📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਅਨੁਦੀਪਨੀਪਾਠ

੧. ਚਿਤ੍ਤਸਙ੍ਗਹਅਨੁਦੀਪਨਾ

ਅਨਨ੍ਤਞ੍ਞਾਣਂ ਨਤ੍ਵਾਨ, ਲੋਕਾਲੋਕਕਰਂ ਜਿਨਂ;

ਕਰਿਸ੍ਸਾਮਿ ਪਰਮਤ੍ਥ-ਦੀਪਨਿਯਾ ਨੁਦੀਪਨਿਂ.

[ਤਤ੍ਥ, ਲੋਕਾਲੋਕਕਰਨ੍ਤਿ ਦਸਸਹਸ੍ਸਿਲੋਕਧਾਤੁਯਂ ਚਤੁਸ੍ਸਚ੍ਚਧਮ੍ਮਦੇਸਨਾਲੋਕਕਾਰਕਂ. ਪਰਮਤ੍ਥਦੀਪਨੀਤਿ ਏਤ੍ਥ ਅਤ੍ਥੋ ਦੁਵਿਧੋ ਪਧਾਨਤ੍ਥੋਚ ਪਰਿਯਾਯਤ੍ਥੋਚ. ਤਤ੍ਥ ਪਧਾਨਤ੍ਥੋ ਪਰਮਤ੍ਥੋਨਾਮ, ਪਧਾਨਤ੍ਥੋਤਿਚ ਪਦਵਾਕ੍ਯਾਨਂ ਮੁਖ੍ਯਤ੍ਥੋ ਉਜੁਕਤ੍ਥੋ. ਪਰਿਯਾਯਤ੍ਥੋਪਿ ਕੋਚਿ, ਯੁਤ੍ਤਰੂਪੋ ਅਤ੍ਥੋ ਪਰਮਤ੍ਥੋ ਯੇਵ. ਪਰਮਤ੍ਥਂਦੀਪੇਤਿਪਕਾਸੇਤੀਤਿਪਰਮਤ੍ਥਦੀਪਨੀ]. ਤਂਪਰ ਮਤ੍ਥਦੀਪਨਿਂਕਰੋਨ੍ਤੋਆਚਰਿਯੋ ਪਥਮਂਤਾਵ ਬੁਦ੍ਧਸ੍ਸਭਗਵਤੋ ਪਣਾਮਂਕਰੋਤਿ ‘‘ਉਦਯਾਯਸ੍ਸਾ’’ਤਿਆਦਿਨਾ.

ਤਤ੍ਥ ‘‘ਉਦਯਾ’’ਤਿ ਉਦਯਤੋਉਗ੍ਗਮਨਤੋ. ‘‘ਯਸ੍ਸਾ’’ਤਿ ਯਸ੍ਸ ਸਬ੍ਬਞ੍ਞੁਬੁਦ੍ਧਮਹਾਸੂਰਸ੍ਸ. ‘‘ਏਕਸ੍ਸਾ’’ਤਿ ਅਦੁਤੀਯਸ੍ਸ, ਅਸਦਿ ਸਸ੍ਸਵਾ. ‘‘ਸਦ੍ਧਮ੍ਮਰਂਸਿਜਾਲਿਨੋ’’ਤਿ ਏਤ੍ਥਸਦ੍ਧਮ੍ਮੋਤਿਸਤ੍ਥੁਸਾ ਸਨਧਮ੍ਮੋਵੁਚ੍ਚਤਿ. ਤਤ੍ਥਚ ਚਤੁਰਾਸੀਤਿਸਹਸ੍ਸਧਮ੍ਮਕ੍ਖਨ੍ਧਸਙ੍ਖਾਤੋ ਦੇਸਨਾਸਦ੍ਧਮ੍ਮੋਇਧਾਧਿਪ੍ਪੇਤੋ. ਸਦ੍ਧਮ੍ਮਸਙ੍ਖਾਤਂਰਂਸਿਜਾਲਂਅਸ੍ਸ ਅਤ੍ਥੀਤਿ ਸਦ੍ਧਮ੍ਮਰਂਸਿਜਾਲੀ. ਤਸ੍ਸਸਦ੍ਧਮ੍ਮਰਂਸਿਜਾਲਿਨੋ. ‘‘ਪਬੁਜ੍ਝਿਂਸੂ’’ਤਿ ਵਿਕਸਿਂਸੁ, ਚਤੁਸ੍ਸਚ੍ਚਞ੍ਞਾਣਵਿਕਾਸਂਤਞ੍ਞਾਣਸਮ੍ਫੁਲ੍ਲਂ ਪਾਪੁਣਿਂਸੁ. ‘‘ਜਨਮ੍ਬੁਜਾ’’ਤਿ ਜਨਸਙ੍ਖਾਤਾਅਮ੍ਬੁਜਾ. ਤਤ੍ਥਜਨਾਨਾਮ ਇਧਬੋਧਨੇਯ੍ਯਸਤ੍ਤਾ ਅਧਿਪ੍ਪੇਤਾ, ਯੇਸਬ੍ਬਞ੍ਞੁਦੇਸਨਂ ਸੁਤ੍ਵਾ ਚਤੁਸ੍ਸਚ੍ਚ ਧਮ੍ਮਂ ਬੁਜ੍ਝਿਸ੍ਸਨ੍ਤਿ. ਅਮ੍ਬੁਜਾਤਿਪਦੁਮਾ. ‘‘ਜਾਤਿਕ੍ਖੇਤ੍ਤੇਮਹਾਸਰੇਤਿ’’ ਜਾਤਿਕ੍ਖੇਤ੍ਤ ਸਙ੍ਖਾਤੇ ਜਨਮ੍ਬੁਜਮਹਾਸਰੇ. ਤਤ੍ਥ ਜਾਤਿਕ੍ਖੇਤ੍ਤਂ ਨਾਮਦਸਸਹਸ੍ਸ ਚਕ੍ਕਵਾਲ਼ਂ, ਯਂ ਏਕਂ ਬੁਦ੍ਧਕ੍ਖੇਤ੍ਤਨ੍ਤਿ ਵੁਚ੍ਚਤਿ. ਯਤ੍ਥ ਚ ਮਹਾਬੋਧਿਸਤ੍ਤਾਨਂ ਬੁਦ੍ਧਭਾਵਤ੍ਥਾਯ ਪਥਮਮਹਾਭਿਨੀਹਾਰਕਾਲਾਦੀਸੁ ਏਕਪ੍ਪਹਾਰੇਨਪਥਵਿਕਮ੍ਪਨਾਦੀਨਿਪਵਤ੍ਤਨ੍ਤਿ. ਯਤ੍ਥਚਵਸਨ੍ਤਾਦੇਵਬ੍ਰਹ੍ਮਾਨੋ ਬੁਦ੍ਧਪਰਿਸਾਹੋਨ੍ਤਿ. ਜਾਤਿਕ੍ਖੇਤ੍ਤੇਮਹਾਸਰੇਯਸ੍ਸ ਏਕਸ੍ਸ ਸਦ੍ਧਮ੍ਮਰਂਸਿਜਾਲਿਨੋ ਮਹਾਸੂਰਸ੍ਸ ਉਦਯਾ ਤਸ੍ਮਿਂ ਜਾਤਿਕ੍ਖੇਤ੍ਤੇ ਮਹਾਸਰੇ ਜਨਮ੍ਬੁਜਾਪਬੁਜ੍ਝਿਂਸੂਤਿਯੋਜਨਾ.

‘‘ਤਂ ਮਹਾਸੂਰ’’ਨ੍ਤਿ ਸਬ੍ਬਞ੍ਞੁਬੁਦ੍ਧਮਹਾਸੂਰਿਯਮਣ੍ਡਲਂ. ਜਨਮ੍ਬੁਜ ਸਨ੍ਤਾਨੇਸੁਪਵਤ੍ਤਂ ਮਹਨ੍ਤਂ ਮੋਹਤਮਂਨੂਦਤਿ ਅਪਨੇਤਿ, ਸਦ੍ਧਮ੍ਮਰਂਸਿਜਾਲਂ ਵਿਸ੍ਸਜ੍ਜਨ੍ਤੋ ਅਨ੍ਤਰਧਾਪੇਤੀਤਿ ਮਹਾਮੋਹਤਮੋਨੁਦੋ. ਤਂ ‘‘ਮਹਾਮੋਹਤਮੋਨੁਦਂ’’.

ਏਵਂ ਬੁਦ੍ਧਸ੍ਸਪਣਾਮਂ ਕਤ੍ਵਾ ਅਤ੍ਤਨਾ ਇਚ੍ਛਿਤਂ ਪਣਾਮਪ੍ਪਯੋਜਨਂ ਪਰਿਣਾਮੇਨ੍ਤੋ ‘‘ਸਞ੍ਜਾਤ’’ਨ੍ਤਿਆਦਿਮਾਹ. ‘‘ਸੋਮਹਾਸੂਰੋਮਯ੍ਹਂ ਹਦਯੇ ਸਞ੍ਜਾਤਂ ਤਮੋਖਨ੍ਧਂ ਪਨੂਦਤ’’ਨ੍ਤਿਯੋਜਨਾ. ਤਤ੍ਥ ‘‘ਸਞ੍ਜਾਤ’’ਨ੍ਤਿ ਸੁਟ੍ਠੁਜਾਤਂ, ਅਨਮਤਗ੍ਗੇਸਂਸਾਰੇ ਦਲ਼੍ਹਂ ਪਵਤ੍ਤਨ੍ਤਿ ਅਤ੍ਥੋ. ‘‘ਤਮੋਖਨ੍ਧ’’ਨ੍ਤਿ ਮਹਾਮੋਹਤਮੋਖਨ੍ਧਂ. ਸਬ੍ਬਕਿਲੇਸਤਮੋਖਨ੍ਧਂ ਵਾ. ਅਨ੍ਤਰਾਯਕਰਾਨਿ ਉਪਵੀਲ਼ਕੋਪਘਾਤਕਕਮ੍ਮਾਨਿਪਿ ਤਮੋਖਨ੍ਧੇ ਸਙ੍ਗਹਿਤਾਨਿ ਏਵ. ਤਥਾ ਰੋਗਾਦਯੋ ਅਨ੍ਤਰਾਯ ਧਮ੍ਮਾਪਿ ਤਮੋਜਾਤਿਕਾਏਵਤਮੋਤਮਪਰਾਯਨੋਤਿਆਦੀਸੁ. ‘‘ਪਨੂਦਤ’’ਨ੍ਤਿ ਪਨੂਦਤੁ, ਅਪਨੇਤੁ, ਅਨ੍ਤਰਧਾਪੇਤੁ.

ਏਵਂ ਸਪ੍ਪਯੋਜਨਂ ਪਣਾਮਂ ਕਤ੍ਵਾ ਇਦਾਨਿ ਸਨਿਦਾਨਂ ਗਨ੍ਥਪ੍ਪਟਿਞ੍ਞਂ ਕਰੋਨ੍ਤੋ ‘‘ਪੋਰਾਣਕੇਹੀ’’ਤਿਆਦਿਮਾਹ. ਤਤ੍ਥ ਨਿਦਾਨਂ ਨਾਮ ਗਨ੍ਥਪ੍ਪਟਿਞ੍ਞਾਯ ਆਸਨ੍ਨਕਾਰਣਂ. ਕਤਧਂਪਨਤਨ੍ਤਿ, ਸਾਰਤ੍ਥਾਭਿਮਾਨੀਨਂ ਯਾਚਨਞ੍ਚਸਙ੍ਗਹਸ੍ਸਵਿਪੁਲਤ੍ਥਤਾ ਚ.

ਤਤ੍ਥ ਦ੍ਵੀਹਿ ਗਾਥਾਹਿ ਸਕਾਰਣਂ ਯਾਚਨਂ ਦਸ੍ਸੇਤਿ. ਪੁਨ ਦ੍ਵੀਹਿ ਗਾਥਾਹਿ ਸਉਪਮਂਵਿਪੁਲਤ੍ਥਤਂਦਸ੍ਸੇਤਿ. ‘‘ਤਸ੍ਮਾ’’ਤਿਆਦਿਨਾ ਗਨ੍ਥਪ੍ਪਕਾਰ ਗਨ੍ਥਗੁਣੇਹਿ ਸਹਗਨ੍ਥਪ੍ਪਟਿਞ੍ਞਂ ਦਸ੍ਸੇਤਿ. ਤਤ੍ਥ ਆਦਿਗਾਥਾਯਂ ‘‘ਅਭਿਧਮ੍ਮਤ੍ਥਸਙ੍ਗਹੇ ਪੋਰਾਣਕੇਹਿ ਵਿਞ੍ਞੂਹਿ ਵਣ੍ਣਿਤਾ ਬਹੂਵਣ੍ਣਨਾ ਇਧਲੋਕਮ੍ਹਿਦਿਸ੍ਸਨ੍ਤੀ’’ਤਿ ਯੋਜਨਾ. ‘‘ਵਣ੍ਣਨਾ’’ਤਿ ਪੋਰਾਣਟੀਕਾਯੋ ਵੁਚ੍ਚਨ੍ਤਿ. ਏਵਞ੍ਚਸਤਿ ਕਸ੍ਮਾ ਅਭਿਨਵਂ ਵਣ੍ਣਨਂ ਯਾਚਨ੍ਤੀਤਿ. ‘‘ਯੇ ਸਾਰਤ੍ਥਾਭਿਮਾਨਿਨੋ, ਤੇ ਤਾਹਿਬਹੂਹਿ ਪੋਰਾਣਵਣ੍ਣਨਾਹਿਤੁਟ੍ਠਿਂ ਨਵਿਨ੍ਦਨ੍ਤਿ. ਤਸ੍ਮਾ ਤਂ ਯਾਚਨ੍ਤੀ’’ਤਿਯੋਜਨਾ. ਏਤੇਨ ਅਪ੍ਪਸਾਰਤ੍ਥਾ ਏਵ ਤਾਪੋਰਾਣਵਣ੍ਣਨਾਯੋਤਿਪਿ ਦੀਪੇਤਿਯੇਵ. ਤਤ੍ਥ ‘‘ਤੁਟ੍ਠਿ’’ਨ੍ਤਿ ਸਨ੍ਤੁਟ੍ਠਿਂ. ਨਵਿਨ੍ਦਨ੍ਤਿਨਪਟਿਲਭਨ੍ਤਿ. ‘‘ਯੇ’’ਤਿਯੇਜਨਾ.

ਸਾਰਤ੍ਥਮੇਵ ਅਭਿਮਾਨੇਨ੍ਤਿ, ਵਿਸੇਸੇਨ ਨਨ੍ਦਨ੍ਤਿਸੀਲੇਨਾਤਿ ਸਾਰਤ੍ਥਾਭਿਮਾਨਿਨੋ. ਤੇਨਵਿਨ੍ਦਨ੍ਤੀਤਿਪੁਰਿਮੇਨਸਮ੍ਬਨ੍ਧੋ. ਪੁਨ ‘‘ਤੇ’’ਤਿ ਤਾਹਿ ਤੁਟ੍ਠਿਂ ਅਵਿਨ੍ਦਨ੍ਤਾ ਤੇਜਨਾ. ‘‘ਮ’’ਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ. ‘‘ਸਙ੍ਗਮ੍ਮਾ’’ਤਿ ਸਮਾਗਨ੍ਤ੍ਵਾ. ਯਸ੍ਮਾ ਪਰਮਤ੍ਥਸ੍ਸਦੀਪਨਂ ਯਾਚਨ੍ਤਿ, ਤਸ੍ਮਾ ਇਮਿਸ੍ਸਾਟੀਕਾਯ ‘‘ਪਰਮਤ੍ਥਦੀਪਨੀ’’ਤਿ ਨਾਮਂਪਿ ਸਿਦ੍ਧਂਹੋਤਿ. ‘‘ਮਹਣ੍ਣਵੇ’’ਤਿ ਮਹਾਸਮੁਦ੍ਦੇ. ‘‘ਰਤਨਾਨੀ’’ਤਿ ਸੁਵਣ੍ਣਰਜਤਾਦੀਨਿ ਰਤਨਾਨਿ. ‘‘ਉਦ੍ਧਰਿਤ੍ਵਾ’’ਤਿ ਉਦ੍ਧਂ ਆਹਰਿਤ੍ਵਾ. ‘‘ਯਥਿਚ੍ਛਕਂਵੀ’’ਤਿਯਥਿਚ੍ਛਿਤਂਪਿ. ਯਤ੍ਤਕਂ ਇਚ੍ਛਨ੍ਤਿ, ਤਤ੍ਤਕਂਵੀਤਿ ਅਧਿਪ੍ਪਾਯੋ. ‘‘ਦਜ੍ਜੇਯ੍ਯੁਂ’’ਤਿ ਦਦੇਯ੍ਯੁਂ. ਕਾਮਂ ਦਦਨ੍ਤੂਤਿ ਅਤ੍ਥੋ. ਏਯ੍ਯਾਦਿਵਚਨਾਨਂ ਅਨੁਮਤਿ ਅਤ੍ਥੇਪਵਤ੍ਤਨਤੋ. ‘‘ਨਵਤ੍ਤਬ੍ਬਾਵਊਨਤਾ’’ਤਿ ਮਹਣ੍ਣਵੇਰਤਨਾਨਂ ਊਨਤਾਹਾਨਿਤਾ ਨਵਤ੍ਤਬ੍ਬਾਵ. ਕਸ੍ਮਾ, ਅਪਰਿਮਾਣ ਰਤਨਾਧਿਟ੍ਠਾਨਤ੍ਤਾ ਮਹਾਸਮੁਦ੍ਦਸ੍ਸ. ਯਤੋ ਸੋ ਸਾਗਰੋਤਿ ਵੁਚ੍ਚਤਿ, ਸਾਨਂਧਨਰਤਨਾਨਂ ਗੇਹਗਬ੍ਭਸਦਿਸਤ੍ਤਾਸਾਗਰੋਤਿ ਹਿਸ੍ਸ ਅਤ੍ਥੋ.

‘‘ਤਥੇਵੇਤ੍ਥਾ’’ਤਿ ਏਤਸ੍ਮਿਂ ਅਭਿਧਮ੍ਮਤ੍ਥ ਸਙ੍ਗਹੇਤਥੇਵ. ‘‘ਵਿਪੁਲਤ੍ਥਾ’’ਤਿ ਮਹਨ੍ਤਾ ਅਤ੍ਥਾ. ‘‘ਰਤਨੂਪਮਾ’’ਤਿ ਮਹਣ੍ਣਵੇ ਰਤਨਸਦਿਸਾ. ‘‘ਸਤਕ੍ਖਤ੍ਤੁਂਪੀ’’ਤਿ ਅਨੇਕਸਤਵਾਰਂਪਿ. ‘‘ਵਣ੍ਣੇਯ੍ਯੁਂ’’ਤਿ ਕਾਮਂਵਣ੍ਣੇਨ੍ਤੁ. ‘‘ਪਰਿਯਾਦਿਨ੍ਨਾ’’ਤਿ ਪਰਿਤੋ ਅਨਵਸੇਸਤੋ ਆਦਿਨ੍ਨਾ ਗਹਿਤਾ. ਪਰਿਕ੍ਖੀਣਾਤਿ ਵੁਤ੍ਤਂ ਹੋਤਿ. ‘‘ਨਹੇਸ੍ਸਰੇ’’ਤਿ ਨਹੇਸ੍ਸਨ੍ਤਿ ਨਭਵਿਸ੍ਸਨ੍ਤਿ. ‘‘ਤਸ੍ਮਾ’’ਤਿ ਯਸ੍ਮਾਚ ਯਾਚਨ੍ਤਿ, ਯਸ੍ਮਾਚ ਪਰਿਯਾਦਿਨ੍ਨਾਨਹੇਸ੍ਸਨ੍ਤਿ, ਤਸ੍ਮਾ. ‘‘ਤਾਸੁਵਣ੍ਣਨਾਸੂ’’ਤਿ ਤਾਸੁ ਪੋਰਾਣਟੀਕਾਸੁ. ‘‘ਵਣ੍ਣਨ’’ਨ੍ਤਿ ਅਭਿਨਵਵਣ੍ਣਨਂ, ਅਭਿਨਵਟੀਕਂਕਰਿਸ੍ਸਨ੍ਤਿ ਸਮ੍ਬਨ੍ਧੋ. ਕੀਦਿਸਂਵਣ੍ਣਨਂ ਕਰਿਸ੍ਸਤੀਤਿ ਆਹ ‘‘ਨਾਨਾਸਾਰਤ੍ਥ ਸਮ੍ਪੁਣ੍ਣ’’ਨ੍ਤਿਆਦਿ. ਤਤ੍ਥ ‘‘ਉਤ੍ਤਾਨਪਦਬ੍ਯਞ੍ਜਨ’’ਨ੍ਤਿ ਉਤ੍ਤਾਨਪਦਞ੍ਚ ਉਤ੍ਤਾਨਵਾਕ੍ਯਞ੍ਚ. ‘‘ਨਾਤਿਸਙ੍ਖੇਪਵਿਤ੍ਥਾਰ’’ਨ੍ਤਿ ਨਾਤਿਸਙ੍ਖੇਪਂਨਾਤਿਵਿਤ੍ਥਾਰਞ੍ਚ. ਮਨ੍ਦਾ ਬੁਦ੍ਧਿ ਯੇਸਂ ਤੇ ਮਨ੍ਦਬੁਦ੍ਧਿਨੋ. ‘‘ਮਨ੍ਦਾ’’ਤਿ ਮੁਦੁਕਾ. ‘‘ਬੁਦ੍ਧੀ’’ਤਿ ਞਾਣਂ. ਮਨ੍ਦਬੁਦ੍ਧਿਨੋ ਸੋਤੁਜਨੇ ਪਬੋਧੇਤਿ ਵਿਕਾਸੇਤਿ, ਞਾਣ ਵਿਕਾਸਂਪਾਪੇਤੀਤਿ ਮਨ੍ਦਬੁਦ੍ਧਿਪ੍ਪਬੋਧਨਾ. ‘‘ਕਰਿਸ੍ਸ’’ਨ੍ਤਿ ਕਰਿਸ੍ਸਾਮਿ. ‘‘ਤ’’ਨ੍ਤਿ ਤਂਵਣ੍ਣਨਂ. ‘‘ਪਰਮਤ੍ਥੇਸੁਪਾਟਵਤ੍ਥਿਨੋਸੁਣਨ੍ਤੂ’’ਤਿ ਯੋਜਨਾ. ਪਟੁਨੋਭਾਵੋਪਾਟਵਂ. ਪਟੁਨੋਤਿ ਬ੍ਯਤ੍ਤਸ੍ਸਪਣ੍ਡਿਤਸ੍ਸ. ਪਾਟਵੇਨ ਅਤ੍ਥੋ ਯੇਸਂ ਤੇ ਪਾਟਵਤ੍ਥਿਨੋ. ਇਤਿਸਦ੍ਦੋ ਪਰਿਸਮਾਪਨਜੋਤਕੋ. ਸੋ ਹਿ ਗਨ੍ਥਾਰਬ੍ਭਵਿਧਾਨਸ੍ਸ ਇਧਪਰਿਸਮਾਪਨਂ ਪਰਿਨਿਟ੍ਠਾਨਂ ਞਾਪੇਤੁਂ ਗਨ੍ਥਾਰਬ੍ਭਵਾਕ੍ਯਸ੍ਸਪਰਿਯਨ੍ਤੇ ਯੋਜਿਤੋ. ਅਵਯਵ ਵਾਕ੍ਯਾਨਂ ਪਿਯੋਜੀਯਤਿਯੇਵ. ਏਸਨਯੋਸਬ੍ਬਤ੍ਥ.

ਗਨ੍ਥਾਰਬ੍ਭਗਾਥਾਵਣ੍ਣਨਾਨਿਟ੍ਠਿਤਾ.

੧. ਏਵਂ ਗਨ੍ਥਾਰਬ੍ਭਵਿਧਾਨਂ ਕਤ੍ਵਾ ਇਦਾਨਿ ਆਦਿਗਾਥਾਯ ਸਮ੍ਬਨ੍ਧਂ ਦਸ੍ਸੇਨ੍ਤੋ ‘‘ਅਭਿਧਮ੍ਮਤ੍ਥਸਙ੍ਗਹ’’ਨ੍ਤਿਆਦਿਮਾਹ. ਸਮ੍ਬਨ੍ਧਨ੍ਤਿ ਕਾਰਣਪ੍ਫਲਸਂਯੋਗਂ. ਤਤ੍ਥ ਗਾਥਾਪਵਤ੍ਤਨਂ ਕਾਰਣਂ ਨਾਮ. ਪਞ੍ਚਪਿਣ੍ਡਤ੍ਥ ਦਸ੍ਸਨਂ ਫਲਂ ਨਾਮ. ਕਾਰਣਪ੍ਫਲਸਂਯੋਗੋ ਸਮ੍ਬਨ੍ਧੋਨਾਮ. ‘‘ਸਪ੍ਪਯੋਜਨੇ’’ਤਿ ਫਲਪ੍ਪਯੋਜਨਸਹਿਤੇ. ਗਨ੍ਥੇਨ ਅਭਿਧਾਤਬ੍ਬੋ ਕਥੇਤਬ੍ਬੋਤਿ ਗਨ੍ਥਾਭਿਧੇਯ੍ਯੋ. ਨਿਪਤਸ੍ਸ ਕਮ੍ਮਂ ਨਿਪਚ੍ਚਂ. ਨਿਪਚ੍ਚ ਕਿਰਿਯਾ, ਨਿਪਚ੍ਚਾਕਾਰੋ, ਨਿਪਚ੍ਚਕਾਰਸ੍ਸਕਰਣਨ੍ਤਿ ਸਮਾਸੋ. ‘‘ਸਾ’’ਤਿ ਰਤਨਤ੍ਤਯਵਨ੍ਦਨਾ. ਦਸ੍ਸਿਤਾਤਿਸਮ੍ਬਨ੍ਧੋ. ‘‘ਅਭਿਹਿਤਾ’’ਤਿ ਕਥਿਤਾ. ਪਕਾਸਿਤਾਤਿ ਵੁਤ੍ਤਂ ਹੋਤਿ. ‘‘ਪਧਾਨਤ੍ਥਭੂਤਾ’’ਤਿ ਅਧਿਪ੍ਪੇਤਤ੍ਥਭੂਤਾਤਿ ਅਧਿਪ੍ਪਾਯੋ. ਦੁਵਿਧੋਹਿ ਅਤ੍ਥੋਵਚਨਤ੍ਥੋ ਚ ਅਭਿਧਾਨਤ੍ਥੋਚ. ਤਤ੍ਥ ਗਚ੍ਛਤੀਤਿ ਗਤੋ, ਪੁਰਿਸੋਤਿ ਵੁਤ੍ਤੇਗਚ੍ਛਤਿ ਪਦੇਨ ਵੁਤ੍ਤੋ ਯੋਕੋਚਿ ਗਚ੍ਛਨ੍ਤੋ ਵਚਨਤ੍ਥੋਨਾਮ. ਪੁਰਿਸੋਤਿ ਪਦੇਨਦਸ੍ਸਿਤੋ ਪਧਾਨਤ੍ਥੋ ਅਧਿਪ੍ਪੇਤਤ੍ਥੋ ਅਭਿਧੇਯ੍ਯਤ੍ਥੋ ਨਾਮਾਤਿ. ‘‘ਅਭਿਧਮ੍ਮਤ੍ਥਾ’’ਤਿ.

ਤਤ੍ਥ ਵੁਤ੍ਤਾਭਿਧਮ੍ਮਤ੍ਥਾ, ਚਤੁਧਾ ਪਰਮਤ੍ਥਤੋ;

ਚਿਤ੍ਤਂ ਚੇਤਸਿਕਂ ਰੂਪਂ, ਨਿਬ੍ਬਾਨਮਿਤਿ ਸਬ੍ਬਥਾ. ਤਿ

ਏਵਂ ਵੁਤ੍ਤਾ ਅਭਿਧਮ੍ਮਤ੍ਥਾ. ਏਵਂ ਵੁਤ੍ਤਤ੍ਤਾਯੇਵਚ ਤੇਚਤ੍ਤਾਰੋ ਅਭਿਧਮ੍ਮਤ੍ਥਾ ਏਵ ਇਧਪਧਾਨਤ੍ਥਭੂਤਾਤਿ ਚ, - ਪਧਾਨਤ੍ਥਾਏਵ ਇਧਗਨ੍ਥਾਭਿਧੇਯ੍ਯ ਭਾਵੇਨ ਅਧਿਪ੍ਪੇਤਾਤਿ ਚਵਿਞ੍ਞਾਯਤੀਤਿ ਅਧਿਪ੍ਪਾਯੋ.

ਕੇਚਿਪਨਵਦੇਯ੍ਯੁਂ, ਤੇਅਭਿਧਮ੍ਮਤ੍ਥਾ ਸਙ੍ਗਹਪ੍ਪਕਰਣਂ ਪਤ੍ਤਾ ਵਿਸੁਂ ਸਙ੍ਗਹਤ੍ਥਾਨਾਮਭਵੇਯ੍ਯੁਂ, ਨਅਭਿਧਮ੍ਮਤ੍ਥਾ ਨਾਮ. ਇਧ ਚ ਸਙ੍ਗਹਤ੍ਥਾ ਏਵ ਅਭਿਧੇਯ੍ਯਭਾਵੇਨ ਅਧਿਪ੍ਪੇਤਾਤਿ ਵੁਤ੍ਤਂ ਅਭਿਧੇਯ੍ਯੋ ਅਭਿਧਮ੍ਮਤ੍ਥ ਸਙ੍ਗਹਪ੍ਪਦੇਨਾਤਿ. ਵੁਚ੍ਚਤੇ. ਤੇਅਭਿਧਮ੍ਮਤ੍ਥਾ ਸਙ੍ਗਹਪ੍ਪਕਰਣਂ ਪਤ੍ਤਾਪਿ ਅਭਿਧਮ੍ਮਤ੍ਥਾ ਏਵਨਾਮ ਹੋਨ੍ਤਿ, ਨ ਵਿਸੁਂ ਸਙ੍ਗਹਤ੍ਥਾਨਾਮ. ਤਤ੍ਥ ਵੁਤ੍ਤਾਭਿਧਮ੍ਮਤ੍ਥਾਤਿਹਿ ਵੁਤ੍ਤਂ, ਨਤੁਵੁਤ੍ਤਂ ਤਤ੍ਥ ਵੁਤ੍ਤਾਸਙ੍ਗਹਤ੍ਥਾਤਿ. ਏਵਞ੍ਚਸਤਿ ਸਙ੍ਗਹਿਤਭਾਵਮਤ੍ਤਂ ਵਿਸਿਟ੍ਠਂ ਹੋਤਿ. ਤਦੇਵ ਇਧ ਅਭਿਧੇਯ੍ਯੋ ਨਾਮ ਸਿਯਾਤਿ ਵੁਤ੍ਤਂ ‘‘ਸਙ੍ਗਹਿਤਭਾਵੋਪਿ ਅਭਿਧੇਯ੍ਯੋ ਯੇਵਾ’’ਤਿਆਦਿ. ਤਤ੍ਥ ‘‘ਸਙ੍ਗਹਿਤਭਾਵੋ’’ਤਿਚਿਤ੍ਤਸਙ੍ਗਹੋ, ਚੇਤਸਿਕਸਙ੍ਗਹੋਤਿਆਦਿਨਾ ਸਙ੍ਗਹਣਕਿਰਿਯਾ. ਸਾ ਸਙ੍ਗਹਿਤੇਹਿ ਧਮ੍ਮੇਹਿ ਅਞ੍ਞਾ ਨਹੋਤਿ. ਤੇਸ੍ਵੇਵਧਮ੍ਮੇਸੁਸਙ੍ਗਯ੍ਹਤੀਤਿ ਵੁਤ੍ਤਂ ‘‘ਸਙ੍ਗਹਿਤਭਾਵੋਪਿ ਅਭਿਧੇਯ੍ਯੋ ਯੇਵਾ’’ਤਿ. ਕਿਞ੍ਚਾਪਿਤੇਹਿ ਅਞ੍ਞਾਨਹੋਤਿ, ਤੇ ਸ੍ਵੇਵ ਸਙ੍ਗਯ੍ਹਤਿ. ਸਾਪਨ ਗਨ੍ਥਸ੍ਸਪਧਾਨਤ੍ਥੋ ਨਹੋਤਿ. ਇਧ ਚ ਪਧਾਨਤ੍ਥੋਵ ਅਧਿਪ੍ਪੇਤੋਤਿ ਵੁਤ੍ਤਂ ‘‘ਤਂਨਸੁਨ੍ਦਰ’’ਨ੍ਤਿ. ਕਸ੍ਮਾ ਨਸੁਨ੍ਦਰਨ੍ਤਿ ਆਹ ‘‘ਨਹਿਸੋ’’ਤਿਆਦਿਂ. ਏਤ੍ਥਚਹਿਸਦ੍ਦੋ ਇਮਸ੍ਸ ਵਾਕ੍ਯਸ੍ਸਹੇਤੁਵਾਕ੍ਯਭਾਵਂ ਜੋਤੇਤਿ. ਏਸਨਯੋਪਰਤ੍ਥਪਿ. ‘‘ਇਤੋਪਟ੍ਠਾਯ ਚਾ’’ਤਿਆਦਿ ਗਨ੍ਥ ਗਰੁਦੋਸਵਿਵਜ੍ਜਨਂ. ਤਤ੍ਥ ‘‘ਇਮਸ੍ਸਸਙ੍ਗਹਸ੍ਸਾ’’ਤਿ ਇਮਸ੍ਸਅਭਿਧਮ੍ਮਤ੍ਥਸਙ੍ਗਹਸ੍ਸ. ‘‘ਦੁਤੀਯਾ’’ਤਿਦੁਤੀਯਾਟੀਕਾ. ‘‘ਦ੍ਵੇਪੀ’’ਤਿ ਦ੍ਵੇਪਿਟੀਕਾਯੋ. ‘‘ਵਿਸੁਦ੍ਧਿਮਗ੍ਗੇਮਹਾਟੀਕਾ’’ਤਿ ਆਚਰਿਯਧਮ੍ਮਪਾਲਤ੍ਥੇਰੇਨ ਕਤਾਪਰਮਤ੍ਥਮਞ੍ਜੂਸਾਨਾਮਟੀਕਾ. ਸਾ ਬ੍ਰਮ੍ਮਰਟ੍ਠੇ ਤਿਰਿਯਪਬ੍ਬਤਵਾਸਿਨਾ ਥੇਰੇਨਕਤਂ ਚੂਲ਼ਟੀਕਂ ਉਪਾਦਾਯ ਮਹਾਟੀਕਾਤਿ ਪਾਕਟਾ. ਤਂਸਨ੍ਧਾਯੇਤਂ ਵੁਤ੍ਤਂ.

ਗਨ੍ਥਪ੍ਪਕਾਰੋਚ ਪਕਾਰਵਨ੍ਤੇਹਿ ਧਮ੍ਮੇਹਿ ਸਹੇਵਸਿਜ੍ਝਤਿ, ਵਿਨਾ ਨਸਿਜ੍ਝਤੀਤਿ ਅਧਿਪ੍ਪਾਯੇਨ ‘‘ਸੋਅਭਿਧਮ੍ਮਤ੍ਥਪਦੇਨਾ’’ਤਿ ਵੁਤ੍ਤਂ. ਕਾਮਞ੍ਚ ਸੋ ਤੇਹਿ ਸਹੇਵਸਿਜ੍ਝਤਿ, ਵਿਨਾਨਸਿਜ੍ਝਤਿ. ਅਭਿਧਮ੍ਮਤ੍ਥਪਦਂ ਪਨ ਸਙ੍ਗਹਣਕਿਰਿਯਾਪਕਾਰਂਨ ਵਦਤੀਤਿ ਵੁਤ੍ਤਂ ‘‘ਤਂ ਨਸੁਨ੍ਦਰ’’ਨ੍ਤਿ. ਦੁਵਿਧਂ ਨਾਮਂ ਅਨ੍ਵਤ੍ਥਨਾਮਂ ਰੁਲ਼ਿਨਾਮਨ੍ਤਿ. ਤਤ੍ਥ, ਅਤ੍ਥਾਨੁਗਤਂ ਨਾਮਂ ਅਨ੍ਵਤ੍ਥਨਾਮਂ, ਯਥਾ ਸੁਖਿਤਸ੍ਸਜਨਸ੍ਸ ਸੁਖੋਤਿਨਾਮਂ. ਅਤ੍ਥਰਹਿਤਂ ਆਰੋਪਿਤਂ ਨਾਮਂ ਰੁਲ਼ਿਨਾਮਂ, ਯਥਾ ਦੁਕ੍ਖਿਤਸ੍ਸਜਨਸ੍ਸ ਸੁਖੋਤਿ ਨਾਮਂ. ਇਧ ਪਨ ਅਨ੍ਵਤ੍ਥਨਾ ਮਨ੍ਤਿਦਸ੍ਸੇਤੁਂ ‘‘ਅਤ੍ਥਾਨੁਗਤਾ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਅਤ੍ਥਾਨੁਗਤਾ’’ਤਿ ਸਕਤ੍ਥਾਨੁਗਤਾ. ਸਦ੍ਦਪ੍ਪਵਤ੍ਤਿਨਿਮਿਤ੍ਤਾਨੁਗਤਾਤਿ ਵੁਤ੍ਤਂ ਹੋਤਿ. ‘‘ਗਨ੍ਥਸਮਞ੍ਞਾ’’ਤਿ ਗਨ੍ਥਸਮ੍ਮੁਤਿ. ਗਨ੍ਥਸ੍ਸਨਾਮਨ੍ਤਿ ਵੁਤ੍ਤਂ ਹੋਤਿ. ਸਙ੍ਗਹਗਨ੍ਥੋਨਾਮ ਪਾਲ਼ਿਯਂਤਤ੍ਥ ਤਤ੍ਥ ਵਿਪ੍ਪਕਿਣ੍ਣੇਧਮ੍ਮੇ ਏਕਤ੍ਥ ਸਭਾਗਰਾਸਿਕਰਣਵਸੇਨ ਪਵਤ੍ਤੋ ਗਨ੍ਥੋ. ਤਂ ਉਗ੍ਗਣ੍ਹਨ੍ਤੋ ਅਪ੍ਪਕੇਨ ਗਨ੍ਥੇਨਬਹੁਕੇਧਮ੍ਮੇਸੁਖੇਨਜਾਨਾਤਿ. ‘‘ਤਦੁਗ੍ਗਹਪਰਿਪੁਚ੍ਛਾਦਿਵਸੇਨਾ’’ਤਿ ਤਸ੍ਸਉਗ੍ਗਹੋਚ ਪਰਿਪੁਚ੍ਛਾਚਾਤਿ ਦ੍ਵਨ੍ਦੋ. ਆਦਿਸਦ੍ਦੇਨ ਧਾਰਣਾਦੀਨਿ ਸਙ੍ਗਣ੍ਹਾਤਿ. ਤਤ੍ਥ ਪਾਠਸ੍ਸਵਾਚੁਗ੍ਗਤਕਰਣਂ ਉਗ੍ਗਹੋਨਾਮ. ਉਗ੍ਗਹਿ ਤਸ੍ਸਪਾਠਸ੍ਸ ਅਤ੍ਥਗ੍ਗਹਣਂ ਪਰਿਪੁਚ੍ਛਾਨਾਮ. ‘‘ਅਨਾਯਾਸਤੋ’’ਤਿ ਨਿਦ੍ਦੁਕ੍ਖੇਨ. ‘‘ਲਦ੍ਧਬ੍ਬਂਫਲਾਨੁਫਲ’’ਨ੍ਤਿ ਸਮ੍ਬਨ੍ਧੋ. ਸਰੂਪਤੋ ਅਵਬੁਜ੍ਝਨਂ ਸਰੂਪਾਵਬੋਧੋ. ਆਦਿਸਦ੍ਦੇਨ ਲਕ੍ਖਣਾਵਬੋਧੋ ਰਸਾਵ ਬੋਧੋਤਿਆਦਿਂ ਸਙ੍ਗਣ੍ਹਾਤਿ. ਅਨੁਪਾਦਾਪਰਿਨਿਬ੍ਬਾਨਂ ਅਨ੍ਤੋ ਪਰਿਯੋਸਾਨਂ ਯਸ੍ਸਾਤਿ ਅਨੁਪਾਦਾਪਰਿਨਿਬ੍ਬਾਨਨ੍ਤਂ. ਤਤ੍ਥ ‘‘ਅਨੁਪਾਦਾਪਰਿਨਿਬ੍ਬਾਨ’’ਨ੍ਤਿ ਤਣ੍ਹਾਦਿਟ੍ਠੀਹਿ ਖਨ੍ਧੇਸੁ ਅਨੁਪਾਦਾਯਪਰਿਨਿਬ੍ਬਾਨਂ. ਅਨੁਪਾਦਿਸੇਸ ਪਰਿਨਿਬ੍ਬਾਨਨ੍ਤਿ ਵੁਤ੍ਤਂ ਹੋਤਿ. ‘‘ਫਲਾਨੁਫਲ’’ਨ੍ਤਿ ਫਲਞ੍ਚੇਵ ਅਨੁਫਲਞ੍ਚ. ਤਤ੍ਥ ‘‘ਫਲ’’ਨ੍ਤਿ ਮੂਲਪ੍ਫਲਂ. ‘‘ਅਨੁਫਲ’’ਨ੍ਤਿ ਪਰਮ੍ਪਰਪ੍ਫਲਂ. ਪਯੋਜੇਤੀਤਿ ‘‘ਪਯੋਜਨਂ’’. ਪਯੋਜੇਤੀਤਿ ਨਿਯੋਜੇਤਿ. ਕਿਂ ਨਿਯੋਜੇਤਿ. ਫਲਤ੍ਥਿਕਂਜਨਂ. ਕਤ੍ਥ ਨਿਯੋਜੇਤਿ. ਫਲਨਿਬ੍ਬਤ੍ਤਕੇਕਮ੍ਮੇ. ਕਿਮਤ੍ਥਾਯ ਨਿਯੋਜੇਤਿ. ਤਸ੍ਸਕਮ੍ਮਸ੍ਸ ਕਰਣਤ੍ਥਾਯਾਤਿ. ਫਲਾਨੁਭਵਨਤ੍ਥਾਯ ਤਤ੍ਥਤਤ੍ਥ ਫਲਾਨੁਭਵਨਕਿਚ੍ਚੇਸੁ ਪਯੁਜ੍ਜੀਯਤੀਤਿ ਪਯੋਜਨਨ੍ਤਿ ਪਿਵਦਨ੍ਤਿ. ‘‘ਸਾਮਤ੍ਥਿਯਤੋ’’ਤਿ ਵਚਨਸਾਮਤ੍ਥਿਯਤੋ. ਕਿਂ ਵਚਨਸਾਮਤ੍ਥਿਯਨ੍ਤਿ. ਕਾਰਣਵਚਨਂ ਫਲਂਪਿਦੀਪੇਤਿ. ਫਲਵਚਨਂ ਕਾਰਣਂਪਿਦੀਪੇਤਿ. ਯਥਾਤਂ ਅਸੁਕਸ੍ਮਿਂ ਰਟ੍ਠੇ ਸਮ੍ਮਾਦੇਵੋ ਵੁਟ੍ਠੋਤਿ ਵੁਤ੍ਤੇ ਤਂ ਰਟ੍ਠਂਸੁ ਭਿਕ੍ਖਨ੍ਤਿ ਵਿਞ੍ਞਾਯਤਿ. ਅਸੁਕਰਟ੍ਠਂ ਸੁਭਿਕ੍ਖਨ੍ਤਿਵੁਤ੍ਤੇ ਤਸ੍ਮਿਂ ਰਟ੍ਠੇ ਸਮ੍ਮਾਦੇਵੋ ਵੁਟ੍ਠੋਤਿ ਵਿਞ੍ਞਾਯਤੀਤਿ. ਪਯੋਜਨਂ ਪਨ ਅਭਿਧਮ੍ਮਤ੍ਥ ਸਦ੍ਦੇਨ ਦਸ੍ਸੇਤਬ੍ਬਂ ਨਤ੍ਥਿ, ਸਙ੍ਗਹਵਚਨਸਾਮਤ੍ਥਿਯੇਨੇਵ ਸਿਦ੍ਧਂ ਹੋਤੀਤਿ ਅਧਿਪ੍ਪਾਯੇਨ ‘‘ਸਙ੍ਗਹਸਦ੍ਦੇਨਾ’’ਤਿ ਵੁਤ੍ਤਂ. ਸਾਮਤ੍ਥਿਯਦਸ੍ਸਨੇ ਪਨ ਸੁਟ੍ਠੁ ਪਰਿਪੁਣ੍ਣਵਚਨਂ ਇਚ੍ਛਿਤਬ੍ਬਂ ਹੋਤਿ. ਇਤਰਥਾ ਅਨਿਟ੍ਠਤ੍ਥਪ੍ਪਸਙ੍ਗੋਪਿ ਸਿਯਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਤਂ ਨ ਸੁਨ੍ਦਰ’’ਨ੍ਤਿ ਵਤ੍ਵਾ ‘‘ਨਹੀ’’ਤਿਆਦਿਨਾ ਹੇਤੁਵਾਕ੍ਯੇਨ ਤਦਤ੍ਥਂ ਸਾਧੇਤਿ.

੨. ਏਵਂ ਸਪ੍ਪਯੋਜਨੇ ਪਞ੍ਚਪਿਣ੍ਡਤ੍ਥੇਤਿ ਏਤ੍ਥ ਪਞ੍ਚਪਿਣ੍ਡਤ੍ਥੇ ਦਸ੍ਸੇਤ੍ਵਾ ਇਦਾਨਿ ਤੇਸਂਪਞ੍ਚਨ੍ਨਂ ਪਿਣ੍ਡਤ੍ਥਾਨਂ ਵਿਸੁਂਵਿਸੁਂ ਪਞ੍ਚਪ੍ਪਯੋਜਨਾਨਿ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ‘‘ਤਤ੍ਥਾ’’ਤਿ ਤੇਸੁਪਞ੍ਚਸੁ ਪਿਣ੍ਡਤ੍ਥੇਸੁ. ਨਸਙ੍ਖ੍ਯਾਤਬ੍ਬਨ੍ਤਿ ਅਸਙ੍ਖ੍ਯੇਯ੍ਯਂ. ਸਙ੍ਖਾਤੁਂਅਸਕ੍ਕੁਣੇਯ੍ਯਨ੍ਤਿ ਅਤ੍ਥੋ. ਨਪਮੇਤਬ੍ਬਨ੍ਤਿ ਅਪ੍ਪਮੇਯ੍ਯਂ. ਪਮੇਤੁਂ ਅਸਕ੍ਕੁਣੇਯ੍ਯਨ੍ਤਿ ਅਤ੍ਥੋ. ਏਵਂ ਕਿਚ੍ਚਪਚ੍ਚਯਾਨਂ ਕਤ੍ਥਚਿ ਸਕ੍ਕਤ੍ਥ ਦੀਪਨਂ ਹੋਤਿ. ਸਕਵਚਨਂ ਪਾਲ਼ਿਵਚਨੇਨ ਸਾਧੇਤੁਂ ‘‘ਯਥਾਹਾ’’ਤਿ ਪੁਚ੍ਛਿਤ੍ਵਾ ਪਾਲ਼ਿਗਾਥਂ ਆਹਰਿ. ਤਤ੍ਥ ‘‘ਯਥਾਹਾ’’ਤਿ ਕਥਂ ਆਹ ਇਚ੍ਚੇਵਤ੍ਥੋ. ਅਨਨ੍ਤਰੇ ਵੁਤ੍ਤਸ੍ਸ ਅਤ੍ਥਸ੍ਸ ਸਾਧਕਂ ਵਚਨਂ ਕਥਂ ਪਾਲ਼ਿਯਂ ਆਹ, ਕਥਂ ਅਟ੍ਠਕਥਾਯਂ ਆਹ, ਕਥਂ ਟੀਕਾਯਂ ਆਹਾਤਿ ਏਵਂ ਯਥਾਰਹਂ ਅਤ੍ਥੋ ਵੇਦਿਤਬ੍ਬੋ. ‘‘ਤੇਤਾਦਿਸੇਨਿਬ੍ਬੁਤੇ ਅਕੁਤੋਭਯੇ ਪੂਜਯਤੋ’’ਤਿ ਯੋਜਨਾ. ਤਤ੍ਥ ‘‘ਤੇ’’ਤਿ ਬੁਦ੍ਧ ਬੁਦ੍ਧ ਸਾਵਕੇ. ‘‘ਤਾਦਿਸੇ’’ਤਿ ਤਥਾ ਰੂਪੇਸੀ ਲਕ੍ਖਨ੍ਧਾਦਿਗੁਣ ਸਮ੍ਪਨ੍ਨੇ. ‘‘ਨਿਬ੍ਬੁਤੇ’’ਤਿ ਕਿਲੇਸ ਨਿਬ੍ਬਾਨੇਨ ਨਿਬ੍ਬੁਤੇ. ਨਤ੍ਥਿ ਕੁਤੋਚਿ ਹੇਤੁਤੋ ਭਯਂ ਯੇਸਂ ਤੇ ਅਕੁਤੋ ਭਯਾ. ਅਨਾਗਾਮਿ ਖੀਣਾਸਵਾ. ‘‘ਭਯ’’ਨ੍ਤਿ ਚਿਤ੍ਤੁਤ੍ਰਾਸਭਯਂ. ‘‘ਪੂਜਯਤੋ’’ਤਿ ਪੂਜੇਨ੍ਤਸ੍ਸ. ‘‘ਤਂ ਪਯੋਜਨ’’ਨ੍ਤਿਤਸ੍ਸਾਰਤਨਤ੍ਤਯ ਵਨ੍ਦਨਾਯ ਪਯੋਜਨਂ. ‘‘ਸਙ੍ਗਹਕਾਰਾ’’ਤਿ ਬੁਦ੍ਧਘੋਸਤ੍ਥੇਰਾਦਯੋ ਪਚ੍ਛਿਮ ਅਟ੍ਠਕਥਾਕਾਰਾ ਵੁਚ੍ਚਨ੍ਤਿ. ਤੇਹਿ ਪੋਰਾਣਟ੍ਠਕਥਾਸੁ ਤਤ੍ਥ ਤਤ੍ਥ ਵਿਪ੍ਪਕਿਣ੍ਣੇਪਕਿਣ੍ਣਕਵਿਨਿਚ੍ਛਯੇਯੁਤ੍ਤਟ੍ਠਾਨੇਸੁ ਸਙ੍ਗਹੇਤ੍ਵਾ ਅਭਿਨਵ ਅਟ੍ਠਕਥਾਯੋ ਕਰੋਨ੍ਤਿ. ਤਸ੍ਮਾ ਸਬ੍ਬਾਅਭਿਨਵਅਟ੍ਠਕਥਾਯੋ ਸਙ੍ਗਹਾ ਨਾਮ ਹੋਨ੍ਤਿ. ਤੇ ਚ ਆਚਰਿਯਾ ਸਙ੍ਗਹਕਾਰਾ ਨਾਮ. ਤੇਨ ਵੁਤ੍ਤਂ ‘‘ਸਙ੍ਗਹਕਾਰਾਤਿ ਬੁਦ੍ਧਘੋਸ. ਪੇ… ਵੁਚ੍ਚਨ੍ਤੀ’’ਤਿ. ਤੇ ਅਨ੍ਤਰਾਯ ਨੀਵਾਰਣਮੇਵ ਇਚ੍ਛਨ੍ਤੀਤਿ ਕਥਂ ਵਿਞ੍ਞਾਯਤੀਤਿ ਚੇ. ਤੇਸਂ ਵਚਨੇਨ ਵਿਞ੍ਞਾਯਤੀਤਿ ਦਸ੍ਸੇਤੁਂ ਸਙ੍ਗਹਕਾਰ ਗਾਥਂ ਆਹਰਿ. ‘‘ਰਤਨਤ੍ਤਯੇਕਤਸ੍ਸ ਏਤਸ੍ਸਨਿਪਚ੍ਚਕਾਰਸ੍ਸ ਆਨੁਭਾਵੇਨ ਅਨ੍ਤਰਾਯੇ ਅਸੇਸਤੋਸੋਸੇਤ੍ਵਾਤਿ ਯੋਜਨਾ. ‘‘ਹੀ’’ਤਿ ਞਾਪਕਹੇਤੁ ਜੋਤਕੋ. ‘‘ਵੁਤ੍ਤ’’ਨ੍ਤਿ ਅਟ੍ਠਸਾਲਿਨਿਯਂ ਵੁਤ੍ਤਂ.

੩. ‘‘ਕਥਞ੍ਚਹੋਤੀ’’ਤਿ ਸਮ੍ਬਨ੍ਧੋ. ਇਤਿ ਅਯਂ ਪੁਚ੍ਛਾ. ‘‘ਵੁਚ੍ਚਤੇ’’ਤਿ ਵਿਸਜ੍ਜਨਾ ਕਥੀਯਤੇ. ‘‘ਹੀ’’ਤਿਵਿਤ੍ਥਾਰਜੋਤਕੋ. ‘‘ਵਨ੍ਦਨਾ ਕਿਰਿਯਾਭਿਨਿਪ੍ਫਾਦਕੋ ਪੁਞ੍ਞਪ੍ਪਵਾਹੋ’’ਤਿ ਸਮ੍ਬਨ੍ਧੋ. ‘‘ਅਨੇਕ…ਪੇ… ਵਾਰੇ’’ਤਿ ਅਚ੍ਚਨ੍ਤ ਸਂਯੋਗਤ੍ਥੇ ਉਪਯੋਗ ਵਚਨਂ. ‘‘ਪੁਞ੍ਞਾਭਿਸਨ੍ਦੋ’’ਤਿ ਪੁਞ੍ਞਾਭਿਸੋਤੋ, ਪੁਞ੍ਞਪ੍ਪਵਾਹੋਤਿ ਤਸ੍ਸੇਵ ਵੇਵਚਨਂ. ‘‘ਸੋ ਚ ਪੁਞ੍ਞਾਤਿਸ੍ਸਯੋ ਹੋਤੀ’’ਤਿ ਸਮ੍ਬਨ੍ਧੋ. ਕਸ੍ਮਾ ਸੋ ਪੁਞ੍ਞਾ ਤਿਸ੍ਸਯੋ ਹੋਤੀਤਿ. ਖੇਤ੍ਤ ਸਮ੍ਪਤ੍ਤਿਯਾ ਚ ਅਜ੍ਝਾਸਯ ਸਮ੍ਪਤ੍ਤਿਯਾ ਚ ਹੋਤੀਤਿ ਦਸ੍ਸੇਤੁਂ ‘‘ਅਨੁਤ੍ਤਰੇਸੂ’’ਤਿਆਦਿਮਾਹ. ਸਂਵਡ੍ਢਿਤ੍ਥਾਤਿ ਸਂਵਡ੍ਢਿਤੋ. ਪੁਞ੍ਞਾਭਿਸਨ੍ਦੋ. ਸਂਵਡ੍ਢਿਤਸ੍ਸਭਾਵੋ ਸਂਵਡ੍ਢਿਤਤ੍ਤਂ. ਸੁਗਨ੍ਧੇਹਿਵਿਯ ਸੁਪਰਿਸੁਦ੍ਧਂਵਤ੍ਥਂ ਪਰਿਭਾਵੀਯਿਤ੍ਥਾਤਿ ਪਰਿਭਾਵਿਤੋ. ਪੁਞ੍ਞਾਭਿਸਨ੍ਦੋਯੇਵ. ਪਰਿਭਾਵਿਤਸ੍ਸ ਭਾਵੋ ਪਰਿਭਾਵਿਤਤ੍ਤਂ. ਉਭਯਤ੍ਥਾਪਿ ਹੇਤੁ ਅਤ੍ਥੇ ਨਿਸ੍ਸਕ੍ਕਵਚਨਂ. ‘‘ਮਹਾਜੁਤਿਕੋ’’ਤਿ ਮਹਾਤੇਜੋ. ‘‘ਮਹਪ੍ਫਲੋ’’ਤਿ ਮੂਲਪ੍ਫਲੇਨ ਮਹਪ੍ਫਲੋ. ‘‘ਮਹਾਨਿਸਂਸੋ’’ਤਿ ਆਨਿਸਂਸਪ੍ਫਲੇਨ ਮਹਾਨਿਸਂਸੋ. ਆਨਿਸਂਸਪ੍ਫਲਨ੍ਤਿ ਚ ਪਰਮ੍ਪਰਾ ਫਲਂ ਵੁਚ੍ਚਤਿ. ਅਞ੍ਞਂ ਪੁਞ੍ਞਂ ਅਤਿਕ੍ਕਮਨ੍ਤੋ ਸਯਤਿ ਪਵਤ੍ਤਤੀਤਿ ਅਤਿਸ੍ਸਯੋ. ਪੁਞ੍ਞਞ੍ਚ ਤਂ ਅਤਿਸ੍ਸਯੋਚਾਤਿ ਪੁਞ੍ਞਾਤਿਸ੍ਸਯੋ. ਅਤਿਸ੍ਸਯਪੁਞ੍ਞਂ, ਅਧਿਕ ਪੁਞ੍ਞਨ੍ਤਿ ਅਤ੍ਥੋ. ‘‘ਸੋ ਅਨੁਬਲਂ ਦੇਤਿ, ਓਕਾਸਲਾਭਂ ਕਰੋਤੀ’’ਤਿ ਸਮ੍ਬਨ੍ਧੋ. ਕਥਞ੍ਚ ਅਨੁਬਲਂ ਦੇਤਿ, ਕਥਞ੍ਚ ਓਕਾਸਲਾਭਂ ਕਰੋਤੀਤਿ ਆਹ ‘‘ਸਯਂ ਪਯੋਗ ਸਮ੍ਪਤ੍ਤਿਭਾਵੇਠਤ੍ਵਾ’’ਤਿਆਦਿਂ. ਤਤ੍ਥ ਪਯੋਗਸਮ੍ਪਤ੍ਤਿਨਾਮ ਅਤੀਤ ਪੁਞ੍ਞਕਮ੍ਮਾਨਂ ਬਲਵਤਰਂ ਉਪਤ੍ਥਮ੍ਭਕਕਮ੍ਮਂ ਹੋਤਿ. ‘‘ਬਹਿਦ੍ਧਾ’’ਤਿ ਬਹਿਦ੍ਧਸਨ੍ਤਾਨਤੋ. ‘‘ਵਿਪਤ੍ਤਿਪਚ੍ਚਯੇ ਸਮ੍ਪਤ੍ਤਿਪਚ੍ਚਯੇ’’ਤਿ ਯੋਜੇਤਬ੍ਬਂ. ਤਤ੍ਥ, ਵਿਪਤ੍ਤਿਪਚ੍ਚਯਾਨਾਮ-ਰਾਜਤੋਵਾ ਚੋਰਤੋਵਾ-ਤਿਆਦਿਨਾ ਆਗਤਾ ਦੁਕ੍ਖੁਪ੍ਪਤ੍ਤਿਪਚ੍ਚਯਾ. ਸਮ੍ਪਤ੍ਤਿਪਚ੍ਚਯਾਨਾਮ ਕਾਯਚਿਤ੍ਤਾਨਂ ਸਪ੍ਪਾਯ ਪਚ੍ਚਯਾ. ਚਤ੍ਤਾਰੋ ਪਚ੍ਚਯਾ ਚ ਉਪਟ੍ਠਾਕਕੁਲਾਨਿ ਚ ਆਰਕ੍ਖ ਦੇਵਤਾਦਯੋ ਚ ਸੁਖੁਪ੍ਪਤ੍ਤਿ ਪਚ੍ਚਯਾ. ਤੇਹਿ ਪਚ੍ਚਯੇਹਿ ਪਾਮੋਜ੍ਜ ਬਹੁ ਲਸ੍ਸ ਥੇਰਸ੍ਸ ਸਨ੍ਤਾਨੇ ਰਤ੍ਤਿਦਿਵਂ ਪੀਤਿਪਸ੍ਸਦ੍ਧਿਸੁਖਸਮਾਧੀਨਂ ਪਵਤ੍ਤਿਯਾ ਅਜ੍ਝਤ੍ਤਭੂਤਾ ਉਤੁਚਿਤ੍ਤਾਹਾਰਾ ਚ ਅਤਿ ਪਣੀਤਾ ਹੋਨ੍ਤਿ. ਤੇਹਿ ਸਮੁਟ੍ਠਿਤਾ ਸਰੀਰਟ੍ਠਕਧਾਤੁਯੋ ਚ ਅਤਿਪਣੀਤਾ ਏਵ ਹੁਤ੍ਵਾ ਉਪਬ੍ਰੂਹਨ੍ਤਿ. ਤਤ੍ਥ ਸਰੀਰਟ੍ਠਕਧਾਤੁਯੋ ਨਾਮ ਪਥਵਿ ਆਦਯੋ ਵਾਤਪਿਤ੍ਤਸੇਮ੍ਹਾਦਯੋਚ. ‘‘ਅਨੁਬਲਂਦੇਤੀ’’ਤਿਅਭਿਨਵਂਥਾਮਬਲਂ ਪਵਤ੍ਤੇਤਿ. ‘‘ਪੁਞ੍ਞਨ੍ਤਰਸ੍ਸਾ’’ਤਿ ਪਵਤ੍ਤਿਵਿਪਾਕਜਨਕਸ੍ਸ ਬਹੁਵਿਧਸ੍ਸ ਪੁਞ੍ਞ ਕਮ੍ਮਸ੍ਸ. ‘‘ਅਥਾ’’ਤਿ ਤਸ੍ਮਿਂ ਕਾਲੇਤਿ ਅਤ੍ਥੋ. ‘‘ਬਲਵਬਲਵਨ੍ਤਿਯੋ ਹੁਤ੍ਵਾ’’ਤਿ ਪਕਤਿ ਬਲਤੋ ਅਤਿਬਲਵਨ੍ਤਿਯੋ ਹੁਤ੍ਵਾ. ‘‘ਤਸ੍ਮਿਂ ਥੇਰਸਨ੍ਤਾਨੇ’’ਤਿ ਸਮ੍ਬਨ੍ਧੋ. ‘‘ਇਟ੍ਠਪ੍ਫਲਘਨਪੂਰਿਤੇ’’ਤਿ ਇਟ੍ਠਪ੍ਫਲਭੂਤਾਨਂ ਰੂਪਸਨ੍ਤਤੀਨਂ ਘਨੇਨ ਪੂਰਿਤੇ. ‘‘ਓਕਾਸੋ ਨਾਮ ਨਤ੍ਥੀ’’ਤਿ ਪਤਿਟ੍ਠਾਨੋਕਾਸੋ ਨਾਮ ਨਤ੍ਥਿ. ‘‘ਇਤੀ’’ਤਿ ਤਸ੍ਮਾ. ‘‘ਦੂਰਤੋ ਅਪਨੀਤਾਨੇਵ ਹੋਨ੍ਤੀ’’ਤਿ ਸਮ੍ਬਨ੍ਧੋ. ਇਟ੍ਠਪ੍ਫਲਸਨ੍ਤਾਨਂ ਵਿਬਾਧਨ੍ਤਿ ਨੀਵਾਰੇਨ੍ਤੀਤਿ ਇਟ੍ਠਪ੍ਫਲਸਨ੍ਤਾਨਵਿਬਾਧਕਾਨਿ ਉਪਪੀਲ਼ਕੂਪਘਾਤਕਕਮ੍ਮਾਨਿ. ਅਨਿਟ੍ਠਪ੍ਫਲ ਸਨ੍ਤਾਨ ਜਨਕਾਨਿ, ਅਕੁਸਲ ਜਨਕ ਕਮ੍ਮਾਨਿ, ਅਪੁਞ੍ਞ ਕਮ੍ਮਾਨੀਤਿ ਤਾਨਿਤਿਵਿਧਾਨਿ ਅਕੁਸਲਕਮ੍ਮਾਨਿ ਦੂਰਤੋ ਅਪਨੀਤਾਨੇਵ ਹੋਨ੍ਤਿ, ਤੇਸਂ ਵਿਪਾਕਸ੍ਸ ਅਨੋਕਾਸਕਰਣੇਨਾਤਿ ਅਧਿਪ੍ਪਾਯੋ. ਤੇਨਾਹ ‘‘ਨਹੀ’’ਤਿਆਦਿਂ. ‘‘ਤਤੋ’’ਤਿ ਤਸ੍ਮਾ ਅਪੁਞ੍ਞ ਕਮ੍ਮਾਨਂ ਦੂਰਤੋ ਅਪਨੀਤਤ੍ਤਾ. ਅਭਿਵਾਦੇਤਬ੍ਬਾਨਂ ਮਾਤਾਪਿਤੁ ਸਮਣਬ੍ਰਾਹ੍ਮਣਾਦੀਨਂ ਅਭਿਵਾਦਨਕਮ੍ਮੇਗਰੁਂਕਰਣਂ ਅਭਿਵਾਦਨ ਸੀਲਂ ਨਾਮ. ਤਂ ਅਸ੍ਸ ਅਤ੍ਥੀਤਿ ਅਭਿਵਾਦਨਸੀਲੀ. ਗੁਣਵੁਦ੍ਧਵਯਵੁਦ੍ਧੇ ਅਪਚੇਤਿ ਅਤ੍ਤਾਨਂ ਨੀਚਵੁਤ੍ਤਿ ਕਰਣੇਨ ਪੂਜੇਤਿਸੀਲੇਨਾਤਿ ਵੁਦ੍ਧਾਪਚਾਯੀ. ਉਭਯਤ੍ਥਾਪਿਸਮ੍ਪਦਾਨ ਵਚਨਂ. ਏਵਨ੍ਤਿਆਦਿਨਿ ਗਮਨ ਵਚਨਂ. ਨਿਗਮਨ੍ਤਿ ਚ ਨਿਟ੍ਠਙ੍ਗਮਨਂ. ਤਸ੍ਮਾਤਿਆਦਿ ਲਦ੍ਧਗੁਣ ਵਚਨਂ. ਲਦ੍ਧਗੁਣੋਤਿ ਚ ਤਂਤਂਪਸਙ੍ਗ ਵਿਸੋਧਨਂ ਪਰਿਪੁਣ੍ਣਂ ਕਤ੍ਵਾ ਲਦ੍ਧੋਵਿਸੁਦ੍ਧੋ ਅਤ੍ਥੋ ਵੁਚ੍ਚਤਿ. ਤਥਾ ਵਚਨ ਸਾਮਤ੍ਥਿਯੇਨ ਲਦ੍ਧੋ ਅਤ੍ਥਨ੍ਤਰੋਪਿ ਅਯਮਿਧ ਅਧਿਪ੍ਪੇਤੋ. ‘‘ਨਕੇਵਲਞ੍ਚ ਥੇਰਸ੍ਸੇਵ ਅਨਨ੍ਤਰਾਯੇਨ ਪਰਿਸਮਾਪਨਤ੍ਥਂ ਹੋਤੀ’’ਤਿ ਯੋਜਨਾ. ‘‘ਸੋਤੂਨਞ੍ਚਗਹਣ ਕਿਚ੍ਚ ਸਮ੍ਪਜ੍ਜਨਤ੍ਥ’’ਨ੍ਤਿਸਮ੍ਬਨ੍ਧੋ. ਸੁਣਨ੍ਤੀਤਿ ਸੋਤਾਰੋ. ਤੇਸਂ. ‘‘ਗਣ੍ਹਨ੍ਤਾਨ’’ਨ੍ਤਿ ਉਗ੍ਗਣ੍ਹਨ੍ਤਾਨਂ. ‘‘ਵਨ੍ਦਨਾਸਿਦ੍ਧਿਯਾ’’ਤਿਰ ਤਨਤ੍ਤਯੇਵਨ੍ਦਨਾ ਪੁਞ੍ਞਸ੍ਸਸਿਦ੍ਧਿਤੋ. ਜਵਨਵਿਨਿਚ੍ਛਯੇ ਯਸ੍ਮਾ ਅਨ੍ਤਰਾਯ ਨੀਵਾਰਣਂਨਾਮ ਦਿਟ੍ਠਧਮ੍ਮੇ ਇਚ੍ਛਿਤਬ੍ਬਂ ਫਲਂ ਹੋਤਿ. ਦਿਟ੍ਠ ਧਮ੍ਮੋ ਚ ਪਥਮ ਜਵਨਸ੍ਸ ਵਿਪਾਕਕ੍ਖੇਤ੍ਤਂ. ਤਸ੍ਮਾ ਉਪਤ੍ਥਮ੍ਭਨ ਕਿਚ੍ਚਂ ਪਤ੍ਵਾਪਿ ਪਥਮ ਜਵਨ ਚੇਤਨਾ ਏਵ ਇਧਪਰਿਯਤ੍ਤਾਤਿ ਅਧਿਪ੍ਪਾਯੇਨ ‘‘ਦਿਟ੍ਠਧਮ੍ਮਵੇਦਨੀਯਭੂਤਾ’’ਤਿ ਵੁਤ੍ਤਂ. ਸਾ ਪਨ ਪਥਮ ਜਵਨ ਚੇਤਨਾ ਉਪਤ੍ਥਮ੍ਭਨ ਕਿਚ੍ਚਂ ਪਤ੍ਵਾਪਿ ਸਬ੍ਬਦੁਬ੍ਬਲਾ ਏਵਸਿਯਾ. ਕਸ੍ਮਾ, ਅਲਦ੍ਧਾਸੇਵਨਤ੍ਤਾ. ਸੇਸ ਚੇਤਨਾਯੋ ਏਵ ਬਲਵਤਿਯੋ ਸਿਯੁਂ. ਕਸ੍ਮਾ, ਲਦ੍ਧਾ ਸੇਵਨਤ੍ਤਾਤਿ ਦਟ੍ਠਬ੍ਬਂ. ‘‘ਸਤ੍ਤਜਵਨਪਕ੍ਖੇ ਅਧਿਪ੍ਪੇਤਤ੍ਤਾ ਉਪਲਦ੍ਧਬ੍ਬਤ੍ਤਾ ਤਂ ਨਸੁਨ੍ਦਰ’’ਨ੍ਤਿ ਸਮ੍ਬਨ੍ਧੋ. ‘‘ਇਤੀ’’ਤਿ ਵਾਕ੍ਯਪਰਿਸਮਾਪਨਂ. ‘‘ਯਥਾ ਅਪ੍ਪਮਤ੍ਤਕਂ ਹੋਤਿ. ਏਵਮੇਵਂ ਅਪ੍ਪਮਤ੍ਤਕਂ ਹੋਤੀ’’ਤਿ ਯੋਜੇਤਬ੍ਬਂ. ‘‘ਤਥਾਹੀ’’ਤਿ ਤਤੋ ਏਵਾਤਿ ਅਤ੍ਥੋ. ਪਟ੍ਠਾਨੇਪਿ=ਕਬਲ਼ੀਕਾਰੋਆਹਾਰੋ ਇਮਸ੍ਸਕਾਯਸ੍ਸ ਆਹਾਰ ਪਚ੍ਚਯੇਨਪਚ੍ਚਯੋ=ਤਿਵਿਭਤ੍ਤੋ. ਇਤਰਥਾ ‘ਕਬਲ਼ੀਕਾਰੋ ਆਹਾਰੋ ਆਹਾਰਸਮੁਟ੍ਠਾਨਾਨਂ ਰੂਪਾਨਂ ਆਹਾਰਪਚ੍ਚਯੇਨ ਪਚ੍ਚਯੋ’ਤਿ ਵਿਭਤ੍ਤੋ ਸਿਯਾਤਿ. ‘‘ਅਧੁਨਾਵਾ’’ਤਿ ਇਮਸ੍ਮਿਂ ਭਵੇ ਏਵ. ਏਵਂ ਵਨ੍ਦਨਾਯਪਯੋਜਨਂ ਦੀਪੇਤ੍ਵਾ ਇਦਾਨਿ ਸੇਸਾਨਂ ਪਿਣ੍ਡਤ੍ਥਾਨਂ ਪਯੋਜਨਂ ਦੀਪੇਤੁਂ ‘‘ਯਸ੍ਮਾਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ, ‘‘ਆਦਿਤੋਵਿਦਿਤੇਸਤੀ’’ਤਿਆਦਿਮ੍ਹਿ-ਭਾਸਿਸ੍ਸਂ ਅਭਿਧਮ੍ਮਤ੍ਥ ਸਙ੍ਗਹ-ਨ੍ਤਿ ਪਦਂ ਸੁਤ੍ਵਾ ਵਿਞ੍ਞਾਤੇਸਤਿ, ‘‘ਉਸ੍ਸਾਹੋਜਾਯਤਿ’’. ਇਮਂ ਉਗ੍ਗਹੇਤ੍ਵਾ ਸੁਦੁਲ੍ਲਭੇ ਅਭਿਧਮ੍ਮਤ੍ਥੇ ਚ ਅਨਾਯਾਸੇਨ ਜਾਨਿਸ੍ਸਾਮ, ਤਮ੍ਮੂਲਕਸ੍ਸ ਚ ਅਨੁਪਾਦਾ ਪਰਿਨਿਬ੍ਬਾਨਨ੍ਤਸ੍ਸ ਪਯੋਜਨਸ੍ਸਭਾਗਿਨੋ ਭਵਿਸ੍ਸਾਮਾਤਿ ਚਿਤ੍ਤੁਪ੍ਪਾਦ ਸਮ੍ਭਵਤੋਤਿ ਅਧਿਪ੍ਪਾਯੋ.

ਪਿਣ੍ਡਤ੍ਥਾਨੁਦੀਪਨਾ ਨਿਟ੍ਠਿਤਾ.

੪. ਪਦਤ੍ਥੇ. ‘‘ਬੁਜ੍ਝੀ’’ਤਿ ਅਞ੍ਞਾਸਿ. ‘‘ਏਤ੍ਥਾ’’ਤਿ ਏਤਸ੍ਮਿਂ ਪਦੇ. ਚ ਸਦ੍ਦੋ ਵਾਕ੍ਯਾਰਮ੍ਭ ਜੋਤਕੋ. ਵਾਕ੍ਯਾ ਰਮ੍ਭੋਤਿ ਚ ਮੂਲਵਾਕ੍ਯੇ ਯਂ ਯਂ ਵਤ੍ਤਬ੍ਬਂ ਅਵੁਤ੍ਤਂ, ਤਸ੍ਸ ਤਸ੍ਸ ਕਥਨਤ੍ਥਾਯ ਅਨੁਵਾਕ੍ਯਸ੍ਸ ਆਰਮ੍ਭੋ. ਬੁਜ੍ਝਨਕਿਰਿਯਾਵੁਚ੍ਚਤਿਞਾਣਂ. ਕਥਂਪਨਅਵਿਪਰੀਤਤ੍ਥੇ ਪਵਤ੍ਤੋ ਸਮ੍ਮਾਸਦ੍ਦੋ ਅਸੇਸ ਬ੍ਯਾਪਨਂ ਦੀਪੇਤੀਤਿ ਪੁਚ੍ਛਾਯ ਪੁਰਿਮਤ੍ਥਮੇ ਵਬ੍ਯਤਿਰੇਕਤੋ ਚ ਅਨ੍ਵਯਤੋ ਚ ਪੁਨ ਵਿਤ੍ਥਾਰੇਨ੍ਤੋ ‘‘ਤਥਾਹੀ’’ਤਿਆਦਿਮਾਹ. ਤਤ੍ਥ, ‘‘ਤਥਾਹੀ’’ਤਿ ਤਸ੍ਸ ਵਚਨਸ੍ਸ ਅਯਂ ਵਿਤ੍ਥਾਰੋਤਿ ਜੋਤੇਤਿ. ‘‘ਅਵਿਪਰੀਤ’’ਨ੍ਤਿ ਕਿਰਿਯਾਵਿਸੇਸਨ ਪਦਮੇਤਂ. ‘‘ਅਤ੍ਤਨੋ ਵਿਸਯੇ ਏਵਾ’’ਤਿ ਅਤ੍ਤਨੋ ਞਾਣਵਿਸਯੇ ਏਵ ਤੇਸਂ ਵਿਸਯੋਚਾਤਿ ਸਮ੍ਬਨ੍ਧੋ. ਯਸ੍ਮਾ ਏਕੋਪਿ ਧਮ੍ਮੋ ਕਾਲਦੇਸਸਨ੍ਤਾਨਾਦਿਭੇਦੇਨ ਅਨਨ੍ਤ ਭੇਦੋ ਹੋਤਿ. ਤਸ੍ਮਾ ਪਦੇਸਞਾਣਿਕਾ ਪਚ੍ਚੇਕਬੁਦ੍ਧਾਦਯੋ ਏਕਧਮ੍ਮਂਪਿ ਸਬ੍ਬਾਕਾਰਤੋ ਜਾਨਿਤੁਂ ਨ ਸਕ੍ਕੋਨ੍ਤਿ. ਤੇਨਾਹ ‘‘ਤੇਹੀ’’ਤਿਆਦਿਂ. ਤਤ੍ਥ ‘‘ਸਬ੍ਬਾਕਾਰਤੋ’’ਤਿ ਸਭਾਵਤੋ, ਹੇਤੁਤੋ, ਪਚ੍ਚਯਤੋ, ਫਲਤੋ, ਨਿਸ੍ਸਨ੍ਦਤੋ, ਕਾਲਤੋ, ਦੇਸਤੋਤਿਆਦਿਨਾ ਆਕਾਰੇਨ. ‘‘ਯਤ੍ਥਾ’’ਤਿ ਯਸ੍ਮਿਂ ਅਵਿਸਯੇਧਮ੍ਮੇ. ‘‘ਤੇ ਵਿਪਰੀਤਂ ਬੁਜ੍ਝੇਯ੍ਯੁਂ, ਸੋ ਅਵਿਸਯੋ ਨਾਮਧਮ੍ਮੋਨਤ੍ਥੀ’’ਤਿਯੋਜਨਾ. ਤਂ ਵਿਤ੍ਥਾਰੇਨ੍ਤੋ ‘‘ਤੇਹੀ’’ਤਿਆਦਿਮਾਹ. ਤਤ੍ਥ, ‘‘ਤਿਯਦ੍ਧਗਤੇ’’ਤਿ ਤੀਸੁਕਾਲੇਸੁ ਗਤੇ ਪਵਤ੍ਤੇ. ‘‘ਅਦ੍ਧਾਮੁਤ੍ਤਕੇ’’ਤਿ ਕਾਲਤ੍ਤਯਵਿਮੁਤ੍ਤਕੇ. ‘‘ਹਤ੍ਥਮਣਿਕੇਵਿਯਾ’’ਤਿ ਹਤ੍ਥ ਤਲੇ ਠਪਿਤਮਣਿਰਤਨਾਨਿਵਿਯ. ‘‘ਸਬ੍ਬੇ ਧਮ੍ਮਾ’’ਤਿਆਦਿ ਪਾਲ਼ਿਸਾਧਕਂ. ਤਤ੍ਥ, ‘‘ਆਪਾਤ’’ਨ੍ਤਿ ਅਭਿਮੁਖਂ ਪਤਨਂ. ਆਬਾਧਨ੍ਤਿਪਿ ਪਾਠੋ, ਓਤ੍ਥਰਿਤ੍ਵਾ ਉਪਟ੍ਠਾਨਨ੍ਤਿ ਅਤ੍ਥੋ. ‘‘ਸਬ੍ਬਞ੍ਞੁਮਹਾਭਵਙ੍ਗ’’ਨ੍ਤਿ ਸਬ੍ਬੇਸਂਸਬ੍ਬਞ੍ਞੁਬੁਦ੍ਧਾਨਂ ਪਚ੍ਛਿਮਭਵੇ ਪਟਿਸਨ੍ਧਿਤੋ ਪਟ੍ਠਾਯ ਪਵਤ੍ਤਂ ਅਟ੍ਠਸੁ ਮਹਾਵਿਪਾਕੇਸੁ ਪਥਮਮਹਾਵਿਪਾਕਂ ਭਵਙ੍ਗ ਚਿਤ੍ਤਂ. ‘‘ਤਤ੍ਥਾ’’ਤਿ ਤਸ੍ਮਿਂ ਮਹਾਭਵਙ੍ਗੇ. ‘‘ਨਿਚ੍ਚਕਾਲਂ ਉਪਟ੍ਠਹਨ੍ਤੀ’’ਤਿ ਸਬ੍ਬਕਾਲਂ ਉਪਟ੍ਠਾਨਾਕਾਰ ਪਤ੍ਤਾ ਹੁਤ੍ਵਾ ਤਿਟ੍ਠਨ੍ਤਿ. ਕਸ੍ਮਾ, ਕਸ੍ਸਚਿ ਆਵਰਣਸ੍ਸ ਅਭਾਵਤੋ. ਇਦਂਪਿਹਿ ਏਕਂ ਉਪਟ੍ਠਾਨਂ ਨਾਮਾਤਿ. ‘‘ਆਵਜ੍ਜਨਾਯਾ’’ਤਿ ਮਨੋਦ੍ਵਾਰਾਵਜ੍ਜਨ ਚਿਤ੍ਤੇਨ. ਧਮ੍ਮਾ ਮਹਨ੍ਤਾ. ਭਵਙ੍ਗਂ ਪਰਿਤ੍ਤਕਂ. ਤਸ੍ਮਾ ਪਰਿਤ੍ਤਕਂ ਭਵਙ੍ਗਂ ਏਕਕ੍ਖਣੇ ਮਹਨ੍ਤਾਨਂ ਧਮ੍ਮਾਨਂ ਨਪਹੋਤੀਤਿ ਚੋਦਕਸ੍ਸ ਅਧਿਪ੍ਪਾਯੋ. ‘‘ਨਚੋਦੇਤਬ੍ਬਮੇਤ’’ਨ੍ਤਿ ਏਤਂ ਠਾਨਂ ਨਚੋਦੇਤਬ੍ਬਂ. ‘‘ਪਰਮੁਕ੍ਕਂਸਪਤ੍ਤਾਨ’’ਨ੍ਤਿ ਏਤ੍ਥ ‘‘ਉਕ੍ਕਂਸੋ’’ਤਿ ਅਚ੍ਚੁਗ੍ਗਮੋ ਅਚ੍ਚੁਤ੍ਤਰੋ. ਪਰਮੋ ਉਕ੍ਕਂਸੋ ਪਰਮੁਕ੍ਕਂਸੋਤਿਵਿਗ੍ਗਹੋ.

ਏਵਂ ਸਮ੍ਮਾਸਦ੍ਦਸ੍ਸ ਅਤ੍ਥਂ ਵਿਚਾਰੇਤ੍ਵਾ ਇਦਾਨਿ ਸਂਸਦ੍ਦਸ੍ਸ ਅਤ੍ਥਂ ਵਿਚਾਰੇਨ੍ਤੋ ‘‘ਸਂਸਦ੍ਦੋਪਨਾ’’ਤਿਆਦਿਮਾਹ. ਤਤ੍ਥ, ‘‘ਉਪਸਗ੍ਗੋ’’ਤਿ ਉਪਸਗ੍ਗਪਦਂ. ‘‘ਪਟਿਵੇਧਧਮ੍ਮੇਸੂ’’ਤਿ ਪਟਿਚ੍ਚਸਮੁਪ੍ਪਾਦਾਦੀਨਂ ਪਟਿਵਿਜ੍ਝਨਞ੍ਞਾਣੇਸੁ. ਨਤ੍ਥਿ ਆਚਰਿਯੋ ਏਤਸ੍ਸਾਤਿ ਅਨਾਚਰਿਯੋ. ਸਮਾਸਨ੍ਤੇ ਕਕਾਰੇਨ ਸਹ ਅਨਾਚਰਿਯਕੋ. ਅਨਾਚਰਿਯਕਸ੍ਸ ਭਾਵੋ ਅਨਾਚਰਿਯਕਤਾ. ਤਂ ਅਨਾਚਰਿਯਕਤਂ. ਤਤੀਯਾ ਰੁਪ੍ਪਸਮਾਪਤ੍ਤਿ ਨਾਮ ਆਕਿਞ੍ਚਞ੍ਞਾਯਤਨਜ੍ਝਾਨਂ. ਤਂ ਭਗਵਾ ਆਲ਼ਾਰਸ੍ਸ ਸਨ੍ਤਿਕੇ ਉਗ੍ਗਣ੍ਹਾਤਿ. ਚਤੁਤ੍ਥਾਰੁਪ੍ਪਸਮਾਪਤ੍ਤਿ ਨਾਮ ਨੇਵਸਞ੍ਞਾ ਨਾਸਞ੍ਞਾਯਤਨਜ੍ਝਾਨਂ. ਤਂ ਉਦਕਸ੍ਸਸਨ੍ਤਿਕੇ ਉਗ੍ਗਣ੍ਹਾਤੀਤਿ ਵੁਤ੍ਤਂ ‘‘ਆਲ਼ਾਰੁਦਕਮੂਲਿਕਾ’’ਤਿ. ‘‘ਅਨਲਙ੍ਕਰਿਤ੍ਵਾ’’ਤਿ ਆਵਜ੍ਜਨਸਮਾਪਜ੍ਜਨਾਦਿਵਸੇਨ ਅਨਲਙ੍ਕਰਿਤ੍ਵਾ. ਅਨਾਸੇਵਿਤ੍ਵਾਤਿ ਵੁਤ੍ਤਂ ਹੋਤਿ. ‘‘ਛਡ੍ਡਿਤਤ੍ਤਾ’’ਤਿ ਏਤਾਸਮਾਪਤ੍ਤਿਯੋਨਾਲਂ ਬੋਧਾਯ, ਅਥ ਖੋ ਯਾਵਦੇਵ ਤਤੀਯ ਚਤੁਤ੍ਥਾਰੁਪ੍ਪਭਵਪ੍ਪਟਿਲਾਭਾਯ ਸਂਵਤ੍ਤਨ੍ਤੀਤਿ ਏਵਂ ਆਦੀਨਵਂ ਦਿਸ੍ਵਾ ਛਡ੍ਡਿਤਤ੍ਤਾ. ‘‘ਬੁਜ੍ਝਨਕਿਰਿਯਾਯਾ’’ਤਿ ਪਟਿਵੇਧਞ੍ਞਾਣਸ੍ਸ. ‘‘ਕੁਤੋ ਪਟਿਵੇਧਧਮ੍ਮਾ’’ਤਿ ਤਾ ਕੁਤੋ ਪਟਿਵੇਧਧਮ੍ਮਾ ਹੋਨ੍ਤਿ. ਪਟਿਵੇਧਧਮ੍ਮਾ ਏਵ ਚ ਬੁਦ੍ਧਭਾਵਾਯਪਦਟ੍ਠਾਨਾਹੋਨ੍ਤੀਤਿ ਅਧਿਪ੍ਪਾਯੋ.

ਪਾਲ਼ਿਯਂ. ‘‘ਪੁਬ੍ਬੇ ਅਨਨੁਸ੍ਸੁਤੇਸੁਧਮ੍ਮੇਸੂ’’ਤਿ ਇਮਸ੍ਮਿਂ ਭਵੇ ਇਤੋ ਪੁਬ੍ਬੇ ਕਸ੍ਸਚਿਸਨ੍ਤਿਕੇ ਅਨਨੁਸ੍ਸੁਤੇ ਸੁਚਤੁਸ੍ਸਚ੍ਚ ਧਮ੍ਮੇਸੁ. ‘‘ਅਭਿਸਮ੍ਬੁਜ੍ਝੀ’’ਤਿਪਦੇ ਅਭਿਸਮ੍ਬੋਧਿਸਙ੍ਖਾਤਂ ਅਰਹਤ੍ਤਮਗ੍ਗਞ੍ਞਾਣਂ ਵੁਤ੍ਤਂ. ਤਦੇਵ ਞਾਣਂ ਸਬ੍ਬਞ੍ਞੁਤਞ੍ਞਾਣਸ੍ਸ ਪਦਟ੍ਠਾਨਂ ਹੋਤਿ. ਤਪ੍ਪਚ੍ਚਯਾ ਤਦਨਨ੍ਤਰਾ ਏਵਸਬ੍ਬਞ੍ਞੁਤਞ੍ਞਾਣਂ ਪਾਤੁਬ੍ਭਵਤੀਤਿ ਵੁਤ੍ਤਂ ‘‘ਤਤ੍ਥ ਚ ਸਬ੍ਬਞ੍ਞੁਤਂ ਪਾਪੁਣਾਤੀ’’ਤਿ. ‘‘ਤਦਨਨ੍ਤਰਾ’’ਤਿ ਚ ਅਰਹਤ੍ਤ ਮਗ੍ਗਵੀਥਿਯਾਚ ਚਤੁਨ੍ਨਂ ਪਚ੍ਚਵੇਕ੍ਖਨ ਵਾਰਾਨਞ੍ਚ ਅਨਨ੍ਤਰੇ ਕਾਲੇਤਿ ਅਤ੍ਥੋ. ‘‘ਨਿਮਿਤ੍ਤਤ੍ਥੇ’’ਤਿ ਨਿਮਿਤ੍ਤ ਹੇਤ੍ਵਤ੍ਥੇ. ‘‘ਭੁਮ੍ਮ’’ਨ੍ਤਿ ਅਟ੍ਠਕਥਾਸੁਆਗਤਂ ਸਤ੍ਤਮੀਵਿਭਤ੍ਤਿਯਾਨਾਮਂ. ਤਾਸੁ ਹਿ ਪਚ੍ਚਤ੍ਤਵਚਨਂ, ਉਪਯੋਗਵਚਨਂ, ਕਰਣ ਵਚਨਂ, ਸਮ੍ਪਦਾਨ ਵਚਨਂ, ਨਿਸ੍ਸਕ੍ਕਵਚਨਂ, ਸਾਮਿਵਚਨਂ, ਸੁਮ੍ਮਵਚਨਨ੍ਤਿ ਏਵਂ ਅਨੁਕ੍ਕਮੇਨ ਸਤ੍ਤਨ੍ਨਂ ਵਿਭਤ੍ਤੀਨਂ ਨਾਮਾਨਿ ਆਗਤਾਨੀਤਿ.

‘‘ਦਸਬਲਞ੍ਞਾਣੇਸੂ’’ਤਿ ਠਾਨਾਠਾਨ ਕੋਸਲ੍ਲਞ੍ਞਾਣਾਦੀਸੁ ਦਸ ਞਾਣਬਲੇਸੁ. ‘‘ਵਸਿਭਾਵ’’ਨ੍ਤਿ ਏਤ੍ਥ ਅਤ੍ਤਨੋ ਵਸਂ ਵਤ੍ਤੇਤੁਂ ਸਮਤ੍ਥਤਾ ਸਙ੍ਖਾਤੋਸਤ੍ਤਿ ਵਿਸੇਸੋ ਵਸੋਨਾਮ. ਵਸੋ ਏਤਸ੍ਸ ਅਤ੍ਥੀਤਿ ਵਸੀ-ਵਸਿਗਣੇਹੀਤਿਆਦੀਸੁਵਿਯ. ਵਸਿਨੋ ਭਾਵੋ ਵਸਿਭਾਵੋ. ਤਂ ਵਸਿਭਾਵਨ੍ਤਿ ਅਤ੍ਥੋ. ਤੇਨਾਹ ‘‘ਵਸਿਭਾਵ’’ਨ੍ਤਿ ਇਸ੍ਸਰਭਾਵਨ੍ਤਿ. ਕਤ੍ਥਚਿ ਪਨ ‘‘ਵਸੀ’’ਤਿ ਇਤ੍ਥਿਲਿਙ੍ਗਪਦਂਪਿ ਦਿਸ੍ਸਤਿ=ਤਤ੍ਰਿਮਾ ਪਞ੍ਚਵਸਿਯੋ ਆਵਜ੍ਜਨਵਸੀਸਮਾਪਜ੍ਜਨਵਸੀ=ਤਿਆਦੀਸੁ.

ਸਮ੍ਮਾਸਮ੍ਬੁਦ੍ਧਪਦ.

੫. ਅਤੁਲਪਦੇ. ਅਨੇਕੇਹਿਗੁਣਪਦੇਹਿ ਪਵਤ੍ਤਿਤਾਵਨ੍ਦਨਾ ‘‘ਅਨੇਕਗੁਣਪਦਵਿਸਯਾਨਾਮ’’. ‘‘ਇਤਿਕਿਂਦੁਤੀਯੇਨਾ’’ਤਿ ਇਤਿ ਤਸ੍ਮਾ ਦੁਤੀਯੇਨ ਅਤੁਲਪਦੇਨ ਕਿਂ ਪਯੋਜਨਂ ਅਤ੍ਥੀਤਿ ਅਤ੍ਥੋ. ‘‘ਨਨ ਸਮਤ੍ਥਾ’’ਤਿ ਨਸਮਤ੍ਥਾ ਨ ਹੋਤੀਤਿ ਯੋਜਨਾ. ਸਮਤ੍ਥਾ ਏਵਾਤਿ ਅਧਿਪ੍ਪਾਯੋ. ‘‘ਮਤ੍ਤਕਾਰਿਨੋ’’ਤਿ ਪਮਾਣਕਾਰਿਨੋ. ‘‘ਥੇਰੋ ਚ ਤੇਸਂ ਅਞ੍ਞਤਰੋ’’, ਤਸ੍ਮਾ ਮਤ੍ਤਂ ਨ ਕਰੋਤਿ, ਦੁਤੀਯਂ ਅਤੁਲ ਪਦਂ ਆਹਰੀਤਿ ਅਧਿਪ੍ਪਾਯੋ. ‘‘ਅਪਿਚਾ’’ਤਿ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ‘‘ਨਕੇਵਲਂ ਵਨ੍ਦਨਾਯ ਅਨ੍ਤਰਾਯਨੀਵਾਰਣਮੇਵ ਇਚ੍ਛਿ ਤਬ੍ਬਂ ਹੋਤੀ’’ਤਿ ਯੋਜਨਾ. ‘‘ਵਨ੍ਦਨਾਯਾ’’ਤਿ ਵਨ੍ਦਨਾਹੇਤੁ. ਸੋਪਿ ਪਞ੍ਞਾਪਾਟਵਾਦਿ ਅਤ੍ਥੋ. ‘‘ਗਨ੍ਥਪਾਰਿਸੁਦ੍ਧਿਯਾ’’ਤਿ ਗਨ੍ਥਦੋਸਾਨਾਮ ਪਦਦੋਸ ਵਾਕ੍ਯਦੋਸ ਅਤ੍ਥਦੋਸਾਦਯੋ ਅਤ੍ਥਿ. ਤੇਹਿ ਦੋਸੇਹਿ ਇਮਸ੍ਸ ਗਨ੍ਥਸ੍ਸ ਪਾਰਿਸੁਦ੍ਧਿਯਾ. ਕਥਂ ਪਨ ਵਨ੍ਦਨਾਯ ਪਞ੍ਞਾਪਾਟਵਾਦਿ ਅਤ੍ਥੋਸਮ੍ਭਵਤੀਤਿ ਵੁਤ੍ਤਂ ‘‘ਅਨੁਸ੍ਸਤਿਟ੍ਠਾਨੇਸੂ’’ਤਿਆਦਿ. ਅਨੁਸ੍ਸਤਿਟ੍ਠਾਨਾਨਿ ਨਾਮ ਬੁਦ੍ਧ ਧਮ੍ਮ ਸਙ੍ਘਸੀਲਾਦੀਨਿ. ਚਿਤ੍ਤਸਮਾਧਾਨਂ ਆਵਹਤੀਤਿ ਚਿਤ੍ਤਸਮਾਧਾਨਾਵਹੋ. ‘‘ਤਿਕ੍ਖਾਸੂਰਾਹੁਤ੍ਵਾਵਹਤੀ’’ਤਿ ਗਮ੍ਭੀਰੇਸੁ ਅਤ੍ਥ ਬ੍ਯਞ੍ਜਨ ਪਦੇਸੁ ਅਮਨ੍ਦਾ ਵਿਸ੍ਸਟ੍ਠਾ ਹੁਤ੍ਵਾ ਵਹਤਿ. ‘‘ਤਦਤ੍ਥਾਯਪੀ’’ਤਿ ਪਞ੍ਞਾਪਾਟਵਾਦਿ ਅਤ੍ਥਾਯਪਿ. ਗੁਣਨਾਮਪਦਾਨਂ ਗੁਣਤ੍ਥੋਨਾਮਵਿਗ੍ਗਹ ਵਾਕ੍ਯੇਸੁ ਪਾਕਟੋ, ਸਿਦ੍ਧਪਦੇਸੁ ਅਪਾਕਟੋ. ਤਸ੍ਮਾ ਤਾਨਿ ਵਿਗ੍ਗਹਤ੍ਥਂ ਅਜਾਨਨ੍ਤਾਨਂ ਸਨ੍ਤਿਕੇ ਨਾਮ ਮਤ੍ਤਾਨਿ ਸਮ੍ਪਜ੍ਜਨ੍ਤੀਤਿ ਵੁਤ੍ਤਂ ‘‘ਯਥਾਵੁਤ੍ਤ ਵਚਨਤ੍ਥਯੋਗੇਪਿ…ਪੇ… ਪਵਤ੍ਤਤ੍ਤਾ’’ਤਿ. ‘‘ਸਭਾਵਨਿਰੁਤ੍ਤਿਂ ਜਾਨਨ੍ਤਾਨ’’ਨ੍ਤਿ ਮਾਗਧ ਭਾਸਂ ਜਾਨਨ੍ਤਾਨਂ. ਮਾਗਧਭਾਸਾਹਿ ਮੂਲਭਾਸਾਤਿ ਚ ਅਰਿਯਭਾਸਾਤਿ ਚ ਮਾਗਧਭਾਸਾਤਿ ਚ ਪਾਲ਼ਿਭਾਸਾਤਿ ਚ ਧਮ੍ਮਨਿਰੁਤ੍ਤੀਤਿ ਚ ਸਭਾਵਨਿਰੁਤ੍ਤੀਤਿ ਚ ਵੁਚ੍ਚਤਿ. ‘‘ਭਾਵਤ੍ਥਸੁਞ੍ਞ’’ਨ੍ਤਿ ਏਤ੍ਥ ਗੁਣਨਾਮਾਨਂ ਗੁਣਤ੍ਥੋ ਭਾਵਤ੍ਥੋ ਨਾਮ. ਸੋ ਏਵਸਕਤ੍ਥੋਤਿ ਚ ਵਚਨਤ੍ਥੋਤਿ ਚ ਵਿਗ੍ਗਹਤ੍ਥੋਤਿ ਚ ਵੁਚ੍ਚਤਿ. ਕਿਰਿਯਨਾਮਾਦੀਸੂਪਿ ਏਸੇਵਨਯੋ. ‘‘ਸਤ੍ਥੂ’’ਤਿ ਸਤ੍ਥੁਨੋ. ‘‘ਸਮਞ੍ਞਾਮਤ੍ਤ’’ਨ੍ਤਿ ਨਾਮਸਞ੍ਞਾਮਤ੍ਤਂ ਭਵਿਤੁਂ ਨਾਰਹਤਿ. ਤਥਾਹਿ ਅਨਾਥਪਿਣ੍ਡਿਕੋਸੇਟ੍ਠਿ ਰਾਜਗਹਂ ਅਨੁਪਤ੍ਤੋ ਬੁਦ੍ਧੋ ਲੋਕੇ ਉਪ੍ਪਨ੍ਨੋਤਿ ਸੁਤ੍ਵਾ ਉਦਾਨਂ ਉਦਾਨੇਸਿ=ਘੋਸੋਪਿ ਖੋ ਏਸੋਦੁਲ੍ਲਭੋ ਲੋਕਸ੍ਮਿਂ ਯਦਿਦਂ ਬੁਦ੍ਧੋ=ਤਿ. ਤਸ੍ਮਾ ਬੁਦ੍ਧੋਤਿ ਨਾਮਂਪਿ ਲੋਕੇ ਮਹਨ੍ਤਂ ਸੁਦੁਲ੍ਲਭਂਗੁਣਪਦਂ ਹੋਤਿ. ਸਮ੍ਮਾਸਮ੍ਬੁਦ੍ਧ ਨਾਮੇਵਤ੍ਤਬ੍ਬਮੇਵਨਤ੍ਥੀਤਿ. ‘‘ਸਭਾਵਨਿਰੁਤ੍ਤਿਂ ਅਜਾਨਨ੍ਤਾਨਂ ਪਨ ਪਦਸਹਸ੍ਸਂ ਵੁਚ੍ਚਮਾਨਂਪੀ’’ਤਿ ਤਿਟ੍ਠਤੁ ਏਕਂ ਅਤੁਲਪਦਂ, ਪਦਸਹਸ੍ਸਂਪਿ ਵੁਚ੍ਚਮਾਨਂ ਸਤ੍ਥੁਸਮਞ੍ਞਾਮਤ੍ਤਮੇਵ ਸਮ੍ਪਜ੍ਜਤਿ. ਤਾਦਿਸਾਹਿ ਜਨਾ ਇਦਂ ਲੋਕੇ ਮਹਨ੍ਤਂ ਗੁਣਪਦਨ੍ਤਿਪਿ ਨਜਾਨਨ੍ਤਿ. ਭਾਵਤ੍ਥਂ ਕਿਂਜਾਨਿਸ੍ਸਨ੍ਤਿ.

‘‘ਅਤੁਲੋ’’ਤਿ ਅਞ੍ਞੇਨ ਸੋ ਅਸਦਿਸੋਤਿ ਵਾ, ਅਞ੍ਞੋ ਵਾਤੇਨ ਸਦਿਸੋਤਸ੍ਸਨਤ੍ਥੀਤਿਵਾ, - ਦ੍ਵਿਧਾਪਿਅਤ੍ਥੋਲਬ੍ਭਤਿ. ਸਾਧਕਗਾਥਾਯਂ ‘‘ਪਟਿਪੁਗ੍ਗਲੋ’’ਤਿ ਯੁਗਗ੍ਗਾਹੀਪੁਗ੍ਗਲੋ. ਕਿਞ੍ਚਾਪਿ ਮਕ੍ਖਲਿ ਪੂਰਣਾਦਯੋ ਵਿਸੁਂਵਿਸੁਂ - ਅਹਂ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ - ਤਿਚ, ਅਹਂ ਸਮ੍ਮਾਸਮ੍ਬੁਦ੍ਧੋ-ਤਿਚ ਪਟਿਜਾਨਨ੍ਤਾ ਯੁਗਗ੍ਗਾਹਿਨੋ ਹੁਤ੍ਵਾ ਵਿਚਰਨ੍ਤਿ. ਧਮ੍ਮਤੋ ਪਨ ਸਿਨੇਰੁ ਪਬ੍ਬਤ ਰਾਜਸ੍ਸ ਸਨ੍ਤਿਕੇ ਸਕ੍ਖਰ ਕਥਲਾਨਿਵਿਯਸਮ੍ਪਜ੍ਜਨ੍ਤੀਤਿ. ‘‘ਅਨਚ੍ਛਰਿਯ’’ਨ੍ਤਿ ਨਤਾਵ ਅਚ੍ਛਰਿਤਬ੍ਬਂ ਹੋਤੀਤਿ ਅਤ੍ਥੋ. ‘‘ਬੁਦ੍ਧਭੂਤਸ੍ਸਾ’’ਤਿ ਬੁਦ੍ਧਭਾਵਂ ਭੂਤਸ੍ਸਪਤ੍ਤਸ੍ਸ. ‘‘ਯਂ ਬੁਦ੍ਧ ਭੂਤਸ੍ਸ ਅਤੁਲਤ੍ਤਂ, ਏਤਂ ਅਨਚ੍ਛਰਿਯ’’ਨ੍ਤਿ ਯੋਜਨਾ. ਯਦਿ ਚੇਤਂ ਅਨਚ੍ਛਰਿਯਂ ਹੋਤਿ, ਕਤਮਂ ਪਨ ਤਾਵ ਅਚ੍ਛਰਿਯਂ ਭਵਤੀਤਿ ਆਹ ‘‘ਸਮ੍ਪਤਿਜਾਤਸ੍ਸਾ’’ਤਿਆਦਿਂ. ਤਤ੍ਥ ‘‘ਸਮ੍ਪਤਿਜਾਤਸ੍ਸਾ’’ਤਿ ਅਜ੍ਜੇਵਜਾਤਸ੍ਸਪਿ ਅਸ੍ਸ ਭਗਵਤੋ. ਕਥਂ ਅਤੁਲਤਾ ਪਞ੍ਞਾਯਤੀਤਿ ਆਹ ‘‘ਤਦਾਹੀ’’ਤਿਆਦਿਂ. ‘‘ਏਕਙ੍ਗਣਾਨੀ’’ਤਿ ਏਕਤਲਾਨਿ. ਤਦਾਹਿ ਬੋਧਿਸਤ੍ਤਸ੍ਸਪੁਞ੍ਞਾਨੁਭਾਵੇਨ ਅਤਿਮਹਨ੍ਤੋ ਓਭਾਸੋ ਪਾਤੁਬ੍ਭਵਤਿ. = ਉਲ਼ਾਰੋ ਓਭਾਸੋ ਪਾਤੁਰਹੋਸਿ ਅਤਿਕ੍ਕਮ੍ਮਦੇਵਾਨਂ ਦੇਵਾਨੁਭਾਵ=ਨ੍ਤਿਹਿ ਵੁਤ੍ਤਂ. ਤੇਨ ਓਭਾਸੇਨ ਫਰਿਤਾ ਸਬ੍ਬੇ ਪਥਵਿ ਪਬ੍ਬਤਾਦਯੋ ਜਾਤਿਫਲਿਕਕ੍ਖਨ੍ਧਾਵਿਯ ਸੁਪ੍ਪਸਨ੍ਨਾ ਹੋਨ੍ਤਿ. ਦਸਸਹਸ੍ਸ ਚਕ੍ਕਵਾਲ਼ਾਨਿ ਏਕਤਲਂ ਹੁਤ੍ਵਾ ਪਞ੍ਞਾਯਨ੍ਤਿ. ਤੇਨ ਵੁਤ੍ਤਂ ‘‘ਅਨੇਕਾਨਿ ਚਕ੍ਕਵਾਲ਼ਸਹਸ੍ਸਾਨਿ ਏਕਙ੍ਗਣਾਨਿ ਅਹੇਸੁ’’ਨ੍ਤਿ. ‘‘ਪਰਮਾਯ ਪੂਜਾਯਾਤਿ ਥੁਤਿਮਙ੍ਗਲਵਚਨਪੂਜਾਯ. ‘‘ਲੋਕਸ੍ਸਾ’’ਤਿ ਸਬ੍ਬ ਸਤ੍ਤਲੋਕਤੋ. ਏਵਂ ਅਚ੍ਛਮ੍ਭਿ ਵਾਚਂ ਨਿਚ੍ਛਾਰੇਸਿ ਧਮ੍ਮਤਾਯ ਸਞ੍ਚੋਦਿਤਤ੍ਤਾਤਿ ਅਧਿਪ੍ਪਾਯੋ. ਤਤ੍ਥ ‘‘ਅਚ੍ਛਮ੍ਭਿਵਾਚ’’ਨ੍ਤਿ ਵਿਸਾਰਦਵਾਚਂ. ਆਸਭਿਂ ਵਾਚਨ੍ਤਿਪਿ ਪਾਠੋ. ਉਤ੍ਤਮਵਾਚਨ੍ਤਿ ਅਤ੍ਥੋ. ‘‘ਨਿਚ੍ਛਾਰੇਸੀ’’ਤਿ ਉਦਾਹਰਤਿ. ਇਦਮ੍ਪਿ ਅਨਚ੍ਛਰਿਯਂ, ਅਞ੍ਞਂ ਪਿਤਤੋ ਅਚ੍ਛਰਿਯਤਰਂ ਅਤ੍ਥੀਤਿ ਦਸ੍ਸੇਤੁਂ ‘‘ਯਦਾਪਨਾ’’ਤਿਆਦਿ ਆਰਦ੍ਧਂ. ਪਾਰਮਿਤਾ ਗੁਣੇਹਿ ਤੇਨ ਸਦਿਸੋ ਕੋਚਿਨਤ੍ਥੇਵ ਥਪੇਤ੍ਵਾ ਅਞ੍ਞੇ ਚ ਮਹਾਬੋਧਿ ਸਤ੍ਤੇਤਿ ਅਧਿਪ੍ਪਾਯੋ. ‘‘ਅਸ੍ਸਾ’’ਤਿ ਤੇਨ ਸਦਿਸਸ੍ਸ. ‘‘ਨਤ੍ਥਿਭਾਵੋ ਦੀਪੇਤਬ੍ਬੋ’’ਤਿ ਸਮ੍ਬਨ੍ਧੋ. ‘‘ਦੀਪੇਤਬ੍ਬੋ’’ਤਿ ਬੁਦ੍ਧਵਂਸਪਾਲ਼ਿਤੋ ਆਹਰਿਤ੍ਵਾ ਦੀਪੇਤਬ੍ਬੋ. ‘‘ਕੁਤੋਸਾਵਕਬੋਧਿਸਤ੍ਤਾਨਂ ਸਤਸਹਸ੍ਸਂ ਸਕ੍ਖਿਸ੍ਸਤੀ’’ਤਿ ਯੋਜਨਾ. ਪਾਰਮਿਯੋ ਪਕਾਰੇਨਵਿਚਿਨਨ੍ਤਿ ਏਤੇਨਾਤਿ ਪਾਰਮਿਪਵਿਚਯੋ. ਞਾਣਂ. ਤਂਪਨਞਾਣਂ ਮਹਾਬੋਧਿਸਤ੍ਤਾਨਂ ਏਵ ਉਪ੍ਪਨ੍ਨਂ ਨਹੋਤਿ. ਪਚ੍ਚੇਕਬੋਧਿਸਤ੍ਤ ਸਾਵਕਬੋਧਿਸਤ੍ਤਾਨਂਪਿ ਉਪ੍ਪਨ੍ਨਮੇਵ. ਤਦੇਵ ਚ ਸਬ੍ਬੇਸਂਪਿ ਬੋਧਿਸਤ੍ਤਾਨਂ ਨਿਯਤਬ੍ਯਾਕਰਣਪ੍ਪਟਿਲਾਭੇ ਪਧਾਨਕਾਰਣਨ੍ਤਿ ਦਸ੍ਸੇਤੁਂ ‘‘ਸਾਵਕਬੋਧਿਸਤ੍ਤਾਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਬੋਧਿਵੁਚ੍ਚਤਿਵਿਮੋਕ੍ਖਞ੍ਞਾਣਂ. ਅਰਿਯਮਗ੍ਗਸ੍ਸੇਤਂ ਨਾਮਂ. ਬੋਧਿਮ੍ਹਿਸਜਨ੍ਤਿ ਲਗ੍ਗਨ੍ਤੀਤਿ ਬੋਧਿਸਤ੍ਤਾ. ‘‘ਲਗ੍ਗਨ੍ਤੀ’’ਤਿ ਤਪ੍ਪਟਿਲਾਭਤ੍ਥਾਯ ਨਿਯਤ ਚਿਤ੍ਤਾ ਹੋਨ੍ਤੀਤਿ ਅਤ੍ਥੋ. ਬੋਧਿ ਅਤ੍ਥਾਯ ਪਟਿਪਨ੍ਨਾ ਸਤ੍ਤਾ ਬੋਧਿਸਤ੍ਤਾਤਿਪਿ ਯੁਜ੍ਜਤਿ. ਬੁਦ੍ਧ ਸੁਞ੍ਞੇਪਿਲੋਕੇ ਕਮ੍ਮਸ੍ਸਕਤਾਞਾਣੇ ਠਤ੍ਵਾ ਵਟ੍ਟਦੁਕ੍ਖਤੋ ਮੋਕ੍ਖਧਮ੍ਮਪਰਿਯੇਸਿਨੋ ਸਤ੍ਤਾਤਿ ਵੁਤ੍ਤਂ ਹੋਤਿ. ‘‘ਸਮ੍ਭਾਰ ਧਮ੍ਮੇ’’ਤਿ ਦਸਵਿਧੇ ਪਾਰਮਿ ਧਮ੍ਮੇ. ਵਟ੍ਟਂ ਅਨੁਸਰਨ੍ਤਿ ਅਨੁਗਚ੍ਛਨ੍ਤੀਤਿ ਵਟ੍ਟਾਨੁਸਾਰਿਨੋ. ਪਥਵਿਯਂ ਪਂਸੁਚੁਣ੍ਣਾਨਿ ਵਿਯ ਪਕਤਿਯਾ ਵਪੁਥੁਭੂਤਾਜਨਾਤਿ ਪੁਥੁਜ੍ਜਨਾ. ਮਹਨ੍ਤਾਪੁਥੁਜ੍ਜਨਾਤਿ ਮਹਾਪੁਥੁਜ੍ਜਨਾ. ਵਟ੍ਟਾਨੁਸਾਰਿਨੋ ਚ ਤੇ ਮਹਾਪੁਥੁਜ੍ਜਨਾਚਾਤਿ ਸਮਾਸੋ. ਤੇਸਂ ਭਾਵੋਤਿ ਵਿਗ੍ਗਹੋ. ਅਯਂ ਭਾਵੋਯੇਵ ਤੇਸਂ ਭੂਮੀਤਿ ਚ ਵੁਚ੍ਚਤਿ. ਅਤ੍ਥਤੋ ਪਨ ਮੋਕ੍ਖਧਮ੍ਮਨਿਰਪੇਕ੍ਖਤਾ ਏਵ. ਅਚ੍ਛਨ੍ਦਿਕਤਾਤਿਪਿ ਵੁਚ੍ਚਤਿ. ‘‘ਓਕ੍ਕਨ੍ਤਾ’’ਤਿ ਪਵਿਟ੍ਠਾ. ਤਯੋਨਿਯਤਾ, ਬੋਧਿਸਤ੍ਤਨਿਯਤੋ ਚ ਚੂਲ਼ਸੋਤਾਪਨ੍ਨਨਿਯਤੋ ਚ ਅਰਿਯ ਸੋਤਾਪਨ੍ਨਨਿਯਤੋ ਚ. ਤਤ੍ਥ ਬੋਧਿਸਤ੍ਤਨਿਯਤੋ ਬੋਧਿਸਮ੍ਭਾਰਬਲੇਨ ਸਿਦ੍ਧੋ. ਚੂਲ਼ਸੋਤਾਪਨ੍ਨ ਨਿਯਤੋ ਪਚ੍ਚਯਾਕਾਰਾਨੁਬੋਧਞ੍ਞਾਣਬਲੇਨ. ਅਰਿਯਸੋਤਾਪਨ੍ਨ ਨਿਯਤੋ ਸੋਤਾਪਤ੍ਤਿ ਮਗ੍ਗਞ੍ਞਾਣ ਬਲੇਨ. ਤੇਸੁ ਬੋਧਿਸਤ੍ਤਨਿਯਤੋ ਇਧ ਅਧਿਪ੍ਪੇਤੋਤਿ ਵੁਤ੍ਤਂ ‘‘ਏਕੇਨ ਪਰਿਯਾਯੇਨਾ’’ਤਿਆਦਿ. ਵਤ੍ਤਬ੍ਬਮੇਵਨਤ੍ਥਿਤੇਸਂ ਦ੍ਵਿਨ੍ਨਂ ਬੋਧਿਸਤ੍ਤਾਨਂ ਪਾਰਮਿ ਪਵਿਚਯਞ੍ਞਾਣ ਸਮ੍ਪਤ੍ਤਿਯਾ ਵਿਨਾ ਨਿਯਤਬ੍ਯਾਕਰਣ ਲਾਭਾ ਸਙ੍ਕਾਯ ਏਵ ਅਭਾਵਤੋਤਿ ਅਧਿਪ੍ਪਾਯੋ.

ਪਦਸਿਦ੍ਧਿਵਿਚਾਰੇਯਂ ਵੁਤ੍ਤਂ ਵਿਭਾਵਨਿਯਂ=ਤੁਲਾਯਸਮਿਤੋਤੁਲ੍ਯੋ. ਤੁਲ੍ਯੋ ਏਵ ਤੁਲੋਯਕਾਰ ਲੋਪਵਸੇਨਾ=ਤਿ. ਤਂਸਨ੍ਧਾਯ ‘‘ਯ ਕਾਰਸ੍ਸਵਾਵਸੇਨਾ’’ਤਿ ਵੁਤ੍ਤਂ. ਯਞ੍ਚਵੁਤ੍ਤਂ ਤਤ੍ਥੇਵ=ਅਥਵਾਸਮੀਤਤ੍ਥੇ ਅਕਾਰਪਚ੍ਚਯਵਸੇਨ ਤੁਲਾਯਸਮੀਤੋਤੁਲੋ=ਤਿ. ਤਂ ਸਨ੍ਧਾਯ ‘‘ਅਕਾਰਸ੍ਸਵਾਵਸੇਨਾ’’ਤਿ ਵੁਤ੍ਤਂ. ਤਤ੍ਥ ‘‘ਤੁਲਾਯਾ’’ਤਿ ਲੋਕੇ ਧਾਰਣਤੁਲਾਸਦਿਸਾਯ ਪਞ੍ਞਾਯਾਤਿ ਅਤ੍ਥੋ. ‘‘ਸਮੀਤੋ’’ਤਿ ਸਮਂ ਕਤੋ. ਨਹਿ ਤੁਲਸਦ੍ਦੋ ਭਵਿਤੁਂ ਨਯੁਤ੍ਤੋ. ਯੁਤ੍ਤੋ ਏਵਾਤਿ ਅਧਿਪ੍ਪਾਯੋ. ਕਥਂ ਵਿਞ੍ਞਾਯਤੀਤਿ ਆਹ ‘‘ਤੁਲਯਿਤੁ’’ਨ੍ਤਿਆਦਿਂ. ਤਤ੍ਥਹਿ ‘‘ਤੁਲਯਿਤੁਂ ਅਸਕ੍ਕੁਣੇਯ੍ਯੋ’’ਤਿਵਚਨੇਨ ਤਸ੍ਸਕਮ੍ਮਸਾਧਨਤ੍ਤਂਦਸ੍ਸੇਤਿ. ‘‘ਕਮ੍ਮਸਾਧਨੇਨੇਵਾ’’ਤਿ ਪੁਬ੍ਬੇ-ਤੁਲਯਿਤਬ੍ਬੋ ਅਞ੍ਞੇਨ ਸਹ ਪਮਿਤਬ੍ਬੋਤਿ ਤੁਲੋਤਿ ਏਵਂ ਇਧਵੁਤ੍ਤੇਨ ਕਮ੍ਮ ਸਾਧਨ ਵਚਨਤ੍ਥੇਨੇਵ. ‘‘ਤਦਤ੍ਥਸਿਦ੍ਧਿਤੋ’’ਤਿ ਤਸ੍ਸ ਵਿਭਾਵਨਿਯਂ ਵੁਤ੍ਤਸ੍ਸ ਦੁਵਿਧਸ੍ਸ ਅਤ੍ਥਸ੍ਸ ਸਿਦ੍ਧਿਤੋ. ‘‘ਤਤੋ’’ਤਿ ਤੁਲਸਦ੍ਦਤੋ. ਚਿਨ੍ਤਾਯ ਕਿਂ ਪਯੋਜਨਂ ਅਤ੍ਥਿ. ਨਤ੍ਥਿਯੇਵਾਤਿ ਅਧਿਪ੍ਪਾਯੋ. ਵਦਤਿ ਸੀਲੇਨਾਤਿ ਵਤ੍ਤਾ. ਵਾਦੀ ਪੁਗ੍ਗਲੋ. ਵਤ੍ਤੁਨੋ ਇਚ੍ਛਾਵਤ੍ਤਿਚ੍ਛਾ. ਵਤ੍ਤੁਂ ਇਚ੍ਛਾਵਤ੍ਤਿਚ੍ਛਾਤਿਪਿਵਦਨ੍ਤਿ. ਵਤ੍ਤਿਚ੍ਛਂ ਅਨੁਗਤੋ ਸਮ੍ਮੁਤਿ ਸਙ੍ਕੇਤਵੋਹਾਰ ਸਿਦ੍ਧਤ੍ਤਾਤਿ ਸਮਾਸੋ. ‘‘ਏਤ’’ਨ੍ਤਿ ਏਤਂ ਦ੍ਵਿਧਾਸਿਦ੍ਧਵਚਨਂ. ‘‘ਚੇ’’ਤਿ ਚੇਵਦੇਯ੍ਯ. ‘‘ਨਾ’’ਤਿ ਨਯੁਤ੍ਤਂ. ‘‘ਯਥਾਸੁਤ’’ਨ੍ਤਿ ਤੁਲ ਇਤਿ ਸੁਤਂ. ‘‘ਯੁਤ੍ਤ’’ਨ੍ਤਿ ਯਥਾਸੁਤ ਨਿਯਾਮੇਨੇਵ ਯੁਤ੍ਤਂ ਵਜ੍ਜੇਤ੍ਵਾ. ‘‘ਅਸ੍ਸੁਤਸ੍ਸਾ’’ਤਿ ਧਾਰਣਤੁਲਾਪਰਿਯਾਯਸ੍ਸ ਇਤ੍ਥਿਲਿਙ੍ਗਤੁਲਾਸਦ੍ਦਸ੍ਸ. ਤਤੋਯੇਵਯਕਾਰ ਯੁਤ੍ਤਸ੍ਸਤੁਲ੍ਯਸਦ੍ਦਸ੍ਸ ਚ ਅਸ੍ਸੁਤਸ੍ਸ. ਇਤ੍ਥਿਲਿਙ੍ਗੇਸਤਿ, ਤਤੋਪਿ ਏਕੋ ਅਕਾਰੋਤਿ ਕਤ੍ਵਾ ਸਮੀਤਤ੍ਥੇ ਦੁਤੀਯੋ ਤਦ੍ਧਿਤ ਅਕਾਰੋਪਿ ਅਸ੍ਸੁਤੋਯੇਵਨਾਮਹੋਤਿ. ‘‘ਪਰਿਕਪ੍ਪਨਾਯਾ’’ਤਿ ਪਰਿਕਪ੍ਪੇਤ੍ਵਾ ਕਥਨਾਯ. ਪਯੋਜਨਾਭਾਵਤੋ ਨ ਯੁਤ੍ਤਨ੍ਤਿਸਮ੍ਬਨ੍ਧੋ. ਅਤੁਲਪਦਂ.

੬. ਏਵਂ ਦ੍ਵਿਨ੍ਨਂ ਪਦਾਨਂ ਪਦਤ੍ਥ ਸਂਵਣ੍ਣਨਂ ਕਤ੍ਵਾ ਇਦਾਨਿ ਤੇਸਂਯੇਵ ਅਤ੍ਥੁਦ੍ਧਾਰਸਂਵਣ੍ਣਨਂ ਕਰੋਨ੍ਤੋ ‘‘ਇਮੇਹਿ ਪਨਾ’’ਤਿਆਦਿਮਾਹ. ਤਤ੍ਥ ‘‘ਸਮ੍ਪਦਾ’’ਤਿ ਸਮ੍ਪਤ੍ਤਿਯੋ. ‘‘ਬੋਧਿਸਮ੍ਭਾਰਸਮ੍ਭਰਣਂ ਨਾਮ’’ ਸਮਤਿਂ ਸਪਾਰਮੀਨਂ ਪਰਿਪੂਰਣਂ. ‘‘ਮਹਾਵਜਿਰਞ੍ਞਾਣ’’ਨ੍ਤਿ ਭਗਵਤੋ ਆਸਵਕ੍ਖਯਞ੍ਞਾਣਮ੍ਪਿ ਵੁਚ੍ਚਤਿ. ਤਸ੍ਸ ਪੁਬ੍ਬਭਾਗੇ ਬੁਦ੍ਧਭਾਵਤ੍ਥਾਯ ਅਨੁਪਦਧਮ੍ਮਵਿਪਸ੍ਸਨਾਵਸੇਨ ਛਤ੍ਤਿਂਸ ਕੋਟਿ ਸਤਸਹਸ੍ਸ ਸਙ੍ਖਾਨਂ ਦੇਵਸਿਕਂ ਵਲ਼ਞ੍ਜਨਕਪ੍ਫਲਸਮਾਪਤ੍ਤੀਨਂ ਪੁਬ੍ਬਭਾਗ ਵਿਪਸ੍ਸਨਾਞਾਣਮ੍ਪਿ ਮਹਾਵਜਿਰਞ੍ਞਾਣਨ੍ਤਿ ਵੁਚ੍ਚਤਿ. ਸਬ੍ਬਮ੍ਪੇਤਂ ਮਹਾਟੀਕਾਯਂ ਵੁਤ੍ਤਂ. ‘‘ਮਹਾਬੋਧਿਯਾ’’ਤਿ ਸਬ੍ਬਞ੍ਞੁ ਬੁਦ੍ਧਾਨਂ ਅਭਿਸਮ੍ਬੋਧਿ ਸਙ੍ਖਾਤਸ੍ਸ ਅਗ੍ਗਮਗ੍ਗਞ੍ਞਾਣਸ੍ਸ. ਪਹਿਯ੍ਯਨ੍ਤਿ ਪਹਾਤਬ੍ਬਾ ਧਮ੍ਮਾ ਏਤੇਨਾਤਿ ਪਹਾਨਂ. ਪਜਹਨ੍ਤਿ ਪਹਾਤਬ੍ਬੇਧਮ੍ਮੇਏਤੇਨਾਤਿਵਾ ਪਹਾਨਨ੍ਤਿ ਕਤ੍ਵਾ ਤਂ ਅਗ੍ਗਮਗ੍ਗਞ੍ਞਾਣਮ੍ਪਿਤਂ ਵਿਪਸ੍ਸਨਾਞਾਣਮ੍ਪਿ ਪਹਾਨਨ੍ਤਿ ਵੁਚ੍ਚਤੀਤਿ ਇਮਿਨਾ ਅਧਿਪ੍ਪਾਯੇਨ ‘‘ਪਹਾਨਸਮ੍ਪਦਾਯਂ ਵਾ ਸਾ ਸਙ੍ਗਹਿਤਾ’’ਤਿ ਵੁਤ੍ਤਂ. ਪਞ੍ਚਸੀਲਾਨਿ. ਪਾਣਾਤਿਪਾਤਸ੍ਸ ਪਹਾਨਂਸੀਲਂ, ਵੇਰਮਣਿਸੀਲਂ, ਚੇਤਸਿਕਂਸੀਲਂ, ਸਂਵਰੋਸੀਲਂ, ਅਵੀਤਿਕ੍ਕਮੋਸਿਲਨ੍ਤਿਆਦੀਸੁਵਿਯ ਏਤ੍ਥਹਿ ਪਹਾਨਸੀਲਂ ਨਾਮ ਯਥਾ ਵੁਤ੍ਤੇਨ ਅਤ੍ਥੇਨ ਵੇਰਮਣਿਸੀਲਮੇਵਾਤਿ ਯੁਜ੍ਜਤਿ. ਪਹਾਨਂ ਨਾਮ ਕੋਚਿਧਮ੍ਮੋ ਨਹੋਤੀਤਿ ਅਧਿਪ੍ਪਾਯੇ ਪਨ ਸਤਿਪਹਾਨ ਸੀਸੇਨ ਪਹਾਨਸਾਧਕਂ ਤਦੇਵਞਾਣਦ੍ਵਯਂ ਉਪਚਾਰੇਨਪਹਾਨਨ੍ਤਿ ਗਹੇਤਬ੍ਬਂ. ਇਤਰਥਾ ਪਹਾਨਸਮ੍ਪਦਾ ਨਾਮ ਅਸਾਰਾ ਅਫਲਾਤਿ ਆਪਜ੍ਜੇਯ੍ਯਾਤਿ. ਪਚ੍ਚੇਕਬੁਦ੍ਧ ਬੁਦ੍ਧਸਾਵਕਾ ਕਿਲੇਸੇ ਪਜਹਨ੍ਤਾਪਿ ਵਾਸਨਾਯ ਸਹ ਅਪ੍ਪਜਹਨਤੋ ਚਿਤ੍ਤ ਸਨ੍ਤਾਨੇ ਮੋਹਵਾਸਨਾਯ ਵਿਜ੍ਜਮਾਨਤ੍ਤਾ ਸਬ੍ਬਞ੍ਞੁ ਭਾਵਂ ਨਗਚ੍ਛਨ੍ਤਿ. ਤਸ੍ਮਾ ਯਥਾਤੇਸਂ ਕਿਲੇਸਪ੍ਪਹਾਨਂ ਪਹਾਨਸਮ੍ਪਦਾ ਨਾਮ ਨਹੋਤਿ. ਨਤਥਾਸਬ੍ਬਞ੍ਞੁਬੁਦ੍ਧਾਨਨ੍ਤਿ ਆਹ ‘‘ਸਹਵਾਸਨਾਯਾ’’ਤਿਆਦਿਂ. ਵਿਭਾਵਨਿਯਂਞਾਣਸਮ੍ਪਦਾ ਪਥਮਂ ਵੁਤ੍ਤਾ. ਤਤੋ ਪਹਾਨ ਸਮ੍ਪਦਾ. ਟੀਕਾਯਂ ਪਨ ਪਹਾਨਸਮ੍ਪਦਾ ਪਥਮਂ ਵੁਤ੍ਤਾ. ਤਤੋ ਅਧਿਗਮ ਸਮ੍ਪਦਾਨਾਮ ਵੁਤ੍ਤਾ. ਤਤੋ ਞਾਣਸਮ੍ਪਦਾ. ਪਹਾਨਸਮ੍ਪਦਾਯਞ੍ਚ ਅਗ੍ਗਮਗ੍ਗਞ੍ਞਾਣਂ ਦਸ੍ਸਿਤਂ. ਅਧਿਗਮ ਸਮ੍ਪਦਾਤਿ ਚ ਸਬ੍ਬਞ੍ਞੁਤਞ੍ਞਾਣਪ੍ਪਟਿਲਾਭੋ ਵੁਤ੍ਤੋ. ਞਾਣਸਮ੍ਪਦਾਯਮ੍ਪਨ ਤੇਹਿ ਦ੍ਵੀਹਿ ਞਾਣੇਹਿ ਅਵਸੇਸਾਨਿਦਸਬਲਞ੍ਞਾਣਾਦੀਨਿਸਬ੍ਬਞ੍ਞਾਣਾਨਿਦਸ੍ਸਿਤਾਨਿ. ਇਧਪਿ ਟੀਕਾਨਯਮੇਵ ਸਮ੍ਭਾਵੇਨ੍ਤੋ ‘‘ਪਹਾਨਸਮ੍ਪਦਾਯੇਵਪਨਾ’’ਤਿਆਦਿਮਾਹ. ‘‘ਸਬ੍ਬਞ੍ਞੁਤਞ੍ਞਾਣਪ੍ਪਦਟ੍ਠਾਨ’’ਨ੍ਤਿ ਸਬ੍ਬਞ੍ਞੁਤਞ੍ਞਾਣਸ੍ਸਪਦਟ੍ਠਾਨਂ, ਆਸਨ੍ਨ ਕਾਰਣਂ. ‘‘ਨ ਹਿ ਮਗ੍ਗਞ੍ਞਾਣਤੋ ਅਞ੍ਞਾ ਪਹਾਨਸਮ੍ਪਦਾਨਾਮ ਅਤ੍ਥਿ’’. ਪਰਮਤ੍ਥਤੋ ਨਤ੍ਥੀਤਿ ਅਧਿਪ੍ਪਾਯੋ. ਇਦਞ੍ਚ ਵਿਸੁਦ੍ਧਿਮਗ੍ਗੇ=ਪਹਾਨਨ੍ਤਿ ਕੋਚਿ ਧਮ੍ਮੋਨਾਮ ਨਤ੍ਥਿ ਅਞ੍ਞਤ੍ਰ ਵੁਤ੍ਤਪ੍ਪਕਾਰਾਨਂ ਪਾਣਾਤਿਪਾਤਾਦੀਨਂ ਅਨੁਪ੍ਪਾਦਮਤ੍ਤਤੋ=ਤਿ ਆਗਤਤ੍ਤਾ ਵੁਤ੍ਤਂ. ਪਹਾਯਕਧਮ੍ਮਸਮਾਦਾਨੇਨ ਪਨ ਪਹਾਤਬ੍ਬ ਧਮ੍ਮਾਨਂ ਅਨੁਪ੍ਪਾਦੋ ਨਾਮ ਏਕੋਪਣੀਤ ਧਮ੍ਮੋਹੋਤਿ. ਏਕਂ ਸਨ੍ਤਿ ਪਦਂ ਹੋਤਿ. ਤਥਾਹਿ ਵੁਤ੍ਤਂ ਪਟਿਸਮ੍ਭਿਦਾ ਮਗ੍ਗੇ=ਉਪ੍ਪਾਦੋ ਭਯਂ, ਅਨੁਪ੍ਪਾਦੋ ਖੇਮਨ੍ਤਿ ਸਨ੍ਤਿਪਦੇ ਞਾਣਂ. ਪਵਤ੍ਤਿ ਭਯਂ, ਅਪ੍ਪਵਤ੍ਤਿ ਖੇਮਨ੍ਤਿ ਸਨ੍ਤਿਪਦੇਞਾਣ=ਨ੍ਤਿ. ਤਦਙ੍ਗਪ੍ਪਹਾਨਂ ਪਨਤਦਙ੍ਗਅਨੁਪ੍ਪਾਦੋ ਨਾਮ. ਵਿਕ੍ਖਮ੍ਭਨਪ੍ਪਹਾਨਂ ਵਿਕ੍ਖਮ੍ਭਨ ਅਨੁਪ੍ਪਾਦੋ ਨਾਮ. ਸਮੁਚ੍ਛੇਦਪ੍ਪਹਾਨਂ ਸਮੁਚ੍ਛੇਦ ਅਨੁਪ੍ਪਾਦੋ ਨਾਮਾਤਿ ਵਤ੍ਤਬ੍ਬਂ. ਇਧ ਪਨ ਅਨੁਪ੍ਪਾਦ ਸਮ੍ਪਾਪਕਂ ਵਿਪਸ੍ਸਨਾ ਞਾਣਞ੍ਚ ਮਗ੍ਗਞ੍ਞਾਣਞ੍ਚ ਉਪਚਾਰੇਨ ਪਹਾਨਨ੍ਤਿ ਅਧਿਪ੍ਪੇਤਂ. ਕਸ੍ਮਾ, ਉਪਰਿਞਾਣ ਸਮ੍ਪਦਾਦੀਨਂ ਪਚ੍ਚਯਤ੍ਤਾਤਿ ਦਟ੍ਠਬ੍ਬਂ. ‘‘ਸਮ੍ਪਦਾਸਙ੍ਕਰੋ’’ਤਿ ਸਮ੍ਪਦਾਸਮ੍ਭੇਦੋ, ਸਮ੍ਪਦਾਸਮ੍ਮਿਸ੍ਸੋ. ‘‘ਞਾਯਾਗਤ’’ਨ੍ਤਿ ਯੁਤ੍ਤਿਤੋ ਆਗਤਂ. ‘‘ਸੀਲਾਦਿਗੁਣੇਹੀ’’ਤਿ ਸੀਲ ਸਮਾਧਿ ਪਞ੍ਞਾ ਵਿਮੁਤ੍ਤਿ ਵਿਮੁਤ੍ਤਿਞ੍ਞਾਣਦਸ੍ਸਨ ਗੁਣੇਹਿ. ‘‘ਇਦ੍ਧਿਧਮ੍ਮੇਹੀ’’ਤਿ ਇਦ੍ਧਿਵਿਧਾਭਿਞ੍ਞਾਦੀਹਿ ਇਦ੍ਧਿਗੁਣੇਹਿ. ‘‘ਲਕ੍ਖਣਾਨੁਬ੍ਯਞ੍ਜਨਪ੍ਪਟਿਮਣ੍ਡਿਤਸ੍ਸਾ’’ਤਿ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣੇਹਿ ਚ ਅਸੀਤਿ ਖੁਦ੍ਦਕਲਕ੍ਖਣੇਹਿ ਚ ਪਟਿਮਣ੍ਡਿਤਸ੍ਸ. ‘‘ਆਸਯੋ’’ਤਿ ਚਿਤ੍ਤ ਸਨ੍ਤਾਨੇ ਅਧਿਸਯਿਤੋ ਇਚ੍ਛਾਵਿਸੇਸੋ. ‘‘ਅਜ੍ਝਾਸਯਸ੍ਸਾ’’ਤਿ ਅਲੋਭਜ੍ਝਾਸਯਾਦਿਕਸ੍ਸਅਜ੍ਝਾਸਯਸ੍ਸ. ‘‘ਉਲ਼ਾਰਤਾ’’ਤਿ ਪਣੀਤਤਾ. ‘‘ਹਿਤਜ੍ਝਾਸਯਤਾ’’ਤਿਹਿਤਕਾਮਤਾ. ਅਪਰਿਪਾਕ ਗਤਿਨ੍ਦ੍ਰਿਯਾਨਂ ਸਤ੍ਤਾਨਂ ਇਨ੍ਦ੍ਰਿਯਪਰਿਪਾਕਕਾਲਾਗਮਨਞ੍ਚ ਏਤ੍ਥ ਵਤ੍ਤਬ੍ਬਂ. ‘‘ਅਭਿਞ੍ਞਾਤਾਨ’’ਨ੍ਤਿ ਅਤਿਪਾਕਟਾਨਂ. ‘‘ਦ੍ਵੇਪਹਾਨਸਮ੍ਪਦਾ’’ਤਿ ਦ੍ਵੇਪਹਾਨ ਸਮ੍ਪਦਾ ਞਾਣਸਮ੍ਪਦਾ. ਸਮ੍ਮਾਸਮ੍ਬੁਦ੍ਧਪਦੇ. ‘‘ਸਾਮਂ ਸਚ੍ਚਾਨਿ ਅਭਿਸਮ੍ਬੁਜ੍ਝੀ’’ਤਿ ਏਤ੍ਥ ਅਭਿਸਮ੍ਬੋਧਿਸਙ੍ਖਾਤਂ ਅਗ੍ਗਮਗ੍ਗਞ੍ਞਾਣਂ ਗਹਿਤਂ. ਤਞ੍ਚ ਪਹਾਨਕਿਚ੍ਚਪ੍ਪਧਾਨਂ ਹੋਤਿ. ‘‘ਤਤ੍ਥ ਚ ਸਬ੍ਬਞ੍ਞੁਤਂ ਪਤ੍ਤੋ’’ਤਿ ਏਤ੍ਥ ਸਬ੍ਬਞ੍ਞੁਤਞ੍ਞਾਣਂ. ‘‘ਬਲੇਸੁ ਚ ਵਸਿਭਾਵ’’ਨ੍ਤਿ ਏਤ੍ਥ ਦਸਬਲਞ੍ਞਾਣਾਨਿ ਗਹਿਤਾਨਿ. ਤੇਨ ਵੁਤ੍ਤਂ ‘‘ਦ੍ਵੇ…ਪੇ… ਸਮ੍ਮਾਸਮ੍ਬੁਦ੍ਧਪਦੇਨਵਿਭਾਵਿਤਾ’’ਤਿ.

ਸਮ੍ਪਦਾਨਿਟ੍ਠਿਤਾ.

੭. ਸਸਦ੍ਧਮ੍ਮਗਣੁਤ੍ਤਮਪਦੇ. ਯਥਾ=ਸਸਙ੍ਘਂਲੋਕਨਾਯਕਂ ਨਮਸ੍ਸਿਸ੍ਸਂ=ਤਿ ਏਤ੍ਥਸਹਸਦ੍ਦਸ੍ਸ ਸਮਵਾਯਤ੍ਥਤ੍ਤਾ ਅਹਂਲੋਕਨਾਯਕਞ੍ਚ ਸਙ੍ਘਞ੍ਚ ਨਮਸ੍ਸਿਸ੍ਸਨ੍ਤਿ ਏਵਂ ਸਮਵਾਯਤ੍ਥੋ ਵਿਞ੍ਞਾਯਤਿ. ਤਥਾ ਇਧਪਿ ਸਮ੍ਮਾਸਮ੍ਬੁਦ੍ਧਞ੍ਚਸਦ੍ਧਮ੍ਮਞ੍ਚ ਗਣੁਤ੍ਤਮਞ੍ਚ ਅਭਿਵਾਦਿਯਾਮੀਤਿ ਏਵਂ ਕਿਰਿਯਾਸਮਵਾਯਤ੍ਥੋ ਸਹਸਦ੍ਦੇਨ ਦੀਪਿਤੋਤਿ ਦਸ੍ਸੇਤੁਂ ‘‘ਦੂਰਤੋਹਂ…ਪੇ… ਏਵਮਿਦਂ ਦਟ੍ਠਬ੍ਬ’’ਨ੍ਤਿ ਵੁਤ੍ਤਂ. ‘‘ਇਦ’’ਨ੍ਤਿ ਸਸਦ੍ਧਮ੍ਮਗਣੁਤ੍ਤਮਪਦਂ. ਏਤ੍ਥ ਚ‘‘ਸਮਵਾਯੋ’’ਤਿ ਦ੍ਵਿਨ੍ਨਂ ਤਿਣ੍ਣਂ ਬਹੂਨਂ ਵਾ ਅਤ੍ਥਾਨਂ ਏਕਸ੍ਮਿਂ ਦਬ੍ਬੇਵਾ ਗੁਣੇਵਾਕਿਰਿਯਾਯਵਾਸਮਂ ਅਵੇਚ੍ਚ ਅਯਨਂਪਵਤ੍ਤਨਂ ਸਮਵਾਯੋ. ਪਚ੍ਚਾਨੁਤਾਪ ਪਚ੍ਚਾਨੁਮੋਦਨਾਦਿਠਾਨੇਸੁ=ਅਹਂ ਪੁਬ੍ਬੇਦਾਨਂ ਨਦਦਿਸ੍ਸਂ, ਸੀਲਂ ਨਰਕ੍ਖਿਸ੍ਸਂ. - ਅਨੇਕਜਾਤਿ ਸਂਸਾਰਂ ਸਨ੍ਧਾਵਿਸ੍ਸ=ਨ੍ਤਿਆਦਿਨਾ ਅਤੀਤੇਪਿਕਾਲੇ ਅਨਾਗਤਵਚਨਂ ਪਯੁਜ੍ਜਤੀਤਿ ਆਹ ‘‘ਨਮਸ੍ਸਿਸ੍ਸ’’ਨ੍ਤਿ ਨਮਸ੍ਸਿਂਤਿ. ‘‘ਗੁਣੀਭੂਤਾਨ’’ਨ੍ਤਿ ਸਮਾਸਪਦੇ ਵਿਸੇਸਨਭੂਤਾਨਂ, ਅਪ੍ਪਧਾਨਭੂਤਾਨਨ੍ਤਿ ਅਤ੍ਥੋ. ਅਬ੍ਭੂਤ ਤਬ੍ਭਾਵੇਚਾਯਂ ਈਕਾਰੋ. ਯਥਾ, ਕਾਕੋ ਸੇਤੀ ਭਵਤਿ, ਬਕੋ ਕਣ੍ਹੀਭਵਤੀਤਿ. ਏਤ੍ਥ ਚ ‘‘ਸੇਤੀ ਭਵਤੀ’’ਤਿ ਅਸੇਤਪੁਬ੍ਬੋ ਸੇਤੋਭਵਤਿ. ‘‘ਕਣ੍ਹੀਭਵਤੀ’’ਤਿ ਅਕਣ੍ਹਪੁਬ੍ਬੋ ਕਣ੍ਹੋਭਵਤੀਤਿ ਅਤ੍ਥੋ. ਤਥਾ ਇਧਪਿ. ਬੁਦ੍ਧਂ ਧਮ੍ਮਞ੍ਚ ਸਙ੍ਘਞ੍ਚਵਨ੍ਦਿਤ੍ਵਾ-ਤਿਆਦੀਸੁ ਵਿਸੁਂਵਿਸੁਂ ਪਧਾਨਤ੍ਤਾ ਅਗੁਣਭੂਤਾਪਿ ਧਮ੍ਮਸਙ੍ਘਾ ਇਧਸਮਾਸਪਦੇ ਅਞ੍ਞਪਦਤ੍ਥਸ੍ਸਗੁਣਭੂਤਾਹੋਨ੍ਤਿ. ਅਯਂ ਅਬ੍ਭੂਤਤਬ੍ਭਾਵਤ੍ਥੋ ਨਾਮ. ‘‘ਅਭਿਵਾਦਿਤਭਾਵੋ’’ਤਿ ਵੁਤ੍ਤੇ ਤਪਚ੍ਚਯਸ੍ਸ ਬਹੁਲਂ ਅਤੀਤਕਾਲਵਿਸਯਤ੍ਤਾ ਪੁਬ੍ਬੇਗਨ੍ਥਾਰਮ੍ਭਕਾਲੇ ਧਮ੍ਮ ਸਙ੍ਘਾਨਂਪਿ ਥੇਰਸ੍ਸ ਵਨ੍ਦਨਾਸਿਦ੍ਧਿ ਦਸ੍ਸਿਤਾ ਹੋਤਿ. ‘‘ਅਭਿਵਾਦੇਤਬ੍ਬ ਭਾਵੋ’’ਤਿ ਵੁਤ੍ਤੇਪਨ ਤਬ੍ਬਪਚ੍ਚਯਸ੍ਸਕਾਲਸਾਮਞ੍ਞਵਿਸਯਤ੍ਤਾਨ ਤਥਾ ਦਸ੍ਸਿਤਾ ਹੋਤਿ. ਦਾਨਂ ਦਾਤਬ੍ਬਂ, ਸੀਲਂ ਰਕ੍ਖਿਤਬ੍ਬਨ੍ਤਿਆਦੀਸੁ ਵਿਯ ਧਮ੍ਮਸਙ੍ਘਾਨਾਮਸਬ੍ਬਕਾਲਂਪਿ ਅਭਿਵਾਦੇਤਬ੍ਬਾਤਿ. ਏਵਂ ਧਮ੍ਮਸਙ੍ਘਾਨਂ ਸਬ੍ਬਕਾਲਂਪਿ ਅਭਿਵਾਦਨਾਰਹਗੁਣੋ ਏਵ ਦਸ੍ਸਿਤੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਤਤ੍ਥ, ‘‘ਅਭਿਵਾਦਨ’’ਨ੍ਤਿ ਇਦਂ ਕਿਰਿਯਾਸਮਵਾਯਦਸ੍ਸਨਤੋ ਵੁਤ੍ਤਂ. ਕਾਲਵਿਸੇਸਂ ਪਨ ਨਦੀਪੇਤਿਯੇਵ. ‘‘ਅਤ੍ਤਨੋ ਨਿਦਸ੍ਸਨੇਨਾ’’ਤਿ ਸਪੁਤ੍ਤਦਾਰੋ ਆਗਤੋਤਿ ਅਤ੍ਤਨਾ ਨੀਹਰਿਤ੍ਵਾ ਦਸ੍ਸਿਤੇਨ ਪਯੋਗੇਨ. ਸੋਹਿ ਪਯੋਗੋ ਕਿਰਿਯਾ ਸਮਵਾਯਸ੍ਸੇਵ. ਨਗੁਣਸਮਵਾਯਸ੍ਸਾਤਿ. ਏਤ੍ਥ ਚ ਥੇਰਸ੍ਸ ਵਨ੍ਦਨਾਵਚਨੇ ਥੇਰੋ ਇਮੇਹਿ ਯੇਵਪਦੇਹਿ ਰਤਨਤ੍ਤਯਂਤੀਹਿਦ੍ਵਾਰੇ ਹਿਵਨ੍ਦਤੀਤਿ ਗਹੇਤ੍ਵਾ ‘‘ਅਭਿਵਾਦਿਯਾ’’ਤਿ ਏਤ੍ਥ ਅਭਿਵਾਦਿਯਾਧੀਤਿ ਚ ਅਤ੍ਥਂ ਨੀਹਰਨ੍ਤਿ. ਅਪ੍ਪਧਾਨ ਕਿਰਿਯਾਪਦੇ ਪਨ ਤਦਤ੍ਥ ਨੀਹਰਣਂ ਅਸਮ੍ਭਾਵੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਤਤ੍ਥ ‘‘ਅਪਿਚਾ’’ਤਿ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥਜੋਤਨੇ ਅਯਂ ਨਿਪਾਤਸਮੁਦਯੋ. ‘‘ਗਨ੍ਥਪ੍ਪਟਿਞ੍ਞਾਯਾ’’ਤਿ ਗਨ੍ਥਪ੍ਪਟਿਞ੍ਞਾਵਚਨੇਨ. ‘‘ਸਹਘਟੇਤ੍ਵਾ’’ਤਿ ਏਕਤੋ ਸਮ੍ਬਨ੍ਧਿਤ੍ਵਾ.

ਵਚਨਤ੍ਥੇ. ਸਧਨੋ ਪੁਰਿਸੋ, ਧਨਵਾਪੁਰਿਸੋ-ਤਿ ਆਦਯੋ ਸਮਾਸਤਦ੍ਧਿਤਸਦ੍ਦਾ ਯੇਭੂਯ੍ਯੇਨ ਅਤਿਸ੍ਸਯਤ੍ਥ ਦੀਪਕਾ ਹੋਨ੍ਤਿ. ਨਹਿ ਅਪ੍ਪਕੇਨ ਧਨੇਨ ਤਥਾ ਵੋਹਰਨ੍ਤਿ. ਤਸ੍ਮਾ ਇਧਾਪਿ ਤਥਾ ਰੂਪਂ ਅਤਿਸ੍ਸਯਤ੍ਥਂ ਦਸ੍ਸੇਤੁਂ ‘‘ਅਤ੍ਤਨਾਨਿਮ੍ਮਿਤੇਨ…ਪੇ… ਸਰਣਭੂਤੇਨਾ’’ਤਿ ਵੁਤ੍ਤਂ. ਤਤ੍ਥ, ‘‘ਅਤ੍ਤਨਾਨਿਮ੍ਮਿਤੇਨਾ’’ਤਿ ਅਤ੍ਤਨਾ ਉਪ੍ਪਾਦਿਤੇਨ. ‘‘ਨਹੀ’’ਤਿਆਦਿਨਾ ਤਦਤ੍ਥਮੇਵ ਬ੍ਯਤਿਰੇਕਤੋ ਵਿਵਰਤਿ. ਤਤ੍ਥ, ‘‘ਪਰਨਿਮ੍ਮਿਤੇਨਾ’’ਤਿ ਬੁਦ੍ਧਨਿਮ੍ਮਿਤੇਨਾਤਿ ਅਧਿਪ੍ਪਾਯੋ. ‘‘ਤਥਾ ਥੋਮਨ’’ਨ੍ਤਿ ਸਸਦ੍ਧਮ੍ਮ ਗਣੁਤ੍ਤਮਨ੍ਤਿ ਥੋਮਨਂ. ‘‘ਇਦਂਪੀ’’ਤਿ ਦੁਤੀਯਤ੍ਥ ਸਮ੍ਪਿਣ੍ਡਨੇ ਅਯਂਪਿਕਾਰੋ. ਨਕੇਵਲਂ ਪੁਰਿਮਪਦਦ੍ਵਯਮੇਵ ਸਤ੍ਥੁ ਅਸਾਧਾਰਣਗੁਣਪਦਂ ਹੋਤਿ. ਅਥ ਖੋ ਇਦਂਪਿ ਪਦਂ ਸਤ੍ਥੁ ਪਚ੍ਚੇਕਬੁਦ੍ਧਾਦੀਹਿ ਅਸਾਧਾਰਣ ਪਦਮੇਵਹੋਤੀਤਿ ਯੋਜਨਾ.

ਧਮ੍ਮਵਚਨਤ੍ਥੇ. ‘‘ਧਾਰੇਤੀ’’ਤਿ ਵਹਤਿ. ਗਾਥਾਯਂ ‘‘ਰਕ੍ਖਤੀ’’ਤਿ ਅਪਾਯਾਦਿਦੁਕ੍ਖਤੋਰਕ੍ਖਤਿ. ‘‘ਯੇਸ’’ਨ੍ਤਿ ਕਿਲੇਸਾਨਂ. ‘‘ਇਮਸ੍ਮਿਂ ਅਤ੍ਥੇ’’ਤਿ ਕਿਲੇਸਸਮੁਚ੍ਛਿਨ੍ਦਨਸਙ੍ਖਾਤੇ ਧਾਰਣਤ੍ਥੇ. ‘‘ਨਿਬ੍ਬਾਨਞ੍ਚਨਿਪ੍ਪਰਿਯਾਯਤੋ ਧਮ੍ਮੋ ਨਾਮਾ’’ਤਿ ਕਸ੍ਮਾ ਵੁਤ੍ਤਂ, ਨਨੁ ਨਿਸ੍ਸਰਣਪ੍ਪਹਾਨਮੇਵ ਨਿਬ੍ਬਾਨਸ੍ਸ ਕਿਚ੍ਚਂ, ਇਦਞ੍ਚ ਸਮੁਚ੍ਛੇਦਪ੍ਪਹਾਨਨ੍ਤਿ ਚੋਦਨਂ ਪਰਿਹਰਨ੍ਤੋ ‘‘ਅਰਿਯਮਗ੍ਗਾਹੀ’’ਤਿਆਦਿਮਾਹ. ‘‘ਨਿਬ੍ਬਾਨੇਨ ਸਹੇਵ ਹੁਤ੍ਵਾ’’ਤਿ ਆਰਮ੍ਮਣਾਧਿਪਤਿਭੂਤਂ ਆਰਮ੍ਮਣੂ ਪਨਿਸ੍ਸਯਭੂਤਞ੍ਚ ਨਿਬ੍ਬਾਨਂ ਅਤ੍ਤਨੋ ਪਤਿਟ੍ਠਂ ਕਤ੍ਵਾਤਿ ਅਧਿਪ੍ਪਾਯੋ. ਅਪਿਚ, ਸਮੁਚ੍ਛੇਦੋਤਿ ਚ ਨਿਸ੍ਸਰਣਨ੍ਤਿ ਚ ਅਤ੍ਥਤੋ ਸਮਾਨਗਤਿਕਂ ਹੋਤਿ. ਤਸ੍ਮਾ ਨਿਸ੍ਸਰਣਂਪਿ ਮੁਖ੍ਯਧਾਰਣ ਮੇਵਾਤਿ ਦਟ੍ਠਬ੍ਬਂ. ਨਿਸ੍ਸਰਣਮੇਵਵਾ ਪਧਾਨਧਾਰਣਨ੍ਤਿ ਪਿਯੁਜ੍ਜਤਿਯੇਵ. ‘‘ਧਾਰਣੂਪਾਯੋਯੇਵਹੋਤਿ’’. ਨਮੁਖ੍ਯਧਾਰਣਂ. ਕਸ੍ਮਾ, ਸਮੁਚ੍ਛੇਦ ਕਿਚ੍ਚਾਭਾਵਤੋ. ‘‘ਏਤੇਪਞ੍ਚ ਪਰਿਯਾਯਧਮ੍ਮਾਯੇਵ’’. ਕਸ੍ਮਾ, ਨਿਬ੍ਬਾਨਸ੍ਸਵਿਯਮਗ੍ਗਾਨਂ ਸਮੁਚ੍ਛੇਦ ਕਿਚ੍ਚੇ ਅਸਹਾਯਤ੍ਤਾਤਿ. ਏਤ੍ਥ ਚ ‘‘ਸਾਮਞ੍ਞਪ੍ਫਲਾਨੀ’’ਤਿ ਸਮਣਸ੍ਸ ਭਾਵੋ ਸਾਮਞ੍ਞਂ. ਅਰਿਯਮਗ੍ਗਸ੍ਸੇਤਂ ਨਾਮਂ. ਸਾਮਞ੍ਞਸ੍ਸਫਲਂ ਸਾਮਞ੍ਞਪ੍ਫਲਂ. ਦੁਤੀਯਵਿਕਪ੍ਪੇ ਅਕਿਚ੍ਚ ਪਚ੍ਚਯਭੂਤਾਪਿ ਕੇਚਿਕਿਤਕਪਚ੍ਚਯਾ ਕਮ੍ਮਤ੍ਥੇਗਤਾ ਕਿਚ੍ਚਪਚ੍ਚਯਾਨਂਪਿ ਅਤ੍ਥਂ ਦੀਪੇਤਿ. ਯਥਾ, ਦਿਟ੍ਠਂ, ਸੁਤਂ, ਮੁਤਂ, ਵਿਞ੍ਞਾਤਨ੍ਤਿ ਵੁਤ੍ਤਂ ‘‘ਧਾਰਣਾਰਹੋ’’ਤਿ. ‘‘ਯਥਾ ਵੁਤ੍ਤ ਧਮ੍ਮਾ ਯੇਵਾ’’ਤਿ ਪਞ੍ਚਮੁਖ੍ਯਧਮ੍ਮਾ, ਪਞ੍ਚਪਰਿਯਾਯਧਮ੍ਮਾਯੇਵ. ‘‘ਕੇਚੀ’’ਤਿ ਚਤ੍ਤਾਰੋ ਮਗ੍ਗਾ. ਪੁਨ ‘‘ਕੇਚੀ’’ਤਿ ਨਿਬ੍ਬਾਨਮੇਵ. ਬਹੁਵਚਨ ਸੋਤੇਪਤਿਤਤ੍ਤਾ ਏਤ੍ਥ ਬਹੁਵਚਨਂ ਰੁਲ਼ਂ. ਪੁਨ ‘‘ਕੇਚੀ’’ਤਿ ਚਤ੍ਤਾਰੋ ਸਾਮਞ੍ਞਪ੍ਫਲ ਧਮ੍ਮਾ. ‘‘ਕੇਚੀ’’ਤਿ ਪਰਿਯਤ੍ਤਿ ਧਮ੍ਮੋ. ਏਤ੍ਥਾਪਿ ਬਹੁਵਚਨਂ ਸੋਤਪਤਿਤਮੇਵ. ‘‘ਧਾਰੇਨ੍ਤ’’ਨ੍ਤਿ ਧਾਰੇਨ੍ਤਂ ਪੁਗ੍ਗਲਂ. ਤਤੀਯ ਵਿਕਪ੍ਪੇ ‘‘ਅਪਤਮਾਨਂ ਵਹਨ੍ਤੀ’’ਤਿ ਅਪਤਮਾਨਂ ਕਤ੍ਵਾ ਵਹਨ੍ਤਿ. ਚਤੁਤ੍ਥ ਵਿਕਪ੍ਪੇ ‘‘ਏਤ੍ਥਾ’’ਤਿ ਏਤਸ੍ਮਿਂ ਧਮ੍ਮੇ. ਧਮ੍ਮੋਵਦੀਪਂ ਏਤੇਸਨ੍ਤਿ ਧਮ੍ਮਦੀਪਾ. ਧਮ੍ਮੋਵ ਪਟਿਸਰਣਂ ਏਤੇਸਨ੍ਤਿ ਧਮ੍ਮਪ੍ਪਟਿਸਰਣਾ. ਧਮ੍ਮਦੀਪਾ ਭਿਕ੍ਖਵੇ ਭਵਥ ਧਮ੍ਮਪ੍ਪਟਿਸਰਣਾ, ਅਨਞ੍ਞਪ੍ਪਟਿਸਰਣਾ ਤਿਹਿ ਵੁਤ੍ਤਂ. ਲਦ੍ਧਾ ਪਤਿਟ੍ਠਾ ਏਤੇਸਨ੍ਤਿ ਲਦ੍ਧਪ੍ਪਤਿਟ੍ਠਾ. ਯੁਜ੍ਜਤਿਯੇਵ. ਧਮ੍ਮਦੀਪਪਾਠਾਨੁਲੋਮਤ੍ਤਾਤਿ ਅਧਿਪ੍ਪਾਯੋ. ਧਮ੍ਮਵਿਚਾਰਣਾਯਂ, ਚੋਦਕੋਪਟਿਪਤ੍ਤਿ ਧਮ੍ਮਂ ਦਸਵਿਧ ਧਮ੍ਮਤੋ ਅਞ੍ਞਂਮਞ੍ਞਮਾਨੋ ‘‘ਕਸ੍ਮਾ’’ਤਿਆਦਿਨਾ ਚੋਦੇਤਿ. ਸੋ ਪਨ ਪਟਿਪਤ੍ਤਿ ਧਮ੍ਮੋ ਤਤੋ ਅਞ੍ਞੋਨ ਹੋਤਿ, ਤਤ੍ਥੇਵ ਅਨ੍ਤੋਗਧੋਤਿ ਦਸ੍ਸੇਨ੍ਤੋ ‘‘ਸੋਪਨਾ’’ਤਿਆਦਿਮਾਹ. ‘‘ਮਗ੍ਗਸ੍ਸ ਪੁਬ੍ਬਭਾਗਪ੍ਪਟਿਪਦਾ ਹੋਤੀ’’ਤਿ ਯਥਾ ਅਮ੍ਬਰੁਕ੍ਖੋ ਅਮ੍ਬਪੁਪ੍ਫਅਮ੍ਬਪ੍ਫਲਸ੍ਸ ਪਤਿਟ੍ਠਾ ਭਾਵੇਨ ਪੁਬ੍ਬਭਾਗ ਨਿਸ੍ਸਯੋ ਹੋਤਿ. ਕਸ੍ਮਾ, ਇਤੋਯੇਵਤਸ੍ਸ ਪੁਪ੍ਫਪ੍ਫਲਸ੍ਸ ਜਾਤਤ੍ਤਾ ਏਤ੍ਥੇਵਸਂ ਵਡ੍ਢਿਤਤ੍ਤਾ ਚ. ਤਥਾ ਪਟਿਪਤ੍ਤਿ ਧਮ੍ਮੋਪਿ ਅਰਿਯਮਗ੍ਗਪ੍ਫਲਸ੍ਸਪਤਿਟ੍ਠਾਭਾਵੇਨ ਪੁਬ੍ਬਭਾਗੂਪਨਿਸ੍ਸਯਪ੍ਪਟਿਪਦਾਹੋਤਿ. ਕਸ੍ਮਾ, ਇਤੋਯੇਵ ਤਸ੍ਸਜਾਤਤ੍ਤਾ ਏਤ੍ਥੇਵਸਂ ਵਡ੍ਢਿਤਤ੍ਤਾ ਚ. ਵੁਤ੍ਤਞ੍ਹੇਤਂ ਮਹਾਵਗ੍ਗ ਸਂਯੁਤ੍ਤੇ. ਸੇਯ੍ਯਥਾਪਿ ਭਿਕ੍ਖਵੇ ਯੇਕੇਚਿ ਮੇਬੀਜਗਾਮਭੂਤਗਾਮਾਵੁਡ੍ਢਿਂ ਵਿਰੁਲ਼ਿਂ ਵੇਪੁਲ੍ਲਂ ਆਪਜ੍ਜਨ੍ਤਿ. ਸਬ੍ਬੇਤੇ ਪਥਵਿਂ ਨਿਸ੍ਸਾਯ ਪਥਵਿਂ ਪਤਿਟ੍ਠਾਯ. ਏਵਮੇਵ ਖੋ ਭਿਕ੍ਖਵੇ ਭਿਕ੍ਖੁਸੀਲਂ ਨਿਸ੍ਸਾਯ ਸੀਲੇਪਤਿਟ੍ਠਾਯ ਅਰਿਯਂ ਅਟ੍ਠਙ੍ਗੀਕਂ ਮਗ੍ਗਂ ਭਾਵੇਨ੍ਤੋ ਵੁਡ੍ਢਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਪਾਪੁਣਾਤਿ ਧਮ੍ਮੇਸੂਤਿ. ‘‘ਪੁਬ੍ਬਚੇਤਨਾਵਿਯਦਾਨੇ’’ਤਿ ਯਥਾ ਤਿਵਿਧਂ ਪੁਞ੍ਞਂ, ਦਾਨਮਯਂ ਪੁਞ੍ਞਂ ਸੀਲਮਯਂ ਪੁਞ੍ਞਂ ਭਾਵਨਾਮਯਂ ਪੁਞ੍ਞਨ੍ਤਿ ਵੁਤ੍ਤੇ ਦਾਨਵਤ੍ਥੁ ਪਰਿਯੇਸਨਤੋ ਪਟ੍ਠਾਯ ਦਾਨਂ ਆਰਬ੍ਭਪਵਤ੍ਤਾ ਸਬ੍ਬਾ ਪੁਬ੍ਬਭਾਗ ਚੇਤਨਾ ਦਾਨਵਚਨੇ ਸਙ੍ਗਹਿਤਾ ਦਾਨਨ੍ਤ੍ਵੇਵ ਸਙ੍ਖ੍ਯਂਗਤਾ. ਏਵਂ ਸੋ ਪਟਿਪਤ੍ਤਿ ਧਮ੍ਮੋ ਅਰਿਯ ਮਗ੍ਗਵਚਨੇ ਏਵਸਙ੍ਗਹਿਤੋ, ਅਰਿਯਮਗ੍ਗੋ ਤ੍ਵੇਵ ਸਙ੍ਖ੍ਯਂ ਗਤੋਤਿ ਵੁਤ੍ਤਂ ਹੋਤਿ.

ਇਮਸ੍ਮਿਂ ਧਮ੍ਮਸਂਸਨ੍ਦਨੇ ਅਪਰਮ੍ਪਿ ਵਤ੍ਤਬ੍ਬਂ ਵਦਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਤਤ੍ਥ ‘‘ਯਦਗ੍ਗੇਨਾ’’ਤਿ ਯੇਨਕਾਰਣਕੋਟ੍ਠਾਸੇਨ ਧਾਰਣੂਪਾਯੋਤਿਆਦਿਨਾ ਕਾਰਣਭਾਗੇਨਾਤਿ ਅਤ੍ਥੋ. ਵਨ੍ਦਨਂ ਅਰਹ ਤੀਤਿ ਵਨ੍ਦਨੇਯ੍ਯੋ. ਤਸ੍ਮਿਂ ਵਨ੍ਦਨੇਯ੍ਯੇ. ‘‘ਪੁਥੁਜ੍ਜਨਕਲ੍ਯਾਣਕੋ’’ਤਿ ਏਤ੍ਥ ਤਿਵਿਧੋ ਕਲ੍ਯਾਣਕੋ ਵਿਨਯਕਲ੍ਯਾਣਕੋ ਸੁਤ੍ਤਨ੍ਤਕਲ੍ਯਾਣਕੋ ਅਭਿਧਮ੍ਮਕਲ੍ਯਾਣਕੋਤਿ. ਤਤ੍ਥ ਵਿਨਯੇ ਪਞ੍ਞਤ੍ਤਾਯ ਕਲ੍ਯਾਣਪ੍ਪਟਿਪਤ੍ਤਿਯਾ ਸਮਨ੍ਨਾਗਤੋ ਭਿਕ੍ਖੁ ਵਿਨਯਕਲ੍ਯਾਣਕੋ ਨਾਮ. ਸੋ ਇਧ ਭਿਕ੍ਖੁ ਪਾਤਿਮੋਕ੍ਖ ਸਂਵਰਸਂਵੁਤੋ ਵਿਹਰਤਿ ਆਚਾਰ ਗੋਚਰ ਸਮ੍ਪਨ੍ਨੋ, ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੂਤਿ ਏਤ੍ਥ ਵੇਦਿਤਬ੍ਬੋ. ਤਤ੍ਥ ਵਿਨਯੇ ਪਞ੍ਞਤ੍ਤਾਕਲ੍ਯਾਣਪ੍ਪਟਿਪਤ੍ਤਿਦੁਵਿਧਾ, ਆਦਿ ਬ੍ਰਹ੍ਮਚਰਿਯਕਸੀਲਂ ਅਭਿਸਮਚਾਰਿਕਸੀਲਨ੍ਤਿ. ਤਤ੍ਥ, ਉਭਤੋਵਿਭਙ੍ਗਪਰਿਯਾਪਨ੍ਨਂ ਸੀਲਂ ਆਦਿਬ੍ਰਹ੍ਮਚਰਿਯਕਂ ਨਾਮ. ਖਨ੍ਧਕਪਰਿਯਾਪਨ੍ਨਂ ਸੀਲਂ ਅਭਿਸਮਚਾਰਿਕਂ ਨਾਮ.

ਸੁਤ੍ਤਨ੍ਤੇਸੁ ਵੁਤ੍ਤਾਯ ਕਲ੍ਯਾਣਪ੍ਪਟਿਪਤ੍ਤਿਯਾ ਸਮਨ੍ਨਾਗਤੋ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ਸੁਤ੍ਤਨ੍ਤ ਕਲ੍ਯਾਣਕੋ ਨਾਮ. ਸੋ ਚਤੂਹਿ ਭਿਕ੍ਖਵੇ ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾਵਕੋ ਸਬ੍ਬਂ ਦੁਗ੍ਗਤਿਭਯਂ ਸਮਤਿਕ੍ਕਨ੍ਤੋ ਹੋਤਿ. ਕਤਮੇਹਿ ਚਤੂਹਿ. ਇਧ ਭਿਕ੍ਖਵੇ ਅਰਿਯਸਾਵਕੋ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ ਇਤਿ ਪਿਸੋ ਭਗਵਾ…ਪੇ… ਸਤ੍ਥਾਦੇਵਮਨੁਸ੍ਸਾਨਂ, ਬੁਦ੍ਧੋ, ਭਗਵਾਤਿ. ਧਮ੍ਮੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ…ਪੇ… ਪਚ੍ਚਤ੍ਤਂ ਵੇਦਿਤਬ੍ਬੋ ਵਿਞ੍ਞੂਹੀਤਿ. ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ. ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਹੋਤੀਤਿ ਏਤ੍ਥ ਵੇਦਿਤਬ੍ਬੋ. ਤਤ੍ਥ ਬੁਦ੍ਧੇ ਅਵੇਚ੍ਚਪ੍ਪਸਾਦੋ ਨਾਮ ਅਰਹਂ, ਸਮ੍ਮਾਸਮ੍ਬੁਦ੍ਧੋ, ਤਿਆਦਿਕਾਨਂ ਗੁਣਪਦਾਨਂ ਅਤ੍ਥ ਜਾਨਨਞ੍ਞਾਣੇਨ ਯੁਤ੍ਤੋ ਪਸਾਦੋ. ਅਰਿਯੇਹਿਕਾਮੀਯਨ੍ਤਿ ਇਚ੍ਛੀਯਨ੍ਤੀਤਿ ਅਰਿਯਕਨ੍ਤਾਨਿ. ਸੁਪਰਿਸੁਦ੍ਧਸ੍ਸ ਆਜੀਵਟ੍ਠਮਕਸੀਲਸ੍ਸੇਤਂ ਨਾਮਂ. ਚਤ੍ਤਾਰਿਮਾਨਿ ਭਿਕ੍ਖਵੇ ਸੋਤਾਪਤ੍ਤਿਯਙ੍ਗਾਨਿ. ਕਤਮਾਨਿ ਚਤ੍ਤਾਰਿ. ਸਪ੍ਪੁਰਿਸਸਂਸੇਵੋ, ਸਦ੍ਧਮ੍ਮਸ੍ਸਵਨਂ, ਯੋਨਿਸੋ ਮਨਸਿਕਾਰੋ, ਧਮ੍ਮਾਨੁ ਧਮ੍ਮਪ੍ਪਟਿਪਤ੍ਤੀਤਿਆਦੀਨਿ ਬਹੂਨਿ ਸੁਤ੍ਤਨ੍ਤਾਨਿ ਇਧ ਵਤ੍ਤਬ੍ਬਾਨਿ.

ਅਭਿਧਮ੍ਮੇ ਵਾ ਸੁਤ੍ਤਨ੍ਤੇਸੁ ਵਾ ਵੁਤ੍ਤਾਯ ਕਲ੍ਯਾਣਪ੍ਪਟਿਪਤ੍ਤਿਯਾ ਸਮਨ੍ਨਾਗਤੋਗਹਟ੍ਠੋ ਵਾ ਪਬ੍ਬਜਿਤੋ ਵਾ ਅਭਿਧਮ੍ਮਕਲ੍ਯਾਣਕੋ ਨਾਮ. ਸੋ ਇਧ ਸੁਤਵਾ ਅਰਿਯਸਾਵਕੋ ਅਰਿਯਾਨਂ ਦਸ੍ਸਾਵੀ ਅਰਿਯ ਧਮ੍ਮਸ੍ਸਕੋਵਿਦੋ ਅਰਿਯਧਮ੍ਮੇਸੁ ਵਿਨੀਤੋ. ਸੋ ਰੂਪਂ ਅਤ੍ਤਤੋ ਨ ਸਮਨੁਪਸ੍ਸਤੀਤਿ ਏਤ੍ਥ ਵੇਦਿਤਬ੍ਬੋ. ਤਤ੍ਥ, ‘‘ਸੁਤਵਾ’’ਤਿ ਏਤ੍ਥ ਖਨ੍ਧਾ, ਯਤਨ, ਧਾਤੁ, ਪਟਿਚ੍ਚਸਮੁਪ੍ਪਾਦ, ਸਤਿਪਟ੍ਠਾਨਾ, ਦੀਸੁ ਉਗ੍ਗਹ ਪਰਿਪੁਚ੍ਛਾ ਵਿਨਿਚ੍ਛਯਞ੍ਞਾਣ ਸਮਨ੍ਨਾਗਤੋ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ਸੁਤ ਵਾ ਨਾਮਾਤਿ ਅਟ੍ਠਕਥਾਸੁ ਵੁਤ੍ਤੋ. ਸੋ ਏਵ ਪੁਥੁਜ੍ਜਨ ਕਲ੍ਯਾਣਕੋਤਿ ਚ ਵੁਚ੍ਚਤਿ.

ਦੁਵੇ ਪੁਥੁਜ੍ਜਨਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਅਨ੍ਧੋ ਪੁਥੁਜ੍ਜਨੋ ਏਕੋ, ਕਲ੍ਯਾਣੇਕੋ ਪੁਥੁਜ੍ਜਨੋ. ਤਿ

ਚ ਵੁਤ੍ਤਂ. ਅਙ੍ਗੁਤ੍ਤਰੇ ਪਨ ਚਤੁਕ੍ਕਨਿਪਾਤੇ ਕਤਮੋ ਪੁਗ੍ਗਲੋ ਅਪ੍ਪਸ੍ਸੁਤੋ ਸੁਤੇਨ ਉਪਪਨ੍ਨੋ ਹੋਤਿ. ਇਧੇਕਚ੍ਚੋ ਧਮ੍ਮਂ ਸੁਣਾਤਿ ਏਕਾਯਪਿ ਚਾਤੁਪ੍ਪਦਿਕਾਯ ਗਾਥਾਯ ਅਤ੍ਥ ਮਞ੍ਞਾਯ ਧਮ੍ਮ ਮਞ੍ਞਾਯ ਧਮ੍ਮਾ ਨੁ ਧਮ੍ਮਪ੍ਪਟਿਪਨ੍ਨੋ ਹੋਤਿ. ਅਯਂ ਅਪ੍ਪਸ੍ਸੁਤੋਸੁਤੇਨ ਉਪਪਨ੍ਨੋਤਿ ਵੁਤ੍ਤਂ. ਸੁਤਵਾਤਿ ਚ ਸੁਤੇਨ ਉਪਪਨ੍ਨੋਤਿ ਚ ਅਤ੍ਥਤੋ ਏਕਨ੍ਤਿ. ਪੁਥੁਜ੍ਜਨ ਕਲ੍ਯਾਣਕੋ ਸਙ੍ਘੇ ਸੇਕ੍ਖੇਸੁਸਙ੍ਗਹਿਤੋ. ਵੁਤ੍ਤਂਹੇਤਂ ਪਰਿਵਾਰੇ ਕੇ ਸਿਕ੍ਖਨ੍ਤੀਤਿ. ਪੁਥੁਜ੍ਜਨ ਕਲ੍ਯਾਣਕੇਨ ਸਦ੍ਧਿਂ ਸਤ੍ਤ ਅਰਿਯਪੁਗ੍ਗਲਾ ਸਿਕ੍ਖਨ੍ਤਿ. ਅਰਹਾ ਖੀਣਾਸਵੋ ਸਿਕ੍ਖਿਤਸਿਕ੍ਖੋਤਿ. ਦਕ੍ਖਿਣ ਵਿਭਙ੍ਗਸੁਤ੍ਤ ਅਟ੍ਠਕਥਾਯਂ ਪਨ. ਤਿ ਸਰਣ ਸਰਣਂ ਗਤੋ ਉਪਾਸਕੋਪਿ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਸਙ੍ਗਹਿਤੋਤਿ ਵੁਤ੍ਤਂ. ਤਤ੍ਥ, ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋਨਾਮ ਸੋਤਾਪਤ੍ਤਿ ਮਗ੍ਗਟ੍ਠੋ ਅਰਿਯਪੁਗ੍ਗਲੋ. ‘‘ਸੋਹਿਸਙ੍ਗਹਿਤੋ’’ਤਿ ਸਮ੍ਬਨ੍ਧੋ. ‘‘ਏਤ੍ਤਾਵਤਾ ਪਟਿਕ੍ਖਿਤ੍ਤਂ ਹੋਤੀ’’ਤਿ ਸਮ੍ਬਨ੍ਧੋ. ‘‘ਸਙ੍ਘੇ ਅਸਙ੍ਗਹਿਤੋ’’ਤਿ ਸਙ੍ਘਂਸਰਣਂ ਗਚ੍ਛਾਮੀਤਿ ਚ, ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋਤਿ ਚ, ਏਵਰੂਪੇਸੁ ਠਾਨੇਸੁ ਆਗਤੇ ਸਙ੍ਘ ਵਚਨੇ ਅਸਙ੍ਗਹਿਤੋ. ‘‘ਨ ਹਿਤਂ ਸਰਣਂ ਗਚ੍ਛਨ੍ਤਸ੍ਸਸਰਣਗਮਨਂ ਸਮ੍ਪਜ੍ਜਤੀ’’ਤਿ ਇਦਂ ਸਙ੍ਘਂਸਰਣਂ ਗਚ੍ਛਾਮੀਤਿ ਏਤ੍ਥ ਸਙ੍ਘ ਵਚਨੇਤਸ੍ਸਪੁਗ੍ਗਲਸ੍ਸ ਅਸਙ੍ਗਹਿਤ ਭਾਵਸਾਧਨਤ੍ਥਂ ਵੁਤ੍ਤਂ. ਤੇਨਾਹ ‘‘ਤਂ ਪਟਿਕ੍ਖਿਤ੍ਤਂ ਹੋਤੀ’’ਤਿ. ਸਚੇ ਪਨ ਸਬ੍ਬਂ ਭਗਵਤੋ ਸਾਵਕਸਙ੍ਘਂ ਅਨੁਦ੍ਧਿਸ੍ਸਤਮੇਵ ਪੁਗ੍ਗਲਂ ਸਙ੍ਘਂਸਰਣਂ ਗਚ੍ਛੇਯ੍ਯ ਆਯਸ੍ਮਨ੍ਤਂ ਸਰਣਂ ਗਚ੍ਛਾਮੀਤਿ. ਸਰਣ ਗਮਨਂ ਨ ਸਮ੍ਪਜ੍ਜਤਿਯੇਵ. ਅਥ ਸਬ੍ਬਂ ਭਗਵਤੋ ਸਾਵਕਸਙ੍ਘਂ ਉਦ੍ਦਿਸ੍ਸ ਤਸ੍ਸ ਸਨ੍ਤਿਕੇ ਸਰਣਂ ਗਚ੍ਛੇਯ੍ਯ ਸਙ੍ਘਂ ਸਰਣਂ ਗਚ੍ਛਾਮੀਤਿ. ਸਮ੍ਪਜ੍ਜਤਿਯੇਵ. ਇਦਞ੍ਚ ਦਹਰਕਾਲੇ ਸਬ੍ਬਪ੍ਪਥਮਂ ਸਰਣਗਮਨਂ ਸਨ੍ਧਾਯ ਵੁਤ੍ਤਂ. ਇਦਞ੍ਹਿ ਸਰਣ ਗਮਨਂ ਨਾਮ ਸਕਿਂ ਗਹੇਤ੍ਵਾ ਰਤਨਤ੍ਤਯੇ ਸਦ੍ਧਂ ਅਜਹਨ੍ਤਸ੍ਸ ਯਾਵਜੀਵਂਪਿ ਨ ਭਿਜ੍ਜਤਿ. ਪੁਨਪ੍ਪੁਨਂ ਗਹਣ ਕਿਚ੍ਚਂ ਨਤ੍ਥਿ. ਪੁਨਪ੍ਪੁਨਂ ਗਣ੍ਹਨ੍ਤੇਪਿ ਦੋਸੋਨਤ੍ਥਿ. ਪੁਨਪ੍ਪੁਨਂ ਪੁਞ੍ਞਂ ਵਡ੍ਢਤਿ. ਸਬ੍ਬਪ੍ਪਥਮਂ ਗਹਣਕਾਲੇ ਚ ਅਞ੍ਞੇਨ ਦਿਨ੍ਨਤ੍ਤਾ ਲਦ੍ਧਂ ਨਹੋਤਿ. ਅਤ੍ਤਨੋਵਚੀ ਭੇਦੇਨ ਲਦ੍ਧਂ ਹੋਤਿ. ਤਸ੍ਮਾ ਅਞ੍ਞਸ੍ਸ ਸਨ੍ਤਿਕੇ ਅਗ੍ਗਹੇਤ੍ਵਾ ਸਯਮੇਵ ਵਚੀਭੇਦਂ ਗਣ੍ਹਨ੍ਤਸ੍ਸ ਗਹਟ੍ਠਸ੍ਸ ਸਰਣ ਗਮਨਂ ਸਮ੍ਪਜ੍ਜਤਿਯੇਵ. ਤਥਾ ਸਬ੍ਬਾਨਿ ਗਹਟ੍ਠਸੀਲਾਨੀਤਿ. ਸਾਮਣੇਰ ਸਰਣ ਗਮਨਮ੍ਪਨ ਭਿਕ੍ਖੁਨਾਦਿਨ੍ਨਮੇਵ ਲਬ੍ਭਤਿ. ਤਞ੍ਚ ਖੋ ਉਭਿਨ੍ਨਂਪਿਠਾਨਕਰਣ ਸਮ੍ਪਤ੍ਤਿਯਾ ਸਤਿ ਏਵਾਤਿ ਦਟ੍ਠਬ੍ਬਂ. ‘‘ਵੋ’’ਤਿ ਤੁਮ੍ਹਾਕਂ. ਯੋਧਮ੍ਮੋ ਚ ਦੇਸਿਤੋ ਯੋਵਿਨਯੋਚਪਞ੍ਞਤ੍ਤੋ. ‘‘ਮਮਚ੍ਚਯੇਨਾ’’ਤਿ ਮਮਾਤਿਕ੍ਕਮੇਨ. ਮਯਿ ਪਰਿਨਿਬ੍ਬੁਤੇਤਿ ਵੁਤ੍ਤਂ ਹੋਤਿ. ਸਤ੍ਥਾ ਭਵਿਸ੍ਸਤੀਤਿ ਪਾਠਸੇਸੋ. ‘‘ਸਂਵਣ੍ਣਿਤੋ’’ਤਿ ਸੁਟ੍ਠੁਤਰਂਵਣ੍ਣਿਤੋ ਥੋਮਿਤੋ. ‘‘ਕਲ੍ਯਾਣਪ੍ਪਟਿਪਤ੍ਤਿਯਂ ਠਿਤੋਪੀ’’ਤਿ ਤੀਸੁਕਲ੍ਯਾਣਪ੍ਪਟਿਪਤ੍ਤੀਸੁ ਅਞ੍ਞਤਰਪ੍ਪਟਿਪਤ੍ਤਿਯਂ ਠਿਤੋਪਿ. ‘‘ਅਟ੍ਠਿਤੋਪੀ’’ਤਿ ਸਬ੍ਬਪ੍ਪਟਿਪਤ੍ਤਿਬਾਹਿਰੋ ਦੁਸ੍ਸੀਲੋਪਾਪਧਮ੍ਮੋਤਿ ਅਧਿਪ੍ਪਾਯੋ. ਵਿਸੇਸਤੋ ਪਨ ਵਿਨਯਪ੍ਪਟਿਪਤ੍ਤਿ ਏਵ ਇਧ ਪਰਿਯਤ੍ਤਾਤਿ ਦਟ੍ਠਬ੍ਬਾ. ‘‘ਸੋ’’ਤਿ ਸੋਦੁਸ੍ਸੀਲੋ ਪਾਪਧਮ੍ਮੋ. ਅਤ੍ਤਨੋਪਿ ਸਰਣਂ ਨਹੋਤਿ. ਅਵਸ੍ਸਂ ਅਪਾਯਗਾਮੀਯੇਵ ਸੋ ਹੋਤੀਤਿ ਅਧਿਪ੍ਪਾਯੋ. ‘‘ਕੁਤੋ ਸਰਣਂ ਭਵਿਸ੍ਸਤੀ’’ਤਿ ਯੋਜਨਾ. ‘‘ਅਨੇਕੇਸੁ ਸੁਤ੍ਤਸਹਸ੍ਸੇਸੂ’’ਤਿ ਵਿਨਯੇਪਿ ਬਹੂਨਿ ਗਰਹਸੁਤ੍ਤਪਦਾਨਿ ਦਿਸ੍ਸਨ੍ਤਿ ਸੁਤ੍ਤਨ੍ਤੇਸੁਪਿ. ਵਿਸੇਸਤੋ ਪਨ ਅਗ੍ਗਿਕ੍ਖਨ੍ਧੋਪਮਸੁਤ੍ਤਾਦੀਸੁ.

ਸਦ੍ਧਮ੍ਮਵਚਨਤ੍ਥੇ. ਕਿਲੇਸੇਸਮੇਨ੍ਤਿ ਵੂਪਸਮੇਨ੍ਤੀਤਿ ਸਨ੍ਤੋਤਿ ਵਚਨਤ੍ਥਂ ਸਨ੍ਧਾਯ ‘‘ਸਮਿਤਕਿਲੇਸਾਨ’’ਨ੍ਤਿ ਵੁਤ੍ਤਂ. ਸਨ੍ਤ ਸਦ੍ਦੋ ਪਨ ਪਸਤ੍ਥੇਚ, ਪੂਜਿਤੇਚ, ਸਪ੍ਪੁਰਿਸੇਚ, ਪਣ੍ਡਿਤੇਚ, ਦਿਸ੍ਸਤੀਤਿ ਇਮਂ ਅਭਿਧਾਨਤ੍ਥਂ ਸਨ੍ਧਾਯ ‘‘ਪਸਤ੍ਥਾਨ’’ਨ੍ਤਿਆਦਿਵੁਤ੍ਤਂ. ‘‘ਸਚ੍ਚੋਵਾ ਧਮ੍ਮੋ ਸਦ੍ਧਮ੍ਮੋ’’ਤਿ ਯੋਜਨਾ. ਏਤੇਨ ਸਭਾਵਤੋ ਅਤ੍ਥਿਸਂਵਿਜ੍ਜਤੀਤਿ ਸਨ੍ਤੋਤਿ ਦਸ੍ਸੇਤਿ. ‘‘ਸੋ’’ਤਿ ਅਞ੍ਞਤਿਤ੍ਥਿਯ ਧਮ੍ਮੋ. ‘‘ਧਾਰੇਨ੍ਤਸ੍ਸਾ’’ਤਿ ਸਵਨੁਗ੍ਗਹਧਾਰਣਪ੍ਪਟਿਪਜ੍ਜਨਾਦਿਵਸੇਨ ਧਾਰੇਨ੍ਤਸ੍ਸ. ਅਹਿਤੋਯੇਵ ਸਮ੍ਪਜ੍ਜਤਿ, ਯੇਭੁਯ੍ਯੇਨ ਦੁਗ੍ਗਤਿ ਵਿਪਾਕਤ੍ਤਾਤਿ ਅਧਿਪ੍ਪਾਯੋ. ‘‘ਅਯਂ ਪਨਾ’’ਤਿ ਸਤ੍ਥੁ ਸਦ੍ਧਮ੍ਮੋ ਪਨ. ‘‘ਤਥਾ ਧਾਰੇਨ੍ਤਸ੍ਸਾ’’ਤਿ ਅਯਂ ਮੇ ਹਿਤੋਤਿ ਧਾਰੇਨ੍ਤਸ੍ਸ ਹਿਤੋਯੇਵਸਮ੍ਪਜ੍ਜਤਿ, ਸੁਗਤਿ ਨਿਬ੍ਬਾਨ ਸਮ੍ਪਾਪਕਤ੍ਤਾਤਿ ਅਧਿਪ੍ਪਾਯੋ.

‘‘ਸਮਾਨਦਿਟ੍ਠਿਸੀਲਾਨ’’ਨ੍ਤਿ ਸਮਾਨਦਿਟ੍ਠਿਕਾਨਂ ਸਮਾਨਸੀਲਾਨਞ੍ਚ. ਏਤੇਨ ਸਮਾਨਦਿਟ੍ਠਿਸੀਲਾ ਜਨਾ ਗਣੀਯਨ੍ਤਿ ਏਤ੍ਥਾਤਿ ਗਣੋ. ਸਂਹਨੀਯਨ੍ਤਿ ਏਕਤੋਕਰੀਯਨ੍ਤਿ ਏਤ੍ਥਾਤਿ ਸਙ੍ਘੋਤਿ ਇਮਮਤ੍ਥਂ ਦੀਪੇਤਿ. ਸਹ ਏਕਤੋ ਧਮ੍ਮਂ ਚਰਨ੍ਤੀਤਿ ਸਹਧਮ੍ਮਿਕਾ. ਏਕਸ੍ਸ ਸਤ੍ਥੁਨੋ ਧਮ੍ਮ ਵਿਨਯੇ ਪਬ੍ਬਜਿਤਾ. ਤੇਸਂ ਸਹਧਮ੍ਮਿਕਾਨਂ. ਭਗਵਤੋ ਸਾਵਕਸਙ੍ਘੋ ਉਤ੍ਤਮਗਣੋ ਨਾਮ. ਯੇ ਕੇਚਿ ਲੋਕੇ ਸਙ੍ਘਾਵਾ ਗਣਾਵਾ. ਤਥਾਗਤਸ੍ਸ ਸਾਵਕਸਙ੍ਘੋ ਤੇਸਂ ਅਗ੍ਗਮਕ੍ਖਾਯਤੀਤਿ ਹਿ ਵੁਤ੍ਤਂ. ਸੋਯੇਵ ਇਧ ਗਣੁਤ੍ਤਮੋਤਿ ਵੁਚ੍ਚਤਿ ਵਿਸੇਸਨ ਪਰ ਨਿਪਾਤ ਵਸੇਨਾਤਿ ਅਧਿਪ੍ਪਾਯੋ. ਉਤ੍ਤਮਸਦ੍ਦਸ੍ਸ ਗੁਣਨਾਮਤ੍ਤਾ ‘‘ਗੁਣਮ੍ਹਿਯੇਵ ਪਵਤ੍ਤਤੀ’’ਤਿ ਵੁਤ੍ਤਂ. ‘‘ਤੇਨਾ’’ਤਿ ਉਤ੍ਤਮ ਸਦ੍ਦੇਨ. ‘‘ਗਣੋਤਿ ਸਙ੍ਘੋਯੇਵ ਵੁਚ੍ਚਤਿ’’ ਸਙ੍ਘਸਦ੍ਦਸ੍ਸਪਿ ਸਮੂਹਟ੍ਠੇ ਨਿਰੁਲ਼੍ਹਤ੍ਤਾ, ‘‘ਸੋ ਵਿਨਯਕਮ੍ਮੇਸੁ ਪਸਿਦ੍ਧੋ’’ਤਿ ਪਞ੍ਚਸਙ੍ਘਾ ਚਤੁਵਗ੍ਗਸਙ੍ਘੋ, ਪਞ੍ਚਵਗ੍ਗਸਙ੍ਘੋ, ਦਸਵਗ੍ਗਸਙ੍ਘੋ, ਵੀਸਤਿਵਗ੍ਗਸਙ੍ਘੋ, ਅਤਿਰੇਕਵੀਸਤਿਵਗ੍ਗਸਙ੍ਘੋ, ਚਤੁਵਗ੍ਗਕਰਣੀਯਂ ਕਮ੍ਮਂ, ਪਞ੍ਚਵਗ੍ਗਕਰਣੀਯਂ ਕਮ੍ਮਨ੍ਤਿਆਦਿਨਾ ਪਸਿਦ੍ਧੋ ਪਾਕਟੋ. ਦਕ੍ਖਿਣਾ ਵੁਚ੍ਚਤਿ ਕਮ੍ਮਞ੍ਚ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾ ਆਯਤਿਂ ਵਿਪਾਕਪ੍ਫਲਪ੍ਪਟਿ ਲਾਭਤ੍ਥਾਯ ਦਿਨ੍ਨਂ ਦਾਨਕਮ੍ਮਂ ਦਕ੍ਖਨ੍ਤਿ ਵਡ੍ਢਨ੍ਤਿ ਸਤ੍ਤਾ ਏਤਾਯਾਤਿ ਕਤ੍ਵਾ. ਤਂਦਕ੍ਖਿਣਂ ਪਟਿਗ੍ਗਣ੍ਹਿਤੁਂ ਅਰਹਤੀਤਿ ਦਕ੍ਖਿਣੇਯ੍ਯੋ. ‘‘ਅਰਹਤੀ’’ਤਿ ਚ ਅਨੁਤ੍ਤਰ ਪੁਞ੍ਞਕ੍ਖੇਤ੍ਤ ਵਿਸੇਸਤ੍ਤਾਦਾਯਕੇਨ ਇਚ੍ਛਿਤ ਪਤ੍ਥਿਤਸ੍ਸ ਆਯਤਿਂ ਫਲਸ੍ਸ ਸੁਟ੍ਠੁਸਮ੍ਪਾਦਨਵਸੇਨ ਦਾਯਕਸ੍ਸ ਚ ਅਵਿਰਾਧਨਤੋ ਅਸਙ੍ਖ੍ਯੇਯ੍ਯਾਪ੍ਪਮੇਯ੍ਯਵਡ੍ਢਿ ਆਵਹਨਤੋ ਚ ਪਟਿਗ੍ਗਣ੍ਹਿਤੁਂ ਅਰਹਤਿ. ਏਵਰੂਪਂਹਿਦਾਨਂ ਨਾਮ ਉਲ਼ਾਰਦਾਨਂ ਹੋਤਿ. ਤਂ ਯੇਸੁਦੁਸ੍ਸੀਲੇਸੁਦਿਯ੍ਯਤਿ. ਤੇਸਂ ਖੇਤ੍ਤ ਦੁਟ੍ਠਤ੍ਤਾ ਦਾਯਕੇਨ ਇਚ੍ਛਿਤਪਤ੍ਥਿਤਂ ਫਲਂ ਨ ਸਮ੍ਪਾਦੇਤਿ. ਨਿਪ੍ਫਲਂ ਵਾ ਹੋਤਿ. ਅਪ੍ਪਪ੍ਫਲਂ ਵਾ. ਏਵਂਸਤਿ, ਤੇ ਦਾਯਕਞ੍ਚ ਵਿਰਾਧੇਨ੍ਤਿ ਨਾਮ. ਪੁਞ੍ਞਪ੍ਫਲਾਨਿ ਚ ਵਿਨਾਸੇਨ੍ਤਿ ਨਾਮ. ਸਯਞ੍ਚ ਤਂਦਾਨਂ ਪਟਿਗ੍ਗਹਣਤੋ ਵਾ ਪਰਿਭੋਗਤੋ ਵਾ ਸਦ੍ਧਾਦੇਯ੍ਯਂ ਵਿਨਿਪਾਤਨਤੋ ਵਾ ਦੁਗ੍ਗਤਿ ਭਾਗਿਨੋ ਹੋਨ੍ਤਿ. ਤਸ੍ਮਾਤੇ ਏਵਰੂਪਂ ਦਾਨਂ ਪਟਿਗ੍ਗਣ੍ਹਿਤੁਂ ਨਾਰਹਨ੍ਤੀਤਿ. ‘‘ਉਪਸਮ੍ਪਦਾਕਮ੍ਮਂ ਸਮ੍ਮੁਤਿ ਨਾਮਾ’’ਤਿ ਏਕੇਨ ਪਰਿਯਾਯੇਨ ਸਮ੍ਮੁਤਿ ਕਮ੍ਮਂ ਨਾਮ. ਤਞ੍ਹਿ ਕਾਮਂਤੇਰ ਸਸੁਸਮ੍ਮੁਤਿ ਕਮ੍ਮੇਸੁਨਾਗਤਂ. ਞਤ੍ਤਿ ਚਤੁਤ੍ਥ ਕਮ੍ਮਵਾਚਾ ਸਙ੍ਖਾਤਾਯ ਪਨ ਸਙ੍ਘਸਮ੍ਮੁਤਿਯਾ ਸਿਦ੍ਧਤ੍ਤਾ ਤੇਨ ਪਰਿਯਾਯੇਨ ਸਮ੍ਮੁਤਿ ਕਮ੍ਮਨ੍ਤਿ ਵੁਚ੍ਚਤੀਤਿ. ‘‘ਉਪਸਮ੍ਪਨ੍ਨਭੂਮਿਂ ਪਤ੍ਵਾ’’ਤਿ ਉਪਸਮ੍ਪਨ੍ਨਭੂਮਿ ਸਙ੍ਖਾਤਂ ਉਪਰਿਠਾਨਨ੍ਤਰਂ ਪਤ੍ਵਾ. ਤਥਾ ਹਿ ਵੁਤ੍ਤਂ ਵਿਨਯੇ ਭਿਕ੍ਖੁ ਵਿਭਙ੍ਗੇ. ਞਤ੍ਤਿ ਚਤੁਤ੍ਥੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨਾਤਿ. ਤਤ੍ਥ, ‘‘ਠਾਨਾਰਹੇਨਾ’’ਤਿ ਉਪਸਮ੍ਪਨ੍ਨ ਭੂਮਿਸਙ੍ਖਾਤਂ ਠਾਨਨ੍ਤਰਂ ਪਾਪੇਤੁਂ ਅਰਹੇਨਾਤਿ ਅਤ੍ਥੋ. ‘‘ਉਪਸਮ੍ਪਨ੍ਨਭੂਮੀ’’ਤਿ ਚ ਉਪਸਮ੍ਪਨ੍ਨ ਸੀਲਂ ਵੁਚ੍ਚਤਿ. ‘‘ਵਿਨਯਕਮ੍ਮੇਸੁ ਪਸਿਦ੍ਧੋ’’ਤਿ. ਸੁਣਾਤੁਮੇਭਨ੍ਤੇ ਸਙ੍ਘੋ ਤਿਆਦੀਸੁ ਪਾਕਟੋ. ਅਪਿਚ ‘‘ਸਮ੍ਮੁਤਿ ਸਙ੍ਘੋ’’ਤਿ, ਦੇਵਸਙ੍ਘਾਸਮਾਗਤਾਤਿਆਦੀਸੁ ਵਿਯ ਬਹੂਨਂ ਸਮੂਹਨਟ੍ਠੇਨ ਲੋਕਸਮ੍ਮੁਤਿਯਾ ਸਿਦ੍ਧੋਸਙ੍ਘੋ ਸਮ੍ਮੁਤਿ ਸਙ੍ਘੋਤਿਪਿ ਯੁਜ੍ਜਤਿ. ‘‘ਅਰਿਯਪੁਗ੍ਗਲਸਮੂਹੋ’’ਤਿ ਪੁਥੁਜ੍ਜਨਕਲ੍ਯਾਣਕੋ ਭਿਕ੍ਖੁ ਪੁਬ੍ਬੇ ਵੁਤ੍ਤਨਯੇਨ ਸੋਤਾਪਤ੍ਤਿ ਮਗ੍ਗਟ੍ਠੇ ਸਙ੍ਗਹਿਤੋਤਿ, ਤੇਨ ਸਹ ਅਟ੍ਠਵਿਧੋ ਅਰਿਯ ਪੁਗ੍ਗਲਸਮੂਹੋ. ‘‘ਸਮ੍ਮੁਤਿ ਸਙ੍ਘੇ ਅਨ੍ਤੋਗਧੋਯੇਵਾ’’ਤਿ ਏਤੇਨ ਦਕ੍ਖਿਣੇਯ੍ਯਸਙ੍ਘੋ ਨਾਮ ਵਿਸੁਂ ਨਵਤ੍ਤਬ੍ਬੋ. ਤਸ੍ਮਿਞ੍ਚ ਨਵਤ੍ਤਬ੍ਬੇ ਸਤਿ, ਸਮ੍ਮੁਤਿ ਸਙ੍ਘੋਤਿਪਿ ਵਤ੍ਤਬ੍ਬ ਕਿਚ੍ਚਂ ਨਤ੍ਥਿ. ਭਗਵਤੋ ਸਾਵਕਸਙ੍ਘੋ ਤ੍ਵੇਵ ਵਤ੍ਤਬ੍ਬਂ ਹੋਤੀਤਿ ਦਸ੍ਸੇਤਿ. ਸਚ੍ਚਮੇਤਂ. ਇਧ ਪਨ ਸਙ੍ਘਵਚਨੇਨ ਆਗਤਟ੍ਠਾਨਸ੍ਸ ਦੁਵਿਧਤ੍ਤਾ ਸਙ੍ਘਸ੍ਸ ਦੁਵਿਧਤਾ ਵੁਤ੍ਤਾ. ਤਤ੍ਥ ਸਮ੍ਮੁਤਿ ਸਙ੍ਘਸ੍ਸ ਆਗਤਟ੍ਠਾਨਂ ਵਿਨਯਕਮ੍ਮੇਸੂਤਿ ਵੁਤ੍ਤਮੇਵ. ਇਦਾਨਿ ਅਰਿਯਸਙ੍ਘਸ੍ਸ ਆਗਤਟ੍ਠਾਨਂ ਦਸ੍ਸੇਨ੍ਤੋ ‘‘ਤਥਾਪੀ’’ਤਿਆਦਿਮਾਹ. ਤਤ੍ਥ ਸਰਣ ਗਮਨ…ਪੇ… ਅਨੁਸ੍ਸਤਿਟ੍ਠਾਨੇਸੁ ਉਪਸਮ੍ਪਨ੍ਨਭੂਤੋ ਭਿਕ੍ਖੁਸਙ੍ਘੋਵ ਗਹੇਤਬ੍ਬੋ. ਦਕ੍ਖਿਣਾਵਿਸੁਦ੍ਧਿਟ੍ਠਾਨੇ ਪਨ ਪੁਗ੍ਗਲਿਕਦਾਨੇਸੁ ਚਤੂਹਿ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤੋ ਉਪਾਸਕੋਪਿ ਸਾਮਣੇਰੋਪਿ ਯੁਜ੍ਜਤਿ. ਸਙ੍ਘਿਕ ਦਾਨੇਸੁ ਪਨ ਭਿਕ੍ਖੁਸਙ੍ਘੋਵ. ‘‘ਤਥਾ ਤਥਾ ਸਂਵਣ੍ਣੇਤ੍ਵਾ’’ਤਿ ਆਹੁਨੇਯ੍ਯੋ, ਪਾਹੁਨੇਯ੍ਯੋ, ਦਕ੍ਖਿਣੇਯ੍ਯੋ, ਅਞ੍ਜਲੀਕਰਣੀਯ੍ਯੋ, ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ, ਤਿਆਦਿਨਾਸੁਟ੍ਠੁ ਥੋਮੇਤ੍ਵਾ. ਸੋ ਦਕ੍ਖਿਣੇਯ੍ਯ ਸਙ੍ਘੋ. ‘‘ਪੁਥੁਜ੍ਜਨ ਸਙ੍ਘੋ’’ਤਿ ਇਦਂ ਅਰਿਯ ਸਙ੍ਘੇਨ ਵਿਨਾਕੇਵਲਂ ਪੁਥੁਜ੍ਜਨਸਙ੍ਘਂ ਸਨ੍ਧਾਯ ਵੁਤ੍ਤਂ. ਏਤ੍ਥ ਚ ਸਙ੍ਘ ਵਚਨੇਨ ਸਙ੍ਘ ਪਰਿਯਾਪਨ੍ਨੋ ਏਕੋਪਿ ਭਿਕ੍ਖੁ ਗਹੇਤਬ੍ਬੋ. ਸੋ ਸਚੇ ਪੁਥੁਜ੍ਜਨੋ ਹੋਤਿ, ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਨਹੋਤਿ. ਯਦਿ ਅਰਿਯ ਪੁਗ੍ਗਲੋ ਹੋਤਿ, ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਹੋਤਿ.

ਦਕ੍ਖਿਣਵਿਭਙ੍ਗਸੁਤ੍ਤੇ ਸਙ੍ਘਿਕਦਾਨੇ ਭਵਿਸ੍ਸਨ੍ਤਿ ਖੋ ਪਨਾਨਨ੍ਦ ਗੋਤ੍ਰਭੁਨੋ ਕਾਸਾਵਕਣ੍ਠਾ ਦੁਸ੍ਸੀਲਾ ਪਾਪਧਮ੍ਮਾ. ਤੇਸਂਪਿ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤਿ. ਤਦਾਪਾਨਨ੍ਦ ਸਙ੍ਘਗਤਂ ਦਕ੍ਖਿਣਂ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਨ੍ਤਿ ਵਦਾਮੀਤਿ ਵੁਤ੍ਤਤ੍ਤਾ ਸਙ੍ਘਿਕਟ੍ਠਾਨਂ ਪਤ੍ਵਾ ਕੋਚਿ ਭਿਕ੍ਖੁ ਦਕ੍ਖਿਣੇਯ੍ਯ ਸਙ੍ਘੇ ਅਸਙ੍ਗਹਿਤੋਤਿ ਨਤ੍ਥੀਤਿ ਦਟ੍ਠਬ੍ਬੋ.

ਖੇਤ੍ਤਂ ਦੂਸੇਨ੍ਤੀਤਿ ਖੇਤ੍ਤਦੁਟ੍ਠਾਨਿ. ਤਿਣਾਨਿ. ਖੇਤ੍ਤਦੁਟ੍ਠਾ ਕਿਲੇਸਾ. ਵੁਤ੍ਤਞ੍ਹਿਧਮ੍ਮਪਦੇ.

ਤਿਣਦੋਸਾਨਿ ਖੇਤ੍ਤਾਨਿ, ਰਾਗਦੋਸਾ ਅਯਂਪਜਾ;

ਤਸ੍ਮਾਹਿ ਵੀਤਰਾਗੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

ਤਿਣਦੋਸਾਨਿ ਖੇਤ੍ਤਾਨਿ, ਦੋਸਦੋਸਾ ਅਯਂਪਜਾ;

ਤਸ੍ਮਾਹਿ ਵੀਤਦੋਸੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਂ.

ਤਿਣਦੋਸਾਨਿ ਖੇਤ੍ਤਾਨਿ, ਮੋਹਦੋਸਾ ਅਯਂਪਜਾ;

ਤਸ੍ਮਾਹਿ ਵੀਤਮੋਹੇਸੁ, ਦਿਨ੍ਨਂ ਹੋਤਿ ਮਹਪ੍ਫਲਨ੍ਤਿ.

ਇਧ ਪਨ ਸਾਤਿਸ੍ਸਯਤੋ ਖੇਤ੍ਤਦੁਟ੍ਠੇ ਕਿਲੇਸੇ ਦਸ੍ਸੇਤੁਂ ‘‘ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਨੁਸਯਾਨ’’ਨ੍ਤਿ ਵੁਤ੍ਤਂ. ‘‘ਸਬ੍ਭਾਵਾ’’ਤਿ ਸਨ੍ਤਸ੍ਸ ਵਿਜ੍ਜਮਾਨਸ੍ਸਭਾਵੋ ਸਬ੍ਭਾਵੋਤਿਵਿਗ੍ਗਹੋ. ‘‘ਅਸ੍ਸਾ’’ਤਿ ਪੁਥੁਜ੍ਜਨ ਸਙ੍ਘਸ੍ਸ. ‘‘ਸਦ੍ਧਮ੍ਮਪਦੇ ਵੁਤ੍ਤਨਯੇਨਾ’’ਤਿ ਅਪਿਚਯਦਗ੍ਗੇਨਾਤਿ ਵੁਤ੍ਤਨਯੇਨ.

ਸਸਦ੍ਧਮ੍ਮਗਣੁਤ੍ਤਮਪਦਤ੍ਥਾਨੁਦੀਪਨੀ ਨਿਟ੍ਠਿਤਾ.

੮. ‘‘ਅਭਿਵਾਦਿਯਾ’’ਤਿ ਸੁਖੀਹੋਹਿਸਪ੍ਪੁਰਿਸਾਤਿ ਏਵਂ ਅਭਿਵਦਾਪੇਤ੍ਵਾ. ਅਭਿਵਾਦਨਞ੍ਚ ਨਾਮ ਵਨ੍ਦਨਾਮੇਵਾਤਿ ਵੁਤ੍ਤਂ ‘‘ਵਨ੍ਦਿਤ੍ਵਾ’’ਤਿ. ਵਨ੍ਦਨ੍ਤੋਹਿ ਵਨ੍ਦਨੇਯ੍ਯੇ ਵੁਦ੍ਧੇ ਤਥਾ ਵਦਾਪੇਤਿ ਨਾਮ. ਤਥਾ ਵਦਨਞ੍ਚ ਵਨ੍ਦਨੇਯ੍ਯਾਨਂਵੁਦ੍ਧਾਨਂ ਵਤ੍ਤਂ. ‘‘ਪਚ੍ਚੁਪਟ੍ਠਾਪੇਤ੍ਵਾ’’ਤਿ ਪਟਿਮੁਖਂ ਉਪਟ੍ਠਾਪੇਤ੍ਵਾ. ‘‘ਤਿਵਿਧਾ’’ਤਿ ਦ੍ਵਾਰ ਭੇਦੇਨ ਤਿਵਿਧਾ. ‘‘ਵਨ੍ਦਨੇਯ੍ਯਾਨ’’ਨ੍ਤਿ ਬੁਦ੍ਧਾਦੀਨਂ. ‘‘ਨਿਪਜ੍ਜਨ੍ਤੋ’’ਤਿ ਨਿਪਤਨ੍ਤੋ. ‘‘ਅਵਨ੍ਦਿਯੇਸੂ’’ਤਿ ਭਿਕ੍ਖੂਹਿ ਅਵਨ੍ਦਿਤਬ੍ਬੇ ਸੁਨਵਕਤਰਾਦੀਸੁ. ‘‘ਗੁਣਪਦਾਨੀ’’ਤਿ ਗੁਣਦੀਪਕਾਨਿ ਅਰਹਂ ਸਮ੍ਮਾਸਮ੍ਬੁਦ੍ਧੋਤਿਆਦਿਪਦਾਨਿ. ਏਤ੍ਥਚਕਾਯੇਨਵਨ੍ਦਤੀਤਿਆਦਿ ਉਪਚਾਰ ਵਚਨਂ ਹੋਤਿ. ਯਥਾ ਚਕ੍ਖੁਨਾ ਰੂਪਂ ਪਸ੍ਸਤੀਤਿ. ਤਥਾਹਿ ਵੁਤ੍ਤਂ ਅਟ੍ਠਕਥਾਸੁ ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਕਰਣਵਸੇਨ ਚਕ੍ਖੂਤਿ ਲਦ੍ਧਵੋਹਾਰੇਨ ਰੂਪਦਸ੍ਸਨ ਸਮਤ੍ਥੇਨ ਚਕ੍ਖੁ ਵਿਞ੍ਞਾਣੇਨ ਰੂਪਂ ਦਿਸ੍ਵਾ. ਪੋਰਾਣਾ ਪਨਾਹੁ ਚਕ੍ਖੁ ਰੂਪਂ ਨ ਪਸ੍ਸਤਿ, ਅਚਿਤ੍ਤਤ੍ਤਾ. ਚਿਤ੍ਤਂ ਨ ਪਸ੍ਸਤਿ, ਅਚਕ੍ਖੁਤ੍ਤਾ. ਦ੍ਵਾਰਾਰਮ੍ਮਣ ਸਙ੍ਘਟ੍ਟਨੇ ਪਨ ਸਤਿ ਚਕ੍ਖੁ ਪਸਾਦਵਤ੍ਥੁ ਕੇਨਚਿਤ੍ਤੇਨ ਪਸ੍ਸਤਿ. ਈਦਿਸੀ ਪਨੇਸਾ ਕਥਾ ਧਨੁਨਾ ਵਿਜ੍ਝਤੀਤਿਆਦੀਸੁ ਵਿਯ ਸਸਮ੍ਭਾਰ ਕਥਾਨਾਮ ਹੋਤਿ. ਤਸ੍ਮਾ ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਚਕ੍ਖੁ ਵਿਞ੍ਞਾਣੇਨ ਰੂਪਂ ਦਿਸ੍ਵਾਤਿ ਅਯਮੇਵੇਤ੍ਥ ਅਤ੍ਥੋਤਿ. ਏਤ੍ਥਹਿ ‘‘ਕਾਯੇਨਾ’’ਤਿ ਕਾਯ ਵਿਞ੍ਞਤ੍ਤਿਸਙ੍ਖਾਤਂ ਦ੍ਵਾਰ ਰੂਪਂ ਕਰਣਂ ਹੋਤਿ. ਤਸ੍ਮਾ ਚਕ੍ਖੁਨਾਤਿ ਵਚਨੇ ਉਪਚਾਰ ਵਚਨੇ ਸਤਿ ਕਾਯੇਨਾਤਿ ਵਚਨਂਪਿ ਉਪਚਾਰ ਵਚਨਨ੍ਤਿ ਵਿਞ੍ਞਾਯਤਿ. ਤਥਾ ਚਕ੍ਖੁਨਾਤਿ ਪਦੇ ਚਕ੍ਖੁਵਿਞ੍ਞਾਣੇਨਾਤਿ ਅਤ੍ਥੇ ਸਤਿ ਕਾਯੇਨਾਤਿ ਪਦੇਪਿ ਕਾਯਕਮ੍ਮੇਨਾਤਿ ਅਤ੍ਥੋ ਵਿਞ੍ਞਾਯਤਿ. ਵਾਚਾਯ ਵਨ੍ਦਤਿ, ਮਨਸਾਵਨ੍ਦਤੀ,ਤਿ ਪਦੇਸੁਪਿ ਏਸਨਯੋ. ਏਵਞ੍ਚ ਸਤਿ, ਕਾਯ ਕਮ੍ਮੇਨਵਨ੍ਦਾਮਿ, ਵਚੀਕਮ੍ਮੇਨ ਵਨ੍ਦਾਮਿ, ਮਨੋਕਮ੍ਮੇਨ ਵਨ੍ਦਾਮਿ, ਤੀਹਿ ਕਮ੍ਮੇਹਿ ਵਨ੍ਦਾਮੀਤਿ ਇਦਮੇਵ ਮੁਖ੍ਯਵਚਨਨ੍ਤਿ ਸਿਦ੍ਧਂ ਹੋਤਿ. ਸਬ੍ਬਮਿਦਂ ਇਨ੍ਦ੍ਰਿਯ ਸਂਵਰਸੀਲਟ੍ਠਾਨੇ ਅਟ੍ਠਕਥਾਸੁ ਆਗਤਤ੍ਤਾ ਵੁਤ੍ਤਂ. ਚਕ੍ਖੁਨਾਤਿ ਇਦਂ ਪਨ ਮੁਖ੍ਯ ਕਰਣ ਵਚਨਮੇਵ ਸਮ੍ਭਵਤਿ. ਕਸ੍ਮਾ, ਚਕ੍ਖੁਸ੍ਸ ਦਸ੍ਸਨਸਙ੍ਖਾਤਸ੍ਸ ਚਕ੍ਖੁਵਿਞ੍ਞਾਣਸ੍ਸ ਵਤ੍ਥੁ ਪੁਰੇਜਾਤਿਨ੍ਦ੍ਰਿਯਪਚ੍ਚਯਵਿਸੇਸਤ੍ਤਾ. ਸੋਤੇਨ ਸਦ੍ਦਂਸੁਤ੍ਵਾਤਿਆਦੀਸੁਪਿ ਏਸਨਯੋ.

ਕਾਯੇਨਵਨ੍ਦਤਿ, ਵਾਚਾਯਵਨ੍ਦਤੀ,ਤਿ ਏਤ੍ਥ ਤਂਕਾਯਵਚੀਵਿਞ੍ਞਤ੍ਤਿ ਰੂਪ ਦ੍ਵਯਂ ਕਿਞ੍ਚਾਪਿ ਸਹਜਾਤ ਚੇਤਨਾ ਕਮ੍ਮੇਨ ਜਾਤਂ ਹੋਤਿ. ਨ ਤਂ ਚੇਤਨਾਕਮ੍ਮਂ ਵਿਞ੍ਞਤ੍ਤਿ ਦ੍ਵਯੇਨਜਾਤਂ. ਏਵਂ ਸਨ੍ਤੇਪਿ ਤਂ ਰੂਪ ਦ੍ਵਯਂ ਤਸ੍ਸਾਚੇਤਨਾਯ ਕਾਯਵਨ੍ਦਨਾਕਮ੍ਮ, ਵਚੀਵਨ੍ਦਨਾਕਮ੍ਮ ਸਿਦ੍ਧਿਯਾ ਉਪਨਿਸ੍ਸਯ ਪਚ੍ਚਯਵਿਸੇਸੋ ਹੋਤਿ. ਯਥਾਤਂ ਮਾਤਿਤੋ ਜਾਤੋ ਪੁਤ੍ਤੋ ਵੁਦ੍ਧਿ ਪਤ੍ਤੋ ਤਂ ਤਂ ਕਮ੍ਮੇਸੁ ਮਾਤੁਯਾ ਬਲ ਵੂਪਨਿਸ੍ਸਯੋ ਹੋਤਿ. ਏਵਞ੍ਚ ਕਤ੍ਵਾ ਤਂ ਰੂਪਦ੍ਵਯਂ ਅਭਿਧਮ੍ਮੇ ਦ੍ਵਾਰਰੂਪਨ੍ਤਿ ਵੁਤ੍ਤਂ. ਤਸ੍ਮਾ ‘ਕਾਯੇਨ, ਵਾਚਾਯਾ,ਤਿ ਇਦਂਪਿ ਮੁਖ੍ਯ ਕਰਣ ਵਚਨਮੇਵਾਤਿ ਦਟ੍ਠਬ੍ਬਂ. ਕਾਯੇਨਾਤਿ ਪਨ ਕਾਯਕਮ੍ਮੇਨਾਤਿ ਅਤ੍ਥੇ ਸਤਿ, ਤਸ੍ਸਕਮ੍ਮਸ੍ਸ ਵਨ੍ਦਨਾਕਿਰਿਯਾਯ ਸਹ ਅਭੇਦੋ ਆਪਜ੍ਜਤੀਤਿ ਚੇ. ਨਾਪਜ੍ਜਤਿ. ਕਸ੍ਮਾ ਚੇਤਨਾਹਂ ਭਿਕ੍ਖਵੇ ਕਮ੍ਮਂ ਵਦਾਮਿ, ਚੇਤਯਿਤ੍ਵਾ ਕਮ੍ਮਂ ਕਰੋਤਿ ‘ਕਾਯੇਨ, ਵਾਚਾਯ, ਮਨਸਾਤਿ ਇਮਸ੍ਮਿਂ ਸੁਤ੍ਤੇ ਯਥਾਹਿ ‘‘ਚੇਤਯਿਤ੍ਵਾ’’ਤਿ ਪੁਰਿਮਚੇਤਨਾਹਿ ਚੇਤ ਯਿਤ੍ਵਾ. ‘‘ਕਮ੍ਮਂ ਕਰੋਤੀ’’ਤਿ ਪਚ੍ਛਿਮਂ ਸਨ੍ਨਿਟ੍ਠਾਪਨ ਚੇਤਨਾ ਕਮ੍ਮਂ ਕਰੋਤੀਤਿ ਅਤ੍ਥੋ. ਤਥਾ ਇਧਪਿ ਪੁਰਿਮਪਚ੍ਛਿਮਚੇਤਨਾ ਸਮ੍ਭਵਤੋਤਿ. ਏਤ੍ਥ ਹਿ ‘‘ਕਾਯਕਮ੍ਮੇਨਾ’’ਤਿ ਪੁਰਿਮਚੇਤਨਾ ਕਮ੍ਮਂ ਗਯ੍ਹਤਿ. ‘‘ਵਨ੍ਦਤੀ’’ਤਿ ਪਚ੍ਛਿਮ ਸਨ੍ਨਿਟ੍ਠਾਪਨਚੇਤਨਾਕਮ੍ਮਨ੍ਤਿ.

੯. ‘‘ਰਚਯਨ੍ਤੋ’’ਤਿ ਵਿਦਹਨ੍ਤੋ. ‘‘ਰਚਯਿਸ੍ਸਤੀ’’ਤਿ ਅਪਚ੍ਚਕ੍ਖੇ ਅਤੀਤੇ ਅਨਾਗਤਵਚਨਂ. ‘‘ਪੋਤ੍ਥਕਾਰੁਲ਼੍ਹ’’ਨ੍ਤਿ ਪੋਤ੍ਥਕ ਪਤ੍ਤੇਸੁਲਿਖਨਵਸੇਨ ਆਰੁਲ਼੍ਹਂ.

੧੦. ਅਭਿਧਮ੍ਮਤ੍ਥਪਦੇ. ‘‘ਅਭਿਧਮ੍ਮੇ’’ਤਿ ਅਭਿਧਮ੍ਮਪ੍ਪਕਰਣੇ. ‘‘ਏਤ੍ਥ, ਏਤੇਨਾ’’ਤਿ ਵਚਨੇਹਿ ਸਙ੍ਗਹਸਦ੍ਦਸ੍ਸ ਏਕਸੇਸਵਿਧਾਨਂਪਿ ਵਿਞ੍ਞਾਯਤਿ. ‘‘ਅਞ੍ਞਂਪਾਲ਼ਿਦ੍ਵਯਂ ਵੁਚ੍ਚਤਿ’’. ਕਸ੍ਮਾਤਂ ਪਾਲ਼ਿਦ੍ਵਯਂ ਅਭਿਧਮ੍ਮੋ ਨਾਮਾਤਿ ਵੁਤ੍ਤਂ ‘‘ਤਞ੍ਚਾ’’ਤਿਆਦਿ. ‘‘ਯਥਾਪਵਤ੍ਤੇ’’ਤਿ ਅਤ੍ਤਨੋ ਪਚ੍ਚਯਾਨੁਰੂਪਂ ਪਵਤ੍ਤੇ. ‘‘ਪਰਮਤ੍ਥਧਮ੍ਮੇ ਏਵਾ’’ਤਿ ਦ੍ਵੇ ਮੇ ਭਿਕ੍ਖਵੇ ਪੁਗ੍ਗਲਾ, ਤਯੋਮੇਭਿਕ੍ਖਵੇ ਪੁਗ੍ਗਲਾਤਿਆਦਿਨਾ ਪਞ੍ਞਤ੍ਤਿਵੋਹਾਰੇਨ ਪਵਤ੍ਤਾਪਿ ਦੇਸਨਾ ਪਰਮਤ੍ਥ ਧਮ੍ਮੇਹਿ ਵਿਨਾ ਨਪਵਤ੍ਤਤਿ. ਪਰਮਤ੍ਥ ਧਮ੍ਮਾਨਂ ਨਾਨਤ੍ਤਵਸੇਨੇਵ ਪੁਗ੍ਗਲਾਨਂ ਨਾਨਤ੍ਤਸਮ੍ਭਵਤੋ. ਤਸ੍ਮਾ ਪਰਮਤ੍ਥਧਮ੍ਮੇ ਏਵ ਦੀਪੇਤਿ. ਨ ਆਣਾਵਿਧਾਨਂ ਦੀਪੇਤਿ. ‘‘ਦ੍ਵੀਸੁਧਮ੍ਮੇਸੂ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ. ‘‘ਯੋਇਤਰਤੋ’’ਤਿ ਨਿਦ੍ਧਾਰਣੀਯਂ. ‘‘ਯੋ’’ਤਿ ਯੋ ਧਮ੍ਮੋ. ‘‘ਇਤਰਤੋ’’ਤਿ ਇਤਰ ਧਮ੍ਮਤੋ ਸੁਤ੍ਤਨ੍ਤ ਧਮ੍ਮਤੋ. ‘‘ਏਵਞ੍ਚ ਕਤ੍ਵਾ’’ਤਿ ਇਮਿਨਾਕਾਰਣੇਨਾਤਿ ਅਤ੍ਥੋ. ਅਟ੍ਠਕਥਾਸੁ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਦੇਸੇਤਬ੍ਬਪ੍ਪਕਾਰਾਨਂ ਅਨਵਸੇਸਵਿਭਤ੍ਤਿਵਸੇਨ ਅਤਿਰੇਕਤਾ, ਸੁਦ੍ਧ ਧਮ੍ਮਾਧਿਟ੍ਠਾਨ ਦੇਸਨਾ ਪਵਤ੍ਤਿਵਸੇਨ ਵਿਸੇਸਤਾ ਯੋਜੇਤਬ੍ਬਾ. ‘‘ਯਤੋ’’ਤਿ ਯਸ੍ਮਾ ਅਨਵਸੇਸਵਿਭਤ੍ਤਿਤੋ, ਅਤਿਵਿਤ੍ਥਾਰਦੇਸਨਾਭਾਵਤੋਤਿ ਵੁਤ੍ਤਂ ਹੋਤਿ. ਕਸ੍ਮਾ ਦੇਵੇਸੁ ਏਵ ਦੇਸੇਨ੍ਤੀਤਿ ਆਹ ‘‘ਨ ਹਿ ਮਨੁਸ੍ਸਾ’’ਤਿਆਦਿਂ. ਤਤ੍ਥ ‘‘ਨ ਹਿ ਮਨੁਸ੍ਸਾ ਪਟਿਗ੍ਗਹੇਤੁਂ ਸਕ੍ਕੋਨ੍ਤੀ’’ਤਿ ਸਮ੍ਬਨ੍ਧੋ. ‘‘ਪਵਤ੍ਤਨਯੋਗ੍ਯ’’ਨ੍ਤਿ ਪਵਤ੍ਤਨਤ੍ਥਾਯ ਪਹੋਨ੍ਤਂ. ‘‘ਕਥਾਮਗ੍ਗ’’ਨ੍ਤਿ ਦੇਸਨਾਕਥਾਪਬਨ੍ਧਂ. ‘‘ਏਕਮਾਤਿਕਾਨੁ ਬਨ੍ਧਾ’’ਤਿ ਕੁਸਲਾ ਧਮ੍ਮਾ ਅਕੁਸਲਾ ਧਮ੍ਮਾਤਿਆਦਿਕਂ ਏਕਂ ਅਭਿਧਮ੍ਮ ਮਾਤਿਕਂ ਅਨੁਗਤਾ. ‘‘ਤਸ੍ਸਾ’’ਤਿ ਅਭਿਧਮ੍ਮਸ੍ਸ. ਅਤਿਰੇਕ ਵਿਸੇਸਤਨ੍ਤਿ ਸਮ੍ਬਨ੍ਧੋ. ‘‘ਤਤ੍ਥਾ’’ਤਿ ਤਿਸ੍ਸਂ ਅਟ੍ਠਸਾਲਿਨਿਯਂ. ਆਦਿਮ੍ਹਿਯੇਵਤਤ੍ਥ ਕੇਨਟ੍ਠੇਨ ਅਭਿਧਮ੍ਮੋ, ਧਮ੍ਮਾਤਿਰੇਕ ਧਮ੍ਮਵਿਸੇਸਟ੍ਠੇ ਨਾ-ਤਿ ਵਤ੍ਵਾ ਤਦਤ੍ਥਂ ਵਿਤ੍ਥਾਰੇਨ੍ਤੋ ਸੁਤ੍ਤਞ੍ਹਿ ਪਤ੍ਵਾ ਪਞ੍ਚਕ੍ਖਨ੍ਧਾ ਏਕਦੇਸੇਨੇਵ ਵਿਭਤ੍ਤਾ, ਨਨਿਪ੍ਪਦੇਸੇਨ. ਅਭਿਧਮ੍ਮਂ ਪਤ੍ਵਾ ਪਨ ਨਿਪ੍ਪਦੇਸਤੋਵ ਵਿਭਤ੍ਤਾ-ਤਿ ਵੁਤ੍ਤਂ. ਤੇਨਾਹ ‘‘ਧਮ੍ਮਨਾਮਿਕਾਨ’’ਨ੍ਤਿਆਦਿਂ. ‘‘ਧਮ੍ਮੋ ਪਨਾ’’ਤਿ ਪਾਲ਼ਿਦ੍ਵਯਮਾਹ.‘‘ਏਵਂ ਸਨ੍ਤੇਪੀ’’ਤਿ ਅਟ੍ਠਸਾਲਿਨਿਯਂ ਏਵਂ ਵਿਚਾਰਿਤੇਪਿਸਤਿ. ‘‘ਸਬ੍ਬਜੇਟ੍ਠਕੋ’’ਤਿ ਤਿਣ੍ਣਂ ਪਿਟਕਾਨਂ ਮਜ੍ਝੇਸਬ੍ਬਜੇਟ੍ਠਕੋ. ਕਸ੍ਮਾ ਸਬ੍ਬਜੇਟ੍ਠਕੋ ਸਿਯਾਤਿ ਆਹ ‘‘ਵਿਨਯਂ ਵਿਵਣ੍ਣੇਨ੍ਤਸ੍ਸਹੀ’’ਤਿਆਦਿਂ. ਤਤ੍ਥ ‘‘ਵਿਵਣ੍ਣੇਨ੍ਤਸ੍ਸਾ’’ਤਿ ਗਰਹਨ੍ਤਸ੍ਸ. ਚਰਤਿ ਪਵਤ੍ਤਤੀਤਿ ਚਕ੍ਕਂ. ਲੋਕਸ੍ਮਿਂ ਕੇਨਚਿ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਪਟਿਨਿਵਤ੍ਤਿਤੁਂ ਅਸਕ੍ਕੁਣੇਯ੍ਯਂ ਆਣਾਵਿਧਾਨਂ ਆਣਾਚਕ੍ਕਂ ਨਾਮ. ਤਥਾ ਅਸਕ੍ਕੁਣੇਯ੍ਯਂ ਦੇਸਨਾ ਵਿਧਾਨਂ ਧਮ੍ਮਚਕ੍ਕਂ ਨਾਮ. ਤਤ੍ਥ, ਯੋ ਪਨ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਪਾਰਾਜਿਕੋ ਹੋਤਿ ਅਸਂਵਾਸੋ-ਤਿਆਦਿਨਾ ਨਯੇਨ ਪਵਤ੍ਤਂ ਆਣਾਵਿਧਾਨਂ ਆਣਾਚਕ੍ਕਂ ਨਾਮ. ਚਤ੍ਤਾਰਿਮਾਨਿ ਭਿਕ੍ਖਵੇ ਅਰਿਯਸਚ੍ਚਾਨੀ-ਤਿਆਦਿਕਂ ਦੇਸਨਾਵਿਧਾਨਂ ਧਮ੍ਮਚਕ੍ਕਂ ਨਾਮ. ਤਦੁਭਯਂਪਿ ਕੋਚਿ ਭਿਨ੍ਦਿਤੁਂ ਪਾਰਾਜਿਕਂ ਵਾ ਭਿਕ੍ਖੁਂ ਅਪਾਰਾਜਿਕਂ ਕਾਤੁਂ ਚਤੁਸ੍ਸਚ੍ਚਂ ਵਾ ਧਮ੍ਮਂ ਅਸਚ੍ਚਂ ਕਾਤੁਂ ਨਸਕ੍ਕੋਤਿ. ਅਥ ਖੋ ਕਰੋਨ੍ਤੋਯੇਵ ਦੇਵਦਤ੍ਤੋਵਿਯ ਆਪਾਯਿਕੋ ਹੋਤਿ. ਪਾਰਾਜਿਕੋਚ ਭਿਕ੍ਖੁ ਅਤ੍ਤਾਨਂ ਸੁਦ੍ਧਂ ਅਕਰੋਨ੍ਤੋ ਅਪਾਯਗਾਮੀਯੇਵ ਹੋਤਿ. ਏਵਂ ਸਬ੍ਬੇਸੁ ਵਿਨਯ ਸਿਕ੍ਖਾਪਦੇਸੁ. ਏਵਂ ਕੇਨਚਿ ਪਟਿਨਿਵਤ੍ਤਿਤੁਂ ਅਸਕ੍ਕੁਣੇਯ੍ਯਤ੍ਤਾ ਤਦੁਭਯਂਪਿ ਅਪ੍ਪਟਿਵਤ੍ਤਿਯਂ ਚਕ੍ਕਂ ਨਾਮ ਹੋਤਿ. ‘‘ਵਿਨਯੋ ਨਾਮ ਸਾਸਨਸ੍ਸ ਮੂਲ’’ਨ੍ਤਿ ਵਿਨਯੇ ਠਿਤੇ ਭਿਕ੍ਖੁਸਙ੍ਘੋ ਪਞ੍ਞਾਯਤਿ. ਭਿਕ੍ਖੁ ਸਙ੍ਘੇ ਪਞ੍ਞਾਯਨ੍ਤੇ ਤਿਵਿਧੋਪਿਸਦ੍ਧਮ੍ਮੋਪਞ੍ਞਾਯਤਿ, ਤਿਵਿਧਂਪਿ ਸਤ੍ਥੁਸਾਸਨਂ ਤਿਟ੍ਠਤਿ. ਏਵਂ ਵਿਨਯੋ ਤਿਵਿਧਸ੍ਸਸਾਸਨਸ੍ਸ ਮੂਲਂ ਹੋਤੀਤਿ. ਕਥਞ੍ਚਪਰਿਯਤ੍ਤਿਸਦ੍ਧਮ੍ਮੇ ਪਞ੍ਞਾਯਨ੍ਤੇ ਤਿਵਿਧਂਪਿ ਸਾਸਨਂ ਤਿਟ੍ਠਤੀਤਿ. ਵੁਚ੍ਚਤੇ. ਤਤ੍ਥ ਸਾਸਨਂ ਤਿਟ੍ਠਤੀਤਿ ਕਿਤ੍ਤਕਂਕਾਲਂ ਤਿਟ੍ਠਤੀਤਿ. ਪਞ੍ਚਵਸ੍ਸਸਹਸ੍ਸਾਨਿ ਤਿਟ੍ਠਤੀਤਿ ਪੋਰਾਣਟ੍ਠਕਥਾਸੁਕਥਯਿਂਸੁ. ਮਿਚ੍ਛਾਵਾਦਿਨੋਪਨਵਦਨ੍ਤਿ ਵਿਨਯੇ ਚੂਲ਼ਵਗ੍ਗੇਭਿਕ੍ਖੁਨਿਕ੍ਖਨ੍ਧਕੇ ਸਚੇ ਆਨਨ੍ਦ ਮਮਸਾਸਨੇਮਾਤੁਗਾਮੋ ਪਬ੍ਬਜ੍ਜਂ ਨਲਭੇਯ੍ਯ. ਵਸ੍ਸਸਹਸ੍ਸਂ ਸਦ੍ਧਮ੍ਮੋ ਤਿਟ੍ਠੇਯ੍ਯ. ਇਦਾਨਿ ਮਾਤੁਗਾਮਸ੍ਸ ਪਬ੍ਬਜ੍ਜਾ ਅਨੁਞ੍ਞਾਤਾ ਗੋਤਮਿਯਾ ਪੁਨਪ੍ਪੁਨਂ ਆਯਾਚਨਂ ਉਪਾਦਾਯ. ਪਞ੍ਚੇਵਦਾਨਿ ਆਨਨ੍ਦ ਵਸ੍ਸਸਤਾਨਿ ਸਦ੍ਧਮ੍ਮੋਠਸ੍ਸਤੀਤਿ ਵੁਤ੍ਤਂ. ਤਸ੍ਮਾ ਬੁਦ੍ਧਸਾਸਨਂ ਪਞ੍ਚਵਸ੍ਸਸਤਾਨਿ ਏਵ ਤਿਟ੍ਠਤਿ. ਤਤੋਪਰਂ ਏਕਦਿਵਸਂਪਿ ਨ ਤਿਟ੍ਠਤਿ. ਇਦਾਨਿ ਸਾਸਨਪ੍ਪਟਿ ਰੂਪਕਮਤ੍ਤਂ ਹੋਤੀਤਿ. ਤਂ ਤੇਸਂ ਮਿਚ੍ਛਾ ਵਚਨਮਤ੍ਤਂ. ‘‘ਪਞ੍ਚੇਵਵਸ੍ਸਸਤਾਨੀ’’ਤਿ ਇਦਂ ਪਨ ਸਨ੍ਨਿਟ੍ਠਾਨ ਵਚਨਂ ਨਹੋਤਿ. ਮਾਤੁਗਾਮਾਨਂ ਆਦੀਨਵ ਦੀਪਨਮਤ੍ਤਵਚਨਂ. ਸੋ ਚ ਆਦੀਨਵੋ ਅਟ੍ਠਗਰੁਧਮ੍ਮੇ ਸਣ੍ਠਪੇਤ੍ਵਾ ਸਤ੍ਥਾਰਾ ਏਵ ਪਟਿਬਾਹਿਤੋ. ਪੁਨ ‘‘ਵਸ੍ਸਸਹਸ੍ਸ’’ਨ੍ਤਿ ਇਦਮੇਵਸਨ੍ਨਿਟ੍ਠਾਨ ਵਚਨਂ ਜਾਤਨ੍ਤਿ. ਏਤ੍ਥਪਿਕੇਚਿਵਦਨ੍ਤਿ ਵਸ੍ਸਸਹਸ੍ਸਮੇਵ ਸਾਸਨਂ ਤਿਟ੍ਠਤਿ, ਤਤੋਪਰਂ ਏਕਦਿਵਸ ਮਤ੍ਤਂਪਿ ਨ ਤਿਟ੍ਠਤਿ, ਅਨ੍ਤਰਧਾਯਤਿ. ਤਦਾ ਸੀਮਾਯੋਪਿ ਅਸੀਮਾ ਹੋਨ੍ਤਿ. ਪਚ੍ਛਾਤਾਸੁ ਉਪਸਮ੍ਪਾਦਿਤਾਪਿ ਅਨੁਪਸਮ੍ਪਨ੍ਨਾ ਹੋਨ੍ਤਿ. ਇਦਾਨਿ ਸਾਸਨਪ੍ਪਟਿ ਰੂਪਕਮਤ੍ਤਂ ਹੋਤੀਤਿ. ਇਦਂਪਿ ਤੇਸਂ ਅਤ੍ਥਞ੍ਚਕਾਰਣਞ੍ਚ ਅਦਿਸ੍ਵਾ ਅਜਾਨਿਤ੍ਵਾ ਵੁਤ੍ਤਤ੍ਤਾ ਮਿਚ੍ਛਾ ਵਚਨਮਤ੍ਤਂ ਹੋਤਿ. ਅਯਂ ਪਨੇਤ੍ਥ ਅਤ੍ਥੋ. ‘‘ਵਸ੍ਸਸਹਸ੍ਸਂ ਸਦ੍ਧਮ੍ਮੋ ਤਿਟ੍ਠੇਯ੍ਯਾ’’ਤਿ ਵਸ੍ਸਸਹਸ੍ਸਮੇਵ ਸਦ੍ਧਮ੍ਮੋ ਅਪਰਿਹਾਯਮਾਨੋ ਤਿਟ੍ਠੇਯ੍ਯ. ਤਤੋਪਰਂ ਪਨ ਨ ਤਿਟ੍ਠੇਯ੍ਯ, ਅਨੁਕ੍ਕਮੇਨ ਪਰਿਹਾਯਮਾਨੋ ਗਚ੍ਛੇਯ੍ਯਾਤਿ. ਕਥਂ ਪਨ ਅਪਰਿਹਾਯਮਾਨੋ ਤਿਟ੍ਠਤਿ, ਕਥਞ੍ਚ ਪਰਿਹਾਯਮਾਨੋ ਗਚ੍ਛਤੀਤਿ. ਵੁਚ੍ਚਤੇ. ਪਞ੍ਚਸਙ੍ਘਾ ਵੇਦਿਤਬ੍ਬਾ. ਯੇਸੁ ਸਙ੍ਘੇ ਸੁਸਦ੍ਧਮ੍ਮੋ ਤਿਟ੍ਠਤਿ. ਕਤਮੇ ਪਞ੍ਚ. ਖੀਣਾਸਵਸਙ੍ਘੋ, ਅਨਾਗਾਮਿਸਙ੍ਘੋ, ਸਕਦਾਗਾਮਿਸਙ੍ਘੋ, ਸੋਤਾਪਨ੍ਨਸਙ੍ਘੋ, ਪੁਥੁਜ੍ਜਨਕਲ੍ਯਾਣਕਸਙ੍ਘੋ,ਤਿ. ਤਤ੍ਥ, ਵਸ੍ਸਸਹਸ੍ਸਬ੍ਭਨ੍ਤਰੇ ਸਬ੍ਬੇਪਞ੍ਚਸਙ੍ਘਾ ਪਞ੍ਞਾਯਨ੍ਤਿ. ਏਵਂ ਵਸ੍ਸਸਹਸ੍ਸਂ ਸਦ੍ਧਮ੍ਮੋ ਅਪਰਿਹਾਯਮਾਨੋ ਤਿਟ੍ਠਤਿ. ਤਤੋਪਰਂ ਖੀਣਾਸਵਸਙ੍ਘੋ ਨ ਪਞ੍ਞਾਯਤਿ. ਸੇਸਾਨਿ ਚਤ੍ਤਾਰਿਵਸ੍ਸਸਹਸ੍ਸਾਨਿ ਅਨੁਕ੍ਕਮੇਨ ਸੇਸਾਨਂ ਚਤੁਨ੍ਨਂ ਸਙ੍ਘਾਨਂ ਖੇਤ੍ਤਾਨਿ ਜਾਤਾਨਿ. ਏਵਂ ਤਤੋਪਰਂ ਪਰਿਹਾਯਮਾਨੋ ਗਚ੍ਛਤੀਤਿ ਅਯਮੇਤ੍ਥ ਅਤ੍ਥੋ. ਕਾਰਣਂ ਵੁਚ੍ਚਤੇ. ‘‘ਸਦ੍ਧਮ੍ਮੋ ਤਿਟ੍ਠੇਯ੍ਯਾ’’ਤਿ ਏਤ੍ਥ ਤਿਵਿਧੋ ਸਦ੍ਧਮ੍ਮੋ ‘ਪਰਿਯਤ੍ਤਿਸਦ੍ਧਮ੍ਮੋ, ਪਟਿਪਤ੍ਤਿਸਦ੍ਧਮ੍ਮੋ, ਪਟਿਵੇਧਸਦ੍ਧਮ੍ਮੋ,ਤਿ. ਸੋ ਏਵ ਤਿਵਿਧਂ ਸਾਸਨਨ੍ਤਿ ਚ ਵੁਚ੍ਚਤਿ. ਤਤ੍ਥ, ਪਰਿਯਤ੍ਤਿ ਸਦ੍ਧਮ੍ਮੋ ਨਾਮ ਸਾਟ੍ਠਕਥਾਨਿਤੀਣਿਪਿਟਕਾਨਿ. ਸੋਚ ਏਤਰਹਿ ਪਰਿਪੁਣ੍ਣੋ ਤਿਟ੍ਠਤਿ. ਕਥਂ ਪਰਿਯਤ੍ਤਿ ਸਾਸਨਂ ਪਟਿਰੂਪਕਮਤ੍ਤਂ ਭਵੇਯ੍ਯ. ਭਿਕ੍ਖੂ ਚ ਪਰਿਯਤ੍ਤਿਕਮ੍ਮਿਕਾ ਅਨੇਕ ਸਤਸਹਸ੍ਸਮਤ੍ਤਾ ਪਞ੍ਞਾਯਨ੍ਤਿ. ਕਥਞ੍ਚਿਦਂ ਸਾਸਨਂ ਤਤੋਪਰਂ ਏਕਦਿਵਸਂਪਿ ਨ ਤਿਟ੍ਠੇਯ੍ਯ. ਤੇ ਚ ਭਿਕ੍ਖੂ ਸੀਲਪ੍ਪਟਿਪਤ੍ਤਿਯਂ ਠਿਤਾ ਅਨੇਕ ਸਤਸਹਸ੍ਸਮਤ੍ਤਾ ਏਤਰਹਿ ਸਨ੍ਧਿਸ੍ਸਨ੍ਤਿ. ਕਥਞ੍ਚ ਪਟਿਪਤ੍ਤਿ ਸਾਸਨਂ ਤਤੋਪਰਂ ਨ ਤਿਟ੍ਠੇਯ੍ਯ. ਪਰਿਯਤ੍ਤਿਯਾਚ ਪਟਿਪਤ੍ਤਿਯਾਚ ਤਿਟ੍ਠਮਾਨਾਯਪਟਿਵੇਧਸਦ੍ਧਮ੍ਮੋਪਿ ਨ ਤਿਟ੍ਠਤੀਤਿ ਨ ਵਤ੍ਤਬ੍ਬੋ. ਯਥਾਹਿ-ਏਕੋ ਧਨਸੇਟ੍ਠਿ ਨਾਮ ਅਤ੍ਥਿ. ਸੋ ਪੁਤ੍ਤਧੀਤੁ ਪਰਮ੍ਪਰਾਨਂ ਅਤ੍ਥਾਯ ਮਹਨ੍ਤਾਰਤਨਨਿਧਯੋ ਭੂਮਿਯਂ ਬਹੂਸੁਟ੍ਠਾਨੇਸੁ ਨਿਦਹਿਤ੍ਵਾ ਠਪਿਤਾ ਹੋਨ੍ਤਿ. ਪੋਤ੍ਥਕੇਸੁ ਚ ਤੇਸਂ ਪਵਤ੍ਤਿਂ ਪਰਿਪੁਣ੍ਣਂ ਲਿਖਿਤ੍ਵਾ ਠਪੇਤਿ. ਤਤ੍ਥ ਨਿਮੀਸੁ ਚ ਪੋਤ੍ਥਕੇਸੁ ਚ ਅਕ੍ਖਰੇਸੁ ਚ ਧਰਨ੍ਤੇਸੁ ਤੇਨਿਧਯੋ ਨਸ੍ਸਨ੍ਤਿ ਅਨ੍ਤਰਧਾਯਨ੍ਤੀਤਿ ਨ ਵਤ੍ਤਬ੍ਬਾਯੇਵ. ਏਵਮਿਦਂ ਸਾਸਨਂ ਦਟ੍ਠਬ੍ਬਂ. ਤਤ੍ਥਹਿ ਨਿਧੀਨਂਨਿਧਾਨਭੂਮਿਸਦਿਸਂ ਤੇਪਿਟਕਂ ਬੁਦ੍ਧਵਚਨਂ, ਧਨਰਤਨਸਦਿਸਾਨਿ ਧਮ੍ਮਰਤਨਾਨਿ. ਯਥਾ ਚ ਸੇਟ੍ਠਿਵਂਸੇਜਾਤੋ ਬਲਸਮ੍ਪਨ੍ਨੋ ਪੁਰਿਸੋ ਪੋਤ੍ਥਕਂ ਪਸ੍ਸਿਤ੍ਵਾ ਸੁਟ੍ਠੁ ਖਣਨ੍ਤੋ ਤਾਨਿਰਤਨਾਨਿ ਲਭਿਸ੍ਸਤਿਯੇਵ. ਏਵਮਿਧਪਿ ਬਲਸਮ੍ਪਨ੍ਨੋ ਭਿਕ੍ਖੁ ਦੇਸਨਾਧਮ੍ਮਂ ਸੁਤ੍ਵਾ ਸੁਟ੍ਠੁ ਪਟਿਪਜ੍ਜਨ੍ਤੋ ਤਾਨਿਧਮ੍ਮਰਤਨਾਨਿ ਲਭਿਸ੍ਸਤਿਯੇਵ. ਲਭਮਾਨੇ ਚ ਸਤਿ, ਕਥਂ ਤਾਨਿਧਮ੍ਮਰਤਨਾਨਿ ਅਨ੍ਤਰਹਿਤਾਨਿ. ਸੀਮਾਨਞ੍ਚ ਪਵਤ੍ਤਿਵਾਨਿਵਤ੍ਤਿ ਵਾ ਆਣਾਚਕ੍ਕਸ੍ਸੇਵ ਵਿਸਯੋ ਹੋਤਿ. ਨ ਧਮ੍ਮਚਕ੍ਕਸ੍ਸ. ਯਞ੍ਚ ਵੁਤ੍ਤਂ-ਪਞ੍ਚੇਵਵਸ੍ਸਸਤਾਨਿਸਦ੍ਧਮ੍ਮੋ ਠਸ੍ਸਤੀਤਿ ਚ, - ਵਸ੍ਸਸਹਸ੍ਸਂ ਸਦ੍ਧਮ੍ਮੋ ਤਿਟ੍ਠੇਯ੍ਯਾਤਿ ਚ. ਇਦਞ੍ਚ ਵਚਨਂ ਧਮ੍ਮਚਕ੍ਕਮੇਵ ਹੋਤਿ, ਨ ਆਣਾਚਕ੍ਕਂ. ਬਦ੍ਧਸੀਮਾਯੋ ਚ ਨਿਵਤ੍ਤਮਾਨਾ ਦ੍ਵੀਹਿ ਕਾਰਣੇਹਿ ਨਿਵਤ੍ਤਨ੍ਤਿ ਅਨ੍ਤਰਧਾਯਨ੍ਤਿ. ਆਣਾਚਕ੍ਕਭੂਤਾਯ ਕਮ੍ਮਵਾਚਾਯ ਸਮੂਹਨਨੇਨ ਵਾ, ਸਾਸਨਸ੍ਸ ਵਾ ਅਨ੍ਤਰਧਾਨੇਨ. ਤਤ੍ਥ ਵਸ੍ਸਸਹਸ੍ਸਪਰਿਯਨ੍ਤੇ ਕਮ੍ਮਵਾਚਾਯ ਸਮੂਹਨਨਞ੍ਚ ਨਤ੍ਥਿ. ਸਾਸਨਨ੍ਤਰਧਾਨਞ੍ਚ ਨਾਮ ਅਨਾਗਤੇ ਧਾਤੁਪਰਿਨਿਬ੍ਬਾਨੇਨ ਪਰਿਚ੍ਛਿਨ੍ਨਂ ਹੋਤਿ. ਧਾਤੁਪਰਿਨਿਬ੍ਬਾਨੇਹਿ ਜਾਤੇ ਸਬ੍ਬਂ ਆਣਾਚਕ੍ਕਂ ਵਿਗਤਂ ਹੋਤਿ, ਅਨ੍ਤਰਧਾਯਤਿ. ਧਮ੍ਮਚਕ੍ਕਂ ਪਨ ਦੇਵਲੋਕੇਸੁ ਯਾਵਾਨਾਗਤਬੁਦ੍ਧਕਾਲਾਪਿ ਪਵਤ੍ਤਿਸ੍ਸਤਿਯੇਵ ਆਲ਼ਵਕਪੁਚ੍ਛਾਗਾਥਾਯੋ ਵਿਯ. ਅਪਿਚਯੋ ਵੋ ਆਨਨ੍ਦ ਮਯਾ ਧਮ੍ਮੋ ਚ ਵਿਨਯੋ ਚ ਦੇਸਿਤੋ ਪਞ੍ਞਤ੍ਤੋ. ਸੋ ਵੋ ਮਮਚ੍ਚਯੇਨ ਸਤ੍ਥਾ-ਤਿ ਵੁਤ੍ਤਂ. ਸੋਚਤਿ ਪਿਟਕਭੂਤੋ ਧਮ੍ਮਵਿਨਯੋ ਸਤ੍ਥਾ ਏਤਰਹਿ ਤਿਵਿਧਂਪਿ ਸਾਸਨਂ ਲੋਕਸ੍ਸ ਦੀਪੇਨ੍ਤੋ ਪਕਾਸੇਨ੍ਤੋ ਤਿਟ੍ਠਤਿ. ਯਤੋਬੁਦ੍ਧਭਾਸਿਕਾਨਂ ਦੇਵਮਨੁਸ੍ਸਾਨਂ ਨਾਨਾ ਬਾਹਿਰਕੇਹਿ ਜਨੇਹਿ ਅਸਾਧਾਰਣੋ ਮਹਨ੍ਤੋ ਞਾਣਾਲੋਕੋ ਏਤਰਹਿ ਵਿਜ੍ਜੋਤਮਾਨੋ ਪਵਤ੍ਤਤਿ. ਤੇਹਿ ਸਬ੍ਬਞ੍ਞੁਤਞ੍ਞਾਣੇਨ ਦੇਸਿਤਾਨਿ ਏਤਰਹਿਧਰਮਾਨਾਨਿ ਚਤੁਰਾਸੀਤਿ ਧਮ੍ਮਕ੍ਖਨ੍ਧ ਸਹਸ੍ਸਾਨਿ ਸੁਤ੍ਵਾ ਅਨਮਤਗ੍ਗੇਸਂਸਾਰੇ ਅਨਨ੍ਤਾਸੁ ਲੋਕਧਾਤੂਸੁ ਸਬ੍ਬਂਲੋਕਤ੍ਤਯਪ੍ਪਵਤ੍ਤਿਞ੍ਚ, ਸਬ੍ਬਂਧਮ੍ਮਪ੍ਪਵਤ੍ਤਿਞ੍ਚ, ਸਬ੍ਬਞ੍ਞੁਤਞ੍ਞਾਣਾਨੁਗਤਿਕੇਨ ਸੁਤਮਯਞ੍ਞਾਣੇਨ ਜਾਨਨ੍ਤਿ. ਆਯਤਿਞ੍ਚ ਸਗ੍ਗਤ੍ਥਾਯ ਚ ਮਗ੍ਗਫਲਨਿਬ੍ਬਾਨਤ੍ਥਾਯ ਚ ਨਾਨਾਪੁਞ੍ਞਕਿਰਿਯਵਤ੍ਥੂਨਿ ਆਰਭਨ੍ਤਿ, ਪਬ੍ਬਜਨ੍ਤਿ. ਪਰਿਯਤ੍ਤਿਂ ਪਰਿਯਾਪੁਣਨ੍ਤਿ. ਪਟਿਪਤ੍ਤਿਂ ਪੂਰੇਨ੍ਤਿ. ਭਾਵਨਂਭਾਵੇਨ੍ਤਿ. ਇਦਂ ਸਬ੍ਬਂ ਸਾਸਨਪ੍ਪਟਿਰੂਪਕਮਤ੍ਤਂਨ ਹੋਤਿ. ਏਕਨ੍ਤ ਸਾਸਨਂ ਹੋਤਿ. ਕਸ੍ਮਾ, ਯਥਾ ਧਮ੍ਮਂ ਯਥਾ ਵਿਨਯਂ ਪਟਿਪਜ੍ਜਨਤੋ. ਇਮਾਯ ਚ ਪਟਿਪਤ੍ਤਿਯਾ ਆਯਤਿਂ ਸਗ੍ਗਮਗ੍ਗਫਲ ਨਿਬ੍ਬਾਨਪ੍ਪਟਿਲਾਭਾਯ ਸਂਵਤ੍ਤਨਿਕਤ੍ਤਾਤਿ. ਏਤ੍ਤਾਵਤਾ ਸਬ੍ਬਂ ਮਿਚ੍ਛਾਵਾਦੀਨਂ ਮਿਚ੍ਛਾਵਚਨਂ ਵਿਧਮਿਤਂਵਿਦ੍ਧਂਸਿਤਂ ਹੋਤੀਤਿ.

