબ્બાતિ પરેસં આરામાદિસવિઞ્ઞાણકવત્થૂનિ વા દાસમયૂરાદિં કેવલં સવિઞ્ઞાણકવત્થુમત્તં વા અવહરિતું કતા યથાવુત્તસરૂપા આદિયનાદયો ઠાનાચાવનપરિયોસાના પઞ્ચ અવહારા યથાવુત્તનાનાભણ્ડએકભણ્ડવિસયા હુત્વા પવત્તન્તીતિ નાનાભણ્ડપઞ્ચકં એકભણ્ડપઞ્ચકન્તિ દસ અવહારા ભવન્તીતિ વિનયધરેન ઓતિણ્ણસ્સ વત્થુનો વિનિચ્છયોપકારકત્તા તથતો ઞાતબ્બાતિ અત્થો.

૪૧. એવં પઞ્ચવીસતિ અવહારે દસ્સેતું વત્તબ્બેસુ પઞ્ચસુ પઞ્ચકેસુ નાનેકભણ્ડપઞ્ચકાનિ દ્વે દસ્સેત્વા ઇદાનિ અવસેસપઞ્ચકત્તયં દસ્સેતુમાહ ‘‘સાહત્થા’’તિઆદિ. તત્થ સાહત્થોતિ સકો હત્થો, તેન નિબ્બત્તો, તસ્સ વા સમ્બન્ધીતિ સાહત્થો, અવહારો, ચોરેન સહત્થા કતો અવહારોતિ અત્થો. આણત્તિકો ચેવાતિ આણત્તિયા નિબ્બત્તો આણત્તિકો, અવહારો, ચોરસ્સ ‘‘ઇમં નામ ભણ્ડં ગણ્હા’’તિ યસ્સ કસ્સચિ આણાપનેન સિદ્ધો અવહારો ચ. નિસ્સગ્ગોતિ નિસ્સજ્જનં નિસ્સગ્ગો, અવહારો, સુઙ્કઘાતટ્ઠાને, પરિકપ્પિતોકાસે વા ઠત્વા ભણ્ડસ્સ બહિ પાતનન્તિ વુત્તં હોતિ.

અત્થસાધકોતિ પારાજિકાપત્તિસઙ્ખાતં અત્થં સાધેતીતિ અત્થસાધકો, સો અવહારો ચ યથાણત્તિકં અવિરાધેત્વા એકંસેન અવહરન્તસ્સ ‘‘અસુકસ્સ ભણ્ડં અવહરા’’તિ અવિસેસેન વા અવહરિતબ્બવત્થુવિસેસો ગહણકાલો ગહણદેસો ગહણાકારો ચાતિ એવમાદિવિસેસાનમઞ્ઞતરેન વિસેસેત્વા વા આણાપનઞ્ચ એકંસેન પાદગ્ઘનકતેલપિવનકં ઉપાહનાદિકિઞ્ચિવત્થું તેલભાજનાદીસુ પાતનાદિપ્પયોગો ચાતિ એવમાદિપ્પયોગો ચ કિરિયાસિદ્ધિયા પુરેતરમેવ પારાજિકસઙ્ખાતસ્સ અત્થસ્સ સાધનતો અત્થસાધકો અવહારો ચાતિ વુત્તં હોતિ.

ધુરનિક્ખેપનઞ્ચાતિ ધુરસ્સ નિક્ખેપનં ધુરનિક્ખેપનં, તઞ્ચ અવહારો, પરસન્તકાનં આરામાદીનં અભિયોગવિસયે ચ ઉપનિક્ખિત્તસ્સ ભણ્ડાદિનો વિસયે ચ ચોરસ્સ સામિનો વિસ્સજ્જને ચ સામિનો ચ, યદા કદાચિ યથાકથઞ્ચિ ગણ્હિસ્સામીતિ ગહણે નિરુસ્સાહભાવસઙ્ખાતો ધુરનિક્ખેપાવહારો ચાતિ વુત્તં હોતિ. ઇતિ ઇદં ધુરનિક્ખેપનઞ્ચ યથાવુત્તપ્પકારં સાહત્થાદિચતુક્કઞ્ચ પઞ્ચન્નં અવહારાનં સમૂહો પઞ્ચકં, સાહત્થાદિપઞ્ચકં ‘‘સાહત્થપઞ્ચક’’ન્તિ વુચ્ચતિ. આદિ-સદ્દો લુત્તનિદ્દિટ્ઠોતિ વેદિતબ્બં.

૪૨. પુબ્બસહપયોગા ચાતિ એત્થ ‘‘પુબ્બપયોગો સહપયોગો’’તિ પયોગ-સદ્દો પચ્ચેકં યોજેતબ્બો. ‘‘આણત્તિવસેન પુબ્બપયોગો વેદિતબ્બો’’તિ અટ્ઠકથાવચનતો (પારા. અટ્ઠ. ૧.૯૨) યથાણત્તિકમવિરાધેત્વા ગણ્હતો ‘‘અસુકસ્સ ઇત્થન્નામં ભણ્ડં અવહરા’’તિ આણાપનં પુબ્બપયોગો નામ અવહારો. કાયેન, વાચાય વા પયુજ્જનં આણાપનં પયોગો, આણત્તસ્સ ભણ્ડગ્ગહણતો પુબ્બત્તા પુબ્બો ચ સો પયોગો ચાતિ પુબ્બપયોગો અવહારોતિ દટ્ઠબ્બં. ‘‘ઠાનાચાવનવસેન સહપયોગો વેદિતબ્બો’’તિ અટ્ઠકથાવચનસ્સ ઉપલક્ખણપદત્તા ઠાનાચાવનઞ્ચ પરાયત્તભૂમિગહણે ખીલસઙ્કમનાદિકઞ્ચ સહપયોગો અવહારોતિ વેદિતબ્બો.

સંવિદાહરણન્તિ બહૂહિ એકતો હુત્વા ‘‘ઇદં નામ ભણ્ડં અવહરિસ્સામા’’તિ સંવિદહિત્વા સબ્બેહિ, એકતો વા સબ્બેસં અનુમતિયા એકેન વા ગન્ત્વા પરસન્તકસ્સ થેય્યચિત્તેન હરણસઙ્ખાતો સંવિદાવહારો ચ. સમં એકી હુત્વા વિસું એકેનાપિ થેય્યચિત્તેન પાદે વા પાદારહે વા ગહિતે કતમન્તનાનં સબ્બેસમ્પિ પારાજિકં હોતીતિ દટ્ઠબ્બં. સંવિદહિત્વા મન્તેત્વા અવહરણં સંવિદાહરણં. નિરુત્તિનયેન સદ્દસિદ્ધિ વેદિતબ્બા. ‘‘સંવિદાહરણ’’ન્તિ ‘‘સંવિદાવહારો’’તિ ઇમસ્સ વેવચનં. ‘‘સમ્બહુલા સંવિદહિત્વા એકો ભણ્ડં અવહરતિ, આપત્તિ સબ્બેસં પારાજિકસ્સા’’તિ (પારા. ૧૧૮) વચનતો એવં સહકતમન્તનેસુ એકેનાપિ થેય્યચિત્તેન પાદે વા પાદારહે વા ગહિતે કતમન્તનાનં સબ્બેસં પારાજિકં હોતીતિ દટ્ઠબ્બં.

સઙ્કેતકમ્મન્તિ પુબ્બણ્હાદિકાલપરિચ્છેદેન સઞ્જાનનં સઙ્કેતો, તેન કતં કમ્મં અવહરણં સઙ્કેતકમ્મં નામ. તં પન પુરેભત્તાદીસુ કઞ્ચિ કાલં પરિચ્છિન્દિત્વા ‘‘ઇમસ્મિં કાલે ઇત્થન્નામં ભણ્ડં અવહરા’’તિ વુત્તે તસ્મિંયેવ કાલે તંયેવ યથાવુત્તં ભણ્ડં અવહરતિ ચે, સઙ્કેતકારકસ્સ સઙ્કેતક્ખણેયેવ પારાજિકન્તિ સઙ્ખેપતો વેદિતબ્બં.

નેમિત્તન્તિ પરભણ્ડાવહારસ્સ હેતુત્તા અક્ખિનિખણનાદિ નિમિત્તં નામ, તેન નિબ્બત્તં નેમિત્તં, અવહરણસઙ્ખાતકમ્મં અવહારો. ‘‘મયા અક્ખિમ્હિ નિખણિતે વા ભમુમ્હિ ઉક્ખિત્તે વા ઇત્થન્નામં ભણ્ડં અવહરા’’તિ આણત્તેન તં નિમિત્તં દિસ્વા વુત્તમેવ ભણ્ડં વુત્તનિયામમવિરાધેત્વા ગહિતં ચે, નિમિત્તકારકસ્સ નિમિત્તકરણક્ખણેયેવ પારાજિકં હોતિ. વુત્તનિયામં વિરાધેત્વા ગહિતં ચે, નિમિત્તકારકો મુચ્ચતિ, અવહારકસ્સેવ પારાજિકં. પુબ્બપયોગો આદિ યસ્સ તં પુબ્બપયોગાદિ, પુબ્બપયોગાદિ ચ તં પઞ્ચકઞ્ચાતિ વિગ્ગહો.

૪૩. થેય્યઞ્ચ પસય્હઞ્ચ પરિકપ્પો ચ પટિચ્છન્નો ચ કુસો ચ થેય્યપસય્હપરિકપ્પપટિચ્છન્નકુસા, તે આદી ઉપપદભૂતા યેસં અવહારાનં તે થેય્ય…પે… કુસાદિકા, અવહારા, ઇમિના થેય્યાવહારો ચ…પે… કુસાવહારો ચાતિ વુત્તં હોતિ. તત્થ થેય્યાવહારોતિ થેનો વુચ્ચતિ ચોરો, તસ્સ ભાવો થેય્યં, એત્થ ન-કારલોપો નિરુત્તિનયેન દટ્ઠબ્બો, તેન અવહરણં થેય્યાવહારો, સન્ધિચ્છેદાદિવસેન અદિસ્સમાનેન ગહણઞ્ચ કૂટમાનકૂટકહાપણાદીહિ વઞ્ચેત્વા ગહણઞ્ચ થેય્યાવહારો.

પસય્હ અભિભવિત્વા અવહરણં પસય્હાવહારો, ગામવિલોપકા વિય સામિકે અભિભવિત્વા ગહણઞ્ચ રાજભટાદયો વિય અભિભવિત્વા નિબદ્ધકરગ્ગહણે અધિકગ્ગહણઞ્ચ પસય્હાવહારો.

વત્થસુત્તાદિકં પરિચ્છિજ્જ કપ્પેત્વા અવહરણં પરિકપ્પાવહારો, સો ચ ભણ્ડોકાસપરિકપ્પવસેન દુવિધો હોતિ. તત્થ નિક્ખિત્તભણ્ડં અન્ધકારપ્પદેસં પવિસિત્વા સુત્તાદિભણ્ડાનિ તત્થ નિક્ખિત્તાનિ, તે પેળાદયો ગણ્હન્તસ્સ ‘‘વત્થાનિ ચે ગણ્હિસ્સામિ, સુત્તાનિ ચે ન ગણ્હિસ્સામી’’તિઆદિના નયેન પરિકપ્પેત્વા ઉક્ખિપનં ભણ્ડપરિકપ્પપુબ્બકત્તા ભણ્ડપરિકપ્પાવહારો નામ. આરામપરિવેણાદીનિ પવિસિત્વા લોભનીયં ભણ્ડં દિસ્વા ગબ્ભપાસાદતલપમુખમાળકપાકારદ્વારકોટ્ઠકાદિં યં કિઞ્ચિ ઠાનં પરિકપ્પેત્વા ‘‘એત્થન્તરે દિટ્ઠો ચે, ઓલોકેતું ગહિતં વિય દસ્સામિ, નો ચે, હરિસ્સામી’’તિ પરિકપ્પેત્વા આદાય ગન્ત્વા પરિકપ્પિતટ્ઠાનાતિક્કમો ઓકાસપરિકપ્પપુબ્બકત્તા ઓકાસપરિકપ્પાવહારો નામાતિ સઙ્ખેપતો વેદિતબ્બો.

તિણપણ્ણાદીહિ પટિચ્છન્નસ્સ ભણ્ડસ્સ અવહરણં પટિચ્છન્નાવહારો, ઉય્યાનાદીસુ કીળમાનેહિ વા સઙ્ઘપરિવિસન્તેહિ વા મનુસ્સેહિ ઓમુઞ્ચિત્વા ઠપિતં અલઙ્કારાદિકં યં કિઞ્ચિ ભણ્ડં દિસ્વા ‘‘ઓણમિત્વા ગણ્હન્તે આસઙ્કન્તી’’તિ ઠત્વા તિણપણ્ણપંસુવાલુકાદીહિ પટિચ્છાદેત્વા સામિકેસુ પરિયેસિત્વા અદિસ્વા સાલયેસુ ગતેસુ પચ્છા થેય્યચિત્તેન ગહણઞ્ચ તદેવ ભણ્ડં કદ્દમાદીસુ થેય્યચિત્તેન અઙ્ગુટ્ઠાદીહિ પીળેત્વા ઓસીદાપેત્વા હેટ્ઠાભાગેન ફુટ્ઠટ્ઠાનં ઉપરિભાગેન અતિક્કમનઞ્ચ પટિચ્છન્નાવહારોતિ વુત્તં હોતિ.

કુસેન અવહારો કુસાવહારો, થેય્યચિત્તેન કુસં સઙ્કામેત્વા પરકોટ્ઠાસસ્સ અગ્ઘેન મહન્તસ્સ વા સમસમસ્સ વા ગહણન્તિ અત્થો. યો પન ભિક્ખુ કુસપાતનેન સઙ્ઘસ્સ ચીવરેસુ ભાજિયમાનેસુ અત્તનો કોટ્ઠાસેન સમં વા અધિકં વા ઊનકં વા અગ્ઘેન પઞ્ચમાસકં વા અતિરેકપઞ્ચમાસકં વા અગ્ઘનકં અઞ્ઞસ્સ કોટ્ઠાસં અવહરિતુકામો અત્તનો કોટ્ઠાસે પતિતં કુસં પરકોટ્ઠાસે પાતેતુકામો ઉદ્ધરતિ, તઙ્ખણે ચ પરસ્સ કોટ્ઠાસે પાતિતક્ખણે ચ ન પારાજિકં અનાપજ્જિત્વા પરકોટ્ઠાસતો પરનામલિખિતં કુસં ઉક્ખિપેન્તો તતો કેસગ્ગમત્તમ્પિ અપનામેતિ, પારાજિકો હોતિ. યદિ પઠમં પરકોટ્ઠાસતો કુસં ઉદ્ધરતિ, ઉદ્ધટક્ખણે ચ અત્તનો કોટ્ઠાસે પાતિતક્ખણે ચ સકનામલિખિતં કુસં ઉદ્ધરણક્ખણે ચ પારાજિકં અનાપજ્જિત્વા પરકોટ્ઠાસે પાતનક્ખણે હત્થતો કેસગ્ગમત્તમ્પિ મુત્તે પારાજિકો હોતિ.

યદિ દ્વેપિ કુસે પટિચ્છાદેત્વા સબ્બેસુ ભિક્ખૂસુ સકસકકોટ્ઠાસં આદાય ગતેસુ યસ્મિં કુસં પટિચ્છાદેસિ, તસ્સ સામિકેન આગન્ત્વા ‘‘મય્હં કુસો કસ્મા ન દિસ્સતી’’તિ વુત્તે ચોરો ‘‘મય્હમ્પિ કુસો ન દિસ્સતી’’તિ વત્વા અત્તનો કોટ્ઠાસં તસ્સ સન્તકં વિય દસ્સેત્વા તસ્મિં વિવદિત્વા વા અવિવદિત્વા વા ગહેત્વા ગતે ઇતરં કોટ્ઠાસં ઉદ્ધરતિ ચે, ઉદ્ધટક્ખણેયેવ પારાજિકો હોતિ. યદિ પરો ‘‘મય્હં કોટ્ઠાસં તુય્હં ન દેમિ, ત્વં તુય્હં કોટ્ઠાસં વિચિનિત્વા ગણ્હાહી’’તિ વદતિ, એવં વુત્તે સો અત્તનો અસ્સામિકભાવં જાનન્તોપિ પરસ્સ કોટ્ઠાસં ઉદ્ધરતિ, ઉદ્ધટક્ખણે પારાજિકો હોતિ. યદિ પરો વિવાદભીરુકત્તા ‘‘કિં વિવાદેના’’તિ ચિન્તેત્વા ‘‘મય્હં વા પત્તં હોતુ તુય્હં વા, વરકોટ્ઠાસં ત્વં ગણ્હાહી’’તિ વદેય્ય, દિન્નકં નામ ગહિતં હોતીતિ પારાજિકં ન હોતીતિ. યદિ ‘‘તવ રુચ્ચનકં ગણ્હાહી’’તિ વુત્તો વિવાદભયેન અત્તનો પત્તં વરભાગં ઠપેત્વા લામકભાગં ગહેત્વા ગતો, ચોરો પચ્છા ગણ્હન્તો વિચિતાવસેસં નામ અગ્ગહેસીતિ પારાજિકો ન હોતિ. એવં કુસાવહારવિનિચ્છયો વેદિતબ્બો. અયમેત્થ પઞ્ચવીસતિયા અવહારેસુ સઙ્ખેપો, વિત્થારો પન સમન્તપાસાદિકાય વિનયસંવણ્ણનાય વુત્તનયેનેવ વેદિતબ્બો.

૪૪. એત્તાવતા અદિન્નાદાનપારાજિકસ્સ વિનિચ્છયાવયવરૂપેન ઉગ્ગહેતબ્બે પઞ્ચવીસતિ અવહારે દસ્સેત્વા ઇદાનિ અદિન્નાદાનવિનિચ્છયે સમ્પત્તે સહસા આપત્તિં અનારોપેત્વા પઠમં ઓલોકેતબ્બાનિ પઞ્ચ ઠાનાનિ દસ્સેતું ‘‘વત્થુકાલગ્ઘદેસે ચા’’તિઆદિ આરદ્ધં.

તત્થ વત્થુ નામ અવહટભણ્ડં. કિં વુત્તં હોતિ? અવહારકેન ‘‘મયા ઇત્થન્નામં ભણ્ડં અવહટ’’ન્તિ વુત્તેપિ તસ્સ ભણ્ડસ્સ સસ્સામિકઅસ્સામિકભાવં ઉપપરિક્ખિત્વા સસ્સામિકં ચે, અવહારકાલે તેસં સાલયભાવં વા નિરાલયભાવં વા નિયમેત્વા સાલયકાલે ચે ગહિતં, ભણ્ડં અગ્ઘાપેત્વા માસકં વા ઊનમાસકં વા હોતિ, દુક્કટેન, અતિરેકમાસકં વા ઊનપઞ્ચમાસકં વા હોતિ, થુલ્લચ્ચયેન, પઞ્ચમાસકં વા અતિરેકપઞ્ચમાસકં વા હોતિ, પારાજિકેન કાતબ્બો. સામિકાનં નિરાલયકાલે ચે ગહિતં, નત્થિ પારાજિકં. ભણ્ડસામિકે પન ભણ્ડં આહરાપેન્તે તં વા ભણ્ડં તદગ્ઘનકં વા દાતબ્બન્તિ.

કાલો નામ અવહારકાલો. ભણ્ડં નામેતં કદાચિ મહગ્ઘં હોતિ, કદાચિ સમગ્ઘં. તસ્મા અવહટભણ્ડસ્સ અગ્ઘં પરિચ્છિન્દન્તેહિ અવહટકાલાનુરૂપં કત્વા પરિચ્છિન્દનત્થં કાલવિનિચ્છયો કાતબ્બોતિ વુત્તં હોતિ.

અગ્ઘો નામ અવહટભણ્ડસ્સ અગ્ઘો. એત્થ ચ સબ્બદા ભણ્ડાનં અગ્ઘો સમાનરૂપો ન હોતિ, નવભણ્ડં મહગ્ઘં હોતિ, પુરાણં ચે સમગ્ઘં. તસ્મા અવહારકાલે ભણ્ડસ્સ નવભાવં વા પુરાણભાવં વા નિયમેત્વા અગ્ઘો પરિચ્છિન્દિતબ્બોતિ અધિપ્પાયો.

દેસો ચાતિ ભણ્ડાવહારદેસો. એત્થ ચ સબ્બસ્સાપિ ભણ્ડસ્સ ઉટ્ઠાનદેસે સમગ્ઘં હુત્વા અઞ્ઞત્થ મહગ્ઘત્તા અવહટભણ્ડે અગ્ઘં પરિચ્છિન્દિત્વા તદનુરૂપા આપત્તિયો નિયમન્તેહિ અગ્ઘં પરિચ્છિન્દનત્થાય અવહારદેસં નિયમેત્વા તસ્મિં દેસે અગ્ઘવસેન તદનુરૂપા આપત્તિયો કારેતબ્બાતિ અધિપ્પાયો.

પરિભોગો નામ અવહટભણ્ડે અવહારતો પુબ્બે પરેહિ કતપરિભોગો. એત્થ ચ યસ્સ કસ્સચિ ભણ્ડસ્સ પરિભોગેન અગ્ઘો પરિહાયતીતિ ભણ્ડસામિકં પુચ્છિત્વા તસ્મિં ભણ્ડે નવેપિ એકવારમ્પિ યેન કેનચિ પકારેન પરિભુત્તે પરિહાપેત્વા અગ્ઘો પરિચ્છિન્દિતબ્બોતિ વુત્તં હોતિ.

એવમાદિના નયેન એતાનિ પઞ્ચ ઠાનાનિ ઉપપરિક્ખિત્વાવ વિનિચ્છયો કાતબ્બોતિ દસ્સેતુમાહ ‘‘પઞ્ચપિ ઞત્વા એતાનિ કત્તબ્બો પણ્ડિતેન વિનિચ્છયો’’તિ.

૪૫. એત્તાવતા અદિન્નાદાનવિનિચ્છયાવયવભૂતે પઞ્ચવીસતિ અવહારે ચ પઞ્ચટ્ઠાનાવલોકનઞ્ચ દસ્સેત્વા ઇદાનિ અનાગતે પાપભિક્ખૂનં લેસોકાસપિદહનત્થં પરસન્તકં યં કિઞ્ચિ વત્થું યત્થ કત્થચિ ઠિતં યેન કેનચિ પકારેન ગણ્હતો મોક્ખાભાવં દસ્સેતુકામેન તથાગતેન યા પનેતા –

ભૂમટ્ઠઞ્ચ થલટ્ઠઞ્ચ;

આકાસટ્ઠ મથાપરં;

વેહાસટ્ઠો દકટ્ઠઞ્ચ;

નાવા યાનટ્ઠમેવ ચ.

ભારા રામ વિહારટ્ઠં;

ખેત્ત વત્થુટ્ઠમેવ ચ;

ગામા રઞ્ઞટ્ઠ મુદકં;

દન્તપોનો વનપ્પતિ.

હરણકો પનિધિ ચેવ;

સુઙ્કઘાતકં પાણકા;

અપદં દ્વિપદઞ્ચેવ;

ચતુપ્પદં બહુપ્પદં.

ઓચરકોણિરક્ખો ચ;

સંવિદાહરણમ્પિ ચ;

સઙ્કેતકમ્મં નિમિત્ત-

મિતિ તિં સેત્થ માતિકા. –

નિક્ખિત્તા, તાસં યથાક્કમં પદભાજને, તદટ્ઠકથાય ચ આગતનયેન વિનિચ્છયં દસ્સેતુકામો પઠમં તાવ ભૂમટ્ઠે વિનિચ્છયં દસ્સેતુમાહ ‘‘દુતિયં વાપી’’તિઆદિ.

તત્થ દુતિયં થેય્યચિત્તેન પરિયેસતો દુક્કટન્તિ સમ્બન્ધો. એવં સબ્બપદેસુ. ઉપરિ સઞ્જાતાહિ રુક્ખલતાહિ, ઇટ્ઠકપાસાણાદીહિ ચ સઞ્છન્નં મહાનિધિં ઉદ્ધરિતુકામેન ‘‘મયા એકેનેવ ન સક્કા’’તિ અત્તનો અઞ્ઞં સહાયં પરિયેસિતું થેય્યચિત્તેન સયિતટ્ઠાના ઉટ્ઠાનાદીસુ સબ્બપયોગેસુ દુક્કટં હોતીતિ અત્થો. કુદાલં ભૂમિખણનત્થાય પિટકં વાપિ પંસુઉદ્ધરણત્થાય યં કિઞ્ચિ ભાજનં. ઇમેસુ દ્વીસુ કુદાલસ્સ ચે દણ્ડો નત્થિ, દણ્ડત્થાય રુક્ખતો દણ્ડં છિન્દતો ચ કુદાલો ચે ન હોતિ, કુદાલકરણત્થાય અયોબીજં ઉદ્ધરણત્થાય અકપ્પિયપથવિં ખણન્તસ્સપિ પચ્છિકરણત્થાય પણ્ણાનિ છિન્દતોપિ પિટકવાયનત્થાય વલ્લિં છિન્દતોપિ ઉભયત્થાપિ પરિયેસને મુસા ભણતોપિ દુક્કટઞ્ચેવ પાચિત્તિયઞ્ચ, ઇતરપયોગેસુ દુક્કટમેવાતિ વેદિતબ્બં.

ગચ્છતોતિ દુતિયાદિં પરિયેસિત્વા લદ્ધા વા અલદ્ધા વા નિધિટ્ઠાનં ગચ્છન્તસ્સ પદે પદે દુક્કટન્તિ અત્થો. એત્થ ચ ‘‘થેય્યચિત્તો દુતિયં વા પરિયેસતી’’તિઆદિ પાળિયં (પારા. ૯૪) ‘‘થેય્યચિત્તો’’તિ વુત્તત્તા, ઇધ ‘‘થેય્યચિત્તેના’’તિ વચનતો ‘‘ઇમં નિધિં લભિત્વા બુદ્ધપૂજં વા કરિસ્સામિ, સઙ્ઘભત્તં વા કરિસ્સામી’’તિ એવમાદિના નયેન કુસલચિત્તપ્પવત્તિયા સતિ અનાપત્તીતિ દટ્ઠબ્બં. પુબ્બયોગતોતિ અદિન્નાદાનસ્સ પુબ્બપયોગભાવતો, દુતિયપરિયેસનાદીસુ પુબ્બપયોગેસુ દુક્કટન્તિ અત્થો.

દુક્કટઞ્ચ અટ્ઠવિધં હોતિ પુબ્બપયોગદુક્કટં સહપયોગદુક્કટં અનામાસદુક્કટં દુરુપચિણ્ણદુક્કટં વિનયદુક્કટં ઞાતદુક્કટં ઞત્તિદુક્કટં પટિસ્સવદુક્કટન્તિ. તત્થ ‘‘થેય્યચિત્તો દુતિયં વા કુદાલં વા પિટકં વા પરિયેસતિ ગચ્છતિ વા, આપત્તિ દુક્કટસ્સા’’તિ વુત્તં પુબ્બપયોગદુક્કટં નામ. ઇધ પાચિત્તિયટ્ઠાને પાચિત્તિયં, ઇતરેસુ પુબ્બપયોગેસુ દુક્કટં. ‘‘તત્થજાતકં કટ્ઠં વા લતં વા છિન્દતિ, આપત્તિ દુક્કટસ્સા’’તિ વુત્તં સહપયોગદુક્કટં. ઇધ અદિન્નાદાનસહિતપયોગત્તા પાચિત્તિયવત્થુમ્હિ, ઇતરત્ર ચ દુક્કટમેવાતિ અયમેત્થ વિસેસો. મુત્તામણિઆદીસુ દસસુ રતનેસુ, સાલિઆદીસુ સત્તસુ ધઞ્ઞેસુ, સબ્બેસુ ચ આવુધભણ્ડાદીસુ આમસનપચ્ચયા દુક્કટં અનામાસદુક્કટં. કદલિનાળિકેરપનસાદિરુક્ખટ્ઠમેવ ફલં આમસન્તસ્સ વુત્તં દુક્કટં દુરુપચિણ્ણદુક્કટં. ઉપચરણં ઉપચિણ્ણં, પરામસનન્તિ અત્થો. દુટ્ઠુ ઉપચિણ્ણં દુરુપચિણ્ણં, દુરુપચિણ્ણે દુક્કટં દુરુપચિણ્ણદુક્કટં. ભિક્ખાચારકાલે પત્તે રજસ્મિં પતિતે પત્તં અપ્પટિગ્ગહેત્વા વા અધોવિત્વા વા ભિક્ખાપટિગ્ગહણેન દુક્કટં વિનયદુક્કટં, વિનયે પઞ્ઞત્તં દુક્કટં વિનયદુક્કટં. કિઞ્ચાપિ અવસેસદુક્કટાનિપિ વિનયે પઞ્ઞત્તાનેવ, તથાપિ રુળ્હિયા મયૂરાદિસદ્દેહિ મોરાદયો વિય ઇદમેવ તથા વુચ્ચતિ. ‘‘સુત્વા ન વદન્તિ, આપત્તિ દુક્કટસ્સા’’તિ વુત્તં ઞાતદુક્કટં નામ. એકાદસસુ સમનુભાસનાસુ ‘‘ઞત્તિયા દુક્કટ’’ન્તિ વુત્તં ઞત્તિદુક્કટં. ‘‘તસ્સ ભિક્ખવે ભિક્ખુનો પુરિમિકા ચ ન પઞ્ઞાયતિ, પટિસ્સવે ચ આપત્તિ દુક્કટસ્સા’’તિ (મહાવ. ૨૦૭) વુત્તં પટિસ્સવદુક્કટં નામ. ઇમેસુ અટ્ઠસુ દુક્કટેસુ ઇધ આપજ્જિતબ્બં દુક્કટં પુબ્બપયોગદુક્કટં નામ. તેનાહ ‘‘પુબ્બયોગતો’’તિ. ગાથાબન્ધસુખત્થં ઉપસગ્ગં અનાદિયિત્વા ‘‘પુબ્બપયોગતો’’તિ વત્તબ્બે ‘‘પુબ્બયોગતો’’તિ વુત્તન્તિ ગહેતબ્બં.

એત્થ ચ કિઞ્ચાપિ ઇમેસુ દુક્કટેસુ અસઙ્ગહિતાનિ ઉભતોવિભઙ્ગાગતાનિ દિવાસેય્યાદિદુક્કટાનિ ચેવ ખન્ધકાગતાનિ ચ બહૂનિ દુક્કટાનિ સન્તિ, તાનિ પનેત્થ વિનયદુક્કટેયેવ સઙ્ગહિતબ્બાનિ. ‘‘વિનયે પઞ્ઞત્તં દુક્કટં વિનયદુક્કટ’’ન્તિ હિ સારત્થદીપનિયં (સારત્થ. ટી. ૨.૯૪) વુત્તન્તિ. અટ્ઠકથાયં (પારા. અટ્ઠ. ૧.૯૪) પન રજોકિણ્ણદુક્કટસ્સેવ ‘‘વિનયદુક્કટ’’ન્તિ ગહણં ઉપલક્ખણમત્તં. ઇતરથા અટ્ઠ દુક્કટાનીતિ ગણનાપરિચ્છેદોયેવ નિરત્થકો સિયાતિ પુબ્બપયોગે દુક્કટાદીનમ્પિ વિનયદુક્કટેયેવ સઙ્ગહેતબ્બભાવેપિ કતિપયાનિ દસ્સેત્વા ઇતરેસમેકતો દસ્સનત્થં તેસં વિસું ગહણં સુત્તઙ્ગસઙ્ગહિતત્તેપિ ગેય્યગાથાદીનં અટ્ઠન્નં વિસું દસ્સનં વિયાતિ વેદિતબ્બં.

૪૬. તત્થજાતકં કટ્ઠં વાતિ તસ્મિં ચિરનિહિતનિધૂપરિ જાતં અલ્લં સુક્ખં કટ્ઠં વા. લતં વાતિ તાદિસં વલ્લિં વા. ઇદં ઉપલક્ખણં તિણાદીનં ખુદ્દકગચ્છાનઞ્ચ ગહેતબ્બત્તા. ઉભયત્થાપીતિ અલ્લે ચ સુક્ખે ચાતિ વુત્તં હોતિ. અલ્લરુક્ખાદીનિ છિન્દતો પાચિત્તિયં અહુત્વા દુક્કટમત્તસ્સ ભવને કારણં દસ્સેતિ ‘‘સહપયોગતો’’તિ. અવહારેન સહિતપયોગત્તા પાચિત્તિયટ્ઠાનેપિ દુક્કટમેવાતિ વુત્તં હોતિ. ‘‘સહપયોગતો ઉભયત્થાપિ દુક્કટ’’ન્તિ વદન્તો પઠમગાથાય દસ્સિતપુબ્બપયોગતો ઇમાય દસ્સિતસહપયોગસ્સ વિસેસં દસ્સેતિ.

૪૭. પથવિન્તિ કપ્પિયં વા અકપ્પિયં વા પથવિં. અકપ્પિયપથવિં ખણતો સહપયોગત્તા દુક્કટમેવ. બ્યૂહતોતિ પંસું એકતો રાસિં કરોન્તસ્સ. ‘‘વિયૂહતિ એકપસ્સે રાસિં કરોતી’’તિ અટ્ઠકથાવચનતો ઊહ-ઇચ્ચેતસ્સ ધાતુનો વિતક્કે ઉપ્પન્નત્તેપિ ધાતૂનમનેકત્થત્તા વિ-ઉપસગ્ગવસેન ઇધ રાસિકરણે વત્તતીતિ ગહેતબ્બં. રાસિભૂતં પંસું કુદાલેન વા હત્થેન વા પચ્છિયા વા ઉદ્ધરન્તસ્સ ચ અપનેન્તસ્સ ચ પયોગગણનાય દુક્કટં પંસુમેવ વાતિ એત્થ અવુત્તસમુચ્ચયત્થેન વા-સદ્દેન સઙ્ગહિતન્તિ દટ્ઠબ્બં. આમસન્તસ્સાતિ નિધિકુમ્ભિં હત્થેન પરામસન્તસ્સ. વાતિ સમુચ્ચયે. દુક્કટન્તિ દુટ્ઠુ કતં કિરિયં સત્થારા વુત્તં વિરાધેત્વા ખલિત્વા કતત્તાતિ દુક્કટં. વુત્તઞ્ચેતં પરિવારે (પરિ. ૩૩૯) –

‘‘દુક્કટન્તિ હિ યં વુત્તં, તં સુણોહિ યથાતથં;

અપરદ્ધં વિરદ્ધઞ્ચ, ખલિતં યઞ્ચ દુક્કટ’’ન્તિ.

દુટ્ઠુ વા વિરૂપં કતં કિરિયાતિ દુક્કટં. વુત્તમ્પિ ચેતં પરિવારે (પરિ. ૩૩૯) –

‘‘યં મનુસ્સો કરે પાપં, આવિ વા યદિ વા રહો;

‘દુક્કટ’ન્તિ પવેદેન્તિ, તેનેતં ઇતિ વુચ્ચતી’’તિ.

એવં ‘‘તત્થજાતક’’ન્તિઆદિગાથાદ્વયાગતં છેદનદુક્કટં ખણનદુક્કટં બ્યૂહનદુક્કટં ઉદ્ધરણદુક્કટં આમસનદુક્કટન્તિ પઞ્ચસુ સહપયોગદુક્કટેસુ પુરિમપુરિમપયોગેહિ આપન્ના દુક્કટાપત્તિયો પચ્છિમં પચ્છિમં દુક્કટં પત્વા પટિપસ્સમ્ભન્તિ, તંતંપયોગાવસાને લજ્જિધમ્મં ઓક્કમિત્વા ઓરમતિ ચે, તંતંદુક્કટમત્તં દેસેત્વા પરિસુદ્ધો હોતિ. ધુરનિક્ખેપમકત્વા ફન્દાપેન્તસ્સ થુલ્લચ્ચયં પત્વા આમસનદુક્કટં પટિપસ્સમ્ભતીતિ મહાઅટ્ઠકથાયં (પારા. અટ્ઠ. ૧.૯૪) વુત્તં. યથાપાળિયા ગય્હમાને પુરિમપુરિમાપત્તીનં પટિપસ્સદ્ધિ ‘‘ઞત્તિયા દુક્કટં, દ્વીહિ કમ્મવાચાહિ થુલ્લચ્ચયા પટિપસ્સમ્ભન્તી’’તિ પાળિયં (પારા. ૪૧૪, ૪૨૧, ૪૨૮, ૪૩૯) આગતત્તા અનુસ્સાવનાય એવ લબ્ભતીતિ દટ્ઠબ્બં. ઇમસ્સ પન સુત્તસ્સ અનુલોમવસેન મહાઅટ્ઠકથાયં વુત્તા ઇમસ્મિં અદિન્નાદાનસિક્ખાપદેપિ આપત્તિપટિપસ્સદ્ધિ પમાણન્તિ નિટ્ઠમેત્થ ગન્તબ્બં.

૪૮. ‘‘ફન્દાપેતિ, આપત્તિ થુલ્લચ્ચયસ્સ. ઠાના ચાવેતિ, આપત્તિ પારાજિકસ્સા’’તિ (પારા. ૯૪) વુત્તં ઠાનાચાવને પારાજિકઞ્ચ તસ્સ સામન્તાપત્તિભૂતં થુલ્લચ્ચયઞ્ચ ઠાનભેદવિઞ્ઞાપનમુખેન વત્તબ્બન્તિ ઇદાનિ તં દસ્સેતુમાહ ‘‘મુખેપાસ’’ન્તિઆદિ. તત્થ મુખે કુમ્ભિમુખવટ્ટિયં. પાસં પવેસેત્વાતિ બન્ધનં પાસં પક્ખિપિત્વા. ખાણુકેતિ અયોખાણુમ્હિ, ખદિરખાણુકે વા. બદ્ધકુમ્ભિયા ઠાનભેદો બન્ધનાનં વસા ઞેય્યોતિ સમ્બન્ધો.

૪૯. ઇદાનિ ઠાનભેદં દસ્સેતિ ‘‘દ્વે’’તિઆદિના. ‘‘એકસ્મિં ખાણુકે’’તિ ઇમિના દ્વીસુ દિસાસુ વા તીસુ ચતૂસુ વા દિસાસુ ખાણુકે ખણિત્વા બદ્ધખાણુગણનાય સમ્ભવન્તો ઠાનભેદો ઉપલક્ખિતો હોતિ. વલયં…પે… કતાય વા દ્વે ઠાનાનીતિ યોજના. વાતિ સમુચ્ચયે ઉપલક્ખિતો હોતિ.

૫૦. એવં ઠાનભેદં દસ્સેત્વા ઇદાનિ ઠાનવસેન આપજ્જિતબ્બા આપત્તિયો દસ્સેતુમાહ ‘‘ઉદ્ધરન્તસ્સા’’તિઆદિ. સઙ્ખલિન્તિ દામં. થુલ્લચ્ચયન્તિ એકસ્સ સન્તિકે દેસેતબ્બાસુ આપત્તીસુ થૂલત્તા, અચ્ચયત્તા ચ થુલ્લચ્ચયં નામ. વુત્તઞ્હેતં પરિવારે –

‘‘થુલ્લચ્ચયન્તિ યં વુત્તં;

તં સુણોહિ યથાતથં;

એકસ્સ મૂલે યો દેસેતિ;

યો ચ તં પટિગણ્હતિ;

અચ્ચયો તેન સમો નત્થિ;

તેનેતં ઇતિ વુચ્ચતી’’તિ. (પરિ. ૩૩૯);

એત્થ ચ થૂલચ્ચયન્તિ વત્તબ્બે ‘‘સમ્પરાયે ચ (સં. નિ. ૧.૪૯) સુગ્ગતિ, તં હોતિ કટુકપ્ફલ’’ન્તિઆદીસુ (ધ. પ. ૬૬) વિય લકારસ્સ દ્વિત્તં, સંયોગે ઊકારસ્સ રસ્સો ચ વેદિતબ્બો. તતો સઙ્ખલિકભેદતો પરં. ઠાના ચાવેતીતિ ઠિતટ્ઠાનતો કેસગ્ગમત્તમ્પિ અપનેતિ. એત્થ ચ નાવટ્ઠકથાયં ‘‘ઉદ્ધં વા અધો વા તિરિયં વા અન્તમસો કેસગ્ગમત્તમ્પિ સઙ્કામેતિ, આપત્તિ પારાજિકસ્સા’’તિ (પારા. ૯૯) વુત્તનયેન ‘‘તિરિય’’ન્તિ વુત્તા ચતસ્સો દિસા, ઉદ્ધમધો ચાતિ છટ્ઠાનાનિ. તાસુ એકં દિસં અપનીયમાનાય કુમ્ભિયા તંદિસાભિમુખં ઇતરદિસાયં ઠિતપસ્સે ઓરિમદિસાય ઠિતપસ્સેન ફુટ્ઠોકાસસ્સ કેસગ્ગમત્તમ્પિ અનતિક્કન્તે ફન્દાપનવસેન થુલ્લચ્ચયં હોતિ, અતિક્કન્તે ઠાના ચાવિતત્તા પારાજિકં હોતીતિ વેદિતબ્બો. ઇમમેવ સન્ધાયાહ ‘‘ઠાના ચાવેતિ ચે ચુતો’’તિ. એસેવ નયો ફન્દનરહિતાય નિધિકુમ્ભિયા ઠાનાચાવનેપિ.

૫૧. એવં પઠમં બન્ધનં છિન્દિત્વા પચ્છા કુમ્ભિગ્ગહણે નયં દસ્સેત્વા ઇદાનિ પઠમં કુમ્ભિં અપનેત્વા પચ્છા બન્ધનાપનયને નયં દસ્સેતુમાહ ‘‘પઠમ’’ન્તિઆદિ. સો નયોતિ ‘‘પઠમુદ્ધારે થુલ્લચ્ચયં, દુતિયુદ્ધારે પારાજિક’’ન્તિ તમેવત્થમતિદિસતિ.

૫૨. વલયન્તિ કુમ્ભિયા બદ્ધસઙ્ખલિકાય મૂલે પવેસિતં વલયં. મૂલે ઘંસન્તો ઇતો ચિતો ચ સારેતીતિ યોજના. ઘંસન્તોતિ ફુસાપેન્તો. ઇતો ચિતો ચ સારેતીતિ ઓરતો ચ પારતો ચ સઞ્ચાલેતિ. રક્ખતીતિ એત્થ ‘‘સીલં ભિક્ખુ’’ન્તિ પાઠસેસો, પારાજિકં નાપજ્જતીતિ વુત્તં હોતિ. તત્થાતિ તસ્મિં મૂલે. ખેગતં કરોન્તોવાતિ સબ્બપસ્સતો મૂલં અફુસાપેત્વા આકાસગતં કરોન્તોવ. પરાજિતોતિ ઠાનાચાવનસ્સ કતત્તા પરાજયમાપન્નો હોતિ.

૫૩. કુમ્ભિમત્થકે જાતન્તિ યોજના. ચિરકાલં નિહિતત્તા મૂલેહિ કુમ્ભિં વિનન્ધિત્વા ઠિતન્તિ અત્થો. સમીપે જાતં રુક્ખં છિન્દતોતિ યોજના. એત્થ ચ ‘‘તત્થજાતકં કટ્ઠં વા’’તિઆદિકાય ગાથાય નિધિમત્થકે ભૂમિયં ઠિતરુક્ખલતાદિં છિન્દન્તસ્સ આપત્તિ વુત્તા, ઇમાય પન ગાથાય ભૂમિં નિખણિત્વા ઓતિણ્ણકાલે નિધિં વિનન્ધિત્વા ઠિતમૂલં અલ્લરુક્ખં, ખાણુકં વા ગહેત્વા આહાતિ પુનરુત્તિદોસાભાવો વેદિતબ્બો. ‘‘અતત્થજ’’ન્તિ ઇમિના સહપયોગાભાવમાહ. ઇમિનાવ પુરિમગાથાય વુત્તં કટ્ઠલતાદીનિ નિધિસમ્બન્ધાનિ ચે, યથાવુત્તદુક્કટસ્સ વત્થૂનિ, સમીપાનિ ચે, પાચિત્તિયસ્સેવ વત્થૂનીતિ દીપેતિ.

૫૪. ઇદાનિ એવં પરિયેસિત્વા દિટ્ઠનિધિભાજનં ઠિતટ્ઠાનતો અચાલેત્વા અન્તોઠિતં ભણ્ડમત્તં ગણ્હતો વિનિચ્છયં દસ્સેતુમાહ ‘‘અન્તોકુમ્ભિગત’’ન્તિઆદિ. તત્થ ફન્દાપેતીતિ અન્તોચાટિયા પક્ખિત્તે અત્તનો ભાજને પક્ખિપિતું રાસિકરણાદિવસેન ફન્દાપેતિ. અપબ્યૂહતિ વાતિ હેટ્ઠા ઠિતં ગણ્હિતું ઉપરિ ઠિતાનિ અપનેન્તો વિયૂહતિ વા. અથ વા અપબ્યૂહન્તોતિ (પારા. અટ્ઠ. ૧.૯૪) અટ્ઠકથાવચનસ્સ દ્વિધા કરોન્તોતિ ગણ્ઠિપદે અત્થો વુત્તોતિ અત્તનો ભાજને પક્ખિપિતું ઇતો ચિતો ચ રાસિં કરોન્તોતિ અત્થો વેદિતબ્બો. તત્થેવાતિ અન્તોકુમ્ભિયમેવ.

૫૫. હરન્તોતિ અવહરન્તો. મુટ્ઠિં છિન્દતીતિ અત્તનો ભાજનં પક્ખિપિત્વા ગણ્હિતું અસક્કુણેય્યો અન્તોકુમ્ભિમ્હિ હત્થં ઓતારેત્વા કુમ્ભિગતભણ્ડેન યથા અબદ્ધં હોતિ, તથા મુટ્ઠિયા પરિચ્છિન્દતિ, કુમ્ભિગતં મુટ્ઠિયા ગણ્હન્તો કુમ્ભિગતેન મુટ્ઠિગતં યથા અસમ્મિસ્સં હોતિ, તથા પરિચ્છિન્દિત્વા પાદગ્ઘનકં વા અતિરેકપાદગ્ઘનકં વા ગણ્હાતીતિ વુત્તં હોતિ. અત્તનો ભાજને ગતં કત્વા વા છિન્દતીતિ યોજના. અત્તનો ભાજનગતં કત્વા કુમ્ભિગતેન યથા અસમ્મિસ્સં હોતિ, તથા પરિચ્છિન્દતીતિ અત્થો, સચે અત્તનો ભાજનગતં હુત્વા કુમ્ભિગતેન અસમ્મિસ્સં ભણ્ડં પઞ્ચમાસકં વા અતિરેકપઞ્ચમાસકં વા અગ્ઘતિ, પારાજિકોતિ વુત્તં હોતિ.

૫૬. હારં વાતિ મુત્તાહારં વા. પામઙ્ગં વાતિ સુવણ્ણમયં, રજતમયં વા પામઙ્ગં દામં. સુત્તારુળ્હન્તિ સુત્તે આરુળ્હં સુત્તારુળ્હં, સુત્તઞ્ચ સુત્તારુળ્હઞ્ચ સુત્તારુળ્હન્તિ એકદેસસરૂપેકસેસો દટ્ઠબ્બો. ‘‘સુત્તેન આવુતસ્સાપિ સુત્તમયસ્સાપિ એતં અધિવચન’’ન્તિ અટ્ઠકથાવચનતો (પારા. અટ્ઠ. ૧.૯૪) પઠમમુત્તાહારં વિના સુવણ્ણરજતપવાળાદિમણિકં વા સુત્તેસુ આવુણિત્વા કતા નાનાવલિયો ચેવ સુત્તમયાનિ ચ ભણ્ડાનિ ગહેતબ્બાનિ. કુમ્ભિયા ઠિતન્તિ પાઠસેસો. ફન્દાપેતીતિ થેય્યચિત્તેન ગણ્હિતુકામતાય ચાલેતિ. યથાવત્થુન્તિ વીતિક્કમાનુરૂપં થુલ્લચ્ચયં હોતીતિ અધિપ્પાયો. ઠાના ચાવેતીતિ ઠિતટ્ઠાનતો કેસગ્ગમત્તમ્પિ અતિક્કામેતિ. ચુતોતિ પાતિમોક્ખસંવરસીલા પરિહીનોતિ અત્થો.

અપરિપુણ્ણાય કુમ્ભિયાએકદેસટ્ઠં ભણ્ડં તતો તતો કેસગ્ગમત્તમ્પિ ઠાનં અપનેત્વા તત્થેવ અન્તોકુમ્ભિયા અઞ્ઞં ઠાનં નેન્તસ્સ ચ તત્થેવ આકાસગતં કરોન્તસ્સ ચ ‘‘અત્તનો ભાજનગતં વા કરોતિ, મુટ્ઠિં વા છિન્દતી’’તિ (પારા. ૯૪) એતેહિ સદિસત્તા વત્થુમ્હિ પાદં અગ્ઘન્તે પારાજિકા હોતીતિ મહાઅટ્ઠકથાયં (પારા. અટ્ઠ. ૧.૯૪) ઇદં સન્નિટ્ઠાનં. ભાજનતલે કોટિં ઠપેત્વા કમેન સકલભાજનકુચ્છિં તેનેવ પૂરેત્વા મુખવટ્ટિયા એકા કોટિ નિક્ખિત્તા ચે, તથાઠપિતસ્સ હારાદિનો સકલભાજનં અટ્ઠાનન્તિ કોટિં ગહેત્વા ઉજુકં ઉક્ખિપન્તસ્સ ઓસાનકોટિ ભાજનતલતો કેસગ્ગમત્તમ્પિ આકાસગતં કરોતો ચ મુખવટ્ટિયં ઘંસિત્વા આકડ્ઢન્તસ્સ સકલભાજનોદરં ખેપેત્વા મુખવટ્ટિયા ઠપિતકોટિયા ફુટ્ઠટ્ઠાનં અપરાય કોટિયા કેસગ્ગમત્તમ્પિ અતિક્કામયતો ચ ભાજનકુચ્છિયા ઉપડ્ઢં વત્થાદિના કેનચિ પૂરેત્વા તસ્સોપરિ ઠપિતહારાદિસુત્તારુળ્હસ્સ ઠિતોકાસમેવ ઠાનન્તિ તતો કેસગ્ગમત્તં અપનેન્તસ્સપિ પારાજિકં હોતીતિ વુત્તં હોતિ.

૫૭. સપ્પિઆદીસૂતિ ભાજનગતેસુ સપ્પિઆદિદ્રવવત્થૂસુ યં કિઞ્ચિ. પાદપૂરણન્તિ પાદં પૂરેતીતિ પાદપૂરણં, પાદગ્ઘનકન્તિ અત્થો. પિવતો પરાજયોતિ સમ્બન્ધો. કદાતિ ચે? એકેનેવ પયોગેન પીતમત્તે પાદપૂરણેતિ યોજના. ‘‘મુખગતં વિના’’તિ પાઠસેસો. તત્થ એકેનેવ પયોગેનાતિ ધુરનિક્ખેપમકત્વા એકાબદ્ધં કત્વા આકડ્ઢેત્વા પિવનપયોગેન. ‘‘મુખગતં વિના’’તિ ઇમિના સચે ગલગતેનેવ પાદો પૂરતિ, અન્તોગલં પવિટ્ઠેતિ વુત્તં હોતિ. મુખગતેન પૂરતિ, મુખગતં ભાજનગતેન વિયોજેત્વા ઓટ્ઠેસુ પિહિતેસૂતિ વુત્તં હોતિ. વેળુનળાદીહિ આકડ્ઢેત્વા પિવન્તસ્સ નાળગતેન પૂરતિ, નાળગતં ભાજનગતેન વિયોજેત્વા નાળિકોટિયં અઙ્ગુલિયા પિહિતાયન્તિ વુત્તં હોતિ. ઇદં ‘‘અત્તનો ભાજનગતં વા કરોતિ, મુટ્ઠિં વા છિન્દતી’’તિ (પારા. ૯૪) વુત્તનયસ્સ અનુલોમવસેન મહાપચ્ચરિયાદીસુ (પારા. અટ્ઠ. ૧.૯૪) અટ્ઠકથાસુ વુત્તનયેન ગહેતબ્બન્તિ અધિપ્પાયો.

‘‘એકેનેવ પયોગેન પીતમત્તે પરાજયો’’તિ ઇમિના સપ્પિઆદીસુ મહગ્ઘેસુ તત્તકેનેવ પાદપૂરણઞ્ચે હોતિ, એકવારમેવ મુખેન વા સપ્પિઆદિના વા ભાજનગતેન એકાબદ્ધભાવે છિન્નમત્તેપિ અત્તનો ભાજને કુમ્ભિં પણામેત્વા પક્ખિત્તેન કુમ્ભિગતે છિન્નમત્તેપિ પારાજિકો હોતીતિ ગહેતબ્બં.

૫૮. ‘‘ધુરનિક્ખેપં કત્વા પુનપ્પુનં પિવન્તસ્સ ન પરાજયો’’તિ ઇમિના ધુરનિક્ખેપમકત્વા પુનપ્પુનં પિવતો પરાજયોતિ સામત્થિયા વુત્તં હોતિ. ધુરનિક્ખેપં અકત્વા પુનપ્પુનં મુખેન ગહેત્વા વા પુટાદીહિ વા ગહેત્વા પાદપૂરણમત્તં પિવન્તસ્સ પરાજયો હોતીતિ ગહેતબ્બં.

૫૯-૬૦. સચે ખિપતિ થેય્યચિત્તોતિ સમ્બન્ધો. યં કિઞ્ચિ ભણ્ડકન્તિ તેલપિવનારહં દુકૂલસાટકચમ્મખણ્ડાદિકં ભણ્ડં. તેલકુમ્ભિયં પરસ્સાતિ લબ્ભતિ. તં નિક્ખિત્તભણ્ડં. ધુવન્તિ એકંસેન. તાવદે વિનસ્સતીતિ સમ્બન્ધો. તાવદેતિ તસ્મિં ખણેયેવ. કતરસ્મિં ખણેતિ આહ ‘‘હત્થતો મુત્તમત્તે’’તિ, તેલસ્સ પીતકાલં અનાગમ્મ પુબ્બપયોગત્તા પઠમમેવ હોતીતિ અધિપ્પાયો. વિનસ્સતીતિ સીલવિનાસં પાપુણાતિ. આવિઞ્જેત્વાતિ પણામેત્વા. ગાળેતીતિ પગ્ઘરાપેતિ. ‘‘સાળેતી’’તિપિ પઠન્તિ, સોયેવ અત્થો. સાળ સવનેતિ ધાતુ. તથાતિ ‘‘થેય્યચિત્તો વિનસ્સતી’’તિ આકડ્ઢતિ, થેય્યચિત્તેન એવં કરોન્તસ્સ પારાજિકો હોતીતિ વુત્તં હોતિ.

૬૧. તન્તિ તેલસ્સ ઓકિરણભાવં ઞત્વા પઠમમેવ તુચ્છભાજને થેય્યચિત્તેન નિક્ખિત્તં પાદગ્ઘનકતેલપિવનકં તં વત્થાદિભણ્ડં. ‘‘ઉદ્ધરન્તોવા’’તિ સાવધારણવચનેન ‘‘પીતમત્તે પરાજયો’’તિ દસ્સિતં મહાઅટ્ઠકથામતં પટિક્ખિત્તં હોતિ. ધંસિતોતિ ‘‘સાસનકપ્પરુક્ખા પાતિતો, પારાજિકાપન્નોતિ અધિપ્પાયો. ‘‘થેય્યચિત્તો’’તિ આકડ્ઢનત્થં ‘‘તથા’’તિ આનેત્વા સમ્બન્ધનીયં. ઇમિના સુદ્ધચિત્તેન ગોપનત્થાય તુચ્છભાજને વત્થાદિં નિક્ખિપિત્વા અઞ્ઞેન તં અનોલોકેત્વા તેલે આસિત્તે પચ્છા સુદ્ધચિત્તેનેવ ઉદ્ધરતો ન દોસોતિ દીપિતં હોતિ.

૬૨. તત્થેવાતિ ઠિતટ્ઠાનેયેવ. ભિન્દતોતિ ઠાના અચાવેત્વા તિણજ્ઝાપકસ્સ વિય ભિક્ખુનો ઠાનાચાવનાધિપ્પાયં વિના પાસાણાદિના કેનચિ પહરિત્વા ભિન્દતો. ‘‘મન્તોસધાનુભાવેન ભિન્દતો’’તિ ચ વદન્તિ. છડ્ડેન્તસ્સાતિ અછડ્ડેતુકામસ્સાપિ સતો પરિપુણ્ણતેલઘટાદીસુ ચાપલ્લેન વાલુકં વા ઉદકં વા ઓકિરિત્વા ઉત્તરાપેન્તસ્સાતિ અત્થો. ‘‘ઉદકમાતિકં ઘટાભિમુખં કત્વા ઓપિલાપેન્તસ્સા’’તિ વદન્તિ. ઠાનાચાવનાધિપ્પાયે સતિપિ થેય્યચિત્તાભાવેન પારાજિકા ન વિજ્જતિ, ભણ્ડદેય્યં પન હોતીતિ સન્નિટ્ઠાનં. ઝાપેન્તસ્સાતિ કટ્ઠાનિ પક્ખિપિત્વા ઝાપેન્તસ્સ. અપરિભોગં કરોન્તસ્સાતિ ઉચ્ચારપસ્સાવાદિમોકિરિત્વા અપરિભોગં કરોન્તસ્સ. દુક્કટન્તિ એતેસુ ભિન્દનાદીસુ ચતૂસુપિ ઠાનેસુ પદભાજનિયં દુક્કટમેવ આગતત્તા વુત્તં.

ભૂમટ્ઠકથાવણ્ણના.

૬૩. ઇદાનિ થલટ્ઠે વિનિચ્છયં દસ્સેતુમાહ ‘‘ઠપિત’’ન્તિઆદિ. તત્થ પત્થરિત્વાતિ અત્થરિત્વા. એત્થ ચ-સદ્દો અવુત્તસમ્પિણ્ડનત્થો, તેન થલે રાસિકતધઞ્ઞાદીસુ વિનિચ્છયો નિમિકુમ્ભિયા વુત્તવિનિચ્છયાનુસારેન વિઞ્ઞાતું સક્કાતિ તં સરૂપતો અવુત્તં સમુચ્ચિનોતિ. અત્થરણાદિકન્તિ પચ્ચત્થરણાદિકં. વેઠેત્વા ઉદ્ધરન્તસ્સાતિ કિલઞ્જસંહરણનિયામેન વટ્ટેત્વા સંહરિત્વા ઉદ્ધરન્તસ્સ. મુત્તે ઠાનાતિ કમેન સંહરિત્વા ઠિતટ્ઠાનતો કેસગ્ગમત્તમ્પિ મુત્તે સતિ. પરાભવોતિ સાસનતો પરિહીનો.

૬૪. એવં અત્થરિત્વા ઠપિતવત્થાદીનં સંહરિત્વા ગહણે વિનિચ્છયં દસ્સેત્વા તિરિયતો આકડ્ઢને વિનિચ્છયં દસ્સેતુમાહ ‘‘ઓરિમન્તેના’’તિઆદિ. પિ, વાતિ પકારન્તરમેવ સમુચ્ચિનોતિ. ઉજુકં કડ્ઢતોપિ વાતિ અત્થરિત્વા ઠપિતવત્થાદિકં ચતૂસુ દિસાસુ એકં દિસં ઉજુકમાકડ્ઢતો ચ પારાજિકં હોતિ. કદાતિ ચે? એત્થાપિ ઓરિમન્તેન ફુટ્ઠમોકાસં પારિમન્તતો અતિક્કન્તે પારાજિકન્તિ યોજના. ઓરિમન્તેન ફુટ્ઠમોકાસન્તિ ગહેત્વા આકડ્ઢન્તસ્સ અત્તનો ઠિતદિસાગતપરિયન્તેન ફુસિત્વા ઠિતટ્ઠાનં. પારિમન્તતોતિ પારિમન્તેન, કરણત્થે તો-પચ્ચયો.

થલં નામ પટિચ્છન્નાપટિચ્છન્નભૂમિપાસાદપબ્બતતલાદીનિ, તત્રટ્ઠં ધઞ્ઞાદિભણ્ડં થલટ્ઠં નામ હોતિ. તત્થ સબ્બત્થ વિનિચ્છયો વુત્તનયેન વેદિતબ્બો.

થલટ્ઠકથાવણ્ણના.

૬૫-૬. પરિચ્છેદાતિ ઠાનપરિચ્છેદા. સેસં સુવિઞ્ઞેય્યમેવ.

૬૭-૮. ખેગતન્તિ આકાસગતં. અસ્સાતિ મોરસ્સ. તન્તિ મોરં.

૬૯. ઠાનાતિ યથાપરિચ્છિન્ના છબ્બિધા ઠાના. તસ્સાતિ મોરસ્સ ફન્દાપનેતિ યોજના. તસ્સાતિ વા ભિક્ખુસ્સ થુલ્લચ્ચયમુદીરિતં.

૭૦. અગ્ગહેત્વા હત્થેન લેડ્ડુખિપનાદિપયોગેન મોરં તાસેત્વા ઠિતટ્ઠાનતો અપનેતિ. અત્તનો ઠાનાતિ મોરસ્સ અત્તનો છપ્પકારટ્ઠાના. સયં ઠાનાતિ ભિક્ખુ સકટ્ઠાના, સમણભાવતોતિ વુત્તં હોતિ.

૭૧-૨. ઇદાનિ ‘‘ઠાના ચાવેતિ ચે મોર’’ન્તિ દસ્સિતં ઠાનાચાવનં વિભાવેતુમાહ ‘‘ફુટ્ઠોકાસ’’ન્તિઆદિ.

૭૩. કરે નિલીયતીતિ પસારિતહત્થતલે નિસીદતિ.

૭૫. ઉડ્ડેત્વાતિ આકાસં ઉપ્પતિત્વા.

૭૬. અઙ્ગે નિલીનન્તિ અંસકૂટાદિસરીરાવયવે નિલીનં. પાદેતિ અત્તનો પઠમુદ્ધારપાદે. દુતિયે પાદે.

૭૭. પાદાનન્તિ દ્વિન્નં પાદાનં. કલાપસ્સાતિ ભૂમિયં ફુસિયમાનસ્સ કલાપગ્ગસ્સ.

૭૮. તતો પથવિતોતિ તીહિ અવયવેહિ પતિટ્ઠિતપથવિપ્પદેસતો, ન પઠમતો તત્થ દુક્કટત્તા, ન દુતિયતો તત્થ થુલ્લચ્ચયત્તા, તતિયા પન ઠાના કેસગ્ગમત્તમ્પિ ચાવયતો પારાજિકન્તિ વુત્તં હોતિ.

એત્તાવતા –

‘‘પઞ્જરે ઠિતં મોરં સહ પઞ્જરેન ઉદ્ધરતિ, પારાજિકં. યદિ પન પાદં નગ્ઘતિ, સબ્બત્થ અગ્ઘવસેન કત્તબ્બં. અન્તોવત્થુમ્હિ ચરન્તં મોરં થેય્યચિત્તો પદસા બહિવત્થું નીહરન્તો દ્વારપરિચ્છેદં અતિક્કામેતિ, પારાજિકં. વજે ઠિતબલિબદ્દસ્સ હિ વજો વિય અન્તોવત્થુ તસ્સ ઠાનં. હત્થેન પન ગહેત્વા અન્તોવત્થુસ્મિમ્પિ આકાસગતં કરોન્તસ્સ પારાજિકમેવ. અન્તોગામે ચરન્તમ્પિ ગામપરિચ્છેદં અતિક્કામેન્તસ્સ પારાજિકં. સયમેવ નિક્ખમિત્વા ગામૂપચારે વા વત્થૂપચારે વા ચરન્તં પન થેય્યચિત્તો કટ્ઠેન વા કથલાય વા ઉત્રાસેત્વા અટવીભિમુખં કરોતિ, મોરો ઉડ્ડેત્વા અન્તોગામે વા અન્તોવત્થુમ્હિ વા છદનપિટ્ઠે વા નિલીયતિ, રક્ખતિ. સચે પન અટવીભિમુખો ઉડ્ડેતિ વા ગચ્છતિ વા, ‘અટવિં પવેસેત્વા ગહેસ્સામી’તિ પરિકપ્પે અસતિ પથવિતો કેસગ્ગમત્તમ્પિ ઉપ્પતિતમત્તે વા દુતિયપદવારે વા પારાજિકં. કસ્મા? યસ્મા ગામતો નિક્ખમન્તસ્સ ઠિતટ્ઠાનમેવ ઠાનં હોતી’’તિ (પારા. અટ્ઠ. ૧.૯૬) –

અટ્ઠકથાગતો વિનિચ્છયો ઉપલક્ખિતોતિ વેદિતબ્બં. કપિઞ્જરાદિપરસન્તકસકુણેસુ ચ એસેવ વિનિચ્છયો દટ્ઠબ્બો.

૭૯. પત્તેતિ દ્વારે ભિક્ખાય ઠિતં ભિક્ખુનો હત્થગતે પત્તે. તસ્સ થેય્યચિત્તસ્સ.

૮૦. અનુદ્ધરિત્વાવાતિ પત્તે પતિતં સુવણ્ણાદિં હત્થેન અનુક્ખિપિત્વાવ પઠમપદવારે થુલ્લચ્ચયં ગમ્મમાનત્તા ન વુત્તં.

૮૧. હત્થેતિ હત્થતલે. વત્થેતિ ચીવરે. મત્થકેતિ સિરસિ. ગાથાછન્દવસેન વા-સદ્દે આકારસ્સ રસ્સત્તં. પતિટ્ઠિતન્તિ પતિતં. તન્તિ છિજ્જમાનં તં સુવણ્ણખણ્ડાદિ. યદિ આકાસે ગચ્છન્તં, પતન્તં વા હત્થેન ગણ્હાતિ. ગહિતહત્થે ઠિતટ્ઠાનમેવ ઠાનં, તતો કેસગ્ગમત્તમ્પિ અપનેન્તસ્સ પારાજિકં. તથા ગહેત્વા થેય્યચિત્તેન ગચ્છતો દુતિયપાદુદ્ધારે. વત્થાદીસુ પતિતેપિ એસેવ નયો.

આકાસટ્ઠકથાવણ્ણના.

૮૨. મઞ્ચપીઠાદીસૂતિ એત્થ આદિ-સદ્દેન મઞ્ચપીઠસદિસે વેહાસભૂતે અટ્ટવિતાનાદયો સઙ્ગણ્હાતિ. આમાસમ્પીતિ હત્થેન વા કાયેન વા આમસિતબ્બં વત્થાદિઞ્ચ. અનામાસમ્પીતિ તથા અપરામસિતબ્બં સુવણ્ણાદિં. આમસન્તસ્સાતિ હત્થાદીહિ પરામસન્તસ્સ. ‘‘દુક્કટ’’ન્તિ ઇમિના ફન્દાપને થુલ્લચ્ચયઞ્ચ ઠાનાચાવને પારાજિકઞ્ચ હેટ્ઠા થલટ્ઠે વુત્તનયેન વિઞ્ઞાતું સક્કાતિ અતિદિસતિ. ઠાનપરિચ્છેદો પન મઞ્ચાદીહિ એવ ઉક્ખિપન્તસ્સ ચતુન્નં પાદાનં વસેન, તત્રટ્ઠમેવ ગણ્હન્તસ્સ મઞ્ચસ્સ ચતૂસુ પાદસીસેસુ ફુસિત્વા મજ્ઝે અફુસિત્વા ઠિતસ્સ ખલિમક્ખિતથદ્ધસાટકસ્સ ચતુન્નં પાદસીસાનં વસેન, અટનીસુ ફુસિત્વા ઠિતસ્સ અટનીનં વસેન વા વેદિતબ્બો.

૮૩. વંસેતિ ચીવરવંસે, ઇમિના ચીવરનિક્ખેપનત્થાય ઠપિતરુક્ખદણ્ડસલાકારજ્જુઆદયો ઉપલક્ખિતા. ઓરતોતિ અત્તનો ઠિતદિસાભિમુખતો. ભોગન્તિ સંહરિત્વા ચીવરં તસ્સ નામેત્વા ઠપિતમજ્ઝટ્ઠાનં. અન્તન્તિ નામેત્વા એકતો કતં, ઉભયાનં વા અન્તં. પારતો કત્વાતિ વંસતો પરભાગે કત્વા.

૮૪. ચીવરેન ફુટ્ઠોકાસોતિ ચીવરેન ફુટ્ઠટ્ઠાનં. તસ્સાતિ તથા ઠપિતસ્સ ચીવરસ્સ. સો સકલો ચીવરવંસો ઠાનં ન તુ હોતીતિ મતોતિ સમ્બન્ધો.

૮૫-૬. ઓરિમન્તેન ફુટ્ઠં વા તં ઓકાસન્તિ સમ્બન્ધો. ચીવરભોગં ગહેત્વા થેય્યચિત્તેન અત્તનો અભિમુખં આકડ્ઢતો અત્તનો ઠિતદિસાય ચીવરવંસે ચીવરેન ફુસિત્વા ઠિતટ્ઠાનપરિયન્તં ઇતરેન અતિક્કામયતો ચુતીતિ સમ્બન્ધો. ઇતરેન પારિમન્તેન ભિત્તિદિસાય ચીવરસ્સ ફુટ્ઠોકાસપરિયન્તં ઇતરેન ફુટ્ઠં તં ઓકાસં ઓરિમન્તેન અતિક્કામયતો વા ચુતીતિ યોજના. ઇતરેનાતિ પારિમન્તેન ભિત્તિપસ્સે ચીવરવંસે ફુસિત્વા ઠિતચીવરપરિયન્તેન. ફુટ્ઠં ચીવરવંસોકાસં. ઓરિમન્તેનાતિ અત્તનો ઠિતદિસાય ચીવરવંસે ફુસિત્વા ઠપિતચીવરપ્પદેસેન. અતિક્કામયતોતિ કેસગ્ગમત્તમ્પિ અતિક્કામેન્તસ્સ.

એવં દીઘન્તાકડ્ઢને સમ્ભવન્તં વિકપ્પં દસ્સેત્વા ઇદાનિ તિરિયન્તેન અતિક્કમનવિધિં દસ્સેતુમાહ ‘‘દક્ખિણન્તેના’’તિઆદિ. પુનાતિ અથ વા. દક્ખિણન્તેન ફુટ્ઠટ્ઠાનં વામન્તેન અતિક્કામયતો ચુતીતિ યોજના. ચીવરં હરિતું ચીવરાભિમુખં ઠિતસ્સ અત્તનો દક્ખિણપસ્સે ચીવરકોટિયા ફુટ્ઠં ચીવરટ્ઠિતપ્પદેસં વામપસ્સે ચીવરન્તેન અતિક્કામયતો પારાજિકમેવાતિ અત્થો. વામન્તેન ફુટ્ઠટ્ઠાનં ઇતરેન અતિક્કામયતો વા ચુતીતિ યોજના. વામન્તેન ફુટ્ઠટ્ઠાનન્તિ ચીવરાભિમુખં ઠિતસ્સ વામપસ્સે ચીવરન્તેન ફુટ્ઠં ચીવરટ્ઠિતપ્પદેસં. ઇતરેન દક્ખિણપસ્સે ચીવરન્તેન અતિક્કામયતો વા ચુતિ પારાજિકા હોતીતિ અત્થો.

૮૭. વંસતોતિ ચીવરેન ફુસિત્વા ઠિતચીવરવંસપ્પદેસતો. ‘‘કેસગ્ગમત્ત’’ન્તિ કત્થચિ પોત્થકે લિખન્તિ, તં ન ગહેતબ્બં. ‘‘ઉક્ખિત્તે’’તિ ભુમ્મેકવચનન્તેન સમાનાધિકરણત્તા પચ્ચત્તેકવચનન્તતા ન યુજ્જતીતિ. ‘‘કેસગ્ગમત્તે ઉક્ખિત્તે’’તિ કત્થચિ પાઠો દિસ્સતિ, સો ચ પમાણં.

૮૮. વિમોચેન્તો થુલ્લચ્ચયં ફુસેતિ યોજના. ચીવરવંસે ફુસાપેત્વા, અફુસાપેત્વા વા રજ્જુયા બન્ધિત્વા ઠપિતચીવરં ગણ્હિતુકામો થેય્યચિત્તેન બન્ધનં મોચેન્તો થુલ્લચ્ચયં આપજ્જતીતિ અત્થો. મુત્તેતિ મુત્તમત્તે. પારાજિકો હોતિ ઠાના ચુતભાવતોતિ અધિપ્પાયો.

૮૯. વેઠેત્વાતિ એત્થ ‘‘વંસમેવા’’તિ સામત્થિયતો લબ્ભતિ. ચીવરવંસં પલિવેઠેત્વા તત્થેવ ઠપિતચીવરં નિબ્બેઠેન્તસ્સ ભિક્ખુનોપિ અયં નયોતિ સમ્બન્ધો. નિબ્બેઠેન્તસ્સાતિ વિનિવેઠેન્તસ્સ. અયં નયોતિ ‘‘નિબ્બેઠેન્તસ્સ થુલ્લચ્ચયં, નિબ્બેઠિતે પારાજિક’’ન્તિ યથાવુત્તનયમતિદિસતિ. વલયં છિન્દતો વાપિ અયં નયોતિ સમ્બન્ધો. ‘‘ભિક્ખુનો, વંસે, ઠપિતં, ચીવર’’ન્તિ ચ આનેત્વા યોજેતબ્બં. ચીવરવંસે પવેસેત્વા ઠપિતં ચીવરવલયં યથા છિન્નમત્તે ઠાના ચવતિ, તથા છિન્દન્તસ્સ ભિક્ખુનો છેદને થુલ્લચ્ચયં, છિન્ને પારાજિકન્તિ અત્થો. મોચેન્તસ્સાપ્યયં નયોતિ એત્થાપિ ‘‘વલય’’ન્તિ ઇમિના સદ્ધિં ‘‘ભિક્ખુનો’’તિઆદિપદાનિ યોજેતબ્બાનિ. ચીવરવંસે ઠપિતં ચીવરં વલયં મોચેન્તસ્સાપિ થુલ્લચ્ચયપારાજિકાનિ પુબ્બે વુત્તનયાનેવ.

ઇહ પુરિમેન અપિ-સદ્દેન યથાવુત્તપકારદ્વયે સમ્પિણ્ડિતે ઇતરેન અપિ-સદ્દેન અવુત્તસમ્પિણ્ડનમન્તરેન અત્થવિસેસાભાવતો અવુત્તમત્થં સમ્પિણ્ડેતિ, તેન ‘‘આકાસગતં વા કરોતિ, નીહરતિ વા’’તિ પકારદ્વયં સઙ્ગણ્હાતિ. તેન રુક્ખમૂલે પવેસેત્વા ઠપિતનિધિસઙ્ખલિકવલયમિવ ચીવરવંસે સબ્બટ્ઠાનેહિપિ અફુસાપેત્વા ચીવરવલયં આકાસગતં કરોન્તસ્સાપિ ચીવરવંસકોટિયા બહિ નીહરન્તસ્સાપિ થુલ્લચ્ચયપારાજિકાનિ વુત્તનયેનેવ ઞાતબ્બાનીતિ એતેયેવ સઙ્ગણ્હાતિ. ‘‘વલયં છિન્દતો વાપિ, મોચેન્તસ્સ વાપિ, વલયં આકાસગતં વા કરોતિ, નીહરતિ વા’’તિ ઇમેસુ ચતૂસુ વિકપ્પેસુ એકમ્પિ તથા અકત્વા ચીવરવલયં ચીવરવંસે ઘંસેત્વા ઇતો ચિતો ચ સઞ્ચારેન્તસ્સ ચીવરવલયસ્સ સબ્બોપિ ચીવરવંસો ઠાનન્તિ ‘‘ઠાનાચાવનં નત્થી’’તિ વુત્તબ્યતિરેકવસેન દસ્સિતબ્બન્તિ ગહેતબ્બં.

૯૦. ઠપિતસ્સ હીતિ એત્થ પસિદ્ધિસૂચકં હિ-સદ્દં આનેત્વા ‘‘ચીવરે વિય હી’’તિ યોજેત્વા વિસેસત્થજોતકં તુ-સદ્દં આનેત્વા ‘‘ઠપિતસ્સ તૂ’’તિ યોજેતબ્બં. અથ વા નિપાતાનમનેકત્થત્તા યથાઠાને ઠિતાનમેવ વિસેસત્થે હિ-સદ્દો, પસિદ્ધિયં તુ-સદ્દો ચ યોજેતબ્બો. વિનિચ્છયો વેદિતબ્બોતિ યોજના. દીઘતો વા તિરિયતો વા પસારેત્વા ચીવરવંસે નિક્ખિત્તસ્સ ચીવરસ્સ વિનિચ્છયો પન સંહરિત્વા ચીવરવંસે ઠપિતચીવરવિનિચ્છયો વિય વુત્તો, ‘‘ઓરિમન્તેન…પે… પારાજિકં ભવે’’તિ ગાથાત્તયે વુત્તનયેન વેદિતબ્બોતિ અત્થો.

૯૧. સિક્કાયાતિ ઓલમ્બિકાધારે. યં ભણ્ડકન્તિ સમ્બન્ધો. પક્ખિપિત્વાતિ નિવેસેત્વા. લગ્ગિતં હોતીતિ ઓલમ્બિતં હોતિ. ‘‘સિક્કાતો તં હરન્તો વા ચુતો’’તિ એતસ્મિં વિકપ્પે સિક્કાય ફુટ્ઠટ્ઠાનવસેન ઠાનાચાવનં વેદિતબ્બં. દુતિયવિકપ્પે સિક્કાય, બન્ધનટ્ઠાનસ્સ ચ ભિત્તિપસ્સે ફુટ્ઠટ્ઠાનં યદિ સિયા, તસ્સ ચ વસેન ઠાનાચાવનં વેદિતબ્બં.

૯૨-૩. કુન્તાદીતિ આદિ-સદ્દેન ભિન્દિવાલાદિ દીઘવત્થુ ગહેતબ્બં. તટ્ટિકાખાણુકા વિય ભિત્તિયં પટિપાટિયા નિવેસિતાનિ મિગસિઙ્ગાનિ વા સૂલાનિ વા નાગદન્તા નામ. અગ્ગે વાતિ કુન્તફલકોટિયં વા. બુન્દે વાતિ કુન્તદન્તમૂલે વા. પરિકડ્ઢતોતિ ઉજુકં આકડ્ઢતો.

ફુટ્ઠોકાસન્તિ તસ્મિં તસ્મિં નાગદન્તે ફુટ્ઠટ્ઠાનં અતિક્કામયતો કેસગ્ગમત્તેન પરાજયો સિયાતિ સમ્બન્ધો, ઠપિતટ્ઠપિતટ્ઠાનં વિહાય કેસગ્ગમત્તમ્પિ અતિક્કામયતો પારાજિકન્તિ અત્થો. કેસગ્ગેન અન્તરેન હેતુના પરાજયોતિ ગહેતબ્બં, કેસગ્ગમત્તમ્પિ અપનયનહેતુ પારાજિકં હોતીતિ અત્થો.

૯૪-૫. એવં દીઘતો આકડ્ઢને, ઉક્ખિપને ચ વિનિચ્છયં દસ્સેત્વા તિરિયં આકડ્ઢને, પરતો નયને ચ વિનિચ્છયં દસ્સેતુમાહ ‘‘પાકારાભિમુખો’’તિઆદિ. આકડ્ઢતીતિ અત્તનો ઠિતટ્ઠાનાભિમુખં આવિઞ્છતિ. ઓરિમન્તફુટ્ઠોકાસન્તિ ઓરિમન્તેન ફુટ્ઠોકાસં, અત્તનો દિસાય કુન્તદણ્ડેન ફુટ્ઠોકાસન્તિ અત્થો. એત્થ અચ્ચયનકિરિયાસમ્બન્ધે સામિવચનપ્પસઙ્ગે ઉપયોગવચનં. ‘‘સકમ્મકધાતુપ્પયોગે ઉપયોગવચનસ્સ માગધિકવોહારે દસ્સનતો કમ્મત્થેયેવ ઉપયોગવચન’’ન્તિ એકે વદન્તિ, એતં કચ્ચાયનલક્ખણેન સમાનં. ઇતરન્તચ્ચયેતિ ઇતરન્તેન કતો અચ્ચયોતિ ઇતરન્તચ્ચયો, મજ્ઝેપદલોપસમાસો, પારિમન્તેન કત્તબ્બાતિક્કમે કતેતિ અત્થો. કેસગ્ગેન ચુતોતિ યોજના. યથાવુત્તોયેવ અત્થો.

પરતો પેલ્લન્તસ્સાતિ પરતો કત્વા પેલ્લન્તસ્સ, ભિત્તિપસ્સાભિમુખં કત્વા નિપ્પીળેન્તસ્સાતિ અત્થો. તથેવાતિ ‘‘કેસગ્ગેન ચુતો’’તિ આકડ્ઢતિ. ઠપિતેપિ ચ કુન્તાદિમ્હિ અયં નયોતિ યોજના. ‘‘કેસગ્ગેના’’તિઆદિના અયમેવ વિનિચ્છયનયો વત્તબ્બોતિ અત્થો.

૯૬. તાલસ્સ ફલં ચાલેન્તસ્સ અસ્સ ભિક્ખુનો યેન ફલેન વત્થુ પઞ્ચમાસકં પૂરતિ, તસ્મિં ફલે બન્ધના મુત્તે પારાજિકં ભવેતિ યોજના.

૯૭. તાલસ્સ પિણ્ડિં છિન્દતીતિ તાલફલકણ્ણિકં છિન્દતિ. યાય વત્થુ પૂરતિ, તસ્સા છિન્નમત્તાય ‘‘અસ્સ પારાજિકં સિયા’’તિ હેટ્ઠા વુત્તનયો ઇધાપિ યોજેતબ્બો. તાલપિણ્ડિ સચે આકાસગતા હોતિ, પિણ્ડિમૂલમેવ ઠાનં. પણ્ણદણ્ડે વા પણ્ણે વા અપસ્સાય ઠિતા ચે, ઠિતટ્ઠાનેહિ સહ પિણ્ડિમૂલં ગહેત્વા ઠાનભેદં ઞત્વા ઠાનાચાવનેન પારાજિકમ્પિ દટ્ઠબ્બં. એસેવ નયોતિ ‘‘યેન વત્થુ પૂરતિ, તસ્મિં બન્ધના મુત્તે અસ્સ પારાજિકં સિયા’’તિ યથાવુત્તો એવ નયો. એતેસુ સબ્બેસુ ઠાનેસુ પારાજિકવીતિક્કમતો પુબ્બભાગાનન્તરપ્પયોગે થુલ્લચ્ચયઞ્ચ સહપયોગે પાચિત્તિયટ્ઠાને દુક્કટઞ્ચ તતોપિ પુબ્બપયોગે પાચિત્તિયટ્ઠાને પાચિત્તિયઞ્ચ દુક્કટઞ્ચ ગમનદુતિયપરિયેસનાદિઅવસેસપયોગેસુ અદિન્નાદાનપુબ્બકત્તા દુક્કટઞ્ચ અસમ્મુય્હન્તેહિ વેદિતબ્બં.

વેહાસટ્ઠકથાવણ્ણના.

૯૮. ઉદકે નિધિટ્ઠાનં ગચ્છતોતિ સમ્બન્ધો. અગમ્ભીરોદકે નિધિટ્ઠાનં પદવારેન ગચ્છતો પદે પદે પુબ્બપયોગે દુક્કટં હોતીતિ યોજના. ગમ્ભીરે પન તથાતિ ‘‘પદવારેન ગચ્છતો દુક્કટ’’ન્તિ યથાવુત્તમતિદિસતિ. ગચ્છતોતિ તરતો, હત્થં અચાલેત્વા તરન્તસ્સ પદવારગણનાય, હત્થેન ચ વાયમન્તસ્સ ‘‘પદવારેના’’તિ ઇદં ઉપલક્ખણન્તિ કત્વા હત્થવારગણનાય પદવારગણનાય દુક્કટાનિ વેદિતબ્બાનિ. તેન વુત્તં અટ્ઠકથાયં ‘‘ગમ્ભીરે હત્થેહિ વા પાદેહિ વા પયોગં કરોન્તસ્સ હત્થવારેહિ વા પદવારેહિ વા પયોગે પયોગે દુક્કટ’’ન્તિ (પારા. અટ્ઠ. ૧.૯૮).

ઉમ્મુજ્જનાદિસૂતિ એત્થ આદિ-સદ્દેન નિમુજ્જનં સઙ્ગણ્હાતિ. એત્થાપિ ‘‘તથા’’તિ અનુવત્તમાનત્તા પયોગે પયોગે દુક્કટન્તિ અયમત્થો વેદિતબ્બો. નિહિતકુમ્ભિયા ગહણત્થં નિમુજ્જનુમ્મુજ્જનેસુપિ હત્થવારેન, પદવારેન, હત્થપદવારેહિ ચ દુક્કટમેવાતિ વુત્તં હોતિ. તેનાહ અટ્ઠકથાયં ‘‘એસેવ નયો કુમ્ભિગહણત્થં નિમુજ્જનુમ્મુજ્જનેસૂ’’તિ (પારા. અટ્ઠ. ૧.૯૮).

ઇમિસ્સા ગાથાય ‘‘નિધિટ્ઠાનં ગચ્છતો દુક્કટ’’ન્તિ વચનતો તથા ગચ્છન્તસ્સ ઉદકસપ્પચણ્ડમચ્છદસ્સનેન ભાયિત્વા પલાયન્તસ્સ ગમનસ્સ અતદત્થત્તા અનાપત્તીતિ બ્યતિરેકેન વિઞ્ઞાયતિ. એત્થ દુતિયપરિયેસનાદિસબ્બપયોગેસુ પાચિત્તિયટ્ઠાને પાચિત્તિયઞ્ચ પાચિત્તિયેન સહ દુક્કટઞ્ચ અવસેસપયોગેસુ સુદ્ધદુક્કટઞ્ચ સહપયોગે ભાજનામસને અનામાસદુક્કટઞ્ચ ફન્દાપને થુલ્લચ્ચયઞ્ચ ઠાનાચાવને પારાજિકઞ્ચ નિધિકુમ્ભિયા વુત્તનયેન વિઞ્ઞાતું સક્કાતિ ન વુત્તન્તિ દટ્ઠબ્બં. તત્થ ઠાનભેદો પઞ્ચધા હોતિ, ઇધ પીળેત્વા ઓસારેતું સક્કુણેય્યત્તા અધોદિસાય સહ છબ્બિધં હોતીતિ અયમેતેસં વિસેસો.

૯૯. તત્થ જાતકપુપ્ફેસૂતિ તસ્મિં જલે રુળ્હેસુ ઉપ્પલાદિકુસુમેસુ, નિદ્ધારણે ભુમ્મં. યેન પુપ્ફેનાતિ નિદ્ધારિતબ્બં. છિન્દતોતિ એત્થ વત્તમાનકાલવસેન અત્થં અગ્ગહેત્વા ‘‘છિન્નવતો’’તિ ભૂતવસેન અત્થો ગહેતબ્બો. એવં અગ્ગહિતે અન્તિમસ્સ પયોગસ્સ યાવ અનુપરમો, થુલ્લચ્ચયારહત્તા પારાજિકવચનસ્સ વત્થુવિરોધિતાય ચ ઇમસ્સેવ પચ્છિમકુસુમસ્સ કન્તનકાલે પુપ્ફનાળપસ્સે તચમત્તેપિ અચ્છિન્ને પારાજિકં નત્થીતિ દસ્સેતું ‘‘એકનાળ…પે… પરિરક્ખતી’’તિ એત્થેવ અનન્તરે વુચ્ચમાનનયસ્સ વિરુદ્ધત્તા ચ ઇમં વિનિચ્છયં દસ્સેતું લિખિતસ્સ ‘‘યસ્મિં પુપ્ફે વત્થુ પૂરતિ, તસ્મિં છિન્નમત્તે પારાજિક’’ન્તિ (પારા. અટ્ઠ. ૧.૯૮) અટ્ઠકથાવચનસ્સ વિરુદ્ધત્તા ચ વત્તમાનકાલમગહેત્વા ભૂતકાલસ્સેવ ગહેતબ્બત્તા ‘‘કદા દેવદત્ત આગતોસી’’તિ પઞ્હસ્સ ‘‘એસોહમાગચ્છામિ, આગચ્છન્તં મા મં વિજ્ઝા’’તિ ઉત્તરે વિય વત્તમાનસમીપે વત્તમાનેવાતિ ભૂતે વત્તમાનબ્યપદેસતો વુત્તન્તિ દટ્ઠબ્બં.

૧૦૦. ‘‘ઉપ્પલજાતિયા’’તિ ઇમિના ‘‘પદુમજાતિયા’’તિ બ્યતિરેકતો વુત્તત્તા ‘‘પદુમજાતિકાનં પન દણ્ડે છિન્ને અબ્ભન્તરે સુત્તં અચ્છિન્નમ્પિ રક્ખતી’’તિ (પારા. અટ્ઠ. ૧.૯૮) અટ્ઠકથાનયો સઙ્ગહિતોતિ દટ્ઠબ્બં. એકનાળસ્સ વા પસ્સેતિ ‘‘નાળસ્સ એકપસ્સે’’તિ વત્તબ્બે ગાથાબન્ધસુખત્થં વુત્તન્તિ વેદિતબ્બં. તતોતિ નાળતો.

૧૦૧. ભારબદ્ધકુસુમેસુ વિનિચ્છયસ્સ વક્ખમાનત્તા છિન્દિત્વા ઠપિતેસૂતિ અબદ્ધકુસુમવસેન ગહેતબ્બં. પુબ્બે વુત્તનયેનાતિ તત્રજાતકકુસુમેસુ વુત્તવિનિચ્છયાનુસારેન. ‘‘યેન પુપ્ફેન પૂરતિ, તસ્મિં છિન્નમત્તે’’તિ અવત્વા ગહિતમત્તે પારાજિકન્તિ યોજના ચેત્થ વિસેસો.

૧૦૨. ભારં કત્વા બદ્ધાનિ ભારબદ્ધાનીતિ મજ્ઝપદલોપીસમાસો. પુપ્ફાનીતિ પાદગ્ઘનકાનિ ઉપ્પલાદિકુસુમાનિ. છસ્વાકારેસૂતિ ઉદકે ઓસીદાપેતું સક્કુણેય્યત્તા અધોદિસાય સહ ચતસ્સો દિસા, ઉદ્ધન્તિ ઇમાસુ છસુ દિસાસુ, નિદ્ધારણે ભુમ્મં. કેનચિ આકારેનાતિ નિદ્ધારેતબ્બદસ્સનં. ઠાનાચાવનસ્સ સાધકતમત્તા કરણેયેવ કરણવચનં. નસ્સતીતિ પાદગ્ઘનકપુપ્ફાનં ઠાનાચાવનેન પારાજિકમાપજ્જિત્વા લોકિયલોકુત્તરાનં અનવસેસગુણાનં પતિટ્ઠાનભૂતં પાતિમોક્ખસંવરસીલં નાસેત્વા સયં ગુણમરણેન મીયતીતિ અત્થો.

૧૦૩. પુપ્ફાનં કલાપન્તિ પાદગ્ઘનકઉપ્પલાદિકુસુમકલાપં. ઉદકં ચાલેત્વાતિ યથા વીચિ ઉટ્ઠાતિ, તથા ચાલેત્વા. પુપ્ફટ્ઠાનાતિ પુપ્ફાનં ઠિતટ્ઠાના. ચાવેતીતિ કલાપં કેસગ્ગમત્તમ્પિ અપનેતિ. ‘‘પુપ્ફં ઠાના ચાવેતી’’તિ કત્થચિ પોત્થકેસુ પાઠો દિસ્સતિ. પુપ્ફકલાપસ્સેવ ગહિતત્તા પુરિમોયેવ ગહેતબ્બો.

૧૦૪. ‘‘એત્થ ગતં ગહેસ્સામી’’તિ સહ પાઠસેસેન યોજના. પરિકપ્પેતીતિ ‘‘એત્થ ગતં ગહેસ્સામી’’તિ ઠાનં પરિચ્છિન્દિત્વા તક્કેતિ. રક્ખતીતિ ઠાનાચાવનેપિ સતિ સો પરિકપ્પો પારાજિકાપત્તિતો તં ભિક્ખું રક્ખતિ. ગતટ્ઠાનાતિ પુપ્ફકલાપેન ગતં સમ્પત્તઞ્ચ તં ઠાનઞ્ચાતિ વિગ્ગહો. ‘‘ઉદ્ધરન્તો’’તિ એતેન ‘‘પુપ્ફાનં કલાપ’’ન્તિ આનેત્વા સમ્બન્ધિતબ્બં. ‘‘કતટ્ઠાના’’તિપિ પાઠો, કતા પુપ્ફાનં ઠાના ઉદ્ધરન્તોતિ સમ્બન્ધો. ઉદકં ચાલેત્વા વીચિયો ઉટ્ઠાપેત્વા વીચિપ્પહારેન ઉદકપિટ્ઠેન પરિકપ્પિતટ્ઠાનં સમ્પત્તં પુપ્ફકલાપં ઠિતટ્ઠાના ઉદ્ધરન્તો કેસગ્ગમત્તમ્પિ ઠાના ચાવેન્તોતિ અત્થો. ‘‘ઠાના’’તિ ઇદં ‘‘ભટ્ઠો’’તિ ઇમિના સમ્બન્ધનીયં. ભટ્ઠો નામ પવુચ્ચતીતિ અત્તના સમાદાય રક્ખિયમાના પાતિમોક્ખસંવરસીલસઙ્ખાતસબ્બગુણરતનઙ્કુરાભિનિબ્બત્તટ્ઠાના પતિતો નામ હોતીતિ પવુચ્ચતિ.

૧૦૫. જલતો અચ્ચુગ્ગતસ્સાતિ એત્થ ‘‘પુપ્ફસ્સા’’તિ સામત્થિયા લબ્ભતિ. જલપિટ્ઠિતો અચ્ચુગ્ગતસ્સ પુપ્ફસ્સ સકલજલં ઠાનં, કદ્દમપિટ્ઠિતો પટ્ઠાય ઉદકપિટ્ઠિપરિયન્તં પુપ્ફદણ્ડેન ફરિત્વા ઠિતં સબ્બમુદકં ઠાનન્તિ વુત્તં હોતિ. ઉપ્પાટેત્વાતિ પુપ્ફગ્ગં આકડ્ઢિત્વા ઉપ્પીળેત્વા. તતોતિ તસ્મા પુપ્ફટ્ઠાનભૂતસકલજલરાસિતો. ઉજુન્તિ ઉજું કત્વા. ઉદ્ધરતોતિ ઉપ્પાટેન્તસ્સ.

૧૦૬. નાળન્તેતિ ઉપ્પાટિતપુપ્ફનાળસ્સ મૂલકોટિયા. જલતોતિ ઉદકપિટ્ઠિતો. મુત્તમત્તે કેસગ્ગમત્તં દૂરં કત્વાતિ પાઠસેસયોજના કાતબ્બા. ‘‘જલતો’’તિ પઠમતતિયપાદેસુ દ્વિક્ખત્તું વચનં અત્થાવિસેસેપિ પદાવુત્તિઅલઙ્કારે અડ્ઢયમકવસેન વુત્તત્તા પુનરુત્તિદોસો ન હોતીતિ વેદિતબ્બં. ‘‘મુત્તમત્તે, અમુત્તે’’તિ ચ સમ્બન્ધિતબ્બં, અત્થાનં વા વિસેસતો ઉભયત્થ વુત્તન્તિ વેદિતબ્બં. તસ્મિં નાળન્તેતિ સમ્બન્ધો.

૧૦૭. તસ્સ નામેત્વા ઉપ્પાટિતસ્સ. સહ ગચ્છેન ઉપ્પાટિતસ્સાપિ અયમેવ વિનિચ્છયો. ઇધ પન સબ્બપુપ્ફપણ્ણનાળાનિ મૂલતો પભુતિ પઠમં ઠિતટ્ઠાનતો અપનામનવસેન ઠાનાચાવનં વેદિતબ્બં. એવં પુપ્ફાદીનિ ઉપ્પાટેન્તસ્સ ભૂતગામવિકોપનાપત્તિયા ઠાને સહપયોગદુક્કટં હોતીતિ વેદિતબ્બં.

૧૦૮-૯. બળિસાદિમચ્છગ્ગહણોપકરણાનં વચનતો, જલે ઠિતમતમચ્છાનં વિનિચ્છયસ્સ ચ વક્ખમાનત્તા મચ્છેતિ જીવમાનકમચ્છાનં ગહણં. ઉપલક્ખણવસેન વા અવુત્તસમુચ્ચયત્થ વા-સદ્દેન વા ખિપકાદીનિ મચ્છવધોપકરણાનિ વુત્તાનેવાતિ દટ્ઠબ્બં. વત્થૂતિ પાદો. તસ્મિં મચ્છે. ઉદ્ધટોયેવ ઉદ્ધટમત્તો, મચ્છો, તસ્મિં. જલાતિ ઉદકતો કેસગ્ગમત્તમ્પિ અપનેત્વા ઉક્ખિત્તમત્તેતિ વુત્તં હોતિ.

૧૧૦. પુપ્ફાનં વિય મચ્છાનમ્પિ ઠિતટ્ઠાનમેવ ઠાનન્તિ અગ્ગહેત્વા સકલજલં ઠાનં કત્વા કસ્મા વુત્તન્તિ આહ ‘‘ઠાનં સલિલજાનં હી’’તિઆદિ. સલિલે જાતા સલિલજા, ઇતિ પકરણતો મચ્છાયેવ વુચ્ચન્તિ. અત્થપ્પકરણસદ્દન્તરસન્નિધાનાદીહિ સદ્દા વિસેસત્થં વદન્તીતિ. હીતિ પસિદ્ધિયં. કેવલન્તિ અવધારણે, જલમેવાતિ વુત્તં હોતિ. ઇમિના બહિઉદકં નિવત્તિતં હોતિ. સકલં જલમેવ ઠાનં યસ્મા, તસ્મા સલિલટ્ઠં જલા વિમોચેન્તો પારાજિકો હોતીતિ હેતુહેતુમન્તભાવેન યોજના વેદિતબ્બા. આપન્નં પરાજેતીતિ પારાજિકા, આપત્તિ, સા એતસ્સ અત્થીતિ પારાજિકો, પુગ્ગલો.

૧૧૧. નીરં ઉદકં. વારિમ્હિ જલે જાતો વારિજો, ઇતિ પકરણતો મચ્છોવ ગય્હતિ. એતેનેવ આકાસે ઉપ્પતિતમચ્છો, ગોચરત્થાય ચ થલમુગ્ગતકુમ્માદયો ઉપલક્ખિતાતિ વેદિતબ્બં. તેસં ગહણે વિનિચ્છયો આકાસટ્ઠથલટ્ઠકથાય વુત્તનયેન વેદિતબ્બો. ભણ્ડગ્ઘેન વિનિદ્દિસેતિ દુક્કટાદિવત્થુનો ભણ્ડસ્સ અગ્ઘવસેન દુક્કટથુલ્લચ્ચયપારાજિકાપત્તિયો વદેય્યાતિ અત્થો.

૧૧૨. તળાકેતિ સરસ્મિં, ઇમિના ચ વાપિપોક્ખરણિસોબ્ભાદિજલાસયા સઙ્ગય્હન્તિ. નદિયાતિ નિન્નગાય, ઇમિના ચ કન્દરાદયો સઙ્ગય્હન્તિ. નિન્નેતિ આવાટે. મચ્છવિસં નામાતિ એત્થ નામ-સદ્દો સઞ્ઞાયં. મચ્છવિસનામકં મદનફલાદિકં દટ્ઠબ્બં. ગતેતિ વિસપક્ખિપકે મચ્છઘાતકે ગતે.

૧૧૪. સામિકેસૂતિ વિસં યોજેત્વા ગતેસુ મચ્છસામિકેસુ. આહરન્તેસૂતિ આહરાપેન્તેસુ. ભણ્ડદેય્યન્તિ ભણ્ડઞ્ચ તં દેય્યઞ્ચાતિ વિગ્ગહો, અત્તના ગહિતવત્થું વા તદગ્ઘનકં વા ભણ્ડં દાતબ્બન્તિ અત્થો.

૧૧૫. મચ્છેતિ મતમચ્છે. સેસેતિ નમતમચ્છે.

૧૧૬. અમતેસુ ગહિતેસૂતિ પકરણતો લબ્ભતિ, નિમિત્તત્થે ચેતં ભુમ્મં. અનાપત્તિં વદન્તીતિ અદિન્નાદાનાપત્તિયા અનાપત્તિં વદન્તિ, મારણપ્પત્તિયા પાચિત્તિયં હોતેવ. અયઞ્ચ વિનિચ્છયો અરક્ખિતઅગોપિતેસુ અસ્સામિકતળાકાદીસુ વેદિતબ્બો.

ઉદકટ્ઠકથાવણ્ણના.

૧૧૭. નાવન્તિ એત્થ ‘‘નાવા નામ યાય તરતી’’તિ (પારા. ૯૯) વચનતો જલતારણારહં અન્તમસો એકમ્પિ વહન્તં રજનદોણિવેણુકલાપાદિકં વેદિતબ્બં. નાવટ્ઠં નામ ભણ્ડં યં કિઞ્ચિ ઇન્દ્રિયબદ્ધં વા અનિન્દ્રિયબદ્ધં વા. ‘‘થેનેત્વા ગણ્હિસ્સામી’’તિ ઇમિના ‘‘થેય્યચિત્તસ્સા’’તિ ઇમમત્થં વિઞ્ઞાપેતિ. પાદુદ્ધારેતિ દુતિયપરિયેસનાદિઅત્થં ગચ્છન્તસ્સ પદે પદે. દોસાતિ દુક્કટાપત્તિયો. વુત્તાતિ ‘‘નાવટ્ઠં ભણ્ડં અવહરિસ્સામી’તિ થેય્યચિત્તો દુતિયં વા પરિયેસતિ ગચ્છતિ વા, આપત્તિ દુક્કટસ્સા’’તિ (પારા. ૯૯) પદભાજનિયં ભગવતા વુત્તા, ઇમિના પુબ્બપયોગસહપયોગદુક્કટાનિ, ફન્દાપને થુલ્લચ્ચયં, ઠાનાચાવને પારાજિકઞ્ચ ઉપલક્ખણવસેન દસ્સિતન્તિ વેદિતબ્બં.

૧૧૮. ચણ્ડસોતેતિ વેગેન ગચ્છન્તે ઉદકપ્પવાહે, ‘‘ચણ્ડસોતે’’તિ ઇમિના બન્ધનં વિના સભાવેન અટ્ઠિતભાવસ્સ સૂચનતો ‘‘બન્ધનમેવ ઠાન’’ન્તિ વુત્તટ્ઠાનપરિચ્છેદસ્સ કારણં દસ્સિતન્તિ વેદિતબ્બં. યસ્મા ચણ્ડસોતે બદ્ધા, તસ્મા બન્ધનમેકમેવ ઠાનં મતન્તિ વુત્તં હોતિ. તસ્મિન્તિ બન્ધને. ધીરા વિનયધરા.

૧૧૯-૧૨૦. ‘‘નિચ્ચલે ઉદકે નાવ-મબન્ધનમવટ્ઠિત’’ન્તિ ઇમિના છધા ઠાનપરિચ્છેદસ્સ લબ્ભમાનત્તે કારણં દસ્સેતિ. નાવં કડ્ઢતો તસ્સ પારાજિકન્તિ સમ્બન્ધો. પુનપિ કિં કરોન્તોતિ આહ ‘‘એકેનન્તેન સમ્ફુટ્ઠ’’ન્તિઆદિ. તં નાવં અતિક્કામયતોતિ સમ્બન્ધો. એત્થાપિ ‘‘કડ્ઢિતવતો અતિક્કમિતવતો’’તિ ભૂતવસેન અત્થો યોજેતબ્બો. યમેત્થ વત્તબ્બં, તં હેટ્ઠા વુત્તનયમેવ.

૧૨૧. એવં ચતુપસ્સાકડ્ઢને વિનિચ્છયં દસ્સેત્વા ઇદાનિ ઉદ્ધં, અધો ચ ઉક્ખિપનઓસીદાપનેસુ વિનિચ્છયં દસ્સેતુમાહ ‘‘તથા’’તિઆદિ. તથાતિ ‘‘તસ્સ પારાજિક’’ન્તિ આકડ્ઢતિ. કસ્મિં કાલેતિ આહ ‘‘ઉદ્ધં કેસગ્ગમત્તમ્પી’’તિઆદિ. અધોનાવાતલન્તિ નાવાતલસ્સ અધો અધોનાવાતલં, તસ્મિં ઉદ્ધં કેસગ્ગમત્તમ્પિ ઉદકમ્હા વિમોચિતેતિ ઇમિના સમ્બન્ધો. તેન ફુટ્ઠં કેસગ્ગમત્તમ્પિ મુખવટ્ટિયા વિમોચિતેતિ યોજના. તેનાતિ અધોનાવાતલેન ફુટ્ઠે ઉદકે મુખવટ્ટિયા કરણભૂતાય કેસગ્ગમત્તમ્પિ વિમોચિતેતિ ગહેતબ્બં.

૧૨૨. તીરે બન્ધિત્વા પન નિચ્ચલે જલે ઠપિતા યા નાવા, તસ્સા નાવાય ઠાનં બન્ધનઞ્ચ ઠિતોકાસો ચાતિ દ્વિધા મતન્તિ યોજના.

૧૨૩. પુબ્બં પઠમં બન્ધનસ્સ વિમોચને થુલ્લચ્ચયં હોતીતિ યોજના. કેનચુપાયેનાતિ ‘‘પુરતો પચ્છતો વાપી’’તિઆદિક્કમેન યથાવુત્તોપાયછક્કેસુ યેન કેનચિ ઉપાયેનાતિ અત્થો. ઠાના ચાવેતિ નાવં.

૧૨૪. પઠમં ઠાના ચાવેત્વાતિ ‘‘પુરતો પચ્છતો વા’’તિઆદિના યથાવુત્તેસુ છસુ આકારેસુ અઞ્ઞતરેન આકારેન નાવં ઠપિતટ્ઠાનતો પઠમં ચાવેત્વા. એસેવ ચ નયોતિ નાવાય પઠમં ઠિતટ્ઠાનતો ચાવને થુલ્લચ્ચયં, પચ્છા બન્ધનમોચને પારાજિકન્તિ એસેવ નયો નેતબ્બોતિ અત્થો. એત્થ ચ ‘‘તીરે બન્ધિત્વા નિચ્ચલે ઉદકે ઠપિતનાવાય બન્ધનઞ્ચ ઠિતોકાસો ચાતિ દ્વે ઠાનાનિ, તં પઠમં બન્ધના મોચેતિ, થુલ્લચ્ચયં. પચ્છા છન્નં આકારાનં અઞ્ઞતરેન ઠાના ચાવેતિ, પારાજિકં. પઠમં ઠાના ચાવેત્વા પચ્છા બન્ધનમોચનેપિ એસેવ નયો’’તિ (પારા. ૯૯) અટ્ઠકથાયં વુત્તવિનિચ્છયો સઙ્ગહિતો. આમસનફન્દાપનેસુ દુક્કટથુલ્લચ્ચયાનિ હેટ્ઠા કુમ્ભિયં વુત્તનયેનેવ ઞાતું સક્કુણેય્યત્તા ન વુત્તાનીતિ વેદિતબ્બં. એવમુપરિપિ.

૧૨૫. ઉસ્સારેત્વાતિ ઉદકતો થલં આરોપેત્વા. નિકુજ્જિત્વાતિ અધોમુખં કત્વા. થલે ઠપિતાય નાવાય મુખવટ્ટિયા ફુટ્ઠોકાસો એવ ઠાનન્તિ યોજના. હીતિ વિસેસો, તેન જલટ્ઠતો થલટ્ઠાય નાવાય વુત્તં વિસેસં જોતેતિ.

૧૨૬. એત્થ અધો ઓસીદાપનસ્સ અલબ્ભમાનતાય તં વિના ઇતરેસં પઞ્ચન્નં આકારાનં વસેન ઠાનાચાવનં દસ્સેતુમાહ ‘‘ઞેય્યો’’તિઆદિ. યતો કુતોચીતિ તિરિયં ચતસ્સન્નં, ઉપરિદિસાય ચ વસેન યં કિઞ્ચિ દિસાભિમુખં કેસગ્ગમત્તમ્પિ અતિક્કમેન્તો.

૧૨૭. ઉક્કુજ્જિતાયપીતિ ઉદ્ધંમુખં ઠપિતાયપિ. ઘટિકાનન્તિ દારુખણ્ડાનં. ‘‘તથા’’તિ ઇમિના ‘‘ઞેય્યો ઠાનપરિચ્છેદો’’તિઆદિના વુત્તનયં અતિદિસતિ. સો પન ઉક્કુજ્જિત્વા ભૂમિયં ઠપિતનાવાય યુજ્જતિ. ઘટિકાનં ઉપરિ ઠપિતાય પન નાગદન્તેસુ ઠપિતકુન્તે વુત્તવિનિચ્છયો યુજ્જતિ.

૧૨૮. ‘‘થેય્યા’’તિ ઇદં ‘‘પાજેન્તસ્સા’’તિ વિસેસનં. તિત્થેતિ તિત્થાસન્નજલે. અરિત્તેનાતિ કેનિપાતેન. ફિયેનાતિ પાજનફલકેન. પાજેન્તસ્સાતિ પેસેન્તસ્સ. ‘‘તં પાજેતી’’તિપિ પાઠો દિસ્સતિ, તં નાવં યો પાજેતિ, તસ્સ પરાજયોતિ અત્થો.

૧૨૯-૩૦. છત્તન્તિ આતપવારણં. પણામેત્વાતિ યથા વાતં ગણ્હાતિ, તથા પણામેત્વા. ઉસ્સાપેત્વાવ ચીવરન્તિ ચીવરં ઉદ્ધં ઉચ્ચારેત્વા વા. ગાથાછન્દવસેન ‘વ’ઇતિ રસ્સત્તં. લઙ્કારસદિસન્તિ પસારિતપટસરિક્ખકં. સમીરણન્તિ માલુતં. ન દોસો તસ્સ વિજ્જતીતિ ઇદં વાતસ્સ અવિજ્જમાનક્ખણે એવં કરોતો પચ્છા આગતેન વાતેન નીતનાવાય વસેન વુત્તં. વાયમાને પન વાતે એવં કરોન્તસ્સ આપત્તિયેવાતિ દટ્ઠબ્બં.

૧૩૧-૨. સયમેવ ઉપાગતન્તિ સમ્બન્ધો. ગામસમીપે તિત્થં ગામતિત્થં. તન્તિ નાવં. ઠાનાતિ છત્તેન વા ચીવરેન વા ગહિતવાતેન ગન્ત્વા ગામતિત્થે ઠિતટ્ઠાના. અચાલેન્તોતિ ફન્દાપનમ્પિ અકરોન્તો, ઇમિના થુલ્લચ્ચયસ્સાપિ અભાવં દસ્સેતિ. ‘‘અચાવેન્તો’’તિપિ પાઠો, ઠિતટ્ઠાનતો કેસગ્ગમત્તમ્પિ અનપનેન્તોતિ અત્થો, ઇમિના પારાજિકાભાવં દસ્સેતિ. કિણિત્વાતિ મૂલેન વિક્કિણિત્વા. સયમેવ ચ ગચ્છન્તિન્તિ એત્થ ચ-કારો વત્તબ્બન્તરસમુચ્ચયે. તથા પણામિતછત્તેન વા ઉસ્સાપિતચીવરેન વા ગહિતવાતેન અત્તના ગચ્છન્તિં. ઠાના ચાવેતીતિ અત્તના ઇચ્છિતદિસાભિમુખં કત્વા પાજનવસેન ગમનટ્ઠાના ચાવેતિ.

નાવટ્ઠકથાવણ્ણના.

૧૩૩-૪. યન્તિ એતેનાતિ યાનં. રમયતીતિ રથો. વહતિ, વુય્હતિ, વહન્તિ એતેનાતિ વા વય્હં. ‘‘ઉપરિ મણ્ડપસદિસં પદરચ્છન્નં, સબ્બપાલિગુણ્ઠિમં વા છાદેત્વા’’તિ (પારા. અટ્ઠ. ૧.૧૦૦) અટ્ઠકથાયં વુત્તનયેન કતં સકટં વય્હં નામ. સન્દમાનિકાતિ ‘‘ઉભોસુ પસ્સેસુ સુવણ્ણરજતાદિમયા ગોપાનસિયો દત્વા ગરુળપક્ખકનયેન કતા સન્દમાનિકા’’તિ (પારા. અટ્ઠ. ૧.૧૦૦) અટ્ઠકથાયં વુત્તનયેન કતયાનવિસેસો. ઠાના ચાવનયોગસ્મિન્તિ ઠાના ચાવનપ્પયોગે.

૧૩૫-૬. દસટ્ઠાનાચાવનવસેન પારાજિકં વદન્તેહિ પઠમં ઠાનભેદસ્સ ઞાતબ્બત્તા તં દસ્સેત્વા આપત્તિભેદં દસ્સેતુમાહ ‘‘યાનસ્સ દુકયુત્તસ્સા’’તિઆદિ. દુકયુત્તસ્સાતિ દુકં ગોયુગં યુત્તસ્સ યસ્સાતિ, યુત્તે યસ્મિન્તિ વા વિગ્ગહો. દસ ઠાનાનીતિ દ્વિન્નં ગોણાનં અટ્ઠ પાદા, દ્વે ચ ચક્કાનીતિ એતેસં દસન્નં પતિટ્ઠિતટ્ઠાનાનં વસેન દસ ઠાનાનિ વદેય્યાતિ અત્થો. એતેનેવ નયેન ચતુયુત્તાદિયાને અટ્ઠારસાતિ ઠાનભેદસ્સ નયો દસ્સિતો હોતિ. યાનં પાજયતોતિ સકટાદિયાનં પેસયતો. ‘‘ધુરેતિ યુગાસન્ને’’તિ અટ્ઠકથાય ગણ્ઠિપદે વુત્તં. રથીસાય યુગેન સદ્ધિં બન્ધનટ્ઠાનાસન્નેતિ વુત્તં હોતિ. ‘‘ધુર’’ન્તિ ચ યુગસ્સેવ નામં. ‘‘ધુરં છડ્ડેત્વા, ધુરં આરોપેત્વા’’તિ (પારા. અટ્ઠ. ૧.૧૦૦) અટ્ઠકથાવચનતો તંસહચરિયાય સમ્બન્ધનટ્ઠાનમ્પિ ધુરં નામ. ઇધ પન ગઙ્ગા-સદ્દો વિય ગઙ્ગાસમીપે ધુરસમીપે પાજકસ્સ નિસજ્જારહટ્ઠાને ધુરસ્સ વત્તમાનતા લબ્ભતિ.

ગોણાનં પાદુદ્ધારે તસ્સ થુલ્લચ્ચયં વિનિદ્દિસેતિ યોજના. ઇદઞ્ચ ગોણાનં અવિલોમકાલં સન્ધાય વુત્તં. વિલોમકાલે સમ્ભવન્તં વિસેસં જોતેતું ‘‘થુલ્લચ્ચયં તુ’’ ઇચ્ચત્ર તુ-સદ્દેન અટ્ઠકથાયં ‘‘સચે પન ગોણા ‘નાયં અમ્હાકં સામિકો’તિ ઞત્વા ધુરં છડ્ડેત્વા આકડ્ઢન્તા તિટ્ઠન્તિ વા ફન્દન્તિ વા, રક્ખતિ તાવ. ગોણે પુન ઉજુકં પટિપાદેત્વા ધુરં આરોપેત્વા દળ્હં યોજેત્વા પાચનેન વિજ્ઝિત્વા પાજેન્તસ્સ વુત્તનયેનેવ તેસં પાદુદ્ધારેન થુલ્લચ્ચય’’ન્તિ વુત્તવિસેસો સઙ્ગહિતોતિ દટ્ઠબ્બો. ચક્કાનં હીતિ એત્થ અધિકેન હિ-સદ્દેન ‘‘સચેપિ સકદ્દમે મગ્ગે એકં ચક્કં કદ્દમે લગ્ગં હોતિ, દુતિયં ચક્કં ગોણા પરિવત્તેન્તા પવત્તેન્તિ, એકસ્સ પન ઠિતત્તા ન તાવ અવહારો હોતિ. ગોણે પન પુન ઉજુકં પટિપાદેત્વા પાજેન્તસ્સ ઠિતચક્કે કેસગ્ગમત્તં ફુટ્ઠોકાસં અતિક્કન્તે પારાજિક’’ન્તિ (પારા. અટ્ઠ. ૧.૧૦૦) અટ્ઠકથાયં વુત્તવિસેસો દસ્સિતો હોતીતિ દટ્ઠબ્બં.

૧૩૭-૯. એત્તાવતા યુત્તયાનવિનિચ્છયં દસ્સેત્વા ઇદાનિ અયુત્તયાનવિનિચ્છયં દસ્સેતુમાહ ‘‘અયુત્તકસ્સા’’તિઆદિ. ધુરેન ઉપત્થમ્ભનિયં ઠિતસ્સ તસ્સ અયુત્તકસ્સાપિ ચ યાનકસ્સ ઉપત્થમ્ભનિચક્કકાનં વસેન તીણેવ ઠાનાનિ ભવન્તીતિ યોજના. તત્થ અયુત્તકસ્સાતિ ગોણેહિ અયુત્તકસ્સ. ધુરેનાતિ યથાવુત્તનયેન ધુરયુત્તટ્ઠાનસમીપદેસેન, સકટસીસેનાતિ વુત્તં હોતિ. ઉપત્થમ્ભનિયન્તિ સકટસીસોપત્થમ્ભનિયા ઉપરિ ઠિતસ્સ. ઉપત્થમ્ભયતિ ધુરન્તિ ઉપત્થમ્ભની. સકટસ્સ પચ્છિમભાગોપત્થમ્ભનત્થં દીયમાનં દણ્ડદ્વયં પચ્છિમોપત્થમ્ભની નામ, પુરિમભાગસ્સ દીયમાનસ્સ ઉપત્થમ્ભની પુરિમોપત્થમ્ભની નામાતિ અયમુપત્થમ્ભનીનં વિસેસો. ઇધ પુરિમોપત્થમ્ભની અધિપ્પેતા. ‘‘ઉપત્થમ્ભનિચક્કકાનં વસેન તીણેવ ઠાનાની’’તિ ઇદં હેટ્ઠા અકપ્પકતાય ઉપત્થમ્ભનિયા વસેન વુત્તં, કપ્પકતાય પન વસેન ‘‘ચત્તારી’’તિ વત્તબ્બં.

‘‘તથા’’તિ ઇમિના ‘‘ઠાનાનિ તીણેવા’’તિ આકડ્ઢતિ, દારુચક્કદ્વયવસેન તીણિ ઠાનાનીતિ અત્થો. ‘‘દારૂન’’ન્તિ ઇમિના બહુવચનનિદ્દેસેન રાસિકતદારૂનં દારુકસ્સ એકસ્સાપિ ફલકસ્સાપિ ગહણં વેદિતબ્બં. ‘‘ભૂમિયમ્પિ ધુરેનેવ, તથેવ ઠપિતસ્સ ચા’’તિ ઇમિના તીણિયેવ ઠાનાનીતિ અતિદિસતિ. એત્થ ધુરચક્કાનં પતિટ્ઠિતોકાસવસેન તીણિ ઠાનાનિ. એત્થ ચ ઉપરિટ્ઠપિતસ્સ ચાતિ ચ-કારં ‘‘ભૂમિયં ઠપિતસ્સા’’તિ એત્થાપિ યોજેત્વા સમુચ્ચયં કાતું સક્કાતિ. તત્થ અધિકવચનેન ચ-કારેન અટ્ઠકથાયં ‘‘યં પન અયુત્તકં ધુરે એકાય, પચ્છતો ચ દ્વીહિ ઉપત્થમ્ભનીહિ ઉપત્થમ્ભેત્વા ઠપિતં, તસ્સ તિણ્ણં ઉપત્થમ્ભનીનં, ચક્કાનઞ્ચ વસેન પઞ્ચ ઠાનાનિ. સચે ધુરે ઉપત્થમ્ભની હેટ્ઠાભાગે કપ્પકતા હોતિ, છ ઠાનાની’’તિ (પારા. અટ્ઠ. ૧.૧૦૦) વુત્તવિનિચ્છયં સઙ્ગણ્હાતિ.

પુરતો પચ્છતો વાપીતિ એત્થ ‘‘કડ્ઢિત્વા’’તિ પાઠસેસો. અપિ-સદ્દેન ‘‘ઉક્ખિપિત્વાપી’’તિ અવુત્તં સમુચ્ચિનોતિ. યો પન પુરતો કડ્ઢિત્વા ઠાના ચાવેતિ, યો વા પન પચ્છતો કડ્ઢિત્વા ઠાના ચાવેતિ, યો વા પન ઉક્ખિપિત્વા ઠાના ચાવેતીતિ યોજના. તિણ્ણન્તિ ઇમે તયો ગહિતા, ‘‘તેસ’’ન્તિ સામત્થિયા લબ્ભતિ, તેસં તિણ્ણં પુગ્ગલાનન્તિ વુત્તં હોતિ. કદા કિં હોતીતિ આહ ‘‘થુલ્લચ્ચયં તુ…પે… પરાજયો’’તિ. ‘‘ઠાના ચાવે’’તિ ઇદં ‘‘થુલ્લચ્ચય’’ન્તિ ઇમિનાપિ સમ્બન્ધનીયં. તુ-સદ્દસ્સ વિસેસજોતનત્થં ઉપાત્તત્તા સાવસેસટ્ઠાનાચાવને ફન્દાપનથુલ્લચ્ચયં, નિરવસેસટ્ઠાનાચાવને પન કતે ઠાનાચાવનપારાજિકા વુત્તા હોતીતિ દટ્ઠબ્બં.

૧૪૦. અક્ખાનં સીસકેહીતિ અક્ખસ્સ ઉભયકોટીહિ. ‘‘જાત્યાખ્યાયમેકસ્મિં બહુવચનમઞ્ઞતરાય’’મિતિ વચનતો એકસ્મિં અત્થે બહુવચનં યુજ્જતિ. ‘‘ઠિતસ્સા’’તિ એતસ્સ વિસેસનસ્સ ‘‘યાનસ્સા’’તિ વિસેસિતબ્બં સામત્થિયા લબ્ભતિ. ‘‘ઠાનાનિ દ્વે’’તિ વુત્તત્તા યથા સકટધુરં ભૂમિં ન ફુસતિ, એવં ઉચ્ચતરેસુ દ્વીસુ તુલાદિદારૂસુ દ્વે અક્ખસીસે આરોપેત્વા ઠપિતં યાનમેવ ગય્હતિ.

૧૪૧. કડ્ઢન્તોતિ દ્વિન્નં અક્ખસીસાનં આધારભૂતેસુ દારૂસુ ઘંસિત્વા ઇતો ચિતો ચ કડ્ઢન્તો. ઉક્ખિપન્તોતિ ઉજું ઠિતટ્ઠાનતો ઉચ્ચારેન્તો. ફુટ્ઠોકાસચ્ચયેતિ ફુટ્ઠોકાસતો કેસગ્ગમત્તાતિક્કમે. અઞ્ઞસ્સાતિ યથાવુત્તપ્પકારતો ઇતરસ્સ. યસ્સ કસ્સચિ રથાદિકસ્સ યાનસ્સ.

૧૪૨. અક્ખુદ્ધીનન્તિ ચતુન્નં અક્ખરુદ્ધનકઆણીનં. અક્ખસ્સ ઉભયકોટીસુ ચક્કાવુણનટ્ઠાનતો અન્તો દ્વીસુ સકટબાહાસુ અક્ખરુદ્ધનત્થાય દ્વે અઙ્ગુલિયો વિય આકોટિતા ચતસ્સો આણિયો અક્ખુદ્ધિ નામ. ધુરસ્સાતિ ધુરબન્ધનટ્ઠાનાસન્નસ્સ રથસીસગ્ગસ્સ. તં યાનં. વા-સદ્દેન પસ્સે વા ગહેત્વા કડ્ઢન્તો, મજ્ઝે વા ગહેત્વા ઉક્ખિપેન્તોતિ કિરિયન્તરં વિકપ્પેતિ. ગહેત્વાતિ એત્થ ‘‘કડ્ઢન્તો’’તિ પાઠસેસો. ઠાના ચાવેતીતિ ઉદ્ધીસુ ગહેત્વા કડ્ઢન્તો અત્તનો દિસાય ઉદ્ધિઅન્તેન ફુટ્ઠટ્ઠાનં ઇતરેન ઉદ્ધિપરિયન્તેન કેસગ્ગમત્તમ્પિ અતિક્કામેતિ.

‘‘ઉદ્ધીસુ વા’’તિ સાસઙ્કવચનેન અનુદ્ધિકયાનસ્સાપિ વિજ્જમાનત્તં સૂચિતં હોતિ. અટ્ઠકથાયં ‘‘અથ ઉદ્ધિખાણુકા ન હોન્તિ, સમમેવ બાહં કત્વા મજ્ઝે વિજ્ઝિત્વા અક્ખસીસાનિ પવેસિતાનિ હોન્તિ, તં હેટ્ઠિમતલસ્સ સમન્તા સબ્બં પથવિં ફુસિત્વા તિટ્ઠતિ, તત્થ ચતૂસુ દિસાસુ, ઉદ્ધઞ્ચ ફુટ્ઠટ્ઠાનાતિક્કમવસેન પારાજિકં વેદિતબ્બ’’ન્તિ (પારા. અટ્ઠ. ૧.૧૦૦) વુત્તવિનિચ્છયઞ્ચ બ્યતિરેકવસેન સઙ્ગણ્હાતિ.

૧૪૩. નાભિયાતિ નાભિમુખેન. એકમેવ સિયા ઠાનન્તિ એકં નાભિયા ફુટ્ઠટ્ઠાનમેવ ઠાનં ભવતીતિ અત્થો. ‘‘એકમસ્સ સિયા ઠાન’’ન્તિ પોત્થકેસુ દિસ્સતિ, તતો પુરિમપાઠોવ સુન્દરતરો. પરિચ્છેદોપીતિ એત્થ પિ-સદ્દો વિસેસત્થજોતકો, પરિચ્છેદો પનાતિ અત્થો. પઞ્ચધાતિ નાભિયા ચતુપસ્સપરિયન્તં, ઉદ્ધઞ્ચ પઞ્ચધા, ઠાનાચાવનાકારો હોતીતિ અત્થો.

૧૪૪. ઠાનાનિ દ્વેતિ નેમિયા, નાભિયા ચ ફુટ્ઠટ્ઠાનવસેન દ્વે ઠાનાનિ. અસ્સાતિ ચક્કસ્સ. તેસં દ્વિન્નં ઠાનાનં. ભિત્તિઆદિં અપસ્સાય ઠપિતચક્કસ્સાપિ હિ અટ્ઠકથાયં વુત્તો અયમ્પિ વિનિચ્છયો વુત્તો, યોપિ ઇમિના ચ પાઠેન દસ્સિતો હોતિ.

૧૪૫. અનારક્ખન્તિ સામિકેન અસંવિહિતારક્ખં. અધોદેત્વાતિ ગોણે અપેસેત્વા. વટ્ટતિ, પારાજિકં ન હોતીતિ અધિપ્પાયો. સામિકે આહરાપેન્તે પન ભણ્ડદેય્યં હોતિ.

યાનટ્ઠકથાવણ્ણના.

૧૪૬. ભારટ્ઠકથાય સીસક્ખન્ધકટોલમ્બવસાતિ એવંનામકાનં સરીરાવયવાનં વસેન ભારો ચતુબ્બિધો હોતિ. તત્થ સીસભારાદીસુ અસમ્મોહત્થં સીસાદીનં પરિચ્છેદો વેદિતબ્બો – સીસસ્સ તાવ પુરિમગલે ગલવાટકો પિટ્ઠિગલે કેસઞ્ચિ કેસન્તે આવટ્ટો હોતિ, ગલસ્સેવ ઉભોસુ પસ્સેસુ કેસઞ્ચિ કેસાવટ્ટા ઓરુય્હ જાયન્તિ, યે ‘‘કણ્ણચૂળિકા’’તિ વુચ્ચન્તિ, તેસં અધોભાગો ચાતિ અયં હેટ્ઠિમપરિચ્છેદો, તતો ઉપરિ સીસં, એત્થન્તરે ઠિતભારો સીસભારો નામ.

ઉભોસુ પસ્સેસુ કણ્ણચૂળિકાહિ પટ્ઠાય હેટ્ઠા, કપ્પરેહિ પટ્ઠાય ઉપરિ, પિટ્ઠિગલાવટ્ટતો ચ ગલવાટકતો ચ પટ્ઠાય હેટ્ઠા, પિટ્ઠિવેમજ્ઝાવટ્ટતો ચ ઉરપરિચ્છેદમજ્ઝે હદયઆવાટતો ચ પટ્ઠાય ઉપરિ ખન્ધો, એત્થન્તરે ઠિતભારો ખન્ધભારો નામ.

પિટ્ઠિવેમજ્ઝાવટ્ટતો, પન હદયઆવાટતો ચ પટ્ઠાય હેટ્ઠા યાવ પાદનખસિખા, અયં કટિપરિચ્છેદો, એત્થન્તરે સમન્તતો સરીરે ઠિતભારો કટિભારો નામ.

કપ્પરતો પટ્ઠાય પન હેટ્ઠા યાવ હત્થનખસિખા, અયં ઓલમ્બકપરિચ્છેદો, એત્થન્તરે ઠિતભારો ઓલમ્બકો નામ.

ભરતીતિ ભારો, ભરતિ એતેન, એતસ્મિન્તિ વા ભારો, ઇતિ યથાવુત્તસીસાદયો અવયવા વુચ્ચન્તિ. ભારે તિટ્ઠતીતિ ભારટ્ઠં. ઇતિ સીસાદીસુ ઠિતં ભણ્ડં વુચ્ચતિ. ‘‘ભારોયેવ ભારટ્ઠ’’ન્તિ (પારા. અટ્ઠ. ૧.૧૦૧) અટ્ઠકથાવચનતો ભરીયતીતિ ભારો, કમ્મનિ સિદ્ધેન ભાર-સદ્દેન ભણ્ડમેવ વુચ્ચતિ.

૧૪૭. સિરસ્મિંયેવાતિ યથાપરિચ્છિન્ને સિરસિ એવ. સારેતીતિ અનુક્ખિપન્તો ઇતો ચિતો ચ સારેતિ. થુલ્લચ્ચયં સિયાતિ ફન્દાપનથુલ્લચ્ચયં ભવેય્ય.

૧૪૮. ખન્ધન્તિ યથાપરિચ્છિન્નમેવ ખન્ધં. ઓરોપિતેતિ ઓહારિતે. સીસતોતિ એત્થ ‘‘ઉદ્ધ’’ન્તિ પાઠસેસો, યથાપરિચ્છિન્નસીસતો ઉપરીતિ અત્થો. કેસગ્ગમત્તમ્પીતિ કેસગ્ગમત્તં દૂરં કત્વા. પિ-સદ્દો પગેવ તતો અધિકન્તિ દીપેતિ. મોચેન્તોપીતિ કેસગ્ગેન અફુસન્તં અપનેન્તો. એત્થાપિ પિ-સદ્દેન ન કેવલં ખન્ધં ઓરોપેન્તસ્સેવ પારાજિકં, અપિચ ખો મોચેન્તોપિ પરાજિતોતિ હેટ્ઠા વુત્તમપેક્ખતિ. પસિબ્બકાદિયમકભારં પન સીસે ચ પિટ્ઠિયઞ્ચાતિ દ્વીસુ ઠાનેસુ ઠિતત્તા દ્વીહિ ઠાનેહિ અપનયનેન પારાજિકં હોતિ, તઞ્ચ ‘‘સીસતો મોચેન્તો’’તિ ઇમિનાવ એકદેસવસેન સઙ્ગહિતન્તિ દટ્ઠબ્બં.

૧૪૯-૫૦. એવં સીસભારે વિનિચ્છયં દસ્સેત્વા તદનન્તરં ઉદ્દેસક્કમેસુ ખન્ધભારાદીસુ વિનિચ્છયે દસ્સેતબ્બેપિ અવસાને વુત્તઓલમ્બકભારે વિનિચ્છયં દસ્સેત્વા આદ્યન્તભારાનં વુત્તનયાનુસારેન સેસેસુપિ વિનિચ્છયં અતિદિસિતુમાહ ‘‘ભાર’’ન્તિઆદિ. સુદ્ધમાનસોતિ પાતરાસાદિકારણેન અથેય્યચિત્તો, હત્થગતભારં થેય્યચિત્તેન ભૂમિયં ઠપનનિસ્સજ્જનાદિં કરોન્તસ્સ હત્થતો મુત્તમત્તે પારાજિકન્તિ ઇદમેતેન ઉપલક્ખિતન્તિ દટ્ઠબ્બં.

એત્થ વુત્તનયેનેવાતિ સીસભારઓલમ્બકભારેસુ વુત્તાનુસારેન. સેસેસુપિ ભારેસૂતિ ખન્ધભારાદિકેસુપિ. મતિસારેન સારમતિના. વેદિતબ્બો વિનિચ્છયોતિ યથાપરિચ્છિન્નેસુ ઠાનેસુ ઠિતં પાદગ્ઘનકં યં કિઞ્ચિ વત્થું થેય્યચિત્તેન ‘‘ગણ્હિસ્સામી’’તિ આમસન્તસ્સ દુક્કટં, ઠાના અચાવેત્વા ફન્દાપેન્તસ્સ થુલ્લચ્ચયં, યથાપરિચ્છિન્નટ્ઠાનાતિક્કમનવસેન વા ઉદ્ધંઉક્ખિપનવસેન વા ઠાના ચાવેન્તસ્સ પારાજિકં હોતીતિ અયં વિનિચ્છયો વેદિતબ્બોતિ અત્થો.

ભારટ્ઠકથાવણ્ણના.

૧૫૧-૩. ઇદાનિ આરામટ્ઠવિનિચ્છયં દસ્સેતુમાહ ‘‘દુક્કટ’’ન્તિઆદિ. આરામન્તિ ચમ્પકાદિપુપ્ફારામઞ્ચ અમ્બાદિફલારામઞ્ચાતિ દ્વીસુ આરામેસુ યં કઞ્ચિ આરામં. આરમન્તિ એત્થ પુપ્ફાદિકામિનોતિ વિગ્ગહો, તં આરામં, અભિ-સદ્દયોગે ઉપયોગવચનં. અભિયુઞ્જતોતિ પરાયત્તભાવં જાનન્તો ‘‘મમ સન્તક’’ન્તિ અટ્ટં કત્વા ગણ્હિતું થેય્યચિત્તેન સહાયાદિભાવત્થં દુતિયકપરિયેસનાદિવસેન અભિયુઞ્જન્તસ્સ દુક્કટં મુનિના વુત્તન્તિ ઇમિના સમ્બન્ધનીયં, અદિન્નાદાનસ્સ પુબ્બપયોગત્તા સહપયોગગણનાય દુક્કટન્તિ ભગવતા વુત્તન્તિ અત્થો. ધમ્મં ચરન્તોતિ અટ્ટં કરોન્તો. પરં સામિકં પરાજેતિ ચે, સયં સાસનતો પરાજિતોતિ યોજના.

તસ્સાતિ ભણ્ડસામિનો. વિમતિં જનયન્તસ્સાતિ ‘‘ઇમિના સહ અટ્ટં કત્વા મમ સન્તકં લભિસ્સામિ વા, ન વા’’તિ સંસયં ઉપ્પાદેન્તસ્સ ચોરસ્સ. યોપિ ધમ્મં ચરન્તો સયં પરજ્જતિ, તસ્સ ચ થુલ્લચ્ચયન્તિ યોજના.

સામિનો ધુરનિક્ખેપેતિ ‘‘અયં થદ્ધો કક્ખળો જીવિતબ્રહ્મચરિયન્તરાયમ્પિ મે કરેય્ય, અલં દાનિ મય્હં ઇમિના આરામેના’’તિ સામિનો ધુરનિક્ખેપે સતિ, અત્તનો ‘‘ન દસ્સામી’’તિ ધુરનિક્ખેપે ચાતિ યોજના. એવં ઉભિન્નં ધુરનિક્ખેપે પારાજિકં. તસ્સાતિ અભિયુઞ્જન્તસ્સ. સબ્બેસં કૂટસક્ખીનઞ્ચાતિ ચ-કારો લુત્તનિદ્દિટ્ઠોતિ વેદિતબ્બો. ચોરસ્સ અસ્સામિકભાવં ઞત્વાપિ તદાયત્તકરણત્થં યં કિઞ્ચિ વદન્તા કૂટસક્ખિનો, તેસં સબ્બેસમ્પિ ભિક્ખૂનં પારાજિકં હોતીતિ અત્થો.

આરામટ્ઠકથાવણ્ણના.

૧૫૪. વિહારટ્ઠકથાયં વિહારન્તિ ઉપલક્ખણત્તા ‘‘પરિવેણં વા, આવાસં વા’’તિ ચ ગહેતબ્બં. સઙ્ઘિકન્તિ ચાતુદ્દિસં સઙ્ઘં ઉદ્દિસ્સ ભિક્ખૂનં દિન્નત્તા સઙ્ઘસન્તકં. કઞ્ચીતિ ખુદ્દકં, મહન્તં વાતિ અત્થો. અચ્છિન્દિત્વાન ગણ્હિતું અભિયુઞ્જન્તસ્સ પારાજિકા ન સિજ્ઝતીતિપિ પાઠસેસયોજના. હેતું દસ્સેતિ ‘‘સબ્બેસં ધુરનિક્ખેપાભાવતો’’તિ, સબ્બસ્સેવ ચાતુદ્દિસિકસઙ્ઘસ્સ ધુરનિક્ખેપસ્સ અસમ્ભવતોતિ અત્થો. ‘‘વિહાર’’ન્તિ એત્તકમેવ અવત્વા ‘‘સઙ્ઘિક’’ન્તિ વિસેસનેન દીઘભાણકાદિભેદસ્સ ગણસ્સ, એકપુગ્ગલસ્સ વા દિન્નવિહારાદિં અચ્છિન્દિત્વા ગણ્હન્તે ધુરનિક્ખેપસમ્ભવા પારાજિકન્તિ વુત્તં હોતિ. એત્થ વિનિચ્છયો આરામે વિય વેદિતબ્બો. ઇમેસુ તત્રટ્ઠભણ્ડે વિનિચ્છયો ભૂમટ્ઠથલટ્ઠઆકાસટ્ઠવેહાસટ્ઠેસુ વુત્તનયેન ઞાતું સક્કાતિ ન વુત્તોતિ વેદિતબ્બો.

વિહારટ્ઠકથાવણ્ણના.

૧૫૫-૬. ખેત્તટ્ઠે સીસાનીતિ વલ્લિયો. નિદમ્પિત્વાનાતિ યથા ધઞ્ઞમત્તં હત્થગતં હોતિ, તથા કત્વા. અસિતેનાતિ દાત્તેન. લાયિત્વાતિ દાયિત્વા. સબ્બકિરિયાપદેસુ ‘‘સાલિઆદીનં સીસાની’’તિ સમ્બન્ધનીયં. સાલિઆદીનં સીસાનિ નિદમ્પિત્વા ગણ્હતો યસ્મિં બીજે ગહિતે વત્થુ પૂરતિ, તસ્મિં બન્ધના મોચિતે તસ્સ પારાજિકં ભવેતિ યોજના. અસિતેન લાયિત્વા ગણ્હતો યસ્મિં સીસે ગહિતે…પે… ભવે, કરેન છિન્દિત્વા ગણ્હતો યસ્સં મુટ્ઠિયં ગહિતાયં…પે… ભવેતિ યોજના. બીજેતિ વીહાદિફલે. વત્થુ પૂરતીતિ પાદગ્ઘનકં હોતીતિ. મુટ્ઠિયન્તિ સીસમુટ્ઠિયં, બીજમુટ્ઠિયં વા. બન્ધના મોચિતેતિ બન્ધનટ્ઠાનતો મોચિતે.

૧૫૭. દણ્ડો વાતિ વત્થુપૂરકવીહિદણ્ડો વા. અચ્છિન્નો રક્ખતીતિ સમ્બન્ધો. તચો વાતિ તસ્સ દણ્ડસ્સ એકપસ્સે છલ્લિ વા અચ્છિન્નો રક્ખતિચ્ચેવ સમ્બન્ધો. વા-ગ્ગહણેન ઇધાવુત્તં અટ્ઠકથાગતં (પારા. અટ્ઠ. ૧.૧૦૪) ‘‘વાકો’’તિ ઇદં સઙ્ગણ્હાતિ. વાકો નામ દણ્ડે વા તચે વા બાહિરં. ઇધાપિ તચો વા અચ્છિન્નો રક્ખતીતિ યોજના. વીહિનાળમ્પિ વાતિ ગહિતધઞ્ઞસાલિસીસેન પતિટ્ઠિતં વીહિકુદ્રૂસાદિગચ્છાનં નાળં, તચગબ્ભોતિ વુત્તં હોતિ. દીઘન્તિ દીઘં ચે હોતિ. ‘‘અનિક્ખન્તોવા’’તિ ઇમિના ‘‘દણ્ડો’’તિ સમ્બન્ધો. ‘‘તતો’’તિ પાઠસેસો. તતો દીઘવીહિનાળતો સબીજવીહિસીસદણ્ડો સબ્બસો છિન્નો છિન્નકોટિયા કેસગ્ગમત્તમ્પિ બહિ અનિક્ખન્તોતિ અત્થો. રક્ખતીતિ તં ભિક્ખું દુક્કટથુલ્લચ્ચયપારાજિકવત્થૂનં અનુરૂપાપત્તિતો પાલેતિ. મુત્તો ચે, ન રક્ખતીતિ અત્થો.

વુત્તઞ્ચેતં અટ્ઠકથાયં ‘‘વીહિનાળં દીઘમ્પિ હોતિ, યાવ અન્તોનાળતો વીહિસીસદણ્ડકો ન નિક્ખમતિ, તાવ રક્ખતિ. કેસગ્ગમત્તમ્પિ નાળતો દણ્ડકસ્સ હેટ્ઠિમતલે નિક્ખન્તમત્તે ભણ્ડગ્ઘવસેન કારેતબ્બો’’તિ (પારા. ૧.૧૦૪). તથા ઇમિનાવ વિનિચ્છયેન અટ્ઠકથાયં ‘‘લાયિતબ્બવત્થુપૂરકવીહિસીસમુટ્ઠિયા મૂલે છિન્નેપિ સીસેસુ અચ્છિન્નવીહિસીસગ્ગેહિ સદ્ધિં જટેત્વા ઠિતેસુ રક્ખતિ, જટં વિજટેત્વા વિયોજિતેસુ યથાવુત્તપારાજિકાદિઆપત્તિયો હોન્તી’’તિ એવમાદિકો વિનિચ્છયો ચ સૂચિતોતિ ગહેતબ્બો.

૧૫૮. મદ્દિત્વાતિ વીહિસીસાનિ મદ્દિત્વા. પપ્ફોટેત્વાતિ ભુસાદીનિ ઓફુનિત્વા. ઇતો સારં ગણ્હિસ્સામીતિ પરિકપ્પેતીતિ યોજના. ઇતોતિ વીહિસીસતો. સારં ગણ્હિસ્સામીતિ સારભાગં આદિયિસ્સામિ. સચે પરિકપ્પેતીતિ યોજના. રક્ખતીતિ વત્થુપહોનકપ્પમાણં દાત્તેન લાયિત્વા વા હત્થેન છિન્દિત્વા વા ઠાના ચાવેત્વા ગહિતમ્પિ યાવ પરિકપ્પો ન નિટ્ઠાતિ, તાવ આપત્તિતો રક્ખતીતિ અત્થો.

૧૫૯. મદ્દનેપીતિ વીહિસીસમદ્દનેપિ. ઉદ્ધરણેપીતિ પલાલાપનયનેપિ. પપ્ફોટનેપીતિ ભુસાદિકચવરાપનયનેપિ. દોસો નત્થીતિ અગ્ઘવસેન પારાજિકાદિઆપત્તિયો ન ભવન્તિ, સહપયોગદુક્કટં પન હોતેવ. અત્તનો…પે… પરાજયોતિ અત્તનો પઠમં પરિકપ્પિતાકારેન સબ્બં કત્વા સારભાગં ગણ્હિતું અત્તનો ભાજને પક્ખિત્તમત્તે યથાવુત્તપારાજિકાદયો હોન્તીતિ અત્થો.

૧૬૦. એત્તાવતા ‘‘ખેત્તટ્ઠં નામ ભણ્ડં ખેત્તે ચતૂહિ ઠાનેહિ નિક્ખિત્તં હોતિ ભૂમટ્ઠં થલટ્ઠં આકાસટ્ઠં વેહાસટ્ઠ’’ન્તિ (પારા. ૧૦૪) વુત્તાનિ ખેત્તટ્ઠાનિ ચત્તારિ યથાવુત્તસદિસાનીતિ તાનિ પહાય ‘‘તત્થજાતક’’ન્તિઆદિ પાળિયં આગતે તત્રજાતે વિનિચ્છયં દસ્સેત્વા ઇદાનિ ‘‘ખેત્તં નામ યત્થ પુબ્બણ્ણં વા અપરણ્ણં વા જાયતી’’તિ (પારા. ૧૦૪) એવમાગતે ખેત્તેપિ વિનિચ્છયં દસ્સેતુમાહ ‘‘જાન’’ન્તિઆદિ. જાનન્તિ પરસન્તકભાવં જાનન્તો. ખીલન્તિ અપ્પિતક્ખરં વા ઇતરં વા પાસાણાદિખીલં. સઙ્કામેતીતિ પરાયત્તભૂમિં સામિકા યથા પસ્સન્તિ, તથા વા અઞ્ઞથા વા અત્તનો સન્તકં કાતુકામતાય કેસગ્ગમત્તમ્પિ ઠાનં યથા સસન્તકં હોતિ, તથા થેય્યચિત્તેન નિખણતીતિ અત્થો.

૧૬૧. તં પારાજિકત્તં તસ્સ કદા હોતીતિ આહ ‘‘સામિકાનં તુ ધુરનિક્ખેપને સતી’’તિ. ‘‘હોતી’’તિ પાઠસેસો. તુ-સદ્દેન ‘‘અત્તનો વા’’તિ વિસેસસ્સ સઙ્ગહિતત્તા સામિનો નિરાલયભાવસઙ્ખાતધુરનિક્ખેપે ચ ‘‘સામિકસ્સ ન દસ્સામી’’તિ અત્તનો ધુરનિક્ખેપે ચ તસ્સ પારાજિકત્તં હોતીતિ અત્થો. એવમુદીરિતન્તિ ‘‘કેસગ્ગમત્તમ્પી’’તિ એવં નિયમિતં કથિતં.

૧૬૨. યા પનાતિ યા ભૂમિ પન. તેસુ દ્વીસુ ખીલેસુ. આદો થુલ્લચ્ચયન્તિ પઠમે ખીલે સઙ્કામિતે સો ભિક્ખુ થુલ્લચ્ચયં આપજ્જતિ. દુતિયેતિ દુતિયે ખીલે સઙ્કામિતે પરાજયો હોતીતિ યોજના. બહૂહિ ખીલેહિ ગહેતબ્બટ્ઠાને પરિયન્તખીલેસુ દ્વીસુ વિનિચ્છયો ચ એતેનેવ વુત્તો હોતિ. એત્થ પન અન્તે ખીલદ્વયં વિના અવસેસખીલનિખણને ચ ઇતરેસુ તદત્થેસુ સબ્બપયોગેસુ ચ દુક્કટં હોતીતિ વિસેસો.

૧૬૩-૪. ‘‘મમેદં સન્તક’’ન્તિ ઞાપેતુકામોતિ સમ્બન્ધો. પરસન્તકાય ભૂમિયા પરાયત્તભાવં ઞત્વાવ થેય્યચિત્તેન કેસગ્ગમત્તમ્પિ ઠાનં ગણ્હિતુકામતાય ‘‘એત્તકં ઠાનં મમ સન્તક’’ન્તિ રજ્જુયા વા યટ્ઠિયા વા મિનિત્વા પરસ્સ ઞાપેતુકામોતિ અત્થો. યેહિ દ્વીહિ પયોગેહીતિ સબ્બપચ્છિમકેહિ રજ્જુપસારણયટ્ઠિપાતનાનમઞ્ઞતરેહિ દ્વીહિ પયોગેહિ. તેસૂતિ નિદ્ધારણે ભુમ્મં.

ઇધ રજ્જું વાપીતિ વિકપ્પત્થવા-સદ્દેન ‘‘યટ્ઠિં વા’’તિ યોજેતબ્બેપિ અવુત્તસમુચ્ચયત્થં અધિકવચનભાવેન વુત્તપિ-સદ્દેન ઇધાવુત્તમરિયાદવતીનં વિનિચ્છયસ્સ ઞાપિતત્તા યથાવુત્તરજ્જુયટ્ઠિવિનિચ્છયેસુ વિય પરસન્તકાય ભૂમિયા કેસગ્ગમત્તમ્પિ ઠાનં થેય્યચિત્તેન ગણ્હિતુકામતાય વતિપાદે નિખણિત્વા વા સાખામત્તેન વા વતિં કરોન્તસ્સ મરિયાદં વા બન્ધન્તસ્સ પાકારં વા ચિનન્તસ્સ પંસુમત્તિકા વા વડ્ઢેન્તસ્સ પુબ્બપયોગે પાચિત્તિયટ્ઠાને પાચિત્તિયઞ્ચ દુક્કટઞ્ચ સહપયોગે કેવલદુક્કટઞ્ચ પચ્છિમપયોગેસુ દ્વીસુ પઠમપયોગે થુલ્લચ્ચયઞ્ચ અવસાનપયોગે પારાજિકઞ્ચ હોતીતિ વિનિચ્છયોપિ સઙ્ગહિતોતિ દટ્ઠબ્બં.

ખેત્તટ્ઠકથાવણ્ણના.

૧૬૫. વત્થટ્ઠાદીસુ વત્થટ્ઠસ્સાતિ એત્થ ‘‘વત્થુ નામ આરામવત્થુ વિહારવત્થૂ’’તિ (પારા. ૧૦૫) પદભાજને વુત્તત્તા પુપ્ફાદિઆરામે કાતું સઙ્ખરિત્વા ઠપિતભૂમિ ચ પુબ્બકતારામાનં વિનાસે તુચ્છભૂમિ ચ વિહારં કાતું અભિસઙ્ખતા ભૂમિ ચ નટ્ઠવિહારભૂમિ ચાતિ એવં વિભાગવતિ વસતિ એત્થ ઉપરોપો વા વિહારો વાતિ ‘‘વત્થૂ’’તિ વુચ્ચતિ ઇચ્ચેવં દુવિધં વત્થુઞ્ચ ‘‘વત્થુટ્ઠં નામ ભણ્ડં વત્થુસ્મિં ચતૂહિ ઠાનેહિ નિક્ખિત્તં હોતિ ભૂમટ્ઠં થલટ્ઠં આકાસટ્ઠં વેહાસટ્ઠ’’ન્તિ (પારા. ૧૦૫) વચનતો એવં ચતુબ્બિધં ભણ્ડઞ્ચાતિ ઇદં દ્વયં વત્થુ ચ વત્થુટ્ઠઞ્ચ વત્થુવત્થુટ્ઠન્તિ વત્તબ્બે એકદેસસરૂપેકસેસવસેન સમાસેત્વા, ઉ-કારસ્સ ચ અકારં કત્વા ‘‘વત્થટ્ઠસ્સા’’તિ દસ્સિતન્તિ ગહેતબ્બં. યથાવુત્તદુવિધવત્થુનો, વત્થટ્ઠસ્સ ચ ભણ્ડસ્સાતિ અત્થો. ખેત્તટ્ઠેતિ એત્થાપિ અયમેવ સમાસોતિ ખેત્તે ચ ખેત્તટ્ઠે ચાતિ ગહેતબ્બં. નાવટ્ઠાદિવોહારેપિ એસેવ નયો. ગામટ્ઠેપિ ચાતિ ‘‘ગામટ્ઠં નામ ભણ્ડં ગામે ચતૂહિ ઠાનેહિ નિક્ખિત્તં હોતિ ભૂમટ્ઠં…પે… વેહાસટ્ઠ’’ન્તિ (પારા. ૧૦૬) વુત્તે ચતુબ્બિધે ગામટ્ઠભણ્ડેપીતિ અત્થો.

વત્થટ્ઠગામટ્ઠકથાવણ્ણના.

૧૬૬. અરઞ્ઞટ્ઠકથાયં ‘‘તિણં વા’’તિઆદિપદાનં ‘‘તત્થજાતક’’ન્તિ પદેન સમ્બન્ધો. તત્થજાતકન્તિ ‘‘અરઞ્ઞં નામ યં મનુસ્સાનં પરિગ્ગહિતં હોતી’’તિ (પારા. અટ્ઠ. ૧.૧૦૭) વચનતો તત્થજાતં યં કિઞ્ચિ મનુસ્સસન્તકં સામિકાનં અકામા અગહેતબ્બતો સારક્ખે અરઞ્ઞે ઉપ્પન્નન્તિ અત્થો. તિણં વાતિ પરેહિ લાયિત્વા ઠપિતં વા અત્તના લાયિતબ્બં વા ગેહચ્છાદનારહં તિણં વા. પણ્ણં વાતિ એવરૂપમેવ ગેહચ્છાદનારહં તાલપણ્ણાદિપણ્ણં વા. લતં વાતિ તથારૂપમેવ વેત્તલતાદિકં વલ્લિં વા. યા પન દીઘા હોતિ, મહારુક્ખે ચ ગચ્છે ચ વિનિવિજ્ઝિત્વા વા વેઠેત્વા વા ગતા, સા મૂલે છિન્નાપિ અવહારં ન જનેતિ, અગ્ગે છિન્નાપિ. યદા પન અગ્ગેપિ મૂલેપિ છિન્ના હોતિ, તદા અવહારં જનેતિ. સચે પન વેઠેત્વા ઠિતા હોતિ, વેઠેત્વા ઠિતા પન રુક્ખતો મોચિતમત્તા અવહારં જનેતીતિ અયમેત્થ વિસેસો. સામિકેન અવિસ્સજ્જિતાલયં છલ્લિવાકાદિઅવસેસભણ્ડઞ્ચ ઇમિનાવ ઉપલક્ખિત્વા સઙ્ગહિતન્તિ વેદિતબ્બં. કટ્ઠમેવ વાતિ દારું વા. ભણ્ડગ્ઘેનેવ કાતબ્બોતિ એત્થ અન્તોભૂતહેતુત્થવસેન કારેતબ્બોતિ અત્થો ગહેતબ્બો. તેનાહ અટ્ઠકથાયં ‘‘ભણ્ડગ્ઘેન કારેતબ્બો’’તિ. અવહટતિણાદિભણ્ડેસુ અગ્ઘવસેન માસકં વા ઊનમાસકં વા હોતિ, દુક્કટં. અતિરેકમાસકં વા ઊનપઞ્ચમાસકં વા હોતિ, થુલ્લચ્ચયં. પઞ્ચમાસકં વા અતિરેકપઞ્ચમાસકં વા હોતિ, પારાજિકં. પારાજિકં ચે અનાપન્નો, આમસનદુક્કટં, ફન્દાપનથુલ્લચ્ચયઞ્ચ કારેતબ્બોતિ અત્થો. ગણ્હન્તોતિ અવહરન્તો.

૧૬૭-૭૪. ઇદાનિ ‘‘કટ્ઠમેવ વા’’તિ વુત્તરુક્ખદારૂસુ વિનિચ્છયં દસ્સેતુમાહ ‘‘મહગ્ઘે’’તિઆદિ. મહગ્ઘેતિ પઞ્ચમાસકં વા અતિરેકપઞ્ચમાસકં વા અગ્ઘકં હુત્વા મહગ્ઘે. નસ્સતીતિ થેય્યચિત્તસમઙ્ગી હુત્વા છિન્નમત્તેપિ પારાજિકં આપજ્જતિ. પિ-સદ્દો અવધારણે. ‘‘કોચિપી’’તિ ઇમિના અદ્ધગતોપિ અલ્લં વા હોતુ પુરાણં વા, તચ્છેત્વા ઠપિતં ન ગહેતબ્બમેવાતિ અત્થો.

મૂલેતિ ઉપલક્ખણમત્તં. ‘‘અગ્ગે ચ મૂલે ચ છિન્નો હોતી’’તિ (પારા. અટ્ઠ. ૧.૧૦૭) અટ્ઠકથાવચનતો મૂલઞ્ચ અગ્ગઞ્ચ છિન્દિત્વાતિ ગહેતબ્બો. અદ્ધગતન્તિ જિણ્ણગળિતપતિતતચં, ચિરકાલં ઠિતન્તિ વુત્તં હોતિ.

લક્ખણેતિ અત્તનો સન્તકં ઞાપેતું રુક્ખક્ખન્ધે તચં છિન્દિત્વા કતસલ્લક્ખણે. છલ્લિયોનદ્ધેતિ સમન્તતો અભિનવુપ્પન્નાહિ છલ્લીહિ પરિયોનન્ધિત્વા અદસ્સનં ગમિતે. અજ્ઝાવુત્થઞ્ચાતિ એત્થ ‘‘ગેહ’’ન્તિ પાઠસેસો. ગેહં કતઞ્ચ અજ્ઝાવુત્થઞ્ચાતિ યોજના. ગેહં કાતું અરઞ્ઞસામિકાનં મૂલં દત્વા રુક્ખે કિણિત્વા છિન્નદારૂહિ તં ગેહં કતઞ્ચ પરિભુત્તઞ્ચાતિ અત્થો. વિનસ્સન્તઞ્ચાતિ એત્થાપિ ‘‘અવસિટ્ઠં દારુ’’ન્તિ પાઠસેસો. તં ગેહં કત્વા અવસિટ્ઠં વસ્સાતપાદીહિ વિવિધા જીરિત્વા વિનસ્સમાનં, વિપન્નદારુન્તિ વુત્તં હોતિ. ગણ્હતો ન દોસો કોચીતિ સમ્બન્ધો. ‘‘સામિકા નિરાલયા’’તિ ગણ્હતો કાચિપિ આપત્તિ નત્થીતિ અત્થો. કિંકારણન્તિ ચે? અરઞ્ઞસામિકેહિ મૂલં ગહેત્વા અઞ્ઞેસં દિન્નત્તા, તેસઞ્ચ નિરાલયં છડ્ડિતત્તાતિ ઇદમેત્થ કારણં.

વુત્તઞ્હેતં અટ્ઠકથાયં ‘‘ગેહાદીનં અત્થાય રુક્ખે છિન્દિત્વા યદા તાનિ કતાનિ, અજ્ઝાવુત્થાનિ ચ હોન્તિ, દારૂનિપિ અરઞ્ઞે વસ્સેન ચ આતપેન ચ વિનસ્સન્તિ, ઈદિસાનિપિ દિસ્વા ‘છડ્ડિતાની’તિ ગહેતું વટ્ટતિ. કસ્મા? યસ્મા અરઞ્ઞસામિકા એતેસં અનિસ્સરા. યેહિ અરઞ્ઞસામિકાનં દેય્યધમ્મં દત્વા છિન્નાનિ, તે એવ ઇસ્સરા, તેહિ ચ તાનિ છડ્ડિતાનિ, નિરાલયા તત્થ જાતા’’તિ (પારા. અટ્ઠ. ૧.૧૦૭). એવમ્પિ સતિ પચ્છા સામિકેસુ આહરાપેન્તેસુ ભણ્ડદેય્યં હોતીતિ દટ્ઠબ્બં.

યો ચાતિ અરઞ્ઞસામિકાનં દેય્યધમ્મં પવિસન્તો અદત્વા ‘‘નિક્ખમન્તો દસ્સામી’’તિ રુક્ખે ગાહાપેત્વા નિક્ખમન્તો યો ચ ભિક્ખુ. આરક્ખટ્ઠાનં પત્વાતિ અરઞ્ઞપાલકા યત્થ નિસિન્ના અરઞ્ઞં રક્ખન્તિ, તં ઠાનં પત્વા. ‘‘ચિન્તેન્તો’’તિ કિરિયન્તરસાપેક્ખત્તા ‘‘અતિક્કમેય્યા’’તિ સામત્થિયતો લબ્ભતિ. તસ્મા ચિત્તે કમ્મટ્ઠાનાદીનિ કત્વાતિ એત્થ આદિ-સદ્દેન પકારત્થેન કુસલપક્ખિયા વિતક્કા સઙ્ગય્હન્તિ. અઞ્ઞં ચિન્તેન્તો વા આરક્ખનટ્ઠાનં પત્વાયેવ અતિક્કામેય્યાતિ યોજેત્વા અત્થો વત્તબ્બો. તત્થ અઞ્ઞં ચિન્તેન્તો વાતિ અઞ્ઞં વિહિતો વા, ઇમિના યથાવુત્તવિતક્કાનં સઙ્ગહો. અસ્સાતિ એત્થ ‘‘દેય્ય’’ન્તિ કિતયોગે કત્તરિ સામિવચનત્તા અનેનાતિ અત્થો.

‘‘યોચા’’તિ એત્થ અવુત્તસમુચ્ચયત્થેન ચ-સદ્દેન અરઞ્ઞપવિસનકાલે યથાવુત્તનયેન મૂલં અદત્વા અરઞ્ઞં પવિસિત્વા દારૂનિ ગહેત્વા ગમનકાલે ‘‘અરઞ્ઞપાલકા સચે યાચન્તિ, દસ્સામી’’તિ પરિકપ્પેત્વા ગન્ત્વા તેહિ અયાચિતત્તા અદત્વા ગચ્છન્તોપિ તથેવ આગન્ત્વા આરક્ખકેસુ કીળાપસુતેસુ વા નિદ્દાયન્તેસુ વા બહિ નિક્ખન્તેસુ વા તત્થ ઠત્વા આરક્ખકે પરિયેસિત્વા અદિસ્વા ગચ્છન્તોપિ તથેવ આગન્ત્વા તત્થ નિયુત્તઇસ્સરજનેહિ અત્તનો હત્થતો દાતબ્બં દત્વા વા અત્તાનં સમ્માનં કત્વા વા પાલકે સઞ્ઞાપેત્વા વા પાલકે ઓકાસં યાચિત્વા તેહિ દિન્નોકાસો વા ગચ્છન્તોપીતિ એત્તકા વુત્તેન સદિસત્તા સઙ્ગહિતાતિ દટ્ઠબ્બા.

વરાહાતિ સૂકરા. વગ્ઘાતિ બ્યગ્ઘા. અચ્છાતિ ઇસ્સા. તરચ્છાતિ કાળસીહા. આદિ-સદ્દેન દીપિમત્તહત્થિસીહાદયો વાળમિગા સઙ્ગય્હન્તિ. એતેયેવ વરાહાદયો સમાગમવસેન મરણાદિઅનિટ્ઠસમીપચારિતાય ઉપ અનિટ્ઠસમીપે દવન્તિ પવત્તન્તીતિ ‘‘ઉપદ્દવા’’તિ વુચ્ચન્તિ. આરક્ખટ્ઠાનં આગતકાલે દિટ્ઠવરાહાદિઉપદ્દવતોતિ વુત્તં હોતિ. મુચ્ચિતુકામતાયાતિ મોક્ખાધિપ્પાયેન. ‘‘તથેવા’’તિ ઇમિના પવિસનકાલે દેય્યધમ્મં અદત્વા ‘‘નિક્ખમનકાલે દસ્સામી’’તિ પવિસિત્વા દારું ગહેત્વા આરક્ખટ્ઠાનં પત્તોતિ પુરિમગાથાય સામત્થિયતો લબ્ભમાનોયેવત્થો દસ્સિતો. તં ઠાનન્તિ તં આરક્ખટ્ઠાનં. અતિક્કામેતીતિ ‘‘ઇદં તં ઠાન’’ન્તિપિ અસલ્લક્ખણમત્તભયુપદ્દવો હુત્વા પલાયન્તો અતિક્કમતિ, ભણ્ડદેય્યં પન હોતીતિ યોજના.

સુઙ્કઘાતતોતિ એત્થાપિ પિ-સદ્દો લુત્તનિદ્દિટ્ઠોતિ વેદિતબ્બો, સુઙ્કગહણટ્ઠાનતોપીતિ અત્થો. સુઙ્કસ્સ રઞ્ઞો દાતબ્બભાગસ્સ ઘાતો મુસિત્વા ગહણમત્તો, સુઙ્કો હઞ્ઞતિ એત્થાતિ વા સુઙ્કઘાતોતિ વિગ્ગહો. સુઙ્કઘાતસરૂપં પરતો આવિ ભવિસ્સતિ. તસ્માતિ સુઙ્કઘાતતો તસ્સ ગરુકત્તા એવ. તન્તિ તં સુઙ્કઘાતટ્ઠાનં. અનોક્કમ્મ ગચ્છતોતિ અપવિસિત્વા ગચ્છન્તસ્સ. દુક્કટં ઉદ્દિટ્ઠં ‘‘સુઙ્કં પરિહરતિ, આપત્તિ દુક્કટસ્સા’’તિ (પારા. ૧૧૩).

એતન્તિ યથાવુત્તઆરક્ખટ્ઠાનં. થેય્યચિત્તેન પરિહરન્તસ્સાતિ થેય્યચિત્તેન પરિહરિત્વા દૂરતો ગચ્છન્તસ્સ. આકાસેનપિ ગચ્છતો પારાજિકમનુદ્દિટ્ઠં સત્થુનાતિ સમ્બન્ધો.

નનુ ચ ‘‘ઇદં પન થેય્યચિત્તેન પરિહરન્તસ્સ આકાસેન ગચ્છતોપિ પારાજિકમેવા’’તિ (પારા. અટ્ઠ. ૧.૧૦૭) અટ્ઠકથાયં વુત્તવચનં વિના પાળિયં ‘‘અરઞ્ઞટ્ઠ’’ન્તિ માતિકાપદસ્સ વિભઙ્ગે ‘‘તત્થજાતકં કટ્ઠં વા લતં વા તિણં વા પઞ્ચમાસકં વા અતિરેકપઞ્ચમાસકં વા અગ્ઘનકં થેય્યચિત્તો આમસતિ, આપત્તિ દુક્કટસ્સ. ફન્દાપેતિ, આપત્તિ થુલ્લચ્ચયસ્સ. ઠાના ચાવેતિ, આપત્તિ પારાજિકસ્સા’’તિ (પારા. ૧૦૬) સામઞ્ઞવચનતો સુઙ્કઘાતે ‘‘સુઙ્કં પરિહરતિ, આપત્તિ દુક્કટસ્સા’’તિ વચનં વિય એત્થ આરક્ખટ્ઠાનં પરિહરન્તસ્સ વિસું વુત્તપારાજિકાપત્તિવચને અસતિપિ ‘‘અટ્ઠકથાય’’ન્તિ અવત્વા ‘‘સત્થુના’’તિ કસ્મા આહાતિ? વુચ્ચતે – અટ્ઠકથાચરિયેન તથેવ વુત્તત્તા આહ. કસ્મા પન અટ્ઠકથાચરિયેન ‘‘અપઞ્ઞત્તં ન પઞ્ઞપેસ્સામ, પઞ્ઞત્તં ન સમુચ્છિન્દિસ્સામા’’તિ (પારા. ૫૬૫) પાળિપાઠં જાનન્તેનપિ પાળિયં અવુત્તપારાજિકં નિદ્દિટ્ઠન્તિ? એત્થ વિનિચ્છયં ભિક્ખૂહિ પુટ્ઠેન ભગવતા વુત્તનયસ્સ મહાઅટ્ઠકથાય આગતત્તા તસ્સેવ નયસ્સ સમન્તપાસાદિકાયં નિદ્દિટ્ઠભાવં જાનન્તેન ઇમિનાપિ આચરિયેન ઇધ ‘‘સત્થુના’’તિ વુત્તન્તિ ગહેતબ્બં.

અથ વા ‘‘સુઙ્કં પરિહરતિ, આપત્તિ દુક્કટસ્સા’’તિ વત્વા આરક્ખટ્ઠાનવિનિચ્છયે અવચનં યથાવુત્તવિસયસ્સ અદિટ્ઠભાવેન વા સિયા, ઇમસ્સ તથા અનવજ્જતા વા સિયા, વુત્તાનુસારેન સુવિઞ્ઞેય્યતા વા સિયાતિ તયો વિકપ્પા. તેસુ પઠમવિકપ્પો સબ્બઞ્ઞુભાવબાધનતો દુબ્બિકપ્પમત્તં હોતિ. દુતિયવિકપ્પો લોકવજ્જસ્સ ઇમસ્સ અનવજ્જભાવો નામ અનુપપન્નોતિ અનાદાતબ્બો. પારિસેસતો તતિયવિકપ્પો યુજ્જતિ.

તત્થ ‘‘વુત્તાનુસારેના’’તિ કિમેત્થ વુત્તં નામ, તદનુસારેન ઇમસ્સાપિ સુવિઞ્ઞેય્યતા કથન્તિ ચે? પઠમનિદ્દિટ્ઠે અરઞ્ઞટ્ઠનિદ્દેસે સામઞ્ઞેન ‘‘ઠાના ચાવેતિ, આપત્તિ પારાજિકસ્સા’’તિ (પારા. ૧૦૬) ઇદં વુત્તં, ન પન થેય્યચિત્તેન આરક્ખટ્ઠાનપરિહરણઞ્ચ. ‘‘ગમનકાલે ‘મૂલં દત્વા ગમિસ્સામી’તિ પુબ્બપરિકપ્પિતનિયામેન અદત્વા ગચ્છતો પરિકપ્પાવહારોવ હોતી’’તિ ચ ‘‘તં પન યેન કેનચિ આકારેન પરિકપ્પિતટ્ઠાનં પહાય ગમનં ઠાનાચાવનં નામ હોતેવાતિ તેન વત્થુના પારાજિકમેવ હોતી’’તિ ચ ‘‘ઠાના ચાવેતિ, આપત્તિ પારાજિકસ્સા’તિ ઇમિના ચ વિઞ્ઞાતત્થમેવ હોતી’’તિ ચ વિસું ન વુત્તં. સુઙ્કટ્ઠાનપરિહરણં પન ઠાનપરિહરણસભાવત્તા સભાવતો ઈદિસંવ સન્તમ્પિ ઇદં વિય પરિકપ્પિતટ્ઠાનં ન હોતીતિ વક્ખમાનરાજસમ્મતટ્ઠાનતો અઞ્ઞં પરિકપ્પિતટ્ઠાનં સમાનમ્પિ થેય્યચિત્તુપ્પત્તિમત્તેન તં પરિહરિત્વા ગચ્છન્તસ્સ થેય્યચિત્તેન અત્તનો પત્તં ગણ્હન્તસ્સ વિય પારાજિકાય અવત્થુતઞ્ચ દુક્કટસ્સેવ વત્થુભાવઞ્ચ વિઞ્ઞાપેતું ‘‘સુઙ્કં પરિહરતિ, આપત્તિ દુક્કટસ્સા’’તિ વુત્તન્તિ ભગવતો અધિપ્પાયઞ્ઞુના અટ્ઠકથાચરિયેન ‘‘પારાજિકમેવા’’તિ (પારા. અટ્ઠ. ૧.૧૦૭) વુત્તત્તા તેન અટ્ઠકથાયં વુત્તનીહારમેવ દસ્સેતું અયમાચરિયોપિ ‘‘સત્થુના પારાજિકમનુદ્દિટ્ઠ’’ન્તિ આહાતિ નિટ્ઠમેત્થ ગન્તબ્બં.

તસ્માતિ યસ્મા એવં પરિહરિત્વા થેય્યચિત્તેન દૂરતો વજ્જેત્વા ગચ્છન્તસ્સાપિ પારાજિકપ્પહોનકતાય અચ્ચન્તભારિયં હોતિ, તસ્મા. એત્થાતિ ઇમસ્મિં અરઞ્ઞારક્ખટ્ઠાને. ‘‘વિસેસેના’’તિ ઇદં ‘‘અપ્પમત્તેન હોતબ્બ’’ન્તિ ઇમિના હેતુભાવેન સમ્બન્ધનીયં. સતિસમ્પન્નચેતસાતિ ચ પિયસીલેનાતિ ચ ‘‘ભિક્ખુના’’તિ એતસ્સ વિસેસનં. અસિક્ખાકામસ્સ ભિક્ખુનો ઇમસ્સ ઓવાદસ્સ અભાજનતાય તં પરિવજ્જેતુમાહ ‘‘પિયસીલેના’’તિ. પિયસીલસ્સાપિ સતિવિરહિતસ્સ પમત્તટ્ઠાને સરણાસમ્ભવા ઇમસ્સ અભાજનતાય તં વજ્જેતુમાહ ‘‘સતિસમ્પન્નચેતસા’’તિ.

અરઞ્ઞટ્ઠકથાવણ્ણના.

૧૭૫-૬. તોયદુલ્લભકાલસ્મિન્તિ તોયં દુલ્લભં યસ્મિં સો તોયદુલ્લભો, તોયદુલ્લભો ચ સો કાલો ચાતિ તોયદુલ્લભકાલો, તસ્મિં. આવજ્જેત્વા વાતિ ઉદકભાજનં નામેત્વા વા. પવેસેત્વા વાતિ અત્તનો ભાજનં તસ્મિં પક્ખિપિત્વા વા. છિદ્દં કત્વાપિ વાતિ ઉદકભાજને ઓમટ્ઠાદિભેદં છિદ્દં કત્વા વા ગણ્હન્તસ્સ ભણ્ડગ્ઘેન વિનિદ્દિસેતિ વક્ખમાનેન સમ્બન્ધનીયં.

તથાતિ યથા તોયદુલ્લભકાલસ્મિં ભાજને રક્ખિતગોપિતં ઉદકં અવહરન્તસ્સ પારાજિકં વુત્તં, તેનેવ નીહારેન. વાપિયં વાતિ પરસન્તકાય સારક્ખાય વાપિયં વા. તળાકે વાતિ તાદિસે જાતસ્સરે વા. એવં સારક્ખાનં પોક્ખરણિઆદીનં એતેહિ વા અવુત્તસમુચ્ચયેન વા-સદ્દેન વા ગહણં વેદિતબ્બં. અત્તનો ભાજનં પવેસેત્વા ગણ્હન્તસ્સાતિ ઉપલક્ખણપદન્તિ ભાજનગતજલે ચ ઇધ ચ તેલભાજને વિય મુખેન વા વંસાદીહિ વા આકડ્ઢિત્વા થેય્યચિત્તેન પિવન્તસ્સ યથાવત્થુકમાપત્તિવિધાનં વેદિતબ્બં.

૧૭૭. મરિયાદન્તિ વાપિઆદીનં પાળિવટ્ટબન્ધં. છિન્દતોતિ કુદાલાદીહિ પંસુઆદીનિ ઉદ્ધરિત્વા દ્વિધા કરોન્તસ્સ. વિસેસત્થાવજોતકેન તુ-સદ્દેન ‘‘મરિયાદં છિન્દિત્વા દુબ્બલં કત્વા તસ્સ છિન્દનત્થાય વીચિયો ઉટ્ઠાપેતું ઉદકં સયં ઓતરિત્વા વા ગોમહિંસે વા અઞ્ઞે મનુસ્સે વા કીળન્તે દારકે વા ઓતારેત્વા વા અત્તનો ધમ્મતાય ઓતિણ્ણે તાસેત્વા વા ઉદકે ઠિતં રુક્ખં છિન્દિત્વા વા છેદાપેત્વા વા પાતેત્વા વા પાતાપેત્વા વા જલં ખોભેતિ, તતો ઉટ્ઠિતાહિ વીચીહિ મરિયાદે છિન્નેપિ તેનેવ છિન્નો હોતિ. એવમેવ ગોમહિંસાદયો મરિયાદં આરોહન્તેનાપિ અઞ્ઞેહિ આરોહાપેન્તેનાપિ તેસં ખુરેહિ મરિયાદે છિન્નેપિ, ઉદકનિદ્ધમનાદિં પિદહિત્વા વા પિદહાપેત્વા વા વાપિમરિયાદાય નીચટ્ઠાનં બન્ધિત્વા વા બન્ધાપેત્વા વા અતિરેકજલાપગમનમગ્ગતો નીહરિતબ્બોદકં વારેત્વા વા બાહિરતો ઉદકં પવેસેત્વા વા પૂરેતિ, ઓઘેન મરિયાદે છિન્નેપિ તેનેવ છિન્નં હોતી’’તિ (પારા. અટ્ઠ. ૧.૧૦૮ અત્થતો સમાનં) એવમાદિકં અટ્ઠકથાગતવિસેસં સઙ્ગણ્હાતિ. અદિન્નાદાનપુબ્બતોતિ અદિન્નાદાનસ્સ પુબ્બપયોગત્તા. ભૂતગામેન સદ્ધિમ્પીતિ ભૂતગામેનપિ સદ્ધિં. અપિ-સદ્દેન પથવિખણનં સમ્પિણ્ડેતિ. મરિયાદં છિન્દન્તો તત્થજાતં તિણાદિં છિન્દતિ, ભૂતગામપાચિત્તિયેન સદ્ધિં દુક્કટં. જાતપથવિં છિન્દતિ, પથવિખણનપાચિત્તિયેન સદ્ધિં દુક્કટં આપજ્જતીતિ અધિપ્પાયો.

૧૭૮. કાતબ્બોતિ એત્થ ‘‘ભણ્ડગ્ઘેન આપત્તિયા’’તિ પાઠસેસો. અન્તોભૂતહેત્વત્થવસેન કારેતબ્બોતિ ગહેતબ્બો. અન્તો ઠત્વા છિન્દન્તો બહિઅન્તેન, બહિ ઠત્વા છિન્દન્તો અન્તોઅન્તેન, ઉભયત્થાપિ ઠત્વા છિન્દન્તો મજ્ઝતો ભણ્ડગ્ઘેન આપત્તિયા કારેતબ્બોતિ યોજના. અયં પનેત્થ અત્થો – અન્તોવાપિયં ઠત્વા મરિયાદં છિન્દિત્વા ઉદકે બહિ નિક્ખમિતે નિક્ખન્તઉદકગ્ઘેન દુક્કટથુલ્લચ્ચયપારાજિકાસુ યથાપન્નાય આપત્તિયા કારેતબ્બો. બહિ ઠત્વા મરિયાદં છિન્દિત્વા અન્તોવાપિયં પવિસન્તોદકસ્સ ઠિતટ્ઠાનતો ચાવિતક્ખણે નિક્ખન્તઉદકગ્ઘેન આપત્તિયા કારેતબ્બો. કદાચિ અન્તો કદાચિ બહિ ઠત્વા મરિયાદં મજ્ઝે ઠપેત્વા છિન્દન્તો મજ્ઝે ઠિતટ્ઠાનં છિન્દિત્વા ઉદકસ્સ નીહટક્ખણે નીહટઉદકસ્સ અગ્ઘેન આપત્તિયા કારેતબ્બોતિ.

ઉદકટ્ઠકથાવણ્ણના.

૧૭૯-૮૦. વારેનાતિ વારેન વારેન સામણેરા અરઞ્ઞતો યં દન્તકટ્ઠં સઙ્ઘસ્સત્થાય આનેત્વા સચે આચરિયાનમ્પિ આહરન્તિ, યાવ તે દન્તકટ્ઠં પમાણેન છિન્દિત્વા સઙ્ઘસ્સ ચ આચરિયાનઞ્ચ ન નિય્યાદેન્તિ, તાવ અરઞ્ઞતો આભતત્તા તં સબ્બં સઙ્ઘસ્સ ચ સકસકઆચરિયાનઞ્ચ આભતં દન્તકટ્ઠં તેસમેવ ચ દન્તકટ્ઠહારકાનં સામણેરાનં સન્તકં હોતીતિ અત્થયોજના.

૧૮૧. તસ્માતિ યસ્મા તેસમેવ સામણેરાનં સન્તકં હોતિ, તસ્મા. તં અરઞ્ઞતો આભતં દન્તકટ્ઠઞ્ચ સઙ્ઘસ્સ ગરુભણ્ડઞ્ચ દન્તકટ્ઠન્તિ સમ્બન્ધો. સઙ્ઘિકાય ભૂમિયં ઉપ્પન્નં સઙ્ઘેન રક્ખિતગોપિતત્તા ગરુભણ્ડભૂતં દન્તકટ્ઠઞ્ચાતિ વુત્તં હોતિ. ગણ્હન્તસ્સ ચાતિ અધિકચ-કારેન ઇહાવુત્તસ્સ અટ્ઠકથાગતસ્સ ગણપુગ્ગલગિહિપરિબદ્ધ આરામુય્યાનસઞ્જાતછિન્નાછિન્નરક્ખિતગોપિતદન્તકટ્ઠસ્સ સમુચ્ચિતત્તા તઞ્ચ થેય્યચિત્તેન ગણ્હન્તસ્સ અવહટદન્તકટ્ઠસ્સ અગ્ઘવસેન આપત્તિયો વત્તબ્બાતિ અયમત્થો દીપિતો હોતિ.

૧૮૨. તેહિ દન્તકટ્ઠહારકેહિ સામણેરેહિ. નિય્યાદિતન્તિ મહાસઙ્ઘસ્સ પટિપાદિતં.

૧૮૩. સઙ્ઘિકકાલતો પટ્ઠાય થેય્યચિત્તેન ગણ્હતોપિ અવહારાભાવે કારણં દસ્સેતુમાહ ‘‘અરક્ખત્તા’’તિઆદિ. તત્થ અરક્ખત્તાતિ સઙ્ઘિકભાવેન લદ્ધેપિ રક્ખિતગોપિતદન્તકટ્ઠે વિય સઙ્ઘેન કતારક્ખાયાભાવા. યથાવુડ્ઢમભાજેતબ્બતોતિ સઙ્ઘિકત્તસ્સાપિ સતો યથાવુડ્ઢં પટિપાટિમનતિક્કમ્મ ભાજેતબ્બફલપુપ્ફાદીનં વિય ભાજેતબ્બતાભાવતો. સબ્બસાધારણત્તા ચાતિ સઙ્ઘપરિયાપન્નાનં સબ્બેસમેવ સાધારણત્તા.

ઇદન્તિ સઙ્ઘસ્સ નિય્યાદિતદન્તકટ્ઠં. અઞ્ઞં વિયાતિ અઞ્ઞં ગણપુગ્ગલાદિસન્તકં રક્ખિતગોપિતદન્તકટ્ઠં વિય. એવં ચોરિકાય ગણ્હતો અવહારાભાવે કારણેન સાધિતેપિ થેય્યચિત્તેન સકપરિક્ખારમ્પિ ગણ્હતો દુક્કટસ્સ વુત્તત્તા તથા ગણ્હન્તો દુક્કટા ન મુચ્ચતીતિ દટ્ઠબ્બં. વત્તં પન જાનિતબ્બં – સઙ્ઘિકદન્તકટ્ઠં ગણ્હન્તેન પધાનઘરાદીસુ પવિસિત્વા ચિરેન ઓસરન્તેન બહિ વીતિનામેતબ્બદિવસે ગણેત્વા તંપમાણેન ગહેતબ્બં, મગ્ગં ગચ્છન્તેન એકં દ્વે દન્તકટ્ઠાનિ થવિકાય પક્ખિપિત્વા ગન્તબ્બં, તત્થેવ વસન્તેન દિવસે ખાદિતબ્બદન્તકટ્ઠં ગહેતબ્બન્તિ.

દન્તકટ્ઠકથાવણ્ણના.

૧૮૪. ‘‘અગ્ગિં વા દેતી’’તિઆદીસુ ‘‘રુક્ખે’’તિ પકરણતો લબ્ભતિ ‘‘રુક્ખો વિનસ્સતી’’તિ વક્ખમાનત્તા, રુક્ખો ચ ‘‘વનપ્પતિ નામ યો મનુસ્સાનં પરિગ્ગહિતો હોતિ રુક્ખો પરિભોગો’’તિ (પારા. ૧૧૦) પાળિયં આગતત્તા ચ અટ્ઠકથાય (પારા. અટ્ઠ. ૧.૧૧૦) ચ વુત્તનયેન અમ્બલબુજપનસાદિકો મનુસ્સાનં પરિભોગારહો મનુસ્સાયત્તો રક્ખિતગોપિતોયેવ ગહેતબ્બો. અગ્ગિં વા દેતીતિ ચોરિકાય અગ્ગિં આલિમ્પેતિ વા. સત્થેન રુક્ખે સમન્તતો આકોટેતીતિ વાસિફરસુઆદિસત્થેન રુક્ખતચં છિન્દન્તો સમન્તતો આવાટં દસ્સેતિ. મણ્ડૂકકણ્ટકનામકં વિસં વા રુક્ખે આકોટેતીતિ ચોરિકાય રુક્ખં નાસેતુકામો રુક્ખે મણ્ડૂકકણ્ટકનામકં વિસં પવેસેતિ.

૧૮૫. યેન વા તેન વાતિ યથાવુત્તેન વા અવુત્તેન વા યેન કેનચિ ઉપાયેન. રુક્ખો વિનસ્સતીતિ અગ્ગિં દત્વા ઝાપિતો ધઞ્ઞકલાપો વિય, તેલકુમ્ભી વિય ચ વિનાવ ઠાનાચાવનેન યથાટ્ઠિતમેવનસ્સતિ. ‘‘ડય્હતી’’તિ ઇદં ‘‘અગ્ગિં દેતી’’તિ ઇદં સન્ધાય વુત્તં. વિનસ્સતીતિ મણ્ડૂકકણ્ટકાકોટનાદિઅવસેસપયોગં સન્ધાય વુત્તન્તિ દટ્ઠબ્બં ‘‘થેય્યચિત્તો છિન્દતિ, પહારે પહારે આપત્તિ દુક્કટસ્સ, એકં પહારં અનાગતે આપત્તિ થુલ્લચ્ચયસ્સ, તસ્મિં પહારે આગતે આપત્તિ પારાજિકસ્સા’’તિ (પારા. ૧૧૦) ઠાનાચાવનેન પારાજિકસ્સ આગતત્તા. પકાસિતન્તિ એત્થ ‘‘અટ્ઠકથાય’’ન્તિ લબ્ભતિ. પાઠાગતં પારાજિકં પન પારિસેસતો ચ સૂચીયતીતિ તબ્બાચકસ્સ વા સઙ્ગાહકસ્સ વા વચનસ્સ ઇહાવિજ્જમાનત્તા તત્થ વિનિચ્છયો પાસંસિકોપિ ઇહાવુત્તો.

વનપ્પતિકથાવણ્ણના.

૧૮૬-૭. ‘‘હરણકં નામ અઞ્ઞસ્સ હરણકં ભણ્ડં. થેય્યચિત્તો આમસતિ, આપત્તિ દુક્કટસ્સ. ફન્દાપેતિ, આપત્તિ થુલ્લચ્ચયસ્સ. ઠાના ચાવેતિ, આપત્તિ પારાજિકસ્સા’’તિ (પારા. ૧૧૧) વુત્તહરણકનિદ્દેસે ‘‘ઠાના ચાવેતિ, આપત્તિ પારાજિકસ્સા’’તિ (પારા. ૧૧૧) પાઠે ‘‘ઠાન’’ન્તિ ગહિતસીસાદિટ્ઠાનપ્પભેદવસેન અટ્ઠકથાય (પારા. અટ્ઠ. ૧.૧૧૦) આગતવિનિચ્છયં દસ્સેતુમાહ ‘‘છિન્દિત્વા મોચેત્વા ગણ્હતો’’તિ. કિરિયાનં સકમ્મકત્તા ‘‘અલઙ્કાર’’ન્તિ પાઠસેસો. છિન્દિત્વાતિ ગીવેય્યકાદિં. મોચેત્વાતિ કણ્ણપિળન્ધનાદિં.

સીસાદીહિ મોચિતમત્તસ્મિન્તિ એત્થાપિ વિસેસિતબ્બદસ્સનત્થં ‘‘અલઙ્કારસ્મિ’’ન્તિ તમેવ ભુમ્મેકવચનન્તવસેન ગહેતબ્બં. આકડ્ઢનવિકડ્ઢનન્તિ એત્થ અભિમુખં કડ્ઢનં આકડ્ઢનન્તિ કત્વા અત્તનો સમીપમાવિઞ્છનં આકડ્ઢનં, વિપરીતં કડ્ઢનં વિકડ્ઢનન્તિ કત્વા તબ્બિપરીતં વિકડ્ઢનં.

૧૮૮-૯. વલયન્તિ અવઙ્કં મટ્ઠહત્થૂપગં. કટકમ્પિ વાતિ અનેકવઙ્કે યોજેત્વા બુબ્બુળાદીનિ દસ્સેત્વા વા અદસ્સેત્વા વા કતં હત્થૂપગં. અગ્ગબાહુન્તિ કપ્પરતો પટ્ઠાય અગ્ગહત્થં. અપરાપરં ચારેતીતિ ઇતો ચિતો ચ સઞ્ચારેતિ. ‘‘સારેતી’’તિ વા પાઠો, સોયેવ અત્થો. તં વલયં વા કટકં વા. આકાસગતં કરોતીતિ સબ્બદિસાહિ યથા હત્થં ન ફુસતિ, તથા આકાસગતં કરોતિ. નિધિવલયસ્સ પવેસિતરુક્ખમૂલે સબ્બદિસાહિ અફુસન્તં આકાસગતકરણે પારાજિકં હોતિ, ઇધ ‘‘રક્ખતી’’તિ કસ્મા વુત્તન્તિ આહ ‘‘સવિઞ્ઞાણકતો’’તિઆદિ. ઇદન્તિ વલયં કટકઞ્ચ.

૧૯૦. ‘‘નિવત્થં વત્થ’’ન્તિ ઇમિના ચીવરમ્પિ ગય્હતિ. પરસ્સ વત્થસામિકસ્સ. પરોપીતિ વત્થસામિકોપિ. તન્તિ ચોરેન અચ્છિજ્જમાનં અત્તના નિવત્થવત્થં. લજ્જાય સહસા ન મુઞ્ચતીતિ લજ્જાય સીઘતરં ન પરિચ્ચજતિ.

૧૯૧. ચોરોપિ આકડ્ઢતિ, સો પરોપિ આકડ્ઢતીતિ યોજના. સો પરો ચોરતો અઞ્ઞો, વત્થસામિકોતિ અત્થો. પરસ્સાતિ વત્થસામિકસ્સ.

૧૯૨. ‘‘ઠાના ચાવેય્યા’’તિ પાઠે ઠાન-સદ્દેન સઙ્ગહિતસીસાદિટ્ઠાનતો હરીયતેતિ હરણકન્તિ વુત્તાલઙ્કારાદિભણ્ડસ્સ ચાવનેન પારાજિકં દસ્સેત્વા ઇદાનિ તદેવ હરણકં હારકેન સહ હરન્તસ્સ હારકસ્સ ઠિતટ્ઠાનતો અપનયનેન ઠાનાચાવનઞ્ચ ‘‘ઠાના ચાવેય્યા’’તિ ઇમિનાવ સઙ્ગય્હતીતિ તત્થાપિ વિનિચ્છયં દસ્સેતુમાહ ‘‘સભણ્ડહારક’’ન્તિઆદિ. ભણ્ડં હરતિ નેતીતિ ભણ્ડહારકો, પુરિસાદિકો, તેન સહાતિ સભણ્ડહારકં, અલઙ્કારવત્થાદીનિ આદાય ગચ્છન્તેહિ ઇત્થિપુરિસાદિપાણેહિ સહેવ. ભણ્ડન્તિ તેહિ હરિયમાનત્તા હરણકસઙ્ખાતવત્થાભરણાદિભણ્ડં. નેન્તસ્સાતિ ‘‘નેન્તો અસ્સા’’તિ પદચ્છેદો. નેન્તોતિ ઠિતટ્ઠાનતો ચાવેત્વા અત્તના ઇચ્છિતદિસાભિમુખં પાપેન્તો. અસ્સ પઠમે પાદે અતિક્કન્તે થુલ્લચ્ચયં આપજ્જિત્વાતિ પાઠસેસયોજના. અસ્સાતિ ઇમસ્સ ભણ્ડહારકસ્સ. પઠમપાદે અતિક્કન્તે અત્તના પઠમં ગન્તબ્બદિસતો ચોરસ્સાભિમતદિસં ગતે થુલ્લચ્ચયં આપજ્જિત્વા દુતિયે અતિક્કન્તે ચુતો સિયાતિ યોજના.

૧૯૩. થેય્યચેતનો સચે તજ્જેત્વા પરસ્સ હત્થતો ભણ્ડં પાતાપેતિ, પરસ્સ હત્થતો ભણ્ડે મુત્તમત્તે તજ્જેત્વા પાતાપકસ્સ પરાજયોતિ યોજના. ભણ્ડે મુત્તમત્તેતિ ભણ્ડે હત્થતો કેસગ્ગમત્તમ્પિ મુત્તક્ખણે.

૧૯૪. અથાપીતિ અથ વા. પરિકપ્પેત્વા પાતાપેતિ વાતિ એત્થ ‘‘યં મય્હં રુચ્ચતિ, તં ગણ્હિસ્સામી’’તિ વા ‘‘એવરૂપં ચે હોતિ, ગણ્હિસ્સામી’’તિ વિસેસેત્વા વા પરિકપ્પેત્વા તજ્જેત્વા પાતેતિ, દુક્કટં. એવં પાતિતં ભણ્ડં તસ્સ ચોરસ્સ આમસને દુક્કટં વુત્તન્તિ યોજના.

૧૯૫. યથાવત્થુન્તિ ભણ્ડસ્સ અગ્ઘાનુરૂપં, થુલ્લચ્ચયં હોતીતિ અધિપ્પાયો. છડ્ડિતેપીતિ તસ્સ ચોરભાવં જાનિત્વા ભીતતસિતેન અત્તના નીયમાને ભણ્ડે છડ્ડિતેપિ સતિ. તેનેવ ઠાનાચાવનં કારાપિતન્તિ પારાજિકન્તિ ન ગહેતબ્બન્તિ આહ ‘‘ન દોસો’’તિ. ‘‘તિટ્ઠ તિટ્ઠા’’તિ વુત્તે પન ઉત્તસિત્વા છડ્ડનં તસ્સ આણત્તિયા વિના હોતીતિ તત્થ તસ્સ અનાપત્તીતિ અધિપ્પાયો. તથા વદતો પન અદિન્નાદાનપુબ્બપયોગત્તા દુક્કટમેવ.

૧૯૬. તન્તિ તં છડ્ડિતં ભણ્ડં. તદુદ્ધારેતિ તસ્સ છડ્ડિતસ્સ ભણ્ડસ્સ ઉદ્ધારે પારાજિકં. પારાજિકં કદા સિયાતિ આહ ‘‘સામિકે સાલયે ગતે’’તિ. નિરાલયં છડ્ડિતં પન ગણ્હતો અસતિ થેય્યચિત્તે ન દોસોતિ બ્યતિરેકતો દસ્સેતિ.

૧૯૭. સામિકસ્સ સાલયકાલે ગણ્હન્તસ્સાપિ પારાજિકાભાવપ્પકારં દસ્સેતુમાહ ‘‘ગણ્હતો’’તિ. પુબ્બગાથાય ‘‘ત’’ન્તિ ઇધાનુવત્તતે. સકસઞ્ઞાયગણ્હતોતિ ‘‘તિટ્ઠ તિટ્ઠા’’તિ વચનતો ઉત્તસિત્વા સાલયં છડ્ડિતં તં વત્થું સકસઞ્ઞાય ગણ્હન્તસ્સ. ગહણેતિ સકસઞ્ઞાય ગહણહેતુ, સકસઞ્ઞાય ગહિતભણ્ડં અત્તનો ગહણકારણા ભિક્ખું અવહારાપત્તિતો રક્ખતીતિ અધિપ્પાયો. તેનાહ ‘‘ગહણે પન રક્ખતી’’તિ. ભણ્ડદેય્યં પન હોતીતિ યોજના. ‘‘તથા’’તિ ઇમિના ગહણે રક્ખતીતિ અતિદિસતિ.

