📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਅਭਿਧਮ੍ਮਾਵਤਾਰੋ

ਗਨ੍ਥਾਰਮ੍ਭਕਥਾ

੧.

ਅਨਨ੍ਤਕਰੁਣਾਪਞ੍ਞਂ ¶ ¶ ¶ , ਤਥਾਗਤਮਨੁਤ੍ਤਰਂ;

ਵਨ੍ਦਿਤ੍ਵਾ ਸਿਰਸਾ ਬੁਦ੍ਧਂ, ਧਮ੍ਮਂ ਸਾਧੁਗਣਮ੍ਪਿ ਚ.

੨.

ਪਣ੍ਡੁਕਮ੍ਬਲਨਾਮਾਯ, ਸਿਲਾਯਾਤੁਲਵਿਕ੍ਕਮੋ;

ਨਿਸਿਨ੍ਨੋ ਦੇਵਰਾਜਸ੍ਸ, ਵਿਮਲੇ ਸੀਤਲੇ ਤਲੇ.

੩.

ਯਂ ਦੇਵਦੇਵੋ ਦੇਵਾਨਂ, ਦੇਵਦੇਵੇਹਿ ਪੂਜਿਤੋ;

ਦੇਸੇਸਿ ਦੇਵਲੋਕਸ੍ਮਿਂ, ਧਮ੍ਮਂ ਦੇਵਪੁਰਕ੍ਖਤੋ.

੪.

ਤਤ੍ਥਾਹਂ ¶ ਪਾਟਵਤ੍ਥਾਯ, ਭਿਕ੍ਖੂਨਂ ਪਿਟਕੁਤ੍ਤਮੇ;

ਅਭਿਧਮ੍ਮਾਵਤਾਰਨ੍ਤੁ, ਮਧੁਰਂ ਮਤਿਵਡ੍ਢਨਂ.

੫.

ਤਾਲ਼ਂ ਮੋਹਕਵਾਟਸ੍ਸ, ਵਿਘਾਟਨਮਨੁਤ੍ਤਰਂ;

ਭਿਕ੍ਖੂਨਂ ਪਵਿਸਨ੍ਤਾਨਂ, ਅਭਿਧਮ੍ਮਮਹਾਪੁਰਂ.

੬.

ਸੁਦੁਤ੍ਤਰਂ ਤਰਨ੍ਤਾਨਂ, ਅਭਿਧਮ੍ਮਮਹੋਦਧਿਂ;

ਸੁਦੁਤ੍ਤਰਂ ਤਰਨ੍ਤਾਨਂ, ਤਰਂਵ ਮਕਰਾਕਰਂ.

੭.

ਆਭਿਧਮ੍ਮਿਕਭਿਕ੍ਖੂਨਂ, ਹਤ੍ਥਸਾਰਮਨੁਤ੍ਤਰਂ;

ਪਵਕ੍ਖਾਮਿ ਸਮਾਸੇਨ, ਤਂ ਸੁਣਾਥ ਸਮਾਹਿਤਾ.

੧. ਪਠਮੋ ਪਰਿਚ੍ਛੇਦੋ

ਚਿਤ੍ਤਨਿਦ੍ਦੇਸੋ

੮.

ਚਿਤ੍ਤਂ ¶ ਚੇਤਸਿਕਂ ਰੂਪਂ, ਨਿਬ੍ਬਾਨਨ੍ਤਿ ਨਿਰੁਤ੍ਤਰੋ;

ਚਤੁਧਾ ਦੇਸਯੀ ਧਮ੍ਮੇ, ਚਤੁਸਚ੍ਚਪ੍ਪਕਾਸਨੋ.

ਤਤ੍ਥ ਚਿਤ੍ਤਨ੍ਤਿ ਵਿਸਯਵਿਜਾਨਨਂ ਚਿਤ੍ਤਂ, ਤਸ੍ਸ ਪਨ ਕੋ ਵਚਨਤ੍ਥੋ? ਵੁਚ੍ਚਤੇ – ਸਬ੍ਬਸਙ੍ਗਾਹਕਵਸੇਨ ਪਨ ਚਿਨ੍ਤੇਤੀਤਿ ਚਿਤ੍ਤਂ, ਅਤ੍ਤਸਨ੍ਤਾਨਂ ਵਾ ਚਿਨੋਤੀਤਿਪਿ ਚਿਤ੍ਤਂ.

੯.

ਵਿਚਿਤ੍ਤਕਰਣਾ ¶ ਚਿਤ੍ਤਂ, ਅਤ੍ਤਨੋ ਚਿਤ੍ਤਤਾਯ ਵਾ;

ਪਞ੍ਞਤ੍ਤਿਯਮ੍ਪਿ ਵਿਞ੍ਞਾਣੇ, ਵਿਚਿਤ੍ਤੇ ਚਿਤ੍ਤਕਮ੍ਮਕੇ;

ਚਿਤ੍ਤਸਮ੍ਮੁਤਿ ਦਟ੍ਠਬ੍ਬਾ, ਵਿਞ੍ਞਾਣੇ ਇਧ ਵਿਞ੍ਞੁਨਾ.

ਤਂ ਪਨ ਸਾਰਮ੍ਮਣਤੋ ਏਕਵਿਧਂ, ਸਵਿਪਾਕਾਵਿਪਾਕਤੋ ਦੁਵਿਧਂ. ਤਤ੍ਥ ਸਵਿਪਾਕਂ ਨਾਮ ਕੁਸਲਾਕੁਸਲਂ, ਅਵਿਪਾਕਂ ਅਬ੍ਯਾਕਤਂ. ਕੁਸਲਾਕੁਸਲਾਬ੍ਯਾਕਤਜਾਤਿਭੇਦਤੋ ਤਿਵਿਧਂ.

ਤਤ੍ਥ ¶ ਕੁਸਲਨ੍ਤਿ ਪਨੇਤਸ੍ਸ ਕੋ ਵਚਨਤ੍ਥੋ?

੧੦.

ਕੁਚ੍ਛਿਤਾਨਂ ਸਲਨਤੋ, ਕੁਸਾਨਂ ਲਵਨੇਨ ਵਾ;

ਕੁਸੇਨ ਲਾਤਬ੍ਬਤ੍ਤਾ ਵਾ, ਕੁਸਲਨ੍ਤਿ ਪਵੁਚ੍ਚਤਿ.

੧੧.

ਛੇਕੇ ਕੁਸਲਸਦ੍ਦੋਯਂ, ਆਰੋਗ੍ਯੇ ਅਨਵਜ੍ਜਕੇ;

ਦਿਟ੍ਠੋ ਇਟ੍ਠਵਿਪਾਕੇਪਿ, ਅਨਵਜ੍ਜਾਦਿਕੇ ਇਧ.

ਤਸ੍ਮਾ ਅਨਵਜ੍ਜਇਟ੍ਠਵਿਪਾਕਲਕ੍ਖਣਂ ਕੁਸਲਂ, ਅਕੁਸਲਵਿਦ੍ਧਂਸਨਰਸਂ, ਵੋਦਾਨਪਚ੍ਚੁਪਟ੍ਠਾਨਂ. ਵਜ੍ਜਪਟਿਪਕ੍ਖਤ੍ਤਾ ਅਨਵਜ੍ਜਲਕ੍ਖਣਂ ਵਾ ਕੁਸਲਂ, ਵੋਦਾਨਭਾਵਰਸਂ, ਇਟ੍ਠਵਿਪਾਕਪਚ੍ਚੁਪਟ੍ਠਾਨਂ, ਯੋਨਿਸੋਮਨਸਿਕਾਰਪਦਟ੍ਠਾਨਂ. ਸਾਵਜ੍ਜਾਨਿਟ੍ਠਵਿਪਾਕਲਕ੍ਖਣਮਕੁਸਲਂ. ਤਦੁਭਯਵਿਪਰੀਤਲਕ੍ਖਣਮਬ੍ਯਾਕਤਂ, ਅਵਿਪਾਕਾਰਹਂ ਵਾ.

ਤਤ੍ਥ ¶ ਕੁਸਲਚਿਤ੍ਤਂ ਏਕਵੀਸਤਿਵਿਧਂ ਹੋਤਿ, ਤਦਿਦਂ ਭੂਮਿਤੋ ਚਤੁਬ੍ਬਿਧਂ ਹੋਤਿ – ਕਾਮਾਵਚਰਂ, ਰੂਪਾਵਚਰਂ, ਅਰੂਪਾਵਚਰਂ, ਲੋਕੁਤ੍ਤਰਞ੍ਚੇਤਿ.

ਤਤ੍ਥ ਕਾਮਾਵਚਰਕੁਸਲਚਿਤ੍ਤਂ ਭੂਮਿਤੋ ਏਕਵਿਧਂ, ਸਵਤ੍ਥੁਕਾਵਤ੍ਥੁਕਭੇਦਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਸੋਮਨਸ੍ਸਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਨ੍ਤਿ ਇਦਂ ਅਟ੍ਠਵਿਧਮ੍ਪਿ ਕਾਮਾਵਚਰਕੁਸਲਚਿਤ੍ਤਂ ਨਾਮ.

੧੨.

ਉਦ੍ਦਾਨਤੋ ਦੁਵੇ ਕਾਮਾ, ਕ੍ਲੇਸਵਤ੍ਥੁਵਸਾ ਪਨ;

ਕਿਲੇਸੋ ਛਨ੍ਦਰਾਗੋਵ, ਵਤ੍ਥੁ ਤੇਭੂਮਵਟ੍ਟਕਂ.

੧੩.

ਕਿਲੇਸਕਾਮੋ ¶ ਕਾਮੇਤਿ, ਵਤ੍ਥੁ ਕਾਮੀਯਤੀਤਿ ਚ;

ਸਿਜ੍ਝਤਿ ਦੁਵਿਧੋਪੇਸ, ਕਾਮੋ ਵੋ ਕਾਰਕਦ੍ਵਯੇ.

੧੪.

ਯਸ੍ਮਿਂ ¶ ਪਨ ਪਦੇਸੇ ਸੋ, ਕਾਮੋਯਂ ਦੁਵਿਧੋਪਿ ਚ;

ਸਮ੍ਪਤ੍ਤੀਨਂ ਵਸੇਨਾਵ-ਚਰਤੀਤਿ ਚ ਸੋ ਪਨ.

੧੫.

ਪਦੇਸੋ ਚਤੁਪਾਯਾਨਂ, ਛਨ੍ਨਂ ਦੇਵਾਨਮੇਵ ਚ;

ਮਨੁਸ੍ਸਾਨਂ ਵਸੇਨੇਵ, ਏਕਾਦਸਵਿਧੋ ਪਨ.

੧੬.

ਕਾਮੋਵਚਰਤੀਤੇਤ੍ਥ, ਕਾਮਾਵਚਰਸਞ੍ਞਿਤੋ;

ਅਸ੍ਸਾਭਿਲਕ੍ਖਿਤਤ੍ਤਾ ਹਿ, ਸਸਤ੍ਥਾਵਚਰੋ ਵਿਯ.

੧੭.

ਸ੍ਵਾਯਂ ਰੂਪਭਵੋ ਰੂਪਂ, ਏਵਂ ਕਾਮੋਤਿ ਸਞ੍ਞਿਤੋ;

ਉਤ੍ਤਰਸ੍ਸ ਪਦਸ੍ਸੇਵ, ਲੋਪਂ ਕਤ੍ਵਾ ਉਦੀਰਿਤੋ.

੧੮.

ਤਸ੍ਮਿਂ ¶ ਕਾਮੇ ਇਦਂ ਚਿਤ੍ਤਂ, ਸਦਾਵਚਰਤੀਤਿ ਚ;

ਕਾਮਾਵਚਰਮਿਚ੍ਚੇਵਂ, ਕਥਿਤਂ ਕਾਮਘਾਤਿਨਾ.

੧੯.

ਪਟਿਸਨ੍ਧਿਂ ਭਵੇ ਕਾਮੇ, ਅਵਚਾਰਯਤੀਤਿ ਵਾ;

ਕਾਮਾਵਚਰਮਿਚ੍ਚੇਵਂ, ਪਰਿਯਾਪਨ੍ਨਨ੍ਤਿ ਤਤ੍ਰ ਵਾ.

੨੦.

ਇਦਂ ਅਟ੍ਠਵਿਧਂ ਚਿਤ੍ਤਂ, ਕਾਮਾਵਚਰਸਞ੍ਞਿਤਂ;

ਦਸਪੁਞ੍ਞਕ੍ਰਿਯਵਤ੍ਥੁ-ਵਸੇਨੇਵ ਪਵਤ੍ਤਤਿ.

੨੧.

ਦਾਨਂ ਸੀਲਂ ਭਾਵਨਾ ਪਤ੍ਤਿਦਾਨਂ,

ਵੇਯ੍ਯਾਵਚ੍ਚਂ ਦੇਸਨਾ ਚਾਨੁਮੋਦੋ;

ਦਿਟ੍ਠਿਜ੍ਜੁਤ੍ਤਂ ਸਂਸੁਤਿਚ੍ਚਾਪਚਾਯੋ,

ਞੇਯ੍ਯੋ ਏਵਂ ਪੁਞ੍ਞਵਤ੍ਥੁਪ੍ਪਭੇਦੋ.

੨੨.

ਗਚ੍ਛਨ੍ਤਿ ਸਙ੍ਗਹਂ ਦਾਨੇ, ਪਤ੍ਤਿਦਾਨਾਨੁਮੋਦਨਾ;

ਤਥਾ ਸੀਲਮਯੇ ਪੁਞ੍ਞੇ, ਵੇਯ੍ਯਾਵਚ੍ਚਾਪਚਾਯਨਾ.

੨੩.

ਦੇਸਨਾ ਸਵਨਂ ਦਿਟ੍ਠਿ-ਉਜੁਕਾ ਭਾਵਨਾਮਯੇ;

ਪੁਨ ਤੀਣੇਵ ਸਮ੍ਭੋਨ੍ਤਿ, ਦਸ ਪੁਞ੍ਞਕ੍ਰਿਯਾਪਿ ਚ.

੨੪.

ਸਬ੍ਬਾਨੁਸ੍ਸਤਿਪੁਞ੍ਞਞ੍ਚ, ਪਸਂਸਾ ਸਰਣਤ੍ਤਯਂ;

ਯਨ੍ਤਿ ਦਿਟ੍ਠਿਜੁਕਮ੍ਮਸ੍ਮਿਂ, ਸਙ੍ਗਹਂ ਨਤ੍ਥਿ ਸਂਸਯੋ.

੨੫.

ਪੁਰਿਮਾ ¶ ਮੁਞ੍ਚਨਾ ਚੇਵ, ਪਰਾ ਤਿਸ੍ਸੋਪਿ ਚੇਤਨਾ;

ਹੋਤਿ ਦਾਨਮਯਂ ਪੁਞ੍ਞਂ, ਏਵਂ ਸੇਸੇਸੁ ਦੀਪਯੇ.

ਇਦਾਨਿ ਅਸ੍ਸ ਪਨਟ੍ਠਵਿਧਸ੍ਸਾਪਿ ਕਾਮਾਵਚਰਕੁਸਲਚਿਤ੍ਤਸ੍ਸ ਅਯਮੁਪ੍ਪਤ੍ਤਿਕ੍ਕਮੋ ਵੇਦਿਤਬ੍ਬੋ. ਯਦਾ ਹਿ ਯੋ ਦੇਯ੍ਯਧਮ੍ਮਪ੍ਪਟਿਗ੍ਗਾਹਕਾਦਿਸਮ੍ਪਤ੍ਤਿਂ, ਅਞ੍ਞਂ ਵਾ ਸੋਮਨਸ੍ਸਹੇਤੁਂ ਆਗਮ੍ਮ ਹਟ੍ਠਪਹਟ੍ਠੋ ‘‘ਅਤ੍ਥਿ ਦਿਨ੍ਨ’’ਨ੍ਤਿ ਆਦਿਨਯਪ੍ਪਵਤ੍ਤਂ ਸਮ੍ਮਾਦਿਟ੍ਠਿਂ ਪੁਰਕ੍ਖਤ੍ਵਾ ਪਰੇਹਿ ਅਨੁਸ੍ਸਾਹਿਤੋ ਦਾਨਾਦੀਨਿ ਪੁਞ੍ਞਾਨਿ ਕਰੋਤਿ, ਤਦਾਸ੍ਸ ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ¶ ਅਸਙ੍ਖਾਰਿਕਂ ¶ ਪਠਮਂ ਮਹਾਕੁਸਲਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਵੁਤ੍ਤਨਯੇਨੇਵ ਹਟ੍ਠਪਹਟ੍ਠੋ ਸਮ੍ਮਾਦਿਟ੍ਠਿਂ ਪੁਰਕ੍ਖਤ੍ਵਾ ਪਰੇਹਿ ਉਸ੍ਸਾਹਿਤੋ ਕਰੋਤਿ, ਤਦਾਸ੍ਸ ਤਮੇਵ ਚਿਤ੍ਤਂ ਸਸਙ੍ਖਾਰਿਕਂ ਹੋਤਿ. ਇਮਸ੍ਮਿਂ ਪਨਤ੍ਥੇ ਸਙ੍ਖਾਰੋਤਿ ਅਤ੍ਤਨੋ ਵਾ ਪਰਸ੍ਸ ਵਾ ਪਵਤ੍ਤਸ੍ਸ ਪੁਬ੍ਬਪ੍ਪਯੋਗਸ੍ਸਾਧਿਵਚਨਂ. ਯਦਾ ਪਨ ਞਾਤਿਜਨਸ੍ਸ ਪਟਿਪਤ੍ਤਿਦਸ੍ਸਨੇਨ ਜਾਤਪਰਿਚਯਾ ਬਾਲਕਾ ਭਿਕ੍ਖੂ ਦਿਸ੍ਵਾ ਸੋਮਨਸ੍ਸਜਾਤਾ ਸਹਸਾ ਯਂ ਕਿਞ੍ਚਿ ਹਤ੍ਥਗਤਂ ਦਦਨ੍ਤਿ ਵਾ ਵਨ੍ਦਨ੍ਤਿ ਵਾ, ਤਦਾ ਤੇਸਂ ਤਤਿਯਚਿਤ੍ਤਮੁਪ੍ਪਜ੍ਜਤਿ. ਯਦਾ ਪਨ ਤੇ ‘‘ਦੇਥ ਵਨ੍ਦਥ, ਅਯ੍ਯੇ’’ਤਿ ਵਦਨ੍ਤਿ, ਏਵਂ ਞਾਤਿਜਨੇਨ ਉਸ੍ਸਾਹਿਤਾ ਹੁਤ੍ਵਾ ਹਤ੍ਥਗਤਂ ਦਦਨ੍ਤਿ ਵਾ ਵਨ੍ਦਨ੍ਤਿ ਵਾ, ਤਦਾ ਤੇਸਂ ਚਤੁਤ੍ਥਚਿਤ੍ਤਮੁਪ੍ਪਜ੍ਜਤਿ. ਯਦਾ ਪਨ ਦੇਯ੍ਯਧਮ੍ਮਪ੍ਪਟਿਗ੍ਗਾਹਕਾਦੀਨਂ ਅਸਮ੍ਪਤ੍ਤਿਂ ਵਾ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵਂ ਆਗਮ੍ਮ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾ ਹੋਨ੍ਤਿ, ਤਦਾ ਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤਿ. ਏਵਂ ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ ਕਾਮਾਵਚਰਕੁਸਲਚਿਤ੍ਤਂ ਵੇਦਿਤਬ੍ਬਂ.

੨੬.

ਦਸਪੁਞ੍ਞਕ੍ਰਿਯਾਦੀਨਂ, ਵਸੇਨ ਚ ਬਹੂਨਿਪਿ;

ਏਤਾਨਿ ਪਨ ਚਿਤ੍ਤਾਨਿ, ਭਵਨ੍ਤੀਤਿ ਪਕਾਸਯੇ.

੨੭.

ਸਤ੍ਤਰਸ ਸਹਸ੍ਸਾਨਿ, ਦ੍ਵੇ ਸਤਾਨਿ ਅਸੀਤਿ ਚ;

ਕਾਮਾਵਚਰਪੁਞ੍ਞਾਨਿ, ਭਵਨ੍ਤੀਤਿ ਵਿਨਿਦ੍ਦਿਸੇ.

ਤਂ ਪਨ ਯਥਾਨੁਰੂਪਂ ਕਾਮਾਵਚਰਸੁਗਤਿਯਂ ਭਵਭੋਗਸਮ੍ਪਤ੍ਤਿਂ ਅਭਿਨਿਪ੍ਫਾਦੇਤਿ.

ਇਤਰੇਸੁ ਪਨ ਰੂਪਾਵਚਰਕੁਸਲਚਿਤ੍ਤਂ ਸਵਤ੍ਥੁਕਤੋ ਏਕਵਿਧਂ, ਦ੍ਵੀਸੁ ਭਵੇਸੁ ਉਪ੍ਪਜ੍ਜਨਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਪਟਿਪਦਾਦਿਭੇਦਤੋ ਚਤੁਬ੍ਬਿਧਂ, ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ. ਸੇਯ੍ਯਥਿਦਂ – ਕਾਮਚ੍ਛਨ੍ਦਬ੍ਯਾਪਾਦਥਿਨਮਿਦ੍ਧਉਦ੍ਧਚ੍ਚਕੁਕ੍ਕੁਚ੍ਚਵਿਚਿਕਿਚ੍ਛਾਵਿਪ੍ਪਹੀਨਂ ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ¶ ਪਠਮਂ, ਵਿਤਕ੍ਕਵਿਪ੍ਪਹੀਨਂ ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ¶ ਦੁਤਿਯਂ, ਵਿਤਕ੍ਕਵਿਚਾਰਵਿਪ੍ਪਹੀਨਂ ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਵਿਤਕ੍ਕਵਿਚਾਰਪੀਤਿਵਿਪ੍ਪਹੀਨਂ ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਵਿਤਕ੍ਕਵਿਚਾਰਪੀਤਿਸੁਖਵਿਪ੍ਪਹੀਨਂ ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਦਂ ਪਞ੍ਚਵਿਧਂ ¶ ਰੂਪਾਵਚਰਕੁਸਲਚਿਤ੍ਤਂ ਨਾਮ.

ਤਂ ਪਨ ਯਥਾਸਮ੍ਭਵਂ ਪਥਵੀਕਸਿਣਾਦੀਸੁ ਆਰਮ੍ਮਣੇਸੁ ਪਵਤ੍ਤਿਵਸੇਨ ਅਨੇਕਵਿਧਂ ਹੋਤਿ. ਸਬ੍ਬਂ ਪਨੇਤਂ ਰੂਪਾਵਚਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਯਥਾਨੁਰੂਪਂ ਰੂਪਾਵਚਰੂਪਪਤ੍ਤਿਨਿਪ੍ਫਾਦਕਂ ਹੋਤਿ. ਏਵਂ ਤਾਵ ਰੂਪਾਵਚਰਕੁਸਲਂ ਵੇਦਿਤਬ੍ਬਂ.

ਸੇਸੇਸੁ ਪਨ ਦ੍ਵੀਸੁ ਅਰੂਪਾਵਚਰਕੁਸਲਚਿਤ੍ਤਂ ਤਾਵ ਉਪੇਕ੍ਖਾਵੇਦਨਾਯੋਗਭੇਦਤੋ ਏਕਵਿਧਂ, ਸਵਤ੍ਥੁਕਾਵਤ੍ਥੁਕਭੇਦਤੋ ਦੁਵਿਧਂ, ਹੀਨਮਜ੍ਝਿਮਪਣੀਤਭੇਦਤੋ ਤਿਵਿਧਂ, ਆਰਮ੍ਮਣਭੇਦਤੋ ਚਤੁਬ੍ਬਿਧਂ. ਕਸਿਣੁਗ੍ਘਾਟਿਮਾਕਾਸਂ, ਤਤ੍ਥ ਪਵਤ੍ਤਵਿਞ੍ਞਾਣਂ, ਤਸ੍ਸ ਅਪਗਮੋ, ਆਕਿਞ੍ਚਞ੍ਞਾਯਤਨਨ੍ਤਿ ਇਦਮਸ੍ਸ ਚਤੁਬ੍ਬਿਧਮਾਰਮ੍ਮਣਂ. ਯਥਾਪਟਿਪਾਟਿਯਾ ਏਤਸ੍ਸਾਰਮ੍ਮਣਸ੍ਸ ਭੇਦਤੋ ਚਤੁਬ੍ਬਿਧਂ ਹੋਤਿ. ਸੇਯ੍ਯਥਿਦਂ – ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਦਂ ਚਤੁਬ੍ਬਿਧਂ ਅਰੂਪਾਵਚਰਕੁਸਲਚਿਤ੍ਤਂ ਨਾਮ. ਸਬ੍ਬਂ ਪਨੇਤਂ ਅਰੂਪਾਵਚਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਯਥਾਨੁਰੂਪਂ ਅਰੂਪੂਪਪਤ੍ਤਿਨਿਪ੍ਫਾਦਕਂ ਹੋਤਿ. ਏਵਂ ਅਰੂਪਾਵਚਰਕੁਸਲਚਿਤ੍ਤਂ ਵੇਦਿਤਬ੍ਬਂ.

ਇਤਰਂ ਪਨ ਲੋਕੁਤ੍ਤਰਕੁਸਲਚਿਤ੍ਤਂ ਨਿਬ੍ਬਾਨਾਰਮ੍ਮਣਤੋ ਏਕਵਿਧਂ, ਨਿਯਤਾਨਿਯਤਵਤ੍ਥੁਕਭੇਦਤੋ ਦੁਵਿਧਂ, ਤੀਹਿ ਵਿਮੋਕ੍ਖਮੁਖੇਹਿ ਪਤ੍ਤਬ੍ਬਤੋ ਤਿਵਿਧਂ, ਚਤੁਮਗ੍ਗਯੋਗਭੇਦਤੋ ਚਤੁਬ੍ਬਿਧਂ ¶ . ਸੇਯ੍ਯਥਿਦਂ – ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਸੀਲਬ੍ਬਤਪਰਾਮਾਸਸਞ੍ਞੋਜਨਪ੍ਪਹਾਨਕਰਂ ਸੋਤਾਪਤ੍ਤਿਮਗ੍ਗਚਿਤ੍ਤਂ, ਰਾਗਦੋਸਮੋਹਾਨਂ ਤਨੁਤ੍ਤਕਰਂ ਸਕਦਾਗਾਮਿਮਗ੍ਗਚਿਤ੍ਤਂ, ਕਾਮਰਾਗਬ੍ਯਾਪਾਦਾਨਂ ਨਿਰਵਸੇਸਪ੍ਪਹਾਨਕਰਂ ਅਨਾਗਾਮਿਮਗ੍ਗਚਿਤ੍ਤਂ, ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਪਹਾਨਕਰਂ ਅਰਹਤ੍ਤਮਗ੍ਗਚਿਤ੍ਤਨ੍ਤਿ ਇਦਂ ਚਤੁਬ੍ਬਿਧਂ ਲੋਕੁਤ੍ਤਰਕੁਸਲਚਿਤ੍ਤਂ ਨਾਮ. ਏਕੇਕਂ ਪਨੇਤ੍ਥ ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ ਹੋਤਿ, ਤਸ੍ਮਾ ਵੀਸਤਿਵਿਧਂ ਹੋਤਿ. ਸਬ੍ਬਂ ਪਨੇਤਂ ਲੋਕੁਤ੍ਤਰਭਾਵਨਾਪੁਞ੍ਞਵਸਪ੍ਪਵਤ੍ਤਂ ਮਗ੍ਗਾਨੁਰੂਪਫਲਪ੍ਪਵਤ੍ਤਿਯਾ ਚਤ੍ਤਾਰੋ ਅਰਿਯਪੁਗ੍ਗਲੇ ਅਭਿਨਿਪ੍ਫਾਦੇਤਿ. ਏਵਂ ਲੋਕੁਤ੍ਤਰਕੁਸਲਂ ਵੇਦਿਤਬ੍ਬਂ.

੨੮.

ਕਾਮੇ ¶ ¶ ਅਟ੍ਠੇਵ ਰੂਪੇ ਚ, ਪਞ੍ਚ ਚਤ੍ਤਾਰਿਰੂਪਿਸੁ;

ਚਤ੍ਤਾਰਾਨੁਤ੍ਤਰਾਨੇਵਂ, ਕੁਸਲਾਨੇਕਵੀਸਤਿ.

੨੯.

ਕੁਸਲਾਕੁਸਲਾਪਗਤੇਨ ਸਤਾ,

ਕੁਸਲੇ ਕੁਸਲੇਨ ਚ ਯਂ ਕੁਸਲਂ;

ਚਤੁਭੂਮਿਗਤਂ ਮੁਨਿਨਾ ਵਸਿਨਾ,

ਲਪਿਤਂ ਲਪਿਤਂ ਸਕਲਮ੍ਪਿ ਮਯਾ.

ਅਕੁਸਲਂ ਪਨ ਭੂਮਿਤੋ ਏਕਵਿਧਂ ਕਾਮਾਵਚਰਮੇਵ, ਨਿਯਤਾਨਿਯਤਵਤ੍ਥੁਵਸੇਨ ਚ ਏਕਹੇਤੁਕਦੁਹੇਤੁਕਵਸੇਨ ਚ ਪਟਿਸਨ੍ਧਿਜਨਕਾਜਨਕਵਸੇਨ ਚ ਦੁਵਿਧਂ, ਤੀਹਿ ਵੇਦਨਾਹਿ ਯੋਗਤੋ ਚ ਲੋਭਮੂਲਂ ਦੋਸਮੂਲਂ ਮੋਹਮੂਲਨ੍ਤਿ ਮੂਲਤੋ ਚ ਤਿਵਿਧਂ ਹੋਤਿ. ਤਤ੍ਥ ਲੋਭਮੂਲਂ ਪਨ ਸੋਮਨਸ੍ਸੁਪੇਕ੍ਖਾਦਿਟ੍ਠਿਪ੍ਪਯੋਗਭੇਦਤੋ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਦਿਟ੍ਠਿਗਤਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਸੋਮਨਸ੍ਸਸਹਗਤਂ ਦਿਟ੍ਠਿਗਤਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਦਿਟ੍ਠਿਗਤਸਮ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਂ, ਉਪੇਕ੍ਖਾਸਹਗਤਂ ਦਿਟ੍ਠਿਗਤਵਿਪ੍ਪਯੁਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਨ੍ਤਿ.

ਯਦਾ ¶ ਹਿ ‘‘ਨਤ੍ਥਿ ਕਾਮੇਸੁ ਆਦੀਨਵੋ’’ਤਿਆਦਿਨਾ ਨਯੇਨ ਮਿਚ੍ਛਾਦਿਟ੍ਠਿਂ ਪੁਰਕ੍ਖਤ੍ਵਾ ਕੇਵਲਂ ਹਟ੍ਠਤੁਟ੍ਠੋ ਕਾਮੇ ਵਾ ਪਰਿਭੁਞ੍ਜਤਿ, ਦਿਟ੍ਠਮਙ੍ਗਲਾਦੀਨਿ ਵਾ ਸਾਰਤੋ ਪਚ੍ਚੇਤਿ ਸਭਾਵਤਿਕ੍ਖੇਨੇਵ ਅਨੁਸ੍ਸਾਹਿਤੇਨ ਚਿਤ੍ਤੇਨ, ਤਦਾਸ੍ਸ ਪਠਮਂ ਅਕੁਸਲਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਮਨ੍ਦੇਨ ਸਮੁਸ੍ਸਾਹਿਤੇਨ, ਤਦਾ ਦੁਤਿਯਂ. ਯਦਾ ਮਿਚ੍ਛਾਦਿਟ੍ਠਿਂ ਅਪੁਰਕ੍ਖਤ੍ਵਾ ਕੇਵਲਂ ਹਟ੍ਠਤੁਟ੍ਠੋ ਮੇਥੁਨਂ ਧਮ੍ਮਂ ਵਾ ਪਰਿਭੁਞ੍ਜਤਿ, ਪਰਸਮ੍ਪਤ੍ਤਿਂ ਵਾ ਅਭਿਜ੍ਝਾਯਤਿ, ਪਰਸ੍ਸ ਭਣ੍ਡਂ ਵਾ ਹਰਤਿ ਸਭਾਵਤਿਕ੍ਖੇਨੇਵ ਅਨੁਸ੍ਸਾਹਿਤੇਨ ਚਿਤ੍ਤੇਨ, ਤਦਾ ਤਤਿਯਂ. ਯਦਾ ਮਨ੍ਦੇਨ ਸਮੁਸ੍ਸਾਹਿਤੇਨ, ਤਦਾ ਚਤੁਤ੍ਥਂ ਉਪ੍ਪਜ੍ਜਤਿ. ਯਦਾ ਪਨ ਕਾਮਾਨਂ ਵਾ ਅਸਮ੍ਪਤ੍ਤਿਂ ਆਗਮ੍ਮ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵੇਨ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾ ਹੋਨ੍ਤਿ, ਤਦਾ ਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤੀਤਿ. ਏਵਂ ਸੋਮਨਸ੍ਸੁਪੇਕ੍ਖਾਦਿਟ੍ਠਿਪ੍ਪਯੋਗਭੇਦਤੋ ਅਟ੍ਠਵਿਧਂ ਲੋਭਮੂਲਂ ਵੇਦਿਤਬ੍ਬਂ.

ਦੋਸਮੂਲਂ ਪਨ ਏਕਨ੍ਤਸਵਤ੍ਥੁਕਤੋ ਏਕਵਿਧਂ, ਅਸਙ੍ਖਾਰਸਸਙ੍ਖਾਰਭੇਦਤੋ ਦੁਵਿਧਂ ਦੋਮਨਸ੍ਸਸਹਗਤਂ ਪਟਿਘਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਨ੍ਤਿ. ਅਸ੍ਸ ਪਨ ਪਾਣਾਤਿਪਾਤਾਦੀਸੁ ਤਿਕ੍ਖਮਨ੍ਦਪ੍ਪਵਤ੍ਤਿਕਾਲੇ ਉਪ੍ਪਤ੍ਤਿ ਵੇਦਿਤਬ੍ਬਾ.

ਮੋਹਮੂਲਮ੍ਪਿ ¶ ¶ ਵਿਚਿਕਿਚ੍ਛੁਦ੍ਧਚ੍ਚਯੋਗਤੋ ਦੁਵਿਧਂ ਹੋਤਿ ਉਪੇਕ੍ਖਾਸਹਗਤਂ ਵਿਚਿਕਿਚ੍ਛਾਸਮ੍ਪਯੁਤ੍ਤਂ, ਉਪੇਕ੍ਖਾਸਹਗਤਂ ਉਦ੍ਧਚ੍ਚਸਮ੍ਪਯੁਤ੍ਤਨ੍ਤਿ. ਤਸ੍ਸ ਅਸਨ੍ਨਿਟ੍ਠਾਨਵਿਕ੍ਖੇਪਕਾਲੇਸੁ ਪਵਤ੍ਤਿ ਵੇਦਿਤਬ੍ਬਾਤਿ.

ਏਵਂ ਤਾਵ ਦ੍ਵਾਦਸਵਿਧਂ ਅਕੁਸਲਚਿਤ੍ਤਂ ਵੇਦਿਤਬ੍ਬਂ, ਸਬ੍ਬਂ ਪਨੇਤਂ ਯਥਾਨੁਰੂਪਂ ਅਪਾਯੇਸੁ ਉਪਪਤ੍ਤਿਯਾ, ਸੁਗਤਿਯਮ੍ਪਿ ਦੁਕ੍ਖਵਿਸੇਸਸ੍ਸ ਅਭਿਨਿਪ੍ਫਾਦਕਂ ਹੋਤਿ.

੩੦.

ਲੋਭਮੂਲਵਸੇਨਟ੍ਠ, ਦੋਸਮੂਲਵਸਾ ਦੁਵੇ;

ਮੋਹਮੂਲਵਸੇਨ ਦ੍ਵੇ, ਏਵਂ ਦ੍ਵਾਦਸਧਾ ਸਿਯੁਂ.

੩੧.

ਪਾਪਾਪਾਪੇਸ੍ਵਪਾਪੇਨ ¶ , ਯਂ ਵੁਤ੍ਤਂ ਪਾਪਮਾਨਸਂ;

ਪਾਪਾਪਾਪਪ੍ਪਹੀਨੇਨ, ਤਂ ਮਯਾ ਸਮੁਦਾਹਟਂ.

ਇਤਰਂ ਪਨ ਅਬ੍ਯਾਕਤਮਵਿਪਾਕਾਰਹਤੋ ਏਕਵਿਧਂ ਹੋਤਿ, ਜਾਤਿਭੇਦਤੋ ਦੁਵਿਧਂ ਵਿਪਾਕਚਿਤ੍ਤਂ ਕਿਰਿਯਚਿਤ੍ਤਨ੍ਤਿ. ਤਤ੍ਥ ਵਿਪਾਕਚਿਤ੍ਤਂ ਭੂਮਿਭੇਦਤੋ ਚਤੁਬ੍ਬਿਧਂ ਕਾਮਾਵਚਰਂ ਰੂਪਾਵਚਰਂ ਅਰੂਪਾਵਚਰਂ ਲੋਕੁਤ੍ਤਰਨ੍ਤਿ. ਤਤ੍ਥ ਕਾਮਾਵਚਰਂ ਦੁਵਿਧਂ ਕੁਸਲਵਿਪਾਕਂ ਅਕੁਸਲਵਿਪਾਕਨ੍ਤਿ. ਕੁਸਲਵਿਪਾਕਂ ਦੁਵਿਧਂ ਸਹੇਤੁਕਮਹੇਤੁਕਞ੍ਚੇਤਿ.

ਤਤ੍ਥ ਸਹੇਤੁਕਵਿਪਾਕਚਿਤ੍ਤਂ ਸਕਕੁਸਲਂ ਵਿਯ ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਅਟ੍ਠਵਿਧਂ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਸੋਮਨਸ੍ਸਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਂ, ਸਸਙ੍ਖਾਰਨ੍ਤਿ ਇਦਂ ਅਟ੍ਠਵਿਧਂ ਸਹੇਤੁਕਵਿਪਾਕਂ ਨਾਮ.

ਯਥਾ ਪਨਸ੍ਸ ਕੁਸਲਂ ਦਾਨਾਦਿਵਸੇਨ ਛਸੁ ਆਰਮ੍ਮਣੇਸੁ ਪਵਤ੍ਤਤਿ, ਨ ਇਦਂ ਤਥਾ. ਇਦਂ ਹਿ ਪਟਿਸਨ੍ਧਿਭਵਙ੍ਗਚੁਤਿਤਦਾਰਮ੍ਮਣਵਸੇਨ ਪਰਿਤ੍ਤਧਮ੍ਮਪਰਿਯਾਪਨ੍ਨੇਸੁਯੇਵ ਛਸੁ ਆਰਮ੍ਮਣੇਸੁ ਪਵਤ੍ਤਤਿ. ਸਮ੍ਪਯੁਤ੍ਤਧਮ੍ਮਾਨਞ੍ਚ ਵਿਸੇਸੇ ਅਸਤਿਪਿ ਆਦਾਸਤਲਾਦੀਸੁ ਮੁਖਨਿਮਿਤ੍ਤਂ ਵਿਯ ਨਿਰੁਸ੍ਸਾਹਂ ਵਿਪਾਕਂ, ਮੁਖਂ ਵਿਯ ਸਉਸ੍ਸਾਹਂ ਕੁਸਲਨ੍ਤਿ ਵੇਦਿਤਬ੍ਬਂ. ਇਮੇਸਂ ਪਨ ਵਿਪਚ੍ਚਨਟ੍ਠਾਨਂ ਵੇਦਿਤਬ੍ਬਂ. ਇਮਾਨਿ ਹਿ ਪਟਿਸਨ੍ਧਿਭਵਙ੍ਗਚੁਤਿਤਦਾਰਮ੍ਮਣਾਨਿ ਹੁਤ੍ਵਾ ਵਿਪਚ੍ਚਨ੍ਤਿ.

੩੨.

ਕਾਮਾਵਚਰਦੇਵਾਨਂ ¶ , ਮਨੁਸ੍ਸਾਨਂ ਇਮੇ ਪਨ;

ਦੁਹੇਤੁਕਤਿਹੇਤੂਨਂ, ਭਵਨ੍ਤਿ ਪਟਿਸਨ੍ਧਿਯੋ.

੩੩.

ਤਤੋ ਪਵਤ੍ਤਿਯਂ ਹੁਤ੍ਵਾ, ਭਵਙ੍ਗਂ ਯਾਵਤਾਯੁਕਂ;

ਬਲਵਾਰਮ੍ਮਣੇ ਹੁਤ੍ਵਾ, ਤਦਾਰਮ੍ਮਣਮੇਵ ਚ.

੩੪.

ਤਤੋ ¶ ¶ ਮਰਣਕਾਲਸ੍ਮਿਂ, ਚੁਤਿ ਹੁਤ੍ਵਾ ਪਵਤ੍ਤਰੇ;

ਏਵਂ ਚਤੂਸੁ ਠਾਨੇਸੁ, ਵਿਪਚ੍ਚਨ੍ਤੀਤਿ ਨਿਦ੍ਦਿਸੇ.

੩੫.

ਸਭੂਮਿਕੁਸਲੇਹੇਵ, ਮਹਾਪਾਕਾ ਸਮਾ ਵਿਨਾ;

ਕਮ੍ਮਦ੍ਵਾਰਞ੍ਚ ਕਮ੍ਮਞ੍ਚ, ਪੁਞ੍ਞਾਨਂ ਕ੍ਰਿਯਵਤ੍ਥੁਕਂ.

੩੬.

ਅਵਿਞ੍ਞਤ੍ਤਿਜਨਤ੍ਤਾ ਹਿ, ਅਵਿਪਾਕਸਭਾਵਤੋ;

ਅਪ੍ਪਵਤ੍ਤਨਤੋ ਚੇਵ, ਪਾਕਾ ਪੁਞ੍ਞੇਹਿ ਨੋ ਸਮਾ.

੩੭.

ਪਰਿਤ੍ਤਾਰਮ੍ਮਣਤ੍ਤਾ ਹਿ, ਤੇਸਮੇਕਨ੍ਤਤੋ ਪਨ;

ਕਰੁਣਾਮੁਦਿਤਾ ਤੇਸੁ, ਨ ਜਾਯਨ੍ਤਿ ਕਦਾਚਿਪਿ.

੩੮.

ਤਥਾ ਵਿਰਤਿਯੋ ਤਿਸ੍ਸੋ, ਨ ਪਨੇਤੇਸੁ ਜਾਯਰੇ;

ਪਞ੍ਚ ਸਿਕ੍ਖਾਪਦਾ ਵੁਤ੍ਤਾ, ਕੁਸਲਾਤਿ ਹਿ ਸਤ੍ਥੁਨਾ.

੩੯.

ਤਥਾਧਿਪਤਿਨੋਪੇਤ੍ਥ, ਨ ਸਨ੍ਤੀਤਿ ਵਿਨਿਦ੍ਦਿਸੇ;

ਛਨ੍ਦਾਦੀਨਿ ਧੁਰਂ ਕਤ੍ਵਾ, ਅਨੁਪ੍ਪਜ੍ਜਨਤੋ ਪਨ.

੪੦.

ਅਸਙ੍ਖਾਰਸਸਙ੍ਖਾਰ-ਵਿਧਾਨਂ ਪਨ ਪੁਞ੍ਞਤੋ;

ਞੇਯ੍ਯਂ ਪਚ੍ਚਯਤੋ ਚੇਵ, ਵਿਪਾਕੇਸੁ ਚ ਵਿਞ੍ਞੁਨਾ.

੪੧.

ਹੀਨਾਦੀਨਂ ਵਿਪਾਕਤ੍ਤਾ, ਪੁਞ੍ਞਾਨਂ ਪੁਞ੍ਞਵਾਦਿਨਾ;

ਹੀਨਾਦਯੋ ਭਵਨ੍ਤੀਤਿ, ਵਿਪਾਕਾ ਪਰਿਦੀਪਿਤਾ.

੪੨.

ਇਦਂ ਅਟ੍ਠਵਿਧਂ ਚਿਤ੍ਤਂ, ਏਕਨ੍ਤੇਨ ਸਵਤ੍ਥੁਕਂ;

ਜਾਯਤੇ ਕਾਮਲੋਕਸ੍ਮਿਂ, ਨ ਪਨਞ੍ਞਤ੍ਥ ਜਾਯਤੇ.

ਏਵਂ ਤਾਵ ਸਹੇਤੁਕਵਿਪਾਕਚਿਤ੍ਤਂ ਵੇਦਿਤਬ੍ਬਂ.

ਅਹੇਤੁਕਵਿਪਾਕਚਿਤ੍ਤਂ ¶ ਪਨ ਅਲੋਭਾਦਿਹੇਤੁਵਿਰਹਿਤਂ ਉਪੇਕ੍ਖਾਸਹਗਤਂ ਚਕ੍ਖੁਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਸੋਤਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਘਾਨਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਜਿਵ੍ਹਾਵਿਞ੍ਞਾਣਂ, ਸੁਖਸਹਗਤਂ ਕਾਯਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਧਾਤੁਸਮ੍ਪਟਿਚ੍ਛਨਂ, ਸੋਮਨਸ੍ਸਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਂ ¶ , ਉਪੇਕ੍ਖਾਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਨ੍ਤਿ ਇਦਂ ਪਨ ਅਟ੍ਠਵਿਧਂ ਅਹੇਤੁਕਵਿਪਾਕਚਿਤ੍ਤਂ ਨਾਮ.

ਇਦਂ ਪਨ ਅਟ੍ਠਵਿਧਂ ਨਿਯਤਵਤ੍ਥੁਕਤੋ ਏਕਵਿਧਂ, ਨਿਯਤਾਨਿਯਤਾਰਮ੍ਮਣਤੋ ਦੁਵਿਧਂ. ਤਤ੍ਥ ਵਿਞ੍ਞਾਣਪਞ੍ਚਕਂ ਨਿਯਤਾਰਮ੍ਮਣਂ, ਸੇਸਤ੍ਤਯਂ ਅਨਿਯਤਾਰਮ੍ਮਣਂ. ਸੁਖਸੋਮਨਸ੍ਸੁਪੇਕ੍ਖਾਵੇਦਨਾਯੋਗਤੋ ਤਿਵਿਧਂ. ਤਤ੍ਥ ਸੁਖਸਹਗਤਂ ਕਾਯਵਿਞ੍ਞਾਣਂ, ਦ੍ਵਿਟ੍ਠਾਨਿਕਂ ਸਨ੍ਤੀਰਣਂ ਸੋਮਨਸ੍ਸੁਪੇਕ੍ਖਾਯੁਤ੍ਤਂ, ਸੇਸਮੁਪੇਕ੍ਖਾਯੁਤ੍ਤਨ੍ਤਿ.

ਦਿਟ੍ਠਾਰਮ੍ਮਣਸੁਤਾਰਮ੍ਮਣਮੁਤਾਰਮ੍ਮਣਦਿਟ੍ਠਸੁਤਮੁਤਾਰਮ੍ਮਣਦਿਟ੍ਠ-ਸੁਤਮੁਤਵਿਞ੍ਞਾਤਾਰਮ੍ਮਣਵਸੇਨ ਪਞ੍ਚਵਿਧਂ. ਤਤ੍ਥ ਦਿਟ੍ਠਾਰਮ੍ਮਣਂ ਚਕ੍ਖੁਵਿਞ੍ਞਾਣਂ, ਸੁਤਾਰਮ੍ਮਣਂ ¶ ਸੋਤਵਿਞ੍ਞਾਣਂ, ਮੁਤਾਰਮ੍ਮਣਂ ਘਾਨਜਿਵ੍ਹਾਕਾਯਵਿਞ੍ਞਾਣਤ੍ਤਯਂ, ਦਿਟ੍ਠਸੁਤਮੁਤਾਰਮ੍ਮਣਂ ਮਨੋਧਾਤੁਸਮ੍ਪਟਿਚ੍ਛਨਂ, ਦਿਟ੍ਠਸੁਤਮੁਤਵਿਞ੍ਞਾਤਾਰਮ੍ਮਣਂ ਸੇਸਮਨੋਵਿਞ੍ਞਾਣਧਾਤੁਦ੍ਵਯਨ੍ਤਿ.

ਵਤ੍ਥੁਤੋ ਛਬ੍ਬਿਧਂ. ਕਥਂ? ਚਕ੍ਖੁਵਿਞ੍ਞਾਣਸ੍ਸ ਚਕ੍ਖੁਮੇਵ ਵਤ੍ਥੁ, ਤਥਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਂ ਸੋਤਘਾਨਜਿਵ੍ਹਾਕਾਯਵਤ੍ਥੁ, ਅਵਸੇਸਤ੍ਤਯਸ੍ਸ ਹਦਯਵਤ੍ਥੁਮੇਵਾਤਿ.

ਆਰਮ੍ਮਣਤੋ ਸਤ੍ਤਵਿਧਂ ਹੋਤਿ. ਕਥਂ? ਰੂਪਾਰਮ੍ਮਣਮੇਵ ਚਕ੍ਖੁਵਿਞ੍ਞਾਣਂ, ਤਥਾ ਸਦ੍ਦਗਨ੍ਧਰਸਫੋਟ੍ਠਬ੍ਬਾਰਮ੍ਮਣਾਨਿ ਪਟਿਪਾਟਿਯਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਿ, ਰੂਪਾਦਿਪਞ੍ਚਾਰਮ੍ਮਣਾ ਮਨੋਧਾਤੁ, ਸੇਸਮਨੋਵਿਞ੍ਞਾਣਧਾਤੁਦ੍ਵਯਂ ਛਲ਼ਾਰਮ੍ਮਣਨ੍ਤਿ.

ਤਂ ਸਬ੍ਬਂ ਪਨ ਅਹੇਤੁਕਵਿਪਾਕਚਿਤ੍ਤਂ ਕਿਚ੍ਚਤੋ ਅਟ੍ਠਵਿਧਂ ਹੋਤਿ. ਕਥਂ? ਦਸ੍ਸਨਕਿਚ੍ਚਂ ਚਕ੍ਖੁਵਿਞ੍ਞਾਣਂ, ਸਵਨਘਾਯਨਸਾਯਨਫੁਸਨਸਮ੍ਪਟਿਚ੍ਛਨਸਨ੍ਤੀਰਣਤਦਾਰਮ੍ਮਣਕਿਚ੍ਚਾਨਿ ਅਵਸੇਸਾਨਿ.

ਤਤ੍ਥ ¶ ਚਕ੍ਖੁਤੋ ਪਵਤ੍ਤਂ ਵਿਞ੍ਞਾਣਂ, ਚਕ੍ਖੁਮ੍ਹਿ ਸਨ੍ਨਿਸ੍ਸਿਤਂ ਵਿਞ੍ਞਾਣਨ੍ਤਿ ਵਾ ਚਕ੍ਖੁਵਿਞ੍ਞਾਣਂ, ਤਥਾ ਸੋਤਵਿਞ੍ਞਾਣਾਦੀਨਿ. ਤਤ੍ਥ ਚਕ੍ਖੁਸਨ੍ਨਿਸ੍ਸਿਤਰੂਪਵਿਜਾਨਨਲਕ੍ਖਣਂ ਚਕ੍ਖੁਵਿਞ੍ਞਾਣਂ ¶ , ਰੂਪਮਤ੍ਤਾਰਮ੍ਮਣਰਸਂ, ਰੂਪਾਭਿਮੁਖਭਾਵਪਚ੍ਚੁਪਟ੍ਠਾਨਂ, ਰੂਪਾਰਮ੍ਮਣਾਯ ਕਿਰਿਯਾਮਨੋਧਾਤੁਯਾ ਅਪਗਮਪਦਟ੍ਠਾਨਂ. ਤਥਾ ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਾਨਿ ਸੋਤਾਦਿਸਨ੍ਨਿਸ੍ਸਿਤਸਦ੍ਦਾਦਿਵਿਜਾਨਨਲਕ੍ਖਣਾਨਿ, ਸਦ੍ਦਾਦਿਮਤ੍ਤਾਰਮ੍ਮਣਰਸਾਨਿ, ਸਦ੍ਦਾਦੀਸੁ ਅਭਿਮੁਖਭਾਵਪਚ੍ਚੁਪਟ੍ਠਾਨਾਨਿ, ਸਦ੍ਦਾਦਿਆਰਮ੍ਮਣਾਨਂ ਕਿਰਿਯਾਮਨੋਧਾਤੂਨਂ ਅਪਗਮਪਦਟ੍ਠਾਨਾਨਿ. ਮਨੋਧਾਤੁਸਮ੍ਪਟਿਚ੍ਛਨਂ ਪਨ ਚਕ੍ਖੁਵਿਞ੍ਞਾਣਾਦੀਨਂ ਅਨਨ੍ਤਰਾ ਰੂਪਾਦਿਵਿਜਾਨਨਲਕ੍ਖਣਂ, ਰੂਪਾਦਿਸਮ੍ਪਟਿਚ੍ਛਨਰਸਂ, ਤਥਾਭਾਵਪਚ੍ਚੁਪਟ੍ਠਾਨਂ, ਚਕ੍ਖੁਵਿਞ੍ਞਾਣਾਦੀਨਂ ਅਪਗਮਪਦਟ੍ਠਾਨਂ.

ਸੇਸਾ ਪਨ ਦ੍ਵੇ ਅਹੇਤੁਕਮਨੋਵਿਞ੍ਞਾਣਧਾਤੁਯੋ ਛਲ਼ਾਰਮ੍ਮਣਵਿਜਾਨਨਲਕ੍ਖਣਾ, ਸਨ੍ਤੀਰਣਾਦਿਰਸਾ, ਤਥਾਭਾਵਪਚ੍ਚੁਪਟ੍ਠਾਨਾ, ਹਦਯਵਤ੍ਥੁਪਦਟ੍ਠਾਨਾਤਿ ਵੇਦਿਤਬ੍ਬਾ. ਤਤ੍ਥ ਪਠਮਾ ਏਕਨ੍ਤਮਿਟ੍ਠਾਰਮ੍ਮਣੇ ਪਵਤ੍ਤਿਸਬ੍ਭਾਵਤੋ ਸੋਮਨਸ੍ਸਯੁਤ੍ਤਾਵ ਹੁਤ੍ਵਾ ਪਞ੍ਚਦ੍ਵਾਰੇ ਸਨ੍ਤੀਰਣਕਿਚ੍ਚਂ ਸਾਧਯਮਾਨਾ ਪਞ੍ਚਸੁ ਦ੍ਵਾਰੇਸੁ ਠਤ੍ਵਾ ਵਿਪਚ੍ਚਤਿ, ਛਸੁ ਪਨ ਦ੍ਵਾਰੇਸੁ ਬਲਵਾਰਮ੍ਮਣੇ ਤਦਾਰਮ੍ਮਣਂ ਹੁਤ੍ਵਾ ਵਿਪਚ੍ਚਤਿ. ਦੁਤਿਯਾ ¶ ਪਨ ਇਟ੍ਠਮਜ੍ਝਤ੍ਤਾਰਮ੍ਮਣੇ ਪਵਤ੍ਤਿਸਬ੍ਭਾਵਤੋ ਉਪੇਕ੍ਖਾਸਹਗਤਾ ਹੁਤ੍ਵਾ ਸਨ੍ਤੀਰਣਤਦਾਰਮ੍ਮਣਪਟਿਸਨ੍ਧਿਭਵਙ੍ਗਚੁਤਿਵਸੇਨ ਪਵਤ੍ਤਨਤੋ ਪਞ੍ਚਸੁ ਠਾਨੇਸੁ ਵਿਪਚ੍ਚਤਿ. ਕਥਂ? ਮਨੁਸ੍ਸਲੋਕੇ ਤਾਵ ਜਚ੍ਚਨ੍ਧਜਚ੍ਚਬਧਿਰਜਚ੍ਚਜਲ਼ਜਚ੍ਚੁਮ੍ਮਤ੍ਤਕਪਣ੍ਡਕਉਭਤੋਬ੍ਯਞ੍ਜਨਨਪੁਂਸਕਾਦੀਨਂ ਪਟਿਸਨ੍ਧਿਗ੍ਗਹਣਕਾਲੇ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਤਿ. ਪਟਿਸਨ੍ਧਿਯਾ ਵੀਤਿਵਤ੍ਤਾਯ ਪਵਤ੍ਤਿਯਂ ਯਾਵਤਾਯੁਕਂ ਭਵਙ੍ਗਂ ਹੁਤ੍ਵਾ ਵਿਪਚ੍ਚਤਿ. ਇਟ੍ਠਮਜ੍ਝਤ੍ਤੇ ਪਞ੍ਚਾਰਮ੍ਮਣਵੀਥਿਯਾ ਸਨ੍ਤੀਰਣਂ ਹੁਤ੍ਵਾ, ਬਲਵਾਰਮ੍ਮਣੇ ਛਦ੍ਵਾਰੇ ਤਦਾਰਮ੍ਮਣਂ ਹੁਤ੍ਵਾ, ਮਰਣਕਾਲੇ ਚੁਤਿ ਹੁਤ੍ਵਾਤਿ ਇਮੇਸੁ ਪਨ ਪਞ੍ਚਸੁ ਠਾਨੇਸੁ ਵਿਪਚ੍ਚਤੀਤਿ. ਏਵਂ ਤਾਵ ਅਹੇਤੁਕਵਿਪਾਕਚਿਤ੍ਤਾਨਿ ਵੇਦਿਤਬ੍ਬਾਨਿ.

੪੩.

ਕਾਮਾਵਚਰਪੁਞ੍ਞਸ੍ਸ ¶ , ਵਿਪਾਕਾ ਹੋਨ੍ਤਿ ਸੋਲ਼ਸ;

ਤਂ ਤਿਹੇਤੁਕਪੁਞ੍ਞਸ੍ਸ, ਵਸੇਨ ਪਰਿਦੀਪਯੇ.

ਇਦਾਨਿ ਰੂਪਾਵਚਰਵਿਪਾਕਚਿਤ੍ਤਾਨਿ ਵੁਚ੍ਚਨ੍ਤਿ. ਤਾਨਿ ਨਿਯਤਵਤ੍ਥੁਕਤੋ ਏਕਵਿਧਾਨਿ, ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਾਨਿ. ਕਥਂ? ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਠਮਂ, ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਦੁਤਿਯਂ, ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਮਾਨਿ ਪਞ੍ਚਪਿ ਰੂਪਾਵਚਰਵਿਪਾਕਚਿਤ੍ਤਾਨਿ ਉਪਪਤ੍ਤਿਯਂ ਪਟਿਸਨ੍ਧਿਭਵਙ੍ਗਚੁਤਿਵਸੇਨ ਪਵਤ੍ਤਨ੍ਤਿ.

ਇਦਾਨਿ ¶ ਅਰੂਪਾਵਚਰਵਿਪਾਕਚਿਤ੍ਤਾਨਿ ਵੁਚ੍ਚਨ੍ਤਿ. ਤਾਨਿ ਸਕਕੁਸਲਾਨਿ ਵਿਯ ਆਰਮ੍ਮਣਭੇਦਤੋ ਚਤੁਬ੍ਬਿਧਾਨਿ ਹੋਨ੍ਤਿ. ਕਥਂ? ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਮਾਨਿ ਚਤ੍ਤਾਰਿ ਅਰੂਪਾਵਚਰਵਿਪਾਕਚਿਤ੍ਤਾਨਿ.

੪੪.

ਕੁਸਲਾਨੁਗਤਂ ਕਤ੍ਵਾ, ਭਾਜਿਤਂ ਕਿਂ ਮਹਗ੍ਗਤਂ;

ਕਾਮਾਵਚਰਪੁਞ੍ਞਂਵ, ਨਾਸਮਾਨਫਲਂ ਯਤੋ.

੪੫.

ਅਤ੍ਤਨੋ ਕੁਸਲੇਹੇਵ, ਸਮਾਨਂ ਸਬ੍ਬਥਾ ਇਦਂ;

ਗਜਾਦੀਨਂ ਯਥਾ ਛਾਯਾ, ਗਜਾਦਿਸਦਿਸਾ ਤਥਾ.

੪੬.

ਕਾਮਾਵਚਰਪੁਞ੍ਞਂਵ, ਨਾਪਰਾਪਰਿਯਵੇਦਨਂ;

ਝਾਨਾ ਅਪਰਿਹੀਨਸ੍ਸ, ਸਤ੍ਤਸ੍ਸ ਭਵਗਾਮਿਨੋ.

੪੭.

ਕੁਸਲਾਨਨ੍ਤਰਂਯੇਵ ¶ , ਫਲਂ ਉਪ੍ਪਜ੍ਜਤੀਤਿ ਚ;

ਞਾਪਨਤ੍ਥਂ ਪਨੇਤਸ੍ਸ, ਕੁਸਲਾਨੁਗਤਂ ਕਤਂ.

੪੮.

ਪਟਿਪ੍ਪਦਾਕ੍ਕਮੋ ਚੇਵ, ਹੀਨਾਦੀਨਞ੍ਚ ਭੇਦਤੋ;

ਝਾਨਾਗਮਨਤੋ ਚੇਤ੍ਥ, ਵੇਦਿਤਬ੍ਬੋ ਵਿਭਾਵਿਨਾ.

੪੯.

ਅਭਾਵੋਧਿਪਤੀਨਞ੍ਚ ¶ , ਅਯਮੇਵ ਵਿਸੇਸਕੋ;

ਸੇਸਂ ਸਬ੍ਬਂ ਚ ਸੇਸੇਨ, ਕੁਸਲੇਨ ਸਮਂ ਮਤਂ. –

ਏਵਂ ਰੂਪਾਵਚਰਾਰੂਪਾਵਚਰਵਿਪਾਕਾ ਵੇਦਿਤਬ੍ਬਾ.

ਇਦਾਨਿ ਲੋਕੁਤ੍ਤਰਵਿਪਾਕਚਿਤ੍ਤਾਨਿ ਹੋਨ੍ਤਿ. ਤਾਨਿ ਚਤੁਮਗ੍ਗਯੁਤ੍ਤਚਿਤ੍ਤਫਲਤ੍ਤਾ ਚਤੁਬ੍ਬਿਧਾਨਿ ਹੋਨ੍ਤਿ. ਕਥਂ? ਸੋਤਾਪਤ੍ਤਿਮਗ੍ਗਫਲਚਿਤ੍ਤਂ, ਸਕਦਾਗਾਮਿਮਗ੍ਗਫਲਚਿਤ੍ਤਂ, ਅਨਾਗਾਮਿਮਗ੍ਗਫਲਚਿਤ੍ਤਂ, ਅਰਹਤ੍ਤਮਗ੍ਗਫਲਚਿਤ੍ਤਨ੍ਤਿ. ਏਵਂ ਪਨੇਤ੍ਥ ਏਕੇਕਂ ਝਾਨਙ੍ਗਯੋਗਭੇਦਤੋ ਪਞ੍ਚਵਿਧਂ, ਪੁਨ ਮਗ੍ਗਵੀਥਿਫਲਸਮਾਪਤ੍ਤਿਵਸੇਨ ਪਵਤ੍ਤਿਤੋ ਦੁਵਿਧਂ. ਏਵਂ ਲੋਕੁਤ੍ਤਰਕੁਸਲਵਿਪਾਕਚਿਤ੍ਤਾਨਿ ਵੇਦਿਤਬ੍ਬਾਨਿ.

੫੦.

ਸੁਞ੍ਞਤਂ ¶ ਅਨਿਮਿਤ੍ਤਨ੍ਤਿ, ਤਥਾਪਣਿਹਿਤਨ੍ਤਿਪਿ;

ਏਤਾਨਿ ਤੀਣਿ ਨਾਮਾਨਿ, ਮਗ੍ਗਸ੍ਸਾਨਨ੍ਤਰੇ ਫਲੇ.

੫੧.

ਲਬ੍ਭਨ੍ਤਿ ਪਰਭਾਗਸ੍ਮਿਂ, ਵਲ਼ਞ੍ਜਨਫਲੇਸੁ ਨ;

ਵਿਪਸ੍ਸਨਾਵਸੇਨੇਵ, ਤਾਨਿ ਨਾਮਾਨਿ ਲਬ੍ਭਰੇ.

੫੨.

ਹੋਨ੍ਤਿ ਸਾਧਿਪਤੀਨੇਵ, ਲੋਕੁਤ੍ਤਰਫਲਾਨਿ ਤੁ;

ਵਿਪਾਕੇਧਿਪਤੀ ਨਤ੍ਥਿ, ਠਪੇਤ੍ਵਾ ਤੁ ਅਨਾਸਵੇ.

੫੩.

ਅਤ੍ਤਨੋ ਮਗ੍ਗਭਾਵੇਨ, ਮਗ੍ਗੋ ‘‘ਮਗ੍ਗੋ’’ਤਿ ਵੁਚ੍ਚਤਿ;

ਫਲਂ ਮਗ੍ਗਮੁਪਾਦਾਯ, ਮਗ੍ਗੋ ਨਾਮਾਤਿ ਵੁਚ੍ਚਤਿ. –

ਏਵਂ ਲੋਕੁਤ੍ਤਰਵਿਪਾਕਾ ਵੇਦਿਤਬ੍ਬਾ.

ਇਦਾਨਿ ਸਤ੍ਤਾਕੁਸਲਵਿਪਾਕਾਨਿ ਵੁਚ੍ਚਨ੍ਤਿ. ਅਕੁਸਲਵਿਪਾਕਂ ਉਪੇਕ੍ਖਾਸਹਗਤਂ ਚਕ੍ਖੁਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਸੋਤਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਘਾਨਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਜਿਵ੍ਹਾਵਿਞ੍ਞਾਣਂ, ਦੁਕ੍ਖਸਹਗਤਂ ਕਾਯਵਿਞ੍ਞਾਣਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਧਾਤੁਸਮ੍ਪਟਿਚ੍ਛਨਂ, ਉਪੇਕ੍ਖਾਸਹਗਤਂ ਅਹੇਤੁਕਮਨੋਵਿਞ੍ਞਾਣਧਾਤੁਸਨ੍ਤੀਰਣਨ੍ਤਿ ਇਮਾਨਿ ਸਤ੍ਤ ਅਕੁਸਲਵਿਪਾਕਚਿਤ੍ਤਾਨਿ.

ਏਤ੍ਥ ¶ ਪਨ ਉਪੇਕ੍ਖਾਸਹਗਤਾਹੇਤੁਕਮਨੋਵਿਞ੍ਞਾਣਧਾਤੁ ਏਕਾਦਸਵਿਧੇਨਾਪਿ ਅਕੁਸਲਚਿਤ੍ਤੇਨ ਕਮ੍ਮੇ ਆਯੂਹਿਤੇ ਕਮ੍ਮਕਮ੍ਮਨਿਮਿਤ੍ਤਗਤਿਨਿਮਿਤ੍ਤੇਸੁ ਅਞ੍ਞਤਰਂ ਆਰਮ੍ਮਣਂ ਕਤ੍ਵਾ ਚਤੂਸੁ ਅਪਾਯੇਸੁ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਤਿ, ਪਟਿਸਨ੍ਧਿਯਾ ਵੀਤਿਵਤ੍ਤਾਯ ¶ ਦੁਤਿਯਚਿਤ੍ਤਵਾਰਂ ਤਤੋ ਪਟ੍ਠਾਯ ਯਾਵਤਾਯੁਕਂ ਭਵਙ੍ਗਂ ਹੁਤ੍ਵਾ, ਅਨਿਟ੍ਠਮਜ੍ਝਤ੍ਤਾਰਮ੍ਮਣਾਯ ਪਞ੍ਚਵਿਞ੍ਞਾਣਵੀਥਿਯਾ ਸਨ੍ਤੀਰਣਂ ਹੁਤ੍ਵਾ, ਬਲਵਾਰਮ੍ਮਣੇ ਛਸੁ ਦ੍ਵਾਰੇਸੁ ਤਦਾਰਮ੍ਮਣਂ ਹੁਤ੍ਵਾ, ਮਰਣਕਾਲੇ ਚੁਤਿ ਹੁਤ੍ਵਾ ਵਿਪਚ੍ਚਤਿ. ਏਵਂ ਪਞ੍ਚਸੁ ਠਾਨੇਸੁ ਵਿਪਚ੍ਚਤਿ. ਕੇਵਲਂ ਹਿ ਤਾਨਿ ਕੁਸਲਵਿਪਾਕਾਹੇਤੁਕਚਿਤ੍ਤਾਨਿ ਕੁਸਲਕਮ੍ਮਪਚ੍ਚਯਾਨਿ, ਇਮਾਨਿ ਅਕੁਸਲਕਮ੍ਮਪਚ੍ਚਯਾਨਿ. ਅਯਮਿਮੇਸਂ, ਤੇਸਞ੍ਚ ਵਿਸੇਸੋ.

੫੪.

ਅਨਿਟ੍ਠਾਨਿਟ੍ਠਮਜ੍ਝਤ੍ਤਗੋਚਰੇ ਵਤ੍ਤਰੇ ਇਮੇ;

ਸੁਖਾਦਿਤ੍ਤਯਯੁਤ੍ਤਾ ਤੇ, ਦੁਕ੍ਖੁਪੇਕ੍ਖਾਯੁਤਾ ਇਮੇ.

ਏਵਂ ¶ ਕਾਮਾਵਚਰਕੁਸਲਵਿਪਾਕਸਹੇਤੁਕਮਟ੍ਠਵਿਧਂ, ਅਹੇਤੁਕਮਟ੍ਠਵਿਧਂ, ਝਾਨਙ੍ਗਯੋਗਭੇਦਤੋ ਰੂਪਾਵਚਰਵਿਪਾਕਂ ਪਞ੍ਚਵਿਧਂ, ਆਰਮ੍ਮਣਭੇਦਤੋ ਅਰੂਪਾਵਚਰਵਿਪਾਕਂ ਚਤੁਬ੍ਬਿਧਂ, ਮਗ੍ਗਸਮ੍ਪਯੁਤ੍ਤਚਿਤ੍ਤਫਲਭੇਦਤੋ ਲੋਕੁਤ੍ਤਰਵਿਪਾਕਂ ਚਤੁਬ੍ਬਿਧਂ, ਚਕ੍ਖੁਵਿਞ੍ਞਾਣਾਦਿਭੇਦਤੋ ਅਕੁਸਲਵਿਪਾਕਂ ਸਤ੍ਤਵਿਧਨ੍ਤਿ ਛਤ੍ਤਿਂਸਵਿਧਂ ਵਿਪਾਕਚਿਤ੍ਤਂ ਵੇਦਿਤਬ੍ਬਂ.

੫੫.

ਏਵਂ ਛਤ੍ਤਿਂਸਧਾ ਪਾਕਂ, ਪਾਕਸਾਸਨਪੂਜਿਤੋ;

ਸਵਿਪਾਕਾਵਿਪਾਕੇਸੁ, ਕੁਸਲੋ ਸੁਗਤੋਬ੍ਰਵਿ.

ਕਿਰਿਯਾਬ੍ਯਾਕਤਚਿਤ੍ਤਂ ਪਨ ਅਵਿਪਾਕਤੋ ਏਕਵਿਧਂ, ਪਰਿਤ੍ਤਮਹਗ੍ਗਤਤੋ ਦੁਵਿਧਂ, ਕਾਮਾਵਚਰਰੂਪਾਵਚਰਅਰੂਪਾਵਚਰਭੂਮਿਭੇਦਤੋ ਤਿਵਿਧਂ. ਤਤ੍ਥ ਕਾਮਾਵਚਰਂ ਦੁਵਿਧਂ ਸਹੇਤੁਕਮਹੇਤੁਕਨ੍ਤਿ. ਤਤ੍ਥ ਸਹੇਤੁਕਂ ਏਕਵਿਧਂ ਅਰਹਤੋ ਏਵ ਉਪ੍ਪਜ੍ਜਨਤੋ. ਸੋਮਨਸ੍ਸੁਪੇਕ੍ਖਾਞਾਣਪ੍ਪਯੋਗਭੇਦਤੋ ਕਾਮਾਵਚਰਕੁਸਲਂ ਵਿਯ ਅਟ੍ਠਵਿਧਂ ਹੋਤਿ. ਸੇਯ੍ਯਥਿਦਂ – ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਸੋਮਨਸ੍ਸਸਹਗਤਂ ¶ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਉਪੇਕ੍ਖਾਸਹਗਤਂ ਞਾਣਸਮ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਂ, ਉਪੇਕ੍ਖਾਸਹਗਤਂ ਞਾਣਵਿਪ੍ਪਯੁਤ੍ਤਂ ਅਸਙ੍ਖਾਰਿਕਂ, ਸਸਙ੍ਖਾਰਿਕਨ੍ਤਿ ਇਮਾਨਿ ਅਟ੍ਠ ਸਹੇਤੁਕਕਿਰਿਯਚਿਤ੍ਤਾਨਿ. ਏਤਾਨਿ ਪਨ ਯਥਾਨੁਰੂਪਂ ਦਾਨਾਦਿਵਸੇਨ ਖੀਣਾਸਵਾਨਂਯੇਵ ਪਵਤ੍ਤਨ੍ਤਿ. ਏਵਂ ਸਹੇਤੁਕਕਿਰਿਯਚਿਤ੍ਤਾਨਿ ਵੇਦਿਤਬ੍ਬਾਨਿ.

ਅਹੇਤੁਕਕਿਰਿਯਚਿਤ੍ਤਂ ਪਨ ਤਿਵਿਧਂ ਕਿਰਿਯਾਹੇਤੁਕਮਨੋਧਾਤੁਉਪੇਕ੍ਖਾਸਹਗਤਾਵਜ੍ਜਨਚਿਤ੍ਤਂ, ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਸੋਮਨਸ੍ਸਸਹਗਤਂ ਹਸਿਤੁਪ੍ਪਾਦਚਿਤ੍ਤਂ, ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਉਪੇਕ੍ਖਾਸਹਗਤਂ ਵੋਟ੍ਠਬ੍ਬਨਚਿਤ੍ਤਨ੍ਤਿ ¶ .

ਤਤ੍ਥ ਕਿਰਿਯਾਹੇਤੁਕਮਨੋਧਾਤੁ ਉਪੇਕ੍ਖਾਸਹਗਤਾ ਹਦਯਵਤ੍ਥੁਂ ਨਿਸ੍ਸਾਯ ਚਕ੍ਖੁਦ੍ਵਾਰੇ ਇਟ੍ਠਇਟ੍ਠਮਜ੍ਝਤ੍ਤਅਨਿਟ੍ਠਅਨਿਟ੍ਠਮਜ੍ਝਤ੍ਤੇਸੁ ਰੂਪਾਰਮ੍ਮਣੇਸੁ ਯੇਨ ਕੇਨਚਿ ਪਸਾਦੇ ਘਟ੍ਟਿਤੇ ਤਂ ਤਂ ਆਰਮ੍ਮਣਂ ਗਹੇਤ੍ਵਾ ਆਵਜ੍ਜਨਵਸੇਨ ਚਕ੍ਖੁਵਿਞ੍ਞਾਣਸ੍ਸ ਪੁਰੇਚਾਰੀ ਹੁਤ੍ਵਾ ਭਵਙ੍ਗਂ ਆਵਟ੍ਟਯਮਾਨਾ ਉਪ੍ਪਜ੍ਜਤਿ. ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ. ਇਤਰਾ ਪਨ ਦ੍ਵੇ ਅਹੇਤੁਕਮਨੋਵਿਞ੍ਞਾਣਧਾਤੁਯੋ ਸਾਧਾਰਣਾਸਾਧਾਰਣਾਤਿ ਦੁਵਿਧਾ ਹੋਨ੍ਤਿ. ਤਤ੍ਥ ਅਸਾਧਾਰਣਾ ਪਨ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁ ਸੋਮਨਸ੍ਸਸਹਗਤਾ ਖੀਣਾਸਵਸ੍ਸੇਵ ਛਸੁ ਦ੍ਵਾਰੇਸੁ ਛਸੁ ਅਨੁਲ਼ਾਰੇਸੁ ਆਰਮ੍ਮਣੇਸੁ ਹਸਿਤੁਪ੍ਪਾਦਕਿਚ੍ਚਾ ਨਿਯਤਵਤ੍ਥੁਕਾ ਉਪ੍ਪਜ੍ਜਤਿ. ਸਾਧਾਰਣਾ ਪਨ ਅਹੇਤੁਕਮਨੋਵਿਞ੍ਞਾਣਧਾਤੁ ਉਪੇਕ੍ਖਾਸਹਗਤਾ ਛਲ਼ਾਰਮ੍ਮਣਵਿਜਾਨਨਲਕ੍ਖਣਾ ¶ , ਤਥਾਭਾਵਪਚ੍ਚੁਪਟ੍ਠਾਨਾ, ਸਾ ਤੀਸੁ ਭਵੇਸੁ ਸਬ੍ਬੇਸਂ ਸਚਿਤ੍ਤਕਸਤ੍ਤਾਨਂ ਸਾਧਾਰਣਾ, ਨ ਕਸ੍ਸਚਿ ਪਨ ਸਚਿਤ੍ਤਕਸ੍ਸ ਨ ਉਪ੍ਪਜ੍ਜਤਿ ਨਾਮ. ਉਪ੍ਪਜ੍ਜਮਾਨਾ ਪਨਾਯਂ ਪਞ੍ਚਦ੍ਵਾਰਮਨੋਦ੍ਵਾਰੇਸੁ ਵੋਟ੍ਠਬ੍ਬਨਾਵਜ੍ਜਨਕਿਚ੍ਚਾ ਉਪ੍ਪਜ੍ਜਤਿ. ਛ ਅਸਾਧਾਰਣਞਾਣਾਨਿਪਿ ਏਤਾਯ ਗਹਿਤਾਰਮ੍ਮਣਮੇਵ ਗਣ੍ਹਨ੍ਤਿ. ਸਬ੍ਬਾਰਮ੍ਮਣਗਹਣਸਮਤ੍ਥਤਾਯ ¶ ਸਬ੍ਬਞ੍ਞੁਤਞ੍ਞਾਣਗਤਿਕਾਤਿ ਵੇਦਿਤਬ੍ਬਾ. ਇਮਾਨਿ ਤੀਣਿ ਅਹੇਤੁਕਕਿਰਿਯਚਿਤ੍ਤਾਨਿ.

ਇਧ ਠਤ੍ਵਾ ਹਸਨਚਿਤ੍ਤਾਨਿ ਪਰਿਗ੍ਗਣ੍ਹਿਤਬ੍ਬਾਨਿ. ਤੇਰਸ ਹਸਨਚਿਤ੍ਤਾਨਿ. ਕੁਸਲਤੋ ਚਤੂਹਿ ਸੋਮਨਸ੍ਸਸਹਗਤੇਹਿ, ਅਕੁਸਲਤੋ ਚਤੂਹੀਤਿ ਇਮੇਹਿ ਅਟ੍ਠਹਿ ਚਿਤ੍ਤੇਹਿ ਪੁਥੁਜ੍ਜਨਾ ਹਸਨ੍ਤਿ, ਸੇਖਾ ਪਨ ਕੁਸਲਤੋ ਚਤੂਹਿ, ਅਕੁਸਲਤੋ ਦ੍ਵੀਹਿ ਦਿਟ੍ਠਿਗਤਵਿਪ੍ਪਯੁਤ੍ਤਸੋਮਨਸ੍ਸਸਹਗਤੇਹੀਤਿ ਛਹਿ ਹਸਨ੍ਤਿ, ਖੀਣਾਸਵਾ ਕਿਰਿਯਤੋ ਪਞ੍ਚਹਿ ਸੋਮਨਸ੍ਸਸਹਗਤੇਹਿ ਹਸਨ੍ਤੀਤਿ.

੫੬.

ਸੋਮਨਸ੍ਸਯੁਤਾਨਟ੍ਠ, ਕੁਸਲਾਕੁਸਲਾਨਿ ਚ;

ਕ੍ਰਿਯਤੋ ਪਨ ਪਞ੍ਚੇਵਂ, ਹਾਸਚਿਤ੍ਤਾਨਿ ਤੇਰਸ.

੫੭.

ਪੁਥੁਜ੍ਜਨਾ ਹਸਨ੍ਤੇਤ੍ਥ, ਚਿਤ੍ਤੇਹਿ ਪਨ ਅਟ੍ਠਹਿ;

ਛਹਿ ਸੇਖਾ ਅਸੇਖਾ ਚ, ਹਸਨ੍ਤਿ ਪਨ ਪਞ੍ਚਹਿ.

ਇਦਾਨਿ ਰੂਪਾਵਚਰਕਿਰਿਯਚਿਤ੍ਤਾਨਿ ਹੋਨ੍ਤਿ. ਵਿਤਕ੍ਕਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਠਮਂ, ਵਿਚਾਰਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਦੁਤਿਯਂ, ਪੀਤਿਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਤਤਿਯਂ, ਸੁਖਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਚਤੁਤ੍ਥਂ, ਉਪੇਕ੍ਖਾਚਿਤ੍ਤੇਕਗ੍ਗਤਾਸਮ੍ਪਯੁਤ੍ਤਂ ਪਞ੍ਚਮਨ੍ਤਿ ਇਮਾਨਿ ਪਞ੍ਚ ਰੂਪਾਵਚਰਕਿਰਿਯਚਿਤ੍ਤਾਨਿ.

ਇਦਾਨਿ ¶ ਅਰੂਪਾਵਚਰਕਿਰਿਯਚਿਤ੍ਤਾਨਿ ਵੁਚ੍ਚਨ੍ਤਿ. ਆਕਾਸਾਨਞ੍ਚਾਯਤਨਸਞ੍ਞਾਸਹਗਤਂ, ਵਿਞ੍ਞਾਣਞ੍ਚਾਯਤਨਸਞ੍ਞਾਸਹਗਤਂ, ਆਕਿਞ੍ਚਞ੍ਞਾਯਤਨਸਞ੍ਞਾਸਹਗਤਂ, ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਸਹਗਤਨ੍ਤਿ ਇਮਾਨਿ ਚਤ੍ਤਾਰਿ ਅਰੂਪਾਵਚਰਕਿਰਿਯਚਿਤ੍ਤਾਨਿ. ਇਮਾਨਿ ਪਨ ਰੂਪਾਰੂਪਕਿਰਿਯਚਿਤ੍ਤਾਨਿ ਸਕਸਕਭੂਮਿਕੁਸਲਸਦਿਸਾਨਿ. ਕੇਵਲਂ ਪਨੇਤਾਨਿ ਕਿਰਿਯਚਿਤ੍ਤਾਨਿ ਖੀਣਾਸਵਾਨਂਯੇਵ ਉਪ੍ਪਜ੍ਜਨ੍ਤਿ, ਕੁਸਲਾਨਿ ਪਨ ਸੇਖਪੁਥੁਜ੍ਜਨਾਨਂ. ਇਮਾਨਿ ਚ ਖੀਣਾਸਵਾਨਂ ਭਾਵਨਾਕਾਰਵਸਪ੍ਪਵਤ੍ਤਾਨਿ, ਤਾਨਿ ਪਨ ਸੇਖਪੁਥੁਜ੍ਜਨਾਨਂ ਭਾਵਨਾਪੁਞ੍ਞਵਸਪ੍ਪਵਤ੍ਤਾਨੀਤਿ ਅਯਮੇਵ ਇਮੇਸਂ, ਤੇਸਞ੍ਚ ਵਿਸੇਸੋ.

੫੮.

ਯਾ ¶ ¶ ਪੁਥੁਜ੍ਜਨਕਾਲਸ੍ਮਿਂ, ਅਭਿਨਿਬ੍ਬਤ੍ਤਿਤਾ ਪਨ;

ਰੂਪਾਰੂਪਸਮਾਪਤ੍ਤਿ, ਸਾ ਖੀਣਾਸਵਭਿਕ੍ਖੁਨੋ.

੫੯.

ਯਾਵ ਖੀਣਾਸਵੋ ਭਿਕ੍ਖੁ, ਨ ਸਮਾਪਜ੍ਜਤੇਵ ਨਂ;

ਤਾਵ ਤਾ ਕੁਸਲਾ ਏਵ, ਸਮਾਪਨ੍ਨਾ ਸਚੇ ਕ੍ਰਿਯਾ.

ਏਵਂ ਸੋਮਨਸ੍ਸਾਦਿਭੇਦਤੋ ਕਾਮਾਵਚਰਸਹੇਤੁਕਕਿਰਿਯਚਿਤ੍ਤਮਟ੍ਠਵਿਧਂ, ਮਨੋਧਾਤੁਮਨੋਵਿਞ੍ਞਾਣਧਾਤੁਦ੍ਵਯਭੇਦਤੋ ਅਹੇਤੁਕਂ ਤਿਵਿਧਂ, ਝਾਨਙ੍ਗਯੋਗਭੇਦਤੋ ਰੂਪਾਵਚਰਂ ਪਞ੍ਚਵਿਧਂ, ਆਰਮ੍ਮਣਭੇਦਤੋ ਅਰੂਪਾਵਚਰਂ ਚਤੁਬ੍ਬਿਧਂ, ਏਵਂ ਭੂਮਿਵਸੇਨ ਵੀਸਤਿਵਿਧਂ ਕਿਰਿਯਚਿਤ੍ਤਂ ਵੇਦਿਤਬ੍ਬਨ੍ਤਿ.

੬੦.

ਏਕਾਦਸਵਿਧਂ ਕਾਮੇ, ਰੂਪੇ ਪਞ੍ਚ ਅਰੂਪਿਸੁ;

ਚਤ੍ਤਾਰੀਤਿ ਚ ਸਬ੍ਬਾਨਿ, ਕ੍ਰਿਯਾਚਿਤ੍ਤਾਨਿ ਵੀਸਤਿ.

੬੧.

ਲੋਕੁਤ੍ਤਰਕ੍ਰਿਯਚਿਤ੍ਤਂ, ਪਨ ਕਸ੍ਮਾ ਨ ਵਿਜ੍ਜਤਿ;

ਏਕਚਿਤ੍ਤਕ੍ਖਣਤ੍ਤਾ ਹਿ, ਮਗ੍ਗਸ੍ਸਾਤਿ ਨ ਵਿਜ੍ਜਤਿ.

੬੨.

ਕ੍ਰਿਯਾਕ੍ਰਿਯਾਪਤ੍ਤਿਵਿਭਾਗਦੇਸਕੋ,

ਕ੍ਰਿਯਾਕ੍ਰਿਯਂ ਚਿਤ੍ਤਮਵੋਚ ਯਂ ਜਿਨੋ;

ਹਿਤਾਹਿਤਾਨਂ ਸਕ੍ਰਿਯਾਕ੍ਰਿਯਾਰਤੋ,

ਕ੍ਰਿਯਾਕ੍ਰਿਯਂ ਤਨ੍ਤੁ ਮਯਾ ਸਮੀਰਿਤਂ.

ਏਤ੍ਤਾਵਤਾ ਏਕਵੀਸਤਿਵਿਧਂ ਕੁਸਲਂ, ਦ੍ਵਾਦਸਵਿਧਂ ਅਕੁਸਲਂ ਛਤ੍ਤਿਂਸਵਿਧਂ ਵਿਪਾਕਂ, ਵੀਸਤਿਵਿਧਂ ਕਿਰਿਯਚਿਤ੍ਤਨ੍ਤਿ ਆਦਿਮ੍ਹਿ ਨਿਕ੍ਖਿਤ੍ਤਂ ਚਿਤ੍ਤਂ ਏਕੂਨਨਵੁਤਿਪ੍ਪਭੇਦੇਨ ਵਿਧਿਨਾ ਪਕਾਸਿਤਂ ਹੋਤੀਤਿ.

੬੩.

ਏਕਵੀਸਤਿ ¶ ਪੁਞ੍ਞਾਨਿ, ਦ੍ਵਾਦਸਾਕੁਸਲਾਨਿ ਚ;

ਛਤ੍ਤਿਂਸੇਵ ਵਿਪਾਕਾਨਿ, ਕ੍ਰਿਯਚਿਤ੍ਤਾਨਿ ਵੀਸਤਿ.

੬੪.

ਏਕੂਨਨਵੁਤਿ ਸਬ੍ਬੇ, ਚਿਤ੍ਤੁਪ੍ਪਾਦਾ ਮਹੇਸਿਨਾ;

ਅਟ੍ਠ ਲੋਕੁਤ੍ਤਰੇ ਕਤ੍ਵਾ, ਨਿਦ੍ਦਿਟ੍ਠਾ ਹਿ ਸਮਾਸਤੋ.

੬੫.

ਪਿਟਕੇ ¶ ¶ ਅਭਿਧਮ੍ਮਸ੍ਮਿਂ, ਯੇ ਭਿਕ੍ਖੂ ਪਾਟਵਤ੍ਥਿਨੋ;

ਤੇਹਾਯਂ ਉਗ੍ਗਹੇਤਬ੍ਬੋ, ਚਿਨ੍ਤੇਤਬ੍ਬੋ ਪੁਨਪ੍ਪੁਨਂ.

੬੬.

ਅਭਿਧਮ੍ਮਾਵਤਾਰੇਨ, ਅਭਿਧਮ੍ਮਮਹੋਦਧਿਂ;

ਯੇ ਤਰਨ੍ਤਿ ਇਮਂ ਲੋਕਂ, ਪਰਞ੍ਚੇਵ ਤਰਨ੍ਤਿ ਤੇਤਿ.

ਇਤਿ ਅਭਿਧਮ੍ਮਾਵਤਾਰੇ ਚਿਤ੍ਤਨਿਦ੍ਦੇਸੋ ਨਾਮ

ਪਠਮੋ ਪਰਿਚ੍ਛੇਦੋ.

੨. ਦੁਤਿਯੋ ਪਰਿਚ੍ਛੇਦੋ

ਚੇਤਸਿਕਨਿਦ੍ਦੇਸੋ

੬੭.

ਚਿਤ੍ਤਾਨਨ੍ਤਰਮੁਦ੍ਦਿਟ੍ਠਾ ¶ , ਯੇ ਚ ਚੇਤਸਿਕਾ ਮਯਾ;

ਤੇਸਂ ਦਾਨਿ ਕਰਿਸ੍ਸਾਮਿ, ਵਿਭਾਜਨਮਿਤੋ ਪਰਂ.

ਤਤ੍ਥ ਚਿਤ੍ਤਸਮ੍ਪਯੁਤ੍ਤਾ, ਚਿਤ੍ਤੇ ਭਵਾ ਵਾ ਚੇਤਸਿਕਾ. ਤੇਪਿ ਚਿਤ੍ਤਂ ਵਿਯ ਸਾਰਮ੍ਮਣਤੋ ਏਕਵਿਧਾ, ਸਵਿਪਾਕਾਵਿਪਾਕਤੋ ਦੁਵਿਧਾ, ਕੁਸਲਾਕੁਸਲਾਬ੍ਯਾਕਤਭੇਦਤੋ ਤਿਵਿਧਾ, ਕਾਮਾਵਚਰਾਦਿਭੇਦਤੋ ਚਤੁਬ੍ਬਿਧਾ.

ਤਤ੍ਥ ਕਾਮਾਵਚਰਚਿਤ੍ਤਸਮ੍ਪਯੁਤ੍ਤਾ ਕਾਮਾਵਚਰਾ. ਤੇਸੁ ਕਾਮਾਵਚਰਪਠਮਮਹਾਕੁਸਲਚਿਤ੍ਤਸਮ੍ਪਯੁਤ੍ਤਾ ਤਾਵ ਨਿਯਤਾ ਸਰੂਪੇਨ ਆਗਤਾ ਏਕੂਨਤਿਂਸ ਧਮ੍ਮਾ ਹੋਨ੍ਤਿ. ਸੇਯ੍ਯਥਿਦਂ – ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤੇਕਗ੍ਗਤਾ ਸਦ੍ਧਾ ਸਤਿ ਵੀਰਿਯਂ ਪਞ੍ਞਾ ਜੀਵਿਤਿਨ੍ਦ੍ਰਿਯਂ ਅਲੋਭੋ ਅਦੋਸੋ ਹਿਰੀ ਓਤ੍ਤਪ੍ਪਂ ਕਾਯਪ੍ਪਸ੍ਸਦ੍ਧਿ ਚਿਤ੍ਤਪ੍ਪਸ੍ਸਦ੍ਧਿ ਕਾਯਲਹੁਤਾ ਚਿਤ੍ਤਲਹੁਤਾ ਕਾਯਮੁਦੁਤਾ ਚਿਤ੍ਤਮੁਦੁਤਾ ਕਾਯਕਮ੍ਮਞ੍ਞਤਾ ਚਿਤ੍ਤਕਮ੍ਮਞ੍ਞਤਾ ਕਾਯਪਾਗੁਞ੍ਞਤਾ ਚਿਤ੍ਤਪਾਗੁਞ੍ਞਤਾ ਕਾਯੁਜੁਕਤਾ ਚਿਤ੍ਤੁਜੁਕਤਾਤਿ. ਪੁਨ ਛਨ੍ਦੋ, ਅਧਿਮੋਕ੍ਖੋ, ਤਤ੍ਰਮਜ੍ਝਤ੍ਤਤਾ, ਮਨਸਿਕਾਰੋ ਚਾਤਿ ਚਤ੍ਤਾਰੋ ਨਿਯਤਯੇਵਾਪਨਕਾ ਹੋਨ੍ਤਿ. ਇਮੇਹਿ ਚਤੂਹਿ ਤੇਤ੍ਤਿਂਸ ਹੋਨ੍ਤਿ ¶ . ਪੁਨ ਕਰੁਣਾ ਮੁਦਿਤਾ ਕਾਯਦੁਚ੍ਚਰਿਤਵਿਰਤਿ ¶ ਵਚੀਦੁਚ੍ਚਰਿਤਵਿਰਤਿ ਮਿਚ੍ਛਾਜੀਵਵਿਰਤਿ ਚੇਤਿ ਇਮੇ ਪਞ੍ਚ ਅਨਿਯਤਾ. ਇਮੇ ਪਨ ਕਦਾਚਿ ਉਪ੍ਪਜ੍ਜਨ੍ਤਿ.

ਇਮੇਸੁ ਪਨ ਕਰੁਣਾਮੁਦਿਤਾਵਸੇਨ ਭਾਵਨਾਕਾਲੇ ਕਰੁਣਾਪੁਬ੍ਬਭਾਗੋ ਵਾ ਮੁਦਿਤਾਪੁਬ੍ਬਭਾਗੋ ਵਾ ਏਤਾ ਉਪ੍ਪਜ੍ਜਨ੍ਤਿ, ਨ ਪਨੇਕਤੋ ਉਪ੍ਪਜ੍ਜਨ੍ਤਿ. ਯਦਾ ਪਨ ਇਮਿਨਾ ਚਿਤ੍ਤੇਨ ਮਿਚ੍ਛਾਕਮ੍ਮਨ੍ਤਾਦੀਹਿ ਵਿਰਮਤਿ, ਤਦਾ ਸਮ੍ਮਾਕਮ੍ਮਨ੍ਤਾਦੀਨਿ ਪਰਿਪੂਰੇਨ੍ਤਿ, ਏਕਾ ਵਿਰਤਿ ਉਪ੍ਪਜ੍ਜਤਿ, ਕਰੁਣਾਮੁਦਿਤਾਹਿ ਸਹ, ਅਞ੍ਞਮਞ੍ਞੇਨ ਚ ਨ ਉਪ੍ਪਜ੍ਜਨ੍ਤਿ. ਤਸ੍ਮਾ ਏਤੇਸੁ ਏਕੇਨ ਸਹ ਚਤੁਤ੍ਤਿਂਸੇਵ ਧਮ੍ਮਾ ਹੋਨ੍ਤਿ.

੬੮.

ਆਦਿਨਾ ¶ ਪੁਞ੍ਞਚਿਤ੍ਤੇਨ, ਤੇਤ੍ਤਿਂਸ ਨਿਯਤਾ ਮਤਾ;

ਕਰੁਣਾਮੁਦਿਤੇਕੇਨ, ਚਤੁਤ੍ਤਿਂਸ ਭਵਨ੍ਤਿ ਤੇ.

੬੯.

ਕਸ੍ਮਾ ਪਨੇਤ੍ਥ ਮੇਤ੍ਤਾ ਚ, ਉਪੇਕ੍ਖਾ ਚ ਨ ਉਦ੍ਧਟਾ;

ਯੇਵਾਪਨਕਧਮ੍ਮੇਸੁ, ਧਮ੍ਮਰਾਜੇਨ ਸਤ੍ਥੁਨਾ.

੭੦.

ਅਬ੍ਯਾਪਾਦੇਨ ਮੇਤ੍ਤਾਪਿ, ਤਤ੍ਰਮਜ੍ਝਤ੍ਤਤਾਯ ਚ;

ਉਪੇਕ੍ਖਾ ਗਹਿਤਾ ਯਸ੍ਮਾ, ਤਸ੍ਮਾ ਨ ਗਹਿਤਾ ਉਭੋ.

੭੧.

ਕਸ੍ਮਾ ਯੇਵਾਪਨਾ ਧਮ੍ਮਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਸਰੂਪੇਨੇਵ ਸਬ੍ਬੇਤੇ, ਪਾਲ਼ਿਯਂ ਨ ਚ ਉਦ੍ਧਟਾ.

੭੨.

ਯਸ੍ਮਾ ਅਨਿਯਤਾ ਕੇਚਿ, ਯਸ੍ਮਾ ਰਾਸਿਂ ਭਜਨ੍ਤਿ ਨ;

ਯਸ੍ਮਾ ਚ ਦੁਬ੍ਬਲਾ ਕੇਚਿ, ਤਸ੍ਮਾ ਵੁਤ੍ਤਾ ਨ ਪਾਲ਼ਿਯਂ.

੭੩.

ਛਨ੍ਦਾਧਿਮੋਕ੍ਖਮੁਦਿਤਾ ਮਨਸਿ ਚ ਕਾਰੋ,

ਮਜ੍ਝਤ੍ਤਤਾ ਚ ਕਰੁਣਾ ਵਿਰਤਿਤ੍ਤਯਂ ਚ;

ਪੁਞ੍ਞੇਸੁ ਤੇਨ ਨਿਯਤਾਨਿਯਤਾ ਚ ਸਬ੍ਬੇ,

ਯੇਵਾਪਨਾ ਮੁਨਿਵਰੇਨ ਨ ਚੇਵ ਵੁਤ੍ਤਾ.

੭੪.