ਪਣਾਮਗਾਥਾਵਣ੍ਣਨਾ.

੧੧. ਦੁਤੀਯਗਾਥਾਵਣ੍ਣਨਾਯਂ. ‘‘ਆਦਿਗਾਥਾਯਾ’’ਤਿ ਪਥਮਗਾਥਾਵਾਕ੍ਯੇਨ. ‘‘ਤਂ ਤਂ ਪਯੋਜਨਸਹਿਤੇ’’ਤਿ ਤੇਨਤੇਨਪਯੋਜਨੇਨ ਸਹਿਤੇ. ‘‘ਪਞ੍ਚ ਅਤ੍ਥੇ’’ਤਿ ਪਞ੍ਚਪਿਣ੍ਡਤ੍ਥੇ. ‘‘ਤੇਅਭਿਧਮ੍ਮਤ੍ਥੇ’’ਤਿ ਅਭਿਧਮ੍ਮਤ੍ਥਪਦੇ ਦੀਪਿਤੇ ਤੇਅਭਿਧਮ੍ਮਤ੍ਥੇ. ‘‘ਤਤ੍ਥਾ’’ਤਿ ਤਿਸ੍ਸਂ ਦੁਤੀਯਗਾਥਾਯਂ. ‘‘ਨਤੁ ਵੁਤ੍ਤ’’ਨ੍ਤਿ ਨਪਨਪਕਰਣਂਪਿ ਪੁਬ੍ਬੇਵੁਤ੍ਤਂ ਹੋਤਿ. ਅਭਿਧਮ੍ਮਤ੍ਥਾ ਕੁਤੋਪੁਬ੍ਬੇਵੁਤ੍ਤਾ ਹੋਨ੍ਤੀਤਿ ਯੋਜਨਾ. ਏਵਂਤੀਸੁ ਅਤ੍ਥਵਿਕਪ੍ਪੇਸੁ ਪਥਮਸ੍ਸ ਕਾਲਵਿਰੋਧਂ ਦਸ੍ਸੇਤ੍ਵਾ ਇਦਾਨਿ ਦੁਤੀਯ ਤਤੀਯਾਨਂ ਸਦ੍ਦਤੋਵਿਰੋਧਂ ਵਤ੍ਤੁਂ ‘‘ਨਚਾ’’ਤਿਆਦਿਮਾਹ. ਤਤ੍ਥ ‘‘ਆਦਿਮ੍ਹਿ ਯੇਵਾ’’ਤਿ ਏਤੇਨ ਯਦਾਕਦਾਚਿ ਪਚ੍ਚਾਮਸਨਂ ਅਪ੍ਪਧਾਨਨ੍ਤਿ ਦਸ੍ਸੇਤਿ. ‘‘ਅਪ੍ਪਧਾਨਪਦਾਨੀ’’ਤਿ ਅਭਿਧਮ੍ਮਤ੍ਥਸਙ੍ਗਹਨ੍ਤਿ ਇਮਸ੍ਮਿਂ ਏਕਸ੍ਮਿਂ ਸਮਾਸਪਦੇ ਪੁਰਿਮਾਨਿ ਵਿਸੇਸਨ ਪਦਾਨਿ. ਤਤ੍ਥ ਸਬ੍ਬਥਾਪਿ ਵੁਤ੍ਤਾਤਿ ਯੋਜਿਤੇ ਸਤਿ, ਤਸ੍ਮਿਂ ਅਭਿਧਮ੍ਮਤ੍ਥਸਙ੍ਗਹਪ੍ਪਕਰਣੇ ਤਸ੍ਮਿਂ ਅਭਿਧਮ੍ਮਤ੍ਥ ਪਦੇਵਾ ਸਬ੍ਬਥਾ ਮਯਾ ਵੁਤ੍ਤਾਤਿ ਅਤ੍ਥੋ ਹੋਤਿ. ਸੋ ਨ ਯੁਜ੍ਜਤਿ. ਤਸ੍ਮਿਂ ਅਭਿਧਮ੍ਮੇ ਬੁਦ੍ਧੇਨ ਭਗਵਤਾ ਸਬ੍ਬਥਾ ਵੁਤ੍ਤਾਤਿ ਅਤ੍ਥੋ ਯੁਜ੍ਜਤਿ. ਅਪ੍ਪਧਾਨਪਦਂ ਪਚ੍ਚਾਮਸਤੀਤਿ ਦੋਸੋਪਨ ਆਪਜ੍ਜਤੇਵ. ਤੇਨਾਹ ‘‘ਏਵਞ੍ਹਿਸਤੀ’’ਤਿਆਦਿਂ. ਤਤ੍ਥ, ‘‘ਏਵਞ੍ਹਿਸਤੀ’’ਤਿ ਅਟ੍ਠਸਾਲਿਨਿਯਂ ਵਿਯ ਇਧ ਅਭਿਧਮ੍ਮਤ੍ਥਸਙ੍ਗਹਪਦਂ ਪਚ੍ਚਾਮਸਨ੍ਤੇ ਸਤਿ. ਹਿਸਦ੍ਦੋ ਫਲ ਵਾਕ੍ਯਜੋਤਕੋ. ਲਦ੍ਧਗੁਣਜੋਤਕੋਤਿਪਿ ਯੁਜ੍ਜਤਿ. ‘‘ਪਟਿਕ੍ਖਿਤ੍ਤਾ ਹੋਤਿ’’ ਤਸ੍ਮਿਂ ਅਭਿਧਮ੍ਮਤ੍ਥਸਙ੍ਗਹਪਦੇ ਮਯਾ ਸਬ੍ਬਥਾ ਵੁਤ੍ਤਾਤਿ ਅਤ੍ਥਸ੍ਸ ਸਮ੍ਭਵਤੋ. ਨ ਕੇਵਲਂ ਸੋ ਏਵ ਦੋਸੋ ਆਪਜ੍ਜਤਿ. ਅਪਰੋਪਿਦੋਸੋ ਅਤ੍ਥੀਤਿ ਦਸ੍ਸੇਤੁਂ ‘‘ਸਾਹੀ’’ਤਿਆਦਿਮਾਹ. ਧਾਤੁਕਥਾਯਂ ਵੁਤ੍ਤੇਨਸਙ੍ਗਹਾਸਙ੍ਗਹਾਦਿਪ੍ਪਕਾਰੇਨਾਤਿਯੋਜਨਾ.

੧੨. ਪਰਮਤ੍ਥਪਦਵਣ੍ਣਨਾਯਂ. ਵਿਸੇਸਨਪਦਂ ਨਾਮ ਕਤ੍ਥਚਿ ਭੂਤਕਥਨਤ੍ਥਾਯਵਾ ਪਯੁਜ੍ਜਤਿ ਕਣ੍ਹੋਕਾਕੋ, ਸੇਤੋਬਕੋ,ਤਿ. ਕਤ੍ਥਚਿ ਅਞ੍ਞਨਿਵਤ੍ਤਨਤ੍ਥਾਯ ਵਾ ਪਯੁਜ੍ਜਤਿ ਨੀਲੋਪਟੋ, ਨੀਲਂਪੁਪ੍ਫ, ਨ੍ਤਿ. ਇਧ ਪਨ ਅਞ੍ਞ ਨਿਵਤ੍ਤਨਤ੍ਥਾਯਾਤਿ ਦਸ੍ਸੇਤੁਂ ‘‘ਦੁਵਿਧਾਨਿਹਿਸਚ੍ਚਾਨੀ’’ਤਿਆਦਿਮਾਹ. ਪਞ੍ਞਾਪੀਯਤੀਤਿਪਞ੍ਞਤ੍ਤਿ. ਪਞ੍ਞਾਪਨਞ੍ਚ ਨਾਮ ਸਮਗ੍ਗਾਨਂ ਜਨਾਨਂ ਵੋਹਾਰੇਨ ਚ ਸਮ੍ਪਟਿਚ੍ਛਨੇਨ ਚਾਤਿ ਦ੍ਵੀਹਿ ਅਙ੍ਗੇਹਿ ਸਿਜ੍ਝਤੀਤਿ ਆਹ ‘‘ਤੇਚਮਹਾਜਨਾ’’ਤਿਆਦਿਂ. ‘‘ਤਸ੍ਮਾਤੇ ਸਮ੍ਮੁਤਿ ਸਚ੍ਚਨ੍ਤਿ ਵੁਚ੍ਚਨ੍ਤੀ’’ਤਿ ਸਮ੍ਬਨ੍ਧੋ. ‘‘ਸਮ੍ਮਤਤ੍ਤਾ’’ਤਿ ਵੋਹਰਿਤਤ੍ਤਾਚੇਵ ਸਮ੍ਪਟਿਚ੍ਛਿਤਤ੍ਤਾ ਚ. ‘‘ਵਚੀਸਚ੍ਚਵਿਰਤਿਸਚ੍ਚਾਨ’’ਨ੍ਤਿ ਏਤ੍ਥ ਵਚੀਸਚ੍ਚਂ ਨਾਮ ਮੁਸਾਵਾਦਰਹਿਤਂ ਸਚ੍ਚਵਚਨਂ. ਵਿਰਤਿਸਚ੍ਚਂ ਨਾਮ ਸਮ੍ਮਾਵਾਚਾਵਿਰਤਿ. ਸਾਹਿ ਮੁਸਾਵਾਦਾਦੀਹਿ ਵਚੀਦੁਚ੍ਚਰਿਤੇਹਿ ਵਿਰਮਣਮਤ੍ਤੇਨ ਵਚੀਸਚ੍ਚਨ੍ਤਿ ਵੁਚ੍ਚਤਿ. ‘‘ਵਤ੍ਥੁਭੂਤਤ੍ਤਾ’’ਤਿ ਅਧਿਟ੍ਠਾਨਭੂਤਤ੍ਤਾ. ਸਮ੍ਮੁਤਿਸਚ੍ਚਨ੍ਤਿ ਵੁਚ੍ਚਨ੍ਤਿ, ਸਮ੍ਮਤਤ੍ਤਾ ਸਮ੍ਮੁਤਿ ਚ, ਸਾ ਸਚ੍ਚਾਨਂ ਵਤ੍ਥੁਭੂਤਤ੍ਤਾ ਸਚ੍ਚਞ੍ਚਾਤਿ ਕਤ੍ਵਾ. ਸਮ੍ਮੁਤਿਯਾ ਸਿਦ੍ਧਂ ਸਚ੍ਚਂ ਸਮ੍ਮੁਤਿਸਚ੍ਚਨ੍ਤਿਪਿ ਯੁਜ੍ਜਤਿ. ‘‘ਸਮ੍ਮਾਪਟਿਪਜ੍ਜਨ੍ਤਾ’’ਤਿ ਪਾਣੋ ਨਹਨ੍ਤਬ੍ਬੋ, ਸਬ੍ਬੇਸਤ੍ਤਾ ਅਵੇਰਾ ਹੋਨ੍ਤੂਤਿਆਦਿਨਾ ਸਮ੍ਮਾਪਟਿਪਜ੍ਜਨ੍ਤਾ. ‘‘ਸਬ੍ਬਲੋਕਿਯਸਮ੍ਪਤ੍ਤਿਯੋ’’ਤਿ ਦਾਨਸੀਲਾਦੀਨਂ ਪੁਞ੍ਞਕਿਰਿਯਵਤ੍ਥੂਨਂ ਫਲਵਿਪਾਕਭੂਤਾ ਸਬ੍ਬਲੋਕਿਯਸਮ੍ਪਤ੍ਤਿਯੋ. ਸਬ੍ਬੇ ‘‘ਬੋਧਿਸਮ੍ਭਾਰਧਮ੍ਮੇ’’ਤਿ ਦਾਨਪਾਰਮਿਸੀਲਪਾਰਮਿਆਦਿਕੇਪਾਰਮਿਧਮ੍ਮੇ. ‘‘ਆਰਾਧੇਨ੍ਤੀ’’ਤਿ ਸਮ੍ਪਾਦੇਨ੍ਤਿ. ‘‘ਮਿਚ੍ਛਾਪਟਿਪਜ੍ਜਨ੍ਤਾ’’ਤਿ ਦੁਚ੍ਚਰਿਤ ਦੁਰਾਜੀਵਮਿਚ੍ਛਾਜੀਵਾਦੀਨਂ ਵਸੇਨ ਮਿਚ੍ਛਾਪਟਿਪਜ੍ਜਨ੍ਤਾ. ‘‘ਏਵਂ ਮਹਨ੍ਤਂ ਸਮ੍ਮੁਤਿ ਸਚ੍ਚ’’ਨ੍ਤਿ ਏਤੇਨ ਅਹਂ ਪਰਮਤ੍ਥ ਸਚ੍ਚਮੇਵਗਣ੍ਹਾਮੀਤਿ ਸਮ੍ਮੁਤਿ ਸਚ੍ਚਂ ਨਭਿਨ੍ਦਿਤਬ੍ਬਂ. ਭਿਨ੍ਦਨ੍ਤੋਹਿ ਸਬ੍ਬਸਮ੍ਪਤ੍ਤੀਹਿ ਪਰਿਬਾਹਿਰੋ ਅਸ੍ਸਾਤਿ ਦਸ੍ਸੇਤਿ. ਕਥਞ੍ਚ ਤਂ ਭਿਨ੍ਦਤੀਤਿ. ਸਤ੍ਤੋ ਨਾਮ ਨਤ੍ਥਿ. ਸਤ੍ਤਸ੍ਸ ਭਵਤੋਸਙ੍ਕਨ੍ਤਿ ਨਾਮ ਨਤ੍ਥਿ. ਭਵਨਿਬ੍ਬਤ੍ਤਕਂ ਕੁਸਲਾਕੁਸਲਕਮ੍ਮਂ ਨਾਮ ਨਤ੍ਥੀਤਿ ਗਣ੍ਹਨ੍ਤੋ ਉਚ੍ਛੇਦਦਿਟ੍ਠਿਯਂ ਤਿਟ੍ਠਤਿ. ਸਬ੍ਬਸਮ੍ਪਤ੍ਤੀਹਿ ਪਰਿਬਾਹਿਰੋ ਹੋਤਿ. ਅਪਾਯ ਪੂਰਕੋ ਭਵਤੀਤਿ. ‘‘ਵਿਜ੍ਜਮਾਨਨ੍ਤ੍ਵੇਵ ਗਣ੍ਹਾਪੇਤੀ’’ਤਿ ਸਞ੍ਞਾ ਚਿਤ੍ਤਦਿਟ੍ਠਿ ਵਿਪਲ੍ਲਾਸਾਨਂ ਵਤ੍ਥੁਭਾਵੇਨ ਗਣ੍ਹਾਪੇਤਿ. ਤੇਨਾਹ ‘‘ਸਕ੍ਕਾਯਦਿਟ੍ਠੀ’’ਤਿਆਦਿਂ. ‘‘ਏਵਂ ਵਿਪਰੀਤਞ੍ਹਿ ਸਮ੍ਮੁਤਿਸਚ੍ਚ’’ਨ੍ਤਿ ਏਤੇਨਸਮ੍ਮੁਤਿ ਸਚ੍ਚਮੇਵਦਲ਼੍ਹਂ ਗਹੇਤ੍ਵਾ ਪਰਮਤ੍ਥ ਸਚ੍ਚਂ ਨਭਿਨ੍ਦਿਤਬ੍ਬਂ. ਭਿਨ੍ਦਨ੍ਤੋਹਿ ਤਾਹਿ ਦਿਟ੍ਠੀਹਿ ਨਮੁਚ੍ਚਤਿ. ਕਥਞ੍ਚ ਤਂ ਭਿਨ੍ਦਤਿ. ਖਨ੍ਧੇ ਵਾ ਖਨ੍ਧਮੁਤ੍ਤਕੇਵਾ ਅਤ੍ਤਜੀਵੇ ਗਹੇਤ੍ਵਾ ਤੇਚ ਅਤ੍ਤਜੀਵਾ ਪਰਮ੍ਮਰਣਾ ਉਚ੍ਛਿਜ੍ਜਨ੍ਤੀਤਿ ਗਣ੍ਹਨ੍ਤੋ ਉਚ੍ਛੇਦਦਿਟ੍ਠਿਯਂ ਤਿਟ੍ਠਤਿ. ਤੇ ਚ ਅਤ੍ਤਜੀਵਾ ਭਵਾਭਵੇਸੁਸਸ੍ਸਤਾ ਹੁਤ੍ਵਾ ਭਵਤੋਭਵਂ ਸਂਸਰਨ੍ਤਿ ਸਨ੍ਧਾਵਨ੍ਤੀਤਿ ਗਣ੍ਹਨ੍ਤੋਸਸ੍ਸਤਦਿਟ੍ਠਿਯਂ ਤਿਟ੍ਠਤਿ. ‘‘ਨਵਿਸਂਵਾਦੇਨ੍ਤੀ’’ਤਿ ਵਿਪਰੀਤਂ ਨਾਪਾਦੇਨ੍ਤਿ. ‘‘ਤਂ ਪਨਾ’’ਤਿ ਸਭਾਵਸਚ੍ਚਂ ਪਨ. ਅਨੁਭਵਨਭੇਦਮਤ੍ਤਂ ਉਪਾਦਾਯੇਵ ਵੇਦਨਾ ਸੁਖਾਤਿ ਵੁਤ੍ਤਾ. ਸਬ੍ਬਾਕਾਰਤੋ ਸੁਖਭੂਤਤ੍ਤਾ ਵੇਦਨਾ ਸੁਖਾਤਿ ਵੁਤ੍ਤਾ ਨਹੋਤਿ. ‘‘ਸਬ੍ਬਾਪਿਵੇਦਨਾ ਦੁਕ੍ਖਾ ਏਵਾ’’ਤਿ ਪਧਾਨਤ੍ਥੋ. ਤਤ੍ਥ ਅਨੁਭਵਨਭੇਦੋ ਤਿਵਿਧੋ. ਸਾਤਤੋ ਵਾ ਅਨੁਭਵਨਂ, ਅਸ੍ਸਾਤਤੋ ਵਾ, ਮਜ੍ਝਤ੍ਤਤੋ ਵਾ. ‘‘ਦੁਕ੍ਖਾ ਏਵਾ’’ਤਿ ਭਯਟ੍ਠੇਨ ਦੁਕ੍ਖਾ ਏਵ. ਭਯਟ੍ਠੇਨਾਤਿ ਚ ਸਂਸਾਰ ਭਯਦਸ੍ਸੀਹਿਭਾਯਿਤਬ੍ਬਟ੍ਠੇਨ. ਸੁਖੋ ਵਿਪਾਕੋ ਯੇਸਂ ਤੇ ਸੁਖਵਿਪਾਕਾ. ਤੇਭੂਮਕਕੁਸਲਾ. ‘‘ਕੁਸਲਸਮ੍ਮਤਾ’’ਤਿ ਏਤੇਨ ਸਭਾਵਸਚ੍ਚੇਪਿ ਏਤੇਵੋਹਾਰਾ ਲੋਕਸਮ੍ਮੁਤਿ ਨਿਸ੍ਸਿਤਾਤਿ ਦੀਪੇਤਿ. ‘‘ਸਾਸਵਤਾ’’ਤਿ ਆਸਵੇਹਿ ਸਹਿਤਭਾਵੋ. ‘‘ਸਂਕਿਲੇਸਿ ਕਤਾ’’ਤਿ ਸਂਕਿਲੇਸ ਧਮ੍ਮੇਹਿ ਸਂਯੁਤ੍ਤਭਾਵੋ. ਓਘੇਹਿ ਚ ਯੋਗੇਹਿ ਚ ਉਪਾਦਾਨੇਹਿ ਚ ਪਤ੍ਤਬ੍ਬਭਾਵੋ ‘‘ਓਘਨੀਯਯੋਗਨੀਯ ਉਪਾਦਾਨੀਯਤਾ’’. ਅਧਿਕਾ ਅਤ੍ਤਾ ਅਜ੍ਝਤ੍ਤਾ. ਬਹਿਦ੍ਧਾਰੁਕ੍ਖੇਰੂਪਧਮ੍ਮਾਰੁਕ੍ਖਸ੍ਸ ਅਤ੍ਤਾਨਾਮ ਸਾਰਟ੍ਠੇਨ. ਸਾਖਾਯਂ ਰੂਪਧਮ੍ਮਾ ਸਾਖਾਯ ਅਤ੍ਤਾਨਾਮ ਸਾਰਟ੍ਠੇਨ. ਸਤ੍ਤਸਨ੍ਤਾਨਪਰਿਯਾਪਨ੍ਨਾ ਪਨ ਰੂਪਾਰੂਪਧਮ੍ਮਾ ਤਣ੍ਹਾਪਰਿਗ੍ਗਹ ਦਲ਼੍ਹਟ੍ਠੇਨ ਤਤੋ ਬਹਿਦ੍ਧਾ ਅਤ੍ਤਤੋ ਅਧਿਕਾ ਅਤ੍ਤਾਤਿ ਅਤ੍ਥੇਨ ਅਜ੍ਝਤ੍ਤਾਤਿ ਲੋਕਸਮ੍ਮੁਤਿ ਹੋਤਿ. ਤੇਨਾਹ ‘‘ਅਜ੍ਝਤ੍ਤਤਿਕਞ੍ਚਾ’’ਤਿਆਦਿਂ. ਦੁਕ੍ਖਨਿਰੋਧ ਮਗ੍ਗਭਾਵੋ ਚ, ਇਤਿ ਇਦਂ ਚਤੁਕ੍ਕਂ ਅਰਿਯਸਚ੍ਚਂ ਨਾਮਾਤਿ ਯੋਜਨਾ. ‘‘ਇਦਮੇਵਾ’’ਤਿ ਇਦਂ ਚਤੁਕ੍ਕਮੇਵ. ‘‘ਅਚਲਮਾਨ’’ਨ੍ਤਿ ਏਤੇਨ ਅਰਿਯਸਦ੍ਦਸ੍ਸ ਅਤ੍ਥਂ ਦੀਪੇਤਿ. ਤੇਭੂਮਕ ਧਮ੍ਮਾਨਂ ਸੁਖਤਾ ਨਾਮ ਚਲਾ ਹੋਤਿ. ਕਸ੍ਮਾ, ਅਨਿਚ੍ਚ ਧਮ੍ਮਤ੍ਤਾ. ਤੇ ਧਮ੍ਮੇਸੁਖਾਤਿ ਗਹੇਤ੍ਵਾ ਅਤ੍ਤਨੋ ਅਜ੍ਝਤ੍ਤਙ੍ਗਂ ਕਰੋਨ੍ਤਾ ਅਚਿਰੇਨੇਵ ਦੁਕ੍ਖਂ ਪਾਪੁਣਨ੍ਤਿ. ਤੇ ਧਮ੍ਮੇ ਦੁਕ੍ਖਾਤਿ ਞਤ੍ਵਾ ਤੇਹਿਵਿਮੁਤ੍ਤਾ ਪੁਨ ਦੁਕ੍ਖਂ ਪਾਪੁਣਨ੍ਤੀਤਿ ਨਤ੍ਥਿ. ਏਸਨਯੋ ਸੇਸਅਰਿਯਸਚ੍ਚੇਸੁ. ‘‘ਤੇਸੂ’’ਤਿਆਦਿਮ੍ਹਿ ਦੁਵਿਧਾਨਿਹਿ ਸਚ੍ਚਾਨੀਤਿ ਵੁਤ੍ਤੇਸੁ ਦ੍ਵੀਸੁ ਸਚ੍ਚੇਸੁ. ‘‘ਤੇਨ ਵੁਤ੍ਤ’’ਨ੍ਤਿਆਦਿ ਲਦ੍ਧਗੁਣਵਚਨਂ. ‘‘ਯੋ ਵਿਨਾ ਅਞ੍ਞਾਪਦੇਸੇਨਾ’’ਤਿ ਏਤ੍ਥ ਅਞ੍ਞਾਪਦੇਸੋ ਨਾਮ ਅਟ੍ਠਧਮ੍ਮ ਸਮੋਧਾਨਂ ਨਿਸ੍ਸਾਯ ਘਟਸਣ੍ਠਾਨਂ ਪਞ੍ਞਾਯਤਿ, ਪਟਸਣ੍ਠਾਨਂ ਪਞ੍ਞਾਯਤਿ, ਤਂ ਸਣ੍ਠਾਨਂ ਅਤ੍ਤਨੋ ਸਭਾਵੇਨ ਵਿਨਾ ਅਞ੍ਞਾਪਦੇਸੇਨ ਸਿਦ੍ਧਂ ਹੋਤਿ. ਯਾਪਨਚਿਨ੍ਤਨ ਕਿਰਿਯਾ ਨਾਮ ਅਤ੍ਥਿ. ਯਂ ਚਿਤ੍ਤਨ੍ਤਿ ਵੁਚ੍ਚਤਿ. ਸਾ ਅਞ੍ਞਾਪਦੇਸੇਨ ਸਿਦ੍ਧਾ ਨ ਹੋਤਿ. ਅਤ੍ਤਨੋ ਸਭਾਵੇਨੇਵਸਿਦ੍ਧਾ. ਏਸਨਯੋ ਫੁਸਨਕਿਰਿਯਾ, ਵੇਦਯਿਤਕਿਰਿਯਾ, ਦੀਸੂਤਿ. ਇਮਮਤ੍ਥਂ ਦਸ੍ਸੇਤੁਂ ‘‘ਯੋਵਿਨਾ ਅਞ੍ਞਾਪਦੇਸੇਨਾ’’ਤਿਆਦਿਮਾਹ. ‘‘ਚਿਤ੍ਤੇਨਪਰਿਕਪ੍ਪੇਤ੍ਵਾ’’ਤਿ ਮਨੋਵਿਞ੍ਞਾਣ ਚਿਤ੍ਤੇਨ ਅਵਿਜ੍ਜਮਾਨਂ ਸਣ੍ਠਾਨਂ ਵਿਜ੍ਜਮਾਨਂ ਕਤ੍ਵਾ. ‘‘ਸਵਿਗ੍ਗਹਂ ਕਤ੍ਵਾ’’ਤਿ ਸਰੀਰਂ ਕਤ੍ਵਾ. ਵਤ੍ਥੁ ਦਬ੍ਬਸਹਿਤਂ ਕਤ੍ਵਾਤਿ ਵੁਤ੍ਤਂ ਹੋਤਿ. ‘‘ਚਿਤ੍ਤਮਯੋਚਿਤ੍ਤਨਿਮ੍ਮਿਤੋ’’ਤਿ ਸੁਪਿਨਨ੍ਤੇ ਦਿਟ੍ਠਰੂਪਾਨਿ ਵਿਯ ਚਿਤ੍ਤੇਨਪਕਤੋ ਚਿਤ੍ਤੇਨ ਨਿਮ੍ਮਿਤੋ. ਕਸ੍ਮਾ ਸਭਾਵਸਿਦ੍ਧੋ ਪਰਮਤ੍ਥੋ ਨਾਮਾਤਿ ਆਹ ‘‘ਸੋਹੀ’’ਤਿਆਦਿਂ. ‘‘ਸਨ੍ਤੀ’’ਤਿ ਏਤੇਨ ਅਸਧਾਤੁ ਵਸੇਨ ਅਤ੍ਥੋਤਿ ਸਿਦ੍ਧਂ ਵੁਤ੍ਤਂ. ਸਦ੍ਦਾਬੁਦ੍ਧੀਹਿ ਅਰਣੀਯਤੋ ਉਪਗਨ੍ਤਬ੍ਬਤੋ ਅਤ੍ਥੋਤਿਪਿਵਦਨ੍ਤਿ. ‘‘ਇਤਰਤੋ’’ਤਿ ਪਰਿਕਪ੍ਪਸਿਦ੍ਧਤੋ. ‘‘ਪਰਮੋ’’ਤਿ ਅਧਿਕੋ. ਤੇਨਾਹ ‘‘ਉਕ੍ਕਂਸਗਤੋ’’ਤਿ. ਏਤੇਨ ਪਰਮਸਦ੍ਦਸ੍ਸ ਅਧਿਕਤ੍ਥਂ ਵਦਤਿ. ਇਦਾਨਿ ਤਸ੍ਸ ਉਤ੍ਤਮਤ੍ਥਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿਵੁਤ੍ਤਂ. ਤਤ੍ਥ, ਇਮਸ੍ਮਿਂ ਬੁਦ੍ਧਸਾਸਨੇ ਪਞ੍ਚਸਾਸਨ ਕਿਚ੍ਚਾਨਿ ਮਹਨ੍ਤਾਨਿ ਅਭਿਞ੍ਞੇਯ੍ਯਾਨਂ ਧਮ੍ਮਾਨਂ ਅਭਿਜਾਨਨਂ. ਪਰਿਞ੍ਞੇਯ੍ਯਾਨਂ ਪਰਿਜਾਨਨਂ. ਪਹਾਤਬ੍ਬਾਨਂ ਪਹਾਨਂ. ਸਚ੍ਛਿ ਕਾਤਬ੍ਬਾਨਂ ਸਚ੍ਛਿਕਰਣਂ. ਭਾਵੇਤਬ੍ਬਾਨਂ ਭਾਵਨਾਤਿ. ਤਤ੍ਥ ਸਬ੍ਬੇਪਿ ਪਰਮਤ੍ਥ ਧਮ੍ਮਾ ਅਭਿਞ੍ਞੇਯ੍ਯਾ ਨਾਮ. ਦੁਕ੍ਖ ਸਚ੍ਚਧਮ੍ਮਾ ਪਰਿਞ੍ਞੇਯ੍ਯਾ ਨਾਮ. ਸਮੁਦਯ ਸਚ੍ਚਧਮ੍ਮਾ ਪਹਾਤਬ੍ਬਾ ਨਾਮ. ਸਾਮਞ੍ਞਪ੍ਫਲਾਨਿ ਚ ਨਿਬ੍ਬਾਨਞ੍ਚ ਸਚ੍ਛਿਕਾਤਬ੍ਬਾ ਨਾਮ. ਮਗ੍ਗਸਚ੍ਚਧਮ੍ਮਾ ਭਾਵੇਤਬ੍ਬਾ ਨਾਮ. ਤੇਸੁ ਧਮ੍ਮੇਸੁ ਤੇਸਂ ਕਿਚ੍ਚਾਨਂ ਸਿਦ੍ਧਿਯਾ ਇਮਸ੍ਮਿਂ ਸਾਸਨੇ ਸਾਸਨਕਿਚ੍ਚਂ ਸਿਦ੍ਧਂ ਹੋਤਿ. ਨਿਟ੍ਠਾਨਂ ਗਚ੍ਛਤਿ. ਤੇ ਚ ਧਮ੍ਮਾ ਏਵ ਰੂਪਾਨਂ ਸਾਸਨ ਕਿਚ੍ਚਾਨਂ ਅਵਿਰਾਧਕਤ੍ਤਾ ਅਵਿਸਂਵਾਦਕਤ੍ਤਾ ਉਤ੍ਤਮਟ੍ਠੇਨ ਪਰਮਤ੍ਥਾ ਨਾਮ ਹੋਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿਮਾਹ. ਤਤ੍ਥ ‘‘ਯੇ’’ਤਿਯੇਜਨਾ. ‘‘ਅਯ’’ਨ੍ਤਿ ਅਯਂ ਧਮ੍ਮੋ. ‘‘ਤਸ੍ਸਾ’’ਤਿ ਤਸ੍ਸਅਭਿਞ੍ਞੇਯ੍ਯਸ੍ਸ, ਤਸ੍ਸਪਰਿਞ੍ਞੇਯ੍ਯਸ੍ਸ, ਤਸ੍ਸਪਹਾਤਬ੍ਬਸ੍ਸ, ਤਸ੍ਸਸਚ੍ਛਿਕਾ ਤਬ੍ਬਸ੍ਸ ਤਸ੍ਸਭਾਵੇਤਬ੍ਬਸ੍ਸਾਤਿ ਸਮ੍ਬਨ੍ਧੋ. ਪਰਮਤ੍ਥਵਣ੍ਣਨਾ ਨਿਟ੍ਠਿਤਾ.

‘‘ਤਂ ਨਸੁਨ੍ਦਰ’’ਨ੍ਤਿ ਬ੍ਯਞ੍ਜਨਤੋ ਨਸੁਨ੍ਦਰਂ. ਨਕੇਵਲਂ ਬ੍ਯਞ੍ਜਨਤੋਯੇਵ ਨਸੁਨ੍ਦਰਂ, ਅਤ੍ਥਤੋਪਿ ਨਸੁਨ੍ਦਰਮੇਵ. ਚਤੁਸਚ੍ਚ ਧਮ੍ਮਾਹਿ ਪਚ੍ਚੇਕਬੁਦ੍ਧਞ੍ਞਾਣਸ੍ਸਪਿ ਗੋਚਰਾ ਹੋਨ੍ਤਿ. ਪਞ੍ਚਞੇਯ੍ਯ ਧਮ੍ਮਾ ਪਨ ਸਬ੍ਬਞ੍ਞੁਤਞ੍ਞਾਣਸ੍ਸੇਵ. ਤਤ੍ਥ ਚਤੁਸਚ੍ਚ ਧਮ੍ਮਾ ਨਾਮ ਪਰਮਤ੍ਥ ਧਮ੍ਮਾ ਏਵ. ਪਞ੍ਚਞੇਯ੍ਯਧਮ੍ਮਾ ਪਨ ਸਬ੍ਬ ਪਞ੍ਞਤ੍ਤਿਯਾ ਸਹ ਸਬ੍ਬਪਰਮਤ੍ਥ ਧਮ੍ਮਾ. ਸਬ੍ਬਞ੍ਞੁਬੁਦ੍ਧਾਨਂ ਚਤੁਸਚ੍ਚਾਭਿ ਸਮ੍ਬੋਧੋ ਧਮ੍ਮ ਪਞ੍ਞਤ੍ਤਿਯਾ ਸਹ ਸਿਜ੍ਝਤਿ. ਪਚ੍ਚੇਕਬੁਦ੍ਧਾਨਂ ਚਤੁਸਚ੍ਚ ਸਮ੍ਬੋਧੋ ਧਮ੍ਮਪਞ੍ਞਤ੍ਤਿਯਾ ਸਹ ਨਸਿਜ੍ਝਤਿ. ਤਸ੍ਮਾ ਤੇ ਸਯਂ ਪਟਿਵਿਦ੍ਧਂ ਚਤੁਸਚ੍ਚ ਧਮ੍ਮਂ ਨਾਮ ਪਞ੍ਞਤ੍ਤਿਂ ਨੀਹਰਿਤ੍ਵਾ ਪਰੇਸਂ ਦੇਸੇਤੁਂ ਨ ਸਕ੍ਕੋਨ੍ਤਿ. ਤੇਸਂ ਚਤੁਸਚ੍ਚਸਮ੍ਬੋਧੋ ਮੂਗਸ੍ਸ ਸੁਪਿਨਦਸ੍ਸਨਂ ਵਿਯ ਹੋਤੀਤਿ ਅਟ੍ਠਕਥਾਸੁ ਵੁਤ੍ਤਂ. ਤਸ੍ਮਾ ਪਞ੍ਞਤ੍ਤਿਯਾ ਸਹ ਪਞ੍ਚ ਞੇਯ੍ਯ ਧਮ੍ਮਾ ਏਵ ਸਬ੍ਬਞ੍ਞੁਤਞ੍ਞਾਣਸ੍ਸ ਗੋਚਰਾਤਿ ਸਕ੍ਕਾਵਤ੍ਤੁਨ੍ਤਿ.

ਪਰਮਤ੍ਥਪਦਵਣ੍ਣਨਾ ਨਿਟ੍ਠਿਤਾ.

੧੩. ਚਿਤ੍ਤਵਚਨਤ੍ਥੇ. ਨਹਿ ਸਾ ਆਰਮ੍ਮਣੇਨਵਿਨਾ ਲਬ੍ਭਤਿ. ਚਿਨ੍ਤੇਤੀਤਿ ਵੁਤ੍ਤੇ ਕਿਂ ਚਿਨ੍ਤੇਤਿ, ਆਰਮ੍ਮਣਂ ਚਿਨ੍ਤੇਤੀਤਿ ਏਵਂ ਆਰਮ੍ਮਣਭੂਤੇਨ ਕਮ੍ਮਪਦੇਨ ਵਿਨਾ ਅਸਮ੍ਭਵਤੋ. ਤਸ੍ਮਾ ਇਧ ਚਿਨ੍ਤਨਾਤਿ ਦਟ੍ਠਬ੍ਬਾ, ਤਸ੍ਮਾ ਅਸ੍ਸ ਨਾਮਂ ਸਿਦ੍ਧਨ੍ਤਿ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ਸੁਤਮਯਞ੍ਞਾਣਂ, ਚਿਨ੍ਤਾਮਯਞ੍ਞਾਣ, ਨ੍ਤਿ ਏਤ੍ਥ ਆਰਮ੍ਮਣਸ੍ਸ ਭੂਤਸਭਾਵ ਚਿਨ੍ਤਾਪਿ ਅਤ੍ਥਿ, ਸਾਪਞ੍ਞਾਏਵਾਤਿ ਤਂ ਨਿਵਤ੍ਤੇਤੁਂ ‘‘ਆਰਮ੍ਮਣ…ਪੇ… ਣੂਪਲਦ੍ਧਿਯੇਵਾ’’ਤਿ ਵੁਤ੍ਤਂ. ਚਿਤ੍ਤਂ, ਮਨੋ, ਮਾਨਸਂ, ਵਿਞ੍ਞਾਣ, ਨ੍ਤਿ ਸਬ੍ਬਂ ਚਿਤ੍ਤਸ੍ਸ ਨਾਮਂ. ਆਰਮ੍ਮਣ ਪਚ੍ਚਯਪ੍ਪਟਿਬਦ੍ਧਂ ਹੋਤਿ. ਨ ਅਞ੍ਞਪਚ੍ਚਯਪ੍ਪਟਿਬਦ੍ਧਂ. ਨ ਚ ਅਞ੍ਞਪਚ੍ਚਯੇਨ ਲਦ੍ਧਂ ਨਾਮਂ. ਏਵਰੂਪਸ੍ਸ ਆਰਮ੍ਮਣ ਵਿਜਾਨਨ ਸਙ੍ਖਾਤਸ੍ਸ ਅਤ੍ਥਨ੍ਤਰਸ੍ਸਬੋਧਕਂ ਨਹੋਤੀਤਿ ਦਸ੍ਸੇਤੁਂ ‘‘ਸਨ੍ਤੇਸੁ ਚਾ’’ਤਿਆਦਿਵੁਤ੍ਤਂ. ‘‘ਏਤੇਨਾ’’ਤਿ ਇਦਂ ਕਤ੍ਤੁਨੋ ਕਿਰਿਯਾਸਾਧਨੇ ਅਤਿਸ੍ਸਯੂਪਕਾਰਕਂ ਕਰਣ ਸਾਧਨਂ ਵਦਤੀਤਿ ਦਸ੍ਸੇਤੁਂ ‘‘ਤਞ੍ਹੀ’’ਤਿਆਦਿਵੁਤ੍ਤਂ. ‘‘ਚਿਨ੍ਤਨਮਤ੍ਤ’’ਨ੍ਤਿ ਏਤ੍ਥ ਮਤ੍ਤਸਦ੍ਦੋ ਵਿਸੇਸਨਿਵਤ੍ਤਿ ਅਤ੍ਥੋਤਿ, ਤੇਨ ਨਿਵਤ੍ਤਿਤਂ ਅਤ੍ਥਂ ਦਸ੍ਸੇਤਿ ‘‘ਸਬ੍ਬੇਪਿਹੀ’’ਤਿਆਦਿਨਾ. ‘‘ਵਿਗ੍ਗਹੋ ਵਾ’’ਤਿ ਸਰੀਰਂ ਵਾ. ਪਚ੍ਚਯੇਨ ਆਯਤ੍ਤਾ ਪਚ੍ਚਯਾਯਤ੍ਤਾ. ‘‘ਆਯਤ੍ਤਾ’’ਤਿ ਸਮ੍ਬਨ੍ਧਾ. ਵਤ੍ਤਨਂ ਵੁਤ੍ਤਿ. ਉਪ੍ਪਜ੍ਜਨਂ ਵਾ ਠਿਤਿ ਵਾ. ਪਚ੍ਚਯਾਯਤ੍ਤਾ ਵੁਤ੍ਤਿ ਏਤੇਸਨ੍ਤਿ ‘‘ਪਚ੍ਚਯਾਯਤ੍ਤ ਵੁਤ੍ਤਿਨੋ’’. ‘‘ਥਾਮੇਨਾ’’ਤਿਆਦਿ ਅਞ੍ਞਮਞ੍ਞਵੇਵਚਨਾਨਿ. ‘‘ਏਕਂ ਭਾਵਸਾਧਨਮੇਵ ਪਧਾਨਤੋ ਲਬ੍ਭਤੀ’’ਤਿ ਇਦਂ ਧਮ੍ਮਾਨਂ ਤਂ ਤਂ ਕਿਰਿਯਾ ਮਤ੍ਤਭਾਵਂ ਸਨ੍ਧਾਯ ਵੁਤ੍ਤਂ. ਕਿਰਿਯਾਮਤ੍ਤਭੂਤਾਪਿ ਪਨ ਤੇ ਧਮ੍ਮਾਸਯਂ ਨਾਨਾਪਚ੍ਚਯਾ ਵਤ੍ਥਾਯਂ ਠਿਤਾ ਵਾ ਹੋਨ੍ਤਿ ਨਾਨਾਪਚ੍ਚਯੁਪ੍ਪਨ੍ਨਾਵਤ੍ਥਾਯਂ ਠਿਤਾ ਵਾ. ਤਸ੍ਮਾ ਪਰਮਤ੍ਥ ਪਦੇਸੁਪਿ ਯਥਾਰਹਂ ਤਦਞ੍ਞਸਾਧਨਾਨਂ ਪਟਿਲਾਭੋ ਅਵਾਰਿਤੋ ਹੋਤਿ. ਇਤਰਥਾ ਹੇਤੁ ਪਚ੍ਚਯੋ, ਆਰਮ੍ਮਣ ਪਚ੍ਚਯੋ, ਸਹਜਾਤਪਚ੍ਚਯੋ, ਨਿਸ੍ਸਯਪਚ੍ਚਯੋਤਿਆਦੀਸੁ ਕਥਂ ਭਾਵਸਾਧਨਂ ਯੁਤ੍ਤਂ ਸਿਯਾਤਿ. ‘‘ਪਧਾਨਤੋ’’ਤਿ ਮੁਖ੍ਯਤੋ. ‘‘ਅਭੇਦਸ੍ਸ ਚਿਨ੍ਤਨਸ੍ਸਭੇਦਕਰਣ’’ਨ੍ਤਿ ਇਦਂ ਚਿਨ੍ਤੇਤੀਤਿ ਚਿਤ੍ਤਨ੍ਤਿਕਤਂ ਕਤ੍ਤੁਸਾਧਨਂ ਸਨ੍ਧਾਯ ਵੁਤ੍ਤਂ. ‘‘ਸਿਲਾਪੁਤ੍ਤਕਸ੍ਸਾ’’ਤਿ ਭੇਸਜ੍ਜਮੂਲਾਨਂ ਪਿਸਨਸਿਲਾਪੋਤਕਸ੍ਸ. ਤਸ੍ਸ ਸਰੀਰਂ ਨਾਮ ਵਿਸੁਂ ਅਙ੍ਗਂ ਨਤ੍ਥਿ. ਅਭਿਨ੍ਨਂਪਿ ਭਿਨ੍ਨਂ ਕਤ੍ਵਾ ਵੁਚ੍ਚਤਿ ‘‘ਸਿਲਾਪੁਤ੍ਤਕਸਰੀਰ’’ਨ੍ਤਿ. ਇਦਂ ਅਭੇਦਸ੍ਸਭੇਦਕਰਣਂ ਨਾਮ ਅਭੂਤਰੂਪਂ ਹੋਤਿ. ਪਯੋਜਨੇ ਸਤਿ ਵਤ੍ਤਬ੍ਬਂ, ਅਸਤਿ ਨ ਵਤ੍ਤਬ੍ਬਨ੍ਤਿ ਆਹ ‘‘ਤਥਾਕਰਣਞ੍ਚਾ’’ਤਿਆਦਿਂ. ਤਤ੍ਥ ‘‘ਪਰਪਰਿਕਪ੍ਪਿਤਸ੍ਸਾ’’ਤਿ ਪਰੇਹਿ ਅਞ੍ਞਤਿਤ੍ਥਾ ਚਰਿਯੇਹਿ ਪਰਿਚਿਨ੍ਤਿਤਸ੍ਸ. ‘‘ਸਤਿਹਿ…ਪੇ… ਕਪ੍ਪਨਾਯਾ’’ਤਿ ਸਚੇ ਅਤ੍ਤਾ ਅਤ੍ਥਿ, ਅਤ੍ਤਾ ਚਿਨ੍ਤੇਤਿ, ਤਸ੍ਮਾ ਅਤ੍ਤਾ ਚਿਤ੍ਤੋਨਾਮਾਤਿਆਦਿ ਵਤ੍ਤਬ੍ਬਂ. ਨ ਵਤ੍ਤਬ੍ਬਂ ਚਿਨ੍ਤੇਤੀਤਿ ਚਿਤ੍ਤਨ੍ਤਿ, ਚਿਤ੍ਤਸ੍ਸ ਕਿਰਿਯਾਮਤ੍ਤਤ੍ਤਾ. ਨ ਪਨ ਅਤ੍ਤਾਦਿਕੋ ਕਤ੍ਤਾ ਨਾਮ ਅਤ੍ਥਿ. ਤਸ੍ਮਾ ਕਿਰਿਯਾ ਮਤ੍ਤਮੇਵ ਕਤ੍ਤਾਰਂ ਕਤ੍ਵਾ ‘‘ਚਿਨ੍ਤੇਤੀਤਿ ਚਿਤ੍ਤ’’ਨ੍ਤਿ ਵੁਤ੍ਤਂ. ਤੇਨ ਵਿਞ੍ਞਾਯਤਿਲੋਕੇ ਅਤ੍ਤਾਦਿਕੋਕਤ੍ਤਾ ਨਾਮ ਨਤ੍ਥੀਤਿ. ਇਦਂ ਅਭੇਦਸ੍ਸਭੇਦ ਪਰਿਕਪ੍ਪਨਾਯ ਪਯੋਜਨਨ੍ਤਿ ਵੁਤ੍ਤਂ ਹੋਤਿ. ‘‘ਅਤ੍ਤਪ੍ਪਧਾਨੋ’’ਤਿ ਕਿਰਿਯਾਸਾਧਨੇ ਬਹੂਨਂਕਾਰਕਾਨਂ ਮਜ੍ਝੇ ਸਯਂਪਧਾਨੋ ਸਯਂਜੇਟ੍ਠਕੋ ਹੁਤ੍ਵਾ. ‘‘ਤਂਕਤ੍ਤੁਭਾਵ’’ਨ੍ਤਿ ਲੋਕੇਸਿਦ੍ਧਂ ਕਤ੍ਤੁਭਾਵਂ. ‘‘ਪੁਨ ਕਰਣਭਾਵ’’ਨ੍ਤਿ ਪੁਨ ਲੋਕੇ ਸਿਦ੍ਧਂ ਕਰਣਭਾਵਂ. ਏਵਂ ਚਿਤ੍ਤਸ੍ਸ ਵਚਨਤ੍ਥਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸ ਅਭਿਧਾਨਤ੍ਥਂ ਦਸ੍ਸੇਨ੍ਤੋ ‘‘ਅਪਿਚੇਤ੍ਥਾ’’ਤਿਆਦਿਮਾਹ. ਯਥਯਿਦਂ ਯੇ ਇਮੇ ਤਿਰਚ੍ਛਾਨਗਤਾ ਪਾਣਾ ਚਿਤ੍ਤਾਵਿਚਿਤ੍ਤਾ. ਏਵਂ ਚਿਤ੍ਤਂ ਵਿਚਿਤ੍ਤਂ ਯਂ ਅਞ੍ਞਂ ਅਤ੍ਥਿ, ਤਂ ਅਞ੍ਞਂ ਏਕਨਿਕਾਯਂਪਿ ਨਸਮਨੁਪਸ੍ਸਾਮੀ-ਤਿ ਯੋਜਨਾ. ‘‘ਨਿਕਾਯ’’ਨ੍ਤਿ ਸਤ੍ਤਜਾਤਿਸਮੂ ਹਂ.‘‘ਨਿਸ੍ਸਕ੍ਕੇ ਕਰਣਵਚਨ’’ਨ੍ਤਿ ਵਿਭਤ੍ਤਾਪਾਦਾਨਤ੍ਥੇ ਕਰਣਵਚਨਂ. ਏਤੇਨ ਤਤੋ ਚਰਣਤੋ ਚਿਤ੍ਤਤੋਤਿ ਅਤ੍ਥਂ ਵਦਤਿ. ਗਾਥਾਯਂ. ‘‘ਤਂ ਤਂ ਸਭਾਵੋ’’ਤਿ ਵਿਜਾਨਨਫੁਸਨਾਦਿਕੋ ਸਭਾਵੋ, ਅਗ੍ਗਿਸ੍ਸਉਣ੍ਹੋਵਿਯ. ‘‘ਕਿਚ੍ਚਸਮ੍ਪਤ੍ਤਿਯੋਰਸੋ’’ਤਿ ਤੇਨ ਤੇਨ ਧਮ੍ਮੇਨ ਕਰਣਕਿਚ੍ਚਞ੍ਚ, ਤਂ ਕਿਚ੍ਚਂ ਕਤ੍ਵਾ ਲਦ੍ਧੋ ਸਮ੍ਪਤ੍ਤਿਗੁਣੋ ਚ. ਅਗ੍ਗਿਸ੍ਸ ਵਤ੍ਥੁਮ੍ਹਿ ਪਰਿਪਾਚਨਕਿਚ੍ਚਂ ਵਿਯ, ਓਭਾਸਨਗੁਣੋਵਿਯ ਚ. ‘‘ਗਯ੍ਹਾਕਾਰੋ’’ਤਿ ਞਾਣੇਨ ਗਹੇਤਬ੍ਬੋ ਤਸ੍ਸ ਤਸ੍ਸ ਧਮ੍ਮਸ੍ਸ ਧਜਭੂਤੋ ਆਕਾਰੋ. ਸਮ੍ਪਤ੍ਤਿ ਰਸੋਯੇਵ ਵੁਚ੍ਚਤਿ. ‘‘ਫਲਂਵਾਪੀ’’ਤਿ ਕਾਰਿਯਪ੍ਫਲਂ ਵਾਪਿ, ਅਗ੍ਗਿਸ੍ਸ ਧੂਮੋਵਿਯ. ‘‘ਆਸਨ੍ਨਕਾਰਣ’’ਨ੍ਤਿ ਅਤ੍ਤਨੋ ਅਨਨ੍ਤਰੇ ਫਲਨਿਬ੍ਬਤ੍ਤਕਂ ਕਾਰਣਂ, ਅਗ੍ਗਿਸ੍ਸ ਅਗ੍ਗਿਕਾਰਕ ਪੁਰਿਸੋ ਵਿਯ. ‘‘ਅਲ’’ਨ੍ਤਿ ਸਮਤ੍ਥਾ. ‘‘ਵਿਬੁਦ੍ਧਿਨੋ’’ਤਿ ਵਿਸੇਸਬੁਦ੍ਧਿ ਸਮ੍ਪਨ੍ਨਸ੍ਸ ਪਣ੍ਡਿਤਸ੍ਸ. ‘‘ਪੁਬ੍ਬਙ੍ਗਮਰਸ’’ਨ੍ਤਿ ਆਰਮ੍ਮਣਗ੍ਗਹਣੇ ਪਧਾਨਰਸ ਕਿਚ੍ਚਂ. ‘‘ਸਨ੍ਧਾਨ ਪਚ੍ਚੁਪਟ੍ਠਾਨ’’ਨ੍ਤਿ ਨਿਰਨ੍ਤਰਪ੍ਪਵਤ੍ਤਾਕਾਰਪਚ੍ਚੁਪਟ੍ਠਾਨਂ. ‘‘ਨਾਮ ਰੂਪਪਦਟ੍ਠਾਨ’’ਨ੍ਤਿ ਫਸ੍ਸਾਦਿਨਾਮਞ੍ਚ ਵਤ੍ਥੁ ਰੂਪਞ੍ਚਚਿਤ੍ਤਸ੍ਸਪਦਟ੍ਠਾਨਂ.

ਚਿਤ੍ਤਵਣ੍ਣਨਾ ਨਿਟ੍ਠਿਤਾ.

੧੪. ‘‘ਚੇਤਸਿ ਭਵ’’ਨ੍ਤਿ ਚਿਤ੍ਤਸ੍ਮਿਂ ਪਾਤੁਭੂਤਂ. ‘‘ਏਤੇਨ ਸਿਦ੍ਧਾ ਹੋਨ੍ਤੀ’’ਤਿ ਸਮ੍ਬਨ੍ਧੋ. ‘‘ਸਾ ਏਵ ਫਸ੍ਸਾਦੀਨਂ ਜਾਤਿ. ਯਾਚਿਤ੍ਤਸ੍ਸਜਰਾ, ਸਾ ਏਵ ਫਸ੍ਸਾਦੀਨਂਜਰਾ’’ਤਿਆਦਿਨਾ ਯੋਜੇਤਬ੍ਬਂ. ‘‘ਏਕਵਣ੍ਟੂਪਨਿ ਬਨ੍ਧਾਨੀ’’ਤਿ ਏਕੇਨ ਵਣ੍ਟਦਣ੍ਡਕੇਨ ਉਪਨਿਬਨ੍ਧਾਨਿ. ‘‘ਏਕਜਾਤਿਯਾਦਿ ਉਪਨਿਬਨ੍ਧਾ’’ਤਿ ਏਕਜਾਤਿਕਥਾ ਦਿਵਸੇਨ ਉਪਨਿਬਨ੍ਧਾ. ‘‘ਚੇ’’ਤਿ ਚੇਵਦੇਯ੍ਯ. ‘‘ਨਾ’’ਤਿ ਨ ਵਤ੍ਤਬ੍ਬਂ. ਗਾਥਾਯਂ. ‘‘ਧਮ੍ਮਾ’’ਤਿ ਨਾਮਕ੍ਖਨ੍ਧ ਧਮ੍ਮਾ. ‘‘ਮਨਸਾ ਏਵਾ’’ਤਿ ਕਤ੍ਤੁਭੂਤੇਨ ਮਨੇਨ ਏਵ. ‘‘ਪਕਤਾ’’ਤਿ ਪਵਤ੍ਤਿਤਾ. ‘‘ਨਿਮ੍ਮਿਤਾ’’ਤਿ ਨਿਪ੍ਫਾਦਿਤਾ. ‘‘ਚਿਤ੍ਤਕਿਰਿਯਾ ਭੂਤਾ ਏਵਾ’’ਤਿ ਆਰਮ੍ਮਣਂ ਵਿਜਾਨਨ੍ਤਂ ਚਿਤ੍ਤਂ ਫੁਸਨਾਕਾਰਂ ਜਨੇਤ੍ਵਾਵ ਵਿਜਾਨਾਤਿ. ਸੋ ਫੁਸਨਾਕਾਰੋ ਫਸ੍ਸੋਤਿ ਵੁਚ੍ਚਤਿ. ਅਵਸੇਸਾ ਪਨ ਸਬ੍ਬੇਪਿ ਚੇਤਸਿਕਧਮ੍ਮਾ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਨ੍ਤਿ. ਫਸ੍ਸੋ ਹੇਤੁ ਫਸ੍ਸੋ ਪਚ੍ਚਯੋ ਵੇਦਨਾਕ੍ਖਨ੍ਧਸ੍ਸ ਉਪਾਦਾਯ. ਸਞ੍ਞਾਕ੍ਖਨ੍ਧਸ੍ਸ. ਸਙ੍ਖਾਰਕ੍ਖਨ੍ਧਸ੍ਸ ਉਪਾਦਾਯਾਤਿ ਹਿ ਵੁਤ੍ਤਂ. ਏਵਂ ਸਨ੍ਤੇਪਿ ਚਿਤ੍ਤਮੂਲਕਤ੍ਤਾ ਚਿਤ੍ਤਨਿਸ੍ਸਿਤਤ੍ਤਾ ਚ ਤੇਪਿਧਮ੍ਮਾ ਚਿਤ੍ਤਕਿਰਿ ਯਾਭੂਤਾ ਏਵ ਹੋਨ੍ਤੀਤਿ. ‘‘ਏਤੇਨਾ’’ਤਿ ਏਤੇਨਗਾਥਾਪਦੇਨ. ਵਿਭਾਵਨਿਯਂ ਪਨ ਏਕਾਲਮ੍ਬਣਤਾ ਮਤ੍ਤੇਨ ਵਿਭਾਵੇਤਿ. ਪਰਿਪੁਣ੍ਣਾਨਿ ਚੇ ਤਸਿਕਙ੍ਗਾਨਿ ਉਪਰਿ ਥੇਰੇਨ ਸਯਮੇਵ ਵਕ੍ਖਮਾਨਤ੍ਤਾਤਿ ਅਧਿਪ੍ਪਾਯੋ. ਇਧ ਪਨ ਪਦਤ੍ਥਵਿਭਾਵਨਟ੍ਠਾਨਤ੍ਤਾ ਪਰਿਪੁਣ੍ਣੇਹਿ ਅਙ੍ਗੇਹਿ ਵਿਭਾਵੇਤੁਂ ਵਟ੍ਟਤੀਤਿ ਆਹ ‘‘ਤਂ ਨਸੁਨ੍ਦਰ’’ਨ੍ਤਿ. ‘‘ਵਤ੍ਥੁਮ੍ਹੀ’’ਤਿ ਪਟਕੋਟ੍ਠਕਾਦਿਮ੍ਹਿ. ‘‘ਨਾਨਾਚਿਤ੍ਤਕਮ੍ਮਾਨੀ’’ਤਿ ਹਤ੍ਥਿ ਅਸ੍ਸਰੂਪਾਦੀਨਿ. ਵਿਜਾਨਨਮਤ੍ਤਂ ਚਿਤ੍ਤਂ, ਕੁਸਲਨ੍ਤਿ ਵਾ ਅਕੁਸਲਨ੍ਤਿ ਵਾ ਵਤ੍ਤਬ੍ਬਂ ਨਤ੍ਥਿ. ਨਾਨਾਚੇਤਸਿਕੇ ਹਿ ਯੁਤ੍ਤਤ੍ਤਾ ਏਵ ਤਥਾ ਵਤ੍ਤਬ੍ਬਂ ਹੋਤਿ. ਵੁਤ੍ਤਂਹੇਤਂ ਭਗਵਤਾ. ਪਭਸ੍ਸਰਮਿਦਂ ਭਿਕ੍ਖਵੇ ਚਿਤ੍ਤਂ. ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਨ੍ਤਿ. ਤੇਨਾਹ ‘‘ਉਦਕਂ ਵਿਯਚਿਤ੍ਤ’’ਨ੍ਤਿਆਦਿਂ.

ਚੇਤਸਿਕਵਣ੍ਣਨਾ ਨਿਟ੍ਠਿਤਾ.

੧੫. ਰੁਪ੍ਪਤੀਤਿ ਪਦਂ ਕਤ੍ਤਰਿਵਾਹੇਤੁਕਮ੍ਮਨਿਵਾਸਿਦ੍ਧਂ. ਰੁਪ੍ਪਨਞ੍ਚਵਿਕਾਰਾਪਤ੍ਤਿ ਏਵਾਤਿ ਦਸ੍ਸੇਤੁਂ ‘‘ਸੀਤੁਣ੍ਹਾਦੀਹੀ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਵਿਸਮਪ੍ਪਵਤ੍ਤਿਵਸੇਨਾ’’ਤਿ ਧਾਤੂਨਂ ਵਿਸਮਪ੍ਪਵਤ੍ਤਿਵਸੇਨ. ਧਾਤੁਕ੍ਖੋ ਭਵਸੇਨਾਤਿ ਵੁਤ੍ਤਂ ਹੋਤਿ, ‘‘ਕੇਨਰੁਪ੍ਪਤੀ’’ਤਿ ਏਤ੍ਥ ‘‘ਕੇਨਾ’’ਤਿ ਹੇਤੁ ਅਤ੍ਥੇਵਾ ਹੇਤੁ ਕਤ੍ਤਰਿਵਾ ਕਰਣਵਚਨਂ ਦਟ੍ਠਬ੍ਬਂ. ਤਥਾ ਸੀਤੇਨਾਤਿਆਦੀਸੁਪਿ. ਡਂਸਮਕਸਾ ਨਾਮ ਸੂਚਿਮੁਖਾ ਖੁਦ੍ਦਕਮਕ੍ਖਿਕਾਚੇਵ ਮਹਨ੍ਤ ਮਕ੍ਖਿਕਾ ਚ. ਵਾਤਾ ਨਾਮ ਪੁਰਤ੍ਥਿਮਵਾਤਾਦਯੋ. ਆਤਪੋ ਨਾਮ ਸੂਰਿਯਾਤਪੋ. ਸਰਿਂਸਪਾਨਾਮ ਅਹਿ ਵਿਚ੍ਛਿਕ ਸਤਪਦਿਕਾਦਯੋ. ਤੇਸਂ ਸਮ੍ਫਸ੍ਸੇਹਿਪਿ ਰੁਪ੍ਪਤਿ. ਮਰਣਂ ਵਾ ਗਚ੍ਛਤਿ, ਮਰਣ ਮਤ੍ਤਂ ਵਾ ਦੁਕ੍ਖਂ. ‘‘ਯੇ ਧਮ੍ਮਾ’’ਤਿ ਦ੍ਵਾਦਸਵਿਧਾ ਸਪ੍ਪਟਿਘਰੂਪਧਮ੍ਮਾ. ‘‘ਅਞ੍ਞੇਸ’’ਨ੍ਤਿ ਸੋਲ਼ਸਨ੍ਨਂ ਅਪ੍ਪਟਿਘਰੂਪਾਨਞ੍ਚ ਅਰੂਪਧਮ੍ਮਾਨਞ੍ਚ. ‘‘ਤੇਸੂ’’ਤਿ ਨਿਦ੍ਧਾਰਣੇਭੁਮ੍ਮਂ. ਇਦਾਨਿ ਪਾਲ਼ਿਯਾ ਸਦ੍ਧਿਂ ਮੁਖ੍ਯਰੁਪ੍ਪਨਂ ਸਂਸਨ੍ਦੇਨ੍ਤੋ ‘‘ਸਮਾਗਮੋ ਚਾ’’ਤਿਆਦਿਮਾਹ. ਸਮਾਗਮੋ ਚ ਨਾਮ ਅਞ੍ਞਮਞ੍ਞਾਭਿਘਟ੍ਟਨਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਆਪਾਤਾਗਮਨਞ੍ਚ ਆਰਮ੍ਮਣਕਰਣਞ੍ਚ ਠਪੇਤ੍ਵਾਤਿ ਯੋਜਨਾ. ‘‘ਮਹਾਭੂਤਾਨਮੇਵ ਵਾ’’ਤਿ ਆਪੋਧਾਤੁ ਵਜ੍ਜਿਤਾਨਂ ਤਿਣ੍ਣਂ ਮਹਾਭੂਤਾਨਮੇਵ ਵਾ. ‘‘ਵਿਕਾਰਂ ਆਪਜ੍ਜਤੀ’’ਤਿ ਵਤ੍ਵਾ ਤਮੇਵਤ੍ਥਂ ਵਿਵਰਨ੍ਤੋ ‘‘ਯਸ੍ਮਿਂ ਖਣੇ’’ਤਿਆਦਿਮਾਹ. ‘‘ਸਯਂਪਿ ਵਿਕਾਰਪਤ੍ਤਾ ਹੋਨ੍ਤੀ’’ਤਿ ਤੇਮਹਾਭੂਤਾਸਯਂਪਿ ਪਕਤਿਂ ਵਿਜਹਿਤ੍ਵਾ ਓਮਤ੍ਤਾਧਿਮਤ੍ਤਭਾਵਂ ਪਾਪੁਣਨ੍ਤੀਤਿ ਅਤ੍ਥੋ. ‘‘ਓਮਤ੍ਤਾਧਿਮਤ੍ਤਰੂਪਸਨ੍ਤਤੀਨਞ੍ਚਾ’’ਤਿ ਪਰਮ੍ਪਰਤੋ ਉਪ੍ਪਜ੍ਜਮਾਨਾ ਰੂਪਸਨ੍ਤਤਿਯੋ ਸਨ੍ਧਾਯ ਵੁਤ੍ਤਂ. ਏਵਂ ਪਾਲ਼ਿਨਯੇਨ ਵਿਪਤ੍ਤਿਵਸੇਨ ਰੁਪ੍ਪਨਂ ਵਤ੍ਵਾ ਇਦਾਨਿ ਵਿਪਤ੍ਤਿ ਵਾ ਹੋਤੁ, ਸਮ੍ਪਤ੍ਤਿ ਵਾ. ਪੁਰਿਮਪਚ੍ਛਿ ਮਸਨ੍ਤਤੀਨਂ ਵਿਸਦਿਸਪ੍ਪਵਤ੍ਤਿਭੂਤੋ ਵਿਕਾਰੋਪਿ ਏਕੇਨ ਪਰਿਯਾਯੇਨ ਰੁਪ੍ਪਨਂਨਾਮਾਤਿ ਕਤ੍ਵਾ ਪੁਨ ਤਂ ਰੁਪ੍ਪਨਂ ਦਸ੍ਸੇਨ੍ਤੋ ‘‘ਅਪਿਚੇਤ੍ਥਾ’’ਤਿਆਦਿਮਾਹ. ‘‘ਘਟ੍ਟਨਵਸੇਨ ਰੁਪ੍ਪਨ ਧਮ੍ਮਾਨ ਮੇਵਾ’’ਤਿ ਆਪਾਤਾਗਮਨਾਦਿਵਸੇਨ ਰੁਪ੍ਪਨਧਮ੍ਮੇਹਿਵਿਨਾ ਅਭਿਘਟ੍ਟਨਵਸੇਨਰੁਪ੍ਪਨ ਸਭਾਵਾਨਂ ਰੂਪਧਮ੍ਮਾਨਮੇਵ ਸਿਦ੍ਧਨ੍ਤਿ ਪੁਚ੍ਛਾ. ‘‘ਸਵਿਗ੍ਗਹਾ ਹੋਨ੍ਤੀ’’ਤਿ ਦਬ੍ਬ ਸਣ੍ਠਾਨਾਕਾਰਸਹਿਤਾ ਹੋਨ੍ਤਿ. ਕਸ੍ਮਾ, ਓਲ਼ਾਰਿਕਸਭਾਵਤ੍ਤਾ. ਬਹੂਨਞ੍ਚਰੂਪਕਲਾਪਾਨਂ ਏਕਕ੍ਖਣੇ ਏਕਾਬਦ੍ਧਭਾਵੇਨਪਵਤ੍ਤਤ੍ਤਾ. ਅਰੂਪਧਮ੍ਮਾਹਿ ਸਣ੍ਹਸੁਖੁਮਸਭਾਵਾ ਚ ਹੋਨ੍ਤਿ. ਸਚੇ ਅਨੇਕਸਤਸਹਸ੍ਸਾਨਿਪਿ ਏਕਤੋ ਪਵਤ੍ਤੇਯ੍ਯੁਂ. ਦਬ੍ਬਸਣ੍ਠਾਨਭਾਵਂ ਨਗਮਿਸ੍ਸਨ੍ਤਿਯੇਵ. ਏਕਸ੍ਮਿਞ੍ਚ ਸਤ੍ਤਸਨ੍ਤਾਨੇ ਏਕਕ੍ਖਣੇ ਏਕ ਕਲਾਪੋਵ ਪਵਤ੍ਤਤਿ. ਕਸ੍ਮਾ, ਅਨਨ੍ਤਰ ਪਚ੍ਚਯੂਪਨਿਬਨ੍ਧੇਨ ਪਵਤ੍ਤਤ੍ਤਾ. ਤਸ੍ਮਾਤੇ ਸਵਿਗ੍ਗਹਾਨ ਹੋਨ੍ਤਿ. ਰੂਪਧਮ੍ਮਾ ਪਨ ਓਲ਼ਾਰਿਕ ਸਭਾਵਾ ਚ ਹੋਨ੍ਤਿ. ਬਹੂਨਂ ਸਨ੍ਨਿਚਯੇਸਤਿ ਦਬ੍ਬਸਣ੍ਠਾਨਤ੍ਥਾਯ ਸਂਵਤ੍ਤਨ੍ਤਿ. ਏਕਕ੍ਖਣੇ ਚ ਬਹੁਕਲਾਪਾਪਿ ਏਕਾਬਦ੍ਧਾਹੁਤ੍ਵਾ ਪਵਤ੍ਤਨ੍ਤਿ. ਤਸ੍ਮਾ ਤੇਸਵਿਗ੍ਗਹਾਹੋਨ੍ਤੀਤਿ.

‘‘ਸੀਤਾਦਿਗ੍ਗਹਣਸਾਮਤ੍ਥਿਯੇਨਾ’’ਤਿ ਸੀਤੇਨਪਿ ਰੁਪ੍ਪਤਿ, ਉਣ੍ਹੇਨਪਿ ਰੁਪ੍ਪਤੀਤਿਆਦਿਨਾ ਲੋਕਸ੍ਸ ਪਚ੍ਚਕ੍ਖਤੋ ਪਾਕਟਸ੍ਸ ਸੀਤਾਦਿਵਚਨਸ੍ਸਸਾਮਤ੍ਥਿਯੇਨ. ਤਞ੍ਹਿ ਵਚਨਂ ਲੋਕਸ੍ਸ ਅਪਾਕਟਂ ਅਰੂਪਧਮ੍ਮਾਨਂ ਰੁਪ੍ਪਨਂ ਇਧਨਾਧਿਪ੍ਪੇਤਨ੍ਤਿ ਦੀਪੇਤੀਤਿ ਅਧਿਪ੍ਪਾਯੋ. ‘‘ਵੋਹਾਰੋ ਨਾਮਾ’’ਤਿ ਨਾਮਸਞ੍ਞਾ ਨਾਮਾਤਿ ਵੁਤ੍ਤਂ ਹੋਤਿ. ‘‘ਲੋਕੋਪਚਾਰੇਨਾ’’ਤਿ ਬਹੁਜਨਸ੍ਸ ਉਪਚਾਰੇਨ ਵੋਹਾਰੇਨ ਕਥਨੇਨ. ‘‘ਪਾਕਟ ਨਿਮਿਤ੍ਤਵਸੇਨੇਵਾ’’ਤਿ ਪਾਕਟਸ੍ਸ ਸਦ੍ਦਪ੍ਪਵਤ੍ਤਿਨਿਮਿਤ੍ਤਸ੍ਸ ਵਸੇਨੇਵ. ‘‘ਸੀਤਾਦਿਗ੍ਗਹਣੇਨ ਵਿਨਾਪੀ’’ਤਿ ਪਿਸਦ੍ਦੇਨ ਸੀਤਾਦਿਗ੍ਗਹਣਸਾਮਤ੍ਥਿਯੇਨਪੀਤਿ ਦੀਪੇਤਿ. ਏਵਂ ਸਨ੍ਤੇਪਿ ਪਾਲ਼ਿਸਾਧਕਂ ਨਾਮ ਨ ਸਕ੍ਕਾਸਬ੍ਬਤ੍ਥ ਲਦ੍ਧੁਂ. ਪਾਕਟਨਿਮਿਤ੍ਤ ਵਚਨਮੇਵ ਸਬ੍ਬਤ੍ਥ ਸਾਧਾਰਣਨ੍ਤਿ ਦਟ੍ਠਬ੍ਬਂ. ‘‘ਤਪ੍ਪਸਙ੍ਗਨਿਵਤ੍ਤੀ’’ਤਿ ਤਸ੍ਸ ਅਰੂਪਧਮ੍ਮਾਨਂ ਰੂਪਤਾਪਸਙ੍ਗਸ੍ਸ ਨਿਵਤ੍ਤਿ. ‘‘ਇਦ੍ਧਿਵਿਕੁਬ੍ਬਨਾਵਸਪ੍ਪਵਤ੍ਤਾ’’ਤਿ ਏਤ੍ਥ ਇਦ੍ਧਿਵਿਕੁਬ੍ਬਨਾਨਾਮਇਦ੍ਧਿਯਾਨਾਨਪ੍ਪਕਾਰਮਾਪਨਂ. ‘‘ਰੂਪਤਾ ਸਿਦ੍ਧੀ’’ਤਿ ਰੂਪਨ੍ਤਿ ਨਾਮ ਸਞ੍ਞਾਸਿਦ੍ਧਿ. ‘‘ਇਦਂ ਪਨਾ’’ਤਿ ਇਦਂ ਰੂਪਂ ਪਨ. ‘‘ਅਨੁਗ੍ਗਹਾਨਂ ਸੀਤਾਦੀਨਂ ਵਸੇਨਾ’’ਤਿ ਕਿਞ੍ਚਾਪਿਪਾਲ਼ਿਯਂ ਸੀਤਾਦਿਵਚਨਂ ਉਪਘਾਤਕਾਨਂ ਸੀਤਾਦੀਨਂ ਵਸੇਨ ਵੁਤ੍ਤਂ. ਤੇਚ ਬ੍ਰਹ੍ਮਲੋਕੇ ਨਤ੍ਥਿ. ਅਨੁਗ੍ਗਾਹਕਾ ਏਵ ਅਤ੍ਥਿ. ਤੇਸਂਵਸੇਨਾਤਿ ਅਧਿਪ੍ਪਾਯੋ. ‘‘ਪਾਲ਼ਿਯਂ ਨਿਦ੍ਦਿਟ੍ਠਾਨੀ’’ਤਿ ਸਞ੍ਜਾਨਾਤੀਤਿ ਖੋ ਭਿਕ੍ਖਵੇ ਤਸ੍ਮਾ ਸਞ੍ਞਾਤਿ ਵੁਚ੍ਚਤਿ. ਕਿਞ੍ਚ ਸਞ੍ਜਾਨਾਤਿ. ਨੀਲਂਪਿ ਸਞ੍ਜਾਨਾਤਿ, ਪੀਤਮ੍ਪਿ ਸਞ੍ਜਾਨਾਤੀ-ਤਿਆਦਿਨਾ ਚ, ਵਿਜਾਨਾਤੀਤਿ ਖੋ ਭਿਕ੍ਖਵੇ ਤਸ੍ਮਾ ਵਿਞ੍ਞਾਣਨ੍ਤਿ ਵੁਚ੍ਚਤਿ. ਕਿਞ੍ਚ ਵਿਜਾਨਾਤਿ. ਮਧੁਰਂਪਿ ਵਿਜਾਨਾਤਿ, ਅਮ੍ਬਿਲਂਪਿ ਵਿਜਾਨਾਤੀ-ਤਿਆਦਿਨਾ ਚ-ਪਾਲ਼ਿਯਂ ਨਿਦ੍ਦਿਟ੍ਠਾਨਿ.

ਰੂਪਪਦਵਣ੍ਣਨਾ ਨਿਟ੍ਠਿਤਾ.

੧੬. ਨਿਬ੍ਬਾਨਪਦੇ. ‘‘ਖਨ੍ਧਾਵਾ’’ਤਿ ਭਵਨ੍ਤਰੇ ਅਪਾਯਾਦੀਸੁ ਭਵਿਸ੍ਸਮਾਨਾ ਖਨ੍ਧਾਵਾ. ਨ ਹਿ ਅਤੀਤ ਧਮ੍ਮਾ, ਨਿਬ੍ਬਾਯਨ੍ਤਿ ਨਾਮ, ਸਤ੍ਤੇ ਪੀਲ਼ੇਤ੍ਵਾ ਨਿਰੁਦ੍ਧਤ੍ਤਾਤਿ ਅਧਿਪ੍ਪਾਯੋ. ਪਚ੍ਚੁਪ੍ਪਨ੍ਨਾ ਚ ਧਮ੍ਮਾ ਏਤਰਹਿ ਪੀਲ਼ੇਨ੍ਤਿ, ਅਵਸ੍ਸਂ ਉਪ੍ਪਜ੍ਜਮਾਨਾ ਅਨਾਗਤਧਮ੍ਮਾ ਚ ਅਨਾਗਤੇ ਪੀਲ਼ੇਸ੍ਸਨ੍ਤਿ, ਕਥਂ ਤੇ ਨਿਬ੍ਬਾਯਨ੍ਤਿ ਨਾਮਾਤਿ ਆਹ ‘‘ਪਚ੍ਚੁਪ੍ਪਨ੍ਨੇਸੁ…ਪੇ… ਵਤ੍ਤਬ੍ਬਮੇਵ ਨਤ੍ਥੀ’’ਤਿ. ‘‘ਵਿਸਯੇਭੁਮ੍ਮ’’ਨ੍ਤਿ ਵਿਸਯਾਧਾਰੇਭੁਮ੍ਮਂ. ਵਿਸਯਾਧਾਰੋ ਨਾਮਮਨੁਸ੍ਸਾਭੂਮਿਯਂ ਗਚ੍ਛਨ੍ਤੀਤਿਆਦੀਸੁ ਵਿਯ ਮੁਖ੍ਯਾਧਾਰੋ ਨਹੋਤਿ. ਤੇਨ ਪਨ ਵਿਨਾ ਅਞ੍ਞਤ੍ਥ ਤਂ ਕਿਰਿਯਂ ਕਾਤੁਂ ਨਸਕ੍ਕੋਤਿ. ਤਸ੍ਮਾ ਆਧਾਰਭਾਵੇਨ ਪਰਿਕਪ੍ਪਿਤੋ ਆਧਾਰੋਤਿ ਦਸ੍ਸੇਤੁਂ ‘‘ਯਥਾਆਕਾਸੇ’’ਤਿਆਦਿਵੁਤ੍ਤਂ. ਯਥਾ ਸਕੁਣਾਨਂ ਪਕ੍ਖਨ ਕਿਰਿਯਾ ਨਾਮ ਆਕਾਸੇਨ ਵਿਨਾ ਅਞ੍ਞਤ੍ਥ ਨਸਿਜ੍ਝਤਿ. ਤਥਾ ਵਟ੍ਟਦੁਕ੍ਖਧਮ੍ਮਾਨਂ ਨਿਬ੍ਬੁਤਿ ਕਿਰਿਯਾਪਿ ਨਿਬ੍ਬਾਨੇਨ ਵਿਨਾ ਅਞ੍ਞਤ੍ਥ ਨਸਿਜ੍ਝਤੀਤਿ ਦਸ੍ਸੇਤੁਂ ‘‘ਯੇਹਿਤੇ’’ਤਿਆਦਿਮਾਹ. ਤਤ੍ਥ ‘‘ਯੇ’’ਤਿ ਯੇਤਿਵਿਧਵਟ੍ਟਦੁਕ੍ਖਸਨ੍ਤਾਪਧਮ੍ਮਾ. ਹਿਸਦ੍ਦੋਨਿਪਾਤੋ. ਤੇਸਦ੍ਦੋ ਵਚਨਾਲਙ੍ਕਾਰੋ. ‘‘ਤਬ੍ਬਿਨਿਮੁਤ੍ਤ’’ਨ੍ਤਿ ਨਿਬ੍ਬਾਨਵਿਨਿਮੁਤ੍ਤਂ. ਨਿਬ੍ਬੁਤਿਠਾਨਂ ਨਾਮ ਨਤ੍ਥਿ. ਤਸ੍ਮਾ ਨਿਬ੍ਬਾਨਂ ਤੇਸਂ ਨਿਬ੍ਬੁਤਿ ਕਿਰਿਯਾਯ ਵਿਸਯਾ ਧਾਰੋਹੋਤੀਤਿ ਅਧਿਪ੍ਪਾਯੋ. ਯਥਾ ਅਯਂ ਪਦੀਪੋ ਨਿਬ੍ਬਾਯਤਿ. ਤਥਾਧੀਰਾ ਨਿਬ੍ਬਨ੍ਤੀਤਿ ਯੋਜਨਾ. ‘‘ਤਂ ਤਂ ਕਿਲੇਸਾਨਂ ਵਾ’’ਤਿ ਤੇ ਸਂਤੇਸਂਕਿਲੇਸਾਨਂ ਵਾ. ‘‘ਖਨ੍ਧਾਨਂ ਵਾ’’ਤਿ ਅਨਾਗਤਭਵੇਸੁ ਖਨ੍ਧਾਨਂ ਵਾ. ‘‘ਪੁਨਅਪ੍ਪਟਿਸਨ੍ਧਿਕਭਾਵ’’ਨ੍ਤਿ ਸਨ੍ਤਾਨਸ੍ਸ ਪੁਨ ਪਟਿਸਨ੍ਧਾਨਾਭਾਵਂ ਪਾਪੁਣਨ੍ਤਿ ਅਰਿਯਾ ਜਨਾ. ਯਥਾ ਮਗ੍ਗੇ ਕਰਣਵਚਨਂ ਦਿਸ੍ਸਤਿ ਅਦ੍ਧਾ ਇਮਾਯਪਟਿਪਤ੍ਤਿਯਾ ਜਰਾਮਰਣਮ੍ਹਾ ਪਰਿਮੁਚ੍ਚਿਸ੍ਸਾਮੀਤਿਆਦੀਸੁ. ਨ ਤਥਾ ਨਿਬ੍ਬਾਨੇਤਿ ਆਹ ‘‘ਮਗ੍ਗੇਵਿਯਾ’’ਤਿਆਦਿਂ. ਨਿਬ੍ਬਾਨੇਪਨਭੁਮ੍ਮਵਚਨਮੇਵ ਦਿਸ੍ਸਤਿ ਯਤ੍ਥਨਾਮਞ੍ਚਰੂਪਞ੍ਚ. ਅਸੇਸਂ ਉਪਰੁਜ੍ਝਤੀਤਿਆਦੀਸੁ. ਤਸ੍ਮਾ ਨਿਬ੍ਬਾਨੇ ਕਰਣ ਵਚਨਂ ਨ ਦਿਸ੍ਸਤਿ, ਕਰਣ ਲਕ੍ਖਣਸ੍ਸੇਵ ਅਭਾਵਤੋਤਿ ਦਸ੍ਸੇਤੁਂ ‘‘ਨ ਚ ਨਿਬ੍ਬਾਨ’’ਨ੍ਤਿਆਦਿ ਵੁਤ੍ਤਂ. ਕਰਣ ਲਕ੍ਖਣਂ ਨਾਮਕਤ੍ਤੁਨੋ ਸਹਕਾਰੀ ਪਚ੍ਚਯਭਾਵੋ. ਨਨੁ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬਾਯਨ੍ਤੀਤਿ ਦਿਸ੍ਸਤੀਤਿ. ਸਚ੍ਚਂ, ਤਤ੍ਥ ਪਨ ਵਿਸੇਸਨੇ ਕਰਣ ਵਚਨਂ. ਨ ਕਰਣਕਾਰਕੇ. ਤਞ੍ਹਿ ਸਉਪਾਦਿਸੇਸਨਿਬ੍ਬਾਨਧਾਤੁਯਾਨਿਵਤ੍ਤਨਤ੍ਥਂ ਵੁਤ੍ਤਨ੍ਤਿ.

ਨਿਬ੍ਬਾਨਪਦਵਣ੍ਣਨਾ.

ਦੁਤੀਯਗਾਥਾਵਣ੍ਣਨਾ ਨਿਟ੍ਠਿਤਾ.

੧੮. ਕਾਮਾਵਚਰਪਦੇ. ‘‘ਕਾਮੀਯਤੀ’’ਤਿ ਇਚ੍ਛੀਯਤਿ. ਨਿਮਿਤ੍ਤਸ੍ਸਾਦਵਤ੍ਥੁ ਮਜ੍ਝਿਮਟ੍ਠਕਥਾਯਂ ਆਗਤਂ. ‘‘ਤੇਕਾਮੀਯਨ੍ਤੀ’’ਤਿ ਤੇ ਅਵੀਚਿਨਿਰਯਾਦਯੋ ਇਚ੍ਛੀਯਨ੍ਤਿ. ‘‘ਤਤ੍ਥ ਉਪ੍ਪਨ੍ਨਾਨਮ੍ਪੀ’’ਤਿ ਅਵੀਚਿਨਿਰਯਾਦੀਸੁ ਉਪ੍ਪਨ੍ਨਾਨਂਪਿ ਸਤ੍ਤਾਨਂ. ‘‘ਭਵਨਿਕਨ੍ਤਿ ਨਾਮ ਹੋਤੀ’’ਤਿ ਭਵਸਙ੍ਖਾਤਂ ਅਤ੍ਤਨੋ ਖਨ੍ਧਂ ਏਤਂ ਮਮ, ਏਸੋਹਮਸ੍ਮਿ, ਏਸੋਮੇ ਅਤ੍ਤਾਤਿ ਗਣ੍ਹਨ੍ਤੀ ਤਣ੍ਹਾ ਭਵਨਿਕਨ੍ਤਿ ਨਾਮ. ਸਾ ਨੇਰਯਿਕਸਤ੍ਤਾਨਂਪਿ ਅਤ੍ਥਿਯੇਵ. ‘‘ਕਾਮੇ ਅਵਚਰਤੀ’’ਤਿ ਕਾਮੇਪਰਿਯਾਪਨ੍ਨਂ ਹੋਤਿ. ਕਾਮੇ ਅਨ੍ਤੋਗਧਂ ਹੋਤਿ. ਰੂਪਾਰੂਪਭੂਮੀਸੁ ਉਪ੍ਪਨ੍ਨਂਪਿ ਰੂਪਾਰੂਪਸਙ੍ਖ੍ਯਂ ਨਗਚ੍ਛਤਿ. ਕਾਮਸਙ੍ਖ੍ਯਮੇਵ ਗਚ੍ਛਤਿ. ਕਾਮਗਣਨਮੇਵਗਚ੍ਛਤੀਤਿ ਅਤ੍ਥੋ. ‘‘ਤੀਸੁਭਵੇਸੁ ਉਪ੍ਪਨ੍ਨਾਨਿਪੀ’’ਤਿ ਕਾਮਰੂਪਾਰੂਪਸਤ੍ਤਸਨ੍ਤਾਨੇਸੁ ਉਪ੍ਪਨ੍ਨਾਨਿਪਿ ਨ ਤਤ੍ਰਪਰਿਯਾ ਪਨ੍ਨਾਨੇਵ ਹੋਨ੍ਤਿ. ਤਤ੍ਰ ਅਪਰਿਯਾਪਨ੍ਨਾਨੇਵ ਹੋਨ੍ਤੀਤਿ ਅਧਿਪ੍ਪਾਯੋ. ‘‘ਕਾਮਾਵਚਰਤਾਪਤ੍ਤਿਦੋਸੋ’’ਤਿ ਕਾਮਾਵਚਰ ਧਮ੍ਮਾਤਿ ਵਤ੍ਤਬ੍ਬਤਾ ਪਤ੍ਤਿਦੋਸੋ. ‘‘ਰੂਪਾਵਚਰਤਾਦਿਮੁਤ੍ਤਿਦੋਸੋ’’ਤਿ ਇਮੇ ਰੂਪਾਵਚਰ ਧਮ੍ਮਾ ਨ ਹੋਨ੍ਤਿ, ਅਰੂਪਾਵਚਰ ਧਮ੍ਮਾ ਨ ਹੋਨ੍ਤਿ, ਲੋਕੁਤ੍ਤਰ ਧਮ੍ਮਾ ਨ ਹੋਨ੍ਤੀਤਿ ਏਵਂ ਵਤ੍ਤਬ੍ਬਤਾਪਤ੍ਤਿ ਦੋਸੋਤਿ ਵੁਤ੍ਤਂ ਹੋਤਿ. ਏਸਨਯੋ ‘‘ਰੂਪਾਰੂਪਾਵਚਰਤਾਪਤ੍ਤਿ ਦੋਸੋ ਕਾਮਾਵਚਰਤਾਮੁਤ੍ਤਿ ਦੋਸੋ’’ ਤਿਪਦੇਸੁ. ਅਵਚਰਸਦ੍ਦਸ੍ਸ ਉਪ੍ਪਨ੍ਨਤ੍ਥੇ ਗਹਿਤੇਪਿ ਏਤੇਦੋਸਾ ਨਾਪਜ੍ਜਨ੍ਤਿ. ਕਸ੍ਮਾ, ਲੋਕੇ ਯੇਭੂਯ੍ਯਨਯਤਬ੍ਬਹੁਲਨਯਾਨਂਪਿ ਸਬ੍ਭਾਵਾਤਿ ਇਮਮਤ੍ਥਂ ਵਦਨ੍ਤੋ ‘‘ਨਨੁਯੇਭੂਯ੍ਯ ਵੁਤ੍ਤਿਵਸੇਨਪੀ’’ਤਿਆਦਿਮਾਹ. ਤਤ੍ਥ ‘‘ਕੇਸਞ੍ਚੀ’’ਤਿ ਕੇਸਞ੍ਚਿ ਪੁਗ੍ਗਲਾਨਂ ਵਾ ਧਮ੍ਮਾਨਂ ਵਾ. ਯਥਾਮਿਗਲੁਦ੍ਦਕੋ ਗਾਮੇ ਚਰਨ੍ਤੋਪਿ ਵਨੇ ਚਰਣਬਹੁਲਤ੍ਤਾ ਵਨਚਰਕੋਤਿ ਨਾਮਂ ਲਭਤਿ. ਰਾਜਹਤ੍ਥੀ ਅਞ੍ਞਤ੍ਥ ਚਰਨ੍ਤੋਪਿ ਸਙ੍ਗਾਮੇ ਚਰਣਬਹੁਲਤ੍ਤਾ ਸਙ੍ਗਾਮਾਵਚਰੋਤਿ ਨਾਮਂ ਲਭਤਿ. ਅਯਂ ਯੇਭੂਯ੍ਯਨਯੋ ਨਾਮ. ਯਸ੍ਮਿਂ ਵਨੇ ਅਮ੍ਬਰੁਕ੍ਖਾਪਿ ਅਤ੍ਥਿ, ਅਞ੍ਞਰੁਕ੍ਖਾਪਿ ਅਤ੍ਥਿ. ਅਮ੍ਬਰੁਕ੍ਖਬਹੁਲਤ੍ਤਾ ਪਨ ਤਂ ਵਨਂ ਅਮ੍ਬਵਨਨ੍ਤਿ ਨਾਮਂ ਲਭਤਿ. ਏਵਂ ਸਿਮ੍ਬਲਿਵਨਾਦੀਸੁ. ਅਯਂ ਤਬ੍ਬਹੁਲਨਯੋ. ਇਧ ਪਨ ਭੂਮਿਯੋ ਤਬ੍ਬਹੁਲਨਯੇਨ ਕਾਮਰੂਪਾਰੂਪ ਨਾਮਂ ਲਭਨ੍ਤਿ, ਧਮ੍ਮਾ ਯੇਭੂਯ੍ਯਨਯੇਨ ਕਾਮਾਵਚਰਾਦਿ ਨਾਮਂ ਲਭਨ੍ਤੀਤਿ. ਏਵਂ ਗਹਿਤੇ ਸਤਿ, ਤੇ ਦੋਸਾਨਾ ਪਜ੍ਜਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਤਸ੍ਮਾ ਇਧਪਿ…ਪੇ… ਦੋਸੋਤੀ’’ਤਿਆਹ. ‘‘ਨਾ’’ਤਿ ਨ ਕੋਚਿਦੋਸੋ ਨਤ੍ਥਿ. ਅਤ੍ਥਿ ਏਵਾਤਿ ਅਧਿਪ੍ਪਾਯੋ. ‘‘ਤਸ੍ਮਾਸ੍ਸਾ’’ਤਿ ਏਤ੍ਥ ‘‘ਅਸ੍ਸਾ’’ਤਿ ਅਵਚਰਸਦ੍ਦਸ੍ਸ. ‘‘ਤਥਾ ਅਤ੍ਥਂ ਅਗ੍ਗਹੇਤ੍ਵਾ’’ਤਿ ਉਪ੍ਪਜ੍ਜਨਤ੍ਥਂ ਅਗ੍ਗਹੇਤ੍ਵਾ. ‘‘ਪਰਿਗ੍ਗਾਹਿਨਿਯਾ ਕਾਮਤਣ੍ਹਾਯ ਕਤੋ’’ਤਿ ਤਥਾ ਪਰਿਗ੍ਗਾਹਿਨਿਯਾ ਕਾਮਤਣ੍ਹਾਯ ਗੋਚਰਵਿਸਯਤ੍ਤਾਤਾਯਤਣ੍ਹਾਯ ਕਤੋਨਾਮ ਹੋਤਿ. ਏਤੇਨ ਕਾਮੇਤੀਤਿ ਕਾਮੋ, ਕਾਮਤਣ੍ਹਾ. ਅਵਚਰਤਿ ਏਤ੍ਥਾਤਿ ਅਵਚਰਂ. ਕਾਮਸ੍ਸ ਅਵਚਰਨ੍ਤਿ ਕਾਮਾਵਚਰਂ. ਕਾਮ ਤਣ੍ਹਾਯ ਗੋਚਰਵਿਸਯਤ੍ਤਾ ਕਾਮਾਵਚਰਨ੍ਤਿ ਅਯਮਤ੍ਥੋਪਿ ਸਿਜ੍ਝਤਿ.

ਰੂਪੇਅਵਚਰਤੀਤਿ ਰੂਪਾਵਚਰਂ. ‘‘ਰੂਪੇ’’ਤਿ ਸੋਲ਼ਸਵਿਧਾਯਰੂਪਭੂਮਿਯਾ. ‘‘ਅਵਚਰਤੀ’’ਤਿ ਤਤ੍ਥ ਪਰਿਯਾਪਨ੍ਨਭਾਵੇਨ ਪਵਤ੍ਤਤਿ. ਅਰੂਪੇ ਅਵਚਰਤੀਤਿ ਅਰੂਪਾਵਚਰਂ. ‘‘ਅਰੂਪੇ’’ਤਿ ਚਤੁਬ੍ਬਿਧਾਯ ਅਰੂਪਭੂਮਿਯਾ. ‘‘ਅਵਚਰਤੀ’’ਤਿ ਤਤ੍ਥ ਪਰਿਯਾਪਨ੍ਨਭਾਵੇਨ ਪਵਤ੍ਤਤੀਤਿ ਇਮਮਤ੍ਥਂ ਵਦਤਿ ‘‘ਰੂਪਾਰੂਪਾਵਚਰੇਸੁਪਿ ਅਯਂਨਯੋ ਨੇਤਬ੍ਬੋ’’ਤਿ. ਰੂਪੇ ਭਵੋ ਰੂਪਂ. ਰੂਪਤਣ੍ਹਾ. ਅਰੂਪੇ ਭਵੋ ਅਰੂਪਂ, ਅਰੂਪਤਣ੍ਹਾ. ਰੂਪਸ੍ਸ ਅਵਚਰਂ ਰੂਪਾਵਚਰਂ. ਅਰੂਪਸ੍ਸ ਅਵਚਰਂ ਅਰੂਪਾਵਚਰਨ੍ਤਿ ਇਮਮਤ੍ਥਂ ਦੀਪੇਤਿ ‘‘ਤੇਸੁ ਪਨਾ’’ਤਿਆਦਿਨਾ. ‘‘ਅਤ੍ਰਾ’’ਤਿ ਇਮਸ੍ਮਿਂ ਠਾਨੇ. ਯਦਿਪਿ ਲੋਭੋ, ਰਾਗੋ, ਕਾਮੋ, ਤਣ੍ਹਾ, ਤਿਸਬ੍ਬਮ੍ਪੇਤਂ ਲੋਭਸ੍ਸਵੇਵਚਨਂ ਹੋਤਿ. ਰੂਪਰਾਗੋ ਅਰੂਪਰਾਗੋਤਿ ਪਨ ਵਿਸੁਂ ਵਿਭਤ੍ਤਤ੍ਤਾ ਇਧ ਕਾਮਸਦ੍ਦੇਨ ਤਂ ਦਞ੍ਞੋਲੋਭੋ ਗਯ੍ਹਤਿ. ‘‘ਸਬ੍ਬੋਪਿ ਲੋਭੋ’’ਤਿ ਏਤੇਨਸਸ੍ਸਤੁਚ੍ਛੇਦ ਦਿਟ੍ਠਿਸਹਗਤੋਪਿ ਸਙ੍ਗਹਿਤੋਤਿ ਦਟ੍ਠਬ੍ਬਂ.

੧੯. ‘‘ਰੂਪਾਰੂਪਸਦ੍ਦਾ ਤਾਸੁ ਭੂਮੀਸੁ ਨਿਰੁਲ਼੍ਹਾ’’ਤਿ ਅਨਿਮਿਤ੍ਤਾ ਹੁਤ੍ਵਾ ਨਿਰੁਲ਼੍ਹਾਤਿ ਅਧਿਪ੍ਪਾਯੋ. ਇਦਾਨਿ ਸਨਿਮਿਤ੍ਤਂ ਨਯਂ ਵਦਤਿ ‘‘ਅਪਿਚਾ’’ਤਿਆਦਿਨਾ. ‘‘ਨਿਸ੍ਸਯੋਪਚਾਰੋ’’ਤਿ ਠਾਨੂਪਚਾਰੋ, ਯਥਾ ਸਬ੍ਬੋਗਾਮੋ ਆਗਤੋਤਿ. ‘‘ਨਿਸ੍ਸਿਤੋ ਪਚਾਰੋ’’ਤਿ ਠਾਨ੍ਯੂਪਚਾਰੋ. ਯਥਾ ਧਜਾ ਆਗਚ੍ਛਨ੍ਤੀਤਿ. ‘‘ਯਂ ਏਤਸ੍ਮਿਂ ਅਨ੍ਤਰੇ’’ਤਿ ਯੇ ਏਤਸ੍ਮਿਂ ਅਨ੍ਤਰੇ ਖਨ੍ਧਧਾਤੁ ਆਯਤਨਾ. ਯਂ ਰੂਪਂ, ਯਾ ਵੇਦਨਾ, ਯਾਸਞ੍ਞਾ, ਯੇ ਸਙ੍ਖਾਰਾ, ਯਂਵਿਞ੍ਞਾਣਨ੍ਤਿ ਯੋਜਨਾ. ‘‘ਸੁਵਿਸਦ’’ਨ੍ਤਿ ਯੇਭੂਯ੍ਯਾਦਿ ਨਯੇਹਿ ਅਨਾਕੁਲਤ੍ਤਾਸੁਵਿਸੁਦ੍ਧਂ. ‘‘ਕਿਂ ਵਿਕ੍ਖੇਪੇਨਾ’’ਤਿ ਚਿਤ੍ਤਵਿਕ੍ਖੇਪੇਨ ਕਿਂ ਪਯੋਜਨਨ੍ਤਿ ਅਤ੍ਥੋ.

੨੦. ‘‘ਲੁਜ੍ਜਨਪ੍ਪਲੁਜ੍ਜਨਟ੍ਠੇਨਾ’’ਤਿ ਭਿਜ੍ਜਨਪ੍ਪਭਿਜ੍ਜਨਟ੍ਠੇਨ. ‘‘ਯਤ੍ਥਾ’’ਤਿ ਯਸ੍ਮਿਂ ਤੇਭੂਮਕੇ ਧਮ੍ਮਸਮੂਹੇ. ‘‘ਨਿਵਿਸਤੀ’’ਤਿ ਨਿਚ੍ਚਂ ਵਿਸਤਿ, ਉਪਗਚ੍ਛਤਿ. ‘‘ਤਸ੍ਸਾ’’ਤਿ ਮਿਚ੍ਛਾਗ੍ਗਾਹਸ੍ਸ. ‘‘ਤੇਸ’’ਨ੍ਤਿ ਲੋਕੁਤ੍ਤਰ ਧਮ੍ਮਾਨਂ. ‘‘ਯੇਸ’’ਨ੍ਤਿ ਲੋਕਿਯ ਧਮ੍ਮਾਨਂ. ‘‘ਲੁਜ੍ਜਨ’’ਨ੍ਤਿ ਖਣਿਕਭਙ੍ਗੇਨ ਭਿਜ੍ਜਨਂ. ‘‘ਪਲੁਜ੍ਜਨ’’ਨ੍ਤਿ ਸਣ੍ਠਾਨਭੇਦੇਨ ਸਨ੍ਤਤਿਚ੍ਛੇਦੇਨ ਨਾਨਪ੍ਪਕਾਰਤੋ ਭਿਜ੍ਜਨਂ. ਨਿਬ੍ਬਾਨਂ ਪਨ ਇਧ ਨ ਲਬ੍ਭਤਿ ਚਿਤ੍ਤਸਙ੍ਗਹਾਧਿਕਾਰਤ੍ਤਾਤਿ ਅਧਿਪ੍ਪਾਯੋ. ਸੋ ਚ ਅਪਰਿਯਾਪਨ੍ਨਭਾਵੋ, ਵਿਸੁਂ ਏਕਾਚਤੁਤ੍ਥੀ ਅਵਤ੍ਥਾ ਭੂਮਿਨਾਮਾਤਿ ਯੋਜਨਾ.

ਚਤੁਬ੍ਭੂਮਿਵਿਭਾਗਵਣ੍ਣਨਾ ਨਿਟ੍ਠਿਤਾ.

੨੧. ‘‘ਹੀਨ’’ਨ੍ਤਿ ਸਦ੍ਧਾਸਤਿਆਦੀਹਿ ਸੋਭਣਧਮ੍ਮੇਹਿ ਅਯੁਤ੍ਤਤ੍ਤਾਹੀਨਂ. ‘‘ਸਬ੍ਬਹੀਨ’’ਨ੍ਤਿ ਲੋਭਾਦੀਹਿ ਪਾਪਧਮ੍ਮੇਹਿ ਯੁਤ੍ਤਤ੍ਤਾ ਸਬ੍ਬ ਚਿਤ੍ਤੇਹਿ ਹੀਨਤਰਂ. ‘‘ਤਦਤ੍ਥੋ’’ਤਿ ਉਪਰਿਮਾਨਂ ਚਿਤ੍ਤਾਨਂ ਸੋਭਣਸਞ੍ਞਾਕਰਣਸੁਖਤ੍ਥੋ. ‘‘ਆਦਿਤੋ’’ਤਿਆਦਿਮ੍ਹਿ. ‘‘ਵੀਥਿਚਿਤ੍ਤਵਸੇਨਾਤਿ ਏਤਂ ਮਮ, ਏਸੋਹਮਸ੍ਮਿ, ਏਸੋਮੇ ਅਤ੍ਤਾਤਿ ਏਵਂ ਪਵਤ੍ਤਸ੍ਸ ਭਵਨਿਕਨ੍ਤਿ ਜਵਨਵੀਥਿਚਿਤ੍ਤਸ੍ਸ ਵਸੇਨ. ਏਵਞ੍ਚਸਤਿ, ਕਿਂ ਕਾਰਣਂ ਲੋਭਮੂਲਚਿਤ੍ਤਸ੍ਸਪਥਮਂ ਵਚਨੇਤਿ ਆਹ ‘‘ਅਕੁਸਲੇਸੁ ਪਨਾ’’ਤਿਆਦਿਂ.‘‘ਦ੍ਵੀਹਿਵਟ੍ਟਮੂਲੇਹੀ’’ਤਿ ਲੋਭਮੋਹਸਙ੍ਖਾਤੇਹਿ ਦ੍ਵੀਹਿ ਵਟ੍ਟਮੂਲੇਹਿ.

੨੨. ‘‘ਸਿਨਿਦ੍ਧਚਿਤ੍ਤ’’ਨ੍ਤਿ ਸਾਤਵੇਦਨਾਯੁਤ੍ਤਤ੍ਤਾਲੂਖਚਿਤ੍ਤਂ ਨ ਹੋਤੀਤਿ ਅਧਿਪ੍ਪਾਯੋ. ਸੁਮਨਸ੍ਸਭਾਵੋਤਿ ਵੁਤ੍ਤੇ ਕਾਯਿਕਸੁਖਵੇਦਨਾਯਪਿ ਪਸਙ੍ਗੋ ਸਿਯਾਤਿ ਵੁਤ੍ਤਂ ‘‘ਮਾਨਸਿਕ…ਪੇ… ਨਾਮ’’ਨ੍ਤਿ. ‘‘ਸੁਮਨਾਭਿਧਾਨਸ੍ਸਾ’’ਤਿ ਸੁਮਨਨਾਮਸ੍ਸ. ‘‘ਪਵਤ੍ਤਿਨਿਮਿਤ੍ਤ’’ਨ੍ਤਿ ਪਵਤ੍ਤਿਯਾ ਆਸਨ੍ਨ ਕਾਰਣਂ. ਕਥਂ ਪਨ ਭਾਵੋ ਪਵਤ੍ਤਿਨਿਮਿਤ੍ਤਂ ਨਾਮਹੋਤੀਤਿ ਆਹ ‘‘ਭਵਨ੍ਤਿ…ਪੇ… ਕਤ੍ਵਾ’’ਤਿ. ਨਿਮਿਤ੍ਤੇ ਭੁਮ੍ਮਂ. ਤਥਾਹਿ ਭਾਵੋ ਨਾਮ ਸਦ੍ਦਪ੍ਪਵਤ੍ਤਿਨਿਮਿਤ੍ਤਨ੍ਤਿ ਵੁਤ੍ਤਂ. ਇਦਾਨਿ ਨਿਮਿਤ੍ਤ ਲਕ੍ਖਣਂ ਦਸ੍ਸੇਨ੍ਤੋ ‘‘ਯਥਾਹੀ’’ਤਿਆਦਿਮਾਹ. ‘‘ਤਤ੍ਥਾ’’ਤਿ ਤਸ੍ਮਿਂ ਪਯੋਗੇ. ‘‘ਦਨ੍ਤ ਨਿਮਿਤ੍ਤ’’ਨ੍ਤਿ ਦਨ੍ਤਕਾਰਣਾ. ‘‘ਤਂ ਵੇਦਨਾ ਨਿਮਿਤ੍ਤ’’ਨ੍ਤਿ ਤਂ ਵੇਦਨਾਕਾਰਣਾ. ਏਤ੍ਥ ਸਿਯਾ, ‘‘ਏਤਸ੍ਮਿਨ੍ਤਿ ਨਿਮਿਤ੍ਤੇ ਭੁਮ੍ਮ’’ਨ੍ਤਿ ਵੁਤ੍ਤਂ, ਨਿਮਿਤ੍ਤਞ੍ਚਨਾਮ ਅਕਾਰਕਂ ਅਸਾਧਨਂ, ਤਂ ਕਥਂ ਸਾਧਨਵਿਗ੍ਗਹੇ ਯੁਜ੍ਜਤੀਤਿ. ਅਧਿਕਰਣ ਸਾਧਨਾਨੁਰੂਪਤ੍ਤਾ ਸਦ੍ਦਪ੍ਪਵਤ੍ਤਿਨਿਮਿਤ੍ਤਸ੍ਸਾਤਿ ਦਟ੍ਠਬ੍ਬਂ. ਏਤੇਨਾਤਿ ਚ ਏਤਸ੍ਮਾਤਿ ਚ ਹੇਤੁ ਅਤ੍ਥੇ ਉਭਯਵਚਨਨ੍ਤਿ ਵਦਨ੍ਤਿ. ਆਸਨ੍ਨਹੇਤੁ ਨਾਮਸਾਧਨਰੂਪੋ ਭਵਤੀਤਿ ਤੇਸਂ ਅਧਿਪ੍ਪਾਯੋ. ਸੁਟ੍ਠੁ ਕਰੋਤਿ, ਪਕਤਿਪਚ੍ਚਯੇਨ ਅਨਿਪ੍ਫਨ੍ਨਂ ਕਮ੍ਮਂ ਅਤ੍ਤਨੋ ਬਲੇਨ ਨਿਪ੍ਫਾਦੇਤੀਤਿ ਸਙ੍ਖਾਰੋ. ‘‘ਪੁਬ੍ਬਾਭਿਸਙ੍ਖਾਰੋ’’ਤਿ ਪੁਬ੍ਬਭਾਗੇ ਅਭਿਸਙ੍ਖਾਰੋ. ਪਯੋਜੇਤਿ ਨਿਯੋਜੇਤੀਤਿ ਪਯੋਗੋ. ਉਪੇਤਿ ਫਲਸਙ੍ਖਾਤੋ ਅਤ੍ਥੋ ਏਤੇਨਾਤਿ ਉਪਾਯੋ. ‘‘ਆਣਤ੍ਤਿਯਾਵਾ’’ਤਿ ਪੇਸਨਾਯਵਾ. ‘‘ਅਜ੍ਝੇਸਨੇਨ ਵਾ’’ਤਿ ਆਯਾਚਨੇਨ ਵਾ. ‘‘ਤਜ੍ਜੇਤ੍ਵਾ ਵਾ’’ਤਿ ਭਯਂ ਦਸ੍ਸੇਤ੍ਵਾ ਵਾ. ‘‘ਤਂ ਤਂ ਉਪਾਯਂ ਪਰੇ ਆਚਿਕ੍ਖ’’ਨ੍ਤਿ. ਕਥਂ ਆਚਿਕ੍ਖਨ੍ਤੀਤਿ ਆਹ ‘‘ਅਕਰਣੇ’’ਤਿਆਦਿਂ. ‘‘ਤਸ੍ਮਿਂ ਤਸ੍ਮਿਂ ਕਮ੍ਮੇ ਪਯੋਜੇਤੀਤਿਕਤ੍ਵਾ ਇਧ ਸਙ੍ਖਾਰੋ ਨਾਮਾ’’ਤਿ ਯੋਜਨਾ. ‘‘ਪਚ੍ਚਯ ਗਣੋ’’ਤਿ ਪਕਤਿਪਚ੍ਚਯਗਣੋ. ‘‘ਤੇਨਾ’’ਤਿ ਸਙ੍ਖਾਰੇਨ. ‘‘ਸਾਧਾਰਣੋ’’ਤਿ ਕੁਸਲਾਕੁਸਲਾਬ੍ਯਾਕਤਾਨਂ ਸਾਧਾਰਣੋ. ‘‘ਦੁਵਿਧੇਨ ਸਙ੍ਖਾਰੇਨਾ’’ਤਿ ਪਯੋਗੇਨ ਵਾ ਉਪਾਯੇਨ ਵਾ. ‘‘ਯੋ ਪਨ ਤੇਨਸਹਿਤੋ’’ਤਿਆਦਿਨਾ ਪੁਬ੍ਬੇਵੁਤ੍ਤਮੇਵਤ੍ਥਂ ਪਕਾਰਨ੍ਤਰੇਨਪਾਕਟਂ ਕਾਤੁਂ ‘‘ਸੋਪਨ ਯਦਾ’’ਤਿਆਦਿ ਵੁਤ੍ਤਂ. ‘‘ਇਤੀ’’ਤਿਆਦਿ ਲਦ੍ਧਗੁਣ ਵਚਨਂ. ‘‘ਪਚ੍ਚਯਗਣਸ੍ਸੇਵਨਾਮ’’ਨ੍ਤਿ ਪਚ੍ਚਯਗਣਸ੍ਸੇਵ ਵਿਸੇਸ ਨਾਮਨ੍ਤਿ ਵੁਤ੍ਤਂ ਹੋਤਿ. ਉਪ੍ਪਨ੍ਨਤ੍ਥੇ ਇਕਪਚ੍ਚਯੋਤਿ ਕਥਂ ਵਿਞ੍ਞਾਯਤੀਤਿ ਆਹ ‘‘ਯਸ੍ਮਿਂ ਸਮਯੇ’’ਤਿਆਦਿਂ. ‘‘ਪਾਲ਼ਿਯ’’ਨ੍ਤਿ ਧਮ੍ਮਸਙ੍ਗਣਿਪਾਲ਼ਿਯਂ. ‘‘ਅਸਲ੍ਲਕ੍ਖੇਤ੍ਵਾ’’ਤਿ ਅਚਿਨ੍ਤੇਤ੍ਵਾ ਇਚ੍ਚੇਵਤ੍ਥੋ. ਸਬ੍ਬਮੇਤਂ ਨਯੁਜ੍ਜਤਿਯੇਵ. ਕਸ੍ਮਾ, ਪਾਲ਼ਿਅਟ੍ਠਕਥਾਹਿ ਅਸਂਸਨ੍ਦਨਤ੍ਤਾ, ਅਤ੍ਥਯੁਤ੍ਤਿਬ੍ਯਞ੍ਜਨਯੁਤ੍ਤੀਨਞ੍ਚ ਅਵਿਸਦਤ੍ਤਾਤਿ ਅਧਿਪ੍ਪਾਯੋ. ‘‘ਤ’’ਨ੍ਤਿ ਚਿਤ੍ਤਂ. ‘‘ਏਤੇਨਾ’’ਤਿ ਪੁਬ੍ਬਪ੍ਪਯੋਗੇਨ. ‘‘ਯਥਾਵੁਤ੍ਤਨਯੇਨਾ’’ਤਿ ਤਿਕ੍ਖਭਾਵਸਙ੍ਖਾਤਮਣ੍ਡਨਵਿਸੇਸੇਨ. ‘‘ਸੋ ਪਨਾ’’ਤਿ ਪੁਬ੍ਬਪ੍ਪਯੋਗੋ ਪਨ. ‘‘ਇਤੀ’’ਤਿ ਤਸ੍ਮਾ. ‘‘ਤਂ ਨਿਬ੍ਬਤ੍ਤਿਤੋ’’ਤਿ ਤੇਨ ਪੁਬ੍ਬਪ੍ਪਯੋਗੇਨ ਨਿਬ੍ਬਤ੍ਤਿਤੋ. ‘‘ਵਿਰਜ੍ਝਿਤ੍ਵਾ’’ਤਿ ਅਯੁਤ੍ਤਪਕ੍ਖੇਪਤਿਤ੍ਵਾ. ਏਤੇਨਪਟਿਕ੍ਖਿਤ੍ਤਾ ਹੋਤੀਤਿ ਸਮ੍ਬਨ੍ਧੋ. ਗਾਥਾਯਂ. ‘‘ਚਿਤ੍ਤਸਮ੍ਭਵੀ’’ਤਿ ਚਿਤ੍ਤਸ੍ਮਿਂ ਸਮ੍ਭੂਤੋ. ਵਿਸੇਸੋ ਸਙ੍ਖਾਰੋ ਨਾਮਾਤਿ ਯੋਜਨਾ. ਸਲੋਮਕੋ, ਸਪਕ੍ਖਕੋਤ੍ਯਾਦੀਸੁਵਿਯਾਤਿ ਵੁਤ੍ਤਂ. ਸਾਸਵਾ ਧਮ੍ਮਾ, ਸਾਰਮ੍ਮਣਾ ਧਮ੍ਮਾਤ੍ਯਾਦੀਸੁਵਿਯਾਤਿ ਪਨ ਵੁਤ੍ਤੇ ਯੁਤ੍ਤਤਰਂ. ‘‘ਪਾਲ਼ਿਅਟ੍ਠਕਥਾ ਸਿਦ੍ਧ’’ਨ੍ਤਿ ਪਾਲ਼ਿਅਟ੍ਠਕਥਾਤੋ ਸਿਦ੍ਧਂ. ਅਪਿਚਯਤ੍ਥਵਿਸੁਦ੍ਧਿਮਗ੍ਗਾਦੀਸੁ ਅਸਙ੍ਖਾਰਂ ਚਿਤ੍ਤਂ, ਸਸਙ੍ਖਾਰਂ ਚਿਤ੍ਤਨ੍ਤਿ ਆਗਤਂ. ਤਤ੍ਥ ਅਯਂ ਪਚ੍ਛਿਮਨਯੋ ਯੁਤ੍ਤੋ. ਉਪਾਯਸਮੁਟ੍ਠਿਤਸ੍ਸ ਅਨੇਕਸਤਸਮ੍ਭਵਤੋ ‘‘ਇਦਞ੍ਚ ਨਯਦਸ੍ਸਨਮੇਵਾ’’ਤਿ ਵੁਤ੍ਤਂ. ‘‘ਉਦਾਸਿਨਭਾਵੇਨਾ’’ਤਿ ਮਜ੍ਝਤ੍ਤਭਾਵੇਨ. ‘‘ਯਤੋ’’ਤਿ ਯਸ੍ਮਾ. ਵਿਕਾਰਪਤ੍ਤੋ ਹੋਤਿ. ਤਤੋ ਅਧਿਮਤ੍ਤਪਸ੍ਸਨਂ ਵਿਞ੍ਞਾਯਤੀਤਿ ਯੋਜਨਾ.

੨੩. ਇਦਾਨਿ ਸਹਗਤਵਚਨ ਸਮ੍ਪਯੁਤ੍ਤਵਚਨਾਨਿ ਵਿਚਾਰੇਨ੍ਤੋ ‘‘ਏਤ੍ਥਚਾ’’ਤਿਆਦਿਮਾਰਭਿ. ‘‘ਨ ਪਨ ਤੇ ਭੇਦਵਨ੍ਤਾ ਹੋਨ੍ਤੀ’’ਤਿ ਕਸ੍ਮਾ ਵੁਤ੍ਤਂ. ਨ ਨੁ ਤੇਪਿਚਕ੍ਖੁ ਸਮ੍ਫਸ੍ਸੋ, ਸੋਤਸਮ੍ਫਸ੍ਸੋ, ਤਿਆਦਿਨਾ ਚ, ਕਾਮਵਿਤਕ੍ਕੋ, ਬ੍ਯਾਪਾਦਵਿਤਕ੍ਕੋ, ਤਿਆਦਿਨਾ ਚ, ਦੁਕ੍ਖੇ ਅਞ੍ਞਾਣਂ, ਦੁਕ੍ਖਸਮੁਦਯੇ ਅਞ੍ਞਾਣ, ਨ੍ਤਿਆਦਿਨਾਚ ਭੇਦਵਨ੍ਤਾ ਹੋਨ੍ਤੀਤਿ. ਸਚ੍ਚਂ. ਤੇ ਪਨ ਭੇਦਾ ਇਮਂ ਚਿਤ੍ਤਂ ਭਿਨ੍ਨਂ ਨ ਕਰੋਨ੍ਤਿ. ਤਸ੍ਮਾ ਤੇ ਭੇਦਵਨ੍ਤਾਨ ਹੋਨ੍ਤੀਤਿ ਵੁਤ੍ਤਾ. ਨ ਚ ਤੇਸਂ ਅਯਂ ਵਿਕਪ੍ਪੋ ਅਤ੍ਥੀਤਿ ਸਮ੍ਬਨ੍ਧੋ. ‘‘ਇਮਸ੍ਮਿਂ ਚਿਤ੍ਤੇ’’ਤਿ ਲੋਭਮੂਲਚਿਤ੍ਤੇ. ‘‘ਕਤ੍ਥਚੀ’’ਤਿ ਕਿਸ੍ਮਿਞ੍ਚਿ ਚਿਤ੍ਤੇ. ਯੇਵਾਪਨਾਤਿ ਵੁਤ੍ਤੇ ਸੁਧਮ੍ਮੇਸੁ ਆਗਤਾਨਿਯੇਵਾਪਨਕਾਨਿ. ‘‘ਅਞ੍ਞੇਹੀ’’ਤਿ ਦੋਸਮੂਲਮੋਹਮੂਲੇਹਿ. ਨਨੁਤਾਨਿਪਿ ਇਧ ਗਹੇਤਬ੍ਬਾਨੀਤਿ ਸਮ੍ਬਨ੍ਧੋ. ‘‘ਨਾ’’ਤਿ ਨ ਗਹੇਤਬ੍ਬਾਨਿ. ਕਸ੍ਮਾਤਿ ਆਹ ‘‘ਤੇਸੁਹੀ’’ਤਿਆਦਿਂ. ਤੇਪਿ ਇਧ ਨਗਹੇਤਬ੍ਬਾ ਸਿਯੁਂ. ਨ ਪਨ ਨ ਗਹੇਤਬ੍ਬਾ. ਕਸ੍ਮਾ, ਵੇਦਨਾਯ ਚ ਸਯਂ ਭੇਦਵਨ੍ਤਤ੍ਤਾ, ਦਿਟ੍ਠਿਸਙ੍ਖਾਰਾਨਞ੍ਚ ਵਿਕਪ੍ਪਸਬ੍ਭਾਵਾਤਿ ਅਧਿਪ੍ਪਾਯੋ.

੨੪. ‘‘ਸੋਮਨਸ੍ਸਸ੍ਸਕਾਰਣ’’ਨ੍ਤਿ ਸੋਮਨਸ੍ਸੁਪ੍ਪਤ੍ਤਿਯਾ ਕਾਰਣਂ. ਸੋਮਨਸ੍ਸੁਪ੍ਪਤ੍ਤਿਯਾ ਕਾਰਣੇ ਵੁਤ੍ਤੇ ਤਂ ਸਹਗਤ ਚਿਤ੍ਤੁਪ੍ਪਤ੍ਤਿਯਾਪਿਕਾਰਣਂ ਸਿਦ੍ਧਂ ਹੋਤੀਤਿ ਕਤ੍ਵਾ ਤਮੇਵ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤੇਨਾਹ ‘‘ਸੋਮਨਸ੍ਸਪ੍ਪਟਿਸਨ੍ਧਿਕੋਹੀ’’ਤਿਆਦਿਂ. ਹੀਨੇਨ ਵਾ…ਪੇ… ਆਰਮ੍ਮਣੇਨ ਸਮਾਯੋਗੋ, ਤੇਨ ਸਮਾਯੁਤ੍ਤਸ੍ਸਾਪਿ ਚਿਤ੍ਤਂ ਉਪ੍ਪਜ੍ਜਮਾਨਨ੍ਤਿਆਦਿਨਾ ਵਤ੍ਤਬ੍ਬਂ. ਤਥਾ ਬ੍ਯਸਨਮੁਤ੍ਤਿਯਂਪਿ. ਉਪੇਕ੍ਖਾਕਾਰਣੇ ‘‘ਬ੍ਯਸਨਮੁਤ੍ਤੀ’’ਤਿ ਇਦਂ ਦੋਮਨਸ੍ਸਪ੍ਪਸਙ੍ਗਪਰਿਹਾਰਵਚਨਂ. ਅਜ੍ਝਾਸਯੋਵੁਚ੍ਚਤਿ ਅਜ੍ਝਾਵੁਤ੍ਤਂ ਗੇਹਂ. ਦਿਟ੍ਠਿਸਙ੍ਖਾਤੋ ਅਜ੍ਝਾਸਯੋਯਸ੍ਸਾਤਿ ਦਿਟ੍ਠਜ੍ਝਾਸਯੋ. ਤਸ੍ਸ ਭਾਵੋ ਦਿਟ੍ਠਜ੍ਝਾਸਯਤਾ. ‘‘ਅਯੋਨਿਸੋ ਉਮ੍ਮੁਜ੍ਜਨ’’ਨ੍ਤਿ ਅਨੁਪਾਯਤੋ ਆਭੁਜਨਂ, ਮਨਸਿਕਰਣਂ. ‘‘ਚਿਨ੍ਤਾ ਪਸੁਤਵਸੇਨਾ’’ਤਿ ਗਮ੍ਭੀਰੇਸੁ ਧਮ੍ਮੇਸੁ ਚਿਨ੍ਤਾਪਸਵਨਵਸੇਨ, ਵੀਮਂਸਾ ਵਡ੍ਢਨਵਸੇਨ. ‘‘ਦਿਟ੍ਠਕਾਰਣਮੇਵਾ’’ਤਿ ਦਿਟ੍ਠਂ ਕਾਰਣਪ੍ਪਟਿਰੂਪਕਮੇਵ. ਤੇਨਾਹ ‘‘ਸਾਰਤੋਸਚ੍ਚਤੋ ਉਮ੍ਮੁਜ੍ਜਨ’’ਨ੍ਤਿ. ‘‘ਤਬ੍ਬਿਪਰੀਤੇਨਾ’’ਤਿ ਤਤੋ ਵਿਪਰੀਤੇਨ. ਅਦਿਟ੍ਠਜ੍ਝਾਸਯਤਾ, ਦਿਟ੍ਠਿਵਿਪਨ੍ਨਪੁਗ੍ਗਲਪਰਿਵਜ੍ਜਨਤਾ, ਸਦ੍ਧਮ੍ਮਸਵਨਤਾ, ਸਮ੍ਮਾਵਿਤਕ੍ਕਬਹੁਲਤਾ, ਯੋਨਿਸੋ ਉਮ੍ਮੁਜ੍ਜਨਞ੍ਚ ਦਿਟ੍ਠਿਵਿਪ੍ਪਯੋਗਕਾਰਣਨ੍ਤਿ ਵਤ੍ਤਬ੍ਬਂ.

‘‘ਇਮੇਸਂ ਪਨ ਚਿਤ੍ਤਾਨਂ ਉਪ੍ਪਤ੍ਤਿਵਿਧਾਨਂ ਵਿਸੁਦ੍ਧਿਮਗ੍ਗੇਗਹੇਤਬ੍ਬ’’ਨ੍ਤਿ ਵਿਸੁਦ੍ਧਿ ਮਗ੍ਗੇਖਨ੍ਧ ਨਿਦ੍ਦੇਸਤੋ ਗਹੇਤਬ੍ਬਂ. ਵੁਤ੍ਤਞ੍ਹਿਤਤ੍ਥ. ਯਦਾ ਹਿਨਤ੍ਥਿਕਾਮੇਸੁ ਆਦੀਨਵੋਤਿਆਦਿਨਾਨਯੇਨ ਮਿਚ੍ਛਾਦਿਟ੍ਠਿਂ ਪੁਰੇਕ੍ਖਿਤ੍ਵਾ ਹਟ੍ਠਤੁਟ੍ਠੋ ਕਾਮੇਵਾ ਪਰਿਭੁਞ੍ਜਤਿ, ਦਿਟ੍ਠਮਙ੍ਗਲਾਦੀਨਿ ਵਾ ਸਾਰਤੋਪਚ੍ਚੇਤਿ ਸਭਾਵ ਤਿਕ੍ਖੇਨ ਅਨੁਸ੍ਸਾਹਿਤੇਨਚਿਤ੍ਤੇਨ. ਤਦਾ ਪਥਮਂ ਅਕੁਸਲ ਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਮਨ੍ਦੇਨ ਸਮੁਸ੍ਸਾਹਿਤੇਨ ਚਿਤ੍ਤੇਨ, ਤਦਾਦੁਤੀਯਂ. ਯਦਾ ਮਿਚ੍ਛਾ ਦਿਟ੍ਠਿਂ ਅਪੁਰੇਕ੍ਖਿਤ੍ਵਾ ਕੇਵਲਂ ਹਟ੍ਠਤੁਟ੍ਠੋ ਮੇਥੁਨਂ ਵਾ ਸੇਵਤਿ, ਪਰ ਸਮ੍ਪਤ੍ਤਿਂ ਵਾ ਅਭਿਜ੍ਝਾਯਤਿ, ਪਰਭਣ੍ਡਂ ਵਾ ਹਰਤਿ ਸਭਾਵਤਿਕ੍ਖੇਨੇਵ ਅਨੁਸ੍ਸਾਹਿਤੇਨ ਚਿਤ੍ਤੇਨ. ਤਦਾ ਤਤੀਯਂ. ਯਦਾ ਮਨ੍ਦੇਨ ਸਮੁਸ੍ਸਾਹਿਤੇਨਚਿਤ੍ਤੇਨ, ਤਦਾ ਚਤੁਤ੍ਥਂ. ਯਦਾ ਪਨ ਕਾਮਾਨਂ ਵਾ ਅਸਮ੍ਪਤ੍ਤਿਂ ਆਗਮ੍ਮ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵੇਨ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾਹੋਨ੍ਤਿ, ਤਦਾਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤੀਤਿ.

ਲੋਭਮੂਲਚਿਤ੍ਤਵਣ੍ਣਨਾ ਨਿਟ੍ਠਿਤਾ.

੨੫. ਦੋਸਮੂਲਚਿਤ੍ਤੇ. ‘‘ਵਿਰੂਪ’’ਨ੍ਤਿ ਦੁਟ੍ਠਂ, ਲੁਦ੍ਦਂ. ਦੁਮ੍ਮਨਸ੍ਸ ਭਾਵੋਤਿ ਵੁਤ੍ਤੇ ਕਾਯਿਕਦੁਕ੍ਖਵੇਦਨਾਯਪਿ ਪਸਙ੍ਗੋ ਸਿਯਾਤਿ ਵੁਤ੍ਤਂ ‘‘ਮਾਨਸਿਕ…ਪੇ… ਨਾਮ’’ਨ੍ਤਿ. ਪਟਿਹਞ੍ਞਤਿ ਬਾਧਤਿ. ‘‘ਸਨ੍ਤਤ੍ਤੇ’’ਤਿ ਸਨ੍ਤਾਪਿਤੇ.

੨੬. ‘‘ਭੇਦਕਰੋ’’ਤਿ ਅਞ੍ਞਮਞ੍ਞਵਿਸੇਸਕਰੋ. ‘‘ਭੇਦਕਰਾਨ ਹੋਨ੍ਤੀ’’ਤਿ ਇਮਸ੍ਸ ਚਿਤ੍ਤਸ੍ਸ ਅਞ੍ਞਮਞ੍ਞਵਿਸੇਸਕਰਾਨ ਹੋਨ੍ਤਿ. ਦੋਮਨਸ੍ਸਗ੍ਗਹਣਂ ਪਸਙ੍ਗਨਿਵਤ੍ਤਨਤ੍ਥਂ ਗਹਿਤਨ੍ਤਿ ਯੋਜਨਾ. ਪਸਙ੍ਗੋਤਿ ਚਨਾਨਪ੍ਪਕਾਰਤੋ ਸਜ੍ਜਨਂ ਲਗ੍ਗਨਂ. ਕਥਂ ਪਸਙ੍ਗੋਤਿ ਆਹ ‘‘ਯਦਾਹੀ’’ਤਿਆਦਿਂ. ‘‘ਤੁਟ੍ਠਿਂ ਪਵੇਦੇਨ੍ਤੀ’’ਤਿ ਤੁਟ੍ਠਾਮਯਂ ਇਮੇਸਂ ਮਰਣੇਨਾਤਿਆਦਿ ਚਿਕ੍ਖਨ੍ਤਿ. ਏਵਂ ਸਹਗਤਪ੍ਪਸਙ੍ਗਂ ਨਿਵਤ੍ਤੇਤ੍ਵਾ ਸਮ੍ਪਯੁਤ੍ਤਪ੍ਪਸਙ੍ਗਂ ਨਿਵਤ੍ਤੇਤੁਂ ‘‘ਪਟਿਘਗ੍ਗਹਣਂਪੀ’’ਤਿਆਦਿ ਵੁਤ੍ਤਂ. ਤਿਰਚ੍ਛਾਨਗਤਪਾਣਵਧੇ ਅਪੁਞ੍ਞਂ ਨਾਮ ਨਤ੍ਥਿ. ਆਦਿਕਪ੍ਪਤੋ ਪਟ੍ਠਾਯ ਮਨੁਸ੍ਸਾਨਂ ਯਥਾਕਾਮ ਪਰਿਭੋਗਤ੍ਥਾਯ ਲੋਕਿਸ੍ਸਰਿਯੇਨਥਾਵਰਟ੍ਠਾਯਿਨਾ ਨਿਮ੍ਮਿਤਤ੍ਤਾਤਿ ਅਧਿਪ੍ਪਾਯੋ. ‘‘ਵਿਸ੍ਸਟ੍ਠਾ’’ਤਿ ਅਨਾਸਙ੍ਕਾ. ‘‘ਅਞ੍ਞੇਵਾ’’ਤਿ ਅਞ੍ਞੇ ਵਾ ਜਨੇ. ਵਿਮਤਿ ਏਵ ਵੇਮਤਿਕਂ. ਵੇਮਤਿਕਂ ਜਾਤਂ ਯੇਸਂ ਤੇ ਵੇਮਤਿਕਜਾਤਾ. ਪੁਰਿਮਚਿਤ੍ਤਸ੍ਸਲੋਭਸਹਗਤਭਾਵੋ ਇਮਾਨਿਅਟ੍ਠਪਿ ਲੋਭਸਹਗਤਚਿਤ੍ਤਾਨਿਨਾਮਾਤਿ ਇਮਿਨਾ ਚੂਲ਼ਨਿਗਮਨੇ ਨੇਵ ਸਿਦ੍ਧੋਵਿਯਾਤਿ ਯੋਜਨਾ. ਚੂਲ਼ਨਿਗਮਨੇਨ ਪਟਿਘਸਮ੍ਪਯੁਤ੍ਤ ਭਾਵੇਸਿਦ੍ਧੇ ਦੋਮਨਸ੍ਸਸਹਗਤਭਾਵੋਪਿ ਤੇਨਸਿਦ੍ਧੋ ਯੇਵਾਤਿ ਕਤ੍ਵਾ ‘‘ਤੇਸਂ ਗਹਣਂ’’ਤਿ ਵੁਤ੍ਤਂ. ‘‘ਤੇਸ’’ਨ੍ਤਿ ਦੋਨਸ੍ਸਪਟਿਘਾਨਂ. ਇਮਸ੍ਮਿਂ ਚਿਤ੍ਤੇ ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿਚਥਿਨਮਿਦ੍ਧਾਨਿ ਚ ਅਨਿਯਤਯੋਗੀਨਿ ਚ ਹੋਨ੍ਤਿ ਯੇਵਾਪਨਕਾਨਿ ਚ. ਤੇਨਾਹ ‘‘ਪੁਰਿਮਚਿਤ੍ਤੇ’’ਤਿਆਦਿਂ. ਦੋਮਨਸ੍ਸਂ ਇਮਸ੍ਮਿਂ ਚਿਤ੍ਤੇ ਅਤ੍ਥਿ, ਅਞ੍ਞਚਿਤ੍ਤੇਸੁ ਨਤ੍ਥਿ, ਤਸ੍ਮਾ ਅਸਾਧਾਰਣ ਧਮ੍ਮੋ ਨਾਮ. ਅਨਞ੍ਞਸਾਧਾਰਣ ਧਮ੍ਮੋਤਿਪਿ ਵੁਚ੍ਚਤਿ. ‘‘ਯਥਾਤਂ’’ਤਿ ਤਂ ਨਿਦਸ੍ਸਨਂ ਤਦੁਦਾਹਰਣਂ ਯਥਾ ਕਤਮਨ੍ਤਿ ਅਤ੍ਥੋ. ‘‘ਉਪਲਕ੍ਖੇਤੀ’’ਤਿ ਸਞ੍ਞਾਪੇਤਿ. ਆਤਪਂਤਾਯਤਿਰਕ੍ਖਤੀਤਿ ਆਤਪਤ੍ਤਂ. ਸੇਤਚ੍ਛਤ੍ਤਂ. ਲਦ੍ਧਂ ਆਤਪਤ੍ਤਂ ਯੇਨਾਤਿ ਲਦ੍ਧਾਤਪਤ੍ਤੋ. ਰਾਜਕੁਮਾਰੋ. ਸੋ ਆਤਪਤ੍ਤਂ ਲਦ੍ਧੋਤਿ ਵੁਤ੍ਤੇ ਸਬ੍ਬਂ ਰਾਜਸਮ੍ਪਤ੍ਤਿਂ ਲਦ੍ਧੋਤਿ ਵਿਞ੍ਞਾਯਤਿ. ਤਸ੍ਮਾ ਇਦਂ ਉਪਲਕ੍ਖਣ ਵਚਨਂ ਜਾਤਨ੍ਤਿ ਦਟ੍ਠਬ੍ਬਂ. ‘‘ਉਭਿਨ੍ਨ’’ਨ੍ਤਿ ਦ੍ਵਿਨ੍ਨਂ ਦੋਮਨਸ੍ਸ ਪਟਿਘਾਨਂ. ਪੁਬ੍ਬੇ ਦੋਮਨਸ੍ਸਸਹਗਤਨ੍ਤਿ ਵਤ੍ਵਾ ਨਿਗਮਨੇ ਪਟਿਘਸਮ੍ਪਯੁਤ੍ਤਚਿਤ੍ਤਾਨੀਤਿ ਵੁਤ੍ਤਤ੍ਤਾ ‘‘ਇਮਸ੍ਸ…ਪੇ… ਸਿਦ੍ਧਿਤੋ’’ਤਿ ਵੁਤ੍ਤਂ.

੨੭. ‘‘ਅਨਿਟ੍ਠਲੋਕਧਮ੍ਮੇਹੀ’’ਤਿ ਅਲਾਭੋ ਚ, ਅਯਸੋਚ, ਨਿਨ੍ਦਾਚ, ਦੁਕ੍ਖਞ੍ਚਾਤਿ ਚਤੂਹਿ ਅਨਿਟ੍ਠਲੋਕਧਮ੍ਮੇਹਿ. ‘‘ਤਂ ਕੁਤੇਤ੍ਥ ਲਬ੍ਭਾ’’ਤਿ ਅਹਂ ਅਲਾਭਾਦੀਹਿ ਮਾਸਮਾਗਚ੍ਛੀਤਿ ਪਤ੍ਥੇਨ੍ਤਸ੍ਸਪਿ ਕੁਤੋਮੇਏਤ੍ਥਲੋਕੇਤਂ ਪਤ੍ਥਨਾ ਪੂਰਣਂ ਸਬ੍ਬਕਾਲਂ ਲਬ੍ਭਾਤਿ ਅਤ੍ਥੋ. ‘‘ਲਬ੍ਭਾ’’ਤਿ ਚ ਕਮ੍ਮਤ੍ਥਦੀਪਕਂ ਪਾਟਿਪਦਿਕਪਦਂ. ਇਮੇਸਂ ਉਪ੍ਪਤ੍ਤਿਵਿਧਾਨਂ ਵਿਸੁਦ੍ਧਿਮਗ੍ਗੇ ਸਙ੍ਖੇਪਤੋਵ ਵੁਤ੍ਤਂ ਤਸ੍ਸ ਪਾਣਾਤਿ ਪਾਤਾਦੀਸੁ ਤਿਕ੍ਖਮਨ੍ਦਪ੍ਪਵਤ੍ਤਿਕਾਲੇ ਪਵਤ੍ਤਿਵੇਦਿਤਬ੍ਬਾਤਿ.

ਦੋਸਮੂਲਚਿਤ੍ਤਵਣ੍ਣਨਾ ਨਿਟ੍ਠਿਤਾ.

੨੮. ਮੋਹਮੂਲਚਿਤ੍ਤੇ. ‘‘ਮੂਲਨ੍ਤਰਵਿਰਹੇਨਾ’’ਤਿ ਅਞ੍ਞਮੂਲਵਿਰਹੇਨ. ਸਂਸਪ੍ਪਤੀਤਿ ਸਂਸਪ੍ਪਮਾਨਾ. ਏਵਂ ਨੁ ਖੋ, ਅਞ੍ਞਥਾਨੁ ਖੋਤਿ ਏਵਂ ਦ੍ਵਿਧਾ ਏਰਯਤਿ ਕਮ੍ਪਤੀਤਿ ਅਤ੍ਥੋ. ਵਿਕ੍ਖਿਪਤੀਤਿ ਵਿਕ੍ਖਿਪਮਾਨਂ. ‘‘ਨਿਯਮਨਤ੍ਥ’’ਨ੍ਤਿ ਇਦਂ ਵਿਚਿਕਿਚ੍ਛਾਸਮ੍ਪਯੁਤ੍ਤਂ ਨਾਮਾਤਿ ਨਿਯਮਨਤ੍ਥਂ. ਇਦਞ੍ਹਿ ਪਟਿਘਸਮ੍ਪਯੁਤ੍ਤਂ ਵਿਯ ਨਿਗਮਨੇਨ ਸਿਦ੍ਧਂ ਨ ਹੋਤਿ. ‘‘ਇਧ ਲਦ੍ਧੋਕਾਸਂ ਹੁਤ੍ਵਾ’’ਤਿ ਮੂਲਨ੍ਤਰ ਵਿਰਹਤ੍ਤਾ ਏਵ ਇਧਲਦ੍ਧੋਕਾਸਂ ਹੁਤ੍ਵਾ. ਪਕਤਿ ਸਭਾਵਭੂਤਂ, ਇਤਿ ਤਸ੍ਮਾ ਨਤ੍ਥੀਤਿ ਯੋਜਨਾ. ‘‘ਅਨੋਸਕ੍ਕਮਾਨ’’ਨ੍ਤਿ ਪਚ੍ਛਤੋ ਅਨਿਵਤ੍ਤਮਾਨਂ. ‘‘ਅਸਂਸੀਦਮਾਨ’’ਨ੍ਤਿ ਹੇਟ੍ਠਤੋ ਅਪਤਮਾਨਂ. ਉਭਯੇਨ ਅਬ੍ਬੋਚ੍ਛਿਨ੍ਨਨ੍ਤਿ ਵੁਤ੍ਤਂ ਹੋਤਿ. ‘‘ਅਤਿਸਮ੍ਮੁਲ਼੍ਹਤਾਯਾ’’ਤਿ ਮੂਲਨ੍ਤਰ ਵਿਰਹੇਨ ਮੋਹੇਨ ਅਤਿਸਮ੍ਮੁਲ਼੍ਹਤਾਯ. ‘‘ਅਤਿਚਞ੍ਚਲਤਾਯਾ’’ਤਿ ਸਂਸਪ੍ਪਮਾਨਵਿਕ੍ਖਿਪਮਾਨੇਹਿਵਿਚਿਕਿਚ੍ਛੁਦ੍ਧਚ੍ਚੇਹਿ ਅਤਿਚਞ੍ਚਲਤਾਯ. ‘‘ਸਬ੍ਬਤ੍ਥਪੀ’’ਤਿ ਸਬ੍ਬੇਸੁਪਿ ਆਰਮ੍ਮਣੇਸੁ. ਅਟ੍ਠਕਥਾਯਂ ਸਙ੍ਖਾਰ ਭੇਦੇਨ ਅਵਿਜ੍ਜਾਯ ਦੁਵਿਧਭਾਵੋਵ ਵੁਤ੍ਤੋ. ਕਥਂ ਵੁਤ੍ਤੋ. ਅਵਿਜ੍ਜਾ ਅਪ੍ਪਟਿਪਤ੍ਤਿ ਮਿਚ੍ਛਾ ਪਟਿਪਤ੍ਤਿਤੋ ਦੁਵਿਧਾ ਤਥਾ ਸਸਙ੍ਖਾ ਰਾਸਙ੍ਖਾਰਤੋਤਿ ਵੁਤ੍ਤੋ. ‘‘ਤਿਵਿਧਭਾਵੋਵਾ’’ਤਿ ਇਮਸ੍ਮਿਂ ਚਿਤ੍ਤੇਸਙ੍ਖਾਰਵਿਮੁਤ੍ਤਾਯ ਅਵਿਜ੍ਜਾਯ ਸਦ੍ਧਿਂ ਤਿਵਿਧਭਾਵੋਵ. ਇਮੇਸਂ ਦ੍ਵਿਨ੍ਨਂ ਚਿਤ੍ਤਾਨਂ ਉਪ੍ਪਤ੍ਤਿਵਿਧਾਨਂ ਵਿਸੁਦ੍ਧਿਮਗ੍ਗੇਸਙ੍ਖੇਪਤੋਵਵੁਤ੍ਤਂ ਤਸ੍ਸਅਸਨ੍ਨਿਟ੍ਠਾਨਵਿਕ੍ਖੇਪਕਾਲੇਪਵਤ੍ਤਿ ਵੇਦਿਤਬ੍ਬਾਤਿ.

੨੯. ‘‘ਸਬ੍ਬਥਾਪੀ’’ਤਿ ਨਿਪਾਤਸਮੁਦਾਯੋ ਵਾ ਹੋਤੁ ਅਞ੍ਞਮਞ੍ਞਵੇਵਚਨੋ ਵਾ, ਵਿਸੁਂ ਨਿਪਾਤੋਵਾਤਿ ਏਵਂ ਸਬ੍ਬਪ੍ਪਕਾਰਤੋਪਿ. ਅਕੁਸਲਪਦੇ ਅਕਾਰੋ ਵਿਰੁਦ੍ਧਤ੍ਥੋ. ਯਥਾ ਅਮਿਤ੍ਤੋ, ਅਸੁਰੋ, ਤਿਦਸ੍ਸੇਤੁਂ ‘‘ਅਕੁਸਲਾਨੀ’’ਤਿਆਦਿਮਾਹ. ‘‘ਪਟਿਵਿਰੁਦ੍ਧਭਾਵੋ’’ਤਿ ਮੋਹਾਦੀਹਿ ਅਕੁਸਲੇਹਿ ਵਿਰੁਦ੍ਧਭਾਵੋ. ਭਾਵਨਂਨਾਰਹਨ੍ਤੀਤਿ ‘‘ਅਭਾਵਨਾਰਹਾ’’. ਕਥਂ ਪਨ ਭਾਵਨਂਨਾਰਹਨ੍ਤੀਤਿ ਆਹ ‘‘ਪੁਨਪ੍ਪੁਨ’’ਨ੍ਤਿਆਦਿਂ. ‘‘ਨਿਯਾਮਂ ਓਕ੍ਕਮਨ੍ਤਾਪੀ’’ਤਿ ਪਞ੍ਚਾਨਨ੍ਤਰਿਯ ਕਮ੍ਮਭਾਵੇਨ ਨਿਯਤਮਿਚ੍ਛਾਦਿਟ੍ਠਿਭਾਵੇਨ ਚ ਨਿਯਾਮਂ ਓਕ੍ਕਮਨ੍ਤਾਪਿ. ਅਪਾਯਂ ਭਜਨ੍ਤੀਤਿ ਅਪਾਯਭਾਗਿਨੋ. ਕਮ੍ਮਕਾਰਕਾ. ਤੇਸਂ ਭਾਵੋ. ਤਾਯ. ‘‘ਵਟ੍ਟਸੋਤਨਿਯਤੇ’’ਤਿ ਸਂਸਾਰਵਟ੍ਟ ਸੋਤਸ੍ਮਿਂ ਨਿਯਤੇ. ‘‘ਥਿਰਤਰਪਤ੍ਤਾ’’ਤਿ ਸਮਾਧਿਵਸੇਨ ਥਿਰਤਰਭਾਵਂ ਪਤ੍ਤਾ. ਇਦਾਨਿ ਤਮੇਵਤ੍ਥਂ ਪਕਾਰਨ੍ਤਰੇਨ ਵਿਭਾਵੇਤੁਂ ‘‘ਅਪਿਚਾ’’ਤਿਆਦਿਮਾਹ. ‘‘ਸਿਯੁ’’ਨ੍ਤਿ ਪਦਂ ਧਾਤੁਪਚ੍ਚਯੇਹਿ ਸਿਦ੍ਧਂ ਨਿਪ੍ਫਨ੍ਨਪਦਂ ਨਾਮ ਨਹੋਤਿ. ਕਸ੍ਮਾ, ਇਧਪਰਿਕਪ੍ਪਤ੍ਥਸ੍ਸ ਅਸਮ੍ਭਵਤੋ. ਨਿਪਾਤਪਦਂ ਹੋਤਿ. ਕਸ੍ਮਾ, ਅਨੇਕਤ੍ਥਤਾ ਸਮ੍ਭਵਤੋ. ਇਧ ਪਨ ਭਵਨ੍ਤਿ ਸਦ੍ਦੇਨ ਸਮਾਨਤ੍ਥੋ. ਤੇਨਾਹ ‘‘ਨਿਪਾਤਪਦਂ ਇਧ ਦਟ੍ਠਬ੍ਬ’’ਨ੍ਤਿ.

ਅਕੁਸਲਵਣ੍ਣਨਾ.

੩੦. ਅਹੇਤੁਕਚਿਤ੍ਤੇ. ‘‘ਸਬ੍ਬਨਿਹੀਨ’’ਨ੍ਤਿ ਸਬ੍ਬਚਿਤ੍ਤੇਹਿ ਹੀਨਂ. ਪੁਨ ‘‘ਸਬ੍ਬਨਿਹੀਨ’’ਨ੍ਤਿ ਸਬ੍ਬਾਹੇਤੁਕੇਹਿ ਹੀਨਂ. ‘‘ਤ’’ਨ੍ਤਿ ਅਕੁਸਲ ਵਿਪਾਕਂ.

੩੧. ਸੁਤ੍ਤਪਾਲ਼ਿਯਂ, ‘‘ਕਟ੍ਠ’’ਨ੍ਤਿ ਸੁਕ੍ਖਦਾਰੁਂ. ‘‘ਸਕਲਿਕ’’ਨ੍ਤਿ ਛਿਨ੍ਦਿਤਫਾਲਿਤਂ ਕਟ੍ਠਕ੍ਖਣ੍ਡਕਂ. ‘‘ਥੁਸ’’ਨ੍ਤਿ ਵੀਹਿਸੁਙ੍ਕਂ. ‘‘ਸਙ੍ਕਾਰ’’ਨ੍ਤਿ ਕਚਵਰਂ. ਚਕ੍ਖੁਞ੍ਚਰੂਪੇ ਚ ਪਟਿਚ੍ਚ ਯਂਵਿਞ੍ਞਾਣਂ ਉਪ੍ਪਜ੍ਜਤਿ. ਤਂ ਚਕ੍ਖੁਵਿਞ੍ਞਾਣਨ੍ਤ੍ਵੇਵ ਵੁਚ੍ਚਤੀਤਿਆਦਿਨਾ ਯੋਜੇਤਬ੍ਬਂ. ਤਤ੍ਥ ‘‘ਰੂਪੇ’’ਤਿ ਰੂਪਾਰਮ੍ਮਣਾਨ. ‘‘ਸਦ੍ਦੇ’’ਤਿਆਦੀਸੁਪਿ ਏਸਨਯੋ. ਏਤ੍ਥ ਚ ਵਿਞ੍ਞਾਣਾਨਿ ਏਕਵਤ੍ਥੁ ਨਿਸ੍ਸਿਤਾਨਿ ਹੋਨ੍ਤਿ. ਤਸ੍ਮਾ ਵਤ੍ਥੁ ਦ੍ਵਾਰੇਸੁ ਏਕਵਚਨਂ ਵੁਤ੍ਤਂ. ਆਰਮ੍ਮਣਾਨਿ ਪਨ ਏਕਵਿਞ੍ਞਾਣੇਨਾਪਿ ਬਹੂਨਿ ਗਹਿਤਾਨਿ. ਤਸ੍ਮਾ ਆਰਮ੍ਮਣੇਸੁ ਬਹੁਵਚਨਂ. ‘‘ਦੁਕ੍ਖਯਤੀ’’ਤਿ ਦੁਕ੍ਖਂ ਕਰੋਤਿ. ਨਾਮਧਾਤੁ ਪਦਞ੍ਹੇਤਂ. ਯਥਾ ਅਤ੍ਤਾਨਂ ਸੁਖੇਤਿ ਵੀਣੇਤੀਤਿ ਸਦ੍ਦਵਿਦੂ. ਧਾਤੁਪਾਠੇਸੁ ਪਨ ਸੁਖਦੁਕ੍ਖਤਕ੍ਕਿਰਿਯਾਯਂਤਿ ਵੁਤ੍ਤਂ. ਤਕ੍ਕਿਰਿਯਾਤਿ ਚ ਸੁਖਕਿਰਿਯਾ ਦੁਕ੍ਖ ਕਿਰਿਯਾਤਿ ਅਤ੍ਥੋ. ਸਾਤਕਿਰਿਯਾ ਅਸ੍ਸਾਤਕਿਰਿਯਾਤਿ ਵੁਤ੍ਤਂ ਹੋਤਿ. ਚ ਸਦ੍ਦੋ ਓਕਾਸਤ੍ਥੋਤਿ ਕਤ੍ਵਾ ‘‘ਦੁਕ੍ਕਰਂ ਓਕਾਸਦਾਨ’’ਨ੍ਤਿ ਵੁਤ੍ਤਂ.

੩੨. ‘‘ਚਕ੍ਖੁਸ੍ਸ ਅਸਮ੍ਭਿਨ੍ਨਤਾ’’ਤਿ ਚਕ੍ਖੁਪਸਾਦਰੂਪਸ੍ਸ ਅਭਿਨ੍ਨਤਾ. ਤਸ੍ਮਿਞ੍ਹਿ ਭਿਨ੍ਨੇਸਤਿ ਅਨ੍ਧਸ੍ਸ ਚਕ੍ਖੁਸ੍ਸ ਰੂਪਾਨਿਨੁਪਟ੍ਠਹਨ੍ਤੀਤਿ. ‘‘ਸੋਤਸ੍ਸਅਸਮ੍ਭਿਨ੍ਨਤਾ’’ਤਿਆਦੀਸੁਪਿ ਏਸਨਯੋ. ‘‘ਆਲੋਕਸਨ੍ਨਿਸ੍ਸਯਪ੍ਪਟਿਲਾਭੋ’’ਤਿ ਚਕ੍ਖੁ ਚ ਆਲੋਕੇਸਤਿ ਕਿਚ੍ਚਕਾਰੀ ਹੋਤਿ. ਅਸਤਿ ਨਹੋਤਿ. ਤਥਾ ਰੂਪਞ੍ਚ. ਤਸ੍ਮਾ ਆਲੋਕੋ ਤੇਸਂ ਵਿਸਯਵਿਸਯੀਭਾਵੂਪਗਮਨੇ ਸਨ੍ਨਿਸ੍ਸਯੋ ਹੋਤਿ. ਤਸ੍ਸ ਆਲੋਕਸਨ੍ਨਿਸ੍ਸਯਸ੍ਸ ਪਟਿਲਾਭੋ. ਏਸਨਯੋ ਆਕਾਸਸਨ੍ਨਿਸ੍ਸਯਾਦੀਸੁ. ਇਮੇਸਂ ਅਙ੍ਗਾਨਂ ਯੁਤ੍ਤਿ ਦੀਪਨਾ ਉਪਰਿਰੂਪਸਙ੍ਗਹੇ ਆਗਮਿਸ੍ਸਤਿ. ‘‘ਅਟ੍ਠਕਥਾਯ’’ਨ੍ਤਿ ਅਟ੍ਠਸਾਲਿਨਿਯਂ. ਤਤ੍ਥ ‘‘ਤਸ੍ਮਿਂ ਪਨ ਆਪਾਤਂ ਆਗਚ੍ਛਨ੍ਤੇਪਿ ਆਲੋਕਸਨ੍ਨਿਸ੍ਸਯੇ ਅਸਤਿ ਚਕ੍ਖੁਵਿਞ੍ਞਾਣਂ ਨੁਪ੍ਪਜ੍ਜਤੀ’’ਤਿ ਵਚਨਂ ਅਸਮ੍ਭਾਵੇਨ੍ਤੋ ‘‘ਤਂ ਵਿਨਾ ਆਲੋਕੇਨਾ’’ਤਿਆਦਿਮਾਹ. ‘‘ਅਭਾਵਦਸ੍ਸਨ ਪਰ’’ਨ੍ਤਿ ਅਭਾਵਦਸ੍ਸਨਪ੍ਪਧਾਨਂ.

੩੩. ਵਿਪਾਕਵਚਨਤ੍ਥੇ. ਵਿਪਚ੍ਚਤੀਤਿ ਵਿਪਾਕਂ. ਵਿਪਚ੍ਚਤੀਤਿ ਚ ਵਿਪਕ੍ਕਭਾਵਂ ਆਪਜ੍ਜਤਿ. ਪੁਬ੍ਬੇ ਕਤਕਮ੍ਮਂ ਇਦਾਨਿ ਨਿਬ੍ਬਤ੍ਤਿਂ ਪਾਪੁਣਾਤੀਤਿ ਵੁਤ੍ਤਂ ਹੋਤਿ. ਇਦਾਨਿ ਤਦਤ੍ਥਂ ਪਾਕਟਂ ਕਰੋਨ੍ਤੋ ‘‘ਅਯਞ੍ਚ ਅਤ੍ਥੋ’’ਤਿਆਦਿਮਾਹ. ਅਟ੍ਠਕਥਾਯਂ ਆਯੂਹਨ ਸਮਙ੍ਗਿਤਾਪਿ ਆਗਤਾ. ਇਧ ਪਨਸਾ ਚੇਤਨਾ ਸਮਙ੍ਗਿਤਾਯ ਸਙ੍ਗਹਿਤਾਤਿ ਕਤ੍ਵਾ ‘‘ਚਤਸ੍ਸੋ ਸਮਙ੍ਗਿਥਾ’’ਤਿ ਵੁਤ੍ਤਂ. ਸਮਙ੍ਗਿਤਾਤਿ ਚ ਸਮ੍ਪਨ੍ਨਤਾ. ‘‘ਤਂ ਤਂ ਕਮ੍ਮਾਯੂਹਨ ਕਾਲੇ’’ਤਿ ਪਾਣਾਤਿ ਪਾਤਾਦਿਕਸ੍ਸ ਤਬ੍ਬਿਰਮਣਾਦਿਕਸ੍ਸ ਚ ਤਸ੍ਸ ਤਸ੍ਸ ਦੁਚ੍ਚਰਿਤਸੁਚਰਿਤਕਮ੍ਮਸ੍ਸ ਆਯੂਹਨਕਾਲੇ. ਸਮੁਚ੍ਚਿਨਨਕਾਲੇਤਿ ਅਤ੍ਥੋ. ‘‘ਸਬ੍ਬਸੋ ਅਭਾਵਂ ਪਤ੍ਵਾਨ ਨਿਰੁਜ੍ਝਤੀ’’ਤਿ ਯਥਾ ਅਬ੍ਯਾਕਤ ਧਮ੍ਮਾਨਿਰੁਜ੍ਝਮਾਨਾ ਸਬ੍ਬਸੋ ਅਭਾਵਂ ਪਤ੍ਵਾ ਨਿਰੁਜ੍ਝਨ੍ਤਿ. ਤਥਾ ਨਨਿਰੁਜ੍ਝਨ੍ਤੀਤਿ ਅਧਿਪ੍ਪਾਯੋ. ‘‘ਸਬ੍ਬਾਕਾਰ ਪਰਿਪੂਰ’’ਨ੍ਤਿ ਪਾਣਾਤਿਪਾਤਂ ਕਰੋਨ੍ਤਸ੍ਸ ਕਮ੍ਮਾਨੁ ਰੂਪਾਬਹੂਕਾਯ ਵਚੀਮਨੋ ਵਿਕਾਰਾ ਸਨ੍ਦਿਸ੍ਸਨ੍ਤਿ. ਏਸਨਯੋ ਅਦਿਨ੍ਨਾਦਾਨਾਦੀਸੁ. ਏਵਰੂਪੇਹਿ ਸਬ੍ਬੇਹਿ ਆਕਾਰ ਵਿਕਾਰੇਹਿ ਪਰਿਪੂਰਂ. ‘‘ਨਿਦਹਿਤ੍ਵਾ ਵਾ’’ਤਿ ਸਣ੍ਠਪੇਤ੍ਵਾ ਏਵ. ‘‘ਯਂਸਨ੍ਧਾਯਾ’’ਤਿ ਯਂਕਿਰਿਯਾਵਿਸੇਸਨਿਧਾਨਂ ਸਨ੍ਧਾਯ.

ਗਾਥਾਯਂ. ‘‘ਸਜ੍ਜੂ’’ਤਿ ਇਮਸ੍ਮਿਂ ਦਿਵਸੇ. ‘‘ਖੀਰਂ ਵਮੁਚ੍ਚਤੀ’’ਤਿ ਯਥਾ ਖੀਰਂ ਨਾਮ ਇਮਸ੍ਮਿਂ ਦਿਵਸੇ ਮੁਚ੍ਚਤਿ. ਪਕਤਿਂ ਜਹਤਿ. ਵਿਪਰਿਣਾਮਂ ਗਚ੍ਛਤਿ. ਨ ਤਥਾ ਪਾਪਂ ਕਤਂ ਕਮ੍ਮਨ੍ਤਿ ਯੋਜਨਾ. ਕਥਂ ਪਨ ਹੋਤੀਤਿ ਆਹ ‘‘ਦਹਨ੍ਤਂ ਬਾਲਮਨ੍ਵੇਤੀ’’ਤਿ. ‘‘ਭਸ੍ਮਾਛਨ੍ਨੋਵਪਾਵਕੋ’’ਤਿ ਛਾਰਿਕਾ ਛਨ੍ਨੋਵਿਯ ਅਗ੍ਗਿ. ‘‘ਸੋ ਪਨਾ’’ਤਿ ਕਿਰਿਯਾ ਵਿਸੇਸੋ ਪਨ. ‘‘ਵਿਸੁਂ ਏਕੋ ਪਰਮਤ੍ਥ ਧਮ੍ਮੋਤਿਪਿ ਸਙ੍ਖ੍ਯਂ ਨ ਗਚ੍ਛਤੀ’’ਤਿ ਵਿਸੁਂ ਸਮ੍ਪਯੁਤ੍ਤ ਧਮ੍ਮ ਭਾਵੇਨ ਸਙ੍ਖ੍ਯਂ ਨ ਗਚ੍ਛਤੀਤਿ ਅਧਿਪ੍ਪਾਯੋ. ਸੋ ਹਿ ਕਮ੍ਮਪਚ੍ਚਯਧਮ੍ਮਤ੍ਤਾ ਪਰਮਤ੍ਥ ਧਮ੍ਮੋ ਨ ਹੋਤੀਤਿ ਨ ਵਤ੍ਤਬ੍ਬੋ. ਤੇਨਾਹ ‘‘ਅਨੁਸਯਧਾਤੁਯੋ ਵਿਯਾ’’ਤਿ. ‘‘ਸੋ’’ਤਿ ਕਿਰਿਯਾਵਿਸੇਸੋ. ‘‘ਤ’’ਨ੍ਤਿ ਕਮ੍ਮਂ ਵਾ, ਕਮ੍ਮਨਿਮਿਤ੍ਤਂ ਵਾ, ਗਤਿਨਿਮਿਤ੍ਤਂ ਵਾ. ‘‘ਤਦਾ ਓਕਾਸਂ ਲਭਤੀ’’ਤਿ ਵਿਪਚ੍ਚਨਤ੍ਥਾਯ ਓਕਾਸਂ ਲਭਤਿ. ਓਕਾਸਂ ਲਭਿਤ੍ਵਾ ਪਚ੍ਚੁਪਟ੍ਠਾਤੀਤਿ ਅਧਿਪ੍ਪਾਯੋ. ‘‘ਤਤ੍ਥਾ’’ਤਿ ਤਾਸੁ ਚ ਤੂਸੁਸਮਙ੍ਗਿਤਾਸੁ. ‘‘ਇਤੀ’’ਤਿ ਲਦ੍ਧਗੁਣਵਚਨਂ. ‘‘ਏਵਞ੍ਚ ਕਤ੍ਵਾ’’ਤਿਆਦਿ ਪੁਨ ਲਦ੍ਧਗੁਣਵਚਨਂ. ‘‘ਪਾਲ਼ਿਯ’’ਨ੍ਤਿ ਧਮ੍ਮਸਙ੍ਗਣਿ ਪਾਲ਼ਿਯਂ. ‘‘ਕਮ੍ਮਸਨ੍ਤਾਨਤੋ’’ਤਿ ਅਰੂਪਸਨ੍ਤਾਨਂ ਏਵ ਵੁਚ੍ਚਤਿ. ‘‘ਯੇ ਪਨਾ’’ਤਿ ਗਨ੍ਥਕਾਰਾ ਪਨ. ‘‘ਤੇਸ’’ਨ੍ਤਿ ਗਨ੍ਥਕਾਰਾਨਂ. ਆਪਜ੍ਜਤੀਤਿ ਸਮ੍ਬਨ੍ਧੋ. ਤੇਸਂ ਵਾਦੇਤਿ ਵਾ ਯੋਜੇਤਬ੍ਬਂ. ਯਞ੍ਚਉਪਮਂ ਦਸ੍ਸੇਨ੍ਤੀਤਿ ਯੋਜਨਾ. ‘‘ਤਤ੍ਥਾ’’ਤਿ ਤਸ੍ਮਿਂ ਵਚਨੇ. ਨ ਚ ਨ ਲਭਨ੍ਤੀਤਿ ਯੋਜਨਾ. ‘‘ਤਦਾ’’ਤਿ ਤਸ੍ਮਿਂ ਪਰਿਣਤਕਾਲੇ. ‘‘ਨਾਲ਼’’ਨ੍ਤਿ ਪੁਪ੍ਫਫਲਾਨਂ ਦਣ੍ਡਕਂ.

੩੪. ‘‘ਸਮ੍ਭਵੋ’’ਤਿ ਪਸਙ੍ਗਕਾਰਣਂ. ਅਭਿਵਿਸੇਸੇਨ ਚਰਣਂ ਪਵਤ੍ਤਨਂ ਅਭਿਚਾਰੋ. ਵਿਸੇਸ ਵੁਤ੍ਤਿ. ਨ ਅਭਿਚਾਰੋ ਬ੍ਯਭਿਚਾਰੋ. ਸਾਮਞ੍ਞ ਵੁਤ੍ਤਿ. ਪਕ੍ਖਨ੍ਤਰੇਨ ਸਾਧਾਰਣਤਾਤਿ ਵੁਤ੍ਤਂ ਹੋਤਿ. ਪਕ੍ਖਨ੍ਤਰੇਨ ਸਾਧਾਰਣਤਾ ਨਾਮਪਕ੍ਖਨ੍ਤਰਸ੍ਸ ਨਾਨਪ੍ਪਕਾਰਤੋ ਸਜ੍ਜਨਮੇਵ ਲਗ੍ਗਨਮੇਵਾਤਿ ਵੁਤ੍ਤਂ ਬ੍ਯਭਿਚਾਰਸ੍ਸਾਤਿ ਪਸਙ੍ਗਸ੍ਸ ਇਚ੍ਚੇਵਤ੍ਥੋਤਿ. ਏਤ੍ਥਚਾਤਿਆਦਿਨਾ ਸਮ੍ਭਵਬ੍ਯਭਿਚਾਰਾਨਂ ਅਭਾਵਮੇਵ ਵਦਤਿ. ਅਕੁਸਲਹੇਤੂਹਿ ਚ ਸਹੇਤੁਕਤਾ ਸਮ੍ਭਵੋ ਨਤ੍ਥੀਤਿ ਸਮ੍ਬਨ੍ਧੋ. ‘‘ਤੇਸ’’ਨ੍ਤਿ ਅਕੁਸਲਵਿਪਾਕਾਨਂ. ‘‘ਅਬ੍ਯਭਿਚਾਰੋਯੇਵਾ’’ਤਿ ਬ੍ਯਭਿਚਾਰਰਹਿਤੋਯੇਵ.

੩੫. ‘‘ਪਞ੍ਚਦ੍ਵਾਰੇ ਉਪ੍ਪਨ੍ਨ’’ਨ੍ਤਿ ਪਞ੍ਚਦ੍ਵਾਰਵਿਕਾਰਂ ਪਟਿਚ੍ਚ ਉਪ੍ਪਨ੍ਨਤ੍ਤਾ ਵੁਤ੍ਤਂ. ਤੇਨਾਹ ‘‘ਤਞ੍ਹੀ’’ਤਿਆਦਿਂ. ਏਸਨਯੋ ਮਨੋਦ੍ਵਾਰਾਵਜ੍ਜਨੇਪਿ.

ਯਦਿ ਹਿ ਅਯਮਤ੍ਥੋਸਿਯਾ, ਏਵਞ੍ਚਸਤਿ, ਅਯਮਤ੍ਥੋ ਆਪਜ੍ਜਤੀਤਿ ਸਮ੍ਬਨ੍ਧੋ. ‘‘ਤੇਸ’’ਨ੍ਤਿ ਵੀਥਿਚਿਤ੍ਤਾਨਂ. ਉਪ੍ਪਾਦਸਦ੍ਦੋਨਿਯਤਪੁਲ੍ਲਿਙ੍ਗੋਤਿ ਕਤ੍ਵਾ ‘‘ਟੀਕਾਸੁ ਪਨ…ਪੇ… ਨਿਦ੍ਦਿਟ੍ਠਂ’’ ਸਿਯਾਤਿ ਵੁਤ੍ਤਂ. ‘‘ਵੁਤ੍ਤਨਯੇਨਾ’’ਤਿ ਸਮ੍ਪਯੁਤ੍ਤਹੇਤੁਵਿਰਹਤੋਤਿ ਵੁਤ੍ਤਨਯੇਨ. ਵਿਪਚ੍ਚਨ ਕਿਚ੍ਚਂ ਨਾਮ ਵਿਪਾਕਾਨਂ ਕਿਚ੍ਚਂ. ਵਿਪਾਕੁਪ੍ਪਾਦਨਕਿਚ੍ਚਂ ਨਾਮ ਕੁਸਲਾਕੁਸਲਾਨਂ ਕਿਚ੍ਚਂ. ‘‘ਤਂ ਤਂ ਕਿਰਿਯਾਮਤ੍ਤਭੂਤਾਨੀ’’ਤਿ ਆਵਜ੍ਜਨ ਕਿਰਿਯਾ ਹਸਨਕਿਰਿਯਾਮਤ੍ਤਭੂਤਾਨਿ. ਪਟਿਸਨ੍ਧਿਭਵਙ੍ਗਚੁਤਿਚਿਤ੍ਤਾਨਿ ਨਾਮ ਕੇਵਲਂ ਕਮ੍ਮਵੇਗੁਕ੍ਖਿਤ੍ਤਭਾਵੇਨਸਨ੍ਤਾਨੇਪਤਿਤਮਤ੍ਤਤ੍ਤਾ ਦੁਬ੍ਬਲ ਕਿਚ੍ਚਾਨਿ ਹੋਨ੍ਤਿ. ਪਞ੍ਚ ਵਿਞ੍ਞਾਣਾਨਿ ਚ ਅਸਾਰਾਨਂ ਅਬਲਾਨਂ ਪਸਾਦਵਤ੍ਥੂਨਂ ਨਿਸ੍ਸਾਯ ਉਪ੍ਪਨ੍ਨਤ੍ਤਾ ਦੁਬ੍ਬਲਵਤ੍ਥੁਕਾਨਿ ਹੋਨ੍ਤਿ. ਸਮ੍ਪਟਿਚ੍ਛਨਾਦੀਨਿ ਚ ਪਞ੍ਚਵਿਞ੍ਞਾਣਾਨੁਬਨ੍ਧ ਮਤ੍ਤਤ੍ਤਾ ਦੁਬ੍ਬਲ ਕਿਚ੍ਚਟ੍ਠਾਨਾਨਿ ਹੋਨ੍ਤਿ. ਤਸ੍ਮਾ ਤਾਨਿ ਸਬ੍ਬਾਨਿ ਅਤ੍ਤਨੋ ਉਸ੍ਸਾਹੇਨਵਿਨਾ ਕੇਵਲਂ ਵਿਪਚ੍ਚਨਮਤ੍ਤੇਨ ਪਵਤ੍ਤਨ੍ਤਿ. ‘‘ਵਿਪਾਕਸਨ੍ਤਾਨਤੋ’’ਤਿ ਪਞ੍ਚਦ੍ਵਾਰਾਵਜ੍ਜਨਞ੍ਚ ਮਨੋਦ੍ਵਾਰਾਵਜ੍ਜਨਞ੍ਚ ਭਵਙ੍ਗਵਿਪਾਕਸਨ੍ਤਾਨਤੋ ਲਦ੍ਧਪਚ੍ਚਯਂ ਹੋਤਿ. ਵੋਟ੍ਠਬ੍ਬਨਂ ਪਞ੍ਚਵਿਞ੍ਞਾਣਾਦਿ ਵਿਪਾਕਸਨ੍ਤਾਨਤੋ ਲਦ੍ਧਪਚ੍ਚਯਂ. ‘‘ਇਤਰਾਨਿ ਪਨਾ’’ਤਿ ਹਸਿਤੁਪ੍ਪਾਦਚਿਤ੍ਤ ਮਹਾਕਿਰਿਯਚਿਤ੍ਤਾਦੀਨਿ. ‘‘ਨਿਰਨੁਸਯਸਨ੍ਤਾਨੇ’’ਤਿ ਅਨੁਸਯਰਹਿਤੇ ਖੀਣਾਸਵਸਨ੍ਤਾਨੇ. ‘‘ਉਸ੍ਸਾਹਰਹਿਤਾਨਿ ਏਵਾ’’ਤਿ ਯਥਾ ਰੁਕ੍ਖਾਨਂ ਵਾਤਪੁਪ੍ਫਾਨਿ ਨਾਮ ਅਤ੍ਥਿ. ਤਾਨਿ ਫਲੁਪ੍ਪਾਦਕਸਿਨੇਹਰਹਿਤਤ੍ਤਾ ਫਲਾਨਿ ਨ ਉਪ੍ਪਾਦੇਨ੍ਤਿ. ਤਥਾ ਤਾਨਿ ਚ ਵਿਪਾਕੁਪ੍ਪਾਦਕਤਣ੍ਹਾਸਿਨੇਹਰਹਿਤਤ੍ਤਾ ਉਸ੍ਸਾਹਬ੍ਯਾਪਾਰ ਰਹਿਤਾਨਿ ਏਵ.

੩੬. ਵੇਦਨਾਵਿਚਾਰਣਾਯਂ. ‘‘ਪਿਚੁਪਿਣ੍ਡਕਾਨਂ ਵਿਯਾ’’ਤਿ ਦ੍ਵਿਨ੍ਨਂ ਕਪ੍ਪਾਸਪਿਚੁਪਿਣ੍ਡਕਾਨਂ ਅਞ੍ਞਮਞ੍ਞਸਙ੍ਘਟ੍ਟਨਂ ਵਿਯ ਉਪਾਦਾਰੂਪਾਨਞ੍ਚ ਅਞ੍ਞਮਞ੍ਞਸਙ੍ਘਟ੍ਟਨਂ ਦੁਬ੍ਬਲਮੇਵਾਤਿ ਯੋਜਨਾ. ‘‘ਤੇਸਂ ਆਰਮ੍ਮਣਭੂਤਾਨ’’ਨ੍ਤਿ ਤਿਣ੍ਣਂ ਮਹਾਭੂਤਾਨਂ. ‘‘ਕਾਯਨਿਸ੍ਸਯਭੂਤੇਸੂ’’ਤਿ ਕਾਯਨਿਸ੍ਸਯਮਹਾਭੂਤੇਸੁ.‘‘ਤੇਹੀ’’ਤਿ ਪਞ੍ਚਵਿਞ੍ਞਾਣੇਹਿ. ‘‘ਪੁਰਿਮਚਿਤ੍ਤੇਨਾ’’ਤਿ ਸਮ੍ਪਟਿਚ੍ਛਨਚਿਤ੍ਤਤੋ. ‘‘ਤ’’ਨ੍ਤਿ ਅਕੁਸਲਵਿਪਾਕਸਨ੍ਤੀਰਣਂ. ਪਟਿਘੇਨ ਵਿਨਾ ਨਪ੍ਪਵਤ੍ਤਤਿ. ਕਸ੍ਮਾ ਨਪ੍ਪਵਤ੍ਤਤੀਤਿ ਆਹ ‘‘ਏਕਨ੍ਤਾਕੁਸਲਭੂਤੇਨਾ’’ਤਿਆਦਿਂ. ‘‘ਅਬ੍ਯਾਕਤੇਸੁ ਅਸਮ੍ਭਵਤੋ’’ਤਿ ਅਬ੍ਯਾਕਤ ਚਿਤ੍ਤੇਸੁ ਯੁਜ੍ਜਿਤੁਂ ਅਸਮ੍ਭਵਤੋ. ਕਮ੍ਮਾਨੁਭਾਵਤੋ ਚ ਮੁਞ੍ਚਿਤ੍ਵਾ ਯਥਾਪੁਰਿਮਂ ਵਿਪਾਕਸਨ੍ਤਾਨਂ ਕਮ੍ਮਾਨੁਭਾਵੇਨ ਪਵਤ੍ਤਂ ਹੋਤਿ. ਤਥਾ ਅਪ੍ਪਵਤ੍ਤਿਤ੍ਵਾਤਿ ਅਧਿਪ੍ਪਾਯੋ. ‘‘ਕੇਨਚੀ’’ਤਿ ਕੇਨਚਿ ਚਿਤ੍ਤੇਨ. ‘‘ਵਿਸਦਿਸਚਿਤ੍ਤਸਨ੍ਤਾਨ ਪਰਾਵਟ੍ਟਨਵਸੇਨਾ’’ਤਿ ਪੁਰਿਮੇਨਵਿਪਾਕ ਚਿਤ੍ਤ ਸਨ੍ਤਾਨੇਨ ਵਿਸਦਿਸਂ ਕੁਸਲਾਦਿ ਜਵਨ ਚਿਤ੍ਤਸਨ੍ਤਾਨਂ ਪਰਤੋ ਆਵਟ੍ਟਾ ਪਨ ਵਸੇਨ. ਤਥਾਹਿਦਂ ਚਿਤ੍ਤਦ੍ਵਯਂ ਪਾਲ਼ਿਯਂ ਆਵਟ੍ਟਨਾ, ਅਨ੍ਵਾਵਟ੍ਟਨਾ, ਆਭੋਗੋ, ਸਮਨ੍ਨਾਹਾਰੋਤਿ ਨਿਦ੍ਦਿਟ੍ਠਂ. ‘‘ਸਬ੍ਬਤ੍ਥਾਪੀ’’ਤਿ ਇਟ੍ਠਾਰਮ੍ਮਣੇਪਿ ਅਨਿਟ੍ਠਾਰਮ੍ਮਣੇਪਿ. ‘‘ਅਤ੍ਤਨੋ ਪਚ੍ਛਾ ਪਵਤ੍ਤਸ੍ਸ ਚਿਤ੍ਤਸ੍ਸ ਵਸੇਨਾ’’ਤਿ ਅਤ੍ਤਨੋ ਪਚ੍ਛਾ ਪਵਤ੍ਤਂ ਚਿਤ੍ਤਂ ਪਟਿਚ੍ਚ ਨ ਵਤ੍ਤਬ੍ਬੋਤਿ ਅਧਿਪ੍ਪਾਯੋ. ‘‘ਅਤ੍ਤਨੋ ਪਚ੍ਚਯੇਹਿ ਏਵ ਸੋ ਸਕ੍ਕਾ ਵਤ੍ਤੁ’’ਨ੍ਤਿ ਅਤ੍ਤਨੋ ਪਚ੍ਚਯੇਸੁ ਬਲਵਨ੍ਤੇਸੁ ਸਤਿ, ਬਲਵਾ ਹੋਤਿ. ਦੁਬ੍ਬਲੇਸੁ ਸਤਿ, ਦੁਬ੍ਬਲੋ ਹੋਤੀਤਿ ਸਕ੍ਕਾਵਤ੍ਤੁਨ੍ਤਿ ਅਧਿਪ੍ਪਾਯੋ. ‘‘ਵਿਸਦਿਸ ਚਿਤ੍ਤਸਨ੍ਤਾਨ’’ਨ੍ਤਿ ਵੋਟ੍ਠਬ੍ਬਨਕਿਰਿਯਚਿਤ੍ਤਸਨ੍ਤਾਨਂ.

੩੭. ਸਙ੍ਖਾਰ ਵਿਚਾਰਣਾਯਂ ‘‘ਵਿਪਾਕੁਦ੍ਧਾਰੇ’’ਤਿ ਅਟ੍ਠਸਾਲਿਨਿਯਂ ਵਿਪਾਕੁਦ੍ਧਾਰ ਕਥਾਯਂ. ‘‘ਉਭਯਕਮ੍ਮੇਨਪੀ’’ਤਿ ਸਸਙ੍ਖਾਰਿਕ ਕਮ੍ਮੇਨਪਿ, ਅਸਙ੍ਖਾਰਿਕ ਕਮ੍ਮੇਨਪਿ. ‘‘ਥੇਰੇਨਾ’’ਤਿ ਮਹਾਦਤ੍ਤਤ੍ਥੇਰੇਨ. ‘‘ਤਦੁਭਯਭਾਵਾਭਾਵੋ’’ਤਿ ਸਸਙ੍ਖਾਰਿਕ ਅਸਙ੍ਖਾਰਿਕਭਾਵਾਨਂ ਅਭਾਵੋ. ‘‘ਤਾਨਿਪਿ ਹਿ ਅਪਰਿਬ੍ਯਤ੍ਤਕਿਚ੍ਚਾਨਿਯੇਵਾ’’ਤਿ ਏਤ੍ਥ ਆਵਜ੍ਜਨ ਦ੍ਵਯਂ ਜਵਨਾਨਂ ਪੁਰੇਚਾਰਿਕ ਕਿਚ੍ਚਤ੍ਤਾ ਅਪਰਿਬ੍ਯਤ੍ਤਕਿਚ੍ਚਂ ਹੋਤੁ. ਹਸਿਤੁਪ੍ਪਾਦਚਿਤ੍ਤਂ ਪਨ ਜਵਨਕਿਚ੍ਚਤ੍ਤਾ ਕਥਂ ਅਪਰਿਬ੍ਯਤ੍ਤਕਿਚ੍ਚਂ ਭਵੇਯ੍ਯਾਤਿ. ਤਮ੍ਪਿ ਸਬ੍ਬਞ੍ਞੁਤਞ੍ਞਾਣਾਦੀਨਂ ਅਨੁਚਾਰਿਕਮਤ੍ਤਤ੍ਤਾ ਅਪਰਿਬ੍ਯਤ੍ਤਕਿਚ੍ਚਂ ਨਾਮ ਹੋਤੀਤਿ. ‘‘ਅਟ੍ਠਮਹਾਵਿਪਾਕੇਸੁ ਵਿਯ ਵਤ੍ਤਬ੍ਬੋ’’ਤਿ ਮਹਾਵਿਪਾਕਾਨਂ ਸਸਙ੍ਖਾਰਿਕਾ ਸਙ੍ਖਾਰਿਕਭਾਵੋ ਪੁਰਿਮਭਵੇ ਮਰਣਾਸਨ੍ਨਕਾਲੇ ਆਰਮ੍ਮਣਾਨਂ ਪਯੋਗੇਨ ਸਹ ਵਾ ਵਿਨਾ ਵਾ ਉਪਟ੍ਠਾਨਂ ਪਟਿਚ੍ਚ ਵੁਤ੍ਤੋ, ਤਥਾ ਵਤ੍ਤਬ੍ਬੋਤਿ ਅਧਿਪ੍ਪਾਯੋ.

੩੮. ‘‘ਦੁਬ੍ਬਲ ਕਮ੍ਮਨਿਬ੍ਬਤ੍ਤੇਸੂ’’ਤਿ ਪਟਿਸਨ੍ਧਿ ਭਵਙ੍ਗ ਚੁਤਿਕਿਚ੍ਚਾਨਿ ਸਨ੍ਧਾਯ ਵੁਤ੍ਤਂ. ‘‘ਦੁਬ੍ਬਲਵਤ੍ਥੁ ਕਿਚ੍ਚਟ੍ਠਾਨੇਸੂ’’ਤਿ ਚਕ੍ਖਾਦਿਵਤ੍ਥੁਕੇਸੁ ਆਵਜ੍ਜਨਾਦਿ ਦੁਬ੍ਬਲਕਿਚ੍ਚ ਦੁਬ੍ਬਲਟ੍ਠਾਨਿਕੇਸੁ. ‘‘ਤਤ੍ਥਾ’’ਤਿਆਦਿਨਾ ਤਦਤ੍ਥਂ ਵਿਵਰਤਿ. ਤਤ੍ਥ ‘‘ਵਿਕ੍ਖੇਪਯੁਤ੍ਤ’’ਨ੍ਤਿ ਵਿਕ੍ਖੇਪਕਿਚ੍ਚੇਨ ਉਦ੍ਧਚ੍ਚੇਨਯੁਤ੍ਤਂ ਹੁਤ੍ਵਾ. ‘‘ਕਪ੍ਪਟ੍ਠਿਤਿਕਂ’’ ਨਾਮ ਸਙ੍ਘਭੇਦਕਮ੍ਮਂ. ਛਸੁਵਤ੍ਥੁ ਰੂਪੇਸੁ ਹਦਯਵਤ੍ਥੁਮੇਵ ਸੁਵਣ੍ਣਰਜਤਂ ਵਿਯ ਸਾਰਵਤ੍ਥੁ ਹੋਤਿ. ਇਤਰਾਨਿ ਫਲਿਕਾਨਿਵਿਯ ਪਸਾਦਮਤ੍ਤਤ੍ਤਾ ਅਸਾਰਾਨਿ ਹੋਨ੍ਤੀਤਿ ਵੁਤ੍ਤਂ ‘‘ਚਕ੍ਖਾਦੀਸੁ ਦੁਬ੍ਬਲਵਤ੍ਥੂਸੂ’’ਤਿ. ਦਸ੍ਸਨਾਦੀਨਿ ਚ ਕਿਚ੍ਚਾਨਿ ਜਵਨ ਕਿਚ੍ਚਸ੍ਸ ਪੁਰੇਚਰਤ੍ਤਾ ਖੁਦ੍ਦਕਿਚ੍ਚਾਨਿ ਹੋਨ੍ਤਿ. ਤੇਨਾਹ ‘‘ਦਸ੍ਸਨਾਦੀਸੂ’’ਤਿਆਦਿਂ.

੩੯. ਇਧ ਦੀਪਨਿਯਂ ਇਚ੍ਚੇਵਨ੍ਤਿ ਪਦਂ ਅਟ੍ਠਾਰਸਾਤਿਪਦਸ੍ਸਵਿਸੇਸਨਨ੍ਤਿ ਕਤ੍ਵਾ ‘‘ਸਬ੍ਬਥਾਪੀਤਿ ਪਦਸ੍ਸ…ਪੇ… ਵੇਦਿਤਬ੍ਬੋ’’ਤਿ ਵੁਤ੍ਤਂ. ਵਿਭਾਵਨਿਯਂ ਪਨ ਤਂ ਸਬ੍ਬਥਾਪੀਤਿ ਪਦਸ੍ਸ ਵਿਸੇਸਨਨ੍ਤਿ ਕਤ੍ਵਾ ‘‘ਸਬ੍ਬਥਾ ਪੀਤਿਕੁਸਲਾਕੁਸਲਵਿਪਾਕਕਿਰਿਯਾਭੇਦੇਨਾ’’ਤਿ ਵੁਤ੍ਤਂ.

ਅਹੇਤੁਕਚਿਤ੍ਤਵਣ੍ਣਨਾ ਨਿਟ੍ਠਿਤਾ.

੪੦. ਸੋਭਣਚਿਤ੍ਤੇਸੁ. ਅਵੁਤ੍ਤਾਪਿ ਸਿਦ੍ਧਾ ਹੋਤਿ. ਯਥਾ ਅਟ੍ਠਚਿਤ੍ਤਾਨਿ ਲੋਕੁਤ੍ਤਰਾਨੀਤਿ ਚ ਵੁਤ੍ਤੇ ਅਵੁਤ੍ਤੇਪਿਸਿਜ੍ਝਨ੍ਤਿ ਸੇਸਚਿਤ੍ਤਾਨਿ ਲੋਕਿਯਾਨੀਤਿ ਚ ਸਉਤ੍ਤਰਾਨੀਤਿ ਚਾਤਿ ਅਧਿਪ੍ਪਾਯੋ. ‘‘ਅਤ੍ਤਸਮਙ੍ਗੀਨੋ’’ਤਿ ਅਤ੍ਤਨਾ ਪਾਪਕਮ੍ਮੇਨ ਸਮਨ੍ਨਾਗਤੇ. ‘‘ਅਨਿਚ੍ਛਨ੍ਤੇ ਯੇਵਾ’’ਤਿ ਸਚੇਪਿ ਅਵੀਚਿਨਿਮਿਤ੍ਤਸ੍ਸਾਦਵਤ੍ਥੁ ਵਿਯ ਕੇਚਿ ਇਚ੍ਛਨ੍ਤੁ. ਅਜਾਨਨ੍ਤਾਨਂ ਪਨ ਇਚ੍ਛਾ ਅਪ੍ਪਮਾਣਨ੍ਤਿ ਅਧਿਪ੍ਪਾਯੋ. ‘‘ਸੋਭਗ੍ਗ ਪਤ੍ਤਿਯਾ’’ਤਿ ਏਤ੍ਥ ਸੁਭਗਸ੍ਸ ਭਾਵੋ ਸੋਭਗ੍ਗਨ੍ਤਿ ਵਿਗ੍ਗਹੋ. ਸੁਭਗਸ੍ਸਾਤਿ ਚ ਸੁਸਿਰਿਕਸ੍ਸ.

੪੧. ‘‘ਯਾਥਾਵਤੋ’’ਤਿ ਯਥਾ ਸਭਾਵਤੋ. ਏਤ੍ਥ ਸਿਯਾ ਜਾਨਾਤੀਤਿ ਞਾਣਨ੍ਤਿ ਵੁਤ੍ਤਂ, ਕਿਂ ਸਬ੍ਬਂ ਞਾਣਂ ਯਾਥਾਵਤੋ ਜਾਨਾਤੀਤਿ. ਕਿਞ੍ਚੇਤ੍ਥ. ਯਦਿ ਸਬ੍ਬਂ ਞਾਣਂ ਯਾਥਾਵਤੋ ਜਾਨਾਤਿ. ਏਵਂ ਸਤਿ, ਞਾਣੇਨ ਚਿਨ੍ਤੇਨ੍ਤਾਨਂ ਅਜਾਨਨਂ ਨਾਮ ਨਤ੍ਥਿ, ਵਿਰਜ੍ਝਨਂ ਨਾਮ ਨਤ੍ਥੀਤਿ ਆਪਜ੍ਜਤਿ. ਅਥ ਸਬ੍ਬਂ ਞਾਣਂ ਯਾਥਾਵਤੋ ਨ ਜਾਨਾਤਿ, ਕਤ੍ਥਚਿ ਜਾਨਾਤਿ, ਕਤ੍ਥਚਿ ਨ ਜਾਨਾਤਿ. ਏਵਞ੍ਚਸਤਿ, ਯਤ੍ਥ ਜਾਨਾਤਿ, ਤਤ੍ਥੇਵ ਤਂ ਞਾਣਂ ਹੋਤਿ. ਯਤ੍ਥ ਨ ਜਾਨਾਤਿ, ਤਤ੍ਥ ਤਂ ਞਾਣਮੇਵ ਨ ਹੋਤੀਤਿ ਆਪਜ੍ਜਤੀਤਿ. ਵੁਚ੍ਚਤੇ. ਞਾਣੇਨ ਚਿਨ੍ਤੇਸ੍ਸਾਮੀਤਿ ਚਿਨ੍ਤੇਨ੍ਤਾਨਂਪਿ ਯਤ੍ਥ ਯਤ੍ਥ ਯਾਥਾਵਤੋ ਜਾਨਨਂ ਨ ਹੋਤਿ, ਤਤ੍ਥ ਤਤ੍ਥ ਞਾਣ ਵਿਪ੍ਪਯੁਤ੍ਤ ਚਿਤ੍ਤਂ ਹੋਤਿ. ਞਾਣਪ੍ਪਟਿ ਰੂਪਕਾ ਚ ਧਮ੍ਮਾ ਅਤ੍ਥਿ ਚਿਤ੍ਤਞ੍ਚ ਵਿਤਕ੍ਕੋ ਚ, ਵਿਚਾਰੋ ਚ, ਦਿਟ੍ਠਿ ਚ. ਏਤੇਹਿ ਚਿਨ੍ਤੇਨ੍ਤਾਪਿ ਅਹਂ ਞਾਣੇਨ ਚਿਨ੍ਤੇਮੀਤਿ ਮਞ੍ਞਨ੍ਤਿ. ‘‘ਦੇਯ੍ਯ ਧਮ੍ਮਪਟਿਗ੍ਗਾਹਕ ਸਮ੍ਪਤ੍ਤੀ’’ਤਿ ਦੇਯ੍ਯਧਮ੍ਮ ਵਤ੍ਥੁ ਸਮ੍ਪਤ੍ਤਿ, ਪਟਿਗ੍ਗਾਹਕ ਪੁਗ੍ਗਲ ਸਮ੍ਪਤ੍ਤਿ. ‘‘ਅਬ੍ਯਾਪਜ੍ਜਲੋਕੂਪਪਤ੍ਤਿਤਾ’’ਤਿ ਏਤ੍ਥ ਅਬ੍ਯਾਪਜ੍ਜਲੋਕੋ ਨਾਮ ਕਾਯਿਕਦੁਕ੍ਖ ਚੇਤਸਿਕ ਦੁਕ੍ਖ ਰਹਿਤੋ ਉਪਰਿਦੇਵਲੋਕੋ ਵਾ ਬ੍ਰਹ੍ਮਲੋਕੋ ਵਾ. ਉਪਪਜ੍ਜਨਂ ਉਪਪਤ੍ਤਿ. ਪਟਿਸਨ੍ਧਿਵਸੇਨ ਉਪਗਮਨਨ੍ਤਿ ਅਤ੍ਥੋ. ਅਬ੍ਯਾਪਜ੍ਜਲੋਕਂ ਉਪਪਤ੍ਤਿ ਯਸ੍ਸ ਸੋ ਅਬ੍ਯਾਪਜ੍ਜ ਲੋਕੂਪਪਤ੍ਤਿ. ਤਸ੍ਸ ਭਾਵੋਤਿ ਵਿਗ੍ਗਹੋ. ‘‘ਕਿਲੇਸ ਦੂਰਤਾ’’ਤਿ ਸਮਾਪਤ੍ਤਿ ਬਲੇਨ ਵਾ, ਅਞ੍ਞਤਰਪ੍ਪਟਿਪਤ੍ਤਿਯਾ ਵਾ, ਵਿਕ੍ਖਮ੍ਭਿਤ ਕਿਲੇਸਤਾ ਵਾ, ਅਰਿਯਮਗ੍ਗੇਨ ਸਮੁਚ੍ਛਿਨ੍ਨ ਕਿਲੇਸਤਾ ਵਾ.

ਤੇਸਂ ਉਪ੍ਪਤ੍ਤਿ ਵਿਧਾਨਂ ਵਿਸੁਦ੍ਧਿ ਮਗ੍ਗੇ ਖਨ੍ਧਨਿਦ੍ਦੇਸੇ ਏਵਂ ਵੁਤ੍ਤਂ. ਯਦਾਹਿ ਦੇਯ੍ਯਧਮ੍ਮ ਪਟਿਗ੍ਗਾਹਕਾਦਿ ਸਮ੍ਪਤ੍ਤਿਂ ਅਞ੍ਞਂ ਵਾ ਸੋਮਨਸ੍ਸਹੇਤੁਂ ਆਗਮ੍ਮ ਹਟ੍ਠਤੁਟ੍ਠੋ ਅਤ੍ਥਿਦਿਨ੍ਨਨ੍ਤਿਆਦਿਨਯਪ੍ਪਵਤ੍ਤਂ ਸਮ੍ਮਾਦਿਟ੍ਠਿਂ ਪੁਰੇਕ੍ਖਿਤ੍ਵਾ ਅਸਂਸੀਦਨ੍ਤੋ ਅਨੁਸ੍ਸਾਹਿਤੋਪਰੇਹਿ ਦਾਨਾਦੀਨਿ ਪੁਞ੍ਞਾਨਿ ਕਰੋਤਿ, ਤਦਾਸ੍ਸ ਸੋਮਨਸ੍ਸਸਹਗਤਂ ਞਾਣ ਸਮ੍ਪਯੁਤ੍ਤਂ ਚਿਤ੍ਤਂ ਅਸਙ੍ਖਾਰਂ ਹੋਤਿ. ਯਦਾ ਪਨ ਵੁਤ੍ਤਨਯੇਨ ਹਟ੍ਠਤੁਟ੍ਠੋ ਸਮ੍ਮਾਦਿਟ੍ਠਿਂ ਪੁਰੇਕ੍ਖਿਤ੍ਵਾ ਅਮੁਤ੍ਤ ਚਾ ਗਤਾਦਿਵਸੇਨ ਸਂਸੀਦਮਾਨੋ ਵਾ ਪਰੇਹਿ ਵਾ ਉਸ੍ਸਾਹਿਤੋ ਕਰੋਤਿ, ਤਦਾਸ੍ਸ ਤਦੇਵ ਚਿਤ੍ਤਂ ਸਸਙ੍ਖਾਰਂ ਹੋਤਿ. ਇਮਸ੍ਮਿਞ੍ਹਿ ਅਤ੍ਥੇ ਸਙ੍ਖਾਰੋਤਿ ਏਤਂ ਅਤ੍ਤਨੋ ਵਾ ਪਰੇਸਂ ਵਾ ਵਸੇਨ ਪਵਤ੍ਤਸ੍ਸ ਪੁਬ੍ਬਪ੍ਪਯੋਗਸ੍ਸਾਧਿਵਚਨਂ. ਯਦਾ ਪਨ ਞਾਤਿ ਜਨਸ੍ਸ ਪਟਿਪਤ੍ਤਿ ਦਸ੍ਸਨੇਨ ਜਾਤਪਰਿਚਯਾਬਾਲਦਾਰਕਾ ਭਿਕ੍ਖੂ ਦਿਸ੍ਵਾ ਸੋਮਨਸ੍ਸ ਜਾਤਾਸਹਸਾ ਕਿਞ੍ਚਿ ਦੇਵ ਹਤ੍ਥਗਤਂ ਦਦਨ੍ਤਿ ਵਾ ਵਨ੍ਦਨ੍ਤਿ ਵਾ, ਤਦਾ ਤਤੀਯਂ ਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਦੇਥਵਨ੍ਦਥਾਤਿ ਞਾਤੀਹਿ ਉਸ੍ਸਾਹਿਤਾ ਏਵਂ ਪਟਿਪਜ੍ਜਨ੍ਤਿ, ਤਦਾ ਚਤੁਤ੍ਥਂ ਚਿਤ੍ਤਂ ਉਪ੍ਪਜ੍ਜਤਿ. ਯਦਾ ਪਨ ਦੇਯ੍ਯਧਮ੍ਮ ਪਟਿਗ੍ਗਾਹਕਾਦੀਨਂ ਅਸਮ੍ਪਤ੍ਤਿਂ ਅਞ੍ਞੇਸਂ ਵਾ ਸੋਮਨਸ੍ਸਹੇਤੂਨਂ ਅਭਾਵਂ ਆਗਮ੍ਮ ਚਤੂਸੁਪਿ ਵਿਕਪ੍ਪੇਸੁ ਸੋਮਨਸ੍ਸਰਹਿਤਾ ਹੋਨ੍ਤਿ. ਤਦਾ ਸੇਸਾਨਿ ਚਤ੍ਤਾਰਿ ਉਪੇਕ੍ਖਾਸਹਗਤਾਨਿ ਉਪ੍ਪਜ੍ਜਨ੍ਤੀਤਿ.

੪੨. ਅਟ੍ਠਪੀਤਿ ਏਤ੍ਥ ਪਿਸਦ੍ਦੇਨ ਇਮਾਨਿ ਚਿਤ੍ਤਾਨਿ ਨ ਕੇਵਲਂ ਅਟ੍ਠੇਵ ਹੋਨ੍ਤਿ. ਅਥ ਖੋ ਤਤੋ ਬਹੂਨਿਪਿ ਬਹੁਤਰਾਨਿਪਿ ਹੋਨ੍ਤੀਤਿ ਇਮਂ ਸਮ੍ਪਿਣ੍ਡਨਤ੍ਥਂ ਦੀਪੇਤੀਤਿ ਦਸ੍ਸੇਤੁਂ ‘‘ਤੇਨਾ’’ਤਿਆਦਿਵੁਤ੍ਤਂ. ਦਸਸੁ ਪੁਞ੍ਞਕਿਰਿਯਾਵਤ੍ਥੂਸੁ ਦਿਟ੍ਠੁਜੁ ਕਮ੍ਮਂ ਨਾਮ ਞਾਣ ਕਿਚ੍ਚਂ. ਤਂ ਕਥਂ ਞਾਣ ਵਿਪ੍ਪਯੁਤ੍ਤ ਚਿਤ੍ਤੇਹਿ ਕਰੋਨ੍ਤੀਤਿ. ਵੁਚ੍ਚਤੇ. ਞਾਣ ਸਮ੍ਪਯੁਤ੍ਤ ਚਿਤ੍ਤੇਹਿ ਦਿਟ੍ਠਿਂ ਉਜੁਂਕਰੋਨ੍ਤਾ ਤੇਸਂ ਅਨ੍ਤਰਨ੍ਤਰਾ ਞਾਣਸੋਤੇ ਪਤਿਤਵਸੇਨ ਞਾਣਵਿਪ੍ਪਯੁਤ੍ਤ ਚਿਤ੍ਤੇਹਿਪਿ ਕਰੋਨ੍ਤਿਯੇਵ. ਸਬ੍ਬੇਸਤ੍ਤਾ ਕਮ੍ਮਸ੍ਸਕਾਤਿਆਦਿਨਾ, ਬੁਦ੍ਧੋ ਸੋਭਗਵਾ, ਸ੍ਵਾਕ੍ਖਾਤੋ ਸੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸੋ ਸਙ੍ਘੋ, ਤਿਆਦਿਨਾ ਚਾਤਿ ਦਟ੍ਠਬ੍ਬਂ. ਤੇਨਾਹ ‘‘ਇਮਾਨਿ ਅਟ੍ਠ ਚਿਤ੍ਤਾਨੀ’’ਤਿਆਦਿਂ. ਤਤ੍ਥ ਦਸਪੁਞ੍ਞਕਿਰਿਯਵਤ੍ਥੂਨਿ ਨਾਮ ‘ਦਾਨਂ, ਸੀਲਂ, ਭਾਵਨਾ, ਅਪਚਾਯਨਂ, ਵੇਯ੍ਯਾਵਚ੍ਚਂ, ਪਤ੍ਤਿਦਾਨਂ, ਪਤ੍ਤਾਨੁਮੋਦਨਂ, ਧਮ੍ਮਸ੍ਸਵਨਾ, ਧਮ੍ਮਦੇਸਨਾ, ਦਿਟ੍ਠੁਜੁ ਕਮ੍ਮਂ,. ਤੇਹਿ ਗੁਣਿਤਾਨਿ ਵਡ੍ਢਿਤਾਨਿ. ਤਾਨਿ ਚ ਅਟ੍ਠਛਸੁ ਆਰਮ੍ਮਣੇਸੁ ਉਪ੍ਪਜ੍ਜਨ੍ਤਿ. ਤੀਣਿ ਚ ਕਮ੍ਮਾਨਿ ਕਰੋਨ੍ਤਾ ਤੇ ਹੇਵ ਅਟ੍ਠਹਿ ਕਰੋਨ੍ਤਿ. ਤਾਨਿਯੇਵ ਚ ਸਬ੍ਬਾਨਿ ਅਤ੍ਥਿ ਹੀਨਾਨਿ, ਅਤ੍ਥਿ ਮਜ੍ਝਿਮਾਨਿ, ਅਤ੍ਥਿ ਪਣੀਤਾਨਿ. ਤਸ੍ਮਾ ਪੁਨ ਅਨੁਕ੍ਕਮੇਨ ਆਰਮ੍ਮਣਾਦੀਹਿ ਵਡ੍ਢਨਂ ਕਰੋਤਿ. ਤਤ੍ਥ ‘‘ਤਾਨਿ ਠਪੇਤਬ੍ਬਾਨੀ’’ਤਿ ਸਮ੍ਬਨ੍ਧੋ. ‘‘ਸੁਦ੍ਧਿਕਾਨੀ’’ਤਿ ਅਧਿਪਤੀਹਿ ਅਮਿਸ੍ਸਿਤਾਨਿ. ‘‘ਇਤਿ ਕਤ੍ਵਾ’’ਤਿ ਇਤਿ ਮਨਸਿ ਕਰਿਤ੍ਵਾ. ਤਥਾ ਞਾਣਵਿਪ੍ਪਯੁਤ੍ਤਾਨਿ ਦ੍ਵੇਸਹਸ੍ਸਾਨਿ ਸਤਂ ਸਟ੍ਠਿ ਚ ਹੋਨ੍ਤੀਤਿ ਯੋਜਨਾ. ‘‘ਵੀਮਂਸਾਵਜ੍ਜਿਤੇਹੀ’’ਤਿ ਵੀਮਂਸਾਧਿਪਤਿ ਵਜ੍ਜਿਤੇਹਿ. ‘‘ਤਥਾਗੁਣਿਤਾਨੀ’’ਤਿ ਸਬ੍ਬਾਨਿ ਪੁਞ੍ਞਕਿਰਿਯਾਦੀਹਿ ਸਮਂ ਗੁਣਿਤਾਨਿ. ‘‘ਕੋਸਲ੍ਲੇਨਾ’’ਤਿ ਕੋਸਲ੍ਲਸਙ੍ਖਾਤੇਨ. ‘‘ਨਾਨਾਵਜ੍ਜਨਵੀਥਿਯ’’ਨ੍ਤਿ ਞਾਣਵਿਪ੍ਪਯੁਤ੍ਤ ਵੀਥੀਹਿ ਵਿਸੁਂ ਭੂਤਾਯ ਆਵਜ੍ਜਨਾਯ ਯੁਤ੍ਤ ਵੀਥਿਯਂ. ‘‘ਤੇਨੇਵਾ’’ਤਿ ਵੀਮਂਸਾਧਿਪਤਿਭੂਤੇਨ ਤੇਨੇਵ ਉਪਨਿਸ੍ਸਯਞ੍ਞਾਣੇਨ. ਏਵਂ ਸਨ੍ਤੇਪਿ ਨ ਸਕ੍ਕਾਭਵਿਤੁਨ੍ਤਿ ਸਮ੍ਬਨ੍ਧੋ.

੪੩. ਵਚਨਤ੍ਥੇ ‘‘ਰੁਜ੍ਜਨਟ੍ਠੇਨਾ’’ਤਿ ਤੁਦਨਟ੍ਠੇਨ. ‘‘ਅਹਿਤਟ੍ਠੇਨਾ’’ਤਿ ਹਿਤਵਿਰੁਦ੍ਧਟ੍ਠੇਨ. ‘‘ਅਨਿਪੁਣਟ੍ਠੇਨਾ’’ਤਿ ਅਸਣ੍ਹਾ ਸੁਖੁਮਟ੍ਠੇਨ. ‘‘ਅਨਿਟ੍ਠਵਿਪਾਕਟ੍ਠੇਨਾ’’ਤਿ ਅਨਿਟ੍ਠਂ ਵਿਪਾਕਂ ਏਤੇਸਨ੍ਤਿ ਅਨਿਟ੍ਠ ਵਿਪਾਕਾਨਿ. ਤੇਸਂ ਭਾਵੋ ਅਨਿਟ੍ਠ ਵਿਪਾਕਟ੍ਠੋ. ਤੇਨ ਅਨਿਟ੍ਠ ਵਿਪਾਕਟ੍ਠੇਨ. ‘‘ਤਪ੍ਪਟਿ ਪਕ੍ਖਤ੍ਤਾ’’ਤਿ ਰਾਗਾਦੀਹਿ ਪਟਿਪਕ੍ਖਤ੍ਤਾ. ਏਵਂ ਪਰਿਯਾਯਤ੍ਥ ਸਙ੍ਖਾਤਂ ਅਭਿਧਾਨਤ੍ਥਂ ਦਸ੍ਸੇਤ੍ਵਾ ਇਦਾਨਿ ਅਟ੍ਠਕਥਾਸੁ ਆਗਤਂ ਵਚਨਤ੍ਥਂ ਦਸ੍ਸੇਤਿ ਕੁਚ੍ਛਿਤੇਤਿਆਦਿਨਾ. ਤਤ੍ਥ ‘‘ਕੁਚ੍ਛਿਤੇ’’ਤਿ ਜੇਗੁਚ੍ਛਿਤਬ੍ਬੇ, ਨਿਨ੍ਦਿ ਤਬ੍ਬੇ ਵਾ. ਚਾਲੇਨ੍ਤਿ ਤਦਙ੍ਗਪ੍ਪਹਾਨਵਸੇਨ, ਕਮ੍ਪੇਨ੍ਤਿ ਵਿਕ੍ਖਮ੍ਭਨਪ੍ਪਹਾਨਵਸੇਨ, ਵਿਦ੍ਧਂਸੇਨ੍ਤਿ ਸਮੁਚ੍ਛੇਦਪ੍ਪਹਾਨਵਸੇਨ. ‘‘ਤਨੁਕਰਣਟ੍ਠੇਨਾ’’ਤਿ ਸਲ੍ਲਿਖਨਟ੍ਠੇਨ. ‘‘ਅਨ੍ਤਕਰਣਟ੍ਠੇਨਾ’’ਤਿ ਪਰਿਯੋਸਾਨਕਰਣਟ੍ਠੇਨ. ‘‘ਅਪਿ ਚਾ’’ਤਿਆਦਿ ਦੀਪਨੀਨਯਦਸ੍ਸਨਂ. ‘‘ਕੋਸਲ੍ਲ ਸਮ੍ਭੂਤਟ੍ਠੇਨਾ’’ਤਿ ਮਹਾਅਟ੍ਠਕਥਾਨਯੋ. ਤਤ੍ਥ, ਕੁਸਲਸ੍ਸ ਪਣ੍ਡਿਤਸ੍ਸ ਭਾਵੋ ਏਕਾਸਲ੍ਲਂ. ਞਾਣਂ. ਤੇਨ ਸਮ੍ਭੂਤਂ ਸਞ੍ਜਾਤਂ ਕੋਸਲ੍ਲ ਸਮ੍ਭੂਤਂ ਤਿਵਿਗ੍ਗਹੋ.

੪੪. ‘‘ਬਲਵਕਮ੍ਮੇਨਾ’’ਤਿ ਤਿਹੇਤੁ ਕੁਕ੍ਕਟ੍ਠ ਕਮ੍ਮੇਨ. ‘‘ਦੁਬ੍ਬਲ ਕਮ੍ਮੇਨਾ’’ਤਿ ਤਿਹੇਤੁਕੋਮਕੇਨ ਵਾ ਦ੍ਵਿਹੇਤੁਕ ਕੁਸਲ ਕਮ੍ਮੇਨ ਵਾ. ‘‘ਕੇਹਿਚਿ ਆਚਰਿਯੇਹੀ’’ਤਿ ਮੋਰਵਾਪਿ ਵਾਸੀ ਮਹਾਦਤ੍ਤਤ੍ਥੇਰਂ ਸਨ੍ਧਾਯ ਵੁਤ੍ਤਂ. ‘‘ਸਙ੍ਗਹਕਾਰੇਨਾ’’ਤਿ ਭਦ੍ਦਨ੍ਤ ਬੁਦ੍ਧਘੋਸਤ੍ਥੇਰੇਨ. ‘‘ਸਨ੍ਨਿਹਿਤ ਪਚ੍ਚਯਵਸੇਨਾ’’ਤਿ ਆਸਨ੍ਨੇ ਸਣ੍ਠਿਤਪਚ੍ਚਯ ਵਸੇਨ. ਪਚ੍ਚੁਪ੍ਪਨ੍ਨ ਪਚ੍ਚਯਵਸੇਨੇਵਾਤਿ ਵੁਤ੍ਤਂ ਹੋਤਿ. ਉਪਟ੍ਠਿਤਾਨਿ ਕਮ੍ਮਾਦੀਨਿ ਆਰਮ੍ਮਣਾਨਿ. ਪਵਤ੍ਤਾਨਿ ਮਹਾਵਿਪਾਕਾਨਿ. ‘‘ਅਵਿਪਾਕ ਸਭਾਵਤੋ’’ਤਿ ਅਵਿਪਚ੍ਚਨਸਭਾਵਤੋ. ਅਵਿਪਾਕੁਪ੍ਪਾਦਨਸਭਾਵਤੋਤਿ ਵੁਤ੍ਤਂ ਹੋਤਿ. ‘‘ਅਟ੍ਠਕਥਾਯ’’ਨ੍ਤਿ ਧਮ੍ਮਸਙ੍ਗਣਿਟ੍ਠਕਥਾਯਂ. ‘‘ਇਧਾ’’ਤਿ ਮਹਾਵਿਪਾਕਚਿਤ੍ਤੇ. ‘‘ਤਥਾ ਅਪ੍ਪਵਤ੍ਤਿਯਾ ਚਾ’’ਤਿ ਦਾਨਾਦਿਵਸੇਨ ਅਪ੍ਪਵਤ੍ਤਿਤੋ ਚ.

੪੫. ਮਹਾਕਿਰਿਯਚਿਤ੍ਤੇ. ‘‘ਉਪਰੀ’’ਤਿ ਵੀਥਿਸਙ੍ਗਹੇ ਤਦਾ ਰਮ੍ਮਣ ਨਿਯਮੇ. ‘‘ਸਯਮੇਵਾ’’ਤਿ ਅਨੁਰੁਦ੍ਧਤ੍ਥੇਰੇਨੇਵ. ‘‘ਵਕ੍ਖਤੀ’’ਤਿ ਵੁਚ੍ਚਿਸ੍ਸਤਿ. ‘‘ਯਥਾਰਹ’’ਨ੍ਤਿ ਖੀਣਾਸਵਸਨ੍ਤਾਨੇ ਉਪ੍ਪਨ੍ਨਾਨਂ ਮਹਾਕਿਰਿਯਾਨਂ ਅਰਹਾਨੁਰੂਪਂ. ਭੂਤਕਥਨ ਵਿਸੇਸਨਂ ਤੇਨ ਨਿਵਤ੍ਤੇਤਬ੍ਬਸ੍ਸ ਅਤ੍ਥਸ੍ਸ ਅਭਾਵਾਤਿ ਅਧਿਪ੍ਪਾਯੋ. ‘‘ਤਂ’’ਤਿ ਸਹੇਤੁਕਗ੍ਗਹਣਂ. ‘‘ਬ੍ਯਵਚ੍ਛੇਦਕਵਿਸੇਸਨ’’ਨ੍ਤਿ ਅਹੇਤੁਕ ਵਿਪਾਕਕਿਰਿਯ ਚਿਤ੍ਤਾਨਞ੍ਚ ਸਬ੍ਭਾਵਾਤਪ੍ਪਸਙ੍ਗਸ੍ਸ ਅਵਚ੍ਛੇਦਕਂ ਵਿਸੇਸਨਂ. ‘‘ਯਥਾ ਸਕ੍ਖਰ ਕਥਲਿਕਂਪਿ ਮਚ੍ਛਗੁਮ੍ਬਂਪਿ ਤਿਟ੍ਠਨ੍ਤਂਪਿ ਚਰਨ੍ਤਂਪਿ ਪਸ੍ਸਤੀ’’ਤਿ ਵਚਨੇ ਸਕ੍ਖਰ ਕਥਲਿਕਂ ਤਿਟ੍ਠਨ੍ਤਂ, ਮਚ੍ਛਗੁਮ੍ਬਂ ਤਿਟ੍ਠਨ੍ਤਂਪਿ ਚਰਨ੍ਤਂਪਿ ਪਸ੍ਸਤੀਤਿ ਏਵਂ ਯਥਾ ਲਾਭ ਯੋਜਨਾ ਹੋਤਿ. ਤਥਾ ਇਧ ਪੀਤਿ.

੪੬. ‘‘ਯਦਿਦ’’ਨ੍ਤਿ ਯਾ ਅਯਂ ਦੀਪਨ ਸਮਤ੍ਥਤਾ, ‘‘ਇਦਂ ਸਾਮਤ੍ਥਿਯ’’ਨ੍ਤਿ ਯੋਜਨਾ. ਅਯਂ ਸਮਤ੍ਥ ਭਾਵੋਤਿ ਅਤ੍ਥੋ. ਭੇਦਵਚਨੇ ਚੋਦਨਾਯਾਤਿ ਸਮ੍ਬਨ੍ਧੋ. ਰਚਨਾਗਾਥਾਯਂ. ‘‘ਏਤਾਨੀ’’ਤਿ ਸੋਭਣ ਕਾਮਾਵਚਰ ਚਿਤ੍ਤਾਨਿ. ‘‘ਪੁਞ੍ਞ ਪਾਪ ਕ੍ਰਿਯਾਭੇਦਾ’’ਤਿ ਪੁਞ੍ਞ ਪਾਪ ਕ੍ਰਿਯਭੇਦੇਨ.

੪੭. ਕਤਮੇ ਧਮ੍ਮਾ ਕਾਮਾਵਚਰਾ. ਹੇਟ੍ਠਤੋ ਅਵੀਚਿਨਿਰਯਂ ਪਰਿਯਨ੍ਤਂ ਕਰਿਤ੍ਵਾ ਉਪਰਿਤੋ ਪਰਨਿਮ੍ਮਿਤ ਵਸਵਤ੍ਤਿਦੇਵੇ ਅਨ੍ਤੋ ਕਰਿਤ੍ਵਾਤਿ ਏਵਂ ਪਾਲ਼ਿਯਂ ਨਿਦ੍ਦਿਟ੍ਠਤ੍ਤਾ ਇਧਕਾਮਸਦ੍ਦੇਨ ਸਹੋਕਾਸਾਕਾਮਭੂਮਿ ਵੁਚ੍ਚਤੀਤਿ ਆਹ ‘‘ਕਾਮੇ ਕਾਮਭੂਮਿਯ’’ਨ੍ਤਿ. ਪਰਿਯਾਪਨ੍ਨਾਤਿ ਪਾਠਸੇਸੋ. ‘‘ਕ੍ਰਿਯਾ ਚਾ’’ਤਿ ਏਤ੍ਥ ਚ ਸਦ੍ਦੋ ਪਨ ਸਦ੍ਦਤ੍ਥੋ. ਇਤਿ ਸਦ੍ਦੋ ਇਚ੍ਚੇਵਂ ਸਦ੍ਦਤ੍ਥੋ. ਏਤੇਨ ਪਟਿਸਿਦ੍ਧਾਤਿ ਸਮ੍ਬਨ੍ਧੋ. ‘‘ਇਧਾ’’ਤਿ ਇਮਸ੍ਮਿਂ ਚਿਤ੍ਤਸਙ੍ਗਹੇ. ‘‘ਤਸ੍ਸਾ’’ਤਿ ਸਬ੍ਬਥਾਸਦ੍ਦਸ੍ਸ. ਭਵੋ ਨਾਮ ਇਨ੍ਦ੍ਰਿਯ ਬਦ੍ਧਸਨ੍ਤਾਨਗਤੋ ਧਮ੍ਮ ਸਮੂਹੋ ਵੁਚ੍ਚਤਿ. ਇਧ ਪਨ ਕਾਮਾਵਚਰਾ ਧਮ੍ਮਾਤਿ ਪਦੇ ਕਾਮਸਦ੍ਦੋ. ਸੋ ਚ ਪਥਵਿ ਪਬ੍ਬਤਾਦੀਹਿ ਸਦ੍ਧਿਂ ਸਬ੍ਬਂ ਕਾਮਭੂਮਿਂ ਵਦਤੀਤਿ ਵੁਤ੍ਤਂ ‘‘ਭੂਮਿਪਰਿਯਾਯੋ ਚਾ’’ਤਿਆਦਿ. ‘‘ਇਨ੍ਦ੍ਰਿਯਾਨਿਨ੍ਦ੍ਰਿਯਬਦ੍ਧ ਧਮ੍ਮ ਸਮੂਹੋ’’ਤਿ ਇਨ੍ਦ੍ਰਿਯਬਦ੍ਧ ਧਮ੍ਮ ਸਮੂਹੋ ਸਤ੍ਤਸਨ੍ਤਾਨਾਗਤੋ, ਅਨਿਨ੍ਦ੍ਰਿਯਬਦ੍ਧ ਧਮ੍ਮ ਸਮੂਹੋ ਪਥਵਿ ਪਬ੍ਬਤਾਦਿ ਗਤੋ. ਤਤ੍ਥ ਜੀਵਿਤਿਨ੍ਦ੍ਰਿਯੇਨ ਅਨਾਬਦ੍ਧੋ ਅਨਾਯਤ੍ਤੋ ਅਨਿਨ੍ਦ੍ਰਿਯਬਦ੍ਧੋਤਿ.

ਇਤਿਕਾਮਚਿਤ੍ਤਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੪੮. ਰੂਪਾਵਚਰਚਿਤ੍ਤੇ. ‘‘ਸਮੁਦਿਤੇਨਾ’’ਤਿ ਪਞ੍ਚਙ੍ਗ ਸਮੁਦਿਤੇਨ. ਪਞ੍ਚਨ੍ਨਂ ਅਙ੍ਗਾਨਂ ਏਕਤੋ ਸਾਮਗ੍ਗਿਭੂਤੇਨਾਤਿ ਅਤ੍ਥੋ. ਪਞ੍ਚਨ੍ਨਞ੍ਹਿ ਏਕਤੋ ਸਾਮਗ੍ਗਿਯਂ ਸਤਿਯੇਵ ਅਪ੍ਪਨਾ ਹੋਤਿ, ਨੋ ਅਸਤਿ. ਸਾਮਗ੍ਗਿਯਨ੍ਤਿ ਚ ਸੁਟ੍ਠੁ ਬਲਵਤਾਯ ਸਮਗ੍ਗਭਾਵੇਤਿ ਅਤ੍ਥੋ. ‘‘ਪਟਿਪਜ੍ਜਿਤਬ੍ਬਤ੍ਤਾ’’ਤਿ ਪਤ੍ਤਬ੍ਬਤ੍ਤਾ. ਝਾਨਂ ਦੁਵਿਧਂ ਆਰਮ੍ਮਣੂਪਨਿਜ੍ਝਾਨਞ੍ਚ ਲਕ੍ਖਣੂ ਪਨਿਜ੍ਝਾਨਞ੍ਚਾਤਿ ਆਹ ‘‘ਕਸਿਣਾਦਿਕਸ੍ਸਾ’’ਤਿਆਦਿਂ. ਇਧ ਪਨ ਆਰਮ੍ਮਣੂਪਨਿਜ੍ਝਾਨਂ ਅਧਿਪ੍ਪੇਤਂ. ਉਪਨਿਜ੍ਝਾਨਨ੍ਤਿ ਚ ਕਸਿਣ ਨਿਮਿਤ੍ਤਾਦਿਕਂ ਆਰਮ੍ਮਣਂ ਚੇਤਸਾ ਉਪਗਨ੍ਤ੍ਵਾਨਿਜ੍ਝਾਨਂ ਓਲੋਕਨਂ. ਝਾਨਸਦ੍ਦਸ੍ਸਝਾਪਨਤ੍ਥੋਪਿ ਸਮ੍ਭਵਤੀਤਿ ਵੁਤ੍ਤਂ ‘‘ਪਚ੍ਚਨੀਕ ਧਮ੍ਮਾਨਞ੍ਚ ਝਾਪਨਤੋ’’ਤਿ. ਅਗ੍ਗਿਨਾ ਵਿਯ ਕਟ੍ਠਾਨਂ ਕਿਲੇਸਾਨਂ ਦਯ੍ਹਨਤੋਤਿ ਅਤ੍ਥੋ. ਏਕਗ੍ਗਤਾ ਏਵ ਸਾਤਿਸ੍ਸਯ ਯੁਤ੍ਤਾ ਅਪ੍ਪਨਾਪਤ੍ਤਕਾਲੇਤਿ ਅਧਿਪ੍ਪਾਯੋ. ਪੁਬ੍ਬਭਾਗੇ ਪਨ ਪਥਮਜ੍ਝਾਨੇ ਵਿਤਕ੍ਕਸ੍ਸ ਬਲਵਭਾਵੋ ਇਚ੍ਛਿਤਬ੍ਬੋ. ‘‘ਸਾਹੀ’’ਤਿਆਦਿਨਾ ਤਦਤ੍ਥਂ ਵਿਵਰਤਿ. ਸਾਹਿ ਏਕਗ੍ਗਤਾਤਿ ਚ ਵੁਚ੍ਚਤੀਤਿ ਸਮ੍ਬਨ੍ਧੋ. ਏਕੋ ਅਤ੍ਤਾਸਭਾਵੋ ਅਸ੍ਸਾਤਿ ਏਕਤ੍ਤਂ. ਏਕਤ੍ਤਂ ਆਰਮ੍ਮਣਮਸ੍ਸਾਤਿ ਏਕਤ੍ਤਾ ਰਮ੍ਮਣਾ. ਏਕਗ੍ਗਤਾ. ਤਸ੍ਸ ਭਾਵੋਤਿ ਵਿਗ੍ਗਹੋ.

ਅਗ੍ਗਸਦ੍ਦੋ ਕੋਟਿ ਅਤ੍ਥੋ. ਕੋਟ੍ਠਾਸਟ੍ਠੋਵਾ. ‘‘ਤਥਾ ਪਵਤ੍ਤਨੇ’’ਤਿ ਚਿਤ੍ਤਸ੍ਸ ਏਕਗ੍ਗਭਾਵੇਨ ਪਵਤ੍ਤਿਯਂ. ‘‘ਆਧਿਪ੍ਪਚ੍ਚਗੁਣਯੋਗੇਨਾ’’ਤਿ ਅਧਿਪਤਿਭਾਵਗੁਣਯੋਗੇਨ. ਇਨ੍ਦ੍ਰਿਯਪਚ੍ਚਯਤਾਗੁਣਯੋਗੇਨਾਤਿ ਵੁਤ੍ਤਂ ਹੋਤਿ. ਸਾਯੇਵ ਏਕਗ੍ਗਤਾ ਏਕਗ੍ਗਤਾ, ਸਮਾਧੀ,ਤਿ ਚ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਸਮਾਧੀ’’ਤਿ ਪਦਸ੍ਸ-ਸਂ-ਆਧੀ-ਤਿ-ਵਾ, ਸਮਆਧੀਤਿ-ਵਾ, ਦ੍ਵਿਧਾ ਪਦਚ੍ਛੇਦੋ. ਤਤ੍ਥ ਸਂਉਪਸਗ੍ਗੋ ਸਮ੍ਮਾਸਦ੍ਦਤ੍ਥੋ. ਸਮਸਦ੍ਦੋ ਪਨ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਤੀਤਿਆਦੀਸੁ ਵਿਯ ਨਾਮਿਕਸਦ੍ਦੋਤਿ ਦ੍ਵਿਧਾ ਵਿਕਪ੍ਪਂ ਦਸ੍ਸੇਨ੍ਤੋ ‘‘ਸਾਯੇਵ ਚਿਤ੍ਤ’’ਨ੍ਤਿਆਦਿਮਾਹ. ਸਾਯੇਵ ਚਿਤ੍ਤਂ-ਸਮ੍ਮਾ ਚ ਆਧਿਯਤੀਤਿ ਸਮਾਧਿ, ਸਾਯੇਵ ਚਿਤ੍ਤਂ-ਸਮਞ੍ਚ ਆਧਿਯਤੀਤਿ ਸਮਾਧੀਤਿ ਦ੍ਵਿਧਾ ਵਿਕਪ੍ਪੋ. ਤਤ੍ਥ ਸਮ੍ਮਾ ਚਾਤਿ ਸੁਨ੍ਦਰੇਨ. ਆਧਿਯਤੀਤਿ ਆਦਹਤਿ. ਆਦਹਨਞ੍ਚ ਠਪਨਮੇਵਾਤਿ ਵੁਤ੍ਤਂ ‘‘ਠਪੇਤੀ’’ਤਿ. ਸਮਞ੍ਚਾਤਿ ਅਵਿਸਮਞ੍ਚ. ‘‘ਤਤ੍ਥੇਵਾ’’ਤਿ ਤਸ੍ਮਿਂ ਆਰਮ੍ਮਣੇ ਏਵ. ‘‘ਲੀਨੁਦ੍ਧਚ੍ਚਾਭਾਵਾ ਪਾਦਨੇਨਾ’’ਤਿ ਲੀਨਸ੍ਸ ਚ ਉਦ੍ਧਚ੍ਚਸ੍ਸ ਚ ਅਭਾਵੋ ਲੀਨੁਦ੍ਧਚ੍ਚਾਭਾਵੋ. ਤਸ੍ਸ ਆਪਾਦਨਂ ਆਪਜ੍ਜਾਪਨਨ੍ਤਿ ਵਿਗ੍ਗਹੋ. ਵਿਵਿਧੇਨ ਚਿਤ੍ਤਸ੍ਸ ਸਂਹਰਣਂ ਵਿਸਾਹਾਰੋ. ਨ ਵਿਸਾਹਾਰੋ ਅਵਿਸਾਹਾਰੋ. ਸਾਯੇਵ ਚ ਨਿਦ੍ਦਿਟ੍ਠਾ. ਇਤਿ ਏਵਂ ਇਮੇਸੁ ਦ੍ਵੀਸੁ ਅਤ੍ਥੇਸੁ ਏਕਗ੍ਗਤਾ ਏਵ ਸਾਤਿਸ੍ਸਯਯੁਤ੍ਤਾਤਿ ਯੋਜੇਤਬ੍ਬਂ. ਏਵਂ ਪਨ ਸਤਿ, ਏਕਗ੍ਗਤਾ ਏਵ ਝਾਨਨ੍ਤਿ ਵਤ੍ਤਬ੍ਬਾ, ਨ ਵਿਤਕ੍ਕਾਦਯੋਤਿ ਚੋਦਨਂ ਪਰਿਹਰਨ੍ਤੋ ‘‘ਵਿਤਕ੍ਕਾਦਯੋਪਨਾ’’ਤਿਆਦਿਮਾਹ. ਅਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਪਨਸਦ੍ਦੋ ਪਕ੍ਖਨ੍ਤਰਤ੍ਥੋ. ਤਸ੍ਸਾ ਏਕਗ੍ਗਤਾਯ. ‘‘ਸਾ ਤਿਸ੍ਸਯ’’ਨ੍ਤਿ ਅਤਿਸ੍ਸਯੇਨ ਸਹ. ‘‘ਓਸਕ੍ਕਿਤੁ’’ਨ੍ਤਿ ਸਂਸੀਦਿਤੁਂ. ‘‘ਨਂ’’ਤਿ ਚਿਤ੍ਤਂ. ‘‘ਸਂਸਪ੍ਪਿਤੁ’’ਨ੍ਤਿ ਏਵਂ ਨੁ ਖੋ ਅਞ੍ਞਥਾਨੁ ਖੋਤਿ ਦ੍ਵਿਧਾ ਚਞ੍ਚਲਿਤੁਂ. ‘‘ਉਕ੍ਕਣ੍ਠਿਤੁ’’ਨ੍ਤਿ ਅਞ੍ਞਾਭਿਮੁਖੀ ਭਵਿਤੁਂ. ਆਰਮਿਤੁਨ੍ਤਿ ਵੁਤ੍ਤਂ ਹੋਤਿ. ਲਦ੍ਧਂ ਸਾਤਂ ਯੇਨਾਤਿ ਲਦ੍ਧਸ੍ਸਾਤਂ. ‘‘ਸਾਤਂ’’ਤਿ ਸਾਰਤ੍ਤਂ. ‘‘ਉਪਬ੍ਰੂਹਿਤਂ’’ਤਿ ਭੁਸਂਵਡ੍ਢਿਤਂ. ‘‘ਸਨ੍ਤ ਸਭਾਵਤ੍ਤਾ’’ਤਿ ਉਪਸਨ੍ਤ ਸਭਾਵਤ੍ਤਾ. ‘‘ਤਥਾ ਅਨੁਗ੍ਗਹਿਤਾ’’ਤਿ ਆਰਮ੍ਮਣਾਭਿਮੁਖਕਰਣਾਦਿਵਸੇਨ ਅਨੁਗ੍ਗ ਹਿਤਾ. ਸਮਾਧਿਸ੍ਸ ਕਾਮਚ੍ਛਨ੍ਦਨੀਵਰਣਪ੍ਪਟਿਪਕ੍ਖਤ੍ਤਾ ‘‘ਸਯਂ…ਪੇ… ਨੀਵਾਰੇਤ੍ਵਾ’’ਤਿ ਵੁਤ੍ਤਂ. ‘‘ਨਿਚ੍ਚਲਂਠਤ੍ਵਾ’’ਤਿ ਅਪ੍ਪਨਾਕਿਚ੍ਚਮਾਹ.