૧૯૮-૯. ધુરનિક્ખેપં કત્વાતિ ‘‘મય્હં કિમેતેન ભણ્ડેન, જીવિતરક્ખનમેવ વરતર’’ન્તિ નિરાલયો હુત્વા. તેનાહ ‘‘ભીતો ચોરા પલાયતી’’તિ. ચોરાતિ એત્થ ચ હેતુમ્હિ નિસ્સક્કં. ગણ્હતોતિ એત્થ ‘‘ત’’ન્તિ પાઠસેસો, તથા છડ્ડિતં તં ભણ્ડન્તિ અત્થો. ઉદ્ધારે દુક્કટન્તિ વત્થુમ્હિ અનવજ્જેપિ થેય્યચિત્તવસેન દુક્કટં હોતિ, અસતિ થેય્યચિત્તે દુક્કટમ્પિ ન હોતીતિ વુત્તં હોતિ. આહરાપેન્તેતિ એત્થ ભાવલક્ખણે ભુમ્મં, તસ્મિં ભણ્ડસામિનિ આહરાપેન્તે સતીતિ અત્થો.

૨૦૦. નિરાલયેન છડ્ડિતવત્થુનો ગહણે ભણ્ડદેય્યઞ્ચ અદેન્તસ્સ પરાજયો ચ કસ્માતિ આહ ‘‘તસ્સા’’તિઆદિ. અઞ્ઞાસૂતિ મહાપચ્ચરિયાદીસુ ઇતરાસુ અટ્ઠકથાસુ.

હરણકકથાવણ્ણના.

૨૦૧. ઉપનિધિકથાય ‘‘ન ગણ્હામી’’તિ સમ્પજાનમુસાવાદં ભાસતોતિ યોજના. યેન કેનચિ રહસિ ‘‘ઇદં મય્હં ભણ્ડં પટિસામેત્વા દેહી’’તિ નિય્યાદિતં ભણ્ડં પચ્છા સામિકેન ‘‘દેહિ મે તં ભણ્ડ’’ન્તિ વુત્તે અચ્ચન્તમુપગન્તું ‘‘નાહં ગણ્હામી’’તિ સમ્પજાનમુસાવાદં ભાસતોતિ અત્થો. ગણ્હામીતિ અગ્ગહેસિં. અચ્ચન્તા હેસો અતીતે વત્તમાનપ્પયોગોયં. ‘‘સમ્પજાનમુસાવાદે પાચિત્તિય’’ન્તિ (પાચિ. ૨) ઇમસ્સ સિક્ખાપદસ્સ વિસયે કસ્મા દુક્કટં વુત્તન્તિ આહ ‘‘અદિન્નાદાનપુબ્બકત્તા’’તિઆદિ. તત્થ અદિન્નાદાનપુબ્બકત્તાતિ અદિન્નાદાનસ્સ સહપયોગવસેન પુબ્બઙ્ગમત્તા, ન પુબ્બપયોગત્તા. ન હિ અદિન્નાદાનસ્સ પુબ્બપયોગે પાચિત્તિયટ્ઠાને દુક્કટમત્થીતિ. તેનેવાહ અટ્ઠકથાયં ‘‘અદિન્નાદાનસ્સ પયોગત્તા’’તિ.

૨૦૨. એતસ્સાતિ એતસ્સ સમીપે. કિં નુ દસ્સતીતિ દસ્સતિ કિં નુ. વિમતુપ્પાદેતિ હેતુમ્હિ ભુમ્મં. તસ્સાતિ યસ્સ ભિક્ખુનો સન્તિકે ઉપનિક્ખિત્તં, તસ્સ.

૨૦૩. તસ્મિન્તિ યસ્મિં ઉપનિક્ખિત્તં, તસ્મિં ભિક્ખુમ્હિ. દાને નિરુસ્સાહેતિ અત્તનિ નિક્ખિત્તસ્સ ભણ્ડસ્સ સામિકસ્સ દાનવિસયે ઉસ્સાહરહિતે સતિ, ‘‘ન દાનિ તં દસ્સામી’’તિ ધુરનિક્ખેપે કતેતિ અધિપ્પાયો. તેનેવાહ ‘‘ઉભિન્નં ધુરનિક્ખેપે’’તિ. પરોતિ ભણ્ડસામિકો. ધુરન્તિ ‘‘યેન કેનચિ આકારેન ગણ્હિસ્સામી’’તિ ઉસ્સાહં. નિક્ખિપેતિ નિક્ખિપેય્ય.

૨૦૪. ચિત્તેનાદાતુકામોવાતિ એત્થ ‘‘યો તસ્સા’’તિ પાઠસેસો. ચેતિ અપિ-સદ્દત્થે. યો ચોરો ચિત્તેન અદાતુકામોવ, તસ્સ ચોરસ્સ ‘‘દસ્સામી’’તિ મુખેન વદતોપીતિ યોજના. અથ વા અદાતુકામોતિ એત્થ ‘‘હુત્વા’’તિ પાઠસેસો. ચેતિ વુત્તત્થો. એવાતિ ‘‘પરાજયો’’તિ ઇમિના યુજ્જતિ. ચિત્તેન અદાતુકામો હુત્વા મુખેન ‘‘દસ્સામી’’તિ વદતોપિ સામિનો ધુરનિક્ખેપે સતિ પરાજયો હોતેવાતિ યોજના.

ઉપનિધિકથાવણ્ણના.

૨૦૫. સુઙ્કઘાતસ્સાતિ ‘‘સુઙ્કઘાતં નામ રઞ્ઞા ઠપિતં હોતિ પબ્બતખણ્ડે વા નદીતિત્થે વા ગામદ્વારે વા’’તિ (પારા. ૧૧૩) પાળિયં આગતસ્સ ‘‘સુઙ્કં તતો હનન્તિ…પે… વિનાસેન્તી’’તિ (પારા. અટ્ઠ. ૧.૧૧૩) અટ્ઠકથાયં નિરુત્તસ્સ ‘‘ઇતો પટ્ઠાય નીયમાને ભણ્ડે એત્તકતો એત્તકં રાજભાગં ગહેતબ્બ’’ન્તિ રાજાદીહિ તંતંપદેસસામિકેહિ નિયમિતસ્સ પબ્બતખણ્ડાદિટ્ઠાનસ્સ. બહીતિ સુઙ્કગહણત્થાય પરિકપ્પિતસીમતો બહિ. પાતેતીતિ એત્થ ‘‘થેય્યચિત્તો’’તિ પકરણતો લબ્ભતિ. ‘‘રાજારહં ભણ્ડ’’ન્તિ પાઠસેસો. યતો કુતોચિ ભણ્ડતો પઞ્ચમાસકં વા અતિરેકપઞ્ચમાસકં વા અગ્ઘનકો ભાગો રાજાદિદેસસામિકસ્સ દાતબ્બો હોતિ, તાદિસં ભણ્ડં થેય્યચિત્તો યથા બહિ પતતિ, એવં ખિપતીતિ અત્થો. ધુવં પતતીતિ એત્થાપિ ‘‘ત’’ન્તિ પાઠસેસો, ‘‘ભણ્ડ’’ન્તિ પકરણતો લબ્ભતિ. યથા ખિત્તં તં ભણ્ડં એકન્તેન બહિ પતતીતિ. હત્થતો મુત્તમત્તે તસ્મિં ભણ્ડે.

૨૦૬. ‘‘ધુવં પતતી’’તિ એત્થ બ્યતિરેકં દસ્સેતુમાહ ‘‘તં રુક્ખે’’તિઆદિ. તન્તિ થેય્યાય બહિ પાતેતું ખિત્તં ભણ્ડં પટિહતં હુત્વાતિ યોજના. વાતક્ખિત્તમ્પિ વાતિ પાઠો ગહેતબ્બો. ‘‘વાતક્ખિત્તો’’તિ લિઙ્ગવિપલ્લાસો વા દટ્ઠબ્બો.

૨૦૭. પચ્છાતિ પતિતટ્ઠાને થોકં ચિરાયિત્વા, ઇમિના થોકમ્પિ ચિરાયિતમત્તે પયોગસાધિયં કારિયં સિદ્ધમેવાતિ પારાજિકસ્સ કારણં સમ્પન્નમેવાતિ દસ્સેતિ. તેનાહ ‘‘પારાજિકં સિયા’’તિ.

૨૦૮. ‘‘ઠત્વા’’તિઆદિના પતિતટ્ઠાને અચિરાયિત્વા ગતેપિ તસ્મિં બહિ પતિતટ્ઠાનતો ઇતરત્રાપિ ચિરાયિતેન બહિ પાતનપ્પયોગેન સાધિયં કારિયં સિદ્ધમેવાતિ પારાજિકકારણસ્સ સિદ્ધતં દસ્સેતિ. તેનેવાહ ‘‘પરાજયો’’તિ. ‘‘અતિટ્ઠમાન’’ન્તિઆદિના યત્થ કત્થચિ અચિરાયનેન પયોગસ્સ નિરત્થકતં દસ્સેતિ. તેનેવાહ ‘‘રક્ખતી’’તિ.

૨૦૯. તન્તિ અટ્ઠકથાવચનં.

૨૧૦. સયં વા વટ્ટેતીતિ અન્તો ઠિતો સયં વા હત્થેન વા પાદેન વા યટ્ઠિયા વા બહિસીમાય નિન્નટ્ઠાનં પરિવટ્ટેતિ. અટ્ઠત્વાતિ પવટ્ટિતમત્તે અન્તો કત્થચિપિ અટ્ઠત્વા. વટ્ટમાનન્તિ પવટ્ટન્તં. ગતન્તિ બહિસીમં કેસગ્ગમત્તટ્ઠાનમ્પિ અન્તોસીમમતિક્કમમત્તં.

૨૧૧. તં ભણ્ડં સચે અન્તો ઠત્વા ઠત્વા બહિ ગચ્છતીતિ યોજના. યદિ અન્તોસીમાય ઠત્વા ઠત્વા બહિસીમં ગચ્છતીતિ અત્થો. રક્ખતીતિ અન્તોસીમાય પઠમગતિનિવત્તનેનેવ એતસ્સ ભિક્ખુનો પયોગવેગસ્સ નિવત્તત્તા, તતો ઉપરિ નિવત્તનારહકારણસ્સ અલદ્ધભાવેન અત્તના ચ ગતત્તા તથા બહિસીમપ્પત્તં તં ભણ્ડં તંમૂલકપયોજકં ભિક્ખું આપત્તિયા રક્ખતીતિ અધિપ્પાયો. સુદ્ધચિત્તેન ઠપિતેતિ ‘‘એવં ઠપિતે વટ્ટિત્વા ગમિસ્સતી’’તિ થેય્યચિત્તેન વિના ‘‘કેવલં ઠપેસ્સામી’’તિ ચિત્તેન બહિસીમાભિમુખં નિન્નટ્ઠાનં ઓતારેત્વા ઠપિતે. સયં વટ્ટતીતિ ભણ્ડં સયમેવ નિન્નટ્ઠાનં નિન્નં હુત્વા બહિસીમં ચે પવટ્ટન્તં ગચ્છતિ. વટ્ટતીતિ આપત્તિયા અકરણતો વટ્ટતિ.

૨૧૨. ગચ્છન્તેતિ ચોરસ્સ પયોગં વિના અત્તનાવ ગચ્છન્તે. તન્તિ રાજદેય્યપઞ્ચમાસકઅતિરેકપઞ્ચમાસકમત્તં સુઙ્કવન્તં ભણ્ડં. નીહટેપિ નાવહારોતિ યોજના. કેવલં થેય્યચિત્તસ્સ આપત્તિયા અનઙ્ગભાવતો, યાનાદિપયોજકકાયવચીપયોગસ્સ અભાવતો, ભણ્ડટ્ઠપિતયાનાદિનો અત્તનાવ બહિસીમપ્પત્તત્તા, તેનેવ ભણ્ડસ્સાપિ ગતત્તા ચ ભિક્ખુનો અવહારો નત્થીતિ અત્થો.

૨૧૩. પયોગેન વિનાતિ ચોરસ્સ સકપયોગમન્તરેન. અવહારો ન વિજ્જતીતિ એત્થ યુત્તિ વુત્તનયાવ.

૨૧૪. મણિન્તિ પાદારહં સુઙ્કદાતબ્બમણિરતનં, એતેનેવ ઉપલક્ખણપદત્તા યંકિઞ્ચિ ભણ્ડં સઙ્ગહિતમેવ. પારાજિકં સિયાતિ યાનસ્સ અત્તના પાજિતત્તાતિ અધિપ્પાયો. સીમાતિક્કમનેતિ સુઙ્કગ્ગહણસ્સ નિયમિતટ્ઠાનાતિક્કમને.

૨૧૫. મતન્તિ ‘‘એત્તકભણ્ડતો એત્તકં ગહેતબ્બ’’ન્તિ રાજૂહિ અનુમતં. સેસો કથામગ્ગોતિ ‘‘સુઙ્કટ્ઠાનં પત્વા સુઙ્કિકેસુ નિદ્દાયમાનેસુ, કીળન્તેસુ, બહિગતેસુ વા પરિયેસિત્વા અદિસ્વા ગચ્છતો ન દોસો, ભણ્ડદેય્યં હોતી’’તિ એવમાદિકો વિનિચ્છયકથામગ્ગો. અરઞ્ઞટ્ઠકથાસમોતિ ‘‘યો ચારક્ખટ્ઠાનં પત્વા’’તિઆદિના (વિ. વિ. ૧૭૦) યથાવુત્તઅરઞ્ઞટ્ઠકથાય સદિસો,

‘‘કમ્મટ્ઠાનં ચિત્તે કત્વા;

ચિન્તેન્તો અઞ્ઞવિહિતો;

સુઙ્કટ્ઠાનં પત્વા ગચ્છે;

ભણ્ડદેય્યં હોતેવસ્સા’’તિ. –

આદિના નયેન વુચ્ચમાનસદિસોયેવ. તેનેવ ગતત્થતાય ઇદાનિ ન વિચારીયતીતિ અધિપ્પાયો.

સુઙ્કઘાતકથાવણ્ણના.

૨૧૬. ‘‘પાણો નામ મનુસ્સપાણો વુચ્ચતી’’તિ (પારા. ૧૧૪) પાળિતો ચ ‘‘તમ્પિ ભુજિસ્સં હરન્તસ્સ અવહારો નત્થી’’તિ (પારા. અટ્ઠ. ૧.૧૧૪) અટ્ઠકથાવચનતો ચ પરદાસમનુસ્સોયેવ અધિપ્પેતોતિ તમેવ દસ્સેતુમાહ ‘‘અન્તોજાત’’ન્તિઆદિ. ગેહદાસિયા કુચ્છિમ્હિ દાસસ્સ જાતો અન્તોજાતો નામ, તં વા. ધનેન કીતો ધનક્કીતો, તં વા. દિન્નં વા પન કેનચીતિ માતુલઅય્યકાદીસુ યેન કેનચિ દાસં કત્વા દિન્નં વા. દાસન્તિ પચ્ચેકં સમ્બન્ધનીયં. કરમરાનીતં વા દાસન્તિ પરવિસયં વિલુમ્પિત્વા આનેત્વા દાસભાવાય ગહિતસઙ્ખાતં કરમરાનીતદાસં વા. હરન્તસ્સ પરાજયોતિ એત્થ ‘‘ચોરિકાય હરિસ્સામી’’તિ આમસને દુક્કટં, ફન્દાપને થુલ્લચ્ચયં આપજ્જિત્વા ઠિતટ્ઠાનતો કેસગ્ગમત્તમ્પિ અતિક્કામયતો પારાજિકં હોતીતિ અધિપ્પાયો.

૨૧૭. ભુજિસ્સં વાતિ યસ્સ કસ્સચિ મનુસ્સસ્સ અદાસભૂતં. માનુસન્તિ મનુસ્સજાતિકં સત્તં. આઠપિતન્તિ ઉપનિક્ખિત્તં.

૨૧૮. તન્તિ અન્તોજાતાદીસુ દાસેસુ યં કઞ્ચિ દાસં. પલાયિતુકામોવાતિ પલાપેતુકામો નીહરિતુકામો. અથ વા તં દાસં ભુજેહિ ઉક્ખિપિત્વા અયં પલાયિતુકામોતિપિ અત્થો ગહેતબ્બો. ભુજેહીતિ ઉભોહિ હત્થેહિ. તં ઠિતટ્ઠાનતોતિ તસ્સ ઠિતટ્ઠાનં તંઠિતટ્ઠાનં, તતો તંઠિતટ્ઠાનતો, ચોરેન અત્તના ઠિતટ્ઠાનતોતિ અત્થો ન ગહેતબ્બોતિ દસ્સેતુમેવં વુત્તં. કિઞ્ચિ સઙ્કામેતીતિ કેસગ્ગમત્તમ્પિ તતો અઞ્ઞં ઠાનં પાપેતિ. ભુજેહિ વાતિ એત્થ વા-સદ્દો વક્ખમાનપકારન્તરાપેક્ખો, ‘‘સઙ્કામેતિ વા’’તિ યોજેતબ્બં.

૨૧૯. તજ્જેત્વાતિ ભયકરેન વચનેન લેસેન, ઇઙ્ગિતેન વા તાસેત્વા નેન્તસ્સ તસ્સાતિ સમ્બન્ધો. પદવારતોતિ પદવારેન યુત્તા થુલ્લચ્ચયાદયો આપત્તિયો હોન્તીતિ યોજના. પઠમપદવારયુત્તા થુલ્લચ્ચયાપત્તિ, દુતિયપદવારયુત્તા પારાજિકાપત્તિ હોતીતિ અત્થો.

૨૨૦. હત્થાદીસૂતિ આદિ-સદ્દેન કેસવત્થાદિં સઙ્ગણ્હાતિ. તન્તિ દાસં. કડ્ઢતોપીતિ આકડ્ઢતોપિ. પરાજયોતિ ‘‘પદવારતો’’તિ અનુવત્તમાનત્તા પઠમપદવારે થુલ્લચ્ચયં, દુતિયપદવારે અતિક્કન્તે પારાજિકન્તિ અત્થો. અયં નયોતિ ‘‘પદવારતો યુત્તા થુલ્લચ્ચયાદયો આપત્તિયો હોન્તી’’તિ વુત્તનયો.

૨૨૧. વેગસાવાતિ વેગેનેવ, ચોરસ્સ વચનેન કાતબ્બવિસેસરહિતેન બલવગમનવેગેનાતિ વુત્તં હોતિ. ઇમિના અનાપત્તિભાવસ્સ કારણં દસ્સેતિ.

૨૨૨. સણિકન્તિ મન્દગતિયા. વદતીતિ ‘‘ગચ્છ, યાહિ, પલાયા’’તિઆદિકં વચનં કથેતિ. સોપિ ચાતિ યો મન્દગતિયા ગચ્છન્તો એવં વુત્તો, સોપિ ચ.

૨૨૩. પલાયિત્વાતિ સામિકં પહાય ગન્ત્વા. અઞ્ઞન્તિ સામિકાયત્તટ્ઠાનતો અઞ્ઞં ઠાનં. સાપણં વીથિસન્નિવેસયુત્તં નિગમમ્પિ વા. તતોતિ પલાયિત્વા પવિટ્ઠગામાદિતો. તન્તિ પલાયિત્વા પવિટ્ઠં તં દાસં.

પાણકથાવણ્ણના.

૨૨૪. થેય્યાતિ થેય્યચિત્તેન. સપ્પકરણ્ડન્તિ સપ્પસયનપેળં. યથાવત્થુન્તિ થુલ્લચ્ચયમાહ. ઠાનતોતિ સપ્પપેળાય ઠિતટ્ઠાનતો. ચાવનેતિ કેસગ્ગમત્તાતિક્કમે.

૨૨૫. કરણ્ડન્તિ સપ્પપેળં. ઉગ્ઘાટેત્વાતિ વિવરિત્વા. કરણ્ડતલતોતિ અન્તોપેળાય તલતો. નઙ્ગુટ્ઠેતિ નઙ્ગુટ્ઠપરિયન્તે.

૨૨૬. ઘંસિત્વાતિ પેળાપસ્સે ફુસાપેત્વા. સપ્પકરણ્ડસ્સ મુખવટ્ટિતોતિ કરણ્ડપુટમુખવટ્ટિતો. તસ્સ નઙ્ગુટ્ઠે મુત્તમત્તેતિ યોજના.

૨૨૭. નામતોતિ નામેન, નામં વત્વાતિ વુત્તં હોતિ. પક્કોસન્તસ્સાતિ અવ્હાયન્તસ્સ. તસ્સાતિ પક્કોસકસ્સ.

૨૨૮. તથાતિ કરણ્ડં વિવરિત્વા. મણ્ડૂકમૂસિકાનં રવં કત્વા નામેન પક્કોસન્તસ્સાતિ યોજના. વા-સદ્દેન લાજાવિકિરણઅચ્છરપહારાદિકં સઙ્ગણ્હાતિ.

૨૨૯. મુખન્તિ સપ્પકરણ્ડસ્સ મુખં. એવમેવ ચ કરોન્તસ્સાતિ મણ્ડૂકસઞ્ઞં, મૂસિકસઞ્ઞં કત્વા વા લાજા વિકિરિત્વા વા અચ્છરં પહરિત્વા વા નામં વત્વા પક્કોસન્તસ્સ. યેન કેનચીતિ વુત્તનીહારતો યેન વા તેન વા.

૨૩૦. ન પક્કોસતિ ચેતિ યથાવુત્તનયેન યોજેત્વા નામં વત્વા ન પક્કોસતિ. તસ્સાતિ કરણ્ડમુખવિવરકસ્સ ભિક્ખુસ્સ.

અપદકથાવણ્ણના.

૨૩૧. હત્થિન્તિ હત્થિમ્હિ, ભુમ્મત્થે એવ ઉપયોગવચનં.

૨૩૨. સાલાયન્તિ હત્થિસાલાયં. વસતિ એત્થાતિ વત્થુ, રાજાગારં, તસ્સ અન્તો અન્તોવત્થુ, અન્તોરાજગેહન્તિ અત્થો. અઙ્ગણેતિ અન્તોરાજઙ્ગણે. પિ-સદ્દો ‘‘અન્તોનગરે’’તિ અવુત્તમ્પિ સમ્પિણ્ડેતિ. વત્થુ ચાતિ ચ-સદ્દેન અઙ્ગણં સમુચ્ચિનોતિ. સકલં અઙ્ગણં ઠાનન્તિ હત્થિનો વિચરણયોગ્ગં અઙ્ગણટ્ઠાનં સન્ધાયાહ, સકલસાલાતિ ગહેતબ્બં.

૨૩૩. અબદ્ધસ્સાતિ યથાવુત્તસાલારાજવત્થઙ્ગણાપેક્ખાય વુત્તં. અબદ્ધસ્સ હિ હત્થિનો સકલસાલાદયો ઠાનં, તદતિક્કમે ઠાનાચાવનં હોતીતિ અત્થો. હીતિ અવધારણે વા. ‘‘બદ્ધસ્સ હી’’તિ યોજનાય વિસેસત્થોવ દટ્ઠબ્બો, બદ્ધસ્સ પનાતિ વુત્તં હોતિ. બદ્ધસ્સ પનાતિ સાલાદીસુ સન્નિહિતસ્સ પન. ઠિતટ્ઠાનઞ્ચાતિ સાલાદીસુ ઠિતટ્ઠાનઞ્ચ, ચતૂહિ પાદેહિ અક્કન્તટ્ઠાનન્તિ વુત્તં હોતિ. બન્ધનઞ્ચાતિ ગીવાય વા પચ્છા પાદદ્વયબન્ધનવલયે વા ઉભયત્થ વા બન્ધનટ્ઠાનઞ્ચ. તસ્માતિ યસ્મા ઠિતટ્ઠાનઞ્ચ બન્ધનઞ્ચ ઠાનન્તિ છ વા પઞ્ચ વા ઠાનાનિ લબ્ભન્તિ, તસ્મા. તેસં ઠાનાનં. કારયેતિ એત્થ ‘‘આપત્તિ’’ન્તિ સામત્થિયા લબ્ભતીતિ. હરતોતિ હત્થિસાલાદિતો ચોરિકાય હરન્તસ્સ. કારયેતિ આમસને દુક્કટં, ઠાનભેદગણનાય યાવ પચ્છિમટ્ઠાના પુરિમેસુ થુલ્લચ્ચયાનિ, અન્તિમટ્ઠાના કેસગ્ગમત્તમ્પિ ચાવને પારાજિકં કારેય્યાતિ અત્થો.

૨૩૪. ઠિતટ્ઠાનન્તિ ચતૂહિ પાદેહિ અક્કન્તટ્ઠાનં, ઇદઞ્ચ અબદ્ધહત્થિં સન્ધાય વુત્તં. બદ્ધસ્સ વિનિચ્છયો સાલાદીસુ બદ્ધસ્સ વુત્તવિનિચ્છયસદિસોતિ ગતત્થતાય ન વુત્તો.

૨૩૫. એકં ઠાનન્તિ સયિતટ્ઠાનમત્તં. તસ્મિન્તિ ગજે. તસ્સાતિ ભિક્ખુસ્સ. તુરઙ્ગમહિસાદીસુ દ્વિપદે ચ બહુપ્પદે ચ.

૨૩૬. એસેવ નયો ઞેય્યો, વત્તબ્બં કિઞ્ચિપિ નત્થીતિ યોજના. તત્થ તુરઙ્ગા અસ્સા. મહિસા લુલાયા. આદિ-સદ્દેન ગોગદ્રભઓટ્ઠાદિચતુપ્પદાનં સઙ્ગહો. નત્થિ કિઞ્ચિપિ વત્તબ્બન્તિ અસ્સસાલારાજાગારઙ્ગણબહિનગરાદીસુ અબન્ધિતસયનઅસ્સાદીનં ઠાનભેદો યથાવુત્તસદિસત્તા ન વુત્તો.

બન્ધિત્વા ઠપિતઅસ્સસ્સ પન સચે સો ચતૂસુ પાદેસુ બદ્ધો હોતિ, બન્ધનાનં, ખુરાનઞ્ચ ગણનાય અટ્ઠ ઠાનાનિ, સચે મુખે ચ બદ્ધો હોતિ, નવ ઠાનાનિ, મુખેયેવ બદ્ધો, પઞ્ચ ઠાનાનીતિ ઠાનભેદો ચ તથેવ સસમિગસૂકરાદિચતુપ્પદેસુ બન્ધિત્વા ઠપિતેસુ બદ્ધબદ્ધટ્ઠાનેહિ સહ ચતૂહિ પાદેહિ અક્કન્તટ્ઠાનવસેન લબ્ભમાનો ઠાનભેદો ચ ગોમહિસેસુ બદ્ધેસુ એવમેવ લબ્ભમાનો ઠાનભેદો ચ વજાદીસુ પદેસેસુ પવેસિતેસુ દ્વારેસુ રુક્ખસૂચિયો અપનેત્વા વા અનપનેત્વા વા નામં વત્વા વા અવત્વા વા પક્કોસન્તસ્સ, સાખાભઙ્ગતિણાદીનિ દસ્સેત્વા પક્કોસિત્વા વા અપક્કોસિત્વા વા પલોભેન્તસ્સ તાસેત્વા નિક્ખમન્તસ્સ સપ્પકરણ્ડકે સપ્પસ્સ વુત્તનયેન લબ્ભમાનો વિસેસો ચ નેતબ્બો. ઇહ સબ્બત્થ ઠાનભેદેસુ બહુકેસુપિ ઉપન્તટ્ઠાનેસુ થુલ્લચ્ચયં, અન્તટ્ઠાને પારાજિકં વુત્તસદિસન્તિ ઇમસ્સ સબ્બસ્સ વિનિચ્છયસ્સ ‘‘એસેવ નયો’’તિ ઇમિનાવ ગતત્તા, આહટતો અવિઞ્ઞાયમાનસ્સ કસ્સચિ વિસેસસ્સાભાવા ચ વુત્તં ‘‘નત્થિ કિઞ્ચિપિ વત્તબ્બ’’ન્તિ.

દ્વિપદેપીતિ ‘‘દ્વિપદં નામ મનુસ્સા પક્ખજાતા’’તિ (પારા. ૧૧૫) પાળિયં વુત્તા મનુસ્સા ચ મયૂરાદિલોમપક્ખા ચ વગ્ગુલિઆદિચમ્મપક્ખા ચ ભમરાદિઅટ્ઠિપક્ખા ચાતિ એવમાદિકે સત્તે ચ. બહુપ્પદેતિ ‘‘બહુપ્પદં નામ વિચ્છિકા સતપદી ઉચ્ચાલિઙ્ગપાણકા’’તિ (પારા. ૧૧૭) પાળિયં વુત્તબહુપ્પદસત્તે ચાતિ અત્થો.

એત્તાવતા પાપભિક્ખૂનં લેસોકાસપિદહનત્થં પદભાજને વુત્તભૂમટ્ઠાદિતિંસવિનિચ્છયમાતિકાકથાસુ પઞ્ચવીસતિ માતિકાકથા દસ્સેત્વા અવસિટ્ઠાસુ પઞ્ચમાતિકાકથાસુ સંવિદાવહારો, સઙ્કેતકમ્મં, નિમિત્તકમ્મન્તિ માતિકત્તયકથા પઠમમેવ અદિન્નાદાનવિનિચ્છયસમ્ભારભૂતાનં પઞ્ચવીસતિયા અવહારાનં દસ્સનટ્ઠાને ઠત્વા –

‘‘પુબ્બસહપયોગો ચ, સંવિદાહરણમ્પિ ચ;

સઙ્કેતકમ્મં નેમિત્તં, પુબ્બયોગાદિપઞ્ચક’’ન્તિ. (વિ. વિ. ૪૨) –

ઇમિના સઙ્ગહિતાતિ તં પહાય અવસેસે ઓચરકો, ઓણિરક્ખકોતિ કથાદ્વયે ઓચરણકકથાય આણત્તિકપ્પયોગત્તા, તઞ્ચ ઓણિરક્ખકેન કરિયમાનં ઠાનાચાવનં સાહત્થિકેન વા આણત્તિકેન વા પયોગેન હોતીતિ તસ્સાપિ ‘‘સાહત્થાણત્તિકો ચેવા’’તિ સાહત્થિકપઞ્ચકે પઠમમેવ સઙ્ગહિતત્તા ચ થલટ્ઠવેહાસટ્ઠકથાદીસુ સઙ્ગહિતત્તા ચ તઞ્ચ દ્વયં ન વુત્તન્તિ વેદિતબ્બં.

તત્થ ‘‘ઓચરકો નામ ભણ્ડં ઓચરિત્વા આચિક્ખતી’’તિ (પારા. ૧૧૮) પાળિયં વુત્તો ચોરાપનપુરિસો ‘‘ઓચરકો’’તિ વેદિતબ્બો. ઓચરતીતિ ઓચરકો, તત્થ તત્થ ગન્ત્વા અન્તો અનુપવિસતીતિ વુત્તં હોતીતિ. ‘‘ઓણિરક્ખો નામ આહટં ભણ્ડં ગોપેન્તો’’તિ (પારા. ૧૧૮) પાળિયં વુત્તો મુહુત્તં અત્તનિ ઠપિતસ્સ પરભણ્ડસ્સ રક્ખકો ‘‘ઓણિરક્ખો’’તિ વેદિતબ્બો. ઓણિતં રક્ખતીતિ ઓણિરક્ખો, યો પરેન અત્તનો વસનટ્ઠાને આભતં ભણ્ડં ‘‘ઇદં તાવ ભન્તે મુહુત્તં ઓલોકેથ, યાવાહં ઇદં નામ કિચ્ચં કત્વા આગચ્છામી’’તિ વુત્તો રક્ખતિ, તસ્સેતં અધિવચનં.

દ્વિચતુબહુપ્પદકથાવણ્ણના.

૨૩૭. ‘‘પઞ્ચહિ આકારેહિ અદિન્નં આદિયન્તસ્સ આપત્તિ પારાજિકસ્સા’’તિઆદિના (પારા. ૧૨૨) નયેન પાળિયં આગતાનિ પઞ્ચઙ્ગાનિ સઙ્ગહેતુમાહ ‘‘પરેસ’’ન્તિઆદિ. તત્થ ‘‘પરેસં સન્તકં ધન’’ન્તિ ઇમિના પરમનુસ્સસન્તકતા, ‘‘પરેસન્તિ વિજાનિત્વા’’તિ ઇમિના પરાયત્તભાવસ્સ જાનનં, ‘‘ગરુક’’ન્તિ ઇમિના પાદં વા અતિરેકપાદં વા અગ્ઘનકતા, ‘‘થેય્યચિત્તેના’’તિ ઇમિના થેય્યચિત્તતા, ‘‘ઠાના ચાવેતી’’તિ ઇમિના પઞ્ચવીસતિયા અવહારાનં અઞ્ઞતરસ્સ સમઙ્ગિતાતિ એવમેત્થ પઞ્ચઙ્ગસઙ્ગહો વેદિતબ્બો.

૨૩૮. એત્તાવતા તિંસમાતિકાકથાવિનિચ્છયં સઙ્ગહેત્વા ઇદાનિ ‘‘અનાપત્તિ સસઞ્ઞિસ્સ વિસ્સાસગ્ગાહે તાવકાલિકે પેતપરિગ્ગહે તિરચ્છાનગતપરિગ્ગહે પંસુકૂલસઞ્ઞિસ્સા’’તિઆદિના (પારા. ૧૩૧) નયેન પાળિયં આગતં અનાપત્તિવારં સઙ્ગહેતુમાહ ‘‘અનાપત્તી’’તિઆદિ. તત્થ સસઞ્ઞિસ્સાતિ પરસન્તકમ્પિ ‘‘સસન્તક’’ન્તિ સુદ્ધસઞ્ઞાય ગણ્હન્તસ્સ અનાપત્તીતિ સબ્બત્થ યોજેતબ્બં. એવં ગહિતં સામિકેહિ દિસ્વા યાચિતે અદેન્તસ્સ ઉભિન્નં ધુરનિક્ખેપેન પારાજિકં.

તિરચ્છાનપરિગ્ગહેતિ તિરચ્છાનેહિ પરિગ્ગહિતવત્થુમ્હિ. સચેપિ હિ નાગગરુળમાણવકમાણવિકાપિ મનુસ્સવેસેન આપણં પસારેત્વા નિસિન્ના હોન્તિ, ભિક્ખુ ચ થેય્યચિત્તેન તેસં સન્તકં ગણ્હાતિ, અનાપત્તીતિ વુત્તં હોતિ. સીહબ્યગ્ઘદીપિપભુતીહિ વાળમિગેહિ ગહિતગોચરં પઠમં મોચાપેન્તસ્સ તં મુઞ્ચિત્વા અત્તનોપિ હિંસનતો થોકં ખાયિતે વારેન્તસ્સ દોસો નત્થિ. સેનાદીસુ તિરચ્છાનેસુ યેન કેનચિ ગહિતં ગોચરં મોચાપેતું વટ્ટતિ. વુત્તઞ્હેતં અટ્ઠકથાયં ‘‘સેનાદયોપિ આમિસં ગહેત્વા ગચ્છન્તે પાતાપેત્વા ગણ્હિતું વટ્ટતી’’તિ (પારા. અટ્ઠ. ૧.૧૩૧). એવમેવ ધમ્મનિદેડ્ડુભાદીહિ ગહિતમણ્ડૂકાદયો જીવિતરક્ખનત્થાય મોચાપેતું વટ્ટતીતિ વેદિતબ્બં.

તાવકાલિકગ્ગાહેતિ ‘‘પટિકરિસ્સામી’’તિ તાવકાલિકં ગણ્હન્તસ્સ એવં ગહિતં સચે ભણ્ડસામિકો પુગ્ગલો વા ગણો વા ‘‘તુમ્હેવ ગણ્હથા’’તિ અનુજાનેય્ય, વટ્ટતિ. નાનુજાનેય્ય, ન ગણ્હેય્ય, દાતબ્બં. અદેન્તસ્સ ઉભિન્નં ધુરનિક્ખેપેન પારાજિકં. ‘‘સઙ્ઘસન્તકં પન પટિદાતુમેવ વટ્ટતી’’તિ અટ્ઠકથાયં વુત્તં.

વિસ્સાસગ્ગાહેતિ ‘‘અનુજાનામિ ભિક્ખવે પઞ્ચહઙ્ગેહિ સમન્નાગતસ્સ વિસ્સાસં ગહેતું, સન્દિટ્ઠો ચ હોતિ, સમ્ભત્તો ચ, આલપિતો ચ, જીવતિ ચ, ગહિતે ચ અત્તમનો હોતી’’તિ (મહાવ. ૩૫૬) પાળિયં આગતં પઞ્ચહઙ્ગેહિ સમન્નાગતસ્સ સન્તકં વિસ્સાસેન ગણ્હન્તસ્સ ગહણે વિનિચ્છયો યથાવુત્તસુત્તવણ્ણનાયં વેદિતબ્બો. યથાહ સમન્તપાસાદિકાયં –

તત્થ સન્દિટ્ઠોતિ દિટ્ઠમત્તકમિત્તો. સમ્ભત્તોતિ દળ્હમિત્તો. આલપિતોતિ ‘‘મમ સન્તકં યં ઇચ્છસિ, તં ગણ્હેય્યાસિ, આપુચ્છિત્વા ગહણે કારણં નત્થી’’તિ વુત્તો. જીવતીતિ અનુટ્ઠાનસેય્યાય સયિતોપિ યાવ જીવિતિન્દ્રિયુપચ્છેદં ન પાપુણાતિ. ગહિતે ચ અત્તમનોતિ ગહિતે તુટ્ઠચિત્તો હોતિ, એવરૂપસ્સ સન્તકં ‘‘ગહિતે મે અત્તમનો ભવિસ્સતી’’તિ જાનન્તેન ગહેતું વટ્ટતિ. અનવસેસપરિયાદાનવસેન ચેતાનિ પઞ્ચઙ્ગાનિ વુત્તાનિ, વિસ્સાસગ્ગાહો પન તીહઙ્ગેહિ રુહતિ – સન્દિટ્ઠો, જીવતિ, ગહિતે અત્તમનો, સમ્ભત્તો, જીવતિ, ગહિતે અત્તમનો, આલપિતો, જીવતિ, ગહિતે અત્તમનોતિ.

યો પન જીવતિ, ન ચ ગહિતે અત્તમનો હોતિ, તસ્સ સન્તકં વિસ્સાસગ્ગાહેન ગહિતમ્પિ પુન દાતબ્બં. દદમાનેન ચ મતકધનં તાવ યે તસ્સ ધને ઇસ્સરા ગહટ્ઠા વા પબ્બજિતા વા, તેસં દાતબ્બં. અનત્તમનસ્સ સન્તકં તસ્સેવ દાતબ્બં. યો પન પઠમંયેવ ‘‘સુટ્ઠુ કતં તયા મમ સન્તકં ગણ્હન્તેના’’તિ વચીભેદેન વા ચિત્તુપ્પાદમત્તેન વા અનુમોદિત્વા પચ્છા કેનચિ કારણેન કુપિતો પચ્ચાહરાપેતું ન લભતિ. યોપિ અદાતુકામોવ, ચિત્તેન પન અધિવાસેતિ, ન કિઞ્ચિ વદતિ, સોપિ પુન પચ્ચાહરાપેતું ન લભતિ. યો પન ‘‘મયા તુમ્હાકં સન્તકં ગહિતં વા પરિભુત્તં વા’’તિ વુત્તે ‘‘ગહિતં વા હોતુ પરિભુત્તં વા, મયા પન તં કેનચિદેવ કરણીયેન ઠપિતં, તં પાકતિકં કાતું વટ્ટતી’’તિ વદતિ, અયં પચ્ચાહરાપેતું લભતીતિ (પારા. અટ્ઠ. ૧.૧૩૧).

પેતપરિગ્ગહેતિ પેત્તિવિસયુપ્પન્ના ચ મરિત્વા તસ્મિંયેવ અત્તભાવે નિબ્બત્તા ચ ચાતુમહારાજિકાદયો દેવા ચ ઇમસ્મિં અત્થે પેતા નામ, તેસં સન્તકં ગણ્હન્તસ્સ ચ અનાપત્તીતિ અત્થો. સચેપિ હિ સક્કો દેવરાજા આપણં પસારેત્વા નિસિન્નો હોતિ, દિબ્બચક્ખુકો ચ ભિક્ખુ તં ઞત્વા સતસહસ્સગ્ઘનકમ્પિ વત્થં તસ્સ વિરવન્તસ્સેવ અચ્છિન્દિત્વા ગણ્હિતું વટ્ટતિ. દેવપૂજત્થં રુક્ખાદીસુ મટ્ઠવત્થાદીનિ ગણ્હતો નિદ્દોસતાય કિમેવ વત્તબ્બં. પંસુકૂલસઞ્ઞાય ગણ્હતોપિ અનાપત્તિ. તથા ગહિતમ્પિ સચે સસ્સામિકં હોતિ, સામિકે આહરાપેન્તે દાતબ્બન્તિ ઉપલક્ખણતો વેદિતબ્બં.

૨૩૯. એત્થાતિ દુતિયપારાજિકવિનિચ્છયે. ચ-સદ્દેન અવુત્તસમુચ્ચયત્થેન અવસેસસિક્ખાપદવિનિચ્છયે સઙ્ગણ્હાતિ. વત્તબ્બોતિ માતિકટ્ઠકથાદીસુ વિય અવસાને કથેતબ્બો. પાળિમુત્તવિનિચ્છયોતિ સમુટ્ઠાનાદિકો તંતંસિક્ખાપદપાળિયં અનાગતો ઉપાલિત્થેરાદીહિ ઠપિતો વિનિચ્છયો.

૨૪૦. પરાજિતાનેકમલેનાતિ અપરિમેય્યકપ્પકોટિસતસહસ્સોપચિતપારમિતાસમ્ભૂતેન સબ્બઞ્ઞુતઞ્ઞાણપદટ્ઠાનેન આસવક્ખયઞાણેન સહ વાસનાય સમુચ્છેદપ્પહાનેન પરાજિતા રાગાદયો અનેકકિલેસમલા યેન સો પરાજિતાનેકમલો, તેન પરાજિતાનેકમલેન. જિનેન યં દુતિયં પારાજિકં વુત્તં, અસ્સ દુતિયપારાજિકસ્સ ચ અત્થો મયા સમાસેન વુત્તો. અસેસેન અતિવિત્થારનયેન વત્તું તસ્સ અત્થં કથેતું કો હિ સમત્થોતિ યોજના. એત્થ ચ-સદ્દો પઠમપારાજિકસમુચ્ચયત્થો. હિ-સદ્દો અવધારણે, તેન અસેસેન તદત્થં વત્તું સમત્થો નત્થેવ અઞ્ઞત્ર તથાગતાતિ દીપેતિ.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

દુતિયપારાજિકકથાવણ્ણના નિટ્ઠિતા.

તતિયપારાજિકકથાવણ્ણના

૨૪૧-૨. એવમતિસુખુમનયસમાકુલં દુતિયપારાજિકં દસ્સેત્વા ઇદાનિ તતિયપારાજિકં દસ્સેતુમાહ ‘‘મનુસ્સજાતિ’’ન્તિઆદિ. તત્થ મનુસ્સજાતિન્તિ જાયતીતિ જાતિ, રૂપારૂપપટિસન્ધિ, મનુસ્સેસુ જાતિ યસ્સ સો મનુસ્સજાતિ, મનુસ્સજાતિકો મનુસ્સવિગ્ગહોતિ વુત્તં હોતિ, તં મનુસ્સજાતિં.

એત્થ ચ મનુસ્સેસૂતિ કુસલાકુસલમનસ્સ ઉસ્સન્નત્તા મનુસ્સસઙ્ખાતેસુ નરેસુ. ‘‘યં માતુકુચ્છિસ્મિં પઠમં ચિત્તં ઉપ્પન્ન’’ન્તિ (પારા. ૧૭૨) પદભાજને વુત્તનયેન માતુકુચ્છિમ્હિ પઠમં ઉપ્પજ્જમાનપટિસન્ધિચિત્તઞ્ચ તંસમ્પયુત્તવેદનાસઞ્ઞાસઙ્ખારસઙ્ખાતખન્ધત્તયઞ્ચ તંસહજાતાનિ –

‘‘તિલતેલસ્સ યથા બિન્દુ, સપ્પિમણ્ડો અનાવિલો;

એવં વણ્ણપ્પટિભાગં, ‘કલલ’ન્તિ પવુચ્ચતી’’તિ. (પારા. અટ્ઠ. ૨.૧૭૨; વિભ. અટ્ઠ. ૨૬) –

વુત્તાનિ જાતિઉણ્ણંસુમ્હિ પસન્નતિલતેલે વા સપ્પિમણ્ડે વા ઓતારેત્વા ઉક્ખિપિત્વા વિધુનિતે અગ્ગે લમ્બમાનબિન્દુપ્પમાણકલલસઙ્ખાતાનિ સભાવકાનં કાયભાવવત્થુદસકવસેન તિંસ રૂપાનિ ચ અભાવકાનં કાયવત્થુદસકવસેન વીસતિ રૂપાનિ ચાતિ અયં નામરૂપપટિસન્ધિ ઇધ ‘‘જાતી’’તિ ગહિતા. ‘‘યસ્સા’’તિ ઇમિના અઞ્ઞપદેન ‘‘યાવ મરણકાલા એત્થન્તરે એસો મનુસ્સવિગ્ગહો નામા’’તિ (પારા. ૧૭૨) પદભાજને વુત્તનયેન પઠમભવઙ્ગતો પટ્ઠાય ચુતિચિત્તાસન્નભવઙ્ગપરિયન્તસન્તાનસઙ્ખાતસત્તો ગહિતો. ઇમિના મનુસ્સવિગ્ગહસ્સ પટિસન્ધિતો પટ્ઠાય પારાજિકવત્થુભાવં દસ્સેતિ.

જાનન્તોતિ ‘‘સત્તો અય’’ન્તિ જાનન્તો. જીવિતા યો વિયોજયેતિ યો ભિક્ખુ જીવિતિન્દ્રિયા વિયોજેય્ય વોરોપેય્ય, તસ્સ જીવિતિન્દ્રિયં ઉપચ્છિન્દેય્ય ઉપરોધેય્યાતિ વુત્તં હોતિ. તેનાહ પદભાજને ‘‘જીવિતા વોરોપેય્યાતિ જીવિતિન્દ્રિયં ઉપચ્છિન્દતિ ઉપરોધેતી’’તિ (પારા. ૧૭૨).

તઞ્ચ જીવિતિન્દ્રિયં રૂપારૂપવસેન દુવિધં હોતિ. તત્થ અરૂપજીવિતિન્દ્રિયં અવિગ્ગહત્તા ઉપક્કમવિસયં ન હોતિ. રૂપજીવિતિન્દ્રિયુપચ્છેદેન પન તદાયત્તવુત્તિતાય તંસમકાલમેવ ઓચ્છિજ્જમાનતાય એત્થ સામઞ્ઞેન ઉભયમ્પિ ગહેતબ્બં. ઇદઞ્ચ અતીતાનાગતં ન ગહેતબ્બં તસ્સ અવિજ્જમાનત્તા. ઉપક્કમવિસયારહં પન પચ્ચુપ્પન્નમેવ ગહેતબ્બં. તઞ્ચ ખણસન્તતિઅદ્ધાવસેન તિવિધં હોતિ.

તત્થ ઉપ્પાદટ્ઠિતિભઙ્ગવસેન ખણત્તયપરિયાપન્નો ભાવો ખણપચ્ચુપ્પન્નં નામ. તં સરસભઙ્ગભૂતત્તા સયં ભિજ્જમાનં ઉપક્કમસાધિયં વિનાસવન્તં ન હોતિ. આતપે ઠત્વા ગબ્ભં પવિટ્ઠસ્સ અન્ધકારવિગમન્તરઞ્ચ સીતેન ઓવરકં પવિટ્ઠસ્સ વિસભાગઉતુસમુટ્ઠાનેન સીતપનૂદન્તરઞ્ચ રૂપસન્તતિ સન્તતિપચ્ચુપ્પન્નં નામ. પટિસન્ધિચુતીનમન્તરાળપ્પવત્તિ ખન્ધસન્તતિ અદ્ધાપચ્ચુપ્પન્નં નામ. ઇમસ્મિં દ્વયે ઉપક્કમસમ્ભવો, તંવસેન ઉપચ્છિજ્જમાનં જીવિતં સન્તાનપરિહાનિપચ્ચયભાવતો સન્તતિઅદ્ધાપચ્ચુપ્પન્નદ્વયં યથાપરિચ્છિન્નકાલમપ્પત્વા ઉપક્કમવસેન અન્તરાયેવ નિરુજ્ઝતિ, તસ્મા સન્તતિઅદ્ધાપચ્ચુપ્પન્નરૂપજીવિતિન્દ્રિયઞ્ચ તંનિરોધેન નિરુજ્ઝમાનઅરૂપજીવિતિન્દ્રિયઞ્ચાતિ ઉભયં એત્થ ‘‘જીવિતા’’તિ ગહિતન્તિ વેદિતબ્બં. ઇદમેવ સન્ધાયાહ પદભાજને ‘‘સન્તતિં વિકોપેતી’’તિ (પારા. ૧૭૨).

ઇમિસ્સાવ પાણાતિપાતભાવે આપત્તિભાવતો એત્થ ઠત્વા અટ્ઠકથાયં (પારા. અટ્ઠ. ૨.૧૭૨) પાણપાણાતિપાતપાણાતિપાતીપાણાતિપાતપ્પયોગાનં વિભાગો દસ્સિતો. તત્થ પાણોતિ વોહારતો સત્તો, પરમત્થતો ઉપચ્છિજ્જમાનં જીવિતિન્દ્રિયં, તં ‘‘જીવિતા’’તિ ઇમિના વુત્તં. પાણાતિપાતો નામ વધકચેતના, સો ચ ‘‘વિયોજયે’’તિ ઇમિના સન્દસ્સિતો. પાણાતિપાતી નામ પુગ્ગલો, સો ચ ‘‘યો’’તિ ઇમિના સન્દસ્સિતો. પાણાતિપાતપ્પયોગો પન –

‘‘વુત્તા પાણાતિપાતસ્સ;

પયોગા છ મહેસિના’’તિ –

આદિના નયેન ઇધેવ વક્ખમાનવિભાગત્તા વક્ખમાનનયેનેવ દટ્ઠબ્બો.

અસ્સ સત્થં નિક્ખિપેય્ય વાતિ યોજના. અસ્સાતિ મનુસ્સજાતિકસ્સ. ‘‘હત્થપાસે’’તિ પાઠસેસો. હત્થપાસો નામ સમીપોતિ. અસ્સાતિ સમીપસમ્બન્ધે સામિવચનં. સત્થન્તિ એત્થ જીવિતવિહિં સનુપકરણભાવેન સમ્મતા ધારાવન્તઅસિઆદિ ચ ધારારહિતયટ્ઠિભિન્દિવાલલગુળાદિ ચ ઉપલક્ખણવસેન ગહેતબ્બા. સસતિ હિંસતીતિ સત્થં. તેનેવાહ પદભાજને ‘‘અસિં વા સત્તિં વા ભિન્દિવાલં વા લગુળં વા પાસાણં વા સત્થં વા વિસં વા રજ્જું વા’’તિ. ઇધાવુત્તં કરપાલિકાછુરિકાદિ સમુખં ‘‘સત્થં વા’’તિ ઇમિના સઙ્ગહિતં. નિક્ખિપેય્યાતિ યથા ભોગહેતું લભતિ, તથા ઉપનિક્ખિપેય્ય, અત્તવધાય ઇચ્છિતક્ખણે યથા ગણ્હાતિ, તથા સમીપે તેનેવ ચિત્તેન ઠપેય્યાતિ વુત્તં હોતિ. ઇમિના થાવરપ્પયોગો સન્દસ્સિતો.

મરણે ગુણં વા વદેય્યાતિ યોજના, મરણત્થાય મરણે ગુણં વણ્ણેતીતિ અત્થો. ‘‘જીવિતે આદીનવં દસ્સેતિ, મરણે ગુણં ભણતી’’તિ (પારા. ૧૭૨) પદભાજને વુત્તત્તા ‘‘કિં તુય્હિમિના પાપકેન દુજ્જીવિતેન, યો ત્વં ન લભસિ પણીતભોજનાનિ ભુઞ્જિતુ’’મિચ્ચાદિના નયેન મરણત્થાય જીવિતે અવણ્ણં વદન્તો ચ ‘‘ત્વં ખોસિ ઉપાસક કતકલ્યાણો અકતપાપો, મતં તે જીવિતા સેય્યો, ઇતો ત્વં કાલકતો વિવિધવિહઙ્ગમવિકૂજિતે પરમસુરભિકુસુમભૂસિતતરુવરનિચિતે પરમરતિકરલળિતગતિભાસિતવિલપિતસુરયુવતિગણવિચરિતે વરનન્દને અચ્છરાસઙ્ઘપરિવારિતો વિચરિસ્સસી’’તિઆદિના નયેન મરણત્થાય મરણાનિસંસં દસ્સેન્તો ચ ‘‘મરણે ગુણં વદેય્ય’’ઇચ્ચેવ વુચ્ચતિ.

મરણૂપાયં દેસેય્યાતિ યોજના. મરણાધિપ્પાયેનેવ ‘‘સત્થં વા આહર, વિસં વા ખાદ, રજ્જુયા વા ઉબ્બન્ધિત્વા કાલઙ્કરોહી’’તિ પદભાજને વુત્તસત્થહરણાનિ ચ અવુત્તમ્પિ સોબ્ભનરકપપાતાદીસુ પપતનઞ્ચાતિ એવમાદિકં મરણૂપાયં આચિક્ખેય્ય. ‘‘હોતિ અયમ્પી’’તિ પદચ્છેદો, અપીતિ પુબ્બે વુત્તદ્વયં સમુચ્ચિનોતિ. દ્વેધા ભિન્નસિલા વિય અસન્ધેય્યોવ સો ઞેય્યોતિ દ્વિધા ભિન્નપાસાણો વિય ભગવતો પટિપત્તિપટિવેધસાસનદ્વયેન સો પચ્ચુપ્પન્ને અત્તભાવે સન્ધાતુમસક્કુણેય્યોવાતિ ઞાતબ્બોતિ અત્થો.

૨૪૩. થાવરાદયોતિ આદિ-સદ્દેન વિજ્જામયઇદ્ધિમયપયોગદ્વયં સઙ્ગહિતં.

૨૪૪. તત્થાતિ તેસુ છસુ પયોગેસુ. સકો હત્થો સહત્થો, તેન નિબ્બત્તો સાહત્થિકો, પયોગો. ઇધ હત્થગ્ગહણં ઉપલક્ખણં, તસ્મા હત્થાદિના અત્તનો અઙ્ગપચ્ચઙ્ગેન નિપ્ફાદિતો વધપ્પયોગો સાહત્થિકોતિ વેદિતબ્બો.

૨૪૫. ‘‘ત્વં તં એવં પહરિત્વા મારેહી’’તિ ભિક્ખુનો પરસ્સ યં આણાપનં, અયમાણત્તિકો નયોતિ યોજના. આણત્તિકો નયોતિ આણત્તિયેવ આણત્તિકો. નેતિ પવત્તેતીતિ નયો, પયોગસ્સેતં નામં.

૨૪૬. દૂરન્તિ દૂરટ્ઠં. કાયેન પટિબદ્ધેનાતિ એત્થ કાયેકદેસો હત્થાદિ કાયો અવયવે સમુદાયોપચારતો ‘‘ગામો દડ્ઢો’’તિ યથા. કાયપટિબદ્ધં ચાપાદિકં પટિબદ્ધં નામ પુબ્બપદલોપેન ‘‘દેવદત્તો દત્તો’’તિ યથા. વા-સદ્દો લુત્તનિદ્દિટ્ઠો, કાયેન વા કાયપટિબદ્ધેન વાતિ વુત્તં હોતિ, ‘‘ઉસુઆદિનિપાતન’’ન્તિ ઇમિના સમ્બન્ધો. વિધાનં વિધિ, પયોગોતિ અત્થો.

૨૪૭. અસઞ્ચારિમુપાયેનાતિ અસઞ્ચારિમેન નિચ્ચલેન ઉપાયેન. ઓપતન્તિ એત્થાતિ ઓપાતો, સો આદિ યેસં અપસ્સેનવિસભેસજ્જસંવિધાનાદીનં તે ઓપાતાદયો, તેસં વિધાનં ઓપાતાદિવિધાનં, ઓપાતક્ખણનાદિકિરિયા.

૨૪૮. વિજ્જાયાતિ આથબ્બનવેદાગતમરણમન્તસઙ્ખાતવિજ્જાય. જપ્પનન્તિ યથા પરો ન સુણાતિ, તથા પુનપ્પુનં વચનં.

૨૪૯. મારણે સમત્થા યા કમ્મવિપાકજા ઇદ્ધિ, અયં ઇદ્ધિમયો પયોગો નામાતિ સમુદીરિતોતિ યોજના. કમ્મવિપાકે જાતા કમ્મવિપાકજા, ઇદ્ધિ, યા ‘‘નાગાનં નાગિદ્ધિ સુપણ્ણાનં સુપણ્ણિદ્ધિ યક્ખાનં યક્ખિદ્ધી’’તિઆદિના (પારા. અટ્ઠ. ૨.૧૭૨) બહુધા અટ્ઠકથાયં વુત્તા. તત્થ દિટ્ઠદટ્ઠફુટ્ઠવિસાનં નાગાનં દિસ્વા, ડંસિત્વા, ફુસિત્વા ચ પરૂપઘાતકરણે નાગિદ્ધિ વેદિતબ્બા. એવં સેસાનમ્પિ. ઇદ્ધિયેવ ઇદ્ધિમયો, ભાવનામયો ઇદ્ધિપ્પયોગો પનેત્થ ન ગહેતબ્બો. વુત્તઞ્હેતં અટ્ઠકથાયં –

‘‘કેચિ પન ભાવનામયિદ્ધિયાપિ પરૂપઘાતકરણં વદન્તિ. સહ પરૂપઘાતકરણેન ચ આદિત્તઘરૂપરિ ખિત્તસ્સ ઉદકઘટસ્સ ભેદનં વિય ઇદ્ધિવિનાસઞ્ચ ઇચ્છન્તિ, તં તેસં ઇચ્છામત્તમેવ. કસ્મા? યસ્મા તં કુસલવેદનાવિતક્કપરિત્તત્તિકાદીહિ ન સમેતિ. કથં? અયઞ્હિ ભાવનામયિદ્ધિ નામ ચતુત્થજ્ઝાનમયા કુસલત્તિકે કુસલા ચેવ અબ્યાકતા ચ, પાણાતિપાતો અકુસલો. વેદનાત્તિકે અદુક્ખમસુખસમ્પયુત્તા, પાણાતિપાતો દુક્ખસમ્પયુત્તો. વિતક્કત્તિકે અવિતક્કઅવિચારા, પાણાતિપાતો સવિતક્કસવિચારો. પરિત્તત્તિકે મહગ્ગતા, પાણાતિપાતો પરિત્તોયેવા’’તિ (પારા. અટ્ઠ. ૨.૧૭૨).

૨૫૦. તત્થાતિ તેસુ છબ્બિધેસુ પયોગેસુ. ઉદ્દેસોપીતિ ઉદ્દિસનં ઉદ્દેસો, તંસહિતો પયોગોપિ ઉદ્દેસોતિ વુત્તં હોતિ ‘‘કુન્તે પવેસેહી’’તિ યથા. એવં વત્તબ્બતાય ચ અનુદ્દેસોતિ તબ્બિપરીતવચનમેવ ઞાપકન્તિ વેદિતબ્બં. એત્થ એકેકો ઉદ્દેસોપિ અનુદ્દેસોપિ હોતીતિ તેસમયં ભેદો પન દુવિધો હોતીતિ પરિદીપિતોતિ યોજના. ઇમેસુ છસુ પયોગેસ્વેવ એકેકસ્સેવ ઉદ્દિસ્સાનુદ્દિસ્સકિરિયમાનતાય દુવિધભાવતો તેસં દ્વાદસવિધો ભેદો પદભાજને ચ અટ્ઠકથાય ચ દીપિતો, તત્થ વિનિચ્છયમિદાનિ દસ્સયિસ્સામીતિ અધિપ્પાયો.

૨૫૧. બહૂસુપીતિ મનુસ્સેસુ બહૂસુપિ. તેન કમ્મેનાતિ પહારદાનસઙ્ખાતેન કમ્મેન. બજ્ઝતીતિ અપાયં નેતું કમ્મપાસેન કમ્મન્તરં નિવારેત્વા બજ્ઝતીતિ અત્થો.

૨૫૨. પહારેપીતિ પહરણેપિ. દેહિનોતિ મનુસ્સવિગ્ગહસ્સ. તસ્સાતિ પહટસ્સ.

૨૫૩. પહટમત્તે વાતિ પહટક્ખણે વા. પચ્છાતિ તપ્પચ્ચયા કાલન્તરે વા. ઉભયથાપિ ચ મતેતિ દ્વિન્નં આકારાનમઞ્ઞતરેન મતેપિ. હન્તા વધકો. પહટમત્તસ્મિન્તિ તસ્મિં મરણારહપહારસ્સ લદ્ધક્ખણેયેવ, મરણતો પુબ્બભાગેયેવાતિ મત્તસદ્દેન દીપેતિ. મરણત્થાય ચ અઞ્ઞત્થાય ચ દિન્નેસુ અનેકેસુ પહારેસુ મરણત્થાય દિન્નપ્પહારેનેવ યદા કદાચિ મરિસ્સતિ, પહારદાનક્ખણેયેવ પારાજિકં હોતિ. અમરણાધિપ્પાયેન દિન્નપ્પહારબલેન ચે મરેય્ય, ન હોતીતિ વુત્તં હોતીતિ.

૨૫૪. દ્વે પયોગાતિ ઉદ્દિસ્સાનુદ્દિસ્સકિરિયાભેદભિન્ના સાહત્થિકાણત્તિકા દ્વે પયોગા.

૨૫૫. કરણસ્સાતિ કિરિયાય. વિસેસોતિ નાનત્તં. આણત્તિનિયામકાતિ આણત્તિં નિયામેન્તિ વવત્થાપેન્તીતિ આણત્તિનિયામકા.

૨૫૬. તત્થાતિ તેસુ આણત્તિનિયામકેસુ છસુ આકારેસુ. યોબ્બનાદિ ચાતિ આદિ-સદ્દેન થાવરિયમન્દખિડ્ડવુદ્ધાદિઅવત્થાવિસેસો સઙ્ગહિતો.

૨૫૭. યં માતિકાય નિદ્દિટ્ઠં સત્થં, તં કતમં?. સત્તમારણન્તિ સત્તે મારેન્તિ એતેનાતિ સત્તમારણં, અસિઆદિવધોપકરણં.

૨૫૮. વિજ્ઝનન્તિ ઉસુઆદીહિ વિજ્ઝનં. ભેદનન્તિ કકચાદીહિ દ્વિધાકરણં. છેદનન્તિ ખગ્ગાદીહિ દ્વિધાકરણં. તાળનન્તિ મુગ્ગરાદીહિ આઘાતનં. એવમાદિવિધોતિ એવમાદિપ્પકારો. અનેકોતિ બહુકો ભેદો. કરણસ્સ વિસેસો કિરિયાવિસેસોતિ અત્થો.

૨૫૯-૬૦. ‘‘પુરતો પહરિત્વાન મારેહી’’તિ યો ભાસિતો આણાપકેન, તેન આણત્તેન પચ્છતો…પે… મારિતેતિ યોજના. વત્થાણત્તિ વિસઙ્કેતાતિ એત્થ ‘‘યં ‘મારેહી’તિ…પે… તતો’’તિ વત્થુવિસઙ્કેતો દસ્સિતો. ‘‘પુરતો…પે… મારિતે’’તિ આણત્તિવિસઙ્કેતો દસ્સિતો. મૂલટ્ઠોતિ આણાપકો. મૂલન્તિ હિ પુબ્બકિરિયાનુરૂપં આણાપનં, તત્થ ઠિતોતિ મૂલટ્ઠો.

૨૬૧. ઇમિના વિસઙ્કેતે આણાપકસ્સ અનાપત્તિં દસ્સેત્વા સઙ્કેતે અવિરાધિતે ઉભિન્નમ્પિ પારાજિકં દસ્સેતુમાહ ‘‘વત્થુ’’ન્તિઆદિ. તં વત્થું અવિરજ્ઝિત્વા મારિતે ઉભયેસં…પે… ઉદીરિતો, યથાણત્તિ ચ મારિતે…પે… ઉદીરિતોતિ યોજના. મારિતે વત્થુસ્મિન્તિ સામત્થિયા લબ્ભતિ. ઉભયેસન્તિ આણાપકઆણત્તાનં. યથાકાલન્તિ આણાપકસ્સ આણત્તિક્ખણં, આણત્તસ્સ મારણક્ખણઞ્ચ અનતિક્કમિત્વા. બન્ધનં બન્ધો, કમ્મુના બન્ધો કમ્મબન્ધો. અથ વા બજ્ઝતિ એતેનાતિ બન્ધો, કમ્મમેવ બન્ધો કમ્મબન્ધો.

૨૬૪. વિસઙ્કેતો નાતિ વિસઙ્કેતો નત્થિ, દ્વિન્નમ્પિ યથાકાલપરિચ્છેદં કમ્મબન્ધોયેવાતિ અત્થો.

૨૬૫. સબ્બસોતિ સબ્બેસુ કાલભેદેસુ, સબ્બસો વેદિતબ્બોતિ વા સમ્બન્ધો. સબ્બસોતિ સબ્બપ્પકારેન. વિભાવિનાતિ પણ્ડિતેન. સો હિ અત્થં વિભાવેતીતિ તથા વુત્તો.

૨૬૬-૭-૮. ‘‘ઇમં ગામે ઠિત’’ન્તિ ઇદં તં સઞ્જાનિતું વુત્તં, ન મારણક્ખણટ્ઠાનનિયમત્થાયાતિ ‘‘યત્થ કત્થચિ ઠિત’’ન્તિ વત્વાપિ ‘‘નત્થિ તસ્સ વિસઙ્કેતો’’તિ આહ. તસ્સાતિ આણાપકસ્સ. ‘‘તત્થા’’તિ વા પાઠો, તસ્સં આણત્તિયન્તિ અત્થો. ‘‘ગામેયેવ ઠિતં વેરિં મારેહી’’તિ સાવધારણં આણત્તો વને ચે ઠિતં મારેતિ વા ‘‘વનેયેવ ઠિતં વેરિં મારેહી’’તિ સાવધારણં વુત્તો ગામે ઠિતં ચે મારેતિ વાતિ યોજના. ‘‘ભિક્ખુના સાવધારણ’’ન્તિ ચ પોત્થકેસુ લિખન્તિ, તં અગ્ગહેત્વા ‘‘વને વા સાવધારણ’’ન્તિ પાઠોયેવ ગહેતબ્બો. વિગતો સઙ્કેતો આણત્તિનિયામો એત્થાતિ વિસઙ્કેતો.

૨૬૯. સબ્બદેસેસૂતિ ગામવનઅઙ્ગણગેહાદીસુ સબ્બેસુ ઠાનેસુ. ભેદતોતિ નાનત્તતો.

૨૭૦. ‘‘સત્થેન પન મારેહી’’તિ યેન કેનચિ યો આણત્તો, તેન યેન કેનચિ સત્થેન મારિતે વિસઙ્કેતો નત્થીતિ યોજના.

૨૭૧-૨. ઇમિના વાસિના હીતિ એત્થ હીતિ પદપૂરણે. ‘‘ઇમિના અસિના મારેય્યા’’તિ વુત્તો અઞ્ઞેન અસિના મારેતિ વા ‘‘ત્વં ઇમસ્સ અસિસ્સ એતાય ધારાય મારય’’ ઇતિ વુત્તો તં વેરિં સચે ઇતરાય ધારાય મારેતિ વા થરુના મારેતિ વા તુણ્ડેન મારેતિ વા, તથા મારિતે વિસઙ્કેતોયેવ હોતીતિ યોજના. થરુનાતિ ખગ્ગમુટ્ઠિના. તુણ્ડેનાતિ ખગ્ગતુણ્ડેન. ‘‘વિસઙ્કેતોવા’’તિ સઙ્કેતવિરાધેનેવ પારાજિકં ન હોતીતિ દસ્સનપદમેતં.

૨૭૩. સબ્બાવુધકજાતિસૂતિ ઇધાવુત્તકરપાલિકાછુરિકાદિસબ્બપહરણસામઞ્ઞેસુ. વિસેસતોતિ ભેદતો.

૨૭૪. પરેનાતિ ભિક્ખુના. સોતિ આણત્તો. નિસિન્નં નં મારેતિ, વિસઙ્કેતો ન વિજ્જતીતિ ‘‘ગચ્છન્તમેવ મારેહી’’તિ સાવધારણં અવુત્તત્તા ‘‘નિસિન્નોપિ સોયેવા’’તિ તં મારેન્તસ્સ વિસઙ્કેતો ન હોતિ, અવધારણં અન્તરેન કથનં તં સઞ્જાનાપેતું વુચ્ચતીતિ ઇરિયાપથનિયામકં ન હોતીતિ અધિપ્પાયો.

૨૭૫-૬. અસતિ સાવધારણે વિસઙ્કેતાભાવં દસ્સેત્વા ઇદાનિ સાવધારણે ઇરિયાપથન્તરેસુ વિસઙ્કેતં દસ્સેતુમાહ ‘‘નિસિન્નંયેવા’’તિઆદિ. ‘‘નિસિન્નંયેવ મારેહી’’તિ વુત્તો ગચ્છન્તં મારેતિ, વિસઙ્કેતન્તિ ઞાતબ્બં. ‘‘ગચ્છન્તંયેવ મારેહી’’તિ વુત્તો નિસિન્નં મારેતિ, વિસઙ્કેતન્તિ ઞાતબ્બન્તિ યોજના. ઇમમેવ યોજનાક્કમં સન્ધાયાહ ‘‘યથાક્કમ’’ન્તિ.

૨૭૭. વિજ્ઝિત્વાતિ સરાદીહિ વિજ્ઝિત્વા.

૨૭૮. છિન્દિત્વાતિ અસિઆદીહિ છિન્દિત્વા. પુન સોતિ પયોગો.

૨૭૯. કરણેસૂતિ વિજ્ઝનાદિકિરિયાવિસેસેસુ.

૨૮૦-૧. એત્તાવતા આણત્તિનિયામકનિદ્દેસં દસ્સેત્વા ઇદાનિ દીઘાદિલિઙ્ગવસેનાપિ સમ્ભવન્તં વિસઙ્કેતં દસ્સેતુમાહ ‘‘દીઘ’’ન્તિઆદિ. ‘‘દીઘં…પે… થૂલં મારેહીતિ અનિયમેત્વા આણાપેતી’’તિ (પારા. અટ્ઠ. ૨.૧૭૪) અટ્ઠકથાવચનતો એવ-કારં વિના ‘‘દીઘં મારેહી’’તિ અનિયમેત્વા કેનચિ યો આણત્તો હોતિ, સોપિ આણત્તો યં કિઞ્ચિ તાદિસં સચે મારેતિ, નત્થિ તત્થ વિસઙ્કેતો, ઉભિન્નમ્પિ પરાજયોતિ યોજના. એવં ‘‘રસ્સ’’ન્તિઆદિસબ્બપદેહિપિ પચ્ચેકં યોજના કાતબ્બા. અનિયમેત્વાતિ વિસઙ્કેતાભાવસ્સ હેતુદસ્સનં. એવકારો વાક્યાલઙ્કારો. તત્થાતિ આણત્તિકપ્પયોગે. ‘‘ઉભિન્નમ્પિ પરાજયો’’તિ વુત્તત્તા આણાપકં વિના અઞ્ઞં યથાવુત્તક્ખણં મનુસ્સવિગ્ગહં ‘‘યં કિઞ્ચિ તાદિસ’’ન્તિ ઇમિના દસ્સેતિ.

સચે આણાપકો આણાપેત્વા અત્તાનમેવ મારેતિ, આણાપકો દુક્કટં આપજ્જિત્વા મરતિ, આણત્તસ્સ પારાજિકં. આણાપકેન અત્તાનમુદ્દિસ્સ આણત્તિયા કતાય આણત્તો અજાનિત્વા તાદિસં અઞ્ઞં મારેતિ, ઓકાસસ્સ અનિયમિતત્તા આણાપકો મુચ્ચતિ, ઇતરો કમ્મુના બજ્ઝતિ. યદિ ‘‘અમુકસ્મિં રત્તિટ્ઠાને વા દિવાટ્ઠાને વા નિસિન્નં ઈદિસં મારેહી’’તિ ઓકાસં નિયમેત્વા આણાપેતિ, તત્થ આણાપકતો અઞ્ઞસ્મિં મારિતે ઉભિન્નમ્પિ પારાજિકં. તતો બહિ મારિતે વધકસ્સેવ કમ્મબન્ધો. આણાપકો અત્તાનમેવ ઉદ્દિસ્સ આણાપેતિ, ઇતરો ચ તમેવ તત્થ મારેતિ, આણાપકસ્સ દુક્કટં, આણત્તસ્સ પારાજિકં. સચે અઞ્ઞત્થ મારેતિ, મૂલટ્ઠો મુચ્ચતિ. અજાનિત્વા અઞ્ઞં તત્થ વા અઞ્ઞત્થ વા મારેતિ, વધકો પારાજિકં આપજ્જતિ, મૂલટ્ઠો મુચ્ચતિ. આનન્તરિયવત્થુમ્હિ આનન્તરિયેન સદ્ધિં યોજેતબ્બં.

૨૮૨. યો મનુસ્સં કઞ્ચિ ઉદ્દિસ્સ સચે ઓપાતં ખણતિ, તથા ઓપાતં ખણન્તસ્સ તસ્સ દુક્કટં નામ આપત્તિ હોતીતિ અજ્ઝાહારયોજના. યોજના ચ નામેસા યથારુતયોજના, અજ્ઝાહારયોજનાતિ દુવિધા. તત્થ પાઠાગતપદાનમેવ યોજના યથારુતયોજના, ઊનપૂરણત્થમજ્ઝાહારપદેહિ સહ પાઠાગતપદાનં યોજના અજ્ઝાહારયોજનાતિ વેદિતબ્બા. ‘‘ખણન્તસ્સ ચ ઓપાત’’ન્તિ પોત્થકેસુ પાઠો દિસ્સતિ. ‘‘ખણન્તસ્સ તથોપાત’ન્તિ પાઠો સુન્દરો’’તિ નિસ્સન્દેહે વુત્તં. ‘‘આવાટન્તિ એતસ્સ ‘ઓપાત’ન્તિ પરિયાયો’’તિ ચ વુત્તં. તતોપિ –

‘‘મનુસ્સં કઞ્ચિ ઉદ્દિસ્સ;

યો ચે ખણતિવાટકં;

ખણતો તં તથા તસ્સ;

હોતિ આપત્તિ દુક્કટ’’ન્તિ. –

પાઠો સુન્દરતરો. જાતપથવિં ખણન્તસ્સ પારાજિકપયોગત્તા પયોગગણનાય દુક્કટં.

૨૮૩. તત્થાતિ તસ્મિં આવાટે. તસ્સાતિ પતિતસ્સ મનુસ્સવિગ્ગહસ્સ. દુક્ખસ્સુપ્પત્તિયાતિ દુક્ખુપ્પત્તિહેતુ. તસ્સાતિ યેન આવાટો ખતો, તસ્સ ભિક્ખુનો. પતિત્વા સો ચે મરતિ, તસ્મિં મતે તસ્સ ભિક્ખુનો પારાજિકં ભવેતિ યોજના.

૨૮૪. અઞ્ઞસ્મિન્તિ યં સમુદ્દિસ્સ આવાટો ખતો, તતો અઞ્ઞસ્મિં. અનુદ્દિસ્સકન્તિ કિરિયાવિસેસનં, અનુદ્દિસ્સકં કત્વાતિ અત્થો. ઓપાતવિસેસનં ચે, ‘‘અનુદ્દિસ્સકો ઓપાતો’’તિ પદચ્છેદો. ‘‘અગ્ગમક્ખાયતી’’તિઆદીસુ (સં. નિ. ૫.૧૩૯; અ. નિ. ૪.૩૪; ૧૦.૧૫; ઇતિવુ. ૯૦; નેત્તિ. ૧૭૦) વિય ઓ-કારટ્ઠાને અ-કારો, મ-કારાગમો ચ દટ્ઠબ્બો, અનોદિસ્સકો ઓપાતો ખતો હોતીતિ અત્થો.

૨૮૫. ‘‘એત્થ પતિત્વા યો કોચિ મરતૂ’’તિ અનોદિસ્સકો ઓપાતો સચે ખતો હોતિ, યત્તકા નિપતિત્વા મરન્તિ ચે, અસ્સ તત્તકા દોસા હોન્તીતિ યોજના. ‘‘યો કોચી’’તિ ઇમિના અત્તનો માતાપિતરો ચ સઙ્ગહિતા. દોસાતિ કમ્મબન્ધદોસા, પારાજિકં પન એકમેવ. અસ્સાતિ યેન અનોદિસ્સ ઓપાતો ખતો, તસ્સ.

૨૮૬. આનન્તરિયવત્થુસ્મિં મતેતિ પાઠસેસો, ‘‘તત્થ પતિત્વા’’તિ અધિકારો, અરહન્તે, માતરિ, પિતરિ ચ તસ્મિં પતિત્વા મતે કાલકતેતિ અત્થો. આનન્તરિયકન્તિ એત્થ સકત્થે, કુચ્છિતે, સઞ્ઞાયં વા ક-પચ્ચયો દટ્ઠબ્બો. ‘‘તથા’’તિ ઇમિના ‘‘આનન્તરિયવત્થુસ્મિ’’ન્તિ ઇમસ્મિં સમાસપદે અવયવભૂતમ્પિ ‘‘વત્થુસ્મિ’’ન્તિ ઇદઞ્ચ ‘‘તત્થ પતિત્વા મતે’’તિ ઇદઞ્ચ આકડ્ઢતિ. થુલ્લચ્ચયાદીનં વત્થુસ્મિં તત્થ પતિત્વા મતે થુલ્લચ્ચયાદયો હોન્તીતિ યોજના. તસ્મિં આવાટે પતિત્વા યક્ખાદીસુ મતેસુ, પારાજિકવત્થુનો દુક્ખુપ્પત્તિયઞ્ચ થુલ્લચ્ચયં, મનુસ્સવિગ્ગહે મતે પારાજિકં, તિરચ્છાને મતે પાચિત્તિયન્તિ વુત્તં હોતિ.

૨૮૭. પાણાતિપાતા દ્વેતિ દ્વિન્નં મતત્તા દ્વે પાણાતિપાતા, એકેન પારાજિકં, ઇતરેન કમ્મબન્ધોયેવ. એકોવેકેકધંસનેતિ માતુ વા દારકસ્સ વા મરણે એકો પાણાતિપાતોવ.

૨૮૮. ચોરેહિ અનુબદ્ધો એત્થ આવાટે પતિત્વા મરિસ્સતિ ચે, ઓપાતખણકસ્સેવ પારાજિકં હોતિ કિરાતિ યોજના. કિરાતિ અનુસ્સવને અરુચિસૂચકં.

૨૮૯-૯૦. વેરિનો ભિક્ખુતો અઞ્ઞે વેરિપુગ્ગલા. તત્થ તસ્મિં ઓપાતે સચે મનુસ્સં પાતેત્વા મારેન્તિ, તથા વેરિનો તત્થ સયમેવ પતિતં મનુસ્સં બહિ નીહરિત્વા સચે મારેન્તિ, તત્થ ઓપપાતિકા મનુસ્સા ઓપાતે નિબ્બત્તિત્વા તતો નિક્ખન્તું અસક્કોન્તા મતા ચે સિયું, સબ્બત્થ ચ યથાવુત્તસબ્બવારેસુ ઓપાતખણકસ્સેવ પરાજયોતિ યોજના. નિબ્બત્તિત્વા હીતિ એત્થ હીતિ પદપૂરણે. યત્થ યત્થ નિપાતસદ્દાનં અત્થો ન દસ્સિતો, તત્થ તત્થ પદપૂરણમત્તતા વેદિતબ્બા.

૨૯૧. યક્ખાદયોતિ આદિ-સદ્દેન તિરચ્છાનાનં સઙ્ગહો. વત્થુવસાતિ થુલ્લચ્ચયપાચિત્તિયાનં વત્થુભૂતયક્ખતિરચ્છાનાનં વસા. થુલ્લચ્ચયાદયોતિ આદિ-સદ્દેન પાચિત્તિયસઙ્ગહો.

૨૯૩. અયં નયોતિ ‘‘અનાપત્તી’’તિ યથાવુત્તો નયો.

૨૯૪-૫. બજ્ઝન્તીતિ સચે અવસ્સં બજ્ઝન્તિ. તત્થાતિ તસ્મિં પાસે. ‘‘હત્થતો મુત્તમત્તસ્મિ’’ન્તિ ઇમિના પયોગસ્સ અત્થસાધકતં દીપેતિ.

૨૯૬. યં પન ઉદ્દિસ્સ પાસો ઓડ્ડિતો, તતો અઞ્ઞસ્સ બન્ધને તુ અનાપત્તિ પકાસિતાતિ યોજના.

૨૯૭. મુધા વાપીતિ અમૂલેન વાપિ. મૂલટ્ઠસ્સેવાતિ પાસકારકસ્સેવ. કમ્મબન્ધોતિ પાણાતિપાતો. બજ્ઝતિ એતેનાતિ બન્ધો, કમ્મમેવ બન્ધો કમ્મબન્ધો. પારાજિકમત્તે વત્તબ્બેપિ યાવ સો વત્તતિ, તાવ તત્થ બજ્ઝિત્વા મતસત્તેસુ પઠમમતસ્સ વસેન પારાજિકં, અવસેસાનં પાણાતિપાતસઙ્ખાતસ્સ અકુસલરાસિનો સમ્ભવતો તં સબ્બં સઙ્ગહેત્વા સામઞ્ઞેન દ્વયમ્પિ દસ્સેતુમાહ ‘‘કમ્મબન્ધો’’તિ.

૨૯૮. ‘‘સચે યેન લદ્ધો, સો ઉગ્ગળિતં વા પાસં સણ્ઠપેતિ, તસ્સ પસ્સેન વા ગચ્છન્તે દિસ્વા વતિં કત્વા સમ્મુખે પવેસેતિ, થદ્ધતરં વા પાસયટ્ઠિં ઠપેતિ, દળ્હતરં વા પાસરજ્જું બન્ધતિ, થિરતરં વા ખાણુકં આકોટેતી’’તિ (પારા. અટ્ઠ. ૨.૧૭૬) અટ્ઠકથાગતં વિનિચ્છયં સઙ્ગહિતુમાહ ‘‘પાસમુગ્ગળિતમ્પિ વા’’તિ. એત્થ અવુત્તસમુચ્ચયત્થેન પિ-સદ્દેન ‘‘સણ્ઠપેતી’’તિઆદિકા ‘‘બન્ધતી’’તિ દસ્સિતકિરિયાવસાના પયોગા દસ્સિતા. થિરં વાપીતિ એત્થ અપિ-સદ્દો અટ્ઠકથાય અવસિટ્ઠં ‘‘ખાણુકં આકોટેતી’’તિ કિરિયં સમુચ્ચિનોતિ ઉભયત્થપિ પકારન્તરવિકપ્પત્થત્તાતિ ગહેતબ્બા. એવન્તિ એવં સતિ. યેન પાસો લદ્ધો, તેનાપિ એવં પાસે કતવિસેસે સતીતિ વુત્તં હોતિ. ઉભિન્નન્તિ પાસકારકસ્સ ચ ઇદાનિ લભિત્વા પટિજગ્ગન્તસ્સ ચાતિ ઉભયેસં.

૨૯૯-૩૦૦. યોતિ પાસકારકો, લદ્ધપાસકોતિ ઇમેસં યો કોચિ. ઉગ્ગળાપેત્વાતિ વિઘાટેત્વા, યથા તત્થ પાણિનો ન બજ્ઝન્તિ, એવં કત્વાતિ અત્થો. તત્થ ચાતિ પુન સણ્ઠપિતે પાસે ચ. કો વિમુચ્ચતિ? યેન લદ્ધો, સો.

૩૦૧-૨. ગોપેત્વાતિ ગોપનહેતુ મોક્ખો ન હોતીતિ યોજના. ‘‘સીહં દિસ્વા ભયં હોતી’’તિઆદીસુ વિય હેતુમ્હિ ત્વા-પચ્ચયો દટ્ઠબ્બો. તમઞ્ઞો…પે… ન ચ મુચ્ચતીતિ એત્થ ન ચાતિ નેવ. નાસેત્વા સબ્બસો વાતિ સો યથા યસ્સ કસ્સચિ સત્તસ્સ વિનાસોપકરણં ન હોતિ, તથા છિન્દનાદીહિ નાસેત્વા. તં પાસયટ્ઠિં. કો વિમુચ્ચતિ? પાસકારકો.

૩૦૩. સૂલં રોપેન્તસ્સાતિ સૂલં નિખણન્તસ્સ. સજ્જેન્તસ્સાતિ સણ્ઠપેન્તસ્સ.

૩૦૪. અસઞ્ચિચ્ચાતિ એત્થ ‘‘કતેન પયોગેના’’તિ પાઠસેસો, ‘‘મતેપિ અનાપત્તી’’તિ એતેહિ સમ્બન્ધો. ‘‘ઇમિનાહં ઉપક્કમેન ઇમં મારેસ્સામી’’તિ અચેતેત્વા અપકપ્પેત્વા અવધકચેતનો હુત્વા કતેન અઞ્ઞત્થિકેનપિ ઉપક્કમેન પરે મતેપિ આપત્તિ નત્થીતિ અત્થો, મુસલુસ્સાપનાદિવત્થૂસુ (પારા. ૧૮૦) વિય અયં સત્તોતિસઞ્ઞી હુત્વા ‘‘ઇમિના ઉપક્કમેન ઇમં મારેસ્સામી’’તિ વીતિક્કમસમુટ્ઠાપકચેતનાસમ્પયુત્તવિકપ્પરહિતો હુત્વા અઞ્ઞત્થિકેન પયોગેન મનુસ્સે મતેપિ પારાજિકં નત્થીતિ વુત્તં હોતિ.

અજાનન્તસ્સાતિ ‘‘ઇમિના અયં મરિસ્સતી’’તિ અજાનન્તસ્સ ઉપક્કમેન પરે મતેપિ અનાપત્તિ, વિસગતપિણ્ડપાતવત્થુમ્હિ (પારા. ૧૮૧) વિય ‘‘ઇદં કારણ’’ન્તિ અજાનિત્વા કતેન મનુસ્સે મતેપિ અનાપત્તીતિ વુત્તં હોતિ. ‘‘તથા’’તિ ઇમિના ‘‘અનાપત્તી’’તિ આકડ્ઢતિ. અમરણચિત્તસ્સ અમરણિચ્છાસહિતચિત્તસ્સ ઉપક્કમેન પરે મતેપિ અનાપત્તિ વુદ્ધપબ્બજિતાદિવત્થૂસુ (પારા. ૧૮૦) વિયાતિ અત્થો. ઉમ્મત્તકાદયો વુત્તસરૂપાયેવ.

૩૦૫. ‘‘મનુસ્સપાણિમ્હી’’તિ ઇમિના મનુસ્સભાવો અઙ્ગભાવેન દસ્સિતો. ‘‘સચસ્સ ચિત્તં મરણૂપસંહિત’’ન્તિ ઇમિના મરણૂપસંહિતચિત્તતા દસ્સિતા.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

તતિયપારાજિકકથાવણ્ણના નિટ્ઠિતા.

ચતુત્થપારાજિકકથાવણ્ણના

૩૦૬-૭. એવં નાતિસઙ્ખેપવિત્થારનયેન તતિયપારાજિકવિનિચ્છયં દસ્સેત્વા ઇદાનિ ચતુત્થપારાજિકવિનિચ્છયં દસ્સેતુમાહ ‘‘અસન્ત’’ન્તિઆદિ. તત્થ ‘‘અસન્ત’’ન્તિ અપેક્ખિત્વા ‘‘અત્તની’’તિ ચ ‘‘ઝાનાદિભેદ’’ન્તિ અપેક્ખિત્વા ‘‘ઉત્તરિમનુસ્સધમ્મ’’ન્તિ ચ ‘‘સમુદાચરેય્યા’’તિ અપેક્ખિત્વા ‘‘યો ભિક્ખૂ’’તિ ચ સામત્થિયા લબ્ભતીતિ અજ્ઝાહરિત્વા ‘‘અત્તનિ અસન્ત’’ન્તિઆદિના નયેન યોજેતબ્બં.

અત્તનિ અસન્તન્તિ તસ્મિં અત્તભાવે અત્તનો સન્તાને અનુપ્પાદિતતાય અવિજ્જમાનં. અત્તસ્સિતમેવ કત્વાતિ અત્તુપનાયિકં કત્વા અત્તનિ વિજ્જમાનં વિય કત્વા તં ઉપનેત્વા. ભવં અધિટ્ઠાય ચ વત્તમાનન્તિ પટિસન્ધિતો પટ્ઠાય ચ વત્તન્તં ભવં ચિત્તેન અધિટ્ઠહિત્વા તક્કેત્વા, ચિત્તે ઠપેત્વાતિ વુત્તં હોતિ. અઞ્ઞાપદેસઞ્ચ વિનાતિ ‘‘યો તે વિહારે વસતીધ ભિક્ખૂ’’તિઆદિના નયેન વક્ખમાનં પરિયાયકથં ઠપેત્વા. અધિમાનઞ્ચ વિનાતિ અદિટ્ઠે દિટ્ઠસઞ્ઞિતાદિસભાવં અધિગતમાનસઙ્ખાતં ‘‘અધિગતઉત્તરિમનુસ્સધમ્મો અહમ્હી’’તિ અધિમાનઞ્ચ ઠપેત્વા. ઝાનાદિભેદન્તિ ઝાનાદયો ભેદા વિસેસા યસ્સ તં ઝાનાદિભેદં, ‘‘ઉત્તરિમનુસ્સધમ્મો નામ ઝાનં વિમોક્ખો સમાધિ સમાપત્તિ ઞાણદસ્સનં મગ્ગભાવના ફલસચ્છિ કિરિયા કિલેસપ્પહાનં વિનીવરણતા ચિત્તસ્સ સુઞ્ઞાગારે અભિરતી’’તિ (પારા. ૧૯૮, ૧૯૯) પદભાજને વુત્તં ઝાનાદિધમ્મવિસેસન્તિ અત્થો. ‘‘ઉત્તરિમનુસ્સધમ્મન્તિ ઉત્તરિમનુસ્સાનં ઝાયીનઞ્ચેવ અરિયાનઞ્ચ ધમ્મ’’ન્તિ (પારા. અટ્ઠ. ૨.૧૯૭) અટ્ઠકથાય વુત્તં ઝાનલાભીહિ ચેવ અટ્ઠહિ અરિયપુગ્ગલેહિ ચ અધિગતત્તા તેસં સન્તકન્તિ સઙ્ખ્યં ગતં ઉત્તરિમનુસ્સધમ્મં.

વિઞ્ઞત્તિપથે ઠિતસ્સ કાયેન વા વાચાય વા યો ભિક્ખુ સમુદાચરેય્યાતિ અજ્ઝાહરિત્વા યોજેતબ્બં. વિઞ્ઞત્તિપથે ઠિતસ્સાતિ દ્વાદસહત્થબ્ભન્તરે પદેસે ઠિતસ્સ ‘‘ઇત્થિયા વા પુરિસસ્સ વા ગહટ્ઠસ્સ વા પબ્બજિતસ્સ વા’’તિ (પારા. ૧૯૮) પદભાજને વુત્તસ્સ યસ્સ કસ્સચિ. કાયેન વાતિ હત્થમુદ્દાદિવસેન કાયેન વા. ‘‘સિક્ખાપચ્ચક્ખાનં હત્થમુદ્દાય સીસં ન ઓતરતિ, ઇદં અભૂતારોચનં હત્થમુદ્દાયપિ ઓતરતી’’તિ (પારા. અટ્ઠ. ૨.૨૧૫) અટ્ઠકથાયં વુત્તત્તા ઇધ હત્થમુદ્દાદિહત્થવિકારો ચ અઙ્ગપચ્ચઙ્ગચોપનઞ્ચ ‘‘કાયેના’’તિ ઇમિના ગહેતબ્બં. વાચાય વાતિ યો સવનૂપચારે ઠિતો તેન વિઞ્ઞાતું સક્કુણેય્યેન યેન કેનચિ વોહારેન વા. યો ભિક્ખૂતિ યો ઉપસમ્પન્નો થેરો વા નવો વા મજ્ઝિમો વા. સમુદાચરેય્યાતિ ‘‘પઠમં ઝાનં સમાપજ્જામી’’તિઆદિવચનપ્પકારેસુ યં કઞ્ચિ પકારં વદેય્ય. તદત્થેતિ તેન વુત્તવાક્યસ્સ અત્થે. ઞાતેવાતિ ઞાતે એવ. માતુગામં વા પુરિસં વા યં કિઞ્ચિ ઉદ્દિસ્સ વુત્તે, તેનેવ વા અનુદ્દિસ્સ વુત્તે સવનૂપચારે ઠિતેન યેન કેનચિ મનુસ્સભૂતેન વચનસમનન્તરમેવ ‘‘અયં પઠમજ્ઝાનલાભી’’તિઆદિકે યથાવુત્તે અત્થપ્પકારે ઞાતેયેવ. ‘‘સો’’તિ અજ્ઝાહરિત્વા ‘‘સો પુન રુળ્હિભાવે અભબ્બો’’તિ યોજેતબ્બં, અત્તનિ અવિજ્જમાનગુણં સન્તં વિય કત્વા ઇચ્છાચારે ઠત્વા એવં કથિતપુગ્ગલો સીલે પતિટ્ઠાય ઉપરૂપરિ લબ્ભમાનલોકિયલોકુત્તરગુણેહિ બુદ્ધિસઙ્ખાતં સાસને બુદ્ધિમધિગન્તું અનરહોતિ અત્થો. કિં વિયાતિ આહ ‘‘યથેવ…પે… રુળિભાવે’’તિ. ‘‘યથા’’તિ એતેન સમ્બન્ધો ‘‘તથા’’તિ, યથા તાલો મત્થકચ્છિન્નો અભબ્બો પુન વિરુળ્હિયા, સોપિ પારાજિકં આપન્નો તથેવ દટ્ઠબ્બોતિ અત્થો.

૩૦૮-૯. ઇદાનિ ‘‘ઞાતેવ અભબ્બો’’તિ ચ ‘‘અઞ્ઞાપદેસઞ્ચ વિના’’તિ ચ એતસ્મિં વાક્યદ્વયે બ્યતિરેકત્થવસેન સમ્ભવન્તં આપત્તિભેદં દસ્સેતુમાહ ‘‘અસન્તમેવા’’તિઆદિ.

અનન્તરન્તિ ‘‘પઠમં ઝાનં સમાપજ્જામી’’તિઆદિવચનસમનન્તરમેવ. સોતિ દ્વાદસહત્થબ્ભન્તરે ઠત્વા યેન તં વચનં સુતં, સો પરો પુગ્ગલો. જાનાતિ ચેતિ ‘‘અયં પઠમજ્ઝાનલાભી’’તિઆદિવસેન તેન વુત્તવચનપ્પકારેન અત્થં અવિરાધેત્વા અચિરેનેવ સચે જાનાતીતિ અત્થો. યો પન ઝાનાદીનં અત્તના અલદ્ધભાવેન વા આગમે ઉગ્ગહપરિપુચ્છાદિવસેન અપરિચિતત્તા વા ઝાનાદિસરૂપં અજાનન્તોપિ કેવલં ‘‘ઝાનં વિમોક્ખો સમાધિ સમાપત્તી’’તિઆદિવચનાનં સુતપુબ્બત્તા તેન ‘‘પઠમં ઝાનં સમાપજ્જામી’’તિઆદિવચને વુત્તે ‘‘ઝાનં કિર એસ સમાપજ્જતી’’તિ યદિ એત્તકમત્થમ્પિ જાનાતિ, સોપિ ‘‘જાનાતિ’’ચ્ચેવ અટ્ઠકથાયં (પારા. અટ્ઠ. ૨.૨૧૫) વુત્તોતિ ગહેતબ્બો. ચુતો હીતિ હિ-સદ્દો અવધારણે, અત્તના વુત્તે તેન તત્તકેયેવ ઞાતે સો અસન્તગુણદીપકો પાપપુગ્ગલો ફલસમ્પત્તિસમ્પન્નં ઇમં સાસનામતમહાપાદપં આરુય્હાપિ ફલં અપરિભુઞ્જિત્વા વિરાધેત્વા પતિત્વા મતો નામ હોતીતિ વુત્તં હોતિ. ઇમસ્સેવત્થસ્સ ‘‘અસન્ત’’મિચ્ચાદિના પઠમં વુત્તસ્સપિ બ્યતિરેકત્થં દસ્સેતું અનુવાદવસેન વુત્તત્તા પુનરુત્તિદોસો ન હોતીતિ દટ્ઠબ્બં.

ઇદાનિ તં બ્યતિરેકત્થં દસ્સેતુમાહ ‘‘નો ચે…પે… હોતી’’તિ. યસ્સ સો આરોચેતિ, સો ચે ન જાનાતિ, અસ્સ અસન્તગુણદીપકસ્સ મુસાવાદિનો.

‘‘અઞ્ઞાપદેસઞ્ચ વિના’’તિ ઇમિના દસ્સિતબ્યતિરેકત્થસ્સ ભાવાભાવે સમ્ભવન્તં આપત્તિભેદં દસ્સેતુમાહ ‘‘યો તે’’તિઆદિ. યો ભિક્ખુ તે તવ ઇધ ઇમસ્મિં વિહારે વસતીતિ યોજના. દીપિતેતિ અત્તનો અધિપ્પાયે પકાસિતે. જાનાતિ ચેતિ યો તથા વુત્તવચનં અસ્સોસિ, સો ‘‘એસ અઞ્ઞાપદેસેન અત્તનો ઝાનલાભિતં દીપેતી’’તિ વા ‘‘એસો ઝાનલાભી’’તિ વા વચનસમનન્તરમેવ સચે જાનાતિ. અસ્સાતિ એવં કથિતવચનવતો તસ્સ ભિક્ખુનો. તં તેન વુત્તવચનં. દુક્કટમેવ હોતિ, ન થુલ્લચ્ચયન્તિ અત્થો. અત્તનો આવાસકારાનં દાયકાનં અઞ્ઞસ્સ પવત્તિં કથેન્તસ્સ વિય અત્તનોયેવ અસન્તગુણં સન્તમિવ કત્વા કથનાકારો ઇમાય ગાથાય અત્થતો વુત્તોતિ દટ્ઠબ્બો.

એત્થ ચ ઝાનલાભીતિ ચાતિ અવુત્તસમુચ્ચયત્થેન ચ-સદ્દેન પાળિયં (પારા. ૨૨૦) આગતા અવસેસપરિયાયવારા ચ સઙ્ગહિતાતિ દટ્ઠબ્બં. તથા ઝાનલાભીતિ એત્થ ઝાનગ્ગહણેન વિમોક્ખાદીનઞ્ચ ઉપલક્ખિતત્તા ઝાનાદિદસવિધઉત્તરિમનુસ્સધમ્મવિસયપરિયાયકથં સુતવતા તઙ્ખણે તદત્થે ઞાતે પરિયાયસમુલ્લાપકેન આપજ્જિતબ્બં થુલ્લચ્ચયઞ્ચ અવિઞ્ઞાતે વા ચિરેન વિઞ્ઞાતે વા આપજ્જિતબ્બં દુક્કટઞ્ચ ઇમાય ગાથાય અત્થતો દસ્સિતમેવાતિ દટ્ઠબ્બં.

૩૧૦. એતન્તિ યથાવુત્તપ્પકારં ઝાનાદિભેદં ઉત્તરિમનુસ્સધમ્મં. અધિમાનાતિ ‘‘અધિગતોહ’’ન્તિ એવં ઉપ્પન્નમાના, અધિકમાનાતિ અત્થો, ‘‘અયં ધમ્મો મયા અધિગતો’’તિ દળ્હમુપ્પન્નેન માનેન કથેન્તસ્સાતિ વુત્તં હોતિ. વુત્તો અનાપત્તિનયોતિ આપત્તિયા અભાવો અનાપત્તિ, સા એવ નયો નેતબ્બો બુજ્ઝિતબ્બોતિ કત્વા, અનાપત્તીતિ વુત્તં હોતિ. ‘‘અધિમાનેના’’તિ એવં વુત્તો ભગવતાતિ અત્થો, ‘‘અધિગતધમ્મોહ’’ન્તિ અધિમાનેન ‘‘અહં પઠમજ્ઝાનલાભી’’તિઆદીનિ વદન્તસ્સ અનાપત્તીતિ વુત્તં હોતિ.

અયમધિમાનો કસ્સ હોતિ, કસ્સ ન હોતીતિ ચે? અરિયાનં ન હોતિ મગ્ગપચ્ચવેક્ખણાદીહિ પઞ્ચહિ પચ્ચવેક્ખણાહિ સઞ્જાતસોમનસ્સાનં વિતિણ્ણકઙ્ખત્તા. દુસ્સીલસ્સાપિ ન હોતિ તસ્સ અરિયગુણાધિગમે નિરુસ્સાહત્તા. સુસીલસ્સાપિ કમ્મટ્ઠાનાનુયોગરહિતસ્સ નિદ્દારામતાદિમનુયુત્તસ્સ ન હોતિ વિસ્સટ્ઠભાવનાભિયોગત્તા. સુપરિસુદ્ધાય સીલસમ્પત્તિયા પતિટ્ઠાય સમથભાવનામનુયુત્તસ્સ રૂપારૂપસમાપત્તિયં પત્તાસિનો વા વિપસ્સનાભિયુત્તસ્સ સોપક્કિલેસોદયબ્બયઞાણલાભિનો વા ઉપ્પજ્જતિ. સો સમથવિપસ્સનાભાવનાહિ કિલેસસમુદાચારસ્સ અભાવે ઉપ્પન્ને તે વિસેસભાગિનો ભવિતું અદત્વા ઠિતિભાગિનો કત્વા ઠપેતીતિ વેદિતબ્બો.

પનાતિ અપિ-સદ્દત્થો. ‘‘એવ’’ન્તિ ઇમિના ‘‘અનાપત્તિનયો વુત્તો’’તિ પચ્ચામસતિ. ‘‘અવત્તુકામસ્સા’’તિ ઇદઞ્ચ પાળિયં આગતં ‘‘અનુલ્લપનાધિપ્પાયસ્સા’’તિ (પારા. ૨૨૨, ૨૨૫) ઇદઞ્ચ અનત્થન્તરં. અવત્તુકામસ્સાતિ એવં વુત્તોતિ યોજના. કોહઞ્ઞેન પાપિચ્છાપકતસ્સ ‘‘ઝાનાદીનં લાભિમ્હી’’તિ વદન્તસ્સ અજ્ઝાસયો ઉલ્લપનાધિપ્પાયો નામ, તથા અહુત્વા સબ્રહ્મચારીસુ અઞ્ઞં બ્યાકરોન્તસ્સ એવમેવ અનાપત્તિભાવો વુત્તો ભગવતાતિ અત્થો. આદિકસ્સાપિ એવં વુત્તોતિ યોજના. ‘‘અનાપત્તિ આદિકમ્મિકસ્સા’’તિ (પારા. ૨૨૨) આદિકમ્મિકસ્સાપિ અનાપત્તિભાવો વુત્તો ભગવતાતિ અત્થો. ઇમસ્મિં સિક્ખાપદે વગ્ગુમુદાતીરિયા ભિક્ખૂ આદિકમ્મિકા. અવુત્તસમુચ્ચયત્થેન તથા-સદ્દેન ઇધ અવુત્તઉમ્મત્તકખિત્તચિત્તવેદનટ્ટા ગહિતા.

૩૧૧. પાપિચ્છતાતિ ‘‘એવં મં જનો સમ્ભાવેસ્સતી’’તિ ઝાનલાભિતાદિહેતુકાય સમ્ભાવનાય સમ્ભાવનાનિમિત્તસ્સ પચ્ચયપટિલાભસ્સ પત્થનાસઙ્ખાતાય પાપિકાય લામિકાય ઇચ્છાય સમન્નાગતભાવો ચ. તસ્સાતિ યં ઝાનાદિભેદભિન્નં ઉત્તરિમનુસ્સધમ્મં સમુલ્લપિ, તસ્સ ધમ્મસ્સ. અસન્તભાવોતિ અત્તસન્તાને પચ્ચુપ્પન્નજાતિયં અનુપ્પાદિતભાવેન અવિજ્જમાનભાવો. મનુસ્સકસ્સ આરોચનઞ્ચેવાતિ વુત્તવચનસ્સ અત્થં તઙ્ખણે જાનનકસ્સ મનુસ્સજાતિકસ્સ ‘‘પઠમં ઝાનં સમાપજ્જિ’’ન્તિઆદિના નયેન સવનૂપચારે ઠત્વા આરોચનઞ્ચ. નઞ્ઞાપદેસેન આરોચનઞ્ચાતિ સમ્બન્ધો. ‘‘યો તે વિહારે વસતિ, સો ભિક્ખુ પઠમં ઝાનં સમાપજ્જી’’તિઆદિના (પારા. ૨૨૦) નયેન પવત્તઅઞ્ઞાપદેસં વિના ઉજુકમેવ આરોચનઞ્ચ. તદેવ ઞાણન્તિ તદા એવ ઞાણં, અચિરાયિત્વા વુત્તક્ખણેયેવ જાનનન્તિ અત્થો. એત્થાતિ ઇમસ્મિં ચતુત્થપારાજિકાપત્તિયં. ધીરા વિનયધરા.

૩૧૨. પઠમે દુતિયે ચન્તેતિ મનુસ્સવિગ્ગહપારાજિકવજ્જિતે યથાવુત્તપારાજિકત્તયે. પરિયાયો ન વિજ્જતીતિ પારાજિકાપત્તિપથં પરિયાયવચનં ન લભતિ. ‘‘ન પનેતરે’’તિ ઇદં એત્થાપિ યોજેતબ્બં, ઇતરે પન તતિયપારાજિકે પરિયાયો ન વિજ્જતીતિ અત્થો. ‘‘મરણવણ્ણં વા સંવણ્ણેય્યા’’તિ (પારા. ૧૭૨) ચ ‘‘અમ્ભો પુરિસ કિં તુય્હિમિના’’તિઆદિના (પારા. ૧૭૧) ચ ‘‘યો એવં મરતિ, સો ધનં વા લભતી’’તિઆદિના (પારા. ૧૭૫) ચ પરિયાયેન વદન્તસ્સ પારાજિકમેવાતિ વુત્તં હોતિ. આણત્તિ પારાજિકહેતુઆણત્તિકપ્પયોગો. ન પનેતરેતિ પઠમચતુત્થપારાજિકદ્વયે પન પારાજિકહેતુભૂતા આણત્તિ ન લભતીતિ અત્થો.

૩૧૩. આદીતિ પઠમપારાજિકં. એકસમુટ્ઠાનન્તિ એકકારણં. સમુટ્ઠાતિ આપત્તિ એતસ્માતિ સમુટ્ઠાનં, કારણં કાયાદિ. તં પન છબ્બિધં કાયો, વાચા, કાયવાચા, કાયચિત્તં, વાચાચિત્તં, કાયવાચાચિત્તન્તિ. તેસં વિનિચ્છયં ઉત્તરે (ઉ. વિ. ૩૨૫ આદયો) યથાગતટ્ઠાનેયેવ ચ વણ્ણયિસ્સામ. તત્રિદં એકસમુટ્ઠાનં એકં કાયચિત્તં સમુટ્ઠાનં એતસ્સાતિ કત્વા. તેનાહ ‘‘દુવઙ્ગં કાયચિત્તતો’’તિ. ‘‘તં સમુટ્ઠાન’’ન્તિ અજ્ઝાહારો. યેન સમુટ્ઠાનેન પઠમપારાજિકાપત્તિ ઉપ્પજ્જતિ, તંસમુટ્ઠાનસઙ્ખાતં કારણં. અઙ્ગજાતસઙ્ખાતં કાયઞ્ચ સેવનચિત્તઞ્ચાતિ દ્વયં અઙ્ગં અવયવં એતસ્સાતિ દુવઙ્ગં, તદુભયસભાવન્તિ અત્થો યથા ‘‘દુવઙ્ગં ચતુત્થજ્ઝાન’’ન્તિ. સેસાતિ અવસિટ્ઠાનિ તીણિ પારાજિકાનિ. તિસમુટ્ઠાનાતિ કાયચિત્તં, વાચાચિત્તં, કાયવાચાચિત્તન્તિ તિસમુટ્ઠાના તીણિ સમુટ્ઠાનાનિ એતેસન્તિ કત્વા. તેસન્તિ તેસં તિણ્ણં સમુટ્ઠાનાનં. અઙ્ગાનીતિ અવયવાનિ. સત્ત કાયો, ચિત્તં, વાચા, ચિત્તં, કાયો, વાચા, ચિત્તન્તિ, તંસભાવાતિ વુત્તં હોતિ.

૩૧૪. આદીતિ મેથુનધમ્મપટિસેવનચિત્તસમ્પયુત્તચેતનાસભાવં પઠમપારાજિકં. સુખોપેક્ખાયુતં ઉદીરિતન્તિ યોજના. ઇટ્ઠાલમ્બણપટિલાભાદિસોમનસ્સહેતુમ્હિ સતિ સુખવેદનાસમ્પયુત્તં હોતિ, તસ્મિં અસતિ ઉપેક્ખાવેદનાય સમ્પયુત્તં હોતીતિ વુત્તન્તિ અત્થો.

તતિયં દુક્ખવેદનન્તિ તતિયં મનુસ્સવિગ્ગહપારાજિકં દોસચિત્તસમ્પયુત્તચેતનાસભાવત્તા દુક્ખવેદનાય સમ્પયુત્તન્તિ અત્થો.

દુતિયન્તિ અદિન્નાદાનચેતનાલક્ખણં દુતિયપારાજિકં. લોભેન પરસન્તકં ચોરિકાય ગણ્હન્તસ્સ સોમનસ્સસમ્પયુત્તં હોતિ, કોધેન અભિભૂતસ્સ વિલુમ્પિત્વા વા વિલુમ્પાપેત્વા વા ગણ્હતો દોમનસ્સસમ્પયુત્તં હોતિ, સોમનસ્સં, દોમનસ્સઞ્ચ વિના અગ્ગહેતુકામો વિય હુત્વા ઉદાસીનસ્સ ગણ્હતો ઉપેક્ખાસમ્પયુત્તં હોતીતિ ‘‘તિવેદનમુદીરિત’’ન્તિ આહ.

ચતુત્થઞ્ચાતિ ઉત્તરિમનુસ્સધમ્મસમુલ્લપનચેતનાલક્ખણં ચતુત્થપારાજિકઞ્ચ. સમ્ભાવનિચ્છાય પચ્ચયાસાય વા તુટ્ઠતુટ્ઠસ્સેવ ‘‘અહં પઠમં ઝાનં સમાપજ્જામી’’તિઆદિના નયેન અત્તનો ઉત્તરિમનુસ્સધમ્મલાભિતં વદન્તસ્સ સોમનસ્સસમ્પયુત્તં હોતિ, અઞ્ઞપુગ્ગલેસુ પટિહતચિત્તસ્સ કલહપુરેક્ખારતાય વદતો દોમનસ્સસમ્પયુત્તં હોતિ, પચ્ચયાલાભેન જિઘચ્છાદિદુક્ખં સહિતુમસક્કુણેય્યતાય ઉદાસીનસ્સ વદતો ઉપેક્ખાસમ્પયુત્તં હોતીતિ ‘‘તિવેદનમુદીરિત’’ન્તિ આહ.

૩૧૫. અટ્ઠ ચિત્તાનીતિ લોભસહગતાનિ અટ્ઠ ચિત્તાનિ લબ્ભરેતિ યોજના, લબ્ભન્તીતિ અત્થો, ચેતનાસભાવેન પઠમપારાજિકેન સમ્પયુત્તાનીતિ વુત્તં હોતિ. એવમુપરિપિ. દુવેતિ પટિઘસમ્પયુત્તાનિ દ્વે ચિત્તાનિ. દસ ચિત્તાનીતિ લોભસહગતાનિ અટ્ઠ, દ્વે પટિઘસમ્પયુત્તાનીતિ. લબ્ભરેતિ સમ્પયુત્તભાવેન લબ્ભન્તિ.

૩૧૬. તસ્માતિ યસ્મા યથાવુત્તચિત્તેહિ સમ્પયુત્તં, તેન હેતુના. ક્રિયાતિ કરણેન આપજ્જિતબ્બત્તા કિરિયા. વીતિક્કમસઞ્ઞાય અભાવેન મુચ્ચનતો સઞ્ઞાય વિમોક્ખો એતસ્સાતિ સઞ્ઞાવિમોક્ખં. લોકવજ્જન્તિ લોકેન અકુસલભાવતો વજ્જનીયન્તિ દીપિતં પકાસિતં.

૩૧૭. આપત્તિયંયેવાતિ એવકારેન ન સિક્ખાપદેતિ દસ્સેતિ. ઇદં વિધાનન્તિ સમુટ્ઠાનાદિકં ઇદં યથાવુત્તં વિધાનં. વિભાવિનાતિ પઞ્ઞવતા વિનયધરેન.

૩૧૮-૯. મુદુપિટ્ઠિ ચાતિ લતા વિય નમિત્વા કરણં દસ્સેત્વા નચ્ચિતું સમવાહિત્વા મુદુકતપિટ્ઠિકો ચ. લમ્બી ચાતિ પલમ્બમાનેન દીઘેન અઙ્ગજાતેન યુત્તો. લમ્બતીતિ લમ્બં, અઙ્ગજાતં, તં યસ્સ અત્થિ સો લમ્બી. ઇમે દ્વેપિ કામપરિળાહાતુરભાવે સતિ અત્તનો અઙ્ગજાતં અત્તનો મુખં, વચ્ચમગ્ગઞ્ચ પવેસેત્વા વીતિક્કમિતુમરહત્તા પારાજિકાપન્નસદિસત્તા પરિવજ્જિતા. મુખગ્ગાહીતિ મુખેન ગહણં મુખગ્ગાહો, સો એતસ્સ અત્થીતિ મુખગ્ગાહી, પરસ્સ અઙ્ગજાતં મુખેન ગણ્હન્તોતિ અત્થો. નિસીદકોતિ પરસ્સ અઙ્ગજાતે અત્તનો વચ્ચમગ્ગેન નિસીદન્તો. ઇમે દ્વે સહવાસિકાનં સીલવિનાસનતો અઞ્ઞેહિ સંવસિતું અનરહાતિ પારાજિકાપન્નસદિસત્તા વિવજ્જિતા. તેસન્તિ અસંવાસતાસામઞ્ઞેન ચત્તારો પારાજિકાપન્ને સઙ્ગણ્હાતિ. ‘‘તેસઞ્ચ મગ્ગેનમગ્ગપટિપત્તિસામઞ્ઞેન પઠમપારાજિકાપન્નસ્સેવ અનુલોમિકાતિ ગહેતબ્બા’’ ઇચ્ચેવં નિસ્સન્દેહે વુત્તં. ઇમિના ચ અકતવીતિક્કમાનમ્પિ મુદુપિટ્ઠિઆદીનં ચતુન્નં અનુલોમપારાજિકભાવો વુત્તોતિ વિઞ્ઞાયતિ.

સમન્તપાસાદિકાયં પન –

‘‘અપરાનિપિ લમ્બી, મુદુપિટ્ઠિકો, પરસ્સ અઙ્ગજાતં મુખેન ગણ્હાતિ, પરસ્સ અઙ્ગજાતે અભિનિસીદતીતિ ઇમેસં ચતુન્નં વસેન ચત્તારિ અનુલોમપારાજિકાનીતિ વદન્તિ. એતાનિ હિ યસ્મા ઉભિન્નં રાગવસેન સદિસભાવૂપગતાનં ધમ્મો ‘મેથુનધમ્મો’તિ વુચ્ચતિ, તસ્મા એતેન પરિયાયેન મેથુનં ધમ્મં અપ્પટિસેવિત્વાયેવ કેવલં મગ્ગેન મગ્ગપ્પવેસનવસેન આપજ્જિતબ્બત્તા મેથુનધમ્મપારાજિકસ્સ અનુલોમેન્તીતિ ‘અનુલોમપારાજિકાની’તિ વુચ્ચન્તી’’તિ (પારા. અટ્ઠ. ૨.૨૩૩) –

વુત્તત્તા ચ તબ્બણ્ણનાય ચ સારત્થદીપનિયં –

‘‘લમ્બંદીઘતાય પલમ્બમાનં અઙ્ગજાતમેતસ્સાતિ લમ્બી. સો એત્તાવતા ન પારાજિકો, અથ ખો યદા અનભિરતિયા પીળિતો અત્તનો અઙ્ગજાતં મુખે વા વચ્ચમગ્ગે વા પવેસેતિ, તદા પારાજિકો હોતિ. મુદુકા પિટ્ઠિ એતસ્સાતિ મુદુપિટ્ઠિકો, કતપરિકમ્માય મુદુકાય પિટ્ઠિયા સમન્નાગતો. સોપિ યદા અનભિરતિયા પીળિતો અત્તનો અઙ્ગજાતં અત્તનો મુખે પવેસેતિ તદા પારાજિકો હોતિ. પરસ્સ અઙ્ગજાતં મુખેન ગણ્હાતીતિ યો અનભિરતિયા પીળિતો પરસ્સ સુત્તસ્સ વા પમત્તસ્સ વા અઙ્ગજાતં અત્તનો મુખેન ગણ્હાતિ. પરસ્સ અઙ્ગજાતે અભિનિસીદતીતિ યો અનભિરતિયા પીળિતો પરસ્સ અઙ્ગજાતં કમ્મનિયં દિસ્વા અત્તનો વચ્ચમગ્ગેન તસ્સૂપરિ અભિનિસીદતિ, તં અત્તનો વચ્ચમગ્ગં પવેસેતીતિ અત્થો. લમ્બીઆદયો ચત્તારો કિઞ્ચાપિ પઠમપારાજિકેન સઙ્ગહિતા, યસ્મા પન ઉભિન્નં રાગપરિયુટ્ઠાનસઙ્ખાતેન પરિયાયેન મેથુનં ધમ્મં અપ્પટિસેવિનો હોન્તિ, તસ્મા વિસું વુત્તા’’તિ (સારત્થ. ટી. ૨.૨૩૩) –

વુત્તત્તા ચ કતવીતિક્કમાયેવેતે ‘‘પારાજિકા’’તિ ગહેતબ્બા.

ભિક્ખુનીનઞ્ચ ચત્તારીતિ એત્થ ‘‘અસાધારણાની’’તિ પાઠસેસો, ભિક્ખૂહિ અસાધારણાનિ ભિક્ખુનીનમેવ નિયતાનિ ઉબ્ભજાણુમણ્ડલિકા, વજ્જપટિચ્છાદિકા, ઉક્ખિત્તાનુવત્તિકા, અટ્ઠવત્થુકાતિ ચત્તારિ પારાજિકાનિ ચ. વિબ્ભન્તા ભિક્ખુની સયન્તિ એત્થ ‘‘તેસં અનુલોમિકા’’તિ આનેત્વા સમ્બન્ધિતબ્બં. તેસં ચતુન્નં પારાજિકાનં અનુલોમિકા સયં વિબ્ભન્તા ભિક્ખુની ચાતિ યોજના. ચિત્તવસિકા હુત્વા અત્તના નિવત્થચીવરમ્પિ હિ માતુગામાનં નિવાસનનીહારેન સયમેવ નિવાસેત્વા ગિહિવેસં રોચેત્વા ગહિતમત્તે સાસનતો ચુતા ભિક્ખુની ચાતિ વુત્તં હોતિ. એવંકરણેન ગિહિભાવાપન્નતાસામઞ્ઞેન સંવાસારહા ન હોન્તીતિ ઇમેસં ચતુન્નં પારાજિકાનં અનુલોમિકા જાતા.

તથાતિ યથા ઇમે દસ્સિતા તેન અસંવાસારહતાય, ભિક્ખુભાવાય અભબ્બતાય ચ પારાજિકાવ, તથા એકાદસ અભબ્બપુગ્ગલાપિ હોન્તીતિ અત્થો. એકાદસાભબ્બાતિ માતુઘાતકો, પિતુઘાતકો, અરહન્તઘાતકો, સઙ્ઘભેદકો, લોહિતુપ્પાદકો, પણ્ડકો, તિરચ્છાનગતો, ઉભતોબ્યઞ્જનકો, થેય્યસંવાસકો, ભિક્ખુનિદૂસકો, તિત્થિયપક્કન્તકોતિ એકાદસ. સબ્બેતે ચતુવીસતિ એતે સબ્બે ચતુવીસતિ પુગ્ગલા સમોધાનતો વેદિતબ્બાતિ અધિપ્પાયો.

૩૨૦. ઇમે ચતુવીસતિ પારાજિકા પુગ્ગલા સીસચ્છિન્નોવ જીવિતું ઇધ ભિક્ખુભાવાય અભબ્બાતિ વુત્તાતિ યોજના.

૩૨૧. ઇમેસં એકાદસન્નં અભબ્બતાય હેતુદસ્સનત્થમાહ ‘‘પણ્ડકો ચા’’તિઆદિ. પણ્ડકો ચાતિ આસિત્તપણ્ડકો, ઉસૂયપણ્ડકો, પક્ખપણ્ડકો, ઓપક્કમિકપણ્ડકો, નપુંસકપણ્ડકોતિ વુત્તો પઞ્ચવિધો પણ્ડકો ચ. તિરચ્છાનોતિ તિરિયં અઞ્છતિ ગચ્છતીતિ ‘‘તિરચ્છાનો’’તિ ગહિતો નાગસુપણ્ણાદિકો સબ્બતિરચ્છાનયોનિકો ચ. યક્ખાદયો સબ્બે અમનુસ્સાપિ ઇધ તિરચ્છાનેયેવ સઙ્ગહિતાતિ વેદિતબ્બા. ઉભતોબ્યઞ્જનોપિ ચાતિ ઇત્થિપુરિસબ્યઞ્જનસાધકેહિ ઉભતો કમ્મતો જાતાનિ થનાદિકાનિ બ્યઞ્જનાનિ યસ્સાતિ નિરુત્તો ઇત્થિઉભતોબ્યઞ્જનો, પુરિસઉભતોબ્યઞ્જનોતિ દુવિધો ઉભતોબ્યઞ્જનો ચ. વત્થુવિપન્નાતિ તબ્ભાવભાવિતાય ભિક્ખુભાવો વસતિ એત્થાતિ વત્થુ, પુગ્ગલાનં ભિક્ખુભાવારહતા, સા પન પબ્બજ્જાક્ખન્ધકાગતસબ્બદોસવિરહિતગુણસમ્પયુત્તતા, તં વિપન્નં પણ્ડકભાવાદિયોગેન યેસં તે ‘‘વત્થુવિપન્ના’’તિ ગહેતબ્બા. હિ-સદ્દો હેતુમ્હિ. યસ્મા વત્થુવિપન્ના, તસ્મા ઇધ અત્તભાવે પબ્બજ્જાય અભબ્બાતિ વુત્તં હોતિ. ‘‘અહેતુપટિસન્ધિકા’’તિ વચનેન ઇમેસં વિપાકાવરણયુત્તભાવમાહ, ઇમિના એતેસં મગ્ગાધિગમસ્સ વારિતભાવો દસ્સિતોતિ વેદિતબ્બં.

૩૨૨. પઞ્ચાનન્તરિકાતિ કમ્માવરણેન યુત્તતાય સગ્ગમોક્ખસમ્પત્તિતો પરિહાયિત્વા મરણાનન્તરં અપાયપટિસન્ધિયં નિયતા માતુઘાતકાદયો પઞ્ચાનન્તરિકા ચ. થેય્યસંવાસોપિ ચાતિ લિઙ્ગત્થેનકો, સંવાસત્થેનકો, ઉભયત્થેનકોતિ તિવિધો થેય્યસંવાસકો ચ. દૂસકોતિ પકતત્તાય ભિક્ખુનિયા મેથુનં પટિસેવિત્વા તસ્સા દૂસિતત્તા ભિક્ખુનિં દૂસેતીતિ ‘‘ભિક્ખુનિદૂસકો’’તિ વુત્તો ચ. તિત્થિપક્કન્તકો ચાતિ તિત્થિયાનં લદ્ધિં, વેસઞ્ચ રોચેત્વા તં ગહેત્વા તેસમન્તરં પવિટ્ઠો ચ. ઇતિ અટ્ઠ પન કિરિયાનટ્ઠાતિ યોજના. ઇતીતિ ઇદમત્થત્તા ઇમેતિ વુત્તં હોતિ. તે ઇમેતિ સમ્બન્ધો. તે ઇમે અટ્ઠ પન માતુવધાદિકિરિયાય ઇહત્તભાવે ભિક્ખુભાવાય અનરહા હુત્વા નટ્ઠાતિ અત્થો. એત્તાવતા એકાદસઅભબ્બાનં અભબ્બતાય કારણં દસ્સિતં હોતિ.

૩૨૩. મયા પારાજિકાનં સારભૂતો યો અયં વિનિચ્છયો વુત્તો, તસ્સ વિનિચ્છયસ્સ અનુસારેન અનુગમનેન સેસોપિ વિનિચ્છયો બુધેન પણ્ડિતેન અસેસતોવ વિઞ્ઞાતું સક્કાતિ યોજના.

૩૨૪. પટુભાવકરે પરમે વિવિધેહિ નયેહિ યુત્તે વિનયપિટકે પરમત્થનયં અભિપત્થયતા અયં સતતં પરિયાપુણિતબ્બોતિ યોજના. તત્થ વિવિધેહિ નાનપ્પકારેહિ. નયેહીતિ નીયન્તિ વુત્તાનુસારેન ઉદીરિયન્તીતિ ‘‘નયા’’તિ વુત્તેહિ ચક્કપેય્યાલાદીહિ નયેહિ. પરમત્થનયન્તિ પરમો ચ સો અત્થો ચાતિ પરમત્થો, પરમો વા વિસેસેન નિચ્છિતબ્બો અત્થો પરમત્થો, સોયેવ વિનિચ્છયત્થિકાનં બુદ્ધિયા નેતબ્બોતિ પરમત્થનયો, વિનિચ્છયૂપાયો નીયતિ એતેનાતિ કત્વા ‘‘પરમત્થનયો’’તિ વુચ્ચતિ, તં પરમત્થનયં. અભિપત્થયતાતિ વિનયપિટકે વિનિચ્છયં વા તદુપાયં વા પત્થયતા, ઇચ્છન્તેનાતિ અત્થો. ‘‘પરિયાપુણિતબ્બો અય’’ન્તિ પદચ્છેદો. મ-કારો આગમસન્ધિજો, ઓ-કારસ્સ અ-કારાદેસો. પરિયાપુણિતબ્બોતિ પઠિતબ્બો, સોતબ્બો ચિન્તેતબ્બો ધારેતબ્બોતિ વુત્તં હોતિ. અયન્તિ વિનયવિનિચ્છયો.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

ચતુત્થપારાજિકકથાવણ્ણના નિટ્ઠિતા.

સઙ્ઘાદિસેસકથાવણ્ણના

૩૨૫. એવં નાનાનયપટિમણ્ડિતસ્સ પારાજિકકણ્ડસ્સ વિનિચ્છયં દસ્સેત્વા ઇદાનિ તદનન્તરમુદ્દિટ્ઠસ્સ તેરસકણ્ડસ્સ વિનિચ્છયં દસ્સેતુમાહ ‘‘મોચેતુકામતા’’તિઆદિ. મોચેતું કામેતીતિ મોચેતુકામો, તસ્સ ભાવો મોચેતુકામતા, તાય સમ્પયુત્તં ચિત્તં મોચેતુકામતાચિત્તં. એત્થ ‘‘મોચેતુકામતા’’તિ ઇમિના એકાદસસુ રાગેસુ ‘‘મોચનસ્સાદો’’તિ વુત્તં ઇમસ્સ સઙ્ઘાદિસેસસ્સ મૂલકારણં સુક્કમોચનવિસયં રાગમાહ.

એકાદસ રાગા નામ ‘‘મોચનસ્સાદો, મુચ્ચનસ્સાદો, મુત્તસ્સાદો, મેથુનસ્સાદો, ફસ્સસ્સાદો, કણ્ડુવનસ્સાદો, દસ્સનસ્સાદો, નિસજ્જસ્સાદો, વાચસ્સાદો, ગેહસ્સિતપેમં, વનભઙ્ગિય’’ન્તિ એવમાગતા. ઇધ મોચનં નામ સમ્ભવધાતુમોચનં, તદત્થાય તબ્બિસયરાગસમ્પયુત્તવેદના મોચનસ્સાદો નામ. તેનાહ અટ્ઠકથાયં ‘‘મોચેતું અસ્સાદો મોચનસ્સાદો’’તિ. મુચ્ચમાને અસ્સાદો મુચ્ચનસ્સાદો, સમ્ભવધાતુમ્હિ મુચ્ચમાને તંરાગસમ્પયુત્તા વેદના મુચ્ચનસ્સાદો નામ. એતેનેવ નયેન મુત્તસ્સાદાદિવાચસ્સાદાવસાનેસુ પદેસુ અત્થક્કમો વેદિતબ્બો. ઇમેહિ નવહિ પદેહિ અસ્સાદસીસેન કુન્તયટ્ઠિઞાયેન તંસહચરિતો રાગો દસ્સિતો. યથાહ અટ્ઠકથાયં ‘‘નવહિ પદેહિ સમ્પયુત્તઅસ્સાદસીસેન રાગો વુત્તો’’તિ.

ગેહસ્સિતપેમન્તિ એત્થ ગેહટ્ઠા માતુઆદયો આધેય્યઆધારવોહારેન ‘‘ગેહા’’તિ વુચ્ચન્તિ. ‘‘મઞ્ચા ઉક્કુટ્ઠિં કરોન્તી’’તિઆદીસુ વિય તન્નિસ્સિતો સિનેહપરિયાયો રાગો ‘‘ગેહસ્સિતપેમ’’ન્તિ વુત્તો. ઇમિના પદેન રાગસ્સ સભાવો સન્દસ્સિતો. વનતો ભઞ્જિત્વા આભતં યં કિઞ્ચિ ફલપુપ્ફાદિ વનભઙ્ગિયં નામ. ઇધ પન રાગવસેન પટિબદ્ધચિત્તં માતુગામેહિ વિરહદુક્ખાપનયનત્થં (પારા. અટ્ઠ. ૨.૨૪૦) તેસં ઠાને ઠપેત્વા દસ્સનફુસનવસેન વિન્દિતું રાગીહિ ગહેતબ્બતો તેહિ પિળન્ધિતમાલસહિતં તમ્બૂલન્તિ એવમાદિ ‘‘વનભઙ્ગિય’’ન્તિ અધિપ્પેતં. ઇમિના પત્થિતવિસયગોચરો રાગો તદાયત્તવત્થુવસેન સન્દસ્સિતો. યથાહ અટ્ઠકથાયં ‘‘એકેન પદેન સરૂપેનેવ રાગો, એકેન પદેન વત્થુના વુત્તો. વનભઙ્ગો હિ રાગસ્સ વત્થુ, ન રાગોયેવા’’તિ (પારા. અટ્ઠ. ૨.૨૪૦).

‘‘મોચેતુકામતા’’તિ ઇદમેવ અવત્વા ‘‘ચિત્ત’’ન્તિ વચનેન વીતિક્કમસાધિકાય કાયવિઞ્ઞત્તિયા સમુટ્ઠાપકં રાગસમ્પયુત્તં ચિત્તવિસેસં દસ્સેતિ. તેન ચિત્તેન સમુટ્ઠાપિયમાનં વિઞ્ઞત્તિસઙ્ખાતં વીતિક્કમં ‘‘વાયામો’’તિ ઇમિના દસ્સેતિ. વાયામો નામ તંચિત્તસમ્પયુત્તવીરિયં. એત્થ પન ‘‘સેમ્હો ગુળો’’તિઆદીસુ વિય ફલે હેતૂપચારઞાયેન વીતિક્કમસ્સ વિસેસહેતુભૂતવીરિયવાચકેન ચ પદેન વીતિક્કમોવ વુત્તોતિ દટ્ઠબ્બં. અજ્ઝત્તબાહિરવત્થુઘટ્ટનં, આકાસે કટિકમ્પનન્તિ સુક્કમોચનત્થો વાયામોતિ અત્થો. સુક્કસ્સ મોચનં સુક્કમોચનં.

એત્થ ચ સુક્કસ્સાતિ ‘‘સુક્કન્તિ દસ સુક્કાનિ નીલં પીતકં લોહિતકં ઓદાતં તક્કવણ્ણં દકવણ્ણં તેલવણ્ણં ખીરવણ્ણં દધિવણ્ણં સપ્પિવણ્ણ’’ન્તિ (પારા. ૨૩૭) પદભાજને વુત્તાનિ સત્તાનં પિત્તાદિઆસયભેદેન, પથવિધાતુઆદીનં ચતુન્નં વા રસસોણિતમંસમેદઅટ્ઠિઅટ્ઠિમિઞ્જાનં છન્નં દેહધાતૂનં વા ભેદેન અનેકધા ભિન્ને દસવિધે સુક્કે અઞ્ઞતરસ્સ સુક્કસ્સાતિ અત્થો. મોચનં વિસ્સટ્ઠીતિ પરિયાયં, પકતિયા ઠિતસકટ્ઠાનતો મોચનન્તિ અત્થો. યથાહ પદભાજને ‘‘વિસ્સટ્ઠીતિ ઠાનતો ચાવના વુચ્ચતી’’તિ (પારા. ૨૩૭). ઇહ ‘‘ઠાનં નામ વત્થિસીસસઙ્ખાતં મુત્તકરણમૂલ’’ન્તિ કેચિ. ‘‘કટી’’તિ અપરે. ‘‘સકલકાયો’’તિ અઞ્ઞે. ઇમેસં તિણ્ણં વચનેસુ ‘‘તતિયસ્સ ભાસિતં સુભાસિત’’ન્તિ (પારા. અટ્ઠ. ૨.૨૩૭) અટ્ઠકથાયં તતિયવાદસ્સ કતપાસંસત્તા કેસલોમનખદન્તાનં મંસવિનિમુત્તટ્ઠાનઞ્ચ મુત્તકરીસખેળસિઙ્ઘાણિકાથદ્ધસુક્ખચમ્મઞ્ચ વજ્જેત્વા અવસેસં સકલસરીરં કાયપ્પસાદભાવજીવિતિન્દ્રિયઅબદ્ધપિત્તાનં વિય સમ્ભવધાતુયા ચ ઠાનન્તિ વેદિતબ્બં.

‘‘સુક્કમોચન’’ન્તિ ઇમિનાકિં વુત્તં હોતીતિ? ‘‘આરોગ્યત્થાય, સુખત્થાય, ભેસજ્જત્થાય, દાનત્થાય, પુઞ્ઞત્થાય, યઞ્ઞત્થાય, સગ્ગત્થાય, બીજત્થાય, વીમંસત્થાય, દવત્થાય મોચેતી’’તિ (પારા. ૨૩૭) વુત્તદસવિધઅધિપ્પાયન્તોગધઅઞ્ઞતરઅધિપ્પાયો હુત્વા ‘‘રાગૂપત્થમ્ભે, વચ્ચૂપત્થમ્ભે, પસ્સાવૂપત્થમ્ભે, વાતૂપત્થમ્ભે, ઉચ્ચાલિઙ્ગપાણકદટ્ઠૂપત્થમ્ભે મોચેતી’’તિ (પારા. ૨૩૭) વુત્તપઞ્ચવિધકાલાનમઞ્ઞતરકાલે ‘‘અજ્ઝત્તરૂપે, બહિદ્ધારૂપે, અજ્ઝત્તબહિદ્ધારૂપે, આકાસે કટિં કમ્પેન્તો મોચેતી’’તિ (પારા. ૨૩૭) વુત્તચતુરુપાયાનમઞ્ઞતરેન ઉપાયેન યથાવુત્તરાગપિસાચવસેન વિવસો હુત્વા યથાવુત્તનીલાદિદસવિધસમ્ભવધાતૂનમઞ્ઞતરં યથાવુત્તટ્ઠાનતો ખુદ્દકમક્ખિકાય પિવનમત્તમ્પિ સચે મોચેતીતિ સઙ્ખેપતો ગહેતબ્બં. એત્થ ચ ઉચ્ચાલિઙ્ગપાણકા નામ લોમસપાણા, યેસં લોમે અલ્લિને અઙ્ગજાતં કમ્મનિયં હોતિ.

અઞ્ઞત્ર સુપિનન્તેનાતિ સુપિનો એવ સુપિનન્તો, નિસ્સક્કવચનપ્પસઙ્ગે કરણવચનતો સુપિનન્તાતિ અત્થો. સુપિના નામ ‘‘વાતાદિધાતુક્ખોભવસેન વા પુબ્બાનુભૂતઇત્થિરૂપાદિવિસયવસેન વા ઇટ્ઠાનિટ્ઠદેવતાનુભાવેન વા પુઞ્ઞેન પટિલભિતબ્બઅત્થસ્સ, અપુઞ્ઞેન પત્તબ્બાનત્થસ્સ ચ પુબ્બનિમિત્તવસેન વા હોતી’’તિ (પારા. અટ્ઠ. ૨.૨૩૭) વુત્તેસુ ચતૂસુ કારણેસુ એકેન કારણેન કપિનિદ્દાય સુપિને દિસ્સમાનારમ્મણતો યં સુક્કમોચનં હોતિ, તં અવિસયં સુક્કમોચનં વિનાતિ વુત્તં હોતિ.

સઙ્ઘાદિસેસોવ સઙ્ઘાદિસેસતા. સઙ્ઘાદિસેસં આપજ્જિત્વા તતો વુટ્ઠાતુકામસ્સ કુલપુત્તસ્સ આદિમ્હિ પરિવાસદાનત્થં, મજ્ઝે ચ મૂલાયપટિકસ્સનેન વિના વા સહ વા માનત્તદાનત્થં, અવસાને અબ્ભાનત્થઞ્ચ સઙ્ઘો એસિતબ્બોતિ ‘‘સઙ્ઘો આદિમ્હિ ચેવ સેસે ચ ઇચ્છિતબ્બો અસ્સાતિ સઙ્ઘાદિસેસો’’તિ (પારા. અટ્ઠ. ૨.૨૩૭; કઙ્ખા. અટ્ઠ. સુક્કવિસ્સટ્ઠિસિક્ખાપદવણ્ણના) વુત્તત્તા સઙ્ઘાદિસેસા નામ, સુક્કવિસ્સટ્ઠિસઙ્ઘાદિસેસાપત્તિ હોતીતિ અત્થો. યથાહ પદભાજને ‘‘સઙ્ઘોવ તસ્સા આપત્તિયા પરિવાસં દેતિ, મૂલાય પટિકસ્સતિ, માનત્તં દેતિ, અબ્ભેતિ, ન સમ્બહુલા, ન એકપુગ્ગલો, તેન વુચ્ચતિ ‘સઙ્ઘાદિસેસો’તિ. તસ્સેવ આપત્તિનિકાયસ્સ નામં નામકમ્મં અધિવચનં, તેનપિ વુચ્ચતિ ‘સઙ્ઘાદિસેસો’’તિ (પારા. ૨૩૭). એત્થ ચ પરિવાસાદિકથા સઙ્ઘાદિસેસાવસાને આગતટ્ઠાનેયેવ આવિ ભવિસ્સતિ.

૩૨૬. એત્તાવતા મૂલસિક્ખાપદાગતં અત્તૂપક્કમમૂલકં આપત્તિં દસ્સેત્વા ઇદાનિ ઇમિસ્સા સઙ્ઘાદિસેસાપત્તિયા પરૂપક્કમેનપિ આપજ્જનં દસ્સેતુમાહ ‘‘પરેના’’તિઆદિ. ઉપક્કમાપેત્વાતિ અઙ્ગજાતસ્સ ગહણં વા ઘટ્ટનં વા કારેત્વા.

૩૨૭. સઞ્ચિચ્ચાતિ ‘‘ઉપક્કમામિ મોચેસ્સામી’’તિ ચેતેત્વા પકપ્પેત્વા. ઉપક્કમન્તસ્સાતિ અજ્ઝત્તરૂપાદીસુ તીસુ યત્થ કત્થચિ ઘટ્ટેન્તસ્સ. સમુદ્દિટ્ઠન્તિ ‘‘ચેતેતિ ઉપક્કમતિ ન મુચ્ચતિ, આપત્તિ થુલ્લચ્ચયસ્સા’’તિ (પારા. ૨૬૨) પદભાજને ભગવતા વુત્તન્તિ અધિપ્પાયો.

૩૨૮. ઇમિસ્સં ગાથાયં ‘‘અત્તનો અઙ્ગજાતં ઉપક્કમન્તસ્સા’’તિ ઇમિના અજ્ઝત્તરૂપે વા બહિદ્ધારૂપે વા અજ્ઝત્તબહિદ્ધારૂપે વા અત્તનો અઙ્ગજાતં ઘટ્ટેન્તસ્સાતિ ઇમસ્સ અત્થસ્સ વુત્તત્તા અઙ્ગજાતઘટ્ટનેન વિનાભાવતો ઇમિના અસઙ્ગય્હમાનસ્સાપિ આકાસે કટિકમ્પનેન સુક્કમોચને સઙ્ઘાદિસેસસ્સ પઠમગાથાયં ‘‘વાયામો’’તિ સામઞ્ઞવચનેન સઙ્ગહિતત્તા તં ઠપેત્વા ‘‘તેન ખો પન સમયેન અઞ્ઞતરસ્સ ભિક્ખુનો મોચનાધિપ્પાયસ્સ આકાસે કટિં કમ્પેન્તસ્સ અસુચિ મુચ્ચિ…પે… અસુચિ ન મુચ્ચિ. તસ્સ કુક્કુચ્ચં અહોસિ…પે… અનાપત્તિ ભિક્ખુ સઙ્ઘાદિસેસસ્સ, આપત્તિ થુલ્લચ્ચયસ્સા’’તિ આકાસેકટિકમ્પનવત્થુમ્હિ વુત્તત્તા અમુત્તે થુલ્લચ્ચયં સઙ્ગહેતુમાહ ‘‘સઞ્ચિચ્ચા’’તિઆદિ.

તત્થ સઞ્ચિચ્ચાતિ ‘‘ઉપક્કમામિ મોચેસ્સામી’’તિ જાનિત્વા સઞ્જાનિત્વાતિ અત્થો. ‘‘ઉપક્કમન્તસ્સા’’તિ સામઞ્ઞતો તં વિસેસેતું ‘‘આકાસે કમ્પનેનપી’’તિ આહ, કટિકમ્પનેનાતિ ગહેતબ્બં. કથમિદં લબ્ભતીતિ ચે? ઇમાય કથાય સઙ્ગહેતબ્બવત્થુમ્હિ ‘‘આકાસે કટિં કમ્પેન્તસ્સા’’તિ (પારા. ૨૬૬) પાઠે ‘‘કટિં કમ્પેન્તસ્સા’’તિ વચનસહચરસ્સ ‘‘આકાસે’’તિ વચનસ્સ સન્નિધાનબલેન લબ્ભતિ અત્થપ્પકરણસદ્દન્તરસન્નિધાના સદ્દાનં વિસેસત્થદીપનતો.

૩૨૯. વત્થિન્તિ મુત્તવત્થિં, મુત્તકરણસ્સ વત્થિન્તિ અત્થો. કીળાય પૂરેત્વાતિ ગામદારકો વિય કીળિતુકામતાય મુત્તવત્થિં દળ્હં ગહેત્વા પૂરેત્વાતિ અત્થો. યથાહ વત્થિવત્થુમ્હિ અટ્ઠકથાયં ‘‘તે ભિક્ખૂ વત્થિં દળ્હં ગહેત્વા પૂરેત્વા પૂરેત્વા વિસ્સજ્જેન્તા ગામદારકાવિય પસ્સાવમકંસૂ’’તિ (પારા. અટ્ઠ. ૨.૨૬૪). ‘‘ન વટ્ટતી’’તિ સામઞ્ઞેન કસ્મા વુત્તન્તિ? તસ્મિં વત્થુસ્મિં વુત્તનયેન મોચનાધિપ્પાયેન દળ્હં ગહેત્વા પૂરેત્વા પૂરેત્વા વિસ્સજ્જેન્તસ્સ સુક્કે મુત્તે મોચનાધિપ્પાયો ચેતેતિ, ઉપક્કમતિ, મુચ્ચતીતિ અઙ્ગાનં સમ્પન્નત્તા સઙ્ઘાદિસેસસ્સ, અમુત્તે થુલ્લચ્ચયસ્સ સમ્ભવતો ઉભયસઙ્ગહત્થમાહ.

૩૩૦. ઉપનિજ્ઝાયનવત્થુમ્હિ ‘‘ન ચ ભિક્ખવે સારત્તેન માતુગામસ્સ અઙ્ગજાતં ઉપનિજ્ઝાયિતબ્બં, યો ઉપનિજ્ઝાયેય્ય, આપત્તિ દુક્કટસ્સા’’તિ (પારા. ૨૬૬) પાળિયં ‘‘માતુગામસ્સા’’તિ સામઞ્ઞેન વુત્તત્તા ‘‘તિસ્સન્ન’’ન્તિ વદતિ. તિસ્સન્નં પન ઇત્થીનન્તિ મનુસ્સામનુસ્સતિરચ્છાનગતવસેન તિસ્સન્નં ઇત્થીનં. ‘‘અઙ્ગજાત’’ન્તિ વિસેસેત્વા વુત્તત્તા ‘‘નિમિત્ત’’ન્તિ મુત્તકરણમેવ વુચ્ચતિ, પટસતેનાપિ પટિચ્છાદિતં વા અપ્પટિચ્છાદિતં વા યોનિમગ્ગન્તિ અત્થો. તેનાહ અટ્ઠકથાયં ‘‘સચેપિ પટસતં નિવત્થા હોતિ, પુરતો વા પચ્છતો વા ઠત્વા ‘ઇમસ્મિં નામ ઓકાસે નિમિત્ત’ન્તિ ઉપનિજ્ઝાયન્તસ્સ દુક્કટમેવ. અનિવત્થાનં ગામદારિકાનં નિમિત્તં ઉપનિજ્ઝાયન્તસ્સ પન કિમેવ વત્તબ્બ’’ન્તિ (પારા. અટ્ઠ. ૨.૨૬૬). પુરતો વાતિ એત્થ ‘‘ઠત્વા’’તિ પાઠસેસો.

૩૩૧. એકેન…પે… પસ્સતો એકં દુક્કટન્તિ સમ્બન્ધો. ‘‘એકેન પયોગેન એકં દુક્કટ’’ન્તિ વચનતો અનેકેહિ પયોગેહિ અનેકાનિ દુક્કટાનીતિ બ્યતિરેકતો લબ્ભતિ. યથાહ અટ્ઠકથાયં ‘‘ઇતો ચિતો ચ વિલોકેત્વા પુનપ્પુનં ઉપનિજ્ઝાયન્તસ્સ પયોગે પયોગે દુક્કટ’’ન્તિ (પારા. અટ્ઠ. ૨.૨૬૬). ઇમિસ્સા અટ્ઠકથાય ‘‘ઇતો ચિતો ચા’’તિ વુત્તત્તા ઉમ્મીલનનિમીલનન્તિ એત્થ ‘‘વિવિધા તં અનોલોકેત્વા તમેવ ઓલોકેન્તસ્સા’’તિ લબ્ભતિ.

૩૩૨. અમોચનાધિપ્પાયસ્સ મુત્તસ્મિં અનાપત્તિ પકાસિતાતિ યોજના. મોચનાધિપ્પાયં વિના ભેસજ્જકરણત્થં સુદ્ધચિત્તેન અઙ્ગજાતે ભેસજ્જલેપં કરોન્તસ્સ વા સુદ્ધચિત્તેનેવ ઉચ્ચારપસ્સાવાદિં કરોન્તસ્સ વા મુત્તેપિ અનાપત્તીતિ ઇદં ‘‘અનાપત્તિ સુપિનન્તેન નમોચનાધિપ્પાયસ્સા’’તિઆદિના (પારા. ૨૬૩) નયેન અનાપત્તિવારે વુત્તમેવાતિ અત્થો.

ઇમસ્મિં પાઠે ‘‘અનુપક્કમન્તસ્સા’’તિ અવુત્તેપિ ઇમસ્સ પાઠસ્સ પુરતો ‘‘ચેતેતિ ન ઉપક્કમતિ મુચ્ચતિ, અનાપત્તી’’તિ (પારા. ૨૬૨) ચ ‘‘ન ચેતેતિ ન ઉપક્કમતિ મુચ્ચતિ, અનાપત્તી’’તિ (પારા. ૨૬૨) ચ વચનતો તં સઙ્ગહેતુમાહ ‘‘અનુપક્કમતોપિ ચ મુત્તસ્મિં અનાપત્તિ પકાસિતા’’તિ. મોચનસ્સાદરાગેન પીળિતો હુત્વા ‘‘અહો વત મે મુચ્ચેય્યા’’તિ ચિન્તેત્વા વા એવરૂપમોચનસ્સાદરાગપીળાપુબ્બઙ્ગમચિત્તે અસતિપિ કેવલં કામવિતક્કમત્તેન ઉપહતો હુત્વા તાદિસઅજ્ઝત્તિકબાહિરવત્થૂસુ ઘટ્ટનવસેન વા આકાસે કટિકમ્પનવસેન વા ઉપક્કમં અકરોન્તસ્સ તાદિસચિન્તાબલેન વા કામવિતક્કબલેન વા સુક્કે મુત્તેપિ અનાપત્તીતિ ઇદં યથાવુત્તપાઠવસેન પકાસિતન્તિ અત્થો.

સુપિનન્તેન મુત્તસ્મિં, અનાપત્તિ પકાસિતાતિ એત્થ અન્તસદ્દત્થાભાવતો સુપિનેતિ અત્થો. સુપિને મેથુનં ધમ્મં પટિસેવન્તસ્સ વા માતુગામેહિ કાયસંસગ્ગં આપજ્જન્તસ્સ વા સુક્કે મુત્તેપિ અવિસયત્તા અનાપત્તિ પાળિયં ‘‘અનાપત્તિ ભિક્ખુ સુપિનન્તેના’’તિ (પારા. ૨૬૩) ઇમિના પકાસિતાતિ અત્થો.

એત્થ ઠત્વા અટ્ઠકથાયં ‘‘સુપિને પન ઉપ્પન્નાય અસ્સાદચેતનાય સચસ્સ વિસયો હોતિ, નિચ્ચલેન ભવિતબ્બં. ન હત્થેન નિમિત્તં કીળાપેતબ્બં. કાસાવપચ્ચત્થરણરક્ખનત્થં પન હત્થપુટેન ગહેત્વા જગ્ગનત્થાય ઉદકટ્ઠાનં ગન્તું વટ્ટતી’’તિ (પારા. અટ્ઠ. ૨.૨૬૨) વુત્તત્તા અણ્ડપાલિકા કિકીસકુણા વિય, વાલપાલિકા ચમરી વિય, એકનેત્તપાલકો પુરિસો વિય ચ કાયજીવિતેપિ અપેક્ખં પહાય સીલં રક્ખિતુકામેન સિક્ખાકામેન નિબ્બાનગામિનિપટિપત્તિં પૂરેતુકામેન કુલપુત્તેન ‘‘અઞ્ઞત્ર સુપિનન્તા’’તિ (પારા. ૨૩૭) વદતો તથાગતસ્સ અધિપ્પાયાનુકૂલં અટ્ઠકથાતો ઞત્વા અપ્પમત્તેન પટિપજ્જિતબ્બન્તિ અયમત્રાનુસાસની.

સુક્કવિસ્સટ્ઠિકથાવણ્ણના.

૩૩૩. મનુસ્સિત્થિન્તિ મનુસ્સજાતિકં ઇત્થિં, ‘‘માતુગામો નામ મનુસ્સિત્થી, ન યક્ખી, ન પેતી, ન તિરચ્છાનગતા, અન્તમસો તદહુજાતાપિ દારિકા, પગેવ મહત્તરી’’તિ (પારા. ૨૭૧) પદભાજને વુત્તત્તા તદહુજાતકુમારિકાભાવેનપિ ઠિતં જીવમાનકમનુસ્સમાતુગામન્તિ વુત્તં હોતિ. ‘‘મનુસ્સિત્થિ’’ન્તિ સામઞ્ઞવચનેન જીવમાનકમનુસ્સિત્થિન્તિ અયં વિસેસો કુતો લબ્ભતીતિ? વિનીતવત્થુમ્હિ (પારા. ૨૮૧ આદયો) મતિત્થિયા કાયં ફુસન્તસ્સ થુલ્લચ્ચયવચનતો પારિસેસતો લબ્ભતિ. આમસન્તોતિ ‘‘હત્થગ્ગાહં વા વેણિગ્ગાહં વા અઞ્ઞતરસ્સ વા અઞ્ઞતરસ્સ વા અઙ્ગસ્સ પરામસન’’ન્તિ (પારા. ૨૭૦) વુત્તત્તા હત્થાદિઅઙ્ગપચ્ચઙ્ગફુસનાદિનાનપ્પકારાનં અઞ્ઞતરેન પકારેન આમસન્તોતિ અત્થો. અત્તનો કાયેન ઇત્થિયા કાયસ્સ સંસગ્ગે મિસ્સીભાવે રાગો કાયસંસગ્ગરાગો. સઙ્ઘાદિસેસો એતસ્સ અત્થીતિ સઙ્ઘાદિસેસિકો, કાયસંસગ્ગસઙ્ઘાદિસેસો આપન્નો હોતીતિ વુત્તં હોતિ.

૩૩૪. કાયસંસગ્ગરાગેન ઇત્થિયા અન્તમસો લોમમ્પિ અત્તનો સરીરે લોમેન ફુસન્તસ્સ ભિક્ખુનો સઙ્ઘાદિસેસાપત્તિ હોતીતિ યોજના. એત્થ (પારા. અટ્ઠ. ૨.૨૭૪) ‘‘લોમગણનાય સઙ્ઘાદિસેસા હોન્તી’’તિ કુરુન્દટ્ઠકથામતસ્સ અટ્ઠિતત્તા, ‘‘કોટ્ઠાસગણનાય ન હોતિ, ઇત્થિગણનાય હોતી’’તિ મહાઅટ્ઠકથામતસ્સ ઠિતત્તા સઙ્ઘસન્તકે મઞ્ચપીઠે પચ્ચત્થરણાદિના કેનચિ અપ્પટિચ્છાદિતે ફુસન્તસ્સ વિય લોમગણનાય અહુત્વા ફુટ્ઠલોમાનં બહુત્તેપિ એકસ્મિં પયોગે એકા એવ આપત્તિ, બહૂસુ પયોગેસુ પયોગગણનાય આપત્તિયો હોન્તીતિ સન્નિટ્ઠાનં.

૩૩૫. ઇત્થિયાતિ મનુસ્સિત્થિયા. સમ્ફુટ્ઠોતિ હત્થાદિસરીરાવયવે સંસગ્ગં સમાપન્નો. સેવનચેતનો વાયમિત્વા કાયસંસગ્ગરાગેન અત્તનો કાયં ચાલેત્વાતિ અત્થો. સઙ્ઘાદિસેસતાતિ એત્થ સકત્થે તદ્ધિતપ્પચ્ચયો. ‘‘સઙ્ઘાદિસેસિતા’’તિ પન પાઠો સુન્દરો, સઙ્ઘાદિસેસસ્સ અત્થિતા વિજ્જમાનભાવોતિ અત્થો. સઙ્ઘાદિસેસાપત્તિયા સબ્ભાવસઙ્ખાતા અત્થિતા ઈપચ્ચયત્થે પુગ્ગલે સઙ્ઘાદિસેસીસદ્દપવત્તિનિમિત્તં હોતીતિ ભાવપચ્ચયો તંઅત્થવસેન લબ્ભતિ. યથાહુ ‘‘યસ્સ ગુણસ્સ હિ ભાવા દબ્બે સદ્દસન્નિવેસો, તદભિધાને ત્તતાદયો’’તિ.

૩૩૬. એકેન હત્થેન ગહેત્વાતિ (કઙ્ખા. અટ્ઠ. કાયસંસગ્ગસિક્ખાપદવણ્ણના) એત્થ ‘‘કાયસંસગ્ગરાગેના’’તિ આનેત્વા સમ્બન્ધિતબ્બં. ‘‘મનુસ્સિત્થિ’’ન્તિ અજ્ઝાહારો. તં મનુસ્સિત્થિં. તત્થ તત્થાતિ ઇત્થિયા તસ્મિં તસ્મિં સરીરાવયવે. ‘‘એકાવાપત્તી’’તિ પઠમં ગહિતહત્થસ્સ અનપનીતત્તા વુત્તં. ગહિતહત્થં પન મોચેત્વા પુનપ્પુનં ફુસન્તસ્સ પયોગગણનાય આપત્તિ હોતીતિ બ્યતિરેકતો લબ્ભતિ.

૩૩૭. એકેન હત્થેન અગ્ગહેત્વા સીસતો યાવ પાદં, પાદતો યાવ સીસઞ્ચ કાયા હત્થં અમોચેત્વા દિવસમ્પિ તં ઇત્થિં ફુસન્તસ્સ એકાવાપત્તીતિ યોજના. એત્થાપિ ‘‘અમોચેત્વા’’તિ બ્યતિરેકતો મોચેત્વા ફુસન્તસ્સ પયોગગણનાય અનેકાપત્તિયોતિ લબ્ભતિ.

૩૩૮. એકતો ગહિતપઞ્ચઙ્ગુલીનં ગણનાય સચે આપત્તિ સિયા, એકસ્સ માતુગામસ્સ સરીરં રાગચિત્તેન ફુસન્તસ્સ દ્વત્તિંસકલાપકોટ્ઠાસતો બ્યતિરેકસ્સ સરીરસ્સાભાવા દ્વત્તિંસકલાપકોટ્ઠાસગણનાય આપત્તિયા ભવિતબ્બં, તથા અભાવતો ઇદમ્પિ ન હોતીતિ દસ્સનત્થં ‘‘ન હિ કોટ્ઠાસતો સિયા’’તિ આહ.

૩૪૦-૧. ઇત્થિયા વિમતિસ્સાપિ અત્તનો કાયેન ઇત્થિયા કાયં ફુસતો તસ્સ થુલ્લચ્ચયં સિયા, ઇત્થિયા પણ્ડકાદિસઞ્ઞિનોપિ અત્તનોપિ કાયેન ઇત્થિયા કાયં ફુસતો તસ્સ થુલ્લચ્ચયં સિયા. આદિ-સદ્દેન પુરિસતિરચ્છાનગતાનં સઙ્ગહો. ઇત્થિયા ઇત્થિસઞ્ઞિનો અત્તનો કાયેન ઇત્થિયા કાયસમ્બદ્ધં ફુસતો તસ્સ થુલ્લચ્ચયં સિયા. પણ્ડકે પણ્ડકસઞ્ઞિનો અત્તનો કાયેન પણ્ડકસ્સ કાયં ફુસતો તસ્સ થુલ્લચ્ચયં સિયા. યક્ખિપેતીસુ યક્ખિપેતિસઞ્ઞિનો અત્તનો કાયેન તાસં કાયં ફુસતો તસ્સ થુલ્લચ્ચયં સિયાતિ યોજના. એત્થ ‘‘પણ્ડકગ્ગહણેન ઉભતોબ્યઞ્જનકોપિ ગય્હતી’’તિ વજિરબુદ્ધિટીકાયં વુત્તં. ‘‘ઇત્થિયા વેમતિકસ્સાપિ પણ્ડકાદિસઞ્ઞિનોપિ અત્તનો કાયેન ઇત્થિયા કાયસમ્બદ્ધં ફુસતો તસ્સ થુલ્લચ્ચયં સિયા’’તિ ન યોજેતબ્બં. કસ્મા? તથા યોજનાયં પાળિયં દુક્કટં વુત્તં, ન થુલ્લચ્ચયન્તિ અનિટ્ઠપ્પસઙ્ગતો.

‘‘દુક્કટં કાયસંસગ્ગે, તિરચ્છાનગતિત્થિયા’’તિ ઇમિના વિનીતવત્થુમ્હિ આગતનયે સઙ્ગહિતેપિ તેનેવ નયેન પણ્ડકે વિમતિઇત્થિસઞ્ઞિતાદિઅઞ્ઞમતિપક્ખે ચ પુરિસતિરચ્છાનગતેસુ પુરિસતિરચ્છાનગતસઞ્ઞિવિમતિપણ્ડકાદિઅઞ્ઞમતિપક્ખે ચ ઇતિ ઇમેસં તિણ્ણં કાયપટિબદ્ધામસનાદીસુ ચ પદભાજને વુત્તસબ્બદુક્કટાપત્તિયો ઉપલક્ખિતાતિ દટ્ઠબ્બં.

૩૪૨. અત્તનો કાયેન પટિબદ્ધેન ઇત્થિયા કાયેન પટિબદ્ધં ફુસન્તસ્સ ભિક્ખુનો પન દુક્કટન્તિ યોજના. એત્થ પિ-સદ્દો વુત્તદુક્કટાનં સમુચ્ચયત્થો. ચ-સદ્દેન પન અવુત્તસમુચ્ચયત્થેન ‘‘નિસ્સગ્ગિયેન કાયં આમસતિ. નિસ્સગ્ગિયેન કાયપટિબદ્ધં આમસતિ. નિસ્સગ્ગિયેન નિસ્સગ્ગિયં આમસતિ, આપત્તિ દુક્કટસ્સા’’તિ (પારા. ૨૭૬) પાળિયં આગતદુક્કટાનં સઙ્ગહો વેદિતબ્બો.

૩૪૩-૪. ન કેવલં પદભાજનાગતઇત્થિસરીરાદિકમેવ અનામાસં, વિનીતવત્થૂસુ દારુધીતલિકવત્થુઅનુલોમતો પોત્થલિકાદિઇત્થિરૂપકઞ્ચ નિસ્સગ્ગિયવારાનુલોમતો અસરીરટ્ઠં માતુગામેહિ પરિભુત્તવત્થાભરણાદિઞ્ચ વિભઙ્ગક્ખન્ધકાદીસુ વુત્તનયાનુસારેન અટ્ઠકથાગતં અવસેસં અનામાસવત્થુઞ્ચ આમસન્તસ્સ આપત્તિં સઙ્ગહેતુમાહ ‘‘ઇત્થીન’’ન્તિઆદિ.

‘‘ઇત્થીનં ઇત્થિરૂપઞ્ચા’’તિ ઇદં ‘‘ઇત્થિકાય ઇત્થિધનં (પારા. ૩૪), સદ્ધાનં સદ્ધાપરાયન’’ન્તિઆદીસુ વિય લોકવોહારવસેન વુત્તં. ઇત્થીનં દારુલોહમયાદિકં ઇત્થિરૂપઞ્ચાતિ યોજના. આદિ-સદ્દેન હેટ્ઠિમપરિચ્છેદતો મત્તિકાય, પિટ્ઠેન વા કતં માતુગામરૂપં સઙ્ગણ્હાતિ. માતુગામરૂપં યેન કેનચિ દિન્નં સબ્બરતનમયં વિના અવસેસં સાદિયિત્વા ભિન્દિત્વા સમણસારુપ્પપરિક્ખારં કારાપેતું, અફુસિત્વા પરિભુઞ્જિતબ્બે વા યોજેતું વટ્ટતિ.

‘‘વત્થ’’ન્તિ ઇમિના નિવાસનપારુપનદ્વયમ્પિ સામઞ્ઞેન ગહિતં. ઇદઞ્ચ માતુગામેન પરિભુઞ્જિતું ઠપિતમ્પિ અનામાસમેવ, ચીવરત્થાય દિન્નં સમ્પટિચ્છિત્વા ગણ્હિતું વટ્ટતિ. હેટ્ઠિમપરિચ્છેદેન તિણચુમ્બટકં, અઙ્ગુલિયા પણ્ણમુદ્દિકં ઉપાદાય અલઙ્કારમેવ. એત્થ ચ વાલકેસવટ્ટકેસેસુ પવેસનકદન્તસૂચિઆદિ કપ્પિયભણ્ડં દિય્યમાનં સમણસારુપ્પપરિક્ખારત્થાય ગહેતબ્બં.

તત્થજાતફલં ખજ્જન્તિ રુક્ખે ઠિતં ખાદિતબ્બં પનસનાળિકેરાદિફલઞ્ચ મનુસ્સેહિ રાસિકતં પરિભુઞ્જિતબ્બફલઞ્ચ ‘‘મનુસ્સેહિ રાસિકતેસુપિ એસેવ નયો’’તિ (પારા. અટ્ઠ. ૨.૨૮૧) અટ્ઠકથાયં વુત્તત્તા અનામાસન્તિ ઉપલક્ખણતો ઇમિનાવ ગહેતબ્બં. અરઞ્ઞે રુક્ખતો પતિતં ફલં ‘‘અનુપસમ્પન્નસ્સ દસ્સામી’’તિ ગહેતું વટ્ટતિ. ‘‘મુગ્ગાદિં તત્થજાતક’’ન્તિ ઉપલક્ખણપદત્તા ગચ્છતો વિયુત્તમ્પિ ગહેતબ્બં. મુગ્ગાદિન્તિ એત્થ ‘‘અપરણ્ણ’’ન્તિ પાઠસેસો.

સબ્બાનિ ધઞ્ઞાનીતિ ‘‘સાલિ વીહિ યવો કઙ્ગુ, કુદ્રૂસવરકગોધુમા’’તિ વુત્તાનિ સત્ત ધઞ્ઞાનિ. ખેત્તમગ્ગેન ગચ્છતા સાલિસીસે હત્થેન અફુસન્તેન ગન્તબ્બં. સચે મગ્ગો સમ્બાધો હોતિ, સરીરે ધઞ્ઞં ફુસન્તેપિ મગ્ગત્તા ન દોસો. વીથિયં, ગેહઙ્ગણે વા ધઞ્ઞેસુ પસારિતેસુ અપસક્કિત્વા ચે ગન્તું ન સક્કા, ‘‘મગ્ગં અધિટ્ઠાય ગન્તબ્બ’’ન્તિ (પારા. અટ્ઠ. ૨.૨૮૧) અટ્ઠકથાવચનતો ‘‘ઇમં મગ્ગં ગમિસ્સામી’’તિ ગન્તું વટ્ટતિ. ‘‘કુલગેહે ધઞ્ઞમત્થકે ચે આસનં પઞ્ઞાપેત્વા દિન્નં હોતિ, નિસીદિતું વટ્ટતી’’તિ (પારા. અટ્ઠ. ૨.૨૮૧ અત્થતો સમાનં) અટ્ઠકથાયં વુત્તં. ‘‘આસનસાલાયં ધઞ્ઞે વિપ્પકિણ્ણે અનુક્કમિત્વા એકમન્તે પીઠકં પઞ્ઞાપેત્વા નિસીદિતબ્બં. સચે મનુસ્સા તસ્મિં ધઞ્ઞમત્થકે આસનં પઞ્ઞાપેત્વા દેન્તિ, નિસીદિતું વટ્ટતી’’તિ (પારા. અટ્ઠ. ૨.૨૮૧ અત્થતો સમાનં) અટ્ઠકથાયં વુત્તત્તા અત્તના તત્થ આસનં પઞ્ઞાપેત્વા નિસીદિતું ન વટ્ટતિ.

૩૪૫. ધમનસઙ્ખાદિં સબ્બં પઞ્ચઙ્ગતુરિયમ્પિ ચાતિ સમ્બન્ધો. ધમનસઙ્ખો નામ સદ્દકરણસઙ્ખો. આદિ-સદ્દેન વંસસિઙ્ગતાળાદીનં સઙ્ગહો. પઞ્ચઙ્ગતુરિયન્તિ આતતં, વિતતં, આતતવિતતં, ઘનં, સુસિરન્તિ પઞ્ચઙ્ગસઙ્ખાતં તુરિયં. તત્થ આતતં નામ ચમ્મપરિયોનદ્ધેસુ ભેરિઆદીસુ એકતો આકડ્ઢિત્વા ઓનદ્ધં એકતલતુરિયં. વિતતં નામ ઉભતો આકડ્ઢિત્વા ઓનદ્ધં ઉભયતલતુરિયં. આતતવિતતં નામ ઉભયતો ચ મજ્ઝતો ચ સબ્બતો પરિયોનન્ધિતં. ઘનં સમ્માદિ. સમ્મન્તિ તાળં, ઘણ્ટાકિઙ્કણિઆદીનમ્પિ એત્થેવ સઙ્ગહો. સુસિરન્તિ વંસાદિ.

ઇધ (પારા. અટ્ઠ. ૨.૨૮૧) કુરુન્દટ્ઠકથાયં વુત્તનયેન ભેરિપોક્ખરઞ્ચ ભેરિતલચમ્મઞ્ચ વીણા ચ વીણાપોક્ખરચમ્મઞ્ચ દણ્ડો ચ અનામાસં. ‘‘પૂજં કત્વા ચેતિયઙ્ગણાદીસુ ઠપિતભેરિયો અચાલેન્તેન અવસેસટ્ઠાનં સમ્મજ્જિતબ્બં. કચવરછડ્ડનકાલે કચવરં વિય ગહેત્વા એકસ્મિં ઠાને ઠપેતબ્બ’’ન્તિ મહાપચ્ચરિયં વુત્તં. તુરિયભણ્ડેસુ યં કિઞ્ચિ અત્તનો દીયમાનં તં પરિવત્તેત્વા કપ્પિયપરિક્ખારં ગહેતું અધિવાસેતબ્બં. દોણિ વા પોક્ખરં વા દન્તકટ્ઠનિક્ખિપનત્થાય, ચમ્મઞ્ચ સત્થકોસકરણત્થાય ગહેતબ્બં.

રતનાનિ ચ સબ્બાનીતિ મુત્તા મણિ વેળુરિયો સઙ્ખો સિલા પવાળં રજતં જાતરૂપં લોહિતઙ્કો મસારગલ્લન્તિ (પારા. અટ્ઠ. ૨.૨૮૧) વુત્તાનિ સબ્બાનિ રતનાનિ ચ. એત્થ ચ વિદ્ધા, અવિદ્ધા વા સામુદ્દિકાદી સબ્બાપિ મુત્તા અનામાસા. ભણ્ડમૂલત્થઞ્ચ ગણ્હિતું ન વટ્ટતિ. અન્તમસો જાતિફલિકં ઉપાદાય નીલપીતાદિભેદો સબ્બોપિ મણિ ધોતવિદ્ધો અનામાસો. આહતાકારેનેવ ઠિતો અવિદ્ધાધોતો મણિ પત્તાદિ ભણ્ડમૂલત્થં અધિવાસેતું વટ્ટતીતિ વુત્તં. મહાપચ્ચરિયં પન પટિક્ખિત્તં. પચિત્વા કતો કાચમણિયેવેકો વટ્ટતિ. વેળુરિયે ચ મણિસદિસોયેવ વિનિચ્છયો.

ધમનસઙ્ખો ‘‘સબ્બં ધમનસઙ્ખાદિ’’ન્તિઆદિગાથાય તુરિયેસુ ગહિતો. રતનખચિતો સઙ્ખો અનામાસો. પાનીયસઙ્ખો ધોતોપિ અધોતોપિ આમાસો. અવસેસસઙ્ખો પન અઞ્જનાદિભેસજ્જત્થં, પત્તાદિભણ્ડમૂલભાવેન ચ અધિવાસેતું વટ્ટતિ. સુવણ્ણેન એકતો વિલિયાપેત્વા કતા મુગ્ગવણ્ણા સિલા અનામાસા. સેસા સિલા ખુદ્દકનિસાનાદિકમ્મત્થં અધિવાસેતું વટ્ટતિ. ‘‘પવાળં ધોતમધોતઞ્ચ વિદ્ધમવિદ્ધઞ્ચ સબ્બથા અનામાસં, નાપિ અધિવાસેતબ્બ’’ન્તિ મહાપચ્ચરિયં વુત્તત્તા પવાળપટિમાચેતિયાનિ ચેવ પોત્થકેસુ પવેસેતબ્બઆણિયા મૂલે, અગ્ગેચ પવેસેતબ્બં પદુમાદિઆકારેન કતં વટ્ટઞ્ચ ન ગહેતબ્બં ન ફુસિતબ્બં.

બીજતો પટ્ઠાય રજતં, જાતરૂપઞ્ચ કતં વા હોતુ અકતં વા, સબ્બસો અનામાસં, ન ચ સાદિતબ્બં. ઇમિના કતં પટિમાદિકઞ્ચ આરકૂટલોહઞ્ચ અનામાસન્તિ વક્ખતિ. કતાકતસુવણ્ણરજતાનં અસાદિયિતબ્બતાય ઇધ અટ્ઠકથાય આગતત્તા ઉત્તરેન રાજપુત્તેન કારેત્વા આહટં સુવણ્ણચેતિયં ન વટ્ટતીતિ મહાપદુમત્થેરેન પટિક્ખિત્તન્તિ સુવણ્ણપટિમાચેતિયપોત્થકાવચ્છાદકમણિપદુમવટ્ટાદિ યં કિઞ્ચિ ન સાદિતબ્બમેવ, ન ચ આમસિતબ્બં. એતેન કતં સેનાસનોપકરણં પન પરિભુઞ્જિતું વટ્ટતિ. ધમ્મમણ્ડપે કતમ્પિ પટિજગ્ગિતું વટ્ટતિ. લોહિતવણ્ણો મણિ, મસારગલ્લમણિ ચ સબ્બથા અનામાસો, ન ચ અધિવાસેતબ્બોતિ મહાપચ્ચરિયં વુત્તં.

૩૪૬. સબ્બમાવુધભણ્ડન્તિ ખગ્ગાદિ સબ્બં આવુધોપકરણં પત્તાદિકપ્પિયપરિક્ખારમૂલત્થાય દીયમાનં સત્થવાણિજાય અકાતબ્બત્તા ન ગહેતબ્બં, ‘‘ઇમં ગણ્હથા’’તિ દિન્નં ભિન્દિત્વા ખણ્ડાખણ્ડિકં કત્વા ‘‘ખુરાદિકપ્પિયપરિક્ખારં કારેસ્સામી’’તિ સાદિતું વટ્ટતિ. સઙ્ગામભૂમિયં મગ્ગે પતિતખગ્ગાદિં દિસ્વા પાસાણેન ભિન્દિત્વા ‘‘ખુરાદિકપ્પિયભણ્ડાનિ કારેસ્સામી’’તિ ગણ્હિતું વટ્ટતિ. ઉસુસત્તિઆદિકં ફલતો દણ્ડં અપનેત્વા કપ્પિયપરિક્ખારકારાપનત્થાય ગહેતબ્બં.

જિયાતિ ધનુગુણો. ચ-કારેન ઇમિસ્સા ગાથાય અવુત્તં અઙ્કુસતોમરાદિં પરહિં સોપકરણં સઙ્ગણ્હાતિ. ધનુદણ્ડકોતિ જિયાવિરહિતો ધનુદણ્ડકો. ઇદં પરહિંસોપકરણભણ્ડાદિકં વિહારે સમ્મજ્જિતબ્બટ્ઠાને ઠપિતં ચે, સામિકાનં વત્વા તેહિ અગ્ગહિતં ચે, અચાલેન્તેન સમ્મજ્જિતબ્બં.

જાલઞ્ચાતિ મચ્છજાલપક્ખિજાલાદિજાલઞ્ચ. જાલં દીયમાનં છત્તવેઠનત્થં, આસનચેતિયાદિમત્થકે બન્ધનાદિપયોજને સતિ તદત્થઞ્ચ ગહેતબ્બં. સરવારણં નામ ફલકાદિકં અઞ્ઞેહિ અત્તનો વિજ્ઝનત્થાય વિસ્સટ્ઠસરનિવારણં વિનાસનોપરોધકારણં હોતીતિ ભણ્ડમૂલત્થં સાદિતું વટ્ટતિ. ‘‘દન્તકટ્ઠાધારફલકાદિ યદિચ્છિતં કરોમી’’તિ મુટ્ઠિં અપનેત્વા ગહેતું વટ્ટતિ.

૩૪૭. ચેતિયન્તિ એત્થ ‘‘સુવણ્ણચેતિય’’ન્તિ ઇદં ‘‘સુવણ્ણપટિબિમ્બાદી’’તિ અનન્તરં વુત્તત્તા લબ્ભતિ. સુવણ્ણગ્ગહણઞ્ચુપલક્ખણન્તિ રજતમયઞ્ચ ગહેતબ્બં. આરકૂટકન્તિ સુવણ્ણવણ્ણં લોહવિસેસમાહ. ‘‘અનામાસ’’ન્તિ ઇદં ‘‘અસમ્પટિચ્છિયં વા’’તિ એતસ્સ ઉપલક્ખણં.

૩૪૮. સબ્બં વાદિતમિતિ સમ્બન્ધો. ઓનહિતુન્તિ ચમ્મવરત્તતન્તીહિ બન્ધિતું. ઓનહાપેતુન્તિ તથેવ અઞ્ઞેહિ કારાપેતું. વાદાપેતુન્તિ અઞ્ઞેહિ વાદાપેતું. વાદેતુન્તિ અત્તના વાદેતું. વાદિતન્તિ વાદનીયં યથા ‘‘કરણીયં કારિત’’ન્તિ, વાદનારહં તુરિયભણ્ડન્તિ અત્થો. ઇદઞ્ચ ઓનહનાદિકિરિયાય કમ્મં.

૩૪૯. ઉપહારં કરિસ્સામાતિ પૂજં કરિસ્સામ. ઇતિ અનુમતિગ્ગહણત્થાય. વત્તબ્બાતિ તે વત્તારો વત્તબ્બાતિ યોજના.

૩૫૦-૧. ધુત્તિયા ઇત્થિયાતિ વિપન્નાચારાય લોળિત્થિયા. સયં ફુસિયમાનસ્સાતિ ભિક્ખુનો પયોગં વિના ઇત્થિયા અત્તનાવ ફુસિયમાનસ્સ. કાયેન અવાયમિત્વાતિ તસ્સા સરીરસમ્ફસ્સાનુભવનત્થં અત્તનો કાયં અચાલેત્વા. ફસ્સં પટિવિજાનતોતિ ફસ્સં અનુભવન્તસ્સ.

અસઞ્ચિચ્ચાતિ એત્થ ‘‘ફુસને’’તિ પાઠસેસો, ‘‘ઇમિના ઉપાયેન ઇમં ફુસામી’’તિ અચેતેત્વા. કિં વુત્તં હોતિ? ‘‘ઇમિના પત્તપટિગ્ગહણાદિના ઉપાયેન એતિસ્સા સરીરસમ્ફસ્સં અનુભવિસ્સામી’’તિ અચિન્તેત્વા પત્તથાલકતટ્ટકપણ્ણપુટભેસજ્જાદિં પટિગ્ગણ્હાપેન્તિયા હત્થે અત્તનો હત્થેન ફુસનાદીસુ અનાપત્તીતિ વુત્તં હોતિ. ‘‘અસ્સતિયા’’તિ ઇદં પન ઇમિનાવ સઙ્ગહિતત્તા ઇધ વિસું ન વુત્તં, માતુગામસ્સ સરીરે ફુસનભાવં અજાનિત્વા અઞ્ઞવિહિતો હુત્વા સતિં અનુપટ્ઠપેત્વા હત્થપાદપસારણાદીસુ ફુસન્તસ્સાતિ અત્થો.

અજાનન્તસ્સાતિ દારકાકારં દારિકં ‘‘માતુગામો’’તિ અજાનિત્વા કેનચિ કરણીયેન ફુસન્તસ્સ. મોક્ખાધિપ્પાયિનો ચાતિ ‘‘મોક્ખાધિપ્પાયો કાયેન વાયમતિ, ફસ્સં પટિવિજાનાતિ, અનાપત્તિ. મોક્ખાધિપ્પાયો કાયેન વાયમતિ, ન ચ ફસ્સં પટિવિજાનાતિ, અનાપત્તિ. મોક્ખાધિપ્પાયો ન ચ કાયેન વાયમતિ, ફસ્સં પટિવિજાનાતિ, અનાપત્તિ. મોક્ખાધિપ્પાયો ન ચ કાયેન વાયમતિ, ન ચ ફસ્સં પટિવિજાનાતિ, અનાપત્તી’’તિ (પારા. ૨૭૯) વુત્તમોક્ખાધિપ્પાયવતો ચતુબ્બિધસ્સ પુગ્ગલસ્સાતિ વુત્તં હોતિ. ‘‘અનાપત્તી’’તિ ઇમિના સમ્બન્ધો.

ઇમેસુ યો માતુગામેન આલિઙ્ગનાદિપયોગેન અજ્ઝોત્થરયમાનો તં અત્તનો સરીરતો અપનેત્વા મુઞ્ચિતુકામો હત્થચાલેન, મુટ્ઠિઆદીહિ વા પટિપણામનં, પહરણાદિકઞ્ચ પયોગં કરોતિ, અયં પઠમો પુગ્ગલો. અત્તાનમજ્ઝોત્થરિતું આગચ્છન્તિં ઇત્થિં દિસ્વા પહરણાકારાદિસબ્બપયોગં દસ્સેત્વા તાસેત્વા અત્તનો સરીરં ફુસિતું અદેન્તો દુતિયો. ઇત્થિયા અજ્ઝોત્થરિત્વા આલિઙ્ગિતો ચોપનરહિતં મં ‘‘અનત્થિકો’’તિ મન્ત્વા ‘‘સયમેવ પલાયિસ્સતી’’તિ, ‘‘અચોપનમેવ મોક્ખોપાયો’’તિ ઞત્વા નિચ્ચલોવ હુત્વા ફસ્સં પટિવિજાનન્તો તતિયો. અત્તાનં અજ્ઝોત્થરિતુમાગચ્છન્તિં ઇત્થિં દિસ્વા દુતિયો વિય તાસેતું કાયપ્પયોગં અકત્વા ‘‘અગતે પાતેસ્સામિ, પહરિત્વા તાસેસ્સામી’’તિ વા ચિન્તેત્વા નિચ્ચલોવ હુત્વા તિટ્ઠન્તો ચતુત્થોતિ વેદિતબ્બો.

૩૫૨. પઠમેનાતિ એત્થ ‘‘પારાજિકેના’’તિ પાઠસેસો, કાયચિત્તસમુટ્ઠાનન્તિ વુત્તં હોતિ. ઇધ ચિત્તં નામ કાયસંસગ્ગરાગસમ્પયુત્તં ચિત્તં, સુક્કવિસ્સટ્ઠિમ્હિ મોચેતુકામતાય સમ્પયુત્તં ચિત્તં.

કાયસંસગ્ગકથાવણ્ણના.

૩૫૩-૪. દુટ્ઠુલ્લવાચસ્સાદેનાતિ દુટ્ઠુ કુચ્છિતભાવં ઉલતિ ગચ્છતીતિ દુટ્ઠુલ્લા, દુટ્ઠુલ્લા ચ સા વાચા ચાતિ દુટ્ઠુલ્લવાચા, વચ્ચમગ્ગપસ્સાવમગ્ગે મેથુનધમ્મપટિસંયુત્તા વાચા, યથાહ ‘‘દુટ્ઠુલ્લા નામ વાચા વચ્ચમગ્ગપસ્સાવમગ્ગમેથુનધમ્મપટિસંયુત્તા વાચા’’તિ (પારા. ૨૮૫), દુટ્ઠુલ્લવાચાય અસ્સાદો દુટ્ઠુલ્લવાચસ્સાદો, તથાપવત્તવચીવિઞ્ઞત્તિસમુટ્ઠાપકચિત્તસમ્પયુત્તા ચેતના, તેન સમ્પયુત્તો રાગો ઇધ સહચરિયેન ‘‘દુટ્ઠુલ્લવાચસ્સાદો’’તિ વુત્તો, તેન, દુટ્ઠુલ્લવાચસ્સાદસમ્પયુત્તેન રાગેનાતિ અત્થો. ઇમિના ‘‘ઓભાસન્તસ્સા’’તિ વક્ખમાનઓભાસનસ્સ હેતુ દસ્સિતો.

ઇત્થિયા ઇત્થિસઞ્ઞિનો ભિક્ખુનોતિ યોજના. ઇત્થિયા ઇત્થિસઞ્ઞિનોતિ ‘‘માતુગામો નામ મનુસ્સિત્થી, ન યક્ખી, ન પેતી, ન તિરચ્છાનગતા, વિઞ્ઞૂ પટિબલા સુભાસિતદુબ્ભાસિતં દુટ્ઠુલ્લાદુટ્ઠુલ્લં આજાનિતુ’’ન્તિ પદભાજને નિદ્દિટ્ઠસરૂપાય સુભાસિતદુબ્ભાસિતં જાનન્તિયા મનુસ્સિત્થિયા ઇત્થિસઞ્ઞિનો ભિક્ખુનોતિ અત્થો. ‘‘દ્વિન્નં મગ્ગાન’’ન્તિ એતસ્સ સમ્બન્ધીવસેન ‘‘ઇત્થિયા’’તિ ઇદં સામિવસેન યોજેતબ્બં, યથાવુત્તસરૂપસ્સ માતુગામસ્સ વચ્ચમગ્ગપસ્સાવમગ્ગન્તિ અત્થો. વણ્ણાવણ્ણવસેન ચાતિ ‘‘વણ્ણં ભણતિ નામ દ્વે મગ્ગે થોમેતિ વણ્ણેતિ પસંસતિ. અવણ્ણં ભણતિ નામ દ્વે મગ્ગે ખુંસેતિ વમ્ભેતિ ગરહતી’’તિ નિદ્દેસે વુત્તનયેન ઉભો મગ્ગે ઉદ્દિસ્સ થોમનગરહણવસેનાતિ વુત્તં હોતિ.

મેથુનસ્સ યાચનાદયો મેથુનયાચનાદયો, તેહિ મેથુનયાચનાદીહિ, ‘‘યાચતિપિ આયાચતિપિ પુચ્છતિપિ પટિપુચ્છતિપિ આચિક્ખતિપિ અનુસાસતિપિ અક્કોસતિપી’’તિ (પારા. ૨૮૫) ઉદ્દેસે વુત્તમેથુનયાચનાદિવસેનાતિ વુત્તં હોતિ. ઇમેહિ દ્વીહિ ‘‘ઓભાસન્તસ્સા’’તિ વુત્તઓભાસના દસ્સિતા. ઓભાસન્તસ્સાતિ ઉદ્દેસયન્તસ્સ, પકાસેન્તસ્સાતિ અત્થો. ‘‘વિઞ્ઞુ’’ન્તિ ઇમિના ઓભાસનકિરિયાય કમ્મમાહ, ઇમિના વિસેસિતબ્બં ‘‘મનુસ્સિત્થિ’’ન્તિ ઇદં પકરણતો લબ્ભતિ, યથાદસ્સિતપદભાજનાગતસરૂપં વિઞ્ઞું પટિબલં મનુસ્સિત્થિન્તિ વુત્તં હોતિ. અન્તમસો હત્થમુદ્દાયપીતિ ઓભાસને અન્તિમપરિચ્છેદદસ્સનં. દુટ્ઠુલ્લવચનસ્સાદભાવે સતિ યો વચ્ચમગ્ગપસ્સાવમગ્ગપટિબદ્ધં ગુણદોસં વા મેથુનધમ્મયાચનાદિવસેન વા દુટ્ઠુલ્લાદુટ્ઠુલ્લં જાનન્તિં મનુસ્સિત્થિં હેટ્ઠિમપરિચ્છેદેન હત્થમુદ્દાયપિ વદેય્યાતિ અત્થો.

ઇમસ્મિં ગાથાદ્વયે દુટ્ઠુલ્લવાચસ્સાદેન ઇત્થિયા ઇત્થિસઞ્ઞિનો વિઞ્ઞું તં ઇત્થિં દ્વિન્નં મગ્ગાનં વણ્ણવસેન અન્તમસો હત્થમુદ્દાયપિ ઓભાસન્તસ્સ ભિક્ખુનો ગરુકં સિયાતિ એકં વાક્યં, તથા ‘‘દ્વિન્નં મગ્ગાનં અવણ્ણવસેના’’તિ ઇમિના ચ ‘‘મેથુનયાચનાદીહી’’તિ ઇમિના ચ યોજનાય વાક્યદ્વયન્તિ એવં યોજનાવસેન તીણિ વાક્યાનિ હોન્તિ.

તત્થ પઠમવાક્યે વણ્ણવચનેન સઙ્ગહિતં થોમનાદિકથં કથેન્તસ્સ સઙ્ઘાદિસેસો હોતિ. ‘‘ઇત્થિલક્ખણેન સુભલક્ખણેન સમન્નાગતાસી’’તિ એત્તકમેવ થોમનત્થં વદતો સઙ્ઘાદિસેસો ન હોતિ, ‘‘તવ વચ્ચમગ્ગો ચ પસ્સાવમગ્ગો ચ ઈદિસો સુભો સુસણ્ઠાનો, તેન નામ ઈદિસેન ઇત્થિલક્ખણેન સુભલક્ખણેન સમન્નાગતાસી’’તિ વદન્તસ્સ હોતિ. ‘‘વણ્ણેતિ, પસંસતી’’તિ પદદ્વયઞ્ચ ‘‘થોમેતી’’તિ પદસ્સ પરિયાયો.

દુતિયવાક્યે અવણ્ણપદસઙ્ગહિતં ખુંસનાદિત્તયે ખુંસનં નામ પતોદોપમેહિ ફરુસવચનેહિ તુદનં. યથાહ અટ્ઠકથાયં ‘‘ખુંસેતીતિ વાચાપતોદેન ઘટ્ટેતી’’તિ (પારા. અટ્ઠ. ૨.૨૮૫). પતુજ્જતેનેનાતિ ‘‘પતોદો’’તિઅગચ્છન્તે અસ્સાદયો પવત્તેતું વિજ્ઝનકપાચનદણ્ડો વુચ્ચતિ. વમ્ભનં નામ અપસાદનં. અપસાદનં નામ ગુણતો પરિહાપનં. યથાહ ‘‘વમ્ભેતીતિ અપસાદેતી’’તિ (પારા. અટ્ઠ. ૨.૨૮૫). ગરહા નામ દોસારોપનં. યથાહ ‘‘ગરહતીતિ દોસં દેતી’’તિ (પારા. અટ્ઠ. ૨.૨૮૫). ઇમં ખુંસનાદિપટિસંયુત્તવચનં વક્ખમાનેસુ ‘‘સિખરણીસિ, સમ્ભિન્નાસિ, ઉભતોબ્યઞ્જનાસી’’તિ ઇમેસુ તીસુ પદેસુ અઞ્ઞતરેન યોજેત્વા કથેન્તસ્સેવ સઙ્ઘાદિસેસો, ન ઇતરસ્સ.

તતિયવાક્યે મેથુનયાચનાદિવચનેહિ સઙ્ગહિતં આયાચનાદિં કરોન્તસ્સાપિ સઙ્ઘાદિસેસો. ‘‘યાચતિ નામ દેહિ મે અરહસિ મે દાતુ’’ન્તિઆદિના (પારા. ૨૮૫) નયેન એકેકં પદં ‘‘દેહિ મે મેથુનં ધમ્મ’’ન્તિઆદિવસેન મેથુનધમ્મપદેન સહ ઘટેત્વા મેથુનધમ્મં યાચન્તસ્સેવ હોતિ.

‘‘કદા તે માતા પસીદિસ્સતિ, કદા તે પિતા પસીદિસ્સતિ, કદા તે દેવતાયો પસીદિસ્સન્તિ, કદા તે સુખણો સુલયો સુમુહુત્તો ભવિસ્સતી’’તિઆદિઆયાચનપદનિદ્દેસે એકેકં પદં તત્થેવ ઓસાને વુત્તેન ‘‘કદા તે મેથુનં ધમ્મં લભિસ્સામી’’તિ પદેન ઘટેત્વા મેથુનં યાચન્તસ્સેવ હોતિ.

‘‘કથં ત્વં સામિકસ્સ દેસિ, કથં જારસ્સ દેસી’’તિ (પારા. ૨૮૫) પુચ્છાનિદ્દેસવચનેસુ ચ અઞ્ઞતરં મેથુનધમ્મપદેન ઘટેત્વા પુચ્છન્તસ્સેવ હોતિ.

‘‘એવં કિર ત્વં સામિકસ્સ દેસિ, એવં જારસ્સ દેસી’’તિ (પારા. ૨૮૫) પટિપુચ્છાનિદ્દેસવચનેસુ અઞ્ઞતરં મેથુનધમ્મપદેન ઘટેત્વા વિસેસેત્વા પટિપુચ્છન્તસ્સેવ હોતિ.

‘‘કથં દદમાના સામિકસ્સ પિયા હોતી’’તિ પુચ્છતો માતુગામસ્સ ‘‘એવં દેહિ, એવં દેન્તી સામિકસ્સ પિયા ભવિસ્સતિ મનાપા ચા’’તિ આણત્તિવચને, અનુસાસનિવચને ચ એસેવ નયો.

૩૫૫. અક્કોસનિદ્દેસાગતેસુ ‘‘અનિમિત્તાસિ નિમિત્તમત્તાસિ અલોહિતાસિ ધુવલોહિતાસિ ધુવચોળાસિ પગ્ઘરન્તીસિ સિખરણીસિ ઇત્થિપણ્ડકાસિ વેપુરિસિકાસિ સમ્ભિન્નાસિ ઉભતોબ્યઞ્જનાસી’’તિ એકાદસસુ પદેસુ ‘‘સિખરણીસિ સમ્ભિન્નાસિ ઉભતોબ્યઞ્જનાસી’’તિ પદત્તયં પચ્ચેકં આપત્તિકરં, ઇમિના પદત્તયેન સહ પુબ્બે વુત્તાનિ વચ્ચમગ્ગપસ્સાવમગ્ગમેથુનધમ્મપદાનિ તીણિ ચાતિ છપ્પદાનં પચ્ચેકં આપત્તિકરત્તા ઇતો પરાનિ અનિમિત્તાદીનિ અટ્ઠ પદાનિ ‘‘અનિમિત્તાસિ મેથુનધમ્મં દેહી’’તિઆદિના નયેન મેથુનધમ્મપદેન સહ ઘટેત્વા વુત્તાનેવ આપત્તિકરાનીતિ વેદિતબ્બાનિ, ‘‘મેથુનયાચનાદીહી’’તિ એત્થ આદિ-સદ્દસઙ્ગહિતેસુ ‘‘અનિમિત્તાસી’’તિઆદીસુ એકાદસસુ અક્કોસપદેસુ અન્તોગધત્તેપિ કેવલં આપત્તિકરત્તા ગરુતરં પદત્તયં વિસું સઙ્ગહેતબ્બન્તિ ઞાપેતુમાહ ‘‘સિખરણીસી’’તિઆદિ.

સિખરણીસીતિ એત્થ ‘‘સિખરણી અસી’’તિ પદચ્છેદો. ‘‘અસી’’તિ પચ્ચેકં યોજેતબ્બં. તુ-સદ્દો કેવલયુત્તમ્પિ આપત્તિકરં હોતીતિ વિસેસં જોતેતિ. કેવલેનાપિ અક્કોસવચનેનાતિ યોજના. સિખરણીસીતિ બહિ નિક્ખન્તઆણિમંસા ભવસિ. સમ્ભિન્નાસીતિ મિસ્સીભૂતવચ્ચમગ્ગપસ્સાવમગ્ગા. ઉભતોબ્યઞ્જનાસીતિ ઇત્થિનિમિત્તેન, પુરિસનિમિત્તેન ચાતિ ઉભતોબ્યઞ્જનેહિ સમન્નાગતા. ‘‘અયં ઇત્થી, અયં પુરિસો’’તિ બ્યઞ્જયતીતિ બ્યઞ્જનં, મુત્તકરણાનિ. સુણન્તિયાતિ એત્થ ‘‘વિઞ્ઞુમનુસ્સિત્થિયા’’તિ અધિકારતો લબ્ભતિ, ઇમિના અક્કોસિતબ્બવત્થુ દસ્સિતં હોતિ. ભાસિતં સુણન્તિયા સુભાસિતદુબ્ભાસિતં જાનન્તિયા મનુસ્સિત્થિયા વિસયે પવત્તઅક્કોસવચનેન સઙ્ઘાદિસેસો હોતીતિ અત્થો.