ਕਸ੍ਮਾ ਪਨੇਤ੍ਥ ਫਸ੍ਸੋਵ, ਪਠਮਂ ਸਮੁਦੀਰਿਤੋ;

ਪਠਮਾਭਿਨਿਪਾਤਤ੍ਤਾ, ਚਿਤ੍ਤਸ੍ਸਾਰਮ੍ਮਣੇ ਕਿਰ.

੭੫.

ਫੁਸਿਤ੍ਵਾ ¶ ¶ ਪਨ ਫਸ੍ਸੇਨ, ਵੇਦਨਾਯ ਚ ਵੇਦਯੇ;

ਸਞ੍ਜਾਨਾਤਿ ਚ ਸਞ੍ਞਾਯ, ਚੇਤਨਾਯ ਚ ਚੇਤਯੇ.

੭੬.

ਬਲਵਪਚ੍ਚਯਤ੍ਤਾ ਚ, ਸਹਜਾਤਾਨਮੇਵ ਹਿ;

ਫਸ੍ਸੋਵ ਪਠਮਂ ਵੁਤ੍ਤੋ, ਤਸ੍ਮਾ ਇਧ ਮਹੇਸਿਨਾ.

੭੭.

ਅਕਾਰਣਮਿਦਂ ਸਬ੍ਬਂ, ਚਿਤ੍ਤਾਨਂ ਤੁ ਸਹੇਵ ਚ;

ਏਕੁਪ੍ਪਾਦਾਦਿਭਾਵੇਨ, ਚਿਤ੍ਤਜਾਨਂ ਪਵਤ੍ਤਿਤੋ.

੭੮.

ਅਯਂ ਤੁ ਪਠਮੁਪ੍ਪਨ੍ਨੋ, ਅਯਂ ਪਚ੍ਛਾਤਿ ਨਤ੍ਥਿਦਂ;

ਬਲਵਪਚ੍ਚਯਤ੍ਤੇਪਿ, ਕਾਰਣਞ੍ਚ ਨ ਦਿਸ੍ਸਤਿ.

੭੯.

ਦੇਸਨਾਕ੍ਕਮਤੋ ਚੇਵ, ਪਠਮਂ ਸਮੁਦੀਰਿਤੋ;

ਇਚ੍ਚੇਵਂ ਪਨ ਵਿਞ੍ਞੇਯ੍ਯਂ, ਵਿਞ੍ਞੁਨਾ ਨ ਵਿਸੇਸਤੋ.

੮੦.

ਨ ਚ ਪਰਿਯੇਸਿਤਬ੍ਬੋਯਂ, ਤਸ੍ਮਾ ਪੁਬ੍ਬਾਪਰਕ੍ਕਮੋ;

ਵਚਨਤ੍ਥਲਕ੍ਖਣਾਦੀਹਿ, ਧਮ੍ਮਾ ਏਵ ਵਿਜਾਨਤਾ.

ਯਸ੍ਮਾ ਪਨ ਇਮੇ ਧਮ੍ਮਾ ਵਚਨਤ੍ਥਲਕ੍ਖਣਾਦੀਹਿ ਵੁਚ੍ਚਮਾਨਾ ਪਾਕਟਾ ਹੋਨ੍ਤਿ ਸੁਵਿਞ੍ਞੇਯ੍ਯਾਵ, ਤਸ੍ਮਾ ਤੇਸਂ ਵਚਨਤ੍ਥਲਕ੍ਖਣਾਦੀਨਿ ਪਵਕ੍ਖਾਮਿ. ਸੇਯ੍ਯਥਿਦਂ – ਫੁਸਤੀਤਿ ਫਸ੍ਸੋ. ਸ੍ਵਾਯਂ ਫੁਸਨਲਕ੍ਖਣੋ, ਸਙ੍ਘਟ੍ਟਨਰਸੋ, ਸਨ੍ਨਿਪਾਤਪਚ੍ਚੁਪਟ੍ਠਾਨੋ, ਫਲਟ੍ਠੇਨ ਵੇਦਨਾਪਚ੍ਚੁਪਟ੍ਠਾਨੋ ਵਾ, ਆਪਾਥਗਤਵਿਸਯਪਦਟ੍ਠਾਨੋ. ਅਯਂ ਹਿ ਅਰੂਪਧਮ੍ਮੋਪਿ ਸਮਾਨੋ ਆਰਮ੍ਮਣੇਸੁ ਫੁਸਨਾਕਾਰੇਨੇਵ ¶ ਪਵਤ੍ਤਤਿ, ਸੋ ਦ੍ਵਿਨ੍ਨਂ ਮੇਣ੍ਡਾਨਂ ਸਨ੍ਨਿਪਾਤੋ ਵਿਯ ਦਟ੍ਠਬ੍ਬੋ.

ਸੁਨ੍ਦਰਂ ਮਨੋਤਿ ਸੁਮਨੋ, ਸੁਮਨਸ੍ਸ ਭਾਵੋ ਸੋਮਨਸ੍ਸਂ, ਸੋਮਨਸ੍ਸਮੇਵ ਵੇਦਨਾ ਸੋਮਨਸ੍ਸਵੇਦਨਾ. ਸਾ ਵੇਦਯਿਤਲਕ੍ਖਣਾ, ਇਟ੍ਠਾਕਾਰਾਨੁਭਵਨਰਸਾ ਰਾਜਾ ਵਿਯ ਸੁਭੋਜਨਰਸਂ, ਚੇਤਸਿਕਅਸ੍ਸਾਦਪਚ੍ਚੁਪਟ੍ਠਾਨਾ, ਪਸ੍ਸਦ੍ਧਿਪਦਟ੍ਠਾਨਾ.

ਨੀਲਾਦਿਭੇਦਂ ¶ ਆਰਮ੍ਮਣਂ ਸਞ੍ਜਾਨਾਤੀਤਿ ਸਞ੍ਞਾ. ਸਾ ਸਞ੍ਜਾਨਨਲਕ੍ਖਣਾ, ਪਚ੍ਚਾਭਿਞ੍ਞਾਣਕਰਣਰਸਾ ਵਡ੍ਢਕਿਸ੍ਸ ਅਭਿਞ੍ਞਾਣਕਰਣਮਿਵ, ਯਥਾਗਹਿਤਨਿਮਿਤ੍ਤਵਸੇਨ ਅਭਿਨਿਵੇਸਕਰਣਪਚ੍ਚੁਪਟ੍ਠਾਨਾ, ਯਥੋਪਟ੍ਠਿਤਵਿਸਯਪਦਟ੍ਠਾਨਾ.

ਚੇਤਯਤੀਤਿ ¶ ਚੇਤਨਾ. ਸਦ੍ਧਿਂ ਅਤ੍ਤਨਾ ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣੇ ਅਭਿਸਨ੍ਦਹਤੀਤਿ ਅਤ੍ਥੋ. ਸਾ ਚੇਤਯਿਤਲਕ੍ਖਣਾ, ਆਯੂਹਨਰਸਾ, ਸਂਵਿਦਹਨਪਚ੍ਚੁਪਟ੍ਠਾਨਾ ਸਕਕਿਚ੍ਚਪਰਕਿਚ੍ਚਸਾਧਕਾ ਜੇਟ੍ਠਸਿਸ੍ਸਮਹਾਵਡ੍ਢਕਿਆਦਯੋ ਵਿਯ.

ਵਿਤਕ੍ਕੇਤੀਤਿ ਵਿਤਕ੍ਕੋ. ਵਿਤਕ੍ਕਨਂ ਵਾ ਵਿਤਕ੍ਕੋ. ਸ੍ਵਾਯਂ ਆਰਮ੍ਮਣੇ ਚਿਤ੍ਤਸ੍ਸ ਅਭਿਨਿਰੋਪਨਲਕ੍ਖਣੋ, ਆਹਨਨਪਰਿਯਾਹਨਨਰਸੋ, ਆਰਮ੍ਮਣੇ ਚਿਤ੍ਤਸ੍ਸ ਆਨਯਨਪਚ੍ਚੁਪਟ੍ਠਾਨੋ.

ਆਰਮ੍ਮਣੇ ਤੇਨ ਚਿਤ੍ਤਂ ਵਿਚਰਤੀਤਿ ਵਿਚਾਰੋ. ਵਿਚਰਣਂ ਵਾ ਵਿਚਾਰੋ. ਅਨੁਸਞ੍ਚਰਣਨ੍ਤਿ ਵੁਤ੍ਤਂ ਹੋਤਿ. ਸ੍ਵਾਯਂ ਆਰਮ੍ਮਣਾਨੁਮਜ੍ਜਨਲਕ੍ਖਣੋ, ਤਤ੍ਥ ਸਹਜਾਤਾਨੁਯੋਜਨਰਸੋ, ਚਿਤ੍ਤਸ੍ਸ ਅਨੁਪਬਨ੍ਧਪਚ੍ਚੁਪਟ੍ਠਾਨੋ.

ਪਿਨਯਤੀਤਿ ਪੀਤਿ. ਸਾ ਸਮ੍ਪਿਯਾਯਨਲਕ੍ਖਣਾ, ਕਾਯਚਿਤ੍ਤਪੀਣਨਰਸਾ, ਫਰਣਰਸਾ ਵਾ, ਓਦਗ੍ਯਪਚ੍ਚੁਪਟ੍ਠਾਨਾ.

ਚਿਤ੍ਤਸ੍ਸ ਏਕਗ੍ਗਭਾਵੋ ਚਿਤ੍ਤੇਕਗ੍ਗਤਾ. ਸਮਾਧਿਸ੍ਸੇਤਂ ਨਾਮਂ. ਸੋ ਅਵਿਸਾਰਲਕ੍ਖਣੋ, ਅਵਿਕ੍ਖੇਪਲਕ੍ਖਣੋ ਵਾ, ਸਹਜਾਤਾਨਂ ਸਮ੍ਪਿਣ੍ਡਨਰਸੋ ਨ੍ਹਾਨਿਯਚੁਣ੍ਣਾਨਂ ਉਦਕਂ ਵਿਯ, ਉਪਸਮਪਚ੍ਚੁਪਟ੍ਠਾਨੋ, ਵਿਸੇਸਤੋ ਸੁਖਪਦਟ੍ਠਾਨੋ.

ਸਦ੍ਦਹਨ੍ਤਿ ਏਤਾਯ, ਸਯਂ ਵਾ ਸਦ੍ਦਹਤਿ, ਸਦ੍ਦਹਨਮਤ੍ਤਮੇਵ ਵਾ ਏਸਾਤਿ ਸਦ੍ਧਾ. ਸਾ ਪਨੇਸਾ ਸਦ੍ਦਹਨਲਕ੍ਖਣਾ, ਪਸਾਦਨਰਸਾ ਉਦਕਪ੍ਪਸਾਦਕਮਣਿ ਵਿਯ, ਅਕਾਲੁਸਿਯਪਚ੍ਚੁਪਟ੍ਠਾਨਾ, ਸਦ੍ਧੇਯ੍ਯਵਤ੍ਥੁਪਦਟ੍ਠਾਨਾ.

ਸਰਨ੍ਤਿ ¶ ਏਤਾਯ, ਸਯਂ ਵਾ ਸਰਤਿ, ਸਰਣਮਤ੍ਤਮੇਵ ਵਾ ਏਸਾਤਿ ਸਤਿ. ਸਾ ਅਪਿਲਾਪਨਲਕ੍ਖਣਾ, ਅਸਮ੍ਮੋਸਰਸਾ, ਆਰਕ੍ਖਪਚ੍ਚੁਪਟ੍ਠਾਨਾ, ਥਿਰਸਞ੍ਞਾਪਦਟ੍ਠਾਨਾ.

ਵੀਰਭਾਵੋ ¶ ਵੀਰਿਯਂ. ਵੀਰਾਨਂ ਵਾ ਕਮ੍ਮਂ ਵੀਰਿਯਂ. ਤਂ ਪਨੇਤਂ ਉਸ੍ਸਾਹਨਲਕ੍ਖਣਂ, ਸਹਜਾਤਾਨਂ ਉਪਤ੍ਥਮ੍ਭਨਰਸਂ, ਅਸਂਸੀਦਨਭਾਵਪਚ੍ਚੁਪਟ੍ਠਾਨਂ, ਸਂਵੇਗਪਦਟ੍ਠਾਨਂ.

ਪਜਾਨਾਤੀਤਿ ¶ ਪਞ੍ਞਾ. ਸਾ ਪਨੇਸਾ ਵਿਜਾਨਨਲਕ੍ਖਣਾ, ਵਿਸਯੋਭਾਸਨਰਸਾ ਪਦੀਪੋ ਵਿਯ, ਅਸਮ੍ਮੋਹਪਚ੍ਚੁਪਟ੍ਠਾਨਾ ਅਰਞ੍ਞਗਤਸੁਦੇਸਕੋ ਵਿਯ.

ਜੀਵਨ੍ਤਿ ਤੇਨ ਤਂਸਮ੍ਪਯੁਤ੍ਤਧਮ੍ਮਾਤਿ ਜੀਵਿਤਂ. ਤਂ ਪਨ ਅਤ੍ਤਨਾ ਅਵਿਨਿਬ੍ਭੁਤ੍ਤਾਨਂ ਧਮ੍ਮਾਨਂ ਅਨੁਪਾਲਨਲਕ੍ਖਣਂ, ਤੇਸਂ ਪਵਤ੍ਤਨਰਸਂ, ਤੇਸਂਯੇਵ ਠਪਨਪਚ੍ਚੁਪਟ੍ਠਾਨਂ, ਯਾਪਯਿਤਬ੍ਬਧਮ੍ਮਪਦਟ੍ਠਾਨਂ. ਸਨ੍ਤੇਪਿ ਚ ਤੇਸਂ ਅਨੁਪਾਲਨਲਕ੍ਖਣਾਦਿਮ੍ਹਿ ਵਿਧਾਨੇ ਅਤ੍ਥਿਕ੍ਖਣੇਯੇਵ ਤਂ ਤੇ ਧਮ੍ਮੇ ਅਨੁਪਾਲੇਤਿ ਉਦਕਂ ਵਿਯ ਉਪ੍ਪਲਾਦੀਨਿ, ਯਥਾਸਕਂ ਪਚ੍ਚਯੁਪ੍ਪਨ੍ਨੇਪਿ ਚ ਧਮ੍ਮੇ ਅਨੁਪਾਲੇਤਿ ਧਾਤਿ ਵਿਯ ਕੁਮਾਰਂ, ਸਯਂਪਵਤ੍ਤਿਤਧਮ੍ਮਸਮ੍ਬਨ੍ਧੇਨੇਵ ਪਵਤ੍ਤਤਿ ਨਿਯਾਮਕੋ ਵਿਯ, ਨ ਭਙ੍ਗਤੋ ਉਦ੍ਧਂ ਪਵਤ੍ਤਯਤਿ ਅਤ੍ਤਨੋ ਚ ਪਵਤ੍ਤਯਿਤਬ੍ਬਾਨਞ੍ਚ ਅਭਾਵਾ, ਨ ਭਙ੍ਗਕ੍ਖਣੇ ਠਪੇਤਿ ਸਯਂ ਭਿਜ੍ਜਮਾਨਤ੍ਤਾ ਖੀਯਮਾਨੋ ਵਿਯ ਵਤ੍ਤਿਸ੍ਨੇਹੋਵ ਪਦੀਪਸਿਖਨ੍ਤਿ.

ਨ ਲੁਬ੍ਭਨ੍ਤਿ ਤੇਨ, ਸਯਂ ਵਾ ਨ ਲੁਬ੍ਭਤਿ, ਅਲੁਬ੍ਭਨਮਤ੍ਤਮੇਵ ਵਾ ਤਨ੍ਤਿ ਅਲੋਭੋ. ਸੋ ਆਰਮ੍ਮਣੇ ਚਿਤ੍ਤਸ੍ਸ ਅਲਗ੍ਗਭਾਵਲਕ੍ਖਣੋ ਕਮਲਦਲੇ ਜਲਬਿਨ੍ਦੁ ਵਿਯ, ਅਪਰਿਗ੍ਗਹਰਸੋ ਮੁਤ੍ਤਭਿਕ੍ਖੁ ਵਿਯ, ਅਨਲ੍ਲੀਨਭਾਵਪਚ੍ਚੁਪਟ੍ਠਾਨੋ ਅਸੁਚਿਮ੍ਹਿ ਪਤਿਤਪੁਰਿਸੋ ਵਿਯ.

ਨ ਦੁਸ੍ਸਨ੍ਤਿ ਤੇਨ, ਸਯਂ ਵਾ ਨ ਦੁਸ੍ਸਤਿ, ਅਦੁਸ੍ਸਨਮਤ੍ਤਮੇਵ ਵਾ ਤਨ੍ਤਿ ਅਦੋਸੋ. ਸੋ ਅਚਣ੍ਡਿਕ੍ਕਲਕ੍ਖਣੋ, ਅਵਿਰੋਧਲਕ੍ਖਣੋ ਵਾ ਅਨੁਕੂਲਮਿਤ੍ਤੋ ਵਿਯ, ਆਘਾਤਵਿਨਯਨਰਸੋ, ਪਰਿਲ਼ਾਹਵਿਨਯਨਰਸੋ ¶ ਵਾ ਚਨ੍ਦਨਂ ਵਿਯ, ਸੋਮ੍ਮਭਾਵਪਚ੍ਚੁਪਟ੍ਠਾਨੋ ਪੁਣ੍ਣਚਨ੍ਦੋ ਵਿਯ.

ਕਾਯਦੁਚ੍ਚਰਿਤਾਦੀਹਿ ਹਿਰੀਯਤੀਤਿ ਹਿਰੀ. ਲਜ੍ਜਾਯੇਤਂ ਅਧਿਵਚਨਂ. ਤੇਹਿਯੇਵ ਓਤ੍ਤਪ੍ਪਤੀਤਿ ਓਤ੍ਤਪ੍ਪਂ. ਪਾਪਤੋ ਉਬ੍ਬੇਗਸ੍ਸੇਤਂ ਅਧਿਵਚਨਂ. ਤਤ੍ਥ ਪਾਪਤੋ ਜਿਗੁਚ੍ਛਨਲਕ੍ਖਣਾ ਹਿਰੀ, ਓਤ੍ਤਾਸਲਕ੍ਖਣਂ ਓਤ੍ਤਪ੍ਪਂ. ਉਭੋਪਿ ਪਾਪਾਨਂ ਅਕਰਣਰਸਾ, ਪਾਪਤੋ ਸਙ੍ਕੋਚਨਪਚ੍ਚੁਪਟ੍ਠਾਨਾ, ਅਤ੍ਤਗਾਰਵਪਰਗਾਰਵਪਦਟ੍ਠਾਨਾ. ਇਮੇ ਧਮ੍ਮਾ ਲੋਕਪਾਲਾਤਿ ਦਟ੍ਠਬ੍ਬਾ.

ਕਾਯਪਸ੍ਸਮ੍ਭਨਂ ਕਾਯਪਸ੍ਸਦ੍ਧਿ. ਚਿਤ੍ਤਪਸ੍ਸਮ੍ਭਨਂ ਚਿਤ੍ਤਪਸ੍ਸਦ੍ਧਿ. ਕਾਯੋਤਿ ਚੇਤ੍ਥ ਵੇਦਨਾਦਯੋ ਤਯੋ ਖਨ੍ਧਾ. ਉਭੋਪਿ ਪਨੇਤਾ ਏਕਤੋ ਹੁਤ੍ਵਾ ਕਾਯਚਿਤ੍ਤਦਰਥਵੂਪਸਮਲਕ੍ਖਣਾ ¶ , ਕਾਯਚਿਤ੍ਤਦਰਥਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਅਪਰਿਪ੍ਫਨ੍ਦਨਸੀਤਿਭਾਵਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਅਵੂਪਸਮਤਾਉਦ੍ਧਚ੍ਚਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.

ਕਾਯਲਹੁਭਾਵੋ ¶ ਕਾਯਲਹੁਤਾ. ਚਿਤ੍ਤਲਹੁਭਾਵੋ ਚਿਤ੍ਤਲਹੁਤਾ. ਕਾਯਚਿਤ੍ਤਾਨਂ ਗਰੁਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਗਰੁਭਾਵਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਅਦਨ੍ਧਤਾਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਗਰੁਭਾਵਕਰਥਿਨਮਿਦ੍ਧਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.

ਕਾਯਮੁਦੁਭਾਵੋ ਕਾਯਮੁਦੁਤਾ. ਚਿਤ੍ਤਮੁਦੁਭਾਵੋ ਚਿਤ੍ਤਮੁਦੁਤਾ. ਕਾਯਚਿਤ੍ਤਾਨਂ ਥਦ੍ਧਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਾਨਂ ਥਦ੍ਧਭਾਵਨਿਮ੍ਮਦਨਰਸਾ, ਅਪ੍ਪਟਿਘਾਤਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਥਦ੍ਧਭਾਵਕਰਦਿਟ੍ਠਿਮਾਨਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.

ਕਾਯਕਮ੍ਮਞ੍ਞਭਾਵੋ ਕਾਯਕਮ੍ਮਞ੍ਞਤਾ. ਚਿਤ੍ਤਕਮ੍ਮਞ੍ਞਭਾਵੋ ਚਿਤ੍ਤਕਮ੍ਮਞ੍ਞਤਾ. ਕਾਯਚਿਤ੍ਤਾਨਂ ਅਕਮ੍ਮਞ੍ਞਭਾਵਵੂਪਸਮਲਕ੍ਖਣਾ, ਕਾਯਚਿਤ੍ਤਾਨਂ ਅਕਮ੍ਮਞ੍ਞਭਾਵਨਿਮ੍ਮਦਨਰਸਾ, ਕਾਯਚਿਤ੍ਤਾਨਂ ਆਰਮ੍ਮਣਕਰਣਸਮ੍ਪਤ੍ਤਿਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਂ, ਕਾਯਚਿਤ੍ਤਾਨਂ ¶ ਅਕਮ੍ਮਞ੍ਞਭਾਵਕਰਅਵਸੇਸਨੀਵਰਣਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਵੇਦਿਤਬ੍ਬਾ.

ਕਾਯਪਾਗੁਞ੍ਞਭਾਵੋ ਕਾਯਪਾਗੁਞ੍ਞਤਾ. ਚਿਤ੍ਤਪਾਗੁਞ੍ਞਭਾਵੋ ਚਿਤ੍ਤਪਾਗੁਞ੍ਞਤਾ. ਕਾਯਚਿਤ੍ਤਾਨਂ ਅਗੇਲਞ੍ਞਭਾਵਲਕ੍ਖਣਾ, ਕਾਯਚਿਤ੍ਤਾਨਂ ਗੇਲਞ੍ਞਨਿਮ੍ਮਦਨਰਸਾ, ਨਿਰਾਦੀਨਵਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਗੇਲਞ੍ਞਭਾਵਕਰਅਸ੍ਸਦ੍ਧਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਦਟ੍ਠਬ੍ਬਾ.

ਕਾਯਸ੍ਸ ਉਜੁਕਭਾਵੋ ਕਾਯੁਜੁਕਤਾ. ਚਿਤ੍ਤਸ੍ਸ ਉਜੁਕਭਾਵੋ ਚਿਤ੍ਤੁਜੁਕਤਾ. ਕਾਯਚਿਤ੍ਤਾਨਂ ਅਕੁਟਿਲਭਾਵਲਕ੍ਖਣਾ, ਕਾਯਚਿਤ੍ਤਾਨਂ ਅਜ੍ਜਵਲਕ੍ਖਣਾ ਵਾ, ਕਾਯਚਿਤ੍ਤਾਨਂ ਕੁਟਿਲਭਾਵਨਿਮ੍ਮਦਨਰਸਾ, ਅਜਿਮ੍ਹਤਾਪਚ੍ਚੁਪਟ੍ਠਾਨਾ, ਕਾਯਚਿਤ੍ਤਪਦਟ੍ਠਾਨਾ, ਕਾਯਚਿਤ੍ਤਾਨਂ ਕੁਟਿਲਭਾਵਕਰਮਾਯਾਸਾਠੇਯ੍ਯਾਦਿਕਿਲੇਸਪ੍ਪਟਿਪਕ੍ਖਭੂਤਾਤਿ ਦਟ੍ਠਬ੍ਬਾ.

ਛਨ੍ਦੋਤਿ ਕਤ੍ਤੁਕਮ੍ਯਤਾਯੇਤਂ ਅਧਿਵਚਨਂ. ਤਸ੍ਮਾ ਸੋ ਕਤ੍ਤੁਕਮ੍ਯਤਾਲਕ੍ਖਣੋ ਛਨ੍ਦੋ, ਆਰਮ੍ਮਣਪਰਿਯੇਸਨਰਸੋ, ਆਰਮ੍ਮਣੇਨ ਅਤ੍ਥਿਕਤਾਪਚ੍ਚੁਪਟ੍ਠਾਨੋ, ਤਦੇਵਸ੍ਸ ਪਦਟ੍ਠਾਨੋ.

ਅਧਿਮੁਚ੍ਚਨਂ ¶ ਅਧਿਮੋਕ੍ਖੋ. ਸੋ ਸਨ੍ਨਿਟ੍ਠਾਨਲਕ੍ਖਣੋ, ਅਸਂਸਪ੍ਪਨਰਸੋ, ਨਿਚ੍ਛਯਪਚ੍ਚੁਪਟ੍ਠਾਨੋ, ਸਨ੍ਨਿਟ੍ਠੇਯ੍ਯਧਮ੍ਮਪਦਟ੍ਠਾਨੋ, ਆਰਮ੍ਮਣੇ ਨਿਚ੍ਚਲਭਾਵੇਨ ਇਨ੍ਦਖੀਲੋ ਵਿਯ ਦਟ੍ਠਬ੍ਬੋ.

ਤੇਸੁ ¶ ਤੇਸੁ ਧਮ੍ਮੇਸੁ ਮਜ੍ਝਤ੍ਤਭਾਵੋ ਤਤ੍ਰਮਜ੍ਝਤ੍ਤਤਾ. ਸਾ ਚਿਤ੍ਤਚੇਤਸਿਕਾਨਂ ਸਮਵਾਹਿਤਲਕ੍ਖਣਾ, ਊਨਾਧਿਕਤਾਨਿਵਾਰਣਰਸਾ, ਪਕ੍ਖਪਾਤੁਪਚ੍ਛੇਦਨਰਸਾ ਵਾ, ਮਜ੍ਝਤ੍ਤਭਾਵਪਚ੍ਚੁਪਟ੍ਠਾਨਾ.

ਕਿਰਿਯਾ ਕਾਰੋ, ਮਨਸ੍ਮਿਂ ਕਾਰੋ ਮਨਸਿਕਾਰੋ. ਪੁਰਿਮਮਨਤੋ ਵਿਸਦਿਸਂ ਮਨਂ ਕਰੋਤੀਤਿ ਚ ਮਨਸਿਕਾਰੋ.

ਸ੍ਵਾਯਂ ¶ ਆਰਮ੍ਮਣਪਟਿਪਾਦਕੋ, ਵੀਥਿਪਟਿਪਾਦਕੋ, ਜਵਨਪਟਿਪਾਦਕੋਤਿ ਤਿਪ੍ਪਕਾਰੋ. ਤਤ੍ਥ ਆਰਮ੍ਮਣਪਟਿਪਾਦਕੋ ਮਨਸ੍ਮਿਂ ਕਾਰੋ ਮਨਸਿਕਾਰੋ. ਸੋ ਸਾਰਣਲਕ੍ਖਣੋ, ਸਮ੍ਪਯੁਤ੍ਤਾਨਂ ਆਰਮ੍ਮਣੇ ਸਂਯੋਜਨਰਸੋ, ਆਰਮ੍ਮਣਾਭਿਮੁਖਭਾਵਪਚ੍ਚੁਪਟ੍ਠਾਨੋ, ਆਰਮ੍ਮਣਪਦਟ੍ਠਾਨੋ, ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਆਰਮ੍ਮਣਪਟਿਪਾਦਕਤ੍ਤੇਨ ਸਮ੍ਪਯੁਤ੍ਤਾਨਂ ਸਾਰਥੀ ਵਿਯ ਦਟ੍ਠਬ੍ਬੋ. ਵੀਥਿਪਟਿਪਾਦਕੋਤਿ ਪਞ੍ਚਦ੍ਵਾਰਾਵਜ੍ਜਨਸ੍ਸੇਤਂ ਅਧਿਵਚਨਂ, ਜਵਨਪਟਿਪਾਦਕੋਤਿ ਮਨੋਦ੍ਵਾਰਾਵਜ੍ਜਨਸ੍ਸੇਤਂ ਅਧਿਵਚਨਂ, ਨ ਤੇ ਇਧ ਅਧਿਪ੍ਪੇਤਾ.

ਕਰੁਣਾਤਿ ਪਰਦੁਕ੍ਖੇ ਸਤਿ ਸਾਧੂਨਂ ਹਦਯਕਮ੍ਪਨਂ ਕਰੋਤੀਤਿ ਕਰੁਣਾ, ਕਿਨਾਤਿ ਵਿਨਾਸੇਤਿ ਵਾ ਪਰਦੁਕ੍ਖਨ੍ਤਿ ਕਰੁਣਾ. ਸਾ ਪਰਦੁਕ੍ਖਾਪਨਯਨਾਕਾਰਪ੍ਪਵਤ੍ਤਿਲਕ੍ਖਣਾ, ਪਰਦੁਕ੍ਖਾਸਹਨਰਸਾ, ਅਵਿਹਿਂਸਾਪਚ੍ਚੁਪਟ੍ਠਾਨਾ, ਦੁਕ੍ਖਾਭਿਭੂਤਾਨਂ ਅਨਾਥਭਾਵਦਸ੍ਸਨਪਦਟ੍ਠਾਨਾ.

ਮੋਦਨ੍ਤਿ ਤਾਯ, ਸਯਂ ਵਾ ਮੋਦਤੀਤਿ ਮੁਦਿਤਾ. ਸਾ ਪਮੋਦਨਲਕ੍ਖਣਾ, ਅਨਿਸ੍ਸਾਯਨਰਸਾ, ਅਰਤਿਵਿਘਾਤਪਚ੍ਚੁਪਟ੍ਠਾਨਾ, ਸਤ੍ਤਾਨਂ ਸਮ੍ਪਤ੍ਤਿਦਸ੍ਸਨਪਦਟ੍ਠਾਨਾ. ਕੇਚਿ ਪਨ ਮੇਤ੍ਤੁਪੇਕ੍ਖਾਯੋਪਿ ਅਨਿਯਤੇ ਇਚ੍ਛਨ੍ਤਿ, ਤਂ ਨ ਗਹੇਤਬ੍ਬਂ. ਅਤ੍ਥਤੋ ਹਿ ਅਦੋਸੋ ਏਵ ਮੇਤ੍ਤਾ, ਤਤ੍ਰਮਜ੍ਝਤ੍ਤੁਪੇਕ੍ਖਾਯੇਵ ਉਪੇਕ੍ਖਾਤਿ.

ਕਾਯਦੁਚ੍ਚਰਿਤਤੋ ਵਿਰਤਿ ਕਾਯਦੁਚ੍ਚਰਿਤਵਿਰਤਿ. ਏਸੇਵ ਨਯੋ ਸੇਸੇਸੁਪਿ ਦ੍ਵੀਸੁ. ਲਕ੍ਖਣਾਦਿਤੋ ਪਨ ਏਤਾ ਤਿਸ੍ਸੋਪਿ ਵਿਰਤਿਯੋ ਕਾਯਦੁਚ੍ਚਰਿਤਾਦਿਵਤ੍ਥੂਨਂ ਅਵੀਤਿਕ੍ਕਮਲਕ੍ਖਣਾ, ਕਾਯਦੁਚ੍ਚਰਿਤਾਦਿਵਤ੍ਥੁਤੋ ਸਙ੍ਕੋਚਨਰਸਾ, ਅਕਿਰਿਯਪਚ੍ਚੁਪਟ੍ਠਾਨਾ, ਸਦ੍ਧਾਹਿਰਿਓਤ੍ਤਪ੍ਪਅਪ੍ਪਿਚ੍ਛਤਾਦਿਗੁਣਪਦਟ੍ਠਾਨਾ. ਕੇਚਿ ਪਨ ਇਮਾਸੁ ਏਕੇਕਂ ਨਿਯਤਂ ਵਿਰਤਿਂ ਇਚ੍ਛਨ੍ਤਿ. ਏਵਂ ਕਾਮਾਵਚਰਪਠਮਮਹਾਕੁਸਲਚਿਤ੍ਤੇਨ ਇਮੇ ਤੇਤ੍ਤਿਂਸ ਵਾ ਚਤੁਤ੍ਤਿਂਸ ਵਾ ਧਮ੍ਮਾ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ.

ਯਥਾ ¶ ¶ ¶ ਚ ਪਠਮੇਨ, ਏਵਂ ਦੁਤਿਯਚਿਤ੍ਤੇਨਾਪਿ. ਸਸਙ੍ਖਾਰਭਾਵਮਤ੍ਤਮੇਵ ਹਿ ਏਤ੍ਥ ਵਿਸੇਸੋ. ਪੁਨ ਤਤਿਯੇਨ ਞਾਣਵਿਪ੍ਪਯੋਗਤੋ ਠਪੇਤ੍ਵਾ ਅਮੋਹਂ ਅਵਸੇਸਾ ਦ੍ਵਤ੍ਤਿਂਸ ਵਾ ਤੇਤ੍ਤਿਂਸ ਵਾ ਵੇਦਿਤਬ੍ਬਾ. ਤਥਾ ਚਤੁਤ੍ਥੇਨਾਪਿ ਸਸਙ੍ਖਾਰਭਾਵਮਤ੍ਤਮੇਵ ਵਿਸੇਸੋ, ਪਠਮੇ ਵੁਤ੍ਤੇਸੁ ਪਨ ਠਪੇਤ੍ਵਾ ਪੀਤਿਂ ਅਵਸੇਸਾ ਪਞ੍ਚਮੇਨ ਸਮ੍ਪਯੋਗਂ ਗਚ੍ਛਨ੍ਤਿ. ਸੋਮਨਸ੍ਸਟ੍ਠਾਨੇ ਚੇਤ੍ਥ ਉਪੇਕ੍ਖਾਵੇਦਨਾ ਪਵਿਟ੍ਠਾ. ਸਾ ਪਨ ਇਟ੍ਠਾਨਿਟ੍ਠਵਿਪਰੀਤਾਨੁਭਵਨਲਕ੍ਖਣਾ, ਪਕ੍ਖਪਾਤੁਪਚ੍ਛੇਦਨਰਸਾ. ਯਥਾ ਚ ਪਞ੍ਚਮੇਨ, ਏਵਂ ਛਟ੍ਠੇਨਾਪਿ. ਸਸਙ੍ਖਾਰਮਤ੍ਤਮੇਵ ਹੋਤਿ ਵਿਸੇਸੋ. ਸਤ੍ਤਮੇਨ ਪਨ ਠਪੇਤ੍ਵਾ ਪਞ੍ਞਂ ਅਵਸੇਸਾ ਏਕਤਿਂਸ ਵਾ ਦ੍ਵਤ੍ਤਿਂਸ ਵਾ ਧਮ੍ਮਾ ਹੋਨ੍ਤਿ, ਤਥਾ ਅਟ੍ਠਮੇਨਾਪਿ. ਸਸਙ੍ਖਾਰਮਤ੍ਤਮੇਵ ਵਿਸੇਸੋ. ਏਵਂ ਤਾਵ ਕਾਮਾਵਚਰਕੁਸਲਚੇਤਸਿਕਾ ਵੇਦਿਤਬ੍ਬਾ.

੮੧.

ਉਪੇਕ੍ਖਾਯੁਤ੍ਤਚਿਤ੍ਤੇਸੁ, ਨ ਦੁਕ੍ਖਸੁਖਪੀਤਿਯੋ;

ਜਾਯਨ੍ਤੇਵ ਵਿਸੁਂ ਪਞ੍ਚ, ਕਰੁਣਾਮੁਦਿਤਾਦਯੋ.

ਅਵਸੇਸੇਸੁ ਪਨ ਰੂਪਾਵਚਰਚਿਤ੍ਤਸਮ੍ਪਯੁਤ੍ਤਾ ਰੂਪਾਵਚਰਾ, ਤਤ੍ਥ ਪਠਮਚਿਤ੍ਤਸਮ੍ਪਯੁਤ੍ਤਾ ਤਾਵ ਕਾਮਾਵਚਰਪਠਮਚਿਤ੍ਤੇ ਵੁਤ੍ਤੇਸੁ ਠਪੇਤ੍ਵਾ ਵਿਰਤਿਤ੍ਤਯਂ ਅਵਸੇਸਾ ਵੇਦਿਤਬ੍ਬਾ. ਵਿਰਤਿਯੋ ਪਨ ਕਾਮਾਵਚਰਕੁਸਲਲੋਕੁਤ੍ਤਰੇਸ੍ਵੇਵ ਉਪ੍ਪਜ੍ਜਨ੍ਤਿ, ਨ ਅਞ੍ਞੇਸੁ. ਦੁਤਿਯੇਨ ਵਿਤਕ੍ਕਵਜ੍ਜਾ ਦ੍ਵਤ੍ਤਿਂਸ ਵਾ ਤੇਤ੍ਤਿਂਸ ਵਾ. ਤਤਿਯੇਨ ਵਿਚਾਰਵਜ੍ਜਾ ਏਕਤਿਂਸ ਵਾ ਦ੍ਵਤ੍ਤਿਂਸ ਵਾ. ਚਤੁਤ੍ਥੇਨ ਤਤੋ ਪੀਤਿਵਜ੍ਜਾ ਤਿਂਸ ਵਾ ਏਕਤਿਂਸ ਵਾ. ਪਞ੍ਚਮੇਨ ਤਤੋ ਕਰੁਣਾਮੁਦਿਤਾਵਜ੍ਜਾ ਤਿਂਸ ਹੋਨ੍ਤਿ, ਸੋਮਨਸ੍ਸਟ੍ਠਾਨੇ ਉਪੇਕ੍ਖਾ ਪਵਿਟ੍ਠਾ. ਏਵਂ ਰੂਪਾਵਚਰਕੁਸਲਚੇਤਸਿਕਾ ਵੇਦਿਤਬ੍ਬਾ.

ਅਰੂਪਾਵਚਰਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ, ਤੇ ਪਨ ਰੂਪਾਵਚਰਪਞ੍ਚਮੇ ਵੁਤ੍ਤਨਯੇਨ ਵੇਦਿਤਬ੍ਬਾ. ਅਰੂਪਾਵਚਰਭਾਵੋਵੇਤ੍ਥ ਵਿਸੇਸੋ.

ਲੋਕੁਤ੍ਤਰਚਿਤ੍ਤਸਮ੍ਪਯੁਤ੍ਤਾ ¶ ਲੋਕੁਤ੍ਤਰਾ, ਤੇ ਪਨ ਪਠਮਜ੍ਝਾਨਿਕੇ ਮਗ੍ਗਚਿਤ੍ਤੇ ਪਠਮਰੂਪਾਵਚਰਚਿਤ੍ਤੇ ਵੁਤ੍ਤਨਯੇਨ ਦੁਤਿਯਜ੍ਝਾਨਿਕਾਦਿਭੇਦੇਪਿ ਮਗ੍ਗਚਿਤ੍ਤੇ ਦੁਤਿਯਰੂਪਾਵਚਰਚਿਤ੍ਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਕਰੁਣਾਮੁਦਿਤਾਨਮਭਾਵੋ ਚ ਨਿਯਤਵਿਰਤਿਭਾਵੋ ਚ ਲੋਕੁਤ੍ਤਰਭਾਵੋ ਚੇਤ੍ਥ ਵਿਸੇਸੋ. ਏਵਂ ਤਾਵ ਕੁਸਲਚਿਤ੍ਤਸਮ੍ਪਯੁਤ੍ਤਚੇਤਸਿਕਾ ਵੇਦਿਤਬ੍ਬਾ.

ਅਕੁਸਲਾ ਪਨ ਚੇਤਸਿਕਾ ਭੂਮਿਤੋ ਏਕਵਿਧਾ ਕਾਮਾਵਚਰਾਯੇਵ, ਤੇਸੁ ਲੋਭਮੂਲਪਠਮਾਕੁਸਲਚਿਤ੍ਤਸਮ੍ਪਯੁਤ੍ਤਾ ¶ ਤਾਵ ਨਿਯਤਾ ਸਰੂਪੇਨਾਗਤਾ ਪਨ੍ਨਰਸ, ਯੇਵਾਪਨਕਾ ਨਿਯਤਾ ਚਤ੍ਤਾਰੋਤਿ ¶ ਏਕੂਨਵੀਸਤਿ ਹੋਨ੍ਤਿ. ਅਨਿਯਤਾ ਛ ਯੇਵਾਪਨਕਾਤਿ ਸਬ੍ਬੇ ਪਞ੍ਚਵੀਸਤਿ ਹੋਨ੍ਤਿ. ਸੇਯ੍ਯਥਿਦਂ – ਫਸ੍ਸੋ ਸੋਮਨਸ੍ਸਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤਸ੍ਸੇਕਗ੍ਗਤਾ ਵੀਰਿਯਂ ਜੀਵਿਤਂ ਅਹਿਰਿਕਂ ਅਨੋਤ੍ਤਪ੍ਪਂ ਲੋਭੋ ਮੋਹੋ ਮਿਚ੍ਛਾਦਿਟ੍ਠੀਤਿ ਇਮੇ ਸਰੂਪੇਨਾਗਤਾ ਪਨ੍ਨਰਸ, ਛਨ੍ਦੋ ਅਧਿਮੋਕ੍ਖੋ ਉਦ੍ਧਚ੍ਚਂ ਮਨਸਿਕਾਰੋਤਿ ਇਮੇ ਚਤ੍ਤਾਰੋ ਨਿਯਤਯੇਵਾਪਨਕਾ, ਇਮੇ ਪਨ ਪਟਿਪਾਟਿਯਾ ਦਸਸੁ ਚਿਤ੍ਤੇਸੁ ਨਿਯਤਾ ਹੋਨ੍ਤਿ, ਮਾਨੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਂ ਥਿਨਮਿਦ੍ਧਨ੍ਤਿ ਇਮੇ ਛਯੇਵ ਅਨਿਯਤਯੇਵਾਪਨਕਾ.

੮੨.

ਏਵਂ ਯੇਵਾਪਨਾ ਸਬ੍ਬੇ, ਨਿਯਤਾਨਿਯਤਾ ਦਸ;

ਨਿਦ੍ਦਿਟ੍ਠਾ ਪਾਪਚਿਤ੍ਤੇਸੁ, ਹਤਪਾਪੇਨ ਤਾਦਿਨਾ.

ਤਤ੍ਥ ਫਸ੍ਸੋਤਿ ਅਕੁਸਲਚਿਤ੍ਤਸਹਜਾਤੋ ਫਸ੍ਸੋ. ਏਸ ਨਯੋ ਸੇਸੇਸੁਪਿ. ਨ ਹਿਰੀਯਤੀਤਿ ਅਹਿਰਿਕੋ, ਅਹਿਰਿਕਸ੍ਸ ਭਾਵੋ ਅਹਿਰਿਕਂ. ਕਾਯਦੁਚ੍ਚਰਿਤਾਦੀਹਿ ਓਤ੍ਤਪ੍ਪਤੀਤਿ ਓਤ੍ਤਪ੍ਪਂ, ਨ ਓਤ੍ਤਪ੍ਪਂ ਅਨੋਤ੍ਤਪ੍ਪਂ. ਤਤ੍ਥ ਕਾਯਦੁਚ੍ਚਰਿਤਾਦੀਹਿ ਅਜਿਗੁਚ੍ਛਨਲਕ੍ਖਣਂ, ਅਲਜ੍ਜਾਲਕ੍ਖਣਂ ਵਾ ਅਹਿਰਿਕਂ, ਅਨੋਤ੍ਤਪ੍ਪਂ ਤੇਹੇਵ ਅਸਾਰਜ੍ਜਨਲਕ੍ਖਣਂ, ਅਨੁਤ੍ਤਾਸਲਕ੍ਖਣਂ ਵਾ.

ਲੁਬ੍ਭਨ੍ਤਿ ¶ ਤੇਨ, ਸਯਂ ਵਾ ਲੁਬ੍ਭਤਿ, ਲੁਬ੍ਭਨਮਤ੍ਤਮੇਵ ਵਾ ਤਨ੍ਤਿ ਲੋਭੋ. ਸੋ ਆਰਮ੍ਮਣਗਹਣਲਕ੍ਖਣੋ ਮਕ੍ਕਟਾਲੇਪੋ ਵਿਯ, ਅਭਿਸਙ੍ਗਰਸੋ ਤਤ੍ਤਕਪਾਲੇ ਪਕ੍ਖਿਤ੍ਤਮਂਸਪੇਸਿ ਵਿਯ, ਅਪਰਿਚ੍ਚਾਗਪਚ੍ਚੁਪਟ੍ਠਾਨੋ ਤੇਲਞ੍ਜਨਰਾਗੋ ਵਿਯ, ਸਂਯੋਜਨਿਯੇਸੁ ਧਮ੍ਮੇਸੁ ਅਸ੍ਸਾਦਦਸ੍ਸਨਪਦਟ੍ਠਾਨੋ.

ਮੁਯ੍ਹਨ੍ਤਿ ਤੇਨ, ਸਯਂ ਵਾ ਮੁਯ੍ਹਤਿ, ਮੁਯ੍ਹਨਮਤ੍ਤਮੇਵ ਵਾ ਤਨ੍ਤਿ ਮੋਹੋ. ਸੋ ਚਿਤ੍ਤਸ੍ਸ ਅਨ੍ਧਭਾਵਲਕ੍ਖਣੋ, ਅਞ੍ਞਾਣਲਕ੍ਖਣੋ ਵਾ, ਅਸਮ੍ਪਟਿਵੇਧਰਸੋ, ਆਰਮ੍ਮਣਸਭਾਵਚ੍ਛਾਦਨਰਸੋ ਵਾ, ਅਨ੍ਧਕਾਰਪਚ੍ਚੁਪਟ੍ਠਾਨੋ, ਅਯੋਨਿਸੋਮਨਸਿਕਾਰਪਦਟ੍ਠਾਨੋ.

ਮਿਚ੍ਛਾ ਪਸ੍ਸਨ੍ਤਿ ਤਾਯ, ਸਯਂ ਵਾ ਮਿਚ੍ਛਾ ਪਸ੍ਸਤਿ, ਮਿਚ੍ਛਾਦਸ੍ਸਨਮਤ੍ਤਮੇਵ ਵਾ ਏਸਾਤਿ ਮਿਚ੍ਛਾਦਿਟ੍ਠਿ. ਸਾ ਅਯੋਨਿਸੋਅਭਿਨਿਵੇਸਲਕ੍ਖਣਾ, ਪਰਾਮਾਸਰਸਾ, ਮਿਚ੍ਛਾਭਿਨਿਵੇਸਪਚ੍ਚੁਪਟ੍ਠਾਨਾ, ਅਰਿਯਾਨਂ ਅਦਸ੍ਸਨਕਾਮਤਾਦਿਪਦਟ੍ਠਾਨਾ.

ਉਦ੍ਧਤਭਾਵੋ ¶ ਉਦ੍ਧਚ੍ਚਂ. ਤਂ ਅਵੂਪਸਮਲਕ੍ਖਣਂ ਵਾਤਾਭਿਘਾਤਚਲਜਲਂ ਵਿਯ, ਅਨਵਟ੍ਠਾਨਰਸਂ ਵਾਤਾਭਿਘਾਤਚਲਧਜਪਟਾਕਾ ਵਿਯ, ਭਨ੍ਤਤ੍ਤਪਚ੍ਚੁਪਟ੍ਠਾਨਂ ਪਾਸਾਣਾਭਿਘਾਤਸਮੁਦ੍ਧਤਭਸ੍ਮਂ ਵਿਯ, ਅਯੋਨਿਸੋਮਨਸਿਕਾਰਪਦਟ੍ਠਾਨਂ.

ਮਞ੍ਞਤੀਤਿ ¶ ਮਾਨੋ. ਸੋ ਉਣ੍ਣਤਿਲਕ੍ਖਣੋ, ਸਮ੍ਪਗ੍ਗਹਣਰਸੋ, ਕੇਤੁਕਮ੍ਯਤਾਪਚ੍ਚੁਪਟ੍ਠਾਨੋ, ਦਿਟ੍ਠਿਵਿਪ੍ਪਯੁਤ੍ਤਲੋਭਪਦਟ੍ਠਾਨੋ.

ਇਸ੍ਸਤੀਤਿ ਇਸ੍ਸਾ. ਸਾ ਪਰਸਮ੍ਪਤ੍ਤੀਨਂ ਉਸੂਯਨਲਕ੍ਖਣਾ, ਤਤ੍ਥੇਵ ਅਨਭਿਰਤਿਰਸਾ, ਤਤੋ ਵਿਮੁਖਭਾਵਪਚ੍ਚੁਪਟ੍ਠਾਨਾ, ਪਰਸਮ੍ਪਤ੍ਤਿਪਦਟ੍ਠਾਨਾ.

ਮਚ੍ਛਰਭਾਵੋ ਮਚ੍ਛਰਿਯਂ. ਤਂ ਅਤ੍ਤਨੋ ਸਮ੍ਪਤ੍ਤੀਨਂ ਨਿਗੁਹਣਲਕ੍ਖਣਂ, ਤਾਸਂਯੇਵ ਪਰੇਹਿ ਸਾਧਾਰਣਭਾਵਅਕ੍ਖਮਨਰਸਂ, ਸਙ੍ਕੋਚਨਪਚ੍ਚੁਪਟ੍ਠਾਨਂ, ਅਤ੍ਤਸਮ੍ਪਤ੍ਤਿਪਦਟ੍ਠਾਨਂ.

ਕੁਚ੍ਛਿਤਂ ¶ ਕਤਂ ਕੁਕਤਂ, ਤਸ੍ਸ ਭਾਵੋ ਕੁਕ੍ਕੁਚ੍ਚਂ. ਤਂ ਪਚ੍ਛਾਨੁਤਾਪਲਕ੍ਖਣਂ, ਕਤਾਕਤਾਨੁਸੋਚਨਰਸਂ, ਵਿਪ੍ਪਟਿਸਾਰਪਚ੍ਚੁਪਟ੍ਠਾਨਂ, ਕਤਾਕਤਪਦਟ੍ਠਾਨਂ.

ਥਿਨਤਾ ਥਿਨਂ. ਮਿਦ੍ਧਤਾ ਮਿਦ੍ਧਂ. ਅਨੁਸ੍ਸਾਹਨਸਂਸੀਦਨਤਾ, ਅਸਤ੍ਤਿਵਿਘਾਤੋ ਚਾਤਿ ਅਤ੍ਥੋ. ਥਿਨਞ੍ਚ ਮਿਦ੍ਧਞ੍ਚ ਥਿਨਮਿਦ੍ਧਂ. ਤਤ੍ਥ ਥਿਨਂ ਅਨੁਸ੍ਸਾਹਨਲਕ੍ਖਣਂ, ਵੀਰਿਯਵਿਨੋਦਨਰਸਂ, ਸਂਸੀਦਨਭਾਵਪਚ੍ਚੁਪਟ੍ਠਾਨਂ. ਮਿਦ੍ਧਂ ਅਕਮ੍ਮਞ੍ਞਤਾਲਕ੍ਖਣਂ, ਓਨਹਨਰਸਂ, ਲੀਨਤਾਪਚ੍ਚੁਪਟ੍ਠਾਨਂ, ਉਭਯਮ੍ਪਿ ਅਯੋਨਿਸੋਮਨਸਿਕਾਰਪਦਟ੍ਠਾਨਂ. ਸੇਸਾ ਕੁਸਲੇ ਵੁਤ੍ਤਨਯੇਨ ਵੇਦਿਤਬ੍ਬਾ.

ਏਤ੍ਥ ਪਨ ਵਿਤਕ੍ਕਵੀਰਿਯਸਮਾਧੀਨਂ ਮਿਚ੍ਛਾਸਙ੍ਕਪ੍ਪਮਿਚ੍ਛਾਵਾਯਾਮਮਿਚ੍ਛਾਸਮਾਧਯੋ ਵਿਸੇਸਕਾ. ਇਤਿ ਇਮੇ ਏਕੂਨਵੀਸਤਿ ਚੇਤਸਿਕਾ ਪਠਮਾਕੁਸਲਚਿਤ੍ਤੇਨ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ. ਯਥਾ ਚ ਪਠਮੇਨ, ਏਵਂ ਦੁਤਿਯੇਨਾਪਿ. ਸਸਙ੍ਖਾਰਭਾਵੋ ਚੇਤ੍ਥ ਥਿਨਮਿਦ੍ਧਸ੍ਸ ਨਿਯਤਭਾਵੋ ਚ ਵਿਸੇਸੋ. ਤਤਿਯੇਨ ਪਠਮੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਸੇਸਾ ਅਟ੍ਠਾਰਸ ਵੇਦਿਤਬ੍ਬਾ. ਮਾਨੋ ਪਨੇਤ੍ਥ ਅਨਿਯਤੋ ਹੋਤਿ, ਦਿਟ੍ਠਿਯਾ ਸਹ ਨ ਉਪ੍ਪਜ੍ਜਤੀਤਿ. ਚਤੁਤ੍ਥੇਨ ਦੁਤਿਯੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਏਤ੍ਥਾਪਿ ਚ ਮਾਨੋ ਅਨਿਯਤੋ ਹੋਤਿ. ਪਞ੍ਚਮੇਨ ਪਠਮੇ ਵੁਤ੍ਤੇਸੁ ਠਪੇਤ੍ਵਾ ਪੀਤਿਂ ਅਵਸੇਸਾ ਸਮ੍ਪਯੋਗਂ ਗਚ੍ਛਨ੍ਤੀਤਿ. ਸੋਮਨਸ੍ਸਟ੍ਠਾਨੇ ਪਨੇਤ੍ਥ ਉਪੇਕ੍ਖਾ ਪਵਿਟ੍ਠਾ. ਛਟ੍ਠੇਨਾਪਿ ਪਞ੍ਚਮੇ ਵੁਤ੍ਤਸਦਿਸਾ ਏਵ. ਸਸਙ੍ਖਾਰਤਾ ¶ , ਥਿਨਮਿਦ੍ਧਸ੍ਸ ਨਿਯਤਭਾਵੋ ਚ ਵਿਸੇਸੋ. ਸਤ੍ਤਮੇਨ ਪਞ੍ਚਮੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਮਾਨੋ ਪਨੇਤ੍ਥ ਅਨਿਯਤੋ. ਅਟ੍ਠਮੇਨ ਛਟ੍ਠੇ ਵੁਤ੍ਤੇਸੁ ਠਪੇਤ੍ਵਾ ਦਿਟ੍ਠਿਂ ਅਵਸੇਸਾ ਵੇਦਿਤਬ੍ਬਾ. ਏਤ੍ਥਾਪਿ ਮਾਨੋ ¶ ਅਨਿਯਤੋ ਹੋਤਿ. ਏਵਂ ਲੋਭਮੂਲਚੇਤਸਿਕਾ ਵੇਦਿਤਬ੍ਬਾ.

ਦੋਮਨਸ੍ਸਸਹਗਤੇਸੁ ਪਟਿਘਸਮ੍ਪਯੁਤ੍ਤੇਸੁ ਦੋਸਮੂਲੇਸੁ ਦ੍ਵੀਸੁ ਪਠਮੇਨ ਅਸਙ੍ਖਾਰਿਕੇਨ ਸਮ੍ਪਯੁਤ੍ਤਾ ਨਿਯਤਾ ਸਰੂਪੇਨਾਗਤਾ ¶ ਤੇਰਸ. ਸੇਯ੍ਯਥਿਦਂ – ਫਸ੍ਸੋ ਦੋਮਨਸ੍ਸਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤੇਕਗ੍ਗਤਾ ਵਿਤਕ੍ਕੋ ਵਿਚਾਰੋ ਵੀਰਿਯਂ ਜੀਵਿਤਂ ਅਹਿਰਿਕਂ ਅਨੋਤ੍ਤਪ੍ਪਂ ਦੋਸੋ ਮੋਹੋ ਚੇਤਿ ਇਮੇ ਤੇਰਸ ਧਮ੍ਮਾ ਛਨ੍ਦਾਦੀਹਿ ਚਤੂਹਿ ਨਿਯਤਯੇਵਾਪਨਕੇਹਿ ਸਤ੍ਤਰਸ ਹੋਨ੍ਤਿ ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚੇਸੁ ਅਨਿਯਤੇਸੁ ਤੀਸੁ ਏਕੇਨ ਸਹ ਅਟ੍ਠਾਰਸ ਹੋਨ੍ਤਿ, ਏਤੇਪਿ ਤਯੋ ਨ ਏਕਤੋ ਉਪ੍ਪਜ੍ਜਨ੍ਤਿ.

ਤਤ੍ਥ ਦੁਟ੍ਠੁ ਮਨੋਤਿ ਦੁਮਨੋ, ਦੁਮਨਸ੍ਸ ਭਾਵੋ ਦੋਮਨਸ੍ਸਂ, ਦੋਮਨਸ੍ਸਵੇਦਨਾਯੇਤਂ ਅਧਿਵਚਨਂ. ਤੇਨ ਸਹਗਤਂ ਦੋਮਨਸ੍ਸਸਹਗਤਂ. ਤਂ ਅਨਿਟ੍ਠਾਰਮ੍ਮਣਾਨੁਭਵਨਲਕ੍ਖਣਂ, ਅਨਿਟ੍ਠਾਕਾਰਸਮ੍ਭੋਗਰਸਂ, ਚੇਤਸਿਕਾਬਾਧਪਚ੍ਚੁਪਟ੍ਠਾਨਂ, ਏਕਨ੍ਤੇਨੇਵ ਹਦਯਵਤ੍ਥੁਪਦਟ੍ਠਾਨਂ.

ਦੁਸ੍ਸਨ੍ਤਿ ਤੇਨ, ਸਯਂ ਵਾ ਦੁਸ੍ਸਤਿ, ਦੁਸ੍ਸਨਮਤ੍ਤਮੇਵ ਵਾ ਤਨ੍ਤਿ ਦੋਸੋ. ਸੋ ਚਣ੍ਡਿਕ੍ਕਲਕ੍ਖਣੋ ਪਹਤਾਸੀਵਿਸੋ ਵਿਯ, ਵਿਸਪ੍ਪਨਰਸੋ ਵਿਸਨਿਪਾਤੋ ਵਿਯ, ਅਤ੍ਤਨੋ ਨਿਸ੍ਸਯਦਹਨਰਸੋ ਵਾ ਦਾਵਗ੍ਗਿ ਵਿਯ, ਦੁਸ੍ਸਨਪਚ੍ਚੁਪਟ੍ਠਾਨੋ ਲਦ੍ਧੋਕਾਸੋ ਵਿਯ ਸਪਤ੍ਤੋ, ਆਘਾਤਵਤ੍ਥੁਪਦਟ੍ਠਾਨੋ. ਅਵਸੇਸਾ ਹੇਟ੍ਠਾ ਵੁਤ੍ਤਪ੍ਪਕਾਰਾਵ. ਇਤਿ ਇਮੇ ਸਤ੍ਤਰਸ ਵਾ ਅਟ੍ਠਾਰਸ ਵਾ ਨਵਮੇਨ ਸਮ੍ਪਯੋਗਂ ਗਚ੍ਛਨ੍ਤੀਤਿ ਵੇਦਿਤਬ੍ਬਾ. ਯਥਾ ਚ ਨਵਮੇਨ, ਏਵਂ ਦਸਮੇਨਾਪਿ. ਸਸਙ੍ਖਾਰਤਾ, ਪਨੇਤ੍ਥ ਥਿਨਮਿਦ੍ਧਸਮ੍ਭਵੋ ਚ ਵਿਸੇਸੋ.

ਦ੍ਵੀਸੁ ਪਨ ਮੋਹਮੂਲੇਸੁ ਵਿਚਿਕਿਚ੍ਛਾਸਮ੍ਪਯੁਤ੍ਤੇਨ ਏਕਾਦਸਮੇਨ ਸਮ੍ਪਯੁਤ੍ਤਾ ਤਾਵ ਫਸ੍ਸੋ ਉਪੇਕ੍ਖਾਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਵੀਰਿਯਂ ਜੀਵਿਤਂ ਚਿਤ੍ਤਟ੍ਠਿਤਿ ਅਹਿਰਿਕਂ ਅਨੋਤ੍ਤਪ੍ਪਂ ਮੋਹੋ ਵਿਚਿਕਿਚ੍ਛਾਤਿ ਸਰੂਪੇਨਾਗਤਾ ਤੇਰਸ, ਉਦ੍ਧਚ੍ਚਂ ਮਨਸਿਕਾਰੋਤਿ ਦ੍ਵੇ ਯੇਵਾਪਨਕਾ ਨਿਯਤਾ. ਤੇਹਿ ਸਦ੍ਧਿਂ ਪਨ੍ਨਰਸ ਹੋਨ੍ਤਿ.

ਤਤ੍ਥ ¶ ਪਵਤ੍ਤਟ੍ਠਿਤਿਮਤ੍ਤਾ ਏਕਗ੍ਗਤਾ. ਵਿਗਤਾ ਚਿਕਿਚ੍ਛਾਤਿ ਵਿਚਿਕਿਚ੍ਛਾ. ਸਭਾਵਂ ਵਿਚਿਨਨ੍ਤੋ ¶ ਏਤਾਯ ਕਿਚ੍ਛਤਿ ਕਿਲਮਤੀਤਿ ਵਿਚਿਕਿਚ੍ਛਾ. ਸਾ ਸਂਸਯਲਕ੍ਖਣਾ, ਕਮ੍ਪਨਰਸਾ, ਅਨਿਚ੍ਛਯਪਚ੍ਚੁਪਟ੍ਠਾਨਾ, ਅਯੋਨਿਸੋਮਨਸਿਕਾਰਪਦਟ੍ਠਾਨਾ. ਸੇਸਾ ਵੁਤ੍ਤਨਯਾ ਏਵ.

ਦ੍ਵਾਦਸਮੇਨ ਉਦ੍ਧਚ੍ਚਸਮ੍ਪਯੁਤ੍ਤੇਨ ਸਮ੍ਪਯੁਤ੍ਤਾ ਸਰੂਪੇਨਾਗਤਾ ¶ ਵਿਚਿਕਿਚ੍ਛਾਸਹਗਤੇ ਵੁਤ੍ਤੇਸੁ ਵਿਚਿਕਿਚ੍ਛਾਹੀਨਾ ਉਦ੍ਧਚ੍ਚਂ ਸਰੂਪੇਨ ਆਗਤਂ, ਤਸ੍ਮਾ ਤੇਰਸੇਵ ਹੋਨ੍ਤਿ. ਵਿਚਿਕਿਚ੍ਛਾਯ ਅਭਾਵੇਨ ਪਨੇਤ੍ਥ ਅਧਿਮੋਕ੍ਖੋ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਚੁਦ੍ਦਸ ਹੋਨ੍ਤਿ. ਅਧਿਮੋਕ੍ਖਸਮ੍ਭਵਤੋ ਸਮਾਧਿ ਬਲਵਾ ਹੋਤਿ, ਅਧਿਮੋਕ੍ਖਮਨਸਿਕਾਰਾ ਦ੍ਵੇ ਯੇਵਾਪਨਕਾ, ਤੇਹਿ ਸਹ ਪਨ੍ਨਰਸੇਵ ਹੋਨ੍ਤਿ. ਏਵਂ ਤਾਵ ਅਕੁਸਲਚੇਤਸਿਕਾ ਵੇਦਿਤਬ੍ਬਾ.

ਇਦਾਨਿ ਅਬ੍ਯਾਕਤਾ ਵੁਚ੍ਚਨ੍ਤਿ, ਅਬ੍ਯਾਕਤਾ ਪਨ ਦੁਵਿਧਾ ਵਿਪਾਕਕਿਰਿਯਭੇਦਤੋ. ਤਤ੍ਥ ਵਿਪਾਕਾ ਕੁਸਲਾ ਵਿਯ ਭੂਮਿਵਸੇਨ ਚਤੁਬ੍ਬਿਧਾ ਕਾਮਾਵਚਰਂ ਰੂਪਾਵਚਰਂ ਅਰੂਪਾਵਚਰਂ ਲੋਕੁਤ੍ਤਰਞ੍ਚੇਤਿ. ਤਤ੍ਥ ਕਾਮਾਵਚਰਵਿਪਾਕਾ ਸਹੇਤੁਕਾਹੇਤੁਕਵਸੇਨ ਦੁਵਿਧਾ. ਤਤ੍ਥ ਸਹੇਤੁਕਵਿਪਾਕਸਮ੍ਪਯੁਤ੍ਤਾ ਸਹੇਤੁਕਾ. ਤੇ ਸਹੇਤੁਕਕਾਮਾਵਚਰਕੁਸਲਸਮ੍ਪਯੁਤ੍ਤਸਦਿਸਾ. ਯਾ ਪਨ ਕਰੁਣਾਮੁਦਿਤਾ ਅਨਿਯਤਾ, ਤਾ ਸਤ੍ਤਾਰਮ੍ਮਣਤ੍ਤਾ ਵਿਪਾਕੇਸੁ ਨੁਪ੍ਪਜ੍ਜਨ੍ਤਿ. ਕਾਮਾਵਚਰਵਿਪਾਕਾਨਂ ਏਕਨ੍ਤਪਰਿਤ੍ਤਾਰਮ੍ਮਣਤ੍ਤਾ ਵਿਰਤਿਯੋ ਪਨੇਤ੍ਥ ਏਕਨ੍ਤਕੁਸਲਤ੍ਤਾ ਨ ਲਬ੍ਭਨ੍ਤਿ. ਵਿਭਙ੍ਗੇ ‘‘ਪਞ੍ਚ ਸਿਕ੍ਖਾਪਦਾ ਕੁਸਲਾਯੇਵਾ’’ਤਿ ਹਿ ਵੁਤ੍ਤਂ. ਏਵਂ ਕਾਮਾਵਚਰਸਹੇਤੁਕਵਿਪਾਕਚੇਤਸਿਕਾ ਵੇਦਿਤਬ੍ਬਾ.

੮੩.

ਤੇਤ੍ਤਿਂਸਾਦਿਦ੍ਵਯੇ ਧਮ੍ਮਾ, ਦ੍ਵਤ੍ਤਿਂਸੇਵ ਤਤੋ ਪਰੇ;

ਬਾਤ੍ਤਿਂਸ ਪਞ੍ਚਮੇ ਛਟ੍ਠੇ, ਏਕਤਿਂਸ ਤਤੋ ਪਰੇ.

ਅਹੇਤੁਕਚਿਤ੍ਤਸਮ੍ਪਯੁਤ੍ਤਾ ¶ ਪਨ ਅਹੇਤੁਕਾ. ਤੇਸੁ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਾ ਤਾਵ ਫਸ੍ਸੋ ਉਪੇਕ੍ਖਾਵੇਦਨਾ ਸਞ੍ਞਾ ਚੇਤਨਾ ਜੀਵਿਤਂ ਚਿਤ੍ਤਟ੍ਠਿਤੀਤਿ ਸਰੂਪੇਨਾਗਤਾ ਛ, ਮਨਸਿਕਾਰੇਨ ਚ ਸਤ੍ਤ ਹੋਨ੍ਤਿ. ਸੋਤਘਾਨਜਿਵ੍ਹਾਕਾਯਵਿਞ੍ਞਾਣਸਮ੍ਪਯੁਤ੍ਤਾਪਿ ਸਤ੍ਤ ਸਤ੍ਤੇਵ ਚੇਤਸਿਕਾ. ਤਤ੍ਥ ਕਾਯਵਿਞ੍ਞਾਣਸਮ੍ਪਯੁਤ੍ਤੇਸੁ ਪਨ ਉਪੇਕ੍ਖਾਠਾਨੇ ਸੁਖਵੇਦਨਾ ਪਵਿਟ੍ਠਾ. ਸਾ ਕਾਯਿਕਸਾਤਲਕ੍ਖਣਾ, ਪੀਣਨਰਸਾ, ਸੇਸਾ ਵੁਤ੍ਤਨਯਾ ਏਵ.

੮੪.

ਇਟ੍ਠਾਰਮ੍ਮਣਯੋਗਸ੍ਮਿਂ, ਚਕ੍ਖੁਵਿਞ੍ਞਾਣਕਾਦਿਸੁ;

ਸਤਿ ਕਸ੍ਮਾ ਉਪੇਕ੍ਖਾਵ, ਵੁਤ੍ਤਾ ਚਤੂਸੁ ਸਤ੍ਥੁਨਾ.

੮੫.

ਉਪਾਦਾਯ ¶ ਚ ਰੂਪੇਨ, ਉਪਾਦਾਰੂਪਕੇ ਪਨ;

ਸਙ੍ਘਟ੍ਟਨਾਨਿਘਂਸਸ੍ਸ, ਦੁਬ੍ਬਲਤ੍ਤਾਤਿ ਦੀਪਯੇ.

੮੬.

ਪਸਾਦਂ ਪਨਤਿਕ੍ਕਮ੍ਮ, ਕੂਟਂਵ ਪਿਚੁਪਿਣ੍ਡਕਂ;

ਭੂਤਰੂਪੇਨ ਭੂਤਾਨਂ, ਘਟ੍ਟਨਾਯ ਸੁਖਾਦਿਕਂ.

ਤਸ੍ਮਾ ¶ ਕਾਯਵਿਞ੍ਞਾਣਂ ਸੁਖਾਦਿਸਮ੍ਪਯੁਤ੍ਤਨ੍ਤਿ ਵੇਦਿਤਬ੍ਬਂ. ਮਨੋਧਾਤੁਨਾ ਸਮ੍ਪਯੁਤ੍ਤਾ ਸਰੂਪੇਨਾਗਤਾ ਚਕ੍ਖੁਵਿਞ੍ਞਾਣੇਨ ਸਦ੍ਧਿਂ ਵੁਤ੍ਤਾ ਛ, ਵਿਤਕ੍ਕਵਿਚਾਰੇਹਿ ਸਹ ਅਟ੍ਠ, ਅਧਿਮੋਕ੍ਖਮਨਸਿਕਾਰੇਹਿ ਦ੍ਵੀਹਿ ਯੇਵਾਪਨਕੇਹਿ ਦਸ ਧਮ੍ਮਾ ਹੋਨ੍ਤਿ. ਤਥਾ ਮਨੋਵਿਞ੍ਞਾਣਧਾਤੁਉਪੇਕ੍ਖਾਸਹਗਤੇਨ. ਸੋਮਨਸ੍ਸਸਹਗਤੇਨ ਪੀਤਿਅਧਿਕਾ ਵੇਦਨਾਪਰਿਵਤ੍ਤਨਞ੍ਚ ਨਾਨਤ੍ਤਂ. ਤਸ੍ਮਾਵੇਤ੍ਥ ਏਕਾਦਸ ਧਮ੍ਮਾ ਹੋਨ੍ਤਿ. ਏਵਂ ਅਹੇਤੁਕਾਪਿ ਕਾਮਾਵਚਰਵਿਪਾਕਚੇਤਸਿਕਾ ਵੇਦਿਤਬ੍ਬਾ.

ਰੂਪਾਵਚਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ਪਨ ਰੂਪਾਵਚਰਾ. ਅਰੂਪਾਵਚਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ. ਤੇ ਸਬ੍ਬੇਪਿ ਅਤ੍ਤਨੋ ਅਤ੍ਤਨੋ ਕੁਸਲਚਿਤ੍ਤਸਮ੍ਪਯੁਤ੍ਤਚੇਤਸਿਕੇਹਿ ਸਦਿਸਾਯੇਵਾਤਿ.

ਲੋਕੁਤ੍ਤਰਵਿਪਾਕਚਿਤ੍ਤਸਮ੍ਪਯੁਤ੍ਤਾ ¶ ਲੋਕੁਤ੍ਤਰਾ. ਤੇ ਸਬ੍ਬੇ ਤੇਸਂਯੇਵ ਲੋਕੁਤ੍ਤਰਵਿਪਾਕਚਿਤ੍ਤਾਨਂ ਸਦਿਸਾ ਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਚੇਤਸਿਕੇਹਿ ਸਦਿਸਾ. ਏਵਂ ਰੂਪਾਵਚਰਾਰੂਪਾਵਚਰਲੋਕੁਤ੍ਤਰਵਿਪਾਕਚੇਤਸਿਕਾ ਵੇਦਿਤਬ੍ਬਾ.

ਅਕੁਸਲਵਿਪਾਕਚਿਤ੍ਤਸਮ੍ਪਯੁਤ੍ਤਾ ਪਨ ਅਕੁਸਲਵਿਪਾਕਚੇਤਸਿਕਾ ਨਾਮ. ਤੇ ਪਨ ਕੁਸਲਵਿਪਾਕਾਹੇਤੁਕਚਿਤ੍ਤੇਸੁ ਚਕ੍ਖੁਵਿਞ੍ਞਾਣਾਦੀਸੁ ਵੁਤ੍ਤਚੇਤਸਿਕਸਦਿਸਾ. ਏਤ੍ਥ ਪਨ ਕਾਯਵਿਞ੍ਞਾਣੇ ਦੁਕ੍ਖਵੇਦਨਾ ਪਵਿਟ੍ਠਾ. ਸਾ ਕਾਯਿਕਾਬਾਧਲਕ੍ਖਣਾ. ਸੇਸਾ ਵੁਤ੍ਤਨਯਾਯੇਵਾਤਿ. ਏਵਂ ਛਤ੍ਤਿਂਸ ਵਿਪਾਕਚਿਤ੍ਤਸਮ੍ਪਯੁਤ੍ਤਚੇਤਸਿਕਾ ਵੇਦਿਤਬ੍ਬਾ.

ਕਿਰਿਯਾਬ੍ਯਾਕਤਾ ਚ ਚੇਤਸਿਕਾ ਭੂਮਿਤੋ ਤਿਵਿਧਾ ਹੋਨ੍ਤਿ ਕਾਮਾਵਚਰਾ ਰੂਪਾਵਚਰਾ ਅਰੂਪਾਵਚਰਾਤਿ. ਤਤ੍ਥ ਕਾਮਾਵਚਰਾ ਸਹੇਤੁਕਾਹੇਤੁਕਤੋ ਦੁਵਿਧਾ ਹੋਨ੍ਤਿ. ਤੇਸੁ ਸਹੇਤੁਕਕਿਰਿਯਚਿਤ੍ਤਸਮ੍ਪਯੁਤ੍ਤਾ ਸਹੇਤੁਕਾ, ਤੇ ਪਨ ਅਟ੍ਠਹਿ ਕਾਮਾਵਚਰਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾ ਠਪੇਤ੍ਵਾ ਵਿਰਤਿਤ੍ਤਯਂ ਅਨਿਯਤਯੇਵਾਪਨਕੇਸੁ ਕਰੁਣਾਮੁਦਿਤਾਯੇਵ ਉਪ੍ਪਜ੍ਜਨ੍ਤਿ. ਅਹੇਤੁਕਕਿਰਿਯਚਿਤ੍ਤਸਮ੍ਪਯੁਤ੍ਤਾ ਅਹੇਤੁਕਾ, ਤੇ ਕੁਸਲਵਿਪਾਕਾਹੇਤੁਕਮਨੋਧਾਤੁਮਨੋਵਿਞ੍ਞਾਣਧਾਤੁਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾ. ਮਨੋਵਿਞ੍ਞਾਣਧਾਤੁਦ੍ਵਯੇ ¶ ਪਨ ਵੀਰਿਯਿਨ੍ਦ੍ਰਿਯਂ ਅਧਿਕਂ. ਵੀਰਿਯਿਨ੍ਦ੍ਰਿਯਸਮ੍ਭਵਤੋ ਪਨੇਤ੍ਥ ਬਲਪ੍ਪਤ੍ਤੋ ਸਮਾਧਿ ਹੋਤਿ. ਹਸਿਤੁਪ੍ਪਾਦਚਿਤ੍ਤੇਨ ਸਮ੍ਪਯੁਤ੍ਤਾ ਦ੍ਵਾਦਸ ਧਮ੍ਮਾ ਹੋਨ੍ਤਿ ਪੀਤਿਯਾ ਸਹ. ਅਯਮੇਤ੍ਥ ਵਿਸੇਸੋ.

ਰੂਪਾਵਚਰਕਿਰਿਯਚਿਤ੍ਤਸਮ੍ਪਯੁਤ੍ਤਾ ਪਨ ਰੂਪਾਵਚਰਾ. ਅਰੂਪਾਵਚਰਕਿਰਿਯਚਿਤ੍ਤਸਮ੍ਪਯੁਤ੍ਤਾ ਅਰੂਪਾਵਚਰਾ. ਤੇ ਸਬ੍ਬੇਪਿ ਸਕਸਕਭੂਮਿਕੁਸਲਚਿਤ੍ਤਸਮ੍ਪਯੁਤ੍ਤੇਹਿ ਸਮਾਨਾਤਿ. ਏਵਂ ਵੀਸਤਿ ਕਿਰਿਯਚਿਤ੍ਤਸਮ੍ਪਯੁਤ੍ਤਾ ਚ ਚੇਤਸਿਕਾ ਵੇਦਿਤਬ੍ਬਾ.

ਏਤ੍ਤਾਵਤਾ ¶ ¶ ਕੁਸਲਾਕੁਸਲਵਿਪਾਕਕਿਰਿਯਭੇਦਭਿਨ੍ਨੇਨ ਏਕੂਨਨਵੁਤਿਯਾ ਚਿਤ੍ਤੇਨ ਸਮ੍ਪਯੁਤ੍ਤਾ ਚੇਤਸਿਕਾ ਨਿਦ੍ਦਿਟ੍ਠਾ ਹੋਨ੍ਤਿ.

੮੭.

ਕੁਸਲਾਕੁਸਲੇਹਿ ਵਿਪਾਕਕ੍ਰਿਯਾ-

ਹਦਯੇਹਿ ਯੁਤਾ ਪਨ ਚੇਤਸਿਕਾ;

ਸਕਲਾਪਿ ਚ ਸਾਧੁ ਮਯਾ ਕਥਿਤਾ,

ਸੁਗਤੇਨ ਮਹਾਮੁਨਿਨਾ ਕਥਿਤਾ.

੮੮.

ਅਵਗਚ੍ਛਤਿ ਯੋ ਇਮਂ ਅਨੁਨਂ,

ਪਰਮਂ ਤਸ੍ਸ ਸਮਨ੍ਤਤੋ ਮਤਿ;

ਅਭਿਧਮ੍ਮਨਯੇ ਦੂਰਾਸਦੇ,

ਅਤਿਗਮ੍ਭੀਰਠਾਨੇ ਵਿਜਮ੍ਭਤੇ.

ਇਤਿ ਅਭਿਧਮ੍ਮਾਵਤਾਰੇ ਚੇਤਸਿਕਨਿਦ੍ਦੇਸੋ ਨਾਮ

ਦੁਤਿਯੋ ਪਰਿਚ੍ਛੇਦੋ.

੩. ਤਤਿਯੋ ਪਰਿਚ੍ਛੇਦੋ

ਚੇਤਸਿਕਵਿਭਾਗਨਿਦ੍ਦੇਸੋ

੮੯.

ਸਬ੍ਬੇ ¶ ¶ ਚੇਤਸਿਕਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਨਾਮਸਾਮਞ੍ਞਤੋਯੇਵ, ਦ੍ਵੇਪਞ੍ਞਾਸ ਭਵਨ੍ਤਿ ਤੇ.

ਸੇਯ੍ਯਥਿਦਂ – ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤੇਕਗ੍ਗਤਾ ਵੀਰਿਯਂ ਜੀਵਿਤਂ ਛਨ੍ਦੋ ਅਧਿਮੋਕ੍ਖੋ ਮਨਸਿਕਾਰੋ ਤਤ੍ਰਮਜ੍ਝਤ੍ਤਤਾ ਸਦ੍ਧਾ ਸਤਿ ਹਿਰੀ ਓਤ੍ਤਪ੍ਪਂ ਅਲੋਭੋ ਅਦੋਸੋ ਅਮੋਹੋ ਕਾਯਪ੍ਪਸ੍ਸਦ੍ਧਿਆਦੀਨਿ ਛ ਯੁਗਾਨਿ, ਤਿਸ੍ਸੋ ਵਿਰਤਿਯੋ, ਕਰੁਣਾ ਮੁਦਿਤਾ ਲੋਭੋ ਦੋਸੋ ਮੋਹੋ ਉਦ੍ਧਚ੍ਚਂ ਮਾਨੋ ਦਿਟ੍ਠਿ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਂ ਥਿਨਂ ਮਿਦ੍ਧਂ ਵਿਚਿਕਿਚ੍ਛਾ ਅਹਿਰਿਕਂ ਅਨੋਤ੍ਤਪ੍ਪਞ੍ਚਾਤਿ.

੯੦.

ਚਤੁਪਞ੍ਞਾਸਧਾ ¶ ਕਾਮੇ, ਰੂਪੇ ਪਞ੍ਚਦਸੇਰਿਤਾ;

ਤੇ ਹੋਨ੍ਤਿ ਦ੍ਵਾਦਸਾਰੂਪੇ, ਚਤ੍ਤਾਲੀਸਮਨਾਸਵਾ.

੯੧.

ਏਕਵੀਸਸਤਂ ਸਬ੍ਬੇ, ਚਿਤ੍ਤੁਪ੍ਪਾਦਾ ਸਮਾਸਤੋ;

ਏਤੇਸੁ ਤੇਸਮੁਪ੍ਪਤ੍ਤਿਂ, ਉਦ੍ਧਰਿਤ੍ਵਾ ਪਨੇਕਕਂ.

੯੨.

ਫਸ੍ਸਾਦੀਨਂ ਤੁ ਧਮ੍ਮਾਨਂ, ਪਵਕ੍ਖਾਮਿ ਇਤੋ ਪਰਂ;

ਪਾਟਵਤ੍ਥਾਯ ਭਿਕ੍ਖੂਨਂ, ਚਿਤ੍ਤਚੇਤਸਿਕੇਸ੍ਵਹਂ.

੯੩.

ਏਕਗ੍ਗਤਾ ਮਨਕ੍ਕਾਰੋ, ਜੀਵਿਤਂ ਫਸ੍ਸਪਞ੍ਚਕਂ;

ਅਟ੍ਠੇਤੇ ਅਵਿਨਿਬ੍ਭੋਗਾ, ਏਕੁਪ੍ਪਾਦਾ ਸਹਕ੍ਖਯਾ.

੯੪.

ਫਸ੍ਸੋ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਿਨ੍ਦ੍ਰਿਯਂ;

ਏਕਗ੍ਗਤਾ ਮਨਕ੍ਕਾਰੋ, ਸਬ੍ਬਸਾਧਾਰਣਾ ਇਮੇ.

੯੫.

ਵਿਤਕ੍ਕੋ ਪਞ੍ਚਪਞ੍ਞਾਸ-ਚਿਤ੍ਤੇਸੁ ਸਮੁਦੀਰਿਤੋ;

ਚਾਰੋ ਛਸਟ੍ਠਿਚਿਤ੍ਤੇਸੁ, ਜਾਯਤੇ ਨਤ੍ਥਿ ਸਂਸਯੋ.

੯੬.

ਏਕਪਞ੍ਞਾਸਚਿਤ੍ਤੇਸੁ ¶ , ਪੀਤਿ ਤੇਸਟ੍ਠਿਯਾ ਸੁਖਂ;

ਉਪੇਕ੍ਖਾ ਪਞ੍ਚਪਞ੍ਞਾਸ-ਚਿਤ੍ਤੇ ਦੁਕ੍ਖਂ ਤੁ ਤੀਸੁ ਹਿ.

੯੭.

ਹੋਤਿ ਦ੍ਵਾਸਟ੍ਠਿਚਿਤ੍ਤੇਸੁ, ਸੋਮਨਸ੍ਸਿਨ੍ਦ੍ਰਿਯਂ ਪਨ;

ਦੁਕ੍ਖਿਨ੍ਦ੍ਰਿਯਂ ਪਨੇਕਸ੍ਮਿਂ, ਤਥੇਕਮ੍ਹਿ ਸੁਖਿਨ੍ਦ੍ਰਿਯਂ.

੯੮.

ਪਞ੍ਚੁਤ੍ਤਰਸਤੇ ¶ ਚਿਤ੍ਤੇ, ਵੀਰਿਯਂ ਆਹ ਨਾਯਕੋ;

ਚਤੁਤ੍ਤਰਸਤੇ ਚਿਤ੍ਤੇ, ਸਮਾਧਿਨ੍ਦ੍ਰਿਯਮਬ੍ਰਵਿ.

੯੯.

ਸਬ੍ਬਾਹੇਤੁਕਚਿਤ੍ਤਾਨਿ, ਠਪੇਤ੍ਵਾ ਚੇਕਹੇਤੁਕੇ;

ਏਕੁਤ੍ਤਰਸਤੇ ਚਿਤ੍ਤੇ, ਛਨ੍ਦਸ੍ਸੁਪ੍ਪਤ੍ਤਿਮੁਦ੍ਦਿਸੇ.

੧੦੦.

ਠਪੇਤ੍ਵਾ ਦਸ ਵਿਞ੍ਞਾਣੇ, ਵਿਚਿਕਿਚ੍ਛਾਯੁਤਮ੍ਪਿ ਚ;

ਦਸੁਤ੍ਤਰਸਤੇ ਚਿਤ੍ਤੇ, ਅਧਿਮੋਕ੍ਖੋ ਉਦੀਰਿਤੋ.

੧੦੧.

ਸਦ੍ਧਾ ¶ ਸਤਿ ਹਿਰੋਤ੍ਤਪ੍ਪਂ, ਅਲੋਭਾਦੋਸਮਜ੍ਝਤਾ;

ਛਲ਼ੇਵ ਯੁਗਲ਼ਾ ਚਾਤਿ, ਧਮ੍ਮਾ ਏਕੂਨਵੀਸਤਿ.

੧੦੨.

ਏਕਨਵੁਤਿਯਾ ਚਿਤ੍ਤੇ, ਜਾਯਨ੍ਤਿ ਨਿਯਤਾ ਇਮੇ;

ਅਹੇਤੁਕੇਸੁ ਚਿਤ੍ਤੇਸੁ, ਅਪੁਞ੍ਞੇਸੁ ਨ ਜਾਯਰੇ.

੧੦੩.

ਏਕੂਨਾਸੀਤਿਯਾ ਚਿਤ੍ਤੇ, ਪਞ੍ਞਾ ਜਾਯਤਿ ਸਬ੍ਬਦਾ;

ਅਟ੍ਠਵੀਸਤਿਯਾ ਚਿਤ੍ਤੇ, ਕਰੁਣਾਮੁਦਿਤਾ ਸਿਯੁਂ.

੧੦੪.

ਕਾਮਾਵਚਰਪੁਞ੍ਞੇਸੁ, ਸਬ੍ਬਲੋਕੁਤ੍ਤਰੇਸੁ ਚ;

ਚਤ੍ਤਾਲੀਸਵਿਧੇ ਚਿਤ੍ਤੇ, ਸਾਟ੍ਠਕੇ ਵਿਰਤਿਤ੍ਤਯਂ.

੧੦੫.

ਸਦ੍ਧਾ ਸਤਿ ਹਿਰੋਤ੍ਤਪ੍ਪਂ, ਅਲੋਭਾਦਿਤ੍ਤਯਮ੍ਪਿ ਚ;

ਯੁਗਲ਼ਾਨਿ ਛ ਮਜ੍ਝਤ੍ਤਂ, ਕਰੁਣਾਮੁਦਿਤਾਪਿ ਚ.

੧੦੬.

ਤਥਾ ਵਿਰਤਿਯੋ ਤਿਸ੍ਸੋ, ਸਬ੍ਬੇ ਤੇ ਪਞ੍ਚਵੀਸਤਿ;

ਕੁਸਲਾਬ੍ਯਾਕਤਾ ਚਾਪਿ, ਕੁਸਲੇਨ ਪਕਾਸਿਤਾ.

੧੦੭.

ਅਹਿਰੀਕਮਨੋਤ੍ਤਪ੍ਪਂ, ਮੋਹੋ ਉਦ੍ਧਚ੍ਚਮੇਵ ਚ;

ਦ੍ਵਾਦਸਾਪੁਞ੍ਞਚਿਤ੍ਤੇਸੁ, ਨਿਯਤਾਯੇਵ ਜਾਯਰੇ.

੧੦੮.

ਲੋਭੋ ¶ ਦੋਸੋ ਚ ਮੋਹੋ ਚ, ਮਾਨੋ ਦਿਟ੍ਠਿ ਚ ਸਂਸਯੋ;

ਮਿਦ੍ਧਮੁਦ੍ਧਚ੍ਚਕੁਕ੍ਕੁਚ੍ਚਂ, ਥਿਨਂ ਮਚ੍ਛਰਿਯਮ੍ਪਿ ਚ.

੧੦੯.

ਅਹਿਰੀਕਮਨੋਤ੍ਤਪ੍ਪਂ, ਇਸ੍ਸਾ ਚ ਦੋਮਨਸ੍ਸਕਂ;

ਏਤੇ ਅਕੁਸਲਾ ਵੁਤ੍ਤਾ, ਏਕਨ੍ਤੇਨ ਮਹੇਸਿਨਾ.

੧੧੦.

ਲੋਭੋ ਅਟ੍ਠਸੁ ਨਿਦ੍ਦਿਟ੍ਠੋ, ਵੁਤ੍ਤਾ ਚਤੂਸੁ ਦਿਟ੍ਠਿਤੁ;

ਮਾਨੋ ਦਿਟ੍ਠਿਵਿਯੁਤ੍ਤੇਸੁ, ਦੋਸੋਦ੍ਵੀਸ੍ਵੇਵ ਜਾਯਤੇ.

੧੧੧.

ਇਸ੍ਸਾਮਚ੍ਛੇਰਕੁਕ੍ਕੁਚ੍ਚਾ, ਦ੍ਵੀਸੁ ਜਾਯਨ੍ਤਿ ਨੋ ਸਹ;

ਵਿਚਿਕਿਚ੍ਛਾ ਪਨੇਕਸ੍ਮਿਂ, ਥਿਨਮਿਦ੍ਧਂ ਤੁ ਪਞ੍ਚਸੁ.

੧੧੨.

ਫਸ੍ਸੋ ¶ ਚ ਵੇਦਨਾ ਸਞ੍ਞਾ, ਚੇਤਨਾ ਜੀਵਿਤਂ ਮਨੋ;

ਵਿਤਕ੍ਕੋ ਚ ਵਿਚਾਰੋ ਚ, ਪੀਤਿ ਵੀਰਿਯਸਮਾਧਿ ਚ.

੧੧੩.

ਛਨ੍ਦੋ ਚੇਵਾਧਿਮੋਕ੍ਖੋ ਚ, ਮਨਸਿਕਾਰੋ ਚ ਚੁਦ੍ਦਸ;

ਕੁਸਲਾਕੁਸਲਾ ਚੇਵ, ਹੋਨ੍ਤਿ ਅਬ੍ਯਾਕਤਾਪਿ ਚ.

੧੧੪.

ਏਕੂਨਤਿਂਸਚਿਤ੍ਤੇਸੁ, ਝਾਨਂ ਪਞ੍ਚਙ੍ਗਿਕਂ ਮਤਂ;

ਚਤੁਝਾਨਙ੍ਗਯੁਤ੍ਤਾਨਿ, ਸਤ੍ਤਤਿਂਸਾਤਿ ਨਿਦ੍ਦਿਸੇ.

੧੧੫.

ਏਕਾਦਸਵਿਧਂ ਚਿਤ੍ਤਂ, ਤਿਵਙ੍ਗਿਕਮੁਦੀਰਿਤਂ;

ਚਤੁਤਿਂਸਵਿਧਂ ਚਿਤ੍ਤਂ, ਦੁਵਙ੍ਗਿਕਮੁਦੀਰਿਤਂ.

੧੧੬.

ਸਭਾਵੇਨਾਵਿਤਕ੍ਕੇਸੁ ¶ , ਝਾਨਙ੍ਗਾਨਿ ਨ ਉਦ੍ਧਰੇ;

ਸਬ੍ਬਾਹੇਤੁਕਚਿਤ੍ਤੇਸੁ, ਮਗ੍ਗਙ੍ਗਾਨਿ ਨ ਉਦ੍ਧਰੇ.

੧੧੭.

ਤੀਣਿ ਸੋਲ਼ਸਚਿਤ੍ਤੇਸੁ, ਇਨ੍ਦ੍ਰਿਯਾਨਿ ਵਦੇ ਬੁਧੋ;

ਏਕਸ੍ਮਿਂ ਪਨ ਚਤ੍ਤਾਰਿ, ਪਞ੍ਚ ਤੇਰਸਸੁਦ੍ਧਰੇ.

੧੧੮.

ਸਤ੍ਤ ਦ੍ਵਾਦਸਚਿਤ੍ਤੇਸੁ, ਇਨ੍ਦ੍ਰਿਯਾਨਿ ਜਿਨੋਬ੍ਰਵਿ;

ਏਕੇਨੂਨੇਸੁ ਅਟ੍ਠੇਵ, ਚਤ੍ਤਾਲੀਸਮਨੇਸੁ ਚ.

੧੧੯.

ਚਤ੍ਤਾਲੀਸਾਯ ¶ ਚਿਤ੍ਤੇਸੁ, ਨਵਕਂ ਨਾਯਕੋਬ੍ਰਵਿ;

ਏਵਂ ਇਨ੍ਦ੍ਰਿਯਯੋਗੋਪਿ, ਵੇਦਿਤਬ੍ਬੋ ਵਿਭਾਵਿਨਾ.

੧੨੦.

ਅਮਗ੍ਗਙ੍ਗਾਨਿ ਨਾਮੇਤ੍ਥ, ਅਟ੍ਠਾਰਸ ਅਹੇਤੁਕਾ;

ਝਾਨਙ੍ਗਾਨਿ ਨ ਵਿਜ੍ਜਨ੍ਤਿ, ਵਿਞ੍ਞਾਣੇਸੁ ਦ੍ਵਿਪਞ੍ਚਸੁ.

੧੨੧.

ਏਕਂ ਚਿਤ੍ਤਂ ਦੁਮਗ੍ਗਙ੍ਗਂ, ਤਿਮਗ੍ਗਙ੍ਗਾਨਿ ਸਤ੍ਤਸੁ;

ਚਤ੍ਤਾਲੀਸਾਯ ਚਿਤ੍ਤੇਸੁ, ਮਗ੍ਗੋ ਸੋ ਚਤੁਰਙ੍ਗਿਕੋ.

੧੨੨.

ਪਞ੍ਚਦ੍ਦਸਸੁ ਚਿਤ੍ਤੇਸੁ, ਮਗ੍ਗੋ ਪਞ੍ਚਙ੍ਗਿਕੋ ਮਤੋ;

ਵੁਤ੍ਤੋ ਦ੍ਵਤ੍ਤਿਂਸਚਿਤ੍ਤੇਸੁ, ਮਗ੍ਗੋ ਸਤ੍ਤਙ੍ਗਿਕੋਪਿ ਚ.

੧੨੩.

ਮਗ੍ਗੋ ¶ ਅਟ੍ਠਸੁ ਚਿਤ੍ਤੇਸੁ, ਮਤੋ ਅਟ੍ਠਙ੍ਗਿਕੋਤਿ ਹਿ;

ਏਵਂ ਤੁ ਸਬ੍ਬਚਿਤ੍ਤੇਸੁ, ਮਗ੍ਗਙ੍ਗਾਨਿ ਸਮੁਦ੍ਧਰੇ.

੧੨੪.

ਬਲਾਨਿ ਦ੍ਵੇ ਦ੍ਵਿਚਿਤ੍ਤੇਸੁ, ਏਕਸ੍ਮਿਂ ਤੀਣਿ ਦੀਪਯੇ;

ਏਕਾਦਸਸੁ ਚਤ੍ਤਾਰਿ, ਛ ਦ੍ਵਾਦਸਸੁ ਨਿਦ੍ਦਿਸੇ.

੧੨੫.

ਏਕੂਨਾਸੀਤਿਯਾ ਸਤ੍ਤ, ਸੋਲ਼ਸੇਵਾਬਲਾਨਿ ਤੁ;

ਚਿਤ੍ਤਮੇਵਂ ਤੁ ਵਿਞ੍ਞੇਯ੍ਯਂ, ਸਬਲਂ ਅਬਲਮ੍ਪਿ ਚ.

੧੨੬.

ਝਾਨਙ੍ਗਮਗ੍ਗਙ੍ਗਬਲਿਨ੍ਦ੍ਰਿਯਾਨਿ,

ਚਿਤ੍ਤੇਸੁ ਜਾਯਨ੍ਤਿ ਹਿ ਯੇਸੁ ਯਾਨਿ;

ਮਯਾ ਸਮਾਸੇਨ ਸਮੁਦ੍ਧਰਿਤ੍ਵਾ,

ਵੁਤ੍ਤਾਨਿ ਸਬ੍ਬਾਨਿਪਿ ਤਾਨਿ ਤੇਸੁ.

ਇਤਿ ਅਭਿਧਮ੍ਮਾਵਤਾਰੇ ਚੇਤਸਿਕਵਿਭਾਗਨਿਦ੍ਦੇਸੋ ਨਾਮ

ਤਤਿਯੋ ਪਰਿਚ੍ਛੇਦੋ.

੪. ਚਤੁਤ੍ਥੋ ਪਰਿਚ੍ਛੇਦੋ

ਏਕਵਿਧਾਦਿਨਿਦ੍ਦੇਸੋ

੧੨੭.

ਇਤੋ ¶ ¶ ਪਰਂ ਪਵਕ੍ਖਾਮਿ, ਨਯਮੇਕਵਿਧਾਦਿਕਂ;

ਆਭਿਧਮ੍ਮਿਕਭਿਕ੍ਖੂਨਂ, ਬੁਦ੍ਧਿਯਾ ਪਨ ਵੁਦ੍ਧਿਯਾ.

੧੨੮.

ਸਬ੍ਬਮੇਕਵਿਧਂ ਚਿਤ੍ਤਂ, ਵਿਜਾਨਨਸਭਾਵਤੋ;

ਦੁਵਿਧਞ੍ਚ ਭਵੇ ਚਿਤ੍ਤਂ, ਅਹੇਤੁਕਸਹੇਤੁਤੋ.

੧੨੯.

ਪੁਞ੍ਞਾਪੁਞ੍ਞਵਿਪਾਕਾ ਹਿ, ਕਾਮੇ ਦਸ ਚ ਪਞ੍ਚ ਚ;

ਕ੍ਰਿਯਾ ਤਿਸ੍ਸੋਤਿ ਸਬ੍ਬੇਪਿ, ਅਟ੍ਠਾਰਸ ਅਹੇਤੁਕਾ.