ਏਵਂ ਉਪਨਿਜ੍ਝਾਨਤ੍ਥਂ ਦਸ੍ਸੇਤ੍ਵਾ ਝਾਪਨਤ੍ਥਂ ਦਸ੍ਸੇਨ੍ਤੋ ‘‘ਤੇਸੁ ਚਾ’’ਤਿਆਦਿਮਾਹ. ‘‘ਤਪ੍ਪਚ੍ਚਨੀਕਾ’’ਤਿ ਤੇਸਂ ਝਾਨਙ੍ਗ ਧਮ੍ਮਾਨਂ ਪਚ੍ਚਨੀਕਾ ਪਟਿਪਕ੍ਖਾ. ‘‘ਮਨਸ੍ਮਿਂ ਪੀ’’ਤਿ ਮਨੋਦ੍ਵਾਰੇਪਿ. ਪਗੇਵ ਕਾਯਵਚੀਦ੍ਵਾਰੇਸੂਤਿ ਏਵਂ ਸਮ੍ਭਾਵਨਤ੍ਥੋ ਚੇਤ੍ਥ ਪਿਸਦ੍ਦੋ. ਅਪਿਸਦ੍ਦੋਪਿ ਯੁਜ੍ਜਤਿ. ‘‘ਝਾਪਿਤਾ ਨਾਮ ਹੋਨ੍ਤੀ’’ਤਿ ਝਾਨਙ੍ਗ ਧਮ੍ਮਗ੍ਗੀਹਿ ਦਡ੍ਢਾਨਾਮ ਹੋਨ੍ਤਿ. ‘‘ਏਵਂ ਸਨ੍ਤੇਪਿ ਤੇਸਂ ਸਮੁਦਾਯੇ ਏਵ ਝਾਨ ਵੋਹਾਰੋ ਸਿਦ੍ਧੋ’’ਤਿ ਯੋਜਨਾ. ‘‘ਧਮ੍ਮ ਸਾਮਗ੍ਗਿਪਧਾਨ’’ਨ੍ਤਿ ਝਾਨਟ੍ਠਾਨੇ ਝਾਨਙ੍ਗ ਧਮ੍ਮਾਨਂ ਮਗ੍ਗਟ੍ਠਾਨੇ ਮਗ੍ਗਙ੍ਗ ਧਮ੍ਮਾਨਂ ਬੋਧਿਟ੍ਠਾਨੇ ਬੋਜ੍ਝਙ੍ਗ ਧਮ੍ਮਾਨਂ ਸਮਗ੍ਗਭਾਵਪ੍ਪਧਾਨਂ.

ਏਵਂ ਸਙ੍ਗਹਕਾਰਾਨਂ ਮਤਿਯਾ ਝਾਨਂ ਵਤ੍ਵਾ ਇਦਾਨਿ ਅਪਰੇਸਾਨਂ ਮਤਿਯਾ ਤਂ ਦਸ੍ਸੇਤੁਂ ‘‘ਅਪਰੇ’’ਤਿਆਦਿਮਾਹ. ਅਪਰੇ ਪਨ ਵਦਨ੍ਤੀਤਿ ਸਮ੍ਬਨ੍ਧੋ. ਤਤ੍ਥ ‘‘ਯਥਾ ਸਕਂਕਿਚ੍ਚਾਨੀ’’ਤਿ ਸਸ੍ਸ ਇਦਂ ਸਕਂ. ਸਸ੍ਸਾਤਿ ਅਤ੍ਤਨੋ. ਇਦਨ੍ਤਿ ਸਨ੍ਤਕਂ. ਯਾਨਿਯਾਨਿ ਅਤ੍ਤਨੋ ਸਨ੍ਤਕਾਨੀਤਿ ਅਤ੍ਥੋ. ‘‘ਇਤੀ’’ਤਿ ਤਸ੍ਮਾ. ‘‘ਪਟ੍ਠਾਨੇ ਝਾਨਪਚ੍ਚਯਂ ਪਤ੍ਵਾ…ਪੇ… ਸਾਧੇਨ੍ਤਿਯੇਵ’’. ਵੁਤ੍ਤਞ੍ਹਿ ਤਤ੍ਥ. ਝਾਨਪਚ੍ਚਯੋਤਿ ਝਾਨਙ੍ਗਾਨਿਝਾਨਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂ ਸਮੁਟ੍ਠਾਨਾਨਞ੍ਚ ਰੂਪਾਨਂ ਝਾਨਪਚ੍ਚਯੇਨ ਪਚ੍ਚਯੋ. ਮਗ੍ਗਪਚ੍ਚਯੋਤਿ ਮਗ੍ਗਙ੍ਗਾਨਿ ਮਗ੍ਗਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂ ਸਮੁਟ੍ਠਾਨਾਨਞ੍ਚ ਰੂਪਾਨਂ ਮਗ੍ਗਪਚ੍ਚਯੇਨ ਪਚ੍ਚਯੋਤਿ. ‘‘ਪਞ੍ਚਸਮੁਦਿਤਾਦੀਨੀ’’ਤਿ ਪਞ੍ਚਸਮੂਹ ਦਸਸਮੂਹਾਨਿ. ‘‘ਪਥਮਜ੍ਝਾਨਾਦਿਭਾਵਸ੍ਸੇਵਚਾ’’ਤਿ ਪਥਮਜ੍ਝਾਨਾਦਿ ਨਾਮਲਾਭਸ੍ਸੇਵਚਾਤਿ ਅਧਿਪ੍ਪਾਯੋ. ‘‘ਝਾਨਭਾਵਸ੍ਸਾ’’ਤਿ ਝਾਨਨਾਮਲਾਭਸ੍ਸ. ‘‘ਤਥਾਵਿਧਕਿਚ੍ਚਵਿਸੇਸਾਭਾਵਾ’’ਤਿ ਤਥਾਵਿਧਾਨਂ ਆਰਮ੍ਮਣਾਭਿਨਿਰੋਪਨਾਦੀਨਂ ਕਿਚ੍ਚ ਵਿਸੇਸਾਨਂ ਅਭਾਵਤੋ.

੪੯. ‘‘ਏਤ੍ਥ ਸਿਯਾ’’ਤਿ ਏਤਸ੍ਮਿਂ ਠਾਨੇ ਪੁਚ੍ਛਾਸਿਯਾ. ‘‘ਅਙ੍ਗ ਭੇਦੋ’’ਤਿ ਪਥਮਜ੍ਝਾਨੇ ਪਞ੍ਚ ਅਙ੍ਗਾਨਿ, ਦੁਤੀਯਜ੍ਝਾਨੇ ਚਤ੍ਤਾਰਿ ਅਙ੍ਗਾਨੀ ਤਿਆਦਿਕੋ ਅਙ੍ਗਭੇਦੋ. ‘‘ਪੁਗ੍ਗਲਜ੍ਝਾਸਯੇਨਾ’’ਤਿ ਪੁਗ੍ਗਲਸ੍ਸ ਇਚ੍ਛਾਵਿਸੇਸੇਨ. ਇਤਿ ਅਯਂ ਵਿਸਜ੍ਜਨਾ. ‘‘ਸੋ’’ਤਿ ਸੋ ਪੁਗ੍ਗਲੋ. ‘‘ਹੀ’’ਤਿ ਵਿਤ੍ਥਾਰ ਜੋਤਕੋ. ਵਿਤਕ੍ਕੋ ਸਹਾਯੋ ਯਸ੍ਸਾਤਿ ਵਿਤਕ੍ਕਸਹਾਯੋ. ‘‘ਵਿਤਕ੍ਕੇ ਨਿਬ੍ਬਿਨ੍ਦਤੀ’’ਤਿ ਓਲ਼ਾਰਿਕੋਵਤਾਯਂ ਵਿਤਕ੍ਕੋ, ਨੀਵਰਣਾਨਂ ਆਸਨ੍ਨੇ ਠਿਤੋਤਿ ਏਵਂ ਵਿਤਕ੍ਕੇ ਆਦੀਨਵਂ ਦਿਸ੍ਵਾ ਨਿਬ੍ਬਿਨ੍ਦਤਿ. ਤਸ੍ਸ ਅਜ੍ਝਾਸਯੋਤਿ ਸਮ੍ਬਨ੍ਧੋ. ਵਿਤਕ੍ਕਂ ਵਿਰਾਜੇਤਿ ਵਿਗਮੇਤਿ ਅਤਿਕ੍ਕਮਾਪੇਤੀਤਿ ਵਿਤਕ੍ਕਵਿਰਾਗੋ. ਵਿਤਕ੍ਕਵਿਰਾਗੋ ਚ ਸੋ ਭਾਵਨਾ ਚਾਤਿ ਸਮਾਸੋ. ‘‘ਉਤ੍ਤਰੁਤ੍ਤਰਜ੍ਝਾਨਾਧਿਗਮਨੇ’’ਤਿ ਉਤ੍ਤਰਿ ਉਤ੍ਤਰਿਝਾਨਪ੍ਪਟਿਲਾਭੇ. ਅਜ੍ਝਾਸਯ ਬਲੇਨ ਪਾਦਕਜ੍ਝਾਨਸਦਿਸਂ ਨ ਹੋਤੀਤਿ ਸਮ੍ਬਨ੍ਧੋ. ਚੇਤੋਪਣਿਧਿ ਇਜ੍ਝਤੀਤਿ ਸਮ੍ਬਨ੍ਧੋ. ‘‘ਵਿਸੁਦ੍ਧਤ੍ਤਾ’’ਤਿ ਸੀਲਵਿਸੁਦ੍ਧਤ੍ਤਾ.

੫੦. ਸਙ੍ਖਾਰ ਭੇਦਵਿਚਾਰਣਾਯਂ. ‘‘ਸਙ੍ਖਾਰ ਭੇਦੋ ਨ ਵੁਤ੍ਤੋ’’ਤਿ ਪਥਮਜ੍ਝਾਨ ਕੁਸਲ ਚਿਤ੍ਤਂ ਅਸਙ੍ਖਾਰਿਕਮੇਕਂ, ਸਸਙ੍ਖਾਰਿਕਮੇਕਨ੍ਤਿਆਦਿਨਾ ਨ ਵੁਤ੍ਤੋਤਿ ਅਧਿਪ੍ਪਾਯੋ. ‘‘ਸੋ’’ਤਿ ਸਙ੍ਖਾਰ ਭੇਦੋ. ‘‘ਸਿਦ੍ਧਤ੍ਤਾ’’ਤਿ ਸਙ੍ਖਾਰ ਭੇਦਸ੍ਸ ਸਿਦ੍ਧਤ੍ਤਾ. ਕਥਂ ਸਿਦ੍ਧੋਤਿ ਆਹ ‘‘ਤਥਾਹੀ’’ਤਿਆਦਿਂ. ਸੁਖਾ ਪਟਿਪਦਾ ਯੇਸਂ ਤਾਨਿ ਸੁਖਪ੍ਪਟਿਪਦਾਨਿ. ਤੇਸਂ ਭਾਵੋਤਿ ਵਿਗ੍ਗਹੋ. ‘‘ਯੋ’’ਤਿ ਯੋਗੀਪੁਗ੍ਗਲੋ. ‘‘ਆਦਿਤੋ’’ਤਿਆਦਿਮ੍ਹਿ. ‘‘ਵਿਕ੍ਖਮ੍ਭੇਨ੍ਤੋ’’ਤਿ ਵਿਮੋਚੇਨ੍ਤੋ ਵਿਯੋਗਂ ਕਰੋਨ੍ਤੋ. ਦੁਕ੍ਖੇਨ ਵਿਕ੍ਖਮ੍ਭੇਤੀਤਿ ਸਮ੍ਬਨ੍ਧੋ. ‘‘ਕਾਮਾਦੀਨਵਦਸ੍ਸਨਾਦਿਨਾ’’ਤਿ ਅਙ੍ਗਾਰਕਾਸੂ ਪਮਾਕਾਮਾਬਹੁਦੁਕ੍ਖਾਬਹੁਪਾਯਾਸਾ, ਆਦੀਨਵੋ ਏਤ੍ਥਭਿਯ੍ਯੋਤਿਆਦਿਨਾ ਕਾਮੇਸੁਆਦੀਨਵਂ ਦਿਸ੍ਵਾ. ਆਦਿਸਦ੍ਦੇਨ ਵਿਤਕ੍ਕਾਦੀਸੁ ਆਦੀਨਵਦਸ੍ਸਨਂ ਸਙ੍ਗਯ੍ਹਤਿ. ‘‘ਤੇਨੇਵਾ’’ਤਿ ਕਾਮਾਦੀਨਵਦਸ੍ਸਨਾਦਿਨਾ ਏਵ. ਏਤ੍ਥ ਅਭਿਞ੍ਞਾਭੇਦੇਨ ਸਙ੍ਖਾਰ ਭੇਦੋ ਨ ਵਤ੍ਤਬ੍ਬੋ, ਪਟਿਪਦਾ ਭੇਦੇਨੇਵ ਵਤ੍ਤਬ੍ਬੋਤਿ ਦਸ੍ਸੇਤੁਂ ‘‘ਖਿਪ੍ਪਾਭਿਞ੍ਞਜ੍ਝਾਨਾਨਂਪੀ’’ਤਿਆਦਿ ਵੁਤ੍ਤਂ. ਤਤ੍ਥ, ਅਭਿਜਾਨਨਂ ਅਭਿਞ੍ਞਾ. ਖਿਪ੍ਪਾਸੀਘਾ ਅਭਿਞ੍ਞਾ ਯੇਸਂ ਤਾਨਿ ਖਿਪ੍ਪਾਭਿਞ੍ਞਾਨਿ. ਦਨ੍ਧਾ ਅਸੀਘਾ ਅਭਿਞ੍ਞਾ ਯੇਸਂ ਤਾਨਿ ਦਨ੍ਧਾਭਿਞ੍ਞਾਨਿ. ਝਾਨਾਨਿ. ‘‘ਯਦਿ ਏਵ’’ਨ੍ਤਿ ਏਵਂ ਪਟਿਪਦਾ ਭੇਦੇਨ ਸਙ੍ਖਾਰ ਭੇਦੋ ਯਦਿ ਸਿਯਾਤਿ ਅਤ੍ਥੋ. ‘‘ਵਲ਼ਞ੍ਜਨਕਾਲੇ’’ਤਿ ਸਮਾਪਤ੍ਤਿ ਸਮਾਪਜ੍ਜਨਕਾਲੇ. ਪਟਿਬਨ੍ਧਕਾ ਨਾਮ ਅਨ੍ਤਰਾਯਿਕਾ. ‘‘ਸਨ੍ਨਿਹਿਤਾਸਨ੍ਨਿਹਿਤਵਸੇਨਾ’’ਤਿ ਆਸਨ੍ਨੇ ਸਣ੍ਠਿਤਾਸਣ੍ਠਿਤਵਸੇਨ. ਸੁਦ੍ਧਂ ਵਿਪਸ੍ਸਨਾਯਾਨਂ ਯੇਸਂ ਤੇ ਸੁਦ੍ਧਵਿਪਸ੍ਸਨਾਯਾਨਿਕਾ. ‘‘ਸੁਦ੍ਧਂ’’ਤਿ ਸਮਥਜ੍ਝਾਨੇਨ ਅਸਮ੍ਮਿਸ੍ਸਂ. ‘‘ਸਤ੍ਥੇਨ ਹਨਿਤ੍ਵਾ’’ਤਿ ਪਰੇ ਨ ਸਤ੍ਥੇਨ ਹਨਨਤੋ ਛਿਨ੍ਦਨਤੋ. ‘‘ਸਹਸਾ’’ਤਿ ਸੀਘਤਰੇਨ. ‘‘ਮਰਨ੍ਤਾਨਂ ਉਪ੍ਪਨ੍ਨਂ’’ਤਿ ਮਰਣਾਸਨ੍ਨਕਾਲੇ ਉਪ੍ਪਨ੍ਨਂਤਿ ਅਧਿਪ੍ਪਾਯੋ. ਅਨਾਗਾਮਿਨੋ ਹਿ ਸੁਦ੍ਧ ਵਿਪਸ੍ਸਨਾਯਾਨਿਕਾਪਿ ਸਮਾਨਾ ਸਮਾਧਿਸ੍ਮਿਂ ਪਰਿਪੂਰਕਾਰਿਨੋ ਨਾਮ ਹੋਨ੍ਤਿ. ਇਚ੍ਛਨ੍ਤੇ ਸੁਸਤਿ ਕਿਞ੍ਚਿ ਨਿਮਿਤ੍ਤਂ ਆਰਬ੍ਭਮਨਸਿਕਾਰ ਮਤ੍ਤੇਨਪਿ ਝਾਨਂ ਇਜ੍ਝਤਿ. ਤੇਨਾਹ ‘‘ਤਂਪਿ ਮਗ੍ਗਸਿਦ੍ਧਗਤਿਕ’’ਨ੍ਤਿ. ‘‘ਰੂਪੀਬ੍ਰਹ੍ਮਲੋਕੇ’’ਤਿ ਇਦਂ ਅਟ੍ਠਨ੍ਨਂ ਸਮਾਪਤ੍ਤੀਨਂਪਿ ਤਤ੍ਥ ਪਾਕਤਿਕਭਾਵਂ ਸਨ੍ਧਾਯ ਵੁਤ੍ਤਂ. ਅਰੂਪੀ ਬ੍ਰਹ੍ਮਲੋਕੇ ਪਨ ਏਕਾ ਏਵ ਸਮਾਪਤ੍ਤਿ ਪਾਕਤਿਕਾਸਮ੍ਭਵਤਿ. ਉਪਪਤ੍ਤਿਸਿਦ੍ਧਜ੍ਝਾਨਾਨਂ ਭਵਨ੍ਤਰੇ ਸਨ੍ਨਿਹਿਤ ਪਚ੍ਚਯਭੇਦੇਨ ਸਙ੍ਖਾਰ ਭੇਦੋ ਵੁਤ੍ਤੋ, ਸੋ ਕਥਂ ਪਚ੍ਚੇਤਬ੍ਬੋਤਿ ਆਹ ‘‘ਏਕਸ੍ਮਿਂ ਭਵੇਪਿ…ਪੇ… ਯੁਤ੍ਤਾਨਿ ਹੋਨ੍ਤੀ’’ਤਿ. ਏਕਸ੍ਮਿਂ ਭਵੇਸਬ੍ਬਪ੍ਪਥਮਂ ਲਦ੍ਧਕਾਲੇ ਸਙ੍ਖਾਰ ਭੇਦਸ੍ਸ ਆਸਨ੍ਨਤ੍ਤਾ ਵਲ਼ਞ੍ਜਨਕਾਲੇਪਿ ਸੋ ਏਵ ਸਙ੍ਖਾਰ ਭੇਦੋ ਸਿਯਾਤਿ ਆਸਙ੍ਕਾਸਮ੍ਭਵਤੋ ਇਦਂ ਵੁਤ੍ਤਂ. ਤੇਨ ਭਵਨ੍ਤਰੇ ਉਪਪਤ੍ਤਿ ਸਿਦ੍ਧਜ੍ਝਾਨਾਨਂ ਸਨ੍ਨਿਹਿਤ ਪਚ੍ਚਯਭੇਦੇਨ ਸਙ੍ਖਾਰਭੇਦੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਇਦਾਨਿ ਤਾਨਿ ਮਗ੍ਗ ਸਿਦ੍ਧਜ੍ਝਾਨ ਉਪਪਤ੍ਤਿ ਸਿਦ੍ਧਜ੍ਝਾਨਾਨਿ ਸਨ੍ਨਿਹਿਤਪਚ੍ਚਯਂ ਅਨਪੇਕ੍ਖਿਤ੍ਵਾ ਮਗ੍ਗਕ੍ਖਣ ਉਪਪਤ੍ਤਿਕ੍ਖਣੇਸੁ ਸਿਦ੍ਧਕਾਲੇ ਝਾਨੁਪ੍ਪਤ੍ਤਿ ਪਟਿਪਦਾਯ ਏਵ ਸਬ੍ਬਸੋ ਅਭਾਵਂ ਗਹੇਤ੍ਵਾ ਅਪਰਂ ਵਿਕਪ੍ਪਂ ਦਸ੍ਸੇਤੁਂ ‘‘ਝਾਨੁਪ੍ਪਤ੍ਤਿ ਪਟਿਪਦਾ ਰਹਿਤਤ੍ਤਾ ਵਾ’’ਤਿਆਦਿ ਵੁਤ੍ਤਂ. ਏਵਂ ਮਹਗ੍ਗਤਝਾਨਾਨਂ ਅਟ੍ਠਕਥਾਵਸੇਨ ਸਿਦ੍ਧਂ ਸਙ੍ਖਾਰ ਭੇਦਂ ਵਤ੍ਵਾ ਇਦਾਨਿ ਪਾਲ਼ਿਵਸੇਨਾਪਿ ਸੋ ਸਿਦ੍ਧੋ ਯੇਵਾਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਆਰਦ੍ਧਂ. ਦੁਕ੍ਖਪ੍ਪਟਿਪਦਾਪੁਬ੍ਬਕਾਨਂ ਦ੍ਵਿਨ੍ਨਂ ਦਨ੍ਧਾਭਿਞ੍ਞਖਿਪ੍ਪਾਭਿਞ੍ਞਸਮਾਧੀਨਂ. ‘‘ਏਤ੍ਤਾਵਤਾ’’ਤਿ ਏਤਂ ਪਰਿਮਾਣਂ ਅਸ੍ਸਾਤਿ ਏਤ੍ਤਾਵਂ. ਏਤ੍ਤਾਵਨ੍ਤੇਨ. ਏਤ੍ਥ ਸਿਯਾ, ਕਸ੍ਮਾ ਇਧ ਸਙ੍ਖਾਰਭੇਦੋ ਨ ਵੁਤ੍ਤੋਤਿਆਦਿਨਾ ਵਚਨਕ੍ਕਮੇਨ ਸਿਦ੍ਧੋ ਹੋਤੀਤਿ ਸਮ੍ਬਨ੍ਧੋ. ਸੇਸਂ ਸੁਵਿਞ੍ਞੇਯ੍ਯਂ.

੫੧. ਵਿਭਾਵਨਿਪਾਠੇ. ਪਰਿਕਮ੍ਮਂ ਨਾਮ ਪਥਵੀ, ਪਥਵੀ, ਆਪੋ, ਆਪੋ-ਤਿਆਦਿਕਂ, ਰੂਪਂ ਅਨਿਚ੍ਚਂ, ਰੂਪਂ ਦੁਕ੍ਖਂ, ਰੂਪਂ ਅਨਤ੍ਤਾ-ਤਿਆਦਿਕਞ੍ਚਭਾਵਨਾਪਰਿਕਮ੍ਮਂ ਅਧਿਕਾਰੋ ਨਾਮ ਪੁਬ੍ਬਭਵੇਕਤਭਾਵਨਾਕਮ੍ਮਂ. ਪੁਬ੍ਬਭਵੇਝਾਨਮਗ੍ਗਫਲਾਨਿਪਤ੍ਥੇਤ੍ਵਾ ਕਤਂ ਦਾਨਸੀਲਾਦਿ ਪੁਞ੍ਞਕਮ੍ਮਞ੍ਚ. ‘‘ਇਦਂ ਤਾਵਨਯੁਜ੍ਜਤੀ’’ਤਿ ਏਤ੍ਥ ਤਾਵਸਦ੍ਦੋ ਵਤ੍ਤਬ੍ਬਨ੍ਤਰਾਪੇਕ੍ਖਨੇ ਨਿਪਾਤੋ. ਤੇਨ ਅਪਰਂਪਿ ਵਤ੍ਤਬ੍ਬਂ ਅਤ੍ਥੀਤਿ ਦੀਪੇਤਿ. ਪੁਬ੍ਬਾਭਿਸਙ੍ਖਾਰੋ ਦੁਵਿਧੋ ਪਕਤਿ ਪੁਬ੍ਬਾਭਿਸਙ੍ਖਾਰੋ, ਪਯੋਗਪੁਬ੍ਬਾਭਿਸਙ੍ਖਾਰੋਤਿ. ਤਤ੍ਥ ਪਰਿਕਮ੍ਮ ਪੁਬ੍ਬਾਭਿਸਙ੍ਖਾਰੋ ਪਕਤਿ ਪੁਬ੍ਬਾਭਿਸਙ੍ਖਾਰੋ ਨਾਮ, ਅਯਂ ਪਕਤਿ ਪਚ੍ਚਯਗਣੋ ਏਵ. ਪੁਬ੍ਬੇ ਵੁਤ੍ਤੋ ਪੁਬ੍ਬਪ੍ਪਯੋਗੋ ਪਯੋਗਪੁਬ੍ਬਾਭਿਸਙ੍ਖਾਰੋ ਨਾਮ. ਸੋ ਏਵ ਇਧਾਧਿਪ੍ਪੇਤੋਤਿ ਦਸ੍ਸੇਤੁਂ ‘‘ਨਹੀ’’ਤਿਆਦਿਮਾਹ. ‘‘ਅਨ੍ਤਮਸੋ’’ਤਿ ਅਨ੍ਤਿਮ ਪਰਿਚ੍ਛੇਦੇਨ. ‘‘ਆਲੋਪਭਿਕ੍ਖਾ’’ ਨਾਮ ਏਕਾ ਲੋਪਭਿਕ੍ਖਾ. ਸੋ ਪਰਿਕਮ੍ਮਸਙ੍ਖਾਤਪੁਬ੍ਬਾਭਿਸਙ੍ਖਾਰੋ. ਝਾਨਾਨਿ ਚ ਸਬ੍ਬਾਨਿ ਉਪ੍ਪਨ੍ਨਾਨਿ ਨਾਮ ਨਤ੍ਥੀਤਿ ਸਮ੍ਬਨ੍ਧੋ. ‘‘ਇਤੀ’’ਤਿ ਤਸ੍ਮਾ. ‘‘ਸੋ’’ਤਿ ਭਾਵਨਾਭਿਸਙ੍ਖਾਰੋ. ‘‘ਤੇਸਂ’’ਤਿ ਸਬ੍ਬੇਸਂਪਿ ਝਾਨਾਨਂ. ਨ ਹਿ ਲੋਕਿਯਜ੍ਝਾਨਾਨਿ ਨਾਮ…ਪੇ… ਅਤ੍ਥਿ, ਇਮੇਸਂ ਸਤ੍ਤਾਨਂ ਸਬ੍ਬਕਪ੍ਪੇਸੁਪਿ ਕਪ੍ਪਵਿਨਾਸਕਾਲੇ ਝਾਨਾਨਿ ਭਾਵੇਤ੍ਵਾ ਬ੍ਰਹ੍ਮਲੋਕ ਪਰਾਯਨਤਾ ਸਬ੍ਭਾਵਾਤਿ ਅਧਿਪ੍ਪਾਯੋ. ‘‘ਪੁਬ੍ਬੇ ਸਮਥਕਮ੍ਮੇਸੁ ਕਤਾਧਿਕਾਰਸ੍ਸਾ’’ਤਿ ਆਸਨ੍ਨਭਵੇਕਤਾਧਿਕਾਰਂ ਸਨ੍ਧਾਯ ਵੁਤ੍ਤਂ. ਦੂਰਭਵੇ ਪਨ ਸਮਥਕਮ੍ਮੇਸੁ ਅਕਤਾਧਿਕਾਰੋ ਨਾਮ ਕੋਚਿ ਨਤ੍ਥੀਤਿ. ‘‘ਏਵਮੇਵਾ’’ਤਿ ਏਵਂ ਏਵ. ਵਿਪਾਕਜ੍ਝਾਨੇਸੁ ਸਙ੍ਖਾਰ ਭੇਦਸ੍ਸ ਪੁਬ੍ਬ ਕਮ੍ਮਵਸੇਨ ਵਤ੍ਤਬ੍ਬਤ੍ਤਾ ‘‘ਕੁਸਲ ਕ੍ਰਿਯਜ੍ਝਾਨੇਸੂ’’ਤਿ ਵੁਤ੍ਤਂ. ‘‘ਅਥਵਾਤਿਆਦਿਕੋ ਪਚ੍ਛਿਮ ਵਿਕਪ੍ਪੋ ਨਾਮ’’ ਅਥਵਾ ਪੁਬ੍ਬਾਭਿਸਙ੍ਖਾਰੇਨੇਵ ਉਪ੍ਪਜ੍ਜਮਾਨਸ੍ਸ ਨਕਦਾਚਿ ਅਸਙ੍ਖਾਰਿਕਭਾਵੋ ਸਮ੍ਭਵਤੀਤਿ ਅਸਙ੍ਖਾਰਿਕਨ੍ਤਿ ਚ, ਬ੍ਯਭਿਚਾਰਾਭਾਵਤੋ ਸਸਙ੍ਖਾਰਿਕਨ੍ਤਿ ਚ ਨ ਵੁਤ੍ਤਨ੍ਤਿ ਅਯਂ ਵਿਕਪ੍ਪੋ. ਤਤ੍ਥ ਅਸਙ੍ਖਾਰਿਕਨ੍ਤਿ ਚ ਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਬ੍ਯਭਿਚਾਰਾ ਭਾਵਤੋ’’ਤਿ ਅਸਙ੍ਖਾਰਿਕਭਾਵੇਨ ਪਸਙ੍ਗਾਭਾਵਤੋ. ਸਸਙ੍ਖਾਰਿਕਨ੍ਤਿ ਚ ਨ ਵੁਤ੍ਤਂ. ਯਦਿ ਵੁਚ੍ਚੇਯ੍ਯ. ਨਿਰਤ੍ਥ ਕਮੇਵਤਂਭਵੇਯ੍ਯ. ਕਸ੍ਮਾ, ਸਮ੍ਭਵ ਬ੍ਯਭਿਚਾਰਾਨਂ ਅਭਾਵਤੋ. ਸਮ੍ਭਵੇ ਬ੍ਯਭਿਚਾਰੇ ਚ. ਵਿਸੇਸਨਂ ਸਾਤ੍ਥਕਂ ਸਿਯਾਤਿ ਹਿ ਵੁਤ੍ਤਂ. ਨ ਚ ਨਿਰਤ੍ਥਕਵਚਨਂ ਪਣ੍ਡਿਤਾ ਵਦਨ੍ਤਿ. ਕਸ੍ਮਾ, ਅਪਣ੍ਡਿਤਲਕ੍ਖਣਤ੍ਤਾ. ਸਤਿ ਪਨ ਸਮ੍ਭਵੇ ਚ ਬ੍ਯਭਿਚਾਰੇ ਚ, ਤਥਾ ਸਕ੍ਕਾ ਵਤ੍ਤੁਂ. ਕਸ੍ਮਾ, ਸਾਤ੍ਥਕਤ੍ਤਾ. ਸਾਤ੍ਥਕਮੇਵ ਪਣ੍ਡਿਤਾ ਵਦਨ੍ਤਿ. ਕਸ੍ਮਾ, ਪਣ੍ਡਿਤ ਲਕ੍ਖਣਤ੍ਤਾਤਿ ਅਧਿਪ੍ਪਾਯੋ.

੫੨. ਪਟਿਪਦਾ ਅਭਿਞ੍ਞਾਵਵਤ੍ਥਾਨੇ. ‘‘ਨਿਮਿਤ੍ਤੁਪ੍ਪਾਦਤੋ’’ਤਿ ਪਟਿਭਾਗਨਿਮਿਤ੍ਤਸ੍ਸ ਉਪ੍ਪਾਦਤੋ. ਸੁਖਾਪਨ ਪਟਿਪਦਾ, ਪਚ੍ਛਾਦਨ੍ਧਂ ਵਾ ਖਿਪ੍ਪਂ ਵਾ ਉਪ੍ਪਨ੍ਨਂ ਝਾਨਂ ਸੁਖਪ੍ਪਟਿਪਦਂ ਨਾਮ ਕਰੋਤੀਤਿ ਯੋਜਨਾ. ‘‘ਪੁਬ੍ਬਭਵੇ’’ਤਿ ਆਸਨ੍ਨੇ ਪੁਬ੍ਬਭਵੇ. ਅਨ੍ਤਰਾਯਿਕਧਮ੍ਮਾ ਨਾਮ ‘ਕਿਲੇਸਨ੍ਤਰਾਯਿਕੋ ਚ, ਕਮ੍ਮਨ੍ਤਰਾਯਿਕੋ ਚ, ਵਿਪਾਕਨ੍ਤਰਾਯਿਕੋ ਚ, ਪਞ੍ਞਤ੍ਤਿ ਵੀਤਿਕ੍ਕਮਨ੍ਤਰਾਯਿਕੋ ਚ, ਅਰਿਯੂਪਵਾਦਨ੍ਤਰਾਯਿਕੋ ਚ. ਤਤ੍ਥ ਤਿਸ੍ਸੋ ਨਿਯਤਮਿਚ੍ਛਾਦਿਟ੍ਠਿਯੋਕਿਲੇਸਨ੍ਤਰਾਯਿਕੋ ਨਾਮ. ਪਞ੍ਚਾਨਨ੍ਤਰਿਯ ਕਮ੍ਮਾਨਿ ਕਮ੍ਮਨ੍ਤਰਾਯਿਕੋ ਨਾਮ. ਅਹੇਤੁਕ ਦ੍ਵਿਹੇਤੁਕਪ੍ਪਟਿਸਨ੍ਧਿਵਿਪਾਕਾ ਵਿਪਾਕਨ੍ਤਰਾਯਿਕੋ ਨਾਮ. ਭਿਕ੍ਖੁ ਭਾਵੇਠਿਤਾਨਂ ਵਿਨਯ ਪਞ੍ਞਤ੍ਤਿਂ ਵੀਤਿਕ੍ਕਮਿਤ੍ਵਾ ਅਕਤਪ੍ਪਟਿਕਮ੍ਮੋ ਵੀਤਿਕ੍ਕਮੋ ਪਞ੍ਞਤ੍ਤਿਵੀਤਿਕ੍ਕਮਨ੍ਤਰਾਯਿਕੋ ਨਾਮ. ਪਟਿਕਮ੍ਮੇਪਨਕਤੇ ਅਨ੍ਤਰਾਯਿਕੋ ਨ ਹੋਤਿ. ਅਰਿਯਪੁਗ੍ਗਲਾਨਂ ਜਾਤਿਆਦੀਹਿ ਉਪਵਦਿਤ੍ਵਾ ਅਕ੍ਕੋਸਿਤ੍ਵਾ ਅਕਤਪ੍ਪਟਿਕਮ੍ਮਂ ਅਕ੍ਕੋਸਨਂ ਅਰਿਯੂਪਵਾਦਨ੍ਤਰਾਯਿਕੋ ਨਾਮ. ਇਧਪਿ ਪਟਿਕਮ੍ਮੇ ਕਤੇ ਅਨ੍ਤਰਾਯਿਕੋ ਨ ਹੋਤਿ. ਸੇਸੇਸੁ ਤੀਸੁ ਪਟਿਕਮ੍ਮਂ ਨਾਮ ਨਤ੍ਥਿ. ਇਮੇ ਧਮ੍ਮਾ ਇਮਸ੍ਮਿਂ ਭਵੇ ਝਾਨਮਗ੍ਗਾਨਂ ਅਨ੍ਤਰਾਯਂ ਕਰੋਨ੍ਤੀਤਿ ਅਨ੍ਤਰਾਯਿਕਾ ਨਾਮ. ਤੇਹਿ ਵਿਮੁਤ੍ਤੋ ਅਨ੍ਤਰਾਯਿਕ ਧਮ੍ਮ ਵਿਮੁਤ੍ਤੋ ਨਾਮ. ‘‘ਕਲ੍ਯਾਣਪ੍ਪਟਿਪਤ੍ਤਿਯਂ ਠਿਤੋ’’ਤਿ ਸੀਲਵਿਸੁਦ੍ਧਿ ਆਦਿਕਾਯ ਕਲ੍ਯਾਣਪ੍ਪਟਿਪਤ੍ਤਿਯਂ ਪਰਿਪੂਰਣ ਵਸੇਨ ਠਿਤੋ. ‘‘ਛਿਨ੍ਨਪਲਿਬੋਧੋ’’ਤਿ ਆਵਾਸਪਲਿਬੋਧਾਦੀਨਿ ਦਸਵਿਧਾਨਿ ਪਲਿਬੋਧਕਮ੍ਮਾਨਿ ਛਿਨ੍ਦਿਤ੍ਵਾ ਠਿਤੋ. ‘‘ਪਹਿਤਤ੍ਤੋ’’ਤਿ, ਯਨ੍ਤਂ ਪੁਰਿਸਥਾਮੇਨ ਪੁਰਿਸਪਰਕ੍ਕਮੇਨ ਪਤ੍ਤਬ੍ਬਂ, ਨ ਤਂ ਅਪਤ੍ਵਾ ਵੀਰਿਯਸ੍ਸ ਸਣ੍ਠਾਨਂ ਭਵਿਸ੍ਸਤੀਤਿ ਏਵਂ ਪਵਤ੍ਤੇਨ ਸਮ੍ਮਪ੍ਪਧਾਨ ਵੀਰਿਯੇਨ ਸਮਨ੍ਨਾਗਤੋ. ਸੋ ਹਿ ਪਹਿਤੋ ਪੇਸਿਤੋ ਅਨਪੇਕ੍ਖਿਤੋ ਅਤ੍ਤਭਾਵੋ ਅਨੇਨਾਤਿ ਪਹਿਤਤ੍ਤੋਤਿ ਵੁਚ੍ਚਤਿ. ‘‘ਨਸਮ੍ਪਜ੍ਜਤੀਤਿ ਨਤ੍ਥਿ’’. ਸਚੇ ਪਞ੍ਚਪਧਾਨਿਯਙ੍ਗਸਮਨ੍ਨਾਗਤੋ ਹੋਤੀਤਿ ਅਧਿਪ੍ਪਾਯੋ. ਪਞ੍ਚਪਧਾਨਿਯਙ੍ਗਾਨਿ ਨਾਮ ਸਦ੍ਧਾਸਮ੍ਪਨ੍ਨਤਾ, ਅਸਾਠੇਯ੍ਯਂ, ਆਰੋਗ੍ਯਂ, ਅਲੀਨਵੀਰਿਯਤਾ, ਪਞ੍ਞਵਨ੍ਤਤਾ,ਤਿ.

੫੨. ਵਿਪਾਕਜ੍ਝਾਨੇ. ‘‘ਮੁਦੁਭੂਤਂ’’ਤਿ ਭਾਵਨਾ ਬਲਪਰਿਤ੍ਤਤ੍ਤਾਮਨ੍ਦਭੂਤਂ. ਮਨ੍ਦਭੂਤਤ੍ਤਾ ਚ ਦੁਬ੍ਬਲਂ. ‘‘ਨਾਨਾ ਕਿਚ੍ਚਟ੍ਠਾਨੇਸੁ ਚਾ’’ਤਿ ਦਸ੍ਸਨਸਵਨਾਦੀਸੁ. ‘‘ਹੀਨੇਸੁਪਿ ਅਤ੍ਤਭਾਵੇਸੂ’’ਤਿ ਅਹੇਤੁਕ ਦ੍ਵਿਹੇਤੁਕਪੁਗ੍ਗਲੇਸੁਪਿ. ‘‘ਅਸਦਿਸਂਪੀ’’ਤਿ ਤਿਹੇਤੁਕੁਕ੍ਕਟ੍ਠਂਪਿ ਕਮ੍ਮਂ ਅਹੇਤੁਕਵਿਪਾਕਂਪਿ ਜਨੇਤੀਤਿਆਦਿਨਾ ਅਸਦਿਸਂਪਿ ਵਿਪਾਕਂ ਜਨੇਤਿ. ‘‘ਭਵਙ੍ਗਟ੍ਠਾਨੇਸੁ ਯੇਵਾ’’ਤਿ ਏਤ੍ਥ ਭਵਙ੍ਗ ਸਦ੍ਦੇਨ ਪਟਿਸਨ੍ਧਿਟ੍ਠਾਨ ਚੁਤਿਟ੍ਠਾਨਾਨਿਪਿ ਸਙ੍ਗਯ੍ਹਨ੍ਤਿ. ‘‘ਕੁਸਲਸਦਿਸਮੇਵਾ’’ਤਿ ਪਥਮਜ੍ਝਾਨਕੁਸਲਂ ਪਥਮਜ੍ਝਾਨ ਵਿਪਾਕਮੇਵ ਜਨੇਤਿ, ਦੁਤੀਯਜ੍ਝਾਨ ਕੁਸਲਂ ਦੁਤੀਯਜ੍ਝਾਨ ਵਿਪਾਕਮੇਵ ਜਨੇਤੀਤਿਆਦਿਨਾ ਕੁਸਲ ਸਦਿਸਮੇਵ ਵਿਪਾਕਂ ਜਨੇਤਿ. ‘‘ਕੁਸਲਮੇਵ…ਪੇ… ਕ੍ਰਿਯਜ੍ਝਾਨਂ ਨਾਮ ਹੋਤਿ’’ ਅਭੇਦੂ ਪਚਾਰੇਨਾਤਿ ਅਧਿਪ੍ਪਾਯੋ. ਭੇਦਮ੍ਪਿ ਅਭੇਦਂ ਕਤ੍ਵਾ ਉਪਚਾਰੋ ਵੋਹਾਰੋ ਅਭੇਦੂ ਪਚਾਰੋ.

੫੪. ਸਙ੍ਗਹਗਾਥਾ ਵਣ੍ਣਨਾਯਂ. ਝਾਨਾਨਂ ਭੇਦੋ ਝਾਨਭੇਦੋ. ਅਤ੍ਥਤੋ ਪਨ ਝਾਨੇਹਿ ਸਮ੍ਪਯੋਗਭੇਦੋ ਝਾਨਭੇਦੋਤਿ ਵੁਤ੍ਤੋ ਹੋਤੀਤਿ ਆਹ ‘‘ਝਾਨੇਹਿ ਸਮ੍ਪਯੋਗਭੇਦੇਨਾ’’ਤਿ. ਪਥਮਜ੍ਝਾਨਿਕਂ ਚਿਤ੍ਤਨ੍ਤਿਆਦਿਨਾ ਯੋਜੇਤਬ੍ਬਂ. ‘‘ਤਮੇਵਾ’’ਤਿ ਰੂਪਾਵਚਰ ਮਾਨਸਮੇਵ. ਵਿਭਾਵਨਿਯਂ ਪਨ ਉਪਰਿਸਙ੍ਗਹਗਾਥਾਯਂ ਝਾਨਙ੍ਗ ਯੋਗਭੇਦੇਨ, ਕਤ੍ਵੇਕੇਕਨ੍ਤੁ ਪਞ੍ਚਧਾਤਿ ਵਚਨਂ ਦਿਸ੍ਵਾ ਇਧ ਝਾਨ ਭੇਦੇਨਾਤਿ ਝਾਨਙ੍ਗੇਹਿ ਸਮ੍ਪਯੋਗਭੇਦੇਨਾਤਿ ਵੁਤ੍ਤਂ. ਏਵਂ ਸਨ੍ਤੇਪਿ ਇਧ ਝਾਨਭੇਦਸ੍ਸ ਵਿਸੁਂ ਅਧਿਪ੍ਪੇਤਤ੍ਤਾ ‘‘ਅਞ੍ਞੋਹਿ ਝਾਨਭੇਦੋ’’ਤਿਆਦਿ ਵੁਤ੍ਤਂ.

ਰੂਪਾਵਚਰਚਿਤ੍ਤਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੫੫. ਅਰੂਪਚਿਤ੍ਤਦੀਪਨਿਯਂ. ‘‘ਭੁਸੋ’’ਤਿ ਅਤਿਰੇਕਤਰਂ. ‘‘ਸਰੂਪਤੋ’’ਤਿ ਪਰਮਤ੍ਥ ਸਭਾਵਤੋ. ਨਤ੍ਥਿ ਜਟਾ ਏਤ੍ਥਾਤਿ ਅਜਟੋ. ਅਜਟੋ ਆਕਾਸੋਤਿ ਅਜਟਾਕਾਸੋ. ‘‘ਪਰਿਚ੍ਛਿਨ੍ਨਾਕਾਸੋ’’ਤਿ ਦ੍ਵਾਰਚ੍ਛਿਦ੍ਦਵਾਤਪਾਨਚ੍ਛਿਦ੍ਦਾਦਿਕੋ ਆਕਾਸੋ, ਯਤ੍ਥ ਆਕਾਸ ਕਸਿਣ ਨਿਮਿਤ੍ਤਂ ਉਗ੍ਗਣ੍ਹਨ੍ਤਿ. ਕਸਿਣ ਨਿਮਿਤ੍ਤਂ ਉਗ੍ਘਾਟੇਤ੍ਵਾ ਲਦ੍ਧੋ ਆਕਾਸੋ ਕਸਿਣੁਗ੍ਘਾਟਿਮਾਕਾਸੋ, ਕਸਿਣਂ ਉਗ੍ਘਾਟੇਨ ਨਿਬ੍ਬਤ੍ਤੋ ਕਸਿਣੁਗ੍ਘਾਟਿਮੋਤਿ ਕਤ੍ਵਾ. ਰੂਪਕਲਾਪਾਨਂ ਪਰਿਚ੍ਛੇਦਮਤ੍ਤਭੂਤੋ ਆਕਾਸੋ ਰੂਪਪਰਿਚ੍ਛੇਦਾਕਾਸੋ. ‘‘ਅਨਨ੍ਤਭਾਵੇਨ ਫਰੀਯਤੀ’’ਤਿ ਚਤੁਰਙ੍ਗੁਲਮਤ੍ਤੋਪਿਸੋ ਅਨਨ੍ਤ ਨਾਮਂ ਕਤ੍ਵਾ ਭਾਵਨਾਮਨਸਿਕਾਰੇਨ ਫਰੀਯਤਿ. ‘‘ਦੇਵਾਨਂ ਅਧਿਟ੍ਠਾਨਵਤ੍ਥੂ’’ਤਿ ਮਹਿਦ੍ਧਿਕਾਨਂ ਗਾਮਨਗਰ ਦੇਵਾਨਂ ਬਲਿਪ੍ਪਟਿਗ੍ਗਹਣਟ੍ਠਾਨਂ ਵੁਚ੍ਚਤਿ, ਯਤ੍ਥ ਮਨੁਸ੍ਸਾ ਸਮਯੇ ਕੁਲ ਦੇਵਤਾਨਂ ਬਲਿਂ ਅਭਿਹਰਨ੍ਤਿ. ‘‘ਬਲਿਂ’’ਤਿ ਪੂਜਨੀਯ ਵਤ੍ਥੁ ਵੁਚ੍ਚਤਿ. ‘‘ਤਸ੍ਮਿਂ’’ਤਿ ਕਸਿਣੁਗ੍ਘਾਟਿਮਾਕਾਸੇ. ‘‘ਤਦੇਵਾ’’ਤਿ ਤਂ ਆਰਮ੍ਮਣਮੇਵ. ਕੁਸਲਜ੍ਝਾਨਂ ਸਮਾਪਨ੍ਨਸ੍ਸਵਾ, ਵਿਪਾਕਜ੍ਝਾਨੇਨ ਉਪਪਨ੍ਨਸ੍ਸਵਾ, ਕ੍ਰਿਯਜ੍ਝਾਨੇਨ ਦਿਟ੍ਠਧਮ੍ਮ ਸੁਖ ਵਿਹਾਰਿਸ੍ਸਵਾ, ਤਿਯੋਜੇਤਬ੍ਬਂ. ਅਨਨ੍ਤਨ੍ਤਿ ਵੁਚ੍ਚਤਿ, ਯਥਾਪਥਵੀਕਸਿਣੇ ਪਵਤ੍ਤਨਤੋ ਝਾਨਂ ਪਥਵੀਕਸਿਣਨ੍ਤਿ ਵੁਚ੍ਚਤੀਤਿ. ‘‘ਏਕਦੇਸੇ’’ਤਿ ਉਪ੍ਪਾਦੇਵਾ ਠਿਤਿਯਂ ਵਾ ਭਙ੍ਗੇਵਾ. ਅਨ੍ਤਰਹਿਤਤ੍ਤਾ ਅਨਨ੍ਤਨ੍ਤਿ ਵੁਚ੍ਚਤਿ. ‘‘ਅਨਨ੍ਤ ਸਞ੍ਞਿਤੇ’’ਤਿ ਅਨਨ੍ਤ ਨਾਮਕੇ. ‘‘ਅਨਨ੍ਤਨ੍ਤਿ ਭਾਵਨਾਯ ਪਵਤ੍ਤਤ੍ਤਾ’’ਤਿ ਇਦਂ ਪਥਮਾ ਰੁਪ੍ਪਵਿਞ੍ਞਾਣਂ ਅਨਨ੍ਤਨ੍ਤਿ ਏਵਂ ਪੁਬ੍ਬਭਾਗ ਭਾਵਨਾਯ ਪਵਤ੍ਤਤ੍ਤਾ. ‘‘ਅਤ੍ਤਨੋ ਫਰਣਾਕਾਰ ਵਸੇਨਾ’’ਤਿ ਪੁਬ੍ਬਭਾਗਭਾਵਨਂ ਅਨਪੇਕ੍ਖਿਤ੍ਵਾਤਿ ਅਧਿਪ੍ਪਾਯੋ. ‘‘ਨਿਰੁਤ੍ਤਿ ਨਯੇਨਾ’’ਤਿ ਸਕਤ੍ਥੇ ਯਪਚ੍ਚਯਂ ਕਤ੍ਵਾ ਨਕਾਰਸ੍ਸਲੋਪੇਨ. ‘‘ਪਾਲ਼ਿਯਾ ਨਸਮੇਤੀ’’ਤਿ ਵਿਭਙ੍ਗ ਪਾਲ਼ਿਯਾਨਸਮੇਤਿ. ‘‘ਅਨਨ੍ਤਂ ਫਰਤੀ’’ਤਿ ਅਨਨ੍ਤਂ ਅਨਨ੍ਤਨ੍ਤਿ ਫਰਤਿ. ‘‘ਪਥਮਾ ਰੁਪ੍ਪਵਿਞ੍ਞਾਣਾਭਾਵੋ’’ਤਿ ਤਸ੍ਸ ਅਭਾਵ ਪਞ੍ਞਤ੍ਤਿਮਤ੍ਤਂ. ‘‘ਨੇਵਤ੍ਥੀ’’ਤਿ ਨਤ੍ਥਿ. ‘‘ਅਸ੍ਸਾ’’ਤਿ ਚਤੁਤ੍ਥਾ ਰੁਪ੍ਪਜ੍ਝਾਨਸ੍ਸ. ਅਥਵਾਤਿਆਦੀਸੁ ‘‘ਪਟੁਸਞ੍ਞਾ ਕਿਚ੍ਚਸ੍ਸਾ’’ਤਿ ਬ੍ਯਤ੍ਤਸਞ੍ਞਾ ਕਿਚ੍ਚਸ੍ਸ. ‘‘ਸਙ੍ਖਾਰਾਵਸੇਸ ਸੁਖੁਮਭਾਵੇਨ ਵਿਜ੍ਜਮਾਨਤ੍ਤਾ’’ਤਿ ਇਮਸ੍ਸ ਅਤ੍ਥਂ ਵਿਭਾਵੇਨ੍ਤੋ ‘‘ਏਤ੍ਥਚਾ’’ਤਿਆਦਿਮਾਹ. ‘‘ਮੁਦ੍ਧਭੂਤਂ’’ਤਿ ਮਤ੍ਥਕਪਤ੍ਤਂ. ‘‘ਦੇਸਨਾਸੀਸਮਤ੍ਤਂ’’ਤਿ ਰਾਜਾ ਆਗਚ੍ਛਤੀਤਿਆਦੀਸੁ ਵਿਯ ਪਧਾਨ ਕਥਾਮਤ੍ਤਨ੍ਤਿ ਵੁਤ੍ਤਂ ਹੋਤਿ. ‘‘ਤਸ੍ਸੇਵਾ’’ਤਿ ਪਥਮਾ ਰੁਪ੍ਪਵਿਞ੍ਞਾਣਸ੍ਸੇਵ. ਕੁਸਲਭੂਤਂ ਪਥਮਾ ਰੁਪ੍ਪਵਿਞ੍ਞਾਣਂ ਪੁਥੁਜ੍ਜਨਾਨਞ੍ਚ ਸੇਕ੍ਖਾਨਞ੍ਚ ਕੁਸਲਭੂਤਸ੍ਸ ਦੁਤੀਯਾਰੁਪ੍ਪਵਿਞ੍ਞਾਣਸ੍ਸ ਆਰਮ੍ਮਣਂ ਹੋਤਿ. ਅਰਹਾ ਪਨ ਤਿਵਿਧੋ. ਤਤ੍ਥ, ਏਕੋਪਥਮਾ ਰੁਪ੍ਪੇਠਤ੍ਵਾ ਅਰਹਤ੍ਤਂ ਪਤ੍ਵਾ ਪਥਮਾਰੁਪ੍ਪਂ ਅਸਮਾਪਜ੍ਜਿਤ੍ਵਾਵ ਦੁਤੀਯਾ ਰੁਪ੍ਪਂ ਉਪ੍ਪਾਦੇਤਿ. ਤਸ੍ਸ ਕੁਸਲਭੂਤਂ ਪਥਮਾ ਰੁਪ੍ਪਂ ਕ੍ਰਿਯਭੂਤਸ੍ਸ ਦੁਤੀਯਾ ਰੁਪ੍ਪਸ੍ਸ ਆਰਮ੍ਮਣਂ. ਏਕੋਪਥਮਾ ਰੁਪ੍ਪੇਠਤ੍ਵਾ ਅਰਹਤ੍ਤਂ ਪਤ੍ਵਾ ਪੁਨ ਤਮੇਵ ਪਥਮਾ ਰੁਪ੍ਪਂ ਸਮਾਪਜ੍ਜਿਤ੍ਵਾ ਦੁਤੀਯਾ ਰੁਪ੍ਪਂ ਉਪ੍ਪਾਦੇਤਿ. ਏਕੋ ਦੁਤੀਯਾ ਰੁਪ੍ਪੇਠਤ੍ਵਾ ਅਰਹਤ੍ਤਂ ਗਚ੍ਛਤਿ. ਤੇਸਂ ਦ੍ਵਿਨ੍ਨਂ ਕ੍ਰਿਯਭੂਤਂ ਪਥਮਾ ਰੁਪ੍ਪਵਿਞ੍ਞਾਣਂ ਕ੍ਰਿਯਭੂਤਸ੍ਸੇਵ ਦੁਤੀਯਾਰੁਪ੍ਪਸ੍ਸ ਆਰਮ੍ਮਣਂ. ਤੇਨਾਹ ‘‘ਵਿਞ੍ਞਾਣਂ ਨਾਮਾ’’ਤਿਆਦਿਂ.

ਅਰੂਪਚਿਤ੍ਤਾਨੁਦੀਪਨਾ.

੫੭. ਲੋਕੁਤ੍ਤਰਚਿਤ੍ਤੇ. ‘‘ਜਲਪ੍ਪਵਾਹੋ’’ਤਿ ਉਦਕਧਾਰਾਸਙ੍ਘਾਟੋ. ‘‘ਪਭਵਤੋ’’ਤਿਆਦਿਪਵਤ੍ਤਿਟ੍ਠਾਨਤੋ. ‘‘ਯਥਾਹਾ’’ਤਿ ਕਥਂ ਪਾਲ਼ਿਯਂ ਆਹ. ‘‘ਸੇਯ੍ਯਥਿਦ’’ਨ੍ਤਿ ਸੋ ਕਤਮੋ. ‘‘ਅਯਂ ਪੀ’’ਤਿ ਅਯਂ ਅਰਿਯਮਗ੍ਗੋਪਿ. ਏਕਚਿਤ੍ਤਕ੍ਖਣਿਕੋ ਅਰਿਯਮਗ੍ਗੋ, ਕਥਂ ਯਾਵ ਅਨੁਪਾਦਿਸੇਸ ਨਿਬ੍ਬਾਨਧਾਤੁਯਾਸਵਤਿ ਸਨ੍ਦਤੀਤਿ ਆਹ ‘‘ਆਨੁਭਾਵਪ੍ਫਰਣਵਸੇਨਾ’’ਤਿ. ਪਾਲ਼ਿਯਂ ਗਙ੍ਗਾਦੀਨਿ ਪਞ੍ਚਨ੍ਨਂ ਮਹਾਨਦੀਨਂ ਨਾਮਾਨਿ. ‘‘ਸਮੁਦ੍ਦ ਨਿਨ੍ਨਾ’’ਤਿ ਮਹਾਸਮੁਦ੍ਦਾਭਿਮੁਖਂ ਨਿਨ੍ਨਾ ਨਮਿਤਾ. ‘‘ਪੋਣਾ’’ਤਿ ਅਨੁਪਤਿਤਾ. ‘‘ਪਬ੍ਭਾਰਾ’’ਤਿ ਅਧੋਵਾਹਿਤਾ. ‘‘ਕਿਲੇਸਾਨਂ’’ਤਿ ਅਨੁਪਗਮਨੇ ਕਮ੍ਮਪਦਂ. ਪਾਲ਼ਿਯਂ ‘‘ਘਟੋ’’ਤਿ ਉਦਕ ਪੁਣ੍ਣਘਟੋ. ‘‘ਨਿਕੁਜ੍ਜੋ’’ਤਿ ਅਧੋਮੁਖਂ ਠਪਿਤੋ. ‘‘ਨੋਪਚ੍ਚਾਵ ਮਤੀ’’ਤਿ ਪੁਨ ਨੋਗਿਲਤਿ. ‘‘ਨ ਪੁਨੇਤੀ’’ਤਿ ਨ ਪੁਨ ਏਤਿ ਨੁਪਗਚ੍ਛਤਿ ਅਰਿਯਸਾਵਕੋ. ‘‘ਨ ਪਚ੍ਚੇਤੀ’’ਤਿ ਨ ਪਟਿ ਏਤਿ. ਤਦਤ੍ਥਂ ਵਦਤਿ ‘‘ਨ ਪਚ੍ਚਾਗਚ੍ਛਤੀ’’ਤਿ. ਏਵਂ ਤਂ ਅਨਿਵਤ੍ਤਗਮਨਂ ਪਾਲ਼ਿਸਾਧਕੇਹਿ ਦੀਪੇਤ੍ਵਾ ਇਦਾਨਿ ਯੁਤ੍ਤਿਸਾਧਕੇਹਿ ਪਕਾਸੇਤੁਂ ‘‘ਯਥਾ ਚਾ’’ਤਿਆਦਿਮਾਹ. ‘‘ਯਤੋ’’ਤਿ ਯਂ ਕਾਰਣਾ. ‘‘ਤੇ’’ਤਿ ਪੁਥੁਜ੍ਜਨਾ. ‘‘ਦੁਸ੍ਸੀਲਾ’’ਤਿ ਨਿਸ੍ਸੀਲਾ. ‘‘ਉਮ੍ਮਤ੍ਤਕਾ’’ਤਿ ਪਿਤ੍ਤੁਮ੍ਮਤ੍ਤਕਾ. ‘‘ਖਿਤ੍ਤ ਚਿਤ੍ਤਾ’’ਤਿ ਛਟ੍ਟਿਤਪਕਤਿ ਚਿਤ੍ਤਾਯਕ੍ਖੁਮ੍ਮਤ੍ਤਕਾ. ‘‘ਦੁਪ੍ਪਞ੍ਞਾ’’ਤਿ ਨਿਪ੍ਪਞ੍ਞਾ. ‘‘ਏਲ਼ਮੂਗਾ’’ਤਿ ਦੁਪ੍ਪਞ੍ਞਤਾਯ ਏਵ ਪਗ੍ਘਰਿਤਲਾਲ ਮੁਖ ਮੂਗਾ. ‘‘ਤਸ੍ਮਿਂ ਮਗ੍ਗੇ ਏਵਾ’’ਤਿ ਅਟ੍ਠਙ੍ਗੀਕੇ ਅਰਿਯਮਗ੍ਗੇ ਏਵ. ਸੋ ਪਨ ਮਗ੍ਗੋ ਪਥਮ ਮਗ੍ਗੋ, ਦੁਤੀਯ ਮਗ੍ਗੋ, ਤਤੀਯ ਮਗ੍ਗੋ, ਚਤੁਤ੍ਥ ਮਗ੍ਗੋ,ਤਿ ਚਤੁਬ੍ਬਿਧੋ ਹੋਤਿ. ‘‘ਆਦਿਤੋ ਪਜ੍ਜਨਂ’’ਤਿ ਚਤੂਸੁ ਮਗ੍ਗੇਸੁ ਆਦਿਮ੍ਹਿ ਪਥਮ ਮਗ੍ਗਸੋਤਸ੍ਸ ਪਜ੍ਜਨਂ ਗਮਨਂ. ਪਟਿਲਾਭੋਤਿ ਵੁਤ੍ਤਂ ਹੋਤਿ. ‘‘ਸੋਤਾਪਤ੍ਤਿਯਾ’’ਤਿ ਸੋਤਸ੍ਸ ਆਪਜ੍ਜਨੇਨ. ‘‘ਅਧਿਗਮ੍ਮਮਾਨੋ’’ਤਿ ਪਟਿਲਬ੍ਭਮਾਨੋ. ਸਬ੍ਬੇ ਬੋਧਿਪਕ੍ਖਿਯ ਧਮ੍ਮਾ ਅਨਿਵਤ੍ਤ ਗਤਿਯਾ ਪਵਤ੍ਤਮਾਨਾ ਸੋਤੋਤਿ ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ਸਮ੍ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣਂ. ਉਪਰਿਸਮ੍ਬੋਧਿ ਏਵ ਪਰਾਯਨਂ ਯੇਸਂ ਤੇ ਉਪਰਿਸਮ੍ਬੋਧਿ ਪਰਾਯਨਾ. ਪਰਾਯਨਨ੍ਤਿ ਚ ਪਟਿਸਰਣਂ. ਕਥਂ ਸੋਤਾਪਤ੍ਤਿ ਵਚਨਂ ਮਗ੍ਗੇਨ ਸਮਾਨਾਧਿਕਰਣਂ ਹੋਤੀਤਿ ਵੁਤ੍ਤਂ ‘‘ਪਥਮ ਮਗ੍ਗ ਸਙ੍ਖਾਤਾਯ ਸੋਤਾਪਤ੍ਤਿਯਾ’’ਤਿਆਦਿ. ‘‘ਮਗ੍ਗੇਤੀ’’ਤਿ ਗਵੇਸਤਿ. ਮਾਰੇਨ੍ਤ ਗਮਨੋਨਿਰੁਤ੍ਤਿਨਯੇਨ ਮਗ੍ਗੋਤਿ ਸਿਜ੍ਝਤੀਤਿ ਵੁਤ੍ਤਂ ‘‘ਕਿਲੇਸੇ ਮਾਰੇਨ੍ਤੋ ਗਚ੍ਛਤੀਤਿ ਮਗ੍ਗੋ’’ਤਿ.

੫੮. ਸਕਦਾਗਾਮਿ ਮਗ੍ਗੇ. ‘‘ਸਕਿਂ ਆਗਚ੍ਛਤੀ’’ਤਿ ਇਤੋਗਨ੍ਤ੍ਵਾ ਪੁਨ ਇਧ ਆਗਚ੍ਛਤੀਤਿ ਅਤ੍ਥੋ. ‘‘ਸੀਲੇਨਾ’’ਤਿ ਪਕਤਿਸਭਾਵੇਨ. ਕਾਮਲੋਕਂ ਆਗਚ੍ਛਨ੍ਤਿ ਏਤੇਹੀਤਿ ਕਾਮਲੋਕਾਗਮਨਾ. ਕਿਲੇਸਾ. ਤੇਸਂ ਸਬ੍ਭਾਵੇਨ ਵਿਜ੍ਜਮਾਨਭਾਵੇਨ. ਪਾਲ਼ਿਯਂ ‘‘ਏਕਚ੍ਚਸ੍ਸ ਪੁਗ੍ਗਲਸ੍ਸਾ’’ਤਿ ਕਤ੍ਤੁ ਅਤ੍ਥੇਸਾਮਿਵਚਨਂ. ਏਕਚ੍ਚੇਨ ਪੁਗ੍ਗਲੇਨ ਅਪ੍ਪਹੀਨਾ ਨੀਤਿ ਸਮ੍ਬਨ੍ਧੋ. ‘‘ਸਹਬ੍ਯਤਂ’’ਤਿ ਸਹਾਯਭਾਵਂ. ‘‘ਆਗਾਮੀਹੋਤੀ’’ਤਿ ਵਤ੍ਵਾ ਤਮੇਵਤ੍ਥਂ ਵਦਤਿ ‘‘ਆਗਨ੍ਤ੍ਵਾ ਇਤ੍ਥਤ੍ਤ’’ਨ੍ਤਿ. ਆਗਚ੍ਛਤਿ ਸੀਲੇਨਾਤਿ ਆਗਨ੍ਤ੍ਵਾ. ਇਤ੍ਥਂ ਭਾਵੋ ਇਤ੍ਥਤ੍ਤਂ. ਇਮਂ ਕਾਮਤ੍ਤਭਾਵਂ ਆਗਨ੍ਤ੍ਵਾ, ਤਸ੍ਮਾ ਆਗਾਮੀ ਨਾਮ ਹੋਤੀਤਿ ਯੋਜਨਾ. ‘‘ਅਯਞ੍ਚ ਅਤ੍ਥੋ’’ਤਿ ਪਟਿਸਨ੍ਧਿਵਸੇਨ ਸਕਿਂ ਇਮਂ ਲੋਕਂ ਆਗਚ੍ਛਤੀਤਿਆਦਿਕੋ ਅਤ੍ਥੋ. ‘‘ਕਿਲੇਸ ਗਤਿਵਸੇਨਾ’’ਤਿ ਕਾਮਲੋਕਾ ਗਮਨ ਕਿਲੇਸ ਗਤਿਵਸੇਨ. ਮਗ੍ਗਸਹਾਯੇਨ ਝਾਨੇਨ ਵਿਕ੍ਖਮ੍ਭਿਤਾ ਕਿਲੇਸਾ ਮਗ੍ਗੇਨ ਸਮੁਚ੍ਛਿਨ੍ਨ ਗਤਿਕਾ ਹੋਨ੍ਤਿ. ਅਯਂ ਮਗ੍ਗਸਹਾਯੋਝਾਨਾਨੁਭਾਵੋ ਨਾਮ. ਤੇਨਾਹ ‘‘ਨ ਹੀ’’ਤਿਆਦਿਂ. ‘‘ਦੇਵਲੋਕਤੋ’’ਤਿ ਏਤ੍ਥ ਬ੍ਰਹ੍ਮਲੋਕੋਪਿ ਸਙ੍ਗਹਿਤੋ. ਪਚ੍ਛਿਮਸ੍ਮਿਂ ਪਨ ਅਤ੍ਥੇ ਸਤੀਤਿ ਯੋਜਨਾ. ਆਗਮਨਸੀਲੋ ਆਗਨ੍ਤ੍ਵਾ. ਨ ਆਗਨ੍ਤ੍ਵਾ ਅਨਾਗਨ੍ਤ੍ਵਾ. ‘‘ਤੇਨਾ’’ਤਿ ਅਨਾਗਮਨੇਨ. ‘‘ਨਾਨਤ੍ਥਾ ਸਮ੍ਭਵਤੋ’’ਤਿ ਦ੍ਵੀਸੁ ਇਤ੍ਥਤ੍ਤਸਦ੍ਦੇਸੁ ਏਕਸ੍ਮਿਂ ਇਮਂ ਕਾਮਾਵਚਰ ਲੋਕਨ੍ਤਿ ਏਕਸ੍ਮਿਂ ਇਮਂ ਮਨੁਸ੍ਸ ਲੋਕਨ੍ਤਿ ਏਵਂ ਨਾਨਤ੍ਥਾਨਂ ਅਸਮ੍ਭਵਤੋ. ਪਾਲ਼ਿਯਂ ‘‘ਸਬ੍ਯਾ ਬਜ੍ਝੋ’’ਤਿ ਚੇਤੋਦੁਕ੍ਖ ਸਙ੍ਖਾਤੇਨ ਚੇਤਸਿਕਰੋਗਾ ਬਾਧੇਨ ਸਹਿਤੋ. ਤੇਨਾਹ ‘‘ਤੇਹਿ ਪਟਿਘਾਨੁਸਯਸ੍ਸਾ’’ਤਿਆਦਿਂ. ਤਤ੍ਥ ‘‘ਤੇ’’ਤਿ ਪੁਥੁਜ੍ਜਨ ਸੋਤਾਪਨ੍ਨ ਸਕਦਾਗਾਮਿਨੋ. ਸਬ੍ਯਾ ਬਜ੍ਝਾਨਾਮਾਤਿ ਸਮ੍ਬਨ੍ਧੋ. ‘‘ਪਚ੍ਛਿਮਸ੍ਸ ਵਾਕ੍ਯਸ੍ਸਾ’’ਤਿ ਆਗਨ੍ਤ੍ਵਾ ਇਤ੍ਥਤ੍ਤਂ ਸੋਤਾਪਨ੍ਨ ਸਕਦਾਗਾਮਿਨੋ ਤੇਨ ਦਟ੍ਠਬ੍ਬਾਤਿ ਵਾਕ੍ਯਸ੍ਸ. ‘‘ਦ੍ਵੀਸੁ ਸਕਦਾਗਾਮੀਸੂ’’ਤਿ ਆਗਨ੍ਤ੍ਵਾ ਇਤ੍ਥਤ੍ਤਨ੍ਤਿ ਵੁਤ੍ਤਤ੍ਤਾ ਤੇਨ ਅਤ੍ਥੇਨ ਸਕਦਾਗਾਮਿਨਾਮਕੇਸੁ ਦ੍ਵੀਸੁ ਸੋਤਾਪਨ੍ਨ ਸਕਦਾਗਾਮੀਸੁ. ‘‘ਪੁਰਿਮਸ੍ਸਾ’’ਤਿ ਸੋਤਾਪਨ੍ਨਸ੍ਸ. ‘‘ਅਨਞ੍ਞ ਸਾਧਾਰਣੇ ਨੇਵਾ’’ਤਿ ਦੁਤੀਯ ਫਲਟ੍ਠਾਦੀਹਿ ਅਸਾਮਞ੍ਞੇਨੇਵ. ਬ੍ਰਹ੍ਮਲੋਕੇਠਿਤਾਨਂ ਸੋਤਾਪਨ੍ਨਾਨਂ ਸਤ੍ਤਕ੍ਖਤ੍ਤੁ ਪਰਮ ਤਾਦਿਭਾਵੋ ਨਤ੍ਥਿ ਵਿਯ ਦੁਤੀਯ ਫਲਟ੍ਠਾਨਂ ਸਕਦਾਗਾਮਿ ਭਾਵੋਪਿ ਨਤ੍ਥਿ. ਤੇਨਾਹ ‘‘ਪਥਮ ਦੁਤੀਯ ਫਲਟ੍ਠਾਪੀ’’ਤਿਆਦਿਂ. ‘‘ਤਸ੍ਮਾ’’ਤਿਆਦਿ ਲਦ੍ਧਗੁਣਵਚਨਂ. ‘‘ਇਤਿ ਕਤ੍ਵਾ’’ਤਿ ਇਮਿਨਾ ਕਾਰਣੇਨ. ‘‘ਹੇਟ੍ਠੂ ਪਰੂਪਪਤ੍ਤਿਵਸੇਨਾ’’ਤਿ ਉਪਰਿਤੋ ਆਗਨ੍ਤ੍ਵਾ ਹੇਟ੍ਠੂਪਪਤ੍ਤਿ ਚ, ਹੇਟ੍ਠਤੋ ਆਗਨ੍ਤ੍ਵਾ ਉਪਰੂਪਪਤ੍ਤਿ ਚਾਤਿ ਏਵਂ ਹੇਟ੍ਠੂਪਰੂਪਪਤ੍ਤਿਵਸੇਨ. ‘‘ਏਵਞ੍ਚ ਕਤ੍ਵਾ’’ਤਿਆਦਿ ਦੁਤੀਯ ਲਦ੍ਧ ਗੁਣਵਚਨਂ. ‘‘ਪਞ੍ਚਨ੍ਨਂ ਇਧ ਨਿਟ੍ਠਾ’’ਤਿ ਪਞ੍ਚਨ੍ਨਂ ਪੁਗ੍ਗਲਾਨਂ ਇਧ ਕਾਮਲੋਕੇ ਨਿਟ੍ਠਾ ਅਨੁਪਾਦਿਸੇਸ ਨਿਬ੍ਬਾਨਪਤ੍ਤੀਤਿ ਵੁਤ੍ਤਂ ਹੋਤਿ. ‘‘ਸੋ ਪਨਾ’’ਤਿ ਸਕਦਾਗਾਮਿ ਪੁਗ੍ਗਲੋ ਪਨ. ਯੇਸਂ ਪਨ ਅਟ੍ਠਕਥਾ ਚਰਿਯਾਨਂ ਅਤ੍ਥੋ, ਤੇਸਂ ਅਤ੍ਥੇਸੋ ਸਕਦਾਗਾਮਿ ਪੁਗ੍ਗਲੋ ਪਞ੍ਚਵਿਧੋਵ ਵੁਤ੍ਤੋ, ਨ ਛਟ੍ਠੋ ਪੁਗ੍ਗਲੋਤਿ ਯੋਜਨਾ. ਯੇਸਂ ਪਨ ਇਮਂ ਲੋਕਨ੍ਤਿ ਅਤ੍ਥੋ, ਤੇਸਂ ਅਤ੍ਥੇ ਛਟ੍ਠੋਪਿ ਲਬ੍ਭਤੀਤਿ ਦਸ੍ਸੇਤੁਂ ‘‘ਮਹਾਪਰਿਨਿਬ੍ਬਾਨ…ਪੇ… ਆਗਤੋ ਯੇਵਾ’’ਤਿ ਵੁਤ੍ਤਂ. ਤਤ੍ਥ ‘‘ਸਕਿਂ ਆਗਮਨਟ੍ਠੇਨ ਆਗਤੋ ਯੇਵਾ’’ਤਿ ਸਕਿਂ ਆਗਮਨਟ੍ਠੇਨ ਸਕਦਾਗਾਮੀਸੁ ਆਗਤੋਯੇਵ. ਸਬ੍ਬਞ੍ਞੁ ਬੁਦ੍ਧਾਪਿ ਪਥਮ ਫਲਟ੍ਠ ਭੂਤਾ ਸਤ੍ਤਕ੍ਖਤ੍ਤੁ ਪਰਮਤਾਯਂ ਸਣ੍ਠਿਤਾ ਵਿਯਾਤਿ ਯੋਜਨਾ. ਏਤ੍ਥ ਚ ‘‘ਸਤ੍ਤਕ੍ਖਤ੍ਤੁਪਰਮਤਾਯਂ’’ਤਿ ਸਤ੍ਤਕ੍ਖਤ੍ਤੁ ਪਰਮਭਾਵੇ. ਇਦਞ੍ਚ ਨਿਦਸ੍ਸਨ ਵਚਨਮਤ੍ਤਂ. ਸਬ੍ਬਞ੍ਞੁ ਬੁਦ੍ਧਾਪਿ ਦੁਤੀਯ ਫਲਟ੍ਠਭੂਤਾ ਸਕਿਂ ਆਗਮਨਪ੍ਪਕਤਿਯਂ ਸਣ੍ਠਿਤਾਯੇਵ ਹੋਨ੍ਤਿ. ਕਸ੍ਮਾ, ਤਸ੍ਮਿਂ ਖਣੇ ਤਂ ਸਭਾਵਾਨਤਿ ਵਤ੍ਤਨਤੋਤਿ ਅਧਿਪ੍ਪਾਯੋ. ਸਬ੍ਬੋਪਿ ਸੋ ਛਬ੍ਬੀਧੋ ਪੁਗ੍ਗਲੋ ਇਧ…ਪੇ… ਦਟ੍ਠਬ੍ਬੋ. ਏਤੇਨ ਯਂ ਵੁਤ੍ਤਂ ਵਿਭਾਵਨਿਯਂ ਪਞ੍ਚਸੁ ਸਕਦਾਗਾਮੀਸੁ ਪਞ੍ਚਮਕੋਵ ਇਧਾਧਿਪ੍ਪੇਤੋਤਿ. ਤਂ ਪਟਿਕ੍ਖਿਤ੍ਤਂ ਹੋਤਿ. ਕਸ੍ਮਾ, ਪਞ੍ਚਮਕੋ ਏਵ ਇਧ ਸਕਦਾਗਾਮਿਪਦੇ ਅਧਿਪ੍ਪੇਤੇਸਤਿ ਇਤਰੇ ਚਤ੍ਤਾਰੋ ਕਤ੍ਥ ਅਧਿਪ੍ਪੇਤਾ ਸਿਯੁਨ੍ਤਿ ਵਤ੍ਤਬ੍ਬਤ੍ਤਾ. ਜਨਕਭੂਤੋ ਸਮਾਨੋ. ‘‘ਞਾਯਾਗਤਾ ਏਵਾ’’ਤਿ ਯੁਤ੍ਤਿਤੋ ਪਰਮ੍ਪਰਾਗਤਾ ਏਵ. ਤੇਨਾਹ ‘‘ਯਥਾ’’ਤਿਆਦਿਂ. ‘‘ਅਵਿਰੁਦ੍ਧੋ’’ਤਿ ਞਾਯੇਨ ਅਵਿਰੁਦ੍ਧੋ.

੫੯. ਓਰਮ੍ਭਾਗੋ ਨਾਮ ਹੇਟ੍ਠਾਭਾਗੋ ਕਾਮਲੋਕੋ. ਓਰਮ੍ਭਾਗਾਯ ਸਂਵਤ੍ਤਨ੍ਤੀਤਿ ਓਰਮ੍ਭਾਗਿਯਾਨਿ ਕਾਮਰਾਗ ਬ੍ਯਾਪਾਦ ਸਂਯੋਜਨਾਦੀਨਿ. ‘‘ਸੋ’’ਤਿ ਅਨਾਗਾਮਿ ਪੁਗ੍ਗਲੋ.

੬੦. ਮਹਪ੍ਫਲਂ ਕਰੋਨ੍ਤਿ ਸੀਲੇਨਾਤਿ ਮਹਪ੍ਫਲ ਕਾਰਿਨੋ. ਤੇਸਂ ਭਾਵੋ ‘‘ਮਹਪ੍ਫਲ ਕਾਰਿਤਾ’’. ਸੀਲਾਦਿ ਗੁਣੋ. ‘‘ਅਰਹਤੀ’’ਤਿ ਪਟਿਗ੍ਗਹਿਤੁਂ ਅਰਹਤਿ. ‘‘ਅਰਹਤੋ’’ਤਿ ਅਰਹਨ੍ਤਸ੍ਸ. ‘‘ਨਿਬ੍ਬਚਨਂ’’ਤਿ ਨਿਰੁਤ੍ਤਿ. ਵਿਗ੍ਗਹ ਵਾਕ੍ਯਨ੍ਤਿ ਵੁਤ੍ਤਂ ਹੋਤਿ. ਸੁਦ੍ਧਿਕਸੁਞ੍ਞਤਾਯ ਤਥਾ ਨ ਵਚਿਤ੍ਤਾਨਿ, ਸੁਞ੍ਞਤਪ੍ਪਟਿਪਦਾਯ ਤਥਾ ਨ ਵਚਿਤ੍ਤਾਨੀਤਿਆਦਿਨਾ ਯੋਜੇਤਬ੍ਬਂ. ਤਤ੍ਥ ‘‘ਸੁਦ੍ਧਿਕ ਸੁਞ੍ਞਤਾਯਾ’’ਤਿ ਸੁਦ੍ਧਿਕਸੁਞ੍ਞਤਵਾਰੇ. ‘‘ਸੁਞ੍ਞਤਪ੍ਪਟਿਪਦਾਯਾ’’ਤਿ ਸੁਞ੍ਞਤਪ੍ਪਟਿਪਦਾਵਾਰੇ. ‘‘ਸਚ੍ਚ ਸਤਿਪਟ੍ਠਾਨ ਵਿਭਙ੍ਗੇਸੁ ਪਨਾ’’ਤਿ ਸਚ੍ਚ ਵਿਭਙ੍ਗ ਸਤਿਪਟ੍ਠਾਨ ਵਿਭਙ੍ਗੇਸੁ ਪਨ, ਸਬ੍ਬਂ ਚਿਤ੍ਤ ਵਡ੍ਢਨਂ ਪਾਲ਼ਿ ਅਟ੍ਠਕਥਾਸੁ ਦੇਸਨਾਵਾਰੇ ਵਿਚਾਰੇਤ੍ਵਾ ਵੇਦਿਤਬ੍ਬਂ.

੬੧. ਫਲਚਿਤ੍ਤੇ. ਸੋਤਾਪਤ੍ਤਿਯਾ ਅਧਿਗਤਂ ਫਲਂ ਸੋਤਾਪਤ੍ਤਿ ਫਲਂ. ਤਤ੍ਥ ‘‘ਅਧਿਗਤਂ’’ਤਿ ਪਟਿਲਦ੍ਧਂ. ਅਟ੍ਠਙ੍ਗੀਕ ਫਲਂ ਸਨ੍ਧਾਯ ‘‘ਤੇਨ ਸਮ੍ਪਯੁਤ੍ਤ’’ਨ੍ਤਿ ਵੁਤ੍ਤਂ. ‘‘ਨਿਰੁਤ੍ਤੀ’’ਤਿ ਵਿਗ੍ਗਹੋ.

੬੨. ਤਨੁਭੂਤੇਪਿ ਕਾਤੁਂ ਨ ਸਕ੍ਕੋਤਿ, ਕੁਤੋ ਸਮੁਚ੍ਛਿਨ੍ਦਿਤੁਂ. ‘‘ਤਾਨੀ’’ਤਿ ਇਨ੍ਦ੍ਰਿਯਾਨਿ. ‘‘ਪਟੂ ਨੀ’’ਤਿਤਿਕ੍ਖਾਨਿ. ‘‘ਸੋ’’ਤਿ ਚਤੁਤ੍ਥ ਮਗ੍ਗੋ. ‘‘ਤਾ ਚਾ’’ਤਿ ਰੂਪਰਾਗ, ਅਰੂਪਰਾਗ, ਮਾਨ, ਉਦ੍ਧਚ੍ਚ, ਅਵਿਜ੍ਜਾਦਯੋ ਚ. ‘‘ਅਞ੍ਞੇ ਚਾ’’ਤਿ ਤੇਹਿ ਦਸਹਿ ਸਂਯੋਜਨੇਹਿ ਅਞ੍ਞੇ ਅਹਿਰਿਕਾਨੋਤ੍ਤਪ੍ਪਾਦਿਕੇ, ਸਬ੍ਬੇਪਿ ਪਾਪ ਧਮ੍ਮੇ ਚ.

੬੩. ਕਿਰਿਯ ਚਿਤ੍ਤ ਵਿਚਾਰਣਾਯਂ. ਨ ਗਹਿਤਂ ਇਤਿ ਅਯਂ ਪੁਚ੍ਛਾ. ਅਭਾਵਾ ਇਤਿ ਅਯਂ ਵਿਸਜ੍ਜਨਾਤਿਆਦਿਨਾ ਯੋਜੇਤਬ੍ਬਂ. ‘‘ਅਸ੍ਸਾ’’ਤਿ ਕਿਰਿਯਾਨੁਤ੍ਤਰਸ੍ਸ. ‘‘ਨਿਰਨੁਸਯਸਨ੍ਤਾਨੇਪੀ’’ਤਿ ਅਨੁਸਯ ਰਹਿਤੇ ਅਰਹਨ੍ਤ ਸਨ੍ਤਾਨੇਪਿ. ‘‘ਇਤੀ’’ਤਿ ਵਾਕ੍ਯ ਪਰਿਸਮਾਪਨਮਤ੍ਤਂ. ‘‘ਵੁਚ੍ਚਤੇ’’ਤਿ ਵਿਸਜ੍ਜਨਾ ਕਥੀਯਤੇ. ਪੁਨ ਅਨੁਪ੍ਪਜ੍ਜਨਂ ਅਨੁਪ੍ਪਾਦੋ. ਅਨੁਪ੍ਪਾਦੋ ਧਮ੍ਮੋ ਸਭਾਵੋ ਯੇਸਂ ਤੇ ਅਨੁਪ੍ਪਾਦ ਧਮ੍ਮਾ. ਤੇਸਂ ਭਾਵੋਤਿ ਵਿਗ੍ਗਹੋ. ਵਿਪਾਕਞ੍ਚ ਜਨੇਤੀਤਿ ਸਮ੍ਬਨ੍ਧੋ. ਕਥਂ ਜਨੇਤੀਤਿ ਆਹ ‘‘ਕੁਸਲ…ਪੇ… ਕਤ੍ਵਾ’’ਤਿ. ਤਤ੍ਥ, ‘‘ਕਤ੍ਵਾ’’ਤਿ ਸਾਧੇਤ੍ਵਾ. ਸਚੇਪਿ ਕਰੇਯ੍ਯਾਤਿ ਯੋਜਨਾ. ‘‘ਕੋਚੀ’’ਤਿ ਅਬ੍ਯਤ੍ਤੋ ਕੋਚਿ ਅਰਿਯਸਾਵਕੋ. ਤਦਾ ਫਲ ਚਿਤ੍ਤਮੇਵ ਪਵਤ੍ਤੇਯ੍ਯਾਤਿ ਸਮ੍ਬਨ੍ਧੋ. ‘‘ਪਟਿਬਾਹਿਤੁਂ ਅਸਕ੍ਕੁਣੇਯ੍ਯੋ’’ਤਿ ਅਪ੍ਪਟਿਬਾਹਿਯੋ ਆਨੁਭਾਵੋ ਅਸ੍ਸਾਤਿ ਸਮਾਸੋ.

੬੪. ‘‘ਆਦਿ ਅਨ੍ਤ ਪਦੇਸ੍ਵੇ ਵਾ’’ਤਿਆਦਿਮ੍ਹਿ ਦ੍ਵਾਦਸਾ ਕੁਸਲਾਨੀਤਿ ਚ, ਅਨ੍ਤੇ ਕ੍ਰਿਯ ਚਿਤ੍ਤਾਨਿ ਵੀਸਤੀਤਿ ਚ ਪਦੇਸੁ. ਰੂਪੇ ਪਰਿਯਾ ਪਨ੍ਨਾਨਿ ਚਿਤ੍ਤਾਨਿ. ਅਰੂਪੇ ਪਰਿਯਾ ਪਨ੍ਨਾਨਿ ਚਿਤ੍ਤਾਨਿ. ‘‘ਪਥਮਾਯ ਭੂਮਿਯਾ ਪਤ੍ਤਿਯਾ’’ਤਿ ਪਥਮਭੂਮਿਂ ਪਾਪੁਣਿਤੁਂ. ‘‘ਸਾਮਞ੍ਞ ਫਲਂ ਅਧਿਪ੍ਪੇਤਨ੍ਤਿ ਵੁਤ੍ਤਂ’’ ਅਟ੍ਠਸਾਲਿਨਿਯਂ. ਅਤ੍ਥਤੋ ਪਨ ਧਮ੍ਮ ਵਿਸੇਸੋਤਿ ਸਮ੍ਬਨ੍ਧੋ. ਮਗ੍ਗ ਫਲ ਨਿਬ੍ਬਾਨ ਸਙ੍ਖਾਤੋ ਧਮ੍ਮ ਵਿਸੇਸੋ ਲੋਕੁਤ੍ਤਰਭੂਮਿ ਨਾਮਾਤਿ ਯੋਜਨਾ. ਅਵਤ੍ਥਾ ਭੂਮਿ ਏਵ ਨਿਪ੍ਪਰਿਯਾਯਭੂਮਿ. ਕਸ੍ਮਾ, ਅਵਤ੍ਥਾ ਵਨ੍ਤਾਨਂ ਧਮ੍ਮਾਨਂ ਸਰੂਪਤੋ ਲਦ੍ਧਤ੍ਤਾ. ਇਤਰਾ ਓਕਾਸਭੂਮਿ ਨਿਪ੍ਪਰਿਯਾਯ ਭੂਮਿ ਨ ਹੋਤਿ. ਕਸ੍ਮਾ, ਪਞ੍ਞਤ੍ਤਿਯਾ ਮਿਸ੍ਸਕਤ੍ਤਾ. ‘‘ਧਮ੍ਮਾਨਂ ਤਂ ਤਂ ਅਵਤ੍ਥਾ ਵਿਸੇਸਵਸੇਨੇਵ ਸਿਦ੍ਧਾ’’ਤਿ ਏਤੇਨ ਅਵਤ੍ਥਾ ਭੂਮਿ ਏਵ ਪਧਾਨ ਭੂਮੀਤਿ ਦਸ੍ਸੇਤਿ. ਕਾਮਤਣ੍ਹਾਯ ਵਿਸਯਭੂਤੋ ਓਲ਼ਾਰਿਕਾਕਾਰੋ ਕਾਮਾਵਚਰਤਾ ਨਾਮ. ਭਵਤਣ੍ਹਾਯ ਵਿਸਯਭੂਤੋ ਮਜ੍ਝਿਮਾਕਾਰੋ ਰੂਪਾਰੂਪਾਵਚਰਤਾ ਨਾਮ. ਤਾਸਂ ਤਣ੍ਹਾਨਂ ਅਵਿਸਯਭੂਤੋ ਸਣ੍ਹ ਸੁਖੁਮਾਕਾਰੋ ਲੋਕੁਤ੍ਤਰਤਾ ਨਾਮ. ਹੀਨਾਨਂ ਅਕੁਸਲ ਕਮ੍ਮਾਨਂ ਵਸੇਨ ਹੀਨਾ ਅਪਾਯਭੂਮਿਯੋ. ਪਣੀਤਾਨਂ ਕੁਸਲ ਕਮ੍ਮਾਨਂ ਵਸੇਨ ਪਣੀਤਾ ਸੁਗਤਿ ਭੂਮਿਯੋ. ਤਤ੍ਥ ਚ ਨਾਨਾ ਅਕੁਸਲ ਕਮ੍ਮਾਨਂ ਵਾ ਨਾਨਾ ਕੁਸਲ ਕਮ੍ਮਾਨਂ ਵਾ ਓਲ਼ਾਰਿਕ ਸੁਖੁਮਤਾ ਵਸੇਨ ਨਾਨਾ ਦੁਗ੍ਗਤਿ ਭੂਮਿਯੋ ਨਾਨਾ ਸੁਗਤਿ ਭੂਮਿਯੋ ਚ ਸਿਦ੍ਧਾ ਹੋਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਪਿ ਚਾ’’ਤਿਆਦਿਮਾਹ.

੬੫. ਗਾਥਾਯ ਪੁਬ੍ਬਦ੍ਧਂ ਨਾਮ-ਇਤ੍ਥ ਮੇਕੂਨ ਨਵੁਤਿ, ਪ੍ਪਭੇਦਂ ਪਨ ਮਾਨਸਨ੍ਤਿ ਪਾਦਦ੍ਵਯਂ. ਅਪਰਦ੍ਧਂ ਨਾਮ ਏਕਵੀਸਸਤਂਵਾਥ, ਵਿਭਜਨ੍ਤਿ ਵਿਚਕ੍ਖਣਾਤਿ ਪਾਦਦ੍ਵਯਂ. ਤਂ ਇਮਿਨਾ ਨ ਸਮੇਤਿ. ਕਥਂ ਨ ਸਮੇਤਿ. ਇਮਿਨਾ ਵਚਨੇਨ ਸਕਲਮ੍ਪਿ ਗਾਥਂ ਏਕੂਨ ਨਵੁਤਿਪ੍ਪਭੇਦਂ ਮਾਨਸਂ ਏਕਵੀਸ ਸਤਂ ਕਤ੍ਵਾ ਵਿਭਜਨ੍ਤੀ-ਤਿ ਏਵਂ ਏਕਵਾਕ੍ਯਂ ਕਤ੍ਵਾ ਯੋਜਨਂ ਞਾਪੇਤਿ. ‘‘ਪਥਮਜ੍ਝਾਨ ਸਦਿਸਟ੍ਠੇਨਾ’’ਤਿ ਲੋਕਿਯ ਪਥਮਜ੍ਝਾਨ ਸਦਿਸਟ੍ਠੇਨ. ਯਂ ਚਤੁਰਙ੍ਗੀਕਂ, ਤਂ ਸਯਮੇਵ ਦੁਤੀਯਜ੍ਝਾਨਨ੍ਤਿ ਸਿਦ੍ਧਂ. ਯਂ ਤਿਯਙ੍ਗੀਕਂ, ਤਂ ਸਯਮੇਵ ਤਤੀਯਜ੍ਝਾਨਨ੍ਤਿ ਸਿਦ੍ਧਂ. ਯਂ ਦੁਵਙ੍ਗੀਕਂ, ਤਂ ਸਯਮੇਵ ਚਤੁਤ੍ਥਜ੍ਝਾਨਨ੍ਤਿ ਸਿਦ੍ਧਂ. ਯਂ ਪੁਨ ਦੁਵਙ੍ਗੀਕਂ, ਤਂ ਸਯਮੇਵ ਪਞ੍ਚਮਜ੍ਝਾਨਨ੍ਤਿ ਸਿਦ੍ਧਂ. ‘‘ਏਵਂ ਵੁਤ੍ਤ’’ਨ੍ਤਿ ਵਿਭਾਵਨਿਯਂ ਝਾਨਙ੍ਗਵਸੇਨ ਪਥਮਜ੍ਝਾਨ ਸਦਿਸਤ੍ਤਾ ਪਥਮਜ੍ਝਾਨਞ੍ਚਾਤਿ ਏਵਂ ਵੁਤ੍ਤਂ. ਵਿਤਕ੍ਕਾਦਿ ਅਙ੍ਗਪਾਤੁਭਾਵੇਨ ਪਞ੍ਚਧਾ ਵਿਭਜਨ੍ਤੀਤਿ ਸਮ੍ਬਨ੍ਧੋ. ਨ ਇਤਰਾਨਿ ਲੋਕਿਯਜ੍ਝਾਨਾਨਿ ਸਾਤਿਸ੍ਸਯਤੋ ਝਾਨਾਨਿ ਨਾਮ ਸਿਯੁਂ. ਕਸ੍ਮਾਤਿ ਆਹ ‘‘ਤਾਨਿ ਹੀ’’ਤਿਆਦਿਂ. ਤਤ੍ਥ ‘‘ਤਾਨੀ’’ਤਿ ਲੋਕਿਯਜ੍ਝਾਨਾਨਿ. ‘‘ਉਪੇਚ੍ਚਾ’’ਤਿ ਉਪਗਨ੍ਤ੍ਵਾ. ‘‘ਝਾਪੇਨ੍ਤੀ’’ਤਿ ਦਹਨ੍ਤਿ. ਪਕਤਿਯਾ ਏਵ ਸਿਦ੍ਧੋ ਹੋਤਿ, ਨ ਪਾਦਕਜ੍ਝਾਨਾਦਿਵਸੇਨ ਸਿਦ੍ਧੋ. ‘‘ਕਿਚ੍ਚ’’ਨ੍ਤਿ ਪਞ੍ਚਙ੍ਗੀਕ ਭਾਵਤ੍ਥਾਯ ਕਤ੍ਤਬ੍ਬ ਕਿਚ੍ਚਂ. ‘‘ਤੇਨ ਪਚ੍ਚਯ ਵਿਸੇਸੇਨਾ’’ਤਿ ਪਾਦਕਜ੍ਝਾਨਾਦਿਨਾ ਪਚ੍ਚਯ ਵਿਸੇਸੇਨ. ‘‘ਤਸ੍ਮਿਂ’’ਤਿ ਪਚ੍ਚਯ ਵਿਸੇਸੇ. ਯਥਾਲੋਕਿਯਜ੍ਝਾਨੇਸੁ ਉਪਚਾਰਭੂਤਾ ਭਾਵਨਾ ਕਾਚਿ ਵਿਤਕ੍ਕ ਵਿਰਾਗ ਭਾਵਨਾ ਨਾਮ ਹੋਤਿ…ਪੇ… ਕਾਚਿ ਰੂਪ ਵਿਰਾਗ ਭਾਵਨਾ ਨਾਮ. ਅਸਞ੍ਞਿ ਗਾਮੀਨਂ ਪਨ ਸਞ੍ਞਾ ਵਿਰਾਗ ਭਾਵਨਾ ਨਾਮ ਹੋਤਿ. ਏਵਮੇਵਨ੍ਤਿ ਯੋਜਨਾ. ‘‘ਸਾ’’ਤਿ ਉਪਚਾਰ ਭਾਵਨਾ.‘‘ਉਪੇਕ੍ਖਾ ਸਹਗਤਂ ਵਾ’’ਤਿ ਏਤ੍ਥ ਵਾ ਸਦ੍ਦੇਨ ਰੂਪਸਮਤਿਕ੍ਕਮਂ ਵਾ ਸਞ੍ਞਾ ਸਮਤਿਕ੍ਕਮਂ ਵਾਤਿ ਅਵੁਤ੍ਤਂ ਵਿਕਪ੍ਪੇਤਿ. ਆਦਿਕਮ੍ਮਿਕਕਾਲੇ ਏਵਂ ਹੋਤੁ, ਵਸਿਭੂਤਕਾਲੇ ਪਨ ਕਥਨ੍ਤਿ ਆਹ ‘‘ਝਾਨੇਸੂ’’ਤਿਆਦਿਂ. ਨਾਨਾਸਤ੍ਤਿਯੁਤ੍ਤਾ ਹੋਤੀਤਿ ਵਤ੍ਵਾ ਨਾਨਾਸਤ੍ਤਿਯੋ ਦਸ੍ਸੇਤਿ ‘‘ਕਾਚੀ’’ਤਿਆਦਿਨਾ. ਯਾ ਉਪਚਾਰ ਭਾਵਨਾ. ‘‘ਵਿਤਕ੍ਕਂ ਵਿਰਾਜੇਤੁਂ’’ਤਿ ਵਿਤਕ੍ਕਂ ਵਿਗਮੇਤੁਂ. ਅਤ੍ਤਨੋ ਝਾਨਂ ਅਵਿਤਕ੍ਕਂ ਕਾਤੁਨ੍ਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਅਤਿਕ੍ਕਾਮੇਤੁਂ’’ਤਿ. ਸਾ ਉਪਚਾਰ ਭਾਵਨਾ. ਸੇਸਾਸੁਪਿ ਉਪਚਾਰ ਭਾਵਨਾਸੁ.

੬੬. (ਕ) ‘‘ਸਾ ਵਿਪਸ੍ਸਨਾ’’ਤਿ ਵੁਟ੍ਠਾਨਗਾਮਿਨਿ ਵਿਪਸ੍ਸਨਾ. ‘‘ਵਿਪਸ੍ਸਨਾ ਪਾਕਤਿਕਾ ਏਵਾ’’ਤਿਕਾਚਿ ਵਿਰਾਗ ਭਾਵਨਾ ਨਾਮ ਨ ਹੋਤੀਤਿ ਅਧਿਪ੍ਪਾਯੋ. ‘‘ਨਿਯਾਮੇਤੁਂ’’ਤਿ ਅਵਿਤਕ੍ਕਮੇਵ ਹੋਤੂਤਿ ਵਦਮਾਨਾ ਵਿਯ ਵਵਤ੍ਥਪੇਤੁਂ. ‘‘ਅਧਿਪ੍ਪਾਯੋ’’ਤਿ ਪਾਦਕਵਾਦਿਤ੍ਥੇਰਸ੍ਸ ਅਧਿਪ੍ਪਾਯੋ. ‘‘ਸਮ੍ਮਸੀਯਤੀ’’ਤਿ ਇਦਂ ਝਾਨਂ ਅਨਿਚ੍ਚਂ ਖਯਟ੍ਠੇਨ, ਦੁਕ੍ਖਂ ਭਯਟ੍ਠੇਨ, ਅਨਤ੍ਤਾ ਅਸਾਰਕਟ੍ਠੇਨਾਤਿ ਸਮ੍ਮਸੀਯਤਿ ਸਮਨੁਪਸ੍ਸੀਯਤਿ. ਤਂ ਅਟ੍ਠਕਥਾਯ ਨ ਸਮੇਤਿ. ਵੁਤ੍ਤਞ੍ਹਿ ਤਤ੍ਥ. ਯਤੋ ਯਤੋ ਸਮਾਪਤ੍ਤਿਤੋ ਵੁਟ੍ਠਾਯ ਯੇ ਯੇ ਸਮਾਪਤ੍ਤਿ ਧਮ੍ਮੇ ਸਮ੍ਮਸਿਤ੍ਵਾ ਮਗ੍ਗੋ ਨਿਬ੍ਬਤ੍ਤਿਤੋ ਹੋਤਿ. ਤਂ ਤਂ ਸਮਾਪਤ੍ਤਿ ਸਦਿਸੋਵ ਹੋਤਿ. ਸਮ੍ਮਸਿਤਸਮਾਪਤ੍ਤਿ ਸਦਿਸੋਤਿ ਅਤ੍ਥੋਤਿ. ਏਤ੍ਥ ਹਿ ‘‘ਯਤੋ ਯਤੋ ਸਮਾਪਤ੍ਤਿਤੋ ਵੁਟ੍ਠਾਯਾ’’ਤਿ ਏਤੇਨ ਪਾਦਕਜ੍ਝਾਨਂ ਕਥਿਤਂ ਹੋਤਿ. ‘‘ਪਾਦਕਜ੍ਝਾਨੇ ਸਤੀ’’ਤਿ ਏਤੇਨ ਅਯਂ ਵਾਦੋਪਿ ਪਾਦਕਜ੍ਝਾਨੇਨ ਵਿਨਾ ਨਸਿਜ੍ਝਤੀਤਿ ਦਸ੍ਸੇਤਿ. ‘‘ਵਿਪਸ੍ਸਨਾਪਿ…ਪੇ… ਪਤ੍ਤਾ ਹੋਤੀ’’ਤਿ ਏਤੇਨ ਇਮਸ੍ਮਿਂ ਵਾਦੇਪਿ ਵਿਪਸ੍ਸਨਾ ਨਿਯਾਮੋ ਇਚ੍ਛਿਤਬ੍ਬੋਤਿ ਦਸ੍ਸੇਤਿ. ਤੇਨਾਹ ‘‘ਯਥਾਲੋਕਿਯਜ੍ਝਾਨੇਸੂ’’ਤਿਆਦਿਂ. ਕਾਮਞ੍ਚੇਤ੍ਥ…ਪੇ… ਅਵਿਰੋਧੋ ਵੁਤ੍ਤੋ ਵਿਯ ਦਿਸ੍ਸਤਿ. ਕਥਂ. ਪਞ੍ਚਮਜ੍ਝਾਨਤੋ ਵੁਟ੍ਠਾਯ ਹਿ ਪਥਮਜ੍ਝਾਨਾਦੀਨਿ ਸਮ੍ਮਸਤੋ ਉਪ੍ਪਨ੍ਨਮਗ੍ਗੋ ਪਥਮਤ੍ਥੇਰਵਾਦੇਨ ਪਞ੍ਚਮਜ੍ਝਾਨਿਕੋ, ਦੁਤੀਯ ਵਾਦੇਨ ਪਥਮਾਦਿਜ੍ਝਾਨਿਕੋ ਆਪਜ੍ਜਤੀਤਿ ਦ੍ਵੇਪਿ ਵਾਦਾ ਵਿਰੁਜ੍ਝਨ੍ਤਿ. ਤਤੀਯ ਵਾਦੇਨ ਪਨੇਤ੍ਥ ਯਂ ਇਚ੍ਛਤਿ, ਤਂ ਝਾਨਿਕੋ ਹੋਤੀਤਿ ਤੇ ਚ ਵਾਦਾ ਨ ਵਿਰੁਜ੍ਝਨ੍ਤਿ, ਅਜ੍ਝਾਸਯੋ ਚ ਸਾਤ੍ਥਕੋ ਹੋਤੀਤਿ ਏਵਂ ਅਵਿਰੁਦ੍ਧੋ ਵੁਤ੍ਤੋ ਹੋਤੀਤਿ. ਏਤ੍ਥ ਪਨ ਯਂ ਇਚ੍ਛਤਿ, ਤਂ ਝਾਨਿਕੋ ਹੋਤਿ. ਇਚ੍ਛਾਯ ਪਨ ਅਸਤਿ, ਵਿਰੋਧੋਯੇਵ. ਤੇਨਾਹ ‘‘ਇਮੇ ਪਨ ਵਾਦਾ. …ਪੇ…. ਵਿਰੋਧੋ ਪਰਿਹਰਿਤੁਂ’’ਤਿ. ਪਾਲ਼ਿਯਂ ‘‘ਅਜ੍ਝਤ੍ਤਂ ਸੁਞ੍ਞਤਂ ਮਨਸਿ ਕਰੋਤੀ’’ਤਿ ਅਜ੍ਝਤ੍ਤਸਨ੍ਤਾਨੇਤਂ ਤਂ ਝਾਨਞ੍ਚ ਝਾਨਸਹਗਤਞ੍ਚ ਖਨ੍ਧ ਪਞ੍ਚਕਂ ਨਿਚ੍ਚ ਸੁਖ ਅਤ੍ਤ ਜੀਵਤੋ ਸੁਞ੍ਞਤਂ ਮਨਸਿ ਕਰੋਤਿ. ‘‘ਨ ਪਕ੍ਖਨ੍ਦਤੀ’’ਤਿ ਨ ਪਵਿਸਤਿ. ‘‘ਸਨ੍ਨਿਸਾਦੇਤਬ੍ਬਂ’’ਤਿ ਸਨ੍ਨਿਸਿਨ੍ਨਂ ਕਾਤਬ੍ਬਂ. ‘‘ਏਕੋਦਿਕਾਤਬ੍ਬਂ’’ਤਿ ਏਕਮੁਖਂ ਕਾਤਬ੍ਬਂ. ‘‘ਸਮਾਦਹਾਤਬ੍ਬਂ’’ਤਿ ਸੁਟ੍ਠੁ ਠਪੇਤਬ੍ਬਂ. ‘‘ਨਿਸ੍ਸਾਯਾ’’ਤਿ ਪਾਦਕਂ ਕਤ੍ਵਾਤਿ ਅਧਿਪ੍ਪਾਯੋ.

੬੭. (ਕ) ਵਾਦਵਿਚਾਰਣਾਯਂ. ਉਪਚਾਰ ਭਾਵਨਾ ਏਵ ਉਪਰਿਜ੍ਝਾਨੇ ਝਾਨਙ੍ਗਂ ਨਿਯਾਮੇਤੀਤਿ ਵੁਤ੍ਤਂ. ਹੇਟ੍ਠਾ ਪਨ ਅਜ੍ਝਾਸਯੋ ਏਵ ਉਪਰਿਜ੍ਝਾਨੇ ਝਾਨਙ੍ਗਂ ਨਿਯਾਮੇਤੀਤਿ ਵੁਤ੍ਤਂ. ਤਤ੍ਥ ‘‘ਅਜ੍ਝਾਸਯੋ ਏਵਾ’’ਤਿ ਏਵ ਸਦ੍ਦੇਨ ਪਾਦਕਜ੍ਝਾਨਂ ਨਿਵਤ੍ਤੇਤਿ. ‘‘ਇਧ ਉਪਚਾਰ ਭਾਵਨਾ ਏਵਾ’’ਤਿ ਏਵ ਸਦ੍ਦੇਨ ਅਜ੍ਝਾਸਯਂ ਨਿਵਤ੍ਤੇਤਿ. ਏਤੇਸੁ ਹਿ ਦ੍ਵੀਸੁ ਸਹ ਭਾਵੀਸੁ ਉਪਚਾਰ ਭਾਵਨਾ ਏਵ ਪਧਾਨਂ ਹੋਤਿ. ਅਜ੍ਝਾਸਯੋ ਪਨ ਤਸ੍ਸ ਨਾਨਾ ਸਤ੍ਤਿਯੋਗਂ ਸਾਧੇਤਿ. ‘‘ਅਜ੍ਝਾਸਯ ਸਾਮਞ੍ਞਂ ਸਣ੍ਠਾਤੀ’’ਤਿ ਮਗ੍ਗੇ ਯਂ ਲਦ੍ਧਬ੍ਬਂ ਹੋਤਿ, ਤਂ ਲਬ੍ਭਤੁ, ਮਯ੍ਹਂ ਵਿਸੇਸੋ ਨਤ੍ਥੀਤਿ ਏਵਂ ਅਜ੍ਝਾਸਯ ਸਾਮਞ੍ਞਂ ਸਣ੍ਠਾਤਿ. ‘‘ਤਸ੍ਮਿ’’ਨ੍ਤਿ ਅਜ੍ਝਾਸਯ ਵਿਸੇਸੇ. ‘‘ਸੋ’’ਤਿ ਅਜ੍ਝਾਸਯ ਵਿਸੇਸੋ. ਕਸ੍ਮਾ ਯੁਤ੍ਤਨ੍ਤਿ ਆਹ ‘‘ਇਚ੍ਛਿ ਤਿਚ੍ਛਿਤ…ਪੇ… ਨਿਬ੍ਬਤ੍ਤਨਂ’’ਤਿ. ‘‘ਸਬ੍ਬਜ੍ਝਾਨੇਸੁ ਚਿਣ੍ਣਵਸਿਭੂਤਾਨਂ’’ਤਿ ਇਦਂ ਸਮਾਪਜ੍ਜਨਨ੍ਤਿ ਚ ਨਿਬ੍ਬਤ੍ਤਨਨ੍ਤਿ ਚ ਪਦ ਦ੍ਵਯੇ ਸਮ੍ਬਨ੍ਧ ਵਚਨਂ. ‘‘ਵਿਪਸ੍ਸਨਾ ਵਿਸੇਸਤ੍ਥਾਯ ਏਵਾ’’ਤਿ ਵੁਟ੍ਠਾਨ ਗਾਮਿਨਿ ਵਿਪਸ੍ਸਨਾ ਵਿਸੇਸਤ੍ਥਾਯ ਏਵ. ਯਸ੍ਮਾ ਪਨ ਅਟ੍ਠਸੁ ਸਮਾਪਤ੍ਤੀਸੁ ਏਕੇਕਾਯ ਸਮਾਪਤ੍ਤਿਯਾ ਵੁਟ੍ਠਾਯ ਵੁਟ੍ਠਿਤ ਸਮਾਪਤ੍ਤਿ ਧਮ੍ਮ ਸਮ੍ਮਸਨਂ ਆਗਤਂ, ਨ ਪਨ ਅਞ੍ਞਜ੍ਝਾਨ ਸਮ੍ਮਸਨਂ. ਤਸ੍ਮਾ ਪਾਦਕਜ੍ਝਾਨਮੇਵ ਪਮਾਣਨ੍ਤਿ ਯੋਜਨਾ. ਪਾਲ਼ਿਪਦੇਸੁ ‘‘ਗਹਪਤੀ’’ਤਿ ਆਲਪਨ ਵਚਨਂ. ‘‘ਵਿਵਿਚ੍ਚੇਵਾ’’ਤਿ ਵਿਵਿਚ੍ਚਿਤ੍ਵਾ ਏਵ. ਵਿਵਿਤ੍ਤੋ ਵਿਗਤੋ ਹੁਤ੍ਵਾ ਏਵ. ‘‘ਉਪਸਮ੍ਪਜ੍ਜਾ’’ਤਿ ਸੁਟ੍ਠੁ ਸਮ੍ਪਾਪੁਣਿਤ੍ਵਾ. ‘‘ਇਤਿ ਪਟਿਸਞ੍ਚਿਕ੍ਖਤੀ’’ਤਿ ਏਵਂ ਪਚ੍ਚਵੇਕ੍ਖਤਿ. ‘‘ਅਭਿਸਞ੍ਚੇਤਯਿਤ’’ਨ੍ਤਿ ਸੁਸਂ ਸਮ੍ਪਿਣ੍ਡਿਤਂ, ਸਂਵਿਦਹਿਤਂ. ‘‘ਤਤ੍ਥ ਠਿਤੋ’’ਤਿ ਤਸ੍ਮਿਂ ਪਥਮਜ੍ਝਾਨੇ ਅਪਰਿਹੀਨੋ ਹੁਤ੍ਵਾ ਠਿਤੋ. ‘‘ਮੇਤ੍ਤਾਚੇਤੋ ਵਿਮੁਤ੍ਤੀ’’ਤਿ ਮੇਤ੍ਤਾਝਾਨਸਙ੍ਖਾਤਾ ਚੇਤੋਵਿਮੁਤ੍ਤਿ, ਅਞ੍ਞਤ੍ਥ ਅਲਗ੍ਗਨਵਸੇਨ ਚਿਤ੍ਤਸ੍ਸ ਪਵਤ੍ਤਿ. ਤਥਾ ਕਰੁਣਾ ਚੇਤੋਵਿਮੁਤ੍ਤਿ. ਮੁਦਿਤਾ ਚੇਤੋਵਿਮੁਤ੍ਤਿ. ‘‘ਵਿਵੇਕਜ’’ਨ੍ਤਿ ਕਾਯਵਿਵੇਕ ਚਿਤ੍ਤਵਿਵੇਕਾਨਂ ਵਸੇਨ ਜਾਤਂ. ‘‘ਪੀਤਿ ਸੁਖਂ’’ਤਿ ਪੀਤਿਯਾ ਚ ਸੁਖੇਨ ਚ ਸਮ੍ਪਨ੍ਨਂ. ਅਥਵਾ, ਵਿਵੇਕੇਹਿ ਜਾਤਾਨਿ ਪੀਤਿ ਸੁਖਾਨਿ ਅਸ੍ਸਾਤਿ ਵਿਵੇਕਜਂ ਪੀਤਿ ਸੁਖਂ. ਮਜ੍ਝੇ ਨਿਗ੍ਗਹਿਤਾਗਮੋ. ਰੂਪਮੇਵ ਰੂਪਗਤਂ, ਵੇਦਨਾ ਏਵ ਵੇਦਨਾ ਗਤਨ੍ਤਿਆਦਿਨਾ ਸਮਾਸੋ. ਗਤਸਦ੍ਦੋ ਚ ਪਦਪੂਰਣਮਤ੍ਤੇ ਦਟ੍ਠਬ੍ਬੋ. ‘‘ਤੇਨੇਵ ਧਮ੍ਮ ਰਾਗੇਨ ਤਾਯਧਮ੍ਮਨਨ੍ਦਿਯਾ’’ਤਿ ਵਿਪਸ੍ਸਨਾਨਿ ਕਨ੍ਤਿਮਾਹ. ਸਹਤ੍ਥੇ ਚ ਕਰਣ ਵਚਨਂ. ਓਪਪਾਤਿਕੋ ਹੋਤੀਤਿ ਸਮ੍ਬਨ੍ਧੋ. ‘‘ਤਤ੍ਥ ਪਰਿਨਿਬ੍ਬਾਯੀ’’ਤਿ ਬ੍ਰਹ੍ਮਲੋਕੇ ਅਵਸ੍ਸਂ ਪਰਿਨਿਬ੍ਬਾਯ ਨ ਧਮ੍ਮੋ. ਤੇਨਾਹ ‘‘ਅਨਾਵਤ੍ਤਿ ਧਮ੍ਮੋ ਤਸ੍ਮਾ ਲੋਕਾ’’ਤਿ. ‘‘ਪਾਦਕਜ੍ਝਾਨਮੇਵ ਪਮਾਣ’’ਨ੍ਤਿ ਪਾਦਕਜ੍ਝਾਨਮੇਵ ਮਗ੍ਗੇਝਾਨਙ੍ਗਂ ਨਿਯਾਮੇਸ੍ਸਤਿ, ਨ ਸਮ੍ਮਸਿਤਜ੍ਝਾਨਨ੍ਤਿ ਅਧਿਪ੍ਪਾਯੋ. ‘‘ਪਾਦਕਂ ਅਕਤ੍ਵਾ’’ਤਿ ਆਸਨ੍ਨੇ ਅਸਮਾਪਜ੍ਜਿਤ੍ਵਾਤਿ ਵੁਤ੍ਤਂ ਹੋਤਿ. ‘‘ਯਂ ਯਂ ਝਾਨਂ ਇਚ੍ਛਨ੍ਤੀ’’ਤਿ ਮਗ੍ਗੇ ਇਚ੍ਛਨ੍ਤਿ.

੬੬. (ਖ) ‘‘ਤਥਾ ਵਿਧੋ’’ਤਿ ਤਥਾ ਪਕਾਰੋ. ਆਸਨ੍ਨੇ ਵੁਟ੍ਠਿਤਸ੍ਸੇਵ ਝਾਨਸ੍ਸ. ‘‘ਚਿਤ੍ਤਸਨ੍ਤਾਨਂ ਵਿਸੇਸੇਤੁਂ’’ਤਿ ਸਚੇ ਪਾਦਕਜ੍ਝਾਨਂ ਪਥਮਜ੍ਝਾਨਂ ਹੋਤਿ, ਤਤੋ ਪਰਂ ਪਵਤ੍ਤਂ ਚਿਤ੍ਤਸਨ੍ਤਾਨਂ ਵਿਤਕ੍ਕੇ ਨਿਨ੍ਨਂ ਹੋਤਿ, ਵਿਤਕ੍ਕੇ ਪਕ੍ਖਨ੍ਦਤਿ. ਅਥ ਪਾਦਕਜ੍ਝਾਨਂ ਦੁਤੀਯਜ੍ਝਾਨਂ ਹੋਤਿ. ਤਤੋ ਪਰਂ ਪਵਤ੍ਤਂ ਚਿਤ੍ਤਸਨ੍ਤਾਨਂ ਵਿਚਾਰੇ ਨਿਨ੍ਨਂ ਹੋਤਿ, ਵਿਚਾਰੇ ਪਕ੍ਖਨ੍ਦਤੀਤਿਆਦਿਨਾ ਨਯੇਨ ਚਿਤ੍ਤਸਨ੍ਤਾਨਂ ਵਿਸੇਸੇਤੁਂ. ‘‘ਯਂ ਤਤ੍ਥ ਵੁਤ੍ਤਂ’’ ਤਿਯਂ ਵਿਭਾਵਨਿਯਂ ਵੁਤ੍ਤਂ.

ਵੇਦਨਾ ਵਿਚਾਰਣਾਯਂ. ‘‘ਨ ਸਿਦ੍ਧੋ’’ਤਿ ਸਿਦ੍ਧੋ ਨ ਹੋਤਿ. ‘‘ਅਞ੍ਞਥਾ’’ਤਿ ਅਞ੍ਞੇਨ ਪਕਾਰੇਨ. ਗਹਿਤੇ ਸਤੀਤਿ ਯੋਜਨਾ. ਪਾਦਕਜ੍ਝਾਨਾਦੀਨਂ ਵਸੇਨ ਸਿਦ੍ਧੋਤਿ ਗਹਿਤੇ ਸਤੀਤਿ ਵੁਤ੍ਤਂ ਹੋਤਿ. ‘‘ਯਾਯ ਕਾਯ ਚਿ ਵੇਦਨਾਯ ਯੁਤ੍ਤਾ ਹੁਤ੍ਵਾ’’ਤਿ ਸੋਮਨਸ੍ਸ ਵੇਦਨਾਯ ਵਾਯੁਤ੍ਤਾ ਹੁਤ੍ਵਾ ਉਪੇਕ੍ਖਾ ਵੇਦਨਾਯ ਵਾ ਯੁਤ੍ਤਾ ਹੁਤ੍ਵਾ. ‘‘ਤੇਹਿ ਨਿਯਮਿਤਾਯ ਏਕੇਕਾਯ ਮਗ੍ਗ ਵੇਦਨਾਯਾ’’ਤਿ ਪਾਦਕਜ੍ਝਾਨਾਦੀਹਿ ਨਿਯਮਿਤਾਯ ਮਗ੍ਗੇ ਸੋਮਨਸ੍ਸ ਵੇਦਨਾਯ ਏਵ ਵਾਸਦ੍ਧਿਂ ਘਟਿਯੇਯ੍ਯ ਮਗ੍ਗੇ ਉਪੇਕ੍ਖਾ ਵੇਦਨਾਯ ਏਵ ਵਾਤਿ ਅਤ੍ਥੋ. ਵੇਦਨਾ ਨਾਮ ਏਕਂ ਝਾਨਙ੍ਗਂ ਹੋਤਿ. ਤਸ੍ਮਾ ਮਗ੍ਗੇਝਾਨਙ੍ਗ ਨਿਯਮੇ ਸਿਦ੍ਧੇ ਮਗ੍ਗੇ ਵੇਦਨਾ ਨਿਯਮੋਪਿ ਸਿਦ੍ਧੋ. ਤਾਨਿ ਪਨ ਪਾਦਕਜ੍ਝਾਨਾਦੀਨਿ ਮਜ੍ਝੇ ਵੁਟ੍ਠਾਨ ਗਾਮਿਨਿ ਵਿਪਸ੍ਸਨਾਯਂ ਨਕਿਞ੍ਚਿਨਿਯਾਮੇਨ੍ਤਿ. ਏਵਞ੍ਚ ਸਤਿ, ਪਾਦਕਜ੍ਝਾਨਾਦੀਹਿ ਨਿਯਮਿਤਾਯ ਮਗ੍ਗੇ ਏਕੇਕਾਯ ਵੇਦਨਾਯ ਸਦ੍ਧਿਂ ਦ੍ਵੇ ਦ੍ਵੇ ਵਿਪਸ੍ਸਨਾ ਵੇਦਨਾਯੋ ਘਟਿਯੇਯ੍ਯੁਂ. ਮਗ੍ਗੇ ਸੋਮਨਸ੍ਸ ਵੇਦਨਾਯ ਵਾ ਸਦ੍ਧਿਂ ਦ੍ਵੇ ਵਿਪਸ੍ਸਨਾ ਵੇਦਨਾਯੋ ਘਟਿਯੇਯ੍ਯੁਂ. ਮਗ੍ਗੇ ਉਪੇਕ੍ਖਾ ਵੇਦਨਾਯ ਵਾ ਸਦ੍ਧਿਂ ਦ੍ਵੇ ਵਿਪਸ੍ਸਨਾ ਵੇਦਨਾਯੋ ਘਟਿਯੇਯ੍ਯੁਂਤਿ ਵੁਤ੍ਤਂ ਹੋਤਿ. ਏਵਞ੍ਚਸਤਿ ਏਕਵੀਥਿਯਂ ਜਵਨਾਨਿ ਭਿਨ੍ਨ ਵੇਦਨਾਨਿ ਸਿਯੁਂ. ਤਞ੍ਚ ਨ ਯੁਜ੍ਜਤਿ. ਤਸ੍ਮਾ ਮਗ੍ਗੇ ਵੇਦਨਾ ਨਿਯਮੋ ਪਾਦਕਜ੍ਝਾਨਾਦਿ ਨਿਯਮੇਨ ਸਿਦ੍ਧੋ ਨ ਹੋਤਿ, ਵਿਪਸ੍ਸਨਾ ਨਿਯਮੇਨੇਵ ਸਿਦ੍ਧੋਤਿ ਅਧਿਪ੍ਪਾਯੋ. ਤਾਨਿ ਪਨ ਪਾਦਕਜ੍ਝਾਨਾਦੀਨਿ ਮਜ੍ਝੇ ਵੁਟ੍ਠਾਨ ਗਾਮਿਨਿ ਵਿਪਸ੍ਸਨਾਯਂ ਨ ਕਿਞ੍ਚਿ ਨ ਨਿਯਾਮੇਨ੍ਤਿ. ਵੇਦਨਂ ਨਿਯਾਮੇਨ੍ਤਿ ਯੇਵਾਤਿ ਦਸ੍ਸੇਤੁਂ ‘‘ਤਂਪਿ ਨ ਯੁਜ੍ਜਤੀ’’ਤਿ ਵਤ੍ਵਾ ‘‘ਪਾਦਕਜ੍ਝਾਨਾਦੀਨਂ ਵਸੇਨੇਵਾ’’ਤਿਆਦਿਮਾਹ. ‘‘ਛ ਨੇਕ੍ਖਮ੍ਮਸ੍ਸਿਤਾ ਉਪੇਕ੍ਖਾ’’ਤਿ ਏਕਾਵ ਚਤੁਤ੍ਥਜ੍ਝਾਨੁ ਪੇਕ੍ਖਾ ਛਸੁ ਆਰਮ੍ਮਣੇਸੁ ਸੋਮਨਸ੍ਸਾਨਿ ਪਜਹਿਤ੍ਵਾ ਪਵਤ੍ਤਤ੍ਤਾ ਛ ਨੇਕ੍ਖਮ੍ਮਸ੍ਸਿਤਾ ਉਪੇਕ੍ਖਾ ਨਾਮ ਹੋਤਿ. ‘‘ਛ ਨੇਕ੍ਖਮ੍ਮਸ੍ਸਿਤਾਨਿ ਸੋਮਨਸ੍ਸਾਨੀ’’ਤਿ ਏਕਂ ਵਪਥਮਜ੍ਝਾਨ ਸੋਮਨਸ੍ਸਂ ਛਸੁ ਆਰਮ੍ਮਣੇਸੁ ਛ ਗੇਹਸ੍ਸਿਤਾਨਿ ਪਜਹਿਤ੍ਵਾ ਪਵਤ੍ਤਤ੍ਤਾ ਛ ਨੇਕ੍ਖਮ੍ਮਸ੍ਸਿਤਾਨਿ ਸੋਮਨਸ੍ਸਾਨਿ ਨਾਮ ਹੋਨ੍ਤਿ. ਅਟ੍ਠਕਥਾਯਞ੍ਚ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਪਥਮਾਦੀਨਿ ਚ ਤੀਣਿ ਝਾਨਾਨੀ’’ਤਿ ਚਤੁਕ੍ਕਨਯੇ ਤੀਣਿ ਸੋਮਨਸ੍ਸ ਝਾਨਾਨਿ ਪਾਦਕਾਨਿ ਕਤ੍ਵਾ. ‘‘ਸੁਦ੍ਧਸਙ੍ਖਾਰੇ ਚ ਪਾਦਕੇਕਤ੍ਵਾ’’ਤਿ ਆਰਮ੍ਮਣ ਭਾਵੇਨ ਪਾਦਕੇਕਤ੍ਵਾਤਿ ਅਧਿਪ੍ਪਾਯੋ. ਅਯਞ੍ਚ ਪਾਦਕਜ੍ਝਾਨਾਦੀਨਂ ਵਸੇਨ ਵੁਟ੍ਠਾਨ ਗਾਮਿਨਿ ਵਿਪਸ੍ਸਨਾਯਞ੍ਚ ਮਗ੍ਗੇ ਚ ਵੇਦਨਾ ਪਰਿਣਾਮੋ ਅਟ੍ਠਸਾਲਿਨਿਯਂਪਿ ਵਿਤ੍ਥਾਰਤੋ ਵੁਤ੍ਤੋ. ‘‘ਅਮਾਨੁਸੀ ਰਤੀ ਹੋਤੀ’’ਤਿ ਮਨੁਸ੍ਸਾਨਂ ਗੇਹਸ੍ਸਿਤਰਤਿਂ ਅਤਿਕ੍ਕਮ੍ਮ ਠਿਤਤ੍ਤਾ ਅਮਾਨੁਸੀ ਨਾਮ ਰਤਿ ਹੋਤਿ. ‘‘ਸਮ੍ਮਧਮ੍ਮਂ ਵਿਪਸ੍ਸਤੋ’’ਤਿ ਸਮ੍ਮਾ ਅਨਿਚ੍ਚ ਲਕ੍ਖਣ ਧਮ੍ਮਂ ਪਸ੍ਸਨ੍ਤਸ੍ਸ ਭਿਕ੍ਖੁਨੋਤਿ ਸਮ੍ਬਨ੍ਧੋ.

੬੭. (ਖ) ‘‘ਝਾਨਙ੍ਗਯੋਗਭੇਦੇਨਾ’’ਤਿ ਵੁਤ੍ਤਂ, ਝਾਨਯੋਗਭੇਦੋ ਪਨ ਅਧਿਪ੍ਪੇਤੋ. ‘‘ਪਞ੍ਚ ਵਿਧੇਝਾਨ ਕੋਟ੍ਠਾਸੇ’’ਤਿ ਪਞ੍ਚਕ ਨਯਵਸੇਨ ਵੁਤ੍ਤਂ. ਇਧ ਚਿਤ੍ਤ ਭੇਦਸ੍ਸ ਅਧਿਪ੍ਪੇਤਤ੍ਤਾ ਝਾਨਭੇਦੇਤਿ ਚ ਝਾਨਨ੍ਤਿ ਚ ਵੁਤ੍ਤੇਪਿ ਚਿਤ੍ਤਮੇਵ ਅਧਿਪ੍ਪੇਤਨ੍ਤਿ ਦਟ੍ਠਬ੍ਬਂ.

ਗਾਥਾਯੋਜਨਾਸੁ. ‘‘ਅਪਰਾਪਿ ਯੋਜਨਾ ਵੁਤ੍ਤਾ’’ਤਿ ਅਥਵਾ ਰੂਪਾਵਚਰਂ ਚਿਤ੍ਤਂ ਅਨੁਤ੍ਤਰਞ੍ਚ ਪਥਮਾਦਿਜ੍ਝਾਨ ਭੇਦੇਨ ਯਥਾ ਗਯ੍ਹਤਿ, ਤਥਾ ਆਰੁਪ੍ਪਞ੍ਚਾਪਿ ਪਞ੍ਚਮੇਝਾਨੇ ਗਯ੍ਹਤੀਤਿ ਏਵਂ ਅਪਰਾਪਿ ਯੋਜਨਾ ਵੁਤ੍ਤਾ. ‘‘ਪਠਿਤਤ੍ਤਾ’’ਤਿ ਉਚ੍ਚਾਰਿਤਤ੍ਤਾ. ਅਨ੍ਤਿਮਗਾਥਾ ਵਣ੍ਣਨਾਯਂ. ‘‘ਯਥਾ’’ਤਿ ਯੇਨ ਪਕਾਰੇਨ. ‘‘ਤਂ ਸਙ੍ਗਹਂ’’ਤਿ ਏਕ ਵੀਸਸਤਸਙ੍ਗਹਂ. ਬੁਜ੍ਝਨ੍ਤੀਤਿ ਬੁਧਾ. ‘‘ਆਹਾ’’ਤਿ ਚ ‘‘ਆਹੂ’’ਤਿ ਚ ਵਤ੍ਤਮਾਨਕਾਲੇਪਿ ਇਚ੍ਛਨ੍ਤਿ ਸਦ੍ਦਵਿਦੂਤਿ ਵੁਤ੍ਤਂ ‘‘ਕਥੇਨ੍ਤਿ ਵਾ’’ਤਿ. ਇਦਞ੍ਚ ਵਚਨਂ ਪੁਬ੍ਬੇ ‘‘ਇਤ੍ਥਮੇਕੂਨ ਨਵੁਤਿ…ਪੇ… ਵਿਭਜਨ੍ਤਿ ਵਿਚਕ੍ਖਣਾ’’ਤਿ ਗਾਥਾਯ ਨਿਗਮਨਨ੍ਤਿ ਞਾਪਨਤ੍ਥਂ ‘‘ਵਿਭਜਨ੍ਤਿ ਵਿਚਕ੍ਖਣਾ’’ਤਿ ਵੁਤ੍ਤਂ ਹੋਤੀ’’ਤਿ ਵੁਤ੍ਤਂ.

ਇਤਿਪਰਮਤ੍ਥਦੀਪਨਿਯਾਨਾਮਟੀਕਾਯਅਨੁਦੀਪਨਿਯਂ

ਚਿਤ੍ਤਸਙ੍ਗਹਸ੍ਸਅਨੁਦੀਪਨਾ ਨਿਟ੍ਠਿਤਾ.

੨. ਚੇਤਸਿਕਸਙ੍ਗਹਅਨੁਦੀਪਨਾ

੬੮. ਏਵਂ ਚਿਤ੍ਤ ਸਙ੍ਗਹਸ੍ਸ ਦੀਪਨਿਂ ਕਤ੍ਵਾ ਚੇਤਸਿਕ ਸਙ੍ਗਹਸ੍ਸ ਦੀਪਨਿਂ ਕਰੋਨ੍ਤੋ ਪਥਮਂ ਪੁਬ੍ਬਾਪਰਾਨੁ ਸਨ੍ਧਿਞ੍ਚ ਆਦਿਗਾਥਾਯ ਪਯੋਜਨ ਸਮ੍ਬਨ੍ਧਞ੍ਚ ਦਸ੍ਸੇਤੁਂ ‘‘ਏਵਂ’’ਤਿਆਦਿ ਮਾਰਦ੍ਧੋ. ਤਤ੍ਥ ‘‘ਅਨੁਪਤ੍ਤ’’ਨ੍ਤਿਆਦਿਮ੍ਹਿ ਚਿਤ੍ਤਂ ਚੇਤਸਿਕਂ ਰੂਪਂ, ਨਿਬ੍ਬਾਨਮਿਤਿਸਬ੍ਬਥਾਤਿ ਏਵਂ ਅਨੁਕ੍ਕਮੋ ਵੁਤ੍ਤੋ. ਤੇਨ ਅਨੁਕ੍ਕਮੇਨ ਅਨੁਪਤ੍ਤਂ. ਹੇਤੁ ਵਿਸੇਸਨਞ੍ਚੇਤਂ. ਯਸ੍ਮਾ ਚਿਤ੍ਤਸਙ੍ਗਹਾਨਨ੍ਤਰਂ ਚੇਤਸਿਕ ਸਙ੍ਗਹੋ ਅਨੁਪਤ੍ਤੋ, ਤਸ੍ਮਾ ਇਦਾਨਿ ਤਂ ਸਙ੍ਗਹਂ ਕਰੋਤੀਤਿ ਦੀਪੇਤਿ. ਚਤ੍ਤਾਰਿ ਸਮ੍ਪਯੋਗ ਲਕ੍ਖਣਾਨਿ ‘ਏਕੁਪ੍ਪਾਦਤਾ, ਏਕ ਨਿਰੋਧਤਾ, ਏਕਾ ਰਮ੍ਮਣਤਾ, ਏਕ ਵਤ੍ਥੁਕਤਾ,ਤਿ. ‘‘ਚੇਤਸਿ ਯੁਤ੍ਤਾ’’ਤਿ ਚਿਤ੍ਤਸ੍ਮਿਂ ਨਿਯੁਤ੍ਤਾ. ਚਿਤ੍ਤਂ ਨਿਸ੍ਸਾਯ ਅਤ੍ਤਨੋ ਅਤ੍ਤਨੋ ਕਿਚ੍ਚੇਸੁ ਉਸ੍ਸੁਕ੍ਕਂ ਆਪਨ੍ਨਾਤਿ ਅਤ੍ਥੋ. ‘‘ਚੇਤਸਾ ਵਾਯੁਤ੍ਤਾ’’ਤਿ ਚਿਤ੍ਤੇਨ ਵਾ ਸਮ੍ਪਯੁਤ੍ਤਾ. ਚਿਤ੍ਤੇਨ ਸਹ ਏਕੀਭਾਵਂ ਗਤਾਤਿ ਅਤ੍ਥੋ. ‘‘ਸਰੂਪਦਸ੍ਸਨ’’ਨ੍ਤਿ ਸਙ੍ਖ੍ਯਾਸਰੂਪਦਸ੍ਸਨਂ. ਸਿਦ੍ਧਪਦਂ ਨਾਮ ਪਕਤਿ ਪਚ੍ਚਯੇਹਿ ਨਿਪ੍ਫਨ੍ਨ ਪਦਂ. ‘‘ਪੁਬ੍ਬਨ੍ਤਤੋ’’ਤਿ ਏਕਸ੍ਸਸਙ੍ਖਤ ਧਮ੍ਮਸ੍ਸ ਪਥਮ ਭਾਗਤੋ. ਉਦ੍ਧਂ ਪਜ੍ਜਨਂ ਨਾਮ ਕਤਮਨ੍ਤਿ ਆਹ ‘‘ਸਰੂਪਤੋ ਪਾਤੁਭਵਨ’’ਨ੍ਤਿ. ਧਾਤੁ ਪਾਠੇਸੁ-ਜਨਿਪਾਤੁਭਾਵੇ-ਤਿ ਵੁਤ੍ਤਤ੍ਤਾ ਆਹ ‘‘ਜਾਤੀਤਿ ਵੁਤ੍ਤਂ ਹੋਤੀ’’ਤਿ. ‘‘ਸਰੂਪ ਵਿਨਾਸੋ’’ਤਿ ਸਰੂਪਤੋ ਪਾਤੁਭਵਨ੍ਤਸ੍ਸ ਭਾਵਸ੍ਸ ਵਿਨਾਸੋ ਅਨ੍ਤਰਧਾਨਂ. ‘‘ਏਵਂ ਪਰਤ੍ਥ ਪੀ’’ਤਿ ਪਰਸ੍ਮਿਂ ਏਕਾਲਮ੍ਬਣਵਤ੍ਥੁਕਾਦਿਪਦੇਪਿ. ‘‘ਏਕ ਚਿਤ੍ਤਸ੍ਸਪਿ ਬਹੁਦੇਵਾ’’ਤਿ ਚਕ੍ਖੁ ਵਿਞ੍ਞਾਣਂ ਰੂਪਂ ਪਸ੍ਸਨ੍ਤਂ ਏਕਮੇਵ ਰੂਪਂ ਪਸ੍ਸਤੀਤਿ ਨਤ੍ਥਿ. ਅਨੇਕਾਨਿ ਏਵਰੂਪਾਨਿ ਏਕਤੋ ਕਤ੍ਵਾ ਪਸ੍ਸਤਿ. ਸੋਤਵਿਞ੍ਞਾਣਾਦੀਸੁਪਿ ਏਸੇਵ ਨਯੋ. ਏਵਞ੍ਚ ਕਤ੍ਵਾ ਪਾਲ਼ਿਯਂ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁ ਵਿਞ੍ਞਾਣਂ. ਸੋਤਞ੍ਚ ਪਟਿਚ੍ਚ ਸਦ੍ਦੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣਨ੍ਤਿਆਦਿਨਾ ਵਤ੍ਥੁਦ੍ਵਾਰੇਸੁ ਏਕਵਚਨਂ ਵਤ੍ਵਾ ਆਰਮ੍ਮਣੇਸੁ ਬਹੁਵਚਨਂ ਕਤਨ੍ਤਿ. ‘‘ਏਕਤ੍ਤਂ ਉਪਨੇਤ੍ਵਾ’’ਤਿ ਚਕ੍ਖੁ ਵਿਞ੍ਞਾਣੇ ਬਹੂਨਿਪਿ ਰੂਪਾਰਮ੍ਮਣਾਨਿ ਰੂਪਤਾ ਸਮਞ੍ਞੇਨ ਏਕੀਭਾਵਂ ਕਤ੍ਵਾ ਏਕਂ ਆਰਮ੍ਮਣਨ੍ਤ੍ਵੇਵ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਸਦ੍ਦਾਰਮ੍ਮਣਾਦੀਸੁਪਿ ਏਸੇਵ ਨਯੋ. ਤਂ ਨ ਸੁਨ੍ਦਰਂ. ਕਸ੍ਮਾ. ਅਤ੍ਥ ਵਿਸੇਸਸ੍ਸ ਅਵਿਞ੍ਞਾਪਨਤੋ. ਕੋਪਨਾਯਂ ਅਤ੍ਥ ਵਿਸੇਸੋਤਿ. ਯਾਚਿਤ੍ਤਸ੍ਸ ਜਾਤਿ, ਸਾਯੇਵ ਫਸ੍ਸਾਦੀਨਨ੍ਤਿਆਦਿਕੋ ਅਤ੍ਥੋ. ਤੇਨਾਹ ‘‘ਅਥ ਖੋ’’ਤਿਆਦਿਂ. ਅਧਿਪ੍ਪੇਤਾ ਏਕੁਪ੍ਪਾਦਤਾ. ਏਸ ਨਯੋ ਏਕ ਨਿਰੋਧਤਾਦੀਸੁ. ‘‘ਮੂਲਟੀਕਾਯ’’ਨ੍ਤਿ ਰੂਪਕਣ੍ਡਮੂਲਟੀਕਾਯਂ. ‘‘ਸਹੇਵਾ’’ਤਿ ਏਕਤੋ ਏਵ. ‘‘ਉਪ੍ਪਾਦਾਦਿਪ੍ਪਵਤ੍ਤਿਤੋ’’ਤਿ ਉਪ੍ਪਾਦਸ੍ਸ ਚ ਜੀਰਣਸ੍ਸ ਚ ਨਿਰੋਧਸ੍ਸ ਚ ਪਵਤ੍ਤਿਤੋ. ‘‘ਉਪ੍ਪਾਦਾਦਯੋ’’ਤਿ ਉਪ੍ਪਾਦ ਜੀਰਣ ਨਿਰੋਧਾ. ਜਾਤਿਜਰਾਮਰਣਾਨੀਤਿ ਵੁਤ੍ਤਂ ਹੋਤਿ. ‘‘ਚੇਤਸਿਕਾਮਤਾ’’ਤਿ ਚੇਤਸਿਕਾ ਇਤਿ ਵਿਞ੍ਞਾਤਾ. ‘‘ਭਾਵਪ੍ਪਧਾਨਂ’’ਤਿ ਏਕੁਪ੍ਪਾਦ ਭਾਵੋ ਏਕੁਪ੍ਪਾਦੋਤਿ ਵੁਤ੍ਤੋ. ਤਥਾ ਏਕ ਨਿਰੋਧਾਦੀਸੁ. ਯਥਾ ਇਦਂਪਿ ਸਙ੍ਘੇਰਤਨਂ ਪਣੀਤ-ਨ੍ਤਿਆਦੀਸੁ ਅਯਂ ਰਤਨ ਭਾਵੋ ਪਣੀਤੋਤਿ ਹੇਤ੍ਥ ਅਤ੍ਥੋ. ‘‘ਯੇ’’ਤਿ ਯੇ ਧਮ੍ਮਾ. ‘‘ਸਹਜਾਤ ਪਚ੍ਚਯੁਪ੍ਪਨ੍ਨ ਰੂਪਾਨਿ ਪੀ’’ਤਿ ਸਹਜਾਤਪਚ੍ਚਯਤੋ ਉਪ੍ਪਨ੍ਨਾਨਿ ਰੂਪਾਨਿਪਿ. ਚੇਤਸਿਕਾਨਿ ਨਾਮ ਸਿਯੁਨ੍ਤਿ ਸਮ੍ਬਨ੍ਧੋ. ‘‘ਤਦਾ ਯਤ੍ਤ ਵੁਤ੍ਤਿਤਾਯਾ’’ਤਿ ਚਿਤ੍ਤਾਯਤ੍ਤਵੁਤ੍ਤਿਯਾਯ. ‘‘ਚੇਤੋਯੁਤ੍ਤਾਨੀ’’ਤਿ ਹੇਤੁ ਵਿਸੇਸਨਂ. ਤਦੇਵ ਹੇਤੁਮਨ੍ਤ ਵਿਸੇਸਨਨ੍ਤਿ ਚ ਹੇਤੁ ਅਨ੍ਤੋ ਨੀਤਵਿਸੇਸਨਨ੍ਤਿ ਚ ਹੇਤੁ ਅਨ੍ਤੋ ਗਧਵਿਸੇਸਨਨ੍ਤਿ ਚ ਵਦਨ੍ਤਿ. ‘‘ਤੇਸ’’ਨ੍ਤਿ ਚਿਤ੍ਤਸ੍ਸ ਸਹਜਾਤਪਚ੍ਚਯੁਪ੍ਪਨ੍ਨਰੂਪਾਨਂ. ‘‘ਨਾਨੁਭੋਨ੍ਤੀ’’ਤਿ ਨਪਾਪੁਣਨ੍ਤਿ. ‘‘ਨ ਹਿ ਸਕ੍ਕਾ ਜਾਨਿਤੁਂ’’ਤਿ ਏਤੇਨ ਭੂਤਕਥਨ ਵਿਸੇਸਨਾਨਿ ਏਤਾਨੀਤਿ ਦੀਪੇਤਿ. ਭੂਤਕਥਨਂਪਿ ਸਮਾਨਂ ਵਤ੍ਤਿਚ੍ਛਾਵਸੇਨ ਬ੍ਯਵਚ੍ਛੇਦਕਂਪਿ ਸਮ੍ਭਵਤਿ. ‘‘ਵਯੋਪਞ੍ਞਾਯਤੀ’’ਤਿ ਵਿਨਾਸੋ ਪਕਾਸਤਿ. ‘‘ਠਿਤਾਯਾ’’ਤਿ ਤਿਟ੍ਠ ਮਾਨਾਯ ਵੇਦਨਾਯ. ਅਞ੍ਞੋ ਪਕਾਰੋ ਅਞ੍ਞਥਾ. ਅਞ੍ਞਥਾ ਭਾਵੋ ਅਞ੍ਞਥਤ੍ਤਂ. ਜਰਾਵਸੇਨ ਪਰਿਣਾਮੋਤਿ ਵੁਤ੍ਤਂ ਹੋਤਿ. ਯੋ ਪਥਵੀਧਾਤੁਯਾ ਉਪ੍ਪਾਦੋ, ਯਾ ਠਿਤਿ, ਯਾ ਅਭਿਨਿਬ੍ਬਤ੍ਤਿ, ਯੋ ਪਾਤੁਭਾਵੋ. ਏਸੋ ਦੁਕ੍ਖਸ੍ਸ ਉਪ੍ਪਾਦੋ, ਏਸਾ ਰੋਗਾਨਂ ਠਿਤਿ, ਏਸੋ ਜਰਾਮਰਣਸ੍ਸ ਪਾਤੁਭਾਵੋਤਿ ਯੋਜਨਾ. ‘‘ਇਤਰਥਾ’’ਤਿ ਇਤੋ ਅਞ੍ਞਥਾ ਗਹਿਤੇ ਸਤੀਤਿ ਅਤ੍ਥੋ. ਏਕਸ੍ਮਿਂ ਰੂਪਾਰੂਪਕਲਾਪੇ ਨਾਨਾ ਧਮ੍ਮਾਨਂ ਵਸੇਨ ਬਹੂਸੁ ਉਪ੍ਪਾਦੇਸੁ ਚ ਨਿਰੋਧੇਸੁ ਚ ਗਹਿਤੇਸੂਤਿ ਵੁਤ੍ਤਂ ਹੋਤਿ. ‘‘ਵਿਕਾਰਰੂਪਾਨਂ’’ਤਿ ਵਿਞ੍ਞਤ੍ਤਿ ਦ੍ਵਯ ਲਹੁਤਾਦਿਤ੍ਤਯਾਨਂ. ਸਬ੍ਬਾਨਿਪਿ ਉਪਾਦਾਰੂਪਾਨਿ ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਵਤ੍ਤਤ੍ਤਾ ਮਹਾਭੂਤ ਗਣਨਾਯ ਚਤ੍ਤਾਰਿ ਚਤ੍ਤਾਰਿ ਸਿਯੁਂਤਿ ਇਮਿਨਾ ਅਧਿਪ੍ਪਾਯੇਨ ‘‘ਸਬ੍ਬੇਸਮ੍ਪਿ ਵਾ’’ਤਿਆਦਿਵੁਤ੍ਤਂ. ਸਬ੍ਬੇਸਮ੍ਪਿ ਵਾ ਚਕ੍ਖਾਦੀਨਂ ਉਪਾਦਾਰੂਪਾਨਂ ਏਕੇਕਸ੍ਮਿਂ ਕਲਾਪੇ ਬਹੁਭਾਵੋ ਵਤ੍ਤਬ੍ਬੋ ਸਿਯਾਤਿ ਯੋਜਨਾ. ਕਸ੍ਮਾ ਬਹੁਭਾਵੋ ਵਤ੍ਤਬ੍ਬੋਤਿ ਆਹ ‘‘ਚਤੁਨ੍ਨਂ ਮਹਾਭੂਤਾਨ’’ਨ੍ਤਿਆਦਿਂ.

ਯਦਿ ਏਵਂ, ਏਕਸ੍ਮਿਂ ਚਿਤ੍ਤੁਪ੍ਪਾਦੇ ਲਹੁਤਾਦੀਨਿਪਿ ਏਕੇਕਾਨਿ ਏਵ ਸਿਯੁਂ, ਅਥ ਕਿਮਤ੍ਥਂ ਦ੍ਵੇ ਦ੍ਵੇ ਕਤ੍ਵਾ ਵੁਤ੍ਤਾਨੀਤਿ ਆਹ ‘‘ਕਾਯਲਹੁਤਾ ਚਿਤ੍ਤ ਲਹੁਤਾਦਯੋਪਨਾ’’ਤਿਆਦਿਂ. ‘‘ਇਮਮਤ੍ਥਂ ਅਸਲ੍ਲਕ੍ਖੇਤ੍ਵਾ’’ਤਿ ਈਦਿਸਂ ਵਿਨਿਚ੍ਛਯਤ੍ਤਂ ਅਚਿਨ੍ਤੇਤ੍ਵਾਤਿ ਅਧਿਪ੍ਪਾਯੋ. ਵਿਭਾਵਨਿਪਾਠੇ ‘‘ਚਿਤ੍ਤਾਨੁਪਰਿਵਤ੍ਤਿਨੋ’’ਤਿ ਏਤੇਨ ਚਿਤ੍ਤੇਨ ਉਪ੍ਪਜ੍ਜਿਤ੍ਵਾ ਤੇਨੇਵ ਚਿਤ੍ਤੇਨ ਸਹਨਿਰੁਜ੍ਝਨਵਸੇਨ ਚਿਤ੍ਤਂ ਅਨੁਪਰਿਵਤ੍ਤਿਸ੍ਸ. ‘‘ਪਸਙ੍ਗਾ’’ਤਿ ਚੇਤਸਿਕਤਾ ਪਸਙ੍ਗੋ. ‘‘ਪੁਰੇਤਰਮੁਪ੍ਪਜ੍ਜਿਤ੍ਵਾ’’ਤਿ ਪੁਰੇਤਰਂ ਏਕੇਨ ਚਿਤ੍ਤੇਨ ਸਹ ਉਪ੍ਪਜ੍ਜਿਤ੍ਵਾਤਿ ਅਧਿਪ੍ਪਾਯੋ. ‘‘ਚਿਤ੍ਤਸ੍ਸਭਙ੍ਗਕ੍ਖਣੇ’’ਤਿ ਅਞ੍ਞਸ੍ਸ ਸਤ੍ਤਰ ਸਮ ਚਿਤ੍ਤਸ੍ਸ ਭਙ੍ਗਕ੍ਖਣੇ. ਤਥਾ ਰੂਪਧਮ੍ਮਾਨਂ ਪਸਙ੍ਗੋ ਨ ਸਕ੍ਕਾ ਨੀਵਾਰੇਤੁਂ ਤਿਯੋਜਨਾ. ‘‘ਪਸਙ੍ਗੋ’’ਤਿ ਚੇਤਸਿਕਤਾ ਪਸਙ੍ਗੋ. ‘‘ਅਲਮਤਿ ਪਪਞ੍ਚੇਨਾ’’ਤਿ ਅਭਿਧਮ੍ਮੇ ਵੇਦਨਾਤ੍ਤਿਕੇਟੀਕਾਸੁ ਵਿਯ ਅਤਿ ਵਿਤ੍ਥਾਰੇਨ ਨਿਰਤ੍ਥਕਂ ਹੋਤੀਤਿ ਅਤ੍ਥੋ. ‘‘ਨਿਰਤ੍ਥਕਂ’’ਤਿ ਵਿਭਾਵਨਿਯਂ ਪਪਞ੍ਚੋ ਨਿਰਤ੍ਥਕੋ ਏਵਾਤਿ ਅਧਿਪ੍ਪਾਯੋ.

੬੯. ਫਸ੍ਸਵਚਨਤ੍ਥੇ. ‘‘ਫੁਸਤੀ’’ਤਿ ਆਰਮ੍ਮਣਂ ਆਹਨਤਿ, ਸਙ੍ਘਟ੍ਟੇਤਿ. ਤਞ੍ਚ ਸਙ੍ਘਟ੍ਟ ਨਂ ਨਦੋਸਪਟਿਘਸ੍ਸ ਵਿਯ ਆਰਮ੍ਮਣਸ੍ਸ ਵਿਬਾਧਨਂ ਹੋਤਿ, ਅਥ ਖੋ ਭਮਰਸ੍ਸ ਪਦੁਮ ਪੁਪ੍ਫੇਸੁ ਪੁਪ੍ਫਰ ਸਗ੍ਗਹਣਂ ਵਿਯ ਵਿਜਾਨਨ ਮਤ੍ਤੇ ਅਠਤ੍ਵਾ ਆਰਮ੍ਮਣ ਰਸਪਾਤੁਭਾਵਤ੍ਥਂ ਯਥਾਰਮ੍ਮਣਂ ਸਂਹਨਨ ਮੇਵਾਤਿ ਦਸ੍ਸੇਤੁਂ ‘‘ਫੁਸਨਞ੍ਚੇਤ੍ਥਾ’’ਤਿਆਦਿਮਾਹ. ‘‘ਆਹਚ੍ਚਾ’’ਤਿ ਆਹਨਿਤ੍ਵਾ ਸਮ੍ਪਾਪੁਣਿਤ੍ਵਾ. ‘‘ਉਪਹਚ੍ਚਾ’’ਤਿ ਤਸ੍ਸੇਵ ਵੇਵਚਨਂ. ਅਯਮਤ੍ਥੋ ਕਥਂ ਪਾਕਟੋਤਿ ਆਹ ‘‘ਯਤੋ’’ਤਿਆਦਿਂ. ਤਤ੍ਥ ‘‘ਯਤੋ’’ਤਿ ਯਂ ਕਾਰਣਾ. ‘‘ਤਦਨੁਭਵਨ੍ਤੀ’’ਤਿ ਤਂ ਆਰਮ੍ਮਣ ਰਸਂ ਅਨੁਭਵਨ੍ਤੀ, ਵੇਦਨਾ ਪਾਤੁਭਵਤਿ, ਵੇਦਨਾ ਪਾਤੁਭਾਵਂ ਦਿਸ੍ਵਾ ਆਰਮ੍ਮਣਪ੍ਫੁਸਨਂ ਞਾਣੇ ਪਾਕਟਂ ਹੋਤੀਤਿ ਅਧਿਪ੍ਪਾਯੋ. ਸ੍ਵਾਯਂ ਫੁਸਨ ਲਕ੍ਖਣੋ, ਸਙ੍ਘਟ੍ਟਨਰਸੋ, ਸਨ੍ਨਿਪਾਤਪਚ੍ਚੁਪਟ੍ਠਾਨੋ, ਆਪਾਤਾ ਗਤਵਿਸਯ ਪਦਟ੍ਠਾਨੋ. ਤਤ੍ਥ ਸਨ੍ਨਿਪਾਤੋ ਨਾਮ ਤਿਣ੍ਣਂ ਤਿਣ੍ਣਂ ਦ੍ਵਾਰਾ ਰਮ੍ਮਣ ਵਿਞ੍ਞਾਣਾਨਂ ਸਙ੍ਗਤਿ ਸਮਾਗਮੋ ਸਮੋਧਾਨਂ. ਤਥਾਹਿ ਵੁਤ੍ਤਂ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁ ਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ ਤਿਆਦਿ. ‘‘ਸਙ੍ਘਟ੍ਟਨਰਸੋ’’ਤਿ ਆਰਮ੍ਮਣੇ ਸਮ੍ਮਦੇਵ ਘਟ੍ਟਨ ਕਿਚ੍ਚੋ. ਸਙ੍ਘਟ੍ਟਨ ਕਿਚ੍ਚਤ੍ਤਾ ਏਵ ਤਿਣ੍ਣਂ ਸਨ੍ਨਿਪਾਤੋ ਹੁਤ੍ਵਾ ਧਮ੍ਮ ਚਿਨ੍ਤਾਞਾਣਸ੍ਸ ਪਟਿਮੁਖਂ ਉਪਟ੍ਠਾਤਿ ਪਕਾਸਤੀਤਿ. ‘‘ਸਨ੍ਨਿਪਾਤ ਪਚ੍ਚੁਪਟ੍ਠਾਨੋ’’. ਪਚ੍ਚੁਪਟ੍ਠਾਨਨ੍ਤਿ ਵਾ ਪਞ੍ਞਾਣਂ ਵੁਚ੍ਚਤਿ ਧਜੋਰਥਸ੍ਸ ਪਞ੍ਞਾਣਨ੍ਤਿ ਏਤ੍ਥ ਵਿਯ. ਸਨ੍ਨਿਪਾਤਾਕਾਰੋ ਪਚ੍ਚੁਪਟ੍ਠਾਨਂ ਯਸ੍ਸਾਤਿ ਸਨ੍ਨਿਪਾਤਪਚ੍ਚੁਪਟ੍ਠਾਨੋ. ਵੇਦਨਾਪਚ੍ਚੁ ਪਟ੍ਠਾਨੋ ਵਾ. ਧੂਮੋਵਿਯ ਅਗ੍ਗਿਸ੍ਸ. ਵੇਦਨਾਫਲਂ ਪਚ੍ਚੁਪਟ੍ਠਾਨਂ ਯਸ੍ਸਾਤਿ ਵਿਗ੍ਗਹੋ. ਅਟ੍ਠਸਾਲਿਨਿਯਂ ਪਨ ਕਸ੍ਮਾ ਪਨੇਤ੍ਥ ਫਸ੍ਸੋ ਪਥਮਂ ਵੁਤ੍ਤੋ ਤਿਪੁਚ੍ਛਿਤ੍ਵਾ ਮਹਾਅਟ੍ਠਕਥਾ ਵਾਦੋਤਾਵ ਦਸ੍ਸਿਤੋ. ਚਿਤ੍ਤਸ੍ਸ ਪਥਮਾਭਿਨਿਪਾਤਤ੍ਤਾ. ਆਰਮ੍ਮਣਸ੍ਮਿਞ੍ਹਿ ਚਿਤ੍ਤਸ੍ਸ ਪਥਮਾਭਿਨਿਪਾਤੋ ਹੁਤ੍ਵਾ ਫਸ੍ਸੋ ਆਰਮ੍ਮਣਂ ਫੁਸਮਾਨੋ ਉਪ੍ਪਜ੍ਜਤਿ. ਤਸ੍ਮਾ ਪਥਮਂ ਵੁਤ੍ਤੋ. ਫਸ੍ਸੇਨ ਫੁਸ੍ਸਿਤ੍ਵਾ ਵੇਦਨਾਯ ਵੇਦਯਤਿ. ਸਞ੍ਞਾਯ ਸਞ੍ਜਾਨਾਤਿ. ਚੇਤਨਾਯ ਚੇਤਤਿ. ਤੇਨ ਵੁਤ੍ਤਂ ਫੁਟ੍ਠੋ ਭਿਕ੍ਖਵੇ ਵੇਦੇਤਿ, ਫੁਟ੍ਠੋ ਸਞ੍ਜਾਨਾਤਿ, ਫੁਟ੍ਠੋ ਚੇਤੇਤੀਤਿ. ਅਪਿ ਚ ਅਯਂ ਫਸ੍ਸੋ ਨਾਮ ਯਥਾਪਾਸਾਦਂ ਪਤ੍ਵਾ ਥਮ੍ਭੋ ਨਾਮ ਸੇਸਦਬ੍ਬ ਸਮ੍ਭਾਰਾਨਂ ਬਲਵਪਚ੍ਚਯੋ. ਏਵਮੇਵ ਸਹਜਾਤ ਸਮ੍ਪਯੁਤ੍ਤ ਧਮ੍ਮਾਨਂ ਬਲਵ ਪਚ੍ਚਯੋ ਹੋਤਿ. ਤਸ੍ਮਾ ਪਥਮਂ ਵੁਤ੍ਤੋਤਿ. ਸਙ੍ਗਹਕਾਰੇਨ ਪਨ ਇਦਂ ਪਨ ਅਕਾਰਣਂ, ਏਕਕ੍ਖਣਸ੍ਮਿਞ੍ਹਿ ਉਪ੍ਪਨ੍ਨ ਧਮ੍ਮਾਨਂ ਅਯਂ ਪਥਮਂ ਉਪ੍ਪਨ੍ਨੋ ਅਯਂ ਪਚ੍ਛਾਤਿ ਇਦਂ ਵਤ੍ਤੁਂ ਨ ਲਬ੍ਭਾ. ਬਲਵਪਚ੍ਚਯਭਾਵੇਪਿ ਫਸ੍ਸਸ੍ਸਕਾਰਣਂ ਨ ਦਿਸ੍ਸਤੀਤਿ ਏਵਂ ਤਂ ਵਾਦਂ ਪਟਿਕ੍ਖਿਪੇਤ੍ਵਾ ਇਦਂ ਵੁਤ੍ਤਂ ਦੇਸਨਾ ਵਾਰੇਨੇਵ ਫਸ੍ਸੋ ਪਥਮਂ ਵੁਤ੍ਤੋਤਿ. ਤਤ੍ਥ ‘‘ਦੇਸਨਾਵਾਰੇ ਨੇਵਾ’’ਤਿ ਦੇਸਨਕ੍ਕਮੇਨੇਵ, ਤਤੋ ਅਞ੍ਞਂ ਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ. ਤੇਸੁ ਪਨ ਦ੍ਵੀਸੁ ਵਾਦੇਸੁ ਮਹਾਅਟ੍ਠਕਥਾ ਵਾਦੋ ਏਵ ਯੁਤ੍ਤੋ. ਯਞ੍ਹਿ ਤਤ੍ਥ ਵੁਤ੍ਤਂ ਚਿਤ੍ਤਸ੍ਸ ਪਥਮਾਭਿਨਿਪਾਤੋ ਹੁਤ੍ਵਾਤਿ. ਤਤ੍ਥ ਪਥਮਾਭਿਨਿਪਾਤੋਤਿ ਇਦਂ ਕਿਚ੍ਚਪ੍ਪਧਾਨਤ੍ਤਾ ਵੁਤ੍ਤਂ. ਨ ਪਨਞ੍ਞੇਹਿ ਚੇਤਸਿਕੇਹਿ ਵਿਨਾ ਵਿਸੁਂ ਪਥਮਂ ਉਪ੍ਪਨ੍ਨਤ੍ਤਾ. ਯਥਾ ਤਂ ਯੇ ਕੇਚਿ ਭਿਕ੍ਖਵੇ ਧਮ੍ਮਾ ਅਕੁਸਲਾ ਅਕੁਸਲਭਾਗਿਯਾ ਅਕੁਸਲਪਕ੍ਖਿਕਾ. ਸਬ੍ਬੇ ਤੇ ਮਨੋਪੁਬ੍ਬਙ੍ਗਮਾ, ਮਨੋ ਤੇਸਂ ਧਮ੍ਮਾਨਂ ਪਥਮਂ ਉਪ੍ਪਜ੍ਜਤੀਤਿ ਇਮਸ੍ਮਿਂ ਸੁਤ੍ਤੇ ਕਿਚ੍ਚਪ੍ਪਧਾਨਤ੍ਤਾ ਮਨੋ ਤੇਸਂ ਧਮ੍ਮਾਨਂ ਪਥਮਂ ਉਪ੍ਪਜ੍ਜਤੀਤਿ ਵੁਤ੍ਤਂ. ਨ ਪਨ ਸਬ੍ਬਚੇਤਸਿਕੇਹਿ ਵਿਨਾ ਵਿਸੁਂ ਪਥਮਂ ਉਪ੍ਪਨ੍ਨਤ੍ਤਾਤਿ ਦਟ੍ਠਬ੍ਬਂ. ਬਲਵਪਚ੍ਚਯ ਭਾਵੇਪਿ ਫਸ੍ਸਸ੍ਸਕਾਰਣਂ ਦਿਸ੍ਸਤਿਯੇਵ. ਫਸ੍ਸੋਹੇਤੁ ਫਸ੍ਸੋ ਪਚ੍ਚਯੋ ਵੇਦਨਾਕ੍ਖਨ੍ਧਸ੍ਸ ਪਞ੍ਞਾ ਪਨਾਯ. ਫਸ੍ਸੋ ਹੇਤੁ ਫਸ੍ਸੋ ਪਚ੍ਚਯੋ ਸਞ੍ਞਾਕ੍ਖਨ੍ਧਸ੍ਸ ਪਞ੍ਞਾ ਨਾਯ. ਫਸ੍ਸੋ ਹੇਤੁ ਫਸ੍ਸੋ ਪਚ੍ਚਯੋ ਸਙ੍ਖਾਰਕ੍ਖਨ੍ਧਸ੍ਸ ਪਞ੍ਞਾਪਨਾਯਾਤਿ ਹਿ ਵੁਤ੍ਤਂ. ਤਸ੍ਮਾ ਸਬ੍ਬੇਸਂ ਚੇਤਸਿਕਾਨਂ ਧਮ੍ਮਾਨਂ ਫਸ੍ਸਪ੍ਪਧਾਨਤ੍ਤਾ ਏਵ ਫਸ੍ਸ ਬਲਵਪਚ੍ਚਯਤ੍ਤਾ ਏਵ ਚ ਫਸ੍ਸੋ ਪਥਮਂ ਵੁਤ੍ਤੋਤਿ ਦਟ੍ਠਬ੍ਬਂ. ਏਤ੍ਥ ਚ ਚਿਤ੍ਤਂ ਆਰਮ੍ਮਣ ਵਿਜਾਨਨਟ੍ਠੇਨ ਫਸ੍ਸਾਦੀਨਂ ਸਬ੍ਬਚੇਤਸਿਕ ਧਮ੍ਮਾਨਂ ਪੁਬ੍ਬਙ੍ਗਮਂ ਹੋਤਿ, ਪਧਾਨਂ, ਜੇਟ੍ਠਕਂ. ਫਸ੍ਸੋ ਪਨ ਆਰਮ੍ਮਣ ਸਙ੍ਘਟ੍ਟਨਟ੍ਠੇਨ ਸਬ੍ਬੇਸਂ ਚੇਤਸਿਕ ਧਮ੍ਮਾਨਂ ਪੁਬ੍ਬਙ੍ਗਮੋ ਹੋਤਿ, ਪਧਾਨੋ, ਜੇਟ੍ਠਕੋਤਿ ਅਯਂ ਦ੍ਵਿਨ੍ਨਂ ਵਿਸੇਸੋਤਿ. ਏਤ੍ਥ ਚੋਦਕੋ ਫੁਸਨਂ ਨਾਮ ਸਪ੍ਪਟਿਘਰੂਪਾਨਂ ਏਵ ਕਿਚ੍ਚਨ੍ਤਿ ਮਞ੍ਞਮਾਨੋ ‘‘ਨਨੁਚਾ’’ਤਿਆਦਿਨਾ ਚੋਦੇਤਿ. ‘‘ਨਨੁਚਾ’’ਤਿ ਚੋਦੇਧੀਤਿ ਦੀਪੇਤਿ. ‘‘ਅਪ੍ਪਟਿਘਸਭਾਵਾ’’ਤਿ ਹੇਤੁਵਿਸੇਸਨਂ. ‘‘ਕਿਞ੍ਚੀ’’ਤਿ ਕਿਞ੍ਚਿਵਤ੍ਥੁਂ. ਅਯਂ ਪਨ ਫਸ੍ਸੋ. ‘‘ਚਿਤ੍ਤਸ੍ਸ ਵਿਕਾਰਾ ਪਤ੍ਤਿਂ’’ਤਿ ਚਲਨ ਕਮ੍ਪਨ ਥਮ੍ਭਨ ਜੇਗੁਚ੍ਛ ਭਯ ਤਾਸ ਛਮ੍ਭਿਤਤ੍ਤਾ ਦਿਵਸੇਨ ਵਿਕਾਰਾ ਪਜ੍ਜਨਂ. ‘‘ਵੇਦਨਾ ਵਿਸੇਸੁਪ੍ਪਤ੍ਤਿਂ’’ਤਿ ਸੁਖਵੇਦਨੀਯਂ ਫਸ੍ਸਂ ਪਟਿਚ੍ਚ ਸੁਖਵੇਦਨਾ, ਦੁਕ੍ਖਵੇਦਨੀਯਂ ਫਸ੍ਸਂ ਪਟਿਚ੍ਚ ਦੁਕ੍ਖ ਵੇਦਨਾਤਿਆਦਿਨਾ ਨਯੇਨ ਫਸ੍ਸ ਵਿਸੇਸਾਨੁਰੂਪਂ ਵੇਦਨਾ ਵਿਸੇਸੁਪ੍ਪਤ੍ਤਿਂ ਸਾਧੇਤਿ. ਏਤ੍ਥ ਚ ਫੁਸਨਂ ਨਾਮ ਦੁਵਿਧਂ ਰੂਪਪ੍ਫੁਸਨਂ, ਨਾਮਪ੍ਫੁਸਨ, ਨ੍ਤਿ. ਤਤ੍ਥ ਰੂਪਪ੍ਫੁਸਨਂ ਨਾਮ ਫੋਟ੍ਠਬ੍ਬ ਧਾਤੂਨਂ ਕਿਚ੍ਚਂ. ਨਾਮਪ੍ਫੁਸਨਂ ਦੁਵਿਧਂ ਫਸ੍ਸਪ੍ਫੁਸਨਂ, ਞਾਣਪ੍ਫੁਸਨ, ਨ੍ਤਿ. ਤਤ੍ਥ ਞਾਣਪ੍ਫੁਸਨਂ ਨਾਮ ਞਾਣਪ੍ਪਟਿਵੇਧੋ. ਅਪਿ ਚ ਝਾਨਮਗ੍ਗ ਫਲ ਨਿਬ੍ਬਾਨਾਨਂ ਪਟਿਲਾਭੋਪਿ ਫੁਸਨਨ੍ਤਿ ਵੁਚ੍ਚਤਿ. ਫੁਸਨ੍ਤਿ ਧੀਰਾ ਨਿਬ੍ਬਾਨਂ. ਯੋਗਕ੍ਖੇਮਂ ਅਨੁਤ੍ਤਰਂ. ਫੁਸਾਮਿ ਨੇਕ੍ਖਮਂ ਸੁਖਂ. ਅਪੁਥੁਜ੍ਜਨ ਸੇਵਿਤਨ੍ਤਿ-ਆਦੀਸੁ. ਇਦਂ ਉਪਮਾ ਮਤ੍ਤਂ ਸਿਯਾ, ਕਸ੍ਸਚਿ ਮਨ੍ਦ ਪਞ੍ਞਸ੍ਸਾਤਿ ਅਧਿਪ੍ਪਾਯੋ. ‘‘ਇਦ’’ਨ੍ਤਿ ਖੇਲ਼ੁਪ੍ਪਾਦ ਵਚਨਂ. ਵਿਞ੍ਞੁਸ੍ਸ ਪਨ ਅਤਿਪਾਕਟ ਫਸ੍ਸ ਨਿਦਸ੍ਸਨੇਨ ਅਪ੍ਪਾਕਟ ਫਸ੍ਸ ਵਿਭਾਵਨਂ ਯੁਤ੍ਤਮੇਵ. ਤੇਨਾਹ ‘‘ਅਤਿਪਾਕਟਾਯ ਪਨਾ’’ਤਿਆਦਿਂ.

੭੦. ਵੇਦਨਾਵਚਨਤ੍ਥੇ. ‘‘ਤਂਸਮਙ੍ਗੀਪੁਗ੍ਗਲਾਨਂ ਵਾ’’ਤਿ ਵੇਦਨਾ ਸਮਙ੍ਗੀਪੁਗ੍ਗਲਾਨਂ ਵਾ. ‘‘ਸਾਤਂ ਵਾ’’ਤਿ ਸਾਧੁਰਸਂ ਵਾ. ‘‘ਅਸ੍ਸਾਤਂ ਵਾ’’ਤਿ ਅਸਾਧੁਰਸਂ ਵਾ. ‘‘ਕਿਂ ਵੇਦਯਤੀ’’ਤਿ ਕਤਮਂ ਵੇਦਯਤਿ. ‘‘ਸੁਖਮ੍ਪਿ ਵੇਦਯਤੀ’’ਤਿ ਸੁਖਮ੍ਪਿ ਵੇਦਨਂ ਵੇਦਯਤਿ. ਅਥਵਾ ‘‘ਕਿਞ੍ਚਵੇਦਯਤੀ’’ਤਿ ਕਥਞ੍ਚਵੇਦਯਤਿ. ‘‘ਸੁਖਮ੍ਪਿ ਵੇਦਯਤੀ’’ਤਿ ਸੁਖਂ ਹੁਤ੍ਵਾਪਿ ਵੇਦਯਤਿ. ਸੁਖ ਭਾਵੇਨ ਵੇਦਯਤੀਤਿ ਵੁਤ੍ਤਂ ਹੋਤਿ. ਏਵਂ ਸੇਸਪਦੇਸੁਪਿ. ‘‘ਕਿਚ੍ਚਨ੍ਤਰਬ੍ਯਾਵਟਾ’’ਤਿ ਅਞ੍ਞਕਿਚ੍ਚਬ੍ਯਾਵਟਾ. ਅਧਿਪਤਿ ਭਾਵੋ ਆਧਿਪਚ੍ਚਂ. ਇਨ੍ਦ੍ਰਿਯ ਕਿਚ੍ਚਂ. ‘‘ਏਵਞ੍ਚ ਕਤ੍ਵਾ’’ਤਿ ਲਦ੍ਧਗੁਣਵਚਨਂ. ਰਾਜਾਰਹ ਭੋਜਨਂ ਰਾਜਗ੍ਗਭੋਜਨਂ. ‘‘ਸੂਦਸਦਿਸਤਾ’’ਤਿ ਰਞ੍ਞੋਭਤ੍ਤਕਾਰਸਦਿਸਤਾ. ਤਤ੍ਥ ਸੂਦੋ ਰਞ੍ਞੋਭਤ੍ਤਂ ਪਚਨ੍ਤੋ ਰਸਜਾਨਨਤ੍ਥਂ ਥੋਕਂ ਗਹੇਤ੍ਵਾ ਜਿਵ੍ਹਗ੍ਗੇ ਠਪੇਤ੍ਵਾ ਰਸਂ ਵੀਮਂਸਤਿ. ਯਥਿਚ੍ਛਿਤਂ ਪਨ ਭੁਞ੍ਜਿਤੁਂ ਅਨਿਸ੍ਸਰੋ. ਰਾਜਾ ਏਵ ਯਥਿਚ੍ਛਿਤਂ ਭੁਞ੍ਜਿਤੁਂ ਇਸ੍ਸਰੋ. ਰਾਜਾ ਵਿਯ ਵੇਦਨਾ. ਸੂਦੋ ਵਿਯ ਸੇਸਚੇਤਸਿਕ ਧਮ੍ਮਾ.

੭੧. ਸਞ੍ਞਾਵਚਨਤ੍ਥੇ. ‘‘ਸਞ੍ਜਾਨਾਤੀ’’ਤਿ ਸੁਟ੍ਠੁ ਜਾਨਾਤਿ. ਸੁਟ੍ਠੁਜਾਨਨਞ੍ਚ ਨਾਮ ਨ ਵਿਞ੍ਞਾਣਸ੍ਸ ਵਿਯ ਵਿਵਿਧਜਾਨਨਂ ਹੋਤਿ. ਨ ਚ ਪਞ੍ਞਾਯ ਵਿਯ ਯਥਾਭੂਤਜਾਨਨਂ ਹੋਤਿ. ਅਥ ਖੋ ਭੂਤਂ ਵਾ ਹੋਤੁ, ਅਭੂਤਂ ਵਾ. ਯਂ ਯਂ ਛ ਹਿ ਵਿਞ੍ਞਾਣੇਹਿ ਵਿਜਾਨਾਤਿ, ਪਞ੍ਞਾਯ ਵਾ ਪਜਾਨਾਤਿ. ਤਸ੍ਸ ਤਸ੍ਸ ਪਚ੍ਛਾ ਅਪ੍ਪਮੁਸ੍ਸਕਰਣ ਮੇਵਾਤਿ ਵੁਤ੍ਤਂ ‘‘ਪੁਨਜਾਨਨਤ੍ਥਂ ਸਞ੍ਞਾਣਂ ਕਰੋਤੀ’’ਤਿ. ਤਤ੍ਥ ‘‘ਸਞ੍ਞਾਣ’’ਨ੍ਤਿ ਨਿਮਿਤ੍ਤ ਕਰਣਂ. ਭਵਨ੍ਤਰਂ ਪਤ੍ਵਾਪਿ ਅਪ੍ਪਮੁਟ੍ਠਭਾਵਂ ਸਾਧੇਤਿ ਓਪਪਾਤਿਕ ਪੁਗ੍ਗਲਾਨਨ੍ਤਿ ਅਧਿਪ੍ਪਾਯੋ. ਤੇਹਿ ਪੁਰਿਮਂ ਅਤ੍ਤਨੋ ਭਵਂ ਜਾਨਨ੍ਤਿ. ਗਬ੍ਭਸੇਯ੍ਯਕਾਪਿ ਕੇਚਿ ਪੁਰਿਮਂ ਭਵਂ ਜਾਨਨ੍ਤਿ, ਯੇਜਾਤਿਸ੍ਸਰ ਪੁਗ੍ਗਲਾਤਿ ਵੁਚ੍ਚਨ੍ਤਿ. ਤਤ੍ਥ ‘‘ਅਪ੍ਪਮੁਟ੍ਠਭਾਵ’’ਨ੍ਤਿ ਅਨਟ੍ਠਭਾਵਂ. ਮਿਚ੍ਛਾਭਿਨਿਵੇਸ ਸਞ੍ਞਾ ਨਾਮ ਅਨਿਚ੍ਚੇ ਨਿਚ੍ਚਨ੍ਤਿਆਦਿਪ੍ਪਵਤ੍ਤਾ ਸਞ੍ਞਾ. ‘‘ਬੋਧੇਤੁ’’ਨ੍ਤਿ ਬੁਜ੍ਝਾਪੇਤੁਂ. ‘‘ਦਾਰੁਤਚ੍ਛਕਸਦਿਸਾਤਿ ਚ ਵੁਤ੍ਤਾ’’ਤਿ ਦਾਰੁਤਚ੍ਛਕੋ ਨਾਮ ਕਟ੍ਠਵਡ੍ਢਕੀ. ਸੋ ਕਟ੍ਠਕ੍ਖਨ੍ਧੇਸੁ ਨਿਮਿਤ੍ਤਕਾਰੀਹੋਤਿ. ਸੁਤਚ੍ਛਿਤਛਿਨ੍ਦਿਤੇਸੁ ਕਟ੍ਠੇਸੁ ਨਿਮਿਤ੍ਤਾਨਿ ਕਤ੍ਵਾ ਠਪੇਤਿ. ਪਚ੍ਛਾਤਾਨਿ ਓਲੋਕੇਤ੍ਵਾ ਕਟ੍ਠਾਨਿ ਕਮ੍ਮੇ ਉਪਨੇਤਿ. ‘‘ਹਤ੍ਥਿ ਦਸ੍ਸਕ ਅਨ੍ਧਸਦਿਸਾ’’ਤਿ ਏਤ੍ਥ ਏਕੋ ਕਿਰ ਰਾਜਾ ਕੇਲ਼ਿਪ੍ਪਸੁਤੋ ਹੋਤਿ. ਸੋ ਜਚ੍ਚਨ੍ਧਾਨਂਠਾਨੇ ਏਕਂ ਹਤ੍ਥਿਂ ਆਨੇਤ੍ਵਾਠਪੇਨ੍ਤੋ ਜਚ੍ਚਨ੍ਧੇ ਆਹ ਜਾਨਾਥ ਭੋ ਤੁਮ੍ਹੇ ਹਤ੍ਥਿਨ੍ਤਿ. ਤੇ ਹਤ੍ਥਿਂ ਜਾਨਿਸ੍ਸਾਮਾਤਿ ਪਰਾਮਸਿਤ੍ਵਾ ਅਤ੍ਤਨੋ ਪਰਾਮਸਿਤਂ ਤਂ ਤਂ ਅਙ੍ਗਮਵਹਤ੍ਥੀਤਿ ਅਭਿਨਿਵਿਸਨ੍ਤਿ. ਦਲ਼੍ਹਂ ਸਲ੍ਲਕ੍ਖੇਨ੍ਤਿ. ਪੁਨ ਰਾਜਾ ਤੇ ਪੁਚ੍ਛਿ ਕੀਦਿਸੋ ਭੋ ਹਤ੍ਥੀਤਿ. ਤੇ ਰਞ੍ਞੋ ਹਤ੍ਥਿਸਣ੍ਠਾਨਂ ਆਚਿਕ੍ਖਨ੍ਤਾ ਵਿਵਾਦਂ ਆਪਜ੍ਜਨ੍ਤਿ. ਆਚਿਕ੍ਖਨਮੇਵ ਰਞ੍ਞੋਹਤ੍ਥਿਦਸ੍ਸਨਨ੍ਤਿ ਕਤ੍ਵਾ ਤੇ ਹਤ੍ਥਿਦਸ੍ਸਕ ਅਨ੍ਧਾਤਿ ਵੁਚ੍ਚਨ੍ਤਿ. ‘‘ਉਪਟ੍ਠਿਤਵਿਸਯਗ੍ਗਹਣੇ’’ਤਿ ਰਤ੍ਤਿਯਂ ਅਨ੍ਧਕਾਰੇ ਰਜ੍ਜੁਕ੍ਖਣ੍ਡਂ ਪਸ੍ਸਨ੍ਤਸ੍ਸ ਸਪ੍ਪਸਣ੍ਠਾਨਂ ਉਪਟ੍ਠਾਤਿ. ਸੋ ਉਪਟ੍ਠਿਤਂ ਸਣ੍ਠਾਨਮਤ੍ਤਂ ਸਪ੍ਪੋਤਿ ਗਣ੍ਹਾਤਿ. ਏਵਂ ਉਪਟ੍ਠਿਤਵਿਸਯਗ੍ਗਹਣਂ ਹੋਤਿ. ਮਿਗਪੋਤਕਾਨਞ੍ਚ ਅਰਞ੍ਞੇਖੇਤ੍ਤਮਜ੍ਝੇਪੁਰਿਸਸਣ੍ਠਾਨਂ ਤਿਣ ਰੂਪਂ ਪਸ੍ਸਨ੍ਤਾਨਂ ਪੁਰਿਸਸਣ੍ਠਾ ਨਂ ਉਪਟ੍ਠਾਤਿ. ਤੇ ਉਪਟ੍ਠਿਤਂ ਸਣ੍ਠਾਨਮਤ੍ਤਂ ਪੁਰਿਸੋਤਿ ਗਣ੍ਹਿਤ੍ਵਾ ਸੋ ਅਮ੍ਹੇ ਪਹਰੇਯ੍ਯਾਤਿ ਪਲਾਯਨ੍ਤਿ. ਵੁਤ੍ਤਾ ਅਟ੍ਠਸਾਲਿਨਿਯਂ.

੭੨. ਚੇਤਨਾਵਚਨਤ੍ਥੇ. ਚੇਤੇਤੀਤਿ ਚੇਤਨਾ. ਚੇਤਨਞ੍ਚੇਤ੍ਥ ਅਭਿਸਨ੍ਧਾਨਂ ਵਾ ਵੁਚ੍ਚਤਿ ਪਕਪ੍ਪਨਂ ਵਾ ਆਯੂਹਨਂ ਵਾਤਿ ਏਵਂ ਤਿਧਾ ਅਤ੍ਥਵਿਕਪ੍ਪਂ ਦਸ੍ਸੇਤੁਂ ‘‘ਸਮ੍ਪਯੁਤ੍ਤ ਧਮ੍ਮੇ’’ਤਿਆਦਿਮਾਹ. ਤਤ੍ਥ ‘‘ਅਭਿਸਨ੍ਦਹਤੀ’’ਤਿ ਅਭਿਮੁਖਂ ਸਨ੍ਦਹਤਿ, ਸਂਯੋਗਂ ਕਰੋਤਿ. ਤੇਨਾਹ ‘‘ਪੁਨਪ੍ਪੁਨਂ ਘਟੇਤੀ’’ਤਿ. ‘‘ਘਟੇਤੀ’’ਤਿ ਸਮ੍ਬਨ੍ਧਤਿ. ‘‘ਪਕਪ੍ਪੇਤਿ ਵਾਤੇ’’ਤਿ ਅਥਵਾ ਤੇ ਸਮ੍ਪਯੁਤ੍ਤ ਧਮ੍ਮੇ ਪਕਾਰਤੋ ਕਪ੍ਪੇਤਿ, ਸਜ੍ਜੇਤਿ. ਤੇਨਾਹ ‘‘ਸਂਵਿਦਹਤੀ’’ਤਿ. ‘‘ਸਂਵਿਦਹਤੀ’’ਤਿ ਤ੍ਵਂ ਫੁਸਨਕਿਚ੍ਚਂ ਕਰੋਹਿ, ਤ੍ਵਂ ਵੇਦਯਿਤ ਕਿਚ੍ਚਂ ਕਰੋਹਿ, ਤ੍ਵਂ ਸਞ੍ਜਾਨਨਕਿਚ੍ਚਂ ਕਰੋਹੀਤਿਆਦਿਨਾ ਵਦਮਾਨਾ ਵਿਯ ਸਂਵਿਦਹਤਿ. ‘‘ਆਯੂਹਤਿਵਾਤੇ’’ਤਿ ਅਥਵਾ ਤੇਸਮ੍ਪਯੁਤ੍ਤ ਧਮ੍ਮੇ ਭੁਸੋ ਬ੍ਯੂਹਯਤਿ, ਰਾਸਿਂ ਕਰੋਤਿ. ਤੇਨਾਹ ‘‘ਆਰਮ੍ਮਣੇ ਸਮ੍ਪਿਣ੍ਡੇਤੀ’’ਤਿ. ‘‘ਸਮੋਸਰਨ੍ਤੇ’’ਤਿ ਏਕਤੋ ਓਸਰਨ੍ਤੇ. ਸਙ੍ਗਮਨ੍ਤੇ. ‘‘ਸਾ’’ਤਿ ਚੇਤਨਾ. ‘‘ਤਾਯਾ’’ਤਿ ਚੇਤਨਾਯ. ‘‘ਤਸ੍ਮਿਂ’’ਤਿ ਰੂਪਾਦਿਕੇਵਾ ਆਰਮ੍ਮਣੇ. ਪੁਞ੍ਞਾਪੁਞ੍ਞ ਕਿਚ੍ਚੇਵਾ. ਪਵਤ੍ਤਮਾਨਾਯ ਸਤਿਯਾ. ਜੇਟ੍ਠਸਿਸ੍ਸੋ ਨਾਮ ਬਹੂਸੁ ਸਿਸ੍ਸੇਸੁ ਜੇਟ੍ਠਭੂਤੋ ਸਿਸ੍ਸੋ. ਤਸ੍ਮਿਂ ਸਜ੍ਝਾਯਨ੍ਤੇ ਸੇਸਾ ਸਬ੍ਬੇ ਸਜ੍ਝਾਯਨ੍ਤਿਯੇਵ. ਤੇਨ ਸੋ ਉਭਯਕਿਚ੍ਚ ਸਾਧਕੋ ਹੋਤਿ. ਏਵਂ ਮਹਾਵਡ੍ਢਕੀਪਿ.

੭੩. ਏਕਗ੍ਗਤਾਵਚਨਤ੍ਥੇ. ਏਕਤ੍ਤਾਰਮ੍ਮਣਂ ਨਾਮ ਏਕਾਰਮ੍ਮਣਸ੍ਸਪਿ ਬਹੂਸੁ ਸਭਾਵੇਸੁ ਏਕਸਭਾਵਸਙ੍ਖਾਤਂ ਆਰਮ੍ਮਣਂ. ‘‘ਤਸ੍ਮਿਂ’’ ਚਿਤ੍ਤਸ੍ਮਿਂ. ‘‘ਨਿਵਾਤੇ’’ਤਿ ਵਾਤਰਹਿਤੇ ਪਦੇਸੇ. ‘‘ਦੀਪਚ੍ਚੀਨਂ’’ਤਿ ਦੀਪਜਾਲਾਨਂ.

੭੪. ਜੀਵਿਤਿਨ੍ਦ੍ਰਿਯਵਚਨਤ੍ਥੇ. ‘‘ਇਸ੍ਸਰਭਾਵੋ ਵੁਚ੍ਚਤਿ’’ ਭਾਵਪ੍ਪਧਾਨ ਨਯੇਨਾਤਿ ਅਧਿਪ੍ਪਾਯੋ. ‘‘ਅਭਿਭਵਿਤ੍ਵਾ’’ਤਿ ਜੀਵਨ ਕਿਚ੍ਚੇ ਅਤ੍ਤਨੋ ਵਸਂ ਵਤ੍ਤਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਚਿਤ੍ਤ ਸਨ੍ਤਾਨਂ ਜੀਵਨ੍ਤਂ ਹੁਤ੍ਵਾਤਿ ਸਮ੍ਬਨ੍ਧੋ.

੭੫. ਮਨਸੀਕਾਰਵਚਨਤ੍ਥੇ. ਸਮਾਸਮਜ੍ਝੇ ਸਕਾਰਾਗਮੋ. ਕਰਧਾਤੁਯੋਗੇ ਈਕਾਰਾਗਮੋ ਚ ਦਟ੍ਠਬ੍ਬੋ. ਅਲੁਤ੍ਤ ਸਤ੍ਤਮੀ ਪਦਨ੍ਥਿ ਕੇਚਿ. ਏਵਂ ਸਤਿ ਈਦੀਘਤ੍ਤਂ ਨਸਿਜ੍ਝਤਿ. ‘‘ਅਸੁਞ੍ਞਂ’’ਤਿ ਅਰਿਤ੍ਤਂ. ‘‘ਪਟਿਪਾਦੇਤੀ’’ਤਿ ਪਟਿਪਜ੍ਜਨਂ ਕਿਚ੍ਚਸਾਧਨਂ ਕਾਰਾਪੇਤਿ. ਅਤ੍ਥਤੋ ਨਿਯੋਜੇਤਿ ਨਾਮਾਤਿ ਆਹ ‘‘ਯੋਜੇਤੀ’’ਤਿ. ‘‘ਇਦਮੇਵ ਦ੍ਵਯਂ’’ਤਿ ਆਵਜ੍ਜਨ ਦ੍ਵਯਂ. ‘‘ਤਂ’’ਤਿ ਤਂ ਦ੍ਵਯਂ. ਉਪਤ੍ਥਮ੍ਭਿਤਂ ਹੁਤ੍ਵਾ ਆਰਮ੍ਮਣੇ ਨਿਨ੍ਨਂ ਕਰੋਤੀਤਿ ਸਮ੍ਬਨ੍ਧੋ. ‘‘ਯੋਨਿਸੋ’’ਤਿ ਉਪਾਯੇਨ ਹਿਤਸੁਖ ਮਗ੍ਗੇਨ. ‘‘ਅਯੋਨਿਸੋ’’ਤਿ ਅਨੁਪਾਯੇਨ ਅਹਿਤ ਅਸੁਖ ਮਗ੍ਗੇਨ. ‘‘ਸਮੁਦਾਚਿਣ੍ਣਨਿਨ੍ਨਨਿਯਾਮਿਤਾਦੀਹੀ’’ਤਿ ਏਤ੍ਥ ਸਮੁਦਾਚਿਣ੍ਣਂ ਨਾਮ ਆਚਿਣ੍ਣ ਕਮ੍ਮਵਸੇਨ ਸੁਟ੍ਠੁ ਪੁਨਪ੍ਪੁਨਂ ਆਚਰਿਤਂ. ਨਿਨ੍ਨਂ ਨਾਮ ਇਦਂ ਨਾਮ ਪਸ੍ਸਾਮਿ, ਇਦਂ ਨਾਮ ਕਰਿਸ੍ਸਾਮੀਤਿ ਪੁਬ੍ਬੇ ਏਵ ਅਜ੍ਝਾਸਯੇਨ ਨਿਨ੍ਨਂ. ਨਿਯਾਮਿਤਂ ਨਾਮ ਇਦਂ ਨਾਮ ਕਤ੍ਤਬ੍ਬਂ, ਇਦਂ ਨਾਮ ਨ ਕਤ੍ਤਬ੍ਬਂ, ਕਤ੍ਤਬ੍ਬਂ ਕਰੋਮਿ, ਅਕਤ੍ਤਬ੍ਬਂ ਨਕਰੋਮੀਤਿ ਏਵਂ ਨਿਯਾਮਿਤਂ. ‘‘ਅਸਤਿ ਕਾਰਣ ਵਿਸੇਸੇ’’ਤਿ ਭਵਙ੍ਗ ਚਿਤ੍ਤਂ ਵੀਥਿਚਿਤ੍ਤੁਪ੍ਪਤ੍ਤਿਯਾ ਅਸਤਿ, ਵੀਥਿਚਿਤ੍ਤਾਨਿ ਚ ਕਾਯਚਿਤ੍ਤਾਨਂ ਅਕਲ੍ਲਾਦਿਕੇਵਾ ਅਧਿਮਤ੍ਤਸ੍ਸ ਆਰਮ੍ਮਣਨ੍ਤਰਸ੍ਸ ਉਪਟ੍ਠਾਨੇਵਾ ਅਸਤਿ. ‘‘ਸਾਧਾਰਣਾ’’ਤਿ ਏਤ੍ਥ ਸਂਸਦ੍ਦੇ ਬਿਨ੍ਦੁ ਲੋਪੋ, ਦੀਘਤ੍ਤਞ੍ਚਾਤਿ ਆਹ ‘‘ਸਮਂ ਧਾਰੇਨ੍ਤੀਤਿ ਸਾਧਾਰਣਾ’’ਤਿ.

੭੬. ਵਿਤਕ੍ਕਵਚਨਤ੍ਥੇ. ‘‘ਤਥਾ ਤਥਾ ਸਙ੍ਕਪ੍ਪੇਤ੍ਵਾ’’ਤਿ ਕਾਮਸਙ੍ਕਪ੍ਪਾਦੀਨਂ ਨੇਕ੍ਖਮ੍ਮਸਙ੍ਕਪ੍ਪਾਦੀਨਞ੍ਚਵਸੇਨ ਤੇਨ ਤੇਨ ਪਕਾਰੇਨ ਸੁਟ੍ਠੁ ਚਿਨ੍ਤੇਤ੍ਵਾ. ‘‘ਤਂ’’ਤਿ ਆਰਮ੍ਮਣਂ. ‘‘ਤੇ’’ਤਿ ਸਮ੍ਪਯੁਤ੍ਤ ਧਮ੍ਮੇ. ‘‘ਅਵਿਤਕ੍ਕਮ੍ਪਿ ਚਿਤ੍ਤਂ’’ਤਿ ਪਞ੍ਚਵਿਞ੍ਞਾਣ ਚਿਤ੍ਤਞ੍ਚ ਦੁਤੀਯਾ ਦਿਜ੍ਝਾਨ ਚਿਤ੍ਤਞ੍ਚ. ‘‘ਅਪਿਚਾ’’ਤਿ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ‘‘ਦੁਤੀਯਜ੍ਝਾਨਾਦੀਨਿ ਚਾ’’ਤਿ ਦੁਤੀਯਜ੍ਝਾਨ ਚਿਤ੍ਤਾਦੀਨਿ ਚ. ‘‘ਉਪਚਾਰ ਭਾਵਨਾ ਵਸੇਨਾ’’ਤਿ ਸਮੁਦਾਚਿਣ੍ਣ ਵਸਿਭੂਤਾਯ ਉਪਚਾਰ ਭਾਵਨਾਯ ਵਸੇਨ. ‘‘ਕਿਂ ਵਾ ਏਤਾਯਯੁਤ੍ਤਿਯਾ’’ਤਿ ਸਵਿਤਕ੍ਕ ਚਿਤ੍ਤਸਨ੍ਤਾਨੇਤਿਆਦਿਕਾਯ ਯੁਤ੍ਤਿਯਾ ਕਿਂ ਪਯੋਜਨਂ ਅਤ੍ਥੀਤਿ ਅਤ੍ਥੋ. ਕਿਞ੍ਚਿ ਪਯੋਜਨਂ ਨਤ੍ਥੀਤਿ ਅਧਿਪ੍ਪਾਯੋ. ਆਰਮ੍ਮਣਂ ਆਰੋਹਤਿਯੇਵ ਆਰਮ੍ਮਣੇਨ ਅਵਿਨਾਭਾਵਵੁਤ੍ਤਿਕਤ੍ਤਾ. ‘‘ਤਂ’’ਤਿ ਚਿਤ੍ਤਂ. ਨਿਯਾਮਕੋ ਨਾਮ ਨਾਵਂ ਇਚ੍ਛਿਤ ਦਿਸਾਦੇਸਨਿਯੋਜਕੋ. ‘‘ਅਕੁਸਲਂ ਪਤ੍ਵਾ’’ਤਿ ਵੁਤ੍ਤਂ. ਕੁਸਲਂ ਪਤ੍ਵਾ ਪਨ ਕਥਂਤਿ. ਕੁਸਲਂ ਪਤ੍ਵਾਪਿ ਪਤਿਰੂਪਦੇਸਾਵਾਸਾਦਿਵਸੇਨ ਸਮੁਦਾ ਚਿਣ੍ਣ ਨਿਨ੍ਨਾਦਿਵਸੇਨ ਚ ਲਦ੍ਧ ਪਚ੍ਚਯੇ ਸਤਿ ਚਿਤ੍ਤਮ੍ਪਿ ਸਦ੍ਧਾਸਤਿ ਆਦਯੋਪਿ ਆਰਮ੍ਮਣ ਰੂਹਨੇ ਥਾਮਗਤਾ ਏਵ. ਅਲਦ੍ਧ ਪਚ੍ਚਯੇ ਪਨ ਸਤਿ ਅਕੁਸਲ ਭਾਵੇ ਠਤ੍ਵਾ ਥਾਮਗਤਂ ਹੋਤਿ. ‘‘ਮਨਸਿਕਾਰ ਵੀਰਿਯ ਸਤੀਨਂ’’ਤਿ ਭਾਵਨਾ ਬਲਪਤ੍ਤਾ ਨਨ੍ਤਿ ਅਧਿਪ੍ਪਾਯੋ. ਏਵਂ ਪਨ ਸਤਿ, ਵਿਤਕ੍ਕਸ੍ਸ ਓਕਾਸੋ ਨਤ੍ਥੀਤਿ. ਅਤ੍ਥਿ. ਸਙ੍ਕਪ੍ਪਨ ਕਿਚ੍ਚ ਵਿਸੇਸਤ੍ਤਾ. ਤਞ੍ਹਿ ਕਿਚ੍ਚਂ ਅਞ੍ਞੇਸਂ ਅਸਾਧਾਰਣਂ, ਵਿਤਕ੍ਕਸ੍ਸੇਵ ਕਿਚ੍ਚਨ੍ਤਿ ਦਸ੍ਸੇਨ੍ਤੋ ‘‘ਵਿਤਕ੍ਕੋਪਨਾ’’ਤਿਆਦਿਮਾਹ. ‘‘ਸਾਰਮ੍ਮਣ ਸਭਾਵਾ’’ਤਿ ਹੇਤੁ ਵਿਸੇਸਨਮੇਤਂ. ‘‘ਤਥਾ ਵੁਤ੍ਤੋ’’ਤਿ ਵਿਤਕ੍ਕੋਤਿ ਵੁਤ੍ਤੋ.

੭੭. ਵਿਚਾਰਵਚਨਤ੍ਥੇ. ‘‘ਵਿਚਰਤੀ’’ਤਿ ਏਕਮੇਕਸ੍ਮਿਂ ਏਵ ਆਰਮ੍ਮਣੇ ਵਿਵਿਧੇਨ ਚਰਤਿ, ਪਵਤ੍ਤਤਿ. ਸਭਾਵਾਕਾਰੋ ਨਾਮ ਨੀਲਪੀਤਾਦਿਕੋ ਅਗਮ੍ਭੀਰੋ ਆਰਮ੍ਮਣ ਸਭਾਵੋ ਚ ਆਰਮ੍ਮਣਸ੍ਸ ਨਾਨਾ ਪਵਤ੍ਤਾਕਾਰੋ ਚ. ‘‘ਅਨੁਮਜ੍ਜਨਵਸੇਨਾ’’ਤਿ ਪੁਨਪ੍ਪੁਨਂ ਮਜ੍ਜਨਵਸੇਨ ਸੋਧਨਵਸੇਨ. ਵਿਤਕ੍ਕੋ ਓਲ਼ਾਰਿਕੋ ਚ ਹੋਤੀਤਿਆਦਿਨਾ ਯੋਜੇਤਬ੍ਬਂ. ‘‘ਓਲ਼ਾਰਿਕੋ’’ਤਿ ਵਿਚਾਰਤੋ ਓਲ਼ਾਰਿਕੋ. ਏਵਂ ਸੇਸਪਦੇਸੁ. ‘‘ਘਣ੍ਡਾਭਿਘਾਤੋ ਵਿਯਾ’’ਤਿ ਘਣ੍ਡਾਭਿਘਾਤੇਨ ਪਥਮੁਪ੍ਪਨ੍ਨਸਦ੍ਦੋ ਵਿਯਾਤਿ ਵਦਨ੍ਤਿ. ਤਥਾਹਿ ਵਿਚਾਰੋ ਘਣ੍ਡਸ੍ਸ ਅਨੁਰਵੋ ਵਿਯ ਵੁਤ੍ਤੋਤਿ. ਦਣ੍ਡਕੇਨ ਘਣ੍ਡਸ੍ਸ ਅਭਿਘਾਤ ਕਿਰਿਯਾ ਵਾ ਘਣ੍ਡਾਭਿਘਾਤੋ. ਤਥਾਹਿ ਆਰਮ੍ਮਣੇ ਚੇਤਸੋ ਪਥਮਾਭਿ ਨਿਪਾਤੋ ਵਿਤਕ੍ਕੋਤਿ ਚ, ਆਹਨਨ ਪਰਿਯਾਹਨਨ ਰਸੋਤਿ ਚ ਵੁਤ੍ਤਂ. ‘‘ਘਣ੍ਡਾਨੁਰਵੋ ਵਿਯਾ’’ਤਿ ਘਣ੍ਡਸ੍ਸ ਅਨੁਰਵਸਦ੍ਦੋ ਵਿਯ.

੭੮. ਅਧਿਮੋਕ੍ਖਵਚਨਤ੍ਥੇ. ‘‘ਸਂਸਪ੍ਪਨਂ’’ਤਿ ਅਨਵਤ੍ਥਾਨਂ. ‘‘ਪਕ੍ਖਤੋ ਮੁਚ੍ਚਨਵਸੇਨਾ’’ਤਿ ਏਵਂ ਨੁ ਖੋਤਿ ਏਕੋ ਪਕ੍ਖੋ, ਨੋਨੁ ਖੋਤਿ ਦੁਤੀਯੋ ਪਕ੍ਖੋ. ਤਾਦਿਸਮ੍ਹਾ ਪਕ੍ਖਤੋ ਮੁਚ੍ਚਨਵਸੇਨ.

੭੯. ਵੀਰਿਯਵਚਨਤ੍ਥੇ. ‘‘ਵੀਰਸ੍ਸਾ’’ਤਿ ਵਿਸ੍ਸਟ੍ਠਸ੍ਸ. ਸੋ ਚ ਕਾਯਵਚੀਮਨੋ ਕਮ੍ਮੇਸੁ ਪਚ੍ਚੁ ਪਟ੍ਠਿਤੇਸੁ ਸੀਤੁਣ੍ਹਾਦਿ ਦੁਕ੍ਖ ਭਯਤੋ ਅਲੀਨ ਵੁਤ੍ਤਿਵਸੇਨ ਪਵਤ੍ਤੋਤਿ ਆਹ ‘‘ਕਮ੍ਮਸੂਰਸ੍ਸਾ’’ਤਿ. ਏਤੇਨ ਅਨੋਤ੍ਤਪ੍ਪਿਂ ਨਿਵਤ੍ਤੇਤਿ. ਅਨੋਤ੍ਤਵ੍ਵੀਹਿ ਪਾਪਸੂਰੋ, ਅਯਂ ਕਮ੍ਮ ਸੂਰੋਤਿ. ‘‘ਮਹਨ੍ਤਂ ਪਿਕਮ੍ਮ’’ਨ੍ਤਿ ਕੁਸੀਤਸ੍ਸ ਮਹਨ੍ਤਨ੍ਤਿ ਮਞ੍ਞਿਤਂ ਕਮ੍ਮਂ. ਏਵਂ ਸੇਸੇਸੁ. ‘‘ਅਪ੍ਪਕਤੋ ਗਣ੍ਹਾਤੀ’’ਤਿ ਅਪ੍ਪਕਭਾਵੇਨ ਗਣ੍ਹਾਤਿ. ਅਪ੍ਪਕਮੇਵਿਦਨ੍ਤਿ ਮਞ੍ਞਤੀਤਿ ਵੁਤ੍ਤਂ ਹੋਤਿ. ‘‘ਅਤ੍ਤ ਕਿਲਮਥਂ’’ਤਿ ਕਾਯਚਿਤ੍ਤਕ੍ਖੇਦਂ. ‘‘ਤਂ’’ਤਿ ਵੀਰਿਯਂ. ‘‘ਤਥਾਪਵਤ੍ਤਿਯਾ’’ਤਿ ਕਮ੍ਮਸੂਰਭਾਵੇਨ ਪਵਤ੍ਤਿਯਾ. ‘‘ਹੇਤੁਚੇ ਵਾ’’ਤਿ ਏਤੇਨ ਭਾਵਸਦ੍ਦਸ੍ਸ ਅਤ੍ਥਂ ਵਦਤਿ. ‘‘ਕਾਯਚਿਤ੍ਤ ਕਿਰਿਯਾਭੂਤਂ’’ਤਿ ਏਤੇਨ ਕਮ੍ਮਸਦ੍ਦਸ੍ਸ ਅਤ੍ਥਂ. ‘‘ਵਿਧਿਨਾ’’ਤਿ ਤਸ੍ਸ ਪਵਤ੍ਤਿਯਾ ਪੁਬ੍ਬਾਭਿਸਙ੍ਖਾਰ ਵਿਧਾਨੇਨ. ਤਮੇਵ ਵਿਧਾਨਂ ਕਮ੍ਮੇਸੁ ਨੇਤਬ੍ਬਤ੍ਤਾ ਨਯੋਤਿ ਚ, ਉਪੇਤਬ੍ਬਤ੍ਤਾ ਉਪਾਯੋਤਿ ਚ ਵੁਚ੍ਚਤੀਤਿ ਆਹ ‘‘ਨਯੇਨ ਉਪਾਯੇਨਾ’’ਤਿ. ਤਮੇਵ ਵਿਧਾਨਂ ਦਸ੍ਸੇਤਿ ‘‘ਵੀਰਿਯਵਤੋ’’ਤਿਆਦਿਨਾ. ‘‘ਈਰਨ੍ਤੀ’’ਤਿ ਏਰਯਨ੍ਤਿ. ‘‘ਕਿਚ੍ਚ ਸਮ੍ਪਤ੍ਤਿਯਾ’’ਤਿ ਆਰਮ੍ਮਣ ਵਿਜਾਨਨ ਫੁਸਨਾਦਿ ਕਿਚ੍ਚ ਸਮ੍ਪਤ੍ਤਿ ਅਤ੍ਥਾਯ. ਬ੍ਯਾਵਟਾਨਿ ਕਾਯਚਿਤ੍ਤਾਨਿ ਯੇਸਨ੍ਤਿ ਵਿਗ੍ਗਹੋ. ‘‘ਬ੍ਯਾਵਟਾਨੀ’’ਤਿ ਉਸ੍ਸਾਹਿਤਾਨਿ. ‘‘ਥੂਣੂਪਤ੍ਥਮ੍ਭਨ ਸਦਿਸਂ’’ਤਿ ਜਿਣ੍ਣਸ੍ਸ ਗੇਹਸ੍ਸ ਅਪਤਨਤ੍ਥਾਯ ਸਾਰਤ੍ਥਮ੍ਭੇਨ ਉਪਤ੍ਥਮ੍ਭਨਸਦਿਸਂ. ਉਪਤ੍ਥਮ੍ਭਕਤ੍ਥਮ੍ਭਸਦਿਸਨ੍ਤਿਪਿ ਵਦਨ੍ਤਿ. ‘‘ਸਬ੍ਬ ਸਮ੍ਪਤ੍ਤੀਨਂ ਮੂਲਂ’’ਤਿ ਸਬ੍ਬਾਸਂ ਲੋਕਿਯ ਸਮ੍ਪਤ੍ਤੀਨਂ ਲੋਕੁਤ੍ਤਰ ਸਮ੍ਪਤ੍ਤੀ ਨਞ੍ਚ ਮੂਲਂ. ਕਸ੍ਮਾ, ਪੁਞ੍ਞਕਮ੍ਮ ਸਮ੍ਪਤ੍ਤਿਯਾ ਚ ਪਾਰਮਿ ਪੁਞ੍ਞਸਮ੍ਪਤ੍ਤਿਯਾ ਚ ਪਤਿਟ੍ਠਾਨਤ੍ਤਾ. ਸਤਿਹਿ ਪੁਞ੍ਞਕਮ੍ਮਸਮ੍ਪਤ੍ਤਿਯਾ ਸਬ੍ਬਾ ਲੋਕਿਯ ਸਮ੍ਪਤ੍ਤਿ ਸਿਜ੍ਝਤਿ. ਸਤਿ ਚ ਪਾਰਮਿ ਪੁਞ੍ਞ ਸਮ੍ਪਤ੍ਤਿਯਾ ਸਬ੍ਬਾਲੋਕੁਤ੍ਤਰ ਸਮ੍ਪਤ੍ਤਿ ਸਿਜ੍ਝਤੀਤਿ. ਏਤੇਨ ਹੀਨ ਵੀਰਿਯੋ ਨਾਮ ਸਬ੍ਬ ਸਮ੍ਪਤ੍ਤਿਤੋ ਪਰਿਬਾਹਿਯੋਤਿ ਦੀਪੇਤਿ.

੮੦. ਪੀਤਿਵਚਨਤ੍ਥੇ. ‘‘ਪਿਨਯਤੀ’’ਤਿ ਪਿਨੇਤਿ, ਪਿਨਂ ਕਰੋਤੀਤਿ ਆਹ ‘‘ਤਪ੍ਪੇਤੀ’’ਤਿ. ਤੋਸੇਤੀਤਿ ਅਤ੍ਥੋ. ‘‘ਤੁਟ੍ਠਿਂ’’ਤਿ ਤੁਸਿਤਂ, ਪਹਟ੍ਠਂ. ‘‘ਸੁਹਿਤਂ’’ਤਿ ਸੁਧਾਤਂ, ਸੁਪੁਣ੍ਣਂ, ਵਦ੍ਧਿਤਂ. ਅਨੇਕਤ੍ਥਤ੍ਤਾ ਧਾਤੂਨਂ ‘‘ਵਡ੍ਢੇਤੀ’’ਤਿ ਵੁਤ੍ਤਂ. ‘‘ਪਿਨਨ੍ਤੀ’’ਤਿ ਤਪ੍ਪਨ੍ਤਿ, ਜੋਤਨ੍ਤਿ, ਵਿਰੋਚਨ੍ਤਿ, ਦਿਵਾ ਤਪ੍ਪਤਿਆਦਿਚ੍ਚੋਤਿਆਦੀਸੁ ਵਿਯ. ਖੁਦ੍ਦਿਕਾ ਪੀਤਿ ਨਾਮ ਲੋਮਹਂਸ ਨ ਮਤ੍ਤਕਾਰਿਕਾ ਪੀਤਿ. ਖਣਿਕਾ ਪੀਤਿ ਨਾਮ ਖਣੇ ਖਣੇ ਵਿਜ੍ਜੁਪ੍ਪਾਦਸਦਿਸਾ ਪੀਤਿ. ਓਕ੍ਕਨ੍ਤਿਕਾ ਪੀਤਿ ਨਾਮ ਸਰੀਰਂ ਓਕ੍ਕਮਿਤ੍ਵਾ ਓਕ੍ਕਮਿਤ੍ਵਾਭਿਜ੍ਜਨ੍ਤੀ ਪੀਤਿ. ਉਬ੍ਬੇਗਾਪੀਤਿ ਨਾਮ ਕਾਯਂ ਉਦਗ੍ਗਂ ਕਤ੍ਵਾ ਆਕਾਸੇ ਉਲ੍ਲਙ੍ਘਾਪੇਨ੍ਤੀ ਪੀਤਿ. ਫਰਣਾ ਪੀਤਿ ਨਾਮ ਕਪ੍ਪਾਸਵਤ੍ਤਿਯਂ ਫਰਣਕਤੇਲਂ ਵਿਯ ਸਕਲਕਾਯਂ ਫਰਣਵਸੇਨ ਪਵਤ੍ਤਾ ਪੀਤਿ.

੮੧. ਛਨ੍ਦਵਚਨਤ੍ਥੇ. ‘‘ਅਭਿਸਨ੍ਧੀ’’ਤਿ ਅਭਿਲਾਸੋ, ਅਭਿਕਙ੍ਖਨਂ. ‘‘ਕਤ੍ਤੁਸਦ੍ਦੋ’’ਤਿ ਕਰਧਾਤੁ ਵਸੇਨ ਵੁਤ੍ਤਂ. ‘‘ਸਬ੍ਬਕਿਰਿਯਾ ਪਦਾਨੀ’’ਤਿ ਸਬ੍ਬਾਨਿ ਤੁਮਿਚ੍ਛਤ੍ਥ ਕਿਰਿਯਾ ਪਦਾਨਿ. ‘‘ਅਤ੍ਥਿਕੋ’’ਤਿ ਅਸਿਦ੍ਧੋ ਹੁਤ੍ਵਾ ਸਾਧੇਤੁਂ ਇਚ੍ਛਿਤੋ ਅਤ੍ਥੋ ਅਸ੍ਸਾਤਿ ਅਤ੍ਥਿਕੋ. ਇਚ੍ਛਨ੍ਤੋਤਿਪਿ ਵਦਨ੍ਤਿ. ‘‘ਆਰਾਧੇਤੁਕਾਮਤਾ ਵਸੇਨਾ’’ਤਿ ਸਾਧੇਤੁ ਕਾਮਤਾਵਸੇਨ, ਸਮ੍ਪਾਦੇਤੁ ਕਾਮਤਾ ਵਸੇਨ. ਉਸੁਂ ਸਰਂ ਅ ਸਨ੍ਤਿ ਖਿਪਨ੍ਤੀਤਿ ਇਸ੍ਸਾਸਾ. ਇਕਾਰਸ੍ਸ ਉਕਾਰੋ. ਧਨੁਗ੍ਗਹਾ. ‘‘ਯਸੇਨ ਵਾ’’ਤਿ ਪਰਿਵਾਰੇਨ ਵਾ, ਕਿਤ੍ਤਿ ਸਦ੍ਦੇਨ ਵਾ. ‘‘ਸਰੇ’’ਤਿ ਕਣ੍ਡੇ. ਵਿਭਾਵਨਿਪਾਠੇ ਨਾਨਾਵਾਦ ਸੋਧਨਤ੍ਥਂ ਅਯਞ੍ਚਾਤਿਆਦਿਵੁਤ੍ਤਂ. ‘‘ਯਦਗ੍ਗੇਨਾ’’ਤਿ ਯੇਨ ਕਾਰਣ ਕੋਟ੍ਠਾਸੇਨ. ਸਙ੍ਗਹਿਤਾਤਿ ਸਮ੍ਬਨ੍ਧੋ. ‘‘ਵਿਸ੍ਸਜ੍ਜਿਤਬ੍ਬ ਯੁਤ੍ਤਕੇਨਾ’’ਤਿ ਵਿਸ੍ਸਜ੍ਜਿਤਬ੍ਬ ਯੋਗ੍ਯੇਨ. ‘‘ਤੇਨ ਅਤ੍ਥਿਕੋ ਯੇਵਾ’’ਤਿ ਪਦੁਦ੍ਧਾਰੋ. ‘‘ਸੋ ਨ ਯੁਜ੍ਜਤੀ’’ਤਿ ਸੋ ਅਤ੍ਥੋ ਨ ਯੁਜ੍ਜਤਿ. ‘‘ਖਿਪਿਤ ਉਸੂਨਂ’’ਤਿ ਪੁਬ੍ਬਭਾਗੇ ਖਿਪਿਤ ਉਸੂਨਂ. ‘‘ਅਤ੍ਥਤੋ ਪਨਾ’’ਤਿ ਅਧਿਪ੍ਪਾਯਤ੍ਥਤੋ ਪਨ. ‘‘ਹਤ੍ਥਪ੍ਪਸਾਰਣਂ ਵਿਯਾ’’ਤਿ ਲੋਕੇ ਕਿਞ੍ਚਿ ਇਚ੍ਛਨ੍ਤਸ੍ਸ ਜਨਸ੍ਸ ਹਤ੍ਥਪ੍ਪਸਾਰਣਂ ਵਿਯਾਤਿ ਅਧਿਪ੍ਪਾਯੋ. ‘‘ਥਾਮਪਤ੍ਤੋ’’ਤਿ ਅਧਿਪਤਿ ਭਾਵ ਪਤ੍ਤੋਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤਥਾਹੇਸਾ’’ਤਿਆਦਿਂ. ‘‘ਤਣ੍ਹਾਯ ਹਤ੍ਥੇ ਠਿਤਾ’’ਤਿ ਉਪਚਾਰ ਵਚਨਮੇਤਂ. ਤਣ੍ਹਾਯ ਪਰਿਗ੍ਗਹਿਤਾਤਿ ਵੁਤ੍ਤਂ ਹੋਤਿ. ਨਸਕ੍ਖਿਸ੍ਸਨ੍ਤਿਯੇਵ, ਨੋ ਨਸਕ੍ਖਿਸ੍ਸਨ੍ਤਿ. ਤਸ੍ਮਾ ਵੇਦਿਤਬ੍ਬਮੇਤਂ ਛਨ੍ਦੋਯੇਵ ਤਣ੍ਹਾਯ ਬਲਵਤਰੋਤਿ. ਕਸ੍ਮਾ ਬਲਵਤਰੋਤਿ. ਆਦੀਨਵਾਨਿਸਂਸ ਦਸ੍ਸਨਞ੍ਞਾਣੇਨ ਯੁਤ੍ਤਤ੍ਤਾਤਿ.

੮੨. ‘‘ਪਕਿਰਨ੍ਤੀ’’ਤਿ ਪਤ੍ਥਰਨ੍ਤਿ. ‘‘ਸਮਾਨਾ’’ਤਿ ਸਾਵਜ੍ਜੇਹਿ ਯੁਤ੍ਤਾ ਸਾਵਜ੍ਜਾ, ਅਨਵਜ੍ਜੇਹਿ ਯੁਤ੍ਤਾ ਅਨਵਜ੍ਜਾਤਿ ਏਵਂ ਸਦਿਸਾ, ਸਾਧਾਰਣਾ.

ਅਞ੍ਞਸਮਾਨਰਾਸਿਮ੍ਹਿਅਨੁਦੀਪਨਾ ਨਿਟ੍ਠਿਤਾ.

੮੩. ਅਕੁਸਲਰਾਸਿਮ੍ਹਿ. ‘‘ਮੁਯ੍ਹਤੀ’’ਤਿ ਞਾਤਬ੍ਬਸ੍ਸਞੇਯ੍ਯ ਧਮ੍ਮਸ੍ਸ ਅਞ੍ਞਾਣ ਵਸੇਨ ਸਮ੍ਮੁਯ੍ਹਤਿ, ਚਿਤ੍ਤਸ੍ਸ ਅਨ੍ਧਭਾਵੋ ਹੋਤਿ. ਚਤੁਰਙ੍ਗਤਮੋ ਨਾਮ ‘ਕਾਲ਼ਪਕ੍ਖ ਚਾਤੁਦ੍ਦਸਿ ਦਿਵਸੋ, ਅਡ੍ਢਰਤ੍ਤਿ ਸਮਯੋ, ਤਿਬ੍ਬਵਨਸਣ੍ਡੋ, ਬਹਲਮੇਘਚ੍ਛਨ੍ਨੋ,ਤਿ ਅਯਂ ਚਤੁਰਙ੍ਗਤਮੋ. ਸੋ ਚਕ੍ਖੁਸ੍ਸ ਅਨ੍ਧਭਾਵਂ ਕਰੋਤਿ. ਏਵਂ ਤਸ੍ਸ ਤਮਸ੍ਸ ਚਕ੍ਖੁਸ੍ਸ ਅਨ੍ਧਭਾਵਕਰਣਂ ਵਿਯ. ਞਾਣਗਤਿਕੋ ਹੋਤੀਤਿ ਦਟ੍ਠਬ੍ਬੋ ਅਟ੍ਠਕਥਾ ਨਯੇਨ. ਤਮੇਵ ਅਟ੍ਠਕਥਾ ਨਯਂ ਦਸ੍ਸੇਤੁਂ ‘‘ਤਥਾ ਹੇਸਾ’’ਤਿਆਦਿ ਵੁਤ੍ਤਂ. ਅਭਿਧਮ੍ਮਟੀਕਾਯਂ ਪਨ ਮਿਚ੍ਛਾ ਞਾਣਨ੍ਤਿ ਮਿਚ੍ਛਾ ਵਿਤਕ੍ਕੋ ਅਧਿਪ੍ਪੇਤੋ. ਸੋ ਹਿ ਮਿਚ੍ਛਾ ਸਙ੍ਕਪ੍ਪੋ ਹੁਤ੍ਵਾ ਨਾਨਪ੍ਪਕਾਰ ਚਿਨ੍ਤਾ ਪਵਤ੍ਤਿ ਵਸੇਨ ਞਾਣਗਤਿਕੋ ਹੋਤਿ. ਮੋਹੋ ਪਨ ਚਿਤ੍ਤਸ੍ਸ ਅਨ੍ਧੀ ਭੂਤੋ, ਨਾਨਾਚਿਨ੍ਤਨ ਕਿਚ੍ਚ ਰਹਿਤੋ, ਕਥਂ ਞਾਣਗਤਿਕੋ ਭਵੇਯ੍ਯਾਤਿ ਤਸ੍ਸ ਅਧਿਪ੍ਪਾਯੋ. ‘‘ਪਾਪ ਕਿਰਿਯਾਸੂ’’ਤਿ ਦੁਚ੍ਚਰਿਤ ਕਮ੍ਮੇਸੁ. ‘‘ਉਪਾਯ ਚਿਨ੍ਤਾਵਸੇਨਾ’’ਤਿ ਕਤਕਮ੍ਮਸ੍ਸ ਸਿਦ੍ਧਤ੍ਥਾਯ ਸਤ੍ਥਾਵੁਧਾਦਿਵਿਧਾਨੇਸੁ ਨਾਨਾਉਪਾਯ ਚਿਨ੍ਤਾਵਸੇਨ. ਅਪ੍ਪਟਿ ਪਜ੍ਜਨਂ ਅਪ੍ਪਟਿ ਪਤ੍ਤਿ. ਞਾਣ ਗਤਿਂ ਅਗਮਨਨ੍ਤਿ ਅਤ੍ਥੋ. ਤੇਨਾਹ ‘‘ਅਞ੍ਞਾਣਮੇਵ ਵੁਚ੍ਚਤੀ’’ਤਿ. ‘‘ਞਾਣਗਤਿਕਾ’’ਤਿ ਞਾਣਪ੍ਪਵਤ੍ਤਿਯਾ ਸਮਾਨਪ੍ਪਵਤ੍ਤਿਕਾ. ਲੋਭੋ ਞਾਣ ਗਤਿਕੋ ਮਾਯਾਸਾਠੇਯ੍ਯ ਕਮ੍ਮੇਸੁ ਵਿਚਿਤ੍ਤਪ੍ਪਵਤ੍ਤਿਕਤ੍ਤਾ. ਵਿਚਾਰੋ ਞਾਣ ਗਤਿਕੋ. ਤਥਾਹਿ ਸੋ ਝਾਨਙ੍ਗੇਸੁ ਵਿਚਿਕਿਚ੍ਛਾਯ ਪਟਿਪਕ੍ਖੋਤਿ ਵੁਤ੍ਤੋ. ਚਿਤ੍ਤਸ੍ਸ ਞਾਣ ਗਤਿ ਕਤਾ ਵਿਚਿਤ੍ਤਤ੍ਥਵਾਚਕੇਨ ਚਿਤ੍ਤਸਦ੍ਦੇਨ ਸਿਦ੍ਧੋ. ਤੇ ਚ ਧਮ੍ਮਾ ਸਬ੍ਬ ਸਤ੍ਤੇਸੁ ਞਾਣ ਗਤਿਕਾ ਨ ਹੋਨ੍ਤਿ. ਞਾਣੂਪਨਿਸ੍ਸਯਂ ਲਭਿਤ੍ਵਾ ਏਵ ਹੋਨ੍ਤੀਤਿ ਦਸ੍ਸੇਤੁਂ ‘‘ਤੇਹੀ’’ਤਿਆਦਿਮਾਹ. ਤੇ ਸਾਧੇਨ੍ਤੀਤਿ ਸਮ੍ਬਨ੍ਧੋ. ਪਕਤਿਯਾ ਵਿਞ੍ਞੁਜਾਤਿਕਾ ਨਾਮ ਤਿਹੇਤੁਕਪ੍ਪਟਿ ਸਨ੍ਧਿਕਾ. ਅਞ੍ਞਪ੍ਪਟਿ ਸਨ੍ਧਿਕਾਪਿ ਬੋਧਿਸਤ੍ਤ ਭੂਮਿਯਂ ਠਿਤਾ ਵਾ ਪਞ੍ਞਾਪਸੁਤ ਭਵਤੋ ਆਗਤਾ ਵਾ. ਸੁਤਪਰਿਯਤ੍ਤਿ ਸਮ੍ਪਨ੍ਨਾ ਨਾਮ ਦ੍ਵਿਹੇਤੁਕਪ੍ਪਟਿ ਸਨ੍ਧਿਕਾਪਿ ਇਮਸ੍ਮਿਂ ਭਵੇ ਬਹੁਸ੍ਸੁਤ ਸਮ੍ਪਨ੍ਨਾ ਚ ਪਰਿਯਤ੍ਤਿ ਕਮ੍ਮ ਸਮ੍ਪਨ੍ਨਾ ਚ.

੮੪. ਅਹਿਰਿਕਵਚਨਤ੍ਥੇ. ‘‘ਨ ਹਿਰੀਯਤੀ’’ਤਿ ਨਾਮ ਧਾਤੁ ਪਦਮੇਤਂ. ਹਰਾਯਤਿ ਲਜ੍ਜਤੀਤਿ ਹਿਰੀ. ਹਰੇ ਲਜ੍ਜਾਯਂਤਿ ਧਾਤੁ. ਨ ਹਿਰੀ ਅਹਿਰੀਤਿ ਵਚਨਤ੍ਥੋ. ‘‘ਰੁਚਿਂ ਉਪ੍ਪਾਦੇਤ੍ਵਾ’’ਤਿ ਗਾਮਸੂ ਕਰਸ੍ਸ ਗੂਥਰਾਸਿ ਦਸ੍ਸਨੇ ਵਿਯ ਚਿਤ੍ਤਰੋਚਨ ਚਿਤ੍ਤ ਖਮਨਂ ਉਪ੍ਪਾਦੇਤ੍ਵਾ. ਅਤ੍ਤਾਨਂ ਪਾਪਕਮ੍ਮ ਲਿਮ੍ਪਤੋ ਚਿਤ੍ਤਸ੍ਸ ਅਲੀਨਤਾ ਅਜਿਗੁਚ੍ਛਨਂ ਨਾਮ. ਅਤ੍ਤਾਨਂ ਅਸਪ੍ਪੁਰਿਸ ਭਾਵਪਤ੍ਤਿਤੋ ਚਿਤ੍ਤਸ੍ਸ ਅਲੀਨਤਾ ਅਲਜ੍ਜਾ ਨਾਮ.

੮੫. ਅਨੋਤ੍ਤਪ੍ਪਵਚਨਤ੍ਥੇ. ‘‘ਨ ਭਾਯਤੀ’’ਤਿ ਪਾਪਕਮ੍ਮਂ ਭਯਤੋ ਨ ਉਪਟ੍ਠਾਤਿ. ‘‘ਨ ਉਤ੍ਰਸਤੀ’’ਤਿ ਪਾਪਕਮ੍ਮ ਹੇਤੁ ਨ ਕਮ੍ਪਤਿ. ‘‘ਤਾਸੂ’’ਤਿ ਪਾਪਕਿਰਿਯਾਸੁ. ‘‘ਅਸਾਰਜ੍ਜਮਾਨਂ ਕਤ੍ਵਾ’’ਤਿ ਸੂਰਂ ਵਿਸ੍ਸਟ੍ਠਂ ਕਤ੍ਵਾ. ਅਸਾਰਜ੍ਜਂ ਨਾਮ ਸੂਰਭਾਵੋ. ਅਨੁਤ੍ਤਾਸੋ ਨਾਮ ਪਾਪਕਮ੍ਮ ਹੇਤੁ ਚਿਤ੍ਤਸ੍ਸ ਅਕਮ੍ਪਨਂ. ਗਾਥਾਯਂ. ਅਜਿਗੁਚ੍ਛਨਸੀਲੋ ਪੁਗ੍ਗਲੋ ਅਜੇਗੁਚ੍ਛੀ. ‘‘ਪਾਪਾ’’ਤਿ ਪਾਪਕਮ੍ਮਤੋ. ‘‘ਸੂਕਰੋ’’ਤਿ ਗਾਮਸੂਕਰੋ. ਸੋ ਗੂਥਤੋ ਅਜੇਗੁਚ੍ਛੀ. ਅਹਿਰਿਕੋ ਪਾਪਤੋ ਅਜੇਗੁਚ੍ਛੀਤਿ ਯੋਜਨਾ. ਅਭਾਯਨਸੀਲੋ ਅਭੀਰੂ. ‘‘ਸਲਭੋ’’ਤਿ ਪਟਙ੍ਗੋ. ‘‘ਪਾਵਕਾ’’ਤਿ ਦੀਪਜਾਲਮ੍ਹਾ. ਸਲਭੋ ਪਾਵਕਮ੍ਹਾ ਅਭੀਰੂ ਵਿਯ ਅਨੋਤ੍ਤਵ੍ਵੀ ਪਾਪਤੋ ਅਭੀਰੂਤਿ ਯੋਜਨਾ.

੮੬. ਉਦ੍ਧਚ੍ਚਵਚਨਤ੍ਥੇ. ‘‘ਉਦ੍ਧਰਤੀ’’ਤਿ ਉਕ੍ਖਿਪਤਿ. ਆਰਮ੍ਮਣਸ੍ਮਿਂ ਨ ਸਨ੍ਨਿ ਸੀਦਤਿ. ਵਿਕ੍ਖਿਪਤੀਤਿ ਵੁਤ੍ਤਂ ਹੋਤਿ. ‘‘ਵਟ੍ਟੇਤ੍ਵਾ’’ਤਿ ਆਵਟ੍ਟੇਤ੍ਵਾ. ‘‘ਵਿਸ੍ਸਟ੍ਠਗੇਣ੍ਡੁਕੋ ਵਿਯਾ’’ਤਿ ਵਿਸ੍ਸਜ੍ਜਿਤੋ ਸਾਰਗੇਣ੍ਡੁਕੋ ਵਿਯ. ‘‘ਧਜਪਟਾਕਾ ਵਿਯਾ’’ਤਿ ਵਾਤੇਰਿਤਾ ਧਜਪਟਾਕਾ ਵਿਯ.

੮੭. ਲੋਭਵਚਨਤ੍ਥੇ. ‘‘ਲੁਬ੍ਭਤੀ’’ਤਿ ਗਿਜ੍ਝਤਿ, ਅਭਿਕਙ੍ਖਤਿ. ਅਭਿਸਜ੍ਜਨਂ ਅਭਿਲਗ੍ਗਨਂ. ਮਕ੍ਕਟਂ ਆਲਿਮ੍ਪਤਿ ਬਨ੍ਧਤਿ ਏਤੇਨਾਤਿ ਮਕ੍ਕਟਾ ਲੇਪੋ. ‘‘ਤਤ੍ਤ ਕਪਾਲੇ’’ਤਿ ਅਗ੍ਗਿਨਾਸਨ੍ਤਤ੍ਤੇ ਘਟ ਕਪਾਲੇ. ਤੇਲਸ੍ਸ ਵਤ੍ਥਮ੍ਹਿ ਅਞ੍ਜਨਂ ਅਭਿਲਗ੍ਗਨਂ ਤੇਲਞ੍ਜਨਂ. ਰਜ੍ਜਨਂ ਪਟਿਸਜ੍ਜਨਂ ਰਾਗੋ. ਤੇਲਞ੍ਜਨ ਭੂਤੋ ਰਾਗੋ ਤੇਲਞ੍ਜਨ ਰਾਗੋ. ਨ ਕਿਲੇਸਰਾਗੋ. ਰਤ੍ਤਿ ਦਿਵਂ ਪਵਤ੍ਤਨਟ੍ਠੇਨ ਤਣ੍ਹਾ ਏਵ ਨਦੀਸੋਤਸਦਿਸਤ੍ਤਾ ਤਣ੍ਹਾ ਨਦੀ. ‘‘ਸਤ੍ਤਾਨਂ’’ਤਿ ਪੁਥੁਜ੍ਜਨ ਸਤ੍ਤਾਨਂ. ‘‘ਸੁਕ੍ਖਕਟ੍ਠਸਾਖਾਪਲਾਸਤਿਣਕਸਟਾਨੀ’’ਤਿ ਸੁਕ੍ਖ ਕਟ੍ਠਕਸਟਾਨਿ, ਸੁਕ੍ਖ ਸਾਖਾ ਕਸਟਾਨੀਤਿਆਦਿਨਾ ਯੋਜੇਤਬ੍ਬਂ. ਕਸਟ ਸਦ੍ਦੇਨ ਅਸਾਰਭਾਵਂ ਦੀਪੇਤਿ. ‘‘ਨਦੀ ਵਿਯਾ’’ਤਿ ਪਬ੍ਬਤੇਯ੍ਯਾ ਨਦੀ ਵਿਯ.

੮੮. ਦਿਟ੍ਠਿਵਚਨਤ੍ਥੇ. ‘‘ਦਸ੍ਸਨਂ’’ਤਿ ਪਰਿਕਪ੍ਪਨਾ ਸਿਦ੍ਧੇਸੁ ਮਿਚ੍ਛਾ ਸਭਾਵੇਸੁ ਵਿਪਰੀਤ ਦਸ੍ਸਨਂ. ਤੇਨਾਹ ‘‘ਧਮ੍ਮਾਨਂ’’ਤਿਆਦਿਂ. ਤਤ੍ਥ ‘‘ਧਮ੍ਮਾਨਂ’’ਤਿ ਰੂਪਾਰੂਪ ਧਮ੍ਮਾਨਂ, ਅਨਿਚ੍ਚਤਾਦਿ ਧਮ੍ਮਾਨਞ੍ਚ. ‘‘ਯਾਥਾਵ ਸਭਾਵੇਸੂ’’ਤਿ ਭੂਤਸਭਾਵੇਸੁ. ਭੂਤਸਭਾਵੋ ਹਿ ਯਥਾ ਧਮ੍ਮਂ ਅਵਤਿ ਰਕ੍ਖਤੀਤਿ ਅਤ੍ਥੇਨ ਯਾਥਾਵੋਤਿ ਵੁਚ੍ਚਤਿ. ਅਤ੍ਤਾਨਂ ਪਣ੍ਡਿਤਂ ਮਞ੍ਞਨ੍ਤੀਤਿ ਪਣ੍ਡਿਤ ਮਾਨਿਨੋ. ਪਟਿਵੇਧਞ੍ਞਾਣਂ ਨਾਮ ਅਰਿਯ ਮਗ੍ਗਞ੍ਞਾਣਂ. ਪਰਮਂ ਵਜ੍ਜਨ੍ਤਿ ਦਟ੍ਠਬ੍ਬਾ ਲੋਕੇ ਮਹਾਸਾਵਜ੍ਜਟ੍ਠੇਨ ਤਂ ਸਦਿਸਸ੍ਸ ਅਞ੍ਞਸ੍ਸ ਵਜ੍ਜਸ੍ਸ ਅਭਾਵਤੋਤਿ ਅਧਿਪ੍ਪਾਯੋ.

੮੯. ਮਾਨਵਚਨਤ੍ਥੇ. ‘‘ਮਞ੍ਞਤੀ’’ਤਿ ਭੂਤਸਭਾਵਂ ਅਤਿਕ੍ਕਮ੍ਮ ਅਧਿਕਂ ਕਤ੍ਵਾ ਅਹਮਸ੍ਮੀਤਿਆਦਿਨਾ ਤੇਨ ਤੇਨ ਅਭੂਤਾਕਾਰੇਨ ਮਞ੍ਞਤਿ. ਤੇਨਾਹ ‘‘ਅਹਂ ਲੋਕੇ’’ਤਿਆਦਿਂ. ਤਤ੍ਥ ‘‘ਕਟ੍ਠਕਥਿਙ੍ਗਰੋ ਵਿਯਾ’’ਤਿ ਸੁਕ੍ਖਦਾਰੁਕ੍ਖਨ੍ਧੋ ਵਿਯ. ਸੋ ਪਨ ਉਪਤ੍ਥਮ੍ਭਿਤੋ ਮਞ੍ਞਤੀਤਿ ਸਮ੍ਬਨ੍ਧੋ. ‘‘ਅਤ੍ਤਾਨਂ ਅਚ੍ਚੁਗ੍ਗਤਂ ਮਞ੍ਞਤੀ’’ਤਿ ਪੁਗ੍ਗਲਂ ਮਾਨੇਨ ਅਭਿਨ੍ਨਂ ਕਤ੍ਵਾ ਵੁਤ੍ਤਂ. ‘‘ਉਨ੍ਨਤਿ ਲਕ੍ਖਣੋ’’ਤਿ ਉਨ੍ਨਮਨ ਸਭਾਵੋ.