૩૫૬. પુનપ્પુનં ઓભાસન્તસ્સ વાચાનં ગણનાય ગરુકા સિયુન્તિ યોજના. એત્થ ‘‘એકં ઇત્થિ’’ન્તિ અજ્ઝાહરિતબ્બં. એકવાચાય બહૂ ઓભાસન્તસ્સ ચ ઇત્થીનં ગણનાય ગરુકા સિયુન્તિ યોજના. એત્થાપિ ‘‘ઇત્થિયોપી’’તિ લબ્ભતિ.

૩૫૭. સા ચે નપ્પટિજાનાતીતિ એત્થ ‘‘યં સુણન્તિં મનુસ્સિત્થિં દ્વિન્નં મગ્ગાનં વણ્ણાવણ્ણવસેન ઓભાસતિ, સા ચે ન પટિજાનાતી’’તિ સામત્થિયા લબ્ભમાનં આદાય યોજેતબ્બં. અત્તનો ભાસિતં દુટ્ઠુલ્લં વુત્તસમનન્તરમેવ અત્થવસેન સચે ન જાનાતીતિ અત્થો. તસ્સાતિ તસ્સ દુટ્ઠુલ્લભાસિતભિક્ખુસ્સ. ઉબ્ભજાણું, અધક્ખકં વા આદિસ્સ ભણને ચાપિ તસ્સ થુલ્લચ્ચયં સિયાતિ યોજના. ભણનેતિ દ્વિન્નં મગ્ગાનં વણ્ણાદિકથને, ‘‘ભણતો’’તિપિ લિખન્તિ, ભણન્તસ્સ, ભણનહેતૂતિ અત્થો. હેતુમ્હિ અયમન્તપચ્ચયો ‘‘અસમ્બુધ’’ન્તિઆદીસુ (પારા. અટ્ઠ. ૧.ગન્થારમ્ભકથા) વિય. ઉબ્ભજાણુન્તિ જાણુતો ઉદ્ધં. અક્ખેકન્તિ અક્ખકતો હેટ્ઠા.

૩૫૮. ઉબ્ભક્ખકન્તિ અક્ખકતો ઉદ્ધં. અધોજાણુમણ્ડલન્તિ જાણુમણ્ડલતો અધો. ઉદ્દિસન્તિ ઉદ્દિસ્સ. ‘‘ઉદ્દિસ્સુબ્ભક્ખં વા તથા, અધોજાણુમણ્ડલ’’ન્તિ ચ લિખન્તિ, સો પાઠો સુન્દરો. વણ્ણાદિભણને દુક્કટન્તિ સમ્બન્ધો. ‘‘વિઞ્ઞુમનુસ્સિત્થિયા’’તિ અધિકારતો લબ્ભતિ. કાયપટિબદ્ધે વણ્ણાદિભણને દુક્કટન્તિ એત્થાપિ એસેવ નયો. વચ્ચમગ્ગપસ્સાવમગ્ગા સઙ્ઘાદિસેસક્ખેત્તં, અધક્ખકં ઉબ્ભજાણુમણ્ડલં થુલ્લચ્ચયક્ખેત્તં, ઉદ્ધક્ખકં અધોજાણુમણ્ડલં દુક્કટક્ખેત્તન્તિ ઇમેસુ તીસુ ખેત્તેસુ અક્ખકઞ્ચેવ જાણુમણ્ડલઞ્ચ થુલ્લચ્ચયદુક્કટાનં દ્વિન્નં અવધિભૂતં કત્થ સઙ્ગય્હતીતિ? દુક્કટક્ખેત્તેયેવ સઙ્ગય્હતિ. યથાહ અટ્ઠકથાયં ‘‘અક્ખકં, પન જાણુમણ્ડલઞ્ચ એત્થેવ દુક્કટક્ખેત્તે સઙ્ગહં ગચ્છતી’’તિ (પારા. અટ્ઠ. ૨.૨૮૬).

૩૫૯. પણ્ડકે યક્ખિપેતીસુ દ્વિન્નં મગ્ગાનં વણ્ણાદિભણને તસ્સ ભણન્તસ્સ થુલ્લચ્ચયં ભવેતિ અધિકારવસેન આગતપદેહિ સહ યોજેતબ્બં. પણ્ડકાદીસૂતિ આદિ-સદ્દેન યક્ખિપેતીનં ગહણં.

૩૬૦. ઉબ્ભક્ખક…પે… અયં નયોતિ ‘‘પણ્ડકાદીસૂ’’તિ ઇમિના યોજેતબ્બં. અયં નયોતિ ‘‘દુક્કટમેવ હોતી’’તિ વુત્તો નયો. સબ્બત્થાતિ સઙ્ઘાદિસેસથુલ્લચ્ચયદુક્કટક્ખેત્તવસેન સબ્બેસુ ખેત્તેસુ.

૩૬૧. અત્થપુરેક્ખારો હુત્વા ઓભાસતોપિ અનાપત્તીતિ યોજના. માતુગામાનં ‘‘અનિમિત્તાસી’’તિઆદીસુ પદેસુ અત્થકથનં પુરેક્ખત્વા ‘‘અનિમિત્તાસી’’તિઆદિપદં ભણન્તસ્સ વા માતુગામેહિ સહ અટ્ઠકથં સજ્ઝાયન્તાનં વા અનાપત્તીતિ અત્થો. ધમ્મપુરેક્ખારો હુત્વા ઓભાસતો અનાપત્તીતિ યોજના. પાળિધમ્મં વાચેન્તસ્સ વા તાસં સુણન્તીનં સજ્ઝાયનં વા પુરેક્ખત્વા ‘‘અનિમિત્તાસી’’તિઆદીસુ પદેસુ યં કિઞ્ચિ પબ્બજિતસ્સ વા ઇતરસ્સ વા માતુગામસ્સ કથેન્તસ્સ અનાપત્તીતિ. પુરેક્ખત્વાનુસાસનિન્તિ ‘‘ઇદાનિ અનિમિત્તાસિ…પે… ઉભતોબ્યઞ્જનાસિ, અપ્પમાદં દાનિ કરેય્યાસિ, યથા આયતિમ્પિ એવરૂપા નાહોસી’’તિ અનુસાસનિં પુરેક્ખત્વા.

૩૬૨. ઉમ્મત્તકાદીનન્તિ પિત્તુમ્મત્તકયક્ખુમ્મત્તકવસેન દ્વિન્નં ઉમ્મત્તકાનઞ્ચ આદિ-સદ્દસઙ્ગહિતસ્સ ઇમસ્મિં આદિકમ્મિકસ્સ ઉદાયિત્થેરસ્સ ચ અનાપત્તીતિ વુત્તં હોતિ. ‘‘ઇદં સિક્ખાપદં તિસમુટ્ઠાનં કાયચિત્તતો ચ વાચાચિત્તતો ચ કાયવાચાચિત્તતો ચ સમુટ્ઠાતિ. કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્ત’’ન્તિ (પારા. અટ્ઠ. ૨.૨૮૭) અટ્ઠકથાયં વુત્તપકિણ્ણકવિનિચ્છયં દસ્સેતિ ‘‘સમુટ્ઠાનાદયો…પે… તુલ્યાવા’’તિ. વેદનાય અદિન્નાદાનેન અસમત્તા ‘‘વેદનેત્થ દ્વિધા મતા’’તિ આહ, સુખોપેક્ખાવેદનાવસેન દ્વિધા મતાતિ અત્થો.

દુટ્ઠુલ્લવાચાકથાવણ્ણના.

૩૬૩. કામપારિચરિયાયાતિ મેથુનધમ્મસઙ્ખાતેન કામેન પારિચરિયાય, મેથુનધમ્મેન પારિચરિયાયાતિ અત્થો. અથ વા કામિતા પત્થિતાતિ કામા, મેથુનરાગવસેન પત્થિતાતિ અત્થો, કામા ચ સા પારિચરિયા ચાતિ કામપારિચરિયા, તસ્સા કામપારિચરિયાયાતિપિ ગહેતબ્બં, મેથુનરાગચિત્તેન અભિપત્થિતપારિચરિયાયાતિઅત્થો. ‘‘વણ્ણં ભાસતો’’તિ ઇમિના સમ્બન્ધો, ‘‘એતદગ્ગં ભગિનિ પારિચરિયાનં યા માદિસં સીલવન્તં કલ્યાણધમ્મં બ્રહ્મચારિં એતેન ધમ્મેન પરિચરેય્યા’’તિ અત્તનો મેથુનધમ્મેન પારિચરિયાય ગુણં આનિસંસં કથેન્તસ્સાતિ વુત્તં હોતિ. તસ્મિંયેવ ખણેતિ તસ્મિં ભણિતક્ખણેયેવ. સા ચે જાનાતીતિ યં ઉદ્દિસ્સ અભાસિ, સચે સા વચનસમનન્તરમેવ જાનાતિ.

૩૬૪. સા મનુસ્સિત્થી નો જાનાતિ ચે, તસ્સ થુલ્લચ્ચયન્તિ સમ્બન્ધો. યક્ખિપેતિદેવીસુ જાનન્તીસુ, પણ્ડકે ચ જાનન્તે અત્તકામપારિચરિયાય વણ્ણં ભાસતો તસ્સ ભિક્ખુનો થુલ્લચ્ચયં હોતીતિ યોજના. સેસેતિ પુરિસતિરચ્છાનગતવિસયે, યક્ખિઆદીનં અજાનનવિસયે ચ અત્તકામપારિચરિયાય વણ્ણં ભાસતો તસ્સ આપત્તિ દુક્કટં હોતીતિ યોજના.

૩૬૫. ચીવરાદીહીતિ ચીવરપિણ્ડપાતાદીહિ. વત્થુકામેહીતિ તણ્હાય વત્થુભાવેન વત્થૂ ચ કામિતત્તા કામાતિ ચ સઙ્ખાતેહિ પચ્ચયેહિ.

૩૬૬. રાગો એવ રાગતા. ‘‘રાગિતા’’તિ વા પાઠો, રાગો અસ્સ અત્થીતિ રાગી, તસ્સ ભાવો રાગિતા, અત્તકામપારિચરિયાય રાગોતિ અત્થો. ઓભાસોતિ અત્તકામપારિચરિયાય ગુણભણનં. તેન રાગેનાતિ કામપારિચરિયાય રાગેન. ખણે તસ્મિન્તિ ભણિતક્ખણે. વિજાનનન્તિ યં મનુસ્સિત્થિં ઉદ્દિસ્સ અત્તકામપારિચરિયાય વણ્ણં ભણતિ, તાય તસ્સ વચનત્થસ્સ વિજાનનન્તિ વુત્તં હોતિ.

૩૬૭. પઞ્ચઙ્ગાનીતિ મનુસ્સિત્થિતા, તંસઞ્ઞિતા, પારિચરિયાય રાગિતા, તેન રાગેન ઓભાસનં, ખણે તસ્મિં વિજાનનન્તિ ઇમાનિ એત્થ અત્તકામપારિચરિયસિક્ખાપદે પઞ્ચ અઙ્ગાનિ, પઞ્ચ આપત્તિકારણાનીતિ અત્થો. અસ્સાતિ અત્તકામપારિચરિયસિક્ખાપદસ્સ.

અત્તકામપારિચરિયકથાવણ્ણના.

૩૬૮. ‘‘પટિગ્ગણ્હાતી’’તિઆદિકિરિયાત્તયોપાદાનસામત્થિયેન તિક્ખત્તું પટિપાદનકં ‘‘યો ભિક્ખૂ’’તિ ચ ‘‘ગરુ હોતી’’તિ પદસામત્થિયેન ‘‘તસ્સા’’તિ ચ લબ્ભમાનત્તા તિવિધેહિ સહ ‘‘યો ભિક્ખુ પુરિસસ્સ સન્દેસં પટિગ્ગણ્હાતિ, વીમંસતિ પચ્ચાહરતિ ચે, તસ્સ ગરુ હોતી’’તિ એકં વાક્યં હોતિ. એવં ‘‘ઇત્થિયાપિ વા’’તિ ઇમિના યોજનાયપિ એકં વાક્યં હોતીતિ ઇમિસ્સા ગાથાય વાક્યદ્વયં યુજ્જતિ.

ઇધ સન્દેસક્કમઞ્ચ યોજનાક્કમઞ્ચ જાનનત્થં પઠમં તાવ ઇત્થીનઞ્ચ ભરિયાનઞ્ચ પભેદો ચ સરૂપઞ્ચ વિભાવીયતિ – તેસુ ઇત્થિયો દસવિધા હોન્તિ. યથાહ પદભાજને ‘‘દસ ઇત્થિયો માતુરક્ખિતા પિતુરક્ખિતા માતાપિતુરક્ખિતા ભાતુરક્ખિતા ભગિનિરક્ખિતા ઞાતિરક્ખિતા ગોત્તરક્ખિતા ધમ્મરક્ખિતા સારક્ખા સપરિદણ્ડા’’તિ. ભરિયા ચ દસવિધા હોન્તિ. યથાહ પદભાજને ‘‘દસ ભરિયાયો ધનક્કીતા છન્દવાસિની ભોગવાસિની ઓદપત્તકિની ઓભટચુમ્બટા દાસી ચ ભરિયા ચ કમ્મકારી ચ ભરિયા ચ ધજાહટા મુહુત્તિકા’’તિ (પારા. ૩૦૩). ઇમાસં પભેદો ચ સરૂપાનિ ચ સઙ્ખેપતો એવં વેદિતબ્બાનિ –

પુરિસેહિ સહ યથા સંવાસં ન કરોતિ, એવં માતરા રક્ખિતા માતુરક્ખિતા. યથાહ ‘‘માતુરક્ખિતા નામ માતા રક્ખતિ ગોપેતિ ઇસ્સરિયં કારેતિ વસં વત્તેતી’’તિ. પિતુરક્ખિતાદીસુપિ એસેવ નયો. તત્થ યસ્મિં કોણ્ડઞ્ઞાદિગોત્તે જાતા, તસ્મિંયેવ ગોત્તે જાતેહિ રક્ખિતા ગોત્તરક્ખિતા. યથાહ ‘‘ગોત્તરક્ખિતા નામ સગોત્તા રક્ખન્તી’’તિઆદિ. એકં સત્થારં ઉદ્દિસ્સ પબ્બજિતેહિ વા એકગણપરિયાપન્નેહિ વા રક્ખિતા ધમ્મરક્ખિતા નામ. યથાહ ‘‘ધમ્મરક્ખિતા નામ સહધમ્મિકા રક્ખન્તી’’તિઆદિ (પારા. ૩૦૪). સારક્ખા નામ ‘‘ગબ્ભેપિ પરિગ્ગહિતા હોતિ ‘મય્હં એસા’તિ અન્તમસો માલાગુળપરિક્ખિત્તાપી’’તિ પાળિયં વુત્તસરૂપા. સપરિદણ્ડા નામ ‘‘કેહિચિ દણ્ડો ઠપિતો હોતિ ‘યો ઇત્થન્નામં ઇત્થિં ગચ્છતિ, તસ્સ એત્તકો દણ્ડો’’તિ વુત્તસરૂપાતિ અયં દસન્નં ઇત્થીનં સરૂપસઙ્ખેપો. ઇમાસુ દસસુ સારક્ખસપરિદણ્ડાનં દ્વિન્નં પરપુરિસસેવાયં મિચ્છાચારો હોતિ, ઇતરાસં ન હોતિ. ઇમા દસપિ પઞ્ચસીલં રક્ખન્તેહિ અગમનીયા.

દસસુ ભરિયાસુ ‘‘ધનક્કીતા નામ ધનેન કિણિત્વા વાસેતી’’તિ વુત્તત્તા ભરિયભાવાય અપ્પકં વા બહું વા ધનં દત્વા ગહિતા ધનક્કીતા નામ. ‘‘છન્દવાસિની નામ પિયો પિયં વાસેતી’’તિ વુત્તત્તા અત્તરુચિયા સંવસિતેન પુરિસેન સમ્પટિચ્છિતા છન્દવાસિની નામ. ‘‘ભોગવાસિની નામ ભોગં દત્વા વાસેતી’’તિ વુત્તત્તા ઉદુક્ખલમુસલાદિગેહોપકરણં લભિત્વા ભરિયભાવં ગચ્છન્તી જનપદિત્થી ભોગવાસિની નામ. ‘‘પટવાસિની નામ પટં દત્વા વાસેતી’’તિ વુત્તત્તા નિવાસનમત્તં વા પારુપનમત્તં વા લદ્ધા ભરિયભાવં ગચ્છન્તી દલિદ્દિત્થી પટવાસિની નામ. ઓદપત્તકિની નામ ‘‘ઉદકપત્તં આમસિત્વા વાસેતી’’તિ (પારા. ૩૦૪) વુત્તત્તા ‘‘ઇદં ઉદકં વિય સંસટ્ઠા અભેજ્જા હોથા’’તિ વત્વા એકસ્મિં ઉદકપત્તે પુરિસેન સદ્ધિં હત્થં ઓતારેત્વા ભરિયભાવં નીતો માતુગામો વુચ્ચતિ. ‘‘ઓભટચુમ્બટા નામ ચુમ્બટં ઓરોપેત્વા વાસેતી’’તિ (પારા. ૩૦૪) વુત્તત્તા સીસતો ચુમ્બટં ઓરોપેત્વા ભરિયભાવમુપનીતા કટ્ઠહારિકાદિઇત્થી ઓભટચુમ્બટા નામ. દાસી ચ ભરિયા ચ નામ ‘‘દાસી ચેવ હોતિ ભરિયા ચા’’તિ (પારા. ૩૦૪) વુત્તત્તા ભરિયં કત્વા વાસિતા ‘‘તસ્સેવ દાસી ચ ભરિયા ચા’’તિ વુત્તા. કમ્મકારી ચ ભરિયા ચ નામ ‘‘કમ્મકારી ચેવ હોતિ ભરિયા ચા’’તિ (પારા. ૩૦૪) વુત્તત્તા પધાનિત્થિનિરપેક્ખેન કુટુમ્બકિચ્ચં કારેત્વા ભરિયભાવં નીતા ભરિયા કતકમ્મા ‘‘કમ્મકારી ચ ભરિયા ચા’’તિ વુત્તા. ‘‘ધજાહટા નામ કરમરાનીતા વુચ્ચતી’’તિ (પારા. ૩૦૪) વુત્તત્તા ધજં ઉસ્સાપેત્વા ગચ્છન્તિયા મહાસેનાય સદ્ધિં ગન્ત્વા પરવિસયં વિલુમ્પન્તેન પચ્છિન્દિત્વા આનેત્વા ભરિયભાવમુપનીતા ઇત્થી ધજાહટા નામ. ‘‘મુહુત્તિકા નામ તઙ્ખણિકા વુચ્ચતી’’તિ (પારા. ૩૦૪) વુત્તત્તા અચિરકાલં સંવાસત્થાય ગહિતા ઇત્થી મુહુત્તિકા નામાતિ અયં દસન્નં ભરિયાનં સરૂપસઙ્ખેપો. યથાવુત્તાસુ દસસુ ઇત્થીસુ અઞ્ઞતરં દસન્નં ભરિયાનં અઞ્ઞતરટ્ઠાને ઠપનત્થમધિપ્પેતભાવં વત્તું પુરિસેન ‘‘ગચ્છ ભન્તે ઇત્થન્નામં માતુરક્ખિતં બ્રૂહિ ‘હોહિ કિર ઇત્થન્નામસ્સ ભરિયા ધનક્કીતા’તિ’’આદિના નયેન દિન્નસન્દેસં ‘‘સાધુ ઉપાસકા’’તિઆદિના નયેન વચીભેદં કત્વા વા સીસકમ્પનાદિવસેન વા પટિગ્ગણ્હાતીતિ આહ ‘‘પટિગ્ગણ્હાતિ સન્દેસં પુરિસસ્સા’’તિ.

એત્થ પુરિસસ્સાતિ ઉપલક્ખણત્તા ‘‘પુરિસસ્સ માતા ભિક્ખું પહિણતી’’તિઆદિના (પારા. ૩૨૧) નયેન પાળિયં વુત્તપુરિસસ્સ માતાપિતુઆદયો ચ ગહેતબ્બા. વીમંસતીતિ એવં પટિગ્ગહિતસાસનં તસ્સાયેવ એકંસેન અવિરાધેત્વા વદન્તસ્સ માતાપિતુઆદીનમઞ્ઞતરસ્સ વા આરોચેતીતિ અત્થો. એત્થાપિ વીમંસતીતિ ઉપલક્ખણત્તા ‘‘પટિગ્ગણ્હાતિ અન્તેવાસિં વીમંસાપેત્વા અત્તના પચ્ચાહરતિ, આપત્તિ સઙ્ઘાદિસેસસ્સા’’તિ (પારા. ૩૩૮) વુત્તત્તા વીમંસાપેતીતિપિ ગહેતબ્બં. પચ્ચાહરતીતિ તથા આહટં સાસનં સુત્વા તસ્સા ઇત્થિયા સમ્પટિચ્છિતે ચ અસમ્પટિચ્છિતે ચ લજ્જાય તુણ્હીભૂતાય ચ તં પવત્તિં પચ્ચાહરિત્વા આચિક્ખતીતિ વુત્તં હોતિ. ઇધાપિ પચ્ચાહરતીતિ ઉપલક્ખણત્તા ‘‘પટિગ્ગણ્હાતિ વીમંસતિ અન્તેવાસિં પચ્ચાહરાપેતિ, આપત્તિ સઙ્ઘાદિસેસસ્સા’’તિ (પારા. ૩૩૮) વુત્તત્તા પચ્ચાહરાપેતીતિ ચ ગહેતબ્બં.

‘‘ઇત્થિયાપિ વા’’તિ ઇમિના યોજેત્વા ગહિતદુતિયવાક્યે ચ એવમેવ અત્થો વત્તબ્બો. તત્થ સન્દેસક્કમો પન ‘‘માતુરક્ખિતા ભિક્ખું પહિણતિ ‘ગચ્છ ભન્તે ઇત્થન્નામં બ્રૂહિ ‘હોમિ ઇત્થન્નામસ્સ ભરિયા ધનક્કીતા’તિ’’આદિપાળિનયેન (પારા. ૩૩૦) દટ્ઠબ્બો. એત્થાપિ ‘‘વીમંસાપેતિ પચ્ચાહરાપેતી’’તિ ઇદઞ્ચ વુત્તનયેનેવ ગહેતબ્બં. ઇમિના નિયામેન દસન્નં ઇત્થીનં નામં વિસું વિસું વત્વા દસન્નં ભરિયાનં અઞ્ઞતરત્થાય દીયમાનસન્દેસક્કમો યોજેતબ્બો. ઇધાપિ ઇત્થિયાપિ વાતિ ઉપલક્ખણત્તા ‘‘માતુરક્ખિતાય માતા ભિક્ખું પહિણતિ ‘ગચ્છ ભન્તે ઇત્થન્નામં બ્રૂહિ ‘હોતુ ઇત્થન્નામસ્સ ભરિયા ધનક્કીતા’’તિઆદિપાળિવસેન (પારા. ૩૨૪) ઇત્થિયા માતુપિતુઆદીનઞ્ચ સન્દેસક્કમો યોજેતબ્બો.

૩૭૦. તં પવત્તિં. સઞ્ચરિત્તા સઞ્ચરણહેતુ. ન મુચ્ચતીતિ ઇત્થિપુરિસાનં અન્તરે સાસનં પટિગ્ગહેત્વા સઞ્ચરણહેતુ આપજ્જિતબ્બસઙ્ઘાદિસેસતો ન મુચ્ચતીતિ અત્થો.

૩૭૧. અઞ્ઞં વાતિ માતાપિતુરક્ખિતાદીસુ અઞ્ઞતરં વા. ‘‘ભાસતો’’તિ લિખન્તિ. ‘‘પેસિતો’’તિ ઇમિના વિરુદ્ધત્તા તં પહાય ‘‘ભાસતી’’તિ પાઠો ગહેતબ્બો. પાઠસેસો વા કાતબ્બો. ‘‘યો અઞ્ઞં ભાસતિ ચે, તસ્સ ભાસતોતિ યોજના’’તિ નિસ્સન્દેહે વુત્તં. ‘‘માતરા રક્ખિતં ઇત્થિં ‘ગચ્છ બ્રૂહી’તિ યો પેસિતો હોતિ, તસ્સ પિતુરક્ખિતં વા અઞ્ઞં વા ભાસતો વિસઙ્કેતોવા’’તિ, ‘‘માતરા…પે… બ્રૂહી’તિ પેસિતો હુત્વા પિતુરક્ખિતં વા અઞ્ઞં વા ભાસતો વિસઙ્કેતોવા’’તિ યોજના યુત્તતરાતિ અમ્હાકં ખન્તિ.

૩૭૨. પટિગ્ગણ્હનતાદીહીતિ પટિગ્ગણ્હનમેવ પટિગ્ગણ્હનતા. આદિ-સદ્દેન વીમંસનપચ્ચાહરણાનિ ગહિતાનિ. સઞ્ચરિત્તેતિ સઞ્ચરણે. સમાપન્નેતિ ગતે સતિ. ગરુકાપત્તિમાદિસેતિ એત્થ ‘‘તસ્સા’’તિ સેસો. આદિસેતિ કથેય્ય.

૩૭૩. દ્વીહિ થુલ્લચ્ચયં વુત્તન્તિ એત્થ દ્વીહિ દ્વીહિ અઙ્ગેહિ સઞ્ચરિત્તે સમાપન્ને થુલ્લચ્ચયં વુત્તન્તિ ગહેતબ્બં. ‘‘પટિગ્ગણ્હાતિ વીમંસતિ ન પચ્ચાહરતિ, આપત્તિ થુલ્લચ્ચયસ્સ. પટિગ્ગણ્હાતિ ન વીમંસતિ પચ્ચાહરતિ, આપત્તિ થુલ્લચ્ચયસ્સ. ન પટિગ્ગણ્હાતિ વીમંસતિ પચ્ચાહરતિ, આપત્તિ થુલ્લચ્ચયસ્સા’’તિ (પારા. ૩૩૮) દ્વીહિ દ્વીહિ અઙ્ગેહિ થુલ્લચ્ચયં વુત્તન્તિ અત્થો. પણ્ડકાદીસૂતિ પણ્ડકયક્ખિપેતીસુ. તીહિપિ અઙ્ગેહિ સઞ્ચરિત્તે સમાપન્ને થુલ્લચ્ચયં વુત્તન્તિ યોજના.

એકેનેવાતિ એકેનેવ અઙ્ગેન. સબ્બત્થાતિ માતુરક્ખિતાદીસુ સબ્બમાતુગામેસુ ચ વિનીતવત્થુમ્હિ ‘‘તેન ખો પન સમયેન અઞ્ઞતરો પુરિસો અઞ્ઞતરં ભિક્ખું આણાપેસિ ‘ગચ્છ ભન્તે ઇત્થન્નામં ઇત્થિં વીમંસા’તિ. સો ગન્ત્વા મનુસ્સે પુચ્છિ ‘કહં ઇત્થન્નામા’તિ. સુત્તા ભન્તેતિ…પે… મતા ભન્તેતિ. નિક્ખન્તા ભન્તેતિ. અનિત્થી ભન્તેતિ. ઇત્થિપણ્ડકા ભન્તેતિ. તસ્સ કુક્કુચ્ચં અહોસિ. અનાપત્તિ ભિક્ખુ સઙ્ઘાદિસેસસ્સ, આપત્તિ દુક્કટસ્સા’’તિ (પારા. ૩૪૧) આગતાસુ સુત્તાદીસુ પઞ્ચસુ ચ.

૩૭૪. અનાપત્તિ પકાસિતાતિ ચેતિયાદીસુ કત્તબ્બં નિસ્સાય ઇત્થિયા પુરિસસ્સ, પુરિસેન ચ ઇત્થિયા દિન્નસાસનં પટિગ્ગહેત્વા વીમંસિત્વા પચ્ચાહરિત્વા આરોચેન્તસ્સ અનાપત્તિભાવો ‘‘અનાપત્તિ સઙ્ઘસ્સ વા ચેતિયસ્સ વા ગિલાનસ્સ વા કરણીયેન ગચ્છતિ, ઉમ્મત્તકસ્સ આદિકમ્મિકસ્સા’’તિ (પારા. ૩૪૦) પાળિયં વુત્તાતિ અત્થો.

૩૭૫. તથા તસ્સાતિ મનુસ્સજાતિકાય તસ્સા. નનાલંવચનીયતાતિ ‘‘મમાય’’ન્તિ વા નિગ્ગહપગ્ગહે વા નિરાસઙ્કં વત્તું નાહરતીતિ અલંવચનીયા, અસ્સામિકા, સા હિ કેનચિ ‘‘મય્હં એસા’’તિ વત્તું વા નિરાસઙ્કેન નિગ્ગહપગ્ગહવચનં વા વત્તું અસક્કુણેય્યા, અલંવચનીયા ન ભવતીતિ નાલંવચનીયા, સસ્સામિકા, સા હિ સામિકેન તથા કાતું સક્કુણેય્યાતિ નાલંવચનીયા, નાલંવચનીયા ન ભવતીતિ નનાલંવચનીયા, અલંવચનીયપદેન વુત્તા અસ્સામિકા એવ, પટિસેધા દ્વે પકતિમત્થં ગમયન્તીતિ, નનાલંવચનીયાય ભાવો નનાલંવચનીયતા, નિરાસઙ્કેન અવચનીયતા અસ્સામિકભાવોતિ વુત્તં હોતિ. સઞ્ચરિત્તવસેન ભિક્ખુના વચનીયા ન હોતીતિ વા ‘‘અલંવચનીયા’’તિપિ ગહેતબ્બમેવ. પટિગ્ગણ્હનતાદીનં વસાતિ એત્થ ચકારો લુત્તનિદ્દિટ્ઠો. તતો પટિગ્ગણ્હનવીમંસનપચ્ચાહરણસઙ્ખાતાનં તિણ્ણં અઙ્ગાનં વસેન ચ પુબ્બે વુત્તમનુસ્સિત્થિતા નનાલંવચનીયતાતિ વુત્તાનં દ્વિન્નં અઙ્ગાનં વસેન ચ ઇદં સિક્ખાપદં આપત્તિકારણેહિ પઞ્ચહિ અઙ્ગેહિ યુત્તન્તિ અત્થો.

૩૭૬. ઇદં સઞ્ચરિત્તસિક્ખાપદં. અથ વા લિઙ્ગવિપલ્લાસેન ચ અયં સઙ્ઘાદિસેસોતિ ગહેતબ્બો. કાયતો, વાચતો, કાયવાચતો, કાયચિત્તતો, વાચાચિત્તતો, કાયવાચાચિત્તતો વા ઉપ્પજ્જનતો છસમુટ્ઠાનં. તતો એવ અચિત્તકમુદીરિતં. મિસ્સકસમુટ્ઠાનઞ્હિ અચિત્તકં. અવસેસચિત્તેસુપિ યસ્મિં ચિત્તે અસતિ અચિત્તકં નામ હોતિ, તં દસ્સેતુમાહ ‘‘અલંવચનિયત્તં વા’’તિઆદિ. ગાથાબન્ધવસેન રસ્સો, ‘‘અલંવચનીયત્ત’’ન્તિ ગહેતબ્બં. યો સન્દેસં પેસેતિ, તસ્મિં પટિબદ્ધભાવન્તિ અત્થો. પણ્ણત્તિં વાતિ સઞ્ચરિત્તસિક્ખાપદસઙ્ખાતં પણ્ણત્તિં વા અજાનતો અચિત્તકમુદીરિતન્તિ સમ્બન્ધો.

૩૭૭. સાસનન્તિ માતુગામસ્સ, પુરિસસ્સ વા સાસનં. કાયવિકારેનાતિ સીસકમ્પનાદિના કાયવિકારેન. ગહેત્વાતિ પટિગ્ગહેત્વા. તં ઉપગમ્માતિ પટિગ્ગહિતસાસનં યસ્સ વત્તબ્બં હોતિ, તં માતુગામં, પુરિસં વા ઉપગમ્મ. વીમંસિત્વાતિ તં કિચ્ચં તીરેત્વા. હરન્તસ્સાતિ પચ્ચાહરન્તસ્સ. કાયતો સિયાતિ વચીભેદં વિના પટિગ્ગહણાદીનં કાયેનેવ કતત્તા કાયસમુટ્ઠાનતોવ સઙ્ઘાદિસેસો હોતીતિ અત્થો.

૩૭૮. ઇત્થિયા વચનં સુત્વાતિ યોજના. યથા નિસિન્નોવાતિ પકતિયા નિસિન્નટ્ઠાનેયેવ નિસિન્નો. તં વચનં. તત્થેવાગતસ્સેવાતિ યત્થ નિસિન્નો ઇત્થિયા સાસનં પટિગ્ગણ્હિ, તમેવ આસનં અવિજહિત્વા અત્તના નિસિન્નટ્ઠાનમેવ આગતસ્સ સન્નિસિતબ્બપુરિસસ્સેવ, એત્થ ‘‘આરોચેત્વા’’તિ પાઠસેસો. પુન ‘‘આરોચેન્તસ્સા’’તિ ઇદં તત્થેવાગતાય તસ્સા એવ ઇત્થિયા એવં યોજેતબ્બં. સાસનં દત્વા ગન્ત્વા પુન તત્થેવ આગતસ્સ માતુગામસ્સેવ ઞાતમનન્તરં કાયિકકિરિયં વિના વચનેનેવ આરોચેન્તસ્સાતિ અત્થો. ઇદં ઇત્થિયા સાસનં પટિગ્ગહણાદિવસેન વુત્તં.

અથ વા પુરિસસ્સ વચનં સુત્વા યથાનિસિન્નોવ તં વચનં ઇત્થિયા આરોચેત્વા પુન તત્થેવાગતસ્સેવ પુરિસસ્સ આરોચેન્તસ્સાતિ એવં પુરિસસન્દેસં પટિગ્ગહણાદિવસેનાપિ યોજના કાતબ્બા. એત્થ ચ તત્થેવાગતસ્સાતિ ઉપલક્ખણં. સાસનવચનમત્તેનેવ પટિગ્ગહેત્વા, કિચ્ચન્તરેન ગન્ત્વા વા યદિચ્છાવસેન દિટ્ઠટ્ઠાને વા વત્વા પુનપિ તત્થેવ દિટ્ઠટ્ઠાને પુન આરોચેન્તસ્સ ચ વચનેનેવ સમુટ્ઠાનભાવો વેદિતબ્બો.

૩૭૯. ‘‘અલં…પે… અજાનતો’’તિ અચિત્તકત્તકારણં વુત્તમેવ, કસ્મા પુન ‘‘અજાનન્તસ્સ પણ્ણત્તિ’’ન્તિ વુત્તન્તિ ચે? તદુભયસ્સાપિ વિસું કારણાભાવં વિઞ્ઞાપેતું વુત્તન્તિ વેદિતબ્બં. નં વિધિન્તિ સાસનં પટિગ્ગહેત્વા આહરિત્વા આરોચેત્વા પચ્ચાહરિત્વા આરોચનસઙ્ખાતં વિધાનં. અરહતોપીતિ ખીણાસવસ્સપિ, સેખપુથુજ્જનાનં પગેવાતિ અયમત્થો સમ્ભાવનત્થેન અપિ-સદ્દેન જોતિતો.

૩૮૦. જાનિત્વાતિ અલંવચનીયભાવં વા પણ્ણત્તિં વા ઉભયમેવ વા જાનિત્વા. તથાતિ કાયવાચતો કરોન્તસ્સાતિ ઇમિના યોજેતબ્બં. સચિત્તકેહીતિ યથાવુત્તચિત્તેન સચિત્તકેહિ. તેહેવાતિ કાયાદીહિ તેહિ એવ, ‘‘તીહેવા’’તિપિ પાઠો.

સઞ્ચરિત્તકથાવણ્ણના.

૩૮૧-૨. સયંયાચિતકેહેવાતિ એત્થ ‘‘ઉપકરણેહી’’તિ પાઠસેસો, ‘‘પુરિસં દેથા’’તિઆદિના નયેન અત્તનાવ યાચિત્વા ગહિતેહિ ઉપકરણેહેવાતિ અત્થો. યથાહ ‘‘સઞ્ઞાચિકા નામ સયં યાચિત્વા પુરિસમ્પિ પુરિસત્તકરમ્પિ ગોણમ્પિ સકટમ્પિ વાસિમ્પિ પરસુમ્પિ કુઠારિમ્પિ કુદાલમ્પિ નિખાદનમ્પી’’તિ. એત્થ એવ-કારેન અયાચિતં નિવત્તેતિ. તેન અસ્સામિકન્તિ દીપિતં હોતિ. ‘‘કુટિક’’ન્તિ ઇમિના ‘‘કુટિ નામ ઉલ્લિત્તા વા હોતિ અવલિત્તા વા ઉલ્લિત્તાવલિત્તા વા’’તિ (પારા. ૩૪૯) વુત્તત્તા ભૂમિતો પટ્ઠાય ભિત્તિચ્છદનાનિ પટિચ્છાદેત્વા મત્તિકાય વા સુધાય વા દ્વારવાતપાનાદિઅલેપોકાસં ઠપેત્વા અન્તો લિત્તભાવેન ઉલ્લિત્તાનામકં વા તથા બહિ લિત્તભાવેન અવલિત્તાનામકં વા અન્તો ચ બહિ ચ લિત્તભાવેન ઉલ્લિત્તાવલિત્તાનામકં વા કુટિન્તિ વુત્તં હોતિ.

અપ્પમાણિકન્તિ ‘‘તત્રિદં પમાણં, દીઘસો દ્વાદસવિદત્થિયો સુગતવિદત્થિયા, તિરિયં સત્તન્તરા’’તિ (પારા. ૩૪૮) દીઘપુથુલાનં વુત્તપ્પમાણેન અતિરેકત્તા અપ્પમાણિકન્તિ અત્થો.

એત્થ ચ તિલક્ખણં પટિવિજ્ઝિત્વા તીણિ કિલેસમૂલાનિ ઉપ્પાટેત્વા કાલત્તયવત્ત સબ્બધમ્મે પટિવિજ્ઝિત્વા તિભુવનેકપટિસરણભૂતસ્સ ભગવતો ધમ્મરાજસ્સ અઙ્ગુલં પમાણમજ્ઝિમપુરિસસ્સ અઙ્ગુલતો તિવઙ્ગુલં હોતિ, એકા વિદત્થિ તિસ્સો વિદત્થિયો હોન્તિ, એકં રતનં તીણિ રતનાનિ હોન્તીતિ એવં નિયમિતા સુગતવિદત્થિ ચ વડ્ઢકિરતનેન દિયડ્ઢરતનપ્પમાણા હોતિ. યથાહ અટ્ઠકથાયં ‘‘સુગતવિદત્થિ નામ ઇદાનિ મજ્ઝિમસ્સ પુરિસસ્સ તિસ્સો વિદત્થિયો વડ્ઢકિહત્થેન દિયડ્ઢો હત્થો હોતી’’તિ (પારા. અટ્ઠ. ૨.૩૪૮-૩૪૯). તસ્મા સુગતવિદત્થિયા દ્વાદસ વડ્ઢકિહત્થેન અટ્ઠારસ હત્થા હોન્તિ. ‘‘દીઘસો દ્વાદસ વિદત્થિયો સુગતવિદત્થિયાતિ બાહિરિમેન માનેના’’તિ (પારા. ૩૪૯) પદભાજને વુત્તત્તા અન્તિમં સુધાલેપં અગ્ગહેત્વા થુસમત્તિકપરિયન્તેન વા મહામત્તિકપરિયન્તેન વા બાહિરન્તતો અટ્ઠારસહત્થપ્પમાણં, ‘‘તિરિયં સત્તન્તરાતિ અબ્ભન્તરિમેન માનેના’’તિ (પારા. ૩૪૯) પદભાજને વુત્તત્તા અબ્ભન્તરિમેન પુથુલતો દ્વાદસઙ્ગુલાધિકદસહત્થપ્પમાણઞ્ચ કુટિયા પમાણન્તિ ગહેતબ્બં. એવં ઠિતપમાણતો દીઘતો પુથુલતો વા ઉભતો વા કેસગ્ગમત્તાધિકાપિ કુટિ આપત્તિયા અઙ્ગં હોતીતિ દસ્સેતું ‘‘અપ્પમાણિક’’ન્તિ આહાતિ સઙ્ખેપતો વેદિતબ્બં.

અત્તુદ્દેસન્તિ ઉદ્દિસિતબ્બોતિ ઉદ્દેસો, અત્તા ઉદ્દેસો એતિસ્સાતિ અત્તુદ્દેસા, કુટિ, તં અત્તુદ્દેસં. ‘‘અત્તુદ્દેસન્તિ અત્તનો અત્થાયા’’તિ પદભાજને વુત્તત્તા ‘‘મય્હં એસા વાસત્થાય ભવિસ્સતી’’તિ અત્તાનં ઉદ્દિસિત્વાતિ અત્થો. ‘‘કરોન્તસ્સા’’તિ ઇદં ‘‘કારયમાનેનાતિ કરોન્તો વા કારાપેન્તો વા’’તિ પદભાજને વુત્તનયેન પયોજકકત્તુનો ચ ગહેતબ્બત્તા ઉપલક્ખણન્તિ ગહેતબ્બં. તથાતિ તેનેવ પકારેન, યેહિ અસ્સામિકતાદીહિ પકારેહિ યુત્તં પમાણાતિક્કન્તં કુટિં કરોન્તસ્સ આપત્તિ, તેહેવ પકારેહિ યુત્તં અદેસિતવત્થુકમ્પિ કુટિં કરોન્તસ્સાતિ. ઇમિના અપ્પમાણિકં વિય અદેસિતવત્થુકમ્પિ વિસુંયેવ આપત્તિયા પધાનઙ્ગન્તિ. વસતિ એત્થાતિ વત્થુ, ભૂમિ, સા અદેસિતા એતિસ્સાતિ અદેસિતવત્થુકા, કુટિ, તં અદેસિતવત્થુકં.

કિં વુત્તં હોતિ? તેન કુટિકારેન ભિક્ખુના કુટિવત્થું સોધેત્વા સમતલં કારેત્વા સઙ્ઘં ઉપસઙ્કમિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા ‘‘અહં ભન્તે સઞ્ઞાચિકાય કુટિં કત્તુકામો અસ્સામિકં અત્તુદ્દેસં, સોહં ભન્તે સઙ્ઘં કુટિવત્થુઓલોકનં યાચામી’’તિ તિક્ખત્તું વત્વા યાચિતેન સઙ્ઘેન વા સઙ્ઘેન ઞત્તિદુતિયાય કમ્મવાચાય સમ્મતેહિ બ્યત્તેહિ પટિબલેહિ દ્વીહિ ભિક્ખૂહિ વા તેન સદ્ધિં ગન્ત્વા કુટિવત્થું ઓલોકેત્વા સારમ્ભભાવં વા અપરિક્કમનભાવં વા ઉભયમેવ વા પસ્સન્તેહિ ‘‘માયિધ કરી’’તિ નિવારેત્વા અનારમ્ભં ચે હોતિ સપરિક્કમનં, આગન્ત્વા સઙ્ઘસ્સ આરોચિતે કુટિકારકેનેવ ભિક્ખુના પુબ્બે વુત્તનયેન સઙ્ઘં ઉપસઙ્કમિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા ‘‘અહં ભન્તે સઞ્ઞાચિકાય કુટિં કત્તુકામો અસ્સામિકં અત્તુદ્દેસં, સોહં ભન્તે સઙ્ઘં કુટિવત્થુદેસનં યાચામી’’તિ તિક્ખત્તું વત્વા યાચિતે વુડ્ઢાનુમતેન બ્યત્તેન ભિક્ખુના પટિબલેન ઞત્તિદુતિયાય કમ્મવાચાય દેસેત્વા નિય્યાદિતકુટિવત્થુસ્સ અભાવા અદેસિતવત્થુકં, તેનેવ અસ્સામિકતાદિપકારેન યુત્તં યથાવુત્તપ્પકારં કુટિકં અત્તના યાચિતેહિ ઉપકરણેહિ કરોન્તસ્સ, કારાપેન્તસ્સ ચાતિ વુત્તં હોતિ.

દ્વે સઙ્ઘાદિસેસા હોન્તીતિ ‘‘ભિક્ખૂ વા અનભિનેય્ય વત્થુદેસનાય, પમાણં વા અતિક્કામેય્ય, સઙ્ઘાદિસેસો’’તિ (પારા. ૩૪૮) તુલ્યબલતાસૂચકેન વા-સદ્દેન સમ્પિણ્ડિત્વા વુત્તઅઙ્ગદ્વયસહિતત્તા દ્વે સઙ્ઘાદિસેસા હોન્તીતિ અત્થો. યથાહ ‘‘ભિક્ખુ કુટિં કરોતિ અદેસિતવત્થુકં પમાણાતિક્કન્તં અનારમ્ભં સપરિક્કમનં, આપત્તિ દ્વિન્નં સઙ્ઘાદિસેસાન’’ન્તિ (પારા. ૩૫૫) ચ ‘‘ભિક્ખુકુટિં કરોતિ અદેસિતવત્થુકં અનારમ્ભં સપરિક્કમનં, આપત્તિ સઙ્ઘાદિસેસસ્સા’’તિ (પારા. ૩૫૪) ચ ‘‘ભિક્ખુ કુટિં કરોતિ પમાણાતિક્કન્તં અનારમ્ભં સપરિક્કમનં, આપત્તિ સઙ્ઘાદિસેસસ્સા’’તિ (પારા. ૩૫૫) ચ વુત્તત્તા દ્વીસુ અઙ્ગેસુ એકં ચે, એકોવ સઙ્ઘાદિસેસો હોતીતિ. તં પન ‘‘સચે એકવિપન્ના સા, ગરુકં એકકં સિયા’’તિ વક્ખતિ.

સારમ્ભાદીસૂતિ એત્થ સારમ્ભ-સદ્દો સોપદ્દવપરિયાયો. યથાહ અટ્ઠકથાયં ‘‘સારમ્ભં અનારમ્ભન્તિ સઉપદ્દવં અનુપદ્દવ’’ન્તિ (પારા. અટ્ઠ. ૨.૩૪૮-૩૪૯). એત્થ ‘‘સેતં છાગમારભેથ યજમાનો’’તિ પયોગે વિય આ-પુબ્બસ્સ રભસ્સ હિંસત્થેપિ દિસ્સમાનત્તા કત્તુસાધનો આરમ્ભ-સદ્દો હિંસકાનં કિપિલ્લિકાદિસત્તાનં વાચકો ભવતીતિ તંસહિતટ્ઠાનં સારમ્ભં નામ હોતિ. તેનેવ પદભાજનેપિ વુત્તં ‘‘સારમ્ભં નામ કિપિલ્લિકાનં વા આસયો હોતિ, ઉપચિકાનં વા, ઉન્દૂરાનં વા, અહીનં વા, વિચ્છિકાનં વા, સતપદીનં વા, હત્થીનં વા, અસ્સાનં વા, સીહાનં વા, બ્યગ્ઘાનં વા…પે… આસયો હોતી’’તિ (પારા. ૩૫૩).

આદિ-સદ્દેન અપરિક્કમનં સઙ્ગણ્હાતિ. ‘‘સપરિક્કમનં નામ સક્કા હોતિ યથાયુત્તેન સકટેન અનુપરિગન્તું, સમન્તા નિસ્સેણિયા અનુપરિગન્તું, એતં સપરિક્કમનં નામા’’તિ (પારા. ૩૫૩) વુત્તલક્ખણવિપરિયાયતો નિબ્બકોસસ્સ ઉદકપાતટ્ઠાને એકં ચક્કં ઠપેત્વા ઇતરં ચક્કં બહિ ઠપેત્વા કુટિં પરિક્ખિપિત્વા આવજ્જિયમાનસ્સ ગોયુત્તસકટસ્સ વા નિસ્સેણિયં ઠત્વા કુટિં છાદયમાનાનં નિસ્સેણિયા વા પરતો ગમિતુમસક્કુણેય્યત્તા અપરિક્કમનન્તિ વેદિતબ્બં.

એવં વુત્તસારમ્ભઅપરિક્કમનસઙ્ખાતઅઙ્ગદ્વયેન યુત્તં ચે, દ્વે દુક્કટાનિ હોન્તિ. યથાહ ‘‘ભિક્ખુ કુટિં કરોતિ દેસિતવત્થુકં પમાણિકં સારમ્ભં અપરિક્કમનં, આપત્તિ દ્વિન્નં દુક્કટાન’’ન્તિ (પારા. ૩૫૫). એકં ચે, એકમેવ હોતિ. યથાહ ‘‘ભિક્ખુ કુટિં કરોતિ દેસિતવત્થુકં પમાણિકં સારમ્ભં સપરિક્કમનં, આપત્તિ દુક્કટસ્સ. ભિક્ખુ કુટિં કરોતિ દેસિતવત્થુકં પમાણિકં અનારમ્ભં અપરિક્કમનં, આપત્તિ દુક્કટસ્સા’’તિ (પારા. ૩૫૫) એતં તયમ્પિ ‘‘સારમ્ભાદીસુ દુક્કટ’’ન્તિ સામઞ્ઞેન સઙ્ગહિતન્તિ દટ્ઠબ્બં.

એકં અઙ્ગં પમાણિકત્તં વા દેસિતવત્થુકત્તં વા વિપન્નં એતિસ્સાતિ એકવિપન્ના. પુબ્બે વુત્તત્થાનં સઙ્ઘાદિસેસાદિપદાનમત્થો વુત્તનયેનેવ વેદિતબ્બો. સાતિ યથાવુત્તલક્ખણકુટિ.

૩૮૩. ઇદાનિ ઇમસ્મિં સિક્ખાપદે અટ્ઠુપ્પત્તિયં ‘‘તે યાચનબહુલા વિઞ્ઞત્તિબહુલા વિહરન્તિ ‘પુરિસં દેથ પુરિસત્તકરં દેથા’’તિઆદિપાળિયા (પારા. ૩૪૨) અટ્ઠકથાયં (પારા. અટ્ઠ. ૨.૩૪૨) આગતં કપ્પિયાકપ્પિયવિનિચ્છયં સઙ્ખેપતો દસ્સેતુમાહ ‘‘પુરિસ’’ન્તિઆદિ. કમ્મસહાયત્થાયાતિ કિસ્મિઞ્ચિ કમ્મે સહાયભાવાય, કમ્મકરણત્થાયાતિ વુત્તં હોતિ. ‘‘ઇત્થન્નામં કમ્મં કાતું પુરિસં લદ્ધું વટ્ટતી’’તિ યાચિતું વટ્ટતીતિ અત્થો. યથાહ અટ્ઠકથાયં ‘‘કમ્મકરણત્થાય ‘પુરિસં દેથા’તિ યાચિતું વટ્ટતી’’તિ (પારા. અટ્ઠ. ૨.૩૪૨). મૂલચ્છેજ્જવસેનાતિ સામિકાનં આયત્તભાવસઙ્ખાતમૂલસ્સ છિન્દનવસેન, અત્તનો આયત્તભાવકરણવસેનાતિ વુત્તં હોતિ.

૩૮૪. અવજ્જન્તિ વજ્જરહિતં, નિદ્દોસન્તિ અત્થો. મિગલુદ્દકમચ્છબન્ધકાદીનં સકકમ્મં વજ્જકમ્મં નામ. તસ્મા મિગલુદ્દકાદયો હત્થકમ્મં યાચન્તેન પન ‘‘તુમ્હાકં હત્થકમ્મં દેથા’’તિ, ‘‘હત્થકમ્મં દાતબ્બ’’ન્તિ સામઞ્ઞેન અવત્વા ‘‘ઇત્થન્નામં કમ્મં દાતબ્બ’’ન્તિ વિસેસેત્વાયેવ યાચિતબ્બં. લુદ્દકે વા ઇતરે વા નિક્કમ્મે અયાચિત્વાપિ યથારુચિ કમ્મં કારાપેતું વટ્ટતિ. હત્થકમ્મયાચનાય સબ્બથાપિ કપ્પિયભાવં દીપેતું તંતંસિપ્પિકે યાચિત્વા મહન્તમ્પિ પાસાદં કારાપેન્તેન હત્થકમ્મે યાચિતે અત્તનો અનોકાસભાવં ઞત્વા અઞ્ઞેસં કરોન્તાનં દાતબ્બં મૂલં દિય્યમાનં અધિવાસેતું વટ્ટતીતિ વિત્થારતો અટ્ઠકથાયં (પારા. અટ્ઠ. ૨.૩૪૨ અત્થતોસમાનં) વુત્તત્તા કુસલાનં અત્થં અપરિહાપેન્તેન કપ્પિયેન સારુપ્પેન પયોગેન યાચિતબ્બં. યાચિતકમ્મં કાતું અસમત્થેહિ કરોન્તાનં દિય્યમાનં હત્થકમ્મમૂલં કમ્મં કારાપેત્વા કમ્મકારકે દસ્સેત્વા દાપેતબ્બં. એવં યાચનાય અનવજ્જભાવે અટ્ઠકથાગતં કારણં દસ્સેતુમાહ ‘‘હત્થકમ્મમ્પી’’તિઆદિ. પિ-સદ્દો અવધારણે, પદપૂરણે વા. હિ-સદ્દો હેતુમ્હિ. યસ્મા ઇદં હત્થકમ્મં કિઞ્ચિ વત્થુ ન હોતિ, તસ્મા અનવજ્જમેવ હત્થકમ્મં યાચિતું પન વટ્ટતીતિ.

૩૮૫. ઞાતકાદિકેતિ ઞાતકપવારિતે. ઠપેત્વાતિ વજ્જેત્વા. ગોણમાયાચમાનસ્સાતિ અઞ્ઞાતકઅપ્પવારિતે તાવકાલિકં વિના કેવલં કમ્મકરણત્થાય ગોણં યાચન્તસ્સ. તેસુપીતિ ઞાતકાદીસુપિ મૂલચ્છેજ્જેન ગોણમાયાચનસ્સ દુક્કટન્તિ યોજના. ‘‘તાવકાલિકનયેન સબ્બત્થ વટ્ટતી’’તિ (પારા. અટ્ઠ. ૨.૩૪૨) અટ્ઠકથાવચનતો યાવ કમ્મકરણકાલં, તાવ નિયમેત્વા ઞાતકઅઞ્ઞાતકપવારિતઅપ્પવારિતે સબ્બેપિ યાચિતું વટ્ટતિ. તથા યાચિત્વા વા અયાચિત્વા વા ગહિતો ચે, રક્ખિત્વા પટિજગ્ગિત્વા સામિકાનં નિય્યાદેતબ્બો, ગોણે વા નટ્ઠે વિસાણે વા ભિન્ને સામિકેસુ અસમ્પટિચ્છન્તેસુ ભણ્ડદેય્યં.

૩૮૬. દેમાતિ એત્થ ‘‘તુમ્હાક’’ન્તિ પાઠસેસો. ‘‘વિહારસ્સ દેમા’તિ વુત્તે પન ‘આરામિકાનં આચિક્ખથ પટિજગ્ગનત્થાયા’તિ વત્તબ્બ’’ન્તિ (પારા. અટ્ઠ. ૨.૩૪૨) અટ્ઠકથાયં વુત્તં. સકટવિનિચ્છયસ્સાપિ ગોણવિનિચ્છયેન સમાનત્તા તં અવત્વા વિસેસમત્તમેવ દસ્સેતુમાહ ‘‘સકટં…પે… વટ્ટતી’’તિ. ‘‘તુમ્હાકં દેમાતિ વુત્તે’’તિ આનેત્વા સમ્બન્ધિતબ્બં. યથાહ અટ્ઠકથાયં ‘‘તુમ્હાકમેવ દેમાતિ વુત્તે દારુભણ્ડં નામ સમ્પટિચ્છિતું વટ્ટતી’’તિ (પારા. અટ્ઠ. ૨.૩૪૨).

૩૮૭. કુઠારાદીસૂતિ એત્થ આદિ-સદ્દેન નિખાદનં સઙ્ગણ્હાતિ. અયં નયો વેદિતબ્બોતિ પાઠસેસો. ‘‘સકટં ગોણો વિય તાવકાલિકં અકત્વા અઞ્ઞાતકઅપ્પવારિતે ન યાચિતબ્બં, મૂલચ્છેજ્જવસેન અઞ્ઞાતકઅપ્પવારિતે ન યાચિતબ્બં, તાવકાલિકં યાચિતબ્બ’’ન્તિ વિનિચ્છયો ચ ‘‘સકટં…પે… વટ્ટતી’’તિ વિસેસવિનિચ્છયો ચાતિ અયં નયો વાસિઆદીસુ ચ વેદિતબ્બોતિ અત્થો. અનજ્ઝાવુત્થકન્તિ કેનચિ ‘‘મમેત’’ન્તિ અપરિગ્ગહિતં, ‘‘રક્ખિતગોપિતટ્ઠાનેયેવ હિ વિઞ્ઞત્તિ નામ વુચ્ચતી’’તિ અટ્ઠકથાવચનતો અરક્ખિતાગોપિતકન્તિ વુત્તં હોતિ. અટ્ઠકથાય વલ્લિઆદિવિનિચ્છયમ્પિ વત્વા ‘‘અનજ્ઝાવુત્થકં પન યં કિઞ્ચિ આહરાપેતું વટ્ટતી’’તિ (પારા. અટ્ઠ. ૨.૩૪૨) વુત્તત્તા સબ્બન્તિ ઇધ વુત્તગોણાદિકઞ્ચ વક્ખમાનવલ્લિઆદિકઞ્ચ ગહેતબ્બં. ઇમિના પુબ્બે વુત્તવિનિચ્છયસ્સ રક્ખિતગોપિતવિસયત્તં દીપિતં હોતિ. હરાપેતુમ્પિ વટ્ટતીતિ એત્થ અપિ-સદ્દેન પગેવ કેનચિ હરિત્વા દિન્નન્તિ દીપેતિ.

૩૮૮. વલ્લિઆદિમ્હીતિ આદિ-સદ્દેન વેત્તમુઞ્જતિણમત્તિકા સઙ્ગણ્હાતિ. એત્થ મુઞ્જપબ્બજતિણં વિના ગેહચ્છાદનતિણં તિણં નામ. ગરુભણ્ડપ્પહોનકેતિ ‘‘વલ્લિ અડ્ઢબાહુમત્તાપી’’તિઆદિના નયેન વુત્તલક્ખણે ગરુભણ્ડપ્પહોનકે. પરેસં સન્તકેયેવાતિ અવધારણેન ન અનજ્ઝાવુત્થકે દુક્કટન્તિ બ્યતિરેકતો દીપેતિ.

૩૮૯. પચ્ચયેસૂતિ ચીવરપિણ્ડપાતસેનાસનસઙ્ખાતેસુ તીસુ પચ્ચયેસુ. એવ-કારેન ગિલાનપચ્ચયસઙ્ખાતે ચતુત્થપચ્ચયે વિઞ્ઞત્તિ વટ્ટતીતિ દીપેતિ. વિઞ્ઞત્તિ નામ ‘‘આહર, દેહી’’તિ ઇચ્છિતપચ્ચયે નામં વત્વા યાચના. અટ્ઠકથાયં વુત્તં ‘‘સબ્બેન સબ્બં ન વટ્ટતી’’તિ (પારા. અટ્ઠ. ૨.૩૪૨) સાવધારણત્થં દસ્સેતું ‘‘ન ચ વટ્ટતી’’તિ વુત્તત્તા નેવ વટ્ટતીતિ અત્થો ગહેતબ્બો.

વિઞ્ઞત્તિયા અલબ્ભમાનભાવેન સમત્તા પચ્ચયેસુ તીસુ અનન્તરં સહનિદ્દિટ્ઠપચ્ચયત્તયતો તતિયપચ્ચયેયેવ લબ્ભમાનવિસેસં દસ્સેતું ‘‘તતિયે પરિકથોભાસનિમિત્તાનિ ચ લબ્ભરે’’તિ વુત્તત્તા અવસિટ્ઠદ્વયે પન પરિકથાદયો ન લબ્ભન્તીતિ વુત્તં હોતિ. અવુત્તે ચતુત્થપચ્ચયેપિ સમુચ્ચયત્થેન ચ-કારેન પરિકથાદિત્તયં લબ્ભતીતિ સિદ્ધત્તા ‘‘તીસ્વેવા’’તિ એવ-કારેન બ્યતિરેકમુખેન વિઞ્ઞત્તિયા ચ અનુઞ્ઞાતત્તા ચતુત્થે ગિલાનપચ્ચયે પરિકથોભાસનિમિત્તકમ્મવિઞ્ઞત્તિયો વટ્ટન્તીતિ સિદ્ધં. એત્તાવતા ચતુત્થે પચ્ચયે પરિકથાદયો ચત્તારોપિ વટ્ટન્તિ, તતિયપચ્ચયે વિઞ્ઞત્તિં વિના સેસત્તયં વટ્ટતિ, પુરિમપચ્ચયદ્વયે સબ્બમ્પિ ન વટ્ટતીતિ વુત્તન્તિ દટ્ઠબ્બં.

સેનાસનપચ્ચયે પરિકથાદિકન્તિ ઉપોસથાગારાદિકરણારહટ્ઠાનં ઓલોકેત્વા ઉપાસકાનં સુણન્તાનં ‘‘ઇમસ્મિં વત ઓકાસે એવરૂપં સેનાસનં કાતું વટ્ટતી’’તિ વા ‘‘યુત્ત’’ન્તિ વા ‘‘અનુરૂપ’’ન્તિ વા પવત્તા કથા પરિકથા નામ. ‘‘ઉપાસકા તુમ્હે કત્થ વસથા’’તિ પુચ્છિત્વા ‘‘પાસાદે ભન્તે’’તિ વુત્તે ‘‘ભિક્ખૂનં પન ઉપાસકા પાસાદો ન વટ્ટતી’’તિઆદિના નયેન પવત્તા કથા ઓભાસો નામ. ઉપાસકેસુ પસ્સમાનેસુ ભૂમિયં રજ્જું પસારેત્વા ભૂમિં ભાજેત્વા ખાણુકે આકોટેત્વા ‘‘કિમિદં ભન્તે’’તિ વુત્તે ‘‘એત્થ આવાસં કરોમ ઉપાસકા’’તિઆદિકા કથા નિમિત્તકથા નામ. ગિલાનપચ્ચયે ચ ઇમિના નયેન યથારહં વેદિતબ્બં. સબ્બમેતં અટ્ઠકથાય (પારા. અટ્ઠ. ૨.૩૪૨) વુત્તં.

૩૯૦-૩. ઇદાનિ કુટિકારસ્સ ભિક્ખુનો આપત્તિદસ્સનત્થમાહ ‘‘અદેસિતે’’તિઆદિ. તં ઉત્તાનત્થમેવ. નિસેન્તસ્સાતિ પાસાણે ઘંસિત્વા તિખિણં કરોન્તસ્સ. પાચિત્તિયા સહાતિ ‘‘ભૂતગામપાતબ્યતાય પાચિત્તિય’’ન્તિ (પાચિ. ૯૦) વુત્તપાચિત્તિયેન સદ્ધિં.

આપત્તિન્તિ પાચિત્તિયટ્ઠાને પાચિત્તિયઞ્ચેવ દુક્કટઞ્ચ ઇતરત્ર સુદ્ધપયોગદુક્કટઞ્ચાતિ આપત્તિં.

યા પનાતિ યા કુટિ. પઠમે દુતિયેતિ એત્થ ‘‘પિણ્ડેહી’’તિ કરણબહુવચનં વિભત્તિવચનવિપરિણામવસેન ‘‘પિણ્ડે’’તિ ભુમ્મેકવચનન્તં કત્વા યોજેતબ્બં, ‘‘નિક્ખિત્તે’’તિ અજ્ઝાહરિતબ્બં, ભાવલક્ખણે ભુમ્મં, નિક્ખિત્તે સતીતિ અત્થો.

૩૯૪. ‘‘સચે અઞ્ઞસ્સા’’તિ પદચ્છેદો. વિપ્પકતન્તિ આરદ્ધમનિટ્ઠિતં. ‘‘અનાપત્તી’’તિ ઇદં નિટ્ઠિતે આપજ્જિતબ્બસઙ્ઘાદિસેસાભાવં સન્ધાયાહ. પુબ્બપયોગમત્તેન હિ પાચિત્તિયદુક્કટાનિપિ હોન્તિ, તાનિ પન દેસેતબ્બાનિ. ‘‘તથા’’તિ ઇમિના ‘‘અનાપત્તી’’તિ આકડ્ઢતિ, તેન સઙ્ઘાદિસેસાપત્તિયા અભાવતો પુબ્બભાગે આપન્નાનં પાચિત્તિયદુક્કટાનં દેસેતબ્બતા ચ દીપિતા હોતિ. તં કુટિન્તિ તં વિપ્પકતકુટિં.

૩૯૫. અઞ્ઞં ભોજનસાલાદિં. તથાતિ અનાપત્તિમાહ.

૩૯૬. ‘‘કરોતો’’તિ ઇમિના ‘‘કારાપયતો’’તિપિ લબ્ભતિ. ઉભયેનાપિ ‘‘ક્રિયતો’’તિ ઇમસ્સ કારણં દસ્સેતિ. ‘‘અપ્પમાણિક’’ન્તિ ઇમિના સઙ્ઘાદિસેસસ્સ અઙ્ગં દસ્સેતિ.

૩૯૭. તન્તિ ‘‘અપ્પમાણિક’’ન્તિ એવં પચ્ચામસતિ. ‘‘ક્રિયાક્રિયતો’’તિ ઇદં કુટિયા કરણઞ્ચ વત્થુદેસનાય અકરણઞ્ચ ઉપાદાય વુત્તં.

કુટિકારસિક્ખાપદવણ્ણના.

૩૯૮. વત્થું અદેસેત્વાતિ સમ્બન્ધો, ‘‘તેન વિહારકારકેન ભિક્ખુના વિહારવત્થું સોધેત્વા સઙ્ઘં ઉપસઙ્કમિત્વા’’તિઆદિના (પારા. ૩૬૭) પદભાજને આગતનયેન વિહારં કારાપેન્તેન ભિક્ખુના વિહારવત્થું સોધેત્વા સમતલં કારેત્વા સઙ્ઘં ઉપસઙ્કમ્મ વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા ‘‘અહં ભન્તે મહલ્લકં વિહારં કત્તુકામો સસ્સામિકં અત્તુદ્દેસં, સોહં ભન્તે સઙ્ઘં વિહારવત્થુઓલોકનં યાચામી’’તિ તિક્ખત્તું યાચિત્વા લદ્ધે વુડ્ઢે વા ભિક્ખૂ ઞત્તિદુતિયાય કમ્મવાચાય સઙ્ઘેન સમ્મતે વા ભિક્ખૂ નેત્વા કતપરિકમ્મં વિહારવત્થું દસ્સેત્વા કુટિવત્થુઓલોકને વિય ગતભિક્ખૂહિ ઓલોકેત્વા સારમ્ભાદિભાવં ઉપપરિક્ખિત્વા અનારમ્ભસપરિક્કમનભાવં ઞત્વા આગન્ત્વા સઙ્ઘસ્સ આરોચિતે પુન તેન સઙ્ઘં ઉપસઙ્કમિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા ‘‘અહં ભન્તે મહલ્લકં વિહારં કત્તુકામો સસ્સામિકં અત્તુદ્દેસં, સોહં ભન્તે સઙ્ઘં વિહારવત્થુદેસનં યાચામી’’તિ તિક્ખત્તું યાચિત્વા સઙ્ઘેન ઞત્તિદુતિયાય કમ્મવાચાય વિહારવત્થુ દેસેતબ્બં, તથા અકત્વાતિ વુત્તં હોતિ. ઇહ સારમ્ભાદિ પઠમસિક્ખાપદે વુત્તનયેનેવ વેદિતબ્બં.

મહલ્લકન્તિ ‘‘સસ્સામિકભાવેન સઞ્ઞાચિકકુટિતો મહન્તભાવો એતસ્સ અત્થીતિ મહલ્લકો. યસ્મા વા વત્થું દેસાપેત્વા પમાણાતિક્કમેનાપિ કાતું વટ્ટતિ, તસ્મા પમાણમહન્તતાયપિ મહલ્લકો’’તિ (પારા. અટ્ઠ. ૨.૩૬૬) અટ્ઠકથાયં વુત્તનયેન મહન્તભાવેન યુત્તન્તિ અત્થો. વિહારન્તિ ‘‘વિહારો નામ ઉલ્લિત્તો વા હોતિ અવલિત્તો વા ઉલ્લિત્તાવલિત્તો વા’’તિ (પારા. ૩૭૧) પદભાજને વુત્તપ્પકારં સેનાસનન્તિ અત્થો. વિહરન્તિ અસ્મિન્તિ વિગ્ગહો. ઉલ્લિત્તાદિસરૂપં પુરિમસિક્ખાપદે વુત્તનયમેવ. તં વિહારં યો કરેય્યાતિ યોજના. કરેય્ય વા કારાપેય્ય વાતિ પુબ્બે વુત્તનયમેવ. અત્તવાસત્થન્તિ અત્તનો વાસં પટિચ્ચ, ઇમિના પરસ્સ વાસત્થાય કરોતિ, અનાપત્તીતિ બ્યતિરેકતો વિઞ્ઞાયતિ. ‘‘ગરુક’’ન્તિ એત્થ વત્થુદેસનાય અકારાપનેન ‘‘એકોવ સઙ્ઘાદિસેસો હોતી’’તિ પુબ્બે વુત્તવિકપ્પત્તયં ન ગહેતબ્બં. ઇદઞ્ચ વક્ખતિ ‘‘પમાણા…પે… સઙ્ઘાદિસેસતા’’તિ (વિ. વિ. ૩૯૯ આદયો).

૩૯૯. ક્રિયાસમુટ્ઠાનાભાવન્તિ પમાણાતિક્કમેપિ આપત્તિયા અસમ્ભવતો કિરિયાસમુટ્ઠાનસ્સ ઇધ અભાવો ઞાતબ્બો. ક્રિય…પે… લક્ખયેતિ એત્થ બ્યતિરેકતો અદેસિતવત્થુકતાય અકિરિયાસમુટ્ઠાનતા અનુઞ્ઞાતા.

મહલ્લકવિહારકથાવણ્ણના.

૪૦૧-૩. તેસૂતિ ચતુવીસતિયા પારાજિકેસુ. ભિક્ખુનો અનુરૂપાનિ એકૂનવીસતીતિ ભિક્ખુનીનં પટિનિયતા ઉબ્ભજાણુમણ્ડલિકાદયો ચત્તારો તદનુલોમાય વિબ્ભન્તભિક્ખુનિયા સહ પઞ્ચ પારાજિકે વિના ભિક્ખુનો અનુરૂપા સેસા એકૂનવીસતિ પારાજિકા.

ઇમસ્મિં સિક્ખાપદે પદભાજને ‘‘પારાજિકેન ધમ્મેનાતિ ચતુન્નં અઞ્ઞતરેના’’તિ (પારા. ૩૮૬) વુત્તનયસ્સ ઇધ ‘‘એકૂનવીસતી’’તિ વચનં વિરુજ્ઝતીતિ ચે? ન વિરુજ્ઝતિ. કસ્મા? યસ્મા પદભાજનં પાતિમોક્ખુદ્દેસાગતમત્તં ગહેત્વા પવત્તં, ઇદં પન બુદ્ધાનુમતિં ગહેત્વા વિનયપરિયત્તિપવત્તકાનં આચરિયાનં મતં ગહેત્વા પવત્તં, તસ્મા ન વિરુજ્ઝતીતિ ગહેતબ્બં. આચરિયો સબ્બપારાજિકાનં ‘‘બ્રહ્મચરિયા ચાવેય્ય’’ન્તિ (પારા. ૩૮૫) વુત્તઅનુદ્ધંસનસ્સ એકન્તસાધનત્તા ભિક્ખુનીનં પટિનિયતસાનુલોમપારાજિકપઞ્ચકં વિના અવસેસં સબ્બં સઙ્ગણ્હિ, તેનેવ વિનયટ્ઠકથાય ગણ્ઠિપદવિવરણે ‘‘ચતુન્નં અઞ્ઞતરેનાતિ પાતિમોક્ખુદ્દેસે એવ આગતે ગહેત્વા વુત્તં, ઇતરેસં અઞ્ઞતરેનાપિ અનુદ્ધંસેન્તસ્સ સઙ્ઘાદિસેસોવા’’તિ વુત્તં. તસ્મા ‘‘અનુદ્ધંસેય્યા’’તિ (પારા. ૩૮૪) પાઠે અધિપ્પાયં ગહેત્વા પવત્તત્તા ઇમેસં આચરિયાનં મતં પમાણન્તિ ગહેતબ્બં. ‘‘તેસુ અઞ્ઞતરેના’’તિ વક્ખમાનત્તા ‘‘એકૂનવીસતી’’તિ એત્થ ‘‘યાની’’તિ સામત્થિયા લબ્ભતિ.

અઞ્ઞતરેન અમૂલકેનાતિ યોજના. અમૂલકેનાતિ ચોદકસ્સ દસ્સનાદીહિ ચોદનામૂલેહિ વિરહિતત્તા અમૂલકં, પારાજિકં, તેન. યથાહ અટ્ઠકથાયં ‘‘યં પારાજિકં ચોદકેન ચુદિતકમ્હિ પુગ્ગલે નેવ દિટ્ઠં ન સુતં ન પરિસઙ્કિતં, ઇદં એતેસં દસ્સનસવનપરિસઙ્કાસઙ્ખાતાનં મૂલાનં અભાવેન અમૂલકં નામા’’તિ (પારા. અટ્ઠ. ૨.૩૮૫-૩૮૬). એત્થ ચ મંસચક્ખુના વા દિબ્બચક્ખુના વા દિટ્ઠં દિટ્ઠં નામ. પકતિસોતેન વા દિબ્બસોતેન વા સુતં સુતં નામ. ચિત્તેન પરિસઙ્કિતં પરિસઙ્કિતં નામ. તં તિવિધં દિટ્ઠસુતમુતપરિસઙ્કિતવસેન.

તત્થ તાદિસે કમ્મનિયે ઓકાસે માતુગામેન સદ્ધિં ભિક્ખુનો અઞ્ઞથિયં પયોગં દિસ્વા અઞ્ઞથા ગહેત્વા ‘‘વીતિક્કમનં નુ ખોયમકાસી’’તિ ગહણં દિટ્ઠપરિસઙ્કિતં નામ. કુટ્ટતિરોહિતે ભિક્ખુમ્હિ માતુગામસ્સ સદ્દં સુત્વા તત્થ અઞ્ઞસ્સ વિઞ્ઞુપુરિસસ્સ સબ્ભાવં અજાનિત્વા ‘‘વીતિક્કમનં નુ ખોયમકાસી’’તિ એવં ગહણં સુતપરિસઙ્કિતં નામ. વિહારપરિયન્તે તરુણમાતુગામપુરિસાનં દિવસં વીતિનામેત્વા ગતટ્ઠાને વિપ્પકિણ્ણપુપ્ફાનિ ઓલોકેત્વા, મંસસુરગન્ધઞ્ચ ઘાયિત્વા ‘‘ઇદં કસ્સ કમ્મ’’ન્તિ ઉપપરિક્ખન્તેન ભિક્ખુનો ચેતિયપૂજિતમાલાગન્ધસ્સ પીતારિટ્ઠસ્સ ભિક્ખુનો સરીરગન્ધં ઘાયિત્વા ‘‘તં એતસ્સ કમ્મં નુ ખો’’તિ કિરિયમાનસંસયો મુતપરિસઙ્કિતં નામ. એવરૂપસ્સ દિટ્ઠસુતપરિસઙ્કિતમૂલકસ્સ અભાવતો અમૂલકેન પારાજિકેનાતિ અયમેત્થ સઙ્ખેપો, વિત્થારો પન સમન્તપાસાદિકાય (પારા. અટ્ઠ. ૨.૩૮૫-૩૮૬) વુત્તનયેન દટ્ઠબ્બો.

ચોદેતીતિ ‘‘પારાજિકં ધમ્મં આપન્નોસી’’તિઆદિવચનેન સયં ચોદેતિ. ચોદાપનં પન વક્ખતિ. ચાવનચેતનો હુત્વાતિ ‘‘અપ્પેવ નામ નં ઇમમ્હા બ્રહ્મચરિયા ચાવેય્ય’’ન્તિ ઉપ્પન્નેન પરં સાસના ચાવેતુકામેન ચિત્તેન સમન્નાગતો હુત્વા. ‘‘સુદ્ધં વા અસુદ્ધં વા’’તિ ઇદં ‘‘ચોદેતી’’તિ ઇમિના વુત્તચોદનાકિરિયાય કમ્મનિદ્દેસો, ‘‘અઞ્ઞં ભિક્ખુ’’ન્તિ સેસો, પારાજિકમનાપન્નં વા આપન્નં વા અઞ્ઞં ભિક્ખુન્તિ અત્થો. યોતિ માતિકાગતભિક્ખુ, ‘‘દુટ્ઠો દોસો અપ્પતીતો’’તિ ઇદં અજ્ઝાહરિતબ્બં, ઉપ્પન્નેન દોસલેસેન સયં દૂસિતો, પરઞ્ચ દૂસેન્તો પીતિસુખાદીહિ અપગતો યો ભિક્ખૂતિ અત્થો. વક્ખમાનેન ‘‘તસ્સા’’તિ ઇમિના સમ્બન્ધો.

‘‘કતે ઓકાસમ્હી’’તિ પદચ્છેદો, ઓકાસં ‘‘કારાપેત્વા’’તિ (પારા. ૩૮૯) પાઠતો અન્તોનીતહેત્વત્થતાય ‘‘કતે’’તિ ‘‘કારિતે’’તિ એતસ્સ પરિયાયો હોતિ, ‘‘ઓકાસં મે કરોહિ, અહં તં વત્તુકામો’’તિ ઓકાસે કારાપિતેતિ અત્થો. ‘‘અકતે ઓકાસે’’તિ પદચ્છેદો, પુબ્બે વુત્તોયેવત્થો. દુક્કટાપત્તિયા સહાતિ ઓકાસસ્સ અકારાપિતત્તા દુક્કટાપત્તિયા સદ્ધિં.

૪૦૪-૫. કોણ્ઠોસીતિ ધુત્તોસિ. જેટ્ઠબ્બતિકોસીતિ કાલીદેવીવતનિયુત્તોસિ. કાલીદેવી કિર સિરિદેવિયા જેટ્ઠા, તસ્મા તસ્સા વતધરો જેટ્ઠબ્બતિકો વુચ્ચતિ. તં પન વતં સમાદિયિત્વા પૂરેન્તો સકલસરીરે મસિં મક્ખેત્વા કાકપત્તાનિ મુટ્ઠિયં કત્વા કાલીદેવિં ફલકે લિખાપેત્વા તં કાજકોટિયં બન્ધિત્વા ઉચ્છિટ્ઠોદકાદિઅસુચિસન્નિચિતઓલિગલ્લં પવિસિત્વા ‘‘દુસ્સીલોસિ નિસ્સીલોસિ સીલવિરહિતોસી’’તિ થોમેન્તો વિચરતીતિ.

દુસ્સીલત્તા એવ હીનજ્ઝાસયતાય પાપધમ્મો લામકસભાવોસિ. પૂતિના કમ્મેન સીલવિપત્તિયા અન્તો પવિટ્ઠત્તા અન્તોપૂતિ. છહિ દ્વારેહિ રાગાદિકિલેસાનુસ્સવનેન તિન્તત્તા અવસ્સુતો. સેસમેત્થ ઉત્તાનત્થમેવ. ગરુકં નિદ્દિસેતિ એત્થ ‘‘કતોકાસમ્હી’’તિ ચ ‘‘તથેવ અકતોકાસે, દુક્કટાપત્તિયા સહા’’તિ ચ આનેત્વા સમ્બન્ધિતબ્બં. એવમુત્તરત્રાપિ.

૪૦૬. સમ્મુખાતિ ચુદિતકસ્સ સમ્મુખા, અવિદૂરેતિ અત્થો. હત્થમુદ્દાયાતિ મુત્તપાણાદિવસેન. તં હત્થમુદ્દાય કથિતં. પરોતિ યં ચોદેસિ, સો ચુદિતકો પરો. ભિક્ખુનોતિ ચોદકસ્સ ભિક્ખુનો.

૪૦૭. સમ્મુખે ઠત્વાતિ ચુદિતકસ્સ આસન્ને ઠત્વા. ‘‘ચોદાપેન્તસ્સા’’તિ એતસ્સ કમ્મભાવતો પરોતિ ઇદં ઉપયોગન્તવસેન સમ્બન્ધિતબ્બં. એવમુત્તરત્ર. કેનચીતિ અઞ્ઞેન કેનચિ પુગ્ગલેન. તસ્સ ચોદકસ્સ. ‘‘ચોદાપેન્તસ્સા’’તિ પુન વચનં નિયમત્થં.

૪૦૮. સોપીતિ ઉગ્ગહાપિતત્તા ચોદનં કરોન્તો ઇતરો પયોજ્જકપુગ્ગલોપિ. તેસં દ્વિન્નમ્પીતિ પયોજકપયોજ્જકાનં દ્વિન્નમ્પિ.

૪૦૯. વુત્તટ્ઠાનં પણ્ણં વા સન્દેસં વા હરન્તો દૂતો નામ, સો ‘‘પણ્ણં વા સાસનં વા પેસેત્વા’’તિ ઇમિના સઙ્ગય્હતીતિ તસ્મિં વિસું અવત્તબ્બેપિ ‘‘દુત’’ન્તિ વચનેન નિસ્સટ્ઠદૂતમાહ. પણ્ણં વા અદત્વા ‘‘એવઞ્ચ એવઞ્ચ વદા’’તિ સાસનઞ્ચ અદત્વા ‘‘તં ચોદેહી’’તિ અત્થમત્તમેવ દત્વા નિસ્સટ્ઠો ભિક્ખુ ઇધ ‘‘નિસ્સટ્ઠદૂતો’’તિ ગહેતબ્બો.

અથ વા ‘‘દૂત’’ન્તિ ઇમિના ચોદેતું ઉગ્ગહાપેત્વા, તમનુગ્ગહાપેત્વા વા નિસ્સટ્ઠો ભિક્ખુ દૂતોયેવ ગહેતબ્બો. ‘‘પણ્ણ’’ન્તિ ઇમિના પબ્બજિતસ્સ વા અપબ્બજિતસ્સ વા કસ્સચિ હત્થે ચોદનં લિખિત્વા દિન્નપણ્ણં ગહેતબ્બં. સાસનન્તિ ‘‘પારાજિકં આપન્નો’’તિઆદિના નયેન વત્વા પેસિયમાનં સાસનં ગહેતબ્બં. ઇદં તયમ્પિ દૂરે નિસીદિત્વા અઞ્ઞેહિ કારાપનતો ‘‘ચોદાપેન્તસ્સા’’તિ આહ. ‘‘પર’’ન્તિ આનેત્વા સમ્બન્ધિતબ્બં. એત્થ ઓકાસકારાપનં નત્થિ.

૪૧૦. તથાતિ યથા અમૂલકેન પારાજિકેન સમ્મુખા ઓકાસે કારિતે, અકારિતે ચ, તથા અમૂલકેહિ સઙ્ઘાદિસેસેહીતિ વુત્તં હોતિ. ‘‘વુત્તે સમ્મુખા પરે’’તિ ભુમ્મવસેન અધિકતેન યોજેતબ્બં, ચોદેતિ ચોદાપેતીતિ વુત્તં હોતીતિ. પાચિત્તિયાપત્તીતિ ઓકાસે કારિતે કેવલા, અકારિતે દુક્કટેન સહાતિ ગહેતબ્બં. સમ્મુખા સેસાપત્તીહિ પરે વુત્તે ચાવનસઞ્ઞિનો દુક્કટં હોતીતિ યોજના. ઓકાસાકારાપનેનપિ દુક્કટમેવ હોતિ.

૪૧૧. અક્કોસનાધિપ્પાયસ્સાતિ ખુંસનાધિપ્પાયસ્સ. અકતોકાસન્તિ અકારિતોકાસં, ‘‘પર’’ન્તિ ઇમિના યોજેતબ્બં. અત્તનાતિ ચોદકેન, ‘‘સયં અકારિતોકાસ’’ન્તિ ઇમિના યોજેતબ્બં. સહ પાચિત્તિયેનાતિ ‘‘ઓમસવાદે પાચિત્તિય’’ન્તિ (પારા. ૧૪) વુત્તપાચિત્તિયેન સહ. વદન્તસ્સાતિ ચોદેન્તસ્સ વા ચોદાપેન્તસ્સ વા, એત્થ ‘‘સમ્મુખા’’તિ ઇદં વક્ખમાનસ્સ ‘‘અસમ્મુખા’’તિ એતસ્સ વિપરિયાયતો લબ્ભતિ, ચ-કારેન કારિતોકાસપક્ખે દુક્કટેન પાચિત્તિયસમ્બન્ધી.

૪૧૨. અસમ્મુખા વદન્તસ્સાતિ એત્થ ‘‘અક્કોસનાધિપ્પાયસ્સા’’તિ આનેત્વા સમ્બન્ધિતબ્બં. ‘‘અકતોકાસમત્તના’’તિ નાનુવત્તતિ. સત્તહિ આપત્તીહીતિ પારાજિકસઙ્ઘાદિસેસથુલ્લચ્ચયપાચિત્તિયપાટિદેસનીયદુક્કટદુબ્ભાસિતસઙ્ખાતેસુ સત્તસુ આપત્તિક્ખન્ધેસુ યેન કેનચીતિ વુત્તં હોતિ. ‘‘તથા’’તિ ઇમિના ‘‘અસમ્મુખા’’તિ ઇદં સઙ્ગણ્હાતિ. કમ્મન્તિ તજ્જનીયાદિસત્તવિધં કમ્મં.

૪૧૩. ઉમ્મત્તકાદીનન્તિ આદિ-સદ્દેન ‘‘અનાપત્તિ સુદ્ધે અસુદ્ધદિટ્ઠિસ્સ અસુદ્ધે અસુદ્ધદિટ્ઠિસ્સ ઉમ્મત્તકસ્સ આદિકમ્મિકસ્સા’’તિ (પારા. ૩૯૦) વુત્તે સઙ્ગણ્હાતિ. પઞ્ચઙ્ગસંયુતન્તિ યં ચોદેતિ, તસ્સ ‘‘ઉપસમ્પન્નો’’તિ સઙ્ખ્યૂપગમનં, તસ્મિં સુદ્ધસઞ્ઞિતા, યેન પારાજિકેન ચોદેતિ, તસ્સ દિટ્ઠાદિવસેન અમૂલકતા, ચાવનાધિપ્પાયેન સમ્મુખા ચોદના, તસ્સ તઙ્ખણવિજાનનન્તિ ઇમેહિ પઞ્ચહિ અઙ્ગેહિ યુત્તં હોતિ.

૪૧૫. ઇદન્તિ ‘‘સિક્ખાપદ’’ન્તિ સેસો, ‘‘સિક્ખાપદ’’ન્તિ ચ ઇમિના તપ્પટિપાદનીયા આપત્તિયેવ ગય્હતિ. તિસમુટ્ઠાનન્તિ કાયચિત્તતો, વાચાચિત્તતો, કાયવાચાચિત્તતોતિ સચિત્તકેહિ તીહિ સમુટ્ઠાનતો તિસમુટ્ઠાનં. તેનેવાહ ‘‘સચિત્ત’’ન્તિ. પટિઘચિત્તાનં દ્વિન્નં અઞ્ઞતરેન સહિતત્તા સચિત્તકં. તંસમ્પયુત્તાય દોમનસ્સવેદનાય વસેન દુક્ખવેદનં.

દુટ્ઠદોસકથાવણ્ણના.

૪૧૬. લેસમત્તન્તિ ‘‘અઞ્ઞમ્પિ વત્થું લિસ્સતિ સિલિસ્સતિ વોહારમત્તેનેવ ઈસકં અલ્લીયતીતિ લેસો, જાતિઆદીનંયેવ અઞ્ઞતરકોટ્ઠાસસ્સેતં અધિવચન’’ન્તિ (પારા. અટ્ઠ. ૨.૩૯૧) અટ્ઠકથાય દસ્સિતનિબ્બચનેસુ ‘‘લેસો નામ દસ લેસા જાતિલેસો નામલેસો’’તિઆદિના (પારા. અટ્ઠ. ૩૯૪) નયેન પદભાજને વુત્તેસુ જાતિનામગોત્તાદીસુ દસસુ લેસેસુ અઞ્ઞતરલેસમત્તન્તિ વુત્તં હોતિ.

તત્થ જાતિ નામ ખત્તિયબ્રાહ્મણાદિજાતિ. નામં નામ ઇમસ્મિં સિક્ખાપદે ‘‘છગલકો દબ્બો મલ્લપુત્તો નામ, છગલિકા મેત્તિયા ભિક્ખુની નામા’’તિ ઠપિતં નામં વિય ચોદકેહિ ઠપિતનામઞ્ચ બુદ્ધરક્ખિતાદિસકનામઞ્ચાતિ દુવિધં નામં. ગોત્તં નામ ગોતમમોગ્ગલ્લાનાદિગોત્તં. લિઙ્ગં નામ દીઘતાદિસણ્ઠાનનાનત્તઞ્ચ કણ્હતાદિવણ્ણનાનત્તઞ્ચાતિ ઇદં દુવિધલિઙ્ગં. આપત્તિલેસો નામ લહુકાદિરૂપેન ઠિતપાચિત્તિયાદિઆપત્તિ. પત્તો નામ લોહપત્તાદિ. ચીવરં નામ પંસુકૂલાદિ. ઉપજ્ઝાયો નામ ચુદિતકસ્સ ઉપજ્ઝાયો. આચરિયો નામ ચુદિતકસ્સ પબ્બજ્જાચરિયાદિકો. સેનાસનં નામ ચુદિતકસ્સેવ નિવાસપાસાદાદિકં.

ચોદેય્યાતિ અઞ્ઞખત્તિયજાતિકં પુગ્ગલં પારાજિકં અજ્ઝાપજ્જન્તં દિસ્વા અત્તનો વેરિખત્તિયજાતિકં પુગ્ગલં ‘‘ખત્તિયો મયા દિટ્ઠો, પારાજિકં ધમ્મં અજ્ઝાપન્નોસી’’તિઆદિના નયેન ચોદેતિ. ગરુકાપત્તિ નામ સઙ્ઘાદિસેસો. સચે ચાવનચેતનોતિ ‘‘અપ્પેવ નામ નં ઇમમ્હા બ્રહ્મચરિયા ચાવેય્ય’’ન્તિ (પારા. ૩૯૨) વુત્તત્તા સચે ઇમં સાસના ચાવેય્યામીતિ અધિપ્પાયો હુત્વા ચોદેતીતિ વુત્તં હોતિ, ઇમિના બ્યતિરેકવસેન ન અઞ્ઞાધિપ્પાયોતિ વુત્તમેવ હોતીતિ પુરિમસિક્ખાપદટ્ઠકથાયં દસ્સિતેસુ ‘‘ચાવનાધિપ્પાયો અક્કોસાધિપ્પાયો’’તિ (પારા. અટ્ઠ. ૨.૩૮૯) એવમાદિનાનપ્પકારાધિપ્પાયેસુ આપત્તિયા અઙ્ગભૂતં ચાવનાધિપ્પાયં દસ્સેત્વા સેસાધિપ્પાયે પટિક્ખિપતિ.

૪૧૭. તથાસઞ્ઞીતિ અયં પારાજિકમજ્ઝાપન્નોયેવાતિ તથાસઞ્ઞી. ‘‘ચોદેતિ વા ચોદાપેતિ વા’’તિ વુત્તત્તા ‘‘તથાસઞ્ઞી’’તિ ઇદં ‘‘ચોદાપેતી’’તિ ઇમિનાપિ યોજેતબ્બં. સેસોતિ એત્થ ‘‘પારાજિકાનિ વુત્તાની’’તિઆદિં કત્વા ‘‘સચિત્તં દુક્ખવેદન’’ન્તિ પરિયન્તં કત્વા દસ્સિતપઠમસિક્ખાપદવિનિચ્છયસઙ્ગાહકકથાપબન્ધેન વુત્તસબ્બવિનિચ્છયેસુ તંસિક્ખાપદનિયતં ‘‘અમૂલકેના’’તિ ઇદઞ્ચ ઇમસ્મિં સિક્ખાપદે ‘‘ભિક્ખુમન્તિમવત્થુના…પે… અનાપત્તિ સિયા’’તિ વુત્તમત્થઞ્ચ ઠપેત્વા અવસિટ્ઠસબ્બવિનિચ્છયોતિ અત્થો. અનન્તરસમો મતો હેટ્ઠા અનન્તરં વુત્તસિક્ખાપદેનેવ સદિસોતિ વેદિતબ્બો.

દુતિયદુટ્ઠદોસકથાવણ્ણના.

૪૧૮. સમગ્ગસ્સ સઙ્ઘસ્સાતિ ‘‘સમગ્ગો નામ સઙ્ઘો સમાનસંવાસકો સમાનસીમાયં ઠિતો’’તિ પદભાજને વુત્તત્તા ચિત્તેન ચ કાયેન ચ એકીભૂતસ્સ સઙ્ઘસ્સાતિ વુત્તં હોતિ. ચ-કારો પદપૂરણો, એવ-કારત્થો વા, નસમગ્ગસ્સાતિ બ્યતિરેકત્થો વેદિતબ્બો. ભેદત્થં વાયમેય્યાતિ ‘‘ઇમે કથં કદા ભિજ્જિસ્સન્તી’’તિ રત્તિન્દિવં ચિન્તેત્વા ઉપાયં ગવેસિત્વા પક્ખપરિયેસનાદિં કરેય્યાતિ અત્થો. વુત્તઞ્હિ પાળિયં ‘‘ભેદાય પરક્કમેય્યાતિ કથં ઇમે નાના અસ્સુ વિના અસ્સુ વગ્ગા અસ્સૂતિ પક્ખં પરિયેસતિ ગણં બન્ધતી’’તિ (પારા. ૪૧૨).

ભેદહેતુન્તિ ‘‘ઇધુપાલિ ભિક્ખુ અધમ્મં ‘ધમ્મો’તિ દીપેતિ, ધમ્મં ‘અધમ્મો’તિ દીપેતી’’તિઆદિના (પરિ. ૪૫૯) નયેન ખન્ધકે વુત્તં અટ્ઠારસભેદકરવત્થુસઙ્ખાતં સઙ્ઘભેદકારણમાહ. ઇદમેવ હિ પદભાજને વુત્તં ‘‘ભેદનસંવત્તનિકં વા અધિકરણન્તિ અટ્ઠારસભેદકરવત્થૂની’’તિ. ગહેત્વાતિ પગ્ગય્હ. તિટ્ઠેય્યાતિ નપ્પટિનિસ્સજ્જેય્ય. પરિદીપયન્તિ એત્થ પરિદીપેન્તો, ન પટિનિસ્સજ્જન્તોતિ અત્થો. યથાહ ‘‘તિટ્ઠેય્યાતિ ન પટિનિસ્સજ્જેય્યા’’તિ.

૪૧૯. ભિક્ખૂહીતિ તસ્સ સઙ્ઘભેદકસ્સ પરક્કમનં પસ્સન્તેહિ વા દૂરે ચે, ઠિતં પવત્તિં સુણન્તેહિ વા લજ્જીહિ સુપેસલેહિ સેસભિક્ખૂહિ. વુત્તઞ્હેતં ‘‘ભિક્ખૂહીતિ અઞ્ઞેહિ ભિક્ખૂહિ. યે પસ્સન્તિ યે સુણન્તિ, તેહિ વત્તબ્બો’’તિ (પારા. ૪૧૨). તસ્સ વદન્તેહિ એવં વત્તબ્બન્તિ વચનાકારદસ્સનત્થમાહ ‘‘માયસ્મા સમગ્ગસ્સ સઙ્ઘસ્સ ભેદાય પરક્કમિ, ભેદનસંવત્તનિકં વા અધિકરણં સમાદાય પગ્ગય્હ અટ્ઠાસિ, સમેતાયસ્મા સઙ્ઘેન, સમગ્ગો હિ સઙ્ઘો સમ્મોદમાનો અવિવદમાનો એકુદ્દેસો ફાસુ વિહરતી’’તિ (પારા. ૪૧૧) પાઠં, તં એકદેસસઙ્ગહવસેન ઉપલક્ખેતુમાહ ‘‘ભેદત્થં…પે… ભેદકારણ’’ન્તિ. ઇતિ વત્તબ્બોતિ યોજના.

૪૨૦. વુચ્ચમાનો હીતિ એત્થ હિ-સદ્દો અપિ-સદ્દત્થો. ‘‘પી’’તિ વા પાઠો, તેહિ લજ્જિભિક્ખૂહિ ‘‘માયસ્મા’’તિઆદિના નયેન વિસું તિક્ખત્તું વુત્તોપીતિ અત્થો. નિસ્સજ્જેય્ય ન ચેવ નન્તિ તં ભેદાય પરક્કમનં અપ્પટિનિસ્સજ્જનપચ્ચયા દુક્કટાપત્તિં આપજ્જિત્વાપિ ન વિસ્સજ્જેય્યાતિ અત્થો. વુત્તઞ્હેતં ‘‘નો ચે પટિનિસ્સજ્જતિ, આપત્તિ દુક્કટસ્સા’’તિ (પારા. ૪૧૨). તથા હિ અપ્પટિનિસ્સજ્જન્તો હત્થેસુ, પાદેસુ ચ ગહેત્વા સઙ્ઘમજ્ઝે આનેત્વા તથેવ તિક્ખત્તું વુત્તોપિ તં અવિસ્સજ્જેત્વા દુક્કટાપત્તિં આપન્નોતિ ઇમિના ચ સઙ્ગહિતો. વુત્તઞ્હેતં ભગવતા ‘‘સો ભિક્ખુ સઙ્ઘમજ્ઝમ્પિ આકડ્ઢિત્વા વત્તબ્બો ‘માયસ્મા…પે… ફાસુ વિહરતી’તિ. દુતિયમ્પિ વત્તબ્બો. તતિયમ્પિ વત્તબ્બો. સચે પટિનિસ્સજ્જતિ, ઇચ્ચેતંકુસલં. નો ચે પટિનિસ્સજ્જતિ, આપત્તિ દુક્કટસ્સા’’તિ. ઇદં ઉભયત્થ દુક્કટં સામઞ્ઞેન વક્ખતિ ‘‘તિક્ખત્તું પન વુત્તસ્સ, અપરિચ્ચજતોપિ ત’’ન્તિ.

સમનુભાસિતબ્બોતિ એત્થ ‘‘સો ભિક્ખૂ’’તિ આનેત્વા સમ્બન્ધિતબ્બં, ‘‘યાવતતિય’’ન્તિ સેસો, યથાહ ‘‘સો ભિક્ખુ ભિક્ખૂહિ યાવતતિયં સમનુભાસિતબ્બો’’તિ (પારા. ૪૧૧), તથા સઙ્ઘમજ્ઝેપિ તિક્ખત્તું વુચ્ચમાનોપિ નો વિસ્સજ્જેત્વા દુક્કટં આપન્નો સો આધાનગ્ગાહી ભિક્ખુ સઙ્ઘેન તિક્ખત્તું વુત્તં કમ્મવાચં વત્વા સમનુભાસિતબ્બોતિ અત્થો. યથાહ અટ્ઠકથાયં ‘‘યાવતતિયં સમનુભાસિતબ્બોતિ યાવ તતિયં સમનુભાસનં, તાવ સમનુભાસિતબ્બો, તીહિ સમનુભાસનકમ્મવાચાહિ કમ્મં કાતબ્બ’’ન્તિ (પારા. અટ્ઠ. ૨.૪૧૧). તન્તિ ભેદાય પરક્કમનં, ભેદનસંવત્તનિકં અધિકરણં પગ્ગહેત્વા ઠાનઞ્ચ. અચ્ચજન્તિ, ઞત્તિચતુત્થાય કમ્મવાચાય વુચ્ચમાનાયપિ અચ્ચજન્તો. ગરુકં ફુસેતિ તતિયાય કમ્મવાચાય ‘‘સો ભાસેય્યા’’તિ ય્યકારપ્પત્તાય સઙ્ઘાદિસેસં આપજ્જતિ.

૪૨૧. સઙ્ઘસ્સ ભેદાય પરક્કમન્તં ભિક્ખું દિસ્વા, સુત્વા, ઞત્વા ચ અવદન્તસ્સ ભિક્ખુનો દુક્કટન્તિ યોજના.

૪૨૨. કીવદૂરે વસન્તેહિ સુત્વા ગન્ત્વા વત્તબ્બન્તિ આહ ‘‘ગન્ત્વા’’તિઆદિ. અદ્ધયોજનમેવ અદ્ધયોજનતા, તતો અધિકં વા. ગિલાનં પટિચ્ચ અદ્ધયોજનં વુત્તં, ઇતરં પટિચ્ચ ‘‘અધિકં દૂરમ્પિ પન ગન્તબ્બ’’ન્તિ વુત્તં. તેનેવાહ ‘‘સચે સક્કોતી’’તિ. તાવદેતિ તદા એવ, અચિરાયિત્વાતિ અત્થો.

૪૨૩. તિક્ખત્તું પન વુત્તસ્સાતિ ‘‘માયસ્મા’’તિઆદિના નયેન વિસુઞ્ચ સઙ્ઘમજ્ઝે ચ તિક્ખત્તું વુત્તસ્સાપિ અપરિચ્ચજન્તસ્સ. તં ભેદાય પરક્કમાદિકં. ભેદપ્પવત્તિયા સુતક્ખણે સયં અગન્ત્વા પણ્ણં વા સાસનં વા પેસેન્તસ્સ આપત્તિં દસ્સેતુમાહ ‘‘દૂતં વા’’તિઆદિ. યથાહ અટ્ઠકથાયં (પારા. અટ્ઠ. ૨.૪૧૧) ‘‘દૂતં વા પણ્ણં વા પેસેત્વા વદતોપિ આપત્તિમોક્ખો નત્થી’’તિઆદિ.

૪૨૫. ય્યકારે પન સમ્પત્તેતિ ‘‘યસ્સ નક્ખમતિ, સો ભાસેય્યા’’તિ (પારા. ૪૧૩) તતિયકમ્મવાચાય અન્તે ય્યકારે ઉચ્ચારિતે. પસ્સમ્ભન્તીતિ પટિપ્પસ્સમ્ભન્તિ, વૂપસમન્તીતિ અત્થો. દુક્કટાદયોતિ ઞત્તિયા દુક્કટં, દ્વીહિ કમ્મવાચાહિ દ્વે ચ થુલ્લચ્ચયા. યથાહ ‘‘સઙ્ઘાદિસેસં અજ્ઝાપજ્જન્તસ્સ ઞત્તિયા દુક્કટં, દ્વીહિ કમ્મવાચાહિ થુલ્લચ્ચયા પટિપ્પસ્સમ્ભન્તી’’તિ (પારા. ૪૧૪). તસ્મા ઞત્તિયા પુબ્બે બહિ ચ સઙ્ઘમજ્ઝે ચ તિક્ખત્તું વુત્તેપિ અપ્પટિનિસ્સજ્જનેન આપન્નાનિ દ્વે દુક્કટાનિ દેસેતબ્બાનીતિ વિઞ્ઞાયતિ.

ઇમિસ્સા કમ્મવાચાય કિં આપન્નાપત્તિયો પટિપ્પસ્સમ્ભન્તિ, ઉદાહુ અનાપન્નાતિ વિચારણાય ‘‘યો અવસાને પટિનિસ્સજ્જિસ્સતિ, સો તા આપત્તિયો ન આપજ્જતિ, તસ્મા અનાપન્ના પટિપ્પસ્સમ્ભન્તી’’તિ (પારા. અટ્ઠ. ૨.૪૧૪) મહાસુમત્થેરસ્સ વાદં ‘‘કિમનાપન્નાનં પટિપ્પસ્સદ્ધિયા’’તિ પટિબાહિત્વા ‘‘લિઙ્ગપરિવત્તને અસાધારણાપત્તિયો વિય આપન્ના પટિપ્પસ્સમ્ભન્તી’’તિ મહાપદુમત્થેરસ્સ વાદો ઠિતો.

૪૨૬. અકતે પન કમ્મસ્મિન્તિ યથાવુત્તસમનુભાસનકમ્મે અકતે. અપરિચ્ચજતોપિ ચાતિ તં સઙ્ઘભેદાય પરક્કમનં અપરિચ્ચજન્તસ્સાપિ. ‘‘સઙ્ઘાદિસેસેના’’તિ ઇમિના કમ્મં અકત્વા સઙ્ઘમજ્ઝે ચ બહિ ચ તિક્ખત્તું વુચ્ચમાનસ્સ અપ્પટિનિસ્સજ્જનેન દુક્કટં પન હોતીતિ બ્યતિરેકતોવ દસ્સેતિ.

૪૨૭. પુબ્બે વાતિ ઞત્તિયા પુબ્બે વિસું, સઙ્ઘમજ્ઝે વા તિક્ખત્તું વુચ્ચમાનેપિ. તઙ્ખણેપીતિ ઞત્તિક્ખણે વા. ઞત્તિયા અનિટ્ઠિતાયપિ પચ્છાપિ, ઇમસ્સ અવધિં દસ્સેતિ ‘‘અસમ્પત્તે ય્યકારસ્મિ’’ન્તિ. પટિનિસ્સજ્જતોપિ ચ તસ્સ સઙ્ઘાદિસેસેન અનાપત્તિ પકાસિતાતિ પઠમગાથાય પચ્છિમડ્ઢં ઇધાનેત્વા યોજેતબ્બં.

૪૨૮. એત્તાવતા ‘‘અનાપત્તિ અસમનુભાસન્તસ્સ પટિનિસ્સજ્જન્તસ્સ ઉમ્મત્તકસ્સ ખિત્તચિત્તસ્સ વેદનાટ્ટસ્સ આદિકમ્મિકસ્સા’’તિ (પારા. ૪૧૬) પાઠે ‘‘પટિનિસ્સજ્જન્તસ્સા’’તિ પદેન ગહિતેસુ ‘‘ઞત્તિતો’’તિઆદીસુ વિનિચ્છયં દસ્સેત્વા તં નિગમેતું ‘‘પટિનિસ્સજ્જતો વાપિ ત’’ન્તિ આહ. નિગમનત્થજોતકો એવં-સદ્દો સામત્થિયા લબ્ભતિ, એવં ‘‘ઞત્તિતો’’તિઆદિના યથાવુત્તનયેન પટિનિસ્સજ્જન્તસ્સ વાતિ અત્થો. તન્તિ સઙ્ઘભેદપ્પયોગં. અસમનુભાસતો વાતિ અસમનુભાસિયમાનસ્સ. ‘‘અસમનુભાસિયતો’’તિ વત્તબ્બે વિકરણપચ્ચયલોપેન ‘‘અસમનુભાસતો’’તિ વુત્તન્તિ દટ્ઠબ્બં. યથાહ અટ્ઠકથાયં ‘‘અસમનુભાસન્તસ્સાતિ અસમનુભાસિયમાનસ્સા’’તિ (પારા. અટ્ઠ. ૨.૪૧૬). ‘‘સઙ્ઘાદિસેસેન અનાપત્તિ પકાસિતા’’તિ અનુવત્તમાનત્તા ઇચ્છિતત્થે સિદ્ધેપિ પુન ‘‘અનાપત્તિ પકાસિતા’’તિ વચને પુનરુત્તતા આપજ્જતીતિ? નાપજ્જતિ, પદાવુત્તિ નામ અલંકારો હોતીતિ.

૪૨૯. ઇમસ્સ સિક્ખાપદસ્સ અત્થુપ્પત્તિયં સઙ્ઘભેદત્થં પઞ્ચ વત્થૂનિ યાચન્તેન દેવદત્તેન ‘‘સાધુ ભન્તે ભિક્ખૂ યાવજીવં મચ્છમંસં ન ખાદેય્યું, યો મચ્છમંસં ખાદેય્ય, વજ્જં નં ફુસેય્યા’’તિ (પારા. ૪૦૯) વુત્તે ‘‘અલં દેવદત્ત મયા તિકોટિપરિસુદ્ધં મચ્છમંસં અનુઞ્ઞાતં અદિટ્ઠં અસુતં અપરિસઙ્કિત’’ન્તિ (પારા. ૪૦૯) અનુઞ્ઞાતેસુ મચ્છમંસેસુ કપ્પિયાકપ્પિયવિનિચ્છયં પુબ્બે અનોકાસાભાવેન અવત્વા પકતં સિક્ખાપદવિનિચ્છયં નિટ્ઠાપેત્વા ઇદાનિ પત્તાવસેસં તં દસ્સેતું ‘‘યઞ્હી’’તિઆદિ આરદ્ધં. ‘‘તં તસ્સા’’તિ વક્ખમાનત્તા ‘‘ય’’ન્તિ ઇદં ‘‘ભિક્ખુ’’ન્તિ ઇમિના ચ ‘‘મચ્છમંસ’’ન્તિ એતેન ચ યોજેતબ્બં. મચ્છન્તિ ઓદકં. મંસન્તિ થલજાનં મંસં. નિબ્બેમતિકોતિ ‘‘મં ઉદ્દિસ્સ કત’’ન્તિ વા ‘‘સઙ્ઘં ઉદ્દિસ્સ કત’’ન્તિ વા ઉપ્પન્નાય વિમતિયા વિરહિતો.

૪૩૦. સમુદ્દિસ્સ કતન્તિ સઙ્ઘં વા અત્તાનં વા ઉદ્દિસ્સ કતં. ‘‘ઞત્વા’’તિ ઇમિના અજાનિત્વા ભુઞ્જન્તસ્સ અનાપત્તિભાવમાહ.

૪૩૧. હત્થીનં અસ્સાનં અચ્છાનં મનુસ્સાનં અહીનં કુક્કુરાનં દીપીનં સીહાનં બ્યગ્ઘાનં તરચ્છાનં મંસં અકપ્પિયં હોતીતિ યોજના.

૪૩૨. સચિત્તકતા આપત્તિયાયેવ યુજ્જતિ, ઇધ પન તંહેતુકં મંસમેવ હેતુમ્હિ ફલૂપચારેન સચિત્તકન્તિ ગહિતં. એત્થ ચિત્તં નામ અત્તાનં વા સઙ્ઘં વા ઉદ્દિસ્સ કતભાવજાનનચિત્તં. સેસન્તિ અનુદ્દિસ્સકતં અકપ્પિયમંસં. અચિત્તકન્તિ વુત્તનયમેવ.

૪૩૩. પુચ્છિત્વાયેવાતિ અકપ્પિયમંસપરિહારત્થં દસસુ મંસેસુ નામઞ્ચ ઉદ્દિસ્સકતસ્સ પરિહારત્થં ઉભયસ્સાપિ પટિલદ્ધાકારઞ્ચ પુચ્છિત્વાયેવાતિ અત્થો. ઓદકેસુ મચ્છેસુ અકપ્પિયાભાવતો લદ્ધાકારોવ ઞાતબ્બો. મંસે દિટ્ઠમત્તેયેવ ‘‘ઇદં અસુકમંસ’’ન્તિ જાનન્તિ ચે, અપુચ્છિતેપિ દોસો નત્થિ. દાયકેસુ મંસસ્સાભાવે લદ્ધનિયામે અપુચ્છિતેપિ દોસો નત્થિ. યથા વા તથા વા વિમતિયા ઉપ્પન્નાય અપ્પટિગ્ગાહેત્વા નિસિન્ને ‘‘કસ્મા ન પટિગ્ગણ્હથા’’તિ પુચ્છિતે વિમતિયા ઉપ્પન્નાકારં વત્વા ‘‘મયં તુમ્હે વા ઇતરે ભિક્ખૂ વા ઉદ્દિસ્સ ન કરિમ્હા’’તિ વત્વા ‘‘અમ્હાકમેવ સન્ધાય કતં, પણ્ણાકારત્થાય કતં, અતિથીનં વા અત્થાય કત’’ન્તિઆદિના અત્તના લદ્ધપ્પકારં વત્વા ‘‘સંસયં અકત્વા પટિગ્ગહેતબ્બ’’ન્તિ વદેય્યું ચે, પટિગ્ગહેતું વટ્ટતીતિ સબ્બમિદં અટ્ઠકથાય વુત્તં.

ભિક્ખૂનં એતં વત્તન્તિ યોજના. વત્તટ્ઠાતિ સમ્માસમ્બુદ્ધેન મહાકરુણાય દેસિતં પાતિમોક્ખસંવરસીલં વિસોધેત્વા પટિપજ્જને પતિટ્ઠિતા. ‘‘વિનયઞ્ઞુનો’’તિ ઇમિના વિનયં અજાનિત્વા ઉપદેસપ્પમાણેનેવ વત્તં પૂરેન્તેહિ વત્તસ્સ વિરોધોપિ સિયાતિ તે નિવત્તેતિ. ‘‘વત્તટ્ઠા’’તિ વિસેસનેન વિનયં ઞત્વાપિ અપૂરણે નિવત્તેતિ. ઉભયેનપિ અત્તના વુત્તવિનિચ્છયસ્સ પરિસુદ્ધભાવં દીપેતિ.

૪૩૪. ઇદં સમનુભાસનન્તિ યથાવુત્તસિક્ખાપદમાહ. સમનુભાસનેન સાધેતબ્બા આપત્તિ સમનુભાસના કારણૂપચારેન. અઞ્ઞથા એકસમુટ્ઠાનાદિભાવો ન યુજ્જતિ. એકસમુટ્ઠાનં કાયવાચાચિત્તસઙ્ખાતં એકં સમુટ્ઠાનં એતસ્સાતિ કત્વા. કાયકમ્મન્તિ હત્થમુદ્દાવસેન કાયેન કાતબ્બસ્સ પટિનિસ્સજ્જનસ્સ અકતત્તા કાયકમ્મં. વચીકમ્મન્તિ વચસા કાતબ્બસ્સ અકતત્તા વચીકમ્મં. અક્રિયન્તિ યથાવુત્તનયેન ‘‘સઙ્ઘભેદોપક્કમનિવારણાય પરક્કમનં પટિનિસ્સજ્જામી’’તિ કાયવિકારેન વા વચીભેદેન વા અવિઞ્ઞાપનતો અકિરિયં નામ હોતીતિ વુત્તં હોતિ.

સઙ્ઘભેદકથાવણ્ણના.

૪૩૫. કિઞ્ચિપિ વત્તબ્બન્તિ ‘‘એકો વા દ્વે વા તયો વા’તિ વુત્તસઙ્ઘભેદાનુવત્તકભિક્ખું પસ્સન્તેહિ સુણન્તેહિ લજ્જિભિક્ખૂહિ વિસુઞ્ચ સઙ્ઘમજ્ઝે ચ નેત્વા તિક્ખત્તુંયેવ સઙ્ઘભેદાનુવત્તનસ્સ અકત્તબ્બતં વત્વા તતો અનોરમન્તાનં ઞત્તિચતુત્થાય કમ્મવાચાય સમનુભાસનકમ્મં કાતબ્બ’’ન્તિ ઇદઞ્ચ ‘‘તતિયાનુસ્સાવનાય ય્ય-કારપ્પત્તાય આપજ્જનકસઙ્ઘાદિસેસતો પુબ્બે આપન્ના દુક્કટથુલ્લચ્ચયા પટિપ્પસ્સમ્ભન્તી’’તિ ઇદઞ્ચ અનાપત્તિપકારો ચાતિ ઇમં સાધારણવિનિચ્છયં સન્ધાયાહ. વચનપ્પકારભેદો પન અત્થેવ, સો સઙ્ખેપતો માતિકાય (પારા. ૪૧૮-૪૧૯) વિત્થારતો પદભાજને (પારા. ૪૧૮-૪૧૯) આગતનયેન વત્તબ્બો. અસ્સાતિ દુતિયસઙ્ઘભેદસિક્ખાપદસ્સ. ‘‘સમુટ્ઠાના…પે… મતા’’તિ ઇમિના સાધારણવિનિચ્છયો અતિદિટ્ઠોતિ દટ્ઠબ્બં.

દુતિયસઙ્ઘભેદકથાવણ્ણના.

૪૩૬. ઉદ્દેસપરિયાપન્નેતિ એત્થ ‘‘સિક્ખાપદે’’તિ સેસો, નિદાનપારાજિકસઙ્ઘાદિસેસઅનિયતવિત્થારસઙ્ખાતે પઞ્ચવિધઉદ્દેસલક્ખણપાતિમોક્ખે અન્તોગધસિક્ખાપદવિસયેતિ અત્થો. ‘‘ઉદ્દેસપરિયાપન્ને સિક્ખાપદે’’તિ ઇમિના ‘‘અવચનીયમત્તાનં કરોતી’’તિ ઇમસ્સ વિસયં દસ્સેતિ. ભિક્ખુ દુબ્બચજાતિકોતિ એત્થ ‘‘યો’’તિ અજ્ઝાહારો. ‘‘દુબ્બચજાતિકોતિ દુબ્બચસભાવો, વત્તું અસક્કુણેય્યોતિ અત્થો’’તિ (પારા. અટ્ઠ. ૨.૪૨૫-૪૨૬) અટ્ઠકથાય વુત્તદોવચસ્સતાય હેતુભૂતપાપિચ્છતાદીહિ એકૂનવીસતિયા ધમ્મેહિ સમન્નાગતો હુત્વા અત્તનિ વુત્તં અનુસિટ્ઠિં સાદરમગ્ગહણેન નાસનતા દોવચસ્સસભાવોતિ અત્થો. વુત્તઞ્હેતં પદભાજને ‘‘દુબ્બચજાતિકો હોતીતિ દુબ્બચો હોતિ દોવચસ્સકરણેહિ ધમ્મેહિ સમન્નાગતો અક્ખમો અપ્પદક્ખિણગ્ગાહી અનુસાસનિ’’ન્તિ (પારા. ૪૨૬).

અવચનીયમત્તાનં કરોતીતિ ‘‘મા મં આયસ્મન્તો કિઞ્ચિ અવચુત્થ કલ્યાણં વા પાપકં વા, અહમ્પાયસ્મન્તે ન કિઞ્ચિ વક્ખામિ કલ્યાણં વા પાપકં વા, વિરમથાયસ્મન્તો મમ વચનાયા’’તિ (પારા. ૪૨૫) વુત્તનયેન અત્તાનં અવચનીયં કરોતિ. ગરુકં સિયાતિ એત્થ ‘‘તસ્સા’’તિ ઇદં અજ્ઝાહારનયસમ્બન્ધેન લબ્ભતિ. તત્રાયં યોજના – દુબ્બચજાતિકો યો ભિક્ખુ ઉદ્દેસપરિયાપન્ને સિક્ખાપદે અત્તાનં અવચનીયં કરોતિ, તસ્સ ગરુકં સિયાતિ.

કિં વુત્તં હોતિ? યો ભિક્ખુ અત્તનો દોવચસ્સતં પસ્સન્તેહિ, સુણન્તેહિ ચ લજ્જિભિક્ખૂહિ ‘‘મા આયસ્મા અત્તાનં અવચનીયં અકાસિ…પે… અઞ્ઞમઞ્ઞવુટ્ઠાપનેના’’તિ (પારા. ૪૨૫) વુત્તનયેન તિક્ખત્તું વુત્તોપિ દુક્કટં આપજ્જિત્વાપિ ન વિસ્સજ્જેતિ, ‘‘સો ભિક્ખુ સઙ્ઘમજ્ઝમ્પિ આકડ્ઢિત્વા વત્તબ્બો’’તિ (પારા. ૪૨૬) વુત્તત્તા હત્થે ગહેત્વા આકડ્ઢિત્વાપિ સઙ્ઘમજ્ઝં નેત્વા તથેવ તિક્ખત્તું વુત્તે દુક્કટં આપજ્જિત્વાપિ ન વિસ્સજ્જેતિ, તસ્સ દુબ્બચજાતિકસ્સ ઞત્તિચતુત્થાય કમ્મવાચાય કરિયમાને સમનુભાસનકમ્મે તતિયાય કમ્મવાચાય ય્યકારપ્પત્તાય પુબ્બે વુત્તનયેનેવ ઞત્તિયા દુક્કટં, દ્વીહિ કમ્મવાચાહિ થુલ્લચ્ચયે ચ પટિપ્પસ્સમ્ભયમાનો સઙ્ઘાદિસેસો હોતીતિ વુત્તં હોતિ.

૪૩૭. દુબ્બચેતિ એત્થ ‘‘સિક્ખાપદે’’તિ સેસો, તથા સઙ્ઘભેદકવણ્ણનેતિ એત્થાપિ. સઙ્ઘભેદો એવ સઙ્ઘભેદકો, તં વણ્ણેતિ કથેતીતિ સઙ્ઘભેદકવણ્ણનં, કિં તં? સિક્ખાપદં, તઞ્ચ પઠમમેવ સઙ્ઘભેદકસિક્ખાપદં ગહેતબ્બં, તસ્મિં વુત્તનયેનાતિ યોજના. યથાહ અટ્ઠકથાયં ‘‘સમુટ્ઠાનાદીનિ પઠમસઙ્ઘભેદસદિસાનેવા’’તિ (પારા. અટ્ઠ. ૨.૪૨૫-૪૨૬). ‘‘સબ્બો વિનિચ્છયો’’તિ એતેન ઇધ દસ્સિતેન ‘‘ગરુકં સિયા’’તિ એતેન સઙ્ગહિતં સઙ્ઘાદિસેસાવસાનવિનિચ્છયં વજ્જેત્વા ‘‘અકતે પના’’તિઆદિગાથાત્તયેન વુત્તઅનાપત્તિપ્પકારે ચ ‘‘ઇદમેકસમુટ્ઠાન’’ન્તિઆદિગાથાય વુત્તસમુટ્ઠાનાદિકે ચ અતિદિસતિ.

દુબ્બચકથાવણ્ણના.

૪૩૮. યો કુલદૂસકો ભિક્ખુ, સો છન્દગામિતાદીહિ પાપેન્તો ભિક્ખુહિ કમ્મે કરિયમાને તં છન્દગામિતાદીહિ પાપનં અચ્ચજન્તો ગરુકં ફુસે સઙ્ઘાદિસેસં આપજ્જતીતિ યોજના. ‘‘કુલદૂસકોતિ કુલાનિ દૂસેતિ પુપ્ફેન વા ફલેન વા ચુણ્ણેન વા મત્તિકાય વા દન્તકટ્ઠેન વા વેળુયા વા વેજ્જિકાય વા જઙ્ઘપેસનિકેન વા’’તિ (પારા. ૪૩૭) વચનતો સદ્ધાસમ્પન્નકુલાનિ લાભં નિસ્સાય પુપ્ફદાનાદીહિ સઙ્ગણ્હિત્વા તથા અકરોન્તેસુ લજ્જિભિક્ખૂસુ કુલાનં સદ્ધાદૂસનતો કુલદૂસકો, ભિક્ખુ.

છન્દગામિતાદીહિ પાપેન્તોતિ કુલદૂસનકમ્મં કરોન્તં દિસ્વા વા સુત્વા વા અવચનતો આપજ્જિતબ્બદુક્કટતો મુચ્ચનત્થાય ‘‘આયસ્મા ખો…પે… અલન્તે ઇધ વાસેના’’તિ વદન્તે લજ્જી પેસલે ભિક્ખૂ ‘‘છન્દગામિનો ચ ભિક્ખૂ…પે… એકચ્ચં ન પબ્બાજેન્તી’’તિ છન્દગામિતાદીહિ ચતૂહિ અગતિગમનેહિ યોજેન્તોતિ અત્થો. કમ્મે કરિયમાનેતિ યથાવુત્તનયેન અત્તાનં ગરહન્તાનં ભિક્ખૂનં કરિયમાનં અક્કોસનઞ્ચ પરિભાસનઞ્ચ યે પસ્સન્તિ, યે ચ સુણન્તિ, તેહિ ‘‘માયસ્મા એવં અવચ, ન ચ ભિક્ખૂ છન્દગામિનો…પે… અલન્તે ઇધ વાસેના’’તિ તિક્ખત્તું વુચ્ચમાનોપિ દુક્કટં આપજ્જિત્વાપિ અપ્પટિનિસ્સજ્જન્તં હત્થે ગહેત્વા આકડ્ઢિત્વા સઙ્ઘમજ્ઝં આનેત્વા ‘‘માયસ્મા એવં અવચા’’તિઆદિના નયેનેવ પુનપિ તિક્ખત્તું વુત્તે દુક્કટં આપજ્જિત્વાપિ અપ્પટિનિસ્સજ્જન્તસ્સ ઞત્તિચતુત્થાય કમ્મવાચાય સમનુભાસનકમ્મે કરિયમાનેતિ વુત્તં હોતિ. ગરુકં ફુસેતિ ઞત્તિયા દુક્કટં, દ્વીહિ કમ્મવાચાહિ થુલ્લચ્ચયે ચ પટિપ્પસ્સમ્ભેન્તો તતિયકમ્મવાચાય અન્તે ય્યકારે સમ્પત્તે સઙ્ઘાદિસેસં આપજ્જતીતિ વુત્તં હોતિ.

૪૩૯-૪૦. ‘‘કુલાનિ દૂસેતિ પુપ્ફેન વા’’તિઆદિના (પારા. ૪૩૭) નયેન વુત્તકુલદૂસનોપકરણભૂતચુણ્ણપણ્ણાદીસુ વિનિચ્છયં દસ્સેતુમાહ ‘‘ચુણ્ણ’’ન્તિઆદિ. ચુણ્ણન્તિ સિરીસપણ્ણાદિચુણ્ણં. પણ્ણન્તિ તમ્બૂલપણ્ણતાલપણ્ણાદિખાદિતબ્બાખાદિતબ્બપણ્ણં. ફલન્તિ તાલપનસાદિફલં. પુપ્ફન્તિ ચમ્પકાદિપુપ્ફં. વેળુન્તિ અન્દોળિકાપાટં કિરણ્ડાદિકં વેળું. કટ્ઠન્તિ ગેહદારું, ઇન્ધનઞ્ચ. મત્તિકન્તિ પાકતિકં, પઞ્ચવણ્ણં વા મત્તિકં.

અત્તનો સન્તકં, તાવકાલિકાદિવસેન ગહિતં વા ચુણ્ણં…પે… મત્તિકં કુલસઙ્ગહણત્થાય દદતો કુલદૂસનદુક્કટં હોતીતિ સમ્બન્ધો. થેય્યાતિ ચોરિકા. ‘‘દદતો’’તિ ઇદં સામિવચનં ‘‘કાતબ્બો’’તિ પચ્ચત્તવચનન્તં વિસેસિતબ્બમપેક્ખિત્વા ‘‘દદન્તો’’તિ વિભત્તિવિપરિણામેન પચ્ચત્તવચનન્તં અનુવત્તેતબ્બં. કાતબ્બોતિ એત્થ કારેતબ્બોતિ અત્થો. ઇમિના સઙ્ઘસન્તકં, ગણસન્તકં, અઞ્ઞપુગ્ગલસન્તકઞ્ચ ચુણ્ણાદિં કુલસઙ્ગહત્થં ચોરિકાય દેન્તો ભણ્ડગ્ઘેન કારેતબ્બોતિ ઇમં વિનિચ્છયં દસ્સેતિ. સઙ્ઘઞ્ઞસન્તકેતિ સઙ્ઘઞ્ઞસન્તકચુણ્ણાદિકેતિ અત્થો. એત્થ અઞ્ઞ-સદ્દેન ગણપુગ્ગલાનં ગહણં.

૪૪૧. સઙ્ઘિકં ગરુભણ્ડં વાતિ સઙ્ઘસન્તકં ગરુભણ્ડપહોનકં વા પણ્ણાદિકં. સેનાસનનિયામિતન્તિ ‘‘એત્તકા ફલરુક્ખાદયો સેનાસને નવકમ્મત્થાયા’’તિ એવં નિયમિતં વા. ઇસ્સરવતાયે વાતિ એવકારેન ‘‘થેય્યા’’તિ ઇદં નિવત્તિતં.

૪૪૨. હરિત્વા વાતિ અત્તનાયેવ હરિત્વા વા. ‘‘પુપ્ફં દેન્તસ્સા’’તિ ઇમિના સમ્બન્ધો. એસ નયો ઉપરિપિ. હરાપેત્વા વાતિ અઞ્ઞસ્સ હત્થે પેસેત્વા વા. પક્કોસિત્વા વાતિ આમન્તેત્વા વા પક્કોસાપેત્વા વાતિ ઉપલક્ખણતો લબ્ભતિ. આગતસ્સ વાતિ અત્તના એવ આગતસ્સ વા. ‘‘કુલસઙ્ગહણત્થાયા’’તિ વચનેન ‘‘એવરૂપે અધિપ્પાયે અસતિ વટ્ટતી’’તિ વુત્તત્તા ‘‘ચેતિયં પૂજં કરોન્તાપિ ‘પૂજેસ્સામા’તિ પુપ્ફાનિ ગહેત્વા ગચ્છન્તાપિ તત્થ તત્થ સમ્પત્તાનં ચેતિયપૂજનત્થાય દેન્તિ, એતમ્પિ પુપ્ફદાનં નામ ન હોતી’’તિઆદિકં (પારા. અટ્ઠ. ૨.૪૩૬-૪૩૭) અટ્ઠકથાગતં સબ્બં વિનિચ્છયં દસ્સિતં હોતિ.

૪૪૩. એવં ઉસ્સગ્ગં દસ્સેત્વા અપવાદં દસ્સેતુમાહ ‘‘હરિત્વા વા’’તિઆદિ. ‘‘હરાપેત્વા’’તિ ઇમિના યોજેતબ્બસ્સ વા-સદ્દસ્સ અવુત્તસમ્પિણ્ડનત્થતાય ‘‘પક્કોસિત્વા વા પક્કોસાપેત્વા વા, આગતાનં વા’’તિ ચ સઙ્ગય્હતિ. આગતસ્સેવાતિ એવકારેન હરિત્વા દાનાદિં નિવત્તેતિ.

૪૪૪. તઞ્ચાતિ માતાપિતુઆદીનં તં પુપ્ફદાનઞ્ચ. વત્થુપૂજત્થન્તિ રતનત્તયપૂજનત્થં. ન પનઞ્ઞથાતિ અઞ્ઞેન પકારેન દાતું ન વટ્ટતિ. યેન પકારેન દાતું ન વટ્ટતિ, કોયં પકારોતિ આહ ‘‘સિવાદી’’તિઆદિ. સિવાદિપૂજનત્થન્તિ મહિસ્સરાદિદેવતાપૂજનત્થઞ્ચ. મણ્ડનત્થન્તિ પિળન્ધનત્થં. એવં અદાતબ્બપ્પકારનિયમનેન ‘‘ઇમં વિક્કિણિત્વા જીવિકં કપ્પેસ્સન્તી’’તિ માતાપિતુઆદીનં દાતું વટ્ટતીતિ વદન્તિ.

૪૪૫. ‘‘ફલાદીસુ …પે… વિનિચ્છયો’’તિ ઇમિના ‘‘હરિત્વા વા હરાપેત્વા વા’’તિઆદિના પુબ્બે વુત્તવિનિચ્છયો ફલપણ્ણાદીસુ સબ્બત્થ સમાનોતિ દસ્સેતિ.

૪૪૬. ‘‘પુપ્ફાદિભાજને’’તિ પુપ્ફફલાદીનં ભાજનકાલે. સમ્મતેનાતિ પુપ્ફાદિભાજનત્થં ખન્ધકે વુત્તનયેન સઙ્ઘેન સમ્મતેન ભિક્ખુના. અસ્સાતિ ભાજનટ્ઠાનં આગતસ્સ. ઇતરેનાતિ સઙ્ઘસમ્મુતિં વિના પુપ્ફાદીનિ ભાજાપેન્તેન. ઞાપેત્વા દાતબ્બન્તિ સબ્બં સઙ્ઘં જાનાપેત્વા દાતબ્બં.

૪૪૭. ઉપડ્ઢભાવન્તિ એકેન ભિક્ખુના લદ્ધબ્બભાગતો ઉપડ્ઢં. ‘‘થોકં થોક’’ન્તિ ઇમિના ઉપડ્ઢતોપિ અપ્પતરં ગહિતં.

૪૪૮. પરિબ્બયવિહીનસ્સાતિ તણ્ડુલાદિજીવિતવુત્તિવયમૂલરહિતસ્સ. સમ્પત્તિસ્સરિયસ્સાપીતિ અત્તનો સમીપમુપગતસ્સ ઇસ્સરસ્સ ચ. ‘‘દાતબ્બં તુ સકં ફલ’’ન્તિ ઇમિના સમ્બન્ધો. ‘‘પરિબ્બયવિહીનાનં, દાતું સપરસન્તક’’ન્તિ ખુદ્દસિક્ખાય આગતં, ઇધ ‘‘સકં ફલ’’ન્તિ વુત્તં. તત્થ પરવચનેન વિસ્સાસિકાનં ગહણં, ઇધ પન વિસ્સાસગ્ગાહેન ગહેત્વા દીયમાનમ્પિ સસન્તકમેવાતિ ‘‘સક’’ન્તિ વુત્તન્તિ ગહેતબ્બં.

૪૪૯-૫૦. યત્ર સઙ્ઘારામે સઙ્ઘેન ફલરુક્ખપરિચ્છેદં કત્વા કતિકા કતાતિ યોજના, ‘‘આગન્તુકાનં એત્તકં ફલં દાતબ્બ’’ન્તિ ફલપરિચ્છેદં કત્વા વા ‘‘એત્તકેસુ રુક્ખેસુ ફલં દાતબ્બ’’ન્તિ રુક્ખપરિચ્છેદં કત્વા વા સઙ્ઘેન કતિકા યેન પકારેન કતાતિ અત્થો. તત્રાગતસ્સપીતિ એવં ઠપિતકતિકવત્તં તં સઙ્ઘારામં ફલત્થાય આગતસ્સાપિ.

યથાપરિચ્છેદન્તિ સઙ્ઘેન તથાકતફલરુક્ખપરિચ્છેદમનતિક્કમ્મ. દદતોતિ ઓચિનિત્વા ઠપિતફલં, કપ્પિયકારકેહિ ઓચિનાપેત્વા વા દેન્તસ્સ. ઓચિતફલે ચ કપ્પિયકારકે ચ અસતિ ફલત્થાય આગતેસુ વત્તિતબ્બવિધિં દસ્સેતુમાહ ‘‘દસ્સેતબ્બાપિ વા’’તિઆદિ. ‘‘વત્વા’’તિ સેસો. ચ-કારં અપિ-સદ્દેન એકતો કત્વા ‘‘અપિચા’’તિ યોજના. એવં વત્વા સઙ્ઘેન પરિચ્છિન્નરુક્ખા દસ્સેતબ્બાતિ ઇમિના ‘‘ઇધ ફલાનિ સુન્દરાનિ, ઇતો ગણ્હથા’તિ એવં પન ન વત્તબ્બ’’ન્તિ (પારા. અટ્ઠ. ૨.૪૩૬-૪૩૭) અટ્ઠકથા બ્યતિરેકતો દસ્સિતા હોતિ.

૪૫૧. ‘‘ખણિત્વા’’તિ એતેન ‘‘ખણાપેત્વા’’તિ ઇદમ્પિ સઙ્ગહિતં, ‘‘કપ્પિયભૂમિ’’ન્તિ વક્ખમાનત્તા પથવિન્તિ એત્થ ‘‘અકપ્પિય’’ન્તિ લબ્ભતિ. તેનેવાહ ‘‘પાચિત્તિયેના’’તિ. ‘‘માલાગચ્છ’’ન્તિ ઇમિના પુપ્ફૂપગે તરુણગચ્છે ચ મલ્લિકાસુમનાદિગુમ્બગાગચ્છે ચ સઙ્ગણ્હાતિ. યથાહ અટ્ઠકથાય ‘‘તરુણકા હિ પુપ્ફરુક્ખાપિ પુપ્ફગચ્છાપિ ‘માલાવચ્છા’ત્વેવ વુચ્ચન્તી’’તિ (પારા. અટ્ઠ. ૨.૪૩૧). આદિ-સદ્દેન ફલૂપગરુક્ખે ચ ભેસજ્જરસે ઓસધગચ્છે ચ સઙ્ગણ્હાતિ. ‘‘રોપાપને’’તિ વક્ખમાનત્તા ‘‘સય’’ન્તિ ઇદં ‘‘રોપને’’તિ ઇમિના યુજ્જતિ.

‘‘સયં ખણિત્વા’’તિ કસ્મા ન યુજ્જતીતિ? ‘‘ખણાપેત્વા’’તિ વક્ખમાનસ્સ અભાવા ચ ‘‘યો પન ભિક્ખુ પથવિં ખણેય્ય વા ખણાપેય્ય વા, પાચિત્તિય’’ન્તિ (પાચિ. ૮૫) વચનતો ખણાપને પાચિત્તિયેન ભવિતબ્બત્તા ચ ‘‘ખણિત્વા’’તિ ઇમિના ચ ખણનખણાપનાનં દ્વિન્નમેવ ગહેતબ્બત્તા ન યુજ્જતિ. કુલદૂસનેતિ કુલદૂસનનિમિત્તં. અકપ્પિયપથવિં ખણિત્વા, ખણાપેત્વા ચ સયં માલાગચ્છાદિરોપને કતે અસ્સ માલાગચ્છાદિરોપકસ્સ ભિક્ખુનો અકપ્પિયપથવીખણનપચ્ચયેન પાચિત્તિયેન સદ્ધિં કુલદૂસને કુલદૂસનનિમિત્તં દુક્કટં હોતીતિ યોજના.

૪૫૨. ‘‘તથા’’તિ ઇમિના ‘‘સયં રોપને’’તિ ઇદં વિના અવસેસપ્પકારં સઙ્ગણ્હાતિ. ‘‘અકપ્પિયેન વાક્યેના’’તિ ઇદં ‘‘અકપ્પિયપથવિં ખણાપેત્વા’’તિ ઇમિના ચ ‘‘રોપાપને’’તિ ઇમિના ચ યુજ્જતિ. ‘‘ઇમં ભૂમિં ખણ, ઇમં ગચ્છં રોપેહી’’તિઆદિકં અકપ્પિયં વોહારં વત્વા અકપ્પિયપથવિં ખણાપેત્વા માલાગચ્છાદિરોપનં કારાપેન્તસ્સાપિ તથેવ પાચિત્તિયઞ્ચ દુક્કટઞ્ચ હોતીતિ અત્થો.

ખણનરોપનેહિ દ્વીહિ પાચિત્તિયદુક્કટાનિ અવસિટ્ઠેહિ તદત્થિકેહિ સબ્બવોહારપયોગભેદેહિ કિં હોતીતિ આહ ‘‘સબ્બત્થા’’તિઆદિ. કુલદૂસનેતિ નિમિત્તે, વિસયે વા ભુમ્મં. અકપ્પિયેન વાક્યેન પન પથવિં ખણાપેત્વા અકપ્પિયેન વાક્યેન રોપાપનેપિ તથા પાચિત્તિયેન સહ કુલદૂસને ભિક્ખુનો દુક્કટં વુત્તં. સબ્બત્થ ઇતો પરેસુપિ તદત્થિકેન સબ્બવોહારબ્યાપારેસુ કુલદૂસનનિમિત્તં ભિક્ખુનો દુક્કટં વુત્તન્તિ યોજના.

૪૫૩. કપ્પિયભૂમિયા અત્તના ખણને, અકપ્પિયવોહારેન ખણાપને ચ પાચિત્તિયાભાવતો દુક્કટંયેવ વુત્તન્તિ આહ ‘‘ઉભયત્થ ચા’’તિઆદિ. એત્થ ‘‘એવ’’ન્તિ સેસો, સો યથાવુત્તમત્થં નિગમેતિ. એવં યથાવુત્તનયેન કપ્પિયભૂમિયમ્પિ માલાગચ્છાદિરોપનરોપાપનસઙ્ખાતેસુ દ્વીસુ ઠાનેસુ ચ ભિક્ખુનો દુક્કટં વુત્તન્તિ યોજના.

૪૫૪. સદુક્કટા પાચિત્તીતિ ‘‘આવાટં ખણ, ગચ્છં રોપેહી’’તિ એકવારં આણત્તે બહૂ આવાટે ખણિત્વા બહૂસુ ગચ્છેસુ રોપિતેસુપિ આણત્તિયા એકત્તા દુક્કટેન સહ પાચિત્તિયં હોતીતિ અયમત્થો અકપ્પિયભૂમિં સન્ધાય વુત્તો. ‘‘સુદ્ધં વા દુક્કટ’’ન્તિ ઇદં અકપ્પિયભૂમિયં કપ્પિયેન વોહારેન આવાટં ખણાપકસ્સ ચ કપ્પિયભૂમિયં અકપ્પિયવોહારેન આવાટં ખણાપકસ્સ ચ ‘‘ઇમં ગચ્છં રોપેહી’’તિ એકવારાણત્તપચ્ચયા આપજ્જિતબ્બં કુલદૂસનદુક્કટં સન્ધાય વુત્તં.

૪૫૫. કપ્પિયેનેવ વાક્યેનાતિ એત્થ કપ્પિયવાક્યં નામ ‘‘એત્થ આવાટં જાન, એત્થ આવાટં જાનિતબ્બં, એત્થ આવાટેન ભવિતબ્બ’’ન્તિ એવરૂપં વાક્યઞ્ચ ‘‘ઇમં ગચ્છં એત્થ જાન, અયં ગચ્છો એત્થ જાનિતબ્બો’’તિઆદિવાક્યઞ્ચ. એવકારેન અકપ્પિયવોહારઞ્ચ કપ્પિયાકપ્પિયમિસ્સકવોહારઞ્ચ નિવત્તેતિ. પરિયાયોભાસનિમિત્તકમ્મં પન ‘‘ઇતરત્તયં વટ્ટતી’’તિ (પારા. અટ્ઠ. ૨.૪૩૧) અટ્ઠકથાવચનતો વટ્ટતિ. ઉભયત્થ ચ ભૂમિયાતિ કપ્પિયાકપ્પિયભૂમીસુ દ્વીસુ. રોપનેતિ એત્થ સમ્બન્ધતો, પકરણતો ચ ‘‘માલાગચ્છાદીન’’ન્તિ લબ્ભતિ.

‘‘વાક્યેના’’તિ વુત્તત્તા ‘‘રોપાપને’’તિ વત્તબ્બો, ‘‘રોપને’’તિ કિમત્થમાહાતિ ચે? સુદ્ધકત્તુનિદ્દેસેન પયોજકસ્સાપિ સઙ્ગહેતબ્બતો ગાથાબન્ધવસેન વુત્તં. ઇમિના ઉપરિગાથાય ‘‘સયં રોપેતુ’’ન્તિ એત્થ ‘‘સય’’ન્તિ ઇમિના વિસેસેત્વા ‘‘રોપાપેતુ’’ન્તિ ઇદં નિવત્તેતિ. ‘‘પરિભોગત્થાય હિ કપ્પિયભૂમિયં વા અકપ્પિયભૂમિયં વા કપ્પિયવોહારેન રોપાપને અનાપત્તી’’તિ (પારા. અટ્ઠ. ૨.૪૩૧) અટ્ઠકથાવિનિચ્છયો ઇમાય ગાથાય સઙ્ગહિતોતિ વેદિતબ્બો. કોચિ દોસોતિ પાચિત્તિયઞ્ચ દુક્કટઞ્ચાતિ વુત્તદોસેસુ એકોપિ દોસો ન વિજ્જતીતિ અત્થો.

૪૫૬-૭. ‘‘સયં રોપેતુ’’ન્તિ ઇદં ‘‘આરામાદીનમત્થાયા’’તિ ઇમિના સમ્બન્ધિતબ્બં.

આદિ-સદ્દેન વનાદિં સઙ્ગણ્હાતિ. સયં રોપિતસ્સ વાતિ એત્થ વા-સદ્દેન ‘‘રોપાપિતસ્સા’’તિ ઇદં સઙ્ગણ્હાતિ, એતસ્સ વિસેસનત્થં ‘‘કપ્પિયેન વોહારેના’’તિ પાઠસેસો. અયં પન વિનિચ્છયો ‘‘આરામત્થાય પન વનત્થાય ચ છાયત્થાય ચ અકપ્પિયવોહારમત્તમેવ ન વટ્ટતિ, સેસં વટ્ટતી’’તિ (પારા. અટ્ઠ. ૨.૪૩૧) અટ્ઠકથાગતનયેન વેદિતબ્બો. અન્તો આરામભૂસનત્થાય, બહિ અરઞ્ઞત્થાય વિય છાયત્થાય સુદ્ધચિત્તેન ‘‘ઇમં જાના’’તિઆદિકપ્પિયવોહારેન રોપાપિતરુક્ખે ચ કપ્પિયભૂમિયઞ્ચ અત્તના કતે વા અકપ્પિયવોહારેન કારાપિતે વા અકપ્પિયભૂમિયઞ્ચ કપ્પિયવોહારેન અત્તના કારાપિતે વા અઞ્ઞેહિ કતે વા આવાટે અત્તના રોપિતે રુક્ખે ચ ફલં પરિભુઞ્જિતું ઇચ્છતિ ચે, પરિભુઞ્જિતું વટ્ટતીતિ અત્થો.

આરામાદીનમત્થાય કપ્પિયભૂમિયં સયં રોપિતસ્સ વા કપ્પિયભૂમિયં વા અકપ્પિયભૂમિયં વા કપ્પિયવોહારેન રોપાપિતસ્સ વા રુક્ખસ્સ યઞ્ચ ફલં, તં ફલં પરિભુઞ્જિતું ભિક્ખૂનં વટ્ટતીતિ યોજના. કત્થચિ પોત્થકેસુ ‘‘આરામાદીનમત્થાયા’’તિ ગાથાય લિખિતટ્ઠાને ‘‘કુલસઙ્ગહણત્થાયા’’તિઆદિગાથા દિસ્સતિ. સા પાળિક્કમવિરુદ્ધત્તા અટ્ઠાનપ્પયુત્તા, ‘‘પુપ્ફાન’’ન્તિઆદિગાથાય પુરતો વુચ્ચમાના પન ઠાનપ્પયુત્તા હોતિ.

૪૫૮. સબ્બત્થાતિ આરામાદિઅત્થાય પુબ્બે વિય અત્તના રોપિતેસુ, રોપાપિતેસુ ચ સબ્બેસુ માલાગચ્છાદીસુ. અકપ્પિયોદકેનેવ પાચિત્તીતિ ‘‘યો પન ભિક્ખુ જાનં સપ્પાણકં ઉદકં તિણં વા મત્તિકં વા સિઞ્ચેય્ય વા સિઞ્ચાપેય્ય વા, પાચિત્તિય’’ન્તિ (પાચિ. ૧૪૦) વુત્તા પાચિત્તિ એવ, ન દુક્કટન્તિ અત્થો.

૪૫૯. ઇદાનિ દુક્કટેન સદ્ધિં પાચિત્તિયવિસયં દસ્સેતિ ‘‘કુલ…પે… દુક્કટ’’ન્તિ. સિઞ્ચતોતિ કપ્પિયોદકેનેવ સિઞ્ચતો, સિઞ્ચાપયતો ચ.

૪૬૦. તેસંયેવ દ્વિન્નં પન અત્થાયાતિ કુલદૂસનપરિભોગાનં દ્વિન્નમત્થાય. સિઞ્ચને સિઞ્ચાપનેતિ એત્થ ‘‘માલાગચ્છાદીન’’ન્તિ પકરણતો લબ્ભતિ. દુક્કટન્તિ એત્થ ‘‘કેવલ’’ન્તિ સેસો.

૪૬૧. ઓચિનાપનેતિ અઞ્ઞેહિ પુપ્ફાનં ઓચિનાપને. સયમોચિનને ચાપીતિ અત્તનાવ ઓચિનને ચ. સપાચિત્તિયદુક્કટન્તિ ‘‘ભૂતગામપાતબ્યતાય પાચિત્તિય’’ન્તિ (પાચિ. ૯૦) વુત્તત્તા પુપ્ફોચિનનહેતુ પાચિત્તિયઞ્ચ કુલદૂસનદુક્કટઞ્ચ હોતીતિ વુત્તં હોતિ.

૪૬૨. પૂજાદિઅત્થાય, કુલસઙ્ગહત્થાય ચ પુપ્ફાનં ઓચિનનઓચિનાપનાનિ કારાપેન્તસ્સ આપત્તિયા આપજ્જનપ્પકારં દસ્સેતુમાહ ‘‘પુપ્ફાન’’ન્તિ. ‘‘પુપ્ફાનં ગણનાય પાચિત્તિયં હોતી’’તિ વુત્તત્તા પુપ્ફમોચિનતોતિ એત્થ ‘‘વિસું વિસુ’’ન્તિ સેસો. એકેકપુપ્ફં ઓચિનન્તસ્સ પુપ્ફગણનાય પાચિત્તિયં હોતીતિ અત્થો. ‘‘એકેન પયોગેન બહૂનિ પુપ્ફાનિ ઓચિનન્તસ્સ પન પયોગગણનાય હોતી’’તિ અટ્ઠકથાયં વુત્તં ઇધ બ્યતિરેકતો લબ્ભતિ. ‘‘ઓચિનતો’’તિ ઇમિના ‘‘ઓચિનાપયતો’’તિ ઇદઞ્ચ કિરિયાસામઞ્ઞે વિસેસસ્સ અન્તોગધભાવતો વા ઉપલક્ખણતો વા દસ્સિતન્તિ.

તત્થ ચ પુપ્ફાનિ વિસું વિસું વત્વા ઓચિનાપેન્તસ્સ પુપ્ફાનં ગણનાય હોતીતિ ઇદમેવ આપજ્જતિ. એકવારમાણત્તેન બહૂનિ પુપ્ફાનિ બહૂસુ ચ વારેસુ ઓચિતેસુ આણત્તિગણનાય હોતીતિ વિનિચ્છયો દટ્ઠબ્બો. ઇદં સબ્બપ્પકારં અનન્તરવુત્તગાથાય દસ્સિતવિધિમ્હિ ચ દટ્ઠબ્બન્તિ ઞાપેતુમાહ ‘‘કુલત્થં ચે સદુક્કટા’’તિ. કુલત્થન્તિ કુલસઙ્ગહત્થં. ‘‘સદુક્કટા’’તિ વુત્તત્તા પાચિત્તિયઞ્ચ દુક્કટઞ્ચ પુપ્ફગણનાય હોતીતિ સિદ્ધં. યથાહ અટ્ઠકથાયં ‘‘પુપ્ફગણનાય દુક્કટપાચિત્તિયાની’’તિ (પારા. અટ્ઠ. ૨.૪૩૧).

૪૬૩. ગન્થનં ગન્થો, તેન નિબ્બત્તં ગન્થિમં. એસ નયો સબ્બત્થ. ગન્થિમાદિસરૂપં સયમેવ વક્ખતિ. સઙ્ગહણં સઙ્ગહો, પુપ્ફાનં સઙ્ગહોતિ વિગ્ગહો.

૪૬૪. ઇમાનિ ગન્થિમાદીનિ સરૂપતો દસ્સેતુમાહ ‘‘તત્થ દણ્ડેન દણ્ડં વા’’તિઆદિ. તત્થ તત્થાતિ તેસુ છસુ પુપ્ફસઙ્ગહેસુ. ‘‘દણ્ડેન દણ્ડં વા’’તિ ઇદં સદણ્ડઉપ્પલાદિકુસુમં સન્ધાયાહ. ‘‘વણ્ટેનપિ ચ વણ્ટક’’ન્તિ ઇદં સવણ્ટકરત્તકુસુમાદિં સન્ધાયાહ. કરણં સબ્બન્તિ કતં સબ્બં. ઇધ સબ્બત્થ કપ્પિયવિધિવિભાગં ‘‘સબ્બમેત’’મિચ્ચાદિગાથાયં વક્ખતિ.

૪૬૫. સુત્તાદીહિ ગોપ્ફેત્વાતિ એત્થ ‘‘વસ્સિકપુપ્ફાદીની’’તિ સેસો. સુત્તેન વા કદલિવાકાદીહિ વા વસ્સિકાદિપુપ્ફે ગન્થિત્વા કતપુપ્ફવિકારો ગોપ્ફિમં નામ. એકતો વણ્ટાનિ યસ્સાતિ વિગ્ગહો. ઉભતોવણ્ટિકાતિ એત્થાપિ એસેવ નયો. અપ્પત્થે વા સકત્થે વા ક-કારો દટ્ઠબ્બો. ઇત્થિલિઙ્ગવિસયે ક-કારતો પુબ્બાકારસ્સ ઇ-કારાદેસો.

સબ્બપુપ્ફાનં વણ્ટાનિ એકદિસાય કત્વા ગન્થિતપુપ્ફાવલિ એકતોવણ્ટિકા નામ, વણ્ટાનિ ઉભયદિસાય કત્વા ગન્થિતપુપ્ફાવલિ ઉભતોવણ્ટિકા નામાતિ તં ગોપ્ફિમં એવં દુવિધં હોતીતિ અત્થો. ‘‘વાકં વા વલ્લિં વા રજ્જું વા દિગુણં કત્વા તત્થ નીપકદમ્બાદિવણ્ટરહિતાનિ પુપ્ફાનિ વેઠેત્વા ગહણં ગોપ્ફિમં નામા’’તિ (પારા. અટ્ઠ. ૨.૪૩૧ અત્થતો સમાનં) અટ્ઠકથાય વુત્તં.

૪૬૬. બુન્દેસૂતિ મૂલેસુ. મકુલાદિકન્તિ એત્થ આદિ-સદ્દેન વણ્ટરહિતમધુકાદિપુપ્ફઞ્ચ વણ્ટસહિતમલ્લિકાદિપુપ્ફઞ્ચ સઙ્ગહિતં. સૂચિઆદીહીતિ એત્થ આદિ-સદ્દેન તાલહીરાદિં સઙ્ગણ્હાતિ. માલાવિકતીતિ પુપ્ફમાલાવિકતિ. સૂચિઆદીહિ મકુલાદિકં પુપ્ફં બુન્દેસુ વિજ્ઝિત્વા આવુતા માલાવિકતિ વેધિમં નામાતિ વુચ્ચતીતિ યોજના.

૪૬૭. ‘‘વેઠિમં નામ પુપ્ફદામપુપ્ફહત્થકેસુ દટ્ઠબ્બ’’ન્તિ (પારા. અટ્ઠ. ૨.૪૩૧) અટ્ઠકથાય દસ્સિતપ્પકારેસુ પઠમપ્પકારં દસ્સેતિ ‘‘વેઠેત્વા કતં માલાગુણેહિ વા’’તિ. ધમ્મદેસનાય વા પટિમાય વા ધાતુયા વા પૂજં કત્તુકામા મુદ્ધનિ ઉજુકં કત્વા માલાદામકલાપં ઓલમ્બિત્વા અગ્ગે ઘટિકાકારદસ્સનત્થં માલાવલિયો અનેકક્ખત્તું પરિક્ખિપન્તા વેઠેન્તિ, ઇદં એવરૂપં માલાગુણકરણમ્પિ વેઠિમં નામાતિ વુત્તં હોતિ.

અઞ્ઞપ્પકારં દસ્સેતિ ‘‘વાકાદીહિ ચ બદ્ધં વા’’તિ, ‘‘બન્ધિત્વા’’તિપિ પાઠો, ‘‘કત’’ન્તિ ઇમિના સમ્બન્ધો. એકચ્ચે ઉપ્પલાદિદીઘદણ્ડકુસુમાનિ અટ્ઠ વા નવ વા દસ વા કલાપં કત્વા તેસમેવ દણ્ડાનં વાકેહિ વા અઞ્ઞેન યેન કેનચિ દણ્ડકગ્ગે ઠપેત્વા વા વિસું વા બન્ધિત્વા ઉપ્પલહત્થાદિં કરોન્તિ, તઞ્ચ વેઠિમં નામાતિ વુત્તં હોતિ. એતં દ્વયમ્પિ ન વટ્ટતિ.

કપ્પિયકારકેહિ ઓચિનિત્વા ઠપિતપુપ્ફાનિ સાટકે પક્ખિપિત્વા ભણ્ડિકં કત્વા બન્ધિતું ન વટ્ટતિ. તેસુયેવ પુપ્ફેસુ અચ્છિન્નેન દણ્ડેન વા તસ્મિંયેવ દણ્ડે અચ્છિન્નવાકેન વા કલાપં કત્વા બન્ધિતું, અંસભણ્ડિકાય પક્ખિપિત્વા ગહેતુઞ્ચ વટ્ટતિ. યથાહ અટ્ઠકથાયં ‘‘તેસંયેવ પન વાકેન વા દણ્ડેન બન્ધિતું અંસભણ્ડિકં વા કાતું વટ્ટતી’’તિ. ‘‘વાકેન વા દણ્ડેન વા’તિ ચ ઇદં અચ્છિન્દિત્વા પરિક્ખિપિત્વા બન્ધનં સન્ધાય વદન્તી’’તિ સીહળગણ્ઠિપદે વુત્તં. પદુમાદિપુપ્ફાનિ પદુમાદિપણ્ણેસુ નાળેહિ પવેસેત્વા નાળેહિ બહિ કત્વા પણ્ણેન પુપ્ફાનિ પટિચ્છાદેત્વા પણ્ણગ્ગે બન્ધિતું વટ્ટતિ. ‘‘દણ્ડે પન બન્ધિતું ન વટ્ટતી’’તિ (પારા. અટ્ઠ. ૨.૪૩૧) ચ અટ્ઠકથાયમેવ વુત્તં.

૪૬૮. પુપ્ફમાલાહિ પૂરણેતિ પુપ્ફાવલીહિ પૂરણે. ઇદં કત્થ લબ્ભતીતિ આહ ‘‘બોધિ’’ન્તિઆદિ. પુપ્ફપટં નામ માલાવલિયો તન્તં વિય પસારેત્વા વત્થં વાયન્તેહિ વિય તિરિયઞ્ચ માલાવલીહિ વાયિતપટં વુચ્ચતિ. ઇદં પુપ્ફપટં માલાવલીહિ દીઘસો પૂરણં સન્ધાય પુરિમે ગહિતં, તિરિયતો વાયનં સન્ધાય વક્ખમાને વાયિમેપિ ગહિતન્તિ પુનરુત્તાભાવો વેદિતબ્બો. પટાદીનન્તિ આદિ-સદ્દેન ચેતિયધાતુકરણ્ડકવેદિકાદીનં ગહણં.

પરિક્ખેપેસુ લબ્ભતીતિ બોધિક્ખન્ધાદીનં પુનપ્પુનં પરિક્ખિપનેસુ લબ્ભતિ. બોધિક્ખન્ધાદયો પુપ્ફાવલીહિ પરિક્ખિપન્તેહિ પઠમવદ્ધટ્ઠાને પુપ્ફાવલિયા અનતિક્કામિતે પુરિમં નામ ઠાનં યાવ પાપુણાતિ, તાવ અઞ્ઞેન ગહેત્વા પરિક્ખિપન્તેન આહરિત્વા પુનપિ તસ્મિં ઠાને પત્તે અઞ્ઞસ્સ દાનવસેન બોધિક્ખન્ધં, ચેતિયં, ધાતુકરણ્ડકં વા પુપ્ફકઞ્ચુકેન છાદેતું વટ્ટતીતિ અટ્ઠકથાય વુત્તં. સચેપિ દ્વેયેવ ભિક્ખૂ ઉભોસુ પસ્સેસુ ઠત્વા પરિયાયેન હરન્તિ, વટ્ટતિયેવાતિ વદન્તિ. પુપ્ફપટવાયનત્થં પસારિયમાનપુપ્ફાવલીસુ ચ એસેવ વિનિચ્છયો.

દીઘપુપ્ફાવલિં નાગદન્તેસુ પક્ખિપિત્વા પુન પક્ખિપિતું ન વટ્ટતિ. ‘‘નાગદન્તેસુ પન પુપ્ફવલયં પવેસેતું વટ્ટતી’’તિ વુત્તત્તા અઞ્ઞેહિ વલયં કત્વા દિન્નપુપ્ફાવલિવલયં ધાતુકરણ્ડથુપિકાય પવેસેતું વટ્ટતિ. ‘‘માલાગુણેહિ પન બહૂહિપિ કતં પુપ્ફદામં લભિત્વા આસનમત્થકાદીસુ બન્ધિતું વટ્ટતી’’તિ વુત્તત્તા પુપ્ફદામપુપ્ફાવલીનં પુપ્ફરહિતાય સુત્તકોટિયા રજ્જુદણ્ડાદીસુ બન્ધિતું વટ્ટતિ.

૪૬૯. પુપ્ફરૂપં નામ ‘‘ગોપ્ફિમપુપ્ફેહેવ હત્થિઅસ્સાદિરૂપકાનિ કરોન્તિ, તાનિપિ વાયિમટ્ઠાને તિટ્ઠન્તી’’તિ (પારા. અટ્ઠ. ૨.૪૩૧) વુત્તત્તા તંતંરૂપસણ્ઠાનં કત્વા પુપ્ફાવલિયો નિવેસેત્વા કરિયમાનં હત્થિઅસ્સાદિરૂપં. ઇમસ્મિં અટ્ઠકથાપાઠે ‘‘તાનિપિ વાયિમટ્ઠાને તિટ્ઠન્તી’’તિ વુત્તત્તા ચ ‘‘અઞ્ઞેહિ કતપરિચ્છેદે પન પુપ્ફાનિ ઠપેન્તેન હત્થિઅસ્સાદિરૂપકમ્પિ કાતું વટ્ટતી’’તિ (પારા. અટ્ઠ. ૨.૪૩૧) અટ્ઠકથાપાઠસ્સ સારત્થદીપનિયં ‘‘પુપ્ફાનિ ઠપેન્તેનાતિ અગન્થિતાનિ પાકતિકપુપ્ફાનિ ઠપેન્તેન. પુપ્ફદામં પન પૂજનત્થાય ભૂમિયં ઠપેન્તેન ફુસાપેત્વા વા અફુસાપેત્વા વા દિગુણં કત્વા ઠપેતું ન વટ્ટતી’’તિ (સારત્થ. ટી. ૨.૪૩૧) વુત્તત્તા ચ ઇમં હત્થિઆદિરૂપં પૂરેન્તેન માલાવલિં અઞ્ઞેહિ કતપરિચ્છેદે સમ્બન્ધિત્વા પાસાણઆસનમઞ્ચપીઠહત્થિરૂપાદિમત્થકે ઠપેત્વા પૂજનપ્પકારો વાયિમન્તિ વિઞ્ઞાયતિ.

પુપ્ફપટન્તિ પુબ્બે વુત્તપ્પકારં પુપ્ફપટં પૂરેન્તેન એકાપિ પુપ્ફાવલિ પરિવત્તેત્વા ન ઠપેતબ્બા, વાયન્તેન અઞ્ઞેહિ પૂરિતેપિ એકાપિ પુપ્ફાવલિ ન પાતેતબ્બા, ઇદં પૂરિમવાયિમાનં નાનાકરણં. આદિગ્ગહણેન પુપ્ફજાલં સઙ્ગણ્હાતિ, તં કરોન્તસ્સ જાલચ્છિદ્દગણનાય દુક્કટં હોતિ. ‘‘ભિત્તિચ્છત્તબોધિત્થમ્ભાદીસુપિ એસેવ નયો’’તિ વુત્તત્તા છત્તાદીસુ ચ પુપ્ફજાલં ન દાતબ્બં.

૪૭૦. ઇમસ્સ સિક્ખાપદસ્સ સાધારણત્તા ‘‘ભિક્ખૂનં ભિક્ખુનીનઞ્ચા’’તિ આહ. બુદ્ધસ્સપીતિ એત્થ પિ-સદ્દો સમ્ભાવને, ‘‘પૂજત્થ’’ન્તિ વત્તબ્બં, બુદ્ધસ્સ પૂજત્થાયપિ કાતું વા કારાપેતું વા ન વટ્ટતીતિ અત્થો. ધમ્મસઙ્ઘરતનાનિપિ ઉપલક્ખણતો સઙ્ગય્હન્તિ. સેસે કિમેવ વત્તબ્બન્તિ બ્યતિરેકત્થો.

૪૭૧. ‘‘તથા’’તિ ઇમિના ‘‘સયં પરેહિ વા કારાપેતું ભિક્ખૂનઞ્ચ ભિક્ખુનીનઞ્ચ બુદ્ધસ્સપી’’તિ અનન્તરગાથાય વુત્તમતિદિસતિ. કલમ્બકન્તિ દ્વિન્નં ધનુકાનમન્તરે ઓલમ્બકદામં. યથાહ અટ્ઠકથાયં ‘‘કલમ્બકોતિ અડ્ઢચન્દનાગદન્તન્તરે ઘટિકાદામઓલમ્બકો વુત્તો’’તિ (પારા. અટ્ઠ. ૨.૪૩૧). એત્થ ચ ઘટિકાદામઓલમ્બકો નામ અન્તે ઘટિકાકારયુત્તો યમકદામઓલમ્બકો. કાતુન્તિ બન્ધિતું ન વટ્ટતીતિ યોજના. એકેકપુપ્ફદામં પન નિક્ખન્તસુત્તકોટિયા પબન્ધિત્વા ઓલમ્બિતું વટ્ટતિ. પુપ્ફદામદ્વયં સઙ્ઘટિતુકામેનપિ નિક્ખન્તસુત્તકોટિયાવ સુત્તકોટિ સઙ્ઘટિતું વટ્ટતિ. અડ્ઢચન્દકમેવ વાતિ ‘‘અડ્ઢચન્દાકારેન માલાગુણપરિક્ખેપો’’તિ અટ્ઠકથાય વુત્તસરૂપં વા.

એત્થ ચ અડ્ઢચન્દાકારેન માલાગુણપરિક્ખેપો નામ અડ્ઢચન્દાકારેન માલાગુણસ્સ પુનપ્પુનં હરણપચ્ચાહરણવસેન પૂરેત્વા પરિક્ખિપનં. તેનેવ તં પૂરિમે પવિટ્ઠં. તસ્મા એતમ્પિ અડ્ઢચન્દાકારં પુનપ્પુનં હરણપચ્ચાહરણવસેન પૂરિતં ન વટ્ટતિ, એકવારં પન અડ્ઢચન્દાકારેન માલાગુણં હરિતું વટ્ટતીતિ વદન્તિ. કાતું ન વટ્ટતીતિ સમ્બન્ધો. ‘‘તદુભયમ્પિ પૂરિમેયેવ પવિટ્ઠ’’ન્તિ (પારા. અટ્ઠ. ૨.૪૩૧) અટ્ઠકથાયં વુત્તં. અઞ્ઞેહિ પૂરિતન્તિ અઞ્ઞેહિ આયતં પસારેત્વા પૂરિતં પુપ્ફપટં. વાયિતુમ્પિ ચાતિ તિરિયં એકપુપ્ફાવલિમ્પિ વાયિતું ‘‘ન વટ્ટતી’’તિ ઇમિનાવ સમ્બન્ધો.

૪૭૨. પિટ્ઠકાચમયન્તિ તણ્ડુલપિટ્ઠાદીહિ કતઞ્ચેવ કાચમત્તિકાય ચ કતં પુપ્ફદામં. ભેણ્ડુપુપ્ફમયમ્પિ ચાતિ ભેણ્ડુદણ્ડકેહિ મલ્લિકાસુમનચમ્પકાદિસદિસં કત્વા છિદ્દેહિ કતદામઞ્ચ. ‘‘ગેણ્ડુપુપ્ફમય’’ન્તિપિ લિખન્તિ. ખરપત્તમયન્તિ એત્થ ખરપત્તં નામ કુઙ્કુટ્ઠખચિતં પુપ્ફપટન્તિ વદન્તિ. કાતુન્તિ ગન્થનગન્થાપનાદીનિ કાતું. ભેણ્ડુખરપત્તદામાનં પટિક્ખિત્તત્તા ચેલાદીહિ કતદામમ્પિ ન વટ્ટતિ અકપ્પિયાનુલોમત્તાતિ વદન્તિ.

૪૭૩. હીરાદીહીતિ તાલનાળિકેરહીરાદીહિ. આદિ-સદ્દેન તિણસલાકાદિં સઙ્ગણ્હાતિ. પટાકત્થન્તિ પટાકાકારેન પૂજનત્થં. ‘‘વિજ્ઝન્તસ્સા’’તિ ઇમિના કણ્ટકેહિ વિજ્ઝનં, હીરાદીહિ આવુણનઞ્ચ સઙ્ગહિતં.

૪૭૫. અસોકપિણ્ડિઆદીનન્તિ અસોકપુપ્ફમઞ્જરિકાદીનં. આદિ-સદ્દેન અટ્ઠકથાયં (પારા. અટ્ઠ. ૨.૪૩૧) એતેહેવ સદ્ધિં દસ્સિતં જાલવિતાનં, છિદ્દાનિ દસ્સેત્વા કતવેદિકા, નાગદન્તકં, પુપ્ફચઙ્કોટકાપિધાનં, તાલપણ્ણવલયાદિઞ્ચ સઙ્ગણ્હાતિ. ધમ્મરજ્જુયાતિ એત્થ સારત્થદીપનિયં ‘‘ધમ્મરજ્જુ નામ ચેતિયં વા બોધિં વા પુપ્ફપવેસનત્થ આવજ્જિત્વા બદ્ધરજ્જૂ’તિ મહાગણ્ઠિપદે, મજ્ઝિમગણ્ઠિપદે ચ વુત્તં, તસ્મા તથા બદ્ધાય રજ્જુયા ચેતિયસ્સ ચ અન્તરે પુપ્ફાનિ પવેસેતું વટ્ટતીતિ વિઞ્ઞાયતિ. ગણ્ઠિપદે પન ‘ધમ્મરજ્જુન્તિ સિથિલવટ્ટિતં રજ્જું કત્વા બોધિં વા ચેતિયં વા પરિક્ખિપિત્વા ધમ્માસને વા લમ્બિત્વા તત્થ પુપ્ફાનિ પવેસેન્તી’તિ વુત્તં, તસ્મા સિથિલવટ્ટિતાય રજ્જુયા અન્તરેપિ પુપ્ફાનિ પવેસેતું વટ્ટતીતિ વિઞ્ઞાયતિ, વીમંસિત્વા યુત્તતરં ગહેતબ્બં. ઉભયત્થાપિ પનેત્થ નેવત્થિ વિરોધોતિ અમ્હાકં ખન્તી’’તિ (સારત્થ. ટી. ૨.૪૩૧) લિખિતં.

૪૭૬. વિજ્ઝન્તસ્સપીતિ પિ-સદ્દેન ધમ્માસનવિતાનાદીસુ પુપ્ફપૂજનત્થં સયં કણ્ટકહીરાદિપ્પવેસનં સઙ્ગણ્હાતિ. ‘‘વિતાનાદીસુ પુપ્ફપૂજનત્થં કણ્ટકહીરાદિપ્પવેસનં ન વટ્ટતી’તિ ઇદં અટ્ઠકથાચરિયપ્પમાણતો ગહેતબ્બ’’ન્તિ સારત્થદીપનિયં વુત્તં.

૪૭૭. કપ્પિયવચનં નામ ‘‘એવં જાન, એવં કતે સોભેય્ય, યથા એતાનિ પુપ્ફાનિ ન વિકિરિયન્તિ, તથા કરોહી’’તિઆદિ (પારા. અટ્ઠ. ૨.૪૩૧) અટ્ઠકથાગતં કપ્પિયવચનં. વત્થુપૂજનેતિ રતનત્તયપૂજને. નિમિત્તાદીસુ નિમિત્તં નામ પુપ્ફાનિ ચ ગન્થનવાકે ચ ગહેત્વા ગન્થિતું જાનન્તાનં સમીપે ઠપનં. ઓભાસો નામ ‘‘તુમ્હેહિ પિળન્ધિતકુસુમાનિ કસ્મા ન વિકિરન્તી’’તિ વુત્તે ‘‘ગન્થિતત્તા’’તિ ચે વદતિ, નનુ પૂજનકપુપ્ફાનિ ગન્થિતું ન વટ્ટતીતિઆદિવચનાનિ. પરિયાયો નામ પણ્ડિતેહિ પુપ્ફાનિ યથા ન વિકિરિયન્તિ, તથા ગન્થિત્વા પૂજેતું મનાપન્તિઆદિવચનં. પકાસિતા અટ્ઠકથાયં.

૪૭૮. ‘‘કુલાનિ દૂસેતિ પુપ્ફેન વા’’તિઆદિપાઠે (પારા. ૪૩૭) ‘‘વેજ્જિકાય વા જઙ્ઘપેસનિકેન વા’’તિ (પારા. ૪૩૭) વુત્તં વેજ્જકમ્માદિં કુલદૂસનતો વિસું કત્વા ‘‘ન કેવલં…પે… કુદાચન’’ન્તિ કસ્મા વુત્તન્તિ? વિસું કાતું ન વુત્તં. યોજના પનેત્થ એવં વેદિતબ્બા ‘‘ન કેવલમિદમેવ વુત્તપ્પકારં પુપ્ફદાનાદિકુલદૂસનં કુદાચનં અકત્તબ્બં, અથ ખો વેજ્જકમ્માદિ કુલદૂસનમ્પિ કુદાચનં ન કત્તબ્બ’’ન્તિ. વેજ્જકમ્માદીતિ એત્થ આદિ-સદ્દેન વક્ખમાનપરિત્તોદકસુત્તદાનઅનામટ્ઠપિણ્ડદાનદૂતેય્યજઙ્ઘપેસનિકે સઙ્ગણ્હાતિ.

૪૭૯. ‘‘કુદાચનં ન કત્તબ્બ’’ન્તિ સામઞ્ઞેન નિસેધેત્વા ઇદાનિ ‘‘કત્તબ્બ’’મિચ્ચાદિના અપવાદવિધિં દસ્સેતિ. પઞ્ચન્નં સહધમ્મિનન્તિ ભિક્ખુભિક્ખુનિસિક્ખમાનસામણેરસામણેરીનં પઞ્ચન્નં સહ સદ્ધિં ચરિતબ્બો પબ્બજ્જાસાસનધમ્મો એતેસં અત્થીતિ ‘‘સહધમ્મિકા’’તિ સઙ્ખં ગતાનં. અકતવિઞ્ઞત્તિં કત્વાપીતિ અઞ્ઞાતકઅપ્પવારિતે ભેસજ્જં યાચિત્વાપિ ‘‘વદેય્યાથ ભન્તે યેનત્થો’’તિ એવં અકતટ્ઠાને વિઞ્ઞત્તિ અકતવિઞ્ઞત્તિ. અત્તનો ધનેતિ સસન્તકવિસયે.

૪૮૦. ‘‘તથા’’તિ સહધમ્મિકાનં વુત્તમતિદિસતિ. તદુપટ્ઠાકજન્તુનોતિ તેસં દ્વિન્નં માતાપિતૂનં વેય્યાવચ્ચકરસ્સ. ભણ્ડુકસ્સાતિ ગિહિલિઙ્ગે ઠિતસ્સાપિ પબ્બજ્જાપેક્ખસ્સ. અત્તનો વેય્યાવચ્ચકરસ્સપીતિ અત્તનો કમ્મકરસ્સપિ. એત્તકાનઞ્ચ જનાનં પઞ્ચસહધમ્મિકાનં વિય અકતવિઞ્ઞત્તિયાપિ ભેસજ્જં કાતબ્બન્તિ વુત્તં હોતિ.

૪૮૧. જેટ્ઠભાતાતિ અત્તનો પુબ્બજો ભાતા. કનિટ્ઠોતિ અનુજો ભાતા. તથા ભગિનિયો દુવેતિ જેટ્ઠકનિટ્ઠા દ્વે ભગિનિયો. ચૂળમાતાતિ માતુ કનિટ્ઠા. ચૂળપિતાતિ પિતુ કનિટ્ઠો. મહામાતાતિ માતુ જેટ્ઠા. મહાપિતા પિતુ જેટ્ઠભાતા.

૪૮૨. પિતુચ્છાતિ પિતુભગિની જેટ્ઠકનિટ્ઠા. માતુલોતિ માતુ ભાતા. જેટ્ઠકનિટ્ઠે દ્વે પિતુચ્છા, દ્વે માતુલે ચ એકતો કત્વા ‘‘દસા’’તિ વુત્તં. ભેસજ્જં કાતું વટ્ટતીતિ સમ્બન્ધો.

૪૮૪. ‘‘દસ્સન્તિ મે ઇમે’’તિ આભોગં કત્વા વા દાતબ્બન્તિ યોજના.

૪૮૫. એતેસં દસન્નં ઞાતીનં. યાવ સત્તમા કુલાતિ એત્થ કુલપરિચ્છેદો કથં ગહેતબ્બોતિ? ‘‘સપુત્તદારં ભાતુ કુટુમ્બં એકં કુલં, એવં તસ્સ પુત્તસ્સ વા ધીતુ વા કુટુમ્બં એકં કુલ’’ન્તિ એવમાદિના નયેન યાવ સત્તમા કુલપરિવટ્ટા ગહેતબ્બા. ‘‘સપુત્તપતિભગિનિયા કુટુમ્બં એકં કુલં, તથા તસ્સ પુત્તસ્સ વા ધીતુ વા કુટુમ્બં એકં કુલ’’ન્તિઆદિના નયેન યાવ સત્તમા કુલપરિવટ્ટા ગહેતબ્બા. ચૂળમાતાદીનમ્પિ કુલપરમ્પરા ઇમિના નિયામેન ગહેતબ્બાતિ વદન્તિ. કુલદૂસનં ન રૂહતીતિ ‘‘દાતું પુપ્ફં પનઞ્ઞસ્સ, આગતસ્સેવ ઞાતિનો’’તિઆદિના (વિ. વિ. ૪૪૩) નયેન કથિતવિધિના એતેસુ પવત્તન્તસ્સ કુલદૂસનં ન રુહતીતિ વુત્તં હોતિ.

૪૮૬. ભાતુજાયાતિ અત્તનો જેટ્ઠસ્સ વા કનિટ્ઠસ્સ વા ભાતુ ભરિયા. ભગિનિસામિકોતિ અત્તનો જેટ્ઠાય વા કનિટ્ઠાય વા ભગિનિયા સામિકો.

૪૮૭. ભાતુનોતિ જેટ્ઠસ્સ, કનિટ્ઠસ્સ ચ ભાતુનો. અનુ પચ્છા જાતાતિ અનુજા, કનિટ્ઠભગિની. ‘‘અનુજા’’તિ ઉપલક્ખણન્તિ જેટ્ઠાયપિ સઙ્ગહો. જેટ્ઠકનિટ્ઠભાતૂનં ભરિયા ચ જેટ્ઠકનિટ્ઠભગિનીનં સામિકા ચ સચે અઞ્ઞાતકા હોન્તીતિ યોજના. દેથાતિ એત્થ ‘‘ઇમં ભેસજ્જ’’ન્તિ પાઠસેસો.

૪૮૮. તેસમ્પિ ભાતુભગિનીનં. ‘‘પુત્તાન’’ન્તિ ઇમિના ધીતૂનમ્પિ સઙ્ગહો. કત્વાતિ વત્વા. તુમ્હાકં માતાપિતૂનં દેથાતિ એત્થાપિ ‘‘ઇમં ભેસજ્જ’’ન્તિ પકરણતો લબ્ભતિ. માતાપિતૂનન્તિ ઉભયસઙ્ગાહકવચનતો ‘‘તુય્હં માતુ વા, તુય્હં પિતુ વા’’તિ યથાસમ્ભવં વિસું વિસુઞ્ચ વત્તબ્બં. તેસન્તિ ચ તુમ્હાકન્તિ ચ સામિવચનં. પુત્તાનન્તિ ચ માતાપિતૂનન્તિ ચ સમ્પદાનવચનં.

૪૮૯. ભેસજ્જકરણારહાનં વત્તબ્બતાય ‘‘અકલ્લકો’’તિ ઇદં ઇસ્સરાદિપદેહિ પચ્ચેકં યોજેતબ્બં. અકલ્લકોતિ આતુરો. કલ્લં વુચ્ચતિ સુખં, તં એતસ્સ અત્થીતિ કલ્લકો, ન કલ્લકો અકલ્લકો. ઞાતિજનુજ્ઝિતો વાતિ ઞાતિજનેન પરિચ્ચત્તો વા.

૪૯૦. એતેસં સબ્બેસન્તિ ઇસ્સરાદિઆતુરાનં સબ્બેસમેતેસં જનાનં. ‘‘સાધુના’’તિ વક્ખમાનત્તા અપચ્ચાસીસતા સતાતિ એત્થ સતાતિ કિરિયાપદં. ‘‘ઇમસ્મિં કતે ઇમે મય્હં એવરૂપં દસ્સન્તી’’તિ અત્તનો અત્થાય પચ્ચાસીસનં અકરોન્તેનાતિ અત્થો. ભિક્ખુસઙ્ઘસ્સ ઉપકારતં પચ્ચાસીસન્તેન કાતું વટ્ટતિ. પટિસન્થારોતિ આમિસપટિસન્થારો, ધમ્મપટિસન્થારોતિ દુવિધો પટિસન્થારો. એત્થ આમિસપટિસન્થારો ગય્હતિ. ભેસજ્જં આમિસેનપિ હોતીતિ ધમ્મકથાય સઙ્ગહોપિ યુજ્જતેવ. પટિસન્થરણં પટિસન્થારો. પટિલદ્ધામિસસ્સ ચ ધમ્મસ્સ ચ તેસુ ચ અત્તનિ ચ પતિરૂપેનાકારેન સમં અત્થરણં પવત્તનન્તિ અત્થો.

અપરો નયો – આમિસસ્સ ચ ધમ્મસ્સ ચ અલાભેન અત્તનો, પરસ્સ ચ અન્તરે સમ્ભવન્તસ્સ છિદ્દસ્સ વિવરસ્સ ભેદસ્સ પટિસન્થરણં પિદહનં સઙ્ગહણં પટિસન્થારો. અયઞ્હિ લોકસન્નિવાસો અલબ્ભમાનેન આમિસેન ચ ધમ્મેન ચાતિ દ્વીહિ છિદ્દો, તસ્સ તં છિદ્દં યથા ન પઞ્ઞાયતિ, એવં પીઠસ્સ વિય પચ્ચત્થરણેન આમિસેન, ધમ્મેન ચ પટિસન્થરણં ‘‘આમિસપટિસન્થારો, ધમ્મપટિસન્થારો’’તિ વુચ્ચતીતિ. સાધુનાતિ સામીચિપ્પટિપન્નતાદિઅરિયધમ્મે પતિટ્ઠિતુકામેન અરિયાચારેન ભિક્ખુનાતિ અત્થો. ‘‘અધુના’’તિ ઇદં ઇમિસ્સા પટિપત્તિયા સબ્બકાલં પટિપજ્જિતબ્બતાયપિ પાપજનકણ્હકસંગામે ઇમસ્મિં વિપન્નકાલે વિસેસેન અપ્પમત્તેન પવત્તેતબ્બન્તિ અધિપ્પાયેન વુત્તં.

૪૯૧-૨. કેનચીતિ ઉપલક્ખણત્તા ઉપાસકેન વા ઉપાસિકાય વાતિ અત્થો. હત્થેનાતિ હત્થાવયવા અઙ્ગુલિયો વુત્તા સમુદાયે પવત્તસ્સ વોહારસ્સ અવયવે પવત્તનતો. કત્વાતિ એત્થ ‘‘પરિત્ત’’ન્તિ પાઠસેસો, કરોતિસ્સ કિરિયાસામઞ્ઞે વત્તનતો ભણિત્વાતિ અત્થો. તેસમેવ ચ સન્તકન્તિ પરિત્તં ભણાપેન્તાનમેવ સન્તકં સુત્તોદકં. એવં વુત્તત્તા ‘‘અત્તનો સુત્તોદકં આહરિત્વા પુઞ્ઞત્થાય ઇદં હત્થેન ચાલેત્વા, આમસિત્વા વા પરિત્તં ભણથા’’તિ વુત્તે કેનચિ પરિત્તોદકં સુત્તં કાતબ્બં. કેનચિ ‘‘પરિત્તોદકસુત્તાનિ દેથા’’તિ વુત્તે ભિક્ખુના તેસમેવ સન્તકં જલં હત્થેન ચાલેત્વા સુત્તકં મદ્દિત્વા પરિત્તં કત્વા દાતબ્બન્તિ યોજના.

૪૯૩. અનામટ્ઠોપીતિ હત્થેન અનામસિતોપિ, અપબ્બજિતસ્સ હત્થતો લદ્ધા અત્તના વા અઞ્ઞેન વા ભિક્ખુના અગહિતગ્ગોતિ વુત્તં હોતિ.

૪૯૪. ચોરદામરિકસ્સ ચાતિ ગામવિલોપકસ્સ ચોરસ્સ ચ.

૪૯૫. પણ્ડુપલાસસ્સાતિ પબ્બજ્જાપેક્ખસ્સ ભણ્ડુકસ્સ, પણ્ડુવણ્ણો પલાસો પણ્ડુપલાસો, સો વિયાતિ પણ્ડુપલાસો, તંસદિસે તબ્બોહારો ‘‘સીહોયં માણવકો’’તિઆદીસુ વિય. યથા પણ્ડુપલાસો રુક્ખા પતનાભિમુખો તિટ્ઠતિ નિયતપાતો, એવમયમ્પિ ગિહિલિઙ્ગતો અપગમાભિમુખો પબ્બજ્જૂપગમને નિયતોવ તિટ્ઠતીતિ ‘‘પણ્ડુપલાસસદિસો’’તિ વેદિતબ્બો.

થાલકેપિ ચાતિ અત્તનો પરિભોગથાલકેપિ. ઇદઞ્ચ નિદસ્સનમત્તં, પત્તોપિ ગહિતોયેવાતિ દટ્ઠબ્બં. ઠપેત્વાતિ એત્થ ‘‘પિણ્ડપાત’’ન્તિ ઉપયોગવસેન સમ્બન્ધનીયં. તં પનાતિ અત્તનો પરિભોગથાલકે ઠપેત્વા દિય્યમાનં પિણ્ડપાતં. ‘‘માતાપિતૂન’’ન્તિ (પારા. અટ્ઠ. ૨.૪૩૬-૪૩૭) અટ્ઠકથાવચનતો એત્થ ‘‘પિતુનો’’તિ ઉપલક્ખણન્તિ માતાપિતૂનમ્પીતિ અત્થો. સચે એકસેસો ઇચ્છિતો, ‘‘પિતૂનમ્પી’’તિ પાઠો યુજ્જતિ.

૪૯૬. જઙ્ઘપેસનિયન્તિ ગિહીનં દૂતેય્યસાસનહરણકમ્મં ‘‘જઙ્ઘપેસનિય’’ન્તિ વુચ્ચતિ. અપિ ચાતિ વુત્તસમુચ્ચયો.

૪૯૭. એત્તાવતા સામઞ્ઞવિધિં દસ્સેત્વા ઇદાનિ અપવાદવિધિં દસ્સેતું ‘‘ભણ્ડૂ’’તિઆદિ વુત્તં. સાસનન્તિ સન્દેસં. હરિતુન્તિ વુત્તટ્ઠાનં નેતું.

૪૯૮. અટ્ઠવિધેનપીતિ પુપ્ફદાનાદિજઙ્ઘપેસનિયાવસાનેન અટ્ઠપ્પકારેનપિ. કુલદૂસનકમ્મેનાતિ કુલાનં સદ્ધાવિનાસકેન અનાચારકમ્મેન. લદ્ધન્તિ એત્થ ‘‘ભોજન’’ન્તિ ઇદં ‘‘ભુઞ્જિતુ’’ન્તિ ચ ‘‘અજ્ઝોહારેસૂ’’તિ ચ વુત્તત્તા, ‘‘સેસેસુપિ અયં નયો’’તિ વક્ખમાનત્તા ચ લબ્ભતિ. પઞ્ચસુ સહધમ્મિકેસુ એકેનાપિ કુલદૂસનેન કમ્મેન ઉપ્પાદિતપચ્ચયો સબ્બેસમ્પિ ન વટ્ટતીતિ ‘‘પઞ્ચન્નં સહધમ્મીનં ન ચ વટ્ટતી’’તિ સબ્બપટિસેધો કતો.

૪૯૯. સબ્બત્થાતિ ‘‘અજ્ઝોહારેસૂ’’તિ એતસ્સ વિસેસનં, સબ્બેસૂતિ અત્થો. ‘‘અજ્ઝોહારે અજ્ઝોહારે’’તિ અટ્ઠકથાગતં સઙ્ગણ્હાતિ. ‘‘અજ્ઝોહારેસૂ’’તિ ઇદં પરગલં કાતબ્બં આમિસં સન્ધાયાહ. સેસપચ્ચયે પટિચ્ચ પરિભોગવસેનેવ ‘‘સેસેસૂ’’તિ આહ, અનજ્ઝોહરણીયેસુ સેસપચ્ચયેસૂતિ અત્થો. કિં વુત્તં હોતિ? ચીવરપચ્ચયે સરીરતો મોચેત્વા પરિભોગગણનાય, સેનાસનપચ્ચયે નિબ્બકોસે ઉદકપતનટ્ઠાનતો અબ્ભન્તરં પવિટ્ઠવારગણનાય, મઞ્ચપીઠાદિસેનાસને નિસીદનસયનાદિપરિભોગગણનાય, અનજ્ઝોહરિત્વા અબ્ભઞ્જનાલેપનાદિવસેન કાતબ્બભેસજ્જે સરીરતો મોચેત્વા વારગણનાયાતિ વુત્તં હોતિ. અયં નયોતિ ‘‘દુક્કટં પરિદીપિત’’ન્તિ વુત્તો નયો.

૫૦૦. ‘‘ઉપ્પન્નપચ્ચયા’’તિ ઇદં ‘‘અભૂતારોચનેના’’તિ ઇદમપેક્ખિત્વા વુત્તં. ‘‘કત્વા રૂપિયવોહાર’’ન્તિ ઇદમપેક્ખિત્વા ‘‘ઉપ્પાદિતપચ્ચયા’’તિ યોજના કાતબ્બા. રૂપિયવોહારવિનિચ્છયો નિસ્સગ્ગિયે આવિ ભવિસ્સતિ. અભૂતારોચનવિનિચ્છયો ચતુત્થપારાજિકે વુત્તો. સમાનાતિ પકાસિતાતિ કુલદૂસનકમ્મેન ઉપ્પાદિતપચ્ચયેહિ સદિસાતિ અટ્ઠકથાયં વુત્તાતિ અત્થો. ઇમિના તત્થાપિ વિનિચ્છયો એત્તકોયેવાતિ અતિદિસતિ.

૫૦૧. ‘‘સંસારવાસો દુક્ખ’’ન્તિ ઞત્વા નિબ્બાનાધિગમે માનસં બન્ધિત્વા નિબ્બાનગામિનિં પટિપદં સન્ધાય સાસનાવતિણ્ણેન સિક્ખાકામેન કુલપુત્તેન સેવિતક્ખણેયેવ જીવિતહરણસમત્થવિસમિસ્સપૂતિમુત્તં વિય વજ્જનીયં અકપ્પિયપચ્ચયં ઉપ્પાદેતું કરિયમાનં અકપ્પિયોપાયપ્પકારં એકતો દસ્સેતુમાહ ‘‘વિઞ્ઞત્તી’’તિઆદિ. તત્થ વિઞ્ઞત્તિ યાચના. અનુપ્પદાનન્તિ પિણ્ડપટિપિણ્ડદાનં. વેજ્જકમ્મં વુત્તનયમેવ. અનેસનં નામ અપ્પિચ્છતાય અનનુરૂપેન પયોગેન પચ્ચયપરિયેસનં.

પારિભટ્યતા નામ ઇસ્સરે સેવિતું પરિવારેત્વા તેસં ચિત્તરુચિતં વિલપન્તાનં પરિભટાનં સેવકજનાનં વિય લાભત્થિકસ્સ ભિક્ખુનો પચ્ચયદાયકેસુ પવત્તીતિ વેદિતબ્બો. પરિ સમન્તતો ભટતિ સેવતીતિ પરિભટો, ઇસ્સરજનાનં સમીપાવચરો સેવકજનો, પરિભટો વિયાતિ પરિભટો, ભિક્ખુ, પરિભટસ્સ કમ્મં પારિભટ્યં, તસ્સ ભાવો પારિભટ્યતા. અથ વા પરિભટતિ ધાતિ વિય કુલદારકે અઙ્કે કરણાદિવસેન ધારેતીતિ પરિભટો, પરિભટસ્સ કમ્મં પારિભટ્યં, તસ્સ ભાવો પારિભટ્યતાતિ લાભાસાય ભિક્ખુનો કુલદારકેસુ અનનુલોમિકા પવત્તિ વુચ્ચતિ.

મુગ્ગસૂપતા નામ પક્કમુગ્ગા વિય પક્કાપક્કબીજમિસ્સા લાભાસાય દાયકાનં ચિત્તારાધનત્થાય સચ્ચાલીકમિસ્સકતા. યથા મુગ્ગેસુ પચ્ચમાનેસુ કોચિદેવ ન પચ્ચતિ, બહવો પચ્ચન્તિ, એવમેવ યસ્સ દાયકેહિ સદ્ધિં કથેન્તસ્સ કિઞ્ચિદેવ સચ્ચં હોતિ, અસચ્ચમેવ બહુકં હોતિ, અયં વુચ્ચતિ મુગ્ગસૂપસદિસત્તા ‘‘મુગ્ગસૂપો’’તિ, તસ્સ કમ્મં મુગ્ગસૂપં, તસ્સ ભાવો મુગ્ગસૂપતા. વત્થુવિજ્જકં નામ કૂપવત્થુગેહવત્થુઆદીનં આચિક્ખનં. વત્થુવિજ્જાયકાનં કતં વત્થુવિજ્જકં.

૫૦૨. જઙ્ઘપેસનિયં, દૂતકમ્મઞ્ચ વુત્તનયમેવ. કુલદૂસનન્તિ વુત્તાવસેસં. અભૂતારોચનઞ્ચ વુત્તનયમેવ. બુદ્ધપટિકુટ્ઠન્તિ બુદ્ધેહિ પટિક્કોસિતં ગરહિતં યથાવુત્તં મિચ્છાજીવઞ્ચ અવુત્તઞ્ચ અઙ્ગવિજ્જાનક્ખત્તવિજ્જાઉક્કાપાતદિસાડાહભૂમિચાલાદિભેદં મિચ્છાજીવનૂપાયં સબ્બં. વિવજ્જયેતિ વિસમિવ, ગૂથમુત્તં વિય ચ આરકા પરિવજ્જેય્યાતિ અત્થો. ‘‘સિક્ખાકામો કુલપુત્તો’’તિ સામત્થિયા લબ્ભતિ.

૫૦૩. પટિનિસ્સજ્જતોપિ તન્તિ સમનુભાસનકમ્મતો પુબ્બે વા ઞત્તિચતુત્થાસુ કમ્મવાચાસુ અન્તકમ્મવાચાય ય્ય-કારં અપ્પત્તાય વા કુલદૂસનકમ્મં પજહન્તસ્સાતિ વુત્તં હોતિ. સઙ્ઘભેદસમન્તિ પઠમસઙ્ઘભેદેન સમન્તિ.

કુલદૂસનકથાવણ્ણના.

૫૦૪. ‘‘જાન’’ન્તિ ઇમસ્સ ‘‘ભિક્ખુના’’તિ એતસ્સ વિસેસનત્તા જાનતાતિ ગહેતબ્બં. પાળિયા લિખિતે સીહળગણ્ઠિપદે પન એવરૂપં આપત્તિં આપન્નોસ્મીતિ ઞત્વાતિ અત્થો વુત્તો. યાવતીહન્તિ યત્તકાનિ અહાનિ, ‘‘છાદિતા’’તિ ઇમિના સમ્બન્ધો, છાદનકિરિયાઅચ્ચન્તસંયોગે ઉપયોગવચનં. છાદિતાતિ ‘‘અહં ઇત્થન્નામં આપત્તિં આપન્નો’’તિ સબ્રહ્મચારીનં અનારોચનદિવસેન પટિચ્છાદિતા. આપત્તીતિ સઙ્ઘાદિસેસાપત્તિ. અકામાતિ અરુચિયાવ સઙ્ઘાદિસેસં આપજ્જિત્વા અકતપટિકમ્મસ્સ સગ્ગમોક્ખાનં અન્તરાયકરત્તાતિ અધિપ્પાયો. પરિવત્થબ્બન્તિ પરિવાસં સમાદાય વત્થબ્બં. કિત્તકં કાલન્તિ આહ ‘‘તાવતીહ’’ન્તિ, તત્તકાનિ અહાનીતિ વુત્તં હોતિ. આપજ્જિત્વા યત્તકાનિ અહાનિ પટિચ્છાદેતિ, તત્તકાનેવ અહાનીતિ અત્થો.