੧੩੦.

ਏਕਸਤ੍ਤਤਿ ਸੇਸਾਨਿ, ਚਿਤ੍ਤੁਪ੍ਪਾਦਾ ਮਹੇਸਿਨਾ;

ਸਹੇਤੁਕਾਤਿ ਨਿਦ੍ਦਿਟ੍ਠਾ, ਤਾਦਿਨਾ ਹੇਤੁਵਾਦਿਨਾ.

੧੩੧.

ਸਵਤ੍ਥੁਕਾਵਤ੍ਥੁਕਤੋ ¶ , ਤਥੋਭਯਵਸੇਨ ਚ;

ਸਬ੍ਬਂ ਵੁਤ੍ਤਪਕਾਰਂ ਤੁ, ਤਿਵਿਧਂ ਹੋਤਿ ਮਾਨਸਂ.

੧੩੨.

ਸਬ੍ਬੋ ਕਾਮਵਿਪਾਕੋ ਚ, ਰੂਪੇ ਪਞ੍ਚਦਸਾਪਿ ਚ;

ਆਦਿਮਗ੍ਗੋ ਸਿਤੁਪ੍ਪਾਦੋ, ਮਨੋਧਾਤੁ ਕ੍ਰਿਯਾਪਿ ਚ.

੧੩੩.

ਦੋਮਨਸ੍ਸਦ੍ਵਯਞ੍ਚਾਪਿ, ਤੇਚਤ੍ਤਾਲੀਸ ਮਾਨਸਾ;

ਨੁਪ੍ਪਜ੍ਜਨ੍ਤਿ ਵਿਨਾ ਵਤ੍ਥੁਂ, ਏਕਨ੍ਤੇਨ ਸਵਤ੍ਥੁਕਾ.

੧੩੪.

ਅਰੂਪਾਵਚਰਪਾਕਾ ਚ, ਏਕਨ੍ਤੇਨ ਅਵਤ੍ਥੁਕਾ;

ਦ੍ਵਾਚਤ੍ਤਾਲੀਸ ਸੇਸਾਨਿ, ਚਿਤ੍ਤਾਨੁਭਯਥਾ ਸਿਯੁਂ.

੧੩੫.

ਏਕੇਕਾਰਮ੍ਮਣਂ ਚਿਤ੍ਤਂ, ਪਞ੍ਚਾਰਮ੍ਮਣਮੇਵ ਚ;

ਛਲ਼ਾਰਮ੍ਮਣਕਞ੍ਚੇਤਿ, ਏਵਮ੍ਪਿ ਤਿਵਿਧਂ ਸਿਯਾ.

੧੩੬.

ਵਿਞ੍ਞਾਣਾਨਿ ਚ ਦ੍ਵੇਪਞ੍ਚ, ਅਟ੍ਠ ਲੋਕੁਤ੍ਤਰਾਨਿ ਚ;

ਸਬ੍ਬਂ ਮਹਗ੍ਗਤਞ੍ਚੇਵ, ਠਪੇਤ੍ਵਾਭਿਞ੍ਞਮਾਨਸਂ.

੧੩੭.

ਤੇਚਤ੍ਤਾਲੀਸ ¶ ਵਿਞ੍ਞੇਯ੍ਯਾ, ਏਕੇਕਾਰਮ੍ਮਣਾ ਪਨ;

ਮਨੋਧਾਤੁਤ੍ਤਯਂ ਤਤ੍ਥ, ਪਞ੍ਚਾਰਮ੍ਮਣਮੀਰਿਤਂ.

੧੩੮.

ਤੇਚਤ੍ਤਾਲੀਸ ਸੇਸਾਨਿ, ਛਲ਼ਾਰਮ੍ਮਣਿਕਾ ਮਤਾ;

ਤਥਾ ਚ ਤਿਵਿਧਂ ਚਿਤ੍ਤਂ, ਕੁਸਲਾਕੁਸਲਾਦਿਤੋ.

੧੩੯.

ਅਹੇਤੁਂ ਏਕਹੇਤੁਞ੍ਚ, ਦ੍ਵਿਹੇਤੁਞ੍ਚ ਤਿਹੇਤੁਕਂ;

ਏਵਂ ਚਤੁਬ੍ਬਿਧਂ ਚਿਤ੍ਤਂ, ਵਿਞ੍ਞਾਤਬ੍ਬਂ ਵਿਭਾਵਿਨਾ.

੧੪੦.

ਹੇਟ੍ਠਾ ਮਯਾਪਿ ਨਿਦ੍ਦਿਟ੍ਠਾ, ਅਟ੍ਠਾਰਸ ਅਹੇਤੁਕਾ;

ਵਿਚਿਕਿਚ੍ਛੁਦ੍ਧਚ੍ਚਸਂਯੁਤ੍ਤਂ, ਏਕਹੇਤੁਮੁਦੀਰਿਤਂ.

੧੪੧.

ਕਾਮੇ ¶ ਦ੍ਵਾਦਸਧਾ ਪੁਞ੍ਞ-ਵਿਪਾਕਕ੍ਰਿਯਤੋ ਪਨ;

ਦਸਧਾਕੁਸਲਾ ਚਾਤਿ, ਬਾਵੀਸਤਿ ਦੁਹੇਤੁਕਾ.

੧੪੨.

ਕਾਮੇ ¶ ਦ੍ਵਾਦਸਧਾ ਪੁਞ੍ਞ-ਵਿਪਾਕਕ੍ਰਿਯਤੋ ਪਨ;

ਸਬ੍ਬਂ ਮਹਗ੍ਗਤਞ੍ਚੇਵ, ਅਪ੍ਪਮਾਣਂ ਤਿਹੇਤੁਕਂ.

੧੪੩.

ਰੂਪੀਰਿਯਾਪਥਵਿਞ੍ਞਤ੍ਤਿ-ਜਨਕਾਜਨਕਾਦਿਤੋ;

ਏਵਞ੍ਚਾਪਿ ਹਿ ਤਂ ਚਿਤ੍ਤਂ, ਹੋਤਿ ਸਬ੍ਬਂ ਚਤੁਬ੍ਬਿਧਂ.

੧੪੪.

ਦ੍ਵਾਦਸਾਕੁਸਲਾ ਤਤ੍ਥ, ਕੁਸਲਾ ਕਾਮਧਾਤੁਯਾ;

ਤਥਾ ਦਸ ਕ੍ਰਿਯਾ ਕਾਮੇ, ਅਭਿਞ੍ਞਾਮਾਨਸਂ ਦ੍ਵਯਂ.

੧੪੫.

ਸਮੁਟ੍ਠਾਪੇਨ੍ਤਿ ਰੂਪਾਨਿ, ਕਪ੍ਪੇਨ੍ਤਿ ਇਰਿਯਾਪਥਂ;

ਜਨਯਨ੍ਤਿ ਚ ਵਿਞ੍ਞਤ੍ਤਿਂ, ਇਮੇ ਦ੍ਵਤ੍ਤਿਂਸ ਮਾਨਸਾ.

੧੪੬.

ਕੁਸਲਾ ਚ ਕ੍ਰਿਯਾ ਚੇਵ, ਤੇ ਮਹਗ੍ਗਤਮਾਨਸਾ;

ਅਟ੍ਠਾਨਾਸਵਚਿਤ੍ਤਾਨਿ, ਛਬ੍ਬੀਸਤਿ ਚ ਮਾਨਸਾ.

੧੪੭.

ਸਮੁਟ੍ਠਾਪੇਨ੍ਤਿ ਰੂਪਾਨਿ, ਕਪ੍ਪੇਨ੍ਤਿ ਇਰਿਯਾਪਥਂ;

ਚੋਪਨਂ ਨ ਚ ਪਾਪੇਨ੍ਤਿ, ਦ੍ਵਿਕਿਚ੍ਚਾ ਨਿਯਤਾ ਇਮੇ.

੧੪੮.

ਠਪੇਤ੍ਵਾ ਦਸ ਵਿਞ੍ਞਾਣੇ, ਵਿਪਾਕਾ ਦ੍ਵੀਸੁ ਭੂਮਿਸੁ;

ਕ੍ਰਿਯਾ ਚੇਵ ਮਨੋਧਾਤੁ, ਇਮਾਨੇਕੂਨਵੀਸਤਿ.

੧੪੯.

ਸਮੁਟ੍ਠਾਪੇਨ੍ਤਿ ¶ ਰੂਪਾਨਿ, ਨ ਕਰੋਨ੍ਤਿਤਰਦ੍ਵਯਂ;

ਪੁਨ ਦ੍ਵੇਪਞ੍ਚਵਿਞ੍ਞਾਣਾ, ਵਿਪਾਕਾ ਚ ਅਰੂਪਿਸੁ.

੧੫੦.

ਸਬ੍ਬੇਸਂ ਸਨ੍ਧਿਚਿਤ੍ਤਞ੍ਚ, ਚੁਤਿਚਿਤ੍ਤਞ੍ਚਾਰਹਤੋ;

ਨ ਕਰੋਨ੍ਤਿ ਤਿਕਿਚ੍ਚਾਨਿ, ਇਮੇ ਸੋਲ਼ਸ ਮਾਨਸਾ.

੧੫੧.

ਏਕਦ੍ਵਿਤਿਚਤੁਟ੍ਠਾਨ-ਪਞ੍ਚਟ੍ਠਾਨਪਭੇਦਤੋ;

ਪਞ੍ਚਧਾ ਚਿਤ੍ਤਮਕ੍ਖਾਸਿ, ਪਞ੍ਚਨਿਮ੍ਮਲਲੋਚਨੋ.

੧੫੨.

ਕੁਸਲਾਕੁਸਲਾ ਸਬ੍ਬੇ, ਚਿਤ੍ਤੁਪ੍ਪਾਦਾ ਮਹਾਕ੍ਰਿਯਾ;

ਮਹਗ੍ਗਤਾ ਕ੍ਰਿਯਾ ਚੇਵ, ਚਤ੍ਤਾਰੋ ਫਲਮਾਨਸਾ.

੧੫੩.

ਸਬ੍ਬੇਵ ¶ ਪਞ੍ਚਪਞ੍ਞਾਸ, ਨਿਪ੍ਪਪਞ੍ਚੇਨ ਸਤ੍ਥੁਨਾ;

ਜਵਨਟ੍ਠਾਨਤੋਯੇਵ, ਏਕਟ੍ਠਾਨੇ ਨਿਯਾਮਿਤਾ.

੧੫੪.

ਪੁਨ ਦ੍ਵੇਪਞ੍ਚਵਿਞ੍ਞਾਣਾ, ਦਸ੍ਸਨੇ ਸਵਨੇ ਤਥਾ;

ਘਾਯਨੇ ਸਾਯਨੇ ਠਾਨੇ, ਫੁਸਨੇ ਪਟਿਪਾਟਿਯਾ.

੧੫੫.

ਮਨੋਧਾਤੁਤ੍ਤਿਕਂ ਠਾਨੇ, ਆਵਜ੍ਜਨੇ ਪਟਿਚ੍ਛਨੇ;

ਅਟ੍ਠਸਟ੍ਠਿ ਭਵਨ੍ਤੇਤੇ, ਏਕਟ੍ਠਾਨਿਕਤਂ ਗਤਾ.

੧੫੬.

ਪੁਨ ਦ੍ਵਿਟ੍ਠਾਨਿਕਂ ਨਾਮ, ਚਿਤ੍ਤਦ੍ਵਯਮੁਦੀਰਿਤਂ;

ਸੋਮਨਸ੍ਸਯੁਤਂ ਪਞ੍ਚ-ਦ੍ਵਾਰੇ ਸਨ੍ਤੀਰਣਂ ਸਿਯਾ.

੧੫੭.

ਤਦਾਰਮ੍ਮਣਂ ਛਦ੍ਵਾਰੇ, ਬਲਵਾਰਮ੍ਮਣੇ ਸਤਿ;

ਤਥਾ ਵੋਟ੍ਠਬ੍ਬਨਂ ਹੋਤਿ, ਪਞ੍ਚਦ੍ਵਾਰੇਸੁ ਵੋਟ੍ਠਬੋ.

੧੫੮.

ਮਨੋਦ੍ਵਾਰੇਸੁ ਸਬ੍ਬੇਸਂ, ਹੋਤਿ ਆਵਜ੍ਜਨਂ ਪਨ;

ਇਦਂ ਦ੍ਵਿਟ੍ਠਾਨਿਕਂ ਨਾਮ, ਹੋਤਿ ਚਿਤ੍ਤਦ੍ਵਯਂ ਪਨ.

੧੫੯.

ਪਟਿਸਨ੍ਧਿਭਵਙ੍ਗਸ੍ਸ, ਚੁਤਿਯਾ ਠਾਨਤੋ ਪਨ;

ਮਹਗ੍ਗਤਵਿਪਾਕਾ ਤੇ, ਨਵ ਤਿਟ੍ਠਾਨਿਕਾ ਮਤਾ.

੧੬੦.

ਅਟ੍ਠ ¶ ਕਾਮਾ ਮਹਾਪਾਕਾ, ਪਟਿਸਨ੍ਧਿਭਵਙ੍ਗਤੋ;

ਤਦਾਰਮ੍ਮਣਤੋ ਚੇਵ, ਚੁਤਿਟ੍ਠਾਨਵਸੇਨ ਚ.

੧੬੧.

ਚਤੁਟ੍ਠਾਨਿਕਚਿਤ੍ਤਾਨਿ ¶ , ਅਟ੍ਠ ਹੋਨ੍ਤੀਤਿ ਨਿਦ੍ਦਿਸੇ;

ਕੁਸਲਾਕੁਸਲਪਾਕਂ ਤੁ-ਪੇਕ੍ਖਾਸਹਗਤਦ੍ਵਯਂ.

੧੬੨.

ਸਨ੍ਤੀਰਣਂ ਭਵੇ ਪਞ੍ਚ-ਦ੍ਵਾਰੇ ਛਦ੍ਵਾਰਿਕੇਸੁ ਚ;

ਤਦਾਰਮ੍ਮਣਤਂ ਯਾਤਿ, ਬਲਵਾਰਮ੍ਮਣੇ ਸਤਿ.

੧੬੩.

ਪਟਿਸਨ੍ਧਿਭਵਙ੍ਗਾਨਂ, ਚੁਤਿਟ੍ਠਾਨਵਸੇਨ ਚ;

ਪਞ੍ਚਟ੍ਠਾਨਿਕਚਿਤ੍ਤਨ੍ਤਿ, ਇਦਂ ਦ੍ਵਯਮੁਦੀਰਿਤਂ.

੧੬੪.

ਪਞ੍ਚਕਿਚ੍ਚਂ ¶ ਦ੍ਵਯਂ ਚਿਤ੍ਤਂ, ਚਤੁਕਿਚ੍ਚਂ ਪਨਟ੍ਠਕਂ;

ਤਿਕਿਚ੍ਚਂ ਨਵਕਂ ਦ੍ਵੇ ਤੁ, ਦ੍ਵਿਕਿਚ੍ਚਾ ਸੇਸਮੇਕਕਂ.

੧੬੫.

ਭਵਙ੍ਗਾਵਜ੍ਜਨਞ੍ਚੇਵ, ਦਸ੍ਸਨਂ ਸਮ੍ਪਟਿਚ੍ਛਨਂ;

ਸਨ੍ਤੀਰਣਂ ਵੋਟ੍ਠਬ੍ਬਨਂ, ਜਵਨਂ ਭਵਤਿ ਸਤ੍ਤਮਂ.

੧੬੬.

ਛਬ੍ਬਿਧਂ ਹੋਤਿ ਤਂ ਛਨ੍ਨਂ, ਵਿਞ੍ਞਾਣਾਨਂ ਪਭੇਦਤੋ;

ਸਤ੍ਤਧਾ ਸਤ੍ਤਵਿਞ੍ਞਾਣ-ਧਾਤੂਨਂ ਤੁ ਪਭੇਦਤੋ.

੧੬੭.

ਏਕੇਕਾਰਮ੍ਮਣਂ ਛਕ੍ਕਂ, ਪਞ੍ਚਾਰਮ੍ਮਣਭੇਦਤੋ;

ਛਲ਼ਾਰਮ੍ਮਣਤੋ ਚੇਵ, ਹੋਤਿ ਅਟ੍ਠਵਿਧਂ ਮਨੋ.

੧੬੮.

ਤਤ੍ਥ ਦ੍ਵੇਪਞ੍ਚਵਿਞ੍ਞਾਣਾ, ਹੋਨ੍ਤਿ ਏਕੇਕਗੋਚਰਾ;

ਰੂਪਾਰਮ੍ਮਣਿਕਾ ਦ੍ਵੇ ਤੁ, ਦ੍ਵੇ ਦ੍ਵੇ ਸਦ੍ਦਾਦਿਗੋਚਰਾ.

੧੬੯.

ਸਬ੍ਬਂ ਮਹਗ੍ਗਤਂ ਚਿਤ੍ਤਂ, ਪਞ੍ਚਾਭਿਞ੍ਞਾਵਿਵਜ੍ਜਿਤਂ;

ਸਬ੍ਬਂ ਲੋਕੁਤ੍ਤਰਞ੍ਚੇਤਿ, ਏਕੇਕਾਰਮ੍ਮਣਂ ਭਵੇ.

੧੭੦.

ਏਕੇਕਾਰਮ੍ਮਣਂ ਛਕ੍ਕ-ਮਿਦਂ ਞੇਯ੍ਯਂ ਵਿਭਾਵਿਨਾ;

ਪਞ੍ਚਾਰਮ੍ਮਣਿਕਂ ਨਾਮ, ਮਨੋਧਾਤੁਤ੍ਤਯਂ ਭਵੇ.

੧੭੧.

ਕਾਮਾਵਚਰਚਿਤ੍ਤਾਨਿ, ਚਤ੍ਤਾਲੀਸਂ ਤਥੇਕਕਂ;

ਅਭਿਞ੍ਞਾਨਿ ਚ ਸਬ੍ਬਾਨਿ, ਛਲ਼ਾਰਮ੍ਮਣਿਕਾਨਿਤਿ.

੧੭੨.

ਚਿਤ੍ਤਂ ਨਵਵਿਧਂ ਹੋਤਿ, ਸਤ੍ਤਵਿਞ੍ਞਾਣਧਾਤੁਸੁ;

ਪਚ੍ਛਿਮਞ੍ਚ ਤਿਧਾ ਕਤ੍ਵਾ, ਕੁਸਲਾਕੁਸਲਾਦਿਤੋ.

੧੭੩.

ਪੁਞ੍ਞਾਪੁਞ੍ਞਵਸੇਨੇਵ ¶ , ਵਿਪਾਕਕ੍ਰਿਯਭੇਦਤੋ;

ਛਸਤ੍ਤਤਿਵਿਧੋ ਭੇਦੋ, ਮਨੋਵਿਞ੍ਞਾਣਧਾਤੁਯਾ.

੧੭੪.

ਮਨੋਧਾਤੁਂ ਦ੍ਵਿਧਾ ਕਤ੍ਵਾ, ਵਿਪਾਕਕ੍ਰਿਯਭੇਦਤੋ;

ਨਵਧਾ ਪੁਬ੍ਬਵੁਤ੍ਤੇਹਿ, ਦਸਧਾ ਹੋਤਿ ਮਾਨਸਂ.

੧੭੫.

ਧਾਤੁਦ੍ਵਯਂ ¶ ਤਿਧਾ ਕਤ੍ਵਾ, ਪਚ੍ਛਿਮਂ ਪੁਨ ਪਣ੍ਡਿਤੋ;

ਏਕਾਦਸਵਿਧਂ ਚਿਤ੍ਤਂ, ਹੋਤੀਤਿ ਪਰਿਦੀਪਯੇ.

੧੭੬.

ਮਨੋਵਿਞ੍ਞਾਣਧਾਤੁਮ੍ਪਿ, ਕੁਸਲਾਕੁਸਲਾਦਿਤੋ;

ਚਤੁਧਾ ਵਿਭਜਿਤ੍ਵਾਨ, ਵਦੇ ਦ੍ਵਾਦਸਧਾ ਠਿਤਂ.

੧੭੭.

ਭਵੇ ¶ ਚੁਦ੍ਦਸਧਾ ਚਿਤ੍ਤਂ, ਚੁਦ੍ਦਸਟ੍ਠਾਨਭੇਦਤੋ;

ਪਟਿਸਨ੍ਧਿਭਵਙ੍ਗਸ੍ਸ, ਚੁਤਿਯਾਵਜ੍ਜਨਸ੍ਸ ਚ.

੧੭੮.

ਪਞ੍ਚਨ੍ਨਂ ਦਸ੍ਸਨਾਦੀਨਂ, ਸਮ੍ਪਟਿਚ੍ਛਨਚੇਤਸੋ;

ਸਨ੍ਤੀਰਣਸ੍ਸ ਵੋਟ੍ਠਬ੍ਬ-ਜਵਨਾਨਂ ਵਸੇਨ ਚ.

੧੭੯.

ਤਦਾਰਮ੍ਮਣਚਿਤ੍ਤਸ੍ਸ, ਤਥੇਵ ਠਾਨਭੇਦਤੋ;

ਏਵਂ ਚੁਦ੍ਦਸਧਾ ਚਿਤ੍ਤਂ, ਹੋਤੀਤਿ ਪਰਿਦੀਪਯੇ.

੧੮੦.

ਭੂਮਿਪੁਗ੍ਗਲਨਾਨਾਤ੍ਤ-ਵਸੇਨ ਚ ਪਵਤ੍ਤਿਤੋ;

ਬਹੁਧਾ ਪਨਿਦਂ ਚਿਤ੍ਤਂ, ਹੋਤੀਤਿ ਚ ਵਿਭਾਵਯੇ.

੧੮੧.

ਏਕਵਿਧਾਦਿਨਯੇ ਪਨਿਮਸ੍ਮਿਂ,

ਯੋ ਕੁਸਲੋ ਮਤਿਮਾ ਇਧ ਭਿਕ੍ਖੁ;

ਤਸ੍ਸਭਿਧਮ੍ਮਗਤਾ ਪਨ ਅਤ੍ਥਾ,

ਹਤ੍ਥਗਤਾਮਲਕਾ ਵਿਯ ਹੋਨ੍ਤਿ.

ਇਤਿ ਅਭਿਧਮ੍ਮਾਵਤਾਰੇ ਏਕਵਿਧਾਦਿਨਿਦ੍ਦੇਸੋ ਨਾਮ

ਚਤੁਤ੍ਥੋ ਪਰਿਚ੍ਛੇਦੋ.

੫. ਪਞ੍ਚਮੋ ਪਰਿਚ੍ਛੇਦੋ

ਭੂਮਿਪੁਗ੍ਗਲਚਿਤ੍ਤੁਪ੍ਪਤ੍ਤਿਨਿਦ੍ਦੇਸੋ

੧੮੨.

ਇਤੋ ¶ ¶ ਪਰਂ ਪਵਕ੍ਖਾਮਿ, ਬੁਦ੍ਧਿਵੁਦ੍ਧਿਕਰਂ ਨਯਂ;

ਚਿਤ੍ਤਾਨਂ ਭੂਮੀਸੁਪ੍ਪਤ੍ਤਿਂ, ਪੁਗ੍ਗਲਾਨਂ ਵਸੇਨ ਚ.

੧੮੩.

ਦੇਵਾਚੇਵ ¶ ਮਨੁਸ੍ਸਾ ਚ, ਤਿਸ੍ਸੋ ਵਾਪਾਯਭੂਮਿਯੋ;

ਗਤਿਯੋ ਪਞ੍ਚ ਨਿਦ੍ਦਿਟ੍ਠਾ, ਸਤ੍ਥੁਨਾ ਤੁ ਤਯੋ ਭਵਾ.

੧੮੪.

ਭੂਮਿਯੋ ਤਤ੍ਥ ਤਿਂਸੇਵ, ਤਾਸੁ ਤਿਂਸੇਵ ਪੁਗ੍ਗਲਾ;

ਭੂਮੀਸ੍ਵੇਤਾਸੁ ਉਪ੍ਪਨ੍ਨਾ, ਸਬ੍ਬੇ ਚ ਪਨ ਪੁਗ੍ਗਲਾ.

੧੮੫.

ਪਟਿਸਨ੍ਧਿਕਚਿਤ੍ਤਾਨਂ, ਵਸੇਨੇਕੂਨਵੀਸਤਿ;

ਪਟਿਸਨ੍ਧਿ ਚ ਨਾਮੇਸਾ, ਦੁਵਿਧਾ ਸਮੁਦੀਰਿਤਾ.

੧੮੬.

ਅਚਿਤ੍ਤਕਾ ਸਚਿਤ੍ਤਾ ਚ, ਅਸਞ੍ਞੀਨਮਚਿਤ੍ਤਕਾ;

ਸੇਸਾ ਸਚਿਤ੍ਤਕਾ ਞੇਯ੍ਯਾ, ਸਾ ਪਨੇਕੂਨਵੀਸਤਿ.

੧੮੭.

ਪਟਿਸਨ੍ਧਿਵਸੇਨੇਵ, ਹੋਨ੍ਤਿ ਵੀਸਤਿ ਪੁਗ੍ਗਲਾ;

ਇਧ ਚਿਤ੍ਤਾਧਿਕਾਰਤ੍ਤਾ, ਅਚਿਤ੍ਤਾ ਨ ਚ ਉਦ੍ਧਟਾ.

੧੮੮.

ਅਹੇਤੁਦ੍ਵਿਤਿਹੇਤੂਤਿ, ਪੁਗ੍ਗਲਾ ਤਿਵਿਧਾ ਸਿਯੁਂ;

ਅਰਿਯਾ ਪਨ ਅਟ੍ਠਾਤਿ, ਸਬ੍ਬੇ ਏਕਾਦਸੇਰਿਤਾ.

੧੮੯.

ਏਤੇਸਂ ਪਨ ਸਬ੍ਬੇਸਂ, ਪੁਗ੍ਗਲਾਨਂ ਪਭੇਦਤੋ;

ਚਿਤ੍ਤਾਨਂ ਭੂਮੀਸੁਪ੍ਪਤ੍ਤਿਂ, ਭਣਤੋ ਮੇ ਨਿਬੋਧਥ.

੧੯੦.

ਤਿਂਸਭੂਮੀਸੁ ਚਿਤ੍ਤਾਨਿ, ਕਤਿ ਜਾਯਨ੍ਤਿ ਮੇ ਵਦ;

ਚੁਦ੍ਦਸੇਵ ਤੁ ਚਿਤ੍ਤਾਨਿ, ਹੋਨ੍ਤਿ ਸਬ੍ਬਾਸੁ ਭੂਮਿਸੁ.

੧੯੧.

ਸਦਾ ਵੀਸਤਿ ਚਿਤ੍ਤਾਨਿ, ਕਾਮੇਯੇਵ ਭਵੇ ਸਿਯੁਂ;

ਪਞ੍ਚ ਰੂਪਭਵੇਯੇਵ, ਚਤ੍ਤਾਰੇਵ ਅਰੂਪਿਸੁ.

੧੯੨.

ਕਾਮਰੂਪਭਵੇਸ੍ਵੇਵ ¶ , ਅਟ੍ਠਾਰਸ ਭਵਨ੍ਤਿ ਹਿ;

ਦ੍ਵੇਚਤ੍ਤਾਲੀਸ ਚਿਤ੍ਤਾਨਿ, ਹੋਨ੍ਤਿ ਤੀਸੁ ਭਵੇਸੁਪਿ.

੧੯੩.

ਠਪੇਤ੍ਵਾ ਪਨ ਸਬ੍ਬਾਸਂ, ਚਤਸ੍ਸੋਪਾਯਭੂਮਿਯੋ;

ਤੇਰਸੇਵ ਚ ਚਿਤ੍ਤਾਨਿ, ਹੋਨ੍ਤਿ ਛਬ੍ਬੀਸਭੂਮਿਸੁ.

੧੯੪.

ਅਪਰਾਨਿ ¶ ਚਤਸ੍ਸੋਪਿ, ਠਪੇਤ੍ਵਾਰੁਪ੍ਪਭੂਮਿਯੋ;

ਚਿਤ੍ਤਾਨਿ ਪਨ ਜਾਯਨ੍ਤਿ, ਛ ਚ ਛਬ੍ਬੀਸਭੂਮਿਸੁ.

੧੯੫.

ਸੁਦ੍ਧਾਵਾਸਿਕਦੇਵਾਨਂ ¶ , ਠਪੇਤ੍ਵਾ ਪਞ੍ਚ ਭੂਮਿਯੋ;

ਪਞ੍ਚ ਚਿਤ੍ਤਾਨਿ ਜਾਯਨ੍ਤੇ, ਪਞ੍ਚਵੀਸਤਿਭੂਮਿਸੁ.

੧੯੬.

ਅਪਰਾਨਿ ਦੁਵੇ ਹੋਨ੍ਤਿ, ਪਞ੍ਚਵੀਸਤਿਭੂਮਿਸੁ;

ਠਪੇਤ੍ਵਾ ਨੇਵਸਞ੍ਞਞ੍ਚ, ਚਤਸ੍ਸੋਪਾਯਭੂਮਿਯੋ.

੧੯੭.

ਦ੍ਵੇਪਿ ਚਿਤ੍ਤਾਨਿ ਜਾਯਨ੍ਤਿ, ਚਤੁਵੀਸਤਿਭੂਮਿਸੁ;

ਆਕਿਞ੍ਚਞ੍ਞਂ ਨੇਵਸਞ੍ਞਞ੍ਚ, ਠਪੇਤ੍ਵਾਪਾਯਭੂਮਿਯੋ.

੧੯੮.

ਅਪਾਯਭੂਮਿਯੋ ਹਿਤ੍ਵਾ, ਤਿਸ੍ਸੋ ਆਰੁਪ੍ਪਭੂਮਿਯੋ;

ਦ੍ਵੇਯੇਵ ਪਨ ਚਿਤ੍ਤਾਨਿ, ਹੋਨ੍ਤਿ ਤੇਵੀਸਭੂਮਿਸੁ.

੧੯੯.

ਅਰੂਪੇ ਚ ਅਪਾਯੇ ਚ, ਠਪੇਤ੍ਵਾ ਅਟ੍ਠ ਭੂਮਿਯੋ;

ਏਕਾਦਸਵਿਧਂ ਚਿਤ੍ਤਂ, ਹੋਨ੍ਤਿ ਦ੍ਵਾਵੀਸਭੂਮਿਸੁ.

੨੦੦.

ਸੁਦ੍ਧਾਵਾਸੇ ਅਪਾਯੇ ਚ, ਠਪੇਤ੍ਵਾ ਨਵ ਭੂਮਿਯੋ;

ਏਕਵੀਸਾਸੁ ਨਿਚ੍ਚਮ੍ਪਿ, ਚਤ੍ਤਾਰੋਵ ਭਵਨ੍ਤਿ ਹਿ.

੨੦੧.

ਏਕਂ ਸਤ੍ਤਰਸਸ੍ਵੇਵ, ਚਿਤ੍ਤਂ ਜਾਯਤਿ ਭੂਮਿਸੁ;

ਸੁਦ੍ਧਾਵਾਸੇ ਠਪੇਤ੍ਵਾ ਤੁ, ਅਪਾਯਾਰੁਪ੍ਪਭੂਮਿਯੋ.

੨੦੨.

ਦ੍ਵਾਦਸੇਵ ਤੁ ਜਾਯਨ੍ਤੇ, ਏਕਾਦਸਸੁ ਭੂਮਿਸੁ;

ਠਪੇਤ੍ਵਾ ਪਨ ਸਬ੍ਬਾਪਿ, ਭੂਮਿਯੋ ਹਿ ਮਹਗ੍ਗਤਾ.

੨੦੩.

ਕਾਮਾਵਚਰਦੇਵਾਨਂ, ਮਨੁਸ੍ਸਾਨਂ ਵਸੇਨ ਤੁ;

ਅਟ੍ਠ ਚਿਤ੍ਤਾਨਿ ਜਾਯਨ੍ਤੇ, ਸਦਾ ਸਤ੍ਤਸੁ ਭੂਮਿਸੁ.

੨੦੪.

ਪਞ੍ਚਮਜ੍ਝਾਨਪਾਕੇਕੋ ¶ , ਜਾਯਤੇ ਛਸੁ ਭੂਮਿਸੁ;

ਚਤ੍ਤਾਰਿ ਪਨ ਚਿਤ੍ਤਾਨਿ, ਤੀਸੁ ਤੀਸ੍ਵੇਵ ਭੂਮਿਸੁ.

੨੦੫.

ਚਤ੍ਤਾਰਿ ¶ ਪਨ ਚਿਤ੍ਤਾਨਿ, ਹੋਨ੍ਤਿ ਏਕੇਕਭੂਮਿਸੁ;

ਅਰੂਪਾਵਚਰਪਾਕਾਨਂ, ਵਸੇਨ ਪਰਿਦੀਪਯੇ.

੨੦੬.

ਕੁਸਲਾਕੁਸਲਾ ਕਾਮੇ,

ਤੇਸਂ ਪਾਕਾ ਅਹੇਤੁਕਾ;

ਆਵਜ੍ਜਨਦ੍ਵਯਞ੍ਚਾਤਿ,

ਸਤ੍ਤਤਿਂਸੇਵ ਮਾਨਸਾ.

੨੦੭.

ਨਰਕਾਦੀਸ੍ਵਪਾਯੇਸੁ, ਚਤੂਸੁਪਿ ਚ ਜਾਯਰੇ;

ਦ੍ਵੇਪਞ੍ਞਾਸਾਵਸੇਸਾਨਿ, ਨੁਪ੍ਪਜ੍ਜਨ੍ਤਿ ਕਦਾਚਿਪਿ.

੨੦੮.

ਕਾਮੇ ਦੇਵਮਨੁਸ੍ਸਾਨਂ, ਨਵ ਪਾਕਾ ਮਹਗ੍ਗਤਾ;

ਨੇਵ ਜਾਯਨ੍ਤਿ ਜਾਯਨ੍ਤਿ, ਅਸੀਤਿ ਹਦਯਾ ਸਦਾ.

੨੦੯.

ਕਾਮੇ ਅਟ੍ਠ ਮਹਾਪਾਕਾ, ਦੋਮਨਸ੍ਸਦ੍ਵਯਮ੍ਪਿ ਚ;

ਤਥਾ ਘਾਨਾਦਿਵਿਞ੍ਞਾਣ-ਤ੍ਤਯਂ ਪਾਕਾ ਅਪੁਞ੍ਞਜਾ.

੨੧੦.

ਨਤ੍ਥਿ ਆਰੁਪ੍ਪਪਾਕਾ ਚ, ਰੂਪਾਵਚਰਭੂਮਿਯਂ;

ਇਮੇਹਿ ਸਹ ਚਿਤ੍ਤੇਹਿ, ਤਯੋ ਮਗ੍ਗਾ ਫਲਦ੍ਵਯਂ.

੨੧੧.

ਚਤ੍ਤਾਰੋ ਦਿਟ੍ਠਿਸਂਯੁਤ੍ਤਾ, ਵਿਚਿਕਿਚ੍ਛਾਯੁਤਮ੍ਪਿ ਚ;

ਚਤ੍ਤਾਰੋ ਹੇਟ੍ਠਿਮਾ ਪਾਕਾ, ਸੁਦ੍ਧਾਵਾਸੇ ਨ ਲਬ੍ਭਰੇ.

੨੧੨.

ਸੇਸਾਨਿ ਏਕਪਞ੍ਞਾਸ, ਚਿਤ੍ਤਾਨਿ ਪਨ ਲਬ੍ਭਰੇ;

ਰੂਪਾਵਚਰਿਕਾ ਸਬ੍ਬੇ, ਵਿਪਾਕਾ ਕਾਮਧਾਤੁਯਾ.

੨੧੩.

ਦੋਮਨਸ੍ਸਾਦਿਮਗ੍ਗੋ ਚ, ਕ੍ਰਿਯਾ ਚ ਦ੍ਵੇ ਅਹੇਤੁਕਾ;

ਤੇਚਤ੍ਤਾਲੀਸ ਚਿਤ੍ਤਾਨਿ, ਨਤ੍ਥਿ ਆਰੁਪ੍ਪਭੂਮਿਯਂ.

੨੧੪.

ਏਵਂ ¶ ਭੂਮਿਵਸੇਨੇਵ, ਚਿਤ੍ਤੁਪ੍ਪਤ੍ਤਿਂ ਵਿਭਾਵਯੇ;

ਤਥਾ ਏਕਾਦਸਨ੍ਨਮ੍ਪਿ, ਪੁਗ੍ਗਲਾਨਂ ਵਸੇਨ ਚ.

੨੧੫.

ਕੁਸਲਾਕੁਸਲਾ ¶ ¶ ਕਾਮੇ,

ਤੇਸਂ ਪਾਕਾ ਅਹੇਤੁਕਾ;

ਆਵਜ੍ਜਨਦ੍ਵਯਞ੍ਚਾਤਿ,

ਸਤ੍ਤਤਿਂਸੇਵ ਮਾਨਸਾ.

੨੧੬.

ਅਹੇਤੁਕਸ੍ਸ ਸਤ੍ਤਸ੍ਸ, ਜਾਯਨ੍ਤੇ ਪਞ੍ਚਭੂਮਿਸੁ;

ਦ੍ਵੇਪਞ੍ਞਾਸਾਵਸੇਸਾਨਿ, ਨ ਜਾਯਨ੍ਤਿ ਕਦਾਚਿਪਿ.

੨੧੭.

ਅਹੇਤੁਕਸ੍ਸ ਵੁਤ੍ਤੇਹਿ, ਕਾਮਪਾਕਾ ਦੁਹੇਤੁਕਾ;

ਦੁਹੇਤੁਕਸ੍ਸ ਜਾਯਨ੍ਤੇ, ਚਤ੍ਤਾਲੀਸਂ ਤਥੇਕਕਂ.

੨੧੮.

ਸਬ੍ਬੇ ਮਹਗ੍ਗਤਾ ਚੇਵ, ਸਬ੍ਬੇਪਿ ਚ ਅਨਾਸਵਾ;

ਤਿਹੇਤੁਕਾ ਵਿਪਾਕਾ ਚ, ਕਾਮੇ ਨਵ ਕ੍ਰਿਯਾਪਿ ਚ.

੨੧੯.

ਦੁਹੇਤੁਨੋ ਨ ਜਾਯਨ੍ਤਿ, ਚਤ੍ਤਾਲੀਸਂ ਤਥਾਟ੍ਠ ਚ;

ਕਾਮਾਵਚਰਸਤ੍ਤਸ੍ਸ, ਤਿਹੇਤੁਪਟਿਸਨ੍ਧਿਨੋ.

੨੨੦.

ਪੁਥੁਜ੍ਜਨਸ੍ਸ ਜਾਯਨ੍ਤੇ, ਚਤੁਪਞ੍ਞਾਸ ਮਾਨਸਾ;

ਦ੍ਵਿਹੇਤੁਕਸ੍ਸ ਵੁਤ੍ਤਾਨਿ, ਚਤ੍ਤਾਲੀਸਂ ਤਥੇਕਕਂ.

੨੨੧.

ਚਤ੍ਤਾਰੋ ਞਾਣਸਂਯੁਤ੍ਤਾ, ਵਿਪਾਕਾ ਕਾਮਧਾਤੁਯਾ;

ਰੂਪਾਰੂਪੇਸੁ ਪੁਞ੍ਞਾਨਿ, ਚਤੁਪਞ੍ਞਾਸ ਮਾਨਸਾ.

੨੨੨.

ਪੁਥੁਜ੍ਜਨਸ੍ਸ ਜਾਯਨ੍ਤੇ, ਪਞ੍ਚਤਿਂਸ ਨ ਜਾਯਰੇ;

ਛਦੇਵੇਸੁ ਮਨੁਸ੍ਸੇਸੁ, ਸੋਤਾਪਨ੍ਨਸ੍ਸ ਦੇਹਿਨੋ.

੨੨੩.

ਪਞ੍ਞਾਸੇਵਸ੍ਸ ਚਿਤ੍ਤਾਨਿ, ਜਾਯਨ੍ਤੀਤਿ ਵਿਨਿਦ੍ਦਿਸੇ;

ਨਵਤਿਂਸੇਵ ਚਿਤ੍ਤਾਨਿ, ਨੁਪ੍ਪਜ੍ਜਨ੍ਤੀਤਿ ਦੀਪਯੇ.

੨੨੪.

ਸੋਤਾਪਨ੍ਨਸ੍ਸ ਵੁਤ੍ਤਾਨਿ, ਠਪੇਤ੍ਵਾ ਪਠਮਂ ਫਲਂ;

ਅਤ੍ਤਨੋਵ ਫਲੇਨਸ੍ਸ, ਸਕਦਾਗਾਮਿਨੋ ਸਿਯੁਂ.

੨੨੫.

ਸੋਤਾਪਨ੍ਨਸ੍ਸ ¶ ¶ ਵੁਤ੍ਤਾਨਿ, ਠਪੇਤ੍ਵਾ ਪਟਿਘਦ੍ਵਯਂ;

ਦੁਤਿਯਂ ਚ ਫਲਂ ਹਿਤ੍ਵਾ, ਯਾਨਿ ਚਿਤ੍ਤਾਨਿ ਤਾਨਿਤਿ;

ਅਨਾਗਾਮਿਸ੍ਸ ਸਤ੍ਤਸ੍ਸ, ਜਾਯਨ੍ਤੀਤਿ ਵਿਨਿਦ੍ਦਿਸੇ.

੨੨੬.

ਕਤਿ ਚਿਤ੍ਤਾਨਿ ਜਾਯਨ੍ਤੇ, ਕਾਮੇ ਅਰਹਤੋ ਪਨ;

ਚਤ੍ਤਾਰੀਸਞ੍ਚ ਚਤ੍ਤਾਰਿ, ਕਾਮੇ ਅਰਹਤੋ ਸਿਯੁਂ.

੨੨੭.

ਮਗ੍ਗਟ੍ਠਾਨਂ ਚਤੁਨ੍ਨਮ੍ਪਿ, ਪੁਗ੍ਗਲਾਨਂ ਸਕਂ ਸਕਂ;

ਮਗ੍ਗਚਿਤ੍ਤਂ ਸਿਯਾ ਤੇਸਂ, ਏਕਚਿਤ੍ਤਕ੍ਖਣਾ ਹਿ ਤੇ.

੨੨੮.

ਪੁਥੁਜ੍ਜਨਸ੍ਸ ਤੀਸ੍ਵੇਵ, ਪਠਮਜ੍ਝਾਨਭੂਮਿਸੁ;

ਪਞ੍ਚਤਿਂਸੇਵ ਚਿਤ੍ਤਾਨਿ, ਜਾਯਨ੍ਤੇਤਿ ਵਿਨਿਦ੍ਦਿਸੇ.

੨੨੯.

ਘਾਨਾਦੀਸੁ ਚ ਵਿਞ੍ਞਾਣ-ਤ੍ਤਯਂ ਸਤ੍ਤ ਅਪੁਞ੍ਞਜਾ;

ਮਹਾਪਾਕਾ ਤਥਾ ਪਾਕਾ, ਉਪਰਿਜ੍ਝਾਨਭੂਮਿਕਾ.

੨੩੦.

ਵਿਪਾਕਾਪਿ ਚ ਆਰੁਪ੍ਪਾ, ਦੋਮਨਸ੍ਸਦ੍ਵਯਮ੍ਪਿ ਚ;

ਅਟ੍ਠਾਰਸ ਕ੍ਰਿਯਾ ਚੇਵ, ਅਟ੍ਠ ਲੋਕੁਤ੍ਤਰਾਨਿ ਚ.

੨੩੧.

ਪਠਮਜ੍ਝਾਨਨਿਬ੍ਬਤ੍ਤ-ਪੁਥੁਜ੍ਜਨਸਰੀਰਿਨੋ;

ਏਤਾਨਿ ਚਤੁਪਞ੍ਞਾਸ, ਚਿਤ੍ਤਾਨਿ ਨ ਚ ਲਬ੍ਭਰੇ.

੨੩੨.

ਸੋਤਾਪਨ੍ਨਸ੍ਸ ¶ ਚਿਤ੍ਤਾਨਿ, ਤਤ੍ਥੇਕਤਿਂਸ ਜਾਯਰੇ;

ਪੁਥੁਜ੍ਜਨਸ੍ਸ ਵੁਤ੍ਤੇਸੁ, ਹਿਤ੍ਵਾ ਚਾਪੁਞ੍ਞਪਞ੍ਚਕਂ.

੨੩੩.

ਸਕਦਾਗਾਮਿਨੋ ਤਤ੍ਥ, ਠਪੇਤ੍ਵਾ ਪਠਮਂ ਫਲਂ;

ਏਕਤਿਂਸੇਵ ਜਾਯਨ੍ਤੇ, ਪਕ੍ਖਿਪਿਤ੍ਵਾ ਸਕਂ ਫਲਂ.

੨੩੪.

ਅਨਾਗਾਮਿਸ੍ਸ ਤਤ੍ਥੇਵ, ਠਪੇਤ੍ਵਾ ਦੁਤਿਯਂ ਫਲਂ;

ਏਕਤਿਂਸੇਵ ਜਾਯਨ੍ਤੇ, ਫਲਚਿਤ੍ਤੇਨ ਅਤ੍ਤਨੋ.

੨੩੫.

ਵਿਞ੍ਞਾਣਂ ਚਕ੍ਖੁਸੋਤਾਨਂ, ਪੁਞ੍ਞਜਂ ਸਮ੍ਪਟਿਚ੍ਛਨਂ;

ਸਨ੍ਤੀਰਣਦ੍ਵਯਞ੍ਚੇਵ, ਕ੍ਰਿਯਚਿਤ੍ਤਾਨਿ ਵੀਸਤਿ.

੨੩੬.

ਅਰਹਤ੍ਤਫਲਂ ¶ ¶ ਪਾਕੋ, ਪਠਮਜ੍ਝਾਨਸਮ੍ਭਵੋ;

ਸਤ੍ਤਵੀਸਤਿ ਚਿਤ੍ਤਾਨਿ, ਅਰਹਨ੍ਤਸ੍ਸ ਜਾਯਰੇ.

੨੩੭.

ਪੁਥੁਜ੍ਜਨਸ੍ਸ ਤੀਸ੍ਵੇਵ, ਦੁਤਿਯਜ੍ਝਾਨਭੂਮਿਸੁ;

ਛਤ੍ਤਿਂਸ ਦੁਤਿਯਜ੍ਝਾਨ-ਤਤਿਯਜ੍ਝਾਨਪਾਕਤੋ.

੨੩੮.

ਪੁਥੁਜ੍ਜਨਸ੍ਸ ਵੁਤ੍ਤੇਸੁ, ਹਿਤ੍ਵਾ ਵਾਪੁਞ੍ਞਪਞ੍ਚਕਂ;

ਸੋਤਾਪਨ੍ਨਸ੍ਸ ਬਾਤ੍ਤਿਂਸ, ਫਲੇਨ ਸਹ ਅਤ੍ਤਨੋ.

੨੩੯.

ਸੋਤਾਪਨ੍ਨਸ੍ਸ ਵੁਤ੍ਤੇਸੁ, ਠਪੇਤ੍ਵਾ ਪਠਮਂ ਫਲਂ;

ਬਾਤ੍ਤਿਂਸ ਫਲਚਿਤ੍ਤੇਨ, ਸਕਦਾਗਾਮਿਸ੍ਸ ਅਤ੍ਤਨੋ.

੨੪੦.

ਸਕਦਾਗਾਮੀਸੁ ਵੁਤ੍ਤੇਸੁ, ਠਪੇਤ੍ਵਾ ਦੁਤਿਯਂ ਫਲਂ;

ਅਨਾਗਾਮਿਫਲੇਨਸ੍ਸ, ਬਾਤ੍ਤਿਂਸੇਵ ਭਵਨ੍ਤਿ ਹਿ.

੨੪੧.

ਅਰਹਨ੍ਤਸ੍ਸ ਤੀਸ੍ਵੇਵ, ਅਟ੍ਠਵੀਸਤਿ ਅਤ੍ਤਨੋ;

ਫਲੇਨ ਦੁਤਿਯਜ੍ਝਾਨ-ਤਤਿਯਜ੍ਝਾਨਪਾਕਤੋ.

੨੪੨.

ਪਰਿਤ੍ਤਕਸੁਭਾਦੀਨਂ, ਦੇਵਾਨਂ ਤੀਸੁ ਭੂਮਿਸੁ;

ਪਞ੍ਚਤਿਂਸੇਵ ਜਾਯਨ੍ਤੇ, ਚਤੁਤ੍ਥਜ੍ਝਾਨਪਾਕਤੋ.

੨੪੩.

ਸੋਤਾਪਨ੍ਨਸ੍ਸ ਤਤ੍ਥੇਕ-ਤਿਂਸ ਚਿਤ੍ਤਾਨਿ ਜਾਯਰੇ;

ਸਕਦਾਗਾਮਿਨੋ ਏਵਂ, ਤਥਾਨਾਗਾਮਿਨੋਪਿ ਚ.

੨੪੪.

ਖੀਣਾਸਵਸ੍ਸ ਤਤ੍ਥੇਵ, ਸਤ੍ਤਵੀਸਤਿ ਮਾਨਸਾ;

ਤਥਾ ਵੇਹਪ੍ਫਲੇ ਚਾਪਿ, ਸਬ੍ਬੇਸਂ ਹੋਨ੍ਤਿ ਮਾਨਸਾ.

੨੪੫.

ਏਕਤਿਂਸੇਵ ਚਿਤ੍ਤਾਨਿ, ਸੁਦ੍ਧਾਵਾਸਿਕਭੂਮਿਸੁ;

ਅਨਾਗਾਮਿਕਸਤ੍ਤਸ੍ਸ, ਹੋਨ੍ਤੀਤਿ ਪਰਿਦੀਪਯੇ.

੨੪੬.

ਅਰਹਤੋ ਪਨ ਤਤ੍ਥੇਵ, ਮਾਨਸਾ ਸਤ੍ਤਵੀਸਤਿ;

ਏਵਂ ਰੂਪੀਸੁ ਚਿਤ੍ਤਾਨਿ, ਵਿਞ੍ਞੇਯ੍ਯਾਨਿ ਵਿਭਾਵਿਨਾ.

੨੪੭.

ਚਤੁਵੀਸਤਿ ¶ ਚਿਤ੍ਤਾਨਿ, ਪਠਮਾਰੁਪ੍ਪਭੂਮਿਯਂ;

ਪੁਥੁਜ੍ਜਨਸ੍ਸ ਸਤ੍ਤਸ੍ਸ, ਜਾਯਨ੍ਤੀਤਿ ਵਿਨਿਦ੍ਦਿਸੇ.

੨੪੮.

ਸੋਤਾਪਨ੍ਨਸ੍ਸ ¶ ਤਤ੍ਥੇਵ, ਠਪੇਤ੍ਵਾਪੁਞ੍ਞਪਞ੍ਚਕਂ;

ਸਮਵੀਸਤਿ ਚਿਤ੍ਤਾਨਿ, ਫਲੇਨ ਸਹ ਅਤ੍ਤਨੋ.

੨੪੯.

ਸਕਦਾਗਾਮਿਨੋ ਤਤ੍ਥ, ਤਥਾਨਾਗਾਮਿਨੋਪਿ ਚ;

ਜਾਯਨ੍ਤਿ ਵੀਸ ਚਿਤ੍ਤਾਨਿ, ਪੁਬ੍ਬਪੁਬ੍ਬਫਲਂ ਵਿਨਾ.

੨੫੦.

ਖੀਣਾਸਵਸ੍ਸ ਤਤ੍ਥੇਵ, ਦਸਪਞ੍ਚ ਚ ਮਾਨਸਾ;

ਪੁਥੁਜ੍ਜਨਸ੍ਸ ਸਤ੍ਤਸ੍ਸ, ਦੁਤਿਯਾਰੁਪ੍ਪਭੂਮਿਯਂ.

੨੫੧.

ਹੋਨ੍ਤਿ ¶ ਤੇਵੀਸ ਚਿਤ੍ਤਾਨਿ, ਇਤਿ ਵਤ੍ਵਾ ਵਿਭਾਵਯੇ;

ਤਿਣ੍ਣਨ੍ਨਮ੍ਪੇਤ੍ਥ ਸੇਖਾਨਂ, ਚਿਤ੍ਤਾਨੇਕੂਨਵੀਸਤਿ.

੨੫੨.

ਚੁਦ੍ਦਸੇਵ ਤੁ ਚਿਤ੍ਤਾਨਿ, ਦੁਤਿਯਾਰੁਪ੍ਪਭੂਮਿਯਂ;

ਕ੍ਰਿਯਾਦ੍ਵਾਦਸ ਪਾਕੇਕੋ, ਫਲਂ ਖੀਣਾਸਵਸ੍ਸ ਤੁ.

੨੫੩.

ਪੁਥੁਜ੍ਜਨਸ੍ਸ ਸਤ੍ਤਸ੍ਸ, ਤਤਿਯਾਰੁਪ੍ਪਭੂਮਿਯਂ;

ਬਾਵੀਸਤਿ ਚ ਚਿਤ੍ਤਾਨਿ, ਭਵਨ੍ਤੀਤਿ ਪਕਾਸਯੇ.

੨੫੪.

ਅਟ੍ਠਾਰਸੇਵ ਚਿਤ੍ਤਾਨਿ, ਸੋਤਾਪਨ੍ਨਸ੍ਸ ਜਾਯਰੇ;

ਸਕਦਾਗਾਮਿਨੋ ਤਾਨਿ, ਠਪੇਤ੍ਵਾ ਪਠਮਂ ਫਲਂ.

੨੫੫.

ਸਕਦਾਗਾਮਿਵੁਤ੍ਤੇਸੁ, ਠਪੇਤ੍ਵਾ ਦੁਤਿਯਂ ਫਲਂ;

ਅਟ੍ਠਾਰਸੇਵ ਚਿਤ੍ਤਾਨਿ, ਅਨਾਗਾਮਿਸ੍ਸ ਜਾਯਰੇ.

੨੫੬.

ਤੇਰਸੇਵ ਚ ਚਿਤ੍ਤਾਨਿ, ਤਤਿਯਾਰੁਪ੍ਪਭੂਮਿਯਂ;

ਖੀਣਾਸਵਸ੍ਸ ਸਤ੍ਤਸ੍ਸ, ਭਵਨ੍ਤੀਤਿ ਵਿਨਿਦ੍ਦਿਸੇ.

੨੫੭.

ਏਕਵੀਸਤਿ ਚਿਤ੍ਤਾਨਿ, ਚਤੁਤ੍ਥਾਰੁਪ੍ਪਭੂਮਿਯਂ;

ਪੁਥੁਜ੍ਜਨਸ੍ਸ ਸਤ੍ਤਸ੍ਸ, ਜਾਯਨ੍ਤੀਤਿ ਵਿਨਿਦ੍ਦਿਸੇ.

੨੫੮.

ਸੋਤਾਪਨ੍ਨਸ੍ਸ ¶ ਸਤ੍ਤਸ੍ਸ, ਸਤ੍ਤਰਸ ਪਕਾਸਯੇ;

ਸਕਦਾਗਾਮਿਨੋ ਤਾਨਿ, ਠਪੇਤ੍ਵਾ ਪਠਮਂ ਫਲਂ.

੨੫੯.

ਸਕਦਾਗਾਮਿਵੁਤ੍ਤੇਸੁ, ਠਪੇਤ੍ਵਾ ਦੁਤਿਯਂ ਫਲਂ;

ਹੋਨ੍ਤਿ ਸਤ੍ਤਰਸੇਵਸ੍ਸ, ਅਨਾਗਾਮਿਸ੍ਸ ਮਾਨਸਾ.

੨੬੦.

ਦ੍ਵਾਦਸੇਵ ¶ ਤੁ ਚਿਤ੍ਤਾਨਿ, ਚਤੁਤ੍ਥਾਰੁਪ੍ਪਭੂਮਿਯਂ;

ਜਾਯਨ੍ਤਿ ਅਰਹਨ੍ਤਸ੍ਸ, ਇਤਿ ਵਤ੍ਵਾ ਵਿਭਾਵਯੇ.

੨੬੧.

ਹੇਟ੍ਠਿਮਾਨਂ ਅਰੂਪੀਨਂ, ਬ੍ਰਹ੍ਮਾਨਂ ਉਪਰੂਪਰਿ;

ਅਰੂਪਕੁਸਲਾ ਚੇਵ, ਉਪ੍ਪਜ੍ਜਨ੍ਤਿ ਕ੍ਰਿਯਾਪਿ ਚ.

੨੬੨.

ਉਦ੍ਧਮੁਦ੍ਧਮਰੂਪੀਨਂ, ਹੇਟ੍ਠਿਮਾ ਹੇਟ੍ਠਿਮਾ ਪਨ;

ਆਰੁਪ੍ਪਾਨੇਵ ਜਾਯਨ੍ਤੇ, ਦਿਟ੍ਠਾਦੀਨਵਤੋ ਕਿਰ.

੨੬੩.

ਠਪੇਤ੍ਵਾ ਪਠਮਂ ਮਗ੍ਗਂ, ਕੁਸਲਾਨੁਤ੍ਤਰਾ ਤਯੋ;

ਕਾਮਾਵਚਰਪੁਞ੍ਞਾਨਿ, ਅਪੁਞ੍ਞਾਨਿ ਤਥਾ ਦਸ.

੨੬੪.

ਚਤ੍ਤਾਰਾਰੁਪ੍ਪਪੁਞ੍ਞਾਨਿ, ਸਬ੍ਬੇ ਪਾਕਾ ਅਨੁਤ੍ਤਰਾ;

ਪਠਮਾਰੁਪ੍ਪਪਾਕੋ ਚ, ਨਵ ਕਾਮਕ੍ਰਿਯਾਪਿ ਚ.

੨੬੫.

ਆਰੁਪ੍ਪਾਪਿ ਕ੍ਰਿਯਾ ਸਬ੍ਬਾ, ਤੇਚਤ੍ਤਾਲੀਸ ਮਾਨਸਾ;

ਉਪ੍ਪਜ੍ਜਨ੍ਤਿ ਪਨੇਤਾਨਿ, ਪਠਮਾਰੁਪ੍ਪਭੂਮਿਯਂ.

੨੬੬.

ਸਬ੍ਬੋ ਕਾਮਵਿਪਾਕੋ ਚ, ਸਬ੍ਬੋ ਰੂਪੋਮਹਗ੍ਗਤੋ;

ਚਿਤ੍ਤੁਪ੍ਪਾਦੋ ਮਨੋਧਾਤੁ, ਦੋਮਨਸ੍ਸਦ੍ਵਯਮ੍ਪਿ ਚ.

੨੬੭.

ਆਦਿਮਗ੍ਗੋ ਤਯੋ ਪਾਕਾ, ਆਰੁਪ੍ਪਾ ਚ ਤਥੂਪਰਿ;

ਛਚਤ੍ਤਾਲੀਸ ਨਤ੍ਥੇਤ੍ਥ, ਪਠਮਾਰੁਪ੍ਪਭੂਮਿਯਂ.

੨੬੮.

ਵੁਤ੍ਤੇਸੁ ਪਨ ਚਿਤ੍ਤੇਸੁ, ਪਠਮਾਰੁਪ੍ਪਭੂਮਿਯਂ;

ਠਪੇਤ੍ਵਾ ਪਠਮਾਰੁਪ੍ਪ-ਤ੍ਤਯਂ ਪਾਕੋ ਚ ਅਤ੍ਤਨੋ.

੨੬੯.

ਤਾਲੀਸੇਤਾਨਿ ¶ ਜਾਯਨ੍ਤੇ, ਦੁਤਿਯਾਰੁਪ੍ਪਭੂਮਿਯਂ;

ਏਵਂ ਸੇਸਦ੍ਵਯੇ ਞੇਯ੍ਯਾ, ਹਿਤ੍ਵਾ ਹੇਟ੍ਠਿਮਹੇਟ੍ਠਿਮਂ.

੨੭੦.

ਅਤ੍ਤਨੋ ¶ ਅਤ੍ਤਨੋ ਪਾਕਾ, ਚਤ੍ਤਾਰੋ ਚ ਅਨਾਸਵਾ;

ਵਿਪਾਕਾ ਹੋਨ੍ਤਿ ਸਬ੍ਬੇਵ, ਚਤੂਸ੍ਵਾਰੁਪ੍ਪਭੂਮਿਸੁ.

੨੭੧.

ਵੋਟ੍ਠਬ੍ਬਨੇਨ ਚਿਤ੍ਤੇਨ, ਕਾਮੇ ਅਟ੍ਠ ਮਹਾਕ੍ਰਿਯਾ;

ਚਤਸ੍ਸੋਪਿ ਚ ਆਰੁਪ੍ਪਾ, ਤੇਰਸੇਵ ਕ੍ਰਿਯਾ ਸਿਯੁਂ.

੨੭੨.

ਖੀਣਾਸਵਸ੍ਸ ¶ ਜਾਯਨ੍ਤੇ, ਪਠਮਾਰੁਪ੍ਪਭੂਮਿਯਂ;

ਦ੍ਵਾਦਸੇਵ ਕ੍ਰਿਯਾ ਹੋਨ੍ਤਿ, ਦੁਤਿਯਾਰੁਪ੍ਪਭੂਮਿਯਂ.

੨੭੩.

ਏਕਾਦਸ ਕ੍ਰਿਯਾ ਹੋਨ੍ਤਿ, ਤਤਿਯਾਰੁਪ੍ਪਭੂਮਿਯਂ;

ਦਸੇਵ ਚ ਕ੍ਰਿਯਾ ਞੇਯ੍ਯਾ, ਚਤੁਤ੍ਥਾਰੁਪ੍ਪਭੂਮਿਯਂ.

੨੭੪.

ਅਰਹਤੋ ਪਨ ਚਿਤ੍ਤਾਨਿ, ਹੋਨ੍ਤਿ ਏਕੂਨਵੀਸਤਿ;

ਅਰਹਤ੍ਤਂ ਕ੍ਰਿਯਾ ਸਬ੍ਬਾ, ਠਪੇਤ੍ਵਾਵਜ੍ਜਨਦ੍ਵਯਂ.

੨੭੫.

ਚਤੁਨ੍ਨਞ੍ਚ ਫਲਟ੍ਠਾਨਂ, ਤਿਹੇਤੁਕਪੁਥੁਜ੍ਜਨੇ;

ਤੇਰਸੇਵ ਚ ਚਿਤ੍ਤਾਨਿ, ਭਵਨ੍ਤੀਤਿ ਪਕਾਸਯੇ.

੨੭੬.

ਚਤ੍ਤਾਰੋ ਞਾਣਸਂਯੁਤ੍ਤਾ, ਮਹਾਪਾਕਾ ਤਥਾ ਨਵ;

ਰੂਪਾਰੂਪਵਿਪਾਕਾ ਚ, ਤੇਰਸੇਵ ਭਵਨ੍ਤਿਮੇ.

੨੭੭.

ਚਤੁਨ੍ਨਞ੍ਚ ਫਲਟ੍ਠਾਨਂ, ਦੁਹੇਤੁਕਪੁਥੁਜ੍ਜਨੇ;

ਞਾਣਹੀਨਾਨਿ ਚਤ੍ਤਾਰਿ, ਵਿਪਾਕਾ ਏਵ ਜਾਯਰੇ.

੨੭੮.

ਪੁਥੁਜ੍ਜਨਾਨਂ ਤਿਣ੍ਣਮ੍ਪਿ, ਚਤੁਨ੍ਨਂ ਅਰਿਯਦੇਹਿਨਂ;

ਸਤ੍ਤਰਸੇਵ ਚਿਤ੍ਤਾਨਿ, ਸਤ੍ਤਨ੍ਨਮ੍ਪਿ ਭਵਨ੍ਤਿ ਹਿ.

੨੭੯.

ਵਿਞ੍ਞਾਣਾਨਿ ਦੁਵੇ ਪਞ੍ਚ, ਮਨੋਧਾਤੁਤ੍ਤਯਮ੍ਪਿ ਚ;

ਸਨ੍ਤੀਰਣਾਨਿ ਵੋਟ੍ਠਬ੍ਬਂ, ਹੋਨ੍ਤਿ ਸਤ੍ਤਰਸੇਵਿਮੇ.

੨੮੦.

ਹੇਟ੍ਠਾ ਤਿਣ੍ਣਂ ਫਲਟ੍ਠਾਨਂ, ਤਿਹੇਤੁਕਪੁਥੁਜ੍ਜਨੇ;

ਨਵੇਵ ਕੁਸਲਾ ਹੋਨ੍ਤਿ, ਚਤੁਨ੍ਨਮ੍ਪਿ ਮਹਗ੍ਗਤਾ.

੨੮੧.

ਤਿਣ੍ਣਂ ¶ ਪੁਥੁਜ੍ਜਨਾਨਞ੍ਚ, ਤਿਣ੍ਣਮਰਿਯਾਨਮਾਦਿਤੋ;

ਤੇਰਸੇਵ ਤੁ ਚਿਤ੍ਤਾਨਿ, ਉਪ੍ਪਜ੍ਜਨ੍ਤੀਤਿ ਨਿਦ੍ਦਿਸੇ.

੨੮੨.

ਅਟ੍ਠੇਵ ਕਾਮਪੁਞ੍ਞਾਨਿ, ਦਿਟ੍ਠਿਹੀਨਾ ਅਪੁਞ੍ਞਤੋ;

ਚਤ੍ਤਾਰੋਪਿ ਚ ਉਦ੍ਧਚ੍ਚ-ਸਂਯੁਤ੍ਤਞ੍ਚਾਤਿ ਤੇਰਸ.

੨੮੩.

ਹੇਟ੍ਠਾ ਦ੍ਵਿਨ੍ਨਂ ਫਲਟ੍ਠਾਨਂ, ਤਥਾ ਸਬ੍ਬਪੁਥੁਜ੍ਜਨੇ;

ਦੋਮਨਸ੍ਸਯੁਤ੍ਤਂ ਚਿਤ੍ਤਂ, ਦ੍ਵਯਮੇਵ ਤੁ ਜਾਯਤੇ.

੨੮੪.

ਤਿਣ੍ਣਂ ¶ ਪੁਥੁਜ੍ਜਨਾਨਂ ਤੁ, ਪਞ੍ਚੇਵ ਪਨ ਜਾਯਰੇ;

ਚਤ੍ਤਾਰਿ ਦਿਟ੍ਠਿਯੁਤ੍ਤਾਨਿ, ਵਿਚਿਕਿਚ੍ਛਾਯੁਤਮ੍ਪਿ ਚ.

੨੮੫.

ਮਗ੍ਗਟ੍ਠਾਨਂ ਚਤੁਨ੍ਨਮ੍ਪਿ, ਮਗ੍ਗਚਿਤ੍ਤਂ ਸਕਂ ਸਕਂ;

ਏਕਮੇਵ ਭਵੇ ਤੇਸਂ, ਇਤਿ ਵਤ੍ਵਾ ਵਿਭਾਵਯੇ.

੨੮੬.

ਮਯਾ ਭਵੇਸੁ ਚਿਤ੍ਤਾਨਂ, ਪੁਗ੍ਗਲਾਨਂ ਵਸੇਨ ਚ;

ਭਿਕ੍ਖੂਨਂ ਪਾਟਵਤ੍ਥਾਯ, ਚਿਤ੍ਤੁਪ੍ਪਤ੍ਤਿ ਪਕਾਸਿਤਾ.

੨੮੭.

ਏਵਂ ਸਬ੍ਬਮਿਦਂ ਚਿਤ੍ਤਂ, ਭੂਮਿਪੁਗ੍ਗਲਭੇਦਤੋ;

ਬਹੁਧਾਪਿ ਚ ਹੋਤੀਤਿ, ਵਿਞ੍ਞਾਤਬ੍ਬਂ ਵਿਭਾਵਿਨਾ.

੨੮੮.

ਸਕ੍ਕਾ ¶ ਵੁਤ੍ਤਾਨੁਸਾਰੇਨ, ਭੇਦੋ ਞਾਤੁਂ ਵਿਭਾਵਿਨਾ;

ਗਨ੍ਥਵਿਤ੍ਥਾਰਭੀਤੇਨ, ਸਂਖਿਤ੍ਤਂ ਪਨਿਦਂ ਮਯਾ.

੨੮੯.

ਪੁਬ੍ਬਾਪਰਂ ਵਿਲੋਕੇਤ੍ਵਾ, ਚਿਨ੍ਤੇਤ੍ਵਾ ਚ ਪੁਨਪ੍ਪੁਨਂ;

ਅਤ੍ਥਂ ਉਪਪਰਿਕ੍ਖਿਤ੍ਵਾ, ਗਹੇਤਬ੍ਬਂ ਵਿਭਾਵਿਨਾ.

੨੯੦.

ਇਮਞ੍ਚਾਭਿਧਮ੍ਮਾਵਤਾਰਂ ਸੁਸਾਰਂ,

ਵਰਂ ਸਤ੍ਤਮੋਹਨ੍ਧਕਾਰਪ੍ਪਦੀਪਂ;

ਸਦਾ ਸਾਧੁ ਚਿਨ੍ਤੇਤਿ ਵਾਚੇਤਿ ਯੋ ਤਂ,

ਨਰਂ ਰਾਗਦੋਸਾ ਚਿਰਂ ਨੋਪਯਨ੍ਤਿ.

ਇਤਿ ਅਭਿਧਮ੍ਮਾਵਤਾਰੇ ਭੂਮਿਪੁਗ੍ਗਲਵਸੇਨ ਚਿਤ੍ਤੁਪ੍ਪਤ੍ਤਿਨਿਦ੍ਦੇਸੋ ਨਾਮ

ਪਞ੍ਚਮੋ ਪਰਿਚ੍ਛੇਦੋ.

੬. ਛਟ੍ਠੋ ਪਰਿਚ੍ਛੇਦੋ

ਆਰਮ੍ਮਣਵਿਭਾਗਨਿਦ੍ਦੇਸੋ

੨੯੧.

ਏਤੇਸਂ ¶ ¶ ¶ ਪਨ ਚਿਤ੍ਤਾਨਂ, ਆਰਮ੍ਮਣਮਿਤੋ ਪਰਂ;

ਦਸ੍ਸਯਿਸ੍ਸਾਮਹਂ ਤੇਨ, ਵਿਨਾ ਨਤ੍ਥਿ ਹਿ ਸਮ੍ਭਵੋ.

੨੯੨.

ਰੂਪਂ ਸਦ੍ਦਂ ਗਨ੍ਧਂ ਰਸਂ, ਫੋਟ੍ਠਬ੍ਬਂ ਧਮ੍ਮਮੇਵ ਚ;

ਛਧਾ ਆਰਮ੍ਮਣਂ ਆਹੁ, ਛਲ਼ਾਰਮ੍ਮਣਕੋਵਿਦਾ.

੨੯੩.

ਤਤ੍ਥ ਭੂਤੇ ਉਪਾਦਾਯ, ਵਣ੍ਣੋ ਚਤੁਸਮੁਟ੍ਠਿਤੋ;

ਸਨਿਦਸ੍ਸਨਪਟਿਘੋ, ਰੂਪਾਰਮ੍ਮਣਸਞ੍ਞਿਤੋ.

੨੯੪.

ਦੁਵਿਧੋ ਹਿ ਸਮੁਦ੍ਦਿਟ੍ਠੋ, ਸਦ੍ਦੋ ਚਿਤ੍ਤੋਤੁਸਮ੍ਭਵੋ;

ਸਵਿਞ੍ਞਾਣਕਸਦ੍ਦੋਵ, ਹੋਤਿ ਚਿਤ੍ਤਸਮੁਟ੍ਠਿਤੋ.

੨੯੫.

ਅਵਿਞ੍ਞਾਣਕਸਦ੍ਦੋ ਯੋ,

ਸੋ ਹੋਤੂਤੁਸਮੁਟ੍ਠਿਤੋ;

ਦੁਵਿਧੋਪਿ ਅਯਂ ਸਦ੍ਦੋ,

ਸਦ੍ਦਾਰਮ੍ਮਣਤਂ ਗਤੋ.

੨੯੬.

ਧਰੀਯਤੀਤਿ ਗਚ੍ਛਨ੍ਤੋ, ਗਨ੍ਧੋ ਸੂਚਨਤੋਪਿ ਵਾ;

ਅਯਂ ਚਤੁਸਮੁਟ੍ਠਾਨੋ, ਗਨ੍ਧਾਰਮ੍ਮਣਸਮ੍ਮਤੋ.

੨੯੭.

ਰਸਮਾਨਾ ਰਸਨ੍ਤੀਤਿ, ਰਸੋਤਿ ਪਰਿਕਿਤ੍ਤਿਤੋ;

ਸੋਵ ਚਤੁਸਮੁਟ੍ਠਾਨੋ, ਰਸਾਰਮ੍ਮਣਨਾਮਕੋ.

੨੯੮.

ਫੁਸੀਯਤੀਤਿ ਫੋਟ੍ਠਬ੍ਬਂ, ਪਥਵੀਤੇਜਵਾਯਵੋ;

ਫੋਟ੍ਠਬ੍ਬਂ ਚਤੁਸਮ੍ਭੂਤਂ, ਫੋਟ੍ਠਬ੍ਬਾਰਮ੍ਮਣਂ ਮਤਂ.

੨੯੯.

ਸਬ੍ਬਂ ਨਾਮਞ੍ਚ ਰੂਪਞ੍ਚ, ਹਿਤ੍ਵਾ ਰੂਪਾਦਿਪਞ੍ਚਕਂ;

ਲਕ੍ਖਣਾਨਿ ਚ ਪਞ੍ਞਤ੍ਤਿ-ਧਮ੍ਮਾਰਮ੍ਮਣਸਞ੍ਞਿਤਂ.

੩੦੦.

ਛਾਰਮ੍ਮਣਾਨਿ ¶ ਲਬ੍ਭਨ੍ਤਿ, ਕਾਮਾਵਚਰਭੂਮਿਯਂ;

ਤੀਣਿ ਰੂਪੇ ਪਨਾਰੂਪੇ, ਧਮ੍ਮਾਰਮ੍ਮਣਮੇਕਕਂ.

੩੦੧.

ਖਣਵਤ੍ਥੁਪਰਿਤ੍ਤਤ੍ਤਾ ¶ , ਆਪਾਥਂ ਨ ਵਜਨ੍ਤਿ ਯੇ;

ਤੇ ਧਮ੍ਮਾਰਮ੍ਮਣਾ ਹੋਨ੍ਤਿ, ਯੇਸਂ ਰੂਪਾਦਯੋ ਕਿਰ.

੩੦੨.

ਤੇ ਪਟਿਕ੍ਖਿਪਿਤਬ੍ਬਾਵ, ਅਞ੍ਞਮਞ੍ਞਸ੍ਸ ਗੋਚਰਂ;

ਨੇਵ ਪਚ੍ਚਨੁਭੋਨ੍ਤਾਨਂ, ਮਨੋ ਤੇਸਂ ਤੁ ਗੋਚਰਂ.

੩੦੩.

ਤਞ੍ਚ ¶ ‘‘ਪਚ੍ਚਨੁਭੋਤੀ’’ਤਿ, ਵੁਤ੍ਤਤ੍ਤਾ ਪਨ ਸਤ੍ਥੁਨਾ;

ਰੂਪਾਦਾਰਮ੍ਮਣਾਨੇਵ, ਹੋਨ੍ਤਿ ਰੂਪਾਦਯੋ ਪਨ.

੩੦੪.

ਦਿਬ੍ਬਚਕ੍ਖਾਦਿਞਾਣਾਨਂ, ਰੂਪਾਦੀਨੇਵ ਗੋਚਰਾ;

ਅਨਾਪਾਥਗਤਾਨੇਵ, ਤਾਨੀਤਿਪਿ ਨ ਯੁਜ੍ਜਤਿ.

੩੦੫.

ਯਂ ਰੂਪਾਰਮ੍ਮਣਂ ਹੋਨ੍ਤਂ, ਤਂ ਧਮ੍ਮਾਰਮ੍ਮਣਂ ਕਥਂ;

ਏਵਂ ਸਤਿ ਪਨੇਤੇਸਂ, ਨਿਯਮੋਤਿ ਕਥਂ ਭਵੇ.

੩੦੬.

ਸਬ੍ਬਂ ਆਰਮ੍ਮਣਂ ਏਤਂ, ਛਬ੍ਬਿਧਂ ਸਮੁਦੀਰਿਤਂ;

ਤਂ ਪਰਿਤ੍ਤਤ੍ਤਿਕਾਦੀਨਂ, ਵਸੇਨ ਬਹੁਧਾ ਮਤਂ.

੩੦੭.

ਸਬ੍ਬੋ ਕਾਮਵਿਪਾਕੋ ਚ, ਕ੍ਰਿਯਾਹੇਤੁਦ੍ਵਯਮ੍ਪਿ ਚ;

ਪਞ੍ਚਵੀਸਤਿ ਏਕਨ੍ਤਂ, ਪਰਿਤ੍ਤਾਰਮ੍ਮਣਾ ਸਿਯੁਂ.

੩੦੮.

ਇਟ੍ਠਾਦਿਭੇਦਾ ਪਞ੍ਚੇਵ, ਰੂਪਸਦ੍ਦਾਦਯੋ ਪਨ;

ਵਿਞ੍ਞਾਣਾਨਂ ਦ੍ਵਿਪਞ੍ਚਨ੍ਨਂ, ਗੋਚਰਾ ਪਟਿਪਾਟਿਯਾ.

੩੦੯.

ਰੂਪਾਦਿਪਞ੍ਚਕਂ ਸਬ੍ਬਂ, ਮਨੋਧਾਤੁਤ੍ਤਯਸ੍ਸ ਤੁ;

ਤੇਰਸਨ੍ਨਂ ਪਨੇਤੇਸਂ, ਰੂਪਕ੍ਖਨ੍ਧੋਵ ਗੋਚਰੋ.

੩੧੦.

ਨਾਰੂਪਂ ਨ ਚ ਪਞ੍ਞਤ੍ਤਿਂ, ਨਾਤੀਤਂ ਨ ਚਨਾਗਤਂ;

ਆਰਮ੍ਮਣਂ ਕਰੋਨ੍ਤੇ ਚ, ਵਤ੍ਤਮਾਨੋ ਹਿ ਗੋਚਰੋ.

੩੧੧.

ਤੇਰਸੇਤਾਨਿ ਚਿਤ੍ਤਾਨਿ, ਜਾਯਨ੍ਤੇ ਕਾਮਧਾਤੁਯਂ;

ਚਤ੍ਤਾਰਿ ਰੂਪਾਵਚਰੇ, ਨੇਵ ਕਿਞ੍ਚਿ ਅਰੂਪਿਸੁ.

੩੧੨.

ਮਹਾਪਾਕਾਨਮਟ੍ਠਨ੍ਨਂ ¶ ¶ , ਸਨ੍ਤੀਰਣਤ੍ਤਯਸ੍ਸਪਿ;

ਛਸੁ ਦ੍ਵਾਰੇਸੁ ਰੂਪਾਦਿਛਪਰਿਤ੍ਤਾਨਿ ਗੋਚਰਾ.

੩੧੩.

ਰੂਪਾਦਯੋ ਪਰਿਤ੍ਤਾ ਛ, ਹਸਿਤੁਪ੍ਪਾਦਗੋਚਰਾ;

ਪਞ੍ਚਦ੍ਵਾਰੇ ਪਟੁਪ੍ਪਨ੍ਨਾ, ਮਨੋਦ੍ਵਾਰੇ ਤਿਕਾਲਿਕਾ.

੩੧੪.

ਦੁਤਿਯਾਰੁਪ੍ਪਚਿਤ੍ਤਞ੍ਚ, ਚਤੁਤ੍ਥਾਰੁਪ੍ਪਮਾਨਸਂ;

ਛਬ੍ਬਿਧਂ ਨਿਯਤਂ ਹੋਤਿ, ਤਂ ਮਹਗ੍ਗਤਗੋਚਰਂ.

੩੧੫.

ਨਿਬ੍ਬਾਨਾਰਮ੍ਮਣਤ੍ਤਾ ਹਿ, ਏਕਨ੍ਤੇਨ ਅਨਞ੍ਞਤੋ;

ਅਟ੍ਠਾਨਾਸਵਚਿਤ੍ਤਾਨਂ, ਅਪ੍ਪਮਾਣੋਵ ਗੋਚਰੋ.

੩੧੬.

ਚਤ੍ਤਾਰੋ ਞਾਣਹੀਨਾ ਚ, ਕਾਮਾਵਚਰਪੁਞ੍ਞਤੋ;

ਕ੍ਰਿਯਤੋਪਿ ਚ ਚਤ੍ਤਾਰੋ, ਦ੍ਵਾਦਸਾਕੁਸਲਾਨਿ ਚ.

੩੧੭.

ਪਰਿਤ੍ਤਾਰਮ੍ਮਣਾ ਚੇਵ, ਤੇ ਮਹਗ੍ਗਤਗੋਚਰਾ;

ਪਞ੍ਞਤ੍ਤਾਰਮ੍ਮਣਤ੍ਤਾ ਹਿ, ਨਵਤ੍ਤਬ੍ਬਾਵ ਹੋਨ੍ਤਿ ਤੇ.

੩੧੮.

ਚਤ੍ਤਾਰੋ ਞਾਣਸਂਯੁਤ੍ਤਾ, ਪੁਞ੍ਞਤੋ ਕ੍ਰਿਯਤੋਪਿ ਚ;

ਤਥਾਭਿਞ੍ਞਾਦ੍ਵਯਞ੍ਚੇਵ, ਕ੍ਰਿਯਾਵੋਟ੍ਠਬ੍ਬਨਮ੍ਪਿ ਚ.

੩੧੯.

ਏਕਾਦਸਨ੍ਨਮੇਤੇਸਂ, ਤਿਵਿਧੋ ਹੋਤਿ ਗੋਚਰੋ;

ਪਞ੍ਞਤ੍ਤਾਰਮ੍ਮਣਤ੍ਤਾ ਹਿ, ਨਵਤ੍ਤਬ੍ਬਾਪਿ ਹੋਨ੍ਤਿਮੇ.

੩੨੦.

ਯਾਨਿ ਵੁਤ੍ਤਾਵਸੇਸਾਨਿ, ਚਿਤ੍ਤਾਨਿ ਪਨ ਤਾਨਿ ਹਿ;

ਨਵਤ੍ਤਬ੍ਬਾਰਮ੍ਮਣਾਨੀਤਿ, ਵਿਞ੍ਞੇਯ੍ਯਾਨਿ ਵਿਭਾਵਿਨਾ.

ਪਰਿਤ੍ਤਾਰਮ੍ਮਣਤ੍ਤਿਕਂ ਸਮਤ੍ਤਂ.

੩੨੧.

ਦੁਤਿਯਾਰੁਪ੍ਪਚਿਤ੍ਤਞ੍ਚ ¶ , ਚਤੁਤ੍ਥਾਰੁਪ੍ਪਮਾਨਸਂ;

ਛਬ੍ਬਿਧਂ ਪਨ ਏਕਨ੍ਤ-ਅਤੀਤਾਰਮ੍ਮਣਂ ਸਿਯਾ.

੩੨੨.

ਵਿਞ੍ਞਾਣਾਨਂ ਦ੍ਵਿਪਞ੍ਚਨ੍ਨਂ, ਮਨੋਧਾਤੁਤ੍ਤਯਸ੍ਸ ਚ;

ਪਞ੍ਚ ਰੂਪਾਦਯੋ ਧਮ੍ਮਾ, ਪਚ੍ਚੁਪ੍ਪਨ੍ਨਾਵ ਗੋਚਰਾ.

੩੨੩.

ਅਟ੍ਠ ¶ ¶ ਕਾਮਮਹਾਪਾਕਾ, ਸਨ੍ਤੀਰਣਤ੍ਤਯਮ੍ਪਿ ਚ;

ਹਸਿਤੁਪ੍ਪਾਦਚਿਤ੍ਤਨ੍ਤਿ, ਦ੍ਵਾਦਸੇਤੇ ਤੁ ਮਾਨਸਾ.

੩੨੪.

ਸਿਯਾਤੀਤਾਰਮ੍ਮਣਾ ਪਚ੍ਚੁ-ਪ੍ਪਨ੍ਨਾਨਾਗਤਗੋਚਰਾ;

ਕੁਸਲਾਕੁਸਲਾ ਕਾਮੇ, ਕ੍ਰਿਯਤੋ ਨਵ ਮਾਨਸਾ.

੩੨੫.

ਅਭਿਞ੍ਞਾਮਾਨਸਾ ਦ੍ਵੇਪਿ, ਸਿਯਾਤੀਤਾਦਿਗੋਚਰਾ;

ਸਨ੍ਤਪਞ੍ਞਤ੍ਤਿਕਾਲੇਪਿ, ਨਵਤ੍ਤਬ੍ਬਾ ਭਵਨ੍ਤਿਮੇ.

੩੨੬.

ਸੇਸਾਨਿ ਪਨ ਸਬ੍ਬਾਨਿ, ਰੂਪਾਰੂਪਭਵੇਸੁਪਿ;

ਨਵਤ੍ਤਬ੍ਬਾਨਿ ਹੋਨ੍ਤੇਵ, ਅਤੀਤਾਰਮ੍ਮਣਾਦਿਨਾ.

੩੨੭.

ਕਾਮਤੋ ਚ ਕ੍ਰਿਯਾ ਪਞ੍ਚ, ਰੂਪਤੋ ਪਞ੍ਚਮੀ ਕ੍ਰਿਯਾ;

ਚਿਤ੍ਤਾਨਂ ਛਨ੍ਨਮੇਤੇਸਂ, ਨਤ੍ਥਿ ਕਿਞ੍ਚਿ ਅਗੋਚਰਂ.

੩੨੮.

ਨਿਬ੍ਬਾਨਞ੍ਚ ਫਲਂ ਮਗ੍ਗਂ, ਰੂਪਞ੍ਚਾਰੂਪਮੇਵ ਚ;

ਸਕ੍ਕੋਨ੍ਤਿ ਗੋਚਰਂ ਕਾਤੁਂ, ਕਤਿ ਚਿਤ੍ਤਾਨਿ ਮੇ ਵਦ.

੩੨੯.

ਚਤ੍ਤਾਰੋ ਞਾਣਸਂਯੁਤ੍ਤਾ,

ਪੁਞ੍ਞਤੋ ਕ੍ਰਿਯਤੋ ਤਥਾ;

ਅਭਿਞ੍ਞਾਹਦਯਾ ਦ੍ਵੇਪਿ,

ਕ੍ਰਿਯਾ ਵੋਟ੍ਠਬ੍ਬਨਮ੍ਪਿ ਚ.

੩੩੦.

ਸਕ੍ਕੋਨ੍ਤਿ ਗੋਚਰਂ ਕਾਤੁਂ, ਚਿਤ੍ਤਾਨੇਕਾਦਸਾਪਿ ਚ;

ਨਿਬ੍ਬਾਨਞ੍ਚ ਫਲਂ ਮਗ੍ਗਂ, ਰੂਪਞ੍ਚਾਰੂਪਮੇਵ ਚ.

੩੩੧.

ਚਿਤ੍ਤੇਸੁ ਪਨ ਸਬ੍ਬੇਸੁ, ਕਤਿ ਚਿਤ੍ਤਾਨਿ ਮੇ ਵਦ;

ਅਰਹਤ੍ਤਫਲਂ ਮਗ੍ਗਂ, ਕਾਤੁਂ ਸਕ੍ਕੋਨ੍ਤਿ ਗੋਚਰਂ.

੩੩੨.

ਸਬ੍ਬੇਸੁ ਪਨ ਚਿਤ੍ਤੇਸੁ, ਛ ਚ ਚਿਤ੍ਤਾਨਿ ਮੇ ਸੁਣ;

ਅਰਹਤ੍ਤਫਲਂ ਮਗ੍ਗਂ, ਕਾਤੁਂ ਸਕ੍ਕੋਨ੍ਤਿ ਗੋਚਰਂ.

੩੩੩.

ਚਤ੍ਤਾਰੋ ਞਾਣਸਂਯੁਤ੍ਤਾ, ਕ੍ਰਿਯਾ ਵੋਟ੍ਠਬ੍ਬਨਮ੍ਪਿ ਚ;

ਕ੍ਰਿਯਾਭਿਞ੍ਞਾ ਮਨੋਧਾਤੁ, ਛ ਚ ਸਕ੍ਕੋਨ੍ਤਿ ਗੋਚਰਂ.

੩੩੪.

ਚਤ੍ਤਾਰੋ ¶ ¶ ਞਾਣਸਂਯੁਤ੍ਤਾ-ਭਿਞ੍ਞਾਚਿਤ੍ਤਞ੍ਚ ਪੁਞ੍ਞਤੋ;

ਨਾਰਹਤ੍ਤਂ ਫਲਂ ਮਗ੍ਗਂ, ਕਾਤੁਂ ਸਕ੍ਕੋਨ੍ਤਿ ਗੋਚਰਂ.

੩੩੫.

ਕਸ੍ਮਾ ਅਰਹਤੋ ਮਗ੍ਗ-ਚਿਤ੍ਤਂ ਵਾ ਫਲਮਾਨਸਂ;

ਪੁਥੁਜ੍ਜਨਾ ਵਾ ਸੇਕ੍ਖਾ ਵਾ, ਨ ਸਕ੍ਕੋਨ੍ਤਿ ਹਿ ਜਾਨਿਤੁਂ.

੩੩੬.

ਪੁਥੁਜ੍ਜਨੋ ਨ ਜਾਨਾਤਿ,

ਸੋਤਾਪਨ੍ਨਸ੍ਸ ਮਾਨਸਂ;

ਸੋਤਾਪਨ੍ਨੋ ਨ ਜਾਨਾਤਿ,

ਸਕਦਾਗਾਮਿਸ੍ਸ ਮਾਨਸਂ.

੩੩੭.

ਸਕਦਾਗਾਮੀ ਨ ਜਾਨਾਤਿ, ਅਨਾਗਾਮਿਸ੍ਸ ਮਾਨਸਂ;

ਅਨਾਗਾਮੀ ਨ ਜਾਨਾਤਿ, ਅਰਹਨ੍ਤਸ੍ਸ ਮਾਨਸਂ.

੩੩੮.

ਹੇਟ੍ਠਿਮੋ ¶ ਹੇਟ੍ਠਿਮੋ ਨੇਵ, ਜਾਨਾਤਿ ਉਪਰੂਪਰਿ;

ਉਪਰੂਪਰਿ ਜਾਨਾਤਿ, ਹੇਟ੍ਠਿਮਸ੍ਸ ਚ ਮਾਨਸਂ.

੩੩੯.

ਯੋ ਧਮ੍ਮੋ ਯਸ੍ਸ ਧਮ੍ਮਸ੍ਸ,

ਹੋਤਿ ਆਰਮ੍ਮਣਂ ਪਨ;

ਤਮੁਦ੍ਧਰਿਤ੍ਵਾ ਏਕੇਕਂ,

ਪਵਕ੍ਖਾਮਿ ਇਤੋ ਪਰਂ.

੩੪੦.

ਕੁਸਲਾਰਮ੍ਮਣਂ ਕਾਮੇ, ਕੁਸਲਾਕੁਸਲਸ੍ਸ ਚ;

ਅਭਿਞ੍ਞਾਮਾਨਸਸ੍ਸਾਪਿ, ਕੁਸਲਸ੍ਸ ਕ੍ਰਿਯਸ੍ਸ ਚ.

੩੪੧.

ਕਾਮਾਵਚਰਪਾਕਸ੍ਸ, ਤਥਾ ਕਾਮਕ੍ਰਿਯਸ੍ਸ ਚ;

ਏਤੇਸਂ ਪਨ ਰਾਸੀਨਂ, ਛਨ੍ਨਂ ਆਰਮ੍ਮਣਂ ਸਿਯਾ.

੩੪੨.

ਰੂਪਾਵਚਰਪੁਞ੍ਞਾਨਿ, ਕਾਮਪਾਕਂ ਤਤੋ ਵਿਨਾ;

ਪਞ੍ਚਨ੍ਨਂ ਪਨ ਰਾਸੀਨਂ, ਹੋਨ੍ਤਿ ਆਰਮ੍ਮਣਾਨਿ ਹਿ.

੩੪੩.

ਆਰੁਪ੍ਪਕੁਸਲਞ੍ਚਾਪਿ, ਤੇਭੂਮਕੁਸਲਸ੍ਸ ਚ;

ਤੇਭੂਮਕਕ੍ਰਿਯਸ੍ਸਾਪਿ, ਤਥੇਵਾਕੁਸਲਸ੍ਸਪਿ.

੩੪੪.

ਅਰੂਪਾਵਚਰਪਾਕਾਨਂ ¶ ¶ , ਦ੍ਵਿਨ੍ਨਂ ਪਨ ਚਤੁਤ੍ਥਦੁ;

ਇਮੇਸਂ ਅਟ੍ਠਰਾਸੀਨਂ, ਹੋਤਾਰਮ੍ਮਣਪਚ੍ਚਯੋ.

੩੪੫.

ਅਪਰਿਯਾਪਨ੍ਨਪੁਞ੍ਞਮ੍ਪਿ, ਕਾਮਾਵਚਰਤੋਪਿ ਚ;

ਰੂਪਤੋ ਪਞ੍ਚਮਸ੍ਸਾਪਿ, ਕੁਸਲਸ੍ਸ ਕ੍ਰਿਯਸ੍ਸ ਚ.

੩੪੬.

ਚਤੁਨ੍ਨਂ ਪਨ ਰਾਸੀਨਂ, ਹੋਤਿ ਆਰਮ੍ਮਣਂ ਸਦਾ;

ਤਥੇਵਾਕੁਸਲਂ ਕਾਮ-ਰੂਪਾਵਚਰਤੋ ਪਨ.

੩੪੭.

ਕੁਸਲਸ੍ਸ ਕ੍ਰਿਯਸ੍ਸਾਪਿ, ਤਥੇਵਾਕੁਸਲਸ੍ਸ ਚ;

ਕਾਮਾਵਚਰਪਾਕਾਨਂ, ਛਨ੍ਨਂ ਰਾਸੀਨਮੀਰਿਤਂ.

੩੪੮.

ਵਿਪਾਕਾਰਮ੍ਮਣਂ ਕਾਮੇ, ਕਾਮਾਵਚਰਤੋਪਿ ਚ;

ਰੂਪਾਵਚਰਤੋ ਚੇਵ, ਕੁਸਲਸ੍ਸ ਕ੍ਰਿਯਸ੍ਸ ਚ.

੩੪੯.

ਕਾਮਾਵਚਰਪਾਕਾਨਂ, ਤਥੇਵਾਕੁਸਲਸ੍ਸ ਚ;

ਛਨ੍ਨਞ੍ਚ ਪਨ ਰਾਸੀਨਂ, ਹੋਤਾਰਮ੍ਮਣਪਚ੍ਚਯੋ.

੩੫੦.

ਵਿਪਾਕਾਰਮ੍ਮਣਂ ਰੂਪੇ, ਕਾਮਾਵਚਰਤੋਪਿ ਚ;

ਰੂਪਾਵਚਰਤੋ ਚੇਵ, ਕੁਸਲਸ੍ਸ ਕ੍ਰਿਯਸ੍ਸ ਚ.

੩੫੧.

ਅਪੁਞ੍ਞਸ੍ਸਾਤਿ ਪਞ੍ਚਨ੍ਨਂ, ਰਾਸੀਨਂ ਹੋਤਿ ਗੋਚਰੋ;

ਅਰੂਪਾਵਚਰਪਾਕੇਸੁ, ਅਯਮੇਵ ਨਯੋ ਮਤੋ.

੩੫੨.

ਅਪਰਿਯਾਪਨ੍ਨਪਾਕਮ੍ਪਿ, ਕਾਮਤੋ ਰੂਪਤੋਪਿ ਚ;

ਕੁਸਲਸ੍ਸ ਕ੍ਰਿਯਸ੍ਸਾਪਿ, ਹੋਤਿ ਆਰਮ੍ਮਣਂ ਪਨ.

੩੫੩.

ਕ੍ਰਿਯਚਿਤ੍ਤਮਿਦਂ ਕਾਮੇ, ਕਾਮਾਵਚਰਤੋਪਿ ਚ;

ਰੂਪਾਵਚਰਤੋ ਚੇਵ, ਕੁਸਲਸ੍ਸ ਕ੍ਰਿਯਸ੍ਸ ਚ.

੩੫੪.

ਕਾਮਾਵਚਰਪਾਕਸ੍ਸ, ਤਥੇਵਾਕੁਸਲਸ੍ਸ ਚ;

ਛਨ੍ਨਂ ਰਾਸੀਨਮੇਤੇਸਂ, ਹੋਤਾਰਮ੍ਮਣਪਚ੍ਚਯੋ.

੩੫੫.

ਯਂ ¶ ਕ੍ਰਿਯਾਮਾਨਸਂ ਰੂਪੇ, ਕਾਮਪਾਕਂ ਤਤੋ ਵਿਨਾ;

ਪਞ੍ਚਨ੍ਨਂ ਪਨ ਰਾਸੀਨਂ, ਹੋਤਿ ਆਰਮ੍ਮਣਂ ਪਨ.

੩੫੬.

ਕ੍ਰਿਯਾਚਿਤ੍ਤਂ ¶ ¶ ਪਨਾਰੁਪ੍ਪੇ, ਤੇਸਂ ਪਞ੍ਚਨ੍ਨਮੇਵ ਚ;

ਆਰੁਪ੍ਪਸ੍ਸ ਕ੍ਰਿਯਸ੍ਸਾਪਿ, ਛਨ੍ਨਂ ਹੋਤੇਵ ਗੋਚਰੋ.

੩੫੭.

ਰੂਪਂ ਚਤੁਸਮੁਟ੍ਠਾਨਂ, ਰੂਪਾਰਮ੍ਮਣਸਞ੍ਞਿਤਂ;

ਕਾਮਾਵਚਰਪੁਞ੍ਞਸ੍ਸ, ਤਥੇਵ ਕੁਸਲਸ੍ਸ ਚ.

੩੫੮.

ਅਭਿਞ੍ਞਾਦ੍ਵਯਚਿਤ੍ਤਸ੍ਸ, ਕਾਮਪਾਕਕ੍ਰਿਯਸ੍ਸ ਚ;

ਛਨ੍ਨਂ ਰਾਸੀਨਮੇਤੇਸਂ, ਹੋਤਾਰਮ੍ਮਣਪਚ੍ਚਯੋ.

੩੫੯.