੯੦. ਦੋਸਵਚਨਤ੍ਥੇ. ਚਣ੍ਡੇਨ ਕਾਯਵਚੀ ਮਨੋਕਮ੍ਮੇਨ ਸਮਨ੍ਨਾਗਤੋ ਚਣ੍ਡਿਕੋ. ਚਣ੍ਡਿਕਸ੍ਸ ਭਾਵੋ ਚਣ੍ਡਿਕ੍ਕਂ. ‘‘ਪਹਤਾਸੀਵਿਸੋ ਵਿਯਾ’’ਤਿ ਦਣ੍ਡੇਨ ਪਹਤੋ ਆਸੀਵਿਸੋ ਵਿਯ. ‘‘ਵਿਸਪ੍ਪਨਟ੍ਠੇਨਾ’’ਤਿ ਸਕਲਕਾਯੇ ਵਿਵਿਧੇਨ ਸਪ੍ਪਨਟ੍ਠੇਨ, ਫਰਣਟ੍ਠੇਨ. ਇਦਞ੍ਚ ਤਂ ਸਮੁਟ੍ਠਾਨ ਰੂਪਾਨਂ ਫਰਣ ਵਸੇਨ ਵੁਤ੍ਤਂ. ‘‘ਅਸਨਿਪਾਤੋ ਵਿਯਾ’’ਤਿ ਸੁਕ੍ਖਾ ਸਨਿਪਤਨਂ ਵਿਯ. ‘‘ਦਾਵਗ੍ਗਿਵਿਯਾ’’ਤਿ ਅਰਞ੍ਞਗ੍ਗਿ ਵਿਯ. ‘‘ਸਪਤ੍ਤੋ ਵਿਯਾ’’ਤਿ ਦੁਟ੍ਠਵੇਰੀ ਵਿਯ. ‘‘ਵਿਸਸਂਸਟ੍ਠਪੂਤਿਮੁਤ੍ਤਂ ਵਿਯਾ’’ਤਿ ਯਥਾ ਮੁਤ੍ਤਂ ਨਾਮ ਪਕਤਿਯਾ ਏਵ ਦੁਗ੍ਗਨ੍ਧਤ੍ਤਾ ਪਟਿਕੁਲਤ੍ਤਾ ਦੂਰੇ ਛਟ੍ਟਨੀਯਨ੍ਤਿ ਅਹਿਤਮੇਵ ਹੋਤਿ. ਪੁਨ ਪੂਤਿਭਾਵੇ ਸਤਿ, ਦੂਰਤਰੇ ਛਟ੍ਟੇਤਬ੍ਬਂ. ਵਿਸਸਂਸਟ੍ਠੇਪਨ ਵਤ੍ਤਬ੍ਬਮੇਵਨਤ੍ਥਿ. ਸਬ੍ਬਸੋ ਅਹਿਤਰਾਸਿ ਹੋਤਿ. ਏਵਂ ਦੋਸੋਪਿ ਤਂ ਸਮਙ੍ਗੀਨੋ ਤਸ੍ਮਿਂ ਖਣੇ ਪਰੇਸਂ ਅਮਨਾਪਿਯਤਂ ਆਪਾਦੇਤਿ. ਅਤ੍ਤਹਿਤ ਪਰਹਿਤ ਵਿਨਾਸਞ੍ਚ ਕਾਰੇਤਿ, ਪਰਮ੍ਮਰਣਾ ਅਪਾਯਞ੍ਚ ਪਾਪੇਤੀਤਿ ਸਬ੍ਬਸੋ ਅਹਿਤਰਾਸਿ ਹੋਤਿ. ਤੇਨ ਵੁਤ੍ਤਂ ‘‘ਵਿਸਸਂਸਟ੍ਠਪੂਤਿ ਮੁਤ੍ਤਂ ਵਿਯ ਦਟ੍ਠਬ੍ਬੋ’’ਤਿ.

੯੧. ਇਸ੍ਸਾਵਚਨਤ੍ਥੇ. ਦੁਵਿਧਾ ਇਸ੍ਸਾਲਦ੍ਧਸਮ੍ਪਤ੍ਤਿ ਵਿਸਯਾ ਚਲਭਿਤਬ੍ਬ ਸਮ੍ਪਤ੍ਤਿ ਵਿਸਯਾ ਚ. ਤਤ੍ਥ ਲਦ੍ਧ ਸਮ੍ਪਤ੍ਤਿ ਵਿਸਯਂ ਤਾਵਦਸ੍ਸੇਤਿ ‘‘ਪਰੇਸਂ ਪਕਤਿਯਾ’’ਤਿਆਦਿਨਾ. ਲਦ੍ਧ ਸਮ੍ਪਤ੍ਤਿਗ੍ਗਹਣੇਨ ਅਤੀਤ ਸਮ੍ਪਤ੍ਤਿਪਿ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਇਸ੍ਸਾਪਕਤਿਕਾਹਿ ਕੇਚਿ ਅਸੁਕੋ ਨਾਮ ਪੁਬ੍ਬੇ ਏਵਂ ਸਮ੍ਪਤ੍ਤਿਕੋ ਅਹੋਸੀਤਿ ਵਾ, ਅਹਂ ਪੁਬ੍ਬੇ ਏਵਂ ਸਮ੍ਪਤ੍ਤਿਕੋ ਅਹੋਸਿਨ੍ਤਿ ਵਾ ਸੁਤ੍ਵਾ ਨਸਹਨ੍ਤਿਯੇਵ. ਤਂ ਵਚਨਂ ਸੋਤੁਂਪਿ ਨ ਇਚ੍ਛਨ੍ਤੀਤਿ. ਅਸੁਕੋਤਿਆਦਿਨਾ ਲਭਿਤਬ੍ਬਸਮ੍ਪਤ੍ਤਿ ਵਿਸਯਂ ਦਸ੍ਸੇਤਿ.

੯੨. ਮਚ੍ਛਰਿਯਵਚਨਤ੍ਥੇ. ‘‘ਮਮ ਏਵਾ’’ਤਿ ਮਮਪਕ੍ਖੇ ਏਵਾਤਿ ਅਧਿਪ੍ਪਾਯੋ. ‘‘ਗੁਣਜਾਤਂ’’ਵਾਤਿ ਅਤ੍ਤਨਿਵਿਜ੍ਜਮਾਨਂ ਸਿਪ੍ਪਵਿਜ੍ਜਾਦਿ ਸਮ੍ਪਤ੍ਤਿ ਗੁਣਜਾਤਂ ਵਾ. ‘‘ਵਤ੍ਥੁ ਵਾ’’ਤਿ ਧਨਧਞ੍ਞਾਦਿਵਤ੍ਥੁ ਵਾ. ‘‘ਅਵਿਪ੍ਫਾਰਿਕਤਾਵਸੇਨਾ’’ਤਿ ਅਞ੍ਞੇਨ ਤਂ ਸਿਪ੍ਪਵਿਜ੍ਜਾਦਿਕਂ ਵਾ ਧਨਧਞ੍ਞਾਦਿਕਂ ਵਾ ਮਯ੍ਹਂ ਦੇਹੀਤਿ ਵੁਤ੍ਤੇ ਪਰਹਿਤਤ੍ਥਾਯ ਦਾਤਬ੍ਬ ਯੁਤ੍ਤਕਂ ਦਸ੍ਸਾਮੀਤਿ ਏਵਂ ਚਿਤ੍ਤੇਸਤਿ, ਪਰਹਿਤਪ੍ਫਰਣਾਵਸੇਨ ਤਂ ਚਿਤ੍ਤਂ ਵਿਪ੍ਫਾਰਿਕਂ ਨਾਮ ਹੋਤਿ. ਦੇਹੀਤਿ ਵਚਨਮ੍ਪਿ ਸੋਤੁਂ ਅਨਿਚ੍ਛਨ੍ਤੋ ਪਰਹਿਤਤ੍ਥਾਯ ਅਵਿਪ੍ਫਾਰਿਕ ਚਿਤ੍ਤੋ ਨਾਮ ਹੋਤਿ. ਏਵਂ ਅਵਿਪ੍ਫਾਰਿਕਤਾਵਸੇਨ ਚਰਤਿ ਪਵਤ੍ਤਤੀਤਿ ਮਚ੍ਛਰਞ੍ਚ ਕਾਰਸ੍ਸ ਛ ਕਾਰਂ ਕਤ੍ਵਾ. ਤਥਾ ਪਵਤ੍ਤਂ ਚਿਤ੍ਤਂ. ਪੁਗ੍ਗਲੋ ਪਨ ਮਚ੍ਛਰੀਤਿ ਵੁਚ੍ਚਤਿ. ‘‘ਤਂ’’ਤਿ ਲਦ੍ਧਸਮ੍ਪਤ੍ਤਿਂ. ‘‘ਪਰੇਹਿ ਸਾਧਾਰਣਂ ਦਿਸ੍ਵਾ’’ਤਿਆਦਿਨਾ ਯੋਜੇਤਬ੍ਬਂ. ਸਾਧਾਰਣਨ੍ਤਿ ਚ ਦ੍ਵਿਸਨ੍ਤਕਂ ਵਾਤਿ ਸਨ੍ਤਕਂ ਵਾ ਭਵਿਸ੍ਸਮਾਨਂ, ਪਰੇਹਿ ਵਾ ਪਰਿਭੁਞ੍ਜਿਯਮਾਨਂ. ‘‘ਨਿਗ੍ਗੁਹਨਲਕ੍ਖਣਂ’’ਤਿ ਰਕ੍ਖਾਵਰਣਗੁਤ੍ਤੀਹਿਸਙ੍ਗੋਪਨ ਸਭਾਵਂ. ਅਤ੍ਤਨਾ ਲਦ੍ਧ ਸਮ੍ਪਤ੍ਤਿ ਨਾਮ ਇਸ੍ਸਾਯ ਅਵਿਸਯੋ. ਲਭਿਤਬ੍ਬਸਮ੍ਪਤ੍ਤਿ ਪਨ ਉਭਯ ਸਾਧਾਰਣਂ. ਤਸ੍ਮਾ ਤਤ੍ਥ ਉਭਿਨ੍ਨਂ ਵਿਸੇਸੋ ਵਤ੍ਤਬ੍ਬੋਤਿ ਤਂ ਦਸ੍ਸੇਤੁਂ ‘‘ਏਤ੍ਥ ਚਾ’’ਤਿਆਦਿਮਾਹ. ‘‘ਯਸ੍ਸ ਲਾਭਂ ਨ ਇਚ੍ਛਤੀ’’ਤਿ ਅਤ੍ਤਨਾ ਲਭਤੁ ਵਾ ਮਾਵਾ, ਕੇਵਲਂ ਪਰ ਸਮ੍ਪਤ੍ਤਿਂ ਅਸਹਨ੍ਤੋ ਯਸ੍ਸ ਪਰਸ੍ਸ ਲਾਭਂ ਨ ਇਚ੍ਛਤਿ. ‘‘ਚਿਤ੍ਤ ਵਿਘਾਤੋ’’ਤਿ ਚਿਤ੍ਤ ਵਿਹਞ੍ਞਨਂ. ‘‘ਅਤ੍ਤਨਾ ਲਦ੍ਧੁਂ ਇਚ੍ਛਤੀ’’ਤਿ ਪਰੋ ਸਮ੍ਪਜ੍ਜਤੁ ਵਾ ਮਾਵਾ, ਯਤ੍ਥ ਪਰਲਾਭੇਸਤਿ, ਅਤ੍ਤਨਾ ਨ ਲਭਿਸ੍ਸਤਿ, ਤਤ੍ਥ ਅਤ੍ਤਨਾਵ ਲਦ੍ਧੁਂ ਇਚ੍ਛਤਿ. ਯਤ੍ਥ ਅਤ੍ਤਨਾ ਚ ਲਭਤਿ, ਪਰੋ ਚ ਲਭਤਿ, ਤਤ੍ਥ ਵਿਘਾਤੋ ਨਤ੍ਥੀਤਿ ਅਧਿਪ੍ਪਾਯੋ. ‘‘ਅਲਬ੍ਭਮਾਨਕਂ ਚਿਨ੍ਤੇਤ੍ਵਾ’’ਤਿ ਅਤ੍ਤਨਾ ਅਲਭਿਸ੍ਸਮਾਨਂ ਸਲ੍ਲਕ੍ਖੇਤ੍ਵਾ.

੯੩. ਕੁਕ੍ਕੁਚ੍ਚਵਚਨਤ੍ਥੇ. ‘‘ਕਿਰਿਯਾ ਕਤਂ’’ਤਿ ਕਤ ਸਦ੍ਦਸ੍ਸਭਾਵ ਸਾਧਨਮਾਹ. ਏਵਂ ਵਚਨਤ੍ਥਂ ਦਸ੍ਸੇਤ੍ਵਾ ਅਭਿਧੇਯ੍ਯਤ੍ਥਂ ਦਸ੍ਸੇਨ੍ਤੋ ‘‘ਅਤ੍ਥਤੋ ਪਨਾ’’ਤਿਆਦਿਮਾਹ. ‘‘ਅਨੁਸੋਚਨ ਵਸੇਨਾ’’ਤਿ ਪਚ੍ਛਾ ਪੁਨਪ੍ਪੁਨਂ ਚਿਤ੍ਤਸਨ੍ਤਾਪਵਸੇਨ. ਸੋ ਕੁਕਤਨ੍ਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਕੁਸਲ ਧਮ੍ਮੇਸੂ’’ਤਿ ਪੁਞ੍ਞ ਕਿਰਿਯਵਤ੍ਥੁ ਧਮ੍ਮੇਸੁ ਚਿਤ੍ਤ ਪਰਿਯਾਦਾਨਾਯ ਏਵ ਸਂਵਤ੍ਤਤਿ. ਕੁਕ੍ਕੁਚ੍ਚ ਸਮਙ੍ਗੀ ਪੁਗ੍ਗਲੋ ਪੁਞ੍ਞਕਮ੍ਮਂ ਕਰੋਨ੍ਤੋਪਿ ਚਿਤ੍ਤ ਸੁਖਂ ਨ ਲਭਤਿ. ਬਹੁਜਨ ਮਜ੍ਝੇ ਵਸਿਤ੍ਵਾ ਨਾਨਾਕਿਚ੍ਚਾਨਿ ਕਰੋਨ੍ਤੋ ਨਾਨਾ ਤਿਰਚ੍ਛਾਨ ਕਥਂ ਕਥੇਨ੍ਤੋ ਚਿਤ੍ਤ ਸੁਖਂ ਲਭਤਿ. ਤਦਾ ਤਸ੍ਸ ਪੁਞ੍ਞਕਮ੍ਮ ਕਰਣਤ੍ਥਾਯ ਚਿਤ੍ਤਂ ਪਰਿਯਾਦੀਯਤਿ, ਪਰਿਕ੍ਖਿਯ੍ਯਤਿ. ਚਿਤ੍ਤਵਸਂ ਗਚ੍ਛਨ੍ਤੋ ਵਿਚਰਤਿ. ਏਵਂ ਚਿਤ੍ਤ ਪਰਿਯਾਦਾਨਾਯ ਏਵ ਸਂਵਤ੍ਤਤਿ. ‘‘ਅਟ੍ਠਕਥਾਯਂ’’ਤਿ ਅਟ੍ਠਸਾਲਿਨਿਯਂ. ‘‘ਕਤਾ ਕਤਸ੍ਸ ਸਾਵਜ੍ਜਾਨਵਜ੍ਜਸ੍ਸਾ’’ਤਿ ਪੁਬ੍ਬੇ ਕਤਸ੍ਸ ਸਾਵਜ੍ਜਕਮ੍ਮਸ੍ਸ, ਅਕਤਸ੍ਸ ਅਨਵਜ੍ਜ ਕਮ੍ਮਸ੍ਸ. ਕਮ੍ਮਤ੍ਥੇਸਾਮਿਵਚਨਂ. ‘‘ਅਭਿਮੁਖਗਮਨਂ’’ਤਿ ਆਰਮ੍ਮਣ ਕਰਣਵਸੇਨ ਚਿਤ੍ਤਸ੍ਸ ਅਭਿਮੁਖਪ੍ਪਵਤ੍ਤਨਂ. ਏਤੇਨ ਪਟਿਮੁਖਂ ਸਰਣਂ ਚਿਨ੍ਤਨਂ ਪਟਿਸਾਰੋਤਿ ਦਸ੍ਸੇਤਿ. ‘‘ਅਕਤਂ ਨ ਕਰੋਤੀ’’ਤਿ ਅਕਤਂ ਕਾਤੁਂ ਨ ਸਕ੍ਕੋਤੀਤਿ ਅਧਿਪ੍ਪਾਯੋ. ਏਵਂ ਕਤਂ ਨ ਕਰੋਤੀਤਿ ਏਤ੍ਥਪਿ. ‘‘ਵਿਰੂਪੋ’’ਤਿ ਵੀਭਚ੍ਛੋ ਅਸੋਭਣੋ. ‘‘ਕੁਚ੍ਛਿਤੋ’’ਤਿ ਗਰਹਿਤਬ੍ਬੋ. ਨਨੁ ਪੁਬ੍ਬੇ ਚਿਤ੍ਤੁਪ੍ਪਾਦੋ ਕੁਚ੍ਛਿਤੋਤਿ ਵੁਤ੍ਤੋ. ਅਟ੍ਠਕਥਾਯਂ ਪਨ ਵਿਪ੍ਪਟਿਸਾਰੋ ਕੁਚ੍ਛਿਤੋਤਿ ਵੁਤ੍ਤੋ. ਉਭਯਮੇਤਂ ਨ ਸਮੇਤੀਤਿ. ਨੋ ਨ ਸਮੇਤਿ, ਅਞ੍ਞਥਾਨੁ ਪਪਤ੍ਤਿਤੋਤਿ ਦਸ੍ਸੇਤੁਂ ‘‘ਏਤ੍ਥ ਚਾ’’ਤਿਆਦਿਮਾਹ. ‘‘ਯੇਨ ਚ ਕਾਰਣੇਨਾ’’ਤਿ ਕਤਾਕਤਂ ਪਟਿਚ੍ਚ ਨਿਰਤ੍ਥਕ ਚਿਤ੍ਤਪ੍ਪਵਤ੍ਤਿ ਕਾਰਣੇਨ. ਸੋ ਚਿਤ੍ਤੁਪ੍ਪਾਦੋਵ ਕੁਕਤਪਦੇ ਗਹੇਤੁਂ ਯੁਤ੍ਤੋ, ਨਵਿਭਾਵਨਿਯਂ ਵਿਯ ਕਤਾਕਤ ਦੁਚ੍ਚਰਿਤ ਸੁਚਰਿਤਨ੍ਤਿ ਅਧਿਪ੍ਪਾਯੋ. ਨਨੁ ਵਿਭਾਵਨਿਯਮ੍ਪਿ ਸੋ ਚਿਤ੍ਤੁਪ੍ਪਾਦੋਵ ਉਪਚਾਰ ਨਯੇਨ ਗਹਿਤੋਤਿ ਚੇ. ਯੁਤ੍ਤਿ ਵਸੇਨ ਚ ਅਟ੍ਠਕਥਾਗਮੇਨ ਚ ਮੁਖ੍ਯਤੋ ਸਿਦ੍ਧੇ ਸਤਿ, ਕਿਂ ਉਪਚਾਰ ਨਯੇਨ. ਤੇਨਾਹ ‘‘ਵਿਭਾਵਨਿਯਂ ਪਨਾ’’ਤਿਆਦਿਂ. ਕੁਕਤਸ੍ਸਭਾਵੋ ਕੁਕ੍ਕੁਚ੍ਚਂ, ਅਕਾਰਸ੍ਸ ਉਕਾਰਂ ਕਤ੍ਵਾਤਿ ਅਯਂ ਅਟ੍ਠਕਥਾਨਯੋ. ਇਦਾਨਿ ਸਦ੍ਦਸਤ੍ਥਨਯੇਨ ਅਪਰਂ ਵਚਨਤ੍ਥਞ੍ਚ ਅਧਿਪ੍ਪਾਯਤ੍ਥਞ੍ਚ ਦਸ੍ਸੇਤੁਂ ‘‘ਅਪਿ ਚਾ’’ਤਿਆਦਿ ਆਰਦ੍ਧਂ. ਤਤ੍ਥ ‘‘ਧਾਤੁਪਾਠੇਸੂ’’ਤਿ ਅਕ੍ਖਰਧਾਤੁਪ੍ਪਕਾਸਨੇਸੁ ਨਿਰੁਤ੍ਤਿ ਪਾਠੇਸੁ. ਪਠਨ੍ਤਿਯੇਵ, ਨੋ ਨ ਪਠਨ੍ਤਿ. ਤੇ ਚ ਅਤ੍ਥਾ ਚੇਤਸੋ ਵਿਪ੍ਪਟਿਸਾਰੋ ਮਨੋ ਵਿਲੇਖੋਤਿ ਏਵਂ ਪਾਲ਼ਿਯਂ ਵੁਤ੍ਤੇਹਿ ਕੁਕ੍ਕੁਚ੍ਚਪਰਿਯਾਯੇਹਿ ਸਮੇਨ੍ਤਿਯੇਵ. ਤਸ੍ਮਾ ਅਯਂ ਅਪਰੋਨਯੋ ਇਧ ਅਵਸ੍ਸਂ ਵਤ੍ਤਬ੍ਬੋ ਯੇਵਾਤਿ ਦੀਪੇਤਿ. ਵਿਪ੍ਪਟਿ ਸਾਰਿਪੁਗ੍ਗਲੋ ਚ ਤਂ ਤਂ ਪੁਞ੍ਞਕਮ੍ਮਂ ਕਰੋਨ੍ਤੋਪਿ ਵਿਪ੍ਪਟਿ ਸਾਰਗ੍ਗਿਨਾ ਦਯ੍ਹਮਾਨ ਚਿਤ੍ਤੋ ਪੁਞ੍ਞਕਮ੍ਮੇ ਚਿਤ੍ਤਪ੍ਪਸਾਦਂ ਨਲਭਤਿ. ਚਿਤ੍ਤ ਸੁਖਂ ਨ ਵਿਨ੍ਦਤਿ. ਕਿਂ ਇਮਿਨਾ ਕਮ੍ਮੇਨਾਤਿ ਤਂ ਪਹਾਯ ਯਤ੍ਥ ਚਿਤ੍ਤ ਸੁਖਂ ਵਿਨ੍ਦਤਿ, ਤਤ੍ਥ ਵਿਚਰਤਿ. ਏਵਂ ਵਿਪ੍ਪਟਿਸਾਰੋ ਪੁਞ੍ਞਕਮ੍ਮਤੋ ਸਙ੍ਕੋਚਨਂ ਨਾਮ ਹੋਤੀਤਿ. ਕਿਲੇਸਸਲ੍ਲਿਖਨਂ ਨਾਮ ਸਨ੍ਤੁਟ੍ਠਿ ਸਲ੍ਲੇਖਪ੍ਪਟਿਪਤ੍ਤਿਯਂ ਠਿਤਸ੍ਸ ਤਦਙ੍ਗਪ੍ਪਹਾਨਾਦਿਵਸੇਨ ਤਂ ਤਂ ਕਿਲੇਸਪ੍ਪਹਾਨਂ ਵੁਚ੍ਚਤਿ. ‘‘ਅਨੁਤ੍ਥੁਨਨਾਕਾਰੇਨਾ’’ਤਿ ਪੁਨਪ੍ਪੁਨਂ ਵਿਲਪਨਾਕਾਰੇਨ. ਸਙ੍ਕੋਚਤੀਤਿ ਵਤ੍ਵਾ ਤਸ੍ਸ ਉਭਯਂ ਅਤ੍ਥਂ ਦਸ੍ਸੇਨ੍ਤੋ ‘‘ਕੁਸਲਕਮ੍ਮ ਸਮਾਦਾਨੇ’’ਤਿਆਦਿਮਾਹ. ਨਮਿਤੁਮ੍ਪਿ ਨ ਦੇਤਿ. ਕੁਤੋ ਸਮਾਦਾਤੁਂ ਵਾ ਵਡ੍ਢੇਤੁਂ ਵਾ ਦਸ੍ਸਤੀਤਿ ਅਧਿਪ੍ਪਾਯੋ. ‘‘ਤਨੁਕਰਣੇਨਾ’’ਤਿ ਦੁਬ੍ਬਲਕਰਣੇਨ. ਵਿਸੇਸਨਟ੍ਠੇਕਰਣ ਵਚਨਂ. ‘‘ਸੋ’’ਤਿ ਧਮ੍ਮਸਮੂਹੋ. ਤਂ ਪਨ ਕੁਕ੍ਕੁਚ੍ਚਂ. ਕੇਚਿ ਪਨ ਕੁਕ੍ਕੁਚ੍ਚਂ ਪਚ੍ਚੁਪ੍ਪਨ੍ਨ ਸੁਚਰਿਤ ਦੁਚ੍ਚਰਿਤਾ ਰਮ੍ਮਣਮ੍ਪਿ ਅਨਾਗਤ ਸੁਚਰਿਤ ਦੁਚ੍ਚਰਿਤਾ ਰਮ੍ਮਣਮ੍ਪਿ ਕਪ੍ਪੇਨ੍ਤਿ. ਤਂ ਪਟਿਕ੍ਖਿਪਨ੍ਤੋ ‘‘ਤੇਨਾ’’ਤਿਆਦਿਮਾਹ. ਮਹਾਨਿਦ੍ਦੇਸਪਾਠੇ ਦ੍ਵੀਹਾਕਾਰੇਹਿ ਉਪ੍ਪਜ੍ਜਤਿ ਕੁਕ੍ਕੁਚ੍ਚਂ ਚੇਤਸੋ ਵਿਪ੍ਪਟਿਸਾਰੋ ਮਨੋਵਿਲੇਖੋਤਿ ਪਾਠੋ. ‘‘ਕਤਤ੍ਤਾ ਚਾ’’ਤਿ ਅਕਤ੍ਤਬ੍ਬਸ੍ਸ ਕਤਤ੍ਤਾ ਚ. ‘‘ਅਕਤਤ੍ਤਾ ਚਾ’’ਤਿ ਕਤ੍ਤਬ੍ਬਸ੍ਸ ਅਕਤਤ੍ਤਾ ਚ. ਕੇਚਿ ਪਨ ਅਯਂ ਵਿਪ੍ਪਟਿਸਾਰੋ ਨਾਮ ਕਦਾਚਿ ਕਸ੍ਸਚਿ ਕੇਨਚਿ ਕਾਰਣੇਨ ਪੁਬ੍ਬੇਕਤ ਸੁਚਰਿਤਮ੍ਪਿ ਅਕਤ ਦੁਚ੍ਚਰਿਤਮ੍ਪਿ ਆਰਬ੍ਭ ਉਪ੍ਪਜ੍ਜਤਿ. ਉਮ੍ਮਤ੍ਤਕਸਦਿਸਞ੍ਹਿ ਪੁਥੁਜ੍ਜਨ ਚਿਤ੍ਤਨ੍ਤਿ ਵਦਨ੍ਤਿ. ਤਂ ਪਟਿਕ੍ਖਿਪਨ੍ਤੋ ‘‘ਏਤੇਨਾ’’ਤਿਆਦਿਮਾਹ. ਸੋ ਪਨ ਕੇਸਞ੍ਚਿ ਵਾਦੇ ਵਿਪ੍ਪਟਿਸਾਰੋ ਨਾਮ ਦੋਮਨਸ੍ਸਂ ਹੋਤਿ, ਨ ਕੁਕ੍ਕੁਚ੍ਚਨ੍ਤਿ ਅਧਿਪ੍ਪਾਯੋ. ਸੋਚ ਖੋ ਦ੍ਵਿਧਾ ਭਾਵੋ. ਅਪਾਯਭਯੇਨ ਤਜ੍ਜੀਯਨ੍ਤਿ ਤਾਸੀਯਨ੍ਤੀਤਿ ਅਪਾਯਭਯ ਤਜ੍ਜਿਤਾ. ‘‘ਨ ਅਞ੍ਞੇਸਂ’’ਤਿ ਸੁਚਰਿਤ ਦੁਚ੍ਚਰਿਤਂ ਅਜਾਨਨ੍ਤਾਨਂ ਅਮਨਸਿਕਰੋਨ੍ਤਾਨਞ੍ਚ ਨ ਹੋਤਿ. ਕਥਂ ਵਿਞ੍ਞਾਯਤੀਤਿ ਚੇ. ਸੁਚਰਿਤਦੁਚ੍ਚਰਿਤ ਨਾਮੇਨ ਅਨੁਸੋਚਨਾਕਾਰਸ੍ਸ ਦਸ੍ਸਿਤਤ੍ਤਾਤਿ ਵੁਤ੍ਤਂ ‘‘ਅਕਤਂ ਮੇ’’ਤਿਆਦਿ. ਯਾਥਾਵਮਾਨੋ ਨਾਮ ਸੇਯ੍ਯਸ੍ਸ ਸੇਯ੍ਯੋ ਹਮਸ੍ਮੀਤਿ ਸਦਿਸਸ੍ਸ ਸਦਿਸੋਹਮਸ੍ਮੀਤਿ ਹੀਨਸ੍ਸ ਹੀਨੋਹਮਸ੍ਮੀਤਿਆਦਿਨਾ ਪਵਤ੍ਤੋ ਭੂਤਮਾਨੋ. ਯਞ੍ਚਕੁਕ੍ਕੁਚ੍ਚਂ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ‘‘ਅਕਤ੍ਵਾ’’ਤਿ ਤਂ ਕਲ੍ਯਾਣ ਕਮ੍ਮਂ ਅਕਤ੍ਵਾ. ‘‘ਕਤ੍ਵਾ’’ਤਿ ਤਂ ਪਾਪਕਮ੍ਮਂ ਕਤ੍ਵਾ. ਇਦਂ ਪਨ ਪੁਬ੍ਬੇਕਤਾ ਕਤਕਾਲੇ ਏਵ ਅਯਾਥਾਵਂ ਹੋਤਿ. ਅਨੁਸੋਚਨ ਕਾਲੇਪਨ ਯਾਥਾਵਮੇਵ. ‘‘ਹਤ੍ਥ ਕੁਕ੍ਕੁਚ੍ਚਂ’’ਤਿ ਏਤ੍ਥ ਸਙ੍ਕੋਚਨਤ੍ਥੋ ਨ ਲਬ੍ਭਤਿ. ਕੁਚ੍ਛਿਤ ਕਿਰਿਯਤ੍ਥੋ ਏਵ ਲਬ੍ਭਤਿ. ਹਤ੍ਥਲੋਲਤਾਹਿ ਹਤ੍ਥ ਕੁਕ੍ਕੁਚ੍ਚਨ੍ਤਿ ਵੁਚ੍ਚਤਿ. ਪਾਦਲੋਲਤਾ ਚ ਪਾਦਕੁਕ੍ਕੁਚ੍ਚਂ. ਤੇਨਾਹ ‘‘ਅਸਂਯਤ ਕੁਕ੍ਕੁਚ੍ਚਂ ਨਾਮਾ’’ਤਿ. ਯਂ ਪਨ ਕੁਕ੍ਕੁਚ੍ਚਂ. ‘‘ਤਂ’’ਤਿ ਤਂ ਵਤ੍ਥੁਂ. ਕੁਕ੍ਕੁਚ੍ਚਂ ਕਰੋਨ੍ਤੀਤਿ ਕੁਕ੍ਕੁਚ੍ਚਾਯਨ੍ਤਾ. ਨਾਮਧਾਤੁ ਪਦਞ੍ਹੇਤਂ. ਕਪ੍ਪਤਿ ਨੁ ਖੋ, ਨ ਨੁ ਖੋ ਕਪ੍ਪਤੀਤਿ ਏਵਂ ਵਿਨਯ ਸਂਸਯਂ ਉਪ੍ਪਾਦੇਨ੍ਤਾਤਿ ਅਤ੍ਥੋ. ‘‘ਕੁਕ੍ਕੁਚ੍ਚਪ੍ਪਕਤਤਾਯਾ’’ਤਿ ਕੁਕ੍ਕੁਚ੍ਚੇਨ ਅਪਕਤਤਾਯ ਅਭਿਭੂਤਤਾਯ. ‘‘ਅਤ੍ਤਨੋ ਅਵਿਸਯੇ’’ਤਿ ਆਣਾਚਕ੍ਕਠਾਨੇ. ਆਣਾਚਕ੍ਕ ਸਾਮਿਨੋ ਬੁਦ੍ਧਸ੍ਸਵਿਸਯਤ੍ਤਾ ਅਤ੍ਤਨੋ ਸਾਵਕ ਭੂਤਸ੍ਸ ਅਵਿਸਯੇਤਿ ਅਤ੍ਥੋ. ਯੇ ਪਨ ਕਰੋਨ੍ਤਿਯੇਵ ਕੁਕ੍ਕੁਚ੍ਚਾਯਨ੍ਤਾ ਪੀਤਿ ਅਧਿਪ੍ਪਾਯੋ. ‘‘ਆਪਤ੍ਤਿਂ’’ਤਿ ਦੁਕ੍ਕਟਾਪਤ੍ਤਿਂ.

੯੪-੯੫. ਥਿਨਮਿਦ੍ਧਵਚਨਤ੍ਥੇਸੁ. ‘‘ਚਿਤ੍ਤਂ ਮਨ੍ਦਮਨ੍ਦਂ ਕਤ੍ਵਾ’’ਤਿ ਚਿਨ੍ਤਨ ਕਿਚ੍ਚੇ ਅਤਿਮਨ੍ਦਂ ਪਰਿਦੁਬ੍ਬਲਂ ਕਤ੍ਵਾ. ਚਿਤ੍ਤਂ ਗਿਲਾਨਂ ਮਿਲਾਤਂ ਕਤ੍ਵਾਤਿ ਵੁਤ੍ਤਂ ਹੋਤਿ. ‘‘ਅਜ੍ਝੋਤ੍ਥਰਤੀ’’ਤਿ ਅਭਿਭਵਤਿ. ਆਰਮ੍ਮਣ ਵਿਜਾਨਨੇ ਵਾ ਜਵਨਕਿਚ੍ਚੇ ਵਾ ਪਰਿਹੀਨਥਾਮਬਲਂ ਕਰੋਤਿ. ‘‘ਥਿਯਤੀ’’ਤਿ ਪਦਂ ਪਾਲ਼ਿਵਸੇਨ ਸਿਦ੍ਧਨ੍ਤਿ ਆਹ ‘‘ਥਿਨਂ ਥਿਯਨਾ’’ਤਿਆਦਿਂ. ‘‘ਅਕਮ੍ਮਞ੍ਞਭੂਤੇ ਕਤ੍ਵਾ’’ਤਿ ਕਾਯਕਮ੍ਮਾਦੀਸੁ ਅਕਮ੍ਮਕ੍ਖਮੇ ਪਰਿਦੁਬ੍ਬਲੇ ਕਤ੍ਵਾ. [ਮੁਗ੍ਗਰੇਨ ਪੋਥੇਤ੍ਵਾ ਵਿਯਾਤਿ ਵੁਤ੍ਤਂ ਹੋਤਿ ]. ‘‘ਤੇ’’ਤਿ ਚਿਤ੍ਤ ਚੇਤਸਿਕੇ ਸਮ੍ਪਯੁਤ੍ਤ ਧਮ੍ਮੇ. ‘‘ਓਲੀਯਾਪੇਤ੍ਵਾ’’ਤਿ ਅਵਲੀਨੇ ਅਵਸੀਦਨ੍ਤੇ ਕਤ੍ਵਾ. ਤੇਨਾਹ ‘‘ਇਰਿਯਾ ਪਥਂ ਪੀ’’ਤਿਆਦਿਂ. ਥਿਨਂ ਚਿਤ੍ਤਂ ਅਭਿਭਵਤਿ, ਵਿਜਾਨਨ ਕਿਚ੍ਚਸ੍ਸ ਗੇਲਞ੍ਞਤ੍ਤਾ ਥਿਨਸ੍ਸ. ਮਿਦ੍ਧਂ ਚੇਤਸਿਕੇ ਅਭਿਭਵਤਿ, ਫੁਸਨਾਦਿ ਕਿਚ੍ਚਸ੍ਸ ਗੇਲਞ੍ਞਤ੍ਤਾ ਮਿਦ੍ਧਸ੍ਸਾਤਿ ਅਧਿਪ੍ਪਾਯੋ.

੯੬. ਵਿਚਿਕਿਚ੍ਛਾਵਚਨਤ੍ਥੇ. ‘‘ਚਿਕਿਚ੍ਛਨਂ’’ਤਿ ਰੋਗਾਪਨਯ ਨਤ੍ਥੇ ਕਿਤਧਾਤੁਵਸੇਨ ਸਿਦ੍ਧਂ ਸਙ੍ਖਤ ਕਿਰਿਯਾ ਪਦਨ੍ਤਿ ਆਹ ‘‘ਞਾਣਪ੍ਪਟਿਕਾਰੋਤਿ ਅਤ੍ਥੋ’’ਤਿ. ‘‘ਪਟਿਕਾਰੋ’’ਤਿ ਚ ਰੋਗਸ੍ਸ ਪਟਿਪਕ੍ਖ ਕਮ੍ਮਂ. ‘‘ਏਤਾਯਾ’’ਤਿ ਨਿਸ੍ਸਕ੍ਕਵਚਨਂ. ਵਿਚਿਨਨ੍ਤਿ ਧਮ੍ਮਂ ਵਿਚਿਨਨ੍ਤੀਤਿ ਵਿਚਿਨੋ. ਧਮ੍ਮ ਵੀਮਂਸਕਾ. ਕਿਚ੍ਛਤਿ ਕਿਲਮਤਿ ਏਤਾਯਾਤਿ ਕਿਚ੍ਛਾ. ਵਿਚਿਨਂ ਕਿਚ੍ਛਾਤਿ ਵਿਚਿਕਿਚ੍ਛਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਸਭਾਵਂ’’ਤਿਆਦਿਮਾਹ. ‘‘ਵਿਚਿਕਿਚ੍ਛਤੀ’’ਤਿ ਸਙ੍ਖਤਧਾਤੁਪਦਂ. ਤਞ੍ਚ ਕਙ੍ਖਾਯਂ ਵਤ੍ਤਤੀਤਿ ਦਸ੍ਸੇਤੁਂ ‘‘ਵਿਚਿਕਿਚ੍ਛਤਿ ਵਾ’’ਤਿਆਦਿ ਵੁਤ੍ਤਂ. ਦ੍ਵਿਧਾ ਏਲ਼ਯਤਿ ਕਮ੍ਪਤੀਤਿ ਦ੍ਵੇਲ਼ਕਂ. ਤਥਾ ਪਵਤ੍ਤਂ ਚਿਤ੍ਤਂ. ਦ੍ਵੇਲ਼ਕਸ੍ਸ ਭਾਵੋਤਿ ਵਿਗ੍ਗਹੋ. ‘‘ਬੁਦ੍ਧਾਦੀਸੁ ਅਟ੍ਠਸੂ’’ਤਿ ਬੁਦ੍ਧੇ ਕਙ੍ਖਤਿ, ਧਮ੍ਮੇ ਕਙ੍ਖਤਿ, ਸਙ੍ਘੇ ਕਙ੍ਖਤਿ, ਸਿਕ੍ਖਾਯ ਕਙ੍ਖਤਿ, ਪੁਬ੍ਬਨ੍ਤੇ ਕਙ੍ਖਤਿ, ਅਪਰਨ੍ਤੇ ਕਙ੍ਖਤਿ, ਪੁਬ੍ਬਨ੍ਤਾ ਪਰਨ੍ਤੇ ਕਙ੍ਖਤਿ, ਇਦਪ੍ਪਚ੍ਚਯਤਾ ਪਟਿਚ੍ਚ ਸਮੁਪ੍ਪਨ੍ਨੇਸੁ ਧਮ੍ਮੇਸੁ ਕਙ੍ਖਤੀਤਿ ਏਵਂ ਵੁਤ੍ਤੇਸੁ ਅਟ੍ਠਸੁ ਸਦ੍ਧੇਯ੍ਯ ਵਤ੍ਥੂਸੁ. ਤਤ੍ਥ ‘‘ਬੁਦ੍ਧੇ ਕਙ੍ਖਤੀ’’ਤਿ ਇਤਿਪਿ ਸੋ ਭਗਵਾ ਅਰਹਂਤਿਆਦਿਨਾ ਵੁਤ੍ਤੇਸੁ ਬੁਦ੍ਧਗੁਣੇਸੁ ਅਸਦ੍ਦਹਨ੍ਤੋ ਬੁਦ੍ਧੇ ਕਙ੍ਖਤਿ ਨਾਮ. ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋਤਿਆਦਿਨਾ ਵੁਤ੍ਤੇਸੁ ਧਮ੍ਮ ਗੁਣੇਸੁ ਅਸਦ੍ਦਹਨ੍ਤੋ ਧਮ੍ਮੇ ਕਙ੍ਖਤਿ ਨਾਮ. ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋਤਿਆਦਿਨਾ ਵੁਤ੍ਤੇਸੁ ਸਙ੍ਘਗੁਣੇਸੁ ਅਸਦ੍ਦਹਨ੍ਤੋ ਸਙ੍ਘੇ ਕਙ੍ਖਤਿ ਨਾਮ. ਤਿਸ੍ਸਨ੍ਨਂ ਸਿਕ੍ਖਾਨਂ ਵਟ੍ਟ ਦੁਕ੍ਖਤੋ ਨਿਯ੍ਯਾਨਟ੍ਠੇਸੁ ਅਸਦ੍ਦਹਨ੍ਤੋ ਸਿਕ੍ਖਾਯ ਕਙ੍ਖਤਿ ਨਾਮ. ਅਤ੍ਤਨੋ ਅਤੀਤ ਭਵਸ੍ਸ ਅਤ੍ਥਿ ਨਤ੍ਥਿਭਾਵੇ ਕਙ੍ਖਨ੍ਤੋ ਪੁਬ੍ਬਨ੍ਤੇ ਕਙ੍ਖਤਿ ਨਾਮ. ਅਤ੍ਤਨੋ ਪਰਮ੍ਮਰਣਾ ਅਨਾਗਤ ਭਵਸ੍ਸ ਅਤ੍ਥਿ ਨਤ੍ਥਿਭਾਵੇ ਕਙ੍ਖਨ੍ਤੋ ਅਪਰਨ੍ਤੇ ਕਙ੍ਖਤਿ ਨਾਮ. ਤਦੁਭਯਸ੍ਸ ਅਤ੍ਥਿ ਨਤ੍ਥਿ ਭਾਵੇ ਕਙ੍ਖਨ੍ਤੋ ਪੁਬ੍ਬਨ੍ਤਾ ਪਰਨ੍ਤੇ ਕਙ੍ਖਤਿ ਨਾਮ. ਇਮਸ੍ਮਿਂ ਭਵੇ ਅਤ੍ਤਨੋ ਖਨ੍ਧਾਨਂ ਪਟਿਚ੍ਚ ਸਮੁਪ੍ਪਾਦੇ ਚ ਪਟਿਚ੍ਚ ਸਮੁਪ੍ਪਨ੍ਨਭਾਵੇ ਚ ਕਙ੍ਖਨ੍ਤੋ ਇਦਪ੍ਪਚ੍ਚਯਤਾ ਪਟਿਚ੍ਚ ਸਮੁਪ੍ਪਨ੍ਨੇਸੁ ਧਮ੍ਮੇਸੁ ਕਙ੍ਖਤਿ ਨਾਮ. ‘‘ਵਿਮਤਿ ਵਸੇਨਾ’’ਤਿ ਵੇਮਤਿਕਭਾਵੇਨ. ਪਵਤ੍ਤਮਾਨਾ ਵਿਚਿਕਿਚ੍ਛਾ. ਵਿਚਿਕਿਚ੍ਛਾ ਪਟਿਰੂਪਕਾ ਨਾਮ ਸਬ੍ਬ ਧਮ੍ਮੇਸੁ ਅਪ੍ਪਟਿਹਤਬੁਦ੍ਧੀਨਂ ਸਬ੍ਬਞ੍ਞੁ ਬੁਦ੍ਧਾਨਂ ਏਵ ਨਤ੍ਥੀਤਿ ਵੁਤ੍ਤਂ ‘‘ਅਸਬ੍ਬਞ੍ਞੂਨਂ’’ਤਿਆਦਿ.

ਅਕੁਸਲਰਾਸਿਮ੍ਹਿਅਨੁਦੀਪਨਾ ਨਿਟ੍ਠਿਤਾ.

੯੭. ਸਦ੍ਧਾਵਚਨਤ੍ਥੇ. ‘‘ਸਨ੍ਨਿਸਿਨ੍ਨਂ’’ਤਿ ਅਚਲਿਤਂ. ‘‘ਸੁਟ੍ਠੂ’’ਤਿ ਅਨਸ੍ਸਨ੍ਤਂ ਅਚਲਨ੍ਤਞ੍ਚ ਕਤ੍ਵਾ. ‘‘ਧਾਰੇਤੀ’’ਤਿ ਏਵਮੇਵ ਹੋਤੀਤਿ ਸਲ੍ਲਕ੍ਖਣਵਸੇਨ ਧਾਰੇਤਿ. ਤਥਾ ਠਪੇਤੀਤਿ. ਸਦ੍ਦਹਨ੍ਤਿ ਵਾ ਸਦ੍ਧਾ ਸਮ੍ਪਨ੍ਨਾ ਸਤ੍ਤਾ. ਸਦ੍ਧਾਤੁਂ ਅਰਹਨ੍ਤੀਤਿ ਸਦ੍ਧੇਯ੍ਯਾਨਿ. ਅਕਾਲੁਸ੍ਸਂ ਵੁਚ੍ਚਤਿ ਅਨਾਵਿਲਂ ਚਿਤ੍ਤਂ. ਅਕਾਲੁਸ੍ਸਂ ਏਵ ਅਕਾਲੁਸ੍ਸਿਯਂ. ਤਸ੍ਸ ਭਾਵੋਤਿ ਵਿਗ੍ਗਹੋ. ‘‘ਓਕਪ੍ਪਨਾ’’ਤਿ ਅਹੋਸਾਧੁ ਅਹੋਸੁਟ੍ਠੂਤਿ ਅਧਿਮੁਚ੍ਚਨਵਸੇਨ ਚਿਨ੍ਤਨਾ. ‘‘ਮਿਚ੍ਛਾਧਿਮੋਕ੍ਖੋ ਯੇਵਾ’’ਤਿ ਦਿਟ੍ਠਿਸਮ੍ਪਯੁਤ੍ਤੋ ਅਧਿਮੋਕ੍ਖੋਯੇਵ. ‘‘ਵਿਤ੍ਤੇ ਅਸਤੀ’’ਤਿ ਧਨੇ ਅਸਤਿ. ਧਨਞ੍ਹਿ ਵਿਤ੍ਤਨ੍ਤਿ ਵੁਚ੍ਚਤਿ. ਯਂ ਯਂ ਇਚ੍ਛਤਿ, ਤਂ ਤਂ ਵਿਨ੍ਦਨ੍ਤਿ ਏਤੇਨਾਤਿ ਕਤ੍ਵਾ. ‘‘ਤੇਸਂ’’ਤਿ ਮਨੁਸ੍ਸਾਨਂ.

੯੮. ਸਤਿਵਚਨਤ੍ਥੇ. ‘‘ਸਰਤੀ’’ਤਿ ਅਨੁਸ੍ਸਰਤਿ. ‘‘ਕਤਾਨੀ’’ਤਿ ਪੁਬ੍ਬੇਕਤਾਨਿ. ‘‘ਕਤ੍ਤਬ੍ਬਾਨੀ’’ਤਿ ਇਦਾਨਿ ਵਾ ਪਚ੍ਛਾ ਵਾ ਕਤ੍ਤਬ੍ਬਾਨਿ. ਕਲ੍ਯਾਣ ਕਮ੍ਮਂ ਨਾਮਪਕਤਿਯਾ ਚਿਤ੍ਤਸ੍ਸ ਰਤਿਟ੍ਠਾਨਂ ਨ ਹੋਤਿ. ਪਾਪ ਕਮ੍ਮਮੇਵ ਚਿਤ੍ਤਸ੍ਸ ਰਤਿਟ੍ਠਾਨਂ ਹੋਤਿ. ਤਸ੍ਮਾ ਕਲ੍ਯਾਣ ਕਮ੍ਮੇ ਏਵ ਅਪ੍ਪਮਜ੍ਜਿਤੁਂ ਵਿਸੁਂ ਸਤਿਨਾਮ ਇਚ੍ਛਿਤਬ੍ਬਾ. ਪਾਪਕਮ੍ਮੇ ਪਨ ਵਿਸੁਂ ਸਤਿਯਾ ਕਿਚ੍ਚਂ ਨਤ੍ਥਿ. ਸਬ੍ਬੇਪਿ ਚਿਤ੍ਤਚੇਤਸਿਕਾ ਧਮ੍ਮਾ ਅਪਮਤ੍ਤ ਰੂਪਾ ਹੋਨ੍ਤਿ. ਤੇਨਾਹ ‘‘ਇਤਰਾਪਨਾ’’ਤਿਆਦਿਂ. ‘‘ਸਤਿਯੇਵ ਨ ਹੋਤੀ’’ਤਿ ਵਿਸੁਂ ਸਤਿ ਨਾਮਕੋ ਏਕੋ ਚੇਤਸਿਕੋਯੇਵ ਨ ਹੋਤਿ. ਕਤਮਾ ਪਨ ਸਾ ਹੋਤੀਤਿ ਆਹ ‘‘ਕਤਸ੍ਸਾ’’ਤਿਆਦਿਂ. ਤਤ੍ਥ ਕਤਸ੍ਸ ਅਪ੍ਪਮਜ੍ਜਨਂ ਨਾਮ ਕੇਸਞ੍ਚਿ ਅਨੁਮੋਦਨਵਸੇਨ ਕੇਸਞ੍ਚਿ ਅਨੁਸੋਚਨਵਸੇਨ ਅਪ੍ਪਮਜ੍ਜਨਂ. ਕਤ੍ਤਬ੍ਬਸ੍ਸ ਅਪ੍ਪਮਜ੍ਜਨਂ ਨਾਮ ਨਿਚ੍ਚਕਾਲਮ੍ਪਿ ਕਾਤੁਂ ਅਭਿਮੁਖਤਾ. ‘‘ਕਤਸ੍ਸਾ’’ਤਿ ਵਾ ਭੁਮ੍ਮਤ੍ਥੇ ਸਾਮਿਵਚਨਂ. ਤਥਾ ਸੇਸੇਸੁ ਦ੍ਵੀਸੁ ਪਦੇਸੁ. ਸਬ੍ਬੇਸੁ ਰਾਜਕਮ੍ਮੇਸੁ ਨਿਯੁਤ੍ਤੋ ਸਬ੍ਬਕਮ੍ਮਿਕੋ. ‘‘ਨਿਯੁਤ੍ਤੋ’’ਤਿ ਅਪ੍ਪਮਤ੍ਤੋ ਹੁਤ੍ਵਾ ਬ੍ਯਾਵਟਕਾਯ ਚਿਤ੍ਤੋ. ਸਬ੍ਬੇਸੁ ਠਾਨੇਸੁ ਇਚ੍ਛਿਤਬ੍ਬਾਤਿ ਸਬ੍ਬਤ੍ਥਿਕਾ. ਸਾ ਹਿ ਛਸੁ ਦ੍ਵਾਰੇਸੁ ਚਿਤ੍ਤਸ੍ਸ ਆਰਕ੍ਖ ਕਿਚ੍ਚਾ ਹੋਤਿ ਇਨ੍ਦ੍ਰਿਯ ਸਂਵਰਣ ਧਮ੍ਮਤ੍ਤਾ. ਤਸ੍ਮਾ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਲੋਭਮੂਲਚਿਤ੍ਤਸ੍ਸ ਅਨੁਪ੍ਪਜ੍ਜਨਤ੍ਥਾਯ ਸਾ ਇਚ੍ਛਿਤਬ੍ਬਾ, ਅਨਿਟ੍ਠਾ ਰਮ੍ਮਣੇ ਦੋਸਮੂਲ ਚਿਤ੍ਤਸ੍ਸ, ਮਜ੍ਝਤ੍ਤਾਰਮ੍ਮਣੇ ਮੋਹਮੂਲ ਚਿਤ੍ਤਸ੍ਸਾਤਿ. ਅਪਿ ਚ, ਬੋਜ੍ਝਙ੍ਗ ਭਾਵਨਾ ਠਾਨੇਸੁ ਇਦਂ ਸੁਤ੍ਤ ਪਦਂ ਵੁਤ੍ਤਂ. ਤਸ੍ਮਾ ਭਾਵਨਾ ਚਿਤ੍ਤਸ੍ਸ ਲੀਨਟ੍ਠਾਨੇਪਿ ਸਾ ਇਚ੍ਛਿਤਬ੍ਬਾ ਲੀਨਪਕ੍ਖਤੋ ਚਿਤ੍ਤਸ੍ਸ ਨੀਵਾਰਣਤ੍ਥਾਯਾਤਿਆਦਿਨਾ ਯੋਜੇਤਬ੍ਬਾ.

੯੯-੧੦੦. ਹਿਰਿਓਤ੍ਤਪ੍ਪਵਚਨਤ੍ਥੇਸੁ. ‘‘ਕਾਯਦੁਚ੍ਚਰਿਤਾਦੀਹਿ ਲਜ੍ਜਤੀ’’ਤਿ ਤਾਨਿਕਾਤੁਂ ਲਜ੍ਜਤਿ. ਤਾਨਿ ਹੀਨਕਮ੍ਮਾਨਿ ਲਾਮਕਕਮ੍ਮਾਨੀਤਿ ਹੀਲ਼ੇਤ੍ਵਾ ਤਤੋ ਅਤ੍ਤਾਨਂ ਰਕ੍ਖਿਤੁਂ ਇਚ੍ਛਤਿ. ਤੇਨਾਹ ‘‘ਜਿਗੁਚ੍ਛਤੀ’’ਤਿ. ‘‘ਉਕ੍ਕਣ੍ਠਤੀ’’ਤਿ ਵਿਰੁਜ੍ਝਤਿ, ਵਿਯੋਗਂ ਇਚ੍ਛਤਿ. ‘‘ਤੇਹਿ ਯੇਵਾ’’ਤਿ ਕਾਯ ਦੁਚ੍ਚਰਿਤਾਦੀਹਿਯੇਵ. ‘‘ਉਬ੍ਬਿਜ੍ਜਤੀ’’ਤਿ ਉਤ੍ਤਸਤਿ, ਭਯਤੋ ਉਪਟ੍ਠਾਤਿ. ਗਾਥਾਸੁ. ‘‘ਅਲਜ੍ਜਿਯੇਸੂ’’ਤਿ ਅਲਜ੍ਜਿਤਬ੍ਬੇਸੁ ਕਲ੍ਯਾਣ ਕਮ੍ਮੇਸੁ. ‘‘ਲਜ੍ਜਰੇ’’ਤਿ ਲਜ੍ਜਨ੍ਤਿ. ‘‘ਅਭਯੇ’’ਤਿ ਅਭਾਯਿਤਬ੍ਬੇ ਕਲ੍ਯਾਣਕਮ੍ਮੇ. ਯਸ੍ਮਾ ਪਨ ਸਪ੍ਪੁਰਿਸਾ ਅਤ੍ਤਾਨਂ ਪਰਿਹਰਨ੍ਤੀਤਿ ਸਮ੍ਬਨ੍ਧੋ. ‘‘ਹਿਰਿਯਾ ਅਤ੍ਤਨਿ ਗਾਰਵਂ ਉਪ੍ਪਾਦੇਤ੍ਵਾ’’ਤਿ ਅਤ੍ਤਨੋ ਜਾਤਿਗੁਣਾਦਿਕਂ ਵਾ ਸੀਲ ਗੁਣਾਦਿਕਂ ਵਾ ਗਰੁਂ ਕਤ੍ਵਾ ਮਾਦਿਸਸ੍ਸ ਏਵ ਰੂਪਂ ਪਾਪਕਮ੍ਮਂ ਅਯੁਤ੍ਤਂ ਕਾਤੁਂ. ਯਦਿ ਕਰੇਯ੍ਯਂ, ਪਚ੍ਛਾ ਅਤ੍ਤਾਨਂ ਅਸੁਦ੍ਧਂ ਞਤ੍ਵਾ ਦੁਕ੍ਖੀਦੁਮ੍ਮਨੋ ਭਵੇਯ੍ਯਨ੍ਤਿ ਏਵਂ ਹਿਰਿਯਾ ਅਤ੍ਤਨਿ ਗਾਰਵਂ ਉਪ੍ਪਾਦੇਤ੍ਵਾ. ‘‘ਓਤ੍ਤਪ੍ਪੇਨ ਪਰੇਸੁ ਗਾਰਵਂ ਉਪ੍ਪਾਦੇਤ੍ਵਾ’’ਤਿ ਪਰਾਨੁਵਾਦਭਯਂ ਭਾਯਿਤ੍ਵਾਤਿ ਅਧਿਪ੍ਪਾਯੋ. ਤਤ੍ਥ ਪਰਾਨੁਵਾਦਭਯਂ ਨਾਮ ਪਰੇਸਂ ਸਾਧੁ ਜਨਾਨਂ ਗਰਹਾ ਭਯਂ. ਅਞ੍ਞਮ੍ਪਿ ਅਪਾਯਭਯਂ ਸਂਸਾਰ ਵਟ੍ਟਭਯਞ੍ਚ ਏਤ੍ਥ ਸਙ੍ਗਯ੍ਹਤਿਯੇਵ. ਲੋਕਂਪਾਲੇਨ੍ਤੀਤਿ ਲੋਕਪਾਲਾ. ‘‘ਲੋਕਂ’’ਤਿ ਸਤ੍ਤਲੋਕਂ. ‘‘ਪਾਲੇਨ੍ਤੀ’’ਤਿ ਅਪਾਯ ਭਯਤੋ ਰਕ੍ਖਨ੍ਤਿ.

੧੦੧. ਅਲੋਭਵਚਨਤ੍ਥੇ. ਅਕਾਰੋ ਵਿਰੁਦ੍ਧਤ੍ਥੋਤਿਆਹ ‘‘ਲੋਭਪ੍ਪਟਿਪਕ੍ਖੋ’’ਤਿ. ਲੋਭਸ੍ਸ ਪਟਿਵਿਰੁਦ੍ਧੋਤਿ ਅਤ੍ਥੋ. ਪਟਿਵਿਰੁਦ੍ਧਤਾ ਚ ਪਹਾਯਕ ਪਹਾਤਬ੍ਬ ਭਾਵੇਨ ਵੇਦਿਤਬ੍ਬਾਤਿ ਦਸ੍ਸੇਤੁਂ ‘‘ਸੋਹੀ’’ਤਿਆਦਿਮਾਹ. ਤਤ੍ਥ ਸੋ ਨੇਕ੍ਖਮ੍ਮਧਾਤੁਵਸੇਨ ਹੁਤ੍ਵਾ ਪਵਤ੍ਤਤੀਤਿ ਸਮ੍ਬਨ੍ਧੋ. ‘‘ਹਿਤ ਸਞ੍ਞਿਤੇਸੂ’’ਤਿ ਇਦਂ ਮੇ ਅਤ੍ਥਾਯ ਹਿਤਾਯ ਸੁਖਾਯਾਤਿ ਏਵਂ ਸਞ੍ਞਿਤੇਸੁ. ‘‘ਲਗ੍ਗਨਵਸੇਨਾ’’ਤਿ ਅਮੁਞ੍ਚਿਤੁਕਾਮਤਾਵਸੇਨ. ਤੇਸ੍ਵੇਵ ਪਵਤ੍ਤਤੀਤਿ ਸਮ੍ਬਨ੍ਧੋ. ‘‘ਭਵਭੋਗ ਸਮ੍ਪਤ੍ਤਿਯੋ ਗੂਥਰਾਸਿਂ ਵਿਯ ਹੀਲ਼ੇਤ੍ਵਾ’’ਤਿ ਇਦਂ ਬੋਧਿਸਤ੍ਤਾਨਂ ਵਸੇਨ ਨਿਦਸ੍ਸਨ ਵਚਨਂ. ਤਤ੍ਥ ‘‘ਹੀਲ਼ੇਤ੍ਵਾ’’ਤਿ ਗਰਹਿਤ੍ਵਾ. ਨਿਕ੍ਖਮਨ੍ਤਿ ਏਤੇਨਾਤਿ ਨੇਕ੍ਖਮ੍ਮੋ. ਸੋ ਏਵ ਧਾਤੂਤਿ ਨੇਕ੍ਖਮ੍ਮਧਾਤੁ.

੧੦੨. ਅਯਂ ਨਯੋ ਦੋਸਪ੍ਪਟਿਪਕ੍ਖੋ, ਮੋਹਪ੍ਪਟਿਪਕ੍ਖੋਤਿਆਦੀਸੁਪਿ ਨੇਤਬ੍ਬੋ.

੧੦੩. ਤਤ੍ਰ ਮਜ੍ਝਤ੍ਤਤਾਯਂ. ‘‘ਲੀਨੁਦ੍ਧਚ੍ਚਾਨਂ’’ਤਿ ਚਿਤ੍ਤਸ੍ਸ ਲੀਨਤਾ ਏਕੋ ਵਿਸਮਪਕ੍ਖੋ. ਉਦ੍ਧਟਤਾ ਦੁਤੀਯੋ ਵਿਸਮਪਕ੍ਖੋ. ਲੀਨਂ ਚਿਤ੍ਤਂ ਕੋਸਜ੍ਜੇ ਵਿਸਮਪਕ੍ਖੇ ਪਤਤਿ. ਉਦ੍ਧਟਂ ਚਿਤ੍ਤਂ ਉਦ੍ਧਚ੍ਚੇ ਵਿਸਮਪਕ੍ਖੇ ਪਤਤਿ. ਤਦੁਭਯਮ੍ਪਿ ਅਕੁਸਲ ਪਕ੍ਖਿਕਂ ਹੋਤਿ. ਤਥਾ ਚਿਤ੍ਤਸ੍ਸ ਅਤਿ ਲੂਖਤਾ ਏਕੋ ਵਿਸਮ ਪਕ੍ਖੋ. ਅਤਿਪਹਟ੍ਠਤਾ ਏਕੋਤਿਆਦਿਨਾ ਸਬ੍ਬਂ ਬੋਜ੍ਝਙ੍ਗਵਿਧਾਨਂ ਵਿਤ੍ਥਾਰੇਤਬ੍ਬਂ. ਤਤ੍ਰ ਮਜ੍ਝਤ੍ਤਤਾ ਪਨ ਸਮ੍ਪਯੁਤ੍ਤ ਧਮ੍ਮੇ ਉਭੋਸੁ ਅਨ੍ਤੇਸੁ ਪਾਤੇਤੁਂ ਅਦਤ੍ਵਾ ਸਯਂ ਮਜ੍ਝਿਮਪ੍ਪਟਿਪਦਾਯਂ ਦਲ਼੍ਹਂ ਤਿਟ੍ਠਤਿ.

੧੦੪. ਪਸ੍ਸਦ੍ਧਾਦੀਸੁ. ‘‘ਤਤ੍ਥ ਤਂ ਵੀਨ੍ਦਨ੍ਤੀ’’ਤਿ ਤੇਸੁ ਪੁਞ੍ਞ ਕਮ੍ਮੇਸੁ ਤਂ ਚਿਤ੍ਤ ਸੁਖਂ ਪਟਿਲਭਨ੍ਤਿ.

੧੦੫. ਲਹੁਤਾ ਦ੍ਵਯੇ. ‘‘ਤਤ੍ਤਪਾਸਾਣੇ’’ਤਿ ਸਨ੍ਤਤ੍ਤੇ ਪਾਸਾਣਪਿਟ੍ਠੇ. ‘‘ਤਤ੍ਥਾ’’ਤਿ ਪੁਞ੍ਞਕਮ੍ਮੇਸੁ.

੧੦੬-੧੧੦. ਮੁਦੁਤਾ ਦ੍ਵਯਾਦੀਸੁ ਸਬ੍ਬਂ ਸੁਵਿਞ੍ਞੇਯ੍ਯਂ.

੧੧੧. ਵਿਰਤਿਤ੍ਤਯੇ. ‘‘ਕਥਾ, ਚੇਤਨਾ, ਵਿਰਤਿ, ਵਸੇਨਾ’’ਤਿ ‘ਕਥਾਸਮ੍ਮਾਵਾਚਾ, ਚੇਤਨਾ ਸਮ੍ਮਾਵਾਚਾ, ਵਿਰਤਿ ਸਮ੍ਮਾਵਾਚਾ, ਵਸੇਨ. ਤਂ ਕਥਾਵਾਚਂ ਸਮੁਟ੍ਠਾਪੇਤੀਤਿ ਤਂ ਸਮੁਟ੍ਠਾਪਿਕਾ. ਯਾ ਪਨ ਪਾਪ ਵਿਰਮਣਾਕਾਰੇਨ ਚਿਤ੍ਤਸ੍ਸ ਪਵਤ੍ਤੀਤਿ ਯੋਜਨਾ. ‘‘ਸਮਾਦਿਯਨ੍ਤਸ੍ਸ ਵਾ’’ਤਿ ਮੁਸਾਵਾਦਾ ਵਿਰਮਾਮੀਤਿਆਦਿਨਾ ਵਚੀਭੇਦਂ ਕਤ੍ਵਾ ਸਮਾਦਿਯਨ੍ਤਸ੍ਸ ਵਾ. ‘‘ਅਧਿਟ੍ਠਹਨ੍ਤਸ੍ਸ ਵਾ’’ਤਿ ਵਚੀਭੇਦਂ ਅਕਤ੍ਵਾ ਚਿਤ੍ਤੇਨੇਵ ਤਥਾ ਅਧਿਟ੍ਠਹਨ੍ਤਸ੍ਸ ਵਾ. ਇਮੇਹਿ ਦ੍ਵੀਹਿ ਪਦੇਹਿ ਸਮਾਦਾਨ ਵਿਰਤਿਪ੍ਪਵਤ੍ਤਿਂ ਵਦਤਿ. ‘‘ਅਵੀਤਿਕ੍ਕਮਨ੍ਤਸ੍ਸ ਵਾ’’ਤਿ ਏਤੇਨ ਸਮ੍ਪਤ੍ਤ ਵਿਰਤਿਪ੍ਪਵਤ੍ਤਿਂ ਵਦਤਿ. ‘‘ਏਤਾਯਾ’’ਤਿ ਸਮ੍ਮਾਵਾਚਾ ਵਿਰਤਿਯਾ. ਸਾ ਪਨ ਕਤ੍ਤੁਨਾ ਚ ਕ੍ਰਿਯਾਯ ਚ ਸਹਭਾਵਿਨੀ ਹੁਤ੍ਵਾ ਸਮਾਦਾਨ ਕ੍ਰਿਯਂ ਸੁਟ੍ਠੁਤਰਂ ਸਾਧੇਤਿ. ਤਸ੍ਮਾ ਸਾ ਕਰਣ ਸਾਧਨਂ ਨਾਮ ਹੋਤਿ. ਤੇਨਾਹ ‘‘ਕਰਣਤ੍ਥੇਵਾਕਰਣ ਵਚਨ’’ਨ੍ਤਿ. ਬਹੂਸੁਜਵਨਵਾਰੇਸੁ ਪਵਤ੍ਤਮਾਨੇਸੁ ਪੁਰਿਮ ਪੁਰਿਮ ਜਵਨਵਾਰਪਰਿਯਾਪਨ੍ਨਾ ਸਮ੍ਮਾਵਾਚਾ ਪਚ੍ਛਿਮ ਪਚ੍ਛਿਮ ਜਵਨਵਾਰਸਮੁਟ੍ਠਿਤਾਯ ਸਮਾਦਾਨ ਕ੍ਰਿਯਾਯ ਪਚ੍ਚਯੋ ਹੋਤਿ. ਸਾ ਪਨ ਤਾਯ ਕ੍ਰਿਯਾਯ ਅਸਹਭਾਵਿਤ੍ਤਾ ਕਰਣਲਕ੍ਖਣਂ ਨ ਸਮ੍ਪਜ੍ਜਤਿ. ਹੇਤੁ ਲਕ੍ਖਣੇ ਤਿਟ੍ਠਤਿ. ਤੇਨਾਹ ‘‘ਹੇਤੁ ਅਤ੍ਥੇਵਾ ਕਰਣਵਚਨ’’ਨ੍ਤਿ. ਇਦਞ੍ਚ ਅਤ੍ਥਤੋ ਲਬ੍ਭਮਾਨਤ੍ਤਾ ਵੁਤ੍ਤਂ. ਸਮ੍ਮਾਵਾਚਾਤਿ ਪਦਂ ਪਨ ਕਿਤਸਾਧਨ ਪਦਤ੍ਤਾਕਰਣਤ੍ਥੇ ਏਵਸਿਦ੍ਧਂ. ਨ ਹਿ ਅਕਾਰਕ ਭੂਤੋ ਹੇਤੁ ਅਤ੍ਥੋ ਸਾਧਨਂ ਨਾਮ ਸਮ੍ਭਵਤਿ. ‘‘ਸਮਾਦਾਨ ਵਚਨਾਨੀ’’ਤਿ ਸਮ੍ਮਾਵਾਚਾ ਸਮੁਟ੍ਠਿਤਾਨਿ ਸਮਾਦਾਨ ਵਚਨਾਨਿ. ‘‘ਤਤੋ’’ਤਿ ਤਤੋਪਰਂ. ‘‘ਤੇਸਂ’’ਤਿ ਤੇ ਸਂਵਦਮਾਨਾਨਂ. ਇਦਞ੍ਚ ਸਬ੍ਬਂ ਸਮ੍ਮਾਵਾਚਾਤਿ ਵਚਨੇ ਵਚੀਭੇਦਵਾਚਂ ਪਧਾਨਂ ਕਤ੍ਵਾ ਵੁਤ੍ਤਂ. ਸਮ੍ਪਤ੍ਤਵਿਰਤਿ ਸਮੁਚ੍ਛੇਦ ਵਿਰਤਿਭੂਤਾਯ ਪਨ ਸਮ੍ਮਾਵਾਚਾਯ ਵਚੀਭੇਦੇਨ ਕਿਚ੍ਚਂ ਨਤ੍ਥਿ. ਵਿਰਤਿ ਕਿਚ੍ਚ ਮੇਵਪਧਾਨਨ੍ਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ‘‘ਪਵਤ੍ਤਮਾਨਾ’’ਤਿ ਪਵਤ੍ਤਮਾਨਤ੍ਤਾ. ਵਿਸੇਸਨ ਹੇਤੁ ਪਦਮੇਤਂ.

੧੧੨-੧੧੩. ਸਮ੍ਮਾਕਮ੍ਮਨ੍ਤੇਪਿ ਸਮ੍ਮਾਆਜੀਵੇਪਿ ਵਤ੍ਤਬ੍ਬਂ ਨਤ੍ਥਿ.

੧੧੪. ‘‘ਸਮ੍ਪਤ੍ਤਂ ਵਤ੍ਥੁਂ’’ਤਿ ਪਾਣਾਤਿ ਪਾਤਾਦਿਕਮ੍ਮਸ੍ਸ ਵਤ੍ਥੁਂ. ਸਾਪਚ੍ਚੁਪ੍ਪਨ੍ਨਾਰਮ੍ਮਣਾਯੇਵ. ਕਸ੍ਮਾ, ਅਤ੍ਤਨੋ ਪਚ੍ਚਕ੍ਖੇ ਸਮ੍ਪਤ੍ਤ ਵਸੇਨਵਤ੍ਥੁਸ੍ਸਧਰਮਾਨਤ੍ਤਾ. ‘‘ਸਮਾਦਿਯਨ੍ਤਸ੍ਸ ਵਾ ਉਪ੍ਪਨ੍ਨਾ’’ਤਿ ਪਾਣਾਤਿ ਪਾਤਾਪਟਿਵਿਰਮਾਧੀਤਿਆਦਿਨਾ ਸਮਾਦਿਯਨ੍ਤਸ੍ਸਯਾ ਸਮਾਦਾਨਕ੍ਖਣੇ ਉਪ੍ਪਨ੍ਨਾ ਵਿਰਤਿ. ‘‘ਸਾ ਪਨ ਪਚ੍ਚੁਪ੍ਪਨ੍ਨਾਰਮ੍ਮਣਾ ਹੋਤੀ’’ਤਿ ਏਤ੍ਥ ਕਥਂ ਪਚ੍ਚੁਪ੍ਪਨ੍ਨਾ ਰਮ੍ਮਣਾ ਹੋਤੀਤਿ. ਪਾਣਾਤਿ ਪਾਤਾਪਟਿਵਿਰਮਾਧੀਤਿ ਵਦਨ੍ਤਸ੍ਸ ਚਿਤ੍ਤਂ ਅਨੁਕ੍ਕਮੇਨ ਪਾਣਸਦ੍ਦਾਦੀਨਂ ਅਤ੍ਥਂ ਆਰਮ੍ਮਣਂ ਕਤ੍ਵਾ ਪਵਤ੍ਤਤਿ. ਤਤ੍ਥ ‘‘ਪਾਣੋ’’ਤਿ ਵੋਹਾਰਤੋ ਸਤ੍ਤੋ. ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ. ਸੋ ਚ ਸਤ੍ਤੋ ਤਞ੍ਚਜੀਵਿਤਿਨ੍ਦ੍ਰਿਯਂ ਲੋਕੇ ਸਬ੍ਬਕਾਲਮ੍ਪਿ ਸਂਵਿਜ੍ਜਤਿਯੇਵ. ਏਵਰੂਪਂ ਜੀਵਿਤਿਨ੍ਦ੍ਰਿਯ ਸਾਮਞ੍ਞਂ ਸਨ੍ਧਾਯ ਪਚ੍ਚੁਪ੍ਪਨ੍ਨਾਰਮ੍ਮਣਾਤਿ ਵੁਤ੍ਤਂ. ਅਦਿਨ੍ਨਾਦਾਨਾ ਪਟਿਵਿਰਮਾਧੀਤਿਆਦੀਸੁਪਿ ਏਸੇਵ ਨਯੋ. ‘‘ਅਨਾਗਤਾ ਰਮ੍ਮਣਾਵਾ’’ਤਿ ਏਤ੍ਥ ਏਕਦਿਵਸਂ ਨਿਯਮੇਤ੍ਵਾ ਸਮਾਦਿਯਨ੍ਤਸ੍ਸ ਤਸ੍ਮਿਂ ਦਿਵਸੇ ਧਰਮਾਨ ਸਤ੍ਤਾਪਿ ਅਤ੍ਥਿ. ਉਪ੍ਪਜ੍ਜਿਸ੍ਸਮਾਨਸਤ੍ਤਾਪਿ ਅਤ੍ਥਿ. ਤਦੁਭਯਮ੍ਪਿ ਪਾਣਵਚਨੇ ਸਙ੍ਗਹਿਤਮੇਵ. ਪਾਣੁਪੇਤਂ ਕਤ੍ਵਾ ਸਮਾਦਿਯਨ੍ਤਸ੍ਸ ਵਤ੍ਤਬ੍ਬਮੇਵ ਨਤ੍ਥਿ. ਅਪਿ ਚ ਅਨਾਗਤਕਾਲਿਕਮ੍ਪਿ ਸਮਾਦਾਨਂ ਅਤ੍ਥਿਯੇਵ. ਅਹਂ ਅਸੁਕਦਿਵਸਤੋ ਪਟ੍ਠਾਯ ਯਾਵਜੀਵਮ੍ਪਿ ਪਾਣਾਤਿਪਾਤਾ ਵਿਰਮਾਧੀਤਿਆਦਿ. ਏਵਂ ਸਮਾਦਾਨ ਵਿਰਤਿ ਅਨਾਗਤਾ ਰਮ੍ਮਣਾਪਿ ਹੋਤੀਤਿ. ‘‘ਪਚ੍ਚਯਸਮੁਚ੍ਛੇਦਵਸੇਨਾ’’ਤਿ ਤਂ ਤਂ ਕਿਲੇਸਾਨੁਸਯ ਸਙ੍ਖਾਤਸ੍ਸ ਪਚ੍ਚਯਸ੍ਸ ਸਮੁਚ੍ਛੇਦਵਸੇਨ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

੧੧੫-੧੧੬. ਅਪ੍ਪਮਞ੍ਞਾਦ੍ਵਯੇ. ਅਪਿਚਾਤਿਆਦੀਸੁ. ‘‘ਕਲਿਸਮ੍ਭਵੇਭਵੇ’’ਤਿ ਦੁਕ੍ਖੁਪ੍ਪਤ੍ਤਿਪਚ੍ਚਯਭੂਤੇ ਸਂਸਾਰਭਵੇ. ‘‘ਪਾਪੇਕਲਿ ਪਰਾਜਯੇ’’ਤਿ ਕਲਿਸਦ੍ਦੋ ਪਾਪੇ ਚ ਪਰਾਜਯੇ ਚ ਵਤ੍ਤਤੀਤਿ ਅਤ੍ਥੋ. ਸਤ੍ਤੇਹਿ ਕਲਿਂ ਅਵਨ੍ਤਿ ਰਕ੍ਖਨ੍ਤਿ ਏਤਾਯਾਤਿ ਕਰੁਣਾ. ਸਤ੍ਤੇਹੀਤਿ ਚ ਰਕ੍ਖਣਤ੍ਥਯੋਗੇ ਇਚ੍ਛਿਤਸ੍ਮਿਂ ਅਤ੍ਥੇ ਅਪਾਦਾਨ ਵਚਨਂ. ਯਥਾ-ਕਾਕੇ ਰਕ੍ਖਨ੍ਤਿ ਤਣ੍ਡੁਲਾ-ਤਿ. ਸਤ੍ਤੇਵਾ ਕਲਿਤੋ ਅਵਨ੍ਤਿ ਰਕ੍ਖਨ੍ਤਿ ਏਤਾਯਾਤਿ ਕਰੁਣਾ. ਕਲਿਤੋਤਿ ਚ ਰਕ੍ਖਣਤ੍ਥ ਯੋਗੇ ਅਨਿਚ੍ਛਿਤਸ੍ਮਿਮ੍ਪਿ ਅਪਾਦਾਨਵਚਨਂ. ਯਥਾ-ਪਾਪਾਚਿਤ੍ਤਂ ਨਿਵਾਰਯੇਤਿ. ਏਕਸ੍ਮਿਂ ਸਤ੍ਤੇ ਪਵਤ੍ਤਾਪਿ ਅਪ੍ਪਮਞ੍ਞਾ ਏਵ ਨਾਮ ਹੋਨ੍ਤਿ. ਯਥਾ ਤਂ ਸਬ੍ਬਞ੍ਞੁਤਞ੍ਞਾਣਂ ਏਕਸ੍ਮਿਂ ਆਰਮ੍ਮਣੇ ਪਵਤ੍ਤਮ੍ਪਿ ਸਬ੍ਬਞ੍ਞੁਤਞ੍ਞਾਣਮੇਵ ਹੋਤੀਤਿ.

੧੧੭. ਪਞ੍ਞਿਨ੍ਦ੍ਰਿਯੇ ਵਤ੍ਤਬ੍ਬਂ ਨਤ੍ਥਿ.

ਸੋਭਣਰਾਸਿਮ੍ਹਿਅਨੁਦੀਪਨਾ ਨਿਟ੍ਠਿਤਾ.

੧੧੮. ਏਤਂ ਪਰਿਮਾਣਂ ਅਸ੍ਸਾਤਿ ਏਤ੍ਤਾਵਂ. ‘‘ਏਤ੍ਤਾਵਤਾ’’ਤਿ ਏਤ੍ਤਾਵਨ੍ਤੇਨ-ਫਸ੍ਸੋ, ਵੇਦਨਾ, ਸਞ੍ਞਾ,ਤਿਆਦਿਵਚਨਕ੍ਕਮੇਨ. ‘‘ਚਿਤ੍ਤੁਪ੍ਪਾਦੇਸੂ’’ਤਿ ਏਤ੍ਥ-ਕਤਮੇ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਾ. ਚਤ੍ਤਾਰੋ ਦਿਟ੍ਠਿਗਤਸਮ੍ਪਯੁਤ੍ਤ ਚਿਤ੍ਤੁਪ੍ਪਾਦਾ-ਤਿਆਦੀਸੁ ਚਿਤ੍ਤਚੇਤਸਿਕ ਸਮੂਹੋ ਚਿਤ੍ਤੁਪ੍ਪਾਦੋਤਿ ਵੁਚ੍ਚਤਿ. ਇਧ ਪਨ ਚਿਤ੍ਤਾਨਿ ਏਵ ਚਿਤ੍ਤੁਪ੍ਪਾਦਾਤਿ ਵੁਚ੍ਚਨ੍ਤੀਤਿ ਆਹ ‘‘ਚਿਤ੍ਤੁਪ੍ਪਾਦੇਸੂਤਿ ਚਿਤ੍ਤੇਸੁ ਇਚ੍ਚੇਵ ਅਤ੍ਥੋ’’ਤਿ. ‘‘ਸਬ੍ਬਦੁਬ੍ਬਲਤ੍ਤਾ’’ਤਿ ਸਬ੍ਬਚਿਤ੍ਤੇਹਿ ਦੁਬ੍ਬਲਤਰਤ੍ਤਾ. ‘‘ਭਾਵਨਾ ਬਲੇਨਾ’’ਤਿ ਵਿਤਕ੍ਕ ਵਿਰਾਗਸਤ੍ਤਿ ਯੁਤ੍ਤੇਨ ਉਪਚਾਰ ਭਾਵਨਾ ਬਲੇਨ, ਵੁਟ੍ਠਾਨ ਗਾਮਿਨਿ ਵਿਪਸ੍ਸਨਾ ਭਾਵਨਾ ਬਲੇਨ ਚ. ‘‘ਬਲਨਾਯਕਤ੍ਤਾ’’ਤਿ ਬਲ ਧਮ੍ਮਾਨਂ ਨਾਯਕਤ੍ਤਾ, ਜੇਟ੍ਠਕਤ੍ਤਾ.

੧੧੯. ਅਕੁਸਲ ਚੇਤਸਿਕੇਸੁ. ‘‘ਪਚ੍ਛਿਮਂ’’ਤਿ ਸਬ੍ਬੇਸੁਪਿ ਦ੍ਵਾਦਸਾ ਕੁਸਲ ਚਿਤ੍ਤੇਸੂਤਿ ਵਚਨਂ. ‘‘ਪੁਰਿਮਸ੍ਸਾ’’ਤਿ ਸਬ੍ਬਾ ਕੁਸਲ ਸਾਧਾਰਣਾ ਨਾਮਾਤਿ ਵਚਨਸ੍ਸ. ‘‘ਸਮਤ੍ਤਨ ਵਚਨਂ’’ਤਿ-ਕਸ੍ਮਾ ਸਬ੍ਬਾਕੁਸਲ ਸਾਧਾਰਣਾ ਨਾਮਾਤਿ. ਯਸ੍ਮਾ ਸਬ੍ਬੇਸੁਪਿ. ਲ. ਚਿਤ੍ਤੇਸੁ ਲਬ੍ਭਨ੍ਤਿ, ਤਸ੍ਮਾ ਸਬ੍ਬਾ ਕੁਸਲ ਸਾਧਾਰਣਾ ਨਾਮਾ-ਤਿ ਏਵਂ ਸਾਧਨ ਵਚਨਂ. ਯਸ੍ਮਾ ਪਨ ਇਮੇਹਿ ਚਤੂਹਿ ਵਿਨਾਨੁਪ੍ਪਜ੍ਜਨ੍ਤਿ, ਤਸ੍ਮਾ ਤੇ ਸਬ੍ਬੇਸੁ ਤੇਸੁ ਲਬ੍ਭਨ੍ਤੀਤਿ ਯੋਜਨਾ. ਕਸ੍ਮਾ ਵਿਨਾ ਨੁਪ੍ਪਜ੍ਜਨ੍ਤੀਤਿ ਆਹ ‘‘ਨ ਹਿਤਾਨੀ’’ਤਿਆਦਿਂ. ‘‘ਤੇਹੀ’’ਤਿ ਪਾਪੇਹਿ. ਸਬ੍ਬ ਪਾਪ ਧਮ੍ਮਤੋਤਿ ਅਤ੍ਥੋ. ‘‘ਤਥਾ ਤਥਾ ਆਮਸਿਤ੍ਵਾ’’ਤਿ ਦਿਟ੍ਠਿ ਖਨ੍ਧੇਸੁ ਨਿਚ੍ਚੋ ਧੁਵੋ ਸਸ੍ਸਤੋਤਿਆਦਿਨਾ ਆਮਸਤਿ. ਮਾਨੋ ਅਹਨ੍ਤਿ ਵਾ ਸੇਯ੍ਯੋ ਸਦਿਸੋਤਿਆਦਿਨਾ ਵਾ ਆਮਸਤਿ. ਏਵਂ ਤਥਾ ਤਥਾ ਆਮਸਿਤ੍ਵਾ. ‘‘ਤੇਸੂ’’ਤਿ ਦਿਟ੍ਠਿਮਾਨੇਸੁ. ਨਿਦ੍ਧਾਰਣੇ ਭੁਮ੍ਮਂ. ਦਿਟ੍ਠਿ ਪਰਾਮਸਨ੍ਤੀ ਪਵਤ੍ਤਤੀਤਿ ਯੋਜਨਾ. ‘‘ਤਂ ਗਹਿਤਾਕਾਰ’’ਨ੍ਤਿ ਤਂ ਅਹਨ੍ਤਿ ਗਹਿਤਂ ਨਿਮਿਤ੍ਤਾਕਾਰਂ. ਸਕ੍ਕਾਯ ਦਿਟ੍ਠਿ ਏਵ ਗਤਿ ਯੇਸਂ ਤੇ ਦਿਟ੍ਠਿ ਗਤਿਕਾ. ਅਵਿਕ੍ਖਮ੍ਭਿਤ ਸਕ੍ਕਾਯ ਦਿਟ੍ਠਿਕਾ. ‘‘ਅਹਨ੍ਤਿ ਗਣ੍ਹਨ੍ਤੀ’’ਤਿ ਮਾਨੇਨ ਗਣ੍ਹਨ੍ਤਿ. ‘‘ਨ ਹਿ ਮਾਨਸ੍ਸ ਵਿਯਾ’’ਤਿ ਯਥਾ ਮਾਨਸ੍ਸ ਅਤ੍ਤਸਮ੍ਪਗ੍ਗਹਣੇ ਬ੍ਯਾਪਾਰੋ ਅਤ੍ਥਿ, ਨ ਤਥਾ ਦਿਟ੍ਠਿਯਾ ਅਤ੍ਤਸਮ੍ਪਗ੍ਗਹਣੇ ਬ੍ਯਾਪਾਰੋ ਅਤ੍ਥੀਤਿ ਯੋਜਨਾ. ਏਤ੍ਥ ਚ ਅਤ੍ਤਸਮ੍ਪਗ੍ਗਹਣਂ ਨਾਮ ਪਰੇਹਿ ਸਦ੍ਧਿਂ ਅਤ੍ਤਾਨਂ ਸੇਯ੍ਯਾਦਿਵਸੇਨ ਸੁਟ੍ਠੁਪਗ੍ਗਹਣਂ. ‘‘ਨ ਚ ਦਿਟ੍ਠਿਯਾ ਵਿਯਾ’’ਤਿ ਯਥਾ ਦਿਟ੍ਠਿਯਾ ਧਮ੍ਮਾਨਂ ਅਯਾਥਾਵਪਕ੍ਖਪਰਿਕਪ੍ਪਨੇ ਬ੍ਯਾਪਾਰੋ ਅਤ੍ਥੀਤਿ ਯੋਜਨਾ. ਤਤ੍ਥ ਅਯਾਥਾਵਪਕ੍ਖੋ ਨਾਮ ਅਤ੍ਤਾ ਸਸ੍ਸਤੋ ਉਚ੍ਛਿਨ੍ਨੋਤਿਆਦਿ. ਮਚ੍ਛਰਿਯਂ ਅਤ੍ਤਸਮ੍ਪਤ੍ਤੀਸੁ ਲਗ੍ਗਨਲੋਭਸਮੁਟ੍ਠਿਤਤ੍ਤਾ ਲੋਭਸਮ੍ਪਯੁਤ੍ਤਮੇਵ ਸਿਯਾਤਿ ਚੋਦਨਂ ਪਰਿਹਰਨ੍ਤੋ ‘‘ਮਚ੍ਛਰਿਯਂ ਪਨਾ’’ਤਿਆਦਿਮਾਹ. ਤਤ੍ਥ ‘‘ਤਾਸਂ’’ਤਿ ਅਤ੍ਤਸਮ੍ਪਤ੍ਤੀਨਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

੧੨੦. ਸੋਭਣਚੇਤਸਿਕੇਸੁ. ‘‘ਤੀਸੁ ਖਨ੍ਧੇਸੁ’’ਤਿ ਸੀਲਕ੍ਖਨ੍ਧ ਸਮਾਧਿਕ੍ਖਨ੍ਧ ਪਞ੍ਞਾਕ੍ਖਨ੍ਧੇਸੁ ਚ. ‘‘ਸਮ੍ਮਾਦਿਟ੍ਠਿ ਪਚ੍ਛਿਮਕੋ’’ਤਿ ਸਮ੍ਮਾਦਿਟ੍ਠਿਯਾ ਪਚ੍ਛਤੋ ਅਨੁਬਨ੍ਧਕੋਤਿ ਅਤ੍ਥੋ. ਸਮ੍ਮਾਦਿਟ੍ਠਿਯਾ ਪਰਿਵਾ ਰਮਤ੍ਤੋਤਿ ਵੁਤ੍ਤਂ ਹੋਤਿ. ‘‘ਤਸ੍ਮਿਂ ਅਸਤਿ ਪੀ’’ਤਿ ਦੁਤੀਯਜ੍ਝਾਨਿਕ ਮਗ੍ਗਾਦੀਸੁ ਤਸ੍ਮਿਂ ਸਮ੍ਮਾਸਙ੍ਕਪ੍ਪੇ ਅਸਨ੍ਤੇਪਿ. ‘‘ਸੀਲਸਮਾਧਿਕ੍ਖਨ੍ਧ ਧਮ੍ਮੇਸੁ ਪਨਾ’’ਤਿ ‘ਸਮ੍ਮਾਵਾਚਾ, ਸਮ੍ਮਾਕਮ੍ਮਨ੍ਤੋ, ਸਮ੍ਮਾਆਜੀਵੋ,ਤਿ ਇਮੇ ਤਯੋ ਧਮ੍ਮਾ ਸੀਲਕ੍ਖਨ੍ਧ ਧਮ੍ਮਾ ਨਾਮ. ਸਮ੍ਮਾ ਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧੀ,ਤਿ ਇਮੇ ਤਯੋ ਧਮ੍ਮਾ ਸਮਾਧਿਕ੍ਖਨ੍ਧਾ ਨਾਮ. ਇਮੇਸੁ ਸੀਲਕ੍ਖਨ੍ਧ ਸਮਾਧਿਕ੍ਖਨ੍ਧੇਸੁ. ‘‘ਏਕੋ ਏਕਸ੍ਸ ਕਿਚ੍ਚਂ ਨ ਸਾਧੇਤੀ’’ਤਿ ਤੇਸੁ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤਸ੍ਸ ਕਿਚ੍ਚਂ ਨ ਸਾਧੇਤਿ. ਸਮ੍ਮਾ ਆਜੀਵਸ੍ਸ ਕਿਚ੍ਚਂ ਨ ਸਾਧੇਤਿ. ਸਮ੍ਮਾਕਮ੍ਮਨ੍ਤੋ ਚ ਸਮ੍ਮਾਵਾਚਾਯ ਕਿਚ੍ਚਂ ਨ ਸਾਧੇਤੀਤਿਆਦਿਨਾ ਸਬ੍ਬਂ ਵਤ੍ਤਬ੍ਬਂ. ‘‘ਸੀਲੇਸੁ ਪਰਿਪੂਰਕਾਰਿਤਾ ਵਸੇਨਾ’’ਤਿ ਸੀਲਪ੍ਪਟਿਪਕ੍ਖ ਧਮ੍ਮਾਨਂ ਸਮੁਚ੍ਛਿਨ੍ਦਕਾਰਿਤਾ ਵਸੇਨਾਤਿ ਅਧਿਪ੍ਪਾਯੋ. ਮੁਸਾਵਾਦ ਵਿਰਤਿ ਮੁਸਾਵਾਦਮੇਵ ਪਜਹਿਤੁਂ ਸਕ੍ਕੋਤਿ. ਨ ਇਤਰਾਨਿ ਪਿਸੁਣਵਾਚਾਦੀਨੀਤਿ ਯੋਜਨਾ. ਏਤ੍ਥ ਸਿਯਾ. ਮੁਸਾਵਾਦਵਿਰਤਿ ਨਾਮ ਕੁਸਲ ਧਮ੍ਮੋ ਹੋਤਿ. ਕੁਸਲ ਧਮ੍ਮੋ ਚ ਨਾਮ ਸਬ੍ਬਸ੍ਸ ਅਕੁਸਲ ਧਮ੍ਮਸ੍ਸ ਪਟਿਪਕ੍ਖੋ. ਏਕਸ੍ਮਿਮ੍ਪਿ ਕੁਸਲ ਧਮ੍ਮੇ ਉਪ੍ਪਜ੍ਜਮਾਨੇ ਤਸ੍ਮਿਂ ਸਨ੍ਤਾਨੇ ਸਬ੍ਬਾਨਿ ਅਕੁਸਲਾਨਿ ਪਜਹਿਤੁਂ ਸਕ੍ਕੋਨ੍ਤੀਤਿ ਵਤ੍ਤਬ੍ਬਾਨਿ. ਅਥ ਚ ਪਨ ਮੁਸਾਵਾਦ ਵਿਰਤਿ ਮੁਸਾਵਾਦਮੇਵ ਪਜਹਿਤੁਂ ਸਕ੍ਕੋਤਿ, ਨ ਇਤਰਾਨੀਤਿ ਵੁਤ੍ਤਂ. ਕਥਮਿਦਂ ਦਟ੍ਠਬ੍ਬਨ੍ਤਿ. ਵੁਚ੍ਚਤੇ. ਪਜਹਿਤੁਂ ਸਕ੍ਕੋਤੀਤਿ ਇਦਂ ਪਞ੍ਚਸੁ ਪਹਾਨੇਸੁ ਤਦਙ੍ਗਪ੍ਪਹਾਨ ਵਚਨਂ. ਤਦਙ੍ਗਪ੍ਪਹਾਨਨ੍ਤਿ ਚ ਤੇਨ ਤੇਨ ਕੁਸਲਙ੍ਗੇਨ ਤਸ੍ਸ ਤਸ੍ਸ ਅਕੁਸਲਙ੍ਗਸ੍ਸ ਪਹਾਨਂ ਤਦਙ੍ਗਪ੍ਪਹਾਨਂ ਨਾਮ. ਇਦਂ ਵੁਤ੍ਤਂ ਹੋਤਿ, ਇਧ ਸਪ੍ਪੁਰਿਸੋ ਪਾਣਾਤਿਪਾਤਾ ਪਟਿਵਿਰਮਾਮੀਤਿਆਦਿਨਾ ਵਿਸੁਂ ਵਿਸੁਂ ਸਿਕ੍ਖਾਪਦਾਨਿ ਸਮਾਦਿਯਿਤ੍ਵਾ ਪਾਣਾਤਿ ਪਾਤਵਿਰਤਿ ਸਙ੍ਖਾਤੇਨ ਕੁਸਲਙ੍ਗੇਨ ਪਾਣਾਤਿਪਾਤ ਸਙ੍ਖਾਤਂ ਅਕੁਸਲਙ੍ਗਂ ਪਜਹਤਿ. ਅਦਿਨ੍ਨਾਦਾਨ ਵਿਰਤਿ ਸਙ੍ਖਾਤੇਨ ਕੁਸਲਙ੍ਗੇਨ ਅਦਿਨ੍ਨਾਦਾਨ ਸਙ੍ਖਾਤਂ ਅਕੁਸਲਙ੍ਗਂ ਪਜਹਤੀਤਿਆਦਿਨਾ ਵਿਤ੍ਥਾਰੇਤਬ੍ਬਂ. ਏਕਸ੍ਮਿਮ੍ਪਿ ਕੁਸਲ ਧਮ੍ਮੇ ਉਪ੍ਪਜ੍ਜਮਾਨੇ ਤਸ੍ਮਿਂ ਸਨ੍ਤਾਨੇ ਸਬ੍ਬਾਨਿ ਅਕੁਸਲਾਨਿ ਨ ਉਪ੍ਪਜ੍ਜਨ੍ਤੀਤਿ ਏਤ੍ਥ ਪਨ ਅਨੋਕਾਸਤ੍ਤਾ ਏਵ ਨ ਉਪ੍ਪਜ੍ਜਨ੍ਤਿ, ਨ ਪਹਾਨਤ੍ਤਾ. ਨ ਹਿ ਤਸ੍ਮਿਂ ਸਨ੍ਤਾਨੇ ਤਸ੍ਮਿਂ ਖਣੇ ਤਾਨਿ ਅਕੁਸਲਾਨਿ ਏਵ ਨ ਉਪ੍ਪਜ੍ਜਨ੍ਤਿ. ਅਥਖੋ ਸਬ੍ਬਾਨਿ ਅਞ੍ਞਾਨਿ ਕੁਸਲ ਚਿਤ੍ਤਾਨਿ ਚ ਨ ਉਪ੍ਪਜ੍ਜਨ੍ਤਿ. ਸਬ੍ਬਾਨਿ ਅਬ੍ਯਾਕਤ ਚਿਤ੍ਤਾਨਿ ਚ ਨ ਉਪ੍ਪਜ੍ਜਨ੍ਤਿ. ਤਾਨਿ ਅਨੋਕਾ ਸਤ੍ਤਾ ਏਵ ਨ ਉਪ੍ਪਜ੍ਜਨ੍ਤਿ. ਨ ਪਹਾਨਤ੍ਤਾ ਨ ਉਪ੍ਪਜ੍ਜਨ੍ਤਿ. ਤਦਙ੍ਗਪ੍ਪਹਾਨਾਦਿ ਵਸੇਨ ਪਨ ਪਹਾਨਂ ਸਨ੍ਧਾਯ ਇਧ ਪਜਹਿਤੁਂ ਸਕ੍ਕੋਤਿ-ਨ ਸਕ੍ਕੋਤੀਤਿ ਵੁਤ੍ਤਂ. ਏਤ੍ਤਾਵਤਾ ਤਦਙ੍ਗਪ੍ਪਹਾਨਂ ਨਾਮ ਸੁਪਾਕਟਂ ਹੋਤਿ. ਮੁਸਾਵਾਦ ਵਿਰਤਿ ਮੁਸਾਵਾਦਮੇਵ ਪਜਹਿਤੁਂ ਸਕ੍ਕੋਤਿ. ਨ ਇਤਰਾਨੀਤਿ ਇਦਞ੍ਚ ਸੁਟ੍ਠੁ ਉਪਪਨ੍ਨਂ ਹੋਤੀਤਿ. ‘‘ਏਤ੍ਥ ਚਾ’’ਤਿਆਦੀਸੁ ਕਾਯਙ੍ਗਚੋਪਨਤ੍ਥਾਯ ਵਾਚਙ੍ਗਚੋਪਨਤ੍ਥਾਯ ਚ ਪਵਤ੍ਤਾਨਿ ਕਾਯਵਚੀਚੋ ਪਨ ਭਾਗਿਯਾਨਿ ਨਾਮ. ਕਾਮਾਵਚਰ ਕੁਸਲੇਸ੍ਵੇਵ ਵਿਰਤਿਯੋ ਸਨ੍ਦਿਸ੍ਸਨ੍ਤਿ. ‘‘ਕਾਮਾਵਚਰ ਕੁਸਲੇਸੁ ਪੀ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ. ਕਾਮਭੂਮਿਯਂ ਉਪ੍ਪਨ੍ਨੇਸੁ ਏਵ ਕਾਮਾਵਚਰ ਕੁਸਲੇਸੁ ਸਨ੍ਦਿਸ੍ਸਨ੍ਤਿ. ਤਿਵਿਧ ਕੁਹਨਵਤ੍ਥੂਨਿ ਚ ਵਿਰਮਿਤਬ੍ਬਵਤ੍ਥੁਟ੍ਠਾਨੇਠਿਤਾਨਿ. ਏਤ੍ਥ ਚ ਕੁਹਨਂ ਨਾਮ ਵਿਮ੍ਹਾਪਨਂ ਲਾਭਸਕ੍ਕਾਰ ਸਿਲੋਕਤ੍ਥਾਯ ਮਨੁਸ੍ਸਾਨਂ ਨਾਨਾਮਾਯਾਸਾਠੇਯ੍ਯ ਕਮ੍ਮਾਨਿ ਕਤ੍ਵਾ ਅਚ੍ਛਰਿਯਬ੍ਭੁਤ ਭਾਵਕਰਣਨ੍ਤਿ ਵੁਤ੍ਤਂ ਹੋਤਿ. ਤਂ ਪਨ ਤਿਵਿਧਂ ‘ਪਚ੍ਚਯਪ੍ਪਟਿਸੇਵਨਕੁਹਨਞ੍ਚ, ਸਾਮਨ੍ਤਜਪ੍ਪਨ ਕੁਹਨਞ੍ਚ, ਇਰਿਯਾ ਪਥਸਣ੍ਠਾ ਪਨ ਕੁਹਨਞ੍ਚ. ਤਤ੍ਥ ਮਹਿਚ੍ਛੋਯੇਵ ਸਮਾਨੋ ਅਪ੍ਪਿਚ੍ਛਾਕਾਰਂ ਦਸ੍ਸੇਤ੍ਵਾ ਆਦਿਤੋ ਆਗਤਾ ਗਤੇ ਚਤੁਪਚ੍ਚਯੇ ਪਟਿਕ੍ਖਿਪਿਤ੍ਵਾ ਪਚ੍ਛਾ ਬਹੁਂ ਬਹੁਂ ਆਗਤੇ ਪਚ੍ਚਯੇ ਪਟਿਗ੍ਗਣ੍ਹਾਤਿ. ਇਦਂ ਪਚ੍ਚਯਪ੍ਪਟਿਸੇਵਨ ਕੁਹਨਂ ਨਾਮ. ਪਾਪਿਚ੍ਛੋਯੇਵ ਸਮਾਨੋ ਅਯਂ ਝਾਨਲਾਭੀਤਿ ਵਾ ਅਭਿਞ੍ਞਾਲਾਭੀਤਿ ਵਾ ਅਰਹਾਤਿ ਵਾ ਜਨੋ ਮਂ ਸਮ੍ਭਾਵੇਤੂਤਿ ਸਮ੍ਭਾਵਨਂ ਇਚ੍ਛਨ੍ਤੋ ਅਤ੍ਤਾਨਂ ਉਤ੍ਤਰਿ ਮਨੁਸ੍ਸ ਧਮ੍ਮਾਨਂ ਸਨ੍ਤਿਕੇ ਤੇ ਵਾ ਅਤ੍ਤਨੋ ਸਨ੍ਤਿਕੇ ਕਤ੍ਵਾ ਵਞ੍ਚੇਤਿ. ਇਦਂ ਸਾਮਨ੍ਤਜਪ੍ਪਨ ਕੁਹਨਂ ਨਾਮ. ਪਾਪਿਚ੍ਛੋਯੇਵ ਸਮਾਨੋ ਅਯਂ ਸਨ੍ਤਵੁਤ੍ਤਿ ਸਮਾਹਿਤੋ ਆਰਦ੍ਧਵੀਰਿਯੋਤਿ ਜਨੋ ਮਂ ਸਮ੍ਭਾਵੇਤੂਤਿ ਸਮ੍ਭਾਵਨਂ ਇਚ੍ਛਨ੍ਤੋ ਇਰਿਯਾ ਪਥ ਨਿਸ੍ਸਿਤਂ ਨਾਨਾਵਞ੍ਚਨਂ ਕਰੋਤਿ. ਇਦਂ ਇਰਿਯਾ ਪਥ ਸਣ੍ਠਾਪਨ ਕੁਹਨਂ ਨਾਮ. ‘‘ਸਿਕ੍ਖਾਪਦਸ੍ਸ ਵਤ੍ਥੂਨੀ’’ਤਿ ਸੁਰਾ ਪਾਨ ਵਿਕਾਲ ਭੋਜਨ ਨਚ੍ਚਗੀਤਵਾਦਿਤ ਦਸ੍ਸਨ ਸਵਨਾਦੀਨਿ. ਸੁਰਾਮੇਰਯਪਾਨਾ ਵਿਰਮਾਧੀਤਿ ਸਮਾਦਿਯਨ੍ਤਸ੍ਸ ਸੁਰਾਮੇਰਯਪਾਨ ਚੇਤਨਾ ਵਿਰਮਿਤਬ੍ਬ ਵਤ੍ਥੁ ਨਾਮ. ਵਿਕਾਲ ਭੋਜਨਾ ਵਿਰਮਾਮੀਤਿ ਸਮਾਦਿਯਨ੍ਤਸ੍ਸ ਵਿਕਾਲੇ ਯਾਵਕਾਲਿਕ ਵਤ੍ਥੁਸ੍ਸ ਪਰਿਭੁਞ੍ਜਨ ਚੇਤਨਾ ਵਿਰਮਿਤਬ੍ਬ ਵਤ੍ਥੁ ਨਾਮ. ਸੇਸੇਸੁਪਿ ਏਸੇਵ ਨਯੋ. ਲੋਕੁਤ੍ਤਰ ਚਿਤ੍ਤੇਸੁ. ‘ਸਬ੍ਬਥਾਪੀ,ਤਿ ਚ ‘ਨਿਯਤਾ’ਤਿ ਚ ‘ਏਕਤੋ ਵਾ’ਤਿ ਚ ਤੀਣਿ ਵਿਸੇਸਨਾਨਿ. ਲੋਕਿਯੇਸੁ ਪਨ ‘ਕਦਾਚੀ’ਤਿ ਚ ‘ਵਿਸੁਂ ਵਿਸੁਂ’ਤਿ ਚ ਦ੍ਵੇ ਦ੍ਵੇ ਵਿਸੇਸਨਾਨਿ. ਤਤ੍ਥ ਲੋਕੁਤ੍ਤਰੇਸੁ ‘ਸਬ੍ਬਥਾਪੀ’ਤਿ ਇਦਂ ਸਮੁਚ੍ਛੇਦਪ੍ਪਹਾਨ ਦਸ੍ਸਨਂ ਲੋਕਿਯੇਸੁਪਿ ਤਬ੍ਬਿਪਰੀਤਂ ਤਦਙ੍ਗਪ੍ਪਹਾਨ ਦਸ੍ਸਨਂ ਅਧਿਪ੍ਪੇਤਨ੍ਤਿ ਕਤ੍ਵਾ ‘‘ਏਕੇਕ ਦੁਚ੍ਚਰਿਤਪ੍ਪਹਾਨਵਸੇਨੇ ਵਾ’’ਤਿ ਵੁਤ੍ਤਂ.

੧੨੧. ਅਪ੍ਪਮਞ੍ਞਾਸੁ. ‘‘ਵਿਭਙ੍ਗੇ’’ਤਿ ਅਪ੍ਪਮਞ੍ਞਾ ਵਿਭਙ੍ਗੇ. ‘‘ਕਾਰੁਞ੍ਞਪ੍ਪਕਤਿਕਸ੍ਸਾ’’ਤਿ ਕਾਰੁਞ੍ਞਸਭਾਵਸ੍ਸ. ‘‘ਅਨਿਸ੍ਸੁਕਿਨੋ’’ਤਿ ਇਸ੍ਸਾਧਮ੍ਮਰਹਿਤਸ੍ਸ. ਥਾਮਗਤਾ ਕਰੁਣਾ ਦੋਸ ਸਮੁਟ੍ਠਿਤਂ ਵਿਹਿਂਸਂ ਪਜਹਤਿ. ਥਾਮਗਤਾ ਮੁਦਿਤਾ ਦੋਸਸਮੁਟ੍ਠਿਤਂ ਅਰਤਿਂ ਪਜਹਤੀਤਿ ਵੁਤ੍ਤਂ ‘‘ਵਿਹਿਂਸਾ ਅਰਤੀਨਂ ਨਿਸ੍ਸਰਣ ਭੂਤਾ’’ਤਿ. ਏਤ੍ਥ ਚ ਅਰਤਿ ਨਾਮ ਸੁਞ੍ਞਾਗਾਰੇਸੁ ਚ ਭਾਵਨਾ ਕਮ੍ਮੇਸੁ ਚ ਨਿਬ੍ਬਿਦਾ. ਦੋਸ ਨਿਸ੍ਸਰਣੇ ਸਤਿ ਦੋਮਨਸ੍ਸਨਿਸ੍ਸਰਣਮ੍ਪਿ ਸਿਦ੍ਧਮੇਵ. ਨਿਸ੍ਸਰਣਞ੍ਚ ਨਾਮ ਪਟਿਪਕ੍ਖ ਧਮ੍ਮ ਸਣ੍ਠਾਨੇਨ ਹੋਤਿ. ਤਸ੍ਮਾ ਪੁਬ੍ਬਭਾਗੇਪਿ ਅਪ੍ਪਮਞ੍ਞਾਸੁ ਨਿਚ੍ਚਂ ਸੋਮਨਸ੍ਸ ਸਣ੍ਠਾਨਂ ਵੇਦਿਤਬ੍ਬਨ੍ਤਿ ਅਧਿਪ੍ਪਾਯੇਨ ‘‘ਦੋਮਨਸ੍ਸਪ੍ਪਟਿਪਕ੍ਖਞ੍ਚਾ’’ਤਿਆਦਿਮਾਹ. ‘‘ਅਟ੍ਠਕਥਾਯਪਿ ਸਹ ਵਿਰੁਦ੍ਧੋ’’ਤਿ ਅਟ੍ਠਸਾਲਿਨਿਯਂ ਉਪੇਕ੍ਖਾ ਸਹਗਤ ਕਾਮਾਵਚਰ ਕੁਸਲ ਚਿਤ੍ਤੇਸੁ ਕਰੁਣਾ ਮੁਦਿਤਾ ਪਰਿਕਮ੍ਮਕਾਲੇਪਿ ਹਿ ਇਮੇਸਂ ਉਪ੍ਪਤ੍ਤਿ ਮਹਾਅਟ੍ਠਕਥਾਯਂ ਅਨੁਞ੍ਞਾਤਾ ਏਵਾ-ਤਿ ਵੁਤ੍ਤਂ. ਤਾਯ ਅਟ੍ਠਕਥਾਯਪਿ ਸਹ ਵਿਰੁਦ੍ਧੋ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ‘‘ਪਟਿਕੂਲਾ ਰਮ੍ਮਣੇਸੁ ਪਨ…ਪੇ… ਵਤ੍ਤਬ੍ਬਮੇਵ ਨਤ੍ਥੀ’’ਤਿ ਪਟਿਕੂਲਾ ਰਮ੍ਮਣਾਨਿ ਨਾਮ ਸੋਮਨਸ੍ਸੇਨ ਦੂਰੇ ਹੋਨ੍ਤਿ, ਤਥਾ ਦੁਕ੍ਖਿਤ ਸਤ੍ਤਾ ਚ, ਤਸ੍ਮਾ ਤਦਾ ਰਮ੍ਮਣਾਨਿ ਅਸੁਭ ਭਾਵਨਾ ਚਿਤ੍ਤਾਨਿ ਚ ਕਰੁਣਾ ਭਾਵਨਾ ਚਿਤ੍ਤਾਨਿ ਚ ਆਦਿਤੋ ਉਪੇਕ੍ਖਾ ਸਹਗਤਾ ਨੇਵਾਤਿ ਵਤ੍ਤਬ੍ਬਮੇਵ ਨਤ੍ਥਿ. ‘‘ਸਾਹਿਵੇਦਨੁਪੇਕ੍ਖਾ ਨਾਮਾ’’ਤਿ ਕਾਮਾਵਚਰ ਵੇਦਨੁਪੇਕ੍ਖਾ ਵੁਤ੍ਤਾ. ਵਿਭਾਵਨਿਪਾਠੇ, ‘‘ਅਞ੍ਞਵਿਹਿਤਸ੍ਸ ਪੀ’’ਤਿ ਅਞ੍ਞਂ ਆਰਮ੍ਮਣਂ ਮਨਸਿਕਰੋਨ੍ਤਸ੍ਸਪਿ. ਸਜ੍ਝਾਯਨਂ ਸਮ੍ਪਜ੍ਜਤਿ, ਸਮ੍ਮਸਨਂ ਸਮ੍ਪਜ੍ਜਤੀਤਿ ਪਾਠਸੇਸੋ. ਇਤਿ ਤਸ੍ਮਾ. ਏਤ੍ਥ ਸਿਯਾ ‘‘ਤਂ ਪਟਿਕ੍ਖਿਤ੍ਤਂ ਹੋਤੀ’’ਤਿ ਕਸ੍ਮਾ ਵੁਤ੍ਤਂ. ਨ ਨੁ ਤਮ੍ਪਿ ਉਪੇਕ੍ਖਾ ਸਹਗਤ ਚਿਤ੍ਤੇਸੁ ਕਰੁਣਾ ਮੁਦਿਤਾਨਂ ਸਮ੍ਭਵਂ ਸਾਧੇਤਿ ਯੇਵਾਤਿ. ਸਚ੍ਚਂ ਸਾਧੇਤਿਯੇਵ. ਤੇਨ ਪਨ ਪਰਿਚਯ ਵਸੇਨ ਤੇਸੁ ਤਾਸਂ ਸਮ੍ਭਵਂ ਦੀਪੇਤਿ. ਇਧ ਪਨ ‘‘ਏਤ੍ਥ ਚਾ’’ਤਿਆਦਿਨਾ ‘‘ਪਟਿਕੂਲਾ ਰਮ੍ਮਣੇਸੂ’’ਤਿਆਦਿਨਾ ਚ ਪਰਿਚਯੇਨ ਵਿਨਾ ਪਕਤਿਯਾ ਤਾਸਂ ਉਪੇਕ੍ਖਾ ਵੇਦਨਾਯ ਏਵ ਸਹ ਪਵਤ੍ਤਿ ਬਹੁਲਤਾ ਵੁਤ੍ਤਾਤਿ. ‘‘ਯੋਗਕਮ੍ਮ ਬਲੇਨਾ’’ਤਿ ਯੁਞ੍ਜਨ ਵੀਰਿਯ ਕਮ੍ਮ ਬਲੇਨ.

੧੨੨. ਚੇਤੋ ਯੁਤ੍ਤਾਨਂ ਚਿਤ੍ਤ ਚੇਤਸਿਕਾਨਂ. ‘‘ਏਤ੍ਥ ਚਾ’’ਤਿਆਦੀਸੁ. ਹੇਟ੍ਠਾ ਚ ਵੁਤ੍ਤੋ ‘ਕਦਾਚਿ ਸਨ੍ਦਿਸ੍ਸਨ੍ਤਿ ਵਿਸੁਂ ਵਿਸੁਂ, ਕਦਾਚਿ ਨਾਨਾ ਹੁਤ੍ਵਾ ਜਾਯਨ੍ਤੀ’ਤਿ. ਉਪਰਿ ਚ ਵਕ੍ਖਤਿ ‘ਅਪ੍ਪਮਞ੍ਞਾ ਵਿਰਤਿਯੋ ਪਨੇਤ੍ਥ ਪਞ੍ਚਪਿ ਪਚ੍ਚੇਕਮੇਵ ਯੋਜੇਤਬ੍ਬਾ’ਤਿ. ਇਸ੍ਸਾਦੀਨਞ੍ਚ ਨਾਨਾ ਕਦਾਚਿ ਯੋਗੋ ਉਪਰਿ ‘ਇਸ੍ਸਾਮਚ੍ਛੇਰ ਕੁਕ੍ਕੁਚ੍ਚਾਨਿ ਪਨੇਤ੍ਥ ਪਚ੍ਚੇਕਮੇਵ ਯੋਜੇਤਬ੍ਬਾਨੀ’ਤਿ ਵਕ੍ਖਤਿ. ਮਾਨਥਿਨ ਮਿਦ੍ਧਾਨਂ ਪਨ ਨਾਨਾ ਕਦਾਚਿ ਯੋਗੋ ਇਧ ਵਤ੍ਤਬ੍ਬੋ. ‘‘ਕਦਾਚੀ’’ਤਿ ਵਤ੍ਵਾ ਤਦਤ੍ਥਂ ਵਿਵਰਤਿ ‘‘ਤੇਸਂ’’ਤਿਆਦਿਨਾ. ‘‘ਤੇਸਂ’’ਤਿ ਦਿਟ੍ਠਿ ਵਿਪ੍ਪਯੁਤ੍ਤਾਨਂ. ‘‘ਨਿਦ੍ਦਾਭਿਭੂਤ ਵਸੇਨਾ’’ਤਿ ਨਿਦਸ੍ਸਨ ਵਚਨਮੇਤਂ. ਤੇਨ ਕੋਸਜ੍ਜਾਦੀਨਮ੍ਪਿ ਗਹਣਂ ਵੇਦਿਤਬ੍ਬਂ. ‘‘ਅਕਮ੍ਮਞ੍ਞਤਾਯਾ’’ਤਿ ਅਕਮ੍ਮਞ੍ਞਭਾਵੇਨ. ਤੇਹਿ ਇਸ੍ਸਾਮਚ੍ਛਰਿਯ ਕੁਕ੍ਕੁਚ੍ਚੇਹਿ. ਤੇਨ ਚ ਮਾਨੇਨ. ਕਿਚ੍ਚ ਵਿਰੋਧੇ ਵਾ ਆਰਮ੍ਮਣ ਵਿਰੋਧੇ ਵਾ ਨਾਨਾਭਾਵੋ. ਅਵਿਰੋਧੇ ਸਹਭਾਵੋ.

੧੨੩. ‘‘ਯੋਗਟ੍ਠਾਨਪਰਿਚ੍ਛਿਨ੍ਦਨ ਵਸੇਨਾ’’ਤਿ ਸਬ੍ਬਚਿਤ੍ਤ ਸਾਧਾਰਣਾ ਤਾਵ ਸਬ੍ਬੇਸੁਪਿ ਏਕੂਨਨਵੁਤਿਚਿਤ੍ਤੁਪ੍ਪਾਦੇਸੁ, ਵਿਤਕ੍ਕੋ ਪਞ੍ਚਪਞ੍ਞਾ ਸਚਿਤ੍ਤੇਸੂਤਿਆਦਿਨਾ ਯੁਤ੍ਤਟ੍ਠਾਨ ਭੂਤਾਨਂ ਚਿਤ੍ਤਾਨਂ ਗਣਨਸਙ੍ਖ੍ਯਾਪਰਿਚ੍ਛੇਦਵਸੇਨ. ‘‘ਯੁਤ੍ਤ ਧਮ੍ਮਰਾਸਿ ਪਰਿਚ੍ਛਿਨ੍ਦਨ ਵਸੇਨਾ’’ਤਿ ਅਨੁਤ੍ਤਰੇ ਛਤ੍ਤਿਂਸ, ਮਹਗ੍ਗਤੇ ਪਞ੍ਚਤਿਂਸਾਤਿਆਦਿਨਾ ਯੁਤ੍ਤ ਧਮ੍ਮਰਾਸੀਨਂ ਗਣਨ ਸਙ੍ਖ੍ਯਾ ਪਰਿਚ੍ਛੇਦ ਵਸੇਨ. ਸੇਸਂ ਸੁਵਿਞ੍ਞੇਯ੍ਯਂ. ‘‘ਪਾਲ਼ਿਯਂ’’ਤਿ ਧਮ੍ਮਸਙ੍ਗਣਿ ਪਾਲ਼ਿਯਂ. ‘‘ਤੇਸਂ ਨਯਾਨਂ’’ਤਿ ਚਤੁਕ੍ਕ ਪਞ੍ਚਕ ਨਯਾਨਂ.

੧੨੪. ‘‘ਕਾਯਵਚੀ ਵਿਸੋਧਨ ਕਿਚ੍ਚਾ’’ਤਿ ਕਾਯਦ੍ਵਾਰਵਚੀਦ੍ਵਾਰ ਸੋਧਨ ਕਿਚ੍ਚਾ.

੧੨੫. ਲੋਕੁਤ੍ਤਰ ਵਿਰਤੀਨਂ ਲੋਕੁਤ੍ਤਰ ਵਿਪਾਕੇਸੁਪਿ ਉਪ੍ਪਜ੍ਜਨਤੋ ‘‘ਇਦਞ੍ਚ…ਪੇ… ਦਟ੍ਠਬ੍ਬ’’ਨ੍ਤਿ. ਤਾਸਂ ਅਪ੍ਪਮਞ੍ਞਾਨਂ. ਤੇਸੁ ਮਹਾਵਿਪਾਕੇਸੁ. ਸਤ੍ਤਪਞ੍ਞਤ੍ਤਾਦੀਨਿ ਆਰਮ੍ਮਣਾਨਿ ਯਸ੍ਸਾਤਿ ਵਿਗ੍ਗਹੋ. ‘‘ਤੇਨਾ’’ਤਿ ਕੁਸਲੇਨ. ‘‘ਵਿਕਪ੍ਪ ਰਹਿਤਤ੍ਤਾ’’ਤਿ ਵਿਵਿਧਾਕਾਰ ਚਿਨ੍ਤਨ ਰਹਿਤਤ੍ਤਾ. ਅਪ੍ਪਨਾਪਤ੍ਤ ਕਮ੍ਮ ਵਿਸੇਸੇਹਿ ਨਿਬ੍ਬਤ੍ਤਾ ਅਪ੍ਪਨਾਪਤ੍ਤਕਮ੍ਮ ਵਿਸੇਸ ਨਿਬ੍ਬਤ੍ਤਾ. ਪਞ੍ਞਤ੍ਤਿ ਵਿਸੇਸਾਨਿ ਨਾਮ ਪਥਵੀਕਸਿਣ ਨਿਮਿਤ੍ਤਾਦੀਨਿ. ‘‘ਅਪਿ ਚਾ’’ਤਿਆਦੀਸੁ. ਨ ਪਞ੍ਞਤ੍ਤਿ ਧਮ੍ਮੇਹਿ ਅਤ੍ਥਿ. ਏਵਞ੍ਚ ਸਤਿ, ਕਾਮਵਿਪਾਕਾਨਿ ਕਾਮਤਣ੍ਹਾਯ ਆਰਮ੍ਮਣਭੂਤਾ ਪਞ੍ਞਤ੍ਤਿਯੋਪਿ ਆਲਮ੍ਬੇਯ੍ਯੁਨ੍ਤਿ. ‘‘ਸਙ੍ਗਹਨਯਭੇਦਕਾਰਕਾ’’ਤਿ ਪਥ ਮਜ੍ਝਾਨਿਕ ਚਿਤ੍ਤੇਸੁ ਛਤ੍ਤਿਂਸ. ਦੁਤੀਯਜ੍ਝਾਨਿਕ ਚਿਤ੍ਤੇਸੁ ਪਞ੍ਚਤਿਂਸਾਤਿਆਦਿਨਾ ਸਙ੍ਗਹਨਯਭੇਦਸ੍ਸ ਕਾਰਕਾ.

੧੨੬. ‘‘ਏਤ੍ਥ ਚਾ’’ਤਿਆਦੀਸੁ. ‘‘ਪਞ੍ਚਸੁ ਅਸਙ੍ਖਾਰਿਕੇਸੂ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ. ਤਥਾ ਪਞ੍ਚਸੁ ਸਸਙ੍ਖਾਰਿਕੇਸੂਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

੧੨੮. ‘‘ਭੂਮਿ ਜਾਤਿ ਸਮ੍ਪਯੋਗਾਦਿਭੇਦੇਨਾ’’ਤਿ ਫਸ੍ਸੋਤਾਵ ਚਤੁਬ੍ਬਿਧੋ ਹੋਤਿ ਕਾਮਾਵਚਰੋ, ਰੂਪਾਵਚਰੋ, ਅਰੂਪਾਵਚਰੋ ਚਾਤਿ. ਅਯਂ ਭੂਮਿਭੇਦੋ.

ਦ੍ਵਾਦਸਾਕੁਸਲਾ ਫਸ੍ਸਾ, ਕੁਸਲਾ ਏਕਵੀਸਤਿ;

ਛਤ੍ਤਿਂਸੇਵ ਵਿਪਾਕਾ ਚ, ਵੀਸਤਿ ਕ੍ਰਿਯਾ ਮਤਾ.

ਇਤਿ ਅਯਂ ਜਾਤਿਭੇਦੋ. ਸੋਮਨਸ੍ਸ ਸਹਗਤੋ, ਦਿਟ੍ਠਿਗਤ ਸਮ੍ਪਯੁਤ੍ਤੋ, ਅਸਙ੍ਖਾਰਿਕੋ ਚ, ਸਸਙ੍ਖਾਰਿਕੋ ਚਾਤਿਆਦਿਨਾ ਸਮ੍ਪਯੋਗਾਦਿਭੇਦੋ ਵਤ੍ਤਬ੍ਬੋ. ‘‘ਚਿਤ੍ਤੇਨ ਸਮਂ ਭੇਦ’’ਨ੍ਤਿ ਅਤ੍ਤਨਾ ਵਾ ਸਮ੍ਪਯੁਤ੍ਤੇਨ ਚਿਤ੍ਤਭੇਦੇਨ ਸਮਂ ਭੇਦਂ. ਏਕੂਨਨ ਵੁਤਿਯਾ ਚਿਤ੍ਤੇਸੁ ਵਾ. ਏਤ੍ਥ ਚ ਵਿਚਿਕਿਚ੍ਛਾ ਚੇਤਸਿਕਂ ਏਕਸ੍ਮਿਂ ਚਿਤ੍ਤੇ ਯੁਤ੍ਤਨ੍ਤਿ ਏਕਮੇਵ ਹੋਤਿ. ਦੋਸੋ, ਇਸ੍ਸਾ, ਮਚ੍ਛਰਿਯਂ, ਕੁਕ੍ਕੁਚ੍ਚਨ੍ਤਿ ਇਮੇ ਚਤ੍ਤਾਰੋ ਦ੍ਵੀਸੁ ਚਿਤ੍ਤੇਸੁ ਯੁਤ੍ਤਾਤਿ ਵਿਸੁਂ ਵਿਸੁਂ ਦ੍ਵੇ ਦ੍ਵੇ ਹੋਨ੍ਤਿ. ਤਥਾ ਦਿਟ੍ਠਿਮਾਨਾ ਪਚ੍ਚੇਕਂ ਚਤ੍ਤਾਰੋ. ਥਿਨਮਿਦ੍ਧਂ ਪਚ੍ਚੇਕਂ ਪਞ੍ਚਾਤਿਆਦਿਨਾ ਸਬ੍ਬਂ ਵਤ੍ਤਬ੍ਬਨ੍ਤਿ.

ਚੇਤਸਿਕਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੩. ਪਕਿਣ੍ਣਕਸਙ੍ਗਹਅਨੁਦੀਪਨਾ

੧੨੯. ਪਕਿਣ੍ਣਕਸਙ੍ਗਹੇ. ਉਭਿਨ੍ਨਂ ਚਿਤ੍ਤ ਚੇਤਸਿਕਾਨਂ. ‘‘ਤੇਪਞ੍ਞਾਸਾ’’ਤਿ ਤੇਪਞ੍ਞਾਸਵਿਧਾ. ‘‘ਭਾਵੋ’’ਤਿ ਵਿਜ੍ਜਮਾਨਕਿਰਿਯਾ. ਯੋ ਲਕ੍ਖਣ ਰਸਾਦੀਸੁ ਲਕ੍ਖਣਨ੍ਤਿ ਵੁਚ੍ਚਤਿ. ਤੇਨਾਹ ‘‘ਧਮ੍ਮਾਨਂ’’ਤਿਆਦਿਂ. ਪਵਤ੍ਤੋਤਿ ਪਾਠਸੇਸ ਪਦਂ. ਏਤੇਨ ‘ਵੇਦਨਾ ਭੇਦੇਨ ਚਿਤ੍ਤਚੇਤਸਿਕਾਨਂ ਸਙ੍ਗਹੋ’ਤਿਆਦੀਸੁਪਿ ਵੇਦਨਾ ਭੇਦੇਨ ਪਵਤ੍ਤੋ ਚਿਤ੍ਤਚੇਤਸਿਕਾਨਂ ਸਙ੍ਗਹੋਤਿਆਦਿਨਾ ਸਮ੍ਬਨ੍ਧਂ ਦਸ੍ਸੇਤਿ. ‘‘ਵਚਨਤ੍ਥੋ ਦਸ੍ਸਿਤੋ’’ਤਿ, ਕਥਂ ਦਸ੍ਸਿਤੋਤਿ ਆਹ ‘‘ਵੇਦਨਾ ਭੇਦੇਨ ਚਿਤ੍ਤਚੇਤਸਿਕਾਨਂ ਸਙ੍ਗਹੋ’’ਤਿਆਦਿ. ‘‘ਤੇਸਂ ਦਾਨਿ ਯਥਾਰਹਂ’’ਤਿ ਏਤ੍ਥ ‘‘ਤੇਸਂ’’ਤਿ ਚਿਤ੍ਤਚੇਤਸਿਕਾਨਂ, ਸਙ੍ਗਹੋ ਨਾਮਾਤਿ ਸਮ੍ਬਨ੍ਧੋ. ਏਤੇਨ ਅਯਂ ਸਙ੍ਗਹੋ ਚਿਤ੍ਤ ਚੇਤਸਿਕਾਨਂ ਏਵ ਸਙ੍ਗਹੋਤਿ ਸਿਦ੍ਧਂ ਹੋਤਿ. ਵੇਦਨਾ ਹੇਤੁਤੋ. ਲ. ਲਮ੍ਬਣਵਤ੍ਥੁਤੋ ਸਙ੍ਗਹੋ ਨਾਮਾਤਿ ਸਮ੍ਬਨ੍ਧੋ. ਏਤੇਨ ਉਪਰਿ ਵੇਦਨਾ ਸਙ੍ਗਹੋਤਿਆਦੀਸੁ ਵੇਦਨਾਤੋ ਸਙ੍ਗਹੋ ਵੇਦਨਾ ਸਙ੍ਗਹੋ. ਲ. ਵਤ੍ਥੁਤੋ ਸਙ੍ਗਹੋ ਵਤ੍ਥੁ ਸਙ੍ਗਹੋਤਿ ਸਿਦ੍ਧਂ ਹੋਤਿ, ਵੇਦਨਾਤੋਤਿਆਦੀਸੁ ਚ ਵੇਦਨਾ ਭੇਦਤੋਤਿਆਦਿ ਅਤ੍ਥਤੋ ਸਿਦ੍ਧਂ ਹੋਤਿ. ਏਵਂ ਛਨ੍ਨਂ ਪਕਿਣ੍ਣਕਸਙ੍ਗਹਾਨਂ ਵਚਨਤ੍ਥੋ ਦਸ੍ਸਿਤੋ. ਤੇਨਾਹ ‘‘ਵੇਦਨਾ ਭੇਦੇਨਾ’’ਤਿਆਦਿਂ. ਆਦਿਨਾ ਦਸ੍ਸਿਤੋਤਿ ਸਮ੍ਬਨ੍ਧੋ. ‘‘ਸਙ੍ਗਹੋ ਨਾਮ ਨਿਯ੍ਯਤੇ’’ਤਿ ਵੁਤ੍ਤਤ੍ਤਾ ‘‘ਨੀਤੋ ਨਾਮ ਅਤ੍ਥੀ’’ਤਿ ਵੁਤ੍ਤਂ. ‘‘ਨਿਯ੍ਯਤੇ’’ਤਿ ਚ ਪਵਤ੍ਤੀਯਤੇਤਿ ਅਤ੍ਥੋ. ਨਨੁ ਤੇਸਂ ‘‘ਸਙ੍ਗਹੋ ਨਾਮ ਨਿਯ੍ਯਤੇ’’ਤਿ ਵੁਤ੍ਤਤ੍ਤਾ ਦ੍ਵੀਹਿ ਚਿਤ੍ਤ ਚੇਤਸਿਕੇਹਿ ਏਵ ਅਯਂ ਸਙ੍ਗਹੋ ਨੇਤਬ੍ਬੋਤਿ. ਨ. ਚਿਤ੍ਤੇਨ ਨੀਤੇ ਚੇਤਸਿਕੇਹਿ ਵਿਸੁਂ ਨੇਤਬ੍ਬ ਕਿਚ੍ਚਸ੍ਸ ਅਭਾਵਤੋਤਿ ਦਸ੍ਸੇਤੁਂ ‘‘ਚਿਤ੍ਤੇ ਪਨ ਸਿਦ੍ਧੇ’’ਤਿਆਦਿ ਵੁਤ੍ਤਂ.

੧੩੦. ਵੇਦਨਾ ਸਙ੍ਗਹੇ. ਵੇਦਨਾ ਭੇਦਂ ਨਿਸ੍ਸਾਯ ਇਮਸ੍ਸ ਸਙ੍ਗਹਸ੍ਸ ਪਵਤ੍ਤਤ੍ਤਾ ‘‘ਨਿਸ੍ਸਯ ਧਮ੍ਮ ਪਰਿਗ੍ਗਹਤ੍ਥ’’ਨ੍ਤਿ ਵੁਤ੍ਤਂ. ‘‘ਸਂਯੁਤ੍ਤਕੇ’’ਤਿ ਵੇਦਨਾ ਸਂਯੁਤ੍ਤਕੇ. ‘‘ਆਰਮ੍ਮਣਂ ਅਨੁਭੋਨ੍ਤੀ’’ਤਿ ਆਰਮ੍ਮਣ ਰਸਂ ਅਨੁਭੋਨ੍ਤਿ. ‘‘ਤੇ’’ਤਿ ਤੇਜਨਾ. ‘‘ਤਂ’’ਤਿ ਤਂ ਆਰਮ੍ਮਣਂ. ‘‘ਸਾਤਤੋ’’ਤਿ ਸੁਖਾਕਾਰਤੋ. ‘‘ਅਸ੍ਸਾਤਤੋ’’ਤਿ ਦੁਕ੍ਖਾ ਕਾਰਤੋ. ਤਤੋ ਅਞ੍ਞੋਪਕਾਰੋ ਨਤ੍ਥਿ, ਤਸ੍ਮਾ ਵੇਦਨਾ ਅਨੁਭਵਨ ਲਕ੍ਖਣੇਨ ਤਿਵਿਧਾ ਏਵ ਹੋਤੀਤਿ ਯੋਜਨਾ. ‘‘ਦ੍ਵੇ’’ਤਿ ਦ੍ਵੇ ਵੇਦਨਾਯੋ. ਉਪੇਕ੍ਖਂ ਸੁਖੇ ਸਙ੍ਗਹੇਤ੍ਵਾ ਸੁਖਦੁਕ੍ਖਵਸੇਨ ਵਾ ਦ੍ਵੇ ਵੇਦਨਾ ਵੁਤ੍ਤਾਤਿ ਯੋਜਨਾ. ‘‘ਸਨ੍ਤਸ੍ਮਿਂ ਏਸਾ ਪਣੀਤੇ ਸੁਖੇ’’ਤਿ ਝਾਨਸਮ੍ਪਯੁਤ੍ਤਂ ਅਦੁਕ੍ਖਮ ਸੁਖਂ ਸਨ੍ਧਾਯ ਵੁਤ੍ਤਂ. ਪਞ੍ਚ ਭੇਦਾਦੀਸੁ ਵਿਤ੍ਥਾਰੋ ਵੇਦਨਾ ਸਂਯੁਤ੍ਤੇ ਗਹੇਤਬ੍ਬੋ. ਵੇਦਯਿਤਨ੍ਤਿ ਚ ਵੇਦਨਾਤਿ ਚ ਅਤ੍ਥਤੋ ਏਕਂ. ‘‘ਸਬ੍ਬਂ ਤਂ ਦੁਕ੍ਖਸ੍ਮਿਂ’’ਤਿ ਸਬ੍ਬਂ ਤਂ ਵੇਦਯਿਤਂ ਦੁਕ੍ਖਸ੍ਮਿਂ ਏਵ ਪਵਿਟ੍ਠਂ ਹੋਤਿ. ਸਙ੍ਖਾਰ ਦੁਕ੍ਖਤਂ ਆਨਨ੍ਦ ਮਯਾ ਸਨ੍ਧਾਯ ਭਾਸਿਤਂ ਸਙ੍ਖਾਰ ਵਿਪਰਿਣਾਮਤਞ੍ਚ, ਯਂ ਕਿਞ੍ਚਿ ਵੇਦਯਿਤਂ, ਸਬ੍ਬਂ ਤਂ ਦੁਕ੍ਖਸ੍ਮਿਂਤਿ ਪਾਲ਼ਿ. ‘‘ਇਨ੍ਦ੍ਰਿਯਭੇਦਵਸੇਨਾ’’ਤਿ ਸੋਮਨਸ੍ਸ ਸਹਗਤਂ, ਉਪੇਕ੍ਖਾਸਹਗਤਂ, ਦੋਮਨਸ੍ਸ ਸਹਗਤਂ, ਸੁਖਸਹਗਤਂ, ਦੁਕ੍ਖ ਸਹਗਤਨ੍ਤਿ ਏਵਂ ਇਨ੍ਦ੍ਰਿਯ ਭੇਦਵਸੇਨ. ‘‘ਯੇਸੁ ਧਮ੍ਮੇਸੂ’’ਤਿ ਸਮ੍ਪਯੁਤ੍ਤ ਧਮ੍ਮੇਸੁ. ‘‘ਤੇਸਂ’’ਤਿ ਸਮ੍ਪਯੁਤ੍ਤ ਧਮ੍ਮਾਨਂ. ਤਤ੍ਥ ਸੁਖਸਮ੍ਪਯੁਤ੍ਤਾ ਧਮ੍ਮਾ ਕਾਯਿਕ ਸੁਖ ਸਮ੍ਪਯੁਤ੍ਤ ਚੇਤਸਿਕ ਸੁਖ ਸਮ੍ਪਯੁਤ੍ਤ ਵਸੇਨ ਦੁਵਿਧਾ. ਏਵਂ ਇਸ੍ਸਰਟ੍ਠਾਨਭੂਤਾਨਂ ਸਮ੍ਪਯੁਤ੍ਤ ਧਮ੍ਮਾਨਂ ਦੁਵਿਧਤ੍ਤਾ ਅਨੁਭਵਨ ਭੇਦੇ ਤੀਸੁ ਵੇਦਨਾਸੁ ਏਕਂ ਸੁਖ ਵੇਦਨਂ ਦ੍ਵਿਧਾ ਭਿਨ੍ਦਿਤ੍ਵਾ ਸੁਖਿਨ੍ਦ੍ਰਿਯਂ ਸੋਮਨਸ੍ਸਿਨ੍ਦ੍ਰਿਯਨ੍ਤਿ ਵੁਤ੍ਤਂ. ਦੁਕ੍ਖਸਮ੍ਪਯੁਤ੍ਤ ਧਮ੍ਮੇਸੁਪਿ ਏਸੇਵਨਯੋ. ‘‘ਅਪਿ ਚਾ’’ਤਿ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ‘‘ਤੇਪੀ’’ਤਿ ਉਪੇਕ੍ਖਾ ਸਮ੍ਪਯੁਤ੍ਤਾਪਿ ਧਮ੍ਮਾ. ਚਕ੍ਖਾਦਿ ਪਸਾਦਕਾਯਾ ਨਾਮ ਚਕ੍ਖੁ ਸੋਤ ਘਾਨ ਜਿਵ੍ਹਾ ਪਸਾਦਕਾਯਾ. ਤੇਸੁ ਨਿਸ੍ਸਿਤਾ ਨਾਮ ਚਕ੍ਖੁ ਵਿਞ੍ਞਾਣ ਚਿਤ੍ਤੁਪ੍ਪਾਦਾਦਯੋ. ‘‘ਸਬ੍ਭਾਵਾ’’ਤਿ ਸਨ੍ਤਭਾਵਤੋ ਸਂਵਿਜ੍ਜਮਾਨ ਭਾਵਤੋ ਦੁਵਿਧਾ ਹੋਨ੍ਤੀਤਿ ਯੋਜਨਾ. ‘‘ਏਕ ਰਸਤ੍ਤਾ’’ਤਿ ਮਜ੍ਝਤ੍ਤਭਾਵੇਨ ਏਕਰਸਤ੍ਤਾ. ‘‘ਇਤਰਾਨੀ’’ਤਿ ਸੋਮਨਸ੍ਸ ਦੋਮਨਸ੍ਸ ਉਪੇਕ੍ਖਿਨ੍ਦ੍ਰਿਯਾਨਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

੧੩੧. ਹੇਤੁਸਙ੍ਗਹੇ. ‘‘ਸੁਪ੍ਪਤਿਟ੍ਠਿਤਭਾਵਸਾਧਨਂ’’ਤਿ ਸੁਟ੍ਠੁ ਪਤਿਟ੍ਠਹਨ੍ਤੀਤਿ ਸੁਪ੍ਪਤਿਟ੍ਠਿਤਾ. ਸੁਪ੍ਪਤਿਟ੍ਠਿਤ ਭਾਵਸਾਧਨਂ ਹੇਤੁ ਕਿਚ੍ਚਂ ਨਾਮਾਤਿ ਯੋਜਨਾ. ‘‘ਇਮੇਪਿ ਧਮ੍ਮਾ’’ਤਿ ਇਮੇਪਿ ਛ ਹੇਤੁ ਧਮ੍ਮਾ. ‘‘ਤਤ੍ਥਾ’’ਤਿ ਤੇਸੁ ਆਰਮ੍ਮਣੇਸੁ, ਸਾਧੇਨ੍ਤਿ. ਤਸ੍ਮਾ ਸੁਪ੍ਪਤਿਟ੍ਠਿਤ ਭਾਵਸਾਧਨਂ ਹੇਤੁਕਿਚ੍ਚਂ ਨਾਮਾਤਿ ਵੁਤ੍ਤਂ. ‘‘ਅਪਰੇ ਪਨਾ’’ਤਿ ਪਟ੍ਠਾਨਟ੍ਠ ਕਥਾਯਂ ਆਗਤੋ ਰੇਵਤਤ੍ਥੇਰ ਵਾਦੋ. ‘‘ਧਮ੍ਮਾਨਂ ਕੁਸਲਾਦਿ ਭਾਵਸਾਧਨਂ’’ਤਿ ਸਹਜਾਤਧਮ੍ਮਾਨਂ ਕੁਸਲਭਾਵਸਾਧਨਂ ਅਕੁਸਲਭਾਵਸਾਧਨਂ ਅਬ੍ਯਾਕਤਭਾਵਸਾਧਨਂ. ‘‘ਏਵਂ ਸਨ੍ਤੇ’’ਤਿਆਦਿ ਤਂ ਵਾਦਂ ਪਟਿਕ੍ਖਿਪਨ੍ਤਾਨਂ ਪਟਿਕ੍ਖੇਪਵਚਨਂ. ‘‘ਯੇਸ’’ਨ੍ਤਿ ਮੋਹਮੂਲ ਚਿਤ੍ਤ ਦ੍ਵਯੇ ਮੋਹੋ ਚ ਅਹੇਤੁਕ ਚਿਤ੍ਤੁਪ੍ਪਾਦ ਰੂਪ ਨਿਬ੍ਬਾਨਾਨਿ ਚ. ‘‘ਨ ਸਮ੍ਪਜ੍ਜੇਯ੍ਯਾ’’ਤਿ ਸਹਜਾਤ ਹੇਤੁਨੋ ਅਭਾਵਾ ਤਸ੍ਸ ਮੋਹਸ੍ਸ ਅਕੁਸਲ ਭਾਵੋ, ਇਤਰੇ ਸਞ੍ਚ ਅਬ੍ਯਾਕਤ ਭਾਵੋ ਨ ਸਮ੍ਪਜ੍ਜੇਯ੍ਯ. ਇਦਂ ਵੁਤ੍ਤਂ ਹੋਤਿ. ਹੇਤੁ ਨਾਮ ਸਹਜਾਤ ਧਮ੍ਮਾਨਂ ਕੁਸਲਾਦਿਭਾਵਂ ਸਾਧੇਤੀਤਿ ਵੁਤ੍ਤਂ. ਏਵਂ ਸਤਿ, ਸੋ ਮੋਹੋ ਸਮ੍ਪਯੁਤ੍ਤ ਧਮ੍ਮਾਨਂ ਅਕੁਸਲ ਭਾਵਂ ਸਾਧੇਯ੍ਯ. ਅਤ੍ਤਨੋ ਪਨ ਅਕੁਸਲ ਭਾਵਂ ਸਾਧੇਨ੍ਤੋ ਸਹਜਾਤੋ ਅਞ੍ਞੋ ਹੇਤੁ ਨਤ੍ਥਿ. ਤਸ੍ਮਾ ਤਸ੍ਸ ਅਕੁਸਲਭਾਵੋ ਨ ਸਮ੍ਪਜ੍ਜੇਯ੍ਯ. ਤਥਾ ਅਹੇਤੁਕ ਚਿਤ੍ਤੁਪ੍ਪਾਦ ਰੂਪ ਨਿਬ੍ਬਾਨਾਨਞ੍ਚ ਅਬ੍ਯਾਕਤਭਾਵਂ ਸਾਧੇਨ੍ਤੋ ਕੋਚਿ ਸਹਜਾਤੋ ਹੇਤੁ ਨਾਮ ਨਤ੍ਥੀਤਿ ਤੇਸਮ੍ਪਿ ਅਬ੍ਯਾਕਤ ਭਾਵੋ ਨ ਸਮ੍ਪਜ੍ਜੇਯ੍ਯ. ਨ ਚ ਨ ਸਮ੍ਪਜ੍ਜਤਿ. ਤਸ੍ਮਾ ਸੋ ਥੇਰਵਾਦੋ ਨ ਯੁਤ੍ਤੋਤਿ. ਏਤ੍ਥ ਸਿਯਾ. ਸੋਚ ਮੋਹੋ ਅਤ੍ਤਨੋ ਧਮ੍ਮਤਾਯ ਅਕੁਸਲੋ ਹੋਤਿ. ਤਾਨਿ ਚ ਅਹੇਤੁਕ ਚਿਤ੍ਤੁਪ੍ਪਾਦਰੂਪ ਨਿਬ੍ਬਾਨਾਨਿ ਅਤ੍ਤਨੋ ਧਮ੍ਮਤਾਯ ਅਬ੍ਯਾਕਤਾਨਿ ਹੋਨ੍ਤੀਤਿ. ਏਵਂ ਸਨ੍ਤੇ, ਯਥਾ ਤੇ ਧਮ੍ਮਾ. ਤਥਾ ਅਞ੍ਞੇਪਿ ਧਮ੍ਮਾ ਅਤ੍ਤਨੋ ਧਮ੍ਮਤਾਯ ਏਵ ਕੁਸਲਾ ਕੁਸਲਾ ਬ੍ਯਾਕਤਾ ਭਵਿਸ੍ਸਨ੍ਤਿ. ਨ ਚੇਤ੍ਥ ਕਾਰਣਂ ਅਤ੍ਥਿ, ਯੇਨਕਾਰਣੇਨ ਤੇ ਏਵ ਧਮ੍ਮਾ ਅਤ੍ਤਨੋ ਧਮ੍ਮਤਾਯ ਅਕੁਸਲਾ ਬ੍ਯਾਕਤਾ ਹੋਨ੍ਤਿ. ਅਞ੍ਞੇ ਪਨ ਧਮ੍ਮਾ ਅਤ੍ਤਨੋ ਧਮ੍ਮਤਾਯ ਕੁਸਲਾ ਕੁਸਲਾ ਬ੍ਯਾਕਤਾ ਨ ਹੋਨ੍ਤਿ, ਹੇਤੂਹਿ ਏਵ ਹੋਨ੍ਤੀਤਿ. ਤਸ੍ਮਾ ਤੇਸਂ ਸਬ੍ਬੇਸਮ੍ਪਿ ਕੁਸਲਾਦਿ ਭਾਵਤ੍ਥਾਯ ਹੇਤੂਹਿ ਪਯੋਜਨਂ ਨਤ੍ਥਿ. ਤਸ੍ਮਾ ਸੋ ਥੇਰਵਾਦੋ ਨ ਯੁਤ੍ਤੋ ਯੇਵਾਤਿ. ਨ ਕੇਵਲਞ੍ਚ ਤਸ੍ਮਿਂ ਥੇਰਵਾਦੇ ਏਤ੍ਤਕੋ ਦੋਸੋ ਅਤ੍ਥਿ. ਅਥ ਖੋ ਅਞ੍ਞੋਪਿ ਦੋਸੋ ਅਤ੍ਥੀਤਿ ਦਸ੍ਸੇਤੁਂ ‘‘ਯਾਨਿ ਚਾ’’ਤਿਆਦਿਮਾਹ. ਤਤ੍ਥਾਯਂ ਅਧਿਪ੍ਪਾਯੋ. ਸਚੇ ਧਮ੍ਮਾਨਂ ਕੁਸਲਾਦਿ ਭਾਵੋ ਸਹਜਾਤ ਹੇਤੁਪ੍ਪਟਿਬਦ੍ਧੋ ਸਿਯਾ. ਏਵਂ ਸਤਿ, ਹੇਤੁ ਪਚ੍ਚਯੇ ਕੁਸਲ ਹੇਤੁਤੋ ਲਦ੍ਧ ਪਚ੍ਚਯਾਨਿ ਰੂਪਾਨਿ ਕੁਸਲਾਨਿ ਭਵੇਯ੍ਯੁਂ. ਅਕੁਸਲ ਹੇਤੁਤੋ ਲਦ੍ਧ ਪਚ੍ਚਯਾਨਿ ਰੂਪਾਨਿ ਅਕੁਸਲਾਨਿ ਭਵੇਯ੍ਯੁਂ. ਨ ਚ ਭਵਨ੍ਤਿ. ਤਸ੍ਮਾ ਸੋ ਵਾਦੋ ਅਯੁਤ੍ਤੋ ਯੇਵਾਤਿ. ਇਦਾਨਿ ਪੁਨ ਤਂ ਥੇਰਵਾਦਂ ਪਗ੍ਗਹੇਤੁਂ ‘‘ਯਥਾਪਨਾ’’ਤਿਆਦਿਮਾਹ. ‘‘ਧਮ੍ਮੇਸੂ’’ਤਿ ਚਤੁਸ੍ਸਚ੍ਚ ਧਮ੍ਮੇਸੁ. ਮੁਯ੍ਹਨਕਿਰਿਯਾ ਨਾਮ ਅਨ੍ਧਕਾਰ ਕਿਰਿਯਾ. ਧਮ੍ਮਚ੍ਛਨ੍ਦੋ ਨਾਮ ਦਾਨਂ ਦਾਤੁਕਾਮੋ, ਸੀਲਂ ਪੂਰੇਤੁਕਾਮੋ, ਭਾਵਨਂ ਭਾਵੇਤੁਕਾਮੋ ਇਚ੍ਚਾਦਿਨਾ ਪਵਤ੍ਤੋ ਛਨ੍ਦੋ. ‘‘ਅਕ੍ਖਨ੍ਤੀ’’ਤਿ ਅਕ੍ਖਮਨਂ, ਅਰੋਚਨਂ, ਅਮਨਾਪੋ. ਪਾਪ ਧਮ੍ਮ ਪਾਪਾ ਰਮ੍ਮਣ ਵਿਰੋਧੋ ਨਾਮ ਕਾਮਰਾਗਟ੍ਠਾਨੀਯੇਹਿ ਸਤ੍ਤਵਿਧ ਮੇਥੁਨ ਧਮ੍ਮਾਦੀਹਿ ਪਾਪ ਧਮ੍ਮੇਹਿ ਚੇਵ ਪਞ੍ਚਕਾਮਗੁਣਾ ਰਮ੍ਮਣੇ ਹਿ ਚ ਚਿਤ੍ਤਸ੍ਸ ਵਿਰੋਧੋ, ਜੇਗੁਚ੍ਛੋ ਪਟਿਕੂਲੋ. ਮੁਯ੍ਹਨਕਿਰਿਯਾ ਪਨ ਏਕਨ੍ਤ ਅਕੁਸਲ ਜਾਤਿਕਾ ਏਵ ਹੋਤਿ. ਏਤ੍ਤਾਵਤਾ ਮੋਹਮੂਲ ਚਿਤ੍ਤ ਦ੍ਵਯੇ ਮੋਹੋ ਅਤ੍ਤਨੋ ਧਮ੍ਮਤਾਯ ਅਕੁਸਲੋ ਹੋਤੀਤਿ ਇਮਮਤ੍ਥਂ ਪਤਿਟ੍ਠਾਪੇਤਿ. ‘‘ਏਵਂ ਸਨ੍ਤੇ’’ਤਿਆਦਿਕਂ ਤਤ੍ਥ ਦੋਸਾਰੋਪਨਂ ਵਿਧਮਤਿ. ਇਦਾਨਿ ਅਹੇਤੁਕ ਚਿਤ੍ਤੁਪ੍ਪਾਦ ਰੂਪ ਨਿਬ੍ਬਾਨਾਨਿ ਅਤ੍ਤਨੋ ਧਮ੍ਮਤਾਯ ਅਬ੍ਯਾਕਤਾਨਿ ਹੋਨ੍ਤੀਤਿ ਇਮਮਤ੍ਥਂ ਪਤਿਟ੍ਠਾਪੇਤੁਂ ‘‘ਯੋਚ ਧਮ੍ਮੋ’’ਤਿਆਦਿਮਾਹ. ‘‘ਏਤ੍ਤਕਮੇਵਾ’’ਤਿ ਅਞ੍ਞਂ ਦੁਕ੍ਕਰ ਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ. ‘‘ਅਹੇਤੁਕ ਚਿਤ੍ਤਾਨਂ’’ਤਿ ਅਹੇਤੁਕ ਚਿਤ੍ਤੁਪ੍ਪਾਦਾਨਂ. ਅਤ੍ਤਨੋ ਧਮ੍ਮਤਾਯ ਏਵ ਸਿਦ੍ਧੋ. ਏਤ੍ਤਾਵਤਾ-ਅਹੇਤੁਕ. ਲ. ਨਿਬ੍ਬਾਨਾਨਿ ਅਤ੍ਤਨੋ ਧਮ੍ਮਤਾਯ ਅਬ੍ਯਾਕਤਾਨਿ ਹੋਨ੍ਤੀ-ਤਿ ਇਮਮਤ੍ਥਂ ਪਤਿਟ੍ਠਾਪੇਤਿ. ‘‘ਏਵਂ ਸਨ੍ਤੇ’’ਤਿਆਦਿ ਤਤ੍ਥ ਦੋਸਾਰੋਪਨਂ ਅਪਨੇਤਿ. ਇਦਾਨਿ ਸਬ੍ਬੋਪਿ ਮੋਹੋ ਅਤ੍ਤਨੋ ਧਮ੍ਮਤਾਯ ਅਕੁਸਲ ਭਾਵੇਠਤ੍ਵਾ ਅਞ੍ਞੇਸਂ ਇਚ੍ਛਾ ਨਾਮ ਅਤ੍ਥਿ, ਅਕ੍ਖਨ੍ਤਿ ਨਾਮ ਅਤ੍ਥੀਤਿ ਏਵਂ ਵੁਤ੍ਤਾਨਂ ਇਚ੍ਛਾ ਅਕ੍ਖਨ੍ਤਿ ਧਮ੍ਮਾਨਮ੍ਪਿ ਅਕੁਸਲ ਭਾਵਂ ਸਾਧੇਤੀਤਿ ਦਸ੍ਸੇਤੁਂ ‘‘ਤਤ੍ਥ ਮੋਹੋ’’ਤਿਆਦਿਮਾਹ. ‘‘ਮੁਯ੍ਹਨ ਨਿਸ੍ਸਨ੍ਦਾਨਿ ਏਵਾ’’ਤਿ ਮੁਯ੍ਹਨਕਿਰਿਯਾਯ ਨਿਸ੍ਸਨ੍ਦਪ੍ਫਲਾਨਿ ਏਵ. ਨ ਕੇਵਲਂ ਸੋ ਲੋਭਾਦੀਨਂ ਅਕੁਸਲਭਾਵਂ ਸਾਧੇਤਿ, ਅਥ ਖੋ ਅਲੋਭਾਦੀਨਮ੍ਪਿ ਕੁਸਲਭਾਵਂ ਸੋ ਏਵ ਸਾਧੇਤੀਤਿ ਦਸ੍ਸੇਤੁਂ ‘‘ਅਲੋਭਾਦੀਨਞ੍ਚਾ’’ਤਿਆਦਿ ਵੁਤ੍ਤਂ. ‘‘ਅਵਿਜ੍ਜਾਨੁਸਯੇਨ ਸਹੇਵ ਸਿਦ੍ਧੋ’’ਤਿ ਤਾਨਿ ਸਤ੍ਤਸਨ੍ਤਾਨੇ ਅਵਿਜ੍ਜਾਨੁਸਯੇ ਅਪ੍ਪਹੀਨੇ ਕੁਸਲਾਨਿ ਹੋਨ੍ਤਿ. ਪਹੀਨੇ ਕਿਰਿਯਾਨਿ ਹੋਨ੍ਤੀਤਿ ਅਧਿਪ੍ਪਾਯੋ. ਇਦਾਨਿ ਲੋਭ ਦੋਸਾਨਂ ਅਲੋਭਾਦੀਨਞ੍ਚ ਹੇਤੁ ਕਿਚ੍ਚਂ ਦਸ੍ਸੇਤੁਂ ‘‘ਤਾਨਿ ਪਨ ਲੋਭਾਦੀਨੀ’’ਤਿਆਦਿ ਵੁਤ੍ਤਂ. ਰਜ੍ਜਨ ਦੁਸ੍ਸਨਾਨਂ ਨਿਸ੍ਸਨ੍ਦਾਨਿ ਰਜ੍ਜਨਾਦਿਨਿਸ੍ਸਨ੍ਦਾਨਿ. ‘‘ਦਿਟ੍ਠਿ ਮਾਨਾਦੀਨੀ’’ਤਿ ਦਿਟ੍ਠਿ ਮਾਨ ਇਸ੍ਸਾ ਮਚ੍ਛਰਿਯਾਦੀਨਿ. ਅਰਜ੍ਜਨ ਅਦੁਸ੍ਸਨ ਅਮੁਯ੍ਹਨਾਨਂ ਨਿਸ੍ਸਨ੍ਦਾਨਿ ਅਰਜ੍ਜਨਾਦਿ ਨਿਸ੍ਸਨ੍ਦਾਨਿ. ‘‘ਸਦ੍ਧਾਦੀਨੀ’’ਤਿ ਸਦ੍ਧਾ ਸਤਿ ਹਿਰਿ ਓਤ੍ਤਪ੍ਪਾਦੀਨਿ. ‘‘ਹੇਤੁਮੁਖੇਨਪੀ’’ਤਿ ਅਹੇਤੁਕ ਚਿਤ੍ਤੁਪ੍ਪਾਦ ਰੂਪ ਨਿਬ੍ਬਾਨਾਨਂ ਅਬ੍ਯਾਕਤਭਾਵੋ ਅਤ੍ਤਨੋ ਧਮ੍ਮਤਾਯ ਸਿਦ੍ਧੋਤਿ ਵੁਤ੍ਤੋ. ਸਹੇਤੁਕ ਵਿਪਾਕ ਕ੍ਰਿਯਾਨਂ ਅਬ੍ਯਾਕਤ ਭਾਵੋ ਪਨ ਅਤ੍ਤਨੋ ਧਮ੍ਮਤਾਯ ਸਿਦ੍ਧੋਤਿਪਿ ਸਹਜਾਤ ਹੇਤੂਨਂ ਹੇਤੁ ਕਿਚ੍ਚੇਨ ਸਿਦ੍ਧੋਤਿਪਿ ਵਤ੍ਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਵਿਭਾਵ ਨਿਪਾਠੇ. ‘‘ਮਗ੍ਗਿਤਬ੍ਬੋ’’ਤਿ ਗਵੇਸਿਤਬ੍ਬੋ. ਅਥ ਤੇਸਂ ਕੁਸਲਾਦਿ ਭਾਵੋ ਸੇਸਸਮ੍ਪਯੁਤ੍ਤ ਹੇਤੁਪ੍ਪਟਿ ਬਦ੍ਧੋ ਸਿਯਾਤਿ ਯੋਜਨਾ. ‘‘ਅਪ੍ਪਟਿ ਬਦ੍ਧੋ’’ਤਿ ਹੇਤੁਨਾ ਅਪ੍ਪਟਿ ਬਦ੍ਧੋ. ‘‘ਕੁਸਲਾਦਿਭਾਵੋ’’ਤਿ ਕੁਸਲਾਦਿਭਾਵੋ ਸਿਯਾ. ‘‘ਸੋ’’ਤਿ ਕੁਸਲਾਦਿਭਾਵੋ. ‘‘ਅਹੇਤੁਕਾਨਂ’’ਤਿ ਅਹੇਤੁਕ ਚਿਤ੍ਤੁਪ੍ਪਾਦ ਰੂਪ ਨਿਬ੍ਬਾਨਾਨਂ. ਇਦਾਨਿ ‘ਯਾਨਿ ਚ ਲਦ੍ਧਹੇਤੁ ਪਚ੍ਚਯਾਨੀ’ਤਿਆਦਿ ਵਚਨਂ ਪਟਿਕ੍ਖਿਪਨ੍ਤੋ ‘‘ਯਥਾਚਾ’’ਤਿਆਦਿਮਾਹ. ‘‘ਰੂਪਾਰੂਪ ਧਮ੍ਮੇਸੂ’’ਤਿ ਨਿਦ੍ਧਾਰਣੇ ਭੁਮ੍ਮ ਵਚਨਂ. ‘‘ਅਰੂਪ ਧਮ੍ਮੇਸੁ ਏਵਾ’’ਤਿ ਨਿਦ੍ਧਾਰਣੀਯਂ. ਨ ਰੂਪ ਧਮ੍ਮੇਸੁ ਫਰਨ੍ਤਿ. ਏਵਂ ਸਤਿ, ਕਸ੍ਮਾ ਤੇ ਰੂਪ ਧਮ੍ਮਾ ਝਾਨਪਚ੍ਚਯੁਪ੍ਪਨ੍ਨੇਸੁ ਵੁਤ੍ਤਾਤਿ ਆਹ ‘‘ਤੇ ਪਨਾ’’ਤਿਆਦਿਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ‘‘ਤਂ ਪਨ ਤੇਸਂ’’ਤਿ ਤੇਸਂ ਹਂਸਾਦੀਨਂ ਤਂ ਵਣ੍ਣਵਿਸੇਸਂ. ‘‘ਯੋਨਿਯੋ’’ਤਿ ਮਾਤਾਪਿਤੁ ਜਾਤਿਯੋ. ‘‘ਅਬ੍ਯਾਕਤਾਨਂ ਪਨਾਤਿ ਸਬ੍ਬਂ’’ਤਿ ਅਬ੍ਯਾਕਤਾਨਂ ਪਨ ਅਬ੍ਯਾਕਤਭਾਵੋ ਨਿਰਨੁਸਯ ਸਨ੍ਤਾਨਪ੍ਪਟਿ ਬਦ੍ਧੋ, ਕਮ੍ਮਪ੍ਪਟਿ ਬਦ੍ਧੋ, ਅਵਿਪਾਕਭਾਵਪ੍ਪਟਿ ਬਦ੍ਧੋ ਚਾਤਿ ਦਟ੍ਠਬ੍ਬਨ੍ਤਿ ਇਦਂ ਸਬ੍ਬਂ. ‘‘ਵੁਤ੍ਤ ਪਕ੍ਖੇਪਤਤਿ ਯੇਵਾ’’ਤਿ ਤਸ੍ਮਿਂ ਪਕ੍ਖੇ ਅਨ੍ਤੋਗਧਮੇਵਾਤਿ ਅਧਿਪ੍ਪਾਯੋ.

੧੩੨. ਕਿਚ੍ਚਸਙ੍ਗਹੇ. ਤਸ੍ਮਿਂ ਪਰਿਕ੍ਖੀਣੇਤਿ ਸਮ੍ਬਨ੍ਧੋ. ‘‘ਕਮ੍ਮਸ੍ਸਾ’’ਤਿ ਕਮ੍ਮਨ੍ਤਰਸ੍ਸ. ਚੁਤਸ੍ਸ ਸਤ੍ਤਸ੍ਸ ਅਭਿਨਿਬ੍ਬਤ੍ਤੀਤਿ ਸਮ੍ਬਨ੍ਧੋ. ‘‘ਭਵਨ੍ਤਰਾਦਿਪ੍ਪਟਿ ਸਨ੍ਧਾਨ ਵਸੇਨਾ’’ਤਿ ਭਵਨ੍ਤਰਸ੍ਸ ਆਦਿਕੋਟਿਯਾ ਪਟਿਸਨ੍ਧਾਨ ਵਸੇਨ. ਭਵਸਨ੍ਤਾਨਸ੍ਸ ਪਵਤ੍ਤੀਤਿ ਸਮ੍ਬਨ੍ਧੋ. ਕਥਂ ਪਵਤ੍ਤੀਤਿ ਆਹ ‘‘ਯਾਵ ਤਂ ਕਮ੍ਮਂ’’ਤਿਆਦਿਂ. ‘‘ਅਵਿਚ੍ਛੇਦਪ੍ਪਵਤ੍ਤਿ ਪਚ੍ਚਯਙ੍ਗਭਾਵੇਨਾ’’ਤਿ ਅਵਿਚ੍ਛੇਦਪ੍ਪਵਤ੍ਤਿਯਾ ਪਧਾਨ ਪਚ੍ਚਯ ਸਙ੍ਖਾਤੇਨ ਅਙ੍ਗਭਾਵੇਨ. ਏਤੇਨ ਭਵਙ੍ਗਪਦੇ ਅਙ੍ਗਸਦ੍ਦਸ੍ਸ ਅਤ੍ਥਂ ਵਦਤਿ. ਤੇਨਾਹ ‘‘ਤਸ੍ਸਹੀ’’ਤਿਆਦਿਂ. ‘‘ਤਸ੍ਸਾ’’ਤਿ ਭਵਙ੍ਗਸ੍ਸ. ਆਵਜ੍ਜਨਂ ਆਵਟ੍ਟਨਨ੍ਤਿ ਏਕੋ ਵਚਨਤ੍ਥੋ. ਤਂ ਵਾ ਆਵਜ੍ਜੇਤੀਤਿ ਏਕੋ. ‘‘ਤਂ’’ਤਿ ਚਿਤ੍ਤ ਸਨ੍ਤਾਨਂ. ਆਵਟ੍ਟਤਿ ਵਾ ਤਂ ਏਤ੍ਥਾਤਿ ਏਕੋ. ਆਵਟ੍ਟਤਿ ਵਾ ਤਂ ਏਤੇਨਾਤਿ ਏਕੋ. ‘‘ਤਂ’’ਤਿ ਚਿਤ੍ਤ ਸਨ੍ਤਾਨਂ. ਆਵਜ੍ਜੇਤਿ ਵਾਤਿ ਏਕੋ. ‘‘ਵੋਟ੍ਠਬ੍ਬਨਂ’’ਤਿ ਵਿ-ਅਵ-ਠਪਨਂਤਿ ਪਦਚ੍ਛੇਦੋ. ਵਿਭਾਵਨਿ ਵਿਚਾਰਣਾਯਂ. ‘‘ਏਕਾਵਜ੍ਜਨ ਪਰਿਕਮ੍ਮ ਚਿਤ੍ਤਤੋ’’ਤਿ ਮਗ੍ਗੇਨ ਵਾ ਅਭਿਞ੍ਞਾਯ ਵਾ ਏਕਂ ਸਮਾਨਂ ਆਵਜ੍ਜਨਂ ਅਸ੍ਸਾਤਿ ਵਿਗ੍ਗਹੋ. ਤਸ੍ਸਂ ਵੀਥਿਯਂ ‘ਆਵਜ੍ਜਨਂ, ਪਰਿਕਮ੍ਮਂ, ਉਪਚਾਰੋ, ਅਨੁਲੋਮਂ, ਗੋਤ੍ਰਭੂ,ਤਿ ਏਤ੍ਥ ਪਰਿਕਮ੍ਮ ਜਵਨਚਿਤ੍ਤਂ ਇਧ ਪਰਿਕਮ੍ਮ ਚਿਤ੍ਤਨ੍ਤਿ ਵੁਤ੍ਤਂ. ‘‘ਤਾਨੀ’’ਤਿ ਮਗ੍ਗਾ ਭਿਞ੍ਞਾਜਵਨਾਨਿ. ‘‘ਤਤ੍ਥਾ’’ਤਿ ਤਸ੍ਮਿਂ ਵਿਭਾਵਨਿ ਪਾਠੇ. ‘‘ਦੀਘਂ ਅਦ੍ਧਾਨਂ’’ਤਿ ਸਕਲਰਤ੍ਤਿਯਂ ਵਾ ਸਕਲ ਦਿਵਸਂ ਵਾ ਨਿਦ੍ਦੋਕ੍ਕਮਨ ਵਸੇਨ ਦੀਘਂ ਕਾਲਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ‘‘ਪਟਿਸਨ੍ਧਿਯਾਠਾਨਂ’’ਤਿ ਪਟਿਸਨ੍ਧਿਕਿਚ੍ਚਸ੍ਸ ਠਾਨਂ. ਕਾਲੋਹਿ ਨਾਮ ਵਿਸੁਂ ਚਿਤ੍ਤਸ੍ਸ ਆਰਮ੍ਮਣ ਭੂਤੋ ਏਕੋ ਪਞ੍ਞਤ੍ਤਿ ਧਮ੍ਮੋਤਿ ਏਤੇਨ ਕਾਲੋ ਨਾਮ ਸਭਾਵਤੋ ਅਵਿਜ੍ਜਮਾਨਤ੍ਤਾ ਕਥਂ ਕਿਚ੍ਚਾਨਂ ਪਵਤ੍ਤਿਟ੍ਠਾਨਂ ਨਾਮ ਸਕ੍ਕਾ ਭਵਿਤੁਨ੍ਤਿ ਇਮਂ ਆਸਙ੍ਕਂ ਵਿਸੋਧੇਤਿ. ‘‘ਇਤਰਥਾ’’ਤਿ ਤਥਾ ਅਗ੍ਗਹੇਤ੍ਵਾ ਅਞ੍ਞਥਾ ਕਿਚ੍ਚਟ੍ਠਾਨਾਨਂ ਅਭੇਦੇ ਗਹਿਤੇ ਸਤੀਤਿ ਅਤ੍ਥੋ. ‘‘ਸਯਂ ਸੋਮਨਸ੍ਸ ਯੁਤ੍ਤਂਪੀ’’ਤਿ ਕਦਾਚਿ ਸਯਂ ਸੋਮਨਸ੍ਸ ਯੁਤ੍ਤਂਪਿ. ‘‘ਤਂ’’ਤਿ ਸੋਮਨਸ੍ਸ ਸਨ੍ਤੀਰਣਂ. ‘‘ਲਦ੍ਧਪਚ੍ਚਯ ਭਾਵੇਨਾ’’ਤਿ ਲਦ੍ਧਅਨਨ੍ਤਰ ਪਚ੍ਚਯਭਾਵੇਨ. ‘‘ਆਸੇਵਨ ਭਾਵ ਰਹਿਤਂ ਪੀ’’ਤਿ ਆਸੇਵਨ ਗੁਣ ਰਹਿਤਮ੍ਪਿ. ਤਞ੍ਹਿ ਆਸੇਵਨ ਪਚ੍ਚਯੇ ਪਚ੍ਚਯੋਪਿ ਨ ਹੋਤਿ, ਪਚ੍ਚਯੁਪ੍ਪਨ੍ਨਮ੍ਪਿ ਨ ਹੋਤੀਤਿ. ‘‘ਪਰਿਕਮ੍ਮ ਭਾਵਨਾ ਬਲੇਨ ਚ ਪਵਤ੍ਤਤ੍ਤਾ’’ਤਿ ਇਦਂ ਫਲਸਮਾਪਤ੍ਤਿ ਵੀਥਿਯਂ ਫਲਜਵਨੇਸੁ ਪਾਕਟਂ. ਸੇਸਮੇਤ੍ਥਸੁਬੋਧਮੇਵ.

੧੩੩. ਦ੍ਵਾਰਸਙ੍ਗਹੇ. ‘‘ਆਦਾਸਪਟ੍ਟਮਯੋ’’ਤਿ ਆਦਾਸਪਟ੍ਟੇਨ ਪਕਤੋ. ‘‘ਦ੍ਵੇ ਏਵਾ’’ਤਿ ਦ੍ਵੇ ਏਵ ਦ੍ਵਾਰਾਨਿ. ‘‘ਦ੍ਵਾਰ ਸਦਿਸਤ੍ਤਾ’’ਤਿ ਨਗਰ ਦ੍ਵਾਰ ਸਦਿਸਤ੍ਤਾ. ‘‘ਕਮ੍ਮਵਿਸੇਸ ਮਹਾਭੂਤ ਵਿਸੇਸ ਸਿਦ੍ਧੇਨਾ’’ਤਿ ਏਤ੍ਥ ਕਮ੍ਮਵਿਸੇਸੇਨ ਚ ਮਹਾਭੂਤ ਵਿਸੇਸੇਨ ਚ ਸਿਦ੍ਧੋਤਿ ਵਿਗ੍ਗਹੋ. ਆਵਜ੍ਜਨਾਦੀਨਿ ਚ ਵੀਥਿ ਚਿਤ੍ਤਾਨਿ ਗਣ੍ਹਨ੍ਤਿ. ‘‘ਯਮ੍ਹੀ’’ਤਿ ਯਸ੍ਮਿਂ ਚਕ੍ਖੁਮ੍ਹਿ. ਤਦੇਵ ਚਕ੍ਖੁ ਚਕ੍ਖੁਦ੍ਵਾਰਂ ਨਾਮਾਤਿ ਸਮ੍ਬਨ੍ਧੋ. ‘‘ਤੇਸਂ ਦ੍ਵਿਨ੍ਨਂ’’ਤਿ ਰੂਪ ਨਿਮਿਤ੍ਤਾਨਞ੍ਚ ਆਵਜ੍ਜਨਾਦਿ ਵੀਥਿਚਿਤ੍ਤਾਨਞ੍ਚ. ‘‘ਵਿਸਯ ਵਿਸਯੀ ਭਾਵੂਪਗਮਨਸ੍ਸਾ’’ਤਿ ਏਤ੍ਥ ਰੂਪ ਨਿਮਿਤ੍ਤਾਨਂ ਵਿਸਯਭਾਵਸ੍ਸ ਉਪਗਮਨਂ ਨਾਮ ਚਕ੍ਖੁ ਮਣ੍ਡੇ ਆਪਾਤਾਗਮਨਂ ਵੁਚ੍ਚਤਿ. ਆਵਜ੍ਜਨਾਦੀਨਂ ਵਿਸਯੀ ਭਾਵਸ੍ਸ ਉਪਗਮਨਂ ਨਾਮ ਤੇਸਂ ਨਿਮਿਤ੍ਤਾਨਂ ਆਰਮ੍ਮਣ ਕਰਣਂ ਵੁਚ੍ਚਤਿ. ‘‘ਮੁਖਪ੍ਪਥਭੂਤਤ੍ਤਾ’’ਤਿ ਮੁਖਮਗ੍ਗਭੂਤਤ੍ਤਾ. ਏਵਂ ਦ੍ਵਾਰ ਸਦ੍ਦਸ੍ਸ ਕਰਣ ਸਾਧਨਯੁਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਅਧਿਕਰਣ ਸਾਧਨ ਯੁਤ੍ਤਿਂ ਦਸ੍ਸੇਤਿ ‘‘ਅਥਵਾ’’ਤਿਆਦਿਨਾ. ‘‘ਰੂਪਾਨਂ’’ਤਿ ਰੂਪ ਨਿਮਿਤ੍ਤਾਨਂ. ‘‘ਚਕ੍ਖੁਮੇਵ ਚਕ੍ਖੁ ਦ੍ਵਾਰ’’ਨ੍ਤਿ ਏਤੇਨ ਚਕ੍ਖੁਮੇਵ ਦ੍ਵਾਰਂ ਚਕ੍ਖੁ ਦ੍ਵਾਰਨ੍ਤਿ ਅਵਧਾਰਣ ਸਮਾਸਂ ਦਸ੍ਸੇਤਿ. ‘‘ਕਾਰਣਂ ਵੁਤ੍ਤਮੇਵਾ’’ਤਿ ਹੇਟ੍ਠਾ ਚਿਤ੍ਤਸਙ੍ਗਹੇ ਮਨੋਦ੍ਵਾਰਾਵਜ੍ਜਨਪਦੇ ਵੁਤ੍ਤਮੇਵ. ਸਬ੍ਬਂ ਏਕੂਨ ਨਵੁਤਿਵਿਧਂ ਚਿਤ੍ਤਂ ਮਨੋਦ੍ਵਾਰਮੇਵ ਨਾਮ ਹੋਤਿ. ਤਥਾਹਿ ਵੁਤ੍ਤਂ ਅਟ੍ਠਸਾਲਿਨਿਯਂ ਅਯਂ ਨਾਮਮਨੋ ਮਨੋਦ੍ਵਾਰਂ ਨਾਮ ਨ ਹੋਤੀਤਿ ਨ ਵਤ੍ਤਬ੍ਬੋਤਿ. ‘‘ਉਪਪਤ੍ਤਿ ਦ੍ਵਾਰਮੇਵਾ’’ਤਿ ਉਪਪਤ੍ਤਿਭਵ ਪਰਿਯਾਪਨ੍ਨਂ ਕਮ੍ਮਜਦ੍ਵਾਰਮੇਵ. ‘‘ਇਧ ਚਾ’’ਤਿ ਇਮਸ੍ਮਿਂ ਸਙ੍ਗਹਗਨ੍ਥੇ ਚ. ਯਞ੍ਚ ਸਾਧਕ ਵਚਨਨ੍ਤਿ ਸਮ੍ਬਨ੍ਧੋ. ‘‘ਤਤ੍ਥਾ’’ਤਿ ਵਿਭਾਵਨਿਯਂ. ‘‘ਤਤ੍ਥੇਵ ਤਂ ਯੁਤ੍ਤਂ’’ਤਿ ਤਸ੍ਮਿਂ ਪਾਲ਼ਿਪ੍ਪਦੇਸੇ ਏਵ ਤਂ ਸਾਧਕ ਵਚਨਂ ਯੁਤ੍ਤਂ. ਇਤਰੇ ਦ੍ਵੇ ਪਚ੍ਚਯਾਤਿ ਸਮ੍ਬਨ੍ਧੋ. ‘‘ਮਨਞ੍ਚਾਤਿ ਏਤ੍ਥਾ’’ਤਿ ਮਨਞ੍ਚ ਪਟਿਚ੍ਚ ਧਮ੍ਮੇ ਚ ਉਪ੍ਪਜ੍ਜਤਿ ਮਨੋਵਿਞ੍ਞਾਣਂਤਿ ਵਾਕ੍ਯੇ ਮਨਞ੍ਚਾਤਿਪਦੇ. ਤਤ੍ਥ ਪਨ ਜਵਨ ਮਨੋਵਿਞ੍ਞਾਣਸ੍ਸ ਉਪ੍ਪਤ੍ਤਿਯਾ ਚਤੂਸੁ ਪਚ੍ਚਯੇਸੁ ਮਨਞ੍ਚਾਤਿ ਏਤ੍ਥ ਦ੍ਵਾਰਭੂਤਂ ਭਵਙ੍ਗਮਨੋ ਚ ਆਵਜ੍ਜਨ ਮਨੋ ਚਾਤਿ ਦ੍ਵੇ ਪਚ੍ਚਯਾ ਲਬ੍ਭਨ੍ਤਿ. ਧਮ੍ਮੇ ਚਾਤਿ ਪਦੇ ਧਮ੍ਮਾਰਮ੍ਮਣ ਸਙ੍ਖਾਤੋ ਏਕੋ ਪਚ੍ਚਯੋ ਲਬ੍ਭਤਿ. ਚ ਸਦ੍ਦੇਨ ਮਨੋਵਿਞ੍ਞਾਣ ਸਮ੍ਪਯੁਤ੍ਤਕ੍ਖਨ੍ਧਾ ਗਯ੍ਹਨ੍ਤਿ. ਏਵਂ ਚਤ੍ਤਾਰੋ ਪਚ੍ਚਯਾ ਹੋਨ੍ਤਿ. ‘‘ਏਤ੍ਥ ਚਾ’’ਤਿ ਇਮਸ੍ਮਿਂ ਅਟ੍ਠਕਥਾ ਵਚਨੇ. ‘‘ਸਨ੍ਨਿਹਿਤ ਪਚ੍ਚਯਾਨਂ ਏਵ ਤਤ੍ਥ ਅਧਿਪ੍ਪੇਤਤ੍ਤਾ’’ਤਿ ਪਟਿਚ੍ਚ ਸਦ੍ਦਸਾਮਤ੍ਥਿਯੇਨ ਆਸਨ੍ਨੇ ਧਰਮਾਨਪਚ੍ਚਯਾਨਂ ਏਵ ਤਸ੍ਮਿਂ ਪਾਲ਼ਿਵਾਕ੍ਯੇ ਅਧਿਪ੍ਪੇਤਤ੍ਤਾ. ‘‘ਦ੍ਵਾਰਭਾਵਾਰਹਸ੍ਸਾ’’ਤਿ ਵਿਸਯ ਵਿਸਯੀਨਂ ਵੁਤ੍ਤ ਨਯੇਨ ਪਵਤ੍ਤਿ ਮੁਖਭਾਵਾਰਹਸ੍ਸ. ਏਤੇਨ ਆਰਮ੍ਮਣਾਨਿ ਆਪਾਤਂ ਆਗਚ੍ਛਨ੍ਤੁ ਵਾ, ਮਾਵਾ, ਵੀਥਿ ਚਿਤ੍ਤਾਨਿ ਪਵਤ੍ਤਨ੍ਤੁਵਾ, ਮਾਵਾ, ਅਪ੍ਪਮਾਣਂ. ਪਭਸ੍ਸਰਪ੍ਪਸਨ੍ਨਭਾਵੇਨ ਦ੍ਵਾਰਭਾਵਾ ਰਹਤਾ ਏਵ ਪਮਾਣਨ੍ਤਿ ਦੀਪੇਤਿ. ‘‘ਨਿਟ੍ਠਮੇਤ੍ਥ ਗਨ੍ਤਬ੍ਬਂ’’ਤਿ ਸਨ੍ਨਿਟ੍ਠਾਨਂ ਏਤ੍ਥ ਗਨ੍ਤਬ੍ਬਂ. ਦ੍ਵਾਰਵਿਕਾਰ ਮੂਲਕਾਨਿ ਤਾਦਿਸਾਨਿ ਕਿਚ੍ਚਾਨਿ ਯੇਸਂ ਤਾਨਿ ਤਂ ਕਿਚ੍ਚਵਨ੍ਤਾਨਿ. ‘‘ਕਮ੍ਮਵਸੇਨ ਸਿਜ੍ਝਨ੍ਤੀ’’ਤਿ ਸਤ੍ਤਸਨ੍ਤਾਨੇ ਪਵਤ੍ਤਨ੍ਤੀਤਿ ਅਧਿਪ੍ਪਾਯੋ. ਤਂ ਕਿਚ੍ਚਵਨ੍ਤਾਨਿ ਚਿਤ੍ਤਾਨਿ. ਵਿਭਾਵਨਿ ਪਾਠੇ ‘‘ਮਨੋਦ੍ਵਾਰ ਸਙ੍ਖਾਤ ਭਵਙ੍ਗਤੋ’’ਤਿ ਮਨੋਦ੍ਵਾਰ ਸਙ੍ਖਾਤ ਭਵਙ੍ਗ ਭਾਵਤੋ ਚ. ‘‘ਆਰਮ੍ਮਣਨ੍ਤਰਗ੍ਗਹਣਵਸੇਨ ਅਪ੍ਪਵਤ੍ਤਿਤੋ’’ਤਿ ਪਟਿਸਨ੍ਧਿ ਚਿਤ੍ਤੇਨ ਯਥਾ ਗਹਿਤਂ ਕਮ੍ਮਕਮ੍ਮਨਿਮਿਤ੍ਤਾਦਿਕਂ ਆਰਮ੍ਮਣਂ ਮੁਞ੍ਚਿਤ੍ਵਾ ਪਵਤ੍ਤਿਕਾਲੇ ਛਸੁ ਦ੍ਵਾਰੇਸੁ ਆਪਾਤਾਗਤਸ੍ਸ ਆਰਮ੍ਮਣਨ੍ਤਰਸ੍ਸ ਗਹਣ ਵਸੇਨ ਅਪ੍ਪਵਤ੍ਤਿਤੋ ਚ. ਹੇਟ੍ਠਾਪਿ ਪਞ੍ਚਦ੍ਵਾਰਾ ਵਜ੍ਜਨ ਚਕ੍ਖੁ ਵਿਞ੍ਞਾਣ ਸਮ੍ਪਟਿਚ੍ਛਨ ਸਨ੍ਤੀਰਣ ਵੋਟ੍ਠਬ੍ਬਨ ਕਾਮਾਵਚਰਜਵਨ ਤਦਾ ਰਮ੍ਮਣ ਵਸੇਨਾਤਿਆਦਿਨਾ ਕਿਚ੍ਚਸੀਸੇਨੇਵ. ਲ. ਵੁਤ੍ਤੋ. ਏਤ੍ਥਹਿ ਆਵਜ੍ਜਨ ਸਮ੍ਪਟਿਚ੍ਛਨਾਦੀਨਿ ਕਿਚ੍ਚ ਵਿਸੇਸਾਨਂ ਨਾਮਾਨਿ ਹੋਨ੍ਤਿ. ‘‘ਚੇ’’ਤਿ ਚੇ ਵਦੇਯ੍ਯ. ‘‘ਨਾ’’ਤਿ ਨ ਵਤ੍ਤਬ੍ਬਂ. ‘‘ਤਥਾ ਅਸ੍ਸੁਤਤ੍ਤਾ’’ਤਿ ਏਕੂਨ ਵੀਸਤਿ ਦ੍ਵਾਰ ਵਿਮੁਤ੍ਤਾਨੀਤਿ ਚ, ਛ ਦ੍ਵਾਰਿਕਾਨਿ ਚੇਵ ਦ੍ਵਾਰ ਵਿਮੁਤ੍ਤਾਨੀਤਿ ਚ, ਮਹਗ੍ਗਤ ਵਿਪਾਕਾਨਿ ਦ੍ਵਾਰ ਵਿਮੁਤ੍ਤਾਨੇ ਵਾਤਿ ਚ, ਸੁਤਂ. ਨ ਪਨ ਦ੍ਵਾਰਿਕ ਵਿਮੁਤ੍ਤਾਨੀਤਿ ਸੁਤਂ.

੧੩੪. ਆਰਮ੍ਮਣ ਸਙ੍ਗਹੇ. ‘‘ਦੁਬ੍ਬਲ ਪੁਰਿਸੇਨਾ’’ਤਿ ਗੇਲਞ੍ਞਾਭਿਭੂਤਤ੍ਤਾ ਵਾ ਜਰਾਭਿਭੂਤਤ੍ਤਾ ਵਾ ਦਣ੍ਡੇਨ ਵਾ ਰਜ੍ਜੁਕੇਨ ਵਾ ਵਿਨਾ ਉਟ੍ਠਾਤੁਮ੍ਪਿ ਪਤਿਟ੍ਠਾਤੁਮ੍ਪਿ ਅਪਰਾਪਰਂ ਗਨ੍ਤੁਮ੍ਪਿ ਅਸਕ੍ਕੋਨ੍ਤੇਨ ਦੁਬ੍ਬਲ ਪੁਰਿਸੇਨ ਦਣ੍ਡਕਂ ਵਾ ਰਜ੍ਜੁਕਂ ਵਾ ਆਲਮ੍ਬਿਯਤਿ. ਆਲਮ੍ਬਿਤ੍ਵਾ ਉਟ੍ਠਾਤਿ. ਪਤਿਟ੍ਠਾਤਿ. ਅਪਰਾਪਰਂ ਗਚ੍ਛਤਿ. ਏਵਮੇਵ. ਅਮੁਞ੍ਚ ਮਾਨੇਹਿ ਹੁਤ੍ਵਾਤਿ ਪਾਠਸੇਸੋ. ‘‘ਆਗਨ੍ਤ੍ਵਾ’’ਤਿ ਆਰਮ੍ਮਣ ਕਰਣ ਵਸੇਨ ਤਤੋ ਤਤੋ ਆਗਨ੍ਤ੍ਵਾ. ‘‘ਵਿਸੁਂ ਸਿਦ੍ਧਾਨੀ’’ਤਿ ਆਲਮ੍ਬਿਯਤੀਤਿ ਏਤਸ੍ਮਿਂ ਅਤ੍ਥੇ ਸਤਿ, ਆਲਮ੍ਬਣਨ੍ਤਿ ਸਿਜ੍ਝਤਿ. ਆਰਮ੍ਮਣਨ੍ਤਿ ਨ ਸਿਜ੍ਝਤਿ. ਤਾਨਿ ਏਤ੍ਥ ਆਗਨ੍ਤ੍ਵਾ ਰਮਨ੍ਤੀਤਿ ਏਤਸ੍ਮਿਂ ਅਤ੍ਥੇ ਸਤਿ, ਆਰਮ੍ਮਣਨ੍ਤਿ ਸਿਜ੍ਝਤਿ. ਆਲਮ੍ਬਣਨ੍ਤਿ ਨ ਸਿਜ੍ਝਤਿ. ਏਵਞ੍ਚ ਸਤਿ ਏਕਂ ਪਦਂ ਦ੍ਵੀਹਿਵਾਕ੍ਯੇਹਿ ਦਸ੍ਸਨਂ ਨ ਸੁਨ੍ਦਰਨ੍ਤਿ. ‘‘ਅਞ੍ਞਾਨਿ ਆਰਮ੍ਮਣਾਨੀ’’ਤਿ ਰੂਪਾਰਮ੍ਮਣਤੋ ਅਞ੍ਞਾਨਿ ਸਦ੍ਦਾਰਮ੍ਮਣਾਦੀਨਿ. ‘‘ਆਗਚ੍ਛਤੀ’’ਤਿ ਆਵਿਭਾਵਂ ਗਚ੍ਛਤਿ, ਉਪ੍ਪਾਦਪ੍ਪਵਤ੍ਤਿ ਵਸੇਨ ਪਚ੍ਚਕ੍ਖਭਾਵਂ ਪਾਪੁਣਾਤਿ. ‘‘ਆਗਚ੍ਛਿਤ੍ਥਾ’’ਤਿ ਆਵਿਭਾਵਂ ਗਚ੍ਛਿਤ੍ਥ, ਉਪ੍ਪਾਦਪ੍ਪਵਤ੍ਤਿ ਵਸੇਨ ਪਚ੍ਚਕ੍ਖਭਾਵਂ ਪਾਪੁਣਿਤ੍ਥ. ‘‘ਅਨਾਗਤਂ’’ਤਿ ਏਤ੍ਥ ਨ ਕਾਰੋ ਅਵਤ੍ਥਾ ਵਸੇਨ ਪਟਿਸੇਧੋ. ਯੋ ਧਮ੍ਮੋ ਪਚ੍ਚਯ ਸਾਮਗ੍ਗਿਯਂ ਸਤਿ ਆਗਮਨ ਜਾਤਿਕੋ ਉਪ੍ਪਜ੍ਜਨ ਸੀਲੋ. ਸੋ ਏਵ ਇਦਾਨਿ ਆਗਚ੍ਛਤਿ, ਇਦਾਨਿ ਆਗਚ੍ਛਿਤ੍ਥ, ਇਦਾਨਿ ਆਗਮਨ ਜਾਤਿਯਂ ਠਿਤੋ, ਨਾਗਚ੍ਛਤਿ ਨਾਗਚ੍ਛਿਤ੍ਥਾਤਿ ਇਮਿਨਾ ਅਤ੍ਥੇਨ ਸੋ ਅਨਾਗਤੋ ਨਾਮ. ਨਿਬ੍ਬਾਨ ਪਞ੍ਞਤ੍ਤਿਯੋ ਪਨ ਆਗਮਨ ਜਾਤਿਕਾ ਨ ਹੋਨ੍ਤਿ. ਤਸ੍ਮਾ ਆਗਮਨਪ੍ਪਸਙ੍ਗਾਭਾਵਤੋ ਅਨਾਗਤਾਤਿ ਨ ਵੁਚ੍ਚਨ੍ਤੀਤਿ. ਤੇਨਾਹ ‘‘ਉਪ੍ਪਾਦ ਜਾਤਿਕਾ’’ਤਿਆਦਿਂ. ‘‘ਤਂ ਵਿਚਾਰੇਤਬ੍ਬਂ’’ਤਿ ਵਤ੍ਵਾ ਵਿਚਾਰਣਾਕਾਰਂ ਦਸ੍ਸੇਤਿ ‘‘ਸਬ੍ਬੇਪਿਹੀ’’ਤਿਆਦਿਨਾ. ਤੇ ਯਦਾ ਵਤ੍ਤਬ੍ਬ ਪਕ੍ਖੇ ਤਿਟ੍ਠਨ੍ਤੀਤਿ ਸਮ੍ਬਨ੍ਧੋ. ਉਪ੍ਪਾਦ ਜਾਤਿਕਾਨਞ੍ਞੇਵ ਸਙ੍ਖਤ ਧਮ੍ਮਾਨਂ. ਤਾਸਂ ਨਿਬ੍ਬਾਨ ਪਞ੍ਞਤ੍ਤੀਨਂ. ‘‘ਨ ਤਥਾ ਇਮੇਸਂ’’ਤਿ ਇਮੇਸਂ ਦ੍ਵਾਰ ਵਿਮੁਤ੍ਤਾਨਂ ਆਰਮ੍ਮਣਂ ਪਨ ਤਥਾ ਨ ਹੋਤੀਤਿ ਯੋਜਨਾ. ‘‘ਤਤ੍ਥਾ’’ਤਿ ਤਸ੍ਮਿਂ ਭਵ ਵਿਸੇਸੇ. ਵਿਭਾਵਨਿਪਾਠੇ ‘‘ਆਵਜ੍ਜਨਸ੍ਸਵਿਯਾ’’ਤਿ ਆਵਜ੍ਜਨਸ੍ਸ ਆਰਮ੍ਮਣਂ ਵਿਯ. ਅਗ੍ਗਹਿਤਮੇਵ ਹੁਤ੍ਵਾ. ‘‘ਏਕਵਜ੍ਜਨ ਵੀਥਿਯਂ ਅਗ੍ਗਹਿਤ ਭਾਵੋ ਇਧ ਨ ਪਮਾਣ’’ਨ੍ਤਿ ਛ ਦ੍ਵਾਰਗ੍ਗਹਿਤਨ੍ਤਿ ਇਧ ਅਪ੍ਪਮਾਣਂ. ਭਵਨ੍ਤਰੇ ਗਹਿਤਸ੍ਸ ਅਧਿਪ੍ਪੇਤਤ੍ਤਾ. ‘‘ਕਾਲਵਿਮੁਤ੍ਤ ਸਾਮਞ੍ਞਂ’’ਵਾਤਿ ਯਂ ਕਿਞ੍ਚਿਕਾਲ ਵਿਮੁਤ੍ਤਂ ਵਾ ਨ ਹੋਤੀਤਿ ਅਧਿਪ੍ਪਾਯੋ. ਆਗਮਸਿਦ੍ਧਿ ਵੋਹਾਰੋ ਨਾਮ ‘‘ਕਮ੍ਮਨ੍ਤਿ ਵਾ, ਕਮ੍ਮਨਿਮਿਤ੍ਤਨ੍ਤਿ ਵਾ, ਗਤਿ ਨਿਮਿਤ੍ਤਨ੍ਤਿ ਵਾ, ਪਸਿਦ੍ਧੋ ਵੋਹਾਰੋ ਵੁਚ੍ਚਤਿ. ਅਜਾਤ ਸਤ੍ਤੁਰਾਜਾ ਸਙ੍ਕਿਚ੍ਚਜਾਤਕੇਪਿ ਪਿਤਰਂ ਮਾਰੇਤਿ. ਤਸ੍ਮਾ ‘‘ਦ੍ਵੀਸੁਭਵੇਸੂ’’ਤਿ ਵੁਤ੍ਤਂ. ‘‘ਛ ਹਿ ਦ੍ਵਾਰੇਹੀ’’ਤਿ ਕਰਣ ਭੂਤੇਹਿ ਛਹਿ ਚਕ੍ਖਾਦਿ ਦ੍ਵਾਰੇਹਿ. ‘‘ਮਰਣਾਸਨ੍ਨ ਜਵਨੇਹੀ’’ਤਿ ਕਤ੍ਤੁ ਭੂਤੇਹਿ ਮਰਣਾਸਨ੍ਨੇ ਪਵਤ੍ਤੇਹਿ ਛ ਦ੍ਵਾਰਿਕ ਜਵਨੇਹਿ. ‘‘ਅਨੇਕਂ ਸਭਾਵਂ’’ਤਿ ਅਨੇਕਨ੍ਤ ਭਾਵਂ. ਯਞ੍ਹਿ ਆਰਮ੍ਮਣਨ੍ਤਿ ਸਮ੍ਬਨ੍ਧੋ. ‘‘ਕੇਨਚਿ ਦ੍ਵਾਰੇਨ ਅਗ੍ਗਹਿਤਮੇਵ ਹੋਤੀ’’ਤਿ ਏਤ੍ਥ ਅਸਞ੍ਞੀ ਭਵਤੋ ਚੁਤਾਨਂ ਸਤ੍ਤਾਨਂ ਕਾਮਪਟਿਸਨ੍ਧਿਯਾ ਕਮ੍ਮਾਦਿ ਆਰਮ੍ਮਣਂ ਭਵਨ੍ਤਰੇ ਕੇਨਚਿ ਦ੍ਵਾਰੇਨ ਅਗ੍ਗਹਿਤਨ੍ਤਿ ਯੁਤ੍ਤਂ. ਕਸ੍ਮਾ, ਤਸ੍ਮਿਂ ਭਵੇ ਕਸ੍ਸਚਿਦ੍ਵਾਰਸ੍ਸੇਵ ਅਭਾਵਤੋ. ਅਰੂਪਭਵਤੋ ਚੁਤਾਨਂ ਪਨ ਕਾਮਪਟਿਸਨ੍ਧਿਯਾ ਗਤਿ ਨਿਮਿਤ੍ਤ ਸਮ੍ਮਤਂ ਆਰਮ੍ਮਣਂ ਕਥਂ ਭਵਨ੍ਤਰੇ ਕੇਨਚਿ ਦ੍ਵਾਰੇਨ ਅਗ੍ਗਹਿਤਂ ਭਵੇਯ੍ਯ, ਮਨੋਦ੍ਵਾਰਗ੍ਗਹਿਤਮੇਵ ਭਵੇਯ੍ਯਾਤਿ ਇਮਂ ਚੋਦਨਂ ਵਿਸੋਧੇਤੁਂ ‘‘ਏਤ੍ਥ ਚ ਯਸ੍ਮਾ ਪਟ੍ਠਾਨੇ’’ਤਿਆਦਿ ਵੁਤ੍ਤਂ. ਤਤੋ ਚੁਤਾਨਂ ਸਤ੍ਤਾਨਂ ਯਾ ਕਾਮਪਟਿਸਨ੍ਧਿ, ਤਸ੍ਸਾਕਾਮਪਟਿ ਸਨ੍ਧਿਯਾ. ਪਚ੍ਚੁਪ੍ਪਨ੍ਨਂ ਗਤਿਨਿਮਿਤ੍ਤਂ ਆਰਮ੍ਮਣਂ ਏਤਿਸ੍ਸਾਤਿ ਵਿਗ੍ਗਹੋ. ਕਾਮਪਟਿਸਨ੍ਧਿ. ਪਰੇਸਂ ਪਯੋਗ ਬਲੇਨਾਪਿ ਕਮ੍ਮਾਦੀਨਂ ਉਪਟ੍ਠਾਨਂ ਨਾਮ ਹੋਤੀਤਿਆਦਿਨਾ ਯੋਜੇਤਬ੍ਬਂ. ‘‘ਸੁਟ੍ਠੁ ਆਸੇਵਿਤਾਨਂ’’ਤਿ ਚਿਰਕਾਲਂ ਸਙ੍ਘ ਵਤ੍ਤ ਚੇਤਿਯਵਤ੍ਤ ਕਰਣਾਦਿਵਸੇਨ ਤਂ ਤਂ ਭਾਵਨਾ ਕਮ੍ਮਵਸੇਨ ਚ ਸੁਟ੍ਠੁ ਆਸੇਵਿਤਾਨਂ ਕਮ੍ਮਕਮ੍ਮਨਿਮਿਤ੍ਤਾਨਂ. ‘‘ਹੋਤਿ ਯੇਵਾ’’ਤਿ ਕਮ੍ਮਾਦੀਨਂ ਉਪਟ੍ਠਾਨਂ ਨਾਮ ਹੋਤਿਯੇਵ. ‘‘ਆਗਨ੍ਤ੍ਵਾ’’ਤਿ ਇਮਂ ਮਨੁਸ੍ਸ ਲੋਕਂ ਆਗਨ੍ਤ੍ਵਾ ਗਣ੍ਹਨ੍ਤਿਯੇਵ. ਤਦਾਪਿ ਨਿਰਯਪਾਲੇਹਿ ਦਸ੍ਸਿਤਂ ਤਂ ਤਂ ਗਤਿ ਨਿਮਿਤ੍ਤਂ ਆਰਮ੍ਮਣਂ ਕਤ੍ਵਾ ਚਵਨ੍ਤਿ. ‘‘ਤਂ’’ਤਿ ਰੇਵਤਿਂ ਨਾਮ ਇਤ੍ਥਿਂ. ਨਨੁ ਨਿਰਯਪਾਲਾ ਨਾਮ ਤਾਵਤਿਂਸਾ ਭਵਨਂ ਗਨ੍ਤੁਂ ਨ ਸਕ੍ਕੁਣੇਯ੍ਯੁਨ੍ਤਿ. ਨੋ ਨਸਕ੍ਕੁਣੇਯ੍ਯੁਂ. ਕਸ੍ਮਾ, ਮਹਿਦ੍ਧਿਕ ਯਕ੍ਖ ਜਾਤਿਕਤ੍ਤਾਤਿ ਦਸ੍ਸੇਤੁਂ ‘‘ਤੇਹੀ’’ਤਿਆਦਿ ਵੁਤ੍ਤਂ. ‘‘ਵੇਸ੍ਸਵਣ ਦੂਤਾ’’ਤਿ ਵੇਸ੍ਸਵਣਮਹਾਰਾਜਸ੍ਸ ਦੂਤਾ. ‘‘ਉਪਚਾਰਜ੍ਝਾਨੇਠਤ੍ਵਾ’’ਤਿ ਅਪ੍ਪਨਾਝਾਨਂ ਅਪਤ੍ਤਤਾਯ ਉਪਚਾਰਭਾਵਨਾਭੂਤੇ ਕਾਮਾਵਚਰਜ੍ਝਾਨੇਠਤ੍ਵਾ. ‘‘ਤਾਨੇਵ ਨਿਮਿਤ੍ਤਾਨੀ’’ਤਿ ਪਥਵੀਕਸਿਣ ਨਿਮਿਤ੍ਤਾਦੀਨਿ ਪਟਿਭਾਗ ਨਿਮਿਤ੍ਤਾਨਿ. ‘‘ਕਾਮਪਟਿਸਨ੍ਧਿਯਾ ਆਰਮ੍ਮਣਂ’’ਤਿ ਤੇਹਿ ਨਿਮਿਤ੍ਤਾਰਮ੍ਮਣੇਹਿ ਅਞ੍ਞਂ ਉਪਚਾਰ ਭਾਵਨਾ ਕਮ੍ਮਂ ਵਾ ਯਂ ਕਿਞ੍ਚਿ ਅਨੁਰੂਪਂ ਗਤਿ ਨਿਮਿਤ੍ਤਂ ਵਾ. ‘‘ਤਾਨੇਵ ਨਿਮਿਤ੍ਤਾਨਿ ਗਹੇਤ੍ਵਾ’’ਤਿ ਵਚਨੇਨ ਤਾਨਿ ਨਿਮਿਤ੍ਤਾਨਿ ਮਰਣਾਸਨ੍ਨ ਜਵਨੇਹਿ ਗਹਿਤਾਨੀਤਿ ਦਸ੍ਸੇਤਿ. ਤਾਨਿ ਚ ਪਞ੍ਞਤ੍ਤਿ ਧਮ੍ਮਤ੍ਤਾ ਕਾਮਪਟਿਸਨ੍ਧਿਯਾ ਆਰਮ੍ਮਣਂ ਨ ਹੋਨ੍ਤੀਤਿ. ‘‘ਪਚ੍ਚੁਪ੍ਪਨ੍ਨਗਤਿ ਨਿਮਿਤ੍ਤੇ ਸਿਦ੍ਧੇ ਸਿਦ੍ਧਮੇਵਾ’’ਤਿ ਤਸ੍ਮਿਂ ਭਵੇ ਗਤਸ੍ਸ ਤਤ੍ਥ ਯਾਵਜੀਵਮ੍ਪਿ ਅਨੁ ਭਵਿਤਬ੍ਬਂ ਆਰਮ੍ਮਣਂ ਨਾਮ ਤਸ੍ਮਿਂ ਖਣੇ ਧਰਮਾਨਂ ਪਚ੍ਚੁਪ੍ਪਨ੍ਨਮ੍ਪਿ ਅਤ੍ਥਿ. ਤਤੋ ਵਡ੍ਢਮਾਨਂ ਅਨਾਗਤਮ੍ਪਿ ਅਤ੍ਥਿ. ਤਤ੍ਥ ਪਚ੍ਚੁਪ੍ਪਨ੍ਨੇ ਉਪਟ੍ਠਹਨ੍ਤੇ ਪਟਿਸਨ੍ਧਿਯਾ ਆਰਮ੍ਮਣਂ ਸਮ੍ਪਜ੍ਜਤਿ. ਅਨਾਗਤਂ ਪਨ ਅਨੁਪਟ੍ਠਹਨ੍ਤਮ੍ਪਿ ਪਚ੍ਚੁਪ੍ਪਨ੍ਨੇ ਅਨ੍ਤੋਗਧਸਦਿਸਂ ਹੋਤੀਤਿ ਅਧਿਪ੍ਪਾਯੋ. ਵਿਭਾਵਨਿ ਪਾਠੇਨ ਚ ਪਚ੍ਚੁਪ੍ਪਨ੍ਨ ਗਤਿਨਿਮਿਤ੍ਤਂ ਵਿਯ ਆਪਾਤਮਾਗਤਂ, ਕਸ੍ਮਾ, ਪਚ੍ਚੁਪ੍ਪਨ੍ਨ ਗਤਿ ਨਿਮਿਤ੍ਤੇਨੇਵ ਕਿਚ੍ਚ ਸਿਦ੍ਧਿਤੋ-ਤਿ ਅਧਿਪ੍ਪਾਯੋ. ਸੇਸਮੇਤ੍ਥ ਸੁਬੋਧਂ. ‘‘ਤਾਨਿਹੀ’’ਤਿਆਦੀਸੁ. ਕੇਚਿ ਵਦਨ੍ਤਿ. ਅਨੇਜੋਸਨ੍ਤਿ ਮਾਰਬ੍ਭ. ਯਂ ਕਾਲਮਕਰੀਮੁਨੀਤਿ ਵੁਤ੍ਤਤ੍ਤਾ ਸਬ੍ਬਞ੍ਞੁ ਬੁਦ੍ਧਾਦੀਨਂ ਪਰਿਨਿਬ੍ਬਾਨ ਚੁਤਿ ਚਿਤ੍ਤਂ ਸਨ੍ਤਿ ਲਕ੍ਖਣਂ ਨਿਬ੍ਬਾਨਂ ਆਰਮ੍ਮਣਂ ਕਰੋਤੀਤਿ. ਤਂ ਸਬ੍ਬਥਾਪਿ ਕਾਮਾਵਚਰਾ ਲਮ੍ਬਣਾ ਨੇਵਾਤਿ ਇਮਿਨਾ ਅਪਨੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਤਾ ਨਿਹਿ ਸਬ੍ਬਞ੍ਞੁ ਬੁਦ੍ਧਾਨਂ ਉਪ੍ਪਨ੍ਨਾਨਿ ਪੀ’’ਤਿਆਦਿ ਵੁਤ੍ਤਂ. ‘‘ਲੋਕੁਤ੍ਤਰ ਧਮ੍ਮਾ’’ਤਿਆਦੀਸੁ. ‘‘ਤਾਨੀ’’ਤਿ ਦ੍ਵਾਦਸਾ ਕੁਸਲ ਚਿਤ੍ਤਾਨਿ ਅਟ੍ਠਞਾਣ ਵਿਪ੍ਪਯੁਤ੍ਤ ਕੁਸਲ ਕ੍ਰਿਯ ਜਵਨਾਨਿ ਚ. ਅਜ੍ਝਾਨ ਲਾਭਿਨੋ ਪੁਥੁਜ੍ਜਨਾ ਮਹਗ੍ਗਤਜ੍ਝਾਨਾਨਿਪਿ ਆਲਮ੍ਬਿਤੁਂ ਨ ਸਕ੍ਕੋਨ੍ਤੀਤਿ ਵੁਤ੍ਤਂ ‘‘ਪਞ੍ਞਤ੍ਤਿਯਾ ਸਹ ਕਾਮਾਵਚਰਾ ਰਮ੍ਮਣਾਨੀ’’ਤਿ. ‘‘ਤਾਨੇ ਵਾ’’ਤਿ ਞਾਣ ਸਮ੍ਪਯੁਤ੍ਤ ਕਾਮ ਕੁਸਲਾਨਿ ਏਵ. ਝਾਨਲਾਭੀਨਂ ਤਾਨੇਵ ਞਾਣ ਸਮ੍ਪਯੁਤ੍ਤਕਾਮ ਕੁਸਲਾਨਿ. ਹੇਟ੍ਠਿਮ ਫਲਟ੍ਠਾਨਂ ਤਾਨੇਵ ਅਤ੍ਤਨਾ ਅਧਿਗਤ ਮਗ੍ਗਫਲ ਨਿਬ੍ਬਾਨਾ ਰਮ੍ਮਣਾਨਿ. ‘‘ਝਾਨਾਨਿ ਪਤ੍ਥੇਨ੍ਤੀ’’ਤਿ ਆਯਤਿਂ ਝਾਨਲਾਭਿਨੋ ਭਵੇਯ੍ਯਾਮਾਤਿ ਪਤ੍ਥਨਂ ਕਰੋਨ੍ਤਿ. ‘‘ਤੇਸਂ ਪੀ’’ਤਿ ਤੇਸਂ ਪੁਥੁਜ੍ਜਨਾਨਮ੍ਪਿ. ‘‘ਤੇ’’ਤਿ ਤੇ ਲੋਕੁਤ੍ਤਰ ਧਮ੍ਮਾ. ‘‘ਅਨੁਭੋਨ੍ਤੀ’’ਤਿ ਸਮ੍ਪਾਪੁਣਨ੍ਤਿ. ‘‘ਨਵਨਿਪਾਤੇ’’ਤਿ ਅਙ੍ਗੁਤ੍ਤਰ ਨਿਕਾਯੇ ਨਵਨਿਪਾਤੇ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.

੧੩੫. ਵਤ੍ਥੁਸਙ੍ਗਹੇ. ‘‘ਵਤ੍ਥੂ’’ਤਿ ਨਿਸ੍ਸਯ ਵਿਸੇਸੋ ਵੁਚ੍ਚਤਿ. ਤਾਨਿ ਨਿਸ੍ਸਯ ਵਤ੍ਥੂਨਿ ਯੇਸਂ ਤਾਨਿ ਤਬ੍ਬਤ੍ਥੁਕਾਨਿ. ‘‘ਤੇਸਞ੍ਚ ਸਦ੍ਦੋ ਨ ਯੁਜ੍ਜਤੀ’’ਤਿ ਤੇਸਂ ਵਾਦੇ ਚ ਸਦ੍ਦੋ ਨ ਯੁਜ੍ਜਤਿ. ਨ ਹਿ ਅਲੁਤ੍ਤ ਚ ਕਾਰਂ ਦ੍ਵਨ੍ਦ ਪਦਂ ਨਾਮ ਅਤ੍ਥੀਤਿ. ‘‘ਪੁਬ੍ਬਪਦੇਸੁ ਆਨੇਤਬ੍ਬੋ’’ਤਿ ਚਕ੍ਖੁ ਵਤ੍ਥੁ ਚ ਸੋਤਵਤ੍ਥੁ ਚਾਤਿਆਦਿਨਾ ਆਨੇਤਬ੍ਬੋ. ਸਮਾਸ ਪਦਂ ਨ ਯੁਜ੍ਜਤਿ. ਨ ਹਿ ਸਮਾਸ ਪਦਤੋ ਏਕ ਦੇਸਂ ਅਞ੍ਞਤ੍ਥ ਆਨੇਤੁਂ ਯੁਜ੍ਜਤੀਤਿ. ਅਵਿਭਤ੍ਤਿਕ ਨਿਦ੍ਦੇਸੋ ਨਾਮ ਚਕ੍ਖੁਂ, ਸੋਤਂ, ਘਾਨਂ, ਜਿਵ੍ਹਾ, ਕਾਯੋ, ਹਦਯਂ, ਵਤ੍ਥੁ ਚਾਤਿ ਵਤ੍ਤਬ੍ਬੇ ਪੁਬ੍ਬਪਦੇਸੁ ਅਵਿਭਤ੍ਤਿਕ ਨਿਦ੍ਦੇਸੋ. ਏਵਞ੍ਚਸਤਿ ਵਤ੍ਥੁ ਸਦ੍ਦੋ ਚ ਸਦ੍ਦੋ ਚ ਪੁਬ੍ਬਪਦੇਸੁ ਆਨੇਤੁਂ ਲਬ੍ਭਨ੍ਤੀਤਿ. ਕਾਮਤਣ੍ਹਾਯ ਅਧੀਨੇਨ ਆਯਤ੍ਤੇਨ ਕਾਮਾਵਚਰ ਕਮ੍ਮੇਨ ਨਿਬ੍ਬਤ੍ਤਾ ਕਾਮਤਣ੍ਹਾਧੀਨ ਕਮ੍ਮ ਨਿਬ੍ਬਤ੍ਤਾ. ‘‘ਰੂਪਾਦੀਨਂ ਪਰਿਭੋਗੋ’’ਤਿ ਰੂਪਾਦੀਨਂ ਪਞ੍ਚਕਾਮਗੁਣਾਨਂ ਪਰਿਭੋਗੋ. ‘‘ਪਰਿਤ੍ਤਕਮ੍ਮਂ ਪੀ’’ਤਿ ਸਬ੍ਬਂ ਕਾਮਾਵਚਰ ਕਮ੍ਮਮ੍ਪਿ. ‘‘ਪੂਰਯਮਾਨਂ’’ਤਿ ਪਰਿਪੂਰੇਨ੍ਤਂ. ਚਕ੍ਖੁ ਦਸ੍ਸਨਾਨੁਤ੍ਤਰਿਯਂ ਨਾਮ. ਸੋਤਂ ਸਵਨਾਨੁਤ੍ਤਰਿਯਂ ਨਾਮ. ਸਬ੍ਬੇਸਂ ਦਸ੍ਸਨ ਕਿਚ੍ਚਾਨਂ ਮਜ੍ਝੇ ਬੁਦ੍ਧ ਦਸ੍ਸਨਾ ਦਿਵਸੇਨ ਅਨੁਤ੍ਤਰਂ ਦਸ੍ਸਨਂ ਜਨੇਤੀਤਿ ਦਸ੍ਸਨਾਨੁਤ੍ਤਰਿਯਂ. ਏਵਂ ਸਵਨਾਨੁਤ੍ਤਰਿਯੇਪਿ ਚਤੁਸਚ੍ਚ ਧਮ੍ਮਸ੍ਸਵਨਾ ਦਿਵਸੇਨਾਤਿ ਵਤ੍ਤਬ੍ਬਂ. ‘‘ਅਜ੍ਝਤ੍ਤ ਬਹਿਦ੍ਧ ਸਨ੍ਤਾ ਨੇਸੁ ਪੀ’’ਤਿ ਅਜ੍ਝਤ੍ਤ ਸਨ੍ਤਾਨੇਪਿ ਬਹਿਦ੍ਧ ਸਨ੍ਤਾਨੇਪਿ. ‘‘ਸੁਦ੍ਧੇ’’ਤਿ ਕੇਨਚਿ ਆਲੋਕੇਨ ਚ ਅਨ੍ਧਕਾਰੇਨ ਚ ਵਿਰਹਿਤੇ. ਆਲੋਕੋ ਹਿ ਏਕੋ ਰੂਪ ਵਿਸੇਸੋ. ਤਥਾ ਅਨ੍ਧਕਾਰੋ ਚ. ਤੇ ਚ ਤਤ੍ਥ ਨਤ੍ਥਿ. ‘‘ਇਮਸ੍ਮਿਂ ਸਙ੍ਗਹੇ’’ਤਿ ਵਤ੍ਥੁ ਸਙ੍ਗਹੇ. ਵਿਸਿਟ੍ਠਂ ਜਾਨਨਂ ਵਿਜਾਨਨਂ. ਤਞ੍ਚ ਵਿਜਾਨਨਂ ਤੀਸੁ ਮਨੋਧਾਤੂਸੁ ਨਤ੍ਥੀਤਿ ਵੁਤ੍ਤਂ ‘‘ਵਿਜਾਨਨ ਕਿਚ੍ਚਾਭਾਵਤੋ’’ਤਿ. ਆਵਜ੍ਜਨ ਕਿਚ੍ਚਂ ਕਿਮੇਤਨ੍ਤਿ, ਮਨਸਿਕਾਰ ਮਤ੍ਤਂ ਹੋਤਿ. ਸਮ੍ਪਟਿਚ੍ਛਨ ਕਿਚ੍ਚਞ੍ਚ ਪਞ੍ਚਵਿਞ੍ਞਾਣੇਹਿ ਯਥਾ ਗਹਿਤਾਨੇਵ ਪਞ੍ਚਾਰਮ੍ਮਣਾਨਿ ਸਮ੍ਪਟਿਚ੍ਛਨ ਮਤ੍ਤਂ ਹੋਤਿ. ਤੇਨਾਹ ‘‘ਵਿਸੇਸਜਾਨਨ ਕਿਚ੍ਚਾਨਿ ਨ ਹੋਨ੍ਤੀ’’ਤਿ. ਦਸ੍ਸਨਂ, ਸਵਨਂ, ਘਾਯਨਂ, ਸਾਯਨਂ, ਫੁਸਨ, ਨ੍ਤਿ ਇਮਾਨਿ ਕਿਚ੍ਚਾਨਿ ਥੋਕਂ ਵਿਸੇਸ ਜਾਨਨ ਕਿਚ੍ਚਾਨਿ ਹੋਨ੍ਤੀਤਿ ਵੁਤ੍ਤਂ ‘‘ਪਚ੍ਚਕ੍ਖਤੋ ਦਸ੍ਸਨਾ ਦਿਵਸੇਨਾ’’ਤਿਆਦਿਂ. ਥੋਕਂ ਵਿਸੇਸ ਜਾਨਨ ਕਿਚ੍ਚਾਨਿ ਹੋਨ੍ਤਿ. ਤਸ੍ਮਾ ਤਾਨਿ ਪਞ੍ਚਵਿਞ੍ਞਾਣਾਨੀਤਿ ਵੁਤ੍ਤਾਨਿ. ਅਵਸੇਸਾ ਪਨ ਸਨ੍ਤੀਰਣਾਦਯੋ ਮਨੋਵਿਞ੍ਞਾਣਧਾਤੁਯੋ ਨਾਮਾਤਿ ਸਮ੍ਬਨ੍ਧੋ. ਨਨੁ ਮਨਨਟ੍ਠੇਨ ਮਨੋ ਚ ਤਂ ਵਿਜਾਨਨਟ੍ਠੇਨ ਵਿਞ੍ਞਾਣਞ੍ਚਾਤਿ ਵੁਤ੍ਤੇਪਿ ਪਞ੍ਚਵਿਞ੍ਞਾਣੇਹਿ ਵਿਸੇਸੋ ਨਤ੍ਥੀਤਿ ਆਹ ‘‘ਅਤਿਸ੍ਸਯ ਵਿਸੇਸ ਜਾਨਨ ਧਾਤੁਯੋਤਿ ਅਤ੍ਥੋ’’ਤਿ. ਏਵਂ ਸਨ੍ਤੇਪਿ ਸੋ ਅਤ੍ਥੋ ਸਦ੍ਦਯੁਤ੍ਤਿਯਾ ਸਿਦ੍ਧੋ ਨ ਹੋਤਿ. ਯਦਿਚ੍ਛਾ ਵਸੇਨ ਵੁਤ੍ਤੋ ਹੋਤੀਤਿ ਆਹ ‘‘ਪਰਿਯਾਯ ਪਦਾਨਂ’’ਤਿਆਦਿ. ਏਤੇਨ ਸੋ ਅਤ੍ਥੋ ਸਦ੍ਦਯੁਤ੍ਤਿਯਾ ਏਵ ਸਿਦ੍ਧੋ. ਨ ਯਦਿਚ੍ਛਾਵਸੇਨ ਵੁਤ੍ਤੋਤਿ ਦਸ੍ਸੇਤਿ. ‘‘ਵਿਸੇਸਨ ਸਮਾਸੇ’’ਤਿ ਮਨੋ ਚ ਤਂ ਵਿਞ੍ਞਾਣਞ੍ਚਾਤਿ ਮਨੋਵਿਞ੍ਞਾਣਨ੍ਤਿ ਏਵਰੂਪੇ ਕਮ੍ਮਧਾਰਯ ਸਮਾਸੇ. ‘‘ਪਦਟ੍ਠਾਨਂ’’ਤਿ ਏਤ੍ਥ ਪਦਨ੍ਤਿ ਚ ਠਾਨਨ੍ਤਿ ਚ ਕਾਰਣਤ੍ਥ ਵਚਨਾਨਿ, ਤਸ੍ਮਾ ਪਰਿਯਾਯ ਸਦ੍ਦਾ ਨਾਮ. ਪਦਞ੍ਚ ਤਂ ਠਾਨਞ੍ਚਾਤਿ ਵੁਤ੍ਤੇ ਅਤਿਸ੍ਸਯ ਕਾਰਣਨ੍ਤਿ ਅਤ੍ਥੋ ਵਿਞ੍ਞਾਯਤਿ. ਤਥਾ ਦੁਕ੍ਖ ਦੁਕ੍ਖਂ, ਰੂਪ ਰੂਪਂ, ਰਾਜ ਰਾਜਾ, ਦੇਵਦੇਵੋਤਿਆਦੀਨਿ. ‘‘ਕਤ੍ਥਚਿ ਦਿਸ੍ਸਤਿ ਯੁਜ੍ਜਤਿ ਚਾ’’ਤਿ ਨ ਹਿ ਕਤ੍ਥਚਿ ਦਿਸ੍ਸਤਿ ਚ. ਸਚੇਪਿ ਕਤ੍ਥਚਿ ਦਿਸ੍ਸੇਯ੍ਯ, ਨ ਹਿ ਯੁਜ੍ਜਤਿ ਚਾਤਿ ਅਤ੍ਥੋ. ‘‘ਮਨਸੋ ਵਿਞ੍ਞਾਣਂ’’ਤਿ ਏਤ੍ਥ ਪਟਿਸਨ੍ਧਿ ਚਿਤ੍ਤਤੋ ਪਟ੍ਠਾਯ ਯਾਵਚੁਤਿ ਚਿਤ੍ਤਾ ਅਨ੍ਤਰੇ ਸਬ੍ਬਂ ਚਿਤ੍ਤ ਸਨ੍ਤਾਨਂ ਸਤ੍ਤ ਵਿਞ੍ਞਾਣ ਧਾਤੂਨਂ ਵਸੇਨ ਵਿਭਾਗਂ ਕਤ੍ਵਾ ਅਤ੍ਥੋ ਵਤ੍ਤਬ੍ਬੋ. ਪਞ੍ਚਦ੍ਵਾਰਾ ਵਜ੍ਜਨਞ੍ਚ ਸਮ੍ਪਟਿਚ੍ਛਨ ਦ੍ਵਯਞ੍ਚ ਮਨੋਧਾਤੁ ਮਤ੍ਤਤ੍ਤਾ ਮਨੋ ਨਾਮ. ਪਞ੍ਚਵਿਞ੍ਞਾਣਾਨਿ ਵਿਞ੍ਞਾਣ ਮਤ੍ਤਾਨਿ ਨਾਮ. ਅਵਸੇਸਾਨਿ ਸਬ੍ਬਾਨਿ ਵਿਞ੍ਞਾਣਾਨਿ ਮਨਸ੍ਸ ਵਿਞ੍ਞਾਣਨ੍ਤਿ ਅਤ੍ਥੇਨ ਮਨੋਵਿਞ੍ਞਾਣਾਨਿ ਨਾਮ. ਤਤ੍ਥ ‘‘ਮਨਸ੍ਸ ਵਿਞ੍ਞਾਣਂ’’ਤਿ ਅਨਨ੍ਤਰ ਪਚ੍ਚਯ ਭੂਤਸ੍ਸ ਵਾ ਮਨਸ੍ਸ ਪਚ੍ਚਯੁਪ੍ਪਨ੍ਨ ਭੂਤਂ ਵਿਞ੍ਞਾਣਂ. ਏਤ੍ਥ ਸਮ੍ਪਟਿਚ੍ਛਨ ਦ੍ਵਯਂ ਪਚ੍ਚਯਮਨੋ ਨਾਮ. ਸਨ੍ਤੀਰਣਤੋ ਪਟ੍ਠਾਯ ਯਾਵ ਦ੍ਵਾਰਨ੍ਤਰੇ ਪਞ੍ਚਦ੍ਵਾਰਾ ਵਜ੍ਜਨਂ ਨਾਗਚ੍ਛਤਿ, ਤਾਵ ਅਨ੍ਤਰੇ ਸਬ੍ਬਂ ਮਨੋਵਿਞ੍ਞਾਣ ਸਨ੍ਤਾਨਂ ਪਚ੍ਚਯੁਪ੍ਪਨ੍ਨ ਵਿਞ੍ਞਾਣਂ ਨਾਮ. ਪੁਨ ‘‘ਮਨਸ੍ਸ ਵਿਞ੍ਞਾਣ’’ਨ੍ਤਿ ਪਚ੍ਚਯੁਪ੍ਪਨ੍ਨ ਭੂਤਸ੍ਸ ਮਨਸ੍ਸ ਪਚ੍ਚਯ ਭੂਤਂ ਵਿਞ੍ਞਾਣਂ. ਏਤ੍ਥ ਪਞ੍ਚਦ੍ਵਾਰਾ ਵਜ੍ਜਨਂ ਪਚ੍ਚਯੁਪ੍ਪਨ੍ਨ ਮਨੋ ਨਾਮ. ਤਤੋ ਪੁਰੇ ਸਬ੍ਬਂ ਮਨੋਵਿਞ੍ਞਾਣ ਸਨ੍ਤਾਨਂ ਪਚ੍ਚਯ ਮਨੋ ਨਾਮ. ਸੇਸਂ ਸੁਵਿਞ੍ਞੇਯ੍ਯਂ. ਅਵਸੇਸਾਪਨਾਤਿਆਦੀਸੁ. ‘‘ਮਨੋਵਿਞ੍ਞਾਣਧਾਤੁ ਭਾਵਂ ਸਮ੍ਭਾਵੇਤੀ’’ਤਿ ਅਵਸੇਸਾ ਪਨ ਧਮ੍ਮਾ ਮਨੋਵਿਞ੍ਞਾਣਧਾਤੁ ਚ ਨਾਮ ਹੋਨ੍ਤਿ, ਹਦਯ ਵਤ੍ਥੁਞ੍ਚ ਨਿਸ੍ਸਾਯਯੇਵ ਵਤ੍ਤਨ੍ਤੀਤਿ ਏਵਂ ਤੇਸਂ ਧਮ੍ਮਾਨਂ ਮਨੋਵਿਞ੍ਞਾਣਧਾਤੁ ਭਾਵਞ੍ਚ ਸਮ੍ਭਾਵੇਤਿ, ਵਣ੍ਣੇਤਿ. ਸੁਟ੍ਠੁ ਪਕਾਸੇਤੀਤਿ ਅਤ੍ਥੋ. ਏਤ੍ਥ ਪਨਾਤਿਆਦੀਸੁ. ‘‘ਪਾਲ਼ਿਯਂ’’ਤਿ ਇਨ੍ਦ੍ਰਿਯ ਸਂਯੁਤ੍ਤ ਪਾਲ਼ਿਯਂ. ਦੁਤੀਯਜ੍ਝਾਨੇ ਏਵ ਅਪਰਿਸੇਸ ਨਿਰੋਧ ਵਚਨਂ ਵਿਰੁਦ੍ਧਂ ਸਿਯਾ. ਕਥਂ, ਸਚੇ ਪਟਿਘੋ ਅਨੀਵਰਣਾ ਵਤ੍ਥੋ ਨਾਮ ਨਤ੍ਥਿ. ਪਥਮਜ੍ਝਾਨਤੋ ਪੁਬ੍ਬੇ ਏਵ ਸੋ ਨਿਰੁਦ੍ਧੋ ਸਿਯਾ. ਅਥ ਦੁਤੀਯਜ੍ਝਾਨੁਪਚਾਰੇਪਿ ਸੋ ਉਪ੍ਪਜ੍ਜੇਯ੍ਯ, ਪਥਮਜ੍ਝਾਨਮ੍ਪਿ ਪਰਿਹੀਨਂ ਸਿਯਾ. ਤਸ੍ਮਿਂ ਪਰਿਹੀਨੇ ਸਤਿ, ਦੁਤੀਯਜ੍ਝਾਨਮ੍ਪਿ ਨੁਪ੍ਪਜ੍ਜੇਯ੍ਯ. ਏਵਂ ਵਿਰੁਦ੍ਧਂ ਸਿਯਾ. ‘‘ਪੁਰਿਮ ਕਾਰਣਮੇਵਾ’’ਤਿ ਅਨੀਵਰਣਾ ਵਤ੍ਥਸ੍ਸ ਪਟਿਘਸ੍ਸ ਅਭਾਵਤੋਤਿ ਕਾਰਣਂ ਏਵ. ਪਰਤੋਘੋਸੋ ਨਾਮ ਸਾਵਕਾਨਂ ਸਮ੍ਮਾਦਿਟ੍ਠਿਪ੍ਪਟਿਲਾਭਾਯ ਪਧਾਨ ਪਚ੍ਚਯੋ ਹੋਤਿ. ਸੋ ਚ ਅਰੂਪਭਵੇ ਨਤ੍ਥਿ. ਧਮ੍ਮਾਭਿਸਮਯੋ ਨਾਮ ਚਤੁਸਚ੍ਚ ਧਮ੍ਮਪ੍ਪਟਿਵੇਧੋ, ਬੁਦ੍ਧਾ ਚ ਪਚ੍ਚੇਕ ਸਮ੍ਬੁਦ੍ਧਾ ਚ ਸਯਮ੍ਭੁਨੋ ਪਰਤੋ ਘੋਸੇਨ ਵਿਨਾ ਧਮ੍ਮਂ ਪਟਿਵਿਜ੍ਝਨ੍ਤਿ. ਤੇ ਚ ਤਤ੍ਥ ਨੁਪ੍ਪਜ੍ਜਨ੍ਤਿ. ‘‘ਰੂਪਵਿਰਾਗ ਭਾਵਨਾਯਾ’’ਤਿ ਰੂਪਵਿਰਾਗ ਭਾਵਨਾ ਬਲੇਨ. ਤੇਸਂ ਰੂਪਾਵਚਰ ਚਿਤ੍ਤਾਨਂ. ‘‘ਸਮਤਿਕ੍ਕਨ੍ਤਤ੍ਤਾ’’ਤਿ ਤੇਸੁ ਨਿਕਨ੍ਤਿਪ੍ਪਹਾਨਵਸੇਨ ਸੁਟ੍ਠੁ ਅਤਿਕ੍ਕਨ੍ਤਤ੍ਤਾ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਂ.

ਪਕਿਣ੍ਣਕਸਙ੍ਗਹਦੀਪਨਿਯਾਅਨੁਦੀਪਨਾਨਿਟ੍ਠਿਤਾ.

੪. ਵੀਥਿਸਙ੍ਗਹਅਨੁਦੀਪਨਾ

੧੩੬. ਵੀਥਿਸਙ੍ਗਹੇ. ‘‘ਤੇਸਞ੍ਞੇ ਵਾ’’ਤਿ ਚਿਤ੍ਤ ਚੇਤਸਿਕਾਨਂ ਏਵ. ‘‘ਵੁਤ੍ਤਪ੍ਪਕਾਰੇਨਾ’’ਤਿ ‘ਤਤ੍ਥ ਚਿਤ੍ਤਂ ਤਾਵ ਚਤੁਬ੍ਬਿਧਂ ਹੋਤਿ ਕਾਮਾਵਚਰਂ ਰੂਪਾਵਚਰਂ, ਤਿਆਦਿਨਾ ਇਚ੍ਚੇਵਂ ਵੁਤ੍ਤਪ੍ਪਕਾਰੇਨ. ‘‘ਪੁਬ੍ਬਾ ਪਰਨਿਯਾਮਿਤਂ’’ਤਿ ਵਾ ਦ੍ਵਤ੍ਤਿਂਸ ਸੁਖ ਪੁਞ੍ਞਮ੍ਹਾਤਿਆਦਿਨਾ ਨਯੇਨ ਪੁਬ੍ਬਾ ਪਰਨਿਯਾਮਿਤਂ. ‘‘ਆਰਬ੍ਭਗਾਥਾਯਾ’’ਤਿ.

ਵੀਥਿ ਚਿਤ੍ਤਵਸੇਨੇਵਂ, ਪਵਤ੍ਤਿਯ ਮੁਦੀਰਿਤੋ;

ਪਵਤ੍ਤਿ ਸਙ੍ਗਹੋ ਨਾਮ, ਸਨ੍ਧਿਯਂ ਦਾਨਿ ਵੁਚ੍ਚਤੀ.ਤਿ

ਏਵਂ ਪਵਤ੍ਤਿਕਾਲੇ ਪਵਤ੍ਤਿ ਸਙ੍ਗਹੋ, ਪਟਿਸਨ੍ਧਿਕਾਲੇ ਪਵਤ੍ਤਿ ਸਙ੍ਗਹੋਤਿ ਸਿਦ੍ਧੋ ਹੋਤਿ. ਕੇਚਿ ਵਾਦੇ ‘‘ਪਟਿਸਨ੍ਧਿ ਪਵਤ੍ਤਿਯਂ’’ਤਿ ਨਿਦ੍ਧਾਰਣੇ ਗਹਿਤੇ ਦ੍ਵੀਸੁ ਪਟਿਸਨ੍ਧਿ ਸਙ੍ਗਹ ਪਵਤ੍ਤਿ ਸਙ੍ਗਹੇਸੁ ਇਦਾਨਿ ਪਵਤ੍ਤਿ ਸਙ੍ਗਹਂ ਪਵਕ੍ਖਾਮਿ, ਪਚ੍ਛਾ ਪਟਿਸਨ੍ਧਿ ਸਙ੍ਗਹਂ ਪਵਕ੍ਖਾਮੀਤਿ ਅਤ੍ਥੋ ਹੋਤਿ. ਤਤ੍ਥ ‘‘ਪਟਿਸਨ੍ਧਿ ਸਙ੍ਗਹੋ’’ਤਿ ਪਟਿਸਨ੍ਧਿਕਾਲੇ ਸਙ੍ਗਹੋ. ‘‘ਪਵਤ੍ਤਿ ਸਙ੍ਗਹੋ’’ਤਿ ਪਵਤ੍ਤਿਕਾਲੇ ਸਙ੍ਗਹੋ. ਸੋ ਚ ਉਪਰਿਗਾਥਾਯ ਨ ਸਮੇਤੀਤਿ ਦਸ੍ਸੇਤੁਂ ‘‘ਏਵਂ ਸਤੀ’’ਤਿਆਦਿਮਾਹ. ‘‘ਤਾਨਿ ਤੀਣਿ ਛਕ੍ਕਾਨਿ ਨਿਕ੍ਖਿਤ੍ਤਾਨੀ’’ਤਿ ਛਕ੍ਕਮਤ੍ਤਾਨਿ ਨਿਕ੍ਖਿਤ੍ਤਾਨਿ, ਨ ਸਕਲਂ. ਵਤ੍ਥੁ ਦ੍ਵਾਰਾ ਲਮ੍ਬਣ ਸਙ੍ਗਹੋਤਿ ਅਧਿਪ੍ਪਾਯੋ. ‘‘ਸਾ ਪਨਾ’’ਤਿ ਸਾਵਿਸਯਪ੍ਪਵਤ੍ਤਿ ਪਨ. ‘‘ਕਾਚਿ ਸੀਘਤਮਾ’’ਤਿ ਕਾਚਿ ਅਤਿਰੇਕਤਰਂ ਸੀਘਾ. ‘‘ਦਨ੍ਧਾ’’ਤਿ ਸਣਿਕਾ, ਚਿਰਾਯਿਕਾ. ‘‘ਅਨੁਪਪਨ੍ਨਾ’’ਤਿ ਅਸਮ੍ਪਨ੍ਨਾ. ਅਸਮ੍ਪਨ੍ਨ ਦੋਸੋ ਆਗਚ੍ਛਤੀਤਿ ਵੁਤ੍ਤਂ ਹੋਤਿ. ‘‘ਧਾਤੁਭੇਦਂ’’ਤਿ ਸਤ੍ਤ ਵਿਞ੍ਞਾਣ ਧਾਤੂਨਂ ਵਿਭਾਗਂ. ‘‘ਧਾਤੁਨਾਨਤ੍ਤਂ’’ਤਿ ਧਾਰਣ ਕਿਚ੍ਚਨਾਨਤ੍ਤਂ. ਇਤਿ ਤਸ੍ਮਾ ਮਨੋਧਾਤੁ ਵਿਸੁਂ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਮਨਨਂ’’ਤਿ ਵਿਜਾਨਨਭਾਵਂ ਅਪਤ੍ਤਂ. ਆਵਜ੍ਜਨਮਤ੍ਤ ਸਮ੍ਪਟਿਚ੍ਛਨਮਤ੍ਤ ਸਙ੍ਖਾਤਂ ਜਾਨਨਮਤ੍ਤਂ. ‘‘ਯਂ ਕਿਞ੍ਚਿ ਮਨਨਂ’’ਤਿ ਅਨ੍ਤਮਸੋ ਆਵਜ੍ਜਨਮਤ੍ਤ ਸਮ੍ਪਟਿਚ੍ਛਨਮਤ੍ਤਂ ਪੀਤਿ ਅਧਿਪ੍ਪਾਯੋ. ‘‘ਸੁਦ੍ਧੋ ਪਨ ਮਨੋਵਿਞ੍ਞਾਣਪ੍ਪਬਨ੍ਧੋ’’ਤਿ ਮਨੋਦ੍ਵਾਰ ਵਿਕਾਰਂ ਪਟਿਚ੍ਚ ਪਵਤ੍ਤੋ ਮਨੋਵਿਞ੍ਞਾਣਪ੍ਪਬਨ੍ਧੋ. ਨ ਭਵਙ੍ਗ ਮਨੋਵਿਞ੍ਞਾਣਪ੍ਪਬਨ੍ਧੋ. ਸੋ ਹਿ ਵੀਥਿਮੁਤ੍ਤਤ੍ਤਾ ਇਧ ਅਪ੍ਪਸਙ੍ਗੋਤਿ. ਮਨੋਦ੍ਵਾਰੇ ਪਨ ਦ੍ਵਿਧਾਤਿ ਸਮ੍ਬਨ੍ਧੋ. ਬੁਦ੍ਧਸ੍ਸ ਭਗਵਤੋ ਪਥਮਾਭਿਨੀਹਾਰਕਾਲੋ ਨਾਮ ਸੁਮੇਧਤਾਪਸਕਾਲੇ ਬੁਦ੍ਧ ਭਾਵਾਯ ਕਾਯ ਚਿਤ੍ਤਾਨਂ ਅਭਿਨੀਹਾਰਕਾਲੋ. ਆਦਿਸਦ੍ਦੇਨ ਪਚ੍ਛਿਮ ਭਵੇ ਪਟਿਸਨ੍ਧਿਗ੍ਗਹਣਾਦਿਂ ਸਙ੍ਗਣ੍ਹਾਤਿ. ‘‘ਜਾਤਿ ਫਲਿਕਕ੍ਖਨ੍ਧਾ ਵਿਯ ਸਮ੍ਪਜ੍ਜਨ੍ਤੀ’’ਤਿ ਤੇਨ ਓਭਾਸੇਨ ਅਜ੍ਝੋਤ੍ਥਟਤ੍ਤਾ ਜਾਤਿਫਲਿਕਕ੍ਖਨ੍ਧ ਸਦਿਸਾ ਹੋਨ੍ਤੀਤਿ ਅਧਿਪ੍ਪਾਯੋ. ‘‘ਉਪਪਤ੍ਤਿ ਦੇਵ ਬ੍ਰਹ੍ਮਾਨਂ ਪਨਾ’’ਤਿ ਉਪਪਤ੍ਤਿਪ੍ਪਟਿਸਨ੍ਧਿਕਾਨਂ ਓਪਪਾਤਿਕ ਦੇਵ ਬ੍ਰਹ੍ਮਾਨਂ ਪਨ. ‘‘ਪਸਾਦ ਨਿਸ੍ਸਯ ਭੂਤਾਨਂ’’ਤਿ ਚਕ੍ਖਾਦੀਨਂ ਪਸਾਦ ਵਤ੍ਥੂਨਂ ਨਿਸ੍ਸਯ ਮਹਾਭੂਤਾਨਂ.