૫૦૫-૬. આપત્તિ કિત્તકેન પટિચ્છન્ના હોતીતિ આહ ‘‘આપત્તિ ચા’’તિઆદિ. તત્થ આપત્તિ ચાતિ સઙ્ઘાદિસેસાપત્તિ ચ. અનુક્ખિત્તો ચાતિ ઉક્ખેપનીયકમ્મેન સયં અનિસ્સારિતો ચ. પહૂ ચાતિ સયં સબ્રહ્મચારીનં સન્તિકં ગન્ત્વા આરોચેતું પહોતિ ચ. અનન્તરાયિકો ચાતિ ગમનવિબન્ધકેન રાજચોરાદિઅન્તરાયેન વિરહિતો ચ. ચતુસ્વ પીતિ એત્થ ‘‘એતેસૂ’’તિ સેસો, એતેસુ ચતૂસૂતિ અત્થો. તંસઞ્ઞીતિ આપત્તિસઞ્ઞી અનુક્ખિત્તસઞ્ઞી પહુસઞ્ઞી અનન્તરાયિકસઞ્ઞીતિ વુત્તં હોતિ. તસ્સ એવંસઞ્ઞિનો ઇમેસુ ચતૂસુ તથાસઞ્ઞિનો પુગ્ગલસ્સ. છાદેતુકામતાતિ આચરિયાદીસુ ગારવેન વા ગરહાદિભયા વા ‘‘ન આરોચેસ્સામી’’તિ પટિચ્છાદેતુકામતા ચ. છાદનન્તિ તથા ચિન્તેત્વા ‘‘અહં ઇત્થન્નામં આપન્નો’’તિ અવત્વા પટિચ્છાદનઞ્ચાતિ ઇમેહિ દસહિ અઙ્ગેહિ. ‘‘ભિક્ખુના’’તિ કત્તુનિદ્દેસત્તા છન્નાતિ એત્થ છાદિતાતિ અત્થો. કાલવિધિં દસ્સેતિ ‘‘અરુણુગ્ગમનેના’’તિ, આપત્તિઆપન્નદિવસં ખેપેત્વા અરુણુટ્ઠાનેન સદ્ધિં છન્ના હોતીતિ અત્થો.

દ્વેભાણવારવણ્ણના નિટ્ઠિતા.

૫૦૭. એવં પટિચ્છન્નસઙ્ઘાદિસેસપટિકમ્મત્થં ‘‘અકામા પરિવત્થબ્બ’’ન્તિ વિહિતસ્સ પરિવાસસ્સ કો ભેદો, કો પવત્તિક્કમોતિ આહ ‘‘તિવિધો’’તિઆદિ. સો પરિવાસો તિવિધો દીપિતોતિ સમ્બન્ધો. કેનાતિ આહ ‘‘તિવિધાપેતચેતસા’’તિ. ‘‘તિસ્સો વિધા, સેય્યોહમસ્મીતિ વિધા, સદિસોહમસ્મીતિ વિધા, હીનોહમસ્મીતિ વિધા’’તિ (દી. નિ. ૩.૩૦૫) વુત્તવિધાય માનનામધેય્યતો તિવિધમાનતો અપગતચિત્તેન સમ્માસમ્બુદ્ધેનાતિ અત્થો.

પટિચ્છન્ના આપત્તિ એતસ્સાતિ પટિચ્છન્નો. અરિસાદીનં આગતિગણત્તા તત્થ પક્ખિપનેન અ-કારપચ્ચયો દટ્ઠબ્બો. તેનેવ વક્ખતિ ‘‘પટિચ્છન્નાય દાતબ્બો’’તિઆદિ.

સુદ્ધન્તોતિ ‘‘ઉભો કોટિયો સોધેત્વા દાતબ્બપરિવાસો સુદ્ધન્તો નામા’’તિ પાળિગણ્ઠિપદે વુત્તત્તા ઉપસમ્પદાકાલસઙ્ખાતો સુદ્ધો પુબ્બન્તો, આરોચિતકાલસઙ્ખાતો સુદ્ધો અપરન્તો ચ પરિવાસસમાદાનકાલે વા પરિવસનકાલે વા ઉપપરિક્ખિત્વા દિટ્ઠા સુદ્ધા અન્તા અનાપત્તિકાલસઙ્ખાતા ઉભો કોટિયો અસ્સાતિ કત્વા સુદ્ધન્તનામકો પરિવાસો ચ. એત્થ ચ ભેદાદિં વક્ખતિ.

સમ્મા દિવસાદીનં ઓધાનં પક્ખેપો યત્થ સો સમોધાનો, પરિવાસો. દિવસેસુ દિવસે વા આપત્તીસુ આપત્તિયો વા સબ્બા નાનાવત્થુકા આપત્તિયો એકતો કત્વા ઓધાય દાતબ્બપરિવાસોતિ અત્થો. એત્થાપિ ભેદાદિં વક્ખતિ.

૫૦૮. તત્રાતિ તેસુ તીસુ પરિવાસેસુ. ‘‘યો’’તિ સેસો. ઇતીતિ એવમત્થો દટ્ઠબ્બો. યો પટિચ્છન્નપરિવાસો, અયન્તિ એવં પકાસિતોતિ યોજના.

૫૦૯-૧૦. પરિવાસદાનકાલે વુચ્ચમાનાય કમ્મવાચાય પધાનલક્ખણં દસ્સેતુમાહ ‘‘વત્થુગોત્તવસેના’’તિઆદિ. તત્થ ‘‘વત્થૂ’’તિ સુક્કમોચનાદિકો વીતિક્કમો વુચ્ચતિ. અયમેવ સુક્કવિસ્સટ્ઠિઆદિકં ગં વાચં સઞ્ઞઞ્ચ તાયતિ રક્ખતીતિ કત્વા ‘‘ગોત્ત’’ન્તિ વુચ્ચતિ. તઞ્હિ સજાતિયસાધારણવિજાતિયવિનિવત્તનવસેન અઞ્ઞત્થ ગન્તું અદત્વા વાચં સદ્દં, તબ્બિસયં સઞ્ઞઞ્ચ રક્ખતિ. ઇદં વત્થુગોત્તદ્વયવાચકં સુક્કવિસ્સટ્ઠિકાયસંસગ્ગવિસેસવચનઞ્ચ ‘‘નાનાવત્થુકા’’તિ સામઞ્ઞવચનઞ્ચાતિ ઇમિના વચનદ્વયેનાતિ વુત્તં હોતિ. વુત્તઞ્હેતં અટ્ઠકથાયં ‘‘સુક્કવિસ્સટ્ઠિં કાયસંસગ્ગ’ન્તિઆદિવચનેનાપિ ‘નાનાવત્થુકાયો’તિઆદિવચનેનાપિ વત્થુચેવ ગોત્તઞ્ચ સઙ્ગહિત’’ન્તિ (ચૂળવ. અટ્ઠ. ૧૦૨). નામાપત્તિવસેન વાતિ એત્થ સઙ્ઘાદિસેસોતિ સજાતિસાધારણનામં, આપત્તીતિ સબ્બસાધારણનામન્તિ દ્વીહિ નામેહિ તંતંવીતિક્કમવસેન આપજ્જિતબ્બતો તદેવ આપત્તીતિ એવમુભિન્નં નામાપત્તીનં વસેન વાતિ અત્થો.

કમ્મવાચા હિ કાતબ્બાતિ ‘‘વત્થુગોત્તવસેનાપી’’તિ એત્થ અપિ-સદ્દો ‘‘નામાપત્તિવસેન વા’’તિ એત્થ સઙ્ઘાદિસેસોતિ સજાતિસાધારણનામં, આપત્તીતિ સબ્બસાધારણનામન્તિ દ્વીહિ નામેહીતિ ઇદં સમુચ્ચિનોતીતિ ઉભયં એકતો યોજેત્વા કમ્મવાચા કાતબ્બાતિ. ‘‘નામાપત્તિવસેન વા’’તિ એત્થ વિકપ્પત્થેન વા-સદ્દેન, ‘‘અહં ભન્તે સમ્બહુલા સઙ્ઘાદિસેસા આપત્તિયો આપજ્જિં એકાહપટિચ્છન્નાયો’તિ એવં નામમત્તવસેન વા યોજના કાતબ્બા’’તિ અટ્ઠકથાય વુત્તવિસેસનિવત્તનત્થમત્તસદ્દવસેન ચ વત્થુગોત્તવિરહિતેન કેવલેન નામાપત્તિમત્તેન પયોજેત્વા કાતબ્બાયેવાતિ વુત્તં હોતિ. કમ્મવાચાય કરણપ્પકારો પન સમુચ્ચયક્ખન્ધકે આગતનયેન આપન્નપુગ્ગલનામેન ચ એકાહપટિચ્છન્નાદિવચનેન ચ યોજેત્વા દટ્ઠબ્બો. તસ્સ દાતબ્બોતિ યોજના. ‘‘પરિવાસો’’તિ પકરણતો લબ્ભતિ, પટિચ્છન્નાપત્તિકસ્સ પુગ્ગલસ્સ પરિવાસો દાતબ્બોતિ અત્થો.

તેન ચાતિ લદ્ધપરિવાસેન અન્તોસીમાય ઉક્કુટિકં નિસિન્નેન પગ્ગહિતઞ્જલિના ભિક્ખુના ચ. સમાદિયિત્વાતિ એત્થાપિ ‘‘વત્ત’’ન્તિ સામત્થિયા લબ્ભતિ. ‘‘સમાદાનેપ્યયં નયો’’તિ (વિ. વિ. ૫૧૪) વક્ખમાનત્તા ‘‘વત્તં સમાદિયામિ, પરિવાસં સમાદિયામી’’તિ ઇમેસં દ્વિન્નં અઞ્ઞતરં વા દ્વયમેવ વા તિક્ખત્તું વત્વા પારિવાસિકક્ખન્ધકે વુત્તવત્તપૂરણત્થં સમાદિયિત્વાતિ વુત્તં હોતિ. આદિતો સઙ્ઘસ્સ આરોચેતબ્બન્તિ યોજના. તથા વત્તં સમાદિયિત્વા નિસિન્નેન પઠમં સઙ્ઘસ્સ ‘‘અહં ભન્તે એકં આપત્તિં આપજ્જિં સઞ્ચેતનિકં સુક્કવિસ્સટ્ઠિં એકાહપટિચ્છન્નં, સોહં સઙ્ઘં એકિસ્સા આપત્તિયા સઞ્ચેતનિકાય સુક્કવિસ્સટ્ઠિયા એકાહપટિચ્છન્નાય એકાહપરિવાસં યાચિં, તસ્સ મે સઙ્ઘો એકિસ્સા આપત્તિયા સઞ્ચેતનિકાય સુક્કવિસ્સટ્ઠિયા એકાહપટિચ્છન્નાય એકાહપરિવાસં અદાસિ, સોહં પરિવસામિ, વેદયામાહં ભન્તે, વેદયતીતિ મં સઙ્ઘો ધારેતૂ’’તિ એવં આરોચેતબ્બં.

‘‘ઇમઞ્ચ પનત્થં ગહેત્વા યાય કાયચિ વાચાય આરોચેતું વટ્ટતિયેવા’’તિ (ચૂળવ. અટ્ઠ. ૧૦૨) અટ્ઠકથાવચનતો યાય કાયચિ ભાસાયપિ આરોચેતું વટ્ટતિ.

૫૧૧. પુનપ્પુનાગતાનન્તિ એત્થ ‘‘ભિક્ખૂન’’ન્તિ સેસો. પુબ્બે આરોચનટ્ઠાનં અસમ્પત્તાનં આગન્તુકાનં ભિક્ખૂનમ્પિ. આરોચેન્તોવાતિ એકસ્સ આરોચને સો ચે વુડ્ઢતરો હોતિ, ‘‘ભન્તે’’તિ વત્વા પુબ્બે વુત્તનયેનેવ વત્વા, નવકો ચે, ‘‘આવુસો’’તિ વત્વા અવસાને ‘‘મં આયસ્મા ધારેતૂ’’તિ, દ્વે ચે હોન્તિ, ‘‘મં આયસ્મન્તા ધારેન્તૂ’’તિ, તયો ચે, ‘‘મં આયસ્મન્તો ધારેન્તૂ’’તિ વત્વા આરોચેન્તોવ. રત્તિયા છેદં અકત્વાતિ ‘‘પકતત્તેન ભિક્ખુના સદ્ધિં એકચ્છન્ને’’તિઆદિના (ચૂળવ. ૮૧) નયેન વુત્તએકસેનાસને પકતત્તેન ભિક્ખુના સદ્ધિં અરુણુટ્ઠાપનવસેન કરિયમાનેન સહવાસેન વા ‘‘પકતત્તભિક્ખૂહિ વિના એકકેન વાસો’’તિ વુત્તવિપ્પવાસેન વા ‘‘આગન્તુકાનં આરોચનાય અકરણ’’ન્તિ વુત્તઅનારોચનેન વા સમ્ભવન્તં રત્તિચ્છેદમકત્વા. વત્તભેદં અકત્વા વા પારિવાસિકક્ખન્ધકે પારિવાસિકસ્સ પઞ્ઞત્તવત્તતો એકમ્પિ અહાપેત્વા ચ. સદા વસેતિ પરિવાસં વસિતું પરિકપ્પિતા સબ્બદિવસા યાવ ખિણન્તિ, તાવ વસેય્યાતિ અત્થો.

૫૧૨. તત્થ પરિવાસો વિસોધેતું ન સક્કા ચેતિ તસ્સ વિહારસ્સ મહન્તત્તા આગતે આગન્તુકભિક્ખૂ પરિયેસિત્વા આરોચેન્તેન રત્તિચ્છેદં અકત્વા પરિવાસં સોધેતું ન સક્કા ચે હોતિ. તં વત્તં નિક્ખિપિત્વાનાતિ તથા સમાદિન્નં વત્તં ઉપરિ વક્ખમાનનયેન નિક્ખિપિત્વા.

૫૧૩. કત્થ નિક્ખિપેય્યાતિ આહ ‘‘તત્થા’’તિઆદિ. તત્થેવ સઙ્ઘમજ્ઝે વાતિ અત્તનો યસ્મિં વત્તં સમાદિન્નં, તસ્મિંયેવ સઙ્ઘમજ્ઝે વા. પુગ્ગલે વાતિ ભિક્ખૂસુ ઉટ્ઠાય તત્થ તત્થ ગતેસુ અન્તોસીમાયયેવ ઓહીને એકભિક્ખુમ્હિ વા અસતિયા બહિસીમં ગતેન સરિતક્ખણે અત્તના સદ્ધિં ગચ્છન્તે તસ્સાયેવ પરિસાય પરિવાસદાને સમ્મુખીભૂતે પુગ્ગલે વા આગન્તુકભિક્ખુ ચે, તસ્સ વા સન્તિકે આરોચેત્વા વત્તં નિક્ખિપિતબ્બન્તિ વુત્તં હોતિ. કથં નિક્ખિપે’તિ આહ ‘‘નિક્ખિપામી’’તિઆદિ. ‘‘તથા’’તિ ઇમિના ‘‘નિક્ખિપામી’’તિ એતં પચ્ચામસતિ. તં વત્તન્તિ અત્તના સમાદિન્નં તં વત્તં.

૫૧૪. અયં નયોતિ ‘‘એકપદેનાપિ દ્વીહિ પદેહિ વા પના’’તિ એવં અનન્તરોદિતનયો.

૫૧૫-૨૦. પકતત્તોતિ વુચ્ચતીતિ સગ્ગમોક્ખાવરણાભાવેન પકતો પુબ્બસરૂપેનેવ ઠિતો અત્તા એતસ્સાતિ ‘‘પકતત્તો’’તિ કથીયતિ. પચ્ચૂસકાલસ્મિન્તિ અરુણતો પુરિમકાલે.

પરિક્ખિત્તવિહારસ્સાતિ એત્થ પાકારાદીહિ પરિક્ખિત્તં એકમ્પિ સેનાસનં વિહરન્તિ અસ્મિન્તિ કત્વા તથા વુચ્ચતિ. દ્વે લેડ્ડુપાતે અતિક્કમ્માતિ યોજના. લેડ્ડુપાતદ્વયસ્સ અવધિં દસ્સેતિ ‘‘પરિક્ખેપતો બહી’’તિ, ‘‘અપરિક્ખિત્તતો પરિક્ખેપારહટ્ઠાના બહી’’તિ ચ.

પરિક્ખેપારહટ્ઠાનં નામ કતમન્તિ? વિસુદ્ધિમગ્ગે (વિસુદ્ધિ. ૧.૩૧) ધુતઙ્ગનિદ્દેસે ‘‘મજ્ઝિમટ્ઠકથાયં પન વિહારસ્સાપિ ગામસ્સેવ ઉપચારં નીહરિત્વા ઉભિન્નં લેડ્ડુપાતાનં અબ્ભન્તરા મિનિતબ્બ’ન્તિ વુત્તં. ઇદમેત્થપમાણ’’ન્તિ વુત્તત્તા અપરિક્ખિત્તસ્સ પઠમલેડ્ડુપાતં હોતિ, ગામે વુત્તેન વિધિના વિહારપરિયન્તે ઠિતભત્તસાલગિલાનસાલાદિસેનાસને ચે પરિક્ખેપો અત્થિ, તત્થ વા, નત્થિ ચે, નિબ્બકોસસ્સ ઉદકપાતટ્ઠાને ઠિતેન માતુગામેન છડ્ડિતભાજનધોવનોદકપતનટ્ઠાને વા સેનાસનતો દૂરે ચેતિયઙ્ગણે, બોધિયઙ્ગણે વા ઠત્વા બલમજ્ઝિમસ્સ પુરિસસ્સ હત્થં પસારેત્વા અત્તનો બલપ્પમાણેન ખિત્તસ્સ મુટ્ઠિયા ગહિતપાસાણસ્સ પતનટ્ઠાનં વિહારૂપચારો નામ, તદેવ પાકારાદીહિ પરિક્ખેપારહટ્ઠાનં નામ. તત્થ ઠત્વા તથેવ ખિત્તસ્સ પાસાણસ્સ પતનટ્ઠાનં એકો લેડ્ડુપાતો, તત્થાપિ ઠત્વા તથેવ ખિત્તસ્સ પાસાણસ્સ પતનટ્ઠાનં એકો લેડ્ડુપાતોતિ એવં દ્વે લેડ્ડુપાતા ગહેતબ્બા.

મગ્ગતો ઓક્કમિત્વાતિ મગ્ગતો અપસક્કિત્વા. ગુમ્બેનાતિ રુક્ખગહનેન વા લતાગહનેન વા. વતિયાતિ કણ્ટકસાખાદીહિ કતાય વતિયા.

વત્તમાદાયાતિ પુબ્બે વુત્તનયેન વત્તં સમાદિયિત્વા. આરોચેત્વાતિ યથાવુત્તનયેન આરોચેત્વા.

નિક્ખિપિત્વાતિ પુબ્બે વુત્તનયેન વત્તં નિક્ખિપિત્વા. ભિક્ખૂતિ અત્તના સદ્ધિં હત્થપાસદાનત્થાય આગતો ભિક્ખુ. યસ્સ કસ્સચીતિ એત્થ ‘‘સન્તિકે’’તિ સેસો.

આરોચેત્વા વાતિ અત્તનો નવકતરો ચે, ‘‘આવુસો’’તિ, વુડ્ઢો ચે, ‘‘ભન્તે’’તિ વત્વા યથાવુત્તનયેનેવ આરોચેત્વા. સેસન્તિ અવસેસવિનિચ્છયં. સમુચ્ચયસ્સાતિ ચૂળવગ્ગાગતસ્સ તતિયસમુચ્ચયક્ખન્ધકસ્સ. અટ્ઠકથાયચાતિ ‘‘સચે અઞ્ઞો કોચિ ભિક્ખુ કેનચિદેવ કરણીયેના’’તિઆદિના (ચૂળવ. અટ્ઠ. ૧૦૨) અટ્ઠકથાગતવિનિચ્છયેનાપિ.

વિભાવયેતિ ‘‘સચે યં ભિક્ખું તત્થ આગતં પસ્સતિ, ભાસમાનસ્સ સદ્દં સુણાતિ, તસ્સ આરોચેતબ્બં. તથા અકરોન્તસ્સ રત્તિચ્છેદો ચ વત્તભેદો ચ હોતિ દુક્કટં આપજ્જતિ. સચે સો દ્વાદસરતનબ્ભન્તરં પત્વા તસ્સ અજાનન્તસ્સેવ પક્કન્તો હોતિ, રત્તિચ્છેદોવ હોતિ, ન વત્તભેદો. સચે અત્તના સદ્ધિં આગતો કેનચિદેવ કરણીયેન ગતો હોતિ, વિહારં ગન્ત્વા યં પઠમં પસ્સતિ, તસ્સ સન્તિકે આરોચેત્વા વત્તં નિક્ખિપિતબ્બં. એવં પરિકપ્પિતદિવસે પુણ્ણે કુક્કુચ્ચવિનોદનત્થં અતિરેકે ચ દિવસે વત્તં પૂરેત્વા પરિયોસાને વત્તે અસમાદિન્ને માનત્તારહો ન હોતીતિ સઙ્ઘં ઉપસઙ્કમ્મ વત્તં સમાદિયિત્વા ખન્ધકે આગતનયેનેવ માનત્તં યાચિતબ્બં. અનિક્ખિત્તવત્તેન ચરિતુકામસ્સ પુન વત્તસમાદાનં કાતબ્બં ન હોતી’’તિ એત્તકો વિસેસો, ઇમં અટ્ઠકથાગતં વિનિચ્છયં પકાસેય્યાતિ વુત્તં હોતીતિ.

પટિચ્છન્નપરિવાસકથાવણ્ણના.

૫૨૧. ન જાનતીતિ એત્થ છન્દવસેન રસ્સો કતો. આપત્તીનઞ્ચ રત્તીનં, પરિચ્છેદં ન જાનતીતિ બહૂ સઙ્ઘાદિસેસે આપજ્જિત્વાપિ ‘‘એત્તકાહં આપત્તિયો આપન્નો’’તિ અત્તનો આપન્નસઙ્ઘાદિસેસાપત્તીનં પરિચ્છેદં ન જાનાતિ, ‘‘મયા આપન્નાપત્તિ એત્તકે દિવસે પટિચ્છન્ના’’તિ દિવસપરિચ્છેદં ન જાનાતિ.

૫૨૨. ઇદાનિ તસ્સ પભેદં દસ્સેતુમાહ ‘‘એસેવા’’તિઆદિ. પરિસુદ્ધેહીતિ સકલસંકિલેસપ્પહાનેન પરિસુદ્ધસન્તાનેહિ ઉપાલિત્થેરાદિપુબ્બાચરિયેહિ. એસોવ સુદ્ધન્તોતિ એસો યથાવુત્તસરૂપો સુદ્ધન્તપરિવાસો. ચૂળસુદ્ધન્તનામો ચાતિ ‘‘યો ઉપસમ્પદતો પટ્ઠાય અનુલોમક્કમેન વા’’તિઆદિના (ચૂળવ. અટ્ઠ. ૧૦૨) અટ્ઠકથાયં વુત્તનયેન ઉપસમ્પદમાળકતો પટ્ઠાય અનુલોમવસેન વા આરોચિતદિવસતો પટ્ઠાય પટિલોમવસેન વા સરન્તે ‘‘કિત્તકાનિ દિવસાનિ પરિસુદ્ધોતિ સરસી’’તિ વિનયધરેહિ પુચ્છિતે ‘‘એત્તકં કાલં પરિસુદ્ધોસ્મી’’તિ વુત્તવતો તેન વુત્તસુદ્ધદિનાનિ પરિયન્તં કત્વા દિન્નો યાવ ઉપસમ્પન્નદિવસો, તાવ બહુદિવસેસુ નેતબ્બં મહાસુદ્ધન્તં સન્ધાય ઇતરદિનાનં પૂરેતબ્બત્તા ચૂળસુદ્ધન્તો નામાતિ વુત્તં હોતિ.

‘‘અયઞ્હિ સુદ્ધન્તપરિવાસો નામ ઉદ્ધમ્પિ આરોહતિ, હેટ્ઠાપિ ઓરોહતિ, ઇદમસ્સ લક્ખણ’’ન્તિ (ચૂળવ. અટ્ઠ. ૧૦૨) વુત્તત્તા ઇમં પરિવાસં પરિવસનતો પચ્છા દિવસં સરન્તો પરિકપ્પેત્વા યોજેત્વા ગહિતદિવસતો વડ્ઢેતિ વા હાપેતિ વા, ઉભયત્થાપિ ‘‘પુન પરિવાસદાનકિચ્ચં નત્થી’’તિ (ચૂળવ. અટ્ઠ. ૧૦૨) વચનતો પુબ્બે દિન્નપરિવાસોયેવ પમાણં. ‘‘એતસ્સ અપ્પટિચ્છન્નં ‘પટિચ્છન્ના’તિ વા અચિરપટિચ્છન્નં ‘ચિરપટિચ્છન્ના’તિ વા અસમ્બહુલમ્પિ ‘સમ્બહુલા’તિ વા વિપરીતતો ગહેત્વા વિનયકમ્મં કરોન્તસ્સ આપત્તિતો વુટ્ઠાનં હોતિ, પટિચ્છન્નં ‘અપ્પટિચ્છન્ના’તિઆદિવિપરિયાયેન ન હોતી’’તિ (ચૂળવ. અટ્ઠ. ૧૦૨ અત્થતો સમાનં) અટ્ઠકથાગતનયો વેદિતબ્બો.

મહાસુદ્ધન્તનામકોતિ ‘‘યો પન યથાવુત્તેન અનુલોમપટિલોમનયેન પુચ્છિયમાનોપિ રત્તિપરિયન્તં ન જાનાતિ, નેવ સરતિ, વેમતિકો વા હોતિ, તસ્સ દિન્નો સુદ્ધન્તપરિવાસો મહાસુદ્ધન્તોતિ વુચ્ચતી’’તિ (ચૂળવ. અટ્ઠ. ૧૦૨) અટ્ઠકથાયં નિદ્દિટ્ઠસરૂપો મહાસુદ્ધન્તો નામ. ‘‘અયં ઉદ્ધં નારોહતિ, હેટ્ઠા પન ઓરોહતી’’તિ વુત્તત્તા અયં પરિવાસો યાવ ઉપસમ્પન્નદિવસો, તાવ પૂરેતબ્બતો તતો ઉદ્ધં નારોહતિ. અન્તરાળે અત્તનો સુદ્ધકાલં પરિકપ્પેત્વા સરતિ ચે, તતો પટ્ઠાય નિવત્તનતો દિવસહાનં પન હોતેવ.

૫૨૩. ‘‘અઞ્ઞતરો ભિક્ખુ સમ્બહુલા સઙ્ઘાદિસેસા આપત્તિયો આપન્નો હોતિ, સો આપત્તિપરિયન્તં ન જાનાતિ, રત્તિપરિયન્તં ન જાનાતી’’તિ (ચૂળવ. ૧૫૬) આગતવત્થુમ્હિ ઇમસ્સ પરિવાસસ્સ અનુઞ્ઞાતત્તા તં વત્થું સઙ્ગહેતું ‘‘આપત્તીનં ચા’’તિઆદિં વત્વાપિ ‘‘આપત્તિપરિયન્તં પન ‘એત્તકા અહં આપત્તિયો આપન્નો’તિ જાનાતુ વા મા વા, અકારણમેત’’ન્તિ (ચૂળવ. અટ્ઠ. ૧૦૨) પટિસેધેત્વા અટ્ઠકથાયં પધાનભાવેન વુત્તરત્તિપરિયન્તસ્સ અપરિજાનનમત્તમેવ પમાણન્તિ દસ્સેતુમાહ ‘‘દુવિધોપી’’તિઆદિ. દુવિધોપિ અયં સુદ્ધન્તપરિવાસો એકચ્ચં રત્તિપરિચ્છેદં, સકલં વા રત્તિપરિચ્છેદં અજાનતો વા વિમતિસ્સ વા દાતબ્બોતિ યોજના.

સુદ્ધન્તપરિવાસકથાવણ્ણના.

૫૨૪. ઇતરોપિ સો સમોધાનપરિવાસો તિધા મતોતિ યોજના. ધાતુસદ્દાનં અનેકત્થત્તા ‘‘ઓધાન’’ન્તિ મક્ખનં વુચ્ચતિ. તેનાહ અટ્ઠકથાયં ‘‘ઓધુનિત્વા મક્ખેત્વા’’તિ (ચૂળવ. અટ્ઠ. ૧૦૨). ‘‘સમોધાન’’ન્તિ પક્ખેપો વુચ્ચતિ. યથાહ અટ્ઠકથાયં ‘‘સમોદહિત્વા’’તિ. ઓધાનઞ્ચ સમોધાનઞ્ચ ઓધાનસમોધાનં, તં યત્થ સો પરિવાસો ‘‘ઓધાનસમોધાનો’’તિ વેદિતબ્બો. અરિસાદિગણે અન્તોગધત્તા હેત્થ, ઉપરિ ચ એવરૂપે ઠાને અ-કારપચ્ચયો દટ્ઠબ્બો. પરિવુત્થદિવસાનં મક્ખનઞ્ચ મૂલાપત્તિયં અન્તરાપત્તીનં પક્ખિપનઞ્ચ યસ્મિં સો પરિવાસોતિ વુત્તં હોતિ. તેનેવેત્થ ‘‘દિવસે પરિવુત્થે તુ, ઓધુનિત્વા પદીયતે’’તિ વક્ખતિ. યથાહ અટ્ઠકથાયં ‘‘પરિવુત્થદિવસે ઓધુનિત્વા મક્ખેત્વા પુરિમાય આપત્તિયા મૂલદિવસપરિચ્છેદે પચ્છા આપન્નં આપત્તિં સમોદહિત્વા’’તિ (ચૂળવ. અટ્ઠ. ૧૦૨).

અગ્ઘપુબ્બકો મિસ્સકપુબ્બકો સમોધાનપરિવાસોતિ યોજના, અગ્ઘસમોધાનપરિવાસો મિસ્સકસમોધાનપરિવાસોતિ વુત્તં હોતિ. અગ્ઘો ચ મિસ્સકો ચ અગ્ઘમિસ્સકા, તે પુબ્બકા એતસ્સાતિ અગ્ઘમિસ્સકપુબ્બકો, સમોધાનો. અગ્ઘેન સમોધાનં અગ્ઘસમોધાનં, તં યત્થ સો અગ્ઘસમોધાનો, આપન્નાસુ બહૂસુ સબ્બચિરપટિચ્છન્નાપત્તીનં દિવસગણનગ્ઘેનેવ પચ્છા આપન્નઆપત્તીનં પક્ખેપયુત્તપરિવાસોતિ અત્થો. યથાહ અટ્ઠકથાયં ‘‘અગ્ઘસમોધાનો નામ સમ્બહુલાસુ આપત્તીસુ યા એકા વા દ્વે વા તિસ્સો વા સમ્બહુલા વા આપત્તિયો સબ્બચિરપટિચ્છન્નાયો, તાસં અગ્ઘેન સમોધાય તાસં રત્તિપરિચ્છેદવસેન અવસેસાનં ઊનતરપટિચ્છન્નાનં આપત્તીનં પરિવાસો દિય્યતિ, અયં વુચ્ચતિ અગ્ઘસમોધાનો’’તિ (ચૂળવ. અટ્ઠ. ૧૦૨). મિસ્સકાનં નાનાવત્થુકાનં આપત્તીનં સમોધાનં મિસ્સકસમોધાનં, તં યત્થ સો પરિવાસો મિસ્સકસમોધાનો. મિસ્સકાનં નાનાવત્થુકાનં આપત્તીનં એકતો પક્ખેપયુત્તો પરિવાસોતિ અત્થો. યથાહ અટ્ઠકથાયં ‘‘મિસ્સકસમોધાનો નામ યો નાનાવત્થુકા આપત્તિયો એકતો કત્વા દિય્યતી’’તિ (ચૂળવ. અટ્ઠ. ૧૦૨).

૫૨૫-૭. એવં તિવિધે સમોધાનપરિવાસે પઠમપરિવાસસ્સ વિસેસનભૂતતાય અવયવાનં દ્વિન્નં ઓધાનસમોધાનસદ્દાનં અત્થાનુવાદેન તદુભયઓધાનસમોધાનસરૂપં વિધાતુમાહ ‘‘આપજ્જિત્વા…પે… પકાસિતો’’તિ. તત્થ પઠમસ્સ ઓધાન-સદ્દસઙ્ખાતસ્સ અવયવસ્સ અત્થસરૂપાનુવાદમાહ ‘‘આપજ્જિત્વા…પે… પદીયતે’’તિ. દુતિયાવયવસઙ્ખાતસમોધાન-સદ્દસ્સ અત્થસરૂપાનુવાદમાહ ‘‘પુરિમાપત્તિયા…પે… ભિક્ખુનો’’તિ. તેનેવ ઉભયત્થાનુવાદે ‘‘ભિક્ખુનો’’તિ પદદ્વયસ્સ, ‘‘પદીયતે દાતબ્બો’’તિ કિરિયાપદદ્વયસ્સ ચ વિસું વિસું ગહિતત્તા પુનરુત્તિદોસાભાવો વેદિતબ્બો. એવં અવયવત્થાનુવાદેન વિધાતબ્બસમુદાયં દસ્સેતુમાહ ‘‘એસોધાનસમોધાનપરિવાસો પકાસિતો’’તિ. એત્થ છાદેન્તસ્સ હીતિ હિ-સદ્દો હેતુમ્હિ. એસોધાનસમોધાનોતિ એત્થ એત-સદ્દસમ્બન્ધેન ‘‘યો’’તિ લબ્ભતિ.

તત્રાયં યોજના – આપજ્જિત્વા…પે… ઓધુનિત્વા યો યસ્મા પદીયતે, પુરિમાપત્તિયા…પે… યો યસ્મા દાતબ્બો, તસ્મા એસોધાનસમોધાનપરિવાસો પકાસિતોતિ.

તત્થ અન્તરાપત્તિં આપજ્જિત્વાતિ પટિચ્છન્નાપત્તિયા પરિવસન્તો વા માનત્તારહો વા માનત્તં ચરન્તો વા અબ્ભાનારહો વા હુત્વા કદાચિ અઞ્ઞં સઙ્ઘાદિસેસાપત્તિં આપજ્જિત્વા. છાદેન્તસ્સાતિ પઠમં આપન્નાપત્તિયાપટિચ્છાદિતકાલેન સમં વા ઊનં વા કાલં પટિચ્છાદેન્તસ્સ. ‘‘મૂલાયપટિકસ્સનેન તે પરિવુત્થદિવસે ચ માનત્તચિણ્ણદિવસે ચ સબ્બે ઓધુનિત્વા’’તિ (ચૂળવ. અટ્ઠ. ૧૦૨) અટ્ઠકથાવચનતો એત્થ ‘‘પરિવુત્થે’’તિ ઉપલક્ખણત્તા ‘‘માનત્તચિણ્ણે ચા’’તિ ગહેતબ્બં. ઓધુનિત્વાતિ ચ મૂલાયપટિકસ્સનવસેન મક્ખેત્વા, અદિવસે કત્વાતિ અધિપ્પાયો.

યો યસ્મા પદીયતે, સો પરિવાસો સટ્ઠિવસ્સાનિ પરિવસિત્વા માનત્તારહો હુત્વાપિ અન્તરાપત્તિં આપજ્જિત્વા એકાહમ્પિ પટિચ્છાદિતે મૂલાયપટિકસ્સનેન તે દિવસે સબ્બે મક્ખેત્વા તાનેવ સટ્ઠિવસ્સાનિ પુનપિ યસ્મા પદીયતેતિ અત્થો. યથાહ અટ્ઠકથાયં ‘‘સટ્ઠિવસ્સાનિ પરિવસિત્વા માનત્તારહો હુત્વાપિ હિ એકદિવસં અન્તરાપત્તિં પટિચ્છાદેત્વા પુનપિ સટ્ઠિવસ્સાનિ પરિવાસારહો હોતી’’તિ (ચૂળવ. અટ્ઠ. ૧૦૨).

પુરિમાપત્તિયાતિ તેન આપન્નાસુ સમ્બહુલાસુ આપત્તીસુ સબ્બાપત્તીનં પુરેતરમેવ પટિચ્છન્નાય આપત્તિયા. મૂલદિવસેતિ પઠમં વીતિક્કમદિવસે. વિનિચ્છિતેતિ ‘‘અસુકસંવચ્છરે અસુકમાસે અસુકદિવસે’’તિ નિયમિતે. સમોધાય પક્ખિપિત્વા દાતબ્બોતિ સમ્બન્ધો. વિધાનતો યાચમાનસ્સાતિ વિધાનતો સઙ્ઘેન દાતબ્બોતિ યોજેતબ્બં, સમુચ્ચયક્ખન્ધકે વુત્તેન વિધિના યાચમાનસ્સ તત્થેવ વુત્તવિધિના સઙ્ઘેન દાતબ્બોતિ અત્થો. ‘‘એસો ઓધાનસમોધાનપરિવાસો’’તિ પદચ્છેદો.

૫૨૮-૯. તથા વુચ્ચતીતિ સમ્બન્ધો. તાસં અગ્ઘવસેન હીતિ હિ-સદ્દો હેતુમ્હિ. ‘‘સોતિ તંસદ્દસમ્બન્ધેન ‘‘યો’’તિ લબ્ભતિ. તત્રાયં યોજના – સમ્બહુલા…પે… તાસં અગ્ઘવસેન તતો ઊનપટિચ્છન્નાનં આપત્તીનં સમોધાય યો યસ્મા પદાતબ્બો પરિવાસો, તસ્મા સો યથા અવયવત્થવસેન ‘‘ઓધાનસમોધાનો’’તિ પરિવાસો વુત્તો, તથા ‘‘અગ્ઘસમોધાનો’’તિ વુચ્ચતીતિ.

તત્થ સમ્બહુલાસૂતિ યાસં આપત્તીનં પરિવસિતુકામો, તાસુ સમ્બહુલાસુ આપત્તીસુ, નિદ્ધારણે ભુમ્મં. ‘‘એકા વા’’તિઆદિ નિદ્ધારિયનિદ્દેસો. તાસં આપત્તીનં. અગ્ઘવસેનાતિ ગણનવસેન, રત્તિપરિચ્છેદવસેનાતિ વુત્તં હોતિ. યથાહ અટ્ઠકથાયં ‘‘તાસં રત્તિપરિચ્છેદવસેના’’તિ (ચૂળવ. અટ્ઠ. ૧૦૨). ‘‘પદાતબ્બો’’તિ ઇમિના સમ્બન્ધો. તતોતિ ચિરપટિચ્છન્નાપત્તિતો. ઊનપટિચ્છન્નાનં આપત્તીનન્તિ એત્થ ઉપયોગત્થે સામિવચનં, ઊનપટિચ્છન્નાયો આપત્તિયો સમોધાયાતિ વુત્તં હોતિ.

૫૩૦. નાના સુક્કવિસ્સટ્ઠિઆદીનિ વત્થૂનિ યાસં તા નાનાવત્થુકા, નાનાવત્થુકા સઞ્ઞા યાસં આપત્તીનં તા નાનાવત્થુકસઞ્ઞાયો. સબ્બાતિ એત્થ ‘‘યા’’તિ સેસો, સુક્કવિસ્સટ્ઠિઆદિકુલદૂસનાવસાના યા સબ્બા તેરસ સઙ્ઘાદિસેસા આપત્તિયોતિ અત્થો. તા સબ્બાતિ એત્થ પિ-સદ્દો વત્તબ્બો. દાતબ્બોતિ એત્થ ‘‘પરિવાસો’’તિ આનેત્વા સમ્બન્ધિતબ્બં. તા સબ્બાપિ એકતો કત્વા દાતબ્બો પરિવાસોતિ યોજના. તસ્સ તેરસ સઙ્ઘાદિસેસાપત્તિયોપિ એકતો કત્વાતિ અત્થો. ‘‘અહં ભન્તે સમ્બહુલા સઙ્ઘાદિસેસા આપત્તિયો આપજ્જિં એકં સુક્કવિસ્સટ્ઠિં…પે… એકં કુલદૂસકં, સોહં ભન્તે સઙ્ઘં તાસં આપત્તીનં સમોધાનપરિવાસં યાચામી’’તિ તિક્ખત્તું યાચનાય ચ તદનુરૂપાય ઞત્તિયા ચ કમ્મવાચાસુ ચ નામં વત્વા દાતબ્બપરિવાસો મિસ્સકો મતો ‘‘મિસ્સકસમોધાનપરિવાસો’’તિ ઞાતો. દ્વે, તિસ્સો, ચતસ્સો, અતિરેકા ચ આપન્નસ્સાપિ પરિવાસં દેન્તેન ઇમિના નિયામેન વત્થું, નામં વિસેસેત્વા ગહેતબ્બં.

સમોધાનપરિવાસકથાવણ્ણના.

૫૩૧. પરિવુત્થપરિવાસસ્સાતિ તિવિધે પરિવાસે અઞ્ઞતરસ્સ વસેન પરિવુત્થપરિવાસસ્સ. ઉત્તરિ છ રત્તિયોતિ પરિવાસતો ઉત્તરિ છ રત્તિયો, છ દિવસેતિ વુત્તં હોતિ, ‘‘ચરિતુ’’ન્તિ સેસો, ચરણકિરિયાય અચ્ચન્તસંયોગે ઉપયોગવચનં. માનત્તં દેય્યન્તિ યોજના, ‘‘સઙ્ઘેના’’તિ સામત્થિયા લબ્ભતિ. સમુચ્ચયક્ખન્ધકે વુત્તનયેન યોજેત્વા છારત્તઞ્ચ દાતબ્બો, ભિક્ખુમાનનવિધિ ભિક્ખુસ્સ દાતબ્બોતિ અત્થો.

‘‘પરિવુત્થપરિવાસસ્સા’’તિ ઇમિના પટિચ્છન્નમાનત્તં પકતં, તત્થ પભેદે અસતિ કસ્મા ‘‘પટિચ્છન્નાપટિચ્છન્નવસા દુવે’’તિ વુત્તન્તિ? પકતભેદમનપેક્ખિત્વા છારત્તમાનત્તે લબ્ભમાનવિસયભેદં દસ્સેતું વુત્તં. એવઞ્હિ સતિ સમોધાનમાનત્તે ચ ‘‘છારત્તં માનત્તં દેતૂ’’તિ (ચૂળવ. ૧૨૮) પાળિયં વુત્તત્તા તમ્પિ ગહેત્વા ‘‘તિધા’’તિ કસ્મા ન વુત્તન્તિ? તમ્પિ પટિચ્છન્નાપત્તિયા પરિવુત્થપરિવાસસ્સેવ દાતબ્બમાનત્તન્તિ પટિચ્છન્નમાનત્તવચનેનેવ સઙ્ગહિતત્તા વિસું ન વુત્તં. તેનેવ ચતુબ્બિધે માનત્તે ઇમેહિ દ્વીહિ વિના દસ્સેતબ્બેસુ દ્વીસુ માનત્તેસુ પક્ખમાનત્તમત્તં ‘‘છાદેન્તિયા’’તિઆદિગાથાય દસ્સેત્વા સમોધાનમાનત્તં વિસું ન દસ્સિતન્તિ દટ્ઠબ્બં.

૫૩૪-૬. વિનિદ્દિટ્ઠપ્પકારન્તિ ‘‘પરિક્ખિત્તવિહારસ્સા’’તિઆદિના યથાવુત્તગાથાદ્વયેન નિદ્દિટ્ઠપ્પકારં. આદિયિત્વાન તં તેસન્તિ એત્થ ‘‘સન્તિકે’’તિ વક્ખમાનતો લબ્ભતિ. તેસં ચતુન્નં સમ્મુખા ઉક્કુટિકં નિસીદિત્વા અઞ્જલિં પગ્ગહેત્વા તં વત્તં સમાદિયિત્વાતિ અત્થો. ‘‘તં તેસં સન્તિકે’’તિ ઇદં ‘‘આરોચેત્વા’’તિ ઇમિનાપિ યુજ્જતિ. તેસમેવ સમ્મુખા નિસિન્નેન ‘‘અહં ભન્તે એકં આપત્તિં આપજ્જિં સઞ્ચેતનિકં સુક્કવિસ્સટ્ઠિ’’ન્તિઆદિના નયેન સમુચ્ચયક્ખન્ધકાગતં આરોચનં કત્વા. ઇમિના અન્તોઅરુણે દિટ્ઠાનં અઞ્ઞેસમ્પિ આરોચનં ઉપલક્ખિતં.

નિક્ખિપે સન્તિકે તેસં વત્તન્તિ એત્થ ‘‘અરુણે ઉટ્ઠિતે’’તિ અજ્ઝાહરિતબ્બં. અરુણે ઉગ્ગતે તેસં ભિક્ખૂનં સમ્મુખા યથાવુત્તનયેનેવ નિસીદિત્વા ‘‘વત્તં નિક્ખિપામિ, માનત્તં નિક્ખિપામી’’તિ ઇમેસુ દ્વીસુ એકં વા દ્વયમેવ વા વત્વા વત્તં નિક્ખિપે.

૫૩૭. તસ્સ માનત્તસ્સ. રત્તિચ્છેદાદિકોતિ એત્થ આદિ-સદ્દેન વત્તભેદો ગહિતો. અટ્ઠકથાવસેન પાળિવસેનાતિ યોજના.

૫૩૮. વીસતિયા ભિક્ખૂનં વગ્ગો સમૂહો વીસતિવગ્ગો, સો એવ વીસતિવગ્ગિકો. અબ્ભેય્યાતિ ઓસારેય્ય, અબ્ભન્તરં કરેય્યાતિ અત્થો. વિધિનાતિ સમુચ્ચયક્ખન્ધકાગતક્કમેન. અબ્ભિતોતિ સંવાસેન અન્તો કતો, પકતત્તોતિ પકતિસભાવો, આપત્તિં અનાપન્નકાલસદિસો હોતીતિ અત્થો.

૫૩૯. આપત્તિં છાદેન્તિયા ભિક્ખુનિયાતિ યોજના, ‘‘આપજ્જિત્વા’’તિ સેસો, આપત્તિં આપજ્જિત્વા ‘‘આપત્તિ ચા’’તિઆદિના (વિ. વિ. ૫૦૫) નયેન પુબ્બે દસ્સિતેહિ દસહિ અઙ્ગેહિ પટિચ્છાદેન્તિયા ભિક્ખુનિયા અત્તનો આપત્તિં છાદેન્તિયા ભિક્ખુનિયા. ન ચ આપત્તીતિ એત્થ ‘‘અત્તનો’’તિ ઇમિના અઞ્ઞિસ્સા આપત્તિં પટિચ્છાદેન્તિયા વજ્જપટિચ્છાદિકાસઙ્ખાતપારાજિકાપત્તીતિ દીપિતં હોતિ. ‘‘ભિક્ખુનિયા’’તિ ઇમિના ભિક્ખુસ્સ દુક્કટાપત્તિભાવં દીપેતિ.

૫૪૧. વિરુદ્ધમત્થં નયતિ પજહતીતિ વિનયો, વિનિચ્છયો, તં વિનયપિટકત્થવિનિચ્છયવિસેસવિસયં સમ્મોહસઙ્ખાતં વિરુદ્ધં પચ્ચત્થિકં તદઙ્ગવસેન પજહનતો વિનયનયસઙ્ખાતં તતો એવ અતિબુદ્ધિદીપનં, અતિસયેન બુદ્ધિં દીપેતીતિ અતિબુદ્ધિદીપનં, તં વિનયત્થવિનિચ્છયકં ઞાણપદીપં વિસેસેન જાલેન્તં. વિવિધેહિ નયેહિ યુત્તતાય વિવિધનયયુતં. વિનયનયેતિ વિનયપિટકસ્સ પરસન્તાનપાપને, વિનયવણ્ણનાયન્તિ વુત્તં હોતિ.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

સઙ્ઘાદિસેસકથાવણ્ણના નિટ્ઠિતા.

અનિયતકથાવણ્ણના

૫૪૨-૩. ઇદાનિ સઙ્ઘાદિસેસકથાનન્તરં અનિયતકથં દસ્સેતુમાહ ‘‘રહોનિસજ્જસ્સાદેના’’તિઆદિ. રહસિ નિસજ્જા રહોનિસજ્જા, તસ્સા અસ્સાદો રહોનિસજ્જસ્સાદો, તેન રહોનિસજ્જસ્સાદેન, મેથુનધમ્મસન્નિસ્સિતેન કિલેસેનાતિ અત્થો. વુત્તઞ્હિ અટ્ઠકથાયં ‘‘રહોનિસજ્જસ્સાદોતિ મેથુનધમ્મસન્નિસ્સિતકિલેસો વુચ્ચતી’’તિ (પારા. અટ્ઠ. ૨.૪૫૧). ‘‘રહો નામ ચક્ખુસ્સ રહો સોતસ્સ રહો. ચક્ખુસ્સ રહો નામ ન સક્કા હોતિ અક્ખિં વા નિખણિયમાને ભમુકં વા ઉક્ખિપિયમાને સીસં વા ઉક્ખિપિયમાને પસ્સિતું. સોતસ્સ રહો નામ ન સક્કા હોતિ પકતિકથા સોતુ’’ન્તિ (પારા. ૪૪૫) પદભાજને વુત્તરહેસુ ચક્ખુસ્સ રહો એવ ઇધાધિપ્પેતો. યથાહ અટ્ઠકથાયં ‘‘કિઞ્ચાપિ પાળિયં ‘સોતસ્સ રહો’તિ આગતં, ચક્ખુસ્સ રહેનેવ પન પરિચ્છેદો વેદિતબ્બો’’તિ (પારા. અટ્ઠ. ૨.૪૪૪-૪૪૫).

ચક્ખુસ્સ રહત્તા ‘‘પટિચ્છન્ન’’ન્તિ ઇમમ્પિ પટિચ્છન્નત્તા એવ ‘‘અલંકમ્મનિય’’ન્તિ ઇમમ્પિ સઙ્ગણ્હાતિ. નિસજ્જસદ્દોપાદાનેન ‘‘આસને’’તિ ઇદમ્પિ ગહિતમેવ. ‘‘માતુગામસ્સ સન્તિકં ગન્તુકામો’’તિ ઇમિના ‘‘માતુગામેન સદ્ધિ’’ન્તિ ઇદમ્પિ ગહિતમેવ. એવં સામત્થિયા લબ્ભમાનપદોપાદાનેન યો પન ભિક્ખુ માતુગામેન સદ્ધિં એકો એકાય રહો પટિચ્છન્ને આસને અલંકમ્મનિયે નિસજ્જસ્સાદેનાતિ વુત્તં હોતિ. ચક્ખુસ્સ રહભાવેન કુટ્ટાદિપટિચ્છન્ને તેનેવ મેથુનસેવનકમ્મસ્સ અનુરૂપે આસને તદહુજાતાયપિ મનુસ્સિત્થિયા સહ નિસજ્જસ્સાદરાગેન સમન્નાગતો હુત્વાતિ અત્થો. એત્થ ‘‘માતુગામસ્સા’’તિ તદહુજાતમ્પિ ઇત્થિં ગણ્હાતીતિ કુતો લબ્ભતીતિ? ‘‘માતુગામો નામ મનુસ્સિત્થી, ન યક્ખી, ન પેતી, ન તિરચ્છાનગતા, અન્તમસો તદહુજાતાપિ દારિકા, પગેવ મહત્તરી’’તિ (પારા. ૪૪૫) પદભાજનતો લબ્ભતિ.

‘‘નિવાસેતી’’તિ ઇમિના ‘‘કાયબન્ધનં બન્ધતિ, ચીવરં પારુપતી’’તિ ઇદં લક્ખીયતિ. સબ્બત્થાતિ યથાવુત્તં પયોગતો પુબ્બાપરપયોગે સઙ્ગણ્હાતિ. તેનેવ ‘‘પયોગે ચ પયોગે ચા’’તિ વિચ્છાપયોગો કતો. નિસીદતો ચસ્સ દુક્કટન્તિ યોજના. ‘‘ઉભિન્નમ્પિ નિસજ્જાય પાચિત્તિય’’ન્તિ વક્ખમાનત્તા દુક્કટં સન્ધાય એકકસ્સ નિસીદતોતિ ગહેતબ્બં.

૫૪૪. નિસજ્જાય ઉભિન્નમ્પીતિ એત્થ ‘‘સકિ’’ન્તિ સેસો, ઉભિન્નં નિસજ્જાપૂરણવસેન અઞ્ઞમઞ્ઞસ્સ પુરે વા પચ્છા વા એકક્ખણે વા માતુગામસ્સ વા ભિક્ખુસ્સ વા એકવારં નિસજ્જાયાતિ વુત્તં હોતિ. વુત્તઞ્હેતં પાળિયં ‘‘માતુગામે નિસિન્ને ભિક્ખુ ઉપનિસિન્નો વા હોતી’’તિઆદિ (પારા. ૪૪૫). હોતિ પાચિત્તિયન્તિ યોજના. પયોગગણનાય ચ હોન્તિ પાચિત્તિયાનીતિ ગહેતબ્બં, માતુગામસ્સ વા ભિક્ખુનો વા ઉભિન્નં વા ઉટ્ઠાયુટ્ઠાય પુનપ્પુનં ઉપનિસીદનપયોગગણનાય ચાતિ અત્થો. ‘‘આપત્તીહિપિ તીહિપી’’તિ વક્ખમાનત્તા પાચિત્તિયગ્ગહણં પારાજિકસઙ્ઘાદિસેસાનં ઉપલક્ખણં હોતિ, તીસુ એકં હોતીતિ વુત્તં હોતિ. એત્થ ‘‘પયોગગણનાયા’’તિ ઇદં પારાજિકાય ન લબ્ભતિ એકપયોગેનેવ સિજ્ઝનતો. કાયસંસગ્ગસઙ્ઘાદિસેસો, પન સરીરતો પુનપ્પુનં વિયુજ્જિત્વા ફુસનેન પાચિત્તિયઞ્ચ યથાવુત્તનયેનેવ લબ્ભતિ.

બહૂસુપિ માતુગામેસુ બહુકાનિ પાચિત્તિયાનિ હોન્તીતિ યોજના. બહૂસુ માતુગામેસુ નિસિન્નેસુ નિસિન્નાનં ગણનાય એકેનેવ પયોગેન બહૂનિ પાચિત્તિયાનિ ચ સઙ્ઘાદિસેસા ચ હોન્તિ. ‘‘પયોગગણનાય ચા’’તિ ઇમસ્સ એત્થાપિ યુજ્જમાનત્તા તાસુ વિસું વિસું ઉટ્ઠાયુટ્ઠાય પુનપ્પુનં નિસીદન્તીસુ, સયઞ્ચ ઉટ્ઠાયુટ્ઠાય પુનપ્પુનં નિસીદતો તાસં ગણનાય આપજ્જિતબ્બાપત્તિયો પયોગગણનાય ચ બહૂ હોન્તીતિ ઇદં લબ્ભતિ. એત્થાપિ પન પારાજિકં ન લબ્ભતિ, સઙ્ઘાદિસેસો, પાચિત્તિયઞ્ચ લબ્ભતિ.

૫૪૫. સમીપે ઠિતોપિ અન્ધો અનાપત્તિં ન કરોતીતિ સોતસ્સ રહભાવે અસતિપિ પધાનભૂતસ્સ ‘‘ચક્ખુસ્સ રહો’’તિ ઇમસ્સ અઙ્ગસ્સ વિજ્જમાનત્તા વુત્તં ‘‘અન્તોદ્વાદસહત્થકે’’તિ, ઇમિના સવનૂપચારે વિજ્જમાનેપીતિ વુત્તં હોતિ. ઇત્થીનં તુ સતમ્પિ ચ ન કરોતિ અનાપત્તિન્તિ યોજના, વિઞ્ઞુનો પુરિસસ્સ અસન્નિહિતભાવેનાતિ અધિપ્પાયો. ‘‘ઇત્થીનમ્પિ સતમ્પિ ચા’’તિ લિખન્તિ, તતોપિ અયમેવ પાઠો સુન્દરો. પિ-સદ્દો વા તુ-સદ્દત્થે દટ્ઠબ્બો.

૫૪૬. નિપજ્જિત્વાતિ એત્થ ‘‘સમીપે’’તિ સેસો, ‘‘નિદ્દાયન્તોપી’’તિ એતસ્સ વિસેસકેન ‘‘નિપજ્જિત્વા’’તિ ઇમિના નિસીદિત્વા નિદ્દાયન્તોતિ ઇમસ્સ નિવત્તિતત્તા સમીપે નિસીદિત્વા નિદ્દાયન્તોપિ અનન્ધો મનુસ્સપુરિસો અનાપત્તિં કરોતીતિ લબ્ભતિ. ‘‘કેવલ’’ન્તિ વિસેસનેન બલવનિદ્દૂપગતો ગહિતોતિ તથા અહુત્વા અન્તરન્તરા આપન્નાપન્ને વિનિચ્છિનિત્વા પવત્તમાનાય કપિનિદ્દાય નિદ્દાયન્તોપિ અનાપત્તિં કરોતીતિ અયમત્થો લબ્ભતિ. ‘‘પિહિતદ્વારગબ્ભસ્સા’’તિ વત્તબ્બે મજ્ઝપદલોપીસમાસવસેન ‘‘પિહિતગબ્ભસ્સા’’તિ વુત્તં. ‘‘દ્વારે’’તિ ઇમિના દ્વારેકદેસભૂતં ઉમ્મારં વા તંસમીપં વા ઉપચારેન વુત્તન્તિ દટ્ઠબ્બં. સચે ગબ્ભો પિહિતદ્વારો ન હોતિ, અનાપત્તીતિ બ્યતિરેકતો દસ્સિતં.

૫૪૭. ઇમસ્મિં અનિયતસિક્ખાપદે પાળિયં અનાપત્તિવારે અસતિપિ ‘‘યો પન ભિક્ખુ માતુગામેન સદ્ધિં રહો પટિચ્છન્ને આસને નિસજ્જં કપ્પેય્ય, પાચિત્તિય’’ન્તિ (પાચિ. ૨૮૫) પઞ્ચમસ્સ અચેલકવગ્ગસ્સ ચતુત્થસિક્ખાપદે અનાપત્તિવારે ‘‘અનાપત્તિ યો કોચિ વિઞ્ઞૂ પુરિસો દુતિયો હોતિ, તિટ્ઠતિ ન નિસીદતિ, અરહોપેક્ખો, અઞ્ઞવિહિતો નિસીદતિ, ઉમ્મત્તકસ્સ આદિકમ્મિકસ્સા’’તિ (પાચિ. ૨૮૮) વુત્તે અનાપત્તિવારે સઙ્ગહેતુમાહ ‘‘અનન્ધે સતી’’તિઆદિ. ‘‘એતસ્સ સમીપે’’તિ પકરણતો લબ્ભતિ. ઇધ પુલ્લિઙ્ગનિદ્દેસેન પુરિસો લબ્ભતિ, ‘‘તેનાપિ અબાલેન ભવિતબ્બં, મનુસ્સજાતિકેન ભવિતબ્બ’’ન્તિ ઇદઞ્ચ ‘‘વિઞ્ઞુસ્મિ’’ન્તિ ઇમિના લબ્ભતિ. અન્ધસદિસનિદ્દૂપગતપટિપક્ખવાચિઅનન્ધપદેન ‘‘અનિદ્દાયન્તે’’તિ લબ્ભતિ, મનાપામનાપં જાનન્તે અનિદ્દાયન્તે મનુસ્સપુરિસે દસ્સનૂપચારસ્સ અન્તો વિજ્જમાનેતિ અત્થો.

‘‘નિસજ્જપચ્ચયા દોસો નત્થી’’તિ ઇમિના સમ્બન્ધો, એવરૂપે રહો આસને માતુગામેન સદ્ધિં નિસિન્નપચ્ચયા આપત્તિ નત્થીતિ અત્થો. ‘‘ઠિતસ્સા’’તિ ઇમિનાપિ તદેવ પદં યોજેતબ્બં. વિઞ્ઞુમ્હિ પટિબલે મનુસ્સપુરિસે અસન્નિહિતેપિ તથાવિધે રહો આસને માતુગામે આસને નિસિન્નેપિ સયાનેપિ ઠિતેપિ સયં ઠિતસ્સ નિસજ્જાય અભાવા તપ્પચ્ચયા આપત્તિ ન હોતીતિ અત્થો. અરહસઞ્ઞિનો નિસજ્જપચ્ચયા દોસો નત્થીતિ રહો આસને માતુગામેન સદ્ધિં નિસજ્જન્તસ્સાપિ ‘‘રહો’’તિ સઞ્ઞારહિતસ્સ નિસીદતો નિસજ્જપચ્ચયા અનાપત્તીતિ અત્થો. વિક્ખિત્તચેતસો નિસજ્જપચ્ચયા દોસો નત્થીતિ યોજના.

૫૪૮. એત્તાવતા પાચિત્તિયાપત્તિમત્તતો અનાપત્તિપ્પકારં દસ્સેત્વા ઇદાનિ ઇમસ્સ સિક્ખાપદસ્સ અનિયતવોહારહેતુભૂતાહિ તીહિ આપત્તીહિ અનાપત્તિપકારં દસ્સેતુમાહ ‘‘ન દોસો’’તિઆદિ. આપત્તીહિપિ તીહિપીતિ ‘‘નિસજ્જં ભિક્ખુ પટિજાનમાનો તિણ્ણં ધમ્માનં અઞ્ઞતરેન કારેતબ્બો પારાજિકેન વા સઙ્ઘાદિસેસેન વા પાચિત્તિયેન વા’’તિ (પારા. ૪૪૪) પાળિયં વુત્તાહિ ‘‘પઠમપારાજિકાપત્તિકાયસંસગ્ગસઙ્ઘાદિસેસાપત્તિપાચિત્તિયાપત્તી’’તિ ઇમાહિ તીહિપિ આપત્તીહીતિ વુત્તં હોતીતિ.

પઠમાનિયતકથાવણ્ણના.

૫૪૯. વત્તબ્બભાવેનાધિકતદુતિયાનિયતવિનિચ્છયતો પઠમાનિયતે વુત્તવિનિચ્છયેહિ સમં વિનિચ્છયં પહાય તત્થ અવુત્તં ઇમસ્સેવ વિનિચ્છયવિસેસં દસ્સેતુમાહ ‘‘અનન્ધા’’તિઆદિ. ઇધ દુટ્ઠુલ્લવાચાસઙ્ઘાદિસેસસ્સાપિ ગહિતત્તા તતો અનાપત્તિકરં દસ્સેતું ‘‘અબધિરો’’તિ વુત્તં. અનન્ધો અબધિરોતિ ‘‘પુરિસો’’તિ ઇદં સન્ધાય વુત્તં. ‘‘ઇત્થી’’તિ ઇદં સન્ધાય ‘‘અનન્ધાબધિરા’’તિ ગહેતબ્બં. એવમુપરિપિ. તેનાપિ સવનૂપચારન્તોગધેન ભવિતબ્બન્તિ દસ્સેતું ‘‘અન્તોદ્વાદસહત્થટ્ઠો’’તિ વુત્તં.

૫૫૦. ‘‘અન્ધો અબધિરો અનાપત્તિં ન કરોતી’’તિ ઇદં કાયસંસગ્ગસઙ્ઘાદિસેસં સન્ધાય વુત્તં. ‘‘બધિરો વાપિ ચક્ખુમા, ન કરોતિ અનાપત્તિ’’ન્તિ ઇદં પન દુટ્ઠુલ્લવાચાસઙ્ઘાદિસેસં સન્ધાય વુત્તન્તિ એવમેત્થ સન્ધાય ભાસિતત્થો વેદિતબ્બો.

પુરિમાનિયતકથાય અવુત્તવિસેસસ્સ દુતિયાનિયતકથાય વત્તુમિચ્છિતત્તા અયમ્પિ વિસેસો ઇધ વત્તબ્બો. કોયં વિસેસો, યો ઇધ વત્તબ્બોતિ ચે? તત્થ ‘‘પટિચ્છન્ને આસને અલંકમ્મનિયે’’તિ (પારા. ૪૪૪) વુત્તં આસનઙ્ગદ્વયં ઇધ ‘‘ન હેવ ખો પન પટિચ્છન્નં આસનં હોતિ નાલંકમ્મનિય’’ન્તિ (પારા. ૪૫૩) નિસેધેત્વા ‘‘અલઞ્ચ ખો હોતિ માતુગામં દુટ્ઠુલ્લાહિ વાચાહિ ઓભાસિતુ’’ન્તિ (પારા. ૪૫૩) ઇદં અપુબ્બઙ્ગં વુત્તં. તત્ર માતુગામોતિ અન્તમસો તદહુજાતાપિ દારિકા ગહિતા, ઇધ ‘‘માતુગામો નામ મનુસ્સિત્થી, ન યક્ખી, ન પેતી, ન તિરચ્છાનગતા, વિઞ્ઞૂ પટિબલા સુભાસિતદુબ્ભાસિતં દુટ્ઠુલ્લાદુટ્ઠુલ્લં આજાનિતુ’’ન્તિ (પારા. ૪૫૪) વિઞ્ઞૂ પટિબલો માતુગામોવ વુત્તો. તત્થ ‘‘પારાજિકેન વા સઙ્ઘાદિસેસેન વા પાચિત્તિયેન વા’’તિ (પારા. ૪૪૪) તિસ્સો આપત્તિયો વુત્તા, ઇધ ‘‘નિસજ્જં ભિક્ખુ પટિજાનમાનો દ્વિન્નં ધમ્માનં અઞ્ઞતરેન કારેતબ્બો સઙ્ઘાદિસેસેન વા પાચિત્તિયેન વા’’તિ (પારા. ૪૫૩) દ્વેયેવ આપત્તિયો વુત્તા. સઙ્ઘાદિસેસેસુ ચ તત્થ ‘‘સા ચે એવં વદેય્ય ‘અય્યો મયા દિટ્ઠો નિસિન્નો માતુગામેન સદ્ધિં કાયસંસગ્ગં સમાપજ્જન્તો’તિ, સો ચ તં પટિજાનાતિ, આપત્તિયા કારેતબ્બો’’તિ (પારા. ૪૪૮) કાયસંસગ્ગસઙ્ઘાદિસેસોવ વુત્તો, ઇધ સો ચ વુત્તો, ‘‘સા ચે એવં વદેય્ય ‘અય્યસ્સ મયા સુતં નિસિન્નસ્સ માતુગામં દુટ્ઠુલ્લાહિ વાચાહિ ઓભાસેન્તસ્સા’તિ, સો ચ તં પટિજાનાતિ, આપત્તિયા કારેતબ્બો’’તિ (પારા. ૪૫૫) દુટ્ઠુલ્લવાચાસઙ્ઘાદિસેસો ચ વુત્તો. એત્તકો ઉભિન્નમનિયતાનં વિસેસો.

અયં કસ્મા ન વુત્તોતિ? અયં સમ્બોધવત્થુવિસેસો વત્તુમિચ્છિતો પન અટ્ઠકથાગતવિનિચ્છયવિસેસતોતિ તસ્મા ન વુત્તોતિ દટ્ઠબ્બો. તિસમુટ્ઠાનમેવિદં કાયચિત્તવાચાચિત્તકાયવાચાચિત્તવસેન તીણિ સમુટ્ઠાનાનિ એતસ્સાતિ કત્વા.

ઇમેહિપિ દ્વીહિ અનિયતસિક્ખાપદેહિ સિક્ખાપદન્તરેસુ પઞ્ઞત્તાયેવ આપત્તિયો, અનાપત્તિયો ચ દસ્સિતા, ન કોચિ આપત્તિવિસેસો વુત્તો, તસ્મા કિમેતેસં વચનેનાતિ? વુચ્ચતે – વિનયવિનિચ્છયલક્ખણં ઠપેતું ભગવતા ઉપ્પન્ને વત્થુમ્હિ દ્વે અનિયતા પઞ્ઞત્તા. કથં? એવરૂપાયપિ સદ્ધેય્યવચનાય ઉપાસિકાય વુચ્ચમાનો પટિજાનમાનોવ આપત્તિયા કારેતબ્બો, ન અપ્પટિજાનમાનો, તસ્મા ‘‘યાય કાયચિ આપત્તિયા યેન કેનચિ ચોદિતે પટિઞ્ઞાતકરણંયેવઙ્ગં કાતબ્બ’’ન્તિ ઇમેહિ સિક્ખાપદેહિ વિનિચ્છયલક્ખણં ઠપિતન્તિ વેદિતબ્બં. અથ કસ્મા ભિક્ખુનીનં અનિયતં ન વુત્તન્તિ? ઇદમેવ લક્ખણં સબ્બત્થ અનુગતન્તિ ન વુત્તં.

દુતિયાનિયતકથાવણ્ણના.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

અનિયતકથાવણ્ણના નિટ્ઠિતા.

નિસ્સગ્ગિયકથાવણ્ણના

૫૫૧. એવં અનિયતકથં દસ્સેત્વા ઇદાનિ નિસ્સગ્ગિયકથં દસ્સેતુમાહ ‘‘ખોમ’’ન્તિઆદિ. ખોમન્તિ એવંનામકં ચીવરં. ખોમન્તિ ગચ્છવિસેસસ્સ નામં, તસ્સ વાકેહિ કતચીવરં કારણોપચારવોહારવસેન ‘‘ખોમ’’ન્તિ વુત્તં. કપ્પાસન્તિ કપ્પાસસુત્તમયં ચીવરં, ઇદમ્પિ વુત્તનયેનેવ ‘‘કપ્પાસ’’ન્તિ વુચ્ચતિ. કોસેય્યં નામ કોસકારકિમિકોસં, કોસેન નિબ્બત્તં સુત્તં કોસેય્યં. ઇધ પન તેન કોસેય્યસુત્તેન નિબ્બત્તં ચીવરં ‘‘કોસેય્ય’’ન્તિ વુત્તં. સાણન્તિ સાણવાકસુત્તેહિ વાયિત્વા કતચીવરં. ઇદઞ્ચ ખોમં વિય દટ્ઠબ્બં. ભઙ્ગન્તિ ખોમસુત્તાદીનિ સબ્બાનિ, એકચ્ચાનિ વા મિસ્સેત્વા કતચીવરં. ઇદમ્પિ કરણપ્પકારેન લદ્ધનામકં. ‘‘ભઙ્ગં નામ એકા ગચ્છજાતિ, તસ્સા વાકમયસુત્તેહિ વાયિત્વા કતચીવર’’ન્તિ કેચિ. ઇમસ્મિં પક્ખે ખોમં વિય ગહેતબ્બં. કમ્બલન્તિ મનુસ્સલોમવાળલોમં વિના સેસલોમેહિ વાયિત્વા કતચીવરં વુત્તન્તિ. ઇદં ‘‘ચીવરં નામ છન્નં ચીવરાનં અઞ્ઞતરં ચીવર’’ન્તિ (પારા. ૪૬૩) પદભાજને ચ ‘‘ખોમં કપ્પાસિકં કોસેય્યં કમ્બલં સાણં ભઙ્ગ’’ન્તિ (પારા. અટ્ઠ. ૨.૪૬૨-૪૬૩) અટ્ઠકથાય ચ વુત્તં સન્ધાયાહ. ‘‘જાતિતો’’તિ ઇદં પમાણાદિભેદસ્સ વક્ખમાનત્તા વુત્તં. જાતિતોતિ ખોમાદિસામઞ્ઞતો. સામઞ્ઞઞ્હિ ‘‘જાતી’’તિ વુચ્ચતિ. દીઘરસ્સથૂલસુખુમનીલપીતાદિભેદભિન્નાનં સબ્બેસં વત્થાવયવાનં સઙ્ગાહિકખોમસુત્તમયતાસામઞ્ઞં જાતીતિ વુત્તં હોતિ. એવં સેસેસુપિ.

૫૫૨. દુકૂલન્તિ એવંનામકં રુક્ખવાકમયચીવરં. પત્તુણ્ણન્તિ પત્તુણ્ણદેસે સઞ્જાતવત્થં. ‘‘પત્તુણ્ણં કોસેય્યવિસેસો’’તિ અભિધાનકોસે વુત્તં. ચિનન્તિ ચિનદેસે ઉપ્પન્નવત્થં. સોમારપટ્ટકન્તિ સોમારદેસે ઉપ્પન્નવત્થં. ‘‘સોમારચિનપટક’’ન્તિપિ લિખન્તિ, સોયેવત્થો. ઇદ્ધિજન્તિ એહિભિક્ખૂનં પુઞ્ઞિદ્ધિયા નિબ્બત્તં ચીવરં. દેવદિન્નન્તિ દેવતાહિ દિન્નં ચીવરં. તઞ્હિ કપ્પરુક્ખે નિબ્બત્તં, જાલિનિયા દેવકઞ્ઞાય અનુરુદ્ધત્થેરસ્સ દિન્નવત્થસદિસં. તસ્સાતિ જાતિતો છબ્બિધસ્સ કપ્પિયચીવરસ્સ. ઇદં છબ્બિધચીવરં યથારહં અનુલોમિકં વુત્તન્તિ અત્થો. દુકૂલઞ્હિ સાણસ્સ અનુલોમં વાકમયત્તા, પત્તુણ્ણાદીનિ કોસેય્યસ્સ અનુલોમાનિ પાણકેહિ કતસુત્તમયત્તા, ઇદ્ધિજમ્પિ ખોમાદીનંયેવ અઞ્ઞતરં હોતીતિ તેસં અનુલોમં, દેવદિન્નમ્પિ ખોમાદીનંયેવ અનુલોમં હોતિ તેસં અઞ્ઞતરભાવતો. યથાહ –

‘‘સાણસ્સ તુ દુકૂલઞ્હિ, ઇદ્ધિજં દેવદિન્નકં;

ખોમાદીનંવસિટ્ઠંતુ, કોસેય્યસ્સાનુલોમિક’’ન્તિ.

૫૫૩. તિણ્ણં ચીવરાનં સમાહારો તિચીવરન્તિ પમાણયુત્તં સઙ્ઘાટિઆદિનામેન અધિટ્ઠિતચીવરસ્સેવ નામત્તા તદેવ વુચ્ચતિ. ગણનવસેન યં કિઞ્ચિ ચીવરત્તયં ન વત્તબ્બં. સમુદ્દેકદેસોપિ યથા ‘‘સમુદ્દો’’તિ વુચ્ચતિ, એવં અધિટ્ઠિતેસુ તીસુ ચીવરેસુ અઞ્ઞતરં ‘‘તિચીવર’’ન્તિ વુચ્ચતિ. પરિક્ખારચોળન્તિ સઙ્ઘાટિઆદિવિસિટ્ઠનામેહિ અનધિટ્ઠિતં ‘‘અનુજાનામિ ભિક્ખવે આયામેન અટ્ઠઙ્ગુલં સુગતઙ્ગુલેન ચતુરઙ્ગુલવિત્થતં પચ્છિમં ચીવર’’ન્તિ (પારા. ૩૫૮) અનુઞ્ઞાતં પચ્છિમચીવરપરિયન્તં કત્વા કતાકતસ્સ યસ્સ કસ્સચિ ચીવરસ્સ રુળ્હિસઞ્ઞા.

મુખં સન્દમાનલાલં પુઞ્છતિ એતેનાતિ મુખપુઞ્છનન્તિ કપોલતો નિચ્ચં સન્દમાનલાલાનં પુઞ્છનત્થાય અનુઞ્ઞાતસ્સ ચીવરવિસેસસ્સ નામં. નિસીદન્તિ એત્થાતિ નિસીદનન્તિ ચ ભિક્ખૂનં અત્થરિત્વા નિસીદિતું અનુઞ્ઞાતસ્સ ચીવરસ્સ નામં. અધિટ્ઠેય્યાતિ ‘‘ઇમં કણ્ડુપ્પટિચ્છાદિ’’ન્તિઆદિના (વિ. વિ. ૫૮૫) વક્ખમાનનયેન નામં ગહેત્વા અધિટ્ઠેય્યાતિ અત્થો. પચ્ચત્થરણમેવ ચાતિ સઙ્ઘિકે મઞ્ચપીઠે સરીરસમ્ફુસનેન આપજ્જિતબ્બાય આપત્તિયા મોચનત્થાય તત્થ અત્થરિત્વા પરિભોગત્થાય અનુઞ્ઞાતં પચ્ચત્થરણચીવરઞ્ચ.

૫૫૪. એકાહન્તિ વસનકિરિયાય અચ્ચન્તસંયોગે ઉપયોગવચનં. તિચીવરન્તિ તિચીવરેન. વિપ્પવસેય્યાતિ ‘‘સઙ્ઘાટિયા વા ઉત્તરાસઙ્ગેન વા અન્તરવાસકેન વા’’તિ (પારા. ૪૭૬) વુત્તત્તા એકદેસે સમુદાયોપચારવસેન અવયવસ્સ વચનતો તિણ્ણં ચીવરાનં અઞ્ઞતરેનાતિપિ વુત્તં હોતિ. ‘‘તથા’’તિ ઇમિના ‘‘વિના’’તિ ઇદં પચ્ચામસતિ. અધિટ્ઠાતિ અધિટ્ઠાયાતિ ગહેતબ્બં ‘‘પટિસઙ્ખા યોનિસો’’તિ (મ. નિ. ૧.૨૨, ૨૩; અ. નિ. ૬.૫૮) યથા, એત્થ ‘‘વળઞ્જિયમાન’’ન્તિ સેસો, અધિટ્ઠાય વળઞ્જિયમાનં નિસીદનં તથા વિના ચતુમાસં ન વસેય્યાતિ યોજના.

૫૫૫. કપ્પિયન્તિ કપ્પિયકારણં નીલાદિવણ્ણભેદકરણં. કપ્પિયન્તિ ચ કારણે કારિયૂપચારેન ગહેતબ્બં. બિન્દું દત્વાતિ ‘‘નીલં વા કદ્દમં વા કાળસામં વા’’તિ (પાચિ. ૩૬૮) વુત્તલોહમલાદિના યેન કેનચિપિ મઙ્ગુલપિટ્ઠિપ્પમાણાદિકં બિન્દું દત્વા. તત્થાતિ તેસુ અધિટ્ઠાતબ્બેસુ તિચીવરાદીસુ, નિદ્ધારણે ભુમ્મં. તિચીવરન્તિ નિદ્ધારિતબ્બં. ઉપપન્નન્તિ યુત્તં. પમાણેનાતિ અનન્તરં વક્ખમાનેન પમાણેન. અધિટ્ઠાતબ્બન્તિ ‘‘ઇમં સઙ્ઘાટિં અધિટ્ઠામી’’તિઆદિના વક્ખમાનનયેન નામં વત્વા અધિટ્ઠાતબ્બં. એવકારેન પન નામં વત્વા ન વિકપ્પેતબ્બન્તિ દસ્સેતિ. એસ નયો સેસચીવરેસુપિ. વુત્તઞ્હેતં ભગવતા ‘‘અનુજાનામિ ભિક્ખવે તિચીવરં અધિટ્ઠાતું, ન વિકપ્પેતુ’’ન્તિઆદિ (મહાવ. ૩૫૮). તસ્મા તિચીવરાદીનિ અધિટ્ઠહન્તેન ‘‘ઇમં સઙ્ઘાટિં અધિટ્ઠામી’’તિઆદિના નામં વત્વા અધિટ્ઠાતબ્બં. વિકપ્પેન્તેન પન ‘‘ઇમં સઙ્ઘાટિ’’ન્તિઆદિના તસ્સ ચીવરસ્સ નામં અગ્ગહેત્વા ‘‘ઇમં ચીવરં તુય્હં વિકપ્પેમી’’તિ વિકપ્પેતબ્બં. તિચીવરં વા હોતુ અઞ્ઞં વા, યદિ તં તં નામં ગહેત્વા વિકપ્પેતિ, અવિકપ્પિતં હોતિ અતિરેકચીવરટ્ઠાને તિટ્ઠતિ. તં ચીવરન્તિ સમ્બન્ધો.

૫૫૬-૭. ‘‘ઉપપન્નં પમાણેના’’તિ એત્થ વુત્તપ્પમાણં દસ્સેતુમાહ ‘‘પચ્છિમન્તેના’’તિઆદિ. સઙ્ઘટિતટ્ઠેન સઙ્ઘાટિ. વત્થખણ્ડાનિ સિબ્બનકમ્મેન સઙ્ઘટેત્વા કતત્તા ‘‘સઙ્ઘાટી’’તિ ચીવરાનં સામઞ્ઞનામં. ઇધ પન રુળ્હિયા અન્તરવાસકાદિવિસેસનામબ્યતિરિત્તે ચીવરવિસેસે વત્તતિ. મુટ્ઠિપઞ્ચકાતિ એત્થ એકાદીનમટ્ઠારસન્તાનં સઙ્ખ્યાસદ્દાનં સઙ્ખ્યેય્યે વત્તમાનત્તા પઞ્ચસદ્દો ચીવરપ્પમાણપ્પકરણતો લબ્ભમાનહત્થસઙ્ખાતરતનેયેવ પવત્તતિ, તેનેવ મુટ્ઠિસદ્દોપિ ઉત્તરપદલોપેન મુટ્ઠિરતને વત્તતિ. પઞ્ચન્નં પૂરણો પઞ્ચમો, મુટ્ઠિયા પઞ્ચમો મુટ્ઠિપઞ્ચમો. મુટ્ઠિપઞ્ચમો પરિમાણમેતિસ્સાતિ ‘‘મુટ્ઠિપઞ્ચમકા’’તિ વત્તબ્બે મ-કારલોપેન ‘‘મુટ્ઠિપઞ્ચકા’’તિ સઙ્ઘાટિ વુત્તા.

મુટ્ઠિત્તિકાતિ એત્થ વુત્તનયેન સઙ્ખ્યેય્યે વત્તમાનો તિ-સદ્દો ચીવરપ્પમાણપ્પકરણતો લબ્ભમાનહત્થસઙ્ખાતરતનેયેવ વત્તતિ, તેનેવ મુટ્ઠિસદ્દોપિ ઉત્તરપદલોપેન મુટ્ઠિરતને વત્તતિ. તિણ્ણં પૂરણો તતિયો, મુટ્ઠિયા તતિયો મુટ્ઠિતતિયો, મુટ્ઠિતતિયો પરિમાણમેતિસ્સાતિ ‘‘મુટ્ઠિતતિયકા’’તિ વત્તબ્બે તિય-પચ્ચયલોપેન ‘‘મુટ્ઠિત્તિકા’’તિ સઙ્ઘાટિયેવ વુચ્ચતિ. એવમુપરિપિ. તિરિયન્તિ તિરિયતો.

ઉત્તમન્તેનાતિ ઉક્કટ્ઠપરિમાણન્તેન. સત્થુનો ચીવરૂનાપીતિ ‘‘તત્રિદં સુગતસ્સ સુગતચીવરપ્પમાણં, દીઘસો નવ વિદત્થિયો સુગતવિદત્થિયા, તિરિયં છ વિદત્થિયો’’તિ (પાચિ. ૫૪૮) વુત્તપ્પમાણસુગતચીવરતો ઊનાપિ. પિ-સદ્દો સમ્ભાવને, ઉક્કટ્ઠપરિચ્છેદેન તત્તકમ્પિ વટ્ટતિ, તતો ચે ઊનં વત્તબ્બમેવ નત્થીતિ અત્થો. અન્તદ્વયસન્દસ્સનેન ઉભયમજ્ઝે યં પહોનકરુચ્ચનકપ્પમાણં, તં ગહેતબ્બન્તિ દસ્સેતિ.

૫૫૮. મુટ્ઠિપઞ્ચકસદ્દો પુબ્બે વુત્તનયેનિધ દીઘન્તે વત્તતિ. મુટ્ઠિપઞ્ચકો દીઘન્તો યસ્સ, યસ્મિં વા પમાણેતિ વિગ્ગહો, દીઘન્તતો મુટ્ઠિપઞ્ચકપ્પમાણેનાતિ વુત્તં હોતિ. ‘‘મુટ્ઠિપઞ્ચમ’’ન્તિપિ લિખન્તિ. તિરિયન્તતોતિ વિત્થારન્તતો. અડ્ઢહત્થો અડ્ઢો ઉત્તરપદલોપેન, સો તેય્યો તતિયો યસ્સ પમાણસ્સાતિ ગહેતબ્બં, તં, અડ્ઢતેય્યરતનપ્પમાણં હોતીતિ અત્થો. દ્વિહત્થં વાતિ દ્વે હત્થા યસ્સ પમાણસ્સાતિ વિગ્ગહો, દ્વિરતનપ્પમાણં વા હોતીતિ અત્થો. ઇદઞ્ચ ‘‘તિરિયં દ્વિહત્થોપિ વટ્ટતિ. પારુપનેનપિ હિ સક્કા નાભિં પટિચ્છાદેતુ’’ન્તિ (પારા. અટ્ઠ. ૨.૪૬૯) અટ્ઠકથાગતત્તા વુત્તં. ‘‘સેસે અન્તરવાસકે’’તિ ઇદં યથાવુત્તપરિમાણેન પરિમિતચીવરનિદસ્સનં.

૫૫૯. અહતાહતકપ્પાનન્તિ એત્થ ‘‘વત્થાન’’ન્તિ સેસો. અહતાનં વત્થાનન્તિ નવવત્થાનં. અહતતો કિઞ્ચિ ઊનાનિ અહતકપ્પાનિ, તેસં નવવોહારૂપગાનં કતિપયધોતાનં વત્થાનન્તિ વુત્તં હોતિ. સઙ્ઘાટીતિ સઙ્ઘાટિનામકચીવરં. દિગુણાતિ દુપટ્ટકતા.

૫૬૦. ઉતુદ્ધટાનન્તિ અતિક્કન્તદિવસાનં, બહુકાલં નિવાસેત્વા પરિચ્ચત્તાનન્તિ વુત્તં હોતિ. અથ વા યાનિ ઉતુતો ઉદ્ધટાનિ, તેસં વત્થાનન્તિ ગહેતબ્બં, તિણ્ણં ઉતૂનમઞ્ઞતરં અતિક્કમિત્વા ઠિતાનં પુરાણવત્થાનન્તિ વુત્તં હોતિ. ચીવરાનન્તિ ચીવરત્થાનિ વત્થાનેવ ગહિતાનિ. ચતુગ્ગુણાતિ ચતુપટ્ટા. સેસા દુવેતિ અન્તરવાસકઉત્તરાસઙ્ગા દ્વે. યથાસુખન્તિ યથારુચિ. પંસુકૂલન્તિ સુસાનાદીસુ પતિતપિલોતિકચીવરં.

૫૬૧. ‘‘તીણિપી’’તિઆદીસુ ‘‘તિચીવરે કયિરમાને સબ્બં છિન્નકં નપ્પહોતી’’તિ પાળિયં આગતવત્થુમ્હિ ‘‘અનુજાનામિ ભિક્ખવે દ્વે છિન્નકાનિ એકં અછિન્નક’’ન્તિ (મહાવ. ૩૬૦) આદિવચનતો ‘‘ચીવર’’ન્તિ સેસો. છિન્દિતબ્બન્તિ વત્થાનિ છિન્દિત્વા સિબ્બેત્વા કાતબ્બં. પહોતિ ચેતિ વત્થાનિ છિન્દિત્વા કરણે યદિ ચીવરસ્સ પહોતિ. સબ્બેસૂતિ તીસુ ચીવરેસુ. અપ્પહોન્તેસૂતિ વત્થાનં છિન્દિત્વા સિબ્બનેન અપ્પહોન્તેસુ. અન્વાધિકન્તિ વત્થે ઊનાતિરેકં અપનેત્વા આગન્તુકપત્તસઙ્ખાતં અનુવાતં ચીવરસ્સ પરિયન્તે, મજ્ઝે ચ યથારહં દીઘરસ્સપરિમાણયુત્તં અલ્લિયાપેતબ્બન્તિ વુત્તં હોતિ.

૫૬૨. અચ્છિન્નં વાતિ યથાવુત્તનયેન અચ્છિન્નં વા. અનાદિન્નન્તિ અનાદિન્નઆગન્તુકપત્તં. તિચીવરન્તિ તીસુ ચીવરેસુ એકેકન્તિ વુત્તં હોતિ. દુબ્ભોગેનાતિ દુટ્ઠુ પરિભોગેન. યથા પરિભુત્તં નસ્સતિ, તથા કિલિટ્ઠાનં ધોવનાદિમકત્વા નિવાસનાદિના પરિભોગેન.

૫૬૩-૪. કુસિન્તિ આયામતો ચ વિત્થારતો ચ અનુવાતં ચીવરમજ્ઝે તાદિસમેવ દીઘપત્તઞ્ચ. વુત્તઞ્હેતં ચીવરક્ખન્ધઅટ્ઠકથાયં ‘‘કુસીતિ આયામતો ચ વિત્થારતો ચ અનુવાતાદીનં દીઘપત્તાનમેતં અધિવચન’’ન્તિ (મહાવ. અટ્ઠ. ૩૪૫). અડ્ઢકુસિન્તિ અનુવાતસદિસં ચીવરમજ્ઝે તત્થ તત્થ રસ્સપત્તં. વુત્તમ્પિ ચેતં ‘‘અડ્ઢકુસીતિ અન્તરન્તરા રસ્સપત્તાનં નામ’’ન્તિ (મહાવ. અટ્ઠ. ૩૪૫). મણ્ડલન્તિ એકેકસ્મિં ખણ્ડે મહામણ્ડલં. વુત્તમ્પિ ચેતં ‘‘મણ્ડલન્તિ પઞ્ચખણ્ડિકચીવરસ્સ એકેકસ્મિં ખણ્ડે મહામણ્ડલ’’ન્તિ (મહાવ. અટ્ઠ. ૩૪૫). અડ્ઢમણ્ડલન્તિ મણ્ડલસ્સ અન્તો નિવેસિયમાનં ખુદ્દકમણ્ડલં. વુત્તમ્પિ ચેતં ‘‘અડ્ઢમણ્ડલન્તિ ખુદ્દકમણ્ડલ’’ન્તિ (મહાવ. અટ્ઠ. ૩૪૫). વિવટ્ટન્તિ મણ્ડલં, અડ્ઢમણ્ડલઞ્ચાતિ દ્વે એકતો કત્વા સિબ્બિતં વેમજ્ઝે ખણ્ડં. વુત્તમ્પિ ચેતં ‘‘વિવટ્ટન્તિ મણ્ડલઞ્ચ અડ્ઢમણ્ડલઞ્ચ એકતો કત્વા સિબ્બિતં મજ્ઝિમખણ્ડ’’ન્તિ (મહાવ. અટ્ઠ. ૩૪૫). અનુવિવટ્ટન્તિ મજ્ઝિમખણ્ડસ્સ ઉભોસુ પસ્સેસુ સિબ્બિતં તથેવ દ્વિમણ્ડલપત્તં ખણ્ડદ્વયં. વુત્તમ્પિ ચેતં ‘‘અનુવિવટ્ટન્તિ તસ્સ ઉભોસુ પસ્સેસુ દ્વે ખણ્ડાની’’તિ (મહાવ. અટ્ઠ. ૩૪૫). બાહન્તન્તિ તેસં અનુવિવટ્ટાનં બાહિરપસ્સે સિબ્બિતં બાહિરખણ્ડદ્વયં. વુત્તમ્પિ ચેતં ‘‘બાહન્તન્તિ તેસં અનુવિવટ્ટાનં બહિ એકેકં ખણ્ડ’’ન્તિ (મહાવ. અટ્ઠ. ૩૪૫).

પઞ્ચન્નં સમાહારો પઞ્ચકં, દસ્સિતપ્પકારપઞ્ચખણ્ડેહિ સિબ્બિતચીવરં પઞ્ચકં નામ. આદિ-સદ્દેન સત્તખણ્ડાદીહિ સિબ્બિતચીવરાનં ગહણં. તેનેવેત્થાહ ‘‘કત્તબ્બં તુ તિચીવર’’ન્તિ. સત્તખણ્ડસ્સ ચીવરસ્સ એકં મજ્ઝિમખણ્ડં વિવટ્ટનામમેવ હોતિ, તસ્સ ઉભોસુ પસ્સેસુ દ્વે દ્વે ખણ્ડાનિ ચૂળાનુવિવટ્ટમહાનુવિવટ્ટસઙ્ખાતાનિ અનુવિવટ્ટનામાનેવ હોન્તિ. વુત્તઞ્ચેતં અટ્ઠકથાયં ‘‘અથ વા અનુવિવટ્ટન્તિ વિવટ્ટસ્સ એકપસ્સતો દ્વિન્નં, એકપસ્સતો દ્વિન્નન્તિ ચતુન્નમ્પિ ખણ્ડાનમેતં નામ’’ન્તિ (મહાવ. અટ્ઠ. ૩૪૫). બાહન્તન્તિ દ્વીસુ પરિયન્તેસુ સિબ્બનીયં બાહિરખણ્ડદ્વયં, તઞ્ચ સઙ્ઘટેત્વા બાહમત્થકે ઠપિયમાનત્તા ‘‘મઞ્ચા ઉક્કુટ્ઠિં કરોન્તી’’તિઆદીસુ વિય આધેય્યે આધારોપચારવસેન બાહાતિ ચ ચીવરસ્સ પરિયન્તાવયવત્તા ‘‘અન્ત’’ન્તિ ચ વુચ્ચતિ. વુત્તમ્પિ ચેતં ‘‘બાહન્તન્તિ સુપ્પમાણં ચીવરં પારુપન્તેન સંહરિત્વા બાહાય ઉપરિ ઠપિતા ઉભો અન્તા બહિમુખા તિટ્ઠન્તિ, તેસં એતં નામ’’ન્તિ (મહાવ. અટ્ઠ. ૩૪૫). ઇદં સત્તખણ્ડચીવરમેવ મહાઅટ્ઠકથાયં વિહિતન્તિ ઇદાનિપિ તદેવ વટ્ટતિ. વુત્તમ્પિ ચેતં ‘‘અયમેવ હિ નયો મહાઅટ્ઠકથાયં વુત્તો’’તિ. ભિક્ખુના કુસિં…પે… બાહન્તમ્પિચાતિ સબ્બં વિધિં દસ્સેત્વાવ છિન્નં પઞ્ચકાદિપ્પભેદકં સમણસારુપ્પં તિચીવરં કત્તબ્બન્તિ યોજના.

૫૬૫-૬. યથાવુત્તવિધિં અવિરાધેત્વા ચીવરં કપ્પબિન્દું દત્વા સઙ્ઘાટિઆદિનામેન અધિટ્ઠાય પરિભુઞ્જન્તસ્સ અધિટ્ઠાનં કથં ભિજ્જતીતિ આહ ‘‘દાનેના’’તિઆદિ. દાનેનાતિ અઞ્ઞસ્સ દાનેન. અચ્છિજ્જગાહેનાતિ અઞ્ઞેન અચ્છિન્દિત્વા ગહણેન. વિસ્સાસગ્ગહણેન ચાતિ અત્તનિ વિસ્સાસેન અઞ્ઞસ્સ ગહણેન. હીનાયાવત્તનેનાતિ સિક્ખં અપ્પચ્ચક્ખાય ગિહિભાવૂપગમનેન અઞ્ઞસ્સ દાને વિય ચીવરે નિરાલયભાવેનેવ પરિચ્ચત્તા.

કેચિ પન ‘‘હીનાયાવત્તનેનાતિ ભિક્ખુનિયા ગિહિભાવૂપગમનેનાતિ એવમત્થં ગહેત્વા ભિક્ખુ પન વિબ્ભન્તોપિ યાવ સિક્ખં ન પચ્ચક્ખાતિ, તાવ ભિક્ખુયેવાતિ અધિટ્ઠાનં ન વિજહતી’’તિ વદન્તિ, તં ન ગહેતબ્બં ‘‘ભિક્ખુનિયા હીનાયાવત્તનેના’’તિ વિસેસેત્વા અવુત્તત્તા, ભિક્ખુનિયા ચ ગિહિભાવૂપગમને અધિટ્ઠાનવિજહનં વિસું વત્તબ્બન્તિ નત્થિ તસ્સા વિબ્ભમનેનેવ અસ્સમણિભાવતો.

સિક્ખાયાતિ ભિક્ખુસિક્ખાય. પહાનેનાતિ પચ્ચક્ખાનેન. સિક્ખાપચ્ચક્ખાનં પનેત્થ સચે ભિક્ખુલિઙ્ગે ઠિતો સિક્ખં પચ્ચક્ખાતિ, તસ્સ કાયલગ્ગમ્પિચીવરં અધિટ્ઠાનં વિજહતીતિ દસ્સનત્થં ગહિતં. ‘‘સિક્ખાય ચ પહાનતો’’તિ ચ લિખન્તિ, તં ‘‘હીનાયાવત્તનેનાપિ, સિક્ખાય ચ પહાનતો’’તિ પાઠક્કમે સતિ યુજ્જતિ. યથાવુત્તો પન પાઠો ‘‘સિક્ખાય ચ પહાનેન, હીનાયાવત્તનેનપી’’તિ પાઠક્કમે યુજ્જતિ. યથા તથા વા હોતુ, ન કોચિ વિરોધો.

પચ્ચુદ્ધારેનાતિ ચીવરસ્સ પચ્ચુદ્ધરણેન. ‘‘કાલકિરિયાયા’’તિ અટ્ઠકથાવચનતો વિનાસેનાતિ ચીવરસામિકસ્સ જીવિતવિનાસોવ વુચ્ચતીતિ. લિઙ્ગસ્સ પરિવત્તનાતિ ભિક્ખુસ્સ ઇત્થિલિઙ્ગપરિવત્તના, ભિક્ખુનિયા પુરિસલિઙ્ગપરિવત્તનાતિ એવં ઉભયથા લિઙ્ગસ્સ પરિવત્તનેન. સબ્બં નવવિધમ્પિ ચીવરં. અધિટ્ઠાનન્તિ એત્થ ‘‘ઇમેહિ અટ્ઠહી’’તિ સેસો. વુત્તોવાયમત્થો અટ્ઠકથાયં ‘‘તત્થ પુરિમેહિ અટ્ઠહિ સબ્બચીવરાનિ અધિટ્ઠાનં વિજહન્તી’’તિ (પારા. અટ્ઠ. ૨.૪૬૯). ભિજ્જતીતિ પજહતિ. છિદ્દસ્સ ભાવો છિદ્દભાવો, તસ્મિં, છિદ્દે સતિ છિદ્દે જાતેતિ વુત્તં હોતિ. તિચીવરન્તિ તીસુ ચીવરેસુ અઞ્ઞતરન્તિ વુત્તં હોતિ. તિચીવરમેવ વાતિ ગહેતબ્બં. વુત્તઞ્ચ ‘‘છિદ્દભાવેન પન તિચીવરસ્સેવા’’તિ.

૫૬૭. કીવપ્પમાણે છિદ્દે જાતેતિ આહ ‘‘કનિટ્ઠસ્સા’’તિઆદિ. ‘‘કનિટ્ઠ…પે… માણક’’ન્તિ ઇમિના હેટ્ઠિમપરિચ્છેદં દસ્સેતિ.

૫૬૮. એકો તન્તુપીતિ દીઘતો વા તિરિયતો વા એકમ્પિ સુત્તં.

૫૬૯. જિણ્ણટ્ઠાને અગ્ગળં દેન્તેન તેચીવરિકેન વત્તિતબ્બવિધિં દસ્સેતુમાહ ‘‘પઠમ’’ન્તિઆદિ. પઠમન્તિ છિન્નટ્ઠાનસ્સ છિન્દનતો પુબ્બેયેવ. અગ્ગળં દત્વાતિ વત્થખણ્ડં અલ્લિયાપેત્વા. રક્ખતીતિ એત્થ ‘‘અધિટ્ઠાન’’ન્તિ અનુવત્તતે, ‘‘તેચીવરિકો ભિક્ખૂ’’તિ લબ્ભતિ, એવં વત્થખણ્ડં અલ્લિયાપેન્તો તેચીવરિકો ભિક્ખુ અધિટ્ઠાનં રક્ખતીતિ વુત્તં હોતિ. વિપરિયાયેન અધિટ્ઠાનં ભિન્દતીતિ લબ્ભતિ. પઠમં દ્વે કોટિયો ઘટેત્વાતિ યોજના. મજ્ઝે જિણ્ણં અધિટ્ઠિતચીવરં મજ્ઝે છિન્દન્તો તતો પુબ્બેયેવ દ્વે કોટિયો એકતો ઘટેત્વા સિબ્બિત્વા. પચ્છાતિ કોટિઘટનતો પચ્છા. છિન્દતીતિ મજ્ઝં ઉભયકોટિં કાતું છિન્દતિ. રક્ખતીતિ વુત્તપ્પકારમેવ.

૫૭૦. તિચીવરે કત્થ જાતં છિદ્દમધિટ્ઠાનં ભિન્દતીતિ આહ ‘‘ચતુરઙ્ગુલા’’તિઆદિ. ચત્તારિ ચ અટ્ઠ ચ ચતુરટ્ઠં, ચતુન્નં અટ્ઠન્નં વા અઙ્ગુલાનં સમાહારો ચતુરટ્ઠઙ્ગુલં, તસ્માતિ ગહેતબ્બં. ચતુરઙ્ગુલા અટ્ઠઙ્ગુલાતિ યોજના. ઓરન્તિ અબ્ભન્તરં. એકઞ્ચ દ્વે ચ એકદ્વે, તેસં એકદ્વિન્નં, ‘‘ચીવરાન’’ન્તિ પકરણતો લબ્ભતિ, એકસ્સ ચીવરસ્સ, દ્વિન્નઞ્ચ ચીવરાનન્તિ યોજના. યથાસઙ્ખ્યાનુદ્દેસવસેન એકસ્સ તિરિયતો ચતુરઙ્ગુલતો ઓરં, દ્વિન્નં તિરિયતો અટ્ઠઙ્ગુલતો ઓરન્તિ યોજના. વાક્યદ્વયેપિ ‘‘છિદ્દં ભિન્દતેવા’’તિ યોજેતબ્બં.

એકસ્સ ચીવરસ્સાતિ અન્તરવાસકચીવરસ્સ. તિરિયતોતિ વિત્થારતો. ચતુરઙ્ગુલં ઓરન્તિ ચતુરઙ્ગુલતો અબ્ભન્તરે છિદ્દં અધિટ્ઠાનં ભિન્દતિ. દ્વિન્નન્તિ ઉત્તરાસઙ્ગસઙ્ઘાટીનં. તિરિયતોતિ વિત્થારતો. અટ્ઠઙ્ગુલતો ઓરન્તિ અટ્ઠઙ્ગુલતો અબ્ભન્તરે. તિણ્ણમ્પિ દીઘતો વિદત્થિયા ઓરં છિદ્દં અધિટ્ઠાનં ભિન્દતેવાતિ યોજના. એત્થ વિદત્થિ વડ્ઢકિવિદત્થિ ગહેતબ્બા. એવં વુત્તપરિચ્છેદબ્ભન્તરે છિદ્દે જાતે તસ્સ ચીવરસ્સ અતિરેકચીવરત્તા દસાહમનતિક્કમિત્વા સૂચિકમ્મં કત્વા અધિટ્ઠાતબ્બં. તથા અકરોન્તેન પન પરિક્ખારચોળં અધિટ્ઠાતબ્બં.

૫૭૧. ‘‘નિસીદનસ્સા’’તિ ‘‘નિસીદનચીવરસ્સા’’તિ વત્તબ્બે ઉત્તરપદલોપેન વુત્તન્તિ દટ્ઠબ્બં. દિયડ્ઢાતિ એત્થ વિસેસિતબ્બા વિદત્થિ ‘‘દ્વે વિદત્થિયો’’તિ ચ ‘‘સુગતસ્સ વિદત્થિયા’’તિ ચ વુત્તસામત્થિયા લબ્ભતિ. અડ્ઢેન દુતિયા દિયડ્ઢા, દુતિયં અડ્ઢમેતસ્સાતિ ‘‘દુતિયડ્ઢા’’તિ વત્તબ્બે તિય-પચ્ચયલોપેન ‘‘દિયડ્ઢા’’તિ વુત્તં, અડ્ઢદુતિયાતિ વુત્તં હોતિ. ‘‘સુગતસ્સ વિદત્થિયા’’તિ પમાણનિયમસ્સ કતત્તા વડ્ઢકિવિદત્થિયા તિસ્સો વિદત્થિયો એકા સુગતવિદત્થિ હોતિ. ઇદં નિસીદનચીવરં દીઘતો વડ્ઢકિહત્થેન તિહત્થં, વિત્થારતો છળઙ્ગુલાધિકદ્વિહત્થપ્પમાણં હોતિ. ‘‘દસા વિદત્થી’’તિ (પાચિ. ૫૩૩) વુત્તત્તા દિયડ્ઢહત્થા દસાતિ વેદિતબ્બા.

૫૭૨. ચતસ્સોતિ એત્થાપિ ‘‘વિદત્થિયો’’તિ સામત્થિયાવ લબ્ભતિ. ‘‘કણ્ડુપ્પટિચ્છાદિયા’’તિ વિભત્તિપરિણામેન દીઘતોતિ યોજના.

૫૭૩. અડ્ઢં તેય્યં તતિયં યસ્સા સા અડ્ઢતેય્યા, અડ્ઢતતિયાતિ વુત્તં હોતિ.

૫૭૪. તતો ઉત્તરિં તદુત્તરિં, તસ્સ તસ્સ વુત્તપ્પમાણતો અતિરેકં. અધિકચ્છેદનન્તિ અધિકસ્સ પમાણાતિરિત્તટ્ઠાનસ્સ છેદનં અસ્સ પાચિત્તિયસ્સ દેસનાયાતિ અધિકચ્છેદનં, વુત્તપ્પમાણતો અધિકટ્ઠાનં છિન્દિત્વા દેસેતબ્બં પાચિત્તિયં. ઉદીરિતં વુત્તં પાળિયાતિ અત્થો.

૫૭૫. અપ્પમાણેનાતિ ગુણવસેન અપ્પમાણેન સમ્માસમ્બુદ્ધેન.

૫૭૬. સબ્બં વટ્ટતીતિ સમ્બન્ધો. ‘‘સબ્બ’’ન્તિ ઇમિના અટ્ઠકથાય આગતં નીલાદિં સઙ્ગણ્હાતિ. મહન્તાદિભેદં સબ્બં પચ્ચત્થરણચીવરં વટ્ટતિ.

૫૭૭. ‘‘મુખપુઞ્છનચોળં એક’’ન્તિ પદચ્છેદો. એકં ધોવિત્વા યાવ સુક્ખાપીયતિ, તાવ અઞ્ઞેન મુખપુઞ્છનેન ભવિતબ્બત્તા આહ ‘‘દ્વેપિ વટ્ટન્તિ સબ્બથા’’તિ.

૫૭૯. પમાણતો, ગણનતો ચ અતીતાતિ પમાણગણનાતીતા. ‘‘પમાણાતીતા’’તિ વચનેન વિનયધરાનં અપ્પમાણગુણતં દસ્સેતિ, ‘‘ગણનાતીતા’’તિ ઇમિના અતિક્કન્તગણનતં. પકતં વિનયે પઠમં કતં બુદ્ધેન ભગવતા પઞ્ઞત્તં જાનન્તીતિ પકતઞ્ઞૂ, વિનયધરા, તે પકતઞ્ઞુનો. અપરિમાણગુણમણિગણભૂસિતઉપાલિદાસકાદિમહાથેરાચરિયપરમ્પરાગતા સઙ્ખ્યાપથાતીતા વિનયધરાતિ વુત્તં હોતિ.

૫૮૦. સુગતટ્ઠઙ્ગુલાયામન્તિ વડ્ઢકિરતનપ્પમાણદીઘં. ચતુરઙ્ગુલવિત્થતન્તિ વડ્ઢકિવિદત્થિપ્પમાણવિત્થારં. વિકપ્પનુપગં પચ્છિમં ચીવરં નામ હોતિ. પચ્છિમં ચીવરન્તિ પરિસ્સાવનપટાદીનં વિસેસનં, પચ્છિમચીવરપ્પમાણન્તિ વુત્તં હોતિ.

૫૮૧. પરિસ્સાવપટન્તિ ઉદકપરિસ્સાવનત્થં પટં. પત્તત્થવિકન્તિ પત્તકઞ્ચુકં. પોત્થકત્થવિકન્તિ પોત્થકકઞ્ચુકં. આદિગ્ગહણેન પચ્છિમપ્પમાણાદિં યં કિઞ્ચિ પટં, દણ્ડપટઞ્ચ સઙ્ગણ્હાતિ.

૫૮૨. અધિટ્ઠાતુન્તિ પરિક્ખારચોળં અધિટ્ઠાતું. ઠપિતેતિ અનધિટ્ઠાય ઠપિતે. મહાપચ્ચરિયં પન ‘‘અનાપત્તી’’તિ (પારા. અટ્ઠ. ૨.૪૬૯) આહ. નત્થિ દોસતાતિ દોસો એવ દોસતા. ‘‘અત્તનો સન્તકભાવતો મોચેત્વા ઠપિતં સન્ધાય મહાપચ્ચરિયં અનાપત્તિ વુત્તા’’તિ વદન્તિ. ‘‘ઇમિના ભેસજ્જં ચેતાપેસ્સામિ, ઇદં માતુયા દસ્સામી’’તિ ઠપેન્તેન અધિટ્ઠાતબ્બં. ‘‘ઇદં ભેસજ્જસ્સ, માતુયા’’તિ વિભજિત્વા સસન્તકભાવતો મોચિતે અધિટ્ઠાનકિચ્ચં નત્થીતિ અધિપ્પાયો. હોતિ ચેત્થ –

‘‘યં વત્થં ભિક્ખુના લદ્ધં, કતં માતાદિસન્તકં;

નિસ્સગ્ગિયં ન હોતીતિ, તમાહુ વિનયઞ્ઞુનો’’તિ.

૫૮૩. વસ્સમાસે ચતુરોતિ વસ્સાને ચતુરો માસે, અધિટ્ઠાનકિરિયાય ચત્તારો માસે અવિચ્છેદોતિ અચ્ચન્તસંયોગે ઉપયોગવચનં. વસ્સિકે ચત્તારો માસે નિવાસેતબ્બા સાટિકા વસ્સિકસાટિકા.

૫૮૪. કણ્ડું પટિચ્છાદેતીતિ કણ્ડુપ્પટિચ્છાદિ, કણ્ડુરોગાતુરસ્સ ભિક્ખુનો તપ્પટિચ્છાદનત્થમનુઞ્ઞાતચીવરસ્સેતમધિવચનં. હોન્તિ ચેત્થ –

‘‘માતિકટ્ઠકથાયસ્સા, કણ્ડુચ્છાદિકસાટિયા;

ન કાલાતિક્કમે વુત્તં, અધિટ્ઠાનવિવટ્ટનં.

અધિટ્ઠાનપહાનઙ્ગે-સુ વુત્તત્તા વિસેસતો;

વીમંસિતબ્બં વિઞ્ઞૂહિ, તત્થ યં કારણં સિયા’’તિ.

૫૮૬. ‘‘અસમ્મુખે એતન્તિ ચા’’તિ વચનેનેવ સમ્મુખે ‘‘ઇમ’’ન્તિ વિઞ્ઞાયતિ. વિચક્ખણો પચ્ચુદ્ધરેય્યાતિ યોજના.

૫૮૭. અધિટ્ઠિતન્તિ અધિટ્ઠાનં.

૫૮૮. ઇતિ સબ્બમિદન્તિ એવં વુત્તં ઇદં તિચીવરાદીનં પમાણાદિસબ્બવિધાનં. તેચીવરિકભિક્ખુનોતિ તિચીવરાધિટ્ઠાનેન અધિટ્ઠિતતેચીવરિકસ્સ વિનયતેચીવરિકસ્સ. તિણ્ણં ચીવરાનં સમાહારો તિચીવરં, તિણ્ણં તિચીવરાનં સમાહારોતિ ‘‘તિતિચીવર’’ન્તિ વત્તબ્બે એકદેસસરૂપેકસેસનયેન ‘‘તિચીવર’’ન્તિ નવચીવરાનિ સઙ્ગહિતાનિ, તિચીવરે નિયુત્તો તેચીવરિકોતિ વિનયતેચીવરિકો વુચ્ચતિ. ધુતઙ્ગતેચીવરિકસ્સાપિ તિચીવરે ઇદમેવ વિધાનન્તિ સોપિ સઙ્ગય્હતિ. અઞ્ઞેસુ વા પન છસુ ચીવરેસુ પરિક્ખારચોળં એકં અંસકાસાવમેવ વટ્ટતિ. તથા વત્વાવાતિ ‘‘ઇમં પરિક્ખારચોળં અધિટ્ઠામી’’તિઆદિના નયેન વત્વા. તં પરિક્ખારચોળં. પરિક્ખારચોળમસ્સ અત્થિ, તત્થ વા નિયુત્તોતિ પરિક્ખારચોળિકો.

૫૮૯. ‘‘તિચીવરં પન પરિક્ખારચોળં અધિટ્ઠાતું વટ્ટતિ, ન વટ્ટતી’’તિ અનુયોગં કત્વા ‘‘વટ્ટતી’’તિ (પારા. અટ્ઠ. ૨.૪૬૯) અટ્ઠકથાય વુત્તત્તા ઇધ ‘‘તિચીવર’’ન્તિ ચીવરત્તયમેવ વુત્તં. ‘‘સુખપરિહારત્થં એકમ્પિ વિકપ્પેતબ્બ’’ન્તિ વચનતો એકદેસે સમુદાયોપચારવસેન એકમ્પિ વિકપ્પેતબ્બમેવ હોતિ.

પરિક્ખારચોળં કાતુમ્પિ વટ્ટતીતિ બદ્ધસીમતો બહિ વસન્તેન એકકેન તેચીવરિકેન અન્તોઅરુણે અસતિયા તીસુ ચીવરેસુ હત્થપાસે અકતેસુ નિસ્સગ્ગિયં પાચિત્તિયં હોતીતિ, વિનયકમ્મં કાતું સભાગપુગ્ગલાનં દુલ્લભત્તા ચ સુખપરિહારત્થં તીસુ એકં વા સબ્બાનિ એવ વા તિચીવરનામેન કતાધિટ્ઠાનાનિ પચ્ચુદ્ધરિત્વા પરિક્ખારચોળનામેન અધિટ્ઠાતુમ્પિ વટ્ટતીતિ વુત્તં હોતિ.

એવં અગ્ગહેત્વા ‘‘સચે તિચીવરં પરિક્ખારચોળાધિટ્ઠાનં લભેય્ય, ઉદોસિતસિક્ખાપદે પરિહારો નિરત્થકો ભવેય્યા’’તિ (પારા. અટ્ઠ. ૨.૪૬૯) વુત્તં મહાપદુમત્થેરસ્સ મતં દસ્સેતુમાહ ‘‘એવં ચુદોસિતે’’તિઆદિ. એવં ચેતિ એવં તિચીવરં પરિક્ખારચોળં અધિટ્ઠહિત્વા પરિહરિતું વટ્ટતિ ચે. ઉદોસિતેતિ ઇમસ્સ સિક્ખાપદસ્સ અનન્તરે દુતિયકથિનસિક્ખાપદે. વુત્તો પરિહારોતિ ‘‘એકકુલસ્સ ગામો હોતિ પરિક્ખિત્તો ચ. અન્તોગામે ચીવરં નિક્ખિપિત્વા અન્તોગામે વત્થબ્બ’’ન્તિઆદિના (પારા. ૪૭૮) નયેન પદભાજનાવસાને વુત્તો, ઇધ ચ ‘‘ગામાદીસુ પદેસેસૂ’’તિઆદિના નયેન અનન્તરં વક્ખમાનો તિચીવરસ્સ પરિહરણવિધિ. નિરત્થકોતિ પરિક્ખારચોળનામેન અધિટ્ઠિતચીવરસ્સ તેન વિધિના તિચીવરં અપરિહરન્તસ્સાપિ ભિક્ખુનો અનાપત્તિભાવતો નિપ્પયોજનોતિ અત્થો.

૫૯૦. તપ્પરિહરિતુમાહ ‘‘ન’’ઇચ્ચાદિ. ન નિરત્થકોતિ યોજના. હેતું દસ્સેતુમાહ ‘‘તેચીવરિકસ્સેવા’’તિઆદિ. યો તિચીવરનામેન અધિટ્ઠાનં અપચ્ચુદ્ધરિત્વા સતિં ઉપટ્ઠપેત્વા અન્તોઅરુણે ચીવરં હત્થપાસતો અમોચેત્વા અરુણં ઉટ્ઠાપેતિ, તાદિસસ્સ તેચીવરિકસ્સેવ તસ્મિં સિક્ખાપદે ઉદોસિતપરિહારસ્સ ભગવતા દેસિતત્તાતિ અત્થો. યસ્મા તાદિસસ્સેવ તેચીવરિકસ્સ ઉદોસિતસિક્ખાપદે પરિહારો વુત્તો, તસ્મા. તં સબ્બમ્પીતિ તં નવવિધં સબ્બમ્પિ ચીવરં. પરિક્ખારચોળસ્સાતિ પરિક્ખારચોળનામેન અધિટ્ઠહિત્વા ચીવરં પરિભુઞ્જિતુકામસ્સ પરિક્ખારચોળનામેન અધિટ્ઠાતું વટ્ટતિ.

૫૯૧. ઇમિના ઉદોસિતપરિહારસ્સ અનિરત્થકભાવં સાધેત્વા ઇદાનિ ‘‘તિચીવરં પરિક્ખારચોળનામેનાપિ અધિટ્ઠાતું વટ્ટતી’’તિ ઇમસ્સ અધિકત્થસ્સ મહાકારુણિકેન અનુઞ્ઞાતભાવે કિરિયન્તરાનુજાનનસઙ્ખાતઅધિકવચનસ્સ ઞાપકહેતુભાવં દસ્સેતુમાહ ‘‘અધિટ્ઠેતી’’તિઆદિ. ઇમસ્મિંયેવ સિક્ખાપદે અનાપત્તિવારે ‘‘અનાપત્તિ અન્તોદસાહં અધિટ્ઠેતિ, વિકપ્પેતી’’તિ પાઠે અનાપત્તિભાવે ‘‘અધિટ્ઠેતી’’તિ એત્તકેનેવ પરિયત્તે (પારા. ૪૬૯) ‘‘વિકપ્પેતી’’તિ કિરિયન્તરાનુજાનનેન પકારન્તરેનાપિ દોસો નત્થીતિ અધિપ્પાયસ્સ વિઞ્ઞાપિતત્તાતિ અત્થો.

૫૯૨. એવં કરોન્તસ્સાતિ તિચીવરનામેન અધિટ્ઠાનં પચ્ચુદ્ધરિત્વા પરિક્ખારચોળનામેન અધિટ્ઠહન્તસ્સ. ઇદાનિ અતિપ્પસઙ્ગં દસ્સેતુકામસ્સ ચોદકસ્સ અધિપ્પાયં દસ્સેતુમાહ ‘‘એવ’’ન્તિઆદિ. મૂલાધિટ્ઠાનં પહાય કાતબ્બપ્પકારન્તરસ્સાપિ વિજ્જમાનત્તા તિચીવરં પચ્ચુદ્ધરિત્વા મુખપુઞ્છનાદિકં કત્વા અધિટ્ઠહતોપિ દોસો ન સિયાતિ કસ્મા નાપજ્જતીતિ અત્થો. નઇતિ અતિપ્પસઙ્ગનિવારણે.

૫૯૩. કિચ્ચવિધાનતોતિ તેસં મુખપુઞ્છનાદીનં અત્તનો અત્તનો કિચ્ચસ્સ સાધનતો, તાદિસં કિચ્ચવિસેસાપેક્ખં વિના તંતંનામેન અધિટ્ઠાતું ન યુજ્જતીતિ અધિપ્પાયો. અકિચ્ચસ્સાતિ મુખપુઞ્છનાદિકિચ્ચરહિતસ્સ. અધિકસ્સાતિ પચ્ચુદ્ધરિત્વા પઠમં અધિટ્ઠાનસ્સ વિજહિતત્તા અતિરેકસ્સ. અસ્સાતિ તિચીવરસ્સ. અધિટ્ઠાનં તુ યુજ્જતીતિ દસાહં અનતિક્કમિત્વા પરિક્ખારચોળનામેન અધિટ્ઠાનં પન યુજ્જતિ.

૫૯૪. નિધાનસ્સ મુખં ઉપાયોતિ નિધાનમુખં, અન્તરવાસકાદિતંતંચીવરનામેન અધિટ્ઠાનતો અતિરેકં યં કિઞ્ચિ ચીવરં યથા ઠપિતં આપત્તિં ન કરોતિ, તથા નિધાનસ્સ ઉપાયોતિ અત્થો. એતં પરિક્ખારચોળાધિટ્ઠાનં. મહાપચ્ચરિયન્તિ બ્રાહ્મણતિસ્સભયે ભિક્ખુસઙ્ઘં જમ્બુદીપં નેતું સક્કસ્સ દેવાનમિન્દસ્સ આણત્તિયા વિસુકમ્મેન નિમ્મિતમહાપચ્ચરિયં નિસીદિત્વા લિખિતત્તા તંનામકાયં વિનયટ્ઠકથાયં, ‘‘મહાપચ્ચરિયાદિસૂ’’તિપિ લિખન્તિ.

૫૯૫. પરિક્ખારચોળનામેન અધિટ્ઠાનવિધાનસ્સ વુત્તપ્પમાણં કતમન્તિ આહ ‘‘ચીવર’’ન્તિઆદિ. ‘‘નિદાને ઉપ્પત્તિતો’’તિ પદચ્છેદો. ‘‘ચીવરં પરિપુણ્ણ’’ન્તિ નિદાને ‘‘તિચીવરં સમ્પુણ્ણં વિજ્જતિ, ઇદમતિરેકચીવરં કિં કાતબ્બ’’ન્તિ ભિક્ખૂહિ ભગવતો આરોચિતવત્થુમ્હિ. ઉપ્પત્તિતોતિ પરિક્ખારચોળાધિટ્ઠાનસ્સ ઉપ્પન્નત્તા, અનુઞ્ઞાતત્તાતિ અત્થો. ‘‘તેન ખો પન સમયેન ભિક્ખૂનં પરિપુણ્ણં હોતિ તિચીવરં, અત્થો ચ હોતિ પરિસ્સાવનેહિપિ થવિકાહિપિ. ભગવતો એતમત્થં આરોચેસું. અનુજાનામિ ભિક્ખવે પરિક્ખારચોળક’’ન્તિ (મહાવ. ૩૫૭) એત્થ પાળિયં એવં વિપ્પવાસસુખત્થં નામેનાધિટ્ઠિતતિચીવરં અધિટ્ઠાનં પચ્ચુદ્ધરિત્વા પરિક્ખારચોળનામેન અધિટ્ઠાતું વટ્ટતીતિ સાધનેન તદેકસાધનત્તા એવ એકમ્પિ ચીવરં વિકપ્પેતું વટ્ટતીતિ વુત્તમેવ હોતિ. તેનેવાહ અટ્ઠકથાયં ‘‘એવઞ્ચ સતિ યો તિચીવરે એકેન ચીવરેન વિપ્પવસિતુકામો હોતિ, તસ્સ તિચીવરાધિટ્ઠાનં પચ્ચુદ્ધરિત્વા વિપ્પવાસસુખત્થં વિકપ્પનાય ઓકાસો દિન્નો હોતી’’તિ (પારા. અટ્ઠ. ૨.૪૬૯).

૫૯૬-૮. એત્તાવતા કપ્પિયચીવરઞ્ચ તત્થ કત્તબ્બઞ્ચ દસ્સેત્વા ઇદાનિ અકપ્પિયચીવરં દસ્સેતુમાહ ‘‘કુસવાકાદી’’તિઆદિ. કુસન્તિ દબ્બતિણં. વાકન્તિ રુક્ખાદીનં વાકં. આદિ-સદ્દેન ફલકં ગહિતં, ચીર-સદ્દો ચીવરપરિયાયો, ઇમસ્મિં કુસાદયો ગન્થેત્વા કતે ચીવરેયેવ વત્તતિ. કેસજં કમ્બલન્તિ મનુસ્સકેસેહિ વીતકમ્બલઞ્ચ. વાલજં કમ્બલન્તિ અસ્સવાલચમરવાલેહિ વીતકમ્બલઞ્ચ. ઉલૂકપક્ખન્તિ કોસિયસકુણપત્તં. ઇધ પન તં ગન્થેત્વા કતચીવરમેવ ગહેતબ્બં. અજિનક્ખિપેતિ અજિનદીપિચમ્મે. ‘‘ધારયતો થુલ્લચ્ચય’’ન્તિ પચ્ચેકં સમ્બન્ધો.

કદલિદુસ્સેતિ કદલિવાકમયવત્થે. એરકદુસ્સેતિ એરકમયવત્થે. અક્કદુસ્સેતિ અક્કદણ્ડે વા તેસં સુત્તાનિ વા ગહેત્વા કતવત્થે. પોત્થકેતિ મકચિવાકમયવત્થે. તિરીટે વાતિ એવંનામકે રુક્ખતચે. વેઠનેતિ સીસવેઠને. કઞ્ચુકેતિ કવચે.

સબ્બનીલકેતિ કેવલનીલકે. એસ નયો મઞ્જેટ્ઠાદીસુ. મહાનામરત્તેતિ તનુપદુમદલવણ્ણરત્તે. મહારઙ્ગરત્તેતિ સતપદિવણ્ણરત્તે.

૫૯૯. અચ્છિન્નદસકેતિ અચ્છિન્ના દસા યસ્સ, તસ્મિં ચીવરે. એસ નયો દીઘદસેપિ. ફલદસેતિ ફલસદિસગન્થિતા દસા યસ્સ, તસ્મિં. પુપ્ફદસેતિ કણ્ણિકં બન્ધિત્વા વિકાસેત્વા કતા દસા યસ્સ, તસ્મિં ચીવરેતિ અત્થો. અચ્છિન્નચીવરસ્સાતિ નગ્ગં કત્વા ચોરેહિ વિલુત્તચીવરસ્સ. એત્થાતિ કુસવાકાદીસુ, સબ્બનીલાદીસુ ચ. કિઞ્ચીતિ એકમ્પિ અકપ્પિયં નત્થિ અનનુલોમિકં નત્થિ. ‘‘નગ્ગેન એતેસુ અકપ્પિયચીવરેસુ યંકિઞ્ચિ લદ્ધં, તેન હિરિકોપિનં પટિચ્છાદેત્વા પચ્છા કપ્પિયચીવરે લદ્ધે તં અધિવાસેત્વા ઇદં અકપ્પિયચીવરં પરિચ્ચજિતબ્બં. સબ્બનીલકાદિવત્થેસુ લદ્ધેસુ કપ્પિયરજનેન રજિત્વા, તં વણ્ણં નાસેત્વા વા કપ્પિયવત્થાનિ ઉભયપસ્સેસુ અલ્લિયાપેત્વા, પટિચ્છાદેત્વા વા નિવાસેતું વટ્ટતી’’તિ અટ્ઠકથાયં વુત્તં.

૬૦૦. ‘‘અન્તોદસાહ’’ન્તિ ઇદં ‘‘અધિટ્ઠેતી’’તિઆદીહિ સબ્બપદેહિપિ યોજેતબ્બં. વિસ્સજ્જેતીતિ અઞ્ઞસ્સ દેતિ. ઇધ દાનં દુવિધં સમ્મુખાદાનં, પરમ્મુખાદાનન્તિ. પટિગ્ગાહકં દિસ્વા ‘‘ઇદં તુય્હં દમ્મી’’તિ દાનં સમ્મુખાદાનં નામ. પરમ્મુખા ‘‘ઇદં ઇત્થન્નામસ્સ દમ્મી’’તિ દિન્નં પરમ્મુખાદાનં. ‘‘ઇદં ત્વં ગણ્હાહી’’તિ વા ‘‘તુય્હં ગણ્હાહી’’તિ વા વુત્તે ‘‘મય્હં ગણ્હામી’’તિ સચે વદતિ, દાનગહણદ્વયમ્પિ સુદ્ધં. ‘‘ઇદં તવ સન્તકં કરોહિ, તવ સન્તકં હોતુ, તવ સન્તકં હોતી’’તિ દાયકેન વુત્તે ગણ્હન્તોપિ ‘‘મમ સન્તકં કરોમિ, મમ સન્તકં હોતુ, મમ સન્તકં હોતી’’તિ વદતિ ચે, દાનં, ગહણઞ્ચ અસુદ્ધં હોતિ. ‘‘તવ સન્તકં કરોહી’’તિ વુત્તે પન ‘‘સાધુ ભન્તે મય્હં ગણ્હામી’’તિ વત્વા ગણ્હાતિ, ગહણં સુદ્ધં. ‘‘ઇદં તુય્હં ગણ્હાહી’’તિ વુત્તે ‘‘અહં ન ગણ્હામી’’તિ વદતિ, પુન ‘‘દિન્નં મયા, તુય્હં ગણ્હાહી’’તિ વુત્તે ઇતરોપિ પુન પટિક્ખિપતિ, તં ચીવરં કસ્સચિ અસન્તકત્તા દસાહાતિક્કમેનાપિ નિસ્સગ્ગિયં ન હોતીતિ પચ્છા તેસુ દ્વીસુ યો ઇચ્છતિ, તેન અધિટ્ઠાય પરિભુઞ્જિતબ્બન્તિ સબ્બમિદં અટ્ઠકથાય (પારા. અટ્ઠ. ૨.૪૬૯ અત્થતો સમાનં) વુત્તં.

અધિટ્ઠિતચીવરે અધિટ્ઠાને વેમતિકેન અત્તનો વિમતિં પઠમં આવિ કત્વા ‘‘સચે અનધિટ્ઠિતં, એવં કતે કપ્પિયં હોતી’’તિ ચિન્તેત્વા નિસ્સજ્જેત્વા વિનયકમ્મં કરોન્તસ્સ મુસાવાદદોસો નાપજ્જતિ. યથાહ અટ્ઠકથાયં ‘‘ન હિ એવં જાનાપેત્વા વિનયકમ્મં કરોન્તસ્સ મુસાવાદો હોતી’’તિ (પારા. અટ્ઠ. ૨.૪૬૯). ‘‘કેચિ ‘તથા વેમતિકચીવરં અઞ્ઞેન વિસ્સાસેન ગહેત્વા પુન દાતબ્બ’ન્તિ વદન્તિ, તં ન સુન્દર’’ન્તિ (પારા. અટ્ઠ. ૨.૪૬૯ થોકં વિસદિસં) તત્થેવ વુત્તં.

વિનસ્સતીતિ ચોરાદીહિ વિનસ્સતિ. ‘‘નસ્સતિ, ડય્હતિ, અચ્છિન્દિત્વા ગણ્હન્તી’’તિ ઇમાનિપિ વિનાસપ્પકારત્તા ‘‘વિનસ્સતી’’તિ ઇમિનાવ સઙ્ગય્હન્તિ. તત્થ ‘‘નસ્સતી’’તિ ઇદં ચોરાદીહિ હટં સન્ધાય વુત્તં, ‘‘વિનસ્સતી’’તિ ઇદં ઉન્દૂરખાયિતાદિં સન્ધાય વુત્તં, ‘‘ડય્હતી’’તિ અગ્ગિના દડ્ઢં સન્ધાય. વિસ્સાસેતિ એત્થ સન્દિટ્ઠો ચ સમ્ભત્તો ચ આલપિતો ચ જીવતિ ચ ગહિતે ચત્તમનો હોતીતિ પઞ્ચઙ્ગસમન્નાગતેન અત્તનિ વિસ્સાસેન અઞ્ઞેન ગહિતેતિ અત્થો. પકાસિતાતિ ‘‘અનાપત્તિ અન્તોદસાહં અધિટ્ઠેતી’’તિઆદિના (પારા. ૪૬૯) નયેન વુત્તા.

૬૦૧. ઇદં પન સમુટ્ઠાનં નામેન કથિનસમુટ્ઠાનં નામાતિ અત્થો. ઇદં કથિનસમુટ્ઠાનં નામ કાયવાચતો ચ કાયવાચાચિત્તતો ચ સમુટ્ઠાતિ. અતિરેકચીવરભાવસ્સ જાનનચિત્તેન પણ્ણત્તિજાનનચિત્તે અસતિપિ આપત્તિસમ્ભવતો અચિત્તં. અનધિટ્ઠાનતો, અવિકપ્પનતો ચ અક્રિયં. કમ્મટ્ઠાનમનુયુઞ્જન્તો વા ચેતિયાદિં વન્દન્તો વા એકાદસમં અરુણં ઉટ્ઠાપેતિ, કુસલચિત્તો આપજ્જતિ, કલહાદિપસુતો વા વીતિક્કમં જાનન્તો વા ઉટ્ઠાપેતિ, અકુસલચિત્તો આપજ્જતિ, ખીણાસવો પન અસતિયા વા પણ્ણત્તિં અજાનન્તો વા તથા કરોન્તો અબ્યાકતચિત્તો આપજ્જતીતિ તિચિત્તં. વુત્તનયેન કમ્મટ્ઠાનાદિમનુયુઞ્જન્તસ્સ સોમનસ્સચિત્તસમઙ્ગિનો સુખવેદના, ઉપેક્ખાચિત્તસમઙ્ગિનો ઉપેક્ખાવેદના, કલહાદિપસુતસ્સ દોમનસ્સચિત્તસમઙ્ગિનો દુક્ખવેદના હોતીતિ તિવેદનં. એસ નયો ઉપરિપિ એવરૂપે ઠાને યોજેતબ્બો.

પઠમકથિનકથાવણ્ણના.

૬૦૨. ગામાદીસુ પદેસેસુ તિપઞ્ચસૂતિ તિચીવરાનિ નિક્ખિપિત્વા વિપ્પવાસેન દોસં, ઉપ્પજ્જનટ્ઠાનઞ્ચ દસ્સેતું ‘‘ગામો એકૂપચારો’’તિઆદિના (પારા. ૪૭૭) નયેન પાળિયં વુત્તગામનિવેસનઉદોસિતઅટ્ટમાળપાસાદહમ્મિયનાવાસત્થખેત્તધઞ્ઞકર- ણઆરામવિહારરુક્ખમૂલઅજ્ઝોકાસસઙ્ખાતેસુ પન્નરસસુ ચીવરનિક્ખેપટ્ઠાનેસૂતિ વુત્તં હોતિ. એત્થ ગામો નામ એકકુટિકાદિગામો.

નિવેસનં નામ ગામતો બહિ ચતુસાલાદિકો ગેહો. તેનાહ ગણ્ઠિપદે ‘‘ગામનિવેસનાનં વિસેસં વદન્તા ‘પુન એકપરિચ્છેદં કત્વા નિવેસિતા બહુગેહા નિવેસનં નામ હોન્તી’તિ વદન્તિ, તસ્મા ઇદં નિવેસનાદિ સબ્બં ‘ગામતો બહી’તિ ગહેતબ્બ’’ન્તિ. ઇદઞ્ચ તત્થેવ વુત્તં ‘‘નિવેસનાદિકં અન્તોગામે ચે હોતિ, ગામે વુત્તપરિહારસ્સેવ લબ્ભનતો અન્તોગામતો બહી’તિ ગહેતબ્બ’’ન્તિ.

અટ્ઠકથાયં ‘‘ઉદોસિતોતિ યાનાદીનં ભણ્ડાનં સાલા’’તિ (પારા. અટ્ઠ. ૨.૪૮૨-૪૮૭) વુત્તસરૂપં ઉદોસિતં નામ. ‘‘અટ્ટોતિ પટિરાજાદિપટિબાહનત્થં ઇટ્ઠકાહિ કતો બહલભિત્તિકો ચતુપઞ્ચભૂમિકો પતિસ્સયવિસેસો’’તિ (પારા. અટ્ઠ. ૨.૪૮૨-૪૮૭) વુત્તસરૂપો અટ્ટો નામ. ‘‘માળોતિ એકકૂટસઙ્ગહિતો ચતુરસ્સપાસાદો’’તિ (પારા. અટ્ઠ. ૪૮૨-૪૮૭) વુત્તો એકકણ્ણિકસઙ્ગહિતો ચતુરસ્સગેહો માળો નામ. પાસાદોતિ દીઘપાસાદો. હમ્મિયન્તિ મુણ્ડચ્છદનપાસાદો. નાવાતિ યાનપ્પત્તિ. સત્થન્તિ જઙ્ઘસત્થસકટસત્થવસેન દુવિધો જનસમૂહો, સો ચ નિવિટ્ઠાનિવિટ્ઠવસેન પચ્ચેકં દુવિધો. તત્થ નિવિટ્ઠે વતિઆદિપરિક્ખેપોપિ હોતેવ.

ખેત્તન્તિ યવખેત્તાદિખેત્તં. ધઞ્ઞકરણં ખલં. આરામો પુપ્ફારામો, ફલારામો ચ. વિહારોતિ એકમ્પિ સેનાસનં વુચ્ચતિ. ‘‘રુક્ખો નામ યં મજ્ઝન્તિકે કાલે સમન્તા છાયા ફરતી’’તિ (પારા. ૪૯૪) વુત્તપ્પમાણપરિચ્છન્નો રુક્ખો. અજ્ઝોકાસો નામ સત્તબ્ભન્તરો, સો વિઞ્ચાટવિઆદિઅગામકારઞ્ઞે ચ મચ્છબન્ધાનં અગમનપથે સમુદ્દદીપે ચ લબ્ભતિ. મચ્છબન્ધાનં અગમનપથો નામ ઉદકપિટ્ઠિયા ગન્ત્વા પુન તદહેવ ગેહં આગન્તું અસક્કુણેય્યતાય દૂરો સમુદ્દપ્પદેસો વુચ્ચતિ.

અયં ગામાદિકો પચ્ચેકં એકૂપચારો, નાનૂપચારોતિ દુવિધો. તત્થ અજ્ઝોકાસં વિના ગામાદિકો તંતંરાજાદિસામિકકુલાનં એકત્થનાનત્થવસેન એકકુલસન્તકો ચે હોતિ, એકૂપચારો. નાનાકુલસન્તકો ચે, નાનૂપચારો હોતિ. વુત્તઞ્હેતં ‘‘ગામો એકૂપચારો નામ એકકુલસ્સ ગામો હોતી’’તિઆદિ (પારા. ૪૭૮). અટ્ઠકથાયમ્પિ વુત્તં ‘‘એકકુલસ્સ ગામોતિ એકસ્સ રઞ્ઞો વા ભોજકસ્સ વા ગામો’’તિ ચ ‘‘નાનાકુલસ્સ ગામોતિ નાનારાજૂનં વા ભોજકાનં વા ગામો વેસાલીકુસિનારાદિસદિસો’’તિ (પારા. અટ્ઠ. ૨.૪૭૯) ચ.

એકકુલેન કારાપિતો વિહારો એકૂપચારો, નાનાકુલેહિ કારાપિતો નાનૂપચારો હોતિ. યથાહ ગણ્ઠિપદે ‘‘વિહારે એકકુલનાનાકુલવોહારો કારાપકાનં વસેન વુત્તો’’તિ. અજ્ઝોકાસે પન ઉપચારભેદો અબ્ભન્તરવસેન વેદિતબ્બો. વુત્તઞ્ચેતં પાળિયં ‘‘અજ્ઝોકાસો એકૂપચારો નામ અગામકે અરઞ્ઞે સમન્તા સત્તબ્ભન્તરા એકૂપચારો. તતો પરં નાનૂપચારો’’તિ. ઇધ એકં અબ્ભન્તરં અટ્ઠવીસતિરતનં હોતિ. યથાહ અટ્ઠકથાયં ‘‘એકં અબ્ભન્તરં અટ્ઠવીસતિહત્થ’’ન્તિ (પારા. અટ્ઠ. ૨.૪૮૯). એવં સઙ્ખેપતો વુત્તસરૂપપ્પભેદાનિ પન્નરસ ઠાનાનિ દસ્સેતુમાહ ‘‘ગામાદીસુ પદેસેસુ તિપઞ્ચસૂ’’તિ. અયમેત્થ સઙ્ખેપો, વિત્થારો પન પાળિઅટ્ઠકથાવણ્ણનતો વેદિતબ્બો.

‘‘તિચીવરેન વિપ્પવાસેય્યાતિ સઙ્ઘાટિયા વા ઉત્તરાસઙ્ગેન વા અન્તરવાસકેન વા. અન્તોગામે ચીવરં નિક્ખિપિત્વા’’તિ (પારા. ૪૭૬, ૪૭૮) વચનતો એત્થ તિચીવરન્તિ તિણ્ણં ચીવરાનમઞ્ઞતરમેવ ચીવરં વત્તબ્બં. એકરત્તન્તિ વિપ્પવાસકિરિયાય અચ્ચન્તસંયોગે ઉપયોગવચનં. અપિ-સદ્દેન કિં પન દિરત્તાદિકન્તિ દસ્સેતિ.

સઙ્ઘસમ્મુતિયા વિનાતિ તિચીવરં પરિહરિતું અસમત્થેન ગિલાનેન ભિક્ખુના સઙ્ઘં વન્દિત્વા ઉક્કુટિકં નિસીદિત્વા અઞ્જલિં પગ્ગય્હ ‘‘અહં ભન્તે ગિલાનો, ન સક્કોમિ તિચીવરં આદાય પક્કમિતું, સોહં ભન્તે સઙ્ઘં તિચીવરેન અવિપ્પવાસસમ્મુતિં યાચામી’’તિ તિક્ખત્તું યાચિતેન સઙ્ઘેન તસ્સ ઞત્તિદુતિયાય કમ્મવાચાય દિન્નં અવિપ્પવાસસમ્મુતિં વિનાતિ વુત્તં હોતિ. તથા લદ્ધસમ્મુતિકસ્સ ગિલાનસ્સ ભિક્ખુનો તસ્મિં ગેલઞ્ઞે અવૂપસન્તે વા વૂપસન્તેપિ ચીવરનિક્ખેપટ્ઠાનં આગમનકાલે વા ઉપ્પન્ને અઞ્ઞેપિ રોગે અવૂપસન્તે તાયયેવ સમ્મુતિયા ન દોસો.

૬૦૩. ભિક્ખુનોતિ અલદ્ધસમ્મુતિકસ્સ ભિક્ખુનો. તેન ચીવરેન. વિપ્પવત્થું ન વટ્ટતીતિ વિના વસિતું ન વટ્ટતિ. કિં વુત્તં હોતિ? ‘‘એકકુલસ્સ ગામો હોતિ પરિક્ખિત્તો ચ, અન્તોગામે ચીવરં નિક્ખિપિત્વા અન્તોગામે વત્થબ્બં. અપરિક્ખિત્તો હોતિ, યસ્મિં ઘરે ચીવરં નિક્ખિત્તં હોતિ, તસ્મિં ઘરે વત્થબ્બં, હત્થપાસા વા ન વિજહિતબ્બં. નાનાકુલસ્સ ગામો હોતિ પરિક્ખિત્તો ચ, યસ્મિં ઘરે ચીવરં નિક્ખિત્તં હોતિ, તસ્મિં ઘરે વત્થબ્બં સભાયે વા દ્વારમૂલે વા, હત્થપાસા વા ન વિજહિતબ્બ’’ન્તિઆદિના (પારા. ૪૭૮) નયેન પાળિયા વુત્તટ્ઠાનતો બહિ અરુણં ઉટ્ઠાપેતું ન વટ્ટતીતિ વુત્તં હોતિ.

ઇમસ્મિં પાઠે ‘‘પરિક્ખિત્તો’’તિ ઇદં પાકારેન વા વતિયા વા પરિખાય વા પરિક્ખિત્તં સન્ધાય વુત્તં. હત્થપાસા વાતિ એત્થ હત્થપાસા નામ અડ્ઢતિયરતનં હોતિ. યથાહ અટ્ઠકથાયં ‘‘તં ઘરં સમન્તતો હત્થપાસા ન વિજહિતબ્બં, અડ્ઢતેય્યરતનપ્પમાણા પદેસા ઉદ્ધં ન વિજહિતબ્બન્તિ વુત્તં હોતી’’તિ (પારા. અટ્ઠ. ૨.૪૭૭-૪૭૮).

વિપ્પવસન્તસ્સ કો દોસોતિ આહ ‘‘હોતિ…પે… અરુણુગ્ગમે’’તિ. અનુઞ્ઞાતટ્ઠાનતો હિ બહિ ચીવરેન વિના અરુણં ઉટ્ઠાપેન્તસ્સ તં ચીવરં નિસ્સજ્જિતબ્બં હોતિ, તંહેતુકા પાચિત્તિયાપત્તિપિ હોતીતિ અત્થો. તેનેવ વક્ખતિ ‘‘નિસ્સજ્જિત્વા…પે… વિઞ્ઞુના’’તિ.

૬૦૪. ન્હાયન્તસ્સેવાતિ ચીવરસ્સ હત્થપાસતો દૂરે નહાયન્તસ્સેવ, અનાદરે સામિવચનં.

૬૦૬. અચ્છિન્નં વિલુત્તં ચીવરં યસ્સ સો અચ્છિન્નચીવરો, ભિક્ખુ, તસ્સ ઠાનં અચ્છિન્નચીવરટ્ઠાનં, તસ્મિં.

૬૦૭. નિવાસેત્વાતિ એત્થ ‘‘અન્તરવાસક’’ન્તિ ચ ગહેત્વાતિ એત્થ ‘‘ઇતરાની’’તિ ચ સેસો. ઇદઞ્ચ ગન્તબ્બટ્ઠાને, આસન્ને મગ્ગે ચ મનુસ્સસમ્બાધે અસતિ કત્તબ્બદસ્સનં. ઇતરત્થ નિવાસેત્વા, પારુપિત્વા ચ સઙ્ઘાટિં અંસે કત્વાવ ગન્તબ્બં હોતિ. વિહારે સભાગેસુ અલબ્ભમાનેસુ આસનસાલમ્પિ ગન્ત્વા સભાગસ્સ સન્તિકે વિનયકમ્મં કત્તબ્બન્તિ અટ્ઠકથાયં (પારા. અટ્ઠ. ૨.૪૯૫ અત્થતો સમાનં) વુત્તં. ‘‘નિસ્સજ્જિત્વા’’તિ ઇમિના ‘‘ઇદં મે ભન્તે ચીવરં રત્તિવિપ્પવુત્થં અઞ્ઞત્ર ભિક્ખુસમ્મુતિયા નિસ્સગ્ગિયં, ઇમાહં સઙ્ઘસ્સ નિસ્સજ્જામી’’તિ સઙ્ઘે વા ‘‘ઇદં મે ભન્તે ચીવરં…પે… અહં આયસ્મન્તાનં નિસ્સજ્જામી’’તિ તિણ્ણં, દ્વિન્નં વા સન્તિકે વા ‘‘ઇદં મે આવુસો…પે… ઇમાહં આયસ્મતો નિસ્સજ્જામી’’તિ એકસ્સ સન્તિકે વા વત્વા નિસ્સજ્જિત્વાતિ વુત્તં હોતિ. વિઞ્ઞુનાતિ એવં નિસ્સગ્ગિયવત્થુનિસ્સજ્જનાદિનાનપ્પકારવિધિજાનનકેન ઞાણવતાતિ અત્થો.

૬૦૮. તં નિસ્સગ્ગિયચીવરં.

૬૦૯. ‘‘અદેન્તસ્સ ચ નિસ્સટ્ઠં દુક્કટ’’ન્તિ ઇમિના ‘‘બ્યત્તેન ભિક્ખુના પટિબલેન આપત્તિ પટિગ્ગહેતબ્બા, નિસ્સટ્ઠચીવરં દાતબ્બ’’ન્તિ વુત્તત્તા ઇમં વિધિં જાનનતાય બ્યત્તેન યથાવિધિં કાતું સમત્થતાય પટિબલેન ખન્ધકે (ચૂળવ. ૨૩૯) આગતનયેન આપત્તિં પટિગ્ગહેત્વા નિસ્સટ્ઠચીવરં હત્થેન ગહેત્વા નિસીદાપેત્વા સચે સઙ્ઘો હોતિ, ‘‘સુણાતુ મે ભન્તે સઙ્ઘો, ઇદં ચીવરં ઇત્થન્નામસ્સ ભિક્ખુનો નિસ્સગ્ગિયં સઙ્ઘસ્સ નિસ્સટ્ઠં, યદિ સઙ્ઘસ્સ પત્તકલ્લં, સઙ્ઘો ઇમં ચીવરં ઇત્થન્નામસ્સ ભિક્ખુનો દદેય્યા’’તિ, સચે તયો હોન્તિ, ‘‘સુણન્તુ મે આયસ્મન્તા, ઇદં ચીવરં ઇત્થન્નામસ્સ ભિક્ખુનો નિસ્સગ્ગિયં આયસ્મન્તાનં નિસ્સટ્ઠં, યદાયસ્મન્તાનં પત્તકલ્લં, આયસ્મન્તા ઇમં ચીવરં ઇત્થન્નામસ્સ ભિક્ખુનો દદેય્યુ’’ન્તિ, સચે એકકો હોતિ, ‘‘ઇમં ચીવરં આયસ્મતો દમ્મી’’તિ દાતબ્બં, નિસ્સટ્ઠચીવરં ‘‘અત્તનોયેવ દિન્ન’’ન્તિ સુદ્ધસઞ્ઞાય ગહેત્વા અદેન્તસ્સ દુક્કટં હોતીતિ વુત્તં હોતિ.

તસ્સ સન્તકભાવં ઞત્વા લેસેન વિલુમ્પન્તસ્સ પન ભણ્ડગ્ઘવસેન દુક્કટથુલ્લચ્ચયપારાજિકાપત્તિયો હોન્તિ. યથાહ અટ્ઠકથાયં ‘‘તસ્સ સન્તકભાવં પન ઞત્વા લેસેન અચ્છિન્દન્તો ભણ્ડં અગ્ઘાપેત્વા કારેતબ્બો’’તિ (પારા. અટ્ઠ. ૨.૪૬૯). પરિયાપુતન્તિ ‘‘ન ભિક્ખવે નિસ્સટ્ઠચીવરં ન દાતબ્બં, યો ન દદેય્ય, આપત્તિ દુક્કટસ્સા’’તિ (પારા. ૪૭૦) પાળિયં વુત્તન્તિ અત્થો.

૬૧૦-૧. થેરે દહરે ચાતિ એતેસુ ઉભોસુપિ મગ્ગં ગચ્છન્તેસૂતિ યોજના. ‘‘થેરે’’તિ ઇમિના અનિસ્સિતભાવમાહ, ‘‘દહરે ચા’’તિ ઇમિના નિસ્સિતભાવં. ઓહીનેતિ ઓસક્કિતે. સચે સો થેરો નિસ્સયાચરિયો ભવેય્યાતિ અધિપ્પાયેનાહ ‘‘ગરુ’’ન્તિ. તસ્મિં દહરે. વત્થન્તિ તસ્સ હત્થે ઠિતચીવરં. ન પસ્સમ્ભતીતિ ધુરનિક્ખેપં અકત્વા ગમને સઉસ્સાહત્તા નિસ્સયપટિપ્પસ્સદ્ધિ ન હોતીતિ અધિપ્પાયો. તેનેવ ‘‘મુહુત્ત’’ન્તિઆદિમાહ.

૬૧૪. પચ્ચુદ્ધારે અન્તોયેવારુણેતિ ઇમિના સમ્બન્ધો, દહરભિક્ખુનો દૂરભાવઞ્ચ અરુણુગ્ગમનઞ્ચ ઞત્વા ચીવરસ્સ અનિસ્સગ્ગિયત્થં તસ્સ હત્થે ઠિતભાવં સલ્લક્ખેત્વા પુરારુણા પચ્ચુદ્ધરેતિ અત્થો. વિસ્સજ્જેતીતિ અઞ્ઞસ્સ દેતિ. વિનસ્સતીતિ ચોરાદીહિ નસ્સતિ.

દુતિયકથિનકથાવણ્ણના.

૬૧૬. અકાલચીવરન્તિ ‘‘અકાલચીવરં નામ અનત્થતે કથિને એકાદસમાસે ઉપ્પન્નં, અત્થતે કથિને સત્તમાસે ઉપ્પન્નં, કાલેપિ આદિસ્સ દિન્ન’’ન્તિ (પારા. ૫૦૦) વચનતો અનત્થતકથિને વિહારે ‘‘ચીવરમાસો’’તિ યો પુબ્બકત્તિકકાળપક્ખપાટિપદતો પટ્ઠાય યાવ અપરકત્તિકપુણ્ણમી, તાવ માસો વુચ્ચતિ, તતો પરેસુ એકાદસસુ માસેસુ ઉપ્પન્નઞ્ચ અત્થતકથિને વિહારે યો ચીવરમાસો, હેમન્તા ચ ચત્તારો માસાતિ પઞ્ચમાસતો બહિ સત્તસુ માસેસુ ઉપ્પન્નઞ્ચ અત્થતકથિને પઞ્ચ માસા યથાપરિચ્છિન્નકાલે સઙ્ઘસ્સ ચ ‘‘ઇદં અકાલચીવરં દમ્મી’’તિ પુગ્ગલસ્સ ચ ‘‘ઇદં તુય્હં દમ્મી’’તિ દિન્નઞ્ચેતિ ઇદં અકાલચીવરન્તિ અત્થો. ‘‘ઉપ્પન્ન’’ન્તિ સેસો, ‘‘ઉપ્પજ્જેય્ય સઙ્ઘતો વા ગણતો વા ઞાતિતો વા મિત્તતો વા પંસુકૂલતો વા અત્તનો વા ધનેના’’તિ (પારા. ૫૦૦) વચનતો સઙ્ઘસ્સ વા ‘‘ઇદં સુત્તન્તિકગણસ્સ દેમ, ઇદં આભિધમ્મિકગણસ્સ દેમા’’તિઆદિના નયેન ગણસ્સ વા દિન્નતો અત્તનો વસ્સગ્ગેન વા ઞાતિઆદિતો વા સુસાનાદિપંસુકૂલખેત્તતો વા અત્તનો સન્તકેન સુત્તકપ્પાસાદિકપ્પિયવત્થુતો વા ઉપ્પન્નચીવરન્તિ અત્થો.

માસપરમં નિક્ખિપેતિ માસો પરમં પમાણં એતસ્સ નિક્ખિપનસ્સાતિ માસપરમં, નિક્ખિપનન્તિ કિરિયાવિસેસનં કાતબ્બં, માસપરમં નિક્ખિપનં કરેય્યાતિ વુત્તં હોતિ. ‘‘આકઙ્ખમાનેન ભિક્ખુના પટિગ્ગહેતબ્બં, પટિગ્ગહેત્વા ખિપ્પમેવ કારેતબ્બં, નો ચસ્સ પારિપૂરી, માસપરમં તેન ભિક્ખુના તં ચીવરં નિક્ખિપિતબ્બં ઊનસ્સ પારિપૂરિયા’’તિ (પારા. ૫૦૦) વચનતો એવં ઉપ્પન્નં ચીવરં ઇચ્છન્તેન પટિગ્ગહેત્વા સચે પહોતિ, દસાહમનતિક્કામેત્વા કારેતબ્બં. સચે નપ્પહોતિ, ઊનસ્સ પરિપૂરણત્થં માસપરમં ઠપેતબ્બન્તિ અત્થો.

કદા એવં નિક્ખિપિતબ્બન્તિ આહ ‘‘સતિ પચ્ચાસાયા’’તિ, ‘‘પચ્ચાસા હોતિ સઙ્ઘતો વા ગણતો વા ઞાતિતો વા મિત્તતો વા પંસુકૂલતો વા અત્તનો વા ધનેના’’તિ (પારા. ૫૦૦) વુત્તસઙ્ઘાદિતો અત્તનો વસ્સગ્ગાદિતો લભેય્ય, તેન ‘‘ઇમસ્સ ઊને પરિપુણ્ણે કારેસ્સામી’’તિ પચ્ચાસાય સતિ એવં નિક્ખિપિતબ્બન્તિ અત્થો. તતો ઉદ્ધં ઠપેતું ન વટ્ટતીતિ માસતો અતિરેકકાલં નિક્ખિપિતું ન વટ્ટતિ, નિસ્સગ્ગિયપાચિત્તિયં હોતીતિ અત્થો.

યદિ એવં ‘‘તદહુપ્પન્ને મૂલચીવરે પચ્ચાસાચીવરં ઉપ્પજ્જતિ, દસાહા કારેતબ્બં…પે… વીસે ઉપ્પન્ને મૂલચીવરે પચ્ચાસાચીવરં ઉપ્પજ્જતિ, દસાહા કારેતબ્બ’’ન્તિ (પારા. ૫૦૦) કસ્મા આહાતિ? પચ્ચાસાચીવરસ્સ દસદિવસે અતિક્કમ્મ ઠપેતું અયુત્તત્તા, મૂલચીવરસ્સ તગ્ગતિકત્તા એવં વુત્તં. યથાહ અટ્ઠકથાયં ‘‘મૂલચીવરસ્સ ઉપ્પન્નદિવસતો યાવ વીસતિમો દિવસો, તાવ ઉપ્પન્નં પચ્ચાસાચીવરં મૂલચીવરં અત્તનો ગતિકં કરોતી’’તિ (પારા. અટ્ઠ. ૨.૫૦૦).

તતિયકથિનકથાવણ્ણના.

૬૧૮-૯. ભિક્ખુનિયા યો ધોવાપેતીતિ સમ્બન્ધો. ‘‘ભિક્ખુની નામ ઉભતોસઙ્ઘે ઉપસમ્પન્ના’’તિ (પારા. ૫૦૦) વચનતો ભિક્ખુનિસઙ્ઘે ઞત્તિચતુત્થાય કમ્મવાચાય, ભિક્ખુસઙ્ઘે ઞત્તિચતુત્થાય કમ્મવાચાયાતિ અટ્ઠવાચિકાય ઉપસમ્પન્ના ભિક્ખુની નામ. ભુત્તન્તિ ભિક્ખુના અત્તના પરિભુત્તં રજિતં આદિન્નકપ્પં, ‘‘પરિભોગં કરિસ્સામી’’તિ અન્તમસો સીસં ઠપેત્વા સયનમત્તેનાપિ પુરાણભૂતં ચીવરન્તિ અત્થો. યથાહ અટ્ઠકથાયં ‘‘રજિત્વા કપ્પં કત્વા એકવારમ્પિ નિવત્થં વા પારુતં વા અન્તમસો પરિભોગસીસેન અંસે વા મત્થકે વા કત્વા મગ્ગં ગતો હોતિ, ઉસ્સીસકં વા કત્વા નિપન્નો હોતિ, એતમ્પિ પુરાણચીવરમેવા’’તિ (પારા. અટ્ઠ. ૨.૫૦૩-૫૦૫). વત્થન્તિ કારિયે કારણોપચારવસેન ચીવરમેવ આહ.

અઞ્ઞાતિકાયાતિ ‘‘અઞ્ઞાતિકા નામ માતિતો વા પિતિતો વા યાવ સત્તમા પિતામહયુગા અસમ્બદ્ધા’’તિ વચનતો અત્તનો વા તસ્સા વા માતુ વા પિતુ વા પરમ્પરાય યાવ સત્તમા યુગા, એત્થન્તરે યેન કેનચિ ઞાતકેન અસમ્બદ્ધભાવેન અઞ્ઞાતિકાયાતિ અત્થો. યથા ચાહ અટ્ઠકથાયં ‘‘પિતામહોયેવ પિતામહયુગં. તતો ઉદ્ધં સબ્બેપિ પુબ્બપુરિસા પિતામહગ્ગહણેનેવ ગહિતા. એવં યાવ સત્તમો પુરિસો, તાવ યા અસમ્બદ્ધા’’તિ (પારા. અટ્ઠ. ૨.૫૦૩-૫૦૫). આકોટાપેતીતિ પહરાપેતિ.

તતો ધોવાપનાદિતો. નિસ્સગ્ગિયાપત્તીતિ નિસ્સગ્ગિયસ્સ આપત્તિ નિસ્સગ્ગિયાપત્તિ, નિસ્સગ્ગિયસ્સ ચીવરસ્સ નામેન વિસિટ્ઠા પાચિત્તિયાપત્તિ હોતીતિ અત્થો. ઇદઞ્ચ તિણ્ણં પયોગાનં અન્તે આપજ્જિતબ્બાય આપત્તિયા દસ્સનં. તસ્સ નિયોગેન ધોવનાદિં કરોન્તિયા ભિક્ખુનિયા તદત્થં સબ્બપુબ્બપયોગગણનાય ભિક્ખુનો દુક્કટં હોતીતિ ગહેતબ્બો. યથાહ અટ્ઠકથાયં ‘‘યાવ નં ધોવિત્વા ઉક્ખિપતિ, તાવ ભિક્ખુનિયા પયોગે પયોગે ભિક્ખુસ્સ દુક્કટ’’ન્તિ (પારા. અટ્ઠ. ૨.૫૦૩-૫૦૫). પઠમેનાતિ તીણિપિ કારાપેન્તસ્સ યં પઠમં કારાપેતિ, તેનાતિ અત્થો. દીપિતન્તિ ‘‘અઞ્ઞાતિકાય અઞ્ઞાતિકસઞ્ઞી પુરાણચીવરં ધોવાપેતિ રજાપેતિ આકોટાપેતિ, નિસ્સગ્ગિયેન આપત્તિ દ્વિન્નં દુક્કટાન’’ન્તિઆદિના (પારા. ૫૦૬) દેસિતં. ઇમિના નયેન દ્વે કારાપેન્તસ્સ પઠમેન નિસ્સગ્ગિયાપત્તિ, દુતિયેન દુક્કટન્તિ અયમત્થો સઙ્ગય્હતિ.

૬૨૦. ‘‘ધોવનત્થાય દેતી’’તિ ઇમિના ‘‘ભુત્તં વત્થ’’ન્તિ અધિકારતો લબ્ભતિ.

૬૨૧. સામણેરનિદ્દેસેપીતિ ‘‘સામણેરા’’તિ નિદ્દેસો નામ યસ્સ, તસ્મિમ્પિ, અત્તના પરિભુત્તં વત્થં ધોવનત્થાય દેતીતિ યોજના, અત્તનો પરિભુત્તં ચીવરં ધોવનત્થાય સામણેરસ્સ દેતીતિ અત્થો. પિ-સદ્દો સમુચ્ચયત્થો. ઉપસમ્પજ્જાતિ પુબ્બકિરિયાય ‘‘ધોવતી’’તિ અપરકિરિયા સામત્થિયા લબ્ભતિ.

૬૨૨. દહરાનઞ્ચ ભિક્ખૂનન્તિ અત્તનો નવકતરાનં ભિક્ખૂનં. નિય્યાદિતે દિન્ને. એસ નયોતિ ‘‘એકેન પાચિત્તિયં, અવસિટ્ઠેહિ દ્વીહિ વા એકેન વા સબ્બપયોગેસુ દુક્કટં હોતી’’તિ નયો.

૬૨૩. ચીવરેતિ પરિભુત્તચીવરે.

૬૨૪. ‘‘ધોવનપ્પચ્ચયાયેવા’’તિ ઇમિના ઇતરદ્વયસ્સ તસ્સ અનાણત્તિયા કતત્તા તતો અનાપત્તિભાવમાહ.

૬૨૬. ઞાતિકાતિ એત્થ ‘‘પટિસઙ્ખા યોનિસો’’તિઆદીસુ (મ. નિ. ૧.૨૨-૨૩, ૪૨૨; અ. નિ. ૬.૫૮; ૮.૯; મહાનિ. ૨૦૬; ધ. સ. ૧૩૫૫; વિભ. ૫૧૮) વિય ગાથાબન્ધવસેન ય-કારલોપો, ઞાતિકાય ભિક્ખુનિયાતિ અત્થો. ‘‘ઞાતિકા અઞ્ઞાતિસઞ્ઞિસ્સા’’તિ પદચ્છેદો. પચ્ચત્થરણન્તિ મઞ્ચપીઠે અત્થરિતબ્બં પચ્ચત્થરણચીવરઞ્ચ.

૬૨૭. ‘‘ભિક્ખુનીનં વસેના’’તિ ઇદં ભિક્ખુસઙ્ઘેપિ ઉપસમ્પન્ના ચે, પાચિત્તિયસમ્ભવા વુત્તં. યથાહ અટ્ઠકથાયં ‘‘ભિક્ખૂનં સન્તિકે ઉપસમ્પન્નાય પન યથાવત્થુકમેવા’’તિ (પારા. અટ્ઠ. ૨.૫૦૬). ભિક્ખુનિસઙ્ઘે પઠમં ઉપસમ્પજ્જિત્વા પચ્છા ભિક્ખુસઙ્ઘે ચે ઉપસમ્પજ્જતિ, કેવલં ભિક્ખુસઙ્ઘે ઉપસમ્પન્નાતિ ન વુચ્ચતીતિ તા ભગવતિ ધરમાને પઠમં પબ્બજિતા પઞ્ચસતા સાકિયાનિયો વુચ્ચન્તિ. યથાહ અટ્ઠકથાયં ‘‘ભિક્ખૂનં સન્તિકે ઉપસમ્પન્ના નામ પઞ્ચસતા સાકિયાનિયો’’તિ (પારા. અટ્ઠ. ૨.૫૦૬). ભિક્ખુનો લિઙ્ગે પરિવત્તે તસ્સેવ ઉપસમ્પન્નકમ્મસ્સ અનુઞ્ઞાતત્તા સોપિ ગહેતબ્બોયેવ.

૬૨૮. અવુત્તા ધોવતીતિ ‘‘ઇમં ચીવરં ધોવા’’તિ અવુત્તા ચીવરં કિલિટ્ઠં દિસ્વા અવત્વા ઠપિતટ્ઠાનતો ચીવરં ગહેત્વા વા સયમેવ વત્વા યાચનાદિનયેન વા અનાણત્તિયા ચ ગહેત્વા ચીવરધોવનાદિં કરેય્ય ચે. અપરિભુત્તં વાતિ હેટ્ઠા વુત્તનયેન અપરિભુત્તં ચીવરં. અઞ્ઞં વાતિ ઉપાહનત્થવિકપત્તત્થવિકપોત્થકત્થવિકમઞ્ચપીઠાદિં યં કિઞ્ચિ પરિક્ખારં.

પુરાણચીવરધોવાપનકથાવણ્ણના.

૬૨૯. વિકપ્પનુપગં પચ્છિમં ઉપાદાય કિઞ્ચિ ચીવરં ગણ્હતોતિ યોજના, એત્થ ‘‘અઞ્ઞાતિકાય ભિક્ખુનિયા હત્થતો’’તિ ચ ‘‘ઞાતિકાય અઞ્ઞાતિકસઞ્ઞિસ્સા’’તિ ચ ‘‘એકતોઉપસમ્પન્નાય હત્થતો ગણ્હાતી’’તિ ચ વક્ખમાનવચનસામત્થિયા લબ્ભમાનતો પુબ્બે વુત્તનયેન અઞ્ઞાતિકાય ઉભતોસઙ્ઘે ઉપસમ્પન્નાય ભિક્ખુનિયા હત્થતો વિકપ્પનુપગરતનવિદત્થિપ્પમાણવત્થતો પટ્ઠાય યં કિઞ્ચિ ચીવરં ગણ્હન્તસ્સાતિ અત્થો. ‘‘આપત્તી’’તિ સામઞ્ઞેન વુત્તેપિ ‘‘નિસ્સગ્ગિયા પાચિત્તિયાપત્તી’’તિ પકરણતો ચ ‘‘નિસ્સગ્ગિયાપત્તી’’તિ વક્ખમાનતો ચ લબ્ભતિ. ઠપેત્વા પારિવત્તકન્તિ ‘‘પારિવત્તકં પરિત્તેન વા વિપુલં, વિપુલેન વા પરિત્ત’’ન્તિ (પારા. ૫૧૪) વચનતો મહાપચ્ચરિયં ‘‘અન્તમસો હરીતકખણ્ડેનાપી’’તિ (પારા. અટ્ઠ. ૨.૫૧૪) વુત્તત્તા ચ હેટ્ઠિમન્તતો હરીતકખણ્ડમ્પિ દત્વા ગહેતબ્બં તિચીવરઞ્ચ પારિવત્તકં નામ હોતિ, તં ઠપેત્વાતિ વુત્તં હોતિ. પરિવત્તનં પરિવત્તં, તં એતસ્સ અત્થીતિ પારિવત્તકં, કયવિક્કયેન ગહેતબ્બં ચીવરન્તિ અત્થો.

૬૩૦. ગહણત્થાય પયોગેતિ ગણ્હિતું હત્થપસારણાદિપ્પયોગે. પરિયાપુતન્તિ ‘‘પટિગ્ગણ્હાતિ પયોગે દુક્કટ’’ન્તિ (પારા. ૫૧૨) દેસિતં.

૬૩૧. અનુપસમ્પન્નહત્થેતિ ભિક્ખુભિક્ખુનિતો અઞ્ઞે સબ્બે અનુપસમ્પન્ના ગહિતા. યથાહ અટ્ઠકથાયં ‘‘સચે પન સિક્ખમાનાસામણેરસામણેરિઉપાસકઉપાસિકાનં હત્થે પેસિતં પટિગ્ગણ્હાતિ, અનાપત્તી’’તિ (પારા. અટ્ઠ. ૨.૫૧૨).

૬૩૨. એકતોતિ એત્થ ભિક્ખુનિસઙ્ઘતોતિ ગહેતબ્બં. અઞ્ઞસ્મિં પક્ખે પાચિત્તિયમેવ. યથાહ અટ્ઠકથાયં ‘‘ભિક્ખૂનં સન્તિકે ઉપસમ્પન્નાય પન પાચિત્તિયમેવા’’તિ (પારા. અટ્ઠ. ૨.૫૧૩).

૬૩૩. ‘‘પારિવત્તકં દસ્સામી’’તિ આભોગં કત્વા ગણ્હાતિ, દોસો ન વિજ્જતીતિ યોજના.

૬૩૪. અઞ્ઞં પરિક્ખારન્તિ થવિકકાયબન્ધનાદિ અવિકપ્પિયં વા અવિકપ્પનુપગં વા પરિક્ખારમેવ ગહેતબ્બં. વિકપ્પનુપગં પન ન વટ્ટતિ. યથાહ અટ્ઠકથાયં ‘‘વિકપ્પનુપગં પચ્છિમચીવરપ્પમાણં પન પટપરિસ્સાવનમ્પિ ન વટ્ટતી’’તિ (પારા. અટ્ઠ. ૨.૫૧૪). ચીવરપટિગ્ગણ્હનં કિરિયા, પારિવત્તકસ્સ અદાનં અકિરિયાતિ કિરિયાય ચ અકિરિયાય ચ આપજ્જિતબ્બતો ક્રિયાક્રિયં.

ચીવરપટિગ્ગહણકથાવણ્ણના.

૬૩૫. ‘‘અઞ્ઞાતકં અપ્પવારિત’’ન્તિ પદચ્છેદો. ‘‘ગહપતિં વા ગહપતાનિં વા’’તિ પાઠસેસો. વુત્તઞ્હિ ભગવતા ‘‘અઞ્ઞાતકં ગહપતિં વા ગહપતાનિં વા’’તિ (પારા. ૫૧૬, ૫૧૮). પુબ્બે વુત્તનયેન યાવ સત્તમા પિતામહયુગા સમ્બદ્ધઞ્ઞાતિકતાય અભાવતો અઞ્ઞાતકં. ‘‘યં મય્હં ગેહે અત્થિ, તં પવારેમી’’તિઆદિના નયેન અપ્પવારિતં. ‘‘ગહપતિ નામ યો કોચિ અગારં અજ્ઝાવસતી’’તિ (પારા. ૫૧૯) પાળિયં વુત્તં ગહપતિં વા. ‘‘ગહપતાની નામ યા કાચિ અગારં અજ્ઝાવસતી’’તિ (પારા. ૫૧૯) પાળિયં વુત્તં ઘરણિં વાતિ અત્થો.

હોતિ નિસ્સગ્ગિયાપત્તીતિ ‘‘અઞ્ઞત્ર સમયા વિઞ્ઞાપેતિ, પયોગે દુક્કટં, પટિલાભેન નિસ્સગ્ગિયં હોતી’’તિ (પારા. ૫૧૯) પાળિયં વુત્તેસુ સબ્બેસુ પુબ્બપયોગેસુ દુક્કટેન સદ્ધિં નિસ્સગ્ગિયપાચિત્તિયં હોતીતિ વુત્તં હોતિ. અઞ્ઞત્ર સમયાતિ ‘‘તત્થાયં સમયો, અચ્છિન્નચીવરો વા હોતિ ભિક્ખુ નટ્ઠચીવરો વા’’તિ (પારા. ૫૧૮) માતિકાય, ‘‘અચ્છિન્નચીવરો નામ ભિક્ખુસ્સ ચીવરં અચ્છિન્નં હોતિ રાજૂહિ વા ચોરેહિ વા ધુત્તેહિ વા યેહિ કેહિચિ વા અચ્છિન્નં હોતિ. નટ્ઠચીવરો નામ ભિક્ખુસ્સ ચીવરં અગ્ગિના વા દડ્ઢં હોતિ, ઉદકેન વા વૂળ્હં હોતિ, ઉન્દૂરેહિ વા ઉપચિકાહિ વા ખાયિતં હોતી’’તિ (પારા. ૫૧૯) પદભાજને ચ નિદ્દિટ્ઠસરૂપકાલતો અઞ્ઞત્રાતિ અત્થો.

૬૩૬. તિકપાચિત્તિયં વુત્તન્તિ ‘‘અઞ્ઞાતકે અઞ્ઞાતકસઞ્ઞી, વેમતિકો, ઞાતકસઞ્ઞી અઞ્ઞત્ર સમયા ચીવરં વિઞ્ઞાપેતિ, નિસ્સગ્ગિયં પાચિત્તિય’’ન્તિ (પારા. ૫૨૦) પાચિત્તિયત્તયં ભગવતા વુત્તં. ‘‘ઞાતકે અઞ્ઞાતિસઞ્ઞિસ્સા’’તિ પદચ્છેદો. તત્થાતિ તસ્મિં ઞાતકે. વેમતિકસ્સાતિ ‘‘ઞાતકો નુ ખો, અઞ્ઞાતકો’’તિ વેમતિકસ્સ. દ્વિકદુક્કટં તથેવાતિ યોજના. ‘‘તથેવા’’તિ ‘‘વુત્ત’’ન્તિ ઇદં આકડ્ઢતિ, ‘‘ઞાતકે અઞ્ઞાતકસઞ્ઞી, વેમતિકો અઞ્ઞત્ર સમયા ચીવરં વિઞ્ઞાપેતિ, આપત્તિ દુક્કટસ્સા’’તિ (પારા. ૫૨૦) દેસિતન્તિ અત્થો.

૬૩૭-૮. સમયે વિઞ્ઞાપેન્તસ્સ અનાપત્તીતિ યોજના. એત્થ ‘‘ચીવરં અઞ્ઞાતકઅપ્પવારિત’’ન્તિ આનેત્વા સમ્બન્ધિતબ્બં, યથાપરિચ્છિન્નકાલદ્વયતો અઞ્ઞતરસ્મિં કાલે અઞ્ઞાતકઅપ્પવારિતં ચીવરં વિઞ્ઞાપેન્તસ્સ અનાપત્તીતિ અત્થો. ઞાતકે વા પવારિતેતિ એત્થાપિ ‘‘અત્તનો’’તિ અજ્ઝાહારો, ‘‘સમયે’’તિ ઇમિના યોજેતબ્બં, અત્તનો ઞાતકપવારિતે અસમયેપિ ચીવરં વિઞ્ઞાપેન્તસ્સ અનાપત્તીતિ અત્થો. અઞ્ઞસ્સત્થાયાતિ એત્થ ‘‘અત્તનો’’તિ સેસો, અત્તનો ઞાતકે, પવારિતે વા વિઞ્ઞાપેન્તસ્સ અનાપત્તીતિ યોજના, અઞ્ઞં ભિક્ખું નિસ્સાય અત્તનો ઞાતકે વા પવારિતે વા ચીવરં વિઞ્ઞાપેન્તસ્સ અનાપત્તીતિ વુત્તં હોતિ. ઇતરં પક્ખં દસ્સેતિ ‘‘તસ્સ ઞાતકે વા પવારિતે વા’’તિ. તસ્સાતિ ‘‘અઞ્ઞસ્સા’’તિ વુત્તસ્સ, ‘‘વિઞ્ઞાપેન્તસ્સ અનાપત્તી’’તિ ઇમિના યોજેતબ્બં. વાતિ પુરિમવિકપ્પાપેક્ખં. યં સન્ધાય ચીવરં વિઞ્ઞાપેતિ, તસ્સ ઞાતકે વા પવારિતે વા તંયેવ સન્ધાય ચીવરં વિઞ્ઞાપેન્તસ્સ અનાપત્તીતિ વુત્તં હોતિ.

‘‘અત્તનો વા ધનેના’’તિ વુત્તં અનાપત્તિઅઙ્ગં ઉમ્મત્તકાદિનોતિ એત્થ આદિ-સદ્દેન સઙ્ગય્હતિ, અત્તનો સન્તકં સુત્તકપ્પાસાદિકં કપ્પિયવત્થું દત્વા ગણ્હિતુકામતાય અકપ્પિયવોહારેન યાચન્તસ્સ ચ અનાપત્તીતિ અત્થો.

અઞ્ઞાતકવિઞ્ઞત્તિકથાવણ્ણના.

૬૩૯. અપ્પવારિતમઞ્ઞાતિન્તિ એત્થ ‘‘ગહપતિં વા ગહપતાનિં વા’’તિ ઇદં સામત્થિયા લબ્ભતિ. તતુત્તરિન્તિ તતો સન્તરુત્તરપરમતો ઉત્તરિન્તિ ગહેતબ્બં, ‘‘સન્તરુત્તરપરમં તેન ભિક્ખુના તતો ચીવરં સાદિતબ્બ’’ન્તિ (પારા. ૫૨૩) વુત્તત્તા અચ્છિન્નચીવરેન સાદિતબ્બઅન્તરવાસકઉત્તરાસઙ્ગમત્તેન અધિકન્તિ અત્થો.

‘‘તતો ચે ઉત્તરિ સાદિયેય્યા’’તિ (પારા. ૫૨૩) વચનતો ‘‘સાદિયન્તસ્સા’’તિ વત્તબ્બં, એવં વત્તબ્બે ‘‘વિઞ્ઞાપેન્તસ્સા’’તિ કસ્મા વુત્તન્તિ? અચ્છિન્નચીવરાનં ભિક્ખૂનં છબ્બગ્ગિયેહિ ભિક્ખૂહિ ચીવરવિઞ્ઞાપનવત્થુસ્મિં ‘‘કથઞ્હિ નામ તુમ્હે મોઘપુરિસા ન મત્તં જાનિત્વા બહું ચીવરં વિઞ્ઞાપેસ્સથા’’તિ (પારા. ૫૨૨) છબ્બગ્ગિયે ભિક્ખૂ ગરહિત્વા ઇમસ્સ સિક્ખાપદસ્સ પઞ્ઞત્તત્તા ‘‘સાદિતબ્બ’’ન્તિ એત્થ વિઞ્ઞાપેતબ્બન્તિ અત્થો હોતિ, તેનેવ ઇમસ્મિં પદભાજને ‘‘તતો ચે ઉત્તરિ સાદિયેય્યાતિ તતુત્તરિ વિઞ્ઞાપેતી’’તિ (પારા. ૫૨૪) ચ આપત્તિભેદસન્દસ્સનટ્ઠાને ‘‘અઞ્ઞાતકે અઞ્ઞાતકસઞ્ઞી તતુત્તરિ ચીવરં વિઞ્ઞાપેતિ, નિસ્સગ્ગિયં પાચિત્તિય’’ન્તિઆદિવચનતો (પારા. ૫૨૫) ચ વુત્તં. યદિ એવં સિક્ખાપદેયેવ ‘‘સાદિતબ્બં, સાદિયેય્યા’’તિ ચ ઉભયત્થ ‘‘વિઞ્ઞાપેતબ્બં, વિઞ્ઞાપેય્યા’’તિ ચ કસ્મા ન વુત્તન્તિ? અચ્છિન્નચીવરભાવં ઞત્વા અવિઞ્ઞાપિતેપિ અભિહરિત્વા દિય્યમાનમ્પિ અધિવાસેન્તેન એવમેવ સાદિતબ્બન્તિ ન વુત્તં. ઇમસ્સેવ ચ અધિકવિઞ્ઞાપનનિસેધનત્થં વદન્તેનાપિ ‘‘તઞ્ચે અઞ્ઞાતકો ગહપતિ વા ગહપતાની વા બહૂહિ ચીવરેહિ અભિહટ્ઠું પવારેય્ય, સન્તરુત્તરપરમં તેન ભિક્ખુના તતો ચીવરં સાદિતબ્બ’’ન્તિ સાદિતબ્બનિયમપ્પધાનં વુત્તં. તસ્મા અચ્છિન્નચીવરેન અત્તના વા તં સન્ધાય અઞ્ઞેન વા વિઞ્ઞાપેન્તેનપિ અવિઞ્ઞાપેન્તેપિ દિય્યમાનં સાદિયન્તેનાપિ સન્તરુત્તરપરમતં નાતિક્કમિતબ્બન્તિ ઇમસ્મિં સિક્ખાપદે સન્ધાય ભાસિતત્થોતિ સલ્લક્ખેતબ્બન્તિ એત્તકં ઞાપેતું ‘‘સાદિયન્તસ્સા’’તિ અવત્વા ‘‘વિઞ્ઞાપેન્તસ્સા’’તિ વુત્તન્તિ આચરિયાભિસન્ધિ વેદિતબ્બા.

૬૪૦. ઇદાનિ વિઞ્ઞાપને ચ અધિવાસને ચ ઉભયત્થેવ નિયમં દસ્સેતું ‘‘સચે તીણિ નટ્ઠાનિ હોન્તિ, દ્વે સાદિતબ્બાનિ. દ્વે નટ્ઠાનિ, એકં સાદિતબ્બં. એકં નટ્ઠં, ન કિઞ્ચિ સાદિતબ્બ’’ન્તિ (પારા. ૫૨૪) પદભાજને વુત્તવિનિચ્છયં દસ્સેતુમાહ ‘‘યસ્સા’’તિઆદિ. ‘‘યસ્સ તીણિપિ નટ્ઠાનિ, દ્વે વા નટ્ઠાનિ, એકં વા નટ્ઠ’’ન્તિ સમ્બન્ધિત્વા યથાક્કમં ‘‘તેન દ્વે સાદિતબ્બાનિ, એકં સાદિતબ્બં, ન કિઞ્ચિપિ સાદિતબ્બ’’ન્તિ યોજના કાતબ્બા. યસ્સ તીણિપિ ચીવરાનિ નટ્ઠાનિ, બહુ ચ દિય્યતિ, તેન દ્વેયેવ ચીવરાનિ સાદિતબ્બાનિ. દ્વે ચીવરાનિ નટ્ઠાનિ, એકં સાદિતબ્બં. એકઞ્ચે નટ્ઠં, ન સાદિતબ્બં, અવસિટ્ઠં પચ્છા ધમ્મેન સમેન લદ્ધનીહારેન ગહેતબ્બન્તિ અત્થો. યથાહ અટ્ઠકથાયં ‘‘સેસં સભાગટ્ઠાનતો પરિયેસિસ્સતી’’તિ. ‘‘ભિક્ખુનિયા પન પઞ્ચસુપિ નટ્ઠેસુ દ્વે સાદિતબ્બાનિ, ચતૂસુ નટ્ઠેસુ એકં સાદિતબ્બં, તીસુ નટ્ઠેસુ કિઞ્ચિ ન સાદિતબ્બ’’ન્તિ (પારા. અટ્ઠ. ૨.૫૨૨-૫૨૪) અટ્ઠકથાયં વુત્તં.

૬૪૧-૨. સેસકં આહરન્તસ્સ અનાપત્તીતિ ઞાતબ્બન્તિ યોજના. એવમુપરિપિ યોજેતબ્બં. ચીવરં યોજેત્વા અતિરેકં વત્થં પચ્ચાહરિત્વા ‘‘દસ્સામી’’તિ બહુમ્પિ ગહેત્વા ગચ્છન્તસ્સ અનાપત્તીતિ અત્થો. અતિરેકમ્પિ તુમ્હેયેવ ગણ્હથાતિ દિન્નં ગણ્હતોપિ અનાપત્તિ. ન અચ્છિન્નકારણા દિન્નેતિ યોજના, અચ્છિન્નચીવરભાવં અનુદ્દિસ્સ બહૂનં ચીવરાનં ગહણનિમિત્તેનાપિ અનાપત્તીતિ અત્થો. એવમેવ ‘‘ન નટ્ઠકારણા દેન્તી’’તિ ઇદમ્પિ દસ્સિતમેવ. અચ્છિન્નચીવરે નિસ્સાય તતુત્તરિચીવરવિઞ્ઞાપનવત્થુમ્હિ ઇમસ્સ સિક્ખાપદસ્સ પઞ્ઞત્તત્તા અનાપત્તિવારે ‘‘અઞ્ઞસ્સત્થાયા’’તિ ન ગહિતં.

તતુત્તરિકથાવણ્ણના.

૬૪૩. કલ્યાણકમ્યતાહેતૂતિ સુન્દરસ્સ મહગ્ઘસ્સ કામતં પટિચ્ચ ચીવરે વિકપ્પનં આપજ્જેય્યાતિ યોજના, ‘‘કીદિસેન તે ભન્તે ચીવરેન અત્થો’’તિ પુબ્બે અપ્પવારિતો ‘‘આયતં વા હોતુ વિત્થતં વા અપ્પિતં વા સણ્હં વા’’તિ (પારા. ૫૨૯) પદભાજને વુત્તવિસિટ્ઠકપ્પં અધિકવિધાનં કરોતીતિ અત્થો. તસ્સ લાભા નિસ્સગ્ગિયં ભવેતિ તથા અપ્પવારિતેન હુત્વા કતેન અધિકવિધાનેન નિપ્ફન્નચીવરસ્સ લાભપ્પયોગેન દુક્કટનિસ્સગ્ગિયપાચિત્તિયા હોન્તિ.

૬૪૪. મહગ્ઘં …પે… વિઞ્ઞાપેતીતિ વીસતિઅગ્ઘનકં ચીવરં દાતુકામમ્હિ ઉપાસકે, ‘‘અલં મય્હં એતેન, દસગ્ઘનકં વા અપ્પગ્ઘનકં વા દેહી’’તિ વદતિ.

૬૪૫. ‘‘ઞાતકે અઞ્ઞાતિસઞ્ઞિસ્સા’’તિ પદચ્છેદો.

પઠમોપક્ખટકથાવણ્ણના.

૬૪૬. પઠમસિક્ખાપદે એકેન ઉપાસકેન પીળા લદ્ધા, ઇધ દ્વીહીતિ એત્તકં નાનાકરણં. સેસં પઠમસિક્ખાપદસદિસમેવાતિ આહ ‘‘દુતિયો…પે… વિનિચ્છયો’’તિ. ઉપક્ખટપદેન લક્ખિતં સિક્ખાપદં ઉપક્ખટં, દુતિયઞ્ચ તં ઉપક્ખટઞ્ચાતિ દુતિયોપક્ખટં, તસ્મિં દુતિયોપક્ખટે. અસ્સાતિ દુતિયોપક્ખટસ્સ.

દુતિયોપક્ખટકથાવણ્ણના.

૬૪૭. રઞ્ઞા વાતિ રાજતો વા. રાજતો ભોગ્ગં ભુઞ્જિતબ્બં અસ્સ અત્થીતિ ‘‘રાજભોગ્ગો’’તિ વુત્તો, રાજતો ભત્તવેત્તનલાભિતો યતો કુતોચિ દાયકા આભતન્તિ સમ્બન્ધો. ન ચ વટ્ટતીતિ એત્થ ‘‘નિસ્સગ્ગિયપાચિત્તિયભાવતો’’તિ અજ્ઝાહરિતબ્બં. ઇધ ઉત્તરિકરણીયં ‘‘તિક્ખત્તુ’’ન્તિઆદિગાથાય (વિ. વિ. ૬૭૧) વક્ખતિ.

૬૪૮. ચીવરચેતાપન્નવસેન અધિગતરજતાદિ યેન કેનચિ પરિયાયેનાપિ ન સાદિતબ્બન્તિ દસ્સેતુમાહ ‘‘રજતં વા’’તિઆદિ. ધવલસભાવતાય રાજતીતિ રજતં, સજ્ઝુ. જાતં રૂપં વણ્ણાયતનમેતસ્સાતિ જાતરૂપં, સુવણ્ણં. કિઞ્ચીતિ અપ્પમત્તકમ્પિ. અત્તનો વા અત્થાય પરસ્સ વા અત્થાય દિય્યમાનં કિઞ્ચિ ગણ્હિતું ન વટ્ટતીતિ યોજના.

૬૪૯. અત્તનો પટિગ્ગહણે આપત્તિયા રૂપિયગહણસિક્ખાપદે વક્ખમાનત્તા અઞ્ઞસ્સ અત્થાય ગહણે આપત્તિદસ્સનત્થમાહ ‘‘અઞ્ઞસ્સત્થાયા’’તિઆદિ. તત્થ અઞ્ઞસ્સત્થાયાતિ અઞ્ઞસ્સ પુગ્ગલસ્સ, ગણસ્સ, સઙ્ઘસ્સ, ચેતિયસ્સ, નવકમ્મસ્સ વા અત્થાય. નિદ્દિટ્ઠન્તિ આહરિત્વા ‘‘ઇમં ગણ્હથા’’તિ વુત્તં રજતં, જાતરૂપં વા અઞ્ઞં વા યં કિઞ્ચિ નિસ્સગ્ગિયદુક્કટવત્થું પટિગ્ગણ્હતો તસ્સ ભિક્ખુનો દુક્કટં હોતીતિ મહાપચ્ચરિયં વુત્તન્તિ યોજના.

૬૫૦-૧. વુત્તમેવત્થં સરૂપતો વિભાવેતુમાહ ‘‘નેત્વા’’તિઆદિ. નેત્વાતિ આનેત્વા. અકપ્પિયં ભણ્ડન્તિ ‘‘રજતં જાતરૂપં વા’’તિ યથાવુત્તમેવ અકપ્પિયભણ્ડં. ઇત્થન્તિ વક્ખમાનપ્પકારેન. ન ચ વટ્ટતીતિ એત્થ ચ-કારેન વટ્ટતિ ચાતિ અનુઞ્ઞાતં કતન્તિ. યથાહ અટ્ઠકથાયં –

‘‘સચે પન ‘નયિદં ભિક્ખૂનં સમ્પટિચ્છિતું વટ્ટતી’તિ પટિક્ખિત્તે ‘વડ્ઢકીનં વા કમ્મકરાનં વા હત્થે ભવિસ્સતિ, કેવલં તુમ્હે સુકતદુક્કટં જાનાથા’તિ વત્વા તેસં હત્થે દત્વા પક્કમતિ, વટ્ટતિ. અથાપિ ‘મમ મનુસ્સાનં હત્થે ભવિસ્સતિ, મય્હમેવ વા હત્થે ભવિસ્સતિ, કેવલં તુમ્હે યં યસ્સ દાતબ્બં, તદત્થાય પેસેય્યાથા’તિ વદતિ, એવમ્પિ વટ્ટતી’’તિ (પારા. અટ્ઠ. ૨.૫૩૮-૫૩૯).

૬૫૨. વિહારસ્સાતિ એત્થ ‘‘નવકમ્મસ્સા’’તિ (પારા. અટ્ઠ. ૨.૫૩૮-૫૩૯) અટ્ઠકથાયં વુત્તત્તા વત્તબ્બં ગાથાબન્ધવસેન ન વુત્તં.

૬૫૪. રજતં જાતરૂપં વા સઙ્ઘસ્સાતિ એત્થ ‘‘ચત્તારો પચ્ચયે પરિભુઞ્જથાતિ દિન્ન’’ન્તિ સેસો. યથાહ અટ્ઠકથાયં ‘‘સચે પન કોચિ બહુમ્પિ હિરઞ્ઞસુવણ્ણં આનેત્વા ‘ઇદં સઙ્ઘસ્સ દમ્મિ, ચત્તારો પચ્ચયે પરિભુઞ્જથા’તિ વદતિ, તં ચે સઙ્ઘો સમ્પટિચ્છતિ, પટિગ્ગહણેપિ પરિભોગેપિ આપત્તી’’તિ (પારા. અટ્ઠ. ૨.૫૩૮-૫૩૯). એવં આભતં તસ્મિં સઙ્ઘે યો કોચિ ભિક્ખુ ‘‘નયિદં કપ્પતી’’તિ સચે પટિક્ખિપતિ, ‘‘અયં સઙ્ઘસ્સ લાભન્તરાયં કરોતી’’તિ વદન્તસ્સેવ આપત્તિ હોતિ. યથાહ અટ્ઠકથાયં ‘‘યો હિ તં ચોદેતિ, સ્વેવ સાપત્તિકો હોતિ, તેન પન એકેન બહૂ અનાપત્તિકા કતા’’તિ (પારા. અટ્ઠ. ૨.૫૩૮-૫૩૯). ઇધ સ્વેવ સાપત્તિકોતિ એત્થ ‘‘દુક્કટાપત્તિકોતિ વુત્તં હોતી’’તિ ગણ્ઠિપદે વુત્તં. ઇમિસ્સા ગાથાય ‘‘સઙ્ઘસ્સા’’તિ અલિખિત્વા ‘‘ભિક્ખુનો’’તિ ચ લિખન્તિ, તં ન સુન્દરં. ઇદાનિ દસ્સિતઅટ્ઠકથાપાઠે ‘‘સઙ્ઘો સમ્પટિચ્છતી’’તિ (પારા. અટ્ઠ. ૨.૫૩૮-૫૩૯) વુત્તત્તા ‘‘સઙ્ઘસ્સા’’તિ પાઠો સુન્દરો.

૬૫૫. તળાકસ્સાતિ વાપિયા. સસ્સુપ્પત્તિનિદાનતો તળાકં ખેત્તં, તતો તસ્સ ગહણં વા પરિભોગો વા ન ચ વટ્ટતીતિ યોજના. તળાકસ્સ ચાતિ એત્થ ચ-કારેન ખેત્તવત્થુ સઙ્ગહિતં. ન ચ વટ્ટતીતિ એત્થ ચકારેન વટ્ટતિ ચાતિ દસ્સિતં હોતિ.

૬૫૬. તં કતમન્તિ આહ ‘‘ચત્તારો’’તિઆદિ. સબ્બમ્પીતિ તળાકપોક્ખરણિખેત્તાદિ સબ્બમ્પિ.

૬૫૮-૯. અપરિચ્છિન્નભાગસ્મિન્તિ ‘‘ઇમસ્મિં ભૂમિભાગે કતસ્સ કમ્મેહિ એત્તકો ભાગો દેય્યો’’તિ એવં પુબ્બે અનિયમિતઆયે ભૂમિભાગે. અકતપુબ્બં નવસસ્સં નામ. એત્તકં ભાગં દેથાતિ એત્તકં કહાપણભાગં દેથ. ઉટ્ઠાપેતીતિ ઉપ્પાદેતિ.

‘‘કસથ વપથા’’તિ અકપ્પિયં વાચં વત્વાતિ યોજના. વપથાતિ ચાતિ એત્થ ચ-સદ્દો ઇધ અવુત્તં તંકત્તુયોગકાલે વુચ્ચમાનં અકપ્પિયવચનન્તરં સમુચ્ચિનોતિ. ઉપ્પાદિતઞ્ચાતિ એત્થ ચ-સદ્દો કહાપણં સમુચ્ચિનોતિ. સબ્બન્તિ તથા ઉપ્પાદિતકહાપણઞ્ચ એવં અકપ્પિયવોહારેન ઉપ્પાદિતઞ્ચાતિ સબ્બં.

૬૬૦. કસથાદિકં વચનં અવત્વા ‘‘એત્તિકાય ભૂમિયા એત્તકો નામ ભાગો’’તિ ભૂમિં યો ચ પતિટ્ઠાપેતિ, તસ્સેવેતમકપ્પિયન્તિ વક્ખમાનેન યોજેતબ્બં. ચ-સદ્દો ‘‘યો પના’’તિ વક્ખમાનપુગ્ગલન્તરાપેક્ખો.