ਨਿਬ੍ਬਾਨਾਰਮ੍ਮਣਂ ਕਾਮ-ਰੂਪਾਵਚਰਤੋ ਪਨ;

ਕੁਸਲਸ੍ਸੁਭਯਸ੍ਸਾਪਿ, ਕਾਮਰੂਪਕ੍ਰਿਯਸ੍ਸ ਚ.

੩੬੦.

ਅਪਰਿਯਾਪਨ੍ਨਤੋ ਚੇਵ, ਫਲਸ੍ਸ ਕੁਸਲਸ੍ਸ ਚ;

ਛਨ੍ਨਂ ਰਾਸੀਨਮੇਤੇਸਂ, ਹੋਤਾਰਮ੍ਮਣਪਚ੍ਚਯੋ.

੩੬੧.

ਨਾਨਪ੍ਪਕਾਰਕਂ ਸਬ੍ਬਂ, ਪਞ੍ਞਤ੍ਤਾਰਮ੍ਮਣਂ ਪਨ;

ਤੇਭੂਮਕਸ੍ਸ ਪੁਞ੍ਞਸ੍ਸ, ਤਥੇਵਾਕੁਸਲਸ੍ਸ ਚ.

੩੬੨.

ਰੂਪਾਰੂਪਵਿਪਾਕਸ੍ਸ, ਤੇਭੂਮਕਕ੍ਰਿਯਸ੍ਸ ਚ;

ਨਵਨ੍ਨਂ ਪਨ ਰਾਸੀਨਂ, ਹੋਤਾਰਮ੍ਮਣਪਚ੍ਚਯੋ.

੩੬੩.

ਰੂਪਾਰਮ੍ਮਣਿਕਾ ਦ੍ਵੇ ਤੁ, ਦ੍ਵੇ ਦ੍ਵੇ ਸਦ੍ਧਾਦਿਗੋਚਰਾ;

ਪਞ੍ਚਾਰਮ੍ਮਣਿਕਾ ਨਾਮ, ਚਿਤ੍ਤੁਪ੍ਪਾਦਾ ਤਯੋ ਮਤਾ.

੩੬੪.

ਇਧੇਕਚਤ੍ਤਾਲੀਸੇਵ, ਛਲ਼ਾਰਮ੍ਮਣਿਕਾ ਮਤਾ;

ਕਾਮਾਵਚਰਚਿਤ੍ਤਾਨ-ਮਯਮਾਰਮ੍ਮਣਕ੍ਕਮੋ.

੩੬੫.

ਪਞ੍ਚਾਭਿਞ੍ਞਾ ਵਿਵਜ੍ਜੇਤ੍ਵਾ, ਰੂਪਾਰੂਪਾ ਅਨਾਸਵਾ;

ਚਿਤ੍ਤੁਪ੍ਪਾਦਾ ਇਮੇ ਸਬ੍ਬੇ, ਧਮ੍ਮਾਰਮ੍ਮਣਗੋਚਰਾ.

੩੬੬.

ਪਠਮਾਰੁਪ੍ਪਕੁਸਲਂ, ਦੁਤਿਯਾਰੁਪ੍ਪਚੇਤਸੋ;

ਕੁਸਲਸ੍ਸ ਵਿਪਾਕਸ੍ਸ, ਕ੍ਰਿਯਸ੍ਸਾਰਮ੍ਮਣਂ ਭਵੇ.

੩੬੭.

ਪਠਮਾਰੁਪ੍ਪਪਾਕੋਯਂ ¶ , ਦੁਤਿਯਾਰੁਪ੍ਪਚੇਤਸੋ;

ਕੁਸਲਸ੍ਸ ਵਿਪਾਕਸ੍ਸ, ਕ੍ਰਿਯਸ੍ਸਾਰਮ੍ਮਣਂ ਨ ਹਿ.

੩੬੮.

ਪਠਮਂ ¶ ਤੁ ਕ੍ਰਿਯਾਚਿਤ੍ਤਂ, ਦੁਤਿਯਾਰੁਪ੍ਪਚੇਤਸੋ;

ਨ ਪੁਞ੍ਞਸ੍ਸ ਨ ਪਾਕਸ੍ਸ, ਹੋਤਿ ਆਰਮ੍ਮਣਂ ਪਨ.

੩੬੯.

ਪਠਮਂ ਤੁ ਕ੍ਰਿਯਾਚਿਤ੍ਤਂ, ਦੁਤਿਯਾਰੁਪ੍ਪਚੇਤਸੋ;

ਕ੍ਰਿਯਸ੍ਸਾਰਮ੍ਮਣਂ ਹੋਤਿ, ਇਤਿ ਞੇਯ੍ਯਂ ਵਿਭਾਵਿਨਾ.

੩੭੦.

ਪੁਥੁਜ੍ਜਨਸ੍ਸ ਸੇਕ੍ਖਸ੍ਸ, ਅਰੂਪਾਰਮ੍ਮਣਂ ਦ੍ਵਿਧਾ;

ਕੁਸਲਂ ਕੁਸਲਸ੍ਸਾਪਿ, ਵਿਪਾਕਸ੍ਸ ਚ ਤਂ ਸਿਯਾ.

੩੭੧.

ਖੀਣਾਸਵਸ੍ਸ ਭਿਕ੍ਖੁਸ੍ਸ, ਪਠਮਾਰੁਪ੍ਪਮਾਨਸਂ;

ਆਰਮ੍ਮਣਂ ਤਿਧਾ ਹੋਤਿ, ਇਤਿ ਵੁਤ੍ਤਂ ਮਹੇਸਿਨਾ.

੩੭੨.

ਕ੍ਰਿਯਸ੍ਸਾਪਿ ਕ੍ਰਿਯਾ ਹੋਤਿ, ਕੁਸਲਮ੍ਪਿ ਕ੍ਰਿਯਸ੍ਸ ਚ;

ਕੁਸਲਂ ਤੁ ਵਿਪਾਕਸ੍ਸ, ਏਵਂ ਹੋਤਿ ਤਿਧਾ ਪਨ.

੩੭੩.

ਤਤਿਯਾਰੁਪ੍ਪਚਿਤ੍ਤਮ੍ਪਿ, ਚਤੁਤ੍ਥਾਰੁਪ੍ਪਚੇਤਸੋ;

ਏਵਮੇਵ ਦ੍ਵਿਧਾ ਚੇਵ, ਤਿਧਾ ਚਾਰਮ੍ਮਣਂ ਸਿਯਾ.

੩੭੪.

ਯਂ ਯਂ ਪਨ ਇਧਾਰਬ੍ਭ,

ਯੇ ਯੇ ਜਾਯਨ੍ਤਿ ਗੋਚਰਂ;

ਸੋ ਸੋ ਤੇਸਞ੍ਚ ਤੇਸਞ੍ਚ,

ਹੋਤਾਰਮ੍ਮਣਪਚ੍ਚਯੋ.

੩੭੫.

ਯੋ ¶ ਪਨਿਮਸ੍ਸ ਨਰੋ ਕਿਰ ਪਾਰਂ,

ਦੁਤ੍ਤਰਮੁਤ੍ਤਰਮੁਤ੍ਤਰਤੀਧ;

ਸੋ ਅਭਿਧਮ੍ਮਮਹਣ੍ਣਵਪਾਰਂ,

ਦੁਤ੍ਤਰਮੁਤ੍ਤਰਮੁਤ੍ਤਰਤੇਵ.

ਇਤਿ ਅਭਿਧਮ੍ਮਾਵਤਾਰੇ ਆਰਮ੍ਮਣਵਿਭਾਗੋ ਨਾਮ

ਛਟ੍ਠੋ ਪਰਿਚ੍ਛੇਦੋ.

੭. ਸਤ੍ਤਮੋ ਪਰਿਚ੍ਛੇਦੋ

ਵਿਪਾਕਚਿਤ੍ਤਪ੍ਪਵਤ੍ਤਿਨਿਦ੍ਦੇਸੋ

੩੭੬.

ਅਨਨ੍ਤਞਾਣੇਨ ¶ ¶ ¶ ਨਿਰਙ੍ਗਣੇਨ,

ਗੁਣੇਸਿਨਾ ਕਾਰੁਣਿਕੇਨ ਤੇਨ;

ਵੁਤ੍ਤੇ ਵਿਪਾਕੇ ਮਤਿਪਾਟਵਤ੍ਥਂ,

ਵਿਪਾਕਚਿਤ੍ਤਪ੍ਪਭਵਂ ਸੁਣਾਥ.

੩੭੭.

ਏਕੂਨਤਿਂਸ ਕਮ੍ਮਾਨਿ, ਪਾਕਾ ਦ੍ਵਤ੍ਤਿਂਸ ਦਸ੍ਸਿਤਾ;

ਤੀਸੁ ਦ੍ਵਾਰੇਸੁ ਕਮ੍ਮਾਨਿ, ਵਿਪਾਕਾ ਛਸੁ ਦਿਸ੍ਸਰੇ.

੩੭੮.

ਕੁਸਲਂ ਕਾਮਲੋਕਸ੍ਮਿਂ, ਪਵਤ੍ਤੇ ਪਟਿਸਨ੍ਧਿਯਂ;

ਤਂ ਤਂ ਪਚ੍ਚਯਮਾਗਮ੍ਮ, ਦਦਾਤਿ ਵਿਵਿਧਂ ਫਲਂ.

੩੭੯.

ਏਕਾਯ ਚੇਤਨਾਯੇਕਾ, ਪਟਿਸਨ੍ਧਿ ਪਕਾਸਿਤਾ;

ਨਾਨਾਕਮ੍ਮੇਹਿ ਨਾਨਾ ਚ, ਭਵਨ੍ਤਿ ਪਟਿਸਨ੍ਧਿਯੋ.

੩੮੦.

ਤਿਹੇਤੁਕਂ ਤੁ ਯਂ ਕਮ੍ਮਂ, ਕਾਮਾਵਚਰਸਞ੍ਞਿਤਂ;

ਤਿਹੇਤੁਕਂ ਦੁਹੇਤੁਞ੍ਚ, ਵਿਪਾਕਂ ਦੇਤ੍ਯਹੇਤੁਕਂ.

੩੮੧.

ਦੁਹੇਤੁਕਂ ਤੁ ਯਂ ਕਮ੍ਮਂ, ਤਂ ਨ ਦੇਤਿ ਤਿਹੇਤੁਕਂ;

ਦੁਹੇਤੁਕਮਹੇਤੁਞ੍ਚ, ਵਿਪਾਕਂ ਦੇਤਿ ਅਤ੍ਤਨੋ.

੩੮੨.

ਤਿਹੇਤੁਕੇਨ ਕਮ੍ਮੇਨ,

ਪਟਿਸਨ੍ਧਿ ਤਿਹੇਤੁਕਾ;

ਦੁਹੇਤੁਕਾਪਿ ਹੋਤੇਵ,

ਨ ਚ ਹੋਤਿ ਅਹੇਤੁਕਾ.

੩੮੩.

ਦੁਹੇਤੁਕੇਨ ਕਮ੍ਮੇਨ,

ਪਟਿਸਨ੍ਧਿ ਦੁਹੇਤੁਕਾ;

ਅਹੇਤੁਕਾਪਿ ¶ ਹੋਤੇਵ,

ਨ ਚ ਹੋਤਿ ਤਿਹੇਤੁਕਾ.

੩੮੪.

ਅਸਙ੍ਖਾਰਮਸਙ੍ਖਾਰਂ ¶ , ਸਸਙ੍ਖਾਰਮ੍ਪਿ ਦੇਤਿ ਹਿ;

ਸਸਙ੍ਖਾਰਮਸਙ੍ਖਾਰਂ, ਸਸਙ੍ਖਾਰਂ ਫਲਂ ਤਥਾ.

੩੮੫.

ਏਕਾਯ ਚੇਤਨਾਯੇਤ੍ਥ, ਕੁਸਲਸ੍ਸ ਚ ਸੋਲ਼ਸ;

ਵਿਧਾ ਵਿਪਾਕਚਿਤ੍ਤਾਨਿ, ਭਵਨ੍ਤੀਤਿ ਪਕਾਸਯੇ.

੩੮੬.

ਆਰਮ੍ਮਣੇਨ ਹੋਤੇਵ, ਵੇਦਨਾਪਰਿਵਤ੍ਤਨਂ;

ਤਦਾਰਮ੍ਮਣਚਿਤ੍ਤਮ੍ਪਿ, ਜਵਨੇਨ ਨਿਯਾਮਿਤਂ.

੩੮੭.

ਕਾਮਾਵਚਰਚਿਤ੍ਤੇਨ, ਕੁਸਲੇਨਾਦਿਨਾ ਪਨ;

ਤੁਲ੍ਯੇਨ ਪਾਕਚਿਤ੍ਤੇਨ, ਗਹਿਤਾ ਪਟਿਸਨ੍ਧਿ ਚੇ.

੩੮੮.

ਬਲਵਾਰਮ੍ਮਣੇ ¶ ਇਟ੍ਠੇ, ਚਕ੍ਖੁਸ੍ਸਾਪਾਥਮਾਗਤੇ;

ਮਨੋਧਾਤੁ ਭਵਙ੍ਗਸ੍ਮਿਂ, ਤਾਯ ਆਵਟ੍ਟਿਤੇ ਪਨ.

੩੮੯.

ਵੀਥਿਚਿਤ੍ਤੇਸੁ ਜਾਤੇਸੁ, ਚਕ੍ਖੁਵਿਞ੍ਞਾਣਕਾਦਿਸੁ;

ਜਾਯਤੇ ਜਵਨਂ ਹੁਤ੍ਵਾ, ਪਠਮਂ ਕਾਮਮਾਨਸਂ.

੩੯੦.

ਸਤ੍ਤਕ੍ਖਤ੍ਤੁਂ ਜਵਿਤ੍ਵਾਨ, ਪਠਮੇ ਕੁਸਲੇ ਗਤੇ;

ਤਦੇਵਾਰਮ੍ਮਣਂ ਕਤ੍ਵਾ, ਤੇਨੇਵ ਸਦਿਸਂ ਪੁਨ.

੩੯੧.

ਵਿਪਾਕਂ ਜਾਯਤੇ ਚਿਤ੍ਤਂ, ਤਦਾਰਮ੍ਮਣਸਞ੍ਞਿਤਂ;

ਸਨ੍ਧਿਯਾ ਤੁਲ੍ਯਤੋ ਮੂਲ-ਭਵਙ੍ਗਨ੍ਤਿ ਪਵੁਚ੍ਚਤੇ.

੩੯੨.

ਤਞ੍ਚ ਸਨ੍ਤੀਰਣਂ ਏਤ੍ਥ, ਦਸ੍ਸਨਂ ਸਮ੍ਪਟਿਚ੍ਛਨਂ;

ਗਣਨੂਪਗਚਿਤ੍ਤਾਨਿ, ਚਤ੍ਤਾਰੇਵ ਭਵਨ੍ਤਿ ਹਿ.

੩੯੩.

ਯਦਾ ਹਿ ਦੁਤਿਯਂ ਚਿਤ੍ਤਂ, ਕੁਸਲਂ ਜਵਨਂ ਤਦਾ;

ਤੇਨ ਤੁਲ੍ਯਵਿਪਾਕਮ੍ਪਿ, ਤਦਾਰਮ੍ਮਣਕਂ ਸਿਯਾ.

੩੯੪.

ਸਨ੍ਧਿਯਾ ਅਸਮਾਨਤ੍ਤਾ, ਦ੍ਵੇ ਨਾਮਾਨਿਸ੍ਸ ਲਬ੍ਭਰੇ;

‘‘ਆਗਨ੍ਤੁਕਭਵਙ੍ਗ’’ਨ੍ਤਿ, ‘‘ਤਦਾਰਮ੍ਮਣਕ’’ਨ੍ਤਿ ਚ.

੩੯੫.

ਯਦਾ ¶ ¶ ਹਿ ਤਤਿਯਂ ਪੁਞ੍ਞਂ, ਜਵਨਂ ਹੋਤਿ ਤੇਨ ਚ;

ਸਦਿਸਂ ਤਤਿਯਂ ਪਾਕਂ, ਤਦਾਰਮ੍ਮਣਕਂ ਸਿਯਾ.

੩੯੬.

‘‘ਆਗਨ੍ਤੁਕਭਵਙ੍ਗ’’ਨ੍ਤਿ, ਇਦਮ੍ਪਿ ਚ ਪਵੁਚ੍ਚਤਿ;

ਇਮਿਨਾ ਪਨ ਸਦ੍ਧਿਂ ਛ, ਪੁਰਿਮਾਨਿ ਚ ਪਞ੍ਚਪਿ.

੩੯੭.

ਯਦਾ ਚਤੁਤ੍ਥਂ ਕੁਸਲਂ, ਜਵਨਂ ਹੋਤਿ ਤੇਨ ਚ;

ਤੁਲ੍ਯਂ ਚਤੁਤ੍ਥਂ ਪਾਕਂ ਤੁ, ਤਦਾਰਮ੍ਮਣਤਂ ਵਜੇ.

੩੯੮.

ਆਗਨ੍ਤੁਕਭਵਙ੍ਗਂ ਤੁ, ਤਦਾਰਮ੍ਮਣਨਾਮਕਂ;

ਪੁਰਿਮਾਨਿ ਛ ਪਾਕਾਨਿ, ਇਮਿਨਾ ਹੋਨ੍ਤਿ ਸਤ੍ਤ ਤੁ.

੩੯੯.

ਤਸ੍ਮਿਂ ਦ੍ਵਾਰੇ ਯਦਾ ਇਟ੍ਠ-ਮਜ੍ਝਤ੍ਤਾਰਮ੍ਮਣਂ ਪਨ;

ਆਗਚ੍ਛਤਿ ਤਦਾਪਾਥਂ, ਤਦਾ ਵੁਤ੍ਤਨਯੇਨਿਧ.

੪੦੦.

ਆਰਮ੍ਮਣਵਸੇਨੇਵ, ਵੇਦਨਾ ਪਰਿਵਤ੍ਤਤਿ;

ਉਪੇਕ੍ਖਾਸਹਿਤਂ ਤਸ੍ਮਾ, ਹੋਤਿ ਸਨ੍ਤੀਰਣਂ ਮਨੋ.

੪੦੧.

ਉਪੇਕ੍ਖਾਸਹਿਤੇਸ੍ਵੇਵ, ਜਵਨੇਸੁ ਚਤੂਸੁਪਿ;

ਤੇਹਿ ਤੁਲ੍ਯਾਨਿ ਚਤ੍ਤਾਰਿ, ਪਾਕਚਿਤ੍ਤਾਨਿ ਜਾਯਰੇ.

੪੦੨.

ਵੇਦਨਾਯਾਸਮਾਨਤ੍ਤਾ, ਅਚ੍ਚਨ੍ਤਂ ਪੁਰਿਮੇਹਿ ਤੁ;

ਹੋਨ੍ਤਿ ਪਿਟ੍ਠਿਭਵਙ੍ਗਾਨਿ, ਚਤ੍ਤਾਰੀਤਿ ਚ ਨਾਮਤੋ.

੪੦੩.

ਪਞ੍ਚਿਮਾਨਿ ਵਿਪਾਕਾਨਿ, ਪੁਰਿਮੇਹਿ ਚ ਸਤ੍ਤਹਿ;

ਸਦ੍ਧਿਂ ਦ੍ਵਾਦਸ ਪਾਕਾਨਿ, ਭਵਨ੍ਤੀਤਿ ਵਿਨਿਦ੍ਦਿਸੇ.

੪੦੪.

ਚਕ੍ਖੁਦ੍ਵਾਰੇ ਤਥਾ ਏਵਂ, ਸੋਤਾਦੀਸ੍ਵਪਿ ਨਿਦ੍ਦਿਸੇ;

ਦ੍ਵਾਦਸ ਦ੍ਵਾਦਸ ਪਾਕਾ, ਸਮਸਟ੍ਠਿ ਭਵਨ੍ਤਿਮੇ.

੪੦੫.

ਏਕਾਯ ਚੇਤਨਾਯੇਵ, ਕਮ੍ਮੇ ਆਯੂਹਿਤੇ ਪਨ;

ਸਮਸਟ੍ਠਿ ਵਿਪਾਕਾਨਿ, ਉਪ੍ਪਜ੍ਜਨ੍ਤਿ ਨ ਸਂਸਯੋ.

੪੦੬.

ਗਹਿਤਾਗਹਣੇਨੇਤ੍ਥ ¶ ¶ , ਚਕ੍ਖੁਦ੍ਵਾਰੇਸੁ ਦ੍ਵਾਦਸ;

ਸੋਤਵਿਞ੍ਞਾਣਕਾਦੀਨਿ, ਚਤ੍ਤਾਰੀਤਿ ਚ ਸੋਲ਼ਸ.

੪੦੭.

ਏਵਮੇਵ ¶ ਸਸਙ੍ਖਾਰ-ਤਿਹੇਤੁਕੁਸਲੇਨਪਿ;

ਅਸਙ੍ਖਾਰਸਸਙ੍ਖਾਰੁ-ਪੇਕ੍ਖਾਸਹਗਤੇਹਿਪਿ.

੪੦੮.

ਕਮ੍ਮੇ ਆਯੂਹਿਤੇ ਤੇਸਂ, ਵਿਪਾਕੇਹਿ ਚ ਤੀਹਿਪਿ;

ਏਸੇਵ ਚ ਨਯੋ ਤੇਹਿ, ਦਿਨ੍ਨਾਯ ਪਟਿਸਨ੍ਧਿਯਾ.

੪੦੯.

ਪਠਮਂ ਇਟ੍ਠਮਜ੍ਝਤ੍ਤ-ਗੋਚਰਸ੍ਸ ਵਸੇਨਿਧ;

ਪਵਤ੍ਤਿਂ ਪਨ ਦਸ੍ਸੇਤ੍ਵਾ, ਉਪੇਕ੍ਖਾਸਹਿਤਦ੍ਵਯੇ.

੪੧੦.

ਦਸ੍ਸੇਤਬ੍ਬਾ ਤਪ੍ਪਚ੍ਛਾ ਤੁ, ਇਟ੍ਠਸ੍ਮਿਂ ਗੋਚਰੇ ਇਧ;

ਏਕੇਕਸ੍ਮਿਂ ਪਨ ਦ੍ਵਾਰੇ, ਦ੍ਵਾਦਸ ਦ੍ਵਾਦਸੇਵ ਤੁ.

੪੧੧.

ਗਹਿਤਾਗਹਣੇਨੇਤ੍ਥ, ਪਾਕਚਿਤ੍ਤਾਨਿ ਸੋਲ਼ਸ;

ਪੁਬ੍ਬੇ ਵੁਤ੍ਤਨਯੇਨੇਵ, ਞੇਯ੍ਯਂ ਸਬ੍ਬਮਸੇਸਤੋ.

੪੧੨.

ਤਿਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਤਿਹੇਤੁਕਾ;

ਭਵਤੀਤਿ ਅਯਂ ਵਾਰੋ, ਵੁਤ੍ਤੋ ਏਤ੍ਤਾਵਤਾ ਮਯਾ.

੪੧੩.

ਸਨ੍ਧਿਮੇਕਂ ਤੁ ਕਮ੍ਮੇਕਂ, ਜਨੇਤਿ ਨ ਤਤੋ ਪਰਂ;

ਅਨੇਕਾਨਿ ਵਿਪਾਕਾਨਿ, ਸਞ੍ਜਨੇਤਿ ਪਵਤ੍ਤਿਯਂ.

੪੧੪.

ਏਕਸ੍ਮਾ ਹਿ ਯਥਾ ਬੀਜਾ, ਜਾਯਤੇ ਏਕਮਙ੍ਕੁਰਂ;

ਸੁਬਹੂਨਿ ਫਲਾਨਿਸ੍ਸ, ਹੋਨ੍ਤਿ ਹੇਤੁਪਵਤ੍ਤਿਤੋ.

੪੧੫.

ਦੁਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਦੁਹੇਤੁਕਾ;

ਹੋਤੀਤਿ ਹਿ ਅਯਂ ਵਾਰੋ, ਅਨੁਪੁਬ੍ਬੇਨ ਆਗਤੋ.

੪੧੬.

ਦੁਹੇਤੁਕੇਨ ਕਮ੍ਮੇਨ, ਸੋਮਨਸ੍ਸਯੁਤੇਨਿਧ;

ਅਸਙ੍ਖਾਰਿਕਚਿਤ੍ਤੇਨ, ਕਮ੍ਮੇ ਆਯੂਹਿਤੇ ਪਨ.

੪੧੭.

ਤੇਨ ¶ ਤੁਲ੍ਯੇਨ ਪਾਕੇਨ, ਗਹਿਤਾ ਪਟਿਸਨ੍ਧਿ ਚੇ;

ਇਟ੍ਠੇ ਆਰਮ੍ਮਣੇ ਚਕ੍ਖੁ-ਦ੍ਵਾਰੇ ਆਪਾਥਮਾਗਤੇ.

੪੧੮.

ਸੋਮਨਸ੍ਸਯੁਤੇ ਞਾਣ-ਹੀਨੇ ਕੁਸਲਮਾਨਸੇ;

ਸਤ੍ਤਕ੍ਖਤ੍ਤੁਂ ਜਵਿਤ੍ਵਾਨ, ਗਤੇ ਤਸ੍ਮਿਂ ਦੁਹੇਤੁਕੇ.

੪੧੯.

ਤਦੇਵਾਰਮ੍ਮਣਂ ¶ ਕਤ੍ਵਾ, ਜਾਯਤੇ ਤਦਨਨ੍ਤਰਂ;

ਤਂਸਰਿਕ੍ਖਕਮੇਕਂ ਤੁ, ਅਸਙ੍ਖਾਰਿਕਮਾਨਸਂ.

੪੨੦.

ਤਂ ਹਿ ਮੂਲਭਵਙ੍ਗਨ੍ਤਿ, ਤਦਾਰਮ੍ਮਣਮਿਚ੍ਚਪਿ;

ਉਭਯਮ੍ਪਿ ਚ ਤਸ੍ਸੇਵ, ਨਾਮਨ੍ਤਿ ਪਰਿਦੀਪਿਤਂ.

੪੨੧.

ਦੁਹੇਤੁਕਸਸਙ੍ਖਾਰੇ, ਜਵਿਤੇਪਿ ਚ ਤਂਸਮਂ;

ਹੋਤਾਗਨ੍ਤੁਕਸਙ੍ਖਾਤਂ, ਤਦਾਰਮ੍ਮਣਮਾਨਸਂ.

੪੨੨.

ਤਥੇਵ ਚ ਦੁਹੇਤੂਨਂ, ਇਟ੍ਠਮਜ੍ਝਤ੍ਤਗੋਚਰੇ;

ਦ੍ਵਿਨ੍ਨਂ ਉਪੇਕ੍ਖਾਯੁਤ੍ਤਾਨਂ, ਜਵਨਾਨਮਨਨ੍ਤਰਂ.

੪੨੩.

ਦ੍ਵੇ ਤਾਦਿਸਾਨਿ ਜਾਯਨ੍ਤੇ, ਤਦਾਰਮ੍ਮਣਮਾਨਸਾ;

ਤੇਸਂ ‘‘ਪਿਟ੍ਠਿਭਵਙ੍ਗ’’ਨ੍ਤਿ, ਨਾਮਂ ‘‘ਆਗਨ੍ਤੁਕ’’ਨ੍ਤਿ ਚ.

੪੨੪.

ਸਨ੍ਤੀਰਣਦ੍ਵਯਞ੍ਚੇਵ, ਦਸ੍ਸਨਂ ਸਮ੍ਪਟਿਚ੍ਛਨਂ;

ਇਮਾਨਿ ਚ ਭਵਙ੍ਗਾਨਿ, ਚਕ੍ਖੁਦ੍ਵਾਰੇ ਪਨਟ੍ਠ ਹਿ.

੪੨੫.

ਏਵਮਟ੍ਠਟ੍ਠ ¶ ਕਤ੍ਵਾਨ, ਦ੍ਵਾਰੇਸੁਪਿ ਚ ਪਞ੍ਚਸੁ;

ਚਤ੍ਤਾਲੀਸ ਵਿਪਾਕਾਨਿ, ਭਵਨ੍ਤੀਤਿ ਪਵਤ੍ਤਿਯਂ.

੪੨੬.

ਗਹਿਤਾਗਹਣੇਨੇਤ੍ਥ, ਚਕ੍ਖੁਦ੍ਵਾਰੇ ਪਨਟ੍ਠ ਚ;

ਸੋਤਘਾਨਾਦਿਨਾ ਸਦ੍ਧਿਂ, ਦ੍ਵਾਦਸੇਵ ਭਵਨ੍ਤਿ ਹਿ.

੪੨੭.

ਏਕਾਯ ਚੇਤਨਾਯੇਵਂ, ਕਮ੍ਮੇ ਆਯੂਹਿਤੇ ਪਨ;

ਦ੍ਵਾਦਸੇਵ ਵਿਪਾਕਾਨਿ, ਭਵਨ੍ਤੀਤਿ ਪਕਾਸਿਤਂ.

੪੨੮.

ਦੁਹੇਤੁਕਤ੍ਤਯੇਨਾਪਿ ¶ , ਸੇਸੇਨ ਸਦਿਸੇਨ ਤੁ;

ਪਾਕੇਨਾਦਿਨ੍ਨਸਨ੍ਧਿਯਾ, ਅਯਮੇਵ ਨਯੋ ਮਤੋ.

੪੨੯.

ਦੁਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਦੁਹੇਤੁਕਾ;

ਹੋਤੀਤਿਪਿ ਅਯਂ ਵਾਰੋ, ਵੁਤ੍ਤੋ ਏਤ੍ਤਾਵਤਾ ਮਯਾ.

੪੩੦.

ਦੁਹੇਤੁਕੇਨ ਕਮ੍ਮੇਨ, ਪਟਿਸਨ੍ਧਿ ਅਹੇਤੁਕਾ;

ਹੋਤੀਤਿ ਚ ਅਯਂ ਵਾਰੋ, ਅਨੁਪੁਬ੍ਬੇਨ ਆਗਤੋ.

੪੩੧.

ਦੁਹੇਤੁਕੇਸੁ ¶ ਚਿਤ੍ਤੇਸੁ, ਕੁਸਲੇਸੁ ਚਤੂਸੁਪਿ;

ਤੇਸੁ ਅਞ੍ਞਤਰੇਨੇਵ, ਕਮ੍ਮੇ ਆਯੂਹਿਤੇ ਪਨ.

੪੩੨.

ਤਸ੍ਸੇਵ ਪਾਕਭੂਤਾਯ, ਆਦਿਨ੍ਨਪਟਿਸਨ੍ਧਿਨੋ;

ਉਪੇਕ੍ਖਾਸਹਿਤਾਹੇਤੁ, ਮਨੋਵਿਞ੍ਞਾਣਧਾਤੁਯਾ.

੪੩੩.

ਪਟਿਸਨ੍ਧਿ ਨ ਵਤ੍ਤਬ੍ਬਾ, ਸਾ ਕਮ੍ਮਸਦਿਸਾਤਿ ਹਿ;

ਕਮ੍ਮਂ ਦੁਹੇਤੁਕਂ ਹੋਤਿ, ਪਟਿਸਨ੍ਧਿ ਅਹੇਤੁਕਾ.

੪੩੪.

ਤਸ੍ਸ ਬੁਦ੍ਧਿਮੁਪੇਤਸ੍ਸ, ਇਟ੍ਠਮਜ੍ਝਤ੍ਤਗੋਚਰੇ;

ਆਪਾਥਮਾਗਤੇ ਚਕ੍ਖੁ-ਦ੍ਵਾਰੇ ਪੁਨ ਚ ਦੇਹਿਨੋ.

੪੩੫.

ਦੁਹੇਤੂਨਂ ਚਤੁਨ੍ਨਮ੍ਪਿ, ਪੁਞ੍ਞਾਨਂ ਯਸ੍ਸ ਕਸ੍ਸਚਿ;

ਜਵਨਸ੍ਸਾਵਸਾਨਸ੍ਮਿਂ, ਅਹੇਤੁਕਮਿਦਂ ਮਨੋ.

੪੩੬.

ਤਦਾਰਮ੍ਮਣਭਾਵੇਨ, ਜਾਯਤੇ ਨਤ੍ਥਿ ਸਂਸਯੋ;

ਤਂ ਤੁ ਮੂਲਭਵਙ੍ਗਞ੍ਚ, ਤਦਾਰਮ੍ਮਣਮੇਵ ਚ.

੪੩੭.

ਵੀਥਿਚਿਤ੍ਤੇਸੁ ਜਾਤੇਸੁ, ਚਕ੍ਖੁਵਿਞ੍ਞਾਣਕਾਦਿਸੁ;

ਉਪੇਕ੍ਖਾਸਹਿਤਂਯੇਵ, ਹੋਤਿ ਸਨ੍ਤੀਰਣਮ੍ਪਿ ਚ.

੪੩੮.

ਤੇਸੁ ਏਕਂ ਠਪੇਤ੍ਵਾਨ, ਗਹਿਤਾਗਹਣੇਨਿਧ;

ਗਣਨੂਪਗਚਿਤ੍ਤਾਨਿ, ਤੀਣਿਯੇਵ ਭਵਨ੍ਤਿ ਹਿ.

੪੩੯.

ਇਟ੍ਠੇ ¶ ਆਰਮ੍ਮਣੇ ਚਕ੍ਖੁ-ਦ੍ਵਾਰੇ ਆਪਾਥਮਾਗਤੇ;

ਤਦਾ ਸਨ੍ਤੀਰਣਞ੍ਚੇਵ, ਤਦਾਰਮ੍ਮਣਮਾਨਸਂ.

੪੪੦.

ਸੋਮਨਸ੍ਸਯੁਤਂਯੇਵ, ਗਹੇਤ੍ਵਾ ਤੇਸੁ ਏਕਕਂ;

ਪੁਰਿਮਾਨਿ ਚ ਤੀਣੀਤਿ, ਚਤ੍ਤਾਰੋਵ ਭਵਨ੍ਤਿ ਹਿ.

੪੪੧.

ਏਵਂ ਚਤ੍ਤਾਰਿ ਚਿਤ੍ਤਾਨਿ, ਦ੍ਵਾਰੇਸੁਪਿ ਚ ਪਞ੍ਚਸੁ;

ਹੋਨ੍ਤਿ ਵੀਸਤਿ ਚਿਤ੍ਤਾਨਿ, ਵਿਪਾਕਾਨਿ ਪਵਤ੍ਤਿਯਂ.

੪੪੨.

ਚਕ੍ਖੁਦ੍ਵਾਰੇ ਤੁ ਚਤ੍ਤਾਰਿ, ਗਹਿਤਾਗਹਣੇਨਿਧ;

ਸੋਤਘਾਨਾਦਿਨਾ ਸਦ੍ਧਿਂ, ਹੋਤੇਵਾਹੇਤੁਕਟ੍ਠਕਂ.

੪੪੩.

ਅਹੇਤੁਪਟਿਸਨ੍ਧਿਸ੍ਸ ¶ , ਨ ਤਦਾਰਮ੍ਮਣਂ ਭਵੇ;

ਦੁਹੇਤੁਕਂ ਤਿਹੇਤੁਂ ਵਾ, ਦੁਹੇਤੁਪਟਿਸਨ੍ਧਿਨੋ.

੪੪੪.

ਜਾਤਾ ¶ ਸੁਗਤਿਯਂ ਯੇਨ, ਪਾਕੇਨ ਪਟਿਸਨ੍ਧਿ ਤੁ;

ਤੇਨ ਤੁਲ੍ਯਮ੍ਪਿ ਹੀਨਂ ਵਾ, ਤਦਾਰਮ੍ਮਣਕਂ ਭਵੇ.

੪੪੫.

ਮਨੁਸ੍ਸਲੋਕਂ ਸਨ੍ਧਾਯ, ਵੁਤ੍ਤਞ੍ਚਾਹੇਤੁਕਟ੍ਠਕਂ;

ਚਤੂਸੁਪਿ ਅਪਾਯੇਸੁ, ਪਵਤ੍ਤੇ ਪਨ ਲਬ੍ਭਤਿ.

੪੪੬.

ਥੇਰੋ ਨੇਰਯਿਕਾਨਂ ਤੁ, ਧਮ੍ਮਂ ਦੇਸੇਤਿ ਵਸ੍ਸਤਿ;

ਗਨ੍ਧਂ ਵਾਯੁਞ੍ਚ ਮਾਪੇਤਿ, ਯਦਾ ਤੇਸਂ ਤਦਾ ਪਨ.

੪੪੭.

ਥੇਰਂ ਦਿਸ੍ਵਾ ਚ ਸੁਤ੍ਵਾ ਚ, ਧਮ੍ਮਂ ਗਨ੍ਧਞ੍ਚ ਘਾਯਤਂ;

ਪਿਵਤਞ੍ਚ ਜਲਂ ਵਾਯੁਂ, ਫੁਸਤਂ ਮੁਦੁਮੇਵ ਚ.

੪੪੮.

ਚਕ੍ਖੁਵਿਞ੍ਞਾਣਕਾਦੀਨਿ, ਪੁਞ੍ਞਜਾਨੇਵ ਪਞ੍ਚਪਿ;

ਸਨ੍ਤੀਰਣਦ੍ਵਯਂ ਏਕਾ, ਮਨੋਧਾਤੂਤਿ ਅਟ੍ਠਕਂ.

੪੪੯.

ਅਯਂ ਤਾਵ ਕਥਾ ਇਟ੍ਠ-ਇਟ੍ਠਮਜ੍ਝਤ੍ਤਗੋਚਰੇ;

ਕਾਮਾਵਚਰਪੁਞ੍ਞਾਨਂ, ਜਵਨਾਨਂ ਵਸੇਨਿਧ.

੪੫੦.

ਨਿਯਮਤ੍ਥਂ ¶ ਤੁ ਯਂ ਵੁਤ੍ਤਂ, ਤਦਾਰਮ੍ਮਣਚੇਤਸੋ;

ਕੁਸਲਂ ਪਨ ਸਨ੍ਧਾਯ, ਤਂ ਵੁਤ੍ਤਨ੍ਤਿ ਹਿ ਦੀਪਿਤਂ.

੪੫੧.

ਇਧਾਕੁਸਲਚਿਤ੍ਤੇਸੁ, ਸੋਮਨਸ੍ਸਯੁਤੇਸੁਪਿ;

ਇਟ੍ਠੇ ਆਰਮ੍ਮਣੇ ਤੇਸੁ, ਜਵਿਤੇਸੁ ਚਤੂਸੁਪਿ.

੪੫੨.

ਸੋਮਨਸ੍ਸਯੁਤਾਹੇਤੁ-ਮਨੋਵਿਞ੍ਞਾਣਧਾਤੁ ਹਿ;

ਤਦਾਰਮ੍ਮਣਭਾਵੇਨ, ਜਾਯਤੇ ਤਦਨਨ੍ਤਰਂ.

੪੫੩.

ਛਸ੍ਵਾਕੁਸਲਚਿਤ੍ਤੇਸੁ, ਉਪੇਕ੍ਖਾਯ ਯੁਤੇਸੁ ਹਿ;

ਗੋਚਰੇ ਇਟ੍ਠਮਜ੍ਝਤ੍ਤੇ, ਜਵਿਤੇਸੁ ਅਨਨ੍ਤਰਂ.

੪੫੪.

ਉਪੇਕ੍ਖਾਸਹਿਤਾਹੇਤੁ-ਮਨੋਵਿਞ੍ਞਾਣਧਾਤੁ ਹਿ;

ਤਦਾਰਮ੍ਮਣਭਾਵੇਨ, ਜਾਯਤੇ ਪਨ ਪੁਞ੍ਞਜਾ.

੪੫੫.

ਇਟ੍ਠਾਰਮ੍ਮਣਯੋਗਸ੍ਮਿਂ ¶ , ਕਙ੍ਖਤੋ ਉਦ੍ਧਤਸ੍ਸ ਵਾ;

ਸੋਮਨਸ੍ਸਯੁਤਂ ਹੋਤਿ, ਤਦਾਰਮ੍ਮਣਮਾਨਸਂ.

੪੫੬.

ਸੋਮਨਸ੍ਸਯੁਤੇ ਚਿਤ੍ਤੇ, ਜਵਨੇ ਜਵਿਤੇ ਪਨ;

ਗਵੇਸਿਤਬ੍ਬਾ ਪਞ੍ਚੇਵ, ਤਦਾਰਮ੍ਮਣਮਾਨਸਾ.

੪੫੭.

ਉਪੇਕ੍ਖਾਸਹਿਤੇ ਚਿਤ੍ਤੇ, ਜਵਨੇ ਜਵਿਤੇ ਪਨ;

ਛਲ਼ੇਵ ਗਵੇਸਿਤਬ੍ਬਾ, ਤਦਾਰਮ੍ਮਣਮਾਨਸਾ.

੪੫੮.

ਤਿਹੇਤੁਸੋਮਨਸ੍ਸੇਨ, ਆਦਿਨ੍ਨਪਟਿਸਨ੍ਧਿਨੋ;

ਝਾਨਤੋ ਪਰਿਹੀਨਸ੍ਸ, ਤਂ ਝਾਨਂ ਪਚ੍ਚਵੇਕ੍ਖਤੋ.

੪੫੯.

ਦੋਮਨਸ੍ਸਯੁਤਂ ਚਿਤ੍ਤਂ, ਹੋਤਿ ਵਿਪ੍ਪਟਿਸਾਰਿਨੋ;

ਤਸ੍ਸ ਕਿਂ ਜਾਯਤੇ ਬ੍ਰੂਹਿ, ਤਦਾਰਮ੍ਮਣਮਾਨਸਂ.

੪੬੦.

ਪਟ੍ਠਾਨੇ ਪਟਿਸਿਦ੍ਧਾ ਹਿ, ਦੋਮਨਸ੍ਸਅਨਨ੍ਤਰਂ;

ਸੋਮਨਸ੍ਸਸ੍ਸ ਉਪ੍ਪਤ੍ਤਿ, ਦੋਮਨਸ੍ਸਸ੍ਸ ਚਸ੍ਸ ਵਾ.

੪੬੧.

ਮਹਗ੍ਗਤਂ ¶ ਪਨਾਰਬ੍ਭ, ਜਵਨੇ ਜਵਿਤੇਪਿ ਚ;

ਤਤ੍ਥੇਵ ਪਟਿਸਿਦ੍ਧਂ ਤੁ, ਤਦਾਰਮ੍ਮਣਮਾਨਸਂ.

੪੬੨.

ਤਸ੍ਮਾ ¶ ਭਵਙ੍ਗਪਾਤੋਵ, ਤਦਾਰਮ੍ਮਣਮੇਵ ਵਾ;

ਨ ਹੋਤਿ ਕਿਂ ਨੁ ਕਾਤਬ੍ਬਂ, ਵਦ ਤ੍ਵਂ ਆਭਿਧਮ੍ਮਿਕ.

੪੬੩.

ਉਪੇਕ੍ਖਾਸਹਿਤਾਹੇਤੁ-ਮਨੋਵਿਞ੍ਞਾਣਧਾਤੁ ਤੁ;

ਪੁਞ੍ਞਾਪੁਞ੍ਞਵਿਪਾਕਾ ਹਿ, ਤਦਾਰਮ੍ਮਣਿਕਾ ਸਿਯਾ.

੪੬੪.

ਆਵਜ੍ਜਨਂ ਕਿਮਸ੍ਸਾਤਿ, ਨਤ੍ਥਿ ਤਂ ਜਾਯਤੇ ਕਥਂ;

ਭਵਙ੍ਗਾਵਜ੍ਜਨਾਨਂ ਕਿਂ, ਮਗ੍ਗਸ੍ਸਾਨਨ੍ਤਰਸ੍ਸ ਚ.

੪੬੫.

ਫਲਸ੍ਸਪਿ ਨਿਰੋਧਾ ਚ, ਵੁਟ੍ਠਹਨ੍ਤਸ੍ਸ ਭਿਕ੍ਖੁਨੋ;

ਫਲਚਿਤ੍ਤਸ੍ਸ ਵਾ ਏਵਂ, ਨਤ੍ਥਿ ਆਵਜ੍ਜਨਂ ਕਿਰ.

੪੬੬.

ਵਿਨਾ ਆਵਜ੍ਜਨੇਨਾਪਿ, ਹੋਤਿ ਜਾਯਤੁ ਮਾਨਸਂ;

ਕਿਮਸ੍ਸਾਰਮ੍ਮਣਂ ਬ੍ਰੂਹਿ, ਯਦਿ ਜਾਨਾਸਿ ਪਣ੍ਡਿਤ.

੪੬੭.

ਵਿਨਾ ¶ ਆਰਮ੍ਮਣੇਨੇਵ, ਨ ਹਿ ਜਾਯਤਿ ਮਾਨਸਂ;

ਰੂਪਾਦੀਸੁ ਪਰਿਤ੍ਤੇਸੁ, ਯਂ ਕਿਞ੍ਚਾਰਬ੍ਭ ਜਾਯਤੇ.

੪੬੮.

ਉਤੁਬੀਜਨਿਯਾਮੋ ਚ, ਕਮ੍ਮਧਮ੍ਮਨਿਯਾਮਤਾ;

ਚਿਤ੍ਤਸ੍ਸ ਚ ਨਿਯਾਮੋਤਿ, ਞੇਯ੍ਯਾ ਪਞ੍ਚ ਨਿਯਾਮਤਾ.

੪੬੯.

ਤਤ੍ਥ ਏਕਪ੍ਪਹਾਰੇਨ, ਫਲਪੁਪ੍ਫਾਦਿਧਾਰਣਂ;

ਰੁਕ੍ਖਾਨਂ ਪਨ ਸਬ੍ਬੇਸਂ, ਅਯਂ ਉਤੁਨਿਯਾਮਤਾ.

੪੭੦.

ਤੇਸਂ ਤੇਸਂ ਤੁ ਬੀਜਾਨਂ, ਤਂਤਂਤੁਲ੍ਯਫਲੁਬ੍ਭਵੋ;

ਮਤ੍ਥਕੇ ਨਾਲ਼ਿਕੇਰਸ੍ਸ, ਛਿਦ੍ਦਤ੍ਤਂ ਬੀਜਜੋ ਅਯਂ.

੪੭੧.

ਤਿਹੇਤੁਕਂ ਤਿਹੇਤੁਞ੍ਚ, ਦੁਹੇਤੁਞ੍ਚ ਅਹੇਤੁਕਂ;

ਵਿਪਾਕਂ ਤੁ ਯਤੋ ਦੇਤਿ, ਅਯਂ ਕਮ੍ਮਨਿਯਾਮਤਾ.

੪੭੨.

ਜਾਤਿਯਂ ¶ ਬੋਧਿਸਤ੍ਤਸ੍ਸ, ਮੇਦਨੀਕਮ੍ਪਨਾਦਿਕਂ;

ਵਿਸੇਸਤ੍ਤਮਨੇਕਮ੍ਪਿ, ਅਯਂ ਧਮ੍ਮਨਿਯਾਮਤਾ.

੪੭੩.

ਗੋਚਰੇਨ ਪਸਾਦਸ੍ਮਿਂ, ਘਟ੍ਟਿਤੇ ਪਨ ਤੇਨਿਧ;

ਉਪ੍ਪਤ੍ਤਾਵਜ੍ਜਨਾਦੀਨਂ, ਅਯਂ ਚਿਤ੍ਤਨਿਯਾਮਤਾ.

੪੭੪.

ਅਨ੍ਧਜ੍ਜਨਾਨਂ ਹਦਯਨ੍ਧਕਾਰਂ,

ਵਿਦ੍ਧਂਸਨਂ ਦੀਪਮਿਮਂ ਜਲਨ੍ਤਂ;

ਸਿਕ੍ਖੇਥ ਧੀਰੋ ਸਤਤਂ ਪਯੁਤ੍ਤੋ,

ਮੋਹਨ੍ਧਕਾਰਾਪਗਮਂ ਯਦਿਚ੍ਛੇਤਿ.

ਇਤਿ ਅਭਿਧਮ੍ਮਾਵਤਾਰੇ ਵਿਪਾਕਚਿਤ੍ਤਪ੍ਪਵਤ੍ਤਿਨਿਦ੍ਦੇਸੋ ਨਾਮ

ਸਤ੍ਤਮੋ ਪਰਿਚ੍ਛੇਦੋ.

੮. ਅਟ੍ਠਮੋ ਪਰਿਚ੍ਛੇਦੋ

ਪਕਿਣ੍ਣਕਨਿਦ੍ਦੇਸੋ

੪੭੫.

ਇਦਾਨਿ ¶ ¶ ਪਨ ਸਬ੍ਬੇਸਂ, ਏਤੇਸਂ ਮਾਨਸਂ ਮਯਾ;

ਪਾਟਵਤ੍ਥਾਯ ਭਿਕ੍ਖੂਨਂ, ਕਥੀਯਤਿ ਪਕਿਣ੍ਣਕਂ.

੪੭੬.

ਪਨ੍ਥਮਕ੍ਕਟਕੋ ਨਾਮ, ਦਿਸਾਸੁ ਪਨ ਪਞ੍ਚਸੁ;

ਤਤ੍ਥ ਸੁਤ੍ਤਂ ਪਸਾਰੇਤ੍ਵਾ, ਜਾਲਮਜ੍ਝੇ ਨਿਪਜ੍ਜਤਿ.

੪੭੭.

ਪਠਮਾਯ ਦਿਸਾਯੇਤ੍ਥ, ਸੁਤ੍ਤੇ ਪਨ ਪਸਾਰਿਤੇ;

ਪਾਣਕੇਨ ਪਟਙ੍ਗੇਨ, ਘਟ੍ਟਿਤੇ ਮਕ੍ਖਿਕਾਯ ਵਾ.

੪੭੮.

ਨਿਪਨ੍ਨਟ੍ਠਾਨਤੋ ਕਿਞ੍ਚਿ, ਚਲਿਤ੍ਵਾ ਉਣ੍ਣਨਾਭਿ ਤੁ;

ਗਨ੍ਤ੍ਵਾ ਸੁਤ੍ਤਾਨੁਸਾਰੇਨ, ਯੂਸਂ ਪਿਵਤਿ ਤਸ੍ਸ ਸਾ.

੪੭੯.

ਪੁਨਾਗਨ੍ਤ੍ਵਾਨ ਤਤ੍ਥੇਵ, ਨਿਪਜ੍ਜਤਿ ਯਥਾਸੁਖਂ;

ਏਵਮੇਵ ਕਰੋਤੇਵ, ਦਿਸਾਸੁ ਦੁਤਿਯਾਦਿਸੁ.

੪੮੦.

ਪਸਾਦਾ ¶ ਪਞ੍ਚ ਦਟ੍ਠਬ੍ਬਾ, ਸੁਤ੍ਤਂ ਪਞ੍ਚਦਿਸਾਸ੍ਵਿਵ;

ਚਿਤ੍ਤਂ ਪਨ ਚ ਦਟ੍ਠਬ੍ਬਂ, ਮਜ੍ਝੇ ਮਕ੍ਕਟਕੋ ਵਿਯ.

੪੮੧.

ਪਾਣਕਾਦੀਹਿ ਸੁਤ੍ਤਸ੍ਸ, ਤਸ੍ਸ ਸਙ੍ਘਟ੍ਟਨਾ ਵਿਯ;

ਪਸਾਦਾਨਂ ਤੁ ਦਟ੍ਠਬ੍ਬਾ, ਘਟ੍ਟਨਾਰਮ੍ਮਣੇਨ ਹਿ.

੪੮੨.

ਚਲਨਂ ਵਿਯ ਤਂਮਜ੍ਝੇ, ਨਿਪਨ੍ਨਾਯੁਣ੍ਣਨਾਭਿਯਾ;

ਪਸਾਦਘਟ੍ਟਨਂ ਤਤ੍ਥ, ਗਹੇਤ੍ਵਾਰਮ੍ਮਣਂ ਪਨ.

੪੮੩.

ਮਨੋਧਾਤੁਕ੍ਰਿਯਾਚਿਤ੍ਤਂ, ਭਵਙ੍ਗਾਵਟ੍ਟਨਂ ਮਤਂ;

ਤਸ੍ਸਾ ਸੁਤ੍ਤਾਨੁਸਾਰਂਵ, ਵੀਥਿਚਿਤ੍ਤਪਵਤ੍ਤਨਂ.

੪੮੪.

ਸੀਸੇ ਪਨਸ੍ਸ ਵਿਜ੍ਝਿਤ੍ਵਾ, ਯੂਸਪਾਨਂਵ ਚੇਤਸੋ;

ਆਰਮ੍ਮਣੇਸੁ ਦਟ੍ਠਬ੍ਬਂ, ਜਵਨਸ੍ਸ ਪਵਤ੍ਤਨਂ.

੪੮੫.

ਪੁਨਾਗਨ੍ਤ੍ਵਾ ¶ ਯਥਾ ਸੁਤ੍ਤ-ਜਾਲਮਜ੍ਝੇ ਨਿਪਜ੍ਜਨਂ;

ਵਤ੍ਥੁਂਯੇਵ ਚ ਨਿਸ੍ਸਾਯ, ਚਿਤ੍ਤਸ੍ਸ ਪਰਿਵਤ੍ਤਨਂ.

੪੮੬.

ਇਦਂ ਤੁ ਪਨ ਓਪਮ੍ਮਂ, ਅਤ੍ਥਂ ਦੀਪੇਤਿ ਕਿਂ ਤੁ ਹਿ;

ਆਰਮ੍ਮਣੇਨ ਪਠਮਂ, ਪਸਾਦੇ ਘਟ੍ਟਿਤੇ ਪਨ.

੪੮੭.

ਪਸਾਦਵਤ੍ਥੁਤੋ ਚਿਤ੍ਤਾ, ਵਤ੍ਥੁਸਨ੍ਨਿਸ੍ਸਿਤਂ ਮਨੋ;

ਤਤੋ ਹਿ ਪਠਮਂਯੇਵ, ਜਾਯਤੀਤਿ ਹਿ ਦੀਪਿਤਂ.

੪੮੮.

ਏਕੇਕਾਰਮ੍ਮਣਂ ¶ ਦ੍ਵੀਸੁ, ਦ੍ਵੀਸੁ ਦ੍ਵਾਰੇਸੁ ਸਬ੍ਬਸੋ;

ਆਗਚ੍ਛਤਿ ਤੇਨਾਪਾਥਂ, ਅਯਮਤ੍ਥੋਪਿ ਦੀਪਿਤੋ.

੪੮੯.

ਰੂਪਂ ਚਕ੍ਖੁਪਸਾਦਮ੍ਹਿ, ਘਟ੍ਟਿਤ੍ਵਾ ਤਙ੍ਖਣੇ ਪਨ;

ਮਨੋਦ੍ਵਾਰੇ ਤਥਾਪਾਥ-ਮਾਗਚ੍ਛਤਿ ਨਿਸਂਸਯੋ.

੪੯੦.

ਖਗੋ ਯਥਾ ਹਿ ਰੁਕ੍ਖਗ੍ਗੇ, ਨਿਲੀਯਨ੍ਤੋਵ ਸਾਖਿਨੋ;

ਸਾਖਂ ਘਟ੍ਟੇਤਿ ਤਸ੍ਸੀਧ, ਛਾਯਾ ਫਰਤਿ ਭੂਮਿਯਂ.

੪੯੧.

ਸਾਖਾਯ ¶ ਘਟ੍ਟਨਚ੍ਛਾਯਾ, ਫਰਣਾਨਿ ਚ ਸਬ੍ਬਸੋ;

ਅਪੁਬ੍ਬਾਚਰਿਮਂ ਏਕ-ਕ੍ਖਣਸ੍ਮਿਂਯੇਵ ਜਾਯਰੇ.

੪੯੨.

ਏਵਮੇਵ ਚ ਰੂਪਸ੍ਸ, ਪਸਾਦਸ੍ਸ ਚ ਘਟ੍ਟਨਂ;

ਭਵਙ੍ਗਚਲਨਸ੍ਸਾਪਿ, ਪਚ੍ਚਯਤ੍ਤੇਨ ਅਤ੍ਥਤੋ.

੪੯੩.

ਤਥੇਵ ਚ ਮਨੋਦ੍ਵਾਰੇ, ਆਪਾਥਗਮਨਮ੍ਪਿ ਚ;

ਅਪੁਬ੍ਬਾਚਰਿਮਂ ਏਕ-ਕ੍ਖਣਸ੍ਮਿਂਯੇਵ ਹੋਤਿਤਿ.

੪੯੪.

ਤਤੋ ਭਵਙ੍ਗਂ ਛਿਨ੍ਦਿਤ੍ਵਾ, ਚਕ੍ਖੁਦ੍ਵਾਰੇ ਯਥਾਕ੍ਕਮਂ;

ਆਵਜ੍ਜਨੇ ਸਮੁਪ੍ਪਨ੍ਨੇ, ਦਸ੍ਸਨੇ ਸਮ੍ਪਟਿਚ੍ਛਨੇ.

੪੯੫.

ਸਨ੍ਤੀਰਣੇ ਸਮੁਪ੍ਪਨ੍ਨੇ, ਤਤੋ ਵੋਟ੍ਠਬ੍ਬਨੇਪਿ ਚ;

ਕੁਸਲਂ ਜਵਨਂ ਚਿਤ੍ਤਂ, ਤਥਾਕੁਸਲਮੇਵ ਵਾ.

੪੯੬.

ਏਸੋ ਏਵ ਨਯੋ ਸੋਤ-ਦ੍ਵਾਰਾਦੀਸੁਪਿ ਵਿਞ੍ਞੁਨਾ;

ਅਵਿਸੇਸੇਨ ਵਿਞ੍ਞੇਯ੍ਯੋ, ਸਦ੍ਦਾਦੀਨਂ ਤੁ ਘਟ੍ਟਨੇ.

੪੯੭.

ਦੋਵਾਰਿਕੋਪਮਾਦੀਨਿ ¶ , ਏਤਸ੍ਸਤ੍ਥਸ੍ਸ ਦੀਪਨੇ;

ਉਦ੍ਧਰਿਤ੍ਵਾਨ ਤਾਨੇਤ੍ਥ, ਦਸ੍ਸੇਤਬ੍ਬਾਨਿ ਵਿਞ੍ਞੁਨਾ.

੪੯੮.

ਅਸਮ੍ਭੇਦੇਨ ਚਕ੍ਖੁਸ੍ਸ, ਰੂਪਾਪਾਥਗਮੇਨ ਚ;

ਆਲੋਕਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੪੯੯.

ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਜਾਯਤੇ ਚਕ੍ਖੁਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.

੫੦੦.

ਅਸਮ੍ਭੇਦੇਨ ਸੋਤਸ੍ਸ, ਸਦ੍ਦਾਪਾਥਗਮੇਨ ਚ;

ਆਕਾਸਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੫੦੧.

ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਜਾਯਤੇ ਸੋਤਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.

੫੦੨.

ਅਸਮ੍ਭੇਦੇਨ ¶ ਘਾਨਸ੍ਸ, ਗਨ੍ਧਾਪਾਥਗਮੇਨ ਚ;

ਵਾਯੋਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੫੦੩.

ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਜਾਯਤੇ ਘਾਨਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.

੫੦੪.

ਅਸਮ੍ਭੇਦੇਨ ਜਿਵ੍ਹਾਯ, ਰਸਾਪਾਥਗਮੇਨ ਚ;

ਆਪੋਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੫੦੫.

ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਜਾਯਤੇ ਜਿਵ੍ਹਾਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.

੫੦੬.

ਅਸਮ੍ਭੇਦੇਨ ¶ ਕਾਯਸ੍ਸ, ਫੋਟ੍ਠਬ੍ਬਾਪਾਥਸਙ੍ਗਮਾ;

ਪਥਵੀਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੫੦੭.

ਪਚ੍ਚਯੇਹਿ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਜਾਯਤੇ ਕਾਯਵਿਞ੍ਞਾਣਂ, ਸਮ੍ਪਯੁਤ੍ਤੇਹਿ ਤਂ ਸਹ.

੫੦੮.

ਅਸਮ੍ਭੇਦਾ ਮਨਸ੍ਸਾਪਿ, ਧਮ੍ਮਾਪਾਥਗਮੇਨ ਚ;

ਵਤ੍ਥੁਸਨ੍ਨਿਸ੍ਸਯੇਨਾਪਿ, ਸਮਨਕ੍ਕਾਰਹੇਤੁਨਾ.

੫੦੯.

ਪਚ੍ਚਯੇਹਿ ¶ ਪਨੇਤੇਹਿ, ਸਮੇਤੇਹਿ ਚਤੂਹਿਪਿ;

ਮਨੋਵਿਞ੍ਞਾਣਮੇਵਂ ਤੁ, ਸਮ੍ਪਯੁਤ੍ਤੇਹਿ ਜਾਯਤੇ.

੫੧੦.

ਮਨੋ ਭਵਙ੍ਗਚਿਤ੍ਤਨ੍ਤਿ, ਵੇਦਿਤਬ੍ਬਂ ਵਿਭਾਵਿਨਾ;

ਆਵਜ੍ਜਨਕ੍ਰਿਯਾਚਿਤ੍ਤਂ, ਸਮਨਕ੍ਕਾਰੋਤਿ ਸਞ੍ਞਿਤਂ.

੫੧੧.

ਵਤ੍ਥੁਸਨ੍ਨਿਸ੍ਸਯੇਨਾਤਿ, ਨਾਯਂ ਸਬ੍ਬਤ੍ਥ ਗਚ੍ਛਤਿ;

ਭਵਂ ਤੁ ਪਞ੍ਚਵੋਕਾਰਂ, ਸਨ੍ਧਾਯ ਕਥਿਤੋ ਪਨ.

੫੧੨.

ਪਟਿਸਨ੍ਧਾਦਿਚਿਤ੍ਤਾਨਿ, ਸਬ੍ਬਾਨੇਕੂਨਵੀਸਤਿ;

ਕਾਮੇ ਦਸ ਚ ਰੂਪੇਸੁ, ਪਞ੍ਚ ਚਤ੍ਤਾਰਿਰੂਪਿਸੁ.

੫੧੩.

ਕਮ੍ਮਂ ¶ ਕਮ੍ਮਨਿਮਿਤ੍ਤਞ੍ਚ, ਤਥਾ ਗਤਿਨਿਮਿਤ੍ਤਕਂ;

ਇਦਂ ਹਿ ਤਿਵਿਧਂ ਤੇਸਂ, ਆਰਮ੍ਮਣਮੁਦੀਰਿਤਂ.

੫੧੪.

ਕਾਮਾਵਚਰਸਨ੍ਧੀਨਂ, ਪਰਿਤ੍ਤਾਰਮ੍ਮਣਂ ਮਤਂ;

ਪਚ੍ਚੁਪ੍ਪਨ੍ਨਮਤੀਤਂ ਵਾ, ਹੋਤਿ ਨਤ੍ਥਿ ਅਨਾਗਤਂ.

੫੧੫.

ਅਟ੍ਠੇਵ ਚ ਮਹਾਪਾਕਾ, ਤੀਣਿ ਸਨ੍ਤੀਰਣਾਨਿ ਚ;

ਏਕਾਦਸਵਿਧਂ ਚਿਤ੍ਤਂ, ਤਦਾਰਮ੍ਮਣਸਞ੍ਞਿਤਂ.

੫੧੬.

ਏਕਾਦਸਵਿਧੇ ਚਿਤ੍ਤੇ, ਤਦਾਰਮ੍ਮਣਸਞ੍ਞਿਤੇ;

ਦਸ ਪੁਞ੍ਞਵਿਪਾਕਾਨਿ, ਏਕਂ ਹੋਤਿ ਅਪੁਞ੍ਞਜਂ.

੫੧੭.

ਮਹਾਪਾਕਾ ਨ ਜਾਯਨ੍ਤੇ, ਰੂਪਾਰੂਪਭਵਦ੍ਵਯੇ;

ਕਾਮੇ ਰੂਪੇ ਭਵੇ ਚੇਵ, ਹੋਤਿ ਸਨ੍ਤੀਰਣਤ੍ਤਯਂ.

੫੧੮.

ਤਦਾਰਮ੍ਮਣਚਿਤ੍ਤਾਨਿ, ਯਾਨਿ ਵੁਤ੍ਤਾਨਿ ਸਤ੍ਥੁਨਾ;

ਤੇਸੁ ਚਿਤ੍ਤਂ ਪਨੇਕਮ੍ਪਿ, ਰੂਪਾਰੂਪਭਵਦ੍ਵਯੇ.

੫੧੯.

ਨ ਤਦਾਰਮ੍ਮਣਂ ਹੁਤ੍ਵਾ, ਪਵਤ੍ਤਤਿ ਕਦਾਚਿਪਿ;

ਕਸ੍ਮਾ ਨ ਹੋਤਿ ਚੇ ਤਤ੍ਥ, ਬੀਜਸ੍ਸਾਭਾਵਤੋ ਪਨ.

੫੨੦.

ਪਟਿਸਨ੍ਧਿਬੀਜਂ ਨਤ੍ਥੇਤ੍ਥ, ਕਾਮਾਵਚਰਸਞ੍ਞਿਤਂ;

ਰੂਪਾਦਿਗੋਚਰੇ ਤਸ੍ਸ, ਭਵੇਯ੍ਯ ਜਨਕਂ ਤੁ ਯਂ.

੫੨੧.

ਚਕ੍ਖੁਵਿਞ੍ਞਾਣਕਾਦੀਨਂ ¶ , ਨਤ੍ਥਿਤਾਪਜ੍ਜਤੀਤਿ ਚੇ;

ਨਿਨ੍ਦ੍ਰਿਯਾਨਂ ਪਵਤ੍ਤਾਨੁ-ਭਾਵਤੋ ਚਿਤ੍ਤਸਮ੍ਭਵੋ.

੫੨੨.

ਏਕਨ੍ਤੇਨ ਯਥਾ ਚੇਤਂ, ਤਦਾਰਮ੍ਮਣਮਾਨਸਂ;

ਨਪ੍ਪਵਤ੍ਤਤਿ ਸਬ੍ਬਮ੍ਪਿ, ਰੂਪਾਰੂਪਭਵਦ੍ਵਯੇ.

੫੨੩.

ਅਕਾਮਾਵਚਰਧਮ੍ਮੇਪਿ, ਤਦੇਤਂ ਨਾਨੁਬਨ੍ਧਤਿ;

ਕਸ੍ਮਾ ਅਜਨਕਤ੍ਤਾ ਹਿ, ਜਨਕਸ੍ਸਾਸਮਾਨਤੋ.

੫੨੪.

ਜਨਕਂ ¶ ਤੇਨ ਤੁਲ੍ਯਂ ਵਾ, ਕਾਮਾਵਚਰਸਞ੍ਞਿਤਂ;

ਕੁਸਲਾਕੁਸਲਾਦਿਂ ਤੁ, ਜਵਨਂ ਅਨੁਬਨ੍ਧਤਿ.

੫੨੫.

ਕਾਮਾਵਚਰਧਮ੍ਮਾਪਿ ¶ , ਯੇ ਮਹਗ੍ਗਤਗੋਚਰਾ;

ਹੁਤ੍ਵਾ ਵਤ੍ਤਨ੍ਤਿ ਤੇ ਚਾਪਿ, ਇਦਂ ਨੇਵਾਨੁਬਨ੍ਧਤਿ.

੫੨੬.

ਪਰਿਤ੍ਤਾਰਮ੍ਮਣਤ੍ਤਾ ਚ, ਏਕਨ੍ਤੇਨ ਪਨਸ੍ਸ ਹਿ;

ਤਥਾਪਰਿਚਿਤਤ੍ਤਾ ਚ, ਨਾਨੁਬਨ੍ਧਤਿ ਸਬ੍ਬਦਾ.

੫੨੭.

ਕਿਂ ਤੇਨ ਯੁਤ੍ਤਿਵਾਦੇਨ, ਵੁਤ੍ਤਂ ਅਟ੍ਠਕਥਾਸੁ ਹਿ;

ਤਦਾਰਮ੍ਮਣਚਿਤ੍ਤਾਨਿ, ਏਕਾਦਸਪਿ ਸਬ੍ਬਸੋ.

੫੨੮.

ਨਾਮਗੋਤ੍ਤਂ ਪਨਾਰਬ੍ਭ, ਜਵਨੇ ਜਵਿਤੇਪਿ ਚ;

ਤਦਾਰਮ੍ਮਣਂ ਨ ਗਣ੍ਹਨ੍ਤਿ, ਰੂਪਾਰੂਪਭਵੇਸੁ ਵਾ.

੫੨੯.

ਯਦਾ ਪਞ੍ਞਤ੍ਤਿਮਾਰਬ੍ਭ, ਜਵਨੇ ਜਵਿਤੇਪਿ ਵਾ;

ਤਥਾ ਵਿਪਸ੍ਸਨਾਯਾਪਿ, ਲਕ੍ਖਣਾਰਮ੍ਮਣਾਯ ਚ.

੫੩੦.

ਤਦਾਰਮ੍ਮਣਾ ਨ ਲਬ੍ਭਨ੍ਤਿ, ਮਿਚ੍ਛਤ੍ਤਨਿਯਤੇਸੁਪਿ;

ਨ ਲੋਕੁਤ੍ਤਰਧਮ੍ਮੇਪਿ, ਆਰਬ੍ਭ ਜਵਨੇ ਗਤੇ.

੫੩੧.

ਤਥਾ ਮਹਗ੍ਗਤੇ ਧਮ੍ਮੇ, ਆਰਬ੍ਭ ਜਵਨੇ ਪਨ;

ਪਟਿਸਮ੍ਭਿਦਾਞਾਣਾਨਿ, ਆਰਬ੍ਭ ਜਵਿਤੇਪਿ ਚ.

੫੩੨.

ਮਨੋਦ੍ਵਾਰੇਪਿ ਸਬ੍ਬੇਸਂ, ਜਵਨਾਨਮਨਨ੍ਤਰਂ;

ਤਦਾਰਮ੍ਮਣਚਿਤ੍ਤਾਨਿ, ਭਵਨ੍ਤਿ ਅਨੁਪੁਬ੍ਬਤੋ.

੫੩੩.

ਨ ¶ ਵਿਜ੍ਜਤਿ ਮਨੋਦ੍ਵਾਰੇ, ਘਟ੍ਟਨਾਰਮ੍ਮਣਸ੍ਸ ਹਿ;

ਕਥਂ ਭਵਙ੍ਗਤੋ ਹੋਤਿ, ਵੁਟ੍ਠਾਨਂ ਪਨ ਚੇਤਸੋ.

੫੩੪.

ਮਨੋਦ੍ਵਾਰੇਪਿ ਆਪਾਥ-ਮਾਗਚ੍ਛਨ੍ਤੇਵ ਗੋਚਰਾ;

ਘਟ੍ਟਨਾਯ ਵਿਨਾ ਤਸ੍ਮਾ, ਚਿਤ੍ਤਾਨਂ ਹੋਤਿ ਸਮ੍ਭਵੋ.

੫੩੫.

ਦ੍ਵਾਦਸਾਪੁਞ੍ਞਚਿਤ੍ਤਾਨਂ ¶ , ਵਿਪਾਕਾ ਸਤ੍ਤਸਤ੍ਤਤਿ;

ਭਵਨ੍ਤਿ ਚਤੁਰਾਸੀਤਿ, ਪਾਪਪਾਕਾ ਪਵਤ੍ਤਿਯਂ.

੫੩੬.

ਏਕਾਦਸਵਿਧਾਨਂ ਤੁ, ਹਿਤ੍ਵਾ ਉਦ੍ਧਚ੍ਚਮਾਨਸਂ;

ਏਕਾਦਸਵਿਧਾ ਚੇਵ, ਭਵਨ੍ਤਿ ਪਟਿਸਨ੍ਧਿਯੋ.

੫੩੭.

ਕ੍ਰਿਯਚਿਤ੍ਤੇਸੁ ਸਬ੍ਬੇਸੁ, ਜਵਨਂ ਨ ਚ ਹੋਤਿ ਯਂ;

ਤਂ ਵੇ ਕਰਣਮਤ੍ਤਤ੍ਤਾ, ਵਾਤਪੁਪ੍ਫਸਮਂ ਮਤਂ.

੫੩੮.

ਜਵਨਤ੍ਤਂ ਤੁ ਸਮ੍ਪਤ੍ਤਂ, ਕਿਚ੍ਚਸਾਧਨਤੋ ਪਨ;

ਛਿਨ੍ਨਮੂਲਸ੍ਸ ਰੁਕ੍ਖਸ੍ਸ, ਪੁਪ੍ਫਂਵ ਅਫਲਂ ਸਿਯਾ.

੫੩੯.

ਪਟਿਚ੍ਚ ਪਨ ਏਤਸ੍ਮਾ, ਫਲਮੇਤੀਤਿ ਪਚ੍ਚਯੋ;

ਯੋ ਧਮ੍ਮੋ ਯਸ੍ਸ ਧਮ੍ਮਸ੍ਸ, ਠਿਤਿਯੁਪ੍ਪਤ੍ਤਿਯਾਪਿ ਵਾ.

੫੪੦.

ਉਪਕਾਰੋ ਹਿ ਸੋ ਤਸ੍ਸ, ਪਚ੍ਚਯੋਤਿ ਪਵੁਚ੍ਚਤਿ;

ਸਮ੍ਭਵੋਪਭਵੋ ਹੇਤੁ, ਕਾਰਣਂ ਪਚ੍ਚਯੋ ਮਤੋ.

੫੪੧.

ਲੋਭਾਦਿ ਪਨ ਯੋ ਧਮ੍ਮੋ, ਮੂਲਟ੍ਠੇਨੁਪਕਾਰਕੋ;

ਹੇਤੂਤਿ ਪਨ ਸੋ ਧਮ੍ਮੋ, ਵਿਞ੍ਞਾਤਬ੍ਬੋ ਵਿਭਾਵਿਨਾ.

੫੪੨.

ਲੋਭੋ ਦੋਸੋ ਚ ਮੋਹੋ ਚ,

ਤਥਾਲੋਭਾਦਯੋ ਤਯੋ;

ਛਲ਼ੇਵ ਹੇਤੁਯੋ ਹੋਨ੍ਤਿ,

ਜਾਤਿਤੋ ਨਵਧਾ ਸਿਯੁਂ.

੫੪੩.

ਧਮ੍ਮਾਨਂ ਕੁਸਲਾਦੀਨਂ, ਕੁਸਲਾਦਿਤ੍ਤਸਾਧਕੋ;

ਮੂਲਟ੍ਠੋਤਿ ਵਦਨ੍ਤੇਵਂ, ਏਕੇ ਆਚਰਿਯਾ ਪਨ.

੫੪੪.

ਏਵਂ ¶ ¶ ਸਨ੍ਤੇ ਤੁ ਹੇਤੂਨਂ, ਤਂਸਮੁਟ੍ਠਾਨਰੂਪਿਸੁ;

ਹੇਤੁਪਚ੍ਚਯਤਾ ਨੇਵ, ਸਮ੍ਪਜ੍ਜਤਿ ਕਦਾਚਿਪਿ.

੫੪੫.

ਨ ਹਿ ਤੇ ਪਨ ਰੂਪਾਨਂ, ਸਾਧੇਨ੍ਤਿ ਕੁਸਲਾਦਿਕਂ;

ਨ ਤੇਸਂ ਪਨ ਰੂਪਾਨਂ, ਪਚ੍ਚਯਾ ਨ ਚ ਹੋਨ੍ਤਿ ਤੇ.

੫੪੬.

ਤਸ੍ਮਾ ¶ ਹਿ ਕੁਸਲਾਦੀਨਂ, ਕੁਸਲਾਦਿਤ੍ਤਸਾਧਕੋ;

ਮੂਲਟ੍ਠੋਤਿ ਨ ਗਨ੍ਤਬ੍ਬੋ, ਵਿਞ੍ਞੁਨਾ ਸਮਯਞ੍ਞੁਨਾ.

੫੪੭.

ਸੁਪ੍ਪਤਿਟ੍ਠਿਤਭਾਵਸ੍ਸ, ਸਾਧਨੇਨੁਪਕਾਰਕੋ;

ਮੂਲਟ੍ਠੋਤਿ ਚ ਹੇਤੂਨਂ, ਵਿਞ੍ਞਾਤਬ੍ਬੋ ਵਿਭਾਵਿਨਾ.

੫੪੮.

ਕੁਸਲਾਕੁਸਲਾ ਹੇਤੂ, ਕ੍ਰਿਯਾਹੇਤੂ ਚ ਸਬ੍ਬਸੋ;

ਧਮ੍ਮਾਨਂ ਸਮ੍ਪਯੁਤ੍ਤਾਨਂ, ਤਂਸਮੁਟ੍ਠਾਨਰੂਪਿਨਂ.

੫੪੯.

ਹੇਤੁਪਚ੍ਚਯਤਂ ਯਾਤਾ, ਪਞ੍ਚਵੋਕਾਰਭੂਮਿਯਂ;

ਸਮ੍ਪਯੁਤ੍ਤਾਨਮੇਵੇਤੇ, ਚਤੁਵੋਕਾਰਭੂਮਿਯਂ.

੫੫੦.

ਕਾਮੇ ਵਿਪਾਕਹੇਤੂਪਿ, ਕਾਮਾਵਚਰਭੂਮਿਯਂ;

ਅਤ੍ਤਨਾ ਸਮ੍ਪਯੁਤ੍ਤਾਨਂ, ਪਟਿਸਨ੍ਧਿਕ੍ਖਣੇ ਪਨ.

੫੫੧.

ਕਟਤ੍ਤਾਰੂਪਜਾਤਾਨਂ, ਤਥੇਵ ਚ ਪਵਤ੍ਤਿਯਂ;

ਚਿਤ੍ਤਜਾਨਞ੍ਚ ਰੂਪਾਨਂ, ਹੇਤੁਪਚ੍ਚਯਤਂ ਗਤਾ.

੫੫੨.

ਰੂਪੇ ਵਿਪਾਕਹੇਤੁ ਚ, ਰੂਪਾਵਚਰਭੂਮਿਯਂ;

ਤਥਾ ਵੁਤ੍ਤਪ੍ਪਕਾਰਾਨਂ, ਹੋਨ੍ਤਿ ਤੇ ਹੇਤੁਪਚ੍ਚਯਾ.

੫੫੩.

ਹੇਤੁਯੋ ਪਞ੍ਚਵੋਕਾਰੇ, ਲੋਕੁਤ੍ਤਰਵਿਪਾਕਜਾ;

ਚਿਤ੍ਤਜਾਨਞ੍ਚ ਰੂਪਾਨਂ, ਸਮ੍ਪਯੁਤ੍ਤਾਨਮੇਵ ਚ.

੫੫੪.

ਤੇ ਹੇਤੁਪਚ੍ਚਯਾ ਹੋਨ੍ਤਿ, ਚਤੁਵੋਕਾਰਭੂਮਿਯਂ;

ਭਵਨ੍ਤਿ ਸਮ੍ਪਯੁਤ੍ਤਾਨਂ, ਇਤਰੇ ਚ ਸਭੂਮਿਯਂ.

੫੫੫.

ਹੇਤੁਤ੍ਥੋ ਹੇਤੁਯੋ ਚੇਵ, ਹੇਤੁਪਚ੍ਚਯਸਮ੍ਭਵੋ;

ਏਵਮੇਵ ਚ ਵਿਞ੍ਞੇਯ੍ਯੋ, ਸਞ੍ਜਾਤਸੁਖਹੇਤੁਨਾ.

੫੫੬.

ਛਨ੍ਦੋ ¶ ਚਿਤ੍ਤਞ੍ਚ ਵੀਰਿਯਂ, ਵੀਮਂਸਾ ਚਾਤਿ ਸਤ੍ਥੁਨਾ;

ਲੋਕਾਧਿਪਤਿਨਾ ਵੁਤ੍ਤਾ, ਚਤੁਧਾਧਿਪਤੀ ਸਿਯੁਂ.

੫੫੭.

ਛਨ੍ਦਂ ¶ ਤੁ ਜੇਟ੍ਠਕਂ ਕਤ੍ਵਾ, ਛਨ੍ਦਂ ਕਤ੍ਵਾ ਧੁਰਂ ਪਨ;

ਚਿਤ੍ਤਸ੍ਸੁਪ੍ਪਤ੍ਤਿਕਾਲਸ੍ਮਿਂ, ਛਨ੍ਦਾਧਿਪਤਿ ਨਾਮਸੋ.

੫੫੮.

ਏਸੇਵ ਚ ਨਯੋ ਞੇਯ੍ਯੋ, ਸੇਸੇਸੁਪਿ ਚ ਤੀਸੁਪਿ;

ਅਧਿਪ੍ਪਤੀਤਿ ਨਿਦ੍ਦਿਟ੍ਠੋ, ਜੇਟ੍ਠਟ੍ਠੇਨੁਪਕਾਰਕੋ.

੫੫੯.

ਸੁਮਤਿਮਤਿਵਿਬੋਧਨਂ ਵਿਚਿਤ੍ਤਂ,

ਕੁਮਤਿਮਤਿਨ੍ਧਨਪਾਵਕਂ ਪਧਾਨਂ;

ਇਮਮਤਿਮਧੁਰਂ ਅਵੇਦਿ ਯੋ ਯੋ,

ਜਿਨਵਚਨਂ ਸਕਲਂ ਅਵੇਦਿ ਸੋ ਸੋ.

ਇਤਿ ਅਭਿਧਮ੍ਮਾਵਤਾਰੇ ਪਕਿਣ੍ਣਕਨਿਦ੍ਦੇਸੋ ਨਾਮ

ਅਟ੍ਠਮੋ ਪਰਿਚ੍ਛੇਦੋ.

੯. ਨਵਮੋ ਪਰਿਚ੍ਛੇਦੋ

ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸੋ

੫੬੦.

ਬਾਤ੍ਤਿਂਸ ¶ ਪਾਕਚਿਤ੍ਤਾਨਿ, ਲੋਕਿਕਾਨੇਵ ਯਾਨਿ ਹਿ;

ਏਤੇਸਂ ਪਾਕਚਿਤ੍ਤਾਨਂ, ਪਟਿਸਨ੍ਧਿਪਵਤ੍ਤਿਸੁ.

੫੬੧.

ਪੁਞ੍ਞਾਪੁਞ੍ਞਾਦਿਸਙ੍ਖਾਰਾ, ਯਥਾ ਯੇਸਞ੍ਚ ਪਚ੍ਚਯਾ;

ਭਵਾਦੀਸੁ ਤਥਾ ਤੇਪਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ.

੫੬੨.

ਤਯੋ ਭਵਾ ਚਤਸ੍ਸੋ ਚ, ਯੋਨਿਯੋ ਗਤਿਪਞ੍ਚਕਂ;

ਵਿਞ੍ਞਾਣਟ੍ਠਿਤਿਯੋ ਸਤ੍ਤ, ਸਤ੍ਤਾਵਾਸਾ ਨਵੇਰਿਤਾ.

੫੬੩.

ਕਾਮੇ ¶ ਪੁਞ੍ਞਾਭਿਸਙ੍ਖਾਰ-ਸਞ੍ਞਿਤਾ ਅਟ੍ਠ ਚੇਤਨਾ;

ਨਵਨ੍ਨਂ ਪਾਕਚਿਤ੍ਤਾਨਂ, ਕਾਮੇ ਸੁਗਤਿਯਂ ਪਨ.

੫੬੪.

ਨਾਨਾਕ੍ਖਣਿਕਕਮ੍ਮੂਪ-ਨਿਸ੍ਸਯਪਚ੍ਚਯੇਹਿ ਚ;

ਦ੍ਵੇਧਾ ਹਿ ਪਚ੍ਚਯਾ ਤੇਸਂ, ਭਵਨ੍ਤਿ ਪਟਿਸਨ੍ਧਿਯਂ.

੫੬੫.

ਉਪੇਕ੍ਖਾਸਹਿਤਾਹੇਤੁ-ਮਨੋਵਿਞ੍ਞਾਣਧਾਤੁਯਾ ¶ ;

ਵਿਨਾ ਪਰਿਤ੍ਤਪਾਕਾਨਂ, ਹੋਨ੍ਤਿ ਦ੍ਵੇਧਾ ਪਵਤ੍ਤਿਯਂ.

੫੬੬.

ਤਾਯੇਵ ਚੇਤਨਾ ਰੂਪ-ਭਵੇ ਦ੍ਵੇਧਾਵ ਪਚ੍ਚਯਾ;

ਪਞ੍ਚਨ੍ਨਂ ਪਾਕਚਿਤ੍ਤਾਨਂ, ਭਵਨ੍ਤਿ ਹਿ ਪਵਤ੍ਤਿਯਂ.

੫੬੭.

ਅਟ੍ਠਨ੍ਨਂ ਤੁ ਪਰਿਤ੍ਤਾਨਂ, ਕਾਮੇ ਦੁਗ੍ਗਤਿਯਂ ਤਥਾ;

ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.

੫੬੮.

ਹੋਨ੍ਤਿ ਵੁਤ੍ਤਪ੍ਪਕਾਰਾਵ, ਕਾਮੇ ਸੁਗਤਿਯਂ ਤਥਾ;

ਸੋਲ਼ਸਨ੍ਨਂ ਵਿਪਾਕਾਨਂ, ਪਵਤ੍ਤੇ ਪਟਿਸਨ੍ਧਿਯਂ.

੫੬੯.

ਰੂਪੇ ਪੁਞ੍ਞਾਭਿਸਙ੍ਖਾਰਾ, ਰੂਪਾਵਚਰਭੂਮਿਯਂ;

ਪਞ੍ਚਨ੍ਨਂ ਪਾਕਚਿਤ੍ਤਾਨਂ, ਪਚ੍ਚਯਾ ਪਟਿਸਨ੍ਧਿਯਂ.

੫੭੦.

ਹੋਨ੍ਤਿਮਾਪੁਞ੍ਞਸਙ੍ਖਾਰਾ, ਕਾਮੇ ਦੁਗ੍ਗਤਿਯਂ ਦ੍ਵਿਧਾ;

ਵਿਞ੍ਞਾਣਸ੍ਸ ਪਨੇਕਸ੍ਸ, ਪਚ੍ਚਯਾ ਪਟਿਸਨ੍ਧਿਯਂ.

੫੭੧.

ਛਨ੍ਨਂ ਪਨ ਪਵਤ੍ਤੇਵ, ਹੋਨ੍ਤਿ ਨੋ ਪਟਿਸਨ੍ਧਿਯਂ;

ਸਤ੍ਤਨ੍ਨਮ੍ਪਿ ਭਵਨ੍ਤੇਵ, ਪਵਤ੍ਤੇ ਪਟਿਸਨ੍ਧਿਯਂ.

੫੭੨.

ਕਾਮੇ ਸੁਗਤਿਯਂ ਤੇਸਂ, ਸਤ੍ਤਨ੍ਨਮ੍ਪਿ ਤਥੇਵ ਚ;

ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.

੫੭੩.

ਵਿਞ੍ਞਾਣਾਨਂ ਚਤੁਨ੍ਨਮ੍ਪਿ, ਤੇਸਂ ਰੂਪਭਵੇ ਤਥਾ;

ਪਵਤ੍ਤੇ ਪਚ੍ਚਯਾ ਹੋਨ੍ਤਿ, ਨ ਹੋਨ੍ਤਿ ਪਟਿਸਨ੍ਧਿਯਂ.

੫੭੪.

ਸੋ ¶ ਚ ਕਾਮਭਵੇਨਿਟ੍ਠ-ਰੂਪਾਦਿਉਪਲਦ੍ਧਿਯਂ;

ਅਨਿਟ੍ਠਰੂਪਾਦਯੋ ਪਨ, ਬ੍ਰਹ੍ਮਲੋਕੇ ਨ ਵਿਜ੍ਜਰੇ.

੫੭੫.

ਤਥੇਵਾਨੇਞ੍ਜਸਙ੍ਖਾਰੋ ¶ , ਅਰੂਪਾਵਚਰਭੂਮਿਯਂ;

ਚਤੁਨ੍ਨਂ ਪਾਕਚਿਤ੍ਤਾਨਂ, ਪਵਤ੍ਤੇ ਪਟਿਸਨ੍ਧਿਯਂ.

੫੭੬.

ਏਵਂ ¶ ਤਾਵ ਭਵੇਸ੍ਵੇਤੇ, ਪਟਿਸਨ੍ਧਿਪਵਤ੍ਤਿਸੁ;

ਯਥਾ ਚ ਪਚ੍ਚਯਾ ਹੋਨ੍ਤਿ, ਤਥਾ ਞੇਯ੍ਯਾ ਵਿਭਾਵਿਨਾ.

੫੭੭.

ਏਸੇਵ ਚ ਨਯੋ ਞੇਯ੍ਯੋ, ਯੋਨਿਆਦੀਸੁ ਤਤ੍ਰਿਦਂ;

ਆਦਿਤੋ ਪਨ ਪਟ੍ਠਾਯ, ਮੁਖਮਤ੍ਤਨਿਦਸ੍ਸਨਂ.

੫੭੮.

ਅਵਿਸੇਸੇਨ ਪੁਞ੍ਞਾਭਿ-ਸਙ੍ਖਾਰੋ ਦ੍ਵਿਭਵੇਸੁਪਿ;

ਦਤ੍ਵਾਨ ਪਟਿਸਨ੍ਧਿਂ ਤੁ, ਸਬ੍ਬਪਾਕਂ ਜਨੇਤਿ ਸੋ.

੫੭੯.

ਤਥਾ ਚਤੂਸੁ ਵਿਞ੍ਞੇਯ੍ਯੋ, ਅਣ੍ਡਜਾਦੀਸੁ ਯੋਨਿਸੁ;

ਬਹੁਦੇਵਮਨੁਸ੍ਸਾਨਂ, ਗਤੀਸੁ ਦ੍ਵੀਸੁ ਏਵ ਚ.

੫੮੦.

ਤਥਾ ਨਾਨਤ੍ਤਕਾਯਾਦਿ-ਵਿਞ੍ਞਾਣਾਨਂ ਠਿਤੀਸੁਪਿ;

ਤਥਾ ਵੁਤ੍ਤਪ੍ਪਕਾਰਸ੍ਮਿਂ, ਸਤ੍ਤਾਵਾਸੇ ਚਤੁਬ੍ਬਿਧੇ.

੫੮੧.

ਏਵਂ ਪੁਞ੍ਞਾਭਿਸਙ੍ਖਾਰੋ, ਭਵਾਦੀਸੁ ਯਥਾਰਹਂ;

ਏਕਵੀਸਤਿਪਾਕਾਨਂ, ਪਚ੍ਚਯੋ ਹੋਤਿ ਚ ਦ੍ਵਿਧਾ.

੫੮੨.

ਕਾਮੇ ਅਪੁਞ੍ਞਸਙ੍ਖਾਰੋ, ਭਵੇ ਚਤੂਸੁ ਯੋਨਿਸੁ;

ਤੀਸੁ ਗਤੀਸੁ ਏਕਿਸ੍ਸਾ, ਵਿਞ੍ਞਾਣਟ੍ਠਿਤਿਯਾਪਿ ਚ.

੫੮੩.

ਸਤ੍ਤਾਵਾਸੇ ਪਨੇਕਸ੍ਮਿਂ,

ਉਹੋਤਿ ਸੋ ਪਚ੍ਚਯੋ ਦ੍ਵਿਧਾ;

ਸਤ੍ਤਨ੍ਨਂ ਪਾਕਚਿਤ੍ਤਾਨਂ,

ਪਵਤ੍ਤੇ ਪਟਿਸਨ੍ਧਿਯਂ.

੫੮੪.

ਤਥੇਵਾਨੇਞ੍ਜਸਙ੍ਖਾਰੋ, ਏਕਾਰੂਪਭਵੇ ਪੁਨ;

ਏਕਿਸ੍ਸਾ ਯੋਨਿਯਾ ਚੇਵ, ਏਕਿਸ੍ਸਾ ਗਤਿਯਾਪਿ ਚ.

੫੮੫.

ਤੀਸੁ ਚਿਤ੍ਤਟ੍ਠਿਤੀਸ੍ਵੇਵ, ਸਤ੍ਤਾਵਾਸੇ ਚਤੁਬ੍ਬਿਧੇ;

ਚਤੁਨ੍ਨਂ ਪਾਕਚਿਤ੍ਤਾਨਂ, ਦ੍ਵੇਧਾ ਸੋ ਹੋਤਿ ਪਚ੍ਚਯੋ.

੫੮੬.

ਪਟਿਸਨ੍ਧਿਪਵਤ੍ਤੀਨਂ ¶ , ਵਸੇਨੇਵ ਭਵਾਦਿਸੁ;

ਵਿਜਾਨਿਤਬ੍ਬਾ ਸਙ੍ਖਾਰਾ, ਯਥਾ ਯੇਸਞ੍ਚ ਪਚ੍ਚਯਾ.

੫੮੭.

ਨ ¶ ਰੂਪਾਰੂਪਧਮ੍ਮਾਨਂ, ਸਙ੍ਕਨ੍ਤਿ ਪਨ ਵਿਜ੍ਜਤਿ;

ਸਙ੍ਕਨ੍ਤਿਭਾਵੇ ਅਸਤਿ, ਪਟਿਸਨ੍ਧਿ ਕਥਂ ਸਿਯਾ.

੫੮੮.

ਨਤ੍ਥਿ ਚਿਤ੍ਤਸ੍ਸ ਸਙ੍ਕਨ੍ਤਿ, ਅਤੀਤਭਵਤੋ ਇਧ;

ਤਤੋ ਹੇਤੁਂ ਵਿਨਾ ਤਸ੍ਸ, ਪਾਤੁਭਾਵੋ ਨ ਵਿਜ੍ਜਤਿ.

੫੮੯.

ਸੁਲਦ੍ਧਪਚ੍ਚਯਂ ਰੂਪਾ-ਰੂਪਮਤ੍ਤਂ ਤੁ ਜਾਯਤਿ;

ਉਪ੍ਪਜ੍ਜਮਾਨਮੇਵਂ ਤੁ, ਲਭਿਤ੍ਵਾ ਪਚ੍ਚਯਂ ਪਨ.

੫੯੦.

ਭਵਨ੍ਤਰਮੁਪੇਤੀਤਿ, ਸਮਞ੍ਞਾਯ ਪਵੁਚ੍ਚਤਿ;

ਨ ਚ ਸਤ੍ਤੋ ਨ ਚ ਜੀਵੋ, ਨ ਅਤ੍ਤਾ ਵਾਪਿ ਵਿਜ੍ਜਤਿ.

੫੯੧.

ਤਯਿਦਂ ਪਾਕਟਂ ਕਤ੍ਵਾ, ਪਟਿਸਨ੍ਧਿਕ੍ਕਮਂ ਪਨ;

ਦਸ੍ਸਯਿਸ੍ਸਾਮਹਂ ਸਾਧੁ, ਨਿਬੋਧਥ ਸੁਦੁਬ੍ਬੁਧਂ.

੫੯੨.

ਅਤੀਤਸ੍ਮਿਂ ¶ ਭਵੇ ਤਸ੍ਸ, ਆਸਨ੍ਨਮਰਣਸ੍ਸ ਹਿ;

ਹਰਿਤਂ ਤਾਲਪਣ੍ਣਂਵ, ਪਕ੍ਖਿਤ੍ਤਂ ਆਤਪੇ ਪਨ.

੫੯੩.

ਸੁਸ੍ਸਮਾਨੇ ਸਰੀਰਸ੍ਮਿਂ, ਨਟ੍ਠੇ ਚਕ੍ਖੁਨ੍ਦ੍ਰਿਯਾਦਿਕੇ;

ਹਦਯਵਤ੍ਥੁਮਤ੍ਤਸ੍ਮਿਂ, ਠਿਤੇ ਕਾਯਪ੍ਪਸਾਦਿਕੇ.

੫੯੪.

ਵਤ੍ਥੁਸਨ੍ਨਿਸ੍ਸਿਤਂ ਚਿਤ੍ਤਂ, ਹੋਤਿ ਤਸ੍ਮਿਂ ਖਣੇਪਿ ਚ;

ਪੁਬ੍ਬਾਨੁਸੇਵਿਤਂ ਕਮ੍ਮਂ, ਪੁਞ੍ਞਂ ਵਾਪੁਞ੍ਞਮੇਵ ਵਾ.

੫੯੫.

ਕਮ੍ਮਂ ਕਮ੍ਮਨਿਮਿਤ੍ਤਂ ਵਾ, ਆਲਮ੍ਬਿਤ੍ਵਾ ਪਵਤ੍ਤਤਿ;

ਏਵਂ ਪਵਤ੍ਤਮਾਨਂ ਤਂ, ਵਿਞ੍ਞਾਣਂ ਲਦ੍ਧਪਚ੍ਚਯਂ.

੫੯੬.

ਅਵਿਜ੍ਜਾਯ ਪਟਿਚ੍ਛਨ੍ਨਾ-ਦੀਨਵੇ ਵਿਸਯੇ ਪਨ;

ਤਣ੍ਹਾ ਨਮੇਤਿ ਸਙ੍ਖਾਰਾ, ਖਿਪਨ੍ਤਿ ਸਹਜਾ ਪਨ.

੫੯੭.

ਨ ਮੀਯਮਾਨਂ ਤਣ੍ਹਾਯ, ਤਂ ਸਨ੍ਤਤਿਵਸਾ ਪਨ;

ਓਰਿਮਾ ਪਨ ਤੀਰਮ੍ਹਾ, ਆਲਮ੍ਬਿਤ੍ਵਾਨ ਰਜ੍ਜੁਕਂ.

੫੯੮.

ਮਾਤਿਕਾਤਿਕ੍ਕਮੋਵੇਤਂ ¶ ¶ , ਪੁਰਿਮਂ ਜਹਤਿ ਨਿਸ੍ਸਯਂ;

ਅਪਰਂ ਕਮ੍ਮਸਮ੍ਭੂਤਂ, ਲਮ੍ਬਿਤ੍ਵਾ ਵਾਪਿ ਨਿਸ੍ਸਯਂ.

੫੯੯.

ਤਂ ਪਨਾਰਮ੍ਮਣਾਦੀਹਿ, ਪਚ੍ਚਯੇਹਿ ਪਵਤ੍ਤਤਿ;

ਪੁਰਿਮਂ ਚਵਨਂ ਏਤ੍ਥ, ਪਚ੍ਛਿਮਂ ਪਟਿਸਨ੍ਧਿ ਤੁ.

੬੦੦.

ਤਦੇਤਂ ਨਾਪਿ ਪੁਰਿਮਾ, ਭਵਤੋਪਿ ਇਧਾਗਤਂ;

ਕਮ੍ਮਾਦਿਞ੍ਚ ਵਿਨਾ ਹੇਤੁਂ, ਪਾਤੁਭੂਤਂ ਨ ਚੇਵ ਤਂ.