‘‘ਯਾਨਿ ਪਨਾ’’ਤਿਆਦੀਸੁ. ਦ੍ਵਤ੍ਤਿ ਚਿਤ੍ਤਕ੍ਖਣਾਨਿ ਅਤਿਕ੍ਕਮ੍ਮ ਆਪਾਤਂ ਆਗਚ੍ਛਨ੍ਤੀਤਿ ਯੋਜਨਾ. ਏਵਂ ਪਰਤ੍ਥਪਿ. ਵਿਭੂਤਸ੍ਸਾਤਿ ਚ ਅਵਿਭੂਤਸ੍ਸਾਤਿ ਚ ਇਦਂ ਆਦਿਮ੍ਹਿ ਮਨੋਦ੍ਵਾਰੇ ਪਨ ਵਿਭੂਤਸ੍ਸਾਤਿ ਚ ਅਵਿਭੂਤਸ੍ਸਾਤਿ ਚ ਪਦਾਨਂ ਉਦ੍ਧਰਣਂ. ‘‘ਰੂਪਾ ਰੂਪਾਨਂ’’ਤਿ ਰੂਪ ਧਮ੍ਮਾਨਞ੍ਚ ਅਰੂਪ ਧਮ੍ਮਾਨਞ੍ਚ. ‘‘ਤਾਵਾ’’ਤਿ ਵੀਥਿ ਚਿਤ੍ਤਪ੍ਪਵਤ੍ਤਿ ਦਸ੍ਸਨਤੋ ਪਥਮਤਰਂ ਏਵਾਤਿ ਅਤ੍ਥੋ. ‘‘ਅਦ੍ਧਾਨ ਪਰਿਚ੍ਛੇਦਂ’’ਤਿ ਖਣਕਾਲ ਪਰਿਚ੍ਛੇਦਂ. ਵਿਭਾਵਨਿਪਾਠੇ ‘‘ਅਤਿਮਹਨ੍ਤਾ ਦਿਵਸੇਨ ਵਿਸਯ ਵਵਤ੍ਥਾਨਂ ਹੋਤੀ’’ਤਿ ਵਚਨੇਨ ਆਦਿਮ੍ਹਿ ‘ਛਵਤ੍ਥੂਨਿ, ਛ ਦ੍ਵਾਰਾਨਿ, ਛ ਆਰਮ੍ਮਣਾਨਿ, ਛ ਵਿਞ੍ਞਾਣਾਨਿ, ਛ ਵੀਥਿਯੋ, ਛ ਧਾਵਿਸਯਪ੍ਪਵਤ੍ਤੀ,ਤਿ ਏਵਂ ਵੁਤ੍ਤੇਸੁ ਛਸੁ ਛਕ੍ਕੇਸੁ ਛਧਾਵਿਸਯਪ੍ਪਵਤ੍ਤੀਤਿ ਪਦਮਤ੍ਤਂ ਸਙ੍ਗਣ੍ਹਾਤਿ. ਤਂ ਅਨੁਪਪਨ੍ਨਂ ਹੋਤਿ. ਤੇਨਾਹ ‘‘ਏਵਞ੍ਹਿ ਸਤੀ’’ਤਿਆਦਿਂ. ‘‘ਵਿਸਯ ਵਵਤ੍ਥਾਨਤ੍ਥ ਮੇਵਾ’’ਤਿ ਅਤਿਮਹਨ੍ਤਾਦਿ ਵਿਸਯ ਵਵਤ੍ਥਾਨਤ੍ਥਮੇਵ ਵੁਤ੍ਤਨ੍ਤਿ ਨ ਚ ਸਕ੍ਕਾ ਵਤ੍ਤੁਂ. ਰੂਪਾ ਰੂਪ ਧਮ੍ਮਾਨਂ ਅਦ੍ਧਾਨ ਪਰਿਚ੍ਛੇਦੋ ਨਾਮ ਅਭਿਧਮ੍ਮੇ ਸਬ੍ਬਤ੍ਥ ਇਚ੍ਛਿਤਬ੍ਬੋ. ਤਸ੍ਮਾ ਤਸ੍ਸ ਦਸ੍ਸਨਤ੍ਥਮ੍ਪਿ ਤਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਸਭਾਵਪ੍ਪਟਿਲਾਭੋ’’ਤਿ ਚਿਨ੍ਤਨ ਫੁਸਨਾਦੀਨਂ ਪਾਤੁਭਾਵੋ ਵੁਚ੍ਚਤਿ. ‘‘ਅਨਿਵਤ੍ਤੀ’’ਤਿ ਅਨਨ੍ਤਰਧਾਨਂ ਵੁਚ੍ਚਤਿ. ‘‘ਪਰਿਹਾਯਿਤ੍ਵਾ’’ਤਿ ਜਰਾ ਕਿਚ੍ਚਂ ਆਹ. ‘‘ਅਚ੍ਛਰਾਸਙ੍ਘਾਟਕ੍ਖਣਸ੍ਸਾ’’ਤਿ ਅਙ੍ਗੁਲੀਨਂ ਸਙ੍ਘਟ੍ਟਨਕ੍ਖਣਸ੍ਸ. ਆਚਰਿਯਾਨਨ੍ਦਤ੍ਥੇਰੋ ਨਾਮ ਅਭਿਧਮ੍ਮ ਟੀਕਾਕਾਰੋ ਵੁਚ੍ਚਤਿ. ‘‘ਅਸ੍ਸਾ ਵਿਜ੍ਜੁਯਾਠਿਤਿ ਨਾਮ ਵਿਸੁਂ ਨ ਪਞ੍ਞਾਯਤੀ’’ਤਿ ਵਿਜ੍ਜੁਪ੍ਪਾਦਂ ਪਸ੍ਸਨ੍ਤਾਨਂ ਨ ਪਞ੍ਞਾਯਤਿ. ਤਥਾ ਚਿਤ੍ਤਮ੍ਪਿ ਵਡ੍ਢਨਾਨਨ੍ਤਰਮੇਵ ਭਿਜ੍ਜਤੀਤਿ ਯੋਜਨਾ. ਤੇਨਾਹ ‘‘ਤਂ ਪੀ’’ਤਿਆਦਿਂ. ਉਦਯਭਾਗੋ ਨਾਮ ਵਡ੍ਢਨਭਾਗੋ, ਵਯਭਾਗੋ ਨਾਮ ਅਨ੍ਤਰਧਾਨਭਾਗੋ. ‘‘ਏਵਞ੍ਚ ਕਤ੍ਵਾ’’ਤਿ ਲਦ੍ਧਗੁਣ ਵਚਨਂ. ‘‘ਏਕਂਚਿਤ੍ਤਂ ਦਿਵਸਂ ਤਿਟ੍ਠਤੀ’’ਤਿ ਪੁਚ੍ਛਾ ਵਚਨਂ. ‘‘ਆਮਨ੍ਤਾ’’ਤਿ ਪਟਿਞ੍ਞਾ ਵਚਨਂ. ‘‘ਵਯਕ੍ਖਣੋ’’ਤਿ ਪੁਚ੍ਛਾ. ‘‘ਨ ਹੇਵਂ ਵਤ੍ਤਬ੍ਬੇ’’ਤਿ ਪਟਿਕ੍ਖੇਪੋ. ਪਚ੍ਚਤ੍ਤ ਵਚਨਸ੍ਸ ਏਕਾਰਤ੍ਤਂ. ਏਵਂ ਨਵਤ੍ਤਬ੍ਬਨ੍ਤਿ ਅਤ੍ਥੋ. ‘‘ਮਹਾਥੇਰੇਨਾ’’ਤਿ ਮੋਗ੍ਗਲਿ ਪੁਤ੍ਤਤਿਸ੍ਸ ਮਹਾਥੇਰੇਨ. ਨਨੁ ਸੁਤ੍ਤਨ੍ਤੇਸੁ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਨਾ’’ਤਿ ਨ ਉਪਲਬ੍ਭਤਿ. ‘‘ਇਮਸ੍ਸ ਵੁਤ੍ਤਤ੍ਤਾ’’ਤਿ ਇਮਸ੍ਸ ਵਚਨਸ੍ਸ ਵੁਤ੍ਤਤ੍ਤਾ. ਸਙ੍ਖਤ ਲਕ੍ਖਣਂ ਵਿਸਯੋ ਯੇਸਂ ਤਾਨਿ ਸਙ੍ਖਤ ਵਿਸਯ ਲਕ੍ਖਣਾਨਿ. ਸਙ੍ਖਤ ਧਮ੍ਮਮੇਵ ਆਹਚ੍ਚ ਤਿਟ੍ਠਤਿ. ਅਯਂ ਅਭਿਧਮ੍ਮੇ ਧਮ੍ਮਤਾਤਿ ਅਧਿਪ੍ਪਾਯੋ. ‘‘ਸਙ੍ਗਹ ਕਾਰੇਨਾ’’ਤਿ ਆਚਰਿਯ ਬੁਦ੍ਧਘੋਸਤ੍ਥੇਰਂ ਵਦਤਿ. ‘‘ਅਤ੍ਥਿਕ੍ਖਣਂ’’ਤਿ ਖਣਦ੍ਵਯਮੇਵ ਵੁਚ੍ਚਤਿ. ਇਤਿ ਵਤ੍ਵਾ ਤਮਤ੍ਥਂ ਸਾਧੇਨ੍ਤੀਤਿ ਸਮ੍ਬਨ੍ਧੋ. ਗਾਥਾਯਂ. ‘‘ਤਸ੍ਸੇਵਾ’’ਤਿ ਤਸ੍ਸਾ ਠਿਤਿਯਾ ਏਵ ਭੇਦੋ. ਸਬ੍ਬਦਾ ਸਬ੍ਬਪਾਣਿਨਂ ਮਰਣਂ ਨਾਮ ਵੁਚ੍ਚਤੀਤਿ ਯੋਜਨਾ. ‘‘ਤਮਤ੍ਥਂ’’ਤਿ ਤਾਨਿ ਅਤ੍ਥਿਕ੍ਖਣਂ ਉਪਾਦਾਯ ਲਬ੍ਭਨ੍ਤੀਤਿ ਅਤ੍ਥਂ. ‘‘ਅਥਵਾ’’ਤਿ ਏਕੋ ਥੇਰਵਾਦੋ. ‘‘ਸਨ੍ਤਤਿ ਵਸੇਨ ਠਾਨਂ’’ਤਿ ਠਿਤਾਯ ਅਞ੍ਞਥਤ੍ਤਂ ਪਞ੍ਞਾਯਤੀਤਿ ਏਤ੍ਥ ਠਿਤਭਾਵਸਙ੍ਖਾਤਂ ਠਾਨਂ ਸਨ੍ਤਤਿ ਠਿਤਿਵਸੇਨ ਵੇਦਿਤਬ੍ਬਨ੍ਤਿ ਵਦਨ੍ਤਿ. ‘‘ਇਮਸ੍ਮਿਂ ਪਨ ਸੁਤ੍ਤੇ’’ਤਿ ਵੇਦਨਾਯ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਾਯ ਅਞ੍ਞਥਤ੍ਤਂ ਪਞ੍ਞਾਯਤੀਤਿ ਇਦਂ ਸੁਤ੍ਤਂ ਵਦਤਿ. ‘‘ਅਪ੍ਪਟਿਬਾਹੇਤ੍ਵਾ’’ਤਿ ਅਨੀਵਾਰੇਤ੍ਵਾ. ਯਾਵਡ੍ਢਨਸ੍ਸ ਨਿਵਤ੍ਤਿ ਨਾਮ ਅਤ੍ਥਿ. ਉਦਯ ਪਰਿਯਨ੍ਤ ਮਤ੍ਤਭੂਤਾ ਸਾ ਏਵ ਨਿਵਤ੍ਤਿ. ‘‘ਦ੍ਵੀਹਿ ਖਨ੍ਧੇਹੀ’’ਤਿ ਰੂਪ ਜਰਾ ਰੂਪਕ੍ਖਨ੍ਧੇਨ ਸਙ੍ਗਹਿਤਾ. ਅਰੂਪ ਜਰਾ ਸਙ੍ਖਾਰਕ੍ਖਨ੍ਧੇਨਾਤਿ ਏਵਂ ਦ੍ਵੀਹਿ ਖਨ੍ਧੇਹਿ. ਯਞ੍ਚ ਤਤ੍ਥ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਰੂਪਸ੍ਸ ਉਪ੍ਪਾਦੋ ਦ੍ਵਿਧਾਭਿਨ੍ਦਿਤ੍ਵਾ ਦੇਸਿਤੋ. ਕਥਂ, ਉਪਚਯੋ ਸਨ੍ਤਤੀ ਤਿਯੋਜਨਾ. ‘‘ਵਿਭਾਗਾ ਰਹਸ੍ਸਾ’’ਤਿ ਉਪ੍ਪਾਦੋ ਉਪ੍ਪਜ੍ਜ ਨਟ੍ਠੇਨ ਏਕੋ ਸਮਾਨੋ ਰੂਪਾਨਂ ਵਡ੍ਢਨ ਸਮਯੇ ਉਪ੍ਪਾਦੋ. ਉਪਰਿ ਵਡ੍ਢਨਟ੍ਠੇਨ ਉਪਚਯੋਤਿ ਵੁਤ੍ਤੋ. ਅਵਡ੍ਢਿਤ੍ਵਾ ਠਿਤ ਸਮਯੇ ਉਪ੍ਪਾਦੋ ਯਥਾ ਠਿਤ ਨੀਹਾਰੇਨ ਚਿਰਕਾਲਂ ਪਵਤ੍ਤਿ ਅਤ੍ਥੇਨ ਸਨ੍ਤਤੀਤਿ ਵੁਤ੍ਤੋ. ਏਵਂ ਵਿਭਾਗਾ ਰਹਸ੍ਸ. ‘‘ਯਥਾਨੁਲੋਮ ਸਾਸਨਂ’’ਤਿ ਵਿਨੇਤਬ੍ਬ ਪੁਗ੍ਗਲਾਨਂ ਅਜ੍ਝਾਸਯਾਨੁਲੋਮ ਸਾਸਨਂ.

‘‘ਅਰੂਪ’’ਨ੍ਤਿਆਦੀਸੁ. ‘‘ਅਰੂਪਂ’’ਤਿ ਸਬ੍ਬਸੋ ਰੂਪਸਣ੍ਠਾਨ ਰਹਿਤਤ੍ਤਾ ਚਿਤ੍ਤ ਚੇਤਸਿਕਂ ਨਾਮਂ ਵੁਚ੍ਚਤਿ. ‘‘ਅਰੂਪਿ ਸਭਾਵਤ੍ਤਾ’’ਤਿ ਅਰੂਪ ਧਮ੍ਮ ਸਭਾਵਤ੍ਤਾ ਇਚ੍ਚੇਵਤ੍ਥੋ. ਤਤ੍ਥ ਅਰੂਪ ਧਮ੍ਮ ਸਭਾਵੋ ਨਾਮ ਰੂਪ ਧਮ੍ਮਤੋ ਸਤਗੁਣੇਨਵਾਸਹਸ੍ਸਗੁਣੇਨਵਾਸਣ੍ਹਸੁਖੁਮਸਭਾਵੋ. ਵਿਭਾਵ ਨਿਪਾਠੇ. ‘‘ਗਾਹਕ ਗਹੇਤਬ੍ਬ ਭਾਵਸ੍ਸ ਤਂ ਤਂ ਖਣਵਸੇਨ ਨਿਪ੍ਫਜ੍ਜਨਤੋ’’ਤਿ ਏਤ੍ਥ ਪਞ੍ਚਦ੍ਵਾਰ ਵੀਥੀਸੁ ਵੀਥਿ ਚਿਤ੍ਤਾਨਞ੍ਚ ਆਰਮ੍ਮਣਾਨਞ੍ਚ ਵਿਸਯੀ ਵਿਸਯਭਾਵੋ ਗਾਹਕ ਗਹੇਤਬ੍ਬ ਭਾਵੋ ਨਾਮ. ‘‘ਤਂ ਤਂ ਖਣਵਸੇਨ ਨਿਪ੍ਫਜ੍ਜਨਤੋ’’ਤਿ ਵੀਥਿ ਚਿਤ੍ਤਾਨਿ ਚ ਏਕਸ੍ਮਿਂ ਆਰਮ੍ਮਣੇਪਿ ਆਵਜ੍ਜਨਾਦੀਹਿ ਨਾਨਾ ਕਿਚ੍ਚੇਹਿ ਗਣ੍ਹਨ੍ਤਾ ਏਵ ਗਹਣ ਕਿਚ੍ਚਂ ਸਮ੍ਪਾਦੇਨ੍ਤਿ. ਨਾਨਾ ਕਿਚ੍ਚਾਨਿ ਚ ਨਾਨਾ ਚਿਤ੍ਤਾਨਂ ਵਸੇਨ ਸਮ੍ਪਜ੍ਜਨ੍ਤਿ. ਆਰਮ੍ਮਣਾਨਿ ਚ ਪੁਰੇਜਾਤਾਨਿ ਹੁਤ੍ਵਾ ਯਾਵ ਤਾਨਿ ਕਿਚ੍ਚਾਨਿ ਸਮ੍ਪਜ੍ਜਨ੍ਤਿ, ਤਾਵ ਪਚ੍ਚੁਪ੍ਪਨ੍ਨਭਾਵੇਨ ਧਰਮਾਨਾਨਿ ਏਵ ਗਹਣਂ ਸਮ੍ਪਾਦੇਨ੍ਤਿ. ਏਵਂ ਸਤਿ, ਗਾਹਕਾਨਂ ਵੀਥਿ ਚਿਤ੍ਤਾਨਞ੍ਚ ਖਣਤ੍ਤਯਾਯੁਕਤ੍ਤਾ ਏਵ ਗਾਹਕ ਕਿਚ੍ਚਂ ਨਿਪ੍ਫਜ੍ਜਤਿ, ਸਿਜ੍ਝਤਿ. ਗਹੇਤਬ੍ਬਾਨਂ ਆਰਮ੍ਮਣਾਨਞ੍ਚ ਸਤ੍ਤਰਸ ਚਿਤ੍ਤਕ੍ਖਣਾਯੁਕਤ੍ਤਾ ਏਵ ਗਹੇਤਬ੍ਬ ਕਿਚ੍ਚਂ ਨਿਪ੍ਫਜ੍ਜਤਿ, ਸਿਜ੍ਝਤਿ. ਏਵਂ ਤਂ ਤਂ ਖਣ ਵਸੇਨ ਨਿਪ੍ਫਜ੍ਜਨਤੋ. ਵਿਞ੍ਞਤ੍ਤਿ ਦ੍ਵਯਂ ਏਕ ਚਿਤ੍ਤਕ੍ਖਣਿਕਂ. ਕਸ੍ਮਾ, ਚਿਤ੍ਤਾਨੁ ਪਰਿਵਤ੍ਤਿ ਧਮ੍ਮਤ੍ਤਾ. ‘‘ਉਪ੍ਪਾਦਮਤ੍ਤਾ’’ਤਿ ਨਿਪ੍ਫਨ੍ਨ ਰੂਪਾਨਂ ਉਪ੍ਪਾਦਮਤ੍ਤਾ. ‘‘ਭਙ੍ਗਮਤ੍ਤਾ’’ਤਿ ਤੇਸਮੇਵ ਭਙ੍ਗਮਤ੍ਤਾ. ‘‘ਰੂਪ ਧਮ੍ਮਾਨਂ’’ਤਿ ਨਿਪ੍ਫਨ੍ਨ ਰੂਪ ਧਮ੍ਮਾਨਂ. ‘‘ਉਪ੍ਪਾਦਨਿਰੋਧ ਵਿਧਾਨਸ੍ਸਾ’’ਤਿ ਉਪ੍ਪਾਦ ਨਿਰੋਧ ਵਿਧਾਨਭੂਤਸ੍ਸ ਮਹਾਅਟ੍ਠਕਥਾਵਾਦਸ੍ਸ ਪਟਿਸਿਦ੍ਧਤ੍ਤਾਤਿ ਸਮ੍ਬਨ੍ਧੋ. ‘‘ਤਂ’’ਤਿ ਤਂ ਮਹਾਅਟ੍ਠਕਥਾ ਵਚਨਂ. ‘‘ਤਸ੍ਮਿਂ ਵਾਦੇ’’ਤਿ ਤਸ੍ਮਿਂ ਮਹਾਅਟ੍ਠਕਥਾਵਾਦੇ. ‘‘ਤਤ੍ਥ ਆਗਤਾ’’ਤਿ ਤਸ੍ਮਿਂ ਵਾਦੇ ਆਗਤਾ. ਯਂ ਪਨ ਵਿਭਾਵਨਿਯਂ ਕਾਰਣਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਤਂ ਟੀਕਾਨਯਂ’’ਤਿ ਤਂ ਸੋਲ਼ਸ ਚਿਤ੍ਤਕ੍ਖਣਾਯੁਕ ਦੀਪਕਂ ਮੂਲਟੀਕਾਨਯਂ. ਤਦਤ੍ਥਂ ਸਾਧੇਨ੍ਤੇਨ ਵਿਭਾਵਨਿ ਟੀਕਾਚਰਿਯੇਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਙ੍ਗਹਕਾਰਸ੍ਸ ਅਟ੍ਠਕਥਾ ਚਰਿਯਸ੍ਸ. ‘‘ਉਪਚਰੀਯਤੀ’’ਤਿ ਉਪਚਾਰ ਵਸੇਨ ਵੋਹਰੀਯਤਿ. ਵਿਭਾਵਨਿਪਾਠੇ. ‘‘ਏਤਾਨੀ’’ਤਿ ਆਰਮ੍ਮਣਾਨਿ. ‘‘ਤਂ’’ਤਿ ਤਂ ਏਕ ਚਿਤ੍ਤਕ੍ਖਣਂ. ‘‘ਤੇ ਚਾ’’ਤਿ ਰੂਪ ਧਮ੍ਮਾ ਚ. ‘‘ਪਰਿਪੁਣ੍ਣ ਪਚ੍ਚਯੂਪਲਦ੍ਧਾ’’ਤਿ ਪਰਿਪੁਣ੍ਣਂ ਪਚ੍ਚਯਂ ਉਪਲਦ੍ਧਾ. ‘‘ਸੋ’’ਤਿ ਟੀਕਾਕਾਰੋ. ‘‘ਇਤਰਾਨੀ’’ਤਿ ਗਨ੍ਧਰਸ ਫੋਟ੍ਠਬ੍ਬਾਨਿ. ‘‘ਗੋਚਰਭਾਵਂ’’ਤਿ ਪਞ੍ਚਦ੍ਵਾਰਿਕ ਚਿਤ੍ਤਾਨਂ ਗੋਚਰਭਾਵਂ. ‘‘ਪੁਰਿਮਾਨਿ ਦ੍ਵੇ’’ਤਿ ਰੂਪਸਦ੍ਦਾ ਰਮ੍ਮਣਾਨਿ. ‘‘ਨਿਮਿਤ੍ਤ ਵਸੇਨ ਘਟ੍ਟੇਨ੍ਤੀ’’ਤਿ ਆਦਾਸਂ ਪਸ੍ਸਨ੍ਤਸ੍ਸ ਮੁਖਸਦਿਸਂ ਮੁਖਨਿਮਿਤ੍ਤਂ ਮੁਖਪ੍ਪਟਿਬਿਮ੍ਬਂ ਆਦਾਸੇ ਉਪਟ੍ਠਾਤਿ. ਏਵਂ ਰੂਪਾਰਮ੍ਮਣਂ ਚਕ੍ਖੁਪਸਾਦੇ ਸਦ੍ਦਾਰਮ੍ਮਣਞ੍ਚ ਸੋਤਪਸਾਦੇ ਤਂ ਸਦਿਸ ਨਿਮਿਤ੍ਤ ਵਸੇਨ ਘਟ੍ਟੇਨ੍ਤਿ. ਨਵਤ੍ਥੁ ਵਸੇਨ ਘਟ੍ਟੇਨ੍ਤਿ. ਸਯਂ ਗਨ੍ਤ੍ਵਾ ਨ ਘਟ੍ਟੇਨ੍ਤੀਤਿ ਅਧਿਪ੍ਪਾਯੋ. ਅਸਮ੍ਪਤ੍ਤਾਨਞ੍ਞੇਵ ਆਰਮ੍ਮਣਾਨਂ. ‘‘ਨਿਮਿਤ੍ਤੁ ਪਟ੍ਠਾਨ ਵਸੇਨਾ’’ਤਿ ਨਿਮਿਤ੍ਤਸ੍ਸ ਉਪਟ੍ਠਾਨਵਸੇਨ. ‘‘ਨਿਮਿਤ੍ਤ ਅਪ੍ਪਨਾਵਸੇਨਾ’’ਤਿ ਨਿਮਿਤ੍ਤਸ੍ਸ ਪਵੇਸਨ ਵਸੇਨ. ਮਨੋਦ੍ਵਾਰੇ ਪਨ ਅਸਮ੍ਪਤ੍ਤਾਨਿਯੇਵ ਹੁਤ੍ਵਾਤਿ ਪਾਠਸੇਸੋ. ‘‘ਆਪਾਤਾ ਗਮਨਞ੍ਚੇਤ੍ਥਾ’’ਤਿਆਦੀਸੁ. ‘‘ਲਞ੍ਛਕਾਨਂ’’ਤਿ ਲਞ੍ਛਨਕਾਰਾਨਂ. ‘‘ਲਞ੍ਛਨਕ੍ਖਨ੍ਧਂ’’ਤਿ ਅਯੋਮਯਂ ਲਞ੍ਛਨਕ੍ਖਨ੍ਧਂ. ਸੋ ਚ ਲਞ੍ਛਨਕ੍ਖਨ੍ਧੋ ਤਾਲਪਣ੍ਣੇ ਆਪਾਤੇਤ੍ਵਾ ਅਕ੍ਖਰਂ ਉਪਟ੍ਠਾਪੇਤਿ. ਤਤ੍ਥ ‘‘ਆਪਾਤੇਤ੍ਵਾ’’ਤਿ ਅਜ੍ਝੋਤ੍ਥਰਿਤ੍ਵਾ. ‘‘ਚਕ੍ਖਾਦਿਪ੍ਪਥੇ’’ਤਿ ਚਕ੍ਖਾਦੀਨਂ ਵਿਸਯਕ੍ਖੇਤ੍ਤੇ. ਨ ਕੇਵਲਂ ਅਤ੍ਤਨੋ ਦ੍ਵਾਰੇਸੁ ਏਵ ਆਪਾਤ ਮਾਗਚ੍ਛਨ੍ਤਿ. ਅਥ ਖੋ ਮਨੋਦ੍ਵਾਰੇਪਿ ਆਪਾਤ ਮਾਗਚ੍ਛਨ੍ਤਿ. ਨ ਕੇਵਲਂ ਭਵਙ੍ਗ ਮਨੋਦ੍ਵਾਰੇ ਏਵ ਆਪਾਤ ਮਾਗਚ੍ਛਨ੍ਤੀਤਿ ਯੋਜਨਾ. ‘‘ਤੇਸੁ ਪਨਾ’’ਤਿ ਤੇਸੁ ਆਰਮ੍ਮਣੇਸੁ ਪਨ. ਤਾਨਿ ਆਰਮ੍ਮਣਾਨਿ ਯੇਸਂ ਤਾਨਿ ਤਦਾ ਰਮ੍ਮਣਾਨਿ. ਨ ਏਕਕ੍ਖਣੇ ਪਞ੍ਚਸੁ ਆਰਮ੍ਮਣੇਸੁ ਵੀਥਿ ਚਿਤ੍ਤਾਨਿ ਪਵਤ੍ਤਨ੍ਤਿ, ਏਕੇਕਸ੍ਮਿਂ ਆਰਮ੍ਮਣੇ ਏਵਾਤਿ ਵੁਤ੍ਤਤ੍ਤਾ ਨ ਦ੍ਵੀਸੁ, ਨ ਤੀਸੁ, ਨ ਚਤੂਸੂਤਿਪਿ ਵਤ੍ਤਬ੍ਬਂ. ਬਹੁਚਿਤ੍ਤਕ੍ਖਣਾਤੀਤਾਨਿ ਪਞ੍ਚਾਰਮ੍ਮਣਾਨਿ ਬਹੁਚਿਤ੍ਤਕ੍ਖਣਾਤੀਤੇ ਪਞ੍ਚਦ੍ਵਾਰੇਤਿ ਯੋਜਨਾ. ਪਞ੍ਚਦ੍ਵਾਰੇਤਿ ਚ ਪਞ੍ਚਦ੍ਵਾਰੇਸੂਤਿ ਅਤ੍ਥੋ. ‘‘ਏਵਂ ਸਤੀ’’ਤਿ ਤੇਸਂ ਪਸਾਦਾਨਂ ਆਵਜ੍ਜਨੇਨ ਸਦ੍ਧਿਂ ਉਪ੍ਪਤ੍ਤਿਯਾ ਸਤਿ. ‘‘ਆਦਿਲਕ੍ਖਣਂ’’ਤਿ ਪਞ੍ਚਾਰਮ੍ਮਣਾਨਂ ਪਞ੍ਚਦ੍ਵਾਰੇਸੁ ਆਪਾਤਾ ਗਮਨ ਸਙ੍ਖਾਤਂ ਵਿਸਯਪ੍ਪਵਤ੍ਤਿਯਾ ਆਦਿਲਕ੍ਖਣਂ. ਚਲਨਞ੍ਚ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ‘‘ਯਥਾ ਗਹਿਤਂ’’ਤਿ ਪਟਿਸਨ੍ਧਿਤੋ ਪਟ੍ਠਾਯ ਗਹਿਤਪ੍ਪਕਾਰਂ. ਵਿਭਾਵਨਿਪਾਠੇ ‘‘ਯੋਗ੍ਯ ਦੇਸਾਵਟ੍ਠਾਨ ਵਸੇਨਾ’’ਤਿ ਆਪਾਤਂ ਆਗਨ੍ਤੁਂ ਯੁਤ੍ਤਟ੍ਠਾਨੇ ਅਵੇਚ੍ਚਟ੍ਠਾਨ ਵਸੇਨ. ਯੁਜ੍ਜਨਞ੍ਚ, ਮਨ੍ਥਨਞ੍ਚ, ਖੋਭਕਰਣਞ੍ਚ, ਘਟ੍ਟਨਨ੍ਤਿ ਚ ਆਪਾਤਾ ਗਮਨਨ੍ਤਿ ਚ ਵੁਚ੍ਚਤੀਤਿ ਯੋਜਨਾ. ਹੇਟ੍ਠਾ ਵੁਤ੍ਤੋਯੇਵ ਆਪਾਤਾ ਗਮਨਞ੍ਚੇਤ੍ਥਾਤਿਆਦਿਨਾ. ‘‘ਨਾਨਾ ਠਾਨਿਯੇਸੂ’’ਤਿ ਨਾਨਾ ਠਾਨੇਸੁ ਠਿਤੇਸੁ. ‘‘ਏਕੋ ਧਮ੍ਮਨਿਯਾਮੋ ਨਾਮਾ’’ਤਿ ਯਥਾ ਬੋਧਿਸਤ੍ਤੇ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਨ੍ਤੇ ਧਮ੍ਮਨਿਯਾਮ ਵਸੇਨ ਸਕਲੇ ਜਾਤਿਕ੍ਖੇਤ੍ਤੇ ਪਥਵਿਕਮ੍ਪਨਂ ਅਹੋਸਿ. ਤਥਾ ਇਧਪਿ ਪਞ੍ਚਦ੍ਵਾਰੇਸੁ ਏਕੇਕਸ੍ਮਿਂ ਦ੍ਵਾਰੇ ਆਰਮ੍ਮਣੇ ਘਟ੍ਟੇਨ੍ਤੇ ਧਮ੍ਮਨਿਯਾਮ ਵਸੇਨ ਭਵਙ੍ਗ ਚਲਨਂ ਹੋਤਿ. ਅਯਂ ਧਮ੍ਮਨਿਯਾਮੋ ਨਾਮ. ‘‘ਸਹੇਵਾ’’ਤਿ ਏਕਤੋਯੇਵ. ਕਥਂ ਹਦਯ ਵਤ੍ਥੁ ਨਿਸ੍ਸਿਤਸ੍ਸ ਭਵਙ੍ਗਸ੍ਸ ਚਲਨਂ ਸਿਯਾਤਿ ਯੋਜਨਾ. ਏਤ੍ਥ ਚ ਪਞ੍ਚਵਿਞ੍ਞਾਣਸ੍ਸ ਚਲਨਂ ਸਿਯਾਤਿ ਇਦਂ ਨ ਵਤ੍ਤਬ੍ਬਂ. ਕਸ੍ਮਾ, ਤਦਾ ਪਞ੍ਚਵਿਞ੍ਞਾਣਸ੍ਸ ਅਵਿਜ੍ਜਮਾਨਤ੍ਤਾ. ਯਦਾ ਚ ਤਂ ਵਿਜ੍ਜਤਿ, ਤਦਾ ਤਂ ਨ ਚਲਤੀਤਿ ਨ ਵਤ੍ਤਬ੍ਬਂ. ਸਬ੍ਬਮ੍ਪਿ ਹਿ ਵੀਥਿਚਿਤ੍ਤਂ ਨਾਮ ਚਲਤਿ ਯੇਵਾਤਿ. ਸਨ੍ਤਤਿ ਨਾਮ ਪੁਬ੍ਬਾ ਪਰਪ੍ਪਬਨ੍ਧੋ. ਸਣ੍ਠਾਨਂ ਨਾਮ ਸਹਪ੍ਪਵਤ੍ਤਾਨਂ ਏਕਤੋ ਠਿਤਿ. ਇਧ ਸਣ੍ਠਾਨਂ ਅਧਿਪ੍ਪੇਤਂ. ਪਞ੍ਚਨਿਸ੍ਸਯ ਮਹਾਭੂਤੇਹਿ ਸਦ੍ਧਿਂ ਹਦਯ ਵਤ੍ਥੁ ਨਿਸ੍ਸਯਭੂਤਾਨਂ ਏਕ ਸਣ੍ਠਾਨ ਭਾਵੇਨ ਏਕਾਬਦ੍ਧਤ੍ਤਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਸਣ੍ਠਾਨ ਵਸੇਨਾਤਿ ਪਨ ਵਤ੍ਤਬ੍ਬਂ’’ਤਿ. ‘‘ਤਾਦਿਸਸ੍ਸ ਅਨੁਕ੍ਕਮ ਚਲਨਸ੍ਸਾ’’ਤਿ ਵਿਭਾਵਨਿਯਂ ਭੇਰਿਸਕ੍ਖਰੋਪਮਾਯ ਸਦ੍ਧਿਂ ਰੂਪਾਦਿਨਾ ਪਸਾਦੇ ਘਟ੍ਟਿਤੇ ਤਨ੍ਨਿਸ੍ਸ ਯੇਸੁ ਮਹਾਭੂਤੇਸੁ ਚਲਿਤੇਸੁ ਅਨੁਕ੍ਕਮੇਨ ਤਂ ਸਮ੍ਬਨ੍ਧਾਨਂ ਸੇਸਰੂਪਾਨਮ੍ਪਿ ਚਲਨੇਨ ਹਦਯ ਵਤ੍ਥੁਮ੍ਹਿ ਚਲਿਤੇ ਤਨ੍ਨਿਸ੍ਸਿਤਸ੍ਸ ਭਵਙ੍ਗਸ੍ਸ ਚਲਨਾ ਕਾਰੇਨ ਪਵਤ੍ਤਿਤੋਤੀਤਿ ਏਵਂ ਵੁਤ੍ਤਸ੍ਸ ਅਨੁਕ੍ਕਮ ਚਲਨਸ੍ਸ. ‘‘ਭਵਙ੍ਗਪ੍ਪਵਾਹਂ’’ਤਿ ਭਵਙ੍ਗ ਸਨ੍ਤਤਿਂ. ‘‘ਕੁਰੁਮਾਨਂ’’ਤਿ ਕਰੋਨ੍ਤਂ. ਸਲ੍ਲਕ੍ਖੇਨ੍ਤਂ’’ਤਿ ਇਦਮੇਵਾਤਿ ਸਨ੍ਨਿਟ੍ਠਾਪੇਨ੍ਤਂ. ‘‘ਯੋਨਿ ਸੋਮਨਸਿਕਾਰਾਦਿਵਸੇਨਾ’’ਤਿ ਯੋਨਿ ਸੋਮਨਸਿਕਾਰੋ ਕੁਸਲ ਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਅਯੋਨਿ ਸੋਮਨਸਿਕਾਰੋ ਅਕੁਸਲ ਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਨਿਰਨੁਸਯ ਸਨ੍ਤਾਨਤਾ ਕ੍ਰਿਯਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਤੇਸੁ ਚ ਸੋਮਨਸ੍ਸ ਜਵਨਾਦੀਨਂ ਉਪ੍ਪਤ੍ਤਿ ਪਚ੍ਚਯੋਪਿ ਹੇਟ੍ਠਾ ਚਿਤ੍ਤ ਸਙ੍ਗਹੇ ਵੁਤ੍ਤਨਯੇਨ ਵੇਦਿਤਬ੍ਬੋ.

‘‘ਭਵਙ੍ਗਪਾਤੋ’’ਤਿਆਦੀਸੁ. ‘‘ਆਵਜ੍ਜਨਤੋ ਪਟ੍ਠਾਯ ਉਟ੍ਠਿਤਂ’’ਤਿ ਕਮ੍ਮ ਵਿਪਾਕਸਨ੍ਤਾਨਤੋ ਚ ਤਦਾਰਮ੍ਮਣਤੋ ਚ ਮੁਞ੍ਚਿਤ੍ਵਾ ਵਿਸੁਂ ਕ੍ਰਿਯਾਮਯ ਬ੍ਯਾਪਾਰੇਨ ਆਰਮ੍ਮਣਨ੍ਤਰਂ ਗਹੇਤ੍ਵਾ ਉਟ੍ਠਿਤਂ ਸਮੁਟ੍ਠਿਤਂ. ਭਵਙ੍ਗ ਚਲਨਮ੍ਪਿ ਉਟ੍ਠਾਨਸ੍ਸ ਆਦਿ ਹੋਤਿ. ਤਸ੍ਮਾ ਤਮ੍ਪਿ ਉਟ੍ਠਿਤੇ ਚਿਤ੍ਤ ਸਨ੍ਤਾਨੇ ਸਙ੍ਗਣ੍ਹਨ੍ਤੋ ਪਥਮ ਭਵਙ੍ਗ ਚਲਨਤੋਯੇਵ ਵਾਤਿ ਵੁਤ੍ਤਂ. ‘‘ਇਮਸ੍ਮਿਂ ਠਾਨੇ’’ਤਿ ਵੀਥਿ ਚਿਤ੍ਤਾਨਂ ਅਨੁਕ੍ਕਮੇਨ ਅਤ੍ਤਨੋ ਕਿਚ੍ਚੇਹਿ ਆਰਮ੍ਮਣਪ੍ਪਵਤ੍ਤਿਟ੍ਠਾਨੇ. ‘‘ਦੋਵਾਰਿਕੋਪਮਾ’’ਤਿ ਬਧਿਰਦੋਵਾਰਿਕੋਪਮਾ. ‘‘ਗਾਮਿਲ੍ਲੋਪਮਾ’’ਤਿ ਗਾਮਦਾਰਕੋਪਮਾ. ‘‘ਅਮ੍ਬੋਪਮਾ’’ਤਿ ਅਮ੍ਬਪ੍ਫਲੋਪਮਾ. ਅਞ੍ਞਾਪਿ ਉਪਮਾ ਅਤ੍ਥਿ. ਮਕ੍ਕਟਸੁਤ੍ਤੋਪਮਾ, ਉਚ੍ਛੁਯਨ੍ਤੋਪਮਾ, ਜਚ੍ਚਨ੍ਧੋਪਮਾ. ਤਾਸਬ੍ਬਾਪਿ ਅਟ੍ਠਸਾਲਿਨਿਯਂ ਵਿਪਾਕੁਦ੍ਧਾਰ ਕਥਾਤੋ ਗਹੇਤਬ੍ਬਾ. ‘‘ਯਤ੍ਥਹੀ’’ਤਿਆਦੀਸੁ. ‘‘ਕਥਂ ਛ ਛਕ੍ਕ ਯੋਜਨਾ ਹੋਤੀ’’ਤਿ. ਚਕ੍ਖੁ ਵਤ੍ਥੁ ਵਚਨਞ੍ਚ, ਚਕ੍ਖੁਦ੍ਵਾਰ ਵਚਨਞ੍ਚ, ਰੂਪਾ ਰਮ੍ਮਣ ਵਚਨਞ੍ਚ, ਚਕ੍ਖੁ ਵਿਞ੍ਞਾਣ ਵਚਨਞ੍ਚ, ਚਕ੍ਖੁਦ੍ਵਾਰ ਵੀਥਿ ਚਕ੍ਖੁ ਵਿਞ੍ਞਾਣ ਵੀਥਿ ਵਚਨਞ੍ਚ, ਅਤਿਮਹਨ੍ਤਾ ਰਮ੍ਮਣ ਵਚਨਞ੍ਚਾ,ਤਿ ਏਤਾਨਿ ਛਵਚਨਾਨਿ. ਤੇਹਿ ਛਛਕ੍ਕੇਹਿ ਆਹਰਿਤ੍ਵਾ ਇਮਿਸ੍ਸਂ ਵੀਥਿਯਂ ਦਸ੍ਸਿਤਾਨਿ. ਸੇਸਵੀਥੀਸੁਪਿ ਯਥਾਲਾਭਂ ਦਸ੍ਸਿਤਬ੍ਬਾਨਿ. ਏਵਂ ਛਛਕ੍ਕਯੋਜਨਾ ਹੋਤਿ. ‘‘ਏਤ੍ਥ ਚ ਯਤ੍ਤਕਾਨੀ’’ਤਿਆਦੀਸੁ. ‘‘ਏਕੂਨ ਪਞ੍ਞਾਸ ਪਰਿਮਾਣੇਸੂ’’ਤਿ ਏਕਸ੍ਸਨਿਪ੍ਫਨ੍ਨ ਰੂਪਧਮ੍ਮਸ੍ਸ ਏਕਪਞ੍ਞਾਸ ਮਤ੍ਤੇਸੁ ਖੁਦ੍ਦਕਕ੍ਖਣੇਸੁ ਉਪ੍ਪਾਦਕ੍ਖਣਞ੍ਚ ਭਙ੍ਗਕ੍ਖਣਞ੍ਚ ਠਪੇਤ੍ਵਾ ਮਜ੍ਝੇ ਏਕੂਨ ਪਞ੍ਞਾਸ ਮਤ੍ਤਾਨਿ ਠਿਤਿਕ੍ਖਣਾਨਿ ਸਨ੍ਤਿ. ਤੇਸੁ ਖਣੇਸੁ ਅਨੁਕ੍ਕਮੇਨ ਉਪ੍ਪਨ੍ਨਾ ਏਕੂਨ ਪਞ੍ਞਾਸ ਚਕ੍ਖੁ ਪਸਾਦਾ ਚ ਸਨ੍ਤਿ. ‘‘ਕਿਸ੍ਮਿਞ੍ਚੀ’’ਤਿ ਤੇਸੁ ਕਤਰਸ੍ਮਿਂ ਨਾਮ ਚਕ੍ਖੁ ਪਸਾਦੇ ਨ ਘਟ੍ਟੇਨ੍ਤੀਤਿ ਨ ਵਤ੍ਤਬ੍ਬਾਨਿ. ‘‘ਤੇਸੁ ਪਨਾ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ. ‘‘ਯਦੇਵ ਏਕਂ ਚਕ੍ਖੂ’’ਤਿ ਨਿਦ੍ਧਾਰਣੀਯਂ. ਤਂ ਪਨ ਕਤਮਨ੍ਤਿ. ਅਤੀਤ ਭਵਙ੍ਗੇਨ ਸਦ੍ਧਿਂ ਉਪ੍ਪਜ੍ਜਿਤ੍ਵਾ ਤਂ ਅਤਿਕ੍ਕਮ੍ਮ ਭਵਙ੍ਗ ਚਲਨਕ੍ਖਣੇ ਲਦ੍ਧਘਟਨਂ ਏਕਂ ਚਕ੍ਖੁ. ਤਂ ਪਨ ਚਕ੍ਖੁ ਵਿਞ੍ਞਾਣਸ੍ਸ ਵਤ੍ਥੁ ਭਾਵਞ੍ਚ ਦ੍ਵਾਰਭਾਵਞ੍ਚ ਸਾਧੇਤਿ. ਸੇਸਵਿਞ੍ਞਾਣਾਨਂ ਦ੍ਵਾਰਭਾਵਂ ਸਾਧੇਤੀਤਿ. ਤੇਨਾਹ ‘‘ਯਥਾਰਹਂ’’ਤਿ. ਏਤਦੇਵ ਏਤਂ ਏਵ ਚਕ੍ਖੁ ਕਿਚ੍ਚ ਸਾਧਨਂ ਨਾਮ ਹੋਤਿ ਵੀਥਿ ਚਿਤ੍ਤੁਪ੍ਪਤ੍ਤਿਯਾ ਵਤ੍ਥੁ ਕਿਚ੍ਚਦ੍ਵਾਰ ਕਿਚ੍ਚਾਨਂ ਸਾਧਨਤੋ. ‘‘ਯਂ ਮਜ੍ਝਿਮਾਯੁਕਂ’’ਤਿ ਮਨ੍ਦਾਯੁਕ ਅਮਨ੍ਦਾਯੁਕਾਨਂ ਮਜ੍ਝੇ ਪਵਤ੍ਤਤ੍ਤਾ ਯਂ ਮਜ੍ਝਿਮਾਯੁਕਨ੍ਤਿ ਵਦਨ੍ਤਿ. ਤਂ ਕਿਚ੍ਚ ਸਾਧਨਂ ਨਾਮਾਤਿ ਯੋਜਨਾ. ‘‘ਇਤਰਾਨਿ ਪਨਾ’’ਤਿ ਏਕੂਨ ਪਞ੍ਞਾਸ ਪਰਿਮਾਣੇਸੁ ਚਕ੍ਖੁ ਪਸਾਦੇਸੂਤਿ ਵੁਤ੍ਤਾਨਿ, ਤੇਸੁ ਏਕਂ ਕਿਚ੍ਚ ਸਾਧਨਂ ਠਪੇਤ੍ਵਾ ਸੇਸਾਨਿ ਇਤਰਾਨਿ ਅਟ੍ਠ ਚਤ੍ਤਾਲੀਸ ਚਕ੍ਖੂਨਿ ਮੋਘਵਤ੍ਥੂਨਿ ਨਾਮ ਹੋਨ੍ਤਿ. ਰੂਪਾ ਰਮ੍ਮਣੇਹਿ ਸਦ੍ਧਿਂ ਲਦ੍ਧ ਘਟ੍ਟਨਾਨਮ੍ਪਿ ਸਤਂ ਵੀਥਿ ਚਿਤ੍ਤੁਪ੍ਪਤ੍ਤਿਯਾ ਵਤ੍ਥੁ ਕਿਚ੍ਚਦ੍ਵਾਰ ਕਿਚ੍ਚਰਹਿਤਤ੍ਤਾ. ਤੇਸੁ ਕਤਮਾਨਿ ਮਨ੍ਦਾਯੁਕਾਨਿ ਨਾਮਾਤਿ ਆਹ ‘‘ਤਾਨਿ ਪਨਾ’’ਤਿਆਦਿਂ. ਕਿਚ੍ਚ ਸਾਧਨਤੋ ਪੁਰਿਮਾਨਿ ਨਾਮ ਅਤੀਤ ਭਵਙ੍ਗਤੋ ਪੁਰੇ ਤੇਰਸਸੁ ਭਵਙ੍ਗੇਸੁ ਆਦਿ ਭਵਙ੍ਗਸ੍ਸ ਭਙ੍ਗਕ੍ਖਣਤੋ ਪਟ੍ਠਾਯ ਖਣੇ ਖਣੇ ਉਪ੍ਪਨ੍ਨਾ ਸਤ੍ਤਤਿਂਸ ਚਕ੍ਖੁ ਪਸਾਦਾ. ਤਾਨਿ ਮਨ੍ਦਾਯੁਕਾਨੀਤਿ ਵਦਨ੍ਤਿ. ਕਸ੍ਮਾ, ਕਿਚ੍ਚ ਸਾਧਨਤੋ ਅਪ੍ਪਤਰਾਯੁਕਤ੍ਤਾ. ਕਿਚ੍ਚ ਸਾਧਨਤੋ ਪਚ੍ਛਿਮਾਨਿ ਨਾਮ ਅਤੀਤ ਭਵਙ੍ਗਸ੍ਸ ਠਿਤਿਕ੍ਖਣਤੋ ਪਟ੍ਠਾਯ ਖਣੇ ਖਣੇ ਉਪ੍ਪਨ੍ਨਾ ਏਕਾਦਸ ਚਕ੍ਖੁ ਪਸਾਦਾ, ਤਾਨਿ ਅਮਨ੍ਦਾਯੁਕਾਨੀਤਿ ਵਦਨ੍ਤਿ. ਕਸ੍ਮਾ, ਕਿਚ੍ਚ ਸਾਧਨਤੋ ਬਹੁਤਰਾਯੁਕਤ੍ਤਾ. ਤਦੁਭਯਾਨਿਪਿ ਅਟ੍ਠ ਚਤ੍ਤਾਲੀਸ ਮਤ੍ਤਾਨਿ ਵੇਦਿਤਬ੍ਬਾਨੀਤਿ ਸਮ੍ਬਨ੍ਧੋ. ‘‘ਤਤੋ’’ਤਿ ਤੇਹਿ ਅਟ੍ਠਚਤ੍ਤਾਲੀਸ ਮਤ੍ਤੇਹਿ. ‘‘ਪੁਰਿਮਤਰਾਨੀ’’ਤਿ ਸਤ੍ਤਤਿਂਸ ਮਨ੍ਦਾਯੁਕੇਹਿ ਪੁਰਿਮਤਰਾਨਿ. ਤਾਨਿ ਹਿ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨਿ. ‘‘ਪਚ੍ਛਿਮਤਰਾਨੀ’’ਤਿ ਏਕਾਦਸ ਅਮਨ੍ਦਾਯੁਕੇਹਿ ਪਚ੍ਛਿਮਤਰਾਨਿ. ਤਾਨਿ ਚ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਉਪ੍ਪਨ੍ਨਾਨਿਪਿ ਤਸ੍ਮਿਂ ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨਿ. ਕਸ੍ਮਾ ਪਨ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਾਨਿ ਤਦੁਭਯਾਨਿ ਇਧ ਨ ਗਹਿਤਾਨੀਤਿ. ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਧਰਮਾਨਾਨਂ ਅਟ੍ਠਚਤ੍ਤਾਲੀਸ ਮਤ੍ਤਾਨਂ ਚਕ੍ਖੂਨਂ ਮਜ੍ਝੇ ਏਵ ਕਤਮਂ ਚਕ੍ਖੁ ਚਕ੍ਖੁ ਵਿਞ੍ਞਾਣਸ੍ਸ ਵਤ੍ਥੁ ਕਿਚ੍ਚ ਦ੍ਵਾਰ ਕਿਚ੍ਚਂ ਸਾਧੇਤੀਤਿ ਆਸਙ੍ਕਿਤਬ੍ਬਂ ਹੋਤਿ. ਏਤ੍ਥ ਚ ਪਞ੍ਚ ਵਤ੍ਥੂਨਿ ਨਾਮ ਅਤ੍ਤਨੋ ਠਿਤਿਕ੍ਖਣੇ ਏਵ ਪਞ੍ਚਵਿਞ੍ਞਾਣਾਨਂ ਵਤ੍ਥੁਦ੍ਵਾਰ ਕਿਚ੍ਚ ਸਾਧਕਤ੍ਤਾ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨੀਤਿ ਚ, ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਧਰਮਾਨਾਨਨ੍ਤਿ ਚ, ਵੁਤ੍ਤਨ੍ਤਿ ਦਟ੍ਠਬ੍ਬਂ.

‘‘ਏਤ੍ਥ ਸਿਯਾ’’ਤਿਆਦੀਸੁ. ‘‘ਇਮਾਯ ਵੀਥਿਯਾ’’ਤਿ ਇਮਾਯ ਅਤਿਮਹਨ੍ਤਾ ਰਮ੍ਮਣ ਵੀਥਿਯਾ. ‘‘ਸਮੁਦਾਯਗ੍ਗਾਹਿਕਾ’’ਤਿ ਰੂਪਾ ਰਮ੍ਮਣਾਨਂ ਸਮੂਹਗ੍ਗਾਹਿਕਾ. ‘‘ਵਣ੍ਣਸਲ੍ਲਕ੍ਖਣਾ’’ਤਿ ਵਣ੍ਣਵਵਤ੍ਥਾਨਿਕਾ. ‘‘ਵਤ੍ਥੁਗ੍ਗਾਹਿਕਾ’’ਤਿ ਦਬ੍ਬ ਸਣ੍ਠਾਨਗ੍ਗਾਹਿਕਾ. ‘‘ਨਾਮਗ੍ਗਾਹਿਕਾ’’ਤਿ ਨਾਮ ਪਞ੍ਞਤ੍ਤਿਗ੍ਗਾਹਿਕਾ. ‘‘ਅਲਾਤਚਕ੍ਕਸ੍ਸ ਗਾਹਿਕਾ ਵਿਯਾ’’ਤਿ ਰਤ੍ਤਨ੍ਧਕਾਰੇ ਏਕੋ ਅਲਾਤਂ ਗਹੇਤ੍ਵਾ ਪਰਿਬ੍ਭਮਤਿ. ਅਞ੍ਞੋ ਤਂ ਪਸ੍ਸਨ੍ਤੋ ਚਕ੍ਕਂ ਵਿਯ ਮਞ੍ਞਤਿ. ਤਤ੍ਥ ਅਲਾਤਸ੍ਸ ਗਤਗਤਟ੍ਠਾਨੇ ਪਚ੍ਚੁਪ੍ਪਨ੍ਨਂ ਰੂਪਂ ਆਰਬ੍ਭ ਚਕ੍ਖੁਦ੍ਵਾਰ ਵੀਥਿਯੋ ਉਪ੍ਪਜ੍ਜਨ੍ਤਿ. ਮਨੋਦ੍ਵਾਰ ਵੀਥਿਯੋ ਪਨ ਪੁਰਿਮ ਪੁਰਿਮਾਹਿ ਚਕ੍ਖੁਦ੍ਵਾਰ ਵੀਥੀਹਿ ਗਹਿਤਾਨਿ ਅਤੀਤ ਰੂਪਾਨਿ ਅਮੁਞ੍ਚਿਤ੍ਵਾ ਏਕਤੋ ਸਣ੍ਠਾਨਞ੍ਚ ਸਨ੍ਤਤਿਞ੍ਚ ਕਤ੍ਵਾ ਗਣ੍ਹਨ੍ਤਿ. ਤਦਾ ਪਸ੍ਸਨ੍ਤਸ੍ਸ ਚਕ੍ਕਂ ਵਿਯ ਉਪਟ੍ਠਾਤਿ. ਏਵਂ ਅਯਂ ਸਮੁਦਾਯਗ੍ਗਾਹਿਕਾ ਦਟ੍ਠਬ੍ਬਾ. ‘‘ਨਤ੍ਥਿ ਤਦਾਰਮ੍ਮਣੁਪ੍ਪਾਦੋ’’ਤਿਆਦੀਸੁ. ‘‘ਯਸ੍ਸਾ’’ਤਿ ਯਸ੍ਸ ਆਰਮ੍ਮਣਸ੍ਸ. ਚਿਤ੍ਤਾਨੀਤਿ ਚ ਨਾਨਾਰਮ੍ਮਣਾਨੀਤਿ ਚ ਕਮ੍ਮਪਦਾਨਿ. ਅਵਸੇਸੇ ਤਸ੍ਮਿਂ ਆਰਮ੍ਮਣੇ. ‘‘ਸਙ੍ਗਹ ਕਾਰੇਨਾ’’ਤਿ ਪੋਰਾਣ ਅਟ੍ਠਕਥਾਯੋ ਏਕਤੋ ਸਙ੍ਗਹੇਤ੍ਵਾ ਕਤਤ੍ਤਾ ਬੁਦ੍ਧਘੋਸਤ੍ਥੇਰੇਨ ਕਤਾ ਸਬ੍ਬਾ ਅਟ੍ਠਕਥਾਯੋ ਸਙ੍ਗਹਟ੍ਠਕਥਾ ਨਾਮ. ਸੋ ਚ ਸਙ੍ਗਹ ਕਾਰੋਤਿ ਵੁਚ੍ਚਤਿ. ‘‘ਇਧ ਪੀ’’ਤਿ ਇਮਸ੍ਮਿਂ ਅਭਿਧਮ੍ਮਤ੍ਥ ਸਙ੍ਗਹੇਪਿ. ‘‘ਥੇਰੇਨਾ’’ਤਿ ਅਨੁਰੁਦ੍ਧਤ੍ਥੇਰੇਨ. ‘‘ਏਕਮ੍ਪਿ ਇਚ੍ਛਤਿ ਯੇਵਾ’’ਤਿ. ‘‘ਯਸ੍ਸ ਹਿ ਚਤ੍ਤਾਰੀ’’ਤਿਆਦੀਸੁ ਯਸ੍ਸ ਆਰਮ੍ਮਣਸ੍ਸ ਚਤ੍ਤਾਰਿ ਵਾ ਪਞ੍ਚਵਾ ਛਵਾਤਿਆਦਿਨਾ ਯੋਜੇਤਬ੍ਬਂ. ‘‘ਜਵਨਮ੍ਪਿ ਅਨੁਪ੍ਪਜ੍ਜਿਤ੍ਵਾ’’ਤਿਆਦੀਸੁ. ‘‘ਅਤ੍ਤਨੋ ਪਧਾਨ ਕ੍ਰਿਯਾਯਾ’’ਤਿ ਅਨੁਪ੍ਪਜ੍ਜਿਤ੍ਵਾਤਿ ਪਦਸ੍ਸ ਪਰਤੋ ‘ਯਂ ਪਵਤ੍ਤਤੀ’ਤਿ ਅਤ੍ਤਨੋ ਪਧਾਨ ਕ੍ਰਿਯਾਪਦਂ ਅਤ੍ਥਿ. ਤੇਨ ਅਤ੍ਤਨੋ ਕ੍ਰਿਯਾਪਦੇਨ ਸਦ੍ਧਿਨ੍ਤਿ ਅਤ੍ਥੋ. ‘‘ਕਤ੍ਥਚਿ ਵੁਤ੍ਤਾ’’ਤਿ ਕਤ੍ਥਚਿ ਸਦ੍ਦਗਨ੍ਥੇਸੁ ਵੁਤ੍ਤਾ. ਅਪਿ ਚ, ਹੇਤੁਮ੍ਹਿ ਤ੍ਵਾਪਚ੍ਚਯੋ ਲਕ੍ਖਣੇ ਹੇਤੁਮ੍ਹਿ ਚ ਮਾਨਨ੍ਤ ਪਚ੍ਚਯਾ ਜੋਤਨੀਯਟ੍ਠੇਨ ਵੁਤ੍ਤਾ, ਨ ਵਚਨੀਯਟ੍ਠੇਨਾਤਿ ਦਟ੍ਠਬ੍ਬਾ. ‘‘ਪਕਤਿ ਨਿਯਾਮੇਨਾ’’ਤਿ ਏਤੇਨ ਪਚ੍ਚਯ ਵਿਸੇਸੇਸਤਿ, ਚਤ੍ਤਾਰਿ ਵਾ ਪਞ੍ਚਵਾ ਛਵਾ ਜਵਨਾਨਿ ਉਪ੍ਪਜ੍ਜਨ੍ਤੀਤਿ ਦੀਪੇਤਿ. ਤੇਨਾਹ ‘‘ਏਤ੍ਥਪਨਾ’’ਤਿਆਦਿਂ. ‘‘ਦ੍ਵਤ੍ਤਿਕ੍ਖਤ੍ਤੁਂ’’ਤਿ ਵਾਸਦ੍ਦਤ੍ਥੇ ਅਞ੍ਞਪਦਤ੍ਥ ਸਮਾਸਪਦਨ੍ਤਿ ਵੁਤ੍ਤਂ ‘‘ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ’’ਤਿ. ‘‘ਵੋਟ੍ਠਬ੍ਬਨਸ੍ਸ ਆਸੇਵਨਤਾ’’ਤਿ ਆਸੇਵਨ ਪਚ੍ਚਯਤਾਵਾ ਪਚ੍ਚਯੁਪ੍ਪਨ੍ਨਤਾਵਾ. ‘‘ਆਵਜ੍ਜਨਾਯਾ’’ਤਿ ਏਤ੍ਥ ਵੋਟ੍ਠਬ੍ਬਨ ਕਿਚ੍ਚਂ ਆਵਜ੍ਜਨਮ੍ਪਿ ਸਙ੍ਗਣ੍ਹਾਤਿ. ਇਧਪਿ ਆਰਮ੍ਮਣ ਦੁਬ੍ਬਲਤਾਯ ਚਤੁਪ੍ਪਞ੍ਚ ਜਵਨੁਪ੍ਪਤ੍ਤਿ ਇਚ੍ਛਿ ਤਬ੍ਬਾਤਿ ਯੋਜਨਾ. ਤਤ੍ਥ ‘‘ਇਧ ਪੀ’’ਤਿ ਇਮਸ੍ਮਿਂ ਪਰਿਤ੍ਤਾ ਰਮ੍ਮਣ ਵਾਰੇਪਿ. ਤਿਵੋਟ੍ਠਬ੍ਬਨਿਕਾ ਪਞ੍ਚ ਪਰਿਤ੍ਤਾ ਰਮ੍ਮਣ ਵੀਥਿਯੋਤਿ ਯੋਜਨਾ. ‘‘ਇਤਰਾਨੀ’’ਤਿ ਪਰਿਤ੍ਤ ਮਹਨ੍ਤਾਤਿ ਮਹਨ੍ਤਾ ਰਮ੍ਮਣਾਨਿ. ‘‘ਉਭਯਥਾਪੀ’’ਤਿ ਆਪਾਤਾ ਗਮਨ ਵਸੇਨਪਿ ਆਰਮ੍ਮਣ ਕਰਣ ਵਸੇਨਪਿ. ਇਮਸ੍ਸ ਪਦਸ੍ਸ.

੧੩੭. ‘‘ਮਨੋਦ੍ਵਾਰੇ ਪਨਾ’’ਤਿਆਦੀਸੁ. ‘‘ਪਰਿਤ੍ਤਕ੍ਖਣਾ ਪੀ’’ਤਿ ਚਿਤ੍ਤ ਫਸ੍ਸਾਦਯੋ ਅਪ੍ਪਤਰਕ੍ਖਣਾਪਿ. ‘‘ਅਤੀਤਾਨਾਗਤਾ ਪੀ’’ਤਿ ਅਤੀਤਾਨਾਗਤ ਧਮ੍ਮਾਪਿ. ‘‘ਘਟ੍ਟਨੇਨਾ’’ਤਿ ਰੂਪਾਦੀਨਂ ਘਟ੍ਟਨੇਨ. ‘‘ਯਤ੍ਥਾ’’ਤਿ ਯਸ੍ਮਿਂ ਭਵਙ੍ਗੇ. ‘‘ਪਞ੍ਚਦ੍ਵਾਰਾਨੁ ਬਨ੍ਧਕਂ’’ਤਿ ਪਞ੍ਚਦ੍ਵਾਰ ਵੀਥਿ ਅਨੁਗਤਂ. ਅਤੀਤਂ ਆਲਮ੍ਬਣਂ ਪਵਤ੍ਤੇਤਿ ਯੇਵਾਤਿ ਸਮ੍ਬਨ੍ਧੋ. ‘‘ਯਥਾਪਾਤਾ ਗਤਮੇਵਾ’’ਤਿ ਪਕਤਿਯਾ ਆਪਾਤਾ ਗਤਪ੍ਪਕਾਰਮੇਵ. ‘‘ਤਥਾ ਤਥਾ’’ਤਿ ਦਿਟ੍ਠ ਸਮ੍ਬਨ੍ਧਾਦਿਨਾ ਤੇਨ ਤੇਨ ਪਕਾਰੇਨ. ‘‘ਕਿਞ੍ਚੀ’’ਤਿ ਕਿਞ੍ਚਿ ਆਰਮ੍ਮਣਂ. ‘‘ਦਿਸ੍ਵਾ’’ਤਿ ਪਚ੍ਚਕ੍ਖਂ ਕਤ੍ਵਾ. ਪਞ੍ਚਦ੍ਵਾਰਗ੍ਗਹਿਤਞ੍ਹਿ ਆਰਮ੍ਮਣਂ ਪਚ੍ਚਕ੍ਖਕਤਟ੍ਠੇਨ ਦਿਟ੍ਠਨ੍ਤਿ ਵੁਚ੍ਚਤਿ. ਯਂ ਕਿਞ੍ਚਿ ਆਰਮ੍ਮਣਂ. ‘‘ਅਨੁਮਾਨੇਨ੍ਤਸ੍ਸਾ’’ਤਿ ਏਵਮੇਵ ਭਵਿਤ੍ਥ, ਭਵਿਸ੍ਸਤਿ, ਭਵਤੀਤਿ ਅਨੁਮਾਨਞ੍ਞਾਣੇਨ ਚਿਨ੍ਤੇਨ੍ਤਸ੍ਸ. ਤਂ ਸਦਿਸਂ ਆਰਮ੍ਮਣਂ. ‘‘ਪਰਸ੍ਸ ਸਦ੍ਦਹਨਾ’’ਤਿ ਪਰਵਚਨਂ ਸੁਤ੍ਵਾ ਯਥਾ ਅਯਂ ਵਦਤਿ, ਤਥੇ ਵੇਤਨ੍ਤਿ ਸਦ੍ਦਹਨਾ. ‘‘ਦਿਟ੍ਠਿ’’ ਵੁਚ੍ਚਤਿ ਞਾਣਂ ਵਾ ਲਦ੍ਧਿ ਵਾ. ‘‘ਨਿਜ੍ਝਾਨਂ’’ਤਿ ਸੁਟ੍ਠੁ ਓਲੋਕਨਂ. ‘‘ਖਨ੍ਤੀ’’ਤਿ ਖਮਨਂ ਸਹਨਂ. ਅਞ੍ਞਥਤ੍ਤਂ ਅਗਮਨਂ. ਦਿਟ੍ਠਿਯਾ ਨਿਜ੍ਝਾਨਂ ਦਿਟ੍ਠਿਨਿਜ੍ਝਾਨਂ. ਦਿਟ੍ਠਿਨਿਜ੍ਝਾਨਸ੍ਸ ਖਨ੍ਤਿ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿ. ‘‘ਸੇਸਂ’’ਤਿ ਨਾਨਾਕਮ੍ਮ ਬਲੇਨਾਤਿਆਦਿਕਂ. ‘‘ਦੇਵਤੋ ਪਸਂਹਾਰਵਸੇਨਾ’’ਤਿ ਦੇਵਤਾ ਕਦਾਚਿ ਕੇਸਞ੍ਚਿ ਸੁਪਿਨਨ੍ਤੇ ਨਾਨਾਰਮ੍ਮਣਾਨਿ ਉਪਸਂਹਰਿਤ੍ਵਾ ਦਸ੍ਸੇਨ੍ਤਿ. ਏਵਂ ਦੇਵਤੋ ਪਸਂਹਾਰ ਵਸੇਨਾਪਿ. ਅਨੁਬੋਧੋ ਨਾਮ ਲੋਕਿਯਞ੍ਞਾਣ ਵਸੇਨ ਚਤੁਸ੍ਸਚ੍ਚ ਧਮ੍ਮਾਨਂ ਅਨੁਬੁਜ੍ਝਨਂ. ਪਟਿਵੇਧੋ ਨਾਮ ਲੋਕੁਤ੍ਤਰਞ੍ਞਾਣ ਕਿਚ੍ਚਂ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਗ੍ਗਹਣੇਨ ਪਕਤੂ ਪਨਿਸ੍ਸਯ ਪਚ੍ਚਯਮ੍ਪਿ ਉਪਲਕ੍ਖੇਤਿ. ਚਿਤ੍ਤ ਸਨ੍ਤਾਨਸ੍ਸ ਅਨਨ੍ਤਰੂਪਨਿਸ੍ਸਯ ਪਚ੍ਚਯਭਾਵੋ ਨਾਮਾਤਿ ਸਮ੍ਬਨ੍ਧੋ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਸਤ੍ਤਿ ਨਾਮ ਅਨਨ੍ਤਰ ਪਰਮ੍ਪਰ ਵਿਪ੍ਫਰਣਵਸੇਨ ਮਹਾਗਤਿਕਾ ਹੋਤੀਤਿ ਵੁਤ੍ਤਂ ਹੋਤਿ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਾਨੁ ਭਾਵੋਤਿਪਿ ਯੁਜ੍ਜਤਿ. ਕਥਂ ਮਹਾਵਿਪ੍ਫਾਰੋਤਿ ਆਹ ‘‘ਸਕਿਂ ਪੀ’’ਤਿਆਦਿਂ. ‘‘ਸੁਟ੍ਠੁ ਆਸੇਵਿਤ੍ਵਾ’’ਤਿ ਏਤ੍ਥ ਪਚ੍ਛਾ ਅਪ੍ਪਮੁਸ੍ਸਮਾਨਂ ਕਤ੍ਵਾ ਪੁਨਪ੍ਪੁਨਂ ਸੇਵਨਂ ਸੁਟ੍ਠੁ ਆਸੇਵਨਂ ਨਾਮ. ਨ ਕੇਵਲਂ ਪੁਰਿਮ ਚਿਤ੍ਤ ਸਨ੍ਤਾਨਸ੍ਸ ਸੋ ਉਪਨਿਸ੍ਸਯ ਪਚ੍ਚਯਾਨੁਭਾਵੋ ਏਵ ਮਹਾਵਿਪ੍ਫਾਰੋ ਹੋਤਿ. ਪਕਤਿਯਾ ਚਿਤ੍ਤਸ੍ਸ ਵਿਚਿਤ੍ਤ ਭਾਵ ਸਙ੍ਖਾਤਂ ਚਿਨ੍ਤਨਾ ਕਿਚ੍ਚਮ੍ਪਿ ਮਹਾਵਿਪ੍ਫਾਰਂ ਹੋਤੀਤਿ ਦਸ੍ਸੇਤੁਂ ‘‘ਚਿਤ੍ਤਞ੍ਚ ਨਾਮਾ’’ਤਿਆਦਿਵੁਤ੍ਤਂ. ਕਥਂ ਮਹਾਵਿਪ੍ਫਾਰਂ ਹੋਤੀਤਿ ਆਹ ‘‘ਕਿਞ੍ਚਿ ਨਿਮਿਤ੍ਤਂ’’ਤਿਆਦਿਂ. ‘‘ਕਿਞ੍ਚਿ ਨਿਮਿਤ੍ਤਂ’’ਤਿ ਦਿਟ੍ਠਾਦੀਸੁ ਨਾਨਾ ਰਮ੍ਮਣੇਸੁ ਕਿਞ੍ਚਿ ਅਪ੍ਪਮਤ੍ਤਕਂ ਦਿਟ੍ਠਾਦਿਕਂ ਆਰਮ੍ਮਣ ਨਿਮਿਤ੍ਤਂ. ‘‘ਤੇਹਿ ਚਕਾਰਣੇਹੀ’’ਤਿ ਤੇਹਿ ਕਤ੍ਤੁਭੂਤੇਹਿ ਦਿਟ੍ਠਾਦੀਹਿ ਕਾਰਣੇਹਿ. ‘‘ਚੋਦੀਯਮਾਨਂ’’ਤਿ ਪਯੋਜੀਯਮਾਨਂ. ‘‘ਅਜ੍ਝਾਸਯ ਯੁਤ੍ਤਂ’’ਤਿ ਅਜ੍ਝਾਸਯੇਨ ਸਂਯੁਤ੍ਤਂ. ਭਵਙ੍ਗ ਚਿਤ੍ਤਸ੍ਸ ਆਰਮ੍ਮਣਂ ਨਾਮ ਅਵਿਭੂਤਂ ਹੋਤਿ. ਭਵਙ੍ਗਂ ਚਾਲੇਤ੍ਵਾ ਆਵਜ੍ਜਨਂ ਨਿਯੋਜੇਤੀਤਿ ਸਮ੍ਬਨ੍ਧੋ. ‘‘ਲਦ੍ਧ ਪਚ੍ਚਯੇਸੂ’’ਤਿ ਆਲੋਕਾਦਿਵਸੇਨ ਵਾ ਦਿਟ੍ਠਾਦਿਵਸੇਨ ਵਾ ਲਦ੍ਧ ਪਚ੍ਚਯਵਨ੍ਤੇਸੁ. ਤਦਭਿਨਿਨ੍ਨਾਕਾਰੋ ਨਾਮ ਨਿਚ੍ਚਕਾਲਮ੍ਪਿ ਤੇਸੁ ਆਰਮ੍ਮਣੇਸੁ ਅਭਿਮੁਖਂ ਨਿਨ੍ਨਾਕਾਰੋ. ਤੇਨ ਆਕਾਰੇਨ ਪਵਤ੍ਤੋ ਮਨਸਿਕਾਰੋ. ਤੇਨ ਸਮ੍ਪਯੁਤ੍ਤਸ੍ਸ. ਏਤੇਹਿ ਵਚਨੇਹਿ ਸੁਦ੍ਧਮਨੋਦ੍ਵਾਰੇ ਆਰਮ੍ਮਣਾਨਂ ਅਪਾਤਾਗਮਨਞ੍ਚ ਭਵਙ੍ਗ ਚਲਨਞ੍ਚ ਨ ਕੇਵਲਂ ਲਦ੍ਧ ਪਚ੍ਚਯਾਨਂ ਆਰਮ੍ਮਣਾਨਂ ਵਸੇਨੇਵ ਹੋਤਿ. ਤਾਦਿਸੇਨ ਪਨ ਮਨਸਿਕਾਰੇਨ ਯੁਤ੍ਤਸ੍ਸ ਸਯਞ੍ਚ ਵੀਥਿ ਚਿਤ੍ਤ ਚਿਨ੍ਤਨਾ ਕਿਚ੍ਚਸ੍ਸ ਚਿਤ੍ਤਸ੍ਸ ਵਸੇਨਾਪਿ ਹੋਤੀਤਿ ਸਿਦ੍ਧਂ ਹੋਤਿ. ਨ ਹਿ ਆਰਮ੍ਮਣਨ੍ਤਰੇ ਅਭਿਨਿਨ੍ਨਾਕਾਰੋ ਨਾਮ ਨਤ੍ਥੀਤਿ ਸਕ੍ਕਾ ਵਤ੍ਤੁਂ. ਕਸ੍ਮਾ, ਅਭਾਵਿਤ ਚਿਤ੍ਤਾਨਂ ਪਮਾਦ ਬਹੁਲਾਨਂ ਜਨਾਨਂ ਕਦਾਚਿ ਕਰਹਚਿ ਭਾਵਨਾ ਮਨਸਿਕਾਰੇ ਕਰੀਯਮਾਨੇਪਿ ਵੀਥਿ ਚਿਤ੍ਤ ਸਨ੍ਤਾਨਸ੍ਸ ਬਹਿਦ੍ਧਾ ਨਾਨਾਰਮ੍ਮਣੇਸੁ ਅਭਿਨਿਨ੍ਨਾਕਾਰਸ੍ਸ ਸਨ੍ਦਿਸ੍ਸਨਤੋਤਿ. ‘‘ਯਥਾ ਚੇਤ੍ਥਾ’’ਤਿ ਯਥਾ ਏਤ੍ਥ ਮਨੋਦ੍ਵਾਰੇ ਰੂਪਾਰੂਪ ਸਤ੍ਤਾਨਂ ਵਿਭੂਤਾ ਰਮ੍ਮਣੇਪਿ ਤਦਾ ਰਮ੍ਮਣੁਪ੍ਪਾਦੋ ਨਤ੍ਥਿ, ਏਵਨ੍ਤਿ ਯੋਜਨਾ. ਞਾਣਵਿਭਙ੍ਗਟ੍ਠਕਥਾਯਂ ਪਨ ਵੋਟ੍ਠਬ੍ਬਨਵਾਰੋਪਿ ਆਗਤੋ. ਯਥਾਹ ਸੁਪਿਨੇਨੇਵ ਦਿਟ੍ਠਂ ਵਿਯ ਮੇ, ਸੁਤਂ ਵਿਯ ਮੇਤਿ ਕਥਨਕਾਲੇਪਿ ਅਬ੍ਯਾਕਤੋ ਯੇਵਾਤਿ. ਤਤ੍ਥ ਹਿ ‘‘ਅਬ੍ਯਾਕਤੋ ਯੇਵਾ’’ਤਿ ਸੁਪਿਨਨ੍ਤੇ ਮਨੋਦ੍ਵਾਰੇ ਦ੍ਵਤ੍ਤਿਕ੍ਖਤ੍ਤੁਂ ਉਪ੍ਪਨ੍ਨਸ੍ਸ ਆਵਜ੍ਜਨਸ੍ਸ ਵਸੇਨ ਅਬ੍ਯਾਕਤੋਯੇਵ. ਤਤੋ ਪਰਂ ਭਵਙ੍ਗਪਾਤੋ. ਅਟ੍ਠਸਾਲਿਨਿਯਮ੍ਪਿ ਵੁਤ੍ਤਂ ਅਯਂ ਪਨ ਵਾਰੋ ਦਿਟ੍ਠਂ ਵਿਯ ਮੇ, ਸੁਤਂ ਵਿਯ ਮੇ ਤਿਆਦੀਨਿ ਵਦਨਕਾਲੇ ਲਬ੍ਭਤੀਤਿ. ਤਂ ਪਨ ਪਞ੍ਚ ਦ੍ਵਾਰੇ ਪਰਿਤ੍ਤਾਰਮ੍ਮਣੇ ਦ੍ਵਤ੍ਤਿਕ੍ਖਤ੍ਤੁਂ ਉਪ੍ਪਨ੍ਨਸ੍ਸ ਵੋਟ੍ਠਬ੍ਬਨਸ੍ਸ ਵਸੇਨ ਵੁਤ੍ਤਂ. ‘‘ਸੋਪਿ ਇਧ ਲਦ੍ਧੁਂ ਵਟ੍ਟਤਿ ਯੇਵਾ’’ਤਿ ਸੋਪਿ ਵਾਰੋ ਇਮਸ੍ਮਿਂ ਮਨੋਦ੍ਵਾਰੇ ਲਦ੍ਧੁਂ ਵਟ੍ਟਤਿਯੇਵ. ‘‘ਭਵਙ੍ਗੇ ਚਲਿਤੇ ਨਿਵਤ੍ਤਨਕਵਾਰਾਨਂ’’ਤਿ ਦ੍ਵਿਕ੍ਖਤ੍ਤੁਂ ਭਵਙ੍ਗ ਚਲਨਮਤ੍ਤੇ ਠਤ੍ਵਾ ਵੀਥਿ ਚਿਤ੍ਤਾਨਿ ਅਨੁਪ੍ਪਜ੍ਜਿਤ੍ਵਾ ਭਵਙ੍ਗਪਾਤਵਸੇਨ ਨਿਵਤ੍ਤਨਕਾਨਂ ਮੋਘਵਾਰਾਨਂ ਮਨੋਦ੍ਵਾਰੇਪਿ ਪਮਾਣਂ ਨ ਭਵਿਸ੍ਸਤਿਯੇਵ. ਅਥ ਇਮਸ੍ਮਿਂਵਾਰੇ ਵੀਥਿ ਚਿਤ੍ਤਪ੍ਪਵਤ੍ਤਿ ਨਤ੍ਥਿ. ਏਵਂ ਸਤਿ, ਇਮਸ੍ਮਿਂ ਵੀਥਿ ਸਙ੍ਗਹੇ ਸੋ ਵਾਰੋ ਨ ਵਤ੍ਤਬ੍ਬੋਤਿ ਚੇ. ਵਤ੍ਤਬ੍ਬੋਯੇਵ. ਕਸ੍ਮਾ, ਛਧਾ ਵਿਸਯਪ੍ਪਵਤ੍ਤੀਤਿ ਇਮਸ੍ਮਿਂ ਛਕ੍ਕੇ ਸਙ੍ਗਹਿਤਤ੍ਤਾਤਿ ਦਸ੍ਸੇਤੁਂ ‘‘ਵਿਸਯੇ ਚ ਆਪਾਤਾਗਤੇ’’ਤਿਆਦਿ ਵੁਤ੍ਤਂ. ਆਰਮ੍ਮਣਭੂਤਾ ਵਿਸਯਪ੍ਪਵਤ੍ਤਿ. ਏਕੇਕਸ੍ਮਿਂ ਅਨੁਬਨ੍ਧਕਵਾਰੇ. ‘‘ਤਦਾਰਮ੍ਮਣ ਵਾਰਾਦਯੋ’’ਤਿ ਤਦਾਰਮ੍ਮਣ ਵਾਰੋ ਜਵਨਵਾਰੋ ਵੋਟ੍ਠਬ੍ਬਨ ਵਾਰੋ ਮੋਘਵਾਰੋ. ਤੇਸੁ ਪਨ ਤਦਾ ਰਮ੍ਮਣਵਾਰੋ ਵਤ੍ਥੁਗ੍ਗਹਣੇ ਚ ਨਾਮਗ੍ਗਹਣੇ ਚ ਨ ਲਬ੍ਭਤਿ. ‘‘ਵਤ੍ਥੂ’’ਤਿ ਹਿ ਸਣ੍ਠਾਨ ਪਞ੍ਞਤ੍ਤਿ. ‘‘ਨਾਮਂ’’ਤਿ ਨਾਮ ਪਞ੍ਞਤ੍ਤਿ. ਨ ਚ ਤਦਾ ਰਮ੍ਮਣਂ ਪਞ੍ਞਤ੍ਤਾ ਰਮ੍ਮਣਂ ਹੋਤੀਤਿ. ਤੇਨ ਵੁਤ੍ਤਂ ‘‘ਯਥਾਰਹਂ’’ਤਿ. ‘‘ਤਤ੍ਥਾ’’ਤਿ ਤੇਸੁ ਦਿਟ੍ਠਵਾਰਾਦੀਸੁ ਛਸੁ ਵਾਰੇਸੁ. ਏਤਰਹਿ ਪਨ ਕੇਚਿ ਆਚਰਿਯਾਤਿ ਪਾਠਸੇਸੋ. ‘‘ਅਤੀਤ ਭਵਙ੍ਗ ਵਸੇਨਾ’’ਤਿ ਏਕਂ ਭਵਙ੍ਗਂ ਅਤਿਕ੍ਕਮ੍ਮ ਆਪਾਤਾ ਗਤੇ ਆਰਮ੍ਮਣੇ ਏਕੋ ਵਾਰੋ, ਦ੍ਵੇ ਭਵਙ੍ਗਾਨਿ ਅਤਿਕ੍ਕਮ੍ਮ ਆਪਾਤਾ ਗਤੇ ਏਕੋਤਿਆਦਿਨਾ ਅਤੀਤ ਭਵਙ੍ਗ ਭੇਦਵਸੇਨ. ‘‘ਤਦਾ ਰਮ੍ਮਣ ਵਸੇਨਾ’’ਤਿ ਤਦਾ ਰਮ੍ਮਣਸ੍ਸ ਉਪ੍ਪਨ੍ਨਵਾਰੋ ਅਨੁਪ੍ਪਨ੍ਨ ਵਾਰੋਤਿ ਏਵਂ ਤਦਾ ਰਮ੍ਮਣ ਵਸੇਨ. ਕਪ੍ਪੇਨ੍ਤਿ ਚਿਨ੍ਤੇਨ੍ਤਿ, ਵਿਦਹਨ੍ਤਿ ਵਾ. ‘‘ਖਣ ਵਸੇਨ ਬਲਵਦੁਬ੍ਬਲਤਾ ਸਮ੍ਭਵੋ’’ਤਿ ਯਥਾ ਪਞ੍ਚਦ੍ਵਾਰੇ ਅਤਿਮਹਨ੍ਤਾ ਰਮ੍ਮਣੇਸੁਪਿ ਆਰਮ੍ਮਣ ਧਮ੍ਮਾ ਉਪ੍ਪਾਦਂ ਪਤ੍ਵਾ ਆਦਿਤੋ ਏਕਚਿਤ੍ਤਕ੍ਖਣਮਤ੍ਤੇ ਦੁਬ੍ਬਲਾ ਹੋਨ੍ਤਿ. ਅਤ੍ਤਨੋ ਦ੍ਵਾਰੇਸੁ ਆਪਾਤਂ ਆਗਨ੍ਤੁਂ ਨ ਸਕ੍ਕੋਨ੍ਤਿ. ਏਕ ਚਿਤ੍ਤਕ੍ਖਣਂ ਪਨ ਅਤਿਕ੍ਕਮ੍ਮ ਬਲਵਨ੍ਤਾ ਹੋਨ੍ਤਿ. ਅਤ੍ਤਨੋ ਦ੍ਵਾਰੇਸੁ ਆਪਾਤਂ ਗਨ੍ਤੁਂ ਸਕ੍ਕੋਨ੍ਤਿ. ਮਹਨ੍ਤਾ ਰਮ੍ਮਣਾਦੀਸੁ ਪਨ ਦ੍ਵਿ ਚਿਤ੍ਤਕ੍ਖਣਿਕਮਤ੍ਤੇ ਦੁਬ੍ਬਲਾ ਹੋਨ੍ਤੀਤਿਆਦਿਨਾ ਵਤ੍ਤਬ੍ਬਾ. ਨ ਤਥਾ ਮਨੋਦ੍ਵਾਰੇ ਆਰਮ੍ਮਣਾਨਂ ਖਣ ਵਸੇਨ ਬਲਵਦੁਬ੍ਬਲਤਾ ਸਮ੍ਭਵੋ ਅਤ੍ਥਿ. ਕਸ੍ਮਾ ਨਤ੍ਥੀਤਿ ਆਹ ‘‘ਤਦਾ’’ਤਿਆਦਿਂ. ਤਤ੍ਥ ‘‘ਤਦਾ’’ਤਿ ਤਸ੍ਮਿਂ ਵੀਥਿ ਚਿਤ੍ਤਪ੍ਪਵਤ੍ਤਿਕਾਲੇ. ‘‘ਤਤ੍ਥਾ’’ਤਿ ਮਨੋਦ੍ਵਾਰੇ.

‘‘ਏਤ੍ਥ ਸਿਯਾ’’ਤਿਆਦੀਸੁ. ‘‘ਸਿਯਾ’’ਤਿ ਕੇਸਞ੍ਚਿ ਵਿਚਾਰਣਾ ਸਿਯਾ. ਏਕਂ ਆਵਜ੍ਜਨਂ ਅਸ੍ਸਾਤਿ ਏਕਾਵਜ੍ਜਨਾ. ‘‘ਵੀਥੀ’’ਤਿ ਵੀਥਿਚਿਤ੍ਤਪ੍ਪਬਨ੍ਧੋ. ਏਕਾਵਜ੍ਜਨਾ ਚ ਸਾ ਵੀਥਿ ਚਾਤਿ ਵਿਗ੍ਗਹੋ. ‘‘ਆਵਜ੍ਜਨਂ’’ਤਿ ਆਵਜ੍ਜਨ ਚਿਤ੍ਤਂ. ਤਂ ਵਾ ਆਵਜ੍ਜਤੀਤਿ ਸਮ੍ਬਨ੍ਧੋ. ‘‘ਤਂ ਤਂ ਜਵਨੇਨਾ’’ਤਿ ਤੇਨ ਤੇਨ ਜਵਨੇਨ ਸਹੁਪ੍ਪਨ੍ਨਂ ਵਾ ਪਰਸ੍ਸ ਚਿਤ੍ਤਂ ਆਵਜ੍ਜਤਿ ਕਿਨ੍ਤਿ ਯੋਜਨਾ. ‘‘ਕਿਞ੍ਚੇਤ੍ਥਾ’’ਤਿ ਏਤ੍ਥ ਵਚਨੇ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ਯਦਿ ਤਾਵ ਆਵਜ੍ਜਨਞ੍ਚ ਜਵਨਾਨਿ ਚਾਤਿ ਅਧਿਕਾਰੋ. ‘‘ਤਞ੍ਹਿ ਚਿਤ੍ਤਂ’’ਤਿ ਪਰਸ੍ਸ ਚਿਤ੍ਤਂ. ‘‘ਏਵਮ੍ਪਿ ਭਿਨ੍ਨਮੇਵਾ’’ਤਿ ਜਵਨਾਨਂ ਧਮ੍ਮਤੋ ਭਿਨ੍ਨਮੇਵ. ਏਤ੍ਥ ਅਟ੍ਠਕਥਾਯਂ ਵਿਨਿਚ੍ਛਿਤਨ੍ਤਿ ਸਮ੍ਬਨ੍ਧੋ. ਤਂ ਚਿਤ੍ਤਂ ਨਿਰੁਦ੍ਧਮ੍ਪਿ ਜਵਨਾਨਮ੍ਪਿ ਪਚ੍ਚੁਪ੍ਪਨ੍ਨਮੇਵ ਹੋਤੀਤਿ ਯੋਜਨਾ. ‘‘ਅਦ੍ਧਾਵਸੇਨ ਗਹਿਤਂ’’ਤਿ ਅਦ੍ਧਾ ਪਚ੍ਚੁਪ੍ਪਨ੍ਨ ਵਸੇਨ ਗਹਿਤਂ. ‘‘ਸਨ੍ਤਤਿਵਸੇਨ ਗਹਿਤਂ’’ਤਿ ਸਨ੍ਤਤਿ ਪਚ੍ਚੁਪ੍ਪਨ੍ਨਵਸੇਨ ਗਹਿਤਂ. ਆਚਰਿਯਾਨਨ੍ਦਮਤੇ. ਸਬ੍ਬੇਸਮ੍ਪਿ ਆਵਜ੍ਜਨ ਜਵਨਾਨਂ. ਚਿਤ੍ਤਮੇਵ ਹੋਤਿ, ਤਸ੍ਮਾ ਧਮ੍ਮਤੋ ਅਭਿਨ੍ਨਂ. ਪਚ੍ਚੁਪ੍ਪਨ੍ਨਞ੍ਚ ਹੋਤਿ, ਤਸ੍ਮਾ ਕਾਲਤੋ ਅਭਿਨ੍ਨਨ੍ਤਿ ਵੁਤ੍ਤਂ ਹੋਤਿ. ਅਨਨ੍ਤਰਪਚ੍ਚਯੇ ਅਤੀਤੋ ਚ ਪਚ੍ਚੁਪ੍ਪਨ੍ਨੋ ਚ ਖਣ ਵਸੇਨ ਯੁਜ੍ਜਤਿ. ਯਦਿ ਅਦ੍ਧਾਸਨ੍ਤਤਿ ਵਸੇਨ ਯੁਜ੍ਜੇਯ੍ਯ, ਪਚ੍ਚੁਪ੍ਪਨ੍ਨੋ ਧਮ੍ਮੋ ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ ਅਨਨ੍ਤਰ ਪਚ੍ਚਯੇਨ ਪਚ੍ਚਯੋਤਿ ਵੁਤ੍ਤੋ ਭਵੇਯ੍ਯ. ਕਸ੍ਮਾ, ਏਕਾਵਜ੍ਜਨ ਵੀਥਿਯਞ੍ਹਿ ਸਬ੍ਬਾਨਿ ਚਿਤ੍ਤਾਨਿ ਅਦ੍ਧਾਸਨ੍ਤਤਿ ਵਸੇਨ ਪਚ੍ਚੁਪ੍ਪਨ੍ਨਾਨਿ ਏਵ ਹੋਨ੍ਤੀਤਿ.

੧੩੮. ਅਪ੍ਪਨਾਵਾਰੇ. ‘‘ਅਪ੍ਪਨਾ ਜਵਨਂ’’ਤਿ ਕਮ੍ਮਪਦਂ. ‘‘ਤਦਾ ਰਮ੍ਮਣਂ’’ਤਿ ਕਤ੍ਤੁਪਦਂ. ‘‘ਇਨ੍ਦ੍ਰਿਯ ਸਮਤਾਦੀਹੀ’’ਤਿ ਸਦ੍ਧਾਦੀਨਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਞ੍ਞਮਞ੍ਞਂ ਅਨਤਿ ਵਤ੍ਤਨਵਸੇਨ ਸਮਤਾਦੀਹਿ. ‘‘ਪਰਿਤੋ’’ਤਿ ਸਮਨ੍ਤਤੋ. ‘‘ਉਪੇਚ੍ਚਾ’’ਤਿ ਉਪਗਨ੍ਤ੍ਵਾ. ਅਪ੍ਪਨਂ ਵਹਿਤੁਂ ਜਨੇਤੁਂ ਸਮਤ੍ਥ ਭਾਵੋ ਅਪ੍ਪਨਾਵਹਸਮਤ੍ਥਭਾਵੋ. ‘‘ਯਸ੍ਸ ਪਵਤ੍ਤਿਯਾ’’ਤਿ ਯਸ੍ਸ ਉਪਚਾਰ ਜਵਨਸ੍ਸ ਪਵਤ੍ਤਿਤੋ. ‘‘ਅਚਿਰਂ ਕਾਲਂ’’ਤਿ ਅਚਿਰੇਕਾਲੇ. ਪਰਿਤ੍ਤ ਜਾਤਿਕਾ ਨਾਮ ਕਾਮਾਵਚਰਜਾਤਿ. ‘‘ਗੋਤ੍ਤਂ’’ਤਿ ਕਮ੍ਮਕਤ੍ਤੁ ਪਦਂ. ‘‘ਅਭਿਭੁਯ੍ਯਤੀ’’ਤਿ ਭਾਵਨਾ ਬਲੇਨ ਅਭਿਭੁਯ੍ਯਮਾਨਂ ਹੋਤਿ. ਅਭਿਮਦ੍ਦੀਯਮਾਨਂ ਹੋਤੀਤਿ ਅਤ੍ਥੋ. ‘‘ਛਿਜ੍ਜਤੀ’’ਤਿ ਇਦਂ ਪਨ ਅਭਿਭਵਨਸ੍ਸ ਸਿਖਾਪਤ੍ਤ ਦਸ੍ਸਨਂ. ਯਾਵ ਤਂ ਗੋਤ੍ਤਂ ਛੇਦਂ ਪਾਪੁਣਾਤਿ, ਤਾਵ ਅਭਿਭੁਯ੍ਯਤਿ, ਮਦ੍ਦੀਯਤੀਤਿ ਵੁਤ੍ਤਂ ਹੋਤਿ. ਗੋਤ੍ਤਂ ਅਭਿਭਵਤੀਤਿ ਗੋਤ੍ਰਭੂਤਿਪਿ ਯੁਜ੍ਜਤਿ. ‘‘ਪਞ੍ਚਮਂ’’ਤਿ ਪਞ੍ਚਮੇ ਚਿਤ੍ਤਵਾਰੇ. ‘‘ਤਦਾਹਿ ਜਵਨਂ ਪਤਿਤਂ ਨਾਮ ਹੋਤੀ’’ਤਿ ਪਕਤਿਯਾ ਜਵਨਪ੍ਪਵਤ੍ਤਿਨਾਮ ਸਤ੍ਤਕ੍ਖਤ੍ਤੁ ਪਰਮੋ ਹੋਤਿ. ਚਤੁਤ੍ਥਞ੍ਚ ਮੁਦ੍ਧਪਤ੍ਤਂ. ਪਞ੍ਚਮਤੋ ਪਟ੍ਠਾਯ ਪਤਿਤਂ. ਤਸ੍ਮਾ ਤਸ੍ਮਿਂ ਪਞ੍ਚਮਵਾਰੇ ਜਵਨਂ ਪਤਿਤਂ ਨਾਮ ਹੋਤਿ. ‘‘ਦੁਤੀਯੇਨਾ’’ਤਿ ਦੁਤੀਯੇਨ ਏਵ ਸਦ੍ਦੇਨ. ‘‘ਦੁਤੀਯਂ’’ਤਿ ਦੁਤੀਯੇ ਚਿਤ੍ਤਵਾਰੇ. ਤਦਾ ਅਨੁਲੋਮਂ ਪਥਮਜਵਨਂ ਹੋਤੀਤਿ ਵੁਤ੍ਤਂ ‘‘ਅਲਦ੍ਧਾ ਸੇਵਨਂ ਅਨੁਲੋਮ’’ਨ੍ਤਿ. ‘‘ਏਤੇਨੇਵਾ’’ਤਿ ਏਤੇਨ ਏਵ ਸਦ੍ਦ ਦ੍ਵਯੇ ਨੇਵ. ਅਟ੍ਠਸਾਲਿਨਿਯਂ ਪਨ ਅਨੁਞ੍ਞਾਤਾ ਵਿਯ ਦਿਸ੍ਸਤਿ. ਵੁਤ੍ਤਞ੍ਹਿ ਤਤ੍ਥ. ਮਨ੍ਦਪਞ੍ਞਸ੍ਸ ਚਤ੍ਤਾਰਿ ਅਨੁਲੋਮਾਨਿ ਹੋਨ੍ਤਿ, ਪਞ੍ਚਮਂ ਗੋਤ੍ਰਭੁ, ਛਟ੍ਠਂ ਮਗ੍ਗਚਿਤ੍ਤਂ, ਸਤ੍ਤਮਂ ਫਲਨ੍ਤਿ. ‘‘ਇਤਰਟ੍ਠਕਥਾਸੂ’’ਤਿ ਵਿਨਯਟ੍ਠ ਕਥਾਦੀਸੁ. ‘‘ਪਟਿਸਿਦ੍ਧਤ੍ਤਾ’’ਤਿ ਪਞ੍ਚਮਂ ਗੋਤ੍ਰ ਭੁਪ੍ਪਵਤ੍ਤਿਯਾ ਪਟਿਸਿਦ੍ਧਤ੍ਤਾ ਆਦਿਮ੍ਹਿ ਅਟ੍ਠਨ੍ਨਂ ਅਞ੍ਞਤ੍ਰਸ੍ਮਿਂਤਿ ਵੁਤ੍ਤਤ੍ਤਾ ਇਧ ਨਿਰੁਦ੍ਧੇਤਿ ਪਦਂ ਅਵਸ੍ਸਂ ਇਚ੍ਛਿਤਬ੍ਬਮੇਵਾਤਿ ਵੁਤ੍ਤਂ ‘‘ਨਿਰੁਦ੍ਧੇ ਅਨਨ੍ਤਰਮੇਵਾਤਿ ਪਦਚ੍ਛੇਦੋ’’ਤਿ. ਅਨਨ੍ਤਰ ਸਦ੍ਦਸ੍ਸ ਚ ਨਿਚ੍ਚਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤਮੇਵਪਦਂ ਵਿਭਤ੍ਤਿ ਪਰਿਣਾਮੇਨ ਅਧਿਕਤਨ੍ਤਿ ਆਹ ‘‘ਨਿਰੁਦ੍ਧਸ੍ਸਾਤਿ ਅਤ੍ਥਤੋ ਲਦ੍ਧਮੇਵਾ’’ਤਿ. ‘‘ਵਸਿਭੂਤਾਪੀ’’ਤਿ ਵਸਿਭੂਤਾਪਿ ਸਮਾਨਾ. ‘‘ਏਕਵਾਰਂ ਜਵਿਤ੍ਵਾ’’ਤਿ ਇਦਂ ਲੋਕਿਯਪ੍ਪਨਾਵਸੇਨ ਵੁਤ੍ਤਂ. ਲੋਕੁਤ੍ਤਰ ਅਪ੍ਪਨਾਪਨ ਸਤ੍ਤਮਮ੍ਪਿ ਉਪ੍ਪਜ੍ਜਤਿਯੇਵ. ਮੂਲਟੀਕਾ ਪਾਠੇ ‘‘ਭੂਮਨ੍ਤਰਪਤ੍ਤਿਯਾ’’ਤਿ ਗੋਤ੍ਰਭੁ ਚਿਤ੍ਤਂ ਕਾਮਭੂਮਿ ਹੋਤਿ. ਅਪ੍ਪਨਾਪਨ ਮਹਗ੍ਗਤਭੂਮਿ ਵਾ ਲੋਕੁਤ੍ਤਰਭੂਮਿ ਵਾ ਹੋਤਿ. ਏਵਂ ਭੂਮਨ੍ਤਰਪਤ੍ਤਿਯਾ. ‘‘ਆਰਮ੍ਮਣਨ੍ਤਰ ਲਦ੍ਧਿਯਾ’’ਤਿ ਫਲਸਮਾਪਤ੍ਤਿ ਵੀਥਿਯਂ ਫਲਜਵਨਂ ਸਨ੍ਧਾਯ ਵੁਤ੍ਤਂ. ਤਤ੍ਥਹਿ ਪੁਰਿਮਾਨਿ ਅਨੁਲੋਮ ਜਵਨਾਨਿ ਸਙ੍ਖਾਰਾ ਰਮ੍ਮਣਾਨਿ ਹੋਨ੍ਤਿ. ਫਲਜਵਨਂ ਨਿਬ੍ਬਾਨਾਰਮ੍ਮਣਂ. ਇਦਞ੍ਚ ਕਾਰਣਮਤ੍ਤਮੇਵ. ਯਥਾਵੁਤ੍ਤ ਲੇਡ੍ਡੁਪਮਾ ਏਵ ਇਧ ਯੁਤ੍ਤਰੂਪਾਤਿ ਦਟ੍ਠਬ੍ਬਂ. ‘‘ਨ ਖੋ ਪਨੇਤਂ ਏਵਂ ਦਟ੍ਠਬ੍ਬ’’ਨ੍ਤਿ ਏਤਂ ਅਤ੍ਥਜਾਤਂ ਨ ਖੋ ਏਵਂ ਦਟ੍ਠਬ੍ਬਂ. ‘‘ਅਨਦ੍ਧਨੀਯਾ’’ਤਿ ਅਦ੍ਧਾਨਂ ਦੀਘਕਾਲਂ ਨਖ ਮਨ੍ਤੀਤਿ ਅਨਦ੍ਧਨੀਯਾ. ਅਸਾਰਾ. ਅਸਾਰਤ੍ਤਾ ਏਵ ਸੀਘਤਰਂ ਰੁਹਨ੍ਤਿ. ਸੀਘਤਰਂ ਵੁਦ੍ਧਿਂ ਵਿਰੁਲ਼੍ਹਿਂ ਆਪਜ੍ਜਨ੍ਤਿ. ਸਾਰਵਨ੍ਤਾ ਪਨ ਸਾਰੇਨ ਸਹ ਵਡ੍ਢਮਾਨਤ੍ਤਾ ਸੀਘਤਰਂ ਨਰੁਹਨ੍ਤਿ. ਸੀਘਤਰਂ ਵੁਦ੍ਧਿਂ ਵਿਰੁਲ਼੍ਹਿਂ ਨਾ ਪਜ੍ਜਨ੍ਤਿ. ਤੇਨਾਹ ‘‘ਏਕਵਸ੍ਸਜੀਵਿਨੋ’’ਤਿਆਦਿਂ. ‘‘ਏਵਮੇਵਾ’’ਤਿਆਦੀਸੁ ‘‘ਪਤਿਤਜਵਨੇਸੂ’’ਤਿ ਪਞ੍ਚਮ ਛਟ੍ਠ ਸਤ੍ਤਮ ਜਵਨੇਸੁ. ‘‘ਏਤ੍ਥ ਚਾ’’ਤਿਆਦੀਸੁ. ‘‘ਸੁਪਕ੍ਕਸਾਲਿਭਤ੍ਤ ਸਦਿਸਾਨੀ’’ਤਿ ਯਥਾ ਸਾਲਿਭਤ੍ਤਾਨਿ ਸੁਪਕ੍ਕਤ੍ਤਾ ਏਵ ਮੁਦੁਤਰਾਨਿ ਹੁਤ੍ਵਾ ਦੁਬ੍ਬਲਾਨਿ ਅਚਿਰਟ੍ਠਿਤਿਕਾਨਿ. ਤਸ੍ਮਿਂ ਦਿਵਸੇਪਿ ਪੂਤਿਭਾਵਂ ਗਚ੍ਛਨ੍ਤਿ. ਏਵਂ ਅਪ੍ਪਨਾ ਜਵਨਾਨਿ. ‘‘ਯਸ੍ਮਾ ਚਾ’’ਤਿਆਦੀਸੁ. ‘‘ਦੁਵਿਧਸ੍ਸ ਨਿਯਮਸ੍ਸਾ’’ਤਿ ਜਵਨਨਿਯਮਸ੍ਸ ਚ ਕਾਲਨਿਯਮਸ੍ਸ ਚ. ‘‘ਪਟਿਸਨ੍ਧਿਯਾ ਅਨਨ੍ਤਰ ਪਚ੍ਚਯ ਭਾਵਿਨੋ’’ਤਿ ਸਤ੍ਤਮ ਜਵਨ ਚੇਤਨਾ ਅਨਨ੍ਤਰ ਪਚ੍ਚਯੋ, ਤਦਨਨ੍ਤਰੇ ਪਵਤ੍ਤਂ ਵਿਪਾਕ ਸਨ੍ਤਾਨਂ ਪਚ੍ਚਯੁਪ੍ਪਨ੍ਨੋ, ਤਮੇਵ ਚ ਅਵਸਾਨੇ ਚੁਤਿ ਚਿਤ੍ਤਂ ਹੁਤ੍ਵਾ ਭਵਨ੍ਤਰੇ ਪਟਿਸਨ੍ਧਿ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ. ਏਵਂ ਪਟਿਸਨ੍ਧਿ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯ ਭਾਵੇਨ ਅਵਸ੍ਸਂ ਭਵਿਸ੍ਸਮਾਨਸ੍ਸਾਤਿ ਅਤ੍ਥੋ. ਇਦਞ੍ਚ ਕਾਰਣ ਮਤ੍ਤਮੇਵ. ਮਹਾਟੀਕਾਵਚਨਂ ਪਨ ਕਿਞ੍ਚਿ ਵਤ੍ਤਬ੍ਬ ਰੂਪਨ੍ਤਿ ਨ ਪਟਿਕ੍ਖਿਤ੍ਤਂ. ‘‘ਨਿਰਨ੍ਤਰਪ੍ਪਵਤ੍ਤਾਨਂ’’ਤਿ ਆਦੀਸੁ. ਭਿਨ੍ਨਾ ਅਸਦਿਸਾ ਵੇਦਨਾ ਯੇਸਂ ਤਾਨਿ ਭਿਨ੍ਨਵੇਦਨਾਨਿ. ‘‘ਆਸੇਵਨ ਪਚ੍ਚਨੀਕਾਨਂ’’ਤਿ ਆਸੇਵਨ ਪਚ੍ਚਯਪ੍ਪਟਿ ਪਕ੍ਖਾਨਂ. ਅਭਿਨ੍ਨਾ ਵੇਦਨਾ ਯੇਸਨ੍ਤਿ ਵਿਗ੍ਗਹੋ. ਕ੍ਰਿਯਜਵਨਾਨਨ੍ਤਰਂ ਅਰਹਤ੍ਤਫਲਂ ਫਲਸਮਾਪਤ੍ਤਿ ਵੀਥਿਯਂ ਦਟ੍ਠਬ੍ਬਂ. ਸੇਸਮੇਤ੍ਥਸੁਵਿਞ੍ਞੇਯ੍ਯਂ.

੧੩੯. ‘‘ਸਬ੍ਬਥਾ ਪੀ’’ਤਿਆਦੀਸੁ. ਲੋਕੇ ਮਜ੍ਝਿਮਕੇ ਹਿ ਮਹਾਜਨੇਹਿ ਇਚ੍ਛਿਤਮ੍ਪਿ ਕਿਞ੍ਚਿ ਆਰਮ੍ਮਣਂ ਅਤਿਉਕ੍ਕਟ੍ਠੇਹਿ ਮਨ੍ਧਾਤੁ ਰਾਜਾਦੀਹਿ ਇਚ੍ਛਿਤਂ ਨ ਹੋਤਿ. ਤਥਾ ਤੇਹਿ ਮਹਾਜਨੇਹਿ ਅਨਿਚ੍ਛਿਤਮ੍ਪਿ ਕਿਞ੍ਚਿ ਆਰਮ੍ਮਣਂ ਅਤਿਦੁਗ੍ਗਤੇਹਿ ਪਚ੍ਚਨ੍ਤ ਵਾਸੀਹਿ ਇਚ੍ਛਿਤਂ ਹੋਤਿ. ਤਸ੍ਮਾ ਆਰਮ੍ਮਣਾਨਂ ਇਟ੍ਠਾਨਿਟ੍ਠ ਵਵਤ੍ਥਾਨਂ ਪਤ੍ਵਾ ਅਤਿਉਕ੍ਕਟ੍ਠੇਹਿ ਚ ਅਤਿਦੁਗ੍ਗਤੇਹਿ ਚ ਵਵਤ੍ਥਾਨਂ ਨ ਗਚ੍ਛਤਿ, ਮਜ੍ਝਿਮਕੇਹਿ ਏਵ ਵਵਤ੍ਥਾਨਂ ਗਚ੍ਛਤਿ. ਤੇਨਾਹ ‘‘ਤਤ੍ਥ ਚਾ’’ਤਿਆਦਿਂ. ‘‘ਆਰਮ੍ਮਣਂ’’ਤਿ ਕਤ੍ਤੁਪਦਂ. ‘‘ਵਿਪਾਕਚਿਤ੍ਤਂ’’ਤਿ ਕਮ੍ਮਪਦਂ. ‘‘ਕਿਞ੍ਚੀ’’ਤਿ ਕਿਞ੍ਚਿ ਰੂਪਂ. ‘‘ਕਿਸ੍ਮਿਞ੍ਚੀ’’ਤਿ ਕਸ੍ਮਿਂਚਿ ਏਕਸ੍ਮਿਂ ਪੁਪ੍ਫੇ. ‘‘ਤੇਨ ਵਾ’’ਤਿ ਤੇਨ ਵਾ ਸੁਖਸਮ੍ਫਸ੍ਸੇਨ ਵਤ੍ਥੇਨ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

‘‘ਵੇਦਨਾਨਿਯਮੋਪਨਾ’’ਤਿਆਦੀਸੁ. ‘‘ਆਦਾਸੇ ਮੁਖਨਿਮਿਤ੍ਤਸ੍ਸ ਵਿਯਾ’’ਤਿ ਯਥਾ ਆਦਾਸੇ ਮੁਖ ਨਿਮਿਤ੍ਤਸ੍ਸ ਚਲਨ ਚਵਨਾਦਿਯੋਗੋ ਨਾਨਾਵਣ੍ਣਯੋਗੋ ਚ ਯਥਾਮੁਖਮੇਵ ਸਿਦ੍ਧੋ. ਤਥਾ ਵਿਪਾਕਾਨਂ. ਵੇਦਨਾ ਯੋਗੋ ਪਨ ਯਥਾਰਮ੍ਮਣਮੇਵ ਸਿਦ੍ਧੋਤਿ ਯੋਜਨਾ. ਤਤ੍ਥ ‘‘ਵੇਦਨਾਯੋਗੋ’’ਤਿ ਨਾਨਾਵੇਦਨਾਯੋਗੋ. ‘‘ਕਪ੍ਪੇਤ੍ਵਾ’’ਤਿ ਚਿਨ੍ਤੇਤ੍ਵਾ. ‘‘ਪਕਪ੍ਪੇਤ੍ਵਾ’’ਤਿ ਨਾਨਪ੍ਪਕਾਰਤੋ ਚਿਨ੍ਤੇਤ੍ਵਾ. ਨ ਕੇਵਲਞ੍ਚ ਵਿਪਾਕਾਨਂ ਏਵ ਯਥਾਰਮ੍ਮਣਂ ਵੇਦਨਾ ਯੋਗੋ ਹੋਤੀਤਿ ਯੋਜਨਾ.

‘‘ਅਯਞ੍ਚਾ’’ਤਿਆਦੀਸੁ. ‘‘ਅਟ੍ਠਕਥਾਯਂ ਪੀ’’ਤਿ ਪਟ੍ਠਾਨ ਅਟ੍ਠਕਥਾਯਮ੍ਪਿ. ‘‘ਤਦਾਰਮ੍ਮਣ ਵਸੇਨਾ’’ਤਿ ਤਦਾਰਮ੍ਮਣਵਸੇਨ ਪਵਤ੍ਤਾਨਨ੍ਤਿ ਪਾਠਸੇਸੋ. ‘‘ਪਞ੍ਚਨ੍ਨਂ’’ਤਿ ਸੋਮਨਸ੍ਸ ਸਨ੍ਤੀਰਣੇਨ ਸਦ੍ਧਿਂ ਚਤ੍ਤਾਰਿ ਮਹਾਵਿਪਾਕ ਸੋਮਨਸ੍ਸਾਨਿ ਸਨ੍ਧਾਯ ਵੁਤ੍ਤਂ. ‘‘ਪਕਤਿ ਨੀਹਾਰੇਨਾ’’ਤਿ ਪਕਤਿਯਾ ਨਿਚ੍ਚਕਾਲਂ ਪਵਤ੍ਤਪ੍ਪਕਾਰੇਨ. ਪਾਲ਼ਿਪਾਠੇ. ਭਾਵਿਤਾਨਿ ਇਨ੍ਦ੍ਰਿਯਾਨਿ ਯੇਨਾਤਿ ਭਾਵਿਤਿਨ੍ਦ੍ਰਿਯੋ. ‘‘ਮਨਾਪਂ’’ਤਿ ਮਨੋਰਮ੍ਮਂ. ‘‘ਅਮਨਾਪਂ’’ਤਿ ਅਮਨੋਰਮ੍ਮਂ. ਵਿਹਰੇਯ੍ਯਨ੍ਤਿ ਸਚੇ ਕਙ੍ਖਤੀਤਿ ਸਮ੍ਬਨ੍ਧੋ. ‘‘ਪਟਿਕੂਲੇ’’ਤਿ ਅਮਨਾਪੇ. ‘‘ਅਪ੍ਪਟਿਕੂਲ ਸਞ੍ਞੀ’’ਤਿ ਮਨਾਪਸਞ੍ਞੀ. ਏਵਂ ਸੇਸੇਸੁ. ‘‘ਤੇਸਂ’’ਤਿ ਖੀਣਾਸਵਾਨਂ. ਪਾਲ਼ਿਪਾਠੇ. ‘‘ਸੁਮਨੋ’’ਤਿ ਸੋਮਨਸ੍ਸਿਤੋ. ‘‘ਦੁਮ੍ਮਨੋ’’ਤਿ ਦੋਮਨਸ੍ਸਿਤੋ. ਪਾਲ਼ਿਪਾਠੇ. ‘‘ਮੇਤ੍ਤਾਯਵਾ ਫਰਤੀ’’ਤਿ ਅਯਂ ਸਤ੍ਤੋ ਅਵੇਰੋਹੋਤੂਤਿਆਦਿਨਾ ਮੇਤ੍ਤਾਚਿਤ੍ਤੇਨ ਵਾ ਫਰਤਿ. ‘‘ਧਾਤੁਸੋ ਉਪਸਂਹਰਤੀ’’ਤਿ ਯਥਾ ਮ ਮ ਕਾਯੋਪਿ ਚਤੁਧਾਤੁ ਸਮੁਸ੍ਸਯੋ ਹੋਤਿ. ਤਤ੍ਥ ਏਕਾਪਿ ਧਾਤੁ ਨਾਮ ਪਟਿਕੂਲਾ ਵਾ ਅਪ੍ਪਟਿਕੂਲਾ ਵਾ ਨ ਹੋਤਿ. ਕੇਵਲਂ ਤੁਚ੍ਛ ਸੁਞ੍ਞ ਸਭਾਵਮਤ੍ਤਾ ਹੋਤਿ. ਏਵਮੇਵ ਇਮਸ੍ਸ ਸਤ੍ਤਸ੍ਸ ਕਾਯੋਪੀਤਿਆਦਿਨਾ ਧਾਤੁ ਸੋ ਉਪਸਂਹਰਤਿ. ‘‘ਅਸੁਭਾਯ ਵਾ’’ਤਿ ਅਸੁਭ ਭਾਵਨਾਯ ਵਾ. ਅਸੁਭ ਭਾਵਨਾ ਚਿਤ੍ਤੇਨ ਵਾਤਿ ਵੁਤ੍ਤਂ ਹੋਤਿ. ‘‘ਅਸੁਭਾਯਾ’’ਤਿ ਵਾ ਤਸ੍ਸ ਅਸੁਭਭਾਵਤ੍ਥਾਯ. ਦੇਵਨਾਟਕਾ ਦੇਵਚ੍ਛਰਾ ਨਾਮ. ਕੁਥਿਤਾਨਿ ਕੁਟ੍ਠਾਨਿ ਯੇਸਂ ਤਾਨਿ ਕੁਥਿਤ ਕੁਟ੍ਠਾਨਿ. ‘‘ਸਰੀਰਾਨੀ’’ਤਿ ਕਾਯਙ੍ਗਾਨਿ. ਕੁਥਿਤ ਕੁਟ੍ਠਾਨਿ ਸਰੀਰਾਨਿ ਯਸ੍ਸ ਸੋ ਕੁਥਿਤਕੁਟ੍ਠਸਰੀਰੋ. ‘‘ਕੁਥਿਤਾਨੀ’’ਤਿ ਅਬ੍ਭੁਕ੍ਕਿਰਣਾਨਿ. ਵੇਦਨਾ ਯੁਤ੍ਤਾਨਿ ਹੋਨ੍ਤਿ ਇਤਿ ਅਪਰੇ ਵਦਨ੍ਤੀਤਿ ਯੋਜਨਾ. ਤਸ੍ਮਾ ਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਕਥਂ ਪਚ੍ਚਯੋ ਹੋਤੀਤਿ ਆਹ ‘‘ਯਥਾ ਆਨਿਸਂਸ ਦਸ੍ਸਨੇਨਾ’’ਤਿਆਦਿਂ. ਤਤ੍ਥ ‘‘ਅਟ੍ਠਕਥਾਯਂ’’ਤਿ ਵਿਸੁਦ੍ਧਿ ਮਗ੍ਗਟ੍ਠਕਥਾਯਂ. ‘‘ਬੁਦ੍ਧਸੁਬੁਦ੍ਧਤਾ ਦਸ੍ਸਨੇਨਾ’’ਤਿ ਅਤ੍ਤਨੋ ਸਤ੍ਥੁਭੂਤਸ੍ਸ ਬੁਦ੍ਧਸ੍ਸ ਸੁਬੁਦ੍ਧਤਾ ਦਸ੍ਸਨੇਨ. ‘‘ਅਤ੍ਤਸਮ੍ਪਤ੍ਤਿ ਦਸ੍ਸਨੇਨਾ’’ਤਿ ਮਯਂ ਪਨ ਏਵਰੂਪਾ ਦੁਕ੍ਖਾ ਮੁਤ੍ਤਾਮ੍ਹਾਤਿ ਏਵਂ ਅਤ੍ਤਨੋ ਸਮ੍ਪਤ੍ਤਿ ਦਸ੍ਸਨੇਨ. ‘‘ਅਟ੍ਠਿਕਙ੍ਕਲਿਕਪੇਤਰੂਪੇ’’ਤਿ ਨਿਮ੍ਮਂ ਸਲੋਹਿਤੇ ਅਟ੍ਠਿਪੁਞ੍ਜਪੇਤਸਰੀਰੇ. ‘‘ਕੁਟ੍ਠਿਨੋ’’ਤਿ ਕੁਟ੍ਠਸਰੀਰਸ੍ਸ. ‘‘ਅਟ੍ਠਕਥਾਯਂ’’ਤਿ ਧਮ੍ਮਪਦ ਅਟ੍ਠਕਥਾਯਂ. ਅਤਿ ਇਟ੍ਠੇ ਦੇਵਚ੍ਛਰ ਵਣ੍ਣਾਦਿਕੇ. ਅਤਿ ਅਨਿਟ੍ਠੇ ਕੁਥਿਤਕੁਟ੍ਠਸਰੀਰਾਦਿਕੇ. ‘‘ਵਤ੍ਥੁ ਭੂਤੋ’’ਤਿ ਉਪ੍ਪਤ੍ਤਿਟ੍ਠਾਨ ਭੂਤੋ. ‘‘ਤੇਸਂ ਤੇਸਂ ਸਤ੍ਤਾਨਂ’’ਤਿ ਕਤ੍ਤੁ ਅਤ੍ਥੇਸਾਮਿਵਚਨਂ. ‘‘ਤਦੁਭਯਂ ਪੀ’’ਤਿ ਉਭਯਂ ਤਂ ਗਹਣਂਪਿ. ‘‘ਤੇਸਂ’’ਤਿ ਤੇਸਂ ਲੋਕਿਯ ਮਹਾਜਨਾਨਂ. ‘‘ਵਿਪਲ੍ਲਾਸਵਸੇਨੇਵ ਹੋਤੀ’’ਤਿ ਦੇਵਚ੍ਛਰਵਣ੍ਣਾਦੀਸੁ ਅਤਿਇਟ੍ਠੇਸੁ ਅਤਿਇਟ੍ਠਾਕਾਰਤੋ ਗਹਣਮ੍ਪਿ ਵਿਪਲ੍ਲਾਸ ਵਸੇਨੇਵ ਹੋਤਿ. ਕਸ੍ਮਾ, ਦੇਵਚ੍ਛਰ ਵਣ੍ਣਾਦੀਸੁ ਅਤਿ ਇਟ੍ਠ ਸਞ੍ਞਾਯ ਵਿਪਲ੍ਲਾਸ ਸਞ੍ਞਾਭਾਵਤੋ.

ਵਿਭਾਵਨਿਪਾਠੇ. ‘‘ਪਵਤ੍ਤਿਯਾ’’ਤਿ ਪਵਤ੍ਤਨਤੋ. ਅਟ੍ਠਕਥਾਧਿਪ੍ਪਾਯੇ ਠਤ੍ਵਾ ਵੁਤ੍ਤਤ੍ਤਾ ਅਟ੍ਠਕਥਾਗਾਰਵੇਨ’’ਤਂ ਵਿਚਾਰੇਤਬ੍ਬ ਮੇਵਾ’’ਤਿ ਵੁਤ੍ਤਂ. ਅਤ੍ਥਤੋ ਪਨ ਅਯੁਤ੍ਤਮੇਵਾਤਿ ਵੁਤ੍ਤਂ ਹੋਤਿ. ਏਸਨਯੋ ਅਞ੍ਞਤ੍ਥਪਿ. ‘‘ਧਮ੍ਮ ਚਕ੍ਖੁਰਹਿਤਾ’’ਤਿ ਧਮ੍ਮ ਵਵਤ੍ਥਾਨਞ੍ਞਾਣ ਚਕ੍ਖੁ ਰਹਿਤਾ. ‘‘ਕੁਸਲਾਕੁਸਲਾਨਿ ਯੇਵਾ’’ਤਿ ਤੇਸਂ ਧਮ੍ਮ ਚਕ੍ਖੁ ਰਹਿਤਾਨਂ ਉਪ੍ਪਨ੍ਨਾਨਿ ਕੁਸਲਾਕੁਸਲਾਨਿਯੇਵ. ਗਾਥਾਯਂ. ‘‘ਰੂਪਾ’’ਤਿ ਰੂਪਤੋ ਨਪ੍ਪਵੇਧਨ੍ਤੀਤਿ ਸਮ੍ਬਨ੍ਧੋ. ‘‘ਸਦ੍ਦਾ’’ਤਿਆਦੀਸੁਪਿ ਏਸੇਵਨਯੋ. ਨਪ੍ਪਵੇਧਨ੍ਤੀਤਿ ਚ ਨ ਚਲਨ੍ਤਿ, ਨ ਕਮ੍ਪਨ੍ਤਿ, ਚਿਤ੍ਤਞ੍ਞਥਤ੍ਤਂ ਨ ਗਚ੍ਛਨ੍ਤਿ. ਤਥਾ ਉਪੇਕ੍ਖਾ ਕ੍ਰਿਯਜਵਨਾਨਨ੍ਤਰਮ੍ਪਿ ਤਦਾਰਮ੍ਮਣਾਨਿ ਸੋਮਨਸ੍ਸੁ ਪੇਕ੍ਖਾਵੇਦਨਾ ਯੁਤ੍ਤਾਨਿ ਏਵ ਸਿਯੁਨ੍ਤਿ ਯੋਜਨਾ. ਮੂਲਟੀਕਾਪਾਠੇ. ‘‘ਤਦਾਰਮ੍ਮਣਤਾ’’ਤਿ ਤਦਾਰਮ੍ਮਣਤਾਯ ਤਦਾਰਮ੍ਮਣਭਾਵੇਨ. ‘‘ਕਤ੍ਥਚੀ’’ਤਿ ਕਤ੍ਥਚਿ ਅਭਿਧਮ੍ਮ ਪਾਲ਼ਿਯਂ. ‘‘ਵਿਜ੍ਜਮਾਨੇ ਚ ਤਸ੍ਮਿਂ’’ਤਿ ਤਸ੍ਮਿਂ ਕ੍ਰਿਯਜਵਨਾਨੁ ਬਨ੍ਧਕੇ ਤਦਾ ਰਮ੍ਮਣੇ ਵਿਜ੍ਜਮਾਨੇ ਸਤਿ. ਏਤਂ ਭਵਙ੍ਗਞ੍ਚ ਨਾਮ ਅਨੁਬਨ੍ਧਤੀਤਿ ਸਮ੍ਬਨ੍ਧੋ. ਨਦੀਸੋਤੋ ਪਟਿਸੋਤਗਾਮਿਨਾਵਂ ਅਨੁਬਨ੍ਧਤਿ ਵਿਯਾਤਿ ਯੋਜਨਾ. ‘‘ਸਵਿਪ੍ਫਾਰਿਕਂ ਏਵਜਵਨਂ’’ਤਿ ਕਿਲੇਸ ਧਮ੍ਮਾਨਂ ਵਿਪਲ੍ਲਾਸ ਧਮ੍ਮਾਨਞ੍ਚ ਵਸੇਨ ਖਣਮਤ੍ਤੇਪਿ ਅਨੇਕਸਤੇਸੁ ਆਰਮ੍ਮਣੇਸੁ ਵਿਵਿਧਾਕਾਰੇਨ ਫਰਣਵੇਗਸਹਿਤਂ ਕੁਸਲਾਕੁਸਲ ਜਵਨਮੇਵ ਅਨੁਬਨ੍ਧਤੀਤਿ ਯੁਤ੍ਤਂ. ਨ ਪਨ ਕ੍ਰਿਯਜਵਨਂ ਅਨੁਬਨ੍ਧਤੀਤਿ ਯੁਤ੍ਤਨ੍ਤਿ ਯੋਜਨਾ. ‘‘ਛਲ਼ਙ੍ਗੁ ਪੇਕ੍ਖਾਵਤੋ’’ਤਿ ਚਕ੍ਖੁਨਾ ਰੂਪਂ ਦਿਸ੍ਵਾ ਨੇਵ ਸੁਮਨੋ ਹੋਤਿ, ਨ ਦੁਮ੍ਮਨੋ, ਉਪੇਕ੍ਖਕੋ ਵਿਹਰਤੀ-ਤਿਆਦਿਨਾ ਵੁਤ੍ਤਾਯ ਛ ਦ੍ਵਾਰਿਕਵਸੇਨ ਛਲ਼ਙ੍ਗ ਸਮਨ੍ਨਾਗਤਾਯ ਉਪੇਕ੍ਖਾਯ ਸਮ੍ਪਨ੍ਨਸ੍ਸ. ਵਤ੍ਤਨਂ ਵੁਤ੍ਤਿ. ਸਨ੍ਤਾ ਵੁਤ੍ਤਿ ਅਸ੍ਸਾਤਿ ਸਨ੍ਤ ਵੁਤ੍ਤਿ. ਤਂ ਵਿਚਾਰੇਨ੍ਤੋ ‘‘ਪਟ੍ਠਾਨੇ ਪਨਾ’’ਤਿਆਦਿਮਾਹ. ‘‘ਯਦਿ ਚੇਤਂ ਵੁਚ੍ਚੇਯ੍ਯਾ’’ਤਿ ਏਤ੍ਥ ‘‘ਏਤਂ’’ਤਿ ਕ੍ਰਿਯਾ ਬ੍ਯਾਕਤੇਤਿਆਦਿਕਂ ਏਤਂ ਵਚਨਂ. ‘‘ਤਸ੍ਮਿਂ’’ਤਿ ਤਸ੍ਮਿਂ ਵਚਨੇ. ‘‘ਏਵਮਾਦਿਨਾ’’ਤਿ ਏਵਮਾਦਿਨਾ ਨਯੇਨ. ਵਿਭਾਵਨਿਪਾਠੇ. ‘‘ਉਤ੍ਤਰਂ’’ਤਿ ਪਰਿਹਾਰਂ. ‘‘ਵਿਪਸ੍ਸਨਾਚਾਰ ਵਸੇਨਾ’’ਤਿ ਵਿਪਸ੍ਸਨਾ ਪਵਤ੍ਤਿ ਵਸੇਨ. ‘‘ਤੇਸਂ’’ਤਿ ਸੋਮਨਸ੍ਸ ਦੋਮਨਸ੍ਸਾਨਂ. ‘‘ਇਤਰੀਤਰਾਨਨ੍ਤਰ ਪਚ੍ਚਯਤਾ’’ਤਿ ਅਞ੍ਞਮਞ੍ਞਾਨਨ੍ਤਰ ਪਚ੍ਚਯਤਾਤਿ ਅਤ੍ਥੋ. ‘‘ਥੇਰੇਨਾ’’ਤਿ ਅਨੁਰੁਦ੍ਧਤ੍ਥੇਰੇਨ. ਸਬ੍ਬਾਨਿ ਤਦਾ ਰਮ੍ਮਣਾਨਿ, ਸਬ੍ਬਾਨਿ ਭਵਙ੍ਗਾਨਿ ਚ. ‘‘ਸਮੁਦਾ ਚਰਨ੍ਤੀ’’ਤਿ ਚਿਰਕਾਲਂ ਸਞ੍ਚਰਨ੍ਤਿ. ‘‘ਏਤਾਨਿਹੀ’’ਤਿਆਦਿਨਾ ਤੇਸਂ ਅਟ੍ਠਾਰਸਨ੍ਨਂ ਜਵਨਾਨਂ ਅਨਨ੍ਤਰਂ ਤਦਾਰਮ੍ਮਣਾਨਂ ਅਨਿਯਮਤੋ ਪਵਤ੍ਤਿਯਾ ਕਾਰਣਯੁਤ੍ਤਿਂ ਦਸ੍ਸੇਤਿ. ਸਮ੍ਭਵਤਿ ਉਪ੍ਪਜ੍ਜਤਿ ਏਤੇਨਾਤਿ ਸਮ੍ਭਵੋ. ਤਦਾ ਰਮ੍ਮਣਸ੍ਸ ਸਮ੍ਭਵੋ ਤਦਾ ਰਮ੍ਮਣ ਸਮ੍ਭਵੋ. ਅਥਵਾ, ਸਮ੍ਭਵਨਂ ਉਪ੍ਪਜ੍ਜਨਂ ਸਮ੍ਭਵੋਤਿ ਇਮੇ ਦ੍ਵੇ ਅਤ੍ਥੇ ਦਸ੍ਸੇਤੁਂ ‘‘ਤਦਾ ਰਮ੍ਮਣ ਸਮ੍ਭਵੋ’’ਤਿਆਦਿ ਵੁਤ੍ਤਂ. ‘‘ਯੇਸਂ ਪਨਾ’’ਤਿਆਦੀਸੁ. ‘‘ਯੇਸਂ’’ਤਿ ਯੇਸਂ ਪੁਗ੍ਗਲਾਨਂ. ‘‘ਇਤਰਾਨੀ’’ਤਿ ਉਪੇਕ੍ਖਾ ਸਨ੍ਤੀਰਣ ਦ੍ਵਯਤੋ ਅਞ੍ਞਾਨਿ. ‘‘ਨ ਹੋਨ੍ਤੀਤਿ ਨ ਵਤ੍ਤਬ੍ਬਾਨੀ’’ਤਿ ਵੁਤ੍ਤਂ. ਏਵਂਸਤਿ, ਕਸ੍ਮਾ ਥੇਰੇਨ ਇਧ ਨ ਵੁਤ੍ਤਾਨੀਤਿ. ਅਟ੍ਠਸਾਲਿਨਿਯਂ ਅਵੁਤ੍ਤਤ੍ਤਾ ਇਧ ਨ ਵੁਤ੍ਤਾਨੀਤਿ. ਅਟ੍ਠਸਾਲਿਨਿਯਂ ਪਨ ਕਸ੍ਮਾ ਨ ਵੁਤ੍ਤਾਨਿ. ਯੇਭੂਯ੍ਯ ਨਿਯਮਸੋਤੇ ਪਤਿਤਤ੍ਤਾ ਨ ਵੁਤ੍ਤਾਨਿ. ਨ ਪਨ ਅਲਬ੍ਭਮਾਨਤ੍ਤਾ ਨ ਵੁਤ੍ਤਾਨੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਅਟ੍ਠਕਥਾਯਂ ਪਨਾ’’ਤਿਆਦਿਮਾਹ. ‘‘ਉਪੇਕ੍ਖਾਸਹਗਤ ਸਨ੍ਤੀਰਣ ਦ੍ਵਯਮੇਵ ਵੁਤ੍ਤਂ’’ਤਿ ਆਗਨ੍ਤੁਕ ਭਵਙ੍ਗਭਾਵੇਨ ਵੁਤ੍ਤਂ. ਯਥਾਹ ਅਥਸ੍ਸ ਯਦਾ ਸੋਮਨਸ੍ਸ ਸਹਗਤਪ੍ਪਟਿਸਨ੍ਧਿਕਸ੍ਸ ਪਵਤ੍ਤੇ ਝਾਨਂ ਨਿਬ੍ਬਤ੍ਤੇਤ੍ਵਾ ਪਮਾਦੇਨ ਪਰਿਹੀਨਜ੍ਝਾਨਸ੍ਸ ਪਣੀਤ ਧਮ੍ਮੋ ਮੇ ਨਟ੍ਠੋਤਿ ਪਚ੍ਚਵੇਕ੍ਖਤੋ ਵਿਪ੍ਪਟਿਸਾਰਿ ਵਸੇਨ ਦੋਮਨਸ੍ਸਂ ਉਪ੍ਪਜ੍ਜਤਿ, ਤਦਾ ਕਿਂ ਉਪ੍ਪਜ੍ਜਤਿ. ਸੋਮਨਸ੍ਸਾਨਨ੍ਤਰਞ੍ਹਿ ਦੋਮਨਸ੍ਸਂ, ਦੋਮਨਸ੍ਸਾਨਨ੍ਤਰਞ੍ਚ ਸੋਮਨਸ੍ਸਂ ਪਟ੍ਠਾਨੇ ਪਟਿਸਿਦ੍ਧਂ. ਮਹਗ੍ਗਤ ਧਮ੍ਮਂ ਆਰਬ੍ਭ ਜਵਨੇ ਜਵਿਤੇ ਤਦਾ ਰਮ੍ਮਣਮ੍ਪਿ ਤਤ੍ਥੇਵ ਪਟਿਸਿਦ੍ਧਨ੍ਤਿ. ਕੁਸਲ ਵਿਪਾਕਾਵਾ ਅਕੁਸਲਵਿਪਾਕਾਵਾ ਉਪੇਕ੍ਖਾ ਸਹਗਤਾ ਹੇਤੁਕਮਨੋਵਿਞ੍ਞਾਣ ਧਾਤੁ ਉਪ੍ਪਜ੍ਜਤਿ. ਕਿਮਸ੍ਸਾ ਰਮ੍ਮਣਨ੍ਤਿ. ਰੂਪਾਦੀਸੁ ਪਰਿਤ੍ਤ ਧਮ੍ਮੇਸੁ ਅਞ੍ਞਤਰਂ. ਏਤੇਸੁ ਹਿ ਯਦੇਵ ਤਸ੍ਮਿਂ ਸਮਯੇ ਆਪਾਤਮਾਗਤਂ ਹੋਤਿ. ਤਂ ਆਰਬ੍ਭ ਏਤਂ ਚਿਤ੍ਤਂ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ-ਤਿ. ਏਵਂ ਦੋਮਨਸ੍ਸਸਹਗਤ ਜਵਨਾਨੁਰੂਪਂ ਉਪੇਕ੍ਖਾਸਹਗਤ ਸਨ੍ਤੀਰਣ ਦ੍ਵਯਮੇਵ ਆਗਨ੍ਤੁਕ ਭਵਙ੍ਗਭਾਵੇਨ ਅਟ੍ਠਕਥਾਯਂ ਵੁਤ੍ਤਨ੍ਤਿ. ‘‘ਏਤਮ੍ਪਿ ਯੁਜ੍ਜਤਿ ਯੇਵਾ’’ਤਿ ਅਕੁਸਲ ਜਵਨਾਵਸਾਨੇ ਏਤਂ ਸਹੇਤੁਕਂ ਆਗਨ੍ਤੁਕ ਭਵਙ੍ਗਂਪਿ ਯੁਜ੍ਜਤਿਯੇਵ. ‘‘ਦੋਮਨਸ੍ਸ ਜਵਨਾਨਨ੍ਤਰਂ ਭਵਙ੍ਗ ਪਾਤੋਵ ਹੋਤੀ’’ਤਿ ਉਪੇਕ੍ਖਾ ਸਹਗਤ ਮੂਲਭਵਙ੍ਗ ਪਾਤੋਵ ਹੋਤਿ. ਆਗਨ੍ਤੁਕ ਭਵਙ੍ਗੇਨ ਕਿਚ੍ਚਂ ਨਤ੍ਥਿ. ਕਸ੍ਮਾ, ਉਪੇਕ੍ਖਾ ਪਟਿਸਨ੍ਧਿਕਤ੍ਤਾ. ਨੇਵਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਕਸ੍ਮਾ, ਤੇਸੁ ਆਰਮ੍ਮਣੇਸੁ ਤਦਾਰਮ੍ਮਣਵਾਰਸ੍ਸ ਅਸਮ੍ਭਵਤੋ. ਨ ਹਿ ਮਹਨ੍ਤਾਰਮ੍ਮਣੇਸੁ ਚ ਅਵਿਭੂਤਾਰਮ੍ਮਣੇਸੁ ਚ ਤਦਾਰਮ੍ਮਣਵਾਰੋ ਸਮ੍ਭਵਤਿ. ਨ ਚ ਮੂਲਭਵਙ੍ਗ ਸਮ੍ਭਵੋ ਅਤ੍ਥਿ. ਕਸ੍ਮਾ, ਮੂਲਭਵਙ੍ਗਭੂ ਤਸ੍ਸ ਸੋਮਨਸ੍ਸ ਭਵਙ੍ਗਸ੍ਸ ਦੋਮਨਸ੍ਸ ਜਵਨੇਨ ਸਹ ਵਿਰੁਦ੍ਧਤ੍ਤਾ. ‘‘ਇਤਿ ਕਤ੍ਵਾ’’ਤਿ ਇਮਿਨਾ ਕਾਰਣੇਨ. ‘‘ਏਕਂ’’ਤਿ ਏਕਂ ਉਪੇਕ੍ਖਾਸਹਗਤ ਵਿਪਾਕਂ. ਤਥਾ ਤਸ੍ਸੇਵ ਦੋਮਨਸ੍ਸਂ ਉਪ੍ਪਾਦੇਨ੍ਤਸ੍ਸ ਨੇਵ ਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਨ ਚ ਮੂਲਭਵਙ੍ਗ ਸਮ੍ਭਵੋਤਿ ਕਤ੍ਵਾ ਦੋਮਨਸ੍ਸਾਨਨ੍ਤਰਂ ਛਸੁ…ਪੇ… ਪਵਤ੍ਤਤੀਤਿ ਯੋਜਨਾ. ਤਤ੍ਥ ‘‘ਤਸ੍ਸੇਵਾ’’ਤਿ ਸੋਮਨਸ੍ਸਪ੍ਪਟਿਸਨ੍ਧਿਕਸ੍ਸੇਵ. ਨੇਵਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਕਸ੍ਮਾ, ਆਰਮ੍ਮਣਾਨਂ ਅਤਿਮਹਨ੍ਤਤ੍ਤੇਪਿ ਅਤਿਵਿਭੂਤਤ੍ਤੇਪਿ ਸਤਿ ਸੋਮਨਸ੍ਸ ਤਦਾਰਮ੍ਮਣਸ੍ਸ ਜਵਨੇਨ ਸਹ ਵਿਰੁਦ੍ਧਤ੍ਤਾ. ਉਪੇਕ੍ਖਾ ਤਦਾ ਰਮ੍ਮਣਸ੍ਸ ਚ ਆਰਮ੍ਮਣੇਨ ਸਹ ਵਿਰੁਦ੍ਧਤ੍ਤਾ. ਨ ਹਿ ਅਤਿ ਇਟ੍ਠਾਰਮ੍ਮਣੇ ਉਪੇਕ੍ਖਾ ਤਦਾਰਮ੍ਮਣਂ ਪਵਤ੍ਤਤਿ. ਮਹਗ੍ਗਤ ਪਞ੍ਞਤ੍ਤਾ ਰਮ੍ਮਣੇਸੁ ਪਨ ਉਭਯਮ੍ਪਿ ਤਦਾਰਮ੍ਮਣਂ ਨੁਪ੍ਪਜ੍ਜਤਿਯੇਵ. ਨ ਚ ਮੂਲਭਵਙ੍ਗ ਸਮ੍ਭਵੋ ਅਤ੍ਥਿ. ਕਸ੍ਮਾ, ਜਵਨੇਨ ਸਹ ਵਿਰੁਦ੍ਧਤ੍ਤਾਤਿ.

‘‘ਏਤ੍ਥ ਚਾ’’ਤਿਆਦੀਸੁ. ‘‘ਸਬ੍ਬ ਧਮ੍ਮੇਸੂ’’ਤਿ ਸਬ੍ਬੇਸੁ ਆਰਮ੍ਮਣ ਧਮ੍ਮੇਸੁ. ‘‘ਪਥਮ ਸਮਨ੍ਨਾਹਾਰੋ’’ਤਿ ਆਵਜ੍ਜਨ ਕਿਚ੍ਚਂ ਆਹ. ਸੁਤ੍ਤਨ੍ਤ ਪਾਠੇ. ‘‘ਤਜ੍ਜੋ’’ਤਿ ਤੇਨ ਆਰਮ੍ਮਣਾਨਂ ਆਪਾਤਾ ਗਮਨੇਨ ਜਾਤੋ. ‘‘ਤਜ੍ਜੋ’’ਤਿ ਵਾ ਤਦਨੁਰੂਪੋਤਿਪਿ ਵਦਨ੍ਤਿ. ‘‘ਵਿਞ੍ਞਾਣਭਾਗਸ੍ਸਾ’’ਤਿ ਚਕ੍ਖੁ ਦ੍ਵਾਰਿਕ ਵਿਞ੍ਞਾਣ ਕੋਟ੍ਠਾਸਸ੍ਸ. ‘‘ਯਤੋ’’ਤਿ ਯਸ੍ਮਿਂ ਕਾਲੇ. ਕਥਂ ਆਵਜ੍ਜਨੇਨ ਵਿਨਾ ਨੁਪ੍ਪਜ੍ਜਤੀਤਿ ਆਹ ‘‘ਸਚੇ ਆਵਜ੍ਜਨੇਨਾ’’ਤਿਆਦਿਂ. ‘‘ਏਤ੍ਥ ਸਿਯਾ’’ਤਿਆਦੀਸੁ. ਯਥਾ ਪਨ ਨਿਰਾਵਜ੍ਜਨਂ ਹੋਤਿ ਭਿਨ੍ਨਾ ਰਮ੍ਮਣਞ੍ਚ, ਏਵਂ ਤਥਾਤਿ ਯੋਜਨਾ. ‘‘ਏਕਸ੍ਸਪੀ’’ਤਿ ਏਕਸ੍ਸ ਆਗਨ੍ਤੁਕ ਭਵਙ੍ਗਸ੍ਸਪਿ ਨਤ੍ਥਿ ਦੋਸੋ. ਮਹਾਅਟ੍ਠਕਥਾਯਞ੍ਚ ਨਤ੍ਥਿ. ਅਟ੍ਠਸਾਲਿਨਿਯਂ ਪਨ ਅਤ੍ਥਿਯੇਵ. ‘‘ਸਵਿਪ੍ਫਨ੍ਦਨਤ੍ਤਾ’’ਤਿ ਏਤ੍ਥ ਅਤ੍ਥੋ ਸਵਿਪ੍ਫਾਰਿਕਨ੍ਤਿ ਪਦੇ ਵੁਤ੍ਤਨਯੇਨ ਵੇਦਿਤਬ੍ਬੋ. ‘‘ਇਤਰੇ ਸਞ੍ਚਾ’’ਤਿ ਮਹਗ੍ਗਤਲੋਕੁਤ੍ਤਰ ਜਵਨਾਨਞ੍ਚ. ਕਾਨਿ ਚਿ ਪਰਿਤ੍ਤਾਰਮ੍ਮਣਾਨਿਪਿ ਸਮਾਨਾਨਿ. ਯਦਿ ਤਦਾਰਮ੍ਮਣੂ ਪਨਿਸ੍ਸ ਯਸ੍ਸ ਕਾਮਭਵਙ੍ਗਸ੍ਸ ਅਭਾਵਤੋ ਤਦਾਰਮ੍ਮਣਾਨਿ ਰੂਪਾਰੂਪ ਬ੍ਰਹ੍ਮਾਨਂ ਨੁਪ੍ਪਜ੍ਜਨ੍ਤਿ. ਏਵਂ ਸਤਿ, ਚਕ੍ਖੁਸੋਤ ਦ੍ਵਾਰਿਕ ਚਿਤ੍ਤਾਨਿਪਿ ਰੂਪ ਬ੍ਰਹ੍ਮਾਨਂ ਨੁਪ੍ਪਜ੍ਜੇਯ੍ਯੁਨ੍ਤਿ ਆਹ ‘‘ਚਕ੍ਖੁ ਸੋਤਵਿਞ੍ਞਾਣਾਨਿ ਪਨਾ’’ਤਿਆਦਿਂ. ‘‘ਇਨ੍ਦ੍ਰਿਯਪ੍ਪਵਤ੍ਤਿ ਆਨੁਭਾਵਤੋ’’ਤਿ ਚਕ੍ਖੁ ਵਤ੍ਥੁ ਸੋਤਵਤ੍ਥੁ ਸਙ੍ਖਾਤਾਨਂ ਇਨ੍ਦ੍ਰਿਯ ਵਤ੍ਥੂਨਂ ਰੂਪ ਬ੍ਰਹ੍ਮ ਸਨ੍ਤਾਨੇ ਪਵਤ੍ਤਤ੍ਤਾ ਤੇਸਂ ਪਵਤ੍ਤਿ ਆਨੁਭਾਵਤੋ ਚਕ੍ਖੁ ਸੋਤਵਿਞ੍ਞਾਣਾਨਿ ਰੂਪਬ੍ਰਹ੍ਮਾਨਂ ਪਵਤ੍ਤਨ੍ਤਿਯੇ ਵਾਤਿ ਦਸ੍ਸੇਤੁਂ ‘‘ਸਮ੍ਪਟਿਚ੍ਛਨ ਸਨ੍ਤੀਰਣਾਨੀ’’ਤਿਆਦਿ ਵੁਤ੍ਤਂ. ‘‘ਵਿਕਪ੍ਪਬਲੇਵਾ’’ਤਿ ਕਾਮਕੁਸਲਾ ਕੁਸਲਾਨਂ ਵਿਯ ਵਿਵਿਧੇਨ ਆਕਾਰੇਨ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ਆਰਮ੍ਮਣਗ੍ਗਹਸਾਮਤ੍ਥਿਯੇਵਾਸਤਿ. ‘‘ਅਪ੍ਪਨਾਪਤ੍ਤ ਭਾਵਨਾ ਕਮ੍ਮਵਿਸੇਸੇ ਵਾ’’ਤਿ ਏਤ੍ਥ ਅਭਿਞ੍ਞਾ ਜਵਨਾਨਿ ਵਿਯ ਮਹਗ੍ਗਤ ਵਿਪਾਕ ਲੋਕੁਤ੍ਤਰ ਵਿਪਾਕਾਨਿ ਵਿਯ ਚਾਤਿ ਵਤ੍ਤਬ੍ਬਂ. ‘‘ਅਟ੍ਠਕਥਾਯਂ’’ਤਿ ਪਟਿਚ੍ਚ ਸਮੁਪ੍ਪਾਦ ਵਿਭਙ੍ਗਟ੍ਠਕਥਾਯਂ. ‘‘ਵਿਭਾਵਨਿਯਂ ਵੁਤ੍ਤ ਕਾਰਣਾਨੀ’’ਤਿ ਅਟ੍ਠਕਥਾਤੋ ਆਹਰਿਤ੍ਵਾ ਵਿਭਾਵਨਿਯਂ ਵੁਤ੍ਤਾਨਿ ‘ਅਜਨਕਤ੍ਤਾ ਜਨਕ ਸਮਾਨਤ੍ਤਾ ਭਾਵਤੋ’ਤਿਆਦੀਨਿ ਕਾਰਣਾਨਿ.

੧੪੦. ਜਵਨ ਨਿਯਮੇ. ਅਟ੍ਠਕਥਾਯਮ੍ਪਿ ਛਕ੍ਖਤ੍ਤੁਂ ਪਵਤ੍ਤਿ ਵੁਤ੍ਤਾ. ਯਥਾਹ ਸਚੇ ਪਨ ਬਲਵਾ ਰਮ੍ਮਣਂ ਆਪਾਤਾਗਤਂ ਹੋਤਿ. ਕ੍ਰਿਯਮਨੋਧਾਤੁਯਾ ਭਵਙ੍ਗੇ ਆਵਟ੍ਟਿਤੇ ਚਕ੍ਖੁਵਿਞ੍ਞਾਣਾਦੀਨਿ ਉਪ੍ਪਜ੍ਜਨ੍ਤਿ. ਜਵਨਟ੍ਠਾਨੇ ਪਨ ਪਥਮਕਾਮਾਵਚਰ ਕੁਸਲ ਚਿਤ੍ਤਂ ਜਵਨਂ ਹੁਤ੍ਵਾ ਛਸਤ੍ਤਵਾਰੇ ਜਵਿਤ੍ਵਾ ਤਦਾਰਮ੍ਮਣਸ੍ਸ ਵਾਰਂ ਦੇਤੀਤਿ. ‘‘ਮੁਦੁਤਰ ਭਾਵੇਨਾ’’ਤਿ ਮਾਤੁਕੁਚ੍ਛਿਮ੍ਹਿ ਠਿਤਕਾਲੇਵਾ ਸਮ੍ਪਤਿ ਜਾਤਕਾਲੇ ਵਾ ਵਤ੍ਥੁਸ੍ਸ ਅਤਿਮੁਦੁਭਾਵੇਨ. ‘‘ਕੇਨਚਿਉਪਦ੍ਦੁਤ ਭਾਵੇਨਾ’’ਤਿ ਬਾਲ਼੍ਹਗੇਲਞ੍ਞਜਾਤਕਾਲੇ ਕੇਨਚਿ ਵਾਤਪਿਤ੍ਤਸੇਮ੍ਹਾਦਿਨਾ ਉਪਦ੍ਦੁਤ ਭਾਵੇਨ. ‘‘ਅਜ੍ਝੋਤ੍ਥਟ ਭਾਵੇਨਾ’’ਤਿ ਤਸ੍ਸ ਵੇਵਚਨਮਤ੍ਤਂ. ਮਨ੍ਦੀਭੂਤੋ ਵੇਗੋ ਯੇਸਂ ਤਾਨਿ ਮਨ੍ਦੀਭੂਤ ਵੇਗਾਨਿ. ‘‘ਅਸਯ੍ਹ ਰੂਪੇਹੀ’’ਤਿ ਦੁਕ੍ਖਮਸਭਾਵੇਹਿ. ਅਭਿਭੂਤਾਨਂ ਸਤ੍ਤਾਨਂ. ਤਞ੍ਚ ਖੋ ਵਚਨਂ ਪਾਕਤਿਕ ਸਤ੍ਤਾਨਂ ਵਸੇਨੇਵ ਵੁਤ੍ਤਂ. ਨ ਸਤ੍ਤਵਿਸੇਸਾਨਂ ਵਸੇਨ. ਏਵਂ ਸਤਿ, ਸਤ੍ਤਵਿਸੇਸਾਨਂ ਵਸੇਨ ਕਥਂ ਦਟ੍ਠਬ੍ਬਨ੍ਤਿ ਆਹ ‘‘ਯੇ ਪਨਾ’’ਤਿਆਦਿਂ. ‘‘ਉਪਰੀ’’ਤਿ ਮਰਣੁਪ੍ਪਤ੍ਤਿਟ੍ਠਾਨੇ. ‘‘ਵੁਤ੍ਤਞ੍ਹੀ’’ਤਿ ਵਿਸੁਦ੍ਧਿ ਮਗ੍ਗੇ ਵੁਤ੍ਤਮੇਵ. ‘‘ਯਮਕਪ੍ਪਾਟਿਹਾਰਿਯਂ’’ਤਿ ਯੁਗਲ਼ਵਤ੍ਥੂਨਂ ਏਕਤੋ ਪਵਤ੍ਤ ਅਚ੍ਛਰਿਯ ਕਮ੍ਮਂ. ‘‘ਦ੍ਵੇ ਝਾਨਙ੍ਗਾਨੀ’’ਤਿ ਉਪੇਕ੍ਖੇਕਗ੍ਗਤਾ ਝਾਨਙ੍ਗਾਨਿ.

‘‘ਯੋਗਕਮ੍ਮਸਿਦ੍ਧਿਯਾ’’ਤਿ ਭਾਵਨਾਨੁ ਯੋਗਕਮ੍ਮਸਿਦ੍ਧਸ੍ਸ. ਇਦ੍ਧਿ ਵਿਕੁਬ੍ਬਨਂ ਨਾਮ ਇਦ੍ਧਿਯਾ ਨਾਨਾਕਮ੍ਮਕਰਣਂ. ‘‘ਸਿਦ੍ਧਿਯਾ ਏਵਾ’’ਤਿ ਸਿਜ੍ਝ ਨਤ੍ਥਾਯ ਏਵ. ਅਤ੍ਤਨੋ ਅਨਨ੍ਤਰੇ ਏਵ ਉਪ੍ਪਨ੍ਨਂ ਫਲਂ ਏਤਿਸ੍ਸਾਤਿ ਆਨਨ੍ਤਰਿਕਪ੍ਫਲਾ. ਮਗ੍ਗਚੇਤਨਾ. ‘‘ਇਤੀ’’ਤਿ ਤਸ੍ਮਾ. ‘‘ਮਨ੍ਦਸ੍ਸਾ’’ਤਿ ਮਨ੍ਦ ਪੁਗ੍ਗਲਸ੍ਸ. ‘‘ਤਿਕ੍ਖਸ੍ਸਾ’’ਤਿ ਤਿਕ੍ਖ ਪੁਗ੍ਗਲਸ੍ਸ. ਤੀਣਿ ਫਲਚਿਤ੍ਤਾਨਿ. ‘‘ਪਯੋਗਾਭਿਸਙ੍ਖਾਰਸ੍ਸਾ’’ਤਿ ਪਥਮਜ੍ਝਾਨਤੋ ਪਟ੍ਠਾਯ ਸਮਥ ਵਿਪਸ੍ਸਨਾਯੁਗਨਨ੍ਧਪ੍ਪਵਤ੍ਤਿ ਸਙ੍ਖਾਤਸ੍ਸ ਪੁਬ੍ਬਪ੍ਪਯੋਗਾਭਿਸਙ੍ਖਾਰਸ੍ਸ. ‘‘ਅਕਤਾਧਿਕਾਰਸ੍ਸਾ’’ਤਿ ਆਸਨ੍ਨੇ ਪੁਰਿਮਭਵੇ ਅਕਤ ਝਾਨਪਰਿਕਮ੍ਮਸ੍ਸ ਪੁਗ੍ਗਲਸ੍ਸ. ਸਬ੍ਬੇਸਮ੍ਪਿ ਫਲਟ੍ਠਾਨਂ ਚਿਣ੍ਣਵਸਿਭਾਵਾਨੇਵ ਹੋਨ੍ਤੀਤਿ ਯੋਜਨਾ.

ਜਵਨਨਿਯਮੋਨਿਟ੍ਠਿਤੋ.

੧੪੧. ਦੁਹੇਤੁਕਾਦੀਸੁ. ਜਾਤਿ ਦ੍ਵਿਹੇਤੁਕਾਦਯੋ ਏਵ ਅਧਿਪ੍ਪੇਤਾਤਿ ਵੁਤ੍ਤਂ ‘‘ਪਟਿਸਨ੍ਧਿਵਿਞ੍ਞਾਣ ਸਹਗਤਾ’’ਤਿਆਦਿਂ. ‘‘ਤੇਸਂ ਦ੍ਵਿਨ੍ਨਂ ਪੀ’’ਤਿ ਦ੍ਵਿਹੇਤੁਕਾਨਮ੍ਪਿ ਅਹੇਤੁਕਾਨਮ੍ਪਿ. ਭੁਸੋਝਾਨ ਮਗ੍ਗਫਲਾਨਿ ਵਾਰੇਨ੍ਤਿ ਨੀਵਾਰੇਨ੍ਤੀਤਿ ਆਵਰਣਾਨਿ. ਵਿਪਾਕਾਨਿ ਚ ਤਾਨਿ ਆਵਰਣਾਨਿ ਚਾਤਿ ਵਿਗ੍ਗਹੋ. ‘‘ਵਿਪਾਕਾਨੀ’’ਤਿ ਅਹੇਤੁਕ ਦ੍ਵਿਹੇਤੁਕ ਵਿਪਾਕਾਨਿ. ਤੇਹਿ ਗਹਿਤਪ੍ਪਟਿਸਨ੍ਧਿਕਾਨਂ ਇਮਸ੍ਮਿਂ ਭਵੇਝਾਨ ਮਗ੍ਗਫਲਪ੍ਪਟਿਲਾਭੋ ਨਾਮ ਨਤ੍ਥਿ. ਤੇਨਾਹ ‘‘ਵਿਪਾਕਾਵਰਣ ਸਬ੍ਭਾਵਤੋ’’ਤਿਆਦਿਂ. ‘‘ਤੇਸਂ’’ਤਿ ਦੁਗ੍ਗਤਿ ਅਹੇਤੁਕ ਪੁਗ੍ਗਲਾਨਂ. ਪੁਗ੍ਗਲਾਨਨ੍ਤਿ ਵੁਤ੍ਤਂ ਹੋਤਿ. ਨ ਲਬ੍ਭਨ੍ਤੀਤਿ ਸਮ੍ਬਨ੍ਧੋ. ‘‘ਇਤਰੇਸਂ’’ਤਿ ਤਤੋ ਅਞ੍ਞੇਸਂ ਸੁਗਤਿ ਅਹੇਤੁਕ ਪੁਗ੍ਗਲਾਨਂ.

‘‘ਏਤ੍ਥ ਸਿਯਾ’’ਤਿਆਦੀਸੁ. ਦੁਗ੍ਗਤਿ ਪਰਿਯਾਪਨ੍ਨਾਨਞ੍ਚ ਅਹੇਤੁਕਾਨਂ. ‘‘ਮੂਲਭਵਙ੍ਗੇ’’ਤਿਆਦਿਮ੍ਹਿ ਪਟਿਸਨ੍ਧਿ ਚਿਤ੍ਤਂ ਹੁਤ੍ਵਾ ਆਗਤੇ ਮੂਲਭਵਙ੍ਗੇ. ‘‘ਯਂ ਕਿਞ੍ਚੀ’’ਤਿ ਯਂ ਕਿਞ੍ਚਿ ਭਵਙ੍ਗਂ. ‘‘ਵੁਚ੍ਚਤੇ’’ਤਿ ਵਿਸਜ੍ਜਨਾ ਵੁਚ੍ਚਤੇ. ‘‘ਸਬ੍ਬ ਅਟ੍ਠਕਥਾਸੁ ਪਟਿਕ੍ਖਿਤ੍ਤੋ’’ਤਿ ਅਟ੍ਠਸਾਲਿਨਿਯਂ ਤਾਵ ਵਿਪਾਕੁਦ੍ਧਾਰਕਥਾਯਂ ਸੋਲ਼ਸਸੁ ਕਾਮਾਵਚਰ ਕੁਸਲ ਵਿਪਾਕੇਸੁ ਅਟ੍ਠਨ੍ਨਂ ਅਹੇਤੁਕ ਵਿਪਾਕਾਨਂ ਏਵ ਆਪਾਯਿਕੇਸੁ ਸਤ੍ਤੇਸੁ ਉਪ੍ਪਤ੍ਤਿਂ ਦਸ੍ਸੇਤਿ. ਨ ਅਟ੍ਠਨ੍ਨਂ ਸਹੇਤੁਕ ਵਿਪਾਕਾਨਂ. ਤਥਾ ਪਟਿਚ੍ਚ ਸਮੁਪ੍ਪਾਦਟ੍ਠ ਕਥਾਸੁ ਚ ਵਿਞ੍ਞਾਣ ਪਦਵਣ੍ਣਨਾਸੁ ਅਞ੍ਞਾਸੁ ਚ ਅਭਿਧਮ੍ਮਾਵਤਾਰਾਦੀਸੂਤਿ ਏਵਂ ਸਬ੍ਬਟ੍ਠਕਥਾਸੁ ਪਟਿਕ੍ਖਿਤ੍ਤਾ ਨਾਮ ਹੋਤਿ. ‘‘ਯੋਗਸਾ ਧਨੀਯਤ੍ਤਾ’’ਤਿ ਪਯੋਗੇਨ ਸਾਧੇਤਬ੍ਬਤ੍ਤਾ. ਕੁਸਲਾਕੁਸਲਾਨਿ ਹਿ ਵਡ੍ਢੇਤੁਂ ਵਾ ਹਾਪੇਤੁਂ ਵਾ ਪਯੋਗੇ ਕਤੇ ਵਡ੍ਢਨ੍ਤਿ ਚੇਵ ਹਾਯਨ੍ਤਿ ਚ. ਞਾਣਵਿਪ੍ਪਯੁਤ੍ਤਭੂਤਂ ਗਹੇਤੁਂ ਯੁਤ੍ਤਂ. ਕਸ੍ਮਾ, ਅਹੇਤੁਕਸ੍ਸ ਭਵਙ੍ਗਸ੍ਸਾਤਿ ਵੁਤ੍ਤਸ੍ਸ ਮੂਲਭਵਙ੍ਗਸ੍ਸ ਅਹੇਤੁਕਤ੍ਤਾ. ‘‘ਦ੍ਵਿਨ੍ਨਮ੍ਪਿ ਅਹੇਤੁਕਾਨਂ’’ਤਿ ਦੁਗ੍ਗਤਿ ਅਹੇਤੁਕਾਨਞ੍ਚ ਸੁਗਤਿ ਅਹੇਤੁਕਾਨਞ੍ਚ. ‘‘ਅਪਰੇਪਨਾ’’ਤਿਆਦਿ ਵਿਭਾਵਨਿਯਂ ਆਗਤੋ ਅਪਰੇ ਵਾਦੋ. ਵੁਤ੍ਤਞ੍ਹਿ ਤਤ੍ਥ ‘ਅਪਰੇਪਨ ਯਥਾ ਅਹੇਤੁਕਾਨਂ ਸਹੇਤੁਕ ਤਦਾਰਮ੍ਮਣਂ ਹੋਤਿ, ਏਵਂ ਦ੍ਵਿਹੇਤੁਕਾਨਂ ਤਿਹੇਤੁਕ ਤਦਾਰਮ੍ਮਣਂਪੀ’ਤਿ ਵਣ੍ਣੇਨ੍ਤਿ. ਤੇਸਂਮਤਾਨੁਰੋਧੇਨ ਚ ਇਧਪਿ ਞਾਣਸਮ੍ਪਯੁਤ੍ਤ ਵਿਪਾਕਪ੍ਪਟਿਕ੍ਖੇਪੋ ਅਹੇਤੁਕੇਯੇਵ ਸਨ੍ਧਾਯਾਤਿ ਵਦਨ੍ਤੀਤਿ. ਤਂ ਪਨ ਵਿਪਾਕੁਦ੍ਧਾਰਕਥਾਯਂ ‘ਏਤ੍ਥੇਵ ਦ੍ਵਾਦਸ ਕਮਗ੍ਗੋਪੀ’ਤਿ ਚ, ਏਤ੍ਥੇਵ ਦਸਕਮਗ੍ਗੋਪੀ’ਤਿ ਚ ਆਗਤੇਹਿ ਨ ਸਮੇਤਿ. ਤਤ੍ਥ ਹਿ ਸੋਲ਼ਸਸੁਕੁਸਲਵਿਪਾਕੇਸੁ ਦ੍ਵਿਹੇਤੁਕ ਕਮ੍ਮਨਿਬ੍ਬਤ੍ਤਾਨਂ ਦ੍ਵਿਨ੍ਨਂ ਦ੍ਵਿਹੇਤੁਕਾਹੇਤੁਕ ਪੁਗ੍ਗਲਾਨਂ ਚਤ੍ਤਾਰਿ ਞਾਣਸਮ੍ਪਯੁਤ੍ਤ ਵਿਪਾਕਾਨਿ ਵਜ੍ਜੇਤ੍ਵਾ ਦ੍ਵਾਦਸ ਕਮਗ੍ਗੋ ਨਾਮ ਹੋਤਿ. ਪੁਨ ਸੇਸੇਸੁ ਦ੍ਵਾਦਸ ਵਿਪਾਕੇਸੁਪਿ ਅਸਙ੍ਖਾਰਿਕ ਕਮ੍ਮਨਿਬ੍ਬਤ੍ਤਾਨਂ ਦ੍ਵੇ ਞਾਣਵਿਪ੍ਪਯੁਤ੍ਤ ਸਸਙ੍ਖਾਰਿਕ ਵਿਪਾਕਾਨਿ, ਸਸਙ੍ਖਾਰਿਕ ਕਮ੍ਮਨਿਬ੍ਬਤ੍ਤਾਨਞ੍ਚ ਦ੍ਵੇ ਞਾਣਵਿਪ੍ਪਯੁਤ੍ਤ ਅਸਙ੍ਖਾਰਿਕ ਵਿਪਾਕਾਨਿ ਵਜ੍ਜੇਤ੍ਵਾ ਦੁਤਿਯਤ੍ਥੇਰ ਵਾਦੇ ਦਸਕਮਗ੍ਗੋ ਨਾਮ ਹੋਤੀਤਿ. ਏਤ੍ਥ ਪਨ ਦ੍ਵਿ ਹੇਤੁਕੋਪਿ ਪੁਗ੍ਗਲੋ ਅਧਿਕੇਨ ਛਨ੍ਦੇਨ ਵਾ ਵੀਰਿਯੇਨ ਵਾ ਚਿਤ੍ਤੇਨ ਵਾ ਯੁਤ੍ਤੋ ਪਰਿਯਤ੍ਤਿ ਧਮ੍ਮਂ ਵਾ ਨਾਨਾਵਿਜ੍ਜਾਸਿਪ੍ਪਾਨਿ ਵਾ ਬਹੁਂ ਗਣ੍ਹੇਯ੍ਯ, ਸੁਣੇਯ੍ਯ, ਧਾਰੇਯ੍ਯ, ਵਾਚੇਯ੍ਯ, ਚਿਨ੍ਤੇਯ੍ਯ. ਅਥਸ੍ਸ ਞਾਣਸਮ੍ਪਯੁਤ੍ਤ ਜਵਨਂ ਬਹੁਲਂ ਸਮੁਦਾ ਚਰੇਯ੍ਯ. ਤਦਾ ਤਸ੍ਸ ਨਾਨਾਕਮ੍ਮੇਨ ਜਵਨਾਨੁ ਰੂਪਂ ਞਾਣਸਮ੍ਪਯੁਤ੍ਤ ਤਦਾਰਮ੍ਮਣਂ ਨ ਨ ਸਮ੍ਭਵਤੀਤਿ ਵੁਤ੍ਤਂ. ਤਂ ਯੁਤ੍ਤਂ ਵਿਯ ਦਿਸ੍ਸਤੀਤਿ. ‘‘ਅਟ੍ਠਕਥਾਯਂ ਪਿਹਿ. ਲ. ਵੁਤ੍ਤਾ’’ਤਿ ਕਥਂ ਵੁਤ੍ਤਾ. ਏਤਾਨਿ ਹਿ ਮਨੁਸ੍ਸੇਸੁ ਚ ਕਾਮਾਵਚਰ ਦੇਵੇਸੁ ਚ ਪੁਞ੍ਞਵਨ੍ਤਾਨਂ ਦ੍ਵਿਹੇਤੁਕਤਿ ਹੇਤੁਕਾਨਂ ਪਟਿਸਨ੍ਧਿਕਾਲੇ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਨ੍ਤੀਤਿਆਦਿਨਾ ਵੁਤ੍ਤਾਤਿ. ਤੇ ਪਨ ਤਿਵਿਧਾ, ਨਵਵਿਧਾਤਿ ਸਮ੍ਬਨ੍ਧੋ. ‘‘ਤੇਸਂ ਤਬ੍ਭਾਵੋ’’ਤਿ ਕੁਸਲਾਨਂ ਕੁਸਲਭਾਵੋ, ਅਕੁਸਲਾਨਂ ਅਕੁਸਲਭਾਵੋ. ‘‘ਸਿਕ੍ਖਨ ਧਮ੍ਮਯੁਤ੍ਤਾ’’ਤਿ ਤੀਹਿ ਸਿਕ੍ਖਾਹਿ ਪਹਾਤਬ੍ਬਾਨਂ ਕਿਲੇਸਾਨਂ ਅਤ੍ਥਿਤਾਯ ਸਿਕ੍ਖਿਤਬ੍ਬਤਾ ਪਕਤਿਯਂ ਠਿਤਾਤਿ ਅਧਿਪ੍ਪਾਯੋ.‘‘ਹੇਟ੍ਠਿਮਾਨਞ੍ਚਾ’’ਤਿ ਹੇਟ੍ਠਿਮ ਫਲਾਨਞ੍ਚ. ਯਾਨਿਯਾਨਿਸਕਾਨਿ ਯਥਾਸਕਂ. ‘‘ਉਪਰਿਮਾਨਂ’’ਤਿ ਉਪਰਿਮਾਨਂ ਪੁਗ੍ਗਲਾਨਂ. ‘‘ਪਰਿਨਿਟ੍ਠਿਤ ਸਿਕ੍ਖਾ ਕਿਚ੍ਚਤ੍ਤਾ’’ਤਿ ਸਿਕ੍ਖਾ ਕਿਚ੍ਚਂ ਨਾਮ ਕਿਲੇਸ ਧਮ੍ਮਾਨਂ ਪਹਾਨਤ੍ਥਾਯ ਏਵ ਹੋਤੀਤਿ ਤੇਸੁ ਸਬ੍ਬਸੋ ਪਹੀਨੇਸੁ ਸਿਕ੍ਖਾ ਕਿਚ੍ਚਂ ਪਰਿਨਿਟ੍ਠਿਤਂ ਹੋਤਿ. ਏਵਂ ਪਰਿਨਿਟ੍ਠਿਤ ਸਿਕ੍ਖਾ ਕਿਚ੍ਚਤ੍ਤਾ. ਸੁਟ੍ਠੁ ਭਬ੍ਬੋਤਿ ਸਮ੍ਭਵੋ. ਸਮ੍ਭਵੋਤਿ ਵਿਸੇਸਨ ਪਦਮੇਤਨ੍ਤਿ ਆਹ ‘‘ਯਥਾ ਸਮ੍ਭਵਂ’’ਤਿ.

੧੪੨. ‘‘ਏਤ੍ਥੇਵਾ’’ਤਿ ਏਤਸ੍ਮਿਂ ਕਾਮਲੋਕੇ ਏਵ. ‘‘ਤਂ ਤਂ ਪਸਾਦਰਹਿਤਾਨਂ’’ਤਿ ਤੇਨਤੇਨ ਪਸਾਦੇਨ ਰਹਿਤਾਨਂ. ਤਸ੍ਮਿਂ ਤਸ੍ਮਿਂ ਦ੍ਵਾਰੇ ਉਪ੍ਪਨ੍ਨਾਨਿ ਤਂ ਤਂ ਦ੍ਵਾਰਿਕਾਨਿ. ਚਤੁਸਟ੍ਠਿਵੀਥਿ ਚਿਤ੍ਤਾਨਿ. ਦ੍ਵੇ ਚਤ੍ਤਾਲੀਸ ਵੀਥਿ ਚਿਤ੍ਤਾਨਿ. ‘‘ਬ੍ਰਹ੍ਮਲੋਕੇ ਵਾ’’ਤਿਆਦੀਸੁ. ਇਦਂ ਅਟ੍ਠਕਥਾ ਵਚਨਂ. ਯਥਾਹ ਰੂਪਭਵੇ ਚਤੁਨ੍ਨਂ ਵਿਞ੍ਞਾਣਾਨਂ, ਤਥੇਵ ਪਚ੍ਚਯੋ. ਪਵਤ੍ਤੇ, ਨੋਪਟਿਸਨ੍ਧਿਯਂ. ਸੋਚ ਖੋ ਕਾਮਾਵਚਰੇ ਅਨਿਟ੍ਠ ਰੂਪਦਸ੍ਸਨ ਸਦ੍ਦਸਵਨਵਸੇਨ, ਬ੍ਰਹ੍ਮਲੋਕੇ ਪਨ ਅਨਿਟ੍ਠਾ ਰੂਪਾਦਯੋ ਨਾਮ ਨਤ੍ਥਿ. ਤਥਾ ਕਾਮਾਵਚਰ ਦੇਵਲੋਕੇ ਪੀਤਿ. ਤਾਨਿ ਚਤ੍ਤਾਰਿ ਚਿਤ੍ਤਾਨਿ. ‘‘ਤਤ੍ਥਾ’’ਤਿ ਤਸ੍ਮਿਂ ਰੂਪਲੋਕੇ. ਵਿਭਾਵਨਿਪਾਠੇ. ‘‘ਇਧਾ’’ਤਿ ਇਮਸ੍ਮਿਂ ਵਚਨੇ. ‘‘ਤਂ ਤਂ ਭੂਮਿ ਪਰਿਯਾਪਨ੍ਨੇ’’ਤਿ ਤਿਸ੍ਸਂ ਤਿਸ੍ਸਂ ਭੂਮਿਯਂ ਪਰਿਯਾਪਨ੍ਨੇ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਵੀਥਿਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੫. ਵੀਥਿਮੁਤ੍ਤਸਙ੍ਗਹਅਨੁਦੀਪਨਾ

੧੪੩. ਵੀਥਿਮੁਤ੍ਤਸਙ੍ਗਹੇ. ‘‘ਪਵਤ੍ਤਿਸਙ੍ਗਹਂ’’ਤਿ ਚਿਤ੍ਤੁਪ੍ਪਾਦਾਨਂ ਪਵਤ੍ਤਾਕਾਰਕਥਨਸਙ੍ਗਹਂ. ‘‘ਪਟਿਸਨ੍ਧਿਯਂ’’ਤਿ ਪਟਿਸਨ੍ਧਿਕਾਲੇ. ‘‘ਤੇਸਂ’’ਤਿ ਚਿਤ੍ਤ ਚੇਤਸਿਕਾਨਂ. ਵਿਭਾਵਨਿਪਾਠੇ. ‘‘ਤਦਾਸਨ੍ਨਤਾਯਾ’’ਤਿ ਤਾਯਪਟਿਸਨ੍ਧਿਯਾ ਆਸਨ੍ਨਤਾਯ. ‘‘ਤਂ ਗਹਣੇਨੇ ਵਾ’’ਤਿ ਸਨ੍ਧਿਗ੍ਗਹਣੇਨ ਏਵ ਸਨ੍ਧਿਵਚਨੇਨ ਏਵ. ‘‘ਵਿਸਯਪ੍ਪਵਤ੍ਤਿ ਨਾਮਾ’’ਤਿ ਕਮ੍ਮ ਕਮ੍ਮਨਿਮਿਤ੍ਤਾਦੀਨਂ ਵਿਸਯਾਨਂ ਦ੍ਵਾਰੇਸੁ ਆਪਾਤਾ ਗਮਨ ਵਸੇਨ ਪਵਤ੍ਤਿ ਨਾਮ. ‘‘ਮਰਣੁਪ੍ਪਤ੍ਤਿਯਂ ਏਵ ਸਿਦ੍ਧਾ’’ਤਿ ਮਰਣੁਪ੍ਪਤ੍ਤਿਯਂ ਜਵਨੇਸੁ ਏਵ ਸਿਦ੍ਧਾ. ਏਤੇਨ ਮਰਣੁਪ੍ਪਤ੍ਤਿ ਵਿਧਾਨਂ ਜਵਨਪ੍ਪਧਾਨਂ ਹੋਤਿ, ਨ ਚੁਤਿਪ੍ਪਧਾਨਨ੍ਤਿ ਦੀਪੇਤਿ. ਨ ਹਿ ਤਸ੍ਮਿਂ ਵਿਧਾਨੇ ਤਸ੍ਸਂ ਚੁਤਿਯਂ ਵਿਸਯਪ੍ਪਵਤ੍ਤਿ ਵਚਨਂ ਨਾਮ ਅਤ੍ਥਿ. ਜਵਨੇਸੁ ਏਵ ਅਤ੍ਥਿ. ਸਾ ਪਨ ਚੁਤਿ ਤਸ੍ਮਿਂ ਭਵੇ ਆਦਿਮ੍ਹਿ ਪਟਿਸਨ੍ਧਿ ਪਵਤ੍ਤਿਯਾ ਸਿਦ੍ਧਾਯ ਸਿਜ੍ਝਤਿ ਯੇਵਾਤਿ. ‘‘ਤੇਸਂ’’ਤਿ ਵੀਥਿਮੁਤ੍ਤਾਨਂ. ‘‘ਭਵਨ੍ਤੀ’’ਤਿ ਪਾਤੁਬ੍ਭਵਨ੍ਤਿ. ‘‘ਤਤੋ’’ਤਿ ਅਯਤੋ. ‘‘ਗਨ੍ਤਬ੍ਬਾ’’ਤਿ ਪਟਿਸਨ੍ਧਿਗ੍ਗਹਣਵਸੇਨ ਉਪਪਜ੍ਜਿਤਬ੍ਬਾ. ‘‘ਗਚ੍ਛਨ੍ਤੀ’’ਤਿ ਪਵਤ੍ਤਨ੍ਤਿ. ‘‘ਤਿਰੋ’’ਤਿ ਤਿਰਿਯਤੋ. ‘‘ਅਞ੍ਛਿਤਾ’’ਤਿ ਗਤਾ ਪਵਤ੍ਤਾ, ਆਯਤਾ ਵਾ. ‘‘ਸਮਾਨਜਾਤਿਤਾਯਾ’’ਤਿ ਤਿਰਚ੍ਛਾਨ ਗਤਜਾਤਿ ਵਸੇਨ ਸਮਾਨਜਾਤਿ ਭਾਵੇਨ. ‘‘ਯੁਵਨ੍ਤੀ’’ਤਿ ਮਿਸ੍ਸੀ ਭਵਨ੍ਤਿ. ‘‘ਸੁਖਸਮੁਸ੍ਸਯਤੋ’’ਤਿ ਸੁਖਸਮੁਦਾਯਤੋ. ‘‘ਦਿਬ੍ਬਨ੍ਤੀ’’ਤਿ ਵਿਜ੍ਜੋਤਨ੍ਤਿ. ‘‘ਇਤਿ ਕਤ੍ਵਾ’’ਤਿ ਇਤਿ ਵਚਨਤ੍ਥਂ ਕਤ੍ਵਾ ਉਪਰਿਦੇਵਾ ਸੁਰਾਤਿ ਵੁਚ੍ਚਨ੍ਤੀਤਿ ਯੋਜਨਾ. ‘‘ਵੇਪਚਿਤ੍ਤਿਪਹਾਰਾਦਾਦਯੋ’’ਤਿ ਵੇਪਚਿਤ੍ਤਿ ਅਸੁਰਿਨ੍ਦ ਪਹਾਰਾਦਅਸੁਰਿਨ੍ਦਾਦਿਕੇ ਦੇਵਾਸੁਰੇ. ‘‘ਸੁਰਪ੍ਪਟਿ ਪਕ੍ਖਾ’’ਤਿ ਤਾਵਤਿਂਸਾਦੇਵਪ੍ਪਟਿਪਕ੍ਖਾ. ‘‘ਸੁਰਸਦਿਸਾ’’ਤਿ ਤਾਵਤਿਂਸਾਦੇਵ ਸਦਿਸਾ. ‘‘ਵੇਮਾਨਿਕਪੇਤੇ’’ਤਿ ਵੇਮਾਨਿਕ ਨਾਮਕੇ ਪੇਤੇ. ‘‘ਵਿਨਿਪਾਤਿਕੇ’’ਤਿ ਵਿਨਿਪਾਤਿਕ ਨਾਮਕੇ ਦੁਗ੍ਗਤ ਦੇਵਜਾਤਿਕੇ. ਤੇਸਂ ਪਵਤ੍ਤਿ ਉਪਰਿ ‘ਵਿਨਿਪਾਤਿਕਾਸੁਰਾਨਞ੍ਚਾ’ਤਿ ਪਦੇ ਆਵਿ ਭਵਿਸ੍ਸਤਿ. ‘‘ਤੇਪੀ’’ਤਿ ਲੋਕਨ੍ਤਰਿਕ ਨੇਰਯਿਕ ਸਤ੍ਤਾਪਿ. ‘‘ਕਾਲਕਞ੍ਚਿਕਪੇਤੇ’’ਤਿ ਕਾਲਕਞ੍ਚਿਕ ਨਾਮਕੇ ਪੇਤੇ. ਏਵਂ ਕਥਾਵਤ੍ਥੁ ਪਾਲ਼ਿਯਂ ਆਗਤਾ ਵੇਸ੍ਸਭੁ ਆਦਯੋ ਯਮਰਾਜਾਨੋਪਨਾਤਿ ਸਮ੍ਬਨ੍ਧੋ. ਵੇਸ੍ਸਭੂ ਚ ਨੋਤ੍ਤਿ ਚ ਸੋਮੋ ਚ ਯਮੋ ਚ ਵੇਸ੍ਸਵਣੋ ਚ ਇਤਿ ਇਮੇ ਪੇਤ੍ਤਿ ਰਾਜਾਨੋ. ‘‘ਰਜ੍ਜ’’ਨ੍ਤਿ ਰਾਜਭਾਵਂ ਰਾਜਕਿਚ੍ਚਂ. ਯੇ ਚ ਯਕ੍ਖਰਕ੍ਖਸਾ ਨਾਮ ਕਰੋਨ੍ਤਾ ਵਿਚਰਨ੍ਤੀਤਿ ਸਮ੍ਬਨ੍ਧੋ. ‘‘ਕੁਰੂਰਕਮ੍ਮਕਾਰਿਨੋ’’ਤਿ ਲੁਦ੍ਦਕਮ੍ਮਕਾਰਿਨੋ. ‘‘ਰੇਵਤਿ ਵਿਮਾਨੇ’’ਤਿ ਰੇਵਤਿ ਵਿਮਾਨ ਵਤ੍ਥੁਮ੍ਹਿ. ‘‘ਇਤੋ’’ਤਿ ਮਨੁਸ੍ਸ ਲੋਕਤੋ, ਸੁਗਤਿਭਵਤੋ ਵਾ. ਤੇਹਿ ਯਕ੍ਖ ਰਕ੍ਖਸਾ ਨਾਮ ਭੂਮਟ੍ਠਕਾਪਿ ਸਨ੍ਤਿ, ਆਕਾਸਟ੍ਠਕਾਪਿ. ‘‘ਨਾਨਾਕਮ੍ਮਕਾਰਣਾਯੋ’’ਤਿ ਦ੍ਵਤ੍ਤਿਂਸ ਵਿਧਾਨਿ ਕਮ੍ਮਕਰਣ ਕਿਚ੍ਚਾਨਿ. ਤੇਸਮ੍ਪਿ ਨਿਰਯਪਾਲਾਨਨ੍ਤਿ ਸਮ੍ਬਨ੍ਧੋ. ‘‘ਤਿਸ੍ਸਨ੍ਨਂ’’ਤਿ ਤਿਸ੍ਸਨ੍ਨਂ ਅਪਾਯਭੂਮੀਨਂ. ਅਪਾਯਭੂਮਿ.

ਉਸ੍ਸਿਤੋ ਮਨੋ ਏਤੇਸਨ੍ਤਿ ਵਾ, ਉਸ੍ਸਨ੍ਨੋ ਮਨੋ ਏਤੇਸਨ੍ਤਿ ਵਾ, ਦ੍ਵਿਧਾਵਿਗ੍ਗਹੋ. ‘‘ਉਸ੍ਸਿਤੋ’’ਤਿ ਉਗ੍ਗਤੋ. ‘‘ਉਸ੍ਸਨ੍ਨੋ’’ਤਿ ਵਿਪੁਲੋ. ਕਸ੍ਮਾ ਤਿਕ੍ਖਤਰ ਚਿਤ੍ਤਾ ਹੋਨ੍ਤੀਤਿ ਵੁਤ੍ਤਨ੍ਤਿ ਆਹ ‘‘ਪਰਿਪੁਣ੍ਣਾਨਂ’’ਤਿਆਦਿਂ. ਪੁਬ੍ਬਵਾਕ੍ਯੇ ਅਨਨ੍ਤ ਚਕ੍ਕਵਾਲ਼ਸਾਧਾਰਣ ਵਸੇਨ ਵੁਤ੍ਤਤ੍ਤਾ ਪੁਨ ‘‘ਇਮਸ੍ਮਿਂ’’ਤਿਆਦਿ ਵੁਤ੍ਤਂ. ਵਤ੍ਤਬ੍ਬਂ ਨਤ੍ਥਿ. ਇਧੇਵ ਸਬ੍ਬਞ੍ਞੁ ਬੁਦ੍ਧਾਦੀਨਂ ਉਪ੍ਪਨ੍ਨਤੋਤਿ ਅਧਿਪ੍ਪਾਯੋ. ‘‘ਅਧਿਗ੍ਗਣ੍ਹਨ੍ਤੀ’’ਤਿ ਅਧਿਕਂ ਕਤ੍ਵਾ ਗਣ੍ਹਨ੍ਤਿ. ‘‘ਸੂਰਾ’’ਤਿ ਪਾਪਕਲ੍ਯਾਣ ਕਮ੍ਮੇਸੁ ਸੂਰਚਿਤ੍ਤਾ. ‘‘ਸਤਿਮਨ੍ਤੋ’’ਤਿ ਵਿਪੁਲਸ੍ਸਤਿਕਾ. ‘‘ਇਧ ਬ੍ਰਹ੍ਮਚਰਿਯਵਾਸੋ’’ਤਿ ਇਧੇਵ ਸਿਕ੍ਖਤ੍ਤਯਪੂਰਣ ਸਙ੍ਖਾਤਸ੍ਸ ਬ੍ਰਹ੍ਮਚਰਿਯਵਾਸਸ੍ਸ ਅਤ੍ਥਿਤਾ. ‘‘ਮਰਿਯਾਦਧਮ੍ਮੇਸੂ’’ਤਿ ਲੋਕਚਾਰਿਤ੍ਤ ਧਮ੍ਮੇਸੁ. ‘‘ਧਤਰਟ੍ਠੋ’’ਤਿ ਧਤਰਟ੍ਠੋ ਮਹਾਰਾਜਾ. ਏਵਂ ਵਿਰੁਲ਼੍ਹਕੋਤਿਆਦੀਸੁ. ‘‘ਗਨ੍ਧਰੁਕ੍ਖਾਧਿ ਵਤ੍ਥਾ’’ਤਿ ਗਨ੍ਧਰੁਕ੍ਖੇਸੁ ਅਜ੍ਝਾਵੁਤ੍ਥਾ. ‘‘ਕੁਮ੍ਭਣ੍ਡਾ’’ਤਿ ਕੁਵੁਚ੍ਚਤਿ ਪਥਵੀ. ਪਥਵਿ ਗਤਾਨਿ ਰਤਨਭਣ੍ਡਾਨਿ ਯੇਸਂ ਤੇਤਿ ਵਿਗ੍ਗਹੋ. ‘‘ਦਾਨਵਰਕ੍ਖਸਾ’’ਤਿ ਦਨੁਨਾਮਦੇਵਧੀਤਾਯ ਅਪਚ੍ਚਨ੍ਤਿ ਅਤ੍ਥੇਨ ਦਾਨਵ ਨਾਮਕਾ ਰਕ੍ਖਸਾ. ਅਵਰੁਜ੍ਝਨ੍ਤਿ ਅਨ੍ਤਰਾਯਂ ਕਰੋਨ੍ਤੀਤਿ ਅਵਰੁਦ੍ਧਕਾ. ‘‘ਵਿਗਚ੍ਛਰੂਪੋ’’ਤਿ ਵਿਪਨ੍ਨਵਣ੍ਣੋ. ‘‘ਨਿਹੀਨਕਮ੍ਮਕਤਾ’’ਤਿ ਨਿਹੀਨਾਨਿਪਾਪਕਮ੍ਮਾਨਿ ਕਤ੍ਵਾ ਆਗਤਾ. ਕਾਚਿਗਨ੍ਧਪ੍ਪਿਯੋ ਜਾਯਨ੍ਤੀਤਿ ਸਮ੍ਬਨ੍ਧੋ. ਯਾਗਨ੍ਧਪ੍ਪਿਯੋ ਜੋਗਿਨੀਤਿ ਚ ਵੁਚ੍ਚਨ੍ਤਿ, ਜੁਣ੍ਹਾਤਿ ਚ ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ‘‘ਅਭਿਲਕ੍ਖਿਤਰਤ੍ਤੀਸੂ’’ਤਿ ਅਭਿਞ੍ਞਾਤਰਤ੍ਤੀਸੁ. ਉਪੋਸਥਰਤ੍ਤੀਸੂਤਿ ਵੁਤ੍ਤਂ ਹੋਤਿ. ‘‘ਗੋਚਰਪ੍ਪਸੁਤਕਾਲੇ’’ਤਿ ਗੋਚਰਤ੍ਥਾਯ ਵਿਚਰਿਤਕਾਲੇ. ‘‘ਜੁਤਿਅਤ੍ਥੇਨਾ’’ਤਿ ਵਿਜ੍ਜੋਤਨਟ੍ਠੇਨ. ਵਸੂਨਿ ਧਨਾਨਿ ਧਾਰੇਨ੍ਤੀਤਿ ਵਸੁਨ੍ਧਰਾ. ਵਸੁਨ੍ਧਰਾ ਚ ਤੇ ਦੇਵ ਯਕ੍ਖਾ ਚਾਤਿ ਵਿਗ੍ਗਹੋ. ‘‘ਨਾਗਾਤ੍ਵੇਵ ਵੁਚ੍ਚਨ੍ਤੀ’’ਤਿ ਪਾਲ਼ਿਯਂ ਨਾਗੇਸੁ ਸਙ੍ਗਯ੍ਹਨ੍ਤੀਤਿ ਅਧਿਪ੍ਪਾਯੋ. ‘‘ਯਾ’’ਤਿ ਯਾ ਭੁਮ੍ਮਦੇਵਯਕ੍ਖ ਜਾਤਿਯੋ. ‘‘ਯਾਸਂ’’ਤਿ ਯਾਸਂ ਭੁਮ੍ਮਦੇਵ ਯਕ੍ਖਜਾਤੀਨਂ. ‘‘ਕੀਲ਼ਾਪਸੁਤਵਸੇਨਾ’’ਤਿ ਬੋਧਿਸਤ੍ਤਾਨਞ੍ਚ ਬੁਦ੍ਧਾਨਞ੍ਚ ਅਚ੍ਛਰਿਯ ਧਮ੍ਮਜਾਤਕਾਲੇ ਉਗ੍ਘੋਸਨ ਕੀਲ਼ਾਕਮ੍ਮਵਡ੍ਢਨਵਸੇਨ. ‘‘ਯਾਸਞ੍ਚ ਮਨ੍ਤਪਦਾਨੀ’’ਤਿ ਯਾਸਂ ਨਿਗ੍ਗਹ ਪਗ੍ਗਹਪੂਜਨਾਦਿ ਵਸੇਨ ਪਵਤ੍ਤਾਨਿ ਮਨ੍ਤਪਦਾਨਿ. ‘‘ਤੇਸੂ’’ਤਿ + ਤੇਸੁ ਚਤੂਸੁ ਅਵਰੁਦ੍ਧਕੇਸੁ. ‘‘ਕੀਲ਼ਾਸੋਣ੍ਡਵਸੇਨਾ’’ਤਿ ਕੀਲ਼ਾਧੁਤ੍ਤਵਸੇਨ. ‘‘ਘਾਸਸੋਣ੍ਡਵਸੇਨਾ’’ਤਿ ਖਾਦਨਭੁਞ੍ਜਨ ਧੁਤ੍ਤਵਸੇਨ. ਸੋਣੋ ਵੁਚ੍ਚਤਿ ਸੁਨਖੋ. ‘‘ਸਤ੍ਤੇ’’ ਨੇਰਯਿਕੇ ਵਾ ਪੇਤੇਵਾ. ‘‘ਕਾਮਞ੍ਚ ਹੋਤੀ’’ਤਿ ਕਿਞ੍ਚਾਪਿ ਹੋਤੀਤਿ ਅਤ੍ਥੋ. ‘‘ਨਿਬਨ੍ਧਨੋਕਾਸੋ’’ਤਿ ਨਿਚ੍ਚਸਮ੍ਬਨ੍ਧਨੋਕਾਸੋ. ‘‘ਸਮੁਦਾਗਤੇਸੂ’’ਤਿ ਪਰਮ੍ਪਰਤੋ ਆਗਤੇਸੁ. ‘‘ਦੇਵਰਾਜਟ੍ਠਾਨੇਸੂ’’ਤਿ ਇਮਸ੍ਮਿਂ ਚਕ੍ਕਵਾਲ਼ੇ ਤਾਵਤਿਂਸਾਭਵਨੇ ਦੇਵਰਾਜਟ੍ਠਾਨੇਸੂਤਿ ਅਧਿਪ੍ਪਾਯੋ. ‘‘ਪਾਲ਼ਿਯਂ ਏਵਾ’’ਤਿ ਦੀਘਨਿਕਾਯੇ ਜਨਵਸਭਸੁਤ੍ਤਪਾਲ਼ਿਯਂ ਏਵ. ਯਚ੍ਛਨ੍ਤਿ ਨਿਯਚ੍ਛਨ੍ਤਿ ਏਤ੍ਥਾਤਿ ਯਾਮੋ. ‘‘ਨਿਯਚ੍ਛਨ੍ਤੀ’’ਤਿ ਅਞ੍ਞਮਞ੍ਞਂ ਇਸ੍ਸਾਮਚ੍ਛਰਿਯ ਮੂਲਕੇਹਿ ਕਲਹਭਣ੍ਡਨਾਦੀਹਿ ਵਿਗਚ੍ਛਨ੍ਤੀਤਿ ਅਤ੍ਥੋ. ‘‘ਤਂ ਸਹਚਰਿਤਤ੍ਤਾ’’ਤਿ ਤੇਨ ਯਾਮ ਨਾਮਕੇਨ ਇਸ੍ਸਰਦੇਵਕੁਲੇਨ ਨਿਚ੍ਚਕਾਲਂ ਸਹ ਪਵਤ੍ਤਤ੍ਤਾ. ‘‘ਵਸਂ ਵਤ੍ਤੇਨ੍ਤੀ’’ਤਿ ਇਚ੍ਛਂ ਪੂਰੇਨ੍ਤੀਤਿ ਵੁਤ੍ਤਂ ਹੋਤਿ.

‘‘ਪੁਰੇ’’ਤਿ ਸਮ੍ਮੁਖਟ੍ਠਾਨੇ. ਤਂ ਪਨ ਠਾਨਂ ਉਚ੍ਚਟ੍ਠਾਨਂ ਨਾਮ ਹੋਤੀਤਿ ਆਹ ‘‘ਉਚ੍ਚੇਠਾਨੇ’’ਤਿ. ‘‘ਸਹਸ੍ਸੋ ਬ੍ਰਹ੍ਮਾ’’ਤਿਆਦੀਸੁ ਅਤ੍ਤਨੋ ਸਰੀਰੋਭਾਸੇਨ ਸਹਸ੍ਸਂ ਚਕ੍ਕਵਾਲ਼ ਲੋਕਂ ਫਰਨ੍ਤੋ ਸਹਸ੍ਸੋਨਾਮਾਤਿ ਅਟ੍ਠਕਥਾਯਂ ਅਧਿਪ੍ਪੇਤਂ. ਕੁਲਦੇਵਤਾਯੋ ਨਾਮ ਕੁਲ ਪਰਮ੍ਪਰ ਪੂਜਿਤ ਦੇਵਤਾਯੋ ਨਾਮ. ‘‘ਉਪਟ੍ਠਹਨ੍ਤੀ’’ਤਿ ਯੁਤ੍ਤਟ੍ਠਾਨੇ ਦੇਵਵਤ੍ਥੁ ਦੇਵਮਾਲਕਾਨਿ ਕਤ੍ਵਾ ਸਮਯੇ ਸਮਯੇ ਤਤ੍ਥ ਗਨ੍ਤ੍ਵਾ ਗਨ੍ਧਮਾਲਾਦੀਹਿ ਪੂਜੇਨ੍ਤਿ, ਵਨ੍ਦਨ੍ਤਿ, ਥੋਮੇਨ੍ਤਿ, ਵਰਂ ਪਤ੍ਥੇਨ੍ਤੀਤਿ ਅਤ੍ਥੋ. ‘‘ਉਪਟ੍ਠਕਾ ਏਵਸਮ੍ਪਜ੍ਜਨ੍ਤੀ’’ਤਿ ਉਪਟ੍ਠਕਮਤ੍ਤਾਵਹੋਨ੍ਤੀਤਿ ਅਧਿਪ੍ਪਾਯੋ. ‘‘ਕਸ੍ਸਚੀ’’ਤਿ ਕਸ੍ਸਚਿ ਹੇਟ੍ਠਿਮਸ੍ਸ. ‘‘ਤਤ੍ਥਾ’’ਤਿ ਤਾਸੁ ਬ੍ਰਹ੍ਮਭੂਮੀਸੁ. ਪੁਨ ‘‘ਤਤ੍ਥਾ’’ਤਿ ਤਸ੍ਮਿਂ ਦੁਤੀਯਤਲੇ. ‘‘ਆਭਾ’’ਤਿ ਸਰੀਰਾਭਾ. ਨਿਚ੍ਛਰਨ੍ਤਿ ਅਙ੍ਗਪਚ੍ਚਙ੍ਗੇਹਿ ਨਿਗ੍ਗਚ੍ਛਨ੍ਤਿ. ‘‘ਅਚਲ ਸਣ੍ਠਿਤਾ’’ਤਿ ਦੁਤੀਯ ਤਲੇ ਵਿਯ ਚਲਿਤਾ ਨ ਹੋਤਿ. ਅਥ ਖੋ ਅਚਲ ਸਣ੍ਠਿਤਾ. ‘‘ਤੇਸਂ’’ਤਿ ਤੇਸਂਵਾਦੀਨਂ ਪਾਠੇ. ਬ੍ਰਹ੍ਮਪਾਰਿਸਜ੍ਜਾਤਿਆਦਿਕਂ ਨਾਮਂ ਨਸਿਦ੍ਧਂਤਿ ਯੋਜਨਾ. ‘‘ਇਞ੍ਜਨਜਾਤਿਕੇਹੀ’’ਤਿ ਚਲਨਜਾਤਿਕੇਹਿ. ‘‘ਹੇਟ੍ਠਿਮਤਲਾਨਂ ਇਞ੍ਜਿਤਂ ਪੁਞ੍ਞਪ੍ਫਲਂ ਅਤ੍ਥੀਤਿ ਸਮ੍ਬਨ੍ਧੋ. ‘‘ਆਨੇਞ੍ਜ ਜਾਤਿਕੇਨਾ’’ਤਿ ਅਚਲਨਜਾਤਿਕੇਨ ਉਪੇਕ੍ਖਾਝਾਨੇਨ ਨਿਬ੍ਬਤ੍ਤਾਨਂ ਚਤੁਤ੍ਥਤਲਾਨਂ. ‘‘ਕੇਨਚਿ ਅਨ੍ਤਰਾਯੇਨਾ’’ਤਿ ਤੇਜੋਸਂਵਟ੍ਟਾਦਿਕੇਨ ਅਨ੍ਤਰਾਯੇਨ. ‘‘ਏਤ੍ਥਪੀ’’ਤਿ ਏਤਸ੍ਮਿਂ ਚਤੁਤ੍ਥਤਲੇਪਿ. ‘‘ਆਯੁ ਵੇਮਤ੍ਤਤਾਯਾ’’ਤਿ ਆਯੁਪ੍ਪਮਾਣਨਾਨਤ੍ਤਸ੍ਸ. ‘‘ਓਲ਼ਾਰਿਕਾਨਂ’’ਤਿ ਇਦਂ ਪਕਤਿਯਾ ਓਲ਼ਾਰਿਕ ਸਭਾਵਤਾਯ ਵੁਤ੍ਤਂ. ਨ ਸੁਖੁਮਾਨਂ ਅਤ੍ਥਿਤਾਯ. ਨਤ੍ਥਿ ਵਿਹਞ੍ਞਨਂ ਏਤੇਸਨ੍ਤਿ ਅਵਿਹਾ. ਕਿਂ ਵਿਹਞ੍ਞਨਂ ਨਾਮਾਤਿ ਆਹ ‘‘ਸਮਥਵਿਪਸ੍ਸਨਾ ਕਮ੍ਮੇਸੁ ਅਵਿਪ੍ਫਾਰਿਕਤਾ ਪਤ੍ਤੀ’’ਤਿ. ਚਿਤ੍ਤਸ੍ਸ ਅਵਿਪ੍ਫਾਰਤਾ ਪਜ੍ਜਨਂ ਨਾਮ ਨਤ੍ਥੀਤਿ ਵੁਤ੍ਤਂ ਹੋਤਿ. ‘‘ਪਸਾਦ ਦਿਬ੍ਬ ਧਮ੍ਮ ਪਞ੍ਞਾ ਚਕ੍ਖੂਹੀ’’ਤਿ ‘ਪਸਾਦ ਚਕ੍ਖੁ, ਦਿਬ੍ਬਚਕ੍ਖੁ, ਧਮ੍ਮਚਕ੍ਖੁ, ਪਞ੍ਞਾ ਚਕ੍ਖੂ, ਹਿ. ਤਤ੍ਥ ਪਸਾਦਚਕ੍ਖੁ ਏਵ ਇਧ ਦਿਬ੍ਬਚਕ੍ਖੂਤਿਪਿ ਵੁਚ੍ਚਤਿ. ‘‘ਧਮ੍ਮ ਚਕ੍ਖੂ’’ਤਿ ਹੇਟ੍ਠਿਮਮਗ੍ਗਞ੍ਞਾਣਂ. ‘‘ਪਞ੍ਞਾ ਚਕ੍ਖੂ’’ਤਿ ਵਿਪਸ੍ਸਨਾ ਞਾਣਪਚ੍ਚਵੇਕ੍ਖਨਾਞਾਣੇਹਿ ਸਦ੍ਧਿਂ ਅਵਸੇਸਂ ਸਬ੍ਬਞ੍ਞਾਣਂ. ‘‘ਰੂਪੀਨਂ ਸਤ੍ਤਾਨਂ’’ਤਿ ਰੂਪਕਾਯਵਨ੍ਤਾਨਂ ਸਤ੍ਤਾਨਂ. ‘‘ਕਨਿਟ੍ਠਭਾਵੋ’’ਤਿ ਅਪ੍ਪਤਰਭਾਵੋ. ‘‘ਅਨਾਗਾਮਿਮਗ੍ਗਟ੍ਠਸ੍ਸਪਿ ਪਟਿਕ੍ਖੇਪੋ’’ਤਿ ਸਕਦਾਗਾਮਿਭਾਵੇਠਤ੍ਵਾ ਭਾਵੇਨ੍ਤਸ੍ਸੇਵ ਅਨਾਗਾਮਿਮਗ੍ਗੋ ਉਪ੍ਪਜ੍ਜਤਿ. ਨੋ ਅਞ੍ਞਥਾਤਿ ਆਹ ‘‘ਸਕਦਾਗਾਮੀਨਂ ਪਟਿਕ੍ਖੇਪੇਨਾ’’ਤਿਆਦਿਂ.

ਭੂਮਿਚਤੁਕ੍ਕਂ ਨਿਟ੍ਠਿਤਂ.

੧੪੪. ਭਵਨ੍ਤਰੇ ਓਕ੍ਕਮਨ੍ਤਿ ਏਤਾਯਾਤਿ ਓਕ੍ਕਨ੍ਤੀਤਿ ਪਿਯੁਜ੍ਜਤਿ. ‘‘ਸੋਤਰਹਿਤੋ’’ਤਿ ਪਸਾਦਸੋਤਰਹਿਤੋ. ਏਵਂ ਸੇਸੇਸੁਪਿ. ‘‘ਆਸਿਤ੍ਤਕਾਦਿਭਾਵੇਨਾ’’ਤਿ ਆਸਿਤ੍ਤਕਪਣ੍ਡਕਾਦਿ ਭਾਵੇਨ. ‘‘ਦ੍ਵੀਹਿ ਬ੍ਯਞ੍ਜਨੇਹੀ’’ਤਿ ਦ੍ਵੀਹਿ ਨਿਮਿਤ੍ਤੇਹਿ. ‘‘ਵਿਬਚ੍ਛਵਚਨੋ’’ਤਿ ਵਿਪਨ੍ਨਵਚਨੋ. ‘‘ਵਤ੍ਥੁ ਵਿਪਨ੍ਨਸ੍ਸਾ’’ਤਿ ਏਤ੍ਥ ‘‘ਵਤ੍ਥੂ’’ਤਿ ਸਮ੍ਭਾਰ ਚਕ੍ਖੁ ਵੁਚ੍ਚਤਿ. ਤਸ੍ਸ ਆਦਿਤੋ ਪਟ੍ਠਾਯ ਵਿਪਨ੍ਨਤ੍ਤਾ ਤੇਨ ਸਮਨ੍ਨਾਗਤੋ ਪੁਗ੍ਗਲੋ ਵਤ੍ਥੁਵਿਪਨ੍ਨੋਤਿ ਵੁਚ੍ਚਤਿ. ‘‘ਤਸ੍ਸ ਤਸ੍ਸਾ’’ਤਿ ਚਕ੍ਖੁਸੋ ਤਾਦਿਕਸ੍ਸ.‘‘ਪਸੂਤਿਯਂ ਯੇਵਾ’’ਤਿ ਵਿਜਾਯਮਾਨਕਾਲੇਯੇਵ. ‘‘ਪਞ੍ਞਾਵੇਯ੍ਯਤ੍ਤਿਯਭਾਵਸ੍ਸਾ’’ਤਿ ਏਤ੍ਥ ਬ੍ਯਤ੍ਤਸ੍ਸ ਭਾਵੋ ਵੇਯ੍ਯਤ੍ਤਿਯਂ. ‘‘ਬ੍ਯਤ੍ਤਸ੍ਸਾ’’ਤਿ ਫਰਣਞ੍ਞਾਣਸ੍ਸ ਪੁਗ੍ਗਲਸ੍ਸ. ਪਞ੍ਞਾ ਸਙ੍ਖਾਤਂ ਵੇਯ੍ਯਤ੍ਤਿਯਂ ਅਸ੍ਸਾਤਿ ਵਿਗ੍ਗਹੋ. ਦ੍ਵਿਹੇਤੁਕ ਤਿਹੇਤੁਕਾਨਂਪਿ ਨ ਸਕ੍ਕਾ ਨਿਯਮੇਤੁਨ੍ਤਿ ਸਮ੍ਬਨ੍ਧੋ. ਕਥਂ ਨ ਸਕ੍ਕਾਤਿ ਆਹ ‘‘ਮਾਤੁਕੁਚ੍ਛਿਮ੍ਹਿ ਵਿਪਤ੍ਤਿ ਨਾਮ ਨਤ੍ਥੀ’’ਤਿ. ਕਤਮੇਸਂ ਵਿਪਤ੍ਤੀਤਿ. ਉਪ੍ਪਨ੍ਨਾਨਮ੍ਪਿ ਚਕ੍ਖੁ ਸੋਤਾਨਂ ਵਿਪਤ੍ਤਿ. ਕੇਨਕਾਰਣੇਨ ਵਿਪਤ੍ਤੀਤਿ. ਪਰੂਪਕ੍ਕਮੇਨਵਾ ਮਾਤੁਯਾ ਵਿਸਮ ਪਯੋਗੇਨ ਵਾ ਨਾਨਾਬਾਧੇਨ ਵਾ ਵਿਪਤ੍ਤੀਤਿ ਯੋਜਨਾ. ਧਾਤੁਪਾਠੇ ਯਕ੍ਖ ਪੂਜਾਯਂਤਿ ਪਠਿਤਤ੍ਤਾ ‘‘ਪੂਜਨੀਯਟ੍ਠੇਨਾ’’ਤਿ ਵੁਤ੍ਤਂ. ਏਤੇਨ ਯਕ੍ਖਿਤਬ੍ਬਾ ਪੂਜਿਤਬ੍ਬਾ ਯਕ੍ਖਾਤਿ ਦਸ੍ਸੇਤਿ. ਯੇ ਪਨ ਕਿਚ੍ਛਜੀਵਿਕਪਤ੍ਤਾ ਵਿਚਰਨ੍ਤਿ, ਤੇ ਭੂਮਸ੍ਸਿਤਾ ਨਾਮ ਹੋਨ੍ਤੀਤਿ ਯੋਜਨਾ. ‘‘ਭੂਮਿਸ੍ਸਿਤਾ’’ਤਿ ਪਾਠੇ ਭੂਮਿਯਂ ਸਿਤਾ ਨਿਸ੍ਸਿਤਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪੁਞ੍ਞਨਿਬ੍ਬਤ੍ਤਸ੍ਸਾ’’ਤਿਆਦਿ ਵੁਤ੍ਤਂ. ‘‘ਵਿਰੂਪਾ ਹੁਤ੍ਵਾ’’ਤਿ ਤੇ ਵਣ੍ਣਤੋਪਿ ਦੁਬ੍ਬਣ੍ਣਾ ਹੋਨ੍ਤਿ. ਸਣ੍ਠਾਨਤੋਪਿ ਦੁਸ੍ਸਣ੍ਠਾਨਾ. ਜੀਵਿਕਤੋਪਿ ਕਿਚ੍ਛਜੀਵਿਕਾਤਿਆਦਿਨਾ ਵਿਪਨ੍ਨਰੂਪਾ ਹੁਤ੍ਵਾ. ‘ਵਿਵਸਾ ਹੁਤ੍ਵਾ ਨਿਪਤਨ੍ਤੀ’ਤਿ ਵਿਨਿਪਾਤਿਕਾਤਿਪਿ ਵਦਨ੍ਤਿ. ਵਿਵਸਾਤਿ ਚ ਅਤ੍ਤਨੋ ਵਸੇਨ ਇਚ੍ਛਾਯ ਵਿਨਾਤਿ ਅਤ੍ਥੋ. ‘‘ਵਿਵਿਤ੍ਤਟ੍ਠਾਨੇਸੂ’’ਤਿ ਜਨਵਿਵਿਤ੍ਤੇਸੁ ਠਾਨੇਸੁ. ਪਰਿਯੇਸਿਤ੍ਵਾ ਵਾ ਜੀਵਿਤਂ ਕਪ੍ਪੇਨ੍ਤਿ. ਪੀਲ਼ੇਤ੍ਵਾ ਵਾ ਜੀਵਿਤਂ ਕਪ੍ਪੇਨ੍ਤਿ. ਤਾਸੇਤ੍ਵਾ ਪੀਲ਼ੇਤ੍ਵਾ ਵਾ ਜੀਵਿਤਂ ਕਪ੍ਪੇਨ੍ਤੀਤਿ ਯੋਜਨਾ. ‘‘ਵੇਮਾਨਿਕਪੇਤਾਪੀ’’ਤਿ ਅਤ੍ਤਨੋ ਪੁਞ੍ਞਨਿਬ੍ਬਤ੍ਤਂ ਦਿਬ੍ਬਵਿਮਾਨਂ ਯੇਸਂ ਅਤ੍ਥਿ, ਤੇ ਵੇਮਾਨਿਕਾ. ਤੇ ਪਨ ਪੁਞ੍ਞਾਪੁਞ੍ਞਮਿਸ੍ਸਕ ਕਮ੍ਮੇਨ ਨਿਬ੍ਬਤ੍ਤਤ੍ਤਾ ਕੇਚਿ ਦਿਵਾ ਦਿਬ੍ਬਸੁਖਂ ਅਨੁਭਵਨ੍ਤਿ, ਰਤ੍ਤਿਂ ਪੇਤਦੁਕ੍ਖਂ. ਕੇਚਿ ਰਤ੍ਤਿਂ ਦਿਬ੍ਬਸੁਖਂ ਅਨੁਭਵਨ੍ਤਿ, ਦਿਵਾ ਪੇਤਦੁਕ੍ਖਨ੍ਤਿ. ਪਰੇਹਿ ਦਤ੍ਤਂ ਦਿਨ੍ਨਂ ਪੁਞ੍ਞਪ੍ਫਲਂ ਉਪਨਿਸ੍ਸਾਯ ਜੀਵਨ੍ਤੀਤਿ ਪਰਦਤ੍ਤੂਪਜੀਵਿਨੋ. ‘‘ਪਰੇਹਿ ਦਿਨ੍ਨਂ ਪੁਞ੍ਞਪ੍ਫਲਂ’’ਤਿ ਞਾਤਕੇਹਿ ਪੁਞ੍ਞਂ ਕਤ੍ਵਾ ਇਦਂ ਮੇ ਪੁਞ੍ਞਂ ਪੇਤਾਨਂ ਕਾਲਙ੍ਕਤਾਨਂ ਞਾਤੀਨਂ ਦੇਧੀਤਿ ਏਵਂ ਦਿਨ੍ਨਂ ਪੁਞ੍ਞਪ੍ਫਲਂ. ‘‘ਸਕਲਚਕ੍ਕਵਾਲ਼ਪਰਿਯਾਪਨ੍ਨਾ ਏਕਭੂਮਕਾ’’ਤਿ ਯਥਾ ਤਾਵਤਿਂਸਾਭੂਮਿ ਨਾਮ ਸਬ੍ਬ ਚਕ੍ਕਵਾਲ਼ੇਸੁਪਿ ਅਤ੍ਥਿ. ਸਬ੍ਬਾਪਿ ਦਿਬ੍ਬੇਨ ਵਸ੍ਸਸਹਸ੍ਸੇਨ ਏਕਆਯੁ ਪਰਿਚ੍ਛੇਦੋ ਹੋਤਿ. ਇਮਸ੍ਮਿਂ ਚਕ੍ਕਵਾਲ਼ੇ ਵਤ੍ਤਬ੍ਬਂ ਨਤ੍ਥਿ. ਨ ਤਥਾ ਨਿਰਯੇਸੁ ਵਾ ਤਿਰਚ੍ਛਾਨ ਯੋਨਿਯਂ ਵਾ ਪੇਤ੍ਤਿਵਿਸਯੇਵਾ ਅਸੁਰਕਾਯੇਵਾ ਮਨੁਸ੍ਸੇਸੁਵਾ ਭੁਮ੍ਮਦੇਵੇਸੁ ਵਾ ਏਕਪਰਿਚ੍ਛੇਦੋ ਨਾਮ ਅਤ੍ਥਿ. ਚਤੁਨ੍ਨਂ ਅਪਾਯਾਨਂ ਆਯੁਪ੍ਪਮਾਣ ਗਣਨਾਯ ਨਿਯਮੋ ਨਤ੍ਥੀਤਿ ਵੁਤ੍ਤਂ, ਨ ਨੁ ਬ੍ਰਹ੍ਮ ਸਂਯੁਤ੍ਤੇ ਕੋਕਾਲਿਕਂ ਭਿਕ੍ਖੁਂ ਆਰਬ੍ਭ ਭਗਵਤਾ ਵੁਤ੍ਤੋ ਦਸਨ੍ਨਂ ਨਿਰਯਾਨਂ ਵਿਸੁਂ ਵਿਸੁਂ ਅਤ੍ਥੀਤਿ. ਸਚ੍ਚਂ ਅਤ੍ਥਿ. ਤੇ ਪਨ ਦਸਨਿਰਯਾ ਅਵੀਚਿਨਿਰਯੇ ਪਰਿਯਾਪਨ੍ਨਾ ਹੁਤ੍ਵਾ ਤਸ੍ਸ ਪਦੇਸਮਤ੍ਤਾ ਹੋਨ੍ਤਿ. ਨ ਤੇਹਿ ਪਦੇ ਸਮਤ੍ਤੇਹਿ ਸਕਲੋ ਅਵੀਚਿਨਿਰਯੋ ਨਿਯਤਾਯੁ ਪਰਿਮਾਣੋਤਿ ਸਕ੍ਕਾ ਵਤ੍ਤੁਂ. ਅਪਿ ਚ ਸੋਪਿ ਤੇਸਂ ਆਯੁਪਰਿਚ੍ਛੇਦੋ ਅਵੀਚਿਭੂਮਿਯਾ ਨਿਯਾਮੇਨ ਸਿਦ੍ਧੋ ਨ ਹੋਤਿ. ਤੇਨ ਤੇਨ ਕਮ੍ਮਵਿਸੇਸੇਨੇਵ ਸਿਦ੍ਧੋ. ਤਸ੍ਮਾ ਯਂ ਵੁਤ੍ਤਂ ‘‘ਤਤ੍ਥ ਯੇਭੂਯ੍ਯੇਨ ਕਮ੍ਮਪ੍ਪਮਾਣਤ੍ਤਾ’’ਤਿ, ਤਂ ਸੁ ਵੁਤ੍ਤਂ ਹੋਤਿ. ਤੇਨਾਹ ‘‘ਤਤ੍ਥ ਨਿਰਯੇਸੂ’’ਤਿਆਦਿਂ. ‘‘ਏਵਂ ਸਨ੍ਤੇ’’ਤਿ ਨ ਇਤਰ ਦੀਪਵਾਸੀਨਂ ਆਯੁਕਪ੍ਪਸ੍ਸ ਆਰੋਹਣਞ੍ਚ ਓਰੋਹਣਞ੍ਚ ਅਤ੍ਥੀਤਿ ਵੁਤ੍ਤੇ ਸਤੀਤਿ ਅਤ੍ਥੋ. ਸਮਾਚਾਰੋ ਨਾਮ ਦਸਸੁਚਰਿਤਾਨਿ. ਵਿਸਮਾਚਾਰੋ ਨਾਮ ਦਸਦੁਚ੍ਚਰਿਤਾਨਿ. ਤੇਸਂ ਨਿਸ੍ਸਨ੍ਦਭੂਤਾ ਸਮ੍ਪਤ੍ਤਿਵਿਪਤ੍ਤਿਯੋਤਿ ਸਮ੍ਬਨ੍ਧੋ. ‘‘ਤੇਸਂ ਪੀ’’ਤਿ ਇਤਰ ਦੀਪਵਾਸੀਨਂਪਿ. ਸੋ ਏਵਪਰਿਚ੍ਛੇਦੋਤਿ ਆਪਜ੍ਜਤਿ. ਨ ਚ ਸਕ੍ਕਾ ਤਥਾ ਭਵਿਤੁਂ. ਆਦਿਕਪ੍ਪਕਾਲੇ ਸਬ੍ਬੇਸਮ੍ਪਿ ਚਤੁਦੀਪ ਵਾਸੀਨਂ ਅਸਙ੍ਖ੍ਯੇਯ੍ਯਾਯੁਕਤਾ ਸਮ੍ਭਵਤੋਤਿ. ਅਥ ਇਤਰਦੀਪਵਾਸੀਨਮ੍ਪਿ ਆਯੁਕਪ੍ਪਸ੍ਸ ਆਰੋਹਣਂ ਓਰੋਹਣਞ੍ਚ ਅਤ੍ਥਿ. ਏਵਂ ਸਤਿ, ਏਤਰਹਿਪਿ ਤੇਸਂ ਆਯੁਕਪ੍ਪੋ ਜਮ੍ਬੁਦੀਪਵਾਸੀਨਂ ਆਯੁਕਪ੍ਪੇਨ ਏਕਗਤਿਕੋ ਸਿਯਾਤਿ ਚੋਦਨਾ. ਨਿਸ੍ਸਨ੍ਦਮਤ੍ਤਤ੍ਤਾਤਿਆਦਿ ਪਰਿਹਾਰੋ. ਨਤ੍ਥਿ ਇਦਂ ਮਮ ਇਦਂ ਮਮਾਤਿ ਪਵਤ੍ਤਾ ਪਾਟਿਪੁਗ੍ਗਲਿਕਤਣ੍ਹਾ ਏਤੇਸਨ੍ਤਿ ‘‘ਅਮਮਾ’’. ‘‘ਅਪਰਿਗ੍ਗਹਾ’’ਤਿ ਪੁਤ੍ਤਦਾਰਾਦਿਪਰਿਗ੍ਗਹਰਹਿਤਾ. ‘‘ਉਪਰਿਮੇ ਚਾਤੁਮਹਾਰਾਜਿਕੇ’’ਤਿ ਆਕਾਸਟ੍ਠਕਚਾਤੁਮਹਾਰਾਜਿਕੇ. ਦਿਵੇ ਦੇਵਲੋਕੇ ਸਿਦ੍ਧਾਨਿ ਦਿਬ੍ਬਾਨਿ. ‘‘ਯਾਵ ਨਿਮਿਰਾਜਕਾਲਾ’’ਤਿ ਯਾਵ ਅਮ੍ਹਾਕਂ ਬੋਧਿਸਤ੍ਤਭੂਤਸ੍ਸ ਨਿਮਿਰਞ੍ਞੋ ਉਪ੍ਪਨ੍ਨਕਾਲਾ. ਕਸ੍ਸ ਪਬੁਦ੍ਧੋ ਪੁਰਿਮੇ ਅਨ੍ਤਰਕਪ੍ਪੇ ਉਪ੍ਪਨ੍ਨੋ. ਨਿਮਿਰਾਜਾ ਪਨ ਇਮਸ੍ਮਿਂ ਅਨ੍ਤਰ ਕਪ੍ਪੇ ਉਪ੍ਪਨ੍ਨੋ. ‘‘ਮਨੁਸ੍ਸ ਲੋਕੇਹਿ ਪਞ੍ਞਾਸਵਸ੍ਸਾਨਿ ਚਾਤੁਮਹਾਰਾਜਿਕੇ ਏਕੋਦਿਬ੍ਬਰਤ੍ਤਿਦਿਵੋ ਹੋਤੀ’’ਤਿਆਦਿ ਅਭਿਧਮ੍ਮੇ ਧਮ੍ਮ ਹਦਯ ਵਿਭਙ੍ਗੇ ਆਗਤਨਯੇਨ ਵੁਤ੍ਤੋ. ਚਤੁਗ੍ਗੁਣਵਚਨੇ. ‘‘ਉਪਰਿਮਾਨਂ’’ਤਿ ਉਪਰਿਮਾਨਂ ਦੇਵਾਨਂ. ਏਕਂ ਵਸ੍ਸਸਹਸ੍ਸਂ ਆਯੁਪ੍ਪਮਾਣਂ ਹੋਤੀਤਿ ਸਮ੍ਬਨ੍ਧੋ. ‘‘ਦ੍ਵੇ’’ਤਿ ਦ੍ਵੇ ਵਸ੍ਸਸਹਸ੍ਸਾਨਿ. ‘‘ਅਟ੍ਠਾ’’ਤਿ ਅਟ੍ਠਵਸ੍ਸਸਹਸ੍ਸਾਨਿ. ‘‘ਹੇਟ੍ਠਿਮਾਨਂ’’ਤਿ ਹੇਟ੍ਠਿਮਾਨਂ ਦੇਵਾਨਂ. ‘‘ਉਪਰਿਮਾਨਂ’’ਤਿ ਉਪਰਿਮਾਨਂ ਦੇਵਾਨਂ. ਯਾਮੇ ਏਕੋ ਰਤ੍ਤਿਦਿਵੋਤਿਆਦਿਨਾ ਯੋਜੇਤਬ੍ਬਂ. ‘‘ਚਤ੍ਤਾਰੀ’’ਤਿ ਮਨੁਸ੍ਸਲੋਕੇ ਚਤ੍ਤਾਰਿ ਵਸ੍ਸਸਤਾਨਿ. ਏਵਂ ਸੇਸੇਸੁ. ‘‘ਆਦਿਅਨ੍ਤ ਦਸ੍ਸਨਵਸੇਨਾ’’ਤਿ ਚਾਤੁਮਹਾਰਾਜਿਕੇ ਮਨੁਸ੍ਸਵਸ੍ਸਗਣਨਾ ਦਸ੍ਸਨਂ ਆਦਿਦਸ੍ਸਨਂ ਨਾਮ. ਇਦਾਨਿ ਵਸਵਤ੍ਤਿਯਂ ਮਨੁਸ੍ਸਵਸ੍ਸਗਣਨਾ ਦਸ੍ਸਨਂ ਅਨ੍ਤ ਦਸ੍ਸਨਂ ਨਾਮ.

ਨ ਅਤਿਦੁਬ੍ਬਲਂਤਿ ਨਾਤਿਦੁਬ੍ਬਲਂ. ‘‘ਤਂ’’ਤਿ ਤਂ ਅਵਿਤਕ੍ਕ ਅਵਿਚਾਰਮਤ੍ਤਝਾਨਂ. ‘‘ਭੂਮਨ੍ਤਰੇ’’ਤਿ ਪਥਮਜ੍ਝਾਨਭੂਮਿਤੋ ਅਞ੍ਞਿਸ੍ਸਂ ਦੁਤੀਯਜ੍ਝਾਨਭੂਮਿਯਂ. ਕਪ੍ਪਵਚਨੇ. ਕਪ੍ਪੀਯਤਿ ਵਸ੍ਸ, ਉਤੁ, ਮਾਸ, ਪਕ੍ਖ, ਰਤ੍ਤਿ, ਦਿਵਾ, ਦਿਵਸੇਨ ਪਰਿਚ੍ਛਿਜ੍ਜੀਯਤੀਤਿ ਕਪ੍ਪੋ. ਕਪ੍ਪੀਯਨ੍ਤਿ ਵਾ ਨਾਨਾਧਮ੍ਮਪ੍ਪਵਤ੍ਤਿਯੋ ਅਤੀਤਾ ਦਿਵਸੇਨ ਪਰਿਚ੍ਛਿਜ੍ਜੀਯਨ੍ਤਿ ਏਤੇਨਾਤਿ ਕਪ੍ਪੋ. ਕਾਲੋ. ਮਹਨ੍ਤੋ ਕਪ੍ਪੋਤਿ ਮਹਾਕਪ੍ਪੋ. ਵਸ੍ਸਾਨਂ ਸਤਭਾਗੇਹਿਪਿ ਸਹਸ੍ਸਭਾਗੇਹਿਪਿ ਸਤਸਹਸ੍ਸਭਾਗੇਹਿਪਿ ਸਙ੍ਖਾਤੁਂ ਅਸਕ੍ਕੁਣੇਯ੍ਯੋਤਿ ਅਸਙ੍ਖ੍ਯੇਯ੍ਯੋ. ਏਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਅਨ੍ਤਰੇ ਦਿਸ੍ਸਮਾਨੋ ਕਪ੍ਪੋ ਅਨ੍ਤਰਕਪ੍ਪੋ. ਸਤ੍ਤਾਨਂ ਨਾਨਾਆਯੁਪਰਿਚ੍ਛੇਦੋ ਆਯੁਕਪ੍ਪੋ. ਸੋ ਪਨ ਮਨੁਸ੍ਸਾਨਂ ਦਸਵਸ੍ਸਾਯੁਕਕਾਲੇ ਦਸਵਸ੍ਸੇਨ ਪਰਿਚ੍ਛਿਨ੍ਨੋ. ਨੇਵਸਞ੍ਞਾ ਦੇਵਾਨਂ ਨਿਚ੍ਚਕਾਲਂ ਚਤੁਰਾਸੀਤਿ ਕਪ੍ਪਸਹਸ੍ਸੇਹਿ ਪਰਿਚ੍ਛਿਨ੍ਨੋ. ਅਨ੍ਤਰਕਪ੍ਪੋ ਨਾਮ ਚੂਲ਼ਕਪ੍ਪਾ ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ਵੀਸਤਿਪ੍ਪਭੇਦਾ ਚੂਲ਼ਕਪ੍ਪਾ ਵੁਚ੍ਚਨ੍ਤੀਤਿ ਕੇਚਿ ਵਦਨ੍ਤੀਤਿਆਦਿਨਾ ਯੋਜਨਾ. ‘‘ਯੇ’’ਤਿ ਯੇ ਚਤੁਸਟ੍ਠਿਯਾਦਿਭੇਦਾ ਅਨ੍ਤਰਕਪ੍ਪਾ. ‘‘ਯਥਾਵਿਨਟ੍ਠਂ’’ਤਿ ਵਿਨਟ੍ਠਪ੍ਪਕਾਰੇਨ ਵਿਨਟ੍ਠਪ੍ਪਕਤਿਯਾ. ਵਡ੍ਢਮਾਨੋ ਕਪ੍ਪੋ ਵਿਵਟ੍ਟੋ. ‘‘ਯਥਾਵਿਵਟ੍ਟਂ’’ਤਿ ਵਿਵਟ੍ਟਪ੍ਪਕਾਰੇਨ ਵਿਵਟ੍ਟਪ੍ਪਕਤਿਯਾ. ਅਚ੍ਚਯੇਨ ਅਤਿਕ੍ਕਮਨੇਨ. ਹਰਣੇਨ ਅਪਨਯਨੇਨ. ‘‘ਤਤ੍ਥਾ’’ਤਿ ਤਸ੍ਮਿਂ ਕਪ੍ਪਵਚਨੇ. ਅਟ੍ਠਕਥਾਯਂ ਵੁਤ੍ਤਤ੍ਤਾਤਿ ਸਮ੍ਬਨ੍ਧੋ. ‘‘ਤੇਜੇਨਾ’’ਤਿ ਅਗ੍ਗਿਨਾ. ‘‘ਸਂਵਟ੍ਟਤੀ’’ਤਿ ਵਿਨਸ੍ਸਤਿ ਤਦਾ. ‘‘ਹੇਟ੍ਠਾ’’ਤਿ ਹੇਟ੍ਠਾਲੋਕੋ. ‘‘ਚਤੁਸਟ੍ਠਿਵਾਰੇਸੂ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ.

ਗਾਥਾਸੁ. ‘‘ਸਤ੍ਤਸਤ੍ਤਗ੍ਗਿਨਾਵਾਰਾ’’ਤਿ ਸਤ੍ਤਸਤ੍ਤਵਾਰਾ ਅਗ੍ਗਿਨਾ ਵਿਨਸ੍ਸਨ੍ਤਿ. ਅਥਵਾ, ਭੁਮ੍ਮਤ੍ਥੇ ਪਚ੍ਚਤ੍ਤਵਚਨਂ. ਸਤ੍ਤਸੁਸਤ੍ਤਸੁਵਾਰੇਸੁ ਲੋਕੋ ਅਗ੍ਗਿਨਾ ਵਿਨਸ੍ਸਤੀਤਿ ਯੋਜਨਾ. ਤੇਨਾਹ ‘‘ਅਟ੍ਠਮੇ ਅਟ੍ਠਮੇ’’ਤਿ. ‘‘ਦਕਾ’’ਤਿ ਉਦਕੇਨ. ਅਟ੍ਠਮੇ ਅਟ੍ਠਮੇਵਾਰੇ ਲੋਕੋ ਦਕੇਨ ਵਿਨਸ੍ਸਤੀਤਿ ਯੋਜਨਾ. ਯਦਾ ਚਤੁਸਟ੍ਠਿਵਾਰਾ ਪੁਣ੍ਣਾ, ਤਦਾ ਏਕੋ ਵਾਯੁਵਾਰੋ ਸਿਯਾ. ਤਤ੍ਥ ‘‘ਤਦਾ’’ਤਿ ਤਸ੍ਮਿਂ ਚਤੁਸਟ੍ਠਿਵਾਰੇ. ‘‘ਵਿਵਟ੍ਟਮਾਨਂ’’ਤਿ ਸਣ੍ਠਹਮਾਨਂ. ‘‘ਵਿਵਟ੍ਟਤੀ’’ਤਿ ਸਣ੍ਠਹਤਿ. ‘‘ਸਂਵਟ੍ਟਮਾਨਂ’’ਤਿ ਵਿਨਸ੍ਸਮਾਨਂ. ‘‘ਸਂਵਟ੍ਟਤੀ’’ਤਿ ਵਿਨਸ੍ਸਤਿ. ‘‘ਦ੍ਵੇ ਅਸਙ੍ਖ੍ਯੇਯ੍ਯਾਨੀ’’ਤਿ ਅਡ੍ਢਦ੍ਵਯਂ ਏਕਂ ਅਸਙ੍ਖ੍ਯੇਯ੍ਯਨ੍ਤਿ ਕਤ੍ਵਾ ਉਪਚਾਰੇਨ ਵੁਤ੍ਤਂ. ਯਥਾਤਂ-ਆਭਸ੍ਸਰਾਨਂ ਅਟ੍ਠਕਪ੍ਪਾਨੀਤਿ. ‘‘ਉਪਡ੍ਢੇਨਾ’’ਤਿ ਉਦਕਵਾਰੇ ਹੇਟ੍ਠਿਮਭੂਮੀਸੁ ਉਦਕੇਨ ਵਿਨਸ੍ਸਮਾਨਾਸੁ ਦੁਤੀਯਜ੍ਝਾਨਭੂਮਿ ਨ ਤਾਵ ਵਿਨਸ੍ਸਤਿ. ਸਂਵਟ੍ਟਕਪ੍ਪੇਪਿ ਚਿਰਕਾਲਂ ਤਿਟ੍ਠਤੇਯੇਵ. ਇਦਂ ਸਨ੍ਧਾਯ ਵੁਤ੍ਤਂ. ਸਬ੍ਬਞ੍ਚੇਤਂ ਲਬ੍ਭਮਾਨਤ੍ਤਾ ਵੁਤ੍ਤਂ. ਅਸਙ੍ਖ੍ਯੇਯ੍ਯਕਪ੍ਪਂ ਸਨ੍ਧਾਯ ਵੁਤ੍ਤਨ੍ਤਿ. ਇਦਮੇਵ ਪਮਾਣਨ੍ਤਿ.

ਪਟਿਸਨ੍ਧਿਚਤੁਕ੍ਕਂ ਨਿਟ੍ਠਿਤਂ.