૬૬૧-૨. ભૂમિયા સયમેવ પમાણસ્સ જાનનત્થં તૂતિ યોજના, ‘‘એત્તકે ભૂમિભાગે અમ્હેહિ સસ્સં કતં, એત્તકં નામ ભાગં ગણ્હથા’’તિ કસકેહિ વુત્તે તેસં વચનં અસદ્દહિત્વા સયમેવ ખેત્તભૂમિયા પમાણં ઞાતુકામતાયાતિ અત્થો. તુ-સદ્દો ઇમમેવ વિસેસં જોતેતિ. યો પન મિનાતિ, તસ્સેવેતમકપ્પિયન્તિ વક્ખમાનેન યોજેતબ્બં. રજ્જુયાપિ ચ દણ્ડેનાતિ એત્થ પાદેનાપિ મિનિતું ન વટ્ટતીતિ વદન્તિ. ‘‘રક્ખતી’’તિઆદિકિરિયાપદેહિપિ એવમેવ યોજેતબ્બં.

ખલે ઠત્વા રક્ખતીતિ ધઞ્ઞકરણે ઠત્વા અઞ્ઞે ગણ્હિતું અદત્વા પાલેતિ. કથં રક્ખિતું વટ્ટતિ, કથં રક્ખિતું ન વટ્ટતીતિ? તં પન વીહિં ‘‘ઇદં વા એત્તકં વા મા ગણ્હ, ઇદં ગહેતું ન લબ્ભતી’’તિ વા ‘‘ઇતો અપનેહિ, ઇધ પુઞ્જં કરોહી’’તિ વા એવમાદિના પયોગેન ચે રક્ખતિ, તં અકપ્પિયં. સચે ‘‘મયિ ઠિતે રક્ખિતં હોતી’’તિ રક્ખતિ, ગણ્હન્તે વા પસ્સિત્વા ‘‘કિં કરોથા’’તિ ભણતિ, વટ્ટતિ. રૂપિયપટિગ્ગહણસિક્ખાપદે દ્વારં પિદહિત્વા રક્ખન્તેન વસિતબ્બન્તિ હિ વુત્તન્તિ ગણ્ઠિપદે વુત્તનયેન વેદિતબ્બો. અઞ્ઞસ્મિમ્પિ ગણ્ઠિપદે વુત્તં ‘‘થેનેત્વા ગણ્હન્તે સતિ એતં ભો પવત્તિં ભિક્ખુસઙ્ઘસ્સ કિં આરોચેસ્સામીતિ પટિપુચ્છિતું વટ્ટતીતિ વદન્તી’’તિ. નીહરાપેતીતિ એત્થાપિ સચે પરિયાયેન વદતિ, વટ્ટતીતિ વદન્તિ. તસ્સેવેતમકપ્પિયન્તિ ઇદં ખેત્તમિનનાદિં કરોન્તેન લદ્ધબ્બતો અઞ્ઞસ્સ અભિનવુપ્પાદિતસ્સ અભાવા અઞ્ઞેસં વટ્ટતીતિ દ્વીસુ ગણ્ઠિપદેસુ વુત્તં.

૬૬૩. ‘‘એત્તકેહિ વીહીહિ ઇદં આહરથા’’તિ વુત્તા સચે આહરન્તીતિ યોજના. એત્થ ‘‘તસ્સેવેતમકપ્પિય’’ન્તિ ઇદં ધઞ્ઞસ્સ વિચારિતત્તા વુત્તં. યથાહ અટ્ઠકથાયં ‘‘તસ્સેવ અકપ્પિયં. કસ્મા? ધઞ્ઞસ્સ વિચારિતત્તા’’તિ (પારા. અટ્ઠ. ૨.૫૩૮-૫૩૯).

૬૬૪. હિરઞ્ઞેનાતિ કહાપણેન. ‘‘તમકપ્પિય’’ન્તિ ઇદં કહાપણાનં વિચારિતત્તા વુત્તં. યથાહ અટ્ઠકથાયં ‘‘સબ્બેસં અકપ્પિયં. કસ્મા? કહાપણાનં વિચારિતત્તા’’તિ (પારા. અટ્ઠ. ૨.૫૩૮-૫૩૯).

૬૬૫. પેસકારકદાસં વાતિ પેસકારકસઙ્ખાતં દાસં વા, પેસકારો તન્તવાયો. આરામિકાનં નામેન દેન્તેતિ ‘‘આરામિકં દમ્મિ, વેય્યાવચ્ચકરં દમ્મી’’તિઆદિના નયેન દેન્તે.

૬૬૬. ખીરં દધિ તક્કં સપ્પિ નવનીતન્તિ પઞ્ચગોરસા.

૬૬૭. અજિકાદીસૂતિ આદિ-સદ્દેન મહિસં સઙ્ગણ્હાતિ.

૬૬૯. પટિસિદ્ધેપીતિ પટિક્ખિત્તેપિ. મૂલં દત્વાતિ કપ્પિયભણ્ડમૂલં દત્વા. કુક્કુટાદયો પન ‘‘સુખેન વસન્તૂ’’તિ અરઞ્ઞેયેવ વિસ્સજ્જેતબ્બં. યથાહ અટ્ઠકથાયં ‘‘કુક્કુટસૂકરે ‘સુખં જીવન્તૂ’તિ અરઞ્ઞે વિસ્સજ્જેતું વટ્ટતી’’તિ (પારા. અટ્ઠ. ૨.૫૩૮-૫૩૯). સૂકરમયૂરાદીસુપિ લદ્ધેસુ તેસં અનુરૂપેયેવ વિસયે વિસ્સજ્જેતબ્બા.

૬૭૧. ‘‘તિક્ખત્તુ’’ન્તિઆદિગાથાય કો સમ્બન્ધો? ‘‘રઞ્ઞા વા રાજભોગ્ગેના’’તિઆદિગાથાય સઙ્ગહિતનયેન રાજરાજામચ્ચબ્રાહ્મણગહપતાદીસુ યેન કેનચિ અત્તના વા ચીવરચેતાપન્નેન ચીવરં ચેતાપેત્વા ‘‘ઇત્થન્નામં ભિક્ખું ચીવરેન અચ્છાદેહી’’તિ વત્વા તં ચીવરચેતાપન્નસઙ્ખાતં ચીવરમૂલં દત્વા પહિતદૂતેન વા ભિક્ખું ઉપસઙ્કમિત્વા ‘‘ઇદં ખો ભન્તે આયસ્મન્તં ઉદ્દિસ્સ ચીવરચેતાપન્નં આભતં, પટિગ્ગણ્હાતુ આયસ્મા ચીવરચેતાપન્ન’’ન્તિ યદિ વુચ્ચેય્ય, ભિક્ખુના ‘‘ન ખો મયં આવુસો ચીવરચેતાપન્નં પટિગ્ગણ્હામ, ચીવરઞ્ચ ખો મયં પટિગ્ગણ્હામ કાલેન કપ્પિય’’ન્તિ વુત્તે સચે તેન ‘‘અત્થિ પનાયસ્મતો કોચિ વેય્યાવચ્ચકરો’’તિ વુત્તે ચીવરત્થિકેન ભિક્ખુના ‘‘એસો ખો આવુસો ભિક્ખૂનં વેય્યાવચ્ચકરો’’તિ આરામિકે વા ઉપાસકે વા દસ્સિતે યદિ સો તસ્સ અત્તના આહરિત્વા ‘‘ઇમસ્સ ભિક્ખુનો ચીવરેન અત્થે સતિ ઇમિના ચીવરં ચેતાપેત્વા અચ્છાદેહી’’તિ વત્વા તં ભિક્ખું ઉપસઙ્કમિત્વા ‘‘યં ખો ભન્તે આયસ્મા વેય્યાવચ્ચકરં નિદ્દિસિ, સઞ્ઞત્તો સો મયા, ઉપસઙ્કમતુ આયસ્મા કાલેન, ચીવરેન તં અચ્છાદેસ્સતી’’તિ યદિ વદેય્ય, તેન ચીવરત્થિકેન ભિક્ખુના કિં કાતબ્બન્તિ ભગવતા વુત્તન્તિ આહાતિ અયમિમિસ્સા ગાથાય સમ્બન્ધો.

તિક્ખત્તું ચોદના વુત્તાતિ ‘‘ચીવરત્થિકેન ભિક્ખવે ભિક્ખુના વેય્યાવચ્ચકરો ઉપસઙ્કમિત્વા દ્વત્તિક્ખત્તું ચોદેતબ્બો સારેતબ્બો ‘અત્થો મે આવુસો ચીવરેના’’તિ તિક્ખત્તું ચોદના કાતબ્બાતિ વુત્તા.

છક્ખત્તું ઠાનમબ્રવીતિ ‘‘દ્વત્તિક્ખત્તું ચોદયમાનો સારયમાનો તં ચીવરં અભિનિપ્ફાદેય્ય, ઇચ્ચેતં કુસલં, નો ચે અભિનિપ્ફાદેય્ય, ચતુક્ખત્તું પઞ્ચક્ખત્તું છક્ખત્તુપરમં તુણ્હીભૂતેન ઉદ્દિસ્સ ઠાતબ્બ’’ન્તિ (પારા. ૫૩૮) વુત્તત્તા તિક્ખત્તું ઉપસઙ્કમિત્વા ‘‘અત્થો મે આવુસો ચીવરેના’’તિ કતાય ચોદનાય ન નિપ્પજ્જેય્ય, તેન પુન ગન્ત્વા યં કિઞ્ચિ અવત્વા ‘‘ન આસને નિસીદિતબ્બં, ન આમિસં પટિગ્ગહેતબ્બં, ન ધમ્મો ભાસિતબ્બો’’તિ (પારા. ૫૩૯) વચનતો ઠાનભઞ્જનકં નિસજ્જાદિં કિઞ્ચિ અકત્વા ‘‘કિં કારણં આગતોસી’’તિ પુચ્છિતે ‘‘જાનાહિ, આવુસો’’તિ એત્તકમત્તં વત્વા ઉક્કટ્ઠપરિચ્છેદેન છક્ખત્તું ઠાનં સદ્ધમ્મવરચક્કવત્તિના ભગવતા દેસિતન્તિ વુત્તં હોતિ.

યદિ ચોદેતિયેવાતિ સચે ઠાનં અકત્વા ચોદનામત્તં કરોતિ, છ અબ્રવીતિ યોજના, ‘‘ચોદના’’તિ સામત્થિયતો લબ્ભતિ, છક્ખત્તું ચોદેત્વા સકિમ્પિ ન ઠાતબ્બન્તિ વુત્તં હોતિ.

છચોદનં અકત્વા યો ઠાનમેવ કરોતિ, તેન કતિ ઠાનાનિ કાતબ્બાનીતિ આહ ‘‘ચોદનાદિગુણા ઠિતી’’તિ, ‘‘કાતબ્બા’’તિ સેસો, ‘‘અબ્રવી’’તિ ઇમિના યોજેતબ્બં, ‘‘ચતુક્ખત્તું ચોદેત્વા ચતુક્ખત્તું ઠાતબ્બં, પઞ્ચક્ખત્તું ચોદેત્વા દ્વિક્ખત્તું ઠાતબ્બં, છક્ખત્તું ચોદેત્વા ન ઠાતબ્બ’’ન્તિ (પારા. ૫૩૯) વચનતો, ‘‘છક્ખત્તુપરમ’’ન્તિ (પારા. ૫૩૯) વચનતો ચ છક્ખત્તું ચોદનાય દિગુણા દ્વાદસક્ખત્તુકા ઠિતિ હોતીતિ સિદ્ધત્તા ચોદનમેવ અકત્વા ઠાનમત્તમેવ કરોન્તસ્સ દ્વાદસક્ખત્તું વુત્તનયેન ઠાતબ્બમેવાતિ વુત્તં હોતિ. તતો પરં કાતબ્બં અદસ્સેત્વા એત્તકેનેવ નિવત્તેતબ્બન્તિ ઞાપેન્તો ‘‘તતો ચે ઉત્તરિ વાયમમાનો તં ચીવરં અભિનિપ્ફાદેતિ, પયોગે દુક્કટં, પટિલાભેન નિસ્સગ્ગિય’’ન્તિ (પારા. ૫૩૯) વુત્તનયા આપત્તિ હોતીતિ દસ્સેતિ.

૬૭૨. ‘‘અચોદેત્વા લદ્ધે’’તિ ઇદં ઉપલક્ખણં ‘‘અટ્ઠત્વા લદ્ધે’’તિ ચ ગય્હમાનત્તા.

રાજસિક્ખાપદકથાવણ્ણના.

ચીવરવગ્ગો પઠમો.

૬૭૩. ‘‘એકેનાપી’’તિ ઇમિના કિં પન દ્વીહિ, બહૂહિ વાતિ વુત્તં હોતિ. મિસ્સેત્વાતિ અન્તમસો વાતેન આહટેનાપિ કોસિયંસુના મિસ્સેત્વા. સન્થતન્તિ ‘‘સન્થતં નામ સન્થરિત્વા કતં હોતિ અવાયિમ’’ન્તિ (પારા. ૫૪૪) પદભાજને ચ ‘‘સમે ભૂમિભાગે કોસિયંસૂનિ ઉપરૂપરિ સન્થરિત્વા કઞ્જિકાદીહિ સિઞ્ચિત્વા કતં હોતી’’તિ (પારા. અટ્ઠ. ૨.૫૪૨) અટ્ઠકથાય ચ વુત્તસરૂપં કઞ્જિકં સિઞ્ચિત્વા કોસિયંસૂનિ અત્થરિત્વા યાવ બહલમિચ્છતિ, તાવ વડ્ઢેત્વા નિસીદનનિપજ્જનાદિઅત્થં કાતબ્બં સન્થતન્તિ અત્થો. કોસિયંસુનાતિ કોસિયકિમિકોસિયસ્સ ઇદન્તિ કોસિયં, સુત્તં, તસ્સ સુત્તસ્સ અંસુ, તેન કોસિયંસુનાતિ અત્થો. કારાપેન્તસ્સાતિ ઉપલક્ખણત્તા ‘‘કરોન્તસ્સા’’તિપિ ગહેતબ્બં. વુત્તઞ્હેતં ‘‘કારાપેય્યાતિ એકેનાપિ કોસિયંસુના મિસ્સેત્વા કરોતિ વા કારાપેતિ વા’’તિ (પારા. ૫૪૪). તેનેવાહ ‘‘પરત્થાય કરોન્તસ્સ કારાપેન્તસ્સા’’તિ.

૬૭૫. ભૂમત્થરણન્તિ પરિકમ્મકતાય ભૂમિયા છવિરક્ખનત્થાય અત્થરિતબ્બં અત્થરણં. ભિસિ નામ મઞ્ચભિસિ, પીઠભિસીતિ દ્વયં. બિબ્બોહનં ઉપધાનં.

કોસિયકથાવણ્ણના.

૬૭૬. કાળકેળકલોમાનન્તિ ‘‘કાળકં નામ દ્વે કાળકાનિ જાતિયા કાળકં વા રજનકાળકં વા’’તિ (પારા. ૫૪૯) વચનતો એવં કાળકાનં એળકલોમાનં. સુદ્ધાનન્તિ ઇતરવણ્ણેહિ એળકલોમેહિ અમિસ્સાનં. યથાહ અટ્ઠકથાયં ‘‘સુદ્ધકાળકાનન્તિ સુદ્ધાનં કાળકાનં, અઞ્ઞેહિ અમિસ્સિતકાળકાનન્તિ અત્થો’’તિ (પારા. અટ્ઠ. ૨.૫૪૭). કરેય્યાતિ કરોન્તસ્સ ચ કારાપેન્તસ્સ ચાતિ વુત્તં હોતિ. યથાહ ‘‘કારાપેય્યાતિ કરોતિ વા કારાપેતિ વા’’તિ. આપત્તિ હોતીતિ ‘‘પયોગે દુક્કટં, પટિલાભેન નિસ્સગ્ગિય’’ન્તિ પાળિયં વુત્તં પુબ્બપયોગદુક્કટઞ્ચ નિસ્સગ્ગિયપાચિત્તિયઞ્ચ આહ.

સુદ્ધકાળકકથાવણ્ણના.

૬૭૭. ઓદાતં તુલં વા બહું વા સબ્બમેવ વા ગહેત્વાનાતિ યોજના. કપિલમ્પિ વાતિ એત્થાપિ એવમેવ યોજેતબ્બં. એત્થ સબ્બમેવ વાતિ સન્થતસ્સ ગહેતબ્બં સબ્બમેવ વા લોમં. કરોન્તસ્સાતિ એત્થ ‘‘સન્થત’’ન્તિ અધિકારતો લબ્ભતિ. ‘‘નવ’’ન્તિ ઇદં ‘‘કરોન્તસ્સા’’તિ પદસામત્થિયેન લબ્ભતિ, નવં સન્થતં કરોન્તસ્સાતિ અત્થો, ‘‘અનાપત્તી’’તિ ઇમિના સમ્બન્ધો. કપિલમ્પિ વાતિ વાકારેન પકારન્તરેનાપિ કરોન્તસ્સ અનાપત્તિં સઙ્ગણ્હાતિ. સેય્યથિદં? ‘‘નવં પન ભિક્ખુના સન્થતં કારયમાનેન દ્વે ભાગા સુદ્ધકાળકાનં એળકલોમાનં આદાતબ્બા તતિયં ઓદાતાનં ચતુત્થં ગોચરિયાન’’ન્તિ (પારા. ૫૫૩) માતિકાય અનુઞ્ઞાતપ્પકારો વેદિતબ્બો.

એત્થ ‘‘ઓદાતં કપિલમ્પિ વા’’તિ એતસ્સ ‘‘બહું વા’’તિ વિસેસનેન કાળકાનં એળકલોમાનં યથાવુત્તભાગદ્વયતો અધિકં એળકલોમમ્પિ ન ગહેતબ્બન્તિ દીપેતિ કેવલાનં કાળકાનં એળકલોમાનં અગ્ગહેતબ્બતાય પઠમસિક્ખાપદેનેવ વુત્તત્તા. ‘‘સબ્બમેવ વા’’તિ ઇમિનાપિ પુરિમસિક્ખાપદે વિય ઇમે ઓદાતાદયો સબ્બે કેવલા ન ગહેતબ્બા ન હોન્તીતિ દસ્સિતં હોતિ. ‘‘અનાપત્તી’’તિ ઇમિના એવં અકત્વા અઞ્ઞેન પકારેન કરોન્તસ્સ આપત્તિ હોતીતિ બ્યતિરેકતો દીપિતં હોતિ.

સેય્યથિદં? વુત્તઞ્હેતં ભગવતા ‘‘અનાદા ચે ભિક્ખુ દ્વે ભાગે સુદ્ધકાળકાનં એળકલોમાનં તતિયં ઓદાતાનં ચતુત્થં ગોચરિયાનં નવં સન્થતં કારાપેય્ય, નિસ્સગ્ગિયં પાચિત્તિય’’ન્તિ. યત્તકપ્પમાણેહિ એળકલોમેહિ નવં સન્થતં કાતુકામો હોતિ, તે લોમે ચતુભાગં તુલયિત્વા દ્વે તુલે વા ઊને વા કાળકલોમે ગહેત્વા એકં તુલં ઓદાતેહિ વા એકં તુલં ગોચરિયેહિ વા કાળકેહિ વા ઊને કત્વા દ્વીહિપિ અધિકે વા કત્વા કાળકલોમે વજ્જેત્વા દ્વીસુ એકં વા દ્વે એવ વા ગહેત્વા કાતુઞ્ચ કારાપેતુઞ્ચ વટ્ટતીતિ વુત્તં હોતિ. એવં અનાપત્તિદસ્સનેન સબ્બોપિ સિક્ખાપદત્થો સઙ્ગહિતોતિ દટ્ઠબ્બો.

૬૭૮. ‘‘અનુક્કમેના’’તિ ઇમિના ઇમમેવ અગ્ગહેત્વા પુરિમાનન્તરં વુત્તસિક્ખાપદદ્વયઞ્ચ ગહેતબ્બન્તિ દીપેતિ. નિસ્સજ્જિત્વા લદ્ધાનિપીતિ યોજના. ‘‘અપી’’તિ ઇમિના ‘‘અઞ્ઞેન કતં પટિલભિત્વા પરિભુઞ્જતિ, આપત્તિ દુક્કટસ્સા’’તિ (પારા. ૫૫૫) વુત્તદુક્કટઞ્ચ ‘‘નિસ્સગ્ગિયં ચીવરં અનિસ્સજ્જિત્વા પરિભુઞ્જતિ, આપત્તિ દુક્કટસ્સા’’તિ (પારા. ૪૬૮) પઠમનિસ્સગ્ગિયસિક્ખાપદે વુત્તનયેન ઇહાપિ ‘‘નિસ્સગ્ગિયં સન્થતં અનિસ્સજ્જિત્વા પરિભુઞ્જતિ, આપત્તિ દુક્કટસ્સા’’તિ વુત્તમ્પિ ધમ્મસઙ્ગહકારકેહિ પેય્યાલવસેન સંખિત્તં તં દુક્કટઞ્ચાતિ ઇદં દ્વયં સઙ્ગહિતન્તિ દટ્ઠબ્બં.

૬૭૯. તતિયં તુ ક્રિયાક્રિયન્તિ ઇદં તતિયસિક્ખાપદં પન ‘‘દ્વે ભાગા સુદ્ધકાળકાન’’ન્તિઆદિના (પારા. ૫૫૪) વુત્તનયેન અગ્ગહેત્વા કાળકાનં અતિરેકગ્ગહણવસેન અનનુઞ્ઞાતપ્પકારેન કરણતો કિરિયાકિરિયં નામ. યથાહ અટ્ઠકથાયં ‘‘આદાય ચ અનાદાય ચ કરણતો કિરિયાકિરિય’’ન્તિ (પારા. અટ્ઠ. ૨.૫૫૨).

દ્વેભાગકથાવણ્ણના.

૬૮૦. છન્નં વસ્સાનં ઓરેનાતિ પુબ્બે સન્થતસ્સ કતદિવસતો પટ્ઠાય ઉપરિ છન્નં વસ્સાનં અબ્ભન્તરેતિ અત્થો. હોતિ નિસ્સગ્ગિયાપત્તીતિ છબ્બસ્સન્તરે કતસન્થતં નિસ્સગ્ગિયં હોતિ, કારકસ્સ ચ પાચિત્તિયં હોતીતિ અત્થો. ભિક્ખુસમ્મુતિં ઠપેત્વાતિ સન્થતં ગહેત્વા અદ્ધાનમગ્ગં પટિપજ્જિતું અસમત્થસ્સ ગિલાનસ્સ ‘‘અહં ભન્તે ગિલાનો ન સક્કોમિ સન્થતં આદાય પક્કમિતું, સોહં ભન્તે સઙ્ઘં સન્થતસમ્મુતિં યાચામી’’તિ (પારા. ૫૫૯) સઙ્ઘમજ્ઝે નિસજ્જ અઞ્જલિં પગ્ગહેત્વા તિક્ખત્તું યાચિતે ઞત્તિદુતિયાય કમ્મવાચાય ગતટ્ઠાને છબ્બસ્સાનં અન્તોપિ સન્થતં કાતું સઙ્ઘેન દિન્નસમ્મુતિં વિનાતિ અત્થો.

૬૮૨. છબ્બસ્સાનિ કરોન્તસ્સાતિ એત્થ ‘‘યદા પરિપુણ્ણાનિ, તદા’’તિ સેસો, છબ્બસ્સેસુ પરિપુણ્ણેસુ સન્થતં કરોન્તસ્સાતિ અત્થો. યથાહ અટ્ઠકથાયં ‘‘યદા છબ્બસ્સાનિ પરિપુણ્ણાનિ હોન્તિ, તદા સન્થતં કરોતી’’તિ (પારા. અટ્ઠ. ૨.૫૫૭). તદુદ્ધમ્પીતિ છબ્બસ્સતો ઉપરિપિ. વિતાનેતિ વિતાનનિમિત્તં કરોન્તસ્સ. સાણિપાકારેતિ પાકારસદિસતિરોકરણીયનિમિત્તં કરોન્તસ્સ. નિસ્સજ્જિત્વા કતેપિ ચાતિ પુરાણસન્થતે અઞ્ઞસ્સ દત્વા અઞ્ઞસ્મિં સન્થતે ઓરતો છન્નં વસ્સાનં કતેપિ ચ અનાપત્તીતિ યોજના. અયમનાપત્તિવારો નેવ પાળિયં, ન અટ્ઠકથાસુ દિસ્સતિ, તસ્મા સો આચરિયપરમ્પરાભતો આચરિયેન દસ્સિતોતિ વિઞ્ઞાયતિ. સાધારણવિનિચ્છયં પન ‘‘અનન્તરસ્સિમસ્સાપિ, વિસેસો નુપલબ્ભતી’’તિ વક્ખતિ.

છબ્બસ્સકથાવણ્ણના.

૬૮૩. અનાદાયાતિ નવં નિસીદનસન્થતં કરોન્તેન ભિક્ખુના તસ્સ વિવણ્ણકરણત્થાય પાળિયં ‘‘પુરાણસન્થતસ્સ સામન્તા સુગતવિદત્થિ આદાતબ્બા દુબ્બણ્ણકરણાયા’’તિ (પારા. ૫૬૭) યા આદાતું વુત્તા, તં પુરાણસન્થતસ્સ છિન્નમુખાવત્તતો સુગતવિદત્થિં અદત્વા. એવમેતં વુત્તન્તિ કથં વિઞ્ઞાયતીતિ? ‘‘અનાદાનવસેનસ્સ, સુગતસ્સ વિદત્થિયા’’તિ વક્ખમાનેન વિઞ્ઞાયતિ. સન્થતેતિ એત્થ ‘‘પુરાણે’’ઇતિ ચ કારેતું કતઞ્ચાતિ એત્થ ‘‘નવં નિસીદનં સન્થત’’ન્તિ ચ સેસો, પુરાણે સન્થતે અસન્તે સામન્તા સુગતવિદત્થિં અનાદાય નવં નિસીદનસન્થતં કરોન્તસ્સ અનાપત્તિ. અઞ્ઞસ્સત્થાય નવં નિસીદનસન્થતં કારેતું, નવં નિસીદનસન્થતં અઞ્ઞેન કતં પટિલભિત્વા પરિભુઞ્જિતુઞ્ચ અનાપત્તીતિ યોજના.

‘‘અઞ્ઞસ્સત્થાય કારેતુ’’ન્તિ ઇદમેત્થ પાચિત્તિયેનેવ અનાપત્તિદસ્સનન્તિ ગહેતબ્બં. તસ્મા ‘‘અઞ્ઞસ્સત્થાય કરોતિ વા કારાપેતિ વા, આપત્તિ દુક્કટસ્સા’’તિ (પારા. ૫૬૯) વુત્તત્તા ચ અટ્ઠકથાય, તબ્બણ્ણનાસુ ચ અદિસ્સમાનત્તા વા તં ન વત્તબ્બં. ‘‘અનાપત્તિ છબ્બસ્સાનિ કરોતિ…પે… અઞ્ઞસ્સત્થાય કરોતિ વા કારાપેતિ વા’’તિ (પારા. ૫૬૪) અનન્તરસિક્ખાપદે વુત્તમોલોકેત્વા વા દુક્કટસ્સ ચ વિહિતત્તા પાચિત્તિયેન અનાપત્તિભાવં સન્ધાય લિખિતન્તિ વિઞ્ઞાયતિ. કતઞ્ચ પરિભુઞ્જિતુન્તિ એત્થ ‘‘અઞ્ઞેના’’તિ વત્તબ્બં, ઇમિના ‘‘અઞ્ઞેન કતં પટિલભિત્વા પરિભુઞ્જતિ, અનાપત્તી’’તિ પાઠોવ દસ્સિતો.

૬૮૪. સુગતસ્સ વિદત્થિયા અનાદાનવસેન ચ અસ્સ સન્થતસ્સ કરણેન ચ સત્થારા એતં સિક્ખાપદં કિરિયાકિરિયં વુત્તન્તિ યોજના.

૬૮૫. નનુ ચ ઇમસ્સ સિક્ખાપદસ્સ અટ્ઠકથાય ‘‘સમુટ્ઠાનાદીનિ કિરિયાકિરિયત્તા ઇમસ્સ સિક્ખાપદસ્સ દ્વેભાગસિક્ખાપદસદિસાની’’તિ (પારા. અટ્ઠ. ૨.૫૬૭) વુત્તાનિ, ઇહ ‘‘સઞ્ચરિત્તસમા’’તિ કસ્મા વુત્તાનીતિ? વુચ્ચતે – દ્વેભાગસિક્ખાપદે ‘‘સમુટ્ઠાનાદીનિપિ કોસિયસિક્ખાપદસદિસાનેવા’’તિ (પારા. અટ્ઠ. ૨.૫૫૨) અટ્ઠકથાય વુત્તાનિ, કોસિયસિક્ખાપદે સમુટ્ઠાનાદીનં સઞ્ચરિત્તેન સમભાવસ્સ વુત્તત્તા, મૂલમેવ સરિત્વા કિરિયાકિરિયસઙ્ખાતવિસેસસ્સ વિસું દસ્સિતત્તા અવસિટ્ઠવિનિચ્છયમત્તં સન્ધાય એવં વુત્તન્તિ ગહેતબ્બં. ઇમં વિસેસં મુઞ્ચિત્વા અવસિટ્ઠવિનિચ્છયેન દ્વીસુ સિક્ખાપદેસુ સાધારણવિનિચ્છયસ્સ અવિસેસતં દસ્સેતુમાહ ‘‘અનન્તરસ્સા’’તિઆદિ.

નિસીદનસન્થતકથાવણ્ણના.

૬૮૬-૭. ગચ્છન્તેતિ તિયોજનપૂરણટ્ઠાનં અતિક્કમ્મ ગચ્છન્તે. યાનેતિ સકટાદિકે. લોમાનીતિ એળકલોમાનિ. સામિકસ્સાતિ યાનાદિસામિનો. અજાનતોતિ અનાદરે સામિવચનં. અદ્ધાનમગ્ગપટિપન્નો યો પન ભિક્ખુ એળકલોમં લભિત્વા ‘‘તિયોજનપરમં સહત્થા હારેતબ્બાની’’તિ (પારા. ૫૭૩) અનુઞ્ઞાતત્તા તિયોજનબ્ભન્તરે સહત્થેનાપિ હરિત્વા તિયોજનાતિક્કમે પરેસં યાનાદીસુ સામિકેસુ અજાનન્તેસુ ‘‘એતે હરિસ્સન્તી’’તિ ચિન્તેત્વા યદિ ઠપેય્યાતિ અત્થો. તેસૂતિ યેસુ એળકલોમાનિ ઠપિતાનિ, તેસુ યાનાદીસુ તિયોજનમતીતેસુ ભિક્ખુસ્સ પયોગં વિનાપિ તિયોજનં અતિક્કન્તેસુ તસ્સ ભિક્ખુનો આપત્તિ હોતીતિ યોજના, તસ્સ ભિક્ખુનો ‘‘પઠમં પાદં તિયોજનં અતિક્કામેતિ, આપત્તિ દુક્કટસ્સ. દુતિયં પાદં અતિક્કામેતિ, નિસ્સગ્ગિયં પાચિત્તિય’’ન્તિ (પારા. ૫૭૩) વુત્તત્તા દુક્કટપાચિત્તિયા હોન્તીતિ અત્થો.

અયં નયોતિ ભિક્ખુનો પયોગં વિના યત્થ એળકલોમાનિ ઠપિતાનિ, તેસુ યાનાદીસુ તિયોજનં અતિક્કમન્તેસુ આપત્તિ હોતીતિ અયમત્થો દટ્ઠબ્બોતિ અત્થો.

૬૮૮. અગચ્છન્તેતિ તિયોજનબ્ભન્તરે ઠિતે. ‘‘અભિરૂહિત્વા’’તિ ઇદં અનાપત્તિકારણેસુ એકં દસ્સેતુમાહ. ‘‘ભૂમિયઞ્હિ ઠત્વા દેન્તો, અવ્હાયન્તો વા પુરતો ગચ્છતિ, એસેવનયો’’તિ અટ્ઠકથાયં વુત્તં. અનાપત્તિવારે ‘‘અઞ્ઞં હરાપેતી’’તિ વચનતો અત્તના પેસિતે અઞ્ઞસ્મિં હરન્તે વટ્ટતીતિ દસ્સેતુમાહ ‘‘સચે સારેતિ વટ્ટતી’’તિ. તેનેવાહ ‘‘તં પનઞ્ઞં હરાપેતિ, વચનેન વિરુજ્ઝતી’’તિ.

૬૯૦. કણ્ણચ્છિદ્દેસૂતિ અત્તનો કણ્ણબિલેસુ.

૬૯૧. અનાપત્તિવારે ‘‘કતભણ્ડ’’ન્તિ વુત્તત્તા તત્થ અન્તમસો સુત્તકેન બદ્ધમત્તમ્પિ કતભણ્ડમેવાતિ આહ ‘‘સુત્તકેન ચ બન્ધિત્વા’’તિ. વેણિં કત્વાતિ કુદ્રૂસસીસપલાલવેણિસદિસં વેણિં કત્વા. આપત્તિ પરિદીપિતાતિ ‘‘વેણિં કત્વા હરતિ, ઇદં નિધાનમુખં નામ, આપત્તિયેવા’’તિ (પારા. અટ્ઠ. ૨.૫૭૫) અટ્ઠકથાયં વુત્તં.

૬૯૨. સુઙ્કઘાતન્તિ એત્થ ‘‘તં ઠાન’’ન્તિ સેસો, યદિ તં ઠાનં સુઙ્કઘાતન્તિ યોજના, તિયોજનોસાનટ્ઠાનં યદિ સુઙ્કઘાતટ્ઠાનં ભવેય્યાતિ અત્થો. અનુપ્પત્વાતિ તં ઠાનં પત્વા. ચોરાદીહિ ઉપદ્દુતો વા ગચ્છતિ, યો અઞ્ઞવિહિતો વા ગચ્છતીતિ યોજના. આપત્તીતિ એત્થ આપત્તિ તસ્સ ગચ્છતોતિ લબ્ભતિ. એત્થ ‘‘આપત્તી’’તિ ઇમિના સિક્ખાપદેન આપત્તિમાહ. ઇમિસ્સા અચિત્તકતાય તેસં દ્વિન્નમ્પિ હોતિ. અદિન્નાદાનપારાજિકં પન સચિત્તકતાય એતેસં ન હોતિ. તેનાહ અટ્ઠકથાયં ‘‘યા હિ તત્થ આપત્તિ, સા ઇધ અનાપત્તિ. યા ઇધ આપત્તિ, સા તત્થ અનાપત્તી’’તિ (પારા. અટ્ઠ. ૨.૫૭૨). થેય્યચિત્તેન હરતો ભણ્ડગ્ઘવસેન પારાજિકથુલ્લચ્ચયદુક્કટેસુ એકં હોતિ. તેનાહ અટ્ઠકથાયં ‘‘અદિન્નાદાને પન સુઙ્કઘાતે આપત્તિ હોતી’’તિ (પારા. અટ્ઠ. ૨.૫૭૨).

૬૯૩. તિયોજનન્તિ એત્થ હરણકિરિયાય અચ્ચન્તસંયોગે ઉપયોગવચનં. ‘‘હરન્તસ્સા’’તિ ઇમસ્સ કમ્મદીપકં ‘‘લોમાની’’તિ ઇદં પકરણતો લબ્ભતિ. ‘‘અનાપત્તિ પકાસિતા’’તિ ઇદં સબ્બત્થ વક્ખમાનેન સમ્બન્ધનીયં. તાનિયેવ પચ્ચાહરન્તસ્સાતિ યોજના. તિયોજનન્તિ એત્થ તંયેવ તિયોજનન્તિ લબ્ભતિ. અત્તના ગતં તિયોજનં પુન તાનેવ લોમાનિ ગહેત્વા પચ્ચાગચ્છન્તસ્સાતિ અત્થો.

૬૯૪. નિવાસત્થાય વા ગન્ત્વાતિ તિયોજનબ્ભન્તરે વા સીમાય વા આવાસે વસિતુકામતાય ગન્ત્વા. તતો પરં હરન્તસ્સાતિ તસ્મિં આવાસે ઉદ્દેસાદિં અલભિત્વા તતો પરં અઞ્ઞસ્મિં આવાસે વસિતુકામતાય પુનપિ તિયોજનં હરન્તસ્સાતિ અત્થો. ઇમિનાવ નયેન તતોપિ અઞ્ઞં ઠાનં, તતોપિ અઞ્ઞન્તિ સુદ્ધચિત્તેન ગતગતટ્ઠાનતો પુનપિ પરમ્પરં ઠાનં ગમનવસેન યોજનસતમ્પિ હરતો દોસો નત્થીતિ ઇદમ્પિ વુત્તં હોતિ. યથાહ અટ્ઠકથાયં ‘‘એવં યોજનસતમ્પિ હરન્તસ્સ અનાપત્તી’’તિ (પારા. અટ્ઠ. ૨.૫૭૫). અચ્છિન્નં વાપિ લભિત્વા હરતોપીતિ ‘‘ચોરાવહટપરિચ્ચત્તં લભિત્વા હરન્તસ્સ. ઇધ સબ્બત્થેવ ‘‘નિવાસત્થાય વા ગન્ત્વા’’તિઆદિકે અનાપત્તિવારે પઠમલદ્ધટ્ઠાનતો પભુતિ અતિરેકતિયોજનમ્પિ હરન્તસ્સ અનાપત્તીતિ અત્થો વિઞ્ઞાયતિ. નિસ્સટ્ઠં લભિત્વાતિ નિસ્સજ્જિત્વા વિનયકમ્મં કત્વા દિન્નં લભિત્વા.

૬૯૫. અઞ્ઞેનાતિ તાનિ હારિના અઞ્ઞેન. કતભણ્ડકન્તિ ‘‘કમ્બલકોજવસન્થતાદિં યં કિઞ્ચિ અન્તમસો સુત્તકેન બદ્ધમત્તમ્પી’’તિ (પારા. અટ્ઠ. ૨.૫૭૫) અટ્ઠકથાયં વુત્તએળકલોમેહિ કતભણ્ડકં.

૬૯૬. ઇદં સમુટ્ઠાનન્તિ ઇદં એળકલોમસમુટ્ઠાનં. પણ્ણત્તિં અજાનનતાય વા ઞત્વાપિ ચીવરાદિપરિક્ખારેસુ લોમસ્સ અલ્લિનભાવં અજાનિત્વાપિ વા તિયોજનં અતિક્કામેન્તસ્સ અરહતોપિ ઇમાય આપત્તિયા સમ્ભવતો ‘‘અચિત્ત’’ન્તિ આહ.

એળકલોમકથાવણ્ણના.

૬૯૭. એળકલોમધોવાપનકથા ઉત્તાનાયેવ.

એળકલોમધોવાપનકથાવણ્ણના.

૬૯૮. ગણ્હેય્ય વાતિ એત્થ ‘‘યો’’તિ સેસો. ‘‘ગણ્હેય્ય વા ગણ્હાપેય્ય વા’’તિ ઇમિના ‘‘તત્થત્તનો પનત્થાયા’’તિ વક્ખમાનત્તા ચ ‘‘નિસ્સજ્જિત્વા’’તિઆદિવચનતો ચ અત્તનો અત્થાય ઉગ્ગણ્હેય્ય વા ઉગ્ગણ્હાપેય્ય વાતિ વુત્તં હોતિ. વાકારેન ‘‘ઉપનિક્ખિત્તં વા સાદિયેય્યા’’તિ ઇદં સઙ્ગણ્હાતિ, ‘‘ઇદં અય્યસ્સ હોતૂ’’તિ ઉપનિક્ખિત્તં ચે સાદિયતીતિ અત્થો.

રજતન્તિ અઞ્ઞત્થ સજ્ઝુ વુચ્ચતિ, ઇધ પન વોહારૂપગકહાપણાદિ વુચ્ચતિ. વુત્તઞ્હેતં પાળિયં ‘‘રજતં નામ કહાપણો લોહમાસકો દારુમાસકો જતુમાસકો, યે વોહારં ગચ્છન્તી’’તિ (પારા. ૫૮૪). ઇધ કહાપણાદીનં સરૂપં અટ્ઠકથાયં –

‘‘તત્થ કહાપણોતિ સોવણ્ણમયો વા રૂપિયમયો વા પાકતિકો વા. લોહમાસકોતિ તમ્બલોહાદીહિ કતમાસકો. દારુમાસકોતિ સારદારુના વા વેળુપેસિકાય વા અન્તમસો તાલપણ્ણેપિ રૂપં છિન્દિત્વા કતમાસકો. જતુમાસકોતિ લાખાય વા નિય્યાસેન વા રૂપં સમુટ્ઠાપેત્વા કતમાસકો. ‘યે વોહારં ગચ્છન્તી’તિ ઇમિના પન પદેન યો યો યત્થ યત્થ જનપદે યદા યદા વોહારં ગચ્છતિ, અન્તમસો અટ્ઠિમયોપિ ચમ્મમયોપિ રુક્ખફલબીજમયોપિ સમુટ્ઠાપિતરૂપોપિ અસમુટ્ઠાપિતરૂપોપિ સબ્બો સઙ્ગહિતો’’તિ (પારા. અટ્ઠ. ૨.૫૮૩-૫૮૪) –

વુત્તનયેન વેદિતબ્બં.

એત્થ ચ પાકતિકો નામ એતરહિ પકતિકહાપણો. રુક્ખફલબીજમયોતિ તિન્તિણિકાદિરુક્ખાનં ફલબીજેન કતો.

જાતરૂપકં સુવણ્ણં. યથાહ પાળિયં ‘‘જાતરૂપં નામ સત્થુવણ્ણો વુચ્ચતી’’તિ (પારા. ૫૮૪). નિસ્સજ્જિત્વાતિ એત્થ ‘‘તેના’’તિ લબ્ભતિ, ‘‘ભિક્ખુના’’તિ ઇમિના યુજ્જતિ, એવં સાદિતભિક્ખુનાતિ અત્થો. નિસ્સજ્જિત્વાતિ અત્તના ઉગ્ગહિતં વા પરેન ઉગ્ગહાપિતં વા ઉપનિક્ખિપિતસ્સ સાદિયનવસેન સાદિતં વા રજતં વા જાતરૂપં વા ‘‘તેન ભિક્ખુના સઙ્ઘં ઉપસઙ્કમિત્વા એકંસં ઉત્તરાસઙ્ગં કરિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા’’તિ (પારા. ૫૮૪) વચનતો સઙ્ઘમજ્ઝે ઉપસઙ્કમિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગય્હ ‘‘અહં ભન્તે રૂપિયં પટિગ્ગહેસિં, ઇદં મે નિસ્સગ્ગિયં, ઇમાહં નિસ્સજ્જામી’’તિ નિસ્સજ્જિત્વાતિ વુત્તં હોતિ.

આપત્તિ દેસેતબ્બાવાતિ અત્તના એવ આપન્નં નિસ્સગ્ગિયં પાચિત્તિયં તસ્મિં સઙ્ઘમજ્ઝે એવમેવ નિસીદિત્વા દેસેતબ્બા. એવં દેસિતા આપત્તિ સઙ્ઘાનુમતેન બ્યત્તેન પટિબલેન ભિક્ખુના પટિગ્ગહેતબ્બા. વુત્તઞ્હેતં ‘‘બ્યત્તેન ભિક્ખુના પટિબલેન આપત્તિ પટિગ્ગહેતબ્બા’’તિ (પારા. ૫૮૪).

૬૯૯. રજતન્તિ રૂપિયં. જાતરૂપન્તિ સુવણ્ણં. ઇમિના પદદ્વયેન કતાકતં સબ્બં સઙ્ગણ્હાતિ. ઉભિન્નં માસકોતિ જાતરૂપમાસકો, રજતમાસકોપિ ચાતિ વુત્તં હોતિ. ઇધ રજતમાસકોતિ ‘‘રજત’’ન્તિ પદભાજને (પારા. ૫૮૪) વુત્તકહાપણાદિ પઞ્ચપ્પકારો માસકો ગહિતો. યથાહ અટ્ઠકથાયં ‘‘વુત્તપ્પકારો સબ્બોપિ રજતમાસકો’’તિ (પારા. અટ્ઠ. ૨.૫૮૩-૫૮૪). ઇધ ‘‘જાતરૂપમાસકો’’તિ વિસું ગહિતત્તા કહાપણપદેન સુવણ્ણકહાપણં વજ્જેત્વા ઇતરદ્વયમેવ વત્તબ્બં. ‘‘નિસ્સગ્ગિયાવહ’’ન્તિ ઇદં અત્તનો અત્થાય ઉગ્ગણ્હનઉગ્ગણ્હાપનસાદિયનાનિ કરોન્તં સન્ધાયાહ. ‘‘તત્થા’’તિઆદિના વક્ખમાનનયેન દુક્કટાવહઞ્ચ હોતેવ.

૭૦૦-૧. મુત્તાદીનં ઇમસ્મિં સિક્ખાપદવિભઙ્ગે અવુત્તત્તેપિ પાચિત્તિયકણ્ડે નવમવગ્ગે દુતિયસ્સ રતનસિક્ખાપદસ્સ પદભાજને ‘‘રતનં નામ મુત્તા મણિ વેળુરિયો સઙ્ખો સિલા પવાલં રજતં જાતરૂપં લોહિતઙ્કો મસારગલ્લ’’ન્તિ (પાચિ. ૫૦૬) વુત્તાનં દસન્નં રતનાનં ઇમસ્મિં સિક્ખાપદે નિસ્સગ્ગિયવત્થું કત્વા વુત્તં રજતં, જાતરૂપઞ્ચ વજ્જેત્વા અવસિટ્ઠાનં અટ્ઠન્નં રતનાનં દુક્કટવત્થુભાવો ઇમસ્સ અટ્ઠકથાયં વવત્થાપિતોતિ દસ્સનત્થમાહ ‘‘મુત્તા…પે… મસારગલ્લ’’ન્તિ. એત્થ વેળુરિયો ગાથાબન્ધવસેન ન વુત્તો, સો એકયોગનિદ્દિટ્ઠાનં સત્તન્નં રતનાનં ગહણેનેવ ગય્હતિ. મુત્તાદયો યથાદસ્સિતસરૂપાયેવ. બ્રહ્મજાલાદિસુત્તન્તવસેનાપિ ‘‘અકપ્પિયા’’તિ સિદ્ધાનં સત્તધઞ્ઞાદીનં પટિગ્ગહણે આપત્તિં દસ્સેતુમાહ ‘‘ધઞ્ઞાની’’તિઆદિ.

૭૦૨. રતનસિક્ખાપદેયેવ ‘‘રતનસમ્મત’’ન્તિ આગતં કપ્પિયવત્થું પટિગ્ગણ્હતો અનાપત્તિભાવં દસ્સેતુમાહ ‘‘મુગ્ગમાસાદિક’’ન્તિઆદિ.

૭૦૩-૪. એવં તિપ્પકારેન ઠિતં વત્થું ગણ્હતો અધિપ્પાયનાનત્તેન સમ્ભવન્તં આપત્તિપ્પભેદં દસ્સેતુમાહ ‘‘તત્થા’’તિઆદિ. તત્થાતિ તેસુ તીસુ નિસ્સગ્ગિયાદિવત્થૂસુ. સઙ્ઘાદીનન્તિ સઙ્ઘગણપુગ્ગલચેતિયાદીનં. તન્તિ નિસ્સગ્ગિયવત્થું. સબ્બત્થાયાતિ સબ્બેસં અત્થાયાતિ વિગ્ગહો. અત્તનો અત્થાય ચ સઙ્ઘાદીનમત્થાય ચ દુક્કટવત્થું ગણ્હન્તસ્સાપિ દુક્કટમેવ હોતીતિ અત્થો. અવુત્તસમુચ્ચયેનેત્થ ચ-સદ્દેન ‘‘સબ્બમ્પિ નિક્ખિપનત્થાય ભણ્ડાગારિકસીસેન સમ્પટિચ્છતો ઉપરિ રતનસિક્ખાપદે આગતવસેન પાચિત્તિય’’ન્તિ (પારા. અટ્ઠ. ૨.૫૮૩-૫૮૪) અટ્ઠકથાય વુત્તવિનિચ્છયવિસેસસ્સ સઙ્ગહો કતો.

૭૦૫. કહાપણાદીનન્તિ આદિ-સદ્દેન સુવણ્ણાદીનં સઙ્ગહો. ‘‘સહસ્સ’’ન્તિ ઇદં ઉપલક્ખણં, સહસ્સમ્પીતિ વુત્તં હોતિ.

૭૦૬. થવિકાદીસૂતિ આદિ-સદ્દેન સિથિલપૂરિતાનિ ભાજનાનિ ગહિતાનિ. ‘‘સિથિલબદ્ધેસૂ’’તિ વિસેસનેન બ્યતિરેકવસેન ‘‘ઘનબદ્ધે, પન ઘનપૂરિતે વા એકાવ આપત્તી’’તિ (પારા. અટ્ઠ. ૨.૫૮૩-૫૮૪) અટ્ઠકથાસેસં દીપેતિ.

૭૦૭. ઉપનિક્ખિત્તસાદિયનકમ્મં દસ્સેતુમાહ ‘‘ઇદ’’ન્તિઆદિ. ગણ્હિતુકામોપીતિ એત્થ ‘‘હોતૂ’’તિ સેસો. નિસેધેતબ્બમેવાતિ કાયેન વા વાચાય વા ‘‘ઇદં ન કપ્પતી’’તિ પટિક્ખિપિતબ્બમેવ, એવં સતિ અનાપત્તિયેવાતિ અત્થો. અયમત્થો અટ્ઠકથાયં ‘‘કાયવાચાહિ વા અપ્પટિક્ખિપિત્વાપિ સુદ્ધચિત્તો હુત્વા ‘નયિદં અમ્હાકં કપ્પતી’તિ ન સાદિયતિ, અનાપત્તિયેવા’’તિ (પારા. અટ્ઠ. ૨.૫૮૩-૫૮૪) આગતોયેવ.

૭૦૮. તં વત્થુન્તિ તથા પટિક્ખિત્તં વત્થું. ઠપેત્વા યદિ ગચ્છતીતિ ‘‘તુમ્હે ગણ્હથ વા, મા વા, દિન્નં દિન્નમેવા’’તિ સચે સો ઠપેત્વાવ ગચ્છતિ. યથા તં ન વિનસ્સતિ, તથા તં ગોપયિતબ્બન્તિ યોજના. ‘‘અઞ્ઞો તત્થ આગન્ત્વા પુચ્છતી’’તિઆદિના અટ્ઠકથાય વુત્તનયેન તત્થાગતેન કપ્પિયકારકેન ‘‘કિમિદ’’ન્તિ પુચ્છિતે સરૂપં આવિ કત્વા ‘‘ગોપયિસ્સામહં ભન્તે, ગુત્તટ્ઠાનં દસ્સેથા’’તિ વુત્તે ‘‘ઇમં ગહેત્વા એહી’’તિ અવત્વા સત્તભૂમિકમ્પિ પાસાદં અભિરુહિત્વા ‘‘ઇધ ઠપેહી’’તિ અવત્વા ‘‘ઇદં ગુત્તટ્ઠાન’’ન્તિ સુરક્ખિતટ્ઠાનં દસ્સેત્વા તત્થ ઠપિતે અગ્ગળં દત્વા રક્ખિતબ્બન્તિ વુત્તં હોતિ.

૭૦૯. ગુત્તટ્ઠાનં ગહેત્વા ગચ્છન્તસ્સ કપ્પિયકારકસ્સ અવત્તબ્બવોહારં દસ્સેતુમાહ ‘‘આહરેદમિદ’’ન્તિઆદિ. અકપ્પિયન્તિ એત્થ ‘‘વચન’’ન્તિ લબ્ભતિ. એવં અકપ્પિયવચનં અવત્વા સુરક્ખિતટ્ઠાને આહરિત્વા ઠપિતે કિં કાતબ્બન્તિ? વિક્કાયિકે પત્તચીવરાદિકપ્પિયભણ્ડે આહટે ‘‘અમ્હાકં ઇમિના અત્થો, ઇમસ્સ એવરૂપં મૂલમ્પિ અત્થિ, કપ્પિયકારકો એવ નત્થી’’તિ વત્વા તેન ‘‘અહં કપ્પિયકારકો, મય્હં દસ્સેથા’’તિ વુત્તે સચે રુચ્ચતિ, દ્વારં વિવરિત્વા ‘‘ઇદં ગણ્હા’’તિ અવત્વા ‘‘એત્થ ઠપિત’’ન્તિ દસ્સેત્વા તસ્મિં તસ્સ અગ્ઘપ્પમાણં ગહેત્વા દેન્તે અધિવાસેતબ્બં. અતિરેકં ગણ્હન્તે ‘‘મયં તુમ્હાકં ભણ્ડં ન ગણ્હામ, ગચ્છથા’’તિ નીહરિત્વા અગ્ગળં દત્વા કપ્પિયકારકે લદ્ધે ‘‘અમ્હાકં એવરૂપેન અત્થો, ઇદં નામ મૂલં અત્થી’’તિ વત્વા તેન કિણિત્વા દિન્ને અધિવાસેતબ્બન્તિ અટ્ઠકથાયં વુત્તનયેન પટિપજ્જિતબ્બં.

૭૧૦. ઠપેત્વા રૂપિયગ્ગાહન્તિ અનન્તરસિક્ખાપદે વક્ખમાનસરૂપં સુવણ્ણાદિરૂપિયં પટિગ્ગહેત્વા નિસ્સજ્જિત્વા દેસિતાપત્તિકં પુગ્ગલં ઠપેત્વા. નિસ્સટ્ઠપરિવત્તિતન્તિ એત્થ નિસ્સજ્જિત્વા આપત્તિયા દેસિતાય ‘‘સચે તત્થ આગચ્છતિ આરામિકો વા ઉપાસકો વા’’તિઆદિના (પારા. ૫૮૪) પદભાજને વુત્તનયેન તત્થાગતં કપ્પિયકારકં ‘‘આવુસો ઇમં જાના’’તિ વત્વા ‘‘ઇમિના કિં આહરિય્યતૂ’’તિ તેન વુત્તે ‘‘ઇમં વા ઇમં વા આહરા’’તિ અવત્વા ‘‘કપ્પિયં આચિક્ખિતબ્બં સપ્પિ વા તેલં વા મધુ વા ફાણિતં વા’’તિ (પારા. ૫૮૪) વુત્તત્તા ભિક્ખૂનં કપ્પિયવત્થુમત્તે આચિક્ખિતે તેન નિસ્સટ્ઠવત્થું પરિવત્તેત્વા આહટં કપ્પિયભણ્ડન્તિ અત્થો.

૭૧૧. અત્તનો પત્તભાગમ્પીતિ તથા આહટે કપ્પિયભણ્ડે સઙ્ઘસ્સ ભાજિયમાને અત્તનો વસ્સગ્ગેન અત્તનો પત્તકોટ્ઠાસમ્પિ. પટિગ્ગાહકભિક્ખુનોતિ રૂપિયં પટિગ્ગહેત્વા આપજ્જિત્વા નિસ્સજ્જિત્વા દેસિતાપત્તિકસ્સ ભિક્ખુનો ન વટ્ટતીતિ સમ્બન્ધો. અઞ્ઞતોતિ અત્તતો અઞ્ઞસ્મા પબ્બજિતમનુસ્સામનુસ્સતિરચ્છાનગતિત્થિપુરિસાનં અઞ્ઞતરતો. લદ્ધન્તિ તેહિ અત્તના લદ્ધકોટ્ઠાસતો દિન્નવસેનપિ લદ્ધં તં વત્થું.

૭૧૨. યં કિઞ્ચિ પચ્ચયન્તિ તં વત્થું પરિવત્તેત્વા ગહિતેસુ ચતૂસુ પચ્ચયેસુ અઞ્ઞતરમ્પિ પચ્ચયં. અન્તમસો પથવિં ખણિત્વા ઉપ્પાદિતોદકમ્પિ દારૂહિ આદિત્તઅગ્ગિમ્પિ તેલેન જલિતપદીપમ્પિ રુક્ખે વા ગેહે વા પકતિછાયમ્પિ તાલપણ્ણમ્પિ ઉપભોગપરિભોગારહં અઞ્ઞમ્પિ યં કિઞ્ચીતિ અટ્ઠકથાય વુત્તનયં ઇમિનાવ સઙ્ગહિતન્તિ ગહેતબ્બં. યથાહ અટ્ઠકથાયં ‘‘અન્તમસો મક્કટાદીહિ તતો હરિત્વા અરઞ્ઞે ઠપિતં વા તેસં હત્થતો ગળિત્વા તિરચ્છાનપરિગ્ગહિતમ્પિ પંસુકૂલમ્પિ ન વટ્ટતિયેવા’’તિઆદિ (પારા. અટ્ઠ. ૨.૫૮૩-૫૮૪), ‘‘રૂપિયપટિગ્ગાહકસ્સ પન કેનચિ પરિયાયેન તતો ઉપ્પન્નપચ્ચયપરિભોગો ન વટ્ટતી’’તિ (પારા. અટ્ઠ. ૨.૫૮૫) ચાતિ. ભિક્ખુનોતિ રૂપિયપટિગ્ગાહકસ્સ ભિક્ખુસ્સ.

૭૧૩. અજ્ઝારામે વાતિ ઉપરિ વક્ખમાનલક્ખણેન પરિચ્છિન્ને અજ્ઝારામે વા. તં રૂપિયં, ‘‘પતિતં દિસ્વા’’તિ સેસો. અજ્ઝાવસથેપિ વાતિ વક્ખમાનલક્ખણે અન્તોઆવાસે ચ. નિક્ખિપન્તસ્સાતિ ‘‘યસ્સ ભવિસ્સતિ, સો હરિસ્સતી’’તિ વુત્તે ઠાને તસ્મિં વત્થુસ્મિં ગણનઞ્ચ ઉપલક્ખણઞ્ચ સલ્લક્ખેત્વા ઠપેન્તસ્સ.

૭૧૪. તિકપાચિત્તિયં વુત્તન્તિ ‘‘રૂપિયે રૂપિયસઞ્ઞી, વેમતિકો, અરૂપિયસઞ્ઞી રૂપિયં પટિગ્ગણ્હાતિ, નિસ્સગ્ગિયં પાચિત્તિય’’ન્તિ (પારા. ૫૮૬) ભગવતા પાચિત્તિયં વુત્તં. દુક્કટન્તિ એત્થ ‘‘દ્વિકદુક્કટ’’ન્તિ સામત્થિયા લબ્ભતિ.

૭૧૫. ક્રિયાક્રિયન્તિ ગહણેન આપજ્જનતો કિરિયં. પટિક્ખેપસ્સ અકરણતો અકિરિયન્તિ.

રૂપિયપટિગ્ગહણકથાવણ્ણના.

૭૧૬-૭. નિસ્સગ્ગિયસ્સાપિ વત્થુન્તિ ‘‘નિસ્સગ્ગિયપાચિત્તિયસ્સ વત્થૂ’’તિ પઠમસિક્ખાપદે નિદ્દિટ્ઠેસુ રજતાદીસુ ચતૂસુ અઞ્ઞતરં વત્થું. દુક્કટસ્સ ચ વત્થું વાતિ પઠમં દસ્સિતમુત્તાદિદુક્કટવત્થૂસુ અઞ્ઞતરં વા, ઇહોભયત્થ હેતુફલસમ્બન્ધે સામિવચનં. કપ્પિયસ્સ ચ વત્થું વાતિ યથાદસ્સિતેસુ એવ મુગ્ગમાસાદિકપ્પિયવત્થૂસુ અઞ્ઞતરં વા, ઇહ અવયવાવયવિસમ્બન્ધે સામિવચનં. અવયવાવયવીનં અભેદેપિ ભેદૂપચારવસેન યથા ‘‘સિલાપુત્તકસ્સ સરીર’’ન્તિ કપ્પિયવત્થુન્તિ વુત્તં હોતિ ‘‘કપ્પિયેન વત્થુના’’તિ વક્ખમાનત્તા. ઇદાનેત્થ દુક્કટવત્થુનો, કપ્પિયવત્થુનો ચ નિસ્સગ્ગિયવત્થુના પરિવત્તિતત્તા આપત્તિ હોતીતિ ગહેતબ્બં. નિસ્સગ્ગિયવત્થુના યો પરિવત્તેતિ, તસ્સ આપત્તીતિ યોજના.

દુક્કટસ્સ વત્થુના, કપ્પિયેન ચ વત્થુના વત્થું નિસ્સગ્ગિયસ્સ પરિવત્તેતિ, આપત્તીતિ યોજના. ઇધ ઉભયત્થાપિ પરિવત્તિતસ્સ નિસ્સગ્ગિયવત્થુત્તા આપત્તિ હોતિ. એવં તીસુપિ ઠાનેસુ ‘‘આપત્તી’’તિ સામઞ્ઞવચનેન નિસ્સગ્ગિયપાચિત્તિયમેવ વુત્તન્તિ પકરણતો લબ્ભતિ.

૭૧૮. દુક્કટસ્સેવ વત્થુના દુક્કટસ્સ ચ વત્થું વા પરિવત્તેતિ, દુક્કટન્તિ યોજના. ‘‘વત્થું વા કપ્પિયસ્સા’’તિ ઇદં વુત્તનયમેવ, કપ્પિયવત્થુન્તિ વુત્તં હોતિ. ઇમસ્સ કપ્પિયવત્થુનોપિ દુક્કટવત્થુના પરિવત્તિતત્તા દુક્કટં હોતીતિ ગહેતબ્બં.

૭૧૯. ‘‘વત્થુના કપ્પિયસ્સા’’તિ ઇદમ્પિ વુત્તનયમેવ. કપ્પિયવત્થુનાપિ પરિવત્તિતે દુક્કટવત્થુવસેન દુક્કટં હોતીતિ આહ ‘‘તથા’’તિ.

૭૨૦. ‘‘તથા’’તિ ઇમિના ‘‘વત્થુનો’’તિ ઇદં આકડ્ઢતિ. ‘‘નિસ્સગ્ગિયસ્સા’’તિ ઇમિના પાચિત્તિયમાહ. પુબ્બન્તિ પઠમં, પુબ્બે વુત્તરૂપિયપટિગ્ગહણસિક્ખાપદેતિ વુત્તં હોતિ. ઇમિનાતિ રૂપિયસંવોહારસિક્ખાપદેન. પરિવત્તનં વારિતન્તિ સમ્બન્ધો.

૭૨૧. રૂપિયન્તિ ચ સઞ્ઞિસ્સાતિ ‘‘રૂપિયં નામ સત્થુવણ્ણો કહાપણો લોહમાસકો દારુમાસકો જતુમાસકો, યે વોહારં ગચ્છન્તી’’તિ (પારા. ૫૮૯) પદભાજને વુત્તેસુ રૂપિયસઞ્ઞિતેસુ વત્થૂસુ ‘‘અઞ્ઞતર’’ન્તિ સઞ્ઞિસ્સ. અરૂપિયેતિ ખરપત્તાદિમ્હિ. તેન અરૂપિયેન. ‘‘ચેતાપેન્તસ્સ અરૂપિય’’ન્તિ પદચ્છેદો. ‘‘અરૂપિયે રૂપિયસઞ્ઞી રૂપિયં ચેતાપેતિ, નિસ્સગ્ગિયં પાચિત્તિય’’ન્તિ (પારા. ૫૯૧) વુત્તત્તા રૂપિયપરિવત્તને દુક્કટસ્સ અભાવતો, પાચિત્તિયસ્સ ચ સમ્ભવતો રૂપિયં ન ગહેતબ્બં. અરૂપિયે રૂપિયં ઇતિ સઞ્ઞિસ્સ ચ વિમતિસ્સ ચ અરૂપિયં ચેતાપેન્તસ્સ તેન દ્વે દુક્કટાનિ હોન્તીતિ યોજના.

૭૨૨. અરૂપિયે અરૂપિયન્તિ સઞ્ઞિસ્સાતિ એત્થ ‘‘અરૂપિયં પરિવત્તેન્તસ્સા’’તિ સેસો. પઞ્ચહીતિ સહત્થે કરણવચનં, ‘‘સહધમ્મિકેહી’’તિ સેસો, પઞ્ચહિ સહધમ્મિકેહિ સદ્ધિન્તિ અત્થો. વદતોતિ વોહરતો, કયવિક્કયં કરોન્તસ્સાતિ અત્થો. ભિક્ખુભિક્ખુનિસામણેરસામણેરિસિક્ખમાનાસઙ્ખાતેહિ પઞ્ચહિ સહધમ્મિકેહિ અરૂપિયં પરિવત્તેન્તસ્સ અનાપત્તીતિ અત્થો.

૭૨૩. સંવોહારેન સમુટ્ઠાનતો ક્રિયસમુટ્ઠાનં.

રૂપિયસંવોહારકથાવણ્ણના.

૭૨૪. કપ્પિયં નામ ‘‘ચીવરપિણ્ડપાતસેનાસનગિલાનપચ્ચયભેસજ્જપરિક્ખારા, અન્તમસો ચુણ્ણપિણ્ડોપિ દન્તકટ્ઠમ્પિ દસિકસુત્તમ્પી’’તિ પદભાજને વુત્તાનિ કપ્પિયવત્થૂનિ. યથાહ અટ્ઠકથાયં ‘‘ચીવરાદીનં કપ્પિયભણ્ડાનં વસેન અનેકવિધ’’ન્તિ. કપ્પિયેનેવાતિ તેનેવ કપ્પિયેન વત્થુના. ‘‘કયવિક્કયં સમાપજ્જેય્યાતિ ‘ઇમિના ઇમં દેહિ, ઇમિના ઇમં આહર, ઇમિના ઇમં પરિવત્તેહિ, ઇમિના ઇમં ચેતાપેહી’તિ અજ્ઝાચરતી’’તિ (પારા. ૫૯૫) વચનતો ‘‘પરિવત્તયતો’’તિ ઇમસ્સ ‘‘કયવિક્કયં સમાપજ્જતો’’તિ પરિયાયો.

તત્થ અઞ્ઞસ્સ હત્થતો કપ્પિયવત્થુના પરિવત્તેત્વા ગહણં કયો નામ. અત્તનો હત્થતો કપ્પિયવત્થું પરિવત્તેત્વા દાનં વિક્કયો. યથાહ અટ્ઠકથાયં ‘‘ઇમિના ઇમં દેહી’તિઆદિના હિ નયેન પરસ્સ કપ્પિયભણ્ડં ગણ્હન્તો કયં સમાપજ્જતિ, અત્તનો કપ્પિયં દેન્તો વિક્કય’’ન્તિ. ‘‘ઠપેત્વા સહધમ્મિકે’’તિ વુત્તત્તા પરિવત્તયતોતિ એત્થ અઞ્ઞેહિ સદ્ધિન્તિ લબ્ભતિ. એત્થ અઞ્ઞે નામ ગિહિનો ઇત્થિપુરિસા, સાસનતો બાહિરા પબ્બજિતા ચ. તસ્મા અયં કયવિક્કયો અન્તમસો માતાપિતૂહિપિ ન કાતબ્બોયેવ. યથાહ અટ્ઠકથાયં ‘‘અયઞ્હિ કયવિક્કયો ઠપેત્વા પઞ્ચ સહધમ્મિકે અવસેસેહિ ગિહિપબ્બજિતેહિ અન્તમસો માતાપિતૂહિપિ સદ્ધિં ન વટ્ટતી’’તિ (પારા. અટ્ઠ. ૨.૫૯૫).

૭૨૫. અકપ્પિયસ્સ વત્થુસ્સાતિ ઇમસ્મિં સિક્ખાપદે વુત્તચીવરાદિકપ્પિયવત્થુતો અઞ્ઞસ્સ નિસ્સગ્ગિયદુક્કટવત્થુસ્સ. તેનેવાતિ અકપ્પિયવત્થુનાયેવ. ‘‘કપ્પિયસ્સ ચા’’તિ પાઠસેસો, તેનેવ અકપ્પિયેન વત્થુના કપ્પિયસ્સ વત્થુસ્સ પરિવત્તનઞ્ચાતિ યોજના. એવઞ્હિ પાઠસેસે અકતે અકપ્પિયેન વત્થુના કપ્પિયસ્સ પરિવત્તનં કયવિક્કયે સઙ્ગહેતબ્બં સિયા, તં ન યુજ્જતિ તસ્સ રૂપિયસંવોહારેયેવ સઙ્ગહિતત્તા, ઇધ ચ ‘‘કપ્પિયવત્થુસ્સેવ કપ્પિયવત્થુના પરિવત્તનં કયવિક્કયો’’તિ નિયમિતત્તા. નિદ્દિટ્ઠન્તિ ‘‘અકપ્પિયભણ્ડપરિવત્તનઞ્હિ કયવિક્કયસઙ્ગહં ન ગચ્છતી’’તિ (પારા. અટ્ઠ. ૨.૫૯૪) અટ્ઠકથાયં નિદ્દિટ્ઠન્તિ અત્થો.

૭૨૬. તસ્માતિ યસ્મા અઞ્ઞત્ર સહધમ્મિકેહિ કપ્પિયવત્થુસ્સાપિ કયવિક્કયો ન વટ્ટતિ, અકપ્પિયસ્સ, કપ્પિયસ્સ ચ વત્થુનો અકપ્પિયેનેવ વત્થુના પરિવત્તનઞ્ચ રૂપિયસંવોહારે સઙ્ગહિતત્તા કયવિક્કયસઙ્ગહં ન ગચ્છતિ, તસ્મા.

૭૨૯. ઇદં નામાતિ ઓદનાદિકપ્પિયવત્થુમેવ આહ.

૭૩૦-૧. ‘‘ગહેત્વા’’તિઆદિગાથાય વત્થુલક્ખણસ્સ ઉદાહરણં દસ્સેત્વાવ આપત્તિભેદં દસ્સેતુમાહ ‘‘વિઘાસાદ’’ન્તિઆદિ. છલ્લિન્તિ રુક્ખતચં. વલ્લિન્તિ લતં. કટ્ઠન્તિ ઇન્ધનદારું. દારુન્તિ ગેહસમ્ભારાદિદારું. વિપલ્લાસેનાપિ વત્તબ્બં ‘‘વલ્લિં વા પન છલ્લિં વા, દારું વા કટ્ઠમેવ વા’’તિ. વત્થૂનન્તિ તથા વત્વા આહરાપિતાનં છલ્લિઆદિવત્થૂનં. કયવિક્કયે આપત્તિયો હોન્તીતિ યોજના, નિસ્સગ્ગિયપાચિત્તિયાપત્તિયો હોન્તીતિ વુત્તં હોતિ.

૭૩૨. ‘‘ઇતિ એવા’’તિ પદચ્છેદો, ‘‘પિવિત્વા’’તિઆદિના નયેન પુબ્બકાલે વિહિતપચ્ચયન્તં અકત્વા વુત્તનયેનેવાતિ અત્થો.

૭૩૩. ભૂમિયા લિમ્પનેતિ યોજનાયં પન સેનાસનભૂમિયં પરિભણ્ડકરણકાળકાદિવણ્ણકરણવસેન લેપને. વત્થુધોવનેતિ ચીવરાદિવત્થૂનં ધોવને. એત્થાતિ તેસુ વુત્તપ્પકારેસુ. એતેસં ગહણસ્સ ઉપલક્ખણત્તા એવરૂપેસુ અઞ્ઞેસુ ઠાનેસુ.

૭૩૪. અયન્તિ ભૂમિસોધનાદિવસેન આપન્ના પાચિત્તિયાપત્તિ.

૭૩૫. ઠપેત્વા ભણ્ડસામિકન્તિ એત્થ બ્યતિરેકવસેન અઞ્ઞસ્સ કપ્પિયકારસ્સાતિ લબ્ભતિ.

૭૩૬. ભાસતો અનાપત્તીતિ યોજના. સેસમેત્થ ઉત્તાનમેવ.

કયવિક્કયકથાવણ્ણના.

કોસિયવગ્ગો દુતિયો.

૭૩૭. કપ્પિયા પત્તા મત્તિકાયોમયા જાતિતો દુવેતિ યોજના. વણ્ણાતિ પમાણાનિ. યથાહ અટ્ઠકથાયં ‘‘તયો પત્તસ્સ વણ્ણાતિ તીણિ પત્તસ્સ પમાણાની’’તિ (પારા. અટ્ઠ. ૨.૬૦૨). તેનાહ ‘‘ઉક્કટ્ઠો મજ્ઝિમોમકો’’તિ.

૭૩૮. દ્વિન્નં તણ્ડુલનાળીનન્તિ સુકોટ્ટિતાનં અખણ્ડાનં પુરાણસાલિતણ્ડુલાનં દ્વે નાળિયો ગહેતબ્બા. યથાહ અટ્ઠકથાયં ‘‘અનુપહતપુરાણસાલિતણ્ડુલાનં સુકોટ્ટિતપરિસુદ્ધાન’’ન્તિ (પારા. અટ્ઠ. ૨.૬૦૨). ભત્તન્તિ અવસ્સાવિતં અનુત્તણ્ડુલં અકિલિન્નં અપિણ્ડિતં સુવિસદં કુન્દમકુલરાસિસદિસં સુપક્કોદનમેવ ગહેતબ્બં. યથાહ અટ્ઠકથાયં ‘‘અનુત્તણ્ડુલં અકિલિન્નં અપિણ્ડિતં સુવિસદં કુન્દમકુલરાસિસદિસં અવસ્સાવિતોદન’’ન્તિ (પારા. અટ્ઠ. ૨.૬૦૨). મગધનાળિયાતિ મગધરટ્ઠે નાળિયા, સા નાળિ તિલાનં અટ્ઠપસતાનિ ગણ્હાતિ. તેનાહુ પોરાણા –

‘‘ખારિદસદ્વયં વાહો, ખારી દોણટ્ઠકદ્વયં;

દ્વિઅટ્ઠનાળિયો દોણો, નાળેકા પસતટ્ઠકં;

લક્ખં તિલાનં પસતં, એતં વુત્તં પમાણતો’’તિ.

‘‘મગધનાળિ નામ અડ્ઢતેરસપલા હોતી’’તિ (પારા. અટ્ઠ. ૨.૬૦૨) અન્ધકટ્ઠકથાયં વુત્તં. તબ્બણ્ણનાય ‘‘અડ્ઢતેરસપલાનિ માસેહિ ગહેતબ્બાની’’તિ વુત્તં. કેચિ પનાહુ –

‘‘ચતુપ્પસતિકા મુટ્ઠિ, પલઞ્ચેતં ચતુગ્ગુણં;

કુડુવપ્પસતઞ્ચેવ, ચત્તારિ ચેવ નાળિ તુ.

‘‘સોયેવ પત્થો ચત્તારો, પત્થા અળ્હકમુચ્ચતે;

અળ્હકાનમ્પિ ચત્તારિ, ‘દોણો’તિ પરિકિત્તિતો’’તિ.

આચરિયા પન ‘‘અટ્ઠપસતા માગધનાળી’’તિ પુબ્બપક્ખમેવ રોચયન્તિ.

ખાદનઞ્ચ ચતુબ્ભાગન્તિ તસ્મિં ભત્તે ચતુધા વિભત્તે એકભાગમત્તં હત્થહારિયઘનમુગ્ગસૂપન્તિ અત્થો. યથાહ અટ્ઠકથાયં ‘‘તસ્સ ઓદનસ્સ ચતુત્થભાગપ્પમાણો નાતિઘનો નાતિતનુકો હત્થહારિયો સબ્બસમ્ભારસઙ્ખતો મુગ્ગસૂપો પક્ખિપિતબ્બો’’તિ (પારા. અટ્ઠ. ૨.૬૦૨).

બ્યઞ્જનઞ્ચ તદૂપિયન્તિ યાવ ચરિમાલોપં, તાવ સબ્બાલોપાનુરૂપં મચ્છમંસાદિબ્યઞ્જનઞ્ચ. યથાહ અટ્ઠકથાયં ‘‘આલોપસ્સ આલોપસ્સ અનુરૂપં યાવચરિમાલોપપ્પહોનકં મચ્છમંસાદિબ્યઞ્જનં પક્ખિપિતબ્બ’’ન્તિ. એત્થ ચ આલોપસ્સ આલોપસ્સ અનુરૂપન્તિ ‘‘બ્યઞ્જનસ્સ મત્તા નામ ઓદનચતુત્થભાગો’’તિ (મ. નિ. અટ્ઠ. ૨.૩૮૭) બ્રહ્માયુસુત્તસ્સ અટ્ઠકથાયં વુત્તત્તા આલોપસ્સ ચતુત્થભાગપ્પમાણં બ્યઞ્જનં આલોપસ્સ અનુરૂપન્તિ ગહેતબ્બં. ઇધ પન સૂપસ્સેવ ઓદનચતુત્થભાગપ્પમાણં દસ્સેત્વા એતસ્સ લક્ખણે દસ્સિતે ઇતરસ્સાપિ દસ્સિતમેવ હોતીતિ બ્યઞ્જનસ્સ તથા વિસેસેત્વા પમાણં ન દસ્સિતં. ઓદને પક્ખિપિતબ્બાનિ સપ્પિતેલતક્કરસકઞ્જિકાદીનિ ગણનૂપગાનિ ન હોન્તિ.

૭૩૯. તં સબ્બન્તિ યથાવુત્તભત્તાદિનિરવસેસં. ગણ્હતીતિ વક્ખમાનેહિ તીહિ પકારેહિ ગણ્હાતિ. તસ્સાતિ ઉક્કટ્ઠસ્સ પત્તસ્સ. ઉપડ્ઢોતિ તસ્મિં પત્તે ગણ્હનકદબ્બસમ્ભારગાહી પત્તો તંસહચરિયેન ‘‘ઉપડ્ઢો’’તિ વુત્તો. તદુપડ્ઢો ચાતિ એત્થાપિ એસેવ નયો. તસ્સ મજ્ઝિમસ્સ પત્તસ્સ ઉપડ્ઢો તદુપડ્ઢોતિ ગહેતબ્બં.

૭૪૦. ઇમેસુ તીસુ પત્તેસુ ઉક્કટ્ઠસ્સ વુત્તં ઓદનાદિ સબ્બં યસ્મિં પત્તે પક્ખિત્તં, તસ્સ મુખવટ્ટિમત્થકે પુઞ્જિયમાનં હીરકં હેટ્ઠાભાગે ફુસતિ, સો ઉક્કટ્ઠમજ્ઝિમો નામ, હીરતો અતિરેકં તિટ્ઠતિ, સો ઉક્કટ્ઠોમકો નામ, અન્તોપત્તે મુખવટ્ટિયા હેટ્ઠિમન્તં અપ્પત્વા તિટ્ઠતિ, સો ઉક્કટ્ઠુક્કટ્ઠો નામ, એવં મજ્ઝિમો ચ ઓમકો ચ પચ્ચેકં તિવિધો હોતીતિ સબ્બે નવ પત્તા હોન્તીતિ દસ્સેતુમાહ ‘‘ઉક્કટ્ઠસ્સા’’તિઆદિ. તસ્સેવાતિ ઉક્કટ્ઠસ્સેવ. ઓમકો ચ મજ્ઝિમો ચાતિ ઓમકમજ્ઝિમા. ઇધ મજ્ઝિમો ચ ઓમકો ચ ઉક્કટ્ઠસ્સેવ ભેદો. એસ નયો ઇતરદ્વયેપિ. ‘‘એવ’’ન્તિ ઇમિના યથા ‘‘ઉક્કટ્ઠુક્કટ્ઠો ઉક્કટ્ઠોમકો ઉક્કટ્ઠમજ્ઝિમો’’તિ યોજેતબ્બો, એવં મજ્ઝિમોમકાનમ્પિ યથાક્કમયોજનં દસ્સેતિ ‘‘મજ્ઝિમો મજ્ઝિમુક્કટ્ઠો મજ્ઝિમોમકો, ઓમકુક્કટ્ઠો ઓમકમજ્ઝિમો ઓમકોમકો ચા’’તિ.

૭૪૧. તેસૂતિ નવસુ પત્તેસુ. તસ્માતિ અપત્તભાવતો. ન ગચ્છન્તીતિ ઉક્કટ્ઠુક્કટ્ઠઞ્ચ ઓમકોમકઞ્ચાતિ દ્વે અપેક્ખિત્વા બહુવચનં કતં. એતે ભાજનસઙ્ખેપેન પરિભુઞ્જિતબ્બાતિ. યથાહ અટ્ઠકથાયં ‘‘તસ્મા એતે ભાજનપરિભોગેન પરિભુઞ્જિતબ્બા’’તિ (પારા. અટ્ઠ. ૨.૬૦૨).

૭૪૨. પત્તલક્ખણસંયુતન્તિ એત્થ પત્તલક્ખણં નામ યથાવુત્તપમાણયુત્તતા, ‘‘અયોપત્તો પઞ્ચહિ પાકેહિ પક્કો મત્તિકાપત્તો દ્વીહિ પાકેહિ પક્કો’’તિ (પારા. અટ્ઠ. ૨.૬૦૮) વુત્તા પાકસમ્પત્તિ, કિણિત્વા ગણ્હાતિ ચે, તસ્સ દાતબ્બમૂલસ્સ અસેસેત્વા દિન્નભાવો, છિદ્દાભાવો, છિન્નરાજીનં અભાવોતિ પઞ્ચવિધં. હોતિ ચેત્થ –

‘‘પમાણયુત્તતા પાક-સમ્પત્તિ દિન્નમૂલતા;

અચ્છિદ્દારાજિતા ચેતિ, પત્તલક્ખણપઞ્ચક’’ન્તિ.

‘‘અધિટ્ઠાય વા વિકપ્પેત્વા વા’’તિ વા-સદ્દો યોજેતબ્બો. અધિટ્ઠાયાતિ પઠમં પરિભુત્તે પત્તે સતિ તં પચ્ચુદ્ધરિત્વા અધિટ્ઠાતબ્બપત્તો હત્થપાસે ચે હોતિ, વક્ખમાનનયેન ‘‘ઇમં પત્તં અધિટ્ઠામી’’તિ વચીભેદકરણવસેન વાચાય વા વચીભેદં અકત્વા એવમેવ ચિન્તેત્વા હત્થેન ગહેત્વા ફન્દાપેન્તેન કાયેન વા દૂરે ચે હત્થપાસા હોતિ, ઠપિતટ્ઠાનં સલ્લક્ખેત્વા ‘‘એતં પત્તં અધિટ્ઠામી’’તિ વાચા ભિન્દિતબ્બાતિ અટ્ઠકથાયં (પારા. અટ્ઠ. ૨.૬૦૮ અત્થતો સમાનં) વુત્તનયેન એકકેન વા પચ્છા સતિસમ્મોસે સરાપેત્વા કુક્કુચ્ચં વૂપસમેતું સમત્થસ્સ પુગ્ગલસ્સ સન્નિધાને વા અધિટ્ઠાયાતિ વુત્તં હોતિ. ‘‘અઞ્ઞસ્સ સન્તિકે અધિટ્ઠાને અયમાનિસંસો – સચસ્સ ‘અધિટ્ઠિતો નુ ખો મે, નો’તિ વિમતિ ઉપ્પજ્જતિ, ઇતરો સારેત્વા વિમતિં છિન્દિસ્સતી’’તિ (પારા. અટ્ઠ. ૨.૬૦૮) અયમત્થો અટ્ઠકથાયં વુત્તો. ‘‘દ્વે પત્તે અધિટ્ઠાતું ન લભતી’’તિ ગણ્ઠિપદે વુત્તં.

વિકપ્પેત્વાતિ (પાચિ. ૩૭૩; પારા. અટ્ઠ. ૨.૬૦૮; કઙ્કા. અટ્ઠ. વિકપ્પનસિક્ખાપદવણ્ણના) ત્થ વિકપ્પેતબ્બસ્સ પત્તસ્સ એકત્તબહુત્તં, સન્નિહિતાસન્નિહિતત્તઞ્ચ સલ્લક્ખેત્વા એકં ચે સન્નિહિતં, ‘‘ઇમં પત્તં તુય્હં વિકપ્પેમી’’તિ વા ‘‘ઇમં પત્તં તિસ્સસ્સ ભિક્ખુનો વિકપ્પેમી’’તિ વા આદિના નયેન એકં વિકપ્પેત્વાતિ વુત્તં હોતિ. એત્થ ‘‘પરિભુઞ્જેય્યા’’તિ વુત્તત્તા, ‘‘મય્હં સન્તકં પરિભુઞ્જેહિ વા વિસ્સજ્જેહિ વા યથાપચ્ચયં વા કરોહી’’તિ તેન અપચ્ચુદ્ધટે પરિભુઞ્જિતું અયુત્તત્તા ‘‘વિકપ્પેત્વા’’તિ પચ્ચુદ્ધટવિસેસો ગહેતબ્બો.

૭૪૩. ધારેય્યાતિ અનધિટ્ઠહિત્વા, અવિકપ્પેત્વા ચ પરિભુઞ્જિતબ્બો. તં કાલં પત્તં અતિક્કામયતોતિ યોજના. ‘‘નિસ્સગ્ગિય’’ન્તિ ઇમિનાપિ ‘‘પત્ત’’ન્તિ ઇદં યુજ્જતિ. પત્ત-સદ્દો માગધિકાનં દ્વિલિઙ્ગકો, તસ્મા એવં વુત્તો.

૭૪૪. અધિટ્ઠિતવિકપ્પિતેસુ અનન્તોગધત્તા અતિરેકભાવં દસ્સેતુમાહ ‘‘યં પત્ત’’ન્તિઆદિ.

૭૪૫. સમ્મુખેતિ અડ્ઢતેય્યહત્થપ્પદેસતો અન્તો ઠિતં પત્તં. દૂરસ્મિન્તિ અડ્ઢતેય્યરતનતો પરભાગે ‘‘અન્તોગબ્ભે વા ઉપરિપાસાદે વા સામન્તવિહારે વા’’તિ અટ્ઠકથાયં વુત્તપ્પકારે દૂરેપિ. યત્થ કત્થચિ વિકપ્પનકાલેપિ સન્તિકદૂરવચનભેદા એવમેવ યોજેત્વા વત્તબ્બા. ‘‘વિકપ્પેતું પન બહૂનિપિ લબ્ભતી’’તિ ગણ્ઠિપદે વુત્તં. અયં નયોતિ ‘‘ઇમં પત્તં પચ્ચુદ્ધરામી’’તિઆદિનયો.

૭૪૬. વાચાકાયવસેન દુવિધે અધિટ્ઠાને વાચાધિટ્ઠાનં દસ્સેત્વા કાયાધિટ્ઠાનં દસ્સેતુમાહ ‘‘આભોગ’’ન્તિઆદિ. આભોગન્તિ ‘‘ઇમં પત્તં અધિટ્ઠામી’’તિ આભોગં. ‘‘મનસા’’તિ ઇમિના ન વચસાતિ વુત્તં હોતિ. કાયવિકારોવ કાયવિકારકં, હત્થેન ફન્દાપનાદિકાયકિરિયાતિ અત્થો. એતેનેવ કાયાધિટ્ઠાનં હત્થેન અપત્તબ્બે દૂરે ન કાતબ્બન્તિ દસ્સેતિ.

૭૪૭-૮. ‘‘જહતિ અધિટ્ઠાન’’ન્તિ પદચ્છેદો. દાનતોતિ અઞ્ઞસ્સ દાનેન. ભેદકતોતિ ભિજ્જનેન. નાસતોતિ પત્તસામિકસ્સ કાલકિરિયાય. વિબ્ભમતોતિ સિક્ખં અપચ્ચક્ખાય ગિહિભાવૂપગમનેન. ઉદ્ધારતોતિ પચ્ચુદ્ધરણેન. પચ્ચક્ખતોતિ સિક્ખાપચ્ચક્ખાનેન. પરિવત્તનતોતિ લિઙ્ગપરિવત્તનેન. ગાહતોતિ વિસ્સાસગ્ગહણેન, અચ્છિન્દિત્વા ગહણેન ચ.

કઙ્ગુસિત્થપ્પમાણેનાતિ સત્તન્નં ધઞ્ઞાનં ખુદ્દકતરસ્સ કઙ્ગુનો સિત્થપ્પમાણેન. ખેનાતિ મુખવટ્ટિયા દ્વઙ્ગુલતો હેટ્ઠા આકાસપરિયાયેન છિદ્દેન. આણિયા વાતિ અયોમયાય આણિયા વા.

૭૫૦-૧. મણિપત્તોતિ મણિના કતો. વેળુરિયુબ્ભવોતિ મરકતમણિમયો. ફલિકુબ્ભવોતિ ફલિકપાસાણેન કતો. કાચમયોતિ કાચમત્તિકામયો. કંસમયોતિ કંસલોહેન કતો. તિપુમયોતિ કાળતિપુમયો. સીસમયોતિ સેતતિપુમયો. વિપલ્લાસેન ચ વદન્તિ. સજ્ઝુમયોતિ રજતમયો.

૭૫૨. ઘટકટાહોતિ ઘટકપાલં. સીસકટાહોતિ છવસીસકપાલં. તુમ્બન્તિ અલાબુ. અસ્સાતિ એકાદસવિધસ્સ પત્તસ્સ. અનુલોમિકન્તિ અકપ્પિયવસેન અનુલોમં. તત્થાતિ તસ્મિં એકાદસવિધે. તમ્બમયં લોહમયં થાલકં પન વટ્ટતીતિ યોજના, પત્તોયેવ ન વટ્ટતિ, તમ્બલોહમયા થાલકા પન વટ્ટન્તીતિ અત્થો.

૭૫૩. તટ્ટિકાદીનીતિ આદિ-સદ્દેન વટ્ટકાદીનં સઙ્ગહો. વટ્ટકન્તિ ચ અડ્ઢચન્દાકારો લોહાદિમયો ભાજનિયવિસેસો. પુગ્ગલસ્સાતિ ભિક્ખુસ્સ. ગિહી ચ સઙ્ઘો ચ ગિહિસઙ્ઘા, તેસં સન્તકા ગિહિસઙ્ઘિકા.

૭૫૪. યં કિઞ્ચિ પત્તન્તિ સત્તસુ પત્તેસુ યં કિઞ્ચિ પત્તં. વોદકં કત્વાતિ વિગતોદકં કત્વા. પટિસામેય્યાતિ નિક્ખેપારહટ્ઠાને નિક્ખિપનવસેન, થવિકાય પક્ખિપિત્વા બન્ધનવસેન વા સઙ્ગોપેય્ય.

૭૫૫. ઓતાપેતુન્તિ આતપે, અગ્ગિમ્હિ વા તાપેતું. ઉણ્હેતિ તસ્મિંયેવ ઉણ્હે. ન નિદહેતબ્બોતિ ન ઝાપેતબ્બો. સીસાપનયનમેવ ન વટ્ટતીતિ ન નિદહેતબ્બોતિ અત્થો અધિકનિવારણેનેવ વિઞ્ઞાયતિ.

૭૫૬. મિડ્ઢન્તેતિ મિડ્ઢિયા અન્તે. પરિભણ્ડન્તેતિ પમુખે મહામિડ્ઢિયા અન્તે. ‘‘વિત્થિણ્ણેતિ અન્તમસો દ્વિપત્તમત્તોકાસવિત્થારે’’તિ કેચિ. ઠપેતું પન વટ્ટતીતિ યોજના, વલયાદિઆધારેન વિનાપિ ઠપેતું વટ્ટતીતિ અત્થો. ‘‘મિડ્ઢિયા પમુખે મિડ્ઢિયા ચ ખરભૂમિપદેસાદીસુ ચ વલયમત્થકે ઠપેતું વટ્ટતી’’તિ વદન્તિ.

૭૫૭. દારુઆધારકેતિ ઉદુક્ખલસદિસે દારુમયે આધારે. દ્વે પત્તે ઠપેતુમ્પિ વટ્ટતીતિ પત્તમત્થકે અપરસ્સાપિ પત્તસ્સ ઠપનવસેન દ્વે પત્તે ઠપેતુમ્પિ વટ્ટતિ. અપિ-સદ્દેન એકસ્મિં વત્તબ્બમેવ નત્થીતિ દસ્સેતિ. અયમેવ નયોતિ ‘‘દ્વેપિ પત્તે ઠપેતું વટ્ટતી’’તિ અયં નયો. દણ્ડભૂમિઆધારકેસૂતિ એત્થ દણ્ડાધારો નામ બહૂહિ દણ્ડેહિ કતો. ભૂમિઆધારકો નામ ભૂમિયં કતો આલવાલવલયાકારો સિલિટ્ઠાધારો. ‘‘દન્તવેત્તલતાદિમયો ભૂમિઆધારકો’’તિ કેચિ.

૭૫૮-૯. તટ્ટિકાયાતિ તાલપણ્ણાદીહિ કતતટ્ટિકાય. પોત્થકેતિ મકચિવાકમયે વા રુક્ખવાકમયે વા અત્થરણે. કટસારકેતિ તાલપણ્ણાદીહિ વીતે અત્થરણે. પરિભણ્ડકતાયાતિ કતગોમયપરિભણ્ડાય. અપિ-સદ્દેન સુધાકમ્મં કત્વા પાસાણેન ઘંસિત્વા મટ્ઠકતાય ભૂમિયા વત્તબ્બમેવ નત્થીતિ દસ્સેતિ. વાલુકાસુ વાતિ લેડ્ડુપાસાણસક્ખરકપાલાદિઅમિસ્સાસુ સણ્હસુખુમવાલુકાસૂતિ વુત્તં હોતિ. તેનેવાહ ‘‘તથારૂપાસૂ’’તિઆદિ. રજમ્હિ સન્તેપિ અસન્તેપિ વિસુંયેવ ‘‘ખરભૂમિયા ન ઠપેતબ્બ’’ન્તિ વુત્તત્તા ‘‘સરજાયા’’તિ ઇમિના રજોકિણ્ણં સણ્હભૂમિમાહ. ખરભૂમિયાતિ ફરુસભૂમિયા.

૭૬૦. લગ્ગેતુન્તિ ઓલમ્બેતું. દણ્ડકોટિયા, નાગદન્તકોટિયા ચ પત્તમુખેન પક્ખિપિત્વા ઠપનમ્પિ લગ્ગનં નામ. છત્તઙ્કમઞ્ચપીઠેસૂતિ છત્તે, અઙ્કે, મઞ્ચપીઠે ચ.

૭૬૧. અટનીસૂતિ અઙ્ગેસુ. બન્ધિત્વાતિ થવિકાય અંસવદ્ધનકાદિના યેન કેનચિ બન્ધિત્વા. ઓલમ્બેતુમ્પીતિ લગ્ગેતુમ્પિ. ‘‘ઠપેતું ઉપરી’’તિ પદચ્છેદો.

૭૬૨. મઞ્ચપીઠટ્ટકેતિ મઞ્ચપીઠેસુ ઠપિતપત્તા યથા ન પતન્તિ, તથા અટનિમત્થકે દારુના પરિક્ખેપે કતે મઞ્ચપીઠટ્ટકા નામ હોન્તિ, તાદિસે મઞ્ચપીઠટ્ટકે ઠપેતું વટ્ટતીતિ અત્થો. ભત્તપૂરોપીતિ ભત્તસ્સ પૂરોપિ. અપિ-સદ્દેન યાગુતેલપરિપૂરિતસ્સાપિ સઙ્ગહો. તુચ્છપત્તે વિનિચ્છયો યથાવુત્તોયેવ. પૂરણં પૂરો, ભત્તસ્સ પૂરો ભત્તપૂરો.

તિભાણવારવણ્ણના નિટ્ઠિતા.

૭૬૩. કવાટન્તિ દ્વારકવાટફલકં. ‘‘સેનાસને દ્વારકવાટવાતપાનકવાટાદી’’તિઆદીસુ દ્વારફલકં ‘‘કવાટ’’ન્તિ હિ વુત્તં. ન પણામેય્યાતિ ન નામેય્ય ન ચાલેય્ય, ન ચ પિદહેય્યાતિ અત્થો. પત્તં હત્થે યસ્સ સો પત્તહત્થોતિ ભિન્નાધિકરણોયં બાહિરત્થસમાસો ‘‘વજિરપાણી’’તિઆદીસુ વિય. ‘‘પણામેય્ય અસ્સા’’તિ પદચ્છેદો.

૭૬૪. ન નીહરેય્ય પત્તેન ચલકાનીતિ રસં પિવિત્વા પાતિતમધુકફલટ્ઠિકાદિ છડ્ડિતાનિ બહિ છડ્ડેતું પત્તેન ન નીહરેય્ય. અટ્ઠિકાનિ વાતિ પનસટ્ઠિકોલટ્ઠિઆદિઅટ્ઠિકાનિ વા. ઉચ્છિટ્ઠમુદકન્તિ મુખધોવનાદિકં ઉચ્છિટ્ઠમુદકં. પત્તેન નીહરન્તસ્સાતિ યોજના, બહિ છડ્ડેતું તં પત્તે આસિઞ્ચિત્વા હરન્તસ્સાતિ વુત્તં હોતિ. ઇતરથા ઉચ્છિટ્ઠપત્તધોવનોદકમ્પિ તેનેવ પત્તેન બહિ ન નીહરિતબ્બં સિયા.

૭૬૫. પટિગ્ગહેતિ મુખધોવનોદકન્તિ પટિગ્ગહો, ખેળમલ્લકોવ. મુખતો નીહટન્તિ મુખેન છડ્ડિતં મંસખણ્ડાદિ યં કિઞ્ચિ.

૭૬૬. વિનસ્સતીતિ વિબ્ભમેન વા સિક્ખાપચ્ચક્ખાનેન વા કાલકિરિયાય વા વિનસ્સતિ. અથ વા યોતિ પચ્ચત્તવચનં ‘‘યસ્સા’’તિ સામિવસેન પરિણામેત્વા યસ્સ ભિક્ખુનો પત્તો ભેદેન વા અચ્છેદેન વા ચોરિકાય હરણેન વા નસ્સતિ, તસ્સ અનાપત્તીતિ યોજના.

૭૬૭. પઠમસ્સાતિ પત્તવગ્ગસ્સ પઠમં સઙ્ગહિતત્તા પઠમસ્સ. પત્તસ્સાતિ પત્તસિક્ખાપદસ્સ. પઠમેનાતિ ચીવરવગ્ગસ્સ પઠમં સઙ્ગહિતત્તા પઠમેન કથિનેનાતિ સમ્બન્ધો. મહેસિનાતિ મહન્તે સીલક્ખન્ધાદયો ગુણે એસિ ગવેસીતિ મહેસિ. પઠમસ્સ પત્તસ્સ સમુટ્ઠાનાદયો સબ્બે ઇધ અનિદ્દિટ્ઠવિનિચ્છયા પઠમેન કથિનેન સમા સદિસા ઇતિ મહેસિના મતા અનુમતા અનુઞ્ઞાતાતિ યોજના.

પઠમપત્તકથાવણ્ણના.

૭૬૮. પઞ્ચ બન્ધનાનિ ઊનાનિ યસ્સ સો પઞ્ચબન્ધનઊનો, પત્તો, તસ્મિં, અબન્ધનઞ્ચ એકદ્વિતિચતુબન્ધનઞ્ચ ‘‘પઞ્ચબન્ધનઊન’’ન્તિ ગહિતં. યથાહ પાળિયં ‘‘ઊનપઞ્ચબન્ધનો નામ પત્તો અબન્ધનો વા એકબન્ધનો વા દ્વિબન્ધનો વા તિબન્ધનો વા ચતુબન્ધનો વા’’તિ (પારા. ૬૧૩). બન્ધને અકતેપિ બન્ધનારહો વક્ખમાનલક્ખણરાજિયુત્તોપિ ‘‘ઊનપઞ્ચબન્ધનોયેવા’’તિ ગહેતબ્બો. એત્થ અબન્ધનો નામ યસ્સ બન્ધનમેવ નત્થિ, સો. તેનેવાહ અટ્ઠકથાયં ‘‘યસ્મા અબન્ધનસ્સપિ પત્તસ્સ પઞ્ચ બન્ધનાનિ ન પૂરેન્તિ સબ્બસો નત્થિતાયા’’તિ (પારા. અટ્ઠ. ૨.૬૧૨-૬૧૩). દ્વઙ્ગુલપ્પમાણતો ઊનરાજિયુત્તો અબન્ધનોકાસોપિ ‘‘અબન્ધનોયેવા’’તિ ગહેતબ્બો. યથાહ પાળિયં ‘‘અબન્ધનોકાસો નામ પત્તો યસ્સ દ્વઙ્ગુલા રાજિ ન હોતી’’તિ (પારા. ૬૧૩).

૭૬૯. ઉદ્દિટ્ઠન્તિ ‘‘બન્ધનોકાસો નામ પત્તો યસ્સ દ્વઙ્ગુલા રાજિ હોતી’’તિ (પારા. ૬૧૩) પદભાજને વુત્તં. દ્વઙ્ગુલાય રાજિયા એકઞ્ચ બન્ધનન્તિ યોજના. ‘‘મુખવટ્ટિતો હેટ્ઠા ભટ્ઠા’’તિ અટ્ઠકથાવચનતો (પારા. અટ્ઠ. ૨.૬૧૨-૬૧૩) ‘‘સબ્બાપિ રાજિયો મુખવટ્ટિતો પટ્ઠાય હેટ્ઠા ભટ્ઠાયેવ ગહેતબ્બા’’તિ નિસ્સન્દેહે વુત્તં. મુખવટ્ટિં વિના અઞ્ઞત્થાપિ ઊનપઞ્ચબન્ધને વા ઊનપઞ્ચબન્ધનોકાસે વા સતિ સોપિ પત્તો ઊનપઞ્ચબન્ધનો ન હોતીતિ ન સક્કા વત્તું, તસ્મા ‘‘મુખવટ્ટિતો પટ્ઠાયા’’તિ (પારા. અટ્ઠ. ૨.૬૧૨-૬૧૩) અટ્ઠકથાયં નિયમેત્વા વચનં વીમંસિતબ્બં. ઇધ પન તથા નિયમો ન દસ્સિતો, તસ્મા અયમેવ વિનિચ્છયો સામઞ્ઞેન વુત્તાય પાળિયા અઞ્ઞદત્થુ સંસન્દતિ સમેતિ. ચ-કારસ્સ અવુત્તસમુચ્ચયત્થત્તા દ્વઙ્ગુલદ્વઙ્ગુલાહિ દ્વીહિ દ્વે બન્ધનાનિ ચ તીણિ બન્ધનાનિ ચાતિ ઇદમ્પિ વુત્તમેવ હોતિ. યથાહ અટ્ઠકથાયં ‘‘યસ્સ પન દ્વે રાજિયો, એકાયેવ વા ચતુરઙ્ગુલા, તસ્સ દ્વે બન્ધનાનિ દાતબ્બાનિ. યસ્સ તિસ્સો, એકાયેવ વા છળઙ્ગુલા, તસ્સ તીણિ બન્ધનાનિ દાતબ્બાની’’તિ (પારા. અટ્ઠ. ૨.૬૧૨-૬૧૩).

ઊનપઞ્ચબન્ધનપત્તેસુ અન્તિમપત્તસ્સ વિભાગં દસ્સેતુમાહ ‘‘બન્ધનાનિ ચા’’તિઆદિ. મુખવટ્ટિયા અટ્ઠઙ્ગુલપ્પમાણાનં ચતુન્નં રાજીનં ચત્તારિ બન્ધનાનિ ચાતિ વુત્તં હોતિ. ચકારો પુબ્બે વુત્તસ્સેવ સમુચ્ચયં કરોતિ. અટ્ઠઙ્ગુલરાજિયા તથાતિ મુખવટ્ટિતો પટ્ઠાય અટ્ઠઙ્ગુલાયામં ભટ્ઠાય રાજિયા દ્વઙ્ગુલદ્વઙ્ગુલમત્તે ઠાને તેનેવ નીહારેન બદ્ધાનિ ચત્તારિ બન્ધનાનિ ચાતિ અત્થો.

૭૭૦. એવં ઊનપઞ્ચબન્ધનપત્તં દસ્સેત્વા ઇદાનિ પરિપુણ્ણપઞ્ચબન્ધનપત્તં દસ્સેતુમાહ ‘‘પઞ્ચ વા’’તિઆદિ. મુખવટ્ટિયા દ્વઙ્ગુલદ્વઙ્ગુલાયામં ઓતિણ્ણા પઞ્ચ રાજિયો ચ. વા-સદ્દેન પઞ્ચબન્ધનવિકપ્પા દસ્સિતા. એકા વાપિ દસઙ્ગુલાતિ મુખવટ્ટિતો દસઙ્ગુલાયામા એકા વા રાજિ હોતિ. અપિ-સદ્દેન તસ્સા રાજિયા બન્ધનો પઞ્ચબન્ધનપક્ખો દસ્સિતો. અયં પત્તોતિ યસ્સ પઞ્ચ રાજિયો વા તત્થ બન્ધનાનિ પઞ્ચબન્ધનાનિ વા, દસઙ્ગુલા એકા રાજિ વા તત્થ બન્ધનાનિ પઞ્ચબન્ધનાનિ વા સન્તિ, અયં પત્તો પઞ્ચબન્ધનો નામ.

૭૭૧. એત્તાવતા મત્તિકાપત્તે વિનિચ્છયં દસ્સેત્વા ઇદાનિ અયોપત્તે દસ્સેતુમાહ ‘‘અયોપત્તો’’તિઆદિ. છિદ્દાનિ પટિચ્છાદેતું બન્ધિતબ્બાનિ અયોપટ્ટાનિ લોહમણ્ડલકાનિ નામ. ‘‘ભણ્ડી’’તિપિ તસ્સેવ પરિયાયો. ભણ્ડિતબ્બં બન્ધિત્વા છિદ્દે પટિચ્છાદિતેપિ યત્થ અસણ્હતાય આમિસં તિટ્ઠતિ, તાદિસોપિ અપત્તોયેવાતિ આહ ‘‘મટ્ઠો વટ્ટતી’’તિ. અયોચુણ્ણેન વાણિયાતિ એત્થાપિ ‘‘મટ્ઠો વટ્ટતી’’તિ સમ્બન્ધનીયં.

૭૭૨. તસ્સ નિસ્સગ્ગિયં સઙ્ઘસ્સ નિસ્સટ્ઠં તં પત્તં તસ્મિં અનુકમ્પાય અગણ્હન્તસ્સાતિ યોજના, ‘‘સઙ્ઘમજ્ઝે નિસ્સજ્જિતબ્બો’’તિ (પારા. ૬૧૩) વચનતો સઙ્ઘમજ્ઝે નિસ્સટ્ઠં તસ્સ તં પત્તં તસ્મિં પત્તનિસ્સજ્જકે પુગ્ગલે અનુકમ્પાય અગણ્હન્તસ્સ.

૭૭૩. દીયમાને તુ પત્તસ્મિન્તિ ઊનપઞ્ચબન્ધનેન પત્તેન વિઞ્ઞાપિતનવપત્તે ભિક્ખુમ્હિ તં પત્તં સઙ્ઘમજ્ઝે નિસ્સજ્જિત્વા આપત્તિં દેસેત્વા નિસિન્ને ચતસ્સો અગતિયો અગમનં, ગહિતાગહિતજાનનન્તિ ઇમેહિ પઞ્ચહિ અઙ્ગેહિ સમન્નાગતેન ભિક્ખુના પઠમં સઙ્ઘં યાચિત્વા ઞત્તિદુતિયાય કમ્મવાચાય સઙ્ઘેન પત્તગાહકં કત્વા સમ્મતેન નિસ્સટ્ઠપત્તં હત્થેન ગહેત્વા તસ્મિં સઙ્ઘે સઙ્ઘત્થેરતો પટ્ઠાય અનુક્કમેન ઉપસઙ્કમ્મ વિઞ્ઞાયમાનં ગુણં વત્વા પણામિતે. યસ્સાતિ તસ્મિં સઙ્ઘમજ્ઝે નિસિન્નસ્સ યસ્સ ભિક્ખુનો, રોચનત્થયોગે સમ્પદાનવચનં. સો દીયમાનો પત્તો. તં દીયમાનં પત્તં.

૭૭૪. દીપિતોતિ ‘‘અપત્તકસ્સ ન ગાહેતબ્બો’’તિ (પારા. ૬૧૫) વુત્તો. તત્થાતિ તસ્સં ભિક્ખુપરિસાયં. પત્તપરિયન્તોતિ એત્થ ‘‘એવં પરિવત્તેત્વા પરિયન્તે ઠિતપત્તો’’તિ (પારા. અટ્ઠ. ૨.૬૧૫) અટ્ઠકથાયં વુત્તત્તા તેન પત્તપરિવત્તનેન આગતો વા સબ્બેહિ અગ્ગહિતત્તા આગતો સો એવ વા પત્તો પરિયન્તો નામ હોતીતિ અત્થો. તસ્સ ભિક્ખુનોતિ પત્તં નિસ્સજ્જિત્વા નિસિન્નસ્સ તસ્સ ભિક્ખુનો.

૭૭૫. તન્તિ અત્તનો દિન્નં તં પરિયન્તપત્તં. અપ્પદેસેતિ મઞ્ચપીઠાદિઅટ્ઠાને. યથાહ અટ્ઠકથાયં ‘‘મઞ્ચપીઠછત્તનાગદન્તાદિકે અદેસે’’તિ (પારા. અટ્ઠ. ૨.૬૧૫). વિસ્સજ્જેતીતિ અઞ્ઞસ્સ દેતિ. અત્તના અદાપેત્વા અઞ્ઞેન તં પત્તં સયમેવ અત્તનો ગહેત્વા અઞ્ઞં અનુરૂપં પત્તં દિય્યમાનં ગણ્હિતું વટ્ટતીતિ અટ્ઠકથાયં વુત્તં. અભોગેન પરિભુઞ્જતીતિ યાગુરન્ધનાદિવસેન પરિભુઞ્જતિ. યથાહ અટ્ઠકથાયં ‘‘અભોગેનાતિ યાગુરન્ધનરજનપચનાદિના’’તિ (પારા. અટ્ઠ. ૨.૬૧૫). ‘‘અન્તરામગ્ગે પન બ્યાધિમ્હિ ઉપ્પન્ને અઞ્ઞસ્મિં ભાજને અસતિ મત્તિકાય લિમ્પિત્વા યાગું વા પચિતું ઉદકં વા તાપેતું વટ્ટતી’’તિ (પારા. અટ્ઠ. ૨.૬૧૫) અટ્ઠકથાયં વુત્તત્તા તાદિસે ઠાને તથાપિ પરિભુઞ્જિતું વટ્ટતીતિ એત્થ વિસેસો.

૭૭૬. નટ્ઠેતિ અત્તનો પરિભુઞ્જિયમાને પત્તે ચોરગ્ગહણાદિના નટ્ઠે. ભિન્નેતિ ભેદમુપગતે. અનાપત્તીતિ અઞ્ઞં પત્તં વિઞ્ઞાપેન્તસ્સ અનાપત્તિ. પકાસિતાતિ ‘‘અનાપત્તિ નટ્ઠપત્તસ્સ ભિન્નપત્તસ્સ ઞાતકાનં પવારિતાનં અઞ્ઞસ્સત્થાય અત્તનો ધનેના’’તિઆદિના (પારા. ૬૧૭) નયેન પાળિયં દેસિતા. ઇધ ‘‘અઞ્ઞસ્સત્થાયા’’તિ વુત્તત્તા અત્તનો વળઞ્જિયમાને પત્તે સતિપિ અઞ્ઞસ્સત્થાય પત્તં વિઞ્ઞાપેતું વટ્ટતિ. ઞાતકાદીનં ગણ્હતોતિ એત્થ ‘‘સન્તક’’ન્તિ લબ્ભતિ. અત્તનો ધનેનાતિ યોજના. એત્થ ધનં નામ સુત્તવત્થાદિ કપ્પિયવત્થુ.

૭૭૭. એત્થ વિઞ્ઞાપનં ક્રિયં.

દુતિયપત્તકથાવણ્ણના.

૭૭૮. સપ્પિઆદિં ભેસજ્જન્તિ એત્થ પાળિયં ‘‘સેય્યથિદં? સપ્પિ નવનીતં તેલં મધુ ફાણિત’’ન્તિ (પારા. ૬૨૨) ઉદ્દિસિત્વા ‘‘સપ્પિ નામ ગોસપ્પિ વા અજિકાસપ્પિ વા મહિંસસપ્પિ વા, યેસં મંસં કપ્પતિ, તેસં સપ્પી’’તિ (પારા. ૬૨૩) નિદ્દિટ્ઠં ઘતઞ્ચ ‘‘તેસંયેવ નવનીત’’ન્તિ (પારા. ૬૨૩) નિદ્દિટ્ઠં નવનીતઞ્ચ ‘‘તિલતેલં સાસપતેલં મધુકતેલં એરણ્ડકતેલં વસાતેલ’’ન્તિ (પારા. ૬૨૩) નિદ્દિટ્ઠં તેલઞ્ચ ‘‘મધુ નામ મક્ખિકામધૂ’’તિ (પારા. ૬૨૩) નિદ્દિટ્ઠં મધુઞ્ચ ‘‘ફાણિતં નામ ઉચ્છુમ્હા નિબ્બત્ત’’ન્તિ (પારા. ૬૨૩) નિદ્દિટ્ઠં ગુળાદિફાણિતઞ્ચાતિ એતસ્મિં પઞ્ચભેસજ્જરાસિમ્હિ યં યં ભેસજ્જન્તિ અત્થો. પુરેભત્તન્તિ પુરેભત્તે. પટિગય્હાતિ પટિગ્ગહેત્વા.

૭૭૯. તં પુરેભત્તં પટિગ્ગહિતં ભેસજ્જં. સત્તાહન્તિ એત્થ ‘‘વટ્ટતી’’તિ કિરિયાય અચ્ચન્તસંયોગે ઉપયોગવચનં. ‘‘સત્તાહં અતિક્કમન્તસ્સા’’તિ પદચ્છેદો. ‘‘સત્તાહાતિક્કમે તસ્સા’’તિ વા પાઠો. સત્તાહસ્સ અતિક્કમો સત્તાહાતિક્કમો, તસ્મિં સત્તાહાતિક્કમે. તસ્સાતિ ભેસજ્જપટિગ્ગાહકસ્સ ભિક્ખુનો. ‘‘નિસ્સગ્ગિય’’ન્તિ ઇમિના પાચિત્તિયમેવ દસ્સિતં. નિસ્સગ્ગિયવત્થુ ભાજનગણનાય આપત્તિં કરોતિ. એકસ્મિં ભાજનેપિ વિસું વિસું ઠપિતાનિ નવનીતપિણ્ડગુળપિણ્ડસક્કરમધુપટલાનિપિ અત્તનો ગણનાય આપત્તિં કરોન્તિ.

૭૮૦. ગણ્હિત્વાતિ પટિગ્ગહેત્વા. સન્નિધીયતીતિ સન્નિધિ, સન્નિહિતવત્થુ, તસ્સ કારકં કરણં અપરાપરદિવસત્થાય ઠપનં, તં કત્વા, પચ્છાભત્તં પટિગ્ગહિતં યથા અપરં દિવસં ગચ્છતિ, તથા કત્વા નિક્ખિપિત્વાતિ અત્થો. નિરામિસં સાયતોતિ આમિસેન અમિસ્સેત્વા ભુઞ્જન્તસ્સ.

૭૮૧. ઉગ્ગહિતન્તિ અપ્પટિગ્ગહાપેત્વા હત્થેન ગહિતં. સરીરભોગેતિ બહિ સરીરપરિભોગેનેવ.

૭૮૨. ગહિતં પટિગ્ગહિતં. તાપેત્વાતિ વિલીયાપેત્વા.

૭૮૩. ‘‘સયં તાપેતિ…પે… ન હોતિ સો’’તિ ઇદં સુધોતનવનીતં સન્ધાય વુત્તં, દુદ્ધોતેન પન દધિગુળિકાદિસહિતેન સામંપાકો હોતેવ. નવનીતસ્સ યં સયં તાપનં, સો સામંપાકો ન હોતીતિ યોજના.

૭૮૪. યેન કેનચીતિ ઉપસમ્પન્નેન, અનુપસમ્પન્નેન વા.

૭૮૫. ‘‘સયં કરોતી’’તિ ઇમિના અનુપસમ્પન્નં નિવત્તેતિ. તેન કતં પન તદહુ પુરેભત્તં સામિસમ્પિ વટ્ટતિ. યથાહ અટ્ઠકથાયં ‘‘પુરેભત્તં પટિગ્ગહિતખીરેન વા દધિના વા કતસપ્પિ અનુપસમ્પન્નેન કતં સામિસમ્પિ તદહુ પુરેભત્તં વટ્ટતી’’તિ (પારા. અટ્ઠ. ૨.૬૨૨).

૭૮૬. સવત્થુકસ્સાતિ એત્થ વત્થુ નામ ખીરદધિ.

૭૮૭. અસ્સાતિ પટિગ્ગહિતખીરદધીહિ કતસપ્પિમાહ. ‘‘પટિગ્ગહેત્વા તાની’’તિ વુત્તત્તાતિ ઇદં ‘‘યાનિ ખો પન તાનિ ગિલાનાનં ભિક્ખૂનં પટિસાયનીયાનિ ભેસજ્જાનિ, સેય્યથિદં? સપ્પિ નવનીતં તેલં મધુ ફાણિતં, તાનિ પટિગ્ગહેત્વા’’તિ (પારા. ૬૨૨) ઇમસ્મિં માતિકાપાઠે ‘‘યાની’’તિ વુત્તસપ્પિઆદીનમેવ ‘‘તાનિ પટિગ્ગહેત્વા’’તિ વુત્તત્તાતિ વુત્તં હોતિ, તત્થ ખીરદધીનં અવુત્તત્તાતિ અધિપ્પાયો.

૭૮૮. કપ્પિયસપ્પિમ્હીતિ કપ્પિયમંસાનં સત્તાનં ઘતે. અકપ્પિયસપ્પિમ્હીતિ અકપ્પિયમંસાનં સત્તાનં ઘતે, પટિગ્ગહેત્વા સત્તાહે અતિક્કન્તેતિ વુત્તં હોતિ.

૭૮૯. તેન સપ્પિના અકપ્પિયેન ભવિતબ્બન્તિ ઇદં દુક્કટં કથં હોતીતિ આહ ‘‘સબ્બા’’તિઆદિ. અકપ્પિયં મંસં યેસં તે અકપ્પિયમંસા, મનુસ્સાદયો, સબ્બે ચ તે અકપ્પિયમંસા ચાતિ સબ્બાકપ્પિયમંસા, તેસં.

૭૯૦-૧. એવં ચે વટ્ટતિ, ‘‘યેસં મંસં કપ્પતિ, તેસં સપ્પી’’તિ કસ્મા પાળિયં વુત્તન્તિ ચોદનં સમુટ્ઠાપેત્વા તં પરિહરિતુમાહ ‘‘યેસ’’ન્તિઆદિ. તત્થ ‘‘યેસઞ્હિ કપ્પતિ મંસં, તેસં સપ્પી’’તિ ઇદં વચનં કિં પયોજનં સાધેતીતિ વુત્તં હોતિ. ઇદાનિ પરિચ્છેદનિયમનસઙ્ખાતં તંપયોજનઞ્ચ તબ્બિસયઞ્ચ દસ્સેતુમાહ ‘‘પણીતભોજનસ્સા’’તિઆદિ. પણીતભોજનસ્સ પરિચ્છેદનિયામનન્તિ યોજના. સત્તાહકાલિકે પઞ્ચવિધે ભેસજ્જેતિ વુત્તં હોતિ, નિદ્ધારણે ભુમ્મં. નિસ્સગ્ગિયસ્સ વત્થૂનન્તિ નિદ્ધારિતબ્બદસ્સનં. નિસ્સગ્ગિયસ્સાતિ એત્થ તંહેતુકસ્સ પાચિત્તિયસ્સાતિ અત્થો. વત્થૂનન્તિ સપ્પિનવનીતદ્વયમેવ વુત્તં. સત્તાહકાલિકે નિસ્સગ્ગિયપાચિત્તિયસ્સ વત્થુ નામ એતેસમેવ સપ્પિનવનીતાનિ, પણીતભોજનઞ્ચ તેસમેવ ખીરદધિસપ્પિનવનીતાનીતિ દસ્સેતું તથા વુત્તં, ન અકપ્પિયમંસસત્તાનં સપ્પિઆદિનિવારણત્થં વુત્તન્તિ અયં પાળિયં તથાગતા ધિપ્પેતો અત્થોતિ વુત્તં હોતિ.

૭૯૨. ગહિતુગ્ગહિતાદિકે ઉગ્ગહિતપટિગ્ગહિતાદિકે નવનીતેપિ સબ્બો વિનિચ્છયો સપ્પિમ્હિ વુત્તનયેનેવ વેદિતબ્બોતિ યોજના. આદિ-સદ્દેન પુરેભત્તં, પચ્છાભત્તં પટિગ્ગહિતખીરદધીહિ, ઉગ્ગહિતખીરદધીહિ ચ કતં નવનીતં, તાદિસમેવ અકપ્પિયમંસનવનીતઞ્ચ સઙ્ગહિતં. સબ્બો વિનિચ્છયોતિ આપત્તિઆદિકં સબ્બવિનિચ્છયં સઙ્ગણ્હાતિ. યથાહ અટ્ઠકથાયં ‘‘સબ્બો આપત્તાનાપત્તિપરિભોગાપરિભોગનયો’’તિ (પારા. અટ્ઠ. ૨.૬૨૨).

૭૯૩-૪. ભિક્ખૂનં આકિરન્તીતિ એત્થ ‘‘પત્તે’’તિ સામત્થિયા લબ્ભતિ. આદિચ્ચપક્કન્તિ આતપે વિલીનં. સંસટ્ઠં પરિસ્સાવિતં.

૭૯૫-૬. તિલતેલં સાસપતેલં મધુકતેલં એરણ્ડકતેલં. ગહિતન્તિ પટિગ્ગહિતં. પુરેભત્તં સામિસમ્પિ નિરામિસમ્પિ સાયિતબ્બન્તિ યોજના. તેસં વસાતિ સત્તાહાતિક્કન્તાનં તેસં તેલાનં વસેન, તેલભાજનગણનાયાતિ વુત્તં હોતિ.

૭૯૮. તેસં તિણ્ણમ્પીતિ એરણ્ડમધુકસાસપબીજાનં તિણ્ણં.

૭૯૯. નિસ્સગ્ગિયં પાચિત્તિયં.

૮૦૦. સાસપાદીનન્તિ એત્થ આદિ-સદ્દેન પટિલોમેન મધુકેરણ્ડકાનં ગહણં. ગહેત્વાતિ પટિગ્ગહેત્વા. ભિક્ખુના તેલત્થાયેવ ગહેત્વા ઠપિતાનં સાસપાદીનં સત્તાહાતિક્કમે દુક્કટં સિયાતિ યોજના.

૮૦૧-૨. નાળિકેરઞ્ચ કરઞ્જઞ્ચ નાળિકેરકરઞ્જાનિ, તેસં, નાળિકેરફલાનં, નત્તમાલટ્ઠીનઞ્ચ તેલન્તિ સમ્બન્ધો. કુરુવકસ્સાતિ અતસિબીજસ્સ. નિમ્બઞ્ચ કોસમ્બકઞ્ચ નિમ્બકોસમ્બકાનિ, તેસં, પુચિમન્દબીજસ્સ ચ ફન્દનબીજસ્સ ચ તેલન્તિ સમ્બન્ધો. ભલ્લાતકસ્સાતિ એવંનામકસ્સ રુક્ખબીજસ્સ. સમયચ્ચયેતિ સત્તાહાતિક્કમે.

૮૦૩. યાવકાલિકભેદઞ્ચાતિ એત્થ ‘‘યાવકાલિક’’ન્તિ ભેદો વિસેસનં યસ્સાતિ વિગ્ગહો, ‘‘ઇદં વત્થુ’’ન્તિ એતસ્સ અજ્ઝોહરણીયવિસેસિતબ્બસ્સ વિસેસનં. યાવજીવિકન્તિપિ તસ્સેવ વિસેસનં. સેસન્તિ ‘‘સામંપાકસવત્થુક પુરેભત્તપચ્છાભત્તપટિગ્ગહિતઉગ્ગહિતકવત્થુવિધાનં સબ્બ’’ન્તિ (પારા. અટ્ઠ. ૨.૬૨૨) અટ્ઠકથાયં દસ્સિતં સેસં વિસેસપ્પકારજાતમાહ. એત્થાપીતિ ઇમસ્મિં તેલવિનિચ્છયેપિ.

૮૦૪. અચ્છસ્સ ઇસસ્સ. મચ્છસ્સ જલજસ્સ. વરાહસ્સ સૂકરસ્સ. સુસુકાસઙ્ખાતસ્સ મકરસ્સ. મચ્છવચનેનેવ મકરસ્સ સઙ્ગહિતત્તેપિ વાળમચ્છભાવેન વિસું ગહણન્તિ અટ્ઠકથાયં વુત્તં. ગદ્રભસ્સ ખરસ્સ. ઇમેસં પઞ્ચન્નં સત્તાનં વસેન પઞ્ચવિધાનં વસાનં તેલઞ્ચ પઞ્ચપ્પકારં હોતીતિ અત્થો.

૮૦૫. કપ્પિયાકપ્પિયસ્સ ચાતિ કપ્પિયાકપ્પિયમંસસ્સ સત્તસ્સાતિ વુત્તં હોતિ, સબ્બમેવ વસાતેલં વટ્ટતીતિ ઇમિના સમ્બન્ધો. એત્થ ‘‘અનુજાનામિ ભિક્ખવે વસાનિ ભેસજ્જાનિ અચ્છવસં મચ્છવસં સુસુકાવસં સૂકરવસં ગદ્રભવસ’’ન્તિ (મહાવ. ૨૬૨) અનુઞ્ઞાતપાઠે અચ્છવસાગ્ગહણેન મનુસ્સેહિ અઞ્ઞેસં સબ્બાકપ્પિયમંસસત્તાનં વસાય અનુઞ્ઞાતત્તા તં સઙ્ગહેતું અકપ્પિયગ્ગહણં કતન્તિ દટ્ઠબ્બં. યથાહ અટ્ઠકથાયં ‘‘અચ્છવસ’ન્તિ વચનેન ઠપેત્વા મનુસ્સવસં સબ્બેસં અકપ્પિયમંસાનં વસા અનુઞ્ઞાતા’’તિ (પારા. અટ્ઠ. ૨.૬૨૩). એત્થ અકપ્પિયમંસસત્તાનં મંસાનં અકપ્પિયભાવો ‘‘મંસેસુ હિ દસ મનુસ્સહત્થિઅસ્સસુનખઅહિસીહબ્યગ્ઘદીપિઅચ્છતરચ્છાનં મંસાનિ અકપ્પિયાનિ. વસાસુ એકા મનુસ્સવસાવ. ખીરાદીસુ અકપ્પિયં નામ નત્થી’’તિ (પારા. અટ્ઠ. ૨.૬૨૩) અટ્ઠકથાવચનતો વેદિતબ્બો. અકપ્પિયવચનેન મનુસ્સવસાયપિ ગય્હમાનત્તા તસ્મિં નીહરિતુમાહ ‘‘ઠપેત્વા’’તિ.

૮૦૬. પુરેભત્તન્તિ પુરેભત્તે. સંસટ્ઠં પરિસ્સાવિતં. ‘‘પુરેભત્ત’’ન્તિ ઇદં ‘‘પટિગ્ગહેત્વાન, પક્કં, સંસટ્ઠ’’ન્તિ ઇમેહિ પદેહિ પચ્ચેકં યોજેતબ્બં. યથાહ પાળિયં ‘‘કાલે પટિગ્ગહિતં કાલે નિપ્પક્કં કાલે સંસટ્ઠં તેલપરિભોગેન પરિભુઞ્જિતુ’’ન્તિ (મહાવ. ૨૬૨).

૮૦૭. તં કત્વા દેતીતિ અપટિગ્ગહિતવસં ગહેત્વા પચિત્વા તેલં દેતીતિ અત્થો. તેનાહ અટ્ઠકથાયં ‘‘અનુપસમ્પન્નેહિ કતં નિબ્બટ્ટિતવસાતેલં પુરેભત્તં પટિગ્ગહિતં પુરેભત્તં સામિસમ્પિ વટ્ટતી’’તિ (પારા. અટ્ઠ. ૨.૬૨૩). તતો ઉદ્ધં સત્તાહમનતિક્કમ્માતિ ગહેતબ્બં. યથાહ અટ્ઠકથાયં ‘‘પચ્છાભત્તતો પટ્ઠાય સત્તાહં નિરામિસમેવ વટ્ટતી’’તિ (પારા. અટ્ઠ. ૨.૬૨૩). ઇધ ઉભયત્થાપિ કાલે, વિકાલે ચ કપ્પિયાકપ્પિયમંસવસાનં તેલં દિય્યમાનં સુખુમમંસચુણ્ણાદિકં અબ્બોહારિકં. યથાહ અટ્ઠકથાયં ‘‘યં પન તત્થ સુખુમરજસદિસં મંસં વા ન્હારુ વા અટ્ઠિ વા લોહિતં વા હોતિ, તં અબ્બોહારિક’’ન્તિ (પારા. અટ્ઠ. ૨.૬૨૩).

૮૦૮. પટિગ્ગહેતુન્તિ એત્થ ‘‘વસ’’ન્તિ ચ કાતુન્તિ એત્થ ‘‘તેલ’’ન્તિ ચ પકરણતો લબ્ભતિ. કાતુન્તિ એત્થ પચિતું પરિસ્સાવિતુન્તિ ઉભયમેવાતિ અત્થો. ‘‘ન વટ્ટતી’’તિ ઇદં પટિગ્ગહણાદિપયોગત્તયે વિસું વિસું દુક્કટત્તા વુત્તં. યથાહ પાળિયં ‘‘વિકાલે ચે ભિક્ખવે પટિગ્ગહિતં વિકાલે નિપ્પક્કં વિકાલે સંસટ્ઠં, તં ચે પરિભુઞ્જેય્ય, આપત્તિ તિણ્ણં દુક્કટાન’’ન્તિ (મહાવ. ૨૬૨). ઇમાનિ હિ તીહિ પયોગેહિ તીણિ દુક્કટાનિ હોન્તિ. સેસોતિ ઉગ્ગહિતકપટિગ્ગહિતકસવત્થુકવિસયો વિનિચ્છયો ચ ભાજનગણનાય આપત્તિભેદો ચાતિ એવંપકારો વત્તબ્બવિસેસો.

૮૦૯. ગહિતન્તિ પટિગ્ગહિતં. મધુકરીકતન્તિ મધુમક્ખિકાખુદ્દકમક્ખિકાભમરમક્ખિકાસઙ્ખાતાહિ તીહિ મધુકરીહિ કતં.

૮૧૦. વત્થૂનં ગણનાતિ મધુપટલેન ઠિતં ચે, પટલગણનાય, પીળેત્વા ભાજને પક્ખિપિત્વા ઠપિતં ચે, ભાજનગણનાય, સિલેસમિવ પત્થિન્નં ચે, મહાભમરમધુખણ્ડપિણ્ડવસેન, વિસું વિસું કતે તેસં ગણનાયાતિ અત્થો.

૮૧૧. ઘનાઘનન્તિ એત્થ ગુળઞ્ચ નાનપ્પકારા સક્કરા ચ ઘનપક્કં નામ. પક્કતનુકં ફાણિતં અઘનપક્કં નામ. ઉચ્છુસિલેસો અપક્કઘનં નામ. ઉચ્છુદણ્ડતો પીળિતરસો અપક્કાઘનં નામ. ‘‘ફાણિતં નામ ઉચ્છુમ્હા નિબ્બત્ત’’ન્તિ (પારા. ૬૨૩) સાધારણપાળિવચનતો, ‘‘ફાણિતં નામ ઉચ્છુરસં ઉપાદાયા’’તિ (કઙ્ખા. અટ્ઠ. ભેસજ્જસિક્ખાપદવણ્ણના; વિ. સઙ્ગ અટ્ઠ. ૯૮) અટ્ઠકથાવચનતો ચ ઇહ રસાદીહિ ઉચ્છુપાનમ્પિ સઙ્ગહિતં. કેચિ ઉચ્છુનો ચતુકાલિકત્તં વણ્ણયન્તિ, તં ન સારતો પચ્ચેતબ્બં.

૮૧૨. ફાણિતન્તિ વુત્તપ્પકારે તસ્મિં ફાણિતે અઞ્ઞતરં. ગહિતં પટિગ્ગહિતં.

૮૧૩. અસંસટ્ઠેનાતિ અપરિસ્સાવિતેન. કતફાણિતન્તિ પરિસ્સાવેત્વા અત્તના કતફાણિતં. પુરેભત્તં ગહિતેનાતિ પુરેભત્તં પટિગ્ગહિતેન. ‘‘સયં કત’’ન્તિ (પારા. અટ્ઠ. ૨.૬૨૩) વુત્તત્તા કતન્તિ ઉચ્છુરસો ગહેતબ્બો.

૮૧૬. કત્વાતિ પચિત્વા ફાણિતં કત્વા.

૮૧૭. પચ્છાભત્તં કતઞ્ચાપીતિ પચ્છાભત્તં અત્તના ચ કતં અનુપસમ્પન્નેન ચ કતં ફાણિતમ્પિ.

૮૧૮. કતં …પે… સીતવારિનાતિ સીતુદકે મધુકપુપ્ફાનિ પક્ખિપિત્વા ઠપેત્વા મદ્દિત્વા પરિસ્સાવિતરસેન કતં મધુકફાણિતં.

૮૧૯. અસ્સાતિ મધુકફાણિતસ્સ. દુક્કટન્તિ તદાધારભાજનગણનાય દુક્કટં. ખીરં પક્ખિપિત્વા કતં મધુકફાણિતં યાવકાલિકં ચે હોતિ, કથં ખણ્ડસક્કરાકતં સત્તાહકાલિકં હોતીતિ વિચારણાયં ખીરજલ્લિકં ધોવિત્વા ધોવિત્વા ગય્હમાનત્તા વટ્ટતીતિ પરિહરન્તિ. યથાહ અટ્ઠકથાયં ‘‘ખણ્ડસક્કરં પન ખીરજલ્લિકં અપનેત્વા અપનેત્વા સોધેન્તિ, તસ્મા વટ્ટતી’’તિ (પારા. અટ્ઠ. ૨.૬૨૩). ‘‘બીજતો પટ્ઠાય ન વટ્ટતી’’તિ પટિક્ખિત્તમધુકપુપ્ફમેરયં વિના આમકઞ્ચ પક્કઞ્ચ મધુકપુપ્ફં પુરેભત્તં વટ્ટતીતિ અટ્ઠકથાયં વુત્તં.

૮૨૦. સબ્બેસં પન ફલાનન્તિ કદલિખજ્જૂરિઆદિફલાનં.

૮૨૧. સામઞ્ઞજોતનાય વિસેસેપિ અવટ્ઠાનતો ‘‘કાલિકા’’તિ ઇમિના ‘‘પચ્છાભત્તં સતિ પચ્ચયે’’તિ વચનસામત્થિયા યાવકાલિકવજ્જા તયો કાલિકા ગહેતબ્બા, ‘‘પુરેભત્તં યથાસુખ’’ન્તિ વચનસામત્થિયા ચત્તારોપિ ગહેતબ્બા. યાવકાલિકવજ્જા તયો કાલિકા પચ્છાભત્તં વિકાલે પચ્ચયે પિપાસાદિકારણે સતિ કેવલમ્પિ પચ્ચેકમ્પિ મિસ્સેત્વાપિ પરિભુઞ્જિતું ભિક્ખુસ્સ વટ્ટન્તિ. કાલિકા ચત્તારોપિ પુરેભત્તં કાલે યાવમજ્ઝન્હા કેવલમ્પિ મિસ્સેત્વાપિ યથાસુખં અસતિપિ પચ્ચયે પરિભુઞ્જિતું ભિક્ખુસ્સ વટ્ટન્તીતિ યોજના.

૮૨૨. અરુઆદીનીતિ વણાદીનિ. ‘‘મક્ખેતું ન વટ્ટતી’’તિ ઇમિના બાહિરપરિભોગોપિ નિવારિતો.

૮૨૩. અનાપત્તિવારે ‘‘અન્તોસત્તાહ’’ન્તિ અધિકારે ‘‘અનુપસમ્પન્નસ્સ ચત્તેન વન્તેન મુત્તેન અનપેક્ખો દત્વા પટિલભિત્વા પરિભુઞ્જતી’’તિ (પારા. ૬૨૫) વુત્તત્તા ચજિત્વાતિ એત્થ ‘‘અન્તોસત્તાહં અનુપસમ્પન્નસ્સા’’તિ વત્તબ્બં. લભિત્વાતિ એત્થ ‘‘સત્તાહાતિક્કમેપી’’તિ સામત્થિયા લબ્ભતિ. તેનાહ મહાપદુમત્થેરો ‘‘અન્તોસત્તાહે દિન્નસ્સ હિ પુન પરિભોગે આપત્તિયેવ નત્થિ, સત્તાહાતિક્કન્તસ્સ પન પરિભોગે અનાપત્તીતિ દસ્સનત્થમિદં વુત્ત’’ન્તિ. લભિત્વાતિ ગહિતતેલેન અનુપસમ્પન્નેન સક્કચ્ચં, અસક્કચ્ચં વા દિન્નં લભિત્વા. સાયિતુન્તિ એત્થ ‘‘લભતી’’તિ સેસો.

૮૨૪. ‘‘અનાપત્તિ અધિટ્ઠેતી’’તિ દ્વિન્નં પદાનં અન્તરે ‘‘અન્તોસત્તાહ’’ન્તિ સેસો, સબ્બપદેહિપિ યુજ્જતિ. અધિટ્ઠેતીતિ સત્તાહબ્ભન્તરે સપ્પિઞ્ચ તેલઞ્ચ વસઞ્ચ મુદ્ધનિ તેલં વા અબ્ભઞ્જનં વા, મધું અરુમક્ખનં, ફાણિતં ઘરધૂપનં ભવિસ્સતીતિ અધિટ્ઠેતિ. અધિટ્ઠિતેન અનધિટ્ઠિતં ચે મિસ્સં હોતિ, પુનપિ અધિટ્ઠાતબ્બં. વિસ્સજ્જેતીતિ અન્તોસત્તાહે અઞ્ઞસ્સ ઉપસમ્પન્નસ્સ દેતિ. સચે તથા દિન્નં અઞ્ઞેન અપ્પટિગ્ગહિતત્તા, તેન પટિગ્ગહિતમ્પિ ઇતરસ્સ દિન્નત્તા તેસં અનાપત્તીતિ અટ્ઠકથાયં (પારા. અટ્ઠ. ૨.૬૨૫ અત્થતો સમાનં) વુત્તં.

વિનસ્સતીતિ સત્તાહબ્ભન્તરે યેન કેનચિ આકારેન યથા અપરિભોગં હોતિ, તથા ચોરિકાય હરણાદિવસેન નસ્સતિ. યથાહ અટ્ઠકથાયં ‘‘વિનસ્સતીતિ અપરિભોગં હોતી’’તિ (પારા. અટ્ઠ. ૨.૬૨૫). અચ્છિન્દિત્વા ગણ્હતીતિ અઞ્ઞો તસ્મિં સત્તાહબ્ભન્તરે વિલુમ્પિત્વા ગણ્હાતિ. વિસ્સાસં ગણ્હતીતિ તસ્મિંયેવ સત્તાહબ્ભન્તરે અઞ્ઞો વિસ્સાસં ગણ્હાતિ.

૮૨૫. અકથિનચિત્તેન સત્થુના સમુટ્ઠાનાદયો સબ્બેવ પઠમેન કથિનેન સમા પકાસિતાતિ યોજના. અકથિનચિત્તેનાતિ મહાકરુણારસેન તિન્તતાય અકક્કસચિત્તેન, અવિહિંસાભિરતચિત્તેનાતિ વુત્તં હોતિ. સત્થુનાતિ દિટ્ઠધમ્મિકસમ્પરાયિકાદીહિ અત્થેહિ સદેવકં લોકં અનુસાસતીતિ સત્થા, તેન સબ્બઞ્ઞુના દસબલેન સમ્માસમ્બુદ્ધેન.

ભેસજ્જસિક્ખાપદકથાવણ્ણના.

૮૨૬. ગિમ્હાનન્તિ એત્થ ‘‘માસાન’’ન્તિ સામત્થિયા લબ્ભતિ, નિદ્ધારણે સામિવચનં, ગિમ્હેસુ ચતૂસુ માસેસૂતિ અત્થો. નિદ્ધારિતબ્બં દસ્સેતિ ‘‘માસો સેસો’’તિ, એત્થ ‘‘વત્તબ્બે કાલે’’તિ સેસો. ફગ્ગુનમાસકણ્હપક્ખપાટિપદતો પટ્ઠાય જેટ્ઠમાસપુણ્ણમિપરિયોસાનેસુ તીસુ માસેસુ અતિક્કન્તેસૂતિ અત્થો. સેસમાસો નામ જેટ્ઠમાસસ્સ કણ્હપક્ખપાટિપદતો પટ્ઠાય આસાળ્હિમાસપુણ્ણમિપરિયોસાનો. ગિમ્હાનં માસો સેસોતિ વત્તબ્બે કાલેતિ અત્થો.

ઇમસ્મિં પચ્છિમે ગિમ્હમાસે જેટ્ઠમાસસ્સ કણ્હપક્ખો વસ્સિકસાટિકા ચે ન લદ્ધા, પરિયેસિતું લદ્ધં કાતું ખેત્તં, અધિટ્ઠાનનિવાસનાનં અખેત્તં. આસાળ્હિપુરિમપક્ખો પરિયેસનકરણનિવાસનાનં ખેત્તં, અધિટ્ઠાતું અખેત્તં. આસાળ્હિકણ્હપક્ખપાટિપદતો યાવ પચ્છિમકત્તિકપુણ્ણમી, ઇદં ચતુન્નમ્પિ ખેત્તન્તિ અયમેત્થ સઙ્ખેપો.

પરિયેસેય્યાતિ ‘‘યે મનુસ્સા પુબ્બે વસ્સિકસાટિકં દેન્તી’’તિઆદિના (પારા. ૬૨૮) પદભાજને વુત્તનયેન પુબ્બે વસ્સિકસાટિકદાયકં ઉપસઙ્કમ્મ ‘‘દેથ મે વસ્સિકસાટિકચીવર’’ન્તિઆદિના વચનેન અવિઞ્ઞાપેત્વા ‘‘કાલો વસ્સિકસાટિકાય સમયો વસ્સિકસાટિકાય, અઞ્ઞેપિ મનુસ્સા વસ્સિકસાટિકં દેન્તી’’તિ એવં સતુપ્પાદમત્તકરણેન પરિયેસેય્ય.

સાટિકન્તિ વસ્સિકસાટિકં. ‘‘અદ્ધમાસો સેસો’’તિ ઇદં ‘‘ગિમ્હાન’’ન્તિ ઇમિનાવ યુજ્જતિ. તત્થ ‘‘વત્તબ્બે કાલે’’તિ અજ્ઝાહરિતબ્બં, આસાળ્હિમાસસ્સ પુરિમપક્ખેતિ અત્થો. કત્વાતિ એત્થ ‘‘લદ્ધ’’ન્તિ સામત્થિયા લબ્ભતિ. યથાવુત્તનયેન સતુપ્પાદેન વા અવસેસાનં સદ્ધાસમ્પન્નકુલાનં વા સન્તિકા લદ્ધં સિબ્બનરજનકપ્પબિન્દુદાનવસેન નિટ્ઠાપેત્વાતિ વુત્તં હોતિ. પરિદહેતિ નિવાસેય્ય.

૮૨૭-૮. પિટ્ઠિસમ્મતે સમયેતિ ‘‘કત્તિકપુણ્ણમાસિયા પન પચ્છિમપાટિપદદિવસતો પટ્ઠાય યાવ જેટ્ઠમૂલપુણ્ણમા ઇમે સત્ત માસા પિટ્ઠિસમયો નામા’’તિ (પારા. અટ્ઠ. ૨.૬૨૮) એવં દસ્સિતેસુ સત્તસુ માસેસુ. ઞાતકાઞ્ઞાતકાદિનો સતુપ્પાદં કત્વાતિ યોજના. આદિ-સદ્દેન પવારિતાપવારિતાનં સઙ્ગહો. યથાહ અટ્ઠકથાયં ‘‘અઞ્ઞાતકઅપ્પવારિતટ્ઠાનતો’’તિ.

તેસુયેવાતિ ઞાતકઅઞ્ઞાતકપવારિતઅપ્પવારિતેસુ. ‘‘તથા’’તિ ઇમિના ‘‘હોતિ નિસ્સગ્ગિયાપત્તી’’તિ ઇદં દસ્સિતં. સા આપત્તિ અઞ્ઞાતકઅપ્પવારિતેસુ અઞ્ઞાતકવિઞ્ઞત્તિસિક્ખાપદેન હોતિ. યથાહ અટ્ઠકથાયં ‘‘દેથ મે વસ્સિકસાટિકચીવર’ન્તિઆદિના નયેન વિઞ્ઞત્તિં કત્વા નિપ્ફાદેન્તસ્સ અઞ્ઞાતકવિઞ્ઞત્તિસિક્ખાપદેન નિસ્સગ્ગિયં પાચિત્તિય’’ન્તિ (પારા. અટ્ઠ. ૨.૬૨૮). ઞાતકપવારિતેસુ તેન સિક્ખાપદેન અનાપત્તિ, પિટ્ઠિસમયત્તા ઇમિના આપત્તિ હોતિ. અઞ્ઞાતકઅપ્પવારિતેસુ ચ વક્ખમાનનયેન વત્તભેદદુક્કટેન સદ્ધિં હોતીતિ દટ્ઠબ્બં.

૮૨૯-૩૦. અઞ્ઞાતકાદિનો કત્વા પન સતુપ્પાદન્તિ યોજના. આદિ-સદ્દેન અપ્પવારિતાનં સઙ્ગહો. કુચ્છિસઞ્ઞિતે સમયેતિ યથાવુત્તપિટ્ઠિસમયે સત્તમાસે વિના ઇતરે પઞ્ચ માસા વુત્તા. યથાહ અટ્ઠકથાયં ‘‘જેટ્ઠમૂલપુણ્ણમાસિયા પન પચ્છિમપાટિપદદિવસતો પટ્ઠાય યાવ કત્તિકપુણ્ણમા ઇમે પઞ્ચ માસા કુચ્છિસમયો નામા’’તિ (પારા. અટ્ઠ. ૨.૬૨૮). વત્થન્તિ વસ્સિકસાટિકં. અદિન્નપુબ્બેસૂતિ યેહિ વસ્સિકસાટિકા ન દિન્નપુબ્બા, તેસુ, ઇમિના વત્તભેદસ્સ કારણમાહ. ઇહ વત્તભેદો નામ ‘‘યે મનુસ્સા પુબ્બે વસ્સિકસાટિકચીવરં દેન્તી’’તિઆદિવચનતો (પારા. ૬૨૮) દિન્નપુબ્બેસુ કાતબ્બસ્સ સતુપ્પાદસ્સ અદિન્નપુબ્બેસુ કરણં. બ્યતિરેકતો દિન્નપુબ્બેસુ નત્થીતિ દીપિતં હોતિ.

તત્રાતિ અઞ્ઞાતકાદિમ્હિ. ‘‘નિસ્સગ્ગિય’’ન્તિ ઇમિના અઞ્ઞાતકવિઞ્ઞત્તિસિક્ખાપદેન આપત્તિં આહ. યથાહ કુચ્છિસમયચતુક્કે ‘‘વિઞ્ઞત્તિમ્પિ કત્વા નિપ્ફાદેન્તસ્સ અઞ્ઞાતકવિઞ્ઞત્તિસિક્ખાપદેન નિસ્સગ્ગિયં પાચિત્તિય’’ન્તિ. અયં પાચિત્તિયાપત્તિ પકતિયા વસ્સિકસાટિકદાયકેસુપિ હોતીતિ ઇદં અટ્ઠકથાયં ‘‘ઇદં પન પકતિયા વસ્સિકસાટિકદાયકેસુપિ હોતિયેવા’’તિ (પારા. અટ્ઠ. ૨.૬૨૮) વચનતો વિઞ્ઞાયતિ.

૮૩૧. ઓવસ્સાપેતીતિ આકાસતો પતિતઉદકેનેવ કાયં તેમેતિ, ઇમિના ‘‘ઘટાદીહિ ઓસિઞ્ચિતું વટ્ટતી’’તિ દીપિતં હોતિ. ‘‘નિબ્બકોસમ્બુના નહાયિતું વટ્ટતી’’તિ ગણ્ઠિપદેસુ વુત્તં. સતિપિ ચીવરેતિ વસ્સિકસાટિકાય સતિયાપિ. ‘‘પરિયોસાને દુક્કટ’’ન્તિ ઇમિના બિન્દુગણનાયાતિ દીપેતિ. વિવટઙ્ગણેતિ રુક્ખાદિના કેનચિ અનાવટટ્ઠાને.

૮૩૨. માસસ્મિન્તિ ગિમ્હાનં પચ્છિમમાસસ્મિં.

૮૩૩. ‘‘અચ્છિન્નચીવરસ્સાતિ એતં વસ્સિકસાટિકમેવ સન્ધાય વુત્ત’’ન્તિ (પારા. અટ્ઠ. ૨.૬૩૦) અટ્ઠકથાયં વુત્તં. વસ્સિકસાટિકં નિવાસેત્વા નહાયન્તસ્સ ચોરુપદ્દવો આપદા નામ. ન્હાનકોટ્ઠકન્તિ નહાનત્થાય કતકોટ્ઠકં. ‘‘વાપી’’તિ ઇમિના પોક્ખરણિજાતસ્સરાદયો ઉપલક્ખિતા. ન્હાયન્તસ્સાતિ નગ્ગો હુત્વા નહાયન્તસ્સાતિ પકરણતો લબ્ભતિ. ‘‘આકાસતો પતિતઉદકેનેવા’’તિ (પારા. અટ્ઠ. ૨.૬૨૯) અટ્ઠકથાયમેવ વુત્તં.

૮૩૪. ક્રિયન્તિ અકાલે પરિયેસનકરણઅધિટ્ઠાનનિવાસનેહિ આપજ્જિતબ્બતો કિરિયં. કાયેન ચ વાચાય ચ વિઞ્ઞાપનાદિં કરોન્તસ્સ કાયકમ્મં વચીકમ્મં હોતિ.

વસ્સિકસાટિકકથાવણ્ણના.

૮૩૫. ‘‘યો પન ભિક્ખુ ભિક્ખુસ્સ સામં ચીવરં દત્વા’’તિ (પારા. ૬૩૨) વચનતો સામન્તિ એત્થ ‘‘ભિક્ખૂ’’તિ ચ દત્વાતિ એત્થ ‘‘ભિક્ખુસ્સ’’ઇતિ ચ લબ્ભતિ. ચીવરન્તિ છન્નં ચીવરાનં અઞ્ઞતરં ચીવરં વિકપ્પનુપગં પચ્છિમં. ‘‘કુપિતો અનત્તમનો અચ્છિન્દેય્યા’’તિ (પારા. ૬૩૨) વચનતો અચ્છિન્દન્તસ્સાતિ એત્થ ‘‘કુપિતસ્સ અનત્તમનસ્સા’’તિ સેસો, કુપિતસ્સ અનત્તમનસ્સ અચ્છિન્દન્તસ્સ વા અચ્છિન્દાપેન્તસ્સ વાતિ અત્થો. તન્તિ અત્તના દિન્નચીવરં. ‘‘સકસઞ્ઞાયા’’તિ ઇમિના પારાજિકાય અવત્થુભાવં દીપેતિ.

૮૩૬. તથાતિ એકાયેવ આપત્તીતિ દીપેતિ.

૮૩૭. વત્થાનન્તિ ચીવરાનં. અસ્સાતિ ભિક્ખુસ્સ.

૮૪૧. સઙ્ઘાટિં ગણ્હ, ઉત્તરાસઙ્ગં ગણ્હાતિ યોજના.

૮૪૨. વિકપ્પનુપગં પચ્છિમન્તિ એત્થ ‘‘ચીવર’’ન્તિ લબ્ભતિ. આયામતો વડ્ઢકિહત્થં તિરિયં તથા વિદત્થિપ્પમાણં વત્થખણ્ડં હેટ્ઠિમપરિચ્છેદતો વિકપ્પનુપગં નામ. અઞ્ઞં કિઞ્ચિ પરિક્ખારન્તિ યોજના, અન્તમસો સુચિમ્પીતિ વુત્તં હોતિ. પરં પુગ્ગલં. છિન્દાપેન્તસ્સાતિ અચ્છિન્દાપેન્તસ્સ. કારિતન્તસ્સ દ્વિકમ્મકત્તા ‘‘પર’’ન્તિ ચ ‘‘પરિક્ખાર’’ન્તિ ચ કમ્મદ્વયગહણં. અઞ્ઞન્તિ પરિક્ખારવિસેસનં. દુક્કટં વત્થુગણનાય, વચનગણનાય ચ.

૮૪૪. એવન્તિ યથા અનુપસમ્પન્ને અનુપસમ્પન્નસઞ્ઞિનો દુક્કટં, એવં અનુપસમ્પન્ને…પે… વેમતિકસ્સાપિ દુક્કટન્તિ યોજના. અચ્છિન્દન્તસ્સાતિ એત્થ યથાવુત્તં ‘‘અનુપસમ્પન્ને’’તિ ઇદં વિભત્તિવિપરિણામેન સામિવચનં કત્વા ‘‘દિન્ન’’ન્તિ અજ્ઝાહારેન સહ યોજેતબ્બં, ‘‘ચીવર’’ન્તિ પકરણતો લબ્ભતિ, અનુપસમ્પન્નસ્સ દિન્નં ચીવરં અચ્છિન્દન્તસ્સાતિ વુત્તં હોતિ.

૮૪૫. સો વાતિ યસ્સ ચીવરં દિન્નં, સો એવ વા ભિક્ખુ. તુટ્ઠો વા દુટ્ઠો વા સો દેતીતિ યોજના. વિસ્સાસમેવ વાતિ વિસ્સાસં કત્વા ગણ્હતોતિ યોજના.

૮૪૬. એત્થાતિ ઇમસ્મિં સિક્ખાપદે.

ચીવરચ્છિન્દનકથાવણ્ણના.

૮૪૭. વિઞ્ઞાપેત્વાતિ વત્થવાયાપનં સન્ધાય યાચિત્વા. છબ્બિધં સુત્તન્તિ પદભાજને ‘‘ખોમં કપ્પાસિકં કોસેય્યં કમ્બલં સાણં ભઙ્ગ’’ન્તિ (પારા. ૬૩૮) આગતં છપ્પકારં સુત્તં. કમ્બલન્તિ એળકલોમસુત્તં. સાનુલોમાનિ છપ્પકારસુત્તાનિ હેટ્ઠા ચીવરવિનિચ્છયે વુત્તાનુસારેન વેદિતબ્બાનિ. ચીવરત્થં વત્થં ‘‘ચીવર’’ન્તિ વુત્તં. તન્તવાયેહીતિ કપ્પિયાકપ્પિયેહિ પેસકારેહિ. પોત્થકેસુ ‘‘વાયાપેતું ન વટ્ટતી’’તિ પાઠો દિસ્સતિ, ‘‘સચે’’તિ ઇમિના અયુજ્જમાનત્તા સો અપાઠો. ‘‘વાયાપેતિ ન વટ્ટતી’’તિ પાઠો યુજ્જતીતિ સચે વાયાપેતીતિ યોજના, અત્તનો અત્થાય યદિ વાયાપેય્યાતિ અત્થો.

૮૪૮. તથા અકપ્પિયો. કીદિસોતિ આહ ‘‘અઞ્ઞાતકાદિકો’’તિ. અઞ્ઞાતકાદિકોતિ અઞ્ઞાતકો આદિ યસ્સ સો અઞ્ઞાતકાદિકો. આદિ-સદ્દેન અપ્પવારિતો ગહિતો. યો ભિક્ખુ તન્તવાયસ્સ અઞ્ઞાતકો, તેન અપ્પવારિતો ચ, તસ્સ અઞ્ઞાતકાદિકો ભિક્ખુના વિઞ્ઞત્તો સો તન્તવાયો અકપ્પિયોતિ અત્થો.

૮૪૯. અકપ્પિયેનાતિ વિઞ્ઞાપિતેન. વાયાપેન્તસ્સાતિ એત્થ ‘‘પયોગે પયોગે દુક્કટં, પટિલાભેના’’તિ સેસો. યથાહ ‘‘વાયાપેતિ, પયોગે પયોગે દુક્કટં. પટિલાભેન નિસ્સગ્ગિય’’ન્તિ (પારા. ૬૩૮).

૮૫૦. કિત્તકે વીતે નિસ્સગ્ગિયં હોતીતિ આહ ‘‘વિદત્થિમત્તે’’તિઆદિ. હત્થમત્તેતિ રતનમત્તે. પદભાજને ‘‘પટિલાભેન નિસ્સગ્ગિય’’ન્તિ વુત્તં, ઇધ ‘‘વીતે નિસ્સગ્ગિય’’ન્તિ કસ્મા આહાતિ? અટ્ઠકથાયં વુત્તત્તા. તત્થાપિ તથા કસ્મા વુત્તન્તિ? તદનન્તરં અત્તનો સન્તકત્તા વીતવીતટ્ઠાનં પટિલદ્ધમેવ હોતિ, પદભાજનેપિ ઇમિના અધિપ્પાયેન પટિલાભેન નિસ્સગ્ગિયં વુત્તં, તસ્મા યાવ ચીવરં વડ્ઢતિ, તાવ ઇમિના પમાણેન આપત્તિયો વડ્ઢન્તિ. ફલકેપિ ચાતિ એત્થ ફલકં નામ તુરિવીતટ્ઠાનં, યત્થ સંહરિત્વા ઠપેન્તિ. ફલકે ફલકેપિ ચ નિસ્સગ્ગિયં વુત્તન્તિ યોજના.

૮૫૧. તેનેવાતિ વિઞ્ઞત્તતન્તવાયેનેવ. કપ્પિયં સુત્તન્તિ અવિઞ્ઞત્તિયા લદ્ધસુત્તં. કપ્પિયેન તન્તવાયેન અકપ્પિયસુત્તં વાયાપેન્તસ્સ તથેવ દુક્કટન્તિ યોજના.

૮૫૨. એકન્તરિકતો વા કપ્પિયાકપ્પિયેહેવ સુત્તેહિ વીતે દુક્કટન્તિ યોજના, અન્તરન્તરા અકપ્પિયસુત્તાનં પસારણેન, વાયનેન ચ દુક્કટં હોતીતિ અત્થો. દીઘતો વા તિરિયતો વા કપ્પિયાકપ્પિયેહેવ સુત્તેહિ વીતે દુક્કટન્તિ યોજના, દીઘતો કપ્પિયસુત્તં પસારેત્વા તિરિયં અકપ્પિયસુત્તેન વીતે દુક્કટં હોતીતિ અત્થો. વાગ્ગહણેન વુત્તવિપરિયાયતોપિ યોજેતબ્બં. દીઘતો અકપ્પિયસુત્તં પસારેત્વા તિરિયતો કપ્પિયસુત્તેન વીતેતિ અયમેત્થ વિપરિયાયો. વીતેતિ એત્થ ‘‘ફલકે ફલકે’’તિ અનુવત્તેતબ્બં.

૮૫૩. કપ્પિયાકપ્પિયેહિ તન્તવાયેહિ કપ્પિયાકપ્પિયસુત્તં મિસ્સેત્વા કતે વીતે ફલકે ફલકે તસ્સ ભિક્ખુસ્સ દુક્કટન્તિ યોજના. વેતિ નિપાતમત્તં, અથ વા વે તસ્મિં કતે વીતેતિ અત્થો.

૮૫૪-૫. તે કપ્પિયાકપ્પિયતન્તવાયા પરિચ્છેદં દસ્સેત્વા વારેનેવ અકપ્પિયસુત્તં સચે વિનન્તીતિ યોજના. અકપ્પિયેન તન્તવાયેન વીતે. છન્દાનુરક્ખનત્થં ‘‘વિતે’’તિ વુત્તં. પમાણસ્મિન્તિ વિકપ્પનુપગપચ્છિમપ્પમાણસ્મિં. તદૂનેતિ તતો વિકપ્પનુપગપચ્છિમપ્પમાણતો ઊને. ઇતરેનાતિ કપ્પિયતન્તવાયેન. ઉભયત્થાતિ પમાણસ્મિં, તદૂને ચ દુક્કટં એવાતિ યોજના.

૮૫૬. સચે કપ્પિયાકપ્પિયતન્તવાયા દ્વેપિ વેમં ઉભયકોટિયા ગહેત્વા એકતોવ વિનન્તિ વાતિ યોજના. તિરિયં સુત્તં પવેસેત્વા યેન આકોટેન્તો ઘનભાવં સમ્પાદેન્તિ, તં વેમં વુચ્ચતિ.

૮૫૭. સબ્બત્થ ભેદેતિ કપ્પિયાકપ્પિયસુત્તતન્તવાયેહિ કતે પમાણતદૂનએકન્તરિકદીઘતિરિયપ્પકારે સબ્બત્થ વારભેદે. આપત્તિભેદોતિ અકપ્પિયસુત્તેહિ આયામવિત્થારતો અકપ્પિયતન્તવાયેન વીતપ્પદેસે પમાણયુત્તે પાચિત્તિયં, ઇતરત્ર દુક્કટન્તિ ભેદો.

૮૫૮. કપ્પિયો તન્તવાયો નામ ઞાતકો વા પવારિતો વા કપ્પિયમૂલેન પયોજિતો વા.

૮૫૯. ‘‘અનાપત્તિ ચીવરં સિબ્બેતું, આયોગે, કાયબન્ધને, અંસબદ્ધકે, પત્તત્થવિકાય, પરિસ્સાવને, ઞાતકાનં, પવારિતાનં, અઞ્ઞસ્સત્થાય, અત્તનો ધનેના’’તિઆદિકં (પારા. ૬૪૦) અનાપત્તિવારં દસ્સેતુમાહ ‘‘અનાપત્તી’’તિઆદિ. ઇધ નિદ્દિટ્ઠોવ લક્ખણેન અનિદ્દિટ્ઠમ્પિ વેદિતબ્બં. એત્થ ચીવરં સિબ્બેતું સુત્તં વિઞ્ઞાપેન્તસ્સ અનાપત્તીતિ યોજના. ધનં નામ તણ્ડુલાદિ કપ્પિયવત્થુ. ‘‘પરિસ્સાવને’’તિઆદીસુ નિમિત્તત્થે ભુમ્મં, પરિસ્સાવનાદિનિમિત્તં સુત્તઞ્ચ તન્તવાયે ચ વિઞ્ઞાપેન્તસ્સ અનાપત્તીતિ વુત્તં હોતિ.

સુત્તવિઞ્ઞત્તિકથાવણ્ણના.

૮૬૦. અપ્પવારિતઞ્ઞાતીનન્તિ અપ્પવારિતાનં અઞ્ઞાતીનં, ‘‘કીદિસેન તે ભન્તે ચીવરેન અત્થો, કીદિસં તે ચીવરં વાયાપેમી’’તિ (પારા. ૬૪૩) પદભાજને વુત્તનયેન અપ્પવારિતાનં અઞ્ઞાતીનન્તિ અત્થો. સમેચ્ચાતિ ઉપગન્ત્વા. વિકપ્પન્તિ વિસિટ્ઠં કપ્પં અધિકવિધાનં. આપજ્જતીતિ કરોતિ, ‘‘ઇદં ખો આવુસો ચીવરં મં ઉદ્દિસ્સ વિય્યતિ, આયતઞ્ચ કરોથ, વિત્થતઞ્ચ અપ્પિતઞ્ચ સુવીતઞ્ચ સુપ્પવાયિતઞ્ચ સુવિલેખિતઞ્ચ સુવિતચ્છિતઞ્ચ કરોથા’’તિઆદિના (પારા. ૬૪૨) નયેન દાયકાનં અધિપ્પાયતો અધિકતરઆયતાદિકરણત્થં વિધાનં કરોતીતિ વુત્તં હોતિ.

તત્થ આયતન્તિ દીઘં. વિત્થતન્તિ પુથુલં. અપ્પિતન્તિ ઘનં. સુવીતન્તિ સુટ્ઠુ વીતં સબ્બટ્ઠાનેસુ સમં કત્વા વીતં. સુપ્પવાયિતન્તિ સુટ્ઠુ પવાયિતં સબ્બટ્ઠાને સમં કત્વા તન્તે પસારિતં. સુવિલેખિતન્તિ લેખનિયા સુટ્ઠુ વિલિખિતં. સુવિતચ્છિતન્તિ કોચ્છેન સુટ્ઠુ વિતચ્છિતં, સુવિનિદ્ધોતન્તિ અત્થો.

૮૬૧. સુત્તવડ્ઢનપ્પકારં દસ્સેતુમાહ ‘‘દીઘાયતપ્પિતત્થાયા’’તિ. તેન ચ પદભાજને ‘‘તસ્સ વચનેન આયતં વા વિત્થતં વા અપ્પિતં વા કરોતિ, પયોગે દુક્કટં, પટિલાભેન નિસ્સગ્ગિયં હોતી’’તિ (પારા. ૬૪૩) એતં આયતાદિત્તયમેવ વુત્તં. સુત્તવડ્ઢનકે કતેતિ એત્થ અનન્તરં વત્તબ્બેન ‘‘પયોગે દુક્કટં પટિલાભેના’’તિ પાઠસેસેન સહ યોજના કાતબ્બા, દાયકેહિ તુલયિત્વા દિન્નપ્પમાણતો સુત્તં વડ્ઢિતું તેન કતેન સબ્બેનાપિ પયોગેન ભિક્ખુનો દુક્કટઞ્ચ પટિલાભેન નિસ્સગ્ગિયપાચિત્તિયઞ્ચ હોતીતિ અત્થો.

૮૬૨. ઞાતકાદીનં તન્તવાયેસુ ચીવરે વિકપ્પં આપજ્જન્તસ્સ અનાપત્તિં વિનિદ્દિસેતિ યોજના. અત્તનો ધનેનાતિ એત્થ ‘‘પયોજિતેસૂ’’તિ સેસો, તન્તવાયેસૂતિ એતસ્સ વિસેસનં. અત્તનો ધનેન પયોજિતેસુ તન્તવાયેસુ ચીવરે વિકપ્પં આપજ્જન્તસ્સ અનાપત્તિં વિનિદ્દિસેતિ યોજના, અત્તનો સન્તકં કપ્પિયવત્થું ગહેત્વા વિનન્તેસુ વિકપ્પં આપજ્જન્તસ્સાતિ અત્થો. અઞ્ઞસ્સત્થાય વિનન્તેસુ વિકપ્પં આપજ્જન્તસ્સાતિ સહ પાઠસેસેન યોજના દટ્ઠબ્બા.

૮૬૩. મહગ્ઘં કત્તુકામિનો તન્તવાયેહિ અપ્પગ્ઘં વાયાપેન્તસ્સ અનાપત્તિં વિનિદ્દિસેતિ યોજના.

પેસકારકથાવણ્ણના.

૮૬૪. વસ્સંવુત્થે ભિક્ખૂ ઉદ્દિસ્સાતિ પુરિમિકાય વસ્સૂપગતે ભિક્ખૂ ઉદ્દિસિત્વા. પવારણાય પુબ્બેવ યં ચીવરં દીયતીતિ સમ્બન્ધો. ઇદં વુત્તં હોતિ – ‘‘દસાહાનાગતં કત્તિકતેમાસિકપુણ્ણમ’’ન્તિ (પારા. ૬૪૮) પાળિયં વુત્તં મહાપવારણાઉપોસથદિવસસ્સ પુરેતરમેવ પુબ્બકત્તિકમાસસ્સ જુણ્હપક્ખપઞ્ચમિયં યં ચીવરં ‘‘અચ્ચેકચીવરં નામ સેનાય વા ગન્તુકામો હોતી’’તિઆદિના (પારા. ૬૪૯) પદભાજનાગતેસુ ગમિકગિલાનગબ્ભિનિઅભિનવુપ્પન્નસદ્ધાદીસુ અઞ્ઞતરેન દૂતં પેસેત્વા વા અત્તના વા આગન્ત્વા ‘‘વસ્સાવાસિકં દમ્મી’’તિ વત્વા દિય્યતીતિ. તં હોતચ્ચેકચીવરન્તિ તં અચ્ચાયિકચીવરં નામ હોતિ.

૮૬૫. પુરે પવારણાયેવાતિ મહાપવારણાય પુરેતરમેવ પઞ્ચમિતો પટ્ઠાય યસ્મિં કિસ્મિઞ્ચિ દિવસે. ભાજેત્વા યદિ ગય્હતીતિ એત્થ ‘‘યેના’’તિ ચ ન કાતબ્બોતિ એત્થ ‘‘તેના’’તિ ચ કરોતિ ચેતિ એત્થ ‘‘સો વસ્સચ્છેદ’’ન્તિ ચ સામત્થિયા લબ્ભતિ. ભાજેત્વા યદિ યેન ગય્હતિ, તેન વસ્સચ્છેદો ન કાતબ્બો. સો વસ્સચ્છેદં કરોતિ ચે, તં ભાજેત્વા ગહિતચીવરં સઙ્ઘિકં હોતીતિ યોજના, છિન્નવસ્સેન તં ચીવરં સઙ્ઘસ્સેવ દાતબ્બન્તિ વુત્તં હોતિ.

૮૬૬. ‘‘અન્તોસમયમેવા’’તિ ઇદં ‘‘અધિટ્ઠેતી’’તિઆદીહિ પદેહિ પચ્ચેકં યોજેતબ્બં. પદભાજને ‘‘ચીવરકાલસમયો નામ અનત્થતે કથિને વસ્સાનસ્સ પચ્છિમો માસો, અત્થતે કથિને પઞ્ચમાસા’’તિ વુત્તસમયબ્ભન્તરેયેવ તં અચ્ચેકચીવરં.

૮૬૭. કથિને તુ અનત્થતેતિ યસ્મિં કથિનં અનત્થતં, તસ્મિં વિહારેતિ વુત્તં હોતિ. તુ-સદ્દો વિસેસત્થજોતકો. અનધિટ્ઠાય અવિકપ્પેત્વા પરિહરીયતિ એત્થ અચ્ચેકચીવરન્તિ પરિહારો, માસો, એકો ચ સો માસો ચાતિ એકમાસો, પુબ્બકત્તિકમાસસ્સ પાટિપદદિવસતો પટ્ઠાય યાવ અપરકત્તિકમાસસ્સ પુણ્ણમી, અયં ચીવરકાલસમયોતિ વુત્તો માસો. દસન્નં અહાનં સમાહારો દસાહં, તં પરમં અધિકં એતસ્સાતિ દસાહપરમો, માસો. ‘‘દસાહાનાગતં કત્તિકતેમાસિકપુણ્ણમ’’ન્તિ (પારા. ૬૪૮) પાળિયં વુત્તપુબ્બકત્તિકપુણ્ણમિપરિયન્તદસાહાધિકોતિ અત્થો. કથિને અનત્થતે તુ દસાહપરમો એકમાસોવ તસ્સ અચ્ચાયિકવત્થસ્સ પરિહારો મતોતિ યોજના.

૮૬૮. અત્થતે કથિનેતિ કથિનત્થતવિહારેતિ વુત્તં હોતિ. તસ્સ અચ્ચાયિકવત્થસ્સાતિ સમ્બન્ધો. દસાહપરમા પઞ્ચ માસાતિ સમ્બન્ધો. અનત્થતકથિને વિહારે યથાવુત્તચીવરકાલસમયસઙ્ખાતવસ્સાનાવસાનમાસો ચ કથિનુદ્ધારદિવસસઙ્ખાતપચ્છિમકત્તિકકાળપક્ખપાટિપદતો યાવ ફગ્ગુનમાસપુણ્ણમી, તાવ હેમન્તા ચત્તારો માસા ચાતિ પઞ્ચ માસા. પકાસિતાતિ ‘‘અનત્થતે કથિને વસ્સાનસ્સ પચ્છિમો માસો, અત્થતે કથિને પઞ્ચ માસા’’તિ (પારા. ૬૪૯) દીપિતા. દસાહપરમાતિ વુત્તત્થોયેવ. અત્થતે કથિને દસાહપરમા પઞ્ચ માસા તસ્સ અચ્ચાયિકવત્થસ્સ પરિહારો કાલોતિ મુનિન્દેન પકાસિતાતિ યોજના.

અયમુભયત્થ વુત્તા દસાહપરમતા અટ્ઠકથાયં ‘‘અનત્થતે કથિને એકાદસદિવસાધિકો માસો, અત્થતે કથિને એકાદસદિવસાધિકા પઞ્ચ માસા’’તિ (પારા. અટ્ઠ. ૨.૬૫૦) વુત્તપાઠેન યથા ન વિરુજ્ઝતિ, તથા વિચારેત્વા ગહેતબ્બા. એવઞ્હિ પાઠે સતિ ન વિરુજ્ઝતિ –

‘‘તસ્સચ્ચાયિકવત્થસ્સ, કથિને તુ અનત્થતે;

પરિહારેકમાસેકા-દસાહપરમો મતો.

અત્થતે કથિને તસ્સ, પઞ્ચ માસા પકાસિતા;

પરિહારો દિનેનેકા-દસાહપરમા પના’’તિ.

૮૬૯. પઠમેન કથિનેનાતિ યોજના. ‘‘અક્રિયં અચિત્ત’’ન્તિ પદચ્છેદો. અક્રિયન્તિ અન્તોસમયે અધિટ્ઠાનાદિઅકરણં.

અચ્ચેકચીવરકથાવણ્ણના.

૮૭૦-૧. ભિક્ખૂતિ સાસઙ્કસમ્મતે સપ્પટિભયે આરઞ્ઞકસેનાસને વસન્તં ભિક્ખુમાહ. યથાહ ‘‘યાનિ ખો પન તાનિ આરઞ્ઞકાનિ સેનાસનાનિ સાસઙ્કસમ્મતાનિ સપ્પટિભયાનિ, તથારૂપેસુ ભિક્ખુ સેનાસનેસુ વિહરન્તો’’તિ (પારા. ૬૫૩). પુબ્બકત્તિકપુણ્ણમં વસિત્વાતિ સમ્બન્ધો. પુબ્બકત્તિકપુણ્ણમા નામ અસ્સયુજમાસસ્સ જુણ્હપક્ખપન્નરસી, એત્થ પન સહચરિયનયેન તદુપલક્ખિતા પુરિમિકા તયો વસ્સાનમાસા વુચ્ચન્તિ. પુણ્ણમન્તિ એત્થ વાસકિરિયાય અચ્ચન્તસંયોગે ઉપયોગવચનં. પુરિમિકાય વસ્સં ઉપગન્ત્વા અચ્છિન્નવસ્સો હુત્વા તયો માસે વસિત્વાતિ અત્થો. યથાહ અટ્ઠકથાયં ‘‘યસ્મા પન યો વસ્સં ઉપગન્ત્વા યાવ પઠમકત્તિકપુણ્ણમં વસતી’’તિ (પારા. અટ્ઠ. ૨.૬૫૩-૬૫૪).

‘‘ચીવર’’ન્તિ તિણ્ણં ચીવરાનં અઞ્ઞતરં વુચ્ચતિ. ગામે ઠપેત્વાતિ સમ્બન્ધો, એત્થ ‘‘કત્તિકપુણ્ણમ’’ન્તિ ચ ‘‘આકઙ્ખમાનો’’તિ ચ સેસો, અપરકત્તિકમાસે કત્તિકચોરભયેન ચીવરં પટિસામેતુકામો ભિક્ખુ આરઞ્ઞકસેનાસનસ્સ સામન્તા ગોચરગામે નિક્ખિપિત્વાતિ અત્થો. યથાહ ‘‘ઉપવસ્સં ખો પન કત્તિકપુણ્ણમં…પે… આકઙ્ખમાનો તિણ્ણં ચીવરાનં અઞ્ઞતરં ચીવરં અન્તરઘરે નિક્ખિપેય્યા’’તિ (પારા. ૬૫૩).

‘‘સમન્તા ગોચરગામે’’તિ ઇદં ‘‘અન્તરઘરે નિક્ખિપેય્યાતિ સમન્તા ગોચરગામે નિક્ખિપેય્યા’’તિ (પારા. ૬૫૪) પદભાજને વુત્તત્તા વુત્તં. ‘‘અપરકત્તિકમાસે’’તિ ચ ‘‘કત્તિકપુણ્ણમન્તિ કત્તિકચાતુમાસિની વુચ્ચતી’’તિ (પારા. ૬૫૪) પદભાજનિયવસેન વુત્તં. ઇધાપિ હિ ‘‘કત્તિકપુણ્ણમ’’ન્તિ અપરકત્તિકજુણ્હપક્ખપન્નરસિયા વુચ્ચમાનાયાપિ સહચરિયનયેન તંસહચરિતો ચતુત્થો માસો વુત્તો.

એત્તાવતા પુરિમિકાય વસ્સં ઉપગન્ત્વા મહાપવારણાય પવારેત્વા વુત્તલક્ખણે આરઞ્ઞકસેનાસને વસન્તસ્સ આરઞ્ઞકસ્સ ભિક્ખુનો પચ્છિમકત્તિકમાસે કત્તિકચોરભયે સતિ તિણ્ણં ચીવરાનં અઞ્ઞતરં ગોચરગામે ઠપેત્વા આરઞ્ઞકઙ્ગં પૂરયતો ચીવરેન વિપ્પવાસો તસ્મિં માસે ન હોતીતિ અનુઞ્ઞાતભાવો દીપિતો. તદેવ પકાસેતું નિક્ખેપોપાયસન્દસ્સનમુખેન વક્ખતિ ‘‘કત્તિકેયેવ માસસ્મિં…પે… વટ્ટતી’’તિ.

ઇદાનિ અસ્મિંયેવ માસે તતો અઞ્ઞત્થ તસ્સ ભિક્ખુનો કેનચિ કરણીયેન ગચ્છતો ગામે ઠપિતેન તેન ચીવરેન વિપ્પવસતો નિદ્દોસભાવં અનુજાનન્તેન ભગવતા ‘‘સિયા ચ તસ્સ ભિક્ખુનો…પે… તેન ચીવરેન વિપ્પવસિતબ્બ’’ન્તિ (પારા. ૬૫૩) વુત્તમત્થં દસ્સેતુમાહ ‘‘પચ્ચયે…પે… સમ્મુતિ’’ન્તિ. પચ્ચયે સતિ તાદિસેતિ ‘‘સિયા પચ્ચયો, સિયા કરણીય’’ન્તિ (પારા. ૬૫૪) વચનતો તાદિસે કિચ્ચે સતીતિ અત્થો. છારત્તપરમન્તિ છ રત્તિયો પરમા યસ્સ વાસકમ્મસ્સ તં છારત્તપરમં, કિરિયાવિસેસનં, છારત્તપરમં વાસકમ્મં કાતબ્બન્તિ અત્થો. તેન વિના વસિતબ્બન્તિ ગામે નિક્ખિત્તેન તેન ચીવરેન વિના તમ્હા આવાસા અઞ્ઞત્થ વસિતબ્બં. તદેવ પાકટં કાતું વક્ખતિ ‘‘અઞ્ઞત્થેવ વસન્તસ્સ, છારત્તપરમં મત’’ન્તિ.

તતોતિ છારત્તતો. ઉત્તરિ વસતોતિ સત્તમં અરુણં ઉટ્ઠાપેત્વા વસન્તસ્સાતિ અત્થો. યથાહ ‘‘તતો ચે ઉત્તરિ વિપ્પવસેય્યાતિ સત્તમે અરુણુગ્ગમને નિસ્સગ્ગિય’’ન્તિ (પારા. ૬૫૪). દોસોતિ નિસ્સગ્ગિયપાચિત્તિયં. ‘‘વિના સઙ્ઘસ્સ સમ્મુતિ’’ન્તિ ઇમિના કિં વુત્તં હોતિ? ઉદોસિતસિક્ખાપદે અનુપઞ્ઞત્તિં કત્વા કોસમ્બિયં ગિલાનભિક્ખુનો ‘‘અનુજાનામિ ભિક્ખવે ગિલાનસ્સ ભિક્ખુનો તિચીવરેન અવિપ્પવાસસમ્મુતિં દાતુ’’ન્તિ (પારા. ૪૭૩) અનુઞ્ઞાતત્તા ગિલાનસ્સ ભિક્ખુનો સઙ્ઘેન ઞત્તિદુતિયાય કમ્મવાચાય પુરિમમેવ યા અવિપ્પવાસસમ્મુતિ દિન્ના, તં વિનાતિ વુત્તં હોતિ. તેન લદ્ધસમ્મુતિકેન યાવ રોગો વૂપસમ્મતિ, તાવ ચિરમ્પિ તેન ચીવરેન વિના વસિતું વટ્ટતીતિ અધિપ્પાયો. યથાહ અટ્ઠકથાયં ‘‘અઞ્ઞત્ર ભિક્ખુસમ્મુતિયાતિ યા ઉદોસિતસિક્ખાપદે કોસમ્બકસમ્મુતિ અનુઞ્ઞાતા, તસ્સા સમ્મુતિયા અઞ્ઞત્ર. સચે સા લદ્ધા હોતિ, છારત્તાતિરેકમ્પિ વિપ્પવસિતું વટ્ટતી’’તિ (પારા. અટ્ઠ. ૨.૬૫૩-૬૫૪).

૮૭૨-૩. ચીવરનિક્ખેપં દસ્સેતુમાહ ‘‘કત્તિકેયેવ…પે… પકાસિતો’’તિ. કત્તિકેયેવ માસસ્મિન્તિ ચતુન્નં વસ્સાનાનં માસાનં પચ્છિમે કત્તિકમાસેયેવ ઇદમેકઙ્ગં. પઠમાય પવારિતોતિ દુતિયમઙ્ગં, ઇધ પઠમાય વસ્સૂપનાયિકાય વસ્સં ઉપગન્ત્વા પવારિતોતિ યોજના, મહાપવારણાય પવારિતોતિ વુત્તં હોતિ. યથાહ અટ્ઠકથાયં ‘‘પુરિમિકાય ઉપગન્ત્વા મહાપવારણાય પવારિતો હોતી’’તિ (પારા. અટ્ઠ. ૨.૬૫૩-૬૫૪). પચ્છિમેન પમાણેન યુત્તેતિ તતિયમઙ્ગં. સેનાસનેતિ એતસ્સ વિસેસનં. ઇહ આરઞ્ઞકસેનાસનસ્સ પચ્છિમપ્પમાણં નામ પાકારેન વા વતિયા વા પરિખાય વા પરિક્ખિત્તસ્સ ગામસ્સ ઇન્દખીલસઙ્ખાતગામદ્વારકોટ્ઠકુમ્મારતો વા અપરિક્ખિત્તસ્સ ગામસ્સ પરિક્ખેપારહટ્ઠાનસઙ્ખાતે પરિયન્તગેહસ્સ ઉપચારે ઠિતસ્સ થામમજ્ઝિમસ્સ પુરિસસ્સ બલપ્પમાણેન વિસ્સટ્ઠલેડ્ડુપાતદ્વયતો વા પટ્ઠાય પરિક્ખિત્તસ્સ વિહારસ્સ સપરિક્ખેપં વા અપરિક્ખિત્તસ્સ વિહારસ્સ યસ્સં દિસાયં ગામો હોતિ, તત્થ ગામપરિયન્તસેનાસનં વા ચેતિયં વા બોધિં વા અવધિં કત્વા વિહારગમનીયેન પકતિમગ્ગેન વિદત્થિગમ્ભીરં આરોપિતેન આચરિયધનુના પમિતપઞ્ચધનુસતપમાણદૂરન્તિ સઙ્ખેપતો ગહેતબ્બં.

સાસઙ્કસમ્મતેતિ ચતુત્થમઙ્ગં, ‘‘ઇહ સપ્પટિભયે’’તિ સેસો. ‘‘સાસઙ્કસમ્મતાનિ સપ્પટિભયાની’’તિ (પારા. ૬૫૩) હિ પાળિ. ઇદં દ્વયમ્પિ ‘‘સેનાસને’’તિ એતસ્સ વિસેસનં. આરામઆરામૂપચારેસુ ચોરાનં નિસિન્નસયિતટ્ઠિતભુત્તપીતટ્ઠાનાદીનં દિસ્સમાનતાય આસઙ્કાસહિતે તત્થેવ આરામાદીસુ પહટમારિતવિલુત્તમનુસ્સાનં દિસ્સમાનતાય વિસેસેન સહભયતાય સપ્પટિભયે આરઞ્ઞકે સેનાસનેતિ અત્થો. વસન્તો ભિક્ખુ. વસન્તોવાતિ એત્થ એવકારો અટ્ઠાનપ્પયુત્તો. તસ્મા તતો આનેત્વા ચતુરઙ્ગસમાયોગે એવાતિ યોજેતબ્બો. ચતુરઙ્ગસમાયોગે એવાતિ યથાવુત્તાનં ચતુન્નં અઙ્ગાનં સમાયોગે સન્નિપાતે સતિ એવ. એત્થ એવકારેન તસ્સ અઙ્ગસ્સ અભાવે અલબ્ભમાનતં દીપેતિ. પકાસિતોતિ ‘‘તત્રાયં અઙ્ગસમ્પત્તી’’તિઆદિકાય (પારા. અટ્ઠ. ૨.૬૫૩-૬૫૪) અટ્ઠકથાય વુત્તો.

૮૭૪. તં ચીવરં. માસમેકન્તિ વસ્સાનસ્સ પચ્છિમમાસસઙ્ખાતં એકં માસં. યો ગામો સચે પુરિમબદ્ધાય અવિપ્પવાસસીમાય અન્તો હોતિ, તત્થ માસતો અતિરેકમ્પિ ઠપેતું વટ્ટતીતિ (વજિર. ટી. પારાજિક ૬૫૩ અત્થતો સમાનં) વજિરબુદ્ધિત્થેરેન વુત્તં.

૮૭૫. અઞ્ઞત્થેવાતિ યસ્સ આરઞ્ઞકસેનાસનસ્સ ગોચરગામે ચીવરં નિક્ખિત્તં, તતો આરઞ્ઞકસેનાસનતો બહિ એવ. અયં અધિપ્પાયોતિ ‘‘યં ગામ’’ન્તિઆદિકાય દિયડ્ઢગાથાય પટિપાદિતત્થદ્વયસઙ્ખાતો અધિપ્પાયો. અસ્સાતિ સાસઙ્કસિક્ખાપદસ્સ. એવં ઇમિના સિક્ખાપદેન ‘‘ચીવરેન વિના કત્તિકમાસે અરઞ્ઞે વસેય્યા’’તિ અનુઞ્ઞાતત્તા ‘‘છારત્તપરમં તેન ભિક્ખુના તેન ચીવરેન વિપ્પવસિતબ્બ’’ન્તિ (પારા. ૬૫૩) ઇમિના ગોચરગામે તં ઠપેત્વા તસ્મિં આરઞ્ઞકાવાસે વસિત્વા કેનચિ કરણીયેન તતો આવાસતો ગન્ત્વા બહિ વસતો દિવસપરિચ્છેદસ્સ વિઞ્ઞાયમાનત્તાયેવાહ ‘‘પટિચ્છન્નો પકાસિતો’’તિ.

૮૭૬. ‘‘સચે ગોચરગામતો પુરત્થિમાય દિસાય સેનાસનં, અયઞ્ચ પચ્છિમં દિસં ગતો હોતી’’તિઆદિના (પારા. અટ્ઠ. ૨.૬૫૬) અટ્ઠકથાયં કથિતનિયામેન વિનિચ્છયં દસ્સેતુમાહ ‘‘સેનાસનમથાગન્ત્વા’’તિઆદિ. સેનાસનન્તિ અત્તના નિવુત્થં આરઞ્ઞકસેનાસનં. આગન્ત્વાતિ બહિ ગતટ્ઠાનતો આગન્ત્વા. ગોચરગામે ચીવરં નિક્ખિપિત્વા તતો પુરત્થિમાય દિસાય આરઞ્ઞકસેનાસને વિહરતો વિહારા નિક્ખમ્મ તતો ગોચરગામતો પચ્છિમદિસાય દૂરટ્ઠાનં ગતસ્સ આગતટ્ઠાનતો તં સેનાસનં આગન્ત્વા વિદૂરત્તા સત્તમં અરુણં ઉટ્ઠાપેતું અસક્કોન્તસ્સ ભિક્ખુનો કિં વિહિતન્તિ અયમેત્થ યોજના.

૮૭૭. ગામસીમમ્પિ વાગન્ત્વાતિ યત્થ ચીવરં નિક્ખિત્તં, તં ગામસીમમ્પિ પુરારુણાયેવ આગન્ત્વા. યત્થ કત્થચીતિ (પારા. અટ્ઠ. ૨.૬૫૬) સભાદેવાલયદ્વારકોટ્ઠકાદીસુ યત્થ કત્થચિ કપ્પિયટ્ઠાને. ‘‘યત્થ કત્થચી’’તિ સામઞ્ઞેન વુત્તત્તા તસ્સા ગામસીમાય અન્તો આરઞ્ઞકઙ્ગારક્ખનારહં દૂરટ્ઠાનં લદ્ધં ચે, અઙ્ગભેદં અકત્વા તત્થ અરુણં ઉટ્ઠાપેતબ્બં. ધુતઙ્ગે વિજ્જમાનેપિ આપત્તિં અનાપજ્જિતું અન્તોગામેપિ અરુણં ઉટ્ઠાપેત્વા ચીવરપવત્તિયેવ ઞાતબ્બા. યથાહ અટ્ઠકથાયં ‘‘ગામસીમમ્પિ ઓક્કમિત્વા સભાયં વા યત્થ કત્થચિ વા વસિત્વા ચીવરપ્પવત્તિં ઞત્વા પક્કમિતું વટ્ટતી’’તિ (પારા. અટ્ઠ. ૨.૬૫૬).

૮૭૮. એવઞ્ચાપિ અસક્કોન્તોતિ અઙ્ગભેદં અકત્વા, કત્વા વા અન્તોગામસીમાય અરુણં ઉટ્ઠાપેતુમ્પિ ગન્તું અસક્કોન્તો. ઞત્વાતિ અત્તનો ચીવરસ્સ ઠપિતટ્ઠાનં સલ્લક્ખેત્વા. તત્થેવાતિ એત્થ ‘‘ઠિતો’’તિ લબ્ભતિ. ખિપ્પન્તિ સીઘં, પુરારુણાતિ વુત્તં હોતિ. અતિરેકે ઠાનેતિ યોજના, યથાહ અટ્ઠકથાયં ‘‘અતિરેકચીવરટ્ઠાને ઠસ્સતી’’તિ (પારા. અટ્ઠ. ૨.૬૫૬), ‘‘અતિરેકચીવરટ્ઠાને તિટ્ઠતી’’તિ ચિન્તેત્વાતિ અત્થો.

૮૭૯. વિસ્સજ્જેતીતિ સત્તમઅરુણુટ્ઠાનતો પુરેતરમેવ અઞ્ઞસ્સ દેતિ. ઉપરિપિ એવમેવ વત્તબ્બં.

૮૮૦. સાસઙ્કસમ્મતે એવંનામકે સિક્ખાપદે સમુટ્ઠાનાદયો સબ્બે તેન દુતિયેન કથિનેન સમા ઇતિ મુનિન્દેન મતા અનુમતા અનુઞ્ઞાતાતિ યોજના.

સાસઙ્કકથાવણ્ણના.

૮૮૧. જાનન્તિ ‘‘સઙ્ઘસ્સ દેમા’’તિ વચનેન પરિણામિતભાવં યેન કેનચિ આકારેન જાનન્તો. યથાહ પદભાજને ‘‘સામં વા જાનાતી’’તિઆદિ (પારા. ૬૫૯). પરિણતન્તિ એત્થ પદભાજને ‘‘પરિણતં નામ ‘દસ્સામ કરિસ્સામા’તિ વાચા ભિન્ના હોતી’’તિ વુત્તનિયામેન સઙ્ઘસ્સ પરિણતન્તિ અત્થો. લાભન્તિ લભિતબ્બં ચીવરાદિ યં કિઞ્ચિ. યથાહ ‘‘લાભો નામ ચીવરપિણ્ડપાતસેનાસનગિલાનપચ્ચયભેસજ્જપરિક્ખારા, અન્તમસો ચુણ્ણપિણ્ડોપિ દન્તકટ્ઠમ્પિ દસિકસુત્તમ્પી’’તિ. અત્તનો પરિણામેય્યાતિ ‘‘બહૂ આવુસો સઙ્ઘસ્સ દાયકા, બહૂ સઙ્ઘસ્સ ભત્તા, મયં તુમ્હે નિસ્સાય તુમ્હે સમ્પસ્સન્તા ઇધ વિહરામ. તુમ્હે ચે અમ્હાકં ન દસ્સથ, અથ કો ચરહિ અમ્હાકં દસ્સતિ. દેથાવુસો અમ્હાકં ઇમાનિ ચીવરાની’’તિ (પારા. ૬૫૭) પાળિયા આગતનયેન અત્તનો પરિણામેય્યાતિ વુત્તં હોતિ. તસ્સ નિસ્સગ્ગિયન્તિ એત્થ ‘‘પયોગે દુક્કટં, પટિલાભેના’’તિ સેસો. નિસ્સગ્ગિયન્તિ ઇદં પરિણતે પરિણતસઞ્ઞિં સન્ધાય વુત્તં. વેમતિકસ્સ પન દુક્કટં હોતિ. યથાહ ‘‘પરિણતે વેમતિકો અત્તનો પરિણામેતિ, આપત્તિ દુક્કટસ્સા’’તિ. અપરિણતસઞ્ઞિનો અનાપત્તિ. યથાહ ‘‘પરિણતે અપરિણતસઞ્ઞી અત્તનો પરિણામેતિ, અનાપત્તી’’તિ.

૮૮૨. ‘‘અઞ્ઞસ્સ દેહી’’તિ સચે પરિણામેતીતિ તથા સઙ્ઘસ્સ પરિણતભાવં જાનન્તો ‘‘અઞ્ઞસ્સ દેહી’’તિ યદિ પરિણામેતિ. સુદ્ધિકં પાચિત્તિયન્તિ નિસ્સજ્જિતબ્બવત્થુરહિતં કેવલં પાચિત્તિયમત્તન્તિ અત્થો. સુદ્ધચિત્તેનાતિ સવાસનાનવસેસકિલેસપ્પહાનેન પરિસુદ્ધચિત્તેન ભગવતા. પાચિત્તિયમુદીરિતન્તિ પાચિત્તિયેસુ અટ્ઠમસ્સ સહધમ્મિકવગ્ગસ્સ અવસાને ‘‘યો પન ભિક્ખુ જાનં સઙ્ઘિકં લાભં પરિણતં પુગ્ગલસ્સ પરિણામેય્ય, પાચિત્તિય’’ન્તિ (પાચિ. ૪૯૦) દેસિતં.

૮૮૩. એકં ચીવરન્તિ સઙ્ઘસ્સ પરિણતચીવરતો એકં ચીવરં. ચીવરં વાતિ એત્થ વા-સદ્દો પચ્ચયન્તરવિકપ્પત્થો. વા પનાતિ એત્થ વા-સદ્દો અત્થવિકપ્પત્થો. એકં ચીવરં વા અઞ્ઞં વા પચ્ચયં પરસ્સ, એકં પન અત્તનો વા પરિણામેય્ય ચેતિ યોજના. સદ્ધિન્તિ એકતો, એકક્ખણેતિ વુત્તં હોતિ. દ્વે પાચિત્તિયો સદ્ધિં સિયુન્તિ યોજના, અઞ્ઞસ્સ પરિણામનેન સુદ્ધપાચિત્તિયઞ્ચ અત્તનો પરિણામનેન નિસ્સગ્ગિયપાચિત્તિયઞ્ચાતિ દ્વે પાચિત્તિયો એકક્ખણે હોન્તીતિ અત્થો.

૮૮૪. પરિણામેત્વા ઠપિતે વિનિચ્છયં દસ્સેત્વા પરિચ્ચજિત્વા દિન્ને વિનિચ્છયં દસ્સેતુમાહ ‘‘સઙ્ઘસ્સા’’તિઆદિ. ‘‘પરાજયો’’તિ ઇદં પાદપ્પહોનકં વત્થું સન્ધાય વુત્તં. યથાવત્થુવસેન પન દુક્કટથુલ્લચ્ચયાપિ વત્તબ્બા.

૮૮૫. અઞ્ઞસ્સ ચેતિયસ્સ પોણં પરિણતં અઞ્ઞસ્સ ચેતિયસ્સ વા સઙ્ઘસ્સ વા પુગ્ગલસ્સ વાપિ પન પરિણામેય્યાતિ યોજના. સઙ્ઘસ્સ પુગ્ગલસ્સાતિ પદદ્વયેપિ એવમેવ યોજેતબ્બં. યથાહ ‘‘સઙ્ઘસ્સ પરિણતં અઞ્ઞસઙ્ઘસ્સ વા ચેતિયસ્સ વા પુગ્ગલસ્સ વા પરિણામેતિ, આપત્તિ દુક્કટસ્સા’’તિઆદિ (પાચિ. ૪૯૨). અઞ્ઞસ્સ પુગ્ગલસ્સ પોણં અઞ્ઞસ્સ પુગ્ગલસ્સ પરિણામેય્યાતિ.