੬੦੧.

ਏਤ੍ਥ ਚੇਤਸ੍ਸ ਚਿਤ੍ਤਸ੍ਸ, ਪੁਰਿਮਾ ਭਵਤੋ ਪਨ;

ਇਧਾਨਾਗਮਨੇਤੀਤ-ਭਵਹੇਤੂਹਿ ਸਮ੍ਭਵੇ.

੬੦੨.

ਪਟਿਘੋਸਦੀਪਮੁਦ੍ਦਾਦੀ, ਭਵਨ੍ਤੇਤ੍ਥ ਨਿਦਸ੍ਸਨਾ;

ਯਥਾ ਆਗਨ੍ਤ੍ਵਾ ਅਞ੍ਞਤ੍ਰ, ਹੋਨ੍ਤਿ ਸਦ੍ਦਾਦਿਹੇਤੁਕਾ.

੬੦੩.

ਏਵਮੇਵ ਚ ਵਿਞ੍ਞਾਣਂ, ਵੇਦਿਤਬ੍ਬਂ ਵਿਭਾਵਿਨਾ;

ਸਨ੍ਤਾਨਬਨ੍ਧਤੋ ਨਤ੍ਥਿ, ਏਕਤਾ ਵਾਪਿ ਨਾਨਤਾ.

੬੦੪.

ਸਤਿ ਸਨ੍ਤਾਨਬਨ੍ਧੇ ਤੁ, ਏਕਨ੍ਤੇਨੇਕਤਾ ਸਿਯਾ;

ਖੀਰਤੋ ਦਧਿਸਮ੍ਭੂਤਂ, ਨ ਭਵੇਯ੍ਯ ਕਦਾਚਿਪਿ.

੬੦੫.

ਅਥਾਪਿ ਪਨ ਏਕਨ੍ਤ-ਨਾਨਤਾ ਸਾ ਭਵੇਯ੍ਯ ਚੇ;

ਖੀਰਸਾਮੀ ਨਰੋ ਨੇਵ, ਦਧਿਸਾਮੀ ਭਵੇਯ੍ਯ ਸੋ.

੬੦੬.

ਤਸ੍ਮਾ ਏਤ੍ਥ ਪਨੇਕਨ੍ਤ-ਏਕਤਾਨਾਨਤਾਪਿ ਵਾ;

ਨ ਚੇਵ ਉਪਗਨ੍ਤਬ੍ਬਾ, ਵਿਞ੍ਞੁਨਾ ਸਮਯਞ੍ਞੁਨਾ.

੬੦੭.

ਨਨੁ ਏਵਮਸਙ੍ਕਨ੍ਤਿ-ਪਾਤੁਭਾਵੇ ਤਸ੍ਸ ਸਤਿ;

ਯੇ ਇਮਸ੍ਮਿਂ ਮਨੁਸ੍ਸਤ੍ਤ-ਭਾਵੇ ਖਨ੍ਧਾਭਿਸਮ੍ਭਵਾ.

੬੦੮.

ਤੇਸਂ ਇਧ ਨਿਰੁਦ੍ਧਤ੍ਤਾ, ਕਮ੍ਮਸ੍ਸ ਫਲਹੇਤੁਨੋ;

ਪਰਤ੍ਥਾਗਮਤੋ ਚੇਵ, ਇਧ ਤਸ੍ਸ ਕਤਸ੍ਸ ਹਿ.

੬੦੯.

ਅਞ੍ਞਸ੍ਸ ¶ ਅਞ੍ਞਤੋ ਚੇਵ, ਕਮ੍ਮਤੋ ਤਂ ਫਲਂ ਸਿਯਾ;

ਤਸ੍ਮਾ ਨ ਸੁਨ੍ਦਰਂ ਏਤਂ, ਵਿਧਾਨਂ ਸਬ੍ਬਮੇਵ ਚ.

ਏਤ੍ਥਾਹ ¶ –

੬੧੦.

ਸਨ੍ਤਾਨੇ ¶ ਯਂ ਫਲਂ ਏਤਂ, ਨਾਞ੍ਞਸ੍ਸ ਨ ਚ ਅਞ੍ਞਤੋ;

ਬੀਜਾਨਂ ਅਭਿਸਙ੍ਖਾਰੋ, ਏਤਸ੍ਸਤ੍ਥਸ੍ਸ ਸਾਧਕੋ.

੬੧੧.

ਏਕਸ੍ਮਿਂ ਪਨ ਸਨ੍ਤਾਨੇ, ਵਤ੍ਤਮਾਨਂ ਫਲਂ ਪਨ;

ਅਞ੍ਞਸ੍ਸਾਤਿਪਿ ਵਾ ਨੇਵ, ਅਞ੍ਞਤੋ ਵਾ ਨ ਹੋਤਿ ਤਂ.

੬੧੨.

ਬੀਜਾਨਂ ਅਭਿਸਙ੍ਖਾਰਾ, ਏਤਸ੍ਸਤ੍ਥਸ੍ਸ ਸਾਧਕੋ;

ਬੀਜਾਨਂ ਅਭਿਸਙ੍ਖਾਰੇ, ਕਤੇ ਤੁ ਮਧੁਆਦਿਨਾ.

੬੧੩.

ਤਸ੍ਸ ਬੀਜਸ੍ਸ ਸਨ੍ਤਾਨੇ, ਪਠਮਂ ਲਦ੍ਧਪਚ੍ਚਯੋ;

ਮਧੁਰੋ ਫਲਸੋ ਤਸ੍ਸ, ਹੋਤਿ ਕਾਲਨ੍ਤਰੇ ਪਨ.

੬੧੪.

ਨ ਹਿ ਤਾਨਿ ਹਿ ਬੀਜਾਨਿ, ਅਭਿਸਙ੍ਖਰਣਮ੍ਪਿ ਵਾ;

ਪਾਪੁਣਨ੍ਤਿ ਫਲਟ੍ਠਾਨਂ, ਏਵਂ ਞੇਯ੍ਯਮਿਦਮ੍ਪਿ ਚ.

੬੧੫.

ਬਾਲਕਾਲੇ ਪਯੁਤ੍ਤੇਨ, ਵਿਜ੍ਜਾਸਿਪ੍ਪੋਸਧਾਦਿਨਾ;

ਦੀਪੇਤਬ੍ਬੋ ਅਯਂ ਵੁਦ੍ਧ-ਕਾਲਸ੍ਮਿਂ ਫਲਦਾਯਿਨਾ.

੬੧੬.

ਏਵਂ ਸਨ੍ਤੇਪਿ ਤਂ ਕਮ੍ਮਂ, ਵਿਜ੍ਜਮਾਨਮ੍ਪਿ ਵਾ ਪਨ;

ਫਲਸ੍ਸ ਪਚ੍ਚਯੋ ਹੋਤਿ, ਅਥ ਵਾਵਿਜ੍ਜਮਾਨਕਂ.

੬੧੭.

ਵਿਜ੍ਜਮਾਨਂ ਸਚੇ ਹੋਤਿ, ਤਪ੍ਪਵਤ੍ਤਿਕ੍ਖਣੇ ਪਨ;

ਭਵਿਤਬ੍ਬਂ ਵਿਪਾਕੇਨ, ਸਦ੍ਧਿਮੇਵ ਚ ਹੇਤੁਨਾ.

੬੧੮.

ਅਥ ਵਾਵਿਜ੍ਜਮਾਨਂ ਤਂ, ਨਿਰੁਦ੍ਧਂ ਪਚ੍ਚਯੋ ਭਵੇ;

ਪਵਤ੍ਤਿਕ੍ਖਣਤੋ ਪੁਬ੍ਬੇ, ਪਚ੍ਛਾ ਨਿਚ੍ਚਫਲਂ ਸਿਯਾ.

ਵੁਚ੍ਚਤੇ ¶ –

੬੧੯.

ਕਟਤ੍ਤਾ ਪਚ੍ਚਯੋ ਕਮ੍ਮਂ, ਤਸ੍ਮਾ ਨਿਚ੍ਚਫਲਂ ਨ ਚ;

ਪਾਟਿਭੋਗਾਦਿਕਂ ਕਮ੍ਮਂ, ਵੇਦਿਤਬ੍ਬਂ ਨਿਦਸ੍ਸਨਂ.

੬੨੦.

ਕਟਤ੍ਤਾਯੇਵ ¶ ਤਂ ਕਮ੍ਮਂ, ਫਲਸ੍ਸ ਪਨ ਪਚ੍ਚਯੋ;

ਨ ਚਸ੍ਸ ਵਿਜ੍ਜਮਾਨਤ੍ਤਂ, ਤਸ੍ਸ ਵਾਵਿਜ੍ਜਮਾਨਤਾ.

੬੨੧.

ਅਭਿਧਮ੍ਮਾਵਤਾਰੋਯਂ, ਪਰਮਤ੍ਥਪਕਾਸਨੋ;

ਸੋਤਬ੍ਬੋ ਪਨ ਸੋਤੂਨਂ, ਪੀਤਿਬੁਦ੍ਧਿਵਿਵਡ੍ਢਨੋ.

ਇਤਿ ਅਭਿਧਮ੍ਮਾਵਤਾਰੇ ਪੁਞ੍ਞਵਿਪਾਕਪਚ੍ਚਯਨਿਦ੍ਦੇਸੋ ਨਾਮ

ਨਵਮੋ ਪਰਿਚ੍ਛੇਦੋ.

੧੦. ਦਸਮੋ ਪਰਿਚ੍ਛੇਦੋ

ਰੂਪਵਿਭਾਗਨਿਦ੍ਦੇਸੋ

੬੨੨.

ਵੁਤ੍ਤਮਾਦਿਮ੍ਹਿ ¶ ਯਂ ਰੂਪਂ, ਚਿਤ੍ਤਜਾਨਮਨਨ੍ਤਰਂ;

ਤਸ੍ਸ ਦਾਨਿ ਕਰਿਸ੍ਸਾਮਿ, ਸਮਾਸੇਨ ਵਿਭਾਵਨਂ.

੬੨੩.

ਯਂ ਰੁਪ੍ਪਤੀਤਿ ਰੂਪਨ੍ਤਿ, ਤਥਾ ਰੂਪਯਤੀਤਿ ਵਾ;

ਰੂਪਾਰੂਪਭਵਾਤੀਤੋ, ਸੁਰੂਪੋ ਰੂਪਮਬ੍ਰਵਿ.

੬੨੪.

ਤਂ ਰੂਪਂ ਦੁਵਿਧਂ ਹੋਤਿ, ਭੂਤੋਪਾਦਾਯਭੇਦਤੋ;

ਚਤੁਬ੍ਬਿਧਾ ਮਹਾਭੂਤਾ, ਉਪਾਦਾ ਚਤੁਵੀਸਤਿ.

੬੨੫.

ਪਥਵੀਧਾਤੁ ਆਪੋ ਚ,

ਤੇਜੋ ਵਾਯੋ ਤਥੇਵ ਚ;

ਚਤ੍ਤਾਰੋਮੇ ਮਹਾਭੂਤਾ,

ਮਹਾਭੂਤੇਨ ਦੇਸਿਤਾ.

੬੨੬.

ਮਹਨ੍ਤਾ ਪਾਤੁਭੂਤਾਤਿ, ਮਹਾਭੂਤਸਮਾਤਿ ਵਾ;

ਵਞ੍ਚਕਤ੍ਤਾ ਅਭੂਤੇਨ, ਮਹਾਭੂਤਾਤਿ ਸਞ੍ਞਿਤਾ.

੬੨੭.

ਚਕ੍ਖੁ ¶ ¶ ਸੋਤਞ੍ਚ ਘਾਨਞ੍ਚ, ਜਿਵ੍ਹਾ ਕਾਯੋ ਚ ਰੂਪਤਾ;

ਸਦ੍ਦੋ ਗਨ੍ਧੋ ਰਸੋ ਇਤ੍ਥਿ-ਪੁਰਿਸਿਨ੍ਦ੍ਰਿਯਜੀਵਿਤਂ.

੬੨੮.

ਵਤ੍ਥੁਮਾਹਾਰਤਾ ਕਾਯ-ਵਚੀਵਿਞ੍ਞਤ੍ਤਿਯੋ ਦੁਵੇ;

ਆਕਾਸੋ ਚੇਵ ਰੂਪਸ੍ਸ, ਲਹੁਤਾਦਿਤ੍ਤਯਮ੍ਪਿ ਚ.

੬੨੯.

ਉਪਚਯੋ ਸਨ੍ਤਤਿਰੂਪਂ, ਜਰਤਾਨਿਚ੍ਚਤਾਪਿ ਚ;

ਉਪਾਦਾਤਿ ਪਵੁਚ੍ਚਨ੍ਤਿ, ਇਮਾਨਿ ਚਤੁਵੀਸਤਿ.

੬੩੦.

ਮਹਾਭੂਤਾਨਿ ਨਿਸ੍ਸਾਯ, ਅਮੁਞ੍ਚਿਤ੍ਵਾ ਪਵਤ੍ਤਿਤੋ;

ਉਪਾਦਾਰੂਪਮਿਚ੍ਚਾਹ, ਨਿਰੁਪਾਦਾਨਮਾਨਸੋ.

੬੩੧.

ਪਥਵੀ ਪਤ੍ਥਟਤ੍ਤਾ ਚ, ਵਾਯੋ ਵਾਯਨਤੋ ਭਵੇ;

ਤੇਜੋ ਤੇਜੇਤਿ ਰੂਪਾਨਿ, ਆਪੋ ਆਪੇਤਿ ਪਾਲਨਾ.

੬੩੨.

ਤੇਸਂ ਦਾਨਿ ਪਵਕ੍ਖਾਮਿ, ਰੂਪਾਨਂ ਲਕ੍ਖਣਾਦਿਕਂ;

ਲਕ੍ਖਣਾਦੀਸੁ ਞਾਤੇਸੁ, ਧਮ੍ਮਾ ਆਵਿ ਭਵਨ੍ਤਿ ਹਿ.

੬੩੩.

ਸਾਮਞ੍ਞਂ ਵਾ ਸਭਾਵੋ ਵਾ, ਧਮ੍ਮਾਨਂ ਲਕ੍ਖਣਂ ਮਤਂ;

ਕਿਚ੍ਚਂ ਵਾ ਤਸ੍ਸ ਸਮ੍ਪਤ੍ਤਿ, ਰਸੋਤਿ ਪਰਿਦੀਪਿਤੋ.

੬੩੪.

ਫਲਂ ਵਾ ਪਚ੍ਚੁਪਟ੍ਠਾਨਂ, ਉਪਟ੍ਠਾਨਨਯੋਪਿ ਵਾ;

ਆਸਨ੍ਨਕਾਰਣਂ ਯਂ ਤੁ, ਤਂ ਪਦਟ੍ਠਾਨਸਞ੍ਞਿਤਂ.

ਤਤ੍ਥ ¶ ਕਕ੍ਖਲ਼ਤ੍ਤਲਕ੍ਖਣਾ ਪਥਵੀਧਾਤੁ, ਪਤਿਟ੍ਠਾਨਰਸਾ, ਸਮ੍ਪਟਿਚ੍ਛਨਪਚ੍ਚੁਪਟ੍ਠਾਨਾ. ਪਗ੍ਘਰਣਲਕ੍ਖਣਾ ਆਪੋਧਾਤੁ, ਉਪਬ੍ਰੂਹਨਰਸਾ, ਸਙ੍ਗਹਪਚ੍ਚੁਪਟ੍ਠਾਨਾ. ਉਣ੍ਹਤ੍ਤਲਕ੍ਖਣਾ ਤੇਜੋਧਾਤੁ, ਪਰਿਪਾਚਨਰਸਾ, ਮਦ੍ਦਵਾਨੁਪ੍ਪਦਾਨਪਚ੍ਚੁਪਟ੍ਠਾਨਾ. ਵਿਤ੍ਥਮ੍ਭਨਲਕ੍ਖਣਾ ਵਾਯੋਧਾਤੁ, ਸਮੁਦੀਰਣਰਸਾ, ਅਭਿਨੀਹਾਰਪਚ੍ਚੁਪਟ੍ਠਾਨਾ. ਏਕੇਕਾਯ ਚੇਤ੍ਥ ਸੇਸਭੂਤਤ੍ਤਯਪਦਟ੍ਠਾਨਾਤਿ ਵੇਦਿਤਬ੍ਬਾ.

ਚਕ੍ਖਤੀਤਿ ਚਕ੍ਖੁ, ਰੂਪਂ ਵਿਭਾਵੇਤੀਤਿ ਅਤ੍ਥੋ.

੬੩੫.

ਤਤ੍ਥ ¶ ¶ ਚਕ੍ਖੁ ਦ੍ਵਿਧਾ ਵੁਤ੍ਤਂ, ਪਞ੍ਞਾਮਂਸਪ੍ਪਭੇਦਤੋ;

ਤਤ੍ਥ ਪਞ੍ਞਾਮਯਂ ਚਕ੍ਖੁ, ਹੋਤਿ ਪਞ੍ਚਵਿਧਂ ਪਨ.

੬੩੬.

ਬੁਦ੍ਧਧਮ੍ਮਸਮਨ੍ਤੇਹਿ, ਞਾਣਦਿਬ੍ਬੇਹਿ ਨਾਮਤੋ;

ਯਥਾਨੁਕ੍ਕਮਤੋ ਤੇਸਂ, ਨਾਨਤ੍ਤਂ ਮੇ ਨਿਬੋਧਥ.

੬੩੭.

ਆਸਯਾਨੁਸਯੇ ਞਾਣਂ, ਇਨ੍ਦ੍ਰਿਯਾਨਂ ਪਰੋਪਰੇ;

ਬੁਦ੍ਧਚਕ੍ਖੁਨ੍ਤਿ ਨਿਦ੍ਦਿਟ੍ਠਂ, ਮੁਨਿਨਾ ਲੋਕਚਕ੍ਖੁਨਾ.

੬੩੮.

ਹੇਟ੍ਠਾਮਗ੍ਗਤ੍ਤਯੇ ਞਾਣਂ, ਧਮ੍ਮਚਕ੍ਖੁਨ੍ਤਿ ਸਞ੍ਞਿਤਂ;

ਞੇਯ੍ਯਂ ਸਮਨ੍ਤਚਕ੍ਖੁਨ੍ਤਿ, ਞਾਣਂ ਸਬ੍ਬਞ੍ਞੁਤਾ ਪਨ.

੬੩੯.

ਯਂ ‘‘ਚਕ੍ਖੁਂ ਉਦਪਾਦੀ’’ਤਿ, ਆਗਤਂ ਞਾਣਚਕ੍ਖੁ ਤਂ;

ਅਭਿਞ੍ਞਾਚਿਤ੍ਤਜਾ ਪਞ੍ਞਾ, ਦਿਬ੍ਬਚਕ੍ਖੁਨ੍ਤਿ ਵੁਚ੍ਚਤਿ.

੬੪੦.

ਮਂਸਚਕ੍ਖੁਪਿ ਦੁਵਿਧਂ, ਸਸਮ੍ਭਾਰਪਸਾਦਤੋ;

ਸਸਮ੍ਭਾਰਞ੍ਚ ਨਾਮੇਤ੍ਥ, ਅਕ੍ਖਿਕੂਪੇ ਪਤਿਟ੍ਠਿਤਂ.

੬੪੧.

ਅਕ੍ਖਿਕੂਪਟ੍ਠਿਨਾ ਹੇਟ੍ਠਾ, ਉਦ੍ਧਞ੍ਚ ਭਮੁਕਟ੍ਠਿਨਾ;

ਉਭਤੋ ਅਕ੍ਖਿਕੂਟੇਹਿ, ਮਤ੍ਥਲੁਙ੍ਗੇਨ ਅਨ੍ਤਤੋ.

੬੪੨.

ਬਹਿਦ੍ਧਾ ਅਕ੍ਖਿਲੋਮੇਹਿ, ਪਰਿਚ੍ਛਿਨ੍ਨੋ ਚ ਯੋ ਪਨ;

ਨ੍ਹਾਰੁਸੁਤ੍ਤੇਨ ਆਬਨ੍ਧੋ, ਮਂਸਪਿਣ੍ਡੋ ਪਵੁਚ੍ਚਤਿ.

੬੪੩.

ਸਕਲੋਪਿ ਚ ਲੋਕੋਯਂ, ਕਮਲਸ੍ਸ ਦਲਂ ਵਿਯ;

ਪੁਥੁਲਂ ਵਿਪੁਲਂ ਨੀਲਂ, ਇਤਿ ਜਾਨਾਤਿ ਲੋਚਨਂ.

੬੪੪.

ਚਕ੍ਖੁ ਨਾਮ ਨ ਤਂ ਹੋਤਿ, ਵਤ੍ਥੁ ਤਸ੍ਸਾਤਿ ਵੁਚ੍ਚਤਿ;

ਇਦਂ ਪਨ ਸਸਮ੍ਭਾਰ-ਚਕ੍ਖੁਨ੍ਤਿ ਪਰਿਦੀਪਿਤਂ.

੬੪੫.

ਵਣ੍ਣੋ ਗਨ੍ਧੋ ਰਸੋ ਓਜਾ,

ਚਤਸ੍ਸੋ ਚਾਪਿ ਧਾਤੁਯੋ;

ਭਾਵਸਮ੍ਭਵਸਣ੍ਠਾਨਂ,

ਜੀਵਿਤਾਨਿ ਤਥੇਵ ਚ.

੬੪੬.

ਕਾਯਚਕ੍ਖੁਪਸਾਦਾਤਿ ¶ ¶ ,

ਸਮ੍ਭਾਰਾ ਹੋਨ੍ਤਿ ਚੁਦ੍ਦਸ;

ਤਥਾ ਵਿਤ੍ਥਾਰਤੋ ਚੇਤਂ,

ਚਤਸ੍ਸੋ ਚਾਪਿ ਧਾਤੁਯੋ.

੬੪੭.

ਵਣ੍ਣੋ ਗਨ੍ਧੋ ਰਸੋ ਓਜਾ,

ਸਣ੍ਠਾਨਸਮ੍ਭਵੋ ਤਥਾ;

ਦਸੇਤੇ ਚਤੁਸਮੁਟ੍ਠਾਨਾ,

ਚਤ੍ਤਾਲੀਸ ਭਵਨ੍ਤਿ ਤੇ.

੬੪੮.

ਚਕ੍ਖੁ ¶ ਕਾਯਪ੍ਪਸਾਦੋ ਚ, ਭਾਵੋ ਜੀਵਿਤਮੇਵ ਚ;

ਚਤ੍ਤਾਲੀਸਞ੍ਚ ਰੂਪਾਨਿ, ਚਤ੍ਤਾਰਿ ਤੁ ਭਵਨ੍ਤਿ ਹਿ.

੬੪੯.

ਇਮੇਸਂ ਪਨ ਰੂਪਾਨਂ, ਵਸੇਨ ਪਰਿਪਿਣ੍ਡਿਤਂ;

ਇਦਂ ਸਮ੍ਭਾਰਚਕ੍ਖੁਨ੍ਤਿ, ਪਣ੍ਡਿਤੇਹਿ ਪਕਾਸਿਤਂ.

੬੫੦.

ਯੋ ਪਨੇਤ੍ਥ ਸਿਤੋ ਅਤ੍ਥਿ, ਪਰਿਬਨ੍ਧੋ ਪਰਿਤ੍ਤਕੋ;

ਚਤੁਨ੍ਨਂ ਪਨ ਭੂਤਾਨਂ, ਪਸਾਦੋ ਕਮ੍ਮਸਮ੍ਭਵੋ.

੬੫੧.

ਇਦਂ ਪਸਾਦਚਕ੍ਖੁਨ੍ਤਿ, ਅਕ੍ਖਾਤਂ ਪਞ੍ਚਚਕ੍ਖੁਨਾ;

ਤਦੇਤਂ ਤਸ੍ਸ ਮਜ੍ਝੇ ਤੁ, ਸਸਮ੍ਭਾਰਸ੍ਸ ਚਕ੍ਖੁਨੋ.

੬੫੨.

ਸੇਤੇਨ ਮਣ੍ਡਲੇਨਸ੍ਸ, ਪਰਿਕ੍ਖਿਤ੍ਤਸ੍ਸ ਸਬ੍ਬਸੋ;

ਕਣ੍ਹਮਣ੍ਡਲਮਜ੍ਝੇ ਵਾ, ਨਿਵਿਟ੍ਠੇ ਦਿਟ੍ਠਮਣ੍ਡਲੇ.

੬੫੩.

ਸਨ੍ਧਾਰਣਾਦਿਕਿਚ੍ਚਾਹਿ, ਧਾਤੂਹਿ ਚ ਚਤੂਹਿਪਿ;

ਕਤੂਪਕਾਰਂ ਹੁਤ੍ਵਾਨ, ਉਤੁਚਿਤ੍ਤਾਦਿਨਾ ਪਨ.

੬੫੪.

ਉਪਤ੍ਥਮ੍ਭਿਯਮਾਨਂ ਤਂ, ਆਯੁਨਾ ਕਤਪਾਲਨਂ;

ਵਣ੍ਣਗਨ੍ਧਰਸਾਦੀਹਿ, ਰੂਪੇਹਿ ਪਰਿਵਾਰਿਤਂ.

੬੫੫.

ਚਕ੍ਖੁਵਿਞ੍ਞਾਣਕਾਦੀਨਂ, ਵਤ੍ਥੁਦ੍ਵਾਰਞ੍ਚ ਸਾਧਯਂ;

ਊਕਾਸਿਰਸਮਾਨੇਨ, ਪਮਾਣੇਨੇਵ ਤਿਟ੍ਠਤਿ.

ਵੁਤ੍ਤਂ ¶ ¶ ਹੇਤਂ –

੬੫੬.

‘‘ਯੇਨ ਚਕ੍ਖੁਪਸਾਦੇਨ, ਰੂਪਾਨਿਮਨੁਪਸ੍ਸਤਿ;

ਪਰਿਤ੍ਤਂ ਸੁਖੁਮਂ ਏਤਂ, ਊਕਾਸਿਰਸਮੂਪਮ’’ਨ੍ਤਿ.

੬੫੭.

ਸੋਤਾਦੀਸੁ ਚ ਏਸੇਵ, ਨਯੋ ਞੇਯ੍ਯੋ ਵਿਭਾਵਿਨਾ;

ਵਿਸੇਸਮਤ੍ਤਮੇਵੇਤ੍ਥ, ਪਵਕ੍ਖਾਮਿ ਇਤੋ ਪਰਂ.

ਸੁਣਾਤੀਤਿ ਸੋਤਂ, ਤਂ ਤਨੁਤਮ੍ਬਲੋਮਾਚਿਤੇ ਅਙ੍ਗੁਲਿਵੇਧਕਸਣ੍ਠਾਨੇ ਪਦੇਸੇ ਵੁਤ੍ਤਪ੍ਪਕਾਰਾਹਿ ਧਾਤੂਹਿ ਕਤੂਪਕਾਰਂ ਉਤੁਚਿਤ੍ਤਾਹਾਰੇਹਿ ਉਪਤ੍ਥਮ੍ਭਿਯਮਾਨਂ ਆਯੁਨਾ ਪਰਿਪਾਲਿਯਮਾਨਂ ਸੋਤਵਿਞ੍ਞਾਣਾਦੀਨਂ ਵਤ੍ਥੁਦ੍ਵਾਰਭਾਵਂ ਸਾਧਯਮਾਨਂ ਤਿਟ੍ਠਤਿ.

ਘਾਯਤੀਤਿ ਘਾਨਂ, ਤਂ ਸਸਮ੍ਭਾਰਘਾਨਬਿਲਸ੍ਸ ਅਨ੍ਤੋ ਅਜਪਦਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਾ ਹੁਤ੍ਵਾ ਤਿਟ੍ਠਤਿ.

ਸਾਯਤੀਤਿ ਜਿਵ੍ਹਾ, ਜੀਵਿਤਮਵ੍ਹਾਯਤੀਤਿ ਵਾ ਜਿਵ੍ਹਾ, ਸਾ ਸਸਮ੍ਭਾਰਜਿਵ੍ਹਾਮਜ੍ਝਸ੍ਸ ਉਪਰਿ ਉਪ੍ਪਲਦਲਗ੍ਗਸਣ੍ਠਾਨੇ ਪਦੇਸੇ ਯਥਾਵੁਤ੍ਤਪ੍ਪਕਾਰਾ ਹੁਤ੍ਵਾ ਤਿਟ੍ਠਤਿ.

ਕੁਚ੍ਛਿਤਾਨਂ ਮਲਾਨਂ ਆਯੋਤਿ ਕਾਯੋ. ਯਾਵਤਾ ਪਨ ਇਮਸ੍ਮਿਂ ਕਾਯੇ ਉਪਾਦਿਨ੍ਨਕਂ ਰੂਪਂ ਅਤ੍ਥਿ, ਸਬ੍ਬਤ੍ਥ ਕਾਯਪਸਾਦੋ ਕਪ੍ਪਾਸਪਟਲੇ ਸ੍ਨੇਹੋ ਵਿਯ ਯਥਾਵੁਤ੍ਤਪ੍ਪਕਾਰੋ ਹੁਤ੍ਵਾ ਤਿਟ੍ਠਤਿ.

ਏਤ੍ਥ ਪਨੇਤੇਸਂ ਲਕ੍ਖਣਾਦੀਨਿ ਪਵਕ੍ਖਾਮਿ – ਦਟ੍ਠੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪਸਾਦਲਕ੍ਖਣਂ ¶ ਚਕ੍ਖੁ, ਰੂਪੇਸੁ ਆਵਿਞ੍ਛਨਰਸਂ, ਚਕ੍ਖੁਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਦਟ੍ਠੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਸੋਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪਸਾਦਲਕ੍ਖਣਂ ¶ ਸੋਤਂ, ਸਦ੍ਦੇਸੁ ਆਵਿਞ੍ਛਨਰਸਂ, ਸੋਤਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਸੋਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਘਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪਸਾਦਲਕ੍ਖਣਂ ਘਾਨਂ, ਗਨ੍ਧੇਸੁ ਆਵਿਞ੍ਛਨਰਸਂ, ਘਾਨਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਂ, ਘਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਂ.

ਸਾਯਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪਸਾਦਲਕ੍ਖਣਾਜਿਵ੍ਹਾ ¶ , ਰਸੇਸੁ ਆਵਿਞ੍ਛਨਰਸਾ, ਜਿਵ੍ਹਾਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨਾ, ਸਾਯਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨਾ.

ਫੁਸਿਤੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪਸਾਦਲਕ੍ਖਣੋ ਕਾਯੋ, ਫੋਟ੍ਠਬ੍ਬੇਸੁ ਆਵਿਞ੍ਛਨਰਸੋ, ਕਾਯਵਿਞ੍ਞਾਣਸ੍ਸ ਆਧਾਰਭਾਵਪਚ੍ਚੁਪਟ੍ਠਾਨੋ, ਫੁਸਿਤੁਕਾਮਤਾਨਿਦਾਨਕਮ੍ਮਜਭੂਤਪਦਟ੍ਠਾਨੋ.

ਕੇਚਿ ਪਨਾਹੁ –

੬੫੮.

ਤੇਜਾਧਿਕਾਨਂ ਭੂਤਾਨਂ, ਪਸਾਦੋ ਪਨ ਚਕ੍ਖੁਤਿ;

ਆਕਾਸਾਨਿਲਤੋਯੁਬ੍ਬਿਅਧਿਕਾਨਂ ਤੁ ਸੇਸਕਾ.

੬੫੯.

ਤੇ ਪਨੇਵਂ ਤੁ ਵਤ੍ਤਬ੍ਬਾ, ‘‘ਸੁਤ੍ਤਂ ਆਹਰਥਾ’’ਤਿ ਹਿ;

ਸੁਤ੍ਤਮੇਵ ਚ ਤੇ ਅਦ੍ਧਾ, ਨ ਦਕ੍ਖਿਸ੍ਸਨ੍ਤਿ ਕਿਞ੍ਚਿਪਿ.

੬੬੦.

ਵਿਸੇਸੇ ਸਤਿ ਭੂਤਾਨਂ, ਪਸਾਦੋ ਹਿ ਕਥਂ ਭਵੇ;

ਸਮਾਨਾਨਂ ਹਿ ਭੂਤਾਨਂ, ਪਸਾਦੋ ਪਰਿਦੀਪਿਤੋ.

੬੬੧.

ਤਸ੍ਮਾ ਨਿਸ੍ਸਯਭੂਤਾਨਂ, ਚਤੁਨ੍ਨਂ ਸਬ੍ਬਸੋ ਪਨ;

ਪਹਾਯੇਵ ਪਨੇਤੇਸਂ, ਵਿਸੇਸਪਰਿਕਪ੍ਪਨਂ.

੬੬੨.

ਞੇਯ੍ਯਾ ਕਮ੍ਮਵਿਸੇਸੇਨ, ਪਸਾਦਾਨਂ ਵਿਸੇਸਤਾ;

ਨ ਹਿ ਭੂਤਵਿਸੇਸੇਨ, ਹੋਤਿ ਤੇਸਂ ਵਿਸੇਸਤਾ.

੬੬੩.

ਏਵਮੇਤੇਸੁ ¶ ਚਕ੍ਖੁਞ੍ਚ, ਸੋਤਂ ਅਪਤ੍ਤਗਾਹਕਂ;

ਸੇਸਂ ਤੁ ਪਨ ਘਾਨਾਦਿਤ੍ਤਯਂ ਸਮ੍ਪਤ੍ਤਗਾਹਕਂ.

ਰੂਪਨ੍ਤਿ ਰੂਪਯਤੀਤਿ ਰੂਪਂ, ਵਣ੍ਣਵਿਕਾਰਮਾਪਜ੍ਜਮਾਨਂ ਹਦਯਙ੍ਗਤਭਾਵਂ ਪਕਾਸੇਤੀਤਿ ਅਤ੍ਥੋ. ਤਂ ਪਨ ਚਕ੍ਖੁਪਟਿਹਨਨਲਕ੍ਖਣਂ, ਚਕ੍ਖੁਵਿਞ੍ਞਾਣਸ੍ਸ ਵਿਸਯਭਾਵਰਸਂ, ਤਸ੍ਸੇਵ ਗੋਚਰਭਾਵਪਚ੍ਚੁਪਟ੍ਠਾਨਂ, ਚਤੁਮਹਾਭੂਤਪਦਟ੍ਠਾਨਂ. ਯਥਾ ਚੇਤਂ, ਤਥਾ ਸਬ੍ਬਾਨਿਪਿ ਉਪਾਦਾਰੂਪਾਨੀਤਿ ¶ .

ਸਦ੍ਦੋਤਿ ¶ ਸਦ੍ਦਯਤੀਤਿ ਸਦ੍ਦੋ, ਸੋ ਪਨ ਸੋਤਪਟਿਹਨਨਲਕ੍ਖਣੋ, ਸੋਤਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਭਾਵਪਚ੍ਚੁਪਟ੍ਠਾਨੋ.

ਰਸੋਤਿ ਰਸਨ੍ਤਿ ਤੇਨਾਤਿ ਰਸੋ, ਸੋ ਜਿਵ੍ਹਾਪਟਿਹਨਨਲਕ੍ਖਣੋ, ਜਿਵ੍ਹਾਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਭਾਵਪਚ੍ਚੁਪਟ੍ਠਾਨੋ.

ਗਨ੍ਧੋਤਿ ਅਤ੍ਤਾਨਂ ਗਨ੍ਧਯਤਿ ਸੂਚਯਤੀਤਿ ਗਨ੍ਧੋ, ਸੋ ਘਾਨਪਟਿਹਨਨਲਕ੍ਖਣੋ, ਘਾਨਵਿਞ੍ਞਾਣਸ੍ਸ ਵਿਸਯਭਾਵਰਸੋ, ਤਸ੍ਸੇਵ ਗੋਚਰਭਾਵਪਚ੍ਚੁਪਟ੍ਠਾਨੋ.

ਇਤ੍ਥਿਨ੍ਦ੍ਰਿਯਨ੍ਤਿ –

੬੬੪.

ਕਮ੍ਮਜੋ ਇਤ੍ਥਿਭਾਵੋਯਂ, ਪਟਿਸਨ੍ਧਿਸਮੁਟ੍ਠਿਤੋ;

ਯਞ੍ਚੇਤਂ ਇਤ੍ਥਿਲਿਙ੍ਗਾਦਿ, ਨ ਤੁ ਤਂ ਇਨ੍ਦ੍ਰਿਯਂ ਸਿਯਾ.

੬੬੫.

ਇਤ੍ਥਿਨ੍ਦ੍ਰਿਯਂ ਪਟਿਚ੍ਚੇਵ, ਇਤ੍ਥਿਲਿਙ੍ਗਾਦਯੋ ਪਨ;

ਪਵਤ੍ਤੇਯੇਵ ਜਾਯਨ੍ਤੇ, ਨ ਤਾਨਿ ਪਟਿਸਨ੍ਧਿਯਂ.

੬੬੬.

ਨ ਚ ਤਂ ਚਕ੍ਖੁਵਿਞ੍ਞੇਯ੍ਯਂ, ਮਨੋਵਿਞ੍ਞੇਯ੍ਯਮੇਵ ਤਂ;

ਇਤ੍ਥਿਲਿਙ੍ਗਾਦਯੋ ਚਕ੍ਖੁਵਿਞ੍ਞੇਯ੍ਯਾ ਹੋਨ੍ਤਿ ਵਾ ਨ ਵਾ.

੬੬੭.

ਏਸੇਵ ਚ ਨਯੋ ਞੇਯ੍ਯੋ, ਸੇਸੇਪਿ ਪੁਰਿਸਿਨ੍ਦ੍ਰਿਯੇ;

ਇਦਂ ਪਠਮਕਪ੍ਪਾਨਂ, ਉਭਯਂ ਤੁ ਪਵਤ੍ਤਿਯਂ.

੬੬੮.

ਸਮੁਟ੍ਠਾਤੀਤਿ ¶ ਵਿਞ੍ਞੇਯ੍ਯਂ, ਪਰਤੋ ਪਟਿਸਨ੍ਧਿਯਂ;

ਪਵਤ੍ਤੇਪਿ ਸਮੁਟ੍ਠਾਯ, ਪਵਤ੍ਤੇ ਪਰਿਵਤ੍ਤਤਿ.

੬੬੯.

ਮਹਤਾ ਪਾਪਕਮ੍ਮੇਨ, ਪੁਰਿਸਤ੍ਤਂ ਵਿਨਸ੍ਸਤਿ;

ਮਹਤਾ ਕੁਸਲੇਨੇਵ, ਜਾਯਤੇ ਪੁਰਿਸਿਨ੍ਦ੍ਰਿਯਂ.

੬੭੦.

ਦੁਬ੍ਬਲਾਕੁਸਲੇਨੇਵ, ਇਤ੍ਥਿਲਿਙ੍ਗਂ ਵਿਨਸ੍ਸਤਿ;

ਦੁਬ੍ਬਲੇਨੇਵ ਪੁਞ੍ਞੇਨ, ਇਤ੍ਥਿਭਾਵੋ ਹਿ ਜਾਯਤੇ.

੬੭੧.

ਉਭਤੋਬ੍ਯਞ੍ਜਨਸ੍ਸਾਪਿ ¶ , ਏਕਮੇਵਿਨ੍ਦ੍ਰਿਯਂ ਸਿਯਾ;

ਏਵਂ ਸਨ੍ਤੇ ਅਭਾਵੋ ਚ, ਦੁਤਿਯਬ੍ਯਞ੍ਜਨਸ੍ਸ ਤੁ.

੬੭੨.

ਨ ਚਾਭਾਵੋ ਸਿਯਾ ਕਸ੍ਮਾ, ਨ ਤਂ ਬ੍ਯਞ੍ਜਨਕਾਰਣਂ;

ਤਸ੍ਸ ਕਮ੍ਮਸਹਾਯਂ ਹਿ, ਰਾਗਚਿਤ੍ਤਂ ਤੁ ਕਾਰਣਂ.

ਉਭਯਸ੍ਸ ਪਨੇਤਸ੍ਸ ਲਕ੍ਖਣਾਦੀਨਿ ਵੁਚ੍ਚਤਿ. ਤਤ੍ਥ ਇਤ੍ਥਿਭਾਵਲਕ੍ਖਣਂ ਇਤ੍ਥਿਨ੍ਦ੍ਰਿਯਂ, ‘‘ਇਤ੍ਥੀ’’ਤਿ ਪਕਾਸਨਰਸਂ, ਇਤ੍ਥਿਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ.

ਪੁਰਿਸਭਾਵਲਕ੍ਖਣਂ ਪੁਰਿਸਿਨ੍ਦ੍ਰਿਯਂ, ‘‘ਪੁਰਿਸੋ’’ਤਿ ਪਕਾਸਨਰਸਂ, ਪੁਰਿਸਲਿਙ੍ਗਨਿਮਿਤ੍ਤਕੁਤ੍ਤਾਕਪ੍ਪਾਨਂ ਕਾਰਣਭਾਵਪਚ੍ਚੁਪਟ੍ਠਾਨਂ.

ਜੀਵਿਤਨ੍ਤਿ –

੬੭੩.

ਜੀਵਿਤਿਨ੍ਦ੍ਰਿਯਨਿਦ੍ਦੇਸੇ, ਵਤ੍ਤਬ੍ਬਂ ਯਂ ਸਿਯਾ ਇਧ;

ਅਰੂਪਜੀਵਿਤੇ ਵੁਤ੍ਤ-ਨਯੇਨੇਵ ਚ ਤਂ ਵਦੇ.

ਲਕ੍ਖਣਾਦੀਨਿ ¶ ਪਨਸ੍ਸ ਏਵਂ ਵੇਦਿਤਬ੍ਬਾਨਿ. ਸਹਜਰੂਪਪਰਿਪਾਲਨਲਕ੍ਖਣਂ ਜੀਵਿਤਿਨ੍ਦ੍ਰਿਯਂ, ਤੇਸਂ ਪਵਤ੍ਤਨਰਸਂ, ਤੇਸਮੇਵ ਠਪਨਪਚ੍ਚੁਪਟ੍ਠਾਨਂ, ਯਾਪਯਿਤਬ੍ਬਭੂਤਪਦਟ੍ਠਾਨਨ੍ਤਿ.

ਵਤ੍ਥੂਤਿ ਹਦਯਵਤ੍ਥੁ.

੬੭੪.

ਯਂ ਨਿਸ੍ਸਾਯ ਮਨੋਧਾਤੁ-ਮਨੋਵਿਞ੍ਞਾਣਧਾਤੁਯੋ;

ਵਤ੍ਤਨ੍ਤਿ ਪਞ੍ਚਵੋਕਾਰੇ, ਤਂ ‘‘ਵਤ੍ਥੂ’’ਤਿ ਪਵੁਚ੍ਚਤਿ.

ਮਨੋਧਾਤੁਮਨੋਵਿਞ੍ਞਾਣਧਾਤੂਨਂ ¶ ਨਿਸ੍ਸਯਲਕ੍ਖਣਂ ਹਦਯਵਤ੍ਥੁ, ਤਾਸਞ੍ਚੇਵ ਧਾਤੂਨਂ ਆਧਾਰਣਰਸਂ, ਉਬ੍ਬਾਹਨਪਚ੍ਚੁਪਟ੍ਠਾਨਂ.

ਆਹਾਰਤਾਤਿ ਕਬਲ਼ੀਕਾਰੋ ਆਹਾਰੋ. ਓਜਟ੍ਠਮਕਂ ਰੂਪਂ ਆਹਰਤੀਤਿ ਆਹਾਰੋ.

੬੭੫.

ਯਾਯ ¶ ਓਜਾਯ ਯਾਪੇਨ੍ਤਿ, ਯਤ੍ਥ ਯਤ੍ਥ ਚ ਪਾਣਿਨੋ;

ਅਯਂ ਤੁ ‘‘ਕਬਲ਼ੀਕਾਰੋ, ਆਹਾਰੋ’’ਤਿ ਪਵੁਚ੍ਚਤਿ.

੬੭੬.

ਅਨ੍ਨਪਾਨਾਦਿਕਂ ਵਤ੍ਥੁ, ਅਗ੍ਗਿਂ ਹਰਤਿ ਕਮ੍ਮਜਂ;

ਕੇਵਲਂ ਨ ਚ ਸਕ੍ਕੋਤਿ, ਪਾਲੇਤੁਂ ਜੀਵਿਤਂ ਪਨ.

੬੭੭.

ਓਜਾ ਸਕ੍ਕੋਤਿ ਪਾਲੇਤੁਂ, ਹਰਿਤੁਂ ਨ ਚ ਪਾਚਕਂ;

ਹਰਿਤੁਮ੍ਪਿ ਚ ਪਾਲੇਤੁਂ, ਉਭੋ ਸਕ੍ਕੋਨ੍ਤਿ ਏਕਤੋ.

ਲਕ੍ਖਣਾਦਿਤੋ ਪਨਸ੍ਸ ਓਜਾਲਕ੍ਖਣੋ ਕਬਲ਼ੀਕਾਰੋ ਆਹਾਰੋ, ਰੂਪਾਹਰਣਰਸੋ, ਉਪਤ੍ਥਮ੍ਭਨਪਚ੍ਚੁਪਟ੍ਠਾਨੋ, ਕਬਲ਼ਂ ਕਤ੍ਵਾ ਅਜ੍ਝੋਹਰਿਤਬ੍ਬਵਤ੍ਥੁਪਦਟ੍ਠਾਨੋਤਿ ਵੇਦਿਤਬ੍ਬੋ.

ਕਾਯਵਿਞ੍ਞਤ੍ਤਿਨਿਦ੍ਦੇਸੇ ਕਾਯੇਨ ਅਤ੍ਤਨੋ ਭਾਵਂ ਵਿਞ੍ਞਾਪੇਨ੍ਤਾਨਂ ਕਾਯਗ੍ਗਹਣਾਨੁਸਾਰੇਨ ਗਹਿਤਾਯ ਏਤਾਯ ਭਾਵੋ ਵਿਞ੍ਞਾਯਤੀਤਿ ਵਿਞ੍ਞਤ੍ਤਿ. ਸਯਂ ਵਾ ਕਾਯਗ੍ਗਹਣਾਨੁਸਾਰੇਨ ਵਿਞ੍ਞਾਯਤੀਤਿਪਿ ਵਿਞ੍ਞਤ੍ਤਿ. ‘‘ਕਾਯੇਨ ਸਂਵਰੋ ਸਾਧੁ, ਸਾਧੁ ਵਾਚਾਯ ਸਂਵਰੋ’’ਤਿ ਆਗਤੋ ਚੋਪਨਸਙ੍ਖਾਤੋ ਕਾਯੋਵ ਵਿਞ੍ਞਤ੍ਤਿ ਕਾਯਵਿਞ੍ਞਤ੍ਤਿ. ਕਾਯਵਿਪ੍ਫਨ੍ਦਨੇਨ ਅਧਿਪ੍ਪਾਯਵਿਞ੍ਞਾਪਨਹੇਤੁਤ੍ਤਾ ਸਯਞ੍ਚ ਤਥਾ ਵਿਞ੍ਞੇਯ੍ਯਤ੍ਤਾ ਕਾਯੇਨ ਵਿਞ੍ਞਤ੍ਤੀਤਿਪਿ ਕਾਯਵਿਞ੍ਞਤ੍ਤਿ.

੬੭੮.

ਤਤ੍ਥ ਯਾ ਸਹਜਾਤਸ੍ਸ, ਚਿਤ੍ਤਜਾਨਿਲਧਾਤੁਯਾ;

ਰੂਪਸ੍ਸ ਚਲਨੇ ਹੇਤੁ, ਏਕਾਕਾਰਵਿਕਾਰਤਾ.

੬੭੯.

ਕਾਯਵਿਞ੍ਞਤ੍ਤਿ ਨਾਮਾਯਂ, ਕਾਯਦ੍ਵਾਰਨ੍ਤਿ ਸਾ ਮਤਾ;

ਤਤ੍ਥ ਯਾ ਚੇਤਨਾਸਿਦ੍ਧਾ, ਪੁਞ੍ਞਾਪੁਞ੍ਞਵਸਾ ਪਨ.

੬੮੦.

ਕਾਯਕਮ੍ਮਨ੍ਤਿ ¶ ਨਿਦ੍ਦਿਟ੍ਠਾ, ਸਤ੍ਥੁਨਾ ਸਾ ਹਿਤੇਸਿਨਾ;

ਸਮ੍ਪਵਤ੍ਤਿ ਪਨੇਤਿਸ੍ਸਾ, ਵਚੀਦ੍ਵਾਰੇਪਿ ਜਾਯਤੇ.

੬੮੧.

ਲਭਿਤ੍ਵਾ ¶ ਪਨੁਪਤ੍ਥਮ੍ਭਂ, ਏਕਾਵਜ੍ਜਨਵੀਥਿਯਂ;

ਹੇਟ੍ਠਾਹਿ ਛਹਿ ਚਿਤ੍ਤੇਹਿ, ਵਾਯੋਧਾਤੁਸਮੁਟ੍ਠਿਤਂ.

੬੮੨.

ਸਤ੍ਤਮੇਨ ਤੁ ਚਿਤ੍ਤੇਨ, ਵਾਯੋਧਾਤੁਸਮੁਟ੍ਠਿਤਾ;

ਚਾਲੇਤਿ ਸਹਜਂ ਰੂਪਂ, ਵਿਞ੍ਞਤ੍ਤਿਸਹਿਤਾਤ੍ਤਨਾ.

ਵਚੀਵਿਞ੍ਞਤ੍ਤਿਨਿਦ੍ਦੇਸੇ ¶ ਪਨ –

੬੮੩.

ਪਚ੍ਚਯੋ ਚਿਤ੍ਤਜਾਤਾਯ, ਉਪਾਦਿਨ੍ਨਕਘਟ੍ਟਨੇ;

ਯੋ ਆਕਾਰਵਿਕਾਰੇਕੋ, ਅਯਂ ਪਥਵਿਧਾਤੁਯਾ.

੬੮੪.

ਵਚੀਵਿਞ੍ਞਤ੍ਤਿ ਵਿਞ੍ਞੇਯ੍ਯਾ, ਸਹ ਸਦ੍ਦਵਸਾ ਪਨ;

ਵਚੀਦ੍ਵਾਰਨ੍ਤਿ ਨਿਦ੍ਦਿਟ੍ਠਾ, ਸਾਵ ਸਕ੍ਯਕੁਲਿਨ੍ਦੁਨਾ.

੬੮੫.

ਸਦ੍ਦੋ ਨ ਚਿਤ੍ਤਜੋ ਅਤ੍ਥਿ, ਵਿਨਾ ਵਿਞ੍ਞਤ੍ਤਿਘਟ੍ਟਨਂ;

ਧਾਤੁਸਙ੍ਘਟ੍ਟਨੇਨੇਵ, ਸਹ ਸਦ੍ਦੋ ਹਿ ਜਾਯਤਿ.

੬੮੬.

ਸਾ ਵਿਞ੍ਞਾਪਨਤੋ ਚੇਵ, ਅਯਂ ਵਿਞ੍ਞੇਯ੍ਯਤੋਪਿ ਚ;

ਵਿਞ੍ਞਤ੍ਤੀਤਿ ਸਿਯਾ ਤਸ੍ਸਾ, ਸਮ੍ਭਵੋ ਕਾਰਕਦ੍ਵਯੇ.

੬੮੭.

ਨ ਵਿਞ੍ਞਤ੍ਤਿਦ੍ਵਯਂ ਅਟ੍ਠ, ਰੂਪਾਨਿ ਵਿਯ ਚਿਤ੍ਤਜਂ;

ਚਿਤ੍ਤਜਾਨਂ ਵਿਕਾਰਤ੍ਤਾ, ਚਿਤ੍ਤਜਨ੍ਤਿ ਪਵੁਚ੍ਚਤਿ.

ਤਤ੍ਥ ਕਾਯਵਿਞ੍ਞਤ੍ਤਿ ਅਧਿਪ੍ਪਾਯਪਕਾਸਨਰਸਾ, ਕਾਯਵਿਪ੍ਫਨ੍ਦਨਹੇਤੁਭਾਵਪਚ੍ਚੁਪਟ੍ਠਾਨਾ, ਚਿਤ੍ਤਸਮੁਟ੍ਠਾਨਵਾਯੋਧਾਤੁਪਦਟ੍ਠਾਨਾ. ਤਥਾ ਵਚੀਵਿਞ੍ਞਤ੍ਤਿ ਅਧਿਪ੍ਪਾਯਪਕਾਸਨਰਸਾ, ਵਚੀਘੋਸਸ੍ਸ ਹੇਤੁਭਾਵਪਚ੍ਚੁਪਟ੍ਠਾਨਾ, ਚਿਤ੍ਤਸਮੁਟ੍ਠਾਨਪਥਵੀਧਾਤੁਪਦਟ੍ਠਾਨਾ.

੬੮੮.

ਨ ਕਸ੍ਸਤੀਤਿ ਆਕਾਸੋ, ਰੂਪਾਨਂ ਵਿਵਰੋ ਪਨ;

ਯੋ ਰੂਪਾਨਂ ਪਰਿਚ੍ਛੇਦੋ, ਸ੍ਵਾਕਾਸੋਤਿ ਪਵੁਚ੍ਚਤਿ.

ਸੋ ¶ ਰੂਪਪਰਿਚ੍ਛੇਦਲਕ੍ਖਣੋ, ਰੂਪਪਰਿਯਨ੍ਤਪਕਾਸਨਰਸੋ, ਰੂਪਮਰਿਯਾਦਪਚ੍ਚੁਪਟ੍ਠਾਨੋ, ਅਸਮ੍ਫੁਟ੍ਠਭਾਵਛਿਦ੍ਦਵਿਵਰਭਾਵਪਚ੍ਚੁਪਟ੍ਠਾਨੋ ਵਾ, ਪਰਿਚ੍ਛਿਨ੍ਨਰੂਪਪਦਟ੍ਠਾਨੋ.

ਰੂਪਸ੍ਸ ਲਹੁਤਾਦਿਤ੍ਤਯਨਿਦ੍ਦੇਸੇ –

੬੮੯.

ਹੇਟ੍ਠਾ ਵੁਤ੍ਤਨਯੇਨੇਵ, ਰੂਪਸ੍ਸ ਲਹੁਤਾਦਿਸੁ;

ਤਿਸ੍ਸੋ ਰੂਪਵਿਕਾਰਾਤਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ.

੬੯੦.

ਏਤਾਸਂ ¶ ਪਨ ਤਿਸ੍ਸਨ੍ਨਂ, ਕਮਤੋ ਚ ਪਵਤ੍ਤਿਯਂ;

ਅਰੋਗੀ ਮਦ੍ਦਿਤਂ ਚਮ੍ਮਂ, ਧਨ੍ਤਹੇਮਂ ਨਿਦਸ੍ਸਨਂ.

੬੯੧.

ਕਮ੍ਮਂ ਕਾਤੁਂ ਨ ਸਕ੍ਕੋਤਿ, ਲਹੁਤਾਦਿਤ੍ਤਯਂ ਪਨ;

ਆਹਾਰਾਦਿਤ੍ਤਯਂਯੇਵ, ਤਂ ਕਰੋਤਿ ਤਤੋ ਤਿਜਂ.

ਤਤ੍ਥ ¶ ਅਦਨ੍ਧਤਾਲਕ੍ਖਣਾ ਰੂਪਸ੍ਸ ਲਹੁਤਾ, ਰੂਪਾਨਂ ਗਰੁਭਾਵਵਿਨੋਦਨਰਸਾ, ਲਹੁਪਰਿਵਤ੍ਤਿਤਾਪਚ੍ਚੁਪਟ੍ਠਾਨਾ, ਲਹੁਰੂਪਪਦਟ੍ਠਾਨਾ.

ਅਥਦ੍ਧਤਾਲਕ੍ਖਣਾ ਰੂਪਸ੍ਸ ਮੁਦੁਤਾ, ਰੂਪਾਨਂ ਥਦ੍ਧਭਾਵਵਿਨੋਦਨਰਸਾ, ਸਬ੍ਬਕਿਰਿਯਾਸੁ ਅਵਿਰੋਧਿਤਾਪਚ੍ਚੁਪਟ੍ਠਾਨਾ, ਮੁਦੁਰੂਪਪਦਟ੍ਠਾਨਾ.

ਸਰੀਰਕਿਰਿਯਾਨੁਕੂਲਕਮ੍ਮਞ੍ਞਤਾਲਕ੍ਖਣਾ ਰੂਪਸ੍ਸ ਕਮ੍ਮਞ੍ਞਤਾ, ਅਕਮ੍ਮਞ੍ਞਤਾਵਿਨੋਦਨਰਸਾ, ਅਦੁਬ੍ਬਲਭਾਵਪਚ੍ਚੁਪਟ੍ਠਾਨਾ, ਕਮ੍ਮਞ੍ਞਤਾਰੂਪਪਦਟ੍ਠਾਨਾ. ਏਤਾ ਪਨ ਤਿਸ੍ਸੋਪਿ ਨ ਅਞ੍ਞਮਞ੍ਞਂ ਵਿਜਹਨ੍ਤਿ.

ਉਪਚਯਸਨ੍ਤਤਿਨਿਦ੍ਦੇਸੇ –

੬੯੨.

ਰੂਪਾਨਮਾਚਯੋ ਯੋ ਹਿ, ਵੁਤ੍ਤੋ ਉਪਚਯੋਤਿ ਸੋ;

ਅਨੁਪ੍ਪਬਨ੍ਧਤਾ ਤੇਸਂ, ਸਨ੍ਤਤੀਤਿ ਪਵੁਚ੍ਚਤਿ.

੬੯੩.

ਅਤ੍ਥਤੋ ¶ ਉਭਯਮ੍ਪੇਤਂ, ਜਾਤਿਰੂਪਨ੍ਤਿ ਦੀਪਿਤਂ;

ਵੁਤ੍ਤਮਾਕਾਰਨਾਨਤ੍ਤਾ, ਵੇਨੇਯ੍ਯਾਨਂ ਵਸੇਨ ਵਾ.

ਲਕ੍ਖਣਾਦਿਤੋ ਪਨ ਆਚਯਲਕ੍ਖਣੋ ਰੂਪਸ੍ਸ ਉਪਚਯੋ, ਪੁਬ੍ਬਨ੍ਤਤੋ ਰੂਪਾਨਂ ਉਮ੍ਮੁਜ੍ਜਾਪਨਰਸੋ, ਨਿਯ੍ਯਾਤਨਪਚ੍ਚੁਪਟ੍ਠਾਨੋ, ਪਰਿਪੁਣ੍ਣਭਾਵਪਚ੍ਚੁਪਟ੍ਠਾਨੋ ਵਾ, ਉਪਚਿਤਰੂਪਪਦਟ੍ਠਾਨੋ.

ਪਵਤ੍ਤਿਲਕ੍ਖਣਾ ਰੂਪਸ੍ਸ ਸਨ੍ਤਤਿ, ਅਨੁਪ੍ਪਬਨ੍ਧਨਰਸਾ, ਅਨੁਪਚ੍ਛੇਦਪਚ੍ਚੁਪਟ੍ਠਾਨਾ, ਅਨੁਪ੍ਪਬਨ੍ਧਰੂਪਪਦਟ੍ਠਾਨਾ.

ਜਰਾਨਿਦ੍ਦੇਸੇ ¶ ਜੀਰਣਂ ਜਰਾ.

੬੯੪.

ਦੁਵਿਧਾਯਂ ਜਰਾ ਨਾਮ, ਪਾਕਟਾਪਾਕਟਾਤਿ ਚ;

ਪਾਕਟਾ ਰੂਪਧਮ੍ਮੇਸੁ, ਅਰੂਪੇਸੁ ਅਪਾਕਟਾ.

ਰੂਪਸ੍ਸ ਪਰਿਪਾਕਤਾਲਕ੍ਖਣਾ ਰੂਪਸ੍ਸ ਜਰਤਾ, ਉਪਨਯਨਰਸਾ, ਸਭਾਵਾਨਂ ਅਪਗਮੇਪਿ ਨਸਭਾਵਾਪਗਮਪਚ੍ਚੁਪਟ੍ਠਾਨਾ ਵੀਹਿਪੁਰਾਣਭਾਵੋ ਵਿਯ, ਪਰਿਪਚ੍ਚਮਾਨਰੂਪਪਦਟ੍ਠਾਨਾ.

ਪਰਿਭੇਦਲਕ੍ਖਣਾ ਰੂਪਸ੍ਸ ਅਨਿਚ੍ਚਤਾ, ਸਂਸੀਦਨਰਸਾ, ਖਯਵਯਪਚ੍ਚੁਪਟ੍ਠਾਨਾ, ਪਰਿਭਿਜ੍ਜਮਾਨਰੂਪਪਦਟ੍ਠਾਨਾਤਿ ਵੇਦਿਤਬ੍ਬਾਤਿ.

ਏਵਂ ਚਤੁਵੀਸਤਿ ਉਪਾਦਾਰੂਪਾਨਿ ਵੇਦਿਤਬ੍ਬਾਨਿ.

੬੯੫.

ਭੂਤਰੂਪਾਨਿ ਚਤ੍ਤਾਰਿ, ਉਪਾਦਾ ਚਤੁਵੀਸਤਿ;

ਅਟ੍ਠਵੀਸਤਿ ਰੂਪਾਨਿ, ਸਬ੍ਬਾਨੇਵ ਭਵਨ੍ਤਿ ਹਿ.

੬੯੬.

ਇਮੇਸੁ ਪਨ ਰੂਪੇਸੁ, ਅਸਮ੍ਮੋਹਤ੍ਥਮੇਵ ਤਂ;

ਸਮੋਧਾਨਂ ਸਮੁਟ੍ਠਾਨਂ, ਨਿਪ੍ਫਨ੍ਨਂ ਸਙ੍ਖਤਮ੍ਪਿ ਚ.

੬੯੭.

ਚੋਦਨਂ ¶ ਪਰਿਹਾਰਞ੍ਚ, ਨਯਮੇਕਵਿਧਾਦਿਕਂ;

ਸਙ੍ਖੇਪੇਨ ਪਵਕ੍ਖਾਮਿ, ਪਕਿਣ੍ਣਕਮਿਦਂ ਸੁਣ.

ਤਤ੍ਥ ¶ ਸਮੋਧਾਨਨ੍ਤਿ ਸਬ੍ਬਮੇਵ ਇਦਂ ਰੂਪਂ ਸਬ੍ਬਸਮੋਧਾਨਤੋ ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੁ ਚਕ੍ਖਾਯਤਨਂ…ਪੇ… ਜਰਤਾ ਅਨਿਚ੍ਚਤਾਤਿ ਅਟ੍ਠਵੀਸਤਿਵਿਧਂ ਚ ਹੋਤਿ, ਇਤੋ ਅਞ੍ਞਂ ਰੂਪਂ ਨਾਮ ਨਤ੍ਥਿ. ਕੇਚਿ ਪਨ ਮਿਦ੍ਧਵਾਦਿਨੋ ‘‘ਮਿਦ੍ਧਰੂਪਂ ਨਾਮ ਅਤ੍ਥੀ’’ਤਿ ਵਦਨ੍ਤਿ, ਤੇ ‘‘ਅਦ੍ਧਾ ਮੁਨੀਸਿ ਸਮ੍ਬੁਦ੍ਧੋ, ਨਤ੍ਥਿ ਨੀਵਰਣਾ ਤਵਾ’’ਤਿ ਚ ‘‘ਥਿਨਮਿਦ੍ਧਨੀਵਰਣਂ ਅਵਿਜ੍ਜਾਨੀਵਰਣਞ੍ਚ ਨੀਵਰਣਸਮ੍ਪਯੁਤ੍ਤ’’ਨ੍ਤਿ ਸਮ੍ਪਯੁਤ੍ਤਵਚਨਤੋ ਚ ਮਹਾਪਕਰਣਪਟ੍ਠਾਨੇ ‘‘ਨੀਵਰਣਂ ਧਮ੍ਮਂ ਪਟਿਚ੍ਚ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ’’ਤਿ ਅਰੂਪੇਪਿ ‘‘ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਉਦ੍ਧਚ੍ਚਕੁਕ੍ਕੁਚ੍ਚਾਵਿਜ੍ਜਾਨੀਵਰਣ’’ਨ੍ਤਿ ਏਵਮਾਦੀਹਿ ਪਾਲ਼ੀਹਿ ਵਿਰੁਜ੍ਝਨਤੋ ਚ ਅਰੂਪਮੇਵ ਮਿਦ੍ਧਨ੍ਤਿ ਪਟਿਕ੍ਖਿਪਿਤਬ੍ਬਾ.

੬੯੮.

ਅਰੂਪੇਪਿ ¶ ਪਨੇਤਸ੍ਸ, ਮਿਦ੍ਧਸ੍ਸੁਪ੍ਪਤ੍ਤਿ ਪਾਠਤੋ;

ਨਿਟ੍ਠਮੇਤ੍ਥਾਵਗਨ੍ਤਬ੍ਬਾ, ਅਰੂਪਨ੍ਤਿ ਚ ਵਿਞ੍ਞੁਨਾ.

ਅਪਰੇ ‘‘ਬਲਰੂਪੇਨ ਸਦ੍ਧਿਂ ਏਕੂਨਤਿਂਸ, ਸਮ੍ਭਵਰੂਪੇਨ ਸਦ੍ਧਿਂ ਤਿਂਸ, ਜਾਤਿਰੂਪੇਨ ਸਦ੍ਧਿਂ ਏਕਤਿਂਸ, ਰੋਗਰੂਪੇਨ ਸਦ੍ਧਿਂ ਦ੍ਵਤ੍ਤਿਂਸ ਰੂਪਾਨੀ’’ਤਿ ਵਦਨ੍ਤਿ. ਤੇਪਿ ਤੇਸਂ ਵਿਸੁਂ ਵਿਸੁਂ ਅਭਾਵਂ ਦਸ੍ਸੇਤ੍ਵਾ ਪਟਿਕ੍ਖਿਪਿਤਬ੍ਬਾ. ਵਾਯੋਧਾਤੁਯਾ ਗਹਿਤਾਯ ਬਲਰੂਪਂ ਗਹਿਤਮੇਵ, ਅਞ੍ਞਂ ਬਲਰੂਪਂ ਨਾਮ ਨਤ੍ਥਿ. ਆਪੋਧਾਤੁਯਾ ਸਮ੍ਭਵਰੂਪਂ, ਉਪਚਯਸਨ੍ਤਤੀਤਿ ਜਾਤਿਰੂਪਂ, ਜਰਤਾਅਨਿਚ੍ਚਤਾਦੀਹਿ ਰੋਗਰੂਪਂ ਗਹਿਤਂ, ਅਞ੍ਞਂ ਰੋਗਰੂਪਂ ਨਾਮ ਨਤ੍ਥੀਤਿ, ਤਸ੍ਮਾ ਅਟ੍ਠਵੀਸਤਿਵਿਧਾਨੇਵ ਰੂਪਾਨੀਤਿ.

ਏਵਂ ਸਮੋਧਾਨਤੋ ਵੇਦਿਤਬ੍ਬਾਨੀਤਿ.

ਸਮੁਟ੍ਠਾਨਨ੍ਤਿ ਚਤ੍ਤਾਰਿ ਰੂਪਸਮੁਟ੍ਠਾਨਾਨਿ ਉਤੁਚਿਤ੍ਤਾਹਾਰਕਮ੍ਮਾਨੀਤਿ.

੬੯੯.

ਕਮ੍ਮਂ ¶ ਉਤੁ ਚ ਚਿਤ੍ਤਞ੍ਚ, ਆਹਾਰੋ ਰੂਪਹੇਤੁਯੋ;

ਏਤੇਹੇਵ ਚ ਰੂਪਾਨਿ, ਜਾਯਨ੍ਤਿ ਨ ਪਨਞ੍ਞਤੋ.

੭੦੦.

ਤਸ੍ਮਾ ਏਕਸਮੁਟ੍ਠਾਨਾ, ਏਕਾਦਸ ਭਵਨ੍ਤਿ ਹਿ;

ਅਟ੍ਠਿਨ੍ਦ੍ਰਿਯਾਨਿ ਵਤ੍ਥੁਞ੍ਚ, ਵਿਞ੍ਞਤ੍ਤਿਦ੍ਵਯਮੇਵ ਚ.

੭੦੧.

ਅਟ੍ਠਿਨ੍ਦ੍ਰਿਯਾਨਿ ਵਤ੍ਥੁਞ੍ਚ, ਏਕਨ੍ਤੇਨੇਵ ਕਮ੍ਮਜਾ;

ਚਿਤ੍ਤਜਂਯੇਵ ਵਿਞ੍ਞਤ੍ਤਿ-ਦ੍ਵਯਂ ਵੁਤ੍ਤਂ ਮਹੇਸਿਨਾ.

੭੦੨.

ਚਿਤ੍ਤੇਨ ਉਤੁਨਾ ਚੇਵ, ਸਦ੍ਦੋ ਦ੍ਵੀਹਿ ਸਮੁਟ੍ਠਿਤੋ;

ਉਤੁਆਹਾਰਚਿਤ੍ਤੇਹਿ, ਲਹੁਤਾਦਿਤ੍ਤਯਂ ਕਤਂ.

੭੦੩.

ਵਣ੍ਣੋ ¶ ਗਨ੍ਧੋ ਰਸੋ ਓਜਾ,

ਚਤਸ੍ਸੋ ਚਾਪਿ ਧਾਤੁਯੋ;

ਸਨ੍ਤਤ੍ਯੁਪਚਯਾਕਾਸਾ,

ਏਕਾਦਸ ਚਤੁਬ੍ਭਵਾ.

੭੦੪.

ਏਕਾਦਸੇਕਤੋ ¶ ਜਾਤਾ,

ਦ੍ਵਿਜੇਕੋਵ ਤਿਜਾ ਤਯੋ;

ਚਤੁਜੇਕਾਦਸਕ੍ਖਾਤਾ,

ਦ੍ਵੇ ਨ ਕੇਨਚਿ ਜਾਯਰੇ.

੭੦੫.

ਕਮ੍ਮੇਨ ਵੀਸਤਿ ਰੂਪਾ, ਸਤ੍ਤਰਸ ਤੁ ਚੇਤਸਾ;

ਉਤੁਨਾ ਦਸਪਞ੍ਚੇਵ, ਚੁਦ੍ਦਸਾਹਾਰਤੋ ਪਨ.

੭੦੬.

ਛਸਟ੍ਠਿ ਸਬ੍ਬਾਨੇਤਾਨਿ, ਸਮੁਟ੍ਠਾਨਵਿਭਾਗਤੋ;

ਅਟ੍ਠਸਟ੍ਠਿ ਚ ਹੋਨ੍ਤੇਵ, ਜਰਤਾਨਿਚ੍ਚਤਾਹਿ ਤੇ.

੭੦੭.

ਜਰਤਾਨਿਚ੍ਚਤਾ ਚੇਵ, ਨ ਕੇਨਚਿ ਸਮੁਟ੍ਠਿਤਾ;

ਜਾਤਸ੍ਸ ਪਾਕਭੇਦਤ੍ਤਾ, ਜਾਯੇਯ੍ਯੁਂ ਯਦਿ ਤਾਨਿਪਿ.

੭੦੮.

ਏਵਂ ਸਨ੍ਤੇ ਤੁ ਤੇਸਮ੍ਪਿ, ਪਾਕਭੇਦਾ ਸਿਯੁਂ ਨ ਹਿ;

ਪਾਕੋ ਪਚ੍ਚਤਿ ਭੇਦੋ ਵਾ, ਨ ਚ ਭਿਜ੍ਜਤਿ ਨਤ੍ਥਿ ਤਂ.

੭੦੯.

ਜਾਤਸ੍ਸ ¶ ਪਾਕਭੇਦਤ੍ਤਾ, ਦ੍ਵਯਮੇਤਂ ਨ ਜਾਯਤਿ;

ਸਿਯਾ ਕਤ੍ਥਚਿ ਬੁਦ੍ਧੇਤ੍ਥ, ‘‘ਰੂਪਸ੍ਸੁਪਚਯੋ’’ਤਿ ਹਿ.

੭੧੦.

ਵਚਨੇਨ ਯਥਾ ‘‘ਜਾਤਿ, ਜਾਯਤੀ’’ਤਿ ਚ ਦੀਪਿਤਂ;

ਪਾਕੋਪਿ ਪਚ੍ਚਤੇਵਂ ਤੁ, ਭੇਦੋਪਿ ਪਰਿਭਿਜ੍ਜਤੁ.

੭੧੧.

ਨ ਚੇਵ ਜਾਯਤੇ ਜਾਤਿ, ਇਤਿ ਞੇਯ੍ਯਾ ਵਿਭਾਵਿਨਾ;

ਜਾਯਮਾਨਸ੍ਸ ਧਮ੍ਮਸ੍ਸ, ਨਿਬ੍ਬਤ੍ਤੀਤਿ ਪਕਾਸਿਤਾ.

੭੧੨.

ਤਤ੍ਥ ਯਥਾ ਸਿਯਾ ਜਾਤਿ, ਯੇਸਂ ਧਮ੍ਮਾਨਮੇਵ ਸਾ;

ਤਪ੍ਪਚ੍ਚਯਤ੍ਤਵੋਹਾਰਂ, ਅਭਿਨਿਬ੍ਬਤ੍ਤਿਸਮ੍ਮੁਤਿਂ.

੭੧੩.

ਲਭਤੇਵ ਤਥਾ ਤੇਸਂ, ਪਾਕਭੇਦਾ ਲਬ੍ਭਨ੍ਤਿ ਤੇ;

ਤਪ੍ਪਚ੍ਚਯਤ੍ਤਵੋਹਾਰਂ, ਅਭਿਨਿਬ੍ਬਤ੍ਤਿਸਮ੍ਮੁਤਿਂ.

੭੧੪.

ਏਵਂ ਇਦਂ ਦ੍ਵਯਞ੍ਚਾਪਿ, ਹੋਤਿ ਕਮ੍ਮਾਦਿਸਮ੍ਭਵਂ;

ਨ ਪਾਕਭੇਦਾ ਵੋਹਾਰਂ, ਤਂ ਲਭਨ੍ਤਿ ਕਦਾਚਿਪਿ.

੭੧੫.

ਕਸ੍ਮਾ ¶ ਹਿ ਜਨਕਾਨਂ ਤੁ, ਪਚ੍ਚਯਾਨਮਭਾਵਤੋ;

ਆਨੁਭਾਵਖਣੁਪ੍ਪਾਦੇ, ਜਾਤਿਯਾ ਪਨ ਲਬ੍ਭਤਿ.

੭੧੬.

ਤਪ੍ਪਚ੍ਚਯਤ੍ਤਵੋਹਾਰਂ, ਅਭਿਨਿਬ੍ਬਤ੍ਤਿਸਮ੍ਮੁਤਿਂ;

ਤਸ੍ਮਾ ਲਭਤਿ ਜਾਤਿ ਚ, ਲਭਤੀ ਨੇਤਰਦ੍ਵਯਂ.

੭੧੭.

ਜਿਯ੍ਯਤੀਤਿ ਨ ਵਤ੍ਤਬ੍ਬਂ, ਤਂ ਦ੍ਵਯਂ ਭਿਜ੍ਜਤੀਤਿ ਵਾ;

ਆਨੁਭਾਵਖਣੇ ਤਸ੍ਸ, ਪਚ੍ਚਯਾਨਮਭਾਵਤੋ.

੭੧੮.

‘‘ਅਨਿਚ੍ਚਂ ਸਙ੍ਖਤਞ੍ਚੇਤਂ, ਜਰਾਮਰਣ’’ਮਿਚ੍ਚਪਿ;

ਵੁਤ੍ਤਤ੍ਤਾ ਜਾਯਤਿਚ੍ਚੇਤਂ, ਅਥ ਮਞ੍ਞਸਿ ਚੇ ਤੁਵਂ.

੭੧੯.

ਏਵਮ੍ਪਿ ਚ ਨ ਵਤ੍ਤਬ੍ਬਂ, ਸਾ ਹਿ ਪਰਿਯਾਯਦੇਸਨਾ;

ਅਨਿਚ੍ਚਾਨਂ ਤੁ ਧਮ੍ਮਾਨਂ, ਜਰਾਮਰਣਤੋ ਤਥਾ.

੭੨੦.

ਅਨਿਚ੍ਚਂ ¶ ਸਙ੍ਖਤਞ੍ਚਾਤਿ, ਵੁਤ੍ਤਂ ਵਿਞ੍ਞਤ੍ਤਿਯੋ ਵਿਯ;

ਯਦਿ ਏਵਂ ਤਯਮੇਤਂ, ਅਜਾਤਤ੍ਤਾ ਚ ਸਬ੍ਬਥਾ.

੭੨੧.

ਨਤ੍ਥੀਤਿ ¶ ਚੇ ਖਂਪੁਪ੍ਫਂਵ, ਨਿਚ੍ਚਂ ਵਾਸਙ੍ਖਤਂ ਵਿਯ;

ਨੋਭਯਂ ਪਨਿਦਂ ਕਸ੍ਮਾ, ਨਿਸ੍ਸਯਾਯਤ੍ਤਵੁਤ੍ਤਿਤੋ.

੭੨੨.

ਭਾਵੇ ਪਥਵਿਯਾਦੀਨਂ, ਨਿਸ੍ਸਯਾਨਂ ਤੁ ਭਾਵਤੋ;

ਤਸ੍ਮਾ ਹਿ ਚ ਖਂਪੁਪ੍ਫਂਵ, ਨ ਨਤ੍ਥਿ ਪਨ ਤਂ ਤਯਂ.

੭੨੩.

ਯਸ੍ਮਾ ਪਥਵਿਯਾਦੀਨਂ, ਅਭਾਵੇਨ ਚ ਲਬ੍ਭਤਿ;

ਤਸ੍ਮਾ ਨ ਪਨ ਨਿਚ੍ਚਂ ਵਾ, ਨਿਬ੍ਬਾਨਂ ਵਿਯ ਤਂ ਤਯਂ.

ਨਿਪ੍ਫਨ੍ਨਨ੍ਤਿ ਏਤ੍ਥ ਚਤ੍ਤਾਰੋ ਮਹਾਭੂਤਾ ਚਕ੍ਖੁਸੋਤਘਾਨਜਿਵ੍ਹਾਕਾਯਰੂਪਸਦ੍ਦਗਨ੍ਧਰਸਇਤ੍ਥਿਪੁਰਿਸਜੀਵਿਤਿਨ੍ਦ੍ਰਿਯਕਬਲ਼ੀਕਾਰਾਹਾਰਹਦਯਵਤ੍ਥੂਤਿ ਅਟ੍ਠਾਰਸ ਰੂਪਾਨਿ ਨਿਪ੍ਫਨ੍ਨਾਨਿ ਨਾਮ. ਸੇਸਾਨਿ ਦਸ ਅਨਿਪ੍ਫਨ੍ਨਾਨਿ ਨਾਮ.

੭੨੪.

ਅਟ੍ਠਾਰਸ ਨਿਪ੍ਫਨ੍ਨਾਨਿ, ਅਨਿਪ੍ਫਨ੍ਨਾਵਸੇਸਕਾ;

ਯਦਿ ਹੋਨ੍ਤਿ ਅਨਿਪ੍ਫਨ੍ਨਾ, ਭਵੇਯ੍ਯੁਂ ਤੇ ਅਸਙ੍ਖਤਾ.

੭੨੫.

ਤੇਸਮੇਵ ¶ ਚ ਰੂਪਾਨਂ, ਵਿਕਾਰਤ੍ਤਾ ਅਸਙ੍ਖਤਾ;

ਕਥਂ ਨਾਮ ਭਵੇਯ੍ਯੁਂ ਤੇ, ਨਿਪ੍ਫਨ੍ਨਾ ਚੇਵ ਸਙ੍ਖਤਾ.

ਏਵਂ ਨਿਪ੍ਫਨ੍ਨਸਙ੍ਖਤੋ ਵੇਦਿਤਬ੍ਬੋ.

ਚੋਦਨਾਪਰਿਹਾਰਨ੍ਤਿ ਏਤ੍ਥ –

੭੨੬.

ਇਤ੍ਥਿਭਾਵੋ ਪੁਮਤ੍ਤਞ੍ਚ, ਜੀਵਿਤਂ ਸਮ੍ਭਵੋਪਿ ਚ;

ਤਥਾ ਕਾਯਪ੍ਪਸਾਦੋਤਿ, ਸਬ੍ਬਟ੍ਠਾਨਾਤਿ ਵਣ੍ਣਿਤਾ.

੭੨੭.

ਏਵਂ ਸਨ੍ਤੇ ਤੁ ਧਮ੍ਮਾਨਂ, ਹੋਤਿ ਸਙ੍ਕਰਦੋਸਤਾ;

ਚਕ੍ਖੁਕਾਯਪਸਾਦਾਨਂ, ਏਕਤ੍ਤਂ ਉਪਪਜ੍ਜਤਿ.

੭੨੮.

ਅਞ੍ਞਂ ਪਨ ਚ ਅਞ੍ਞਸ੍ਮਿਂ, ਨ ਚਤ੍ਥਿ ਪਰਮਤ੍ਥਤੋ;

ਤਸ੍ਮਾ ਕਾਯਿਨ੍ਦ੍ਰਿਯਂ ਚਕ੍ਖੁ-ਪਸਾਦੇਨ ਨ ਸਙ੍ਕਰਂ.

੭੨੯.

ਅਞ੍ਞਮਞ੍ਞਾਵਿਨਿਬ੍ਭੋਗਵਸੇਨ ¶ ਤੁ ਪਵਤ੍ਤਿਤੋ;

ਤੇਸਂ ਠਾਨਨ੍ਤਰਂ ਵਤ੍ਤੁਂ, ਨ ਸਕ੍ਕਾ ਸਮਯਞ੍ਞੁਨਾ.

੭੩੦.

ਯਾਵਤਾ ਅਨੁਪਾਦਿਨ੍ਨਸਨ੍ਤਾਨਂ ਅਤ੍ਥਿ ਤਤ੍ਥ ਸੋ;

ਅਤ੍ਥਿ ਕਾਯਪਸਾਦੋਤਿ, ਤਸ੍ਮਾ ਏਵਮੁਦੀਰਿਤਂ.

੭੩੧.

ਲਕ੍ਖਣਾਦਿਵਸੇਨਾਪਿ, ਨਾਨਤ੍ਤਂ ਸਮੁਪਾਗਤਂ;

ਧਜਾਨਂ ਪਞ੍ਚਵਣ੍ਣਾਨਂ, ਛਾਯਾ ਉਪਮਤਂ ਗਤਾ.

੭੩੨.

ਤਸ੍ਮਾ ¶ ਹਿ ਪਨ ਧਮ੍ਮਾਨਂ, ਅਞ੍ਞਮਞ੍ਞਂ ਵਿਮਿਸ੍ਸਤਾ;

ਨ ਹੋਤੇਵਾਤਿ ਵਿਞ੍ਞੇਯ੍ਯਾ, ਵਿਞ੍ਞੁਨਾ ਸਮਯਞ੍ਞੁਨਾ.

ਏਵਂ ਨਿਪ੍ਫਨ੍ਨਾਨਿਪ੍ਫਨ੍ਨਭਾਵੋ, ਚੋਦਨਾਪਰਿਹਾਰੋ ਚ ਵੇਦਿਤਬ੍ਬੋ.

ਨਯਮੇਕਵਿਧਾਦਿਕਨ੍ਤਿ –

੭੩੩.

ਲੋਕਿਕਤ੍ਤਾ ¶ ਨਹੇਤੁਤ੍ਤਾ, ਸਙ੍ਖਤਤ੍ਤਾ ਚ ਸਾਸਵਾ;

ਸਬ੍ਬਮੇਕਵਿਧਂ ਰੂਪਂ, ਪਚ੍ਚਯਾਯਤ੍ਤਵੁਤ੍ਤਿਤੋ.

੭੩੪.

ਅਜ੍ਝਤ੍ਤਿਕਬਹਿਦ੍ਧਾ ਚ, ਇਨ੍ਦ੍ਰਿਯਾਨਿਨ੍ਦ੍ਰਿਯਾਪਿ ਚ;

ਸੁਖੁਮੋਲ਼ਾਰਿਕਾ ਚੇਵ, ਉਪਾਦਿਨ੍ਨਾਦਿਤੋ ਦ੍ਵਿਧਾ.

੭੩੫.

ਚਕ੍ਖੁਆਯਤਨਾਦੀਨਿ, ਪਞ੍ਚ ਅਜ੍ਝਤ੍ਤਿਕਾਨਿ ਤੁ;

ਤੇਵੀਸਤਿਵਿਧਂ ਸੇਸਂ, ਬਾਹਿਰਨ੍ਤਿ ਪਵੁਚ੍ਚਤਿ.

੭੩੬.

ਚਕ੍ਖੁਸੋਤਿਨ੍ਦ੍ਰਿਯਾਦੀਨਿ, ਇਨ੍ਦ੍ਰਿਯਾਨਿ ਪਨਟ੍ਠ ਤੁ;

ਸੇਸਞ੍ਚ ਤੁ ਵੀਸਂ ਰੂਪਂ, ਅਨਿਨ੍ਦ੍ਰਿਯਮੁਦੀਰਿਤਂ.

੭੩੭.

ਚਕ੍ਖੁਆਯਤਨਾਦੀਨਿ, ਨਵ ਫੋਟ੍ਠਬ੍ਬਮੇਵ ਚ;

ਤਂ ਬਾਰਸਵਿਧਂ ਰੂਪਂ, ਓਲ਼ਾਰਿਕਮੁਦੀਰਿਤਂ.

੭੩੮.

ਸੇਸਾਨਿ ਪਨ ਰੂਪਾਨਿ, ਸੁਖੁਮਾਨਿ ਤੁ ਸੋਲ਼ਸ;

ਕਮ੍ਮਜਂ ਤੁ ਉਪਾਦਿਨ੍ਨਂ, ਅਨੁਪਾਦਿਨ੍ਨਮਞ੍ਞਥਾ.

ਏਵਞ੍ਚ ਦੁਵਿਧਂ ਹੋਤਿ.

ਪੁਨ ¶ ਸਨਿਦਸ੍ਸਨਸਪ੍ਪਟਿਘਅਨਿਦਸ੍ਸਨਸਪ੍ਪਟਿਘ- ਅਨਿਦਸ੍ਸਨਅਪ੍ਪਟਿਘਭੇਦਤੋ ਚ, ਕਮ੍ਮਜਾਕਮ੍ਮਜਨੇਵਕਮ੍ਮਜਾਨਾਕਮ੍ਮਜਭੇਦਤੋ ਚ ਤਿਵਿਧਂ. ਤਤ੍ਥ ਰੂਪਾਯਤਨਂ ਸਨਿਦਸ੍ਸਨਸਪ੍ਪਟਿਘਂ, ਏਕਾਦਸਵਿਧਂ ਸੇਸੋਲ਼ਾਰਿਕਰੂਪਂ ਅਨਿਦਸ੍ਸਨਸਪ੍ਪਟਿਘਂ, ਸੇਸਂ ਸੋਲ਼ਸਵਿਧਂ ਸੁਖੁਮਰੂਪਂ ਅਨਿਦਸ੍ਸਨਅਪ੍ਪਟਿਘਂ. ਕਮ੍ਮਤੋ ਜਾਤਂ ਕਮ੍ਮਜਂ, ਅਟ੍ਠਿਨ੍ਦ੍ਰਿਯਾਨਿ, ਵਤ੍ਥੁ ਚ ਕਮ੍ਮਜਂ, ਤਦਞ੍ਞਪ੍ਪਚ੍ਚਯਾ ਜਾਤਂ ਅਕਮ੍ਮਜਂ, ਨਕੁਤੋਚਿ ਜਾਤਂ ਨੇਵਕਮ੍ਮਜਾਨਾਕਮ੍ਮਜਂ ਜਰਤਾ ਅਨਿਚ੍ਚਤਾ ਚ. ਏਵਂ ਤਿਵਿਧਂ ਹੋਤਿ.

ਪੁਨ ਦਿਟ੍ਠਸੁਤਮੁਤਵਿਞ੍ਞਾਤਵਸੇਨ ਚ, ਦ੍ਵਾਰਞ੍ਚੇਵ ਵਤ੍ਥੁ ਚ, ਦ੍ਵਾਰਮੇਵ ਹੁਤ੍ਵਾ ਨ ਵਤ੍ਥੁ ਚ, ਵਤ੍ਥੁਮੇਵ ਹੁਤ੍ਵਾ ਨ ਦ੍ਵਾਰਞ੍ਚ, ਨੇਵ ਦ੍ਵਾਰਞ੍ਚ ਨ ਵਤ੍ਥੁ ਚਾਤਿ ਏਵਂ ਭੇਦਤੋ ਚ, ਦ੍ਵਾਰਞ੍ਚੇਵਿਨ੍ਦ੍ਰਿਯਞ੍ਚ, ਦ੍ਵਾਰਂਯੇਵ ਹੁਤ੍ਵਾ ਨੇਵਿਨ੍ਦ੍ਰਿਯਞ੍ਚ, ਇਨ੍ਦ੍ਰਿਯਮੇਵ ਹੁਤ੍ਵਾ ਨ ਦ੍ਵਾਰਞ੍ਚ, ਨੇਵ ਦ੍ਵਾਰਞ੍ਚ ਨੇਵਿਨ੍ਦ੍ਰਿਯਞ੍ਚਾਤਿ ਏਵਂ ¶ ਭੇਦਤੋ ਚ, ਵਤ੍ਥੁ ਚੇਵ ਇਨ੍ਦ੍ਰਿਯਞ੍ਚ, ਇਨ੍ਦ੍ਰਿਯਮੇਵ ਹੁਤ੍ਵਾ ਨ ਵਤ੍ਥੁ ਚ, ਵਤ੍ਥੁਮੇਵ ਹੁਤ੍ਵਾ ਨੇਵਿਨ੍ਦ੍ਰਿਯਞ੍ਚ, ਨੇਵਿਨ੍ਦ੍ਰਿਯਂ ਨ ਵਤ੍ਥੁ ਚੇਤਿ ਏਵਂ ਭੇਦਤੋ ਚ ਚਤੁਬ੍ਬਿਧਂ.

ਤਤ੍ਥ ¶ ਦਿਟ੍ਠਂ ਨਾਮ ਰੂਪਾਯਤਨਂ, ਸੁਤਂ ਨਾਮ ਸਦ੍ਦਾਯਤਨਂ, ਮੁਤਂ ਨਾਮ ਗਨ੍ਧਰਸਫੋਟ੍ਠਬ੍ਬਾਯਤਨਤ੍ਤਯਂ, ਵਿਞ੍ਞਾਤਂ ਨਾਮ ਅਵਸੇਸਚਕ੍ਖਾਯਤਨਾਦਿਪਞ੍ਚਕਂ, ਸੋਲ਼ਸਵਿਧਂ ਸੁਖੁਮਰੂਪਞ੍ਚ. ਚਕ੍ਖਾਯਤਨਾਦਿਪਞ੍ਚਕਂ ਦ੍ਵਾਰਞ੍ਚੇਵ ਵਤ੍ਥੁ ਚ, ਵਿਞ੍ਞਤ੍ਤਿਦ੍ਵਯਂ ਦ੍ਵਾਰਮੇਵ ਹੋਤਿ, ਨ ਵਤ੍ਥੁ, ਹਦਯਵਤ੍ਥੁ ਵਤ੍ਥੁਮੇਵ ਹੋਤਿ, ਨ ਦ੍ਵਾਰਂ, ਸੇਸਂ ਸਬ੍ਬਂ ਰੂਪਂ ਨੇਵ ਦ੍ਵਾਰਂ ਨ ਵਤ੍ਥੁ ਚ. ਤਤਿਯਚਤੁਕ੍ਕੇ ਇਨ੍ਦ੍ਰਿਯਮੇਵ ਹੁਤ੍ਵਾ ਨ ਦ੍ਵਾਰਨ੍ਤਿ ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਾਨਿ. ਇਮਾਨਿ ਹਿ ਇਨ੍ਦ੍ਰਿਯਾਨੇਵ ਹੋਨ੍ਤਿ, ਨ ਦ੍ਵਾਰਾਨਿ, ਸੇਸਮਨਨ੍ਤਰਚਤੁਕ੍ਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਚਤੁਤ੍ਥਚਤੁਕ੍ਕੇ ਤਤਿਯਪਦਂ ਹਦਯਵਤ੍ਥੁਂ ਸਨ੍ਧਾਯ ਵੁਤ੍ਤਂ, ਸੇਸਂ ਵੁਤ੍ਤਨਯਮੇਵ. ਏਵਂ ਚਤੁਬ੍ਬਿਧਂ ਹੋਤੀਤਿ ਵੇਦਿਤਬ੍ਬਂ.

ਪੁਨ ਏਕਜਦ੍ਵਿਜਤਿਜਚਤੁਜਨਕੁਤੋਚਿਜਾਤਭੇਦਤੋ, ਦ੍ਵਾਰਿਨ੍ਦ੍ਰਿਯਂ ਵਤ੍ਥੁ ਚ, ਦ੍ਵਾਰਮੇਵ ਹੁਤ੍ਵਾ ਨੇਵਿਨ੍ਦ੍ਰਿਯਂ ਨ ਵਤ੍ਥੁ ਚ, ਵਤ੍ਥੁਮੇਵ ਹੁਤ੍ਵਾ ਨੇਵਿਨ੍ਦ੍ਰਿਯਂ ਨ ਦ੍ਵਾਰਞ੍ਚ, ਇਨ੍ਦ੍ਰਿਯਮੇਵ ਹੁਤ੍ਵਾ ਨ ਵਤ੍ਥੁ ਨ ਦ੍ਵਾਰਞ੍ਚ, ਨੇਵਿਨ੍ਦ੍ਰਿਯਂ ¶ ਨ ਵਤ੍ਥੁ ਨ ਦ੍ਵਾਰਞ੍ਚਾਤਿ ਏਵਂ ਪਭੇਦਤੋ ਪਞ੍ਚਵਿਧਂ.

ਤਤ੍ਥ –

੭੩੯.

ਅਟ੍ਠਿਨ੍ਦ੍ਰਿਯਾਨਿ ਵਤ੍ਥੁਞ੍ਚ, ਵਿਞ੍ਞਤ੍ਤਿਦ੍ਵਯਮੇਵ ਚ;

ਏਕਾਦਸਵਿਧਂ ਰੂਪਂ, ਏਕਜਨ੍ਤਿ ਪਵੁਚ੍ਚਤਿ.

੭੪੦.

ਸਦ੍ਦੋ ਏਕੋ ਦ੍ਵਿਜੋ ਨਾਮ, ਲਹੁਤਾਦਿਤ੍ਤਯਂ ਤਿਜਂ;

ਏਕਾਦਸਵਿਧਂ ਸੇਸਂ, ਚਤੁਜਨ੍ਤਿ ਪਕਾਸਿਤਂ.

੭੪੧.

ਜਰਤਾਨਿਚ੍ਚਤਾ ਚੇਵ, ਨਕੁਤੋਚਿ ਭਵੇ ਪਨ;

ਚਕ੍ਖਾਦਿਪਞ੍ਚਕਂ ਦ੍ਵਾਰਂ, ਇਨ੍ਦ੍ਰਿਯਂ ਵਤ੍ਥੁਮੇਵ ਚ.

੭੪੨.

ਵਿਞ੍ਞਤ੍ਤੀਨਂ ਦ੍ਵਯਂ ਦ੍ਵਾਰਂ, ਨੇਵਿਨ੍ਦ੍ਰਿਯਂ ਨ ਵਤ੍ਥੁ ਚ;

ਹਦਯਵਤ੍ਥੁ ਵਤ੍ਥੂਵ, ਨ ਦ੍ਵਾਰਂ ਨੇਵਿਨ੍ਦ੍ਰਿਯਂ ਪਨ.

ਇਤ੍ਥਿਪੁਰਿਸਜੀਵਿਤਿਨ੍ਦ੍ਰਿਯਾਨਿ ¶ ਇਨ੍ਦ੍ਰਿਯਮੇਵ ਨ ਵਤ੍ਥੁ ਨ ਦ੍ਵਾਰਞ੍ਚ, ਸੇਸਂ ਪਨ ਰੂਪਂ ਨੇਵਿਨ੍ਦ੍ਰਿਯਂ ਨ ਵਤ੍ਥੁ ਨ ਦ੍ਵਾਰਨ੍ਤਿ. ਏਵਂ ਪਞ੍ਚਵਿਧਨ੍ਤਿ ਵੇਦਿਤਬ੍ਬਂ.

ਪੁਨ ਕਮ੍ਮਜਚਿਤ੍ਤਜਉਤੁਚਿਤ੍ਤਜਉਤੁਚਿਤ੍ਤਾਹਾਰਜਚਤੁਜਨਕੁਤੋਚਿਜਾਤਭੇਦਤੋ, ਚਕ੍ਖੁਵਿਞ੍ਞੇਯ੍ਯਸੋਤਘਾਨਜਿਵ੍ਹਾਕਾਯਮਨੋਵਿਞ੍ਞੇਯ੍ਯਵਸੇਨ ਛਬ੍ਬਿਧਂ.

ਤਤ੍ਥ ਅਟ੍ਠਿਨ੍ਦ੍ਰਿਯਾਨਿ ਵਤ੍ਥੁ ਚ ਕਮ੍ਮਜਮੇਵ, ਵਿਞ੍ਞਤ੍ਤਿਦ੍ਵਯਂ ਚਿਤ੍ਤਜਮੇਵ, ਸਦ੍ਦੋ ਉਤੁਚਿਤ੍ਤਜੋ, ਲਹੁਤਾਦਿਤ੍ਤਯਂ ਉਤੁਚਿਤ੍ਤਾਹਾਰਜਮੇਵ, ਸੇਸਂ ਏਕਾਦਸਵਿਧਂ ਚਤੁਜਂ ਨਾਮ, ਜਰਤਾ ਅਨਿਚ੍ਚਤਾ ਨਕੁਤੋਚਿਜਾਤਂ ਨਾਮ. ਦੁਤਿਯਛਕ੍ਕੇ ਚਕ੍ਖੁਵਿਞ੍ਞੇਯ੍ਯਂ ¶ ਨਾਮ ਚਕ੍ਖੁਵਿਞ੍ਞਾਣੇਨ ਵਿਞ੍ਞੇਯ੍ਯਂ ਰੂਪਾਯਤਨਂ…ਪੇ… ਕਾਯਵਿਞ੍ਞੇਯ੍ਯਂ ਨਾਮ ਫੋਟ੍ਠਬ੍ਬਾਯਤਨਂ, ਮਨੋਵਿਞ੍ਞੇਯ੍ਯਂ ਨਾਮ ਸੇਸਾ ਪਞ੍ਚ ਓਲ਼ਾਰਿਕਾ ਚ ਸੋਲ਼ਸ ਸੁਖੁਮਰੂਪਾਨਿ ਚਾਤਿ ਏਕਵੀਸਤਿਵਿਧਂ ਹੋਤਿ. ਏਵਂ ਛਬ੍ਬਿਧਂ ਹੋਤਿ.