੧੪੫. ਕਮ੍ਮਚਤੁਕ੍ਕੇ. ‘‘ਜਨੇਤੀ’’ਤਿ ਅਜਨਿਤਂ ਜਨੇਤਿ. ਪਾਤੁਭਾਵੇਤਿ. ‘‘ਉਪਤ੍ਥਮ੍ਭਤੀ’’ਤਿ ਜਨਿਤਂ ਉਪਤ੍ਥਮ੍ਭਤਿ. ਚਿਰਟ੍ਠਿਤਿਕਂ ਕਰੋਤਿ. ‘‘ਉਪਪੀਲ਼ੇਤੀ’’ਤਿ ਜਨਿਤਂ ਉਪਪੀਲ਼ੇਤਿ, ਪਰਿਹਾਪੇਤਿ. ‘‘ਉਪਘਾਤੇਤੀ’’ਤਿ ਉਪਚ੍ਛਿਨ੍ਦਤਿ. ‘‘ਕਟਤ੍ਤਾ ਰੂਪਾਨਂ’’ਤਿ ਕਟਤ੍ਤਾਨਾਮਕਾਨਂ ਕਮ੍ਮਜਰੂਪਾਨਂ. ‘‘ਕਮ੍ਮਪਥਪਤ੍ਤਾਵਾ’’ਤਿ ਏਤ੍ਥ ਪਟਿਸਨ੍ਧਿਜਨੇਨ ਸਤਿ, ਸਬ੍ਬਮ੍ਪਿ ਕਮ੍ਮਂ ਕਮ੍ਮਪਥਪਤ੍ਤਂ ਨਾਮ ਹੋਤੀਤਿ ਦਟ੍ਠਬ੍ਬਂ. ਵਿਪਚ੍ਚਿਤ੍ਥਾਤਿ ਵਿਪਕ੍ਕਂ. ਵਿਪਕ੍ਕਂ ਵਿਪਾਕਂ ਯੇਸਨ੍ਤਿ ਵਿਪਕ੍ਕ ਵਿਪਾਕਾ. ਉਪਤ੍ਥਮ੍ਭਮਾਨਾ ਪਵਤ੍ਤਤਿ. ਸਯਂਪਿ ਪਚ੍ਚਯਲਾਭੇ ਸਤੀਤਿ ਅਧਿਪ੍ਪਾਯੋ. ‘‘ਅਲਦ੍ਧੋਕਾਸਸ੍ਸਾ’’ਤਿ ਇਦਂ ਨਿਦਸ੍ਸਨ ਮਤ੍ਤਂ. ਲਦ੍ਧੋਕਾਸਸ੍ਸਪਿ ਉਪਤ੍ਥਮ੍ਭਨਂ ਨਾਮ ਇਚ੍ਛਿਤਬ੍ਬਮੇਵ. ਅਞ੍ਞਂ ਅਕੁਸਲਕਮ੍ਮਂ ਓਕਾਸਂ ਲਭਤੀਤਿ ਯੋਜਨਾ. ‘‘ਚਾਯਂ’’ਤਿ ਚੇ ਅਯਂ. ‘‘ਕਾਲਙ੍ਕਰਿਯਾ’’ਤਿ ਕਾਲਂਕਰੇਯ੍ਯ. ‘‘ਅਸ੍ਸਾ’’ਤਿ ਇਮਸ੍ਸ ਪੁਗ੍ਗਲਸ੍ਸ. ‘‘ਪਸਾਦਿਤਂ’’ਤਿ ਪਸਨ੍ਨਂ. ‘‘ਪਦੂਸਿਤਂ’’ਤਿ ਪਦੁਟ੍ਠਂ. ਪੁਬ੍ਬੇ ‘ਮਰਣਾਸਨ੍ਨ ਕਾਲੇ’ਤਿ ਵੁਤ੍ਤਤ੍ਤਾ ਇਧ ‘ਪਵਤ੍ਤਿਕਾਲੇਪੀ’ਤਿ ਵੁਤ੍ਤਂ. ‘‘ਏਤਂ’’ਤਿ ਕਮ੍ਮਨ੍ਤਰਸ੍ਸ ਉਪਤ੍ਥਮ੍ਭਨਂ. ‘‘ਜੀਵਿਤਪਰਿਕ੍ਖਾਰੇ’’ਤਿ ਜੀਵਿਤਪਰਿਵਾਰੇ ਪਚ੍ਚਯੇ. ‘‘ਸਮੁਦਾਨੇਤ੍ਵਾ’’ਤਿ ਸਮਾਹ ਰਿਤ੍ਵਾ.‘‘ਏਤ੍ਥਾ’’ਤਿ ਉਪਤ੍ਥਮ੍ਭਕ ਕਮ੍ਮਟ੍ਠਾਨੇ. ਖਨ੍ਧਸਨ੍ਤਾਨਸ੍ਸ ਉਪਬ੍ਰੂਹਨਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਨਯੇਨਾ’’ਤਿ ‘ਜੀਵਿਤਨ੍ਤਰਾਯੇ ਅਪਨੇਤ੍ਵਾ’ਤਿਆਦਿਨਾ ਵੁਤ੍ਤਨਯੇਨ. ਖਨ੍ਧਸਨ੍ਤਾਨਸ੍ਸ ਚਿਰਤਰਪ੍ਪਵਤ੍ਤਿਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਪ੍ਪਕਾਰਾ’’ਤਿ ‘ਵਿਪਚ੍ਚਿਤੁਂ ਅਲਦ੍ਧੋਕਾਸਾਵਾ ਵਿਪਕ੍ਕ ਵਿਪਾਕਾ ਵਾ ਸਬ੍ਬਾਪਿ ਕੁਸਲਾ ਕੁਸਲ ਚੇਤਨਾ’ਤਿ ਏਵਂ ਵੁਤ੍ਤਪ੍ਪਕਾਰਾ. ‘‘ਦੁਬ੍ਬਲਤਰਂ ਕਤ੍ਵਾ ਵਾ ਵਿਬਾਧਮਾਨਾ’’ਤਿ ਉਪਪੀਲ਼ਕ ਕਮ੍ਮਕਿਚ੍ਚਂ ਵੁਤ੍ਤਂ. ‘‘ਜਨਕ ਕਮ੍ਮਸ੍ਸ ਦੁਬ੍ਬਲ ਆਯੂਹਨਕਾਲੇ’’ਤਿ ਸਮੁਚ੍ਚਯਨਕਾਲੇ. ‘‘ਵਿਹਤ ਸਾਮਤ੍ਥਿਯਂ’’ਤਿ ਵਿਨਾਸਿਤਸਤ੍ਤਿਕਂ. ‘‘ਮਹੇਸਕ੍ਖੇਸੂ’’ਤਿ ਮਹਾਨੁਭਾਵੇਸੁ. ‘‘ਉਪਤ੍ਥਮ੍ਭਕਮ੍ਪਿ ਤਬ੍ਬਿਪਰਿਯਾਯੇਨ ਵੇਦਿਤਬ੍ਬਂ’’ਤਿ ਉਪਪੀਲ਼ਕ ਕਮ੍ਮਤੋ ਵਿਪਰਿਯਾਯੇਨ ਵੇਦਿਤਬ੍ਬਂ. ‘ਉਪਰਿਭੂਮਿ ਨਿਬ੍ਬਤ੍ਤਕਮ੍ਪਿ ਸਮਾਨਂ ਹੇਟ੍ਠਾਭੂਮਿਯਂ ਨਿਬ੍ਬਤ੍ਤੇਤੀ’ਤਿਆਦੀਸੁ ‘ਹੇਟ੍ਠਾਭੂਮਿ ਨਿਬ੍ਬਤ੍ਤਕਮ੍ਪਿ ਸਮਾਨਂ ਉਪਰਿਭੂਮਿਯਂ ਨਿਬ੍ਬਤ੍ਤੇਤੀ’ਤਿਆਦਿਨਾ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ. ਅਜਾਤਸਤ੍ਤੁਰਾਜਵਤ੍ਥੁਮ੍ਹਿ ਤਸ੍ਸ ਰਞ੍ਞੋ ਪਿਤੁਘਾਤਕਮ੍ਮਂ ਮਹਾਅਵੀਚਿਨਿਰਯੇ ਨਿਬ੍ਬਤ੍ਤਨਕਮ੍ਪਿ ਸਮਾਨਂ ਪਚ੍ਛਾ ਬੁਦ੍ਧੁ ਪਟ੍ਠਾਨ ਕਮ੍ਮੇਨ ਬਾਧੀਯਮਾਨਂ ਵਿਹਤਸਾਮਤ੍ਥਿਯਂ ਹੁਤ੍ਵਾ ਤਂ ਉਸ੍ਸਦਨਿਰਯੇ ਨਿਬ੍ਬਤ੍ਤੇਤਿ. ਖਨ੍ਧਸਨ੍ਤਾਨਸ੍ਸ ਵਿਬਾਧਨਂ ਨਾਮ ਸਤ੍ਤਸ੍ਸ ਦੁਕ੍ਖੁਪ੍ਪਤ੍ਤਿ ਕਰਣਨ੍ਤਿ ਸਮ੍ਬਨ੍ਧੋ. ਕਥਂ ਗੋਮਹਿਂਸਾਦੀਨਂ ਪੁਤ੍ਤਦਾਰਞਾਤਿਮਿਤ੍ਤਾਨਞ੍ਚ ਵਿਪਤ੍ਤਿਕਰਣਂ ਤਸ੍ਸ ਸਤ੍ਤਸ੍ਸ ਉਪਪੀਲ਼ਕ ਕਮ੍ਮਕਿਚ੍ਚਂ ਭਵੇਯ੍ਯ. ਅਞ੍ਞੋਹਿ ਸੋ ਪੁਗ੍ਗਲੋ, ਅਞ੍ਞੇ ਗੋਮਹਿਂਸਾਦਯੋ. ਨ ਚ ਅਞ੍ਞੇਨ ਕਤਂ ਕਮ੍ਮਂ ਅਞ੍ਞੇਸਂ ਸਤ੍ਤਾਨਂ ਦੁਕ੍ਖੁਪ੍ਪਤ੍ਤਿਂ ਵਾ ਸੁਖੁਪ੍ਪਤ੍ਤਿਂ ਵਾ ਕਰੇਯ੍ਯਾਤਿ ਚੋਦਨਾ. ਦੁਵਿਧਨ੍ਤਿਆਦਿਨਾ ਤਂ ਵਿਸ੍ਸਜ੍ਜੇਤਿ. ਆਨਨ੍ਦ ਸੇਟ੍ਠਿਵਤ੍ਥੁਮ੍ਹਿ. ਸੋਸੇਟ੍ਠਿ ਮਹਾਮਚ੍ਛਰਿਯੋ ਅਹੋਸਿ. ਅਞ੍ਞੇਪਿ ਦਾਨਂ ਦੇਨ੍ਤੇ ਨੀਵਾਰੇਸਿ. ਸੋ ਤਤੋ ਚਵਿਤ੍ਵਾ ਏਕਸ੍ਮਿਂ ਗਾਮਕੇ ਏਕਿਸ੍ਸਾ ਇਤ੍ਥਿਯਾਕੁਚ੍ਛਿਮ੍ਹਿ ਜਾਤੋ. ਤਸ੍ਸ ਜਾਤਕਾਲਤੋ ਪਟ੍ਠਾਯ ਤਸ੍ਸ ਪਾਪਕਮ੍ਮੇਨ ਮਾਤਰਂ ਆਦਿਂ ਕਤ੍ਵਾ ਸਕਲਗਾਮਿਕਾਨਂ ਜਨਾਨਂ ਦੁਕ੍ਖੁਪ੍ਪਤ੍ਤਿ ਹੋਤੀਤਿ ਧਮ੍ਮਪਦ ਅਟ੍ਠਕਥਾਯਂ ਵੁਤ੍ਤਂ. ਤਸ੍ਮਾ ਨਿਸ੍ਸਨ੍ਦਫਲਵਸੇਨ ਅਞ੍ਞੇਨ ਕਤਂ ਕਮ੍ਮਂ ਅਞ੍ਞੇਸਂ ਸਤ੍ਤਾਨਂ ਦੁਕ੍ਖੁਪ੍ਪਤ੍ਤਿਂ ਵਾ ਸੁਖੁਪ੍ਪਤ੍ਤਿਂ ਵਾ ਕਰੋਤਿ ਯੇਵਾਤਿ ਦਟ੍ਠਬ੍ਬਂ. [‘‘ਕਮ੍ਮਜਸਨ੍ਤਤਿ ਸੀਸੇਸੂ’’ਤਿ ਪਟਿਸਨ੍ਧਿਕਾਲਤੋ ਪਟ੍ਠਾਯ ਉਪ੍ਪਨ੍ਨਾ ਏਕੇਕਾ ਕਮ੍ਮਜਰੂਪਸਨ੍ਤਤਿ ਨਾਮ ਅਤ੍ਥਿ. ਸਾ ਪਚ੍ਛਾ ਅਪਰਾਪਰਂ ਤਾਦਿਸਾਯ ਕਮ੍ਮਜਰੂਪਸਨ੍ਤਤਿਯਾ ਪਵਤ੍ਤਤ੍ਥਾਯ ਸੀਸਭੂਤਤ੍ਤਾ ਸਨ੍ਤਤਿ ਸੀਸਨ੍ਤਿ ਵੁਚ੍ਚਤਿ. ਯਂ ਕਿਞ੍ਚਿ ਏਕਂ ਵਾਕਮ੍ਮਜਸਨ੍ਤਤਿ ਸੀਸਂ. ਦ੍ਵੇ ਵਾਕਮ੍ਮਜਸਨ੍ਤਤਿ ਸੀਸਾਨਿ ]. ਵਿਸੁਦ੍ਧਿਮਗ੍ਗਪਾਠੇ. ‘‘ਤਦੇਵਾ’’ਤਿ ਤਂ ਉਪਘਾਤਕ ਕਮ੍ਮਮੇਵ. ‘‘ਇਧ ਚਾ’’ਤਿ ਇਮਸ੍ਮਿਂ ਅਭਿਧਮ੍ਮਤ੍ਥਸਙ੍ਗਹੇ. ‘‘ਇਮਸ੍ਸ ਪੀ’’ਤਿ ਇਮਸ੍ਸ ਉਪਘਾਤਕ ਕਮ੍ਮਸ੍ਸਪਿ. ਦੁਟ੍ਠਗਾਮਣਿ ਰਞ੍ਞੋ ਵਤ੍ਥੁਮ੍ਹਿ ਚ ਸੋਣਤ੍ਥੇਰ ਪਿਤੁਨੋ ਵਤ੍ਥੁਮ੍ਹਿ ਚ ਤੇਸਂ ਮਰਣਾਸਨ੍ਨਕਾਲੇ ਪਥਮਂ ਦੁਗ੍ਗਤਿ ਨਿਮਿਤ੍ਤਾਨਿ ਉਪਟ੍ਠਹਨ੍ਤਿ. ਪਚ੍ਛਾ ਰਞ੍ਞੋ ਏਕਂ ਪੁਬ੍ਬਕਤਂ ਕਲ੍ਯਾਣ ਕਮ੍ਮਂ ਅਨੁਸ੍ਸਰਨ੍ਤਸ੍ਸ ਥੇਰਪਿਤੁ ਚ ਤਙ੍ਖਣੇ ਏਵ ਏਕਂ ਕਲ੍ਯਾਣ ਕਮ੍ਮਂ ਕਰੋਨ੍ਤਸ੍ਸ ਤਾਨਿ ਦੁਗ੍ਗਤਿ ਨਿਮਿਤ੍ਤਾਨਿ ਅਨ੍ਤਰਧਾਯਨ੍ਤਿ. ਸਗ੍ਗਨਿਮਿਤ੍ਤਾਨਿ ਪਾਤੁਬ੍ਭਵਨ੍ਤਿ. ਉਭੋਪਿ ਚਵਿਤ੍ਵਾ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ. ਕੁਸਲਾ ਕੁਸਲ ਕਮ੍ਮਾਨਂ ਖਯਂ ਕਰੋਤੀਤਿ ਕੁਸਲਾ ਕੁਸਲ ਕਮ੍ਮਕ੍ਖਯਕਰੋ. ‘‘ਆਯੁ ਕਮ੍ਮੇਸੁ ਵਿਜ੍ਜਮਾਨੇਸੂ’’ਤਿ ਤਸ੍ਸ ਸਤ੍ਤਸ੍ਸ ਆਯੁ ਪਰਿਚ੍ਛੇਦੋ ਚ ਪਰਿਯਨ੍ਤ ਗਤੋ ਨ ਹੋਤਿ, ਕਮ੍ਮਾਨੁਭਾਵੋ ਚ ਪਰਿਕ੍ਖੀਣੋ ਨ ਹੋਤਿ. ਏਵਂ ਆਯੁ ਕਮ੍ਮੇਸੁ ਵਿਜ੍ਜਮਾਨੇਸੁ. ‘‘ਅਪਰਾਧ ਕਮ੍ਮਸ੍ਸਾ’’ਤਿ ਮਾਤਾਪਿਤੂਸੁਵਾ ਧਮ੍ਮਿਕਸਮਣ ਬ੍ਰਾਹ੍ਮਣੇਸੁ ਵਾ ਅਪਰਜ੍ਝਨਵਸੇਨ ਕਤਸ੍ਸ ਅਪਰਾਧਕਮ੍ਮਸ੍ਸ. ‘‘ਸੋ ਪਨਾ’’ਤਿ ਮਜ੍ਝਿਮਟ੍ਠਕਥਾਵਾਦੋ ਪਨ. ‘‘ਅਰੁਚ੍ਚਮਾਨੋ ਵਿਯਾ’’ਤਿ ਅਨਿਚ੍ਛਿਯਮਾਨੋਵਿਯ. ‘‘ਸੋ’’ਤਿ ਮਜ੍ਝਿਮਟ੍ਠਕਥਾ ਵਾਦੋ. ‘‘ਤਤ੍ਥ ਪਨਾ’’ਤਿ ਮਜ੍ਝਿਮਟ੍ਠਕਥਾਯਂ ਪਨ. ‘‘ਸਬ੍ਬਞ੍ਚੇਤਂ’’ਤਿ ਸਬ੍ਬਞ੍ਚ ਏਤਂ ਸੁਤ੍ਤਵਚਨਂ, ਵਸੇਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਨਿਚ੍ਛਨ੍ਤੇਹਿ ਟੀਕਾ ਚਰਿਯੇਹਿ. ‘‘ਵਿਪਾਕਂ ਪਟਿਇਚ੍ਛਿਤਬ੍ਬੋ’’ਤਿ ਵਿਪਾਕਂ ਪਟਿਚ੍ਚ ਇਚ੍ਛਿ ਤਬ੍ਬੋ. ਏਤ੍ਥ ‘‘ਵਿਪਾਕਂ’’ਤਿ ਕਮ੍ਮਨਿਬ੍ਬਤ੍ਤਕ੍ਖਨ੍ਧ ਸਨ੍ਤਾਨਂ ਵੁਚ੍ਚਤਿ. ਤਸ੍ਸ ਜਨਕਂ ਕਮ੍ਮਂ ਜਨਕ ਕਮ੍ਮਨ੍ਤਿ ਵੁਚ੍ਚਤਿ. ਤਸ੍ਸੇਵ ਖਨ੍ਧਸਨ੍ਤਾਨਸ੍ਸ ਉਪਤ੍ਥਮ੍ਭਕਂ ਤਸ੍ਸੇਵ ਉਪਪੀਲ਼ਕਂ ਤਸ੍ਸੇਵ ਉਪਘਾਤਕਂ ਕਮ੍ਮਂ ਉਪਘਾਤਕ ਕਮ੍ਮਨ੍ਤਿ ਵੁਚ੍ਚਤੀਤਿ ਅਧਿਪ੍ਪਾਯੋ. ‘‘ਸਾਕੇਤ ਪਞ੍ਹੇ’’ਤਿ ਵਿਪਾਕੁਦ੍ਧਾਰੇ ਆਗਤੇ ਸਾਕੇਤ ਪਞ੍ਹੇ. ਧਮ੍ਮਦਿਨ੍ਨਾਯ ਨਾਮ ਉਗ੍ਗਸੇਨ ਰਞ੍ਞੋ ਦੇਵਿਯਾ ਵਤ੍ਥੁਮ੍ਹਿ ਸਾਦੇਵੀ ਪੁਬ੍ਬੇ ਏਕਂ ਅਜਂ ਘਾਤੇਸਿ, ਤੇਨ ਕਮ੍ਮੇਨ ਅਪਾਯੇਸੁ ਪਤਿਤ੍ਵਾ ਪਚ੍ਛਾ ਪਵਤ੍ਤਿ ਵਿਪਾਕਵਸੇਨ ਬਹੂਸੁ ਭਵੇਸੁ ਅਜਸਰੀਰੇ ਲੋਮਗਣਨਾਮਤ੍ਤਂ ਅਤ੍ਤਨੋ ਸੀਸਚ੍ਛੇਦਨ ਦੁਕ੍ਖਂ ਅਨੁਭੋਸੀਤਿ. ‘‘ਸਾ ਪਨਾ’’ਤਿ ਸਾ ਏਕਾ ਪਾਣਾਤਿਪਾਤ ਚੇਤਨਾ ਪਨ. ਮਹਾਮੋਗ੍ਗਲਾਨ ਵਤ੍ਥੁ ਨਾਮ ਪਞ੍ਚਸਤ ਚੋਰਾਨਂ ਥੇਰਸ੍ਸ ਘਾਤ ਨ ਵਤ੍ਥੁ. ਥੇਰੋਹਿ ਅਤ੍ਤਨਾ ਪੁਬ੍ਬਕਤੇਨ ਉਪਚ੍ਛੇਦਕ ਕਮ੍ਮੇਨ ਚੋਰਘਾਤਨਂ ਲਭਿਤ੍ਵਾ ਪਰਿਨਿਬ੍ਬੁਤੋ. ਸਾਮਾਵਤਿਦੇਵੀ ਚ ਵਗ੍ਗੁਮੁਦਾਨਦਿਤੀਰਵਾਸਿਨੋ ਪਞ੍ਚਸਤ ਭਿਕ੍ਖੂ ਚ ਅਤ੍ਤਨੋ ਪੁਬ੍ਬਕਤੇਹਿ ਉਪਚ੍ਛੇਦਕ ਕਮ੍ਮੇਹਿ ਤਾਦਿਸਂ ਪਰੂਪਕ੍ਕਮਂ ਲਭਿਤ੍ਵਾ ਸਗ੍ਗੇਸੁ ਨਿਬ੍ਬਤ੍ਤਾ. ਦੁਸ੍ਸਿਮਾਰੋ ਨਾਮ ਕਕੁਸਨ੍ਧ ਬੁਦ੍ਧਕਾਲੇ ਮਾਰਦੇਵ ਪੁਤ੍ਤੋ ਵੁਚ੍ਚਤਿ. ਕਲਾਬੁਰਾਜਾਨਾਮ ਖਨ੍ਤਿ ਵਾਦਿਤਾ ਪਸਸ੍ਸ ਘਾਤਕੋ ਵੁਚ੍ਚਤਿ. ਤੇ ਪਨ ਤਙ੍ਖਣੇ ਅਤ੍ਤਨਾ ਕਤੇਨ ਉਪਚ੍ਛੇਦਕ ਕਮ੍ਮੇਨ ਤਙ੍ਖਣੇ ਏਵ ਚਵਿਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਾ. ਤਤ੍ਥ ਪੁਰਿਮ ਵਤ੍ਥੂਸੁ ਉਪਚ੍ਛੇਦਕ ਕਮ੍ਮਂ ਉਪਚ੍ਛਿਨ੍ਦਨ ਮਤ੍ਤਂ ਕਰੋਤਿ. ਨ ਅਤ੍ਤਨੋ ਵਿਪਾਕਂ ਦੇਤਿ. ਪਚ੍ਛਿਮਵਤ੍ਥੂਸੁ ਪਨ ਉਪਚ੍ਛਿਨ੍ਦਨਞ੍ਚ ਕਰੋਤਿ, ਵਿਪਾਕਞ੍ਚ ਦੇਤੀਤਿ. ਵਿਭਾਵਨਿਪਾਠੇ. ‘‘ਉਪਚ੍ਛੇਦਨ ਪੁਬ੍ਬਕਂ’’ਤਿ ਉਪਚ੍ਛੇਦਨ ਪੁਬ੍ਬਕਂ ਵਿਪਾਕਂ ਜਨੇਤੀਤਿ ਯੋਜਨਾ. ਕਮ੍ਮਨ੍ਤਰਸ੍ਸ ਵਿਪਾਕਂ ਉਪਚ੍ਛਿਨ੍ਦਿਤ੍ਵਾਵ ਅਤ੍ਤਨੋ ਵਿਪਾਕਂ ਜਨੇਤੀਤਿ ਅਧਿਪ੍ਪਾਯੋ. ਤਤ੍ਥ ‘‘ਅਤ੍ਤਨੋ ਵਿਪਾਕਂ ਜਨੇਤੀ’’ਤਿ ਇਧ ਕਦਾਚਿ ਜਨੇਤਿ, ਕਦਾਚਿ ਨ ਜਨੇਤੀਤਿ ਏਵਂ ਵਿਭਾਗਸ੍ਸ ਅਕਤਤ੍ਤਾ ‘‘ਤਂ ਨ ਸੁਨ੍ਦਰਂ’’ਤਿ ਵੁਤ੍ਤਂ. ਤੇਨਾਹ ‘‘ਇਧ ਪੁਬ੍ਬਕਤੇਨਾ’’ਤਿਆਦਿਂ. ‘‘ਅਟ੍ਠਕਥਾਸੁਯੇਵ ਆਗਤਤ੍ਤਾ’’ਤਿ ਤੇਸੁ ਵਤ੍ਥੂਸੁ ਤੇਜਨਾ ਉਪਚ੍ਛੇਦਕ ਕਮ੍ਮੇਨ ਮਰਨ੍ਤੀਤਿ ਏਵਂ ਵਤ੍ਵਾ ਆਗਤਤ੍ਤਾ. ਵਿਪਾਕਂ ਨਿਬ੍ਬਤ੍ਤੇਤੀਤਿ ਵਿਪਾਕ ਨਿਬ੍ਬਤ੍ਤਕਂ. ਤਸ੍ਸ ਭਾਵੋ ਵਿਪਾਕ ਨਿਬ੍ਬਤ੍ਤਕਤ੍ਤਂ. ਵਿਪਾਕ ਨਿਬ੍ਬਤ੍ਤਕਤ੍ਤਸ੍ਸ ਅਭਾਵੋਤਿ ਵਿਗ੍ਗਹੋ.

ਜਨਕਚਤੁਕ੍ਕਂ ਨਿਟ੍ਠਿਤਂ.

੧੩੬. ‘‘ਨਿਕਨ੍ਤਿ ਬਲੇਨ ਵਾ ਪਟਿਬਾਹਿਯਮਾਨਂ ਵਿਪਾਕਂ ਨ ਦੇਤੀ’’ਤਿ ਝਾਨਲਾਭਿਨੋ ਹੁਤ੍ਵਾਪਿ ਮਰਣਕਾਲੇ ਉਪ੍ਪਜ੍ਜਿਤੁਂ ਨਿਕਨ੍ਤਿਯਾ ਸਤਿ, ਤਂ ਝਾਨਂ ਵਿਪਾਕਂ ਨ ਦੇਤੀਤਿ ਅਧਿਪ੍ਪਾਯੋ. ‘‘ਏਕਸ੍ਸਾ’’ਤਿ ਏਕਸ੍ਸ ਪੁਗ੍ਗਲਸ੍ਸ. ‘‘ਤੇਸਂ’’ਤਿ ਮਹਗ੍ਗਤਕਮ੍ਮ ਆਨਨ੍ਤਰਿਯ ਕਮ੍ਮਾਨਂ. ਅਨ੍ਤਿਮ ਜਵਨਵੀਥਿਯਂ ਕਤਂ ਨਾਮ ਵਤ੍ਥੁ ਦੁਬ੍ਬਲਤ੍ਤਾ ਸਯਮ੍ਪਿ ਦੁਬ੍ਬਲਂ ਹੋਤਿ. ਪਟਿਸਨ੍ਧਿਂ ਨ ਜਨੇਤਿ. ਤੇਨਾਹ ‘‘ਅਨ੍ਤਿਮ ਜਵਨਵੀਥਿਤੋ ਪੁਬ੍ਬਭਾਗੇ ਆਸਨ੍ਨੇ ਕਤਂ’’ਤਿ. ਇਦਞ੍ਚ ਕਮ੍ਮਸਾਮਞ੍ਞ ਵਸੇਨ ਵੁਤ੍ਤਂ. ਕਮ੍ਮਵਿਸੇਸੇ ਪਨ ਸਤਿ, ਨ ਦੇਤੀਤਿ ਨ ਵਤ੍ਤਬ੍ਬਨ੍ਤਿ ਦਸ੍ਸੇਤੁਂ ‘‘ਮਿਚ੍ਛਾਦਿਟ੍ਠਿਕਮ੍ਮਂ ਪਨਾ’’ਤਿਆਦਿ ਵੁਤ੍ਤਂ. ਕਤਂ ਆਸਨ੍ਨ ਕਮ੍ਮਂ ਨਾਮਾਤਿ ਗਹੇਤਬ੍ਬਨ੍ਤਿ ਯੋਜਨਾ. ਪਾਲ਼ਿਪਾਠੇ. ਅਸ੍ਸਪੁਗ੍ਗਲਸ੍ਸ ਮਰਣਕਾਲੇਵਾ ਸਮ੍ਮਾਦਿਟ੍ਠਿ ਸਮਤ੍ਤਾ ਸਮਾਦਿਨ੍ਨਾ, ਮਿਚ੍ਛਾਦਿਟ੍ਠਿ ਸਮਤ੍ਤਾ ਸਮਾਦਿਨ੍ਨਾਤਿ ਯੋਜਨਾ. ਪਰਤੋ ਪਰਿਪੁਣ੍ਣਂ ਆਗਮਿਸ੍ਸਤਿ. ਸੋਮਨਸ੍ਸ ਜਨਕਂ ਪਰਚੇਤਨਾ ਪਵਤ੍ਤਿਵਸੇਨ. ਸਨ੍ਤਾਪ ਜਨਕਂ ਕੁਕ੍ਕੁਚ੍ਚਵਿਪ੍ਪਟਿਸਾਰਪ੍ਪਵਤ੍ਤਿਵਸੇਨ. ਇਦਂ ਗਰੁਕ ਚਤੁਕ੍ਕਂ ਨਾਮ ਅਨਨ੍ਤਰੇ ਭਵੇ ਵਿਪਚ੍ਚਨਕਾਨਂ ਕਮ੍ਮਾਨਂ ਵਸੇਨ ਵੁਤ੍ਤਨ੍ਤਿ ਆਹ ‘‘ਉਪਪਜ੍ਜਵੇਦਨੀਯ ਕਮ੍ਮਾਨਿ ਏਵਾ’’ਤਿ. ਕਮ੍ਮਂ ਨਾਮ ਕੁਸਲਂ ਵਾ ਹੋਤੁ, ਅਕੁਸਲਂ ਵਾ. ਪੁਨਪ੍ਪੁਨਂ ਲਦ੍ਧਾ ਸੇਵਨੇ ਸਤਿ, ਵਿਪਾਕਂ ਦੇਤਿ. ਅਸਤਿ ਨ ਦੇਤਿ. ਕਾਮਾਵਚਰਸ੍ਸ ਕੁਸਲਸ੍ਸ ਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਵਿਪਾਕਂ ਉਪ੍ਪਨ੍ਨਂ ਹੋਤਿ ਚਕ੍ਖੁ ਵਿਞ੍ਞਾਣਨ੍ਤਿ ਚ, ਅਕੁਸਲਸ੍ਸ ਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਵਿਪਾਕਂ ਉਪ੍ਪਨ੍ਨਂ ਹੋਤਿ ਚਕ੍ਖੁ ਵਿਞ੍ਞਾਣਨ੍ਤਿ ਚ, ਪਾਲ਼ਿਯਂ ਵੁਤ੍ਤਂ. ਏਤ੍ਥਹਿ ਕਤਤ੍ਤਾਤਿ ਵਤ੍ਵਾ ਪੁਨ ਉਪਚਿਤਤ੍ਤਾਤਿ ਵਚਨਂ ਪੁਨਪ੍ਪੁਨਂ ਵਡ੍ਢਨਸਙ੍ਖਾਤੇ ਆਸੇਵਨੇ ਸਤਿ ਏਵ ਵਿਪਾਕਂ ਦੇਤੀਤਿ ਞਾਪੇਤਿ. ਤਸ੍ਮਾ ਕਤਮਤ੍ਤ ਕਮ੍ਮਤ੍ਤਾ ਕਟਤ੍ਤਾ ਕਮ੍ਮਂ ਨਾਮਾਤਿ ਵੁਤ੍ਤੇਪਿ ਅਨਨ੍ਤਰਭਵੇ ਵਿਪਚ੍ਚਨਕ ਕਮ੍ਮਸ੍ਸੇਵ ਇਧ ਅਧਿਪ੍ਪੇਤਤ੍ਤਾ ਪੁਨਪ੍ਪੁਨਂ ਲਦ੍ਧਾ ਸੇਵਨਮੇਵ ਇਧ ਗਹੇਤਬ੍ਬਨ੍ਤਿ ਦਸ੍ਸੇਤੁਂ ਅਟ੍ਠਕਥਾਯਂ ‘‘ਪੁਨਪ੍ਪੁਨਂ ਲਦ੍ਧਾਸੇਵਨਂ’’ਤਿ ਵੁਤ੍ਤਂ.

‘‘ਏਵਞ੍ਚ ਕਤ੍ਵਾ’’ਤਿਆਦੀਸੁ. ‘‘ਯਤ੍ਥ ਤਂ ਪੁਬ੍ਬਕਤਂ ਕਮ੍ਮਨ੍ਤਿ ਆਗਤਂ’’ਤਿ ਯਸ੍ਮਿਂ ਅਟ੍ਠਕਥਾ ਪਦੇਸੇ ਤਂ ਕਟਤ੍ਤਾ ਕਮ੍ਮਂ ਪੁਬ੍ਬਕਤਂ ਕਮ੍ਮਂਤਿ ਆਗਤਂ. ‘‘ਕਸ੍ਮਾ ਇਧਾ’’ਤਿਆਦੀਸੁ. ‘‘ਇਧਾ’’ਤਿ ਇਮਸ੍ਮਿਂ ਅਭਿਧਮ੍ਮਤ੍ਥ ਸਙ੍ਗਹੇ. ਪਾਲ਼ਿਯਂ. ਯਂ ਗਰੁਕਂ, ਤਂ ਵਿਪਾਕਂ ਦੇਤਿ. ਤਸ੍ਮਿਂ ਅਸਤਿ, ਯਂ ਬਹੁਲਂ. ਤਸ੍ਮਿਂ ਅਸਤਿ, ਯਂ ਆਸਨ੍ਨਂ. ਤਸ੍ਮਿਂ ਅਸਤਿ, ਯਂ ਕਟਤ੍ਤਾ ਵਾ ਪਨ ਕਮ੍ਮਂ, ਤਂ ਵਿਪਾਕਂ ਦੇਤੀਤਿ ਅਤ੍ਥੋ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਸੁਤ੍ਤਨ੍ਤਪਾਠੇ. ਸੁਖਵੇਦਨਂ ਜਨੇਤੀਤਿ ਸੁਖਵੇਦਨੀਯਂ. ‘‘ਸਮਤ੍ਤਾ’’ਤਿ ਸੁਟ੍ਠੁਗਹਿਤਾ. ‘‘ਸਮਾਦਿਨ੍ਨਾ’’ਤਿ ਤਦਤ੍ਥਵਿਵਰਣਂ. ‘‘ਪਰਿਯਤ੍ਤਂ’’ਤਿ ਸਮਤ੍ਥਂ. ਤਮ੍ਬਦਾਧਿਕਸ੍ਸ ਯਾਵਜੀਵਂ ਬਹੂਨਿ ਪਾਪਕਮ੍ਮਾਨਿ ਆਚਿਣ੍ਣਾਨਿ. ਮਰਣ ਦਿਵਸੇ ਪਨ ਸਾਰਿਪੁਤ੍ਤਤ੍ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਚਵਿਤ੍ਵਾ ਤੇਨ ਆਸਨ੍ਨ ਕਮ੍ਮੇਨ ਸਗ੍ਗੇ ਨਿਬ੍ਬਤ੍ਤਿ. ਵਾਤਕਾਲਸ੍ਸ ਯਾਵਜੀਵਂ ਬਹੂਨਿ ਕਲ੍ਯਾਣ ਕਮ੍ਮਾਨਿ ਆਚਿਣ੍ਣਾਨਿ. ਮਰਣ ਦਿਵਸੇਪਨ ਬੁਦ੍ਧਸਾਸਨੇ ਵਿਪਰੀਤ ਸਞ੍ਞਂ ਕਤ੍ਵਾ ਤੇਨ ਆਸਨ੍ਨ ਕਮ੍ਮੇਨ ਅਪਾਯੇ ਨਿਬ੍ਬਤ੍ਤਿ.

ਗਰੁਕਚਤੁਕ੍ਕਂ ਨਿਟ੍ਠਿਤਂ.

੧੪੭. ਦਿਟ੍ਠਧਮ੍ਮਚਤੁਕ੍ਕੇ. ਪਸ੍ਸਿਤਬ੍ਬੋਤਿ ਦਿਟ੍ਠੋ. ‘‘ਧਮ੍ਮੋ’’ਤਿ ਖਨ੍ਧਾਯਤਨ ਧਮ੍ਮ ਸਮੂਹੋ. ਦਿਟ੍ਠੋ ਧਮ੍ਮੋਤਿ ਦਿਟ੍ਠ ਧਮ੍ਮੋ. ਵਤ੍ਤਮਾਨੋ ਧਮ੍ਮਸਮੂਹੋ. ਯੋ ਅਤ੍ਤਭਾਵੋਤਿ ਵੁਚ੍ਚਤਿ. ਅਤ੍ਤਸਙ੍ਖਾਤਸ੍ਸ ਦਿਟ੍ਠਿਯਾ ਪਰਿਕਪ੍ਪਿਤਸਾਰਸ੍ਸ ਭਾਵੋ ਪਵਤ੍ਤਿ ਕਾਰਣਨ੍ਤਿ ਕਤ੍ਵਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਦਿਟ੍ਠ ਧਮ੍ਮੋ ਵੁਚ੍ਚਤੀ’’ਤਿਆਦਿਮਾਹ. ‘‘ਵਿਪਾਕਂ ਪਟਿਸਂਵੇਦੇਤੀ’’ਤਿ ਏਤੇਨ ਕਥਂ ਕਮ੍ਮਸਾਧਨਂ ਦਸ੍ਸੇਤਿ. ਪਟਿਸਂਵੇਦਨ ਕ੍ਰਿਯਾਪਦੇ ਵਿਪਾਕਨ੍ਤਿ ਕਮ੍ਮਪਦਂ ਦਿਸ੍ਵਾ ਵਿਪਾਕਂ ਨਾਮ ਵੇਦਿਤਬ੍ਬਂ ਵੇਦਨੀਯਂ. ਪਟਿਸਂਵੇਦਿਤਬ੍ਬਂ ਪਟਿਸਂਵੇਦਨੀਯਨ੍ਤਿ ਵਿਞ੍ਞਾਤਤ੍ਤਾ. ‘‘ਉਪੇਚ੍ਚਾ’’ਤਿ ਉਪਗਨ੍ਤ੍ਵਾ. ‘‘ਉਪਪਜ੍ਜਿਤ੍ਵਾ’’ਤਿ ਉਪੇਚ੍ਚ ਪਜ੍ਜਿਤ੍ਵਾ. ਪਾਪੁਣਿਤ੍ਵਾਤਿ ਅਤ੍ਥੋ. ਵਿਭਾਵਨਿਪਾਠੇ. ‘‘ਦਿਟ੍ਠ ਧਮ੍ਮਤੋ’’ਤਿ ਦਿਟ੍ਠ ਧਮ੍ਮਸ੍ਸ. ਸਾਮਿਅਤ੍ਥੇ ਪਞ੍ਚਮੀ. ਪਾਲ਼ਿਯਂ ਵੁਤ੍ਤਂ. ‘‘ਏਤ੍ਥਹੀ’’ਤਿਆਦਿ ਪੁਬ੍ਬਵਾਕ੍ਯੇ ਵੁਤ੍ਤ ਨਯਮੇਵ. ਅਪਰਸਦ੍ਦੋ ਨਿਚ੍ਚਂ ਅਪਾਦਾਨਾ ਪੇਕ੍ਖੋ. ਤਞ੍ਚ ਅਪਾਦਾਨਂ ਨਾਮ ਅਨਨ੍ਤਰੇ ਵੁਤ੍ਤਪਦੇਹਿ. ‘‘ਦਿਟ੍ਠਧਮ੍ਮਾ ਨਾਗਤਾਨਨ੍ਤਰ ਭਵੇਹੀ’’ਤਿ ਦਿਟ੍ਠਧਮ੍ਮਤੋ ਚ ਅਨਾਗਤਾਨਨ੍ਤਰ ਭਵਤੋ ਚਾਤਿ ਅਤ੍ਥੋ. ‘‘ਪਰਿਵਤ੍ਤੋ’’ਤਿ ਪਬਨ੍ਧੋ. ਅਪਰਾਪਰਿਯੋਤਿ ਵਾ, ਅਪਰੋ ਚ ਅਪਰੋ ਚ ਅਪਰਾਪਰੋ. ਅਪਰਾਪਰੇ ਪਵਤ੍ਤੋ ਅਪਰਾਪਰਿਯੋਤਿ ਅਤ੍ਥੋ. ‘‘ਉਪਪਜ੍ਜਭਵਂ’’ਤਿ ਅਨਾਗਤਾਨਨ੍ਤਰਭਵਂ. ਅਹੋਸਿ ਕਮ੍ਮੇ ‘‘ਅਹੋਸੀ’’ਤਿ ਪਦਂ ਅਞ੍ਞਾਸਿ ਕੋਣ੍ਡਞ੍ਞੋਤਿ ਪਦੇਵਿਯ ਰੁਲ਼੍ਹੀਨਾਮਪਦਨ੍ਤਿ ਆਹ ‘‘ਅਹੋਸਿ ਨਾਮਕਂ’’ਤਿ. ਤਂ ਪਨ ਰੁਲ਼੍ਹਿਪਦਂ ਕੁਤੋਪਵਤ੍ਤਂਤਿ ਆਹ ‘‘ਅਹੋਸਿ ਕਮ੍ਮਂ’’ਤਿਆਦਿਂ. ‘‘ਏਵਂ ਵੁਤ੍ਤ ਪਾਠਵਸੇਨਾ’’ਤਿ ਏਤ੍ਥ ਇਧ ਵੁਤ੍ਤੋ ਪਾਠੋ ਸਾ ਵਸੇਸੋ. ਪਰਿਪੁਣ੍ਣਪਾਠੋ ਪਨ ਅਹੋਸਿ ਕਮ੍ਮਂ ਅਹੋਸਿ ਕਮ੍ਮ ਵਿਪਾਕੋ, ਅਹੋਸਿ ਕਮ੍ਮਂ ਨਾਹੋਸਿ ਕਮ੍ਮ ਵਿਪਾਕੋ, ਅਹੋਸਿ ਕਮ੍ਮਂ ਅਤ੍ਥਿਕਮ੍ਮ ਵਿਪਾਕੋ, ਅਹੋਸਿ ਕਮ੍ਮਂ ਨਤ੍ਥਿ ਕਮ੍ਮਵਿਪਾਕੋ, ਅਹੋਸਿਕਮ੍ਮਂ ਭਵਿਸ੍ਸਤਿ ਕਮ੍ਮ ਵਿਪਾਕੋ, ਅਹੋਸਿ ਕਮ੍ਮਂ ਨ ਭਵਿਸ੍ਸਤਿ ਕਮ੍ਮ ਵਿਪਾਕੋਤਿਆਦਿਨਾ ਪਟਿਸਮ੍ਭਿਦਾ ਮਗ੍ਗੇ ਆਗਤੋ. ‘‘ਸਾ’’ਤਿ ਪਥਮ ਜਵਨ ਚੇਤਨਾ. ‘‘ਅਪ੍ਪਤਰ ਵਿਪਾਕਾ ਚਾਤੀ’’ਤਿ ਏਤ੍ਥ ‘‘ਇਤੀ’’ਤਿ ਹੇਤੁ ਅਤ੍ਥੇ ਨਿਪਾਤੋ, ਤਸ੍ਮਾ ਅਚਿਰਟ੍ਠਿਤਿ ਕਤ੍ਤਾ ਦਿਟ੍ਠ ਧਮ੍ਮੇ ਏਵ ਫਲਂ ਦਤ੍ਵਾ ਵਿਗਚ੍ਛਤਿ, ਤਸ੍ਮਾ ਅਪ੍ਪਤਰ ਵਿਪਾਕਤ੍ਤਾ ਅਹੇਤੁਕਮਤ੍ਤਂ ਫਲਂ ਦਤ੍ਵਾ ਵਿਗਚ੍ਛਤੀਤਿ ਯੋਜਨਾ. ‘‘ਪਚ੍ਚਯੋਤਿ ਚਾ’’ਤਿ ਪਚ੍ਚਯਂ ਲਦ੍ਧਾਤਿ ਵੁਤ੍ਤੋ ਪਚ੍ਚਯੋਤਿ ਚ. ‘‘ਸੋ’’ਤਿ ਮਹਨ੍ਤਂ ਵੁਤ੍ਤੋ ਪਚ੍ਚਯੋ. ‘‘ਕਾਕਵਲਿਯਾਦੀਨਂ ਵਿਯਾ’’ਤਿ ਕਾਕਵਲਿਯਾਦੀਨਂ ਪੁਗ੍ਗਲਾਨਂ ਦਿਟ੍ਠਵੇਦਨੀਯ ਕਮ੍ਮਂ ਵਿਯ. ‘‘ਪਾਕਟਤਰਪ੍ਫਲਦਾਨਂ’’ਤਿ ਸਤ੍ਤਾਹਬ੍ਭਨ੍ਤਰੇ ਏਵ ਸੇਟ੍ਠਿਟ੍ਠਾਨਪ੍ਪਟਿ ਲਾਭਾਦਿਵਸੇਨ ਪਾਕਟਤਰਪ੍ਫਲਦਾਨਕਂ ਕਮ੍ਮਵਿਸੇਸਂ. ਕਮ੍ਮ ਪਥਜਵਨਸਨ੍ਤਾਨੇ ਪਵਤ੍ਤਾ ਪਥਮਜਵਨ ਚੇਤਨਾ ਵਾ ਇਤਰਾਪਿ ਪਥਮ ਜਵਨ ਚੇਤਨਾ ਵਾਤਿ ਯੋਜਨਾ. ‘‘ਕਾਚੀ’’ਤਿ ਏਕਚ੍ਚਾ ਪਥਮਜਵਨ ਚੇਤਨਾ. ਸੇਸਾਨਿ ਦਿਟ੍ਠਧਮ੍ਮ ਵੇਦਨੀਯ ਕਮ੍ਮਾਨਿ.

ਉਪਪਜ੍ਜਕਮ੍ਮੇ. ‘‘ਅਤ੍ਥ ਸਾਧਿਕਾ’’ਤਿ ਸਨ੍ਨਿਟ੍ਠਾਨਤ੍ਥਸਾਧਿਕਾ. ਪਾਣਘਾਤਾਦਿ ਕਿਚ੍ਚਸਾਧਿਕਾਤਿ ਵੁਤ੍ਤਂ ਹੋਤਿ. ਸੁਟ੍ਠੁ ਨਿਟ੍ਠਾਪੇਤੀਤਿ ਸਨ੍ਨਿਟ੍ਠਾਪਿਕਾ. ‘‘ਸੇਸਾਨਿ ਪੀ’’ਤਿ ਸੇਸਾਨਿ ਉਪਪਜ੍ਜ ਵੇਦਨੀਯ ਕਮ੍ਮਾਨਿਪਿ. ‘‘ਇਧਾ’’ਤਿ ਇਮਸ੍ਮਿਂ ਮਨੁਸ੍ਸ ਲੋਕੇ. ‘‘ਮਿਸ੍ਸਕਕਮ੍ਮਾਨੀ’’ਤਿ ਕੁਸਲਾ ਕੁਸਲਮਿਸ੍ਸਕਾਨਿ ਕਮ੍ਮਾਨਿ. ਵੇਮਾਨਿਕਪੇਤਵਤ੍ਥੂਨਿ ਵਿਮਾਨਵਤ੍ਥੁ ਪਾਲ਼ਿਯਂ ਆਗਤਾਨਿ. ‘‘ਸੁਗਤਿਯਂ ਵਿਪਤ੍ਤਿਂ ਅਨੁਭਵਨ੍ਤਾਨਿ ਵਤ੍ਥੂਨੀ’’ਤਿ ਏਤ੍ਥ ‘‘ਵਿਪਤ੍ਤਿਂ’’ਤਿ ਚਕ੍ਖੁ ਸੋਤਾਦੀਨਂ ਅਙ੍ਗ ਪਚ੍ਚਙ੍ਗਾਨਂ ਵਾ ਵਿਪਤ੍ਤਿਂ. ਨਾਨਾ ਦੁਕ੍ਖੁਪ੍ਪਤ੍ਤਿਭੂਤਂ ਵਾ ਵਿਪਤ੍ਤਿਂ. ‘‘ਦੁਗ੍ਗਤਿਯਂ ਸਮ੍ਪਤ੍ਤਿਂ’’ਤਿ ਮਹਿਦ੍ਧੀਨਂ ਨਾਗਸੁਪਣ੍ਣਾਦੀਨਂ ਸਮ੍ਪਤ੍ਤਿਂ. ‘‘ਯਥਾ ਵੁਤ੍ਤ ਵਤ੍ਥੂਹੀ’’ਤਿ ਵੇਮਾਨਿਕ ਪੇਤਵਤ੍ਥਾਦੀਹਿ. ਅਟ੍ਠਕਥਾਪਾਠੇ. ‘‘ਤੇਸਂ ਸਙ੍ਕਮਨਂ ਨਤ੍ਥੀ’’ਤਿ ਤੇਸਂ ਕਮ੍ਮਾਨਂ ਵਿਪਚ੍ਚਨਕਾਲ ਸਙ੍ਕਨ੍ਤਿ ਨਾਮ ਨਤ੍ਥਿ. ‘‘ਯਥਾਠਾਨੇਯੇਵ ਪਤਿਟ੍ਠਨ੍ਤੀ’’ਤਿ ਤਾਨਿ ਦਿਟ੍ਠ ਧਮ੍ਮਟ੍ਠਾਨਾਦਿਵਸੇਨ ਭਗਵਤਾ ਯਥਾ ਵੁਤ੍ਤਟ੍ਠਾਨੇ ਏਵ ਤਿਟ੍ਠਨ੍ਤਿ. ‘‘ਏਵਂ ਵੁਤ੍ਤਂ’’ਤਿ ਤੇਸਂ ਸਙ੍ਕਮਨਂ ਨਤ੍ਥੀਤਿਆਦਿਨਯੇਨ ਵੁਤ੍ਤਂ. ‘‘ਯੁਤ੍ਤਿਯਾ ਵਾ ਅਭਾਵਤੋ’’ਤਿ ਏਤ੍ਥ ਦਿਟ੍ਠ ਧਮ੍ਮ ਵੇਦਨੀਯਸ੍ਸ ਪਟਿਸਨ੍ਧਿ ਵਿਪਾਕਾਦਿ ਯੁਤ੍ਤਿਯਾ ਅਭਾਵਤੋ.

ਦਿਟ੍ਠਧਮ੍ਮਚਤੁਕ੍ਕਂ.

੧੪੮. ਪਾਕਟ੍ਠਾਨਚਤੁਕ੍ਕੇ. ‘‘ਕਾਯਾਦੀਨਂ’’ਤਿ ਚੋਪਨਕਾਯਾਦੀਨਂ. ਕਾਯ ਵਿਞ੍ਞਤ੍ਤਾਦੀਨਨ੍ਤਿ ਵੁਤ੍ਤਂ ਹੋਤਿ. ‘‘ਅਤਿਪਾਤੇਨ੍ਤੀ’’ਤਿ ਅਤਿਕ੍ਕਮ੍ਮ ਪਯੋਗੇਨ ਅਭਿਭਵਿਤ੍ਵਾ ਪਾਤੇਨ੍ਤਿ. ਤੇਨਾਹ ‘‘ਅਤਿਪਾਤਨਞ੍ਚੇਤ੍ਥਾ’’ਤਿਆਦਿਂ. ‘‘ਅਦਿਨ੍ਨਂ’’ਤਿ ਸਾਮਿਕੇਨਅਦਿਨ੍ਨਂ ਪਰਸਨ੍ਤਕਂ. ਅਗਮਨੀਯਵਤ੍ਥੂਨਿ ਨਾਮ ਅਵੀਤਿਕ੍ਕਮਨਤ੍ਥਾਯ ਅਨੁਪਗਨ੍ਤਬ੍ਬਾਨਿ ਮਾਤੁਰਕ੍ਖਿਤਾਦੀਨਿ ਇਤ੍ਥਿ ਪੁਰਿਸਸਰੀਰਾਨਿ. ‘‘ਤਸ੍ਸਾ’’ਤਿ ਪਰਪਾਣਸ੍ਸ. ‘‘ਤਤੋ’’ਤਿ ਪਰਪਰਿਗ੍ਗਹਿਤ ਭਾਵਤੋ. ‘‘ਅਚ੍ਛਿਨ੍ਦਕ ਚੇਤਨਾ’’ਤਿ ਪਰਸਨ੍ਤਕਸ੍ਸ ਅਤ੍ਤਨੋ ਸਨ੍ਤਕਕਰਣਵਸੇਨ ਭੁਸਂ ਪਰਸਨ੍ਤਕਾ ਭਾਵਚ੍ਛਿਨ੍ਦਕ ਚੇਤਨਾ. ਵਿਲੁਪ੍ਪਨ ਚੇਤਨਾਤਿ ਵੁਤ੍ਤਂ ਹੋਤਿ. ‘‘ਮਗ੍ਗੇਨ ਮਗ੍ਗਪ੍ਪਟਿਪਾਦਕਸ੍ਸਾ’’ਤਿ ਅਤ੍ਤਨੋ ਮਗ੍ਗੇਨ ਪਰਮਗ੍ਗ ਸਮ੍ਪਯੋਜਕਸ੍ਸ. ‘‘ਏਤ੍ਥਪੀ’’ਤਿ ਯਥਾ ਅਦਿਨ੍ਨਾਦਾਨੇ ਪਰਪਰਿਗ੍ਗਹਿਤ ਸਞ੍ਞਿਨੋਤਿ ਦੁਤੀਯਂ ਅਙ੍ਗਪਦਂ ਵੁਤ੍ਤਂ. ਏਵਂ ਏਤ੍ਥਪਿ. ਏਤ੍ਥ ਵਦਨ੍ਤਿ ਅਗਮਨੀਯ ਵਤ੍ਥੁ ਵਸੇਨ ਚਿਤ੍ਤਨ੍ਤਿ ਅਵਤ੍ਵਾ ਤਸ੍ਮਿਂ ਸੇਵਨ ਚਿਤ੍ਤਨ੍ਤਿ ਵੁਤ੍ਤਂ. ਤਸ੍ਮਾ ਅਗਮਨੀਯ ਵਤ੍ਥੁ ਸਞ੍ਞਿਤਾਤਿ ਅਵੁਤ੍ਤਮ੍ਪਿ ਵੁਤ੍ਤਸਦਿਸਂ ਹੋਤੀਤਿ. ਨ ਹੋਤਿ. ਨ ਹਿ ਤਸ੍ਮਿਨ੍ਤਿ ਵਚਨਂ ਸਞ੍ਞਾਵਿਸੇਸ ਸਹਿਤਂ ਅਤ੍ਥਂ ਵਦਤਿ. ਈਦਿਸੇਸੁ ਚ ਠਾਨੇਸੁ ਸਚੇ ਸਞ੍ਞਾਪਧਾਨਂ ਹੋਤਿ. ਪਾਣਸਞ੍ਞਿਤਾ, ਪਰਪਰਿਗ੍ਗਹਿਤ ਸਞ੍ਞਿਤਾ,ਤਿ ਅਙ੍ਗ ਪਦਂ ਵਿਯ ਇਧਪਿ ਅਗਮਨੀਯ ਵਤ੍ਥੁ ਸਞ੍ਞਿਤਾਤਿ ਦੁਤੀਯਂ ਅਙ੍ਗਪਦਂ ਅਵਸ੍ਸਂ ਵਤ੍ਤਬ੍ਬਂ ਹੋਤਿ. ਕਸ੍ਮਾ, ਅਙ੍ਗਨਿਯਮਟ੍ਠਾਨਤ੍ਤਾ. ਤੇਨਾਹ ‘‘ਏਤੇਨਾ’’ਤਿਆਦਿਂ. ‘‘ਚਤੁਰਙ੍ਗੀਕੋਵ ਵੁਤ੍ਤੋ’’ਤਿ ਤਸ੍ਸ ਚਤ੍ਤਾਰੋ ਸਮ੍ਭਾਰਾ. ਅਗਮਨੀਯ ਵਤ੍ਥੁ, ਤਸ੍ਮਿਂ ਸੇਵਨ ਚਿਤ੍ਤਂ, ਸੇਵਨਪ੍ਪਯੋਗੋ, ਮਗ੍ਗੇਨ ਮਗ੍ਗਪ੍ਪਟਿਪਤ੍ਤਿ ਅਧਿਵਾਸਨਨ੍ਤਿ. ‘‘ਸਾ’’ਤਿ ਭਿਕ੍ਖੁਨੀ. ‘‘ਰਕ੍ਖਿਤਾਸੁ ਸਙ੍ਗਹਿਤਾ’’ਤਿ ਮਾਤੁਰਕ੍ਖਿਤ ਪਿਤੁ ਰਕ੍ਖਿਤਾਦੀਸੁ ਸਙ੍ਗਹਿਤਾ. ‘‘ਟੀਕਾਸੁ ਪਨਾ’’ਤਿ ਸੁਤ੍ਤਨ੍ਤਟੀਕਾਸੁ ਪਨ. ‘‘ਸਾ’’ਤਿ ਭਿਕ੍ਖੁਨੀ. ਪਾਸਣ੍ਡਾ ਵੁਚ੍ਚਨ੍ਤਿ ਦ੍ਵਾਸਟ੍ਠਿ ਦਿਟ੍ਠਿਗਤਾਦੀਨਿ. ਤਂ ਵਾਦਿਨੋ ਪਾਸਣ੍ਡਿਯਾ ਨਾਮ. ਤੇਸਂ ਧਮ੍ਮੋ ਪਾਸਣ੍ਡਿਯ ਧਮ੍ਮੋ ਨਾਮ. ਮਿਚ੍ਛਾਚਾਰੋਪਿ ਦੁਸ੍ਸੀਲਾਯ ਇਤ੍ਥਿਯਾ ਵੀਤਿਕ੍ਕਮੋ ਅਪ੍ਪਸਾਵਜ੍ਜੋ. ਤਤੋ ਗੋਰੂਪ ਸੀਲਿਕਾਯ ਮਹਾਸਾਵਜ੍ਜੋ. ਤਤੋ ਸਰਣਙ੍ਗਤਾਯ, ਪਞ੍ਚ ਸਿਕ੍ਖਾ ਪਦਿਕਾਯ, ਸਾਮਣੇਰਿਯਾ, ਪੁਥੁਜ੍ਜਨ ਭਿਕ੍ਖੁਨਿਯਾਤਿਆਦਿ. ਅਟ੍ਠਕਥਾ ਪਾਠੇ. ‘‘ਏਤ੍ਥਾ’’ਤਿ ਇਮਸ੍ਮਿਂ ਅਕੁਸਲਕਾਯਕਮ੍ਮੇ. ‘‘ਨ ਗਹਿਤਂ’’ਤਿ ਥੇਰੇਨ ਵਾ ਅਟ੍ਠਕਥਾਚਰਿਯੇਹਿ ਵਾ ਨ ਗਹਿਤਂ. ਸੁਰਞ੍ਚ ਮੇਰਯਞ੍ਚ ਪਿਵਨ੍ਤਿ ਏਤੇਨਾਤਿ ਸੁਰਾਮੇਰਯ ਪਾਨਂ. ਤਦਜ੍ਝੋਹਰਣ ਚੇਤਨਾ ਕਮ੍ਮਂ. ‘‘ਸਬ੍ਬ ਲਹੁਕੋ’’ਤਿ ਸਬ੍ਬੇਸਂ ਸੁਰਾਪਾਨ ਕਮ੍ਮ ਵਿਪਾਕਾਨਂ ਮਜ੍ਝੇ ਯੋ ਵਿਪਾਕੋ ਲਹੁਕਤਰੋ, ਪਵਤ੍ਤਿਵਿਪਾਕਮਤ੍ਤੋਤਿ ਵੁਤ੍ਤਂ ਹੋਤਿ. ‘‘ਉਮ੍ਮਤ੍ਤਕਸਂਵਤ੍ਤਨਿਕੋ’’ਤਿ ਉਮ੍ਮਤ੍ਤਭਾਵ ਸਂਵਤ੍ਤਨਿਕੋ. ‘‘ਪਞ੍ਚਪੀ’’ਤਿ ਸੁਰਾਪਾਨ ਕਮ੍ਮੇਨ ਸਹ ਪਞ੍ਚਪਿ. ਮੂਲਟੀਕਾ ਵਚਨੇ. ‘‘ਤਸ੍ਸਾ’’ਤਿ ਸੁਰਾਪਾਨ ਕਮ੍ਮਸ੍ਸ. ਪਟਿਸਮ੍ਭਿਦਾ ਮਗ੍ਗਟੀਕਾਯਂ ਇਮਸ੍ਸ ਵਾਕ੍ਯਸ੍ਸ ਸਂਵਣ੍ਣਨਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥ ‘‘ਤਬ੍ਬਿ ਰਮਣਾਦਯੋ ਚਾ’’ਤਿ ਤਤੋ ਸੁਰਾਪਾਨਤੋ ਵਿਰਮਣਾਦਯੋ ਚ. ‘‘ਮਦਸ੍ਸਾ’’ਤਿ ਮਜ੍ਜਨਸ੍ਸ. ‘‘ਅਪੁਞ੍ਞਪਥਸ੍ਸਾ’’ਤਿ ਅਕੁਸਲ ਕਮ੍ਮ ਪਥਸ੍ਸ. ‘‘ਤਬ੍ਬਿਰਤਿ ਪੀ’’ਤਿ ਤਤੋ ਸੁਰਾਪਾਨਤੋ ਵਿਰਤਿਪਿ. ‘‘ਨਿਮ੍ਮਦਤਾਯਾ’’ਤਿ ਮਜ੍ਜਨਰਹਿਤ ਭਾਵਸ੍ਸ. ‘‘ਸਾ’’ਤਿ ਨਿਮ੍ਮਦਤਾ. ‘‘ਪੁਞ੍ਞਪਥਸ੍ਸਾ’’ਤਿ ਕੁਸਲਕਮ੍ਮ ਪਥਸ੍ਸ. ‘‘ਇਤੀ’’ਤਿ ਤਸ੍ਮਾ. ‘‘ਤਾਨੀ’’ਤਿ ਸੁਰਾਪਾਨ ਕਮ੍ਮਤਬ੍ਬਿਰਤਿ ਕਮ੍ਮਾਨਿ. ‘‘ਨ ਇਤਰਂ’’ਤਿ ਕਮ੍ਮਪਥੇਹਿ ਅਸਮ੍ਬਨ੍ਧਂ. ਸੁਰਾਪਾਨਂ ਵਿਸੁਂ ਪਟਿਸਨ੍ਧਿਂ ਨ ਦੇਤੀਤਿ ਯੋਜਨਾ. ਤਬ੍ਬਿਰਤਿ ਕਮ੍ਮੇ ਪਨ ਸਚੇ ਇਦਂ ਸੁਰਾਪਾਨਂ ਨਾਮ ਪਾਪਕਮ੍ਮਂ ਦੁਚ੍ਚਰਿਤਨ੍ਤਿ ਞਤ੍ਵਾ ਸਮਾਦਾਨ ਵਿਰਤਿ ਸਮ੍ਪਤ੍ਤਵਿਰਤਿ ਵਸੇਨ ਤਂ ਸਿਕ੍ਖਾਪਦਂ ਰਕ੍ਖਤਿ. ਤਂ ਸੀਲਂ ਅਞ੍ਞੇਹਿ ਪੁਞ੍ਞਪਥੇਹਿ ਅਸਮ੍ਬਨ੍ਧਮ੍ਪਿ ਵਿਸੁਂ ਪਟਿਸਨ੍ਧਿਂ ਨ ਦੇਤੀਤਿ ਨ ਵਤ੍ਤਬ੍ਬਂ. ‘‘ਏਵਮਿਦਂ ਪੀ’’ਤਿ ਏਵਂ ਇਦਮ੍ਪਿ ਸੁਰਾਪਾਨ ਕਮ੍ਮਂ ਕਮ੍ਮ ਪਥਪਤ੍ਤਸ੍ਸ ਕਮ੍ਮਸ੍ਸ ਪਰਿਵਾਰਭੂਤਂ ਏਵ ਪਟਿਸਨ੍ਧਿਂ ਜਨੇਤੀਤਿ ਯੋਜਨਾ. ‘‘ਤਤ੍ਥਾ’’ਤਿ ਕਮ੍ਮਪਥਸੁਤ੍ਤੇਸੁ. ਸਰੂਪਤੋ ਨ ਵੁਤ੍ਤਨ੍ਤਿ ਚ ਸਕ੍ਕਾ ਵਤ੍ਤੁਨ੍ਤਿ ਸਮ੍ਬਨ੍ਧੋ. ‘‘ਯਂ’’ਤਿ ਯਂ ਸੁਰਾਪਾਨ ਕਮ੍ਮਂ. ‘‘ਤਤ੍ਥਾ’’ਤਿ ਤੇਸੁ ਕਮ੍ਮਪਥਸੁਤ੍ਤੇਸੁ. ਕਮ੍ਮ ਜਨਨਂ ਨਾਮ ਦੁਚ੍ਚਰਿਤ ਕਮ੍ਮਾਨਂ ਜਨਨਂ. ਸਕ੍ਕੇਨ ਦੇਵਾਨ ਮਿਨ੍ਦੇਨ ਤਸ੍ਸ ਅਪਾਯਗਾਮਿਤਾ ਵੁਤ੍ਤਾਤਿ ਸਮ੍ਬਨ੍ਧੋ. ਤਸ੍ਸਾਸੁਰਾਯ ਪੁਣ੍ਣਂ ਇਮਂ ਸੁਰਾਕੁਮ੍ਭਂਕਿਣਾਥ. ਮੂਲਂ ਦੇਥ ਗਣ੍ਹਾਥਾਤਿ ਅਤ੍ਥੋ. ‘‘ਤਸ੍ਸਾ’’ਤਿ ਸੁਰਾਪਾਨ ਕਮ੍ਮਸ੍ਸ. ਅਪਾਯਂ ਗਮੇਤਿ ਸਮ੍ਪਾਪੇਤੀਤਿ ਅਪਾਯ ਗਾਮੀ. ‘‘ਯਦਿਦਂ’’ਤਿ ਯਾ ਅਯਂ ਯਥਾਲਾਭ ਯੋਜਨਾ ਅਤ੍ਥਿ. ਮੂਲਟੀਕਾ ਵਚਨੇ. ‘‘ਕਮ੍ਮਸਹਜਾਤਾ’’ਤਿ ਅਕੁਸਲ ਕਮ੍ਮਸਹਜਾਤਾ ਤਣ੍ਹਾ. ‘‘ਤੇਸਂ’’ਤਿ ਤੇਸਂ ਪਞ੍ਚਨ੍ਨਂ ਕਮ੍ਮਾਨਂ. ‘‘ਕੋਟ੍ਠਾਸਤੋ’’ਤਿ ਧਮ੍ਮਸਙ੍ਗਣਿਯਂ ਫਸ੍ਸੋ ਹੋਤਿ, ਵੇਦਨਾ ਹੋਤੀਤਿਆਦਿਨਾ ਵੁਤ੍ਤੇ ਧਮ੍ਮੁਦ੍ਦੇਸਵਾਰੇ ਝਾਨਾਦਿਕੋਟ੍ਠਾਸਾ ਨਾਮ ਆਗਤਾ. ਤੇਸੁ ਪਞ੍ਚ ਸਿਕ੍ਖਾਪਦਾ ਕੋਟ੍ਠਾਸਤੋ ਕਮ੍ਮਪਥ ਕੋਟ੍ਠਾਸਿਕਾ ਏਵ. ਕਮ੍ਮਪਥ ਕੋਟ੍ਠਾਸੇ ਅਨ੍ਤੋਗਧਾਤਿ ਅਤ੍ਥੋ. ‘‘ਪੁਰਿਮਾਨਂ ਚਤੁਨ੍ਨਂ’’ਤਿ ਪਾਣਾਤਿ ਪਾਤਾਦੀਨਂ ਚਤੁਨ੍ਨਂ ਕਮ੍ਮਾਨਂ. ‘‘ਪਟਿਕ੍ਖਿਤ੍ਤੋ’’ਤਿ ਤਸ੍ਸ ਕਮ੍ਮਪਥਭਾਵੋ ਪਟਿਕ੍ਖਿਤ੍ਤੋ. ‘‘ਤਤੀਯਂ’’ਤਿ ਤਤੀਯ ਸੁਤ੍ਤਂ. ਏਤਾਸੁਪਿ ਚ ਅਟ੍ਠਕਥਾਸੁ.

ਕਾਯਕਮ੍ਮਾਦੀਸੁ. ਸਸਮ੍ਭਾਰਕਾਯੋ ਨਾਮ ਸਕਲੋ ਰੂਪਕਾਯੋ. ਪਸਾਦਕਾਯੋ ਨਾਮ ਕਾਯਪਸਾਦੋ ਏਵ. ਕਾਯ ਵਿਞ੍ਞਤ੍ਤਿ ਚੋਪਨਕਾਯੋ ਨਾਮ. ‘‘ਚੋਪਨ’’ਨ੍ਤਿ ਚ ਚਲਨਂ ਵੁਚ੍ਚਤਿ. ‘‘ਸੋ ਯੇਵਾ’’ਤਿ ਚੋਪਨਕਾਯੋਯੇਵ. ਕਾਯਕਮ੍ਮ ਨਾਮ ਲਾਭੋ ਚ ਹੋਤਿ, ਤਸ੍ਮਾ ਸੋ ਕਮ੍ਮਾਨਂ ਪਵਤ੍ਤਿ ਮੁਖਨ੍ਤਿ ਵੁਚ੍ਚਤੀਤਿ ਯੋਜਨਾ. ‘‘ਕਮ੍ਮਾਨਿ ਵਿਸੇਸੇਤੁਂ’’ਤਿ ਇਦਂ ਕਾਯਕਮ੍ਮਂ ਨਾਮ, ਇਦਂ ਵਚੀਕਮ੍ਮਂ ਨਾਮਾਤਿ ਵਿਸੇਸੇਤੁਂ ਨਿਯਮੇਤੁਂ. ‘‘ਸਕ੍ਕੋਨ੍ਤੀ’’ਤਿ ਕਮ੍ਮਾਨਿ ਵਿਸੇਸੇਤੁਂ ਸਕ੍ਕੋਨ੍ਤਿ. ਤਸ੍ਮਾ ਕਾਯਦ੍ਵਾਰੇ ਵੁਤ੍ਤਿਤੋਤਿ ਚ ਵਚੀਦ੍ਵਾਰੇ ਵੁਤ੍ਤਿਤੋਤਿ ਚ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਮਿਚ੍ਛਾਚਾਰਸ੍ਸ ਵਚੀਦ੍ਵਾਰੇ ਅਪ੍ਪਵਤ੍ਤਿਤੋ ‘‘ਪੁਰਿਮਾਨਿ ਦ੍ਵੇ’’ਤਿ ਵੁਤ੍ਤਂ. ‘‘ਮਜ੍ਝਿਮਾਨਿ ਚਤ੍ਤਾਰੀ’’ਤਿ ਮੁਸਾਵਾਦਾਦੀਨਿ ਚਤ੍ਤਾਰਿ ਵਚੀਕਮ੍ਮਾਨਿ. ‘‘ਛਬ੍ਬਿਧਾਨਿ ਤਾਨਿ ਵਜ੍ਜਾਨੀਤਿ’’ਤਿ ‘ਕਾਯਕਮ੍ਮਂ ਜਹੇਯ੍ਯੁ’ਨ੍ਤਿਆਦੀਨਿ ਛਬ੍ਬਿਧਾਨਿ ਤਾਨਿ ਵਜ੍ਜਾਨਿ. ਕਥਂ ਏਕਮੇਕੇਨ ਬਾਹੁਲ੍ਲ ਸਦ੍ਦੇਨ ਛਬ੍ਬਿਧਾਨਿ ਤਾਨਿ ਵਜ੍ਜੇਤੀਤਿ. ਅਨ੍ਵਯਤੋ ਚ ਬ੍ਯਤਿਰੇਕਤੋ ਚ ਵਜ੍ਜੇਤਿ. ਕਥਂ, ਪਾਣਾਤਿਪਾਤ ਕਮ੍ਮਂ ਕਦਾਚਿ ਅਪ੍ਪਕੇਨ ਵਚੀਦ੍ਵਾਰੇ ਉਪ੍ਪਨ੍ਨਮ੍ਪਿ ਕਾਯਦ੍ਵਾਰੇ ਏਵ ਪਵਤ੍ਤਿ ਬਹੁਲਤ੍ਤਾ ਕਾਯਕਮ੍ਮਮੇਵ ਹੋਤਿ. ਵਚੀਕਮ੍ਮ ਸਙ੍ਖ੍ਯਂ ਨ ਗਚ੍ਛਤਿ. ਦ੍ਵੇ ਵਾ ਅਸ੍ਸ ਨਾਮਾਨਿ ਨ ਭਵਨ੍ਤਿ. ਵਚੀਦ੍ਵਾਰੇ ਪਨ ਅਪ੍ਪਕਵੁਤ੍ਤਿਤ੍ਤਾ ਵਚੀਕਮ੍ਮਂ ਨਾਮ ਨ ਹੋਤਿ. ਕਾਯਕਮ੍ਮਨ੍ਤਿ ਨਾਮਂ ਨ ਜਹਤਿ. ਦ੍ਵੇ ਵਾ ਅਸ੍ਸ ਨਾਮਾਨਿ ਨ ਭਵਨ੍ਤੀਤਿ ਏਵਂ ਏਕੇਨ ਕਾਯਦ੍ਵਾਰੇ ਬਾਹੁਲ੍ਲ ਵੁਤ੍ਤਿਵਚਨੇਨ ਪਾਣਾਤਿਪਾਤ ਕਮ੍ਮੇ ਛਬ੍ਬਿਧਾਨਿ ਵਜ੍ਜਾਨਿ ਵਜ੍ਜੇਤੀਤਿ. ਏਵਂ ਸੇਸੇਸੁ. ਵਨਚਰਕੋ ਨਾਮ ਵਨਲੁਦ੍ਦਕੋ. ਸੋ ਪਨ ਕਦਾਚਿ ਅਪ੍ਪਕੇਨ ਗਾਮੇ ਚਰਨ੍ਤੋਪਿ ਵਨੇ ਬਾਹੁਲ੍ਲ ਚਾਰਿਤ੍ਤਾ ਵਨਚਰਕੋ ਏਵ ਹੋਤਿ. ਗਾਮਚਰਕੋਤਿ ਨਾਮਂ ਨ ਲਭਤਿ. ਦ੍ਵੇ ਵਾ ਅਸ੍ਸ ਨਾਮਾਨਿ ਨ ਭਵਨ੍ਤਿ. ਏਵਂ ਸਙ੍ਗਾਮਾਵਚਰਕਾਪਿ. ਸਙ੍ਗਾਮਾਵਚਰੋ ਨਾਮ ਸਙ੍ਗਾਮੇ ਬਾਹੁਲ੍ਲਾਵਚਰੋ ਹਤ੍ਥੀ ਵੁਚ੍ਚਤਿ. ਏਤ੍ਥ ਮਨੋਦ੍ਵਾਰਂ ਸਬ੍ਬ ਕਮ੍ਮ ਸਾਧਾਰਣਤ੍ਤਾ ਕਮ੍ਮਾਨਿ ਵਿਸੇਸੇਤੁਂ ਨ ਸਕ੍ਕੋਤੀਤਿ ਵੁਤ੍ਤਂ. ਏਵਞ੍ਚਸਤਿ, ‘ਅਭਿਜ੍ਝਾ ਬ੍ਯਾਪਾਦੋ ਮਿਚ੍ਛਾਦਿਟ੍ਠਿ ਚੇਤਿ ਮਨਸ੍ਮਿਂ ਵੁਤ੍ਤਿਤੋ ਮਨੋਕਮ੍ਮਂ ਨਾਮਾ’ਤਿ ਇਦਂ ਨ ਵਤ੍ਤਬ੍ਬਨ੍ਤਿ. ਨੋ ਨ ਵਤ੍ਤਬ੍ਬਂ. ਕਮ੍ਮ ਸਿਦ੍ਧਿਂ ਪਟਿਚ੍ਚ ਅਞ੍ਞਦ੍ਵਾਰੇਹਿ ਅਸਾਧਾਰਣਤ੍ਤਾ. ਤੇਨਾਹ ‘‘ਮਨੋਕਮ੍ਮਾਨਿ ਪਨਾ’’ਤਿਆਦਿਂ. ‘‘ਸਿਦ੍ਧਂ’’ਤਿ ਨਿਬ੍ਬਤ੍ਤਂ. ‘‘ਕਾਯਕਮ੍ਮਦ੍ਵਾਰਂ’’ਤਿ ਏਤ੍ਥ ਤਤ੍ਥ ਚੋਪਨਕਾਯੋ ਕਾਯਕਮ੍ਮਾਨਂ ਪਵਤ੍ਤਿ ਬਹੁਲਤ੍ਤਾ ਕਾਯਕਮ੍ਮ ਦ੍ਵਾਰਂ ਨਾਮ. ਚੋਪਨਵਾਚਾ ਤਤ੍ਥ ਵਚੀਕਮ੍ਮਾਨਂ ਪਵਤ੍ਤਿ ਬਹੁਲਤ੍ਤਾ ਵਚੀਕਮ੍ਮਦ੍ਵਾਰਂ ਨਾਮ. ਕੁਸਲਾ ਕੁਸਲ ਜਵਨ ਚਿਤ੍ਤਂ ਪਨ ਮਨੋਕਮ੍ਮਾਨਂ ਤਤ੍ਥੇਵ ਕਮ੍ਮ ਕਿਚ੍ਚ ਸਿਦ੍ਧਿਤੋ ਮਨੋਕਮ੍ਮ ਦ੍ਵਾਰਂ ਨਾਮਾਤਿ ਏਵਂ ਕਮ੍ਮੇਨ ਦ੍ਵਾਰ ਵਵਤ੍ਥਾਨਂ ਵੇਦਿਤਬ੍ਬਂ. ‘‘ਤਸ੍ਸ ਦ੍ਵਾਰਸ੍ਸ ਨਾਮਂ ਭਿਨ੍ਦਿਤੁਂ ਵਾ’’ਤਿ ਕਾਯੋਤਿ ਨਾਮਂ ਭਿਨ੍ਦਿਤੁਂ ਵਾ. ‘‘ਅਤ੍ਤਨੋ ਨਾਮਂ ਦਾਤੁਨ੍ਤਿ ਵਾ’’ਤਿ ਵਚੀਤਿ ਨਾਮਂ ਤਸ੍ਸ ਦਾਤੁਂ ਵਾ. ‘‘ਬ੍ਰਾਹ੍ਮਣ ਗਾਮਾਦੀਨਂ ਬ੍ਰਾਹ੍ਮਣ ਗਾਮਾਦਿਭਾਵੋ ਵਿਯਾ’’ਤਿ ਤਸ੍ਮਿਂ ਅਞ੍ਞਕੁਲੇਸੁ ਵਸਨ੍ਤੇਸੁਪਿ ਬ੍ਰਾਹ੍ਮਣ ਕੁਲਬਹੁਲਤ੍ਤਾ ਬ੍ਰਾਹ੍ਮਣ ਗਾਮੋਤ੍ਵੇਵ ਨਾਮਂ ਹੋਤਿ. ਤਸ੍ਮਿਂ ਵਨੇ ਅਞ੍ਞਰੁਕ੍ਖੇਸੁ ਸਨ੍ਤੇਸੁਪਿ ਖਦੀਰਰੁਕ੍ਖ ਬਹੁਲਤ੍ਤਾ ਖਦੀਰਵਨਨ੍ਤ੍ਵੇਵ ਨਾਮਂ ਹੋਤੀਤਿ ਵਤ੍ਤਬ੍ਬਨ੍ਤਿ. ਕਾਯਕਮ੍ਮਂ ਨਿਟ੍ਠਿਤਂ.

੧੪੯. ਵਚੀਕਮ੍ਮੇ. ‘‘ਮੁਸਾ ਵਦਨ੍ਤੀ’’ਤਿ ਅਭੂਤਤੋ ਵਦਨ੍ਤਿ. ਪਿਸਤਿ ਏਤਾਯਾਤਿ ਪਿਸੁਣਾ. ‘‘ਨਿਰੁਤ੍ਤਿ ਨਯੇਨਾ’’ਤਿ ਏਤ੍ਥ ਪਿਯਸੁਞ੍ਞ ਕਰਣਾਤਿ ਵਤ੍ਤਬ੍ਬੇ ਅਕ੍ਖਰ ਲੋਪਕਰਣਂ ਨਿਰੁਤ੍ਤਿ ਨਯੋ ਨਾਮ. ‘‘ਯੇਨਾ’’ਤਿ ਯੇਨਜਨੇਨ. ‘‘ਸਮ੍ਫਂ’’ਤਿ ਏਤ੍ਥ ਸਂਸਦ੍ਦੋ ਸਮ੍ਮਤਿ ਦੁਕ੍ਖਂ ਏਤੇਨਾਤਿ ਅਤ੍ਥੇਨ ਸੁਖੇ ਹਿਤੇ ਵਤ੍ਤਤੀਤਿ ਆਹ ‘‘ਸਂ ਸੁਖਂ ਹਿਤਞ੍ਚਾ’’ਤਿ. ਕੀਦਿਸਂ ਸੁਖਂ ਹਿਤਞ੍ਚਾਤਿ ਆਹ ‘‘ਸਾਧੁਜਨੇਹਿ ਅਧਿਗਨ੍ਤਬ੍ਬਂ’’ਤਿ. ਏਤੇਨ ਪਾਪਜਨੇਹਿ ਅਧਿਗਨ੍ਤਬ੍ਬਂ ਹਿਤਸੁਖਂ ਪਟਿਕ੍ਖਿਪਤਿ. ਹਿਤਸੁਖਸ੍ਸ ਵਿਨਾਸਨਂ ਨਾਮ ਤਸ੍ਸ ਆਗਮਨ ਮਗ੍ਗਭਿਨ੍ਦਨਨ੍ਤਿ ਆਹ ‘‘ਹਿਤਸੁਖ ਮਗ੍ਗਂ ਭਿਨ੍ਦਤੀ’’ਤਿ. ‘‘ਤਂ ਵਾ’’ਤਿ ਏਤ੍ਥ ‘‘ਤਂ’’ਤਿ ਹਿਤਸੁਖਂ. ‘‘ਅਤ੍ਥ ਧਮ੍ਮਾ ਪਗਤਸ੍ਸਾ’’ਤਿ ਅਤ੍ਥਤੋ ਚ ਧਮ੍ਮਤੋ ਚ ਅਪਗਤਸ੍ਸ. ‘‘ਪਟਿਭਾਣ ਚਿਤ੍ਤਸ੍ਸਾ’’ਤਿ ਸੁਣਨ੍ਤਾਨਂ ਚਿਤ੍ਤਰਤਿ ਚਿਤ੍ਤਹਾਸਵਡ੍ਢਨਤ੍ਥਾਯ ਪਟਿਭਾਣਞ੍ਞਾਣੇਨ ਚਿਤ੍ਤੀਕਤਸ੍ਸ. ‘‘ਯਤ੍ਥਾ’’ਤਿ ਯਸ੍ਮਿਂ ਕਥਾ ਮਗ੍ਗੇ. ‘‘ਅਤ੍ਥ ਧਮ੍ਮ ਵਿਨਯਪਦਂ’’ਤਿ ਅਤ੍ਥ ਪਦਞ੍ਚ ਧਮ੍ਮਪਦਞ੍ਚ ਵਿਨਯ ਪਦਞ੍ਚ. ਤਤ੍ਥ ਅਤ੍ਥੋ ਨਾਮ ਆਰੋਗ੍ਯਸਮ੍ਪਤ੍ਤਿ, ਮਿਤ੍ਤਸਮ੍ਪਤ੍ਤਿ, ਪਞ੍ਞਾਸਮ੍ਪਤ੍ਤਿ, ਧਨ ਸਮ੍ਪਤ੍ਤਿ, ਭੋਗਸਮ੍ਪਤ੍ਤਿਯੋ. ਤਾਸੁ ਕੋਸਲ੍ਲਜਨਕਂ ਵਾਕ੍ਯਪਦਂ ਅਤ੍ਥਪਦਂ ਨਾਮ. ਇਦਂ ਸੁਚਰਿਤਂ ਨਾਮ ਸਗ੍ਗਸਂਵਤ੍ਤਨਿਕਂ, ਇਦਂ ਦੁਚ੍ਚਰਿਤਂ ਨਾਮ ਅਪਾਯ ਸਂਵਤ੍ਤਨਿਕਨ੍ਤਿ ਏਵਂ ਸਭਾਵ ਧਮ੍ਮੇਸੁ ਕੋਸਲ੍ਲ ਜਨਕਂ ਵਾਕ੍ਯ ਪਦਂ ਧਮ੍ਮ ਪਦਂ ਨਾਮ. ਏਵਂ ਚਿਤ੍ਤਂ ਦਮਿਤਬ੍ਬਂ, ਏਵਂ ਇਨ੍ਦ੍ਰਿਯਾਨਿ ਦਮਿਤਬ੍ਬਾਨਿ, ਏਵਂ ਰਾਗੋ ਵਿਨੇਤਬ੍ਬੋ, ਏਵਂ ਦੋਸੋ ਵਿਨੇਤਬ੍ਬੋਤਿਆਦਿਨਾ ਵਿਨੇਤਬ੍ਬੇਸੁ ਵਿਨਯ ਕੋਸਲ੍ਲਜਨਕਂ ਵਾਕ੍ਯਪਦਂ ਵਿਨਯ ਪਦਂ ਨਾਮ. ਯਤ੍ਥ ਏਵਰੂਪਂ ਅਤ੍ਥ ਪਦਞ੍ਚ ਧਮ੍ਮ ਪਦਞ੍ਚ ਵਿਨਯ ਪਦਞ੍ਚ ਕਿਞ੍ਚਿ ਨਤ੍ਥਿ. ਤਸ੍ਸ ਵਾਚਾ ਵਤ੍ਥੁਮਤ੍ਤਸ੍ਸ ਏਤਂਨਾਮਂ ਹੋਤੀਤਿ ਯੋਜਨਾ. ‘‘ਸਮ੍ਫਂ’’ਤਿ ਵੁਤ੍ਤਪ੍ਪਕਾਰਂ ਨਿਰਤ੍ਥਕਵਚਨਂ. ‘‘ਤਤ੍ਥਾ’’ਤਿ ਤੇਸੁ ਵਚੀਕਮ੍ਮੇਸੁ. ਵਿਸਂਵਾਦਨਂ ਨਾਮ ਵਿਰਜ੍ਝਾ ਪਨਂ. ਵਿਸਂਵਾਦਕੋ ਨਾਮ ਵਿਰਜ੍ਝਾਪਨਕੋ. ਅਤ੍ਥਂ ਭਞ੍ਜਤਿ ਵਿਨਾਸੇਤੀਤਿ ਅਤ੍ਥ ਭਞ੍ਜਨਕੋ. ‘‘ਕਮ੍ਮਪਥਭੇਦੋ’’ਤਿ ਪਟਿਸਨ੍ਧਿ ਜਨਕੋ ਕਮ੍ਮਪਥਵਿਸੇਸੋ. ‘‘ਇਤਰੋ’’ਤਿ ਅਤ੍ਥ ਭਞ੍ਜਨਕਤੋ ਅਞ੍ਞੋ ਮੁਸਾਵਾਦੋ. ‘‘ਕਮ੍ਮ ਮੇਵਾ’’ਤਿ ਪਵਤ੍ਤਿ ਵਿਪਾਕ ਜਨਕਂ ਵਚੀਕਮ੍ਮਮੇਵ. ‘‘ਰਜਾਨਂ’’ਤਿ ਧੂਲੀਨਂ. ਤਾਸੁ ਸੁਗਤਿ ਦੁਗ੍ਗਤੀਸੁ ਉਪ੍ਪਜ੍ਜਨ੍ਤੀਤਿ ਤਦੁਪ੍ਪਜ੍ਜਨਕਾਨਿ. ‘‘ਪਥਭੂਤਤ੍ਤਾ’’ਤਿ ਉਪ੍ਪਤ੍ਤਿਮਗ੍ਗਭੂਤਤ੍ਤਾ. ‘‘ਭੇਦ ਪੁਰੇਕ੍ਖਾਰੇਨਾ’’ਤਿ ਮਿਤ੍ਤਭੇਦਪੁਰੇਕ੍ਖਾਰੇਨ. ਮਿਤ੍ਤਂ ਭਿਨ੍ਦਤੀਤਿ ਭੇਦਕੋ. ‘‘ਸਂਕਿਲਿਟ੍ਠ ਚੇਤਨਾ’’ਤਿ ਅਤ੍ਥ ਪੁਰੇਕ੍ਖਾਰ ਧਮ੍ਮ ਪੁਰੇਕ੍ਖਾਰ ਵਿਨਯ ਪੁਰੇਕ੍ਖਾਰ ਅਨੁਸਾਸਨਿ ਪੁਰੇਕ੍ਖਾਰ ਰਹਿਤਾ ਕੇਵਲਂ ਭੇਦਪੁਰੇਕ੍ਖਾਰ ਚੇਤਨਾ ਸਂਕਿਲਿਟ੍ਠ ਚੇਤਨਾ ਨਾਮ. ‘‘ਪਰੇ ਭਿਨ੍ਨੇ ਯੇਵਾ’’ਤਿ ਪਰਜਨੇ ਪਰਜਨੇਨ ਮਿਥੁਭੇਦਵਸੇਨ ਭਿਨ੍ਨੇਯੇਵ. ‘‘ਯਂ ਕਿਞ੍ਚੀ’’ਤਿ ਯਂ ਕਿਞ੍ਚਿ ਅਕ੍ਕੋਸਵਤ੍ਥੁ. ‘‘ਅਯਂ ਪੀ’’ਤਿ ਅਯਂ ਫਰੁਸਵਾਚਾਪਿ. ਏਵਂ ਅਕ੍ਕੋਸਨ ਕਮ੍ਮਂਪਿ ਅਕ੍ਕੋਸਿਤਬ੍ਬਸ੍ਸ ਦੂਰੇ ਠਿਤਸ੍ਸਪਿ ਮਤਸ੍ਸਪਿ ਸਮ੍ਪਜ੍ਜਤੀਤਿ ਯੋਜਨਾ. ਅਨਤ੍ਥਂ ਨਿਰਤ੍ਥਕਵਾਚਾ ਵਤ੍ਥੁ ਮਤ੍ਤਂ ਵਿਞ੍ਞਾਪੇਤੀਤਿ ਅਨਤ੍ਥਵਿਞ੍ਞਾਪਨਕੋ. ‘‘ਸਚ੍ਚਤੋ ਗਣ੍ਹਨ੍ਤੇ ਯੇਵਾ’’ਤਿ ਯਥਾ ਸੋ ਕਥੇਤਿ, ਤਥਾ ਤਂ ਵਤ੍ਥੁ ਉਪ੍ਪਨ੍ਨ ਪੁਬ੍ਬਨ੍ਤਿ ਏਵਂ ਸਚ੍ਚਤੋ ਗਣ੍ਹਨ੍ਤੇਯੇਵ. ਕੇਚਿ ਸਚ੍ਚਤੋ ਗਣ੍ਹਿਤ੍ਵਾ ਕਿਞ੍ਚਿ ਵਤ੍ਥੁਂ ਪੂਜਨੀਯ ਠਾਨੇ ਠਪੇਤ੍ਵਾ ਥੋਮੇਨ੍ਤਾ ਪੂਜੇਨ੍ਤਾ ਵਨ੍ਦਨ੍ਤਾ ਪਰਿਹਰਨ੍ਤਿ. ਸਮ੍ਪਰਾਯਿ ਕਤ੍ਥਾਯ ਤਂ ਸਰਣਂ ਗਚ੍ਛਨ੍ਤਿ. ਸਬ੍ਬਮੇਤਂ ਨਿਰਤ੍ਥਕਂ ਹੋਤਿ. ‘‘ਤਦਸ੍ਸਾਦਵਸੇਨਾ’’ਤਿ ਤਂ ਰਾਜਕਥਾਦਿਂ ਤਤ੍ਥ ਚਿਤ੍ਤਰਤਿਂ ਲਭਿਤ੍ਵਾ ਅਸ੍ਸਾਦਵਸੇਨ ਕਥੇਨ੍ਤਸ੍ਸੇਵ ਕਮ੍ਮਂ ਹੋਤਿ. ਅਨਿਚ੍ਚ ਲਕ੍ਖਣ ਵਿਭਾਵਨਤ੍ਥਾਯ ਵਾ ਰਤਨਤ੍ਤਯ ਗੁਣਵਿਭਾਵਨਤ੍ਥਾਯ ਵਾ ਪਾਪ ਗਰਹ ਕਲ੍ਯਾਣ ਸਮ੍ਭਾਵਨਾਯ ਵਾ ਕਥੇਨ੍ਤਸ੍ਸ ਪਨ ਸਤ੍ਥਕਮੇਵ ਹੋਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਅਤ੍ਥ ਧਮ੍ਮ ਵਿਨਯ ਨਿਸ੍ਸਿਤਂ’’ਤਿਆਦਿਂ. ਸੇਸਮੇਤ੍ਥ ਕਾਯਦ੍ਵਾਰੇ ਦੀਪਿਤਮੇਵ.

੧੫੦. ਮਨੋਕਮ੍ਮੇ. ‘‘ਅਭਿਝਾਯਨ੍ਤੀ’’ਤਿ ਅਤਿਰੇਕਤਰਂ ਝਾਯਨ੍ਤਿ, ਚਿਨ੍ਤੇਨ੍ਤਿ, ਓਲੋਕੇਨ੍ਤਿ ਵਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਅਸ੍ਸਾਦਮਤ੍ਤੇ ਅਠਤ੍ਵਾ’’ਤਿਆਦਿਮਾਹ. ‘‘ਬ੍ਯਾਪਾਦੇਨ੍ਤੀ’’ਤਿ ਵਿਗਤਭਾਵਂ ਆਪਾਦੇਨ੍ਤਿ ਸਮ੍ਪਾਪੇਨ੍ਤਿ. ਤਞ੍ਚ ਆਪਾਦਨਂ ਨ ਕਾਯਵਾਚਾਹਿ. ਅਥ ਖੋ ਚਿਤ੍ਤੇਨੇਵਾਤਿ ਵੁਤ੍ਤਂ ‘‘ਚਿਨ੍ਤੇਨ੍ਤੀ’’ਤਿ. ‘‘ਤਬ੍ਬਿ ਪਰੀਤਤੋ’’ਤਿ ਸਪ੍ਪੁਰਿਸ ਪਞ੍ਞਤ੍ਤਿਤੋ ਵਿਪਰੀਤੇਨ. ‘‘ਤਤ੍ਥਾ’’ਤਿ ਤੇਸੁ ਮਨੋਕਮ੍ਮੇਸੁ. ‘‘ਇਦਂ ਮਮਸ੍ਸਾ’’ਤਿ ਇਦਂ ਸਨ੍ਤਕਂ ਮਮਸਨ੍ਤਕਂ ਭਵੇਯ੍ਯ, ਅਹੋ ਸਾਧੁ ਵਤਾਤਿ ਯੋਜਨਾ. ‘‘ਅਤ੍ਤਨੋ ਕਤ੍ਵਾ’’ਤਿ ਅਤ੍ਤਨੋ ਸਨ੍ਤਕਂ ਕਤ੍ਵਾ. ‘‘ਲਾਭਾਵਤਿਮੇ’’ਤਿ ਏਤ੍ਥ ਸੁਲਾਭਂ ਲਭਨ੍ਤੀਤਿ ਲਾਭਾ. ‘‘ਅਤ੍ਤਨੋ ਕਰੇਯ੍ਯਂ’’ਤਿ ਅਤ੍ਤਨੋ ਸਨ੍ਤਕਂ ਕਰੇਯ੍ਯਂ. ਪਰਭਣ੍ਡਂ ਵਤ੍ਥੁ ਯਸ੍ਸਾਤਿ ਪਰਭਣ੍ਡ ਵਤ੍ਥੁਕੋ. ‘‘ਵਤ੍ਥੂ’’ਤਿ ਆਰਮ੍ਮਣਭੂਤਂ ਵਤ੍ਥੁ. ਯਾਵ ਨ ਪਰਿਣਾਮੇਤਿ, ਤਾਵ ਨ ਕਮ੍ਮਪਥਭੇਦੋ ਹੋਤੀਤਿ ਯੋਜਨਾ. ‘‘ਵੁਤ੍ਤਞ੍ਹੇਤਂ ਅਟ੍ਠਕਥਾਸੂ’’ਤਿ ਅਧਿਕਾਰੋ. ‘‘ਅਯਂ’’ਤਿ ਅਯਂ ਸਤ੍ਤੋ. ‘‘ਤਸ੍ਸਾ’’ਤਿ ਤਸ੍ਸ ਸਤ੍ਤਸ੍ਸ. ਦਸਵਤ੍ਥੁਕਾਮਿਚ੍ਛਾਦਿਟ੍ਠਿ ਨਾਮ ‘ਨਤ੍ਥਿਦਿਨ੍ਨਂ, ਨਤ੍ਥਿਯਿਟ੍ਠਂ, ਨਤ੍ਥਿਹੁਤਂ’ਤਿਆਦਿਕਾ ਮਿਚ੍ਛਾਦਿਟ੍ਠਿ. ਦ੍ਵਾਸਟ੍ਠਿ ਦਿਟ੍ਠਿਗਤੇਸੁ ਕਾਚਿਦਿਟ੍ਠਿਯੋ ਨਤ੍ਥਿਕਾਦਿ ਸਭਾਵਾ ਹੋਨ੍ਤਿ. ਇਧ ਪਨ ਤਬ੍ਬਹੁਲਨਯੇਨ ਕਮ੍ਮਮੇਵਾਤਿ ਵੁਤ੍ਤਂ. ਯਥਾਵੁਤ੍ਤੋਤਿ ਸਮ੍ਬਨ੍ਧੋ. ਗਚ੍ਛਨ੍ਤਸ੍ਸ ਪੁਗ੍ਗਲਸ੍ਸ. ‘‘ਚਿਤ੍ਤੁਪ੍ਪਾਦੋ’’ਤਿ ਮਗ੍ਗਚਿਤ੍ਤੁਪ੍ਪਾਦੇ. ‘‘ਪਸ੍ਸਨ੍ਤੋ’’ਤਿ ਤੀਣਿ ਲਕ੍ਖਣਾਨਿ ਪਸ੍ਸਨ੍ਤੋ. ਵੁਤ੍ਤੋਤਿ ਸਮ੍ਬਨ੍ਧੋ. ‘‘ਨਿਯਾਮਂ’’ਤਿ ਸਮ੍ਮਤ੍ਤ ਨਿਯਾਮਂ. ਅਵਿਪਰੀਤਨਿਯਾਮਨ੍ਤਿ ਅਤ੍ਥੋ. ਪੁਨ ‘‘ਨਿਯਾਮਂ’’ਤਿ ਮਿਚ੍ਛਤ੍ਤਨਿਯਾਮਂ. ਵਿਪਰੀਤ ਨਿਯਾਮਨ੍ਤਿ ਅਤ੍ਥੋ. ਤਿਕਿਚ੍ਛਿਤੁਂ ਅਸਕ੍ਕੁਣੇਯ੍ਯੋਤਿ ਅਤੇਕਿਚ੍ਛੋ. ਏਕਨ੍ਤੇਨ ਅਪਾਯਗਾਮੀ ਹੋਤੀਤਿ ਅਤ੍ਥੋ. ‘‘ਅਪਸ੍ਸਿਤ੍ਵਾ’’ਤਿ ਦਿਟ੍ਠਿਟ੍ਠਾਨਾਨਂ ਅਪਸ੍ਸਿਤ੍ਵਾ. ‘‘ਮਿਚ੍ਛਾਧਿਮੋਕ੍ਖਮਤ੍ਤੇਨਾ’’ਤਿ ਤਿਤ੍ਥਾ ਚਰਿਯੇਸੁ ਸਦ੍ਦਹਨ ਮਤ੍ਤੇਨਾਤਿ ਅਧਿਪ੍ਪਾਯੋ. ‘‘ਸਕਂ ਆਚਰਿਯਕਂ’’ਤਿ ਅਤ੍ਤਨੋ ਆਚਰਿਯਸ੍ਸ ਸਨ੍ਤਕਭੂਤਂ. ਠਿਤੋ ਪੁਗ੍ਗਲੋ. ਅਟ੍ਠਕਥਾਯਂ ਵੁਤ੍ਤੋ, ਯਥਾਹ ਮਿਚ੍ਛਤ੍ਤਤਿਕੇ ਮਿਚ੍ਛਾਸਭਾਵਾਤਿ ਮਿਚ੍ਛਤ੍ਤਾ. ਵਿਪਾਕਦਾਨੇ ਸਤਿ, ਖਨ੍ਧਭੇਦਾਨਨ੍ਤਰਮੇਵ ਵਿਪਾਕਦਾਨਤੋ ਨਿਯਤਾ. ਮਿਚ੍ਛਤ੍ਤਾ ਚ ਤੇ ਨਿਯਤਾ ਚਾਤਿ ਮਿਚ੍ਛਤ੍ਤਨਿਯਤਾ. ਸਮ੍ਮਾਸ ਭਾਵਾਤਿ ਸਮ੍ਮਤ੍ਤਾ. ਸਮ੍ਮਤ੍ਤਾ ਚ ਤੇ ਨਿਯਤਾ ਚ ਅਨਨ੍ਤਰਮੇਵ ਫਲਦਾਨ ਨਿਯਮੇਨਾਤਿ ਸਮ੍ਮਤ੍ਤਨਿਯਤਾਤਿ. ‘‘ਤਸ੍ਸਾ’’ਤਿ ਮਿਚ੍ਛਾਦਿਟ੍ਠਿਯਾ. ‘‘ਅਚੋਪੇਤ੍ਵਾ’’ਤਿ ਅਚਾਲੇਤ੍ਵਾ. ‘‘ਏਤੇਨਾ’’ਤਿ ਏਤੇਨਪਿ ਸਦ੍ਦੇਨ. ‘‘ਇਮੇਸਂ’’ਤਿ ਮਨੋਕਮ੍ਮਾਨਂ. ‘‘ਏਤੇਨਾ’’ਤਿ ਮਨਸ੍ਮਿਂ ਏਵਾਤਿ ਵਚਨੇਨ. ‘‘ਉਪਪਨ੍ਨਂ’’ਤਿ ਪਰਿਪੁਣ੍ਣਂ. ‘‘ਉਪਲਕ੍ਖਣਾਦਿਵਸੇਨਾ’’ਤਿ ਉਪਲਕ੍ਖਣਨਯ ਨਿਦਸ੍ਸਨਨਯ ਪਧਾਨਨਯਾਦਿਵਸੇਨ. ‘‘ਅਤ੍ਥਨ੍ਤਰਪ੍ਪਸਙ੍ਗੋ ਹੋਤੀ’’ਤਿ ਕਥਂ ਹੋਤਿ. ਏਵਸਦ੍ਦੇਨ ਵਿਨਾ ਪਾਣਾਤਿਪਾਤ ਕਮ੍ਮਂ ਕਾਯਦ੍ਵਾਰੇ ਬਾਹੁਲ੍ਲ ਵੁਤ੍ਤਿਤੋ ਕਾਯਕਮ੍ਮਂ ਨਾਮਾਤਿ ਵੁਤ੍ਤੇ ਇਦਂ ਲਦ੍ਧਾਤਪਤ੍ਤੋ ਰਾਜਕੁਮਾਰੋਤਿ ਵਿਯ ਉਪਲਕ੍ਖਣਨਯਮਤ੍ਤਂ. ਤੇਨ ਸੇਸਦ੍ਵਾਰੇਸੁਪਿ ਬਾਹੁਲ੍ਲ ਵੁਤ੍ਤਿਂ ਉਪਸਲ੍ਲਕ੍ਖੇਤੀਤਿ ਅਤ੍ਥਨ੍ਤਰਪ੍ਪਸਙ੍ਗੋ ਸਿਯਾਤਿ. ਏਵਂ ਸੇਸਨਯੇਸੁਪੀਤਿ. ‘‘ਅਪਿਚਾ’’ਤਿ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਜੋਤੇਤਿ. ‘‘ਤੇਸੂ’’ਤਿ ਪਾਣਵਧਾਦੀਸੁ. ‘‘ਏਕਂ ਅਙ੍ਗਂ’’ਤਿ ਉਪਕ੍ਕਮੋਤਿ ਚਤੁਤ੍ਥਂ ਅਙ੍ਗਂ. ‘‘ਤਂ ਸਹਜਾਤਾ ਚਾ’’ਤਿ ਚੇਤਨਾ ਸਹਜਾਤਾ ਚ. ਚੇਤਨਾ ਪਕ੍ਖੇ ਭਵਾਤਿ ਚੇਤਨਾ ਪਕ੍ਖਿਕਾ. ਚੇਤਨਾ ਵਿਯ ਕਾਯਕਮ੍ਮਭਾਵਂ ਗਚ੍ਛਨ੍ਤੀਤਿ ਵੁਤ੍ਤਂ ਹੋਤਿ. ‘‘ਅਬ੍ਬੋਹਾਰਿਕਤ੍ਤਂ ਗਚ੍ਛਨ੍ਤੀ’’ਤਿ ਮਨੋਕਮ੍ਮਨ੍ਤਿ ਵੋਹਰਿਤੁਂ ਅਪ੍ਪਹੋਨਕਤ੍ਤਂ ਗਚ੍ਛਨ੍ਤੀਤਿ ਅਤ੍ਥੋ. ਅਤ੍ਤਾ ਪਧਾਨਂ ਯੇਸਂ ਤੇ ਅਤ੍ਤਪ੍ਪਧਾਨਾ. ਅਭਿਜ੍ਝਾਦਯੋ. ਅਤ੍ਤਪ੍ਪਧਾਨਾ ਨ ਹੋਨ੍ਤਿ. ਚੇਤਨਾ ਪਧਾਨਾ ਹੋਨ੍ਤਿ. ਇਧੇਵ ਤੇ ਅਤ੍ਤਪ੍ਪਧਾਨਾ ਹੋਨ੍ਤੀਤਿ ਅਤ੍ਥੋ. ‘‘ਤਥਾ ਤਥਾ’’ਤਿ ਅਹੋਵਤ ਇਦਂ ਮਮਸ੍ਸਾਤਿਆਦਿਨਾ ਤੇਨ ਤੇਨ ਪਕਾਰੇਨ. ‘‘ਤਤ੍ਥਾ’’ਤਿ ਤੇਸੁ ਮਨੋਕਮ੍ਮੇਸੁ. ‘‘ਸਬ੍ਬੇਨ ਸਬ੍ਬਂ’’ਤਿ ਪਾਟਿਪਦਿਕਪਦਮੇਤਂ. ਸਬ੍ਬਪ੍ਪਕਾਰਤੋਤਿ ਅਤ੍ਥੋ. ‘‘ਇਧਾ’’ਤਿ ਮਨੋਕਮ੍ਮਟ੍ਠਾਨੇ. ‘‘ਮਨੋਕਮ੍ਮ ਕਿਚ੍ਚਵਿਸੇਸੇਨਾ’’ਤਿ ਅਹੋਵਤ ਇਦਂ ਮਮਸ੍ਸਾਤਿਆਦਿਕੇਨ ਕਿਚ੍ਚ ਵਿਸੇਸੇਨ. ਮਨੋਕਮ੍ਮ ਦੀਪਨਾ ਨਿਟ੍ਠਿਤਾ.

੧੫੧. ‘‘ਏਤ੍ਥ ਚ ਦਸਨ੍ਨਂ ਪੀ’’ਤਿਆਦੀਸੁ. ‘‘ਤਾਪੀ’’ਤਿ ਤਾ ਪੁਬ੍ਬਾਪਰਚੇਤਨਾਯੋਪਿ. ਆਦਿਤੋ ਪਟ੍ਠਾਯ ਪਵਤ੍ਤਾ ਤਾਪੀਤਿ ਸਮ੍ਬਨ੍ਧੋ. ‘‘ਯਾਨਿਪਨਾ’’ਤਿਆਦੀਸੁ. ਏਕੋ ਏਕਸ੍ਸ ਵਦਤਿ ਅਹਂ ਇਮਂ ਸਤ੍ਤਂ ਮਾਰੇਮਿ, ਤ੍ਵਂ ਅਸੁਕਂਸਤ੍ਤਂ ਮਾਰੇਹੀਤਿ. ਏਵਂ ਵਤ੍ਵਾ ਉਭੋਪਿ ਉਪਕ੍ਕਮਂ ਕਰੋਨ੍ਤਿ. ਕਮ੍ਮਂ ਪਨ ਉਭਿਨ੍ਨਮ੍ਪਿ ਨ ਸਿਜ੍ਝਤਿ. ਤਤ੍ਥ ਆਣਾਪਕਸ੍ਸ ਤ੍ਵਂ ਅਸੁਕਂ ਸਤ੍ਤਂ ਮਾਰੇਹੀਤਿ ਆਣਾਪਨ ਕਮ੍ਮਂ ਸਚੇ ਸਿਜ੍ਝਤਿ. ਵਚੀਦ੍ਵਾਰੇ ਪਵਤ੍ਤਂ ਕਾਯਕਮ੍ਮਨ੍ਤਿ ਵੁਚ੍ਚਤਿ. ਇਧ ਪਨ ਅਸਿਦ੍ਧਤ੍ਤਾ ਵਚੀਦ੍ਵਾਰੇ ਦਿਸ੍ਸ ਮਾਨਂ ਵਚੀਕਮ੍ਮਨ੍ਤਿ ਵੁਚ੍ਚਤਿ. ਵਚੀਦੁਚ੍ਚਰਿਤਮਤ੍ਤਨ੍ਤਿ ਵੁਤ੍ਤਂ ਹੋਤਿ. ਏਸਨਯੋ ਸੇਸੇਸੁਪਿ.

‘‘ਦੋਸਮੂਲੇਨਾ’’ਤਿਆਦੀਸੁ. ਦੋਸੋ ਏਵ ਮੂਲਂ ਦੋਸਮੂਲਂ. ਦੋਸੋ ਮੂਲਂ ਮਸ੍ਸਾਤਿ ਦੋਸਮੂਲਂ. ਤਂ ਸਮ੍ਪਯੁਤ੍ਤ ਚਿਤ੍ਤਨ੍ਤਿ ਦ੍ਵਿਧਾ ਅਤ੍ਥੋ. ਬ੍ਯਾਪਾਦੋ ਨਾਮ ਦੋਸੋ ਏਵ. ਸੋ ਕਥਂ ਦੋਸੇਨ ਮੂਲੇਨ ਜਾਯੇਯ੍ਯਾਤਿ ਵੁਤ੍ਤਂ ‘‘ਪੁਰਿਮੋ ਬ੍ਯਾਪਾਦਵਜ੍ਜੇਹੀ’’ਤਿ. ਪਰਤੋ ਅਭਿਜ੍ਝਾਯਮ੍ਪਿ ਏਸਨਯੋ. ਵਿਭਾਵਨਿਪਾਠੇ. ਨਿਧਿਪਾਠਕਾ ਨਾਮ ਰਾਜਨਿਧਿ ਵਿਧਾਯਕਾ. ਤਤ੍ਥ ਚਣ੍ਡੋ ਨਿਗ੍ਗਹੇਤਬ੍ਬੋਤਿ ਆਗਤਤ੍ਤਾ ਦੁਟ੍ਠਨਿਗ੍ਗਹਤ੍ਥਨ੍ਤਿ ਵੁਤ੍ਤਂ. ਰਾਜੂਨਂ ਅਦਿਨ੍ਨਾਦਾਨਂ ਮੋਹਮੂਲੇਨ ਜਾਯਤੀਤਿ ਯੋਜਨਾ. ‘‘ਬ੍ਰਾਹ੍ਮਣਾਨਞ੍ਚਾ’’ਤਿ ਸਕਸਞ੍ਞਾਯ ਏਵ ਯਂ ਕਿਞ੍ਚਿ ਹਰਨ੍ਤਾਨਂ ਬ੍ਰਾਹ੍ਮਣਾਨਞ੍ਚ ਕਮ੍ਮਫਲਸਮ੍ਬਨ੍ਧਾਪਵਾਦੀਨਞ੍ਚ. ‘‘ਆਹਰਣਂ’’ਤਿ ਅਦਿਨ੍ਨਾਦਾਨਵਸੇਨ ਹਰਣਂ. ਅਵਹਰਣਨ੍ਤਿ ਵੁਤ੍ਤਂ ਹੋਤਿ. ਯੋ ਪਨ ਮੋਹੋ ਰਾਜੂਨਂ ਉਪ੍ਪਨ੍ਨੋ, ਯੋ ਚ ਬ੍ਰਾਹ੍ਮਣਾਨਂ ਉਪ੍ਪਨ੍ਨੋ, ਯੋ ਚ ਕਮ੍ਮ ਫਲਸਮ੍ਬਨ੍ਧਾ ਪਵਾਦੀਨਂ ਉਪ੍ਪਨ੍ਨੋਤਿ ਸਮ੍ਬਨ੍ਧੋ. ‘‘ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿ ਲੋਭੋ ਕਮ੍ਮਾਨਂ ਸੁਟ੍ਠੁਵਡ੍ਢਨਾਯ ਨਿਦਾਨਂ ਕਾਰਣਂ ਹੋਤੀਤਿ ਯੋਜਨਾ. ਸਞ੍ਜਾਤਾ ਕਙ੍ਖਾਯੇਸਂ ਤੇ ਸਞ੍ਜਾਤਕਙ੍ਖਾ. ਪਰਿਤੋ ਉਟ੍ਠਾਤਿ ਏਤ੍ਥਾਤਿ ਪਰਿਯੁਟ੍ਠਾਨਂ. ਕਙ੍ਖਾਯ ਪਰਿਯੁਟ੍ਠਾਨਂ ਕਙ੍ਖਾਪਰਿਯੁਟ੍ਠਾਨਂ. ਜਨਾਨਂ ਤਾਨਿਕਮ੍ਮਾਨੀਤਿ ਸਮ੍ਬਨ੍ਧੋ.

ਅਕੁਸਲਕਮ੍ਮਦੀਪਨਾਨਿਟ੍ਠਿਤਾ.

੧੫੭. ਕੁਸਲਕਮ੍ਮੇ. ਅਯਂ ਪਨ ਏਵਮਾਦੀਸੁ ਸੁਤ੍ਤਪਦੇਸੁ ਆਗਤੋਤਿ ਸਮ੍ਬਨ੍ਧੋ. ‘‘ਮੇਤ੍ਤਂ ਕਾਯਕਮ੍ਮਂ’’ਤਿ ਮੇਤ੍ਤਾਸਹਗਤਂ ਕਾਯਕਮ੍ਮਂ. ਏਵਂ ਵਚੀਕਮ੍ਮੇਪਿ. ਚੇਤਨਾ ਹੇਤ੍ਥ ਕਮ੍ਮਨ੍ਤਿ ਅਧਿਪ੍ਪੇਤਾ. ਮਨੋਕਮ੍ਮੇ ਪਨ ਚੇਤਨਾਪਿ ਯੁਜ੍ਜਤਿ. ਅਬ੍ਯਾਪਾਦੋਪਿ ਯੁਜ੍ਜਤਿ. ਞਾਣਂ ਅਨੁਪਰਿਵਤ੍ਤੀਤਿ ਞਾਣਾਨੁਪਰਿਵਤ੍ਤਂ. ਞਾਣਾਨੁਪਰਿਵਤ੍ਤੀਤਿਪਿ ਪਾਠੋ, ਸੋ ਯੇਵਤ੍ਥੋ. ‘‘ਪਦਕ੍ਖਿਣਂ’’ਤਿ ਪਵਡ੍ਢਿਤਂ. ਅਪਰਂ ਪਰਿਯਾਯਂ ਦਸ੍ਸੇਤਿ ‘‘ਯਸ੍ਮਿਂ ਪਨਾ’’ਤਿਆਦਿਨਾ. ਦੁਸ੍ਸੀਲਸ੍ਸ ਭਾਵੋ ਦੁਸ੍ਸਿਲ੍ਯਂ. ਪਾਣਾਤਿਪਾਤਾਦਿਕਮ੍ਮਂ. ‘‘ਪਵਤ੍ਤਮਾਨੇ’’ਤਿ ਕਾਯਦ੍ਵਾਰੇ ਪਵਤ੍ਤਮਾਨੇ. ‘‘ਯਂ ਪਨ ਕੁਸਲਂ’’ਤਿ ਪਾਣਾਤਿ ਪਾਤਾਦਿਤੋ ਵਿਰਤਿ ਕੁਸਲਂ. ‘‘ਪਵਤ੍ਤਮਾਨਂ’’ਤਿ ਚਿਤ੍ਤੇ ਪਵਤ੍ਤਮਾਨਂ. ‘‘ਕਿਚ੍ਚ ਸੀਸੇਨਾ’’ਤਿ ਕਿਚ੍ਚਪ੍ਪਧਾਨੇਨ. ਕਿਚ੍ਚਂ ਪਧਾਨਂ ਕਤ੍ਵਾਤਿ ਅਧਿਪ੍ਪਾਯੋ. ਸੇਸਮੇਤ੍ਥ ਕਾਯਕਮ੍ਮੇ ਸੁਵਿਞ੍ਞੇਯ੍ਯਂ.

‘‘ਵਚੀਕਮ੍ਮੇਪਿ ਏਸੇਵਨਯੋ’’ਤਿ ਯਸ੍ਮਿਂ ਦੁਸ੍ਸਿਲ੍ਯੇ ਪਵਤ੍ਤਮਾਨੇ ਵਾਚਾ ਅਪਰਿਸੁਦ੍ਧਾ ਹੋਤਿ. ਵਚੀ ਸਂਵਰੋ ਭਿਜ੍ਜਤੀਤਿਆਦਿਨਾ ਵਤ੍ਤਬ੍ਬਂ. ‘‘ਅਵਸੇਸਂ ਪਨਾ’’ਤਿ ਤੀਹਿ ਕਾਯਕਮ੍ਮੇਹਿ ਚਤੂਹਿ ਵਚੀਕਮ੍ਮੇਹਿ ਅਵਸੇਸਂ. ਤਤ੍ਥ ‘‘ਤੀਹਿ ਕਾਯਕਮ੍ਮੇਹੀ’’ਤਿ ਤੀਹਿ ਕਾਯਦੁਚ੍ਚਰਿਤ ਵਿਰਤਿ ਕਮ੍ਮੇਹਿ. ‘‘ਚਤੂਹਿ ਵਚੀਕਮ੍ਮੇਹੀ’’ਤਿ ਚਤੂਹਿ ਵਚੀਦੁਚ੍ਚਰਿਤ ਵਿਰਤਿ ਕਮ੍ਮੇਹਿ. ‘‘ਸਬ੍ਬਂਪਿ ਕਲ੍ਯਾਣ ਕਮ੍ਮਂ’’ਤਿ ਸਬ੍ਬਮ੍ਪਿ ਦਾਨਕਮ੍ਮਂ, ਸਬ੍ਬਮ੍ਪਿ ਭਾਵਨਾ ਕਮ੍ਮਂ, ਅਪਚਾਯਨ ਕਮ੍ਮਂ, ਵੇਯ੍ਯਾਵਚ੍ਚਕਮ੍ਮਂ, ਪਤ੍ਤਿਦਾਨਕਮ੍ਮਂ, ਪਤ੍ਤਾਨੁਮੋਦਨਾਕਮ੍ਮਂ, ਧਮ੍ਮਸਵਨ ਕਮ੍ਮਂ, ਧਮ੍ਮ ਦੇਸਨਾ ਕਮ੍ਮਂ, ਸਬ੍ਬਮ੍ਪਿ ਦਿਟ੍ਠਿਜੁਕਮ੍ਮਂ ਤੀਸੁਦ੍ਵਾਰੇਸੁ ਪਵਤ੍ਤਮ੍ਪਿ ਮਨੋਕਮ੍ਮਂ ਨਾਮਾਤਿ ਯੋਜਨਾ. ਇਮੇਸੁ ਪਨ ਦ੍ਵੀਸੁ ਪਰਿਯਾਯੇਸੁ ਪਚ੍ਛਿਮੋਯੇਵ ਪਧਾਨਨ੍ਤਿ ਸਮ੍ਬਨ੍ਧੋ. ‘‘ਯਾਵ ਦੇਵਾ’’ਤਿ ਅਨ੍ਤਿਮ ਪਰਿਚ੍ਛੇਦ ਜੋਤਕੋ ਨਿਪਾਤੋ. ਮਤ੍ਥਕਪਰਿਚ੍ਛੇਦੇਨਾਤਿ ਅਤ੍ਥੋ.

ਸੀਲਪਦੇ. ‘‘ਸੀਲਯਤੀ’’ਤਿ ਸਮ੍ਮਾ ਦਹਤਿ ਚ ਉਪਧਾਰੇਤਿ ਚਾਤਿ ਦ੍ਵਿਧਾ ਅਤ੍ਥੋ. ‘‘ਸੁਸਮਾਹਿਤਾਨੀ’’ਤਿ ਸੁਪ੍ਪਤਿਟ੍ਠਿਤਾਨਿ. ‘‘ਉਪਰਿਮੇ ਕੁਸਲ ਧਮ੍ਮੇ’’ਤਿ ਮਹਗ੍ਗਤ ਲੋਕੁਤ੍ਤਰ ਕੁਸਲਧਮ੍ਮੇ. ਸਤ੍ਤਸੁ ਵਿਸੁਦ੍ਧੀਸੁ ਉਪਰਿਮੇ ਚਿਤ੍ਤ ਵਿਸੁਦ੍ਧਾਦਿ ਕੁਸਲਧਮ੍ਮੇ. ‘‘ਅਧਿਕੁਸਲ ਧਮ੍ਮੇ’’ਤਿ ਅਧਿਕੇ ਬੋਧਿਪਕ੍ਖਿਯ ਕੁਸਲ ਧਮ੍ਮੇ. ਪਰੇਹਿ ਦਿਨ੍ਨਂ, ਤਦੇਵ ਪਤ੍ਤਿਂ. ਸਬ੍ਬਾਨਿ ਪਨ ਤਾਨਿ ਦਾਨਾਦੀਨਿ ਕੁਸਲਾਨਿ. ਸੋਧੇਨ੍ਤਿ ਸਪ੍ਪੁਰਿਸਾਜਨਾ. ਤਾਨਿ ਏਵਪੁਞ੍ਞਾਨਿ. ਏਕਮੇਕਂ ਪੁਞ੍ਞਕ੍ਰਿਯਵਤ੍ਥੁ. ‘‘ਇਮਿਨਾ ਪਚ੍ਚਯੇਨਾ’’ਤਿ ਚੀਵਰਾਦਿ ਪਚ੍ਚਯੇਨ, ਅਨ੍ਨਪਾਨਾਦਿ ਪਚ੍ਚਯੇਨ, ਧਨ ਧਨਞ੍ਞਾਦਿਪਚ੍ਚਯੇਨ ਵਾ. ‘‘ਸਬ੍ਬਂਪਿ ਚੇਤਂ’’ਤਿ ਸਬ੍ਬਮ੍ਪਿ ਏਤਂ ਦਸਵਿਧਂ ਪੁਞ੍ਞਂ. ‘‘ਹੀਨੇਨ ਛਨ੍ਦੇਨਾ’’ਤਿ ਯਸਕਾਮਤਾਦਿਵਸੇਨ ਹੀਨੇਨ ਛਨ੍ਦੇਨ, ਹੀਨੇਨ ਚਿਤ੍ਤੇਨ, ਹੀਨੇਨ ਵੀਰਿਯੇਨ, ਹੀਨਾਯ ਵੀਮਂਸਾਯ. ‘‘ਮਜ੍ਝਿਮੇਨਾ’’ਤਿ ਪੁਞ੍ਞਪ੍ਫਲਕਾਮਤਾਦਿਵਸੇਨ ਮਜ੍ਝਿਮੇਨ. ‘‘ਪਣੀਤੇਨਾ’’ਤਿ ਕਤ੍ਤਬ੍ਬਮੇਵਿਦਨ੍ਤਿ ਅਰਿਯਵਂਸਾਨੁ ਬ੍ਰੂਹਨਵਸੇਨ ਪਣੀਤੇਨ ਛਨ੍ਦਾਦਿਨਾ ਪਵਤ੍ਤਿ ਤਂ ਪਣੀਤਨ੍ਤਿ ਯੋਜਨਾ. ‘‘ਯਸਕਾਮਤਾਯਾ’’ਤਿ ਕਿਤ੍ਤਿ ਸਦ੍ਦਕਾਮਤਾਯ ਵਾ, ਪਰਿਵਾਰਕਾਮਤਾਯ ਵਾ. ‘‘ਪੁਞ੍ਞਪ੍ਫਲਕਾਮਤਾਯਾ’’ਤਿ ਭਵਸਮ੍ਪਤ੍ਤਿ ਭੋਗਸਮ੍ਪਤ੍ਤਿਕਾਮਤਾਯ. ‘‘ਅਰਿਯਭਾਵਂ ਨਿਸ੍ਸਾਯਾ’’ਤਿ ਇਦਂ ਦਾਨਂ ਨਾਮ ਅਰਿਯਾਨਂ ਵਂਸੋ. ਅਹਮ੍ਪਿ ਅਰਿਯੋ. ਤਸ੍ਮਾ ਮਯਾਪਿ ਕਤ੍ਤਬ੍ਬਮੇਵਿਦਨ੍ਤਿ ਏਵਂ ਅਰਿਯਭਾਵਂ ਨਿਸ੍ਸਾਯਾਤਿ ਅਤ੍ਥੋ. ਏਤ੍ਥ ਚ ‘‘ਅਰਿਯੋ’’ਤਿ ਆਚਾਰ ਅਰਿਯੋਪਿ ਯੁਜ੍ਜਤਿ ਦਸ੍ਸਨ ਅਰਿਯੋਪਿ. ਤਤ੍ਥ ਆਚਾਰ ਅਰਿਯੋ ਨਾਮ ਸਪ੍ਪੁਰਿਸੋ ਪੁਥੁਜ੍ਜਨ ਕਲ੍ਯਾਣਕੋ ਵੁਚ੍ਚਤਿ. ਦਸ੍ਸਨ ਅਰਿਯੋ ਨਾਮ ਪਰਮਤ੍ਥ ਅਰਿਯੋ. ‘‘ਪਾਰਮਿਤਾ ਦਾਨਂ’’ਤਿ ਸਬ੍ਬਦਾਨੇਹਿ ਅਗ੍ਗਪਤ੍ਤਂ ਮਹਾਬੋਧਿ ਸਤ੍ਤਾਨਂ ਪਾਰਙ੍ਗਤਦਾਨਂ. ਤਞ੍ਹਿ ਸਬ੍ਬ ਸਤ੍ਤਵਿਮੋਕ੍ਖਤ੍ਥਾਯ ਪਵਤ੍ਤਿ ਤਤ੍ਤਾ ਅਗ੍ਗਪਤ੍ਤਂ ਹੋਤਿ, ਪਾਰਙ੍ਗਤਂ. ਤਤੋ ਉਤ੍ਤਰਿਤਰਸ੍ਸ ਕਸ੍ਸਚਿਦਾਨਸ੍ਸ ਅਭਾਵਤੋ. ਸੇਸੇਸੁਪਿ ਪੁਞ੍ਞ ਕ੍ਰਿਯਵਤ੍ਥੂਸੁ. ‘‘ਤਿਕਦ੍ਵਯਂ’’ਤਿ ਪੁਰਿਮਾਦਿ ਹੀਨਾਦਿ ਤਿਕਦ੍ਵਯਂ. ‘‘ਅਨ੍ਤਿਮ ਵਤ੍ਥੁਨਾ’’ਤਿ ਅਨ੍ਤਿਮ ਵਤ੍ਥੁ ਅਜ੍ਝਾਪਜ੍ਜਨੇਨ ਵਾ. ‘‘ਦੁਸ੍ਸੀਲੋ ਨਾਮਾ’’ਤਿ ਦੁਸ੍ਸੀਲ ਭਿਕ੍ਖੁ ਨਾਮ. ਸੋ ਹਿ ਯਾਵਭਿਕ੍ਖੁਪ੍ਪਟੀਞ੍ਞਂ ਨ ਵਿਜਹਿ. ਤਾਵ ਭਿਕ੍ਖੁ ਏਵ. ਨ ਸਾਮਣੇਰੋ, ਨ ਗਿਹੀ. ਤਂ ਚੇ ਅਞ੍ਞੋ ਭਿਕ੍ਖੁ ਅਮੂਲਕੇਨ ਅਨ੍ਤਿਮ ਵਤ੍ਥੁਨਾ ਅਨੁਦ੍ਧਂਸੇਤਿ. ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿ ਸੇਸੋ. ਓਮਸਵਾਦੇ ਪਾਚਿਤ੍ਤਿਯਂ. ਸਹਸੇਯ੍ਯਟ੍ਠਾਨੇ ਤੇਨ ਸਹ ਅਤਿਰੇਕ ਰਤ੍ਤਿਂ ਸਯਨ੍ਤਸ੍ਸਾਪਿ ਆਪਤ੍ਤਿ ਨਤ੍ਥਿ. ਤਸ੍ਮਾ ਸੋ ਦੁਸ੍ਸੀਲ ਭਿਕ੍ਖੁਤ੍ਵੇਵ ਵਤ੍ਤਬ੍ਬੋਤਿ. ‘‘ਪੁਨ ਕਮ੍ਮਵਾਚਾਯ ਸਮਾਦਾਤਬ੍ਬਨ੍ਤਿ ਨਤ੍ਥੀ’’ਤਿ ਯਥਾ ਸਿਕ੍ਖਂ ਪਚ੍ਚਕ੍ਖਨ੍ਤਸ੍ਸ ਸਬ੍ਬਂ ਸਮਾਦਾਨਂ ਭਿਜ੍ਜਤਿ. ਪੁਨ ਭਿਕ੍ਖੁਭਾਵਂ ਇਚ੍ਛਨ੍ਤੇਨ ਪੁਨ ਕਮ੍ਮਵਾਚਾਯ ਸਮਾਦਾਤਬ੍ਬਂ ਹੋਤਿ. ਏਵਂ ਪੁਨ ਕਮ੍ਮਵਾਚਾਯ ਸਮਾਦਾਤਬ੍ਬਨ੍ਤਿ ਨਤ੍ਥਿ. ‘‘ਇਤਰੇਸੁ ਪਨਾ’’ਤਿ ਲਿਙ੍ਗਨਾਸਨਙ੍ਗਤੋ ਅਞ੍ਞੇਸੁ ਦਣ੍ਡਕਮ੍ਮਙ੍ਗੇਸੁ. ਨਿਚ੍ਚਸੀਲਾਦੀਸੁ. ‘‘ਯਂ ਨਿਚ੍ਚਮੇਵ ਵਟ੍ਟਤੀ’’ਤਿ ਯਂ ਪਾਣਾਤਿਪਾਤ ਵਿਰਤਿ ਸੀਲਂ ਨਿਚ੍ਚਮੇਵ ਰਕ੍ਖਿਤੁਂ ਵਟ੍ਟਤਿ. ਅਨਿਚ੍ਚਂ ਨ ਵਟ੍ਟਤਿ. ਕਸ੍ਮਾ, ਪਾਣਘਾਤਾਦਿਂ ਕਰੋਨ੍ਤਸ੍ਸ ਸਬ੍ਬਕਾਲਮ੍ਪਿ ਦੁਚ੍ਚਰਿਤ ਸਮ੍ਭਵਤੋ. ਤੇਨਾਹ ‘‘ਅਨਿਚ੍ਚਂ ਸਾਵਜ੍ਜਂ ਹੋਤੀ’’ਤਿ. ਦੁਚ੍ਚਰਿਤਂ ਹੋਤੀਤਿ ਅਤ੍ਥੋ. ‘‘ਯਂ ਨਿਚ੍ਚਮ੍ਪਿ ਵਟ੍ਟਤੀ’’ਤਿ ਪਕਤਿ ਗਹਟ੍ਠਾਨਂ ਯਂ ਵਿਕਾਲ ਭੋਜਨਾਦਿ ਵਿਰਤਿ ਸੀਲਂ ਨਿਚ੍ਚਮ੍ਪਿ ਵਟ੍ਟਤਿ. ‘‘ਅਨਿਚ੍ਚਮ੍ਪਿ ਵਟ੍ਟਤੀ’’ਤਿ ਸਮਾਦਾਨ ਦਿਵਸਂ ਅਤਿਕ੍ਕਮਿਤ੍ਵਾ ਵਿਕਾਲ ਭੋਜਨਾਦਿਂ ਕਰੋਨ੍ਤਸ੍ਸ ਵੀਤਿਕ੍ਕਮ ਦੋਸੋਵਾ ਦੁਚ੍ਚਰਿਤ ਦੋਸੋ ਵਾ ਨਤ੍ਥੀਤਿ ਅਧਿਪ੍ਪਾਯੋ. ਤੇਨਾਹ ‘‘ਸਾਵਜ੍ਜਂ ਨ ਹੋਤੀ’’ਤਿ. ਦੁਚ੍ਚਰਿਤਂ ਨ ਹੋਤੀਤਿ ਅਤ੍ਥੋ. ਤਥਾ ਦਸਸੀਲਞ੍ਚ ਪਕਤਿ ਗਹਟ੍ਠਾਨਂ ਅਨਿਚ੍ਚਸੀਲਂ ਨਾਮਾਤਿ ਯੋਜਨਾ. ‘‘ਅਨਿਚ੍ਚਸੀਲਮੇਵ ਹੋਤੀ’’ਤਿ ਪਕਤਿ ਗਹਟ੍ਠਾਨਂ ਤਂ ਦਸਸੀਲਂ ਯਾਵਜੀਵਂ ਨਿਚ੍ਚਂ ਕਤ੍ਵਾ ਸਮਾਦਿਯਿਤ੍ਵਾ ਰਕ੍ਖਨ੍ਤਾਨਮ੍ਪਿ ਅਪਬ੍ਬਜਿਤਤ੍ਤਾ ਪਬ੍ਬਜਿਤੇਸੁ ਜਾਤਿ ਸਭਾਵੇਨੇਵ ਸਿਦ੍ਧਂ ਨਿਚ੍ਚਸੀਲਂ ਨਾਮ ਨ ਹੋਤਿ. ਯਾਵਜੀਵਂ ਕਤ੍ਵਾ ਸਮਾਦਾਨ ਵਸੇਨੇਵ ਨਿਚ੍ਚਂ ਹੋਤੀਤਿ ਅਧਿਪ੍ਪਾਯੋ. ‘‘ਵੇਸਧਾਰਣੇਨ ਸਹ ਸਿਦ੍ਧਤ੍ਤਾ’’ਤਿ ਏਤ੍ਥ ਕਥਂ ਵੇਸਧਾਰਣੇਨ ਸਿਦ੍ਧਂ ਹੋਤੀਤਿ. ਵੇਸਧਾਰਣਂ ਨਾਮ ਗਿਹਿਵਤ੍ਥਂ ਪਹਾਯ ਕਾਸਾਯ ਵਤ੍ਥ ਧਾਰਣਂ. ਕਾਸਾਯਵਤ੍ਥਞ੍ਚ ਨਾਮ ਅਰਹਤ੍ਤਧਜੋ ਹੋਤਿ. ਨ ਚ ਅਰਹਤ੍ਤਧਜਂ ਧਾਰੇਨ੍ਤਸ੍ਸ ਸਿਕ੍ਖਾਪਦਂ ਅਸਮਾਦਿਯਨ੍ਤਸ੍ਸਪਿ ਵਿਕਾਲੇ ਭੁਞ੍ਜਿਤੁਂ ਵਟ੍ਟਤਿ. ਤਥਾ ਨਚ੍ਚਾਦੀਨਿ ਪਸ੍ਸਿਤੁਂ, ਮਾਲਾਦੀਨਿ ਧਾਰੇਤੁਂ, ਉਚ੍ਚਾਸਯਨਾਦੀਸੁ ਵਸਿਤੁਂ, ਜਾਤਰੂਪਾਦੀਨਿ ਸਾਦਿਤੁਂ. ਕਸ੍ਮਾ ਇਤਿ ਚੇ, ਤੇਸਞ੍ਹਿ ਤਂ ਤਂ ਯਥਾਸਕਂ ਸੀਲਂ ਨਿਚ੍ਚਂ ਸੁਦ੍ਧਂ ਕਤ੍ਵਾ ਰਕ੍ਖਿਤੁਮੇਵ ਵਟ੍ਟਤੀਤਿਆਦਿਨਾ ਕਾਰਣਂ ਹੇਟ੍ਠਾ ਵੁਤ੍ਤਮੇਵਾਤਿ. ‘‘ਅਪ੍ਪਨਂ ਅਪਤ੍ਤਾਵ ਅਧਿਪ੍ਪੇਤਾ’’ਤਿ ਅਪ੍ਪਨਾਪਤ੍ਤਾਨਂ ਮਹਗ੍ਗਤਭਾਵਨਾਨਂ ਵਿਸੁਂ ਉਪਰਿ ਵਕ੍ਖਮਾਨਤ੍ਤਾਤਿ ਅਧਿਪ੍ਪਾਯੋ. ‘‘ਏਤ੍ਥੇਵਾ’’ਤਿ ਇਮਸ੍ਮਿਂ ਭਾਵਨਾ ਕਮ੍ਮੇ ਏਵ. ‘‘ਤੇ ਸਞ੍ਞੇਵਾ’’ਤਿ ਰਤਨਤ੍ਤਯਾਦੀਨਂ ਏਵ ਚ. ਗਨ੍ਤੁਂ ਆਰਦ੍ਧੋ ਗਮਿਕੋ. ਅਦ੍ਧਾਨਂ ਦੀਘਮਗ੍ਗਂ ਗਚ੍ਛਨ੍ਤੋ ਅਦ੍ਧਿਕੋ. ‘‘ਪਰਿਸੁਦ੍ਧੇਨਾ’’ਤਿ ਲਾਭਸਕ੍ਕਾਰਾਦਿ ਨਿਰਪੇਕ੍ਖਤਾਯ ਅਤ੍ਤੁਕ੍ਕਂ ਸਨ ਪਰਵਮ੍ਭਨਾਦਿ ਰਹਿਤਤਾਯ ਚ ਪਰਿਸੁਦ੍ਧੇਨ. ‘‘ਹਿਤਪ੍ਫਰਣ ਚਿਤ੍ਤੇਨਾ’’ਤਿ ਮਯਿ ਕਰੋਨ੍ਤੇ ਇਮਸ੍ਸ ਏਤ੍ਤਕਂ ਹਿਤਸੁਖਂ ਭਵਿਸ੍ਸਤੀਤਿ ਏਵਂ ਤੇਸਂ ਹਿਤਸੁਖੇਸੁ ਫਰਣ ਚਿਤ੍ਤੇਨ. ਮੇਤ੍ਤਚਿਤ੍ਤੇਨਾਤਿ ਵੁਤ੍ਤਂ ਹੋਤਿ. ‘‘ਅਤ੍ਤਨੋ ਕਿਚ੍ਚੇਸੁ ਵਿਯਾ’’ਤਿ ਏਤੇਨ ਤੇਸਂ ਸਬ੍ਬਂ ਕਿਚ੍ਚਂ ਅਤ੍ਤਨੋਭਾਰਂ ਕਰੋਤੀਤਿ ਦੀਪੇਤਿ. ‘‘ਸਾਧਾਰਣ ਕਰਣਂ’’ਤਿ ਅਤ੍ਤਨੋ ਪੁਞ੍ਞਂ ਪਰੇਸਂ ਦਾਨਂ. ਅਤ੍ਤ ਮਨਤਾਪਵੇਦਨਿਯਾਧੁਸਾਧੂਤਿ ਵਚੀਭੇਦਕਰਣਂ. ਤਞ੍ਹਿਦਿਨ੍ਨਞ੍ਚਾਨੁਮੋਦਿਤਞ੍ਚ ਦਿਟ੍ਠਧਮ੍ਮਵੇਦਨੀਯਂ ਜਾਤਨ੍ਤਿ ਸਮ੍ਬਨ੍ਧੋ. ‘‘ਯੋਨਿਸੋਮਨਸਿਕਾਰੇ ਠਤ੍ਵਾਤਿ ਏਤ੍ਥ ਸਿਲੋਕਾਦਿਪਕ੍ਖਿਕਂ ਅਯੋਨਿਸੋਮਨਸਿਕਾਰਂ ਜਹਿਤ੍ਵਾ ਸੁਣਨ੍ਤਸ੍ਸ ਇਮਂ ਧਮ੍ਮਂ ਸੁਤ੍ਵਾ ਅਤ੍ਥਰਸਧਮ੍ਮਰਸਪ੍ਪਟਿਸਂਵੇਦੀ ਭਵਿਸ੍ਸਾਮੀਤਿ, ਦੇਸੇਨ੍ਤਸ੍ਸ ਇਮਂ ਦੇਸੇਨ੍ਤੋ ਧਮ੍ਮਸ੍ਸ ਚ ਸੁਣਨ੍ਤਾਨਞ੍ਚ ਅਨੁਗ੍ਗਹਂ ਕਰਿਸ੍ਸਾਮੀਤਿ ਯੋਨਿਸੋਮਨਸਿਕਾਰੇ ਠਤ੍ਵਾ. ਲਾਭ ਸਕ੍ਕਾਰਾਦਿ ਪਕ੍ਖਿਕੋ ਮਨਸਿਕਾਰੋ ਅਯੋਨਿ ਸੋਮਨਸਿਕਾਰੋ ਨਾਮ. ਨਿਯ੍ਯਾਨਤ੍ਥ ਨਿਸ੍ਸਰਣਤ੍ਥ ਪਕ੍ਖਿਕੋ ਯੋਨਿਸੋਮਨਸਿਕਾਰੋ ਨਾਮ. ਨਿਰਵਜ੍ਜ ਕਮ੍ਮਾਨਿ ਨਾਮ ਕਸਿਗੋਰਕ੍ਖਾਦਿ ਕਮ੍ਮਾਨਿ. ਨਿਰਵਜ੍ਜਸਿਪ੍ਪਾਨਿ ਨਾਮ ਵਡ੍ਢਕਿਸਿਪ੍ਪਾਦੀਨਿ ਵੇਜ੍ਜਸਿਪ੍ਪਾਦੀਨਿ ਚ. ਨਿਰਵਜ੍ਜ ਵਿਜ੍ਜਾਠਾਨਾਨਿ ਨਾਮ ਪਰੂਪਰੋਧਰ ਹਿਤਾਨਿ ਅਙ੍ਗਵਿਜ੍ਜਾ ਵੇਦਵਿਜ੍ਜਾ ਮਨ੍ਤਵਿਜ੍ਜਾਦੀਨਿ. ‘‘ਵੋਦਾਨ ਕਰਣਂ’’ਤਿ ਵਿਸੇਸੇਨ ਵਿਸੁਦ੍ਧਕਰਣਂ. ‘‘ਤਂ ਸਭਾਵਤ੍ਤਾ’’ਤਿ ਦਾਨਸਭਾਵਤ੍ਤਾ. ‘‘ਚਾਰਿਤ੍ਤ ਸੀਲਤ੍ਤਾ’’ਤਿ ਸਪ੍ਪੁਰਿਸਾਨਂ ਪਕਤਿ ਚਾਰਿਤ੍ਤ ਸੀਲਤ੍ਤਾ. ਪੁਨ ‘‘ਤਂ ਸਭਾਵਤ੍ਤਾ’’ਤਿ ਭਾਵਨਾ ਸਭਾਵਤ੍ਤਾ. ਤਥਾਹਿ ਦੇਸੇਨ੍ਤਸ੍ਸ ਚ ਸੁਣਨ੍ਤਸ੍ਸ ਚ ਦੇਸਨਾਸੋਤਾਨੁਸਾਰੇਨ ਚਿਤ੍ਤਭਾਵਨਾ ਞਾਣਭਾਵਨਾਵਹਤ੍ਤਾ ਦੇਸਨਾਸਵਨਾ ਸਭਾਵਾ ਹੋਨ੍ਤਿ. ਅਤ੍ਤਨੋ ਦਿਟ੍ਠਿਂ ਸਯਮੇਵ ਉਜੁਂ ਕਰੋਨ੍ਤਸ੍ਸ ਚ ਞਾਣਭਾਵਨਾ ਕਮ੍ਮਮੇਵ. ਤਥਾ ਪਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਉਜੁਂ ਕਰੋਨ੍ਤਸ੍ਸਾਪੀਤਿ. ‘‘ਧਮ੍ਮੋ ਨਾਮ ਨਤ੍ਥੀ’’ਤਿ ਦੇਸਨਾ ਧਮ੍ਮੋ ਨਾਮ ਨਤ੍ਥਿ. ਕਸ੍ਮਾ, ਦਾਨਸੀਲਾਨਿ ਦੇਸੇਨ੍ਤੇਨਪਿ ਅਨ੍ਤੇ ਲਕ੍ਖਣਤ੍ਤਯੇਨ ਸਹਸਚ੍ਚਪ੍ਪਕਾਸਨਸ੍ਸ ਕਤ੍ਤਬ੍ਬਤ੍ਤਾ. ਏਤੇਨ ਦੇਸਨਾਸਵਨਾ ਅਨ੍ਤੇ ਲਕ੍ਖਣਤ੍ਤਯਾਨੁਪਸ੍ਸਨਾ ਭਾਵਨਾ ਕਮ੍ਮਟ੍ਠਾਨੇ ਪਤਿਟ੍ਠਿਤਤ੍ਤਾ ਤਂ ਸਭਾਵਾ ਹੋਨ੍ਤੀਤਿ ਦਸ੍ਸੇਤਿ. ‘‘ਮਨੋਕਮ੍ਮ ਮੇਵਾ’’ਤਿ ਪਦੁਦ੍ਧਾਰੋ. ‘‘ਮਨਸ੍ਮਿਂ ਏਵਾ’’ਤਿ ਮਨੋਦ੍ਵਾਰੇ ਏਵ. ‘‘ਕਿਚ੍ਚਸਿਦ੍ਧਿਤੋ’’ਤਿ ਅਪ੍ਪਨਾਕਿਚ੍ਚਸ੍ਸ ਸਿਜ੍ਝਨਤੋ. ‘‘ਅਙ੍ਗਭਾਵਾ ਸਮ੍ਭਵਤੋ’’ਤਿ ਅਪ੍ਪਨਾ ਕਿਚ੍ਚਸਿਦ੍ਧਿਯਂ ਅਙ੍ਗਭਾਵਾ ਸਮ੍ਭਵਤੋ. ‘‘ਤਞ੍ਚਭਾਵਨਾ ਮਯ’’ਨ੍ਤਿ ਪਦੁਦ੍ਧਾਰੋ. ‘‘ਦਾਨਾਦਿਵਸੇਨਾ’’ਤਿ ਦਾਨਸੀਲਵਸੇਨ. ਦਾਨਵਸੇਨ ਅਪ੍ਪਵਤ੍ਤਨਤੋਤਿ ਇਦਂ ਤਾਵ ਯੁਜ੍ਜਤਿ. ਸੀਲਵਸੇਨ ਅਪ੍ਪਵਤ੍ਤਨਤੋਤਿ ਇਦਂ ਪਨ ਪਾਲ਼ਿਯਾ ਨ ਸਮੇਤਿ. ਪਾਲ਼ਿਯਞ੍ਹਿ ਮਹਗ੍ਗਤਜ੍ਝਾਨੇਸੁਪਿ ਪਹਾਨਂ ਸੀਲਂ ਵੇਰਮਣਿ ਸੀਲਨ੍ਤਿਆਦਿ ਵੁਤ੍ਤਨ੍ਤਿ ਚੋਦਨਾ. ਤਂ ਪਰਿਹਰਨ੍ਤੋ ‘‘ਯਂ ਪਨਾ’’ਤਿਆਦਿਮਾਹ. ‘‘ਪਰਿਯਾਯੇਨ ਵੁਤ੍ਤਂ’’ਤਿ ਕੇਨਪਰਿਯਾਯੇਨ ਵੁਤ੍ਤਨ੍ਤਿ. ਪਕਤਿ ਚਾਰਿਤ੍ਤਂ ਸੀਲਨ੍ਤਿ ਵੁਚ੍ਚਤਿ. ਉਪ੍ਪਨ੍ਨੇ ਚ ਪਥਮਜ੍ਝਾਨੇ ਨੀਵਰਣਾਨਂ ਪਹਾਨਂ ਨਾਮ ਪਕਤਿਚਾਰਿਤ੍ਤਮੇਵ ਪਕਤਿ ਨਿਯਾਮੇਨ ਪਵਤ੍ਤਮੇਵ. ਇਤਿ ਪਕਤਿਚਾਰਿਤ੍ਤਤ੍ਤਾ ਸੀਲਨ੍ਤਿ ਵੁਤ੍ਤਂ. ਪੁਨ ਨੀਵਰਣਾਨਂ ਪਹਾਨਮੇਵ ਤੇਹਿ ਵਿਗਮਨਟ੍ਠੇਨ ਵੇਰਮਣੀਤਿ ਚ, ਪਿਦਹਨਟ੍ਠੇਨ ਸਂਵਰੋਤਿ ਚ, ਪਹਾਨ ਕਿਚ੍ਚਂ ਅਵਿਜਹਨਟ੍ਠੇਨ ਅਵੀਤਿਕ੍ਕਮੋਤਿ ਚ, ਵੁਤ੍ਤਂ. ਚੇਤਨਾਸੀਲਨ੍ਤਿ ਏਤ੍ਥ ਪਨ ਝਾਨਸਮ੍ਪਯੁਤ੍ਤ ਚੇਤਨਾ ਏਵ ਵੁਚ੍ਚਤਿ. ਸਾ ਚ ਸੀਲਜਾਤਿ ਕਤ੍ਤਾ ਸੀਲਨ੍ਤਿ ਵੁਤ੍ਤਾਤਿ ਦਟ੍ਠਬ੍ਬਂ. ‘‘ਅਪ੍ਪਨਾਪਤ੍ਤ’’ਨ੍ਤਿ ਪਦੁਦ੍ਧਾਰੋ. ‘‘ਝਾਨਭੇਦੇਨਾ’’ਤਿ ਪਨ ਵਤ੍ਤਬ੍ਬਂ. ਰੂਪਾਵਚਰਕੁਸਲਞ੍ਹਿ ਝਾਨਭੇਦੇਨ ਪਞ੍ਚਵਿਧਂ, ਝਾਨਮੇਵ ਪਨ ਝਾਨਙ੍ਗਭੇਦੇਨ ਪਞ੍ਚਵਿਧਨ੍ਤਿ.

ਕੁਸਲਕਮ੍ਮਦੀਪਨਾ ਨਿਟ੍ਠਿਤਾ.

੧੫੩. ‘‘ਏਤ੍ਥਾ’’ਤਿਆਦੀਸੁ. ‘‘ਧਮ੍ਮਸਙ੍ਗਹੇ’’ਤਿ ਧਮ੍ਮਸਙ੍ਗਣਿ ਪਾਲ਼ਿਯਂ. ‘‘ਦਸ੍ਸਨੇਨਾ’’ਤਿ ਸੋਤਾਪਤ੍ਤਿ ਮਗ੍ਗਞ੍ਞਾਣੇਨ. ‘‘ਤਂ’’ਤਿ ਉਦ੍ਧਚ੍ਚ ਚੇਤਨਂ. ‘‘ਭਾਵਨਾਯਾ’’ਤਿ ਉਪਰਿਮਗ੍ਗਤ੍ਤਯਸਙ੍ਖਾਤਾਯ ਭਾਵਨਾਯ. ਪਾਲ਼ਿਪਾਠੇ. ‘‘ਚਿਤ੍ਤੁਪ੍ਪਾਦਾ’’ਤਿ ਚਿਤ੍ਤਚੇਤਸਿਕਾ ਵੁਚ੍ਚਨ੍ਤਿ. ‘‘ਸਿਯਾ’’ਤਿ ਏਕਚ੍ਚੇਤਿ ਅਤ੍ਥੇ ਨਿਪਾਤ ਪਦਂ. ਇਮੇਸੁ ਛਸੁ ਚਿਤ੍ਤੁਪ੍ਪਾਦੇਸੁ ਏਕਚ੍ਚੇ ਛ ਚਿਤ੍ਤੁਪ੍ਪਾਦਾ ਸੋਤਾਪਤ੍ਤਿ ਮਗ੍ਗੇਨ ਪਹਾਤਬ੍ਬਾ, ਏਕਚ੍ਚੇ ਛ ਚਿਤ੍ਤੁਪ੍ਪਾਦਾ ਤੀਹਿ ਉਪਰਿ ਮਗ੍ਗੇਹਿ ਪਹਾਤਬ੍ਬਾਤਿ ਅਤ੍ਥੋ. ਤਤ੍ਥ ਪਥਮਪਦੇ ‘‘ਏਕਚ੍ਚੇ ਛ ਚਿਤ੍ਤੁਪ੍ਪਾਦਾ’’ਤਿ ਕਮ੍ਮਪਥਪਤ੍ਤਕਮ੍ਮਸਹਜਾਤਾ ਛ ਚਿਤ੍ਤੁਪ੍ਪਾਦਾ. ਦੁਤੀਯ ਪਦੇ ‘‘ਏਕਚ੍ਚੇ ਛ ਚਿਤ੍ਤੁਪ੍ਪਾਦਾ’’ਤਿ ਅਕਮ੍ਮਪਥ ਪਤ੍ਤਾ ਧਮ੍ਮਿਕੇਸੁ ਠਾਨੇਸੁ ਅਸ੍ਸਾਦਨਾਭਿ ਨਨ੍ਦਾਦਿਵਸੇਨ ਪਵਤ੍ਤਾ ਛ ਚਿਤ੍ਤੁਪ੍ਪਾਦਾ. ‘‘ਤਤ੍ਥਾ’’ਤਿ ਧਮ੍ਮਸਙ੍ਗਹੇ. ‘‘ਇਤਰਤ੍ਥਾ’’ਤਿ ਇਤਰੇਸੁ ਭਾਵਨਾਯ ਪਹਾਤਬ੍ਬੇਸੁ. ‘‘ਤਸ੍ਸਾ’’ਤਿ ਨਾਨਕ੍ਖਣਿਕ ਕਮ੍ਮਪਚ੍ਚਯਸ੍ਸ. ਪਾਲ਼ਿਪਾਠੇ. ‘‘ਸਹਜਾਤਾ’’ਤਿ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਸਹਜਾਤਾ. ‘‘ਨਾਨਕ੍ਖਣਿਕਾ’’ਤਿ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਅਸਹਜਾਤਾ ਅਤੀਤਕਾਲਭੂਤੇ ਨਾਨਕ੍ਖਣੇ ਪਵਤ੍ਤਾ ਪਾਣਾਤਿਪਾਤਾਦਿ ਚੇਤਨਾ. ‘‘ਯਦਿ ਏਵਂ’’ਤਿ ਏਵਂ ਯਦਿ ਸਿਯਾਤਿ ਅਤ੍ਥੋ. ਯਦਿ ਉਦ੍ਧਚ੍ਚ ਚੇਤਨਾ ਦਸ੍ਸਨ ਪਦੇ ਅਨੁਦ੍ਧਟਤ੍ਤਾ ਪਟਿਸਨ੍ਧਿਂ ਨਾਕਡ੍ਢਤੀਤਿ ਵਿਞ੍ਞਾਯੇਯ੍ਯ. ਏਵਂ ਸਤੀਤਿ ਪਾਠਸੇਸੋ. ‘‘ਚੇ’’ਤਿ ਚੇ ਵਦੇਯ੍ਯ. ‘‘ਨਾ’’ਤਿ ਨ ਸਕ੍ਕਾ ਵਤ੍ਤੁਂ. ‘‘ਤਸ੍ਸਾ ਵਿਪਾਕਸ੍ਸਾ’’ਤਿ ਤਸ੍ਸਾ ਉਦ੍ਧਚ੍ਚ ਚੇਤਨਾਯ ਵਿਪਾਕਸ੍ਸ. ਪਾਲ਼ਿਪਾਠੇ. ‘‘ਇਮੇਸੁ ਧਮ੍ਮੇਸੁ ਞਾਣਂ’’ਤਿ ਇਮੇ ਧਮ੍ਮੇ ਆਰਮ੍ਮਣਂ ਕਤ੍ਵਾ ਉਪ੍ਪਨ੍ਨਞ੍ਞਾਣਂ. ‘‘ਤੇਸਂ ਵਿਪਾਕੇ’’ਤਿ ਉਦ੍ਧਚ੍ਚ ਸਹਗਤਾਨਂ ਵਿਪਾਕੇ. ‘‘ਞਾਣਂ’’ਤਿ ਤਂ ਵਿਪਾਕਂ ਆਰਮ੍ਮਣਂ ਕਤ੍ਵਾ ਉਪ੍ਪਨ੍ਨਞ੍ਞਾਣਂ. ‘‘ਸਬ੍ਬ ਦੁਬ੍ਬਲਨ੍ਤਿ ਚ ਸਕ੍ਕਾ ਵਤ੍ਤੁਂ’’ਤਿ ਸਮ੍ਬਨ੍ਧੋ. ‘‘ਅਤਿਵਿਯ ਕਾਲ਼ਕਧਮ੍ਮਤ੍ਤਾ’’ਤਿ ਬੁਦ੍ਧਾਦੀਸੁ ਮਹਨ੍ਤੇਸੁ ਠਾਨੇਸੁ ਸਦ੍ਧਾਰਤਨਸ੍ਸ ਅਨ੍ਤਰਾਯਂ ਕਤ੍ਵਾ ਪਵਤ੍ਤਨਤੋ ਅਤਿਯੇਵਕਣ੍ਹ ਧਮ੍ਮਤ੍ਤਾ. ਤਸ੍ਸਾ ਵਿਚਿਕਿਚ੍ਛਾ ਚੇਤਨਾਯ ਪਟਿਸਨ੍ਧਿ ਆਕਡ੍ਢਨਮ੍ਪਿ ਵਿਞ੍ਞਾਤਬ੍ਬਨ੍ਤਿ ਯੋਜਨਾ. ‘‘ਸਭਾਵ ਵਿਰੁਦ੍ਧਤ੍ਤਾ ਯੇਵਾ’’ਤਿ ਵਿਚਿਕਿਚ੍ਛਾ ਅਸਨ੍ਨਿਟ੍ਠਾਨ ਸਭਾਵਾ. ਅਧਿਮੋਕ੍ਖੋ ਸਨ੍ਨਿਟ੍ਠਾਨ ਸਭਾਵੋਤਿ ਏਵਂ ਸਭਾਵ ਵਿਰੁਦ੍ਧਤ੍ਤਾਯੇਵ.

‘‘ਸਬ੍ਬਤ੍ਥਾ’’ਤਿਆਦੀਸੁ. ‘‘ਵਿਪਚ੍ਚਤੀਤਿ ਵਿਪਾਚੇਤੀ’’ਤਿ ਵਦਨ੍ਤਿ. ਤਂ ਪਨ ਪਦਰੂਪੇਨ ਨ ਸਮੇਤੀਤਿ ਅਞ੍ਞਂ ਅਤ੍ਥਂ ਵਦਨ੍ਤੋ ‘‘ਸਬ੍ਬਮ੍ਪਿ ਵਾ’’ਤਿਆਦਿਮਾਹ. ‘‘ਮਹਾਸਮ੍ਪਤ੍ਤਿਯੋ ਸਮੁਟ੍ਠਾਪੇਤ੍ਵਾ’’ਤਿ ਦੇਵਲੋਕੇ ਦੇਵਸਮ੍ਪਤ੍ਤਿ ਸਦਿਸਾ ਦਿਬ੍ਬਵਿਮਾਨਾਦਿਕਾ ਮਹਾਸਮ੍ਪਤ੍ਤਿਯੋ ਸਮੁਟ੍ਠਾਪੇਤ੍ਵਾ. ਇਦਂ ‘‘ਓਕਾਸਂ ਕਤ੍ਵਾ’’ਤਿ ਪਦੇ ਵਿਸੇਸਨਂ. ਤਤ੍ਥ ‘‘ਸੁਖ ਵਿਪਾਕਂ’’ਤਿ ਇਦਂ ਅਟ੍ਠ ਅਹੇਤੁਕ ਵਿਪਾਕਾਨਿ ਸਨ੍ਧਾਯ ਵੁਤ੍ਤਂ. ਰੂਪਲੋਕੇ ਬ੍ਰਹ੍ਮਾਨਂ ਰੂਪਕਾਯੋ ਰੂਪਾਵਚਰ ਕਮ੍ਮੇਨ ਨਿਬ੍ਬਤ੍ਤੋ. ਸੋ ਚ ਕਾਮਾਵਚਰ ਧਮ੍ਮ ਸਮੂਹੋ ਏਵ. ਏਵਂ ਸਨ੍ਤੇ ਤਸ੍ਮਿਂ ਲੋਕੇ ਪਞ੍ਚ ਅਹੇਤੁਕ ਵਿਪਾਕਾਨਿਪਿ ਰੂਪਾਵਚਰ ਕਮ੍ਮੇਨ ਨਿਬ੍ਬਤ੍ਤਾਨਿ ਸਿਯੁਨ੍ਤਿ ਚੋਦਨਾ. ਤਂ ਪਰਿਹਰਨ੍ਤੋ ‘‘ਰੂਪਾਵਚਰ ਕੁਸਲਂਹੀ’’ਤਿਆਦਿਮਾਹ. ‘‘ਤਾਨੀ’’ਤਿ ਅਪਾਯਭੂਮਿਯਂ ਉਪ੍ਪਨ੍ਨਾਨਿ ਅਟ੍ਠ ਅਹੇਤੁਕ ਵਿਪਾਕਾਨਿ. ‘‘ਸਬ੍ਬਸ੍ਮਿਂ ਕਾਮਲੋਕੇ’’ਤਿ ਏਕਾਦਸਵਿਧੇ ਕਾਮਲੋਕੇ. ‘‘ਤੇਸੁ ਚਾ’’ਤਿ ਤੇਸੁ ਅਟ੍ਠ ਅਹੇਤੁਕ ਵਿਪਾਕੇਸੁ ਚ. ‘‘ਆਰਮ੍ਮਣਨ੍ਤਰੇ’’ਤਿ ਕਸਿਣ ਨਿਮਿਤ੍ਤਾਦਿਤੋ ਅਞ੍ਞਸ੍ਮਿਂ ਆਰਮ੍ਮਣੇ. ‘‘ਨਿਮਿਤ੍ਤਾ ਰਮ੍ਮਣੇ’’ਤਿ ਕਸਿਣ ਨਿਮਿਤ੍ਤਾਦਿਕੇ ਨਿਮਿਤ੍ਤ ਪਞ੍ਞਤ੍ਤਾ ਰਮ੍ਮਣੇ. ‘‘ਤਾਨਿ ਪਞ੍ਚਵਿਪਾਕਾਨੀ’’ਤਿ ਚਕ੍ਖੁ ਵਿਞ੍ਞਾਣਾਦੀਨਿ ਪਞ੍ਚ ਅਹੇਤੁਕ ਵਿਪਾਕਾਨਿ ਕਾਮਾਵਚਰ ਕੁਸਲ ਕਮ੍ਮਸ੍ਸੇਵ ਵਿਪਾਕਾਨਿ ਹੋਨ੍ਤੀਤਿ ਯੋਜਨਾ. ‘‘ਸੋਲ਼ਸਕ ਮਗ੍ਗੋ’’ਤਿ ਸੋਲ਼ਸਕਥਾ ਮਗ੍ਗੋ ਕਥਾਪਬਨ੍ਧੋ. ਏਵਂ ਦ੍ਵਾਦਸ ਕਮਗ੍ਗੋ. ‘‘ਅਹੇਤੁਕਟ੍ਠਕ’’ਨ੍ਤਿ ਅਹੇਤੁਕ ਵਿਪਾਕਟ੍ਠਕਂ. ਸਮ੍ਮਾ ਪਕਾਰੇਨ ਜਾਨਾਤੀਤਿ ਸਮ੍ਪਜਾਨਂ. ਞਾਣਂ. ਸਮ੍ਪਜਾਨੇਨ ਕਤਨ੍ਤਿ ਵਿਗ੍ਗਹੋ. ਨ ਸਮ੍ਪਜਾਨਕਤਂ ਅਸਮ੍ਪਜਾਨਕਤਂ. ‘‘ਸਦ੍ਦਹਿਤ੍ਵਾ’’ਤਿ ਏਤੇਨ ਦਿਟ੍ਠੁਜੁ ਕਮ੍ਮਞਾਣ ਸਮ੍ਪਤ੍ਤਿਂ ਦੀਪੇਤਿ. ਨ ਹਿ ਤੇਨ ਞਾਣੇਨ ਅਸਮ੍ਪਨ੍ਨੋ ਕਮ੍ਮਞ੍ਚ ਕਮ੍ਮਫਲਞ੍ਚ ਸਦ੍ਦਹਤੀਤਿ. ਜਾਨਿਤ੍ਵਾਤਿ ਵਾ ਪਾਠੋ ਸਿਯਾ. ‘‘ਏਕਮੇਕਂ’’ਤਿ ਏਕਮੇਕਂ ਕੁਸਲਕਮ੍ਮਂ. ‘‘ਕੁਸਲ ਸਮਯੇ’’ਤਿ ਕੁਸਲ ਕਮ੍ਮ ਕਰਣਕਾਲੇ. ਕੁਸਲੁਪ੍ਪਤ੍ਤਿਕਾਲੇ ਵਾ. ਯਸ੍ਸਮੇ ਈਦਿਸਂ ਪੁਞ੍ਞਂ ਪਸੁਤਂ. ਤਸ੍ਸਮੇ ਭਵਲਾਭੋ ਭੋਗਲਾਭੋ ਮਿਤ੍ਤਲਾਭੋ ਸਬ੍ਬੇਲਾਭਾ ਏਕਨ੍ਤੇਨ ਸੁਲਾਭਾਤਿ ਅਤ੍ਥੋ. ‘‘ਸੁਲਦ੍ਧਂ’’ਤਿ ਇਦਂ ਪੁਞ੍ਞਂ ਸੁਲਦ੍ਧਂ. ਦੇਵੇਸੁ ਚ ਮਨੁਸ੍ਸੇਸੁ ਸਂਸਰਿਤ੍ਵਾਤਿ ਪਾਠਸੇਸੋ. ‘‘ਸੇਸੇਨਾ’’ਤਿ ਤਸ੍ਸਕਮ੍ਮਸ੍ਸ ਵਿਪਾਕਾਵਸੇਸੇਨ. ਅਟ੍ਠਕਥਾ ਪਾਠੇ. ‘‘ਏਕਪਿਣ੍ਡਪਾਤਸ੍ਮਿਂ’’ਤਿ ਏਕਵਾਰਂ ਪਿਣ੍ਡਪਾਤਦਾਨੇ. ਸਂਯੁਤ੍ਤਟ੍ਠਕਥਾਯਂ ਵੁਤ੍ਤਂ. ਤਸ੍ਮਾ ਯਂ ਵੁਤ੍ਤਂ ‘ਏਕਾ ਚੇਤਨਾ ਏਕਮੇਵ ਪਟਿਸਨ੍ਧਿਂ ਦੇਤੀ’ਤਿ, ਤਂ ਸੁਵੁਤ੍ਤਨ੍ਤਿ ਅਧਿਪ੍ਪਾਯੋ. ‘‘ਪਟਿਪਕ੍ਖੇਹੀ’’ਤਿ ਪਟਿਪਕ੍ਖੇਹਿ ਅਕੁਸਲੇਹਿ. ਵਿਸੇਸੇਨ ਭੁਸਂ ਮੁਲ਼੍ਹੋ ਬ੍ਯਾਮੁਲ਼੍ਹੋ. ਅਤਿਵਿਯ ਬ੍ਯਾਮੁਲ਼੍ਹੋ ਅਤਿਬ੍ਯਾਮੁਲ਼੍ਹੋ. ਅਤਿਬ੍ਯਾਮੁਲ਼੍ਹਤ੍ਥਾਯ ਪਚ੍ਚਯਭੂਤਨ੍ਤਿ ਵਿਗ੍ਗਹੋ. ਅਤਿਦੁਪ੍ਪਞ੍ਞਾਯ ਪਚ੍ਚਯਭੂਤਨ੍ਤਿ ਅਤ੍ਥੋ. ਸੋ ਹਿ ਥੇਰੋ ਵਦਤੀਤਿ ਸਮ੍ਬਨ੍ਧੋ. ‘‘ਇਤਿ ਕਤ੍ਵਾ’’ਤਿ ਏਵਂ ਮਨਸਿਕਰਿਤ੍ਵਾ. ‘‘ਸਨ੍ਨਿਹਿਤਪਚ੍ਚਯਮਤ੍ਤੇਨਾ’’ਤਿ ਆਸਨ੍ਨੇ ਸਣ੍ਠਿਤਪਚ੍ਚਯ ਮਤ੍ਤੇਨ. ‘‘ਪੁਬ੍ਬਪਯੋਗ ਪਚ੍ਚਯਮਤ੍ਤੇਨਾ’’ਤਿ ਵੁਤ੍ਤਂ ਹੋਤਿ. ਬਲਵਕਮ੍ਮਵਸੇਨ ਉਪ੍ਪਨ੍ਨਤ੍ਤਾ ਤਿਕ੍ਖਤਰਂ ਵਿਪਾਕਂ. ਯਦਾ ਪਯੋਗ ਰਹਿਤੇਨ ਪਚ੍ਚਯਗਣੇਨ ਉਪ੍ਪਜ੍ਜਤਿ, ਤਦਾ ਅਸਙ੍ਖਾਰਿਕਂ ਨਾਮ. ਯਦਾ ਪਯੋਗਸਹਿਤੇਨ, ਤਦਾ ਸਸਙ੍ਖਾਰਿਕਂ ਨਾਮ. ਤਤ੍ਥ ਅਸਙ੍ਖਾਰਿਕਂ ਤਿਕ੍ਖਂ ਨਾਮ. ਸਸਙ੍ਖਾਰਿਕਂ ਮਨ੍ਦਂ ਨਾਮ. ਤਥਾ ਦੁਬ੍ਬਲ ਕਮ੍ਮੇਨ ਉਪ੍ਪਨ੍ਨੇ ਮਨ੍ਦਵਿਪਾਕੇਪਿ ਯੋਜੇਤਬ੍ਬਂ. ਏਵਂ ਤਿਕ੍ਖਮਨ੍ਦਾਨਂ ਮਨ੍ਦਤਿਕ੍ਖਤਾਪਤ੍ਤਿ ਨਾਮ ਸਿਯਾ. ਨ ਚ ਤਥਾ ਸਕ੍ਕਾ ਭਵਿਤੁਨ੍ਤਿ ਅਧਿਪ੍ਪਾਯੋ. ਏਤ੍ਥ ਸਿਯਾ, ਯਦਿ ਪੁਬ੍ਬਕਮ੍ਮਵਸੇਨ ਅਟ੍ਠਨ੍ਨਂ ਮਹਾਵਿਪਾਕਾਨਂ ਸਙ੍ਖਾਰਭੇਦੋ ਸਿਦ੍ਧੋ ਸਿਯਾ, ਅਟ੍ਠਨ੍ਨਂ ਅਹੇਤੁਕ ਵਿਪਾਕਾਨਮ੍ਪਿ ਸੋਸਙ੍ਖਾਰਭੇਦੋ ਸਿਦ੍ਧੋ ਭਵੇਯ੍ਯ. ਤਾਨਿਪਿ ਹਿ ਕਾਨਿਚਿ ਅਸਙ੍ਖਾਰਿਕੇਨ ਕਮ੍ਮੇਨ ਨਿਬ੍ਬਤ੍ਤਾਨਿ, ਕਾਨਿਚਿ ਸਸਙ੍ਖਾਰਿਕੇਨਾਤਿ ਚੋਦਨਾ. ਤਂ ਪਰਿਹਰਨ੍ਤੋ ‘‘ਅਹੇਤੁਕ ਵਿਪਾਕਾਨਂ ਪਨਾ’’ਤਿਆਦਿਮਾਹ. ‘‘ਉਭਯਕਮ੍ਮ ਨਿਬ੍ਬਤ੍ਤਨਂ’’ਤਿ ਤੇਸਂ ਸਙ੍ਖਾਰ ਭੇਦਰਹਿਤਤ੍ਤਾ ਅਸਙ੍ਖਾਰਿਕ ਕਮ੍ਮੇਨਪਿ ਵਿਰੋਧੋ ਨਤ੍ਥਿ. ਸਸਙ੍ਖਾਰਿਕ ਕਮ੍ਮੇਨਪਿ ਵਿਰੋਧੋ ਨਤ੍ਥਿ. ਅਸਙ੍ਖਾਰਿਕ ਕਮ੍ਮੇਨਪਿ ਨਿਬ੍ਬਤ੍ਤਨ੍ਤਿ. ਸਸਙ੍ਖਾਰਿਕ ਕਮ੍ਮੇਨਪਿ ਨਿਬ੍ਬਤ੍ਤਨ੍ਤਿ. ਏਵਂ ਉਭਯਕਮ੍ਮ ਨਿਬ੍ਬਤ੍ਤਨਂ ਯੁਤ੍ਤਂ. ‘‘ਇਤਿ ਅਧਿਪ੍ਪਾਯੋ’’ਤਿ ਤਸ੍ਸ ਥੇਰਸ੍ਸ ਅਧਿਪ੍ਪਾਯੋ. ‘‘ਨ ਕਮ੍ਮਾਗਮਨ ਵਸੇਨਾ’’ਤਿ ਕਮ੍ਮਸਙ੍ਖਾਤਸ੍ਸ ਚਿਰਕਾਲਤੋ ਆਗਮਨ ਪਚ੍ਚਯਸ੍ਸ ਵਸੇਨ. ‘‘ਆਗਮਨਂ’’ਤਿ ਚ ਆਗਚ੍ਛਤਿ ਏਤੇਨਾਤਿ ਆਗਮਨਨ੍ਤਿ ਵਿਗ੍ਗਹੋ. ‘‘ਕਮ੍ਮਭਵੇ’’ਤਿ ਅਤੀਤੇ ਕਮ੍ਮਕਰਣਭਵੇ. ‘‘ਕੇਚਨਾ’’ਤਿ ਕੇਚਿ. ਅਟ੍ਠਸਾਲਿਨਿਯਂ ਪਨ ਆਗਤਾਤਿ ਚ. ਪਟਿਸਮ੍ਭਿਦਾ ਮਗ੍ਗੇ ਪਨ ਦ੍ਵਿਹੇਤੁਕਾ ਵੁਤ੍ਤਾਤਿ ਚ ਸਮ੍ਬਨ੍ਧੋ. ਇਮਸ੍ਮਿਂ ਠਾਨੇ ਪਟਿਸਮ੍ਭਿਦਾ ਮਗ੍ਗਟ੍ਠਕਥਾ ਵਚਨਮ੍ਪਿ ਵਤ੍ਤਬ੍ਬਨ੍ਤਿ ਵਦਨ੍ਤੋ ‘‘ਤਤ੍ਥ ਪਨਾ’’ਤਿਆਦਿਮਾਹ. ‘‘ਤੀਸੁਖਣੇਸੂ’’ਤਿ ਕਮ੍ਮਕ੍ਖਣੇ ਨਿਕਨ੍ਤਿਕ੍ਖਣੇ ਪਟਿਸਨ੍ਧਿਕ੍ਖਣੇਤਿ ਤੀਸੁਖਣੇਸੁ. ‘‘ਟੀਕਾਕਾਰਾਪਨਾ’’ਤਿ ਅਭਿਧਮ੍ਮਟੀਕਾਕਾਰਾਪਨ. ‘‘ਸਾਵਸੇਸਪਾਠੋ’’ਤਿ ਪਾਲ਼ਿਯਂ ਤਿਹੇਤੁਕੇਨ ਕਮ੍ਮੇਨ ਦ੍ਵਿਹੇਤੁਕ ਪਟਿਸਨ੍ਧਿ, ਦ੍ਵਿਹੇਤੁਕੇਨ ਕਮ੍ਮੇਨ ਅਹੇਤੁਕ ਪਟਿਸਨ੍ਧਿ ਅਵਸੇਸਾ ਹੋਤਿ. ਏਵਂ ਅਵਸੇਸ ਵਾਕ੍ਯ ਸਹਿਤੋ ਪਾਠੋ. ਸਰਿਕ੍ਖਮੇਵ ਸਰਿਕ੍ਖਕਂ. ਕਮ੍ਮੇਨ ਸਰਿਕ੍ਖਕਂ ਸਦਿਸਂ ਕਮ੍ਮਸਰਿਕ੍ਖਕਂ. ਵਿਪਾਕਂ. ‘‘ਮਹਾਥੇਰੇਨਾ’’ਤਿ ਸਾਰਿਪੁਤ੍ਤ ਮਹਾਥੇਰੇਨ. ਏਵਞ੍ਚ ਕਤ੍ਵਾਤਿਆਦਿਨਾ ਟੀਕਾਕਾਰਾਨਂ ਵਚਨਂ ਉਪਤ੍ਥਮ੍ਭੇਤਿ.

ਕਾਮਾਵਚਰਕਮ੍ਮਂ ਨਿਟ੍ਠਿਤਂ.

੧੫੪. ਰੂਪਾਵਚਰਕਮ੍ਮੇ. ‘‘ਅਪ੍ਪਗੁਣਤਾਯਾ’’ਤਿ ਅਪਰਿਚਿਤਤਾਯ. ਅਵਡ੍ਢਤਾਯ. ‘‘ਹੀਨੇਹਿ ਛਨ੍ਦਾਦੀਹੀ’’ਤਿ ਲਾਭਸਕ੍ਕਾਰ ਸਿਲੋਕਾਦਿ ਸਾਪੇਕ੍ਖਤਾਯ ਹੀਨੇਹਿ ਛਨ੍ਦਾਦੀਹਿ. ‘‘ਤੇ ਧਮ੍ਮਾ’’ਤਿ ਛਨ੍ਦਾਦਯੋ ਧਮ੍ਮਾ. ਤਾਨਿ ਇਧ ਨਾਧਿਪ੍ਪੇਤਾਨਿ. ਕਸ੍ਮਾ, ਉਪਪਤ੍ਤਿਪ੍ਪਭੇਦਸ੍ਸ ਅਸਾਧਕਤ੍ਤਾਤਿ ਅਧਿਪ੍ਪਾਯੋ. ‘‘ਇਮਾਨੇਵਾ’’ਤਿ ਇਮਾਨਿ ਏਵ ਝਾਨਾਨਿ. ‘‘ਤਿਵਿਧਾਸੂ’’ਤਿ ਏਕਸ੍ਮਿਂਤਲੇ ਬ੍ਰਹ੍ਮਪਾਰਿਸਜ੍ਜਾਦਿ ਵਸੇਨ ਤਿਵਿਧਾਸੁ. ‘‘ਅਟ੍ਠਾਰਸਪ੍ਪਭੇਦੇਨ ਵਿਭਜਿਤ੍ਵਾ’’ਤਿ ਤੀਸੁ ਹੀਨ ਮਜ੍ਝਿਮਪਣੀਤੇਸੁ ਏਕੇਕਸ੍ਮਿਂ ਹੀਨ ਹੀਨਂ ਹੀਨ ਮਜ੍ਝਿਮਂ ਹੀਨ ਪਣੀਤਨ੍ਤਿਆਦਿਨਾ ਵਿਭਤ੍ਤੇਨ ਨਵਵਿਧਾਨਿ ਹੋਨ੍ਤਿ. ਪੁਨ ਤੇਸੁ ਤੀਣਿ ਮਜ੍ਝਿਮਾਨਿ. ਮਜ੍ਝਿਮਹੀਨਂ ਮਜ੍ਝਿਮਮਜ੍ਝਿਮਨ੍ਤਿਆਦਿਨਾ ਵਿਭਤ੍ਤਾਨਿ ਨਵਵਿਧਾਨਿ ਹੋਨ੍ਤਿ. ਏਵਂ ਅਟ੍ਠਾਰਸਭੇਦੇਨ ਵਿਭਜਿਤ੍ਵਾ. ‘‘ਕਮ੍ਮਦ੍ਵਾਰਾਨਿ ਨਾਮਾ’’ਤਿ ਕਮ੍ਮਪ੍ਪਵਤ੍ਤਿ ਮੁਖਾਨਿ ਨਾਮ. ‘‘ਇਮੇਹਿ ਪਭਾਵਿਤਤ੍ਤਾ’’ਤਿ ਇਮੇਹਿ ਪਭਾਵੇਹਿ ਮੂਲਕਾਰਣੇਹਿ ਪਭਾਵਿਤਤ੍ਤਾ ਪਵਤ੍ਤਾਪਿਤਤ੍ਤਾ. ‘‘ਅਟ੍ਠਾਰਸਖਤ੍ਤਿਯਾ’’ਤਿ ਹੀਨਮਜ੍ਝਿਮਾਦਿਭੇਦੇਨ ਅਟ੍ਠਾਰਸ ਖਤ੍ਤਿਯਾ. ਤਥਾ ਅਟ੍ਠਾਰਸ ਬ੍ਰਾਹ੍ਮਣਾਦਯੋ. ਅਟ੍ਠ ਚਤ੍ਤਾਲੀਸ ਗੋਤ੍ਤਾਨਿ ਨਾਮ ਹੀਨਮਜ੍ਝਿਮਾ ਦਿਵਸੇਨ ਵਿਭਤ੍ਤਾਨਿ ਗੋਤਮਗੋਤ੍ਤਾਦੀਨਿ ਅਟ੍ਠਚਤ੍ਤਾਲੀਸ ਗੋਤ੍ਤਾਨਿ. ਤੇਸਂ ਚਾਰਿਤ੍ਤ ਪਟਿਪਤ੍ਤਿਭੂਤਾਨਿ ਚਰਣਾਨਿਪਿ ਅਟ੍ਠਚਤ੍ਤਾਲੀਸ ਹੋਨ੍ਤੀਤਿ. ਏਤ੍ਥ ਸਿਯਾ. ਪੁਰਿਮ ਵਚਨੇ ਹੀਨਾਦੀਨਿ ਬ੍ਰਹ੍ਮਲੋਕੇ, ਅਟ੍ਠਕਥਾ ਵਚਨੇਹੀਨਾਦੀਨਿ ਮਨੁਸ੍ਸਲੋਕੇਤਿ ਸਾਧੇਤਬ੍ਬਂ ਅਞ੍ਞਂ, ਸਾਧਕਂ ਅਞ੍ਞਨ੍ਤਿ ਚੋਦਨਾ. ਤਂ ਪਰਿਹਰਤਿ ‘‘ਏਤੇਨਹੀ’’ਤਿਆਦਿਨਾ. ‘‘ਉਪਲਕ੍ਖੇਤੀ’’ਤਿ ਪਚ੍ਚਕ੍ਖਤੋ ਪਾਕਟਂ ਏਕਦੇਸਂ ਦਸ੍ਸੇਤ੍ਵਾ ਅਪਾਕਟੇ ਤਾਦਿਸੇਪਿ ਜਾਨਾਪੇਤੀਤਿ ਅਤ੍ਥੋ. ‘‘ਸਮਤ੍ਥਾ ਸਮਤ੍ਥਂ ਵਾ’’ਤਿ ਸਮਤ੍ਥਾ ਸਮਤ੍ਥਭਾਵਂ ਵਾ. ‘‘ਤਥਾ ਹਾਨੇਨਾ’’ਤਿ ਤਥਾਹਿ ਅਨੇਨ ਆਚਰਿਯੇਨ. ਅਨੁਰੁਦ੍ਧਾ ਚਰਿਯੇਨਾਤਿ ਵੁਤ੍ਤਂ ਹੋਤਿ. ਨਾਮ ਰੂਪ ਪਰਿਚ੍ਛੇਦੇ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਮਾਨਾਸੇਵਨੇ ਲਦ੍ਧੇ ਸਤਿ, ਮਹਬ੍ਬਲੇ ਵਿਜ੍ਜਮਾਨੇ ਮਹਗ੍ਗਤਕਮ੍ਮਂ ਵਿਪਾਕਂ ਜਨੇਤਿ. ਤਾਦਿਸਂ ਹੇਤੁਂ ਅਲਦ੍ਧਾ ਅਲਭਿਤ੍ਵਾ ਅਭਿਞ੍ਞਾ ਚੇਤਨਾ ਵਿਪਾਕਂ ਨ ਪਚ੍ਚਤੀਤਿ ਯੋਜਨਾ. ਤਤ੍ਥ ‘‘ਸਮਾਨਾ ਸੇਵਨੇ’’ਤਿ ਭੂਮਿਸਮਾਨਤਾ ਵਸੇਨ ਸਮਾਨਾਸੇਵਨੇ. ਕਾਮਜਵਨਂ ਕਾਮਜਵਨੇਨ ਸਮਾਨਾਸੇਵਨਂ. ਰੂਪਜਵਨਂ ਰੂਪਜਵਨੇਨ. ਅਰੂਪਜਵਨਂ ਅਰੂਪਜਵਨੇਨਾਤਿ ਦਟ੍ਠਬ੍ਬਂ. ਤੇਨ ਵੁਤ੍ਤਂ ‘‘ਸਮਾਨਭੂਮਿਕਤੋ’’ਤਿਆਦਿ. ਤਤ੍ਥ ‘‘ਤਦਭਾਵਤੋ’’ਤਿ ਤਾਦਿਸਸ੍ਸ ਬਲਵਭਾਵਸ੍ਸ ਅਭਾਵਤੋ. ਏਕਵਾਰਮਤ੍ਤਭੂਤਾ ਮਹਗ੍ਗਤ ਚੇਤਨਾ ਚ. ‘‘ਸਬ੍ਬ ਪਥਮਭੂਤਾ’’ਤਿ ਸਮਾਪਤ੍ਤਿ ਵੀਥੀਸੁ ਗੋਤ੍ਰਭੁਸ੍ਸ ਅਨਨ੍ਤਰੇ ਮਹਗ੍ਗਤ ਜਵਨਂ ਸਨ੍ਧਾਯ ਵੁਤ੍ਤਂ. ਲੋਕੁਤ੍ਤਰ ਮਗ੍ਗਚੇਤਨਾ ਕਦਾਚਿਪਿ ਸਮਾਨਾ ਸੇਵਨਂ ਨ ਲਭਤਿ. ਏਵਂ ਸਨ੍ਤੇਪਿ ਅਤ੍ਤਨੋ ਅਨਨ੍ਤਰਤੋ ਪਟ੍ਠਾਯ ਯਾਵਜੀਵਮ੍ਪਿ ਭਵਨ੍ਤਰੇਪਿ ਅਰਿਯਫਲਂ ਜਨੇਤਿਯੇਵ. ਏਵਮੇਵਾਤਿ ਵੁਤ੍ਤਂ ਹੋਤਿ. ਇਦਂ ਪਵਤ੍ਤਿਫਲਂ ਨਾਮ ਹੋਤਿ, ਇਧ ਪਨ ਪਟਿਸਨ੍ਧਿ ਫਲਂ ਵਿਚਾਰਿਤਂ, ਤਸ੍ਮਾ ਅਸਮਾਨਂ ਇਦਂ ਨਿਦਸ੍ਸਨਨ੍ਤਿ ਚੇ. ਵੁਚ੍ਚਤੇ. ਮਗ੍ਗਚੇਤਨਾ ਨਾਮ ਤਣ੍ਹਾ ਸਹਾਯਕਂ ਵਟ੍ਟਗਾਮਿ ਕਮ੍ਮਂ ਨ ਹੋਤਿ. ਅਤਣ੍ਹਾ ਸਹਾਯਕਂ ਵਿਵਟ੍ਟਗਾਮਿ ਕਮ੍ਮਂ ਹੋਤਿ. ਤਸ੍ਮਾ ਪਟਿਸਨ੍ਧਿਂ ਨ ਦੇਤਿ. ਸਚੇ ਪਨ ਤਂ ਤਣ੍ਹਾ ਸਹਾਯਕਂ ਵਟ੍ਟਗਾਮਿਕਮ੍ਮਂ ਭਵੇਯ੍ਯ. ਪਟਿਸਨ੍ਧਿ ਕਾਲੇਪਿ ਫਲਂ ਦਦੇਯ੍ਯ. ਅਸਮਾਨਾ ਸੇਵਨਤਾ ਪਮਾਣਂ ਨ ਭਵੇਯ੍ਯ. ਏਵਂ ਅਞ੍ਞਕਾਰਣਤ੍ਤਾ ਅਸਮਾਨਂ ਨਿਦਸ੍ਸਨਂ ਹੋਤਿ. ਨ ਅਸਮਾਨਾ ਸੇਵਨਤਾਯਾਤਿ ਦਟ੍ਠਬ੍ਬਂ. ‘‘ਉਪਚਿਤਤ੍ਤਾ’’ਤਿ ਪੁਨਪ੍ਪੁਨਂ ਆਸੇਵਨ ਲਾਭੇਨ ਵਡ੍ਢਿਤਤ੍ਤਾ. ‘‘ਸਾ ਚੇਤਨਾ’’ਤਿਆਦਿਕਮ੍ਮਿਕਮਹਗ੍ਗਤ ਚੇਤਨਾ ਚ. ‘‘ਨਾ’’ਤਿ ਚੋਦਨਾ, ਨ ਸਿਯਾਤਿ ਅਤ੍ਥੋ. ਨ ਚ ਸਾਪਿ ਸਮਾਨਭੂਮਕ ਧਮ੍ਮਤੋ ਲਦ੍ਧਾ ਸੇਵਨਾ ਹੋਤਿ. ਏਵਂ ਸਨ੍ਤੇਪਿ ਕਤਤ੍ਤਾ ਭਾਵਿਤਤ੍ਤਾਤਿ ਵੁਤ੍ਤਂ. ਭਾਵਿਤਤ੍ਤਾਤਿ ਚ ਪੁਨਪ੍ਪੁਨਂ ਆਸੇਵਨ ਲਾਭੇਨ ਵਡ੍ਢਿਤਤ੍ਤਾ ਇਚ੍ਚੇਵਤ੍ਥੋ. ਤਸ੍ਮਾ ਵਿਞ੍ਞਾਯਤਿ ਅਸਮਾਨਭੂਮਿਕੇਹਿ ਪੁਬ੍ਬਭਾਗਪ੍ਪਵਤ੍ਤੇਹਿ ਕਾਮਜਵਨੇਹਿ ਪਰਮ੍ਪਰਤੋ ਪੁਨਪ੍ਪੁਨਂ ਲਦ੍ਧਾ ਸੇਵਨਤਾਯ ਏਵ ਇਧ ਉਪਚਿਤਤ੍ਤਾਤਿ ਵੁਤ੍ਤਨ੍ਤਿ. ਤੇਨ ਵੁਤ੍ਤਂ ‘‘ਉਭਯਤ੍ਥ ਪਨਾ’’ਤਿਆਦਿ. ਤਤ੍ਥ ‘‘ਉਭਯਤ੍ਥਾ’’ਤਿ ਉਭਯੇਸੁ ਕਤਤ੍ਤਾ ਉਪਚਿਤਤ੍ਤਾਤਿ ਚ ਕਤਤ੍ਤਾ ਭਾਵਿਤਤ੍ਤਾਤਿ ਚ ਵੁਤ੍ਤੇਸੁ ਪਾਠੇਸੁ. ‘‘ਪਥਮ ਸਮਨ੍ਨਾਹਾਰਤੋ ਪਟ੍ਟਾਯਾ’’ਤਿ ਮਹਗ੍ਗਤਜ੍ਝਾਨੇ ਅਪ੍ਪਨਾਵੀਥਿਤੋ ਪੁਰੇ ਦ੍ਵੀਸੁ ਪਰਿਕਮ੍ਮ ਭਾਵਨਾ ਉਪਚਾਰ ਭਾਵਨਾਸੁ ਪਰਿਕਮ੍ਮ ਭਾਵਨਂ ਭਾਵੇਨ੍ਤਸ੍ਸ ਪਥਵੀ ਪਥਵੀਤਿਆਦਿਨਾ ਪਥਮ ਸਮਨ੍ਨਾਹਾਰਤੋ ਪਟ੍ਠਾਯ. ਲੋਕੁਤ੍ਤਰ ਮਗ੍ਗੇਪਨ ਦਸਸੁ ਵਿਪਸ੍ਸਨਾ ਞਾਣੇਸੁ ਸਬ੍ਬਪਥਮਂ ਸਮ੍ਮਸਨਞ੍ਞਾਣਂ ਭਾਵੇਨ੍ਤਸ੍ਸ ਰੂਪਂ ਅਨਿਚ੍ਚਂ ਵੇਦਨਾ ਅਨਿਚ੍ਚਾਤਿਆਦਿਨਾ ਪਥਮ ਸਮਨ੍ਨਾਹਾਰਤੋ ਪਟ੍ਠਾਯਾਤਿ ਅਤ੍ਥੋ. ਉਪਚਿਨਿਤ੍ਵਾਤਿ ਚ ਭਾਵੇਤ੍ਵਾਤਿ ਚ ਵਡ੍ਢੇਤ੍ਵਾ ਇਚ੍ਚੇਵ ਅਤ੍ਥੋ. ‘‘ਅਬ੍ਭੁਣ੍ਹਾ’’ਤਿ ਅਭਿਨਵਾਤਿ ਵੁਤ੍ਤਂ ਹੋਤਿ. ‘‘ਅਯਂ ਵਾਦੋ’’ਤਿ ਅਨੁਰੁਦ੍ਧਾ ਚਰਿਯਸ੍ਸ ਵਾਦੋ. ਯਦਿ ਏਵਂ, ਅਟ੍ਠਕਥਾਸੁ ਸਙ੍ਖਾਰ ਪਚ੍ਚਯਾ ਵਿਞ੍ਞਾਣ ਪਦ ਨਿਦ੍ਦੇਸੇਸੁ ਅਭਿਞ੍ਞਾ ਚੇਤਨਾ ਪਨੇਤ੍ਥ ਪਰਤੋ ਵਿਞ੍ਞਾਣਸ੍ਸ ਪਚ੍ਚਯੋ ਨ ਹੋਤੀਤਿ ਨ ਗਹਿਤਾਤਿ ਵੁਤ੍ਤਂ. ਤਤ੍ਥ ਅਞ੍ਞਂ ਯੁਤ੍ਤਂ ਕਾਰਣਂ ਵਤ੍ਤਬ੍ਬਨ੍ਤਿ, ਤਂ ਵਦਨ੍ਤੋ ‘‘ਚਤੁਤ੍ਥਜ੍ਝਾਨ ਸਮਾਧਿਸ੍ਸ ਪਨਾ’’ਤਿਆਦਿਮਾਹ. ‘‘ਟੀਕਾਕਾਰਾ’’ਤਿ ਅਭਿਧਮ੍ਮਟੀਕਾਕਾਰਾ. ‘‘ਤਸ੍ਸਾ ਪਨਾ’’ਤਿਆਦਿ ਅਤ੍ਤਨੋਵਾਦ ਦਸ੍ਸਨਂ. ਸਾਧੇਨ੍ਤਿਯਾ ਅਭਿਞ੍ਞਾ ਚੇਤਨਾਯ. ਅਚਿਤ੍ਤਕਭਵ ਪਤ੍ਥਨਾਸਹਿਤਂ ਸਞ੍ਞਾ ਵਿਰਾਗਨ੍ਤਿ ਸਮ੍ਬਨ੍ਧੋ. ‘‘ਇਧਾ’’ਤਿ ਮਨੁਸ੍ਸ ਲੋਕੇ.

‘‘ਅਨਾਗਾਮਿਨੋ ਪਨਾ’’ਤਿਆਦੀਸੁ. ‘‘ਏਤੇਨਾ’’ਤਿ ਏਤੇਨ ਅਤ੍ਥ ਵਚਨੇਨ. ‘‘ਸਦ੍ਧਾਧਿਕੋ’’ਤਿ ਸਨ੍ਧਿਨ੍ਦ੍ਰਿਯਾਧਿਕੋ. ਏਵਂ ਵੀਰਿਯਾਧਿਕਾਦੀਸੁਪਿ. ‘‘ਅਤ੍ਤਨਾ ਲਦ੍ਧ ਸਮਾਪਤ੍ਤੀਨਂ’’ਤਿ ਏਕਸ੍ਸਪਿ ਪੁਗ੍ਗਲਸ੍ਸ ਬਹੂਨਂ ਅਤ੍ਤਨਾ ਲਦ੍ਧ ਸਮਾਪਤ੍ਤੀਨਂ. ਤੇਸੁ ਪੁਥੁਜ੍ਜਨ ਸੋਤਾਪਨ੍ਨ ਸਕਦਾਗਾਮੀਸੁ. ‘‘ਪੁਥੁਜ੍ਜਨੋ’’ਤਿ ਝਾਨਲਾਭਿ ਪੁਥੁਜ੍ਜਨੋ. ‘‘ਨਿਕਨ੍ਤਿਯਾਸਤੀ’’ਤਿ ਕਾਮਭਵਨਿਕਨ੍ਤਿਯਾ ਸਤਿ. ‘‘ਇਤਰੇ ਪਨਾ’’ਤਿ ਸੋਤਾਪਨ੍ਨ ਸਕਦਾਗਾਮਿਨੋ ਪਨ. ਪਰਿਹੀਨਜ੍ਝਾਨਾ ਏਵ ਤਤ੍ਥ ਨਿਬ੍ਬਤ੍ਤਨ੍ਤਿ. ਨ ਨਿਕਨ੍ਤਿ ਬਲੇਨਾਤਿ ਅਧਿਪ੍ਪਾਯੋ. ਵਿਭਾਵਨਿਪਾਠੇ ‘‘ਤੇਸਂ ਪੀ’’ਤਿ ਝਾਨਲਾਭਿ ਸੋਤਾਪਨ੍ਨ ਸਕਦਾਗਾਮੀਨਮ੍ਪਿ. ਇਚ੍ਛਨ੍ਤੇਨ ਟੀਕਾਚਰਿਯੇਨ. ਤਥਾ ਨਿਕਨ੍ਤਿਯਾ ਸਤਿ ਪੁਥੁਜ੍ਜਨਾਦਯੋ ਕਾਮਾਵਚਰ ਕਮ੍ਮ ਬਲੇਨ ਕਾਮਭਵੇਪਿ ਨਿਬ੍ਬਤ੍ਤਨ੍ਤੀਤਿ ਯੋਜਨਾ. ਚੇਤੋਪਣਿਧਿ ਇਜ੍ਝਤਿ. ਕਸ੍ਮਾ, ਵਿਸੁਦ੍ਧਤ੍ਤਾ. ਸੀਲਵਿਸੁਦ੍ਧਤ੍ਤਾਤਿ ਅਧਿਪ੍ਪਾਯੋ. ‘‘ਤੇ’’ਤਿ ਝਾਨਲਾਭਿ ਸੋਤਾਪਨ੍ਨ ਸਕਦਾਗਾਮਿਨੋ. ਅਙ੍ਗੁਤ੍ਤਰ ਪਾਠੇ. ‘‘ਸਹਦਸ੍ਸਨੁਪ੍ਪਾਦਾ’’ਤਿ ਸੋਤਾਪਤ੍ਤਿ ਮਗ੍ਗਞ੍ਞਾਣਂ ਦਸ੍ਸਨਨ੍ਤਿ ਵੁਚ੍ਚਤਿ. ਦਸ੍ਸਨਸ੍ਸ ਉਪ੍ਪਾਦਕ੍ਖਣੇਨ ਸਦ੍ਧਿਂ. ਨਤ੍ਥਿ ਤਸ੍ਸ ਤਂ ਸਂਯੋਜਨਨ੍ਤਿਪਿ ਪਾਠੋ. ‘‘ਇਮਂ ਲੋਕਂ’’ਤਿ ਇਮਂ ਕਾਮਲੋਕਂ. ‘‘ਵਿਪਸ੍ਸਨਾ ਨਿਕਨ੍ਤਿ ਤਣ੍ਹਾ’’ਤਿ ਤੇਨੇਵ ਧਮ੍ਮਰਾਗੇਨ ਤਾਯ ਧਮ੍ਮ ਨਨ੍ਦਿਯਾਤਿ ਏਵਂ ਵੁਤ੍ਤਾ ਵਿਪਸ੍ਸਨਾ ਸੁਖੇ ਨਿਕਨ੍ਤਿ ਤਣ੍ਹਾ. ਪਚ੍ਚਯੇ ਸਤਿ ਕੁਪ੍ਪਨ੍ਤਿ ਨਸ੍ਸਨ੍ਤੀਤਿ ਕੁਪ੍ਪਾ. ਕੁਪ੍ਪਾ ਧਮ੍ਮਾ ਯੇਸਂ ਤੇ ਕੁਪ੍ਪ ਧਮ੍ਮਾ. ‘‘ਧਮ੍ਮਾ’’ਤਿ ਮਹਗ੍ਗਤ ਧਮ੍ਮਾ. ਇਮੇ ਦ੍ਵੇ ਸੋਤਾਪਨ੍ਨ ਸਕਦਾਗਾਮਿਨੋ ਸੀਲੇਸੁ ਪਰਿਪੂਰਕਾਰਿਨੋ ਨਾਮ. ਸੀਲਪ੍ਪਟਿ ਪਕ੍ਖਾਨਂ ਕਿਲੇਸਾਨਂ ਸਬ੍ਬਸੋ ਪਹੀਨਤ੍ਤਾ. ਤਸ੍ਮਾ ਤੇ ਸੀਲੇਸੁ ਅਕੁਪ੍ਪ ਧਮ੍ਮਾਤਿ ਵੁਚ੍ਚਨ੍ਤਿ. ਸਮਾਧਿਸ੍ਮਿਂ ਪਨ ਕੁਪ੍ਪ ਧਮ੍ਮਾ ਏਵ. ‘‘ਮਹਾਬ੍ਰਹ੍ਮੇਸੁ ਨ ਨਿਬ੍ਬਤ੍ਤਨ੍ਤੀ’’ਤਿ ਮਹਾਬ੍ਰਹ੍ਮਤ੍ਤਂ ਨ ਲਭਨ੍ਤੀਤਿ ਅਧਿਪ੍ਪਾਯੋ. ‘‘ਹੀਨਜ੍ਝਾਸਯਤ੍ਤਾ’’ਤਿ ਏਤ੍ਥ ਇਤ੍ਥਿਯੋ ਨਾਮ ਪਕਤਿਯਾਵ ਹੀਨਜ੍ਝਾਸਯਾ ਹੋਨ੍ਤਿ ਨੀਚ ਛਨ੍ਦਾ ਨੀਚ ਚਿਤ੍ਤਾ ਮਨ੍ਦਵੀਰਿਯਾ ਮਨ੍ਦਪਞ੍ਞਾ. ਕਸ੍ਮਾ, ਹੀਨਲਿਙ੍ਗਤ੍ਤਾ. ਕਸ੍ਮਾ ਚ ਤਾ ਹੀਨਲਿਙ੍ਗਾ ਹੋਨ੍ਤਿ. ਦੁਬ੍ਬਲ ਕਮ੍ਮਨਿਬ੍ਬਤ੍ਤਤ੍ਤਾ. ਦੁਬ੍ਬਲ ਕਮ੍ਮਨ੍ਤਿ ਚ ਪੁਰਿਸਤ੍ਤ ਜਨਕਂ ਕਮ੍ਮਂ ਉਪਾਦਾਯ ਵੁਚ੍ਚਤਿ. ਬ੍ਰਹ੍ਮਪੁਰੋਹਿਤਾਨਮ੍ਪਿ ਸਙ੍ਗਹਣਂ ਵੇਦਿਤਬ੍ਬਂ. ਕਸ੍ਮਾ, ਬ੍ਰਹ੍ਮਪਾਰਿਸਜ੍ਜਾਨਨ੍ਤਿ ਅਟ੍ਠਕਥਾ ਵਚਨਸ੍ਸ ਯੇਭੂਯ੍ਯਵਚਨਤ੍ਤਾ. ਤੇਨਾਹ ‘‘ਨ ਮਹਾਬ੍ਰਹ੍ਮਾਨਂ’’ਤਿ. ਇਤਰਥਾ ਨ ਬ੍ਰਹ੍ਮਪੁਰੋਹਿਤਾਨਂ ਨ ਚ ਮਹਾਬ੍ਰਹ੍ਮਾਨਨ੍ਤਿ ਵੁਤ੍ਤਂ ਸਿਯਾ. ਨ ਚ ਤਥਾ ਸਕ੍ਕਾ ਵਤ੍ਤੁਂ ‘ਬ੍ਰਹ੍ਮਤ੍ਤਨ੍ਤਿ ਮਹਾਬ੍ਰਹ੍ਮਤ੍ਤ’ਨ੍ਤਿ ਇਮਿਨਾ ਵਚਨੇਨ ਵਿਰੁਜ੍ਝਨਤੋ. ਅਯਞ੍ਚ ਅਤ੍ਥੋ ਨ ਕੇਵਲਂ ਯੇਭੂਯ੍ਯਨਯਮਤ੍ਤੇਨ ਸਿਦ੍ਧੋ. ਅਥ ਖੋ ਬ੍ਯਞ੍ਜਨ ਸਾਮਤ੍ਥਿਯੇਨਾਪਿ ਸਿਦ੍ਧੋਤਿ ਦਸ੍ਸੇਤੁਂ ‘‘ਤੇਹੀ’’ਤਿਆਦਿਮਾਹ. ਤਤ੍ਥ ‘‘ਤੇ’’ਤਿ ਬ੍ਰਹ੍ਮਪੁਰੋਹਿਤਾ. ਸਂਯੁਤ੍ਤਪਾਠੇ. ‘‘ਪਟਿਭਾਤੁਤਂ’’ਤਿ ਏਤ੍ਥ ‘‘ਤਂ’’ਤਿ ਤੁਯ੍ਹਂ. ਧਮ੍ਮੀਕਥਾ ਤੁਯ੍ਹਂ ਪਟਿਭਾਤੁ, ਪਾਤੁਬ੍ਭਵਤੁ. ਕਥੇਤੁ ਇਚ੍ਚੇਵ ਵੁਤ੍ਤਂ ਹੋਤਿ. ‘‘ਬ੍ਰਾਹ੍ਮਣਾ’’ਤਿ ਅਭਿਭੁਂ ਭਿਕ੍ਖੁਂ ਆਲਪਤਿ. ‘‘ਬ੍ਰਹ੍ਮੁਨੋ’’ਤਿ ਮਹਾਬ੍ਰਹ੍ਮੁਨੋ ਅਤ੍ਥਾਯ. ਏਵਂ ਸੇਸੇਸੁ ਦ੍ਵੀਸੁ. ‘‘ਤੇਸਂ’’ਤਿ ਬ੍ਰਹ੍ਮਪੁਰੋਹਿਤਾਨਂ. ਵਿਭਾਵਨਿਪਾਠੇ ‘‘ਇਤਿ ਅਤ੍ਥੋ ਦਟ੍ਠਬ੍ਬੋ’’ਤਿ ‘‘ਬ੍ਰਹ੍ਮਪਾਰਿਸਜ੍ਜੇਸੁ ਯੇਵਾ’’ਤਿ ਪੁਲ੍ਲਿਙ੍ਗ ਵਚਨਤ੍ਤਾ ਪੁਗ੍ਗਲਪ੍ਪਧਾਨਂ ਹੋਤਿ. ਨਭੂਮਿਪ੍ਪਧਾਨਂ. ਤਸ੍ਮਾ ਅਯਮਤ੍ਥੋ ਯੁਤ੍ਤਿਵਸੇਨ ਦਟ੍ਠਬ੍ਬੋਤਿ. ‘‘ਤੀਸੁਭਵਗ੍ਗੇਸੂ’’ਤਿ ਵੇਹਪ੍ਫਲਭੂਮਿ ਪੁਥੁਜ੍ਜਨਭਵਗ੍ਗੋ ਨਾਮ ਹੋਤਿ ਰੂਪਲੋਕੇ. ਤਤੋ ਉਪਰਿ ਪੁਥੁਜ੍ਜਨਭੂਮਿਯਾ ਅਭਾਵਤੋ. ਅਕਨਿਟ੍ਠਭੂਮਿ ਅਰਿਯਭਵਗ੍ਗੋ ਨਾਮ. ਤਤ੍ਥ ਠਿਤਾਨਂ ਅਰਿਯਾਨਂ ਤਤ੍ਥੇਵ ਨਿਟ੍ਠਾਨਤੋ. ਨੇਵਸਞ੍ਞਾਭੂਮਿ ਲੋਕਭਵਗ੍ਗੋ ਨਾਮ. ਤਤੋ ਉਪਰਿ ਲੋਕਸ੍ਸੇਵ ਅਭਾਵਤੋਤਿ.

ਕਮ੍ਮਚਤੁਕ੍ਕਾਨੁਦੀਪਨਾ ਨਿਟ੍ਠਿਤਾ.

੧੫੫. ਮਰਣੁਪ੍ਪਤ੍ਤਿਯਂ. ‘‘ਆਯੁਪਰਿਮਾਣਸ੍ਸਾ’’ਤਿ ਆਯੁਕਪ੍ਪਸ੍ਸ. ‘‘ਤਦੁਭਯਸ੍ਸਾ’’ਤਿ ਆਯੁਕਪ੍ਪਸ੍ਸ ਚ ਕਮ੍ਮਸ੍ਸ ਚ. ‘‘ਉਪਘਾਤਕ ਕਮ੍ਮੇਨਾ’’ਤਿ ਬਲਵਨ੍ਤੇਨ ਪਾਣਾਤਿਪਾਤਕਮ੍ਮੇਨ. ‘‘ਦੁਸ੍ਸਿਮਾਰ ਕਲਾਬੁਰਾਜਾਦੀਨਂ ਵਿਯਾ’’ਤਿ ਤੇਸਂ ਮਰਣਂ ਵਿਯ. ਉਪਰੋਧਿਤਂ ਖਨ੍ਧ ਸਨ੍ਤਾਨ ਮਸ੍ਸਾਤਿ ਵਿਗ੍ਗਹੋ. ‘‘ਉਪਰੋਧਿਤਂ’’ਤਿ ਉਪਗਨ੍ਤ੍ਵਾ ਨਿਰੋਧਾਪਿਤਂ. ਕਮ੍ਮਂ ਖਿਯ੍ਯਤਿਯੇਵ. ਏਵਂ ਸਤਿ, ਸਬ੍ਬਂਪਿ ਮਰਣਂ ਏਕੇਨ ਕਮ੍ਮਕ੍ਖਯੇਨ ਸਿਦ੍ਧਂ. ਤਸ੍ਮਾ ਏਕਂ ਕਮ੍ਮਕ੍ਖਯ ਮਰਣਮੇਵ ਵਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ‘‘ਇਤਰੇਪਿ ਵੁਤ੍ਤਾ’’ਤਿ ਇਤਰਾਨਿਪਿ ਤੀਣਿ ਮਰਣਾਨਿ ਵੁਤ੍ਤਾਨੀਤਿ ਚੋਦਨਾ. ਵੁਚ੍ਚਤੇ ਪਰਿਹਾਰੋ. ‘‘ਸਰਸਵਸੇਨੇਵਾ’’ਤਿ ਅਤ੍ਤਨੋ ਧਮ੍ਮਤਾਵਸੇਨੇਵ. ਨਾਨਾ ਆਯੁ ਕਪ੍ਪਂ ਵਿਦਹਨ੍ਤਿ ਸਙ੍ਖਰੋਨ੍ਤੀਤਿ ਨਾਨਾਆਯੁਕਪ੍ਪ ਵਿਧਾਯਕਾ. ‘‘ਸਤ੍ਤਨਿਕਾਯੇ’’ਤਿ ਸਤ੍ਤਸਮੂਹੇ. ਨਿਚ੍ਚਕਾਲਂ ਠਿਤਿਂ ਕਰੋਨ੍ਤੀਤਿ ਠਿਤਿਕਰਾ. ਕਦਾਚਿ ਵੁਦ੍ਧਿਂ ਕਰੋਨ੍ਤਿ, ਕਦਾਚਿ ਹਾਨਿਂ ਕਰੋਨ੍ਤੀਤਿ ਵੁਦ੍ਧਿਕਰਾ ਹਾਨਿਕਰਾ ਚ. ‘‘ਤੇਸਂ ਵਸੇਨਾ’’ਤਿ ਤੇਸਂ ਉਤੁ ਆਹਾਰਾਨਂ ਵਸੇਨ. ‘‘ਤਯੋਪਿ ਚੇਤੇ’’ਤਿ ਏਤੇਤਯੋਪਿ ਠਿਤਿਕਰਾਦਯੋ. ਕਮ੍ਮਂ ਵਿਪਚ੍ਚਮਾਨਂ ਦਤ੍ਵਾ ਖਿਯ੍ਯਤੀਤਿ ਸਮ੍ਬਨ੍ਧੋ. ਏਤੇਨ ਏਵਰੂਪੇਠਾਨੇ ਕਮ੍ਮਂ ਅਪ੍ਪਧਾਨਨ੍ਤਿ ਦੀਪੇਤਿ. ‘‘ਤਦਨੁਰੂਪਂ ਏਵਾ’’ਤਿ ਤਂ ਦਸਵਸ੍ਸਕਾਲਾਨੁ ਰੂਪਂ ਏਵ. ‘‘ਭੋ ਗਞ੍ਚਾ’’ਤਿ ਧਨਧਞ੍ਞਾਦਿਪਰਿਭੋਗਞ੍ਚ. ਤੇਸਂ ਉਤੁਆਹਾਰਾਨਂ ਗਤਿ ਏਤੇਸਨ੍ਤਿ ਤਗ੍ਗਤਿਕਾ. ਤੇਸਂ ਉਤੁਆਹਾਰਾਨਂ ਗਤਿਂ ਅਨੁਵਤ੍ਤਨ੍ਤੀਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਤਦਨੁਵਤ੍ਤਿਕਾ’’ਤਿ. ਸਙ੍ਖਾਰਵਿਦੂਹਿ ਅਞ੍ਞਤ੍ਰਾਤਿ ਸਮ੍ਬਨ੍ਧੋ. ਸਙ੍ਖਾਰਵਿਦੁਨੋ ਠਪੇਤ੍ਵਾਤਿ ਅਤ੍ਥੋ. ਇਦ੍ਧਿਯਾ ਪਕਤਾਤਿ ਇਦ੍ਧਿਮਯਾ. ‘‘ਇਦ੍ਧਿਯਾ’’ਤਿ ਦੇਵਿਦ੍ਧਿਯਾਵਾ ਭਾਵਨਾਮਯਿਦ੍ਧਿਯਾਵਾ. ਵਿਜ੍ਜਾਯ ਪਕਤਾਤਿ ਵਿਜ੍ਜਾਮਯਾ. ‘‘ਵਿਜ੍ਜਾਯਾ’’ਤਿ ਗਨ੍ਧਾਰਿਵਿਜ੍ਜਾਯ. ਅਟ੍ਠਿ ਨ੍ਹਾਰੁ ਮਂਸ ਲੋਹਿਤਾਦਿਕਾ ਰਸਧਾਤੁਯੋ ਅਯਨ੍ਤਿ ਵਡ੍ਢਨ੍ਤਿ ਏਤੇਹੀਤਿ ਰਸਾਯਨਾਨਿ. ਤਾਨਿ ਵਿਦਹਨ੍ਤਿ ਏਤੇਹੀਤਿ ਰਸਾਯਨ ਵਿਧਯੋ. ਨਯੂਪਦੇਸਾ. ਚਿਰਟ੍ਠਿਤਿ ਕਤ੍ਥਾਯ ਜੀਵਿਤਂ ਸਙ੍ਖਰੋਨ੍ਤਿ ਏਤੇਹੀਤਿ ਜੀਵਿਤ ਸਙ੍ਖਾਰਾ. ਇਦ੍ਧਿਮਯ ਵਿਜ੍ਜਾਮਯ ਜੀਵਿਤ ਸਙ੍ਖਾਰੇਸੁ ਚ ਰਸਾਯਨ ਵਿਧਿਸਙ੍ਖਾਤੇਸੁ ਜੀਵਿਤ ਸਙ੍ਖਾਰੇਸੁ ਚ ਵਿਦੁਨੋਤਿ ਸਮਾਸੋ. ‘‘ਦ੍ਵਿ ਸਮੁਟ੍ਠਾਨਿਕ ਰੂਪਧਮ੍ਮੇਸੂ’’ਤਿ ਉਤੁਸਮੁਟ੍ਠਾਨਿਕ ਰੂਪਧਮ੍ਮੇਸੁ ਚ ਆਹਾਰ ਸਮੁਟ੍ਠਾਨਿਕ ਰੂਪਧਮ੍ਮੇਸੁ ਚ. ‘‘ਪਰਿਣਮਨ੍ਤੇਸੂ’’ਤਿ ਵਿਪਰਿਣਮਨ੍ਤੇਸੁ. ਤੇਨਾਹ ‘‘ਜਿਯ੍ਯਮਾਨੇਸੂ’’ਤਿਆਦਿਂ. ‘‘ਯਾਵਮਹਨ੍ਤਂ ਪੀਤਿ’’ ਸਬ੍ਬਞ੍ਞੁਬੁਦ੍ਧਾਨਂ ਕਮ੍ਮਂ ਵਿਯ ਕੋਟਿਪਤ੍ਤਵਸੇਨ ਅਤਿਮਹਨ੍ਤਮ੍ਪਿ. ‘‘ਅਸ੍ਸਾ’’ਤਿ ਕਮ੍ਮਸ੍ਸ. ‘‘ਉਪਚ੍ਛੇਦਕ ਮਰਣੇਪਿ ਨੇਤਬ੍ਬੋ’’ਤਿ ਬਲਵਨ੍ਤੇ ਉਪਚ੍ਛੇਦਕ ਕਮ੍ਮੇ ਆਗਤੇ ਯਾਵਮਹਨ੍ਤਮ੍ਪਿ ਜਨਕ ਕਮ੍ਮਂ ਅਤ੍ਤਨੋ ਵਿਪਾਕਾਧਿਟ੍ਠਾਨ ਵਿਪਤ੍ਤਿਯਾ ਖਿਯ੍ਯਤਿਯੇਵ. ਸੋ ਚਸ੍ਸਖਯੋ ਨ ਸਰਸੇਨ ਹੋਤਿ, ਅਥ ਖੋ ਉਪਚ੍ਛੇਦਕ ਕਮ੍ਮ ਬਲੇਨ ਹੋਤੀਤਿ ਇਧ ਉਪਚ੍ਛੇਦਕ ਮਰਣਂ ਵਿਸੁਂ ਗਹਿਤਨ੍ਤਿ ਏਵਂ ਉਪਚ੍ਛੇਦਕ ਮਰਣੇਪਿ ਨੇਤਬ੍ਬੋ. ‘‘ਅਕਾਲ ਮਰਣਂ’’ਤਿ ਆਯੁਕ੍ਖਯਮਰਣਾਦੀਨਿ ਤੀਣਿ ਮਰਣਾਨਿ ਕਾਲਮਰਣਾਨਿ ਨਾਮ, ਮਰਣਾ ਰਹਕਾਲੇ ਮਰਣਾਨੀਤਿ ਵੁਤ੍ਤਂ ਹੋਤਿ. ਤਤੋ ਅਞ੍ਞਂ ਯਂ ਕਿਞ੍ਚਿ ਮਰਣਂ ਅਕਾਲ ਮਰਣਨ੍ਤਿ ਵੁਚ੍ਚਤਿ. ਤੇਨਾਹ ‘‘ਤਞ੍ਹਿ ਪਵਤ੍ਤਮਾਨਂ’’ਤਿਆਦਿਂ. ‘‘ਮੂਲਭੇਦਤੋ’’ਤਿ ਮੂਲਕਾਰਣਪ੍ਪਭੇਦਤੋ. ਯਸ੍ਮਾ ਪਨ ਮਿਲਿਨ੍ਦ ਪਞ੍ਹੇ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਨ੍ਨਿਪਤਨ੍ਤੀਤਿ ਸਨ੍ਨਿਪਾਤਾ. ਸਨ੍ਨਿਪਾਤੇਹਿ ਉਪ੍ਪਨ੍ਨਾ ਸਨ੍ਨਿਪਾਤਿਕਾਤਿ ਅਤ੍ਥਂ ਸਨ੍ਧਾਯ ‘‘ਸਨ੍ਨਿਪਤਿਤਾਨਂ’’ਤਿ ਵੁਤ੍ਤਂ. ਅਥਵਾ. ਸਨ੍ਨਿਪਤਨਂ ਸਨ੍ਨਿਪਾਤੋ. ਦ੍ਵਿਨ੍ਨਂ ਤਿਣ੍ਣਂ ਵਾ ਦੋਸਾਨਂ ਮਿਸ੍ਸਕਭਾਵੋ. ਸਨ੍ਨਿਪਾਤੇਨ ਉਪ੍ਪਨ੍ਨਾ ਸਨ੍ਨਿਪਾਤਿਕਾਤਿਪਿ ਯੁਜ੍ਜਤਿ. ‘‘ਅਨਿਸਮ੍ਮਕਾਰੀਨਂ’’ਤਿ ਅਨਿਸਾਮੇਤ੍ਵਾ ਅਨੁਪਧਾਰੇਤ੍ਵਾ ਕਰਣ ਸੀਲਾਨਂ. ਪਵਤ੍ਤਾ ਆਬਾਧਾ ਵਿਸਮਪਰਿਹਾਰਜਾਨਾਮਾਤਿ ਯੋਜਨਾ. ‘‘ਅਤ੍ਤਨਾ ਵਾਕਤਾਨਂ ਪਯੋਗਾਨਂ’’ਤਿ ਸਤ੍ਥਹਰਣ, ਵਿਸਖਾਦਨ, ਉਦਕਪਾਤਨਾਦਿਵਸੇਨ ਕਤਾਨਂ. ‘‘ਵਿਨਾਸੇਨ੍ਤੀ’’ਤਿ ਸਤ੍ਥਵਸ੍ਸ ਵਾਲੁਕਵਸ੍ਸਾਦੀਨਿ ਵਸ੍ਸਾਪੇਤ੍ਵਾਵਾ ਸਮੁਦ੍ਦ ਵੀਚਿਯੋ ਉਟ੍ਠਾਪੇਤ੍ਵਾਵਾ ਏਵਰੂਪੇ ਮਹਨ੍ਤੇ ਭਯੁਪਦ੍ਦਵੇ ਕਤ੍ਵਾ ਵਿਨਾਸੇਨ੍ਤਿ. ‘‘ਮਨੁਸ੍ਸ ਪਥੇ’’ਤਿ ਮਨੁਸ੍ਸ ਪਦੇਸੇ. ‘‘ਤੇ’’ਤਿ ਚਣ੍ਡਾ ਯਕ੍ਖਾ. ‘‘ਜੀਵਿਤਕ੍ਖਯਂ ਪਾਪੇਨ੍ਤੀ’’ਤਿ ਮਨੁਸ੍ਸਾਨਂ ਵਾ ਗੋਮਹਿਂਸਾਨਂ ਵਾ ਮੇਦਲੋਹਿਤਾਨਿ ਪਾਤਬ੍ਯਤ੍ਥਾਯ ਤੇਸੁ ਨਾਨਾਰੋਗਨ੍ਤਰ ਕਪ੍ਪਾਨਿ ਉਪ੍ਪਾਦੇਤ੍ਵਾ ਜੀਵਿਤਕ੍ਖਯਂ ਪਾਪੇਨ੍ਤੀਤਿ ਅਤ੍ਥੋ. ‘‘ਵਤ੍ਤਬ੍ਬਮੇਵ ਨਤ੍ਥੀ’’ਤਿ ਸਕਲਂ ਰਜ੍ਜਂ ਵਾ ਰਟ੍ਠਂ ਵਾ ਦੀਪਕਂ ਵਾ ਵਿਨਾਸੇਨ੍ਤੀਤਿ ਵੁਤ੍ਤੇ ਸਕਲਂ ਜਨਪਦਂ ਵਾ ਨਗਰਂ ਵਾ ਨਿਗਮਂ ਵਾ ਗਾਮਂ ਵਾ ਤਂ ਤਂ ਪੁਗ੍ਗਲਂ ਵਾ ਵਿਨਾਸੇਨ੍ਤੀਤਿ ਵਿਸੁਂ ਵਤ੍ਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ. ‘‘ਸਤ੍ਥਦੁਬ੍ਭਿਕ੍ਖਰੋਗਨ੍ਤਰ ਕਪ੍ਪਾਪੀ’’ਤਿ ਸਤ੍ਥਨ੍ਤਰ ਕਪ੍ਪੋ ਦੁਬ੍ਭਿਕ੍ਖਨ੍ਤਰ ਕਪ੍ਪੋ ਰੋਗਨ੍ਤਰ ਕਪ੍ਪੋਤਿ ਇਮੇ ਤਯੋ ਅਨ੍ਤਰ ਕਪ੍ਪਾਪਿ ਇਧ ਵਤ੍ਤਬ੍ਬਾਤਿ ਅਤ੍ਥੋ. ਤੇਸੁ ਪਨ ਰੋਗਨ੍ਤਰ ਕਪ੍ਪੋ ਯਕ੍ਖਾ ਵਾਲ਼ੇ ਅਮਨੁਸ੍ਸੇ ਓਸ੍ਸਜ੍ਜਨ੍ਤਿ, ਤੇਨ ਬਹੂ ਮਨੁਸ੍ਸਾ ਕਾਲਙ੍ਕਰੋਨ੍ਤੀਤਿ ਇਮਿਨਾ ਏਕਦੇਸੇਨ ਵੁਤ੍ਤੋਯੇਵ. ‘‘ਉਪਪੀਲ਼ਕੋ ਪਘਾਤਕਾਨਂ ਕਮ੍ਮਾਨਂ ਵਿਪਚ੍ਚਨਵਸੇਨਾ’’ਤਿ ਏਤ੍ਥ ਤੇਸਂ ਕਮ੍ਮਾਨਂ ਓਕਾਸਪ੍ਪਟਿਲਾਭੇਨ ਸਤ੍ਤਸਨ੍ਤਾਨੇ ਸੁਖਸਨ੍ਤਾਨਂ ਵਿਬਾਧੇਤ੍ਵਾ ਮਰਣਂ ਵਾ ਪਾਪੇਤ੍ਵਾ ਮਰਣ ਮਤ੍ਤਂ ਵਾ ਦੁਕ੍ਖਂ ਜਨੇਤ੍ਵਾ ਪੀਲ਼ਨਞ੍ਚ ਘਾਤਨਞ੍ਚ ਇਧ ਵਿਪਚ੍ਚਨ ਨਾਮੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵਿਪਾਕਂ ਪਨ ਜਨੇਨ੍ਤੁਵਾ, ਮਾਵਾ, ਇਧ ਅਪ੍ਪਮਾਣਨ੍ਤਿ. ਏਤ੍ਥ ਸਿਯਾ. ਅਟ੍ਠਸੁ ਕਾਰਣੇਸੁ ਓਪਕ੍ਕਮਿਕਟ੍ਠਾਨੇ ‘ਕੁਪ੍ਪਿਤਾਹਿ ਦੇਵਤਾ ਸਕਲਂ ਰਜ੍ਜਾਦਿਕਂ ਅਸੇਸਂ ਕਤ੍ਵਾ ਵਿਨਾਸੇਨ੍ਤੀ’ਤਿ ਵੁਤ੍ਤਂ. ਤਤ੍ਥ ਵਿਨਾਸਿਤਾ ਜਨਾ ਕਿਂ ਨੁ ਖੋ ਅਤ੍ਤਨੋ ਅਤ੍ਤਨੋ ਕਮ੍ਮ ਵਿਪਾਕਜੇਹਿ ਆਬਾਧਨ ਦਣ੍ਡੇਹਿ ਵਾ ਵਿਨਸ੍ਸਨ੍ਤਿ, ਉਦਾਹੁ ਵਿਸੁਂ ਓਪਕ੍ਕਮਿਕੇਹਿ ਆਬਾਧਨ ਦਣ੍ਡੇਹਿ ਵਾ ਵਿਨਸ੍ਸਨ੍ਤਿ. ਯਞ੍ਚੇਤ੍ਥ ਵੁਤ੍ਤਂ ‘ਏਵਂ ਅਕਾਲ ਮਰਣਂ ਉਪਚ੍ਛੇਦਕ ਕਮ੍ਮੁਨਾ ਵਾ ਅਞ੍ਞੇਹਿ ਵਾ ਅਨੇਕ ਸਹਸ੍ਸੇਹਿ ਕਾਰਣੇਹਿ ਹੋਤੀ’ਤਿ. ਤਤ੍ਥ ਯਸ੍ਸ ਉਪਚ੍ਛੇਦਕ ਕਮ੍ਮਂ ਨਾਮ ਨਤ੍ਥਿ. ਕਿਂ ਤਸ੍ਸ ਅਞ੍ਞੇਨ ਕਾਰਣੇਨ ਅਕਾਲ ਮਰਣਂ ਨਾਮ ਭਵੇਯ੍ਯਾਤਿ. ਏਤ੍ਥ ਵਦੇਯ੍ਯੁਂ, ਤਸ੍ਸ ਅਞ੍ਞੇਨ ਕਾਰਣੇਨ ਅਕਾਲ ਮਰਣਂ ਨਾਮ ਨ ਭਵੇਯ੍ਯ. ਸਬ੍ਬੇ ਸਤ੍ਤਾ ਕਮ੍ਮਸ੍ਸਕਾ, ਕਮ੍ਮਦਾਯਾਦਾ, ਕਮ੍ਮਯੋਨੀ, ਕਮ੍ਮ ਬਨ੍ਧੂ, ਕਮ੍ਮਪ੍ਪਟਿਸ੍ਸਰਣਾਤਿਹਿ ਵੁਤ੍ਤਂਤਿ. ਤੇਸਂ ਤਂ ਵਾਦਂ ਭਿਨ੍ਦਨ੍ਤੋ ‘‘ਯੇਹਿਕੇਚਿ ਲੋਕੇ ਦਿਸ੍ਸਨ੍ਤੀ’’ਤਿਆਦਿਮਾਹ. ਪੁਨ ਤਦਤ੍ਥਂ ਦਲ਼੍ਹਂ ਕਰੋਨ੍ਤੋ ‘‘ਯਥਾਹਾ’’ਤਿਆਦਿਂ ਵਦਤਿ. ਤਤ੍ਥ ਦੁਵਿਧਂ ਕਮ੍ਮਫਲਂ, ਵਿਪਾਕ ਫਲਞ੍ਚ ਨਿਸ੍ਸਨ੍ਦ ਫਲਞ੍ਚ. ਤਤ੍ਥ ਵਿਪਾਕ ਫਲਂ ਨਾਮ ਵਿਪਾਕਕ੍ਖਨ੍ਧਾ ਚ ਚਕ੍ਖੁ ਸੋਤਾਦੀਨਿ ਕਟਤ੍ਤਾ ਰੂਪਾਨਿ ਚ. ਤਂ ਯੇਨ ਪੁਬ੍ਬੇ ਕਮ੍ਮਂ ਕਤਂ, ਤਸ੍ਸੇਵ ਸਾਧਾਰਣਂ ਹੋਤਿ. ਤਸ੍ਸ ਸਨ੍ਤਾਨੇ ਏਵ ਪਵਤ੍ਤਤਿ. ਨਿਸ੍ਸਨ੍ਦ ਫਲਂ ਨਾਮ ਤਸ੍ਸ ਸੁਖੁਪ੍ਪਤ੍ਤਿਯਾ ਵਾ ਦੁਕ੍ਖੁਪ੍ਪਤ੍ਤਿਯਾ ਵਾ ਅਤ੍ਤਨੋ ਕਮ੍ਮਾਨੁਭਾਵੇਨ ਬਹਿਦ੍ਧਾ ਸਮੁਟ੍ਠਿਤਾਨਿ ਇਟ੍ਠਾਰਮ੍ਮਣਾਨਿ ਵਾ ਅਨਿਟ੍ਠਾ ਰਮ੍ਮਣਾਨਿ ਵਾ. ਤਂ ਪਨ ਅਞ੍ਞੇਸਮ੍ਪਿ ਸਾਧਾਰਣਂ ਹੋਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸਕਕਮ੍ਮਸਮੁਟ੍ਠਿਤਾ ਏਵ. ਲ. ਪਰੇਸਂ ਸਾਧਾਰਣਾ ਏਵਾ’’ਤਿ. ਲੋਕੇ ਅਟ੍ਠਲੋਕ ਧਮ੍ਮਾ ਨਾਮ ਸਬ੍ਬੇ ਕਮ੍ਮ ਵਿਪਾਕਜਾ ਏਵਾਤਿ ਨ ਵਤ੍ਤਬ੍ਬਾ. ਇਮੇ ਚ ਸਤ੍ਤਾ ਸਂਸਾਰੇ ਸਂਸਰਨ੍ਤਾ ਅਟ੍ਠਸੁਲੋਕ ਧਮ੍ਮੇਸੁ ਨਿਮ੍ਮੁਜ੍ਜਨ੍ਤਾ ਸਂਸਰਨ੍ਤਿ, ਤਸ੍ਮਾ ਤੇ ਵਿਨਾਪਿ ਉਪਪੀਲ਼ਕ ਕਮ੍ਮੇਨ ਅਞ੍ਞੇਹਿ ਕਾਰਣੇਹਿ ਨਾਨਾਦੁਕ੍ਖਂ ਫੁਸਨ੍ਤਿਯੇਵ. ਤਥਾ ਵਿਨਾਪਿ ਉਪਚ੍ਛੇਦਕ ਕਮ੍ਮੇਨ ਮਰਣ ਦੁਕ੍ਖਂ ਪਾਪੁਣਨ੍ਤਿਯੇਵ. ਤੇਨ ਵੁਤ੍ਤਂ ‘‘ਕਮ੍ਮੇਨ ਵਿਨਾ ਯਤੋਕੁਤੋਚਿ ਸਮੁਟ੍ਠਿਤਾ’’ਤਿਆਦਿ.

‘‘ਤੇ ਉਪ੍ਪਜ੍ਜਨ੍ਤੀ’’ਤਿ ਤੇ ਨਾਨਾਰੋਗਾਦਯੋ ਉਪ੍ਪਜ੍ਜਨ੍ਤਿ. ‘‘ਨ ਉਪਾਯ ਕੁਸਲਾ ਵਾ’’ਤਿ ਤਤੋ ਅਤ੍ਤਾਨਂ ਮੋਚੇਤੁਂ ਕਾਰਣ ਕੁਸਲਾ ਵਾ ਨ ਹੋਨ੍ਤਿ. ‘‘ਨ ਚ ਪਟਿਕਾਰ ਕੁਸਲਾ ਵਾ’’ਤਿ ਉਪ੍ਪਨ੍ਨਂ ਰੋਗਾਦਿਭਯਂ ਅਪਨੇਤੁਂ ਵੂਪਸਮੇਤੁਂ ਪਟਿਕਾਰ ਕਮ੍ਮੇਤਿ ਕਿਚ੍ਛਕਮ੍ਮੇ ਕੁਸਲਾ ਵਾ ਨ ਹੋਨ੍ਤਿ. ‘‘ਨਾਪਿ ਪਰਿਹਾਰ ਕੁਸਲਾ ਵਾ’’ਤਿ ਤਤੋ ਮੋਚਨਤ੍ਥਂ ਪਰਿਹਰਿਤੁਂ ਦੇਸਨ੍ਤਰਂ ਗਨ੍ਤੁਂ ਕੁਸਲਾ ਵਾ ਨ ਹੋਨ੍ਤੀਤਿ ਅਤ੍ਥੋ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ‘‘ਰੋਗਾਦਯੋ ਏਵ ਤਂ ਖੇਪੇਨ੍ਤਾ ਪਵਤ੍ਤਨ੍ਤੀ’’ਤਿ ਕਥਂ ਤੇ ਪੁਬ੍ਬਕਮ੍ਮਂ ਖੇਪੇਨ੍ਤੀਤਿ. ਤਸ੍ਸ ਵਿਪਾਕਭੂਤਂ ਜੀਵਿਤ ਸਨ੍ਤਾਨਂ ਵਿਨਾਸੇਨ੍ਤਾ ਖੇਪੇਨ੍ਤਿ. ਵਿਨਟ੍ਠੇਹਿ ਜੀਵਿਤ ਸਨ੍ਤਾਨੇ ਤਂ ਭਵਂ ਜਨੇਨ੍ਤਂ ਖਿਯ੍ਯਤਿ ਯੇਵਾਤਿ. ਤੇਨਾਹ ‘‘ਯਥਾਹੀ’’ਤਿਆਦਿਂ. ‘‘ਕਮ੍ਮਸ੍ਸਪਿ ਤਥੇਵਾ’’ਤਿ ਤਥੇਵ ਪੁਬ੍ਬਕਮ੍ਮਸ੍ਸਪਿ ਤਿਣਗ੍ਗੇ ਉਸ੍ਸਾਵ ਬਿਨ੍ਦੁਸ੍ਸੇਵ ਪਰਿਦੁਬ੍ਬਲਤਾ ਸਿਦ੍ਧਾ ਹੋਤਿ. ਜੀਵਿਤੇ ਪਰਿਕ੍ਖੀਣੇ ਤਂ ਭਵਂ ਜਨੇਨ੍ਤਸ੍ਸ ਪੁਬ੍ਬਕਮ੍ਮਸ੍ਸਪਿ ਪਰਿਕ੍ਖੀਣਤ੍ਤਾ. ‘‘ਏਵਞ੍ਚੇਤਂ’’ਤਿ ਏਤਂ ਕਮ੍ਮਪ੍ਪਟਿ ਸਂਯੁਤ੍ਤ ਵਚਨਂ ਇਧ ਅਮ੍ਹੇਹਿ ਵੁਤ੍ਤਨਯੇਨ ਸਮ੍ਪਟਿਚ੍ਛਿਤਬ੍ਬਂ. ਸਬ੍ਬਂ ਪੁਬ੍ਬੇਕਤਹੇਤੁਦਿਟ੍ਠਿ ਨਾਮ ਸਬ੍ਬਂ ਸੁਖਂ ਵਾ ਦੁਕ੍ਖਂ ਵਾ ਸੁਚਰਿਤਂ ਵਾ ਦੁਚ੍ਚਰਿਤਂ ਵਾ ਪੁਬ੍ਬਭਵੇ ਅਤ੍ਤਨਾ ਕਤੇਨ ਪੁਬ੍ਬਕਮ੍ਮਹੇਤੁਨਾ ਏਵ ਉਪ੍ਪਜ੍ਜਤੀਤਿ ਏਵਂ ਪਵਤ੍ਤਾ ਦਿਟ੍ਠਿ. ‘‘ਯਂ ਕਿਞ੍ਚਾਯਂ’’ਤਿ ਯਂ ਕਿਞ੍ਚਿ ਅਯਂ. ਮਹਾਬੋਧਿਸਤ੍ਤਾਨਂ ਅਧਿਮੁਤ੍ਤਿਕਾਲਙ੍ਕਰਿਯਾ ਨਾਮ ਇਧ ਮੇ ਚਿਰਕਾਲਂ ਠਿਤਸ੍ਸ ਪਾਰਮਿਪੂਰਣ ਕਿਚ੍ਚਂ ਨਤ੍ਥਿ, ਇਦਾਨੇਵ ਇਤੋ ਚਵਿਤ੍ਵਾ ਮਨੁਸ੍ਸਲੋਕੇ ਉਪ੍ਪਜ੍ਜਿਸ੍ਸਾਮਿ, ਉਪਰੁਜ੍ਝਤੁ ਮੇ ਇਦਂ ਜੀਵਿਤਨ੍ਤਿ ਅਧਿਮੁਞ੍ਚਿਤ੍ਵਾ ਦਲ਼੍ਹਂ ਮਨਸਿਕਰਿਤ੍ਵਾ ਕਾਲਙ੍ਕਰਿਯਾ. ‘‘ਸਯਮੇਵ ਸਤ੍ਥਂ ਆਹਰਿਤ੍ਵਾ’’ਤਿ ਸਯਮੇਵ ਅਤ੍ਤਨੋ ਗੀਵਂ ਸਤ੍ਥੇਨ ਹਨਿਤ੍ਵਾਤਿ ਅਤ੍ਥੋ. ‘‘ਏਤ੍ਥੇਵਾ’’ਤਿ ਅਕਾਲਮਰਣੇ ਏਵ.

‘‘ਤਥਾ ਚਾ’’ਤਿਆਦੀਸੁ. ‘‘ਸਮਾਪਤ੍ਤਿ ਲਾਭੀਨਂ’’ਤਿ ਨਿਦ੍ਧਾਰਣੇਭੁਮ੍ਮ ਵਚਨਂ. ‘‘ਜੀਵਿਤ ਸਮਸੀਸੀਨਂ’’ਤਿ ਅਰਹਤ੍ਤ ਮਗ੍ਗਂ ਲਭਿਤ੍ਵਾ ਮਗ੍ਗਪਚ੍ਚਵੇਕ੍ਖਨਵੀਥਿ ਏਵ ਮਰਣਾਸਨ੍ਨਵੀਥਿਂ ਕਤ੍ਵਾ ਪਰਿਨਿਬ੍ਬਾਨਤ੍ਤਾ ਸਮਂ ਸੀਸਂ ਏਤੇਸਨ੍ਤਿ ਸਮਸੀਸਿਨੋ. ‘‘ਸਮਂ ਸੀਸਂ’’ਤਿ ਜੀਵਿਤ ਸਨ੍ਤਾਨ ਪਰਿਯਨ੍ਤੇਨ ਸਮਂ ਵਟ੍ਟਦੁਕ੍ਖ ਸਨ੍ਤਾਨ ਪਰਿਯਨ੍ਤਂ ਵੁਚ੍ਚਤਿ. ‘‘ਸਬ੍ਬੇਸਂ ਪੀ’’ਤਿ ਸਬ੍ਬੇਸਮ੍ਪਿ ਖੀਣਾਸਵਾਨਂ. ‘‘ਇਮਂ ਸੁਤ੍ਤਪਦਂ’’ਤਿ ਮਹਾਪਰਿਨਿਬ੍ਬਾਨਸੁਤ੍ਤੇ ਆਗਤਂ ਸੁਤ੍ਤਪਦਂ. ‘‘ਤੇ’’ਤਿ ਤੇ ਵਾਦਿਨੋ. ‘‘ਤੇਨਾ’’ਤਿ ਤੇਨ ਵਾਦਵਚਨੇਨ. ਕ੍ਰਿਯਮਨੋਧਾਤੁ ਨਾਮ ਪਞ੍ਚਦ੍ਵਾਰਾਵਜ੍ਜਨਂ. ਕ੍ਰਿਯਾਹੇਤੁਕਮਨੋ ਵਿਞ੍ਞਾਣਧਾਤੁ ਨਾਮ ਹਸਿਤੁਪ੍ਪਾਦਚਿਤ੍ਤਂ. ‘‘ਅਸ੍ਸਾ’’ਤਿ ਪਰਿਨਿਬ੍ਬਾਯਨ੍ਤਸ੍ਸ ਬੁਦ੍ਧਸ੍ਸ. ‘‘ਨ ਸਮੇਤਿ ਯੇਵਾ’’ਤਿ ਸਨ੍ਤਿਂ ਅਨੁਪਾਦਿਸੇਸਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾਤਿ ਏਤ੍ਥ ਪਰਿਨਿਬ੍ਬਾਨ ਜਵਨੇਹਿ ਆਰਮ੍ਮਣਂ ਕਤ੍ਵਾਤਿ ਵੁਤ੍ਤੇਪਿ ਨ ਸਮੇਤਿਯੇਵ. ਤੇਨਾਹ ‘‘ਤਥਾਹੀ’’ਤਿਆਦਿਂ. ‘‘ਭਵਙ੍ਗਂ ਓਤਰਿਤ੍ਵਾ ਪਰਿਨਿਬ੍ਬਾਯਤੀ’’ਤਿ ਏਤ੍ਥ ਪਰਿਨਿਬ੍ਬਾਨ ਚੁਤਿਚਿਤ੍ਤਮੇਵ ਭਵਙ੍ਗਨ੍ਤਿ ਵੁਤ੍ਤਂ. ਚੁਤਿਚਿਤ੍ਤਨ੍ਤਿ ਚ ਭਵਨ੍ਤਰਂ ਗਚ੍ਛਨ੍ਤਸ੍ਸੇਵ ਵੁਚ੍ਚਤਿ. ਇਧ ਪਨ ਵੋਹਾਰ ਮਤ੍ਤਨ੍ਤਿ ਦਟ੍ਠਬ੍ਬਂ. ਵਿਭਾਵਨਿਪਾਠੇ. ਚੁਤਿਪਰਿਯੋਸਾਨਾਨਂ ਮਰਣਾਸਨ੍ਨ ਚਿਤ੍ਤਾਨਂ. ਯਥਾ ਪਨ ਬੁਦ੍ਧਾਨਂ ਭਗਵਨ੍ਤਾਨਂ ਯਾਵਜੀਵਂ ਉਪ੍ਪਨ੍ਨਂ ਮਹਾਭਵਙ੍ਗਚਿਤ੍ਤਂ ਕਮ੍ਮਕਮ੍ਮਨਿਮਿਤ੍ਤਾਦਯੋ ਆਰਮ੍ਮਣਂ ਕਰੋਤਿਯੇਵ. ਤਥਾ ਪਰਿਨਿਬ੍ਬਾਨ ਚੁਤਿਚਿਤ੍ਤਂ ਪੀਤਿ ਆਹ ‘‘ਨ ਹੀ’’ਤਿਆਦਿਂ. ਨਨੁ ਮਰਣਕਾਲੇ ਕਮ੍ਮਕਮ੍ਮਨਿਮਿਤ੍ਤਾਦੀਨਂ ਗਹਣਂ ਨਾਮ ਭਵਨ੍ਤਰ ਗਮਨਤ੍ਥਾਯ ਹੋਤਿ, ਬੁਦ੍ਧਾ ਚ ਭਵਨ੍ਤਰਂ ਨ ਗਚ੍ਛਨ੍ਤਿ. ਤਸ੍ਮਾ ‘‘ਨ ਹਿ. ਲ. ਨ ਕਰੋਤੀ’’ਤਿ ਇਦਂ ਨ ਯੁਤ੍ਤਨ੍ਤਿ. ਨੋ ਨ ਯੁਤ੍ਤਂ. ਭਵਨ੍ਤਰ ਗਮਨਤ੍ਥਾਯਾਤਿ ਇਦਂ ਜਵਨੇਹਿ ਗਹਣੇ ਦਟ੍ਠਬ੍ਬਂ. ਇਧ ਪਨ ਚੁਤਿਚਿਤ੍ਤੇਨ ਗਹਣੇਤਿ ਦਸ੍ਸੇਨ੍ਤੋ ‘‘ਨਚਚੁਤਿਯਾਗਹਿਤਾਨੀ’’ਤਿਆਦਿਮਾਹ. ‘‘ਕਮ੍ਮਸਿਦ੍ਧਿਯਾ’’ਤਿ ਕਮ੍ਮਸਿਜ੍ਝਨਤ੍ਥਾਯ.‘‘ਏਤ੍ਥ ਚਾ’’ਤਿਆਦੀਸੁ. ‘‘ਤਸ੍ਸਾ’’ਤਿ ਸੋਣਤ੍ਥੇਰ ਪਿਤੁਨੋ. ‘‘ਕਮ੍ਮਬਲੇਨਾ’’ਤਿਆਦੀਸੁ. ‘‘ਅਞ੍ਞੇਨਪਿ ਕਾਰਣ ਬਲੇਨਾ’’ਤਿ ਆਚਿਣ੍ਣਭਾਵਾਦਿਕੇਨ ਕਾਰਣਬਲੇਨ. ਗਤਿਨਿਮਿਤ੍ਤਂ ਪਨ ਕਮ੍ਮਬਲੇਨੇਵਾਤਿ ਯੁਤ੍ਤਂ ਸਿਯਾ. ‘‘ਤਥੋਪਟ੍ਠਿਤਂ’’ਤਿ ਅਨ੍ਤਿਮਵੀਥਿਤੋ ਪੁਬ੍ਬੇ ਬਹੂਸੁਵੀਥੀਸੁ ਉਪਟ੍ਠਿਤਪ੍ਪਕਾਰਨ੍ਤਿਅਤ੍ਥੋ. ਪਾਪਪਕ੍ਖਿਯੇਸੁ ਦੁਗ੍ਗਤਿਨਿਮਿਤ੍ਤੇਸੁ. ਕਲ੍ਯਾਣਪਕ੍ਖਿਯਾਨਿ ਸਗ੍ਗਨਿਮਿਤ੍ਤਾਨਿ. ਧਮ੍ਮਾਸੋਕਰਞ੍ਞੋ ਮਰਣਕਾਲੇ ਪਾਪਪਕ੍ਖਿਯਾਨਂ ਉਪਟ੍ਠਾਨਂ ਕਤ੍ਥਚਿ ਸੀਹਲ਼ਗਨ੍ਥੇ ਵੁਤ੍ਤਂ.