૮૮૬. ઇમસ્સ સબ્બસત્તવિસયતં દસ્સેતુમાહ ‘‘યો પના’’તિઆદિ.

૮૮૭. ઇદં પરિણતસિક્ખાપદં. તિસમુટ્ઠાનન્તિ કાયચિત્તવાચાચિત્તકાયવાચાચિત્તસઙ્ખાતેહિ તીહિ સચિત્તકસમુટ્ઠાનેહિ સમુટ્ઠાનતો તિસમુટ્ઠાનં. પરિણામનપચ્ચયા આપજ્જિતબ્બતો ક્રિયં. સઙ્ઘાદીનં પરિણતન્તિસઞ્ઞાય અભાવેન વિમુચ્ચનતો સઞ્ઞાવિમોક્ખં. કાયવિઞ્ઞત્તિવચીવિઞ્ઞત્તીહિ પરિણામેતબ્બતો કાયકમ્મં વચીકમ્મં.

પરિણતકથાવણ્ણના.

પત્તવગ્ગો તતિયો.

૮૮૮. યે ઇમં વિનિચ્છયં તરન્તિ, તે પઞ્ઞત્તિમહાસમુદ્દં તરન્તીતિ યોજના. પઞ્ઞત્તિસઙ્ખાતં વિનયપિટકમેવ મહાસમુદ્દો વિયાતિ પઞ્ઞત્તિમહાસમુદ્દો, તં. એવં સમુદાયં દસ્સેત્વા તદવયવે દસ્સેતુમાહ ‘‘નેકા’’તિઆદિ. નેકાનિ નાનપ્પકારાનિ વત્તાનિ સેનાસનવત્તાદીનિ ખન્ધકાગતાનિ ઉગ્ગા ઉત્તુઙ્ગા તરઙ્ગમાલા મહાવીચિપરમ્પરા યસ્સાતિ વિગ્ગહો, નાનપ્પકારખન્ધકવત્તસઙ્ખાતમહાતરઙ્ગપરમ્પરાય સજ્જિતન્તિ અત્થો. સીલં પાતિમોક્ખસંવરાદિકમેવ અન્તો વેલાવલયો યસ્સ સો સીલન્તો, તં, પાતિમોક્ખસંવરસીલાદિચતુપારિસુદ્ધિસીલમેવ પટિપાદેતબ્બતાય અન્તં વેલાવલયભૂતન્તિ અત્થો. આપત્તિયો સત્તાપત્તિક્ખન્ધા, સીલાચારદિટ્ઠિઆજીવવિપત્તિયો ચ ગાહકા મકરાદયો યસ્સાતિ વિગ્ગહો, સીલાચારાજીવદિટ્ઠિસમ્પત્તિસઙ્ખાતમુદુસત્તનાસકઆપત્તિવિપત્તિસઙ્ખા- તમાતઙ્ગમકરાદિચણ્ડસત્તવન્તન્તિ અત્થો. એવં અયં ગાથા સમુદાયાવયવાનં સબ્બેસમેવ રૂપકાલઙ્કારેન વિરચિતાતિ દટ્ઠબ્બા.

ઇતિ વિનયત્થસારસન્દીપનિયા

વિનયવિનિચ્છયવણ્ણનાય

નિસ્સગ્ગિયકથાવણ્ણના નિટ્ઠિતા.

પાચિત્તિયકથાવણ્ણના

૮૮૯. એવં નાતિવિત્થારસઙ્ખેપતો નિસ્સગ્ગિયવિનિચ્છયં દસ્સેત્વા ઇદાનિ તદનન્તરં નિદ્દિટ્ઠસ્સ પાચિત્તિયકણ્ડસ્સ વિનિચ્છયં દસ્સેતું ‘‘સમ્પજાનમુસાવાદે’’તિઆદિ આરદ્ધં. સમ્પજાનમુસાવાદેતિ અત્તનો વચનસ્સ મુસાભાવં ઞત્વા, અદિટ્ઠં ‘‘દિટ્ઠ’’ન્તિઆદિના નયેન મુસાવાદે સમ્પજાનન્તસ્સ મુસાભણનેતિપિ અત્થો ગહેતબ્બો. યથાહ અટ્ઠકથાયં ‘‘જાનિત્વા જાનન્તસ્સ ચ મુસાભણને’’તિ (પાચિ. અટ્ઠ. ૨). ‘‘મુસાવાદે’’તિ હિ નિમિત્તત્થે ભુમ્મં, મુસાવાદનિમિત્તન્તિ અત્થો.

દવા ભણન્તસ્સાતિ યોજના. અનુપપરિક્ખિત્વા વેગેન દિટ્ઠમ્પિ ‘‘અદિટ્ઠં મે’’તિ વદન્તસ્સાતિ અત્થો. યથાહ ‘‘દવા ભણતિ નામ સહસા ભણતી’’તિ પદભાજનીઅટ્ઠકથાયં ‘‘સહસા ભણતીતિ અવીમંસિત્વા અનુપધારેત્વા વેગેન દિટ્ઠમ્પિ ‘અદિટ્ઠં મે’તિ ભણતી’’તિ (પાચિ. અટ્ઠ. ૧૧). રવા ભણન્તસ્સાતિ ‘‘ચીવર’’ન્તિ વત્તુકામસ્સ ‘‘ચીર’’ન્તિ વચનં વિય મન્દત્તા મોમૂહત્તા ‘‘અઞ્ઞં ભણિસ્સામી’’તિ અઞ્ઞં ભણન્તસ્સ. યથાહ ‘‘રવા ભણતિ નામ ‘અઞ્ઞં ભણિસ્સામી’તિ અઞ્ઞં ભણતી’’તિ.

૮૯૦. અઞ્ઞત્થાતિ ચતુત્થપારાજિકાદીસુ. અત્તના અલદ્ધં ઉત્તરિમનુસ્સધમ્મં ‘‘લદ્ધં મયા’’તિ મુસા યસ્સ ભણતિ, તેન તઙ્ખણમેવ સુત્વા તદત્થે ઞાતે પારાજિકસ્સ, અઞ્ઞાતે કાલન્તરેન ઞાતે ચ પરિયાયવચને ચ ઞાતે થુલ્લચ્ચયસ્સ, પરિયાયવચને અવિઞ્ઞાતે દુક્કટસ્સ, દુટ્ઠદોસસિક્ખાપદે પારાજિકં અનાપન્નસ્સ ‘‘આપન્નો’’તિ મુસાભણને સઙ્ઘાદિસેસસ્સ, ઓમસવાદસિક્ખાપદે દુબ્ભાસિતસ્સ ચ વુત્તત્તા આહ ‘‘મુસાવાદસ્સ કારણા પઞ્ચ આપત્તિયો’’તિ. ઇમાય પાચિત્તિયા સદ્ધિં છ આપત્તિક્ખન્ધા હોન્તિ.

સમ્પજાનમુસાવાદકથાવણ્ણના.

૮૯૧-૩. વુત્તેસુ જાતિઆદીસુ દસસુ અક્કોસવત્થૂસૂતિ યોજના, પદભાજને વુત્તેસુ જાતિનામગોત્તકમ્મસિપ્પઆબાધલિઙ્ગકિલેસઆપત્તિઅક્કોસાનં વસેન દસસુ અક્કોસવત્થૂસૂતિ અત્થો. તેસુ કિલેસં વિના સબ્બેતે હીનુક્કટ્ઠવસેન દ્વિપ્પકારા હોન્તિ. યથાહ પદભાજને ‘‘જાતિ નામ દ્વે જાતિયો હીના ચ જાતિ ઉક્કટ્ઠા ચ જાતી’’તિઆદિ.

તત્થ ચણ્ડાલાદિજાતિ હીના, ખત્તિયબ્રાહ્મણજાતિયો ઉક્કટ્ઠા. નામેસુ અવકણ્ણકજવકણ્ણકાદિનામાનિ દાસનામત્તા હીનાનિ, બુદ્ધરક્ખિતાદિનામાનિ ઉક્કટ્ઠાનિ. કોસિયાદિગોત્તં હીનં, ગોતમાદિગોત્તં ઉક્કટ્ઠં. કમ્મેસુ વડ્ઢકિમણિકારાદિકમ્માનિ હીનાનિ, કસિવાણિજ્જાગોરક્ખકમ્માનિ ઉક્કટ્ઠાનિ. સિપ્પેસુ નળકારકુમ્ભકારાદિસિપ્પં હીનં, મુદ્દાગણનાદિસિપ્પં ઉક્કટ્ઠં. આબાધેસુ સબ્બેપિ આબાધા હીના, અપિચ મધુમેહો પીળાજનકત્તાભાવા ઉક્કટ્ઠો. લિઙ્ગેસુ અતિદીઘતાદયો હીના, નાતિદીઘતાદયો ઉક્કટ્ઠા. સબ્બેપિ કિલેસા હીના. સબ્બાપત્તિયોપિ હીના, અપિચ સોતાપત્તિસમાપત્તિ ઉક્કટ્ઠા. અક્કોસેસુ ‘‘ઓટ્ઠોસિ મેણ્ડોસિ ગોણોસી’’તિઆદિકો હીનો, ‘‘પણ્ડિતોસિ બ્યત્તોસી’’તિઆદિકો ઉક્કટ્ઠો.

અઞ્ઞત્રઞ્ઞાપદેસેનાતિ પરિયાયકથનેન વિના. ઓમસન્તસ્સાતિ વચનપતોદેન ઓવિજ્ઝન્તસ્સ. સમ્બુદ્ધેન પકાસિતાતિ ‘‘ચણ્ડાલોસિ વેનોસિ નેસાદોસિ રથકારોસિ પુક્કુસોસી’તિ ભણતિ, આપત્તિ વાચાય વાચાય પાચિત્તિયસ્સા’’તિ સામં સબ્બધમ્માવબોધતો ‘‘સમ્બુદ્ધો’’તિ પઞ્ઞાતેન ભગવતા દેસિતા.

૮૯૪. તેહેવાતિ જાતિઆદીહિ અક્કોસવત્થૂહેવ. અઞ્ઞાપદેસેન ભૂતેન વા…પે… આપન્નમેવ વા અનુપસમ્પન્નં અક્કોસન્તસ્સ દુક્કટં સમ્બુદ્ધેન પકાસિતન્તિ સમ્બન્ધો. ઇધ ભૂતાભૂતપદાનિ તેહીતિ અપેક્ખિત્વા બહુવચનન્તાનિ યોજેતબ્બાનિ. એતેન ‘‘સન્તિ ઇધેકચ્ચે’’તિઆદિદુતિયવારત્થં (પાચિ. ૨૬) દસ્સેન્તેન દુક્કટસાધનત્થેન તદેકકારિયં તતિયં યેનૂનવારઞ્ચ ચતુત્થં ન મયન્તિઆદિવારઞ્ચ સઙ્ગહિતન્તિ દટ્ઠબ્બં. યથાહ અટ્ઠકથાયં ‘‘સન્તિ ઇધેકચ્ચે’તિ વારે પન પરિહરિત્વા વુત્તભાવેન દુક્કટં. એસેવ નયો ‘યેનૂન…પે… ન મય’ન્તિ વારેસુપી’’તિ (પાચિ. અટ્ઠ. ૨૬).

પાળિમુત્તપદેહિપીતિ એત્થાપિ તથેવ ‘‘ભૂતેન વા’’તિઆદીનિ પદાનિ સમ્બન્ધિતબ્બાનિ. ‘‘ચોરોસિ, ગણ્ઠિભેદકોસી’’તિઆદિ પાળિમુત્તપદં નામ. સબ્બત્થાતિ સબ્બેસુ ચતૂસુ વારેસુ, પાળિમુત્તપદેસુ ચ. વુત્તઞ્હિ ‘‘અનુપસમ્પન્ને પન ચતૂસુપિ વારેસુ દુક્કટમેવ. ‘ચોરોસિ, ગણ્ઠિભેદકોસી’તિઆદિવચનેહિ પન ઉપસમ્પન્નેપિ અનુપસમ્પન્નેપિ સબ્બવારેસુ દુક્કટમેવા’’તિ (પાચિ. અટ્ઠ. ૨૬). ‘‘અનુપસમ્પન્ન’’ન્તિ ઇમિના ‘‘ઇમસ્મિઞ્ચ સિક્ખાપદે ઠપેત્વા ભિક્ખું ભિક્ખુનિઆદયો સબ્બે સત્તા અનુપસમ્પન્નટ્ઠાને ઠિતા’’તિ (પાચિ. અટ્ઠ. ૨૬) અટ્ઠકથાયં વુત્તા અનુપસમ્પન્ના સઙ્ગહિતા. તેનેવેત્થાપિ વક્ખતિ ‘‘પવિટ્ઠાનુપસમ્પન્નટ્ઠાને ઇધ ચ ભિક્ખુની’’તિ.

૮૯૫. દવકમ્યતાતિ એત્થ ‘‘પટિસઙ્ખા યોનિસો’’તિઆદીસુ (મ. નિ. ૧.૨૨, ૨૩, ૪૨૨; અ. નિ. ૬.૫૮; ૯.૯; મહાનિ. ૨૦૬; વિભ. ૫૧૮) વિય ય-કારલોપો. સબ્બત્થાતિ સબ્બેસુ વુત્તપાચિત્તિયવત્થૂસુ ચ દુક્કટવત્થૂસુ ચાતિ સબ્બત્થેવ. દુબ્ભાસિતમુદીરિતન્તિ ‘‘ચણ્ડાલોસિ…પે… પુક્કુસોસી’તિ ભણતિ, આપત્તિ વાચાય વાચાય દુબ્ભાસિતસ્સા’’તિ (પાચિ. ૩૨) વુત્તન્તિ અત્થો. પરમ્મુખા પન પાચિત્તિયવત્થૂહિ ચ દુક્કટવત્થૂહિ ચ અક્કોસને દુક્કટમેવ. તથા દવકમ્યતાય પરમ્મુખા વદન્તસ્સાપિ દુબ્ભાસિતમેવાતિ આચરિયા વદન્તિ.

૮૯૬-૭. અત્થં પુરક્ખત્વા વદતો ભિક્ખુસ્સ અનાપત્તીતિ યોજના. ધમ્મો નામ ‘‘ચણ્ડાલોસી’’તિઆદિપાળિયેવ. યથાહ અટ્ઠકથાયં ‘‘પાળિં વાચેન્તો ધમ્મપુરેક્ખારો’’તિ (પાચિ. અટ્ઠ. ૩૫). અનુસાસની નામ ‘‘ઇદાનિપિ ચણ્ડાલોસિ, મા પાપધમ્મં અકાસિ, મા તમો તમપરાયનો અહોસી’’તિઆદિના (પાચિ. અટ્ઠ. ૩૫) નયેન અટ્ઠકથાયં વુત્તસરૂપાયેવ અનુસાસનીપુરેક્ખતાય ઠત્વા વદન્તસ્સ ચિત્તસ્સ લહુપરિવત્તિતભાવતો અન્તરા કોધે ઉપ્પન્નેપિ અનાપત્તિ.

એત્થાતિ ઇમસ્મિં ઓમસવાદસિક્ખાપદે. પટિઘસમ્પયુત્તચિત્તેનેવ આપજ્જિતબ્બત્તા માનસિકદુક્ખવેદનાવ હોતિ.

ઓમસવાદકથાવણ્ણના.

૮૯૮. દુવિધાકારતો ભિક્ખુપેસુઞ્ઞે આપત્તિ સિયાતિ યોજના. પિસતીતિ પિસુણા, વાચા, સમગ્ગે સત્તે અવયવભૂતે વગ્ગે ભિન્ને કરોતીતિ અત્થો. પિસુણા એવ પેસુઞ્ઞં, તાય વાચાય સમન્નાગતો પુગ્ગલો સહચરિયનયેન પિસુણો, તસ્સ કમ્મં પેસુઞ્ઞં, ભિક્ખૂનં પેસુઞ્ઞં ભિક્ખુપેસુઞ્ઞં, તસ્મિં ભિક્ખુપેસુઞ્ઞે. પદભાજને ‘‘ઉપસમ્પન્નો ઉપસમ્પન્નસ્સ સુત્વા ઉપસમ્પન્નસ્સ પેસુઞ્ઞં ઉપસંહરતિ ‘ઇત્થન્નામો તં ‘ચણ્ડાલો…પે… પુક્કુસો’તિ ભણતી’તિ આપત્તિ…પે… પાચિત્તિયસ્સા’’તિ (પાચિ. ૩૯) વુત્તત્તા સયં ઉપસમ્પન્નો હુત્વા ઉપસમ્પન્નસ્સ જાતિઆદીસુ દસસુ અક્કોસવત્થૂસુ અઞ્ઞતરેન અઞ્ઞં ઉપસમ્પન્નં પરમ્મુખા અક્કોસન્તસ્સ સુત્વા તસ્સ સન્તિકં ગન્ત્વા વક્ખમાનસરૂપેસુ અત્તનો પિયકામતાભેદાધિપ્પાયસઙ્ખાતેસુ દ્વીસુ કારણેસુ અઞ્ઞતરકારણં પટિચ્ચ ‘‘અસુકો તુય્હં એવં વદતી’’તિ પેસુઞ્ઞં હરતિ, તસ્સ પેસુઞ્ઞકથનનિમિત્તં પાચિત્તિયં હોતીતિ અત્થો.

દુવિધાકારતોતિ એત્થ આકાર-સદ્દો કારણપરિયાયો. યથાહ અટ્ઠકથાયં ‘‘દ્વીહાકારેહીતિ દ્વીહિ કારણેહી’’તિ (પાચિ. અટ્ઠ. ૩૮). એત્થ કારણં નામ અધિપ્પાયવિસેસો. તં કારણં અધિપ્પાયમુખેન દસ્સેતુમાહ ‘‘અત્તનો’’તિઆદિ. અત્તનો પિયકામસ્સાતિ અત્તનો પિયભાવકામસ્સ પેસુઞ્ઞં ભણન્તસ્સ, અત્તનો પિયભાવં કામયન્તસ્સાતિ અત્થો, તાદિસેન અધિપ્પાયેનાતિ વુત્તં હોતિ. યથાહ અટ્ઠકથાયં ‘‘એવં અહં એતસ્સ પિયો ભવિસ્સામી’’તિ અત્તનો પિયભાવં પત્થયમાનસ્સા’’તિ (પાચિ. અટ્ઠ. ૩૮). પરભેદત્થિનોપિ વાતિ અક્કોસકસ્સ ચ અત્તનો પેસુઞ્ઞવચનં સુણન્તસ્સ ચાતિ ઉભિન્નં ભેદં ઇચ્છન્તસ્સાતિ અત્થો, ભેદાધિપ્પાયેનાતિ વુત્તં હોતિ. યથાહ અટ્ઠકથાયં ‘‘પરસ્સ પરેન ભેદં ઇચ્છન્તસ્સા’’તિ (પાચિ. અટ્ઠ. ૩૮).

૮૯૯. પરિયાયનયેન અક્કોસન્તસ્સ વચનસ્સ…પે… દુક્કટન્તિ યોજના, પરિયાયઅક્કોસવચનં સુત્વા પરસ્સ સન્તિકં ગન્ત્વા વદન્તસ્સ ભિક્ખુનો દુક્કટં હોતીતિ અત્થો. યથાહ ‘‘ઇત્થન્નામો સન્તિ ઇધેકચ્ચે ચણ્ડાલા…પે… ભણતિ, ન સો અઞ્ઞં ભણતિ, તંયેવ ભણતીતિ આપત્તિ વાચાય વાચાય દુક્કટસ્સા’’તિઆદિ (પાચિ. ૪૧). પાળિમુત્તનયેન અક્કોસન્તસ્સ વચનસ્સ…પે… દુક્કટન્તિ યોજના. એત્થ ‘‘ચોરોસિ, ગણ્ઠિભેદકોસી’’તિઆદિના દસ્સિતો પાળિમુત્તનયો નામ.

૯૦૦. અનુપસમ્પન્નસ્સ અક્કોસં ઉપસમ્પન્નં હરતોપિ ચ તથા દુક્કટન્તિ યોજના. ચ-સદ્દેન ઉપસમ્પન્નસ્સ અક્કોસં અનુપસમ્પન્નં હરતોપિ ચ, અનુપસમ્પન્નસ્સ અક્કોસં અનુપસમ્પન્નં હરતોપિ ચ તથા દુક્કટન્તિ વિકપ્પદ્વયઞ્ચ સમુચ્ચિનોતિ. ‘‘ઇધાપિ ભિક્ખુનિં આદિં કત્વા સબ્બે અનુપસમ્પન્ના નામા’’તિ (પાચિ. અટ્ઠ. ૩૮) અટ્ઠકથાવચનતો ‘‘ભિક્ખુની’’તિ ઉપલક્ખણં.

૯૦૧. ન ચેવ પિયકામસ્સાતિ પિયભાવં અકામયન્તસ્સ ચ. ન ભેદત્થિનોપિ ચાતિ ભેદં અનિચ્છન્તસ્સ ચ. પાપાનં ગરહત્થાયાતિ એત્થ ‘‘કેવલ’’ન્તિ સેસો. યથાહ અટ્ઠકથાયં ‘‘એકં અક્કોસન્તં, એકઞ્ચ ખમન્તં દિસ્વા ‘અહો નિલ્લજ્જો, ઈદિસમ્પિ નામ આયસ્મન્તં પુન વત્તબ્બં મઞ્ઞિસ્સતી’તિ એવં કેવલં પાપગરહિતાય ભણન્તસ્સ અનાપત્તી’’તિ (પાચિ. અટ્ઠ. ૩૮).

પેસુઞ્ઞકથાવણ્ણના.

૯૦૩. અઞ્ઞેનાતિ સામણેરાદિના. ‘‘યઞ્ચ પદં યઞ્ચ અનુપદં યઞ્ચ અન્વક્ખરં યઞ્ચ અનુબ્યઞ્જનં, સબ્બમેતં પદસો નામા’’તિ (પાચિ. ૪૬) પદભાજને વુત્તત્તા અવયવે સમુદાયોપચારવસેન ‘‘પિટકત્તય’’ન્તિ તદેકદેસપદાદિ એવ વુત્તોતિ ગહેતબ્બો. એત્થ પદાદિસરૂપં અટ્ઠકથાય વેદિતબ્બં. વુત્તઞ્હિ તત્થ ‘‘પદન્તિ એકો ગાથાપાદો અધિપ્પેતો. અનુપદન્તિ દુતિયો પાદો. અન્વક્ખરન્તિ એકેકમક્ખરં. અનુબ્યઞ્જનન્તિ પુરિમબ્યઞ્જનેન સદિસં પચ્છાબ્યઞ્જન’’ન્તિ (પાચિ. અટ્ઠ. ૪૫). ઇદં ગાથામયદેસનં સન્ધાય વુત્તં. ‘‘યં કિઞ્ચિ વા એકમક્ખરં અન્વક્ખરં, અક્ખરસમૂહો અનુબ્યઞ્જનં, અક્ખરાનુબ્યઞ્જનસમૂહો પદં, પઠમપદં પદમેવ, દુતિયં અનુપદન્તિ એવમેત્થ નાનાકરણં વેદિતબ્બ’’ન્તિપિ (પાચિ. અટ્ઠ. ૪૫) વુત્તં. ઇદં ચુણ્ણિયદેસનં સન્ધાય વુત્તં.

ધમ્મન્તિ બુદ્ધભાસિતાદિપાળિધમ્મં. પટિસમ્ભિદાયઞ્હિ ધમ્મપઞ્ચકે પાળિપિ ધમ્મોતિ વુત્તા. ધમ્મપઞ્ચકં નામ ફલનિબ્બત્તકો હેતુ, અરિયમગ્ગો, ભાસિતં, કુસલાકુસલં ચેતિ એતે ધમ્મસઞ્ઞિતાતિ નિદ્દિટ્ઠં. એત્થ હિ ભાસિતન્તિ પાળિ વુત્તા. અટ્ઠકથાનિસ્સિતોપિ એત્થેવ સઙ્ગહં ગચ્છતિ. સો ચ પુબ્બે મગધભાસાય ઠિતો સઙ્ગીતિત્તયારુળ્હો ગહેતબ્બો.

‘‘સહ ભણન્તસ્સ પાચિત્તિયં સિયા’’તિ ઇમિના ‘‘એકતો પટ્ઠપેત્વા એકતો ઓસાપેન્તી’’તિઆદિના (પાચિ. ૪૬) પદભાજનાગતનયેન અનુપસમ્પન્નેન સદ્ધિં આરભિત્વા એકતો ઉચ્ચારણવસેન પદં વા અનુપદં વા અન્વક્ખરં વા અનુબ્યઞ્જનં વા વદતો પદાદિગણનાવસેન પાચિત્તિયન્તિ વુત્તં હોતિ.

૯૦૪. સઙ્ગીતિં અનારુળ્હેસુ ધમ્મેસુ રાજોવાદાદયો સુત્તન્તા આપત્તિજનકાયેવાતિ મહાપચ્ચરિયાદિસુ વુત્તાતિ યોજના. રાજોવાદો નામ એકો સુત્તન્તો. આદિ-સદ્દેન તિક્ખિન્દ્રિયાદિસુત્તન્તા ગહિતા.

૯૦૫. ભિક્ખુસ્મિમ્પિ ભિક્ખુનિયાપિ ચ અનુપસમ્પન્નસઞ્ઞિનો, વિમતિસ્સ વા ભિક્ખુસ્સ તથા પદસોધમ્મે દુક્કટં હોતીતિ યોજના.

૯૦૬-૭. એકતો ઉદ્દિસાપેતીતિ એકતો ઉદ્દેસં ગણ્હન્તેહિ અનુપસમ્પન્નેહિ સદ્ધિં ઉચ્ચારણવસેન ઉદ્દિસાપેતિ. સજ્ઝાયં વા કરોતીતિ તથા એકતો સજ્ઝાયતિ.

‘‘સચે એકગાથાય એકો પાદો ન આગચ્છતિ, સેસં આગચ્છતિ, અયં યેભુય્યેન પગુણગન્થો નામ. એસ નયો સુત્તેપિ વેદિતબ્બોતી’’તિ (પાચિ. અટ્ઠ. ૪૮) અટ્ઠકથાવચનતો પગુણગન્થન્તિ એત્થ ‘‘યેભુય્યેના’’તિ સેસો. ઓપાતેતીતિ ‘‘એવં ભણાહી’’તિ એકતો ભણતિ. ઉદ્દેસન્તિ ઉદ્દિસિતબ્બં. તેનાતિ અનુપસમ્પન્નેન.

૯૦૮. યસ્મા ઇદં પદસોધમ્મસિક્ખાપદં વાચતો ચ સમુટ્ઠાતિ, વાચાચિત્તદ્વયાપિ ચ સમુટ્ઠાતિ, તસ્મા ઇદં સમુટ્ઠાનં પદસોધમ્મસઞ્ઞિતન્તિ વુત્તન્તિ યોજના.

પદસોધમ્મકથાવણ્ણના.

૯૦૯-૧૦. સબ્બચ્છન્નસબ્બપરિચ્છન્ને સેનાસને તિસ્સન્નં પન રત્તીનં યો પન ભિક્ખુ રત્તિયં ઠપેત્વા ભિક્ખું અઞ્ઞેન સચે નિપજ્જેય્ય, તસ્સ પાચિત્તિયં સિયાતિ યોજના. ‘‘યં કિઞ્ચિ પટિચ્છાદનસમત્થં ઇધ છદનઞ્ચ પરિચ્છન્નઞ્ચ વેદિતબ્બ’’ન્તિ (પાચિ. અટ્ઠ. ૫૧) અટ્ઠકથાયં વુત્તત્તા છદનારહં ઇટ્ઠકાસિલાસુધાતિણપણ્ણાદીનં યેન કેનચિ સબ્બસો છાદિતં સેનાસનં સબ્બચ્છન્નં. ‘‘ભૂમિતો પટ્ઠાય યાવ છદનં આહચ્ચ પાકારેન વા અઞ્ઞેન વા કેનચિ અન્તમસો વત્થેનપિ પરિક્ખિત્ત’’ન્તિ (પાચિ. અટ્ઠ. ૫૧) અટ્ઠકથાયં વુત્તત્તા યેન કેનચિ પરિક્ખિપિત્વા પટિચ્છાદિતસેનાસનં સબ્બપરિચ્છન્નં. ‘‘છદનં અનાહચ્ચ સબ્બન્તિમેન પરિયાયેન દિયડ્ઢહત્થુબ્બેધેન પાકારાદિના પરિક્ખિત્તાપિ સબ્બપરિચ્છન્નાયેવા’’તિ (પાચિ. અટ્ઠ. ૫૧) કુરુન્દટ્ઠકથાયં વુત્તં, તં ‘‘દિયડ્ઢા’’તિઆદિના વક્ખતિ.

એવં સબ્બચ્છન્નસબ્બપરિચ્છન્ને એકસ્મિં સેનાસને યો ભિક્ખુ ઉપસમ્પન્નતો અઞ્ઞેન એકેન વા અનેકેહિ વા તિરત્તં સહસેય્યં કપ્પેત્વા ચતુત્થરત્તિં આદિં કત્વા સબ્બરત્તીસુ સૂરિયત્થઙ્ગમતો પટ્ઠાય સકલરત્તિયં પઠમં વા પચ્છા વા અપુબ્બાચરિમં વા પિટ્ઠિં પસારેત્વા સચે એકસેનાસને સેય્યં કપ્પેતિ, તસ્સ દેવસિકં પાચિત્તિયં હોતીતિ ઇદં વિધાનં ‘‘અપિચેત્થ એકાવાસાદિકમ્પિ ચતુક્કં વેદિતબ્બ’’ન્તિઆદિના (પાચિ. અટ્ઠ. ૫૧) અટ્ઠકથાયં વુત્તં.

‘‘યેભુય્યેન પરિચ્છન્ને છન્ને’’તિ ઇમિનાપિ એવમેવ યોજેત્વા અત્થો વેદિતબ્બો. ‘‘યસ્સા પન ઉપરિ બહુતરં ઠાનં છન્નં, અપ્પં અચ્છન્નં, સમન્તતો ચ બહુતરં પરિક્ખિત્તં, અપ્પં અપરિક્ખિત્તં, અયં યેભુય્યેનછન્ના યેભુય્યેનપરિચ્છન્ના નામા’’તિ (પાચિ. અટ્ઠ. ૫૧) અટ્ઠકથાયં વુત્તનયેન યેભુય્યેન છન્નપરિચ્છન્નં વેદિતબ્બં. અત્થો વુત્તનયોયેવ. ‘‘યેભુય્યેન પંસુકા’’તિ એતસ્સ અટ્ઠકથાયં (પાચિ. અટ્ઠ. ૮૬) તીસુ દ્વે યેભુય્યં નામ, ઇધ પન પદસોધમ્મે ‘‘યેભુય્યેન પગુણં ગન્થ’’ન્તિ એતસ્સ અટ્ઠકથાયં (પાચિ. અટ્ઠ. ૪૮) ‘‘એકગાથાયા’’તિઆદિવિવરણે વિય ચતૂસુ તયોપિ ભાગા યેભુય્યં નામાતિ વેદિતબ્બં.

૯૧૧. મેથુનસ્સ પહોનકં યં પન વત્થુ પઠમપારાજિકાય નિદ્દિટ્ઠં અન્તમસો તિરચ્છાનગતેનપિ, તેન પઠમપારાજિકવત્થુના પુગ્ગલેન સહ નિપજ્જિત્વા આપત્તિ સહસેય્યાપત્તિ હોતીતિ યોજના.

૯૧૨-૩. ‘‘ઉભો વા નિપજ્જન્તી’’તિ વિકપ્પસ્સ પઠમગાથાદ્વયેનેવ અત્થતો દસ્સિતત્તા પુબ્બાપરિયવસેનપિ સમ્ભવન્તં દસ્સેતું ‘‘અનુપસમ્પન્ને’’તિઆદિના (પાચિ. ૫૨-૫૪) નયેન દસ્સિતપક્ખદ્વયં નિદસ્સેતુમાહ ‘‘નિપન્ને’’તિઆદિ. ‘‘ઉટ્ઠહિત્વા’’તિ ઇદં વિચ્છાવસેન ગહેતબ્બં. અનુપસમ્પન્નગણનાયપિ વાતિ બહૂસુ અનુપસમ્પન્નેસુ તેસં ગણનાય ચ. અનુપસમ્પન્નેસુ બહૂસુ તેસં ગણનાય એકસ્સ ભિક્ખુનો બહૂ આપત્તિયો હોન્તીતિ એવં દસ્સનેન ઉપસમ્પન્નેસુ બહૂસુ એકસ્મિં અનુપસમ્પન્ને સતિ તેસઞ્ચ તસ્સ પયોગગણનાય આપજ્જિતબ્બા બહૂ આપત્તિયો ચ ઉભોસુપિ બહૂસુ એકેકસ્સેવ ઉપસમ્પન્નસ્સ અનુપસમ્પન્નગણનાય બહૂ આપત્તિયો ચ હોન્તીતિપિ દસ્સિતં હોતિ.

૯૧૪. એકેનેવ દ્વારેન વળઞ્જિતબ્બતો એકૂપચારે સતગબ્ભેપિ સેનાસને ઉપસમ્પન્નો એકસ્મિં ગબ્ભે વસન્તો અત્તના સયનગબ્ભે દ્વારં પિદહિત્વા વા અપિદહિત્વા વા ચતુત્થરત્તિયં સયતિ ચે, ઉપરિમતલે, અવસેસગબ્ભેસુ ચ સયન્તેહિ અનુપસમ્પન્નેહિ પુબ્બે વુત્તઆપત્તિનિયમોયેવાતિ દસ્સનત્થમાહ ‘‘સચે પિધાયા’’તિઆદિ. ગબ્ભદ્વારં ઉત્તરપદલોપેન ‘‘ગબ્ભ’’ન્તિ વુત્તં. ચતુત્થદિવસે અત્થઙ્ગતે સૂરિયે નિપજ્જતિ, આપત્તિ સિયાતિ યોજના. ‘‘અનુપસમ્પન્નેન સહા’’તિ પકરણતો લબ્ભતિ. આપત્તિ પાચિત્તિયં.

૯૧૫. દિયડ્ઢહત્થુબ્બેધેનાતિ વડ્ઢકિરતનેન દિયડ્ઢરતનુબ્બેધેન. પાકારો નામ નિટ્ઠિતો. ચયનં નામ વિપ્પકતપાકારોતિપિ વદન્તિ. ઇમિના ચ આળિન્દસ્સ અગ્ગહણત્થં ‘‘દસહત્થુબ્બેધાપિ જગતિ પરિક્ખેપસઙ્ખ્યં ન ગચ્છતી’’તિ (પાચિ. અટ્ઠ. ૫૧) અટ્ઠકથા પમાણન્તિ વદન્તિ. જગતીતિ આળિન્દં. આદિ-સદ્દેન ભિત્તિપણ્ણાવરણાદિગહણં.

૯૧૬. દુસ્સકુટિયન્તિ વત્થકુટિયં.

૯૧૭. ‘‘સબ્બચ્છન્નપરિચ્છન્નાદિપ્પભેદતો યેભુય્યાદિપ્પભેદતો’’તિ આદિ-સદ્દો પચ્ચેકં યોજેતબ્બો. પઠમેન આદિ-સદ્દેન સબ્બચ્છન્નયેભુય્યપરિચ્છન્નસબ્બચ્છન્નઉપડ્ઢપરિચ્છન્નસબ્બપરિચ્છન્નયેભુય્યચ્છન્ન- સબ્બપરિચ્છન્નઉપડ્ઢચ્છન્નસઙ્ખાતાનિ ચત્તારિ સેનાસનાનિ ગહિતાનિ. ગાથાય સરૂપેન વુત્તસબ્બચ્છન્નસબ્બપરિચ્છન્નેન સદ્ધિં પઞ્ચ સેનાસનાનિ દસ્સિતાનિ હોન્તિ. દુતિયેન આદિ-સદ્દેન યેભુય્યચ્છન્નયેભુય્યપરિચ્છન્ન યેભુય્યચ્છન્નઉપડ્ઢપરિચ્છન્ન યેભુય્યપરિચ્છન્નઉપડ્ઢચ્છન્નસઙ્ખાતાનિ તીણિ સેનાસનાનિ ગહિતાનિ. ઇમે અટ્ઠ વિકપ્પા લબ્ભન્તિ. કસ્મા વુત્તં ‘‘સત્ત પાચિત્તિયાની’’તિ? મહાઅટ્ઠકથાય વુત્તત્તા. યથાહ ‘‘મહાઅટ્ઠકથાયં પન ‘સબ્બચ્છન્ને યેભુય્યેનપરિચ્છન્ને પાચિત્તિયં, સબ્બચ્છન્ને ઉપડ્ઢપરિચ્છન્ને પાચિત્તિયં, યેભુય્યેનચ્છન્ને ઉપડ્ઢપરિચ્છન્ને પાચિત્તિયં, સબ્બપરિચ્છન્ને યેભુય્યેનચ્છન્ને પાચિત્તિયં, સબ્બપરિચ્છન્ને ઉપડ્ઢચ્છન્ને પાચિત્તિયં, યેભુય્યેનપરિચ્છન્ને ઉપડ્ઢચ્છન્ને પાચિત્તિયં, પાળિયં વુત્તપાચિત્તિયેન સદ્ધિં સત્ત પાચિત્તિયાની’તિ વુત્ત’’ન્તિ (પાચિ. અટ્ઠ. ૫૩).

કસ્મા પન અટ્ઠકથાયં ‘‘અટ્ઠ પાચિત્તિયાની’’તિ વત્વા ‘‘સત્તા’’તિ ગણનપરિચ્છેદો કતોતિ? નિસ્સન્દેહે તાવ ‘‘સેય્યા નામ સબ્બચ્છન્ના સબ્બપરિચ્છન્ના, યેભુય્યેનચ્છન્ના યેભુય્યેનપરિચ્છન્ના’તિ (પાચિ. ૫૨) પાળિયં આગતેસુ દ્વીસુ વિકપ્પેસુ એકસ્મિં વુત્તપાચિત્તિયં ગહેત્વા પાળિયં વુત્તેન પાચિત્તિયેન ‘સત્તા’તિ વુત્ત’’ન્તિ પરિહારો દસ્સિતો. સારત્થદીપનિયઞ્ચ ‘‘સત્ત પાચિત્તિયાની’તિ પાળિયં વુત્તપાચિત્તિયદ્વયં સામઞ્ઞતો એકત્તેન ગહેત્વા વુત્તં. વિસું પન ગય્હમાને સબ્બચ્છન્ને સબ્બપરિચ્છન્ને પાચિત્તિયં, યેભુય્યેનચ્છન્ને યેભુય્યેનપરિચ્છન્ને પાચિત્તિયન્તિ અટ્ઠેવ પાચિત્તિયાનિ હોન્તી’’તિ (સારત્થ. ટી. પાચિત્તિય ૩.૫૩) પરિહારો વુત્તો.

સબ્બયેભુય્યઉપડ્ઢપદેસુ છન્નપરિચ્છન્નપદેહિ યોજિતેસુ નવ વિકપ્પા સમ્ભવન્તિ, તેસુ નવમે ઉપડ્ઢચ્છન્નઉપડ્ઢપરિચ્છન્નવિકપ્પે દુક્કટસ્સ દસ્સિતત્તા પારિસેસતો ઇતરેસુ અટ્ઠસુ અટ્ઠ પાચિત્તિયાનેવ સમ્ભવન્તિ. અટ્ઠકથાયં પન અપ્પકં ઊનમધિકં વા ગુણનૂપગં ન હોતીતિ કત્વા ‘‘સત્તા‘‘તિ વુત્તન્તિ ગહેતબ્બં. એત્થાતિ ઇમસ્મિં સિક્ખાપદે.

૯૧૮. ‘‘અડ્ઢચ્છન્ને અડ્ઢપરિચ્છન્ને’’તિ યોજના. ‘‘સબ્બપરિચ્છન્ને ચૂળચ્છન્ને’’તિ યથાક્કમેન યોજના. ઇમિના અટ્ઠકથાગતેસુ પઞ્ચસુ વિકપ્પેસુ તતિયવિકપ્પં દસ્સેત્વા આદિ-સદ્દેન સબ્બચ્છન્નાદયો સેસવિકપ્પા ગહિતા. યથાહ અટ્ઠકથાયં ‘‘સબ્બચ્છન્ને ચૂળકપરિચ્છન્ને દુક્કટં, યેભુય્યેનચ્છન્ને ચૂળકપરિચ્છન્ને દુક્કટં, સબ્બપરિચ્છન્ને ચૂળકચ્છન્ને દુક્કટં, યેભુય્યેનપરિચ્છન્ને ચૂળકચ્છન્ને દુક્કટં, પાળિયં આગતદુક્કટેન સહ પઞ્ચ દુક્કટાનીહિ વુત્ત’’ન્તિ (પાચિ. અટ્ઠ. ૫૩). પાળિયં આગતદુક્કટં નામ ઇમિસ્સાયેવ ગાથાય આદિમ્હિયેવ વુત્તદુક્કટં. યથાહ ‘‘ઉપડ્ઢચ્છન્ને ઉપડ્ઢપરિચ્છન્ને આપત્તિ દુક્કટસ્સા’’તિ (પાચિ. ૫૩).

ચૂળચ્છન્નાદીનિ ચેત્થ એવં વેદિતબ્બાનિ – યસ્સ ચતૂસુ ભાગેસુ એકો છન્નો, સેસા અચ્છન્ના, ઇદં ચૂળકચ્છન્નં. યસ્સ તીસુ ભાગેસુ દ્વે છન્ના, એકો અચ્છન્નો, ઇદં યેભુય્યેનચ્છન્નં. યસ્સ દ્વીસુ ભાગેસુ એકો છન્નો, એકો અચ્છન્નો, ઇદં ઉપડ્ઢચ્છન્નં નામ સેનાસનં. ચૂળપરિચ્છન્નાદીનિ ઇમિના નયેન વેદિતબ્બાનિ. છન્નાદીહિપીતિ સહત્થે કરણવચનં. પિ-સદ્દો સમુચ્ચયત્થો. સબ્બચૂળપરિચ્છન્નછન્નાદીહિ ચતૂહિપિ સહ અડ્ઢચ્છન્નપરિચ્છન્ને પઞ્ચધા દુક્કટં પરિદીપિતન્તિ યોજના.

૯૨૦. સબ્બચ્છન્નાદિકેતિ એત્થ આદિ-સદ્દેન ‘‘સબ્બપરિચ્છન્ને સબ્બઅચ્છન્ને યેભુય્યેનઅચ્છન્ને યેભુય્યેનઅપરિચ્છન્ને’’તિ (પાચિ. ૫૪) પાળિયં વુત્તા અનાપત્તિવારસેસા ચ અટ્ઠકથાયં વુત્તા ‘‘ઉપડ્ઢચ્છન્ને ચૂળકપરિચ્છન્ને, ઉપડ્ઢપરિચ્છન્ને ચૂળકચ્છન્ને, ચૂળકચ્છન્ને ચૂળકપરિચ્છન્ને’’તિ (પાચિ. અટ્ઠ. ૫૩) તયો અનાપત્તિવારા ચ ગહિતા.

૯૨૧. નિપન્નેપીતિ એત્થ પિ-સદ્દેન ‘‘ભિક્ખુ નિપન્ને અનુપસમ્પન્નો નિસીદતિ, ઉભો વા નિસીદન્તી’’તિ (પાચિ. ૫૪) પાળિયં વુત્તપકારન્તરે સમુચ્ચિનોતિ.

સહસેય્યકથાવણ્ણના.

૯૨૨. અપિ-સદ્દેન પગેવ મહત્તરિયાતિ દસ્સેતિ. સહસેય્યં પકપ્પેય્યાતિ યથાવુત્તલક્ખણં સબ્બચ્છન્નસબ્બપરિચ્છન્નાદિસેનાસનં પવિસિત્વા સૂરિયત્થઙ્ગમતો પટ્ઠાય પુબ્બે વુત્તપ્પકારેનેવ પિટ્ઠિપ્પસારણલક્ખણં સેય્યં કપ્પેય્ય.

૯૨૩-૪. દેવિયાતિ દેવિત્થિયા. તિરચ્છાનગતિત્થિયાતિ ગોધાદિકાય. ‘‘મેથુનવત્થુભૂતાયા’’તિ ઇમિના મેથુનધમ્મસ્સ અવત્થુભૂતાય સહસેય્યાય દોસાભાવં દસ્સેતિ. વત્થૂનં ગણનાયાતિ માતુગામસ્સ ગણનાય ચ તાસઞ્ચ અત્તનો ચ પયોગગણનાય ચ. અસ્સાતિ ભિક્ખુસ્સ. માતુગામેન તયો દિવસે સહસેય્યાય ઇમિના સિક્ખાપદેન આપત્તિં આપજ્જિત્વા ચતુત્થદિવસે સહસેય્યાય દ્વીહિપિ સિક્ખાપદેહિ આપત્તિં આપજ્જતીતિ એત્થ દુક્કટવત્થુભૂતાય ઇત્થિયા તત્થેવ સહસેય્યાય ઇમિના સિક્ખાપદેન દુક્કટં આપજ્જિત્વા ચતુત્થદિવસે રત્તિયં સહસેય્યાય ઇમિના સિક્ખાપદેન આપજ્જિતબ્બદુક્કટેન સહ પુરિમસિક્ખાપદેન પાચિત્તિયં આપજ્જતીતિ વેદિતબ્બં.

દુતિયસહસેય્યકથાવણ્ણના.

૯૨૬. છપ્પઞ્ચવાચાહિ ઉદ્ધં ઇત્થિયા ધમ્મં ભણન્તસ્સાતિ સમ્બન્ધો. ઇત્થિયાતિ ‘‘માતુગામો નામ મનુસ્સિત્થી, ન યક્ખી, ન પેતી, ન તિરચ્છાનગતા, વિઞ્ઞૂ પટિબલા હોતિ સુભાસિતદુબ્ભાસિતં દુટ્ઠુલ્લાદુટ્ઠુલ્લં આજાનિતુ’’ન્તિ પાળિયં વુત્તમનુસ્સિત્થિયા. ભણન્તસ્સાતિ વક્ખમાનલક્ખણં ધમ્મં છહિ પદેહિ ઉત્તરિ ભણન્તસ્સ. વિઞ્ઞું પુરિસવિગ્ગહં વિનાતિ ‘‘વિઞ્ઞૂ નામ પુરિસવિગ્ગહો પટિબલો હોતિ સુભાસિતદુબ્ભાસિતં દુટ્ઠુલ્લાદુટ્ઠુલ્લં આજાનિતુ’’ન્તિ (પાચિ. ૬૪) પાળિયં વુત્તસવનૂપચારગતમનુસ્સપુરિસં વિના. ધમ્મન્તિ વક્ખમાનપ્પકારસરૂપં દેસનાધમ્મં.

૯૨૭. ગાથામયા, ચુણ્ણિયગન્થમયાતિ દુવિધા દેસના, તત્થ ગાથામયદેસનાય વાચા નામ ગાથાપાદલક્ખણાતિ દસ્સેતુમાહ ‘‘ગાથાપાદો’’તિઆદિ. ચુણ્ણિયદેસનાયં પન વાચાપરિચ્છેદો વિભત્યન્તવસેન વેદિતબ્બો. તેનાહ ગણ્ઠિપદે ‘‘એકો ગાથાપાદો’તિ ઇદં ગાથાબન્ધમેવ સન્ધાય વુત્તં, અઞ્ઞત્થ પન વિભત્તિઅન્તપદમેવ ગહેતબ્બ’’ન્તિ. પદસોધમ્મં નિદ્દિટ્ઠં ધમ્મન્તિ પિટકત્તયં. ‘‘અટ્ઠકથ’’ન્તિ ઇમિના સઙ્ગીતિત્તયારુળ્હં પોરાણટ્ઠકથં ગહેતબ્બં. તેનેવ ગણ્ઠિપદે વુત્તં ‘‘અટ્ઠકથં ધમ્મપદજાતકાદિવત્થુઞ્ચા’’તિ. ઇમિનાપિ પોરાણકં સઙ્ગીતિઆરુળ્હમેવ અટ્ઠકથં વુત્તન્તિ વદન્તિ. અટ્ઠકથાદિપાઠં ઠપેત્વા દમિળાદિભાસન્તરેન યથારુચિ કથેતું વટ્ટતીતિ.

૯૨૮. પદાદીનં વસા છન્નં વાચાનં ઉપરિ ધમ્મં દેસેન્તસ્સાતિ યોજના. દેસેન્તસ્સાતિ પદસોધમ્મે વુત્તલક્ખણપદાદિસરૂપાહિ છહિ વાચાહિ ઉત્તરિ ધમ્મં દેસેન્તસ્સ. પદાદિગણનાયાતિ યથાવુત્તલક્ખણપદઅનુપદઅન્વક્ખરઅનુબ્યઞ્જનગણનાય.

૯૨૯. પુરિસવિગ્ગહન્તિ મનુસ્સપુરિસવેસં. એત્થ તિરચ્છાનગતા નામ વેસનિમ્માનારહા ઇદ્ધિમન્તા નાગસુપણ્ણા.

૯૩૧. વદતોતિ અધિકં ધમ્મં ભાસતો.

૯૩૨. ઇત્થિરૂપન્તિ મનુસ્સિત્થિવેસં. તિરચ્છાનગતિત્થિયાતિ વુત્તસરૂપાય તિરચ્છાનગતિત્થિયા.

૯૩૩. સયં ઉટ્ઠાય નિસીદિત્વા પુન ધમ્મં દેસેન્તસ્સ અનાપત્તિ પકાસિતાતિ સમ્બન્ધો. માતુગામસ્સ વા તથાતિ એત્થ ‘‘તથા’’તિ ઇમિના વુત્તપ્પકારસ્સ ગહિતત્તા ઉટ્ઠાય નિસિન્નસ્સ માતુગામસ્સ પુન ધમ્મં દેસેન્તસ્સ અનાપત્તિ પકાસિતાતિ વુત્તં હોતિ. ‘‘ઉટ્ઠાયા’’તિઆદિના ઇરિયાપથપરિવત્તનદસ્સનેન નાનાઇરિયાપથેપિ અનાપત્તિં દીપેતિ.

૯૩૪. અઞ્ઞિસ્સા પુન અઞ્ઞિસ્સાતિ એત્થ ‘‘આગતાગતાયા’’તિ સેસો. યથાહ અટ્ઠકથાયં ‘‘અઞ્ઞસ્સ માતુગામસ્સાતિ એકિસ્સા દેસેત્વા પુન આગતાગતાય અઞ્ઞિસ્સાપિ દેસેતીતિ એવં એકાસને નિસિન્નો માતુગામસતસહસ્સન્નમ્પિ દેસેતીતિ અત્થો’’તિ (પાચિ. અટ્ઠ. ૬૬). અવુત્તસમુચ્ચયત્થેન ચ-સદ્દેન ‘‘પઞ્હં પુટ્ઠો કથેતી’’તિ (પાચિ. ૬૬) ઇદં સમુચ્ચિનોતિ. ‘‘દીઘનિકાયો કિમત્થિયો ભન્તે’’તિ પઞ્હં પુચ્છતો માતુગામસ્સ સબ્બં દીઘનિકાયં વદતોપિ અનાપત્તિ. યથાહ અટ્ઠકથાયં ‘‘પઞ્હં પુચ્છતિ, પઞ્હં પુટ્ઠો કથેતીતિ માતુગામો ‘દીઘનિકાયો નામ ભન્તે કિમત્થં દીપેતી’તિ પુચ્છતિ, એવં પઞ્હં પુટ્ઠો ભિક્ખુ સબ્બં ચેપિ દીઘનિકાયં કથેતિ, અનાપત્તી’’તિ (પાચિ. અટ્ઠ. ૬૬). એત્થ ચ સબ્બં ચેપિ દીઘનિકાયં કથેતીતિ યાવ ન નિટ્ઠાતિ, તાવ પુનદિવસેપિ કથેતિ.

૯૩૫. ધમ્મસ્સ દેસનાય, વિઞ્ઞુમનુસ્સપુરિસસ્સ અસન્નિહિતકરણેન ચ આપજ્જિતબ્બતો ક્રિયાક્રિયં.

ધમ્મદેસનાકથાવણ્ણના.

૯૩૬. મહગ્ગતં રૂપારૂપજ્ઝાનં. પણીતં લોકુત્તરધમ્મં. પધાનભાવં નીતન્તિ પણીતં. આરોચેન્તસ્સાતિ ‘‘પઠમં ઝાનં સમાપજ્જામી’’તિઆદિના (પારા. ૨૦૧) નયેન ચતુત્થપારાજિકે વુત્તનયેન વદન્તસ્સ. પરિનિબ્બાનકાલે ચ પુટ્ઠકાલે ચ ભિક્ખુભિક્ખુનીનં અત્તના લદ્ધસ્સ ઉત્તરિમનુસ્સધમ્મસ્સ આરોચેતબ્બત્તા ‘‘ઠપેત્વા ભિક્ખુનિં ભિક્ખુ’’ન્તિ વુત્તં. ‘‘અઞ્ઞસ્સા’’તિ સેસો. યથાહ અટ્ઠકથાયં ‘‘ઉપસમ્પન્નસ્સ ભૂતં આરોચેતીતિ ઉત્તરિમનુસ્સધમ્મમેવ સન્ધાય વુત્તં. પરિનિબ્બાનકાલે, હિ અન્તરા વા અતિકડ્ઢિયમાનેન ઉપસમ્પન્નસ્સ ભૂતં આરોચેતું વટ્ટતી’’તિ (પાચિ. અટ્ઠ. ૭૭). ભૂતેતિ એત્થ ‘‘ઉત્તરિમનુસ્સધમ્મે આરોચિતે’’તિ વત્તબ્બં, નિમિત્તત્થે ભુમ્મં, અત્તનો સન્તાને ઇમસ્મિં અત્તભાવે સિદ્ધઉત્તરિમનુસ્સધમ્મસ્સ આરોચનનિમિત્તન્તિ અત્થો.

૯૩૭. નો ચે જાનાતિ સો વુત્તન્તિ યસ્સ આરોચેતિ, સો સચે સુતક્ખણેયેવ વુત્તનયેનેવ ‘‘એસ પઠમજ્ઝાનસ્સ લાભી’’તિઆદિના નયેન વુત્તં નો જાનાતિ. પરિયાયવચનેતિ ‘‘યો તે વિહારે વસતિ, સો પઠમસ્સ ઝાનસ્સ લાભી’’તિ એવમાદિપરિયાયવચને. યસ્સ ઉત્તરિમનુસ્સધમ્મં આરોચેતિ, સો સચે સુતસમનન્તરં ‘‘એસ એવં વદતી’’તિ વુત્તં નો જાનાતિ, તાદિસસ્સ આરોચેન્તસ્સ ભિક્ખુનો હોતિ આપત્તિ દુક્કટન્તિ સમ્બન્ધો. અસ્સ ભૂતસ્સ પરિયાયવચને ચ ભિક્ખુનો આપત્તિ દુક્કટં હોતીતિ યોજના.

૯૩૮. તથારૂપે કારણે સતીતિ પરસ્સ કારણભાવં ઞત્વાપિ પટિપત્તિયા અમોઘભાવદસ્સનસમુત્તેજનસમ્પહંસનાદિકરસઙ્ખાતે કારણે સતિ. સબ્બસ્સાપીતિ ઉપસમ્પન્નાનુપસમ્પન્નસ્સ સબ્બસ્સ. સીલાદિન્તિ સીલસુતપરિયત્તિગુણં. વદતોતિ એત્થ ‘‘ભિક્ખુનો’’તિ પકરણતો લબ્ભતિ.

૯૩૯. તદસમ્ભવાતિ દિટ્ઠિસમ્પન્નસ્સ ઉમ્માદાદીનં અસમ્ભવા. યથાહ અટ્ઠકથાયં ‘‘દિટ્ઠિસમ્પન્નાનં ઉમ્માદસ્સ વા ચિત્તક્ખેપસ્સ વા અભાવાતિ. મહાપચ્ચરિયમ્પિ હિ વિચારિત’’ન્તિ (પાચિ. અટ્ઠ. ૭૭). ઉમ્મત્તકપદસ્સ અવચને કારણં વદન્તેનેવ ખિત્તચિત્તાદિપદાનં અવચને કારણઞ્ચ ઉપલક્ખણતો દસ્સિતમેવાતિ દટ્ઠબ્બં. એત્થ ચ મગ્ગફલદિટ્ઠિયા સમન્નાગતાનં અરિયાનમેવ હિ ઉમ્મત્તકાદિભાવો નત્થિ. ઝાનલાભિનો પન તસ્મિં સતિ ઝાના પરિહાયન્તિ, તસ્મા તેસં અભૂતારોચનપચ્ચયા અનાપત્તિ વત્તબ્બા, ન ભૂતારોચનપચ્ચયા.

૯૪૦. ઇમિસ્સાપત્તિયા અઞ્ઞત્ર ઝાનમગ્ગાદિલાભીનં અઞ્ઞસ્સ અસમ્ભવા ‘‘કુસલાબ્યાકતેહેવ દ્વિચિત્ત’’ન્તિ વુત્તં. ઇદઞ્ચ ઉક્કટ્ઠપરિચ્છેદેન અરિયપુગ્ગલેયેવ સન્ધાય વુત્તં. પણ્ણત્તિં અજાનન્તા પન ઝાનલાભી પુથુજ્જના નાનાવત્થુમ્હિ લોભવસેન અકુસલચિત્તેનાપિ ન આરોચેન્તીતિ નત્થિ, તસ્મા ‘‘તિચિત્ત’’ન્તિ વત્તબ્બં સિયા, તથાપિ બહુલેન કુસલાબ્યાકતાનમેવ સમ્ભવોતિ એવં વુત્તન્તિ દટ્ઠબ્બં. દ્વિવેદનં સુખોપેક્ખાવસેન. ઇદઞ્ચ સિક્ખાપદં પણ્ણત્તિઅજાનનવસેન અચિત્તકસમુટ્ઠાનં હોતિ. અરિયા ચેત્થ પણ્ણત્તિં જાનન્તા વીતિક્કમં ન કરોન્તિ, પુથુજ્જના પન પણ્ણત્તિં જાનિત્વાપિ વીતિક્કમં કરોન્તિ. તે ચ સત્થુનો આણાવીતિક્કમચેતનાય બલવઅકુસલભાવતો ઝાના પરિહાયન્તીતિ દટ્ઠબ્બં.

ભૂતારોચનકથાવણ્ણના.

૯૪૧. ભિક્ખુનો દુટ્ઠુલ્લં આપત્તિં ભિક્ખુસમ્મુતિં ઠપેત્વા અનુપસમ્પન્ને આરોચેન્તસ્સ ભિક્ખુનો આપત્તીતિ યોજના. દુટ્ઠુલ્લં આપત્તિન્તિ સઙ્ઘાદિસેસો. નનુ ચ ‘‘દુટ્ઠુલ્લા નામ આપત્તિ ચત્તારિ ચ પારાજિકાનિ તેરસ ચ સઙ્ઘાદિસેસા’’તિ (પાચિ. ૭૯) પદભાજને પારાજિકસઙ્ઘાદિસેસા દસ્સિતા, કસ્મા ઇધ સઙ્ઘાદિસેસોવ ગહિતોતિ? વુચ્ચતે – પારાજિકં દુટ્ઠુલ્લસદ્દત્થદસ્સનત્થં વુત્તં, ઇધ પન સઙ્ઘાદિસેસોયેવ ભગવતા અધિપ્પેતોતિ અટ્ઠકથાયં વિચારિતમેતં. વુત્તઞ્હિ તત્થ ‘‘પારાજિકાનિ દુટ્ઠુલ્લસદ્દત્થદસ્સનત્થં વુત્તાનિ, સઙ્ઘાદિસેસં પન ઇધ અધિપ્પેત’’ન્તિ (પાચિ. અટ્ઠ. ૭૮). વક્ખતિ ચ ‘‘ઇધ સઙ્ઘાદિસેસાવ, દુટ્ઠુલ્લાપત્તિયો મતા’’તિ. અનુપસમ્પન્નેતિ ‘‘ભિક્ખુઞ્ચ ભિક્ખુનિઞ્ચ ઠપેત્વા અવસેસો અનુપસમ્પન્નો’’તિ (પાચિ. ૮૦) પદભાજને નિદ્દિટ્ઠઅનુપસમ્પન્નસ્સ આરોચેન્તસ્સાતિ વુત્તં હોતિ.

ઠપેત્વા ભિક્ખુસમ્મુતિન્તિ ‘‘અત્થિ ભિક્ખુસમ્મુતિ આપત્તિપરિયન્તા ન કુલપરિયન્તા’’તિઆદિના (પાચિ. ૮૦) પદભાજને દસ્સિતં અભિણ્હાપત્તિકસ્સ ભિક્ખુનો આયતિં સંવરત્થં હિરોત્તપ્પજનનત્થં આપત્તિયો વા ઉપાસકકુલાનિ વા ઉભયમેવ વા પરિચ્છિન્દિત્વા વા અપરિચ્છિન્દિત્વા વા આપત્તિયો આરોચેતું સઙ્ઘેન સઙ્ઘમજ્ઝે તિક્ખત્તું સાવેત્વા કતસમ્મુતિં ઠપેત્વાતિ વુત્તં હોતિ. યથાહ અટ્ઠકથાયં ‘‘અભિણ્હાપત્તિકં ભિક્ખું દિસ્વા ‘એવમેસ પરેસુ હિરોત્તપ્પેનાપિ આયતિં સંવરં આપજ્જિસ્સતી’તિ તસ્સ ભિક્ખુનો હિતેસિતાય તિક્ખત્તું અપલોકેત્વા સઙ્ઘેન કાતબ્બા’’તિ (પાચિ. અટ્ઠ. ૮૦).

૯૪૨. ઘટેત્વા વદન્તસ્સેવાતિ એવકારો યથાઠાને યોજેતબ્બો. એવકારેન બ્યવચ્છિન્નમત્થં વક્ખતિ ‘‘વત્થુ’’ન્તિઆદિના. ‘‘અસુચિં મોચેત્વા’’તિ ઇમિના વત્થુમાહ, ‘‘સઙ્ઘાદિસેસ’’ન્તિ ઇમિના આપત્તિં. વજ્જમેવ વજ્જતા. ‘‘પાચિત્તિયાપત્તી’’તિ ઇમસ્સાયં પરિયાયો. ‘‘અયં અસુચિં મોચેત્વા સઙ્ઘાદિસેસં આપન્નો’’તિ વત્થુના સદ્ધિં ઘટેત્વા આપત્તિં વદન્તસ્સ વજ્જતા પાચિત્તિયાપત્તિ હોતીતિ યોજના.

૯૪૩. સુદ્ધસ્સાતિ પારાજિકમનાપન્નસ્સ. વદન્તિ વદનહેતુ, વત્થુના સદ્ધિં સઙ્ઘાદિસેસસ્સ કથનતોતિ અત્થો.

૯૪૪. અદુટ્ઠુલ્લાયાતિ સઙ્ઘાદિસેસતો અઞ્ઞાય આપત્તિયા. દુટ્ઠુલ્લસઞ્ઞિનોતિ સઙ્ઘાદિસેસસઞ્ઞિનો. સેસા આપત્તિયોપિ વાતિ સઙ્ઘાદિસેસં વિના સેસે છળાપત્તિક્ખન્ધે.

૯૪૫. તથાતિ દુક્કટં અતિદિસતિ. પઞ્ચધા મતં અનુપસમ્પન્નસ્સ દુટ્ઠુલ્લં અજ્ઝાચારં આરોચેન્તસ્સ તથા દુક્કટન્તિ યોજના. અનુપસમ્પન્નસ્સ પઞ્ચધા મતં દુટ્ઠુલ્લં અજ્ઝાચારન્તિ ચ પાણાતિપાતાદિપઞ્ચસિક્ખાપદવીતિક્કમા ગહિતા. કેચિ પન ‘‘સુક્કવિસ્સટ્ઠિઆદયો પઞ્ચા’’તિ વદન્તિ, તં ન ગહેતબ્બં. પાણાતિપાતાદીનિ હિ દસેવ સિક્ખાપદાનિ સામણેરાનં પઞ્ઞત્તાનિ. તેસં પઞ્ઞત્તેસુયેવ ચ સિક્ખાપદેસુ દુટ્ઠુલ્લાદુટ્ઠુલ્લવિચારણા કાતબ્બા, ન ચ સુક્કવિસ્સટ્ઠિઆદીનિ વિસું તેસં પઞ્ઞત્તાનિ અત્થીતિ.

અથ ભિક્ખુનો દુટ્ઠુલ્લસઙ્ખાતાનિ સુક્કવિસ્સટ્ઠિઆદીનિ અનુપસમ્પન્નસ્સ કિં નામ હોન્તીતિ? અજ્ઝાચારો નામ હોન્તીતિ. યથાહ અટ્ઠકથાયં ‘‘સુક્કવિસ્સટ્ઠિ…પે… અજ્ઝાચારો નામાતિ વુત્ત’’ન્તિ (પાચિ. અટ્ઠ. ૮૨). ઇમિનાપિ ચેતં સિદ્ધં ‘‘અનુપસમ્પન્નસ્સ સુક્કવિસ્સટ્ઠિઆદિ દુટ્ઠુલ્લં નામ ન હોતી’’તિ. ‘‘અજ્ઝાચારો નામા’’તિ હિ વદન્તો અનુપસમ્પન્નસ્સ સુક્કવિસ્સટ્ઠિઆદિ કેવલં અજ્ઝાચારો નામ હોતિ, ન પન દુટ્ઠુલ્લો નામ અજ્ઝાચારોતિ દીપેતિ. ‘‘અજ્ઝાચારો નામા’’તિ ચ અટ્ઠકથાયં વુત્તત્તા, અકત્તબ્બરૂપત્તા ચ અનુપસમ્પન્નસ્સ સુક્કવિસ્સટ્ઠિઆદીનિ દણ્ડકમ્મવત્થુપક્ખં ભજન્તિ. તાનિ ચ અઞ્ઞસ્સ અનુપસમ્પન્નસ્સ અવણ્ણકામતાય આરોચેન્તો ભિક્ખુ દુક્કટં આપજ્જતીતિ વદન્તિ. ઇધ પન અનુપસમ્પન્નગ્ગહણેન સામણેરસામણેરિસિક્ખમાનાનં ગહણં વેદિતબ્બં.

અદુટ્ઠુલ્લં અજ્ઝાચારન્તિ યોજના. ‘‘અનુપસમ્પન્નસ્સા’’તિ ચ અજ્ઝાહરિતબ્બાનિ. અનુપસમ્પન્નસ્સ યથાવુત્તેહિ પઞ્ચસિક્ખાપદેહિ અઞ્ઞં વિકાલભોજનાદિં અદુટ્ઠુલ્લં અજ્ઝાચારં વા. યથાહ ‘‘અનુપસમ્પન્નસ્સ દુટ્ઠુલ્લં વા અદુટ્ઠુલ્લં વા અજ્ઝાચાર’’ન્તિઆદિ (પાચિ. ૮૨).

૯૪૬. કેવલં વત્થું વા આરોચેન્તસ્સાતિ ‘‘અયં સુક્કવિસ્સટ્ઠિં આપન્નો’’તિઆદિના નયેન વત્થુમત્તં આરોચેન્તસ્સ. કેવલં આપત્તિં વા આરોચેન્તસ્સાતિ ‘‘અયં પારાજિકં આપન્નો, અયં સઙ્ઘાદિસેસં આપન્નો’’તિઆદિના નયેન આપત્તિમત્તં આરોચેન્તસ્સ ચ. ભિક્ખુસમ્મુતિયાતિ એત્થ વત્થુના ઘટેત્વા આપત્તિં આરોચેન્તસ્સાતિ ગહેતબ્બં. ‘‘તથા’’તિ ઇમિના ‘‘અનાપત્તી’’તિ એતં પરામસતિ.

દુટ્ઠુલ્લારોચનકથાવણ્ણના.

૯૪૮. અકપ્પિયં પથવિન્તિ પદભાજને ‘‘દ્વે પથવિયો જાતા ચ પથવી અજાતા ચ પથવી’’તિ (પાચિ. ૮૬) ઉદ્દિસિત્વા –

‘‘જાતા નામ પથવી સુદ્ધપંસુ સુદ્ધમત્તિકા અપ્પપાસાણા અપ્પસક્ખરા અપ્પકથલા અપ્પમરુમ્બા અપ્પવાલિકા યેભુય્યેનપંસુકા યેભુય્યેનમત્તિકા, અદડ્ઢાપિ વુચ્ચતિ જાતા પથવી. યોપિ પંસુપુઞ્જો વા મત્તિકાપુઞ્જો વા અતિરેકચાતુમાસં ઓવટ્ઠો, અયમ્પિ વુચ્ચતિ જાતા પથવી’’તિ (પાચિ. ૮૬) ચ,

‘‘અજાતા નામ પથવી સુદ્ધપાસાણા સુદ્ધસક્ખરા સુદ્ધકથલા સુદ્ધમરુમ્બા સુદ્ધવાલિકા અપ્પપંસુ અપ્પમત્તિકા યેભુય્યેનપાસાણા યેભુય્યેનસક્ખરા યેભુય્યેનકથલા યેભુય્યેનમરુમ્બા યેભુય્યેનવાલિકા, દડ્ઢાપિ વુચ્ચતિ અજાતા પથવી. યોપિ પંસુપુઞ્જો વા મત્તિકાપુઞ્જો વા ઊનચાતુમાસં ઓવટ્ઠો, અયમ્પિ વુચ્ચતિ અજાતા પથવી’’તિ (પાચિ. ૮૬) ચ –

નિદ્દિટ્ઠાસુ દ્વીસુ પથવીસુ જાતપથવિસઙ્ખાતં અકપ્પિયપથવિં.

એત્થ પાસાણાદીનં લક્ખણં અટ્ઠકથાયં ‘‘મુટ્ઠિપ્પમાણતો ઉપરિ પાસાણાતિ વેદિતબ્બા, મુટ્ઠિપ્પમાણા સક્ખરા. કથલાતિ કપાલખણ્ડાનિ. મરુમ્બાતિ કટસક્ખરા. વાલિકાતિ વાલુકાયેવા’’તિ વુત્તનયેનેવ વેદિતબ્બં. યેભુય્યેનપંસુકાદીનં લક્ખણં ‘‘યેભુય્યેનપંસુકાતિ તીસુ કોટ્ઠાસેસુ દ્વે કોટ્ઠાસા પંસુ, એકો પાસાણાદીસુ અઞ્ઞતરો કોટ્ઠાસો’’તિ (પાચિ. અટ્ઠ. ૮૬) ચ ‘‘અદડ્ઢાપીતિ ઉદ્ધનપત્તપચનકુમ્ભકારાવાપાદિવસેન તથા તથા અદડ્ઢા’’તિઆદિ અટ્ઠકથાતો ચ વેદિતબ્બં. ‘‘અપ્પપંસુઅપ્પમત્તિકા’’તિ દ્વીસુપિ પદેસુ નિદ્દેસરૂપેન યેભુય્યેનપાસાણાદિપદપઞ્ચકં વુત્તં, તત્થાપિ અત્થો યેભુય્યેનપંસુપદાદીસુ વુત્તવિપલ્લાસેન વેદિતબ્બો. યથાહ અટ્ઠકથાયં ‘‘તેસંયેવ હિ દ્વિન્નં પભેદદસ્સનમેત’’ન્તિ (પાચિ. ૮૬).

ખણેય્ય વાતિ એવરૂપં અકપ્પિયપથવિપદેસં અન્તમસો પાદઙ્ગુટ્ઠેનાપિ સમ્મુઞ્જનિસલાકાયપિ સયં વા ખણતિ. ખણાપેય્ય વાતિ અઞ્ઞેન વા ‘‘ઇદં ખણાહી’’તિઆદિના અકપ્પિયવોહારેન ખણાપેય્ય. ભેદાપેય્યાતિ તથેવ ભેદાપેય્ય. ભિન્દેય્ય વાતિ પસ્સાવધારાદીહિપિ ભિન્દેય્ય. અધિકારવસેન વા-સદ્દસ્સ સબ્બકિરિયાપદેહિ સમ્બન્ધો લબ્ભતીતિ ભેદાપેય્ય ચાતિ એત્થ ચ-સદ્દો ઇધ અવુત્તસ્સ ‘‘દહતિ વા, દહાપેતિ વા’’તિ પદદ્વયસ્સ સમુચ્ચયકોતિ વેદિતબ્બો. અન્તમસો પત્તમ્પિ પચન્તો સયં વા દહતિ, અઞ્ઞેન વા દહાપેતીતિઆદિ ઇમેસં પદાનં અટ્ઠકથાવસેન (પાચિ. અટ્ઠ. ૮૭) વેદિતબ્બં. પાચિત્તિયં સિયાતિ ખણન્તસ્સ, ભિન્દન્તસ્સ ચ પહારે પહારે પાચિત્તિયં.

૯૪૯. આણાપેન્તસ્સ આણત્તિગણનાય, દહન્તસ્સ અગ્ગિપાતગણનાય હોતીતિ ઇદં ‘‘પહારે પહારે પાચિત્તિય’’ન્તિઆદિઅટ્ઠકથાવચનવસેન વેદિતબ્બં, ઇમમેવ દસ્સેતુમાહ ‘‘સયમેવા’’તિઆદિ.

૯૫૦. આણાપેન્તસ્સાતિ સકિં આણાપેન્તસ્સ.

૯૫૧. ‘‘ખણાપેય્યા’’તિ સામઞ્ઞવચનસ્સ અપવાદદસ્સનત્થં ‘‘ખણ પોક્ખરણિ’’ન્તિઆદિમાહ. કોચિ દોસો ન વિજ્જતીતિ એત્થ પોક્ખરણિઆવાટાદિસદ્દાનં પથવિપરિયાયત્તાભાવતો એવંવચનેન અનાપત્તીતિ અધિપ્પાયો.

૯૫૨. ‘‘ઇમં ઇધા’’તિઆદીનં પદાનં પચ્ચક્ખભૂતાધિપ્પેતભૂમિવાચકત્તા તેહિ યોજેત્વા વુત્તસ્સ તસ્સેવ પયોગસ્સ આપત્તિકરભાવં દસ્સેતુમાહ ‘‘ઇમ’’ન્તિઆદિ.

૯૫૩. કન્દન્તિ તાલાદિકન્દં. કુરુન્દન્તિ કુલચોચરુક્ખં. થૂણન્તિ થમ્ભં. ખાણુકન્તિ સાખાવિટપરહિતં રુક્ખાવયવં. મૂલન્તિ પથવિયા સુપ્પતિટ્ઠિતભાવકરં રુક્ખાવયવં. વટ્ટતીતિ અનિયમેત્વા વચનેન અનાપત્તિભાવતો વટ્ટતિ.

૯૫૪. ઇમન્તિ પચ્ચક્ખપરામાસપદેન નિયમેત્વા વચનતો આપત્તિ હોતીતિ આહ ‘‘નિયમેત્વાન વત્તું પન ન વટ્ટતી’’તિ.

૯૫૫. ઘટેહિ ઉસ્સિઞ્ચિતુન્તિ ઘટેહિ ગહેત્વા અવસિઞ્ચિતું. તનુકદ્દમોતિ જમ્બાલો. બહલં કદ્દમં ભિક્ખુના અપનેતું ન ચ વટ્ટતીતિ યોજેતબ્બં.

૯૫૬. નદિયાદીનન્તિ એત્થ આદિ-સદ્દેન ગઙ્ગાકન્દરાદીનં ગહણં. ‘‘તટ’’ન્તિ ઇમિના સમ્બન્ધો. વટ્ઠન્તિ વુટ્ઠીહિ ઓવટ્ઠઞ્ચ. ચાતુમાસન્તિ વિકોપનકિરિયાય અચ્ચન્તસંયોગે ઉપયોગવચનં, ચાતુમાસબ્ભન્તરે વિકોપેતું વટ્ટતીતિ અત્થો.

૯૫૭. સચે તોયસ્મિં પતતિ તટન્તિ યોજના, સચે કૂલં ભિજ્જિત્વા અન્તોઉદકે પતતીતિ. દેવે વુટ્ઠેપીતિ પજ્જુન્નદેવે વુટ્ઠેપિ. વુટ્ઠ-સદ્દો કત્તુસાધનો. ચાતુમાસમતિક્કન્તેપીતિ યોજના. તત્થ હેતુદસ્સનત્થમાહ ‘‘તોયે દેવો હિ વસ્સતી’’તિ.

૯૫૮. સોણ્ડિન્તિ પાસાણપોક્ખરણિં. તત્થ તૂતિ ઉદકરહિતે તસ્મિં સોણ્ડિઆવાટે.

૯૫૯. અન્તોચાતુમાસં સોધેતું ભિન્દિતુન્તિ યોજના. ‘‘સોધેતું ભિન્દિતું વિકોપેતુ’’ન્તિ કિરિયાપદેહિ ‘‘રજ’’ન્તિ કમ્મપદં આનેત્વા સમ્બન્ધિતબ્બં. તં રજોરાસિં દેવે વુટ્ઠે પચ્છા ઉદકસ્સ છિન્નત્તા બહલભૂમિસુક્ખમ્પિ વુટ્ઠિપાતદિવસતો પટ્ઠાય અન્તોચાતુમાસે કોપેતું ભિન્દિતું વટ્ટતીતિ અત્થો.

૯૬૦. પુણ્ણે સોણ્ડિમ્હિ તં રજં વિકોપેતું વટ્ટતિ ચાતુમાસતો ઉદ્ધન્તિ યોજના.

૯૬૧. ‘‘ફુસાયન્તે’’તિ એતેન ‘‘દેવો’’તિ ઇદં ભુમ્મવસેન વિપરિણામેત્વા ‘‘દેવે ફુસાયન્તે’’તિ યોજેતબ્બં, પજ્જુન્નદેવે વુટ્ઠિપાતં કરોન્તેતિ અત્થો. પિટ્ઠિપાસાણકેતિ પાસાણપિટ્ઠે. તમ્પીતિ તથા પાસાણપિટ્ઠે લગ્ગં તમ્પિ રજં.

૯૬૨. અકતપબ્ભારો નામ યથા હેટ્ઠાભાગો વુટ્ઠિફુસિતેહિ ન તેમીયતિ, તથા નમિત્વા ઠિતપબ્બતપ્પદેસો. ઇદં અનોવસ્સકટ્ઠાને ઉટ્ઠિતવમ્મિકાનં ઉપલક્ખણં.

૯૬૩. અબ્ભોકાસે વુટ્ઠિતો વમ્મિકો સચે ઓવટ્ઠો, કં ચાતુમાસં વિકોપેતું વટ્ટતીતિ સમ્બન્ધો. ચાતુમાસન્તિ વિકોપનકિરિયાય અચ્ચન્તસંયોગે ઉપયોગવચનં. રુક્ખેતિ ચ થમ્ભપાસાણાદીનં ઉપલક્ખણં. ઉપચિકાદીનન્તિ આદિ-સદ્દેન કાળકિપિલ્લિકાદીનં ગહણં. સો નયોતિ ‘‘ઓવટ્ઠદિવસતો ઉત્તરિ ચાતુમાસબ્ભન્તરે કોપેતું વટ્ટતી’’તિ યથાવુત્તો નયો.

૯૬૪. મૂસિકુક્કિરં નામ મૂસિકાહિ ઉદ્ધટપંસુ. મૂસિકાનં ઉક્કિરો મૂસિકુક્કિરોતિ વિગ્ગહો. ગોકણ્ટકં નામ ગુન્નં ખુરાનં ઉટ્ઠિતમત્તિકા. ગણ્ડુપ્પાદમલં નામ ભૂલતાય મલમત્તિકા. સમ્બન્ધં પન પકતિભૂમિં અકોપેન્તેન મત્થકતો ગણ્હિતું વટ્ટતિ.

૯૬૫. કસીતિ કસિતટ્ઠાનં, તત્થ નઙ્ગલેન ઉદ્ધટમત્તિકા કસિનઙ્ગલમત્તિકા. ‘‘અચ્છિન્ના’’તિઇમિના ખણ્ડાખણ્ડિકં કત્વા આયતં હુત્વા ઠિતમત્તિકાપટલમ્પિ અજાતપથવી સિયાતિ આસઙ્કાનિવત્તનત્થમાહ ‘‘ભૂમિસમ્બન્ધા’’તિ. સાતિ કસિનઙ્ગલમત્તિકા.

૯૬૬. સેનાસનન્તિ એત્થ ‘‘પુરાણ’’ન્તિ પાઠસેસો ગહેતબ્બો. ઓવટ્ઠં ચાતુમાસતો ઉદ્ધં ન વિકોપયેતિ યોજના.

૯૬૭. તતોતિ ઓવટ્ઠદિવસતો પટ્ઠાય ચાતુમાસાતિક્કન્તગેહતો. ‘‘ગોપાનસિ’’ન્તિ ઇમિના ગોપાનસિમત્થકે ઠિતઉપચિકાપંસુમ્હિ ભિજ્જન્તેપિ અનાપત્તિભાવં દીપેતિ. ‘‘ભિત્તિ’’ન્તિ ઇમિના તદેકદેસં ભિત્તિપાદાદિદારુમાહ. ઇદમ્પિ ભિત્તિમત્તિકં ઉપચિકામત્તિકં સન્ધાય વુત્તં. ‘‘થમ્ભ’’ન્તિ ઇદમ્પિ તંસમ્બન્ધપાકારભૂમિમત્તિકાઉપચિકાદિપંસું સન્ધાય વુત્તં. પદરત્થરન્તિ અત્થતપદરં. ઇદમ્પિ પદરાનં ઉપરિ મત્તિકાઉપચિકાપંસું સન્ધાય વુત્તં. ‘‘ગોપાનસિ’’ન્તિઆદીહિ પદેહિ ‘‘ગણ્હિસ્સામી’’તિ પચ્ચેકં યોજનીયં. ‘‘ગણ્હિસ્સામી’’તિ ઇમિના વિકોપનાધિપ્પાયાભાવં દીપેતિ.

૯૬૮. ગણ્હન્તસ્સાતિ એત્થ અનાદરે સામિવચનં, ‘‘સુદ્ધચિત્તેના’’તિ પાઠસેસો. ઇટ્ઠકાતિ છદનિટ્ઠકા. આદિ-સદ્દેન પાસાણસમુદ્દફેણાદીનં ગહણં. પતતીતિ સુદ્ધચિત્તેન ગણ્હન્તે સચે મત્તિકા છિજ્જિત્વા પતતિ, અનાપત્તીતિ અત્થો. મત્તિકન્તિ ભિત્તિયં, છદને ચ ચાતુમાસાધિકોવટ્ઠમત્તિકં, અનોવટ્ઠં ચે, ગણ્હિતું વટ્ટતીતિ. યથાહ અટ્ઠકથાયં ‘‘સચે યા યા અતિન્તા, તં તં ગણ્હાતિ, અનાપત્તી’’તિ (પાચિ. અટ્ઠ. ૮૬). યદિ ગણ્હતિ, આપત્તિ સિયાતિ યોજના.

૯૬૯. અતિન્તોતિ વસ્સોદકેન અતિન્તો, ઇમિના વિનિચ્છિતબ્બવત્થું દસ્સેતિ. તસ્સ અન્તોગેહે ચ બહિ ચ સમ્ભવતો અન્તોગેહે ઠિતસ્સ તાવ વિનિચ્છયં દસ્સેતુમાહ ‘‘અન્તોગેહે સચે સિયા’’તિ. વસ્સોદકેન તિન્તાતિન્તેસુ દ્વીસુ મત્તિકાપુઞ્જેસુ અતિન્તં તાવ દસ્સેતુમાહ ‘‘અનોવટ્ઠો ચા’’તિ.

૯૭૦. વસ્સોદકેન તિન્તે વિનિચ્છયં દસ્સેતુમાહ ‘‘વુટ્ઠે પુન ચા’’તિઆદિ. ‘‘વુટ્ઠે’’તિ ઇમિના ‘‘મત્તિકાપુઞ્જો’’તિ પદં ભુમ્મવસેન વિપરિણામેત્વા વુટ્ઠે મત્તિકાપુઞ્જેતિ યોજેતબ્બં, ‘‘એકદિવસમ્પી’’તિ સેસો, ગેહસ્મિન્તિ એત્થ ‘‘ઠિતે’’તિ વત્તબ્બં, ગેહસ્મિં ઠિતે મત્તિકાપુઞ્જે વસ્સોદકેન એકદિવસમ્પિ તિન્તેતિ વુત્તં હોતિ. વક્ખમાનનયેન અઞ્ઞત્થ પહરિત્વા ઉટ્ઠિતેન તેન અતેમિત્વા ઉજુકં પતિતેહિ વસ્સફુસિતેહિ તિન્તેતિ ગહેતબ્બં. સચે સબ્બો તિન્તો હોતીતિ યોજના. ‘‘મત્તિકાપુઞ્જો’’તિ ઇમિના સમ્બન્ધો.

૯૭૧. ‘‘સબ્બો’’તિ ઇમિના વિસેસનેન બ્યવચ્છિન્નં એકદેસતિન્તે વિનિચ્છયં દસ્સેતુમાહ ‘‘યત્તક’’ન્તિઆદિ. તુ-સદ્દો ઇમમેવ વિસેસં જોતેતિ. યત્તકન્તિ હેટ્ઠા અનોતરિત્વા મત્થકતો, પરિયન્તકતો ચ યત્તકપ્પમાણં. તત્થાતિ મત્તિકાપુઞ્જે. ‘‘અકપ્પિય’’ન્તિ એતસ્સ ‘‘ચાતુમાસચ્ચયેના’’તિ અનુવત્તતિ. ‘‘અતિન્તં…પે… કપ્પિય’’ન્તિ ઇમિના અકપ્પિયટ્ઠાનં પરિહરિત્વા વા કપ્પિયકારકેહિ કપ્પિયવચનેન હરાપેત્વા વા અતિન્તં ઠાનં યથાકામં વળઞ્જેતબ્બન્તિ અયમત્થો દસ્સિતો હોતિ. યથાહ અટ્ઠકથાયં ‘‘કપ્પિયકારકેહી’’તિઆદિ (પાચિ. અટ્ઠ. ૮૬).

૯૭૨. વારિનાતિ ઉજુકં આકાસતો પતિતવસ્સોદકેન. અઞ્ઞત્થ પહરિત્વા તત્થ પતિત્વા તેમિતે વટ્ટતિ. સો મત્તિકાપુઞ્જો. તતો પરન્તિ એકાબદ્ધકાલતો ઉત્તરિં સો મત્તિકાપુઞ્જો વારિના તેમિતો ભૂમિયા એકાબદ્ધો ચે હોતિ, તતો પરં સા જાતા પથવી એવ, કોપેતું ન વટ્ટતીતિ યોજના.

૯૭૩. ‘‘ઓવટ્ઠો’’તિ ઇમિના અનોવટ્ઠપાકારો કપ્પિયોતિ બ્યતિરેકવસેન દસ્સેતિ. ‘‘મત્તિકામયો’’તિ વિસેસનેન ઇટ્ઠકપાકારાદિં બ્યવચ્છિન્દતિ. તસ્સ પન કપ્પિયભાવં વક્ખતિ ‘‘સચે ઇટ્ઠકપાકારો’’તિઆદિના. ‘‘ચાતુમાસચ્ચયે’’તિ ઇમિના તતો અન્તો વિકોપનીયભાવં દસ્સેતિ.

૯૭૪. તત્થાતિ ઓવટ્ઠે મત્તિકપાકારે. અઘંસન્તોવાતિ પાકારમત્તિકં અકોપેન્તો. મત્તસો છુપિત્વાતિ પમાણતો મુદુકં કત્વા હત્થતલં ઠપેત્વા. અલ્લહત્થેનાતિ ઉદકતિન્તેન હત્થતલેન. હત્થેકદેસો હત્થો નામ.

૯૭૫. યેભુય્યકથલે ઠાનેતિ પુબ્બે વુત્તનયેન યસ્સા તીસુ ભાગેસુ દ્વે ભાગા કથલા હોન્તિ, તાદિસે કપ્પિયપથવિટ્ઠાને.

૯૭૬. અબ્ભોકાસેતિ ઉપલક્ખણત્તા અન્તોગેહેપિ થમ્ભં ચાલેત્વા જાતપથવિં વિકોપેતું ન વટ્ટતીતિ દટ્ઠબ્બં. દ્વીસુપિ ઠાનેસુ સુદ્ધચિત્તેન નિદ્દોસભાવં યથાવુત્તેન ‘‘થમ્ભં વા પદરત્થરં. ગણ્હિસ્સામી’તિ સઞ્ઞાય, ગહેતું પન વટ્ટતી’’તિ ઇમિના નયેનાહ. પથવિન્તિ અકપ્પિયપથવિં.

૯૭૭. ઉજુમુદ્ધરતો ન દોસોતિ યોજના.

૯૭૮. ઉચ્ચાલેત્વાતિ ઉક્ખિપિત્વા ચાલેત્વા પરિવત્તેત્વા. પવટ્ટતીતિ પવટ્ટેત્વા પવટ્ટેત્વા નેતીતિ અત્થો. સુદ્ધચિત્તસ્સાતિ ‘‘ભૂમિ ભિજ્જતી’’તિ અસલ્લક્ખેત્વા ‘‘પાસાણં પવટ્ટેત્વા પવટ્ટેત્વા હરિસ્સામી’’તિ સુદ્ધચિત્તવતો.

૯૭૯. ભૂમિયં દારૂનિ ફાલેન્તાનમ્પિ ભૂમિયં સાખાદીનિ કડ્ઢતો ચાતિ યોજના.

૯૮૦. કણ્ટકન્તિ રુક્ખકણ્ટકં, મચ્છકણ્ટકઞ્ચ. સૂચિ નામ અયોમયદન્તમયતમ્બમયકટ્ઠમયાદિસૂચીનં અઞ્ઞતરા. અટ્ઠિં વાતિ ગોમહિંસાદીનં અટ્ઠિં વા. હીરં વાતિ નાળિકેરાદિહીરં વા. આકોટેતુન્તિ યથા એકકોટિ ભૂમિં પવિસતિ, તથા તાળેતું. પવેસેતુન્તિ ભૂમિં ગમયિતું.

૯૮૧. પસ્સાવં મુત્તં. મેદનિન્તિ એત્થ અકપ્પિયપથવિમાહ. ભિન્દિસ્સામીતિ એત્થ ‘‘એવં ચિન્તેત્વા’’તિ સેસો.

૯૮૨. કરોન્તસ્સાતિ સુદ્ધચિત્તેન પસ્સાવં કરોન્તસ્સાતિયોજેતબ્બં. ‘‘સમ્મજ્જતો’’તિ ઇદં ‘‘સમ્મજ્જન્તેના’’તિ ગહેતબ્બં, ‘‘સમ્મજ્જનિયા’’તિ સેસો, અનન્તરં મેદનીપદં ઉપયોગવસેન ‘‘મેદનિ’’ન્તિ ગહેતબ્બં, ‘‘વિસમ’’ન્તિ સેસો, ‘‘સમં કાતુ’’ન્તિ ઇમિના યોજેતબ્બં, સમ્મજ્જન્તેન ઉચ્ચટ્ઠાનં મદ્દિત્વા, આવાટટ્ઠાનં પવેસેત્વા સમં કાતું સમ્મજ્જનિયા ઘંસેતું ન વટ્ટતીતિ અત્થો. યથાહ અટ્ઠકથાયં ‘‘વિસમં ભૂમિં સમં કરિસ્સામીતિ સમ્મજ્જનિયા ઘંસિતુમ્પિ ન વટ્ટતી’’તિ (પાચિ. અટ્ઠ. ૮૬).

૯૮૩. પાદઙ્ગુટ્ઠેન વાતિ એત્થ સમુચ્ચયત્થેન વા-સદ્દેન અટ્ઠકથાયં વુત્તં ‘‘કત્તરયટ્ઠિયા ભૂમિં કોટ્ટેન્તી’’તિ ઇદં સઙ્ગણ્હાતિ. લિખિતુમ્પીતિ રાજિં કાતુમ્પિ ભૂમિં ભિન્દન્તેનાતિ યોજના. પાદેહીતિ પાદતલેહિ.

૯૮૫. ભૂમિન્તિ અકપ્પિયભૂમિં. દહતિ દહાપેતીતિ એત્થ ‘‘યો’’તિ ચ ‘‘તસ્સા’’તિ ચ સમ્બન્ધવસેન લબ્ભતિ. પત્તં દહન્તસ્સાતિ છવિયા થિરભાવત્થં ધૂમં ગાહાપેત્વા તિણુક્કાદીહિ પત્તં ગણ્હન્તસ્સ.

૯૮૬. તત્તકાનેવાતિ ઠાનપ્પમાણાનેવ. ઇધાપિ ‘‘યો’’તિ ચ ‘‘તસ્સા’’તિ ચ સામત્થિયા લબ્ભતિ.

૯૮૭. ભૂમિયન્તિ અકપ્પિયભૂમિયં. પત્તં પચીયતિ એત્થાતિ પત્તપચનં, કપાલં, તસ્મિં કપાલે.

૯૮૮. સો અગ્ગિ તાનિ દારૂનિ દહન્તો ગન્ત્વા ચે એકંસેન ભૂમિં દહતિ, તસ્મા દારૂનં ઉપરિ અગ્ગિં ઠપેતું ન વટ્ટતીતિ યોજના.

૯૮૯. ઇટ્ઠકા આવપીયન્તિ પચ્ચન્તિ એત્થાતિ ઇટ્ઠકાવાપો, સો એવ ઇટ્ઠકાવાપકો, ઇટ્ઠકાપચનટ્ઠાનં. આદિ-સદ્દેન કુમ્ભકારાવાપાદિં સઙ્ગણ્હાતિ.

૯૯૦. ઉપાદીયતીતિ ઉપાદાનં, ઇન્ધનં, ન ઉપાદાનં અનુપાદાનં, ઇન્ધનતો અઞ્ઞં, તતો અનુપાદાનતોતિ અત્થો. ખાણુકેતિ મતખાણુકે ચ સુક્ખરુક્ખે ચ ભૂમિગતં અદત્વા ‘‘નિબ્બાપેસ્સામી’’તિ અગ્ગિદાનં વટ્ટતિ. પચ્છા ઉસ્સાહે કતેપિ ન નિબ્બાયતિ, ન દોસોતિ. યથાહ અટ્ઠકથાયં ‘‘સચે પન ભૂમિં અપ્પત્તમેવા’’તિઆદિ (પાચિ. અટ્ઠ. ૮૭).

૯૯૧. તિણુક્કન્તિ તિણેન બદ્ધઉક્કં. તિણુક્કન્તિ ઉપલક્ખણં. નાળિકેરપણ્ણાદીહિ બદ્ધાપિ સઙ્ગય્હન્તિ.

૯૯૨. તસ્સ અગ્ગિસ્સ પતિતટ્ઠાને ઇન્ધનં દત્વા પુન તં અગ્ગિં કાતું વટ્ટતીતિ મહાપચ્ચરિયં રુતં કથિતન્તિ યોજના.

૯૯૩. ‘‘તસ્સ અપથવિય’’ન્તિ પદચ્છેદો. વિમતિસ્સુભયત્થાપીતિ પથવિઅપથવિદ્વયેપિ વેમતિકસ્સ. તત્થ જાતા પથવી, ઇતરા અપથવી.

૯૯૪. ઇમન્તિ આવાટં, મત્તિકં, પંસું વા.

પથવીખણનકથાવણ્ણના.

મુસાવાદવગ્ગો પઠમો.

૯૯૫. ભવન્તસ્સાતિ જાયન્તસ્સ, વડ્ઢમાનસ્સ ચ. ભૂતસ્સાતિ જાતસ્સ, વડ્ઢિતસ્સ ચાતિ અત્થો. યથાહ અટ્ઠકથાયં ‘‘ભવન્તિ અહુવુઞ્ચાતિ ભૂતા, જાયન્તિ વડ્ઢન્તિ, જાતા વડ્ઢિતા ચા’’તિ (પાચિ. અટ્ઠ. ૯૦). એત્થ ચ ‘‘ભવન્તી’’તિ ઇમિના વિરુળ્હમૂલે નીલભાવં આપજ્જિત્વા વડ્ઢમાનકે તરુણગચ્છે દસ્સેતિ. ‘‘અહુવુ’’ન્તિ ઇમિના પન વડ્ઢિત્વા ઠિતે મહન્તે રુક્ખગચ્છાદિકે દસ્સેતિ. ‘‘ભવન્તી’’તિ ઇમસ્સ વિવરણં ‘‘જયન્તિ વડ્ઢન્તી’’તિ, ‘‘અહુવુ’’ન્તિ ઇમસ્સ ‘‘જાતા વડ્ઢિતા’’તિ. એવં ભૂત-સદ્દો પચ્ચુપ્પન્નાતીતવિસયોતિ દસ્સેતિ. ‘‘ભવન્તસ્સ ભૂતસ્સા’’તિ ઇમિના પદદ્વયેન ‘‘ભૂતગામસ્સા’’તિ પદસ્સ તુલ્યાધિકરણતાદસ્સનેન ગામ-સદ્દસ્સ દિટ્ઠિગતવનન્તાદિસદ્દાનં દિટ્ઠિવનાદિસદ્દત્થે વિય ભૂતસદ્દત્થે વુત્તિપક્ખમાહ. યથાહ અટ્ઠકથાયં (પાચિ. અટ્ઠ. ૯૦) ‘‘ભૂતા એવ વા ગામો ભૂતગામો, પતિટ્ઠિતહરિતતિણરુક્ખાદીનમેતં અધિવચન’’ન્તિ. ભૂતાનં દેવતાનં ગામો નિવાસોતિ વા ભૂતગામો. ભૂમિયં પતિટ્ઠહિત્વા હિ હરિતભાવમાપન્ના તિણરુક્ખગચ્છાદયો દેવતાહિ પરિગય્હન્તીતિ. જાયન્તસ્સ વડ્ઢન્તસ્સ વા સમ્પત્તવુદ્ધિમરિયાદસ્સ વા રુક્ખાદિનોતિ અત્થો.

પાતબ્યતાનિમિત્તન્તિ એત્થ પાતબ્યભાવો પાતબ્યતા, ‘‘છેદનભેદનાદીહિ યથારુચિ પરિભુઞ્જિતબ્બતાતિ અત્થો’’તિ અટ્ઠકથાવચનતો પાતબ્યતા-સદ્દસ્સ પરિભુઞ્જિતબ્બતાતિ અત્થો વેદિતબ્બો, સા નિમિત્તં હેતુ યસ્સ પાચિત્તિયસ્સ તં પાતબ્યતાનિમિત્તં. રુક્ખાદીનં છેદનફાલનાદિવસેન વિકોપનીયતાસઙ્ખાતપાતબ્યતાનિમિત્તં પરિભુઞ્જિતબ્બતાહેતુ પાચિત્તિયં ઉદીરિતં વુત્તન્તિ અત્થો.

૯૯૬-૭. સોતિ ભૂતગામો. તિલબીજાદિકોતિ તિલબીજમેત્થ સુખુમપણ્ણસેવાલાદિકો. આદિ-સદ્દેન ચ તાદિસા ઇતરા સેવાલજાતિ ગહિતા. ‘‘ઉપરિ ખુદ્દાનુખુદ્દકપણ્ણઙ્કુરો, હેટ્ઠા ખુદ્દાનુખુદ્દકમૂલઙ્કુરો સેવાલો તિલબીજં નામા’’તિ ગણ્ઠિપદે વુત્તન્તિ. વિકોપેન્તસ્સ તં સબ્બન્તિ ભૂમિયં પતિટ્ઠાય ઉદકે જાયમાનકસેવાલાદિં ભૂમિયા ઉપ્પાટનચ્છેદનવસેન જલે એવ પતિટ્ઠિતં સુખુમપણ્ણનીલિકાદિં ઉદકતો ઉદ્ધરણચ્છેદનવસેન તં સબ્બં સેવાલં વિકોપેન્તસ્સાતિ અત્થો.

૯૯૮. હત્થેન વિયૂહિત્વાતિ જલતો અમોચેત્વા હત્થેન દૂરતો અપનેત્વા. ‘‘હોતી’’તિઆદિ તસ્સ હેતુસન્દસ્સનત્થં. સકલં અનવસેસં સબ્બં જલં તસ્સ યસ્મા ઠાનં હોતિ, તસ્માતિ અત્થો.

૯૯૯. ચેચ્ચાતિ જાનન્તો. તં સેવાલજાતિકં જલા ઉદ્ધરિતું ઉદકેન વિના ભિક્ખુસ્સ ન વટ્ટતીતિ યોજના. ઠાનસઙ્કમનઞ્હિ તન્તિ હેતુદસ્સનં. તં તથાકરણં યસ્મા ઠાનસઙ્કમનં ઠાનતો ચાવનં, તસ્મા તં ન વટ્ટતીતિ યોજના.

૧૦૦૦. યથાવુત્તસ્સ બ્યતિરેકં દસ્સેતુમાહ ‘‘ઉદકેના’’તિઆદિ. તત્થ ઉદકેનાતિ સહત્થે કરણવચનં. તં સેવાલજાતિકં. વારિસૂતિ એત્થ વાસં વારયન્તીતિ વારી, તેસુ.

૧૦૦૧. જલે વલ્લિતિણાદીનીતિ જલમત્થકે વલ્લિઞ્ચ જાયમાનકરવલ્લિતિણાદીનિ ચ. ઉદ્ધરન્તસ્સાતિ ભૂમિયં પતિટ્ઠિતં ભૂમિતો, ઉદકે પતિટ્ઠિતં ઉદકતો ચ ઉદ્ધરન્તસ્સ. તત્થ અન્તપક્ખં દસ્સેતુમાહ ‘‘તોયતો’’તિ. વિકોપેન્તસ્સાતિ ખણ્ડનાદિવસેન કોપેન્તસ્સ. તત્થાતિ તસ્મિં ઉદકે, એવ-કારો લુત્તનિદ્દિટ્ઠો ‘‘તત્થેવા’’તિ (પાચિ. અટ્ઠ. ૯૨) અટ્ઠકથાવચનતો.

૧૦૦૨. એત્થાતિ ઉદકે એવ. વિકોપેન્તસ્સાતિ કપ્પિયં અકારાપેત્વા છેદનાદિં કરોન્તસ્સ. તાનીતિ તથા પરેહિ ઉપ્પાટિતત્તા ભૂતગામભાવતો મુત્તાનિ વલ્લિતિણાદીનિ. બીજગામેનાતિ મૂલબીજગામાદિવસેન.

૧૦૦૩. એવં ઉદકટ્ઠે સઙ્ખેપતો વિનિચ્છયં દસ્સેત્વા ઇદાનિ ઇતરત્રાપિ વિનિચ્છયં દસ્સેતુમાહ ‘‘થલટ્ઠે’’તિઆદિ. હરિતખાણુકોતિ એત્થ ‘‘યો’’તિ સેસો. ‘‘તસ્સા’’તિ ઇમિના સમ્બન્ધો, કકુધકરઞ્જાદીનં છિન્નાવસિટ્ઠખાણુકોતિ વુત્તં હોતિ. ‘‘ભૂતગામેન સઙ્ગહો’’તિ ઇમિના તંવિકોપને પાચિત્તિયભાવં દીપેતિ. એવમુપરિપિ.

૧૦૦૪. નાળિકેરાદિકાનં ખાણૂતિ એત્થાપિ ‘‘ઉપરિહરિતો’’તિ સામત્થિયા લબ્ભતિ. ‘‘બીજગામેન સઙ્ગહો’’તિ ઇમિના દુક્કટવત્થુતમાહ. એવમુપરિપિ. કિઞ્ચાપિ હિ તાલનાળિકેરાદીનં ખાણુ ઉદ્ધં અવડ્ઢનકો ભૂતગામસ્સ કારણં ન હોતિ, તથાપિ ભૂતગામસઙ્ખાતનિબ્બત્તપણ્ણમૂલબીજતો સમ્ભૂતત્તા ભૂતગામતો ઉપ્પન્નો નામ હોતીતિ બીજગામેન સઙ્ગહં ગચ્છતિ.

૧૦૦૫. તથાપકાસિતોતિ ‘‘બીજગામો’’તિ વુત્તો.

૧૦૦૬. ફલિતા કદલી યાવ નીલપણ્ણા, તાવ સા ચ ભૂતગામોતિ પકાસિતાતિ યોજના. યથાહ અટ્ઠકથાયં ‘‘કદલી પન ફલિતા યાવ નીલપણ્ણા, તાવ ભૂતગામેનેવ સઙ્ગહિતા’’તિ (પાચિ. અટ્ઠ. ૯૨). નળન્તિ ખુદ્દકવેળુ. વેળૂતિ મહાવેળુ. તિણાદીનન્તિ આદિ-સદ્દેન સસ્સાદયો ગહિતા.

૧૦૦૭. યો અયં પન વેળુ અગ્ગતો પટ્ઠાય યદા સુસ્સતિ, તદા સો બીજગામેન સઙ્ગહિતો નામ હોતીતિ યોજના. બીજગામેનાતિ ફળુબીજગામેન. યથાહ અટ્ઠકથાયં ‘‘કતરબીજગામેન? ફળુબીજગામેના’’તિ.

૧૦૦૮. ઇન્દસાલો સલ્લકી. આદિ-સદ્દેન સોભઞ્જનાદીનં સઙ્ગહો. તુ-સદ્દેન અટ્ઠકથાયં ‘‘કિઞ્ચાપિ રાસિકતદણ્ડકેહિ રતનપ્પમાણાપિ સાખા નિક્ખમન્તી’’તિ (પાચિ. અટ્ઠ. ૯૨) વુત્તવિસેસં જોતેતિ. છિન્દિત્વા ઠપિતદણ્ડકેસુ રતનમત્તાસુપિ સાખાસુ ઉટ્ઠિતાસુ ભૂતગામં અહુત્વા બીજગામમેવ હોતિ અવિરુળ્હમૂલકત્તાતિ અયં વિનિચ્છયો વિનયઞ્ઞુના ઞાતો કુક્કુચ્ચકાનમુપકારાય હોતીતિ આહ ‘‘વિઞ્ઞેય્યો વિનયઞ્ઞુના’’તિ. ઇમમેવત્થં ‘‘મૂલમત્તેપિ વા’’તિઆદિના વક્ખતિ.

૧૦૦૯. મણ્ડપાદીનમત્થાયાતિ મણ્ડપવતિપાકારાદીનમત્થાય. સચે તે નિક્ખણન્તીતિ યદિ તે ઇન્દસાલાદિદણ્ડકે ભૂમિયં નિખણન્તિ. નિગ્ગતે મૂલપણ્ણસ્મિન્તિ તથા નિખાતદણ્ડતો મૂલે ચ પણ્ણે ચ જાતે. ભૂતગામેન સઙ્ગહોતિ એત્થ ‘‘તેસ’’ન્તિ સામત્થિયા લબ્ભતિ, ‘‘વિઞ્ઞેય્યો’’તિ અધિકારો.

૧૦૧૦. નિગ્ગતેપીતિ તતિયેન પિ-સદ્દેન અતિખુદ્દકતં સૂચેતિ.

૧૦૧૧. સકન્દા તાલટ્ઠીતિ સકન્દતાલબીજં. પત્તવટ્ટીતિ સૂચિસણ્ઠાના અઙ્કુરપત્તવટ્ટિ. ન ચ બીજગામોતિ વુચ્ચતીતિ યોજના. ‘‘ભૂતગામો’’તિ ઇદં યથાવુત્તસ્સ બ્યતિરેકવસેન દસ્સેતિ.

૧૦૧૨. નાળિકેરતચન્તિ નાળિકેરફલછલ્લિં. દન્તસૂચીવાતિ દન્તમયસૂચિ ઇવ. સોપીતિ નાળિકેરોપિ. રુક્ખતચસદ્દાનં ફલેસુ વત્તમાનકાલેસુપિ તંલિઙ્ગતા ન વિરુજ્ઝતીતિ ‘‘સો’’તિ આહાતિ વિઞ્ઞાયતિ.

૧૦૧૩. મિગસિઙ્ગસમાનાયાતિ હરિતવિસાણસદિસાય. પત્તવટ્ટિયાતિ અઙ્કુરપત્તવટ્ટિયા. સતિયાતિ વિજ્જમાનાય. ભૂતગામોતિ વુચ્ચતીતિ અમૂલકભૂતગામોતિ વુચ્ચતિ. ઇદં નાળિકેરસ્સ આવેણિકં કત્વા વુત્તં.

ચતુભાણવારવણ્ણના નિટ્ઠિતા.

૧૦૧૫-૬. અમ્બટ્ઠીતિ અમ્બબીજં. જમ્બુટ્ઠીતિ જમ્બુબીજં. આદિ-સદ્દેન મધુકપનસાદિબીજાનં ગહણં. વન્દાકાતિ રુક્ખાદની. અઞ્ઞં વાતિ ભણ્ડકદલિમનોરહં વા. અસ્સાતિ વન્દાકાદિનો. અમૂલવલ્લીતિ એવંનામિકા વલ્લિ.

૧૦૧૭. સો સેવાલોતિ યોજના.

૧૦૧૮. ઘંસિત્વાતિ યેન કેનચિ ઘંસિત્વા. તં સેવાલં. તસ્માતિ તસ્મા પાકારા.

૧૦૧૯. સેવાલે અપનીતે. અન્તોતિ પાનીયઘટાદીનં અન્તોકુચ્છિમ્હિ. કણ્ણકં અબ્બોહારન્તિ યોજના. પાનીયઘટાદીનં બહિ સેવાલો ઉદકે અટ્ઠિતત્તા, બીજગામાનુલોમત્તા ચ દુક્કટવત્થૂતિ વદન્તિ. કણ્ણકં નીલવણ્ણમ્પિ અબ્બોહારિકમેવ.

૧૦૨૦. પાસાણદદ્દૂતિ મનુસ્સસરીરે રોગાકારેન પાસાણે જાયમાનસ્સેતં અધિવચનં. સેવાલન્તિ પાસાણસેવાલં. સેલેય્યકા નામ સિલાય સમ્ભૂતા એકા સુગન્ધજાતિ. અપત્તાનીતિ પણ્ણરહિતાનિ.

૧૦૨૧. પુપ્ફિતન્તિ વિકસિતં. તં અહિચ્છત્તં. મકુલન્તિ અવિકસિતં.

૧૦૨૨. અલ્લસ્મિં રુક્ખે તચં વિકોપેત્વા યથા ગહેતું ન વટ્ટતિ, તથા પપ્પટિકમ્પિ નિય્યાસમ્પિ વિકોપેત્વા ગહેતું ન વટ્ટતીતિ યોજના, પાચિત્તિયમેવાતિ અધિપ્પાયો. પપ્પટિકમ્પીતિ અલ્લતચમત્થકે સુક્ખતચપટલમ્પિ. ‘‘અલ્લસ્મિ’’ન્તિ ઇમિના બ્યતિરેકેન મતરુક્ખે દોસાભાવં દીપેતિ. ‘‘તચં વિકોપેત્વા’’તિ વચનતો રુક્ખતચમ્પિ પપ્પટિકમ્પિ સાલકપિત્થાદિનિય્યાસમ્પિ રુક્ખે અલ્લતચં અવિકોપેત્વા મત્થકતો છિન્દિત્વા ગહેતું વટ્ટતિ.

૧૦૨૩. અક્ખરચ્છિન્દનારહેસુ નુહિકદલિઆદીસુ રુક્ખેસુ, તત્થજાતેસુ તાલપણ્ણાદિકેસુ વા અક્ખરં લિખતો પાચિત્તિયમુદીરયેતિ યોજના. ‘‘તત્થજાતેસૂ’’તિ ઇમિના રુક્ખતો અપનીતપણ્ણેસુ લિખિતું વટ્ટતીતિ બ્યતિરેકતો દીપેતિ.

૧૦૨૪. ‘‘પક્કમેવ વા’’તિ વિસું વચનતો ‘‘ફલં વા’’તિ ઇમિના અપક્કં ફલં ગહિતં.

૧૦૨૫. ફલિનિંસાખન્તિ ખાદનારહફલવતિં જમ્બુસાખાદિકં સાખં. ગણ્હતો અનુપસમ્પન્નસ્સાતિ ગહેતબ્બં. સયં ખાદિતુકામો ચેતિ તથા ઓનમિત્વા સાખતો ઓચિનિત્વા દિન્નફલં સચે સયં ખાદિતુકામો હોતિ. એવં દાતુન્તિ યથાવુત્તપ્પકારં નામેત્વા દાતું.

૧૦૨૬. પરં કઞ્ચિ ઉક્ખિપિત્વાતિ અઞ્ઞં કઞ્ચિ અનુપસમ્પન્નં ઉક્ખિપિત્વા. પુપ્ફાનિ ઓચિનન્તેસૂતિ કુસુમાનિ લુનન્તેસુ. અયમેવ વિનિચ્છયોતિ સામઞ્ઞનિદ્દેસેપિ એત્થ અત્તનો નામેત્વા દિન્નસાખાય પુપ્ફાનિ પાનીયવાસત્થાય ન ગહેતબ્બાનિ. અનુપસમ્પન્નં ઉક્ખિપિત્વા પુપ્ફાનિ ઓચિનાપેત્વા ગહિતપુપ્ફાનિ ગહેતબ્બાનીતિ અયમેત્થ વિસેસો. યથાહ અટ્ઠકથાયં ‘‘તેહિ પન પુપ્ફેહિ પાનીયં ન વાસેતબ્બં. પાનીયવાસત્થિકેન સામણેરં ઉક્ખિપિત્વા ઓચિનાપેતબ્બાની’’તિ (પાચિ. અટ્ઠ. ૯૨).

૧૦૨૭. ‘‘સાખા’’તિ ભિન્દિત્વા વા છિન્દિત્વા વા મોચિતા વુચ્ચતિ. સાખીનન્તિ રુક્ખાનં. તન્તિ યથાવુત્તરુક્ખતો મોચિતસાખં. યેસં રુક્ખાનં સાખા રુહતિ, તેસં સાખીનં તં સાખં કપ્પિયં અકારાપેત્વા વિકોપેન્તસ્સ દુક્કટન્તિ યોજના. ‘‘યેસં રુક્ખાનં સાખા રુહતી’’તિ વુત્તત્તા યેસં સાખા ન રુહતિ, તેસં તસ્સા કપ્પિયકરણકિચ્ચં નત્થીતિ વદન્તિ.

૧૦૨૮. અલ્લસિઙ્ગિવેરાદિકેસુપીતિ આદિ-સદ્દેન વચલસુણાદીનં ગહણં.

૧૦૨૯. અનિયામતો વટ્ટતેવાતિ યોજના. નિયામસરૂપં દસ્સેતું ‘‘ઇમં રુક્ખ’’ન્તિઆદિવક્ખમાનત્તા અનિયામતોતિ સામઞ્ઞનિદ્દેસે ‘‘ઇમ’’ન્તિ નિયામવચનાભાવતોતિ ગહેતબ્બં.

૧૦૩૨. ઉચ્છુખણ્ડાનન્તિ પૂરણયોગે સામિવચનં, ઉચ્છુખણ્ડેહીતિ વુત્તં હોતિ. સબ્બમેવાતિ પચ્છિયં ઠિતં સબ્બં ખણ્ડં. કતં હોતીતિ કતં કપ્પિયં હોતિ. એકસ્મિં કપ્પિયે કતેતિ પચ્છિયં સબ્બખણ્ડેસુ ફુસિત્વા ઠિતેસુ એકસ્મિં ખણ્ડે કપ્પિયે કતે. ‘‘અનુજાનામિ ભિક્ખવે પઞ્ચહિ સમણકપ્પેહિ ફલં પરિભુઞ્જિતું અગ્ગિપરિજિતં સત્થપરિજિતં નખપરિજિતં અબીજં નિબ્બટ્ટબીજંયેવ પઞ્ચમ’’ન્તિ (ચૂળવ. ૨૫૦) ઇતિ વુત્તેસુ અગ્ગિસત્થનખેસુ અઞ્ઞતરેન તત્ત અયોખણ્ડેન વા જલિતગ્ગિના વા સૂચિમુખેન વા નખચ્છેદનેન વા સત્થકધારાય વા મનુસ્સસીહાદીનં ઉપ્પાટિતાનુપ્પાટિતઅપૂતિનખેન વા વિજ્ઝિત્વા વા છિન્દિત્વા વા કપ્પિયં કાતબ્બં. કરોન્તેન ચ અનુપસમ્પન્નેન ભિક્ખુના ‘‘કપ્પિયં કરોહી’’તિ વુત્તેયેવ ‘‘કપ્પિય’’ન્તિ પઠમં વત્વા પચ્છા અગ્ગિપરિજિતાદિ કાકબ્બન્તિ ગહેતબ્બં. વક્ખતિ ચ ‘‘કપ્પિયન્તિ…પે… વટ્ટતી’’તિ. ‘‘કપ્પિય’’ન્તિ વચનં પન યાય કાયચિ વાચાય વત્તું વટ્ટતીતિ વદન્તિ. પઠમં અગ્ગિં નિક્ખિપિત્વા નખાદીહિ વા વિજ્ઝિત્વા વા છિન્દિત્વા વા કપ્પિયં કાતબ્બં. કરોન્તેન ચ તં અનુદ્ધરિત્વાવ ‘‘કપ્પિય’’ન્તિ વત્વા પચ્છા ઉદ્ધરિતું વટ્ટતીતિ વદન્તિ, ‘‘કપ્પિય’’ન્તિ વત્તુકામો ‘‘કપ્પ’’ન્તિ ચે વદતિ, વટ્ટતીતિ કેચિ.

૧૦૩૩. દારુન્તિ ઉચ્છૂહિ સદ્ધિં એકતોબદ્ધદારું. દારું વિજ્ઝતીતિ એત્થ જાનિત્વાપિ વિજ્ઝતિ વા વિજ્ઝાપેતિ વા, વટ્ટતિયેવ. ‘‘એકસિત્થેપી’’તિ એત્થાપિ એસેવ નયો.

૧૦૩૪. તાનિ ઉચ્છુદારૂનિ. તન્તિ વલ્લિં, રજ્જું વા.

૧૦૩૫. મરિચપક્કેહીતિ પરિણતેહિ મરિચપક્કેહિ. અપરિણતાનં પન અબીજત્તા કપ્પિયે અકતેપિ વટ્ટતિ. ઇદઞ્ચ સેતલસુણતચલસુણાદીહિ મિસ્સભત્તસ્સ ઉપલક્ખણં. એત્થ ચ ભત્તસિત્થસમ્બન્ધવસેન એકાબદ્ધતા વેદિતબ્બા, ન ફલાદીનમેવ અઞ્ઞમઞ્ઞસમ્બન્ધવસેન.

૧૦૩૬. તિલતણ્ડુલકાદિસૂતિ કપ્પિયં કાતબ્બતિલેહિ મિસ્સતણ્ડુલાદીસુ. આદિ-સદ્દેન કપ્પિયં કાતબ્બવત્થૂહિ મિસ્સિતાનિ ઇતરવત્થૂનિ ગહિતાનિ. એકાબદ્ધે કપિત્થેપીતિ કટાહેન બદ્ધબીજે પરિણતકપિત્થફલેપિ. કટાહેતિ બદ્ધમિઞ્જે કપાલે.

૧૦૩૭. કટાહં મુઞ્ચિત્વાતિ સુક્ખત્તા સમન્તતો કટાહં મુઞ્ચિત્વા. મિઞ્જકન્તિ પરિણતકપિત્થફલમિઞ્જં. તં કપિત્થં ભિન્દાપેત્વાતિ કપિત્થકટાહં ભિન્દાપેત્વા, ઇદં બીજતો મુત્તસ્સ કટાહસ્સ ભાજનગતિકત્તા વુત્તં.

૧૦૩૮. ‘‘અભૂતગામઅબીજેસૂ’’તિ પદચ્છેદો, અભૂતગામે ચ અબીજે ચાતિ અત્થો. નનુ ચ ‘‘અબીજે બીજસઞ્ઞી, વેમતિકો, આપત્તિ દુક્કટસ્સા’’તિ (પાચિ. ૯૨) પાઠં વિના ‘‘અભૂતગામે ભૂતગામસઞ્ઞી’’તિ પાઠો નત્થીતિ અભૂતગામગ્ગહણં કસ્મા કતન્તિ? વુચ્ચતે – તસ્મિં પાઠે બીજં ભૂતગામઞ્ચ બીજગામં બીજઞ્ચ બીજબીજન્તિ વત્તબ્બે એકસેસનયેન ‘‘બીજ’’ન્તિ ગહેત્વા વિનિચ્છિતન્તિ ઉભયં વિભજિત્વા દસ્સનત્થં વુત્તં. તત્થ તસ્મિં અભૂતગામઅબીજગામદ્વયે. ઇમિસ્સા ગાથાય ‘‘અભૂતગામે ભૂતગામસઞ્ઞિનો દુક્કટં, વેમતિકસ્સ દુક્કટં, અબીજગામે બીજગામસઞ્ઞિનો દુક્કટં, વેમતિકસ્સ દુક્કટ’’ન્તિ ચત્તારિ દુક્કટાનિ દસ્સિતાનિ. તત્થ અભૂતગામન્તિ બીજગામં ગહેતબ્બં. અબીજગામન્તિ નો બીજં.

૧૦૩૯. તત્થ તસ્મિં ભૂતગામબીજગામદ્વયે. ‘‘અતથાસઞ્ઞિનો’’તિઆદીસુ ‘‘ભૂતગામં વિકોપેન્તસ્સા’’તિ સેસો, અનાપત્તિ પકાસિતાતિ સમ્બન્ધો, અભૂતગામં, અબીજન્તિ વા સઞ્ઞિનો ભૂતગામં બીજમ્પિ વિકોપેન્તસ્સ અનાપત્તિ પકાસિતાતિ અત્થો ગહેતબ્બો. યથાહ પાળિયં ‘‘બીજે અબીજસઞ્ઞી છિન્દતિ વા…પે… અનાપત્તી’’તિ.

અસઞ્ચિચ્ચ ભૂતગામં વિકોપેન્તસ્સ અનાપત્તીતિ યોજના. એવમુપરિપિ યોજેતબ્બં. ગચ્છન્તસ્સ પાદેસુ ગહેત્વા વા આલમ્બણકત્તરયટ્ઠિયા ઘંસિત્વા વા તિણાદીસુ છિજ્જેસુપિ ‘‘ઇમં છિન્દિસ્સામી’’તિ અમનસિકતત્તા અનાપત્તીતિ અત્થો. અસતિસ્સાતિ અઞ્ઞવિહિતસતિસ્સ વા અઞ્ઞેન કથયતો વા પાદઙ્ગુટ્ઠાદીહિ તિણાદીનિ છિન્દન્તસ્સ. ચ-કારેન ઇધ અવુત્તં ‘‘અજાનન્તસ્સા’’તિ ઇદં સમુચ્ચિતં. ‘‘ઇમં ભૂતગામ’’ન્તિ વા ‘‘ઇમસ્મિં અગ્ગિમ્હિ પતિતે ઇમં ડય્હતી’’તિ વા ‘‘ઇમિના ઇદં ભિજ્જતિ છિજ્જતી’’તિઆદિં વા અજાનન્તસ્સ અનાપત્તીતિ અત્થો.

૧૦૪૦. ઇદં ચાતિ ઇદં ભૂતગામસિક્ખાપદઞ્ચ. તિસમુટ્ઠાનન્તિ કાયચિત્તવાચાચિત્તકાયવાચાચિત્તવસેન તિસમુટ્ઠાનં. છેદનાદિકિરિયાય આપજ્જનતો ક્રિયં. તિચિત્તન્તિ પણ્ણત્તિં અજાનિત્વા ચેતિયાદીસુ તિણગહનાદિકં કરોન્તસ્સ અખીણાસવસ્સ કુસલં, ખીણાસવસ્સ કિરિયં, ફલપુપ્ફાદિલોભેન વિકોપેન્તાનં સેખપુથુજ્જનાનં અકુસલન્તિ તિચિત્તં.

ભૂતગામકથાવણ્ણના.

૧૦૪૧. અઞ્ઞવાદવિહેસકે કમ્મસ્મિં સઙ્ઘેન કતેતિ યોજના, અઞ્ઞવાદકવિહેસકારોપનકમ્મે ઞત્તિદુતિયાય કમ્મવાચાય પચ્ચેકં સઙ્ઘેન કતેતિ અત્થો. ‘‘અઞ્ઞં વદતીતિ અઞ્ઞવાદકં, અઞ્ઞેનઞ્ઞં પટિચરણસ્સેતં નામં. વિહેસેતીતિ વિહેસકં, તુણ્હીભૂતસ્સેતં નામ’’ન્તિ (પાચિ. અટ્ઠ. ૯૮) વચનતો સઙ્ઘમજ્ઝે વત્થુના, આપત્તિયા વા ચોદનાય કતાય તં અવત્તુકામો હુત્વા ‘‘કો આપન્નો, કિં આપન્નો, કિસ્મિં આપન્નો’’તિઆદિના (પાચિ. ૯૪) પદભાજનાનુક્કમેન પુચ્છિતં ઠપેત્વા અઞ્ઞસ્સ અવચનં અઞ્ઞેનઞ્ઞં પટિચરણં, તં કરોન્તો અઞ્ઞવાદકો. ઇધ પન ભાવપ્પધાનવસેન કિરિયા ગહિતા.

તથેવ ચોદિયમાનો હુત્વા પુચ્છિતં અવત્તુકામો હુત્વા આપત્તિભીરુકતાય અઞ્ઞેનઞ્ઞં પટિચરણં અકત્વા સઙ્ઘં વિહેસેતું તુણ્હીભૂતો વિહેસકો નામ. એત્થાપિ ભાવપ્પધાનવસેન કિરિયાવ ગહેતબ્બા. ઇધ પન તબ્ભાવારોપનકમ્મં વુચ્ચતીતિ સંખેપો. પુન તથા કરોન્તસ્સાતિ પુનપિ તેનેવ પકારેન અઞ્ઞવાદકવિહેસકાનિ વિસું વિસું કરોન્તસ્સ. પાચિત્તિયદ્વયં હોતીતિ પદભાજને ‘‘રોપિતે અઞ્ઞવાદકે’’તિઆદિના (પાચિ. ૧૦૦) નયેન ચ ‘‘રોપિતે વિહેસકે’’તિઆદિના (પાચિ. ૧૦૦) નયેન ચ વિસું વિસું પાચિત્તિયસ્સ વુત્તત્તા એકેકસ્મિં વત્થુમ્હિ એકેકાય આપત્તિયા સમ્ભવતો પાચિત્તિયદ્વયં હોતીતિ ગહેતબ્બં.

૧૦૪૨. ધમ્મેતિ એત્થ ‘‘કમ્મે’’તિ સેસો. ધમ્મકમ્મે ધમ્મકમ્મસઞ્ઞી, વેમતિકો, અધમ્મકમ્મસઞ્ઞીતિ તીસુ વિકપ્પેસુ. અધમ્મેતિ એત્થાપિ એસેવ નયો. કમ્મે અરોપિતેતિ અઞ્ઞવાદકકમ્મારોપને અકતે. એવં વદન્તસ્સાતિ ‘‘કો આપન્નો’’તિઆદીનિ વદન્તસ્સ. વદન્તસ્સ ચાતિ એત્થ ચકારેન કમ્મે અરોપિતે એવં વિહેસન્તસ્સ ચ દુક્કટન્તિ સમુચ્ચિનોતિ. ઇમસ્મિં પક્ખે કમ્મે અરોપિતેતિ વિહેસકકાલમાહ.

૧૦૪૩. આપન્નન્તિ અત્તના આપન્નં. ભણ્ડનં ભવિસ્સતીતિ સઞ્ઞિસ્સાતિ મયા ઇમસ્મિં વુત્તે સઙ્ઘસ્સ ભણ્ડનકલહાદયો હોન્તીતિ સઞ્ઞાય તુણ્હી ભવન્તસ્સ. ગિલાનસ્સાતિ વત્તું અસક્કુણેય્યમુખરોગાદિયુત્તસ્સ.

૧૦૪૪. ક્રિયાક્રિયન્તિ અઞ્ઞેનઞ્ઞપટિચરણં ક્રિયં. તુણ્હીભાવો અક્રિયં.

અઞ્ઞવાદકકથાવણ્ણના.

૧૦૪૫-૬. સમ્મતસ્સાતિ ખન્ધકાગતસેનાસનપઞ્ઞાપકસમ્મુતિઆદીસુ તેરસસુ સમ્મુતીસુ એકં વા કતિપયા વા સબ્બા વા દાતું સઙ્ઘેન ઞત્તિં ઠપેત્વા કમ્મવાચં વત્વા દિન્નસમ્મુતિકસ્સ. ‘‘ઉપસમ્પન્નં સઙ્ઘેન સમ્મત’’ન્તિ (પાચિ. ૧૦૬) વચનતો ભિક્ખુનોતિ ઉપસમ્પન્નમાહ, અયસં કત્તુકામોતિ સમ્બન્ધો. વદન્તોતિ ‘‘છન્દેન ઇત્થન્નામો સેનાસનં પઞ્ઞાપેતિ, છન્દેન ભત્તાનિ ઉદ્દિસતી’’તિઆદિં ભણન્તો. ‘‘ઉપસમ્પન્ને’’તિ ઇદં ‘‘ઉજ્ઝાપેતી’’તિ કિરિયમપેક્ખિત્વા કમ્મનિ ઉપયોગબહુવચનં. અયઞ્હેત્થ અત્થો – ઉજ્ઝાપેતિ અવઞ્ઞાય ઓલોકાપેતિ, લામકતો વા ચિન્તાપેતિ, ખીયતીતિ ‘‘છન્દેન ઇત્થન્નામો સેનાસનં પઞ્ઞપેતી’’તિઆદિં કથેન્તો પકાસેતીતિ. ઇમસ્મિં પક્ખે ‘‘ઉપસમ્પન્નાન’’ન્તિ વત્તબ્બે સામિઅત્થે ઉપયોગવસેન ‘‘ઉપસમ્પન્ને’’તિ વુત્તં, ઉપસમ્પન્નાનં સન્તિકે પકાસેતીતિ અત્થો.

‘‘પાચિત્તિયદ્વયં હોતી’’તિ ઇદં ‘‘ઉજ્ઝાપનકે ખિય્યનકે પાચિત્તિય’’ન્તિ (પાચિ. ૧૦૫) દ્વિન્નં વત્થૂનં એકતો વુત્તત્તા ઇધાપિ એકતો વુત્તં, વિસું વિસું પન ગહેતબ્બં. ધમ્મેતિ એત્થ ‘‘કમ્મે’’તિ સેસો, ઉપસમ્પન્નસ્સ સમ્મતસ્સ સઙ્ઘેન દિન્નસમ્મુતિકમ્મં સચે ધમ્મકમ્મં હોતીતિ અત્થો. અધમ્મેતિ એત્થાપિ એસેવ નયો.

૧૦૪૭-૮. ભિક્ખુનોતિ સમ્મતસ્સ ભિક્ખુનો. અસમ્મતસ્સ ભિક્ખુસ્સ અવણ્ણં ભાસતોતિ યોજના. યસ્સ કસ્સચીતિ એત્થ ‘‘સન્તિકે’’તિ સેસો, ઉપસમ્પન્નસ્સ ચ અનુપસમ્પન્નસ્સ ચ યસ્સ કસ્સચિ સન્તિકેતિ અત્થો. ઉપસમ્પન્નકાલે સમ્મતં પચ્છા સામણેરભાવં ઉપગતં સન્ધાય ‘‘સમ્મતસ્સ સામણેરસ્સા’’તિ વુત્તં. અવણ્ણં વદતોતિ યોજના.

૧૦૪૯. કરોન્તં સમ્મતં. ભણતોતિ ઉજ્ઝાપયતો, ખીયતો. અત્થો પન વુત્તનયોવ. ઉજ્ઝાપનખીયનકિરિયાહિ આપજ્જનતો ક્રિયં. યસ્મા ઉજ્ઝાપનં, ખીયનઞ્ચ મુસાવાદવસેનેવ પવત્તં, તસ્મા ‘‘આદિકમ્મિકસ્સ અનાપત્તી’’તિ પાચિત્તિયટ્ઠાને, દુક્કટટ્ઠાને ચ ઇમિના ચ અનાપત્તિદસ્સનત્થં વુત્તન્તિ ગહેતબ્બં. એવઞ્ચ કત્વા ઉજ્ઝાપેન્તસ્સ, ખીયન્તસ્સ ચ એકક્ખણે દ્વે દ્વે આપત્તિયો હોન્તીતિ આપન્નં.

ઉજ્ઝાપનકકથાવણ્ણના.

૧૦૫૦. સઙ્ઘસ્સ મઞ્ચાદિન્તિ સમ્બન્ધો. ‘‘સઙ્ઘિકં મઞ્ચં વા પીઠં વા ભિસિં વા કોચ્છં વા’’તિ પાળિયં દસ્સિતં સઙ્ઘસન્તકં મઞ્ચાદિં. એત્થ ચ મઞ્ચો નામ પાળિયં ‘‘ચત્તારો મઞ્ચા મસારકો બુન્દિકાબદ્ધો કુળીરપાદકો આહચ્ચપાદકો’’તિ (પાચિ. ૧૧૧) ચ દસ્સિતો ચતુબ્બિધો મઞ્ચો. તત્થ મસારકો નામ મઞ્ચપાદે વિજ્ઝિત્વા તત્થ અટનિસિખાહિ આવુણિત્વા કતમઞ્ચો. સો ઇદાનિ વત્તમાનો વેત્તમઞ્ચો. બુન્દિકાબદ્ધો નામ અટનિસીસેસુ બુન્દિકરન્તરતો મઞ્ચપાદે ડંસાપેત્વા કતો વેત્તમઞ્ચપદરમઞ્ચો દટ્ઠબ્બો. કુળીરપાદકો નામ પાદબુન્દે અસ્સખુરાદિઆકારં દસ્સેત્વા કક્કટપાદેહિ વિય વઙ્કપાદેહિ યોજિતમઞ્ચો. આહચ્ચપાદકો નામ અટનિયો વિજ્ઝિત્વા અટનિછિદ્દે પાદસીસે સિખં કત્વા તં પવેસેત્વા અટનિયા ઉપરિ નિક્ખન્તે પાદસિખામત્થકે તિરિયં વિજ્ઝિત્વા આણિં પવેસેત્વા કતમઞ્ચો.

પીઠં નામ એવમેવ કતં તન્નામકમેવ ચતુબ્બિધં;

ભિસિ નામ ‘‘પઞ્ચ ભિસિયો ઉણ્ણભિસિ ચોળભિસિ વાકભિસિ તિણભિસિ પણ્ણભિસી’’તિ ગબ્ભવસેન દસ્સિતા પઞ્ચ ભિસિયો. તત્થ ઉણ્ણા નામ મનુસ્સલોમં ઠપેત્વા અવસેસલોમાનિ. ચોળા નામ પિલોતિકા. વાકં નામ મકચિવાકાદિકં. તિણં નામ દબ્બતિણાદિ. પણ્ણં નામ તમાલપણ્ણં ઠપેત્વા અવસેસપણ્ણં.

કોચ્છન્તિ પાળિયં ‘‘કોચ્છં નામ વાકમયં વા ઉસીરમયં વા મુઞ્જમયં વા પબ્બજમયં વા અન્તો સંવેઠેત્વા બદ્ધં હોતી’’તિ (પાચિ. ૧૧૧) દસ્સિતં વાકં વા ઉસીરં વા મુઞ્જતિણં વા એળકલોમાનિ વા પબ્બજતિણં વા આદાય ઉભોહિ કોટીહિ વિત્થતં કત્વા મજ્ઝે પીળેત્વા સઙ્કુચિત્વા તં બન્ધિત્વા સીહચમ્માદીહિ વેઠનબન્ધનાનિ પટિચ્છાદેત્વા પાદપુઞ્છની વિય નિસજ્જત્થાય કતં આસનન્તિ વદન્તિ. યથાહ અટ્ઠકથાયં ‘‘હેટ્ઠા ચ ઉપરિ ચ વિત્થતં, મજ્ઝે સંખિત્તં, પણવસણ્ઠાનં કત્વા બદ્ધં હોતિ, તં કિર મજ્ઝે સીહબ્યગ્ઘચમ્મપરિક્ખિત્તમ્પિ કરોન્તિ. અકપ્પિયચમ્મં નામેત્થ નત્થી’’તિઆદિ (પાચિ. અટ્ઠ. ૧૧૧). સન્થરાપેત્વાતિ ઉપસમ્પન્નેન વા અનુપસમ્પન્નેન વા સન્થરાપેત્વા. એત્થ વિનિચ્છયં વક્ખતિ. સન્થરિત્વાતિ સયં સન્થરિત્વા વા.

૧૦૫૧. નેવુદ્ધરેય્યાતિ પઞ્ઞત્તટ્ઠાનતો ઉદ્ધરિત્વા ન પટિસામેય્ય. ન ઉદ્ધરાપેય્ય વાતિ અઞ્ઞેન વા તથા ન કારાપેય્ય. તન્તિ મઞ્ચાદિં. પક્કમન્તોતિ એત્થ ‘‘યો ભિક્ખૂ’’તિ લબ્ભતિ, મઞ્ચાદીનં અત્થતટ્ઠાનતો થામમજ્ઝિમસ્સ પુરિસસ્સ થામપ્પમાણેન હત્થં પસારેત્વા ખિત્તપાસાણસ્સ પતનટ્ઠાનં અતિક્કમ્મ ગચ્છન્તોતિ અત્થો. યથાહ પાળિયં ‘‘મજ્ઝિમસ્સ પુરિસસ્સ લેડ્ડુપાતં અતિક્કમન્તસ્સા’’તિ.

૧૦૫૨. વસ્સિકે ચતુરો માસેતિ અન્તોવસ્સં ચાતુમાસે. સચે દેવો ન વસ્સતીતિ એત્થ ‘‘કત્થચિ જનપદે’’તિ સેસો. તેનેવ ‘‘સચે’’તિ સાસઙ્કમાહ. ‘‘યેસુ જનપદેસુ વસ્સકાલે ન વસ્સતિ, તેસુપિ ચત્તારો માસે નિક્ખિપિતું ન વટ્ટતિયેવા’’તિ (પાચિ. અટ્ઠ. ૧૧૦) અટ્ઠકથાયં વુત્તં. તથા ચાપીતિ તે ચત્તારો માસે અવસ્સન્તેપિ.

૧૦૫૩. યત્થાતિ યસ્મિં લઙ્કાદીપસદિસે દેસે. યત્થ અપરેપિ હેમન્તે ચત્તારો માસે દેવો વસ્સતિ, તત્થ અટ્ઠ માસે અજ્ઝોકાસે મઞ્ચાદિં ઠપેતું ન વટ્ટતીતિ યોજના. ગિમ્હાને પન ચત્તારો માસે બહિ ઠપેતું વટ્ટતીતિ બ્યતિરેકતો દસ્સેતિ.

૧૦૫૪. નિવાસસ્મિન્તિ રુક્ખે કુલાવકં કત્વા નિરન્તરવાસે સતિ. યથાહ અટ્ઠકથાયં ‘‘યસ્મિં પન ધુવનિવાસેન કુલાવકે કત્વા વસન્તી’’તિ (પાચિ. અટ્ઠ. ૧૧૦). કદાચિપીતિ અનોવસ્સકાલેપિ.

૧૦૫૫-૬. સઙ્ઘિકં યં કિઞ્ચિ મઞ્ચાદીતિ યોજના. સન્થતં યદીતિ અનાણત્તેન યદિ અત્થતં, પઞ્ઞત્તન્તિ વુત્તં હોતિ. યત્થ કત્થચિ ઠાનેતિ રુક્ખમૂલમણ્ડપઅબ્ભોકાસાદિમ્હિ યત્થ કત્થચિ ઠાને. યેન કેનચીતિ સદ્ધિવિહારિકેન વા અન્તેવાસિકેન વા અઞ્ઞેન વા. ભિક્ખુનાતિ ઉપસમ્પન્નેન. સોતિ યસ્સત્થાય પઞ્ઞત્તં, સો ભિક્ખુ.

૧૦૫૭. તન્તિ તં સઙ્ઘિકં વેત્તમઞ્ચાદિં. સન્થરાપિત-સદ્દો કત્તુસાધનો, સન્થરિતું નિયોજકસ્સેવ ભિક્ખુનોતિ અત્થો.

૧૦૫૮. ભિક્ખુનાતિ એત્થ ‘‘આણાપકો’’તિ વક્ખમાનત્તા આણત્તેન ભિક્ખુના ઉપસમ્પન્નેનાતિ લબ્ભતિ. તસ્સેવાતિ આણત્તિયા આસનપઞ્ઞાપકસ્સ તસ્સેવ ભિક્ખુનો. ‘‘નિસીદતી’’તિ વચનસ્સ ઉપલક્ખણત્તા આગન્ત્વા થવિકં વા ચીવરં વા યં કિઞ્ચિદેવ ઠપેતિ, ‘‘મય્હમેવ ભારો’’તિ વા વદતિ, પઞ્ઞાપકો મુચ્ચતીતિ ગહેતબ્બો.

૧૦૫૯-૬૦. અનાપુચ્છાતિ એત્થ ‘‘યો ભિક્ખુ વા સામણેરો વા આરામિકો વા લજ્જી હોતિ, અત્તનો પલિબોધં વિય મઞ્ઞતી’’તિ (પાચિ. અટ્ઠ. ૧૧૩) અટ્ઠકથાય વુત્તસરૂપં યં કઞ્ચિ અનાપુચ્છાતિ અત્થો. ‘‘ભિક્ખુ વા સામણેરો વા આરામિકો વા લજ્જી હોતી’’તિ (પાચિ. અટ્ઠ. ૧૧૩) વુત્તત્તા અલજ્જિં આપુચ્છિત્વા ગન્તું ન વટ્ટતીતિ વદન્તિ. ‘‘મયં ગમિસ્સામા’’તિ વત્વા અનુમતિગહણં આપુચ્છનં નામ, તં અનાપત્તિયા કથં અઙ્ગં હોતીતિ ચે? ગમનસ્સ અનુમતિયા લદ્ધત્તા. ‘‘કપ્પં લભિત્વા ગન્તબ્બ’’ન્તિ વચનતો અનુમતિદાયકેન વત્તાવત્તં સમ્પટિચ્છિતં વિય હોતીતિ લદ્ધકપ્પત્તા એવં ગચ્છતિ ચે, વટ્ટતિ. અનિય્યાતેત્વાતિ નિય્યાતનં અકત્વા વત્તાવત્તં અપ્પટિયાદેત્વા, અસમ્પટિચ્છાપેત્વાતિ વુત્તં હોતિ. વારેતિ પદવારે.

૧૦૬૨. તસ્મા ઠાનાતિ અત્તના ઠત્વા આણાપિતભોજનસાલતો. યથાહ અટ્ઠકથાયં ‘‘ભોજનસાલતો નિક્ખમિત્વા અઞ્ઞત્થ ગચ્છતી’’તિ (પાચિ. અટ્ઠ. ૧૧૧).

૧૦૬૩. સઙ્ઘિકે સઙ્ઘિકસઞ્ઞિવેમતિકપુગ્ગલિકસઞ્ઞીનં વસેન તિકપાચિત્તિયં. તિકાતીતેનાતિ અકુસલમૂલત્તિકાદિતો સવાસનસમુચ્છેદપ્પહાનવસેન અતિક્કન્તેન. તિકદુક્કટન્તિ ‘‘પુગ્ગલિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી અઞ્ઞસ્સ પુગ્ગલિકે આપત્તિ દુક્કટસ્સા’’તિ (પાચિ. ૧૧૨) વચનતો દુક્કટત્તયં હોતિ.

૧૦૬૪-૫. ચિમિલિકં નામ પરિકમ્મકતાય ભૂમિયા છવિરક્ખનત્થં અત્થરિતબ્બપિલોતિકં. તટ્ટિકા નામ તાલપણ્ણાદીહિ કતતટ્ટિકા. ચમ્મં સીહચમ્માદિ. સેનાસનપરિક્ખારે અકપ્પિયચમ્મં નામ નત્થિ. યથાહ ‘‘અટ્ઠકથાસુ હિ સેનાસનપરિભોગે પટિક્ખિત્તચમ્મં નામ ન દિસ્સતિ, તસ્મા સીહચમ્માદીનં પરિહરણેયેવ પટિક્ખેપો વેદિતબ્બો’’તિ (પાચિ. અટ્ઠ. ૧૧૨). ઇમસ્સ ચ અટ્ઠકથાપાઠસ્સ સારત્થદીપનિયા (સારત્થ. ટી. પાચિત્તિય ૩.૧૧૨) એવં અત્થો વણ્ણિતો –

‘‘સીહચમ્માદીનં પરિહરણેયેવ પટિક્ખેપો વેદિતબ્બો’’તિ ઇમિના ‘‘ન ભિક્ખવે મહાચમ્માનિ ધારેતબ્બાનિ સીહચમ્મં બ્યગ્ઘચમ્મં દીપિચમ્મં, યો ધારેય્ય, આપત્તિ દુક્કટસ્સા’’તિ એવં વુત્તાય ખન્ધકપાળિયા અધિપ્પાયં વિભાવેતિ. ઇદં વુત્તં હોતિ – ‘‘અન્તોપિ મઞ્ચે પઞ્ઞત્તાનિ હોન્તિ, બહિપિ મઞ્ચે પઞ્ઞત્તાનિ હોન્તી’’તિ (મહાવ. ૨૫૫) ઇમસ્મિં વત્થુસ્મિં સિક્ખાપદસ્સ પઞ્ઞત્તત્તા મઞ્ચપીઠેસુ અત્થરિત્વા પરિભોગોયેવ પટિક્ખિત્તો, ભૂમત્થરણવસેન પરિભોગો પન અપ્પટિક્ખિત્તોતિ. યદિ એવં ‘‘પરિહરણેયેવ પટિક્ખેપો’’તિ ઇદં કસ્મા વુત્તન્તિ? યથા ‘‘અનુજાનામિ ભિક્ખવે સબ્બં પાસાદપરિભોગ’’ન્તિ (ચૂળવ. ૩૨૦) વચનતો પુગ્ગલિકેપિ સેનાસને સેનાસનપરિભોગવસેન નિયમિતં સુવણ્ણઘટાદિકં પરિભુઞ્જિતું વટ્ટમાનમ્પિ કેવલં અત્તનો સન્તકં કત્વા પરિભુઞ્જિતું ન વટ્ટતિ, એવમિદં ભૂમત્થરણવસેન પરિભુઞ્જિયમાનમ્પિ અત્તનો સન્તકં કત્વા તં તં વિહારં હરિત્વા પરિભુઞ્જિતું ન વટ્ટતીતિ દસ્સનત્થં ‘‘પરિહરણેયેવ પટિક્ખેપો વેદિતબ્બો’’તિ વુત્તન્તિ.

‘‘ફલક’’ન્તિ ઇમિના પાઠાગતં ફલકપીઠમેવ દસ્સિતં. યથાહ અટ્ઠકથાયં ‘‘ફલકપીઠં નામ ફલકમયં પીઠ’’ન્તિ (પાચિ. અટ્ઠ. ૧૧૨). પાદપુઞ્છનિન્તિ કદલિવાકાદીહિ કતં પાદપુઞ્છનિકં. ભૂમત્થરણં નામ ચિમિલિકાય સતિ તસ્સા ઉપરિ, અસતિ સુદ્ધભૂમિયં અત્થરિતબ્બા કટસારકાદિવિકતિ. ઉત્તરત્થરણં નામ સઙ્ઘિકમઞ્ચપીઠાદીનં ઉપરિ અત્થરિતબ્બપચ્ચત્થરણં.

પત્તાધારકન્તિ પત્તવલયાધારકં. તં યથાવુત્તપરિક્ખારં. ગચ્છતોતિ લેડ્ડુપાતં અતિક્કમ્મ ગચ્છતો. સચે પન દાયકેહિ દાનકાલેયેવ સહસ્સગ્ઘનકમ્પિ કમ્બલં ‘‘પાદપુઞ્છનિં કત્વા પરિભુઞ્જથા’’તિ દિન્નં, તથેવ પરિભુઞ્જિતું વટ્ટતિ. તસ્મા ઇમં મઞ્ચપીઠાદિસેનાસનમ્પિ ‘‘અબ્ભોકાસેપિ યથાસુખં પરિભુઞ્જથા’’તિ દાયકેહિ દિન્નં ચે, સબ્બસ્મિમ્પિ કાલે અબ્ભોકાસે નિક્ખિપિતું વટ્ટતીતિ વદન્તિ.

૧૦૬૬. આરઞ્ઞકેનાપિ સચે ગન્તબ્બં હોતિ, અનોવસ્સકે નોસતિ મઞ્ચપીઠાદિં રુક્ખસ્મિં લગ્ગેત્વા યથાસુખં ગન્તબ્બન્તિ યોજના.

૧૦૬૭. ઉપચિકાદીહીતિ એત્થ આદિ-સદ્દેન મૂસિકા ગહિતા. ન લુજ્જતીતિ ન નસ્સતિ. તં સબ્બન્તિ મઞ્ચાદિકં સકલં.

૧૦૬૮. અત્તનો સન્તકેતિ અત્તનો પુગ્ગલિકે મઞ્ચાદિવિસયે. રુદ્ધેતિ વુડ્ઢભિક્ખુના વા ઇસ્સરાદીહિ વા યક્ખસીહાદીહિ વા મઞ્ચાદિકે રુદ્ધે અજ્ઝાવુત્થે, અભિભવિત્વા ગહિતેતિ અત્થો. આપદાસુપીતિ બ્રહ્મચરિયન્તરાયાદીસુ ચ સન્તેસુ. ગચ્છતો ભિક્ખુનો અનાપત્તીતિ યોજના.

૧૦૬૯. કાયવાચતો, કાયવાચાચિત્તતો ચ સમુટ્ઠાનં કથિનસમુટ્ઠાનં નામ. પઞ્ઞત્તિં અજાનિત્વા સયં અનુદ્ધરન્તસ્સ કાયેન હોતિ, અનાપુચ્છન્તસ્સ વાચાય હોતિ, પઞ્ઞત્તિં જાનિત્વા એવં અકરોન્તસ્સ સચિત્તકેન તેનેવ દ્વયેન સમુટ્ઠાતીતિ વેદિતબ્બં. લેડ્ડુપાતાતિક્કમો ક્રિયં. મઞ્ચાદીનં અનુદ્ધરણાદિ અક્રિયં.

પઠમસેનાસનકથાવણ્ણના.

૧૦૭૦-૩. ભિસીતિ પઠમસિક્ખાપદે વુત્તપઞ્ચપ્પકારા ઇમિસ્સા અટ્ઠકથાય ‘‘મઞ્ચકભિસિ વા પીઠકભિસિ વા’’તિ (પાચિ. અટ્ઠ. ૧૧૬) એવં દસ્સિતભિસિ ચ. પચ્ચત્થરણં નામ પાવારો કોજવો વા. ‘‘એત્તકમેવ વુત્તન્તિ અટ્ઠકથાસુ વુત્તં. ‘ઇદઞ્ચ અટ્ઠકથાસુ તથાવુત્તભાવદસ્સનત્થં વુત્તં, અઞ્ઞમ્પિ તાદિસં મઞ્ચપીઠેસુ અત્થરિતબ્બં પચ્ચત્થરણમેવા’તિ તીસુપિ ગણ્ઠિપદેસુ વુત્ત’’ન્તિ (સારત્થ. અટ્ઠ. પાચિત્તિય ૩.૧૧૬) સારત્થદીપનિયા લિખિતં. નિસીદનન્તિ નિસીદનચીવરં.

તિણસન્થારો એરકાદીનિ તિણાનિ દ્વીસુ તીસુ ઠાનેસુ ગોપેત્વા કતસન્થારો. પણ્ણસન્થારો નામ નાળિકેરાદિપણ્ણે તથેવ ગોપેત્વા કતસન્થારો. સયન્તિ એત્થાતિ સેય્યા. ‘‘સબ્બચ્છન્નપરિચ્છન્ને’’તિ ઇદં સહસેય્યકથાય વુત્તત્થમેવ.

દસવિધં સેય્યન્તિ દસવિધાસુ સેય્યાસુ અઞ્ઞતરન્તિ વુત્તં હોતિ. સન્થરિત્વાપિ વાતિ એત્થ પિ-સદ્દો સમ્પિણ્ડનત્થો, સો સન્થરાપેત્વાપીતિ ઇમં સમ્પિણ્ડેતિ. વા-સદ્દં ‘‘સયં અનુદ્ધરિત્વા’’તિ એત્થ ‘‘અનુદ્ધરિત્વા વા’’તિ યોજેત્વા ‘‘અનુદ્ધરાપેત્વા વા’’તિ અયં વિકપ્પો સઙ્ગય્હતિ. તં સેય્યં.

આરામસ્સૂપચારન્તિ ‘‘અપરિક્ખિત્તસ્સ ઉપચારો નામ સેનાસનતો દ્વે લેડ્ડુપાતા’’તિ અટ્ઠકથાયં વુત્તં ઉપચારમાહ. અસ્સાતિ વિહારસ્સ પરિક્ખિત્તસ્સ.

૧૦૭૪. ઉભયેસન્તિ સેનાસનસેય્યાનં. અન્તોગબ્ભે સન્થરિત્વા ગચ્છતોતિ સમ્બન્ધો.

૧૦૭૫. ઉપચારે વિહારસ્સાતિ એત્થ વિહારો નામ અન્તોગબ્ભાદિસબ્બપરિચ્છન્નગુત્તસેનાસનં. યથાહ અટ્ઠકથાયં ‘‘વિહારોતિ અન્તોગબ્ભો વા અઞ્ઞં વા સબ્બપરિચ્છન્નં ગુત્તસેનાસનં વેદિતબ્બ’’ન્તિ (પાચિ. અટ્ઠ. ૧૧૭). તત્થ ઉપચારો નામ તંસમીપં ઠાનં. યથાહ ‘‘ઉપચારેતિ તસ્સ બહિ આસન્ને ઓકાસે’’તિ. મણ્ડપો નામ પરિચ્છન્નાપરિચ્છન્નસન્નિપાતમણ્ડપો. યથાહ ‘‘મણ્ડપે વાતિ અપરિચ્છન્ને પરિચ્છન્ને વાપિ બહૂનં સન્નિપાતમણ્ડપે’’તિ. આદિ-સદ્દેન ઉપટ્ઠાનસાલારુક્ખમૂલાનિ સઙ્ગહિતાનિ. ઉપટ્ઠાનસાલા નામ અગુત્તા ભોજનસાલા. યથાહ ‘‘ઉપટ્ઠાનસાલાયં વાતિ ભોજનસાલાયં વા’’તિ (પાચિ. અટ્ઠ. ૧૧૭). અગુત્તતા ચ ‘‘ઠાનસ્સ અગુત્તતાયા’’તિ (પાચિ. અટ્ઠ. ૧૧૭) અટ્ઠકથાવચનતો વેદિતબ્બાતિ.

૧૦૭૬. તિકપાચિત્તિયં વુત્તન્તિ ‘‘સઙ્ઘિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી’’તિ વારત્તયે પાચિત્તિયત્તયં વુત્તં. દસવત્થૂસુ ભવં તદન્તોગધત્તાતિ દસવત્થુકં, દસન્નં વા વત્થુ દસવત્થુ, તંયેવ દસવત્થુકન્તિ ભિસિઆદિકં અઞ્ઞતરં સેય્યાભણ્ડં. તસ્સાતિ સન્થારકસ્સ. ‘‘પુગ્ગલિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી અઞ્ઞસ્સ પુગ્ગલિકે આપત્તિ દુક્કટસ્સા’’તિ (પાચિ. ૧૧૭) તિકદુક્કટં દીપિતં.

૧૦૭૭. ઉદ્ધરિત્વાતિ અત્થતસેય્યં યથા ઉપચિકાહિ ન ખજ્જતિ, તથા પટિસામેત્વા, ‘‘ગચ્છતો’’તિ ઇમિના સમ્બન્ધો. અઞ્ઞેન વુદ્ધભિક્ખુઇસ્સરાદિના. પલિબુદ્ધેતિ સેનાસને પરિબુદ્ધે નિવારિતે.

૧૦૭૮. સાપેક્ખોવ ચ ગન્ત્વાતિ ‘‘અજ્જેવ ગન્ત્વા ઇદં પટિસામેસ્સામી’’તિ અપેક્ખાસહિતોવ ગામન્તરાદિં ગન્ત્વા. યથાહ ‘‘અજ્જેવ આગન્ત્વા પટિજગ્ગિસ્સામી’તિ એવં સાપેક્ખો નદીપારં વા ગામન્તરં વા ગન્ત્વા’’તિ (પાચિ. અટ્ઠ. ૧૧૮). તત્થ ઠત્વાતિ ગતટ્ઠાને ઠત્વા, તતો બહિ ગચ્છામીતિ ચિત્તે ઉપ્પન્નેતિ વુત્તં હોતિ. યથાહ ‘‘યત્થસ્સ ગમનચિત્તં ઉપ્પન્નં, તત્થેવ ઠિતો’’તિ (પાચિ. અટ્ઠ. ૧૧૮). તં પુચ્છતીતિ સમ્બન્ધો. તં સેય્યં કઞ્ચિ પેસેત્વા આપુચ્છતીતિ વુત્તં હોતિ. યથાહ ‘‘કઞ્ચિ પેસેત્વા આપુચ્છતી’’તિ (પાચિ. અટ્ઠ. ૧૧૮). એત્થ ચ પુરિમસિક્ખાપદે મઞ્ચાદીનં પઞ્ઞત્તટ્ઠાનતો અન્તોવિહારે વા હોતુ બહિ વા, લેડ્ડુપાતાતિક્કમેન, ઇધ ઉપચારાતિક્કમેન પાચિત્તિયન્તિ અયં વિસેસો વેદિતબ્બો.

અબ્ભોકાસમ્હિ મઞ્ચાદિં, વિહારે સેય્યમત્તકં;

હિત્વા વજન્તસ્સ દોસો, લેડ્ડુપાતૂપચારતોતિ.

દુતિયસેનાસનકથાવણ્ણના.

૧૦૭૯. યો ભિક્ખુ સઙ્ઘિકાવાસે પુબ્બુપગતં ભિક્ખું જાનં અનુપખજ્જ સેય્યં કપ્પેય્ય ચે, અસ્સ ભિક્ખુનો પાચિત્તિયં સિયાતિ યોજના. પુબ્બુપગતો નામ વસ્સગ્ગેન પાપેત્વા દિન્નં સેનાસનં ગહેત્વા વસન્તો. જાનન્તિ ‘‘અનુટ્ઠાપનીયો અય’’ન્તિ જાનન્તો. અનુટ્ઠાપનીયા નામ વુદ્ધાદયો. યથાહ પદભાજને ‘‘જાનાતિ નામ વુડ્ઢોતિ, ગિલાનોતિ, સઙ્ઘેન દિન્નોતિ જાનાતી’’તિ (પાચિ. ૧૨૧). અનુપખજ્જાતિ અનુપવિસિત્વા, તસ્સ પઠમં પઞ્ઞત્તં મઞ્ચાદીનં આસન્નતરં વક્ખમાનલક્ખણં ઉપચારં પવિસિત્વાતિ અત્થો. સેય્યં કપ્પેય્યાતિ દસવિધાસુ સેય્યાસુ અઞ્ઞતરં અત્થરિત્વા સયનં કરેય્ય, નિપજ્જેય્યાતિ વુત્તં હોતિ. વક્ખતિ ચ ‘‘દસસ્વઞ્ઞતરં સેય્ય’’ન્તિઆદિ. ‘‘નિસજ્જં વા’’તિ સેસો. યથાહ પદભાજને ‘‘અભિનિસીદતિ વા અભિનિપજ્જતિ વા’’તિ.

૧૦૮૦-૨. ઉદ્દિટ્ઠમત્થં નિદ્દિસિતુકામો પઠમં ‘‘અનુપખજ્જસેય્યં કપ્પેય્યા’’તિ એત્થ વિનિચ્છયં દસ્સેતુમાહ ‘‘પાદધોવનપાસાણા…પે… દુક્કટ’’ન્તિ. સેનાસનં પવિસન્તસ્સ ભિક્ખુનો પાદધોવનપાસાણા યાવ તં મઞ્ચં વા પીઠં વા નિક્ખમન્તસ્સ પન મઞ્ચપીઠતો યાવ પસ્સાવટ્ઠાનં, એત્થન્તરે તુ યં ઠાનં, ઇદમેવ ઉપચારોતિ વુચ્ચતીતિ યોજના. તત્થ ઉપચારેતિ યોજના. બાધેતુકામસ્સાતિ ‘‘યસ્સ સમ્બાધો ભવિસ્સતિ, સો પક્કમિસ્સતી’’તિ એવં ઉપ્પન્નચિત્તસ્સ. સયન્તિ એત્થાતિ વિગ્ગહો.

૧૯૮૩. ‘‘પાચિત્તિયસ્સા’’તિ ઉદ્દેસતો વુત્તં નિદ્દિસિતુમાહ ‘‘નિસીદન્તસ્સા’’તિઆદિ. તત્થાતિ તથા અનુપખજ્જ અત્થતાય સેય્યાય. ‘‘પાચિત્તિયદ્વય’’ન્તિ ઇદં ‘‘દ્વેપિ કરોન્તસ્સા’’તિ ઇમં પચ્છિમવિકપ્પં સન્ધાય વુત્તં. પુરિમવિકપ્પદ્વયે પન ‘‘નિસીદન્તસ્સ વા પાચિત્તિયં, નિપજ્જન્તસ્સ વા પાચિત્તિય’’ન્તિ વત્તબ્બં. ઇમસ્મિં વિકપ્પત્તયે પચ્ચેકં ‘‘તિકપાચિત્તિયં તિકદુક્કટ’’ન્તિ ઉભયસ્સાપિ વત્તબ્બતા અટ્ઠકથાયં વુત્તા. કથં? સઙ્ઘિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી નિસજ્જં કપ્પેતિ, પાચિત્તિયન્તિ નિસજ્જાય તિકપાચિત્તિયં, એવં સેય્યાય તિકપાચિત્તિયં, ઉભયત્થ તિકપાચિત્તિયદ્વયન્તિ એવં વિકપ્પદ્વયે દ્વાદસ પાચિત્તિયાનિ. પુગ્ગલિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી અઞ્ઞસ્સ પુગ્ગલિકે નિસજ્જં કપ્પેતિ, દુક્કટન્તિ નિસજ્જાય તિકદુક્કટં, એવં સેય્યાય તિકદુક્કટં, ઉભયત્થ તિકદુક્કટદ્વયન્તિ દ્વાદસ દુક્કટાનિ ચ વેદિતબ્બાનિ.

૧૦૮૪. કરોન્તસ્સાતિ એત્થ ‘‘નિસીદનાદિ’’ન્તિ પકરણતો લબ્ભતિ. તિકપાચિત્તિયં વુત્તન્તિ ‘‘સઙ્ઘિકે સઙ્ઘિકસઞ્ઞી, વેમતિકો, પુગ્ગલિકસઞ્ઞી’’તિ વિકપ્પત્તયે તિકપાચિત્તિયં પાળિયં (પાચિ. ૧૨૨) વુત્તં. એવં પુગ્ગલિકેપિ તિકદુક્કટં વુત્તં. તેનાહ ‘‘પુગ્ગલે તિકદુક્કટ’’ન્તિ. ઇમિના યથાવુત્તપાચિત્તિયદુક્કટાનિ સામઞ્ઞેન તિકે પક્ખિપિત્વા એવં વુત્તાનીતિ વેદિતબ્બં.

૧૦૮૫-૬. ‘‘વુત્તૂપચાર’’ન્તિઆદિગાથાદ્વયે વિહારસ્સ વુત્તૂપચારં મુઞ્ચિત્વા ઉપચારે વા અબ્ભોકાસેપિ વા સન્થરતોપિ વા સન્થરાપયતોપિ વા તત્થ નિસીદતો વા દુક્કટં વુત્તં. તત્થ સબ્બત્થેવ તસ્સ નિવાસો વારિતોતિ યોજના. તત્થ વિહારસ્સાતિ યથાવુત્તસેનાસનસ્સ. ઉપચારેતિ અવિદૂરે. અબ્ભોકાસેતિ તસ્સ સેનાસનસ્સ નચ્ચાસન્ને અઙ્ગણપ્પદેસે.

નિસીદતો વાતિ વાગ્ગહણેન નિપજ્જતો વા દ્વેપિ કરોન્તસ્સ વાતિ સઙ્ગણ્હાતિ. યથાહ પાળિયં ‘‘અભિનિસીદતિ વા અભિનિપજ્જતિ વા, આપત્તિ દુક્કટસ્સા’’તિ (પાચિ. ૧૨૨). તત્થાતિ તસ્મિં પુબ્બૂપગતસ્સ પત્તે સેનાસને. સબ્બત્થેવાતિ યથાવુત્તૂપચારતો અન્તો ચ બહિ ચ અન્તમસો અજ્ઝોકાસેપીતિ સબ્બત્થેવ. તસ્સાતિ અનત્તમનસ્સ અનુપખજ્જ સેય્યં કપ્પયતો તસ્સ વિસભાગપુગ્ગલસ્સ. નિવાસો વારિતો પરવિહેઠકેન સહવાસસ્સ મહાનત્થકરત્તાતિ અધિપ્પાયો. યથાહ અટ્ઠકથાયં ‘‘એવરૂપેન હિ વિસભાગપુગ્ગલેન એકવિહારે વા એકઙ્ગણે વા વસન્તેન અત્થો નત્થિ, તસ્મા સબ્બત્થેવસ્સ નિવાસો વારિતો’’તિ (પાચિ. અટ્ઠ. ૧૨૨).

૧૦૮૭. ‘‘સીતાદિઉપપીળિતસ્સા’’તિ પદચ્છેદો, સીતાદીહિ ઉપપીળિતસ્સ બાધિતસ્સાતિ અત્થો. આદિ-સદ્દેન ‘‘ઉણ્હેન વા’’તિઆદિકં સઙ્ગણ્હાતિ. યથાહ ‘‘સીતેન વા ઉણ્હેન વા પીળિતો પવિસતી’’તિ. એત્થ આપદા નામ બહિ સયન્તસ્સ જીવિતબ્રહ્મચરિયન્તરાયાપજ્જનં.

૧૦૮૮. ઇદં સિક્ખાપદં દુક્ખવેદનં હોતીતિ યોજના.

અનુપખજ્જકથાવણ્ણના.

૧૦૮૯. નિક્કડ્ઢેય્યાતિ નીહરેય્ય. નિક્કડ્ઢાપેય્ય વાતિ નીહરાપેય્ય વા.

૧૯૯૦. બહૂ ભૂમિયો વાલિકાતલસઙ્ખાતા યસ્સ સો બહુભૂમો, પાસાદો. સમાસન્તવિધિવસેન ‘‘બહુભૂમો’’તિ વુચ્ચતિ.

૧૦૯૧. ઠપેત્વા ઠપેત્વાતિ તસ્મિં તસ્મિં ઠાને ગતિનિવત્તિં કત્વા કત્વા.

૧૦૯૨. અયં નયોતિ ‘‘નિક્ખમા’તિ એકવચનેન ગચ્છન્તે અનેકેપિ દ્વારકોટ્ઠકે અતિક્કન્તે આણાપકસ્સ એકાવ આપત્તિ હોતિ, ઠિતટ્ઠાનતો ઠત્વા ઠત્વા નીહરન્તસ્સ દ્વારકોટ્ઠગણનાય હોતી’’તિ અયં નયો. આણત્તિયા ખણેયેવાતિ ‘‘ઇમં નિક્કડ્ઢાહી’’તિ આણત્તિક્ખણેયેવ.

૧૦૯૩. એકાવાતિ એત્થ ‘‘પાચિત્તિ હોતી’’તિ વત્તબ્બો. બહુકાનિ ચેતિ એત્થ ‘‘દ્વારાની’’તિ વત્તબ્બં, અતિક્કામેતીતિ સમ્બન્ધો. ‘‘એત્તકે દ્વારકોટ્ઠકે અતિક્કમાપેત્વા નિક્કડ્ઢાહી’’તિ ચ ‘‘યાવ પરિયન્તદ્વારકોટ્ઠકા નિક્કડ્ઢાહી’’તિ ચ ‘‘બહૂ દ્વારકોટ્ઠકે અતિક્કામેત્વા નિક્કડ્ઢાહી’’તિ ચ આણત્તત્તા બહૂ દ્વારકોટ્ઠકે અતિક્કામેત્વા સચે નિક્કડ્ઢતીતિ અત્થો. યથાહ અટ્ઠકથાયં ‘‘સચે પન એત્તકાનિ દ્વારાનિ નિક્કડ્ઢાહી’તિ વા ‘યાવ મહાદ્વારં, તાવ નિક્કડ્ઢાહી’તિ વા એવં નિયમેત્વા આણત્તો હોતિ, દ્વારગણનાય પાચિત્તિયાની’’તિ (પાચિ. અટ્ઠ. ૧૨૬). બહૂનિ પાચિત્તિયાનિ હોન્તીતિ યોજના.

૧૦૯૪. ઉપટ્ઠાનસાલાદીતિ એત્થ નિસ્સક્કત્થે પચ્ચત્તવચનતો ઉપટ્ઠાનસાલાદિતોતિ અત્થો ગહેતબ્બો. ‘‘ઉપચારતો’’તિ ઇમિના સમાનાધિકરણત્તા વિહારસ્સ ઉપટ્ઠાનસાલાદિતો ઉપચારતોતિ વુત્તં હોતિ. યથાહ ગણ્ઠિપદે ‘‘ઉપચારો નામ ઉપટ્ઠાનસાલાદિમત્તમેવા’’તિ. કાયેનપિ વાચાયપિ તથા નિક્કડ્ઢને ચ દુક્કટન્તિ વક્ખમાનેન સહ યોજના. તસ્સાતિ ઉપસમ્પન્નસ્સ. આદિ-સદ્દેન મણ્ડપાદયો ગહિતા. યથાહ ‘‘વિહારસ્સ ઉપચારા વા ઉપટ્ઠાનસાલાય વા મણ્ડપા વા રુક્ખમૂલા વા અજ્ઝોકાસા વા નિક્કડ્ઢતિ વા નિક્કડ્ઢાપેતિ વા, આપત્તિ દુક્કટસ્સા’’તિ (પાચિ. ૧૨૭). ‘‘વાચાયા’’તિ ઇમિના ‘‘નિક્ખમા’’તિ ચ ‘‘ઇમં નિક્કડ્ઢાહી’’તિ આણાપનઞ્ચ ગહિતં. ‘‘તથા’’તિ ઇમિના એકેન પયોગેન એકાપત્તિ, નાનાપયોગેસુ પયોગગણનાય, દ્વારગણનાય વા હોતીતિ વુત્તમેવ પકારં ઉપસંહરતિ.

૧૦૯૫. ‘‘તથા’’તિ ઇદં ‘‘ઇતરં નિક્કડ્ઢન્તસ્સ દુક્કટ’’ન્તિ ઇમિનાપિ યોજેતબ્બં. યથા વિહારૂપચારતો ઉપટ્ઠાનસાલાદિતો ઉપસમ્પન્નં નિક્કડ્ઢન્તસ્સ, નિક્કડ્ઢાપેન્તસ્સ ચ દુક્કટં હોતિ, તથા અનુપસમ્પન્નસ્સ વિહારતો ચ વિહારૂપચારતો ચ નિક્કડ્ઢનાદિં કરોન્તસ્સ ભિક્ખુનો દુક્કટં હોતીતિ અત્થો. તથા વિહારસ્સૂપચારા વા વિહારા વા સબ્બેસમ્પિ પરિક્ખારં નિક્કડ્ઢન્તસ્સ દુક્કટન્તિ યોજના. સબ્બેસન્તિ ઉપસમ્પન્નાનુપસમ્પન્નાનં. પરિક્ખારન્તિ અન્તમસો રજનછલ્લિપિ સઙ્ગય્હતિ. યથાહ અટ્ઠકથાયં ‘‘અન્તમસો રજનછલ્લિમ્પી’’તિ (પાચિ. અટ્ઠ. ૧૨૬).

૧૦૯૬. ‘‘અસમ્બદ્ધેસૂ’’તિ ઇમિના બ્યતિરેકતો અસિથિલબદ્ધેસુ પરિક્ખારેસુ એકિસ્સાયેવ આપત્તિયા સમ્ભવં દસ્સેતિ. યથાહ અટ્ઠકથાયં ‘‘ગાળ્હં બન્ધિત્વા ઠપિતેસુ પન એકાવ આપત્તી’તિ મહાપચ્ચરિયં વુત્ત’’ન્તિ (પાચિ. અટ્ઠ. ૧૨૬). સિથિલબન્ધનં પન સમ્મા બન્ધનં ન હોતીતિ અસમ્બદ્ધવચનેન ગહિતન્તિ દટ્ઠબ્બં. અસ્સ ભિક્ખુસ્સ વત્થૂનં ગણનાય દુક્કટં પરિદીપયેતિ યોજના, પરિક્ખારં નીહરન્તસ્સ, નીહરાપેન્તસ્સ ચ અસ્સ ભિક્ખુનોતિ વુત્તં હોતિ.

૧૦૯૭-૮. અન્તેવાસિન્તિ ચ સદ્ધિવિહારિકન્તિ ચ એત્થ ‘‘અસમ્માવત્તન્ત’’ન્તિ સેસો. યથાહ અનાપત્તિવારે ‘‘અન્તેવાસિકં વા સદ્ધિવિહારિકં વા ન સમ્મા વત્તન્તં નિક્કડ્ઢતી’’તિઆદિ (પાચિ. ૧૨૮). નિક્કડ્ઢન્તસ્સાતિ એત્થ ‘‘નિક્કડ્ઢાપેન્તસ્સા’’તિ સેસો. અસમ્માવત્તન્તં અન્તેવાસિં વા અલજ્જિં વા તથા અસમ્માવત્તન્તં સદ્ધિવિહારિકં વા ઉમ્મત્તકં વા તેસં અન્તેવાસિઆદીનં પરિક્ખારં વા અત્તનો વસનટ્ઠાના વા તથા વિસ્સાસિકસ્સ વસનટ્ઠાના વા નિક્કડ્ઢન્તસ્સ, નિક્કડ્ઢાપેન્તસ્સ વા ઉપસમ્પન્નં વા અનુપસમ્પન્નં વા સઙ્ઘિકવિહારા નિક્કડ્ઢન્તસ્સ સયં ઉમ્મત્તકસ્સ વા અનાપત્તિ પકાસિતાતિ યોજના.

અટ્ઠકથાયં ‘‘અલજ્જીઆદયો પન અત્તનો વસનટ્ઠાનતોયેવ નિક્કડ્ઢિતબ્બા’’તિ (પાચિ. અટ્ઠ. ૧૨૮) વુત્તં, પાળિયઞ્ચ ‘‘અત્તનો પુગ્ગલિકે અનાપત્તી’’તિ (પાચિ. ૧૨૭) વુત્તં, ‘‘અત્તનો વિસ્સાસિકસ્સ વસનટ્ઠાના’’તિ ઇદં કસ્મા વુત્તન્તિ ચે? ઇમસ્સેવ પાઠસ્સ અનુલોમતો વુત્તં. અન્તેવાસિકન્તિઆદીસુ પઠમં અસમ્માવત્તનાદિભાવેન ‘‘નિક્કડ્ઢિસ્સામી’’તિ ચિન્તેત્વા નિક્કડ્ઢન્તસ્સ ચિત્તલહુપરિવત્તિતાય કોપે ઉપ્પન્નેપિ અનાપત્તિ.

૧૦૯૯. ‘‘તથા’’તિ ઇમિના ‘‘નિક્કડ્ઢન્તસ્સા’’તિ ચ તત્થેવ સેસં ‘‘નિક્કડ્ઢાપેન્તસ્સા’’તિ (પાચિ. અટ્ઠ. ૧૨૬) ચ ‘‘તસ્સ પરિક્ખારં વા’’તિ ચ યથાવુત્તં ઉપસંહરતિ. ‘‘સઙ્ઘારામાપિ સબ્બસ્મા’’તિ ઇદં કલહકારકેનેવ યોજેતબ્બં. યથાહ અટ્ઠકથાયં ‘‘ભણ્ડનકારકકલહકારકમેવ સકલસઙ્ઘારામતો નિક્કડ્ઢિતું લભતિ. સો હિ પક્ખં લભિત્વા સઙ્ઘમ્પિ ભિન્દેય્યા’’તિ (પાચિ. અટ્ઠ. ૧૨૮). ઇદં તૂતિ એત્થ વિસેસત્થજોતકેન તુ-સદ્દેન વુત્તવિસેસનં વિના અવસેસવિનિચ્છયો અનન્તરસદિસોયેવાતિ દીપેતિ. તિસમુટ્ઠાનં કાયચિત્તવાચાચિત્તકાયવાચાચિત્તતો સમુટ્ઠાનતોતિ.

નિક્કડ્ઢનકથાવણ્ણના.

૧૧૦૦-૧. મજ્ઝિમાસીસઘટ્ટાયાતિ સીસં ન ઘટ્ટેતીતિ અસીસઘટ્ટા, મજ્ઝિમસ્સ અસીસઘટ્ટા મજ્ઝિમાસીસઘટ્ટા, તાય, પમાણમજ્ઝિમસ્સ પુરિસસ્સ સીસાઘટ્ટનપ્પમાણુબ્બેધહેટ્ઠિમતલાયાતિ અત્થો. વેહાસકુટિયાતિ પદરાદીહિ ઉપરિ અચ્છન્નતલાય દ્વિભૂમિકાદિભેદાય કુટિયા. ઉપરીતિ મત્થકે, અકતપદરાદિઅત્થરણાય તુલામત્તયુત્તાય ઉપરિમતલેતિ વુત્તં હોતિ. યથાહ અટ્ઠકથાયં ‘‘યાહિ કાહિચિ ઉપરિ અચ્છન્નતલા દ્વિભૂમિકકુટિ વા તિભૂમિકાદિકુટિ વા ‘વેહાસકુટી’તિ વુચ્ચતિ, ઇધ પન અસીસઘટ્ટા અધિપ્પેતા’’તિ (પાચિ. અટ્ઠ. ૧૩૧). આહચ્ચપાદકે મઞ્ચેતિ ‘‘આહચ્ચપાદકો નામ મઞ્ચો અઙ્ગે વિજ્ઝિત્વા ઠિતો હોતી’’તિ પાળિયં દસ્સિતે અટનિસીસાનિ વિજ્ઝિત્વા પાદસિખં આવુણિત્વા ઉપરિસિખાય અનાકોટિતઆણિમ્હિ ઠિતમઞ્ચેતિ અત્થો. આહચ્ચપાદકે પીઠેતિ સમ્બન્ધો. યથાહ પાળિયં ‘‘આહચ્ચપાદકં નામ પીઠં અઙ્ગે વિજ્ઝિત્વા ઠિતં હોતી’’તિ (પાચિ. ૧૩૧). સોયેવત્થો.

તસ્મિં આહચ્ચપાદકે મઞ્ચે વા પીઠે વા નિસીદન્તસ્સ વા નિપજ્જન્તસ્સ વા તસ્સ ભિક્ખુનો પયોગગણનાય પાચિત્તિયો સિયુન્તિ યોજના.

૧૧૦૨-૩. સઙ્ઘિકે સઙ્ઘિકસઞ્ઞિવેમતિકપુગ્ગલિકસઞ્ઞીનં વસેન તિકપાચિત્તિયં. પુગ્ગલેતિ પુગ્ગલિકે વિહારે. વેહાસકુટિયા…પે… ગણનાયેવ તસ્સ તિકદુક્કટન્તિ યોજના. પુગ્ગલિકે સઙ્ઘિકસઞ્ઞિવેમતિકઅઞ્ઞપુગ્ગલિકસઞ્ઞીનં વસેન તિકદુક્કટં.

હેટ્ઠા અપરિભોગે વાતિ દારુસમ્ભારાદીનં વસેન હેટ્ઠિમતલે અવલઞ્જે વા. સીસઘટ્ટાય વાતિ સીસઘટ્ટનપ્પમાણતલાય કુટિયા વા. અવેહાસવિહારે વાતિ અવેહાસકુટિયા ભૂમિયં કતપણ્ણસાલાદીસુ. એત્થાપિ ‘‘વિસ્સાસિકવિહારે’’તિ ઇદં ‘‘અત્તનો પુગ્ગલિકે અનાપત્તી’’તિ (પાચિ. ૧૩૨) ઇમસ્સ અનુલોમનતો વુત્તં.

૧૧૦૪. યત્થ પટાણિ વા દિન્નાતિ યસ્મિં મઞ્ચે પાદસીસાનં ઉપરિ અટનિમત્થકતો તિરિયં આણિ પવેસિતા હોતિ, તત્થ અભિનિસીદતો, અભિનિપજ્જતો વા ન દોસોતિ યોજના. તત્થાતિ પુબ્બે વુત્તઅપવેસિતપટાણિમ્હિ મઞ્ચે વા પીઠે વા. ‘‘ઠત્વા’’તિ ઇમિના નિપજ્જનં નિવત્તેતિ. લગેતીતિ ઉપરિબદ્ધઅઙ્કુસસિક્કાદીસુ યં કિઞ્ચિ પરિક્ખારં લગેતિ. ઇદં સિક્ખાપદં સમુટ્ઠાનતો એળકલોમેન સિક્ખાપદેન સમં મતન્તિ યોજના.

વેહાસકુટિકથાવણ્ણના.

૧૧૦૫. યાવ દ્વારસ્સ કોસમ્હાતિ એત્થ ‘‘મહલ્લકસ્સ વિહારસ્સા’’તિ સેસો, ‘‘મહલ્લકો નામ વિહારો સસ્સામિકો વુચ્ચતી’’તિ (પાચિ. ૧૩૬) પાળિયં વુત્તત્તા કારાપેતાનં દાયકાનં સમ્ભવતો મહલ્લકસ્સ ‘‘વિહારો નામ ઉલ્લિત્તો વા હોતિ અવલિત્તો વા ઉલ્લિત્તાવલિત્તો વા’’તિ દસ્સિતભેદસ્સ વિહારસ્સ દ્વારકોસસઙ્ખાતપિટ્ઠસઙ્ઘાટસ્સ ‘‘સમન્તા હત્થપાસા’’તિ (પાચિ. ૧૩૬) પાળિયં વુત્તદ્વારકવાટપુથુલપ્પમાણદ્વારબાહસમીપં અવધિં કત્વાતિ અત્થો. યથાહ અટ્ઠકથાયં ‘‘દ્વારકોસો નામ પિટ્ઠસઙ્ઘાટસ્સ સમન્તા કવાટવિત્થારપ્પમાણો ઓકાસો’’તિ (પાચિ. અટ્ઠ. ૧૩૫).

અગ્ગળટ્ઠપનાયાતિ એત્થ અગ્ગળસહચરિયેન તંસહિતદ્વારકવાટેન યુત્તદ્વારબાહાનમેવ વુત્તત્તા દ્વારબાહાનં નિચ્ચલત્થાયાતિ અત્થો. યથાહ અટ્ઠકથાયં ‘‘સકવાટસ્સ દ્વારબન્ધસ્સ નિચ્ચલભાવત્થાયાતિ અત્થો’’તિ (પાચિ. અટ્ઠ. ૧૩૫). લિમ્પિતબ્બન્તિ એત્થ ‘‘પુનપ્પુન’’ન્તિ સેસો. યથાહ અટ્ઠકથાયં ‘‘પુનપ્પુનં લિમ્પિતબ્બો વા લેપાપેતબ્બો વા’’તિ (પાચિ. અટ્ઠ. ૧૩૫). તિણમત્તિકાનં ઉપરિ પુનપ્પુનં મત્તિકાલેપો કાતબ્બોતિ અત્થો.

૧૧૦૬-૭. યો ઞેય્યો, અયં નયોતિ સમ્બન્ધો, ‘‘પુનપ્પુનં લિમ્પિતબ્બં વા લેપાપેતબ્બમેવ વા’’તિ યો વુત્તો, અયં નયો વેદિતબ્બોતિ અત્થો. આલોકં સન્ધેતિ પિધેતીતિ આલોકસન્ધિ, વાતપાનકવાટાનમેતં અધિવચનં. યથાહ ‘‘આલોકસન્ધીતિ વાતપાનકવાટકા વુચ્ચન્તી’’તિ (પાચિ. અટ્ઠ. ૧૩૫). એત્થ કવાટસ્સ સામન્તા કવાટદ્વારફલકવિત્થારપ્પમાણં લેપટ્ઠાનં. યથાહ ‘‘સબ્બદિસાસુ કવાટવિત્થારપ્પમાણો ઓકાસો’’તિ (પાચિ. અટ્ઠ. ૧૩૫).

એત્થાયમધિપ્પાયો – વાતપાનકવાટસ્સ સામન્તા દ્વારફલકવિત્થારપ્પમાણે ઠાને તિણ્ણં મત્તિકાનં ઉપરિપિ યત્તકં બહલં ઇચ્છતિ, તત્તકે ઠાને આલોકસન્ધિ પરિકમ્મત્થાય લિમ્પિતબ્બો વા લેપાપેતબ્બો વાતિ. ‘‘પુનપ્પુનં છાદાપેસિ પુનપ્પુનં લેપાપેસી’’તિ (પાચિ. ૧૩૪) ઇમસ્મિં વત્થુસ્મિં ઉપ્પન્નદોસેન સિક્ખાપદસ્સ પઞ્ઞત્તત્તા લેપં અનુજાનન્તેન ચ દ્વારબન્ધનસ્સ સામન્તા અડ્ઢતેય્યહત્થપ્પમાણેયેવ પદેસે પુનપ્પુનં લેપસ્સ અનુઞ્ઞાતત્તા તતો અઞ્ઞત્થ પુનપ્પુનં લિમ્પેન્તસ્સ વા લિમ્પાપેન્તસ્સ વા ભિત્તિયં મત્તિકાહિ કત્તબ્બકિચ્ચં નિટ્ઠાપેત્વા પુન ચતુત્થલેપે દિન્ને પાચિત્તિયેન ભવિતબ્બન્તિ વદન્તિ. ગણ્ઠિપદેસુ પન તીસુપિ પુનપ્પુનં લેપદાનસ્સ વુત્તપ્પમાણતો અઞ્ઞત્થ પટિક્ખિત્તમત્તં ઠપેત્વા પાચિત્તિયસ્સ અવુત્તત્તા દુક્કટં અનુરૂપન્તિ વુત્તં.

છદનસ્સાતિ પદભાજને વુત્તાનં ઇટ્ઠકાસિલાસુધાતિણપણ્ણચ્છદનાનં અઞ્ઞતરસ્સ. દ્વત્તિપરિયાયન્તિ એત્થ અટ્ઠકથાયં ‘‘પરિયાયેનાતિ પરિક્ખેપેન, એવં છદનં પન તિણપણ્ણેહિ લબ્ભતી’’તિ (પાચિ. અટ્ઠ. ૧૩૬) વુત્તત્તા પરિયાયન્તિ તિણેહિ વા પણ્ણેહિ વા પરિક્ખિપિત્વા છદનમેવ ગહેતબ્બં. ઇટ્ઠકાય વા સિલાય વા સુધાય વા છદને લબ્ભમાનં મગ્ગેન છદનં પન ઉપલક્ખણવસેન લબ્ભતિ. દ્વત્તિપરિયાયેન છદનઞ્ચ ‘‘સબ્બમ્પિ ચેતં છદનં છદનૂપરિ વેદિતબ્બ’’ન્તિ (પાચિ. અટ્ઠ. ૧૩૬) અટ્ઠકથાવચનતો ઉપરૂપરિ છદનવસેન વેદિતબ્બં. હરિતં નામ પુબ્બણ્ણાદિ. યથાહ અટ્ઠકથાયં ‘‘હરિતન્તિ ચેત્થ સત્તધઞ્ઞભેદં પુબ્બણ્ણં, મુગ્ગમાસતિલકુલત્થઅલાબુકુમ્ભણ્ડાદિભેદઞ્ચ અપરણ્ણં અધિપ્પેત’’ન્તિ (પાચિ. અટ્ઠ. ૧૩૫). ઇમેસુ અઞ્ઞતરસ્સાભાવેન અહરિતં નામ.

અધિટ્ઠેય્યન્તિ વિધાતબ્બં. તતો ઉદ્ધન્તિ તીહિ પરિયાયેહિ વા તીહિ મગ્ગેહિ વા ઉદ્ધં. યથાહ અટ્ઠકથાયં ‘‘તિણ્ણં મગ્ગાનં વા પરિયાયાનં વા ઉપરી’’તિ (પાચિ. અટ્ઠ. ૧૩૬). પાચિત્તિયં હોતીતિ વક્ખમાનદૂરતાય યુત્તે અહરિતટ્ઠાને ઠત્વા સંવિદહિત્વા તિક્ખત્તું છાદાપેત્વા તતિયવારે ‘‘એવં કરોહી’’તિ આણાપેત્વા પક્કમિતબ્બં. અપક્કમન્તેન તુણ્હીભૂતેન ઠાતબ્બં, તતો ઉત્તરિ ચતુત્થવારે છદનત્થં વિદહન્તસ્સ ઇટ્ઠકાદિગણનાય, તિણેસુ તિણગણનાય, પણ્ણેસુ પણ્ણગણનાય પાચિત્તિયન્તિ વુત્તં હોતિ. યથાહ પાળિયં ‘‘મગ્ગેન છાદેન્તસ્સ દ્વે મગ્ગે અધિટ્ઠહિત્વા તતિયાય મગ્ગં આણાપેત્વા પક્કમિતબ્બ’’ન્તિઆદિ (પાચિ. ૧૩૬). તતિયાય મગ્ગન્તિ એત્થ તતિયાયાતિ ઉપયોગત્થે સમ્પદાનવચનં, તતિયં મગ્ગન્તિ અત્થો. તત્થાતિ હરિતે, ‘‘સચે હરિતે ઠિતો અધિટ્ઠાતિ, આપત્તિ દુક્કટસ્સા’’તિ (પાચિ. ૧૩૭) વચનતો અધિટ્ઠાનાય તિટ્ઠતોતિ લબ્ભતિ. બીજરોપનતો પટ્ઠાય યાવ સસ્સં તિટ્ઠતિ, તાવ હરિતં નામ. યથાહ અટ્ઠકથાયં ‘‘યસ્મિમ્પિ ખેત્તે વુત્તં બીજં ન તાવ સમ્પજ્જતિ, વસ્સે પન પતિતે સમ્પજ્જિસ્સતી’’તિઆદિ (પાચિ. અટ્ઠ. ૧૩૫).

૧૧૦૮-૯. અહરિતટ્ઠાનેપિ તિટ્ઠતો પરિચ્છેદં દસ્સેતુમાહ ‘‘પિટ્ઠિવંસે’’તિઆદિ. ‘‘પિટ્ઠિવંસે’’તિ ઇદં વંસયુત્તસેનાસનવસેન વુત્તં. કણ્ણિકં ગાહાપેત્વા કતસેનાસનસ્સાપિ ઉપલક્ખણં હોતિ. પિટ્ઠિવંસેતિ ચ ‘‘ગઙ્ગાયં ઘોસો’’તિઆદીસુ વિય સામીપિકાધારે ભુમ્મં. કુતોયં વિસેસો લબ્ભતીતિ? અટ્ઠકથાયં ‘‘પિટ્ઠિવંસસ્સ વા કૂટાગારકણ્ણિકાય વા ઉપરિ, થુપિકાય વા પસ્સે નિસિન્નો હોતી’’તિ (પાચિ. અટ્ઠ. ૧૩૫) વુત્તવિધાનતો લબ્ભતિ. ‘‘નિસિન્નો’’તિ અટ્ઠકથાવચનતો ઠિતોતિ એત્થ ગતિનિવત્તિસામઞ્ઞેન નિસિન્નો ચ વુત્તોતિ ગહેતબ્બો. યસ્મિં ઠાનેતિ એત્થ ‘‘અહરિતે’’તિ પકરણતો લબ્ભતિ. ‘‘ઠાતુ’’ન્તિ ઇદં અધિટ્ઠાનકરણત્થાય ઠાનં ગહેત્વા વુત્તન્તિ ‘‘તસ્સ અન્તો અહરિતેપિ ઠત્વા અધિટ્ઠાતું ન લબ્ભતી’’તિ (પાચિ. અટ્ઠ. ૧૩૬) અટ્ઠકથાવચનતો વિઞ્ઞાયતિ.

પતનોકાસતોતિ એત્થ પઠમત્થે તો-પચ્ચયો. તઞ્હિ ઠાનં વિહારસ્સ પતનોકાસોતિ યોજના. હીતિ હેતુઅત્થે વત્તમાનતો યસ્મા અહરિતે પતન્તસ્સ વિહારસ્સેતં ઠાનં પતનોકાસો, તસ્મા તત્થ ઠાતું ન વટ્ટતીતિ ગહેતબ્બં.

૧૧૧૧. ઇમસ્મિં સિક્ખાપદે આદો તાવ વિહારપદસ્સ પદભાજને ‘‘વિહારો નામ ઉલ્લિત્તો વા’’તિઆદિવુત્તત્તા (પાચિ. અટ્ઠ. ૧૩૬) તબ્બિપરિયાયતો તિણેહેવ કતછદનભિત્તિકા કુટિ તિણકુટિકાતિ વિઞ્ઞાયતીતિ તિણછદના કુટિકા તિણકુટિકા.

દ્વત્તિપરિયાયકથાવણ્ણના.

૧૧૧૨. જાનન્તિ તોયસ્સ સપ્પાણકભાવં જાનન્તો. સિઞ્ચેય્ય સિઞ્ચાપેય્યાતિ એત્થ ‘‘તેન ઉદકેના’’તિ વત્તબ્બં. યથાહ અટ્ઠકથાયં ‘‘તેન ઉદકેન સયં વા સિઞ્ચેય્યા’’તિઆદિ (પાચિ. અટ્ઠ. ૧૪૦).

૧૧૧૩. યો પન ધારં અચ્છિન્દિત્વા સચે મત્તિકં સિઞ્ચેય્ય, એવં સિઞ્ચતો તસ્સાતિ યોજના.

૧૧૧૪-૫. સન્દમાનકન્તિ તોયવાહિનિં. માતિકં આળિં. સમ્મુખં કરોન્તસ્સાતિ ઉદકં ન્હાયિતુમિચ્છિતં યદિ, સયં અભિમુખં કરોન્તસ્સ. તત્થ તત્થ બન્ધતો અસ્સ ભિક્ખુસ્સ પયોગગણનાય આપત્તિ સિયાતિ યોજના. પયોગગણનાતિ પયોગગણનાય, ઉદકં બન્ધિત્વા બન્ધિત્વા યથિચ્છિતદિસાભિમુખકરણપયોગાનં ગણનાયાતિ અત્થો.

૧૧૧૬-૭. યં જલં તિણાદિમ્હિ પક્ખિત્તે સચે ખયં વા આવિલત્તં વા ગચ્છતિ, તાદિસે ઉદકે મત્તિકં, તિણમેવ વા સચે સકટપુણ્ણમ્પિ એકતો પક્ખિપેય્ય, એવં પક્ખિપન્તસ્સ એકા પાચિત્તિ. એકેકં મત્તિકં, તિણમેવ વા. વા-સદ્દેન કટ્ઠગોમયાદિં વા પક્ખિપન્તસ્સ પયોગગણનાય પાચિત્તિયન્તિ યોજના. આવિલત્તન્તિ પાણકા યથા નસ્સન્તિ, તથા આલુળિતભાવં. ઇમિના એવં અવિનસ્સમાનપાણકે મહાઉદકે તિણાદિં પક્ખિપન્તસ્સ અનાપત્તિભાવં દીપેતિ. યથાહ અટ્ઠકથાયં ‘‘ઇદં પન મહાઉદકં…પે… સન્ધાય વુત્ત’’ન્તિ (પાચિ. અટ્ઠ. ૧૪૦).

૧૧૧૮. દુક્કટં હોતીતિ આણાપનપચ્ચયા દુક્કટં હોતિ. એકા પાચિત્તિ.