ਪੁਨ ਛਵਤ੍ਥੁਅਵਤ੍ਥੁਭੇਦਤੋ ਚ, ਚਕ੍ਖੁਵਿਞ੍ਞੇਯ੍ਯਂ ਸੋਤਘਾਨਜਿਵ੍ਹਾਕਾਯਵਿਞ੍ਞੇਯ੍ਯਂ ਮਨੋਧਾਤੁਵਿਞ੍ਞੇਯ੍ਯਂ ਮਨੋਵਿਞ੍ਞਾਣਧਾਤੁਵਿਞ੍ਞੇਯ੍ਯਨ੍ਤਿ ਸਤ੍ਤਵਿਧਂ ਹੋਤਿ.

ਤਤ੍ਥ ¶ ਚਕ੍ਖਾਦਿਪਞ੍ਚਵਤ੍ਥੂਨਿ ਹਦਯਵਤ੍ਥੁਨਾ ਸਦ੍ਧਿਂ ਛ ਵਤ੍ਥੂਨਿ, ਸੇਸਂ ਬਾਵੀਸਤਿਵਿਧਂ ਰੂਪਂ ਅਵਤ੍ਥੁ ਨਾਮ, ਦੁਤਿਯਸਤ੍ਤਕਮੁਤ੍ਤਾਨਮੇਵ. ਏਵਂ ਸਤ੍ਤਵਿਧਂ ਹੋਤਿ.

ਪੁਨ ਸਤ੍ਤਦ੍ਵਾਰਾਦ੍ਵਾਰਭੇਦਤੋ ਅਟ੍ਠਵਿਧਂ. ਤਤ੍ਥ ਚਕ੍ਖੁਦ੍ਵਾਰਾਦੀਨਿ ਪਞ੍ਚ ਕਾਯਵਿਞ੍ਞਤ੍ਤਿਵਚੀਵਿਞ੍ਞਤ੍ਤਿਦ੍ਵਾਰੇਹਿ ਸਦ੍ਧਿਂ ਸਤ੍ਤ ਦ੍ਵਾਰਾਨਿ, ਸੇਸਮਦ੍ਵਾਰਨ੍ਤਿ ਏਵਂ ਅਟ੍ਠਵਿਧਂ ਹੋਤਿ.

ਪੁਨ ਅਟ੍ਠਿਨ੍ਦ੍ਰਿਯਾਨਿਨ੍ਦ੍ਰਿਯਭੇਦਤੋ ਪਨ ਨਵਵਿਧਂ.

ਪੁਨ ਨਵਕਮ੍ਮਜਾਕਮ੍ਮਜਭੇਦਤੋ ਦਸਵਿਧਂ.

ਪੁਨ ਆਯਤਨਭੇਦਤੋ ਏਕਾਦਸਵਿਧਂ.

ਭਵੇਸੁ ਰੂਪਕਲਾਪਪਵਤ੍ਤਿਭੇਦਤੋ ਬਹੁਵਿਧਨ੍ਤਿ ਵੇਦਿਤਬ੍ਬਂ.

੭੪੩.

ਇਤੋ ਪਰਂ ਪਵਕ੍ਖਾਮਿ, ਕਾਮਰੂਪਭਵਦ੍ਵਯੇ;

ਉਪ੍ਪਤ੍ਤਿਂ ਪਨ ਰੂਪਾਨਂ, ਪਟਿਸਨ੍ਧਿਪਵਤ੍ਤਿਸੁ.

੭੪੪.

ਭੁਮ੍ਮਵਜ੍ਜੇਸੁ ¶ ਦੇਵੇਸੁ, ਨਿਰਯੇ ਨਿਜ੍ਝਾਮਤਣ੍ਹਿਕੇ;

ਯੋਨਿਯੋ ਪੁਰਿਮਾ ਤਿਸ੍ਸੋ, ਨ ਸਨ੍ਤੀਤਿ ਵਿਨਿਦ੍ਦਿਸੇ.

੭੪੫.

ਸੇਸੇ ਗਤਿਤ੍ਤਯੇ ਭੁਮ੍ਮ-ਦੇਵੇਸੁਪਿ ਚ ਯੋਨਿਯੋ;

ਚਤਸ੍ਸੋ ਚ ਭਵਨ੍ਤੀਤਿ, ਵੇਦਿਤਬ੍ਬਾ ਵਿਭਾਵਿਨਾ.

੭੪੬.

ਗਬ੍ਭਸੇਯ੍ਯਕਸਤ੍ਤਸ੍ਸ, ਪਟਿਸਨ੍ਧਿਕ੍ਖਣੇ ਪਨ;

ਤਿਂਸ ਰੂਪਾਨਿ ਜਾਯਨ੍ਤੇ, ਸਭਾਵਸ੍ਸੇਵ ਦੇਹਿਨੋ.

੭੪੭.

ਅਭਾਵਗਬ੍ਭਸੇਯ੍ਯਾਨਂ, ਅਣ੍ਡਜਾਨਞ੍ਚ ਵੀਸਤਿ;

ਭਵਨ੍ਤਿ ਪਨ ਰੂਪਾਨਿ, ਕਾਯਵਤ੍ਥੁਵਸੇਨ ਤੁ.

੭੪੮.

ਗਹਿਤਾਗਹਣੇਨੇਤ੍ਥ, ਏਕਾਦਸ ਭਵਨ੍ਤਿ ਤੇ;

ਏਸੇਵ ਚ ਨਯੋ ਞੇਯ੍ਯੋ, ਸਬ੍ਬੇਸੁ ਦਸਕੇਸੁਪਿ.

੭੪੯.

ਜੀਵਿਤੇਨ ਯਦਾ ਸਦ੍ਧਿਂ, ਜਾਤੇ ਸੁਦ੍ਧਕਮਟ੍ਠਕਂ;

ਜੀਵਿਤਨਵਕਂ ਨਾਮ, ਹੋਤੀਤਿ ਸਮੁਦੀਰਿਤਂ.

੭੫੦.

ਜੀਵਿਤਨਵਕਂ ¶ ਕਾਯਪਸਾਦੇਨੇਕਤੋ ਸਿਯਾ;

ਤਂ ਕਾਯਦਸਕਂ ਨਾਮ, ਹੋਤੀਤਿ ਪਰਿਯਾਪੁਟਂ.

੭੫੧.

ਏਸੇਵ ਚ ਨਯੋ ਞੇਯ੍ਯੋ, ਸਦ੍ਧਿਂ ਭਾਵੇਨ ਵਤ੍ਥੁਨਾ;

ਚਕ੍ਖਾਦੀਹਿ ਚ ਯੋਜੇਤ੍ਵਾ, ਦਸਕਾ ਸਤ੍ਤ ਵਿਞ੍ਞੁਨਾ.

੭੫੨.

ਓਪਪਾਤਿਕਸਤ੍ਤਾਨਂ, ਮਨੁਸ੍ਸੇਸੂਪਪਤ੍ਤਿਯਂ;

ਕਾਮਾਵਚਰਦੇਵਾਨਂ, ਨਿਚ੍ਚਂ ਰੂਪਾਨਿ ਸਤ੍ਤਤਿ.

੭੫੩.

ਚਕ੍ਖੁ ¶ ਸੋਤਞ੍ਚ ਘਾਨਞ੍ਚ, ਜਿਵ੍ਹਾ ਕਾਯੋ ਚ ਵਤ੍ਥੁ ਚ;

ਭਾਵੋ ਚਾਤਿ ਹਿ ਸਤ੍ਤਨ੍ਨਂ, ਦਸਕਾਨਂ ਵਸਾ ਪਨ.

੭੫੪.

ਬ੍ਰਹ੍ਮਾਨਂ ਰੂਪਿਨਂ ਚਕ੍ਖੁ-ਸੋਤਵਤ੍ਥੁਵਸਾ ਪਨ;

ਦਸਕਾਨਿ ਚ ਤੀਣੇਵ, ਨਵਕਂ ਜੀਵਿਤਸ੍ਸ ਚ.

੭੫੫.

ਚਤੁਨ੍ਨਂ ਤੁ ਕਲਾਪਾਨਂ, ਵਸੇਨ ਪਨ ਰੂਪਿਨਂ;

ਚਤ੍ਤਾਲੀਸੇਵ ਰੂਪਾਨਿ, ਏਕੂਨਾਨਿ ਭਵਨ੍ਤਿ ਹਿ.

੭੫੬.

ਜੀਵਿਤਨਵਕੇਨੇਵ ¶ , ਅਸਞ੍ਞੁਪ੍ਪਤ੍ਤਿ ਦੀਪਿਤਾ;

ਜਚ੍ਚਨ੍ਧਬਧਿਰਾਘਾਨ-ਰਹਿਤੇ ਤੁ ਨਪੁਂਸਕੇ.

੭੫੭.

ਵਤ੍ਥੁਨੋ ਕਾਯਜਿਵ੍ਹਾਨਂ, ਵਸਾ ਤਿਂਸਾਵਕਂਸਤੋ;

ਉਕ੍ਕਂਸਸ੍ਸਾਵਕਂਸਸ੍ਸ, ਅਨ੍ਤਰੇ ਅਨੁਰੂਪਤੋ.

੭੫੮.

ਪਰਿਪੁਣ੍ਣਾਨਂ ਰੂਪਾਨਂ, ਵਸੇਨ ਪਨ ਪਾਣਿਨਂ;

ਰੂਪਾਨਂ ਤੁ ਸਮੁਪ੍ਪਤ੍ਤਿ, ਵੇਦਿਤਬ੍ਬਾ ਵਿਭਾਵਿਨਾ.

੭੫੯.

ਸਤ੍ਤਵੀਸਤਿ ਰੂਪਾਨਿ, ਕਾਮਾਵਚਰਦੇਹਿਨੋ;

ਅਪ੍ਪਵਤ੍ਤਨਤੋ ਹੋਨ੍ਤਿ, ਦ੍ਵਿਨ੍ਨਂ ਭਾਵਾਨਮੇਕਤੋ.

੭੬੦.

ਘਾਨਂ ਜਿਵ੍ਹਾ ਚ ਕਾਯੋ ਚ, ਤਥਾ ਭਾਵਦ੍ਵਯਮ੍ਪਿ ਚ;

ਬ੍ਰਹ੍ਮਾਨਂ ਪਨ ਰੂਪੀਨਂ, ਪਞ੍ਚ ਰੂਪਾ ਨ ਵਿਜ੍ਜਰੇ.

੭੬੧.

ਚਤੁਸਨ੍ਤਤਿ ਕਾਮਸ੍ਮਿਂ, ਰੂਪੇ ਹੋਨ੍ਤਿ ਤਿਸਨ੍ਤਤਿ;

ਦ੍ਵਿਸਨ੍ਤਤਿ ਅਸਞ੍ਞੇਸੁ, ਬਹਿਦ੍ਧਾ ਏਕਸਨ੍ਤਤਿ.

੭੬੨.

ਰੂਪਂ ¶ ਨਿਬ੍ਬਤ੍ਤਮਾਨਂ ਤੁ, ਸਬ੍ਬੇਸਂ ਪਨ ਪਾਣਿਨਂ;

ਪਠਮਂ ਕਮ੍ਮਤੋਯੇਵ, ਨਿਬ੍ਬਤ੍ਤਤਿ ਨ ਸਂਸਯੋ.

੭੬੩.

ਗਬ੍ਭਸੇਯ੍ਯਕਸਤ੍ਤਾਨਂ, ਪਟਿਸਨ੍ਧਿਕ੍ਖਣੇ ਪਨ;

ਤਞ੍ਚ ਖੋ ਸਨ੍ਧਿਚਿਤ੍ਤਸ੍ਸ, ਉਪ੍ਪਾਦੇਯੇਵ ਜਾਯਰੇ.

੭੬੪.

ਯਥੇਵ ਤਸ੍ਸ ਉਪ੍ਪਾਦੇ, ਤਿਂਸ ਰੂਪਾਨਿ ਜਾਯਰੇ;

ਤਥੇਵ ਠਿਤਿਭਙ੍ਗੇਸੁ, ਤਿਂਸ ਤਿਂਸੇਵ ਜਾਯਰੇ.

੭੬੫.

ਸਬ੍ਬਾਨੇਤਾਨਿ ਰੂਪਾਨਿ, ਰੂਪਕ੍ਖਨ੍ਧੋਤਿ ਸਞ੍ਞਿਤੋ;

ਅਨਿਚ੍ਚੋ ਅਦ੍ਧੁਵੋਨਤ੍ਤਾ, ਦੁਕ੍ਖਕ੍ਖਨ੍ਧੋਵ ਕੇਵਲੋ.

੭੬੬.

ਰੋਗਤੋ ਗਣ੍ਡਤੋ ਰੂਪਂ, ਪਰਤੋ ਚ ਪਲੋਕਤੋ;

ਦਿਸ੍ਵਾਨ ਦੁਕ੍ਖਤੋ ਰੂਪਂ, ਰੂਪੇ ਛਨ੍ਦਂ ਵਿਰਾਜਯੇ.

੭੬੭.

ਗਨ੍ਤੁਂ ਪਨਿਚ੍ਛੇ ਪਿਟਕੇਭਿਧਮ੍ਮੇ,

ਯੋ ਧਮ੍ਮਸੇਨਾਪਤਿਨਾ ਸਮਤ੍ਤਂ;

ਹਿਤਤ੍ਥਿਨਾ ¶ ਤੇਨ ਚ ਭਿਕ੍ਖੁਨਾਯਂ,

ਸਕ੍ਕਚ੍ਚ ਸਮ੍ਮਾ ਪਨ ਸਿਕ੍ਖਿਤਬ੍ਬੋ.

ਇਤਿ ਅਭਿਧਮ੍ਮਾਵਤਾਰੇ ਰੂਪਵਿਭਾਗੋ ਨਾਮ

ਦਸਮੋ ਪਰਿਚ੍ਛੇਦੋ.

੧੧. ਏਕਾਦਸਮੋ ਪਰਿਚ੍ਛੇਦੋ

ਨਿਬ੍ਬਾਨਨਿਦ੍ਦੇਸੋ

੭੬੮.

ਰੂਪਾਨਨ੍ਤਰਮੁਦ੍ਦਿਟ੍ਠਂ ¶ , ਨਿਬ੍ਬਾਨਂ ਯਂ ਪਨਾਦਿਤੋ;

ਤਸ੍ਸਿਦਾਨਿ ਅਨੁਪ੍ਪਤ੍ਤੋ, ਵਿਭਾਵਨਨਯਕ੍ਕਮੋ.

੭੬੯.

ਤਸ੍ਮਾਹਂ ਤਸ੍ਸ ਦਸ੍ਸੇਤੁਂ, ਦੁਕ੍ਕਰਸ੍ਸ ਯਥਾਬਲਂ;

ਦੁਬ੍ਬੋਧਸ੍ਸ ਪਵਕ੍ਖਾਮਿ, ਵਿਭਾਵਨਮਿਤੋ ਪਰਂ.

ਤਤ੍ਥ ¶ ਨਿਬ੍ਬਾਨਨ੍ਤਿ ਭਵਾਭਵਂ ਵਿਨਨਤੋ ਵਾਨਂ ਵੁਚ੍ਚਤਿ ਤਣ੍ਹਾ, ਵਾਨਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਨ੍ਤਿ ਚ ਪਵੁਚ੍ਚਤਿ ਅਮਤਂ ਅਸਙ੍ਖਤਂ ਪਰਮਂ ਸੁਖਂ. ਵੁਤ੍ਤਂ ਹੇਤਂ ‘‘ਯੋ ਸੋ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨ’’ਨ੍ਤਿ.

੭੭੦.

ਯਸ੍ਸ ਚਾਧਿਗਮਾ ਸਬ੍ਬ-ਕਿਲੇਸਾਨਂ ਖਯੋ ਭਵੇ;

ਨਿਬ੍ਬਾਨਮਿਤਿ ਨਿਦ੍ਦਿਟ੍ਠਂ, ਨਿਬ੍ਬਾਨਕੁਸਲੇਨ ਤਂ.

ਏਤਂ ਚ ਨਿਬ੍ਬਾਨਂ ਨਾਮ ਤਯਿਦਂ ਸਨ੍ਤਿਲਕ੍ਖਣਂ, ਅਚ੍ਚੁਤਿਰਸਂ, ਅਸ੍ਸਾਸਕਰਣਰਸਂ ਵਾ, ਅਨਿਮਿਤ੍ਤਪਚ੍ਚੁਪਟ੍ਠਾਨਂ, ਨਿਸ੍ਸਰਣਪਚ੍ਚੁਪਟ੍ਠਾਨਂ ਵਾਤਿ ਵੇਦਿਤਬ੍ਬਂ.

ਏਤ੍ਥਾਹ – ਨ ਪਰਮਤ੍ਥਤੋ ਨਿਬ੍ਬਾਨਂ ਨਾਮ ਏਕੋ ਸਭਾਵੋ ਅਤ੍ਥਿ, ਤਿਤ੍ਥਿਯਾਨਂ ਅਤ੍ਤਾ ਵਿਯ, ਸਸਵਿਸਾਣਂ ¶ ਵਿਯ ਚ ਅਨੁਪਲਬ੍ਭਨੀਯਤੋਤਿ? ਨ, ਪਞ੍ਞਾਚਕ੍ਖੁਨਾ ਉਪਪਰਿਕ੍ਖਿਯਮਾਨਾਨਂ ਹਿਤਗਵੇਸੀਨਂ ਯਥਾਨੁਰੂਪਾਯ ਪਟਿਪਤ੍ਤਿਯਾ ਉਪਲਬ੍ਭਨੀਯਤੋ. ਯਂ ਹਿ ਪੁਥੁਜ੍ਜਨਾ ਨੋਪਲਬ੍ਭਨ੍ਤਿ, ਤਂ ‘‘ਨਤ੍ਥੀ’’ਤਿ ਨ ਵਤ੍ਤਬ੍ਬਂ. ਅਥਾਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ‘‘ਕਤਮਂ ਨੁ ਖੋ, ਆਵੁਸੋ, ਨਿਬ੍ਬਾਨ’’ਨ੍ਤਿ ਨਿਬ੍ਬਾਨਂ ਪੁਟ੍ਠੇਨ ‘‘ਯੋ ਖੋ, ਆਵੁਸੋ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ’’ਤਿ ਰਾਗਾਦੀਨਂ ਖਯੋਵ ਦਸ੍ਸਿਤੋ, ਤਸ੍ਮਾ ਰਾਗਾਦੀਨਂ ¶ ਖਯਮਤ੍ਤਮੇਵ ਨਿਬ੍ਬਾਨਨ੍ਤਿ ਚੇ? ਤਂ ਨ. ਕਸ੍ਮਾ? ਅਰਹਤ੍ਤਸ੍ਸਾਪਿ ਰਾਗਾਦੀਨਂ ਖਯਮਤ੍ਤਪਸਙ੍ਗਦੋਸਾਪਤ੍ਤਿਤੋ. ਕਥਂ? ਨਿਬ੍ਬਾਨਂ ਪੁਚ੍ਛਾਨਨ੍ਤਰਮੇਵ ‘‘ਕਤਮਂ ਨੁ ਖੋ, ਆਵੁਸੋ, ਅਰਹਤ੍ਤ’’ਨ੍ਤਿ ਪੁਟ੍ਠੇਨ ‘‘ਯੋ ਖੋ, ਆਵੁਸੋ, ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ’’ਤਿ ਰਾਗਾਦੀਨਂ ਖਯੋਵ ਵੁਤ੍ਤੋ, ਤਸ੍ਮਾ ਤਵ ਮਤੇਨ ਅਰਹਤ੍ਤਫਲਸ੍ਸਾਪਿ ਰਾਗਾਦੀਨਂ ਖਯਮਤ੍ਤਤਾ ਭਵੇਯ੍ਯ, ਨ ਚੇਤਂ ਯੁਤ੍ਤਂ ਅਨੁਤ੍ਤਰਸ੍ਸ ਲੋਕੁਤ੍ਤਰਫਲਚਿਤ੍ਤਸ੍ਸ ਰਾਗਾਨਂ ਖਯਮਤ੍ਤਤਾਪਜ੍ਜਨਂ, ਤਸ੍ਮਾ ਮਾ ¶ ਏਵਂ ਬ੍ਯਞ੍ਜਨਚ੍ਛਾਯਾਯ ਵਦੇਸਿ, ਉਭਿਨ੍ਨਂ ਪਨ ਸੁਤ੍ਤਾਨਂ ਅਤ੍ਥੋ ਉਪਪਰਿਕ੍ਖਿਤਬ੍ਬੋ.

ਯਸ੍ਸ ਪਨ ਧਮ੍ਮਸ੍ਸਾਧਿਗਮੇਨ ਰਾਗਾਦੀਨਂ ਖਯੋ ਹੋਤਿ, ਸੋ ਧਮ੍ਮੋ ਰਾਗਾਦੀਨਂ ਖਯਸ੍ਸ ਉਪਨਿਸ੍ਸਯਤ੍ਤਾ ਅਕ੍ਖਯੋਪਿ ਸਮਾਨੋ ‘‘ਰਾਗਾਦੀਨਂ ਖਯੋ ਨਿਬ੍ਬਾਨ’’ਨ੍ਤਿ ਖਯੋਪਚਾਰੇਨ ਵੁਤ੍ਤੋ, ‘‘ਤਿਪੁਸਂ ਜਰੋ ਗੁਲ਼ੋ ਸੇਮ੍ਹੋ’’ਤਿਆਦੀਸੁ ਵਿਯ ਫਲੂਪਚਾਰੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਰਹਤ੍ਤਂ ਪਨ ਖਯਨ੍ਤੇ ਉਪ੍ਪਨ੍ਨਤ੍ਤਾ ‘‘ਖਯੋ’’ਤਿ ਵੁਤ੍ਤਂ. ਯਦਿ ਰਾਗਾਦੀਨਂ ਖਯਮਤ੍ਤਂ ਨਿਬ੍ਬਾਨਂ ਭਵੇਯ੍ਯ, ਸਬ੍ਬੇ ਬਾਲਪੁਥੁਜ੍ਜਨਾਪਿ ਸਮਧਿਗਤਨਿਬ੍ਬਾਨਾ ਸਚ੍ਛਿਕਤਨਿਰੋਧਾ ਭਵੇਯ੍ਯੁਂ. ਕਿਞ੍ਚ ਭਿਯ੍ਯੋ – ਨਿਬ੍ਬਾਨਸ੍ਸ ਬਹੁਤ੍ਤਾਦਿਦੋਸਾਪਤ੍ਤਿਤੋ ਚ. ਏਵਞ੍ਹਿ ਸਤਿ ਰਾਗਾਦਿਕ੍ਖਯਾਨਂ ਬਹੁਭਾਵਤੋ ਨਿਬ੍ਬਾਨਸ੍ਸਾਪਿ ਬਹੁਭਾਵੋ ਭਵੇਯ੍ਯ, ਸਙ੍ਖਤਲਕ੍ਖਣਞ੍ਚ ਨਿਬ੍ਬਾਨਂ ਭਵੇਯ੍ਯ, ਸਙ੍ਖਤਲਕ੍ਖਣਤ੍ਤਾ ਸਙ੍ਖਤਪਰਿਯਾਪਨ੍ਨਞ੍ਚ, ਸਙ੍ਖਤਪਰਿਯਾਪਨ੍ਨਤ੍ਤਾ ਅਨਿਚ੍ਚਂ ਦੁਕ੍ਖਂ ਨਿਬ੍ਬਾਨਂ ਭਵੇਯ੍ਯਾਤਿ.

ਕਿਞ੍ਚ ਭਿਯ੍ਯੋ – ਯਦਿ ਖਯੋ ਨਿਬ੍ਬਾਨਂ ਭਵੇਯ੍ਯ, ਗੋਤ੍ਰਭੁਵੋਦਾਨਮਗ੍ਗਫਲਚਿਤ੍ਤਾਨਂ ਕਿਂ ਨੁ ਆਰਮ੍ਮਣਂ ਵਦੇਸਿ, ਵਦ ਭਦ੍ਰਮੁਖਾਤਿ? ਰਾਗਾਦੀਨਂ ਖਯਮੇਵ ਵਦਾਮੀਤਿ. ਕਿਂ ਪਨ ਰਾਗਾਦਯੋ ਗੋਤ੍ਰਭੁਆਦੀਨਂ ਖਣੇ ਖੀਯਨ੍ਤਿ, ਉਦਾਹੁ ਖੀਯਿਸ੍ਸਨ੍ਤਿ, ਅਥ ਖੀਣਾਤਿ? ਕਿਂ ਪਨੇਤ੍ਥ ‘‘ਖੀਣੇਸ੍ਵੇਵ ਖਯਂ ਵਦਾਮੀ’’ਤਿ. ਸੁਟ੍ਠੁ ਉਪਧਾਰੇਤ੍ਵਾ ਵਦ ਭਦ੍ਰਮੁਖਾਤਿ, ਯਦਿ ਖੀਣੇਸ੍ਵੇਵ ਖਯਂ ਵਦੇਸਿ, ਨ ਗੋਤ੍ਰਭੁਚਿਤ੍ਤਾਦੀਨਂ ਨਿਬ੍ਬਾਨਾਰਮ੍ਮਣਤਾ ਸਿਜ੍ਝਤੀਤਿ. ਕਿਂ ਕਾਰਣਂ? ਗੋਤ੍ਰਭੁਕ੍ਖਣੇ ਰਾਗਾਦਯੋ ਖੀਯਿਸ੍ਸਨ੍ਤਿ, ਤਥਾ ਵੋਦਾਨਕ੍ਖਣੇ, ਮਗ੍ਗਕ੍ਖਣੇ ਪਨ ਖੀਯਨ੍ਤਿ, ਨ ਖੀਣਾ, ਫਲਕ੍ਖਣੇ ਖੀਣਾ. ਏਵਂ ਸਨ੍ਤੇ ਭਵਤੋ ਮਤੇਨ ਫਲਮੇਵ ਖਯਾਰਮ੍ਮਣਂ, ਨ ਇਤਰੇ, ਇਤਰੇਸਂ ਪਨ ਕਿਮਾਰਮ੍ਮਣਂ ਵਦੇਸੀਤਿ ¶ ? ਅਦ੍ਧਾ ਸੋ ਆਰਮ੍ਮਣਂ ਅਪਸ੍ਸਨ੍ਤੋ ਨਿਰੁਤ੍ਤਰੋ ¶ ਭਵਿਸ੍ਸਤਿ. ਅਪਿਚ ਕਿਲੇਸਕ੍ਖਯੋ ਨਾਮ ਸਪ੍ਪੁਰਿਸੇਹਿ ਕਰੀਯਤਿ, ਯਥਾਨੁਰੂਪਾਯ ਪਟਿਪਤ੍ਤਿਯਾ ਉਪ੍ਪਾਦੀਯਤੀਤਿ ਅਤ੍ਥੋ. ਨਿਬ੍ਬਾਨਂ ਪਨ ਨ ਕੇਨਚਿ ਕਰੀਯਤਿ ਨ ਉਪ੍ਪਾਦੀਯਤਿ, ਤਸ੍ਮਾ ਨਿਬ੍ਬਾਨਮਮਤਮਸਙ੍ਖਤਂ. ਤਮਕਤਂ ¶ ਜਾਨਾਤੀਤਿ ਅਰਿਯਸਾਵਕੋ ‘‘ਅਕਤਞ੍ਞੂ’’ਤਿ ਪਵੁਚ੍ਚਤਿ. ਵੁਤ੍ਤਞ੍ਚੇਤਂ –

੭੭੧.

‘‘ਅਸਦ੍ਧੋ ਅਕਤਞ੍ਞੂ ਚ,

ਸਨ੍ਧਿਚ੍ਛੇਦੋ ਚ ਯੋ ਨਰੋ;

ਹਤਾਵਕਾਸੋ ਵਨ੍ਤਾਸੋ,

ਸ ਵੇ ਉਤ੍ਤਮਪੋਰਿਸੋ’’ਤਿ.

ਅਪਿਚ ‘‘ਨਿਸ੍ਸਰਣ’’ਨ੍ਤਿ ਭਗਵਤਾ ਵੁਤ੍ਤਤ੍ਤਾ ਚ. ‘‘ਨਿਸ੍ਸਰਣ’’ਨ੍ਤਿ ਹਿ ਨਿਬ੍ਬਾਨਸ੍ਸੇਤਂ ਨਾਮਂ. ਯਥਾਹ ‘‘ਤਯੋ ਖੋਮੇ, ਭਿਕ੍ਖਵੇ, ਧਮ੍ਮਾ ਦੁਪ੍ਪਟਿਵਿਜ੍ਝਾ. ਕਤਮੇ ਤਯੋ ਧਮ੍ਮਾ ਦੁਪ੍ਪਟਿਵਿਜ੍ਝਾ? ਤਿਸ੍ਸੋ ਨਿਸ੍ਸਰਣਧਾਤੁਯੋ. ਕਾਮਾਨਮੇਤਂ ਨਿਸ੍ਸਰਣਂ, ਯਦਿਦਂ ਨੇਕ੍ਖਮ੍ਮਂ. ਰੂਪਾਨਮੇਤਂ ਨਿਸ੍ਸਰਣਂ, ਯਦਿਦਂ ਅਰੂਪਂ. ਯਂ ਖੋ ਪਨ ਕਿਞ੍ਚਿ ਭੂਤਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ, ਨਿਰੋਧੋ ਤਸ੍ਸ ਨਿਸ੍ਸਰਣ’’ਨ੍ਤਿ ਹਿ ਵੁਤ੍ਤਂ. ਏਵਂ ਵੁਤ੍ਤਸ੍ਸ ਤਸ੍ਸ ਨਿਬ੍ਬਾਨਸ੍ਸ ਅਭਾਵਪਤ੍ਤਿਦੋਸਤੋ ਪਠਮਜ੍ਝਾਨਾਕਾਸਾਨਞ੍ਚਾਯਤਨਾਨਮ੍ਪਿ ਅਭਾਵੋ ਭਵੇਯ੍ਯ, ਤਸ੍ਮਾ ਅਯੁਤ੍ਤਂ ਅਕ੍ਖਯਸ੍ਸ ਨਿਬ੍ਬਾਨਸ੍ਸ ਖਯਦੋਸਾਪਜ੍ਜਨਨ੍ਤਿ, ਨ ਤੁ ਖਯੋ ਨਿਬ੍ਬਾਨਂ.

‘‘ਅਤ੍ਥਿ ਨਿਸ੍ਸਰਣਂ ਲੋਕੇ, ਪਞ੍ਞਾਯ ਮੇ ਸੁਫੁਸਿਤ’’ਨ੍ਤਿ ਚ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਚ ਧਮ੍ਮਸਾਮਿਨਾ ਤਥਾਗਤੇਨ ਸਮ੍ਮਾਸਮ੍ਬੁਦ੍ਧੇਨ ਅਨੇਕੇਸੁ ਸੁਤ੍ਤਨ੍ਤੇਸੁ ਪਰਮਤ੍ਥਵਸੇਨ ਵੁਤ੍ਤਤ੍ਤਾ ‘‘ਅਤ੍ਥਿ ਨਿਬ੍ਬਾਨਂ ਨਾਮ ਏਕੋ ਧਮ੍ਮੋ’’ਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਅਪਿਚ ਪਰਿਤ੍ਤਤ੍ਤਿਕੇ ‘‘ਕਤਮੇ ਧਮ੍ਮਾ ਅਪ੍ਪਮਾਣਾ’’ਤਿ ਪਦਮੁਦ੍ਧਰਿਤ੍ਵਾ – ‘‘ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ ਚਤ੍ਤਾਰਿ ਚ ਸਾਮਞ੍ਞਫਲਾਨਿ ਨਿਬ੍ਬਾਨਞ੍ਚ, ਇਮੇ ਧਮ੍ਮਾ ਅਪ੍ਪਮਾਣਾ’’ਤਿ ਵੁਤ੍ਤਤ੍ਤਾ ਰਾਗਾਦੀਨਂ ਖਯਸ੍ਸ ਅਪ੍ਪਮਾਣਤ੍ਤਂ ਕਥਂ ਯੁਜ੍ਜਤਿ, ਤਸ੍ਮਾ ਪਰਮਤ੍ਥਤੋ ਅਤ੍ਥਿਯੇਵ ਨਿਬ੍ਬਾਨਂ ਨਾਮ ਏਕੋ ਸਭਾਵੋਤਿ. ਤਂ ¶ ਪਨ ਪਕਤਿਵਾਦੀਨਂ ਪਕਤਿ ਵਿਯ, ਤਿਤ੍ਥਿਯਾਨਂ ਅਤ੍ਤਾ ਵਿਯ ਚ ਸਸਵਿਸਾਣਂ ਵਿਯ ਚ ਨਾਵਿਜ੍ਜਮਾਨਂ.

ਅਥ ਪਞ੍ਞਤ੍ਤਿਮਤ੍ਤਂ ਨਿਬ੍ਬਾਨਨ੍ਤਿ ਚੇ, ਤਮ੍ਪਿ ਅਯੁਤ੍ਤਂ. ਕਸ੍ਮਾ? ਨਿਬ੍ਬਾਨਾਰਮ੍ਮਣਾਨਂ ਚਿਤ੍ਤਚੇਤਸਿਕਾਨਂ ਨਵਤ੍ਤਬ੍ਬਾਰਮ੍ਮਣਤ੍ਤਾ. ਕਥਂ? ਪਰਿਤ੍ਤਾਰਮ੍ਮਣਤ੍ਤਿਕੇ ਚ ਪਨ ‘‘ਕਤਮੇ ਧਮ੍ਮਾ ਅਪ੍ਪਮਾਣਾਰਮ੍ਮਣਾ’’ਤਿ ¶ ਪਦਮੁਦ੍ਧਰਿਤ੍ਵਾ ‘‘ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ ਚਤ੍ਤਾਰਿ ਚ ਸਾਮਞ੍ਞਫਲਾਨਿ ¶ , ਇਮੇ ਧਮ੍ਮਾ ਅਪ੍ਪਮਾਣਾਰਮ੍ਮਣਾ’’ਤਿ ਹਿ ਵੁਤ੍ਤਂ. ਯਦਿ ਪਨੇਤੇਸਂ ਪਞ੍ਞਤ੍ਤਿਆਰਮ੍ਮਣਂ ਸਿਯਾ, ਅਪ੍ਪਮਾਣਾਰਮ੍ਮਣਤਾ ਨ ਯੁਜ੍ਜੇਯ੍ਯ, ਨਵਤ੍ਤਬ੍ਬਾਰਮ੍ਮਣਪਕ੍ਖਂ ਭਜੇਯ੍ਯੁਂ. ‘‘ਨਵਤ੍ਤਬ੍ਬਾਰਮ੍ਮਣਾ ਪਨ ਰੂਪਾਵਚਰਤ੍ਤਿਕਚਤੁਕ੍ਕਜ੍ਝਾਨਾ ਕੁਸਲਤੋ ਚ ਵਿਪਾਕਤੋ ਚ ਕਿਰਿਯਤੋ ਚ, ਚਤੁਤ੍ਥਸ੍ਸ ਝਾਨਸ੍ਸ ਵਿਪਾਕੋ, ਆਕਾਸਾਨਞ੍ਚਾਯਤਨਂ ਆਕਿਞ੍ਚਞ੍ਞਾਯਤਨਂ ਕੁਸਲਤੋ ਚ ਵਿਪਾਕਤੋ ਚ ਕਿਰਿਯਤੋ ਚ, ਇਮੇ ਧਮ੍ਮਾ ਨਵਤ੍ਤਬ੍ਬਾਰਮ੍ਮਣਾ’’ਤਿ ਹਿ ਵੁਤ੍ਤਂ, ਤਸ੍ਮਾ ਨ ਪਞ੍ਞਤ੍ਤਿਮਤ੍ਤਂ ਨਿਬ੍ਬਾਨਂ. ਯਸ੍ਮਾ ਚ ਪਣ੍ਣਤ੍ਤਿਭਾਵੋ ਨਿਬ੍ਬਾਨਸ੍ਸ ਨ ਯੁਜ੍ਜਤਿ, ਤਸ੍ਮਾ ਮਗ੍ਗਫਲਾਨਂ ਆਰਮ੍ਮਣਪਚ੍ਚਯਭੂਤਂ ਉਪ੍ਪਾਦਾਦੀਨਮਭਾਵਤੋ ਨਿਚ੍ਚਂ, ਰੂਪਸਭਾਵਾਭਾਵਤੋ ਅਰੂਪਂ, ਪਪਞ੍ਚਾਭਾਵਤੋ ਨਿਪ੍ਪਪਞ੍ਚਂ ਨਿਬ੍ਬਾਨਂ ਨਾਮ ਅਤ੍ਥੀਤਿ ਉਪਗਨ੍ਤਬ੍ਬਨ੍ਤਿ.

੭੭੨.

ਅਚ੍ਚਨ੍ਤਮਨਨ੍ਤਂ ਸਨ੍ਤਂ, ਅਮਤਂ ਅਪਲੋਕਿਤਂ;

ਪਣੀਤਂ ਸਰਣਂ ਖੇਮਂ, ਤਾਣਂ ਲੇਣਂ ਪਰਾਯਣਂ.

੭੭੩.

ਸਿਵਞ੍ਚ ਨਿਪੁਣਂ ਸਚ੍ਚਂ, ਦੁਕ੍ਖਕ੍ਖਯਮਨਾਸਵਂ;

ਸੁਦੁਦ੍ਦਸਂ ਪਰਂ ਪਾਰਂ, ਨਿਬ੍ਬਾਨਮਨਿਦਸ੍ਸਨਂ.

੭੭੪.

ਤਣ੍ਹਾਕ੍ਖਯਂ ਧੁਵਂ ਦੀਪਂ, ਅਬ੍ਯਾਪਜ੍ਝਮਨੀਤਿਕਂ;

ਅਨਾਲਯਮਰੂਪਞ੍ਚ, ਪਦਮਚ੍ਚੁਤਮਕ੍ਖਰਂ.

੭੭੫.

ਵਿਰਾਗਞ੍ਚ ਨਿਰੋਧਞ੍ਚ, ਵਿਮੁਤ੍ਤਿ ਮੋਕ੍ਖਮੇਵ ਚ;

ਇਮੇਹਿ ਪਨ ਨਾਮੇਹਿ, ਨਿਬ੍ਬਾਨਂ ਤੁ ਕਥੀਯਤਿ.

੭੭੬.

ਏਵਞ੍ਚ ¶ ਪਨ ਵਿਞ੍ਞਾਯ, ਨਿਬ੍ਬਾਨਮ੍ਪਿ ਚ ਅਚ੍ਚੁਤਂ;

ਤਸ੍ਸ ਚਾਧਿਗਮੂਪਾਯੋ, ਕਤ੍ਤਬ੍ਬੋ ਵਿਞ੍ਞੁਨਾ ਸਦਾ.

੭੭੭.

ਸਦ੍ਧਾਬੁਦ੍ਧਿਕਰਂ ਤਥਾਗਤਮਤੇ ਸਮ੍ਮੋਹਵਿਦ੍ਧਂਸਨਂ,

ਪਞ੍ਞਾਸਮ੍ਭਵਸਮ੍ਪਸਾਦਨਕਰਂ ਜਾਨਾਤਿ ਯੋ ਚੇ ਇਮਂ;

ਅਤ੍ਥਬ੍ਯਞ੍ਜਨਸਾਲਿਨਂ ਸੁਮਧੁਰਂ ਸਾਰਞ੍ਞੁਵਿਮ੍ਹਾਪਨਂ,

ਗਮ੍ਭੀਰੇ ਨਿਪੁਣਾਭਿਧਮ੍ਮਪਿਟਕੇ ਸੋ ਯਾਭਿਨਿਟ੍ਠਂ ਪਦਂ.

ਇਤਿ ਅਭਿਧਮ੍ਮਾਵਤਾਰੇ ਨਿਬ੍ਬਾਨਨਿਦ੍ਦੇਸੋ ਨਾਮ

ਏਕਾਦਸਮੋ ਪਰਿਚ੍ਛੇਦੋ.

੧੨. ਦ੍ਵਾਦਸਮੋ ਪਰਿਚ੍ਛੇਦੋ

ਪਞ੍ਞਤ੍ਤਿਨਿਦ੍ਦੇਸੋ

ਏਤ੍ਥਾਹ ¶ ¶ – ‘‘ਕਿਂ ਏਤ੍ਤਕਮੇਵ ਞੇਯ੍ਯਂ, ਉਦਾਹੁ ਅਞ੍ਞਮ੍ਪਿ ਅਤ੍ਥੀ’’ਤਿ? ਅਤ੍ਥਿ ਪਞ੍ਞਤ੍ਤਿ ਨਾਮਾਤਿ. ਸਾ ਪਨੇਸਾ ਪਞ੍ਞਪੇਤਬ੍ਬਤੋ, ਪਞ੍ਞਾਪਨਤੋ ਚ ‘‘ਪਞ੍ਞਤ੍ਤੀ’’ਤਿ ਵੁਚ੍ਚਤਿ. ਤੇਨੇਵਾਹ – ‘‘ਯਾ ਤੇਸਂ ਤੇਸਂ ਧਮ੍ਮਾਨਂ ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ ਨਾਮਂ ਨਾਮਕਮ੍ਮਂ ਨਾਮਧੇਯ੍ਯਂ ਨਿਰੁਤ੍ਤਿ ਬ੍ਯਞ੍ਜਨਂ ਅਭਿਲਾਪੋ’’ਤਿ. ਤਤ੍ਥ ਸਙ੍ਖਾਯਤੀਤਿ ਸਙ੍ਖਾ, ਕਥੀਯਤੀਤਿ ਅਤ੍ਥੋ. ਕਿਨ੍ਤਿ ਕਥੀਯਤਿ? ‘‘ਅਹ’’ਨ੍ਤਿ ‘‘ਮਮ’’ਨ੍ਤਿ ‘‘ਪਰੋ’’ਤਿ ‘‘ਪਰਸ੍ਸਾ’’ਤਿ ‘‘ਮਞ੍ਚੋ’’ਤਿ ‘‘ਪੀਠ’’ਨ੍ਤਿ ਅਨੇਕੇਹਿ ਆਕਾਰੇਹਿ ਕਥੀਯਤੀਤਿ ਸਙ੍ਖਾ. ਸਮਞ੍ਞਾਯਤੀਤਿ ਸਮਞ੍ਞਾ. ਪਞ੍ਞਾਪੀਯਤੀਤਿ ਪਞ੍ਞਤ੍ਤਿ. ਵੋਹਰੀਯਤੀਤਿ ਵੋਹਾਰੋ. ਕਿਨ੍ਤਿ ਵੋਹਰੀਯਤਿ? ‘‘ਅਹ’’ਨ੍ਤਿ ‘‘ਮਮ’’ਨ੍ਤਿ ‘‘ਪਰੋ’’ਤਿ ‘‘ਪਰਸ੍ਸਾ’’ਤਿ ‘‘ਮਞ੍ਚੋ’’ਤਿ ‘‘ਪੀਠ’’ਨ੍ਤਿ. ਏਵਂ ਤਾਵ ਪਞ੍ਞਪੇਤਬ੍ਬਤੋ ਪਞ੍ਞਤ੍ਤੀਤਿ ਵੁਤ੍ਤਾ. ‘‘ਅਹ’’ਨ੍ਤਿ ਹਿ ਰੂਪਾਦਯੋ ਧਮ੍ਮੇ ਉਪਾਦਾਯ ਪਟਿਚ੍ਚ ਕਾਰਣਂ ਕਤ੍ਵਾ ਯਥਾ ਤੇ ਰੂਪਾਦਯੋ ਧਮ੍ਮਾ ਉਪ੍ਪਾਦਵਯਵਨ੍ਤੋ, ਨ ਏਵਂਵਿਧਾ, ਕੇਵਲਂ ਲੋਕਸਙ੍ਕੇਤੇਨ ¶ ਸਿਦ੍ਧਾ ਯਾ ਅਯਂ ‘‘ਅਹ’’ਨ੍ਤਿ ਕਥੀਯਤਿ ਚੇਵ ਪਞ੍ਞਾਪੀਯਤਿ ਚ, ਏਸਾ ਪਞ੍ਞਤ੍ਤੀਤਿ ਅਤ੍ਥੋ.

ਇਦਾਨਿ ਪਞ੍ਞਾਪਨਤੋ ਪਞ੍ਞਤ੍ਤਿਂ ਪਕਾਸੇਤੁਂ ‘‘ਨਾਮਂ ਨਾਮਕਮ੍ਮ’’ਨ੍ਤਿਆਦਿਮਾਹ. ਤਤ੍ਥ ਨਾਮਨ੍ਤਿ ਤਂ ਤਂ ਧਮ੍ਮਂ ‘‘ਏਸ ਇਤ੍ਥਨ੍ਨਾਮੋ ਨਾਮਾ’’ਤਿ ਪਞ੍ਞਪੇਤਿ, ਤਸ੍ਮਾ ਤਂ ਪਞ੍ਞਤ੍ਤੀਤਿ ਪਵੁਚ੍ਚਤਿ. ਨਾਮਕਮ੍ਮਨ੍ਤਿਆਦੀਨਿ ਤਸ੍ਸਾ ਏਵ ਵੇਵਚਨਾਨਿ. ਅਯਂ ਪਞ੍ਞਾਪਨਤੋ ਪਞ੍ਞਤ੍ਤਿ ਨਾਮ.

ਸਾ ਪਨੇਸਾ ਤਜ੍ਜਾਪਞ੍ਞਤ੍ਤਿ ਉਪਾਦਾਪਞ੍ਞਤ੍ਤਿ ਉਪਨਿਧਾਪਞ੍ਞਤ੍ਤੀਤਿ ਤਿਵਿਧਾ ਹੋਤਿ. ਤਤ੍ਥ ਤਜ੍ਜਾਪਞ੍ਞਤ੍ਤਿ ਨਾਮ ਚਕ੍ਖੁਸੋਤਰੂਪਸਦ੍ਦਪਥਵੀਤੇਜੋਵਾਯੋਤਿਆਦਿਨਯਪ੍ਪਵਤ੍ਤਾ. ਉਪਾਦਾਪਞ੍ਞਤ੍ਤਿ ਪਨ ਸਮੂਹਾਸਮੂਹਵਸੇਨ ਦੁਵਿਧਾ ਹੋਤਿ. ਤਤ੍ਥ ਸਮੂਹਪਞ੍ਞਤ੍ਤਿ ਨਾਮ ਰੂਪਾਰੂਪਧਮ੍ਮੇਸੁ ਏਕਸ੍ਸ ਵਾ ਬਹੂਨਂ ਵਾ ਨਾਮਂ ਗਹੇਤ੍ਵਾ ਸਮੂਹਮੇਵੋਪਾਦਾਯ ਵੁਚ੍ਚਤਿ. ਕਥਂ? ਅਚ੍ਛਤਰਚ੍ਛਘਟਪਟਾਦਿਪ੍ਪਭੇਦਾ. ਅਯਂ ਸਮੂਹਪਞ੍ਞਤ੍ਤਿ ¶ ਨਾਮ. ਅਸਮੂਹਪਞ੍ਞਤ੍ਤਿ ਪਨ ਦਿਸਾਕਾਸਕਾਲਨਿਮਿਤ੍ਤਾਭਾਵਨਿਰੋਧਾਦਿਭੇਦਾ.

ਯਦਾ ਪਨ ਸਾ ਵਿਜ੍ਜਮਾਨਂ ਪਰਮਤ੍ਥਂ ਜੋਤਯਤਿ, ਤਦਾ ‘‘ਵਿਜ੍ਜਮਾਨਪਞ੍ਞਤ੍ਤੀ’’ਤਿ ਪਵੁਚ੍ਚਤਿ. ਯਦਾ ਅਵਿਜ੍ਜਮਾਨਂ ਸਮੂਹਾਸਮੂਹਭੇਦਂ ਨਾਮਮਤ੍ਤਂ ਜੋਤਯਤਿ, ਤਦਾ ‘‘ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਪਵੁਚ੍ਚਤਿ ¶ . ਦੁਵਿਧਾਪਿ ਪਨੇਸਾ ਸੋਤਦ੍ਵਾਰਜਵਨਾਨਨ੍ਤਰਂ ਗਹਿਤਪੁਬ੍ਬਸਙ੍ਕੇਤਮਨੋਦ੍ਵਾਰਜਵਨਵਿਞ੍ਞਾਣੇਨ ਵਿਞ੍ਞਾਯਤਿ. ਯਾਯ ਗਹਿਤਪੁਬ੍ਬਸਙ੍ਕੇਤੇਨ ਮਨੋਦ੍ਵਾਰਜਵਨਵਿਞ੍ਞਾਣੇਨ ਪਞ੍ਞਾਪੀਯਤਿ. ਯਂ ਸਨ੍ਧਾਯ ‘‘ਵਿਜ੍ਜਮਾਨਪਞ੍ਞਤ੍ਤਿ, ਅਵਿਜ੍ਜਮਾਨਪਞ੍ਞਤ੍ਤਿ, ਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ, ਅਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ, ਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ, ਅਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਛਕ੍ਕਨਯੋ ਵੁਤ੍ਤੋ. ਤਤ੍ਥ ਪਰਮਤ੍ਥਤੋ ਵਿਜ੍ਜਮਾਨਾਨਂ ਰੂਪਾਦੀਨਂ ਪਞ੍ਞਾਪਨਾ ਵਿਜ੍ਜਮਾਨਪਞ੍ਞਤ੍ਤਿ. ਤਥਾ ਅਵਿਜ੍ਜਮਾਨਾਨਮਿਤ੍ਥਿਪੁਰਿਸਾਦੀਨਂ ਪਞ੍ਞਾਪਨਾ ਅਵਿਜ੍ਜਮਾਨਪਞ੍ਞਤ੍ਤਿ. ਠਪੇਤ੍ਵਾ ਪਨ ਵਚਨਤ੍ਥਂ ਕੇਨਚਿ ਆਕਾਰੇਨ ਅਨੁਪਲਬ੍ਭਮਾਨਾਨਂ ਪਞ੍ਚਮਸਚ੍ਚਾਦੀਨਂ, ਤਿਤ੍ਥਿਯਪਰਿਕਪ੍ਪਿਤਾਨਂ ਵਾ ਪਕਤਿਪੁਰਿਸਾਦੀਨਂ ਪਞ੍ਞਾਪਨਾਪਿ ਅਵਿਜ੍ਜਮਾਨਪਞ੍ਞਤ੍ਤਿਯੇਵ ¶ . ‘‘ਤੇਵਿਜ੍ਜੋ, ਛਲ਼ਭਿਞ੍ਞੋ’’ਤਿ ਏਵਮਾਦਿਨਯਪ੍ਪਵਤ੍ਤਾ ਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ. ‘‘ਇਤ੍ਥਿਸਦ੍ਦੋ, ਪੁਰਿਸਸਦ੍ਦੋ’’ਤਿ ਏਵਮਾਦਿਕਾ ਅਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ. ‘‘ਚਕ੍ਖੁਵਿਞ੍ਞਾਣਂ, ਸੋਤਵਿਞ੍ਞਾਣ’’ਨ੍ਤਿ ਏਵਮਾਦਿਕਾ ਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ. ‘‘ਖਤ੍ਤਿਯਕੁਮਾਰੋ, ਬ੍ਰਾਹ੍ਮਣਕੁਮਾਰੋ, ਭਿਕ੍ਖੁਕੁਮਾਰੋ’’ਤਿ ਏਵਮਾਦਿਕਾ ਅਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤੀਤਿ ਏਵਂ ਵੁਤ੍ਤਾ ਛ ਪਞ੍ਞਤ੍ਤਿਯੋਪਿ ਏਤ੍ਥੇਵ ਸਙ੍ਗਹਂ ਗਚ੍ਛਨ੍ਤਿ. ਅਯਂ ਉਪਾਦਾਪਞ੍ਞਤ੍ਤਿ ਨਾਮ.

ਉਪਨਿਧਾਪਞ੍ਞਤ੍ਤਿਪਿ ਏਤਿਸ੍ਸਾ ਏਵ ਪਭੇਦਾ, ਸਾ ਪਨ ‘‘ਦੀਘਂ ਉਪਨਿਧਾਯ ਰਸ੍ਸੋ, ਰਸ੍ਸਂ ਉਪਨਿਧਾਯ ਦੀਘੋ’’ਤਿਆਦਿਨਯਪ੍ਪਵਤ੍ਤਾ ‘‘ਕਪਣਂ ਮਾਨੁਸਕਂ ਰਜ੍ਜਂ ਦਿਬ੍ਬਸੁਖਂ ਉਪਨਿਧਾਯਾ’’ਤਿ ਏਵਮਾਦਿਕਾ ਚ, ਤਸ੍ਮਾ ਪਞ੍ਞਪੇਤਬ੍ਬਤੋ ਚ ਪਞ੍ਞਾਪਨਤੋ ਚ ਪਞ੍ਞਤ੍ਤੀਤਿ ਵੇਦਿਤਬ੍ਬਾ. ਸਮਞ੍ਞਾ ਸਮਤ੍ਤਾ.

੭੭੮.

ਪਰਮਤ੍ਥਤੋ ਚ ਪਞ੍ਞਤ੍ਤਿ, ਤਤਿਯਾ ਕੋਟਿ ਨ ਵਿਜ੍ਜਤਿ;

ਦ੍ਵੀਸੁ ਠਾਨੇਸੁ ਕੁਸਲੋ, ਪਰਵਾਦੇਸੁ ਨ ਕਮ੍ਪਤਿ.

ਇਤਿ ਅਭਿਧਮ੍ਮਾਵਤਾਰੇ ਪਞ੍ਞਤ੍ਤਿਨਿਦ੍ਦੇਸੋ ਨਾਮ

ਦ੍ਵਾਦਸਮੋ ਪਰਿਚ੍ਛੇਦੋ.

੧੩. ਤੇਰਸਮੋ ਪਰਿਚ੍ਛੇਦੋ

ਕਾਰਕਪਟਿਵੇਧਨਿਦ੍ਦੇਸੋ

ਏਤ੍ਥਾਹ ¶ ¶ – ਨਿਦ੍ਦਿਟ੍ਠਾ ਕੁਸਲਾਦਯੋ ਨਾਮ ਧਮ੍ਮਾ, ਨ ਪਨੇਤੇਸਂ ਕਾਰਕੋ ਅਤ੍ਤਾ ਨਿਦ੍ਦਿਟ੍ਠੋ. ਤਸ੍ਸ ਹਿ ਕਾਰਕਸ੍ਸ ਵੇਦਕਸ੍ਸ ਅਤ੍ਤਨੋ ਅਭਾਵੇ ਕੁਸਲਾਕੁਸਲਾਨਂ ਧਮ੍ਮਾਨਂ ਅਭਾਵੋ ਸਿਯਾ, ਤੇਸਮਭਾਵੇ ਤਦਾਯਤ੍ਤਵੁਤ੍ਤੀਨਂ ਤੇਸਂ ਵਿਪਾਕਾਨਮਭਾਵੋ ਹੋਤਿ, ਤਸ੍ਮਾ ਕੁਸਲਾਦੀਨਂ ਧਮ੍ਮਾਨਂ ਦੇਸਨਾ ਨਿਰਤ੍ਥਿਕਾਤਿ? ਅਤ੍ਰ ਵੁਚ੍ਚਤੇ – ਨਾਯਂ ¶ ਨਿਰਤ੍ਥਿਕਾ, ਸਾਤ੍ਥਿਕਾਵਾਯਂ ਦੇਸਨਾ. ਯਦਿ ਕਾਰਕਸ੍ਸਾਭਾਵਾ ਕੁਸਲਾਦੀਨਮਭਾਵੋ ਸਿਯਾ, ਤਸ੍ਸ ਪਰਿਕਪ੍ਪਿਤਸ੍ਸ ਅਤ੍ਤਨੋਪਿ ਅਭਾਵੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਤਸ੍ਸ ਅਤ੍ਤਨੋ ਅਞ੍ਞਸ੍ਸ ਕਾਰਕਸ੍ਸਾਭਾਵਤੋ. ਕਾਰਕਾਭਾਵੇਪਿ ਕਤ੍ਤਾ ਅਤ੍ਤਾ ਅਤ੍ਥੀਤਿ ਚੇ? ਤਥਾ ਕੁਸਲਾਦੀਨਮ੍ਪਿ ਅਸਤਿਪਿ ਕਤ੍ਤਰਿ ਅਤ੍ਥਿਤਾ ਉਪਗਨ੍ਤਬ੍ਬਾ, ਕੁਤੋਯਂ ਤਵ ਤਤ੍ਥਾਨੁਰੋਧੋ, ਇਧ ਵਿਰੋਧੋਤਿ. ਅਥਾਪਿ ਯਥਾ ਪਨ ਲੋਕੇ ਕਾਰਕਾਭਾਵੇਪਿ ਪਥਵੀਆਪਤੇਜਉਤੁਆਦਯੋ ਪਟਿਚ੍ਚ ਅਙ੍ਕੁਰਾਦੀਨਂ ਅਭਿਨਿਬ੍ਬਤ੍ਤਿ ਦਿਸ੍ਸਤਿ, ਤਥਾ ਏਤੇਸਮ੍ਪਿ ਕੁਸਲਾਦੀਨਂ ਧਮ੍ਮਾਨਂ ਹੇਤੁਪਚ੍ਚਯਸਾਮਗ੍ਗਿਯਾ ਅਭਿਨਿਬ੍ਬਤ੍ਤਿ ਹੋਤੀਤਿ ਵੇਦਿਤਬ੍ਬਾ.

ਅਥਾਪਿ ਚੇਤ੍ਥ ਤਸ੍ਸਾ ਪਞ੍ਞਾਯ ਪਰਿਕਪ੍ਪਿਤੋ ਨਿਚ੍ਚੋ ਧੁਵੋ ਕੁਸਲਾਦੀਨਂ ਕਤ੍ਤਾ ਅਤ੍ਤਾ ਪਰਮਤ੍ਥਤੋ ਅਤ੍ਥੀਤਿ ਚੇ? ਤਮੁਪਪਰਿਕ੍ਖਿਸ੍ਸਾਮ ਤਾਵ, ਸੋ ਪਨ ਤਾਵ ਅਤ੍ਤਾ ਕਾਰਕੋ ਵੇਦਕੋ ਕਿਂ ਸਚੇਤਨੋ ਵਾ, ਉਦਾਹੁ ਅਚੇਤਨੋ ਵਾਤਿ? ਕਿਞ੍ਚੇਤ੍ਥ – ਯਦਿ ਅਚੇਤਨੋ ਸਿਯਾ, ਪਾਕਾਰਤਰੁਪਾਸਾਣਸਦਿਸੋ ਸਿਯਾ. ਤਸ੍ਸ ਕਾਰਕਵੇਦਕਤ੍ਤਾਭਾਵੋ ਸਿਯਾ. ਯਦਿ ਸਚੇਤਨੋ, ਸੋ ਚੇਤਨਾਯ ਅਞ੍ਞੋ ਵਾ ਸਿਯਾ, ਅਨਞ੍ਞੋ ਵਾ. ਅਥਾਨਞ੍ਞੋ, ਚੇਤਨਾਯ ਨਾਸੇ ਅਤ੍ਤਨੋਪਿ ਨਾਸੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਚੇਤਨਾਯ ਅਨਞ੍ਞਤ੍ਤਾ.

ਅਥਾਪਿ ਭਵਤੋ ਅਧਿਪ੍ਪਾਯੋ ਏਵਂ ਸਿਯਾ, ਅਤ੍ਤਨੋ ਪਨ ਨਾਸੋ ¶ ਨ ਭਵਤਿ ਨਿਚ੍ਚਤ੍ਤਾ, ਚੇਤਨਾਯਯੇਵ ਨਾਸੋ ਭਵਤੀਤਿ? ਵੁਚ੍ਚਤੇ – ਅਤ੍ਤਨੋ ਅਨਾਸੇ ਸਤਿ ਚੇਤਨਾਯਪਿ ਨਾਸੋ ਨ ਭਵਤਿ. ਕਿਂ ਕਾਰਣਨ੍ਤਿ ਚੇ? ਚੇਤਨਾਯ ਅਨਞ੍ਞਤ੍ਤਾ. ਚੇਤਨਤ੍ਤਾਨਂ ਅਨਞ੍ਞਤ੍ਤੇ ਸਤਿ ਚੇਤਨਾਯਯੇਵ ਨਾਸੋ ਭਵਤਿ, ਨ ਅਤ੍ਤਨੋਤਿ ਅਯੁਤ੍ਤਮੇਤਂ. ਅਥ ਚੇਤਨਾਯਯੇਵ ਵਿਨਾਸੇ ਵਿਸੇਸਕਾਰਣਂ ਨਤ੍ਥਿ, ਅਤ੍ਤਾਵ ਨਸ੍ਸਤੁ, ਤਿਟ੍ਠਤੁ ਚੇਤਨਾ. ਅਥ ਚੇਤਨਾਯ ਨਾਸੇ ਅਤ੍ਤਨੋ ਨਾਸੋ ¶ ਨ ਭਵਤੀਤਿ ਚੇ? ਚੇਤਨਾਯ ਅਤ੍ਤਾ ਅਞ੍ਞੋ ਸਿਯਾ. ਅਥ ਅਞ੍ਞਸ੍ਸ ਅਤ੍ਤਸ੍ਸ ਨਾਸੇ ਸਤਿ ਸਯਂ ਨਾਸੋ ਨ ਭਵਤਿ, ਏਵਞ੍ਚ ਸਤਿ ‘‘ਚੇਤਨਾਯ ¶ ਅਨਞ੍ਞੋ ਅਤ੍ਤਾ’’ਤਿ ਤਵ ਪਟਿਞ੍ਞਾ ਹੀਨਾ. ਅਥਾਪਿ ਚੇਤਨਤ੍ਤਾਨਂ ਅਨਞ੍ਞਤ੍ਤੇ ਸਤਿ ਅਤ੍ਤਨੋ ਅਨਾਸੋ ਚੇਤਨਾਯਪਿ ਅਨਾਸੋ ਭਵਤੁ. ਅਥ ਨ ਭਵਤਿ, ਪਟਿਞ੍ਞਾ ਹੀਨਾ. ਅਥ ਵੁਤ੍ਤਪ੍ਪਕਾਰਤੋ ਵਿਪਰੀਤਂ ਵਾ ਸਿਯਾ, ਅਤ੍ਤਾ ਨਸ੍ਸਤੁ, ਚੇਤਨਾ ਤਿਟ੍ਠਤੁ. ਅਥ ਪਨ ਏਵਂ ਨ ਭਵਤੀਤਿ ਚੇ? ਅਨਞ੍ਞਤ੍ਤਪਕ੍ਖਂ ਪਰਿਚ੍ਚਜ. ਅਥ ਪਨ ਨ ਪਰਿਚ੍ਚਜਸਿ, ਪਟਿਞ੍ਞਾਹੀਨੋ ਭਵਸਿ.

ਅਥਾਯਂ ਭਵਤੋ ਅਧਿਪ੍ਪਾਯੋ ਸਿਯਾ ‘‘ਨਾਯਂ ਮਮ ਅਤ੍ਤਾ ਚੇਤਨਾਯ ਅਨਞ੍ਞੋ, ਅਞ੍ਞੋਯੇਵਾ’’ਤਿ? ਤਤ੍ਰ ਵੁਚ੍ਚਤੇ – ਇਧ ਪਨ ਅਞ੍ਞਤ੍ਤਂ ਦੁਵਿਧਂ ਹੋਤਿ ਲਕ੍ਖਣਕਤਮਞ੍ਞਤ੍ਤਞ੍ਚ ਦੇਸਨ੍ਤਰਕਤਮਞ੍ਞਤ੍ਤਞ੍ਚਾਤਿ. ਤਤ੍ਥ ਕਿਂ ਤ੍ਵਂ ਚੇਤਨਤ੍ਤਾਨਂ ਲਕ੍ਖਣਕਤਮਞ੍ਞਤ੍ਤਂ ਵਦੇਸਿ, ਉਦਾਹੁ ਦੇਸਨ੍ਤਰਕਤਮਞ੍ਞਤ੍ਤਨ੍ਤਿ? ਅਹਂ ਲਕ੍ਖਣਕਤਮਞ੍ਞਤ੍ਤਂ ਵਦਾਮੀਤਿ. ਯਥਾ ਹਿ ਰੂਪਰਸਗਨ੍ਧਾਦੀਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ ਹੋਤਿ, ਏਵਂ ਚੇਤਨਤ੍ਤਾਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ ਹੋਤਿ, ਤਸ੍ਮਾ ਲਕ੍ਖਣਕਤਮਞ੍ਞਤ੍ਤਂ ਵਦਾਮੀਤਿ. ਤਤ੍ਰ ਵੁਚ੍ਚਤੇ – ਯਥਾ ਹਿ ਜਾਤਵੇਦਸ੍ਸ ਡਯ੍ਹਮਾਨੇ ਆਮਕਸਙ੍ਘਟੇ ਆਮਕਵਣ੍ਣਵਿਨਾਸੇ ਰਸਾਦੀਨਂ ਵਿਨਾਸੋ ਭਵਤਿ, ਤਥੇਵ ਚੇਤਨਾਯ ਵਿਨਾਸੇ ਅਤ੍ਤਨੋਪਿ ਵਿਨਾਸੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਰੂਪਰਸਾਦੀਨਂ ਵਿਯ ਏਕਦੇਸਤ੍ਤਾਤਿ.

ਅਥੇਵਂ ਭਵਤੋ ਮਤਿ ਸਿਯਾ ‘‘ਏਕਦੇਸਤ੍ਤੇ ਸਤਿਪਿ ਅਤ੍ਤਨੋ ਪਨ ਨਾਸੋ ਨ ਭਵਤਿ, ਚੇਤਨਾਯਯੇਵ ਵਿਨਾਸੋ ਭਵਤੀ’’ਤਿ? ਅਤ੍ਰ ਵੁਚ੍ਚਤੇ – ਅਤ੍ਤਨੋ ਅਨਾਸੇ ਚੇਤਨਾਯਪਿ ਅਨਾਸੋਵ ਹੋਤਿ. ਕਿਂ ਕਾਰਣਨ੍ਤਿ ਚੇ? ਰੂਪਰਸਾਦੀਨਂ ਵਿਯ ਅਵਿਨਿਬ੍ਭੋਗਤੋ. ਅਥ ਸਮਾਨੇ ਏਕਦੇਸਤ੍ਤੇ ਅਵਿਨਿਬ੍ਭੋਗਭਾਵੇਪਿ ¶ ਕੇਨ ਹੇਤੁਨਾ ਚੇਤਨਾਯ ਏਵ ਨਾਸੋ ਭਵਤਿ, ਨ ਪਨ ਅਤ੍ਤਨੋ. ਅਥ ਵਿਸੇਸਕਾਰਣਂ ਨਤ੍ਥਿ, ਤਵ ਲਦ੍ਧਿਯਾ ਅਤ੍ਤਾਵ ਨਸ੍ਸਤੁ, ਤਿਟ੍ਠਤੁ ਚੇਤਨਾ. ਅਥ ਚੇਤਨਾਯ ਨਾਸੇ ਅਤ੍ਤਨੋ ਨਾਸੋ ¶ ਨ ਭਵਤਿ, ਉਭਿਨ੍ਨਂ ਏਕਦੇਸਤਾ ਨਤ੍ਥਿ. ਏਵਞ੍ਚ ਸਤਿ ਕੋ ਦੋਸੋਤਿ ਚੇ? ਯਂ ਪਨ ਤਯਾ ਵੁਤ੍ਤਂ, ਯਥਾ ਰੂਪਰਸਗਨ੍ਧਾਦੀਨਂ ਏਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ, ਤਥਾ ਚੇਤਨਤ੍ਤਾਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਨ੍ਤਿ? ਤਮਯੁਤ੍ਤਨ੍ਤਿ ਤਵ ਪਟਿਞ੍ਞਾ ਹੀਨਾ. ਅਥ ਰੂਪਰਸਾਦੀਨਂ ਵਿਯ ਸਮਾਨੇਪਿ ਏਕਦੇਸਤ੍ਤੇ ਯਦਿ ਅਤ੍ਤਨੋ ਅਨਾਸੇ ਚੇਤਨਾਯਪਿ ਅਨਾਸੋ ਨ ਭਵਤਿ, ਪਟਿਞ੍ਞਾਹੀਨੋ ਅਸਿ. ਅਥ ਵੁਤ੍ਤਪ੍ਪਕਾਰਤੋ ਵਿਪਰੀਤਂ ਵਾ ਸਿਯਾ, ਤਵ ਅਤ੍ਤਾ ਨਸ੍ਸਤੁ, ਚੇਤਨਾ ਤਿਟ੍ਠਤੁ. ਅਥੇਵਂ ਨ ਭਵਤੀਤਿ ਚੇ? ਏਕਦੇਸਤਾਵ ਨਤ੍ਥੀਤਿ.

ਅਥ ਦੇਸਨ੍ਤਰਕਤਮਞ੍ਞਤ੍ਤਂ ਵਦੇਸਿ, ਚੇਤਨਤ੍ਤਾਨਂ ਅਞ੍ਞਤ੍ਤੇ ਸਤਿ ਘਟਪਟਸਕਟਗੇਹਾਦੀਨਂ ਵਿਯ ਅਞ੍ਞਤ੍ਤਂ ਸਿਯਾ. ਚੇਤਨਾਯ ਵਿਨਾ ਅਨਞ੍ਞਤਾ ਤੇ ਅਤ੍ਤਾ ਨ ਘਟੇਨ ਵਿਨਾ ਪਟੋ ਵਿਯ ਅਞ੍ਞੋ ਸਿਯਾ ¶ . ਅਞ੍ਞੋ ਚ ਹਿ ਘਟੋ ਅਞ੍ਞੋ ਚ ਪਟੋਤਿ? ਨ, ਏਵਞ੍ਚ ਸਤਿ ਕੋ ਦੋਸੋਤਿ ਚੇ? ‘‘ਅਚੇਤਨੋ ਅਤ੍ਤਾ’’ਤਿ ਪੁਬ੍ਬੇ ਵੁਤ੍ਤਦੋਸਤੋ ਨ ਪਰਿਮੁਚ੍ਚਤੀਤਿ. ਤਸ੍ਮਾ ਪਰਮਤ੍ਥਤੋ ਨ ਕੋਚਿ ਕਤ੍ਤਾ ਵਾ ਵੇਦਕੋ ਵਾ ਅਤ੍ਤਾ ਅਤ੍ਥੀਤਿ ਦਟ੍ਠਬ੍ਬਨ੍ਤਿ.

ਯਦਿ ਏਵਂ ਅਥ ਕਸ੍ਮਾ ਭਗਵਤਾ –

੭੭੯.

‘‘ਅਸ੍ਮਾ ਲੋਕਾ ਪਰਂ ਲੋਕਂ,

ਸੋ ਚ ਸਨ੍ਧਾਵਤੀ ਨਰੋ;

ਸੋ ਚ ਕਰੋਤਿ ਵੇਦੇਤਿ,

ਸੁਖਦੁਕ੍ਖਂ ਸਯਂਕਤ’’ਨ੍ਤਿ ਚ.

੭੮੦.

‘‘ਸਤ੍ਤੋ ¶ ਸਂਸਾਰਮਾਪਨ੍ਨੋ,

ਦੁਕ੍ਖਮਸ੍ਸ ਮਹਬ੍ਭਯਂ;

ਅਤ੍ਥਿ ਮਾਤਾ ਅਤ੍ਥਿ ਪਿਤਾ,

ਅਤ੍ਥਿ ਸਤ੍ਤੋਪਪਾਤਿਕੋ’’ਤਿ ਚ.

੭੮੧.

‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ,

ਭਾਰਹਾਰੋ ਚ ਪੁਗ੍ਗਲੋ;

ਭਾਰਾਦਾਨਂ ਦੁਕ੍ਖਂ ਲੋਕੇ,

ਭਾਰਨਿਕ੍ਖੇਪਨਂ ਸੁਖ’’ਨ੍ਤਿ ਚ.

੭੮੨.

‘‘ਯਞ੍ਹਿ ਕਰੋਤਿ ਪੁਰਿਸੋ,

ਕਾਯੇਨ ਵਾਚਾ ਉਦ ਚੇਤਸਾ;

ਤਞ੍ਹਿ ਤਸ੍ਸ ਸਕਂ ਹੋਤਿ,

ਤਞ੍ਚ ਆਦਾਯ ਗਚ੍ਛਤੀ’’ਤਿ ਚ.

੭੮੩.

‘‘ਏਕਸ੍ਸੇਕੇਨ ਕਪ੍ਪੇਨ,

ਪੁਗ੍ਗਲਸ੍ਸਟ੍ਠਿਸਞ੍ਚਯੋ;

ਸਿਯਾ ਪਬ੍ਬਤਸਮੋ ਰਾਸਿ,

ਇਤਿ ਵੁਤ੍ਤਂ ਮਹੇਸਿਨਾ’’ਤਿ ਚ.

੭੮੪.

‘‘ਅਸਦ੍ਧੋ ¶ ਅਕਤਞ੍ਞੂ ਚ,

ਸਨ੍ਧਿਚ੍ਛੇਦੋ ਚ ਯੋ ਨਰੋ;

ਹਤਾਵਕਾਸੋ ਵਨ੍ਤਾਸੋ,

ਸ ਵੇ ਉਤ੍ਤਮਪੋਰਿਸੋ’’ਤਿ ਚ. –

ਵੁਤ੍ਤਨ੍ਤਿ. ਸਚ੍ਚਂ ਏਵਂ ਵੁਤ੍ਤਂ ਭਗਵਤਾ, ਤਞ੍ਚ ਖੋ ਸਮ੍ਮੁਤਿਵਸੇਨ, ਨ ਪਰਮਤ੍ਥਤੋ. ਨਨੁ ਭਗਵਤਾ ਇਦਮ੍ਪਿ ਵੁਤ੍ਤਂ –

੭੮੫.

‘‘ਕਿਂ ¶ ਨੁ ਸਤ੍ਤੋਤਿ ਪਚ੍ਚੇਸਿ, ਮਾਰ ਦਿਟ੍ਠਿਗਤਂ ਨੁ ਤੇ;

ਸੁਦ੍ਧਸਙ੍ਖਾਰਪੁਞ੍ਜੋਯਂ, ਨਯਿਧ ਸਤ੍ਤੁਪਲਬ੍ਭਤੀ’’ਤਿ ਚ.

੭੮੬.

‘‘ਯਥਾਪਿ ¶ ਅਙ੍ਗਸਮ੍ਭਾਰਾ,

ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ,

ਹੋਤਿ ਸਤ੍ਤੋਤਿ ਸਮ੍ਮੁਤੀ’’ਤਿ ਚ.

ਤਸ੍ਮਾ ਨ ਵਚਨਮਤ੍ਤਮੇਵਾਵਲਮ੍ਬਿਤਬ੍ਬਂ, ਨ ਚ ਦਲ਼੍ਹਮੂਲ਼੍ਹਗਾਹਿਨਾ ਚ ਭਵਿਤਬ੍ਬਂ, ਗਰੁਕੁਲਮੁਪਸੇਵਿਤ੍ਵਾ ਸੁਤ੍ਤਪਦਾਨਂ ਅਧਿਪ੍ਪਾਯੋ ਜਾਨਿਤਬ੍ਬੋ, ਸੁਤ੍ਤਪਦੇਸੁ ਅਭਿਯੋਗੋ ਕਾਤਬ੍ਬੋ. ਦ੍ਵੇ ਸਚ੍ਚਾਨਿ ਭਗਵਤਾ ਵੁਤ੍ਤਾਨਿ – ‘‘ਸਮ੍ਮੁਤਿਸਚ੍ਚਂ, ਪਰਮਤ੍ਥਸਚ੍ਚਞ੍ਚਾ’’ਤਿ. ਤਸ੍ਮਾ ਦ੍ਵੇਪਿ ਸਮ੍ਮੁਤਿਪਰਮਤ੍ਥਸਚ੍ਚਾਨਿ ਅਸਙ੍ਕਰਤੋ ਞਾਤਬ੍ਬਾਨਿ. ਏਵਂ ਅਸਙ੍ਕਰਤੋ ਞਤ੍ਵਾ ਕੋਚਿ ਕਾਰਕੋ ਵਾ ਵੇਦਕੋ ਵਾ ਨਿਚ੍ਚੋ ਧੁਵੋ ਅਤ੍ਤਾ ਪਰਮਤ੍ਥਤੋ ਨਤ੍ਥੀਤਿ ਉਪਪਰਿਕ੍ਖਿਤ੍ਵਾ ਪਚ੍ਚਯਸਾਮਗ੍ਗਿਯਾ ਧਮ੍ਮਾਨਂ ਪਵਤ੍ਤਿਂ ਸਲ੍ਲਕ੍ਖੇਤ੍ਵਾ ਪਣ੍ਡਿਤੇਨ ਕੁਲਪੁਤ੍ਤੇਨ ਅਤ੍ਥਕਾਮੇਨ ਦੁਕ੍ਖਸ੍ਸਨ੍ਤਕਿਰਿਯਾਯ ਪਟਿਪਜ੍ਜਿਤਬ੍ਬਨ੍ਤਿ.

੭੮੭.

ਯੋ ਇਮਂ ਗਨ੍ਥਂ ਅਚ੍ਚਨ੍ਤਂ, ਚਿਨ੍ਤੇਤਿ ਸਤਤਮ੍ਪਿ ਸੋ;

ਕਮੇਨ ਪਰਮਾ ਪਞ੍ਞਾ, ਤਸ੍ਸ ਗਚ੍ਛਤਿ ਵੇਪੁਲਂ.

੭੮੮.

ਅਤਿਮਤਿਕਰਮਾਧਿਨੀਹਰਂ,

ਵਿਮਤਿਵਿਨਾਸਕਰਂ ਪਿਯਕ੍ਕਰਂ;

ਪਠਤਿ ¶ ਸੁਣਤਿ ਯੋ ਸਦਾ ਇਮਂ,

ਵਿਕਸਤਿ ਤਸ੍ਸ ਮਤੀਧ ਭਿਕ੍ਖੁਨੋ.

ਇਤਿ ਅਭਿਧਮ੍ਮਾਵਤਾਰੇ ਕਾਰਕਪਟਿਵੇਧਨਿਦ੍ਦੇਸੋ ਨਾਮ

ਤੇਰਸਮੋ ਪਰਿਚ੍ਛੇਦੋ.

੧੪. ਚੁਦ੍ਦਸਮੋ ਪਰਿਚ੍ਛੇਦੋ

ਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ

੭੮੯.

ਭਾਵਨਾਨਯਮਹਂ ¶ ¶ ਹਿਤਾਨਯਂ,

ਮਾਨਯਞ੍ਚ ਸੁਗਤਂ ਸੁਖਾਨਯਂ;

ਬ੍ਯਾਕਰੋਮਿ ਪਰਮਂ ਇਤੋ ਪਰਂ,

ਤਂ ਸੁਣਾਥ ਮਧੁਰਤ੍ਥਵਣ੍ਣਨਂ.

੭੯੦.

ਉਤ੍ਤਰਂ ਤੁ ਮਨੁਸ੍ਸਾਨਂ, ਧਮ੍ਮਤੋ ਞਾਣਦਸ੍ਸਨਂ;

ਪਤ੍ਤੁਕਾਮੇਨ ਕਾਤਬ੍ਬਂ, ਆਦਿਤੋ ਸੀਲਸੋਧਨਂ.

੭੯੧.

ਸਙ੍ਕਸ੍ਸਰਸਮਾਚਾਰੇ, ਦੁਸ੍ਸੀਲੇ ਸੀਲਵਜ੍ਜਿਤੇ;

ਨਤ੍ਥਿ ਝਾਨਂ ਕੁਤੋ ਮਗ੍ਗੋ, ਤਸ੍ਮਾ ਸੀਲਂ ਵਿਸੋਧਯੇ.

੭੯੨.

ਸੀਲਂ ਚਾਰਿਤ੍ਤਵਾਰਿਤ੍ਤਵਸੇਨ ਦੁਵਿਧਂ ਮਤਂ;

ਤਂ ਪਨਾਚ੍ਛਿਦ੍ਦਮਕ੍ਖਣ੍ਡਮਕਮ੍ਮਾਸਮਨਿਨ੍ਦਿਤਂ.

੭੯੩.

ਕਤ੍ਤਬ੍ਬਂ ਅਤ੍ਥਕਾਮੇਨ, ਵਿਵੇਕਸੁਖਮਿਚ੍ਛਤਾ;

ਸੀਲਞ੍ਚ ਨਾਮ ਭਿਕ੍ਖੂਨਂ, ਅਲਙ੍ਕਾਰੋ ਅਨੁਤ੍ਤਰੋ.

੭੯੪.

ਰਤਨਂ ਸਰਣਂ ਖੇਮਂ, ਤਾਣਂ ਲੇਣਂ ਪਰਾਯਣਂ;

ਚਿਨ੍ਤਾਮਣਿ ਪਣੀਤੋ ਚ, ਸੀਲਂ ਯਾਨਮਨੁਤ੍ਤਰਂ.

੭੯੫.

ਸੀਤਲਂ ¶ ਸਲਿਲਂ ਸੀਲਂ, ਕਿਲੇਸਮਲਧੋਵਨਂ;

ਗੁਣਾਨਂ ਮੂਲਭੂਤਞ੍ਚ, ਦੋਸਾਨਂ ਬਲਘਾਤਿ ਚ.

੭੯੬.

ਤਿਦਿਵਾਰੋਹਣਞ੍ਚੇਤਂ, ਸੋਪਾਨਂ ਪਰਮੁਤ੍ਤਮਂ;

ਮਗ੍ਗੋ ਖੇਮੋ ਚ ਨਿਬ੍ਬਾਨਨਗਰਸ੍ਸ ਪਵੇਸਨੇ.

੭੯੭.

ਤਸ੍ਮਾ ਸੁਪਰਿਸੁਦ੍ਧਂ ਤਂ, ਸੀਲਂ ਦੁਵਿਧਲਕ੍ਖਣਂ;

ਕਤ੍ਤਬ੍ਬਂ ਅਤ੍ਥਕਾਮੇਨ, ਪਿਯਸੀਲੇਨ ਭਿਕ੍ਖੁਨਾ.

੭੯੮.

ਕਾਤਬ੍ਬੋ ਪਨ ਸੀਲਸ੍ਮਿਂ, ਪਰਿਸੁਦ੍ਧੇ ਠਿਤੇਨਿਧ;

ਪਲਿਬੋਧਸ੍ਸੁਪਚ੍ਛੇਦੋ, ਪਲਿਬੋਧਾ ਦਸਾਹੁ ਚ.

੭੯੯.

‘‘ਆਵਾਸੋ ¶ ਚ ਕੁਲਂ ਲਾਭੋ,

ਗਣੋ ਕਮ੍ਮਞ੍ਚ ਪਞ੍ਚਮਂ;

ਅਦ੍ਧਾਨਂ ਞਾਤਿ ਆਬਾਧੋ,

ਗਨ੍ਥੋ ਇਦ੍ਧੀਤਿ ਤੇ ਦਸਾ’’ਤਿ.

੮੦੦.

ਪਲਿਬੋਧਸ੍ਸੁਪਚ੍ਛੇਦਂ, ਕਤ੍ਵਾ ਦਸਵਿਧਸ੍ਸਪਿ;

ਉਪਸਙ੍ਕਮਿਤਬ੍ਬੋ ਸੋ, ਕਮ੍ਮਟ੍ਠਾਨਸ੍ਸ ਦਾਯਕੋ.

੮੦੧.

ਪਿਯੋ ¶ ਗਰੁ ਭਾਵਨੀਯੋ, ਵਤ੍ਤਾ ਚ ਵਚਨਕ੍ਖਮੋ;

ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋ ਚਟ੍ਠਾਨੇ ਨਿਯੋਜਕੋ.

੮੦੨.

ਏਵਮਾਦਿਗੁਣੋਪੇਤਮੁਪਗਨ੍ਤ੍ਵਾ ਹਿਤੇਸਿਨਂ;

ਕਲ੍ਯਾਣਮਿਤ੍ਤਂ ਕਾਲੇਨ, ਕਮ੍ਮਟ੍ਠਾਨਸ੍ਸ ਦਾਯਕਂ.

੮੦੩.

ਕਮ੍ਮਟ੍ਠਾਨਂ ਗਹੇਤਬ੍ਬਂ, ਵਤ੍ਤਂ ਕਤ੍ਵਾ ਪਨਸ੍ਸ ਤੁ;

ਤੇਨਾਪਿ ਚਰਿਤਂ ਞਤ੍ਵਾ, ਦਾਤਬ੍ਬਂ ਤਸ੍ਸ ਭਿਕ੍ਖੁਨੋ.

੮੦੪.

ਚਰਿਤਂ ਪਨਿਦਂ ਰਾਗਦੋਸਮੋਹਵਸੇਨ ਚ;

ਸਦ੍ਧਾਬੁਦ੍ਧਿਵਿਤਕ੍ਕਾਨਂ, ਵਸੇਨ ਛਬ੍ਬਿਧਂ ਮਤਂ.

੮੦੫.

ਵੋਮਿਸ੍ਸਕਨਯਾ ਤੇਸਂ, ਚਤੁਸਟ੍ਠਿ ਭਵਨ੍ਤਿ ਤੇ;

ਤੇਹਿ ਅਤ੍ਥੋ ਨ ਚਤ੍ਥੀਤਿ, ਨ ਮਯਾ ਇਧ ਦਸ੍ਸਿਤਾ.

੮੦੬.

ਅਸੁਭਾ ¶ ਚ ਦਸੇਵੇਤ੍ਥ, ਤਥਾ ਕਾਯਗਤਾਸਤਿ;

ਏਕਾਦਸ ਇਮੇ ਰਾਗ-ਚਰਿਤਸ੍ਸਾਨੁਕੂਲਤਾ.

੮੦੭.

ਚਤਸ੍ਸੋ ਅਪ੍ਪਮਞ੍ਞਾਯੋ, ਸਵਣ੍ਣਕਸਿਣਾ ਇਮੇ;

ਅਟ੍ਠੇਵ ਚ ਸਦਾ ਦੋਸ-ਚਰਿਤਸ੍ਸਾਨੁਕੂਲਤਾ.

੮੦੮.

ਤਂ ਮੋਹਚਰਿਤਸ੍ਸੇਤ੍ਥ, ਵਿਤਕ੍ਕਚਰਿਤਸ੍ਸ ਚ;

ਅਨੁਕੂਲਨ੍ਤਿ ਨਿਦ੍ਦਿਟ੍ਠਂ, ਆਨਾਪਾਨਂ ਪਨੇਕਕਂ.

੮੦੯.

ਪੁਰਿਮਾਨੁਸ੍ਸਤਿਛਕ੍ਕਂ, ਸਦ੍ਧਾਚਰਿਤਦੇਹਿਨੋ;

ਮਰਣੂਪਸਮਾਯੁਤ੍ਤਾ, ਸਤਿਮਾਹਾਰਨਿਸ੍ਸਿਤਾ.

੮੧੦.

ਸਞ੍ਞਾ ¶ ਧਾਤੁਵਵਤ੍ਥਾਨਂ, ਬੁਦ੍ਧਿਪ੍ਪਕਤਿਜਨ੍ਤੁਨੋ;

ਇਮੇ ਪਨ ਚ ਚਤ੍ਤਾਰੋ, ਅਨੁਕੂਲਾਤਿ ਦੀਪਿਤਾ.

੮੧੧.

ਚਤ੍ਤਾਰੋਪਿ ਚ ਆਰੁਪ੍ਪਾ, ਸੇਸਾਨਿ ਕਸਿਣਾਨਿ ਚ;

ਅਨੁਕੂਲਾ ਇਮੇ ਸਬ੍ਬ-ਚਰਿਤਾਨਨ੍ਤਿ ਵਣ੍ਣਿਤਾ.

੮੧੨.

ਇਦਂ ਸਬ੍ਬਂ ਪਨੇਕਨ੍ਤ-ਵਿਪਚ੍ਚਨੀਕਭਾਵਤੋ;

ਅਤਿਸਪ੍ਪਾਯਤੋ ਵੁਤ੍ਤ-ਮਿਤਿ ਞੇਯ੍ਯਂ ਵਿਭਾਵਿਨਾ.

੮੧੩.

ਕਮ੍ਮਟ੍ਠਾਨਾਨਿ ਸਬ੍ਬਾਨਿ, ਚਤ੍ਤਾਲੀਸਾਤਿ ਨਿਦ੍ਦਿਸੇ;

ਕਸਿਣਾਨਿ ਦਸ ਚੇਵ, ਅਸੁਭਾਨੁਸ੍ਸਤੀ ਦਸ.

੮੧੪.

ਚਤਸ੍ਸੋ ਅਪ੍ਪਮਞ੍ਞਾਯੋ, ਚਤ੍ਤਾਰੋ ਚ ਅਰੂਪਿਨੋ;

ਚਤੁਧਾਤੁਵਵਤ੍ਥਾਨਂ, ਸਞ੍ਞਾ ਚਾਹਾਰਤਾ ਇਤਿ.

੮੧੫.

ਕਮ੍ਮਟ੍ਠਾਨੇਸੁ ਏਤੇਸੁ, ਉਪਚਾਰਵਹਾ ਕਤਿ;

ਆਨਾਪਾਨਸਤਿਂ ਕਾਯ-ਗਤਂ ਹਿਤ੍ਵਾ ਪਨਟ੍ਠਪਿ.

੮੧੬.

ਸੇਸਾਨੁਸ੍ਸਤਿਯੋ ਸਞ੍ਞਾ, ਵਵਤ੍ਥਾਨਨ੍ਤਿ ਤੇਰਸ;

ਉਪਚਾਰਵਹਾ ਵੁਤ੍ਤਾ, ਸੇਸਾ ਤੇ ਅਪ੍ਪਨਾਵਹਾ.

੮੧੭.

ਅਪ੍ਪਨਾਯਾਵਹੇਸ੍ਵੇਤ੍ਥ, ਕਸਿਣਾਨਿ ਦਸਾਪਿ ਚ;

ਆਨਾਪਾਨਸਤੀ ਚੇਵ, ਚਤੁਕ੍ਕਜ੍ਝਾਨਿਕਾ ਇਮੇ.

੮੧੮.

ਅਸੁਭਾਨਿ ¶ ਦਸ ਚੇਤ੍ਥ, ਤਥਾ ਕਾਯਗਤਾਸਤਿ;

ਏਕਾਦਸ ਇਮੇ ਧਮ੍ਮਾ, ਪਠਮਜ੍ਝਾਨਿਕਾ ਸਿਯੁਂ.

੮੧੯.

ਆਦਿਬ੍ਰਹ੍ਮਵਿਹਾਰਾਤਿ ¶ , ਤਿਕਜ੍ਝਾਨਵਹਾ ਤਯੋ;

ਚਤੁਤ੍ਥਾਪਿ ਚ ਆਰੁਪ੍ਪਾ, ਚਤੁਤ੍ਥਜ੍ਝਾਨਿਕਾ ਮਤਾ.

੮੨੦.

ਵਸੇਨਾਰਮ੍ਮਣਙ੍ਗਾਨਂ, ਦੁਵਿਧੋ ਸਮਤਿਕ੍ਕਮੋ;

ਗੋਚਰਾਤਿਕ੍ਕਮਾਰੂਪੇ, ਰੂਪੇ ਝਾਨਙ੍ਗਤਿਕ੍ਕਮੋ.

੮੨੧.

ਦਸੇਵ ਕਸਿਣਾਨੇਤ੍ਥ, ਵਡ੍ਢੇਤਬ੍ਬਾਨਿ ਹੋਨ੍ਤਿ ਹਿ;

ਨ ਚ ਵਡ੍ਢਨਿਯਾ ਸੇਸਾ, ਭਵਨ੍ਤਿ ਅਸੁਭਾਦਯੋ.

੮੨੨.

ਦਸੇਵ ਕਸਿਣਾਨੇਤ੍ਥ, ਅਸੁਭਾਨਿ ਦਸਾਪਿ ਚ;

ਆਨਾਪਾਨਸਤੀ ਚੇਵ, ਤਥਾ ਕਾਯਗਤਾਸਤਿ.

੮੨੩.

ਪਟਿਭਾਗਨਿਮਿਤ੍ਤਾਨਿ ¶ , ਹੋਨ੍ਤਿ ਆਰਮ੍ਮਣਾਨਿ ਹਿ;

ਸੇਸਾਨੇਵ ਪਟਿਭਾਗ-ਨਿਮਿਤ੍ਤਾਰਮ੍ਮਣਾ ਸਿਯੁਂ.

੮੨੪.

ਅਸੁਭਾਨਿ ਦਸਾਹਾਰ-ਸਞ੍ਞਾ ਕਾਯਗਤਾਸਤਿ;

ਦੇਵੇਸੁ ਨਪ੍ਪਵਤ੍ਤਨ੍ਤਿ, ਦ੍ਵਾਦਸੇਤਾਨਿ ਸਬ੍ਬਦਾ.

੮੨੫.

ਤਾਨਿ ਦ੍ਵਾਦਸ ਚੇਤਾਨਿ, ਆਨਾਪਾਨਸਤੀਪਿ ਚ;

ਤੇਰਸੇਵ ਪਨੇਤਾਨਿ, ਬ੍ਰਹ੍ਮਲੋਕੇ ਨ ਵਿਜ੍ਜਰੇ.

੮੨੬.

ਠਪੇਤ੍ਵਾ ਚਤੁਰਾਰੂਪੇ, ਨਤ੍ਥਿ ਕਿਞ੍ਚਿ ਅਰੂਪਿਸੁ;

ਮਨੁਸ੍ਸਲੋਕੇ ਸਬ੍ਬਾਨਿ, ਪਵਤ੍ਤਨ੍ਤਿ ਨ ਸਂਸਯੋ.

੮੨੭.

ਚਤੁਤ੍ਥਂ ਕਸਿਣਂ ਹਿਤ੍ਵਾ, ਕਸਿਣਾ ਅਸੁਭਾਨਿ ਚ;

ਦਿਟ੍ਠੇਨੇਵ ਗਹੇਤਬ੍ਬਾ, ਇਮੇ ਏਕੂਨਵੀਸਤਿ.

੮੨੮.

ਸਤਿਯਮ੍ਪਿ ਚ ਕਾਯਮ੍ਹਿ, ਦਿਟ੍ਠੇਨ ਤਚਪਞ੍ਚਕਂ;

ਸੇਸਮੇਤ੍ਥ ਸੁਤੇਨੇਵ, ਗਹੇਤਬ੍ਬਨ੍ਤਿ ਦੀਪਿਤਂ.

੮੨੯.

ਆਨਾਪਾਨਸਤੀ ਏਤ੍ਥ, ਫੁਟ੍ਠੇਨ ਪਰਿਦੀਪਿਤਾ;

ਵਾਯੋਕਸਿਣਮੇਵੇਤ੍ਥ, ਦਿਟ੍ਠਫੁਟ੍ਠੇਨ ਗਯ੍ਹਤਿ.

੮੩੦.

ਸੁਤੇਨੇਵ ¶ ਗਹੇਤਬ੍ਬਾ, ਸੇਸਾ ਅਟ੍ਠਾਰਸਾਪਿ ਚ;

ਉਪੇਕ੍ਖਾ ਅਪ੍ਪਮਞ੍ਞਾ ਚ, ਅਰੂਪਾ ਚੇਵ ਪਞ੍ਚਿਮੇ.

੮੩੧.

ਆਦਿਤੋਵ ਗਹੇਤਬ੍ਬਾ, ਨ ਹੋਨ੍ਤੀਤਿ ਪਕਾਸਿਤਾ;

ਪਞ੍ਚਤਿਂਸਾਵਸੇਸਾਨਿ, ਗਹੇਤਬ੍ਬਾਨਿ ਆਦਿਤੋ.

੮੩੨.

ਕਮ੍ਮਟ੍ਠਾਨੇਸੁ ਹੇਤੇਸੁ, ਆਕਾਸਕਸਿਣਂ ਵਿਨਾ;

ਕਸਿਣਾ ਨਵ ਹੋਨ੍ਤੇ ਚ, ਅਰੂਪਾਨਂ ਤੁ ਪਚ੍ਚਯਾ.

੮੩੩.

ਦਸਾਪਿ ਕਸਿਣਾ ਹੋਨ੍ਤਿ, ਅਭਿਞ੍ਞਾਨਂ ਤੁ ਪਚ੍ਚਯਾ;

ਤਯੋ ਬ੍ਰਹ੍ਮਵਿਹਾਰਾਪਿ, ਚਤੁਕ੍ਕਸ੍ਸ ਭਵਨ੍ਤਿ ਤੁ.

੮੩੪.

ਹੇਟ੍ਠਿਮਂ ਹੇਟ੍ਠਿਮਾਰੁਪ੍ਪਂ, ਉਪਰੂਪਰਿਮਸ੍ਸ ਹਿ;

ਤਥਾ ਚਤੁਤ੍ਥਮਾਰੁਪ੍ਪਂ, ਨਿਰੋਧਸ੍ਸਾਤਿ ਦੀਪਿਤਂ.

੮੩੫.

ਸਬ੍ਬਾਨਿ ਚ ਪਨੇਤਾਨਿ, ਚਤ੍ਤਾਲੀਸਵਿਧਾਨਿ ਤੁ;

ਵਿਪਸ੍ਸਨਾਭਵਸਮ੍ਪਤ੍ਤਿ-ਸੁਖਾਨਂ ਪਚ੍ਚਯਾ ਸਿਯੁਂ.

੮੩੬.

ਕਮ੍ਮਟ੍ਠਾਨਂ ¶ ਗਹੇਤ੍ਵਾਨ, ਆਚਰਿਯਸ੍ਸ ਸਨ੍ਤਿਕੇ;

ਵਸਨ੍ਤਸ੍ਸ ਕਥੇਤਬ੍ਬਂ, ਆਗਤਸ੍ਸਾਗਤਕ੍ਖਣੇ.

੮੩੭.