ਸਕਲਂ ਪਥਵਿਂ ਭੁਤ੍ਵਾ,

ਦਤ੍ਵਾ ਕੋਟਿਸਤਂ ਧਨਂ;

ਅਨ੍ਤੇ ਅਡ੍ਢਾਮਲਕਮਤ੍ਤਸ੍ਸ;

ਅਸੋਕੋ ਇਸ੍ਸਰਂ ਗਤੋ; ਤਿ ਚ;

ਅਸੋਕੋ ਸੋਕ ਮਾਗਤੋ; ਤਿ ਚ;

‘‘ਤਂ’’ਤਿ ਵਿਪਚ੍ਚਮਾਨਕਂ ਕਮ੍ਮਂ. ‘‘ਨਿਯਾਮਕ ਸਹਕਾਰਿ ਪਚ੍ਚਯਭੂਤਾ’’ਤਿ ਏਤ੍ਥ ਯਥਾ ਨਾਵਾਯਂ ਨਿਯਾਮਕੋ ਨਾਮ ਨਾਵਂ ਇਚ੍ਛਿਤਦਿਸਾਭਿਮੁਖਂ ਨਿਯਾਮੇਤਿ, ਨਿਯੋਜੇਤਿ. ਤਥਾ ਅਯਂ ਤਣ੍ਹਾਪਿ ਭਵਨਿਕਨ੍ਤਿ ਹੁਤ੍ਵਾ ਚਿਤ੍ਤਸਨ੍ਤਾਨਂ ਗਨ੍ਤਬ੍ਬਭਵਾਭਿਮੁਖਂ ਨਿਯਾਮੇਤਿ, ਨਿਯੋਜੇਤਿ. ਕਮ੍ਮਸ੍ਸ ਚ ਅਚ੍ਚਾਯਤ੍ਤ ਸਹਾਯਭਾਵੇਨ ਸਹਕਾਰੀ ਪਚ੍ਚਯੋ ਹੋਤੀਤਿ ਦਟ੍ਠਬ੍ਬਂ. ‘‘ਕੁਸਲਾਕੁਸਲ ਕਮ੍ਮਨਿਮਿਤ੍ਤਾਨਿ ਵਾ’’ਤਿ ਅਞ੍ਞਾਨਿ ਕੁਸਲਾ ਕੁਸਲਕਮ੍ਮਨਿਮਿਤ੍ਤਾਨਿ ਵਾ. ‘‘ਤਦੁਪਤ੍ਥਮ੍ਭਿਕਾ’’ਤਿ ਤਸ੍ਸ ਕਮ੍ਮਸ੍ਸ ਉਪਤ੍ਥਮ੍ਭਿਕਾ. ‘‘ਨਿਮਿਤ੍ਤਸ੍ਸਾਦਗਧਿਤਂ’’ਤਿ ਮੁਖਨਿਮਿਤ੍ਤਾਦੀਸੁ ਅਸ੍ਸਾਦੇਨ੍ਤਂ ਗਿਜ੍ਝਨ੍ਤਂ. ‘‘ਤਿਟ੍ਠਮਾਨਂ ਤਿਟ੍ਠਤੀ’’ਤਿ ਤਿਟ੍ਠਮਾਨਂ ਹੁਤ੍ਵਾ ਤਿਟ੍ਠਤਿ. ਅਮੁਞ੍ਚਿਤ੍ਵਾ ਤਿਟ੍ਠਤੀਤਿ ਵੁਤ੍ਤਂ ਹੋਤਿ. ਅਨੁਬ੍ਯਞ੍ਜਨਂ ਨਾਮ ਪਿਯਸਾਤਰੂਪੋ ਕਥਿਤਲਪਿਤਾਦਿ ਕ੍ਰਿਯਾਵਿਸੇਸੋ. ‘‘ਅਸ੍ਸ ਪੁਗ੍ਗਲਸ੍ਸਾ’’ਤਿ ਆਸਨ੍ਨ ਮਰਣਸ੍ਸ ਪੁਗ੍ਗਲਸ੍ਸ. ਅਟ੍ਠਕਥਾ ਪਾਠੇ. ‘‘ਕਿਲੇਸ ਬਲਵਿਨਾਮਿਤਂ’’ਤਿ ਅਵਿਜ੍ਜਾ ਤਣ੍ਹਾਦੀਨਂ ਕਿਲੇਸਾਨਂ ਬਲੇਨ ਵਿਨਾਮਿਤਂ. ਪਟਿਚ੍ਛਾਦਿਕਾ ਆਦੀਨ ਵਾ ਯਸ੍ਸਾਤਿ ਵਿਗ੍ਗਹੋ. ‘‘ਤਂ’’ਤਿ ਚਿਤ੍ਤਸਨ੍ਤਾਨਂ. ‘‘ਤਸ੍ਮਿਂ’’ਤਿ ਕਮ੍ਮਾਦਿਵਿਸਯੇ. ਅਟ੍ਠਕਥਾਯ ਨ ਸਮੇਤਿ. ਤਸ੍ਮਿਂ ਵਿਸਯੇਤਿਹਿ ਤਤ੍ਥ ਵੁਤ੍ਤਂ. ਨ ਵੁਤ੍ਤਂ ਤਸ੍ਮਿਂ ਭਵੇਤਿ. ‘‘ਤਸ੍ਮਿਂ ਵੁਤ੍ਤਾ ਨਂ’’ਤਿ ਤਸ੍ਮਿਂ ‘ਯੇਭੂਯ੍ਯੇਨ ਭਵਨ੍ਤਰੇ ਛ ਦ੍ਵਾਰਗ੍ਗਹਿਤਂ’ਤਿ ਠਾਨੇ ਟੀਕਾਸੁ ਵੁਤ੍ਤਾਨਂ. ਤਂ ਸਦਿਸ ਜਵਨੁਪ੍ਪਤ੍ਤਿ ਨਾਮ ਕਮ੍ਮਕਰਣਕਾਲੇ ਪਵਤ੍ਤ ਜਵਨੇਹਿ ਸਦਿਸਾਨਂ ਇਦਾਨਿ ਜਵਨਾਨਂ ਉਪ੍ਪਤ੍ਤਿ. ਭਵਪ੍ਪਟਿਚ੍ਛਨ੍ਨਞ੍ਚ ਕਮ੍ਮਂ ਅਪਾਕਟਞ੍ਚ ਕਮ੍ਮਂ ਨ ਤਥਾ ਉਪਟ੍ਠਾਤਿ. ਕੇਵਲਂ ਅਤ੍ਤਾਨਂ ਅਭਿਨਵਕਰਣ ਵਸੇਨ ਦ੍ਵਾਰਪਤ੍ਤਂ ਹੁਤ੍ਵਾ ਉਪਟ੍ਠਾਤੀਤਿ ਅਧਿਪ੍ਪਾਯੋ. ‘‘ਵਿਸੀਦ ਪਤ੍ਤਾ’’ਤਿ ਵਿਸਞ੍ਞੀਭਾਵੇਨ ਵਿਰੂਪਂ ਹੁਤ੍ਵਾ ਸੀਦਨਪਤ੍ਤਾ. ‘‘ਤਬ੍ਬਿਪਰੀਤੇਨ ਪਾਪਕਮ੍ਮ ਬਹੁਲਾਪਿ ਵਤ੍ਤਬ੍ਬਾ’’ਤਿ ਤੇਪਿਵਿਸੀਦਨ੍ਤਰੇ ਆਵੁਧ ਹਤ੍ਥਾ ਪਾਣਘਾਤਂ ਕਰੋਨ੍ਤਾ ਗਣ੍ਹਥਬਨ੍ਧਥਾਤਿ ਉਗ੍ਘੋਸਨ੍ਤਾ ਦੁਟ੍ਠਚਿਤ੍ਤਾ ਹੋਨ੍ਤੀਤਿਆਦਿਨਾ ਵਤ੍ਤਬ੍ਬਾ. ਅਟ੍ਠਕਥਾ ਪਾਠੇਸੁ. ਉਕ੍ਖਿਤ੍ਤੋ ਅਸਿ ਯਸ੍ਸਾਤਿ ਉਕ੍ਖਿਤ੍ਤਾ ਸਿਕੋ. ਪਤੁਦਨ੍ਤਿ ਵਿਜ੍ਝਨ੍ਤਿ ਏਤੇਨਾਤਿ ਪਤੋਦਨਂ. ਪਾਜਨਦਣ੍ਡੋ. ਤਸ੍ਸ ਅਗ੍ਗੇ ਕਤਾ ਸੂਚਿ ਪਤੋਦਨ ਸੂਚਿ. ‘‘ਪਤੋਦਨ ਦੁਕ੍ਖਂ’’ਤਿ ਵਿਜ੍ਝਨ ਦੁਕ੍ਖਂ. ਕਥਂ ਪਨ ਉਕ੍ਖਿਤ੍ਤਾਸਿਕਾਦਿਭਾਵੇਨ ਉਪਟ੍ਠਾਨਂ ਕਮ੍ਮੁਪਟ੍ਠਾਨਂ ਨਾਮ ਹੋਤਿ. ਕਥਞ੍ਚ ਤਂ ਪਟਿਸਨ੍ਧਿਯਾ ਆਰਮ੍ਮਣਭਾਵਂ ਉਪੇਤੀਤਿ ਆਹ ‘‘ਸੋ ਚਾ’’ਤਿਆਦਿਂ. ਉਪ੍ਪਜ੍ਜਮਾਨਾਨਂ ਸਤ੍ਤਾਨਂ. ‘‘ਇਤਰੇਸਂ ਪਨਾ’’ਤਿ ਰੂਪਾਰੂਪ ਭਵੇਸੁ ਉਪ੍ਪਜ੍ਜਮਾਨਾਨਂ ਪਨ. ‘‘ਪਰਿਪੁਣ੍ਣਂ ਕਤ੍ਵਾ’’ਤਿ ਤਦਾਰਮ੍ਮਣ ਪਰਿਯੋਸਾਨਾਯਵਾ ਸੁਦ੍ਧਾਯ ਵਾ ਜਵਨਵੀਥਿਯਾਤਿ ਏਵਂ ਪਰਿਪੁਣ੍ਣਂ ਕਤ੍ਵਾ. ਅਯਂ ਪਨ ਭਵਙ੍ਗਾਵਸਾਨੇ ਚੁਤਿਚਿਤ੍ਤੁਪ੍ਪਤ੍ਤਿ ਨਾਮ ਅਟ੍ਠਕਥਾਸੁ ਨਤ੍ਥਿ. ਯਞ੍ਚ ਭਵਙ੍ਗਂ ਓਤਰਿਤ੍ਵਾ ਪਰਿਨਿਬ੍ਬਾਯਤੀਤਿਆਦਿ ਤਤ੍ਥ ਤਤ੍ਥ ਵੁਤ੍ਤਂ. ਤਤ੍ਥਪਿ ‘‘ਭਵਙ੍ਗਂ’’ਤਿ ਚੁਤਿਚਿਤ੍ਤਮੇਵ ਟੀਕਾਸੁ ਵਣ੍ਣੇਨ੍ਤਿ. ਤਸ੍ਮਾ ‘‘ਭਵਙ੍ਗਕ੍ਖਯੇਵਾ’’ਤਿ ਇਦਂ ਕਥਂ ਯੁਜ੍ਜੇਯ੍ਯਾਤਿ ਆਹ ‘‘ਏਤ੍ਥ ਚਾ’’ਤਿਆਦਿਂ. ਅਨੁਰੂਪਂ ਸੇਤੀਤਿ ਅਨੁਸਯੋ. ਅਨੁਬਨ੍ਧੋ ਹੁਤ੍ਵਾ ਸੇਤੀਤਿ ਅਨੁਸਯੋ. ਅਨੁ ਅਨੁ ਵਾ ਸੇਤੀਤਿ ਅਨੁਸਯੋ. ਏਤ੍ਥ ਚ ਅਨੁਸਯੋ ਨਾਮ ਜਵਨਸਹਜਾਤੋ ਨ ਹੋਤਿ. ਇਧ ਚ ਅਨੁਸਯ ਨਾਮੇਨ ਵੁਤ੍ਤਂ. ਨਾਨਾਜਵਨ ਸਹਜਾਤਾ ਚ ਅਵਿਜ੍ਜਾ ਤਣ੍ਹਾ ਪਟਿਸਨ੍ਧਿਯਾ ਵਿਸੇਸ ਪਚ੍ਚਯਾ ਹੋਨ੍ਤੇਵ. ਕਥਂ ਤਾ ਇਧ ਗਹਿਤਾ ਸਿਯੁਨ੍ਤਿ ਆਹ ‘‘ਏਤ੍ਥ ਚਾ’’ਤਿਆਦਿਂ. ਏਵਂ ਸਨ੍ਤੇ ਅਵਿਜ੍ਜਾ ਪਰਿਕ੍ਖਿਤ੍ਤੇਨ ਤਣ੍ਹਾਮੂਲਕੇਨਾਤਿ ਵੁਤ੍ਤੇਸੁ ਸੁਟ੍ਠੁ ਯੁਜ੍ਜਤਿ. ਅਨੁਸਯੇਹਿ ਸਹ ਜਵਨਸਹਜਾਤਾਨਮ੍ਪਿ ਲਦ੍ਧਤ੍ਤਾ. ਤਸ੍ਮਾ ਇਧ ਅਨੁਸਯ ਵਚਨਂ ਨ ਯੁਤ੍ਤਨ੍ਤਿ ਚੋਦਨਾ. ਯੁਤ੍ਤਮੇਵਾਤਿ ਦਸ੍ਸੇਨ੍ਤੋ ‘‘ਅਪਿ ਚਾ’’ਤਿਆਦਿਮਾਹ. ‘‘ਪਰਿਯਤ੍ਤਾ’’ਤਿ ਸਮਤ੍ਤਾ. ‘‘ਸੋ ਪੀ’’ਤਿ ਫਸ੍ਸਾਦਿ ਧਮ੍ਮ ਸਮੂਹੋਪਿ.‘‘ਤਥਾ ਰੂਪਾ ਯੇਵਾ’’ਤਿ ਅਗ੍ਗਮਗ੍ਗੇਨ ਅਪ੍ਪਹੀਨ ਰੂਪਾਯੇਵ, ਅਨੁਸਯਭੂਤਾਯੇਵਾਤਿ ਵੁਤ੍ਤਂ ਹੋਤਿ. ‘‘ਤਂ’’ਤਿ ਚਿਤ੍ਤ ਸਨ੍ਤਾਨਂ. ‘‘ਤਤ੍ਥਾ’’ਤਿ ਤਦੁਭਯਸ੍ਮਿਂ. ਕਥਂ ਤਂ ਤਤ੍ਥ ਖਿਪਨ੍ਤੀਤਿ ਆਹ ‘‘ਤਸ੍ਮਿਂ’’ਤਿਆਦਿਂ. ‘‘ਵਿਜਾਨਨਧਾਤੁਯਾ’’ਤਿ ਵਿਞ੍ਞਾਣ ਧਾਤੁਯਾ. ਸਙ੍ਕਨ੍ਤਾ ਨਾਮ ਨਤ੍ਥਿ. ਯਤ੍ਥ ਯਤ੍ਥ ਉਪ੍ਪਜ੍ਜਨ੍ਤਿ. ਤਤ੍ਥ ਤਤ੍ਥੇਵ ਭਿਜ੍ਜਨ੍ਤੀਤਿ ਅਧਿਪ੍ਪਾਯੋ. ਕੁਤੋ ਮਰਣਕਾਲੇ ਸਙ੍ਕਨ੍ਤਾ ਨਾਮ ਅਤ੍ਥਿ ਵਿਜ੍ਜਨ੍ਤੀਤਿ ਯੋਜਨਾ. ਏਵਂ ਸਨ੍ਤੇ ਇਦਂ ਵਚਨਂ ਅਨਮਤਗ੍ਗਿਯ ਸੁਤ੍ਤੇਨ ਵਿਰੁਦ੍ਧਂ ਸਿਯਾਤਿ. ਨ ਵਿਰੁਦ੍ਧਂ. ਇਦਞ੍ਹਿ ਅਭਿਧਮ੍ਮ ਵਚਨਂ, ਮੁਖ੍ਯਵਚਨਂ, ਅਨਮਤਗ੍ਗਿਯ ਸੁਤ੍ਤਂ ਪਨ ਸੁਤ੍ਤਨ੍ਤ ਵਚਨਂ ਪਰਿਯਾਯ ਵਚਨਨ੍ਤਿ ਦਸ੍ਸੇਨ੍ਤੋ ‘‘ਯਞ੍ਚਾ’’ਤਿਆਦਿਮਾਹ. ਪਰਿਯਾਯੇਨ ਵੁਤ੍ਤਨ੍ਤਿ ਵਤ੍ਵਾ ਤਂ ਪਰਿਯਾਯਂ ਦਸ੍ਸੇਤਿ ‘‘ਯੇਸਞ੍ਹੀ’’ਤਿਆਦਿਨਾ. ‘‘ਸੋ’’ਤਿ ਸੋ ਪੁਗ੍ਗਲੋ. ‘‘ਤੇਸਂ’’ਤਿ ਅਵਿਜ੍ਜਾ ਤਣ੍ਹਾ ਸਙ੍ਖਾਰਾਨਞ੍ਚ ਪਟਿਸਨ੍ਧਿ ਨਾਮ ਰੂਪ ਧਮ੍ਮਾਨਞ੍ਚ. ‘‘ਹੇਤੁਪ੍ਫਲਸਮ੍ਬਨ੍ਧੇਨ ਭਵਨ੍ਤਰਂ ਸਨ੍ਧਾਵਤਿ ਸਂਸਰਤੀਤਿ ਵੁਚ੍ਚਤੀ’’ਤਿ ਪੁਬ੍ਬੇ ਕਮ੍ਮਕਰਣਕਾਲੇਪਿ ਤੇ ਅਵਿਜ੍ਜਾ ਤਣ੍ਹਾ ਸਙ੍ਖਾਰਾ ਏਵ ਸੋ ਸਤ੍ਤੋਤਿ ਵੁਚ੍ਚਨ੍ਤਿ. ਪਚ੍ਛਾ ਤੇਸਂ ਫਲਭੂਤਾਯਂ ਪਟਿਸਨ੍ਧਿਯਾ ਪਾਤੁਭਵਨਕਾਲੇਪਿ ਸਾਪਟਿਸਨ੍ਧਿ ਏਵ ਸੋ ਸਤ੍ਤੋਤਿ ਵੁਚ੍ਚਤਿ. ਮਜ੍ਝੇ ਧਮ੍ਮਪ੍ਪਬਨ੍ਧੋਪਿ ਸੋ ਸਤ੍ਤੋਤਿ ਵੁਚ੍ਚਤਿ. ਏਵਂ ਹੇਤੁਧਮ੍ਮੇਹਿ ਸਦ੍ਧਿਂ ਫਲਧਮ੍ਮੇ ਏਕਂ ਸਤ੍ਤਂ ਕਰੋਨ੍ਤਸ੍ਸ ਹੇਤੁਪ੍ਫਲ ਸਮ੍ਬਨ੍ਧੋ ਹੋਤਿ. ਏਵਂ ਹੇਤੁਪ੍ਫਲ ਸਮ੍ਬਨ੍ਧੇਨ ਸੋ ਏਵ ਕਮ੍ਮਂ ਕਰੋਤਿ. ਤੇਨ ਕਮ੍ਮੇਨ ਸੋ ਏਵ ਭਵਨ੍ਤਰਂ ਸਨ੍ਧਾਵਤਿ ਸਂਸਰਤੀਤਿ ਵੁਚ੍ਚਤਿ. ਏਤ੍ਥ ਚ ਅਨਮਤਗ੍ਗੋ ਯਂ ਭਿਕ੍ਖਵੇ. ਲ. ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂਤਿ ਏਵਂ ਸਤ੍ਤਵੋਹਾਰੇਨ ਵੁਤ੍ਤਤ੍ਤਾ ਸਾਧਮ੍ਮਦੇਸਨਾ ਪਰਿਯਾਯਦੇਸਨਾ ਹੋਤਿ. ਪਰਿਯਾਯਦੇਸਨਤ੍ਤਾ ਚ ਸਨ੍ਧਾਵਤਂ ਸਂਸਰਤਨ੍ਤਿ ਪਰਿਯਾਯੋਪਿ ਸਿਜ੍ਝਤਿ. ਯਸ੍ਸਂ ਪਨ ਧਮ੍ਮ ਦੇਸਨਾਯਂ ਧਮ੍ਮਦੇਸਨਾਤਿ ਵਚਨਾਨੁ ਰੂਪਂ ਧਮ੍ਮਮੇਵ ਦੇਸੇਤਿ, ਨ ਸਤ੍ਤਂ, ਨ ਪੁਗ੍ਗਲਂ. ਅਯਂ ਧਮ੍ਮਦੇਸਨਾ ਏਵ ਮੁਖ੍ਯਦੇਸਨਾ ਨਾਮ ਹੋਤਿ. ਤਤ੍ਥ ਦੇਸਿਤ ਧਮ੍ਮਾ ਪਨ ਪਕਤਿਕਾਲੇਪਿ ਦੇਸਨ੍ਤਰਂ ਕਾਲਨ੍ਤਰਂ ਖਣਨ੍ਤਰਂ ਸਙ੍ਕਨ੍ਤਾ ਨਾਮ ਨਤ੍ਥਿ. ਯਤ੍ਥ ਯਤ੍ਥ ਉਪ੍ਪਨ੍ਨਾ, ਤਤ੍ਥ ਤਤ੍ਥੇਵ ਭਿਜ੍ਜਨ੍ਤਿ. ਖਯਵਯਂ ਗਚ੍ਛਨ੍ਤਿ. ਤੇਨ ਵੁਤ੍ਤਂ ‘ਨ ਹਿ ਉਪ੍ਪਨ੍ਨੁਪ੍ਪਨ੍ਨਾ ਧਮ੍ਮਾ. ਲ. ਸਙ੍ਕਨ੍ਤਾ ਨਾਮ ਅਤ੍ਥੀ’ਤਿ. ਪਟਿਘੋਸੋ ਚ, ਪਦੀਪੋ ਚ, ਮੁਦ੍ਦਾ ਚ. ਆਦਿਸਦ੍ਦੇਨ ਪਟਿਬਿਮ੍ਬਚ੍ਛਾਯਾ ਚ, ਬੀਜਸਙ੍ਖਾਰੋ ਚ, ਪਾਟਿਭੋਗੋ ਚ, ਬਾਲਕੁਮਾਰ ਸਰੀਰੇਸੁ ਉਪਯੁਤ੍ਤਾ ਵਿਜ੍ਜਾਸਿਪ੍ਪੋਸਧਾ ਚਾਤਿ ਏਵਂ ਅਟ੍ਠਕਥਾ ਯਂ ਆਗਤਾਨਿ ਨਿਦਸ੍ਸਨਾਨਿ ਸਙ੍ਗਯ੍ਹਨ੍ਤਿ. ‘‘ਨਿਦਸ੍ਸਨਾ’’ਨੀਤਿ ਚ ਉਪਮਾਯੋ ਵੁਚ੍ਚਨ੍ਤਿ. ਤਤ੍ਥ ‘‘ਪਟਿਘੋਸੋ’’ਤਿ ਗਮ੍ਭੀਰਲੇਣ ਦ੍ਵਾਰੇ ਠਤ੍ਵਾ ਸਦ੍ਦਂ ਕਰੋਨ੍ਤਸ੍ਸ ਅਨ੍ਤੋਲੇਣੇ ਪਟਿਘੋਸੋ ਪਵਤ੍ਤਤਿ. ਤਤ੍ਥ ਦ੍ਵਾਰੇ ਉਪ੍ਪਨ੍ਨੋ ਮੂਲਸਦ੍ਦੋ ਅਨ੍ਤੋਲੇਣਂ ਨ ਗਚ੍ਛਤਿ, ਉਪ੍ਪਨ੍ਨਟ੍ਠਾਨੇ ਏਵ ਨਿਰੁਜ੍ਝਤਿ. ਪਟਿਘੋਸੋ ਚ ਤਤੋ ਆਗਤੋ ਨ ਹੋਤਿ. ਨ ਚ ਵਿਨਾ ਮੂਲਸਦ੍ਦ + ਪਚ੍ਚਯੇਨ ਅਞ੍ਞਤੋ ਪਵਤ੍ਤਤਿ. ਮੂਲਸਦ੍ਦਪਚ੍ਚਯਾ ਏਵ ਤਤ੍ਥ ਪਵਤ੍ਤਤੀਤਿ. ਤਤ੍ਥ ਮੂਲਸਦ੍ਦੋ ਵਿਯ ਅਤੀਤ ਕਮ੍ਮਂ. ਪਟਿਘੋਸੋ ਵਿਯ ਅਨਨ੍ਤਰੇ ਪਟਿਸਨ੍ਧਿ. ਏਸਨਯੋ ਪਦੀਪ ਮੁਦ੍ਦਾ ਪਟਿਬਿਮ੍ਬਚ੍ਛਾਯਾਸੁ. ਤਤ੍ਥ ‘‘ਪਦੀਪੋ’’ਤਿ ਪਥਮਂ ਏਕਂ ਪਦੀਪਂ ਜਾਲੇਤ੍ਵਾ ਤੇਨ ਅਞ੍ਞਂ ਪਦੀਪਸਤਮ੍ਪਿ ਪਦੀਪ ਸਹਸ੍ਸਮ੍ਪਿ ਜਾਲੇਤਿ. ‘‘ਮੁਦ੍ਦਾ’’ਤਿ ਲਞ੍ਛਨਲੇਖਾ. ਤਤ੍ਥ ਏਕੇਨ ਲਞ੍ਛਨਕ੍ਖਨ੍ਧੇਨ, ਤੇਨ ਲਞ੍ਛਨਲੇਖਾਸਤਮ੍ਪਿ ਲਞ੍ਛਨਲੇਖਾ ਸਹਸ੍ਸਮ੍ਪਿ ਕਰੋਤਿ. ‘‘ਪਟਿਬਿਮ੍ਬਚ੍ਛਾਯਾ’’ਤਿ ਪਸਨ੍ਨੇਸੁ ਆਦਾਸਪਟ੍ਟੇਸੁਵਾ ਉਦਕੇਸੁਵਾ ਉਪ੍ਪਨ੍ਨਾ ਸਰੀਰਚ੍ਛਾਯਾ. ਏਤੇਹਿ ਨਿਦਸ੍ਸਨੇਹਿ ਫਲਂ ਨਾਮ ਹੇਤੁਤੋ ਆਗਤਂ ਨ ਹੋਤਿ. ਹੇਤੁਨਾ ਚ ਵਿਨਾ ਨ ਸਿਜ੍ਝਤੀਤਿ ਏਤ੍ਤਕਮਤ੍ਥਂ ਦੀਪੇਤਿ. ‘‘ਬੀਜਸਙ੍ਖਾਰੋ’’ਤਿ ਕਾਲਨ੍ਤਰੇ ਉਪ੍ਪਨ੍ਨੇਸੁ ਪੁਪ੍ਫਫਲੇਸੁ ਇਚ੍ਛਿਤਵਣ੍ਣ ਗਨ੍ਧਰਸਪਾਤੁਭਾਵਤ੍ਥਾਯ ਰੋਪਨਕਾਲੇ ਅਮ੍ਬਬੀਜਾਦੀਸੁ ਇਚ੍ਛਿਤਵਣ੍ਣ ਗਨ੍ਧਰਸਧਾਤੂਨਂ ਪਰਿਭਾਵਨਾ. ਤਤ੍ਥ ਤਪ੍ਪਚ੍ਚਯਾ ਕਾਲਨ੍ਤਰੇ ਪੁਪ੍ਫਫਲੇਸੁ ਉਪ੍ਪਨ੍ਨੇਸੁ ਤੇਵਣ੍ਣਗਨ੍ਧਰਸਾ ਪਾਤੁਬ੍ਭਵਨ੍ਤਿ. ‘‘ਪਾਟਿਭੋਗੋ’’ਤਿ ਕਿਞ੍ਚਿ ਅਤ੍ਥਂ ਸਾਧੇਤੁਂ ਪਰਸ੍ਸ ਸਨ੍ਤਿਕੇ ਇਣਂ ਗਣ੍ਹਨ੍ਤਸ੍ਸ ਤਵਧਨਂ ਸਂਵਚ੍ਛਰੇਨ ਵੁਡ੍ਢਿਯਾ ਸਹ ਦਸ੍ਸਾਮਿ, ਸਚੇ ਨਦਦੇਯ੍ਯਂ. ਅਸੁਕਂ ਨਾਮ ਮਮਖੇਤ੍ਤਂ ਵਾ ਵਤ੍ਥੁਵਾ ਤੁਯ੍ਹਂ ਹੋਤੂਤਿ ਪਟਿਞ੍ਞਾਠਪਨਂ. ਤਤ੍ਥ ਤਪ੍ਪਚ੍ਚਯਾ ਧਨਂ ਲਭਿਤ੍ਵਾ ਤਂ ਅਤ੍ਥਞ੍ਚ ਸਾਧੇਤਿ. ਕਾਲੇ ਸਮ੍ਪਤ੍ਤੇ ਵੁਡ੍ਢਿਯਾ ਸਹ ਇਣਞ੍ਚ ਸੋਧੇਤਿ. ‘‘ਵਿਜ੍ਜਾਸਿਪ੍ਪੋਸਧਾ’’ਤਿ ਲੋਕੇ ਪੁਤ੍ਤਕੇ ਯਾਵਜੀਵਂ ਹਿਤਤ੍ਥਾਯ ਦਹਰਕਾਲੇ ਕਿਞ੍ਚਿ ਵਿਜ੍ਜਂਵਾ ਸਿਪ੍ਪਂਵਾ ਸਿਕ੍ਖਾਪੇਨ੍ਤਿ. ਯਾਵਜੀਵਂ ਖਰਰੋਗਾਨਂ ਅਨੁਪ੍ਪਾਦਤ੍ਥਾਯ ਦਹਰਕਾਲੇ ਓਜਵਨ੍ਤਂ ਕਿਞ੍ਚਿ ਓਸਧਂ ਵਾ ਅਜ੍ਝੋਹਾਰੇਨ੍ਤਿ. ਤਤ੍ਥ ਤਪ੍ਪਚ੍ਚਯਾ ਪੁਤ੍ਤਾਨਂ ਯਾਵਜੀਵਂ ਹਿਤਪ੍ਪਟਿਲਾਭੋ ਵਾ ਤਾਦਿਸਾਨਂ ਰੋਗਾਨਂ ਅਨੁਪ੍ਪਾਦੋ ਵਾ ਹੋਤਿਯੇਵ. ਏਤੇਹਿ ਯਥਾ ਕਾਲਨ੍ਤਰੇ ਅਸਨ੍ਤੇਸੁਯੇਵ ਪਾਟਿਭੋਗਾਦੀਸੁ ਮੂਲਕਮ੍ਮੇਸੁ ਪੁਬ੍ਬਭਾਗੇ ਕਤਪਚ੍ਚਯਾ ਏਵ ਪਚ੍ਛਾ ਅਤ੍ਥ ਸਾਧਨਾਦੀਨਿ ਸਿਜ੍ਝਨ੍ਤਿ. ਤਥਾ ਕੁਸਲਾ ਕੁਸਲ ਕਮ੍ਮਾਨਿ ਕਤ੍ਵਾ ਕਾਲਨ੍ਤਰੇ ਤੇਸੁ ਅਸਨ੍ਤੇਸੁਪਿ ਪੁਬ੍ਬੇ ਕਤਤ੍ਤਾ ਏਵ ਪਚ੍ਛਾ ਪਟਿਸਨ੍ਧਾਦੀਨਿ ਫਲਾਨਿ ਪਾਤੁਬ੍ਭਵਨ੍ਤੀਤਿ ਦੀਪੇਤਿ. ਤੇਨਵੁਤ੍ਤਂ ‘‘ਪਟਿਘੋਸ ਪਦੀਪਮੁਦ੍ਦਾਦੀਨਿ ਚੇਤ੍ਥ ਨਿਦਸ੍ਸਨਾਨੀ’’ਤਿ. ‘‘ਕਮ੍ਮਦੁਬ੍ਬਲਭਾਵੇਨਾ’’ਤਿ ਤਦਾ ਜੀਵਿਤਿਨ੍ਦ੍ਰਿਯਸ੍ਸ ਦੁਬ੍ਬਲਤ੍ਤਾ ਕਮ੍ਮਮ੍ਪਿ ਦੁਬ੍ਬਲਮੇਵ ਹੋਤੀਤਿ ਕਤ੍ਵਾ ਵੁਤ੍ਤਂ. ਕਾਮਞ੍ਚੇਤ੍ਥ ਅਟ੍ਠਕਥਾਯਂ ਵਤ੍ਵਾ ਦਸ੍ਸਿਤਂ, ਤਥਾਪਿ ਸਮ੍ਭਵਤੀਤਿ ਸਮ੍ਬਨ੍ਧੋ. ਤਤ੍ਥ ‘‘ਤਂ ਪੀ’’ਤਿ ਗਤਿਨਿਮਿਤ੍ਤਮ੍ਪਿ. ‘‘ਤਥਾ ਚਵਨ੍ਤਾਨਂ’’ਤਿ ਦਿਬ੍ਬਰਥਾਦੀਨਿ ਗਤਿਨਿਮਿਤ੍ਤਂ ਕਤ੍ਵਾ ਚਵਨ੍ਤਾਨਂ. ‘‘ਦਯ੍ਹਮਾਨਕਾਯੇਨਾ’’ਤਿ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਗਾਥਾਯਂ. ਪਞ੍ਚਦ੍ਵਾਰੇ ਪਟਿਸਨ੍ਧਿਕਮ੍ਮਂ ਵਿਨਾ ਦ੍ਵਿਗੋਚਰੇ ਸਿਯਾਤਿ ਯੋਜਨਾ. ਤਤ੍ਥ ‘‘ਦ੍ਵਿਗੋਚਰੇ’’ਤਿ ਕਮ੍ਮਨਿਮਿਤ੍ਤ ਗਤਿਨਿਮਿਤ੍ਤਭੂਤੇ ਦ੍ਵਿਗੋਚਰੇ. ਤਤ੍ਥ ਪਞ੍ਚਦ੍ਵਾਰੇ ਪਟਿਸਨ੍ਧਿ ਨਾਮ ਪਞ੍ਚਦ੍ਵਾਰਿਕ ਮਰਣਾਸਨ੍ਨ ਵੀਥਿਚਿਤ੍ਤਾਨਂ ਅਨ੍ਤੇ ਚ ਵਨ੍ਤਾਨਂ ਪਟਿਸਨ੍ਧਿ. ਸਾਪਿ ਗਤਿਨਿਮਿਤ੍ਤਭੂਤੇ ਗੋਚਰੇ ਸਿਯਾਤਿ ਵੁਤ੍ਤੇ ਪਞ੍ਚਦ੍ਵਾਰਿਕ ਵੀਥਿਚਿਤ੍ਤਾਨਿ ਪਞ੍ਚਾਰਮ੍ਮਣਭੂਤਾਨਿ ਗਤਿਨਿਮਿਤ੍ਤਾਨਿ ਆਰਮ੍ਮਣਂ ਕਰੋਨ੍ਤੀਤਿਪਿ ਸਿਦ੍ਧਂ ਹੋਤਿ. ਏਵਞ੍ਚ ਸਤਿ. ਤੇਸਂ ਵੀਥਿਚਿਤ੍ਤਾਨਂ ਅਨ੍ਤੇ ਅਚਵਿਤ੍ਵਾ ਤਦਨੁਬਨ੍ਧਕ ਮਨੋਦ੍ਵਾਰਿਕਵੀਥਿਚਿਤ੍ਤੇਹਿਪਿ ਕਦਾਚਿ ਕੇਸਞ੍ਚਿ ਚ ਵਨਂ ਨਨਸਮ੍ਭਵਤੀਤਿ ਸਕ੍ਕਾ ਵਤ੍ਤੁਂ. ਤੇਸੁ ਪਨ ਅਨੁਬਨ੍ਧਕ ਵੀਥੀਸੁ ਅਤੀਤਗ੍ਗਹਣ ਸਮੁਦਾਯਗ੍ਗਹਣੇਹਿ ਚ ਵਨ੍ਤਾਨਂ ਅਤੀਤਾਨਿਪਿ ਗਤਿਨਿਮਿਤ੍ਤਾਨਿ ਲਬ੍ਭਨ੍ਤਿ. ਵਤ੍ਥੁਗ੍ਗਹਣਨਾਮਗ੍ਗਹਣੇਹਿ ਚ ਵਨ੍ਤਾਨਂ ਧਮ੍ਮਾ ਰਮ੍ਮਣਂਪਿ ਲਬ੍ਭਤਿਯੇਵ. ਤਸ੍ਮਾ ਯਂ ਵੁਤ੍ਤਂ ਆਚਰਿਯੇਨ ਕਾਮਾਵਚਰ ਪਟਿਸਨ੍ਧਿਯਾ ਛ ਦ੍ਵਾਰਗ੍ਗਹਿਤਂ ਕਮ੍ਮਨਿਮਿਤ੍ਤਂ ਗਤਿਨਿਮਿਤ੍ਤਞ੍ਚ ਪਚ੍ਚੁਪ੍ਪਨ੍ਨਮਤੀਤਾ ਰਮ੍ਮਣਂ ਉਪਲਬ੍ਭਤੀਤਿ. ਤਂ ਸੁਵੁਤ੍ਤਮੇਵਾਤਿ ਦਟ੍ਠਬ੍ਬਂ. ਯਂ ਪਨ ‘ਤਮੇਵ ਤਥੋਪਟ੍ਠਿਤਂ ਆਰਮ੍ਮਣਂ ਆਰਬ੍ਭ ਚਿਤ੍ਤਸਨ੍ਤਾਨਂ ਅਭਿਣ੍ਹਂ ਪਵਤ੍ਤਤੀ’ਤਿ ਏਵਂ ਅਨ੍ਤਿਮਵੀਥਿਤੋ ਪੁਬ੍ਬਭਾਗੇ ਬਹੂਨਂ ਵੀਥਿਵਾਰਾਨਂ ਪਵਤ੍ਤਨਂ ਆਚਰਿਯੇਨ ਵੁਤ੍ਤਂ. ਤਂ ਤਥੋਪਟ੍ਠਿਤਂ ਗਤਿਨਿਮਿਤ੍ਤਂ ਆਰਬ੍ਭਾਤਿਪਿ ਲਦ੍ਧੁਂ ਵਟ੍ਟਤਿਯੇਵ. ਏਵਞ੍ਚਸਤਿ, ਗਤਿਨਿਮਿਤ੍ਤਂਪਿ ਅਤੀਤਂ ਲਬ੍ਭਤੀਤਿ ਦਸ੍ਸੇਤੁਂ ‘‘ਯਦਾਪਨਾ’’ਤਿਆਦਿ ਵੁਤ੍ਤਂ. ‘‘ਸਨ੍ਤਤਿ ਵਸੇਨਾ’’ਤਿ ਸਨ੍ਤਤਿ ਪਚ੍ਚੁਪ੍ਪਨ੍ਨ ਵਸੇਨ. ‘‘ਤਸ੍ਸਾ’’ਤਿ ਗਤਿਨਿਮਿਤ੍ਤਸ੍ਸ. ਯੇਭੂਯ੍ਯੇਨ ਵੁਤ੍ਤੋ, ਨ ਸਬ੍ਬਸਙ੍ਗਾਹਿਕੇਨ ਵੁਤ੍ਤੋਤਿ ਅਧਿਪ੍ਪਾਯੋ. ‘‘ਮਨੋਦ੍ਵਾਰਿਕ ਮਰਣਾਸਨ੍ਨ ਜਵਨਾਨਂਪਿ ਇਚ੍ਛਿਤਬ੍ਬਤ੍ਤਾ’’ਤਿ ਪੁਰੇਜਾਤਪਚ੍ਚਯ ਭਾਵੇਨ ਇਚ੍ਛਿਤਬ੍ਬਤ੍ਤਾਤਿ ਅਧਿਪ੍ਪਾਯੋ. ‘‘ਤਦਨੁਬਨ੍ਧਾਯਾ’’ਤਿ ਤਾਨਿ ਮਨੋਦ੍ਵਾਰਿ ਕਮਰਣਾਸਨ੍ਨ ਜਵਨਾਨਿ ਅਨੁਗਤਾਯ. ‘‘ਪਟਿਸਨ੍ਧਿਯਾਪਿ ਸਮ੍ਭਵਤੋ’’ਤਿ ਤਸ੍ਸ ਪੁਰੇਜਾਤ ਪਚ੍ਚਯਸ੍ਸ ਪਟਿਸਨ੍ਧਿਯਾਪਿ ਪੁਰੇਜਾਤ ਪਚ੍ਚਯਤਾ ਸਮ੍ਭਵਤੋ. ਨਨੁ ਥੇਰੇਨ ਭਿਨ੍ਦਿਤ੍ਵਾ ਅਵੁਤ੍ਤੇਪਿ ਭਿਨ੍ਦਿਤਬ੍ਬੇ ਸਤਿ, ਭਿਨ੍ਦਨਮੇਵ ਯੁਤ੍ਤਨ੍ਤਿ ਚੇ. ਨ ਯੁਤ੍ਤਂ. ਕਸ੍ਮਾ, ਕਮ੍ਮਨਿਮਿਤ੍ਤੇਨ ਸਮਾਨਗਤਿਕਤ੍ਤਾ. ਤੇਨਾਹ ‘‘ਨਚਤਂ’’ਤਿਆਦਿਂ. ਵਿਭਾਵਨਿਯਂ ਯਥਾਸਮ੍ਭਵਂ ਯੋਜੇਤਬ੍ਬਂਤਿ ਵਤ੍ਵਾ ਅਪਰੇਪਨ ਅਵਿਸੇਸਤੋਵ ਵਣ੍ਣੇਨ੍ਤੀਤਿ ਅਪਰੇਵਾਦੋਪਿ ਵੁਤ੍ਤੋ. ਤਤ੍ਥ ‘‘ਅਵਿਸੇਸਤੋ ਵਣ੍ਣੇਨ੍ਤੀ’’ਤਿ ਅਭਿਨ੍ਦਿਤ੍ਵਾਵ ਵਣ੍ਣੇਨ੍ਤੀਤਿ ਵੁਤ੍ਤਂ ਹੋਤਿ. ਪੁਨ ਤਂ ਅਪਰੇਵਾਦਂ ਅਸਮ੍ਪਟਿਚ੍ਛਨ੍ਤੋ ‘‘ਅਟ੍ਠਕਥਾਯਂ ਪਨਾ’’ਤਿਆਦਿਮਾਹ. ਇਧ ਪਨ ਤਂ ਅਪਰੇਵਾਦਂ ਪਗ੍ਗਣ੍ਹਨ੍ਤੋ ਪੁਨ ‘‘ਯਞ੍ਚ ਤਤ੍ਥਾ’’ਤਿਆਦਿਮਾਹ. ਤਤ੍ਥ ‘‘ਤਦਾਰਮ੍ਮਣਾਯਾ’’ਤਿ ਤਂ ਗਤਿਨਿਮਿਤ੍ਤਾ ਰਮ੍ਮਣਾਯ. ‘‘ਤੇਸਂ ਵਚਨਂ’’ਤਿ ਅਪਰੇਸਂ ਵਚਨਂ. ‘‘ਅਞ੍ਞਤ੍ਰ ਅਵਿਚਾਰਣਾਯਾ’’ਤਿ ਕਸ੍ਮਾ ਵੁਤ੍ਤਂ. ਨਨੁ ਅਟ੍ਠਕਥਾਯਂ ਪਨਾਤਿਆਦਿ ਸਬ੍ਬਂ ਵਿਚਾਰਣਾ ਵਚਨਮੇਵ ਹੋਤੀਤਿ. ਸਚ੍ਚਂ ਯਥਾ ਦਿਟ੍ਠਪਾਠਵਸੇਨ, ਸਾਵਸੇਸ ਪਾਠਭਾਵਂ ਪਨ ਨ ਵਿਚਾਰੇਤਿਯੇਵ. ਤਸ੍ਮਾ ‘‘ਅਞ੍ਞਤ੍ਰ ਅਵਿਚਾਰਣਾਯਾ’’ਤਿ ਵੁਤ੍ਤਂ. ਏਤ੍ਥ ਸਿਯਾ. ਅਟ੍ਠਕਥਾਪਾਠੋ ਸਾਵਸੇਸੋ ਹੋਤੁ, ਮੂਲਟੀਕਾਪਾਠੋ ਪਨ ਮਨੋਦ੍ਵਾਰੇ ਯੇਵਾਤਿ ਨਿਯਮੇਤ੍ਵਾ ਵੁਤ੍ਤਤ੍ਤਾ ਕਥਂ ਸਾਵਸੇਸੋ ਸਿਯਾਤਿ. ਨਿਯਮੇਤ੍ਵਾ ਵੁਤ੍ਤੋਪਿ ਇਧ ਅਧਿਪ੍ਪੇਤਤ੍ਥੇ ਅਪਰਿਪੁਣ੍ਣੇ ਸਾਵਸੇਸੋ ਏਵ ਹੋਤੀਤਿ. ਤੇਨ ਵੁਤ੍ਤਂ ‘‘ਅਞ੍ਞਂ ਕਾਰਣਂ ਨਤ੍ਥਿ ਅਞ੍ਞਤ੍ਰ ਅਵਿਚਾਰਣਾਯਾ’’ਤਿ. ‘‘ਪਚ੍ਚੁਪ੍ਪਨ੍ਨਮਤੀਤਂ’’ਤਿਆਦੀਸੁ. ਤਦਾਰਮ੍ਮਣਾਵਸਾਨਾਯ ਪਞ੍ਚਦ੍ਵਾਰਿਕ ਜਵਨਵੀਥਿਯਾ ਚ ਵਨਂ ਹੋਤੀਤਿ ਯੋਜਨਾ. ਏਵਂ ਅਪਰਤ੍ਥਪਿ. ਬਲਵਨ੍ਤੇਪਿ ਸਤਿ. ਤਦਾਰਮ੍ਮਣਾਵਸਾਨਾਯ ਏਵ ਵੀਥਿਯਾ. ‘‘ਵੁਤ੍ਤਤ੍ਤਾ ਪਨਾ’’ਤਿ ਅਟ੍ਠਕਥਾਯਂ ਏਵ ਵੁਤ੍ਤਤ੍ਤਾ ਪਨ. ‘‘ਪੁਰਿਮਭਾਗੇ ਏਵਾ’’ਤਿ ਪਞ੍ਚਦ੍ਵਾਰਿਕ ਅਨ੍ਤਿਮ ਵੀਥਿਤੋ ਪੁਬ੍ਬਭਾਗੇ ਏਵ. ‘‘ਤਾਹੀ’’ਤਿ ਦੇਯ੍ਯਧਮ੍ਮਵਤ੍ਥੂਹਿ. ‘‘ਯਥਾਤਂ’’ਤਿ ਤਂ ਅਤ੍ਥਜਾਤਂ ਕਤਮਂ ਵਿਯਾਤਿ ਅਤ੍ਥੋ. ‘‘ਇਤੋ’’ਤਿ ਮਨੁਸ੍ਸ ਭਵਤੋ. ਨਿਮਿਤ੍ਤ ਸਦਿਸਂ ਸਦ੍ਦਂ ਵਣ੍ਣਨ੍ਤਿ ਸਮ੍ਬਨ੍ਧੋ. ‘‘ਨਟ੍ਠਚਕਾਰਂ’’ਤਿ ਪਤਿਤਚਕਾਰਂ. ਅਟ੍ਠਕਥਾਪਾਠੇ ਞਾਤਕਾ ਮਾਤਾਦਯੋ ਪਞ੍ਚਦ੍ਵਾਰੇ ਉਪਸਂਹਰਨ੍ਤੀਤਿ ਸਮ੍ਬਨ੍ਧੋ. ‘‘ਤਵਤ੍ਥਾਯਾ’’ਤਿ ਤਵਅਤ੍ਥਾਯ. ‘‘ਚੀਨਪਟਸੋਮਾਰਪਟਾਦਿਵਸੇਨਾ’’ਤਿ ਚੀਨਰਟ੍ਠੇ ਪਵਤ੍ਤੋ ਪਟੋ ਚੀਨਪਟੋ. ਤਥਾ ਸੋਮਾਰਪਟੇਪਿ. ‘‘ਤਾਨੀ’’ਤਿ ਰਸਫੋਟ੍ਠਬ੍ਬਾਨਿ. ਫੋਟ੍ਠਬ੍ਬਂ ਪਨ ਅਞ੍ਞਂਪਿ ਯੁਜ੍ਜਤੇਵ. ਅਤ੍ਥਿਦਾਨੀਤਿ ਮਨਸਿਕਤਤ੍ਤਾ ਪਚ੍ਚੁਪ੍ਪਨ੍ਨਭੂਤਾਨੀਤਿ ਵੁਤ੍ਤਂ. ‘‘ਅਰੂਪੀਨਂ’’ਤਿ ਅਰੂਪਬ੍ਰਹ੍ਮਾਨਂ. ‘‘ਤੇ’’ਤਿ ਅਰੂਪਿਨੋ. ‘‘ਤਾਨੀ’’ਤਿ ਹੇਟ੍ਠਿਮਜ੍ਝਾਨਾਨਿ. ਵਿਸ੍ਸਟ੍ਠਂ ਲਦ੍ਧਝਾਨਂ ਯੇਸਂ ਤੇ ਵਿਸ੍ਸਟ੍ਠਜ੍ਝਾਨਾ. ‘‘ਤਤੋਯੇਵ ਚਾ’’ਤਿ ਵਿਸ੍ਸਟ੍ਠਜ੍ਝਾਨਤ੍ਤਾਯੇਵ ਚ. ਆਕਡ੍ਢਿਤਂ ਮਾਨਸਂ ਚਿਤ੍ਤਂ ਏਤੇਸਨ੍ਤਿ ਵਿਗ੍ਗਹੋ. ਇਦਞ੍ਚ ਹੇਤੁਵਿਸੇਸਨ ਪਦਂ. ਆਕਡ੍ਢਿਤਮਾਨਸਤ੍ਤਾ ਕਾਮਭਵੇ ਉਪ੍ਪਜ੍ਜਮਾਨਾਨਨ੍ਤਿ ਦੀਪੇਤਿ. ਤੇਸਂ ਅਰੂਪੀਨਂ. ‘‘ਅਞ੍ਞਂ ਦੁਬ੍ਬਲ ਕਮ੍ਮਂ’’ਤਿ ਉਪਚਾਰਜ੍ਝਾਨਕਮ੍ਮਤੋ ਅਞ੍ਞਂ ਤਿਹੇਤੁਕੋਮਕਂ ਕਮ੍ਮਂ. ‘‘ਤੇਸਂ’’ਤਿ ਰੂਪਲੋਕਤੋ ਚ ਵਨ੍ਤਾਨਂ. ‘‘ਸਤੋ’’ਤਿ ਸਨ੍ਤਸ੍ਸ ਸਮਾਨਸ੍ਸ. ‘‘ਉਪਤ੍ਥਮ੍ਭਨੇ ਕਾਰਣਂ ਨਤ੍ਥੀ’’ਤਿ ਇਦਂ ਉਪਚਾਰਜ੍ਝਾਨ ਕਮ੍ਮਸ੍ਸ ਗਰੁਕ ਕਮ੍ਮਗਤਿਕਤ੍ਤਾ ਵੁਤ੍ਤਂ. ਏਕਨ੍ਤ ਗਰੁਕਕਮ੍ਮਭੂਤਂਪਿ ਪਨ ਮਹਗ੍ਗਤਜ੍ਝਾਨ ਕਮ੍ਮਂ ਨਾਮ ਨਾਨਾਨਿਕਨ੍ਤਿ ਬਲੇਨ ਪਟਿਬਾਹੀਯਮਾਨਂ ਪਟਿਸਨ੍ਧਿਂ ਨ ਦੇਤਿਯੇਵ. ਉਪਚਾਰਜ੍ਝਾਨ ਕਮ੍ਮੇ ਵਤ੍ਤਬ੍ਬਂ ਨਤ੍ਥੀਤਿ ਦਟ੍ਠਬ੍ਬਂ. ‘‘ਤਾਦਿਸਾਨੀ’’ਤਿ ਤਥਾ ਰੂਪਾਨਿ ਦ੍ਵਿਹੇਤੁਕੋਮਕ ਕਮ੍ਮਾਨਿ ਤੇਸਂ ਓਕਾਸਂ ਨ ਲਭਨ੍ਤਿ. ਨੀਵਰਣਾਨਂ ਸੁਟ੍ਠੁਵਿਕ੍ਖਮ੍ਭਿਤਤ੍ਤਾਯੇਵ. ‘‘ਯੇਨਾ’’ਤਿ ਯੇਨ ਛਨ੍ਦਾਦੀਨਂ ਪਵਤ੍ਤਿ ਕਾਰਣੇਨ. ‘‘ਨਾਨਾਕਮ੍ਮਾਨਿ ਪੀ’’ਤਿ ਉਪਚਾਰਜ੍ਝਾਨ ਕਮ੍ਮਤੋ ਅਞ੍ਞਾਨਿ ਪਚ੍ਚੁਪ੍ਪਨ੍ਨ ਕਮ੍ਮਾਨਿਪਿ ਅਤੀਤਭਵੇਸੁ ਕਤਾਨਿ ਅਪਰਪਰਿਯਾਯ ਕਮ੍ਮਾਨਿਪਿ. ‘‘ਯੇਨ ਚਾ’’ਤਿ ਯੇਨ ਨਾਨਾਕਮ੍ਮਾਨਮ੍ਪਿ ਓਕਾਸ ਲਾਭਕਾਰਣੇਨ ਚ. ‘‘ਤੇ’’ਤਿ ਰੂਪੀ ਬ੍ਰਹ੍ਮਾਨੋ. ‘‘ਵੁਤ੍ਤਨਯੇਨੇ ਵਾ’’ਤਿ ਸੁਟ੍ਠੁਵਿਕ੍ਖਮ੍ਭਿਤਨੀਵਰਣਾਨਂ ਤੇਸਂ ਅਪ੍ਪਨਾ ਪਤ੍ਤਜ੍ਝਾਨਵਿਸੇਸੇਨ [ ਯਸ੍ਮਾ ਪਨਾਤਿਆਦਿਨਾ ਚ ] ਪਰਿਭਾਵਿਤ ਚਿਤ੍ਤਸਨ੍ਤਾਨਤ੍ਤਾ’ਤਿ ਚ ਵੁਤ੍ਤਨਯੇਨੇਵ. ‘‘ਤਂ ਕਾਰਣਂ’’ਤਿ ਅਹੇਤੁਕ ਪਟਿਸਨ੍ਧਿਯਾ ਅਭਾਵ ਕਾਰਣਂ. ਪਰਮ੍ਪਰ ਭਵੇਸੁਚ ਵੀਥਿਮੁਤ੍ਤਚਿਤ੍ਤਾਨਂ ਪਵਤ੍ਤਾਕਾਰਂ ਦਸ੍ਸੇਤੁਨ੍ਤਿ ਸਮ੍ਬਨ੍ਧੋ. ‘‘ਯਥਾ ਤਾਨਿਯੇਵ ਓਸਧਾਨੀ’’ਤਿ ਲੋਕੇ ਏਕਂ ਓਸਧਂ ਲਭਿਤ੍ਵਾਤਂ ਦੇਵਸਿਕਂ ਭੁਞ੍ਜਤਿ. ਏਕੋਪਥਮਦਿਵਸੇ ਭੁਞ੍ਜਨ੍ਤਂ ਦਿਸ੍ਵਾ ਕਤਮਂ ਨਾਮ ਤ੍ਵਂ ਓਸਧਂ ਭੁਞ੍ਜਸੀਤਿ ਪੁਚ੍ਛਿ. ਇਦਂ ਨਾਮ ਓਸਧਂ ਭੁਞ੍ਜਾਮੀਤਿ ਵਦਤਿ. ਪੁਨਦਿਵਸੇਸੁਪਿ ਓਸਧਂ ਭੁਞ੍ਜਨ੍ਤਂ ਦਿਸ੍ਵਾ ਤਥੇਵ ਪੁਚ੍ਛਿ. ਤਮੇਵ ਓਸਧਂ ਭੁਞ੍ਜਾਮੀਤਿ ਵਦਤਿ. ਤਤ੍ਥ ‘‘ਤਮੇਵ ਓਸਧਂ’’ਤਿ ਯਂ ਪਥਮਦਿਵਸੇ ਓਸਧਂ ਤਯਾਚ ਪੁਚ੍ਛਿਤਂ. ਮਯਾ ਚ ਕਥਿਤਂ. ਤਮੇਵ ਅਜ੍ਜ ਭੁਞ੍ਜਾਮੀਤਿ ਅਤ੍ਥੋ. ਤਤ੍ਥ ਪਨ ਪਥਮਦਿਵਸੇ ਭੁਤ੍ਤਂ ਓਸਧਂ ਅਞ੍ਞਂ. ਅਜ੍ਜ ਭੁਤ੍ਤਂ ਅਞ੍ਞਂ. ਤਂਸਦਿਸਂ ਪਨ ਅਞ੍ਞਂਪਿ ਤਮੇਵਾਤਿ ਲੋਕੇ ਵੋਹਰਨ੍ਤਿ ਤਾਨਿਯੇਵ ਓਸਧਾਨਿ ਭੁਞ੍ਜਾਮੀਤਿ. ਏਵਂ ਇਧਪਿ ਤਸ੍ਸਦਿਸੇ ਤਬ੍ਬੋਹਾਰੋ ਦਟ੍ਠਬ੍ਬੋ. ‘‘ਤਸ੍ਮਿਂ’’ਤਿ ਭਵਙ੍ਗਚਿਤ੍ਤੇ. ਅਵਤ੍ਤਮਾਨੇ ਉਪਪਤ੍ਤਿਭਵੋ ਓਚ੍ਛਿਜ੍ਜਤਿ. ਵਤ੍ਤਮਾਨੇ ਨ ਓਚ੍ਛਿਜ੍ਜਤਿ. ਤਸ੍ਮਾ ਤਸ੍ਸ ਉਪਪਤ੍ਤਿ ਭਵਸ੍ਸ ਅਨੋਚ੍ਛੇਦ ਅਙ੍ਗਤ੍ਥਾਯ ਕਾਰਣਤ੍ਤਾ ਭਵਙ੍ਗਨ੍ਤਿ ਵੁਚ੍ਚਤੀਤਿ ਅਧਿਪ੍ਪਾਯੋ. ‘‘ਉਪਪਤ੍ਤਿ ਭਵੋ’’ਤਿ ਚ ਕਮ੍ਮਜਕ੍ਖਨ੍ਧਸਨ੍ਤਾਨਂ ਵੁਚ੍ਚਤਿ. ‘‘ਪਰਸਮਯੇ’’ਤਿ ਉਚ੍ਛੇਦ ਦਿਟ੍ਠੀਨਂ ਵਾਦੇ. ‘‘ਵਟ੍ਟਮੂਲਾਨੀ’’ਤਿ ਅਵਿਜ੍ਜਾਤਣ੍ਹਾ ਵੁਚ੍ਚਨ੍ਤਿ. ਵਟ੍ਟਮੂਲਾਨਿ ਸੁਟ੍ਠੁਉਚ੍ਛਿਜ੍ਜਨ੍ਤਿ ਏਤ੍ਥਾਤਿ ਵਿਗ੍ਗਹੋ. ‘‘ਯਸ੍ਸ ਅਤ੍ਥਾਯਾ’’ਤਿ ਸਉਪਾਦਿਸੇਸਾਦਿਕਸ੍ਸ ਨਿਬ੍ਬਾਨਸ੍ਸ ਪਟਿਲਾਭਤ੍ਥਾਯ. ‘‘ਪਟ੍ਠਪੀਯਨ੍ਤੀ’’ਤਿ ਪਵਤ੍ਤਾਪੀਯਨ੍ਤਿ. ਪਜ੍ਜਨ੍ਤਿ ਪਾਪੁਣਨ੍ਤਿ ਅਰਿਯਾ ਜਨਾ ਏਤ੍ਥਾਤਿ ਪਦਂ. ਪਰਤੋ ਸਮਨ੍ਤਿਪਦੇ ਅਨੁਪਾਦਿਸੇਸਸ੍ਸ ਗਯ੍ਹਮਾਨਤ੍ਤਾ ਇਧ ਸਉਪਾਦਿਸੇਸਨ੍ਤਿ ਵੁਤ੍ਤਂ. ਬੁਜ੍ਝਨ੍ਤੀਤਿ ਬੁਧਾ. ਸੁਟ੍ਠੁ ਸਦ੍ਧਿਂ ਉਚ੍ਛਿਨ੍ਨਂ ਸਿਨੇਹਬਨ੍ਧਨਂ ਯੇਹਿ ਤੇ ਸੁਸਮੁਚ੍ਛਿਨ੍ਨਸਿਨੇਹਬਨ੍ਧਨਾ. ਕਥਞ੍ਚ ਸੁਟ੍ਠੁਉਚ੍ਛਿਨ੍ਨਂ, ਕੇਹਿ ਚ ਸਦ੍ਧਿਂ ਉਚ੍ਛਿਨ੍ਨਨ੍ਤਿਆਹ ‘‘ਅਨੁਸਯਮਤ੍ਤਂ ਪੀ’’ਤਿਆਦਿਂ. ‘‘ਸੇਸਕਿਲੇਸੇਹੀ’’ਤਿ ਤਣ੍ਹਾਸਿਨੇਹ ਬਨ੍ਧਨਤੋ ਅਵਸੇਸ ਕਿਲੇਸੇਹਿ. ‘‘ਅਧਿਸਯਿਤਂ’’ਤਿ ਵਿਕ੍ਖਮ੍ਭਿਤੁਂਪਿ ਅਸਕ੍ਕੁਣੇਯ੍ਯਂ ਹੁਤ੍ਵਾ ਅਤਿਰੇਕਤਰਂ ਸਯਿਤਂ. ‘‘ਅਧਿਗਮਾਵਹਂ’’ਤਿ ਅਧਿਗਮੋ ਵੁਚ੍ਚਤਿ ਨਵਵਿਧੋ ਲੋਕੁਤ੍ਤਰ ਧਮ੍ਮੋ. ਤਂ ਆਵਹਤੀਤਿ ਅਧਿਗਮਾਵਹਂ. ‘‘ਸੀਲਂ’’ਤਿ ਚਤੁਪਾਰਿਸੁਦ੍ਧਿਸੀਲਂ. ‘‘ਧੁਤਙ੍ਗਂ’’ਤਿ ਤੇਰਸਧੁਤਙ੍ਗਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਵੀਥਿਮੁਤ੍ਤਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੬. ਰੂਪਸਙ੍ਗਹਅਨੁਦੀਪਨਾ

੧੫੬. ਰੂਪਸਙ੍ਗਹੇ. ‘‘ਚਿਤ੍ਤਚੇਤਸਿਕੇ’’ਤਿ ਚਿਤ੍ਤਚੇਤਸਿਕ ਧਮ੍ਮੇ. ‘‘ਦ੍ਵੀਹਿ ਪਭੇਦਪ੍ਪਵਤ੍ਤੀਹੀ’’ਤਿ ਦ੍ਵੀਹਿ ਪਭੇਦਸਙ੍ਗਹਪਵਤ੍ਤਿ ਸਙ੍ਗਹੇਹਿ. ‘‘ਯੇ ਵਤ੍ਤਨ੍ਤੀ’’ਤਿ ਯੇ ਧਮ੍ਮਾ ਵਤ੍ਤਨ੍ਤਿ ਪਵਤ੍ਤਨ੍ਤਿ. ‘‘ਏਤ੍ਤਾਵਤਾ’’ਤਿ ਏਤ੍ਤਕੇਨ ‘ਤਤ੍ਥ ਵੁਤ੍ਤਾਭਿਧਮ੍ਮਤ੍ਥਾ’ਤਿਆਦਿਕੇਨ ਵਚਨਕ੍ਕਮੇਨ. ਨਿਪਾਤਂ ਇਚ੍ਛਨ੍ਤਾ ਏਤ੍ਤਕੇਹਿ ਪਞ੍ਚਹਿ ਪਰਿਚ੍ਛੇਦੇਹੀਤਿ ਵਣ੍ਣੇਨ੍ਤਿ. ਵਚਨਵਿਪਲ੍ਲਾਸਂ ਇਚ੍ਛਨ੍ਤਾਤਿਪਿ ਯੁਜ੍ਜਤਿ. ‘‘ਸਮੁਟ੍ਠਾਤੀ’’ਤਿ ਸੁਟ੍ਠੁ ਉਟ੍ਠਾਤਿ, ਪਾਤੁਬ੍ਭਵਤਿ, ਵਿਜ੍ਜਮਾਨਤਂ ਗਚ੍ਛਤਿ. ‘‘ਕਮ੍ਮਾਦੀ’’ਤਿ ਕਮ੍ਮਾਦਿਪਚ੍ਚਯੋ. ‘‘ਪਿਣ੍ਡੀ’’ਤਿ ਏਕਗ੍ਘਨਤਾ ਵੁਚ੍ਚਤਿ. ਉਪਾਦਾਯ ਮਹਨ੍ਤਾਨਿ ਏਵ ਹੁਤ੍ਵਾਤਿ ਸਮ੍ਬਨ੍ਧੋ. ਇਨ੍ਦ੍ਰਿਯਬਦ੍ਧਸਨ੍ਤਾਨਂ ਸਤ੍ਤਸਨ੍ਤਾਨਂ. ਅਜ੍ਝਤ੍ਤ ਸਨ੍ਤਾਨਂਤਿਪਿ ਵੁਚ੍ਚਤਿ. ‘‘ਵਿਸਂਵਾਦਕਟ੍ਠੇਨਾ’’ਤਿ ਵਿਰਾਧਕਟ੍ਠੇਨ. ਭੂਤਞ੍ਚ ਅਭੂਤਂ ਕਤ੍ਵਾ ਅਭੂਤਞ੍ਚ ਭੂਤਂ ਕਤ੍ਵਾ ਸਨ੍ਦਸ੍ਸਕਟ੍ਠੇਨਾਤਿ ਵੁਤ੍ਤਂ ਹੋਤਿ. ਭੂਤਵਜ੍ਜਪ੍ਪਟਿਚ੍ਛਾਦਨਕਮ੍ਮਂ ਮਹਾਮਾਯਾ ਨਾਮ. ਮਾਯਂ ਕਰੋਨ੍ਤੀਤਿ ਮਾਯਾਕਾਰਾ. ਆਵਿਸਨਂ ਨਾਮ ਸਤ੍ਤਾਨਂ ਸਰੀਰੇਸੁ ਆਵਿਸਨਂ. ਗਹਣਂ ਨਾਮ ਸਤ੍ਤਾਨਂ ਅਤ੍ਤਨੋਵਸਂ ਵਤ੍ਤਾਪਨਂ. ਤਦੁਭਯਂ ਕਰੋਨ੍ਤਾ ਕਤ੍ਥ ਠਤ੍ਵਾ ਕਰੋਨ੍ਤਿ. ਅਨ੍ਤੋਵਾਠਤ੍ਵਾ ਕਰੋਨ੍ਤਿ, ਬਹਿਵਾ ਠਤ੍ਵਾ ਕਰੋਨ੍ਤੀਤਿ ਪਾਕਤਿਕੇਹਿ ਮਨੁਸ੍ਸੇਹਿ ਜਾਨਿਤੁਂ ਪਸ੍ਸਿਤੁਂ ਅਸਕ੍ਕੁਣੇਯ੍ਯਤ੍ਤਾ ਅਚਿਨ੍ਤੇਯ੍ਯਟ੍ਠਾਨਂ ਨਾਮ. ‘‘ਵਞ੍ਚਕਟ੍ਠੇਨਾ’’ਤਿ ਏਤਾ ਪਕਤਿਯਾ ਅਤਿਦੁਬ੍ਬਣ੍ਣਂ ਅਤ੍ਤਾਨਂ ਦੇਵਚ੍ਛਰਾਵਣ੍ਣਂ ਕਤ੍ਵਾ ਵਞ੍ਚੇਨ੍ਤਿ. ਵਸਨਰੁਕ੍ਖਗੁਮ੍ਬਂਪਿ ਦਿਬ੍ਬਵਿਮਾਨਂ ਕਤ੍ਵਾ ਵਞ੍ਚੇਨ੍ਤਿ. ਏਵਰੂਪੇਨ ਵਞ੍ਚਕਟ੍ਠੇਨ. ‘‘ਤੇਨੇਵਟ੍ਠੇਨਾ’’ਤਿ ਵਿਸਂਵਾਦਕਟ੍ਠਾਦਿਨਾ ਤਿਵਿਧੇਨੇਵ ਅਤ੍ਥੇਨ. ਤਾਨਿਪਿਹਿ ਅਸਤ੍ਤਭੂਤਂਯੇਵ ਅਤ੍ਤਾਨਂ ਸਤ੍ਤੋਤਿ ਵਿਸਂਵਾਦੇਨ੍ਤਿ. ਅਰੁਕ੍ਖਂਯੇਵ ਅਤ੍ਤਾਨਂ ਰੁਕ੍ਖੋਤਿ ਵਿਸਂਵਾਦੇਨ੍ਤਿ. ਅਨਿਟ੍ਠਂ, ਅਕਨ੍ਤਂ, ਅਮਨਾਪਂਯੇਵ ਅਤ੍ਤਾਨਂ ਇਟ੍ਠੋ, ਕਨ੍ਤੋ, ਮਨਾਪੋਤਿ ਵਞ੍ਚੇਨ੍ਤਿ, ਤਥਾ ਸਹਜਾਤਾਨਞ੍ਚ ਤੇਸਂ ਅਞ੍ਞਮਞ੍ਞਸ੍ਸ ਅਨ੍ਤੋ ਵਾ ਤਿਟ੍ਠਨ੍ਤਿ. ਉਦਾਹੁਬਹਿਵਾਤਿਟ੍ਠਨ੍ਤੀਤਿ ਜਾਨਿਤੁਂ ਪਸ੍ਸਿਤੁਂ ਅਸਕ੍ਕੁਣੇਯ੍ਯਂ ਠਾਨਂ ਹੋਤੀਤਿ. ‘‘ਉਭਯਤ੍ਥਪੀ’’ਤਿ ਮਾਯਾਕਾਰਾਦਿ ਮਹਾਭੂਤੇਸੁ ਚ ਪਥਵਿਯਾਦਿਮਹਾਭੂਤੇਸੁ ਚ. ‘‘ਅਭੂਤਾਨੀ’’ਤਿ ਅਸਨ੍ਤਾਨਿ, ਅਸਚ੍ਚਾਨਿ.‘‘ਅਬ੍ਭੁਤਾਨੀ’’ਤਿ ਅਚ੍ਛਰਿਯਕਮ੍ਮਾਨਿ. ‘‘ਇਮਸ੍ਮਿਂ ਪਾਠੇ’’ਤਿ ਚਤੁਨ੍ਨਂ ਮਹਾਭੂਤਾਨਨ੍ਤਿ ਏਵਂ ਸਮ੍ਬਨ੍ਧ ਪਦਸਹਿਤੇ ਪਾਠੇ. ਅਞ੍ਞਤ੍ਥ ਪਨ ਉਪਾਦਾਰੂਪਂ ਅਨੁਪਾਦਾਰੂਪਨ੍ਤਿਆਦੀਸੁ ਯਕਾਰ ਵਿਰਹੋ ਦਿਟ੍ਠੋਤਿ ਅਧਿਪ੍ਪਾਯੋ. ਧਾਤੂਨਂ ਅਨੇਕਤ੍ਥਤ੍ਤਾ ‘‘ਪਥਯਤਿ ਪਕ੍ਖਾਯਤੀ’’ਤਿ ਵੁਤ੍ਤਂ. ‘‘ਪੁਥੂ’’ਤਿ ਪਾਟਿਪਦਿਕਪਦਂ. ਤਮੇਵ ਜਾਤਤ੍ਥੇ ਨਿਰੁਤ੍ਤਿਨਯੇਨ ਪਥਵੀਤਿ ਸਿਦ੍ਧਨ੍ਤਿ ਦਸ੍ਸੇਤੁਂ ‘‘ਪੁਥੁਮਹਨ੍ਤੀ’’ਤਿਆਦਿ ਵੁਤ੍ਤਂ. ਪਕਾਰੇਨ ਥਵੀਯਤੀਤਿ ਅਤ੍ਥੇ ਪਥਵੀਤਿ ਇਦਂ ਉਜੁਕਮੇਵ. ‘‘ਆਪੇਤੀ’’ਤਿ ਬ੍ਯਾਪੇਤਿ. ‘‘ਅਪ੍ਪਾਯਤੀ’’ਤਿ ਭੁਸਂ ਪਾਯਤਿ, ਵਡ੍ਢੇਤਿ. ਤੇਨਾਹ ‘‘ਸੁਟ੍ਠੁ ਬ੍ਰੂਹੇਤੀ’’ਤਿਆਦਿਂ. ਨਿਸਾਨਤ੍ਥਵਸੇਨੇਵ ਪਰਿਪਾਚਨਤ੍ਥੋਪਿ ਲਬ੍ਭਤੀਤਿ ਆਹ ‘‘ਪਰਿਪਾਚੇਤਿਵਾ’’ਤਿ. ‘‘ਸਮੀਰੇਤੀ’’ਤਿ ਸੁਟ੍ਠੁ ਈਰੇਤਿ ਕਮ੍ਪੇਤਿ. ਵਾਯਤਿ ਵਹਤੀਤਿ ਵਾਯੋ ਅਤ੍ਥਾਤਿਸ੍ਸਯ ਨਯੇਨ. ‘‘ਵਿਤ੍ਥਮ੍ਭਨਂ’’ਤਿ ਵਿਵਿਧੇਨ ਆਕਾਰੇਨ ਭੂਤਸਙ੍ਘਾਟਾਨਂ ਥਮ੍ਭਨਂ ਵਹਨਂ ਅਭਿਨੀਹਰਣਂ. ਕਕ੍ਖਲ਼ਤਾ ਨਾਮ ਖਰਤਾ ਫਰੁਸਤਾ. ਸਹਜਾਤਰੂਪਾਨਂ ਪਤਿਟ੍ਠਾਨਤ੍ਥਾਯ ਥਦ੍ਧਤਾ ਥੂਲਤਾ. ਸਾ ਸੇਸਭੂਤੇਸੁ ਨਤ੍ਥੀਤਿ ਆਹ ‘‘ਸੇਸਭੂਤਤ੍ਤਯਂ ਉਪਾਦਾਯਾ’’ਤਿ. ‘‘ਅਨਵਟ੍ਠਾਨਤਾ’’ਤਿ ਏਤ੍ਥ ਅਵਟ੍ਠਾਨਂ ਨਾਮ ਅਚਲਟ੍ਠਾਨਂ. ਨ ਅਵਟ੍ਠਾਨਨ੍ਤਿ ਅਨਵਟ੍ਠਾਨਂ. ਚਲਨਨ੍ਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਮੁਦੁਭੂਤਾਪੀ’’ਤਿਆਦਿਂ. ਆਬਨ੍ਧਕਂ ਨਾਮ ਆਬਨ੍ਧਿਤਬ੍ਬੇ ਵਤ੍ਥੁਮ੍ਹਿ ਮੁਦੁਮ੍ਹਿ ਸਤਿ, ਦਲ਼੍ਹਂ ਨ ਬਨ੍ਧਤਿ. ਥਦ੍ਧੇਸਤਿ, ਦਲ਼੍ਹਂ ਬਨ੍ਧਤੀਤਿ ਇਦਂ ਲੋਕਤੋਵ ਸਿਦ੍ਧਨ੍ਤਿ ਆਹ ‘‘ਆਬਨ੍ਧਿਤਬ੍ਬਾਯਾ’’ਤਿਆਦਿਂ. ‘‘ਤਬ੍ਭਾਵਂ’’ਤਿ ਪਰਿਣਤਭਾਵਂ. ‘‘ਪਰਿਪਾਚਕਤਾ ਦਸ੍ਸਨਤੋ’’ਤਿ ਹੇਮਨ੍ਤੇ ਅਜ੍ਝੋਹਟਾਹਾਰਾਨਂ ਸੁਟ੍ਠੁਪਰਿਪਾਚਕਤਾ ਦਸ੍ਸਨਤੋਤਿ ਵਦਨ੍ਤਿ. ਉਸਤਿ ਦਹਤੀਤਿ ਉਣ੍ਹਂ. ‘‘ਦਹਤੀ’’ਤਿ ਚ ਉਣ੍ਹਤੇਜੋਪਿ ਉਣ੍ਹਭਾਵੇਨ ਦਹਤਿ, ਸੀਤਤੇਜੋਪਿ ਸੀਤਭਾਵੇਨ ਦਹਤਿ. ਉਣ੍ਹੇਨ ਫੁਟ੍ਠਂ ਵਤ੍ਥੁ ਉਣ੍ਹਤ੍ਤਂ ਗਚ੍ਛਤਿ, ਸੀਤੇਨ ਫੁਟ੍ਠਂ ਵਤ੍ਥੁ ਸੀਤਤ੍ਤਂ ਗਚ੍ਛਤਿ. ਯਞ੍ਚ ਉਣ੍ਹਤ੍ਤਂ ਗਚ੍ਛਤਿ, ਤਂ ਉਣ੍ਹਤੇਜੋ ਉਣ੍ਹਭਾਵੇਨ ਦਹਤਿਨਾਮ. ਯਞ੍ਚ ਸੀਤਤ੍ਤਂ ਗਚ੍ਛਤਿ, ਤਂ ਸੀਤਤੇਜੋ ਸੀਤਭਾਵੇਨ ਦਹਤਿਨਾਮ. ਏਵਂ ਸੀਤਤੇਜੋਪਿ ਉਸਤਿਦਹਤੀਤਿ ਅਤ੍ਥੇਨ ਉਣ੍ਹਤ੍ਤ ਲਕ੍ਖਣੋਨਾਮ ਹੋਤੀਤਿ. ਏਵਂਸਨ੍ਤੇ ਨੀਲੇਨਵਣ੍ਣੇਨ ਫੁਟ੍ਠਂ ਵਤ੍ਥੁ ਨੀਲਂ ਹੋਤਿ. ਪੀਤੇਨ ਫੁਟ੍ਠਂ ਪੀਤਂ ਹੋਤਿ. ਨੀਲਂਪਿ ਪੀਤਂਪਿ ਤਂ ਵਤ੍ਥੁਂ ਦਹਤਿਨਾਮਾਤਿ ਚੇ. ਨੀਲੇਨ ਵਣ੍ਣੇਨ ਫੁਟ੍ਠਂਨਾਮ ਨਤ੍ਥਿ. ਤਥਾ ਪੀਤੇਨ. ਕਸ੍ਮਾ, ਨੀਲਾਦੀਨਂ ਉਪਾਦਾਰੂਪਾਨਂ ਫੁਸਨ ਕਿਚ੍ਚਾ ਭਾਵਤੋ. ਸਮ੍ਮਿਸ੍ਸਿਤਂ ਨਾਮ ਹੋਤਿ. ਨ ਚ ਸਮ੍ਮਿਸ੍ਸਨਮਤ੍ਤੇਨ ਦਹਤਿ. ਫੁਸਨ੍ਤੋ ਏਵ ਦਹਤਿ. ਫੁਸਨ੍ਤਾਨਂਪਿ ਪਥਵਿਵਾਤਾਨਂ ਦਹਨਕਿਚ੍ਚਂ ਨਤ੍ਥਿ. ਪਰਿਪਾਚਨਕਿਚ੍ਚਂ ਨਤ੍ਥੀਤਿ ਅਧਿਪ੍ਪਾਯੋ. ਸਚੇ ਘਨਥਦ੍ਧੇ ਸਿਲਾਥਮ੍ਭੇ ਵਿਤ੍ਥਮ੍ਭਨਂ ਅਤ੍ਥਿ, ਸਕਲੋ ਸਿਲਾਥਮ੍ਭੋ ਕਪ੍ਪਾਸਪਿਚੁਗੁਲ਼੍ਹੋਵਿਯ ਸਿਥਿਲੋ ਚ ਲਹੁਕੋ ਚ ਭਵੇਯ੍ਯ. ਨਚ ਭਵਤਿ. ਤਸ੍ਮਾ ਤਤ੍ਥ ਵਿਤ੍ਥਮ੍ਭਨਂ ਨਤ੍ਥੀਤਿ ਅਧਿਪ੍ਪਾਯੇਨ ‘‘ਸੋ ਪਨ ਘਨਥਦ੍ਧੇਸੁ ਸਿਲਾਥਮ੍ਭਾਦੀਸੁ ਨ ਲਬ੍ਭਤੀ’’ਤਿ ਚੋਦੇਤਿ. ਤਤ੍ਥ ਪਨ ਵਿਤ੍ਥਮ੍ਭਨਂ ਲਬ੍ਭਮਾਨਂ ਅਧਿਮਤ੍ਤੇਨ ਨ ਲਬ੍ਭਤਿ, ਸਹਜਾਤਭੂਤਾਨਂ ਉਪਤ੍ਥਮ੍ਭਨਮਤ੍ਤੇਨ ਲਬ੍ਭਤੀਤਿ ਦਸ੍ਸੇਨ੍ਤੋ ‘‘ਨਾ’’ਤਿ ਵਤ੍ਵਾ ‘‘ਤਤ੍ਥਹੀ’’ਤਿਆਦਿਮਾਹ. ਤਤ੍ਥ ‘‘ਵਹਤੀ’’ਤਿ ਥਦ੍ਧਕਕ੍ਖਲ਼ ਕਿਚ੍ਚਂ ਵਹਤਿ.

ਪਸਾਦਰੂਪੇਸੁ. ‘‘ਸਮਵਿਸਮਂ’’ਤਿ ਸਮਟ੍ਠਾਨਞ੍ਚ ਵਿਸਮਟ੍ਠਾਨਞ੍ਚ, ਸਮਦੇਸਞ੍ਚ ਵਿਸਮਦੇਸਞ੍ਚ, ਸਮਪਥਞ੍ਚ ਵਿਸਮਪਥਞ੍ਚਾਤਿ ਏਵਮਾਦਿਂ ਸਮਵਿਸਮਂ. ‘‘ਆਚਿਕ੍ਖਤੀ’’ਤਿ ਆਚਿਕ੍ਖਨ੍ਤਂ ਵਿਯ ਤਂ ਜਾਨਨ ਕਿਚ੍ਚਂ ਸਮ੍ਪਾਦੇਤਿ. ਤੇਨਾਹ ‘‘ਸਮਵਿਸਮਜਾਨਨਸ੍ਸ ਤਂ ਮੂਲਕਤ੍ਤਾ’’ਤਿ. ‘‘ਅਨਿਰਾਕਰਣਤੋ’’ਤਿ ਅਪ੍ਪਟਿਕ੍ਖਿਪਨਤੋ. ‘‘ਤਂ ਵਾ’’ਤਿ ਰੂਪਂ ਵਾ. ਸੁਣਨ੍ਤਿ ਜਨਾ. ਸੁਯ੍ਯਨ੍ਤਿ ਜਨੇਹਿ. ਏਵਂ ਘਾਯਨ੍ਤੀਤਿਆਦੀਸੁ. ‘‘ਜੀਵਿਤ ਨਿਮਿਤ੍ਤਂ’’ਤਿ ਜੀਵਿਤਪ੍ਪਵਤ੍ਤਿਕਾਰਣਭੂਤੋ. ‘‘ਨਿਨ੍ਨਤਾਯਾ’’ਤਿ ਵਿਸਯਵਿਸਯੀਭਾਵੂਪਗਮਨੇਨ ਨਿਨ੍ਨਤਾਯ. ‘‘ਜੀਵਿਤਵੁਤ੍ਤਿ ਸਮ੍ਪਾਦਕਤ੍ਤਾ’’ਤਿ ਨਾਨਾਵਚੀਭੇਦਵਚੀਕਮ੍ਮਪ੍ਪਵਤ੍ਤਨੇਨਾਤਿ ਅਧਿਪ੍ਪਾਯੋ. ਇਮੇ ਪਨ ਪਞ੍ਚ ਚਕ੍ਖੁ ਪਸਾਦਾਦਯੋਤਿ ਸਮ੍ਬਨ੍ਧੋ. ‘‘ਦਟ੍ਠੁਕਾਮਤਾ’’ਤਿ ਰੂਪਤਣ੍ਹਾ ਵੁਚ੍ਚਤਿ. ਆਦਿਸਦ੍ਦੇਨ ਸੋਤੁਕਾਮਤਾ ਘਾਯਿਤੁਕਾਮਤਾ ਸਾਯਿਤੁਕਾਮਤਾ ਫੁਸਿਤੁਕਾਮਤਾਯੋ ਸਙ੍ਗਯ੍ਹਨ੍ਤਿ. ਅਤ੍ਥਤੋ ਸਦ੍ਦਤਣ੍ਹਾ ਗਨ੍ਧਤਣ੍ਹਾ ਰਸਤਣ੍ਹਾ ਫੋਟ੍ਠਬ੍ਬਤਣ੍ਹਾ ਏਵ. ‘‘ਨਿਦਾਨਂ’’ਤਿ ਕਾਰਣਂ. ਦਟ੍ਠੁਕਾਮਤਾਦਯੋ ਨਿਦਾਨ ਮਸ੍ਸਾਤਿ ਵਿਗ੍ਗਹੋ. ਕੁਸਲਾ ਕੁਸਲਕਮ੍ਮਂ. ਸਮੁਟ੍ਠਾਤਿ ਏਤੇਨਾਤਿ ਸਮੁਟ੍ਠਾਨਂ. ਕਮ੍ਮਮੇਵ. ਦਟ੍ਠੁਕਾਮਤਾਦਿਨਿਦਾਨਕਮ੍ਮਂ ਸਮੁਟ੍ਠਾਨਂ ਯੇਸਨ੍ਤਿ ਸਮਾਸੋ. ਪਥਵਿਆਦੀਨਿ ਭੂਤਾਨਿ. ਤੇਸਂ ਪਸਾਦੋ ਲਕ੍ਖਣਂ ਏਤੇਸਨ੍ਤਿ ਵਿਗ੍ਗਹੋ. ਦੁਤੀਯ ਵਿਕਪ੍ਪੇ. ਰੂਪਾਦੀਨਂ ਪਞ੍ਚਾਰਮ੍ਮਣਾਨਂ ਅਭਿਘਾਤਂ ਅਰਹਤੀਤਿ ਰੂਪਾਦਿਅਭਿਘਾਤਾਰਹੋ. ਭੂਤਾਨਂ ਪਸਾਦੋ ਭੂਤਪ੍ਪਸਾਦੋ. ਸੋ ਲਕ੍ਖਣਂ ਏਤੇਸਨ੍ਤਿ ਵਿਗ੍ਗਹੋ. ਚਕ੍ਖੁ ਊਕਾਸਿਰਪ੍ਪਮਾਣੇ ਦਿਟ੍ਠ ਮਣ੍ਡਲੇ ਤਿਟ੍ਠਤੀਤਿ ਸਮ੍ਬਨ੍ਧੋ. ‘‘ਦਿਟ੍ਠਮਣ੍ਡਲੇ’’ਤਿ ਮਹਾਜਨੇਹਿ ਪਕਤਿ ਚਕ੍ਖੁਨਾ ਦਿਟ੍ਠੇ ਪਸਨ੍ਨਮਣ੍ਡਲੇ. ਤੇਲਂ ਸਤ੍ਤਪਿਚੁਪਟਲਾਨਿ ਬ੍ਯਾਪੇਤ੍ਵਾ ਤਿਟ੍ਠਤਿਵਿਯਾਤਿ ਯੋਜਨਾ. ‘‘ਸੋਤਬਿਲਂ’’ ਨਾਮ ਸੋਤਕੂਪੋ. ‘‘ਅਙ੍ਗੁਲਿਵੇਠਨਾ’’ ਨਾਮ ਅਙ੍ਗੁਲਿਮੁਦ੍ਦਿਕਾ. ‘‘ਉਪਚਿਤਤਨੁਤਮ੍ਬਲੋਮਂ’’ਤਿ ਰਾਸੀਕਤਞ੍ਚ ਵਿਰਲ਼ਞ੍ਚ ਤਮ੍ਬਲੋਹਵਣ੍ਣਞ੍ਚ ਸੁਖੁਮਲੋਮਂ. ਉਪਚਿਤਂ ਰਾਸੀਕਤਂ ਤਨੁਤਮ੍ਬਲੋਮਂ ਏਤ੍ਥਾਤਿ ਵਿਗ੍ਗਹੋ. ‘‘ਅਜਪਦਸਣ੍ਠਾਨਂ’’ਤਿ ਅਜਸ੍ਸ ਪਾਦੇਨ ਅਕ੍ਕਨ੍ਤਪਦਸਣ੍ਠਾਨਵਨ੍ਤਂ. ‘‘ਉਪ੍ਪਲਦਲਂ’’ ਨਾਮ ਉਪ੍ਪਲਪਣ੍ਣਂ. ਉਪ੍ਪਲਦਲਸ੍ਸ ਅਗ੍ਗਸਣ੍ਠਾਨਵਨ੍ਤਂ. ‘‘ਵਟ੍ਟਿ’’ ਨਾਮ ਇਧ ਮਨੁਸ੍ਸਾਨਂ ਸਰੀਰਾਕਾਰਸਣ੍ਠਿਤਾ ਆਯਤਪਿਣ੍ਡਿ. ‘‘ਸੁਕ੍ਖਚਮ੍ਮਾਨਿ ਚ ਠਪੇਤ੍ਵਾ’’ਤਿ ਸਮ੍ਬਨ੍ਧੋ. ਤੇ ਪਨ ਪਞ੍ਚਪ੍ਪਸਾਦਾ. ਸਮੁਦੀਰਣਂ ਚਞ੍ਚਲਨਂ. ‘‘ਯਥਾਤਂ’’ਤਿ ਕਤਮਂ ਵਿਯ ਤਂ. ਇਮੇ ਪਸਾਦਾ ਵਿਚਿਤ੍ਤਾ, ਕਥਂਵਿਚਿਤ੍ਤਾਤਿ ਆਹ ‘‘ਅਞ੍ਞਮਞ੍ਞਂ ਅਸਦਿਸਾ’’ਤਿ. ਕਥਂ ਅਸਦਿਸਾਤਿ ਆਹ ‘‘ਤੇਹੀ’’ਤਿਆਦਿਂ.

ਗੋਚਰਰੂਪੇਸੁ. ‘‘ਵਣ੍ਣਵਿਸੇਸਂ’’ਤਿ ਵਣ੍ਣਵਿਸੇਸਤ੍ਥਂ. ਵਣ੍ਣਵਿਕਾਰਨ੍ਤਿ ਵੁਤ੍ਤਂ ਹੋਤਿ. ਹਦਯੇ ਗਤੋ ਪਵਤ੍ਤੋ ਭਾਵੋ ਹਦਯਙ੍ਗਤਭਾਵੋ. ‘‘ਭਾਵੋ’’ਤਿ ਚ ਅਧਿਪ੍ਪਾਯੋ ਵੁਚ੍ਚਤਿ. ਤਂ ਪਕਾਸੇਤਿ, ਮੁਖੇ ਵਣ੍ਣਵਿਕਾਰਂ ਦਿਸ੍ਵਾ ਅਯਂ ਮੇ ਤੁਸ੍ਸਤਿ, ਅਯਂ ਮੇ ਰੁਚ੍ਚਤਿ, ਅਯਂ ਮੇ ਕੁਪ੍ਪਤਿ, ਅਯਂ ਸੋਮਨਸ੍ਸਿਤੋ, ਅਯਂ ਦੋਮਨਸ੍ਸਿਤੋਤਿ ਏਵਂ ਜਾਨਨਪਚ੍ਚਯਤ੍ਤਾ. ‘‘ਪਕਤਿਯਾ ਪੀ’’ਤਿ ਵਣ੍ਣਵਿਸੇਸਂ ਅਨਾਪਜ੍ਜਿਤ੍ਵਾਪੀਤਿ ਅਧਿਪ੍ਪਾਯੋ. ‘‘ਯਂ ਕਿਞ੍ਚਿਦਬ੍ਬਂ’’ਤਿ ਸਵਿਞ੍ਞਾਣਕਵਤ੍ਥੁਂ. ਸਮਵਿਸਮਂ ਪੁਬ੍ਬੇ ਪਕਾਸਿਤਂ. ਤਂ ਤਂ ਅਤ੍ਥਂ ਵਾ ਆਚਿਕ੍ਖਤਿ ਤਂ ਸੁਤ੍ਵਾ ਤਸ੍ਸ ਤਸ੍ਸ ਅਤ੍ਥਸ੍ਸ ਜਾਨਨਤੋ. ਅਤ੍ਤਨੋ ਵਤ੍ਥੁਂ ਵਾ ਆਚਿਕ੍ਖਤਿ ਤਂ ਸੁਤ੍ਵਾ ਤਸ੍ਸ ਵਤ੍ਥੁਸ੍ਸਪਿ ਜਾਨਨਤੋ. ‘‘ਅਤ੍ਤਨੋ ਵਤ੍ਥੁਂ ਸੂਚੇਤੀ’’ਤਿ ਇਧ ਇਦਂ ਨਾਮ ਅਤ੍ਥੀਤਿ ਪਕਾਸੇਤਿ. ‘‘ਫੁਸੀਯਤੀ’’ਤਿ ਫੁਸਿਤ੍ਵਾ ਵਿਜਾਨੀਯਤਿ. ‘‘ਤਂ’’ਤਿ ਫੁਸਨਂ. ‘‘ਤਸ੍ਸਾ’’ਤਿ ਆਪੋਧਾਤੁਯਾ. ‘‘ਦ੍ਰਵਤਾਵਾ’’ਤਿ ਅਦ੍ਦਤਿਨ੍ਤਰਸਤਾਵਾ. ਫੁਸਿਤ੍ਵਾ ਗਯ੍ਹਤਿ, ਸਾ ਚ ਆਪੋਧਾਤੁ ਸਿਯਾਤਿ ਚੋਦੇਤਿ. ਵੁਚ੍ਚਤੇ ਪਰਿਹਾਰੋ. ਏਵਂ ਪਨ ਨ ਲਬ੍ਭਤਿ, ਤਸ੍ਮਾ ਸਾ ਤੇਜੋਯੇਵ. ਨ ਆਪੋਤਿ. ਏਤ੍ਥ ਏਵਂ ਅਲਬ੍ਭਮਾਨਾਪਿ ਸਾਸੀਤਤਾ ਆਪੋਯੇਵ, ਨ ਤੇਜੋ. ਕਸ੍ਮਾ, ਆਪਸ੍ਸਪਿ ਸੀਤੁਣ੍ਹਵਸੇਨ ਦੁਵਿਧਤਾ ਸਮ੍ਭਵਤੋ. ਤਸ੍ਮਿਞ੍ਹਿ ਲੋਹਰਸੇ ਉਣ੍ਹਤਾ ਉਣ੍ਹਆਪੋ, ਸੀਤਵਤ੍ਥੂਸੁ ਸੀਤਤਾ ਸੀਤਆਪੋਤਿ ਚੇ. ਏਵਂ ਪਨ ਸਤਿ ਤੇਜੋ ਨਾਮ ਨਤ੍ਥੀਤਿ ਆਪਜ੍ਜਤੀਤਿ ਪਰਿਹਾਰੋ. ‘‘ਸਹ ਅਪ੍ਪਵਤ੍ਤਨਤੋ’’ਤਿ ਏਕਤੋ ਅਪ੍ਪਵਤ੍ਤਨਤੋ. ‘‘ਓਰਪਾਰਾਨਂ ਵਿਯਾ’’ਤਿ ਨਦਿਯਂ ਤੀਰਂ ਨਾਮ ਇਦਂ ਓਰਿਮਤੀਰਂ, ਇਦਂ ਪਾਰਿਮਨ੍ਤਿ ਨਿਯਮਤੋ ਨਤ੍ਥਿ. ਯਤ੍ਥ ਸਯਂ ਤਿਟ੍ਠਤਿ, ਤਂ ਓਰਿਮਨ੍ਤਿ, ਇਤਰਂ ਪਾਰਿਮਨ੍ਤਿ ਵੋਹਰਤਿ. ਏਵਂ ਓਰਪਾਰਾਨਂ ਅਨਵਟ੍ਠਾਨਂ ਹੋਤੀਤਿ. ਏਤ੍ਥ ਚ ‘‘ਸੀਤੁਣ੍ਹਾਨਂ ਸਹ ਅਪ੍ਪਵਤ੍ਤਨਤੋ’’ਤਿ ਏਤੇਨ ਯਦਿ ਤੇ ਸਹ ਪਵਤ੍ਤੇਯ੍ਯੁਂ. ਤਤ੍ਥ ਸੀਤਤਾ ਆਪੋਨਾਮ, ਉਣ੍ਹਤਾ ਤੇਜੋਨਾਮਾਤਿ ਵਤ੍ਤਬ੍ਬਾ ਸਿਯੁਂ. ਨ ਪਨ ਤੇ ਸਹ ਪਵਤ੍ਤਨ੍ਤਿ, ਤਸ੍ਮਾ ਤਥਾ ਨ ਵਤ੍ਤਬ੍ਬਾ ਹੋਨ੍ਤੀਤਿ ਦਸ੍ਸੇਤਿ. ਨ ਨ ਵਤ੍ਤਬ੍ਬਾ. ਕਸ੍ਮਾ, ਉਣ੍ਹਤੇਜੇਨ ਯੁਤ੍ਤੋਹਿ ਆਪੋ ਉਣ੍ਹਤ੍ਤਮੇਵ ਗਚ੍ਛਤਿ. ਯਥਾਤਂ ਉਣ੍ਹਤੇਜੇਨ ਯੁਤ੍ਤਾ ਪਥਵੀਪਿ ਵਾਯੋਪਿ ਉਣ੍ਹਤ੍ਤਮੇਵ ਗਚ੍ਛਨ੍ਤੀਤਿ. ਤਸ੍ਮਾ ਤੇ ਸਹ ਨ ਪਵਤ੍ਤਨ੍ਤਿ. ਸਹ ਅਪ੍ਪਵਤ੍ਤੇਸੁਪਿ ਤੇਸੁ ਅਞ੍ਞਤ੍ਥ ਸੀਤਵਤ੍ਥੂਸੁ ਸੀਤਤਾ ਆਪੋਨਾਮਾਤਿ ਵਤ੍ਤਬ੍ਬਮੇਵ ਹੋਤੀਤਿ ਚੋਦਨਾ. ਏਵਂਸਨ੍ਤੇ ਤਸ੍ਮਿਂ ਲੋਹਰਸੇ ਸਬ੍ਬੇਪਿ ਰੂਪਧਮ੍ਮਾ ਉਣ੍ਹਤ੍ਤਂ ਗਚ੍ਛਨ੍ਤੀਤਿ ਸਬ੍ਬੇਪਿ ਤੇਜੋਭਾਵਂ ਪਾਪੁਣਨ੍ਤਿ. ‘ਉਣ੍ਹਤ੍ਤ ਲਕ੍ਖਣੋ ਤੇਜੋ’ਤਿਹਿ ਵੁਤ੍ਤਂ. ਯਦਿ ਚ ਸੀਤਵਤ੍ਥੂਸੁ ਸੀਤਭਾਵੋ ਨਾਮ ਸਿਯਾ. ਤਤ੍ਥਪਿ ਤੇਨ ਯੁਤ੍ਤਾ ਸਬ੍ਬੇਪਿ ਰੂਪਧਮ੍ਮਾ ਸੀਤਤਂ ਗਚ੍ਛਨ੍ਤਿਯੇਵ. ਤਤ੍ਥਪਿ ਤਵਮਤਿਯਾ ਸਬ੍ਬੇਪਿ ਆਪੋਭਾਵਂ ਪਾਪੁਣਨ੍ਤਿ. ਨ ਪਨ ਸਕ੍ਕਾ ਤਥਾ ਭਵਿਤੁਂ. ਨ ਹਿ ਏਵਰੂਪਂ ਲਕ੍ਖਣਞ੍ਞਥਤ੍ਤਂ ਨਾਮ ਤੇਸਂ ਅਤ੍ਥਿ. ਭਾਵਞ੍ਞਥਤ੍ਤਮੇਵ ਅਤ੍ਥਿ. ਤਤ੍ਥ ‘‘ਲਕ੍ਖਣਞ੍ਞਥਤ੍ਤਂ’’ ਨਾਮ ਪਥਵੀ ਆਪੋਭਾਵਂ ਗਚ੍ਛਤਿ. ਆਪੋ ਪਥਵਿਭਾਵਂ ਗਚ੍ਛਤੀਤਿਆਦਿ. ‘‘ਭਾਵਞ੍ਞਥਤ੍ਤਂ’’ ਨਾਮ ਪਥਵੀ ਕਦਾਚਿ ਕਕ੍ਖਲ਼ਾ ਹੋਤਿ. ਕਦਾਚਿ ਮੁਦੁਕਾ. ਆਪੋ ਕਦਾਚਿ ਆਬਨ੍ਧਨਮਤ੍ਤੋ ਹੋਤਿ. ਕਦਾਚਿ ਪਗ੍ਘਰਣਕੋ. ਤੇਜੋ ਕਦਾਚਿ ਉਣ੍ਹੋ, ਕਦਾਚਿ ਸੀਤੋ. ਵਾਯੋ ਕਦਾਚਿ ਵਿਤ੍ਥਮ੍ਭਨਮਤ੍ਤੋ, ਕਦਾਚਿ ਸਮੁਦੀਰਣੋਤਿ. ਏਵਂ ਏਕਮੇਕਸ੍ਸਾ ਧਾਤੁਯਾ ਤਿਕ੍ਖ ਮਨ੍ਦ ਓਮਤ੍ਤਾਧਿਮਤ੍ਤਵਸੇਨ ਕ੍ਰਿਯਾਸਙ੍ਕਨ੍ਤਿ ਨਾਮ ਅਤ੍ਥੀਤਿ. ਤਸ੍ਮਾ ਯਂ ਵੁਤ੍ਤਂ ‘ਉਣ੍ਹਤੇਜੇਨ ਯੁਤ੍ਤੋਹਿ ਆਪੋ ਉਣ੍ਹਤ੍ਤਮੇਵ ਗਚ੍ਛਤਿ, ਯਥਾ ਤਂ ਉਣ੍ਹਤੇਜੇਨ ਯੁਤ੍ਤਾ ਪਥਵੀਪਿ ਵਾਯੋਪਿ ਉਣ੍ਹਤ੍ਤਮੇਵ ਗਚ੍ਛਨ੍ਤੀ’ਤਿ. ਤਂ ਲਕ੍ਖਣਞ੍ਞਥਤ੍ਤਵਚਨਂ ਹੋਤਿ. ਨ ਯੁਜ੍ਜਤਿ. ਨ ਹਿ ਉਣ੍ਹਤੇਜੇਨ ਯੁਤ੍ਤਾ ਸਬ੍ਬੇਤੇਧਮ੍ਮਾ ਉਣ੍ਹਤ੍ਤਂ ਗਚ੍ਛਨ੍ਤਿ. ਅਤ੍ਤਨੋ ਅਤ੍ਤਨੋ ਸਭਾਵਂ ਨ ਵਿਜਹਨ੍ਤਿ. ਤਥਾਹਿ ਤਸ੍ਮਿਂ ਪਕ੍ਕੁਥਿਤੇ ਸਨ੍ਤਤ੍ਤੇ ਲੋਹਰਸੇ ਭਾਵੋ ਉਣ੍ਹਤ੍ਤਂ ਨ ਗਚ੍ਛਤਿ. ਆਬਨ੍ਧਨ ਸਭਾਵਂ ਵਾ ਪਗ੍ਘਰਣ ਸਭਾਵਂ ਵਾ ਨ ਵਿਜਹਤਿ. ਯਦਿ ਉਣ੍ਹਤ੍ਤਂ ਗਚ੍ਛੇਯ੍ਯ, ਤਂ ਸਭਾਵਂ ਵਿਜਹੇਯ੍ਯ. ਏਵਂਸਤਿ, ਤਸ੍ਮਿਂ ਲੋਹਰਸੇ ਆਬਨ੍ਧਨਾਕਾਰੋ ਵਾ ਪਗ੍ਘਰਣਾਕਾਰੋ ਵਾ ਨ ਪਞ੍ਞਾਯੇਯ੍ਯ. ਸਬ੍ਬੇਰੂਪ ਧਮ੍ਮਾ ਵਿਕ੍ਕਿਰੇਯ੍ਯੁਂ. ਵਿਕ੍ਕਿਰਿਤ੍ਵਾ ਅਨ੍ਤਰਧਾਰੇਯ੍ਯੁਂ. ਨ ਚ ਨ ਪਞ੍ਞਾਯਤਿ. ਨਾਪਿ ਵਿਕ੍ਕਿਰਨ੍ਤਿ. ਨੋਚ ਤਤ੍ਥ ਆਬਨ੍ਧਨਾਕਾਰੋ ਉਣ੍ਹਤ੍ਤਂ ਗਚ੍ਛਤਿ. ਅਞ੍ਞੋਹਿ ਆਬਨ੍ਧਨਾਕਾਰੋ, ਅਞ੍ਞਂ ਉਣ੍ਹਤ੍ਤਂ. ਆਬਨ੍ਧਨਾਕਾਰੋ ਆਪੋ, ਉਣ੍ਹਤ੍ਤਂ ਤੇਜੋ. ਤਤ੍ਥ ਪਥਵਿਵਾਯੇਸੁਪਿ ਏਸੇਵਨਯੋ. ਤਸ੍ਮਾ ਯਂ ਵੁਤ੍ਤਂ ‘‘ਯਦਿ ਤੇ ਸਹ ਪਵਤ੍ਤੇਯ੍ਯੁਂ. ਤਤ੍ਥ ਸੀਤਤਾ ਆਪੋਨਾਮ, ਉਣ੍ਹਤਾ ਤੇਜੋ ਨਾਮਾਤਿ ਵਤ੍ਤਬ੍ਬਾ ਸਿਯੁਂ. ਨ ਪਨ ਤੇ ਸਹ ਪਵਤ੍ਤਨ੍ਤਿ. ਤਸ੍ਮਾ ਤਥਾ ਨ ਵਤ੍ਤਬ੍ਬਾ ਹੋਨ੍ਤੀਤਿ ਦਸ੍ਸੇਤੀ’’ਤਿ. ਤਂ ਸੁਵੁਤ੍ਤਮੇਵਾਤਿ ਦਟ੍ਠਬ੍ਬਂ. ‘‘ਤੇਸਂ ਅਨਵਟ੍ਠਾਨਤੋ’’ਤਿ ਏਤੇਨ ਸਚੇ ਤੇ ਸੀਤੁਣ੍ਹਾ ਅਵਟ੍ਠਿਤਾ ਸਿਯੁਂ. ਅਥ ਸਬ੍ਬਕਾਲੇਪਿ ਸੀਤਤਾ ਆਪੋਨਾਮ, ਉਣ੍ਹਤਾ ਤੇਜੋਨਾਮਾਤਿ ਵਤ੍ਤਬ੍ਬਾ ਸਿਯੁਂ. ਨ ਪਨ ਤੇ ਅਵਟ੍ਠਿਤਾ ਹੋਨ੍ਤਿ. ਅਨਵਟ੍ਠਿਤਾ ਏਵ ਹੋਨ੍ਤਿ. ਤਸ੍ਮਾ ਤਥਾ ਨ ਵਤ੍ਤਬ੍ਬਾ ਹੋਨ੍ਤੀਤਿ ਦਸ੍ਸੇਤਿ. ਏਤ੍ਥ ਚ ਅਨਵਟ੍ਠਿਤੇਸੁ ਸਨ੍ਤੇਸੁ ਯਦਿ ਸੀਤਤਾ ਆਪੋ ਨਾਮ, ਉਣ੍ਹਤਾ ਤੇਜੋਨਾਮਾਤਿ ਵਦੇਯ੍ਯੁਂ. ਏਵਞ੍ਚਸਤਿ, ਆਪਤੇਜਾਪਿ ਅਨਵਟ੍ਠਿਤਾ ਸਿਯੁਂ. ਯੋ ਇਦਾਨਿ ਆਪੋ, ਸੋਯੇਵ ਖਣਨ੍ਤਰੇ ਤੇਜੋ ਨਾਮ. ਯੋ ਵਾ ਇਦਾਨਿ ਤੇਜੋ, ਸੋਯੇਵ ਖਣਨ੍ਤਰੇ ਆਪੋ ਨਾਮਾਤਿ ਆਪਜ੍ਜੇਯ੍ਯੁਂ. ਨ ਚ ਸਕ੍ਕਾ ਤਥਾ ਭਵਿਤੁਂ. ਲਕ੍ਖਣਞ੍ਞਥਤ੍ਤੇ ਅਸਨ੍ਤੇ ਵੋਹਾਰਞ੍ਞਥਤ੍ਤਸ੍ਸਪਿ ਅਸਮ੍ਭਵਤੋ. ਤੇਨ ਵੁਤ੍ਤਂ ‘‘ਓਰਪਾਰਾਨਂ ਵਿਯ ਤੇਸਂ ਅਨਵਟ੍ਠਾਨਤੋ ਚ ਵਿਞ੍ਞਾਯਤੀ’’ਤਿ. ਤਤ੍ਥ ‘‘ਵਿਞ੍ਞਾਯਤੀ’’ਤਿ ਸਾਸੀਤਤਾ ਤੇਜੋਯੇਵ, ਨ ਆਪੋਤਿ ਵਿਞ੍ਞਾਯਤੀਤਿ.

‘‘ਅਥ ਪਨਾ’’ਤਿਆਦੀਸੁ. ਯਂ ਪੁਬ੍ਬੇ ਪਰੇਨ ਵੁਤ੍ਤਂ ‘ਨਨੁ ਦ੍ਰਵਤਾ ਵਾ ਫੁਸਿਤ੍ਵਾ ਗਯ੍ਹਤੀ’ਤਿ. ਤਂ ਵਿਚਾਰੇਤੁਂ ‘‘ਅਥ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਅਥ ਪਨਾ’’ਤਿ ਯਦਿ ਪਨ ਗਯ੍ਹਤਿ, ਏਵਂਸਤੀਤਿ ਚ. ਏਵਞ੍ਚਸਤਿ ਆਰਮ੍ਮਣ ਭੂਤੋ ਏਵ ਸਿਯਾਤਿ ਸਮ੍ਬਨ੍ਧੋ. ਅਯਂ ਪਨੇਤ੍ਥਾ ਧਿਪ੍ਪਾਯੋ. ਸਚੇ ਦ੍ਰਵਭਾਵਭੂਤੋ ਆਪੋ ਫੁਸਿਤ੍ਵਾ ਗਯ੍ਹੇਯ੍ਯ. ਏਵਂ ਸਤਿ, ਅਯੋਪਿਣ੍ਡਾਦੀਸੁ ਆਬਨ੍ਧਨਮਤ੍ਤਭੂਤੋ ਆਪੋਪਿ ਫੁਸਿਤ੍ਵਾ ਗਹੇਤਬ੍ਬੋ ਸਿਯਾ. ਕਸ੍ਮਾ, ਆਪਭਾਵੇਨ ਏਕਤ੍ਤਾ. ਏਵਞ੍ਚਸਤਿ, ਤੇਸੁ ਅਯੋਪਿਣ੍ਡਾਦੀਸੁ ਸੋ ਆਪੋ ਤਾਨਿ ਹਤ੍ਥੇਨ ਵਾ ਪਾਦੇਨ ਵਾ ਫੁਸਨ੍ਤਸ੍ਸ ਪਹਰਨ੍ਤਸ੍ਸ ਵਿਨਾ ਇਤਰ ਮਹਾਭੂਤੇਹਿ ਵਿਸੁਂ ਕਾਯਿਕ ਸੁਖਦੁਕ੍ਖਾਨਂ ਆਰਮ੍ਮਣ ਪਚ੍ਚਯੋ ਸਿਯਾ. ਯਥਾਤਂ, ਤੇਸ੍ਵੇਵ ਅਯੋਪਿਣ੍ਡਾਦੀਸੁ ਪਥਵਿਮਹਾਭੂਤਂ ਵਿਨਾ ਇਤਰਮਹਾਭੂਤੇਹਿ ਵਿਸੁਂ ਕਾਯਿਕਸੁਖਦੁਕ੍ਖਾਨਂ ਆਰਮ੍ਮਣ ਪਚ੍ਚਯੋ ਹੋਤਿ. ਏਵਂ ਤੇਜੋਵਾਯੇਸੁਪੀਤਿ. ਨ ਪਨ ਸੋ ਵਿਸੁਂ ਕਾਯਿਕਸੁਖਦੁਕ੍ਖਾਨਂ ਆਰਮ੍ਮਣ ਪਚ੍ਚਯੋ ਹੋਤਿ. ਤਸ੍ਮਾ ਸੋ ਫੋਟ੍ਠਬ੍ਬ ਸਭਾਵੋ ਨ ਹੋਤਿ. ਯਥਾ ਚ ਸੋ ਫੋਟ੍ਠਬ੍ਬਸਭਾਵੋ ਨ ਹੋਤਿ. ਤਥਾ ਪਕਤਿ ਉਦਕਾਦੀਸੁ ਦ੍ਰਵਭਾਵਭੂਤੋਪਿ ਆਪੋ ਤਾਨਿ ਫੁਸਨ੍ਤਸ੍ਸ ਪਹਰਨ੍ਤਸ੍ਸ ਕਾਯਿਕਸੁਖਦੁਕ੍ਖਾਨਂ ਆਰਮ੍ਮਣ ਪਚ੍ਚਯੋ ਨ ਹੋਤਿ. ਨ ਚ ਫੋਟ੍ਠਬ੍ਬ ਸਭਾਵੋਤਿ. ਏਵਞ੍ਚਸਤਿ, ਕਥਂ ਅਯੋਪਿਣ੍ਡਾਦੀਸੁ ਆਬਨ੍ਧਨਮਤ੍ਤਭੂਤੋ ਆਪੋ ਕਾਯਿਕਸੁਖਦੁਕ੍ਖਾਨਂ ਪਚ੍ਚਯੋ ਨ ਹੋਤਿ. ਕਥਞ੍ਚ ਤੇਸੁ ਇਤਰਮਹਾਭੂਤਾਨਿ ਵਿਸੁਂ ਵਿਸੁਂ ਕਾਯਿਕਸੁਖਦੁਕ੍ਖਾਨਂ ਪਚ੍ਚਯਾ ਹੋਨ੍ਤੀਤਿ. ਤਂ ਦਸ੍ਸੇਤੁਂ ‘‘ਯਞ੍ਹੀ’’ਤਿਆਦਿਮਾਹ. ਤਤ੍ਥ ‘‘ਸਣ੍ਹਥਦ੍ਧਤਾਵਸੇਨਵਾ’’ਤਿ ਤੇਸੁ ਠਿਤਾਯ ਪਥਵਿਧਾਤੁਯਾ ਸਣ੍ਹਥਦ੍ਧਤਾਵਸੇਨ ਵਾ. ਸਣ੍ਹਪਥਵੀਸੁਖਵੇਦਨਾਯ ਥਦ੍ਧਪਥਵੀਦੁਕ੍ਖਵੇਦਨਾਯ ਆਰਮ੍ਮਣ ਪਚ੍ਚਯੋਤਿ ਵੁਤ੍ਤਂ ਹੋਤਿ. ਏਵਂ ਸੇਸੇਸੁ. ‘‘ਅਬ੍ਭਨ੍ਤਰਤ੍ਥਮ੍ਭਨਸ੍ਸਾ’’ਤਿ ਤੇਸਂ ਅਯੋਪਿਣ੍ਡਾਦੀਨਂ ਅਬ੍ਭਨ੍ਤਰੇ ਠਿਤਸ੍ਸ ਵਿਤ੍ਥਮ੍ਭਨ ਸਭਾਵਸ੍ਸ. ‘‘ਨੋ ਅਞ੍ਞਥਾ’’ਤਿ ਤਾਨਿਤੀਣਿ ਕਾਰਣਾਨਿ ਠਪੇਤ੍ਵਾ ਆਬਨ੍ਧਨ ਕ੍ਰਿਯਂ ਪਟਿਚ੍ਚ ਕਾਯਿਕਸੁਖਦੁਕ੍ਖੁਪ੍ਪਤ੍ਤਿ ਨਾਮ ਨਤ੍ਥੀਤਿ ਅਧਿਪ੍ਪਾਯੋ. ਇਦਾਨਿ ਪਕਤਿ ਉਦਕਾਦੀਸੁ ਦ੍ਰਵਭਾਵਭੂਤਂ ਆਪੋਧਾਤੁਮ੍ਪਿ ਫੁਸਿਤ੍ਵਾ ਜਾਨਨ੍ਤੀਤਿ ਮਹਾਜਨਾ ਮਞ੍ਞਨ੍ਤਿ. ਤਬ੍ਬਿਸੋਧਨੇਨ ਸਹ ਲਦ੍ਧਗੁਣਂ ਦਸ੍ਸੇਤੁਂ ‘‘ਤਸ੍ਮਾ’’ਤਿਆਦਿਮਾਹ. ਤਤ੍ਥ ‘‘ਪਥਮਂ ਦ੍ਰਵਤਾ ਸਹਿਤਾਨਿ. ਲ. ਜਾਨਨ੍ਤੀ’’ਤਿ ਇਦਂ ਪਧਾਨ ਵਚਨਂ. ਲੋਕੇ ਹਤ੍ਥੇਨ ਪਰਾਮਸਿਤ੍ਵਾ ਵਾ ਚਕ੍ਖੁਨਾ ਦਿਸ੍ਵਾ ਵਾ ਇਦਂ ਰਸ੍ਸਂ, ਇਦਂ ਦੀਘਂ, ਇਦਂ ਵਟ੍ਟਂ, ਇਦਂ ਮਣ੍ਡਲਨ੍ਤਿਆਦਿਨਾ ਸਣ੍ਠਾਨਂ ਜਾਨਨ੍ਤਾ ਹਤ੍ਥ ਫੁਸਨੇਨ ਵਾ ਚਕ੍ਖੁ ਦਸ੍ਸਨੇਨ ਵਾ ਸਹੇਵ ਤਂ ਜਾਨਨ੍ਤੀਤਿ ਮਞ੍ਞਨ੍ਤਿ. ਤਤ੍ਥ ਪਨ ਪੁਰਿਮਭਾਗੇ ਕਾਯਦ੍ਵਾਰਵੀਥਿ ਚਿਤ੍ਤੇਨ ਪਚ੍ਚੁਪ੍ਪਨ੍ਨਾਨਿ ਤੀਣਿਭੂਤਾਨਿ ਫੁਸਿਤ੍ਵਾ ਵਾ ਚਕ੍ਖੁਦ੍ਵਾਰ ਵੀਥਿਚਿਤ੍ਤੇਨ ਪਚ੍ਚੁਪ੍ਪਨ੍ਨਂ ਰੂਪਂ ਦਿਸ੍ਵਾ ਵਾ ਪਚ੍ਛਾ ਵਤ੍ਥੁਗ੍ਗਹਣਵੀਥਿਯਾ ਉਪ੍ਪਨ੍ਨਾਯ ਏਵ ਸਣ੍ਠਾਨਂ ਜਾਨਨ੍ਤਿ. ਏਸੇਵਨਯੋ ਰਤ੍ਤਿਯਂ ਅਲਾਤਚਕ੍ਕਸਣ੍ਠਾਨਂ ਜਾਨਨ੍ਤਸ੍ਸਪਿ. ਤਤ੍ਥ ਪਨ ਬਹੂਨਿਪਿ ਪੁਬ੍ਬਾਪਰਵੀਥਿਚਿਤ੍ਤਸਨ੍ਤਾਨਾਨਿ ਇਚ੍ਛਿਤਬ੍ਬਾਨਿ. ਤਥਾ ਲੋਕੇ ਚਕ੍ਖੁਨਾ ਦਿਸ੍ਵਾ ਦ੍ਵਾਰਵਾਤਪਾਨਾਦੀਨਂ ਛਿਦ੍ਦਵਿਵਰਾਨਿ ਜਾਨਨ੍ਤਾ ਚਕ੍ਖੁਨਾ ਦਸ੍ਸਨੇਨ ਸਹੇਵ ਤਾਨਿ ਜਾਨਨ੍ਤੀਤਿ ਮਞ੍ਞਨ੍ਤਿ. ਤਤ੍ਥ ਪਨ ਪੁਰਿਮਭਾਗੇ ਚਕ੍ਖੁਦ੍ਵਾਰਿਕਵੀਥਿ ਚਿਤ੍ਤੇਨ ਪਚ੍ਚੁਪ੍ਪਨ੍ਨਾਨਿ ਕਵਾਟਰੂਪਭਿਤ੍ਤਿ ਰੂਪਾਨਿ ਪੁਨਪ੍ਪੁਨਂ ਦਿਸ੍ਵਾ ਪਚ੍ਛਾ ਅਲਾਤਚਕ੍ਕਸ੍ਸ ਮਜ੍ਝੇ ਵਿਵਰਂਪਿ ਜਾਨਨ੍ਤਾ ਵਿਯ ਵਿਸੁਂ ਉਪ੍ਪਨ੍ਨਾਯ ਮਨੋਦ੍ਵਾਰਿਕ ਵਿਞ੍ਞਾਣਵੀਥਿਯਾ ਏਵ ਤਂ ਛਿਦ੍ਦਵਿਵਰਭੂਤਂ ਆਕਾਸਂ ਜਾਨਨ੍ਤਿ. ਤਥਾ ਹਤ੍ਥੇਨ ਉਦਕਂ ਫੁਸਨ੍ਤਸ੍ਸ ਪਥਮਂ ਦ੍ਰਵਸਹਿਤਾਨਿ ਵਿਲੀਨਾਨਿ ਮੁਦੂਨਿ ਤੀਣਿਫੋਟ੍ਠਬ੍ਬ ਮਹਾਭੂਤਾਨਿ ਵਿਸੁਂ ਵਿਸੁਂ ਕਾਯਦ੍ਵਾਰਿਕ ਵੀਥਿ ਚਿਤ੍ਤੇਹਿ ਫੁਸਨਕਿਚ੍ਚੇਨ ਆਰਮ੍ਮਣਂ ਕਰਿਤ੍ਵਾ ਪਚ੍ਛਾ ਵਿਸੁਂ ਸੁਦ੍ਧਾਯ ਮਨੋਦ੍ਵਾਰਿਕ ਵੀਥਿਯਾ ਏਵ ਦ੍ਰਵਭਾਵਸਙ੍ਖਾਤਂ ਪਗ੍ਘਰਣਕ ਆਪੋਧਾਤੁਂ ਜਾਨਨ੍ਤਿ. ਏਵਂ ਸਨ੍ਤੇਪਿ ਤਂ ਦ੍ਰਵਭਾਵਂਪਿ ਹਤ੍ਥੇਨ ਫੁਸਨੇਨ ਸਹੇਵ ਜਾਨਨ੍ਤੀਤਿ ਮਞ੍ਞਨ੍ਤੀਤਿ ਅਧਿਪ੍ਪਾਯੋ.

ਗਾਵੋ ਚਰਨ੍ਤਿ ਏਤ੍ਥਾਤਿ ਆਹ ‘‘ਗੁਨ੍ਨਂ ਚਰਣਟ੍ਠਾਨਂ’’ਤਿ. ਅਕ੍ਖਰ ਵਿਦੂ ਪਨ ਗੋਸਦ੍ਦਂ ਇਨ੍ਦ੍ਰਿਯਤ੍ਥੇਪਿ ਇਚ੍ਛਨ੍ਤੀਤਿ ਆਹ ‘‘ਗੋਤਿ ਵਾ’’ਤਿਆਦਿਂ. ਤਾਨਿ ਚਕ੍ਖਾਦੀਨਿ ਏਤੇਸੁ ਰੂਪਾਦੀਸੁ ਚਰਨ੍ਤਿ, ਏਤਾਨਿ ਵਾ ਰੂਪਾਦੀਨਿ ਤੇਸੁ ਚਕ੍ਖਾਦੀਸੁ ਚਰਨ੍ਤਿ. ਤਤ੍ਥ ਪੁਰਿਮੇਨ ਗਾਵੋ ਇਨ੍ਦ੍ਰਿਯਾਨਿ ਚਰਨ੍ਤਿ ਏਤੇਸੂਤਿ ਗੋਚਰਾਨੀਤਿ ਦਸ੍ਸੇਤਿ. ਪਚ੍ਛਿਮੇਨ ਗੋਸੁਇਨ੍ਦ੍ਰਿਯੇਸੁ ਚਰਨ੍ਤੀਤਿ ਗੋਚਰਾਨੀਤਿ. ਇਮਾਨਿ ਪਨ ਪਞ੍ਚ ਰੂਪਾਦੀਨਿ.

ਭਾਵਦ੍ਵਯੇ. ਇਚ੍ਛਨਟ੍ਠੇਨ ਠਾਨਟ੍ਠੇਨ ਠਪਨਟ੍ਠੇਨ ਚ ਇਤ੍ਥੀ. ਸਾਹਿਕਾਮਰਤਿ ਅਤ੍ਥਾਯ ਸਯਂਪਿ ਅਞ੍ਞਂਕਾਮਿਕਂ ਇਚ੍ਛਤਿ. ਸਯਞ੍ਚ ਕਾਮਿਕੇਨ ਇਚ੍ਛੀਯਤਿ. ਅਞ੍ਞੋ ਚ ਕਾਮਿਕੋ ਘਰਾਵਾਸ ਸੁਖਤ੍ਥਾਯ ਤਤ੍ਥ ਠਾਨਂ ਉਪੇਤਿ, ਪਤਿਟ੍ਠਾਤਿ. ਆਯਤਿਞ੍ਚ ਕੁਲਵਂਸਪ੍ਪਤਿਟ੍ਠਾਨਤ੍ਥਾਯ ਤਤ੍ਥ ਕੁਲਵਂਸ ਬੀਜਂ ਠਪੇਤੀਤਿ. ਪੂਰਣਟ੍ਠੇਨ ਇਚ੍ਛਨਟ੍ਠੇਨ ਚ ਪੁਰਿਸੋ. ਸੋਹਿ ਅਤ੍ਤਹਿਤਞ੍ਚ ਪੂਰੇਤਿ, ਪਰਹਿਤਞ੍ਚ ਇਚ੍ਛਤਿ. ਇਧਲੋਕਹਿਤਞ੍ਚ ਪੂਰੇਤਿ, ਪਰਲੋਕਹਿਤਞ੍ਚ ਇਚ੍ਛਤਿ. ਉਭਯਲੋਕਹਿਤਞ੍ਚ ਪੂਰੇਤਿ, ਲੋਕੁਤ੍ਤਰਹਿਤਞ੍ਚ ਇਚ੍ਛਤਿ, ਏਸਤਿ, ਗਵੇਸਤੀਤਿ. ਪੁਮਸ੍ਸਸਕਂ ਪੁਂਸਕਂ. ਪੁਰਿਸਲਿਙ੍ਗਾਦਿ. ਨਤ੍ਥਿ ਪੁਂਸਕਂ ਏਤਸ੍ਸਾਤਿ ਨਪੁਂਸਕਂ. ‘‘ਯਸ੍ਸ ਪਨ ਧਮ੍ਮਸ੍ਸਾ’’ਤਿ ਭਾਵਰੂਪਧਮ੍ਮਸ੍ਸ. ‘‘ਤਂ’’ਤਿ ਖਨ੍ਧਪਞ੍ਚਕਂ. ਮਹਾਸਣ੍ਠਾਨਂ ਸਤ੍ਤਾਨਂ ਜਾਤਿਭੇਦਂ ਲਿਙ੍ਗੇਤਿ ਞਾਪੇਤੀਤਿ ਲਿਙ੍ਗਂ. ਲਕ੍ਖਣਪਾਠਕਾ ਨਿਮਿਨਨ੍ਤਿ ਸਞ੍ਜਾਨਨ੍ਤਿ ਕਲ੍ਯਾਣ ਪਾਪਕਂ ਕਮ੍ਮਵਿਪਾਕਂ ਏਤੇਨਾਤਿ ਨਿਮਿਤ੍ਤਂ. ਕਿਰਿਯਾ ਕੁਤ੍ਤਂ. ਆਯੁਕਨ੍ਤਂ ਕਪ੍ਪੀਯਤਿ ਸਙ੍ਖਰੀਯਤੀਤਿ ਆਕਪ੍ਪੋ. ਸਬ੍ਬੇਪੇਤੇਲਿਙ੍ਗਾਦਯੋ. ਸੋਚ ਅਵਿਸਦਾਦਿਭਾਵੋ. ‘‘ਵਚਨੇਸੁਚਾ’’ਤਿ ਇਤ੍ਥਿਸਦ੍ਦਪੁਰਿਸਸਦ੍ਦਾਦੀਸੁ ਚ. ‘‘ਵਚਨਤ੍ਥੇਸੁ ਚਾ’’ਤਿ ਇਤ੍ਥਿ ਸਣ੍ਠਾਨ ਪੁਰਿਸਸਣ੍ਠਾਨਾਦਿ ਅਤ੍ਥੇਸੁ ਚ. ‘‘ਨਿਮਿਤ੍ਤਸਦ੍ਦੋ ਵਿਯਾ’’ਤਿ ਨਿਮਿਤ੍ਤ ਸਦ੍ਦੋ ਅਙ੍ਗਜਾਤੇ ਪਾਕਟੋ ਵਿਯਾਤਿ. ਨ ਪਾਕਟੋ ਦਿਟ੍ਠੋ. ਅਪਾਕਟੋ ਪਨ ਕਤ੍ਥਚਿ ਦਿਟ੍ਠੋਤਿ ਅਧਿਪ੍ਪਾਯੋ. ‘‘ਭਵਨ੍ਤਿ ਸਦ੍ਦਬੁਦ੍ਧਿਯੋ’’ਤਿ ਸਦ੍ਦਸਤ੍ਥਨਯੋ. ‘‘ਭਵਨ੍ਤਿ ਲਿਙ੍ਗਾਦੀਨੀ’’ਤਿ ਅਟ੍ਠਕਥਾਨਯੋ. ਤਤ੍ਥ ਹਿ ਇਤ੍ਥਿਲਿਙ੍ਗਾਦੀਨਂ ਹੇਤੁਭਾਵ ਲਕ੍ਖਣਨ੍ਤਿ ਵੁਤ੍ਤਂ. ‘‘ਏਤਸ੍ਮਿਂ ਸਤੀ’’ਤਿ ਚ ਜਾਤਿਯਾ ਸਤਿ, ਜਰਾਮਰਣਂ ਹੋਤਿ. ਅਸਤਿ ਨ ਹੋਤੀਤਿ ਏਤ੍ਥਵਿਯ ਹੇਤੁ ਫਲਭਾਵਪਾਕਟਤ੍ਥਂ ਵੁਤ੍ਤਂ.

ਵਤ੍ਥੁਰੂਪੇ. ਨਿਰੁਤ੍ਤਿਨਯੇਨ ਵਚਨਤ੍ਥਾ ਭਵਨ੍ਤਿ. ਧਾਤੁ ਦ੍ਵਯਂ ਨਾਮ ਮਨੋਧਾਤੁ ਮਨੋਵਿਞ੍ਞਾਣਧਾਤੁ ਦ੍ਵਯਂ. ‘‘ਅਵਤ੍ਵਾ’’ਤਿ ਹਦਯ ਵਤ੍ਥੁਂ ਅਵਤ੍ਵਾ. ‘‘ਤਂ’’ਤਿ ਹਦਯ ਵਤ੍ਥੁ ਰੂਪਂ. ‘‘ਪਞ੍ਚਾ’’ਤਿ ਪਞ੍ਚਵਤ੍ਥੂਨਿ. ‘‘ਤੇਸਂ’’ਤਿ ਤੇਸਂ ਕੁਸਲਾਦੀਨਂ. ‘‘ਤਤ੍ਥ ਵੁਤ੍ਤਂ’’ਤਿ ਪਟ੍ਠਾਨੇ ਵੁਤ੍ਤਂ. ‘‘ਯਂ ਰੂਪਂ ਨਿਸ੍ਸਾਯਾ’’ਤਿ ਯਂ ਰੂਪਂ ਨਿਸ੍ਸਾਯ ਮਨੋਧਾਤੁ ਚ ਮਨੋਵਿਞ੍ਞਾਣਧਾਤੁ ਚ ਵਤ੍ਤਨ੍ਤੀਤਿ ਇਮਂ ਪਾਠਂ ਨਿਦ੍ਦਿਸਤਿ. ‘‘ਅਨਞ੍ਞ ਸਾਧਾਰਣੇਸੁ ਠਾਨੇਸੂ’’ਤਿ ਚਕ੍ਖੁ ਵਤ੍ਥਾਦੀਹਿ ਅਞ੍ਞਵਤ੍ਥੂਹਿ ਅਸਾਧਾਰਣੇਸੁ ਕੁਸਲਾਕੁਸਲਟ੍ਠਾਨੇਸੁ.

ਜੀਵਿਤਰੂਪੇ. ‘‘ਆਧਿਪ੍ਪਚ੍ਚਯੋਗੇਨਾ’’ਤਿ ਅਧਿਪਤਿਭਾਵਯੋਗੇਨ. ‘‘ਅਧਿਪਤਿਭਾਵੋ’’ਤਿ ਚ ਇਨ੍ਦ੍ਰਿਯਪਚ੍ਚਯ ਕਿਚ੍ਚਂ ਵੁਚ੍ਚਤਿ. ਨ ਅਧਿਪਤਿ ਪਚ੍ਚਯਕਿਚ੍ਚਂ. ‘‘ਜੀਵਨ੍ਤੀ’’ਤਿ ਹਰਿਤਭਾਵਂ ਨ ਵਿਜਹਨ੍ਤੀਤਿ ਵੁਤ੍ਤਂ ਹੋਤਿ. ਨ ਹਿ ਤਾਨਿ ਏਕਨ੍ਤੇਨ ਜੀਵਨ੍ਤਾਨਿ ਨਾਮ ਹੋਨ੍ਤਿ. ਜੀਵਿਤ ਰੂਪਸ੍ਸ ਏਕਨ੍ਤ ਕਮ੍ਮਜਸ੍ਸ ਬਹਿਦ੍ਧਾ ਅਨੁਪਲਦ੍ਧਤ੍ਤਾ. ਕਮ੍ਮਜਰੂਪਾਨਿ ਜੀਵਨ੍ਤਿ ਯੇਵਾਤਿ ਸਮ੍ਬਨ੍ਧੋ. ‘‘ਕਮ੍ਮੇ ਅਸਨ੍ਤੇਪੀ’’ਤਿ ਕਮ੍ਮਚੇਤਨਾਯ ਪੁਬ੍ਬੇ ਨਿਰੁਦ੍ਧਤ੍ਤਾ ਵੁਤ੍ਤਂ. ਤਦਤ੍ਥਂ ਬ੍ਯਤਿਰੇਕਤੋ ਪਾਕਟਂ ਕਰੋਨ੍ਤੋ ‘‘ਤਥਾਹੀ’’ਤਿਆਦਿਮਾਹ. ‘‘ਇਤਰ ਰੂਪਾਨੀ’’ਤਿ ਚਿਤ੍ਤਜਰੂਪਾਦੀਨਿ. ਏਕਵੀਥਿਵਾਰੋ ਨਾਮ ਪਞ੍ਚਦ੍ਵਾਰਵੀਥਿਵਾਰੋ. ਮਨੋਦ੍ਵਾਰਵੀਥਿਵਾਰੋ ਏਕਜਵਨ ਵਾਰੋਤਿ ਵੁਤ੍ਤੋ. ਪਰਿਚ੍ਛਿਨ੍ਨਂ ਹੋਤਿ. ਕਸ੍ਮਾ, ਏਕੇਕਸ੍ਮਿਂ ਵੀਥਿਵਾਰੇ ਨਿਰੁਦ੍ਧੇ ਭਵਙ੍ਗ ਸਮਯੇ ਅਸਦਿਸਸ੍ਸ ਰੂਪਸਨ੍ਤਾਨਸ੍ਸ ਪਾਤੁਬ੍ਭਾਵਤੋਤਿ ਅਧਿਪ੍ਪਾਯੋ. ਤਞ੍ਚ ਖੋ ਰੂਪਵਿਸੇਸਂ ਜਾਨਨ੍ਤਸ੍ਸੇਵ ਪਾਕਟਂ ਹੋਤਿ. ਅਜਾਨਨ੍ਤਸ੍ਸ ਪਨ ਤਙ੍ਖਣਮਤ੍ਤੇ ਅਪਾਕਟਂ. ਕਸ੍ਮਾ, ਤਾਦਿਸਸ੍ਸਪਿ ਉਤੁਜਰੂਪਸਨ੍ਤਾਨਸ੍ਸ ਥੋਕਂ ਪਵਤ੍ਤਨਤੋ. ਯਸ੍ਸਹਿ ਦੋਸ ਸਮੁਟ੍ਠਿਤੇਨ ਰੂਪਸਨ੍ਤਾਨੇਨ ਮੁਖਰੂਪਂ ਦੁਬ੍ਬਣ੍ਣਂ ਹੋਤਿ. ਤਸ੍ਸ ਦੋਸੇ ਨਿਰੁਦ੍ਧੇਪਿ ਤਂ ਰੂਪਂ ਥੋਕਂ ਦੁਬ੍ਬਣ੍ਣਮੇਵ ਖਾਯਤੀਤਿ. ‘‘ਉਤੁਜਾਹਾਰਜਾਨਞ੍ਚ ਸਨ੍ਤਤਿ ਪਚ੍ਚੁਪ੍ਪਨ੍ਨਂ’’ਤਿ ਅਧਿਕਾਰੋ. ਏਕਂ ਅਦ੍ਧਾਪਚ੍ਚੁਪ੍ਪਨ੍ਨਮੇਵ ਹੋਤੀਤਿ ਵੁਤ੍ਤਂ. ਨ ਨੁ ਚਕ੍ਖੁਸੋਤਾਦੀਨਿ ਕਮ੍ਮਜਰੂਪਸਨ੍ਤਾਨਾਨਿਪਿ ਪਵਤ੍ਤਿਕਾਲੇ ਕਦਾਚਿ ਸੁਪ੍ਪਸਨ੍ਨਾਨਿ, ਕਦਾਚਿ ਪਸਨ੍ਨਾਨਿ, ਕਦਾਚਿ ਅਪ੍ਪਸਨ੍ਨਾਨਿ ਦਿਸ੍ਸਨ੍ਤੀਤਿ. ਸਚ੍ਚਂ, ਤਥਾ ਪਵਤ੍ਤਿ ਪਨ ਸਨ੍ਤਾਨ ਵਿਚ੍ਛੇਦੇਨ ਨ ਹੋਤਿ, ਨਾਨਾਵਿਚ੍ਛਿਨ੍ਨੇ ਚ ਏਕੇਕਸ੍ਮਿਂ ਸਨ੍ਤਾਨੇ ਤੇਸਂ ਪੁਨਘਟਨਂ ਨਾਮ ਨਤ੍ਥਿ. ਸਕਿਂ ਅਨ੍ਧੋ ਅਨ੍ਧੋਯੇਵ ਹੋਤਿ. ਬਧਿਰੋਚ ਬਧਿਰੋਯੇਵਾਤਿ ਅਧਿਪ੍ਪਾਯੋ. ‘‘ਯਦਿ ਏਵਂ’’ਤਿ ਏਵਂ ਯਦਿ ਸਿਯਾਤਿ ਅਤ੍ਥੋ. ‘‘ਅਰੂਪ ਧਮ੍ਮਾਨਂ ਸਨ੍ਤਤਿ ਪਚ੍ਚੁਪ੍ਪਨ੍ਨਂ’’ਤਿ ਅਧਿਕਾਰੋ. ‘‘ਵਿਪਾਕਾਨੀ’’ਤਿ ਭਵਙ੍ਗਭੂਤਾਨਿ ਵਿਪਾਕਾਨਿ. ਏਕਸਨ੍ਤਤਿਵਸੇਨ ਪਵਤ੍ਤਿਸ੍ਸਨ੍ਤਿਯੇਵ, ਤਸ੍ਮਾ ਤੇਸਂ ਨਾਨਾਸਨ੍ਤਤਿ ਪਚ੍ਚੁਪ੍ਪਨ੍ਨਂ ਨਾਮ ਨ ਵਤ੍ਤਬ੍ਬਂ. ਕਸ੍ਮਾ, ਯਾਵਜੀਵਮ੍ਪਿ ਏਕ ਕਮ੍ਮਨਿਬ੍ਬਤ੍ਤਤ੍ਤਾਤਿ ਅਧਿਪ੍ਪਾਯੋ. ‘‘ਇਤਰਾਨਿ ਪਨਾ’’ਤਿ ਕੁਸਲਾ ਕੁਸਲ ਕ੍ਰਿਯਚਿਤ੍ਤਾਨਿ ਪਨ. ‘‘ਤਦਾਰਮ੍ਮਣਾ’’ਤਿ ਨਿਰੁਦ੍ਧਾਰਮ੍ਮਣਾ. ਅਦ੍ਧਾਨਪ੍ਫਰਣਾਨੁਭਾਵੇਨ ਪਵਤ੍ਤਨ੍ਤਿਯੇਵ. ਨ ਪਨ ਚਿਤ੍ਤਜਰੂਪਾਦੀਨਿ ਵਿਯ ਅਤ੍ਤਨੋ ਜਨਕਪਚ੍ਚਯੇ ਨਿਰੁਦ੍ਧੇ ਨਿਰੁਜ੍ਝਨ੍ਤਿ. ਅਯਂ ਅਰੂਪਧਮ੍ਮਾਨਂ ਜੀਵਨ੍ਤਤ੍ਤੇ ਵਿਸੇਸੋਤਿ ਅਧਿਪ੍ਪਾਯੋ. ‘‘ਅਯਮਤ੍ਥੋ ਵਤ੍ਤਬ੍ਬੋ’’ਤਿ ਅਰੂਪ ਧਮ੍ਮਾਨਂ ਜੀਵਨ੍ਤਤਾਵਿਸੇਸੋ ਵਤ੍ਤਬ੍ਬੋ. ਯਥਾ ਰੂਪਸਨ੍ਤਤਿਯਂ ਅਨਨ੍ਤਰ ਪਚ੍ਚਯੋ ਨਾਮ ਨਤ੍ਥਿ. ਚੁਤਿਕਾਲੇ ਭਵਨ੍ਤਰਰੂਪਸਨ੍ਤਾਨਸ੍ਸ ਕਿਞ੍ਚਿ ਪਚ੍ਚਯਤ੍ਤਂ ਅਨੁਪਗਨ੍ਤ੍ਵਾ ਨਿਰੁਜ੍ਝਤਿ. ਤੇਨ ਭਵਨ੍ਤਰ ਪਾਤੁਬ੍ਭਾਵੋ ਨਾਮ ਤੇਸਂ ਨਤ੍ਥਿ. ਨ ਤਥਾ ਅਰੂਪਸਨ੍ਤਤਿਯਂ. ਤਤ੍ਥ ਪਨ ਚੁਤਿਚਿਤ੍ਤਮ੍ਪਿ ਪਟਿਸਨ੍ਧਿਯਾ ਅਨਨ੍ਤਰ ਪਚ੍ਚਯੋ ਹੁਤ੍ਵਾ ਨਿਰੁਜ੍ਝਤਿ. ਤੇਨ ਭਵਨ੍ਤਰਪਾਤੁਬ੍ਭਾਵੋ ਨਾਮ ਤੇਸਂ ਅਤ੍ਥਿ. ਅਯਮ੍ਪਿ ਅਰੂਪਧਮ੍ਮਾਨਂ ਜੀਵਨ੍ਤਤ੍ਤੇ ਵਿਸੇਸੋ. ਤਸ੍ਮਾ ਅਰੂਪਧਮ੍ਮਾਨਂਪਿ ਕਮ੍ਮਜਰੂਪਾਨਂ ਵਿਯ ਨਿਚ੍ਚਂ ਜੀਵਿਤਯੋਗੇਨ ਜੀਵਨ੍ਤਤ੍ਤਾ ਸਨ੍ਤਤਿ ਪਚ੍ਚੁਪ੍ਪਨ੍ਨਂ ਨਾਮ ਨ ਭਵੇਯ੍ਯਾਤਿ ਨ ਚੋਦੇਤਬ੍ਬਨ੍ਤਿ. ਕੁਸਲਾ ਕੁਸਲ ਕ੍ਰਿਯਚਿਤ੍ਤਾਨਿ ਨਾਮ ਅਕਮ੍ਮਜਾਨਿ ਹੋਨ੍ਤਿ. ਚਿਤ੍ਤਜਰੂਪਾਦੀਨਿ ਵਿਯ ਅਤੀਤਂ ਕਮ੍ਮਂ ਅਨਪੇਕ੍ਖਿਤ੍ਵਾ ਤਙ੍ਖਣਿਕੇਹਿ ਨਾਨਾਪਚ੍ਚਯੇਹਿ ਉਪ੍ਪਜ੍ਜਨ੍ਤਿ. ਤਸ੍ਮਾ ਤੇਸਂ ਜੀਵਨ੍ਤਾਨਂਪਿ ਸਤਂ ਅਜੀਵਨ੍ਤਾਨਂ ਚਿਤ੍ਤਜਰੂਪਾਦੀਨਂ ਵਿਯ ਨਾਨਾਸਨ੍ਤਤਿ ਪਚ੍ਚੁਪ੍ਪਨ੍ਨਂ ਨਾਮ ਅਤ੍ਥਿ. ਜੀਵਨ੍ਤਤਾ ਵਿਸੇਸੋਪਿ ਅਤ੍ਥੀਤਿ ਅਧਿਪ੍ਪਾਯੋ. ਏਤ੍ਥ ਕੇਚਿ ਵਦਨ੍ਤਿ. ਰੁਕ੍ਖਾਦੀਸੁਪਿ ਜੀਵਿਤਂ ਨਾਮ ਅਤ੍ਥਿ. ਯਤੋ ਤੇਸਂ ਹਰਿਤਤਾ ਚ ਅਹਰਿਤਤਾ ਚ ਰੂਹਨਞ੍ਚ-ਅਰੂਹਨਞ੍ਚ ਦਿਸ੍ਸਤੀਤਿ. ਵੁਚ੍ਚਤੇ, ਯਦਿ ਤੇਸਂ ਜੀਵਿਤਂ ਨਾਮ ਅਤ੍ਥਿ, ਅਰੂਪਜੀਵਿਤਂ ਵਾ ਸਿਯਾ, ਰੂਪਜੀਵਿਤਂ ਵਾ. ਤਤ੍ਥ ਸਚੇ ਅਰੂਪਜੀਵਿਤਂ ਹੋਤਿ. ਯਥਾ ਤੇਨ ਸਮਨ੍ਨਾਗਤੋ ਸਤ੍ਤੋ ਪੁਨਪ੍ਪੁਨਂ ਮਰਿਤ੍ਵਾ ਪੁਨਪ੍ਪੁਨਂ ਭਵਨ੍ਤਰੇ ਪਾਤੁਬ੍ਭਵਨ੍ਤਿ. ਤਥਾ ਰੁਕ੍ਖਾਪਿ ਮਰਿਤ੍ਵਾ ਭਵਨ੍ਤਰੇ ਪਾਤੁਬ੍ਭਵੇਯ੍ਯੁਂ. ਅਥ ਰੂਪਜੀਵਿਤਂ ਸਿਯਾ. ਯਥਾ ਸਤ੍ਤਾਨਂ ਚਕ੍ਖਾਦਿ ਅਙ੍ਗੇਸੁ ਜੀਵਿਤ ਸਨ੍ਤਾਨੇ ਭਿਨ੍ਨੇ ਤਾਨਿ ਅਙ੍ਗਾਨਿ ਪੁਨ ਜੀਵਨ੍ਤਾਨਿ ਕਾਤੁਂ ਨ ਸਕ੍ਕੋਨ੍ਤਿ. ਤਥਾ ਰੁਕ੍ਖਾਪਿ ਖਨ੍ਧੇਸੁ ਵਾ ਸਾਖਾਸੁਵਾ ਛਿਨ੍ਨੇਸੁ ਜੀਵਿਤਸਨ੍ਤਾਨੇ ਭਿਨ੍ਨੇ ਤੇਖਨ੍ਧਾਵਾ ਸਾਖਾਯੋ ਵਾ ਪੁਨ ਅਞ੍ਞਤ੍ਥ ਰੋਪੇਤੁਂ ਨ ਸਕ੍ਕਾ ਭਵੇਯ੍ਯੁਂ. ਸਕ੍ਕਾ ਏਵ ਭਵਨ੍ਤਿ. ਤਸ੍ਮਾ ਤਦੁਭਯਂਪਿ ਜੀਵਿਤਂ ਨਾਮ ਤੇਸਂ ਨਤ੍ਥੀਤਿ ਦਟ੍ਠਬ੍ਬਂ. ਵਿਭਾਵਨਿਪਾਠੇ. ਨ ਹਿ ਤੇਸਂ ਕਮ੍ਮਂਯੇਵ ਠਿਤਿਕਾਰਣਂ ਹੋਤੀਤਿ ਏਤ੍ਥ ਕਮ੍ਮਂ ਠਿਤਿਕਾਰਣਂ ਏਵ ਨ ਹੋਤੀਤਿ ਯੋਜੇਤਬ੍ਬਂ. ਤੇਨਾਹ ‘‘ਆਹਾਰਜਾਦੀਨਂ’’ਤਿਆਦਿਂ. ਏਕਕਲਾਪੇ ਗਤਾ ਪਵਤ੍ਤਾ ਸਹਜਾਤ ਪਚ੍ਚਯਾ, ਤੇਹਿ ਆਯਤ੍ਤਾ ਪਟਿਬਦ੍ਧਾਤਿ ਵਿਗ੍ਗਹੋ. ਕਮ੍ਮਾਦੀਨਂ ਰੂਪਜਨਕਪਚ੍ਚਯਾਨਂ ਜਨਕਾਨੁਭਾਵੋ ਨਾਮ ਰੂਪਕਲਾਪਾਨਂ ਉਪ੍ਪਾਦਕ੍ਖਣੇ ਏਵ ਫਰਤਿ, ਨ ਠਿਤਿਕ੍ਖਣੇ. ਉਪਚਯਸਨ੍ਤਤਿਯੋ ਚ ਉਪ੍ਪਾਦਕ੍ਖਣੇ ਲਬ੍ਭਨ੍ਤਿ, ਨ ਠਿਤਿਕ੍ਖਣੇ. ਤਸ੍ਮਾ ਤਾ ਜਨਕਪਚ੍ਚਯਾਨੁਭਾਵਕ੍ਖਣੇ ਲਦ੍ਧਤ੍ਤਾ ਕੁਤੋਚਿਜਾਤਨਾਮਂ ਲਭਨ੍ਤਿ. ਜਰਤਾਪਨ ਠਿਤਿਕ੍ਖਣੇ ਏਵ ਲਬ੍ਭਤਿ, ਨ ਉਪ੍ਪਾਦਕ੍ਖਣੇ. ਤਸ੍ਮਾ ਸਾ ਕੁਤੋਚਿਜਾਤ ਨਾਮਂ ਨ ਲਭਤਿ. ਯਦਿ ਪਨ ਆਹਾਰਜਾਦੀਨਂ ਰੂਪਧਮ੍ਮਾਨਂ ਠਿਤਿ ਨਾਮ ਆਹਾਰਾਦਿ ਜਨਕਪਚ੍ਚਯਾਯਤ੍ਤਾ ਭਵੇਯ੍ਯ. ਜਰਤਾਪਿ ਜਨਕਪਚ੍ਚਯਾਨੁਭਾਵਕ੍ਖਣੇਵ ਲਬ੍ਭਮਾਨਾ ਸਿਯਾ. ਏਵਞ੍ਚਸਤਿ, ਸਾਪਿ ਕੁਤੋਚਿਜਾਤ ਨਾਮਂ ਲਭੇਯ੍ਯ. ਨ ਪਨ ਲਭਤਿ. ਤਸ੍ਮਾ ਤੇਸਂ ਠਿਤਿ ਨਾਮ ਜਨਕਪਚ੍ਚਯਾਯਤ੍ਤਾ ਨ ਹੋਤੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਇਤਰਥਾ’’ਤਿਆਦਿਮਾਹ. ‘‘ਉਪਤ੍ਥਮ੍ਭਮਾਨਾ’’ਤਿ ਕਲਾਪਨ੍ਤਰੇ ਠਤ੍ਵਾ ਉਪਤ੍ਥਮ੍ਭਮਾਨਾ. ‘‘ਨ ਖਣਠਿਤਿਪ੍ਪਵਤ੍ਤਿਯਾ’’ਤਿ ਖਣਠਿ ਤਿਭਾਵੇਨ ਪਵਤ੍ਤਿਅਤ੍ਥਾਯ ਉਪਤ੍ਥਮ੍ਭਨ੍ਤਿ, ਅਨੁਪਾਲੇਤੀਤਿ ਯੋਜਨਾ. ਸਬ੍ਬੇਸਂਪਿ ਰੂਪਾਰੂਪਧਮ੍ਮਾਨਂ. ‘‘ਤਂ’’ਤਿ ਵਿਭਾਵਨਿਵਚਨਂ. ‘‘ਇਦਂ ਪਨਾ’’ਤਿ ਜੀਵਿਤਰੂਪਂ ਪਨ.

ਆਹਾਰਰੂਪੇ. ‘‘ਸਵਤ੍ਥੁਕਵਚਨਂ’’ਤਿ ਭੋਜਨਾਦਿ ਵਤ੍ਥੁਨਾ ਸਹ ਪਵਤ੍ਤਤੀਤਿ ਸਵਤ੍ਥੁਕਂ. ਵਚਨਂ. ਨ ਹਿ ਨਿਬ੍ਬਤ੍ਤਿਤਂ ਆਹਾਰ ਰੂਪਂ ਨਾਮ ਕਬਲ਼ਂ ਕਾਤੁਂ ਸਕ੍ਕਾ ਹੋਤੀਤਿ. ‘‘ਵਿਵੇਚਿਤਾਨੀ’’ਤਿ ਪਾਚਨ ਕਿਚ੍ਚੇਨ ਵਿਭਜਿਤਾਨਿ. ਵਿਸੁਂ ਵਿਸੁਂ ਕਤਾਨਿ. ‘‘ਪਞ੍ਚਧਾ ਵਿਭਾਗਂ ਗਚ੍ਛਨ੍ਤੀ’’ਤਿ ਏਕਂ ਭਾਗਂ ਪਾਣਕਾ ਖਾਦਨ੍ਤਿ. ਏਕਂ ਭਾਗਂ ਉਦਰਗ੍ਗਿ ਝਾਪੇਤਿ. ਏਕੋ ਭਾਗੋ ਮੁਤ੍ਤਂ ਹੋਤਿ. ਏਕੋਭਾਗੋ ਕਰੀਸਂ. ਏਕੋਭਾਗੋ ਰਸਭਾਵਂ ਆਪਜ੍ਜਿਤ੍ਵਾ ਸੋਣਿਤਮਂਸਾਦੀਨਿ ਉਪਬ੍ਰੂਹਯਤੀਤਿ ਏਵਂ ਵੁਤ੍ਤਨਯੇਨ ਪਞ੍ਚਧਾ ਵਿਭਾਗਂ ਗਚ੍ਛਨ੍ਤਿ. ‘‘ਲੋਕੇ’’ਤਿ ਲੋਕਿਯ ਗਨ੍ਥੇ. ‘‘ਤਤੋ’’ਤਿ ਆਮਾਸਯਤੋ. ਅਨੁਫਰਨ੍ਤੋ ਹੁਤ੍ਵਾ. ‘‘ਤਸ੍ਸਾ’’ਤਿ ਰਸਭਾਗਸ੍ਸ. ‘‘ਭੂਤੇਸੂ’’ਤਿ ਮਹਾਭੂਤੇਸੁ. ਸਹ ਇਨ੍ਦ੍ਰਿਯੇਨ ਵਤ੍ਤਤੀਤਿ ਸੇਨ੍ਦ੍ਰਿਯੋ. ਕਾਯੋ. ਉਦਯਤੀਤਿ ਓਜਾ. ਦਕਾਰਸ੍ਸ ਜਕਾਰੋ. ਅਵਤਿ ਜਨੇਤੀਤਿ ਓਜਾ. ਅਵਸਦ੍ਦਸ੍ਸ ਓਕਾਰੋ. ‘‘ਅਤ੍ਤਨੋਵਤ੍ਥੁਂ’’ਤਿ ਅਤ੍ਤਨੋਨਿਸ੍ਸਯਭੂਤਂ ਰੂਪਕਾਯਂ.

‘‘ਅਞ੍ਞਾਪਦੇਸੋ’’ ਨਾਮ ਰੂਪਸ੍ਸ ਲਹੁਤਾਤਿਆਦੀਸੁ ਅਞ੍ਞਸ੍ਸ ਰੂਪਸ੍ਸ ਕ੍ਰਿਯਾਮਤ੍ਤਭਾਵੇਨ ਅਪਦਿਸਨਂ ਵੁਚ੍ਚਤਿ. ‘‘ਉਜੁਕਤੋਵ ਨਿਪ੍ਫਾਦਿਤਂ’’ਤਿ ਮੁਖ੍ਯਤੋਵ ਜਨਿਤਂ. ਯਥਾਹਿ ਸਬ੍ਬਂ ਅਨਿਪ੍ਫਨ੍ਨਰੂਪਂ ਅਜਾਤਿ ਧਮ੍ਮਤ੍ਤਾ ਉਜੁਕਤੋ ਕਮ੍ਮਾਦੀਹਿ ਜਾਤਂ ਨਾਮ ਨ ਹੋਤਿ. ਕਮ੍ਮਾਦੀਹਿ ਜਾਤਂ ਪਨ ਨਿਪ੍ਫਨ੍ਨਰੂਪਂ ਨਿਸ੍ਸਾਯ ਦਿਸ੍ਸਮਾਨਤ੍ਤਾ ਠਾਨੂਪਚਾਰੇਨ ਵਿਞ੍ਞਤ੍ਤਿ ਦ੍ਵਯਂ ਚਿਤ੍ਤਜਂਤਿਆਦਿਨਾ ਵੁਚ੍ਚਤਿ. ਨ ਤਥਾ ਇਦਂ ਨਿਪ੍ਫਨ੍ਨਰੂਪਂ. ਇਦਂ ਪਨ ਜਾਤਿਧਮ੍ਮਤ੍ਤਾ ਉਜੁਕਤੋਵ ਕਮ੍ਮਾਦੀਹਿ ਪਚ੍ਚਯੇਹਿ ਨਿਪ੍ਫਾਦਿਤਂ ਜਨਿਤਨ੍ਤਿ ਵੁਤ੍ਤਂ ਹੋਤਿ. ‘‘ਰੂਪਂ’’ਤਿ ਵੁਤ੍ਤੇ ਅਨਿਪ੍ਫਨ੍ਨਰੂਪਂਪਿ ਲਬ੍ਭਤੀਤਿ ਤਤੋ ਵਿਸੇਸਨਤ੍ਥਂ ਰੂਪਰੂਪਨ੍ਤਿ ਵੁਚ੍ਚਤੀਤਿ ਆਹ ‘‘ਰੁਪ੍ਪਨਲਕ੍ਖਣ ਸਮ੍ਪਨ੍ਨਂ’’ਤਿਆਦਿਂ. ਤਤ੍ਥ ‘‘ਰੁਪ੍ਪਨਲਕ੍ਖਣਂ’’ ਨਾਮ ਸੀਤੁਣ੍ਹਾਦੀਹਿ ਵਿਕਾਰਪਤ੍ਤਿਲਕ੍ਖਣਂ. ਤਮ੍ਪਨ ਅਨਿਪ੍ਫਨ੍ਨ ਰੂਪੇ ਮੁਖ੍ਯਤੋ ਨ ਲਬ੍ਭਤਿ. ਨਿਪ੍ਫਨ੍ਨਰੂਪੇ ਏਵ ਲਬ੍ਭਤਿ. ਕਸ੍ਮਾ, ਨਿਪ੍ਫਨ੍ਨਰੂਪਸ੍ਸਹਿ ਨਾਨਾਵਿਕਾਰੋ ਵਿਕਾਰਰੂਪਨ੍ਤਿ ਵੁਚ੍ਚਤਿ. ਲਕ੍ਖਣਂ ਲਕ੍ਖਣ ਰੂਪਨ੍ਤਿ ਵੁਚ੍ਚਤਿ. ਵਿਕਾਰਸ੍ਸ ਪਨ ਵਿਕਾਰੋ ਨਾਮ ਨਤ੍ਥਿ. ਲਕ੍ਖਣਸ੍ਸ ਚ ਲਕ੍ਖਣਂ ਨਾਮ ਨਤ੍ਥਿ. ਯਦਿ ਅਤ੍ਥੀਤਿ ਵਦੇਯ੍ਯ. ਵਿਕਾਰਸ੍ਸ ਵਿਕਾਰੋ, ਤਸ੍ਸ ਚ ਵਿਕਾਰੋ, ਤਸ੍ਸ ਚ ਵਿਕਾਰੋਤਿ ਅਪਰਿਯਨ੍ਤਮੇਵ ਸਿਯਾ. ਤਥਾ ਲਕ੍ਖਣੇਪੀਤਿ.

ਆਕਾਸਧਾਤੁਯਂ. ‘‘ਪਕਾਸਨ੍ਤੀ’’ਤਿ ਇਦਂ ਏਕਂ ਇਦਂ ਏਕਨ੍ਤਿ ਪਞ੍ਞਾਯਨ੍ਤਿ. ‘‘ਪਰਿਚ੍ਛਿਨ੍ਦਤੀ’’ਤਿ ਆਹ ‘‘ਪਰਿਤੋ’’ਤਿਆਦਿਂ. ‘‘ਅਸਮ੍ਮਿਸ੍ਸਂ’’ਤਿ ਵਤ੍ਵਾ ਤਦਤ੍ਥਂ ਵਿਵਰਤਿ ‘‘ਏਕਤ੍ਤਂ ਅਨੁਪਗਮਨਂ’’ਤਿ. ਪਰਿਚ੍ਛਿਨ੍ਦੀਯਤੀਤਿ ਪਰਿਚ੍ਛੇਦੋਤਿ ਆਹ ‘‘ਤੇਹਿ ਵਾ’’ਤਿਆਦਿਂ. ‘‘ਤੇਹਿ ਵਾ’’ਤਿ ਕਲਾਪਨ੍ਤਰਭੂਤੇਹਿ ਵਾ. ‘‘ਅਤ੍ਤਨੋ ਵਾ ਪਰੇਸਂ ਵਾ ਅਕਤ੍ਵਾ’’ਤਿ ਅਤ੍ਤਨੋਪਕ੍ਖਿਕਂ ਵਾ ਪਰੇਸਂ ਪਕ੍ਖਿਕਂ ਵਾ ਅਕਤ੍ਵਾ. ਪਰਿਚ੍ਛੇਦ ਕ੍ਰਿਯਾਮਤ੍ਤਂ ਪਰਿਚ੍ਛੇਦੋਤਿ ਆਹ ‘‘ਤੇਸਂ ਵਾ’’ਤਿਆਦਿਂ. ‘‘ਤੇਸਂ ਵਾ’’ਤਿ ਕਲਾਪਨ੍ਤਰਭੂਤਾਨਂ ਵਾ. ‘‘ਅਯਂ ਪਨਾ’’ਤਿ ਅਯਂ ਪਰਿਚ੍ਛੇਦੋ ਪਨ. ‘‘ਤਸ੍ਸਾ’’ਤਿ ਪਰਿਚ੍ਛੇਦਸ੍ਸ. ਸੋ ਪਾਲ਼ਿਯਂ ਵੁਤ੍ਤੋਤਿ ਸਮ੍ਬਨ੍ਧੋ. ‘‘ਇਤਿ ਕਤ੍ਵਾ’’ਤਿ ਏਵਂ ਮਨਸਿਕਤ੍ਵਾ. ‘‘ਏਤੇਹੀ’’ਤਿ ਏਤੇਹਿ ਮਹਾਭੂਤੇਹਿ. ‘‘ਅਞ੍ਞਮਞ੍ਞ ਅਬ੍ਯਾਪਿਤਤਾ’’ਤਿ ਦ੍ਵਿਨ੍ਨਂ ਤਿਣ੍ਣਂ ਵਾ ਰੂਪਕਲਾਪਾਨਂ ਏਕਕਲਾਪਤ੍ਤੂਪਗਮਨਂ ਅਞ੍ਞਮਞ੍ਞ ਬ੍ਯਾਪਿਤਾ ਨਾਮ, ਤਥਾ ਅਨੁਪਗਮਨਂ ਅਞ੍ਞਮਞ੍ਞ ਅਬ੍ਯਾਪਿਤਤਾ ਨਾਮ. ਤੇਨਾਹ ‘‘ਏਕਤ੍ਤਂ’’ਤਿਆਦਿਂ. ‘‘ਤਤ੍ਥਾ’’ਤਿ ਤਿਸ੍ਸਂ ਪਾਲ਼ਿਯਂ. ‘‘ਨਾਨਾਕਲਾਪਗਤਾਨਂ ਭੂਤਾਨਂ’’ਤਿ ਏਤੇਨ ਕਲਾਪਪਰਿਯਨ੍ਤਤਾ ਏਵ ਵੁਤ੍ਤਾ ਹੋਤਿ.

ਵਿਞ੍ਞਤ੍ਤਿ ਦ੍ਵਯੇ. ‘‘ਸਯਞ੍ਚਾ’’ਤਿ ਵਿਞ੍ਞਤ੍ਤਿ ਸਙ੍ਖਾਤਂ ਸਯਞ੍ਚ. ‘‘ਤੇਨਾ’’ਤਿ ਚਲਮਾਨੇਨ ਕਾਯਙ੍ਗੇਨ. ‘‘ਤੇਹੀ’’ਤਿ ਪਚ੍ਚਕ੍ਖੇ ਠਿਤੇਹਿ ਜਨੇਹਿ. ਤਤ੍ਥਾਤਿਆਦੀਸੁ. ‘‘ਕਾਯਙ੍ਗਵਿਕਾਰਂ ਕਰੋਨ੍ਤਸ੍ਸਾ’’ਤਿ ਅਭਿਕ੍ਕਮਨਾਦਿ ਅਤ੍ਥਾਯ ਹਤ੍ਥਪਾਦਾਦੀਨਂ ਕਾਯਙ੍ਗਾਨਂ ਚਲਨ ਸਙ੍ਖਾਤਂ ਵਿਕਾਰਂ ਕਰੋਨ੍ਤਸ੍ਸ. ਉਪ੍ਪਜ੍ਜਨ੍ਤਾ ਚ ਸਬ੍ਬੇਤੇ ਚਿਤ੍ਤਜਵਾਤਕਲਾਪਾ ਯਥਾਧਿਪ੍ਪੇਤ ਦਿਸਾਭਿਮੁਖਾ ਏਵ ਉਪ੍ਪਜ੍ਜਨ੍ਤੀਤਿ ਯੋਜਨਾ. ‘‘ਯਥਾ ਵਾ ਤਥਾ ਵਾ ਅਨੁਪ੍ਪਜ੍ਜਿਤ੍ਵਾ’’ਤਿ ਅਨਿਯਮਤੋ ਅਨੁਪ੍ਪਜ੍ਜਿਤ੍ਵਾਤਿ ਵੁਤ੍ਤਂ ਹੋਤਿ. ਯਸ੍ਸ ਚੋਪਨ ਕਾਯਸ੍ਸ. ‘‘ਤੇਹੀ’’ਤਿ ਚਿਤ੍ਤਜਵਾਤਕਲਾਪੇਹਿ. ਨਿਯਾਮਕੋ ਨਾਵਾਨਿਯੋਜਕੋ. ‘‘ਤੇ ਚਾ’’ਤਿ ਤੇਚਿਤ੍ਤਜਵਾਤਕਲਾਪਸਙ੍ਘਾਟਾ. ਏਤੇਨ ਸਕਲਂ ਕਾਯਙ੍ਗਂ ਨਿਦਸ੍ਸੇਤਿ. ਸਕਲਕਾਯਙ੍ਗਂ ਨਾਵਾਸਦਿਸਨ੍ਤਿ ਵੁਤ੍ਤਂ ਹੋਤਿ. ‘‘ਚਾਰੇਤ੍ਵਾ’’ਤਿ ਵਿਯੂਹਿਤ੍ਵਾ. ਕਥਂ ਪਨ ਸਾ ਨਿਯਾਮਕਸਦਿਸੀ ਹੋਤੀਤਿ ਆਹ ‘‘ਯਥਾਹੀ’’ਤਿਆਦਿ. ਯਦੇਤਂ ਸਕ੍ਕੋਤੀਤਿ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਕਤੀਪਯਜਵਨ ਵਾਰੇਹੀ’’ਤਿ ਦ੍ਵਤ੍ਤਿ ਜਵਨਵਾਰੇਹਿ. ‘‘ਤਤੋ’’ਤਿ ਯਸ੍ਮਿਂ ਵਾਰੇ ਚਲਨ ਸਙ੍ਖਾਤਂ ਦੇਸਨ੍ਤਰ ਪਾਪਨਂ ਜਾਯਤਿ. ਤਤੋ ਚਲਨਵਾਰਤੋ. ਸਨ੍ਥਮ੍ਭਨ ਸਨ੍ਧਾਰਣਾਨਿ ਏਵ ਸਮ੍ਪਜ੍ਜਨ੍ਤਿ, ਨ ਚਲਨਸਙ੍ਖਾਤਂ ਦੇਸਨ੍ਤਰ ਪਾਪਨਂ. ‘‘ਏਤ੍ਥਾ’’ਤਿ ਏਤਿਸ੍ਸਂ ਅਟ੍ਠਕਥਾਯਂ. ਨਾਨਾਜਵਨਵੀਥੀਸੁ. ਲ. ਉਪਤ੍ਥਮ੍ਭਨੇ ਚ ਯੁਜ੍ਜਤਿਯੇਵ. ਨ ਏਕਿਸ੍ਸਾਯ ਜਵਨਵੀਥਿਯਂ ਏਵ ਯੁਜ੍ਜਤੀਤਿ ਅਧਿਪ੍ਪਾਯੋ. ਯਦਿ ਨਾਨਾਜਵਨਵੀਥੀਸੁ ਤਥਾ ਉਪਤ੍ਥਮ੍ਭਨਞ੍ਚ ਗਯ੍ਹੇਯ੍ਯ. ਏਵਂਸਤਿ, ਅਨ੍ਤਰਨ੍ਤਰਾ ਬਹੂ ਭਵਙ੍ਗਵਾਰਾਪਿ ਸਨ੍ਤਿ. ਤਤ੍ਥ ਕਥਂ ਤਦੁਪਤ੍ਥਮ੍ਭਨਂ ਸਮ੍ਪਜ੍ਜੇਯ੍ਯਾਤਿ ਆਹ ‘‘ਤਥਾਹੀ’’ਤਿਆਦਿਂ. ਤਤ੍ਥ ‘‘ਉਤੁਜਰੂਪਸਙ੍ਘਾਟਾਨਿ ਪੀ’’ਤਿ ਭਵਙ੍ਗਸਮਯੇ ਪਵਤ੍ਤਾਨਿ ਉਤੁਜਰੂਪਕਲਾਪਸਨ੍ਧਾਨਕਾਨਿ. ‘‘ਤਦਾਕਾਰ ਵਨ੍ਤਾਨੀ’’ਤਿ ਤਸ੍ਸਾ ਚਿਤ੍ਤਜਰੂਪਸਨ੍ਤਤਿਯਾ ਆਕਾਰ ਵਨ੍ਤਾਨਿ. ਪਚ੍ਛਿਮ ਪਚ੍ਛਿਮਾਨਂ ਰੂਪਕਲਾ ਪਸਙ੍ਘਾਟਾਨਂ ਅਪਰਾਪਰਂ ਉਪ੍ਪਜ੍ਜਨਨ੍ਤਿ ਸਮ੍ਬਨ੍ਧੋ. ਪੁਰਿਮਪੁਰਿਮਾਨਂ ਰੂਪਕਲਾਪਸਙ੍ਘਾਟਾਨਂ ਖਣਿਕਧਮ੍ਮਤਾ ਚ ਤੇਸਂ ਨ ਸਿਯਾ. ਨ ਚ ਤੇ ਖਣਿਕਧਮ੍ਮਾ ਨ ਹੋਨ੍ਤਿ. ਅਞ੍ਞਥਾ ਦੇਸਨ੍ਤਰ ਸਙ੍ਕਮਨਸਙ੍ਖਾਤਂ ਚਲਨਂ ਏਵ ਨ ਸਿਯਾ. ਚਲਨਂ ਤਿਹਿ ਨਾਨਾਕ੍ਰਿਯਾਨਂ ਪਾਤੁਬ੍ਭਾਵੋ ਵੁਚ੍ਚਤਿ. ਨਾਨਾਕ੍ਰਿਯਾ ਚ ਨਾਮ ਨਾਨਾਧਮ੍ਮਾ ਏਵ. ਯਸ੍ਮਾ ਚ ਅਙ੍ਗਪਚ੍ਚਙ੍ਗਾਨਂ ਖਣੇਖਣੇ ਚਲਨਂ ਨਾਮ ਲੋਕੇ ਪਚ੍ਚਕ੍ਖਤੋ ਦਿਟ੍ਠਂ. ਤਸ੍ਮਾ ਤੇਸਂ ਖਣਿਕਧਮ੍ਮਤਾਪਿ ਦਟ੍ਠਬ੍ਬਾ ਹੋਤੀਤਿ. ਏਤੇਨ ਤੇਸਂ ਖਣਿਕਮਰਣਂ ਦਸ੍ਸੇਤਿ, ਯਂ ਰੂਪਾਰੂਪਧਮ੍ਮਾਨਂ ਅਨਿਚ੍ਚਲਕ੍ਖਣਨ੍ਤਿ ਵੁਚ੍ਚਤਿ. ਅਬ੍ਯਾਪਾਰ ਧਮ੍ਮਤਾ ਚ ਅਵਸਵਤ੍ਤਿਤਾ ਚ ਤੇਸਂ ਨ ਸਿਯਾ. ਨ ਚ ਤੇ ਅਬ੍ਯਾਪਾਰ ਧਮ੍ਮਾ, ਨ ਅਵਸਵਤ੍ਤਿ ਧਮ੍ਮਾ ਚ ਨ ਹੋਨ੍ਤਿ. ਅਞ੍ਞਥਾ ਪਚ੍ਚਯਾਯਤ੍ਤ ਵੁਤ੍ਤਿਤਾ ਏਵ ਤੇਸਂ ਨ ਸਿਯਾ. ਪਚ੍ਚਯਾਯਤ੍ਤ ਵੁਤ੍ਤਿਤਾਤਿ ਚ ਪਚ੍ਚਯੇ ਸਤਿ, ਤੇ ਵਤ੍ਤਨ੍ਤਿ, ਅਸਤਿ ਨ ਵਤ੍ਤਨ੍ਤੀਤਿ ਏਵਂ ਪਵਤ੍ਤਾ ਪਚ੍ਚਯਾਯਤ੍ਤ ਵੁਤ੍ਤਿਤਾ ਯਸ੍ਮਾ ਚ ਪਚ੍ਚਯਸਾਮਗ੍ਗਿਯਂ ਸਤਿ, ਤੇ ਵਤ੍ਤਨ੍ਤਿਯੇਵ. ਤੇਸਂ ਵਤ੍ਤਨਤ੍ਥਾਯ ਕੇਨਚਿਬ੍ਯਾਪਾਰੇਨ ਕਿਚ੍ਚਂ ਨਤ੍ਥਿ. ਤੇ ਮਾਵਤ੍ਤਨ੍ਤੂਤਿ ਚ ਅਤ੍ਤਨੋ ਵਸੇਨ ਵਤ੍ਤਨ੍ਤਿ. ਪਚ੍ਚਯੇ ਅਸਤਿ, ਨ ਵਤ੍ਤਨ੍ਤਿਯੇਵ. ਤੇਸਂ ਅਵਤ੍ਤਨਤ੍ਥਾਯ ਕੇਨਚਿਬ੍ਯਾਪਾਰੇਨ ਕਿਚ੍ਚਂ ਨਤ੍ਥਿ. ਤੇਮਾਵਤ੍ਤਨ੍ਤੂਤਿ ਚ ਅਤ੍ਤਨੋ ਵਸੇਨਵਤ੍ਤਨ੍ਤਿ. ਯਸ੍ਮਾ ਚ ਤੇਸਂ ਪਚ੍ਚਯਾਯਤ੍ਤ ਵੁਤ੍ਤਿਤਾ ਨਾਮ ਲੋਕੇ ਵਿਞ੍ਞੂਨਂ ਪਚ੍ਚਕ੍ਖਤੋਦਿਟ੍ਠਾ. ਤਸ੍ਮਾ ਤੇਸਂ ਅਬ੍ਯਾਪਾਰਤਾ ਚ ਅਵਸਵਤ੍ਤਿਤਾ ਚ ਦਟ੍ਠਬ੍ਬਾ ਹੋਤਿ. ਏਤੇਨ ਤੇਸਂ ਸਬ੍ਬੇਹਿ ਸਤ੍ਤਪੁਗ੍ਗਲ ਅਤ੍ਤਾਕਾਰੇਹਿ ਸਬ੍ਬਸੋ ਸੁਞ੍ਞਂ ਦਸ੍ਸੇਤਿ, ਯਂ ਰੂਪਾਰੂਪਧਮ੍ਮਾਨਂ ਅਨਤ੍ਤਲਕ੍ਖਣਨ੍ਤਿ ਵੁਚ੍ਚਤੀਤਿ.

‘‘ਵਚੀਭੇਦਂ’’ਤਿ ਅਕ੍ਖਰ ਪਦਭਾਵਪਤ੍ਤਂ ਵਚੀਮਯਸਦ੍ਦਪ੍ਪਕਾਰਂ. ਉਪਾਦਿਨ੍ਨਕਪਥਵੀਧਾਤੁਯੋ ਨਾਮ ਕਮ੍ਮਜ ਪਥਵੀਧਾਤੁਯੋ. ਤਾਸੁ ਸਙ੍ਘਟ੍ਟਨਨ੍ਤਿ ਸਮ੍ਬਨ੍ਧੋ. ਅਤ੍ਤਨਾ ਸਹਜਾਤੇਨਯੇਨ ਆਕਾਰਵਿਕਾਰੇਨ ਉਪਗਚ੍ਛਤਿ, ਯੇਨ ਚ ਉਪਲਬ੍ਭਤੀਤਿ ਸਮ੍ਬਨ੍ਧੋ. ਅਜ੍ਝਤ੍ਤ ਸਨ੍ਤਾਨਗਤਾ ਸਬ੍ਬੇ ਚਤੁਜਰੂਪਧਮ੍ਮਾਪਿ ਕਤ੍ਥਚਿ ਉਪਾਦਿਨ੍ਨਕਾਤਿ ਵੁਚ੍ਚਨ੍ਤੀਤਿ ਆਹ ‘‘ਚਤੁਜਭੂਤਾਯ ਏਵ ਵਾ’’ਤਿ. ਦ੍ਵੀਸੁਠਾਨ ਕਰਣੇਸੁ ਕਰਣਪਕ੍ਖੇ ਚਲਨਾਕਾਰਪ੍ਪਵਤ੍ਤਾ ਚਿਤ੍ਤਜਪਥਵੀਧਾਤੁ ਠਾਨਪਕ੍ਖੇ ਪਥਵਿਧਾਤੁਯਂ ਸਙ੍ਘਟ੍ਟਯਮਾਨਾ ਕਮ੍ਮਜਪਥਵਿਯਂ ਏਵ ਘਟ੍ਟੇਤਿ. ਇਤਰ ਪਥਵਿਯਂ ਨ ਘਟ੍ਟੇਤੀਤਿ ਨ ਸਕ੍ਕਾ ਵਤ੍ਤੁਂਤਿ ਕਤ੍ਵਾ ਇਧ ਏਵਗ੍ਗਹਣਂ ਕਤਂ. ‘‘ਵਿਕਾਰ ਦ੍ਵਯਞ੍ਚਾ’’ਤਿ ਕਾਯਵਿਕਾਰ ਵਚੀਵਿਕਾਰ ਦ੍ਵਯਞ੍ਚ. ਕਥਂ ਪਨ ਅਸਮ੍ਮਿਸ੍ਸਂ ਕਤ੍ਵਾ ਵੇਦਿਤਬ੍ਬਨ੍ਤਿ ਆਹ ‘‘ਏਤ੍ਥਚਾ’’ਤਿਆਦਿਂ. ਯਂ ਪਨ ਤਾਸਂ ਘਟ੍ਟਨਪ੍ਪਕਾਰਵਿਧਾਨਂ ਅਤ੍ਥੀਤਿ ਸਮ੍ਬਨ੍ਧੋ. ‘‘ਤਾਸਂ’’ ਚਿਤ੍ਤਜਪਥਵੀਨਂ. ‘‘ਤਂ ਤਂ ਵਣ੍ਣਤ੍ਤਪਤ੍ਤਿਯਾ’’ਤਿ ਕ, ਖਾ, ਦਿਵਣ੍ਣਤ੍ਤਪਤ੍ਤਤ੍ਥਾਯ. ਯਂ ਪਨ ਕਾਯਵਿਞ੍ਞਤ੍ਤਿਟ੍ਠਾਨੇ ‘ਅਯਞ੍ਚ ਅਤ੍ਥੋ ਉਪਰਿ ਅਕ੍ਖਰੁਪ੍ਪਤ੍ਤਿ ਵਿਚਾਰਣਾਯਂ ਪਾਕਟੋ ਭਵਿਸ੍ਸਤੀ’ਤਿ ਵੁਤ੍ਤਂ. ਤਂ ਇਧ ਪਾਕਟਂ ਕਰੋਨ੍ਤੋ ‘‘ਏਤ੍ਥ ਚਾ’’ਤਿਆਦਿਮਾਹ. ਤੇਨੇਵ ਹਿ ਮੂਲਟੀਕਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਏਤ੍ਥ ਚਾ’’ਤਿ ਮੂਲਟੀਕਾਪਾਠੇ. ‘‘ਪੁਬ੍ਬਭਾਗੇ’’ਤਿ ਪਰਿਬ੍ਯਤ੍ਤ ਅਕ੍ਖਰਪ੍ਪਵਤ੍ਤਵੀਥਿਤੋ ਪੁਬ੍ਬਭਾਗੇ. ‘‘ਨਾਨਾਜਵਨਵੀਥੀਹੀ’’ਤਿ ਨਾਨਪ੍ਪਕਾਰੇਹਿ ਜਵਨਵੀਥਿਵਾਰੇਹਿ. ‘‘ਪਥਮਜਵਨਚਿਤ੍ਤਸ੍ਸਪੀ’’ਤਿ ਪਰਿਬ੍ਯਤ੍ਤ ਅਕ੍ਖਰਪ੍ਪਵਤ੍ਤਿਵੀਥਿਯਂ ਉਪ੍ਪਨ੍ਨਪਥਮਜਵਨ ਚਿਤ੍ਤਸ੍ਸਪਿ. ਤਸ੍ਸ ਆਸੇਵਨਞ੍ਚ ਨਾਮ ਤਤੋ ਪੁਰਿਮੇਹਿ ਵੀਥਿਵਾਰੇਹਿ ਏਵ ਲਦ੍ਧਂ ਸਿਯਾਤਿ ਅਧਿਪ੍ਪਾਯੋ. ‘‘ਆਸੇਵਨਂ’’ਤਿ ਚ ਉਪਚਾਰ ਵਚਨਂ ਦਟ੍ਠਬ੍ਬਨ੍ਤਿ ਹੇਟ੍ਠਾ ਵੁਤ੍ਤਮੇਵ. ‘‘ਤਸ੍ਸਾ’’ਤਿ ਪਰਿਬ੍ਯਤ੍ਤਕ੍ਖਰਸ੍ਸ. ਵੁਤ੍ਤਞ੍ਚ ਸਦ੍ਦਸਤ੍ਥੇਸੁ. ‘‘ਦੀਘਮੁਚ੍ਚਰੇ’’ਤਿ ਪਞ੍ਚਦੀਘਾ ਵੁਚ੍ਚਨ੍ਤਿ. ਮਿਥਿਨ੍ਦ ਪਞ੍ਹਾਪਾਠੇ. ‘‘ਸਾਧਿਕੇ ਵੀਹਿਵਾਹਸਤੇ’’ਤਿ ਵੀਹਿਧਞ੍ਞਪੂਰੋ ਸਕਟੋ ਵੀਹਿਵਾਹੋ ਨਾਮ. ਵੀਹਿਵਾਹਾਨਂ ਸਾਧਿਕੇ ਸਤਸ੍ਮਿਂ. ਅਭਿਮਞ੍ਞਨਂ ਅਭਿਮਾਨੋ. ‘‘ਸੇਸਮੇਤ੍ਥ ਕਾਯਵਿਞ੍ਞਤ੍ਤਿਯਂ ਵੁਤ੍ਤਨਯੇ ਨਾ’’ਤਿ ਤਥਾਹਿ ਚਲਨਚਿਤ੍ਤਜਰੂਪਸਨ੍ਤਤਿਯਂ ਪਵਤ੍ਤਾਨੀਤਿਆਦਿਨਾ ਵੁਤ੍ਤ ਨਯੇਨਾਤਿ ਅਤ੍ਥੋ. ਇਧ ਪਨ ਵਚੀਭੇਦਕਰ ਚਿਤ੍ਤਜਸਦ੍ਦਸਨ੍ਤਤਿਯਂ ਪਵਤ੍ਤਾਨਿ ਉਤੁਜਰੂਪਸਙ੍ਘਾਟਾਨੀਤਿਆਦਿਨਾ ਵਤ੍ਤਬ੍ਬਂ. ਤੇਨਾਹ ‘‘ਯਥਾਸਮ੍ਭਵਂ’’ਤਿ. ‘‘ਪਵਤ੍ਤਨਤ੍ਥੋ’’ਤਿ ਅਭਿਕ੍ਕਮਨਾਦਿ ਸਜ੍ਝਾਯਨਾਦੀਨਂ ਪਵਤ੍ਤਾਪਨਤ੍ਥੋ. ‘‘ਏਤ੍ਥ ਚਾ’’ਤਿਆਦੀਸੁ. ‘‘ਬੋਧੇਤੁ ਕਾਮਤਾ ਰਹਿਤੇਸੂ’’ਤਿ ਅਭਿਕ੍ਕਮਨਪਟਿਕ੍ਕਮਨਾਦੀਸੁ ਕਾਯਵਿਞ੍ਞਤ੍ਤਿ ਚ, ਸੁਤ੍ਤਨ੍ਤ ਸਜ੍ਝਾਯਨਾਦੀਸੁ ਵਚੀਵਿਞ੍ਞਤ੍ਤਿ ਚ ਪਰਂ ਬੋਧੇਤੁਕਾਮਤਾ ਰਹਿਤਾਤਿ ਦਟ੍ਠਬ੍ਬਾ. ‘‘ਦ੍ਵੀਸੁ ਬੋਧਕਵਿਞ੍ਞਤ੍ਤੀਸੂ’’ਤਿ ਬੋਧਕਕਾਯਵਿਞ੍ਞਤ੍ਤਿ ਬੋਧਕਵਚੀ ਵਿਞ੍ਞਤ੍ਤੀਸੁ. ਪੁਰਿਮਾ ਕਾਯਵਿਞ੍ਞਤ੍ਤਿ, ਪਚ੍ਛਿਮਾ ਚ ਵਚੀਵਿਞ੍ਞਤ੍ਤਿ. ਪਚ੍ਛਾ ਸੁਦ੍ਧੇਨ ਮਨੋਦ੍ਵਾਰਿਕ ਜਵਨੇਨ ਏਵ ਵਿਞ੍ਞਾਯਤਿ, ਨ ਪਞ੍ਚਦ੍ਵਾਰਿਕ ਜਵਨੇਨਾਤਿ ਯੋਜਨਾ. ਚਕ੍ਖੁਵਿਞ੍ਞਾਣ ਵੀਥਿਯਾ ਗਹੇਤ੍ਵਾਤਿ ਸਮ੍ਬਨ੍ਧੋ. ‘‘ਕਾਯਵਿਞ੍ਞਾਣ ਵੀਥਿਯਾ’’ਤਿ ਵਚੀਭੇਦਂ ਅਕਤ੍ਵਾ ਹਤ੍ਥਗ੍ਗਹਣਾਦਿ ਵਸੇਨ ਅਧਿਪ੍ਪਾਯ ਵਿਞ੍ਞਾਪਨੇ ਅਯਂ ਕਾਯਵਿਞ੍ਞਾਣਵੀਥਿ ਦਟ੍ਠਬ੍ਬਾ. ਕਸ੍ਮਾ ਪਨ ਸਯਞ੍ਚਵਿਞ੍ਞਾਯਤੀਤਿ ਵਿਞ੍ਞਤ੍ਤੀਤਿ ਅਯਂ ਵਿਕਪ੍ਪੋ ਵੁਤ੍ਤੋਤਿ ਆਹ ‘‘ਸਾਹਿ ਅਤ੍ਤਾਨਂ’’ਤਿਆਦਿਂ. ‘‘ਮਜ੍ਝੇ’’ਤਿ ਵਿਞ੍ਞਤ੍ਤਿਗ੍ਗਹਣਵੀਥਿ ਅਧਿਪ੍ਪਾਯਗ੍ਗਹਣਵੀਥਿਨਂ ਮਜ੍ਝੇ. ਕਥਂ ਪਵਤ੍ਤਕਵਿਞ੍ਞਤ੍ਤੀਸੁ ਅਧਿਪ੍ਪਾਯਂ ਵਿਞ੍ਞਾਪੇਤਿ, ਸਯਞ੍ਚਵਿਞ੍ਞਾਯਤੀਤਿ ਦ੍ਵੇ ਅਤ੍ਥਾ ਲਬ੍ਭਨ੍ਤੀਤਿ ਆਹ ‘‘ਦ੍ਵੀਸੁ ਪਨਾ’’ਤਿਆਦਿਂ. ਅਯਂ ਅਭਿਕ੍ਕਮਤਿ, ਅਯਂ ਪਟਿਕ੍ਕਮਤੀਤਿ ਜਾਨਨ੍ਤਾ ਅਭਿਕ੍ਕਮਨਪਯੋਗਞ੍ਚ ਤਪ੍ਪਯੋਗ ਜਨਕਚਿਤ੍ਤਞ੍ਚ ਜਾਨਨ੍ਤਿ. ‘‘ਪਰਸ੍ਸਕਥਂ’’ਤਿ ਬੋਧੇਤੁਕਾਮਤਾਰਹਿਤਮ੍ਪਿ ਪਰਸ੍ਸਵਚਨਸਦ੍ਦਂ. ਰਾਗਚਿਤ੍ਤਞ੍ਚ ਜਾਨਨ੍ਤਿ. ਤੇਨ ਵੁਤ੍ਤਂ ਮੂਲਟੀਕਾਯਂ ਪਰਂ ਬੋਧੇਤੁਕਾਮਤਾਯ ਵਿਨਾਪਿ ਅਭਿਕ੍ਕਮਨਾਦਿਪ੍ਪਵਤ੍ਤਨੇਨ ਸੋਚਿਤ੍ਤਸਹਭੁਵਿਕਾਰੋ ਅਧਿਪ੍ਪਾਯਂ. ਲ. ਦ੍ਵਿਧਾਪਿ ਵਿਞ੍ਞਤ੍ਤਿ ਯੇਵਾਤਿ.

ਵਿਕਾਰਰੂਪੇਸੁ. ‘‘ਕਮ੍ਮਯੋਗ੍ਯਂ’’ਤਿ ਅਭਿਕ੍ਕਮਨਾਦਿਕਮ੍ਮੇਸੁ ਯੋਜੇਤੁਂ ਯੁਤ੍ਤਂ. ਅਦਨ੍ਧਤਾ ਵੁਚ੍ਚਤਿ ਸੀਘਪ੍ਪਵਤ੍ਤਿ. ਸਾ ਲਕ੍ਖਣਂ ਅਸ੍ਸਾਤਿ ਵਿਗ੍ਗਹੋ. ਸਰੀਰ ਕ੍ਰਿਯਾਨੁਕੁਲੋ ਕਮ੍ਮਞ੍ਞਭਾਵੋ ਲਕ੍ਖਣਂ ਯਸ੍ਸਾਤਿ ਸਮਾਸੋ. ‘‘ਧਾਤੁਯੋ’’ਤਿ ਮਹਾਭੂਤਧਾਤੁਯੋ ਵਾ, ਪਿਤ੍ਤਸੇਮ੍ਹਾਦਿਧਾਤੁਯੋ ਵਾ. ਪੂਤਿਮੁਖਸਪ੍ਪਸਙ੍ਖਾਤਸ੍ਸ ਆਪਸ੍ਸ ਪਰਿਯੁਟ੍ਠਾਨਨ੍ਤਿ ਵਾਕ੍ਯਂ. ਅਸਯ੍ਹਭਾਰੋ ਨਾਮ ਵਹਿਤੁਂ ਅਸਕ੍ਕੁਣੇਯ੍ਯਭਾਰੋ. ‘‘ਸਾ ਪਵਤ੍ਤਤੀ’’ਤਿ ਕਾਯਲਹੁਤਾ ਪਵਤ੍ਤਤਿ. ਥਦ੍ਧਂ ਕਰੋਨ੍ਤਿ ਸਰੀਰਗਤਾ ਧਾਤੁਯੋਤਿ ਅਧਿਕਾਰੋ. ਭੁਸਂ ਮਾਰੇਤੀਤਿ ਆਮਰਿਕੋ. ਦਕਾਰੋ ਆਗਮੋ. ਗਾਮਨਿਗਮਵਿਲੁਪ੍ਪਕੋ ਚੋਰਗਣੋ. ਤਸ੍ਸ ਭਯੇਨ ਪਰਿਯੁਟ੍ਠਿਤਂ. ‘‘ਵਿਵਟ੍ਟਮਾਨਂ’’ਤਿ ਵਿਰੂਪਂ ਹੁਤ੍ਵਾ ਵਟ੍ਟਨ੍ਤਂ. ‘‘ਮੂਲਭੂਤਾ ਹੋਤੀ’’ਤਿ ਅਸਪ੍ਪਾਯ ਸੇਵਨੇ ਸਤਿ, ਸਾ ਪਥਮਂ ਪਰਿਯੁਟ੍ਠਾਤਿ. ਸੀਤਾਧਿਕਾਵਾ ਹੋਤਿ, ਉਣ੍ਹਾਧਿਕਾਵਾ. ਤਾਯ ਪਰਿਯੁਟ੍ਠਿਤਾਯ ਏਵ ਸਬ੍ਬਪਰਿਯੁਟ੍ਠਾਨਾਨਿ ਪਵਤ੍ਤਨ੍ਤੀਤਿ ਵੁਤ੍ਤਂ ਹੋਤਿ. ‘‘ਇਮਾਪਨਤਿਸ੍ਸੋ ਰੂਪਜਾਤਿਯੋ ਰੂਪਕਾਯਸ੍ਸ ਵਿਸੇਸਾਕਾਰਾ ਹੋਨ੍ਤਿ. ਇਤਿ ਤਸ੍ਮਾ ਵਿਕਾਰਰੂਪਂ ਨਾਮਾਤਿ ਯੋਜਨਾ.

ਲਕ੍ਖਣਰੂਪੇਸੁ. ‘‘ਚਯਨਂ’’ਤਿ ਸਞ੍ਚਿਤਭਾਵਗਮਨਂ. ‘‘ਆਦਿਤੋ’’ਤਿਆਦਿਮ੍ਹਿ. ‘‘ਉਪਰਿਤੋ’’ਤਿ ਉਪਰਿਭਾਗੇ. ‘‘ਆਚਯੋ’’ਤਿਆਦਿਮ੍ਹਿ ਚਯੋ. ‘‘ਉਪਚਯੋ’’ਤਿ ਉਪਰੂਪਰਿਚਯੋ. ‘‘ਅਦ੍ਧਾਨਪੂਰਣਵਸੇਨਾ’’ਤਿ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਮ੍ਪਿ ਦੀਘਕਾਲਂ ਅਤ੍ਤਭਾਵਂ ਪੂਰਣਵਸੇਨ. ‘‘ਤੇਨ ਪਰਿਯਾਯੇਨਾ’’ਤਿ ਉਪਸਦ੍ਦਸ੍ਸ ਅਤ੍ਥਨਾਨਤ੍ਤਂ ਅਚਿਨ੍ਤੇਤ੍ਵਾ ਨਿਬ੍ਬਤ੍ਤਿਂ ਵਡ੍ਢਿਯਂ ਅਨ੍ਤੋਗਧਂ ਕਤ੍ਵਾ ਵੁਤ੍ਤੇਨ ਤੇਨਪਰਿਯਾਯੇਨ. ਤਸ੍ਸ ਚ ਏਕੇਕਸ੍ਸ ਸਨ੍ਤਤਿ ਪਚ੍ਚੁਪ੍ਪਨ੍ਨਸ੍ਸ. ਤਤ੍ਥ ਚਿਤ੍ਤਜਰੂਪੇਸੁ ਅਸ੍ਸਾਸ ਪਸ੍ਸਾਸਾਨਂ ਵਾ ਪਦਵਾਰਹਤ੍ਥਵਾਰਾਦੀਨਂ ਵਾ ਅਕ੍ਖਰਾਨਂ ਵਾ ਨਿਬ੍ਬਤ੍ਤਿ ਵਡ੍ਢਿ ਪਵਤ੍ਤਿਯੋ ਦਿਸ੍ਸਨ੍ਤਿਯੇਵ. ਤਥਾ ਨਾਨਾਚਿਤ੍ਤਸਮੁਟ੍ਠਿਤਾਨਂ ਨਾਨਾਰੂਪਸਨ੍ਤਤੀਨਂ ਪੀਤਿ. ਉਤੁਜਰੂਪੇਸੁ ਇਰਿਯਾ ਪਥਨਾਨਤ੍ਤਂ ਪਟਿਚ੍ਚ ਸੁਖਦੁਕ੍ਖਜਨਕਾਨਂ ਨਾਨਾਰੂਪਸਨ੍ਤਤੀਨਂ ਨਿਬ੍ਬਤ੍ਤਿਵਡ੍ਢਿਪਵਤ੍ਤਿਯੋ ਦਿਸ੍ਸਨ੍ਤਿਯੇਵ. ਤਥਾ ਬਹਿਦ੍ਧਾ ਖਾਣੁਕਣ੍ਟਕਾਦਿਸਮ੍ਫਸ੍ਸੇਨ ਸੀਤੁਣ੍ਹਾਦਿਸਮ੍ਫਸ੍ਸੇਨ ਵਾਤਾਤਪਾਦਿਸਮ੍ਫਸ੍ਸੇਨ ਵਾ ਸਰੀਰੇ ਉਪ੍ਪਨ੍ਨਾਨਂ ਨਾਨਾਰੂਪਸਨ੍ਤਤੀਨਮ੍ਪਿ ਚਕ੍ਖੁਰੋਗਾਦਿਰੂਪਾਨਮ੍ਪੀਤਿ. ਆਹਾਰਜਰੂਪੇਸੁ ਆਹਾਰਨਾਨਤ੍ਤਂ ਪਟਿਚ੍ਚ ਸਰੀਰੇ ਉਪ੍ਪਨ੍ਨਾਨਂ ਸਮਵਿਸਮਰੂਪਸਨ੍ਤਤੀਨਂਤਿ. ‘‘ਅਯਂ ਨਯੋ’’ਤਿ ਬਹਿਦ੍ਧਾਸਨ੍ਤਾਨੇ ਨਿਦਸ੍ਸਨ ਨਯੋ. ਤੇਨ ਅਜ੍ਝਤ੍ਤਸਨ੍ਤਾਨੇਪਿ ਸਤ੍ਤਸਨ੍ਤਾਨਾਨਂ ਹਤ੍ਥਪਾਦਾਦਿਸਨ੍ਤਾਨਾਨਂ ਕੇਸਲੋਮਾਦਿ ਸਨ੍ਤਾਨਾਨਞ੍ਚ ਨਿਬ੍ਬਤ੍ਤਿ ਵਡ੍ਢਿਪਵਤ੍ਤਿਯੋ ਨਿਦਸ੍ਸੇਤਿ. ‘‘ਜੀਰਣਂ’’ਤਿ ਅਭਿਨਵਾਵਤ੍ਥਤੋ ਹਾਯਨਂ. ਪਾਲ਼ਿਪਾਠੇ. ‘‘ਠਿਤਸ੍ਸ ਅਞ੍ਞਥਤ੍ਤਂ’’ਤਿ ਅਞ੍ਞੋ ਪਕਾਰੋ ਅਞ੍ਞਥਾ. ਅਞ੍ਞਥਾ ਭਾਵੋ ਅਞ੍ਞਥਤ੍ਤਂ. ਏਤੇਨ ਜਰਾਵਸੇਨਵਾ ਨਾਨਾਰੋਗਾਬਾਧਾਦਿਵਸੇਨ ਵਾ ਵਿਪਰਿਣਾਮੋ ਵੁਤ੍ਤੋ. ‘‘ਤਥਾ ਅਵਤ੍ਥਾਭੇਦਯੋਗਤੋ’’ਤਿ ਜਾਤਿਰੂਪਮੇਵ ਆਦਿਮ੍ਹਿ ਨਿਬ੍ਬਤ੍ਤਿ ਹੋਤਿ. ਤਤੋਪਰਂ ਤਮੇਵ ਵਡ੍ਢਿ ਹੋਤਿ. ਤਤੋ ਪਰਂ ਤਮੇਵ ਪਵਤ੍ਤਿ ਹੋਤੀਤਿ ਏਵਂ ਤਥਾ ਅਵਤ੍ਥਾਭੇਦਯੋਗਤੋ. ਤੇਨਾਹ ‘‘ਸਾਹੀ’’ਤਿਆਦਿਂ. ‘‘ਪਬਨ੍ਧਯਤੀ’’ਤਿ ਪਬਨ੍ਧਂ ਕਰੋਤਿ. ਸਙ੍ਗਹਗਾਥਾਦੀਸੁ ਪਨ ਸੁਵਿਞ੍ਞੇਯ੍ਯਾ. ‘‘ਏਤ੍ਥ ਚ ਪਚ੍ਛਿਮਾਨੀ’’ਤਿਆਦੀਸੁ. ਵੋਹਾਰਸਿਦ੍ਧਮਤ੍ਤਭਾਵਂ’’ਤਿ ਪੁਗ੍ਗਲੋ ਸਤ੍ਤੋ ਅਤ੍ਤਾ ਜੀਵੋਤਿਆਦਿਕਾ ਪਞ੍ਞਤ੍ਤਿ ਨਾਮ ਵੋਹਾਰ ਸਿਦ੍ਧਮਤ੍ਤਾ ਹੋਤਿ. ਸਭਾਵਸਿਦ੍ਧਾ ਨ ਹੋਤਿ. ਸਾਹਿ ਮਹਾਜਨੇਹਿ ਖਨ੍ਧ ਪਞ੍ਚਕਂ ਉਪਾਦਾਯ ਪੁਗ੍ਗਲੋ ਨਾਮ ਅਤ੍ਥੀਤਿ ਸਮ੍ਮਤਤ੍ਤਾ ਵੋਹਰਿਤਤ੍ਤਾ ਵੋਹਾਰਸਿਦ੍ਧਾ ਨਾਮ. ਸਭਾਵਸਿਦ੍ਧਾ ਪਨ ਨ ਹੋਤਿ. ਤਸ੍ਮਾ ਅਰਿਯਾਨਂ ਵੋਹਾਰੇ ਪੁਗ੍ਗਲੋ ਨਾਮ ਨਤ੍ਥੀਤਿ ਸਿਜ੍ਝਤਿ. ਇਮਾਨਿ ਪਨ ਰੂਪਾਨਿ ਸਭਾਵਸਿਦ੍ਧਤ੍ਤਾ ਅਰਿਯਾਨਂ ਵੋਹਾਰੇਪਿ ਅਤ੍ਥੀਤਿ ਸਿਜ੍ਝਨ੍ਤਿ. ਤੇਨਾਹ ‘‘ਤਾਦਿਸੇਨਾ’’ਤਿਆਦਿਂ. ‘‘ਸੁਦ੍ਧਧਮ੍ਮਗਤਿਯਾ ਸਿਦ੍ਧੇਨਾ’’ਤਿ ਪਥਵੀਧਾਤੁ ਨਾਮ ਸੁਦ੍ਧਧਮ੍ਮੋ ਹੋਤਿ. ਸਾ ਉਪ੍ਪਾਦਮ੍ਪਿ ਗਚ੍ਛਤਿ, ਜਰਮ੍ਪਿ ਗਚ੍ਛਤਿ, ਭੇਦਮ੍ਪਿ ਗਚ੍ਛਤਿ. ਤਸ੍ਮਾ ਤਸ੍ਸਾ ਉਪ੍ਪਾਦੋਪਿ ਜਰਾਪਿ ਭੇਦੋਪਿ ਸੁਦ੍ਧਧਮ੍ਮਗਤਿਯਾ ਸਿਦ੍ਧੋ ਨਾਮ. ਏਵਂ ਲਕ੍ਖਣਰੂਪਾਨਂ ਸੁਦ੍ਧਧਮ੍ਮਗਤਿਸਿਦ੍ਧਂ ਪਰਮਤ੍ਥਲਕ੍ਖਣਂ ਵੇਦਿਤਬ੍ਬਂ. ਤਥਾ ਵਿਞ੍ਞਤ੍ਤਿ ਦ੍ਵਯਸ੍ਸਪਿ ਵਿਕਾਰਰੂਪਤ੍ਤਯਸ੍ਸਪਿ ਪਰਿਚ੍ਛੇਦ ਰੂਪਸ੍ਸਪੀਤਿ. ਯਥਾ ਚ ਇਮੇਸਂ ਰੂਪਾਨਂ. ਤਥਾ ਨਿਬ੍ਬਾਨਸ੍ਸਪਿ ਸੁਦ੍ਧਧਮ੍ਮਗਤਿਸਿਦ੍ਧਂ ਪਰਮਤ੍ਥਲਕ੍ਖਣਂ ਅਤ੍ਥਿਯੇਵ. ਕਿਲੇਸਧਮ੍ਮਾਹਿ ਅਰਿਯਮਗ੍ਗੇ ਅਭਾਵਿਤੇ ਭਵਪਰਮ੍ਪਰਾਯ ਉਪ੍ਪਾਦਂ ਗਚ੍ਛਨ੍ਤਿਯੇਵ. ਭਾਵਿਤੇਪਨ ਅਨੁਪ੍ਪਾਦਂ ਨਿਰੋਧਂ ਗਚ੍ਛਨ੍ਤਿਯੇਵ. ਤਸ੍ਮਾ ਕਿਲੇਸਧਮ੍ਮਾਨਂ ਅਨੁਪ੍ਪਾਦਨਿਰੋਧੋਪਿ ਸੁਦ੍ਧਧਮ੍ਮਗਤਿਯਾ ਸਿਦ੍ਧੋ ਨਾਮ. ਏਵਂ ਨਿਬ੍ਬਾਨਸ੍ਸਪਿ ਸੁਦ੍ਧਧਮ੍ਮਗਤਿਸਿਦ੍ਧਂ ਪਰਮਤ੍ਥਲਕ੍ਖਣਂ ਵੇਦਿਤਬ੍ਬਂ. ਅਤ੍ਥਿ ਭਿਕ੍ਖਵੇ ਅਜਾਤਂ ਅਭੂਤਨ੍ਤਿ ਇਦਂ ਸੁਤ੍ਤਂਪਿ ਏਤ੍ਥ ਵਤ੍ਤਬ੍ਬਂ. ਏਤੇਨ ਅਰਿਯਵੋਹਾਰੇ ਨਿਬ੍ਬਾਨਸ੍ਸ ਏਕਨ੍ਤੇਨ ਅਤ੍ਥਿਤਾ ਭਗਵਤਾ ਵੁਤ੍ਤਾ ਹੋਤਿ. ਤੇਨਾਹ ‘‘ਇਤਰਥਾ’’ਤਿਆਦਿਂ. ‘‘ਨਸਭਾਵਤੋ ਅਨੁਪਲਦ੍ਧਤ੍ਤਾ ਅਨਿਪ੍ਫਨ੍ਨਾਨਿ ਨਾਮ ਹੋਨ੍ਤੀ’’ਤਿ ਏਤੇਨ ਏਤਾਨਿ ਅਸਭਾਵਰੂਪਾਨੀਤਿ ਚ ਅਲਕ੍ਖਣ ਰੂਪਾਨੀਤਿ ਚ ਅਸਮ੍ਮਸਨਰੂਪਾਨੀਤਿ ਚ ਨ ਸਕ੍ਕਾ ਵਤ੍ਤੁਂਤਿਪਿ ਦੀਪੇਤਿ. ਕਸ੍ਮਾ, ਯਥਾਸਕਂ ਸਭਾਵੇਹਿ ਸਭਾਵਵਨ੍ਤਤ੍ਤਾ ਯਥਾਸਕਂ ਲਕ੍ਖਣੇ ਹਿ ਸਲਕ੍ਖਣਤ੍ਤਾ ਪਟਿਸਮ੍ਭਿਦਾਮਗ੍ਗੇ ਸਮ੍ਮਸਨਞ੍ਞਾਣ ਵਿਭਙ੍ਗੇ ਜਾਤਿਜਰਾਮਰਣਾਨਮ੍ਪਿ ਸਮ੍ਮਸਿਤਬ੍ਬਧਮ੍ਮੇਸੁ ਆਗਤਤ੍ਤਾਤਿ. ਅਟ੍ਠਸਾਲਿਨਿਯਮ੍ਪਿ ਅਯਮਤ੍ਥੋ ਵੁਤ੍ਤੋਯੇਵ. ਯਥਾਹ ਪਰਿਨਿਪ੍ਫਨ੍ਨਨ੍ਤਿ ਪਨ੍ਨਰਸਰੂਪਾਨਿ ਪਰਿਨਿਪ੍ਫਨ੍ਨਾਨਿ ਨਾਮ. ਦਸਰੂਪਾਨਿ ਅਪਰਿਨਿਪ੍ਫਨ੍ਨਾਨਿ ਨਾਮ. ਯਦਿ ਅਪਰਿਨਿਪ੍ਫਨ੍ਨਾਨਿ ਨਾਮ. ਏਵਂਸਤਿ, ਅਸਙ੍ਖਤਾਨਿ ਨਾਮ ਸਿਯੁਂ. ਤੇਸਂਯੇਵ ਪਨਰੂਪਾਨਂ ਕਾਯਵਿਕਾਰੋ ਕਾਯਵਿਞ੍ਞਤ੍ਤਿ ਨਾਮ. ਵਚੀਵਿਕਾਰੋ ਵਚੀਵਿਞ੍ਞਤ੍ਤਿ ਨਾਮ. ਛਿਦ੍ਦਂ ਵਿਵਰਂ ਆਕਾਸਧਾਤੁ ਨਾਮ. ਲਹੁਭਾਵੋ ਲਹੁਤਾ ਨਾਮ. ਮੁਦੁਭਾਵੋ ਮੁਦੁਤਾ ਨਾਮ. ਕਮ੍ਮਞ੍ਞਭਾਵੋ ਕਮ੍ਮਞ੍ਞਤਾ ਨਾਮ. ਨਿਬ੍ਬਤ੍ਤਿ ਉਪਚਯੋ ਨਾਮ. ਪਵਤ੍ਤਿ ਸਨ੍ਤਤਿ ਨਾਮ. ਜੀਰਣਾਕਾਰੋ ਜਰਤਾ ਨਾਮ. ਹੁਤ੍ਵਾ ਅਭਾਵਾਕਾਰੋ ਅਨਿਚ੍ਚਤਾ ਨਾਮਾਤਿ ਸਬ੍ਬਂ ਪਰਿਨਿਪ੍ਫਨ੍ਨਂ ਸਙ੍ਖਤਮੇਵਾਤਿ. ਤਤ੍ਥ ‘‘ਤੇਸਂਯੇਵ ਰੂਪਾਨਂ’’ਤਿ ਨਿਦ੍ਧਾਰਣੇ ਭੁਮ੍ਮਂ. ਤੇਸਂਯੇਵ ਦਸਨ੍ਨਂ ਰੂਪਾਨਂ ਮਜ੍ਝੇਤਿ ਵੁਤ੍ਤਂ ਹੋਤਿ. ‘‘ਇਤਿਸਬ੍ਬਂ’’ਤਿ ਇਦਂ ਸਬ੍ਬਂ ਦਸਵਿਧਂ ਰੂਪਂ ਪਰਿਨਿਪ੍ਫਨ੍ਨਮੇਵ ਸਙ੍ਖਤਮੇਵਾਤਿ ਅਤ੍ਥੋ. ਖਨ੍ਧਵਿਭਙ੍ਗਟ੍ਠਕਥਾਯਮ੍ਪਿ ਵੁਤ੍ਤੋਵ. ਯਥਾਹ ਪਞ੍ਚਵਿਪਨਖਨ੍ਧਾ ਪਰਿਨਿਪ੍ਫਨ੍ਨਾਵ ਹੋਨ੍ਤਿ, ਨੋ ਅਪਰਿਨਿਪ੍ਫਨ੍ਨਾ. ਸਙ੍ਖਤਾਵ, ਨੋ ਅਸਙ੍ਖਤਾ. ਅਪਿਚ ਨਿਪ੍ਫਨ੍ਨਾਪਿ ਹੋਨ੍ਤਿਯੇਵ. ਸਭਾਵਧਮ੍ਮੇਸੁਹਿ ਨਿਬ੍ਬਾਨਮੇਵੇਕਂ ਅਪਰਿਨਿਪ੍ਫਨ੍ਨਂ ਅਨਿਪ੍ਫਨ੍ਨਞ੍ਚਾਤਿ ਚ. ਨਿਰੋਧਸਮਾਪਤ੍ਤਿ ਚ ਨਾਮ ਪਞ੍ਞਤ੍ਤਿ ਚ ਕਥਨ੍ਤਿ. ਨਿਰੋਧਸਮਾਪਤ੍ਤਿ ਲੋਕਿਯਲੋਕੁਤ੍ਤਰਾਤਿ ਵਾ ਸਙ੍ਖਤਾਸਙ੍ਖਤਾਤਿ ਵਾ ਪਰਿਨਿਪ੍ਫਨ੍ਨਾਪਰਿਨਿਪ੍ਫਨ੍ਨਾਤਿ ਵਾ ਨ ਵਤ੍ਤਬ੍ਬਾ. ਨਿਪ੍ਫਨ੍ਨਾ ਪਨ ਹੋਤਿ. ਸਮਾਪਜ੍ਜਨ੍ਤੇਨ ਸਮਾਪਜ੍ਜਿਤਬ੍ਬਤੋ. ਤਥਾ ਨਾਮਪਞ੍ਞਤ੍ਤਿ, ਸਾਪਿਹਿ ਲੋਕਿਯਾਦਿਭੇਦਂ ਨਲਭਤਿ. ਨਿਪ੍ਫਨ੍ਨਾ ਪਨ ਹੋਤਿ. ਨੋ ਅਨਿਪ੍ਫਨ੍ਨਾ. ਨਾਮਗ੍ਗਹਣਞ੍ਹਿ ਗਣ੍ਹਨ੍ਤੋਵ ਗਣ੍ਹਾਤੀਤਿ ਚ. ਏਤੇਨ ਲਕ੍ਖਣਰੂਪਾਨਮ੍ਪਿ ਨਿਪ੍ਫਨ੍ਨਤਾ ਸਿਦ੍ਧਾ ਹੋਤਿ. ਵਿਸੁਦ੍ਧਿ ਮਗ੍ਗੇਪਨ ਨਿਪ੍ਫਨ੍ਨਂ ਅਨਿਪ੍ਫਨ੍ਨਂਤਿਦੁਕਸ੍ਸ ਨਿਦ੍ਦੇਸੇ. ਅਟ੍ਠਾਰਸਵਿਧਂ ਰੂਪਂ ਪਰਿਚ੍ਛੇਦਵਿਕਾਰ ਲਕ੍ਖਣਭਾਵਂ ਅਤਿਕ੍ਕਮਿਤ੍ਵਾ ਸਭਾਵੇਨੇਵ ਪਰਿਗ੍ਗਹੇਤਬ੍ਬਤੋ ਨਿਪ੍ਫਨ੍ਨਂ, ਸੇਸਂ ਤਬ੍ਬਿਪਰੀਤਤਾਯ ਅਨਿਪ੍ਫਨ੍ਨਨ੍ਤਿ ਚ. ਨਿਪ੍ਫਨ੍ਨਰੂਪਂ ਪਨ ਰੂਪਰੂਪਂ ਨਾਮਾਤਿ ਚ. ਯਂ ਚਤੂਹਿ ਕਮ੍ਮਾਦੀਹਿ ਜਾਤਂ, ਤਂ ਚਤੁਜਂ ਨਾਮ. ਤਂ ਲਕ੍ਖਣ ਰੂਪਵਜ੍ਜਂ ਅਵਸੇਸਰੂਪਂ. ਲਕ੍ਖਣਰੂਪਂ ਪਨ ਨ ਕੁਤੋਚਿਜਾਤਨ੍ਤਿ ਚ ਵੁਤ੍ਤਂ. ਸਬ੍ਬਞ੍ਚੇਤਂ ਆਚਰਿਯੇਹਿ ਗਹਿਤਨਾਮਮਤ੍ਤਤ੍ਤਾ ਵਤ੍ਤਿਚ੍ਛਾਨੁਗਤਂ ਹੋਤਿ. ਯਂ ਰੁਚ੍ਚਤਿ, ਤਂ ਗਹੇਤ੍ਵਾ ਕਥੇਤਬ੍ਬਨ੍ਤਿ.

ਰੂਪਸਮੁਦ੍ਦੇਸਾਨੁਦੀਪਨਾ ਨਿਟ੍ਠਿਤਾ.

੧੯੭. ਰੂਪਵਿਭਾਗੇ.‘‘ਏਕਵਿਧਨਯਂ ਤਾਵ ਦਸ੍ਸੇਤੁਂ’’ਤਿ ਰੂਪਵਿਭਾਗਤੋ ਪਥਮਂ ਦਸ੍ਸੇਤੁਂ. ਏਤੇਨ ਏਕਵਿਧਨਯੋ ਰੂਪਵਿਭਾਗੋ ਨਾਮ ਨ ਤਾਵ ਹੋਤੀਤਿ ਦਸ੍ਸੇਤਿ. ਤਂ ਨ ਸਮੇਤਿ. ਕੇਨ ਨ ਸਮੇਤੀਤਿ ਆਹ ‘‘ਵਕ੍ਖਤਿਹੀ’’ਤਿਆਦਿਂ. ‘‘ਅਜ੍ਝਤ੍ਤਿਕਾਦਿਭੇਦੇਨ ਵਿਭਜਨ੍ਤਿ ਵਿਚਕ੍ਖਣਾ’’ਤਿ ਏਤੇਨ ਸਬ੍ਬਂਰੂਪਂ ਅਜ੍ਝਤ੍ਤਿਕਬਾਹਿਰਵਸੇਨ ਦੁਵਿਧਨ੍ਤਿਆਦਿਕੋ ਦੁਵਿਧਨਯੋ ਏਵ ਰੂਪਵਿਭਾਗਨਯੋ ਨਾਮਾਤਿ ਵਿਞ੍ਞਾਯਤਿ. ਤਸ੍ਮਾ ਤੇਨ ਨ ਸਮੇਤੀਤਿ ਵੁਤ੍ਤਂ ਹੋਤਿ. ਅਪਿਚ ਪਾਲ਼ਿਯਂ. ਸਹੇਤੁਕਾ ਧਮ੍ਮਾ, ਅਹੇਤੁਕਾ ਧਮ੍ਮਾਤਿਆਦਿ ਦੁਕੇਸੁ ਸਬ੍ਬਂਰੂਪਂ ਅਹੇਤੁਕਮੇਵ, ਨ ਸਹੇਤੁਕਨ੍ਤਿਆਦਿ ਨਿਯਮਕਰਣਮ੍ਪਿ ਰੂਪਵਿਭਾਗੋ ਏਵਾਤਿ ਕਤ੍ਵਾ ਤਥਾ ਵੁਤ੍ਤਨ੍ਤਿ ਗਹੇਤਬ੍ਬਂ. ‘‘ਇਤਰਾਨਿ ਪਨਾ’’ਤਿ ਕਾਮਾਵਚਰਨ੍ਤਿਆਦੀਨਿ ਪਨ. ‘‘ਜਨਕੇਨ ਪਚ੍ਚਯੇਨਾ’’ਤਿ ਪਧਾਨਵਚਨਮੇਤਂ. ਉਪਤ੍ਥਮ੍ਭਕਾਦਿ ਪਚ੍ਚਯਾਪਿ ਗਹੇਤਬ੍ਬਾ ਏਵ. ‘‘ਸਙ੍ਗਮ੍ਮਾ’’ਤਿ ਸਮਾਗਨ੍ਤ੍ਵਾ. ‘‘ਕਰੀਯਤੀ’’ਤਿ ਨਿਪ੍ਫਾਦੀਯਤਿ. ਯੋਧਮ੍ਮੋਤਿਆਦੀਸੁ. ‘‘ਪਹੀਨੋ ਪੀ’’ਤਿ ਛਿਨ੍ਦਨਭਿਨ੍ਦਨਾਦਿਵਸੇਨ ਪਹੀਨੋਪਿ. ‘‘ਤਸ੍ਮਿਂ ਸਤੀ’’ਤਿ ਸਮੁਦਯਪ੍ਪਹਾਨੇ ਸਤਿ. ਕਿਚ੍ਚਪਚ੍ਚਯਾਨਂ ਅਰਹਤ੍ਥਸ੍ਸ ਚ ਸਕ੍ਕਤ੍ਥਸ੍ਸ ਚ ਦੀਪਨਤੋ ਦੁਵਿਧਂ ਅਤ੍ਥਂ ਦਸ੍ਸੇਤੁਂ ‘‘ਅਟ੍ਠਾਨਤ੍ਤਾ’’ਤਿਆਦਿ ਵੁਤ੍ਤਂ. ‘‘ਤਬ੍ਬਿਸਯਸ੍ਸਾ’’ਤਿ ਰੂਪਵਿਸਯਸ੍ਸ. ‘‘ਏਵਂ’’ਤਿ ਏਵਂਸਨ੍ਤੇ. ‘‘ਪਹੀਨਂ ਭਵਿਸ੍ਸਤੀ’’ਤਿ ਅਨਾਗਤਭਵੇ ਪੁਨ ਅਨੁਪ੍ਪਾਦਤ੍ਥਾਯ ਇਧੇਵ ਪਹੀਨਂ ਭਵਿਸ੍ਸਤੀਤਿ ਅਤ੍ਥੋ. ਤੇਨਾਹ ‘‘ਉਚ੍ਛਿਨ੍ਨਮੂਲਂ’’ਤਿਆਦਿਂ. ‘‘ਤਾਲਾਵਤ੍ਥੁਕਤਂ’’ਤਿ ਛਿਨ੍ਨਤਾਲਕ੍ਖਾਣੁਕਂ ਵਿਯ ਕਤਂ ਭਵਿਸ੍ਸਤਿ. ‘‘ਅਨਭਾਵਂ ਕਤਂ’’ਤਿ ਪੁਨ ਅਭਾਵਂ ਕਤਂ. ‘‘ਪਾਕਟੋ’’ਤਿ ਦਸ੍ਸਨਾਦਿਕਿਚ੍ਚਵਿਸੇਸੇਹਿ ਪਞ੍ਞਾਤੋ. ‘‘ਤਦੁਪਾਦਾਯਾ’’ਤਿ ਤਂ ਉਪਨਿਧਾਯ. ਵਿਭਾਵਨਿਪਾਠੇ. ‘‘ਅਜ੍ਝਤ੍ਤਿਕਰੂਪਂ’’ਤਿ ਪਦੁਦ੍ਧਾਰਣਂ. ਅਤ੍ਤਾਨਂ ਅਧਿਕਿਚ੍ਚ ਪਵਤ੍ਤਂ ਅਜ੍ਝਤ੍ਤਂ. ਅਜ੍ਝਤ੍ਤਮੇਵ ਅਜ੍ਝਤ੍ਤਿਕਨ੍ਤਿ ਦਸ੍ਸੇਤਿ ‘‘ਅਤ੍ਤਭਾਵਸਙ੍ਖਾਤਂ’’ਤਿਆਦਿਨਾ. ਤਂ ਨ ਸੁਨ੍ਦਰਂ. ਕਸ੍ਮਾ, ਅਜ੍ਝਤ੍ਤਧਮ੍ਮ ਅਜ੍ਝਤ੍ਤਿਕ ਧਮ੍ਮਾਨਞ੍ਚ ਅਵਿਸੇਸੋ ਆਪਜ੍ਜਤੀਤਿ ਵਕ੍ਖਮਾਨਕਾਰਣਤ੍ਤਾ. ‘‘ਦ੍ਵਾਰਰੂਪਂ ਨਾਮਾ’’ਤਿ ਪਦੁਦ੍ਧਾਰਪਦਂ. ਕਸ੍ਮਾ ਦ੍ਵਾਰਰੂਪਂ ਨਾਮਾਤਿ ਆਹ ‘‘ਯਥਾਕ੍ਕਮਂ’’ਤਿਆਦਿਂ. ਪਰਤੋਪਿ ਏਸਨਯੋ. ‘‘ਦੇਸਨਾਭੇਦ ਰਕ੍ਖਣਤ੍ਥਂ’’ਤਿ ਦੁਕਦੇਸਨਾਭੇਦਤੋ ਰਕ੍ਖਣਤ੍ਥਂ. ਤਤ੍ਥ ਦੇਸਨਾਭੇਦੋ ਨਾਮ ਰੂਪਕਣ੍ਡੇ ਪਞ੍ਚਵਿਞ੍ਞਾਣਾਨਂ ਵਤ੍ਥੁ ਰੂਪਞ੍ਚ, ਨ ਵਤ੍ਥੁ ਰੂਪਞ੍ਚ, ਆਰਮ੍ਮਣ ਰੂਪਞ੍ਚ, ਨ ਆਰਮ੍ਮਣ ਰੂਪਞ੍ਚ ਵਤ੍ਵਾ ਮਨੋਵਿਞ੍ਞਾਣਸ੍ਸ ਨ ਵੁਤ੍ਤਂ. ਯਦਿ ਵੁਚ੍ਚੇਯ੍ਯ, ਆਰਮ੍ਮਣਦੁਕੇ ਮਨੋਵਿਞ੍ਞਾਣਸ੍ਸ ਆਰਮ੍ਮਣ ਰੂਪਂ, ਨ ਆਰਮ੍ਮਣ ਰੂਪਨ੍ਤਿ ਦੁਕਪਦਂ ਨ ਲਬ੍ਭੇਯ੍ਯ. ਅਯਂ ਦੇਸਨਾਭੇਦੋ ਨਾਮ. ਵਤ੍ਥੁਦੁਕੇਸੁ ਹਦਯਵਤ੍ਥੁਵਸੇਨ ਲਬ੍ਭਮਾਨਂ ਮਨੋਵਿਞ੍ਞਾਣਦੁਕਂ ਨ ਵੁਤ੍ਤਨ੍ਤਿ. ‘‘ਥੂਲਸਭਾਵਤ੍ਤਾ’’ਤਿ ਸੁਖੁਮਰੂਪਂ ਉਪਾਦਾਯ ਵੁਤ੍ਤਂ. ‘‘ਦੂਰੇ ਪਵਤ੍ਤਸ੍ਸਪੀ’’ਤਿ ਯਥਾ ਸੁਖੁਮਰੂਪਂ ਅਤ੍ਤਨੋ ਸਰੀਰੇ ਪਵਤ੍ਤਮ੍ਪਿ ਞਾਣੇਨ ਸੀਘਂ ਪਰਿਗ੍ਗਹੇਤੁਂ ਨ ਸਕ੍ਕਾ ਹੋਤਿ, ਤਥਾ ਇਦਂ. ਇਮਸ੍ਸ ਪਨ ਦੂਰੇ ਪਵਤ੍ਤਸ੍ਸਪਿ. ‘‘ਗਹਣਯੋਗ੍ਯਤ੍ਤਾ’’ਤਿ ਞਾਣੇਨ ਪਰਿਗ੍ਗਹਣਪਤ੍ਤਤ੍ਤਾਤਿ ਅਧਿਪ੍ਪਾਯੋ. ਵਿਭਾਵਨਿਪਾਠੇ. ‘‘ਸਯਂਨਿਸ੍ਸਯਵਸੇਨ ਚਾ’’ਤਿ ਸਯਞ੍ਚ ਨਿਸ੍ਸਯ ਮਹਾਭੂਤਵਸੇਨ ਚ. ਤਤ੍ਥ ਸਯਂ ਸਮ੍ਪਤ੍ਤਾ ਨਾਮ ਫੋਟ੍ਠਬ੍ਬਧਾਤੁਯੋ. ਨਿਸ੍ਸਯਵਸੇਨ ਸਮ੍ਪਤ੍ਤਾ ਨਾਮ ਗਨ੍ਧਰਸਾ. ਉਭਯਥਾਪਿ ਅਸਮ੍ਪਤ੍ਤਾ ਨਾਮ ਚਕ੍ਖੁ ਰੂਪ, ਸੋਤ ਸਦ੍ਦਾ. ਯੋ ਪਟਿਮੁਖਭਾਵੋ ਅਤ੍ਥਿ, ਯਂ ਅਞ੍ਞਮਞ੍ਞਪਤਨਂ ਅਤ੍ਥੀਤਿ ਯੋਜਨਾ. ਨ ਚ ਤਾਨਿ ਅਞ੍ਞਪ੍ਪਕਾਰਾਨਿ ਏਵ ਸਕ੍ਕਾ ਭਵਿਤੁਨ੍ਤਿ ਸਮ੍ਬਨ੍ਧੋ. ‘‘ਅਨੁਗ੍ਗਹ ਉਪਘਾਤਵਸੇਨਾ’’ਤਿ ਵਡ੍ਢਨਤ੍ਥਾਯ ਅਨੁਗ੍ਗਹਵਸੇਨ, ਹਾਯਨਾਦਿ ਅਤ੍ਥਾਯ ਉਪਘਾਤਵਸੇਨ. ‘‘ਯਂ ਕਿਞ੍ਚੀ’’ਤਿ ਚਤੁਸਮੁਟ੍ਠਾਨਿਕਰੂਪਂ ਗਣ੍ਹਾਤਿ. ‘‘ਆਦਿਨ੍ਨਪਰਾਮਟ੍ਠਤ੍ਤਾ’’ਤਿ ਤਣ੍ਹਾਮਾਨੇਹਿ ਏਤਂ ਮਮ ਏਸੋਹਮਸ੍ਮੀਤਿਆਦਿਨ੍ਨਤ੍ਤਾ, ਦਿਟ੍ਠਿਯਾ ਏਸੋ ਮੇ ਅਤ੍ਤਾਤਿ ਪਰਾਮਟ੍ਠਤ੍ਤਾ ਚ. ‘‘ਨਿਚ੍ਚਕਾਲਂ ਪਵਤ੍ਤਿਵਸੇਨਾ’’ਤਿ ਏਕੇਨ ਜਨਕਕਮ੍ਮੇਨ ਪਟਿਸਨ੍ਧਿਕ੍ਖਣਤੋ ਪਟ੍ਠਾਯ ਨਿਚ੍ਚਕਾਲਂ ਪਵਤ੍ਤਿਵਸੇਨ. ‘‘ਉਪਚਰੀਯਤੀ’’ਤਿ ਵੋਹਰੀਯਤਿ. ‘‘ਅਤ੍ਥਵਿਸੇਸਬੋਧੋ’’ਤਿ ਰੂਪਾਰਮ੍ਮਣਸ੍ਸ ਕਿਚ੍ਚਵਿਸੇਸਬੋਧੋ. ‘‘ਅਸਮ੍ਪਤ੍ਤਵਸੇਨਾ’’ਤਿ ਵਿਸਯਟ੍ਠਾਨਂ ਸਯਂ ਅਸਮ੍ਪਜ੍ਜਨਵਸੇਨ. ਅਤ੍ਤਨੋਠਾਨਂ ਵਾ ਵਿਸਯਸ੍ਸ ਅਸਮ੍ਪਜ੍ਜਨਵਸੇਨ. ਤਤ੍ਥ ਵਿਸਯਸ੍ਸ ਅਸਮ੍ਪਤ੍ਤਂ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਤਥਾ ਸੋਤਸਦ੍ਦੇਸੁ ਚ ਅਞ੍ਞਮਞ੍ਞਂ ਲਗ੍ਗਿਤ੍ਵਾ ਉਪ੍ਪਜ੍ਜਮਾਨੇਸੁ. ‘‘ਸਮ੍ਪਤ੍ਤਿਯਾ ਏਵਾ’’ਤਿ ਸਮ੍ਪਜ੍ਜਨਤ੍ਥਾਯ ਏਵ. ਤਥਾ ਆਪੋ ਚ ਸਮ੍ਪਤ੍ਤਿਯਾ ਏਵ ਪਚ੍ਚਯੋਤਿ ਯੋਜਨਾ. ਦੁਬ੍ਬਲਪਥਵੀ ਏਵ ਸਨ੍ਨਿਸ੍ਸਯੋ ਯਸ੍ਸਾਤਿ ਵਿਗ੍ਗਹੋ. ‘‘ਅਸ੍ਸਾ’’ਤਿ ਚਕ੍ਖੁਸ੍ਸ. ‘‘ਸੋਤਸ੍ਸਪਨਕਥਂ’’ਤਿ ਸੋਤਸ੍ਸ ਅਸਮ੍ਪਤ੍ਤਗ੍ਗਹਣਂ ਕਥਂ ਪਾਕਟਂ. ਸਮ੍ਪਤ੍ਤਗ੍ਗਹਣਂ ਏਵ ਪਾਕਟਨ੍ਤਿ ਦੀਪੇਤਿ. ਤੇਨਾਹ ‘‘ਤਤ੍ਥਹੀ’’ਤਿਆਦਿਂ. ਦਕ੍ਖਿਣਪਸ੍ਸਤੋ ਵਾ ਸੁਯ੍ਯਤਿ, ਚੇਤਿਯਾਦਿਕਸ੍ਸ ਪੁਰਤ੍ਥਿਮਦਿਸਾਭਾਗੇ ਠਿਤਾਨਨ੍ਤਿ ਅਧਿਪ੍ਪਾਯੋ. ‘‘ਪਟਿਘਟ੍ਟਨਾਨਿਘਂਸੋ’’ਤਿ ਸੋਤੇਸੁ ਪਟਿਘਟ੍ਟਨਵੇਗੋ. ‘‘ਤੇਸਂ’’ਤਿ ਆਸਨ੍ਨੇਵਾ ਦੂਰੇ ਵਾ ਠਿਤਾਨਂ. ਹੋਤੁ ਦੂਰੇ ਠਿਤਾਨਂ ਚਿਰੇਨ ਸੁਤੋਤਿ ਅਭਿਮਾਨੋ. ਕਸ੍ਮਾ ਪਨ ਉਜੁਕਂ ਅਸੁਤ੍ਵਾ ਦਕ੍ਖਿਣਪਸ੍ਸਤੋਵਾ ਉਤ੍ਤਰਪਸ੍ਸਤੋ ਵਾ ਸੁਣੇਯ੍ਯ, ਅਸੁਯ੍ਯਮਾਨੋ ਭਵੇਯ੍ਯਾਤਿ ਪੁਚ੍ਛਾ. ਤਂ ਕਥੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਵਿਭਾਵਨਿਪਾਠੇ. ‘‘ਗਨ੍ਤ੍ਵਾ ਵਿਸਯਦੇਸਂ ਤਂ, ਫਰਿਤ੍ਵਾ ਗਣ੍ਹਤੀਤਿ ਚੇ’’ਤਿ ਤਂ ਚਕ੍ਖੁਸੋਤ ਦ੍ਵਯਂ ਦੂਰੇਵਿਸਯਾਨਂ ਉਪ੍ਪਨ੍ਨਦੇਸਂ ਫਰਿਤ੍ਵਾ ਗਣ੍ਹਤੀਤਿ ਚੇਵਦੇਯ੍ਯਾਤਿ ਅਤ੍ਥੋ. ਦੂਰੇਠਤ੍ਵਾ ਪਸ੍ਸਨ੍ਤੋ ਸੁਣਨ੍ਤੋ ਚ ਮਹਨ੍ਤਮ੍ਪਿਪਬ੍ਬਤਂ ਏਕਕ੍ਖਣੇ ਪਸ੍ਸਤਿ, ਮਹਨ੍ਤਂਪਿ ਮੇਘਸਦ੍ਦਂ ਏਕਕ੍ਖਣੇ ਸੁਣਾਤਿ. ਤਸ੍ਮਾ ਉਭਯਂ ਅਸਮ੍ਪਤ੍ਤਗੋਚਰਨ੍ਤਿ ਵਿਞ੍ਞਾਯਤਿ. ਇਮਸ੍ਮਿਂ ਵਚਨੇ ਠਤ੍ਵਾ ਇਦਂ ਪਰਿਕਪ੍ਪਵਚਨਂ ਦਸ੍ਸੇਤਿ ਤਂ ਦ੍ਵਯਂ ਵਿਸਯਪ੍ਪਦੇਸਂ ਗਨ੍ਤ੍ਵਾ ਮਹਨ੍ਤਂਪਿ ਪਬ੍ਬਤਂ ਵਾ ਮੇਘਸਦ੍ਦਂ ਵਾ ਫਰਿਤ੍ਵਾ ਗਣ੍ਹਾਤਿ. ਤਸ੍ਮਾ ਮਹਨ੍ਤਂਪਿ ਪਸ੍ਸਤਿ, ਸੁਣਾਤਿ. ਨ ਅਸਮ੍ਪਤ੍ਤਗੋਚਰਤ੍ਤਾ ਮਹਨ੍ਤਂ ਪਸ੍ਸਤਿ ਸੁਣਾਤੀਤਿ ਕੋਚਿ ਵਦੇਯ੍ਯਾਤਿ ਵੁਤ੍ਤਂ ਹੋਤਿ. ਅਧਿਟ੍ਠਾਨਵਿਧਾਨੇਪਿ ਤਸ੍ਸ ਸੋ ਗੋਚਰੋ ਸਿਯਾਤਿ. ਏਵਂਸਤਿ, ਦਿਬ੍ਬਚਕ੍ਖੁ ਦਿਬ੍ਬਸੋਤਾਭਿਞ੍ਞਾਨਂ ਅਧਿਟ੍ਠਾਨਵਿਧਾਨੇਪਿ ਸੋ ਰੂਪਸਦ੍ਦਵਿਸਯੋ ਤਸ੍ਸ ਪਸਾਦਚਕ੍ਖੁਸੋਤਸ੍ਸ ਗੋਚਰੋ ਸਿਯਾਤਿ ਅਭਿਞ੍ਞਾਧਿਟ੍ਠਾਨ ਕਿਚ੍ਚਂ ਨਾਮ ਨਤ੍ਥਿ. ਚਕ੍ਖੁਸੋਤਂ ਦੇਵਲੋਕਮ੍ਪਿ ਗਨ੍ਤ੍ਵਾ ਦਿਬ੍ਬਰੂਪਮ੍ਪਿ ਦਿਬ੍ਬਸਦ੍ਦਮ੍ਪਿ ਗਣ੍ਹੇਯ੍ਯ. ਨ ਪਨ ਗਣ੍ਹਾਤਿ. ਤਸ੍ਮਾ ਤਸ੍ਸ ਵਿਸਯਦੇਸਗਮਨਞ੍ਚ ਮਹਨ੍ਤਦੇਸਫਰਣਞ੍ਚ ਨ ਚਿਨ੍ਤੇਤਬ੍ਬਨ੍ਤਿ ਵੁਤ੍ਤਂ ਹੋਤਿ.

ਰੂਪਵਿਭਾਗਾਨੁਦੀਪਨਾ ਨਿਟ੍ਠਿਤਾ.

੧੫੮. ਰੂਪਸਮੁਟ੍ਠਾਨੇ. ਸੁਤ੍ਤਨ੍ਤੇਸੁ ਚੇਤਨਾਸਮ੍ਪਯੁਤ੍ਤਾ ਅਭਿਜ੍ਝਾਦਯੋਪਿ ਕਮ੍ਮਨ੍ਤਿ ਵੁਤ੍ਤਾ. ਤੇ ਪਨ ਪਟ੍ਠਾਨੇ ਕਮ੍ਮਪਚ੍ਚਯਂ ਪਤ੍ਵਾ ਤਪ੍ਪਚ੍ਚਯਕਿਚ੍ਚਂ ਨ ਸਾਧੇਨ੍ਤਿ, ਚੇਤਨਾ ਏਵ ਸਾਧੇਤੀਤਿ ਆਹ ‘‘ਸਾ ਯੇਵਾ’’ਤਿਆਦਿਂ. ‘‘ਤਂ ਸਮੁਟ੍ਠਾਨਾਨਞ੍ਚ ਰੂਪਾਨਂ’’ਤਿ ਹੇਤੂਹਿ ਚ ਹੇਤੁਸਮ੍ਪਯੁਤ੍ਤਕਧਮ੍ਮੇਹਿ ਚ ਸਮੁਟ੍ਠਾਨਾਨਞ੍ਚ ਰੂਪਾਨਨ੍ਤਿ ਅਤ੍ਥਵਸੇਨ ਚੇਤਸਿਕਧਮ੍ਮਾਨਮ੍ਪਿ ਰੂਪਸਮੁਟ੍ਠਾਪਕਤਾ ਸਿਦ੍ਧਾ ਹੋਤਿ. ਸੋ ਹਿ ਉਦਯਤਿ ਪਸਵਤੀਤਿ ਸਮ੍ਬਨ੍ਧੋ. ‘‘ਕਪ੍ਪਸਣ੍ਠਾਪਨਵਸੇਨਾ’’ਤਿ ਕਪ੍ਪਪ੍ਪਤਿਟ੍ਠਾਪਨਵਸੇਨ. ਅਜ੍ਝਤ੍ਤਿਕਸਦ੍ਦੋ ਛਸੁ ਚਕ੍ਖਾਦੀਸੁ ਅਜ੍ਝਤ੍ਤਿਕਾਯਤਨੇ ਸ੍ਵੇਵ ਪਵਤ੍ਤਤਿ. ਇਧ ਪਨ ਸਕਲਂ ਅਜ੍ਝਤ੍ਤਸਨ੍ਤਾਨਂ ਅਧਿਪ੍ਪੇਤਨ੍ਤਿ ਆਹ ‘‘ਅਜ੍ਝਤ੍ਤ ਸਨ੍ਤਾਨੇਤਿ ਪਨ ਵਤ੍ਤਬ੍ਬਂ’’ਤਿ. ‘‘ਖਣੇ ਖਣੇ’’ਤਿ ਵਿਚ੍ਛਾਵਚਨਂ. ‘‘ਵਿਚ੍ਛਾ’’ਤਿ ਚ ਬਹੂਸੁਖਣੇਸੁ ਬ੍ਯਾਪਨਨ੍ਤਿ ਆਹ ‘‘ਤੀਸੁਤੀਸੁਖਣੇਸੂ’’ਤਿ.