૧૧૧૯. સબ્બત્થાતિ સપ્પાણકે ચ અપ્પાણકે ચ. વિમતિસ્સાતિ સહચરિયેન વિમતિસહિતમાહ.

૧૧૨૦. ‘‘સબ્બત્થાપાણસઞ્ઞિસ્સા’’તિઆદીસુ અધિકારતો લબ્ભમાનં ‘‘સિઞ્ચનાદીસુ યં કિઞ્ચિ કરોન્તસ્સા’’તિ ઇદં પચ્ચેકં સમ્બન્ધનીયં. સબ્બત્થાતિ સપ્પાણકે, અપ્પાણકે ચ. અપાણસઞ્ઞિસ્સાતિ એવં કતેન પયોગેન નસ્સમાના પાણકા ન સન્તીતિસઞ્ઞિસ્સ. અસઞ્ચિચ્ચાતિ યથા પાણકા ન નસ્સન્તિ, એવં ઘટાદીહિ ગહિતં સપ્પાણકઉદકં ઉદકેયેવ ઓસિઞ્ચન્તસ્સ વા ઓસિઞ્ચાપેન્તસ્સ વા વટ્ટિત્વા તસ્મિં ઉદકે તિણાદિમ્હિ પતિતે અસઞ્ચિચ્ચ કતં નામ હોતિ. અસતિસ્સાતિ અસતિયા કરોન્તસ્સ. અજાનતોતિ પાણકાનં અત્થિભાવં અજાનિત્વા કરોન્તસ્સ.

૧૧૨૧-૨. વધકચિત્તે સતિ સત્તમે સપ્પાણકવગ્ગે પઠમસિક્ખાપદસ્સ વિસયભાવતો તતો વિસેસેતુમાહ ‘‘વિના વધકચિત્તેના’’તિ. ઇમસ્મિં સિક્ખાપદે પાળિયં (પાચિ. ૧૪૦) ‘‘સપ્પાણકં ઉદક’’ન્તિ ઇમિના અટ્ઠકથાગતં પઠમઙ્ગઞ્ચ ‘‘જાન’’ન્તિ ઇમિના દુતિયઙ્ગઞ્ચ ‘‘સિઞ્ચેય્ય વા સિઞ્ચાપેય્ય વા’’તિ ઇમિના ચતુત્થઙ્ગઞ્ચ વુત્તં, ન વુત્તં તતિયઙ્ગં. તઞ્ચ ખો વધકચિત્તસ્સ સત્તમવગ્ગે પઠમસિક્ખાપદેન પાચિત્તિયવચનતો એત્થ તદભાવલક્ખણં તતિયઙ્ગં વુત્તમેવ હોતીતિઅધિપ્પાયેન અટ્ઠકથાયં વુત્તન્તિ આહ ‘‘વિના વધકચિત્તેના’’તિ. તેનેવાહ ‘‘ચત્તારેવસ્સ અઙ્ગાનિ, નિદ્દિટ્ઠાનિ મહેસિના’’તિ. અસ્સાતિ ઇમસ્સ સિક્ખાપદસ્સ.

૧૧૨૩. સપ્પાણકસઞ્ઞિસ્સ ‘‘પરિભોગેન પાણકા મરિસ્સન્તી’’તિ પુબ્બભાગે જાનન્તસ્સાપિ સિઞ્ચનસિઞ્ચાપનં ‘‘પદીપે નિપતિત્વા પટઙ્ગાદિપાણકા મરિસ્સન્તી’’તિ જાનન્તસ્સ પદીપુજ્જલનં વિય વિનાપિ વધકચેતનાય હોતીતિ આહ ‘‘પણ્ણત્તિવજ્જં તિચિત્ત’’ન્તિ. એત્થ કિસ્મિઞ્ચિ કુપિતસ્સ વા કીળાપસુતસ્સ વા સિઞ્ચતો અકુસલચિત્તં, માલાગચ્છાદિં સિઞ્ચતો કુસલચિત્તં, પણ્ણત્તિં અજાનતો ખીણાસવસ્સ અબ્યાકતચિત્તન્તિ તિચિત્તં વેદિતબ્બં. તસ્સાતિ સત્તમવગ્ગે પઠમસિક્ખાપદસ્સ. અસ્સ ચાતિ ઇમસ્સ સિઞ્ચનસિક્ખાપદસ્સ ચ. ઇદં વિસેસનન્તિ ઇદં નાનાકરણં. એત્થ ઇમસ્મિં પકરણે નિદ્દિટ્ઠં પકાસિતન્તિ અત્થો. તં લોકવજ્જં, ઇદં પણ્ણત્તિવજ્જં. તં અકુસલચિત્તં, ઇદં તિચિત્તં. તં દુક્ખવેદનં, ઇદં તિવેદનન્તિ વુત્તં હોતિ.

સત્તમવગ્ગે દુતિયસ્સ ઇમસ્સ ચ કો વિસેસોતિ ચે? ઇમસ્સ સિક્ખાપદસ્સ ‘‘સિઞ્ચેય્ય વા સિઞ્ચાપેય્ય વા’’તિ બાહિરપરિભોગવસેન પઠમં પઞ્ઞત્તત્તા ‘‘સપ્પાણકં ઉદકં પરિભુઞ્જેય્યા’’તિ (પાચિ. ૩૮૮) સિક્ખાપદં અત્તનો નહાનપાનાદિપરિભોગવસેન પઞ્ઞત્તન્તિ વેદિતબ્બં. તસ્મિં વા પઠમં પઞ્ઞત્તેપિ અત્તનો પરિભોગવસેનેવ પઞ્ઞત્તત્તા પુન ઇદં સિક્ખાપદં બાહિરપરિભોગવસેન પઞ્ઞત્તન્તિ ગહેતબ્બં.

સપ્પાણકકથાવણ્ણના.

સેનાસનવગ્ગો દુતિયો.

૧૧૨૪-૬. અટ્ઠઙ્ગયુત્તસ્સાતિ એત્થ ‘‘સીલવા’’તિઆદિ એકમઙ્ગં, ‘‘બહુસ્સુતો’’તિઆદિ દુતિયં, ‘‘ઉભયાનિ ખો પનસ્સા’’તિઆદિ તતિયં, ‘‘કલ્યાણવાચો હોતી’’તિઆદિ ચતુત્થં, ‘‘યેભુય્યેન ભિક્ખુનીનં પિયો હોતિ મનાપો’’તિ પઞ્ચમં, ‘‘પટિબલો હોતિ ભિક્ખુનિયો ઓવદિતુ’’ન્તિ છટ્ઠં, ‘‘ન ખો પનેતં ભગવન્તં ઉદ્દિસ્સા’’તિઆદિ સત્તમં, ‘‘વીસતિવસ્સો વા હોતિ અતિરેકવીસતિવસ્સો વા’’તિ અટ્ઠમન્તિ એતાનિ પાઠાગતાનિ અટ્ઠ અઙ્ગાનિ નામ. ભિક્ખુનીનં ઓવાદો, તદત્થાય સમ્મુતીતિ વિગ્ગહો. ઇધાતિ ઇમસ્મિં સિક્ખાપદે. ઞત્તિ ચતુત્થી યસ્સ કમ્મસ્સાતિ વિગ્ગહો. ‘‘કમ્મેના’’તિ સેસો.

અટ્ઠઙ્ગયુત્તસ્સ ભિક્ખુસ્સ મહેસિના ઞત્તિચતુત્થેન કમ્મેન યા ભિક્ખુનોવાદકસમ્મુતિ ઇધ અનુઞ્ઞાતા, તાય અસમ્મતો યો ભિક્ખૂતિ યોજના.

ગરુધમ્મેહિ અટ્ઠહીતિ ‘‘વસ્સસતૂપસમ્પન્નાય ભિક્ખુનિયા તદહુપસમ્પન્નસ્સ ભિક્ખુનો અભિવાદનં પચ્ચુપટ્ઠાનં અઞ્જલિકમ્મં સામીચિકમ્મં કાતબ્બ’’ન્તિઆદીહિ (પાચિ. ૧૪૯) પાળિયં આગતેહિ અટ્ઠહિ ગરુધમ્મેહિ. એકં ભિક્ખુનિં, સમ્બહુલા વા ભિક્ખુનિયોતિ ઇદં પકરણતો લબ્ભતિ. ઓસારેન્તોવાતિ પાળિં ઉચ્ચારેન્તોવ. યથાહ અટ્ઠકથાયં ‘‘ઓસારેતબ્બાતિ પાળિ વત્તબ્બા’’તિ (પાચિ. અટ્ઠ. ૧૪૯). તે ધમ્મેતિ પુબ્બે વુત્તે તે અટ્ઠ ગરુધમ્મે. ઓવદેય્યાતિ અટ્ઠગરુધમ્મપાળિભાસનસઙ્ખાતં ઓવાદં કરેય્ય.

કિં વુત્તં હોતિ? પાટિપદે ઓવાદત્થાય આગન્ત્વા વન્દિત્વા એકમન્તં નિસિન્ના ભિક્ખુનિયો ‘‘તેન ભિક્ખુના’’તિઆદિના પાઠાગતનયેન ‘‘સમગ્ગત્થ ભગિનિયો’’તિ પુચ્છિત્વા ‘‘સમગ્ગમ્હય્યા’’તિ યદિ વદેય્યું, ‘‘વત્તન્તિ ભગિનિયો અટ્ઠ ગરુધમ્મા’’તિ પુનપિ પુચ્છિત્વા ‘‘વત્તન્તય્યા’’તિ યદિ વદેય્યું, ‘‘એસો ભગિનિયો ઓવાદો’’તિ નિય્યાદેય્ય. ‘‘ન વત્તન્તય્યા’’તિ યદિ વદેય્યું, ‘‘વસ્સસતૂપસમ્પન્નાયા’’તિઆદિના અટ્ઠગરુધમ્મપાળિભાસનવસેન ઓવાદં કરેય્યાતિ વુત્તં હોતિ. યથાહ ‘‘ઓસારેન્તોવ તે ધમ્મે ઓવદેય્યા’’તિ.

૧૧૨૭. અઞ્ઞેન ધમ્મેનાતિ સુત્તન્તેન વા અભિધમ્મેન વા. એકતોઉપસમ્પન્નન્તિ ભિક્ખુનિસઙ્ઘેયેવ ઉપસમ્પન્નં. યથાહ અટ્ઠકથાયં ‘‘ભિક્ખુનીનં સન્તિકે એકતોઉપસમ્પન્નાયા’’તિ. તથાતિ ઓવદન્તસ્સ દુક્કટન્તિ દસ્સેતિ.

૧૧૨૮. ભિક્ખૂનં સન્તિકેયેવ ઉપસમ્પન્નન્તિ મહાપજાપતિયા ગોતમિયા સદ્ધિં પબ્બજિતા પઞ્ચસતા સાકિયાનિયો સઙ્ગણ્હાતિ. લિઙ્ગવિપલ્લાસે ઉપસમ્પન્નભિક્ખુનો લિઙ્ગપરિવત્તને સતિ તથા પાચિત્તિ એવ પકાસિતાતિ અત્થો.

૧૧૨૯. ઓવાદં અનિય્યાદેત્વાતિ ‘‘વત્તન્તિ ભગિનિયો અટ્ઠ ગરુધમ્મા’’તિ પુચ્છિત્વા ‘‘વત્તન્તય્યા’’તિ વુત્તેતિ એત્થાપિ સોયેવત્થો.

૧૧૩૦. ગરુધમ્મેહિ ઓવદતો દુક્કટન્તિ યોજના.

૧૧૩૧. અગણ્હન્તસ્સ ઓવાદન્તિ એત્થ ઓવાદત્થં યાચનસન્દેસો તદત્થતાય ઓવાદોતિ ગહિતોતિ ઓવાદસાસનં અસમ્પટિચ્છન્તસ્સાતિ અત્થો. અપચ્ચાહરતોપિ તન્તિ તં અત્તના ગહિતં ઓવાદસાસનં ઉપોસથગ્ગે આરોચેત્વા પાતિમોક્ખુદ્દેસકેન દિન્નં પટિસાસનં ભિક્ખુનિસઙ્ઘસ્સ નેત્વા અવદન્તસ્સાપિ. બાલન્તિ સાસનસમ્પટિચ્છનઞ્ચ ઉપોસથગ્ગં નેત્વા આરોચનઞ્ચ પટિસાસનં હરિત્વા પાટિપદે ભિક્ખુનિસઙ્ઘગણપુગ્ગલાનં યથાનુરૂપં પચ્ચારોચનઞ્ચ કાતું અજાનનતાય બાલં. ગિલાનન્તિ ઉપોસથગ્ગં ગન્ત્વાપિ આરોચનસ્સ બાધકેન ગેલઞ્ઞેન સમન્નાગતં ગિલાનં. ગમિકન્તિ પાટિપદં અનિસીદિત્વા ગન્તબ્બં અચ્ચાયિકગમનં ગમિકઞ્ચ ઠપેત્વા દુક્કટં સિયાતિ સમ્બન્ધો.

૧૧૩૨. કમ્મસ્મિન્તિ એત્થ કમ્મ-સદ્દેન ભિક્ખુનોવાદકસ્સ ઞત્તિચતુત્થેન કમ્મેન દિન્નં સમ્મુતિકમ્મં અધિપ્પેતન્તિ અટ્ઠકથાયં વુત્તં. ઞત્તિં, કમ્મવાચઞ્ચ પરિહાપેત્વા, પરિવત્તેત્વા વા કતં ચે, અધમ્મકમ્મં નામ. વગ્ગેતિ છન્દારહાનં છન્દસ્સ અનાહરણેન વા સન્નિપતિતાનં ઉક્કોટેન વા વગ્ગે સતિ. તિકપાચિત્તિયં સિયાતિ ‘‘અધમ્મકમ્મે અધમ્મકમ્મસઞ્ઞી વગ્ગં ભિક્ખુનિસઙ્ઘં વગ્ગસઞ્ઞી ઓવદતિ, વેમતિકો ઓવદતિ, સમગ્ગસઞ્ઞી ઓવદતિ, આપત્તિ પાચિત્તિયસ્સા’’તિ (પાચિ. ૧૫૦) અધમ્મકમ્મે અધમ્મકમ્મસઞ્ઞિપક્ખે વુત્તપાચિત્તિયત્તયં હોતિ.

૧૧૩૩. અધમ્મે પન કમ્મસ્મિં વેમતિકસ્સાપીતિ યોજના. ‘‘તથા’’તિ ઇમિના ‘‘વગ્ગે ભિક્ખુનિસઙ્ઘસ્મિં, તિકપાચિત્તિયં સિયા’’તિ ઇદં સઙ્ગણ્હાતિ. કિં વુત્તં હોતિ? અધમ્મકમ્મે વેમતિકપક્ખે ‘‘વગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ પાચિત્તિયસ્સા’’તિ (પાચિ. ૧૫૦) અધમ્મિકકમ્મેયેવ વિમતિવારે વુત્તતિકપાચિત્તિયં હોતીતિ વુત્તં હોતિ. ‘‘ધમ્મકમ્મન્તિ સઞ્ઞિનો’’તિ ઇમિનાપિ ‘‘અધમ્મે પન કમ્મસ્મિ’’ન્તિ ઇદં યોજેતબ્બં, ‘‘તથા’’તિ સમ્બન્ધો, તેન ‘‘વગ્ગે’’તિઆદિકં સઙ્ગણ્હાતિ. ‘‘અધમ્મકમ્મે ધમ્મકમ્મસઞ્ઞી વગ્ગં ભિક્ખુનિસઙ્ઘં વગ્ગસઞ્ઞી ઓવદતિ, વેમતિકો, સમગ્ગસઞ્ઞી ઓવદતિ, આપત્તિ પાચિત્તિયસ્સા’’તિ (પાચિ. ૧૫૦) વુત્તં તિકપાચિત્તિયં હોતિ. એવમેતા પાચિત્તિયો સન્ધાયાહ ‘‘નવ પાચિત્તિયો વુત્તા’’તિ.

ઇમસ્મિં વિય અધમ્મકમ્મવારે ‘‘સમગ્ગે ભિક્ખુનિસઙ્ઘસ્મિ’’ન્તિ વિકપ્પે ચ એવમેવ નવ પાચિત્તિયો હોન્તીતિ અતિદિસન્તો ‘‘સમગ્ગેપિ ચ તત્તકા’’તિ આહ. યથાહ ‘‘અધમ્મકમ્મે અધમ્મકમ્મસઞ્ઞી સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ પાચિત્તિયસ્સ. અધમ્મકમ્મે વેમતિકો સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ પાચિત્તિયસ્સ. અધમ્મકમ્મે ધમ્મકમ્મસઞ્ઞી સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ પાચિત્તિયસ્સા’’તિ (પાચિ. ૧૫૦).

૧૧૩૪. દ્વિન્નં નવકાનં વસાતિ યથાદસ્સિતં વગ્ગનવકં, સમગ્ગનવકન્તિ દ્વિન્નં નવકાનં વસેન. તાતિ પાચિત્તિયો.

‘‘ધમ્મકમ્મે અધમ્મકમ્મસઞ્ઞી વગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ દુક્કટસ્સ. ધમ્મકમ્મે વેમતિકો વગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ દુક્કટસ્સ. ધમ્મકમ્મે ધમ્મકમ્મસઞ્ઞી વગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ દુક્કટસ્સા’’તિ વગ્ગપક્ખે નવ દુક્કટાનિ. ‘‘ધમ્મકમ્મે અધમ્મકમ્મસઞ્ઞી સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ દુક્કટસ્સ. ધમ્મકમ્મે વેમતિકો સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો, સમગ્ગસઞ્ઞી ઓવદતિ, આપત્તિ દુક્કટસ્સ. ધમ્મકમ્મે ધમ્મકમ્મસઞ્ઞી સમગ્ગં ભિક્ખુનિસઙ્ઘં વગ્ગસઞ્ઞી, વેમતિકો ઓવદતિ, આપત્તિ દુક્કટસ્સ. ધમ્મકમ્મે ધમ્મકમ્મસઞ્ઞી સમગ્ગં ભિક્ખુનિસઙ્ઘં સમગ્ગસઞ્ઞી ઓવદતિ, અનાપત્તી’’તિ (પાચિ. ૧૫૧) એત્થ અન્તે વુત્તં અનાપત્તિવારં વિના અવસેસેસુ અટ્ઠસુ વારેસુ સમગ્ગપક્ખે અટ્ઠ દુક્કટાનિ. એવં પુરિમાનિ નવ, ઇમાનિ અટ્ઠાતિ ધમ્મકમ્મપક્ખે સત્તરસ દુક્કટાનિ હોન્તીતિ આહ ‘‘દુક્કટં ધમ્મકમ્મેપિ, સત્તરસવિધં સિયા’’તિ.

૧૧૩૫. ‘‘ઓસારેહી’’તિ વુત્તો કથેતિ વાતિ યોજના. ‘‘અટ્ઠગરુધમ્મં કથેહી’’તિ વુત્તો તં કથેતિ વા. પઞ્હં પુટ્ઠો કથેતિ વાતિ અટ્ઠગરુધમ્મવિસયે પઞ્હં પુટ્ઠો તમેવ વદતિ વા. સિક્ખમાનાય કથેતિ વાતિ સમ્બન્ધો. સિક્ખમાનાય અટ્ઠગરુધમ્મે કથેતિ વા, નેવ દોસોતિ અત્થો. ઉમ્મત્તકાદિનો કથયતો નેવ દોસોતિ યોજના.

૧૧૩૬. ઇદાનિ તિણ્ણમ્પિ બહુસ્સુતાનં લક્ખણે એકત્થ દસ્સિતે ભિક્ખુનોવાદકસ્સ વિસેસો સુવિઞ્ઞેય્યો હોતીતિ તં દસ્સેતુમાહ ‘‘વાચુગ્ગતાવ કાતબ્બા’’તિઆદિ. દ્વે માતિકા પગુણા વાચુગ્ગતા કાતબ્બાતિ યોજના. ભિક્ખુભિક્ખુનિવિભઙ્ગે માતિકા પગુણા વાચુગ્ગતાવ કાતબ્બાતિ યોજના, ભિક્ખુભિક્ખુનિવિભઙ્ગમાતિકા પગુણા કત્વા તાસં અટ્ઠકથં ઉગ્ગહેત્વા પાળિતો, અત્થતો ચ વચનપથારુળ્હા વોહારક્ખમાયેવ કાતબ્બાતિ વુત્તં હોતિ. ચત્તારો ભાણવારા પગુણા વાચુગ્ગતાવ કાતબ્બાતિ પકાસિતાતિ યોજના. ‘‘પગુણા’’તિ ઇમિના પાળિયં પગુણં કત્વા ધારેત્વા પરિપુચ્છિતબ્બન્તિ દસ્સેતિ. ‘‘વાચુગ્ગતાવ કાતબ્બા’’તિ ઇમિના તદત્થં સુત્વા ધારેત્વા પરિપુચ્છિતબ્બમેવાતિ દસ્સેતિ.

૧૧૩૭. પરિકથત્થાયાતિ સમ્પત્તાનં ધમ્મકથનત્થાય. કથામગ્ગોતિ મહાસુદસ્સનકથામગ્ગો. મઙ્ગલ…પે… અનુમોદનાતિ અગ્ગસ્સ દાનાદિમઙ્ગલેસુ ભત્તાનુમોદનાસઙ્ખાતા દાનકથા ચ, કુમારમઙ્ગલાદીસુ મહામઙ્ગલસુત્તાદિમઙ્ગલાનુમોદના ચ, અમઙ્ગલં નામ કાલકિરિયા, તત્થ મતકભત્તાદીસુ તિરોકુટ્ટાદિકથા ચાતિ એવં તિસ્સોયેવાનુમોદના.

૧૧૩૮. ઉપોસથાદિઅત્થાયાતિ એત્થ આદિ-સદ્દેન પવારણાદીનં સઙ્ગહો. કમ્માકમ્મવિનિચ્છયોતિ કમ્મવગ્ગે વુત્તવિનિચ્છયો, પરિવારે કમ્મવગ્ગે આગતખુદ્દાનુખુદ્દકકમ્મવિનિચ્છયોતિ વુત્તં હોતિ. ‘‘કમ્મટ્ઠાન’’ન્તિ ઇમિના ‘‘ઉત્તમત્થસ્સ પાપક’’ન્તિ વક્ખમાનત્તા વિપસ્સનાકમ્મટ્ઠાનમાહ. વિપસ્સનાવસેન ઉગ્ગણ્હન્તેન ચ ધાતુવવત્થાનમુખેન ઉગ્ગહેતબ્બન્તિ ગણ્ઠિપદેસુ વુત્તં. ઉત્તમત્થસ્સાતિ અરહત્તસ્સ.

૧૧૩૯. એત્તકં ઉગ્ગહેત્વાન બહુસ્સુતોતિ યથાવુત્તધમ્માનં ઉગ્ગહિતત્તા બહુસ્સુતો. પઞ્ચવસ્સોતિ ઉપસમ્પદતો પટ્ઠાય પરિપુણ્ણપઞ્ચસંવચ્છરો. ‘‘દસવસ્સો’’તિ એત્થાપિ એસેવ નયો. સંવચ્છરવસેન પઞ્ચવસ્સેસુ પરિપુણ્ણેસુ વુત્થવસ્સવસેન અપરિપુણ્ણેસુપિ પઞ્ચવસ્સોયેવ. ઇતરથા ઊનપઞ્ચવસ્સોતિ વેદિતબ્બો. પરિપુણ્ણવીસતિવસ્સૂપસમ્પદાદીસુ વિય કેચિ સંવચ્છરગણનં અવિચારેત્વા ‘‘પઞ્ચવસ્સો’’તિવચનસામઞ્ઞેન વુત્થવસ્સગણનમેવ ગણ્હન્તિ, તદયુત્તં. તથા ગહણેસુ યુત્તિ વા મગ્ગિતબ્બા. મુઞ્ચિત્વા નિસ્સયન્તિ નિસ્સયવાસં જહિત્વા. ઇસ્સરોતિ નિસ્સયાચરિયવિરહેન ઇસ્સરો, ઇમિના નિસ્સયમુત્તલક્ખણં દસ્સિતં.

૧૧૪૦. દ્વે વિભઙ્ગાતિ ભિક્ખુભિક્ખુનિવિભઙ્ગદ્વયં. ઇધ ‘‘વાચુગ્ગતા’’તિ ઇદં પરિપુચ્છમ્પિ સન્ધાયાહાતિપિ વુત્તં. તેનાહ સારત્થદીપનિયં ‘‘દ્વે વિભઙ્ગા પગુણા વાચુગ્ગતા કાતબ્બા’તિઇદં પરિપુચ્છાવસેન ઉગ્ગહણમ્પિ સન્ધાય વુત્ત’ન્તિ વદન્તી’’તિ (સારત્થ. ટી. પાચિત્તિય ૩.૧૪૫-૧૪૭). બ્યઞ્જનાદિતોતિ એત્થ બ્યઞ્જનં નામ પદં, આદિ-સદ્દેન સઙ્ગહિતં અનુબ્યઞ્જનં નામ અક્ખરં, પદક્ખરાનિ અપરિહાપેત્વાતિ વુત્તં હોતિ. ચતૂસ્વપિ નિકાયેસૂતિ દીઘમજ્ઝિમસંયુત્ત અઙ્ગુત્તરનિકાયેસુ, નિદ્ધારણે ભુમ્મં. એકો વા નિકાયો પોત્થકોપિ ચ એકોતિ યોજના. અપિ-સદ્દેન ખુદ્દકનિકાયસ્સાપિ સઙ્ગહો વેદિતબ્બો. ‘‘પિ વા’’તિ ઇમિના ખુદ્દકનિકાયે જાતકભાણકેન સાટ્ઠકથં જાતકં ઉગ્ગહેત્વાપિ ધમ્મપદં સહ વત્થુના ઉગ્ગહેતબ્બમેવાતિ દસ્સિતે દ્વે પોત્થકે સમુચ્ચિનોતિ, ચત્તારિ ખન્ધકવત્તાનિ વા.

૧૧૪૨. દિસાપામોક્ખો યત્થ યત્થ વસતિ, તસ્સા તસ્સાદિસાય પામોક્ખો પધાનો. યેનકામંગમોતિ યત્થ કત્થચિ દિસાભાગે યથાકામં વુત્તિકો હોતીતિ અત્થો. પરિસં ઉપટ્ઠાપેતું કામં લભતે ઇસ્સરોતિ યોજના, ઇસ્સરો હુત્વા ભિક્ખુપરિસાય અત્તાનં ઉપટ્ઠાપેતું યથારુચિયા લભતીતિ અત્થો. એત્તાવતા પરિસૂપટ્ઠાપકલક્ખણં વુત્તં.

૧૧૪૩. વાચુગ્ગન્તિ વાચુગ્ગતં. એત્થ ચ ‘‘ઇદાનિ અયં ભણ્ડપાથાવિધિ ન હોતીતિ મિહકપરિપુચ્છનકથાનુરૂપતો અત્થકરણં ન વાચુગ્ગતકરણં નામાતિ વિઞ્ઞાયતી’’તિ નિસ્સન્દેહે વુત્તં. ઇમિના યથાવુત્તં દુતિયઙ્ગમેવ સઙ્ગહિતં.

૧૧૪૪. અસ્સાતિ ઇમસ્સ સિક્ખાપદસ્સ. અસમ્મતતાદીનિ તીણિ અઙ્ગાનીતિ અત્તનો અસમ્મતતા, ભિક્ખુનિયા પરિપુણ્ણૂપસમ્પન્નતા, ઓવાદવસેન અટ્ઠગરુધમ્મભણનન્તિ ઇમાનિ તીણિ અઙ્ગાનિ.

ઓવાદકથાવણ્ણના.

૧૧૪૬. તિકપાચિત્તિયન્તિ ‘‘અત્થઙ્ગતે સૂરિયે અત્થઙ્ગતસઞ્ઞી, વેમતિકો, અનત્થઙ્ગતસઞ્ઞી’’તિ વિકપ્પત્તયે. એકતોઉપસમ્પન્નન્તિ ભિક્ખુનિસઙ્ઘે ઉપસમ્પન્નં. ‘‘ભિક્ખુસઙ્ઘે ઉપસમ્પન્નં પન ઓવદતો પાચિત્તિયમેવા’’તિ અટ્ઠકથાયં વુત્તં.

૧૧૪૮. ઉદ્દેસાદિનયેનાતિ ‘‘અનાપત્તિ ઉદ્દેસં દેન્તો, પરિપુચ્છં દેન્તો’’તિઆદિના અનાપત્તિવારનયેન. અસ્સાતિ ભિક્ખુસ્સ.

અત્થઙ્ગતસૂરિયકથાવણ્ણના.

૧૧૪૯. ‘‘સચે અસમ્મતો’’તિ વક્ખમાનત્તા ઓવદન્તસ્સાતિ એત્થ ‘‘સમ્મતસ્સા’’તિ લબ્ભતિ. ભિક્ખુનુપસ્સયન્તિ ભિક્ખુનિવિહારં. અઞ્ઞત્ર કાલાતિ ‘‘તત્થાયં સમયો, ગિલાના હોતિ ભિક્ખુની’’તિ વુત્તકાલતો અઞ્ઞત્ર. ‘‘ગિલાના નામ ભિક્ખુની ન સક્કોતિ ઓવાદાય વા સંવાસાય વા ગન્તુ’’ન્તિ (પાચિ. ૧૬૧) દસ્સિતે ગિલાનકાલે અનાપત્તીતિ વુત્તં હોતિ.

૧૧૫૦. પાચિત્તિયદ્વયં હોતીતિ પઠમસિક્ખાપદેન, ઇમિના ચ સિક્ખાપદેન દ્વે પાચિત્તિયાનિ હોન્તીતિ. ‘‘તીણિપિ પાચિત્તિયાની’’તિ યોજેતબ્બા, પઠમદુતિયતતિયેહિ સિક્ખાપદેહિ તીણિ પાચિત્તિયાનિ હોન્તીતિ અત્થો.

૧૧૫૧. અઞ્ઞેન ધમ્મેનાતિ ગરુધમ્મતો અઞ્ઞેન બુદ્ધવચનેન. દુક્કટદ્વયન્તિ અસમ્મતભિક્ખુનુપસ્સયગમનમૂલકં દુક્કટદ્વયં. ભિક્ખુનોતિ અસમ્મતસ્સ ‘‘સમ્મતસ્સાપી’’તિ વક્ખમાનત્તા. ‘‘અટ્ઠહિ વા ગરુધમ્મેહિ અઞ્ઞેન વા ધમ્મેન ઓવદતિ, આપત્તિ પાચિત્તિયસ્સા’’તિ (પાચિ. ૧૫૫) અત્થઙ્ગતસિક્ખાપદે વુત્તત્તા ‘‘રત્તિહેતુક’’ન્તિ આહ, રત્તિઓવાદનમૂલન્તિ અત્થો.

૧૧૫૨. પાચિત્તિયદ્વયન્તિ દુતિયતતિયમૂલકં. ગરુધમ્મેન ઓવાદો ગરુધમ્મો, સો નિદાનં યસ્સ પાચિત્તિયસ્સાતિ વિગ્ગહો. સમ્મતત્તા ગરુધમ્મનિદાનસ્સ પાચિત્તિયસ્સ અભાવતોતિ સમ્બન્ધો. ઇમિના પઠમસિક્ખાપદેન અનાપત્તિભાવં દસ્સેતિ.

૧૧૫૩. તસ્સેવાતિ સમ્મતસ્સેવ. દુક્કટં ઇમિના તતિયસિક્ખાપદેન. અનાપત્તિ પઠમસિક્ખાપદેન, તેનેવાહ ‘‘સમ્મતત્તા’’તિ. પાચિત્તિ દુતિયસિક્ખાપદેન, તેનેવાહ ‘‘રત્તિય’’ન્તિ.

૧૧૫૪. તિકપાચિત્તિયં વુત્તન્તિ ‘‘ઉપસમ્પન્નાય ઉપસમ્પન્નસઞ્ઞી, વેમતિકો, અનુપસમ્પન્નસઞ્ઞી ભિક્ખુનુપસ્સયં ઉપસઙ્કમિત્વા અઞ્ઞત્ર સમયા ઓવદતિ, આપત્તિ પાચિત્તિયસ્સા’’તિ (પાચિ. ૧૬૨) તિકપાચિત્તિયં વુત્તં. ઇતરદ્વયેતિ ‘‘અનુપસમ્પન્નાય ઉપસમ્પન્નસઞ્ઞી, આપત્તિ દુક્કટસ્સ. અનુપસમ્પન્નાય વેમતિકો, આપત્તિ દુક્કટસ્સા’’તિ (પાચિ. ૧૬૨) દસ્સિતે ઇતરદ્વયે. ઓવદન્તસ્સાતિ યેન કેનચિ ઓવદન્તસ્સ.

૧૧૫૫. તિકપાચિત્તિયં, દુક્કટટ્ઠાને દુક્કટમેવ હોતીતિ દસ્સેતુમાહ ‘‘તથા’’તિ. ભિક્ખુનુપસ્સયં ગન્ત્વા અઞ્ઞેન ધમ્મેન ઓવદન્તસ્સ તથાતિ યોજના.

ભિક્ખુનુપસ્સયકથાવણ્ણના.

૧૧૫૬. ચીવરાદીનન્તિ આદિ-સદ્દેન પિણ્ડપાતાદિઇતરપચ્ચયત્તયઞ્ચ સક્કારગરુકારમાનનવન્દનપૂજનાનિ ચ સઙ્ગહિતાનિ. સમ્મતેતિ ભિક્ખુનોવાદકસમ્મુતિયા સમ્મતે.

૧૧૫૭. તિકપાચિત્તિયં વુત્તન્તિ ‘‘ધમ્મકમ્મે ધમ્મકમ્મસઞ્ઞી, વેમતિકો, અધમ્મકમ્મસઞ્ઞી એવં વદતિ, આપત્તિ પાચિત્તિયસ્સા’’તિ (પાચિ. ૧૬૭) તિકપાચિત્તિયં પાળિયં દસ્સિતમેવ. ઇધ કમ્મં નામ યથાવુત્તં સમ્મુતિકમ્મં. અધમ્મકમ્મે ધમ્મકમ્મસઞ્ઞિવેમતિકઅધમ્મકમ્મસઞ્ઞીનં વસેન તિકદુક્કટં. વીસતિવસ્સો વા અતિરેકવીસતિવસ્સો વાતિ સમ્મુતિયા અઙ્ગાનિ.

૧૧૫૮. ‘‘સમ્મતં અનુપસમ્પન્ન’’ન્તિ કં સન્ધાયાહાતિ ચે? સમ્મતેન હુત્વા સિક્ખં પચ્ચક્ખાય સામણેરભાવમુપગતં સન્ધાય વુત્તં. આમિસત્થાયાતિ ચીવરાદીનમત્થાય.

આમિસકથાવણ્ણના.

૧૧૬૨. ભિક્ખુનિયા દિન્નન્તિ એત્થ ‘‘ભિક્ખુસ્સા’’તિ વત્તબ્બં. ભિક્ખુના દિન્નન્તિ યોજના. ‘‘ભિક્ખુનિયા’’તિ સેસો. તત્થાતિ ચીવરપટિગ્ગહણસિક્ખાપદે. સૂચિતાતિ પકાસિતા.

ચીવરદાનકથાવણ્ણના.

૧૧૬૩. અઞ્ઞાતિકાય ભિક્ખુનિયા ચીવરન્તિ યોજના.

૧૧૬૪. એત્થાતિ ઇમસ્મિં સિક્ખાપદે.

૧૧૬૫. સૂચિં ચીવરં પવેસેત્વાતિ સમ્બન્ધો. સૂચિનીહરણેતિ ચીવરતો.

૧૧૬૬. પયોગસ્સ વસાતિ એકક્ખણે બહૂ આવુણિત્વા સૂચિયા નીહરણપયોગગણનાય. બહૂ પાચિત્તિયોતિ યોજના, પયોગપ્પમાણાપત્તિયો હોન્તીતિ અત્થો.

૧૧૬૯. અનેકા પાચિત્તિયાપત્તી હોન્તીતિ યોજના. આરપથેતિ સૂચિમગ્ગે. દુતિયે પથેતિ એત્થ આર-સદ્દો ગાથાબન્ધસુખત્થં લુત્તોતિ વેદિતબ્બો.

૧૧૭૦. કા હિ નામ કથાતિ ‘‘અનેકાપત્તિયો હોન્તી’’તિ એત્થ કિં વત્તબ્બન્તિ અત્થો. તિકપાચિત્તિયન્તિ ‘‘અઞ્ઞાતિકાય અઞ્ઞાતિકસઞ્ઞી, વેમતિકો, ઞાતિકસઞ્ઞી ચીવરં સિબ્બતિ વા સિબ્બાપેતિ વા, આપત્તિ પાચિત્તિયસ્સા’’તિ (પાચિ. ૧૭૮) વુત્તં તિકપાચિત્તિયં.

૧૧૭૨. અઞ્ઞં પરિક્ખારન્તિ ઉપાહનત્થવિકાદિં. સિબ્બતોતિ એત્થ ‘‘સિબ્બાપયતો’’તિ અધિકારતો લબ્ભતિ. સિક્ખમાનસામણેરિયો સિક્ખમાનાદિકા નામ.

૧૧૭૩. સિબ્બનકિરિયાય આપજ્જિતબ્બતો ક્રિયં.

ચીવરસિબ્બનકથાવણ્ણના.

૧૧૭૪-૫. સંવિધાયાતિ ‘‘અજ્જ યામ, સ્વે યામા’’તિઆદિના નયેન સંવિદહિત્વા. યથાહ ‘‘અજ્જ વા હિય્યો વા પરે વા ગચ્છામાતિ સંવિદહતી’’તિ (પાચિ. ૧૮૩). મગ્ગન્તિ એકદ્ધાનમગ્ગં, અન્તમસો ગામન્તરમ્પિ. અઞ્ઞત્ર સમયાતિ ‘‘તત્થાયં સમયો, સત્થગમનીયો હોતિ મગ્ગો સાસઙ્કસમ્મતો સપ્પટિભયો’’તિ (પાચિ. ૧૮૨) વુત્તકાલવિસેસા અઞ્ઞત્રાતિ વુત્તં હોતિ. સત્થવાહેહિ વિના અગમનીયો મગ્ગો સત્થગમનીયો નામ. ચોરાનં સયિતનિસિન્નટ્ઠિતખાદિતપીતટ્ઠાનાનિ યત્થ દિસ્સન્તિ, તાદિસો મગ્ગો સાસઙ્કો નામ. ચોરેહિ હતમારિતઘાતવિલુત્તમનુસ્સા યત્થ પઞ્ઞાયન્તિ, સો સપ્પટિભયો નામ. ઇધાતિ ઇમસ્મિં ભિક્ખુનિયા સદ્ધિં કતસંવિધાનં અવિરાધેત્વા તાય એકદ્ધાનમગ્ગં પટિપજ્જનકાલેતિ અત્થો.

અઞ્ઞો ગામો ગામન્તરં, તત્થ ઓક્કમનં ઉપગમનં ગામન્તરોક્કમો, તસ્મિં કતેતિ અત્થો. અગામકે અરઞ્ઞે અદ્ધયોજનાતિક્કમે વાતિ યોજના, ગામરહિતં અરઞ્ઞમગ્ગમ્પિ દ્વિગાવુતં અતિક્કન્તે વાતિ અત્થો.

૧૧૭૬. ‘‘આપત્તિ હોતી’’તિ સામઞ્ઞતો દસ્સિતઆપત્તિયા ભેદાભેદં દસ્સેતુમાહ ‘‘એત્થા’’તિઆદિ. એત્થાતિ ઇમસ્મિં સિક્ખાપદવિનિચ્છયે, પકરણે વા. દુક્કટં દીપિતન્તિ સમ્બન્ધો. અકપ્પિયભૂમટ્ઠોતિ એત્થ અકપ્પિયા ભૂમિ નામ અન્તોગામે ભિક્ખુનુપસ્સયદ્વારકોટ્ઠકોતિ એવમાદિ. યથાહ અટ્ઠકથાયં ‘‘સચે પન અન્તોગામે ભિક્ખુનુપસ્સયદ્વારે રથિકાય, અઞ્ઞેસુ વા ચતુક્કસિઙ્ઘાટકહત્થિસાલાદીસુ સંવિદહન્તિ, ભિક્ખુનો આપત્તિ દુક્કટસ્સા’’તિ (પાચિ. અટ્ઠ. ૧૮૨-૧૮૩). એત્થ ચ ચતુન્નં મગ્ગાનં સમ્બન્ધટ્ઠાનં ચતુક્કં. તિણ્ણં મગ્ગાનં સમ્બન્ધટ્ઠાનં સિઙ્ઘાટકં.

૧૧૭૭. કપ્પિયભૂમિ નામ ભિક્ખુનુપસ્સયાદિ. યથાહ ‘‘સચે ઉભોપિ ભિક્ખુનુપસ્સયે વા અન્તરારામે વા આસનસાલાય વા તિત્થિયસેય્યાય વા ઠત્વા સંવિદહન્તિ, અનાપત્તિ. કપ્પિયભૂમિ કિરાયં. તસ્મા એત્થ સંવિદહનપચ્ચયા દુક્કટાપત્તિં ન વદન્તી’’તિ (પાચિ. અટ્ઠ. ૧૮૨-૧૮૩). તેનેવાહ ‘‘ન વદન્તસ્સ દુક્કટ’’ન્તિ. ‘‘ન વદન્તિ અસ્સા’’તિ પદચ્છેદો.

૧૧૭૮. ઉભયત્થાતિ અકપ્પિયભૂમિયં ઠત્વા સંવિધાય ગમને, કપ્પિયભૂમિયં ઠત્વા સંવિધાય ગમને ચાતિ ઉભયવિકપ્પે. ગચ્છન્તસ્સેવાતિ એવકારેન નિક્ખન્તસ્સ જોતકં. યથાહ ‘‘નિક્ખમને અનાપત્તી’’તિ. ‘‘ભિક્ખુનો’’તિ ઇમિના ભિક્ખુનિયા અનાપત્તિભાવં દીપેતિ. આપત્તિખેત્તનિયમનત્થમાહ ‘‘અનન્તરસ્સા’’તિઆદિ.

૧૧૭૯. તત્રાપીતિ કપ્પિયભૂમિઉપચારોક્કમનેપિ. ઉદીરિતન્તિ મહાપચ્ચરિયં. યથાહ ‘‘મહાપચ્ચરિયં વુત્ત’’ન્તિ.

૧૧૮૦. અન્તરાતિ અત્તનો નિક્ખન્તગામસ્સ, અનન્તરગામસ્સ ચ વેમજ્ઝે. યથાહ ‘‘ગામતો નિક્ખમિત્વા પન યાવ અનન્તરગામસ્સ ઉપચારં ન ઓક્કમતિ, એત્થન્તરે સંવિદહિતેપિ ભિક્ખુનો દુક્કટ’’ન્તિ (પાચિ. અટ્ઠ. ૧૮૨-૧૮૩). ઇમસ્મિં સિક્ખાપદે કાલદ્વારમગ્ગાનં વસેન તયો સઙ્કેતવિસઙ્કેતાતિ તેસુ મગ્ગદ્વારવિસઙ્કેતેપિ આપત્તિ હોતેવાતિ દસ્સેતુમાહ ‘‘દ્વાર…પે… વુચ્ચતી’’તિ. કાલવિસઙ્કેતે પન અનાપત્તિં વક્ખતિ. આપત્તિ પાચિત્તિ.

૧૧૮૧. અસંવિદહિતે કાલેતિ ‘‘પુરેભત્તં ગમિસ્સામા’’તિઆદિના કતસંવિધાનાનં પચ્છાભત્તાદિ અસંવિદહિતકાલં નામ, તસ્મિં. ભિક્ખુસ્સેવ વિધાનસ્મિન્તિ ભિક્ખુનિયા સંવિધાનં વિના ભિક્ખુસ્સેવ વિધાને સતિ આપત્તિ દુક્કટં.

૧૧૮૨. સમયે વિદહિત્વા ગચ્છતો વા અસમયે વિદહિત્વા વિસઙ્કેતેન ગચ્છતો વા આપદાસુ વિદહિત્વા ગચ્છતો વા અનાપત્તીતિ યોજના. તથાતિ ‘‘વિદહિત્વા ગચ્છતો અનાપત્તી’’તિ ઇદં અતિદિસતિ.

તત્થ સમયો નામ યથાવુત્તકાલવિસેસો. વિસઙ્કેતો નામ કાલવિસઙ્કેતો, ‘‘અસુકસ્મિં દિવસે અસુકવેલાય ગમિસ્સામા’’તિ સંવિદહિત્વા ગમનકાલે તસ્સ કાલસઙ્કેતસ્સ વિભવનન્તિ વુત્તં હોતિ. યથાહ ‘‘કાલવિસઙ્કેતેયેવ અનાપત્તી’’તિ (પાચિ. અટ્ઠ. ૧૮૫). આપદા નામ રટ્ઠભેદે જનપદાનં પલાયનકાલો. યથાહ ‘‘રટ્ઠભેદે ચક્કસમારુળ્હા જનપદા પરિયાયન્તિ, એવરૂપાસુ આપદાસૂ’’તિ (પાચિ. અટ્ઠ. ૧૮૫). એત્થ ચ રટ્ઠભેદેતિ રટ્ઠવિલોપે. ચક્કસમારુળ્હાતિ ઇરિયાપથચક્કં, સકટચક્કં વા સમારુળ્હા. ઉમ્મત્તકાદિનોતિ આદિ-સદ્દેન ખિત્તચિત્તાદયો ગહિતા.

૧૧૮૩. કાયવાચાદિકત્તયાતિ એત્થ આદિ-સદ્દેન ચિત્તં ગહિતં, કાયવાચાચિત્તાતિ વુત્તં હોતિ.

સંવિધાનકથાવણ્ણના.

૧૧૮૪. ઉદ્ધં જવતીતિ ઉજ્જવની, પટિસોતગામિની નાવા, તં. અધો જવનતો ઓજવની, અનુસોતગામિની નાવા, તં. અભિરુહેય્યાતિ એત્થ ‘‘સંવિધાયા’’તિ સેસો. યથાહ ‘‘યો પન ભિક્ખુ ભિક્ખુનિયા સદ્ધિં સંવિધાય એકં નાવં અભિરુહેય્યા’’તિ (પાચિ. ૧૮૬). લોકસ્સાદસઙ્ખાતમિત્તસન્થવેન તં નાવં આરુય્હ કીળનચિત્તં પુબ્બઙ્ગમં કત્વા અઞ્ઞમઞ્ઞં સંવિધાયાતિ અત્થો. યથાહ અટ્ઠકથાયં ‘‘લોકસ્સાદમિત્તસન્થવવસેન કીળાપુરેક્ખારો સંવિદહિત્વા’’તિ (પાચિ. અટ્ઠ. ૧૮૮).

૧૧૮૫. સગામતીરપસ્સેન ગમને ગામન્તરવસેન વા પાચિત્તિ, અગામતીરપસ્સેન ગમને અદ્ધયોજને પાચિત્તિ અદ્ધયોજનાતિરેકે ઠાને ગામે વિજ્જમાનેપિ અવિજ્જમાનેપિ.

૧૧૮૬. યોજનપુથુલાય નદિયા મજ્ઝેન ગચ્છતો અદ્ધયોજનવસેન આપત્તિદસ્સનત્થમાહ ‘‘તથા’’તિઆદિ. ‘‘ઊનયોજનપુથુલાય નદિયા મજ્ઝં ઉભયભાગં ભજતીતિ તાદિસિકાય નદિયા મજ્ઝેન ગચ્છન્તસ્સ ગામન્તરગણનાય, અદ્ધયોજનગણનાય ચ આપત્તી’’તિ વદન્તિ.

૧૧૮૭. યથાસુખં સમુદ્દસ્મિન્તિ એત્થ ‘‘ગન્તબ્બ’’ન્તિ સેસો. ‘‘સબ્બઅટ્ઠકથાસૂ’’તિઆદિના યથાસુખગમનાનુઞ્ઞાય હેતું દસ્સેતિ. ઇમિનાવ અસન્દમાનોદકેસુ વાપિતળાકાદીસુ અનાપત્તીતિ વિઞ્ઞાયતિ.

૧૧૮૮. તિત્થસમ્પાદનત્થાયાતિ પરતિત્થં પાપેતું. તં નાવં. યુત્તાતિ નાવાપાજકા.

૧૧૮૯. ‘‘તથા’’તિ ઇમિના ‘‘અનાપત્તિ પકાસિતા’’તિ ઇમં સઙ્ગણ્હાતિ. અસંવિદહિત્વા ભિક્ખુનિયા સદ્ધિં એકં નાવં અભિરુહેય્ય વા, તિરિયં તરણાય ભિક્ખુનિયા સદ્ધિં સંવિદહિત્વાપિ એકં નાવં અભિરુહેય્ય વા, આપદાસુ ભિક્ખુનિયા સદ્ધિં સંવિદહિત્વાપિ એકં નાવં અભિરુહેય્ય વા, તથા અનાપત્તિ પકાસિતાતિ યોજના.

‘‘અનન્તરસમો’’તિ ઇમિના ‘‘અસંવિદહિતે કાલે’’તિઆદિના વુત્તવિનિચ્છયં સઙ્ગણ્હાતિ. ઇધાપિ કાલવિસઙ્કેતે અનાપત્તિ, તિત્થનાવાવિસઙ્કેતે આપત્તિયેવ. યથાહ ‘‘ઇધાપિ કાલવિસઙ્કેતેનેવ અનાપત્તી’’તિઆદિ (પાચિ. અટ્ઠ. ૧૯૧). ‘‘લોકસ્સાદમિત્તસન્થવવસેન કીળાપુરેક્ખારો સંવિદહિત્વા’’તિ (પાચિ. અટ્ઠ. ૧૮૮) વચનતો કેચિ ‘‘ઇમં સિક્ખાપદં અકુસલચિત્તં લોકવજ્જ’’ન્તિ વદન્તિ, તં ન ગહેતબ્બં. કીળાપુરેક્ખારતાય હિ અભિરુહિત્વા ગામન્તરોક્કમને, અદ્ધયોજનાતિક્કમે વા કુસલાબ્યાકતચિત્તસમઙ્ગીપિ હુત્વા આપત્તિં આપજ્જતિ. યદિ હિ સો સંવેગં પટિલભિત્વા અરહત્તં વા સચ્છિકરેય્ય, નિદ્દં વા ઓક્કમેય્ય, કમ્મટ્ઠાનં વા મનસિ કરોન્તો ગચ્છેય્ય, કુતો તસ્સ અકુસલચિત્તસમઙ્ગિતા, યેનિદં સિક્ખાપદં ‘‘અકુસલચિત્તં, લોકવજ્જ’’ન્તિ વુચ્ચતિ, તસ્મા પણ્ણત્તિવજ્જં, તિચિત્તન્તિ સિદ્ધં.

નાવાભિરુહનકથાવણ્ણના.

૧૧૯૦. ગિહિસમારમ્ભં હિત્વા ભિક્ખુનિયા પરિપાચિતં ભત્તં ઞત્વા ભુઞ્જતો ભિક્ખુનો પાચિત્તિ હોતીતિ યોજના. પરિપાચિતં નામ ભિક્ખુનો સીલસુતાદિગુણં કુલાનં વત્વા નિપ્ફાદિતં. યથાહ ‘‘ભિક્ખુનિયા પરિપાચિતં, ગુણપ્પકાસનેન નિપ્ફાદિતં લદ્ધબ્બં કતન્તિ અત્થો’’તિ (પાચિ. અટ્ઠ. ૧૯૪). ગિહિસમારમ્ભન્તિ ભિક્ખુનિયા પરિપાચનતો પુબ્બેયેવ ગિહિપટિયત્તં. યથાહ ‘‘ભિક્ખુનિયા પરિપાચનતો પઠમમેવ યં ગિહીનં પટિયાદિતં ભત્ત’’ન્તિ (પાચિ. અટ્ઠ. ૧૯૪). વક્ખતિ હિ ‘‘ગિહિસમ્પાદિતમ્પિ વા વિના’’તિ.

૧૧૯૧. ‘‘તસ્સા’’તિ વક્ખમાનત્તા ‘‘યં ભોજન’’ન્તિ યોજેતબ્બં. તસ્સાતિ પઞ્ચધા વુત્તસ્સ ભોજનસ્સ. સબ્બેસુ અજ્ઝોહારેસૂતિ સબ્બેસુ પરગલકરણપ્પયોગેસુ.

૧૧૯૨. ભિક્ખુનિયા પરિપાચિતં ભુઞ્જતો દોસોતિ યોજના.

૧૧૯૩. ઉભોસૂતિ પરિપાચિતેપિ અપરિપાચિતેપિ. સબ્બત્થાતિ ઇમેસુ દ્વીસુ પરિભુઞ્જતો અજ્ઝોહારવસેનેવ દુક્કટન્તિ યોજના.

૧૧૯૫. પઞ્ચભોજનં ઠપેત્વા અઞ્ઞં પન યં કિઞ્ચિ યાગુખજ્જફલાદિકં ભુઞ્જન્તસ્સ અનાપત્તીતિ યોજના.

પરિપાચિતકથાવણ્ણના.

૧૧૯૭. ઇદં સબ્બં દસમં સિક્ખાપદં સમુટ્ઠાનનયાદિના દુતિયાનિયતેનેવ સદિસં મતન્તિ યોજના. ઇદં સિક્ખાપદન્તિ ‘‘યો પન ભિક્ખુ ભિક્ખુનિયા સદ્ધિં એકો એકાય રહો નિસજ્જં કપ્પેય્ય, પાચિત્તિય’’ન્તિ (પાચિ. ૧૯૯) વુત્તં રહોનિસજ્જસિક્ખાપદં.

રહોનિસજ્જકથાવણ્ણના.

ભિક્ખુનિવગ્ગો તતિયો.

૧૧૯૮. એકોતિ એકદિવસિકો. આવસથો પિણ્ડોતિ પુઞ્ઞત્થિકેહિ એકં પાસણ્ડં અનુદ્દિસ્સ યાવદત્થં દાતું સાલાદીસુ પઞ્ઞત્તં પઞ્ચસુ ભોજનેસુ અઞ્ઞતરં ભોજનં. યથાહ ‘‘આવસથપિણ્ડો નામ પઞ્ચન્નં ભોજનાનં અઞ્ઞતરં ભોજનં સાલાય વા મણ્ડપે વા રુક્ખમૂલે વા અજ્ઝોકાસે વા અનોદિસ્સ યાવદત્થો પઞ્ઞત્તો હોતી’’તિ (પાચિ. ૨૦૬). અગિલાનેનાતિ એત્થ ‘‘અગિલાનો નામ સક્કોતિ તમ્હા આવસથા પક્કમિતુ’’ન્તિ વુત્ત પદભાજનિયઅટ્ઠકથાયં ‘‘અદ્ધયોજનં વા યોજનં વા ગન્તું સક્કોતી’’તિ (પાચિ. અટ્ઠ. ૨૦૬) વુત્તત્તા તમ્હા આવસથા અદ્ધયોજનં વા યોજનં વા ગન્તું સમત્થેન અગિલાનેનાતિ અત્થો. તતો ઉદ્ધન્તિ દુતિયદિવસતો ઉત્તરિ.

૧૧૯૯. અનોદિસ્સેવ પઞ્ઞત્તે પિણ્ડેતિ યોજના, ‘‘ઇમેસંયેવ વા’’તિ અઞ્ઞતરં પાસણ્ડં વા ‘‘એત્તકાનંયેવ વા’’તિ તત્થ પુગ્ગલપરિચ્છેદં વા અકત્વા સબ્બસાધારણં કત્વા પઞ્ઞત્તે આવસથપિણ્ડેતિ અત્થો. યાવદત્થે એવ પિણ્ડે પઞ્ઞત્તેતિ યોજના, યાવતા અત્થો કુચ્છિપૂરણાદિકં પયોજનમેત્થ પિણ્ડેતિ વિગ્ગહો, ‘‘એત્તકં દાતબ્બ’’ન્તિ અપરિચ્છિન્દિત્વા ‘‘ભુઞ્જન્તાનં યાવદત્થં દાતબ્બ’’ન્તિ પઞ્ઞત્તે પિણ્ડે એવાતિ અત્થો. ભુઞ્જિતબ્બન્તિ કમ્મસાધનં વા ભાવસાધનં વા. ‘‘ભોજન’’ન્તિ અજ્ઝાહરણીયં. સકિન્તિ એકવારં. તત્થાતિ આવસથે.

૧૨૦૦. તસ્સ પિણ્ડસ્સ. અજ્ઝોહારેસુ સબ્બેસૂતિ સબ્બેસુ અજ્ઝોહારપ્પયોગેસુ કતેસુ. તસ્સ અજ્ઝોહારકસ્સ. પાચિત્તિયો પયોગગણનાય.

૧૨૦૧. ‘‘એકેન કુલેન નાનેકટ્ઠાનભેદેસુ પઞ્ઞત્તે’’તિ, ‘‘નાનાકુલેહિ વા નાનેકટ્ઠાનભેદેસુ પઞ્ઞત્તે’’તિ ચાતિ યોજના. ‘‘પિણ્ડે’’તિ અધિકારો. નાના ચ એકો ચ નાનેકા, ઠાનાનં ભેદા ઠાનભેદા, નાનેકા ચ તે ઠાનભેદા ચાતિ વિગ્ગહો, તેસુ. એકભોગોતિ એકપિણ્ડપરિભોગો. એવકારેન દુતિયદિવસાદિપરિભોગં નિવત્તેતિ.

૧૨૦૪. ગિલાનસ્સાતિ વુત્તલક્ખણેન ગિલાનો હુત્વા પુનપ્પુનં ભુઞ્જન્તસ્સ ગચ્છતો વા આગચ્છન્તસ્સ વા અનાપત્તીતિ યોજના, અન્તમસો અદ્ધયોજનમ્પિ ગચ્છતો, ગન્ત્વા આગચ્છતો વા અન્તરામગ્ગે ચ ગતટ્ઠાને ચ એકસ્મિં દિવસે ભુઞ્જન્તસ્સ અનાપત્તીતિ વુત્તં હોતિ. યથાહ ‘‘યો ગચ્છન્તો અન્તરામગ્ગે એકદિવસં, ગતટ્ઠાને ચ એકદિવસં ભુઞ્જતિ, તસ્સાપિ અનાપત્તિ. આગચ્છન્તેપિ એસેવ નયો’’તિ (પાચિ. અટ્ઠ. ૨૦૮). ઓદિસ્સ પઞ્ઞત્તેતિ એત્થ ‘‘ભિક્ખૂ’’તિ સેસો. યથાહ ‘‘ભિક્ખૂનંયેવ અત્થાય ઉદ્દિસિત્વા પઞ્ઞત્તો હોતી’’તિ (પાચિ. અટ્ઠ. ૨૦૮). પરિત્તેતિ ઉદરપૂરણાય અપ્પહોનકે થોકે ભોજને. યથાહ ‘‘યાવદત્થં પઞ્ઞત્તો ન હોતિ, થોકં થોકં લબ્ભતિ, તાદિસં નિચ્ચમ્પિ પરિભુઞ્જિતું વટ્ટતી’’તિ (પાચિ. અટ્ઠ. ૨૦૮). સકિન્તિ યાવદત્થં પઞ્ઞત્તં વુત્તનયેન એકવારં ભુઞ્જતો અનાપત્તિ.

૧૨૦૫. યાગુઆદીનીતિ આદિ-સદ્દેન પઞ્ચભોજનતો અઞ્ઞેસં અજ્ઝોહરણીયાનં ગહણં.

આવસથકથાવણ્ણના.

૧૨૦૬. વુત્તા સમયા અઞ્ઞત્રાતિ યોજના, ‘‘તત્થાયં સમયો, ગિલાનસમયો ચીવરદાનસમયો ચીવરકારસમયો અદ્ધાનગમનસમયો નાવાભિરુહનસમયો મહાસમયો સમણભત્તસમયો’’તિ (પાચિ. ૨૧૭) વુત્તા સત્તવિધકાલા અઞ્ઞત્ર.

તત્થ યદા પાદાનં ફલિતત્તા ન સક્કોતિ પિણ્ડાય ચરિતું, અયં ગિલાનસમયો. અત્થતકથિનાનં પઞ્ચ માસા, ઇતરેસં કત્તિકમાસોતિ અયં ચીવરદાનસમયો. યદા ચીવરે કરિયમાને કિઞ્ચિદેવ ચીવરે કત્તબ્બં કરોતિ, અયં ચીવરકારસમયો. યદા અદ્ધયોજનમ્પિ ગન્તુકામો વા હોતિ, ગચ્છતિ વા, ગતો વા, અયં અદ્ધાનગમનસમયો. નાવાભિરુહનસમયેપિ એસેવ નયો. યદા ગોચરગામે ચત્તારો ભિક્ખૂ પિણ્ડાય ચરિત્વા ન યાપેન્તિ, અયં મહાસમયો. યદા યો કોચિ પબ્બજિતો ભત્તેન નિમન્તેતિ, અયં સમણભત્તસમયો. ગણો કતમોતિ આહ ‘‘ગણો’’તિઆદિ.

૧૨૦૭. ગણભોજનં નામ કિન્તિ આહ ‘‘ય’’ન્તિઆદિ. યં પઞ્ચન્નં અઞ્ઞતરં નિમન્તનતો, વિઞ્ઞત્તિતો વા લદ્ધં, તં ઇધ ભોજનન્તિ અધિપ્પેતં હોતીતિ યોજના. નિમન્તનતોતિ ‘‘ભોજનાન’’ન્તિઆદિના વક્ખમાનપ્પકારેન કતં અકપ્પિયનિમન્તનમાહ. વિઞ્ઞત્તિતોપિ વાતિ ‘‘સચેપી’’તિઆદિના વક્ખમાનનયેન કતમકપ્પિયવિઞ્ઞત્તિમાહ.

૧૨૦૮-૧૧. ભોજનાનન્તિ નિદ્ધારણે સામિવચનં, ‘‘અઞ્ઞતરસ્સા’’તિ સેસો, ‘‘ઓદનો સત્તુ કુમ્માસો, મચ્છો મંસઞ્ચ ભોજન’’ન્તિ સઙ્ગહિતાનં પઞ્ચન્નં ભોજનાનં અઞ્ઞતરસ્સ. નામન્તિ વક્ખમાનં ઓદનાદિનામં. ભિક્ખૂ નિમન્તેતીતિ એત્થ ‘‘એકતો, નાનતો વા’’તિ સેસો. યથાહ ‘‘એકતો નિમન્તિતા. નાનતો નિમન્તિતા’’તિ (પાચિ. અટ્ઠ. ૨૧૭-૨૧૮). એકતો નિમન્તનં નામ સબ્બેસં ભિક્ખૂનં એકતો ઠિતાનં નિમન્તનં. નાનતો નિમન્તનં નામ ભિક્ખૂનં વિસું વિસું વસનટ્ઠાનં ગન્ત્વા વા એકતો ઠિતટ્ઠાનં ગન્ત્વા વા અનેકેહિ નિમન્તનં. યથાહ ‘‘ચત્તારિ પરિવેણાનિ વા વિહારે વા ગન્ત્વા નાનતો નિમન્તિતા, એકટ્ઠાને ઠિતેસુયેવ વા એકો પુત્તેન, એકો પિતરાતિ એવમ્પિ નાનતો નિમન્તિતા’’તિ (પાચિ. અટ્ઠ. ૨૧૭-૨૧૮).

વેવચનં નામ ઓદનાદિસબ્બપદાનં, સમ્પટિચ્છથાતિઆદિકિરિયાપદાનઞ્ચ પરિયાયવચનં. ભાસન્તરં નામ માગધવચનતો અઞ્ઞં સીહળદમિળાદિવોહારન્તરં. વેવચનેહિ એવ વા ભાસન્તરેન વા નિમન્તેતીતિ સમ્બન્ધો.

તતો નિમન્તનાનન્તરં. નિમન્તનન્તિ યથાવુત્તં અકપ્પિયનિમન્તનં. એકતો ગણ્હન્તીતિ અઞ્ઞમઞ્ઞસ્સ દ્વાદસહત્થં અમુઞ્ચિત્વા ઠિતા વા નિસિન્ના વા એકતો ગણ્હન્તિ.

‘‘ગણભોજનકારણ’’ન્તિ ઇદં ભોજનપચ્ચયા પાચિત્તિયં એવં ગહણમન્તરેન ન હોતીતિ વુત્તં.

૧૨૧૨. એકતો, નાનતો વાપિ યં ગમનં, ભોજનમ્પિ વા, તં ગણભોજને ન કારણન્તિપિ વિઞ્ઞૂ ભણન્તીતિ યોજના. એકતો નાનતો વાપીતિ એત્થ ‘‘ઠિતા વા નિસિન્ના વા’’તિ સેસો.

૧૨૧૩-૪. વિઞ્ઞાપેત્વાતિ ‘‘અમ્હાકં ચતુન્નમ્પિ ભત્તં દેહી’’તિઆદિના એકતો વા ‘‘મય્હં દેહિ, મય્હં દેહી’’તિ પાટેક્કં વા વિઞ્ઞાપેત્વા. એવમ્પીતિ વિઞ્ઞત્તિતોપિ.

૧૨૧૫. દુવિધસ્સાતિ નિમન્તકસ્સ, વિઞ્ઞાપકસ્સ ચ.

૧૨૧૬. સત્તસુપિ સમયેસુ ભુઞ્જતં અનાપત્તીતિ યોજના, ‘‘ગણભોજન’’ન્તિ પકરણતો લબ્ભતિ, યથાવુત્તેસુ ગિલાનાદીસુ સત્તસુ કાલેસુ લેસં વિના ભુઞ્જન્તાનન્તિ અત્થો. ‘‘એકતો’’તિ ઇદં ‘‘ગહેત્વા’’તિ ઇમિના યોજેતબ્બં. ભુઞ્જતન્તિ ભુઞ્જન્તાનં. તથાતિ ‘‘અનાપત્તી’’તિ ઇદં પચ્ચામસતિ.

૧૨૧૭. અનુપસમ્પન્નો ચ ચારી ચ પત્તો ચ અનિમન્તિતો ચ અનુપસમ્પન્ન…પે… નિમન્તિતા, તે ચતુત્થે કત્વાતિ અત્થો, અનુપસમ્પન્નં વા પિણ્ડચારિં વા ચતુત્થસ્સ પત્તં વા અનિમન્તિતં વા ચતુત્થં કત્વા એકતો ગહેત્વા ભુઞ્જન્તાનં ગણભેદો મુનિના પકાસિતો, ગણસ્સ અપરિપુણ્ણતા દીપિતાતિ વુત્તં હોતિ. પિણ્ડાય ચરતિ સીલેનાતિ પિણ્ડચારી, સો ઇધ પુબ્બપદલોપેન ‘‘ચારી’’તિ વુત્તો, પિણ્ડપાતિકો. સો હિ નિમન્તનં અસાદિયન્તો ગણભોજનકો ગણખાદકો ન હોતીતિ અધિપ્પાયો. પત્તો નામ વિહારે નિસીદિત્વા ચતુત્થેન અત્તના લદ્ધબ્બભોજનત્થાય પેસિતો પત્તો. અનિમન્તિતો નામ પઠમં અકપ્પિયનિમન્તનાય નિમન્તિતે અનન્તોગધો ઉપસમ્પન્નો. એત્થાતિ ઇમસ્મિં સિક્ખાપદે. અપિ-સદ્દો હેટ્ઠા દસ્સિતં દ્વિન્નં, તિણ્ણં વા વસેન વુત્તવિનિચ્છયં અપેક્ખતિ.

૧૨૧૮. સમયલદ્ધાનન્તિ ગિલાનાદયો સત્તસમયા લદ્ધા યેહિ તે સમયલદ્ધા, તેસં, નિદ્ધારણે સામિવચનં. ‘‘અઞ્ઞતરસ્સા’’તિ સેસો, ‘‘વસેના’’તિ ઇમિના સમ્બન્ધો. નેવ ગણભેદોતિ યોજના. સમયલદ્ધકસ્સ અત્તનો અનાપત્તિભાવમન્તરેન તં ચતુત્થં કત્વા ગણભોજનં ગણ્હન્તાનં પન આપત્તિસમ્ભવતો આહ ‘‘આપત્તિ પન વેદિતબ્બા’’તિ. યથાહ મહાપચ્ચરિયં ‘‘સમયલદ્ધકો સયમેવ મુચ્ચતિ, સેસાનં ગણપૂરકત્તા આપત્તિકરો હોતી’’તિ (પાચિ. અટ્ઠ. ૨૨૦).

૧૨૧૯. પઞ્ચભોજનેસુ અઞ્ઞતરસ્સ નામં ગહેત્વા નિમન્તેત્વા તેસુયેવ અઞ્ઞં દિય્યમાનં ગણ્હન્તસ્સ વિસઙ્કેતાભાવં દસ્સેતુમાહ ‘‘ભોજનાનઞ્ચા’’તિઆદિ. ભોજનાનન્તિ નિદ્ધારણે સામિવચનં, અઞ્ઞતરસ્સ વસેનાતિ વુત્તં હોતિ. તં વિસઙ્કેતં, ઓદનાદીનં નામેન નિમન્તેત્વા દિય્યમાનં યાગુઆદિં ગણ્હન્તસ્સ ગણભોજનં ન હોતીતિ વુત્તં હોતિ.

૧૨૨૧. ‘‘નિચ્ચભત્ત’’ન્તિ ધુવભત્તં વુચ્ચતિ. ‘‘નિચ્ચભત્તં ગણ્હથા’’તિ વદન્તિ, બહૂનમ્પિ એકતો ગહેતું વટ્ટતિ. સલાકભત્તાદીસુપિ એસેવ નયો.

ગણભોજનકથાવણ્ણના.

૧૨૨૩-૪. બહૂહિ મનુસ્સકેહીતિ વિસું વિસું નિમન્તિતેહિ અનેકેહિ મનુસ્સેહિ. પઞ્ચસુ યસ્સ કસ્સાતિ એત્થ ‘‘સહધમ્મિકેસૂ’’તિ સેસો, નિદ્ધારણે ભુમ્મં, પઞ્ચસુ સહધમ્મિકેસુ યસ્સ કસ્સચીતિ અત્થો. ‘‘હિત્વા’’તિઆદિના કિમાહાતિ? યસ્સ વિકપ્પેતિ, તસ્મિં સન્નિહિતે ‘‘મય્હં ભત્તપચ્ચાસં તુય્હં દમ્મી’’તિ સમ્મુખા વિકપ્પનવસેન વા તસ્મિં અસન્નિહિતે તસ્સ નામં ગહેત્વા ‘‘મય્હં ભત્તપચ્ચાસં ઇત્થન્નામસ્સ દમ્મી’’તિ અસમ્મુખા વિકપ્પનવસેન વા પઠમનિમન્તનાય વિકપ્પનં હિત્વા, તં અવિકપ્પેત્વાતિ વુત્તં હોતિ.

ભત્તન્તિ એત્થ ‘‘યો ભુઞ્જતી’’તિ સેસો. નિમન્તિતો યો પચ્છા નિમન્તિતં ભત્તં ભુઞ્જતિ, તસ્સ પાચિત્તિયન્તિ યોજના. ઉપ્પટિપાટિયા એકસિત્થમ્પિ ભુઞ્જતો તસ્સ પાચિત્તિયં સિયાતિ યોજનાતિ. કિં વુત્તં હોતિ? પચ્છા નિમન્તિતાનં ભોજનં પઠમં ભુઞ્જિત્વા પઠમં નિમન્તિતાનં ભોજનં પચ્છા ભુઞ્જન્તસ્સ ચ એકપત્તેયેવ હેટ્ઠા પઠમં નિમન્તિતાનં ભોજનં પક્ખિપિત્વા ઇતરં ઉપરિ પક્ખિપિત્વા હેટ્ઠા હત્થં ઓતારેત્વા હેટ્ઠા ઠિતભોજને એકસિત્થમ્પિ પઠમં અભુઞ્જિત્વા ઉપરિ ઠિતં પઠમં ભુઞ્જન્તસ્સ ચાતિ વુત્તં હોતિ. તેનેવ યથા ઉપ્પટિપાટિ ન હોતિ, તથા મિસ્સીકતં ભોજનં ભુઞ્જન્તસ્સ ન દોસોતિ મહાપચ્ચરિયં વિનિચ્છયો બ્યતિરેકતો દસ્સિતો હોતિ. યથાહ ‘‘દ્વે તીણિ કુલાનિ નિમન્તેત્વા એકસ્મિં ઠાને નિસીદાપેત્વા ઇતો ચિતો ચ આહરિત્વા ભત્તં આકિરન્તિ, સૂપબ્યઞ્જનં આકિરન્તિ, એકમિસ્સકં હોતિ, એત્થ અનાપત્તીતિ મહાપચ્ચરિયં વુત્ત’’ન્તિ (પાચિ. અટ્ઠ. ૨૨૯).

૧૨૨૫-૬. પરમ્પરભોજનસ્સ સરૂપં પદભાજને વુત્તનયેન દસ્સેતુમાહ ‘‘ભોજનાનમ્પી’’તિઆદિ. તેસમેવ પઞ્ચન્નં ભોજનાનં અઞ્ઞતરં ભોજનં પરિભુઞ્જતીતિ યોજના. મહેસિના પરિદીપિતન્તિ પદભાજને ‘‘પરમ્પરભોજનં નામ પઞ્ચન્નં ભોજનાન’’ન્તિઆદિના (પાચિ. ૨૨૭) નયેન વુત્તં.

૧૨૨૭. યત્થાતિ અનેકેહિ એકભાજને પક્ખિત્તે યસ્મિં ભોજનેતિ વુત્તં હોતિ એકેનેવ દિન્ને વિચારણાભાવા. સબ્બમેકરસં સિયાતિ વિસું વિસું વિઞ્ઞાયમાનરસં અહુત્વા એકરસમેવ હોતિ.

૧૨૩૦. ‘‘ગામેના’’તિ ઇમિના ગામટ્ઠાયેવ વુત્તા. ‘‘નિમન્તિતસ્સ દોસો ન વિજ્જતી’’તિ ઇદં ગામપૂગનિગમેહિ પચ્ચેકં યોજેતબ્બં. ગામ-સદ્દેન ‘‘ગામા વા અરઞ્ઞા વા’’તિ (પારા. ૯૧) એત્થ વિય નગરમ્પિ સઙ્ગહિતં. પૂગો નામ વિસું વિસું સમૂહા હુત્વા પુઞ્ઞકારિનો ધમ્મિકમનુસ્સા. નિગમો નામ સાપણો મહાગામો. સકલગામેન નિમન્તિતો હુત્વા સમ્પત્તે યત્થ કત્થચિ ગેહે ભુઞ્જન્તસ્સ અનાપત્તીતિ અત્થો. પૂગાદીસુપિ એસેવ નયો. યથાહ ‘‘સકલેન ગામેન એકતો હુત્વા નિમન્તિતસ્સેવ યત્થ કત્થચિ ભુઞ્જતો અનાપત્તિ. પૂગેપિ એસેવ નયો’’તિ (પાચિ. અટ્ઠ. ૨૨૯). નિચ્ચભત્તે દોસો ન વિજ્જતીતિ અનેકટ્ઠાનતો દિય્યમાનં નિચ્ચભત્તમ્પિ ઉપ્પટિપાટિયા ભુઞ્જન્તસ્સ ન દોસોતિ વુત્તં હોતિ.

૧૨૩૧. કાયો વાચા કાયવાચાચિત્તન્તિ ઇમેહિ આપજ્જનં કથિનસમુટ્ઠાનં નામ. ઇધ ક્રિયં નામ ભોજનં, અક્રિયં નામ પઠમનિમન્તનસ્સ અવિકપ્પનં, ઇદં દ્વયમેવાહ ‘‘ભોજનઞ્ચાવિકપ્પન’’ન્તિ.

પરમ્પરભોજનકથાવણ્ણના.

૧૨૩૨-૩. પૂવાતિ અતિરસાદયો રસા. પહેણકત્થાયાતિ પણ્ણાકારત્થાય. પટિયત્તાતિ સમ્પાદિતા. પાથેય્યત્થાયાતિ ગમિકસ્સ સમ્બલત્થાય. પટિયત્તા મન્થા વાતિ સમ્બન્ધો. મન્થા નામ બદ્ધસત્તુઅબદ્ધસત્તુતિલતણ્ડુલાદયો. યથાહ ‘‘બદ્ધસત્તુઅબદ્ધસત્તુતિલતણ્ડુલાદિ સબ્બં ઇધ મન્થોત્વેવ સઙ્ખં ગચ્છતી’’તિ (પાચિ. અટ્ઠ. ૨૩૩). યે પૂવા, મન્થા વાતિ યોજના. હીતિ નિપાતમત્તં. તત્થ પટિયત્તેસુ તેસુ પૂવેસુ વા મન્થેસુ વા. ભિક્ખુનાતિ એત્થ ‘‘આકઙ્ખમાનેના’’તિ સેસો.

દ્વત્તિપત્તાતિ દ્વે વા તયો વા પત્તાતિ વિગ્ગહો. પૂરાતિ મુખવટ્ટિયા હેટ્ઠિમરાજિસમં પુણ્ણા. યથાહ ‘‘મુખવટ્ટિયા હેટ્ઠિમલેખાય સમપૂરે પત્તે ગહેત્વા’’તિ (પાચિ. અટ્ઠ. ૨૩૩). ‘‘દ્વત્તિપત્તા પૂરા’’તિ ચેત્થ પરિમાણં દસ્સિતં, પરિમાણપરિમેય્યાનં અભેદોપચારેન પૂવમન્થા ગહેતબ્બા યથા ‘‘દ્વે તિસ્સો તણ્ડુલનાળિયો’’તિ. પૂવેહિ વા સત્તૂહિ વાતિ યોજના. સત્તૂતિ બદ્ધસત્તુઅબદ્ધસત્તૂનં ગહણં, ઇમિનાવ તિલાદીનિ ઉપલક્ખિતાનિ. તતિયપત્તસ્સ મુખવટ્ટિયા હેટ્ઠારાજિયા ઉદ્ધં કત્વા પક્ખિત્તઞ્ચેતં ‘‘તતો ઉત્તરિ’’ન્તિ ઇમિના ચ ગય્હતિ. યથાહ ‘‘સચે તતિયં પત્તં થૂપીકતં ગણ્હાતિ, પૂવગણનાય પાચિત્તિય’’ન્તિ (પાચિ. અટ્ઠ. ૨૩૩).

૧૨૩૭. તત્થ તેસુ પૂવેસુ વા મન્થેસુ વા દ્વે ચે પત્તપૂરા લદ્ધાતિ યોજના. એકો પત્તપૂરો પદાતબ્બોતિ યોજના. એકતોતિ એકપત્તપૂરતો ન પદાતબ્બોતિ યોજના, કિઞ્ચિપિ અકામા ન દાતબ્બન્તિ અત્થો. યથાહ ‘‘યેન એકો ગહિતો, ન તેન કિઞ્ચિ અકામા દાતબ્બં. યથારુચિ કાતબ્બ’’ન્તિ (પાચિ. અટ્ઠ. ૨૩૩). એવં દદન્તેન આસનસાલાય વા અત્તનો નિબદ્ધવાસટ્ઠાને વા દિટ્ઠસ્સ ભિક્ખુસઙ્ઘસ્સ સાધારણં કત્વા દાનમન્તરેન ન મિત્તાનમેવ દાતબ્બં. યથાહ ‘‘યથામિત્તં પન દાતું ન લબ્ભતી’’તિ (પાચિ. અટ્ઠ. ૨૩૩).

૧૨૩૮-૯. અપહેણકં અપાથેય્યં દેન્તાનન્તિ સમ્બન્ધો. યથાહ ‘‘ન પહેણકત્થાય ન પાથેય્યત્થાય પટિયત્તં દેન્તી’’તિ (પાચિ. ૨૩૫). તતોતિ પહેણકપાથેય્યતો. વા-સદ્દેન ઇધ અવુત્તં ‘‘ગમને પટિપ્પસ્સદ્ધે દેન્તી’’તિ (પાચિ. ૨૩૫) અનાપત્તિવારે વુત્તં સઙ્ગણ્હાતિ. તદૂનકન્તિ તતો દ્વત્તિપત્તતો ઊનકં. યથાહ ‘‘ઊનકદ્વત્તિપત્તપૂરે પટિગ્ગણ્હાતી’’તિ (પાચિ. ૨૩૫). અપાથેય્યાદિઅત્થાય પટિયાદિતન્તિ સઞ્ઞાય પાથેય્યાદિં ગણ્હન્તસ્સાપિ આપત્તિયેવ અચિત્તકત્તા સિક્ખાપદસ્સ. અત્તનોયેવ ગહણત્થં ‘‘ઇમસ્સ હત્થે દેહી’’તિ વચનેનાપિ આપજ્જનતો વચીકમ્મં.

કાણમાતુકથાવણ્ણના.

૧૨૪૦. અઞ્ઞેનાતિ તદ્ધિતલોપેન નિદ્દેસો, અઞ્ઞતરેનાતિ અત્થો, પવારિતોતિ સમ્બન્ધો. ભોજનાનન્તિ નિદ્ધારણે ભુમ્મં. પવારિતોતિ ‘‘ગણ્હથ ભન્તે યાવ ઇચ્છથા’તિ એવં યાવદત્થપવારણાય, સયઞ્ચ ‘અલં આવુસો થોકં થોકં દેહી’તિ એવં પટિક્ખેપપવારણાયા’’તિ અટ્ઠકથાય વુત્તપ્પકારદ્વયેન પવારિતોતિ અત્થો. વિકપ્પદ્વયે પકારદ્વયે પવારિત-સદ્દે વર-ધાતુસ્સ પત્થનવારણત્થવસેનાયમત્થો વેદિતબ્બો, ‘‘પાચિત્તિ અનતિરિત્ત’’ન્તિ પદચ્છેદો. ‘‘અનતિરિત્તં ભોજન’’ન્તિ વિસેસિતબ્બમપેક્ખિત્વા ‘‘અઞ્ઞેના’’તિ એત્થ વિભત્તિં વિપરિણામેત્વા ‘‘પઞ્ચન્નં ભોજનાનં અઞ્ઞતરં ભોજન’’ન્તિ યોજેતબ્બં, વક્ખમાને અનતિરિત્તકતભોજનનિદ્દેસે વુત્તેસુ પઞ્ચસુ ભોજનેસુ અઞ્ઞતરં ભોજનન્તિ અત્થો. ‘‘ખાદનીયં વા ભોજનીયં વા’’તિ (પાચિ. ૨૩૬, ૨૩૮) સહ દેસિતત્તા એકયોગઞાયેન ‘‘ખાદનીયં વા’’તિ ચ ગહેતબ્બં. પઞ્ચ ભોજનાનિ, કાલિકત્તયઞ્ચ ઠપેત્વા સબ્બં યાવકાલિકં ખાદનીયન્તિ વુત્તં.

૧૨૪૧. અસનન્તિ એત્થ વિપ્પકતભોજનં દિસ્સતિ, ભુઞ્જમાનો ચે પુગ્ગલો હોતિ, ભોજનકિરિયાનુપચ્છિન્ના વત્તતીતિ અત્થો. ભોજનન્તિ પવારણપહોનકઓદનાદિ હત્થાદીસુ દિસ્સતિ. હત્થપાસોતિ પવારણપહોનકં ભોજનં દાતું અભિહરિત્વા ઠિતોકાસો અડ્ઢતેય્યહત્થપ્પમાણો હોતીતિ વુત્તં હોતિ. અભિહરણં અભિહારો, સો એવ અભિહારતા, તથા દાતું ઠિતસ્સ કાયેન કતો અભિહારો દિસ્સતીતિ વુત્તં હોતિ. કાયવાચાપટિક્ખેપોતિ તથા અભિહટે ભોજને પટિગ્ગાહકસ્સ હત્થવિકારાદિકો કાયિકો વા ‘‘અલ’’ન્તિઆદિકો વાચસિકો વા પટિક્ખેપો પઞ્ઞાયતીતિ અત્થો.

૧૨૪૨. નિપ્પપઞ્ચેનાતિ સહ વાસનાય પહીનતણ્હાદિપપઞ્ચત્તયરહિતેન તથાગતેન.

૧૨૪૩. તત્થાતિ ઓદનાદીસુ. સત્તન્નન્તિ ‘‘સાલી’’તિઆદિના વક્ખમાનાનુરૂપાનં.

૧૨૪૪. ઓદકોતિ ઉદકે ભવો. એત્થાતિ પઞ્ચઙ્ગપવારણાય. અયંનિચ્છયોતિ વક્ખમાનવિધિપ્પકારં વિનિચ્છયં દસ્સેતિ.

૧૨૪૫. સાલીતિ સબ્બસાલિજાતિ. વીહીતિ સબ્બવીહિજાતિ. કઙ્ગૂતિ સેતરત્તકાળભેદા સબ્બા કઙ્ગુજાતિ. વરકો સેતવરકો. ધઞ્ઞેન સમ્ભતપુઞ્ઞસમ્ભારેન ભગવતા.

૧૨૪૬. તિણન્તિ તિણબીજમેવ વુત્તં. દીપિતં સઙ્ગહિતં. વરકચોરકોતિ સુખુમવરકો.

૧૨૪૮. અઙ્ગસમ્પત્તિં દસ્સેતુમાહ ‘‘હત્થેના’’તિઆદિ.

૧૨૪૯. તનૂતિ તનુકા.

૧૨૫૦. ન રક્ખતિ પવારણં.

૧૨૫૧-૨. ધઞ્ઞરસાદીનીતિ આદિ-સદ્દેન દધિઆદયો ગહિતા. આરોપેત્વાતિ ઉદ્ધનં આરોપેત્વા. ફલન્તિ એલાળુકાદિફલં. પણ્ણન્તિ સૂપસાકં. કળીરન્તિ વેળુઆદીનં કળીરં. બહૂનીતિ તેસમેવ વિસેસનં. તત્થ ચાતિ પક્ખિત્તપણ્ણાદિમ્હિ તક્કાદિકે. ઓધિં દસ્સેતીતિ એત્થ ‘‘પરિભોગકાલે’’તિ સેસો. સઞ્જનેતીતિ એત્થ ‘‘ફલાદિયાગૂ’’તિ લબ્ભતિ.

૧૨૫૩-૪. રસેતિ મંસાદિરસે. ‘‘યાગું ગણ્હથા’’તિ વા ‘‘યાગુ’’ન્તિ વા વત્વાતિ યોજેતબ્બા. યાગુ સઙ્ગહિતાતિ એત્થ ઓધિપઞ્ઞાયનઅપઞ્ઞાયનવિકપ્પદ્વયે યાગુયા સમો વિનિચ્છયોતિ અધિપ્પાયો.

૧૨૫૫. છુપન્તીતિ સમ્ફુસન્તિ. છુપ સમ્ફસ્સેતિ ધાતુ, પક્ખિપન્તીતિ વુત્તં હોતિ. યથાહ ‘‘યત્થ મચ્છમંસં પક્ખિપન્તી’’તિ (પાચિ. અટ્ઠ. ૨૩૮-૨૩૯). સાસપમત્તમ્પિ મચ્છમંસં વા સચે પઞ્ઞાયતીતિ યોજના. પવારણન્તિ એત્થ ‘‘જનેતી’’તિ સેસો. યાગુયાતિ પદં પચ્ચત્તવસેન વિપરિણામેત્વા યાગુ જનેતીતિ યોજેતબ્બં.

૧૨૫૬. સંસટ્ઠોતિ પરિસ્સાવિતો ન સઞ્જનેતીતિ યોજના.

૧૨૫૭. સબ્બસો ઠપેત્વાતિ સમ્બન્ધો. મંસાદિપક્ખિત્તઓદનાદિપ્પકરણાવસેસતો અઙ્ગં દસ્સેતુમાહ ‘‘સબ્બસો’’તિ. સબ્બસો ન પવારેતીતિ યોજના. વેળુતણ્ડુલન્તિ વેળુવીહીનં તણ્ડુલં. આદિ-સદ્દેન કન્દમૂલં સઙ્ગહિતં. યથાહ ‘‘વેણુતણ્ડુલાદીહિ વા કન્દમૂલફલેહિ વા યેહિ કેહિચિ કતભત્ત’’ન્તિ.

૧૨૫૮. તતોતિ સાલિઆદિતો, વેળુઆદિતો ચ, તતો નિબ્બત્તા પુથુકા વાતિ અત્થો. તાહીતિ પુથુકાહિ. સુદ્ધાતિ પુથુકાદીહિ અમિસ્સા ન પવારેન્તીતિ સમ્બન્ધો.

૧૨૫૯. ભટ્ઠાનન્તિ ભજ્જિતાનં. સત્તૂહિ સઙ્ગહિતં સત્તુસઙ્ગહિતં.

૧૨૬૧. સત્તૂનં મોદકોતિ સત્તુબદ્ધં, બદ્ધસત્તૂતિ અત્થો.

૧૨૬૩. તેહેવાતિ લાજેહિ એવ. સુદ્ધં ખજ્જકં વાતિ વક્ખમાનનયેન મચ્છાદીહિ અસમ્મિસ્સં ખજ્જકં.

૧૨૬૪. ‘‘પૂરિત’’ન્તિઆદિના તબ્બિપરિયાયં દસ્સેતિ. તન્તિ કુણ્ડકાદિ.

૧૨૬૬. અકપ્પિયં મંસં. અવત્થુત્તાતિ અકપ્પિયમંસાનં વારેતબ્બત્તા પવારણાય અવત્થુત્તા.

૧૨૬૭. વત્થુકત્તાતિ કપ્પિયમંસસ્સ પવારણાય વત્થુભૂતત્તા. પવારેતીતિ એત્થ ‘‘ખાદિયમાનસ્સ ચ મંસત્તા’’તિ સેસો દટ્ઠબ્બો. યથાહ ‘‘યં પન ખાદતિ, તં કિઞ્ચાપિ પટિક્ખિપિતબ્બટ્ઠાને ઠિતં, ખાદિયમાનં પન મંસભાવં ન જહતી’’તિ (પાચિ. અટ્ઠ. ૨૩૮-૨૩૯).

૧૨૬૮. કિઞ્ચિ કપ્પિયભોજનન્તિ પઞ્ચસુ ભોજનેસુ યં કિઞ્ચિ કપ્પિયભોજનં.

૧૨૬૯. અકપ્પિયં મંસં અઞ્ઞન્તિ અકપ્પિયમંસતો અવસેસં કુલદૂસનાદિવસેન ઉપ્પન્નભોજનં ગહિતં. યથાહ ‘‘કુલદૂસનવેજ્જકમ્મઉત્તરિમનુસ્સધમ્મારોચનસાદિતરૂપિયાદીહિ નિબ્બત્તં બુદ્ધપટિકુટ્ઠં અનેસનાય ઉપ્પન્નં અકપ્પિયભોજનં પટિક્ખિપતિ, ન પવારેતી’’તિ.

૧૨૭૦-૧. અસનં ભોજનન્તિ અઙ્ગદ્વયે વિનિચ્છયં દસ્સેતુમાહ ‘‘સચે અજ્ઝોહટ’’ન્તિઆદિ. અજ્ઝોહટન્તિ પરગલગતં હોતિ. ‘‘પત્તે’’તિ ઇમિના થાલકાદિભાજનઞ્ચ ગહિતં. કત્થચિ ભોજનં નત્થીતિ યોજના. પત્તે, હત્થે, મુખે વા યત્થ કત્થચિ પઞ્ચન્નં ભોજનાનં કિઞ્ચિ ન વિજ્જતિ, ગન્ધમત્તં પઞ્ઞાયતીતિ વુત્તં હોતિ.

૧૨૭૨. આદાયાતિ એત્થ ‘‘અઞ્ઞત્ર ભુઞ્જિતુ’’ન્તિ સેસો. ‘‘યોપિ અઞ્ઞત્ર ગન્ત્વા ભુઞ્જિતુકામો મુખે ભત્તં ગિલિત્વા સેસં આદાયા’’તિઆદિના (પાચિ. અટ્ઠ. ૨૩૮-૨૩૯) મહાપચ્ચરિયટ્ઠકથાયં વુત્તવચનસ્સ પમાણત્તા આહ ‘‘ન પવારેતી’’તિ.

૧૨૭૩. ‘‘મુખે ભત્તં ગિલિતં, હત્થે ભત્તં વિઘાસાદસ્સ દાતુકામો, પત્તે ભત્તં ભિક્ખુસ્સ દાતુકામો, સચે તસ્મિં ખણે પટિક્ખિપતિ, ન પવારેતી’’તિ (પાચિ. અટ્ઠ. ૨૩૮-૨૩૯) એવમાગતં કુરુન્દટ્ઠકથં સઙ્ગહેતું ‘‘મુખે ચ ભત્ત’’ન્તિઆદિવચનતો ચ ‘‘અસનસ્સ ઉપચ્છેદા’’તિઆદિના વક્ખમાનાય યુત્તિયા અસનાવસાને યુજ્જમાનત્તા ચ ઇમિસ્સા ગાથાય ‘‘ભોત્તુકામો’’તિ પાઠં અગ્ગહેત્વા ‘‘દાતુકામો’’તિ પાઠો ગહેતબ્બો.

૧૨૭૪. ‘‘અસનસ્સ ઉપચ્છેદા’’તિ ઇમિના તસ્મિંયેવ આસને યથાનિસિન્નેનેવ કાતબ્બે અસને આસાવચ્છેદો દીપિતો. યથાહ અટ્ઠકથાયં ‘‘તસ્મિં પન આસને ન ભુઞ્જિતુકામો, વિહારં પવિસિત્વા ભુઞ્જિતુકામો, અઞ્ઞસ્સ વા દાતુકામો’’તિ (પાચિ. અટ્ઠ. ૨૩૮-૨૩૯). કુરુન્દટ્ઠકથાયં તસ્સ વિનિચ્છયસ્સ દસ્સિતત્તા ‘‘મહાપઞ્ઞા’’તિ કુરુન્દટ્ઠકથાચરિયં સન્ધાયાહ. કારણાકારણઞ્ઞુનોતિ ‘‘પવારણસ્સ ઇદં કારણં, ઇદં અકારણ’’ન્તિ જાનન્તા. ‘‘કારણાકારણઞ્ઞુના’’તિ કત્થચિ પોત્થકે લિખન્તિ. તત્થ મહાપઞ્ઞા કારણાકારણઞ્ઞુનો આચરિયા અસનસ્સ…પે… સોતિ હિ કારણં કથયન્તીતિ યોજના.

૧૨૭૫. હત્થપાસઙ્ગે વિનિચ્છયં દસ્સેતુમાહ ‘‘ગણ્હતો…પે… પસારિત’’ન્તિ. ગણ્હતોતિ યેન ઇરિયાપથેન સમન્નાગતો હુત્વા ગણ્હાતિ, એવં ગણ્હતો. પચ્છિમં અઙ્ગન્તિ દાયકેન દિન્નસ્સ પટિગ્ગાહકસ્સ યો અવયવો પરભાગે હોતિ, તં ઠાનાદિઇરિયાપથસમન્નાગતસ્સ પટિગ્ગાહકસ્સ પણ્હિઆદિં પચ્છિમં અઙ્ગં. દદતો પસારિતં હત્થં વિના પુરિમં અઙ્ગન્તિ યોજના. પસારિતં હત્થન્તિ એત્થ ‘‘દાતુ’’ન્તિ સેસો. ઉભિન્નન્તિ એત્થ ‘‘અન્તરે’’તિ સેસો. પટિગ્ગાહકદાયકાનં પચ્છિમપુરિમાનં ઉભિન્નં અઙ્ગાનં અન્તરે ઓકાસે. અડ્ઢં ઉપડ્ઢં હત્થં તેય્યં તતિયં યસ્સાતિ વિગ્ગહો, અતિરેકવિદત્થિદ્વિરતનપ્પમાણન્તિ અત્થો.

૧૨૭૬. અભિહારઙ્ગે વિનિચ્છયં દસ્સેતુમાહ ‘‘તસ્મિ’’ન્તિઆદિ. અડ્ઢતેય્યે તસ્મિં ઠાને ઠત્વાતિ યોજના, દ્વિરતનવિદત્થિપમાણે તસ્મિં ઠાને ઠત્વાતિ અત્થો. અભિહટન્તિ ઉપનીતં. તાદિસન્તિ અભિહટસદિસં, પવારણપહોનકાનં પઞ્ચન્નં ભોજનાનં અઞ્ઞતરન્તિ અત્થો.

૧૨૭૭-૮. આધારકે વાપીતિ વલયાદિપત્તાધારકેપિ. ઊરૂસૂતિ દ્વિન્નં ઊરૂનં મજ્ઝે, અઙ્કેતિ અત્થો. આહરિત્વાતિ અભિહરિત્વા. ભત્તં ગણ્હાતીતિ એત્થ ‘‘ઇતો’’તિ સેસો, ‘‘ઇતો ભત્તં ગણ્હા’’તિ અનન્તરે નિસિન્નો ચ ભાસતીતિ યોજના. ભત્તન્તિ ઉપલક્ખણં, પઞ્ચસુ ભોજનેસુ યં કિઞ્ચીતિ અત્થો. તન્તિ તથા ગણ્હિતું વુત્તભત્તાદિભોજનં. અભિહારસ્સ ચાતિ એત્થ ચ-સદ્દો પદપૂરણત્થો, એવકારત્થો વા, અભાવા એવાતિ યોજના.

૧૨૭૯. ‘‘ભત્તપચ્છિ’’ન્તિ ઇદં ઉપલક્ખણં.

૧૨૮૦. દીયમાનેતિ એત્થ ‘‘ભોજને’’તિ સેસો. ઇતરોતિ હત્થપાસે નિસિન્નો. અભિહારઙ્ગસ્સ અભાવા સો ન પવારિતોતિ.

૧૨૮૧. પટિક્ખેપઙ્ગે વિનિચ્છયં દસ્સેતુમાહ ‘‘કાયેના’’તિઆદિ. વાચાભિહારસ્સ અનઙ્ગત્તા આહ ‘‘કાયેનાભિહટ’’ન્તિ. યથાહ ‘‘વાચાય અભિહટં પટિક્ખિપતો પવારણા નત્થી’’તિ (પાચિ. અટ્ઠ. ૨૩૮-૨૩૯). અભિહટભોજનં પટિક્ખિપિતું અઙ્ગુલિયો વા હત્થં વા હત્થગતસ્સ કસ્સચિ ચલનાદિં યં કઞ્ચિ કાયવિકારં કરોન્તો, ભમું ઉક્ખિપન્તો, કુજ્ઝિત્વા ઓલોકેન્તો વા કાયેન પટિક્ખિપતીતિ વુચ્ચતિ. ‘‘અલ’’ન્તિ વા ‘‘ન ગણ્હામી’’તિ વા ‘‘આગમેહી’’તિ વા ‘‘અધિવાસેહી’’તિ વા ‘‘મા આકિરા’’તિ વા ‘‘અપગચ્છાહી’’તિ વા એવમાદિકં વદન્તો વાચાય પટિક્ખિપતીતિ વુચ્ચતિ.

૧૨૮૨-૩. આકિરાતિ એત્થાપિ ‘‘ઇતિ ચા’’તિ યોજેતબ્બં. એવં વદન્તસ્સ નિવારેતુકામતાચિત્તે સતિપિ નિવારણવચનેન હોન્તં પવારણં આકિરાતિઆદિવિધિવચને ન હોતીતિ આહ ‘‘ન પન’ન્તિ પવારણા’’તિ. પવારણા પન ન અત્થીતિ યોજના.

૧૨૮૪. ‘‘રસં ગણ્હથા’’તિ વદેતિ સમ્બન્ધો. તં સુત્વાતિ તં વચનં સુત્વા.

૧૨૮૫. ‘‘સાર’’ન્તિ ઇદં વણ્ણભણનમત્તં. ‘‘ઇદ’’ન્તિ સામઞ્ઞેન મચ્છમંસં વદતિ, પવારણઙ્ગં હોતિ. મચ્છરસં મંસરસન્તિ એત્થ દ્વન્દસમાસસ્સપિ સમ્ભવતો ‘‘મચ્છં, મંસં ગણ્હા’’તિ ચ વુત્તં હોતિ, તઞ્ચ અઙ્ગં હોતિ.

૧૨૮૬. ‘‘રસં ગણ્હા’’તિ વુત્તે પનસ્સ વિકપ્પસ્સ અભાવા પવારણસ્સ અઙ્ગં ન હોતિ. તેનેવાહ ‘‘અત્થિ ચ મંસં ચે’’તિ.

૧૨૮૭. મુહુત્તં આગમેહીતિ કઞ્ચિ કાલં ઓલોકેહિ.

૧૨૮૮. પનસાદીહીતિ આદિ-સદ્દેન વેત્તઙ્ગાદીનં ગહણં.

૧૨૯૦. મચ્છસૂપં મંસસૂપન્તિ એત્થ સમાસવિકપ્પા ‘‘મચ્છરસં મંસરસ’’ન્તિ એત્થ વિય દટ્ઠબ્બા.

૧૨૯૧. કરમ્બકન્તિ મચ્છમંસેન વા અઞ્ઞેન વા મિસ્સસ્સેવ સૂપવિસેસસ્સ નામં. તેનેવ ચ ‘‘મંસકરમ્બકં ગણ્હથ, મચ્છકરમ્બકં ગણ્હથા’’તિ વુત્તે નિસેધેન પવારણા હોતિ, ‘‘કરમ્બકં ગણ્હથા’’તિ વુત્તે અનિયતવચનત્તા ન હોતિ. કળીરસૂપાદીહિ સમાનવિનિચ્છયભાવં દસ્સેતુમાહ ‘‘એસેવ નયો વુત્તો’’તિ.

૧૨૯૨. વુત્તસ્મિન્તિ વુત્તે.

૧૨૯૩. યેનાતિ ભત્તેન. આપુચ્છિતોતિ ‘‘ગણ્હથા’’તિ વુત્તો. તસ્સ ભત્તસ્સ. અત્થિતાય યાગુયા વિજ્જમાનત્તા. ઇતિ કારણન્તિ ઇદં પવારણકારણં.

૧૨૯૪. ‘‘યાગુમિસ્સકં ગણ્હા’’તિ વુત્તે સા યાગુ તત્થ તસ્મિં અભિહટે ભાજને પક્ખિત્તભત્તેન સમા વા બહુતરા વા ચે હોતિ, સો એવં વત્વા અભિહટં પટિક્ખેપં ભિક્ખુ ન પવારેતિ કિરાતિ યોજના. કિરાતિ અરુચિં સૂચેતિ. તેનેવ વક્ખતિ ‘‘કારણં પન દુદ્દસ’’ન્તિ.

૧૨૯૫. સબ્બત્થાતિ સબ્બઅટ્ઠકથાસુ.

૧૨૯૬. વિસું કત્વાતિ એકસિત્થમ્પિ યથા ન હોતિ, તથા રસં વા ખીરં વા ભત્તતો વિયોજેત્વા.

૧૨૯૭. ગચ્છન્તેનેવાતિ યાવ ભોજનનિટ્ઠાનં, તાવ ગચ્છન્તેનેવ. યથાહ ‘‘ગચ્છન્તેન નદિપૂરં પત્તેનપિ અટ્ઠત્વા નદિતીરે ગુમ્બં પરિક્ખિપિત્વા વિચરન્તેન નાવં વા સેતું વા આરુળ્હેન અટ્ઠત્વા વટ્ટેત્વા વિચરન્તેના’’તિ.

૧૨૯૮. સોતિ ગચ્છન્તો. તતોતિ ઠાનતો, ગમનઇરિયાપથસ્સ વિકોપિતત્તાતિ અધિપ્પાયો.

૧૨૯૯. આસનં અવિચાલેત્વાતિ નિસજ્જાવસેન ફુટ્ઠટ્ઠાનં અચાલેત્વા, અનુટ્ઠહિત્વાતિ વુત્તં હોતિ. ‘‘અદિન્નાદાને વિય ઠાનાચાવનં ગહેતબ્બ’’ન્તિ ગણ્ઠિપદે વુત્તં.

૧૩૦૦. તતોતિ પવારિતકાલતો ઉદ્ધં, તતો નિસિન્નટ્ઠાનતો વા. ઇતો, એત્તો વા. ઈસકમ્પિ સંસરિતુન્તિ નિસિન્નટ્ઠાનતો ઇતો ચિતો ચ થોકમ્પિ સંસરિતું, અપગન્તુન્તિ અત્થો.

૧૩૦૧. સબ્બત્થાતિ પીઠકાદિસંહારિમે સબ્બસ્મિં આસને. ‘‘વિનયઞ્ઞુના’’તિ ઇમિના ‘‘સચે પન નં સહ મઞ્ચેન ઉક્ખિપિત્વા અઞ્ઞત્ર નેન્તિ, વટ્ટતી’’તિ (પાચિ. અટ્ઠ. ૨૩૮-૨૩૯) અટ્ઠકથાયં ‘‘પીઠકાદીસુપિ અયમેવ વિનિચ્છયો’’તિ વુત્તભાવં જાનન્તેનાતિ વુત્તં હોતિ.

૧૩૦૨. નિપજ્જિત્વાતિ એત્થ ‘‘પરિવત્તન્તેન યેન પસ્સેન નિપન્નો, તસ્સ ઠાનં નાતિક્કમેતબ્બ’’ન્તિ વચનતો પુબ્બસયિતટ્ઠાનં અવિજહિત્વા સયિત્વાયેવાતિ અત્થો. તથેવાતિ ઉક્કુટિકો હુત્વાવાતિ વુત્તં હોતિ. ‘‘તસ્સ પન હેટ્ઠા પલાલપીઠં વા કિઞ્ચિ વા નિસીદનકં દાતબ્બ’’ન્તિ (પાચિ. અટ્ઠ. ૨૩૮-૨૩૯) અટ્ઠકથાયં વુત્તં.

૧૩૦૩. અતિરિત્તં કરોન્તેન સિક્ખુના ભાજનં ઓનમેત્વાન ભોજને દસ્સિતે અથ ‘‘અલમેતં સબ્બ’’ન્તિ વત્તબ્બન્તિ યોજના. તત્થ અતિરિત્તં કરોન્તેનાતિ ‘‘અતિરિત્તં નામ કપ્પિયકતં હોતિ, પટિગ્ગહિતકતં હોતિ, ઉચ્ચારિતકતં હોતિ, હત્થપાસે કતં હોતિ, ભુત્તાવિના કતં હોતિ, ભુત્તાવિના પવારિતેન આસના અવુટ્ઠિતેન કતં હોતિ, ‘અલમેતં સબ્બ’ન્તિ વુત્તં હોતિ, ગિલાનાતિરિત્તં હોતી’’તિ (પાચિ. ૨૩૯) વુત્તેસુ અટ્ઠસુ આકારેસુ અન્તં વિના પુરિમેહિ સત્તહિ વિનયકમ્માકારેહિ અતિરિત્તં કરોન્તેનાતિ વુત્તં હોતિ. યથાહ ‘‘ઇમેહિ સત્તહિ વિનયકમ્માકારેહિ યં અતિરિત્ત’’ન્તિઆદિ (પાચિ. અટ્ઠ. ૨૩૮-૨૩૯).

ઇધ અતિરિત્તં કાતું અભિહટભોજનં કપ્પિયઞ્ચ નામ હોતિ, કપ્પિયકતેન સિઙ્ગિવેરલસુણાદિવત્થુના યુત્તતાય ચ અકપ્પિયમંસાભાવેન ચ કુલદૂસનાદીહિ અનુપ્પન્નભાવેન ચ કતઞ્ચ નામ હોતિ. ‘‘અલમેતં સબ્બ’’ન્તિ અતિરિત્તકતભાવતો એવં કપ્પિયઞ્ચ તં કતં ચાતિ કપ્પિયકતન્તિ વુત્તં હોતિ. એવમુપરિપિ કત-સદ્દસ્સ અત્થો ચ સમાસવિગ્ગહો ચ વેદિતબ્બો. અવસિટ્ઠપદેસુ ભિક્ખુના પટિગ્ગહિતં પટિગ્ગહિતં નામ. તં કારાપેત્વા આગતેન ભિક્ખુના થોકં ઉચ્ચારેત્વા, ઓતારેત્વા વા દસ્સિતં ઉચ્ચારિતકતં નામ. કપ્પિયં કારાપેતુમાગતસ્સ અડ્ઢતેય્યહત્થપ્પમાણહત્થપાસબ્ભન્તરગતેન અતિરિત્તકતં ‘‘હત્થપાસે કત’’ન્તિ વુચ્ચતિ. અન્તમસો પવારણજનકં યં કિઞ્ચિ ભોજનં કુસગ્ગેનાપિ ગહેત્વા ભુત્તત્તા ભુત્તાવિના. યથાહ ‘‘પઞ્ચન્નં ભોજનાનં અઞ્ઞતરં ભોજનં અન્તમસો કુસગ્ગેનાપિ ભુત્તં હોતી’’તિ. ભુઞ્જન્તો પવારિતો હુત્વા યો આસનં ન કોપેતિ, સો ભુત્તાવી પવારિતો ‘‘આસના અવુટ્ઠિતો’’તિ વુચ્ચતિ, તેન કતં ‘‘ભુત્તાવિના…પે… અવુટ્ઠિતેન કત’’ન્તિ વુત્તં. ‘‘અલમેતં સબ્બ’’ન્તિ વચીભેદં કત્વા વુત્તં ‘‘અલમેતં સબ્બન્તિ વુત્તં હોતી’’તિ દસ્સિતં. અયં સત્તવિધો વિનયકમ્માકારો નામ.

ગિલાનાતિરિત્તકં પન ઇમિસ્સા ગાથાય અવુત્તમ્પિ અનતિરિત્તસન્દસ્સનત્થં વક્ખમાનાય ‘‘કત’’ન્તિઆદિગાથાય ‘‘ન ગિલાનાતિરિત્તઞ્ચા’’તિ ઇમસ્સ વિપરિયાયતો વેદિતબ્બં. ગિલાનતો અતિરિત્તં, તસ્સ અઞ્ઞદિનેસુ ભુઞ્જનત્થાય ઉપટ્ઠાપિતમ્પિ ગિલાનાતિરિત્તં નામ.

‘‘તેન ભિક્ખુના’’તિ ઇમિના ‘‘ભુત્તાવિના’’તિ ચ ‘‘ભુત્તાવિના પવારિતેન આસના વુટ્ઠિતેના’’તિ ચ વુત્તપ્પકારેન વિસિટ્ઠં તેનેવ પાકટં ભિક્ખું પરામસતિ, પવારણજનકાનં પઞ્ચન્નં ભોજનાનં અઞ્ઞતરં અપ્પમત્તકમ્પિ ભુત્તાવિના, ભુત્તાવી પવારિતોપિ હુત્વા આસના અવુટ્ઠિતેન વા ભિક્ખુનાતિ વુત્તં હોતિ. ઓનમિત્વાન ભાજનેતિ એત્થ ‘‘દસ્સિતે ભોજને’’તિ સેસો, ‘‘અથા’’તિ ઇમિના સમ્બન્ધો. કપ્પિયકરણારહાનિ સિઙ્ગિવેરાદીનિ કપ્પિયં કારેત્વા પટિગ્ગહાપેત્વા આગન્ત્વા હત્થપાસબ્ભન્તરે પત્વા અતિરિત્તં કારાપેન્તેન ભિક્ખુના ભાજનં થોકં ઓનામેત્વા ઉચ્ચારેત્વા દસ્સિતકાલાનન્તરાતિ વુત્તં હોતિ. ઉત્તરિ કાતબ્બં દસ્સેતુમાહ ‘‘અલ’’ન્તિઆદિ.

એત્તાવતા ‘‘તેન ભિક્ખુના’’તિ ઇમિના ‘‘ભુત્તાવિના કતં, ભુત્તાવિના પવારિતેન આસના અવુટ્ઠિતેન કત’’ન્તિ અઙ્ગદ્વયં સઙ્ગહિતં. ‘‘ઓનમેત્વાન ભાજન’’ન્તિ ઇમિના ‘‘ઉચ્ચારિતકતં હોતી’’તિ ઇદં સઙ્ગહિતં. ‘‘કપ્પિયકતં, પટિગ્ગહિતકતં, હત્થપાસેકત’’ન્તિ ઇદં તયં અનન્તરિયવાચિના અથ-સદ્દેન સઙ્ગહિતં. ‘‘અલમેતં સબ્બ’’ન્તિ ઇદં પનેત્થ સરૂપેનેવ દસ્સિતન્તિ દટ્ઠબ્બં.

૧૩૦૪. પત્તે ઠિતભોજનમેવ અતિરિત્તં કાતબ્બન્તિ નત્થિ, પચ્છિઆદીસુ યત્થ કત્થચિ ભાજને ઠિતમ્પિ કાતબ્બન્તિ દસ્સેતુમાહ ‘‘કપ્પિયં પના’’તિ. કુણ્ડેતિ ભણ્ડુક્ખલિયં. ભાજનેતિ યં કિઞ્ચિ ભાજનં ગહિતં.

૧૩૦૫. એતન્તિ અતિરિત્તકતં એતં ભોજનં. તં એકમેવ ઠપેત્વાતિ યોજના. ‘‘વટ્ટતેવા’’તિ વુત્તેપિ અબ્ભઙ્ગાદીનમત્થાયાતિ ગણ્હેય્યુન્તિ આહ ‘‘ભુઞ્જિતબ્બ’’ન્તિ, તમેકં વિના પરેહિ પરિભુઞ્જિતબ્બન્તિ અત્થો.

૧૩૦૬-૭. કપ્પિયં કારેત્વાતિ અતિરિત્તં કારેત્વા. આકિરન્તિ ચેતિ યદિ પક્ખિપન્તિ. પુન તથા અતિરિત્તં કારેત્વા ભુઞ્જિતબ્બન્તિ યોજના.

તં કેન અતિરિત્તં કાતબ્બન્તિ આહ ‘‘યેના’’તિઆદિ. તન્તિ અતિરિત્તકતં ભોજનં. યેન અકતન્તિ યેન ભિક્ખુના પઠમં અતિરિત્તં ન કતં, તેન કાતબ્બન્તિ સમ્બન્ધો. યથાહ ‘‘યેન અકતન્તિ અઞ્ઞેન ભિક્ખુના યેન પઠમં ન કતં, તેન કાતબ્બ’’ન્તિ (પાચિ. અટ્ઠ. ૨૩૮-૨૩૯). યં વા અકતં, તં વિસું તેન વા કાતબ્બન્તિ યોજના. યં વા અકતન્તિ તસ્મિં અતિરિત્તકતભોજને અપક્ખિત્તં યં ભોજનં અતિરિત્તં ન કતં. તં વિસું તેન વા કાતબ્બન્તિ પચ્છા પક્ખિત્તં ભોજનં અતિરિત્તં કતેન યથા અમિસ્સં હોતિ, તથા અઞ્ઞસ્સ ભાજનસ્સ ગહણવસેન વિસું કારેત્વા તેન પઠમં કતાતિરિત્તેનાપિ અતિરિત્તં કાતબ્બં. યથાહ – ‘‘યઞ્ચ અકતન્તિ યેન પઠમં કપ્પિયં કતં, તેનાપિ યં અકતં, તં કાતબ્બં. પઠમભાજને પન કાતું ન લબ્ભતિ. તત્થ હિ કરિયમાનં પઠમં કતેન સદ્ધિં કતં હોતિ, તસ્મા અઞ્ઞસ્મિં ભાજને કાતું વટ્ટતીતિ અધિપ્પાયો’’તિ.

૧૩૦૮. અકપ્પિયાદીહિ સત્તહીતિ ‘‘અનતિરિત્તં નામ અકપ્પિયકતં હોતિ, અપ્પટિગ્ગહિતકતં હોતિ, અનુચ્ચારિતકતં હોતિ, અહત્થપાસે કતં હોતિ, અભુત્તાવિના કતં હોતિ, ભુત્તાવિના ચ પવારિતેન આસના વુટ્ઠિતેન કતં હોતિ, ‘અલમેતં સબ્બ’ન્તિ અવુત્તં હોતી’’તિ (પાચિ. ૨૩૯) વુત્તેહિ સત્તહિ વિનયકમ્માકારેહિ. અતિરિત્તં કતન્તિ યોજના. ‘‘હોતિ અનતિરિત્તક’’ન્તિ પદચ્છેદો.

૧૩૦૯. ઉપકટ્ઠવેલાયપિ અતિરિત્તં કરોન્તેન ‘‘અહં પાતોવ ભુઞ્જિ’’ન્તિ વા ‘‘થોકં પરિભુઞ્જિ’’ન્તિ વા અચિન્તેત્વા કાતબ્બન્તિ દસ્સેતુમાહ ‘‘યોપી’’તિઆદિ. ઉપકટ્ઠૂપનીતમ્પીતિ ઉપકટ્ઠવેલાય ઉપનીતમ્પિ ભોજનં.

૧૩૧૦. યામાદિકાલિકન્તિ યામસત્તાહયાવજીવિકકાલિકં. અનામિસ્સન્તિ આમિસેન અમિસ્સં. તં યામાદિકાલિકં પરિભુઞ્જતોતિ સમ્બન્ધો.

૧૩૧૨. ગિલાનસ્સ ભુત્તાતિરિત્તં વિય કદાચિ ભુઞ્જિસ્સતીતિ ઉદ્દિસ્સ ઠપિતમ્પિ ગિલાનાતિરિત્તં નામાતિ અટ્ઠકથાયં (પાચિ. અટ્ઠ. ૨૩૮-૨૩૯ અત્થતો સમાનં) વુત્તં. ‘‘વિહારાદીસુ ગિલાનસ્સ પાપુણનકોટ્ઠાસમ્પિ ગિલાનાતિરિત્તં નામા’’તિ વદન્તિ.

૧૩૧૩. કથિનેનાતિ પઠમકથિનેન.

પઠમપવારણકથાવણ્ણના.

૧૩૧૪. અનતિરિત્તેનાતિ એત્થ ‘‘ખાદનીયેન વા ભોજનીયેન વા’’તિ સેસો. એત્થ ‘‘ખાદનીયં નામ પઞ્ચભોજનાનિ યામકાલિકં સત્તાહકાલિકં યાવજીવિકં ઠપેત્વા અવસેસ’’ન્તિ (પાચિ. ૨૩૯) વુત્તં પઞ્ચભોજનતો અઞ્ઞં સબ્બં યાવકાલિકં ખાદનીયં નામ. ‘‘ભોજનીયં નામ પઞ્ચ ભોજનાનિ ઓદનો કુમ્માસો સત્તુ મચ્છો મંસ’’ન્તિ (પાચિ. ૨૩૯) વુત્તં. એત્થ વિનિચ્છયો અનન્તરસિક્ખાપદે વુત્તો. પવારેય્યાતિ એત્થ ‘‘અભિહટ્ઠુ’’ન્તિ સેસો. અભિહટ્ઠું પવારેય્યાતિ અભિહરિત્વા ‘‘હન્દ ભિક્ખુ યાવતકં ઇચ્છસિ, તાવતકં ગહેત્વા ખાદ વા ભુઞ્જ વા’’તિ એવં પવારેય્ય. ‘‘પવારિત’’ન્તિપદં વુત્તત્થમેવ. જાનન્તિ સુત્વા વા દિસ્વા વા તસ્સ પવારિતભાવં જાનન્તો. આસાદનાપેક્ખોતિ આસાદનં ચોદનં મઙ્કુકરણભાવં અપેક્ખમાનો. ભુત્તેતિ તસ્સ પયોગેન ઇતરેન ભુઞ્જિત્વા પરિયોસાપિતે. તસ્સાતિ યો તસ્સ પવારિતભાવં ઞત્વા ‘‘ભુઞ્જા’’તિ નિયોજેસિ, તસ્સ.

૧૩૧૫-૬. એકસ્સ ભુઞ્જનેન અઞ્ઞસ્સ પાચિત્તિ હોતીતિ કથમેતન્તિ આસઙ્કાય તથા વુત્તત્તા પરિહરિતુમાહ ‘‘દુક્કટં…પે… દસ્સિત’’ન્તિ. ઇતરસ્સ ગહણેતિ પવારિતભિક્ખુનો ભુઞ્જનત્થાય પટિગ્ગહણે. અજ્ઝોહારપયોગેસુ ચાતિ એત્થાપિ ‘‘ઇતરસ્સા’’તિ સમ્બન્ધો. સબ્બં દુક્કટં, પાચિત્તિયઞ્ચ. દસ્સિતન્તિ ‘‘અભિહરતિ, આપત્તિ દુક્કટસ્સ. તસ્સ વચનેન ‘ખાદિસ્સામિ ભુઞ્જિસ્સામી’તિ પટિગ્ગણ્હાતિ, આપત્તિ દુક્કટસ્સ. અજ્ઝોહારે અજ્ઝોહારે આપત્તિ દુક્કટસ્સ. ભોજનપરિયોસાને આપત્તિ પાચિત્તિયસ્સા’’તિ (પાચિ. ૨૪૪) દેસિતં ભગવતાતિ અત્થો.

૧૩૧૭. ઉભયત્થાપિ વિમતિસ્સાતિ પવારિતે ચ અપવારિતે ચ વિમતિસ્સ. દુક્કટં પરિદીપિતન્તિ ‘‘પવારિતે વેમતિકો. અપ્પવારિતે વેમતિકો, આપત્તિ દુક્કટસ્સા’’તિ (પાચિ. ૨૪૫) દેસિતં.

૧૩૧૮. કારાપેત્વાતિ એત્થ ‘‘ભુઞ્જાહી’’તિ સેસો. અઞ્ઞસ્સત્થાયાતિ એત્થ ‘‘અભિહરન્તો ગચ્છાહી’’તિ સેસો.

૧૩૧૯. ઓમસવાદતુલ્યાવાતિ ઇદં અદિન્નાદાનસમુટ્ઠાનં સન્ધાયાહ.

દુતિયપવારણકથાવણ્ણના.

૧૩૨૦. ખાદનીયં વાતિ પઞ્ચ ભોજનાનિ ચ કાલિકત્તયઞ્ચ વિના અવસેસેસુ યં કિઞ્ચિ વા. ભોજનીયં વાતિ પઞ્ચસુ ભોજનેસુ અઞ્ઞતરમ્પિ. વિકાલેતિ વિગતે કાલે. કાલો નામ અરુણુગ્ગમનતો યાવ મજ્ઝન્તિકા, તદઞ્ઞો વિકાલો. યથાહ ‘‘વિકાલો નામ મજ્ઝન્તિકે વીતિવત્તે યાવ અરુણુગ્ગમના’’તિ (પાચિ. ૨૪૯). ઠિતમજ્ઝન્તિકોપિ કાલેયેવ સઙ્ગય્હતિ. યથાહ ‘‘ઠિતમજ્ઝન્તિકોપિ કાલસઙ્ગહં ગચ્છતિ. તતો પટ્ઠાય પન ખાદિતું વા ભુઞ્જિતું વા ન સક્કા, સહસા પિવિતું પન સક્કા ભવેય્ય. કુક્કુચ્ચકેન પન ન કાતબ્બં. કાલપરિચ્છેદજાનનત્થઞ્ચ કાલત્થમ્ભો યોજેતબ્બો, કાલબ્ભન્તરેવ ભત્તકિચ્ચં કાતબ્બ’’ન્તિ (પાચિ. અટ્ઠ. ૨૪૮-૨૪૯). દોસન્તિ પાચિત્તિયં.

૧૩૨૧. ‘‘ખાદનીયં વા ભોજનીયં વા’’તિ એત્થ ભોજનીયસ્સ પવારણસિક્ખાપદે દસ્સિતસરૂપત્તા ખાદનીયં તાવ સરૂપતો દસ્સેતુમાહ ‘‘યમામિસગત’’ન્તિઆદિ. એત્થાતિ એતેસુ ખાદનીયભોજનીયેસુ. યં પન વનમૂલફલાદિકં આમિસગતં આમિસે યાવકાલિકે પરિયાપન્નં, તં ખાદનીયન્તિ યોજના. કાલિકેસ્વસમોહત્થન્તિ એત્થ ગાથાબન્ધવસેન મ-કારલોપો, અસમ્મોહત્થન્તિ વુત્તં હોતિ. ઇદન્તિ વક્ખમાનં સન્ધાયાહ.

૧૩૨૨. મૂલન્તિ યં કિઞ્ચિ રુક્ખલતાનં મૂલં. કન્દન્તિ રુક્ખલતાનમેવ કન્દં. મુળાલન્તિ પદુમગચ્છમૂલકન્દં. મત્થકન્તિ તાલનાળિકેરાદીનં મત્થકં, વેળુકળીરપલ્લવઙ્કુરાનઞ્ચ એત્થેવ સઙ્ગહો. ખન્ધકન્તિ ઉચ્છુઆદિખન્ધકં. તચન્તિ છલ્લિ. પત્તન્તિ પણ્ણં. પુપ્ફન્તિ કુસુમં. ફલન્તિ રુક્ખલતાદીનં ફલં. અટ્ઠીતિ રુક્ખલતાદિબીજં. પિટ્ઠન્તિ ધઞ્ઞાદિપિટ્ઠં. નિય્યાસન્તિ સિલેસં. ‘‘ખાદનીય’’ન્તિ સબ્બત્થ પકરણતો લબ્ભતિ.

૧૩૨૩. એવં ખાદનીયાનં માતિકં નિક્ખિપિત્વા તે સરૂપતો દસ્સેતુમાહ ‘‘મૂલખાદનીયાદીન’’ન્તિઆદિ. તત્થ રુક્ખમૂલમેવ ખાદનીયં, તં આદિ યેસન્તિ વિગ્ગહો. મુખમત્તનિદસ્સનં નિબોધથાતિ એત્થ ‘‘મયા કરિયમાન’’ન્તિ સેસો. મુખમત્તન્તિ પવેસદ્વારમત્તં, નિરવસેસતો દસ્સને પપઞ્ચભીરુકાનં પુબ્બે ભયં હોતીતિ સઙ્ખેપતો ખાદનીયાનિ દસ્સિસ્સન્તિ વુત્તં હોતિ. તથા દસ્સને પયોજનમાહ ‘‘નામત્થેસુ ભિક્ખૂનં પાટવત્થાયા’’તિ, મૂલખાદનીયાદીનં નામેસુ ચ તદત્થેસુ ચ ભિક્ખૂનં પાટવુપ્પાદનત્થન્તિ અત્થો.

૧૩૨૪-૫. મૂલકમૂલાદીનિ ઉપદેસતોયેવ વેદિતબ્બાનિ. ન હિ તાનિ પરિયાયન્તરેન વુચ્ચમાનાનિપિ સક્કા વિઞ્ઞાતું. પરિયાયન્તરેનપિ હિ વુચ્ચમાને તં તં નામં અજાનન્તાનં સમ્મોહોયેવ સિયા, તસ્મા તત્થ ન કિઞ્ચિ વક્ખામ. સાકાનન્તિ સૂપેય્યપણ્ણાનં. ઇધાતિ ઇમસ્મિં સિક્ખાપદે. આહારત્થન્તિ આહારેન કત્તબ્બપયોજનં, આહારકિચ્ચન્તિ વુત્તં હોતિ. ‘‘આમિસત્થ’’ન્તિપિ લિખન્તિ. ફરન્તીતિ વિત્થારેન્તિ.

૧૩૨૬. જરટ્ઠન્તિ પુરાણકન્દં. યં તં જરટ્ઠન્તિ સમ્બન્ધો. સેસાનં જરટ્ઠં યાવકાલિકન્તિ યોજના. સેસાનન્તિ મૂલકાદીનિ વુત્તાનિ. યથાહ ‘‘મૂલકખારકજજ્ઝરીમૂલાનં પન જરટ્ઠાનિપિ આમિસગતિકાનેવા’’તિ (પાચિ. અટ્ઠ. ૨૪૮-૨૪૯).

૧૩૩૧. ધોતોતિ નિબ્બત્તિતપિટ્ઠો.

૧૩૩૨. અધોતો ખીરવલ્લિયા કન્દોતિ યોજના. વાક્યપથાતીતાતિ ‘‘અસુકો વા અસુકો વા’’તિ વત્વા પરિયન્તં પાપેતું અસક્કુણેય્યત્તા વચનપથાતીતા.

૧૩૩૩. પુણ્ડરીકં સેતં. પદુમં રત્તં.

૧૩૩૪. સમ્ભવં જાતં.

૧૩૩૮. જરટ્ઠબુન્દોતિ કન્દસ્સ હેટ્ઠા અતીવ પરિણતટ્ઠાનં.

૧૩૩૯. પથવિયં ગતોતિ અન્તોપથવિયં ગતો, પથવિયં નિમુજ્જિત્વા ગતતરુણદણ્ડોતિ વુત્તં હોતિ.

૧૩૪૦. એવં અન્તોભૂમિયં ગતો. ‘‘પણ્ણદણ્ડો ઉપ્પલાદીન’’ન્તિ પદચ્છેદો. સબ્બોતિ તરુણોપિ પરિણતોપિ. ઉપ્પલાદીનં, પદુમજાતિયા ચ સબ્બો પણ્ણદણ્ડો યાવકાલિકોતિ યોજના.

૧૩૪૫. પત્તખાદનીયંનામાતિ પત્તસઙ્ખાતં ખાદનીયં નામ.

૧૩૪૮. મૂલકાદીનન્તિ ‘‘મૂલકં ખારકઞ્ચેવા’’તિઆદિકાય ગાથાય વુત્તમૂલકાદીનં.

૧૩૪૯. કણ્ણિકાતિ પદુમકણ્ણિકા.

૧૩૬૦. કેતકાદીનન્તિ એત્થ આદિ-સદ્દેન તિમ્બરુસકં ગહિતં. તાલફલટ્ઠીતિ તરુણફલાનં અટ્ઠિ.

૧૩૬૧. ‘‘પુન્નાગમધુકટ્ઠીની’’તિ ચ ‘‘પુન્નાગમધુકટ્ઠિચા’’તિ ચ પોત્થકેસુ ઉભયથા પાઠો દિસ્સતિ, અત્થો પન એકોયેવ. ‘‘સેલુ અટ્ઠી’’તિ પદચ્છેદો. અનામિસેતિ યાવજીવિકે.

૧૩૬૩. ધોતં તાલપિટ્ઠન્તિ તાલફેગ્ગું કોટ્ટેત્વા ઉદકે મદ્દિત્વા પરિસ્સાવેત્વા કલલે ભાજનતલં ઓતિણ્ણે પસન્નોદકં અપનેત્વા ગહિતતાલપિટ્ઠન્તિ વુત્તં હોતિ. તથા ખીરવલ્લિયા પિટ્ઠન્તિ યોજના, તથેવ કોટ્ટેત્વા પરિસ્સાવેત્વા ગહિતખીરવલ્લિયા પિટ્ઠન્તિ અત્થો.

૧૩૬૪. અધોતં વુત્તવિપરિયાયતો ગહેતબ્બં. ‘‘આહારત્થમસાધેન્તં, સબ્બં તં યાવજીવિક’’ન્તિ વચનતો તેસુ તેસુ જનપદેસુ મનુસ્સાનં આહારકિચ્ચં અકરોન્તં મૂલાદિ યાવજીવિકં, તદઞ્ઞં યાવકાલિકન્તિ સઙ્ખેપલક્ખણં કાતબ્બન્તિ.

વિકાલભોજનકથાવણ્ણના.

૧૩૬૯. ભોજનં સન્નિધિં કત્વા ખાદનં વાતિ એત્થ ભોજનખાદનીયાનિ યથાવુત્તભેદસરૂપાનેવ. સન્નિધિં કત્વાતિ પટિગ્ગહેત્વા એકરત્તમ્પિ અતિક્કામેત્વા, સન્નિદહિત્વાતિ વુત્તં હોતિ. યથાહ ‘‘પટિગ્ગહેત્વા એકરત્તમ્પિ વીતિનામિતસ્સેતં અધિવચન’’ન્તિ (પાચિ. અટ્ઠ. ૨૫૩). તદેવ વક્ખતિ ‘‘સય’’ન્તિઆદિના. ખાદનન્તિ કમ્મસાધનોયં, ‘‘ખજ્જ’’ન્તિ ઇમિના સમાનત્થો.

૧૩૭૧. ‘‘સન્નિધિં કત્વા’’તિ એત્થ નિદ્દેસં દસ્સેતુમાહ ‘‘સય’’ન્તિઆદિ.

૧૩૭૨. ‘‘તં ન વટ્ટતી’’તિ એત્થ અત્થં દસ્સેતુમાહ ‘‘તતો’’તિઆદિ. તતોતિ સન્નિધિકતભોજનતો. સુદ્ધચિત્તેનાતિ સવાસનસકલકિલેસપ્પહાનતો નિમ્મલચિત્તેન. તાદિનાતિ અટ્ઠસુ લોકધમ્મેસુ નિબ્બિકારભાવેન તાદિના. અથ વા યાદિસા પુરિમકા સમ્માસમ્બુદ્ધા રૂપારૂપગુણેહિ અહેસું, તાદિસેન ભગવતા.

૧૩૭૩. ઓદનાદીસુ પઞ્ચસુ ભોજનેસુ તાવ અકપ્પિયમંસેન સન્નિધિવસેન પાચિત્તિયઞ્ચ આપત્તિવિસેસઞ્ચ દસ્સેતુમાહ ‘‘અકપ્પિયેસૂ’’તિઆદિ. પાચિત્તીતિ સન્નિધિપાચિત્તિયમાહ. ઇતરેતિ સીહાદિમંસમ્હિ. દુક્કટેન સહ પાચિત્તીતિ યોજના.

૧૩૭૪. યામકાલિકસઙ્ખાતં પરિભુઞ્જતોતિ એત્થ ‘‘સન્નિધિં કત્વા’’તિ અધિકારતો લબ્ભતિ. ‘‘દુક્કટેન સહા’’તિ અવત્વા ‘‘પાચિત્તી’’તિ વુત્તત્તા સતિ પચ્ચયે પરિભુઞ્જતોતિ ગહેતબ્બં. યથાહ ‘‘યામકાલિકં સતિ પચ્ચયે અજ્ઝોહારતો પાચિત્તિયં. આહારત્થાય અજ્ઝોહારતો દુક્કટેન સદ્ધિં પાચિત્તિય’’ન્તિ (પાચિ. અટ્ઠ. ૨૫૩).

૧૩૭૫. અન્નન્તિ એત્થાપિ ‘‘સન્નિધિકત’’ન્તિ ઇદં પુરે વિય લબ્ભતિ, ‘‘પકતિ’’ન્તિ ઇદં ‘‘અન્ન’’ન્તિ એતસ્સ વિસેસનં, મનુસ્સમંસાદીહિ અસમ્મિસ્સં નાતિરિત્તકતં અન્નમત્તન્તિ અત્થો. પાચિત્તિયદ્વયન્તિ અનતિરિત્તપચ્ચયા ચ સન્નિધિપચ્ચયા ચ દ્વે પાચિત્તિયાનિ.

૧૩૭૬. ‘‘દ્વે, દ્વય’’ન્તિ ઉભયત્થાપિ અયમેવત્થો.

૧૩૭૭. સામિસેન મુખેન દ્વેતિ એત્થ ‘‘પઞ્ચ ભોજનાનિ યામકાલિકં સત્તાહકાલિકં યાવજીવિકં ઠપેત્વા અવસેસં ખાદનીયં નામા’’તિ (પાચિ. ૨૫૪) વુત્તત્તા ખાદનીયાસઙ્ગહિતેન યામકાલિકેન ચ તેન સમ્મિસ્સત્તા સન્નિધિનામેન મુખગતઆમિસમૂલકેન ચ સન્નિધિપાચિત્તિયાનિ દ્વે હોન્તીતિ અત્થો. સામિસેન મુખેનાતિ ઉપલક્ખણત્તા યથાકથઞ્ચિ આમિસે મિસ્સીભૂતે એત્તકા આપત્તિયોતિ દટ્ઠબ્બં. નિરામિસં યામકાલિકં ભુઞ્જતો એકમેવ પાચિત્તિયન્તિ યોજના, યેન કેનચિ આકારેન અસમ્મિસ્સં યામકાલિકં પરિભુઞ્જતો એકમેવ પાચિત્તિયં હોતીતિ અત્થો.

૧૩૭૮. તમેવાતિ સન્નિહિતમેવ કાલિકં. તેસુ દ્વીસુ વિકપ્પેસૂતિ સામિસનિરામિસવિકપ્પદ્વયે. કેવલં દુક્કટં વડ્ઢતીતિ પઠમવિકપ્પે દ્વીહિ પાચિત્તિયેહિ સદ્ધિં દુક્કટં, દુતિયવિકપ્પે પાચિત્તિયેન સદ્ધિં દુક્કટં હોતીતિ વુત્તં હોતિ.

૧૩૭૯. સુદ્ધન્તિ એત્થ ‘‘સન્નિધિકતં ભોજન’’ન્તિ સેસો. ઇદં ‘‘પકતિભોજને’’તિ (પાચિ. અટ્ઠ. ૨૫૩) અટ્ઠકથાયં, ઇધ ચ ‘‘ન દોસો યામકાલિકે’’તિ યામકાલિકસ્સ વિસું વક્ખમાનત્તા વિઞ્ઞાયતિ, અકપ્પિયમંસયામકાલિકેહિ અમિસ્સં ભોજનન્તિ વુત્તં હોતિ.

૧૩૮૦. મંસેતિ એત્થ ‘‘અકપ્પિયે’’તિ ઇદં થુલ્લચ્ચયાદિવચનેનેવ લબ્ભતિ. વડ્ઢતીતિ પુબ્બે વુત્તેહિ પાચિત્તિયદ્વયેહિ સદ્ધિં મનુસ્સમંસે થુલ્લચ્ચયઞ્ચ સીહાદિમંસે દુક્કટઞ્ચ વડ્ઢતિ. મનુસ્સમંસે ચ સેસે સીહમંસાદિકે અકપ્પિયમંસે ચ યથાનુક્કમતો થુલ્લચ્ચયઞ્ચેવ દુક્કટઞ્ચાતિ દ્વયં વડ્ઢતીતિ યોજના.

૧૩૮૧. અનતિરિત્તમ્પિ ભોજનં વિકાલે પરિભુઞ્જતો ભિક્ખુનો તન્નિમિત્તકો દોસો યથાવુત્તેસુ સબ્બવિકપ્પેસુ નત્થીતિ યોજના. ‘‘વિકાલ…પે… કાલિકે’’તિ યામકાલિકસ્સ વિસું વક્ખમાનત્તા ચ અતિરિત્તકારાપનઞ્ચ ભોજનેયેવ સમ્ભવતીતિ અનતિરિત્તન્તિ એત્થ ‘‘નિહિતભોજન’’ન્તિ સેસો. ‘‘અનતિરિત્તપચ્ચયા પન વિકાલે સબ્બવિકપ્પેસુ અનાપત્તી’’તિ (પાચિ. અટ્ઠ. ૨૫૩) અટ્ઠકથાવચનતો દોસોતિ અનતિરિત્તપચ્ચયા પાચિત્તિયમાહ. તેનેવ વક્ખતિ ‘‘તન્નિમિત્તકો’’તિ, અનતિરિત્તનિમિત્તકોતિ અત્થો. સબ્બવિકપ્પેસૂતિ ‘‘સુદ્ધં વા મનુસ્સમંસમિસ્સં વા સીહાદિમંસમિસ્સં વા યામકાલિકમિસ્સં વા’’તિ સબ્બેસુ વિકપ્પેસુ. ‘‘તન્નિમિત્તકો’’તિ વચનેનેવ વારિતવિકાલાદિનિમિત્તસ્સ દોસસ્સ સમ્ભવં દસ્સેતિ.

૧૩૮૨-૩. વિકાલપચ્ચયા વાતિ એત્થ વા-સદ્દેન ‘‘અનતિરિત્તપચ્ચયા’’તિ ઇદં સમુચ્ચિતં. અપિ-સદ્દો ‘‘યામકાલિકેપી’’તિ યોજેતબ્બો. સત્તાહકાલિકં, યાવજીવિકં આહારસ્સેવ અત્થાય પટિગ્ગણ્હતો ગહણે, યથાવુત્તસ્સ સત્તાહકાલિકયાવજીવિકભેદેન દુવિધસ્સ તુ અજ્ઝોહારપયોગેસુ નિરામિસે વા દુક્કટન્તિ યોજના. તુ-સદ્દો એવ-કારત્થો.

૧૩૮૪. અથાતિ વાક્યારમ્ભે નિપાતો. આમિસસંસટ્ઠં સત્તાહકાલિકં, યાવજીવિકં વાતિ યોજના. ગહેત્વાતિ પટિગ્ગહેત્વા. ઠપિતન્તિ અરુણં અતિક્કામેત્વા ઠપિતં. પાચિત્તીતિ સન્નિધિપાચિત્તિ.

૧૩૮૫. કાલોતિ અરુણુગ્ગમનાદિમજ્ઝન્તિકાવસાનો કાલો. યામોતિ મજ્ઝન્તિકાદિદુતિયઅરુણુગ્ગમનાવસાનો. તં તં કાલં કાલિકં અતિક્કામયતો તુ દોસોતિ યોજના. તુ-સદ્દો એવકારત્થો. તં વા કાલિકન્તિ યથાક્કમં યાવકાલિકં યામકાલિકં સત્તાહકાલિકન્તિ વુત્તં હોતિ.

૧૩૮૬. યાવકાલિકં અત્તના સમ્ભિન્નાનિ ઇતરાનિ તીણિ કાલિકાનિ અત્તનોયેવ સભાવં ઉપનેતીતિ યોજના. સકો ભાવો સભાવો, તં.

૧૩૮૭-૮. એવમેવ વિનિદ્દિસેતિ ‘‘પુરિમં પુરિમં કાલિકં અત્તના સમ્મિસ્સં પચ્છિમં પચ્છિમં અત્તનો સભાવમેવ ગાહાપેતી’’તિ કથેય્યાતિ વુત્તં હોતિ.

ઇમેસૂતિઆદીસુ નિદ્ધારણે ભુમ્મં. અન્તોવુત્થં હોતીતિ અકપ્પિયકુટિયં ઠપેત્વા અરુણુટ્ઠાપનેન અન્તોવુત્થં નામ હોતિ. સન્નિધિ ચ હોતીતિ પટિગ્ગહેત્વા પટિગ્ગહણં અવિજહિત્વા અરુણુટ્ઠાપનેન સન્નિધિ ચ નામ હોતિ. પોત્થકેસુ ‘‘સન્નિધિ’’ન્તિ સાનુનાસિકો પાઠો દિસ્સતિ, ‘‘હોતી’’તિ કિરિયાય સમ્બન્ધત્તા સન્નિધિ-સદ્દો પઠમેકવચનન્તોતિ અનુનાસિકો આગમસન્ધિજોતિ વેદિતબ્બો. ઉભયમ્પીતિ યથાવુત્તં અન્તોવુત્થં, સન્નિધિ ચાતિ ઉભયમ્પિ. ન હોતેવાતિ પુરિમકાલિકદ્વયેન અમિસ્સં ન હોતેવ.

૧૩૮૯. કપ્પિયકુટિનામેન અકતં, અસમ્મતં, અપરિગ્ગહં, પાકારાદીહિ પરિક્ખિત્તં સેનાસનં અકપ્પિયકુટિ નામાતિ સઙ્ખેપતો ગહેતબ્બં. અન્તદ્વયેનાતિ સત્તાહકાલિકયાવજીવિકેન, સહત્થે કરણવચનં. ‘‘મિસ્સિત’’ન્તિ સેસો. ગહિતન્તિ પટિગ્ગહિતં. તં પુબ્બં દ્વયન્તિ યાવકાલિકયામકાલિકદ્વયં. પુરિમકાલિકદ્વયે યં કિઞ્ચિ તદહુપટિગ્ગહિતમ્પિ અકપ્પિયકુટિયાયેવ ઠપેત્વા અરુણં ઉટ્ઠાપિતેન પચ્છિમકાલિકદ્વયે યેન કેનચિ સમ્મિસ્સં અન્તોવુત્થં નામ હોતીતિ વુત્તં હોતિ.

૧૩૯૦. અન્તોવુત્થેન પચ્છિમકાલિકદ્વયેન સંસટ્ઠં યદિદં પુરિમકાલિકદ્વયં, અયં મુખસન્નિધિ નામ હોતીતિ અટ્ઠકથાયં (મહાવ. અટ્ઠ. ૨૯૫ અત્થતો સમાનં) વુત્તં. મહાપચ્ચરિયં પન અન્તોવુત્થં હોતિ, ન કપ્પતિ ઇતિ દળ્હં કત્વા વુત્તન્તિ યોજના.

તત્થ ‘‘મુખસન્નિધી’’તિ ચ ‘‘અન્તોવુત્થ’’ન્તિ ચ નામમત્તમેવ નાનાકરણં, સોયેવત્થોતિ ઉભિન્નં અટ્ઠકથાવચનાનં અનત્થન્તરતા વેદિતબ્બા. તથા હિ મુખ-સદ્દો અન્તો-સદ્દપરિયાયો, સન્નિધિ-સદ્દો પરિવુત્થ-સદ્દપરિયાયો. મુખે સન્નિધિ મુખસન્નિધીતિ કમ્મસાધનં. બહિ સન્નિધિનિવત્તનત્થં અટ્ઠકથાસુ મુખ-ગ્ગહણં, અન્તો-ગહણઞ્ચ કતં. બહીતિ ચ પટિગ્ગહેત્વા અકપ્પિયકુટિયા બહિ યત્થ કત્થચિ પરિવુત્થં પચ્છિમકાલિકદ્વયં પુરિમેન કાલિકદ્વયેન સંસટ્ઠં અધિપ્પેતં. મુખસન્નિધિઅન્તોવુત્થપદાનં અનત્થન્તરભાવો સમન્તપાસાદિકાયં વુત્તો.

યથાહ ‘‘સામણેરો ભિક્ખુસ્સ તણ્ડુલાદિકં આમિસં આહરિત્વા કપ્પિયકુટિયં નિક્ખિપિત્વા પુનદિવસે પચિત્વા દેતિ, અન્તોવુત્થં ન હોતિ. તત્થ અકપ્પિયકુટિયં નિક્ખિત્તસપ્પિઆદીસુ યં કિઞ્ચિ પક્ખિપિત્વા દેતિ, મુખસન્નિધિ નામ હોતિ. મહાપચ્ચરિયં પન ‘અન્તોવુત્થં હોતી’તિ વુત્તં, તત્થ નામમત્તમેવ નાનાકરણ’’ન્તિ (મહાવ. અટ્ઠ. ૨૯૫). નિસ્સન્દેહે પન અઞ્ઞથા વુત્તો વિય વિઞ્ઞાયતિ, તત્થપિ અયમેવ નયો વેદિતબ્બો.

૧૩૯૧. ન દોસોતિ સન્નિધિદોસો ન હોતિ. નિદહિત્વાતિ પટિગ્ગહેત્વા પટિગ્ગહણં અવિજહિત્વા સકસકકાલબ્ભન્તરેયેવ નિદહિત્વા. એત્થ ચ હેટ્ઠિમન્તતો સન્નિધિં દસ્સેતું ‘‘પત્તં ધોવિત્વા પુન તત્થ અચ્છોદકં વા આસિઞ્ચિત્વા અઙ્ગુલિયા વા ઘંસિત્વા નિસ્નેહભાવો જાનિતબ્બો’’તિ (પાચિ. અટ્ઠ. ૨૫૩) અટ્ઠકથાયં વુત્તં. એતેન નિરપેક્ખેન પટિગ્ગહણં અવિસ્સજ્જેત્વાવ સયં વા અઞ્ઞેન વા તુચ્છં કત્વાન સમ્મા ધોવિત્વા નિટ્ઠાપિતે પત્તે લગ્ગમ્પિ અવિજહિતપટિગ્ગહિતમેવ હોતીતિ તત્થ આપત્તિ વુત્તાતિ ગણ્ઠિપદેસુ વુત્તં. એતેન નિરપેક્ખેન પટિગ્ગહણે વિસ્સટ્ઠે તાદિસેપિ પત્તે દોસો નત્થીતિ સિદ્ધં.

સન્નિધિકથાવણ્ણના.

૧૩૯૩. પણીતાનિ ભોજનાનીતિ પાળિયં ‘‘સેય્યથિદં? સપ્પિ નવનીતં તેલં મધુ ફાણિતં મચ્છો મંસં ખીરં દધી’’તિ (પાચિ. ૨૫૯) ઉદ્દિસિત્વા –

‘‘સપ્પિ નામ ગોસપ્પિ વા અજિકાસપ્પિ વા મહિંસસપ્પિ વા, યેસં મંસં કપ્પતિ, તેસં સપ્પિ. નવનીતં નામ તેસઞ્ઞેવ નવનીતં. તેલં નામ તિલતેલં સાસપતેલં મધુકતેલં એરણ્ડકતેલં વસાતેલં. મધુ નામ મક્ખિકામધુ. ફાણિતં નામ ઉચ્છુમ્હા નિબ્બત્તં. મચ્છો નામ ઓદકો વુચ્ચતિ. મંસં નામ યેસં મંસં કપ્પતિ, તેસં મંસં. ખીરં નામ ગોખીરં વા અજિકાખીરં વા મહિંસખીરં વા, યેસં મંસં કપ્પતિ, તેસં ખીરં. દધિ નામ તેસઞ્ઞેવ દધી’’તિ (પાચિ. ૨૬૦) –

નિદ્દિટ્ઠાનિ નવ પણીતભોજનાનીતિ અત્થો. અગિલાનોતિ ‘‘અગિલાનો નામ યસ્સ વિના પણીતભોજનાનિ ફાસુ હોતી’’તિ (પાચિ. ૨૬૦) વુત્તો. અગિલાનોતિ એત્થ ‘‘હુત્વા’’તિ સેસો.

૧૩૯૪. સપ્પિના દેહીતિઆદિ વિઞ્ઞાપનપ્પકારો. સપ્પિભત્તન્તિ એત્થ કિઞ્ચાપિ સપ્પિસંસટ્ઠં ભત્તં, સપ્પિ ચ ભત્તઞ્ચ સપ્પિભત્તન્તિ વિઞ્ઞાયતિ, અટ્ઠકથાસુ પન ‘‘સાલિભત્તં વિય સપ્પિભત્તં નામ નત્થી’’તિ (પાચિ. અટ્ઠ. ૨૫૯) કારણં વત્વા દુક્કટસ્સેવ દળ્હતરં કત્વા વુત્તત્તા ન સક્કા અઞ્ઞં વત્તું. અટ્ઠકથાચરિયા એવ હિ ઈદિસેસુ ઠાનેસુ પમાણં.

૧૩૯૫. પાચિત્તિ પરિયાપુતાતિ ‘‘અજ્ઝોહારે અજ્ઝોહારે આપત્તિ પાચિત્તિયસ્સા’’તિ (પાચિ. ૨૬૦) એવં અજ્ઝોહારગણનાય પાચિત્તિ વુત્તા.

૧૩૯૬. સુદ્ધાનીતિ અન્નેન અમિસ્સાનિ. સેખિયેસૂતિ સિક્ખાકરણીયે વુત્તન્તિ અત્થો.

૧૩૯૭. યસ્મા સુદ્ધાનં પણીતભોજનાનં વિઞ્ઞાપેત્વા પરિભુઞ્જનં દુક્કટવિસયં, તસ્મા. સત્તધઞ્ઞમયન્તિ સાલિઆદીનં સત્તન્નં ધઞ્ઞાનં અઞ્ઞતરસ્સ વિકારભૂતં.

૧૩૯૮. સચે દદાતીતિ યોજના. વિસઙ્કેતન્તિ અનાપત્તિ હોતીતિ વુત્તં હોતિ.

૧૩૯૯. દેતિ ચેતિ સમ્બન્ધો. અઞ્ઞતરેનાતિ સહત્થે કરણવચનં. ‘‘ભત્ત’’ન્તિ અધિકારતો લબ્ભતિ. અસ્સ ભિક્ખુસ્સ. વિસઙ્કેતન્તિ અઞ્ઞં યાચિતસ્સ અઞ્ઞસ્સ દિન્નત્તા સઙ્કેતસ્સ વિરાધનેન અનાપત્તીતિ વુત્તં હોતિ.

૧૪૦૦. યેન યેન હીતિ એત્થાપિ તથેવ કરણવચનં. ‘‘વિઞ્ઞત્ત’’ન્તિ ઇદં અધિકતસ્સ ‘‘ભત્ત’’ન્તિ એતસ્સ વિસેસનં. યેન યેનાતિ અનિયમેન પણીતેન. તેન સપ્પિઆદિ વિસું વિસું ગહિતમેવ, સપ્પિઆદીનં ગોસપ્પિઆદિભેદો ચ સઙ્ગહિતો. તસ્મિં લદ્ધેપીતિ યાચિતેયેવ લદ્ધે સતિ. તસ્સ તસ્સ મૂલેપિ લદ્ધેતિ વિચ્છાવસેન યોજના.

કિં વુત્તં હોતિ? ‘‘સપ્પિના ભત્તં દેહી’’તિ સામઞ્ઞેન વિઞ્ઞાપેન્તસ્સ તમેવ વા ‘‘ઇમિના સપ્પિં કત્વા ગણ્હથા’’તિ નવનીતાદીસુ અઞ્ઞતરં વા ધેનું વા મૂલં વા દેતિ ચે, ‘‘ગોસપ્પિના ભત્તં દેહી’’તિ વિસેસયુત્તં કત્વા વિઞ્ઞાપેન્તસ્સ તમેવ વા ગોનવનીતાદીનિ વા ગાવિં વા ‘‘ઇદં દત્વા સપ્પિં ગણ્હથા’’તિ મૂલં વા સચે દેતિ, વિસઙ્કેતં ન હોતિ, યથાવત્થુકમેવ આપત્તિં આપજ્જતીતિ વુત્તં હોતિ.

ન અઞ્ઞથાતિ સપ્પિં યાચિતવતો ‘‘ઇમં ગહેત્વા સપ્પિં કત્વા ગણ્હથા’’તિ અવત્વા ‘‘સપ્પિ નત્થિ, ઇદં ગણ્હથા’’તિ વત્વા વા તુણ્હીભૂતેન વા નવનીતાદીસુ કિસ્મિઞ્ચિ દિન્ને વિસેસવિઞ્ઞાપકસ્સ તદઞ્ઞદાનેપિ વિસઙ્કેતમેવ હોતીતિ અત્થો. પાળિયા અનાગતેપિ દિન્ને વિસઙ્કેતમેવ હોતિ. ‘‘સચે પન અઞ્ઞં પાળિયા આગતં વા અનાગતં વા દેતિ, વિસઙ્કેત’’ન્તિ (પાચિ. અટ્ઠ. ૨૫૯) અટ્ઠકથાયં વુત્તં.

૧૪૦૧. પાળિયન્તિ પુબ્બે દસ્સિતં ‘‘સપ્પિ નામ ગોસપ્પી’’તિઆદિં નિદ્દેસપાળિમાહ. યથાહ ‘‘પાળિયં આગતનવનીતાદીનિ ઠપેત્વા’’તિઆદિ (પાચિ. અટ્ઠ. ૨૫૯). અઞ્ઞેહિ નવનીતાદીહિ. સહત્થે કરણવચનં.

૧૪૦૨. ‘‘વિઞ્ઞાપેત્વા’’તિ ઇમસ્સ કમ્મભૂતં ‘‘ભત્ત’’ન્તિ અધિકતં. ગાથાબન્ધવસેન વા-સદ્દસ્સ રસ્સો કતો. એકતો વાતિ યોજના, ‘‘નાનતો’’તિપિ ગહિતમેવ, એકટ્ઠાનતો વા નાનટ્ઠાનતો વાતિ વુત્તં હોતિ. યથાહ ‘‘સચે પન સબ્બેહિપિ સપ્પિઆદીહિ એકટ્ઠાને વા નાનટ્ઠાને વા વિઞ્ઞાપેત્વા’’તિઆદિ (પાચિ. અટ્ઠ. ૨૫૯). તેનેવ ભુઞ્જતીતિ એત્થ પરિકપ્પસૂચકં ‘‘ચે’’તિ ઇદઞ્ચ અવકંસસન્દસ્સનત્થં ‘‘કુસગ્ગેન એકબિન્દુમ્પી’’તિ ઇદઞ્ચ અજ્ઝાહરિતબ્બં. મતાતિ અટ્ઠકથાયં (પાચિ. અટ્ઠ. ૨૫૯) વુત્તં સન્ધાયાહ. એકતો વા નાનતો વા ઠાના ભત્તં વિઞ્ઞાપેત્વા એકરસં કત્વા અન્તમસો કુસગ્ગેન એકબિન્દુમ્પિ ભુઞ્જતિ ચે, નવ પાચિત્તિયો મતાતિ યોજના.

૧૪૦૩. અકપ્પિયેન સપ્પિના દેહીતિ વુત્તેપીતિ યોજના, સહત્થે કરણવચનં. ‘‘ભત્ત’’ન્તિ અધિકતં. ‘‘યેસં મંસં કપ્પતિ, તેસં સપ્પી’’તિ (પાચિ. ૨૬૦) વુત્તપ્પકારસ્સ વિપરિયાયતો અકપ્પિયં દટ્ઠબ્બં. તેન ચે દેતીતિ યદિ તેન યાચિતેન તેનેવ અકપ્પિયેન સદ્ધિં ઓદનં દેતીતિ.

૧૪૦૪. તથાસઞ્ઞિસ્સાતિ તથાસઞ્ઞિનો, ગિલાનોમ્હીતિસઞ્ઞિનોતિ અત્થો. યથાહ ‘‘ગિલાનો ગિલાનસઞ્ઞી, અનાપત્તી’’તિ (પાચિ. ૨૬૧).

૧૪૦૫. ગિલાનકાલે વિઞ્ઞત્તં અગિલાનસ્સ ભુઞ્જતો અનાપત્તિ પકાસિતાતિ યોજના. એવમિતરેહિપિ દ્વીહિ પદેહિ યોજેતબ્બં. યથાહ ‘‘અનાપત્તિ ગિલાનો હુત્વા વિઞ્ઞાપેત્વા અગિલાનો ભુઞ્જતી’’તિઆદિ (પાચિ. ૨૬૨). ઞાતકાદીનન્તિ એત્થ ‘‘આયત્ત’’ન્તિ સેસો. આદિ-સદ્દેન ‘‘પવારિતાનં અઞ્ઞસ્સત્થાય અત્તનો ધનેન ઉમ્મત્તકસ્સ આદિકમ્મિકસ્સા’’તિ ઇદં સઙ્ગણ્હાતીતિ.

૧૪૦૬. ચત્તારિ સમુટ્ઠાનાનિ દસ્સેતુમાહ ‘‘કાયતો’’તિઆદિ.

પણીતભોજનકથાવણ્ણના.

૧૪૦૭. ‘‘અદિન્ન’’ન્તિ ઇમિના અદિન્નાદાનસિક્ખાપદે (પારા. ૯૧ આદયો) વિય પરપરિગ્ગહિતં અવત્વા અપ્પટિગ્ગહિતમેવ વત્તબ્બં. યથાહ ‘‘અદિન્નં નામ અપ્પટિગ્ગહિતકં વુચ્ચતી’’તિ (પાચિ. ૨૬૬). મુખદ્વારન્તિ મુખે દ્વારં મુખદ્વારં, ગલનાળિકા, ઇમિના પન વચનેન યં કિઞ્ચિ અજ્ઝોહરણીયં, તં મુખેન વા પવિસતુ નાસિકાય વા, ગલબિલં પવિટ્ઠમેવ આપત્તિકરન્તિ દીપેતિ. આહારન્તિ ઉદકદન્તપોનેહિ અઞ્ઞં અજ્ઝોહરિતબ્બં યં કિઞ્ચિ યાવકાલિકાદિં. યથાહ ‘‘આહારો નામ ઉદકદન્તપોનં ઠપેત્વા યં કિઞ્ચિ અજ્ઝોહરણીય’’ન્તિ (પાચિ. ૨૬૬).

આહરેય્યાતિ મુખદ્વારં પવેસેય્ય, ઇમિના પરગલં અકત્વા મુખેન પટિગ્ગહિતગ્ગહણેપિ નત્થિ દોસોતિ સૂચિતં. તેનેવાહ ‘‘દન્તપોનોદકં હિત્વા’’તિ. તેનેવ વુત્તં ગણ્ઠિપદે ‘‘ભગવતો દન્તકટ્ઠસ્સ મુખદ્વારઠપને અનાપત્તિવચનેનેવ યં કિઞ્ચિ વત્થું પરગલં અકત્વા મુખે ઠપને અનાપત્તિભાવો વુત્તો’’તિ. ઉદકઞ્હિ યથાસુખં પાતું, દન્તકટ્ઠઞ્ચ દન્તપોનપરિભોગેન પરિભુઞ્જિતું વટ્ટતિ, તસ્સ પન રસં ગિલિતું ન વટ્ટતિ. સચેપિ દન્તકટ્ઠરસો અજાનન્તસ્સ અન્તો પવિસતિ, પાચિત્તિયમેવ. દન્તે પુનન્તિ નિમ્મલે કરોન્તિ એતેનાતિ દન્તપોનં.

૧૪૦૮-૯. બ્યતિરેકમુખેન અદિન્નલક્ખણં, પદભાજને ચ વુત્તનયેન પઠમં દિન્નલક્ખણં દસ્સેન્તો આહ ‘‘હત્થપાસો’’તિઆદિ. હત્થપાસોતિ પવારણસિક્ખાપદે –

‘‘ગણ્હતો પચ્છિમં અઙ્ગં, દદતો પુરિમં પન;

ઉભિન્નં અડ્ઢતેય્યં ચે, વિના હત્થં પસારિત’’ન્તિ. (વિ. વિ. ૧૨૭૫) –

વુત્તલક્ખણો હત્થપાસો. અભિનીહારોતિ તત્થેવ વુત્તનયેન અભિમુખં કત્વા હરણઞ્ચ. મજ્ઝિમુચ્ચારણક્ખમોતિ પટિગ્ગહેતબ્બભારસ્સ ઉક્કટ્ઠપરિચ્છેદેન થામમજ્ઝિમેન પુરિસેન ઉક્ખિપનારહતા. ભાવપ્પધાનોયં નિદ્દેસો. અવકંસો પન ‘‘અન્તમસો રથરેણુમત્તમ્પી’’તિ (પાચિ. અટ્ઠ. ૨૬૯) અટ્ઠકથાવચનતો વેદિતબ્બો. ઉચ્ચારણં ઉક્ખિપનં. ‘‘અમનુસ્સો’’તિ ઇમિના તદઞ્ઞસત્તસામઞ્ઞેન તિરચ્છાનગતાપિ વેદિતબ્બા. ‘‘પક્ખી વા’’તિઆદિવક્ખમાનેન વા વેદિતબ્બા. કાયાદિનાતિ કાયકાયપટિબદ્ધનિસ્સગ્ગિયાનં અઞ્ઞતરેન. તેનેવાહ ‘‘તિધા’’તિ.

દ્વિધાતિ કાયેન વા કાયપટિબદ્ધેન વા. પઞ્ચઙ્ગસંયોગેતિ એત્થ ‘‘હત્થપાસો’’તિ પઠમઙ્ગં, ‘‘અભિનીહારો’’તિ દુતિયં, ‘‘મજ્ઝિમુચ્ચારણક્ખમો’’તિ તતિયં, ‘‘મનુસ્સો…પે… તિધા’’તિ ચતુત્થં, ‘‘પટિગ્ગણ્હાતિ…પે… દ્વિધા’’તિ પઞ્ચમન્તિ ઇમાનિ પઞ્ચ અઙ્ગાનિ, પઞ્ચન્નં અઙ્ગાનં સંયોગો સમાગમો સન્નિપાતો પઞ્ચઙ્ગસંયોગો, તસ્મિં. ગહણન્તિ પટિગ્ગહણં. તસ્સ ભિક્ખુનો. રૂહતિ સમ્પજ્જતિ.

૧૪૧૦-૧૨. ઇતરોતિ પટિગ્ગાહકો. તસ્સ અઙ્ગસ્સ. ન ગચ્છતીતિ નગો, ‘‘નગો’’તિ રુક્ખોપિ પબ્બતોપિ વુચ્ચતિ. એવરૂપેતિ ઈદિસે ઉચ્ચનીચટ્ઠાને.

૧૪૧૩. સોણ્ડાયાતિ હત્થેન.

૧૪૧૫-૬. ઈસકં ઓનત્વા થોકં નામેત્વા તેન ભિક્ખુના તં હેટ્ઠિમં ભાજનં એકદેસેનાપિ પટિચ્છિતબ્બન્તિ યોજના.

૧૪૧૭. ઉગ્ઘાટેત્વા ઉચ્ચારેત્વા, ભાજનાનિ વિસું વિસું ઓરોપેત્વાતિ વુત્તં હોતિ.

૧૪૧૮. કાજભત્તન્તિ ભત્તકાજં, ભત્તભરિતં પિટકન્તિ વુત્તં હોતિ. ઓનત્વા દેતીતિ સયં ઓનમિત્વા બ્યાભઙ્ગિં દેતિ.

૧૪૧૯. ‘‘તિંસહત્થો’’તિ ઇદં તિંસરતનમત્તો ચે હોતિ, ‘‘દૂર’’ન્તિ ન પરિસઙ્કિતબ્બોતિ દસ્સનત્થમાહ. ગહિતેકસ્મિન્તિ ઉભયકોટીસુ ઠપિતે દ્વે ઘટે પટિગ્ગહાપેતું હત્થપાસે ઠિતેન દાયકેન દિય્યમાનં તિંસહત્થવેણું પટિગ્ગણ્હન્તેન યેન કેનચિ કાયપ્પદેસેન વા કાયપટિબદ્ધેન વા ‘‘ઇમં ગણ્હામી’’તિ આભોગં કત્વા મઞ્ચાદીસુ યત્થ કત્થચિ ફુસિત્વા પટિગ્ગહિતેતિ વુત્તં હોતિ. તં સબ્બન્તિ તેસુ દ્વીસુ ઘટેસુ પક્ખિત્તં સબ્બમેવ. ગહિતમેવાતિ પટિગ્ગહિતમેવ હોતિ, દાયકસ્સ હત્થપાસબ્ભન્તરે ગતત્તા ઇદં તસ્સ કાયપટિબદ્ધન્તિ ‘‘દૂર’’ન્તિ સઙ્કા ન કાતબ્બાતિ એવકારેન દીપેતિ. ‘‘દ્વીસુ ઘટેસુ ભૂમિયં ઠપિતેસુપિ તત્થ બન્ધનવેળુયં પટિગ્ગણ્હનમત્તેનેવ પટિગ્ગહિતં હોતી’’તિ ગણ્ઠિપદે વુત્તં.

૧૪૨૦-૨૪. ‘‘કટસારકે’’તિ ઇમિના દોણિફલકાદયો ઉપલક્ખિતા. ‘‘નિસીદતી’’તિ ઇદં ‘‘તિટ્ઠતી’’તિઆદીનં ઉપલક્ખણં. મઞ્ચાદીનિ ફુસિત્વાતિ એત્થ ‘‘અઙ્ગુલિયાપી’’તિ સેસો. યથાહ ‘‘પટિગ્ગહણસઞ્ઞાય મઞ્ચાદીનિ અઙ્ગુલિયાપિ ફુસિત્વા ઠિતેન વા નિસિન્નેન વા નિપન્નેન વા’’તિઆદિ (પાચિ. અટ્ઠ. ૨૬૫). પત્તેસૂતિ તથા ઠપિતેસુ સબ્બેસુ પત્તેસુયેવ. યઞ્ચ દીયતીતિ એત્થ ‘‘તથા ઠિતેના’’તિ સામત્થિયા લબ્ભતિ.

મઞ્ચાદીસુ અઙ્ગુલિઆદિના યેન કેનચિ ફુટ્ઠમત્તેપિ પટિગ્ગહણસ્સ રુહણભાવં દસ્સેત્વા ઇદાનિ તદારોહણેનાપિ સિજ્ઝતીતિ દસ્સેતુમાહ ‘‘પટિગ્ગહેસ્સામી’’તિઆદિ. સચે પન પટિગ્ગહેસ્સામિચ્ચેવ મઞ્ચાદીનિ આરુહિત્વા નિસીદતિ, દાયકોપિ હત્થપાસે ઠત્વાન દેતિ ચે, તં સબ્બં ગહિતં હોતીતિ યોજના.

કુચ્છિયા કુચ્છિં આહચ્ચ યે પત્તા ભૂમિયં ઠિતા, તેસુ યં યં પત્તં અઙ્ગુલિયાપિ વા સૂચિયાપિ વા ફુસિત્વા નિસિન્નો, તત્થ તત્થેવ દીયમાનમ્પિ પટિગ્ગણ્હાતિ, વટ્ટતીતિ યોજના.

૧૪૨૫. કટસારાદયો સચે મહન્તા, પટિગ્ગહણં ન રુહેય્યાતિ વિકપ્પો સિયાતિ તન્નિવત્તનત્થમાહ ‘‘કટસારકે’’તિઆદિ. ‘‘મહન્તસ્મિ’’ન્તિ ઇમિના કટસારકસ્સ પુન વચને હેતુમાહ. હત્થત્થરં નામ હત્થિપિટ્ઠે અત્થરિતબ્બં અત્થરણં. આદિ-સદ્દેન અસ્સત્થરરથત્થરાદિં સઙ્ગણ્હાતિ. ઠિતપત્તેસુ દિય્યમાનં ગણ્હતો પટિગ્ગહણરુહણહેતું દસ્સેતિ ‘‘હત્થપાસસ્મિં વિજ્જમાને તૂ’’તિ. તુ-સદ્દો વુત્તવિસેસમેવ જોતેતિ.

૧૪૨૬. તત્થજાતકપણ્ણેસૂતિ રુક્ખેયેવ ઠિતેસુ પણ્ણેસુ. ગહેતુન્તિ પટિગ્ગહેતું. ‘‘ન પનેતાની’’તિઆદિ યેન હેતુના ન વટ્ટતિ, તસ્સ દસ્સનં. હિ-સદ્દો પસિદ્ધિં સૂચેતિ.

૧૪૨૭. થામમજ્ઝિમેન પુરિસેન ઉક્ખિપિતું અસક્કુણેય્યં અસંહારિયં. તાદિસેતિ તથારૂપે, અસંહારિયેતિ વુત્તં હોતિ. ખાણુબદ્ધેતિ ભૂમિયં નિખાતખાણુકે બદ્ધે.

૧૪૨૮. તિન્તિણિકાતિ ચિઞ્ચા. આદિ-સદ્દેન તથા ખુદ્દકાનં કદમ્બપુપ્ફપણ્ણાદીનં ગહણં. ‘‘તિન્તિણિકાદિપણ્ણેસૂ’’તિ વચનતો સાખાસુ પટિગ્ગહણં રુહતીતિ દટ્ઠબ્બં. ભૂમિયં પત્થટેસૂતિ યોજેતબ્બં. યથાહ ‘‘ભૂમિયં અત્થતેસુ સુખુમેસુ તિન્તિણિકાદિપણ્ણેસુપિ પટિગ્ગહણં ન રુહતી’’તિ (પાચિ. અટ્ઠ. ૨૬૫).

૧૪૨૯. પરિવેસકોતિ દાયકો.

૧૪૩૦. અસેસતો પુઞ્છિત્વાતિ યોજના.

૧૪૩૧. પટિગ્ગહેત્વાવાતિ પત્તં પટિગ્ગહેત્વાવ. ભિક્ખા ગહેતબ્બાતિ સમ્બન્ધો.

૧૪૩૨. અપટિગ્ગહિતેતિ એત્થ ‘‘પત્તે’’તિ સેસો. તં પચ્છા પટિગ્ગહેત્વા પરિભુઞ્જતો અનાપત્તીતિ યોજના.

૧૪૩૩. અનાદિયિત્વાતિ અગ્ગહેત્વા, તસ્મિં વચને આદરં અકત્વાતિ વુત્તં હોતિ.

૧૪૩૫. અઞ્ઞસ્સ અનુપસમ્પન્નસ્સ.

૧૪૩૬. પુબ્બાભોગસ્સ અનુરૂપવસેન ‘‘સામણેરસ્સ તં દત્વા…પે… પન વટ્ટતી’’તિ વુત્તં. યસ્મા પન તં ‘‘અઞ્ઞસ્સ દસ્સામી’’તિ ચિત્તુપ્પાદમત્તેન પરસન્તકં નામ ન હોતિ, તસ્મા તસ્સ અદત્વાપિ પટિગ્ગહેત્વા પરિભુઞ્જિતું વટ્ટતિ.

૧૪૩૭-૯. ભિક્ખુનોતિ અઞ્ઞસ્સ ભિક્ખુસ્સ. ભત્તસ્સાતિ કઞ્જિકાદિદ્રવમિસ્સભત્તમાહ. ઉપ્લવતીતિ ઉપરિ પ્લવતિ. કઞ્જિકન્તિ આરનાલં, ઇમસ્સ ઉપલક્ખણત્તા ખીરતક્કાદિદ્રવં સઙ્ગહિતં. પવાહેત્વાતિ મત્થકતો પલાપેત્વા. અન્તો પવિટ્ઠં સચે તન્તિ તં રજં યદિ ભત્તસ્સ અન્તો પવિટ્ઠં હોતિ. પટિગ્ગહેતબ્બન્તિ અનુપસમ્પન્ને અસતિ હત્થતો અમોચેન્તેનેવ યત્થ અનુપસમ્પન્નો અત્થિ, તં તત્થ નેત્વા પટિગ્ગહેતબ્બં.

૧૪૪૦. અપનીયાવાતિ એત્થ ‘‘થૂલ’’ન્તિ ઇદં ‘‘સુખુમં ચે’’તિ વક્ખમાનવિપરિયાયતો લબ્ભતિ. સભત્તં અપનીયાતિ સમ્બન્ધો. યથાહ ‘‘ઉપરિભત્તેન સદ્ધિં અપનેતબ્બં, પટિગ્ગહેત્વા વા ભુઞ્જિતબ્બ’’ન્તિ (પાચિ. અટ્ઠ. ૨૬૫).

૧૪૪૧. થેવોતિ બિન્દુ. થેવો…પે… વટ્ટતીતિ એત્થ યથા પઠમતરં પતિતથેવે દોસો નત્થિ, તથા આકિરિત્વા અપનેન્તાનં પચ્છા પતિતથેવેપિ અભિહટત્તા નેવત્થિ દોસો.

૧૪૪૨-૪. ચરુકેનાતિ ખુદ્દકઉક્ખલિયા. તતો ચરુકતો. મસીતિ જલ્લિકાઆદિકા ભસ્મા. ભાજનેતિ ભાજનપત્તાદિભાજને. તસ્સ ચાતિ તસ્સ મસિઆદિનો ચ.

અનન્તરસ્સ ભિક્ખુસ્સ દીયમાનં યં પત્તતો ઉપ્પતિત્વા ઇતરસ્સ ભિક્ખુનો પત્તે સચે પતતિ, તં પટિગ્ગહિતમેવ હોતિ, તસ્મા વટ્ટતેવાતિ યોજના. ‘‘દીયમાન’’ન્તિ એત્થ ‘‘ભત્તાદિકં યં કિઞ્ચી’’તિ પકરણતો લબ્ભતિ. વટ્ટતેવા યન્તિ એત્થ ‘‘વટ્ટતેવ અય’’ન્તિ પદચ્છેદો ન કાતબ્બો ‘‘અય’’ન્તિ ઇમિના સમ્બન્ધનીયસ્સ અભાવતો. તસ્મા વ-કારો ગાથાછન્દવસેન દીઘં કત્વા વુત્તોતિ વેદિતબ્બો.

૧૪૪૫-૬. પાયાસસ્સાતિ એત્થ પૂરણયોગે સામિવચનં, પાયાસેનાતિ વુત્તં હોતિ. ઉણ્હતોતિ ઉણ્હત્તા. ન સક્કતીતિ ન સક્કોતિ. મુખવટ્ટિયં વટ્ટતીતિ મુખવટ્ટિં ઉક્ખિપિત્વા હત્થે ફુસાપિતે ગણ્હિતું વટ્ટતિ. તથા મુખવટ્ટિયા ગહેતું ન સક્કા ચે, આધારકેનપિ ગહેતબ્બોતિ યોજના.

૧૪૪૭-૮. આહરિયમાનં વા નેવ જાનાતિ, દીયમાનં વા ન જાનાતીતિ યોજના. ગાથાબન્ધવસેન ‘‘જાનતી’’તિ રસ્સો કતો. આભોગન્તિ ‘‘ગણ્હામી’’તિ આભોગં. યથાહ મહાપચ્ચરિયં ‘‘આભોગમત્તમેવ હિ એત્થ પમાણ’’ન્તિ (પાચિ. અટ્ઠ. ૨૬૫). ‘‘કાયેન વા કાયપટિબદ્ધેન વા પટિગ્ગણ્હાતી’’તિ (પાચિ. અટ્ઠ. ૨૬૫) વુત્તત્તા પત્તં ગહેત્વા નિસિન્નત્તા ‘‘કાયપટિબદ્ધેન ગણ્હિસ્સામી’’તિ આભોગં કત્વાતિપિ યુજ્જતેવ.

૧૪૪૯. ‘‘હત્થેન મુઞ્ચિત્વા’’તિ ઇદં ‘‘આધારકમ્પિ વા’’તિ ઇમિનાપિ યોજેતબ્બં. ‘‘પાદેન પેલ્લેત્વા’’તિ ઇમિના પન ‘‘આધારક’’ન્તિ ઇદમેવ યોજેતબ્બં. યથાહ ‘‘હત્થેન આધારકં મુઞ્ચિત્વા પાદેન પેલ્લેત્વા નિદ્દાયતી’’તિ (પાચિ. અટ્ઠ. ૨૬૫). પેલ્લેત્વાતિ પીળેત્વા, અક્કમિત્વાતિ વુત્તં હોતિ.

૧૪૫૦. કમિ-ધાતુસ્સ મજ્ઝે ‘‘અક્ક’’ઇતિ પદચ્છેદો યતિહીનદોસોતિ.

‘‘સિલોકે નિયતટ્ઠાનં, પદચ્છેદં યતિં વિદૂ;

તદપેતં યતિબ્ભટ્ઠં, સવનુબ્બેજનં યથા’’તિ. –

દણ્ડિના વુત્તલક્ખણતો સિદ્ધતાય દોસો યથા ન હોતિ, તથા વિચારેત્વા ગહેતબ્બં. કેચિ પનેત્થ ઇ-કારાગમસ્સ પચ્ચયભાવત્તા તંસહિતો મ-કારો તગ્ગહણેન સઙ્ગય્હતીતિ ઉભયપક્ખભાગીતિ ધાતુપચ્ચયાનં મજ્ઝે યતિયા ઇચ્છિતત્તા ન દોસોતિ પરિહરન્તિ. જાગરસ્સાપીતિ અનિદ્દાયન્તસ્સાપિ. અનાદરોતિ અનાદરભાવો.

૧૪૫૧. તસ્માતિ તથા ગહણસ્સ અનાદરભાવતો. તન્તિ તં આધારકં પાદેન અક્કમિત્વા પટિગ્ગહણઞ્ચ. દીયમાનન્તિ દાયકેન પટિગ્ગહાપિયમાનં. પતતીતિ પટિગ્ગાહકસ્સ હત્થં અફુસિત્વા રજોરહિતાય સુદ્ધભૂમિયા વા પદુમિનિપણ્ણાદીસુ વા પતતિ. યથાહ ‘‘યં દિય્યમાનં દાયકસ્સ હત્થતો પરિગળિત્વા સુદ્ધાય ભૂમિયા વા પદુમિનિપણ્ણવત્થકટસારકાદીસુ વા પતતિ, તં સામં ગહેત્વા પરિભુઞ્જિતું વટ્ટતી’’તિ (પાચિ. અટ્ઠ. ૨૬૫). સરજાય ભૂમિયા પતિતે રજં પુઞ્છિત્વા વા ધોવિત્વા વા પટિગ્ગહાપેત્વા વા પરિભુઞ્જિતબ્બન્તિ ઇદં અટ્ઠકથાયં પન ‘‘સરજાય ભૂમિયં પતતી’’તિઆદિના દસ્સિતં. ગહેતુન્તિ એત્થ ‘‘ભુઞ્જિતુ’’ન્તિ ચ વટ્ટતીતિ એત્થ ‘‘પરિચ્ચત્તં દાયકેહી’’તિ ચ સેસો. યથાહ ‘‘અનુજાનામિ ભિક્ખવે યં દિય્યમાનં પતતિ, તં સામં ગહેત્વા પરિભુઞ્જિતું. પરિચ્ચત્તં તં ભિક્ખવે દાયકેહી’’તિ (ચૂળવ. ૨૭૩). ‘‘યં દિય્યમાનં પતતી’’તિ અવિસેસેન વુત્તત્તા ચતૂસુપિ કાલિકેસુ અયં નયો વેદિતબ્બો.

૧૪૫૨. અબ્બોહારિકનયં દસ્સેતુમાહ ‘‘ભુઞ્જન્તાન’’ન્તિ.

૧૪૫૩-૪. તં મલં. તેસૂતિ ઉચ્છુઆદીસુ વત્થૂસુ. તન્તિ મલમિસ્સકં ઉચ્છુઆદિકં વત્થુ. ન પઞ્ઞાયતીતિ ન પન પઞ્ઞાયતિ. તસ્મિન્તિ ઉચ્છુઆદિવત્થુસ્મિં.

૧૪૫૫. નિસદોદુક્ખલાદીનન્તિ આદિ-સદ્દેન નિસદપોતમુસલાદીનં ગહણં.

૧૪૫૬. વાસિયા ઉપલક્ખણત્તા તજ્જાતિકં યં કિઞ્ચિ સત્થમ્પિ ગહેતબ્બં. ખીરેતિ અનુપસમ્પન્નેન તાપિતખીરે, ઇદં ઉપરિ આમકસ્સ વિસું ગહણેન વિઞ્ઞાયતિ. નીલિકાતિ નીલવણ્ણં. સત્થકે વિય નિચ્છયોતિ સત્થેન ઉટ્ઠિતમલે ઉચ્છુખણ્ડે વિય પટિગ્ગહેત્વા પરિભુઞ્જિતબ્બન્તિ વિનિચ્છયો વેદિતબ્બો.

૧૪૫૭. તન્તિ તં અગ્ગિસન્તત્તવાસિઆદિં, તાપવત્થુતો વાસિ ગહેતબ્બા.

૧૪૫૯. તન્તિ તં હત્થાદિકાયાવયવં વા ચીવરં વા ધોવિત્વા પતિતકિલિટ્ઠજલમિસ્સમોદનં. રુક્ખમૂલાદીસુ નિસીદિત્વા ભુઞ્જન્તસ્સ પત્તાદીસુ રુક્ખપણ્ણાદિં ધોવિત્વા પતિતકિલિટ્ઠોદકેપિ એસેવ વિનિચ્છયોતિ દસ્સેતુમાહ ‘‘એસેવા’’તિઆદિ.

૧૪૬૦. જલં સચે સુદ્ધં પતતિ, વટ્ટતીતિ યોજના, ‘‘રુક્ખતો’’તિ લબ્ભતિ. અબ્ભોકાસે ચ સચે સુદ્ધં તોયં પતતિ, વટ્ટતીતિ એત્થ ‘‘આકાસતો’’તિ લબ્ભતિ. ઉભયત્થાપિ રુક્ખપણ્ણેસુ, આકાસે ચ રજસ્સ પઠમમેવ વસ્સોદકેન ધોવિતત્તા આહ ‘‘સુદ્ધ’’ન્તિ.

૧૪૬૧. અચ્છુપન્તેનાતિ અફુસન્તેન. તસ્સ સામણેરસ્સ.

૧૪૬૨. પત્તન્તિ અનુપસમ્પન્નસ્સ પત્તં. છુપિત્વાતિ અનુપસમ્પન્નપત્તગતોદનં ફુસિત્વા. તં અત્તનો પત્તે ભત્તં. યથાહ ‘‘અપ્પટિગ્ગહિતે ઓદનં છુપિત્વા પુન અત્તનો પત્તે ઓદનં ગણ્હન્તસ્સ ઉગ્ગહિતકો હોતી’’તિ (પાચિ. અટ્ઠ. ૨૬૫).

૧૪૬૪. પચ્છાતિ તસ્મિં ગહિતેપિ અગહિતેપિ પચ્છા. તં પટિગ્ગહિતભોજનં.

૧૪૬૭. તસ્સ અત્તનો પત્તગતસ્સ ભત્તસ્સ.

૧૪૬૮. પરેનાતિ અપ્પટિગ્ગહિતપત્તેન.

૧૪૬૯-૭૦. ‘‘યાગુઆદીનં પચને ભિક્ખૂનં ભાજને’’તિ સમ્બન્ધો. પચન્તિ એત્થાતિ પચનં, ભાજનં. ભાજનૂપરિ હત્થેસુ સામણેરસ્સાતિ ભાજનસ્સ ઉપરિ કતેસુ સામણેરસ્સ હત્થેસુ. પતિતં હત્થતો તસ્મિન્તિ તસ્સ સામણેરસ્સ હત્થતો પરિગળિત્વા તસ્મિં ભાજને પતિતં.

૧૪૭૧. ‘‘ન કરોતિ અકપ્પિય’’ન્તિ એત્થ કારણમાહ ‘‘પરિચ્ચત્તઞ્હિ ત’’ન્તિ. તઞ્હિ યસ્મા પરિચ્ચત્તં, તસ્મા અકપ્પિયં ન કરોતીતિ વુત્તં હોતિ. એવં અકત્વાતિ યથાવુત્તપકારેન અકત્વા. આકિરતેવ ચેતિ સચે ભાજને આકિરતિ એવ. તં તથા પક્ખિત્તં ભત્તભાજનં. નિરામિસં કત્વાતિ તત્થ પતિતં આમિસં યથા ન તિટ્ઠતિ, એવં ધોવિત્વા ભુઞ્જિતબ્બન્તિ સમ્બન્ધો.

૧૪૭૨-૩. કુટન્તિ ઘટં. આવજ્જેતીતિ કુટં નામેત્વા યાગું આસિઞ્ચતિ.

૧૪૭૪. હત્થેતિ દ્વે હત્થે. તત્થાતિ તત્થ ભૂમિયં ઠપિતેસુ દ્વીસુ હત્થતલેસુ.

૧૪૭૫-૬. એકસ્સ ગહણૂપગં ચે ભારન્તિ થામમજ્ઝિમેન એકેન પુરિસેન ઉક્ખિપનપ્પમાણં ભારં સચે ભવેય્ય. ‘‘તથા’’તિ ઇમિના ‘‘એકસ્સ ગહણૂપગં ભાર’’ન્તિ ઇદં પચ્ચામસતિ.

૧૪૭૭. લગ્ગેન્તીતિ ઓલમ્બન્તિ. તત્થાતિ તસ્મિં મઞ્ચપીઠે. વટ્ટતેવાતિ ઉગ્ગહિતકં ન હોતીતિ દીપેતિ.

૧૪૭૮. સમ્મુજ્જન્તોતિ સમ્મજ્જન્તો. ઘટ્ટેતીતિ અસઞ્ચિચ્ચ સમ્મજ્જનિયા ફુસતિ.

૧૪૭૯. તં ઞત્વાતિ પટિગ્ગહિતભાવં ઞત્વા. ઠપેતું વટ્ટતિ ઉગ્ગહિતકં ન હોતીતિ અધિપ્પાયો.

૧૪૮૦. તન્તિ પટિગ્ગહિતસઞ્ઞાય ગહિતં તં અપ્પટિગ્ગહિતં. અઞ્ઞથા પન ન કત્તબ્બન્તિ અપિહિતં પિધાતુઞ્ચ પિહિતં વિવરિતુઞ્ચ ન વટ્ટતીતિ અત્થો.

૧૪૮૧. બહિ ઠપેતિ ચેતિ યદિ પુબ્બે ઠપિતટ્ઠાનતો બહિ ઠપેતિ. તેનાતિ બહિ ઠપેત્વા મુત્તહત્થેન તેન ભિક્ખુના. તન્તિ બહિ ઠપિતં હત્થતો મુત્તં. ઞત્વાતિ અપ્પટિગ્ગહિતભાવં ઞત્વા. તં તથા ઞત્વા ઠપિતં.

૧૪૮૨-૩. ઉટ્ઠેતિ યદિ કણ્ણિકાતિ સચે કણ્ણિકા સઞ્જાયતિ. સિઙ્ગિવેરાદિકેતિ એત્થ આદિ-સદ્દેન પિપ્ફલિઆદીનં ગહણં. મૂલેતિ પઞ્ચમૂલાદિકે મૂલે. ઘુણચુણ્ણન્તિ ઘુણપાણકેહિ ઉપ્પાદિતચુણ્ણં. ‘‘તથા’’તિ ઇમિના ‘‘ઉટ્ઠેતી’’તિ કિરિયં પચ્ચામસતિ. તંસમુટ્ઠાનતોતિ પટિગ્ગહિતતેલાદીસુ સમુપ્પન્નત્તા. તઞ્ઞેવાતિ પવુચ્ચતીતિ પઠમપટિગ્ગહિતં તમેવ તેલાદિકન્તિ વુચ્ચતિ. તેનાહ ‘‘પટિગ્ગહણ…પે… ન વિજ્જતી’’તિ.

૧૪૮૪-૫. કોચિ પુગ્ગલોતિ સામણેરગમિકાદીસુપિ યો કોચિ સત્તો. તાલપિણ્ડિન્તિ તાલકણ્ણિકં ફલં. અઞ્ઞો ભૂમટ્ઠોતિ ભૂમિયં ઠિતો અઞ્ઞો કોચિ પુગ્ગલો ઇત્થી વા પુરિસો વા.

૧૪૮૬. છિન્દિત્વાતિ છિન્દં કત્વા. વતિન્તિ હત્થપાસપ્પહોનકબહલવતિં. યથાહ ‘‘હત્થપાસે સતી’’તિ (પાચિ. અટ્ઠ. ૨૬૫). દણ્ડકે અફુસિત્વાવાતિ યત્તકેન ગમનવેગો નિબ્બાયતિ, એત્તકં, પહરણતો વતિદણ્ડકે વા અપ્પહરિત્વાતિ વુત્તં હોતિ. પહરિત્વા ઠત્વા ગચ્છતિ ચે, ન વટ્ટતિ. યથાહ અટ્ઠકથાયં ‘‘મયં પન ‘યં ઠાનં પહટં, તતો સયં પતિતમિવ હોતી’તિ તક્કયામ. તસ્મિમ્પિ અટ્ઠત્વા ગચ્છન્તે યુજ્જતિ સુઙ્કઘાતકતો પવટ્ટેત્વા બહિ પતિતભણ્ડં વિયા’’તિ (પાચિ. અટ્ઠ. ૨૬૫).

૧૪૮૭-૮. પાકારોતિ એત્થ ‘‘વતિં વા’’તિ (પાચિ. અટ્ઠ. ૨૬૫) અટ્ઠકથાયં આગતત્તા ઇદં અધિકારતો ગહેતબ્બં. ‘‘ન પુથુલો’’તિ એત્થ અધિપ્પેતપ્પમાણં દસ્સેતુમાહ ‘‘અન્તો…પે… પહોતિ ચે’’તિ. ‘‘ઉદ્ધં હત્થસતં ગન્ત્વા’’તિ ઇમિના દાયકસ્સ દાતુમિચ્છાય આકાસં તં ઉક્ખિપિત્વા વિસ્સટ્ઠભાવં ઞાપેતિ. સમ્પત્તન્તિ હત્થપ્પત્તં. ગણ્હતોતિ પટિગ્ગહણસઞ્ઞાય ગણ્હતો.

૧૪૮૯. ‘‘સામણેર’’ન્તિ ઇદં ઉપલક્ખણન્તિ ગિહિનોપિ ગહણં. તત્થેવાતિ ખન્ધે એવ. નિસિન્નો સામણેરો.

૧૪૯૧-૨. ફલિનિં સાખન્તિ ફલવતિં સાખં. ‘‘ખાદિતુ’’ન્તિ ઇદં ‘‘ચિત્તે સમુપ્પન્ને’’તિ ઇમિના યોજેતબ્બં. સચે ફલં ખાદતિ, એવં ખાદિતું વટ્ટતીતિ યોજના. મક્ખિકાનં નિવારત્થન્તિ મક્ખિકાનં નિવારેતું.

૧૪૯૩. છાયત્થઞ્ચ મક્ખિકા નિવારેતુઞ્ચ ગય્હમાના ફલસાખા સુખપરિભોગત્થાય કપ્પિયં કારાપેત્વા પટિગ્ગહિતા ચે, ખાદિતુમિચ્છાય સતિ પુન અપ્પટિગ્ગહિતાપિ વટ્ટતીતિ દસ્સેતુમાહ ‘‘કપ્પિયં પન કારેત્વા’’તિઆદિ.

૧૪૯૪-૫. ‘‘તં સો પટિગ્ગહાપેત્વા’’તિ વક્ખમાનત્તા ‘‘ગહેત્વા’’તિ ઇદં અપ્પટિગ્ગહાપેત્વા ગહણં સન્ધાય વુત્તન્તિ ગહેતબ્બં. તં પટિગ્ગહિતન્તિ એત્થ ‘‘ચે પુબ્બમેવા’’તિ સેસો.

૧૪૯૬-૯. ભિક્ખુસ્સ પાથેય્યતણ્ડુલેતિ સમ્બન્ધો. સોતિ સામણેરો. ઇતરેહીતિ ભિક્ખુના ગહિતેહિ અત્તનો તણ્ડુલેહિ.

દ્વીસુ પત્તેસૂતિ ઉપલક્ખણં. બહૂસુપિ એસેવ નયો. અત્તના લદ્ધં ભિક્ખૂનં દત્વા તેહિ લદ્ધં અત્તના ગહેત્વા અઞ્ઞેસં દાનવસેન બહુન્નમ્પિ દાતું વટ્ટતીતિ અટ્ઠકથાયં (પાચિ. અટ્ઠ. ૨૬૫ અત્થતો સમાનં) વુત્તં તમેવ દસ્સેતુમાહ ‘‘યાગું ભિક્ખુસ્સા’’તિઆદિ. ‘‘આવુસો તુય્હં યાગું મય્હં દેહી’તિ એવં થેરેહિ પટિપાટિયા યાચિત્વાપિ પિવિતું વટ્ટતિ, સબ્બેહિ સામણેરસ્સ સન્તકમેવ ભુત્તં હોતી’’તિ (પાચિ. અટ્ઠ. ૨૬૫) અટ્ઠકથાયં વુત્તં. સામણેરસ્સ પીતત્તાતિ એત્થ ‘‘યાગુયા’’તિઇદં અધિકારતો લબ્ભતિ.

૧૫૦૦. ઇમસ્સાતિ પાથેય્યતણ્ડુલહારકસ્સ. ‘‘ન વિસેસતા’’તિ ઇમિના વિસું અવત્તબ્બતં દીપેતિ.

૧૫૦૧. અસ્સ વિસેસસ્સાતિ યથાવુત્તવિનિચ્છયવિસેસસ્સ વિસું વત્તબ્બભાવેતિ સેસો. તસ્સાતિ સામણેરતણ્ડુલહારકસ્સ ભિક્ખુસ્સ. સાલયભાવન્તિ અત્તના હટતણ્ડુલેસુ પરિક્ખીણેસુ ‘‘ઇદં અમ્હાકમ્પિ પદસ્સતી’’તિ સાલયભાવો. છાયાદીનમત્થાય ગય્હમાનાય સાખાય ઇમિસ્સા ફલં ખાદિતુકામતાય સતિ ખાદનારહન્તિ આલયસ્સ કાતું સક્કુણેય્યત્તા અયમ્પિ અવિસેસોતિ વિઞ્ઞાયતિ, તત્થ સમ્ભવન્તં પન વિસેસં દસ્સેતુમાહાતિ વત્તું યુજ્જતિ.

૧૫૦૨-૪. નિચ્ચાલેતું ન સક્કોતીતિ નિચ્ચાલેત્વા સક્ખરા અપનેતું ન સક્કોતિ. ચેલકોતિ ચૂળસામણેરો. પક્કકાલસ્મિં વિવરિત્વા પક્કતા ઞાતબ્બાતિ યોજના. પિ-સદ્દો પન-સદ્દત્થે. ઓરોપેત્વાતિ ઉદ્ધનતો ઓરોપેત્વા. પુબ્બતણ્ડુલધોવનત્થાય કતપટિગ્ગહણસ્સેવ પમાણત્તા આહ ‘‘ન પચ્છસ્સ પટિગ્ગહણકારણ’’ન્તિ. અસ્સાતિ ભોજનસ્સ.