ਉਗ੍ਗਹੇਤ੍ਵਾ ¶ ਪਨਞ੍ਞਤ੍ਰ, ਗਨ੍ਤੁਕਾਮਸ੍ਸ ਭਿਕ੍ਖੁਨੋ;

ਨਾਤਿਸਙ੍ਖੇਪਵਿਤ੍ਥਾਰਂ, ਕਥੇਤਬ੍ਬਂ ਤੁ ਤੇਨਪਿ.

੮੩੮.

ਕਮ੍ਮਟ੍ਠਾਨਂ ਗਹੇਤ੍ਵਾਨ, ਸਮ੍ਮਟ੍ਠਾਨਂ ਮਨੋਭੁਨੋ;

ਅਟ੍ਠਾਰਸਹਿ ਦੋਸੇਹਿ, ਨਿਚ੍ਚਂ ਪਨ ਵਿਵਜ੍ਜਿਤੇ.

੮੩੯.

ਅਨੁਰੂਪੇ ਵਿਹਾਰਸ੍ਮਿਂ, ਵਿਹਾਤਬ੍ਬਂ ਤੁ ਗਾਮਤੋ;

ਨਾਤਿਦੂਰੇ ਨਚ੍ਚਾਸਨ੍ਨੇ, ਸਿਵੇ ਪਞ੍ਚਙ੍ਗਸਂਯੁਤੇ.

੮੪੦.

ਖੁਦ੍ਦਕੋ ਪਲਿਬੋਧੋਪਿ, ਛਿਨ੍ਦਿਤਬ੍ਬੋ ਪਨਤ੍ਥਿ ਚੇ;

ਦੀਘਾ ਕੇਸਾ ਨਖਾ ਲੋਮਾ, ਛਿਨ੍ਦਿਤਬ੍ਬਾ ਵਿਭਾਵਿਨਾ.

੮੪੧.

ਚੀਵਰਂ ਰਜਿਤਬ੍ਬਂ ਤਂ, ਕਿਲਿਟ੍ਠਂ ਤੁ ਸਚੇ ਸਿਯਾ;

ਸਚੇ ਪਤ੍ਤੇ ਮਲਂ ਹੋਤਿ, ਪਚਿਤਬ੍ਬੋਵ ਸੁਟ੍ਠੁ ਸੋ.

੮੪੨.

ਅਚ੍ਛਿਨ੍ਨਪਲਿਬੋਧੇਨ ¶ , ਪਚ੍ਛਾ ਤੇਨ ਚ ਭਿਕ੍ਖੁਨਾ;

ਪਵਿਵਿਤ੍ਤੇ ਪਨੋਕਾਸੇ, ਵਸਨ੍ਤੇਨ ਯਥਾਸੁਖਂ.

੮੪੩.

ਵਜ੍ਜੇਤ੍ਵਾ ਮਤ੍ਤਿਕਂ ਨੀਲਂ, ਪੀਤਂ ਸੇਤਞ੍ਚ ਲੋਹਿਤਂ;

ਸਣ੍ਹਾਯਾਰੁਣਵਣ੍ਣਾਯ, ਮਤ੍ਤਿਕਾਯ ਮਨੋਰਮਂ.

੮੪੪.

ਕਤ੍ਤਬ੍ਬਂ ਕਸਿਣਜ੍ਝਾਨਂ, ਪਤ੍ਤੁਕਾਮੇਨ ਧੀਮਤਾ;

ਸੇਨਾਸਨੇ ਵਿਵਿਤ੍ਤਸ੍ਮਿਂ, ਬਹਿਦ੍ਧਾ ਵਾਪਿ ਤਾਦਿਸੇ.

੮੪੫.

ਪਟਿਚ੍ਛਨ੍ਨੇ ਪਨਟ੍ਠਾਨੇ, ਪਬ੍ਭਾਰੇ ਵਾ ਗੁਹਨ੍ਤਰੇ;

ਸਂਹਾਰਿਮਂ ਵਾ ਕਾਤਬ੍ਬਂ, ਤਂ ਤਤ੍ਰਟ੍ਠਕਮੇਵ ਵਾ.

੮੪੬.

ਸਂਹਾਰਿਮਂ ਕਰੋਨ੍ਤੇਨ, ਦਣ੍ਡਕੇਸੁ ਚਤੂਸ੍ਵਪਿ;

ਚਮ੍ਮਂ ਵਾ ਕਟਸਾਰਂ ਵਾ, ਦੁਸ੍ਸਪਤ੍ਤਮ੍ਪਿ ਵਾ ਤਥਾ.

੮੪੭.

ਬਨ੍ਧਿਤ੍ਵਾ ਤਥਾ ਕਾਤਬ੍ਬਂ, ਮਤ੍ਤਿਕਾਯ ਪਮਾਣਤੋ;

ਭੂਮਿਯਂ ਪਤ੍ਥਰਿਤ੍ਵਾ ਚ, ਓਲੋਕੇਤਬ੍ਬਮੇਵ ਤਂ.

੮੪੮.

ਤਤ੍ਰਟ੍ਠਂ ਭੂਮਿਯਂ ਵਟ੍ਟਂ, ਆਕੋਟਿਤ੍ਵਾਨ ਖਾਣੁਕੇ;

ਵਲ੍ਲੀਹਿ ਤਂ ਵਿਨਨ੍ਧਿਤ੍ਵਾ, ਕਾਤਬ੍ਬਂ ਕਣ੍ਣਿਕਂ ਸਮਂ.

੮੪੯.

ਵਿਤ੍ਥਾਰਤੋ ¶ ਪਮਾਣੇਨ, ਵਿਦਤ੍ਥਿਚਤੁਰਙ੍ਗੁਲਂ;

ਵਟ੍ਟਂ ਵਤ੍ਤਤਿ ਤਂ ਕਾਤੁਂ, ਵਿਵਟ੍ਟਂ ਪਨ ਮਿਚ੍ਛਤਾ.

੮੫੦.

ਭੇਰੀਤਲਸਮਂ ਸਾਧੁ, ਕਤ੍ਵਾ ਕਸਿਣਮਣ੍ਡਲਂ;

ਸਮ੍ਮਜ੍ਜਿਤ੍ਵਾਨ ਤਂ ਠਾਨਂ, ਨ੍ਹਤ੍ਵਾ ਆਗਮ੍ਮ ਪਣ੍ਡਿਤੋ.

੮੫੧.

ਹਤ੍ਥਪਾਸਪਮਾਣਸ੍ਮਿਂ, ਤਮ੍ਹਾ ਕਸਿਣਮਣ੍ਡਲਾ;

ਪਦੇਸੇ ਤੁ ਸੁਪਞ੍ਞਤ੍ਤੇ, ਆਸਨਸ੍ਮਿਂ ਸੁਅਤ੍ਥਤੇ.

੮੫੨.

ਉਚ੍ਚੇ ਤਤ੍ਥ ਨਿਸੀਦਿਤ੍ਵਾ, ਵਿਦਤ੍ਥਿਚਤੁਰਙ੍ਗੁਲੇ;

ਉਜੁਕਾਯਂ ਪਣਿਧਾਯ, ਕਤ੍ਵਾ ਪਰਿਮੁਖਂ ਸਤਿਂ.

੮੫੩.

ਕਾਮੇਸ੍ਵਾਦੀਨਵਂ ਦਿਸ੍ਵਾ, ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ;

ਪਰਮਂ ਪੀਤਿਪਾਮੋਜ੍ਜਂ, ਜਨੇਤ੍ਵਾ ਰਤਨਤ੍ਤਯੇ.

੮੫੪.

‘‘ਭਾਗੀ ¶ ਅਸ੍ਸਮਹਂ ਅਦ੍ਧਾ, ਇਮਾਯ ਪਟਿਪਤ੍ਤਿਯਾ;

ਪਵਿਵੇਕਸੁਖਸ੍ਸਾ’’ਤਿ, ਕਤ੍ਵਾ ਉਸ੍ਸਾਹਮੁਤ੍ਤਮਂ.

੮੫੫.

ਆਕਾਰੇਨ ¶ ਸਮੇਨੇਵ, ਉਮ੍ਮੀਲਿਤ੍ਵਾਨ ਲੋਚਨਂ;

ਨਿਮਿਤ੍ਤਂ ਗਣ੍ਹਤਾ ਸਾਧੁ, ਭਾਵੇਤਬ੍ਬਂ ਪੁਨਪ੍ਪੁਨਂ.

੮੫੬.

ਨ ਵਣ੍ਣੋ ਪੇਕ੍ਖਿਤਬ੍ਬੋ ਸੋ, ਦਟ੍ਠਬ੍ਬਂ ਨ ਚ ਲਕ੍ਖਣਂ;

ਵਣ੍ਣਂ ਪਨ ਅਮੁਞ੍ਚਿਤ੍ਵਾ, ਉਸ੍ਸਦਸ੍ਸ ਵਸੇਨ ਹਿ.

੮੫੭.

ਚਿਤ੍ਤਂ ਪਣ੍ਣਤ੍ਤਿਧਮ੍ਮਸ੍ਮਿਂ, ਠਪੇਤ੍ਵੇਕਗ੍ਗਮਾਨਸੋ;

‘‘ਪਥਵੀ ਪਥਵਿ’’ਚ੍ਚੇਵਂ, ਵਤ੍ਵਾ ਭਾਵੇਯ੍ਯ ਪਣ੍ਡਿਤੋ.

੮੫੮.

ਪਥਵੀ ਮੇਦਨੀ ਭੂਮਿ, ਵਸੁਧਾ ਚ ਵਸੁਨ੍ਧਰਾ;

ਏਵਂ ਪਥਵਿਨਾਮੇਸੁ, ਏਕਂ ਵਤ੍ਤੁਮ੍ਪਿ ਵਟ੍ਟਤਿ.

੮੫੯.

ਉਮ੍ਮੀਲਿਤ੍ਵਾ ਨਿਮੀਲਿਤ੍ਵਾ, ਆਵਜ੍ਜੇਯ੍ਯ ਪੁਨਪ੍ਪੁਨਂ;

ਯਾਵੁਗ੍ਗਹਨਿਮਿਤ੍ਤਂ ਤੁ, ਨੁਪ੍ਪਜ੍ਜਤਿ ਚ ਤਾਵ ਸੋ.

੮੬੦.

ਏਵਂ ਭਾਵਯਤੋ ਤਸ੍ਸ, ਪੁਨ ਏਕਗ੍ਗਚੇਤਸੋ;

ਯਦਾ ਪਨ ਨਿਮੀਲੇਤ੍ਵਾ, ਆਵਜ੍ਜਨ੍ਤਸ੍ਸ ਯੋਗਿਨੋ.

੮੬੧.

ਯਥਾ ਉਮ੍ਮੀਲਿਤੇਕਾਲੇ, ਤਥਾਪਾਥਂ ਤੁ ਯਾਤਿ ਚੇ;

ਤਦੁਗ੍ਗਹਨਿਮਿਤ੍ਤਂ ਤ-ਮੁਪ੍ਪਨ੍ਨਨ੍ਤਿ ਪਵੁਚ੍ਚਤਿ.

੮੬੨.

ਨਿਮਿਤ੍ਤੇ ¶ ਪਨ ਸਞ੍ਜਾਤੇ, ਤਤੋ ਪਭੁਤਿ ਯੋਗਿਨਾ;

ਨਿਸੀਦਿਤਬ੍ਬਂ ਨੋ ਚੇਵਂ, ਤਸ੍ਮਿਂ ਠਾਨੇ ਵਿਜਾਨਤਾ.

੮੬੩.

ਅਤ੍ਤਨੋ ਵਸਨਟ੍ਠਾਨਂ, ਪਵਿਸਿਤ੍ਵਾਨ ਧੀਮਤਾ;

ਤੇਨ ਤਤ੍ਥ ਨਿਸਿਨ੍ਨੇਨ, ਭਾਵੇਤਬ੍ਬਂ ਯਥਾਸੁਖਂ.

੮੬੪.

ਪਪਞ੍ਚਪਰਿਹਾਰਤ੍ਥਂ, ਪਾਦਾਨਂ ਪਨ ਧੋਵਨੇ;

ਤਸ੍ਸੇਕਤਲਿਕਾ ਦ੍ਵੇ ਚ, ਇਚ੍ਛਿਤਬ੍ਬਾ ਉਪਾਹਨਾ.

੮੬੫.

ਸਮਾਧਿਤਰੁਣੋ ਤਸ੍ਸ, ਅਸਪ੍ਪਾਯੇਨ ਕੇਨਚਿ;

ਸਚੇ ਨਸ੍ਸਤਿ ਤਂ ਠਾਨਂ, ਗਨ੍ਤ੍ਵਾਵਾਦਾਯ ਤਂ ਪਨ.

੮੬੬.

ਪੀਠੇ ¶ ਸੁਖਨਿਸਿਨ੍ਨੇਨ, ਭਾਵੇਤਬ੍ਬਂ ਪੁਨਪ੍ਪੁਨਂ;

ਸਮਨ੍ਨਾਹਰਿਤਬ੍ਬਞ੍ਚ, ਕਰੇ ਤਕ੍ਕਾਹਤਮ੍ਪਿ ਚ.

੮੬੭.

ਨਿਮਿਤ੍ਤਂ ਪਨ ਤਂ ਹਿਤ੍ਵਾ, ਚਿਤ੍ਤਂ ਧਾਵਤਿ ਚੇ ਬਹਿ;

ਨਿਵਾਰੇਤ੍ਵਾ ਨਿਮਿਤ੍ਤਸ੍ਮਿਂ, ਠਪੇਤਬ੍ਬਂ ਤੁ ਮਾਨਸਂ.

੮੬੮.

ਯਤ੍ਥ ਯਤ੍ਥ ਨਿਸੀਦਿਤ੍ਵਾ, ਤਮਿਚ੍ਛਤਿ ਤਪੋਧਨੋ;

ਤਤ੍ਥ ਤਤ੍ਥ ਦਿਵਾਰਤ੍ਤਿਂ, ਤਸ੍ਸੁਪਟ੍ਠਾਤਿ ਚੇਤਸੋ.

੮੬੯.

ਏਵਂ ਤਸ੍ਸ ਕਰੋਨ੍ਤਸ੍ਸ, ਅਨੁਪੁਬ੍ਬੇਨ ਯੋਗਿਨੋ;

ਵਿਕ੍ਖਮ੍ਭਨ੍ਤਿ ਚ ਸਬ੍ਬਾਨਿ, ਪਞ੍ਚ ਨੀਵਰਣਾਨਿਪਿ.

੮੭੦.

ਸਮਾਧਿਯਤਿ ਚਿਤ੍ਤਮ੍ਪਿ, ਉਪਚਾਰਸਮਾਧਿਨਾ;

ਪਟਿਭਾਗਨਿਮਿਤ੍ਤਮ੍ਪਿ, ਉਪ੍ਪਜ੍ਜਤਿ ਚ ਯੋਗਿਨੋ.

੮੭੧.

ਕੋ ਪਨਾਯਂ ਵਿਸੇਸੋ ਹਿ, ਇਮਸ੍ਸ ਪੁਰਿਮਸ੍ਸ ਵਾ;

ਥਵਿਕਾ ਨੀਹਤਾਦਾਸ-ਮਣ੍ਡਲਂ ਵਿਯ ਮਜ੍ਜਿਤਂ.

੮੭੨.

ਮੇਘਤੋ ਵਿਯ ਨਿਕ੍ਖਨ੍ਤਂ, ਸਮ੍ਪੁਣ੍ਣਚਨ੍ਦਮਣ੍ਡਲਂ;

ਪਟਿਭਾਗਨਿਮਿਤ੍ਤਂ ਤਂ, ਬਲਾਕਾ ਵਿਯ ਤੋਯਦੇ.

੮੭੩.

ਤਦੁਗ੍ਗਹਨਿਮਿਤ੍ਤਂ ¶ ਤਂ, ਪਦਾਲੇਤ੍ਵਾਵ ਨਿਗ੍ਗਤਂ;

ਤਤੋਧਿਕਤਰਂ ਸੁਦ੍ਧਂ, ਹੁਤ੍ਵਾਪਟ੍ਠਾਤਿ ਤਸ੍ਸ ਤਂ.

੮੭੪.

ਤਨੁਸਣ੍ਠਾਨਵਨ੍ਤਞ੍ਚ, ਵਣ੍ਣਵਨ੍ਤਂ ਨ ਚੇਵ ਤਂ;

ਉਪਟ੍ਠਾਕਾਰਮਤ੍ਤਂ ਤਂ, ਪਞ੍ਞਜਂ ਭਾਵਨਾਮਯਂ.

੮੭੫.

ਪਟਿਭਾਗੇ ¶ ਸਮੁਪ੍ਪਨ੍ਨੇ, ਨਿਮਿਤ੍ਤੇ ਭਾਵਨਾਮਯੇ;

ਹੋਨ੍ਤਿ ਵਿਕ੍ਖਮ੍ਭਿਤਾਨੇਵ, ਪਞ੍ਚ ਨੀਵਰਣਾਨਿਪਿ.

੮੭੬.

ਕਿਲੇਸਾ ਸਨ੍ਨਿਸਿਨ੍ਨਾਵ, ਯੁਤ੍ਤਯੋਗਸ੍ਸ ਭਿਕ੍ਖੁਨੋ;

ਚਿਤ੍ਤਂ ਸਮਾਹਿਤਂਯੇਵ, ਉਪਚਾਰਸਮਾਧਿਨਾ.

੮੭੭.

ਆਕਾਰੇਹਿ ਪਨ ਦ੍ਵੀਹਿ, ਸਮਾਧਿਯਤਿ ਮਾਨਸਂ;

ਉਪਚਾਰਕ੍ਖਣੇ ਤਸ੍ਸ, ਪਟਿਲਾਭੇ ਸਮਾਧਿਨੋ.

੮੭੮.

ਨੀਵਾਰਣਪ੍ਪਹਾਨੇਨ ¶ , ਉਪਚਾਰਕ੍ਖਣੇ ਤਥਾ;

ਅਙ੍ਗਾਨਂ ਪਾਤੁਭਾਵੇਨ, ਪਟਿਲਾਭਕ੍ਖਣੇ ਪਨ.

੮੭੯.

ਦ੍ਵਿਨ੍ਨਂ ਪਨ ਸਮਾਧੀਨਂ, ਕਿਂ ਨਾਨਾਕਰਣਂ ਪਨ;

ਅਙ੍ਗਾਨਿ ਥਾਮਜਾਤਾਨਿ, ਉਪਚਾਰਕ੍ਖਣੇਨ ਚ.

੮੮੦.

ਅਪ੍ਪਨਾਯ ਪਨਙ੍ਗਾਨਿ, ਥਾਮਜਾਤਾਨਿ ਜਾਯਰੇ;

ਤਸ੍ਮਾ ਤਂ ਅਪ੍ਪਨਾਚਿਤ੍ਤਂ, ਦਿਵਸਮ੍ਪਿ ਪਵਤ੍ਤਤਿ.

੮੮੧.

ਪਲ੍ਲਙ੍ਕੇਨ ਚ ਤੇਨੇਵ, ਵਡ੍ਢੇਤ੍ਵਾ ਤਂ ਨਿਮਿਤ੍ਤਕਂ;

ਅਪ੍ਪਨਂ ਅਧਿਗਨ੍ਤੁਂ ਸੋ, ਸਕ੍ਕੋਤਿ ਯਦਿ ਸੁਨ੍ਦਰਂ.

੮੮੨.

ਨੋ ਚੇ ਸਕ੍ਕੋਤਿ ਸੋ ਤੇਨ,

ਤਂ ਨਿਮਿਤ੍ਤਂ ਤੁ ਯੋਗਿਨਾ;

ਚਕ੍ਕਵਤ੍ਤਿਯ ਗਬ੍ਭੋਵ,

ਰਤਨਂ ਵਿਯ ਦੁਲ੍ਲਭਂ.

੮੮੩.

ਸਤਤਂ ਅਪ੍ਪਮਤ੍ਤੇਨ, ਰਕ੍ਖਿਤਬ੍ਬਂ ਸਤੀਮਤਾ;

ਨਿਮਿਤ੍ਤਂ ਰਕ੍ਖਤੋ ਲਦ੍ਧਂ, ਪਰਿਹਾਨਿ ਨ ਵਿਜ੍ਜਤਿ.

੮੮੪.

ਆਰਕ੍ਖਣੇ ਅਸਨ੍ਤਮ੍ਹਿ, ਲਦ੍ਧਂ ਲਦ੍ਧਂ ਵਿਨਸ੍ਸਤਿ;

ਰਕ੍ਖਿਤਬ੍ਬਂ ਹਿ ਤਸ੍ਮਾ ਤਂ, ਤਤ੍ਰਾਯਂ ਰਕ੍ਖਣਾਵਿਧਿ.

੮੮੫.

ਆਵਾਸੋ ਗੋਚਰੋ ਭਸ੍ਸਂ, ਪੁਗ੍ਗਲੋ ਭੋਜਨਂ ਉਤੁ;

ਇਰਿਯਾਪਥੋਤਿ ਸਤ੍ਤੇਤੇ, ਅਸਪ੍ਪਾਯੇ ਵਿਵਜ੍ਜਯੇ.

੮੮੬.

ਸਪ੍ਪਾਯੇ ¶ ਸਤ੍ਤ ਸੇਵੇਯ੍ਯ, ਏਵਞ੍ਹਿ ਪਟਿਪਜ੍ਜਤੋ;

ਨ ਚਿਰੇਨੇਵ ਕਾਲੇਨ, ਹੋਤਿ ਭਿਕ੍ਖੁਸ੍ਸ ਅਪ੍ਪਨਾ.

੮੮੭.

ਯਸ੍ਸਪ੍ਪਨਾ ਨ ਹੋਤੇਵ, ਏਵਮ੍ਪਿ ਪਟਿਪਜ੍ਜਤੋ;

ਅਪ੍ਪਨਾਯ ਚ ਕੋਸਲ੍ਲਂ, ਸਮ੍ਮਾ ਸਮ੍ਪਾਦਯੇ ਬੁਧੋ.

੮੮੮.

ਅਪ੍ਪਨਾਯ ਹਿ ਕੋਸਲ੍ਲ-ਮਿਦਂ ਦਸਵਿਧਂ ਇਧ;

ਗਨ੍ਥਵਿਤ੍ਥਾਰਭੀਤੇਨ, ਮਯਾ ਵਿਸ੍ਸਜ੍ਜਿਤਨ੍ਤਿ ਚ.

੮੮੯.

ਏਵਞ੍ਹਿ ¶ ਸਮ੍ਪਾਦਯਤੋ, ਅਪ੍ਪਨਾਕੋਸਲ੍ਲਂ ਪਨ;

ਪਟਿਲਦ੍ਧੇ ਨਿਮਿਤ੍ਤਸ੍ਮਿਂ, ਅਪ੍ਪਨਾ ਸਮ੍ਪਵਤ੍ਤਤਿ.

੮੯੦.

ਏਵਮ੍ਪਿ ਪਟਿਪਨ੍ਨਸ੍ਸ, ਸਚੇ ਸਾ ਨਪ੍ਪਵਤ੍ਤਤਿ;

ਤਥਾਪਿ ਨ ਜਹੇ ਯੋਗਂ, ਵਾਯਮੇਥੇਵ ਪਣ੍ਡਿਤੋ.

੮੯੧.

ਚਿਤ੍ਤਪ੍ਪਵਤ੍ਤਿਆਕਾਰਂ ¶ , ਤਸ੍ਮਾ ਸਲ੍ਲਕ੍ਖਯਂ ਬੁਧੋ;

ਸਮਤਂ ਵੀਰਿਯਸ੍ਸੇਵ, ਯੋਜਯੇਥ ਪੁਨਪ੍ਪੁਨਂ.

੮੯੨.

ਈਸਕਮ੍ਪਿ ਲਯਂ ਯਨ੍ਤਂ, ਪਗ੍ਗਣ੍ਹੇਥੇਵ ਮਾਨਸਂ;

ਅਚ੍ਚਾਰਦ੍ਧਂ ਨਿਸੇਧੇਤ੍ਵਾ, ਸਮਮੇਵ ਪਵਤ੍ਤਯੇ.

੮੯੩.

ਲੀਨਤੁਦ੍ਧਤਭਾਵੇਹਿ, ਮੋਚਯਿਤ੍ਵਾਨ ਮਾਨਸਂ;

ਪਟਿਭਾਗਨਿਮਿਤ੍ਤਾਭਿ-ਮੁਖਂ ਤਂ ਪਟਿਪਾਦਯੇ.

੮੯੪.

ਏਵਂ ਨਿਮਿਤ੍ਤਾਭਿਮੁਖਂ, ਪਟਿਪਾਦਯਤੋ ਪਨ;

ਇਦਾਨੇਵਪ੍ਪਨਾ ਤਸ੍ਸ, ਸਾ ਸਮਿਜ੍ਝਿਸ੍ਸਤੀਤਿ ਚ.

੮੯੫.

ਭਵਙ੍ਗਂ ਪਨ ਪਚ੍ਛਿਜ੍ਜ, ਪਥਵੀਕਸਿਣਂ ਤਥਾ;

ਤਦੇਵਾਰਮ੍ਮਣਂ ਕਤ੍ਵਾ, ਮਨੋਦ੍ਵਾਰਮ੍ਹਿ ਯੋਗਿਨੋ.

੮੯੬.

ਜਾਯਤੇਵਜ੍ਜਨਂ ਚਿਤ੍ਤਂ, ਤਤ੍ਰੇਵਾਰਮ੍ਮਣੇ ਤਤੋ;

ਜਵਨਾਨਿ ਚ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ.

੮੯੭.

ਅਵਸਾਨੇ ਪਨੇਕਂ ਤੁ, ਰੂਪਾਵਚਰਿਕਂ ਭਵੇ;

ਤਕ੍ਕਾਦਯੋ ਪਨਞ੍ਞੇਹਿ, ਭਵਨ੍ਤਿ ਬਲਵਤ੍ਤਰਾ.

੮੯੮.

ਅਪ੍ਪਨਾਚੇਤਸੋ ਤਾਨਿ, ਪਰਿਕਮ੍ਮੋਪਚਾਰਤੋ;

ਵੁਚ੍ਚਨ੍ਤਿ ਪਰਿਕਮ੍ਮਾਨਿ, ਉਪਚਾਰਾਨਿ ਚਾਤਿਪਿ.

੮੯੯.

ਅਪ੍ਪਨਾਯਾਨੁਲੋਮਤ੍ਤਾ ¶ , ਅਨੁਲੋਮਾਨਿ ਏਵ ਚ;

ਯਂ ਤਂ ਸਬ੍ਬਨ੍ਤਿਮਂ ਏਤ੍ਥ, ਗੋਤ੍ਰਭੂਤਿ ਪਵੁਚ੍ਚਤਿ.

੯੦੦.

ਗਹਿਤਾਗਹਣੇਨੇਤ੍ਥ, ਪਰਿਕਮ੍ਮਪ੍ਪਨਾਦਿਕਂ;

ਦੁਤਿਯਂ ਉਪਚਾਰਂ ਤਂ, ਤਤਿਯਂ ਅਨੁਲੋਮਕਂ.

੯੦੧.

ਚਤੁਤ੍ਥਂ ¶ ਗੋਤ੍ਰਭੁ ਦਿਟ੍ਠਂ, ਪਞ੍ਚਮਂ ਅਪ੍ਪਨਾਮਨੋ;

ਪਠਮਂ ਉਪਚਾਰਂ ਵਾ, ਦੁਤਿਯਂ ਅਨੁਲੋਮਕਂ.

੯੦੨.

ਤਤਿਯਂ ਗੋਤ੍ਰਭੁ ਦਿਟ੍ਠਂ, ਚਤੁਤ੍ਥਂ ਅਪ੍ਪਨਾਮਨੋ;

ਚਤੁਤ੍ਥਂ ਪਞ੍ਚਮਂ ਵਾਤਿ, ਅਪ੍ਪੇਤਿ ਨ ਤਤੋ ਪਰਂ.

੯੦੩.

ਛਟ੍ਠੇ ਵਾ ਸਤ੍ਤਮੇ ਵਾਪਿ, ਅਪ੍ਪਨਾ ਨੇਵ ਜਾਯਤਿ;

ਆਸਨ੍ਨਤ੍ਤਾ ਭਵਙ੍ਗਸ੍ਸ, ਜਵਨਂ ਪਤਿ ਤਾਵਦੇ.

੯੦੪.

ਪੁਰਿਮੇਹਾਸੇਵਨਂ ਲਦ੍ਧਾ, ਛਟ੍ਠਂ ਵਾ ਸਤ੍ਤਮਮ੍ਪਿ ਵਾ;

ਅਪ੍ਪੇਤੀਤਿ ਪਨੇਤ੍ਥਾਹ, ਗੋਦਤ੍ਤੋ ਆਭਿਧਮ੍ਮਿਕੋ.

੯੦੫.

ਧਾਵਨ੍ਤੋ ਹਿ ਯਥਾ ਕੋਚਿ,

ਨਰੋ ਛਿਨ੍ਨਤਟਾਮੁਖੋ;

ਠਾਤੁਕਾਮੋ ਪਰਿਯਨ੍ਤੇ,

ਠਾਤੁਂ ਸਕ੍ਕੋਤਿ ਨੇਵ ਸੋ.

੯੦੬.

ਏਵਮੇਵ ਪਨਚ੍ਛਟ੍ਠੇ, ਸਤ੍ਤਮੇ ਵਾਪਿ ਮਾਨਸੋ;

ਨ ਸਕ੍ਕੋਤੀਤਿ ਅਪ੍ਪੇਤੁਂ, ਵੇਦਿਤਬ੍ਬਂ ਵਿਭਾਵਿਨਾ.

੯੦੭.

ਏਕਚਿਤ੍ਤਕ੍ਖਣਾਯੇਵ, ਹੋਤਾਯਂ ਅਪ੍ਪਨਾ ਪਨ;

ਤਤੋ ਭਵਙ੍ਗਪਾਤੋਵ, ਹੋਤੀਤਿ ਪਰਿਦੀਪਿਤਂ.

੯੦੮.

ਤਤੋ ਭਵਙ੍ਗਂ ਛਿਨ੍ਦਿਤ੍ਵਾ, ਪਚ੍ਚਵੇਕ੍ਖਣਹੇਤੁਕਂ;

ਆਵਜ੍ਜਨਂ ਤਤੋ ਝਾਨ-ਪਚ੍ਚਵੇਕ੍ਖਣਮਾਨਸਂ.

੯੦੯.

ਕਾਮਚ੍ਛਨ੍ਦੋ ¶ ਚ ਬ੍ਯਾਪਾਦੋ, ਥਿਨਮਿਦ੍ਧਞ੍ਚ ਉਦ੍ਧਤੋ;

ਕੁਕ੍ਕੁਚ੍ਚਂ ਵਿਚਿਕਿਚ੍ਛਾ ਚ, ਪਹੀਨਾ ਪਞ੍ਚਿਮੇ ਪਨ.

੯੧੦.

ਵਿਤਕ੍ਕੇਨ ਵਿਚਾਰੇਨ, ਪੀਤਿਯਾ ਚ ਸੁਖੇਨ ਚ;

ਏਕਗ੍ਗਤਾਯ ਸਂਯੁਤ੍ਤਂ, ਝਾਨਂ ਪਞ੍ਚਙ੍ਗਿਕਂ ਇਦਂ.

੯੧੧.

ਨਾਨਾਵਿਸਯਲੁਦ੍ਧਸ੍ਸ ¶ , ਕਾਮਚ੍ਛਨ੍ਦਵਸਾ ਪਨ;

ਇਤੋ ਚਿਤੋ ਭਮਨ੍ਤਸ੍ਸ, ਵਨੇ ਮਕ੍ਕਟਕੋ ਵਿਯ.

੯੧੨.

ਏਕਸ੍ਮਿਂ ¶ ਵਿਸਯੇਯੇਵ, ਸਮਾਧਾਨੇਵ ਚੇਤਸੋ;

‘‘ਸਮਾਧਿ ਕਾਮਚ੍ਛਨ੍ਦਸ੍ਸ, ਪਟਿਪਕ੍ਖੋ’’ਤਿ ਵੁਚ੍ਚਤਿ.

੯੧੩.

ਪਾਮੋਜ੍ਜਭਾਵਤੋ ਚੇਵ, ਸੀਤਲਤ੍ਤਾ ਸਭਾਵਤੋ;

‘‘ਬ੍ਯਾਪਾਦਸ੍ਸ ਤਤੋ ਪੀਤਿ, ਪਟਿਪਕ੍ਖਾ’’ਤਿ ਭਾਸਿਤਾ.

੯੧੪.

ਸਵਿਪ੍ਫਾਰਿਕਭਾਵੇਨ, ਨੇਕ੍ਖਮ੍ਮਾਦਿਪਵਤ੍ਤਿਤੋ;

‘‘ਵਿਤਕ੍ਕੋ ਥਿਨਮਿਦ੍ਧਸ੍ਸ, ਪਟਿਪਕ੍ਖੋ’’ਤਿ ਵਣ੍ਣਿਤੋ.

੯੧੫.

ਅਵੂਪਸਨ੍ਤਭਾਵਸ੍ਸ, ਸਯਞ੍ਚੇਵਾਤਿਸਨ੍ਤਤੋ;

‘‘ਸੁਖਂ ਉਦ੍ਧਚ੍ਚਕੁਕ੍ਕੁਚ੍ਚ-ਦ੍ਵਯਸ੍ਸ ਪਟਿਪਕ੍ਖਕਂ’’.

੯੧੬.

ਮਤਿਯਾ ਅਨੁਰੂਪਤ੍ਤਾ, ‘‘ਅਨੁਮਜ੍ਜਨਲਕ੍ਖਣੋ;

ਵਿਚਾਰੋ ਵਿਚਿਕਿਚ੍ਛਾਯ, ਪਟਿਪਕ੍ਖੋ’’ਤਿ ਦੀਪਿਤੋ.

੯੧੭.

ਪਞ੍ਚਙ੍ਗਵਿਪ੍ਪਯੁਤ੍ਤਂ ਤਂ, ਝਾਨਂ ਪਞ੍ਚਙ੍ਗਸਂਯੁਤਂ;

ਸਿਵਂ ਤਿਵਿਧਕਲ੍ਯਾਣਂ, ਦਸਲਕ੍ਖਣਸਂਯੁਤਂ.

੯੧੮.

ਏਵਞ੍ਚਾਧਿਗਤਂ ਹੋਤਿ, ਪਠਮਂ ਤੇਨ ਯੋਗਿਨਾ;

ਸੁਚਿਰਟ੍ਠਿਤਿਕਾਮੇਨ, ਤਸ੍ਸ ਝਾਨਸ੍ਸ ਸਬ੍ਬਸੋ.

੯੧੯.

ਤਂ ਸਮਾਪਜ੍ਜਿਤਬ੍ਬਂ ਤੁ, ਵਿਸੋਧੇਤ੍ਵਾਨ ਪਾਪਕੇ;

ਤਂ ਸਮਾਪਜ੍ਜਤੋ ਤਸ੍ਸ, ਸੁਚਿਰਟ੍ਠਿਤਿਕਂ ਭਵੇ.

੯੨੦.

ਚਿਤ੍ਤਭਾਵਨਵੇਪੁਲ੍ਲਂ, ਪਤ੍ਥਯਨ੍ਤੇਨ ਭਿਕ੍ਖੁਨਾ;

ਪਟਿਭਾਗਨਿਮਿਤ੍ਤਂ ਤਂ, ਵਡ੍ਢੇਤਬ੍ਬਂ ਯਥਾਕ੍ਕਮਂ.

੯੨੧.

ਵਡ੍ਢਨਾਭੂਮਿਯੋ ਦ੍ਵੇ ਚ, ਉਪਚਾਰਞ੍ਚ ਅਪ੍ਪਨਾ;

ਉਪਚਾਰਮ੍ਪਿ ਵਾ ਪਤ੍ਵਾ, ਵਡ੍ਢੇਤੁਂ ਤਞ੍ਚ ਵਤ੍ਤਤਿ.

੯੨੨.

ਅਪ੍ਪਨਂ ਪਨ ਪਤ੍ਵਾ ਵਾ, ਤਤ੍ਰਾਯਂ ਵਡ੍ਢਨਕ੍ਕਮੋ;

ਕਸਿਤਬ੍ਬਂ ਯਥਾਠਾਨਂ, ਪਰਿਚ੍ਛਿਨ੍ਦਤਿ ਕਸ੍ਸਕੋ.

੯੨੩.

ਯੋਗਿਨਾ ਏਵਮੇਵਮ੍ਪਿ, ਅਙ੍ਗੁਲਦ੍ਵਙ੍ਗੁਲਾਦਿਨਾ;

ਪਰਿਚ੍ਛਿਜ੍ਜ ਪਰਿਚ੍ਛਿਜ੍ਜ, ਵਡ੍ਢੇਤਬ੍ਬਂ ਯਥਿਚ੍ਛਕਂ.

੯੨੪.

ਪਤ੍ਤੇਪਿ ¶ ¶ ਪਠਮੇ ਝਾਨੇ, ਆਕਾਰੇਹਿਪਿ ਪਞ੍ਚਹਿ;

ਸੁਚਿਣ੍ਣਵਸਿਨਾ ਤੇਨ, ਭਵਿਤਬ੍ਬਂ ਤਪਸ੍ਸਿਨਾ.

੯੨੫.

ਆਵਜ੍ਜਨਂ ਸਮਾਪਤ੍ਤਿ, ਅਧਿਟ੍ਠਾਨੇਸੁ ਤੀਸੁ ਚ;

ਵੁਟ੍ਠਾਨਪਚ੍ਚਵੇਕ੍ਖਾਸੁ, ਵਸਿਤਾ ਪਞ੍ਚ ਭਾਸਿਤਾ.

੯੨੬.

ਆਵਜ੍ਜਿਤ੍ਵਾ ਅਧਿਟ੍ਠਿਤ੍ਵਾ, ਸਮਾਪਜ੍ਜ ਪੁਨਪ੍ਪੁਨਂ;

ਵੁਟ੍ਠਿਤ੍ਵਾ ਪਚ੍ਚਵੇਕ੍ਖਿਤ੍ਵਾ, ਵਸਿਤਾ ਪਞ੍ਚ ਸਾਧਯੇ.

੯੨੭.

ਪਠਮੇ ¶ ਅਵਸਿਪਤ੍ਤੇ, ਦੁਤਿਯਂ ਯੋ ਪਨਿਚ੍ਛਤਿ;

ਉਭਤੋ ਭਟ੍ਠੋਭਵੇ ਯੋਗੀ, ਪਠਮਾ ਦੁਤਿਯਾਪਿ ਚ.

੯੨੮.

ਕਾਮਸ੍ਸਹਗਤਾ ਸਞ੍ਞਾ, ਮਨਕ੍ਕਾਰਾ ਚਰਨ੍ਤਿ ਚੇ;

ਪਮਾਦਯੋਗਿਨੋ ਝਾਨਂ, ਹੋਤਿ ਤਂ ਹਾਨਭਾਗਿਯਂ.

੯੨੯.

ਸਤਿ ਸਨ੍ਤਿਟ੍ਠਤੇ ਤਸ੍ਮਿਂ, ਸਨ੍ਤਾ ਤਦਨੁਧਮ੍ਮਤਾ;

ਮਨ੍ਦਸ੍ਸ ਯੋਗਿਨੋ ਝਾਨਂ, ਹੋਤਿ ਤਂ ਠਿਤਿਭਾਗਿਯਂ.

੯੩੦.

ਅਤਕ੍ਕਸਹਿਤਾ ਸਞ੍ਞਾ, ਮਨਕ੍ਕਾਰਾ ਚਰਨ੍ਤਿ ਚੇ;

ਅਪ੍ਪਮਤ੍ਤਸ੍ਸ ਤਂ ਝਾਨਂ, ਵਿਸੇਸਭਾਗਿਯਂ ਸਿਯਾ.

੯੩੧.

ਨਿਬ੍ਬਿਦਾਸਂਯੁਤਾ ਸਞ੍ਞਾ, ਮਨਕ੍ਕਾਰਾ ਚਰਨ੍ਤਿ ਚੇ;

ਨਿਬ੍ਬੇਧਭਾਗਿਯਂ ਝਾਨਂ, ਹੋਤੀਤਿ ਪਰਿਦੀਪਿਤਂ.

੯੩੨.

ਤਸ੍ਮਾ ਪਞ੍ਚਸੁ ਏਤੇਸੁ, ਸੁਚਿਣ੍ਣਵਸਿਨਾ ਪਨ;

ਪਠਮਾ ਪਗੁਣਤੋ ਝਾਨਾ, ਵੁਟ੍ਠਾਯ ਵਿਧਿਨਾ ਤਤੋ.

੯੩੩.

ਯਸ੍ਮਾ ਅਯਂ ਸਮਾਪਤ੍ਤਿ, ਆਸਨ੍ਨਾਕੁਸਲਾਰਿਕਾ;

ਥੂਲਤ੍ਤਾ ਤਕ੍ਕਚਾਰਾਨਂ, ਤਤੋਯਂ ਅਙ੍ਗਦੁਬ੍ਬਲਾ.

੯੩੪.

ਇਤਿ ਆਦੀਨਵਂ ਦਿਸ੍ਵਾ, ਪਠਮੇ ਪਨ ਯੋਗਿਨਾ;

ਦੁਤਿਯਂ ਸਨ੍ਤਤੋ ਝਾਨਂ, ਚਿਨ੍ਤਯਿਤ੍ਵਾਨ ਧੀਮਤਾ.

੯੩੫.

ਨਿਕਨ੍ਤਿਂ ਪਰਿਯਾਦਾਯ, ਝਾਨਸ੍ਮਿਂ ਪਠਮੇ ਪੁਨ;

ਦੁਤਿਯਾਧਿਗਮਤ੍ਥਾਯ, ਕਾਤਬ੍ਬੋ ਭਾਵਨਕ੍ਕਮੋ.

੯੩੬.

ਅਥਸ੍ਸ ¶ ਪਠਮਜ੍ਝਾਨਾ, ਵੁਟ੍ਠਾਯ ਵਿਧਿਨਾ ਯਦਾ;

ਸਤਸ੍ਸ ਸਮ੍ਪਜਾਨਸ੍ਸ, ਝਾਨਙ੍ਗਂ ਪਚ੍ਚਵੇਕ੍ਖਤੋ.

੯੩੭.

ਥੂਲਤੋ ¶ ਤਕ੍ਕਚਾਰਾ ਹਿ, ਉਪਤਿਟ੍ਠਨ੍ਤਿ ਯੋਗਿਨੋ;

ਸੇਸਮਙ੍ਗਤ੍ਤਯਂ ਤਸ੍ਸ, ਸਨ੍ਤਮੇਵੋਪਤਿਟ੍ਠਤਿ.

੯੩੮.

ਥੂਲਙ੍ਗਾਨਂ ਪਹਾਨਾਯ, ਤਦਾ ਤਸ੍ਸ ਚ ਯੋਗਿਨੋ;

ਸਨ੍ਤਙ੍ਗਪਟਿਲਾਭਾਯ, ਨਿਮਿਤ੍ਤਂ ਤੁ ਤਦੇਵ ਚ.

੯੩੯.

‘‘ਪਥਵੀ ਪਥਵਿ’’ਚ੍ਚੇਵਂ, ਕਰੋਤੋ ਮਨਸਾ ਪੁਨ;

ਇਦਾਨਿ ਦੁਤਿਯਜ੍ਝਾਨ-ਮੁਪ੍ਪਜ੍ਜਿਸ੍ਸਤਿ ਤਂ ਇਤਿ.

੯੪੦.

ਭਵਙ੍ਗਂ ਪਨ ਪਚ੍ਛਿਜ੍ਜ, ਪਥਵੀਕਸਿਣਂ ਪਨ;

ਤਦੇਵਾਰਮ੍ਮਣਂ ਕਤ੍ਵਾ, ਮਨੋਦ੍ਵਾਰਮ੍ਹਿ ਯੋਗਿਨੋ.

੯੪੧.

ਜਾਯਤਾਵਜ੍ਜਨਂ ਚਿਤ੍ਤਂ, ਤਸ੍ਮਿਂ ਆਰਮ੍ਮਣੇ ਤਤੋ;

ਜਵਨਾਨਿ ਹਿ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ.

੯੪੨.

ਅਵਸਾਨੇ ਪਨੇਕਮ੍ਪਿ, ਤੇਸਂ ਜਵਨਚੇਤਸਂ;

ਰੂਪਾਵਚਰਿਕਂ ਹੋਤਿ, ਦੁਤਿਯਜ੍ਝਾਨਮਾਨਸਂ.

੯੪੩.

ਸਮ੍ਪਸਾਦਨਮਜ੍ਝਤ੍ਤਂ, ਪੀਤਿਯਾ ਚ ਸੁਖੇਨ ਚ;

ਏਕਗ੍ਗਤਾਯ ਸਂਯੁਤ੍ਤਂ, ਝਾਨਂ ਹੋਤਿ ਤਿਵਙ੍ਗਿਕਂ.

੯੪੪.

ਹੇਟ੍ਠਾ ਵੁਤ੍ਤਨਯੇਨੇਵ, ਸੇਸਂ ਸਮੁਪਲਕ੍ਖਯੇ;

ਏਵਂ ਦੁਵਙ੍ਗਹੀਨਂ ਤੁ, ਤੀਹਿ ਅਙ੍ਗੇਹਿ ਸਂਯੁਤਂ.

੯੪੫.

ਝਾਨਂ ¶ ਤਿਵਿਧਕਲ੍ਯਾਣਂ, ਦਸਲਕ੍ਖਣਸਂਯੁਤਂ;

ਦੁਤਿਯਾਧਿਗਤਂ ਹੋਤਿ, ਭਿਕ੍ਖੁਨਾ ਭਾਵਨਾਮਯਂ.

੯੪੬.

ਦੁਤਿਯਾਧਿਗਤੇ ਝਾਨੇ, ਆਕਾਰੇਹਿ ਚ ਪਞ੍ਚਹਿ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਦੁਤਿਯੇਪਿ ਸਤੀਮਤਾ.

੯੪੭.

ਤਸ੍ਮਾ ਪਗੁਣਤੋ ਝਾਨਾ, ਵੁਟ੍ਠਾਯ ਦੁਤਿਯਾ ਪੁਨ;

ਆਸਨ੍ਨਤਕ੍ਕਚਾਰਾਰਿ, ਸਮਾਪਤ੍ਤਿ ਅਯਂ ਇਤਿ.

੯੪੮.

ਪੀਤਿਯਾ ¶ ਪਿਯਤੋ ਤਸ੍ਸ, ਚੇਤਸੋ ਉਪ੍ਪਿਲਾਪਨਂ;

ਪੀਤਿਯਾ ਪਨ ਥੂਲਤ੍ਤਾ, ਤਤੋਯਂ ਅਙ੍ਗਦੁਬ੍ਬਲਾ.

੯੪੯.

ਤਤ੍ਥ ¶ ਆਦੀਨਵਂ ਦਿਸ੍ਵਾ, ਤਤਿਯੇ ਸਨ੍ਤਤੋ ਪਨ;

ਨਿਕਨ੍ਤਿਂ ਪਰਿਯਾਦਾਯ, ਝਾਨਸ੍ਮਿਂ ਦੁਤਿਯੇ ਪੁਨ.

੯੫੦.

ਤਤਿਯਾਧਿਗਮਤ੍ਥਾਯ, ਕਾਤਬ੍ਬੋ ਭਾਵਨਕ੍ਕਮੋ;

ਅਥਸ੍ਸ ਦੁਤਿਯਜ੍ਝਾਨਾ, ਵੁਟ੍ਠਾਯ ਚ ਯਦਾ ਪਨ.

੯੫੧.

ਸਤਸ੍ਸ ਸਮ੍ਪਜਾਨਸ੍ਸ, ਝਾਨਙ੍ਗਂ ਪਚ੍ਚਵੇਕ੍ਖਤੋ;

ਥੂਲਤੋ ਪੀਤੁਪਟ੍ਠਾਤਿ, ਸੁਖਾਦਿ ਸਨ੍ਤਤੋ ਪਨ.

੯੫੨.

ਥੂਲਙ੍ਗਾਨਂ ਪਹਾਨਾਯ, ਤਦਾ ਤਸ੍ਸ ਚ ਯੋਗਿਨੋ;

ਸਨ੍ਤਙ੍ਗਪਟਿਲਾਭਾਯ, ਨਿਮਿਤ੍ਤਂ ਤੁ ਤਦੇਵ ਚ.

੯੫੩.

‘‘ਪਥਵੀ ਪਥਵਿ’’ਚ੍ਚੇਵਂ, ਕਰੋਤੋ ਮਨਸਾ ਪੁਨ;

ਇਦਾਨਿ ਤਤਿਯਂ ਝਾਨ-ਮੁਪ੍ਪਜ੍ਜਿਸ੍ਸਤਿ ਤਂ ਇਤਿ.

੯੫੪.

ਭਵਙ੍ਗਂ ਮਨੁਪਚ੍ਛਿਜ੍ਜ, ਪਥਵੀਕਸਿਣਂ ਪਨ;

ਤਦੇਵਾਰਮ੍ਮਣਂ ਕਤ੍ਵਾ, ਮਨੋਦ੍ਵਾਰਮ੍ਹਿ ਯੋਗਿਨੋ.

੯੫੫.

ਜਾਯਤਾਵਜ੍ਜਨਂ ਚਿਤ੍ਤਂ, ਤਸ੍ਮਿਂ ਆਰਮ੍ਮਣੇ ਤਤੋ;

ਜਵਨਾਨਿ ਚ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ.

੯੫੬.

ਅਵਸਾਨੇ ਪਨੇਕਂ ਤੁ, ਤੇਸਂ ਜਵਨਚੇਤਸਂ;

ਰੂਪਾਵਚਰਿਕਂ ਹੋਤਿ, ਤਤਿਯਜ੍ਝਾਨਮਾਨਸਂ.

੯੫੭.

ਸਤਿਯਾ ਸਮ੍ਪਜਞ੍ਞੇਨ, ਸਮ੍ਪਨ੍ਨਂ ਤੁ ਸੁਖੇਨ ਚ;

ਏਕਗ੍ਗਤਾਯ ਸਂਯੁਤ੍ਤਂ, ਦੁਵਙ੍ਗਂ ਤਤਿਯਂ ਮਤਂ.

੯੫੮.

ਹੇਟ੍ਠਾ ਵੁਤ੍ਤਨਯੇਨੇਵ, ਸੇਸਂ ਸਮੁਪਲਕ੍ਖਯੇ;

ਏਵਮੇਕਙ੍ਗਹੀਨਂ ਤੁ, ਦ੍ਵੀਹਿ ਅਙ੍ਗੇਹਿ ਸਂਯੁਤਂ.

੯੫੯.

ਝਾਨਂ ਤਿਵਿਧਕਲ੍ਯਾਣਂ, ਦਸਲਕ੍ਖਣਸਂਯੁਤਂ;

ਤਤਿਯਾਧਿਗਤਂ ਹੋਤਿ, ਭਿਕ੍ਖੁਨਾ ਭਾਵਨਾਮਯਂ.

੯੬੦.

ਤਤਿਯਾਧਿਗਤੇ ¶ ਝਾਨੇ, ਆਕਾਰੇਹਿ ਚ ਪਞ੍ਚਹਿ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਤਸ੍ਮਿਂ ਪਨ ਸਤੀਮਤਾ.

੯੬੧.

ਤਸ੍ਮਾ ਪਗੁਣਤੋ ਝਾਨਾ, ਵੁਟ੍ਠਾਯ ਤਤਿਯਾ ਪੁਨ;

ਆਸਨ੍ਨਪੀਤਿਦੋਸਾ ਹਿ, ਸਮਾਪਤ੍ਤਿ ਅਯਨ੍ਤਿ ਚ.

੯੬੨.

ਯਦੇਵਚੇਤ੍ਥ ¶ ਆਭੋਗੋ, ਸੁਖਮਿਚ੍ਚੇਵ ਚੇਤਸੋ;

ਏਵਂ ਸੁਖਸ੍ਸ ਥੂਲਤ੍ਤਾ, ਹੋਤਾਯਂ ਅਙ੍ਗਦੁਬ੍ਬਲਾ.

੯੬੩.

ਇਤਿ ¶ ਆਦੀਨਵਂ ਦਿਸ੍ਵਾ, ਝਾਨਸ੍ਮਿਂ ਤਤਿਯੇ ਪੁਨ;

ਚਤੁਤ੍ਥਂ ਸਨ੍ਤਤੋ ਦਿਸ੍ਵਾ, ਚੇਤਸਾ ਪਨ ਯੋਗਿਨਾ.

੯੬੪.

ਨਿਕਨ੍ਤਿਂ ਪਰਿਯਾਦਾਯ, ਝਾਨਸ੍ਮਿਂ ਤਤਿਯੇ ਪੁਨ;

ਚਤੁਤ੍ਥਾਧਿਗਮਤ੍ਥਾਯ, ਕਾਤਬ੍ਬੋ ਭਾਵਨਕ੍ਕਮੋ.

੯੬੫.

ਅਥਸ੍ਸ ਤਤਿਯਜ੍ਝਾਨਾ, ਵੁਟ੍ਠਾਯ ਹਿ ਯਦਾ ਪਨ;

ਸਤਸ੍ਸ ਸਮ੍ਪਜਾਨਸ੍ਸ, ਝਾਨਙ੍ਗਂ ਪਚ੍ਚਵੇਕ੍ਖਤੋ.

੯੬੬.

ਥੂਲਤੋ ਤਸ੍ਸੁਪਟ੍ਠਾਤਿ, ਸੁਖਂ ਤਂ ਮਾਨਸਂ ਤਤੋ;

ਉਪੇਕ੍ਖਾ ਸਨ੍ਤਤੋ ਤਸ੍ਸ, ਚਿਤ੍ਤਸ੍ਸੇਕਗ੍ਗਤਾਪਿ ਚ.

੯੬੭.

ਥੂਲਙ੍ਗਸ੍ਸ ਪਹਾਨਾਯ, ਸਨ੍ਤਙ੍ਗਸ੍ਸੂਪਲਦ੍ਧਿਯਾ;

ਤਦੇਵ ਚ ਨਿਮਿਤ੍ਤਞ੍ਹਿ, ‘‘ਪਥਵੀ ਪਥਵੀ’’ਤਿ ਚ.

੯੬੮.

ਕਰੋਤੋ ਮਨਸਾ ਏਵ, ਪੁਨਪ੍ਪੁਨਞ੍ਚ ਯੋਗਿਨੋ;

ਚਤੁਤ੍ਥਂ ਪਨਿਦਂ ਝਾਨਂ, ਉਪ੍ਪਜ੍ਜਿਸ੍ਸਤਿ ਤਂ ਇਤਿ.

੯੬੯.

ਭਵਙ੍ਗਂ ਪਨੁਪਚ੍ਛਿਜ੍ਜ, ਪਥਵੀਕਸਿਣਂ ਤਥਾ;

ਤਦੇਵਾਰਮ੍ਮਣਂ ਕਤ੍ਵਾ, ਮਨੋਦ੍ਵਾਰਮ੍ਹਿ ਯੋਗਿਨੋ.

੯੭੦.

ਜਾਯਤਾਵਜ੍ਜਨਂ ਚਿਤ੍ਤਂ, ਤਸ੍ਮਿਂ ਆਰਮ੍ਮਣੇ ਤਤੋ;

ਜਵਨਾਨਿ ਚ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ.

੯੭੧.

ਅਵਸਾਨੇ ਪਨੇਕਂ ਤੁ, ਤੇਸਂ ਜਵਨਚੇਤਸਂ;

ਰੂਪਾਵਚਰਿਕਂ ਹੋਤਿ, ਚਤੁਤ੍ਥਜ੍ਝਾਨਮਾਨਸਂ.

੯੭੨.

ਏਕਙ੍ਗਵਿਪ੍ਪਹੀਨਂ ¶ ਤੁ, ਦ੍ਵੀਹਿ ਅਙ੍ਗੇਹਿ ਯੋਗਤੋ;

ਚਤੁਤ੍ਥਂ ਪਨਿਦਂ ਝਾਨਂ, ਦੁਵਙ੍ਗਨ੍ਤਿ ਪਵੁਚ੍ਚਤਿ.

੯੭੩.

ਏਵਂ ਤਿਵਿਧਕਲ੍ਯਾਣਂ, ਦਸਲਕ੍ਖਣਸਂਯੁਤਂ;

ਚਤੁਤ੍ਥਾਧਿਗਤਂ ਹੋਤਿ, ਭਿਕ੍ਖੁਨਾ ਭਾਵਨਾਮਯਂ.

੯੭੪.

ਯਸ੍ਮਾ ਸੁਖਮੁਪੇਕ੍ਖਾਯ, ਨ ਹੋਤਾਸੇਵਨਂ ਪਨ;

ਉਪੇਕ੍ਖਾਸਹਗਤਾਨੇਵ, ਜਵਨਾਨਿ ਜਵਨ੍ਤਿ ਚ.

੯੭੫.

ਉਪੇਕ੍ਖਾਸਹਗਤਂ ¶ ਤਸ੍ਮਾ, ਚਤੁਤ੍ਥਂ ਸਮੁਦੀਰਿਤਂ;

ਅਯਮੇਤ੍ਥ ਵਿਸੇਸੋ ਹਿ, ਸੇਸਂ ਵੁਤ੍ਤਨਯਂ ਪਨ.

੯੭੬.

ਯਂ ਚਤੁਕ੍ਕਨਯੇ ਝਾਨਂ, ਦੁਤਿਯਂ ਤਂ ਦ੍ਵਿਧਾ ਪਨ;

ਕਤ੍ਵਾਨ ਪਞ੍ਚਕਨਯੇ, ਦੁਤਿਯਂ ਤਤਿਯਂ ਕਤਂ.

੯੭੭.

ਤਤਿਯਂ ਤਂ ਚਤੁਤ੍ਥਞ੍ਚ, ਚਤੁਤ੍ਥਂ ਪਞ੍ਚਮਂ ਇਧ;

ਪਠਮਂ ਪਠਮਂਯੇਵ, ਅਯਮੇਤ੍ਥ ਵਿਸੇਸਤਾ.

੯੭੮.

ਏਵਮੇਤ੍ਤਾਵਤਾ ਵੁਤ੍ਤਾ, ਨਾਤਿਸਙ੍ਖੇਪਤੋ ਮਯਾ;

ਨਾਤਿਵਿਤ੍ਥਾਰਤੋ ਚਾਯਂ, ਰੂਪਾਵਚਰਭਾਵਨਾ.

੯੭੯.

ਸੁਮਧੁਰਵਰਤਰਵਚਨੋ, ਕਂ ਨੁ ਜਨਂ ਨੇਵ ਰਞ੍ਜਯਤਿ;

ਅਤਿਨਿਸਿਤਵਿਸਦਬੁਦ੍ਧਿ-ਪਸਾਦਜਨ ਵੇਦਨੀਯੋਯਂ.

ਇਤਿ ਅਭਿਧਮ੍ਮਾਵਤਾਰੇ ਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ

ਨਾਮ ਚੁਦ੍ਦਸਮੋ ਪਰਿਚ੍ਛੇਦੋ.

੧੫. ਪਨ੍ਨਰਸਮੋ ਪਰਿਚ੍ਛੇਦੋ

ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ

੯੮੦.

ਰੂਪਾਰੂਪਮਤੀਤੇਨ ¶ ¶ , ਰੂਪਾਰੂਪਾਦਿਵੇਦਿਨਾ;

ਯਾਨਿ ਚਾਰੂਪਪੁਞ੍ਞਾਨਿ, ਸਰੂਪੇਨੀਰਿਤਾਨਿ ਤੁ.

੯੮੧.

ਤੇਸਂ ਦਾਨਿ ਪਵਕ੍ਖਾਮਿ, ਭਾਵਨਾਨਯਮੁਤ੍ਤਮਂ;

ਯੋਗਾਵਚਰਭਿਕ੍ਖੂਨਂ, ਹਿਤਤ੍ਥਾਯ ਸਮਾਸਤੋ.

੯੮੨.

‘‘ਰੂਪੇ ਖੋ ਵਿਜ੍ਜਮਾਨਸ੍ਮਿਂ, ਦਣ੍ਡਾਦਾਨਾਦਯੋ ਸਿਯੁਂ;

ਅਨੇਕਾਪਿ ਪਨਾਬਾਧਾ, ਚਕ੍ਖੁਰੋਗਾਦਯੋ’’ਇਤਿ.

੯੮੩.

ਰੂਪੇ ਆਦੀਨਵਂ ਦਿਸ੍ਵਾ, ਰੂਪੇ ਨਿਬ੍ਬਿਨ੍ਦਮਾਨਸੋ;

ਤਸ੍ਸਾਤਿਕ੍ਕਮਨਤ੍ਥਾਯ, ਅਰੂਪਂ ਪਟਿਪਜ੍ਜਤਿ.

੯੮੪.

ਤਮ੍ਹਾ ¶ ਕਸਿਣਰੂਪਾਪਿ, ਸੋ ਨਿਬ੍ਬਿਜ੍ਜ ਵਿਸਾਰਦੋ;

ਅਪਕ੍ਕਮਿਤੁਕਾਮੋ ਚ, ਸੂਕਰਾਭਿਹਤੋਵ ਸਾ.

੯੮੫.

ਚਤੁਤ੍ਥੇ ਪਨ ਝਾਨਸ੍ਮਿਂ, ਹੁਤ੍ਵਾ ਚਿਣ੍ਣਵਸੀ ਵਸੀ;

ਚਤੁਤ੍ਥਜ੍ਝਾਨਤੋ ਧੀਮਾ, ਵੁਟ੍ਠਾਯ ਵਿਧਿਨਾ ਪੁਨ.

੯੮੬.

ਕਰੋਤਿ ਪਨਿਦਂ ਚਿਤ੍ਤਂ, ਰੂਪਮਾਰਮ੍ਮਣਂ ਯਤੋ;

ਆਸਨ੍ਨਸੋਮਨਸ੍ਸਞ੍ਚ, ਥੂਲਸਨ੍ਤਵਿਮੋਕ੍ਖਤੋ.

੯੮੭.

ਇਤਿ ਆਦੀਨਵਂ ਦਿਸ੍ਵਾ, ਚਤੁਤ੍ਥੇ ਤਤ੍ਥ ਸਬ੍ਬਸੋ;

ਨਿਕਨ੍ਤਿਂ ਪਰਿਯਾਦਾਯ, ਪਠਮਾਰੁਪ੍ਪਞ੍ਚ ਸਨ੍ਤਤੋ.

੯੮੮.

ਚਕ੍ਕਵਾਲ਼ਪਰਿਯਨ੍ਤਂ, ਯਤ੍ਤਕਂ ਵਾ ਪਨਿਚ੍ਛਤਿ;

ਤਤ੍ਤਕਂ ਪਤ੍ਥਰਿਤ੍ਵਾਨ, ਫੁਟ੍ਠੋਕਾਸਞ੍ਚ ਤੇਨ ਤਂ.

੯੮੯.

ਆਕਾਸੋ ¶ ਇਤਿ ਵਾਨਨ੍ਤੋ,

ਆਕਾਸੋ ਇਤਿ ਵਾ ਪੁਨ;

ਮਨਸਾ ਹਿ ਕਰੋਨ੍ਤੋਵ,

ਉਗ੍ਘਾਟੇਤਿ ਪਵੁਚ੍ਚਤਿ.

੯੯੦.

ਉਗ੍ਘਾਟੇਨ੍ਤੋ ਹਿ ਕਸਿਣਂ, ਨ ਸਂਵੇਲ੍ਲੇਤਿ ਤਂ ਪਨ;

ਨ ਚੁਦ੍ਧਰਤਿ ਸੋ ਯੋਗੀ, ਪੂਵਂ ਵਿਯ ਕਪਾਲਤੋ.

੯੯੧.

ਕੇਵਲਂ ਪਨ ਤਂ ਨੇਵ, ਆਵਜ੍ਜਤਿ ਨ ਪੇਕ੍ਖਤਿ;

ਨਾਵਜ੍ਜਨ੍ਤੋ ਨਪੇਕ੍ਖਨ੍ਤੋ, ਉਗ੍ਘਾਟੇਤਿ ਹਿ ਨਾਮਸੋ.

੯੯੨.

ਕਸਿਣੁਗ੍ਘਾਟਿਮਾਕਾਸਂ ¶ , ਨਿਮਿਤ੍ਤਂ ਪਨ ਤਂਵ ਸੋ;

ਆਕਾਸੋ ਇਤਿ ਚਿਤ੍ਤੇਨ, ਆਵਜ੍ਜਤਿ ਪੁਨਪ੍ਪੁਨਂ.

੯੯੩.

ਆਵਜ੍ਜਤੋ ਹਿ ਤਸ੍ਸੇਵਂ,

ਕਰੋਤੋ ਤਕ੍ਕਾਹਤਮ੍ਪਿ ਚ;

ਪਞ੍ਚ ਨੀਵਰਣਾ ਤਸ੍ਸ,

ਵਿਕ੍ਖਮ੍ਭਨ੍ਤਿ ਹਿ ਸਬ੍ਬਸੋ.

੯੯੪.

ਆਸੇਵਤਿ ¶ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਕਰੋਤੋ ਪਨ ਤਸ੍ਸੇਵ, ਸਨ੍ਤਚਿਤ੍ਤਸ੍ਸ ਯੋਗਿਨੋ.

੯੯੫.

ਤਤ੍ਰਾਕਾਸੇ ਪਨਾਪ੍ਪੇਤਿ, ਪਠਮਾਰੁਪ੍ਪਮਾਨਸਂ;

ਇਧਾਪਿ ਪੁਰਿਮੇ ਭਾਗੇ, ਤੀਣਿ ਚਤ੍ਤਾਰਿ ਵਾ ਪਨ.

੯੯੬.

ਜਵਨਾਨਿ ਉਪੇਕ੍ਖਾਯ, ਸਮ੍ਪਯੁਤ੍ਤਾਨਿ ਹੋਨ੍ਤਿ ਹਿ;

ਚਤੁਤ੍ਥਂ ਪਞ੍ਚਮਂ ਵਾਪਿ, ਹੋਤਿ ਆਰੁਪ੍ਪਮਾਨਸਂ.

੯੯੭.

ਪੁਨ ਭਾਵੇਤੁਕਾਮੇਨ, ਦੁਤਿਯਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਪਠਮਾਰੁਪ੍ਪਮਾਨਸੇ.

੯੯੮.

ਆਸਨ੍ਨਰੂਪਾਵਚਰ-ਜ੍ਝਾਨਪਚ੍ਚਤ੍ਥਿਕਨ੍ਤਿ ਚ;

ਦੁਤਿਯਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੯੯੯.

ਏਵਮਾਦੀਨਵਂ ¶ ਦਿਸ੍ਵਾ, ਪਠਮਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਦੁਤਿਯਂ ਸਨ੍ਤਤੋ ਪਨ.

੧੦੦੦.

ਤਮਾਕਾਸਂ ਫਰਿਤ੍ਵਾਨ, ਪਵਤ੍ਤਮਾਨਸਂ ਪਨ;

ਤਞ੍ਚ ਵਿਞ੍ਞਾਣਮਿਚ੍ਚੇਵਂ, ਕਤ੍ਤਬ੍ਬਂ ਮਨਸਾ ਬਹੁਂ.

੧੦੦੧.

ਆਵਜ੍ਜਨਞ੍ਚ ਕਤ੍ਤਬ੍ਬਂ, ਤਥਾ ਤਕ੍ਕਾਹਤਮ੍ਪਿ ਚ;

‘‘ਅਨਨ੍ਤ’’ਨ੍ਤਿ ‘‘ਅਨਨ੍ਤ’’ਨ੍ਤਿ, ਕਾਤਬ੍ਬਂ ਮਨਸਾ ਨਿਧ.

੧੦੦੨.

ਤਸ੍ਮਿਂ ਪਨ ਨਿਮਿਤ੍ਤਸ੍ਮਿਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਉਪਚਾਰੇਨ ਤਂ ਚਿਤ੍ਤਂ, ਸਮਾਧਿਯਤਿ ਯੋਗਿਨੋ.

੧੦੦੩.

ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੦੪.

ਆਕਾਸਂ ਫੁਸਵਿਞ੍ਞਾਣੇ, ਦੁਤਿਯਾਰੁਪ੍ਪਮਾਨਸਂ;

ਅਪ੍ਪੇਤਿ ਅਪ੍ਪਨਾ ਯਸ੍ਮਿਂ, ਨਯੋ ਵੁਤ੍ਤਨਯੋਵ ਸੋ.

੧੦੦੫.

ਆਕਾਸੋਯਮਨਨ੍ਤੋਤਿ, ਏਵਮਾਕਾਸਮੇਵ ਤਂ;

ਫਰਿਤ੍ਵਾ ਪਵਤ੍ਤਵਿਞ੍ਞਾਣਂ, ‘‘ਵਿਞ੍ਞਾਣਞ੍ਚ’’ਨ੍ਤਿ ਵੁਚ੍ਚਤਿ.

੧੦੦੬.

ਮਨਕ੍ਕਾਰਵਸੇਨਾਪਿ, ਅਨਨ੍ਤਂ ਪਰਿਦੀਪਿਤਂ;

‘‘ਵਿਞ੍ਞਾਣਾਨਨ੍ਤ’’ਮਿਚ੍ਚੇਵ, ਵਤ੍ਤਬ੍ਬਂ ਪਨਿਦਂ ਸਿਯਾ.

੧੦੦੭.

ਅਥ ¶ ਭਾਵੇਤੁਕਾਮੇਨ, ਤਤਿਯਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਦੁਤਿਯਾਰੁਪ੍ਪਮਾਨਸੇ.

੧੦੦੮.

ਆਸਨ੍ਨਪਠਮਾਰੁਪ੍ਪ-ਚਿਤ੍ਤਪਚ੍ਚਤ੍ਥਿਕਨ੍ਤਿ ਚ;

ਤਤਿਯਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੧੦੦੯.

ਏਵਮਾਦੀਨਵਂ ਦਿਸ੍ਵਾ, ਦੁਤਿਯਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਤਤਿਯਂ ਸਨ੍ਤਤੋ ਪਨ.

੧੦੧੦.

ਏਵਂ ਮਨਸਿ ਕਤ੍ਵਾਨ, ਕਾਤਬ੍ਬੋ ਮਨਸਾ ਪੁਨ;

ਪਠਮਾਰੁਪ੍ਪਵਿਞ੍ਞਾਣਾ-ਭਾਵੋ ਤਸ੍ਸੇਵ ਸੁਞ੍ਞਤੋ.

੧੦੧੧.

ਤਂ ¶ ¶ ਪਨਾਕਾਸਵਿਞ੍ਞਾਣਂ, ਅਕਤ੍ਵਾ ਮਨਸਾ ਪੁਨ;

‘‘ਨਤ੍ਥਿ ਨਤ੍ਥੀ’’ਤਿ ਵਾਤੇਨ, ‘‘ਸੁਞ੍ਞਂ ਸੁਞ੍ਞ’’ਨ੍ਤਿ ਵਾ ਤਤੋ.

੧੦੧੨.

ਆਵਜ੍ਜਿਤਬ੍ਬਮੇਵਞ੍ਹਿ, ਕਤ੍ਤਬ੍ਬਂ ਮਨਸਾਪਿ ਚ;

ਤਕ੍ਕਾਹਤਞ੍ਚ ਕਾਤਬ੍ਬਂ, ਪੁਨਪ੍ਪੁਨਂਵ ਧੀਮਤਾ.

੧੦੧੩.

ਤਸ੍ਮਿਂ ਨਿਮਿਤ੍ਤੇ ਤਸ੍ਸੇਵਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਸਤਿ ਤਿਟ੍ਠਤਿ ਭਿਯ੍ਯੋਪਿ, ਸਮਾਧਿਯਤਿ ਮਾਨਸਂ.

੧੦੧੪.

ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੧੫.

ਕਸਿਣੁਗ੍ਘਾਟਿਮਾਕਾਸਂ, ਫਰਿਤ੍ਵਾਨ ਸਮਨ੍ਤਤੋ;

ਵਿਞ੍ਞਾਣਸ੍ਸ ਪਵਤ੍ਤਸ੍ਸ, ਨਤ੍ਥਿਭਾਵੇ ਅਭਾਵਕੇ.

੧੦੧੬.

ਤਤਿਯਾਰੁਪ੍ਪਵਿਞ੍ਞਾਣਂ,

ਤਂ ਪਨਾਪ੍ਪੇਤਿ ਯੋਗਿਨੋ;

ਅਪ੍ਪਨਾਯ ਨਯੋਪੇਤ੍ਥ,

ਹੋਤਿ ਵੁਤ੍ਤਨਯੋਵ ਸੋ.

੧੦੧੭.

ਆਕਾਸਗਤਵਿਞ੍ਞਾਣਂ, ਦੁਤਿਯਾਰੁਪ੍ਪਚਕ੍ਖੁਨਾ;

ਪਸ੍ਸਨ੍ਤੋ ਵਿਹਰਿਤ੍ਵਾਨ, ‘‘ਨਤ੍ਥਿ ਨਤ੍ਥੀ’’ਤਿਆਦਿਨਾ.

੧੦੧੮.

ਪਰਿਕਮ੍ਮਮਨਕ੍ਕਾਰੇ ¶ , ਤਸ੍ਮਿਂ ਅਨ੍ਤਰਹਿਤੇ ਪਨ;

ਤਸ੍ਸਾਪਗਮਮਤ੍ਤਂਵ, ਪਸ੍ਸਨ੍ਤੋ ਵਸਤੀ ਚ ਸੋ.

੧੦੧੯.

ਸਨ੍ਨਿਪਾਤਂ ਯਥਾ ਕੋਚਿ, ਦਿਸ੍ਵਾ ਸਙ੍ਘਸ੍ਸ ਕਤ੍ਥਚਿ;

ਗਤੇ ਸਙ੍ਘੇ ਤੁ ਤਂ ਠਾਨਂ, ਸੁਞ੍ਞਮੇਵਾਨੁਪਸ੍ਸਤਿ.

੧੦੨੦.

ਪੁਨ ਭਾਵੇਤੁਕਾਮੇਨ, ਚਤੁਤ੍ਥਾਰੁਪ੍ਪਮਾਨਸਂ;

ਸੁਚਿਣ੍ਣਵਸਿਨਾ ਹੁਤ੍ਵਾ, ਤਤਿਯਾਰੁਪ੍ਪਮਾਨਸੇ.

੧੦੨੧.

ਆਸਨ੍ਨਦੁਤਿਯਾਰੁਪ੍ਪ-ਚਿਤ੍ਤਪਚ੍ਚਤ੍ਥਿਕਨ੍ਤਿ ਚ;

ਚਤੁਤ੍ਥਾਰੁਪ੍ਪਚਿਤ੍ਤਂਵ, ਨ ਚ ਸਨ੍ਤਮਿਦਨ੍ਤਿ ਚ.

੧੦੨੨.

ਏਵਮਾਦੀਨਵਂ ¶ ਦਿਸ੍ਵਾ, ਤਤਿਯਾਰੁਪ੍ਪਮਾਨਸੇ;

ਨਿਕਨ੍ਤਿਂ ਪਰਿਯਾਦਾਯ, ਚਤੁਤ੍ਥਂ ਸਨ੍ਤਤੋ ਪਨ.

੧੦੨੩.

ਏਵਂ ਮਨਸਿ ਕਤ੍ਵਾਨ, ਪੁਨ ਤਤ੍ਥੇਵ ਧੀਮਤਾ;

ਅਭਾਵਾਰਮ੍ਮਣਂ ਕਤ੍ਵਾ, ਸਮ੍ਪਵਤ੍ਤਮਿਦਂ ਮਨੋ.

੧੦੨੪.

‘‘ਸਨ੍ਤਂ ਸਨ੍ਤਮਿਦਂ ਚਿਤ੍ਤ’’-ਮਿਚ੍ਚੇਵਂ ਤਂ ਪੁਨਪ੍ਪੁਨਂ;

ਹੋਤਿ ਆਵਜ੍ਜਿਤਬ੍ਬਞ੍ਚ, ਕਾਤਬ੍ਬਂ ਮਨਸਾਪਿ ਚ.

੧੦੨੫.

ਤਸ੍ਮਿਂ ਨਿਮਿਤ੍ਤੇ ਤਸ੍ਸੇਵਂ, ਵਿਚਾਰੇਨ੍ਤਸ੍ਸ ਮਾਨਸਂ;

ਸਤਿ ਤਿਟ੍ਠਤਿ ਭਿਯ੍ਯੋਪਿ, ਸਮਾਧਿਯਤਿ ਮਾਨਸਂ.

੧੦੨੬.

ਆਸੇਵਤਿ ਚ ਭਾਵੇਤਿ, ਤਂ ਨਿਮਿਤ੍ਤਂ ਪੁਨਪ੍ਪੁਨਂ;

ਤਸ੍ਸ ਚੇਵਂ ਕਰੋਨ੍ਤਸ੍ਸ, ਸਤਿਸਮ੍ਪਨ੍ਨਚੇਤਸੋ.

੧੦੨੭.

ਤਤਿਯਾਰੁਪ੍ਪਸਙ੍ਖਾਤ-ਖਨ੍ਧੇਸੁ ਚ ਚਤੂਸੁਪਿ;

ਚਤੁਤ੍ਥਾਰੁਪ੍ਪਵਿਞ੍ਞਾਣਂ, ਤਂ ਪਨਾਪ੍ਪੇਤਿ ਯੋਗਿਨੋ.

੧੦੨੮.

ਅਪ੍ਪਨਾਯ ¶ ਨਯੋਪੇਤ੍ਥ, ਹੇਟ੍ਠਾ ਵੁਤ੍ਤਨਯੂਪਮੋ;

ਅਪਿਚੇਤ੍ਥ ਵਿਸੇਸੋਯਂ, ਵੇਦਿਤਬ੍ਬੋ ਵਿਭਾਵਿਨਾ.

੧੦੨੯.

‘‘ਅਹੋ ਸਨ੍ਤਾ ਵਤਾਯ’’ਨ੍ਤਿ, ਸਮਾਪਤ੍ਤਿ ਪਦਿਸ੍ਸਤਿ;

ਯਾ ਪਨਾਭਾਵਮਤ੍ਤਮ੍ਪਿ, ਕਤ੍ਵਾ ਠਸ੍ਸਤਿ ਗੋਚਰਂ.

੧੦੩੦.

ਸਨ੍ਤਾਰਮ੍ਮਣਤਾਯੇਵ, ‘‘ਸਨ੍ਤਾਯ’’ਨ੍ਤਿ ਵਿਪਸ੍ਸਤਿ;

ਸਨ੍ਤਤੋ ਚੇ ਮਨਕ੍ਕਾਰੋ, ਕਥਞ੍ਚ ਸਮਤਿਕ੍ਕਮੋ.

੧੦੩੧.

ਅਨਾਪਜ੍ਜਿਤੁਕਾਮਤ੍ਤਾ ¶ , ਹੋਤੇਵ ਸਮਤਿਕ੍ਕਮੋ;

‘‘ਸਮਾਪਜ੍ਜਾਮਹਮੇਤ’’-ਮਿਚ੍ਚਾਭੋਗੋ ਨ ਵਿਜ੍ਜਤਿ.

੧੦੩੨.

ਸਨ੍ਤਤੋ ਤਂ ਕਰੋਨ੍ਤੋ ਹਿ, ਮਨਸਾ ਸੁਖੁਮਂ ਪਰਂ;

ਅਸਞ੍ਞਂ ਪਨ ਦੁਬ੍ਬਲ੍ਯਂ, ਪਾਪੁਣਾਤਿ ਮਹਗ੍ਗਤਂ.

੧੦੩੩.

ਨੇਵਸਞ੍ਞੀ ਚ ਨਾਸਞ੍ਞੀ,

ਯਾਯ ਸਞ੍ਞਾਯ ਹੋਤਿ ਸੋ;

ਨ ¶ ਕੇਵਲਂ ਤੁ ਸਞ੍ਞਾਵ,

ਏਦਿਸੀ ਅਥ ਖੋ ਪਨ.

੧੦੩੪.

ਏਵਮੇਵ ਭਵਨ੍ਤੇਤ੍ਥ, ਸੁਖੁਮਾ ਵੇਦਨਾਦਯੋ;

ਪਤ੍ਤਮਕ੍ਖਨਤੇਲੇਨ, ਮਗ੍ਗਸ੍ਮਿਂ ਉਦਕੇਨ ਚ.

੧੦੩੫.

ਸਾਵੇਤਬ੍ਬੋ ਅਯਂ ਅਤ੍ਥੋ, ਚਤੁਤ੍ਥਾਰੁਪ੍ਪਬੋਧਨੇ;

ਪਟੁਸਞ੍ਞਾਯ ਕਿਚ੍ਚਸ੍ਸ, ਨੇਵਕ੍ਕਰਣਤੋ ਅਯਂ.

੧੦੩੬.

‘‘ਨੇਵਸਞ੍ਞਾ’’ਤਿ ਨਿਦ੍ਦਿਟ੍ਠਾ, ਚਤੁਤ੍ਥਾਰੁਪ੍ਪਸਮ੍ਭਵਾ;

ਪਟੁਸਞ੍ਞਾਯ ਕਿਚ੍ਚਂ ਸਾ, ਕਾਤੁਂ ਸਕ੍ਕੋਤਿ ਨੇਵ ਚ.

੧੦੩੭.

ਯਥਾ ਦਹਨਕਿਚ੍ਚਂ ਤੁ, ਤੇਜੋਧਾਤੁ ਸੁਖੋਦਕੇ;

ਸਾ ਸਙ੍ਖਾਰਾਵਸੇਸਤ੍ਤਾ, ਸੁਖੁਮਤ੍ਤੇਨ ਵਿਜ੍ਜਤਿ;

ਤਸ੍ਮਾ ਪਨ ਚ ਸਾ ਸਞ੍ਞਾ, ‘‘ਨਾਸਞ੍ਞਾ’’ਤਿ ਪਵੁਚ੍ਚਤਿ.

੧੦੩੮.

ਏਤਾ ਹਿ ਰੂਪਮਾਕਾਸਂ,

ਵਿਞ੍ਞਾਣਂ ਤਦਭਾਵਕਂ;

ਅਤਿਕ੍ਕਮਿਤ੍ਵਾ ਕਮਤੋ,

ਚਤਸ੍ਸੋ ਹੋਨ੍ਤਿ ਆਹ ਚ.

੧੦੩੯.

‘‘ਆਰਮ੍ਮਣਾਤਿਕ੍ਕਮਤੋ, ਚਤਸ੍ਸੋਪਿ ਭਵਨ੍ਤਿਮਾ;

ਅਙ੍ਗਾਤਿਕ੍ਕਮਮੇਤਾਸਂ, ਨ ਇਚ੍ਛਨ੍ਤਿ ਵਿਭਾਵਿਨੋ.

੧੦੪੦.

ਸੁਪਣੀਤਤਰਾ ¶ ਹੋਨ੍ਤਿ,

ਪਚ੍ਛਿਮਾ ਪਚ੍ਛਿਮਾ ਇਧ;

ਉਪਮਾ ਤਤ੍ਥ ਵਿਞ੍ਞੇਯ੍ਯਾ,

ਪਾਸਾਦਤਲਸਾਟਿਕਾ’’ਤਿ.

੧੦੪੧.

ਸਙ੍ਖੇਪੇਨ ਮਯਾਰੁਪ੍ਪ-ਸਮਾਪਤ੍ਤਿਨਯੋ ਅਯਂ;

ਦਸ੍ਸਿਤੋ ਦਸ੍ਸਿਤੋ ਸੁਦ੍ਧ-ਦਸ੍ਸਿਨਾ ਪਿਯਦਸ੍ਸਿਨਾ.

੧੦੪੨.

ਰੂਪਾਰੂਪਜ੍ਝਾਨਸਮਾਪਤ੍ਤਿਵਿਧਾਨਂ ¶ ,

ਜਾਨਾਤਿਮਂ ਸਾਰਤਰਂ ਯੋ ਪਨ ਭਿਕ੍ਖੁ;

ਰੂਪਾਰੂਪਜ੍ਝਾਨਸਮਾਪਤ੍ਤੀਸੁ ਦਕ੍ਖੋ,

ਰੂਪਾਰੂਪਂ ਯਾਤਿ ਭਵਂ ਸੋ ਅਭਿਭੁਯ੍ਯ.

ਇਤਿ ਅਭਿਧਮ੍ਮਾਵਤਾਰੇ ਅਰੂਪਾਵਚਰਸਮਾਧਿਭਾਵਨਾਨਿਦ੍ਦੇਸੋ ਨਾਮ

ਪਨ੍ਨਰਸਮੋ ਪਰਿਚ੍ਛੇਦੋ.

੧੬. ਸੋਲ਼ਸਮੋ ਪਰਿਚ੍ਛੇਦੋ

ਅਭਿਞ੍ਞਾਨਿਦ੍ਦੇਸੋ

੧੦੪੩.

ਇਤੋ ¶ ਪਰਂ ਕਰਿਸ੍ਸਾਮਿ, ਪਞ੍ਞਾਸੁਦ੍ਧਿਕਰਂ ਪਰਂ;

ਪਞ੍ਚਨ੍ਨਮ੍ਪਿ ਅਭਿਞ੍ਞਾਨਂ, ਮੁਖਮਤ੍ਤਨਿਦਸ੍ਸਨਂ.

੧੦੪੪.

ਰੂਪਾਰੂਪਸਮਾਪਤ੍ਤੀ,

ਨਿਬ੍ਬਤ੍ਤੇਤ੍ਵਾ ਪਨਟ੍ਠਪਿ;

ਲੋਕਿਕਾਪਿ ਅਭਿਞ੍ਞਾਯੋ,

ਭਾਵੇਤਬ੍ਬਾ ਵਿਭਾਵਿਨਾ.

੧੦੪੫.

ਚਤੁਤ੍ਥਜ੍ਝਾਨਮਤ੍ਤੇਪਿ, ਸੁਚਿਣ੍ਣਵਸਿਨਾ ਸਤਾ;

ਅਨੁਯੋਗਮਭਿਞ੍ਞਾਸੁ, ਕਾਤੁਂ ਵਤ੍ਤਤਿ ਯੋਗਿਨੋ.

੧੦੪੬.

ਅਭਿਞ੍ਞਾ ¶ ਨਾਮ ਭਿਕ੍ਖੂਨਂ, ਸਾਭਿਞ੍ਞਾਨਂ ਅਨੁਤ੍ਤਰੋ;

ਅਲਙ੍ਕਾਰੋ ਹਿ ਤਾਣਨ੍ਤਿ, ਸਤ੍ਥਨ੍ਤਿ ਚ ਪਵੁਚ੍ਚਤਿ.

੧੦੪੭.

ਨਿਬ੍ਬਤ੍ਤਿਤਾਸ੍ਵਭਿਞ੍ਞਾਸੁ, ਯੋਗਾਵਚਰਭਿਕ੍ਖੁਨਾ;

ਸਮਾਧਿਭਾਵਨਾ ਹਿਸ੍ਸ, ਤਦਾ ਨਿਟ੍ਠਙ੍ਗਤਾ ਸਿਯਾ.

੧੦੪੮.

ਦਿਬ੍ਬਾਨਿ ¶ ਚਕ੍ਖੁਸੋਤਾਨਿ, ਇਦ੍ਧਿਚਿਤ੍ਤਵਿਜਾਨਨਂ;

ਪੁਬ੍ਬੇਨਿਵਾਸਞਾਣਨ੍ਤਿ, ਪਞ੍ਚਾਭਿਞ੍ਞਾ ਇਮਾ ਸਿਯੁਂ.

੧੦੪੯.

ਕਸਿਣਾਨੁਲੋਮਤਾਦੀਹਿ, ਚਤੁਦ੍ਦਸਨਯੇਹਿ ਚ;

ਦਮੇਤਬ੍ਬਮਭਿਞ੍ਞਾਯੋ, ਪਤ੍ਤੁਕਾਮੇਨ ਮਾਨਸਂ.

੧੦੫੦.

ਦਨ੍ਤੇ ਸਮਾਹਿਤੇ ਸੁਦ੍ਧੇ, ਪਰਿਯੋਦਾਤੇ ਅਨਙ੍ਗਣੇ;

ਨੁਪਕ੍ਲੇਸੇ ਮੁਦੁਭੂਤੇ, ਕਮ੍ਮਨੀਯੇ ਠਿਤਾਚਲੇ.

੧੦੫੧.

ਇਤਿ ਅਟ੍ਠਙ੍ਗਸਮ੍ਪਨ੍ਨੇ, ਚਿਤ੍ਤੇ ਇਦ੍ਧਿਵਿਧਾਯ ਚ;

ਅਭਿਨੀਹਰਤਿ ਚੇ ਚਿਤ੍ਤਂ, ਸਿਜ੍ਝਤਿਦ੍ਧਿਵਿਕੁਬ੍ਬਨਂ.

੧੦੫੨.

ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪਨ;

ਵੁਟ੍ਠਾਯ ਹਿ ਸਤਂ ਵਾਪਿ, ਸਹਸ੍ਸਂ ਵਾ ਯਦਿਚ੍ਛਤਿ.

੧੦੫੩.

‘‘ਸਤਂ ਹੋਮਿ ਸਤਂ ਹੋਮੀ’’-ਚ੍ਚੇਵਂ ਕਤ੍ਵਾਨ ਮਾਨਸਂ;

ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪਨ.

੧੦੫੪.

ਵੁਟ੍ਠਾਯ ਪੁਨਧਿਟ੍ਠਾਤਿ,

ਸਹਾਧਿਟ੍ਠਾਨਚੇਤਸਾ;

ਸਤਂ ਹੋਤਿ ਹਿ ਸੋ ਯੋਗੀ,

ਸਹਸ੍ਸਾਦੀਸ੍ਵਯਂ ਨਯੋ.

੧੦੫੫.

ਪਾਦਕਜ੍ਝਾਨਚਿਤ੍ਤਂ ਤੁ, ਨਿਮਿਤ੍ਤਾਰਮ੍ਮਣਂ ਸਿਯਾ;

ਪਰਿਕਮ੍ਮਮਨਾਨੇਤ੍ਥ, ਸਤਾਰਮ੍ਮਣਿਕਾਨਿ ਤੁ.

੧੦੫੬.

ਤਦਾਧਿਟ੍ਠਾਨਚਿਤ੍ਤਮ੍ਪਿ ¶ , ਸਤਾਰਮ੍ਮਣਮੇਵ ਤਂ;

ਪੁਬ੍ਬੇ ਵੁਤ੍ਤਪ੍ਪਨਾਚਿਤ੍ਤਂ, ਵਿਯ ਗੋਤ੍ਰਭੁਨਨ੍ਤਰਂ.

੧੦੫੭.

ਤਮੇਕਂ ¶ ਜਾਯਤੇ ਤਤ੍ਥ, ਚਤੁਤ੍ਥਜ੍ਝਾਨਿਕਂ ਮਨੋ;

ਪਰਿਕਮ੍ਮਵਿਸੇਸੋਵ, ਸੇਸਂ ਪੁਬ੍ਬਸਮਂ ਇਧ.

ਇਦ੍ਧਿਵਿਧਞਾਣਂ.

੧੦੫੮.

ਦਿਬ੍ਬਸੋਤਮਿਦਂ ¶ ਤਤ੍ਥ, ਭਾਵੇਤਬ੍ਬਂ ਕਥਂ ਸਿਯਾ;

ਅਭਿਞ੍ਞਾਪਾਦਕਜ੍ਝਾਨਂ, ਸਮਾਪਜ੍ਜ ਤਤੋ ਪੁਨ.

੧੦੫੯.

ਵੁਟ੍ਠਾਯ ਪਰਿਕਮ੍ਮੇਨ, ਕਾਮਾਵਚਰਚੇਤਸਾ;

ਸਦ੍ਦੋ ਆਵਜ੍ਜਿਤਬ੍ਬੋਵ, ਮਹਨ੍ਤੋ ਸੁਖੁਮੋਪਿ ਚ.

੧੦੬੦.

ਤਸ੍ਸੇਵਂ ਪਨ ਸਦ੍ਦਸ੍ਸ, ਨਿਮਿਤ੍ਤਂ ਮਨਸਿ ਕੁਬ੍ਬਤੋ;

ਦਿਬ੍ਬਸੋਤਮਿਦਾਨਿਸ੍ਸ, ਉਪ੍ਪਜ੍ਜਿਸ੍ਸਤਿ ਤਂ ਇਤਿ.

੧੦੬੧.

ਸਦ੍ਦੇਸ੍ਵਞ੍ਞਤਰਂ ਸਦ੍ਦਂ, ਕਤ੍ਵਾ ਆਰਮ੍ਮਣਂ ਤਤੋ;

ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇ ਤੁ, ਮਨੋਦ੍ਵਾਰਾਵਜ੍ਜਨੇ ਪੁਨ.

੧੦੬੨.

ਜਵਨਾਨਿ ਹਿ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ;

ਪੁਰਿਮਾਨੇਤ੍ਥ ਚਿਤ੍ਤੇਸੁ, ਤੀਣਿ ਚਤ੍ਤਾਰਿ ਵਾ ਪਨ.

੧੦੬੩.

ਪਰਿਕਮ੍ਮੋਪਚਾਰਾਨੁ-ਲੋਮਗੋਤ੍ਰਭੁਨਾਮਕਾ;

ਚਤੁਤ੍ਥਂ ਪਞ੍ਚਮਂ ਵਾਪਿ, ਅਪ੍ਪਨਾਚਿਤ੍ਤਮੀਰਿਤਂ.

੧੦੬੪.

ਸਹਜਾਤਂ ਤੁ ਯਂ ਞਾਣਂ, ਅਪ੍ਪਨਾਮਾਨਸੇਨ ਹਿ;

ਤਂ ਞਾਣਂ ਦਿਬ੍ਬਸੋਤਨ੍ਤਿ, ਵਦਨ੍ਤਿ ਸੁਤਕੋਵਿਦਾ.

੧੦੬੫.

ਥਾਮਜਾਤਂ ਕਰੋਨ੍ਤੇਨ, ਤਂ ਞਾਣਂ ਤੇਨ ਯੋਗਿਨਾ;

‘‘ਏਤ੍ਥਨ੍ਤਰਗਤਂ ਸਦ੍ਦਂ, ਸੁਣਾਮੀ’’ਤਿ ਚ ਚੇਤਸਾ.

੧੦੬੬.

ਅਙ੍ਗੁਲਂ ਦ੍ਵਙ੍ਗੁਲਂ ਭਿਯ੍ਯੋ,

ਵਿਦਤ੍ਥਿ ਰਤਨਂ ਤਥਾ;

ਗਾਮੋ ਦੇਸੋ ਤਤੋ ਯਾਵ,

ਚਕ੍ਕਵਾਲ਼ਾ ਤਤੋ ਪਰਂ.

੧੦੬੭.

ਇਚ੍ਚੇਵਂ ਤੁ ਪਰਿਚ੍ਛਿਜ੍ਜ, ਵਡ੍ਢੇਤਬ੍ਬਂ ਯਥਾਕ੍ਕਮਂ;

ਏਸੋ ਅਧਿਗਤਾਭਿਞ੍ਞੋ, ਪਾਦਕਾਰਮ੍ਮਣੇਨ ਤੁ.

੧੦੬੮.

ਫੁਟ੍ਠੋਕਾਸਗਤੇ ¶ ਸਦ੍ਦੇ, ਸਬ੍ਬੇ ਪਨ ਸੁਣਾਤਿ ਸੋ;

ਸੁਣਨ੍ਤੋ ਪਾਟਿਯੇਕ੍ਕਮ੍ਪਿ, ਸਲ੍ਲਕ੍ਖੇਤੁਂ ਪਹੋਤਿ ਸੋ.

ਦਿਬ੍ਬਸੋਤਞਾਣਂ.

੧੦੬੯.

ਕਥਂ ¶ ਪਨੁਪ੍ਪਾਦੇਤਬ੍ਬਂ, ਚੇਤੋਪਰਿਯਮਾਨਸਂ;

ਦਿਬ੍ਬਚਕ੍ਖੁਵਸੇਨੇਵ, ਇਦਂ ਞਾਣਂ ਪਨਿਜ੍ਝਤਿ.

੧੦੭੦.

ਆਲੋਕਂ ਪਨ ਵਡ੍ਢੇਤ੍ਵਾ, ਤਸ੍ਮਾ ਦਿਬ੍ਬੇਨ ਚਕ੍ਖੁਨਾ;

ਹਦਯਂ ਪਨ ਨਿਸ੍ਸਾਯ, ਵਤ੍ਤਮਾਨਂ ਤੁ ਲੋਹਿਤਂ.

੧੦੭੧.

ਦਿਸ੍ਵਾ ਪਰਸ੍ਸ ਵਿਞ੍ਞੇਯ੍ਯਂ,

ਹੋਤਿ ਚਿਤ੍ਤਂ ਤੁ ਭਿਕ੍ਖੁਨਾ;

ਸੋਮਨਸ੍ਸਯੁਤੇ ਚਿਤ੍ਤੇ,

ਲੋਹਿਤਂ ਲੋਹਿਤਂ ਸਿਯਾ.

੧੦੭੨.

ਦੋਮਨਸ੍ਸਯੁਤੇ ਚਿਤ੍ਤੇ, ਵਤ੍ਤਮਾਨੇ ਤੁ ਕਾਲ਼ਕਂ;

ਉਪੇਕ੍ਖਾਸਹਿਤੇ ਚਿਤ੍ਤੇ, ਤਿਲਤੇਲੂਪਮਂ ਸਿਯਾ.

੧੦੭੩.

ਤਸ੍ਮਾ ¶ ਪਰਸ੍ਸ ਸਤ੍ਤਸ੍ਸ, ਦਿਸ੍ਵਾ ਹਦਯਲੋਹਿਤਂ;

ਚੇਤੋਪਰਿਯਞਾਣਂ ਤਂ, ਕਾਤਬ੍ਬਂ ਥਾਮਤਂ ਗਤਂ.

੧੦੭੪.

ਏਵਂ ਥਾਮਗਤੇ ਤਸ੍ਮਿਂ, ਯਥਾਨੁਕ੍ਕਮਤੋ ਪਨ;

ਚਿਤ੍ਤਮੇਵ ਵਿਜਾਨਾਤਿ, ਵਿਨਾ ਲੋਹਿਤਦਸ੍ਸਨਂ.

੧੦੭੫.

ਕਾਮਾਵਚਰਚਿਤ੍ਤਞ੍ਚ, ਰੂਪਾਰੂਪੇਸੁ ਮਾਨਸਂ;

ਸਬ੍ਬਮੇਵ ਵਿਜਾਨਾਤਿ, ਸਰਾਗਾਦਿਪ੍ਪਭੇਦਕਂ.

ਚੇਤੋਪਰਿਯਞਾਣਂ.

੧੦੭੬.

ਪੁਬ੍ਬੇਨਿਵਾਸਞਾਣੇਨ, ਕਤ੍ਤਬ੍ਬਾ ਤਦਨੁਸ੍ਸਤਿ;

ਤਂ ਸਮ੍ਪਾਦੇਤੁਕਾਮੇਨ, ਆਦਿਕਮ੍ਮਿਕਭਿਕ੍ਖੁਨਾ;

ਝਾਨਾਨਿ ਪਨ ਚਤ੍ਤਾਰਿ, ਸਮਾਪਜ੍ਜਾਨੁਪੁਬ੍ਬਤੋ.

੧੦੭੭.

ਅਭਿਞ੍ਞਾਪਾਦਕਜ੍ਝਾਨਾ, ਵੁਟ੍ਠਾਯ ਹਿ ਤਤੋ ਪੁਨ;

ਭਿਕ੍ਖੁਨਾ ਵਜ੍ਜਿਤਬ੍ਬਾਵ, ਨਿਸਜ੍ਜਾ ਸਬ੍ਬਪਚ੍ਛਿਮਾ.

੧੦੭੮.

ਤਤੋ ¶ ¶ ਪਭੁਤਿ ਸਬ੍ਬਮ੍ਪਿ, ਪਟਿਲੋਮਕ੍ਕਮਾ ਪਨ;

ਸਬ੍ਬਮਾਵਜ੍ਜਿਤਬ੍ਬਂ ਤਂ, ਦਿਵਸੇ ਰਤ੍ਤਿਯਂ ਕਤਂ.

੧੦੭੯.

ਪਟਿਲੋਮਕ੍ਕਮੇਨੇਵ, ਦੁਤਿਯੇ ਤਤਿਯੇਪਿ ਚ;

ਦਿਵਸੇ ਪਕ੍ਖਮਾਸੇਸੁ, ਤਥਾ ਸਂਵਚ੍ਛਰੇਸੁਪਿ.

੧੦੮੦.

ਯਾਵ ਅਸ੍ਮਿਂ ਭਵੇ ਸਨ੍ਧਿ, ਤਾਵ ਤੇਨ ਚ ਭਿਕ੍ਖੁਨਾ;

ਕਤਮਾਵਜ੍ਜਿਤਬ੍ਬਂ ਤਂ, ਪੁਰਿਮਸ੍ਮਿਂ ਭਵੇਪਿ ਚ.

੧੦੮੧.

ਚੁਤਿਕ੍ਖਣੇਪਿ ਨਿਬ੍ਬਤ੍ਤਂ, ਨਾਮਰੂਪਞ੍ਚ ਸਾਧੁਕਂ;

ਏਵਮਾਵਜ੍ਜਿਤੇ ਤਸ੍ਮਿਂ, ਨਾਮਰੂਪੇ ਯਦਾ ਪਨ.

੧੦੮੨.

ਤਦੇਵਾਰਮ੍ਮਣਂ ਕਤ੍ਵਾ, ਨਾਮਰੂਪਂ ਚੁਤਿਕ੍ਖਣੇ;

ਮਨੋਦ੍ਵਾਰੇ ਮਨਕ੍ਕਾਰੋ, ਉਪ੍ਪਜ੍ਜਤਿ ਤਦਾ ਪਨ.

੧੦੮੩.

ਆਵਜ੍ਜਨੇ ਨਿਰੁਦ੍ਧਸ੍ਮਿਂ, ਤਦੇਵਾਰਮ੍ਮਣਂ ਪਨ;

ਕਤ੍ਵਾ ਜਵਨਚਿਤ੍ਤਾਨਿ, ਹੋਨ੍ਤਿ ਚਤ੍ਤਾਰਿ ਪਞ੍ਚ ਵਾ;

ਪੁਬ੍ਬੇ ਵੁਤ੍ਤਨਯੇਨੇਵ, ਸੇਸਂ ਞੇਯ੍ਯਂ ਵਿਭਾਵਿਨਾ.

੧੦੮੪.

ਪਰਿਕਮ੍ਮਾਦਿਨਾਮਾਨਿ, ਪੁਰਿਮਾਨਿ ਭਵਨ੍ਤਿ ਤੁ;

ਪਚ੍ਛਿਮਂ ਅਪ੍ਪਨਾਚਿਤ੍ਤਂ, ਰੂਪਾਵਚਰਿਕਂ ਭਵੇ.

੧੦੮੫.

ਤੇਨ ਚਿਤ੍ਤੇਨ ਯਂ ਞਾਣਂ, ਸਂਯੁਤ੍ਤਂ ਤੇਨ ਯਾ ਪਨ;

ਸਂਯੁਤ੍ਤਾ ਸਤਿ ਸਾ ਪੁਬ੍ਬੇ-ਨਿਵਾਸਾਨੁਸ੍ਸਤੀਰਿਤਾ.

ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ.

੧੦੮੬.

ਰੂਪਂ ਪਸ੍ਸਿਤੁਕਾਮੇਨ, ਭਿਕ੍ਖੁਨਾ ਦਿਬ੍ਬਚਕ੍ਖੁਨਾ;

ਕਸਿਣਾਰਮ੍ਮਣਂ ਝਾਨਂ, ਅਭਿਞ੍ਞਾਪਾਦਕਂ ਪਨ.

੧੦੮੭.

ਅਭਿਨੀਹਾਰਕ੍ਖਮਂ ਕਤ੍ਵਾ, ਤੇਜੋਕਸਿਣਮੇਵ ਵਾ;

ਓਦਾਤਕਸਿਣਂ ਵਾਪਿ, ਆਲੋਕਕਸਿਣਮ੍ਪਿ ਵਾ.

੧੦੮੮.

ਇਮੇਸੁ ¶ ਕਤਪੁਞ੍ਞੇਹਿ, ਕਸਿਣੇਸੁ ਚ ਤੀਸੁਪਿ;

ਆਲੋਕਕਸਿਣਂ ਏਤ੍ਥ, ਸੇਟ੍ਠਨ੍ਤਿ ਪਰਿਦੀਪਿਤਂ.

੧੦੮੯.

ਤਸ੍ਮਾ ¶ ¶ ਤਮਿਤਰਂ ਵਾਪਿ, ਉਪ੍ਪਾਦੇਤ੍ਵਾ ਯਥਾਕ੍ਕਮਂ;

ਉਪਚਾਰਭੂਮਿਯਂਯੇਵ, ਠਤ੍ਵਾ ਤਂ ਪਨ ਪਣ੍ਡਿਤੋ.

੧੦੯੦.

ਵਡ੍ਢੇਤ੍ਵਾਨ ਠਪੇਤਬ੍ਬਂ, ਨ ਉਪ੍ਪਾਦੇਯ੍ਯ ਅਪ੍ਪਨਂ;

ਉਪ੍ਪਾਦੇਤਿ ਸਚੇ ਹੋਤਿ, ਪਾਦਕਜ੍ਝਾਨਨਿਸ੍ਸਿਤਂ.

੧੦੯੧.

ਝਾਨਸ੍ਸ ਵਡ੍ਢਿਤਸ੍ਸਨ੍ਤੋ-ਗਤਂ ਰੂਪਂ ਤੁ ਯੋਗਿਨਾ;

ਪਸ੍ਸਿਤਬ੍ਬਂ ਭਵੇ ਰੂਪਂ, ਪਸ੍ਸਤੋ ਪਨ ਤਸ੍ਸ ਤਂ.

੧੦੯੨.

ਪਰਿਕਮ੍ਮਸ੍ਸ ਵਾਰੋ ਹਿ, ਅਤਿਕ੍ਕਮਤਿ ਤਾਵਦੇ;

ਆਲੋਕੋਪਿ ਤਤੋ ਤਸ੍ਸ, ਖਿਪ੍ਪਮਨ੍ਤਰਧਾਯਤਿ.

੧੦੯੩.

ਤਸ੍ਮਿਂ ਅਨ੍ਤਰਹਿਤੇ ਰੂਪ-ਗਤਮ੍ਪਿ ਚ ਨ ਦਿਸ੍ਸਤਿ;

ਤੇਨਾਥ ਪਾਦਕਜ੍ਝਾਨਂ, ਪਵਿਸਿਤ੍ਵਾ ਤਤੋ ਪੁਨ.

੧੦੯੪.

ਵੁਟ੍ਠਾਯ ਪਨ ਆਲੋਕੋ, ਫਰਿਤਬ੍ਬੋਵ ਭਿਕ੍ਖੁਨਾ;

ਏਵਂ ਅਨੁਕ੍ਕਮੇਨੇਵ, ਆਲੋਕੋ ਥਾਮਵਾ ਸਿਯਾ.

੧੦੯੫.

‘‘ਆਲੋਕੋ ਏਤ੍ਥ ਹੋਤੂ’’ਤਿ,

ਯਤ੍ਤਕਂ ਠਾਨਮੇਵ ਸੋ;

ਪਰਿਚ੍ਛਿਨ੍ਦਤਿ ਤਤ੍ਥੇਵ,

ਆਲੋਕੋ ਪਨ ਤਿਟ੍ਠਤਿ.

੧੦੯੬.

ਦਿਵਸਮ੍ਪਿ ਨਿਸੀਦਿਤ੍ਵਾ, ਪਸ੍ਸਤੋ ਹੋਤਿ ਦਸ੍ਸਨਂ;

ਤਿਣੁਕ੍ਕਾਯ ਗਤੋ ਮਗ੍ਗਂ, ਪੁਰਿਸੇਤ੍ਥ ਨਿਦਸ੍ਸਨਂ.

੧੦੯੭.

ਉਪ੍ਪਾਦਨਕ੍ਕਮੋਪਿਸ੍ਸ, ਤਤ੍ਰਾਯਂ ਦਿਬ੍ਬਚਕ੍ਖੁਨੋ;

ਵੁਤ੍ਤਪ੍ਪਕਾਰਰੂਪਂ ਤਂ, ਕਤ੍ਵਾ ਆਰਮ੍ਮਣਂ ਪਨ.

੧੦੯੮.

ਮਨੋਦ੍ਵਾਰੇ ਮਨਕ੍ਕਾਰੇ, ਜਾਤੇ ਯਾਨਿ ਤਦੇਵ ਚ;

ਰੂਪਂ ਆਰਮ੍ਮਣਂ ਕਤ੍ਵਾ, ਜਾਯਨ੍ਤਿ ਜਵਨਾਨਿ ਹਿ.

੧੦੯੯.

ਕਾਮਾਵਚਰਚਿਤ੍ਤਾਨਿ ¶ , ਤਾਨਿ ਚਤ੍ਤਾਰਿ ਪਞ੍ਚ ਵਾ;

ਹੇਟ੍ਠਾ ਵੁਤ੍ਤਨਯੇਨੇਵ, ਸੇਸਂ ਞੇਯ੍ਯਂ ਵਿਭਾਵਿਨਾ.

੧੧੦੦.

ਅਤ੍ਥਸਾਧਕਚਿਤ੍ਤਂ ਤਂ, ਚਤੁਤ੍ਥਜ੍ਝਾਨਿਕਂ ਮਤਂ;

ਤਂਚਿਤ੍ਤਸਂਯੁਤਂ ਞਾਣਂ, ਦਿਬ੍ਬਚਕ੍ਖੁਨ੍ਤਿ ਵੁਚ੍ਚਤਿ.

੧੧੦੧.

ਅਨਾਗਤਂਸਞਾਣਸ੍ਸ ¶ , ਯਥਾਕਮ੍ਮੁਪਗਸ੍ਸ ਚ;

ਪਰਿਕਮ੍ਮਂ ਵਿਸੁਂ ਨਤ੍ਥਿ, ਇਜ੍ਝਨ੍ਤਿ ਦਿਬ੍ਬਚਕ੍ਖੁਨਾ.

੧੧੦੨.

ਚੁਤੂਪਪਾਤਞਾਣਮ੍ਪਿ, ਦਿਬ੍ਬਚਕ੍ਖੁਨ੍ਤਿ ਵਾ ਪਨ;

ਅਤ੍ਥਤੋ ਏਕਮੇਵੇਦਂ, ਬ੍ਯਞ੍ਜਨੇ ਪਨ ਨਾਨਤਾ.

ਦਿਬ੍ਬਚਕ੍ਖੁਞਾਣਂ.

੧੧੦੩.

ਯੋਧ ਸੁਣਾਤਿ ਕਰੋਤਿ ਚ ਚਿਤ੍ਤੇ,

ਗਨ੍ਥਮਿਮਂ ਪਰਮਂ ਪਨ ਭਿਕ੍ਖੁ;

ਸੋ ਅਭਿਧਮ੍ਮਮਹਣ੍ਣਵਪਾਰਂ,

ਯਾਤਿ ਅਨੇਨ ਤਰੇਨ ਤਰਿਤ੍ਵਾ.

ਇਤਿ ਅਭਿਧਮ੍ਮਾਵਤਾਰੇ ਅਭਿਞ੍ਞਾਨਿਦ੍ਦੇਸੋ ਨਾਮ

ਸੋਲ਼ਸਮੋ ਪਰਿਚ੍ਛੇਦੋ.

੧੭. ਸਤ੍ਤਰਸਮੋ ਪਰਿਚ੍ਛੇਦੋ

ਅਭਿਞ੍ਞਾਰਮ੍ਮਣਨਿਦ੍ਦੇਸੋ

੧੧੦੪.

ਅਨਾਗਤਂਸਞਾਣਞ੍ਚ ¶ , ਯਥਾਕਮ੍ਮੁਪਗਮ੍ਪਿ ਚ;

ਪਞ੍ਚ ਇਦ੍ਧਿਵਿਧਾਦੀਨਿ, ਸਤ੍ਤਾਭਿਞ੍ਞਾ ਇਮਾ ਪਨ.

੧੧੦੫.

ਏਤਾਸਂ ¶ ਪਨ ਸਤ੍ਤਨ੍ਨਂ, ਅਭਿਞ੍ਞਾਨਮਿਤੋ ਪਰਂ;

ਪਵਕ੍ਖਾਮਿ ਸਮਾਸੇਨ, ਆਰਮ੍ਮਣਵਿਨਿਚ੍ਛਯਂ.

੧੧੦੬.

ਆਰਮ੍ਮਣਤ੍ਤਿਕਾ ਵੁਤ੍ਤਾ, ਯੇ ਚਤ੍ਤਾਰੋ ਮਹੇਸਿਨਾ;

ਸਤ੍ਤਨ੍ਨਮੇਤ੍ਥ ਞਾਣਾਨਂ, ਸਮ੍ਪਵਤ੍ਤਿਂ ਸੁਣਾਥ ਮੇ.

੧੧੦੭.

ਤਤ੍ਥ ਇਦ੍ਧਿਵਿਧਞਾਣਂ, ਪਰਿਤ੍ਤਾਦੀਸੁ ਸਤ੍ਤਸੁ;

ਆਰਮ੍ਮਣਵਿਭਾਗੇਸੁ, ਪਵਤ੍ਤਤਿ ਕਥਂ ਪਨ.

੧੧੦੮.

ਕਾਯੇਨਾਦਿਸ੍ਸਮਾਨੇਨ, ਗਨ੍ਤੁਕਾਮੋ ਯਦਾਭਵੇ;

ਚਿਤ੍ਤਸਨ੍ਨਿਸ੍ਸਿਤਂ ਕਤ੍ਵਾ, ਕਾਯਂ ਚਿਤ੍ਤਵਸੇਨ ਤਂ.

੧੧੦੯.

ਮਹਗ੍ਗਤੇ ¶ ਚ ਚਿਤ੍ਤਸ੍ਮਿਂ, ਸਮਾਰੋਪੇਤਿ ਸੋ ਤਦਾ;

ਕਾਯਾਰਮ੍ਮਣਤੋ ਞਾਣਂ, ਪਰਿਤ੍ਤਾਰਮ੍ਮਣਂ ਸਿਯਾ.

੧੧੧੦.

ਦਿਸ੍ਸਮਾਨੇਨ ਕਾਯੇਨ, ਗਨ੍ਤੁਕਾਮੋ ਯਦਾ ਭਵੇ;

ਕਾਯਸਨ੍ਨਿਸ੍ਸਿਤਂ ਕਤ੍ਵਾ, ਚਿਤ੍ਤਂ ਕਾਯਵਸੇਨ ਤਂ.

੧੧੧੧.

ਪਾਦਕਜ੍ਝਾਨਚਿਤ੍ਤਂ ਤਂ, ਕਾਯੇ ਰੋਪੇਤਿ ਸੋ ਤਦਾ;

ਝਾਨਾਰਮ੍ਮਣਤੋ ਞਾਣਂ, ਤਂ ਮਹਗ੍ਗਤਗੋਚਰਂ.

੧੧੧੨.

ਅਨਾਗਤਮਤੀਤਞ੍ਚ, ਕਰੋਤਿ ਵਿਸਯਂ ਯਦਾ;

ਅਤੀਤਾਰਮ੍ਮਣਂ ਹੋਤਿ, ਤਦਾਨਾਗਤਗੋਚਰਂ.

੧੧੧੩.

ਕਾਯੇਨ ਦਿਸ੍ਸਮਾਨੇਨ, ਗਮਨੇ ਪਨ ਭਿਕ੍ਖੁਨੋ;

ਪਚ੍ਚੁਪ੍ਪਨ੍ਨੋ ਭਵੇ ਤਸ੍ਸ, ਗੋਚਰੋਤਿ ਵਿਨਿਦ੍ਦਿਸੇ.

੧੧੧੪.

ਕਾਯਂ ਚਿਤ੍ਤਵਸੇਨਾਪਿ, ਚਿਤ੍ਤਂ ਕਾਯਵਸੇਨ ਵਾ;

ਪਰਿਣਾਮਨਕਾਲਸ੍ਮਿਂ, ਅਜ੍ਝਤ੍ਤਾਰਮ੍ਮਣਂ ਸਿਯਾ.

੧੧੧੫.

ਬਹਿਦ੍ਧਾਰਮ੍ਮਣਂ ਹੋਤਿ, ਬਹਿਦ੍ਧਾਰੂਪਦਸ੍ਸਨੇ;

ਏਵਮਿਦ੍ਧਿਵਿਧਂ ਞਾਣਂ, ਸਮ੍ਪਵਤ੍ਤਤਿ ਸਤ੍ਤਸੁ.

੧੧੧੬.

ਪਚ੍ਚੁਪ੍ਪਨ੍ਨੇ ਪਰਿਤ੍ਤੇ ਚ, ਬਹਿਦ੍ਧਜ੍ਝਤ੍ਤਿਕੇਸੁਪਿ;

ਚਤੂਸ੍ਵੇਤੇਸੁ ਧਮ੍ਮੇਸੁ, ਦਿਬ੍ਬਸੋਤਂ ਪਵਤ੍ਤਤਿ.

੧੧੧੭.

ਪਚ੍ਚੁਪ੍ਪਨ੍ਨੋ ¶ ¶ ਪਰਿਤ੍ਤੋ ਚ, ਸਦ੍ਦੋ ਆਰਮ੍ਮਣਂ ਯਤੋ;

ਪਰਿਤ੍ਤਾਰਮ੍ਮਣਂ ਪਚ੍ਚੁ-ਪ੍ਪਨ੍ਨਾਰਮ੍ਮਣਤਂ ਗਤਂ.

੧੧੧੮.

ਅਤ੍ਤਨੋ ਕੁਚ੍ਛਿਸਦ੍ਦਸ੍ਸ, ਸਵਨੇਪਿ ਪਰਸ੍ਸ ਚ;

ਅਜ੍ਝਤ੍ਤਾਰਮ੍ਮਣਞ੍ਚੇਵ, ਬਹਿਦ੍ਧਾਰਮ੍ਮਣਮ੍ਪਿ ਚ.

੧੧੧੯.

ਚੇਤੋਪਰਿਯਞਾਣਮ੍ਪਿ, ਪਰਿਤ੍ਤਾਦੀਸੁ ਅਟ੍ਠਸੁ;

ਆਰਮ੍ਮਣਵਿਭਾਗੇਸੁ, ਪਵਤ੍ਤਤਿ ਕਥਂ ਪਨ.

੧੧੨੦.

ਪਰਿਤ੍ਤਾਰਮ੍ਮਣਂ ਹੋਤਿ, ਪਰਿਤ੍ਤਾਨਂ ਪਜਾਨਨੇ;

ਜਾਨਨੇ ਮਜ੍ਝਿਮਾਨਂ ਤੁ, ਤਂ ਮਹਗ੍ਗਤਗੋਚਰਂ.

੧੧੨੧.

ਜਾਨਨੇ ਪਨ ਮਗ੍ਗਸ੍ਸ, ਫਲਸ੍ਸਾਪਿ ਪਜਾਨਨੇ;

ਤਦਾ ਪਨਸ੍ਸ ਞਾਣਸ੍ਸ, ਅਪ੍ਪਮਾਣੋਵ ਗੋਚਰੋ.

੧੧੨੨.

ਤਂ ¶ ਮਗ੍ਗਾਰਮ੍ਮਣਂ ਹੋਤਿ, ਮਗ੍ਗਚਿਤ੍ਤਸ੍ਸ ਜਾਨਨੇ;

ਪਰਿਯਾਯੇਨੇਵੇਤਸ੍ਸ, ਮਗ੍ਗਾਰਮ੍ਮਣਤਾ ਮਤਾ.

੧੧੨੩.

ਅਤੀਤੇ ਸਤ੍ਤਦਿਵਸ-ਬ੍ਭਨ੍ਤਰੇ ਚ ਯਦਾ ਪਨ;

ਅਨਾਗਤੇ ਤਥਾ ਸਤ੍ਤ-ਦਿਵਸਬ੍ਭਨ੍ਤਰੇਪਿ ਚ.

੧੧੨੪.

ਪਰੇਸਂ ਪਨ ਚਿਤ੍ਤਸ੍ਸ, ਜਾਨਨੇ ਸਮੁਦੀਰਿਤਂ;

ਅਤੀਤਾਰਮ੍ਮਣਞ੍ਚੇਵ, ਤਦਾਨਾਗਤਗੋਚਰਂ.

੧੧੨੫.

ਕਥਞ੍ਚ ਪਨ ਤਂ ਪਚ੍ਚੁਪ੍ਪਨ੍ਨਗੋਚਰਤਂ ਗਤਂ;

ਪਚ੍ਚੁਪ੍ਪਨ੍ਨਂ ਤਿਧਾ ਵੁਤ੍ਤਂ, ਖਣਸਨ੍ਤਤਿਅਦ੍ਧਤੋ.

੧੧੨੬.

ਤਤ੍ਥ ਤਿਕ੍ਖਣਸਮ੍ਪਤ੍ਤਂ, ਪਚ੍ਚੁਪ੍ਪਨ੍ਨਖਣਾਦਿਕਂ;

ਏਕਦ੍ਵੇਸਨ੍ਤਤਿਵਾਰਪਰਿਯਾਪਨ੍ਨਮਿਦਂ ਪਨ.

੧੧੨੭.

ਸਨ੍ਤਤਿਪਚ੍ਚੁਪ੍ਪਨ੍ਨਨ੍ਤਿ, ਆਹੁ ਸਨ੍ਤਤਿਕੋਵਿਦਾ;

ਏਕਬ੍ਭਵਪਰਿਚ੍ਛਿਨ੍ਨਂ, ਪਚ੍ਚੁਪ੍ਪਨ੍ਨਨ੍ਤਿ ਪਚ੍ਛਿਮਂ.

੧੧੨੮.

ਖਣਾਦਿਕਤ੍ਤਯਂ ਪਚ੍ਚੁ-ਪ੍ਪਨ੍ਨਂ ਤਮਾਹੁ ਕੇਚਿਧ;

ਚੇਤੋਪਰਿਯਞਾਣਸ੍ਸ, ਹੋਤਿ ਆਰਮ੍ਮਣਂ ਇਤਿ.

੧੧੨੯.

ਯਥਾ ¶ ਚ ਪੁਪ੍ਫਮੁਟ੍ਠਿਮ੍ਹਿ, ਉਕ੍ਖਿਤ੍ਤੇ ਗਗਨੇ ਪਨ;

ਅਵਸ੍ਸਂ ਏਕਮੇਕਸ੍ਸ, ਵਣ੍ਟਂ ਵਣ੍ਟੇਨ ਵਿਜ੍ਝਤਿ.

੧੧੩੦.

ਏਵਂ ਮਹਾਜਨਸ੍ਸਾਪਿ, ਚਿਤ੍ਤੇ ਆਵਜ੍ਜਿਤੇ ਪਨ;

ਏਕਸ੍ਸ ਚਿਤ੍ਤਮੇਕੇਨ, ਅਵਸ੍ਸਂ ਪਨ ਵਿਜ੍ਝਤਿ.

੧੧੩੧.

ਯੇਨਾਵਜ੍ਜਤਿ ਚਿਤ੍ਤੇਨ, ਯੇਨ ਜਾਨਾਤਿ ਚੇਤਸਾ;

ਤੇਸਂ ਦ੍ਵਿਨ੍ਨਂ ਸਹਟ੍ਠਾਨਾ-ਭਾਵਤੋ ਤਂ ਨ ਯੁਜ੍ਜਤਿ.

੧੧੩੨.

ਜਵਨਾਵਜ੍ਜਨਾਨਂ ਤੁ, ਨਾਨਾਰਮ੍ਮਣਪਤ੍ਤਿਤੋ;

ਅਨਿਟ੍ਠੇ ਪਨ ਹਿ ਠਾਨੇ, ਅਯੁਤ੍ਤਨ੍ਤਿ ਪਕਾਸਿਤਂ.

੧੧੩੩.

ਤਸ੍ਮਾ ਸਨ੍ਤਤਿਅਦ੍ਧਾਨ-ਪਚ੍ਚੁਪ੍ਪਨ੍ਨਾਨਮੇਵ ਤੁ;

ਵਸੇਨ ਪਚ੍ਚੁਪ੍ਪਨ੍ਨਂ ਤਂ, ਹੋਤਿ ਆਰਮ੍ਮਣਂ ਇਦਂ.

੧੧੩੪.

ਪਚ੍ਚੁਪ੍ਪਨ੍ਨਮ੍ਪਿ ਅਦ੍ਧਾਖ੍ਯਂ, ਇਦਂ ਜਵਨਵਾਰਤੋ;

ਦੀਪੇਤਬ੍ਬਨ੍ਤਿ ਨਿਦ੍ਦਿਟ੍ਠਂ, ਤਤ੍ਰਾਯਂ ਦੀਪਨਾਨਯੋ.

੧੧੩੫.

ਯਦਾ ¶ ¶ ਪਰਸ੍ਸ ਚਿਤ੍ਤਞ੍ਹਿ, ਞਾਤੁਮਾਵਜ੍ਜਤਿਦ੍ਧਿਮਾ;

ਆਵਜ੍ਜਨਮਨੋ ਤਸ੍ਸ, ਪਚ੍ਚੁਪ੍ਪਨ੍ਨਖਣਵ੍ਹਯਂ.

੧੧੩੬.

ਆਰਮ੍ਮਣਂ ਤਦਾ ਕਤ੍ਵਾ, ਤੇਨ ਸਦ੍ਧਿਂ ਨਿਰੁਜ੍ਝਤਿ;

ਜਵਨਾਨਿ ਹਿ ਜਾਯਨ੍ਤੇ, ਤਸ੍ਸ ਚਤ੍ਤਾਰਿ ਪਞ੍ਚ ਵਾ.

੧੧੩੭.

ਏਤੇਸਂ ਪਚ੍ਛਿਮਂ ਚਿਤ੍ਤਂ, ਇਦ੍ਧਿਚਿਤ੍ਤਮੁਦੀਰਿਤਂ;

ਕਾਮਾਵਚਰਚਿਤ੍ਤਾਨਿ, ਸੇਸਾਨੀਤਿ ਵਿਨਿਦ੍ਦਿਸੇ.

੧੧੩੮.

ਏਤੇਸਂ ਪਨ ਸਬ੍ਬੇਸਂ, ਨਿਰੁਦ੍ਧਂ ਤੁ ਤਦੇਵ ਚ;

ਚਿਤ੍ਤਂ ਆਰਮ੍ਮਣਂ ਹੋਤਿ, ਤਸ੍ਮਾ ਸਬ੍ਬਾਨਿ ਤਾਨਿਪਿ.

੧੧੩੯.

ਏਕਾਰਮ੍ਮਣਤਂ ਯਨ੍ਤਿ, ਨ ਨਾਨਾਰਮ੍ਮਣਾਨਿ ਹਿ;

ਅਦ੍ਧਾਵਸਾ ਭਵੇ ਪਚ੍ਚੁ-ਪ੍ਪਨ੍ਨਾਰਮ੍ਮਣਤੋ ਪਨ.

੧੧੪੦.

ਏਕਾਰਮ੍ਮਣਭਾਵੇਪਿ, ਇਦ੍ਧਿਮਾਨਸਮੇਵ ਚ;

ਪਰਸ੍ਸ ਚਿਤ੍ਤਂ ਜਾਨਾਤਿ, ਨੇਤਰਾਨਿ ਯਥਾ ਪਨ.

੧੧੪੧.

ਚਕ੍ਖੁਦ੍ਵਾਰੇ ¶ ਤੁ ਵਿਞ੍ਞਾਣਂ, ਰੂਪਂ ਪਸ੍ਸਤਿ ਨੇਤਰਂ;

ਏਵਮੇਵ ਚ ਤਂ ਇਦ੍ਧਿ-ਚਿਤ੍ਤਮੇਵ ਚ ਜਾਨਾਤਿ.

੧੧੪੨.

ਪਰਚਿਤ੍ਤਾਰਮ੍ਮਣਤ੍ਤਾ, ਬਹਿਦ੍ਧਾਰਮ੍ਮਣਂ ਸਿਯਾ;

ਚੇਤੋਪਰਿਯਞਾਣਮ੍ਪਿ, ਅਟ੍ਠਸ੍ਵੇਵ ਪਵਤ੍ਤਤਿ.

੧੧੪੩.

ਪੁਬ੍ਬੇਨਿਵਾਸਞਾਣਮ੍ਪਿ, ਪਰਿਤ੍ਤਾਦੀਸੁ ਅਟ੍ਠਸੁ;

ਆਰਮ੍ਮਣਵਿਭਾਗੇਸੁ, ਪਵਤ੍ਤਤਿ ਕਥਂ ਪਨ.

੧੧੪੪.

ਕਾਮਾਵਚਰਖਨ੍ਧਾਨਂ, ਸਮਨੁਸ੍ਸਰਣੇ ਪਨ;

ਪਰਿਤ੍ਤਾਰਮ੍ਮਣਂਯੇਵ, ਹੋਤੀਤਿ ਪਰਿਦੀਪਯੇ.

੧੧੪੫.

ਰੂਪਾਵਚਰਿਕਾਰੁਪ੍ਪਖਨ੍ਧਾਨੁਸ੍ਸਰਣੇ ਪਨ;

ਭਵਤੀਤਿ ਹਿ ਞਾਤਬ੍ਬਂ, ਤਂ ਮਹਗ੍ਗਤਗੋਚਰਂ.

੧੧੪੬.

ਅਤੀਤੇ ਅਤ੍ਤਨਾ ਮਗ੍ਗਂ, ਭਾਵਿਤਂ ਤੁ ਫਲਮ੍ਪਿ ਵਾ;

ਸਮਨੁਸ੍ਸਰਤੋ ਏਵ-ਪ੍ਪਮਾਣਾਰਮ੍ਮਣਂ ਸਿਯਾ.

੧੧੪੭.

ਸਮਨੁਸ੍ਸਰਤੋ ਮਗ੍ਗਂ, ਮਗ੍ਗਾਰਮ੍ਮਣਮੇਵ ਤਂ;

ਅਤੀਤਾਰਮ੍ਮਣਂਯੇਵ, ਹੋਤਿ ਏਕਨ੍ਤਤੋ ਇਦਂ.

੧੧੪੮.

ਚੇਤੋਪਰਿਯਞਾਣਮ੍ਪਿ ¶ , ਯਥਾਕਮ੍ਮੁਪਗਮ੍ਪਿ ਚ;

ਅਤੀਤਾਰਮ੍ਮਣਾ ਹੋਨ੍ਤਿ, ਕਿਞ੍ਚਾਪਿ ਅਥ ਖੋ ਪਨ.

੧੧੪੯.

ਚੇਤੋਪਰਿਯਞਾਣਸ੍ਸ, ਸਤ੍ਤਦ੍ਦਿਵਸਬ੍ਭਨ੍ਤਰਂ;

ਅਤੀਤਂ ਚਿਤ੍ਤਮੇਵਸ੍ਸ, ਆਰਮ੍ਮਣਮੁਦੀਰਿਤਂ.

੧੧੫੦.

ਅਤੀਤੇ ਚੇਤਨਾਮਤ੍ਤਂ, ਯਥਾਕਮ੍ਮੁਪਗਸ੍ਸਪਿ;

ਪੁਬ੍ਬੇਨਿਵਾਸਞਾਣਸ੍ਸ, ਨਤ੍ਥਿ ਕਿਞ੍ਚਿ ਅਗੋਚਰਂ.

੧੧੫੧.

ਅਜ੍ਝਤ੍ਤਾਰਮ੍ਮਣਂ ਅਤ੍ਤ-ਖਨ੍ਧਾਨੁਸ੍ਸਰਣੇ ਸਿਯਾ;

ਬਹਿਦ੍ਧਾਰਮ੍ਮਣਂ ਅਞ੍ਞ-ਖਨ੍ਧਾਨੁਸ੍ਸਰਣੇ ਭਵੇ.

੧੧੫੨.

ਸਰਣੇ ਨਾਮਗੋਤ੍ਤਸ੍ਸ, ਤਂ ਨਵਤ੍ਤਬ੍ਬਗੋਚਰਂ;

ਪੁਬ੍ਬੇਨਿਵਾਸਞਾਣਮ੍ਪਿ, ਅਟ੍ਠਸ੍ਵੇਵ ਪਵਤ੍ਤਤਿ.

੧੧੫੩.

ਪਚ੍ਚੁਪ੍ਪਨ੍ਨੇ ¶ ਪਰਿਤ੍ਤੇ ਚ, ਬਹਿਦ੍ਧਜ੍ਝਤ੍ਤਿਕੇਸੁਪਿ;

ਚਤੂਸ੍ਵੇਤੇਸੁ ਧਮ੍ਮੇਸੁ, ਦਿਬ੍ਬਚਕ੍ਖੁ ਪਵਤ੍ਤਤਿ.

੧੧੫੪.

ਦਿਬ੍ਬਸੋਤਸਮਂ ¶ ਦਿਬ੍ਬ-ਚਕ੍ਖੁਆਰਮ੍ਮਣਕ੍ਕਮੇ;

ਰੂਪਂ ਸਦ੍ਦੋਤਿ ਦ੍ਵਿਨ੍ਨਂ ਤੁ, ਅਯਮੇਵ ਵਿਸੇਸਤਾ.

੧੧੫੫.

ਅਨਾਗਤਂਸਞਾਣਮ੍ਪਿ, ਪਰਿਤ੍ਤਾਦੀਸੁ ਅਟ੍ਠਸੁ;

ਆਰਮ੍ਮਣਵਿਭਾਗੇਸੁ, ਪਵਤ੍ਤਤਿ ਕਥਂ ਪਨ.

੧੧੫੬.

ਨਿਬ੍ਬਤ੍ਤਿਸ੍ਸਤਿ ਯਂ ਕਾਮਾ-ਵਚਰੇਤਿ ਪਜਾਨਤੋ;

ਪਰਿਤ੍ਤਾਰਮ੍ਮਣਂ ਹੋਤਿ, ਰੂਪਾਰੂਪੇਸ੍ਵਨਾਗਤੇ.

੧੧੫੭.

ਨਿਬ੍ਬਤ੍ਤਿਸ੍ਸਤਿ ਯਞ੍ਚਾਪਿ, ਸਿਯਾ ਮਹਗ੍ਗਤਗੋਚਰਂ;

ਭਾਵੇਸ੍ਸਤਿ ਅਯਂ ਮਗ੍ਗਂ, ਫਲਂ ਸਚ੍ਛਿਕਰਿਸ੍ਸਤਿ.

੧੧੫੮.

ਏਵਂ ਪਜਾਨਨੇ ਅਪ੍ਪ-ਮਾਣਾਰਮ੍ਮਣਤਂ ਭਵੇ;

ਮਗ੍ਗਂ ਭਾਵੇਸ੍ਸਤਿਚ੍ਚੇਵ, ਜਾਨਨੇ ਮਗ੍ਗਗੋਚਰਂ.

੧੧੫੯.

ਏਕਨ੍ਤੇਨ ਇਦਂ ਞਾਣਂ, ਹੋਤਾਨਾਗਤਗੋਚਰਂ;

ਚੇਤੋਪਰਿਯਂ ਤੁ ਕਿਞ੍ਚਾਪਿ, ਹੋਤਾਨਾਗਤਗੋਚਰਂ.

੧੧੬੦.

ਅਥ ਖੋ ਪਨ ਤਂ ਸਤ੍ਤ-ਦਿਵਸਬ੍ਭਨ੍ਤਰਂ ਪਨ;

ਚਿਤ੍ਤਮੇਵ ਚ ਜਾਨਾਤਿ, ਨ ਹਿ ਤਂ ਅਞ੍ਞਗੋਚਰਂ.

੧੧੬੧.

ਅਨਾਗਤਂਸਞਾਣਸ੍ਸ ¶ , ਅਨਾਗਤਂਸਗੋਚਰਂ;

‘‘ਅਹਂ ਦੇਵੋ ਭਵਿਸ੍ਸਾਮਿ’’-ਚ੍ਚੇਵਮਜ੍ਝਤ੍ਤਗੋਚਰਂ.

੧੧੬੨.

‘‘ਤਿਸ੍ਸੋ ਫੁਸ੍ਸੋ ਅਮੁਤ੍ਰਾਯਂ,

ਨਿਬ੍ਬਤ੍ਤਿਸ੍ਸਤਿਨਾਗਤੇ’’;

ਇਚ੍ਚੇਵਂ ਜਾਨਨੇ ਤਸ੍ਸ,

ਬਹਿਦ੍ਧਾਰਮ੍ਮਣਂ ਸਿਯਾ.

੧੧੬੩.

ਜਾਨਨੇ ਨਾਮਗੋਤ੍ਤਸ੍ਸ, ਯਸ੍ਸ ਕਸ੍ਸਚਿਨਾਗਤੇ;

ਪੁਬ੍ਬੇਨਿਵਾਸਞਾਣਂਵ, ਤਂ ਨਵਤ੍ਤਬ੍ਬਗੋਚਰਂ.

੧੧੬੪.

ਯਥਾਕਮ੍ਮੁਪਗਞਾਣਂ ¶ , ਪਰਿਤ੍ਤਾਦੀਸੁ ਪਞ੍ਚਸੁ;

ਆਰਮ੍ਮਣਵਿਭਾਗੇਸੁ, ਪਵਤ੍ਤਤਿ ਕਥਂ ਪਨ.

੧੧੬੫.

ਜਾਨਨੇ ਕਾਮਕਮ੍ਮਸ੍ਸ, ਪਰਿਤ੍ਤਾਰਮ੍ਮਣਂ ਸਿਯਾ;

ਤਥਾ ਮਹਗ੍ਗਤਕਮ੍ਮਸ੍ਸ, ਤਂ ਮਹਗ੍ਗਤਗੋਚਰਂ.

੧੧੬੬.

ਅਤੀਤਮੇਵ ਜਾਨਾਤਿ, ਤਸ੍ਮਾ ਚਾਤੀਤਗੋਚਰਂ;

ਅਜ੍ਝਤ੍ਤਾਰਮ੍ਮਣਂ ਹੋਤਿ, ਅਤ੍ਤਨੋ ਕਮ੍ਮਜਾਨਨੇ.

੧੧੬੭.

ਬਹਿਦ੍ਧਾਰਮ੍ਮਣਂ ਹੋਤਿ, ਪਰਕਮ੍ਮਪਜਾਨਨੇ;

ਏਵਂ ਪਵਤ੍ਤਿ ਞਾਤਬ੍ਬਾ, ਯਥਾਕਮ੍ਮੁਪਗਸ੍ਸਪਿ.

੧੧੬੮.

ਸਤ੍ਤਨ੍ਨਮ੍ਪਿ ਅਭਿਞ੍ਞਾਨਂ, ਵੁਤ੍ਤੋ ਆਰਮ੍ਮਣਕ੍ਕਮੋ;

ਏਤ੍ਥ ਵੁਤ੍ਤਨਯੇਨੇਵ, ਵੇਦਿਤਬ੍ਬੋ ਵਿਭਾਵਿਨਾ.

੧੧੬੯.

ਵਿਵਿਧਤ੍ਥਵਣ੍ਣਪਦੇਹਿ ਸਮ੍ਪਨ੍ਨਂ,

ਮਧੁਰਤ੍ਥਮਤਿਨੀਹਰਂ ਗਨ੍ਥਂ;

ਸੋਤੁਜਨਸ੍ਸ ਹਦਯਪੀਤਿਕਰਂ,

ਸੁਣੇਯ੍ਯ ਕੋਚਿ ਮਨੁਜੋ ਸਚੇਤਨੋ.

ਇਤਿ ਅਭਿਧਮ੍ਮਾਵਤਾਰੇ ਅਭਿਞ੍ਞਾਰਮ੍ਮਣਨਿਦ੍ਦੇਸੋ ਨਾਮ

ਸਤ੍ਤਰਸਮੋ ਪਰਿਚ੍ਛੇਦੋ.

੧੮. ਅਟ੍ਠਾਰਸਮੋ ਪਰਿਚ੍ਛੇਦੋ

ਦਿਟ੍ਠਿਵਿਸੁਦ੍ਧਿਨਿਦ੍ਦੇਸੋ

੧੧੭੦.

ਸਮਾਧਿਂ ¶ ¶ ਪਨ ਸਾਭਿਞ੍ਞਂ, ਭਾਵੇਤ੍ਵਾ ਤਦਨਨ੍ਤਰਂ;

ਭਾਵੇਤਬ੍ਬਾ ਯਤੋ ਪਞ੍ਞਾ, ਭਿਕ੍ਖੁਨਾ ਤੇਨ ਧੀਮਤਾ.

੧੧੭੧.

ਤਤੋਹਂ ¶ ਦਾਨਿ ਵਕ੍ਖਾਮਿ, ਪਞ੍ਞਾਭਾਵਨਮੁਤ੍ਤਮਂ;

ਸਮਾਸੇਨੇਵ ਭਿਕ੍ਖੂਨਂ, ਪਰਂ ਪੀਤਿਸੁਖਾਵਹਂ.

੧੧੭੨.

ਕਾ ਪਞ੍ਞਾ ਪਨ ਕੋ ਚਤ੍ਥੋ,

ਕਿਮਸ੍ਸਾ ਲਕ੍ਖਣਾਦਿਕਂ;

ਕਤਿਧਾ ਸਾ ਕਥਂ ਤੇਨ,

ਭਾਵੇਤਬ੍ਬਾਤਿ ਵੁਚ੍ਚਤੇ. –

੧੧੭੩.

ਪਞ੍ਞਾ ਵਿਪਸ੍ਸਨਾਪਞ੍ਞਾ, ਪੁਞ੍ਞਚਿਤ੍ਤਸਮਾਯੁਤਾ;

ਪਜਾਨਾਤੀਤਿ ਪਞ੍ਞਾ ਸਾ, ਜਾਨਨਾ ਵਾ ਪਕਾਰਤੋ.

੧੧੭੪.

ਸਞ੍ਞਾਵਿਞ੍ਞਾਣਪਞ੍ਞਾਨਂ, ਕੋ ਵਿਸੇਸੋ ਕਿਮਨ੍ਤਰਂ;

ਸਞ੍ਞਾਵਿਞ੍ਞਾਣਪਞ੍ਞਾਨਂ, ਜਾਨਨਤ੍ਤੇ ਸਮੇਪਿ ਚ.

੧੧੭੫.

ਯਾ ਸਞ੍ਜਾਨਨਮਤ੍ਤਂਵ, ਸਞ੍ਞਾ ਨੀਲਾਦਿਤੋ ਪਨ;

ਲਕ੍ਖਣਪ੍ਪਟਿਵੇਧਂ ਤੁ, ਕਾਤੁਂ ਸਕ੍ਕੋਤਿ ਨੇਵ ਸਾ.

੧੧੭੬.

ਵਿਞ੍ਞਾਣਂ ਪਨ ਜਾਨਾਤਿ, ਨੀਲਪੀਤਾਦਿਗੋਚਰਂ;

ਸਕ੍ਕੋਤਿਪਿ ਅਨਿਚ੍ਚਾਦਿਲਕ੍ਖਣਂ ਪਟਿਵਿਜ੍ਝਿਤੁਂ.

੧੧੭੭.

ਉਸ੍ਸਕ੍ਕਿਤ੍ਵਾ ਨ ਸਕ੍ਕੋਤਿ, ਮਗ੍ਗਂ ਪਾਪੇਤੁਮੇਵ ਤਂ;

ਪਞ੍ਞਾ ਵੁਤ੍ਤਨਯਂ ਕਾਤੁਂ, ਸਕ੍ਕੋਤਿ ਤਿਵਿਧਮ੍ਪਿ ਤਂ.

੧੧੭੮.

ਇਮੇਸਂ ਪਨ ਤਿਣ੍ਣਮ੍ਪਿ, ਵਿਸੇਸੋ ਸਮੁਦੀਰਿਤੋ;

ਸਬ੍ਬੇਸਂ ਪਨ ਧਮ੍ਮਾਨਂ, ਸਭਾਵਪਟਿਵੇਧਨਂ.

੧੧੭੯.

ਲਕ੍ਖਣਂ ਪਨ ਪਞ੍ਞਾਯ, ਲਕ੍ਖਣਞ੍ਞੂਹਿ ਦੀਪਿਤਂ;

ਸਮ੍ਮੋਹਨਨ੍ਧਕਾਰਸ੍ਸ, ਵਿਦ੍ਧਂਸਨਰਸਾ ਮਤਾ.

੧੧੮੦.

ਅਸਮ੍ਮੋਹਪਚ੍ਚੁਪਟ੍ਠਾਨਾ ¶ , ਸਮਾਧਾਸਨ੍ਨਕਾਰਣਾ;

ਏਵਮੇਤ੍ਥ ਚ ਵਿਞ੍ਞੇਯ੍ਯਾ, ਪਞ੍ਞਾਯ ਲਕ੍ਖਣਾਦਿਕਾ.

ਕਤਿਧਾਤਿ ¶ ਏਤ੍ਥ –

੧੧੮੧.

ਲਕ੍ਖਣੇਨੇਕਧਾ ਵੁਤ੍ਤਾ,

ਲੋਕਿਕਾਲੋਕਿਕਾ ਦ੍ਵਿਧਾ;

ਲੋਕਿਯੇਨੇਤ੍ਥ ਮਗ੍ਗੇਨ,

ਯੁਤ੍ਤਾ ਸਾ ਲੋਕਿਕਾ ਸਿਯਾ.

੧੧੮੨.

ਲੋਕੁਤ੍ਤਰੇਨ ¶ ਮਗ੍ਗੇਨ, ਯੁਤ੍ਤਾ ਲੋਕੁਤ੍ਤਰਾ ਮਤਾ;

ਤਿਵਿਧਾਪਿ ਸਿਯਾ ਪਞ੍ਞਾ, ਚਿਨ੍ਤਾਸੁਤਮਯਾਦਿਤੋ.

੧੧੮੩.

ਤਤ੍ਥਤ੍ਤਨੋਵ ਚਿਨ੍ਤਾਯ, ਨਿਪ੍ਫਨ੍ਨਤ੍ਤਾਤਿ ਤਸ੍ਸ ਸਾ;

ਹੋਤਿ ਚਿਨ੍ਤਾਮਯਾ ਪਞ੍ਞਾ, ਭੂਰਿਪਞ੍ਞੇਨ ਦੇਸਿਤਾ.

੧੧੮੪.

ਪਰਤੋ ਪਨ ਸੁਤ੍ਵਾਨ, ਲਦ੍ਧਾ ਪਞ੍ਞਾ ਅਯਂ ਇਧ;

ਸੁਤੇਨੇਵ ਚ ਨਿਪ੍ਫਨ੍ਨਾ, ਪਞ੍ਞਾ ਸੁਤਮਯਾ ਮਤਾ.

੧੧੮੫.

ਯਥਾ ਵਾਪਿ ਤਥਾ ਚੇਤ੍ਥ, ਭਾਵਨਾਯ ਵਸੇਨ ਤੁ;

ਨਿਪ੍ਫਨ੍ਨਾ ਅਪ੍ਪਨਾਪਤ੍ਤਾ, ਪਞ੍ਞਾ ਸਾ ਭਾਵਨਾਮਯਾ.

੧੧੮੬.

ਪਟਿਸਮ੍ਭਿਦਾਚਤੁਕ੍ਕਸ੍ਸ, ਵਸੇਨ ਚਤੁਧਾ ਸਿਯਾ;

ਅਤ੍ਥਧਮ੍ਮਨਿਰੁਤ੍ਤੀਸੁ, ਞਾਣਂ ਞਾਣੇਸੁ ਤੀਸੁਪਿ.

੧੧੮੭.

ਯਂ ਕਿਞ੍ਚਿ ਪਚ੍ਚਯੁਪ੍ਪਨ੍ਨਂ, ਵਿਪਾਕਾ ਚ ਕ੍ਰਿਯਾ ਤਥਾ;

ਨਿਬ੍ਬਾਨਂ ਭਾਸਿਤਤ੍ਥੋ ਚ, ਪਞ੍ਚੇਤੇ ਅਤ੍ਥਸਞ੍ਞਿਤਾ.

੧੧੮੮.

ਫਲਨਿਬ੍ਬਤ੍ਤਕੋ ਹੇਤੁ, ਅਰਿਯਮਗ੍ਗੋ ਚ ਭਾਸਿਤਂ;

ਕੁਸਲਾਕੁਸਲਞ੍ਚੇਤਿ, ਪਞ੍ਚੇਤੇ ਧਮ੍ਮਸਞ੍ਞਿਤਾ.

੧੧੮੯.

ਤਸ੍ਮਿਂ ਅਤ੍ਥੇ ਚ ਧਮ੍ਮੇ ਚ, ਯਾ ਸਭਾਵਨਿਰੁਤ੍ਤਿ ਤੁ;

ਨਿਰੁਤ੍ਤੀਤਿ ਚ ਨਿਦ੍ਦਿਟ੍ਠਾ, ਨਿਰੁਤ੍ਤਿਕੁਸਲੇਨ ਸਾ.

੧੧੯੦.

ਞਾਣਂ ਆਰਮ੍ਮਣਂ ਕਤ੍ਵਾ, ਤਿਵਿਧਂ ਪਚ੍ਚਵੇਕ੍ਖਤੋ;

ਤੇਸੁ ਞਾਣੇਸੁ ਯਂ ਞਾਣਂ, ਪਟਿਭਾਨਨ੍ਤਿ ਤਂ ਮਤਂ.

੧੧੯੧.

ਪਰਿਯਤ੍ਤਿਪਰਿਪੁਚ੍ਛਾਹਿ ¶ ¶ , ਸਵਨਾਧਿਗਮੇਹਿ ਚ;

ਪੁਬ੍ਬਯੋਗੇਨ ਗਚ੍ਛਨ੍ਤਿ, ਪਭੇਦਂ ਪਟਿਸਮ੍ਭਿਦਾ.

ਕਥਂ ਭਾਵੇਤਬ੍ਬਾਤਿ ਏਤ੍ਥ –

੧੧੯੨.

ਖਨ੍ਧਾਦੀਸੁ ਹਿ ਧਮ੍ਮੇਸੁ, ਭੂਮਿਭੂਤੇਸੁ ਯੋਗਿਨਾ;

ਉਗ੍ਗਹਾਦਿਵਸੇਨੇਤ੍ਥ, ਕਤ੍ਵਾ ਪਰਿਚਯਂ ਪਨ.

੧੧੯੩.

ਸੀਲਂ ਚਿਤ੍ਤਵਿਸੁਦ੍ਧਿਞ੍ਚ, ਸਮ੍ਪਾਦੇਤ੍ਵਾ ਤਤੋ ਪਰਂ;

ਦਿਟ੍ਠਿਸੁਦ੍ਧਾਦਯੋ ਪਞ੍ਚ, ਸਮ੍ਪਾਦੇਨ੍ਤੇਨ ਸੁਦ੍ਧਿਯਾ.

੧੧੯੪.

ਤਾਯ ਪਞ੍ਞਾਯ ਯੁਤ੍ਤੇਨ, ਭੀਤੇਨ ਜਨਨਾਦਿਤੋ;

ਭਾਵੇਤਬ੍ਬਾ ਭਵਾਭਾਵਂ, ਪਤ੍ਥਯਨ੍ਤੇਨ ਭਿਕ੍ਖੁਨਾ.

੧੧੯੫.

ਰੂਪਞ੍ਚ ਵੇਦਨਾ ਸਞ੍ਞਾ, ਸਙ੍ਖਾਰਾ ਚੇਵ ਸਬ੍ਬਸੋ;

ਵਿਞ੍ਞਾਣਞ੍ਚੇਤਿ ਪਞ੍ਚੇਤੇ, ਖਨ੍ਧਾ ਸਮ੍ਬੁਦ੍ਧਦੇਸਿਤਾ.

੧੧੯੬.

ਤਤ੍ਥ ਯਂ ਕਿਞ੍ਚਿ ਰੂਪਂ ਤਂ, ਅਤੀਤਾਨਾਗਤਾਦਿਕਂ;

ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ, ਸੁਖੁਮੋਲ਼ਾਰਿਕਮ੍ਪਿ ਵਾ.

੧੧੯੭.

ਹੀਨਂ ਵਾਪਿ ਪਣੀਤਂ ਵਾ, ਯਂ ਦੂਰੇ ਯਞ੍ਚ ਸਨ੍ਤਿਕੇ;

ਸਬ੍ਬਂ ਤਮੇਕਤੋ ਕਤ੍ਵਾ, ਰੂਪਕ੍ਖਨ੍ਧੋਤਿ ਵੁਚ੍ਚਤਿ.

੧੧੯੮.

ਇਤਰੇਸੁਪਿ ਯਂ ਕਿਞ੍ਚਿ, ਤਂ ਵੇਦਯਿਤਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਵੇਦਨਾਕ੍ਖਨ੍ਧਤਾ ਕਤਾ.

੧੧੯੯.

ਚਿਤ੍ਤਜਂ ¶ ਪਨ ਯਂ ਕਿਞ੍ਚਿ, ਤਂ ਸਞ੍ਜਾਨਨਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਸਞ੍ਞਾਕ੍ਖਨ੍ਧੋਤਿ ਵੁਚ੍ਚਤਿ.

੧੨੦੦.

ਯਂ ਕਿਞ੍ਚਿ ਚਿਤ੍ਤਸਮ੍ਭੂਤਂ, ਅਭਿਸਙ੍ਖਾਰਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਸਙ੍ਖਾਰਕ੍ਖਨ੍ਧਤਾ ਕਤਾ.

੧੨੦੧.

ਤਤ੍ਥ ਚਿਤ੍ਤਂ ਤੁ ਯਂ ਕਿਞ੍ਚਿ, ਤਂ ਵਿਜਾਨਨਲਕ੍ਖਣਂ;

ਸਬ੍ਬਂ ਤਮੇਕਤੋ ਕਤ੍ਵਾ, ਵਿਞ੍ਞਾਣਕ੍ਖਨ੍ਧਤਾ ਕਤਾ.

੧੨੦੨.

ਚਤ੍ਤਾਰੋ ¶ ਚ ਮਹਾਭੂਤਾ, ਉਪਾਦਾ ਚਤੁਵੀਸਤਿ;

ਅਟ੍ਠਵੀਸਤਿਧਾ ਚੇਤਂ, ਰੂਪਂ ਰੂਪਨ੍ਤਿ ਗਣ੍ਹਤਿ.

੧੨੦੩.

ਏਕਾਸੀਤਿਯਾ ¶ ਚਿਤ੍ਤੇਨ, ਸਂਯੁਤ੍ਤਾ ਵੇਦਨਾਦਯੋ;

ਵੇਦਨਾਸਞ੍ਞਾਸਙ੍ਖਾਰ-ਵਿਞ੍ਞਾਣਕ੍ਖਨ੍ਧਸਞ੍ਞਿਤਾ.

੧੨੦੪.

ਚਤ੍ਤਾਰੋਰੂਪਿਨੋ ਖਨ੍ਧੇ, ਨਾਮਨ੍ਤਿ ਪਰਿਗਣ੍ਹਤਿ;

ਰੂਪਕ੍ਖਨ੍ਧੋ ਭਵੇ ਰੂਪਂ, ਨਾਮਕ੍ਖਨ੍ਧਾ ਅਰੂਪਿਨੋ.

੧੨੦੫.

ਰੁਪ੍ਪਨਲਕ੍ਖਣਂ ਰੂਪਂ, ਨਾਮਂ ਨਮਨਲਕ੍ਖਣਂ;

ਇਤਿ ਸਙ੍ਖੇਪਤੋ ਨਾਮ-ਰੂਪਂ ਸੋ ਪਰਿਗਣ੍ਹਤਿ.

੧੨੦੬.

ਫਾਲੇਨ੍ਤੋ ਵਿਯ ਤਾਲਸ੍ਸ, ਕਨ੍ਦਂ ਤੁ ਯਮਕਂ ਦ੍ਵਿਧਾ;

ਵਵਤ੍ਥਪੇਤਿ ਨਾਮਞ੍ਚ, ਰੂਪਞ੍ਚਾਤਿ ਦ੍ਵਿਧਾ ਪਨ.

੧੨੦੭.

ਨਾਮਤੋ ਰੂਪਤੋ ਅਞ੍ਞੋ,

ਸਤ੍ਤੋ ਵਾ ਪੁਗ੍ਗਲੋਪਿ ਵਾ;

ਅਤ੍ਤਾ ਵਾ ਕੋਚਿ ਨਤ੍ਥੀਤਿ,

ਨਿਟ੍ਠਂ ਗਚ੍ਛਤਿ ਸਬ੍ਬਦਾ.

੧੨੦੮.

ਏਵਂ ਵਵਤ੍ਥਪੇਤ੍ਵਾ ਸੋ, ਨਾਮਰੂਪਂ ਸਭਾਵਤੋ;

ਸਤ੍ਤਸਮ੍ਮੋਹਘਾਤਤ੍ਥਂ, ਬਹੁਸੁਤ੍ਤਵਸੇਨਿਧ.

੧੨੦੯.

ਨਾਮਰੂਪਮਤ੍ਤਞ੍ਞੇਵ, ਨਤ੍ਥਿ ਕੋਚਿਧ ਪੁਗ੍ਗਲੋ;

ਏਵਮੇਤ੍ਥ ਪਣ੍ਡਿਤੋ ਪੋਸੋ, ਵਵਤ੍ਥਪੇਤਿ ਤਂ ਪਨ.

ਵੁਤ੍ਤਂ ਹੇਤਂ –

੧੨੧੦.

‘‘ਯਥਾਪਿ ਅਙ੍ਗਸਮ੍ਭਾਰਾ,

ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ,

ਹੋਤਿ ਸਤ੍ਤੋਤਿ ਸਮ੍ਮੁਤੀ’’ਤਿ.

੧੨੧੧.

ਯਥਾਪਿ ¶ ਦਾਰੁਯਨ੍ਤਮ੍ਪਿ, ਨਿਜ੍ਜੀਵਞ੍ਚ ਨਿਰੀਹਕਂ;

ਦਾਰੁਰਜ੍ਜੁਸਮਾਯੋਗੇ, ਤਂ ਗਚ੍ਛਤਿਪਿ ਤਿਟ੍ਠਤਿ.

੧੨੧੨.

ਤਥੇਦਂ ਨਾਮਰੂਪਮ੍ਪਿ, ਨਿਜ੍ਜੀਵਞ੍ਚ ਨਿਰੀਹਕਂ;

ਅਞ੍ਞਮਞ੍ਞਸਮਾਯੋਗੇ, ਤਂ ਗਚ੍ਛਤਿਪਿ ਤਿਟ੍ਠਤਿ.

ਤੇਨਾਹੁ ਪੋਰਾਣਾ –

੧੨੧੩.

‘‘ਨਾਮਞ੍ਚ ¶ ਰੂਪਞ੍ਚ ਇਧਤ੍ਥਿ ਸਚ੍ਚਤੋ,

ਨ ਹੇਤ੍ਥ ਸਤ੍ਤੋ ਮਨੁਜੋ ਚ ਵਿਜ੍ਜਤਿ;

ਸੁਞ੍ਞਂ ਇਦਂ ਯਨ੍ਤਮਿਵਾਭਿਸਙ੍ਖਤਂ,

ਦੁਕ੍ਖਸ੍ਸ ਪੁਞ੍ਜੋ ਤਿਣਕਟ੍ਠਸਾਦਿਸੋ’’ਤਿ.

੧੨੧੪.

ਅਞ੍ਞਮਞ੍ਞੂਪਨਿਸ੍ਸਾਯ ¶ , ਦਣ੍ਡਕੇਸੁ ਠਿਤੇਸੁ ਹਿ;

ਏਕਸ੍ਮਿਂ ਪਤਮਾਨੇ ਤੁ, ਤਥੇਵ ਪਤਤੀਤਰੋ.

ਤੇਨਾਹੁ ਪੋਰਾਣਾ –

੧੨੧੫.

‘‘ਯਮਕਂ ਨਾਮਰੂਪਞ੍ਚ, ਉਭੋ ਅਞ੍ਞੋਞ੍ਞਨਿਸ੍ਸਿਤਾ;

ਏਕਸ੍ਮਿਂ ਭਿਜ੍ਜਮਾਨਸ੍ਮਿਂ, ਉਭੋ ਭਿਜ੍ਜਨ੍ਤਿ ਪਚ੍ਚਯਾ’’ਤਿ.

੧੨੧੬.

ਉਤਿਨ੍ਨਂ ਨਾਮਰੂਪਾਨਂ, ਨਾਮਂ ਨਿਤ੍ਤੇਜਮੇਤ੍ਥ ਤਂ;

ਸਕੇਨੇਵ ਹਿ ਤੇਜੇਨ, ਨ ਸਕ੍ਕੋਤਿ ਪਵਤ੍ਤਿਤੁਂ.

੧੨੧੭.

ਨ ਬ੍ਯਾਹਰਤਿ ਨੋ ਸੇਤਿ, ਨ ਤਿਟ੍ਠਤਿ ਨ ਗਚ੍ਛਤਿ;

ਨ ਭੇਦੇਤਿ ਨ ਚੋਰੇਤਿ, ਨ ਭੁਞ੍ਜਤਿ ਨ ਖਾਦਤਿ.

੧੨੧੮.

ਤਥਾ ਰੂਪਮ੍ਪਿ ਨਿਤ੍ਤੇਜਂ, ਵਿਨਾ ਨਾਮਞ੍ਚ ਸਬ੍ਬਥਾ;

ਸਕੇਨੇਵ ਹਿ ਤੇਜੇਨ, ਨ ਸਕ੍ਕੋਤਿ ਪਵਤ੍ਤਿਤੁਂ.

੧੨੧੯.

ਭੁਞ੍ਜਾਮੀਤਿ ਪਿਵਾਮੀਤਿ, ਖਾਦਾਮੀਤਿ ਤਥੇਵ ਚ;

ਰੋਦਾਮੀਤਿ ਹਸਾਮੀਤਿ, ਰੂਪਸ੍ਸੇਤਂ ਨ ਵਿਜ੍ਜਤਿ.

੧੨੨੦.

ਨਾਮਂ ¶ ਨਿਸ੍ਸਾਯ ਰੂਪਂ ਤੁ, ਰੂਪਂ ਨਿਸ੍ਸਾਯ ਨਾਮਕਂ;

ਪਵਤ੍ਤਤਿ ਸਦਾ ਸਬ੍ਬਂ, ਪਞ੍ਚਵੋਕਾਰਭੂਮਿਯਂ.

੧੨੨੧.

ਇਮਸ੍ਸ ਪਨ ਅਤ੍ਥਸ੍ਸ, ਆਵਿਭਾਵਤ੍ਥਮੇਵ ਚ;

ਜਚ੍ਚਨ੍ਧਪੀਠਸਪ੍ਪੀਨਂ, ਵਤ੍ਤਬ੍ਬਾ ਉਪਮਾ ਇਧ.

੧੨੨੨.

ਯਥਾ ਹਿ ਨਾਵਂ ਨਿਸ੍ਸਾਯ, ਮਨੁਸ੍ਸਾ ਯਨ੍ਤਿ ਅਣ੍ਣਵੇ;

ਏਵਂ ਰੂਪਮ੍ਪਿ ਨਿਸ੍ਸਾਯ, ਨਾਮਕਾਯੋ ਪਵਤ੍ਤਤਿ.

੧੨੨੩.

ਯਥਾ ¶ ਮਨੁਸ੍ਸੇ ਨਿਸ੍ਸਾਯ, ਨਾਵਾ ਗਚ੍ਛਤਿ ਅਣ੍ਣਵੇ;

ਏਵਂ ਨਾਮਮ੍ਪਿ ਨਿਸ੍ਸਾਯ, ਰੂਪਕਾਯੋ ਪਵਤ੍ਤਤਿ.

੧੨੨੪.

ਸਤ੍ਤਸਞ੍ਞਂ ਵਿਨੋਦੇਤ੍ਵਾ, ਨਾਮਰੂਪਸ੍ਸ ਸਬ੍ਬਥਾ;

ਯਾਥਾਵਦਸ੍ਸਨਂ ਏਤਂ, ‘‘ਦਿਟ੍ਠਿਸੁਦ੍ਧੀ’’ਤਿ ਵੁਚ੍ਚਤਿ.

੧੨੨੫.

ਪਰਿਮੁਚ੍ਚਿਤੁਕਾਮੋ ਚ, ਦੁਕ੍ਖਤੋ ਜਾਤਿਆਦਿਤੋ;

ਅਨ੍ਤਦ੍ਵਯਂ ਵਿਵਜ੍ਜੇਤ੍ਵਾ, ਭਾਵਯੇ ਪਨ ਪਣ੍ਡਿਤੋ.

੧੨੨੬.

ਦਿਟ੍ਠਿਵਿਸੁਦ੍ਧਿਮਿਮਂ ਪਰਿਸੁਦ੍ਧਂ,

ਸੁਟ੍ਠੁਤਰਂ ਤੁ ਕਰੋਤਿ ਨਰੋ ਯੋ;

ਦਿਟ੍ਠਿਗਤਾਨਿ ਮਲਾਨਿ ਅਸੇਸਂ,

ਨਾਸਮੁਪੇਨ੍ਤਿ ਹਿ ਤਸ੍ਸ ਨਰਸ੍ਸ.

ਇਤਿ ਅਭਿਧਮ੍ਮਾਵਤਾਰੇ ਦਿਟ੍ਠਿਵਿਸੁਦ੍ਧਿਨਿਦ੍ਦੇਸੋ ਨਾਮ

ਅਟ੍ਠਾਰਸਮੋ ਪਰਿਚ੍ਛੇਦੋ.

੧੯. ਏਕੂਨਵੀਸਤਿਮੋ ਪਰਿਚ੍ਛੇਦੋ

ਕਙ੍ਖਾਵਿਤਰਣਵਿਸੁਦ੍ਧਿਨਿਦ੍ਦੇਸੋ

੧੨੨੭.

ਏਤਸ੍ਸ ¶ ¶ ਨਾਮਰੂਪਸ੍ਸ, ਜਾਨਿਤ੍ਵਾ ਹੇਤੁਪਚ੍ਚਯੇ;

ਕਙ੍ਖਾ ਤੀਸੁ ਪਨਦ੍ਧਾਸੁ, ਵਿਤਰਿਤ੍ਵਾ ਠਿਤਂ ਪਨ.

੧੨੨੮.

ਕਙ੍ਖਾਵਿਤਰਣਂ ਨਾਮ, ਞਾਣਂ ਤਂ ਸਮੁਦੀਰਿਤਂ;

ਤਂ ਸਮ੍ਪਾਦੇਤੁਕਾਮੇਨ, ਅਤ੍ਥਕਾਮੇਨ ਭਿਕ੍ਖੁਨਾ.

੧੨੨੯.

ਨਾਮਰੂਪਸ੍ਸ ਕੋ ਹੇਤੁ, ਕੋਨੁ ਵਾ ਪਚ੍ਚਯੋ ਭਵੇ;

ਆਵਜ੍ਜਿਤ੍ਵਾ ਤਮਿਚ੍ਚੇਵਂ, ਰੂਪਕਾਯਸ੍ਸ ਤਾਵਦੇ.

੧੨੩੦.

ਕੇਸਾ ਲੋਮਾ ਨਖਾ ਦਨ੍ਤਾ, ਤਚੋ ਮਂਸਂ ਨਹਾਰੁ ਚ;

ਅਟ੍ਠਿਮਿਞ੍ਜਞ੍ਚ ਵਕ੍ਕਞ੍ਚ, ਹਦਯਂ ਯਕਨਮ੍ਪਿ ਚ.

੧੨੩੧.

ਇਚ੍ਚੇਵਮਾਦਿਬਾਤ੍ਤਿਂਸ-ਕੋਟ੍ਠਾਸਪਚ੍ਚਯਸ੍ਸ ਹਿ;

ਪਰਿਗ੍ਗਣ੍ਹਤਿ ਕਾਯਸ੍ਸ, ਮਨਸਾ ਹੇਤੁਪਚ੍ਚਯੇ.

੧੨੩੨.

ਅਵਿਜ੍ਜਾ ¶ ਤਣ੍ਹੁਪਾਦਾਨਂ, ਕਮ੍ਮਂ ਹੇਤੁ ਚਤੁਬ੍ਬਿਧੋ;

ਏਤਸ੍ਸ ਰੂਪਕਾਯਸ੍ਸ, ਆਹਾਰੋ ਪਚ੍ਚਯੋ ਮਤੋ.

੧੨੩੩.

ਜਨਕੋ ਹੇਤੁ ਅਕ੍ਖਾਤੋ,

ਪਚ੍ਚਯੋ ਅਨੁਪਾਲਕੋ;

ਹੇਤ੍ਵਙ੍ਕੁਰਸ੍ਸ ਬੀਜਂ ਤੁ,

ਪਚ੍ਚਯਾ ਪਥਵਾਦਯੋ.

੧੨੩੪.

ਇਤਿਮੇ ਪਞ੍ਚ ਧਮ੍ਮਾ ਹਿ, ਹੇਤੁਪਚ੍ਚਯਤਂ ਗਤਾ;

ਅਵਿਜ੍ਜਾਦਯੋ ਤਯੋ ਤਤ੍ਥ, ਮਾਤਾਵ ਉਪਨਿਸ੍ਸਯਾ.

੧੨੩੫.

ਜਨਕਂ ਪਨ ਕਮ੍ਮਂ ਤੁ, ਪੁਤ੍ਤਸ੍ਸ ਹਿ ਪਿਤਾ ਵਿਯ;

ਧਾਤੀ ਵਿਯ ਕੁਮਾਰਸ੍ਸ, ਆਹਾਰੋ ਧਾਰਕੋ ਭਵੇ.

੧੨੩੬.

ਇਚ੍ਚੇਵਂ ¶ ਰੂਪਕਾਯਸ੍ਸ, ਸੋ ਪਚ੍ਚਯਪਰਿਗ੍ਗਹਂ;

ਕਤ੍ਵਾ ਪੁਨਪਿ ‘‘ਚਕ੍ਖੁਞ੍ਚ, ਰੂਪਮਾਲੋਕਮੇਵ ਚ.

੧੨੩੭.

ਪਟਿਚ੍ਚ ਚਕ੍ਖੁਵਿਞ੍ਞਾਣਂ, ਹੋਤਿ’’ਇਚ੍ਚੇਵਮਾਦਿਨਾ;

ਨਯੇਨ ਨਾਮਕਾਯਸ੍ਸ, ਪਚ੍ਚਯਂ ਪਰਿਗਣ੍ਹਤਿ.

੧੨੩੮.

ਸੋ ਏਵਂ ਨਾਮਰੂਪਸ੍ਸ, ਵੁਤ੍ਤਿਂ ਦਿਸ੍ਵਾਨ ਪਚ੍ਚਯਾ;

ਯਥਾ ਏਤਰਹਿਦਂ ਤੁ, ਅਤੀਤੇਪਿ ਤਥੇਵਿਦਂ.

੧੨੩੯.

ਪਚ੍ਚਯਾ ਚ ਪਵਤ੍ਤਿਤ੍ਥ, ਤਥੇਵਾਨਾਗਤੇਪਿ ਚ;

ਪਵਤ੍ਤਿਸ੍ਸਤਿ ਅਦ੍ਧਾਸੁ, ਤੀਸ੍ਵੇਵਂ ਅਨੁਪਸ੍ਸਤਿ.

੧੨੪੦.

ਤਸ੍ਸੇਵਂ ¶ ਪਸ੍ਸਤੋ ਯਾ ਸਾ, ਪੁਬ੍ਬਨ੍ਤੇ ਪਞ੍ਚਧਾ ਤਥਾ;

ਅਪਰਨ੍ਤੇ ਸਿਯਾ ਕਙ੍ਖਾ, ਪਞ੍ਚਧਾ ਸਮੁਦੀਰਿਤਾ.

੧੨੪੧.

ਪਚ੍ਚੁਪ੍ਪਨ੍ਨੇਪਿ ਅਦ੍ਧਾਨੇ, ਛਬ੍ਬਿਧਾ ਪਰਿਕਿਤ੍ਤਿਤਾ;

ਸਬ੍ਬਾ ਚਾਨਵਸੇਸਾਵ, ਯੋਗਿਨੋ ਸਾ ਪਹਿਯ੍ਯਤਿ.

੧੨੪੨.

ਏਕੋ ਕਮ੍ਮਵਿਪਾਕਾਨਂ, ਵਸੇਨਾਪਿ ਚ ਪਣ੍ਡਿਤੋ;

ਏਤਸ੍ਸ ਨਾਮਰੂਪਸ੍ਸ, ਪਚ੍ਚਯਂ ਪਰਿਗਣ੍ਹਤਿ.

੧੨੪੩.

ਕਮ੍ਮਂ ਚਤੁਬ੍ਬਿਧਂ ਦਿਟ੍ਠ-ਧਮ੍ਮਵੇਦਨਿਯਂ ਤਥਾ;

ਉਪਪਜ੍ਜਾਪਰਾਪਰਿਯਾ-ਹੋਸਿਕਮ੍ਮਵਸਾ ਪਨ.

ਤਤ੍ਥ ¶ ਏਕਜਵਨਵੀਥਿਯਂ ਸਤ੍ਤਸੁ ਚਿਤ੍ਤੇਸੁ ਕੁਸਲਾ ਵਾ ਅਕੁਸਲਾ ਵਾ ਪਠਮਜਵਨਚੇਤਨਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ. ਤਂ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ, ਤਥਾ ਅਸਕ੍ਕੋਨ੍ਤਂ ਪਨ ‘‘ਅਹੋਸਿਕਮ੍ਮਂ ਨਾਹੋਸਿ ਕਮ੍ਮਵਿਪਾਕੋ, ਨ ਭਵਿਸ੍ਸਤਿ ਕਮ੍ਮਵਿਪਾਕੋ, ਨਤ੍ਥਿ ਕਮ੍ਮਵਿਪਾਕੋ’’ਤਿ ਇਮਸ੍ਸ ਤਿਕਸ੍ਸ ਵਸੇਨ ਅਹੋਸਿਕਮ੍ਮਂ ਨਾਮ ਹੋਤਿ. ਅਤ੍ਥਸਾਧਿਕਾ ਪਨ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤਮਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤਿ, ਤਥਾ ਅਸਕ੍ਕੋਨ੍ਤਂ ਵੁਤ੍ਤਨਯੇਨ ਅਹੋਸਿਕਮ੍ਮਂ ਨਾਮ ਹੋਤਿ. ਉਭਿਨ੍ਨਮਨ੍ਤਰੇ ਪਞ੍ਚਜਵਨਚੇਤਨਾ ਅਪਰਾਪਰਿਯਵੇਦਨੀਯਕਮ੍ਮਂ ਨਾਮ. ਤਮਨਾਗਤੇ ਯਦਾ ਓਕਾਸਂ ਲਭਤਿ, ਤਦਾ ਵਿਪਾਕਂ ਦੇਤਿ, ਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਂ ਨਾਮ ਨ ਹੋਤਿ.

੧੨੪੪.

ਅਪਰਂ ¶ ਚਤੁਬ੍ਬਿਧਂ ਕਮ੍ਮਂ, ਗਰੁਕਂ ਬਹੁਲਮ੍ਪਿ ਚ;

ਆਸਨ੍ਨਞ੍ਚ ਕਟਤ੍ਤਾ ਚ, ਕਮ੍ਮਨ੍ਤਿ ਸਮੁਦੀਰਿਤਂ.

੧੨੪੫.

ਅਞ੍ਞਂ ਚਤੁਬ੍ਬਿਧਂ ਕਮ੍ਮਂ, ਜਨਕਂ ਉਪਥਮ੍ਭਕਂ;

ਤਥੂਪਪੀਲ਼ਕਂ ਕਮ੍ਮ-ਮੁਪਘਾਤਕਮੇਵ ਚ.

ਤਤ੍ਥ ਜਨਕਂ ਨਾਮ ਕੁਸਲਂ ਵਾ ਅਕੁਸਲਂ ਵਾ ਕਮ੍ਮਂ ਪਟਿਸਨ੍ਧਿਯਮ੍ਪਿ ਪਵਤ੍ਤੇਪਿ ਰੂਪਾਰੂਪਵਿਪਾਕਕ੍ਖਨ੍ਧੇ ਜਨੇਤਿ. ਉਪਤ੍ਥਮ੍ਭਕਂ ਪਨ ਵਿਪਾਕਂ ਜਨੇਤੁਂ ਨ ਸਕ੍ਕੋਤਿ, ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਉਪਤ੍ਥਮ੍ਭੇਤਿ, ਅਦ੍ਧਾਨਂ ਪਵਤ੍ਤੇਤਿ. ਉਪਪੀਲ਼ਕਂ ਪਨ ਅਞ੍ਞੇਨ ਕਮ੍ਮੇਨ ਦਿਨ੍ਨਾਯ ਪਟਿਸਨ੍ਧਿਯਾ ਜਨਿਤੇ ਵਿਪਾਕੇ ਉਪ੍ਪਜ੍ਜਨਕਸੁਖਦੁਕ੍ਖਂ ਪੀਲ਼ੇਤਿ ਬਾਧਤਿ, ਅਦ੍ਧਾਨਂ ਪਵਤ੍ਤਿਤੁਂ ਨ ਦੇਤਿ. ਉਪਘਾਤਕਂ ਪਨ ਸਯਂ ਕੁਸਲਮ੍ਪਿ ਅਕੁਸਲਮ੍ਪਿ ਸਮਾਨਂ ¶ ਅਞ੍ਞਂ ਦੁਬ੍ਬਲਕਮ੍ਮਂ ਘਾਤੇਤ੍ਵਾ ਤਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ. ਏਵਂ ਪਨ ਕਮ੍ਮੇਨ ਓਕਾਸੇ ਕਤੇ ਤਂਵਿਪਾਕਮੁਪ੍ਪਨ੍ਨਂ ਨਾਮ ਹੋਤਿ. ਇਤਿ ਇਮਂ ਦ੍ਵਾਦਸਵਿਧਂ ਕਮ੍ਮਂ ਕਮ੍ਮਵਟ੍ਟੇ ਪਕ੍ਖਿਪਿਤ੍ਵਾ ¶ ਏਵਮੇਕੋ ਕਮ੍ਮਵਿਪਾਕਵਸੇਨ ਨਾਮਰੂਪਸ੍ਸ ਪਚ੍ਚਯਪਰਿਗ੍ਗਹਂ ਕਰੋਤਿ.

ਇਤਿ ਏਵਂ ਕਮ੍ਮਵਿਪਾਕਵਟ੍ਟਵਸੇਨ ਨਾਮਰੂਪਸ੍ਸ ਪਵਤ੍ਤਿਂ ਦਿਸ੍ਵਾ ‘‘ਯਥਾ ਇਦਂ ਏਤਰਹਿ, ਏਵਮਤੀਤੇਪਿ ਅਦ੍ਧਾਨੇ ਕਮ੍ਮਵਿਪਾਕਵਸੇਨ ਪਚ੍ਚਯਤੋ ਪਵਤ੍ਤਿਤ੍ਥ, ਅਨਾਗਤੇਪਿ ਪਵਤ੍ਤਿਸ੍ਸਤੀ’’ਤਿ ਇਤਿ ਕਮ੍ਮਞ੍ਚੇਵ ਵਿਪਾਕੋ ਚਾਤਿ ਕਮ੍ਮਵਿਪਾਕਵਸੇਨ ਲੋਕੋ ਪਵਤ੍ਤਤੀਤਿ ਤਂ ਸਮਨੁਪਸ੍ਸਤਿ. ਤਸ੍ਸੇਵਂ ਸਮਨੁਪਸ੍ਸਤੋ ਸਬ੍ਬਾ ਸੋਲ਼ਸਵਿਧਾ ਕਙ੍ਖਾ ਪਹਿਯ੍ਯਤਿ.

੧੨੪੬.

ਹੇਤੁਫਲਸ੍ਸ ਸਮ੍ਬਨ੍ਧਵਸੇਨੇਵ ਪਵਤ੍ਤਤਿ;

ਕੇਵਲਂ ਨਾਮਰੂਪਨ੍ਤਿ, ਸਮ੍ਮਾ ਸਮਨੁਪਸ੍ਸਤਿ.

੧੨੪੭.

ਏਵਂ ਕਾਰਣਤੋ ਉਦ੍ਧਂ, ਕਾਰਣਂ ਨ ਚ ਪਸ੍ਸਤਿ;

ਪਾਕਪਵਤ੍ਤਿਤੋ ਉਦ੍ਧਂ, ਨ ਪਾਕਪਟਿਵੇਦਕਂ.

ਤੇਨਾਹੁ ਪੋਰਾਣਾ –

੧੨੪੮.

‘‘ਕਮ੍ਮਸ੍ਸ ਕਾਰਕੋ ਨਤ੍ਥਿ, ਵਿਪਾਕਸ੍ਸ ਚ ਵੇਦਕੋ;

ਸੁਦ੍ਧਧਮ੍ਮਾ ਪਵਤ੍ਤਨ੍ਤਿ, ਏਵੇਤਂ ਸਮ੍ਮਦਸ੍ਸਨਂ.

੧੨੪੯.

ਏਵਂ ¶ ਕਮ੍ਮੇ ਵਿਪਾਕੇ ਚ, ਵਤ੍ਤਮਾਨੇ ਸਹੇਤੁਕੇ;

ਬੀਜਰੁਕ੍ਖਾਦਿਕਾਨਂਵ, ਪੁਬ੍ਬਾ ਕੋਟਿ ਨ ਨਾਯਤਿ.

੧੨੫੦.

ਅਨਾਗਤੇਪਿ ਸਂਸਾਰੇ, ਅਪ੍ਪਵਤ੍ਤਿ ਨ ਦਿਸ੍ਸਤਿ;

ਏਤਮਤ੍ਥਮਨਞ੍ਞਾਯ, ਤਿਤ੍ਥਿਯਾ ਅਸਯਂਵਸੀ.

੧੨੫੧.

ਸਤ੍ਤਸਞ੍ਞਂ ਗਹੇਤ੍ਵਾਨ, ਸਸ੍ਸਤੁਚ੍ਛੇਦਦਸ੍ਸਿਨੋ;

ਦ੍ਵਾਸਟ੍ਠਿਦਿਟ੍ਠਿਂ ਗਣ੍ਹਨ੍ਤਿ, ਅਞ੍ਞਮਞ੍ਞਵਿਰੋਧਿਨੋ.

੧੨੫੨.

ਦਿਟ੍ਠਿਬਨ੍ਧਨਬਦ੍ਧਾ ਤੇ, ਤਣ੍ਹਾਸੋਤੇਨ ਵੁਯ੍ਹਰੇ;

ਤਣ੍ਹਾਸੋਤੇਨ ਵੁਯ੍ਹਨ੍ਤਾ, ਨ ਤੇ ਦੁਕ੍ਖਾ ਪਮੁਚ੍ਚਰੇ.

੧੨੫੩.

ਏਵਮੇਤਂ ਅਭਿਞ੍ਞਾਯ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;

ਗਮ੍ਭੀਰਂ ਨਿਪੁਣਂ ਸੁਞ੍ਞਂ, ਪਚ੍ਚਯਂ ਪਟਿਵਿਜ੍ਝਤਿ.

੧੨੫੪.

ਕਮ੍ਮਂ ¶ ਨਤ੍ਥਿ ਵਿਪਾਕਮ੍ਹਿ, ਪਾਕੋ ਕਮ੍ਮੇ ਨ ਵਿਜ੍ਜਤਿ;

ਅਞ੍ਞਮਞ੍ਞਂ ਉਭੋ ਸੁਞ੍ਞਾ, ਨ ਚ ਕਮ੍ਮਂ ਵਿਨਾ ਫਲਂ.

੧੨੫੫.

ਯਥਾ ਨ ਸੂਰਿਯੇ ਅਗ੍ਗਿ, ਨ ਮਣਿਮ੍ਹਿ ਨ ਗੋਮਯੇ;

ਨ ਤੇਸਂ ਬਹਿ ਸੋ ਅਤ੍ਥਿ, ਸਮ੍ਭਾਰੇਹਿ ਚ ਜਾਯਤਿ.

੧੨੫੬.

ਤਥਾ ਨ ਅਨ੍ਤੋ ਕਮ੍ਮਸ੍ਸ, ਵਿਪਾਕੋ ਉਪਲਬ੍ਭਤਿ;

ਬਹਿਦ੍ਧਾਪਿ ਨ ਕਮ੍ਮਸ੍ਸ, ਨ ਕਮ੍ਮਂ ਤਤ੍ਥ ਵਿਜ੍ਜਤਿ.

੧੨੫੭.

ਫਲੇਨ ¶ ਸੁਞ੍ਞਂ ਤਂ ਕਮ੍ਮਂ, ਫਲਂ ਕਮ੍ਮੇ ਨ ਵਿਜ੍ਜਤਿ;

ਕਮ੍ਮਞ੍ਚ ਖੋ ਉਪਾਦਾਯ, ਤਤੋ ਨਿਬ੍ਬਤ੍ਤਤੇ ਫਲਂ.

੧੨੫੮.

ਨ ਹੇਤ੍ਥ ਦੇਵੋ ਬ੍ਰਹ੍ਮਾ ਵਾ,

ਸਂਸਾਰਸ੍ਸਤ੍ਥਿ ਕਾਰਕੋ;

ਸੁਦ੍ਧਧਮ੍ਮਾ ਪਵਤ੍ਤਨ੍ਤਿ,

ਹੇਤੁਸਮ੍ਭਾਰਪਚ੍ਚਯਾ’’ਤਿ.

੧੨੫੯.

ਏਵਂ ਨਾਨਪ੍ਪਕਾਰੇਹਿ, ਨਾਮਰੂਪਸ੍ਸ ਪਚ੍ਚਯਂ;

ਪਰਿਗ੍ਗਹੇਤ੍ਵਾ ਅਦ੍ਧਾਸੁ, ਤਰਿਤ੍ਵਾ ਕਙ੍ਖਮੁਟ੍ਠਿਤਂ.

੧੨੬੦.

ਕਙ੍ਖਾਵਿਤਰਣਂ ¶ ਨਾਮ, ਞਾਣਂ ਤਂ ਸਮੁਦੀਰਿਤਂ;

ਧਮ੍ਮਟ੍ਠਿਤਿ ਯਥਾਭੂਤਂ, ਤਂ ਸਮ੍ਮਾਦਸ੍ਸਨਨ੍ਤਿਪਿ.

੧੨੬੧.

ਇਮਿਨਾ ਪਨ ਞਾਣੇਨ,

ਸਂਯੁਤ੍ਤੋ ਬੁਦ੍ਧਸਾਸਨੇ;

ਹੋਤਿ ਲਦ੍ਧਪਤਿਟ੍ਠੋਵ,

ਸੋਤਾਪਨ੍ਨੋ ਹਿ ਚੂਲ਼ਕੋ.

੧੨੬੨.

ਤਸ੍ਮਾ ਸਪਞ੍ਞੋ ਪਨ ਅਤ੍ਥਕਾਮੋ,

ਯੋ ਨਾਮਰੂਪਸ੍ਸ ਹੇਤੁਪਚ੍ਚਯਾਨਿ;

ਪਰਿਗ੍ਗਹਂ ਸਾਧੁ ਕਰੋਤਿ ਧੀਰੋ,

ਖਿਪ੍ਪਂ ਸ ਨਿਬ੍ਬਾਨਪੁਰਂ ਉਪੇਤਿ.

ਇਤਿ ਅਭਿਧਮ੍ਮਾਵਤਾਰੇ ਕਙ੍ਖਾਵਿਤਰਣਵਿਸੁਦ੍ਧਿਨਿਦ੍ਦੇਸੋ ਨਾਮ

ਏਕੂਨਵੀਸਤਿਮੋ ਪਰਿਚ੍ਛੇਦੋ.

੨੦. ਵੀਸਤਿਮੋ ਪਰਿਚ੍ਛੇਦੋ

ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸੋ

੧੨੬੩.

ਕਲਾਪਸਮ੍ਮਸਨੇਨੇਵ ¶ ¶ ,

ਯੋਗੋ ਕਰਣਿਯੋ ਸਿਯਾ;

ਮਗ੍ਗਾਮਗ੍ਗੇ ਤੁ ਞਾਣਂ ਤ-

ਮਧਿਗਨ੍ਤੁਂ ਪਨਿਚ੍ਛਤਾ.

੧੨੬੪.

ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ, ਨਿਬ੍ਬਤ੍ਤਿ ਉਦਯੋ ਮਤੋ;

ਵਯੋ ਵਿਪਰਿਣਾਮੋਤਿ, ਤਸ੍ਸੇਵ ਸਮੁਦੀਰਿਤਾ.

੧੨੬੫.

ਅਨੁਪਸ੍ਸਨਾਪਿ ¶ ਞਾਣਨ੍ਤਿ, ਵਰਞਾਣੇਨ ਦੇਸਿਤਂ;

ਸੋ ਪਨੇਵਂ ਪਜਾਨਾਤਿ, ਯੋਗਾਵਚਰਮਾਣਵੋ.

੧੨੬੬.

ਇਮਸ੍ਸ ਨਾਮਰੂਪਸ੍ਸ, ਪੁਬ੍ਬੇ ਉਪ੍ਪਤ੍ਤਿਤੋ ਪਨ;

ਨਿਚਯੋ ਰਾਸਿ ਵਾ ਨਤ੍ਥਿ, ਤਥਾ ਉਪ੍ਪਜ੍ਜਤੋਪਿ ਚ.

੧੨੬੭.

ਰਾਸਿਤੋ ਨਿਚਯਾ ਵਾਪਿ, ਨਤ੍ਥਿ ਆਗਮਨਨ੍ਤਿ ਚ;

ਤਥਾ ਨਿਰੁਜ੍ਝਮਾਨਸ੍ਸ, ਨ ਦਿਸਾਗਮਨਨ੍ਤਿ ਚ.

੧੨੬੮.

ਨਿਰੁਦ੍ਧਸ੍ਸਾਪਿ ਏਕਸ੍ਮਿਂ, ਠਾਨੇ ਨਤ੍ਥਿ ਚਯੋਤਿ ਚ;

ਏਤ੍ਥ ਵੀਣੂਪਮਾ ਵੁਤ੍ਤਾ, ਏਤਸ੍ਸਤ੍ਥਸ੍ਸ ਦੀਪਨੇ.

੧੨੬੯.

ਉਦਬ੍ਬਯਮਨਕ੍ਕਾਰਮੇਵਂ ਸਙ੍ਖੇਪਤੋ ਪਨ;

ਕਤ੍ਵਾ ਤਸ੍ਸੇਵ ਞਾਣਸ੍ਸ, ਵਿਭਙ੍ਗਸ੍ਸ ਵਸੇਨ ਤੁ.

੧੨੭੦.

‘‘ਅਵਿਜ੍ਜਾਸਮੁਦਯਾ ਰੂਪਸਮੁਦਯੋ’’ਤਿ ਹਿ ਆਦਿਨਾ;

ਨਯੇਨੇਕੇਕਖਨ੍ਧਸ੍ਸ, ਉਦਯਬ੍ਬਯਦਸ੍ਸਨੇ.

੧੨੭੧.

ਦਸ ਦਸਾਤਿ ਕਤ੍ਵਾਨ, ਵੁਤ੍ਤਾ ਪਞ੍ਞਾਸਲਕ੍ਖਣਾ;

ਤੇਸਂ ਪਨ ਵਸੇਨਾਪਿ, ਧਮ੍ਮੇ ਸਮਨੁਪਸ੍ਸਤਿ.

੧੨੭੨.

ਏਵਂ ਰੂਪੁਦਯੋ ਹੋਤਿ, ਏਵਮਸ੍ਸ ਵਯੋ ਇਤਿ;

ਉਦੇਤਿ ਏਵਂ ਰੂਪਮ੍ਪਿ, ਏਵਂ ਰੂਪਂ ਤੁ ਵੇਤਿ ਚ.

੧੨੭੩.

ਏਵਂ ¶ ਪਚ੍ਚਯਤੋਪੇਤ੍ਥ, ਖਣਤੋ ਉਦਯਬ੍ਬਯਂ;

ਪਸ੍ਸਤੋ ਸਬ੍ਬਧਮ੍ਮਾ ਚ, ਪਾਕਟਾ ਹੋਨ੍ਤਿ ਤਸ੍ਸ ਤੇ.

੧੨੭੪.

ਉਦਕੇ ਦਣ੍ਡਰਾਜੀਵ, ਆਰਗ੍ਗੇਰਿਵ ਸਾਸਪੋ;

ਵਿਜ੍ਜੁਪ੍ਪਾਦਾਵ ਧਮ੍ਮਾ ਤੇ, ਪਰਿਤ੍ਤਟ੍ਠਾਯਿਨੋ ਸਿਯੁਂ.

੧੨੭੫.

ਕਦਲੀਸੁਪਿਨਾਲਾਤਚਕ੍ਕਮਾਯੁਪਮਾ ਇਮੇ;

ਅਸਾਰਾ ਪਨ ਨਿਸ੍ਸਾਰਾ, ਹੁਤ੍ਵਾ ਖਾਯਨ੍ਤਿ ਯੋਗਿਨੋ.

੧੨੭੬.

ਏਵਮੇਤ੍ਤਾਵਤਾ ¶ ਤੇਨ, ਉਦਯਬ੍ਬਯਦਸ੍ਸਨਂ;

ਲਕ੍ਖਣਾਨਿ ਚ ਪਞ੍ਞਾਸ, ਪਟਿਵਿਜ੍ਝ ਠਿਤਂ ਪਨ.

੧੨੭੭.

ਞਾਣਂ ¶ ਅਧਿਗਤਂ ਹੋਤਿ, ਤਰੁਣਂ ਪਠਮਂ ਪਨ;

ਯਸ੍ਸ ਚਾਧਿਗਮਾ ਯੋਗੀ, ਹੋਤਾਰਦ੍ਧਵਿਪਸ੍ਸਕੋ.

੧੨੭੮.

ਵਿਪਸ੍ਸਨਾਯ ਹੇਤਾਯ,

ਕਰੁਣਾਯਾਥ ਯੋਗਿਨੋ;

ਵਿਪਸ੍ਸਕਸ੍ਸ ਜਾਯਨ੍ਤੇ,

ਉਪਕ੍ਲੇਸਾ ਦਸੇਵਿਮੇ.

੧੨੭੯.

ਓਭਾਸੋ ਪੀਤਿ ਪਸ੍ਸਦ੍ਧਿ, ਞਾਣਂ ਸਦ੍ਧਾ ਸਤੀ ਸੁਖਂ;

ਉਪੇਕ੍ਖਾ ਵੀਰਿਯਂ ਨਿਕਨ੍ਤੀਤਿ, ਉਪਕ੍ਲੇਸਾ ਦਸੇਵਿਮੇ.

੧੨੮੦.

ਸਮ੍ਪਤ੍ਤਪਟਿਵੇਧਸ੍ਸ, ਸੋਤਾਪਨ੍ਨਾਦਿਨੋਪਿ ਚ;

ਤਥਾ ਵਿਪ੍ਪਟਿਪਨ੍ਨਸ੍ਸ, ਉਪਕ੍ਲੇਸਾ ਨ ਜਾਯਰੇ.

੧੨੮੧.

ਸਮ੍ਮਾਵ ਪਟਿਪਨ੍ਨਸ੍ਸ, ਯੁਤ੍ਤਯੋਗਸ੍ਸ ਭਿਕ੍ਖੁਨੋ;

ਸਦਾ ਵਿਪਸ੍ਸਕਸ੍ਸੇਵ, ਉਪ੍ਪਜ੍ਜਨ੍ਤਿ ਕਿਰਸ੍ਸੁ ਤੇ.

੧੨੮੨.

ਵਿਪਸ੍ਸਨਾਯ ਓਭਾਸੋ, ਓਭਾਸੋਤਿ ਪਵੁਚ੍ਚਤਿ;

ਤਸ੍ਮਿਂ ਪਨ ਸਮੁਪ੍ਪਨ੍ਨੇ, ਯੋਗਾਵਚਰਭਿਕ੍ਖੁ ਸੋ.

੧੨੮੩.

ਮਗ੍ਗਪ੍ਪਤ੍ਤੋ ਫਲਪ੍ਪਤ੍ਤੋ, ਅਹਮਸ੍ਮੀਤਿ ਗਣ੍ਹਤਿ;

ਅਮਗ੍ਗਂਯੇਵ ਮਗ੍ਗੋਤਿ, ਤਸ੍ਸੇਵਂ ਪਨ ਗਣ੍ਹਤੋ.

੧੨੮੪.

ਏਵਂ ¶ ਵਿਪਸ੍ਸਨਾਵੀਥਿ,

ਓਕ੍ਕਨ੍ਤਾ ਨਾਮ ਹੋਤਿ ਸਾ;

ਓਭਾਸਮੇਵ ਸੋ ਭਿਕ੍ਖੁ,

ਅਸ੍ਸਾਦੇਨ੍ਤੋ ਨਿਸੀਦਤਿ.