૧૫૦૫. કારિતન્તસ્સ દ્વિકમ્મકત્તા આહ ‘‘ઉદ્ધનં સુદ્ધભાજન’’ન્તિ, ઉદ્ધનેતિ વુત્તં હોતિ.

૧૫૦૬. કોચીતિ અનુપસમ્પન્નો. તેન ભિક્ખુનાતિ ઉદ્ધનં સુદ્ધભાજનં આરોપેત્વા યેન અગ્ગિ કતો, તેન ભિક્ખુના. ઇદઞ્ચ ઉપલક્ખણં અઞ્ઞેનપિ ન કાતબ્બત્તા.

૧૫૦૭. પચ્છાતિ તણ્ડુલપક્ખેપતો પચ્છા. તં યાગું. સચે પચતીતિ અગ્ગિં કરોન્તો પચતિ. સામપાકા ન મુચ્ચતીતિ તં યાગું પિવન્તો સામપાકદુક્કટતો ન મુચ્ચતિ.

૧૫૦૮. વલ્લિયા સહ તત્થ વલ્લિયં જાતં ફલં કિઞ્ચિ ઈસકમ્પિ ચાલેતિ, તતો લદ્ધં કિઞ્ચિ ફલં તસ્સેવ ભિક્ખુનો ન વટ્ટતીતિ યોજના, તં પરિભુઞ્જતો દુરુપચિણ્ણદુક્કટં હોતીતિ અધિપ્પાયો. તસ્સેવાતિ એવકારેન અઞ્ઞેસં વટ્ટતીતિ દીપેતિ.

૧૫૦૯. પરામટ્ઠુન્તિ આમસિતું. અપસ્સયિતુન્તિ અવલમ્બિતું, અપસ્સનં વા કાતું. ‘‘કિરા’’તિ ઇમિના કેવલં મહાપચ્ચરિયં (પાચિ. અટ્ઠ. ૨૬૫) વુત્તભાવં સૂચેતિ.

૧૫૧૦-૧. તત્થાતિ તસ્મિં તેલે. હત્થેન સણ્ડાસગ્ગહણં અમુઞ્ચન્તેન. તં તેલં.

૧૫૧૫-૬. લોણકિચ્ચન્તિ અલવણટ્ઠાને લોણેન કાતબ્બકિચ્ચં. સન્નિહિતસેસકાલિકસમ્મિસ્સં યાવજીવિકં વિય સમુદ્દોદકસ્સ અસન્નિધિભાવં દસ્સેતુમાહ ‘‘યાવજીવિકસઙ્ખાત’’ન્તિઆદિ. કાલવિનિમ્મુત્તન્તિ અકાલિકં, ચતૂસુ કાલિકેસુ અસઙ્ગહિતન્તિ અત્થો.

૧૫૧૭. હિમસ્સ કરકાતિ હિમોદકસ્સ મુત્તા વિય પત્થિનસક્ખરા. બહલમ્પિ ચાતિ પક્ખિત્તટ્ઠાને મુખે વા કદ્દમવણ્ણસ્સ અપઞ્ઞાયનપ્પમાણબહલં પાનીયઞ્ચ. અપ્પટિગ્ગહિતં વટ્ટતિ. સચે કદ્દમવણ્ણં પઞ્ઞાયતિ, ન વટ્ટતીતિ. યથાહ ‘‘સચે પન મુખે ચ હત્થે ચ લગ્ગતિ, ન વટ્ટતિ, પટિગ્ગહેત્વા પરિભુઞ્જિતબ્બ’’ન્તિ (પાચિ. અટ્ઠ. ૨૬૫).

૧૫૧૮. કસિતટ્ઠાનેતિ કટ્ઠટ્ઠાને. ન વટ્ટતિ અપ્પટિગ્ગહિતં. એવં સબ્બત્થ.

૧૫૧૯. સોબ્ભો દુક્ખોગાહનજલાસયો. ‘‘આવાટો’’તિ કેચિ. કકુધોતિ અજ્જુનો.

૧૫૨૦. પાનીયસ્સ ઘટેતિ પાનીયઘટે. તં પાનીયઘટં.

૧૫૨૧. વાસત્થાય પુપ્ફાનિ વાસપુપ્ફાનિ. તત્થાતિ તસ્મિં પાનીયઘટે. કમલ્લિકાસૂતિ પાટલિકુસુમાદીહિપિ સહ કણ્ટકમલ્લિકાસુ. દિન્નાસૂતિ પાનીયે પક્ખિત્તાસુ.

૧૫૨૨. વિસતીતિ અન્તોગલં પવિસતિ. તેનેવ અટ્ઠકથાયં ‘‘અપ્પટિગ્ગહેત્વા ઠપિતં પટિગ્ગહેતબ્બ’’ન્તિ (પાચિ. અટ્ઠ. ૨૬૫) વુત્તં. ઇદં અટ્ઠકથાવચનં ‘‘અઞ્ઞત્ર ઉદકદન્તપોના’’તિ (પાચિ. ૨૬૬) પાળિયા વિરુજ્ઝતીતિ ચે? ન વિરુજ્ઝતિ. સા હિ કેવલં દન્તકિચ્ચં સન્ધાય વુત્તા, ઇદં રસં સન્ધાય વુત્તન્તિ. તેનેવ તદનન્તરં ‘‘અજાનન્તસ્સ રસે પવિટ્ઠેપિ આપત્તિયેવ. અચિત્તકઞ્હિ ઇદં સિક્ખાપદ’’ન્તિ (પાચિ. અટ્ઠ. ૨૬૫) વુત્તં. તસ્સ સિક્ખાપદસ્સ અચિત્તકતા ‘‘અપ્પટિગ્ગહિતકે પટિગ્ગહિતસઞ્ઞી’’તિઆદિકાય પાળિયા કપ્પિયસઞ્ઞિનોપિ પાચિત્તિયસ્સ વુત્તત્તા વિઞ્ઞાયતિ. પસન્નોદકસ્સ પન અપ્પટિગ્ગહેત્વાપિ પાતબ્બતાય દન્તકટ્ઠેન સદિસત્તા એકયોગનિદ્દિટ્ઠાનં સહેવ પવત્તીતિ વિઞ્ઞાયતિ. ઉદકસ્સ ચ દન્તપોનસ્સ ચ તુલ્યદોસેન ભવિતબ્બન્તિ.

૧૫૨૩. મુત્તોદકસિઙ્ઘાણિકાદિદ્રવઅસ્સુખીરાદિદ્રવસ્સ આપોધાતુપ્પકારત્તા, કણ્ણમલાદિનો ઘનદબ્બસ્સ પથવિધાતુપ્પકારત્તા ‘‘સરીરટ્ઠેસુ ભૂતેસૂ’’તિ ઇમિના ખીરાદિમાહ. ‘‘કિ’’ન્તિ ઇદં ન વટ્ટતીતિ પદેનપિ યોજેતબ્બં. કપ્પાકપ્પિયમંસાનન્તિ એત્થ ‘‘સત્તાન’’ન્તિ સામત્થિયા લબ્ભતિ.

૧૫૨૪. લોણન્તિ એત્થ ‘‘એતં સબ્બમ્પી’’તિ ઇદં અધિકારતો લબ્ભતિ.

૧૫૨૫. એત્થાતિ એતેસુ યથાવુત્તેસુ કણ્ણમલાદીસુ.

૧૫૨૮. ચત્તારિ વિકટાનીતિ મહાવિકટં નામ ગૂથં, મત્તિકા, મુત્તં, છારિકા ચાતિ વુત્તાનિ ચત્તારિ વિકટાનિ. તાનિ હિ વિરુદ્ધાનિ સપ્પવિસાનિ કતાનિ વિહતાનીતિ ‘‘વિકટાની’’તિ વુચ્ચન્તિ. નત્થિ દાયકો એત્થાતિ નદાયકં, ઠાનં, તસ્મિં. ‘‘ન અ નો મા અલં પટિસેધે’’તિ વુત્તત્તા પટિસેધવાચિના ન-સદ્દેન સમાસો, ‘‘અદાયકે’’તિ ઇમિના અનત્થન્તરં. ઇધ દુબ્બચો ચ અસમત્થો ચ અસન્તો નામાતિ અટ્ઠકથાયં (પાચિ. અટ્ઠ. ૨૬૫; કઙ્ખા. અટ્ઠ. દન્તપોનસિક્ખાપદવણ્ણના, અત્થતો સમાનં) વુત્તં. ઇદં કાલોદિસ્સં નામ.

૧૫૨૯. પથવિન્તિ અકપ્પિયપથવિં. તરુન્તિ અલ્લરુક્ખં. ઇમિના સપ્પદટ્ઠકાલે અસતિ કપ્પિયકારકે વિકટત્થાય અત્તના ચ કત્તબ્બન્તિ દસ્સેતિ.

૧૫૩૦. અચ્છેદગાહતોતિ વિલુમ્પિત્વા ગણ્હનતો. ‘‘તસ્સા’’તિ ઇદં સબ્બેહિ હેતુપદેહિ યુજ્જતિ. તસ્સાતિ અપ્પટિગ્ગહિતસ્સાતિ અત્થો. અપરસ્સ અભિક્ખુકસ્સ દાનેન ચાતિ યોજના. ‘‘અભિક્ખુકસ્સા’’તિ પન વિસેસનેન ઉપસમ્પન્નસ્સ દિન્ને પટિગ્ગહણં ન વિજહતીતિ દીપેતિ. સબ્બન્તિ યથાવુત્તં કાયેન ગહણાદિપ્પકારસ્સ કલ્યં ગહિતં. એવન્તિ ઇમિના નિયામેન.

૧૫૩૧. દુરુપચિણ્ણેતિ દુટ્ઠુ ઉપચિણ્ણે દુરામટ્ઠે, અપ્પટિગ્ગહિતસ્સ આમિસભત્તભાજનાદિનો કીળાવસેન હત્થેન પરામસને ચ તત્થજાતકફલિનિં સાખાય વા વલ્લિયા વા ગહેત્વા ચાલને ચાતિ અત્થો. ઉગ્ગહિતસ્સ ગહણેતિ અપ્પટિગ્ગહિતભાવં ઞત્વાવ ગહિતસ્સ કસ્સચિ વત્થુનો પટિગ્ગહણે ચ. અન્તોવુત્થે ચાતિ અકપ્પિયકુટિયા અન્તો ઠપેત્વા અરુણં ઉટ્ઠાપિતે ચ. સયંપક્કે ચાતિ યત્થ કત્થચિ અત્તના પક્કે ચ. અન્તોપક્કે ચાતિ અકપ્પિયકુટિયા અન્તોયેવ પક્કે ચ. દુક્કટં નિદ્દિટ્ઠન્તિ સમ્બન્ધો.

૧૫૩૨-૩. પટિગ્ગહિતકે તસ્મિં પટિગ્ગહિતસઞ્ઞિસ્સાતિ સમ્બન્ધો. દન્તપોનં દન્તકટ્ઠં.

૧૫૩૪. ભિક્ખુનીનન્તિ ભિક્ખુનો ચ ભિક્ખુનિયા ચ ભિક્ખુનીનં, એકદેસસરૂપેકસેસો. એત્થ ઇમસ્મિં સિક્ખાપદે. વિનિચ્છયો નવમજ્ઝિમથેરભિક્ખુનીનં યતો અવિસેસેન ઇચ્છિતબ્બકો, તતો તસ્મા હેતુના સકલો અયં વિનિચ્છયો અસમાસતો મયા કથિતોતિ યોજના. કુસલત્તિકાદીસુ વિય અત્થસાકલ્યસ્સ અત્થસઙ્ખેપતોવ વત્તું સક્કુણેય્યત્તા ‘‘સકલો’’તિ વત્વાપિ કથાય વિત્થારિતભાવં દસ્સેતુમાહ ‘‘અસમાસતો’’તિ.

દન્તપોનકથાવણ્ણના.

ભોજનવગ્ગો ચતુત્થો.

૧૫૩૫. ‘‘અચેલકાદીન’’ન્તિઆદીસુ ‘‘અચેલકો નામ યો કોચિ પરિબ્બાજકસમાપન્નો નગ્ગો’’તિ (પાચિ. ૨૭૧) પદભાજને વુત્તં, તદટ્ઠકથાય ‘‘પરિબ્બાજકસમાપન્નોતિ પબ્બજ્જં સમાપન્નો’’તિ (પાચિ. અટ્ઠ. ૨૬૯) વુત્તં, તસ્મા અચેલકપબ્બજ્જમુપગતોયેવેત્થ અચેલકો નામ. આદિ-સદ્દેન ‘‘પરિબ્બાજકસ્સ વા પરિબ્બાજિકાય વા’’તિ (પાચિ. ૨૭૦) માતિકા-ગતે દ્વે સઙ્ગણ્હાતિ. ઇમેસુ ચ દ્વીસુ ‘‘પરિબ્બાજકો નામ ભિક્ખુઞ્ચ સામણેરઞ્ચ ઠપેત્વા યો કોચિ પરિબ્બાજકસમાપન્નો’’તિ (પાચિ. ૨૭૧) વુત્તો પરિબ્બાજકો નામ. ‘‘ભિક્ખુનિઞ્ચ સિક્ખમાનઞ્ચ સામણેરિઞ્ચ ઠપેત્વા યા કાચિ પરિબ્બાજિકસમાપન્ના’’તિ (પાચિ. ૨૭૧) વુત્તા પરિબ્બાજિકા નામાતિ ગહેતબ્બા. પરિબ્બાજકા પનેત્થ છન્નાયેવ ગહેતબ્બા. દેન્તસ્સાતિ એત્થ ‘‘ભિક્ખુસ્સા’’તિ પકરણતો લબ્ભતિ, એત્થ ‘‘કાયાદિના’’તિ સેસો. યથાહ ‘‘દદેય્યાતિ કાયેન વા કાયપટિબદ્ધેન વા નિસ્સગ્ગિયેન વા દેતી’’તિ (પાચિ. ૨૭૧).

૧૫૩૬. તિકપાચિત્તિયન્તિ તિત્થિયે તિત્થિયસઞ્ઞી, વેમતિકો, અતિત્થિયસઞ્ઞીતિ તિકે પાચિત્તિયત્તયં.

૧૫૩૭. અતિત્થિયે તિત્થિયસઞ્ઞિસ્સ, વેમતિકસ્સ ચ તસ્સ ભિક્ખુનો દુક્કટન્તિ યોજના.

૧૫૩૮-૯. તેસન્તિ તિત્થિયાનં. બહિલેપનન્તિ બહિસરીરે લિમ્પિતબ્બં કિઞ્ચિ દેન્તસ્સ. તેસં તિત્થિયાનં સન્તિકે સમીપે અત્તનો ભત્તપત્તાદિકં ભોજનં ઠપેત્વા ‘‘ભોજનં ગણ્હથા’’તિ વદન્તસ્સ ચ અનાપત્તીતિ યોજના. ‘‘સમુટ્ઠાનં એળકૂપમ’’ન્તિ પદચ્છેદો.

અચેલકકથાવણ્ણના.

૧૫૪૦-૨. ભિક્ખુ ભિક્ખુનો યં કિઞ્ચિ આમિસં દાપેત્વા વા અદાપેત્વા વાતિ યોજના. કિં વુત્તં હોતિ? ‘‘એહાવુસો, ગામં વા નિગમં વા પિણ્ડાય પવિસિસ્સામા’’તિ (પાચિ. ૨૭૫) સિક્ખાપદે વુત્તનયેનેવ વત્વા યેન સદ્ધિં ગામં પિણ્ડાય પવિટ્ઠો, તસ્સ ભિક્ખુસ્સ ખાદનીયાદિભેદં યં કિઞ્ચિ આમિસં દાપેત્વા વા અદાપેત્વા વાતિ.

તં ભિક્ખું ‘‘ગચ્છા’’તિ વત્વા ઉય્યોજેતીતિ યોજના. કિં વુત્તં હોતિ? એવં યો ભિક્ખુ તેન સદ્ધિં ગામં પવિટ્ઠો, તં ‘‘ગચ્છાવુસો, ન મે તયા સદ્ધિં કથા વા નિસજ્જા વા ફાસુ હોતિ, એકકસ્સ મે કથા વા નિસજ્જા વા ફાસુ હોતી’’તિ (પાચિ. ૨૭૫) વત્વા તપ્પચ્ચયા તેસં ઇત્થિયાસદ્ધિં વચનાદીનં અનાચારાનં પચ્ચયા ગન્તું નિયોજેતીતિ. તપ્પચ્ચયાતિ ‘‘ઉય્યોજનમત્તસ્મિ’’ન્તિ વિસેસનં. પઠમેન ચાતિ એત્થ ચ-સદ્દો અટ્ઠાનપ્પયુત્તો ‘‘ઉય્યોજનમત્તસ્મિઞ્ચા’’તિ યોજેતબ્બો. તસ્સાતિ ઉય્યોજકસ્સ.

અસ્સાતિ ઉય્યોજિતસ્સ, અવયવસમ્બન્ધે સામિવચનં. ઉપચારસ્મિં અતિક્કન્તેતિ વક્ખમાનલક્ખણે દસ્સનૂપચારે વા સવનૂપચારે વા અતિક્કન્તેતિ અત્થો, ભાવલક્ખણે ભુમ્મં. પુન અસ્સાતિ ઉપચારસ્સ. દ્વાદસરતનપરિયોસાનં, તદન્તોગધં પાકારાદિ એવ વા ઉપચારસ્સ સીમા નામ.

૧૫૪૩. તં સરૂપતો દસ્સેતુમાહ ‘‘દસ્સને’’તિઆદિ. અજ્ઝોકાસે દસ્સને ઉપચારસ્સ દ્વાદસ હત્થા પમાણં દેસિતાતિ યોજના. સવને ચ અજ્ઝોકાસે એવં સવનૂપચારસ્સ અજ્ઝોકાસે દ્વાદસ હત્થા પમાણં દેસિતાતિ યોજના, સવને ચ ઉપચારસ્સ અવધિ દ્વાદસહત્થપ્પમાણમેવાતિ વુત્તન્તિ અત્થો. ન ચેતરેતિ ઇતરસ્મિં અનજ્ઝોકાસે એવં ઉપચારસ્સ પમાણં દ્વાદસહત્થા ન ચ દેસિતા, કિં નુ બ્યાવધાકરા કુટ્ટાદયો ઉપચારસ્સ પમાણન્તિ દેસિતાતિ વુત્તં હોતિ. વુત્તઞ્ચેતં અટ્ઠકથાયં ‘‘સચે પન અન્તરા કુટ્ટદ્વારપાકારાદયો હોન્તિ, તેહિ અન્તરિતભાવોયેવ દસ્સનૂપચારાતિક્કમો, તસ્સ વસેન આપત્તિ વેદિતબ્બા’’તિ (પાચિ. અટ્ઠ. ૨૭૬). ઇધ ઉપચારદ્વયે સમાનેપિ ઉય્યોજિતમવધિઅન્તં સન્ધાય અસવનૂપચારં વુત્તન્તિ વિઞ્ઞાયતિ.

૧૫૪૪. ‘‘તિકપાચિત્તીતિ ઉપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીહિ તિકપાચિત્તિયં. ઇતરેતિ અનુપસમ્પન્ને. તિકદુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટં. ‘‘ઇતરેતિ સામણેરેયેવા’’તિ નિસ્સન્દેહે લિખિતં. એતસ્સેવત્થસ્સ વજિરબુદ્ધિનાપિ વુત્તભાવો દસ્સિતો. તથાદસ્સનં પઞ્ચસહધમ્મિકેસુ ઇધાધિપ્પેતમનુપસમ્પન્નં સન્ધાય વુત્તં ચે, યુજ્જતિ. અઞ્ઞથા પાળિઅટ્ઠકથાસુ ‘‘અનુપસમ્પન્ને’’તિ સામઞ્ઞેન નિદ્દિટ્ઠત્તા ગહટ્ઠાનુપસમ્પન્નમ્પિ તથા ઉય્યોજેન્તસ્સ અનાપત્તિ ન વત્તબ્બાતિ અમ્હાકં ખન્તિ.

ઉભિન્નન્તિ ઉપસમ્પન્નાનુપસમ્પન્નાનં. નિસ્સન્દેહે પન ‘‘ભિક્ખુસામણેરાન’’ન્તિ લિખિતં. કલિસાસનારોપનેતિ એત્થ કલીતિ કોધો, તસ્સ સાસનં આણા કલિસાસનં, તસ્સ આરોપનં પવત્તનં કલિસાસનારોપનં, તસ્મિં, કોધવસેન ઠાનનિસજ્જાદીસુ દોસં દસ્સેત્વા ‘‘પસ્સથ ભો ઇમસ્સ ઠાનં નિસજ્જં આલોકિતં વિલોકિતં, ખાણુકો વિય તિટ્ઠતિ, સુનખો વિય નિસીદતિ, મક્કટો વિય ઇતો ચિતો ચ વિલોકેતી’’તિ એવં ‘‘અપ્પેવ નામ ઇમિનાપિ ઉબ્બાળ્હો પક્કમેય્યા’’તિ અમનાપવચનસ્સ ભણનેતિ વુત્તં હોતિ.

૧૫૪૫. ઉય્યોજેન્તસ્સ કિચ્ચેનાતિ વિહારપાલકાદીનં ભોજનહરણાદિકિચ્ચેન પેસેન્તસ્સ, ઇમસ્સ ઉપલક્ખણત્તા ‘‘અનાપત્તિ ‘ઉભો એકતો ન યાપેસ્સામા’તિ ઉય્યોજેતી’’તિઆદિના (પાચિ. ૨૭૮) અનાપત્તિવારાગતા સબ્બેપિ પકારા ગહેતબ્બા.

ઉય્યોજનકથાવણ્ણના.

૧૫૪૬. ખુદ્દકેતિ એત્થ ‘‘સયનિઘરે’’તિ સેસો ઉપરિ ‘‘અસયનિઘરે તસ્સ, સયનિઘરસઞ્ઞિનો’’તિ વક્ખમાનત્તા લબ્ભતિ. ‘‘મહલ્લકે’’તિ એત્થાપિ એસેવ નયો. પિટ્ઠિસઙ્ઘાટતો અડ્ઢતેય્યહત્થપ્પમાણં યસ્સ વેમજ્ઝે હોતિ, ઈદિસે ખુદ્દકે સયનિઘરેતિ અત્થો. પિટ્ઠિવંસન્તિ પિટ્ઠિવંસેન નિયમિતં ગેહમજ્ઝં. તેનાહ અટ્ઠકથાયં ‘‘પિટ્ઠિવંસં અતિક્કમિત્વા’તિ ઇમિના મજ્ઝાતિક્કમં દસ્સેતી’’તિ (પાચિ. અટ્ઠ. ૨૮૦). સભોજનેતિ સહ ભોજનેહીતિ સભોજનં, તસ્મિં સભોજને. અથ વા સભોજનેતિ સભોગે. રાગપરિયુટ્ઠિતસ્સ પુરિસસ્સ હિ ઇત્થી ભોગો, ઇત્થિયા ચ પુરિસો, મેથુનરાગેન સારત્તપુરિસિત્થિસહિતેતિ વુત્તં હોતિ. યથાહ પદભાજને ‘‘સભોજનં નામ કુલં ઇત્થી ચેવ હોતિ પુરિસો ચ, ઇત્થી ચ પુરિસો ચ ઉભો અનિક્ખન્તા હોન્તિ, ઉભો અવીતરાગા’’તિ (પાચિ. અટ્ઠ. ૨૮૧). ઇમિના પરિયુટ્ઠિતસ્સ મેથુનરાગગ્ગિનો તઙ્ખણે નિબ્બત્તભાવો દીપિતો. કુલેતિ ઘરે.

૧૫૪૭. હત્થપાસન્તિ અડ્ઢતેય્યરતનપ્પમાણદેસં. પિટ્ઠિસઙ્ઘાટકસ્સ ચાતિ દ્વારસબન્ધસ્સ ચ. સયનસ્સાતિ સયન્તિ એત્થાતિ સયનં, તસ્સ, આસન્ને ઠાને યો નિસીદતિ સભોજને કુલે, ‘‘તસ્સા’’તિ ઇમિના યોજેતબ્બં, સયનસ્સ સમીપે ઠાને યો નિસીદતીતિ અત્થો. મહલ્લકેતિ પુબ્બે વુત્તપ્પમાણતો મહન્તે સયનિઘરે. ‘‘ઈદિસઞ્ચ સયનિઘરં મહાચતુસાલાદીસુ હોતી’’તિ (પાચિ. અટ્ઠ. ૨૮૦) અટ્ઠકથાયં વુત્તં.

૧૫૪૮. સયનમેતસ્સ અત્થીતિ સયની, સયની ચ તં ઘરઞ્ચાતિ વિગ્ગહો. તત્થાતિ સયનિઘરે.

૧૫૪૯-૫૦. દુતિયે સતીતિ દુતિયે ભિક્ખુમ્હિ સતિ. યથાહ અનાપત્તિવારે ‘‘ભિક્ખુ દુતિયો હોતી’’તિ (પાચિ. ૨૮૩). વીતરાગેસૂતિ વીતરાગપરિયુટ્ઠાનેસુ. વુત્તલક્ખણં પદેસન્તિ ખુદ્દકમહન્તસેનાસને વુત્તલક્ખણપદેસ. અનતિક્કમ્મ નિસિન્નસ્સાતિ અનતિક્કમિત્વા નિસીદતો.

સભોજનકથાવણ્ણના.

૧૫૫૨. તેસન્તિ દ્વિન્નં અનિયતસિક્ખાપદાનં. એસન્તિ ઇમેસં દ્વિન્નં રહોપટિચ્છન્નરહોનિસજ્જસિક્ખાપદાનં, અયમેવ વિસેસોતિ અનન્તરસિક્ખાપદેન સમુટ્ઠાનભાવસઙ્ખાતો અયં વિસેસો દીપિતોતિ યોજના.

રહોપટિચ્છન્નરહોનિસજ્જકથાવણ્ણના.

૧૫૫૩-૬. વુત્તોતિ નિમન્તિતો. સન્તં ભિક્ખુન્તિ ‘‘કુલં ઉપસઙ્કમિસ્સામી’’તિ યસ્મિં પદેસે ચિત્તં ઉપ્પન્નં, તસ્સ સામન્તા દ્વાદસહત્થબ્ભન્તરે ઠિતં ભિક્ખુન્તિ અત્થો. યથાહ ‘‘યત્થ ઠિતસ્સ કુલાનિ પયિરુપાસનચિત્તં ઉપ્પન્નં, તતો પટ્ઠાય યં પસ્સે વા અભિમુખે વા પસ્સતિ, યસ્સ ચ સક્કા હોતિ પકતિવચનેન આરોચેતું, અયં સન્તો નામા’’તિ (પાચિ. અટ્ઠ. ૨૯૮). એત્થ યં દ્વાદસહત્થબ્ભન્તરે ઠિતેન સોતું સક્કા ભવેય્ય, તં પકતિવચનં નામ. અનાપુચ્છાતિ ‘‘અહં ઇત્થન્નામસ્સ ઘરં ગચ્છામી’’તિ વા ‘‘ચારિત્તં આપુચ્છામી’’તિ વા ઈદિસેન વચનેન અનાપુચ્છિત્વા. ચારિત્તં આપજ્જેય્ય ચેતિ યદિ સઞ્ચરેય્યાતિ વુત્તં હોતિ. અઞ્ઞત્ર સમયાતિ ‘‘તત્થાયં સમયો, ચીવરદાનસમયો ચીવરકારસમયો’’તિ (પાચિ. ૨૯૯) સિક્ખાપદે અનુપઞ્ઞત્તિવસેન વુત્તા દુવિધા સમયા અઞ્ઞસ્મિં કાલે.

આપત્તિભેદં દસ્સેતુમાહ ‘‘ઠપેત્વા’’તિઆદિ. ‘‘અવીતિવત્તે મજ્ઝન્હે’’તિ ઇમિના પુરેભત્તં, પચ્છાભત્તઞ્ચ સઙ્ગહિતં. એત્થ ચ પુરેભત્તં પચ્છાભત્તન્તિ યેન ભત્તેન નિમન્તિતો, તસ્મિં અભુત્તે વા ભુત્તે વાતિ અત્થો. યથાહ ‘‘પુરેભત્તં નામ યેન નિમન્તિતો, તં અભુત્તાવી. પચ્છાભત્તં નામ યેન નિમન્તિતો, તં અન્તમસો કુસગ્ગેનપિ ભુત્તં હોતી’’તિ (પાચિ. ૩૦૦) પદભાજને વુત્તં. અઞ્ઞસ્સ ઘરન્તિ નિમન્તિતતો અઞ્ઞસ્સ ગેહં. ઘરૂપચારોક્કમને દુક્કટન્તિ સમ્બન્ધો, અત્તના ગતગેહસ્સ ઉપચારોક્કમને દુક્કટન્તિ અત્થો. પઠમેન પાદેનાતિ સમ્બન્ધો.

ઘરુમ્મારેતિ અઞ્ઞસ્સ ગેહુમ્મારે. ઘરૂપચારે દુક્કટં સન્ધાય ‘‘અપરમ્પિ ચા’’તિ વુત્તં. ‘‘સમતિક્કમે’’તિ ઇમિના સહ ‘‘ઘરુમ્મારે’’તિ પદં ‘‘ઘરુમ્મારસ્સા’’તિ વિભત્તિવિપરિણામેન યોજેતબ્બં.

૧૫૫૭. ઠિતટ્ઠાનેતિ યત્થ ઠિતસ્સ ગમનચિત્તં ઉપ્પન્નં, તસ્મિં ઠાને દ્વાદસહત્થબ્ભન્તરેતિ ઇદં યથાવુત્તનિયામેનેવ ગહેતબ્બં. ઓલોકેત્વાતિ ઉભયપસ્સં, અભિમુખઞ્ચ ઓલોકેત્વા. ‘‘યં પસ્સે વા અભિમુખે વા પસ્સતી’’તિ (પાચિ. અટ્ઠ. ૨૯૮) અટ્ઠકથાયં વુત્તં.

૧૫૫૮. દૂરેતિ દ્વાદસહત્થતો દૂરમેવાહ. ઇતો ચિતો ચ ગવેસિત્વા આરોચને કિચ્ચં નત્થીતિ યોજના.

૧૫૫૯. ન દોસોતિ અનાપત્તિ. સમયેતિ એત્થ ‘‘અનાપુચ્છતો’’તિ સેસો. એત્થ ચ ઉપરિ ચ ‘‘ન દોસો’’તિ પચ્ચેકં યુજ્જતિ. સન્તં ભિક્ખુન્તિ સમ્બન્ધો. ઘરેનાતિ અઞ્ઞસ્સ ઘરેન, એત્થ ‘‘ઘરૂપચારેન ચા’’તિ સેસો. આરામં ગચ્છતોતિ એત્થ તેન મગ્ગેનાતિ વુત્તં હોતિ.

૧૫૬૦. ‘‘તેન મગ્ગેના’’તિ ચ ‘‘ગચ્છતો’’તિ ચ પદદ્વયં ‘‘તિત્થિયાનં પસ્સય’’ન્તિ ચ ‘‘ભિક્ખુનિપસ્સય’’ન્તિ ચ ઉભયત્થ તથા-સદ્દેન લબ્ભતિ. તેન ઘરેન, ઘરૂપચારેન વા ગન્તબ્બમગ્ગેન તિત્થિયારામં વા ભિક્ખુનિપસ્સયં વા ગચ્છતો અનાપત્તીતિ અત્થો. આપદાય ગચ્છતીતિ યોજના. જીવિતબ્રહ્મચરિયન્તરાયા આપદા. આસનસાલં વાતિ સીહળદીપે વિય ભિક્ખૂનં ભુઞ્જનત્થાય યત્થ દાનપતીહિ આસનાનિ પઞ્ઞાપીયન્તિ, તં આસનસાલં વા, ભોજનસાલન્તિ અત્થો. ‘‘આપદાયાસનસાલ’’ન્તિ વત્તબ્બે ગાથાબન્ધવસેન યકારલોપો. ભત્તિયસ્સ ઘરન્તિ નિમન્તિતઘરં વા સલાકભત્તદાયકાનં વા ઘરં.

૧૫૬૧. પવેસનં ક્રિયં. અનાપુચ્છનં અક્રિયં. અચિત્તકસમુટ્ઠાનમિસ્સકત્તા ‘‘અચિત્ત’’ન્તિ વુત્તં. કુસલાકુસલાબ્યાકતાનં અઞ્ઞતરચિત્તસમઙ્ગિના આપજ્જિતબ્બં સન્ધાય ‘‘તિચિત્તઞ્ચા’’તિ વુત્તં.

ચારિત્તકથાવણ્ણના.

૧૫૬૨. ‘‘સબ્બા’’તિ ઇદં વિવરન્તો ‘‘ચતુમાસપવારણા પુનપવારણા નિચ્ચપવારણા’’તિ પવારણત્તયં દસ્સેતિ. એત્થ ચ ‘‘ચતુમાસપચ્ચયપવારણા સાદિતબ્બાતિ ગિલાનપચ્ચયપવારણા સાદિતબ્બા’’તિ (પાચિ. ૩૦૭) પદભાજને વુત્તં. પુનપવારણા ચ ચત્તારોયેવ માસે ભેસજ્જેન પવારણં. તેનાહ અટ્ઠુપ્પત્તિયં ‘‘તેન હિ ત્વં મહાનામ સઙ્ઘં અપરમ્પિ ચતુમાસં ભેસજ્જેન પવારેહી’’તિ. નિચ્ચપવારણા નામ યાવજીવં ભેસજ્જેહેવ પવારણા. વુત્તમ્પિ ચેતં ભગવતા અટ્ઠુપ્પત્તિયં ‘‘તેન હિ ત્વં મહાનામ સઙ્ઘં યાવજીવં ભેસજ્જેન પવારેહી’’તિ (પાચિ. ૩૦૩).

સબ્બા ચેતા પવારણા ભેસજ્જપરિયન્તરત્તિપરિયન્તતદુભયપરિયન્તઅપરિયન્તવસેન ચતુબ્બિધા હોન્તિ. યથાહ –

‘‘ભેસજ્જપરિયન્તા નામ ભેસજ્જાનિ પરિગ્ગહિતાનિ હોન્તિ ‘એત્તકેહિ ભેસજ્જેહિ પવારેમી’તિ. રત્તિપરિયન્તા નામ રત્તિયો પરિગ્ગહિતાયો હોન્તિ ‘એત્તકાસુ રત્તીસુ પવારેમી’તિ. ભેસજ્જપરિયન્તા ચ રત્તિપરિયન્તા ચ નામ ભેસજ્જાનિ ચ પરિગ્ગહિતાનિ હોન્તિ રત્તિયો ચ પરિગ્ગહિતાયો હોન્તિ ‘એત્તકેહિ ભેસજ્જેહિ એત્તકાસુ રત્તીસુ પવારેમી’તિ. નેવભેસજ્જપરિયન્તા નરત્તિપરિયન્તા નામ ભેસજ્જાનિ ચ અપરિગ્ગહિતાનિ હોન્તિ રત્તિયો ચ અપરિગ્ગહિતાયો હોન્તી’’તિ (પાચિ. ૩૦૭).

૧૫૬૩. ‘‘સાદિતબ્બા’’તિ વુત્તે સાદિયનપ્પકારે દસ્સેતુમાહ ‘‘વિઞ્ઞાપેસ્સામી’’તિઆદિ. ભેસજ્જમ્પિ સતિ મે પચ્ચયે વિઞ્ઞાપેસ્સામીતિ યોજના, ‘‘સાદિતબ્બા’’તિ ઇમિના સમ્બન્ધો. તદેવ બ્યતિરેકતો દસ્સેતુમાહ ‘‘ન પટિક્ખિપિતબ્બા’’તિ. પટિક્ખેપકારણં દસ્સેતુમાહ ‘‘રોગોદાનિ ન મેતિ ચા’’તિ. સા તિવિધા પવારણા.

૧૫૬૪. તિકપાચિત્તિયં વુત્તન્તિ ‘‘તતુત્તરિ તતુત્તરિસઞ્ઞી, વેમતિકો, નતતુત્તરિસઞ્ઞી ભેસજ્જં વિઞ્ઞાપેતિ, આપત્તિ પાચિત્તિયસ્સા’’તિ (પાચિ. ૩૦૯) વુત્તં પાચિત્તિયત્તયં. ઇધ તતુત્તરીતિ એત્થ યેહિ ભેસજ્જેહિ પવારિતો, યાસુ ચ રત્તીસુ પવારિતો, તતો ચે ઉત્તરિ અધિકન્તિ અત્થો. યથાહ ‘‘ભેસજ્જપરિયન્તે યેહિ ભેસજ્જેહિ પવારિતો હોતિ, તાનિ ભેસજ્જાનિ ઠપેત્વા અઞ્ઞાનિ ભેસજ્જાનિ વિઞ્ઞાપેતિ, આપત્તિ પાચિત્તિયસ્સા’’તિ ચ ‘‘રત્તિપરિયન્તે યાસુ રત્તીસુ પવારિતો હોતિ, તા રત્તિયો ઠપેત્વા અઞ્ઞાસુ રત્તીસુ વિઞ્ઞાપેતિ, આપત્તિ પાચિત્તિયસ્સા’’તિ (પાચિ. ૩૦૮) ચ. તત્થ વેમતિકસ્સ ચ દુક્કટં વુત્તન્તિ યોજના.

૧૫૬૫. તતો ચતુમાસતો ઉત્તરિ અતિરેકં તતુત્તરિ, તતુત્તરિ ન હોતીતિ નતતુત્તરિ, નતતુત્તરીતિ સઞ્ઞા અસ્સ અત્થીતિ નતતુત્તરિસઞ્ઞી, ભિક્ખુ, તસ્સ અનાપત્તીતિ યોજના. યેહિ ભેસજ્જેહિ પવારિતો, તાનિ વિઞ્ઞાપેન્તસ્સ અનાપત્તીતિ સહ સેસેન યોજેતબ્બં. યથાહ ‘‘અનાપત્તિ યેહિ ભેસજ્જેહિ પવારિતો હોતિ, તાનિ ભેસજ્જાનિ વિઞ્ઞાપેતી’’તિ (પાચિ. ૩૧૦). યેન વા યેહિ ભેસજ્જેહિ યાસુ વા રત્તીસુ પવારિતો, તતો અઞ્ઞમ્પિ યથાતથં આચિક્ખિત્વા ભિય્યો વિઞ્ઞાપેન્તસ્સ અનાપત્તીતિ સહ સેસેન યોજેતબ્બં. યથાતથં આચિક્ખિત્વા ભિય્યો વિઞ્ઞાપેન્તસ્સાતિ એત્થ ‘‘ઇમેહિ તયા ભેસજ્જેહિ પવારિતમ્હ, અમ્હાકઞ્ચ ઇમિના ચ ઇમિના ચ ભેસજ્જેન અત્થો’તિ આચિક્ખિત્વા વિઞ્ઞાપેતિ, ‘યાસુ તયા રત્તીસુ પવારિતમ્હ, તાયો ચ રત્તિયો વીતિવત્તા, અમ્હાકઞ્ચ ભેસજ્જેન અત્થો’તિ આચિક્ખિત્વા વિઞ્ઞાપેતી’’તિ (પાચિ. ૩૧૦) વચનતો યથાતથં વત્વા અધિકં વિઞ્ઞાપેન્તસ્સાતિ અત્થો.

૧૫૬૬. અઞ્ઞસ્સ ભિક્ખુસ્સ અત્થાય વા વિઞ્ઞાપેન્તસ્સ ભિક્ખુસ્સ અનાપત્તીતિ યોજના. ઞાતકાનં વિઞ્ઞાપેન્તસ્સ અનાપત્તીતિ એત્થ ઞાતકાનં સન્તકં વિઞ્ઞાપેન્તસ્સ અનાપત્તીતિ અત્થો. અત્તનો વા ધનેન વિઞ્ઞાપેન્તસ્સ અનાપત્તીતિ યોજના. એત્થ ધનં નામ તણ્ડુલાદિ કપ્પિયવત્થુ.

૧૫૬૭. ‘‘તથા’’તિ ઇમિના ‘‘વિઞ્ઞાપેન્તસ્સા’’તિ ઇદં પચ્ચામસતિ. ઉમ્મત્તકાદીનન્તિ વિસેસિતબ્બમપેક્ખિત્વા ‘‘વિઞ્ઞાપેન્તાન’’ન્તિ બહુવચનં કાતબ્બં.

ભેસજ્જકથાવણ્ણના.

૧૫૬૮. ઉય્યુત્તન્તિ સઙ્ગામત્થાય કતઉય્યોગં, ગામતો નિક્ખમ્મ ગચ્છન્તં વા એકત્થ સન્નિવિટ્ઠં વા. યથાહ ‘‘ઉય્યુત્તા નામ સેના ગામતો નિક્ખમિત્વા નિવિટ્ઠા વા હોતિ પયાતા વા’’તિ (પાચિ. ૩૧૪). અઞ્ઞત્ર પચ્ચયાતિ ઠપેત્વા તથારૂપપચ્ચયં.

૧૫૬૯. દસ્સનસ્સુપચારસ્મિન્તિ એત્થ દસ્સનૂપચારં નામ યસ્મિં ઠાને ઠિતસ્સ સેના પઞ્ઞાયતિ, તં ઠાનં. યથાહ ‘‘યત્થ ઠિતો પસ્સતિ, આપત્તિ પાચિત્તિયસ્સા’’તિ (પાચિ. ૩૧૪). ઉપચારં વિમુઞ્ચિત્વા પસ્સન્તસ્સાતિ યથાવુત્તદસ્સનોપચારટ્ઠાનં એત્થ ઠત્વા ઓલોકેતું ન સુકરન્તિઆદિના કારણેન તં ઠાનં પહાય અઞ્ઞત્થ વિલોકેન્તસ્સાતિ વુત્તં હોતિ. કેનચિ પટિચ્છન્નં હુત્વા અદિસ્સમાનમ્પિ નિન્નં ઠાનં ઓતિણ્ણં અપઞ્ઞાયમાનમ્પિ પઞ્ઞાયન્તમ્પિ ઓલોકેતું ન સક્કા એવમેવ વિનિચ્છયો વેદિતબ્બો. યથાહ ‘‘કેનચિ અન્તરિતા વા નિન્નં ઓરુળ્હા વા ન દિસ્સતી’’તિઆદિ (પાચિ. અટ્ઠ. ૩૧૪). પયોગતોતિ યથાવુત્તદસ્સનપયોગગણનાય.

૧૫૭૦. ઇદાનિ ચતુરઙ્ગસેનાલક્ખણં દસ્સેતુમાહ ‘‘આરોહા પન ચત્તારો’’તિઆદિ. આરોહાતિ એત્થ હત્થારોહા દટ્ઠબ્બા. તપ્પાદરક્ખકાતિ તસ્સ પાદરક્ખકાતિ વિગ્ગહો. દ્વે દ્વેતિ એકેકં પાદં રક્ખન્તા દ્વે દ્વે. દ્વાદસપોસોતિ દ્વાદસ પોસા એતસ્સાતિ વિગ્ગહો. દ્વાદસપુરિસયુત્તો એકો હત્થી નામ.

૧૫૭૧. આરોહોતિ એત્થ અસ્સારોહો વુચ્ચતિ. તિપુરિસોતિ તયો પુરિસા અસ્સાતિ વિગ્ગહો. હયોતિ અસ્સો. એકો સારથીતિ રથચારિકો. ‘‘યોધો એકો’’તિ પદચ્છેદો. આણિરક્ખાતિ રથચક્કદ્વયસ્સ અગળનત્થં અક્ખકસ્સ ઉભોસુ કોટીસુ આકોટિતા દ્વે આણિયો રક્ખનકા.

૧૫૭૨. ચતુપોસોતિ ચત્તારો પોસા યસ્સાતિ વિગ્ગહો. ચતુસચ્ચવિભાવિનાતિ ચતુન્નં અરિયસચ્ચાનં દેસકેન ભગવતા. પદહત્થાતિ આવુધહત્થા. પજ્જતે ગમ્યતે અનેન પરે હનિતુન્તિ પદં, આવુધં, પદાનિ હત્થેસુ યેસં તે પદહત્થાતિ ભિન્નાધિકરણો બાહિરત્થસમાસો યથા ‘‘વજિરપાણી’’તિ. પત્તિપદાતિ-સદ્દો અનત્થન્તરા, મનુસ્સસેનાય અધિવચનં.

૧૫૭૩. ચતુરઙ્ગસમાયુત્તાતિ ચતૂહિ અઙ્ગેહિ અવયવેહિ સમાયુત્તાતિ વિગ્ગહો.

૧૫૭૪. હત્થિઆદીસૂતિ યથાવુત્તલક્ખણહત્થિઅસ્સરથપદાતિનામકેસુ ચતૂસુ અઙ્ગેસુ, નિદ્ધારણે ભુમ્મં. એકેકન્તિ એકેકં અઙ્ગં. એતેસુ અવકંસતો એકં પુરિસારુળ્હમપિ હત્થિઞ્ચ તથા અસ્સઞ્ચ એકં પદહત્થપુરિસઞ્ચ એકમેકં કત્વા આહ ‘‘એકેકં દસ્સનત્થાય ગચ્છતો’’તિ. યથાહ અટ્ઠકથાયં ‘‘અન્તમસો એકપુરિસારુળ્હં એકમ્પિ હત્થિમ્પી’’તિઆદિ (પાચિ. અટ્ઠ. ૩૧૫). અનુય્યુત્તેપીતિ સઙ્ગામં વિના અઞ્ઞેન કારણેન નિક્ખન્તે. યથાહ ‘‘અનુય્યુત્તા નામ રાજા ઉય્યાનં વા નદિં વા ગચ્છતિ, એવં અનુય્યુત્તા હોતી’’તિ (પાચિ. અટ્ઠ. ૩૧૫).

૧૫૭૫. સમ્પત્તન્તિ એત્થ ‘‘સેન’’ન્તિ પકરણતો લબ્ભતિ. આપદાસૂતિ જીવિતબ્રહ્મચરિયન્તરાયે સતિ ‘‘એત્થ ગતો મુચ્ચિસ્સામી’’તિ ગચ્છતો અનાપત્તિ. તથારૂપે પચ્ચયે ગિલાનાવલોકનાદિકે ગમનાનુરૂપપચ્ચયે સતિ અનાપત્તીતિ યોજના.

ઉય્યુત્તકથાવણ્ણના.

૧૫૭૬-૭. ‘‘સિયા ચ તસ્સ ભિક્ખુનો કોચિદેવ પચ્ચયો સેનં ગમનાય, દિરત્તતિરત્તં તેન ભિક્ખુના સેનાય વસિતબ્બ’’ન્તિ (પાચિ. ૩૧૮) અનુઞ્ઞાતત્તા કેનચિ કરણીયેન સઙ્ગામત્થં ઉય્યુત્તાય સેનાય દિરત્તતિરત્તં પટિપાટિયા વસિત્વા ચતુત્થરત્તિયં વસન્તસ્સ પન ભિક્ખુનો આપત્તિં દસ્સેતુમાહ ‘‘ચતુત્થે’’તિઆદિ. અનાપત્તિવારે ‘‘ગિલાનો વસતી’’તિ (પાચિ. ૩૨૧) વુત્તત્તા આહ ‘‘અરોગવા’’તિ. સેનાયાતિ એત્થ પરિક્ખેપારહટ્ઠાનેન વા સઞ્ચરણપરિયન્તેન વા સેના પરિચ્છિન્દિતબ્બા, એવં પરિચ્છિન્નાય સેનાય અન્તોવાતિ અત્થો.

તિકપાચિત્તિયન્તિ ‘‘અતિરેકતિરત્તે અતિરેકસઞ્ઞી, વેમતિકો, ઊનકસઞ્ઞી સેનાય વસતિ, આપત્તિ પાચિત્તિયસ્સા’’તિ (પાચિ. ૩૨૦) પાચિત્તિયત્તયં વુત્તં.

સેનાવાસકથાવણ્ણના.

૧૫૮૦. ઉય્યોધિકં નામ સઙ્ગામટ્ઠાનં. યથાહ અટ્ઠકથાયં ‘‘ઉગ્ગન્ત્વા ઉગ્ગન્ત્વા એત્થ યુજ્ઝન્તીતિ ઉય્યોધિકં, સમ્પહારટ્ઠાનસ્સેતં અધિવચન’’ન્તિ (પાચિ. અટ્ઠ. ૩૨૨). બલગ્ગન્તિ ‘‘એત્તકા હત્થી’’તિઆદિના (પાચિ. ૩૨૪) પદભાજનાગતનયેન બલસ્સ ગણનટ્ઠાનં બલગ્ગં. યથાહ ‘‘બલસ્સ અગ્ગં જાનન્તિ એત્થાતિ બલગ્ગં, બલગણનટ્ઠાનન્તિ અત્થો’’તિ (પાચિ. અટ્ઠ. ૩૨૨). સેનાબ્યૂહન્તિ ‘‘ઇતો હત્થી હોન્તુ, ઇતો અસ્સા, ઇતો રથા, ઇતો પત્તી હોન્તૂ’’તિ (પાચિ. ૩૨૪) પદભાજને વુત્તસેનાસન્નિવેસટ્ઠાનં સેનાબ્યૂહં. યથાહ ‘‘સેનાય વિયૂહં સેનાબ્યૂહં, સેનાસન્નિવેસસ્સેતં અધિવચન’’ન્તિ (પાચિ. અટ્ઠ. ૩૨૨).

૧૫૮૧. પુરિમેતિ અનન્તરસિક્ખાપદે. ‘‘દ્વાદસપુરિસો હત્થી’’ઇતિ યો હત્થી વુત્તોતિ યોજના. તેનાતિ તેન હત્થિના હેતુભૂતેન.

૧૫૮૨. ‘‘સેસેસૂ’’તિ ઇમિના અસ્સાનીકરથાનીકપત્તાનીકા ગહિતા. પત્તાનીકં નામ ‘‘ચત્તારો પુરિસા પદહત્થા પત્તી પચ્છિમં પત્તાનીક’’ન્તિ (પાચિ. ૩૨૪) સેનઙ્ગેસુ પટિનિદ્દેસેન નિબ્બિસેસં કત્વા વુત્તં. તિણ્ણન્તિ એતેસં ઉય્યુત્તાદીનં.

ઉય્યોધિકકથાવણ્ણના.

અચેલકવગ્ગો પઞ્ચમો.

૧૫૮૩. પિટ્ઠાદીહીતિ એત્થ આદિ-સદ્દેન પૂવાદિં સઙ્ગણ્હાતિ. યથાહ ‘‘સુરા નામ પિટ્ઠસુરા પૂવસુરા ઓદનસુરા કિણ્ણપક્ખિત્તા સમ્ભારસંયુત્તા’’તિ (પાચિ. ૩૨૮). એત્થ ચ પિટ્ઠં ભાજને પક્ખિપિત્વા તજ્જં ઉદકં દત્વા પક્ખિપિત્વા કતા પિટ્ઠસુરા. એવં પૂવે, ઓદને ચ ભાજને પક્ખિપિત્વા તજ્જં ઉદકં દત્વા મદ્દિત્વા કતા ‘‘પૂવસુરા, ઓદનસુરા’’તિ વુચ્ચતિ. ‘‘કિણ્ણા’’તિ પન તસ્સા સુરાય બીજં વુચ્ચતિ, યે ‘‘સુરામોદકા’’તિપિ વુચ્ચન્તિ, તે પક્ખિપિત્વા કતા કિણ્ણપક્ખિત્તા. હરીતકિસાસપાદિનાનાસમ્ભારેહિ સંયોજિતા સમ્ભારસંયુત્તા.

પુપ્ફાદીહીતિ એત્થ આદિ-સદ્દેન ફલાદીનં ગહણં. યથાહ ‘‘મેરયો નામ પુપ્ફાસવો ફલાસવો મધ્વાસવો ગુળાસવો સમ્ભારસંયુત્તો’’તિ (પાચિ. ૩૨૮). તત્થ ચ પુપ્ફાસવો નામ મધુકપુપ્ફાદીનં જાતિરસકતો ચેવ તાલનાળિકેરપુપ્ફાનઞ્ચ રસો ચિરપરિવાસિતો. ફલાસવો પન મુદ્દિકાપનસફલાદીનિ મદ્દિત્વા તેસં રસેન કતો. મધ્વાસવો નામ મુદ્દિકાનં જાતિરસેન કતો. મક્ખિકામધુનાપિ કરીયતીતિ વદન્તિ. ઉચ્છુરસો ગુળાસવો. હરીતકામલકકટુકભણ્ડાદિનાનાસમ્ભારાનં રસો ચિરપરિવાસિતો સમ્ભારસંયુત્તો. આસવો મેરયં હોતીતિ યોજના.

૧૫૮૪. બીજતો પટ્ઠાયાતિ સમ્ભારે પટિયાદિત્વા ચાટિયં પક્ખિત્તકાલતો પટ્ઠાય તાલનાળિકેરાદીનં પુપ્ફરસે પુપ્ફતો ગળિતાભિનવકાલતોયેવ ચ પટ્ઠાય. પિવન્તસ્સાતિ એત્થ ‘‘કુસગ્ગેના’’તિપિ સેસો. ઉભયમ્પિ ચાતિ સુરં, મેરયઞ્ચાતિ ઉભયમ્પિ. બીજતો પન પટ્ઠાય કુસગ્ગેન પિવન્તસ્સપિ ભિક્ખુનો પાચિત્તિયં હોતીતિ યોજેતબ્બં. પયોગબાહુલ્લેન આપત્તિબાહુલ્લં દસ્સેતુમાહ ‘‘પયોગે ચ પયોગે ચા’’તિ. ઇદઞ્ચ વિચ્છિન્દિત્વા વિચ્છિન્દિત્વા પિવન્તસ્સ ભિક્ખુનો પયોગે ચ પયોગે ચ પાચિત્તિયં હોતીતિ યોજેતબ્બં. યથાહ ‘‘વિચ્છિન્દિત્વા વિચ્છિન્દિત્વા પિવતો પયોગગણનાય આપત્તિયો’’તિ (પાચિ. અટ્ઠ. ૩૨૮). એકેનેવ પયોગેન બહુમ્પિ પિવન્તસ્સ એકં એવ આપત્તિં બ્યતિરેકતો દીપેતિ. યથાહ ‘‘એકેન પન પયોગેન બહુમ્પિ પિવન્તસ્સ એકા આપત્તી’’તિ (પાચિ. અટ્ઠ. ૩૨૮).

૧૫૮૫. તિકપાચિત્તિયં વુત્તન્તિ ‘‘મજ્જે મજ્જસઞ્ઞી, મજ્જે વેમતિકો, મજ્જે અમજ્જસઞ્ઞી પિવતિ, આપત્તિ પાચિત્તિયસ્સા’’તિ (પાચિ. ૩૨૮) તિકપાચિત્તિયં વુત્તં.

૧૫૮૬. ‘‘અનાપત્તિ નમજ્જં હોતિ મજ્જવણ્ણં મજ્જગન્ધં મજ્જરસં, તં પિવતી’’તિ (પાચિ. ૩૨૮) વુત્તત્તા આહ ‘‘અમજ્જં મજ્જવણ્ણ’’ન્તિઆદિ. અરિટ્ઠં નામ આમલકફલરસાદીહિ કતો આસવવિસેસો. લોણસોવીરકં નામ અટ્ઠકથાયં –

‘‘હરીતકામલકવિભીતકકસાવે, સબ્બધઞ્ઞાનિ, સબ્બઅપરણ્ણાનિ, સત્તન્નમ્પિ ધઞ્ઞાનં ઓદનં, કદલિફલાદીનિ સબ્બફલાનિ, વેત્તકેતકખજ્જૂરિકળીરાદયો સબ્બકળીરે, મચ્છમંસખણ્ડાનિ, અનેકાનિ ચ મધુફાણિતસિન્ધવલોણતિકટુકાદીનિ ભેસજ્જાનિ પક્ખિપિત્વા કુમ્ભિમુખં લિમ્પિત્વા એકં વા દ્વે વા તીણિ વા સંવચ્છરાનિ ઠપેન્તિ, તં પરિપચ્ચિત્વા જમ્બુરસવણ્ણં હોતિ. વાતકાસકુટ્ઠપણ્ડુભગન્દલાદીનઞ્ચ સિનિદ્ધભોજનભુત્તાનઞ્ચ ઉત્તરપાનં ભત્તજીરણકભેસજ્જં તાદિસં નત્થિ. તં પનેતં ભિક્ખૂનં પચ્છાભત્તમ્પિ વટ્ટતિ, ગિલાનાનં પાકતિકમેવ. અગિલાનાનં પન ઉદકસમ્ભિન્નં પાનપરિભોગેના’’તિ (પારા. અટ્ઠ. ૨.૧૯૨) –

વિભાવિતો ભેસજ્જવિસેસો. સુત્તં નામ અનેકેહિ ભેસજ્જેહિ અભિસઙ્ખતો અમજ્જભૂતો આસવવિસેસો.

૧૫૮૭. વાસગાહાપનત્થાયાતિ સુગન્ધિભાવગાહાપનત્થં. ઈસકન્તિ મજ્જવણ્ણગન્ધરસા યથા ન પઞ્ઞાયન્તિ, એવં અપ્પમત્તકં. યથાહ ‘‘અનતિક્ખિત્તમજ્જેયેવ અનાપત્તિ. યં પન અતિક્ખિત્તમજ્જં હોતિ, યત્થ મજ્જસ્સ વણ્ણગન્ધરસા પઞ્ઞાયન્તિ, તસ્મિં આપત્તિયેવા’’તિ (પાચિ. અટ્ઠ. ૩૨૯). સૂપાદીનં તુ પાકેતિ એત્થ આદિ-સદ્દેન મંસપાકાદયો સઙ્ગહિતા. યથાહ ‘‘સૂપસમ્પાકે મંસસમ્પાકે તેલસમ્પાકે’’તિ (પાચિ. ૩૨૮).

૧૫૮૮. વત્થુઅજાનના અચિત્તન્તિ સમ્બન્ધો. યથાહ ‘‘વત્થુઅજાનનતાય ચેત્થ અચિત્તકતા વેદિતબ્બા’’તિ (પાચિ. અટ્ઠ. ૩૨૯). વત્થુઅજાનનતા ચ નામ ‘‘મજ્જ’’ન્તિ અજાનનભાવો. ઇદન્તિ ઇદં સિક્ખાપદં. ચ-સદ્દેન અઞ્ઞાનિ ચ ગિરગ્ગસમજ્જાદિસિક્ખાપદાનિ સમુચ્ચિનોતિ. અકુસલેનેવાતિ અકુસલચિત્તેનેવ. પાનતોતિ પાતબ્બતો. લોકવજ્જકન્તિ સાધુલોકેન વજ્જેતબ્બન્તિ અત્થો. લોકવજ્જમેવ લોકવજ્જકં.

નનુ ચેત્થ વત્થુઅજાનનતાય અચિત્તકત્તે તંવત્થુઅજાનનં કુસલાબ્યાકતચિત્તસમઙ્ગિનોપિ સમ્ભવતિ, કસ્મા ‘‘અકુસલેનેવ પાનતો લોકવજ્જક’’ન્તિ વુત્તન્તિ? વુચ્ચતે – યસ્મા અમજ્જસઞ્ઞાય પિવતો, મજ્જસઞ્ઞાય ચ પિવતો મજ્જં વત્થુનિયામેન કિલેસુપ્પત્તિયાવ પચ્ચયો હોતિ, યથા મજ્જં પીતં અજાનન્તસ્સાપિ અકુસલાનમેવ પચ્ચયો હોતિ, ન કુસલાનં, તથા અજ્ઝોહરણકાલેપિ વત્થુનિયામેન અકુસલસ્સેવ પચ્ચયો હોતીતિ કત્વા વુત્તં ‘‘અકુસલેનેવ પાનતો લોકવજ્જક’’ન્તિ. યથા તં નિળિનિજાતકે (જા. ૨.૧૮.૧ આદયો; જા. અટ્ઠ. ૫.૧૮.૧ આદયો) ભેસજ્જસઞ્ઞાય ઇત્થિયા મગ્ગે અઙ્ગજાતં પવેસેન્તસ્સ કુમારસ્સ ‘‘ઇત્થી’’તિ વા ‘‘તસ્સા મગ્ગે મેથુનં પટિસેવામી’’તિ વા સઞ્ઞાય અભાવેપિ કામરાગુપ્પત્તિયા સીલાદિગુણપરિહાનિ વત્થુનિયામતો ચ અહોસિ, એવમિધાપિ દટ્ઠબ્બો.

કેચિ પન ‘‘અકુસલેનેવ પાનતો’’તિ ઇદં ઇમસ્સ સિક્ખાપદસ્સ સચિત્તકપક્ખં સન્ધાય વુત્તં, અઞ્ઞથા પાણાતિપાતાદીસુપિ અતિપ્પસઙ્ગોતિ મઞ્ઞમાના બહુકારણં, નિયમનઞ્ચ દસ્સેસું. વિનયટ્ઠકથાયં (પાચિ. અટ્ઠ. ૩૨૯), પન ખુદ્દકપાઠટ્ઠકથાયં (ખુ. પા. અટ્ઠ. સિક્ખાપદવણ્ણના), વિભઙ્ગટ્ઠકથાદીસુ ચ ‘‘તિચિત્ત’’ન્તિ અવત્વા ‘‘અકુસલચિત્ત’’મિચ્ચેવ વુત્તત્તા, સિક્ખાપદસ્સ સામઞ્ઞલક્ખણં દસ્સેન્તેન પક્ખન્તરલક્ખણદસ્સનસ્સ અયુત્તત્તા ચ અટ્ઠકથાસુ યથારુતવસેનેવ અત્થગ્ગહણે ચ કસ્સચિ વિરોધસ્સ અસમ્ભવતો સચિત્તકપક્ખમેવ સન્ધાય અકુસલચિત્તતા, લોકવજ્જતા ચેત્થ ન વત્તબ્બા. ‘‘વત્થું જાનિત્વાપિ અજાનિત્વાપિ મજ્જં પિવતો ભિક્ખુસ્સ પાચિત્તિયં. સામણેરસ્સ પન જાનિત્વાવ પિવતો સીલભેદો, ન અજાનિત્વા’’તિ (માહાવ. અટ્ઠ. ૧૦૮ અત્થતો સમાનં) યં વુત્તં, તત્થ કારણં મગ્ગિતબ્બં. સિક્ખાપદપઞ્ઞત્તિયા બુદ્ધાનમેવ વિસયત્તા ન તં મગ્ગિતબ્બં, યથાપઞ્ઞત્તેયેવ વત્તિતબ્બં. ઇદં પન સિક્ખાપદં અકુસલચિત્તં, સુખોપેક્ખાવેદનાનં વસેન દુવેદનઞ્ચ હોતિ. વિનયટ્ઠકથાયં (પાચિ. અટ્ઠ. ૩૨૯), પન માતિકટ્ઠકથાયઞ્ચ (કઙ્ખા. અટ્ઠ. સુરાપાનસિક્ખાપદવણ્ણના) ‘‘તિવેદન’’ન્તિ પાઠો દિસ્સતિ, ખુદ્દકપાઠવણ્ણનાય (ખુ. પા. અટ્ઠ. સિક્ખાપદવણ્ણના), વિભઙ્ગટ્ઠકથાદીસુ (વિભ. અટ્ઠ. ૭૦૩ આદયો) ચ ‘‘સુખમજ્ઝત્તવેદનાવસેન દુવેદન’’ન્તિ ચ ‘‘લોભમોહમૂલવસેન દ્વિમૂલક’’ન્તિ ચ વુત્તત્તા સો ‘‘પમાદપાઠો’’તિ ગહેતબ્બો.

સુરાપાનકથાવણ્ણના.

૧૫૮૯. યેન કેનચિ અઙ્ગેનાતિ અઙ્ગુલિઆદિના યેન કેનચિ સરીરાવયવેન. હસાધિપ્પાયિનોતિ હસે અધિપ્પાયો હસાધિપ્પાયો, સો એતસ્સ અત્થીતિ વિગ્ગહો, તસ્સ, ઇમિના કીળાધિપ્પાયરહિતસ્સ અનાપત્તિં બ્યતિરેકતો દીપેતિ. વક્ખતિ ચ ‘‘અનાપત્તિ નહસાધિપ્પાયસ્સા’’તિ. ફુસતો ફુસન્તસ્સ.

૧૫૯૦. સબ્બત્થાતિ સબ્બેસુ ઉપસમ્પન્નાનુપસમ્પન્નેસુ. કાયપટિબદ્ધાદિકે નયેતિ ‘‘કાયેન કાયપટિબદ્ધં આમસતિ, આપત્તિ દુક્કટસ્સા’’તિએવમાદિના (પાચિ. ૩૩૨) દસ્સિતે નયે. અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તીણિ દુક્કટાનિ વુત્તાનીતિ આહ ‘‘તથેવાનુપસમ્પન્ને, દીપિતં તિકદુક્કટ’’ન્તિ. એત્થ ચ ‘‘તથેવા’’તિ ઇમિના ઉપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકપાચિત્તિયસ્સ વુત્તભાવો દીપિતો હોતિ. યથા ઉપસમ્પન્ને તિકપાચિત્તિયં દીપિતં, તથેવ અનુપસમ્પન્ને તિકદુક્કટં દીપિતન્તિ યોજના.

૧૫૯૧. એત્થ…પે… ભિક્ખુનીતિ એત્થ ભિક્ખુપિ ભિક્ખુનિયા અનુપસમ્પન્નટ્ઠાને ઠિતોતિ વેદિતબ્બો.

૧૫૯૨. નહસાધિપ્પાયસ્સ ફુસતોતિ હસાધિપ્પાયં વિના વન્દનાદીસુ પાદાદિસરીરાવયવેન પરં ફુસન્તસ્સ. કિચ્ચે સતીતિ પિટ્ઠિપરિકમ્માદિકિચ્ચે સતિ.

અઙ્ગુલિપતોદકકથાવણ્ણના.

૧૫૯૩. જલેતિ એત્થ ‘‘ઉપરિગોપ્ફકે’’તિ સેસો. યથાહ ‘‘ઉપરિગોપ્ફકે ઉદકે’’તિ (પાચિ. ૩૩૭). નિમુજ્જનાદીનન્તિ એત્થ આદિ-સદ્દેન ઉમ્મુજ્જનપ્લવનાનિ ગહિતાનિ. યથાહ ‘‘ઉપરિગોપ્ફકે ઉદકે હસાધિપ્પાયો નિમુજ્જતિ વા ઉમ્મુજ્જતિ વા પલવતિ વા’’તિ (પાચિ. ૩૩૭). ‘‘કેવલ’’ન્તિ ઇમિના નહાનાદિકિચ્ચેન ઓતરન્તસ્સ અનાપત્તીતિ દીપેતિ.

૧૫૯૪. ઉપરિગોપ્ફકે જલેતિ ગોપ્ફકાનં ઉપરિભાગપ્પમાણે જલે. નિમુજ્જેય્યપિ વાતિ અન્તોજલં પવિસન્તો નિમુજ્જેય્ય વા. તરેય્ય વાતિ પ્લવેય્ય વા.

૧૫૯૫-૬. અન્તોયેવોદકે નિમુજ્જિત્વાન ગચ્છતો તસ્સ હત્થપાદપયોગેહિ પાચિત્તિં પરિદીપયેતિ યોજના.

૧૫૯૭. હત્થાદિસકલસરીરાવયવં સઙ્ગણ્હિતું ‘‘યેન યેના’’તિ અનિયમામેડિતમાહ. જલં તરતો ભિક્ખુનો યેન યેન પન અઙ્ગેન તરણં હોતીતિ યોજના.

૧૫૯૮. તરુતો વાપીતિ રુક્ખતોપિ વા. તિકપાચિત્તિયન્તિ ઉદકે હસધમ્મે હસધમ્મસઞ્ઞિવેમતિકઅહસધમ્મસઞ્ઞીનં વસેન તિકપાચિત્તિયં. ‘‘તિકદુક્કટ’’ન્તિ પાઠો દિસ્સતિ, ‘‘ઉદકે અહસધમ્મે હસધમ્મસઞ્ઞી, આપત્તિ દુક્કટસ્સ. ઉદકે અહસધમ્મે વેમતિકો, આપત્તિ દુક્કટસ્સા’’તિ (પાચિ. ૩૩૮) વત્વા ‘‘ઉદકે અહસધમ્મે અહસધમ્મસઞ્ઞી, અનાપત્તી’’તિ (પાચિ. ૩૩૮) તતિયવિકપ્પે પાળિયં અનાપત્તિ વુત્તાતિ સો પમાદપાઠો, ‘‘દ્વિકદુક્કટ’’ન્તિ પાઠોયેવ ગહેતબ્બો.

૧૫૯૯. નાવં તીરે ઉસ્સારેન્તોપિ વાતિ સમ્બન્ધો. ઉસ્સારેન્તોતિ તીરમારોપેન્તો. ‘‘કીળતી’’તિ ઇદં ‘‘પાજેન્તો’’તિ ઇમિનાપિ યોજેતબ્બં.

૧૬૦૦. કથલાય વાતિ ખુદ્દકકપાલિકાય વા. ઉદકન્તિ એત્થ ‘‘ભાજનગતં વા’’તિ સેસો. ‘‘ભાજનગતં ઉદકં વા’’તિ (પાચિ. ૩૩૮) હિ પદભાજને વુત્તં.

૧૬૦૧. કઞ્ચિકં વાતિ ધઞ્ઞરસં વા. અપિ-સદ્દો ‘‘ખીરં વા તક્કં વા રજનં વા પસ્સાવં વા’’તિ (પાચિ. ૩૩૮) પાળિયં આગતે સમ્પિણ્ડેતિ. ચિક્ખલ્લં વાપીતિ ઉદકકદ્દમં વા. એત્થ વિસેસજોતકેન અપિ-સદ્દેન ‘‘અપિચ ઉપરિગોપ્ફકે વુત્તાનિ ઉમ્મુજ્જનાદીનિ ઠપેત્વા અઞ્ઞેન યેન કેનચિ આકારેન ઉદકં ઓતરિત્વા વા અનોતરિત્વા વા યત્થ કત્થચિ ઠિતં ઉદકં અન્તમસો બિન્દું ગહેત્વા ખિપનકીળાયપિ કીળન્તસ્સ દુક્કટમેવા’’તિ (પાચિ. અટ્ઠ. ૩૩૬) અટ્ઠકથાગતં વિનિચ્છયવિસેસં સમ્પિણ્ડેતિ. વિક્ખિપન્તિ વિક્ખિપિત્વા.

૧૬૦૨. સતિ કિચ્ચે જલં વિગાહિત્વા નિમુજ્જનાદિકં કરોન્તસ્સ અનાપત્તીતિ યોજના. કિચ્ચં નામ નહાનાદિકં.

૧૬૦૩. અનન્તરસ્સાતિ અઙ્ગુલિપતોદકસિક્ખાપદસ્સ. વિસેસોવ વિસેસતા, કોચિ વિસેસો નત્થીતિ અત્થો.

હસધમ્મકથાવણ્ણના.

૧૬૦૪-૫. યો ભિક્ખુ ભિક્ખુના પઞ્ઞત્તેન વુચ્ચમાનો અસ્સ વચનં અકત્તુકામતાય આદરં પન સચે ન કરોતિ, તસ્સ તસ્મિં અનાદરિયે પાચિત્તિયમુદીરયેતિ યોજના, ઇમિના વાક્યેન પુગ્ગલાનાદરમૂલકં પાચિત્તિયં વુત્તં. યથાહ ‘‘અનાદરિયં નામ દ્વે અનાદરિયાનિ પુગ્ગલાનાદરિયઞ્ચ ધમ્માનાદરિયઞ્ચા’’તિ (પાચિ. ૩૪૨), ‘‘પુગ્ગલાનાદરિયં નામ ઉપસમ્પન્નેન પઞ્ઞત્તેન વુચ્ચમાનો ‘અયં ઉક્ખિત્તકો વા વમ્ભિતો વા ગરહિતો વા ઇમસ્સ વચનં અકતં ભવિસ્સતી’તિ અનાદરિયં કરોતિ, આપત્તિ પાચિત્તિયસ્સા’’તિ (પાચિ. ૩૪૨) ચ.

ધમ્મમેવ વા અસિક્ખિતુકામો યો ભિક્ખુ ભિક્ખુના પઞ્ઞત્તેન વુચ્ચમાનો અસ્સ વચનં અકત્તુકામતાય આદરં પન સચે ન કરોતિ, તસ્સ તસ્મિં અનાદરિયે પાચિત્તિયમુદીરયેતિ યોજના, ઇમિના ધમ્માનાદરિયમૂલકં પાચિત્તિયં વુત્તં. યથાહ ‘‘ધમ્માનાદરિયં નામ ઉપસમ્પન્નેન પઞ્ઞત્તેન વુચ્ચમાનો કથાયં નસ્સેય્ય વા વિનસ્સેય્ય વા અન્તરધાયેય્ય વા, તં નસિક્ખિતુકામો અનાદરિયં કરોતિ, આપત્તિ પાચિત્તિયસ્સા’’તિ (પાચિ. ૩૪૨). અનાદરિયેતિ નિમિત્તત્થે ભુમ્મં.

૧૬૦૬. તિકપાચિત્તિયં વુત્તન્તિ ‘‘ઉપસમ્પન્ને ઉપસમ્પન્નસઞ્ઞી, વેમતિકો, અનુપસમ્પન્નસઞ્ઞી અનાદરિયં કરોતિ, આપત્તિ પાચિત્તિયસ્સા’’તિ (પાચિ. ૩૪૩) તિકપાચિત્તિયં વુત્તં. તિકાતીતેનાતિ લોકત્તિકમતિક્કન્તેન. અનુપસમ્પન્નાનાદરે તિકદુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટં.

૧૬૦૭. સુત્તેનેવાભિધમ્મેનાતિ એત્થ એવકારો ‘‘દુક્કટ’’ન્તિ ઇમિના યોજેતબ્બો. ‘‘સુત્તેન અભિધમ્મેના’’તિ પદદ્વયેન અભેદોપચારતો સુત્તાભિધમ્માગતો પરિયત્તિધમ્મો વુત્તો. અપઞ્ઞત્તેનાતિ પઞ્ઞત્તસઙ્ખાતવિનયતો અઞ્ઞત્તા અપઞ્ઞત્તેન. ‘‘અપઞ્ઞત્તેના’’તિ ઇદં ‘‘સુત્તેન અભિધમ્મેના’’તિ પદદ્વયવિસેસનં. ભિક્ખુના વુત્તસ્સ તસ્મિં ભિક્ખુમ્હિ વા ધમ્મે વા અનાદરં કરોતો દુક્કટમેવ. સામણેરેન ઉભયેનપિ પઞ્ઞત્તેન વા અપઞ્ઞત્તેન વા વુત્તસ્સ તસ્મિં સામણેરે વા પઞ્ઞત્તે વા અપઞ્ઞત્તે વા ધમ્મે અનાદરં કરોતો ભિક્ખુસ્સ દુક્કટમેવાતિ યોજના.

૧૬૦૮. દોસોતિ પાચિત્તિયદુક્કટસઙ્ખાતો કોચિ દોસો.

૧૬૦૯. એત્થાતિ ઇમસ્મિં આચરિયાનં ગાહે. ગારય્હો આચરિયુગ્ગહો નેવ ગહેતબ્બોતિ યોજના. ગારય્હો આચરિયુગ્ગહોતિ એત્થ ‘‘યસ્મા ઉચ્છુરસો સત્તાહકાલિકો, તસ્સ કસટો યાવજીવિકો, દ્વિન્નંયેવ સમવાયો ઉચ્છુયટ્ઠિ, તસ્મા વિકાલે ઉચ્છુયટ્ઠિં ખાદિતું વટ્ટતિ ગુળહરીતકે વિયા’’તિ એવમાદિકો સમ્પતિ નિબ્બત્તો ગારય્હાચરિયવાદો. કતરો પન ગહેતબ્બોતિ? પવેણિયા આગતો આચરિયુગ્ગહોવ ગહેતબ્બો.

કુરુન્દિયં પન ‘‘લોકવજ્જે આચરિયુગ્ગહો ન વટ્ટતિ, પણ્ણત્તિવજ્જે પન વટ્ટતી’’તિ (પાચિ. અટ્ઠ. ૩૪૪) વુત્તં. મહાપચ્ચરિયં ‘‘સુત્તં, સુત્તાનુલોમઞ્ચ ઉગ્ગહિતકાનંયેવ આચરિયાનં ઉગ્ગહો પમાણં, અજાનન્તાનં કથા અપ્પમાણ’’ન્તિ (પાચિ. અટ્ઠ. ૩૪૪) વુત્તં. ‘‘તં સબ્બં પવેણિયા આગતે સમોધાનં ગચ્છતી’’તિ (પાચિ. અટ્ઠ. ૩૪૪) અટ્ઠકથાયં વુત્તં. એત્થ લોકવજ્જે આચરિયુગ્ગહો ન વટ્ટતીતિ લોકવજ્જસિક્ખાપદે આપત્તિટ્ઠાને યો આચરિયવાદો, સો ન ગહેતબ્બો, લોકવજ્જમતિક્કમિત્વા ‘‘ઇદં અમ્હાકં આચરિયુગ્ગહો’’તિ વદન્તસ્સ ઉગ્ગહો ન વટ્ટતીતિ અધિપ્પાયો. સુત્તાનુલોમં નામ અટ્ઠકથા. પવેણિયા આગતે સમોધાનં ગચ્છતીતિ ‘‘પવેણિયા આગતો આચરિયુગ્ગહોવ ગહેતબ્બો’’તિ (પાચિ. અટ્ઠ. ૩૪૪) એવં વુત્તે મહાઅટ્ઠકથાવાદેયેવ સઙ્ગહં ગચ્છતીતિ અધિપ્પાયો.

અનાદરિયકથાવણ્ણના.

૧૬૧૦-૧. ‘‘યો પન ભિક્ખુ ભિક્ખું ભિંસાપેય્ય, પાચિત્તિય’’ન્તિ (પાચિ. ૩૪૬) માતિકાવચનતો ભયસઞ્જનનત્થાયાતિ એત્થ ‘‘ભિક્ખુસ્સા’’તિ સેસો. તેનેવ વક્ખતિ ‘‘ઇતરસ્સ તુ ભિક્ખુસ્સા’’તિ. રૂપાદિન્તિ રૂપસદ્દગન્ધાદિં. ઉપસંહરેતિ ઉપટ્ઠપેતિ, દસ્સેતીતિ વુત્તં હોતિ. ભયાનકં કથન્તિ ચોરકન્તારાદિકથં. યથાહ ‘‘ચોરકન્તારં વા વાળકન્તારં વા પિસાચકન્તારં વા આચિક્ખતી’’તિ (પાચિ. ૩૪૮). પરસન્તિકેતિ એત્થ ‘‘પરો’’તિ વુત્તનયેન લબ્ભમાનો ઉપસમ્પન્નો ગહેતબ્બો.

દિસ્વા વાતિ ઉપટ્ઠાપિતં તં રૂપાદિં દિસ્વા વા. સુત્વા વાતિ તં ભયાનકં કથં સુત્વા વા. યસ્સ ભયદસ્સનત્થાય તં ઉપટ્ઠાપેસિ, સો ભાયતુ વા મા વા ભાયતુ. ઇતરસ્સાતિ તદુપટ્ઠાપકસ્સ ભિક્ખુસ્સ. તઙ્ખણેતિ ઉપટ્ઠાપિતક્ખણે.

૧૬૧૨. તિકપાચિત્તિયં વુત્તન્તિ ‘‘ઉપસમ્પન્ને ઉપસમ્પન્નસઞ્ઞી, વેમતિકો, અનુપસમ્પન્નસઞ્ઞી ભિંસાપેતિ, આપત્તિ પાચિત્તિયસ્સા’’તિ (પાચિ. ૩૪૮) તિકપાચિત્તિયં વુત્તં. તિકદુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટં. ‘‘અનુપસમ્પન્નં ભિંસાપેતુકામો’’તિઆદિકે દુક્કટવારે અનુપસમ્પન્નગ્ગહણેન ગિહિનોપિ સઙ્ગય્હમાનત્તા ‘‘સામણેરં ગહટ્ઠં વા’’તિ આહ. સામણેરં…પે… ભિક્ખુનો તથેવ ભિંસાપેન્તસ્સ તિકદુક્કટં વુત્તન્તિ યોજના.

ભિંસાપનકથાવણ્ણના.

૧૬૧૪. જોતિન્તિ અગ્ગિં. તપ્પેતુકામોતિ વિસિબ્બેતુકામો. ‘‘તેન ખો પન સમયેન ભિક્ખૂ પદીપેપિ જોતિકેપિ જન્તાઘરેપિ કુક્કુચ્ચાયન્તી’’તિ (પાચિ. ૩૫૨) ઉપ્પન્નવત્થુમ્હિ ‘‘અનુજાનામિ ભિક્ખવે તથારૂપપચ્ચયા જોતિં સમાદહિતું સમાદહાપેતુ’’ન્તિ (પાચિ. ૩૫૨) વુત્તત્તા એત્થ ‘‘તથારૂપં પચ્ચય’’ન્તિ ઇમિના પદીપુજ્જલનઞ્ચ પત્તપચનસરીરસેદનાદિકમ્મઞ્ચ જન્તાઘરવત્તઞ્ચ ગહેતબ્બં. એત્થ ચ જોતિકેપીતિ પત્તપચનસેદનકમ્માદીસુ જોતિકરણેતિ અત્થો.

૧૬૧૫. સયંસમાદહન્તસ્સાતિ અત્તના જાલેન્તસ્સ.

૧૬૧૬. જાલાપેન્તસ્સ …પે… દુક્કટન્તિ આણત્તિયા આપજ્જિતબ્બં દુક્કટં સન્ધાયાહ. આણત્તિયા જલિતે આપજ્જિતબ્બાપત્તિ ‘‘જાલુટ્ઠાને પનાપત્તિ, પાચિત્તિ પરિકિત્તિતા’’તિ અનુવત્તમાનત્તા સિદ્ધાતિ વિસું ન વુત્તા.

૧૬૧૭. ગિલાનસ્સાતિ ‘‘ગિલાનો નામ યસ્સ વિના અગ્ગિના ન ફાસુ હોતી’’તિ (પાચિ. ૩૫૪) વુત્તસ્સ ગિલાનસ્સ. અવિજ્ઝાતં અલાતં ઉક્ખિપન્તસ્સાતિ ગહણેન ભટ્ઠં અનિબ્બુતાલાતં અગ્ગિનો સમીપં કરોન્તસ્સ, યથાઠાને ઠપેન્તસ્સાતિ વુત્તં હોતિ.

૧૬૧૮-૯. વિજ્ઝાતં અલાતન્તિ નિબ્બુતાલાતં. યથાવત્થુકં પાચિત્તિયન્તિ વુત્તં હોતિ. અઞ્ઞેન વા કતં વિસિબ્બેન્તસ્સ અનાપત્તીતિ યોજના. વિસિબ્બેન્તસ્સાતિ તપ્પેન્તસ્સ. અઙ્ગારન્તિ વીતચ્ચિકં અઙ્ગારં. પદીપુજ્જલનાદિકેતિ આદિ-સદ્દેન ‘‘જોતિકે જન્તાઘરે તથારૂપપચ્ચયા’’તિ (પાચિ. ૩૫૨) આગતં સઙ્ગણ્હાતિ. એત્થ ચ તથારૂપપચ્ચયાતિ ઠપેત્વા પદીપાદીનિ અઞ્ઞેનપિ તથારૂપેન પચ્ચયેન.

જોતિસમાદહનકથાવણ્ણના.

૧૬૨૦-૧. મજ્ઝિમે દેસેતિ જમ્બુદીપે યત્થ બોધિમણ્ડલં હોતિ, તસ્મિં નવયોજનસતાવટ્ટે મજ્ઝિમમણ્ડલે, ઇમિના ઇદં સિક્ખાપદં તત્થેવ દેસોદિસ્સકતાય નિયતન્તિ દસ્સેતિ. તેનેવ વક્ખતિ અનાપત્તિવારે ‘‘પચ્ચન્તિમેપિ વા દેસે’’તિ. ચુણ્ણન્તિ સિરીસચુણ્ણાદિકં ચુણ્ણં. અભિસઙ્ખરતોતિ પટિયાદેન્તસ્સ.

૧૬૨૨-૩. ‘‘માસે ઊનસઞ્ઞિનો’’તિ પદચ્છેદો. અતિરેકદ્ધમાસે ઊનસઞ્ઞિનો વા અતિરેકદ્ધમાસે વિમતિસ્સ વા દુક્કટન્તિ યોજના. અતિરેકદ્ધમાસે ન્હાયન્તસ્સ અનાપત્તીતિ યોજના. સમયેસુ ચ ન્હાયન્તસ્સ અનાપત્તીતિ એત્થ ‘‘ઉણ્હસમયો પરિળાહસમયો ગિલાનસમયો કમ્મસમયો અદ્ધાનગમનસમયો વાતવુટ્ઠિસમયો’’તિ (પાચિ. ૩૬૩) દસ્સિતેસુ છસુ સમયેસુ અઞ્ઞતરે સમ્પત્તે સમયે સતિં પચ્ચુપટ્ઠપેત્વા ઊનમાસેપિ નહાયન્તસ્સ અનાપત્તીતિ અત્થો.

તત્થ જેટ્ઠમાસો ચ આસાળ્હિમાસસ્સ પુરિમપક્ખો ચાતિ દિયડ્ઢમાસો ઉણ્હસમયો નામ. યથાહ ‘‘ઉણ્હસમયો નામ દિયડ્ઢો માસો સેસો ગિમ્હાન’’ન્તિ (પાચિ. ૩૬૪), વસ્સાનસ્સ પઠમો માસો પરિળાહસમયો નામ. યથાહ ‘‘પરિળાહસમયો નામ વસ્સાનસ્સ પઠમો માસો’’તિ (પાચિ. ૩૬૪). ‘‘યસ્સ વિના નહાના ન ફાસુ હોતી’’તિ (પાચિ. ૩૬૪) વુત્તો સમયો ગિલાનસમયો નામ. ‘‘અન્તમસો પરિવેણમ્પિ સમ્મટ્ઠં હોતી’’તિ (પાચિ. ૩૬૪) વુત્તો કમ્મસમયો નામ. ‘‘અદ્ધયોજનં ગચ્છિસ્સામી’તિ નહાયિતબ્બ’’ન્તિ (પાચિ. ૩૬૪) વુત્તો અદ્ધાનગમનસમયો નામ. ‘‘ભિક્ખૂ સરજેન વાતેન ઓકિણ્ણા હોન્તિ, દ્વે વા તીણિ વા ઉદકફુસિતાનિ કાયે પતિતાનિ હોન્તી’’તિ (પાચિ. ૩૬૪) વુત્તો વાતવુટ્ઠિસમયો નામ.

નદીપારં ગચ્છતોપિ ઊનકદ્ધમાસે ન્હાયન્તસ્સ અનાપત્તીતિ યોજના. વાલિકં ઉક્કિરિત્વાનાતિ એત્થ સુક્ખાય નદિયા વાલિકં ઉક્કિરિત્વા. કતાવાટેસુપિ ઊનકદ્ધમાસે ન્હાયન્તસ્સપિ અનાપત્તીતિ. ‘‘તથા’’તિ ઇમિના ‘‘ન્હાયન્તસ્સ અનાપત્તી’’તિ ઇદં પચ્ચામસતિ.

૧૬૨૪. પચ્ચન્તિમેપિ વા દેસેતિ જમ્બુદીપે યથાવુત્તમજ્ઝિમદેસતો બહિ પચ્ચન્તિમેસુ જનપદેસુ, ખુદ્દકેસુ ચ દીપેસુ. સબ્બેસન્તિ લદ્ધસમયાનં, અલદ્ધસમયાનઞ્ચ સબ્બેસં ભિક્ખૂનં. આપદાસૂતિ ભમરઅનુબન્ધાદિઆપદાસુ. યથાહ ‘‘ભમરાદીહિ અનુબદ્ધસ્સ ઉદકે નિમુજ્જિતું વટ્ટતી’’તિ (પાચિ. અટ્ઠ. ૩૬૬). કાયચિત્તસમુટ્ઠાનં એળકલોમસમુટ્ઠાનં નામ.

ન્હાનકથાવણ્ણના.

૧૬૨૫-૭. ‘‘નવં નામ અકતકપ્પં વુચ્ચતી’’તિ (પાચિ. ૩૬૯) પાળિવચનતો ચ ‘‘પટિલદ્ધનવચીવરેનાતિ અત્થો’’તિ (પાચિ. અટ્ઠ. ૩૬૮) અટ્ઠકથાવચનતો ચ ચીવરન્તિ એત્થ ‘‘નવ’’ન્તિ સેસો. કપ્પિયં બિન્દું અદત્વા નવં ચીવરં ભિક્ખુ પરિભુઞ્જતિ, તસ્સેવં પરિભુઞ્જતો પાચિત્તીતિ સમ્બન્ધો. છન્નન્તિ ખોમાદીનં, નિદ્ધારણે સામિવચનં. અઞ્ઞતરં નવં ચીવરન્તિ નિદ્ધારેતબ્બં. યત્થ કત્થચીતિ ‘‘ચતૂસુ વા કોણેસુ તીસુ વા દ્વીસુ વા એકસ્મિં વા કોણે’’તિ (પાચિ. અટ્ઠ. ૩૬૮) અટ્ઠકથાવચનતો ચીવરકોણેસુ યત્થ કત્થચિ.

કંસનીલેનાતિ ચમ્મકારનીલેન. ચમ્મકારનીલં નામ પકતિનીલં. ગણ્ઠિપદે પન ‘‘ચમ્મકારા ઉદકે તિફલં, અયોગૂથઞ્ચ પક્ખિપિત્વા ચમ્મં કાળં કરોન્તિ, તં ચમ્મકારનીલ’’ન્તિ વુત્તં. મહાપચ્ચરિયં પન ‘‘અયોમલં લોહમલં, એતં કંસનીલં નામા’’તિ (પાચિ. અટ્ઠ. ૩૬૮) વુત્તં. પત્તનીલેન વાતિ ‘‘યો કોચિ નીલવણ્ણો પણ્ણરસો’’તિ (પાચિ. અટ્ઠ. ૩૬૮) અટ્ઠકથાય વુત્તેન નીલપણ્ણરસેન. યેન કેનચિ કાળેનાતિ અઙ્ગારજલ્લિકાદીસુ અઞ્ઞતરેન યેન કેનચિ કાળવણ્ણેન. ‘‘કદ્દમો નામ ઓદકો વુચ્ચતી’’તિ (પાચિ. ૩૬૯) વુત્તત્તા કદ્દમેનાતિ ઉદકાનુકદ્દમસુક્ખકદ્દમાદિં સઙ્ગણ્હાતિ.

‘‘મઙ્ગુલસ્સ પિટ્ઠિપ્પમાણકં મયૂરસ્સ અક્ખિપ્પમાણક’’ન્તિ યથાક્કમેન યોજના.

૧૬૨૮. ‘‘પાળિકપ્પો કણ્ણિકાકપ્પો’’તિ યોજના, મુત્તાવલિ વિય પાળિં કત્વા અપ્પિતકપ્પો ચ કણ્ણિકાકારેન અપ્પિતકપ્પો ચાતિ અત્થો. કત્થચીતિ એત્થ ‘‘યથાવુત્તપ્પદેસે’’તિ સેસો. ‘‘ચતૂસુ વા કોણેસુ તીસુ વા’’તિ (પાચિ. અટ્ઠ. ૩૬૮) વુત્તત્તા ‘‘અનેકં વા’’તિ આહ. વટ્ટમેવ વટ્ટકં, ઇમિના અઞ્ઞં વિકારં ન વટ્ટતીતિ દસ્સેતિ. યથાહ ‘‘ઠપેત્વા એકં વટ્ટબિન્દું અઞ્ઞેન કેનચિપિ વિકારેન કપ્પો ન કાતબ્બો’’તિ (પાચિ. ૩૬૮).

૧૬૨૯. ‘‘અનાપત્તિ પકાસિતા’’તિ ઇદં ‘‘વિમતિસ્સચા’’તિ એત્થ ચ-સદ્દેન સમુચ્ચિતં ‘‘આદિન્ને આદિન્નસઞ્ઞિનો’’તિ તતિયવિકપ્પં સન્ધાય વુત્તં. યથાહ ‘‘આદિન્ને આદિન્નસઞ્ઞી, અનાપત્તી’’તિ.

૧૬૩૦. ‘‘કપ્પે નટ્ઠેપિ વા’’તિઆદીહિ ચ યોજેતબ્બં. પિ-સદ્દેન ‘‘કપ્પકતોકાસે જિણ્ણે’’તિ ઇદં સમ્પિણ્ડેતિ. યથાહ ‘‘કપ્પકતોકાસો જિણ્ણો હોતી’’તિ. તેન કપ્પકતેનાતિ સહત્થે કરણવચનં. સંસિબ્બિતેસૂતિ એત્થ ‘‘અકપ્પકતેસૂ’’તિ સેસો. યથાહ ‘‘કપ્પકતેન અકપ્પકતં સંસિબ્બિતં હોતી’’તિ. નિવાસનપારુપનં ક્રિયં. કપ્પબિન્દુઅનાદાનં અક્રિયં.

દુબ્બણ્ણકરણકથાવણ્ણના.

૧૬૩૧-૪. ‘‘વિકપ્પના નામ દ્વે વિકપ્પના સમ્મુખાવિકપ્પના ચ પરમ્મુખાવિકપ્પના ચા’’તિ (પાચિ. ૩૭૪) વુત્તત્તા ‘‘વિકપ્પના દુવે’’તિઆદિમાહ. ઇતીતિ નિદસ્સને, એવન્તિ અત્થો. કથં સમ્મુખાવિકપ્પના હોતીતિ આહ ‘‘સમ્મુખાય…પે… નિદ્દિસે’’તિ. એકસ્સાતિ એત્થ ‘‘બ્યત્તસ્સા’’તિ સેસો. ઇધ બ્યત્તો નામ વિકપ્પનપચ્ચુદ્ધારણવિધિં જાનન્તો.

યથાવચનયોગતોતિ ‘‘ઇમં ચીવર’ન્તિ વા, ‘ઇમાનિ ચીવરાની’તિ વા, ‘એતં ચીવર’ન્તિ વા, ‘એતાનિ ચીવરાની’તિ વા’’તિ (પારા. અટ્ઠ. ૨.૪૬૯) અટ્ઠકથાય વુત્તં અનતિક્કમ્મ, વચનસમ્બન્ધક્કમેનાતિ અત્થો. તદેકદેસસરૂપં દસ્સેતિ ‘‘ઇમં ચીવર’’ન્તિ.

‘‘અપચ્ચુદ્ધટતો’’તિ ઇમિના ‘‘ન કપ્પતી’’તિ એતસ્સ હેતું દસ્સેતિ.

૧૬૩૫. ‘‘સન્તક’’મિચ્ચાદિ પચ્ચુદ્ધરણપ્પકારો. યથાપચ્ચયં કરોહીતિ તુય્હં રુચ્ચનકં કરોહીતિ અત્થો.

૧૬૩૬. સમ્મુખાવિકપ્પન્તરં દસ્સેતુમાહ ‘‘અપરા સમ્મુખા વુત્તા’’તિઆદિ. અત્તના અભિરુચિતસ્સ યસ્સ કસ્સચિ નામં ગહેત્વાતિ યોજના. સહધમ્મિનન્તિ એત્થ ‘‘પઞ્ચન્ન’’ન્તિ સેસો, નિદ્ધારણે સામિવચનં.

૧૬૩૯. એવન્તિ વક્ખમાનાપેક્ખં. અપિ-સદ્દો પન સદ્દસ્સત્થે.

૧૬૪૦. મિત્તોતિ દળ્હમિત્તો, ‘‘તેન વત્તબ્બં ‘કો તે મિત્તો વા સન્દિટ્ઠો વા’’તિ (પાચિ. ૩૭૪) વચનતો ઇદં ઉપલક્ખણં. પુન તેનપિ ભિક્ખુના વત્તબ્બન્તિ યોજના.

૧૬૪૧-૨. ‘‘અહં તિસ્સસ્સ ભિક્ખુનો દમ્મી’તિ વા…પે… ‘તિસ્સાય સામણેરિયા દમ્મી’તિ વા’’તિ (પારા. અટ્ઠ. ૨.૪૬૯) સેસઅટ્ઠકથાપાઠેન ‘‘ઇદ’’મિચ્ચાદિપાઠો યોજેતબ્બો.

૧૬૪૩. દ્વીસૂતિ નિદ્ધારણે ભુમ્મં, એત્થ ‘‘વિકપ્પનાસૂ’’તિ પકરણતો લબ્ભતિ.

૧૬૪૪-૫. ઇધ પન ઇમસ્મિં સાસને યેન પન ભિક્ખુના સહ ચીવરસામિકેન તં વિનયકમ્મં કતં, તસ્સ અવિસ્સાસેન વિસ્સાસભાવં વિના સો વિનયકમ્મકતો ભિક્ખુ તં ચીવરં પરિભુઞ્જેય્ય, તસ્સ ભિક્ખુનો પાચિત્તીતિ યોજના. છન્દાનુરક્ખનત્થં ‘‘વિનયંકમ્મ’’ન્તિ અનુસ્સારાગમો વેદિતબ્બો, વિનયકમ્મન્તિ અત્થો. તં ચીવરં અધિટ્ઠહન્તસ્સ વા વિસ્સજ્જન્તસ્સ વા દુક્કટન્તિ યોજના.

૧૬૪૬. પચ્ચુદ્ધારકવત્થેસૂતિ પચ્ચુદ્ધટવત્થેસુ. અપચ્ચુદ્ધારસઞ્ઞિનોતિ અપચ્ચુદ્ધટસઞ્ઞિનો. તત્થાતિ અપચ્ચુદ્ધટવત્થેસુ. વેમતિકસ્સાતિ ‘‘પચ્ચુદ્ધટાનિ નુ ખો મયા, અપચ્ચુદ્ધટાની’’તિ સંસયાપન્નસ્સ.

૧૬૪૭. પચ્ચુદ્ધારણસઞ્ઞિસ્સાતિ પચ્ચુદ્ધટમિદન્તિ સઞ્ઞિસ્સ. વિસ્સાસાતિ યસ્સ વા ચીવરં વિકપ્પેસિ, તેન અપચ્ચુદ્ધટમ્પિ તસ્સ વિસ્સાસા પરિભુઞ્જતો ચ. યથાહ ‘‘તસ્સ વા વિસ્સસન્તો પરિભુઞ્જતી’’તિ (પાચિ. ૩૭૬).

વિકપ્પનકથાવણ્ણના.

૧૬૪૮-૯. ‘‘પત્તો નામ દ્વે પત્તા અયોપત્તો મત્તિકાપત્તો’’તિ (પાચિ. ૩૭૯) જાતિયા કપ્પિયપત્તાનં વુત્તત્તા આહ ‘‘અધિટ્ઠાનુપગં પત્ત’’ન્તિ. તાદિસન્તિ અધિટ્ઠાનુપગં. સૂચિઘરં નામ સસૂચિકં વા અસૂચિકં વા. કાયબન્ધનં નામ પટ્ટિકા વા સૂકરન્તકં વા. નિસીદનં નામ સદસં વુચ્ચતિ.

‘‘પત્તં વા’’તિઆદીહિ ઉપયોગન્તપદેહિ ‘‘અપનેત્વા નિધેન્તસ્સા’’તિ પચ્ચેકં યોજેતબ્બં. નિધેન્તસ્સાતિ એતસ્સ ‘‘હસાપેક્ખસ્સા’’તિ વિસેસનં. યથાહ ‘‘હસાપેક્ખોપીતિ કીળાધિપ્પાયો’’તિ (પાચિ. ૩૭૯). ‘‘કેવલ’’ન્તિ ઇમિના દુન્નિક્ખિત્તસ્સ પટિસામનાધિપ્પાયાદિઅઞ્ઞાધિપ્પાયાભાવં દીપેતિ. વક્ખતિ ચ ‘‘દુન્નિક્ખિત્તમનાપત્તિ, પટિસામયતો પના’’તિ.

૧૬૫૦. તેનાપીતિ આણત્તેન. તસ્સાતિ આણાપકસ્સ. તિકદુક્કટં વુત્તન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટં વુત્તં, ઇમિના ચ ઉપસમ્પન્નસન્તકે તિકપાચિત્તિયન્તિ ઇદઞ્ચ વુત્તમેવ હોતિ.

૧૬૫૧. અઞ્ઞન્તિ પાળિયં અનાગતં પત્તત્થવિકાદિપરિક્ખારં.

૧૬૫૨. સબ્બેસૂતિ પાળિયં આગતેસુ ચ અનાગતેસુ ચ સબ્બેસુ પરિક્ખારેસુ.

૧૬૫૩. ધમ્મકથં કત્વાતિ ‘‘સમણેન નામ અનિહિતપરિક્ખારેન ભવિતું ન વટ્ટતી’’તિ (પાચિ. અટ્ઠ. ૩૭૭) અટ્ઠકથાગતનયેન ધમ્મકથં કત્વા. અનિહિતપરિક્ખારેનાતિ અપ્પટિસામિતપરિક્ખારેન. નિધેતિ ચે, તથા અનાપત્તીતિ યોજના. અવિહેસેતુકામસ્સાતિ વિહેસાધિપ્પાયરહિતસ્સ. અકીળસ્સાતિ કીળાધિપ્પાયરહિતસ્સ કેવલં વત્તસીસેન ‘‘પટિસામેત્વા દસ્સામી’’તિ અપનિધેન્તસ્સ.

૧૬૫૪. અદિન્નાદાનસમુટ્ઠાનાપત્તીનં અકુસલાદિવસેનપિ સચિત્તકત્તા આહ ‘‘ઇદં અકુસલેનેવ સચિત્ત’’ન્તિ.

ચીવરાપનિધાનકથાવણ્ણના.

સુરાપાનવગ્ગો છટ્ઠો.

૧૬૫૫. ‘‘તિરચ્છાનગતં પાણ’’ન્તિ ઇમિના ‘‘યો પન ભિક્ખુ સઞ્ચિચ્ચ પાણં જીવિતા વોરોપેય્ય, પાચિત્તિય’’ન્તિ (પાચિ. ૩૮૩) ઇમસ્મિં સિક્ખાપદે અધિપ્પેતં પાણં દસ્સેતિ. આપત્તિનાનત્તાભાવા આહ ‘‘મહન્તં ખુદ્દકમ્પિ વા’’તિ. યથાહ ‘‘ઇમસ્મિઞ્ચ સિક્ખાપદે તિરચ્છાનગતોયેવ ‘પાણો’તિ વેદિતબ્બો, તં ખુદ્દકમ્પિ મહન્તમ્પિ મારેન્તસ્સ આપત્તિનાનાકરણં નત્થિ, મહન્તે પન ઉપક્કમમહન્તત્તા અકુસલં મહન્તં હોતી’’તિ (પાચિ. અટ્ઠ. ૩૮૨). ‘‘મારેન્તસ્સ અસ્સા’’તિ પદચ્છેદો. ‘‘ખુદ્દકમ્પિ વા મારેન્તસ્સા’’તિ ઇમિના અટ્ઠકથાયં ‘‘અન્તમસો મઞ્ચપીઠં સોધેન્તો મઙ્ગુલબીજકેપિ પાણસઞ્ઞી નિક્કારુણિકતાય તં ભિન્દન્તો અપનેતિ, પાચિત્તિયં. તસ્મા એવરૂપેસુ ઠાનેસુ કારુઞ્ઞં ઉપટ્ઠપેત્વા અપ્પમત્તેન વત્તં કાતબ્બ’’ન્તિ વુત્તવિનિચ્છયોપિ સઙ્ગહિતો.

૧૬૫૬. ઉભયત્થ ચાતિ પાણે વા અપાણે વાતિ ઉભયત્થાપિ. અવસેસવિનિચ્છયો પનેત્થ મનુસ્સવિગ્ગહે વુત્તનયેનેવ વેદિતબ્બો.

સઞ્ચિચ્ચપાણકથાવણ્ણના.

૧૬૫૮. સપ્પાણકન્તિ સહ પાણકેહીતિ સપ્પાણકં. યે પરિભોગેન મરન્તિ, એવરૂપા ઇધ ‘‘પાણકા’’તિ અધિપ્પેતા. અસ્સાતિ ભિક્ખુનો.

૧૬૫૯. ‘‘અવિચ્છિજ્જા’’તિ ઇમિના વિચ્છેદેનેવ પયોગનાનત્તં હોતીતિ દીપેતિ. પત્તપૂરમ્પીતિ એત્થ પિ-સદ્દો બ્યતિરેકે.

૧૬૬૦-૧. અસ્સ પાચિત્તિ પરિદીપિતાતિ સમ્બન્ધો. તાદિસેનાતિ સપ્પાણકેન. આવિઞ્છિત્વાનાતિ પરિબ્ભમિત્વા. યાગુયોતિ એત્થ ‘‘ઉણ્હા’’તિ સામત્થિયા લબ્ભતિ. ઇદઞ્ચ પાણીનં મારણત્થં યં કિઞ્ચિ ઉણ્હવત્થું સપ્પાણકેન ઉદકેન અનિબ્બાપેતું ઉપલક્ખણં. તં સપ્પાણકં ઉદકં. ન્હાયતોપિ વાતિ એત્થ પિ-સદ્દેન અટ્ઠકથાયં –

‘‘ઉદકસોણ્ડિં વા પોક્ખરણિં વા પવિસિત્વા બહિ નિક્ખમનત્થાય વીચિં ઉટ્ઠાપયતોપિ. સોણ્ડિં વા પોક્ખરણિં વા સોધેન્તેહિ તતો ગહિતઉદકં ઉદકેયેવ આસિઞ્ચિતબ્બં. સમીપમ્હિ ઉદકે અસતિ કપ્પિયઉદકસ્સ અટ્ઠ વા દસ વા ઘટે ઉદકસણ્ઠાનકપ્પદેસે આસિઞ્ચિત્વા તત્થ આસિઞ્ચિતબ્બં. ‘પવટ્ટિત્વા ઉદકે પતિસ્સતી’તિ ઉણ્હપાસાણે ઉદકં નાસિઞ્ચિતબ્બં. કપ્પિયઉદકેન પન પાસાણં નિબ્બાપેત્વા આસિઞ્ચિતું વટ્ટતી’’તિ (પાચિ. અટ્ઠ. ૩૮૭) –

વુત્તવિનિચ્છયં સમ્પિણ્ડેતિ.

૧૬૬૨. ઉભયત્થપીતિ સપ્પાણકેપિ અપ્પાણકેપીતિ ઉભયત્થેવ.

૧૬૬૪-૬. પાણપટિબદ્ધતાય કારણં દસ્સેતુમાહ ‘‘પતન’’ન્તિઆદિ. સલભાદીનન્તિ પટઙ્ગાદીનં. ઞત્વાતિ એત્થ પિ-સદ્દો લુત્તનિદ્દિટ્ઠો. એવમુપરિપિ. પદીપુજ્જલનન્તિ એત્થ ‘‘વિયા’’તિ સેસો. એત્થાતિ ઇમસ્મિં સિક્ખાપદે. સપ્પાણભાવોવ સપ્પાણભાવતા, તં. ભુઞ્જતોતિ ભુઞ્જિતબ્બતો.

સલભાદીનં પતનં ઞત્વાપિ સુદ્ધેન ચેતસા પદીપુજ્જલનં વિય સપાણભાવં ઞત્વાપિ જલસઞ્ઞાય ભુઞ્જિતબ્બતો એત્થ પણ્ણત્તિવજ્જતા ઞેય્યાતિ યોજના.

એવં સન્તે સિઞ્ચનસપ્પાણકસિક્ખાપદાનં ઉભિન્નમ્પિ કો વિસેસોતિ આહ ‘‘સિઞ્ચને’’તિઆદિ. સિઞ્ચનં સિઞ્ચનસિક્ખાપદં સિઞ્ચને વુત્તં સિઞ્ચનવિસયે પઞ્ઞત્તં, ઇદં પન સપ્પાણકસિક્ખાપદં પરિભોગે વુત્તં અજ્ઝોહારવિસયે પઞ્ઞત્તન્તિ અયમેવ તસ્સ ચેવ અસ્સ ચ વિસેસોતિ યોજના.

સપ્પાણકકથાવણ્ણના.

૧૬૬૭. યથાધમ્મન્તિ યો યસ્સ અધિકરણસ્સ વૂપસમનાય ધમ્મો વુત્તો, તેનેવ ધમ્મેનાતિ અત્થો. ‘‘કિચ્ચાધિકરણ’’ન્તિ ઇમિના ઇતરાનિ અધિકરણાનિ ઉપલક્ખિતાનિ. યથાહ ‘‘અધિકરણં નામ ચત્તારિ અધિકરણાનિ વિવાદાધિકરણં અનુવાદાધિકરણં આપત્તાધિકરણં કિચ્ચાધિકરણ’’ન્તિ (પાચિ. ૩૯૪). અપલોકનકમ્માદીનિ ચત્તારિ સઙ્ઘકિચ્ચં નામ, તદેવ સમથેહિ અધિકરણીયત્તા વૂપસમેતબ્બત્તા અધિકરણન્તિ કિચ્ચાધિકરણં. પુન નીહાતબ્બન્તિ પુન નીહરિતબ્બં, વૂપસમેતબ્બન્તિ અત્થો. ઇમિના ‘‘અકતં કમ્મ’’ન્તિઆદિના પાળિયં દસ્સિતા દ્વાદસ ઉક્કોટા ઉપલક્ખિતાતિ દટ્ઠબ્બા. ઉક્કોટેન્તસ્સાતિ તસ્સ તસ્સ ભિક્ખુનો સન્તિકં ગન્ત્વા ‘‘અકતં કમ્મ’’ન્તિઆદીનિ વત્વા ઉચ્ચાલેન્તસ્સ યથાપતિટ્ઠિતભાવેન પતિટ્ઠાતું ન દેન્તસ્સ. એત્થ ચ પતિટ્ઠાતું ન દેન્તસ્સાતિ તસ્સ પવત્તિઆકારદસ્સનત્થં વુત્તં. યં પન ધમ્મેન અધિકરણં નિહટં, તં સુનિહટમેવ.

૧૬૬૮. ‘‘અકતં કમ્મં, દુક્કટં કમ્મં, પુન કાતબ્બં કમ્મ’’ન્તિ વદતા વદન્તેન ભિક્ખુના તં કમ્મં ઉચ્ચાલેતું ન વટ્ટતીતિ યોજના.

૧૬૬૯. વિપ્પકતેતિ આરદ્ધાનિટ્ઠિતે. તન્તિ પટિક્કોસન્તં. સઞ્ઞાપેત્વાતિ કતકમ્મસ્સ અનવજ્જભાવં ઞાપેત્વા. ન પનઞ્ઞથાતિ તથા અસઞ્ઞાપેત્વા.

૧૬૭૦. અધમ્મે પન કમ્મસ્મિન્તિ યથાપાળિઆગતે કમ્મસ્મિં. ઉભયત્થાપીતિ ધમ્મકમ્મે, અધમ્મકમ્મે વાતિ ઉભયત્થ.

૧૬૭૧. ન ચ કમ્મારહસ્સ વાતિ એત્થ ચ-સદ્દો ‘‘વગ્ગેન ચા’’તિ યોજેતબ્બો. ચ-સદ્દો વા-સદ્દત્થે દટ્ઠબ્બો. ‘‘અધમ્મેન, વગ્ગેન વા ન કમ્મારહસ્સ વા કત’’ન્તિ જાનતો ઉક્કોટને દોસો નત્થીતિ યોજના.

ઉક્કોટનકથાવણ્ણના.

૧૬૭૩. ‘‘દુટ્ઠુલ્લા નામ આપત્તિ ચત્તારિ ચ પારાજિકાનિ તેરસ ચ સઙ્ઘાદિસેસા’’તિ (પાચિ. ૩૯૯) વચનતો પારાજિકાનમ્પિ દુટ્ઠુલ્લત્તા, ઇધ ચ પારાજિકસ્સ અનધિપ્પેતત્તા ઇધાધિપ્પેતમેવ દસ્સેતું ‘‘સઙ્ઘાદિસેસ’’ન્તિ ઇમિના દુટ્ઠુલ્લ-પદં વિસેસિતં. યથાહ ‘‘એત્થ ચત્તારિ પારાજિકાનિ અત્થુદ્ધારવસેન દસ્સિતાનિ, સઙ્ઘાદિસેસાપત્તિ પન અધિપ્પેતા’’તિ (પાચિ. અટ્ઠ. ૩૯૯). ઞત્વાતિ સામં વા અઞ્ઞતો વા જાનિત્વા. છાદયતો તસ્સ પરિયાપુતાતિ ‘‘ઇમં જાનિત્વા ચોદેસ્સન્તિ, સારેસ્સન્તિ, નારોચેસ્સામી’’તિ પટિચ્છાદેન્તસ્સ તસ્સ પરિયાપુતા દેસિતા.

૧૬૭૪-૫. ધુરં નિક્ખિપિત્વાતિ ‘‘અઞ્ઞસ્સ ન આરોચેસ્સામી’’તિ ધુરનિક્ખેપં કત્વા. તસ્સાતિ દુટ્ઠુલ્લસ્સ. પટિચ્છાદનં હેતુ કારણં યસ્સ આરોચનસ્સાતિ વિગ્ગહો. પટિચ્છાદનહેતુકન્તિ આરોચનકિરિયાય વિસેસનં, ‘‘ઇત્થન્નામો ઇત્થન્નામં સઙ્ઘાદિસેસં આપન્નો, અઞ્ઞસ્સ ન આરોચેહી’’તિ વત્વા આરોચનં કરોતીતિ વુત્તં હોતિ. ઇતીતિ વુત્તનિદસ્સને, હીતિ એવકારત્થે, એવમેવ વદતીતિ અત્થો.

યાવ કોટિ ન છિજ્જતિ, તાવ એવં ભિક્ખૂનં સતમ્પિ સહસ્સમ્પિ તં આપત્તિં આપજ્જતિ એવાતિ યોજના.

૧૬૭૬. મૂલેનાતિ સઙ્ઘાદિસેસં આપન્નપુગ્ગલેન. આરોચિતસ્સ દુતિયસ્સાતિ સમાનાધિકરણં. મૂલેન ‘‘મમ આપત્તિં આપન્નભાવં અઞ્ઞસ્સ ન આરોચેહી’’તિ આરોચિતસ્સ દુતિયભિક્ખુસ્સ સન્તિકા સુણન્તેન તતિયેન નિવત્તિત્વા તસ્સેવ દુતિયસ્સ પકાસિતે આરોચનસ્સ કોટિ છિન્નાતિ વુચ્ચતીતિ યોજના. કોટીતિ આરોચનકિરિયાવસાનં વુચ્ચતિ.

૧૬૭૭. દુટ્ઠુલ્લાય ચ દુટ્ઠુલ્લસઞ્ઞીતિ એત્થ ‘‘આરોચેન્તો’’તિ પકરણતો લબ્ભતિ. ઇતરેસુ પન દ્વીસૂતિ દુટ્ઠુલ્લાય વેમતિકો, અદુટ્ઠુલ્લસઞ્ઞીતિ દ્વીસુ.

૧૬૭૮. અદુટ્ઠુલ્લાયાતિ પઞ્ચવિધાય લહુકાપત્તિયા. સબ્બત્થાતિ સબ્બેસુ વિકપ્પેસુ. તિકદુક્કટં નિદ્દિટ્ઠન્તિ અદુટ્ઠુલ્લાય દુટ્ઠુલ્લસઞ્ઞિવેમતિકઅદુટ્ઠુલ્લસઞ્ઞીનં વસેન દુક્કટત્તયં પાળિયં (પાચિ. ૪૦૦) દસ્સિતન્તિ અત્થો. સબ્બત્થાતિ સબ્બેસુ. અનુપસમ્પન્નવારેસૂતિ તીસુ અનુપસમ્પન્નવિકપ્પેસુ. દુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટન્તિ અત્થો.

૧૬૭૯-૮૦. ‘‘સઙ્ઘસ્સ ભેદનાદીનિ ભવિસ્સન્તી’’તિઆદીહિ સબ્બેહિ પદેહિ ‘‘ન આરોચેતિ ચે, દોસો નત્થી’’તિ ઇદં પચ્ચેકં યોજેતબ્બં. સભાગં વા ન પસ્સતીતિ તથા અપસ્સન્તો ન આરોચેતિ ચે, દોસો નત્થિ. કક્ખળો અયન્તિ ન આરોચેતિ ચે, દોસો નત્થિ.

૧૬૮૧. અઞ્ઞસ્સ અનારોચનેન આપજ્જિતબ્બતો ‘‘અક્રિય’’ન્તિ વુત્તં. ‘‘આરોચેતબ્બ’’ન્તિ અનુઞ્ઞાતસ્સ અનારોચનં અનાદરમન્તરેન ન હોતીતિ આહ ‘‘દુક્ખવેદન’’ન્તિ. એત્થ ચ માતિકટ્ઠકથાયં ‘‘સમનુભાસનસદિસાનેવા’’તિ (કઙ્ખા. અટ્ઠ. દુટ્ઠલ્લસિક્ખાપદવણ્ણના) વુત્તં, ઇધ ‘‘ધુરનિક્ખેપતુલ્યાવા’’તિ, ઉભયત્થ નામમત્તમેવ વિસેસો, એકમેવ સમુટ્ઠાનન્તિ વેદિતબ્બં.

દુટ્ઠુલ્લકથાવણ્ણના.

૧૬૮૨. ઊનવીસતિવસ્સન્તિ એત્થ ‘‘જાન’’ન્તિ સેસો, ‘‘ઊનવીસતિવસ્સો’’તિ જાનન્તોતિ અત્થો. ઊનવીસતિવસ્સો નામ પટિસન્ધિતો પટ્ઠાય અપરિપુણ્ણવીસતિસંવચ્છરો. યોતિ યો ભિક્ખુ ઉપજ્ઝાયો હુત્વા. કરેય્યાતિ કારાપેય્ય. ઉપસમ્પજ્જતીતિ ઉપસમ્પદો, તં. યો જાનં ઊનવીસતિવસ્સં પુગ્ગલં ઉપસમ્પદં ઉપસમ્પન્નં કરેય્ય, તસ્સ એવં ઉપસમ્પાદેન્તસ્સ ભિક્ખુનો પાચિત્તિયં હોતીતિ યોજના. સેસાનન્તિ ‘‘ગણસ્સ ચ આચરિયસ્સ ચ આપત્તિ દુક્કટસ્સા’’તિ (પાચિ. ૪૦૪) પાળિયં દસ્સિતાનં ગહણં.

૧૬૮૩. ઊનવીસતિવસ્સભાવં જાનતા વા અજાનતા વા ભિક્ખુના યો પુગ્ગલો ચે ઉપસમ્પાદિતો, સો અનુપસમ્પન્નોવ હોતિ, પુન સો પરિપુણ્ણવીસતિવસ્સો સમાનો ઉપસમ્પન્નો કાતબ્બો ઉપસમ્પાદેતબ્બોયેવાતિ યોજના.

૧૬૮૪. દસવસ્સચ્ચયેન પરિપુણ્ણદસવસ્સો હુત્વા ઉપજ્ઝાયસ્સ સતો અસ્સ ભિક્ખુપટિઞ્ઞસ્સ અઞ્ઞેસં ઉપસમ્પાદને કોચિ દોસો ચે એકંસેન નત્થિ ન વિજ્જતીતિ યોજના.

૧૬૮૫. તં ભિક્ખુન્તિ ઊનવીસતિવસ્સો હુત્વા ઉપસમ્પજ્જિત્વા પરિપુણ્ણદસવસ્સો ઉપજ્ઝાયો હુત્વા ઉપસમ્પાદેન્તં તં ભિક્ખુપટિઞ્ઞં. ગણો ચે પરિપૂરતીતિ મજ્ઝિમદેસે દસવગ્ગો, પચ્ચન્તિમેસુ જનપદેસુ પઞ્ચવગ્ગો ગણો સચે અનૂનો હોતિ. તેતિ ઉપસમ્પાદિતા. સૂપસમ્પન્નાતિ સુટ્ઠુ ઉપસમ્પન્ના.

૧૬૮૬-૭. યો ભિક્ખુ ઉપજ્ઝાયો હુત્વા ‘‘ઊનવીસતિવસ્સપુગ્ગલં ઉપસમ્પાદયિસ્સામિ’’ઇતિ ગણમ્પિ વા આચરિયમ્પિ વા પત્તમ્પિ વા પરિયેસતિ, માળકઞ્ચ સમ્મન્નતિ બદ્ધસીમં બન્ધતિ, તસ્સ સબ્બેસુ પયોગેસુ દુક્કટં. તથા ઞત્તિયા દુક્કટં. તથા દ્વીસુ કમ્મવાચાસુપિ દુક્કટન્તિ યોજના.

૧૬૮૮-૯. વીસતિ ચ તાનિ વસ્સાનિ ચાતિ વીસતિવસ્સાનિ, ઊનાનિ વીસતિવસ્સાનિ યસ્સ સો ઊનવીસતિવસ્સો, ઊનવીસતિવસ્સોતિ સઞ્ઞા ઊનવીસતિવસ્સસઞ્ઞા, સા એતસ્સ અત્થીતિ ‘‘ઊનવીસતિવસ્સસઞ્ઞી’’ઇતિ વત્તબ્બે નિપાતનલક્ખણેન વસ્સ-સદ્દલોપં કત્વા ‘‘ઊનવીસતિસઞ્ઞી’’તિ વુત્તં, તસ્સ ઊનવીસતિસઞ્ઞિસ્સ. પરિપુણ્ણાનિ વીસતિવસ્સાનિ એતસ્સાતિ ‘‘પરિપુણ્ણવીસતિવસ્સો’’તિ વત્તબ્બે નિપાતનલક્ખણેન વીસતિવસ્સ-સદ્દલોપં કત્વા ‘‘પરિપુણ્ણો’’તિ પુગ્ગલો વુચ્ચતિ, તસ્મિં પરિપુણ્ણે, પરિપુણ્ણવીસતિવસ્સે પુગ્ગલેતિ અત્થો. ઉભયત્થાતિ ઊનવીસતિપરિપુણ્ણવીસતિવસ્સેસુ ઉભોસુ પુગ્ગલેસુ.

ઊનવીસતિવસ્સકથાવણ્ણના.

૧૬૯૧. થેય્યસત્થેન સદ્ધિન્તિ ‘‘થેય્યસત્થો નામ ચોરા કતકમ્મા વા હોન્તિ અકતકમ્મા વા’’તિઆદિના (પાચિ. ૪૦૯) પદભાજને વુત્તસરૂપેન સત્થસઙ્ખાતેન જનસમૂહેન સહાતિ વુત્તં હોતિ. સહાદિયોગે કરણવચનં. જાનન્તોતિ ‘‘થેય્યસત્થો’’તિ જાનન્તો. સંવિધાયાતિ ‘‘ગચ્છામાવુસો, ગચ્છામ ભન્તે, ગચ્છામાવુસો, અજ્જ વા હિય્યો વા પરે વા અપરે વા ગચ્છામા’’તિ પદભાજને વુત્તનયેન સંવિદહિત્વાતિ અત્થો. મગ્ગન્તિ એકદ્ધાનમગ્ગં, એત્થ ‘‘અન્તમસો ગામન્તરમ્પી’’તિ સેસો. યથાહ ‘‘એકદ્ધાનમગ્ગં પટિપજ્જેય્ય અન્તમસો ગામન્તરમ્પી’’તિ. પાચિત્તિયં સિયાતિ ‘‘ગામે ગામન્તરે ગામન્તરે આપત્તિ પાચિત્તિયસ્સ. અગામકે અરઞ્ઞે અદ્ધયોજને અદ્ધયોજને આપત્તિ પાચિત્તિયસ્સા’’તિ વુત્તપ્પકારં પાચિત્તિયં ભવેય્ય.

૧૬૯૨. ન ઉદ્ધટોતિ ઇધ ન વુત્તો.

૧૬૯૩-૪. મગ્ગાટવિવિસઙ્કેતેતિ મગ્ગવિસઙ્કેતે, અટવિવિસઙ્કેતે ચ. યથાવત્થુકમેવાતિ પાચિત્તિયમેવ. તેસૂતિ સત્થિકેસુ. અસંવિદહન્તેસૂતિ સંવિધાનં અકરોન્તેસુ. સયં વિદહતોપિ ચાતિ અત્તના સંવિદહન્તસ્સ ચ. ઉભયત્થાતિ થેય્યસત્થે વા અથેય્યસત્થે વાતિ દ્વીસુ.

૧૬૯૫. અથેય્યસત્થસઞ્ઞિસ્સાતિ એત્થ ‘‘ઉભયત્થા’’તિ અનુવત્તેતબ્બં. કાલસ્સાયન્તિ કાલિકો, વિસઙ્કેતો, તસ્મિં, કાલસમ્બન્ધિનિ વિસઙ્કેતે ચ અનાપત્તીતિ અત્થો. ‘‘કાલિકે’’તિ ઇમિના વિસઙ્કેતવિસેસનેન મગ્ગાટવિવિસઙ્કેતેપિ આપત્તિયેવાતિ દીપેતિ.

૧૬૯૬. કાયચિત્તતો, કાયવાચાચિત્તતો ચ સમુટ્ઠાનતો ઇદં સિક્ખાપદં થેય્યસત્થસમુટ્ઠાનં કથિતન્તિ યોજના.

થેય્યસત્થકથાવણ્ણના.

૧૬૯૭. સત્તમન્તિ ‘‘યો પન ભિક્ખુ માતુગામેન સદ્ધિં સંવિધાયા’’તિઆદિના (પાચિ. ૪૧૩) ઉદ્દિટ્ઠં સત્તમસિક્ખાપદં. ભિક્ખુનિયા સદ્ધિં સંવિધાનેનાતિ ભિક્ખુનિયા સદ્ધિં સંવિધાનસિક્ખાપદેન. સમુટ્ઠાનાદિનાતિ સમુટ્ઠાનાદિના વિનિચ્છયેન. તુલ્યન્તિ સદિસં. કોચિપીતિ અપ્પમત્તકોપિ.

સંવિધાનકથાવણ્ણના.

૧૬૯૮. એતે પઞ્ચ ધમ્મા અન્તરાયકરાતિ પકાસિતાતિ યોજના. ઇધ અયં અન્તરાયકર-સદ્દો પાળિયં આગતેન અન્તરાયિક-સદ્દેન સમાનત્થો. તસ્મા કમ્મન્તરાયિકા, કિલેસન્તરાયિકા, વિપાકન્તરાયિકા, ઉપવાદન્તરાયિકા, આણાવીતિક્કમન્તરાયિકાતિ ઇમે પઞ્ચ અન્તરાયિકા ધમ્મા ભગવતા પકાસિતાતિ વુત્તં હોતિ.

તત્થ તંતંસમ્પત્તિયા વિબન્ધનવસેન સત્તસન્તાનસ્સ અન્તરે વેમજ્ઝે એતિ આગચ્છતીતિ અન્તરાયો, દિટ્ઠધમ્મિકાદિઅનત્થો, અનતિક્કમનટ્ઠેન તસ્મિં અન્તરાયે નિયુત્તા, અન્તરાયં વા ફલં અરહન્તિ, અન્તરાયસ્સ વા કરણસીલાતિ અન્તરાયિકા (સારત્થ. ટી. પાચિત્તિય ૩.૪૧૭; કઙ્ખા. અભિ. ટી. અરિટ્ઠસિક્ખાપદવણ્ણના).

પઞ્ચાનન્તરિયકમ્માનેવ કમ્મન્તરાયિકા, તથા ભિક્ખુનિદૂસકકમ્મં. તં પન મોક્ખસ્સેવ અન્તરાયં કરોતિ, ન સગ્ગસ્સ. ઇદઞ્ચ મિચ્છાચારલક્ખણસ્સ અભાવતો વુત્તં. ન હિ ભિક્ખુનિયા ધમ્મરક્ખિતભાવો અત્થિ. પાકતિકભિક્ખુનિવસેન ચેતં વુત્તં. અરિયાય પન પવત્તં અપાયસંવત્તનિકમેવ. નન્દમાણવકો (મ. નિ. અટ્ઠ. ૩.૭; ધ. પ. અટ્ઠ. ૧.૬૮ ઉપ્પલવણ્ણત્થેરીવત્થુ; અ. નિ. અટ્ઠ. ૨.૩.૩૪) ચેત્થ નિદસ્સનં. ઉભિન્નં સમાનચ્છન્દતાવસેન વા ન સગ્ગન્તરાયિકતા, મોક્ખન્તરાયિકતા પન મોક્ખત્થાય પટિપત્તિયા વિદૂસનતો. અભિભવિત્વા પન પવત્તિયા સગ્ગન્તરાયિકતાપિ ન સક્કા નિવારેતુન્તિ વદન્તિ.

અહેતુકદિટ્ઠિઅકિરિયદિટ્ઠિનત્થિકદિટ્ઠિસઙ્ખાતા મિચ્છાદિટ્ઠિધમ્મા નિયતભાવપ્પત્તા કિલેસન્તરાયિકા નામ. પણ્ડકતિરચ્છાનગતઉભતોબ્યઞ્જનકાનં પટિસન્ધિચિત્તુપ્પાદધમ્મા વિપાકન્તરાયિકા નામ. પણ્ડકાદિગ્ગહણઞ્ચેત્થ નિદસ્સનમત્તં સબ્બાયપિ અહેતુકપટિસન્ધિયા વિપાકન્તરાયિકભાવતો. અરિયૂપવાદા ઉપવાદન્તરાયિકા નામ. તે પન યાવ અરિયે ન ખમાપેન્તિ, તાવદેવ, ન તતો પરં. સઞ્ચિચ્ચ આપન્ના સત્તાપત્તિક્ખન્ધા આણાવીતિક્કમન્તરાયિકા નામ. તેપિ યાવ ભિક્ખુભાવં વા પટિજાનાતિ, ન વુટ્ઠાતિ વા ન દેસેતિ વા, તાવદેવ, ન તતો પરં.

૧૬૯૯-૭૦૦.

‘‘અનન્તરાયિકા એતે;

યથા હોન્તિ તથા અહં;

દેસિતં મુનિના ધમ્મં;

આજાનામીતિ યો વદે’’તિ. –

એવં દુતિયગાથા વત્તબ્બા. તથા અવુત્તે ‘‘તિક્ખત્તુ’’ન્તિઆદિગાથા પઠમગાથાય સદ્ધિં ઘટના એવ ન સિયા. તસ્મા એત્થાયં ગાથા પરિહીનાતિ વિઞ્ઞાયતિ.

એતેતિ ‘‘અન્તરાયિકા’’તિ ભગવતા પકાસિતા પઞ્ચ ધમ્મા ‘‘યથા અનન્તરાયિકા હોન્તિ, તથા અહં મુનિના દેસિતં ધમ્મં આજાનામી’’તિ યો ભિક્ખુ વદેય્ય, સો પન ભિક્ખુ તિક્ખત્તું વત્તબ્બોતિ સમ્બન્ધો. કેહિ કથં વત્તબ્બોતિ આહ ‘‘યે પસ્સન્તી’’તિઆદિ. યે તથાવાદિતં ભિક્ખું પસ્સન્તિ, ‘‘અસુકો આયસ્મા એવંવાદી’’તિ પરતો સુણન્તિ ચ, તેહિ. સો પન ભિક્ખુ ‘‘મા આયસ્મા એવં અવચા’’તિ તિક્ખત્તું વત્તબ્બોતિ યોજના.

૧૭૦૧. અવદન્તસ્સાતિ તં દિસ્વા વા સુત્વા વા યથાવુત્તનયેન અવદન્તસ્સ. દુક્કટન્તિ ઞાતદુક્કટં. તં દુલદ્ધિં. અનિસ્સજતોતિ ભિક્ખૂહિ એવં વુત્તેપિ અનિસ્સજન્તસ્સ. તથા દુક્કટન્તિ અતિદિસતિ.

૧૭૦૨. કમ્મવાચાયાતિ તતિયાય કમ્મવાચાય. ઓસાનેતિ પરિયોસાને, ય્યકારે પત્તેતિ અધિપ્પાયો. તિકપાચિત્તિયં વુત્તન્તિ ‘‘ધમ્મકમ્મે ધમ્મકમ્મસઞ્ઞી ન પટિનિસ્સજ્જતિ, આપત્તિ પાચિત્તિયસ્સ. ધમ્મકમ્મે વેમતિકો ન પટિનિસ્સજ્જતિ, આપત્તિ પાચિત્તિયસ્સ. ધમ્મકમ્મે અધમ્મકમ્મસઞ્ઞી ન પટિનિસ્સજ્જતિ, આપત્તિ પાચિત્તિયસ્સા’’તિ (પાચિ. ૪૨૧) તિકપાચિત્તિયં વુત્તં. અધમ્મે તિકદુક્કટં વુત્તન્તિ અધમ્મકમ્મે ધમ્મકમ્મસઞ્ઞિવેમતિકઅધમ્મકમ્મસઞ્ઞીનં વસેન તિકદુક્કટં વુત્તં.

૧૭૦૩. ‘‘અનાપત્તિ અકતકમ્મસ્સા’’તિ પદચ્છેદો. કમ્મં નામ સમનુભાસનકમ્મં. યથાહ ‘‘અનાપત્તિ અસમનુભાસન્તસ્સા’’તિ (પાચિ. ૪૨૨).

અરિટ્ઠકથાવણ્ણના.

૧૭૦૪. ઞત્વાતિ અનોસારિતભાવં સયમેવ વા પરતો વા તસ્સ વા સન્તિકા ઞત્વા. અકતાનુધમ્મેનાતિ અકતો ઓસારણસઙ્ખાતો અનુધમ્મો યસ્સ સો અકતાનુધમ્મો, તેન, સહયોગે કરણવચનં. તથાવાદિકભિક્ખુનાતિ ‘‘તથાહં ભગવતા ધમ્મં દેસિતં આજાનામી’’તિઆદિં વદન્તેન ભિક્ખુના. ‘‘અકતાનુધમ્મેના’’તિ ઇમિના સમાનાધિકરણં. સંવસેય્યાતિ ઉપોસથાદિકં સઙ્ઘકમ્મં કરેય્ય. ભુઞ્જેય્ય ચાતિ આમિસસમ્ભોગં વા ધમ્મસમ્ભોગં વા કરેય્ય. સહ સેય્ય વાતિ નાનૂપચારેપિ એકચ્છન્ને નિપજ્જેય્ય.

૧૭૦૫. ઇદાનિ યથાવુત્તપાચિત્તિયસ્સ ખેત્તનિયમં દસ્સેતુમાહ ‘‘ઉપોસથાદિકં કમ્મ’’ન્તિઆદિ. આદિ-સદ્દેન પવારણં ગહિતં. યથાહ ‘‘ઉપોસથં વા પવારણં વા’’તિ (પાચિ. ૪૨૫). તેન સહાતિ ઉક્ખિત્તકેન સહ. ‘‘કમ્મસ્સ પરિયોસાને’’તિ ઇદં સંવાસેન આપત્તિખેત્તનિદસ્સનં.

૧૭૦૬. એકેનેવ પયોગેન બહું યામકાલિકાદિઆમિસં ગણ્હતો એકં પાચિત્તિયં. તથા એકેનેવ પયોગેન બહું આમિસં દદતોપિ એકં પાચિત્તિયં. બહૂસુ પયોગેસુ બહૂનિ પાચિત્તિયાનીતિ યોજના. ઇમિના ચ આમિસસમ્ભોગેન તુલ્યફલં ધમ્મસમ્ભોગમ્પિ સહચરિયેન આહાતિ વેદિતબ્બં. તત્થ પન પદાદીહિ ઉદ્દિસન્તસ્સ વા ઉદ્દિસાપેન્તસ્સ વા પદસોધમ્મે વુત્તનયેન આપત્તિ વેદિતબ્બા.

૧૭૦૭. ઇતરોતિ પકતત્તો. ઇતરસ્મિન્તિ ઉક્ખિત્તકે. પરોતિ પકતત્તો. ઉભોપિ વાતિ પકતત્તઉક્ખિત્તા દ્વેપિ વા. ‘‘એકત્થ એકતો નિપજ્જન્તી’’તિ સેસો. ઇમેસુ તીસુપિ ઠાનેસુ ‘‘પાચિત્તી’’તિ પકરણતો લબ્ભતિ.

૧૭૦૮. ઉટ્ઠહિત્વા પુનપ્પુનં નિપજ્જન્તસ્સ નિપજ્જનપયોગાનં વસેન આપત્તિયો સિયુન્તિ અજ્ઝાહારયોજના કાતબ્બા. ‘‘ઉક્ખિત્તકે નિપન્નસ્મિ’’ન્તિઆદિના વુત્તાપત્તિવિનિચ્છયો કત્થ હોતીતિ આહ ‘‘એકનાનૂપચારેસુ, એકચ્છન્ને વિનિચ્છયો’’તિ. નાનૂપચારેસૂતિ એત્થ પિ-સદ્દો ચ ‘‘વિનિચ્છયો’’તિ એત્થ અયન્તિ ચ યોજેતબ્બો. એકો ઉપચારો અસ્સાતિ એકૂપચારં, નાના ઉપચારો અસ્સાતિ નાનૂપચારં, એકૂપચારઞ્ચ નાનૂપચારઞ્ચ એકનાનૂપચારાનિ એકદેસસરૂપેકસેસેન, તેસુ. એકતો છન્નાનિ એકચ્છન્નાનિ, તેસુ એકચ્છન્નેસૂતિ વત્તબ્બે વણ્ણલોપેન વા વચનવિપલ્લાસેન વા ‘‘એકચ્છન્ને’’તિ વુત્તં. એકનાનૂપચારેસુપિ સેનાસનેસુ એકચ્છન્નેસુ અયં યથાવુત્તઆપત્તિવિનિચ્છયો દટ્ઠબ્બોતિ અત્થો.

૧૭૦૯. ઉભયત્થાપીતિ ઉક્ખિત્તાનુક્ખિત્તેસુ દ્વીસુપિ.

૧૭૧૦. ‘‘સઞ્ઞિસ્સ ઓસારિતોતિ ચા’’તિ પદચ્છેદો.

ઉક્ખિત્તકથાવણ્ણના.

૧૭૧૨. તથા વિનાસિતન્તિ ‘‘અજ્જતગ્ગે તે આવુસો સમણુદ્દેસ ન ચેવ સો ભગવા સત્થા અપદિસિતબ્બો, યમ્પિ ચઞ્ઞે સમણુદ્દેસા લભન્તિ ભિક્ખૂહિ સદ્ધિં દિરત્તતિરત્તં સહસેય્યં, સાપિ તે નત્થિ, ચર પિરે વિનસ્સા’’તિ (પાચિ. ૪૨૯) વુત્તનયેન નાસિતં. ‘‘તથા નાસિતં સમણુદ્દેસ’’ન્તિ (પાચિ. ૪૨૮) વચનતો ‘‘સમણુદ્દેસ’’ન્તિ સેસો. જાનન્તિ વુત્તનયેન ‘‘નાસિતો અય’’ન્તિ જાનન્તો. ઉપલાપેય્યાતિ ‘‘ઉપલાપેય્ય વાતિ તસ્સ પત્તં વા ચીવરં વા ઉદ્દેસં વા પરિપુચ્છં વા દસ્સામી’’તિ (પાચિ. ૪૩૦) પદભાજને આગતનયેન સઙ્ગણ્હેય્ય. તેનાતિ નાસિતેન. ઉપટ્ઠાપેય્ય વાતિ તેન દિય્યમાનાનિ ચુણ્ણમત્તિકાદીનિ સાદિયન્તો તેન અત્તનો ઉપટ્ઠાનં કારાપેય્ય વા. ‘‘તેના’’તિ ઇદં સહત્થે કરણવસેન ‘‘સમ્ભુઞ્જેય્યા’’તિઆદીહિ ચ યોજેતબ્બં. વાતિ એત્થ ગાથાબન્ધવસેન રસ્સો. સમ્ભોગસહસેય્યા અનન્તરસિક્ખાપદે વુત્તનયા એવ. તસ્મા આપત્તિપરિચ્છેદોપેત્થ તસ્મિં વુત્તનયેનેવ વેદિતબ્બો.

૧૭૧૩. અત્થુદ્ધારવસેન અટ્ઠકથાયં (પાચિ. અટ્ઠ. ૪૨૮) વુત્તા તિસ્સો નાસના દસ્સેતુમાહ ‘‘સંવાસેન…પે… તિસ્સો’’તિ. તત્થ તીસુ કતમા અધિપ્પેતાતિ આહ ‘‘એત્થા’’તિઆદિ. દણ્ડકમ્મેન નાસના એત્થ અધિપ્પેતાતિ યોજના. એતાસં વિભાગો ચ ‘‘તત્થ આપત્તિયા અદસ્સનાદીસુ ઉક્ખેપના સંવાસનાસના નામ. ‘દૂસકો નાસેતબ્બો, મેત્તિયં ભિક્ખુનિં નાસેથા’તિ અયં લિઙ્ગનાસના નામ. ‘અજ્જતગ્ગે તે આવુસો સમણુદ્દેસ ન ચેવ સો ભગવા સત્થા અપદિસિતબ્બો’તિ અયં દણ્ડકમ્મનાસના નામા’’તિ (પાચિ. અટ્ઠ. ૪૨૮) અટ્ઠકથાય વુત્તો.

૧૭૧૫. ‘‘વુત્તા સમનુભાસને’’તિ (વિ. વિ. ૧૭૦૩) તત્થ વુત્તત્તા આહ ‘‘અરિટ્ઠેન સમા મતા’’તિ.

કણ્ટકકથાવણ્ણના.

સપ્પાણકવગ્ગો સત્તમો.

૧૭૧૬-૭. યો ભિક્ખુ સિક્ખાપદં વીતિક્કમન્તો તં વીતિક્કમં યે પસ્સન્તિ, સુણન્તિ ચ, તેહિ ભિક્ખૂહિ સિક્ખાપદેન વુચ્ચમાનો ‘‘માવુસો એવં અકાસિ, ન કપ્પતિ એતં ભિક્ખુસ્સા’’તિ સિક્ખાપદે વુત્તનયેન વુચ્ચમાનો ‘‘એતસ્મિં સિક્ખાપદે યેન મં તુમ્હે વદેથ, એતસ્મિં સિક્ખાપદત્થે યાવ અઞ્ઞં વિયત્તં બહુસ્સુતં પકતઞ્ઞું વિનયધરં ન પુચ્છામિ, તાવ અહં ન સિક્ખિસ્સામી’’તિ ભણતિ, તસ્સ એવં ભણન્તસ્સ પાચિત્તિયં સિયાતિ સાધિપ્પાયયોજના.

૧૭૧૮-૯. અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન અનુપસમ્પન્ને સત્થુના તિકદુક્કટં દીપિતન્તિ યોજના, ઇમિના ચ ઉપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન ઉપસમ્પન્ને તિકપાચિત્તિયં દીપિતં હોતિ. અપઞ્ઞત્તેન ઓવદનપ્પકારં દસ્સેતુમાહ ‘‘ન સલ્લેખાયિદં હોતી’’તિ. ઉભોહિપિ ઉપસમ્પન્નાનુપસમ્પન્નેહિ. ‘‘ઇદં સલ્લેખાય ન હોતી’’તિ અપઞ્ઞત્તેન વુચ્ચમાનસ્સ ‘‘ન તાવાહ’’ન્તિઆદીનિ વદતો તસ્સ ભિક્ખુનો દુક્કટં હોતીતિ યોજના. ‘‘ન દોસો ઉમ્મત્તકાદીન’’ન્તિ પદચ્છેદો.

સહધમ્મિકકથાવણ્ણના.

૧૭૨૦. ‘‘યો પન ભિક્ખુ પાતિમોક્ખે ઉદ્દિસ્સમાને એવં વદેય્યા’’તિઆદિસિક્ખાપદપાઠતો (પાચિ. ૪૩૯) ઉદ્દિટ્ઠેહીતિ એત્થ ‘‘ખુદ્દાનુખુદ્દકેહિ સિક્ખાપદેહી’’તિ સેસો. પારાજિકં ઠપેત્વા અવસેસા ઉપાદાયુપાદાય ખુદ્દાનુખુદ્દકાતિ નિદ્દિટ્ઠા. એત્થ કિન્તિ પટિક્ખેપે, એતેહિ કિં, પયોજનં નત્થીતિ વુત્તં હોતિ. એતેહીતિ સમીપત્થે વચનસામઞ્ઞેન ‘‘ઇમેહી’’તિ એતસ્સ પરિયાયો. ‘‘કિં પનિમેહી’’તિ (પાચિ. ૪૩૯) સિક્ખાપદપાઠે પટિક્ખેપસ્સ કારણં દસ્સેતિ ‘‘કુક્કુચ્ચાદિનિદાનતો’’તિ. એત્થ આદિ-સદ્દેન વિહેસાવિલેખા ગહિતા. એત્થ કુક્કુચ્ચં નામ ‘‘કપ્પતિ નુ ખો, ન કપ્પતિ નુ ખો’’તિ કુક્કુચ્ચકરણં. વિહેસા નામ વિપ્પટિસારો. વિલેખા નામ વિચિકિચ્છાસઙ્ખાતા મનોવિલેખતા મનોવિલેખા, ઇમેહિ સકલેહિ પદેહિ સિક્ખાપદવિવણ્ણકપ્પકારો દસ્સિતો. ‘‘ઇતિ સિક્ખાપદવિવણ્ણને’’તિ ઇતિ-સદ્દો અજ્ઝાહરિત્વા યોજેતબ્બો. વિવણ્ણનેતિ નિમિત્તત્થે ભુમ્મં.

કુક્કુચ્ચાદિનિદાનતો એતેહિ ખુદ્દાનુખુદ્દકેહિ સિક્ખાપદેહિ ઉદ્દિટ્ઠેહિ કિં ઇતિ સિક્ખાપદવિવણ્ણને પાચિત્તિયાપત્તિ હોતીતિ યોજના.

૧૭૨૧. તિકપાચિત્તિયં વુત્તન્તિ ‘‘ઉપસમ્પન્ને ઉપસમ્પન્નસઞ્ઞી વિનયં વિવણ્ણેતિ, આપત્તિ પાચિત્તિયસ્સ. ઉપસમ્પન્ને વેમતિકો…પે… અનુપસમ્પન્નસઞ્ઞી…પે… પાચિત્તિયસ્સા’’તિ (પાચિ. ૪૪૧) તીણિ પાચિત્તિયાનિ વુત્તાનિ. તં વિનયં સચે પન અનુપસમ્પન્નસ્સ સન્તિકે વિવણ્ણેતિ, તિકદુક્કટન્તિ યોજના.

૧૭૨૨-૪. ઉભિન્નમ્પીતિ ઉપસમ્પન્નાનં, અનુપસમ્પન્નાનં ઉભિન્નમ્પિ, ‘‘સન્તિકે’’તિ સેસો. અઞ્ઞધમ્મવિવણ્ણનેતિ વિનયતો અઞ્ઞેસં સુત્તાભિધમ્માનં વિવણ્ણને.

અનાપત્તિવિસયં દસ્સેતુમાહ ‘‘નવિવણ્ણેતુકામસ્સા’’તિઆદિ. નવિવણ્ણેતુકામસ્સ ‘‘હન્દ સુત્તન્તં પરિયાપુણ, પચ્છાપિ વિનયં પરિયાપુણિસ્સસિ’’ ઇતિ એવં વદન્તસ્સ અનાપત્તીતિ યોજના. સદિસા એવ સાદિસા.

વિલેખનકથાવણ્ણના.

૧૭૨૫. મોહનકથાયં તાવ –

‘‘અન્વડ્ઢમાસં યો ભિક્ખુ;

પાતિમોક્ખે અસેસતો;

ઉદ્દિસ્સમાને અઞ્ઞાણ-

તાય પુચ્છતિ અત્તનો’’તિ. –

પઠમગાથાય ભવિતબ્બં. એવઞ્હિ સતિ ‘‘અઞ્ઞાણેના’’તિઆદિગાથા પરિપુણ્ણસમ્બન્ધા સિયાતિ વિઞ્ઞાયતિ.

અઞ્ઞાણેનાતિ એત્થ વા ‘‘આપન્નત્તા’’તિ સેસો. આપત્તિમોક્ખોતિ આપત્તિયા મોક્ખો. અઞ્ઞાણેન આપન્નત્તા આપત્તિમોક્ખો નેવ વિજ્જતીતિ યોજના. કિં કાતબ્બન્તિ આહ ‘‘કારેતબ્બો’’તિઆદિ. યથા ધમ્મો ઠિતો, તથા ભિક્ખુ કારેતબ્બોતિ સમ્બન્ધો. ધમ્મ-સદ્દો પાળિવાચકો, પાળિયં યથા વુત્તં, તથા કારેતબ્બોતિ અત્થો, દેસનાગામિની આપત્તિ ચે, દેસાપેતબ્બો, વુટ્ઠાનગામિની ચે, વુટ્ઠાપેતબ્બોતિ વુત્તં હોતિ. યથાહ ‘‘યથાધમ્મો કારેતબ્બો’’તિ (પાચિ. ૪૪૪). અઞ્ઞાણેન આપન્નત્તા તસ્સ આપત્તિયા મોક્ખો નત્થિ. યથા પન ધમ્મો ચ વિનયો ચ ઠિતો, તથા ભિક્ખુ કારેતબ્બો, દેસનાગામિનિં ચે આપન્નો હોતિ, દેસાપેતબ્બો, વુટ્ઠાનગામિનિં ચે, વુટ્ઠાપેતબ્બોતિ અત્થો.

૧૭૨૬. ઉત્તરિન્તિ યથાધમ્મકરણતો ઉત્તરિં. દુતિયેનેવાતિ ઞત્તિદુતિયેનેવ. નિન્દિત્વાતિ ‘‘તસ્સ તે આવુસો અલાભા’’તિઆદિના ગરહિત્વા.

૧૭૨૭. એવં આરોપિતે મોહેતિ યથાધમ્મકરણતો ઉપરિ યથાવુત્તનયેન તં પુગ્ગલં ગરહિત્વા ઞત્તિદુતિયાય કમ્મવાચાય તસ્સ એવં મોહે આરોપિતે. પુન યદિ મોહેતીતિ યોજના. તસ્મિં મોહનકે પુગ્ગલે પાચિત્તિ વુત્તાતિ યોજના.

૧૭૨૮. દીપિતં તિકદુક્કટન્તિ ‘‘અધમ્મકમ્મે ધમ્મકમ્મસઞ્ઞી મોહેતિ, વેમતિકો, અધમ્મકમ્મસઞ્ઞી મોહેતિ, આપત્તિ દુક્કટસ્સા’’તિ (પાચિ. ૪૪૭) તિકદુક્કટં દસ્સિતં. એતસ્સ વિપરિયાયતો તિકપાચિત્તિયં વેદિતબ્બં. યથાહ ‘‘ધમ્મકમ્મે ધમ્મકમ્મસઞ્ઞી મોહેતિ, વેમતિકો, અધમ્મકમ્મસઞ્ઞી મોહેતિ, આપત્તિ પાચિત્તિયસ્સા’’તિ (પાચિ. ૪૪૭). એત્થ કમ્મન્તિ મોહારોપનકમ્મં અધિપ્પેતં. યથાહ ‘‘ધમ્મકમ્મેતિઆદીસુ મોહારોપનકમ્મં અધિપ્પેત’’ન્તિ (પાચિ. અટ્ઠ. ૪૪૭).

૧૭૨૯-૩૦. ‘‘ન ચ મોહેતુકામસ્સા’’તિઆદીહિ ‘‘અનાપત્તીતિ વિઞ્ઞેય્ય’’ન્તિ ઇદં પચ્ચેકં યોજેતબ્બં. ‘‘વિત્થારેન અસુતસ્સા’’તિ પદચ્છેદો. એત્થ ‘‘પાતિમોક્ખ’’ન્તિ કમ્મપદં અપેક્ખિતબ્બં. વિત્થારેન ઊનકદ્વત્તિક્ખત્તું સુતસ્સ ચાતિ યોજના. તથાતિ ઇમિના ‘‘અનાપત્તીતિ વિઞ્ઞેય્ય’’ન્તિ ઇદં પચ્ચામસતિ.

મોહનકથાવણ્ણના.

૧૭૩૧-૨. કુદ્ધોતિ કુપિતો. પહારં દેતીતિ કાયેન વા કાયપટિબદ્ધેન વા નિસ્સગ્ગિયેન વા અન્તમસો ઉપ્પલપત્તેનાપિ પહારં દેતિ. યથાહ ‘‘પહારં દદેય્યાતિ કાયેન વા કાયપટિબદ્ધેન વા નિસ્સગ્ગિયેન વા અન્તમસો ઉપ્પલપત્તેનાપિ પહારં દેતી’’તિ (પાચિ. ૪૫૧). એત્થ ‘‘અઞ્ઞસ્સ ભિક્ખુસ્સા’’તિ સેસો. તસ્સાતિ અપેક્ખિત્વા ‘‘યો’’તિ લબ્ભતિ.

અટ્ઠકથાગતં વિનિચ્છયં દસ્સેતુમાહ ‘‘સમ્પહરિતુકામેના’’તિઆદિ, ઇમિના મરણાધિપ્પાયેન પહટે પારાજિકન્તિ વુત્તં હોતિ.

૧૭૩૩. ‘‘ઇતિ એવં કતે અયં સઙ્ઘમજ્ઝેન વિરોચતી’’તિ વિરૂપકરણાપેક્ખો વિરૂપકરણે અપેક્ખવા તસ્સ ચ અપેક્ખિતસ્સ ભિક્ખુસ્સ કણ્ણં વા નાસં વા યદિ છિન્દતિ, દુક્કટન્તિ યોજના.

૧૭૩૪. અનુપસમ્પન્નેતિ સામિવચનત્થે ભુમ્મં. ‘‘ઇત્થિયા’’તિઆદીહિ પદેહિ યથારહં યોજેતબ્બં ‘‘અનુપસમ્પન્નાય ઇત્થિયા અનુપસમ્પન્નસ્સ પુરિસસ્સા’’તિ. તિરચ્છાનગતસ્સપીતિ એત્થ ‘‘અન્તમસો’’તિ સેસો. યથાહ ‘‘અન્તમસો તિરચ્છાનગતસ્સપી’’તિ (પાચિ. અટ્ઠ. ૪૫૨).

૧૭૩૫. ‘‘સચે પહરતિ ઇત્થિઞ્ચા’’તિ પદચ્છેદો. રત્તેન ચેતસાતિ કાયસંસગ્ગરાગેન રત્તેન ચિત્તેન. વિનિદ્દિટ્ઠાતિ ‘‘યો પન ભિક્ખુ ઓતિણ્ણો વિપરિણતેન ચિત્તેન માતુગામેન સદ્ધિં કાયસંસગ્ગં સમાપજ્જેય્યા’’તિઆદિના (પારા. ૨૭૦) દસ્સિતા.

૧૭૩૬. મોક્ખાધિપ્પાયોતિ તતો અત્તનો મોક્ખં પત્થેન્તો. દોસો ન વિજ્જતીતિ દુક્કટાદિકોપિ દોસો નત્થિ.

૧૭૩૭-૯. હેઠેતુકામમાયન્તં ચોરમ્પિ વા પચ્ચત્થિકમ્પિ વા અન્તરામગ્ગે પસ્સિત્વાતિ યોજના. દિસ્વા કથં પટિપજ્જિતબ્બન્તિ આહ ‘‘મા ઇધાગચ્છુપાસકા’’તિઆદિ, આગમનપટિક્ખેપેન તત્થેવ તિટ્ઠાતિ વુત્તં હોતિ. આયન્તન્તિ એવં વુત્તે તં અનાદિયિત્વા આગચ્છન્તં. યથાહ ‘‘વચનં અનાદિયિત્વા આગચ્છન્ત’’ન્તિ (પાચિ. અટ્ઠ. ૪૫૩).

એસેવ નયોતિ ‘‘મા આગચ્છા’તિ વુત્તેપિ આગચ્છન્તં પહટે મતેપિ અનાપત્તી’’તિ અયં નયો.

૧૭૪૦. તિકપાચિત્તિયં વુત્તન્તિ ‘‘ઉપસમ્પન્ને ઉપસમ્પન્નસઞ્ઞી, વેમતિકો, અનુપસમ્પન્નસઞ્ઞી પહારં દેતિ, આપત્તિ પાચિત્તિયસ્સા’’તિ (પાચિ. ૪૫૨) તિકપાચિત્તિયં વુત્તં. સેસેતિ અનુપસમ્પન્ને. તિકદુક્કટન્તિ ‘‘અનુપસમ્પન્ને ઉપસમ્પન્નસઞ્ઞી, વેમતિકો, અનુપસમ્પન્નસઞ્ઞી પહારં દેતિ, આપત્તિ દુક્કટસ્સા’’તિ (પાચિ. ૪૫૨) તિકદુક્કટં વુત્તં. અનાણત્તિકત્તા આહ ‘‘કાયચિત્તસમુટ્ઠાન’’ન્તિ. કાયચિત્તાનં સુખોપેક્ખાપિ સમ્ભવન્તીતિ તતો વિસેસેતુમાહ ‘‘દુક્ખવેદન’’ન્તિ.

પહારકથાવણ્ણના.

૧૭૪૧. કાયન્તિ કાયેકદેસં હત્થાદિઅવયવમાહ. વાતિ દુતિયત્થસમ્પિણ્ડને. કાયબદ્ધન્તિ કાયપટિબદ્ધં પહરણયોગ્ગાયોગ્ગેસુ કત્તરયટ્ઠિસત્થાદીસુ અઞ્ઞતરં. સચે ઉચ્ચારેય્યાતિ સચે પહરણાકારં દસ્સેત્વા ઉક્ખિપેય્ય, ઇદં ‘‘કાયં વા કાયપટિબદ્ધં વા’’તિ ઇમેહિ પદેહિ પચ્ચેકં યોજેતબ્બં. તસ્સાતિ ઉચ્ચારિતકાયાદિકસ્સ. ઉગ્ગિરણપચ્ચયાતિ ઉક્ખિપનકારણા.

૧૭૪૨. અસમ્પહરિતુકામેનાતિ પહારદાનં અનિચ્છન્તેન. દિન્નત્તાતિ પહારસ્સ દિન્નત્તા. અપ્પહરિતુકામત્તા પુરિમસિક્ખાપદેન પાચિત્તિયં ન હોતિ, ઉગ્ગિરિતુકામતાય કતપયોગસ્સ ઉગ્ગિરણમત્તે અટ્ઠત્વા પહારસ્સ દિન્નત્તા ઇમિનાપિ પાચિત્તિયં ન હોતિ, અજ્ઝાસયસ્સ, પયોગસ્સ ચ અસુદ્ધત્તા અનાપત્તિયાપિ ન ભવિતબ્બન્તિ દુક્કટં વુત્તં.

૧૭૪૩. સચે તેન પહારેન ભિક્ખુનો હત્થાદીસુપિ યં કિઞ્ચિ અઙ્ગં ભિજ્જતિ, પહટસ્સ પહારદાયકસ્સ દુક્કટન્તિ સમ્બન્ધો.

૧૭૪૪. સેસો વિનિચ્છયો ‘‘મોક્ખાધિપ્પાયો’’તિઆદિકો ઇધ અવુત્તો વિનિચ્છયો સમુટ્ઠાનાદિના સદ્ધિં અનન્તરે વુત્તનયેન વિનયઞ્ઞુના વેદિતબ્બોતિ યોજના. ‘‘તિરચ્છાનાદીનં વચ્ચકરણાદિં દિસ્વાન પલાપેતુકામતાય કુજ્ઝિત્વાપિ ઉગ્ગિરન્તસ્સ મોક્ખાધિપ્પાયો એવા’’તિ વદન્તિ.

તલસત્તિકથાવણ્ણના.

૧૭૪૫. અમૂલકેનાતિ દિટ્ઠાદિમૂલવિરહિતેન, એત્થ ‘‘ભિક્ખુ’’ન્તિ સેસો. સઙ્ઘાદિસેસેનાતિ તેરસન્નં અઞ્ઞતરેન. તસ્સાતિ ચોદકસ્સ, ચોદાપકસ્સ વા પાપભિક્ખુનો. સચે ચુદિતકો તસ્મિં ખણે ‘‘એસ મં ચોદેતી’’તિ જાનાતિ, પાચિત્તિયં સિયાતિ યોજના, ઇમિના ‘‘સચે એવં ન જાનાતિ, ચિરેન વા જાનાતિ, દુક્કટં હોતી’’તિ સિદ્ધં.

૧૭૪૬. તત્થાતિ ઉપસમ્પન્ને. તિકપાચિત્તિયન્તિ ‘‘ઉપસમ્પન્ને ઉપસમ્પન્નસઞ્ઞી અમૂલકેન સઙ્ઘાદિસેસેન અનુદ્ધંસેતિ, આપત્તિ પાચિત્તિયસ્સ. વેમતિકો…પે… અનુપસમ્પન્નસઞ્ઞી અમૂલકેન સઙ્ઘાદિસેસેન અનુદ્ધંસેતિ, આપત્તિ પાચિત્તિયસ્સા’’તિ (પાચિ. ૪૬૨) તિકપાચિત્તિયં. દિટ્ઠાચારવિપત્તિયા ચોદકો દુક્કટાપત્તીતિ અમૂલિકાય દિટ્ઠિવિપત્તિયા વા આચારવિપત્તિયા વા અનુદ્ધંસેન્તસ્સ દુક્કટાપત્તિ હોતીતિ અત્થો. સેસે ચાતિ અનુપસમ્પન્ને. તિકદુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તીણિ દુક્કટાનિ હોન્તીતિ અત્થો.

૧૭૪૭. ‘‘તથાસઞ્ઞિસ્સ અનાપત્તી’’તિ પદચ્છેદો. તથાસઞ્ઞિસ્સાતિ સમૂલકસઞ્ઞિસ્સ.

અમૂલકકથાવણ્ણના.

૧૭૪૮-૯. સઞ્ચિચ્ચાતિ તસ્સ પરિપુણ્ણવીસતિવસ્સાદિભાવં જાનન્તોયેવ. ભિક્ખુનોતિ એત્થ ‘‘અઞ્ઞસ્સા’’તિ સેસો. ઊનવીસતિવસ્સો ત્વં મઞ્ઞેતિ એત્થ ‘‘મઞ્ઞે’’તિ ઇમિના પરિકપ્પત્થવાચિના નિપાતેન ‘‘ઉદકં મઞ્ઞે આદિત્ત’’ન્તિઆદીસુ (પારા. ૩૮૩) વિય મુસાવાદાપત્તિયા અવિસયતં દીપેતિ. હિતેસિતાય અનુસિટ્ઠિદાનાદિકે તથારૂપે અઞ્ઞસ્મિં પચ્ચયે કારણે અસતિ ‘‘ઊનવીસતિવસ્સો ત્વં મઞ્ઞે’’ ઇતિ એવમાદિના અઞ્ઞસ્સ ભિક્ખુનો યો ભિક્ખુ સચે સઞ્ચિચ્ચ કુક્કુચ્ચં ઉપ્પાદેય્ય, તસ્સ એવં કુક્કુચ્ચં ઉપ્પાદેન્તસ્સ ભિક્ખુનો વાચાય વાચાય પાચિત્તિ હોતીતિ યોજના.

૧૭૫૦. તિકપાચિત્તિયં વુત્તન્તિ ‘‘ઉપસમ્પન્ને ઉપસમ્પન્નસઞ્ઞી સઞ્ચિચ્ચ કુક્કુચ્ચં ઉપદહતિ, આપત્તિ પાચિત્તિયસ્સ. વેમતિકો…પે… અનુપસમ્પન્નસઞ્ઞી સઞ્ચિચ્ચ કુક્કુચ્ચં ઉપદહતિ, આપત્તિ પાચિત્તિયસ્સા’’તિ (પાચિ. ૪૬૭) તિકપાચિત્તિયં વુત્તં. સેસે ચાતિ અનુપસમ્પન્ને ચ. તિકદુક્કટન્તિ અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન તિકદુક્કટં. વજ્જમેવ વજ્જતા.

૧૭૫૧. હિતેસિતાય ભાસતોતિ સમ્બન્ધો. મા એવન્તિ એત્થ ‘‘કરોહી’’તિ સેસો, પુનપિ મા એવં કરોહીતિ અત્થો. ‘‘અહં તં ઇત્થિયા સહ નિસિન્નં મઞ્ઞે, તયા વિકાલે ભુત્તં મઞ્ઞે, પુન મા એવં કરોહિ’’ ઇતિ હિતેસિતાય ભાસતો અનાપત્તિ પકાસિતાતિ યોજના.

સઞ્ચિચ્ચકથાવણ્ણના.

૧૭૫૩. ભણ્ડનં નામ કલહો, ભણ્ડનં જાતં યેસન્તિ વિગ્ગહો, જાતભણ્ડનાનન્તિ અત્થો, ‘‘વચન’’ન્તિ સેસો. સોતું ઉપસ્સુતિં તિટ્ઠેય્યાતિ યોજના. ઉપેચ્ચ સુય્યતિ એત્થાતિ હિ ઉપસ્સુતિ, ઠાનં, યં ઠાનં ઉપગતેન સક્કા હોતિ કથેન્તાનં સદ્દં સોતું, તત્થાતિ અત્થો. યો પન ભિક્ખુ ભણ્ડનજાતાનં ભિક્ખૂનં વચનં સોતું ઉપસ્સુતિં સચે તિટ્ઠેય્ય, તસ્સ પાચિત્તિયં સિયાતિ યોજના.

૧૭૫૪. ચોદેતુકામતાય ગચ્છતો અસ્સાતિ યોજના.

૧૭૫૫. સોતુન્તિ પચ્છતો ગચ્છન્તાનં ભણ્ડનજાતાનં વચનં સોતું. ઓહીયન્તસ્સાતિ પકતિગમનં હાપેત્વા ઓસક્કન્તસ્સ. પુરતો ગચ્છતો ભિક્ખુસ્સ દુક્કટન્તિ યોજના. ગચ્છતો તુરિતં વાપીતિ પુરતો ગચ્છન્તાનં ભણ્ડનજાતાનં વચનં સોતું પચ્છતો સીઘં ગચ્છન્તસ્સાપિ. અયમેવ વિનિચ્છયોતિ પદે પદે અયં એવ વિનિચ્છયો.

૧૭૫૬. અત્તનો ઠિતોકાસન્તિ સમ્બન્ધો. ઉક્કાસિત્વાપિ વાતિ ઉક્કાસિતસદ્દં કત્વા વા. એત્થ અહન્તિ વા વત્વા ઞાપેતબ્બન્તિ યોજના.

૧૭૫૭. તિકપાચિત્તિયં વુત્તં ઉપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન. સેસે ચાતિ અનુપસમ્પન્ને. તિકદુક્કટં અનુપસમ્પન્ને ઉપસમ્પન્નસઞ્ઞિવેમતિકઅનુપસમ્પન્નસઞ્ઞીનં વસેન.

૧૭૫૮. ઓરમિસ્સન્તિ મયા ગહિતદુગ્ગાહતો વિરમિસ્સામિ.

૧૭૫૯. કાયચિત્તતો ચ કાયવાચાચિત્તતો ચ સમુટ્ઠાનતો થેય્યસત્થસમુટ્ઠાનં. સિયા કિરિયં સોતુકામતાય ગમનવસેન, સિયા અકિરિયં ઠિતટ્ઠાનં આગન્ત્વા મન્તયમાનં અજાનાપનવસેન, તેનાહ ‘‘ઇદં હોતિ ક્રિયાક્રિય’’ન્તિ. ગમનેન સિજ્ઝનતો કાયકમ્મં. તુણ્હીભાવેન સિજ્ઝનતો વચીકમ્મં. સદોસન્તિ સાવજ્જં, અકુસલચિત્તન્તિ વુત્તં હોતિ.

ઉપસ્સુતિકથાવણ્ણના.

૧૭૬૦. ધમ્મિકાનન્તિ ધમ્મેન વિનયેન સત્થુસાસનેન કતાનં. કમ્માનન્તિ અપલોકનકમ્મં, ઞત્તિકમ્મં, ઞત્તિદુતિયકમ્મં, ઞત્તિચતુત્થકમ્મન્તિ ઇમેસં ચતુન્નં કમ્માનં. ખીયતીતિ અરુચિં પકાસેતિ.

૧૭૬૧. ઉભયત્થાતિ અધમ્મે, ધમ્મે ચ.

૧૭૬૨. અધમ્મેનાતિ એત્થ ‘‘કમ્મેના’’તિ સેસો, ધમ્મવિરુદ્ધેન કમ્મેનાતિ અત્થો. ‘‘કમ્મસ્મિ’’ન્તિ ઇદં વિભત્તિં વિપરિણામેત્વા ‘‘કમ્મેના’’તિ અનુવત્તેતબ્બં. વગ્ગેનાતિ ‘‘છન્દારહાનં છન્દો આહટો હોતિ, સમ્મુખીભૂતા ન પટિક્કોસન્તી’’તિ (મહાવ. ૩૮૭) વુત્તસામગ્ગિલક્ખણસ્સ વિરુદ્ધત્તા અસમગ્ગેન, એત્થ ‘‘સઙ્ઘેના’’તિ સેસો. ‘‘તથા અકમ્મારહસ્સા’’તિ પદચ્છેદો. ‘‘અધમ્મેન કમ્મેન ઇમે કમ્મં કરોન્તી’’તિ ચ ‘‘અસમગ્ગેન સઙ્ઘેન ઇમે કમ્મં કરોન્તી’’તિ ચ ‘‘અધમ્મેન કમ્મેન વગ્ગેન સઙ્ઘેન ઇમે કમ્મં કરોન્તી’’તિ ચ તથા ‘‘અકમ્મારહસ્સ ઇમે કમ્મં કરોન્તી’’તિ ચ ઞત્વા યો ખીયતિ, તસ્સ ચ અનાપત્તિ પકાસિતાતિ યોજના.

કમ્મપટિબાહનકથાવણ્ણના.

૧૭૬૪-૫. આરોચિતં વત્થુ યાવ ન વિનિચ્છિતં વાતિ યોજના, ‘‘ચોદકેન ચ ચુદિતકેન ચ અત્તનો કથા કથિતા, અનુવિજ્જકો સમ્મતો, એત્તાવતાપિ વત્થુમેવ આરોચિતં હોતી’’તિ (પાચિ. અટ્ઠ. ૪૮૧) અટ્ઠકથાય વુત્તત્તા આરોચિતં વત્થુ યાવ ન વિનિચ્છિતં હોતીતિ અત્થો. ઞત્તિ વા ઠપિતા, કમ્મવાચા નિટ્ઠં યાવ ન ગચ્છતિ, એતસ્મિં…પે…હોતિ આપત્તિ દુક્કટન્તિ યોજના.

૧૭૬૬. છન્દં અદત્વા હત્થપાસે જહિતે તસ્સ પાચિત્તિયં સિયાતિ યોજના.

૧૭૬૭-૯. અધમ્મેપિ કમ્મસ્મિં ધમ્મકમ્મન્તિ સઞ્ઞિનો દુક્કટન્તિ યોજના. ધમ્મકમ્મે ચ અધમ્મકમ્મસઞ્ઞિનો અનાપત્તિ ઇધ ન વુત્તા, પાળિયં પન વુત્તત્તા ઇધાપિ યોજેતબ્બા. ‘‘સઙ્ઘસ્સ ભણ્ડનાદીનિ ભવિસ્સન્તી’’તિ સઞ્ઞિનો ગચ્છતો ચ યો વા ગિલાનો હોતિ, તસ્સ ગચ્છતો ચ ગિલાનસ્સ કરણીયે સતિ ગચ્છતો ચ કમ્મં નકોપેતુકામસ્સ ગચ્છતો ચ પસ્સાવનાદિના પીળિતસ્સ ગચ્છતો ચ ‘‘આગમિસ્સામિ’’ઇતિ એવં ગચ્છતોપિ ન દોસતાતિ યોજના. તત્થ દોસો એવ દોસતા, આપત્તિ, નદોસતા અનાપત્તિ. હત્થપાસં વિજહિત્વા ગમનેન, છન્દસ્સ અદાનેન ચ આપજ્જનતો ક્રિયાક્રિયં.

છન્દંઅદત્વાગમનકથાવણ્ણના.

૧૭૭૦-૧. સમગ્ગેન સઙ્ઘેન સદ્ધિન્તિ સમાનસંવાસકેન સમાનસીમાયં ઠિતેન સઙ્ઘેન સદ્ધિં. વુત્તઞ્હિ ‘‘સમગ્ગો નામ સઙ્ઘો સમાનસંવાસકો સમાનસીમાયં ઠિતો’’તિ (પાચિ. ૪૮૬). ચીવરન્તિ વિકપ્પનુપગમાહ. યથાહ ‘‘ચીવરં નામ છન્નં ચીવરાનં અઞ્ઞતરં ચીવરં વિકપ્પનુપગં પચ્છિમ’’ન્તિ (પાચિ. ૪૮૬). સમ્મતસ્સાતિ સેનાસનપઞ્ઞાપકાદિસમ્મુતિં પત્તેસુ અઞ્ઞતરસ્સ. ખીયતીતિ ‘‘યો યો મિત્તો, તસ્સ તસ્સ દેન્તી’’તિઆદિના નયેન અવણ્ણં ભણતિ.

ધમ્મકમ્મે ધમ્મકમ્મસઞ્ઞિવેમતિકઅધમ્મકમ્મસઞ્ઞીનં વસેન તિકપાચિત્તિયં વુત્તં.

૧૭૭૨-૪. સઙ્ઘેનાસમ્મતસ્સાપિ ચીવરં, અઞ્ઞમેવ વા તથેવ સમગ્ગેન સઙ્ઘેન દત્વા ખીયતિ, તસ્સ દુક્કટન્તિ યોજના. અનુપસમ્પન્ને તથેવ સમગ્ગેન સઙ્ઘેન દિન્ને સબ્બત્થ ચીવરે, અઞ્ઞપરિક્ખારે ચ દુક્કટન્તિ યોજના. અનુપસમ્પન્નેતિ સમ્પદાનત્થે ભુમ્મં, અનુપસમ્પન્નસ્સાતિ અત્થો.

સભાવતો છન્દાદીનં વસેનેવ કરોન્તં ખીયન્તસ્સ ચ અનાપત્તીતિ યોજના. નયા વિનિચ્છયક્કમા.

દુબ્બલકથાવણ્ણના.

૧૭૭૫. ઇદં દ્વાદસમન્તિ સમ્બન્ધો, ‘‘યો પન ભિક્ખુ જાનં સઙ્ઘિકં લાભં પરિણતં પુગ્ગલસ્સ પરિણામેય્ય, પાચિત્તિય’’ન્તિ (પાચિ. ૪૯૦) ઇમં દ્વાદસમં સિક્ખાપદન્તિ અત્થો. તિંસકકણ્ડસ્મિં નિસ્સગ્ગિયકણ્ડે. અન્તિમેનાતિ એત્થ ‘‘સિક્ખાપદેના’’તિ પકરણતો લબ્ભતિ. ચ-સદ્દો એવકારત્થો. ‘‘યો પન ભિક્ખુ જાનં સઙ્ઘિકં લાભં પરિણતં અત્તનો પરિણામેય્ય, નિસ્સગ્ગિયં પાચિત્તિય’’ન્તિ (પારા. ૬૫૮) ઇમિના અન્તિમેનેવ સિક્ખાપદેન સબ્બથા સબ્બં વત્તબ્બં તુલ્યન્તિ યોજના. અયમેવ વિસેસતાતિ એત્થ વિસેસોયેવ વિસેસતા, અયમેવ વિસેસોતિ અત્થો.

૧૭૭૬. તત્થાતિ તસ્મિં નિસ્સગ્ગિયાવસાને સિક્ખાપદે. અત્તનો પરિણામનાતિ અત્તનો પરિણામનહેતુ.

પરિણામનકથાવણ્ણના.

સહધમ્મિકવગ્ગો અટ્ઠમો.

૧૭૭૭-૮. યો પન ભિક્ખુ દેવિયા વાપિ રઞ્ઞો વાપિ અવિદિતાગમનો અપ્પટિસંવિદિતાગમનો સયનીયઘરા રાજસ્મિં અનિક્ખન્તે, દેવિયા અનિક્ખન્તાય તસ્સ સયનીયઘરસ્સ ઉમ્મારં ઇન્દખીલં સચે અતિક્કમેય્ય, તસ્સ ભિક્ખુનો પઠમે પાદે દુક્કટં સિયા, દુતિયે પાદે પાચિત્તિયં સિયાતિ યોજના.

૧૭૭૯. પટિસંવિદિતેતિ અત્તનો આગમને નિવેદિતે. નેવપટિસંવિદિતસઞ્ઞિનોતિ અનિવેદિતસઞ્ઞિનો. તત્થાતિ તસ્મિં પટિસંવિદિતાગમને. વેમતિકસ્સાતિ ‘‘પટિસંવિદિતં નુ ખો, ન પટિસંવિદિતં નુ ખો’’તિ સંસયમાપન્નસ્સ.

૧૭૮૦-૧. નેવ ખત્તિયસ્સ અપ્પટિસંવિદિતેપિ વા ન ખત્તિયાભિસેકેન અભિસિત્તસ્સ અપ્પટિસંવિદિતેપિ વા પવિસતો ન દોસોતિ યોજના, એવરૂપાનં અનિવેદિતેપિ પવિસન્તસ્સ અનાપત્તીતિ અત્થો.

ઉભોસુ રાજિનિ ચ દેવિયા ચ સયનિઘરતો બહિ નિક્ખન્તેસુ પવિસતોપિ વા ઉભિન્નં અઞ્ઞતરસ્મિં નિક્ખન્તે પવિસતોપિ વા ન દોસોતિ યોજના. કથિનેનાતિ એત્થ ‘‘સમુટ્ઠાનાદિના સમ’’ન્તિ સેસો, ઇદં સિક્ખાપદં સમુટ્ઠાનાદિવસેન કથિનસિક્ખાપદેન સમાનન્તિ વુત્તં હોતિ. સયનીયઘરપ્પવેસો ક્રિયં. અપ્પટિસંવેદનં અક્રિયં.

અન્તેપુરકથાવણ્ણના.

૧૭૮૨. રજતં, જાતરૂપં વા અત્તનો અત્થાય ઉગ્ગણ્હન્તસ્સ, ઉગ્ગણ્હાપયતોપિ વા તસ્સ નિસ્સગ્ગિયાપત્તીતિ યોજના.

૧૭૮૩. ગણપુગ્ગલસઙ્ઘાનં અત્થાય ચેતિયે નવકમ્મસ્સ અત્થાય ઉગ્ગણ્હાપયતો, ઉગ્ગણ્હતોપિ વા દુક્કટં હોતીતિ યોજના. જાતરૂપરજતાનં સરૂપં નિસ્સગ્ગિયે વુત્તનયેનેવ વેદિતબ્બં.

૧૭૮૪. મુત્તાદિરતનમ્પિ વુત્તસરૂપમેવ. સઙ્ઘાદીનમ્પીતિ એત્થ આદિ-સદ્દેન ગણપુગ્ગલચેતિયાનં સઙ્ગહો.

૧૭૮૫-૬. યં કિઞ્ચિ ગિહિસન્તકં સચે કપ્પિયવત્થુ વા હોતુ, અકપ્પિયવત્થુ વાપિ હોતુ, માતુકણ્ણપિળન્ધનં તાલપણ્ણમ્પિ વા હોતુ, ભણ્ડાગારિકસીસેન પટિસામયતો તસ્સ પાચિત્તિયાપત્તિ હોતીતિ યોજના.

૧૭૮૭. ન નિધેતબ્બમેવાતિ ન પટિસામેતબ્બમેવ.

૧૭૮૮. એસો હિ યસ્મા પલિબોધો નામ, તસ્મા ઠપેતું પન વટ્ટતીતિ યોજના.

૧૭૮૯. અનુઞ્ઞાતે ઠાનેતિ એત્થ ‘‘પતિત’’ન્તિ સેસો. એત્થ અનુઞ્ઞાતટ્ઠાનં નામ અજ્ઝારામો વા અજ્ઝાવસથો વા. યથાહ ‘‘અનુજાનામિ ભિક્ખવે રતનં વા રતનસમ્મતં વા અજ્ઝારામે વા અજ્ઝાવસથે વા ઉગ્ગહેત્વા વા ઉગ્ગહાપેત્વા વા નિક્ખિપિતું ‘યસ્સ ભવિસ્સતિ, સો હરિસ્સતી’’તિ (પાચિ. ૫૦૪). એત્થ ચ અજ્ઝારામો નામ પરિક્ખિત્તસ્સ અન્તોપરિક્ખેપો, અપરિક્ખિત્તસ્સ દ્વિન્નં લેડ્ડુપાતાનં અન્તો. અજ્ઝાવસથો નામ પરિક્ખિત્તસ્સ અન્તોપરિક્ખેપો, અપરિક્ખિત્તસ્સ મુસલપાતબ્ભન્તરં. ‘‘ઉગ્ગહેત્વા’’તિ ઇદં ઉપલક્ખણં, ઉગ્ગહાપેત્વાતિપિ વુત્તં હોતિ.

૧૭૯૦-૧. અનુઞ્ઞાતે પન ઠાને યથાવુત્તઅજ્ઝારામાદિકે ઠાને રતનં વા રતનસમ્મતં વા મનુસ્સાનં ઉપભોગપરિભોગં વા સયનભણ્ડં વા ગહેત્વા નિક્ખિપન્તસ્સ, રતનસમ્મતં વિસ્સાસં ગણ્હન્તસ્સ ચ તાવકાલિકમેવ વા ગણ્હન્તસ્સ ઉભયત્થ ઉમ્મત્તકાદીનઞ્ચ ન દોસોતિ યોજના.

સઞ્ચરિત્તસમોદયન્તિ એત્થ ‘‘સમુટ્ઠાનાદિના ઇદં સિક્ખાપદ’’ન્તિ વત્તબ્બં, ઇદં સિક્ખાપદં સમુટ્ઠાનાદિના સઞ્ચરિત્તસમજાતિકન્તિ અત્થો.

રતનકથાવણ્ણના.

૧૭૯૨. પુરેતિ પુબ્બભાગે.

૧૭૯૩-૪. સન્તન્તિ ચારિત્તસિક્ખાપદે વુત્તસરૂપં. અનાપુચ્છાતિ ‘‘વિકાલે ગામપ્પવેસનં આપુચ્છામી’’તિ અનાપુચ્છિત્વા. પચ્ચયં વિનાતિ તાદિસં અચ્ચાયિકં કરણીયં વિના. પરિક્ખેપોક્કમેતિ પરિક્ખેપસ્સ અન્તોપવેસે. ઉપચારોક્કમેતિ એત્થાપિ એસેવ નયો.

૧૭૯૫. અથાતિ વાક્યન્તરારમ્ભે.

૧૭૯૬. તતો અઞ્ઞન્તિ પઠમં વિકાલે ગામપ્પવેસનં આપુચ્છિત્વા તતો પવિટ્ઠગામતો અઞ્ઞં ગામં. પુન તતોતિ દુતિયગામમાહ. કત્થચિ પોત્થકે ‘‘આપુચ્છને કિચ્ચ’’ન્તિ પાઠો દિસ્સતિ, ‘‘આપુચ્છનકિચ્ચ’’ન્તિ પાઠોયેવ પન યુત્તતરો. યથાઆકઙ્ખિતપમાણં દસ્સેતુમાહ ‘‘ગામસતેપિ વા’’તિ.

૧૭૯૭. પસ્સમ્ભેત્વાનાતિ પટિવિનોદેત્વા. અન્તરા અઞ્ઞં ગામં પવિસન્તિ ચેતિ યોજના.

૧૭૯૮-૯. કુલઘરે વા અઞ્ઞત્થ આસનસાલાય વા ભત્તકિચ્ચં કત્વા યો ભિક્ખુ સપ્પિભિક્ખાય વા તેલભિક્ખાય વા સચે ચરિતુકામો સિયાતિ યોજના.

પસ્સેતિ પકતિવચનસવનારહે અત્તનો સમીપે, એતેનેવ એત્તકા ઠાના દૂરીભૂતો અસન્તો નામ હોતીતિ બ્યતિરેકતો લબ્ભતીતિ દસ્સેતિ. અસન્તેતિ અવિજ્જમાને વા વુત્તપ્પમાણતો દૂરીભૂતે વા. નત્થીતિ એત્થ ‘‘ચિન્તેત્વા’’તિ સેસો.

૧૮૦૨. અનોક્કમ્માતિ અનુપસક્કિત્વા. મગ્ગાતિ ગન્તબ્બમગ્ગા.

૧૮૦૩. તિકપાચિત્તિયન્તિ વિકાલે વિકાલસઞ્ઞિવેમતિકકાલસઞ્ઞીનં વસેન તિકપાચિત્તિયં વુત્તં.

૧૮૦૪. અચ્ચાયિકે કિચ્ચે વાપીતિ સપ્પદટ્ઠાદીનં ભેસજ્જપરિયેસનાદિકે અચિરાયિતબ્બકિચ્ચે સતિ ગચ્છતો.

૧૮૦૫. અન્તરારામન્તિ ગામબ્ભન્તરે સઙ્ઘારામં. ભિક્ખુનીનં ઉપસ્સયન્તિ ભિક્ખુનિવિહારં. તિત્થિયાનં ઉપસ્સયન્તિ તિત્થિયારામં.

૧૮૦૬-૭. અન્તરારામાદિગમને ન કેવલં અનાપુચ્છા ગચ્છતોયેવ, કાયબન્ધનં અબન્ધિત્વા, સઙ્ઘાટિં અપારુપિત્વા ગચ્છન્તસ્સાપિ અનાપત્તિ.

આપદાસુપીતિ સીહો વા બ્યગ્ઘો વા આગચ્છતિ, મેઘો વા ઉટ્ઠેતિ, અઞ્ઞો વા કોચિ ઉપદ્દવો ઉપ્પજ્જતિ, એવરૂપાસુ આપદાસુપિ બહિગામતો અન્તોગામં ગચ્છતો અનાપત્તીતિ અત્થો.

વિકાલગામપ્પવેસનકથાવણ્ણના.

૧૮૦૮. અટ્ઠિદન્તમયં વાપિ વિસાણજં વાપિ સૂચિઘરન્તિ યોજના. અટ્ઠિ નામ યં કિઞ્ચિ અટ્ઠિ. દન્તોતિ હત્થિદન્તો. વિસાણં નામ યં કિઞ્ચિ વિસાણં.

૧૮૦૯. લાભેતિ પટિલાભે. ભેદનકન્તિ ભેદનમેવ ભેદનકં, તં અસ્સ અત્થીતિ ભેદનકં, પઠમં ભિન્દિત્વા પચ્છા દેસેતબ્બત્તા તં ભેદનકં અસ્સ પાચિત્તિયસ્સ અત્થીતિ ભેદનકં, પાચિત્તિયં, અસ્સત્થિઅત્થે અ-કારપચ્ચયો.

૧૮૧૦-૧. ‘‘અનાપત્તિ અરણિકે’’તિ પદચ્છેદો. અરણિકેતિ અરણિધનુકે. વિધેતિ કાયબન્ધનસ્સ વિધકે. અઞ્જનિકાતિ અઞ્જનિનાળિકા. દકપુઞ્છનિયાતિ નહાતસ્સ ગત્તે ઉદકપુઞ્છનપેસિકાય. વાસિજટેતિ વાસિદણ્ડકે.

સૂચિઘરકથાવણ્ણના.

૧૮૧૨-૩. મઞ્ચપીઠસરૂપં દુતિયે ભૂતગામવગ્ગે ચતુત્થસિક્ખાપદે વુત્તમેવ. ‘‘સુગતઙ્ગુલેન અટ્ઠઙ્ગુલપાદક’’ન્તિ અટ્ઠઙ્ગુલપાદકસ્સ આગતત્તા ‘‘અટ્ઠઙ્ગુલપ્પમાણેના’’તિ એત્થ ‘‘પાદેના’’તિ સેસો.

હેટ્ઠિમાટનિન્તિ અટનિયા હેટ્ઠિમતલં. અટનિયા હેટ્ઠિમં હેટ્ઠિમાટની, તં ઠપેત્વા, અઞ્ઞત્ર હેટ્ઠિમાય અટનિયાતિ વુત્તં હોતિ. દેસનાપુબ્બભાગિયેન મઞ્ચપાદચ્છેદેન સહ વત્તતીતિ સચ્છેદા. તં પમાણં. અતિક્કમતોતિ અતિક્કામયતો, ગાથાબન્ધવસેન ય-કારલોપો.

૧૮૧૫. પમાણેન કરોન્તસ્સાતિ અટનિયા હેટ્ઠા વડ્ઢકિરતનપ્પમાણેન પાદેન યોજેત્વા કરોન્તસ્સ, એતેનેવ ‘‘ઊનકં કરોન્તસ્સા’’તિ ઇદં ઉપલક્ખિતં. તસ્સાતિ તસ્સ અપ્પમાણિકસ્સ. છિન્દિત્વાતિ અટનિતો હેટ્ઠા વડ્ઢકિરતનાતિરિત્તં ઠાનં છિન્દિત્વા.

૧૮૧૬. પમાણતો નિખણિત્વાતિ એત્થ ‘‘અધિક’’ન્તિ સામત્થિયા લબ્ભતિ, પમાણતો અધિકં ઠાનં નિખણિત્વા, અન્તોભૂમિં પવેસેત્વાતિ વુત્તં હોતિ. ઉત્તાનં વાપીતિ ઉદ્ધં પાદં કત્વા ભૂમિયં વા દારુઘટિકાસુ વા ઠપેત્વા. અટ્ટં વા બન્ધિત્વા પરિભુઞ્જતોતિ ઉક્ખિપિત્વા તુલાસઙ્ઘાટે ઠપેત્વા અટ્ટં બન્ધિત્વા પરિભુઞ્જન્તસ્સ અનાપત્તિ.

મઞ્ચકથાવણ્ણના.

૧૮૧૭. તૂલં ઓનદ્ધમેત્થાતિ તૂલોનદ્ધં, તૂલં પક્ખિપિત્વા ઉપરિ ચિમિલિકાય ઓનદ્ધં, ‘‘તૂલં નામ તીણિ તૂલાનિ રુક્ખતૂલં લતાતૂલં પોટકિતૂલ’’ન્તિ (પાચિ. ૫૨૮) વુત્તતૂલાનં અઞ્ઞતરં પક્ખિપિત્વા ઉપરિ પિલોતિકાય સિબ્બિત્વા કતન્તિ વુત્તં હોતિ. પોટકિતૂલન્તિ એરકતૂલાદિ યં કિઞ્ચિ તિણજાતીનં તૂલં. ઉદ્દાલનમેવ ઉદ્દાલનકં, તં અસ્સ અત્થીતિ ઉદ્દાલનકન્તિ વુત્તનયમેવ. અતિક્કન્તા ઈતિ ઉપદ્દવો યેન સો અનીતિ, ભગવા, તેન અનીતિના.

૧૮૧૮. આયોગેતિ આયોગપત્તે. બન્ધનેતિ કાયબન્ધને. અંસબદ્ધકેતિ અંસબન્ધનકે. બિબ્બોહનેતિ ઉપધાને. થવિકાતિ પત્તથવિકા. થવિકાદીસૂતિ આદિ-સદ્દેન સિપાટિકાદીનં સઙ્ગહો. થવિકાદીસુ તૂલોનદ્ધેસુ પરિભુત્તેસુ ભિક્ખુનો અનાપત્તીતિ યોજના.

૧૮૧૯. અઞ્ઞેન ચ કતન્તિ એત્થ ‘‘મઞ્ચં વા પીઠં વા’’તિ પકરણતો લબ્ભતિ. ઉદ્દાલેત્વાતિ પિલોતિકં ઉપ્પાટેત્વા તૂલં અપનેત્વા. નયાતિ સમુટ્ઠાનાદયો.

તૂલોનદ્ધકથાવણ્ણના.

૧૮૨૦. નિસીદનન્તિ નિસીદનચીવરં. પમાણતોતિ ‘‘તત્રિદં પમાણં, દીઘસો દ્વે વિદત્થિયો સુગતવિદત્થિયા, તિરિયં દિયડ્ઢં, દસા વિદત્થી’’તિ (પાચિ. ૫૩૧) વુત્તપમાણતો. પમાણાતિક્કમે પયોગે તસ્સ દુક્કટં સિયાતિ યોજના.

૧૮૨૧. સચ્છેદન્તિ પમાણતો અતિરિત્તપદેસસ્સ છેદનકિરિયાસહિતપટિકમ્મં પાચિત્તિયમુદીરિતન્તિ અત્થો. તસ્સાતિ નિસીદનસ્સ. દ્વીસુ ઠાનેસુ ફાલેત્વા તિસ્સો દસા કાતબ્બા સિયુન્તિ યોજના.

૧૮૨૨. તદૂનકન્તિ તતો પમાણતો ઊનકં. વિતાનાદિં કરોન્તસ્સાતિ એત્થ આદિ-સદ્દેન અત્થરણસાણિપાકારભિસિબિબ્બોહનાનં સઙ્ગહો. ‘‘સઞ્ચરિત્તસમા નયા’’તિ ઇદં વુત્તત્થમેવ.

નિસીદનકથાવણ્ણના.

૧૮૨૩. રોગેતિ કણ્ડુપિળકાદિરોગે સતિ. યથાહ ‘‘અનુજાનામિ ભિક્ખવે યસ્સ કણ્ડુ વા પિળકાવા અસ્સાવો વા થુલ્લકચ્છુ વા આબાધો, તસ્સ કણ્ડુપટિચ્છાદિ’’ન્તિ (મહાવ. ૩૫૪). એત્થ કણ્ડૂતિ કચ્છુ. પિળકાતિ લોહિતતુણ્ડિકા સુખુમપિળકા. અસ્સાવોતિ અરિસભગન્દલમધુમેહાદિવસેન અસુચિપગ્ઘરણં. થુલ્લકચ્છુ વા આબાધોતિ મહાપિળકાબાધો વુચ્ચતિ. પમાણતોતિ ‘‘તત્રિદં પમાણં, દીઘસો ચતસ્સો વિદત્થિયો સુગતવિદત્થિયા, તિરિયં દ્વે વિદત્થિયો’’તિ (પાચિ. ૫૩૮) વુત્તપ્પમાણતો.

કણ્ડુપટિચ્છાદિકથાવણ્ણના.

૧૮૨૫. પમાણેનેવાતિ ‘‘તત્રિદં પમાણં, દીઘસો છ વિદત્થિયો સુગતવિદત્થિયા, તિરિયં અડ્ઢતેય્યા’’તિ (પાચિ. ૫૪૩) વુત્તપ્પમાણેનેવ. પમાણાતિક્કમેતિ વસ્સિકસાટિકાય યથાવુત્તપમાણતો અતિક્કમને, નિમિત્તત્થે ચેતં ભુમ્મં. તસ્સ ભિક્ખુસ્સ. નયોતિ છેદનપાચિત્તિયાદિકો વિનિચ્છયનયો.

વસ્સિકસાટિકકથાવણ્ણના.

૧૮૨૬. સુગતસ્સ ચીવરેન તુલ્યપ્પમાણં ચીવરં યો ભિક્ખુ સચે કારેય્ય, તસ્સ ચીવરસ્સ કરણે તસ્સ ભિક્ખુસ્સ દુક્કટં સિયાતિ યોજના. તુલ્યં પમાણં યસ્સાતિ વિગ્ગહો.

૧૮૨૭. અત્તનો વત્થાનં કરણકારાપનં વિના અઞ્ઞતો પટિલાભો નામ નત્થિ, સૂચિકમ્મપરિયોસાને ચીવરસરૂપસ્સ પટિલાભોયેવેત્થ પટિલાભોતિ વિઞ્ઞાયતિ.

૧૮૨૮. તસ્સાતિ યં ‘‘સુગતસ્સ ચીવરેના’’તિ વુત્તં, તસ્સ સુગતચીવરસ્સ. દીઘસો પમાણેન સુગતસ્સ વિદત્થિયા નવ વિદત્થિયો, તિરિયં પમાણેન છ વિદત્થિયો વિનિદ્દિટ્ઠા સિક્ખાપદેયેવ કથિતાતિ યોજના.

નન્દકથાવણ્ણના.

રાજવગ્ગો નવમો.

ઇતિ વિનયત્થસારસન્દીપનિયા વિનયવિનિચ્છયવણ્ણનાય

પાચિત્તિયકથાવણ્ણના નિટ્ઠિતા.

પઠમો ભાગો નિટ્ઠિતો.