ਯਮਕਪਾਠੇਸੁ. ਯਸ੍ਸ ਵਾ ਪਨ ਪੁਗ੍ਗਲਸ੍ਸ. ‘‘ਨਿਰੁਜ੍ਝਤੀ’’ਤਿ ਭਙ੍ਗਕ੍ਖਣ ਸਮਙ੍ਗਿਤਮਾਹ. ‘‘ਉਪ੍ਪਜ੍ਜਤੀ’’ਤਿ ਉਪ੍ਪਾਦਕ੍ਖਣ ਸਮਙ੍ਗਿਤਂ. ‘‘ਇਤੀ’’ਤਿ ਅਯਂ ਪੁਚ੍ਛਾ. ‘‘ਨੋ’’ਤਿ ਪਟਿਕ੍ਖੇਪੋ. ਸਮੁਦਯਸਚ੍ਚਸ੍ਸ ਭਙ੍ਗਕ੍ਖਣੇ ਦੁਕ੍ਖਸਚ੍ਚਭੂਤਸ੍ਸ ਰੂਪਸ੍ਸਵਾ ਨਾਮਸ੍ਸਵਾ ਉਪ੍ਪਾਦੋ ਨਾਮ ਨਤ੍ਥੀਤਿ ਵੁਤ੍ਤਂ ਹੋਤਿ. ਯਸ੍ਸ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਯਸ੍ਸ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤੀਤਿ ਦ੍ਵੇ ਪਾਠਾਗਹੇਤਬ੍ਬਾ. ‘‘ਨੋ’’ਤਿ ਕੁਸਲਾਕੁਸਲ ਧਮ੍ਮਾਨਂ ਉਪ੍ਪਾਦਕ੍ਖਣੇ ਅਬ੍ਯਾਕਤਭੂਤਾਨਂ ਰੂਪਾਨਂ ਵਾ ਨਾਮਾਨਂ ਵਾ ਨਿਰੋਧੋ ਨਾਮ ਨਤ੍ਥੀਤਿ ਵੁਤ੍ਤਂ ਹੋਤਿ. ਤੇਸੁਪਾਠੇਸੁ ਕੇਸਞ੍ਚਿਵਾਦੀਨਂ ਵਚਨੋਕਾਸਂ ਦਸ੍ਸੇਤੁਂ ‘‘ਅਰੂਪਭਵਂ’’ਤਿਆਦਿ ਵੁਤ੍ਤਂ. ‘‘ਚੇ’’ਤਿ ਕੋਚਿਵਾਦੀ ਚੇਵਦੇਯ੍ਯ. ‘‘ਨਾ’’ਤਿ ਨ ਵਤ੍ਤਬ੍ਬਂ. ‘‘ਉਪ੍ਪਜ੍ਜਤੀ’’ਤਿ ਚ ਉਦ੍ਧਟਾ ਸਿਯੁਨ੍ਤਿ ਸਮ੍ਬਨ੍ਧੋ. ‘‘ਇਤਰਤ੍ਥ ਚਾ’’ਤਿ ਤਤੋ ਇਤਰਸ੍ਮਿਂ ਯਸ੍ਸ ਕੁਸਲਾ ਧਮ੍ਮਾਤਿਆਦਿਪਾਠੇ ਚ. ‘‘ਤਮ੍ਪਿ ਨਾ’’ਤਿ ਤਮ੍ਪਿ ਵਚਨਂ ਨ ਵਤ੍ਤਬ੍ਬਨ੍ਤਿ ਅਤ੍ਥੋ. ‘‘ਪੁਰਿਮਕੋਟ੍ਠਾਸੇ’’ਤਿ ਅਸਞ੍ਞਸਤ੍ਤਾਨਂ ਤੇਸਂ ਤਤ੍ਥਾਤਿ ਇਮਸ੍ਮਿਂ ਪੁਰਿਮਪਕ੍ਖੇਤਿ ਅਧਿਪ੍ਪਾਯੋ. ‘‘ਪਚ੍ਛਿਮਕੋਟ੍ਠਾਸੇ’’ਤਿ ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸਭਙ੍ਗਕ੍ਖਣੇਤਿ ਇਮਸ੍ਮਿਂ ਪਚ੍ਛਿਮ ਪਕ੍ਖੇ. ਚਵਨ੍ਤਾਨਂ ਇਚ੍ਚੇਵ ਵੁਤ੍ਤਂ ਸਿਯਾ, ਨ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇਤਿ, ਨੋ ਚ ਨ ਵੁਤ੍ਤਂ, ਤਸ੍ਮਾ ਵਿਞ੍ਞਾਯਤਿ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਰੂਪਜੀਵਿਤਿਨ੍ਦ੍ਰਿਯਮ੍ਪਿ ਨ ਉਪ੍ਪਜ੍ਜਤੀਤਿ. ਰੂਪਜੀਵਿਤਿਨ੍ਦ੍ਰਿਯੇ ਚ ਅਨੁਪ੍ਪਜ੍ਜਮਾਨੇ ਸਤਿ, ਸਬ੍ਬਾਨਿ ਕਮ੍ਮਜਰੂਪਾਨਿ ਉਤੁਜਰੂਪਾਨਿ ਆਹਾਰਜਰੂਪਾਨਿ ਚ ਚਿਤ੍ਤਸ੍ਸ ਭਙ੍ਗਕ੍ਖਣੇ ਨੁਪ੍ਪਜ੍ਜਨ੍ਤੀਤਿ ਵਿਞ੍ਞਾਤਬ੍ਬਂ ਹੋਤੀਤਿ ਅਧਿਪ੍ਪਾਯੋ. ‘‘ਪਚ੍ਛਿਮਕੋਟ੍ਠਾਸੇ’’ਤਿ ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇਤਿ ਇਮਸ੍ਮਿਂ ਪਚ੍ਛਿਮਪਕ੍ਖੇ. ਤਤ੍ਥ ਚ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇਤਿ ਇਦਂ ਅਧਿਪ੍ਪੇਤਂ. ਏਵਂ ਪਾਲ਼ਿਸਾਧਕਂ ਦਸ੍ਸੇਤ੍ਵਾ ਇਦਾਨਿ ਯੁਤ੍ਤਿਸਾਧਕਂ ਦਸ੍ਸੇਨ੍ਤੋ ‘‘ਯਸ੍ਮਾ ਚਾ’’ਤਿਆਦਿਮਾਹ. ‘‘ਤਸ੍ਸਾ’’ਤਿ ਆਨਨ੍ਦਾ ਚਰਿਯਸ੍ਸ ਮੂਲਟੀਕਾਕਾਰਸ੍ਸ. ਵਿਭਾਵਨਿਯਂ. ਭਙ੍ਗੇ ਰੂਪਸ੍ਸ ਨੁਪ੍ਪਾਦੋ, ਚਿਤ੍ਤਜਾਨਂ ਵਸੇਨ ਵਾ. ਆਰੁਪ੍ਪਂ ਵਾਪਿ ਸਨ੍ਧਾਯ, ਭਾਸਿਤੋ ਯਮਕਸ੍ਸ ਹਿ. ਨ ਚਿਤ੍ਤਟ੍ਠਿਤਿ ਭਙ੍ਗੇ ਚ, ਨ ਰੂਪਸ੍ਸ ਅਸਮ੍ਭਵੋ. ਤਿ ਵੁਤ੍ਤਂ. ਤਤ੍ਥ ‘‘ਨ ਹਿ ਨ ਚਿਤ੍ਤਟ੍ਠਿਤੀ’’ਤਿ ਚਿਤ੍ਤਸ੍ਸਠਿਤਿ ਨਾਮ ਨ ਹਿ ਨਤ੍ਥਿ. ‘‘ਭਙ੍ਗੇਚਾ’’ਤਿ ਚਿਤ੍ਤਸ੍ਸਭਙ੍ਗਕ੍ਖਣੇ ਚ. ਤਂ ਅਸਮ੍ਭਾਵੇਨ੍ਤੋ ‘‘ਯਮਕਪਾਲ਼ਿਯੋ ਪਨਾ’’ਤਿਆਦਿਮਾਹ. ‘‘ਨਾਨਤ੍ਥਾ ਨਾਨਾਬ੍ਯਞ੍ਜਨਾ’’ਤਿ ਏਤੇਨ ਪਾਲ਼ਿਸਂਸਨ੍ਦਨਾ ਨਾਮ ਗਰੁਕਤ੍ਤਬ੍ਬਾਤਿ ਦੀਪੇਤਿ. ‘‘ਗਮ੍ਭੀਰੋ ਚ ਸਤ੍ਥੁ ਅਧਿਪ੍ਪਾਯੋ’’ਤਿ ਏਤੇਨ ਅਤ੍ਤਾਨਂ ਸਤ੍ਥੁਮਤਞ੍ਞੁਂ ਕਤ੍ਵਾ ਇਦਂ ਸਨ੍ਧਾਯ ਏਤਂ ਸਨ੍ਧਾਯਾਤਿ ਵਤ੍ਤੁਂ ਦੁਕ੍ਕਰਨ੍ਤਿ ਦੀਪੇਤਿ. ‘‘ਸੁਦ੍ਧਂ ਅਰੂਪਮੇਵਾ’’ਤਿ ਸੁਦ੍ਧਂ ਅਰੂਪਪ੍ਪਟਿਸਨ੍ਧਿਂ ਏਵ. ਛ ਚਤ੍ਤਾਲੀਸਚਿਤ੍ਤਾਨਿ ਰੂਪਂ ਜਨੇਤੁਂ ਨ ਸਕ੍ਕੋਨ੍ਤਿ. ਏਵਂ ਸਤਿ ਅਰੂਪਵਿਪਾਕਵਜ੍ਜਿਤਨ੍ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਅਰੂਪਵਿਪਾਕਾਪਨਾ’’ਤਿਆਦਿਂ. ਵਿਭਾਵਨਿਪਾਠੇ. ‘‘ਹੇਤੁਨੋ’’ਤਿ ਰੂਪਵਿਰਾਗਭਾਵਨਾ ਕਮ੍ਮਸਙ੍ਖਾਤਸ੍ਸ ਹੇਤੁਸ੍ਸ. ‘‘ਤਬ੍ਬੀਧੁਰਤਾਯਾ’’ਤਿ ਰੂਪਵਿਰੁਦ੍ਧਤਾਯ. ਰੂਪਾਰੂਪਵਿਰਾਗਭਾਵਨਾਭੂਤੋ ਮਗ੍ਗੋ. ਤੇਨ ਨਿਬ੍ਬਤ੍ਤਸ੍ਸ. ਰੂਪੋਕਾਸੋ ਨਾਮ ਕਾਮਰੂਪਭਵੋ. ਵਿਭਾਵਨਿਪਾਠੇ. ‘‘ਏਕੂਨ ਨ ਵੁਤਿਭਵਙ੍ਗਸ੍ਸੇ ਵਾ’’ਤਿ ਪਵਤ੍ਤਿਕਾਲੇ ਰੂਪਜਨਕਸ੍ਸ ਏਕੂਨ ਨ ਵੁਤਿਭਵਙ੍ਗ ਚਿਤ੍ਤਸ੍ਸਾਤਿ ਅਤ੍ਥੋ. ਤਤ੍ਥ ਪਨ ਅਰੂਪਵਿਪਾਕਂ ਪਵਤ੍ਤਿਕਾਲੇਪਿ ਰੂਪਜਨਕਂ ਨ ਹੋਤੀਤਿ ਆਹ ‘‘ਤਤ੍ਥਾ’’ਤਿਆਦਿਂ. ਕੇਚਿ ਪਨ ਪਟਿਸਨ੍ਧਿ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਰੂਪਂ ਪਚ੍ਛਾਜਾਤ ਪਚ੍ਚਯਂ ਨ ਲਭਤਿ. ਠਿਤਿਕ੍ਖਣੇ ਰੂਪਂ ਪਰਤੋ ਭਵਙ੍ਗਚਿਤ੍ਤਤੋ ਪਚ੍ਛਾਜਾਤਪਚ੍ਚਯਂ ਲਭਤੀਤਿ ਵਦਨ੍ਤਿ. ਤਂ ਨ ਗਹੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਨ ਹਿ ਅਤ੍ਤਨਾ’’ਤਿਆਦਿ ਵੁਤ੍ਤਂ. ਸਯਂ ਵਿਜ੍ਜਮਾਨੋ ਹੁਤ੍ਵਾ ਉਪਕਾਰਕੋ ਪਚ੍ਚਯੋ ਅਤ੍ਥਿਪਚ੍ਚਯੋ. ਪਚ੍ਛਾਜਾਤੋ ਚ ਤਸ੍ਸ ਏਕਦੇਸੋ. ‘‘ਆਯੁਸਙ੍ਖਾਰਾਨਂ’’ਤਿ ਉਸ੍ਮਾਦੀਨਂ. ‘‘ਤਂ’’ਤਿ ਖੀਣਾਸਵਾਨਂ ਚੁਤਿਚਿਤ੍ਤਂ. ‘‘ਯਥਾਹਾ’’ਤਿ ਸੋ ਥੇਰੋ ਕਿਂ ਆਹ. ‘‘ਵੁਤ੍ਤਂ’’ਤਿ ਅਟ੍ਠਕਥਾਯਂ ਵੁਤ੍ਤਂ. ਇਤਿ ਪਨ ਵਚਨਤੋ ਅਞ੍ਞੇਸਂਪਿ ਚੁਤਿਚਿਤ੍ਤਂ ਰੂਪਂ ਨ ਸਮੁਟ੍ਠਾਪੇਤੀਤਿ ਵਿਞ੍ਞਾਯਤੀਤਿ ਪਧਾਨਵਚਨਂ. ਪਨ ਸਦ੍ਦੋ ਅਰੁਚਿ ਜੋਤਕੋ. ‘‘ਤਥਾ ਵੁਤ੍ਤੇਪੀ’’ਤਿ ਜੋਤੇਤਿ. ਵਚੀਸਙ੍ਖਾਰੋ ਨਾਮ ਵਿਤਕ੍ਕਵਿਚਾਰੋ. ਕਾਯਸਙ੍ਖਾਰੋ ਨਾਮ ਅਸ੍ਸਾਸਪਸ੍ਸਾਸਵਾਤੋ. ਸੋ ਸਬ੍ਬੇਸਂਪਿ ਕਾਮਸਤ੍ਤਾਨਂ ਚੁਤਿ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਚ ਤਤੋ ਪੁਰਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਚ ਨਨਿਰੁਜ੍ਝਤੀਤਿ ਵਚਨੇਨ ਚੁਤਿਚਿਤ੍ਤਤੋ ਪੁਬ੍ਬਭਾਗੇਯੇਵ ਅਸ੍ਸਾਸਪਸ੍ਸਾਸਾਨਂ ਅਭਾਵਂ ਞਾਪੇਤਿ. ਨਨੁ ਇਮਿਸ੍ਸਂ ਪਾਲ਼ਿਯਂ ਚੁਤਿਕਾਲੇ ਅਸ੍ਸਾਸਪਸ੍ਸਾਸਸ੍ਸ ਅਭਾਵਂ ਵਦਤਿ. ਅਞ੍ਞੇਸਂ ਚਿਤ੍ਤਜਰੂਪਾਨਂ ਅਭਾਵਂ ਨ ਵਦਤਿ. ਤਸ੍ਮਾ ਇਮਾਯ ਪਾਲ਼ਿਯਾ ਸਬ੍ਬੇਸਮ੍ਪਿ ਚੁਤਿਚਿਤ੍ਤਂ ਅਸ੍ਸਾਸਪਸ੍ਸਾਸਂ ਨ ਜਨੇਤੀਤਿ ਵਿਞ੍ਞਾਯਤਿ. ਨ ਅਞ੍ਞਾਨਿ ਚਿਤ੍ਤਜਰੂਪਾਨੀਤਿ ਚੋਦਨਾ. ਤਂ ਪਰਿਹਰਨ੍ਤੋ ‘‘ਨ ਹੀ’’ਤਿਆਦਿਮਾਹ. ਨ ਹਿ ਰੂਪਸਮੁਟ੍ਠਾਪਕਚਿਤ੍ਤਸ੍ਸ ਕਾਯਸਙ੍ਖਾਰ ਸਮੁਟ੍ਠਾਪਨਂ ਅਤ੍ਥੀਤਿ ਸਮ੍ਬਨ੍ਧੋ. ‘‘ਗਬ੍ਭਗਮਨਾਦਿਵਿਨਿਬਦ੍ਧਾਭਾਵੇ’’ਤਿ ਮਾਤੁਕੁਚ੍ਛਿਮ੍ਹਿ ਗਤਸ੍ਸ ਅਸ੍ਸਾਸਪਸ੍ਸਾਸੋ ਨ ਉਪ੍ਪਜ੍ਜਤਿ, ਤਥਾ ਉਦਕੇ ਨਿਮੁਗ੍ਗਸ੍ਸ. ਬਾਲ਼੍ਹਂ ਵਿਸਞ੍ਞੀਭੂਤਸ੍ਸ. ਚਤੁਤ੍ਥਜ੍ਝਾਨਂ ਸਮਾਪਜ੍ਜਨ੍ਤਸ੍ਸ. ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਨ੍ਤਸ੍ਸ. ਰੂਪਾਰੂਪਭਵੇ ਠਿਤਸ੍ਸਾਤਿ. ਤਸ੍ਮਾ ਏਤੇਗਬ੍ਭਗਮਨਾਦਯੋ ਅਸ੍ਸਾਸਪਸ੍ਸਾਸਂ ਵਿਨਿਬਦ੍ਧਨ੍ਤਿ ਨੀਵਾਰੇਨ੍ਤੀਤਿ ਗਬ੍ਭਗਮਨਾਦਿਵਿਨਿਬਦ੍ਧਾ. ਤੇਸਂ ਅਭਾਵੋਤਿ ਵਿਗ੍ਗਹੋ. ਵਿਨਾ ਇਮੇਹਿ ਕਾਰਣੇਹਿ ਅਸ੍ਸਾਸਪਸ੍ਸਾਸਸ੍ਸ ਚ ਅਞ੍ਞਚਿਤ੍ਤਜਰੂਪਾਨਞ੍ਚ ਵਿਸੇਸੋ ਨਤ੍ਥੀਤਿ ਵੁਤ੍ਤਂ ਹੋਤਿ. ਅਞ੍ਞਂਪਿ ਯੁਤ੍ਤਿਂ ਦਸ੍ਸੇਤਿ ‘‘ਚੁਤੋ ਚਾ’’ਤਿਆਦਿਨਾ. ਚੁਤੋ ਚ ਹੋਤਿ, ਅਸ੍ਸ ਚਿਤ੍ਤਸਮੁਟ੍ਠਾਨ ਰੂਪਞ੍ਚ ਪਵਤ੍ਤਤੀਤਿ ਨ ਚ ਯੁਤ੍ਤਨ੍ਤਿ ਯੋਜਨਾ. ਸੋ ਚ ਸੁਟ੍ਠੁ ਓਲ਼ਾਰਿਕੋ ਰੂਪਧਮ੍ਮੋ. ਇਤਿ ਤਸ੍ਮਾ ਨ ਸਕ੍ਕਾ ਵਤ੍ਤੁਂਤਿ ਸਮ੍ਬਨ੍ਧੋ. ‘‘ਇਮਸ੍ਸ ਅਤ੍ਥਸ੍ਸਾ’’ਤਿ ਵਤ੍ਵਾ ਤਂ ਅਤ੍ਥਂ ਵਦਤਿ ‘‘ਓਲ਼ਾਰਿਕਸ੍ਸਾ’’ਤਿਆਦਿਨਾ. ‘‘ਕਤੀਪਯ ਖਣਮਤ੍ਤਂ’’ਤਿ ਪਨ੍ਨਰਸਖਣਸੋਲ਼ਸਖਣਮਤ੍ਤਂ. ‘‘ਚਿਤ੍ਤਜਰੂਪਪ੍ਪਵਤ੍ਤਿਯਾ’’ਤਿ ਚਿਤ੍ਤਜਰੂਪਪ੍ਪਵਤ੍ਤਨਤੋ. ਦੁਬ੍ਬਲਾ ਹੋਨ੍ਤਿ, ਤਦਾ ਪਞ੍ਚਾਰਮ੍ਮਣਾਨਿਪਿ ਪਞ੍ਚਦ੍ਵਾਰੇਸੁ ਆਪਾਤਂ ਨਾਗਚ੍ਛਨ੍ਤਿ. ‘‘ਪਚ੍ਚਯਪਰਿਤ੍ਤਤਾਯ ਵਾ’’ਤਿ ਤਦਾ ਪਚ੍ਛਾਜਾਤਪਚ੍ਚਯਸ੍ਸ ਅਲਾਭਤੋ ਵੁਤ੍ਤਂ. ਦੁਬ੍ਬਲਾ ਹੋਨ੍ਤਿ. ਤਦਾ ਦੁਬ੍ਬਲਤ੍ਤਾ ਏਵ ਪਞ੍ਚਾਰਮ੍ਮਣਾਨਿ ਪਞ੍ਚਦ੍ਵਾਰੇਸੁ ਆਪਾਤਂ ਨਾਗਚ੍ਛਨ੍ਤਿ. ਪਰਿਯੋਸਾਨੇਪਿ ਏਕਚਿਤ੍ਤਕ੍ਖਣਮਤ੍ਤੇ. ਵਤ੍ਥੁਸ੍ਸ ਆਦਿਅਨ੍ਤਨਿਸ੍ਸਿਤਾਨਿ ਪਟਿਸਨ੍ਧਿਕ੍ਖਣੇ ਆਦਿਮ੍ਹਿ ਨਿਸ੍ਸਿਤਾਨਿ. ਮਰਣਾਸਨ੍ਨਕਾਲੇ ਅਨ੍ਤੇ ਨਿਸ੍ਸਿਤਾਨਿ. ਸਮਦੁਬ੍ਬਲਾਨਿ ਏਵ ਹੋਨ੍ਤਿ. ਤਸ੍ਮਾ ਯਥਾ ਸਬ੍ਬਪਟਿਸਨ੍ਧਿਚਿਤ੍ਤਮ੍ਪਿ ਰੂਪਂ ਨ ਜਨੇਤਿ, ਤਥਾ ਸਬ੍ਬਚੁਤਿਚਿਤ੍ਤਮ੍ਪਿ ਰੂਪਂ ਨ ਜਨੇਤੀਤਿ ਸਕ੍ਕਾ ਵਿਞ੍ਞਾਤੁਨ੍ਤਿ. ‘‘ਪਾਲ਼ਿਵਿਰੋਧਂ’’ਤਿ ਪੁਬ੍ਬੇ ਦਸ੍ਸਿਤਾਯ ਸਙ੍ਖਾਰ ਯਮਕਪਾਲ਼ਿਯਾ ਵਿਰੋਧਂ.‘‘ਕਾਰਣਂ ਵੁਤ੍ਤਮੇਵਾ’’ਤਿ ਚਿਤ੍ਤਞ੍ਹਿ ਉਪ੍ਪਾਦਕ੍ਖਣੇ ਏਵ ਪਰਿਪੁਣ੍ਣਂ ਪਚ੍ਚਯਂ ਲਭਿਤ੍ਵਾ ਬਲਵਂ ਹੋਤੀਤਿ ਵੁਤ੍ਤਮੇਵ. ‘‘ਤਂ’’ਤਿ ਅਪ੍ਪਨਾਜਵਨਂ. ਅਚਲਮਾਨਂ ਹੁਤ੍ਵਾ. ‘‘ਅਬ੍ਬੋਕਿਣ੍ਣੇ’’ਤਿ ਵੀਥਿਚਿਤ੍ਤ ਵਾਰੇਨ ਅਵੋਕਿਣ੍ਣੇ. ਨ ਤਥਾ ਪਵਤ੍ਤਮਾਨੇਸੁ ਅਙ੍ਗਾਨਿ ਓਸੀਦਨ੍ਤਿ, ਯਥਾ ਠਪਿਤਾਨੇਵ ਹੁਤ੍ਵਾ ਪਵਤ੍ਤਨ੍ਤਿ. ‘‘ਨ ਤਤੋਪਰਂ’’ਤਿ ਤਤੋ ਅਤਿਰੇਕਂ ਰੂਪਵਿਸੇਸਂ ਨ ਜਨੇਤਿ. ‘‘ਕਿਞ੍ਚੀ’’ਤਿ ਕਿਞ੍ਚਿਚਿਤ੍ਤਂ. ‘‘ਉਤ੍ਤਰਕਿਚ੍ਚਂ’’ਤਿ ਉਪਰੂਪਰਿਕਿਚ੍ਚਂ. ‘‘ਅਟ੍ਠ ਪੁਥੁਜ੍ਜਨਾਨਂ’’ਤਿ ਅਟ੍ਠ ਸੋਮਨਸ੍ਸ ਜਵਨਾਨਿ ਹਸਨਂਪਿ ਜਨੇਨ੍ਤਿ. ਛ ਜਵਨਾਨਿ ਪਞ੍ਚਜਵਨਾਨੀਤਿ ਅਧਿਕਾਰੋ. ਤੇਸਂ ਬੁਦ੍ਧਾਨਂ. ਸਿਤਕਮ੍ਮਸ੍ਸਾਤਿ ਸਮ੍ਬਨ੍ਧੋ. ਸਿਤਕਮ੍ਮਂ ਨਾਮ ਮਿਹਿਤਕਮ੍ਮਂ. ‘‘ਕਾਰਣਂ ਵੁਤ੍ਤਮੇਵਾ’’ਤਿ ‘ਰੂਪਸ੍ਸ ਪਨ ਉਪਤ੍ਥਮ੍ਭਕਭੂਤਾ ਉਤੁਆਹਾਰਾ ਪਚ੍ਛਾਜਾਤਪਚ੍ਚਯ ਧਮ੍ਮਾ ਚ ਠਿਤਿਕ੍ਖਣੇ ਏਵ ਫਰਨ੍ਤੀ’ਤਿ ਏਵਂ ਕਾਰਣਂ ਵੁਤ੍ਤਮੇਵ. ‘‘ਉਤੁਨੋ ਬਲਵਭਾਵੋ’’ਤਿ ਰੂਪੁਪ੍ਪਾਦਨਤ੍ਥਾਯ ਬਲਵਭਾਵੋ. ਸਨ੍ਤਤਿਠਿਤਿਯਾ ਬਲਵਭਾਵੋ ਪਨ ਪਚ੍ਛਾਜਾਤਪਚ੍ਚਯਾਯਤ੍ਤੋ ਹੋਤਿ. ਰੂਪਂ ਨ ਸਮੁਟ੍ਠਾਪੇਯ੍ਯ. ਨੋ ਨ ਸਮੁਟ੍ਠਾਪੇਤੀਤਿ ਆਹ ‘‘ਵਕ੍ਖਤਿ ਚਾ’’ਤਿਆਦਿਂ. ਅਜ੍ਝਤ੍ਤ ਸਨ੍ਤਾਨਗਤੋ ਚ ਬਹਿਦ੍ਧਾਸਨ੍ਤਾਨਗਤੋ ਚ ਦੁਵਿਧਾਹਾਰੋਤਿ ਸਮ੍ਬਨ੍ਧੋ.

ਏਤ੍ਥਚਾਤਿਆਦੀਸੁ. ਉਤੁ ਪਞ੍ਚਵਿਧੋ. ਅਜ੍ਝਤ੍ਤਸਨ੍ਤਾਨੇ ਚਤੁਜਵਸੇਨ ਚਤੁਬ੍ਬਿਧੋ, ਬਹਿਦ੍ਧਾ ਸਨ੍ਤਾਨੇ ਉਤੁਜਵਸੇਨ ਏਕੋ. ਤਥਾ ਆਹਾਰੋਪਿ ਪਞ੍ਚਵਿਧੋ. ਤੇਸੁ ਠਪੇਤ੍ਵਾ ਬਹਿਦ੍ਧਾਹਾਰਂ ਅਵਸੇਸਾਨਂ ਅਜ੍ਝਤ੍ਤ ਸਨ੍ਤਾਨੇ ਰੂਪਸਮੁਟ੍ਠਾਪਨੇ ਵਿਵਾਦੋ ਨਤ੍ਥਿ. ਬਹਿਦ੍ਧਾਹਾਰਸ੍ਸ ਪਨ ਅਜ੍ਝਤ੍ਤਸਨ੍ਤਾਨੇ ਰੂਪਸਮੁਟ੍ਠਾਪਨੇ ਵਿਵਾਦੋ ਅਤ੍ਥੀਤਿ ਤਂ ਦਸ੍ਸੇਤੁਂ ‘‘ਏਤ੍ਥ ਚਾ’’ਤਿਆਦਿਮਾਹ. ‘‘ਉਤੁਓਜਾਨਂ ਵਿਯਾ’’ਤਿ ਉਤੁਓਜਾਨਂ ਅਜ੍ਝਤ੍ਤਸਨ੍ਤਾਨੇ ਰੂਪਸਮੁਟ੍ਠਾਪਨਂ ਵਿਯ. ਅਟ੍ਠਕਥਾਪਾਠੇ. ‘‘ਦਨ੍ਤਵਿਚੁਣ੍ਣਿਤਂ ਪਨਾ’’ਤਿ ਦਨ੍ਤੇਹਿ ਸਙ੍ਖਾਦਿਤ੍ਵਾ ਵਿਚੁਣ੍ਣਂ ਕਤਂ ਪਨ. ‘‘ਸਿਤ੍ਥਂ’’ਤਿ ਭਤ੍ਤਚੁਣ੍ਣਸਿਤ੍ਥਂ. ਟੀਕਾਪਾਠੇ. ‘‘ਸਾ’’ਤਿ ਬਹਿਦ੍ਧਾ ਓਜਾ. ‘‘ਨਸਙ੍ਖਾਦਿਤੋ’’ਤਿ ਨ ਸੁਟ੍ਠੁਖਾਦਿਤੋ. ‘‘ਤਤ੍ਤਕੇਨਪੀ’’ਤਿ ਮੁਖੇਠਪਿਤਮਤ੍ਤੇਨਪਿ. ‘‘ਅਬ੍ਭਨ੍ਤਰਸ੍ਸਾ’’ਤਿ ਅਜ੍ਝਤ੍ਤਾਹਾਰਸ੍ਸ. ‘‘ਅਟ੍ਠਅਟ੍ਠਰੂਪਾਨਿ ਸਮੁਟ੍ਠਾਪੇਤੀ’’ਤਿ ਉਪਤ੍ਥਮ੍ਭਨਵਸੇਨ ਸਮੁਟ੍ਠਾਪੇਤਿ, ਜਨਨ ਵਸੇਨ ਪਨ ਅਜ੍ਝਤ੍ਤਿਕਾਹਾਰੋ ਏਵ ਸਮੁਟ੍ਠਾਪੇਤੀਤਿ ਅਧਿਪ੍ਪਾਯੋ. ‘‘ਉਪਾਦਿਨ੍ਨਕਾ’’ਤਿ ਅਜ੍ਝਤ੍ਤ ਸਮ੍ਭੂਤਾ ਵੁਚ੍ਚਨ੍ਤਿ. ਬਹਿਦ੍ਧਾ ਓਜਾਪਿ ਰੂਪਂ ਸਮੁਟ੍ਠਾਪੇਤਿ ਯੇਵਾਤਿ ਸਮ੍ਬਨ੍ਧੋ. ‘‘ਤੇਨਉਤੁਨਾ’’ਤਿ ਅਜ੍ਝਤ੍ਤ ਉਤੁਨਾ. ‘‘ਸੇਦਿਯਮਾਨਾ’’ਤਿ ਉਸ੍ਮਾਪਿਯਮਾਨਾ. ‘‘ਤਾਯ ਚ ਓਜਾਯਾ’’ਤਿ ਅਜ੍ਝਤ੍ਤ ਓਜਾਯ. ‘‘ਮੇਦਸਿਨੇਹੁਪਚਯ ਵਸੇਨਾ’’ਤਿ ਮੇਦਕੋਟ੍ਠਾਸਰਸਸਿਨੇਹ ਕੋਟ੍ਠਾਸਾਨਂ ਵਡ੍ਢਨਵਸੇਨ. ਇਤਰਾਨਿ ਪਨ ਤੀਣਿਰੂਪਸਮੁਟ੍ਠਾਨਾਨਿ. ਪਾਲ਼ਿਪਾਠੇ. ‘‘ਇਨ੍ਦ੍ਰਿਯਾਨੀ’’ਤਿ ਚਕ੍ਖਾਦੀਨਿ ਇਨ੍ਦ੍ਰਿਯ ਰੂਪਾਨਿ. ‘‘ਵਿਹਾਰੋ’’ਤਿ ਸਮਾਪਤ੍ਤਿ ਏਵ ਵੁਚ੍ਚਤਿ. ਸਮਾਪਤ੍ਤਿ ਚਿਤ੍ਤੇਨ ਜਾਤਤ੍ਤਾ ਤਾਨਿ ਇਨ੍ਦ੍ਰਿਯਾਨਿ ਵਿਪ੍ਪਸਨ੍ਨ ਨੀਤਿ ਕਤ੍ਵਾ ਕਸ੍ਮਾ ਵੁਤ੍ਤਨ੍ਤਿ ਪੁਚ੍ਛਤਿ. ‘‘ਉਪਚਰਿਤਤ੍ਤਾ’’ਤਿ ਠਾਨੂਪਚਾਰੇਨ ਵੋਹਰਿਤਤ੍ਤਾ. ‘‘ਤੇਸਂ ਨ ਵਨ੍ਨਂ’’ਤਿ ਇਨ੍ਦ੍ਰਿਯਰੂਪਾਨਂ. ਨਿਧਿਕਣ੍ਡਪਾਠੇ. ਸੁਨ੍ਦਰੋ ਵਣ੍ਣੋ ਯਸ੍ਸਾਤਿ ਸੁਵਣ੍ਣੋ. ਸੁਵਣ੍ਣਸ੍ਸ ਭਾਵੋ ਸੁਵਣ੍ਣਤਾ. ਤਥਾਸੁਸ੍ਸਰਤਾ. ‘‘ਸਰੋ’’ਤਿ ਚ ਸਦ੍ਦੋ ਵੁਚ੍ਚਤਿ. ‘‘ਸੁਸਣ੍ਠਾਨਂ’’ਤਿ ਅਙ੍ਗਪਚ੍ਚਙ੍ਗਾਨਂ ਸੁਟ੍ਠੁਸਣ੍ਠਾਨਂ. ‘‘ਸੁਰੂਪਤਾ’’ਤਿ ਸੁਨ੍ਦਰਰੂਪਕਾਯਤਾ. ‘‘ਯਥਾ’’ਤਿ ਯੇਨਆਕਾਰੇਨ ਸਣ੍ਠਿਤੇ ਸਤਿ. ਤਥਾ ਤੇਨ ਆਕਾਰੇਨ ਸਣ੍ਠਿਤਾ ਹੋਤੀਤਿ ਯੋਜਨਾ.

ਲਹੁਤਾਦਿਤ੍ਤਯੇ. ਦਨ੍ਧਤ੍ਤਾਦਿਕਰਾਨਂ ਧਾਤੁਕ੍ਖੋਭਾਨਂ ਪਟਿਪਕ੍ਖੇਹਿ ਪਚ੍ਚਯੇਹਿ ਸਮੁਟ੍ਠਾਤੀਤਿ ਵਿਗ੍ਗਹੋ. ‘‘ਏਤਸ੍ਸਾ’’ਤਿ ਲਹੁਤਾਦਿਤ੍ਤਯਸ੍ਸ ਵੁਤ੍ਤਾ. ਤਸ੍ਮਾ ਏਤਂ ਲਹੁਤਾਦਿਤ੍ਤਯਂ ਕਮ੍ਮਸਮੁਟ੍ਠਾਨਨ੍ਤਿ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ. ‘‘ਯਮਕੇਸੁਪਿ ਅਦ੍ਧਾਪਚ੍ਚੁਪ੍ਪਨ੍ਨੇਨੇਵ ਗਹਿਤੋ’’ਤਿ ਯਸ੍ਸ ਚਕ੍ਖਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਸੋਤਾਯਤਨਂ ਉਪ੍ਪਜ੍ਜਤੀਤਿ. ਸਚਕ੍ਖੁਕਾਨਂ ਅਸੋਤਕਾਨਂ ਉਪਪਜ੍ਜਨ੍ਤਾਨਂ ਤੇਸਂ ਚਕ੍ਖਾਯਤਨਂ ਉਪ੍ਪਜ੍ਜਤੀਤਿਆਦੀਸੁ ਉਪ੍ਪਾਦਵਾਰੇ ਪਟਿਸਨ੍ਧਿਵਸੇਨ, ਨਿਰੋਧਵਾਰੇ ਚੁਤਿਵਸੇਨ ਅਦ੍ਧਾਪਚ੍ਚੁਪ੍ਪਨ੍ਨਂਵ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਅਕਮ੍ਮਜਾਨਂ ਪਵਤ੍ਤਿਕਾਲੇ ਕਾਲਭੇਦੋ ਵੁਤ੍ਤੋਤਿ. ‘‘ਕਮ੍ਮਵਿਪਾਕਜਾ ਆਬਾਧਾਤਿ ਵੁਤ੍ਤਂ’’ਤਿ ਵੀਥਿਮੁਤ੍ਤਸਙ੍ਗਹੇ ਉਪਚ੍ਛੇਦਕਕਮ੍ਮਦੀਪਨਿਯਂ ‘ਅਤ੍ਥਿ ਵਾਤ ਸਮੁਟ੍ਠਿਤਾ ਆਬਾਧਾ. ਲ. ਅਤ੍ਥਿ ਕਮ੍ਮਵਿਪਾਕਜਾ ਆਬਾਧਾ’ਤਿ ਵੁਤ੍ਤਂ. ਤਾਨਿ ਉਪਪੀਲ਼ਕੁਪਘਾਤਕ ਕਮ੍ਮਾਨਿਪਿ ਵਿਪਤ੍ਤਿਯੋ ਲਭਮਾਨਾਨਿ ਏਵ ਖੋਭੇਤ੍ਵਾ ਨਾਨਾਬਾਧੇ ਉਪ੍ਪਾਦੇਨ੍ਤੀਤਿ ਸਮ੍ਬਨ੍ਧੋ. ਸਰੀਰੇ ਠਨ੍ਤਿ ਤਿਟ੍ਠਨ੍ਤੀਤਿ ਸਰੀਰਟ੍ਠਕਾ. ‘‘ਤਦਨੁਗਤਿਕਾਨਿ ਏਵ ਹੋਨ੍ਤੀ’’ਤਿ ਕਮ੍ਮਜਾਦੀਨਿਪਿ ਖੁਬ੍ਭਿਤਾਨਿ ਏਵ ਹੋਨ੍ਤੀਤਿ ਅਧਿਪ੍ਪਾਯੋ. ਏਤੇਨ ਅਟ੍ਠਸੁ ਕਾਰਣੇਸੁ ਯੇਨਕੇਨਚਿਕਾਰਣੇਨ ਚਕ੍ਖੁਰੋਗਾਦਿਕੇ ਆਬਾਧੇ ਜਾਤੇ ਤਸ੍ਮਿਂ ਅਙ੍ਗੇ ਪਵਤ੍ਤਾਨਿ ਸਬ੍ਬਾਨਿ ਰੋਗਸਮੁਟ੍ਠਾਨਾਨਿ ਆਬਾਧਭਾਵਂ ਗਚ੍ਛਨ੍ਤਿਯੇਵ. ਏਵਂ ਸਨ੍ਤੇਪਿ ਤਪ੍ਪਰਿਯਾਪਨ੍ਨਾਨਿ ਕਮ੍ਮਜਰੂਪਾਨਿ ਤਦਨੁਗਤਿਕਭਾਵੇਨ ਆਬਾਧਭਾਵਂ ਗਚ੍ਛਨ੍ਤਿ, ਨ ਉਜੁਕਤੋ ਕਮ੍ਮਵਸੇਨਾਤਿ ਦੀਪੇਤਿ. ਕਮ੍ਮਸਮੁਟ੍ਠਾਨੋ ਆਬਾਧੋ ਨਾਮ ਨਤ੍ਥਿ. ਤਥਾਪਿ ਅਟ੍ਠਸੁ ਆਬਾਧੇਸੁਪਿ ਅਤ੍ਥਿ ਵਾਤਸਮੁਟ੍ਠਾਨਾ ਆਬਾਧਾਤਿਆਦੀਸੁ ਵਿਯ ਅਤ੍ਥਿ ਕਮ੍ਮਸਮੁਟ੍ਠਾਨਾ ਆਬਾਧਾਤਿ ਅਵਤ੍ਵਾ ਅਤ੍ਥਿ ਕਮ੍ਮਵਿਪਾਕਜਾ ਆਬਾਧਾਤਿ ਵੁਤ੍ਤਂ. ਤਤ੍ਥ ਉਪਪੀਲ਼ਕੋ ਪਘਾਤਕਕਮ੍ਮਾਨਂਵਸੇਨ ਉਪ੍ਪਨ੍ਨੋ ਯੋਕੋਚਿਧਾਤੁਕ੍ਖੋਭੋ ਸੁਤ੍ਤਨ੍ਤਪਰਿਯਾਯੇ ਨ ਕਮ੍ਮਵਿਪਾਕੋਤਿ ਵੁਚ੍ਚਤਿਯੇਵ. ਤਤੋ ਜਾਤੋ ਯੋਕੋਚਿ ਆਬਾਧੋ ਕਮ੍ਮਵਿਪਾਕਜੋਤਿ ਵੁਤ੍ਤੋਤਿ. ਸੁਗਮ੍ਭੀਰਮਿਦਂਠਾਨਂ. ਸੁਟ੍ਠੁਵਿਚਾਰੇਤ੍ਵਾ ਕਥੇਤਬ੍ਬਂ. ‘‘ਯਤੋ’’ਤਿ ਯਸ੍ਮਾ ਕਮ੍ਮਸਮੁਟ੍ਠਾਨਾ ਬਾਧਪਚ੍ਚਯਾ. ਲ. ਲਬ੍ਭਮਾਨੋ ਸਿਯਾ. ਕੇਵਲਂ ਸੋ ਕਮ੍ਮਸਮੁਟ੍ਠਾਨੋ ਆਬਾਧੋ ਨਾਮ ਨਤ੍ਥੀਤਿ ਯੋਜਨਾ. ‘‘ਅਵਿਹਿਂਸਾ ਕਮ੍ਮਨਿਬ੍ਬਤ੍ਤਾ’’ਤਿ ਮੇਤ੍ਤਾਕਰੁਣਾਕਮ੍ਮਨਿਬ੍ਬਤ੍ਤਾ. ਸੁਵਿਦੂਰਤਾਯਚੇਵ ਨਿਰਾਬਾਧਾ ਹੋਨ੍ਤੀਤਿ ਸਮ੍ਬਨ੍ਧੋ. ‘‘ਸਣ੍ਠਿਤਿਯਾ’’ਤਿ ਦੁਕ੍ਖੋਭਨੀਯੇ ਵਿਸੇਸਨਪਦਂ. ਹੇਤੁਪਦਂ ਵਾ ਦਟ੍ਠਬ੍ਬਂ. ਖੋਭੇਤੁਂ ਦੁਕ੍ਕਰਾ ਦੁਕ੍ਖੋਭਨੀਯਾ. ‘‘ਕਾਮਂ’’ਤਿ ਕਿਞ੍ਚਾਪੀਤਿ ਅਤ੍ਥੇ ਨਿਪਾਤਪਦਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

‘‘ਵੁਚ੍ਚਤੇ’’ਤਿਆਦੀਸੁ. ਰੂਪਪਚ੍ਚਯਧਮ੍ਮਾਨਂ ਪਚ੍ਚਯਕਿਚ੍ਚਂ ਤਿਵਿਧਂ. ਜਨਨਞ੍ਚ ਉਪਤ੍ਥਮ੍ਭਨਞ੍ਚ ਅਨੁਪਾਲਨਞ੍ਚ. ਤਤ੍ਥ ਜਨਨਕਿਚ੍ਚਂ ਜਨੇਤਬ੍ਬਾਨਂ ਜਾਤਿਕ੍ਖਣੇ ਏਵ ਲਬ੍ਭਤਿ. ਸੇਸਦ੍ਵਯਂ ਪਨ ਠਿਤਿਕ੍ਖਣੇਪਿ ਲਬ੍ਭਤਿ. ਭਙ੍ਗਕ੍ਖਣੇ ਪਨ ਸਬ੍ਬਂ ਪਚ੍ਚਯਕਿਚ੍ਚਂ ਨਤ੍ਥਿ. ਤਤ੍ਥ ਜਨਨਕਿਚ੍ਚਵਸੇਨ ਵਿਚਾਰੇਨ੍ਤੋ ‘‘ਰੂਪਜਨਕਾਨਂ’’ਤਿਆਦਿਮਾਹ. ‘‘ਅਪਿਚਾ’’ਤਿਆਦੀਸੁ. ‘‘ਤਾਸਂ’’ਤਿ ਉਪਚਯਸਨ੍ਤਤੀਨਂ, ਜਰਤਾ ਅਨਿਚ੍ਚਤਾਨਞ੍ਚ. ‘‘ਤੇਸੂ’’ਤਿ ਕੁਤੋਚਿ ਸਮੁਟ੍ਠਾਨੇਸੁ. ਇਧ ਪਨ ਅਭਿਧਮ੍ਮਤ੍ਥ ਸਙ੍ਗਹੇਪਨ. ‘‘ਏਵਂ ਸਨ੍ਤੇਪੀ’’ਤਿ ਪਚ੍ਚਯਵਿਸੇਸੇਨ ਅਦਿਸ੍ਸਮਾਨਵਿਸੇਸਤ੍ਥੇਪਿ. ‘‘ਸਾਰਤਰ’’ਨ੍ਤਿ ਅਤਿਸਾਰਭੂਤਂ. ‘‘ਸੇਯ੍ਯੋ’’ਤਿ ਸੇਟ੍ਠੋ.

ਰੂਪਸਮੁਟ੍ਠਾਨਾਨੁਦੀਪਨਾ ਨਿਟ੍ਠਿਤਾ.

੧੬੯. ਕਲਾਪਯੋਜਨਾਯਂ. ‘‘ਸਙ੍ਖਾਨੇ’’ਤਿ ਗਣਨੇ. ‘‘ਤੇਨਾ’’ਤਿ ਸਙ੍ਖਾਨਟ੍ਠੇਨ ਏਕਸਦ੍ਦੇਨ ਦਸ੍ਸੇਤੀਤਿ ਸਮ੍ਬਨ੍ਧੋ. ‘‘ਪਿਣ੍ਡੀ’’ਤਿ ਏਕਗ੍ਘਨੋ. ਮੂਲਟੀਕਾਪਾਠੇ. ‘‘ਉਪ੍ਪਾਦਾਦਿਪ੍ਪਵਤ੍ਤਿਤੋ’’ਤਿ ਉਪ੍ਪਾਦਾਦਿਵਸੇਨ ਪਵਤ੍ਤਨਤੋ. ‘‘ਇਤੀ’’ਤਿ ਤਸ੍ਮਾ. ਉਪਾਦਾਰੂਪਾਨਿ ਤ੍ਵੇਵ ਵੁਚ੍ਚਨ੍ਤਿ. ‘‘ਏਵਂ ਵਿਕਾਰਪਰਿਚ੍ਛੇਦ ਰੂਪਾਨਿ ਚ ਯੋਜੇਤਬ੍ਬਾਨੀ’’ਤਿ ਪਞ੍ਚਵਿਕਾਰਰੂਪਾਨਿ ਕਲਾਪਸ੍ਸੇਵ ਚੋਪਨਾਦਿਸਭਾਵਾ ਹੋਨ੍ਤਿ, ਨ ਏਕਮੇਕਸ੍ਸ ਰੂਪਸ੍ਸ. ਤਸ੍ਮਾ ਤਾਨਿ ਏਕੇਕਸ੍ਮਿਂ ਕਲਾਪੇ ਏਕੇਕਾਨਿ ਏਵ ਹੋਨ੍ਤਿ. ਪਰਿਚ੍ਛੇਦਰੂਪਂ ਪਨ ਕਲਾਪਪਰਿਯਾਪਨ੍ਨਂ ਰੂਪਂ ਨ ਹੋਤਿ. ਤਸ੍ਮਾ ਦ੍ਵਿਨ੍ਨਂ ਦ੍ਵਿਨ੍ਨਂ ਕਲਾਪਾਨਂ ਅਨ੍ਤਰਾ ਤਂਪਿ ਏਕੇਕਮੇਵ ਹੋਤੀਤਿ ਦਟ੍ਠਬ੍ਬਂ. ‘‘ਚਤੁਨ੍ਨਂ ਮਹਾਭੂਤਾਨਂ ਨਿਸ੍ਸਯਤਾ ਸਮ੍ਭਵਤੋ’’ਤਿ ਏਤ੍ਥ ਚਤੁਨ੍ਨਂ ਮਹਾਭੂਤਾਨਂਪਿ ਲਕ੍ਖਣਮਤ੍ਤੇਨ ਨਾਨਤ੍ਤਂ ਹੋਤਿ, ਪਵਤ੍ਤਿਵਸੇਨ ਪਨ ਏਕਗ੍ਘਨਤ੍ਤਾ ਸਙ੍ਖਾਨਟ੍ਠੇਨਪਿ ਏਕੋ ਨਿਸ੍ਸਯੋਤਿ ਵਤ੍ਤਬ੍ਬਮੇਵ. ਏਵਞ੍ਹਿਸਤਿ ਏਕਸਦ੍ਦਸ੍ਸ ਅਤ੍ਥ ਚਲਨਂ ਨਤ੍ਥੀਤਿ. ‘‘ਤੇਨ ਸਦ੍ਦੇਨਾ’’ਤਿ ਚਿਤ੍ਤਜਸਦ੍ਦੇਨ. ਅਤ੍ਤਾਨਂ ਮੋਚੇਨ੍ਤੋ ‘‘ਅਧਿਪ੍ਪਾਯੇਨਾ’’ਤਿ ਆਹ. ਥੇਰਸ੍ਸ ਅਧਿਪ੍ਪਾਯੇਨਾਤਿ ਵੁਤ੍ਤਂ ਹੋਤਿ. ਅਤ੍ਤਨੋ ਅਧਿਪ੍ਪਾਯਂ ਦਸ੍ਸੇਨ੍ਤੋ ‘‘ਏਤ੍ਥ ਪਨਾ’’ਤਿਆਦਿਮਾਹ. ਤਤ੍ਥ ‘‘ਸਦ੍ਦੇਨਾ’’ਤਿ ਚਿਤ੍ਤਜਸਦ੍ਦੇਨ. ‘‘ਤਾਯਵਾਚਾਯਾ’’ਤਿ ਵਚੀਮਯਸਦ੍ਦੇਨਾਤਿ ਅਤ੍ਥੋ. ‘‘ਵਿਞ੍ਞਤ੍ਤੀ’’ਤਿ ਵਿਞ੍ਞਾਪਨਂ ਇਚ੍ਚੇਵਤ੍ਥੋ. ਵਿਞ੍ਞਾਪੇਤੀਤਿ ਵਿਞ੍ਞਾਪਿਤੋ. ਤਸ੍ਸ ਭਾਵੋ ਵਿਞ੍ਞਾਵਿਤਤ੍ਤਂ. ਵਿਤਕ੍ਕਵਿਪ੍ਫਾਰਸਦ੍ਦੋ ਨਾਮ ਕਸ੍ਸਚਿ ਮਹਨ੍ਤਂ ਅਤ੍ਥਂ ਚਿਨ੍ਤੇਨ੍ਤਸ੍ਸ ਸੋਕਵਸੇਨ ਵਾ ਤੁਟ੍ਠਿਵਸੇਨ ਵਾ ਬਲਵਵਿਤਕ੍ਕੋ ਪਵਤ੍ਤਤਿ. ਸੋ ਸੋਕਂ ਵਾ ਤੁਟ੍ਠਿਂ ਵਾ ਸਨ੍ਧਾਰੇ ਤੁਂ ਅਸਕ੍ਕੋਨ੍ਤੋ ਦੁਤੀਯੇਨ ਸਦ੍ਧਿਂ ਮਨ੍ਤੇਨ੍ਤੋ ਵਿਯ ਅਤ੍ਤਨੋ ਮੁਖੇਯੇਵ ਅਬ੍ਯਤ੍ਤਂ ਸਦ੍ਦਂ ਕਤ੍ਵਾ ਸਮੁਦੀਰਤਿ. ਪਕਤਿਜਨੋ ਤਂ ਸਦ੍ਦਮਤ੍ਤਂ ਸੁਣਾਤਿ ਵਾ ਨ ਵਾਸੁਣਾਤਿ. ਸੁਣਨ੍ਤੋਪਿ ਅਕ੍ਖਰਂ ਵਾ ਅਤ੍ਥਂ ਵਾ ਅਧਿਪ੍ਪਾਯਂ ਵਾ ਨ ਜਾਨਾਤਿ. ਦਿਬ੍ਬਸੋਤੇਨ ਵਾ ਵਿਜ੍ਜਾਸੋਤੇਨ ਵਾਸੁਣਨ੍ਤੋ ਅਕ੍ਖਰਂਪਿ ਅਤ੍ਥਂਪਿ ਅਧਿਪ੍ਪਾਯਂਪਿ ਜਾਨਾਤਿ. ਜਾਨਿਤ੍ਵਾ ਏਵਂਪਿ ਤੇ ਮਨੋ, ਇਤ੍ਥਂਪਿ ਤੇ ਮਨੋਤਿਆਦਿਸਤਿ. ਅਯਂ ਵਿਤਕ੍ਕਵਿਪ੍ਫਾਰਸਦ੍ਦੋ ਨਾਮ. ਸੋ ਵਿਞ੍ਞਤ੍ਤਿਰਹਿਤੋ ਸੋਤਵਿਞ੍ਞੇਯ੍ਯੋਤਿ ਮਹਾਅਟ੍ਠਕਥਾਯਂ ਵੁਤ੍ਤੋ. ਸਙ੍ਗਹਕਾਰੋਪਨ ਵਚੀਮਯਸਦ੍ਦੋਨਾਮ ਵਿਞ੍ਞਤ੍ਤਿਰਹਿਤੋਤਿ ਵਾ ਅਸੋਤਵਿਞ੍ਞੇਯ੍ਯੋਤਿ ਵਾ ਨਤ੍ਥੀਤਿ ਪਟਿਕ੍ਖਿਪਤਿ. ‘‘ਆਗਤੇ’’ਤਿ ਅਟ੍ਠਕਥਾਸੁ ਆਗਤੇ. ‘‘ਪਚ੍ਚੇਤਬ੍ਬਾ’’ਤਿ ਸਦ੍ਧਾਤਬ੍ਬਾ. ‘‘ਟੀਕਾਸੁਪਨਸ੍ਸਾ’’ਤਿ ਅਸ੍ਸਸਚ੍ਚਸਙ੍ਖੇਪਸ੍ਸ ਦ੍ਵੀਸੁਟੀਕਾਸੁ. ਅਕ੍ਖਰਞ੍ਚ ਪਦਞ੍ਚ ਬ੍ਯਞ੍ਜਨਞ੍ਚ ਅਤ੍ਥੋ ਚਾਤਿ ਦ੍ਵਨ੍ਦੋ. ਅਪ੍ਪਞ੍ਞਾਯਮਾਨਾ ਅਕ੍ਖਰਪਦਬ੍ਯਞ੍ਜਨਤ੍ਥਾ ਯਸ੍ਸਾਤਿ ਵਿਗ੍ਗਹੋ. ‘‘ਅਨ੍ਧਦਮਿਲ਼ਾਦੀਨਂ’’ਤਿ ਅਨ੍ਧਜਾਤਿਕਦਮਿਲ਼ਜਾਤਿਕਾਦੀਨਂ ਮਿਲਕ੍ਖੂਨਂ. ‘‘ਉਕ੍ਕਾਸਿਤਸਦ੍ਦੋ ਚ ਖਿਪਿਤਸਦ੍ਦੋ ਚ ਵਮਿਤਸਦ੍ਦੋ ਚ ਛਡ੍ਡਿਤਸਦ੍ਦੋ ਚਾਤਿ ਦ੍ਵਨ੍ਦੋ. ਆਦਿਸਦ੍ਦੇਨ ਤਾਦਿਸਾ ਉਗ੍ਗਾਰ ਹਿਕ੍ਕਾਰ ਹਸਿਤ ਰੋਦਿਤਾਦਯੋ ਸਙ੍ਗਣ੍ਹਾਤਿ. ਸੇਸਮੇਤ੍ਥਸੁਵਿਞ੍ਞੇਯ੍ਯਂ.

ਕਲਾਪਯੋਜਨਾਨੁਦੀਪਨਾ ਨਿਟ੍ਠਿਤਾ.

੧੬੧. ਰੂਪਪ੍ਪਵਤ੍ਤਿਕ੍ਕਮੇ. ਨਪੁਗ੍ਗਲਵਸੇਨ ਵਿਸੇਸਨਂ ਹੋਤਿ. ਭੂਮਿਵਸੇਨ ਵਿਸੇਸਨਂ ਹੋਤਿ. ਤਞ੍ਚ ਖੋ ਪਵਤ੍ਤਿਕਾਲਵਸੇਨਾਤਿ ਅਧਿਪ੍ਪਾਯੋ.

ਏਤ੍ਥਚਾਤਿਆਦੀਸੁ. ਪੁਰਿਮੇਸੁ ਦ੍ਵੀਸੁ ਯੋਨੀਸੁ ਪਾਲ਼ਿਨਯੇਨ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਨਿਕ੍ਖਨ੍ਤਾ, ਇਤਿ ਤਸ੍ਮਾ ਅਣ੍ਡਜਾਤਿ ਚ ਜਲਾਬੁਜਾਤਿ ਚ ਵੁਚ੍ਚਨ੍ਤਿ. ਕਥਂ ਅਯਂ ਨਯੋ ਪਾਲ਼ਿਨਯੋ ਨਾਮ ਹੋਤੀਤਿ. ਪਾਲ਼ਿਯਂ ਅਣ੍ਡਕੋਸਂ ਵਤ੍ਥਿਕੋਸਂ ਅਭਿਨਿਬ੍ਭਿਜ੍ਜ ਅਭਿਨਿਬ੍ਭਿਜ੍ਜ ਜਾਯਨ੍ਤੀਤਿ ਵਚਨੇਨ ਅਣ੍ਡਤੋ ਜਲਾਬੁਤੋ ਜਾਤਾ ਵਿਜਾਤਾ ਨਿਕ੍ਖਨ੍ਤਾਤਿ ਅਤ੍ਥੋ ਵਿਞ੍ਞਾਯਤਿ. ਅਟ੍ਠਕਥਾਯਂ ਪਨ ਅਣ੍ਡੇਜਾਤਾ ਜਲਾਬੁਮ੍ਹਿਜਾਤਾਤਿ ਵੁਤ੍ਤਂ. ਗਬ੍ਭਪਲਿਵੇਠਨਾਸਯੋ ਨਾਮ ਯੇਨ ਪਲਿਵੇਠਿਤੋ ਗਬ੍ਭੋ ਤਿਟ੍ਠਤਿ. ਵਿਭਾਵਨਿਪਾਠੇ ‘‘ਉਕ੍ਕਂਸਗਤਿ ਪਰਿਚ੍ਛੇਦਵਸੇਨਾ’’ਤਿ ਉਕ੍ਕਟ੍ਠਪ੍ਪਵਤ੍ਤਿਨਿਯਮਨਵਸੇਨ. ਉਕ੍ਕਟ੍ਠਨਯਵਸੇਨਾਤਿ ਵੁਤ੍ਤਂ ਹੋਤਿ. ਅਭਿਰੂਪਸ੍ਸ ਕਞ੍ਞਾ ਦਾਤਬ੍ਬਾਤਿ ਏਤ੍ਥ ਕਞ੍ਞਾ ਦਾਤਬ੍ਬਾਤਿ ਸਾਮਞ੍ਞਤੋ ਵੁਤ੍ਤੇਪਿ ਅਭਿਰੂਪਸ੍ਸ ਪੁਰਿਸਸ੍ਸਾਤਿ ਵੁਤ੍ਤਤ੍ਤਾ ਕਞ੍ਞਾਪਿ ਅਭਿਰੂਪਕਞ੍ਞਾ ਏਵ ਵਿਞ੍ਞਾਯਤਿ. ਅਯਂ ਉਕ੍ਕਟ੍ਠਨਯੋ ਨਾਮ. ‘‘ਤਤ੍ਥ ਤਾਨਿ ਸਬ੍ਬਾਨੀ’’ਤਿਆਦੀਸੁ. ਤਾਨਿਸਬ੍ਬਾਨਿਪਿ ਚਕ੍ਖੁ ਸੋਤ ਘਾਨ ਭਾਵ ਦ੍ਵਯਾਨਿ ਨ ਓਮਕੇਨ ਕਮ੍ਮੇਨ ਲਬ੍ਭਤਿ. ਉਕ੍ਕਟ੍ਠੇਨ ਕਮ੍ਮੇਨ ਏਵ ਲਬ੍ਭਤੀਤਿ ਅਧਿਪ੍ਪਾਯੋ. ਵਿਭਙ੍ਗਪਾਠੇ. ਸਦ੍ਦਾਯਤਨਂ ਨਾਮ ਪਟਿਸਨ੍ਧਿਕਾਲੇ ਨ ਲਬ੍ਭਤੀਤਿ ਵੁਤ੍ਤਂ ‘‘ਏਕਾਦਸਾਯਤਨਾਨੀ’’ਤਿ. ਚਕ੍ਖੁਵੇਕਲ੍ਲਸ੍ਸ ਦਸ, ਸੋਤਵੇਕਲ੍ਲਸ੍ਸ ਅਪਰਾਨਿਦਸ, ਚਕ੍ਖੁ ਸੋਤਵੇਕਲ੍ਲਸ੍ਸਨਵ, ਗਬ੍ਭਸੇਯ੍ਯਸ੍ਸਵਸੇਨ ਸਤ੍ਤਾਯਤਨਾਨਿ. ਪਾਲ਼ਿਯਂ ਓਪਪਾਤਿ ਕਗਬ੍ਭਸੇਯ੍ਯਕਾਨਂ ਏਵ ਵੁਤ੍ਤਤ੍ਤਾ ‘‘ਪਾਲ਼ਿਯਂ ਅਵੁਤ੍ਤਂਪਿਪਨਾ’’ਤਿ ਵੁਤ੍ਤਂ. ਅਵੁਤ੍ਤਮ੍ਪਿ ਚਕ੍ਖਾਦਿਵੇਕਲ੍ਲਂ. ‘‘ਅਞ੍ਞਮਞ੍ਞਂ ਅਵਿਨਾਭਾਵਵੁਤ੍ਤਿਤਾ ਵੁਤ੍ਤਾ’’ਤਿ ਕਥਂ ਵੁਤ੍ਤਾ ਯਸ੍ਸ ਘਾਨਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਜਿਵ੍ਹਾਯਤਨਂ ਉਪ੍ਪਜ੍ਜਤੀਤਿ, ਆਮਨ੍ਤਾ. ਯਸ੍ਸ ਵਾ ਪਨ ਜਿਵ੍ਹਾਯਤਨਂ ਉਪ੍ਪਜ੍ਜਤਿ, ਤਸ੍ਸ ਘਾਨਾਯਤਨਂ ਉਪ੍ਪਜ੍ਜਤੀਤਿ, ਆਮਨ੍ਤਾਤਿਆਦਿਨਾ ਵੁਤ੍ਤਾ ਪੇਯ੍ਯਾਲਮੁਖੇਨ. ਆਚਰਿਯਾਨਨ੍ਦਤ੍ਥੇਰੇ ਨ ਪਨ ਇਚ੍ਛਿਤਨ੍ਤਿ ਸਮ੍ਬਨ੍ਧੋ. ‘‘ਜਿਵ੍ਹਾਵੇਕਲ੍ਲਤਾਵਿਯਾ’’ਤਿ ਜਿਵ੍ਹਾਵੇਕਲ੍ਲਤਾਨਾਮ ਨਤ੍ਥਿ ਵਿਯ. ‘‘ਘਾਨਵੇਕਲ੍ਲਤਾਪਿ ਅਤ੍ਥੀਤਿ ਯੁਤ੍ਤਂ’’ਤਿ ਏਤ੍ਥ ਪਾਲ਼ਿਯਂ ਅਘਾਨਕਾਨਂ ਇਤ੍ਥੀਨਂ ਪੁਰਿਸਾਨਂਤਿ ਇਦਂ ਮਾਤੁਗਬ੍ਭੇ ਘਾਨਾਯਤਨੇ ਅਨੁਪ੍ਪਨ੍ਨੇਯੇਵ ਪੁਰੇਤਰਞ੍ਚ ਵਨ੍ਤਾਨਂ ਇਤ੍ਥਿਪੁਰਿਸਾਨਂ ਵਸੇਨ ਵੁਤ੍ਤਂ. ਨ ਘਾਨਵੇਕਲ੍ਲਾਨਂ ਅਤ੍ਥਿਤਾਯਾਤਿਪਿ ਵਦਨ੍ਤਿ. ਗਬ੍ਭੇ ਸੇਨ੍ਤੀਤਿ ਗਬ੍ਭਸਯਾ. ਗਬ੍ਭਸਯਾ ਏਵ ਗਬ੍ਭਸੇਯ੍ਯਾ.

ਪਵਤ੍ਤਿਕਾਲੇਤਿਆਦੀਸੁ. ਮੂਲਟੀਕਾਪਾਠੇ. ‘‘ਓਰਤੋ’’ਤਿ ਪਟਿਸਨ੍ਧਿਂ ਉਪਾਦਾਯ ਵੁਤ੍ਤਂ. ਏਕਾਦਸਮਸਤ੍ਤਾਹੇ ਅਨਾਗਤੇਤਿ ਵੁਤ੍ਤਂ ਹੋਤਿ. ਰੂਪਾਯਤਨਂ ਨੁਪ੍ਪਜ੍ਜਿਸ੍ਸਤਿ. ਨੋ ਚ ਚਕ੍ਖਾਯਤਨਂ ਨੁਪ੍ਪਜ੍ਜਿਸ੍ਸਤੀਤਿ ਇਦਂ ਅਦ੍ਧਾਪਚ੍ਚੁਪ੍ਪਨ੍ਨਵਸੇਨ ਵੁਤ੍ਤਂ. ਤਸ੍ਮਾ ਪਟਿਸਨ੍ਧਿਤੋ ਪਟ੍ਠਾਯ ਉਪ੍ਪਨ੍ਨਂ ਰੂਪਾਯਤਨਂ ਯਾਵਜੀਵਂਪਿ ਉਪ੍ਪਨ੍ਨਨ੍ਤ੍ਵੇਵ ਵੁਚ੍ਚਤਿ. ਨ ਉਪ੍ਪਜ੍ਜਿਸ੍ਸਮਾਨਨ੍ਤਿ. ਚਕ੍ਖਾਯਤਨਂ ਪਨ ਏਕਾਦਸਮਸਤ੍ਤਾਹਾ ਓਰਤੋ ਠਿਤਸ੍ਸ ਨ ਉਪ੍ਪਨ੍ਨਂ. ਤਦਾ ਅਨੁਪ੍ਪਨ੍ਨਤ੍ਤਾ ਏਕਾਦਸਮੇ ਸਤ੍ਤਾਹੇ ਸਮ੍ਪਤ੍ਤੇ ਉਪ੍ਪਜ੍ਜਿਸ੍ਸਤੀਤਿ ਵਤ੍ਤਬ੍ਬਂ ਹੋਤਿ. ਪਚ੍ਛਿਮ ਭਵਿਕਤ੍ਤਾ ਪਨ ਤਦੁਭਯਮ੍ਪਿ ਭਵਨ੍ਤਰੇ ਨੁਪ੍ਪਜ੍ਜਿਸ੍ਸਤਿਯੇਵਾਤਿ. ਘਾਨਾਯਤਨਂ ਨਿਬ੍ਬਤ੍ਤੇਤੀਤਿ ਘਾਨਾਯਤਨਾਨਿਬ੍ਬਤ੍ਤਤਂ, ਕਮ੍ਮਂ. ਤੇਨ ਕਮ੍ਮੇਨ ਗਹਿਤਪ੍ਪਟਿਸਨ੍ਧਿਕਾਨਂ. ਇਦਞ੍ਚ ਯਦਿ ਤਨ੍ਨਿਬ੍ਬਤ੍ਤਕੇਨ ਕਮ੍ਮੇਨ ਪਟਿਸਨ੍ਧਿਂ ਗਣ੍ਹੇਯ੍ਯੁਂ. ਘਾਨਾਯਤਨੇ ਅਨੁਪ੍ਪਨ੍ਨੇ ਅਨ੍ਤਰਾ ਨ ਕਾਲਙ੍ਕਰੇਯ੍ਯੁਨ੍ਤਿ ਕਤ੍ਵਾ ਵੁਤ੍ਤਂ. ਤਨ੍ਨਿਬ੍ਬਤ੍ਤਕੇਨ ਕਮ੍ਮੇਨ ਪਟਿਸਨ੍ਧਿਂ ਗਣ੍ਹਨ੍ਤਾਪਿ ਤਤੋ ਬਲਵਨ੍ਤੇ ਉਪਚ੍ਛੇਦਕਕਮ੍ਮੇ ਆਗਤੇ ਸਤਿ. ਘਾਨਾਯਤਨੁਪ੍ਪਤ੍ਤਿਕਾਲਂ ਅਪਤ੍ਵਾ ਅਨ੍ਤਰਾ ਨਕਾਲਙ੍ਕਰੋਨ੍ਤੀਤਿ ਨਤ੍ਥਿ. ‘‘ਚਕ੍ਖੁਘਾਨੇਸੁ ਵੁਤ੍ਤੇਸੂ’’ਤਿ ਟੀਕਾਯਂ ਵੁਤ੍ਤੇਸੁ. ‘‘ਅਤ੍ਥਤੋ ਸਿਦ੍ਧਾ ਏਵਾ’’ਤਿ ਏਕਾਦਸਮਸਤ੍ਤਾਹੇ ਉਪ੍ਪਨ੍ਨਾਤਿ ਸਿਦ੍ਧਾ ਏਵ. ‘‘ਈਦਿਸੇਸੁਠਾਨੇਸੂ’’ਤਿ ਸਭਾਵਂ ਵਿਚਾਰੇ ਤੁਂ ਦੁਕ੍ਕਰੇਸੁ ਠਾਨੇਸੁ. ਅਟ੍ਠਕਥਾਯੇਵ ਪਮਾਣਂ ਕਾਤੁਂ ਯੁਤ੍ਤਾਤਿ ਅਧਿਪ੍ਪਾਯੋ. ਅਟ੍ਠਕਥਾਪਾਠੇ. ‘‘ਪੁਰਿਮਂ ਭਵਚਕ੍ਕਂ’’ਤਿ ਅਵਿਜ੍ਜਾਮੂਲਕਂ ਵੇਦਨਾਵਸਾਨਂ ਭਵਚਕ੍ਕਂ. ‘‘ਅਨੁਪੁਬ੍ਬਪ੍ਪਵਤ੍ਤਿਦੀਪਨਤੋ’’ਤਿ ਯਥਾ ਪਚ੍ਛਿਮੇ ਤਣ੍ਹਾਮੂਲਕੇ ਭਵਚਕ੍ਕੇ ਉਪਪਤ੍ਤਿਭਵਪ੍ਪਵਤ੍ਤਿਂ ਵਦਨ੍ਤੇਨ ਭਵਪਚ੍ਚਯਾਜਾਤੀਤਿ ਏਵਂ ਏਕਤੋ ਕਤ੍ਵਾ ਵੁਤ੍ਤਾ, ਨ ਤਥਾ ਪੁਰਿਮੇ ਭਵਚਕ੍ਕੇ. ਤਤ੍ਥ ਪਨ ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣ ਪਚ੍ਚਯਾ ਨਾਮ ਰੂਪਨ੍ਤਿਆਦਿਨਾ ਅਨੁਪੁਬ੍ਬਪ੍ਪਵਤ੍ਤਿਦੀਪਨਤੋ. ‘‘ਸੋ ਪਟਿਕ੍ਖਿਤ੍ਤੋਯੇਵਾ’’ਤਿ ਆਯਤਨਾਨਂ ਕਮਤੋ ਵਿਨਿਚ੍ਛਯਟ੍ਠਾਨੇ ਦੇਸਨਾਕ੍ਕਮੋਵ ਯੁਤ੍ਤੋਤਿ ਵਤ੍ਵਾ ਸੋ ਉਪ੍ਪਤ੍ਤਿਕ੍ਕਮੋ ਪਟਿਕ੍ਖਿਤ੍ਤੋ.

ਸਂਯੁਤ੍ਤਕੇ ਯਕ੍ਖਸਂਯੁਤ੍ਤਪਾਲ਼ਿਯਂ. ਗਾਥਾਸੁ. ‘‘ਕਲਲਾ’’ਤਿ ਕਲਲਤੋ. ‘‘ਅਬ੍ਬੁਦਾ’’ਤਿ ਅਬ੍ਬੁਦਤੋ. ‘‘ਪੇਸਿਯਾ’’ਤਿ ਪੇਸਿਤੋ. ‘‘ਘਨਾ’’ਤਿ ਘਨਤੋ. ‘‘ਜਾਤਿਉਣ੍ਣਂਸੂਹੀ’’ਤਿ ਸੁਦ੍ਧਜਾਤਿਕਸ੍ਸ ਏਲਕਸ੍ਸ ਲੋਮਂਸੂਹਿ. ‘‘ਪਰਿਪਕ੍ਕਸਮੂਹਕਂ’’ਤਿ ਕਲਲਤੋ ਪਰਂ ਥੋਕਂ ਪਰਿਪਕ੍ਕਞ੍ਚ ਸਮੂਹਾਕਾਰਞ੍ਚ ਹੁਤ੍ਵਾ. ‘‘ਵਿਵਤ੍ਤਮਾਨਂ ਤਬ੍ਭਾਵਂ’’ਤਿ ਕਲਲਭਾਵਂ ਵਿਜਹਿਤ੍ਵਾ ਵਤ੍ਤਮਾਨਂ. ‘‘ਵਿਲੀਨਤਿ ਪੁਸਦਿਸਾ’’ਤਿ ਅਗ੍ਗਿਮ੍ਹਿ ਵਿਲੀਨਤਿਪੁਰਸਸਦਿਸਾ. ‘‘ਮੁਚ੍ਚਤੀ’’ਤਿ ਕਪਾਲੇ ਨਲਗ੍ਗਤਿ. ਏਤਾਨਿਜਾਯਨ੍ਤੀਤਿ ਏਵਂ ਅਟ੍ਠਕਥਾਯਞ੍ਚ ਵੁਤ੍ਤਂ. ‘‘ਦ੍ਵਾ ਚਤ੍ਤਾਲੀਸਮੇ ਸਤ੍ਤਾਹੇ’’ਤਿ ਨਵਮਾਸੇ ਅਤਿਕ੍ਕਮ੍ਮ ਵੀਸਤਿਮੇਦਿਵਸੇ. ਯਦਿ ਏਵਂ, ਪਞ੍ਚਮੇਸਤ੍ਤਾਹੇ ਪਞ੍ਚਪ੍ਪਸਾਖਾ ਜਾਯਨ੍ਤਿ, ਏਕਾਦਸਮੇਸਤ੍ਤਾਹੇ ਚਤ੍ਤਾਰਿ ਆਯਤਨਾਨਿ ਜਾਯਨ੍ਤਿ, ਮਜ੍ਝੇਪਨ ਪਞ੍ਚਸਤ੍ਤਾਹਾ ਅਤ੍ਥਿ. ਤਤ੍ਥ ਕਥਨ੍ਤਿ ਆਹ ‘‘ਏਤ੍ਥ ਚਾ’’ਤਿਆਦਿਂ. ‘‘ਛਸਤ੍ਤਾਹਾ’’ਤਿ ਏਕਾਦਸਮੇਨ ਸਦ੍ਧਿਂ ਛਸਤ੍ਤਾਹਾ. ਏਕਾਦਸਮੇਪਿ ਹਿ ਪਚ੍ਛਿਮਦਿਵਸੇ ਜਾਤਤ੍ਤਾ ਛਦਿਵਸਾਨਿ ਅਵਸਿਟ੍ਠਾਨਿ ਹੋਨ੍ਤਿ. ‘‘ਪਰਿਣਤਕਾਲਾ’’ਤਿ ਪਰਿਪਕ੍ਕਕਾਲਾ. ਪਰਿਪਾਕਗਤਾ ਏਵ ਹਿ ਕਮ੍ਮਜਮਹਾਭੂਤਾ ਸੁਪ੍ਪਸਨ੍ਨਾ ਹੋਨ੍ਤਿ. ਤੇਸਞ੍ਚ ਪਸਾਦਗੁਣਾ ਪਸਾਦਰੂਪਾ ਹੋਨ੍ਤੀਤਿ. ‘‘ਤਸ੍ਸਾ’’ਤਿ ਕਲਲਸ੍ਸ. ਵਣ੍ਣਜਾਤਂ ਵਾ ਸਣ੍ਠਾਨਂ ਵਾਤਿ ਸਮ੍ਬਨ੍ਧੋ. ‘‘ਆਕਾਸਕੋਟ੍ਠਾਸਿਕੋ’’ਤਿ ਮਨੁਸ੍ਸੇਹਿ ਆਕਾਸਕੋਟ੍ਠਾਸੇ ਠਪਿਤੋ. ਹੁਤ੍ਵਾਤਿ ਪਾਠਸੇਸੋ. ਕਥਂ ਪਰਮਾਣੁਤੋ ਪਰਿਤ੍ਤਕਂ ਸਿਯਾਤਿ ਆਹ ‘‘ਸੋਹੀ’’ਤਿਆਦਿਂ. ‘‘ਸੋ’’ਤਿ ਪਰਮਾਣੁ. ਪਟਿਸਨ੍ਧਿਕ੍ਖਣੇ ਕਲਲਰੂਪਂ ਕਲਾਪਤ੍ਤਯਪਰਿਮਾਣਂ. ਪਰਮਾਣੁ ਪਨ ਏਕੂਨਪਞ੍ਞਾਸਕਲਾਪਪਰਿਮਾਣੋ. ਤਸ੍ਮਾ ਤਂ ਤਤੋ ਪਰਿਤ੍ਤਕਨ੍ਤਿ ਵੁਤ੍ਤਂ ਹੋਤਿ. ਪਟਿਸਨ੍ਧਿਕ੍ਖਣਤੋ ਪਰਂ ਪਨ ਤਂਪਿ ਖਣੇਖਣੇ ਉਪਚਿਤਮੇਵ ਹੋਤਿ. ‘‘ਧਾਤੂਨਂ’’ਤਿ ਚਤੁਧਾਤੁਵਵਤ੍ਥਾਨੇ ਆਗਤਾਨਂ ਚਤੁਨ੍ਨਂ ਮਹਾਭੂਤਾਨਂ. ਕਲਲਸ੍ਸਵਾ ਉਪਚਿਤਪ੍ਪਮਾਣਂ ਗਹੇਤ੍ਵਾ ਵੁਤ੍ਤਨ੍ਤਿਪਿ ਯੁਜ੍ਜਤਿ. ‘‘ਵਤ੍ਥੁਸ੍ਮਿਂ’’ਤਿ ਅਬ੍ਬੁਦਾਦਿਵਤ੍ਥੁਮ੍ਹਿ. ‘‘ਜਲਾਬੁਮੂਲਾਨੁਸਾਰੇਨਾ’’ਤਿ ਜਲਾਬੁਜਾਤਕਾਲੇ ਤਸ੍ਸ ਮੂਲਾਨੁ ਸਾਰੇਨਾਤਿ ਅਧਿਪ੍ਪਾਯੋ. ਗਾਥਾਯਂ. ‘‘ਮਾਤੁਤਿਰੋ ਕੁਚ੍ਛਿਗਤੋ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ‘‘ਮਾਤੁਕੁਚ੍ਛਿਗਤੋ ਤਿਰੋ’’ਤਿ ਵੁਤ੍ਤਂ. ਤੇਨਾਹ ‘‘ਮਾਤੁਯਾ ਤਿਰੋਕੁਚ੍ਛਿ ਗਤੋ’’ਤਿ. ‘‘ਛਿਦ੍ਦੋ’’ਤਿ ਸੁਖੁਮੇਹਿ ਛਿਦ੍ਦੇਹਿ ਸਮਨ੍ਨਾਗਤੋ. ਲਦ੍ਧਂਵਾ ਪਾਨਭੋਜਨਂ. ‘‘ਤਤੋ ਪਟ੍ਠਾਯਾ’’ਤਿ ਸਤ੍ਤਰਸਮਭਵਙ੍ਗਚਿਤ੍ਤਤੋ ਪਟ੍ਠਾਯ. ‘‘ਰੂਪਸਮੁਟ੍ਠਾਨੇ ਵੁਤ੍ਤਮੇਵਾ’’ਤਿ ਰੂਪਸਮੁਟ੍ਠਾਨੇ ਮੂਲਟੀਕਾਵਾਦ ਵਿਚਾਰਣਾਯਂ ‘ਯਂ ਪਿਤਤ੍ਥ ਨ ਚ ਯੁਤ੍ਤ’ਨ੍ਤਿਆਦਿਨਾ ਵੁਤ੍ਤਮੇਵ. ‘‘ਅਜ੍ਝੋਹਟਾਹਾਰਾਭਾਵਤੋ’’ਤਿ ਬਹਿਦ੍ਧਾਹਾਰਾਭਾਵਤੋਤਿ ਅਧਿਪ੍ਪਾਯੋ. ‘‘ਤਤ੍ਥਾ’’ਤਿ ਰੂਪਬ੍ਰਹ੍ਮਲੋਕੇ. ਅਭਾਵਂ ਵਣ੍ਣੇਤਿ. ਕਸ੍ਮਾਪਨ ਵਣ੍ਣੇਤਿ, ਨਨੁ ਵਣ੍ਣੇਨ੍ਤਸ੍ਸ ਅਟ੍ਠਕਥਾ ਵਿਰੋਧੋ ਸਿਯਾਤਿ. ਵਿਰੋਧੋ ਵਾ ਹੋਤੁ, ਅਵਿਰੋਧੋ ਵਾ. ਪਾਲ਼ਿਯੇਵ ਪਮਾਣਨ੍ਤਿ ਦਸ੍ਸੇਨ੍ਤੋ ‘‘ਰੂਪਧਾਤੁਯਾ’’ਤਿਆਦਿਨਾ ਵਿਭਙ੍ਗੇ ਪਾਲ਼ਿਂ ਆਹਰਿ. ਤਤ੍ਥ ‘‘ਰੂਪਧਾਤੁਯਾ’’ਤਿ ਰੂਪਲੋਕਧਾਤੁਯਾ. ਰੂਪ ਬ੍ਰਹ੍ਮਲੋਕੇਤਿ ਵੁਤ੍ਤਂ ਹੋਤਿ. ‘‘ਉਪਪਤ੍ਤਿਕ੍ਖਣੇ’’ਤਿ ਪਟਿਸਨ੍ਧਿਕ੍ਖਣੇ. ਆਚਰਿਯਸ੍ਸ ਅਧਿਪ੍ਪਾਯਂ ਵਿਭਾਵੇਨ੍ਤੋ ‘‘ਏਤ੍ਥਚਾ’’ਤਿਆਦਿਮਾਹ. ‘‘ਫੋਟ੍ਠਬ੍ਬੇ ਪਟਿਕ੍ਖਿਤ੍ਤੇਪੀ’’ਤਿ ਪਞ੍ਚਾਯਤਨਾਨੀਤਿ ਵਾ ਪਞ੍ਚਧਾਤੁਯੋਤਿ ਵਾ ਪਰਿਚ੍ਛੇਦਕਰਣਮੇਵ ਪਟਿਕ੍ਖਿ ਪਨਂ ਦਟ੍ਠਬ੍ਬਂ. ‘‘ਕਿਚ੍ਚਨ੍ਤਰ ਸਬ੍ਭਾਵਾ’’ਤਿ ਫੋਟ੍ਠਬ੍ਬਕਿਚ੍ਚਤੋ ਕਿਚ੍ਚਨ੍ਤਰਸ੍ਸ ਵਿਜ੍ਜਮਾਨਤ੍ਤਾ. ਕਿਮ੍ਪਨ ਕਿਚ੍ਚਨ੍ਤਰਨ੍ਤਿ. ਰੂਪਕਾਯਸ੍ਸ ਪਵਤ੍ਤਿਯਾ ਹੇਤੁਪਚ੍ਚਯਕਿਚ੍ਚਂ. ਮਹਾਭੂਤਾ ਹੇਤੂ ਮਹਾਭੂਤਾ ਪਚ੍ਚਯਾ ਰੂਪਕ੍ਖਨ੍ਧਸ੍ਸ ਪਞ੍ਞਾਪਨਾਯਾਤਿ ਹਿ ਭਗਵਤਾ ਵੁਤ੍ਤਂ. ਤਤ੍ਥ ਹੇਤੁਕਿਚ੍ਚਂ ਨਾਮ ਰੂਪਜਨਨਕਿਚ੍ਚਂ. ਪਚ੍ਚਯ ਕਿਚ੍ਚਂ ਨਾਮ ਰੂਪੂਪਤ੍ਥਮ੍ਭਨ ਕਿਚ੍ਚਂ. ਕਿਚ੍ਚਨ੍ਤਰਮੇਵਨਤ੍ਥੀਤਿ ਘਾਨਾਦੀਨਂ ਵਿਸਯ ਗੋਚਰਭਾਵਕਿਚ੍ਚਂ ਤੇਸਂ ਕਿਚ੍ਚਂ ਨਾਮ, ਤਤੋ ਅਞ੍ਞਂ ਕਿਚ੍ਚਂ ਨਾਮ ਨਤ੍ਥਿ. ‘‘ਯੇਨਾ’’ਤਿ ਕਿਚ੍ਚਨ੍ਤਰੇਨ. ‘‘ਤੇ’’ਤਿ ਗਨ੍ਧਾਦਯੋ. ਇਦਾਨਿ ਅਟ੍ਠਕ ਤਾਨੁਗਤਂ ਵਾਦਂ ਦਸ੍ਸੇਨ੍ਤੋ ‘‘ਯਥਾਪਨਾ’’ਤਿਆਦਿਮਾਹ. ‘‘ਯੇਨ ਕਿਚ੍ਚਵਿਸੇਸੇਨਾ’’ਤਿ ਵਿਸਯਗੋਚਰਭਾਵਕਿਚ੍ਚਵਿਸੇਸੇਨ. ਰੂਪਜਨਨਰੂਪੂਪਤ੍ਥਮ੍ਭਨ ਕਿਚ੍ਚਵਿਸੇਸੇਨ ਚ. ‘‘ਸਬ੍ਬਤ੍ਥਾ’’ਤਿ ਸਬ੍ਬਸ੍ਮਿਂ ਪਾਲ਼ਿਪ੍ਪਦੇਸੇ. ‘‘ਤੇਸਂ’’ਤਿ ਗਨ੍ਧਾਦੀਨਂ. ‘‘ਤਤ੍ਥਾ’’ਤਿ ਰੂਪਲੋਕੇ. ‘‘ਨਿਸ੍ਸਨ੍ਦ ਧਮ੍ਮਮਤ੍ਤਭਾਵੇਨਾ’’ਤਿ ਏਤ੍ਥ ਯਥਾ ਅਗ੍ਗਿਮ੍ਹਿ ਜਾਤੇ ਤਸ੍ਸ ਨਿਸ੍ਸਨ੍ਦਾ ਨਾਮ ਇਚ੍ਛਨ੍ਤਸ੍ਸਪਿ ਅਨਿਚ੍ਛਨ੍ਤਸ੍ਸਪਿ ਜਾਯਨ੍ਤਿਯੇਵ. ਵਣ੍ਣੋਪਿ ਜਾਯਤਿ, ਓਭਾਸੋਪਿ, ਗਨ੍ਧੋਪਿ, ਰਸੋਪਿ, ਧੂਮੋਪਿ, ਪੁਪ੍ਫੁਲ੍ਲਾਨਿਪਿ ਕਦਾਚਿ ਜਾਯਨ੍ਤਿਯੇਵ. ਤੇਹਿ ਵਣ੍ਣਾਦੀਹਿ ਕਰਣੀਯੇ ਕਿਚ੍ਚਵਿਸੇਸੇ ਸਤਿਪਿ ਅਸਤਿਪਿ. ਤਥਾ ਮਹਾਭੂਤੇਸੁ ਜਾਤੇਸੁ ਤੇਸਂ ਨਿਸ੍ਸਨ੍ਦਾ ਨਾਮ ਇਚ੍ਛਨ੍ਤਸ੍ਸਪਿ ਅਨਿਚ੍ਛਨ੍ਤਸ੍ਸਪਿ ਕਿਚ੍ਚਵਿਸੇਸੇ ਸਤਿਪਿ ਅਸਤਿਪਿ ਜਾਯਨ੍ਤਿਯੇਵ. ਏਵਂ ਨਿਸ੍ਸਨ੍ਦਧਮ੍ਮਮਤ੍ਤਭਾਵੇਨ. ਅਨੁਪ੍ਪਵੇਸੋ ਯੁਤ੍ਤੋ ਸਿਯਾ ਅਜ੍ਝਤ੍ਤ ਸਨ੍ਤਾਨੇਤਿ ਅਧਿਪ੍ਪਾਯੋ. ਬਹਿਦ੍ਧਾ ਸਨ੍ਤਾਨੇ ਪਨ ਵਤ੍ਥਾ ਭਰਣ ਵਿਮਾਨਾਦੀਸੁ ਤੇਸਂ ਭਾਵੋ ਇਚ੍ਛਿ ਤਬ੍ਬੋ ਸਿਯਾ. ਅਜ੍ਝਤ੍ਤੇਪਿ ਵਾ ਕਾਯਂ ਓਲ਼ਾਰਿਕਂ ਕਤ੍ਵਾ ਮਾਪਿਤਕਾਲੇਤਿ. ਏਤ੍ਥ ਚ ‘‘ਧਮ੍ਮਾਯਤਨ ਧਮ੍ਮਧਾਤੂਸੁ ਅਨੁਪ੍ਪਵੇਸੋ’’ਤਿ ਏਤ੍ਥ ਅਟ੍ਠਸਾਲਿਨਿਯਂ ਤਾਵ. ਯੇ ਪਨ ਅਨਾਪਾਤਾਗਤਾ ਰੂਪਾਦਯੋਪਿ ਧਮ੍ਮਾਰਮ੍ਮਣਮਿਚ੍ਚੇਵ ਵਦਨ੍ਤੀਤਿ ਵੁਤ੍ਤਂ. ਤਂ ਤਤ੍ਥ ਪਟਿਕ੍ਖਿਤ੍ਤਂ. ਅਨਾਪਾਤਾਗਮਨਂ ਨਾਮ ਵਿਸਯਗੋਚਰ ਕਿਚ੍ਚਰਹਿਤਤਾ ਵੁਚ੍ਚਤਿ. ਤਞ੍ਚ ਮਨੁਸ੍ਸਾਨਮ੍ਪਿ ਦੇਵਾਨਮ੍ਪਿ ਬ੍ਰਹ੍ਮਾਨਮ੍ਪਿ ਪਸਾਦਰੂਪੇਸੁ ਅਨਾਪਾਤਾ ਗਮਨਮੇਵ ਅਧਿਪ੍ਪੇਤਂ. ਤਂ ਪਨ ਅਤ੍ਥਿਨਤ੍ਥੀਤਿ ਵਿਚਾਰੇਤ੍ਵਾ ਕਥੇਤਬ੍ਬਂ. ਅਪਿ ਚ ਨਿਸ੍ਸਨ੍ਦਧਮ੍ਮਾ ਨਾਮ ਓਲ਼ਾਰਿਕਾਨਂ ਮਹਾਭੂਤਾਨਂ ਵਿਵਿਧਾਕਾਰਾਪਿ ਭਵੇਯ੍ਯੁਂ. ਬ੍ਰਹ੍ਮਾਨਂ ਪਨ ਅਜ੍ਝਤ੍ਤ ਰੂਪਂ ਅਪ੍ਪਨਾ ਪਤ੍ਤਕਮ੍ਮਵਿਸੇਸੇਨ ਪਵਤ੍ਤਂ ਅਤਿਸੁਖੁਮਂ ਹੋਤਿ. ਤਸ੍ਮਾ ਕਾਮਸਤ੍ਤ ਸਨ੍ਤਾਨੇ ਵਿਯ ਤਤ੍ਥ ਪਰਿਪੁਣ੍ਣਂ ਨਿਸ੍ਸਨ੍ਦਰੂਪਂ ਨਾਮ ਵਿਚਾਰੇਤਬ੍ਬਮੇਵ. ਧਮ੍ਮਾ ਰਮ੍ਮਣਞ੍ਚ ਮੁਖ੍ਯਧਮ੍ਮਾਰਮ੍ਮਣਂ ਅਨੁਲੋਮ ਧਮ੍ਮਾਯਤਨਨ੍ਤਿ ਪਾਲ਼ਿਯਂ ਵੁਤ੍ਤਂ ਨਤ੍ਥਿ ਯੇਵਾਤਿ. ‘‘ਜੀਵਿਤ ਛਕ੍ਕਞ੍ਚਾ’’ਤਿ ਵਤ੍ਤਬ੍ਬਂ ਰੂਪਲੋਕੇ. ‘‘ਤਤ੍ਥਾ’’ਤਿ ਅਸਞ੍ਞਸਤ੍ਤੇ. ਕਾਮਲੋਕੇ ਜੀਵਿਤਨਵਕਂ ਕਸ੍ਮਾ ਵਿਸੁਂ ਨ ਵੁਤ੍ਤਨ੍ਤਿ. ਪਟਿਸਨ੍ਧਿਕ੍ਖਣੇ ਕਸ੍ਮਾ ਨ ਵੁਤ੍ਤਂ. ਪਵਤ੍ਤਿਕਾਲੇਪਿ ਵਿਸੁਂ ਨ ਵੁਤ੍ਤਮੇਵ. ‘‘ਆਹਾਰੂਪਤ੍ਥਮ੍ਭਕਸ੍ਸਾ’’ਤਿ ਆਹਾਰਸਙ੍ਖਾਤਸ੍ਸ ਰੂਪੂਪਤ੍ਥਮ੍ਭਕਸ੍ਸ. ‘‘ਸਕਲਸਰੀਰ ਬ੍ਯਾਪਿਨੋ ਅਨੁਪਾਲਕਜੀਵਿਤਸ੍ਸਾ’’ਤਿ ਕਾਯਦਸਕਭਾਵਦਸਕੇਸੁ ਪਰਿਯਾਪਨ੍ਨਸ੍ਸ ਜੀਵਿਤਸ੍ਸ. ‘‘ਏਤ ਦੇਵਾ’’ਤਿ ਜੀਵਿਤਨਵਕਮੇਵ. ‘‘ਤਤ੍ਥਾ’’ਤਿ ਰੂਪਲੋਕੇ. ਉਦਯਭੂਤਸ੍ਸਾ’’ਤਿ ਵਡ੍ਢਿਭੂਤਸ੍ਸ. ‘‘ਦ੍ਵੀਸੁ ਅਗ੍ਗੀਸੂ’’ਤਿ ਪਾਚਕਗ੍ਗਿਸ੍ਮਿਞ੍ਚ ਕਾਯਗ੍ਗਿਸ੍ਮਿਞ੍ਚ. ਆਤਙ੍ਕੋ ਵੁਚ੍ਚਤਿ ਰੋਗੋ. ਬਹੁਕੋ ਆਤਙ੍ਕੋ ਯਸ੍ਸਾਤਿ ਵਿਗ੍ਗਹੋ. ‘‘ਵਿਸਮਵੇਪਾਕਿਨਿਯਾ’’ਤਿ ਵਿਸਮਂ ਪਾਚੇਨ੍ਤਿਯਾ. ‘‘ਗਹਣਿਯਾ’’ਤਿ ਉਦਰਗ੍ਗਿਨਾ. ‘‘ਪਧਾਨਕ੍ਖਮਾਯਾ’’ਤਿ ਪਧਾਨ ਸਙ੍ਖਾਤਂ ਭਾਵਨਾਰਬ੍ਭਕਿਚ੍ਚਂ ਖਮਨ੍ਤਿਯਾ. ‘‘ਏਤਂ’’ਤਿ ਜੀਵਿਤਨਵਕਂ. ‘‘ਥੇਰੇਨ ਚਾ’’ਤਿ ਅਨੁਰੁਦ੍ਧਤ੍ਥੇਰੇਨ ਚ. ‘‘ਏਤਂ’’ਤਿ ਜੀਵਿਤ ਨਵਕਂ. ‘‘ਨਿਰੋਧਕ੍ਕਮੋ’’ਤਿ ਮਰਣਾਸਨ੍ਨਕਾਲੇ ਨਿਰੋਧਕ੍ਕਮੋ. ‘‘ਏਤ੍ਥਾ’’ਤਿ ਰੂਪਲੋਕੇ. ਕਲ਼ੇਵਰਂ ਵੁਚ੍ਚਤਿ ਮਤਸਰੀਰਂ. ਤਸ੍ਸ ਨਿਕ੍ਖੇਪੋ ਕਲ਼ੇਵਰਨਿਕ੍ਖੇਪੋ. ਅਞ੍ਞੇਸਞ੍ਚ ਓਪਪਾਤਿਕਾਨਂ ਕਲ਼ੇਵਰਨਿਕ੍ਖੇਪੋ ਨਾਮ ਨਤ੍ਥਿ. ਕਸ੍ਮਾ ਪਨ ਤੇਸਂ ਕਲ਼ੇਵਰਨਿਕ੍ਖੇਪੋ ਨਾਮ ਨਤ੍ਥੀਤਿ ਆਹ ‘‘ਤੇਸਞ੍ਹੀ’’ਤਿਆਦਿਂ. ਵਿਭਾਵਨਿਪਾਠੇ. ਸਬ੍ਬੇਸਂਪਿ ਰੂਪਬ੍ਰਹ੍ਮਾਨਂ. ਆਹਾਰਸਮੁਟ੍ਠਾਨਾਨਂ ਰੂਪਾਨਂ ਅਭਾਵਤੋ ਤਿਸਮੁਟ੍ਠਾਨਾਨੀਤਿ ਵੁਤ੍ਤਂ. ਅਸਞ੍ਞਸਤ੍ਤੇ ਚਿਤ੍ਤਸਮੁਟ੍ਠਾਨਾਨਮ੍ਪਿ ਅਭਾਵਤੋ ਦ੍ਵਿਸਮੁਟ੍ਠਾਨਾਨੀਤਿ ਵੁਤ੍ਤਂ. ‘‘ਤਾਨੀ’’ਤਿ ਮਰਣਾਸਨ੍ਨ ਚਿਤ੍ਤਸਮੁਟ੍ਠਾਨਾਨਿ. ਤਂ ਪਰਿਮਾਣਂ ਅਸ੍ਸਾਤਿ ਤਾਵਤ੍ਤਕਂ. ‘‘ਲਹੁਕਗਰੁਕਤਾਦਿਵਿਕਾਰੋ’’ਤਿ ਸਕਲਰੂਪਕਾਯਸ੍ਸ ਲਹੁਕਗਰੁਕਾਦਿਵਿਕਾਰੋ. ਅਪਿ ਚ ਤਤ੍ਥ ਦਨ੍ਧਤ੍ਤਾਦਿਕਰ ਧਾਤੁਕ੍ਖੋਭਪਚ੍ਚਯਾਨਂ ਸਬ੍ਬਸੋ ਅਭਾਵਤੋ ਨਿਚ੍ਚਕਾਲਮ੍ਪਿ ਸਕਲਸਰੀਰਸ੍ਸ ਲਹੁਤਾਦਿਗੁਣੋ ਵਤ੍ਤਤਿਯੇਵ. ਕਿਂ ਤਤ੍ਥ ਪਟਿਪਕ੍ਖ ਧਮ੍ਮਪ੍ਪਵਤ੍ਤਿ ਚਿਨ੍ਤਾਯ. ਤਥਾ ਅਸਞ੍ਞਸਤ੍ਤੇਪਿ ਰੁਪ੍ਪਨਵਿਕਾਰ ਚਿਨ੍ਤਾਯਾਤਿ.

ਰੂਪਪ੍ਪਵਤ੍ਤਿਕ੍ਕਮਾਨੁਦੀਪਨਾ ਨਿਟ੍ਠਿਤਾ.

੧੬੧. ਨਿਬ੍ਬਾਨਸਙ੍ਗਹੇ. ਦ੍ਵੀਸੁ ਨਿਬ੍ਬਾਨਪਦੇਸੁ ਪਥਮਪਦਂ ਅਵਿਞ੍ਞਾਤਤ੍ਥਂ ਸਾਮਞ੍ਞ ਪਦਂ. ਦੁਤੀਯਂ ਵਿਞ੍ਞਾ ਤਤ੍ਥਂ ਵਿਸੇਸਪਦਂ. ਕਿਲੇਸੇ ਸਮੇਤੀਤਿ ਸਮਣੋ. ਅਰਿਯਪੁਗ੍ਗਲੋ. ਸਮਣਸ੍ਸ ਭਾਵੋ ਸਾਮਞ੍ਞਂ. ਅਰਿਯਮਗ੍ਗੋ. ਸਾਮਞ੍ਞਸ੍ਸ ਫਲਾਨਿ ਸਾਮਞ੍ਞਫਲਾਨਿ. ਲੋਕਤੋ ਉਤ੍ਤਰਤਿ ਅਤਿਕ੍ਕਮਤੀਤਿ ਲੋਕੁਤ੍ਤਰਂ. ਲੋਕੇ ਨ ਪਞ੍ਞਾਵੀਯਤੀਤਿ ਪਞ੍ਞਤ੍ਤੀਤਿ ਇਮਮਤ੍ਥਂ ਸਨ੍ਧਾਯ ‘‘ਨਹੀ’’ਤਿਆਦਿਮਾਹ. ਚਤ੍ਤਾਰਿਮਗ੍ਗਞ੍ਞਾਣਾਨਿ ਚਤੁਮਗ੍ਗਞ੍ਞਾਣਨ੍ਤਿ ਏਵਂ ਸਮਾਸਵਸੇਨ ਏਕਵਚਨਨ੍ਤਂ ਪਦਂ ਵਾਕ੍ਯਂ ਪਤ੍ਵਾ ਬਹੁਵਚਨਨ੍ਤਂ ਹੋਤੀਤਿਆਹ ‘‘ਚਤੂਹਿ ਅਰਿਯਮਗ੍ਗਞ੍ਞਾਣੇਹੀ’’ਤਿ. ‘‘ਤਾਦਿਸਮ੍ਹਾ’’ਤਿ ਅਰਿਯਮਗ੍ਗਸਦਿਸਮ੍ਹਾ. ‘‘ਵਿਮੁਖਾਨਂ’’ਤਿ ਪਰਮ੍ਮੁਖਾਨਂ. ‘‘ਜਚ੍ਚਨ੍ਧਾਨਂ ਵਿਯਾ’’ਤਿ ਜਚ੍ਚਨ੍ਧਾਨਂ ਚਨ੍ਦਮਣ੍ਡਲਸ੍ਸ ਅਵਿਸਯਭਾਵੋ ਵਿਯ. ‘‘ਤਸ੍ਸਾ’’ਤਿ ਨਿਬ੍ਬਾਨਸ੍ਸ. ਤਤ੍ਥ ‘‘ਜਚ੍ਚਨ੍ਧਾਨਂ’’ਤਿ ਅਵਿਸਯਪਦੇ ਸਾਮਿਪਦਂ. ‘‘ਤਸ੍ਸਾ’’ਤਿ ਭਾਵਪਦਂ. ‘‘ਯਂ ਕਿਞ੍ਚੀ’’ਤਿ ਕਿਞ੍ਚਿਯਂ ਅਤ੍ਥਜਾਤਂ. ਅਸ੍ਸਨਿਬ੍ਬਾਨਸ੍ਸ ਸਿਦ੍ਧਤਨ੍ਤਿ ਸਮ੍ਬਨ੍ਧੋ. ਅਪਾਕਟਸ੍ਸ ਧਮ੍ਮਸ੍ਸ. ਵਾਯਾਮੋਪਿ ਨਾਮ ਨ ਅਤ੍ਥਿ. ਕੁਤੋ ਤਸ੍ਸ ਸਚ੍ਛਿਕਰਣਂ ਭਵਿਸ੍ਸਤੀਤਿ ਅਧਿਪ੍ਪਾਯੋ. ‘‘ਯੇਨਾ’’ਤਿ ਵਾਯਾਮੇਨ. ‘‘ਨਿਬ੍ਬਾਨੇਨ ਵਿਨਾ’’ਤਿ ਨਿਬ੍ਬਾਨਾਰਮ੍ਮਣਂ ਅਲਭਿਤ੍ਵਾਤਿ ਵੁਤ੍ਤਂ ਹੋਤਿ. ‘‘ਅਕਿਚ੍ਚਸਿਦ੍ਧਿਂ’’ਤਿ ਕਿਲੇਸਪ੍ਪਹਾਨ ਕਿਚ੍ਚਸ੍ਸ ਅਸਿਦ੍ਧਿਂ. ‘‘ਤਤੋ’’ਤਿ ਤਸ੍ਮਾ. ‘‘ਵਧਾਯਾ’’ਤਿ ਵਧਿਤੁਂ. ‘‘ਪਰਿਸਕ੍ਕਨ੍ਤਾ’’ਤਿ ਵਾਯਮਨ੍ਤਾ. ਗਾਥਾਯਂ. ‘‘ਅਨ੍ਤੋਜਟਾ’’ਤਿ ਅਜ੍ਝਤ੍ਤਸਨ੍ਤਾਨੇ ਤਣ੍ਹਾਜਟਾ, ਤਣ੍ਹਾਵਿਨਦ੍ਧਾ. ‘‘ਬਹਿਜਟਾ’’ਤਿ ਬਹਿਦ੍ਧਾਸਨ੍ਤਾਨੇ ਤਣ੍ਹਾਜਟਾ, ਤਣ੍ਹਾਵਿਨਦ੍ਧਾ. ‘‘ਤਸ੍ਸਾ’’ਤਿ ਤਣ੍ਹਾਯ. ‘‘ਵਤ੍ਥੁਤੋ’’ਤਿ ਵਿਸੁਂਵਿਸੁਂ ਜਾਤਸਰੂਪਤੋ. ਪਰਿਨਿਬ੍ਬਾਯਿਂਸੁ, ਪਰਿਨਿਬ੍ਬਾਯਨ੍ਤਿ, ਪਰਿਨਿਬ੍ਬਾਯਿਸ੍ਸਨ੍ਤੀਤਿ ਪਰਿਨਿਬ੍ਬੁਤਾ. ਤਕਾਰਪਚ੍ਚਯਸ੍ਸ ਕਾਲਤ੍ਤਯੇਪਿ ਪਵਤ੍ਤਨਤੋ. ਯਥਾ ਦਿਟ੍ਠਾ, ਸੁਤਾ, ਮੁਤਾ, ਵਿਞ੍ਞਾਤਾ,ਤਿ. ਵਿਸਿਟ੍ਠਂ ਕਤ੍ਵਾ ਜਾਨਿਤਬ੍ਬਨ੍ਤਿ ਵਿਞ੍ਞਾਣਂ. ਨ ਨਿਦਸ੍ਸਿਤਬ੍ਬਨ੍ਤਿ ਅਨਿਦਸ੍ਸਨਂ. ਨਤ੍ਥਿ ਅਨ੍ਤੋ ਏਤਸ੍ਸਾਤਿ ਅਨਨ੍ਤਂ. ਸਬ੍ਬਤੋ ਪਵਤ੍ਤਾ ਗੁਣਪ੍ਪਭਾ ਏਤਸ੍ਸਾਤਿ ਸਬ੍ਬਤੋਪਭਂ. ‘‘ਭਗਵਤਾ ਵੁਤ੍ਤਂ’’ਤਿ ਦੀਘਨਿਕਾਯੇ ਕੇਵਟ੍ਟਸੁਤ੍ਤੇ ਵੁਤ੍ਤਂ. ‘‘ਸਵਨ੍ਤਿਯੋ’’ਤਿ ਮਹਾਨਦਿਯੋ ਵਾ ਕੁਨ੍ਨਦਿਯੋ ਵਾ. ‘‘ਅਪ੍ਪੇਨ੍ਤੀ’’ਤਿ ਪਵਿਸਨ੍ਤਿ. ‘‘ਧਾਰਾਤਿ’’ ਮੇਘਵੁਟ੍ਠਿਧਾਰਾ. ਬੁਦ੍ਧੇਸੁ ਅਨੁਪ੍ਪਜ੍ਜਨ੍ਤੇਸੁ ਏਕਸਤ੍ਤੋਪਿ ਪਰਿਨਿਬ੍ਬਾਤੁਂ ਨ ਸਕ੍ਕੋਤੀਤਿ ਇਦਂ ਬੁਦ੍ਧੁਪ੍ਪਾਦਕਪ੍ਪੇ ਏਵ ਪਚ੍ਚੇਕ ਸਮ੍ਬੁਦ੍ਧਾਪਿ ਉਪ੍ਪਜ੍ਜਨ੍ਤੀਤਿ ਕਤ੍ਵਾ ਵੁਤ੍ਤਂ. ਅਪਦਾਨ ਪਾਲ਼ਿਯਂ ਪਨ ਬੁਦ੍ਧਸੁਞ੍ਞਕਪ੍ਪੇਪਿ ਪਚ੍ਚੇਕਸਮ੍ਬੁਦ੍ਧਾਨਂ ਉਪ੍ਪਤ੍ਤਿ ਆਗਤਾ ਏਵ. ‘‘ਏਕਸਤ੍ਤੋਪੀ’’ਤਿ ਵਾ ਸਾਵਕਸਤ੍ਤੋ ਗਹੇਤਬ੍ਬੋ. ਏਵਞ੍ਹਿ ਸਤਿ ਅਪਦਾਨਪਾਲ਼ਿਯਾ ਅਵਿਰੋਧੋ ਹੋਤਿ. ‘‘ਆਰਾਧੇਨ੍ਤੀ’’ਤਿ ਸਾਧੇਨ੍ਤਿ ਪਟਿਲਭਨ੍ਤਿ. ਸਬ੍ਬਤੋ ਪਵਤ੍ਤਾ ਗੁਣਪ੍ਪਭਾ ਏਤਸ੍ਸਾਤਿ ਅਤ੍ਥਂ ਸਨ੍ਧਾਯ ‘‘ਸਬ੍ਬਤੋਪਭਾ ਸਮ੍ਪਨ੍ਨਂ’’ਤਿ ਵੁਤ੍ਤਂ. ‘‘ਜੋਤਿ ਵਨ੍ਤ ਤਰੋਵਾ’’ਤਿ ਓਭਾਸਵਨ੍ਤਤਰੋ ਵਾ. ਸਬ੍ਬਤ੍ਥ ਪਭਵਤਿ ਸਂਵਿਜ੍ਜਤੀਤਿ ਸਬ੍ਬਤੋਪਭਨ੍ਤਿ ਇਮਮਤ੍ਥਂ ਸਨ੍ਧਾਯ ਸਬ੍ਬਤੋ ਵਾ ਪਭੁਤਮੇਵ ਹੋਤੀਤਿ ਵੁਤ੍ਤਂ. ਤੇਨਾਹ ‘‘ਨ ਕਤ੍ਥਚਿ ਨਤ੍ਥੀ’’ਤਿ. ‘‘ਏਵਂਸਨ੍ਤੇ ਪੀ’’ਤਿ ਏਵਂ ਵੁਤ੍ਤਨਯੇਨ ਏਕਵਿਧੇ ਸਨ੍ਤੇਪਿ. ‘‘ਉਪਚਰਿਤੁਂ’’ਤਿ ਉਪਚਾਰਵਸੇਨ ਵੋਹਰਿਤੁਂ. ‘‘ਯਥਾਹਾ’’ਤਿ ਤਸ੍ਮਿਂ ਯੇਵਸੁਤ੍ਤੇ ਪੁਨ ਕਿਂ ਆਹ. ਭਵਂ ਨੇਤੀਤਿ ਭਵਨੇਤ੍ਤਿ. ਭਵਤਣ੍ਹਾ ਏਵ. ‘‘ਸਮ੍ਪਰਾਯਿਕਾ’’ਤਿ ਚੁਤਿਅਨਨ੍ਤਰੇ ਪਤ੍ਤਬ੍ਬਾ. ਦ੍ਵਿਨ੍ਨਂ ਖੀਣਾਸਵਾਨਂ ਅਨੁਪਾਦਿਸੇਸਤਾ ਵੁਤ੍ਤਾਤਿ ਸਮ੍ਬਨ੍ਧੋ. ਏਤ੍ਥ ‘‘ਅਨੁਪਾਦਿਸੇਸਤਾ’’ਤਿ ਅਨੁਪਾਦਿਸੇਸਨਿਬ੍ਬਾਨਂ ਵੁਚ੍ਚਤਿ. ਸੇਕ੍ਖੇਸੁ ਅਰਹਤ੍ਤਮਗ੍ਗਟ੍ਠਸ੍ਸ ਸੇਕ੍ਖਸ੍ਸ ਕਿਲੇਸੁਪਾਦਿਸੇਸ ਵਸੇਨ ਅਨੁਪਾਦਿਸੇਸਤਾ ਵੁਤ੍ਤਾ. ‘‘ਕਿਲੇਸੁਪਾਦਿਸੇਸੋ’’ਤਿ ਚ ਕਿਲੇਸ ਸਙ੍ਖਾਤੋ ਉਪਾਦਿਸੇਸੋ. ਤਥਾ ਖਨ੍ਧੁਪਾਦਿਸੇਸੋਪਿ. ਅਨ੍ਤਰਾਪਰਿਨਿਬ੍ਬਾਯੀਤਿਆਦੀਸੁ ਪਰਿਨਿਬ੍ਬਾਨਂ ਨਾਮ ਕਿਲੇਸਪਰਿਨਿਬ੍ਬਾਨਂ ਵੁਤ੍ਤਂ. ਉਭਤੋ ਭਾਗ ਵਿਮੁਤ੍ਤਾਦੀਨਂ ਪਦਤ੍ਥੋ ਨਵਮਪਰਿਚ੍ਛੇਦੇ ਆਗਮਿਸ੍ਸਤਿ. ‘‘ਕਿਲੇਸਕ੍ਖਯੇਨ ਸਹੇਵ ਖਿਯ੍ਯਨ੍ਤੀ’’ਤਿ ਪਚ੍ਚੁਪ੍ਪਨ੍ਨਭਵੇ ਅਰਹਤ੍ਤਮਗ੍ਗਕ੍ਖਣੇ ਕਿਲੇਸਕ੍ਖਯੇਨ ਸਦ੍ਧਿਂ ਏਵ ਖਿਯ੍ਯਨ੍ਤਿ. ਅਨੁਪ੍ਪਾਦ ਧਮ੍ਮਤਂ ਗਚ੍ਛਨ੍ਤਿ. ਤਥਾ ਅਨਾਗਾਮਿ ਪੁਗ੍ਗਲਸ੍ਸ ਕਾਮਪਟਿਸਨ੍ਧਿਕ੍ਖਨ੍ਧਾਪਿ ਅਨਾਗਾਮਿਮਗ੍ਗਕ੍ਖਣੇ, ਸੋਤਾਪਨ੍ਨਸ੍ਸ ਸਤ੍ਤਭਵੇਠਪੇਤ੍ਵਾ ਅਵਸੇਸ ਕਾਮਪਟਿਸਨ੍ਧਿਕ੍ਖਨ੍ਧਾ ਸੋਤਾਪਤ੍ਤਿ ਮਗ੍ਗਕ੍ਖਣੇ ਤਂ ਤਂ ਕਿਲੇਸਕ੍ਖਯੇ ਨ ਸਹੇਵ ਖਿਯ੍ਯਨ੍ਤੀਤਿ. ਪਚ੍ਚੁਪ੍ਪਨ੍ਨਕ੍ਖਨ੍ਧਾ ਪਨ ਕਿਲੇਸਕ੍ਖਯੇਨ ਸਹਖਿਯ੍ਯਨ੍ਤਿ. ਖਨ੍ਧੁਪਾਦਿਸੇਸਾ ਨਾਮ ਹੁਤ੍ਵਾ ਯਾਵਮਰਣਕਾਲਾ ਖੀਣਾਸਵਾਨਮ੍ਪਿ ਪਵਤ੍ਤਨ੍ਤਿ. ਕਸ੍ਮਾ ਪਵਤ੍ਤਨ੍ਤੀਤਿ ਆਹ ‘‘ਯਾਵਚੁਤਿਯਾ ਪਵਤ੍ਤਮਾਨਂ’’ਤਿਆਦਿਂ. ਪਚ੍ਚੁਪ੍ਪਨ੍ਨਕ੍ਖਨ੍ਧਸਨ੍ਤਾਨਂ ਪਨ ਧਮ੍ਮਤਾਸਿਦ੍ਧਨ੍ਤਿ ਸਮ੍ਬਨ੍ਧੋ. ‘‘ਫਲਨਿਸ੍ਸਨ੍ਦਭੂਤਂ’’ਤਿ ਵਿਪਾਕਫਲਭੂਤਞ੍ਚ ਨਿਸ੍ਸਨ੍ਦਫਲਭੂਤਞ੍ਚ ਹੁਤ੍ਵਾ. ‘‘ਤੇਨਸਹੇਵਾ’’ਤਿ ਕਿਲੇਸਕ੍ਖਯੇਨ ਸਹੇਵ. ‘‘ਯਸ੍ਮਾਪਨਾ’’ਤਿਆਦੀਸੁ. ਪਰਿਸਮਨ੍ਤਤੋ ਬੁਨ੍ਧਨ੍ਤਿ ਨੀਵਾਰੇਨ੍ਤਿ, ਸਨ੍ਤਿਸੁਖਸ੍ਸ ਅਨ੍ਤਰਾਯਂ ਕਰੋਨ੍ਤੀਤਿ ਪਲਿਬੋਧਾ. ਕਿਲੇਸਾਭਿਸਙ੍ਖਰਣ ਕਿਚ੍ਚਾਨਿ, ਕਮ੍ਮਾਭਿਸਙ੍ਖਰਣਕਿਚ੍ਚਾਨਿ, ਖਨ੍ਧਾਭਿਸਙ੍ਖਰਣ ਕਿਚ੍ਚਾਨਿ ਚ. ਪਲਿਬੋਧੇਹਿ ਸਹ ਵਤ੍ਤਨ੍ਤੀਤਿ ਸਪਲਿਬੋਧਾ. ਸਙ੍ਖਾਰ ਨਿਮਿਤ੍ਤੇਹਿ ਸਹ ਵਤ੍ਤਨ੍ਤੀਤਿ ਸਨਿਮਿਤ੍ਤਾ. ਤਣ੍ਹਾਪਣਿਧੀਹਿ ਸਹ ਵਤ੍ਤਨ੍ਤੀਤਿ ਸਪਣਿਹਿਤਾ.‘‘ਤਤੋ’’ਤਿ ਪਾਪਕਮ੍ਮਤੋ, ਅਪਾਯਦੁਕ੍ਖਤੋ ਚ. ‘‘ਕੋਚੀ’’ਤਿ ਕੋਚਿਧਮ੍ਮੋ. ‘‘ਨਿਰੋਧੇਤੁਂ ਸਕ੍ਕੋਤੀ’’ਤਿ ਸਕ੍ਕਾਯਦਿਟ੍ਠਿਯਾ ਨਿਰੁਦ੍ਧਾਯ ਤੇ ਨਿਰੁਜ੍ਝਨ੍ਤਿ. ਅਨਿਰੁਦ੍ਧਾਯ ਨਨਿਰੁਜ੍ਝਨ੍ਤਿ. ਤਸ੍ਮਾ ਸਕ੍ਕਾਯਦਿਟ੍ਠਿ ਨਿਰੋਧੋ ਨਿਬ੍ਯਾਪਾਰਧਮ੍ਮੋਪਿ ਸਮਾਨੋ ਤੇ ਪਲਿਬੋਧੇ ਨਿਰੋਧੇਤਿ ਨਾਮ. ‘‘ਨਿਰੋਧੇਤੁਂ ਸਕ੍ਕੋਤੀ’’ਤਿ ਚ ਅਬ੍ਯਾਪਾਰੇ ਬ੍ਯਾਪਾਰਪਰਿਕਪ੍ਪਨਾਤਿ ਦਟ੍ਠਬ੍ਬਂ. ਸਕ੍ਕਾਯਦਿਟ੍ਠਿਨਿਰੋਧੋਯੇਵ ਤੇ ਪਲਿਬੋਧੇ ਨਿਰੋਧੇਤੁਂ ਸਕ੍ਕੋਤੀਤਿ ਏਤ੍ਥ ਦ੍ਵਿਨ੍ਨਮ੍ਪਿ ਨਿਰੋਧੋ ਏਕੋਯੇਵ. ਏਵਂ ਸਨ੍ਤੇਪਿ ਅਵਿਜ੍ਜਾ ਨਿਰੋਧਾ ਸਙ੍ਖਾਰ ਨਿਰੋਧੋਤਿਆਦੀਸੁ ਵਿਯ ਅਭੇਦੇ ਭੇਦਪਰਿਕਪ੍ਪਨਾ ਹੋਤੀਤਿ. ਉਪ੍ਪਾਦੋ ਚ ਪਵਤ੍ਤੋ ਚ ਉਪ੍ਪਾਦਪ੍ਪਵਤ੍ਤਾ. ਤੇ ਮੂਲਂ ਯਸ੍ਸਾਤਿ ਵਿਗ੍ਗਹੋ. ਯੇਨ ਓਲ਼ਾਰਿਕਾਕਾਰੇਨ. ਮਾਰੇਨ੍ਤੀਤਿ ਮਾਰਾ. ਵਧਕਪਚ੍ਚਤ੍ਥਿਕਾਤਿ ਵੁਤ੍ਤਂ ਹੋਤਿ. ਕਿਲੇਸਮਾਰਾਦਯੋ. ਮਾਰਾ ਦਹਨ੍ਤਿ ਤਿਟ੍ਠਨ੍ਤਿ ਏਤੇਸੂਤਿ ਮਾਰਧੇਯ੍ਯਾ. ਮਾਰੇਤਿ ਚਾਵੇਤਿ ਚਾਤਿ ਮਚ੍ਚੁ. ਮਰਣਮੇਵ. ਮਚ੍ਚੁਦਹਤਿ ਤਿਟ੍ਠਤਿ ਏਤੇਸੂਤਿ ਮਚ੍ਚੁਧੇਯ੍ਯਾ. ‘‘ਨਤ੍ਥਿ ਤਸ੍ਮਿਂ ਨਿਮਿਤ੍ਤਂ’’ਤਿ ਵੁਤ੍ਤੇ ਪਞ੍ਞਤ੍ਤਿਧਮ੍ਮੇਸੁਪਿ ਉਪ੍ਪਾਦਪ੍ਪਵਤ੍ਤਮੂਲਂ ਨਿਮਿਤ੍ਤਂ ਨਾਮ ਨਤ੍ਥਿ. ਏਵਂਸਤਿ, ਤੇਹਿ ਨਿਬ੍ਬਾਨਸ੍ਸ ਅਵਿਸੇਸੋ ਆਪਜ੍ਜਤੀਤਿ ਚੋਦਨਾ. ਤਂ ਪਰਿਹਰਨ੍ਤੋ ‘‘ਤਞ੍ਹੀ’’ਤਿਆਦਿਮਾਹ. ਵਿਦ੍ਧਂਸੇਤ੍ਵਾਤਿ ਚ ਸਾਧੇਨ੍ਤਨ੍ਤਿ ਚ ਅਤ੍ਥਵਿਸੇਸ ਪਾਕਟਤ੍ਥਾਯ ਅਬ੍ਯਾਪਾਰੇ ਬ੍ਯਾਪਾਰ ਪਰਿਕਪ੍ਪਨਾ ਏਵ. ਪਣੀਤਾਦਿਭੇਦੇ. ਇਦਂ ਬੁਦ੍ਧਾਨਂ ਨਿਬ੍ਬਾਨਂ ਪਣੀਤਂ. ਇਦਂ ਪਚ੍ਚੇਕਬੁਦ੍ਧਾਨਂ ਨਿਬ੍ਬਾਨਂ ਮਜ੍ਝਿਮਂ. ਇਦਂ ਬੁਦ੍ਧਸਾਵਕਾਨਂ ਨਿਬ੍ਬਾਨਂ ਹੀਨਨ੍ਤਿ ਭਿਨ੍ਨਂ ਨ ਹੋਤੀਤਿ ਯੋਜੇਤਬ੍ਬਂ. ਨਾਨਪ੍ਪਕਾਰੇਨ ਚਿਤ੍ਤਂ ਨਿਧੇਤਿ ਏਤੇਨਾਤਿ ਪਣਿਹਿਤਂ. ‘‘ਨਿਧੇਤੀ’’ਤਿ ਆਰਮ੍ਮਣੇਸੁ ਨਿਨ੍ਨਂ ਪੋਣਂ ਪਬ੍ਭਾਰਂ ਕਤ੍ਵਾ ਠਪੇਤੀਤਿ ਅਤ੍ਥੋ. ਤਥਾ ਪਣਿਧਾਨਪਣਿਧੀਸੁ. ਅਤ੍ਥਤੋ ਏਕਂ ਆਸਾਤਣ੍ਹਾਯ ਨਾਮਂ. ‘‘ਲਬ੍ਭਮਾਨਾਪੀ’’ਤਿ ਭਵਸਮ੍ਪਤ੍ਤਿ ਭੋਗਸਮ੍ਪਤ੍ਤਿਯੋ ਲਬ੍ਭਮਾਨਾਪਿ. ‘‘ਪਿਪਾਸਵਿਨਯ ਧਮ੍ਮਤ੍ਤਾ’’ਤਿ ਪਾਤੁਂ ਪਰਿਭੁਞ੍ਜਿਤੁਂ ਇਚ੍ਛਾ ਪਿਪਾਸਾ. ਪਿਪਾਸਂ ਵਿਨੇਤਿ ਵਿਗਮੇਤੀਤਿ ਪਿਪਾਸਵਿਨਯੋ. ‘‘ਵੇਦਯਿਤਸੁਖਂ’’ਤਿ ਵੇਦਨਾਸੁਖਂ. ‘‘ਕਤਮਂ ਤਂ ਆਵੁਸੋ’’ਤਿ ਪਾਲ਼ਿਪਾਠੇ ‘‘ਤਂ’’ਤਿ ਤਸ੍ਮਾ. ‘‘ਯਦੇਤ੍ਥ ਵੇਦਯਿਤਂ ਨਤ੍ਥੀ’’ਤਿ ਯਸ੍ਮਾ ਏਤ੍ਥ ਵੇਦਯਿਤਂ ਨਤ੍ਥਿ. ਤਸ੍ਮਾ ਨਿਬ੍ਬਾਨੇ ਸੁਖਂ ਨਾਮ ਕਤਮਨ੍ਤਿ ਯੋਜਨਾ. ‘‘ਏਤ੍ਥਾ’’ਤਿ ਏਤਸ੍ਮਿਂ ਨਿਬ੍ਬਾਨੇ. ‘‘ਏਤਦੇਵੇਤ੍ਥਾ’’ਤਿਆਦਿਮ੍ਹਿ. ‘‘ਏਤ ਦੇਵਾ’’ਤਿ ਏਸੋਏਵ. ਯਸ੍ਮਾ ਏਤ੍ਥ ਵੇਦਯਿਤਂ ਨਤ੍ਥਿ. ਤਸ੍ਮਾ ਏਸੋ ਵੇਦਯਿਤਸ੍ਸ ਨਤ੍ਥਿਭਾਵੋ ਏਵ ਏਤ੍ਥਨਿਬ੍ਬਾਨੇ ਸੁਖਨ੍ਤਿ ਯੋਜਨਾ.

‘‘ਏਤ੍ਥ ਚਾ’’ਤਿਆਦੀਸੁ. ਯਦੇਤਂ ਖਿਯ੍ਯਨਂ ਨਿਰੁਜ੍ਝਨਂ ਅਤ੍ਥੀਤਿ ਸਮ੍ਬਨ੍ਧੋ. ਕੇਚਿ ਪਨ ਤਂਖਿਯ੍ਯਨ ਨਿਰੁਜ੍ਝਨ ਕ੍ਰਿਯਾਮਤ੍ਤਂ ਨਿਬ੍ਬਾਨਂ ਨ ਹੋਤਿ. ਅਭਾਵ ਪਞ੍ਞਤ੍ਤਿਮਤ੍ਤਂ ਹੋਤੀਤਿ ਵਦਨ੍ਤਿ. ਤਂ ਪਟਿਸੇਧੇਨ੍ਤੋ ‘‘ਨ ਹਿਤਂ’’ਤਿਆਦਿਮਾਹ. ‘‘ਪਞ੍ਞਤ੍ਤਿਰੂਪਂ’’ਤਿ ਪਞ੍ਞਤ੍ਤਿਸਭਾਵੋ. ਪਾਲ਼ਿਪਾਠੇ. ‘‘ਪਦਹਤੀ’’ਤਿ ਵੀਰਿਯਂ ਦਲ਼੍ਹਂ ਕਰੋਤਿ. ਪਹਿਤੋ ਅਤ੍ਤਾ ਅਨੇਨਾਤਿ ਪਹਿਤਤ੍ਤੋ. ‘‘ਪਹਿਤੋ’’ਤਿ ਪਦਹਿਤੋ. ਅਨਿਵਤ੍ਤਭਾਵੇ ਠਪਿਤੋ. ਪੇਸਿਤੋਤਿਪਿ ਵਣ੍ਣੇਨ੍ਤਿ. ‘‘ਕਾਯੇਨਾ’’ਤਿ ਨਾਮਕਾਯੇਨ. ਤਣ੍ਹਾਵਸੇ ਵਤ੍ਤਨ੍ਤੀਤਿ ਤਣ੍ਹਾਵਸਿਕਾ. ‘‘ਤੇਸਂ ਪੀ’’ਤਿ ਤੇਸਂ ਵਾਦੇਪਿ. ਤਸ੍ਮਿਂ ਖਯ ਨਿਰੋਧਮਤ੍ਤੇ ਅਨਨ੍ਤਗੁਣਾ ਨਾਮ ਨਤ੍ਥੀਤਿ ਇਮਂ ਵਾਦਂ ਵਿਸੋਧੇਤੁਂ ‘‘ਨਿਬ੍ਬਾਨਸ੍ਸ ਚਾ’’ਤਿਆਦਿ ਵੁਤ੍ਤਂ. ‘‘ਪਟਿਪਕ੍ਖਵਸੇਨ ਸਿਜ੍ਝਨ੍ਤੀ’’ਤਿ ਏਤੇਨ ਵਟ੍ਟਧਮ੍ਮੇਸੁ ਮਹਨ੍ਤਂ ਆਦੀਨਵਂ ਪਸ੍ਸਨ੍ਤਾ ਏਵ ਤੇਸਂ ਨਿਰੋਧੇ ਮਹਨ੍ਤਂ ਗੁਣਾਨਿਸਂਸਂ ਪਸ੍ਸਨ੍ਤੀਤਿ ਦੀਪੇਤਿ. ਯੇ ਪਨ ਯਥਾਵੁਤ੍ਤਂ ਖਯਨਿਰੋਧਂ ਪਰਮਤ੍ਥਨਿਬ੍ਬਾਨਨ੍ਤਿ ਨ ਜਾਨਨ੍ਤਿ, ਤੇਸਂ ਵਤ੍ਤਬ੍ਬਮੇਵ ਨਤ੍ਥਿ. ਏਵਂ ਗੁਣਪਦਾਨਂ ਗਮ੍ਭੀਰਤ੍ਤਾ ਤਂਖਯਨਿਰੋਧਮਤ੍ਤਂ ਅਨਨ੍ਤਗੁਣਾਨਂ ਵਤ੍ਥੁ ਨ ਹੋਤੀਤਿ ਮਞ੍ਞਨ੍ਤਿ. ਇਦਾਨਿ ਨਿਬ੍ਬਾਨਂ ਪਰਮਂ ਸੁਖਨ੍ਤਿ ਵੁਤ੍ਤਂ. ਕਥਂ ਤਂ ਖਯਨਿਰੋਧਮਤ੍ਤਂ ਪਰਮਸੁਖਂ ਨਾਮ ਭਵੇਯ੍ਯਾਤਿ ਇਮਂ ਵਾਦਂ ਵਿਸੋਧੇਤੁਂ ‘‘ਸਨ੍ਤਿਸੁਖਞ੍ਚਨਾਮਾ’’ਤਿਆਦਿ ਵੁਤ੍ਤਂ. ਅਤ੍ਥਿਭਿਕ੍ਖਵੇਤਿ ਸੁਤ੍ਤੇ. ‘‘ਨੋਚੇਤਂ ਅਭਵਿਸ੍ਸਾ’’ਤਿ ਏਤਂ ਅਜਾਤਂ ਨੋਚੇ ਸਨ੍ਤਂ ਵਿਜ੍ਜਮਾਨਂ ਨ ਭਵੇਯ੍ਯ. ‘‘ਨਯਿਮਸ੍ਸਾ’’ਤਿ ਨ ਇਮਸ੍ਸ. ਪਚ੍ਚਕ੍ਖਭੂਤਂ ਖਨ੍ਧਪਞ੍ਚਕਂ ਦਸ੍ਸੇਨ੍ਤੋ ‘‘ਇਮਸ੍ਸਾ’’ਤਿ ਵਦਤਿ. ਨਿਸ੍ਸਕ੍ਕਤ੍ਥੇ ਚ ਸਾਮਿਵਚਨਂ. ਇਮਸ੍ਮਾ ਜਾਤਾ ਭੂਤਾ ਕਤਾ ਸਙ੍ਖਤਾ ਸਤ੍ਤਾਨਂ ਨਿਸ੍ਸਰਣਂ ਨਾਮ ਨ ਪਞ੍ਞਾਯੇਯ੍ਯਾਤਿ ਯੋਜਨਾ. ਪਰਤ੍ਥਪਿ ਏਸਨਯੋ. ਏਸਨਯੋ ਸਬ੍ਬੇਸੂਤਿਆਦੀਸੁ. ਦੁਚ੍ਚਰਿਤ ਧਮ੍ਮਾ ਨਾਮ ਪਚ੍ਚਯੇ ਸਤਿ, ਜਾਯਨ੍ਤਿ. ਅਸਤਿ, ਨ ਜਾਯਨ੍ਤੀਤਿ ਏਵਂ ਜਾਤਂ ਵਿਯ ਅਜਾਤਮ੍ਪਿ ਤੇਸਂ ਅਤ੍ਥਿ. ਯਦਿ ਚ ਅਜਾਤਂ ਨਾਮ ਨਤ੍ਥਿ. ਜਾਤਮੇਵ ਅਤ੍ਥਿ. ਏਵਂਸਤਿ, ਅਤ੍ਤਨਿ ਦੁਚ੍ਚਰਿਤਾਨਂ ਅਜਾਤਤ੍ਥਾਯ ਸਮ੍ਮਾਪਟਿਪਜ੍ਜਨ੍ਤਾਨਂਪਿ ਸਬ੍ਬੇ ਦੁਚ੍ਚਰਿਤ ਧਮ੍ਮਾ ਅਤ੍ਤਨਿ ਜਾਤਾਯੇਵ ਸਿਯੁਂ, ਨੋ ਅਜਾਤਾ. ਕਸ੍ਮਾ, ਅਜਾਤਸ੍ਸ ਨਾਮ ਨਤ੍ਥਿਤਾਯਾਤਿਆਦਿਨਾ ਯੋਜੇਤਬ੍ਬਂ.

‘‘ਏਤ੍ਤਾਵਤਾ’’ਤਿ, ਅਤ੍ਥਿ ਭਿਕ੍ਖਵੇ ਅਜਾਤਂਤਿਆਦਿਨਾ ਪਾਲ਼ਿਵਚਨੇਨ. ਸਬ੍ਬੇਸਙ੍ਖਾਰਾ ਸਮਨ੍ਤਿ ਵੂਪਸਮਨ੍ਤਿ ਏਤ੍ਥਾਤਿ ਸਬ੍ਬਸਙ੍ਖਾਰ ਸਮਥੋ. ਸਬ੍ਬੇ ਉਪਧਯੋ ਏਤ੍ਥ ਨਿਸ੍ਸਜ੍ਜਨ੍ਤਿ ਅਰਿਯਾਜਨਾਤਿ ਸਬ੍ਬੁਪਧਿਨਿਸ੍ਸਗ੍ਗੋ. ‘‘ਉਪਲਬ੍ਭਮਾਨੋ’’ਤਿ ਸਨ੍ਤਿਲਕ੍ਖਣੇਨ ਞਾਣੇਨ ਉਪਲਬ੍ਭਮਾਨੋ. ‘‘ਏਸਿਂਸੂ’’ਤਿ ਕਤ੍ਵਾ ਏਸਨਕਿਚ੍ਚਸ੍ਸ ਸਿਖਾਪਤ੍ਤਂ ਅਤ੍ਥਂ ਦਸ੍ਸੇਤੁਂ ‘‘ਅਧਿਗਚ੍ਛਿਂਸੂ’’ਤਿ ਵੁਤ੍ਤਂ.

ਨਿਬ੍ਬਾਨਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

ਰੂਪਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੭. ਸਮੁਚ੍ਚਯਸਙ੍ਗਹਅਨੁਦੀਪਨਾ

੧੬੨. ਸਮੁਚ੍ਚਯਸਙ੍ਗਹੇ. ਅਤ੍ਤਨੋ ਆਵੇਣਿਕਭੂਤੇਨ ਸਾਮਞ੍ਞ ਲਕ੍ਖਣੇਨਤਿ ਚ ਸਮ੍ਬਨ੍ਧੋ. ਅਞ੍ਞਾਪਦੇਸੇਨ ਏਵ ਤਦੁਭਯਲਕ੍ਖਣੇਨ ਸਲਕ੍ਖਣਾਨਿ ਨਾਮ ਵੁਚ੍ਚਨ੍ਤੀਤਿ ਅਧਿਪ੍ਪਾਯੋ. ‘‘ਨਿਬ੍ਬਾਨਸ੍ਸਪਿ ਸਰੂਪਤੋ ਲਬ੍ਭਮਾਨਸਭਾਵਤਾ’’ਤਿ ਅਞ੍ਞਨਿਸ੍ਸਯ ਰਹਿਤੇਨ ਲਬ੍ਭਮਾਨਸਭਾਵਤਾ. ਨਨੁ ਨਿਬ੍ਬਾਨਮ੍ਪਿ ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋਤਿਆਦਿਨਾ ਅਞ੍ਞਨਿਸ੍ਸਯਦਸ੍ਸਨਂ ਅਤ੍ਥਿ ਯੇਵਾਤਿ. ਦਸ੍ਸਨਮਤ੍ਤਂ ਅਤ੍ਥਿ. ਨਿਬ੍ਬਾਨਂ ਪਨ ਰਾਗਾਦੀਹਿ ਪਟਿਬਦ੍ਧਂ ਨ ਹੋਤਿ. ਅਥ ਖੋ ਤੇਹਿ ਦੂਰਤਰਂ ਹੋਤਿ. ਪਟਿਪਕ੍ਖਤਰਂ, ਪਟਿਵਿਰੁਦ੍ਧਤਰਂ. ਯਞ੍ਹਿ ਰੂਪਸ੍ਸ ਖਯੋ ਵਯੋ ਭੇਦੋ ਅਨਿਚ੍ਚਾਤਿ ਵੁਤ੍ਤਂ. ਤਤ੍ਥ ਰੂਪਸ੍ਸ ਉਪ੍ਪਜ੍ਜਿਤ੍ਵਾ ਖਯੋ ਵੁਤ੍ਤੋਤਿ ਸੋ ਰੂਪਸ੍ਸ ਨਿਸ੍ਸਿਤੋ ਏਵ ਹੋਤਿ. ਇਧ ਪਨ ਰਾਗਾਦੀਨਂ ਪੁਨ ਉਪ੍ਪਾਦਸ੍ਸਪਿ ਅਭਾਵੋ ਵੁਤ੍ਤੋਤਿ ਸੋ ਰਾਗਾਦੀਸੁ ਅਨਿਸ੍ਸਿਤੋ ਏਵ. ਨ ਕੇਵਲਂ ਅਨਿਸ੍ਸਿਤੋ. ਅਥ ਖੋ ਤੇਹਿ ਦੂਰਤਰੋ ਚ ਪਟਿਪਕ੍ਖਤਰੋ ਚ ਤੇਸਂ ਪਟਿਪਕ੍ਖਗੁਣੇਹਿ ਇਮਸ੍ਸਸਿਦ੍ਧਤ੍ਤਾਤਿ. ਅਨਿਪ੍ਫਨ੍ਨਰੂਪਾਨਿਪਿ ਅਧਿਪ੍ਪੇਤਾਨਿ ਏਵ ਤੇਸਮ੍ਪਿ ਖਨ੍ਧਾਯਤਨਧਾਤੁ ਸਚ੍ਚੇਸੁ ਸਙ੍ਗਹਿਤਤ੍ਤਾ.

ਆਸਵਾਦੀਸੁ. ‘‘ਪਾਰਿਵਾਸਿਯਟ੍ਠੇਨਾ’’ਤਿ ਪਰਿਵਾਸਕਰਣਟ੍ਠੇਨ. ‘‘ਮਦਨੀਯਟ੍ਠੇਨਾ’’ਤਿ ਮਦਨਜਨਕਟ੍ਠੇਨ. ‘‘ਪਰਿਵਾਸਂ ਗਣ੍ਹਨ੍ਤੀ’’ਤਿ ਦੋਸਵੇਪੁਲ੍ਲਂ ਆਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ. ਪੁਨ ‘‘ਪਰਿਵਾਸਂ’’ਤਿ ਦੁਗ੍ਗਨ੍ਧਤਾਦਿਪਰਿਵਾਸਂ. ‘‘ਆਸਵਭਰਿਤਮੇਵਾ’’ਤਿ ਆਸਵੇਹਿ ਪੂਰਿਤਮੇਵ. ‘‘ਛਲ਼ਾਰਮ੍ਮਣਾਨਿ ਦੂਸੇਨ੍ਤੀ’’ਤਿ ਤਾਨਿ ਸਾਸਵਾਦਿਭਾਵਂ ਪਾਪੇਨ੍ਤੀਤਿ ਅਧਿਪ੍ਪਾਯੋ. ‘‘ਭਵਤੋ’’ਤਿ ਭੂਮਿਤੋ ਇਚ੍ਚੇਵਤ੍ਥੋ. ਅਵਧੀਯਤਿ ਪਰਿਚ੍ਛਿਨ੍ਦੀਯਤਿ ਏਤਸ੍ਮਾਤਿ ਅਵਧਿ. ਅਪਾਦਾਨਂ ਵੁਚ੍ਚਤਿ. ਮਰਿਯਾਦੋ ਨਾਮ ਪਰਿਯਨ੍ਤਪਰਿਚ੍ਛੇਦੋ. ਮਰਿਯਾਦਮਤ੍ਤਭੂਤੋ ਕ੍ਰਿਯਾਵਿਸਯੋ ਮਰਿਯਾਦਵਿਸਯੋ. ਅਵਧਿ ਨਾਮ ਬ੍ਯਾਪਨ ਵਿਧਾਨਂ, ਕ੍ਰਿਯਾ ਬ੍ਯਾਪਨਸ੍ਸ ਵਿਸਯੋ ਅਭਿਵਿਧਿਵਿਸਯੋ. ‘‘ਯਸ੍ਸਾ’’ਤਿ ਅਵਧਿ ਵਤ੍ਥੁਸ੍ਸ. ‘‘ਅਤ੍ਤਾਨਂ’’ਤਿ ਅਵਧਿਵਤ੍ਥੁਂ. ‘‘ਬਹਿਕਤ੍ਵਾ’’ਤਿ ਸਮ੍ਪਤ੍ਤਮਤ੍ਤਂ ਕਤ੍ਵਾਤਿ ਅਧਿਪ੍ਪਾਯੋ. ਅਵਧਿਵਿਚਾਰਣਾਯਂ. ‘‘ਸਦ੍ਦਸ੍ਸਾ’’ਤਿ ਭਗਵਤੋ ਕਿਤ੍ਤਿਸਦ੍ਦਸ੍ਸ. ‘‘ਤਂ’’ਤਿ ਅਵਧਿਭੂਤਂ ਅਤ੍ਥਂ. ‘‘ਯਸੋ’’ਤਿ ਕਿਤ੍ਤਿਸਦ੍ਦੋ. ‘‘ਇਤਰਂ’’ਤਿ ਅਨਭਿਵਿਧਿਵਿਸਯਂ ਬਹਿ ਕਤ੍ਵਾ ਪਵਤ੍ਤਤਿ.

ਕਾਮਾਸਵਾਦੀਸੁ. ‘‘ਤਨ੍ਨਾਮੇਨਾ’’ਤਿ ਕਾਮਨਾਮੇਨ. ‘‘ਤਦਾਰਮ੍ਮਣਾ’’ਤਿ ਕਾਮਧਮ੍ਮਾਰਮ੍ਮਣਾ. ‘‘ਅਯਮਤ੍ਥੋ ਵਾ’’ਤਿ ਕਾਮੀਯਤੀਤਿਆਦਿਨਾ ਵੁਤ੍ਤੋ ਪਚ੍ਛਿਮਤ੍ਥੋਵ. ‘‘ਮਹਗ੍ਗਤਕੁਸਲਧਮ੍ਮਾ’’ਤਿ ਇਧਾਧਿਪ੍ਪੇਤਂ ਕਮ੍ਮਭਵਂ ਸਨ੍ਧਾਯ ਵੁਤ੍ਤਂ. ‘‘ਤਂ ਨਿਬ੍ਬਤ੍ਤਾ’’ਤਿ ਤੇਨ ਨਿਬ੍ਬਤ੍ਤਾ. ‘‘ਤਦਾਰਮ੍ਮਣਾ’’ਤਿ ਦੁਵਿਧਭਵਾਰਮ੍ਮਣਾ. ‘‘ਤਣ੍ਹਾ ਏਵਾ’’ਤਿ ਭਵਤਣ੍ਹਾ ਏਵ. ‘‘ਭਵੋ ਏਵਾ’’ਤਿ ਭਵਾਰਮ੍ਮਣਤਾਯ ਭਵਨਾਮਿਕਾ ਤਣ੍ਹਾ ਏਵ. ‘‘ਇਮੇ ਏਵਾ’’ਤਿ ਤਣ੍ਹਾਦਿਟ੍ਠਿ ਅਵਿਜ੍ਜਾ ਏਵ. ‘‘ਪਰਿਵੁਤ੍ਥੇ ਸਤੀ’’ਤਿ ਪਰਿਵਸਿਤੇ ਸਤਿ. ‘‘ਕਾਮਵਿਸਯਾ’’ਤਿ ਕਾਮਧਮ੍ਮਵਿਸਯਾ. ‘‘ਤਸ੍ਮਿਂ’’ਤਿ ਕਾਮਾਸਵੇ. ਭਵਵਿਸਯਾ ਮਾਨਾਦਯੋ ਪਰਿਵੁਤ੍ਥਾ ਏਵਾਤਿਆਦਿਨਾ ਯੋਜੇਤਬ੍ਬਂ. ਤਥਾ ਦਿਟ੍ਠਿਵਿਸਯਾਤਿ ਪਦੇਪਿ.

‘‘ਅਨਸ੍ਸਾਸਿਕਂ ਕਤ੍ਵਾ’’ਤਿ ਅਸ੍ਸਾਸਪਸ੍ਸਾਸਰਹਿਤਂ ਕਤ੍ਵਾ. ‘‘ਅਵਹਨਨਟ੍ਠੇਨਾ’’ਤਿ ਅਜ੍ਝੋਤ੍ਥਰਿਤ੍ਵਾ ਮਾਰਣਟ੍ਠੇਨ. ਅਧੋਕਤ੍ਵਾ ਮਾਰਣਟ੍ਠੇਨਾਤਿਪਿ ਯੁਜ੍ਜਤਿ. ‘‘ਦੁਤ੍ਤਰਟ੍ਠੇਨਾ’’ਤਿ ਤਤ੍ਥ ਪਤਨ੍ਤਸ੍ਸ ਤਰਿਤੁਂ ਦੁਕ੍ਕਰਟ੍ਠੇਨ. ‘‘ਵੁਤ੍ਤਨਯੇਨਾ’’ਤਿ ਆਸਵੇਸੁ ਵੁਤ੍ਤਨਯੇਨ.

‘‘ਵਟ੍ਟਸ੍ਮਿਂ’’ਤਿ ਤਿਵਿਧਵਟ੍ਟਸ੍ਮਿਂ. ‘‘ਭਵਯਨ੍ਤਕੇ’’ਤਿ ਅਵਿਜ੍ਜਾਸਙ੍ਖਾਰਾਦਿਕੇ ਭਵਚਕ੍ਕੇ. ‘‘ਆਮਸਨਂ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ ‘‘ਤਥਾ ਤਥਾ ਕਪ੍ਪੇਤ੍ਵਾ ਗਹਣ’’ਨ੍ਤਿ. ‘‘ਸਾਸਨੇ’’ਤਿ ਪਰਿਯਤ੍ਤਿਸਾਸਨੇ ਤਸ੍ਮਿਂ ਤਸ੍ਮਿਂ ਸੁਤ੍ਤਨ੍ਤੇ. ‘‘ਦਿਟ੍ਠਿਯੋ ਦਿਟ੍ਠੁਪਾਦਾਨਂ’’ਤਿ ਦਿਟ੍ਠਿਵਤ੍ਥੂਸੁ ਦਲ਼੍ਹਗ੍ਗਾਹਟ੍ਠੇਨ ਦਿਟ੍ਠਿਯੋ ਏਵ ਦਿਟ੍ਠੁਪਾਦਾਨਂ. ਅਤ੍ਤਵਾਦੁਪਾਦਾਨੇ. ਪਰਿਕਪ੍ਪ ਬੁਦ੍ਧਿ ਨਾਮ ਮਿਚ੍ਛਾਞਾਣਂ ਵੁਚ੍ਚਤਿ. ‘‘ਇਸ੍ਸਰ ਨਿਮ੍ਮਿਤਂ’’ਤਿ ਸਕਲਲੋਕਿਸ੍ਸਰੇਨ ਮਹਾਬ੍ਰਹ੍ਮੁਨਾ ਆਦਿਕਪ੍ਪਕਾਲੇ ਨਿਮ੍ਮਿਤਂ. ‘‘ਅਧਿਚ੍ਚ ਸਮੁਪ੍ਪਨ੍ਨਂ’’ਤਿ ਅਹੇਤੁ ਅਪਚ੍ਚਯਾ ਸਮੁਪ੍ਪਨ੍ਨਂ. ‘‘ਅਚ੍ਚਨ੍ਤਸਸ੍ਸਤਂ’’ਤਿ ਭਵਪਰਮ੍ਪਰਾਸੁ ਸਸ੍ਸਤਂ. ‘‘ਏਕਚ੍ਚਸਸ੍ਸਤਂ’’ਤਿ ਭਵਵਿਸੇਸਂ ਪਤ੍ਵਾ ਏਕਚ੍ਚਾਨਂ ਸਤ੍ਤਾਨਂ ਸਸ੍ਸਤਂ. ‘‘ਉਚ੍ਛਿਨ੍ਨਂ’’ਤਿ ਯਤ੍ਥਕਤ੍ਥਚਿ ਪਰਮ੍ਮਰਣਾ ਉਚ੍ਛਿਨ੍ਨਂ. ਪੁਰਾਣਞ੍ਚਕਮ੍ਮਂ ਪਰਿਕ੍ਖੀਣਂ, ਨਵਞ੍ਚਕਮ੍ਮਂ ਅਕਤਂ. ਏਵਂ ਸਂਸਾਰ ਸੁਦ੍ਧੀਤਿਆਦਿਨਾ ਗਹਣਨ੍ਤਿ ਅਤ੍ਥੋ. ਸਨ੍ਤੋ ਕਾਯੋ ਸਕ੍ਕਾਯੋ. ‘‘ਸਨ੍ਤੋ’’ਤਿ ਪਰਮਤ੍ਥਤੋ ਵਿਜ੍ਜਮਾਨੋ. ‘‘ਕਾਯੋ’’ਤਿ ਰੂਪਕਾਯੋ, ਨਾਮਕਾਯੋ. ਅਤ੍ਤਨੋ ਅਤ੍ਤਨੋ ਕਾਯੋ ਵਾ ਸਕ੍ਕਾਯੋ. ਪਚ੍ਚਤ੍ਤਕਾਯੋ, ਪਾਟਿਪੁਗ੍ਗਲਿਕ ਕਾਯੋਤਿ ਵੁਤ੍ਤਂ ਹੋਤਿ. ਯਥਾਵੁਤ੍ਤਕਾਯ ਦ੍ਵਯਮੇਵ. ਸਕ੍ਕਾਯੇ ਦਿਟ੍ਠਿ ਸਕ੍ਕਾਯਦਿਟ੍ਠਿ. ਤਤ੍ਥ ‘‘ਸਕ੍ਕਾਯੇ ਦਿਟ੍ਠੀ’’ਤਿ ਪੁਬ੍ਬਨ੍ਤਾਪਰਨ੍ਤ ਕਪ੍ਪਿਕਾਨਂ ਵਿਯ ਪੁਬ੍ਬਨ੍ਤਾ ਪਰਨ੍ਤੇਅਚਿਨ੍ਤੇਤ੍ਵਾ ਸਬ੍ਬਸਤ੍ਤਾਨਂਪਿ ਅਤ੍ਤਨੋ ਖਨ੍ਧੇਸੁ ਏਵ ‘ਰੂਪਂ ਮੇ ਅਤ੍ਤਾਤਿ ਵਾ’ ਅਤ੍ਤਾ ਮੇ ਰੂਪਵਾਤਿ ਵਾ, ਅਤ੍ਤਨਿ ਮੇ ਰੂਪਨ੍ਤਿ ਵਾ, ਰੂਪਸ੍ਮਿਂ ਮੇ ਅਤ੍ਤਾਤਿ ਵਾ, ਏਵਮਾਦਿਨਾ ਧਮ੍ਮਤਾ ਸਿਦ੍ਧਾ ਦਿਟ੍ਠੀਤਿ ਵੁਤ੍ਤਂ ਹੋਤਿ. ‘‘ਅਸ੍ਸੁਤਵਾ’’ਤਿ ਖਨ੍ਧਦੇਸਨਾਦਿਕੇ ਸੁਞ੍ਞਤਧਮ੍ਮਪ੍ਪਟਿਸਂ ਯੁਤ੍ਤੇ ਦੇਸਨਾ ਧਮ੍ਮੇ ਅਸ੍ਸੁਤ ਪੁਬ੍ਬਤ੍ਤਾ ਨਤ੍ਥਿ ਸੁਤਂ ਏਤਸ੍ਸਾਤਿ ਅਸ੍ਸੁਤਵਾ. ‘‘ਪੁਥੁਜ੍ਜਨੋ’’ਤਿ ਲੋਕਿਯਮਹਾਜਨੋ. ਤਤ੍ਥ ਪਰਿਯਾਪਨ੍ਨੋ ਪਨ ਏਕਪੁਗ੍ਗਲੋਪਿ ਪੁਥੁਜ੍ਜਨੋਤ੍ਵੇਵ ਵੁਚ੍ਚਤਿ. ਸੋ ਸੁਤਵਾਪਿ ਅਤ੍ਥਿ, ਅਸ੍ਸੁਤਵਾਪਿ ਅਤ੍ਥਿ. ਇਧ ਅਸ੍ਸੁਤਵਾ ਅਧਿਪ੍ਪੇਤੋ. ਅਰਿਯ ਪੁਗ੍ਗਲੋ ਪਨ ਤਤ੍ਥ ਪਰਿਯਾਪਨ੍ਨੋ ਨ ਹੋਤਿ. ਅਹਨ੍ਤਿਵਾ, ਮਮਾਤਿ ਵਾ, ਮਯੀਤਿ ਵਾ, ਮੇਤਿ ਵਾ, ਪਰਾਮਸਨ ਪਦਾਨਿ ਨਾਮ. ‘‘ਸੇਸਧਮ੍ਮੇਵਾ ਗਹੇਤ੍ਵਾ’’ਤਿ ਰੂਪਤੋ ਅਵਸੇਸੇ ਨਾਮਕ੍ਖਨ੍ਧ ਧਮ੍ਮੇ ਅਤ੍ਤਾ ਮੇਤਿ ਗਹੇਤ੍ਵਾ ਵਾ. ‘‘ਧਮ੍ਮ ਮੁਤ੍ਤਕਂ ਵਾ ਅਤ੍ਤਾਨਂ ਗਹੇਤ੍ਵਾ’’ਤਿ ਪਞ੍ਚਕ੍ਖਨ੍ਧਧਮ੍ਮਵਿਮੁਤ੍ਤਂ ਪਰਿਕਪ੍ਪਸਿਦ੍ਧਂ ਅਤ੍ਤਾਨਂ ਵਾ ਗਹੇਤ੍ਵਾ. ਚਤਸ੍ਸੋ ਅਵਤ੍ਥਾ ਯਸ੍ਸਾਤਿ ਚਤੁਰਾਵਤ੍ਥਿਕਾ. ਵੇਦਨਾਯ ਸਮ੍ਭੋਗਰਸਤ੍ਤਾ ‘‘ਸਂਭੁਞ੍ਜਿਂ’’ਤਿ ਵੁਤ੍ਤਂ. ‘‘ਸੁਖਿਤੋ’’ਤਿ ਸੁਖਵੇਦਨਾਯ ਸਮਙ੍ਗੀਪੁਗ੍ਗਲੋ. ਧਮ੍ਮਤੋ ਖਨ੍ਧ ਪਞ੍ਚਕਮੇਵ. ਤਤ੍ਥ ਪਨ ਸੁਖਵੇਦਨਾਪਧਾਨਤ੍ਤਾ ਤਥਾ ਸਮਨੁਪਸ੍ਸਨ੍ਤੋ ਵੇਦਨਂ ਅਤ੍ਤਾਤਿ ਸਮਨੁਪਸ੍ਸਤਿ ਨਾਮ. ‘‘ਸਮੂਹਤੋ ਗਹੇਤ੍ਵਾ’’ਤਿ ਅਹਮਸ੍ਮਿ, ਅਹਂ ਏਕੋ ਸਤ੍ਤੋਤਿਆਦਿਨਾ ਸਮੂਹਤੋ. ‘‘ਵਤ੍ਥੂ’’ਤਿ ਪਞ੍ਚਕ੍ਖਨ੍ਧਾ ਵੁਚ੍ਚਨ੍ਤਿ. ਞਾਤਪਰਿਞ੍ਞਾਦਿਵਸੇਨ ਅਪਰਿਞ੍ਞਾਤਾਨਿ ਵਤ੍ਥੂਨਿ ਏਤੇਹੀਤਿ ਅਪਰਿਞ੍ਞਾਤਵਤ੍ਥੁਕਾ. ਏਕਮੁਹੁਤ੍ਤਮਤ੍ਤੇਪਿ ਕਾਲੇ. ਰੂਪਂ ਅਤ੍ਤਤੋ ਸਮਨੁਪਸ੍ਸਤੀਤਿਆਦਿਕਂ ਚਤੁਰਾਵਤ੍ਥਂ ਸਨ੍ਧਾਯ ‘‘ਕਦਾਚਿ ਅਤ੍ਤਤੋ’’ਤਿਆਦਿ ਵੁਤ੍ਤਂ. ‘‘ਅਤ੍ਤਨਿਮਿਤ੍ਤਂ’’ਤਿ ਅਭਿਕ੍ਕਮਨਾਦੀਸੁ ਕਾਯਵਚੀਮਨੋ ਕ੍ਰਿਯਾਸੁ ਅਹਂ ਅਭਿਕ੍ਕਮਾਮਿ, ਅਹਂ ਪਟਿਕ੍ਕਮਾਮੀਤਿਆਦਿਨਾ ਚਿਤ੍ਤੇ ਦਿਸ੍ਸਮਾਨਾ ਅਤ੍ਤਚ੍ਛਾਯਾ ਵੁਚ੍ਚਤਿ.

‘‘ਕਾਮਨਟ੍ਠੇਨਾ’’ਤਿ ਇਚ੍ਛਨਟ੍ਠੇਨ. ‘‘ਛਨ੍ਦਨਟ੍ਠੇਨਾ’’ਤਿ ਪਤ੍ਥਨਟ੍ਠੇਨ. ਲੀਨਭਾਵੋ ਨਾਮ ਚਿਤ੍ਤਚੇਤਸਿਕਾਨਂ ਪਟਿਕੁਟਨਂ. ਆਪਾਦੀਯਤੇ ਆਪਾਦਨਂ. ਲੀਨਭਾਵਸ੍ਸ ਆਪਾਦਨਨ੍ਤਿ ਵਿਗ੍ਗਹੋ. ‘‘ਤਨ੍ਦੀ’’ਤਿ ਆਲਸ੍ਯਂ ਵੁਚ੍ਚਤਿ. ‘‘ਵਿਜਮ੍ਭਿਤਤਾ’’ ਨਾਮ ਕਿਲੇਸਵਸੇਨ ਕਾਯਙ੍ਗਾਨਂ ਵਿਜਮ੍ਭਨਂ ਸਮਿਞ੍ਜਨਪ੍ਪਸਾਰਣਾਦਿਕਰਣਂ. ਸਾ ਏਵ ਪਚ੍ਚਯੋ ਏਤਸ੍ਸਾਤਿ ਵਿਗ੍ਗਹੋ.

ਅਨੁਸਯਪਦਤ੍ਥੇ. ‘‘ਉਪ੍ਪਜ੍ਜਨ੍ਤੀ’’ਤਿ ਉਪ੍ਪਜ੍ਜਿਤੁਂ ਸਕ੍ਕੋਨ੍ਤਿ. ਨ ਪਨ ਏਕਨ੍ਤਤੋ ਉਪ੍ਪਜ੍ਜਨ੍ਤਿ. ਸਨ੍ਤੇਸੁਹਿ ਏਕਨ੍ਤਤੋ ਉਪ੍ਪਜ੍ਜਨ੍ਤੇਸੁ ਅਨੁਸਯਾ ਨਾਮ ਨ ਹੋਨ੍ਤਿ ਸਯਨਕਿਚ੍ਚਸ੍ਸੇਵ ਅਭਾਵਤੋ. ‘‘ਉਪ੍ਪਜ੍ਜਨ੍ਤੀ’’ਤਿ ਵਾ ਉਪ੍ਪਜ੍ਜਿਤੁਂ ਪਹੋਨ੍ਤਿ. ਪਤ੍ਥੋਦਨੋ ਬਹੂਨਂ ਜਨਾਨਂ ਪਹੋਤੀਤਿਆਦੀਸੁ ਵਿਯ. ਪਞ੍ਞਤ੍ਤਿਯੋਹਿ ਅਸਭਾਵਧਮ੍ਮਜਾਤਿਕਤ੍ਤਾ ਕਾਰਣ ਲਾਭੇਪਿ ਉਪ੍ਪਜ੍ਜਿਤੁਂ ਨਪ੍ਪਹੋਨ੍ਤਿ. ਇਮੇ ਪਨ ਸਭਾਵਧਮ੍ਮਜਾਤਿਕਤ੍ਤਾ ਕਾਰਣ ਲਾਭੇ ਸਤਿ ਉਪ੍ਪਜ੍ਜਿਤੁਂ ਪਹੋਨ੍ਤੀਤਿ. ਏਵਞ੍ਹਿਸਤਿ, ਉਪ੍ਪਾਦਂ ਅਪਤ੍ਤਾਨਂਪਿ ਤੇਸਂ ਪਰਮਤ੍ਥਜਾਤਿਕਤਾ ਸਿਦ੍ਧਾ ਹੋਤੀਤਿ. ‘‘ਸਹ ਅਨੁਸੇਨ੍ਤੀ’’ਤਿ ਏਕਤੋ ਅਨੁਸੇਨ੍ਤੀਤਿ ਵੁਤ੍ਤਾ ਕਾਮਰਾਗਾਨੁਸਯੋ ਚ ਪਟਿਘਾਨੁਸਯੋ ਚ ਮਾਨਾਨੁਸਯੋ ਚ ਦਿਟ੍ਠਾਨੁਸਯੋ ਚ ਵਿਚਿਕਿਚ੍ਛਾਨੁਸਯੋ ਚ. ਇਮੇਸਂ ਸਤ੍ਤਾਨਂ ਸਤ੍ਤਸਨ੍ਤਾਨੇ ਅਨੁਸਯਕਿਚ੍ਚਮਤ੍ਤਂ ਠਪੇਤ੍ਵਾ ਏਕਤੋ ਉਪ੍ਪਤ੍ਤਿ ਨਾਮ ਨਤ੍ਥਿ. ਯਦਿ ਏਕਤੋ ਉਪ੍ਪਜ੍ਜੇਯ੍ਯੁਂ. ਦ੍ਵਾਦਸਾ ਕੁਸਲਚਿਤ੍ਤਾਨਿ ਸਤ੍ਤਸਨ੍ਤਾਨੇ ਨਿਚ੍ਚਕਾਲਮ੍ਪਿ ਏਕਤੋ ਉਪ੍ਪਜ੍ਜੇਯ੍ਯੁਂ. ਨ ਚ ਉਪ੍ਪਜ੍ਜਨ੍ਤਿ. ਤਸ੍ਮਾ ਵਿਞ੍ਞਾਯਤਿ ਉਪ੍ਪਜ੍ਜਨਂ ਨਾਮ ਅਪ੍ਪਹੀਨਟ੍ਠੇਨ ਉਪ੍ਪਜ੍ਜਨਾਰਹਭਾਵੋ ਵੁਤ੍ਤੋਤਿ. ਸੇਨ੍ਤੀਤਿ ਵਤ੍ਵਾ ਤਦਤ੍ਥਂ ਦਸ੍ਸੇਤਿ ‘‘ਵਿਸੁਂ’’ਤਿਆਦਿਨਾ. ‘‘ਅਵੁਟ੍ਠਿਤਾ’’ਤਿ ਉਪ੍ਪਾਦਂ ਅਪਤ੍ਤਾ. ‘‘ਤਥਾਪਵਤ੍ਤਾ’’ਤਿ ਚਾਲਨਾਕਾਰੇਨ ਪਵਤ੍ਤਾ. ਪੁਨ ‘‘ਤਥਾਪਵਤ੍ਤਾ’’ਤਿ ਜਵਨਸਹਜਾਤਾਕਾਰੇਨ ਪਵਤ੍ਤਾ. ‘‘ਯੇਸਂ’’ਤਿ ਕਾਮਰਾਗਾਨੁਸਯਾਦੀਨਂ. ‘‘ਆਵਜ੍ਜਨਂ’’ਤਿ ਆਵਜ੍ਜਨਚਿਤ੍ਤਂ. ‘‘ਦਮਥਂ’’ਤਿ ਸੁਦਨ੍ਤਭਾਵਂ. ‘‘ਤਥਾ ਪਵਤ੍ਤਾ’’ਤਿ ਚਿਤ੍ਤਸਨ੍ਤਾਨਾਨੁਸਯਨਾਕਾਰੇਨ ਪਵਤ੍ਤਾ. ਤਾਅਵਤ੍ਥਾ ਯੇਸਂ ਤੇ ਤਦਵਤ੍ਥਿਕਾ. ਯਦਿ ਤੇ ਉਪ੍ਪਾਦਂ ਅਪਤ੍ਤਾ. ਏਵਂਸਤਿ, ਤੇ ਪਰਮਤ੍ਥਾਪਿ ਨਾਮ ਨ ਭਵੇਯ੍ਯੁਨ੍ਤਿ ਚੋਦਨਂ ਪਰਿਹਰਤਿ ‘‘ਤੇ ਪਨਾ’’ਤਿਆਦਿਨਾ. ਸਚੇ ਤੇ ਕੁਸਲਾਬ੍ਯਾਕਤ ਚਿਤ੍ਤਸਨ੍ਤਾਨਮ੍ਪਿ ਅਨੁਗਤਾ. ਏਵਂਸਤਿ, ਤੇ ਕੁਸਲਾਬ੍ਯਾਕਤਾਨਿ ਨਾਮ ਸਿਯੁਨ੍ਤਿ ਚੋਦਨਂ ਪਰਿਹਰਤਿ ‘‘ਨ ਚਾ’’ਤਿਆਦਿਨਾ. ਅਥ ਤੇ ਏਕਨ੍ਤ ਅਕੁਸਲਾ ਸਿਯੁਂ. ਏਵਂਸਤਿ, ਕੁਸਲਾਬ੍ਯਾਕਤੇਹਿ ਵਿਰੁਦ੍ਧਾ ਭਵੇਯ੍ਯੁਂਤਿ ਚੋਦਨਂ ਪਰਿਹਰਤਿ ‘‘ਨਾਪੀ’’ਤਿਆਦਿਨਾ. ਯਦਿ ਉਪ੍ਪਾਦਂ ਅਪਤ੍ਤਾ. ਏਵਂਸਤਿ, ਕਾਲਵਿਮੁਤ੍ਤਾ ਸਿਯੁਨ੍ਤਿ ਆਹ ‘‘ਨਾਪਿਕਾਲਤ੍ਤਯ ਵਿਨਿਮੁਤ੍ਤਾ’’ਤਿਆਦਿਂ. ‘‘ਸਾਨੁਸਯੇ ਚਿਤ੍ਤਸਨ੍ਤਾਨੇ’’ਤਿ ਸੇਕ੍ਖਪੁਥੁਜ੍ਜਨਾਨਂ ਚਿਤ੍ਤਸਨ੍ਤਾਨੇ. ‘‘ਸਹ ਮਗ੍ਗੁਪ੍ਪਾਦਾ’’ਤਿ ਮਗ੍ਗੁਪ੍ਪਾਦੇਨ ਸਹੇਵ. ‘‘ਤਤ੍ਥ ਤਤ੍ਥ ਵੁਤ੍ਤੋ’’ਤਿ ਅਟ੍ਠਕਥਾਟੀਕਾਸੁ ਵੁਤ੍ਤੋ. ‘‘ਅਨਾਗਤਸਾਮਞ੍ਞਂ’’ਤਿ ਅਨਾਗਤਸਦਿਸਂ. ਨ ਏਕਨ੍ਤ ਅਨਾਗਤਨ੍ਤਿਪਿ ਵਦਨ੍ਤਿ. ਕਥਂ ਤੇ ਸਙ੍ਖਤਜਾਤਿਕਾ ਹੋਨ੍ਤੀਤਿ ਆਹ ‘‘ਤੇਹਿ ਮਗ੍ਗੇ’’ਤਿਆਦਿਂ. ਵਿਭਾਵਨਿਪਾਠੇ. ‘‘ਅਪ੍ਪਹੀਨਾ’’ਤਿ ਮਗ੍ਗੇਨ ਅਪ੍ਪਹੀਨਾ. ‘‘ਤਦਵਤ੍ਥਾ’’ਤਿ ਉਪ੍ਪਜ੍ਜਨਾਰਹਾਵਤ੍ਥਾ. ‘‘ਤਂ ਸਭਾਵਤ੍ਤਾ’’ਤਿ ਕਾਮਰਾਗਾਦਿ ਸਭਾਵਤ੍ਤਾ. ‘‘ਤਥਾ ਵੁਚ੍ਚਨ੍ਤੀ’’ਤਿ ਅਨੁਸਯਾਤਿ ਵੁਚ੍ਚਨ੍ਤਿ. ਅਨਾਗਤਾ ਨਾਮ ਨ ਹੋਨ੍ਤਿ. ਚਿਤ੍ਤਸਨ੍ਤਾਨੇ ਵਤ੍ਤਮਾਨਭਾਵੇਨ ਸਿਦ੍ਧਤ੍ਤਾ. ‘‘ਹਞ੍ਚਿ ਪਜਹਤੀ’’ਤਿ ਯਦਿਪਜਹਤਿ. ‘‘ਤੇਨਹੀ’’ਤਿ ਤਤੋ ਏਵ. ‘‘ਰਤ੍ਤੋ’’ਤਿ ਰਾਗਸਮਙ੍ਗੀ ਹੁਤ੍ਵਾ. ‘‘ਦੁਟ੍ਠੋ’’ਤਿ ਦੋਸਸਮਙ੍ਗੀ ਹੁਤ੍ਵਾ. ‘‘ਮੁਲ਼੍ਹੋ’’ਤਿ ਮੋਹਸਮਙ੍ਗੀ ਹੁਤ੍ਵਾ ਪਜਹਤੀਤਿ ਦੋਸੋ ਆਪਜ੍ਜਤੀਤਿ ਵੁਤ੍ਤਂ ਹੋਤਿ. ਪਰਿਯੁਟ੍ਠਾਨ ਪਤ੍ਤਾਨਂ ਰਾਗਾਦੀਨਂ. ‘‘ਮਗ੍ਗਵਜ੍ਝਂ’’ਤਿ ਮਗ੍ਗੇਨ ਵਧਿਤਬ੍ਬਂ. ‘‘ਉਪ੍ਪਨ੍ਨਂ’’ਤਿ ਪਚ੍ਚੁਪ੍ਪਨ੍ਨਂ. ਵਤ੍ਤਮਾਨਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਵਤ੍ਤਮਾਨੁਪ੍ਪਨ੍ਨਂ. ‘‘ਭੁਤ੍ਵਾ’’ਤਿ ਆਰਮ੍ਮਣਂ ਪਰਿਭੁਞ੍ਜਿਤ੍ਵਾ. ਵਿਗਚ੍ਛਤੀਤਿ ਵਿਗਤਂ. ਭੁਤ੍ਵਾ ਵਿਗਤਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਭੁਤ੍ਵਾ ਵਿਗਤੁਪ੍ਪਨ੍ਨਂ. ਵਿਪਚ੍ਚਨਤ੍ਥਾਯ ਓਕਾਸਂ ਕਰੋਨ੍ਤੀਤਿ ਓਕਾਸਕਤਂ. ਓਕਾਸਕਤਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਓਕਾਸਕਤੁਪ੍ਪਨ੍ਨਂ. ਸਮੁਦਾਚਾਰੋ ਵੁਚ੍ਚਤਿ ਭਿਯ੍ਯੋ ਪਵਤ੍ਤਨਂ. ਸਮੁਦਾਚਾਰੋ ਚ ਸੋ ਉਪ੍ਪਨ੍ਨਞ੍ਚਾਤਿ ਸਮੁਦਾਚਾਰੁਪ੍ਪਨ੍ਨਂ. ਖਨ੍ਧਪਞ੍ਚਕ ਸਙ੍ਖਾਤਂ ਭੂਮਿਂ ਲਭਤੀਤਿ ਭੂਮਿਲਦ੍ਧਂ. ਭੂਮਿਲਦ੍ਧਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਭੂਮਿਲਦ੍ਧੁਪ੍ਪਨ੍ਨਂ. ਆਰਮ੍ਮਣਂ ਅਧਿਕਤਰਂ ਗਣ੍ਹਾਤੀਤਿ ਆਰਮ੍ਮਣਾਧਿਗ੍ਗਹਿਤਂ. ਆਰਮ੍ਮਣਾਧਿਗ੍ਗਹਿਤਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਆਰਮ੍ਮਣਾਧਿਗ੍ਗਹਿਤੁਪ੍ਪਨ੍ਨਂ. ਮਹਗ੍ਗਤਜ੍ਝਾਨੇਨ ਅਵਿਕ੍ਖਮ੍ਭਿਤਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਅਵਿਕ੍ਖਮ੍ਭਿਤੁਪ੍ਪਨ੍ਨਂ. ਮਗ੍ਗੇਨ ਅਸਮੁਗ੍ਘਾਟਿਤਞ੍ਚ ਤਂ ਉਪ੍ਪਨ੍ਨਞ੍ਚਾਤਿ ਅਸਮੁਗ੍ਘਾਟਿਤੁਪ੍ਪਨ੍ਨਂ. ਏਵਂ ਮਗ੍ਗਵਜ੍ਝਾਨਂ ਅਨੁਸਯਾਨਂ ਉਪ੍ਪਨ੍ਨਭਾਵੇਨ ਵੁਤ੍ਤਤ੍ਤਾ ਪਚ੍ਚੁਪ੍ਪਨ੍ਨਤਾ ਪਰਿਯਾਯੋਵ ਤੇਸਂ ਵਤ੍ਤਬ੍ਬੋਤਿ. ‘‘ਸੇਕ੍ਖਾ’’ਤਿ ਸਤ੍ਤਸੇਕ੍ਖਪੁਗ੍ਗਲਾ.

ਓਰਮ੍ਭਾਗੋ ਵੁਚ੍ਚਤਿ ਕਾਮਲੋਕੋਚੇਵ ਪੁਥੁਜ੍ਜਨਭਾਵੋ ਚ. ਓਰਮ੍ਭਾਗੇ ਸਨ੍ਦਿਸ੍ਸਨ੍ਤੀਤਿ ਓਰਮ੍ਭਾਗਿਯਾਨਿ. ਉਦ੍ਧਂਭਾਗੋ ਵੁਚ੍ਚਤਿ ਮਹਗ੍ਗਤਭਾਵੋਚੇਵ ਅਰਿਯਭਾਵੋ ਚ. ਉਦ੍ਧਂਭਾਗੇ ਸਨ੍ਦਿਸ੍ਸਨ੍ਤੀਤਿ ਉਦ੍ਧਂਭਾਗਿਯਾਨਿ. ਤਤ੍ਥ. ਕਾਮਚ੍ਛਨ੍ਦੋ, ਬ੍ਯਾਪਾਦੋ,ਤਿ ਇਮਾਨਿ ਦ੍ਵੇਸਂ ਯੋਜਨਾਨਿ ਕਾਮਲੋਕਸਙ੍ਖਾਤੇ ਓਰਮ੍ਭਾਗੇ ਏਵ ਸਨ੍ਦਿਸ੍ਸਨ੍ਤਿ. ਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ,ਤਿ ਇਮਾਨਿ ਤੀਣਿ ਪੁਥੁਜ੍ਜਨਭਾਵ ਸਙ੍ਖਾਤੇ. ਸੇਸਾਨਿ ਪਨ ਪਞ੍ਚ ਮਹਗ੍ਗਤਭਾਵਸਙ੍ਖਾਤੇ ਚ ਅਰਿਯਭਾਵਸਙ੍ਖਾਤੇਚ ਉਦ੍ਧਂਭਾਗੇਪਿ ਸਨ੍ਦਿਸ੍ਸਨ੍ਤਿ. ਅਥਵਾ. ਪੁਰਿਮਾਨਿ ਪਞ੍ਚਯਸ੍ਸ ਤਾਨਿ ਮਗ੍ਗੇਨ ਅਪ੍ਪਹੀਨਾਨਿ, ਤਂ ਉਪਰਿਭਵਗ੍ਗੇ ਠਿਤਂਪਿ ਕਾਮਲੋਕਸਙ੍ਖਾਤਂ ਓਰਮ੍ਭਾਗਂ ਆਕਡ੍ਢਨ੍ਤਿ, ਤਸ੍ਮਾ ਓਰਮ੍ਭਾਗਾਯ ਸਂਵਤ੍ਤਨ੍ਤੀਤਿ ਓਰਮ੍ਭਾਗਿਯਾਨਿ. ਪਚ੍ਛਿਮਾਨਿ ਪਞ੍ਚ ਯਸ੍ਸ ਤਾਨਿ ਅਪ੍ਪਹੀਨਾਨਿ, ਤਂ ਕਾਮਲੋਕੇ ਠਿਤਂਪਿ ਉਦ੍ਧਂਭਾਗਂ ਆਕਡ੍ਢਨ੍ਤਿ, ਤਸ੍ਮਾ ਉਦ੍ਧਂਭਾਗਾਯ ਸਂਵਤ੍ਤਨ੍ਤੀਤਿ ਉਦ੍ਧਂਭਾਗਿਯਾਨਿ. ਤਤ੍ਥਹਿ ਦ੍ਵੇਰੂਪਾਰੂਪਰਾਗਾ ਏਕਨ੍ਤੇਨ ਮਹਗ੍ਗਤਭਾਵਂ ਆਕਡ੍ਢਨ੍ਤਿਯੇਵ. ਮਾਨੋ ਚ ਉਦ੍ਧਚ੍ਚਞ੍ਚ ਅਵਿਜ੍ਜਾਚਾਤਿ ਇਮਾਨਿ ਚ ਰੂਪਾਰੂਪਰਾਗਸਹਗਤਾਨਿ ਹੁਤ੍ਵਾ ਆਕਡ੍ਢਨ੍ਤਿ. ਓਰਂ ਹੇਟ੍ਠਿਮਂ ਕਾਮਲੋਕਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ. ਉਦ੍ਧਂ ਰੂਪਾਰੂਪਲੋਕਂ ਭਜਨ੍ਤੀਤਿ ਉਦ੍ਧਂਭਾਗਿਯਾਨੀਤਿਪਿ ਵਣ੍ਣੇਨ੍ਤਿ. ‘‘ਇਤਰਾਨਿ ਪਨਾ’’ਤਿ ਦ੍ਵੇ ਇਸ੍ਸਾ ਸਂਯੋਜਨ ਮਚ੍ਛਰਿਯਸਂਯੋਜਨਾਨਿ. ‘‘ਕਮੋਪਨ ਦ੍ਵਿਨ੍ਨਂ ਪੀ’’ਤਿ ਇਧ ਸਙ੍ਗਹੇ ਦ੍ਵਿਨ੍ਨਂਪਿ ਅਨੁਕ੍ਕਮੋਪਨ.

‘‘ਵਿਬਾਧੇਨ੍ਤੀ’’ਤਿ ਵਿਹਿਂਸਨ੍ਤਿ. ‘‘ਉਪਤਾਪੇਨ੍ਤਿਚਾ’’ਤਿ ਉਪਗਨ੍ਤ੍ਵਾ ਸਨ੍ਤਾਪੇਨ੍ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਅਕੁਸਲਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

੧੬੩. ਮਿਸ੍ਸਕਸਙ੍ਗਹੇ. ‘‘ਚਿਤ੍ਤਪ੍ਪਟਿਪਾਦਨਂ ਚਿਤ੍ਤਨਿਯੋਜਨਂ. ‘‘ਸੁਗਤਿ ਦੁਗ੍ਗਤਿ ਵਿਵਟ੍ਟਸਙ੍ਖਾਤਾਸੁ ਚਾ’’ਤਿ ਸੁਗਤਿਭਵ ਦੁਗ੍ਗਤਿ ਭਵਨਿਬ੍ਬਾਨਸਙ੍ਖਾਤਾਸੁ ਚ. ਨਿਬ੍ਬਾਨਞ੍ਹਿ ਵਟ੍ਟਤੋ ਗਿਗਤਤ੍ਤਾ ਵਿਵਟ੍ਟਨ੍ਤਿ ਵੁਚ੍ਚਤਿ. ‘‘ਦਸ੍ਸਨਾਦੀਹਿ ਏਵਾ’’ਤਿ ਦਸ੍ਸਨਸਙ੍ਕਪ੍ਪਨਾਦੀਹਿ ਏਵ. ਉਜੁਗਤਿ ਨਾਮ ਹਿਤਸੁਖਸਂਵਤ੍ਤਨਿਕਾ ਪਵਤ੍ਤਿ ਵੁਚ੍ਚਤਿ. ਵਙ੍ਕਗਤਿਨਾਮ ਅਹਿਤ ਦੁਕ੍ਖਸਂਵਤ੍ਤਨਿਕਾ ਪਵਤ੍ਤਿ. ‘‘ਪਥਙ੍ਗਾਨੀ’’ਤਿ ਪਥਸ੍ਸਮਗ੍ਗਸ੍ਸ ਅਙ੍ਗਾਨਿ. ਮਗ੍ਗੋਤਿ ਚ ਉਪਾਯੋ ਵੁਚ੍ਚਤੀਤਿ ਆਹ ‘‘ਉਪਾਯਙ੍ਗਾਨੀ’’ਤਿ. ‘‘ਇਤਰਾਨੀ’’ਤਿ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪਾਦੀਨਿ ਅਙ੍ਗਾਨਿ. ਉਜੁਗਤਿਯਾ ਗਮਨਸ੍ਸ ਉਪਾਯਙ੍ਗਾਨਿ. ਇਮੇਪਿ ਚਤ੍ਤਾਰੋ ਮਗ੍ਗਙ੍ਗ ਧਮ੍ਮਾ ਧਮ੍ਮਾ ਨਾਮ ਆਗਤਾ. ‘‘ਤਥਾ ਤਥਾ ਪਵਤ੍ਤਾਨਂ’’ਤਿ ਮੁਸਾਵਾਦਾਦਿਵਸੇਨ ਪਵਤ੍ਤਾਨਂ. ‘‘ਨਾ ਨਾਮਗ੍ਗੋਵਾ’’ਤਿ ਮਿਚ੍ਛਾਮਗ੍ਗੋ ਚ ਸਮ੍ਮਾਮਗ੍ਗੋ ਚ.

‘‘ਅਤ੍ਤਾਧੀਨਵੁਤ੍ਤਿਕੇ’’ਤਿ ਅਤ੍ਤਾਯਤ੍ਤਪ੍ਪਵਤ੍ਤਿਕੇ. ਅਤ੍ਤਨੋ ਗਤਿ ਨਾਮ ਚਕ੍ਖੁਨ੍ਦ੍ਰਿਯਾਦੀਨਂ ਦਸ੍ਸਨਾਦਿ ਕਿਚ੍ਚਮੇਵ ਵੁਚ੍ਚਤਿ. ‘‘ਇਸ੍ਸਰਾ ਅਧਿਪਤਿਨੋ’’ਤਿ ਇਦਂ ਆਧਿਪ੍ਪਚ੍ਚਤ੍ਥਪਾਕਟਤ੍ਥਂ ਵੁਤ੍ਤਂ. ਅਤ੍ਥੋ ਪਨ ਭਾਵਪ੍ਪਧਾਨਵਸੇਨ ਗਹੇਤਬ੍ਬੋ. ਇਨ੍ਦ੍ਰਿਯਂ ਇਸ੍ਸਰਿਯਂ ਆਧਿਪ੍ਪਚ੍ਚਨ੍ਤਿਹਿ ਇਮੇ ਏਕਤ੍ਥਾਤਿ. ‘‘ਇਤ੍ਥਾਕਾਰਾਨਿ’’ ਨਾਮ ਇਤ੍ਥਿਲਿਙ੍ਗਪੁਰਿਸਲਿਙ੍ਗਾਦਿ. ‘‘ਅਞ੍ਞਥਾ ਅਪ੍ਪਵਤ੍ਤਿਯਂ’’ਤਿ ਇਤ੍ਥਿਸਣ੍ਠਾਨੇ ਪੁਰਿਸਲਿਙ੍ਗਾਦੀਨਂ, ਪੁਰਿਸਸਣ੍ਠਾਨੇ ਇਤ੍ਥਿਲਿਙ੍ਗਾਦੀਨਂ ਅਪ੍ਪਵਤ੍ਤਿਯਂ. ਤੇਨਾਹ ‘‘ਤਥਾਹੀ’’ਤਿਆਦਿਂ. ਮਨੋ ਵਿਜਾਨਨਕਿਚ੍ਚੇ ਸਮ੍ਪਯੁਤ੍ਤਧਮ੍ਮਾਨਂ ਇਸ੍ਸਰੋ ਹੋਤਿ ਅਨਞ੍ਞਾਭਿਭਵਨੀਯਭਾਵੇਨ ਪਵਤ੍ਤਨਤੋਤਿ ਸਮ੍ਬਨ੍ਧੋ. ਏਵਂ ਪਰਤ੍ਥ. ‘‘ਆਰਮ੍ਮਣਾਧਿਮੁਚ੍ਚਨੇ’’ਤਿ ਆਰਮ੍ਮਣੇ ਨਿਰਾਸਙ੍ਕਪ੍ਪਵਤ੍ਤਿਯਂ. ‘‘ਆਰਮ੍ਮਣੁਪਟ੍ਠਾਨੇ’’ਤਿ ਚਿਤ੍ਤੇ ਬੁਦ੍ਧਗੁਣਾਧਿਕਸ੍ਸ ਆਰਮ੍ਮਣਸ੍ਸ ਉਪਟ੍ਠਾਨੇ. ‘‘ਚਤੁਸਚ੍ਚਧਮ੍ਮੋ’’ਤਿ ਤੇਨ ਪੁਗ੍ਗਲੇਨ ਅਨਞ੍ਞਾਤ ਪੁਬ੍ਬੋ ਚਤੁਸਚ੍ਚ ਧਮ੍ਮੋ. ਅਨਞ੍ਞਾਤ ਪੁਬ੍ਬਂ ਅਮਤਂ ਵਾ ਪਦਂ. ਅਨਞ੍ਞਾਤਂ ਞਸ੍ਸਾਮਿ ਇਤਿ ਪਵਤ੍ਤਂ ਇਨ੍ਦ੍ਰਿਯਨ੍ਤਿ ਸਮਾਸੋ. ਪਟਿਪਨ੍ਨਸ੍ਸਾਤਿ ਪਨ ਅਤ੍ਥਤੋ ਸਿਦ੍ਧਤ੍ਤਾ ਵੁਤ੍ਤਂ. ‘‘ਵਿਪ੍ਪਕਤਭਾਵੇਨਾ’’ਤਿ ਅਨਿਟ੍ਠਙ੍ਗਤਭਾਵੇਨ. ਪੁਨਪ੍ਪੁਨਂ ਜਾਨਨਕਿਚ੍ਚਯੁਤ੍ਤਾਨਂ ਮਜ੍ਝੇ ਛਨ੍ਨਂਸੇਕ੍ਖਾਨਂ. ਏਤੇਨ ਅਵਸਦ੍ਦਸ੍ਸਯਾਵ ਸਬ੍ਬਕਿਲੇਸਪ੍ਪਹਾਨਾ ਜਾਨਨਨ੍ਤਿ ਅਤ੍ਥਂ ਦੀਪੇਤਿ. ਪਥਮ ਮਗ੍ਗੇਨ ਞਾਤਂ ਮਰਿਯਾਦਂ ਅਨਤਿਕ੍ਕਮ੍ਮ ਜਾਨਨਨ੍ਤਿਪਿ ਵਣ੍ਣੇਨ੍ਤਿ. ਆਜਾਨਿਤਤ੍ਥਾਤਿ ਅਞ੍ਞਾਤਾਵੀ. ਅਰਹਾ ਖੀਣਾਸਵੋ ਕਤਕਿਚ੍ਚੋ ਵੁਸਿਤ ਬ੍ਰਹ੍ਮਚਰਿਯੋ. ਅਞ੍ਞਾਤਾਵਿਨੋ ਇਨ੍ਦ੍ਰਿਯਨ੍ਤਿ ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ ਅਤ੍ਥਂ ਦਸ੍ਸੇਤੁਂ ‘‘ਪਰਿਨਿਟ੍ਠਿਤ ਆਜਾਨਨਕਿਚ੍ਚਸ੍ਸਾ’’ਤਿਆਦਿ ਵੁਤ੍ਤਂ. ‘‘ਤਬ੍ਬਿਮੁਤ੍ਤੀ’’ਤਿ ਅਤ੍ਤਗ੍ਗਾਹ ਵਿਮੁਤ੍ਤਿ. ‘‘ਤਸ੍ਮਿਂ ਵਾ’’ਤਿ ਤਸ੍ਮਿਂ ਅਤ੍ਤਨਿਵਾ. ‘‘ਸਂਕਿਲਿਟ੍ਠੋ’’ਤਿ ਨਾਨਾਕਿਲੇਸੇਹਿ ਸਂਕਿਲੇਸਿਤੋ. ‘‘ਵਿਪ੍ਫਨ੍ਦਿਤੋ’’ਤਿ ਨਾਨਾਸੁਖਦੁਕ੍ਖੇਹਿ ਸਂਕਮ੍ਪਿਤੋ. ‘‘ਵੋਦਾਨਪਤ੍ਤਿਯਾ’’ਤਿ ਵਿਸੁਦ੍ਧਿਪਤ੍ਤਤ੍ਥਾਯ. ‘‘ਤਾਯਪਟਿ ਪਤ੍ਤਿਯਾ’’ਤਿ ਕਰਣਤ੍ਥੇ, ਹੇਤੁ ਅਤ੍ਥੇ ਵਾ ਕਰਣਵਚਨਂ. ‘‘ਵੋਦਾਨਪਤ੍ਤਿਯਾ’’ਤਿ ਸਾਮਿਅਤ੍ਥੇ ਸਾਮਿਵਚਨਂ.

‘‘ਬਲੀਯਨ੍ਤੀ’’ਤਿ ਨਾਮਧਾਤੁਨਿਦ੍ਦੇਸੋ. ਤੇਨਾਹ ‘‘ਬਲਸਾ ਕਰੋਨ੍ਤੀ’’ਤਿ. ‘‘ਬਲਸਾ’’ਤਿ ਬਲੇਨ. ਪਰਿਤੋ ਸਮਨ੍ਤਤੋ ਸੇਨ੍ਤਿ ਪਰਿਵਾਰੇਨ੍ਤੀਤਿ ਪਰਿਸ੍ਸਯਾ. ਅਸ੍ਸਦ੍ਧਸ੍ਸ ਭਾਵੋ ਅਸ੍ਸਦ੍ਧਿਯਂ. ਕੋਸਜ੍ਜਸਙ੍ਖਾਤੇਨ ਪਟਿਪਕ੍ਖਧਮ੍ਮੇਨ. ਮੁਟ੍ਠਾ ਨਟ੍ਠਾ ਸਤਿ ਯਸ੍ਸਾਤਿ ਮੁਟ੍ਠਸ੍ਸਤਿ. ਮੁਟ੍ਠਸ੍ਸਤਿਸ੍ਸ ਭਾਵੋ ਮੁਟ੍ਠਸ੍ਸਚ੍ਚਂ. ‘‘ਸੇਸਦੁਕ ਦ੍ਵਯਂ’’ਤਿ ਅਹਿਰਿਕਦੁਕਂ ਹਿਰਿਦੁਕਞ੍ਚ.

ਗਹਪਤਿ, ਜਾਯਮ੍ਪਤੀ, ਤਿਆਦੀਸੁ ਵਿਯ ਪਤਿਸਦ੍ਦੋ ਸਾਮਿਇਸ੍ਸਰ ਪਰਿਯਾਯੋਤਿ ਆਹ ‘‘ਪਤੀਤਿ ਸਾਮਿਇਸ੍ਸਰੋ’’ਤਿ. ‘‘ਪਰੇਸਂ’’ਤਿ ਸਹਜਾਤੇਸੁ ਪਰੇਸਂ ਇਨ੍ਦ੍ਰਿਯਾਨਂ. ‘‘ਪਰੇਹੀ’’ਤਿ ਕਮ੍ਮਤ੍ਥੇ ਕਰਣਵਚਨਂ. ਪਰੇ ਸਹਜਾਤੇ ਇਨ੍ਦ੍ਰਿਯ ਧਮ੍ਮੇਤਿ ਅਤ੍ਥੋ. ‘‘ਅਧਿਕੋ’’ਤਿ ਅਧਿਕਤਰੋ. ‘‘ਅਤ੍ਤਾਧੀਨ ਵੁਤ੍ਤੀਨਂ’’ਤਿ ਅਤ੍ਤਾਯਤ੍ਤਵੁਤ੍ਤੀਨਂ. ‘‘ਛਨ੍ਦਾਗਮਨਵਸੇਨ ਵਾ’’ਤਿ ਏਤ੍ਥ ਆਗਚ੍ਛਤਿ ਫਲਂ ਏਤੇਨਾਤਿ ਆਗਮਨਂ. ਆਦਿਕਾਰਣਂ, ਮੂਲਕਾਰਣਂ, ਪਭਵਕਾਰਣਂ. ਛਨ੍ਦੋ ਏਵ ਆਗਮਨਂ ਛਨ੍ਦਾਗਮਨਂ. ਤੇਨਾਹ ‘‘ਪੁਬ੍ਬੇ ਅਤੀਤਭਵੇਸੂ’’ਤਿਆਦਿਂ. ਸਮ੍ਪਯੁਤ੍ਤ ਧਮ੍ਮੇ ਅਤ੍ਤਪਰਾਧੀਨੇ ਕਤ੍ਵਾਤਿ ਸਮ੍ਬਨ੍ਧੋ. ਮਹੋਘੋ ਤਿਣਪਣ੍ਣਕਸਟੇ ਅਤ੍ਤਪਰਾਧੀਨੇ ਕਰੋਨ੍ਤੋ ਵਿਯਾਤਿ ਯੋਜਨਾ. ਤਤ੍ਥ ‘‘ਅਤ੍ਤਪਰਾਧੀਨੇ’’ਤਿ ਅਤ੍ਤਸਙ੍ਖਾਤੋਪਰੋ ਅਤ੍ਤਪਰੋ. ਅਤ੍ਤਪਰੇਨ ਅਧੀਨਾ ਅਤ੍ਤਪਰਾਧੀਨਾਤਿ ਅਤ੍ਥੋ. ‘‘ਸੇਸੇਸੁਪੀ’’ਤਿ ਸੇਸੇਸੁ ਵੀਰਿਯ ਚਿਤ੍ਤ ਵੀਮਂਸਾਧਿਪਤੀਸੁਪਿ. ਏਤੇਨ ‘ਵੀਰਿਯਮੇਵ ਅਧਿਪਤਿ ਵੀਰਿਯਾਧਿਪਤਿ. ਵੀਰਿਯਵਤੋ ਕਿਂ ਨਾਮ ਕਮ੍ਮਂ ਨ ਸਿਜ੍ਝਤੀਤਿ ਏਵਂ ਪੁਬ੍ਬਾਭਿਸਙ੍ਖਾਰਵਸੇਨ ਵਾ ਪੁਬ੍ਬੇ ਅਤੀਤਭਵੇਸੁ ਸੁਟ੍ਠੁ ਆਸੇਵਿਤਵੀਰਿਯਾਗਮਨਵਸੇਨ ਵਾ ਤੇਸੁ ਤੇਸੁ ਕਲ੍ਯਾਣ ਪਾਪਕਮ੍ਮੇਸੁ ਸਮ੍ਪਯੁਤ੍ਤ ਧਮ੍ਮੇ ਮਹੋਘੋ ਵਿਯ ਤਿਣਪਣ੍ਣਕਸਟੇ ਅਤ੍ਤਪਰਾਧੀਨੇ ਨਿਚ੍ਚਂ ਪਗ੍ਗਹਿਤਧੁਰੇਕਤ੍ਵਾ ਪਵਤ੍ਤਂ ਵੀਰਿਯ’ਨ੍ਤਿਆਦਿਨਯਂ ਅਤਿਦਿਸਤਿ. ‘‘ਪਚ੍ਛਿਮਾ ਤਯੋ ਧਮ੍ਮਾ’’ਤਿ ਵੀਰਿਯ ਚਿਤ੍ਤ ਵੀਮਂਸਾ ਧਮ੍ਮਾ. ਪਰਵਸੇਪਿ ਵਤ੍ਤਨ੍ਤਿ, ਤਦਾ ਤੇਸਂ ਅਧਿਪਤਿਭਾਵੋ ਨਤ੍ਥੀਤਿ ਚੋਦਨਾ. ਅਧਿਪਤਿ ਕਿਚ੍ਚਂ ਨਾਮ ਧੁਰਵਾਹਿਤਾਤਿ ਸਮ੍ਬਨ੍ਧੋ. ‘‘ਤਂ ਤਂ ਕਿਚ੍ਚ ਵਿਸੇਸਂ ਅਨਪੇਕ੍ਖਿਤ੍ਵਾ’’ਤਿ ਚਕ੍ਖੁਨ੍ਦ੍ਰਿਯਂ ਦਸ੍ਸਨ ਕਿਚ੍ਚੇ ਇਸ੍ਸਰੋ, ਸੋਤਿਨ੍ਦ੍ਰਿਯਂ ਸਵਨ ਕਿਚ੍ਚੇਤਿਆਦੀਸੁ ਤਂ ਤਂ ਕਿਚ੍ਚਵਿਸੇਸਂ ਅਪੇਕ੍ਖਤਿ, ਤਥਾ ਅਨਪੇਕ੍ਖਿਤ੍ਵਾ. ‘‘ਵਿਜਾਨਨਾਦਿ ਕਿਚ੍ਚਂ’’ਤਿ ‘ਮਨੋ ਆਰਮ੍ਮਣ ਵਿਜਾਨਨੇ’ਤਿਆਦਿਨਾ ਵੁਤ੍ਤਂ ਸਬ੍ਬਂ ਇਨ੍ਦ੍ਰਿਯ ਕਿਚ੍ਚਂ.

ਭੁਸੋ ਹਰਨ੍ਤਿ ਵਹਨ੍ਤੀਤਿ ਆਹਾਰਾ. ‘‘ਭੁਸੋ’’ਤਿ ਅਤਿਰੇਕਤਰਨ੍ਤਿ ਅਤ੍ਥੋ. ਕਥਂ ਪਨ ਭੁਸੋ ਹਰਨ੍ਤੀਤਿ ਆਹ ‘‘ਸਹਜਾਤਾਦੀ’’ਤਿਆਦਿਂ. ਤੇਤੇ ਪਚ੍ਚਯ ਧਮ੍ਮਾ ਤੇਤੇ ਪਚ੍ਚਯੁਪ੍ਪਨ੍ਨ ਧਮ੍ਮਾ ਚਾਤਿ ਯੋਜਨਾ. ‘‘ਏਤ੍ਥਾ’’ਤਿ ਇਮਿਸ੍ਸਂ ਪਾਲ਼ਿਯਂ. ‘‘ਪਚ੍ਚਯਾਹਾਰੋ ਵਾ’’ਤਿ ਏਤ੍ਥ ਹੇਤੁ ਆਰਮ੍ਮਣਾਦਿਕੋ ਸਬ੍ਬੋਪਚ੍ਚਯੋ ਪਚ੍ਚਯਾਹਾਰੋ ਨਾਮ. ਆਹਾਰ ਪਚ੍ਚਯੋਪਨ ਵਿਸੁਂ ਏਕੋ ਪਚ੍ਚਯਵਿਸੇਸੋ. ‘‘ਪਚ੍ਚਯਟ੍ਠੇਨਾ’’ਤਿ ਹੇਤੁ ਆਰਮ੍ਮਣਾਦਿ ਪਚ੍ਚਯਟ੍ਠੇਨ. ‘‘ਆਹਾਰਭੂਤਾ’’ਤਿ ਉਪਤ੍ਥਮ੍ਭਨਕਿਚ੍ਚਵਿਸੇਸਭੂਤਾਤਿ ਵੁਤ੍ਤਂ ਹੋਤਿ. ‘‘ਕਲ਼ੀਰਙ੍ਕੁਰਾਨਂ’’ਤਿ ਕਮ੍ਮਤ੍ਥੇ ਸਾਮਿਵਚਨਂ. ‘‘ਵਡ੍ਢਿਯਾ’’ਤਿ ਵਡ੍ਢਨਤ੍ਥਾਯ. ‘‘ਠਿਤਿਯਾ’’ਤਿ ਠਿਤਤ੍ਥਾਯ. ਇਮੇਸਤ੍ਤਾ ਵਟ੍ਟੇ ਪਵਤ੍ਤਨ੍ਤੀਤਿ ਸਮ੍ਬਨ੍ਧੋ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ‘‘ਪਕ੍ਖੇ ਵਿਯੂਹਿਤ੍ਵਾ’’ਤਿ ਪਕ੍ਖੇ ਸਞ੍ਚਾਲੇਤ੍ਵਾਤਿ ਵੁਤ੍ਤਂ ਹੋਤਿ. ‘‘ਪਕ੍ਖੇ’’ਤਿ ਵਾ ਪਕ੍ਖੇਹਿ ਵਾਤਂ ਬ੍ਯੂਹਿਤ੍ਵਾ. ‘‘ਤਦਨੁਸਯਿਤਸ੍ਸਾ’’ਤਿ ਤਸ੍ਮਿਂ ਵਿਪਾਕ ਸਨ੍ਤਾਨੇ ਅਨੁਸਯਿ ਤਸ੍ਸ. ‘‘ਵਿਭਾਵੇਤ੍ਵਾ’’ਤਿ ਪਚ੍ਚਕ੍ਖਤੋ ਵਿਭੂਤਂ ਪਾਕਟਂ ਕਤ੍ਵਾ. ‘‘ਅਲਭਿਤ੍ਵਾ’’ਤਿ ਚਕ੍ਖੁਮ੍ਹਿ ਅਲਭਿਤ੍ਵਾ. ਅਪਸ੍ਸਿਤ੍ਵਾਤਿ ਵੁਤ੍ਤਂ ਹੋਤਿ. ‘‘ਤਤ੍ਥੇਵਾ’’ਤਿ ਨਿਵਾਸਟ੍ਠਾਨੇ ਏਵ. ‘‘ਸਮ੍ਪਯੁਤ੍ਤਾ’’ਤਿ ਵਿਞ੍ਞਾਣੇਨ ਸਮ੍ਪਯੁਤ੍ਤਾ. ਭਵਿਂਸੁ ਵਡ੍ਢਿਂ ਸੂਤਿ ਭੂਤਾ. ਸਮ੍ਭਵਂ ਵੁਡ੍ਢਿਕਾਰਣਂ ਏਸਨ੍ਤਿ ਗਵੇਸਨ੍ਤੀਤਿ ਸਮ੍ਭਵੇਸਿਨੋ. ‘‘ਵੁਤ੍ਤਨਯੇਨਾ’’ਤਿ ‘ਯਥਾ ਯਵਬੀਜਾਨਂ ਵਾ ਸਾਲਿਬੀਜਾਨਂ ਵਾ’ਤਿਆਦਿਨਾ ਵੁਤ੍ਤਨਯੇਨ. ‘‘ਆਹਾਰੇਤੀ’’ਤਿ ਪਵਤ੍ਤੇਤਿ. ‘‘ਮਨੋਸਞ੍ਚੇਤਨਾਹਾਰੋ’’ਤਿ ਕੁਸਲਾਕੁਸਲ ਕਮ੍ਮਭੂਤੋ ਮਨੋਸਞ੍ਚੇਤਨਾਹਾਰੋ. ‘‘ਤਯੋ ਭਵੇ’’ਤਿ ਤਯੋ ਕਾਮਭਵਾਦਿਕੇ ਉਪਪਤ੍ਤਿਭਵੇ. ਠਿਤਿਯਾਤਿ ਚ ਅਨੁਗ੍ਗਹਾਯਾਤਿ ਚ ਵੁਤ੍ਤਂ. ਇਤਰਥਾ ਉਪ੍ਪਤ੍ਤਿਯਾਤਿ ਚ ਵੁਤ੍ਤਂ ਸਿਯਾਤਿ ਅਧਿਪ੍ਪਾਯੋ.

‘‘ਦੁਬ੍ਬਲਕਿਚ੍ਚਟ੍ਠਾਨਵਤ੍ਥੁਕਤ੍ਤਾ’’ਤਿ ਦੁਬ੍ਬਲਕਿਚ੍ਚਤ੍ਤਾ ਦੁਬ੍ਬਲਟ੍ਠਾਨਤ੍ਤਾ ਦੁਬ੍ਬਲਵਤ੍ਥੁਕਤ੍ਤਾ. ‘‘ਅਭਿਨਿਪਾਤ ਮਤ੍ਤਾਨਿ ਹੋਨ੍ਤੀ’’ਤਿ ਦਸ੍ਸਨ ਸਵਨਾਦਿ ਮਤ੍ਤਾਨਿ ਹੋਨ੍ਤੀਤਿ ਅਧਿਪ੍ਪਾਯੋ. ‘‘ਵਿਤਕ੍ਕ ਪਚ੍ਛਿਮਕਂ ਝਾਨਂ’’ਤਿ ਝਾਨਾਨਿ ਨਾਮ ਵਿਤਕ੍ਕਸ੍ਸ ਪਚ੍ਛਾਨੁਗਤਂ ਹੋਤੀਤਿ ਅਤ੍ਥੋ. ‘‘ਤਤ੍ਥਾ’’ਤਿ ਤੇਸੁਪਞ੍ਚਵਿਞ੍ਞਾਣੇਸੁ. ‘‘ਤਾ’’ਤਿ ਵੇਦਨਾ ਏਕਗ੍ਗਤਾ. ‘‘ਤਂ’’ਤਿ ਝਾਨਕਿਚ੍ਚਂ. ਏਕਗ੍ਗਤਾ ਬਲਵਤੀ ਨ ਹੋਤੀਤਿ ਸਮ੍ਬਨ੍ਧੋ. ‘‘ਮਗ੍ਗਿਨ੍ਦ੍ਰਿਯ ਬਲਭਾਵਾਯਾ’’ਤਿ ਮਗ੍ਗਿਨ੍ਦ੍ਰਿਯ ਬਲਭਾਵਤ੍ਥਾਯ. ਲੋਕੁਤ੍ਤਰਵਿਪਾਕਾਨਿ ਜਵਨਕਿਚ੍ਚਾਨਿ ਚ ਸਾਧਿਪਤਿਕਾਨਿ ਚ ਹੋਨ੍ਤੀਤਿ ਵੁਤ੍ਤਂ ‘‘ਤਿਭੂਮਕਾਨੀ’’ਤਿਆਦਿ. ਸੇਸਮੇਤ੍ਥ ਸੁਬੋਧਂ.

ਮਿਸ੍ਸਕਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

੧੬੪. ਬੋਧਿਪਕ੍ਖਿਯਸਙ੍ਗਹੇ. ‘‘ਸਤਿਪਟ੍ਠਾਨਾ’’ਤਿ ਏਤ੍ਥ ਪਸਦ੍ਦੋ ਪਮੁਖਤ੍ਥੋ ਪਧਾਨਤ੍ਥੋਤਿ ਆਹ ‘‘ਪਮੁਖਾ ਪਧਾਨਾ ਹੁਤ੍ਵਾ’’ਤਿ. ਠਾਸਦ੍ਦੋ ਗਤਿਨਿਵਤ੍ਤਿ ਅਤ੍ਥੋਤਿ ਆਹ ‘‘ਚਿਤ੍ਤਗਮਨਂ ਨਿਵਤ੍ਤੇਤ੍ਵਾ ਪਵਤ੍ਤਨ੍ਤੀ’’ਤਿ. ‘‘ਕਾਯੇ ਅਨੁਪਸ੍ਸਨਾ’’ਤਿ ਕਾਯੇ ਪਵਤ੍ਤਾ ਅਨੁਪਸ੍ਸਨਾ. ਪੁਨਪ੍ਪੁਨਂ ਪਸ੍ਸਨ੍ਤਿ ਯੋਗਿਨੋ ਏਤਾਯਾਤਿ ਅਨੁਪਸ੍ਸਨਾ. ਕਤਮਂ ਪਸ੍ਸਨ੍ਤੀਤਿ ਆਹ ‘‘ਅਸ੍ਸਾਸਪਸ੍ਸਾਸਾਦਿਕਸ੍ਸਾ’’ਤਿਆਦਿਂ. ਕਥਞ੍ਚਤਂ ਪਸ੍ਸਨ੍ਤੀਤਿ ਵੁਤ੍ਤਂ ‘‘ਤਂ ਤਂ ਕਾਯਭਾਵੇਨਾ’’ਤਿਆਦਿ. ਇਦਾਨਿ ਪੁਨਪ੍ਪੁਨ ਸਦ੍ਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਯਾਵਾ’’ਤਿਆਦਿਮਾਹ. ਵੇਦਨਾਨੁ ਪਸ੍ਸਨਾਦੀਸੁਪਿ ਏਸੇਵਨਯੋ. ਤਂ ਨ ਸੁਨ੍ਦਰਂ. ਕਸ੍ਮਾ, ਸਕਲਸ੍ਸ ਰੂਪਕਾਯਸ੍ਸ ਅਧਿਪ੍ਪੇਤਤ੍ਤਾ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ. ਯਦਿ ਏਵਨ੍ਤਿਆਦੀਸੁ. ‘‘ਇਤਰਾਪਿ ਸਿਦ੍ਧਾ’’ਤਿ ਕਾਯਾਨੁਪਸ੍ਸਨਾਦਯੋਪਿ ਸਿਦ੍ਧਾ. ਕਸ੍ਮਾ, ਧਮ੍ਮਾਨੁਪਸ੍ਸਨਾਯ ਅਨ੍ਤੋਗਧਤ੍ਤਾ. ‘‘ਤਥਾ ਅਨੁਪਸ੍ਸਨ੍ਤਸ੍ਸਾ’’ਤਿ ਰੂਪ੍ਪਨਲਕ੍ਖਣਤੋ ਅਨੁਪਸ੍ਸਨ੍ਤਸ੍ਸ. ‘‘ਤਂ ਤਂ ਸਮੂਹਭੂਤਰੂਪਧਮ੍ਮਵਸੇਨਾ’’ਤਿ ਅਸ੍ਸਾਸਪਸ੍ਸਾਸਾਦਿ ਸਮੂਹਭੂਤਸ੍ਸ ਰੂਪ ਧਮ੍ਮਸ੍ਸ ਵਸੇਨ. ‘‘ਸੁਭਾਦਿਵਿਪਲ੍ਲਾਸਸ੍ਸਾ’’ਤਿ ਸੁਭ ਸੁਖ ਨਿਚ੍ਚਵਿਪਲ੍ਲਾਸਸ੍ਸ. ‘‘ਓਲ਼ਾਰਿਕਸ੍ਸਾ’’ਤਿ ਸੁਪਾਕਟਵਸੇਨ ਓਲ਼ਾਰਿਕਸ੍ਸ. ‘‘ਅਤ੍ਤੂਪਨਿਬਨ੍ਧਾ’’ਤਿ ਅਤ੍ਤੇਨ ਉਪਨਿਬਨ੍ਧਾ, ਪਟਿਬਦ੍ਧਾ.

‘‘ਕਾਮਂ’’ਤਿ ਏਕਨ੍ਤੇਨ. ਉਪਸੁਸ੍ਸਤੂਤਿ ਸਮ੍ਬਨ੍ਧੋ. ‘‘ਯਨ੍ਤਂ’’ਤਿ ਝਾਨਾਭਿਞ੍ਞਾ ਮਗ੍ਗਫਲਨਿਬ੍ਬਾਨਂ. ‘‘ਵੀਰਿਯਸ੍ਸ ਸਣ੍ਠਾਨਂ’’ਤਿ ਵੀਰਿਯਗਮਨਸ੍ਸ ਵੀਰਿਯਪ੍ਪਵਤ੍ਤਨਸ੍ਸ ਨਿਵਤ੍ਤਿਵਸੇਨ ਸਣ੍ਠਾਨਂ. ਉਪ੍ਪਨ੍ਨਸਦ੍ਦੇਨ ਅਤੀਤ ਕਿਲੇਸਾਪਿ ਪਚ੍ਚੁਪ੍ਪਨ੍ਨ ਕਿਲੇਸਾਪਿ ਗਹੇਤਬ੍ਬਾ ਹੋਨ੍ਤੀਤਿ ਆਹ ‘‘ਅਸੁਕਸ੍ਮਿਂ ਕਾਲੇ’’ਤਿਆਦਿਂ. ‘‘ਮਯ੍ਹਂ ਉਪ੍ਪਨ੍ਨਂ’’ਤਿ ਇਦਾਨਿ ਉਪ੍ਪਨ੍ਨਂ. ‘‘ਪਹਾਨਾਯਾ’’ਤਿ ਏਤ੍ਥ ਸਮੁਚ੍ਛੇਦਪ੍ਪਹਾਨਂ ਅਧਿਪ੍ਪੇਤਨ੍ਤਿ ਆਹ ‘‘ਅਨੁਪ੍ਪਾਦ ਧਮ੍ਮਤਾਪਾਦਨਕਰਣਤ੍ਥਂ’’ਤਿ. ਤਤ੍ਥ ਅਨੁਪ੍ਪਾਦੋ ਧਮ੍ਮੋ ਯੇਸਂ ਤੇ ਅਨੁਪ੍ਪਾਦ ਧਮ੍ਮਾ. ਮਗ੍ਗੇਨ ਪਹੀਨਾ ਅਕੁਸਲ ਧਮ੍ਮਾ. ਅਨੁਪ੍ਪਾਦ ਧਮ੍ਮਾਨਂ ਭਾਵੋਤਿ ਵਿਗ੍ਗਹੋ. ਅਨੁਪ੍ਪਾਦ ਧਮ੍ਮਤਾਯ ਆਪਾਦਨਂ. ਤਸ੍ਸ ਕਰਣਨ੍ਤਿ ਸਮਾਸੋ. ‘‘ਦਿਸ੍ਵਾ’’ਤਿ ਤੇਸਂ ਉਪ੍ਪਤ੍ਤਿ ਵਤ੍ਥੁਂ ਦਿਸ੍ਵਾ. ‘‘ਪਚ੍ਚਯਸਮੁਚ੍ਛਿਨ੍ਦਨਤ੍ਥਂ’’ਤਿ ਪਚ੍ਚਯਭੂਤਸ੍ਸ ਅਨੁਸਯਸ੍ਸ ਸਮੁਚ੍ਛਿਨ੍ਦਨਤ੍ਥਂ. ‘‘ਅਪਤ੍ਤਾ’’ਤਿ ਇਦਾਨਿ ਅਪਤ੍ਤਾ. ‘‘ਸਮਯੇ’’ਤਿ ਬੁਦ੍ਧੁਪ੍ਪਾਦਨਵਮਕ੍ਖਣੇ. ‘‘ਨਿਯਾਮਂ ਨ ਓਕ੍ਕਮਨ੍ਤੀ’’ਤਿ ਅਰਿਯਮਗ੍ਗਸਙ੍ਖਾਤਂ ਸਮ੍ਮਤ੍ਤਨਿਯਾਮਂ ਨ ਓਕ੍ਕਮਨ੍ਤਿ. ਨਪ੍ਪਵਿਸਨ੍ਤਿ. ਕਿਲੇਸੇਹਿ ਅਕੋਪੇਤਬ੍ਬਤਾਯ ਅਕੁਪ੍ਪੋ ਧਮ੍ਮੋ ਯਸ੍ਸਾਤਿ ਅਕੁਪ੍ਪ ਧਮ੍ਮੋ. ਖੀਣਾਸਵੋ. ਅਕੁਪ੍ਪ ਧਮ੍ਮਸ੍ਸ ਭਾਵੋ ਅਕੁਪ੍ਪ ਧਮ੍ਮਤਾ. ਅਰਹਤ੍ਤ ਫਲਂ. ‘‘ਤੇਸਂ’’ਤਿ ਕੁਸਲਾਨਂ ਧਮ੍ਮਾਨਂ. ਉਪ੍ਪਨ੍ਨਾਨਂ ਪਾਪਕਾਨਂ ਪਹਾਨਾਯਾਤਿ ਕਤ੍ਵਾ ਵਿਸੁਦ੍ਧਿਧਮ੍ਮੇਸੁ ਯੋਗਂ ਕਰੋਨ੍ਤਸ੍ਸ ਅਨੁਕ੍ਕਮੇਨ ਭਾਵਨਾ ਕਮ੍ਮੇ ਮਤ੍ਥਕਂ ਪਤ੍ਤੇਆਦਿਤੋ ਪਟ੍ਠਾਯ ਉਪ੍ਪਨ੍ਨਾਪਿ ਪਾਪਕਾ ਪਹਿਯ੍ਯਨ੍ਤਿ. ਅਨੁਪ੍ਪਨ੍ਨਾਪਿ ਨੁਪ੍ਪਜ੍ਜਨ੍ਤਿ. ਅਨੁਪ੍ਪਨ੍ਨਾਪਿ ਕੁਸਲਾ ਉਪ੍ਪਜ੍ਜਨ੍ਤਿ. ਉਪ੍ਪਨ੍ਨਾਪਿ ਭਾਵਨਾ ਪਾਰਿਪੂਰਿਂ ਗਚ੍ਛਨ੍ਤਿ. ਏਸਨਯੋ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਨੁਪ੍ਪਾਦਾਯਾਤਿਆਦੀਸੁ. ਏਵਂ ਚਤੂਸੁ ਮੁਖੇਸੁ ਏਕੇਕਮੁਖੇਨਪਿ ਸਮ੍ਮਾ ਪਦਹਨ੍ਤਸ੍ਸ ਸਮ੍ਮਪ੍ਪਧਾਨਂ ਚਤੁਕਿਚ੍ਚਸਾਧਕਂ ਹੋਤਿ. ਤੇਨਾਹ ‘‘ਏਤੇਸੁ ਪਨਾ’’ਤਿਆਦਿਂ.

ਅਭਿਵਿਸਿਟ੍ਠੇਨ ਧਮ੍ਮਵਵਤ੍ਥਾਨਞ੍ਞਾਣੇਨ ਞਾਤਬ੍ਬਾ ਸਬ੍ਬੇ ਪਰਮਤ੍ਥ ਧਮ੍ਮਾ ਅਭਿਞ੍ਞੇਯ੍ਯਾ ਨਾਮ. ‘‘ਅਭਿਞ੍ਞਾ ਸਿਦ੍ਧੀ’’ਤਿ ਅਭਿਜਾਨਨ ਕਿਚ੍ਚਸਿਦ੍ਧਿ. ਵਿਸੁਂ ਵਿਸੁਂ ਪਰਿਚ੍ਛਿਨ੍ਦਿਤ੍ਵਾ ਞਾਤਬ੍ਬਾ ਚਤੁਸਚ੍ਚ ਧਮ੍ਮਾ ਪਰਿਞ੍ਞੇਯ੍ਯਾ ਨਾਮ. ਤੇਹਿ ਦੁਕ੍ਖਸਚ੍ਚ ਧਮ੍ਮਾ ਪਰਿਞ੍ਞਾਤਬ੍ਬਭਾਵੇਨ, ਸਮੁਦਯ ਸਚ੍ਚ ਧਮ੍ਮਾ ਪਹਾਤਬ੍ਬ ਭਾਵੇਨ, ਨਿਰੋਧਸਚ੍ਚ ਧਮ੍ਮਾ ਸਚ੍ਛਿਕਾਤਬ੍ਬ ਭਾਵੇਨ, ਮਗ੍ਗਸਚ੍ਚ ਧਮ੍ਮਾ ਭਾਵੇਤਬ੍ਬਭਾਵੇਨ ਞਾਤਬ੍ਬਾ ਹੋਨ੍ਤੀਤਿ. ‘‘ਭਾਵਨਾਸਿਦ੍ਧੀ’’ਤਿ ਭਾਵਨਾਕਿਚ੍ਚ ਸਿਦ੍ਧਿ. ਤਂ ਸਂਯੁਤ੍ਤਕੇ ਇਮਾਯਪਾਲ਼ਿਯਾ ਸਮੇਤੀਤਿ ਸਮ੍ਬਨ੍ਧੋ. ‘‘ਵਿਭਙ੍ਗੇ ਪਨਾ’’ਤਿ ਇਦ੍ਧਿਪਾਦਵਿਭਙ੍ਗੇ ਪਨ. ‘‘ਚਿਤ੍ਤ ਚੇਤਸਿਕਰਾਸੀ’’ਤਿ ਸਹ ਪੁਬ੍ਬਭਾਗਭਾਵਨਾਯ ਉਤ੍ਤਰਿ ਮਨੁਸ੍ਸ ਧਮ੍ਮਪਰਿਯਾ ਪਨ੍ਨਾ ਚਿਤ੍ਤਚੇਤਸਿਕਰਾਸਿ. ‘‘ਤਤ੍ਥ ਪਨਾ’’ਤਿ ਵਿਭਙ੍ਗੇ ਤਸ੍ਮਿਂ ਉਤ੍ਤਰਚੂਲ਼ਭਾਜਨੀਯੇ ਪਨ. ‘‘ਇਧਾ’’ਤਿ ਇਮਸ੍ਮਿਂ ਸਙ੍ਗਹੇ.

ਚਤ੍ਤਾਰਿ ਸੋਤਾਪਤ੍ਤਿਯਙ੍ਗਾਨਿ ਨਾਮ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ. ਧਮ੍ਮੇ, ਸਙ੍ਘੇ, ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋਤਿ ਏਵਂ ਵੁਤ੍ਤਾਨਿ ਸੋਤਾਪਤ੍ਤਿਯਾ ਅਙ੍ਗਾਨਿ. ਤਤ੍ਥ ‘‘ਅਰਿਯਕਨ੍ਤੇਹੀ’’ਤਿ ਅਰਿਯਜਨੇਹਿ ਕਾਮਿਤੇਹਿ ਇਚ੍ਛਿਤੇਹਿ. ‘‘ਸੀਲੇਹੀ’’ਤਿ ਪਞ੍ਚਨਿਚ੍ਚਸੀਲੇਹਿ, ਆਜੀਵਟ੍ਠਮਕਸੀਲੇਹਿ ਵਾ. ‘‘ਸਮ੍ਮਪ੍ਪਧਾਨੇਸੂ’’ਤਿ ਸਮ੍ਮਪ੍ਪਧਾਨਕਿਚ੍ਚੇਸੁ.

‘‘ਸੋਲ਼ਸਹਿਕਿਚ੍ਚੇਹੀ’’ਤਿ ਏਕੇਕਸ੍ਮਿਂ ਸਚ੍ਚੇ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਸੋਲ਼ਸਹਿ ਕਿਚ੍ਚੇਹਿ. ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਤਿਆਦੀਹਿ ਸੋਲ਼ਸਹਿ ਅਤ੍ਥੇਹੀਤਿ ਵੁਤ੍ਤਂ ਹੋਤਿ. ਤੇ ਚ ਅਤ੍ਥਾ ਪਰਤੋ ਆਗਮਿਸ੍ਸਨ੍ਤਿ. ਸਤਿ ਏਵ ਸਮ੍ਬੋਜ੍ਝਙ੍ਗੋਤਿ ਵੁਤ੍ਤਂ, ਕਥਂ ਪਨ ਸਾਸਤਿ ਸਮ੍ਬੋਧਿਂ ਸਮੁਟ੍ਠਾਪੇਤੀਤਿ ਆਹ ‘‘ਸਾਹੀ’’ਤਿਆਦਿਂ. ਏਸਨਯੋ ਸੇਸਬੋਜ੍ਝਙ੍ਗੇਸੁਪਿ. ‘‘ਤੇਸੁ ਧਮ੍ਮੇਸੂ’’ਤਿ ਅਜ੍ਝਤ੍ਤਬਹਿਦ੍ਧਾ ਧਮ੍ਮੇਸੁ. ‘‘ਲੀਨਸਙ੍ਕੋਚ ਕੋਸਜ੍ਜਪਕ੍ਖਂ’’ਤਿ ਲੀਨਪਕ੍ਖ ਸਙ੍ਕੋਚ ਪਕ੍ਖਕੋਸਜ੍ਜ ਪਕ੍ਖਂ. ਧੁਰਂ ਸੁਟ੍ਠੁ ਪਗ੍ਗਣ੍ਹਾਤਿ ਉਕ੍ਖਿਪਤੀਤਿ ਧੁਰਸਮ੍ਪਗ੍ਗਹੋ. ‘‘ਧੁਰਂ’’ਤਿ ਸਮਥਧੁਰਂ ਵਿਪਸ੍ਸਨਾ ਧੁਰਞ੍ਚ. ‘‘ਅਰਤਿ ਉਕ੍ਕਣ੍ਠ ਪਕ੍ਖਂ’’ਤਿ ਅਰਤਿਪਕ੍ਖ ਨਿਬ੍ਬਿਦਾਪਕ੍ਖਂ. ਧਮ੍ਮੇ ਰਤਿ ਧਮ੍ਮਰਤਿ. ਧਮ੍ਮੇ ਨਨ੍ਦੀ ਧਮ੍ਮਨਨ੍ਦੀ. ਧਮ੍ਮੇ ਆਰਾਮੋ ਧਮ੍ਮਾਰਾਮੋ. ‘‘ਸਾਰਮ੍ਭੋ’’ ਨਾਮ ਚਿਤ੍ਤਵਿਹੇਸਾ. ‘‘ਦਰਥੋ’’ ਨਾਮ ਚਿਤ੍ਤਸਨ੍ਤਾਪੋ. ਸਮਾਹਿਤੋ ਭਿਕ੍ਖਵੇ ਯਥਾਭੂਤਂ ਪਜਾਨਾਤਿ ਪਸ੍ਸਤੀਤਿ ਵਚਨਤੋ ਪਞ੍ਞਾਯ ਸਮਾਧਿ ਪਾਦਕਤਾ ਪਾਕਟਾਤਿ ਵੁਤ੍ਤਂ ‘‘ਤਸ੍ਸਾ’’ਤਿਆਦਿਂ. ਸਮਂ ਅਵਿਸਮਂ ਅਤ੍ਤਨੋ ਕਿਚ੍ਚਂ ਵਹਤਿ ਸੀਲੇਨਾਤਿ ਸਮਵਾਹੀ. ਸਮਵਾਹਿਸ੍ਸ ਭਾਵੋ ਸਮਵਾਹਿਤਾ.

ਸਾ ਪਨ ਚਤੁਬ੍ਬਿਧਾ ਹੋਤੀਤਿ ਸਮ੍ਬਨ੍ਧੋ. ‘‘ਤਸ੍ਸਾ’’ਤਿ ਸਮ੍ਮਾਦਿਟ੍ਠਿਯਾ. ‘‘ਵਿਸਾਖਾ’’ਤਿ ਆਲਪਨ ਪਦਂ. ‘ਸਬ੍ਬੇ ਲੋਕੁਤ੍ਤਰੇ ਹੋਨ੍ਤੀ’ਤਿ ਵਚਨਸ੍ਸ ਸਮ੍ਬਨ੍ਧਂ ਦਸ੍ਸੇਤੁਂ ‘‘ਤੇ ਪਨ ਸਤ੍ਤਤਿਂਸਪ੍ਪਭੇਦਾ’’ਤਿਆਦਿਮਾਹ. ਨ ਵਟ੍ਠਾਨਾਨਿ ਅਸ੍ਸ ਅਤ੍ਥੀਤਿ ਨਵਟ੍ਠਾਨਿਕਂ. ‘‘ਲੋਕੁਤ੍ਤਰੇ’’ਤਿ ਲੋਕੁਤ੍ਤਰ ਚਿਤ੍ਤੇ. ‘‘ਅਤ੍ਤਪ੍ਪਟਿਪਕ੍ਖਾਨਂ’’ਤਿ ਅਤ੍ਤਨਾ ਉਜੁਪ੍ਪਟਿਪਕ੍ਖਾਨਂ. ‘‘ਤੇ’’ਤਿ ਬੋਧਿਪਕ੍ਖਿਯ ਧਮ੍ਮਾ. ਏਤੇਨ ਦਸ੍ਸੇਤੀਤਿ ਸਮ੍ਬਨ੍ਧੋ. ‘‘ਕੁਣ੍ਡਲਿਯਾ’’ਤਿ ਏਵਂ ਨਾਮਕਂ ਬ੍ਰਾਹ੍ਮਣਂ ਆਲਪਤਿ. ‘‘ਵਿਜ੍ਜਾ’’ਤਿ ਮਗ੍ਗਵਿਜ੍ਜਾ. ‘‘ਵਿਮੁਤ੍ਤੀ’’ਤਿ ਫਲਵਿਮੁਤ੍ਤਿ.

ਬੋਧਿਪਕ੍ਖਿਯਾਨੁਦੀਪਨਾ ਨਿਟ੍ਠਿਤਾ.

੧੬੫. ਸਬ੍ਬਸਙ੍ਗਹੇ. ‘‘ਪਞ੍ਚਰਾਸਯੋ’’ਤਿ ਪਞ੍ਚਸਙ੍ਗਹਾ. ‘‘ਅਤੀਤਾਦਿਭੇਦਭਿਨ੍ਨਾਨਂ’’ਤਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਭੇਦੇਨ, ਅਜ੍ਝਤ੍ਤ ਬਹਿਦ੍ਧਾਭੇਦੇਨ, ਓਲ਼ਾਰਿਕਸੁਖੁਮਭੇਦੇਨ, ਹੀਨਪਣੀਤਭੇਦੇਨ, ਦੂਰਸਨ੍ਤਿਕਭੇਦੇਨ ਚ ਭਿਨ੍ਨਾਨਂ. ‘‘ਉਪਪਤ੍ਤਿ ਦ੍ਵਾਰੇਸੂ’’ਤਿ ਚਕ੍ਖਾਦਿ ਦ੍ਵਾਰੇਸੁ. ‘‘ਕਮ੍ਮਦ੍ਵਾਰੇਸੂ’’ਤਿ ਕਾਯਕਮ੍ਮਦ੍ਵਾਰਾਦੀਸੁ. ‘‘ਸਙ੍ਗਮ੍ਮਾ’’ਤਿ ਸਙ੍ਗਨ੍ਤ੍ਵਾ. ‘‘ਸਮਾਗਮ੍ਮਾ’’ਤਿ ਸਮਾਗਨ੍ਤ੍ਵਾ. ‘‘ਸਾਧਾਰਣ ਕਿਚ੍ਚਾਨਿ ਵਾ’’ਤਿ ਸਬ੍ਬਿਰਿਯਾਪਥੇਹਿ ਸਾਧਾਰਣ ਕਿਚ੍ਚਾਨਿਵਾ. ਪਾਲ਼ਿਪਾਠੇ. ‘‘ਕਿਞ੍ਚਾ’’ਤਿ ਕਸ੍ਮਾ ਚ. ‘‘ਸਙ੍ਖਾਰੇਵਦੇਥਾ’’ਤਿ ਸਙ੍ਖਾਰਾ ਸਙ੍ਖਾਰਾ ਇਤਿ ਤੁਮ੍ਹੇ ਵਦੇਥ. ‘‘ਕਿਞ੍ਚਸਙ੍ਖਤਂ’’ਤਿ ਕਤਮਞ੍ਚਸਙ੍ਖਤਂ. ‘‘ਰੂਪਂ ਰੂਪਤ੍ਥਾਯਾ’’ਤਿ ਰੂਪਵਿਕਤਿਯਾ ਜਾਤਤ੍ਥਾਯ ਰੂਪਸਙ੍ਖਾਤਂ ਸਙ੍ਖਤਂ ਅਭਿਸਙ੍ਖਰੋਨ੍ਤੀਤਿ ਅਤ੍ਥੋ. ਉਪਭੋਗੋ ਨਾਮ ਵਤ੍ਥਾਭਰਣਾਦਿਕੋ ਅਨ੍ਤੋਭੋਗੋ. ਪਰਿਭੋਗੋ ਨਾਮ ਮਞ੍ਚਪੀਠਾਦਿਕੋ ਬਾਹਿਰ ਪਰਿਭੋਗੋ. ਸਮ੍ਪਰਾਯਿਕਞ੍ਚ ਵੇਦਨਨ੍ਤਿ ਅਧਿਕਾਰੋ. ਸੇਸੇਸੁਪਿ ਸਞ੍ਞਾਸਙ੍ਖਾਰ ਵਿਞ੍ਞਾਣੇਸੁਪਿ. ‘‘ਦਾਨਂ ਦਾਨਤ੍ਥਾਯਾ’’ਤਿ ਦਾਨਪੁਞ੍ਞਸ੍ਸ ਜਾਤਤ੍ਥਾਯ. ਦਾਨਸਙ੍ਖਾਤਂ ਸਙ੍ਖਤਂ ਅਭਿਸਙ੍ਖਰੋਨ੍ਤੀਤਿ ਅਤ੍ਥੋ. ਅਥਵਾ ਦਾਨਸ੍ਸ ਅਤ੍ਥੋ ਦਾਨਤ੍ਥੋ. ‘‘ਅਤ੍ਥੋ’’ਤਿ ਚ ਵਿਪਾਕਤ੍ਥੋ ਫਲਤ੍ਥੋ. ਦਾਨਵਿਪਾਕਤ੍ਥਾਯ ਦਾਨਫਲਤ੍ਥਾਯ ਦਾਨਪੁਞ੍ਞਸਙ੍ਖਾਤਂ ਸਙ੍ਖਤਂ ਅਭਿਸਙ੍ਖਰੋਨ੍ਤੀਤਿ ਅਤ੍ਥੋ. ਏਵਂ ਸੇਸੇਸੁਪਿ. ‘‘ਅਨੁਯੁਞ੍ਜਨ੍ਤਾ’’ਤਿ ਵਿਪਸ੍ਸਨਾ ਕਮ੍ਮਂ ਅਨੁਯੁਞ੍ਜਨ੍ਤਾ. ‘‘ਤੀਸੁ ਧਮ੍ਮੇਸੁ ਕਿਲਮਿਸ੍ਸਨ੍ਤੀ’’ਤਿ ਵੁਤ੍ਤਂ. ਕਥਂ ਕਿਲਮਿਸ੍ਸਨ੍ਤੀਤਿ ਆਹ ‘‘ਤਥਾਹਿ ਯਥਾ’’ਤਿਆਦਿਂ. ‘‘ਸੁਖਸਞ੍ਞਿਤੇਸੁ ਪਟਿਸਰਣੇਸੂ’’ਤਿ ਚਿਤ੍ਤਸਾਤਚਿਤ੍ਤਰਤਿ ਪਟਿਲਾਭਤ੍ਥਾਯ ਪਟਿਸਰਣੇਸੁ ਆਰਮ੍ਮਣੇਸੁ. ‘‘ਤਾਹੀ’’ਤਿ ਸਮ੍ਪਤ੍ਤੀਹਿ. ‘‘ਤਾ’’ਤਿ ਸਮ੍ਪਤ੍ਤਿਯੋ. ਪਰਮੁਕ੍ਕਂਸਗਤਂ ਸੁਖਸਞ੍ਞਿਤਟ੍ਠਾਨਂ ਹੋਤਿ. ਤਸ੍ਮਾ ਤਤ੍ਥ ਦੁਕ੍ਖਾਨੁਪਸ੍ਸਨਾਞਾਣਂ ਅਤਿਰੇਕਤਰਂ ਪਵਤ੍ਤੇਤਬ੍ਬਨ੍ਤਿ ਤਦਤ੍ਥਾਯ ਭਗਵਾ ਤਂ ਵੇਦਨਂ ਵਿਸੁਂ ਏਕਂ ਖਨ੍ਧਂ ਕਤ੍ਵਾ ਖਨ੍ਧ ਦੇਸਨਂ ਦੇਸੇਤੀਤਿ ਅਧਿਪ੍ਪਾਯੋ. ਏਸਨਯੋ ਪਰਤ੍ਥਪਿ. ‘‘ਞਾਣਸਮ੍ਮਤਂ’’ਤਿ ਪੁਥੁਜ੍ਜਨੇਹਿ ਞਾਣਸਮ੍ਮਤਂ. ‘‘ਪਰਮਂ ਅਤ੍ਤਾਨਂ ਕਤ੍ਵਾ’’ਤਿ ਲੋਕੇ ਵਿਞ੍ਞੁਤ੍ਤਂ ਪਰਮਂ ਹੋਤਿ, ਤਸ੍ਮਾ ਵਿਜਾਨਨਂ ਪਰਮਂ ਅਤ੍ਤਾਨਂ ਕਤ੍ਵਾ. ਸੇਸਮੇਤ੍ਥ ਸੁਪਾਕਟਂ. ‘‘ਯਤ੍ਥਭੁਞ੍ਜਤੀ’’ਤਿਆਦੀਸੁ. ‘‘ਯਤ੍ਥ ਭੁਞ੍ਜਤੀ’’ਤਿ ਯਸ੍ਮਿਂ ਭਾਜਨੇ ਭੁਞ੍ਜਤਿ. ‘‘ਯਞ੍ਚ ਭੁਞ੍ਜਤੀ’’ਤਿ ਯਞ੍ਚ ਭੋਜਨਂ ਭੁਞ੍ਜਤਿ. ‘‘ਯੇਨ ਚ ਭੁਞ੍ਜਤੀ’’ਤਿ ਯੇਨਬ੍ਯਞ੍ਜਨੇਨ ਭੁਞ੍ਜਤਿ. ‘‘ਯੋ ਚ ਭੋਜਕੋ’’ਤਿ ਸਮੀਪੇ ਠਤ੍ਵਾ ਪਰਿਵੇਸਕੋ. ‘‘ਯੋ ਚ ਭੁਞ੍ਜਿਤਾ’’ਤਿ ਯੋ ਚ ਭੁਞ੍ਜਕੋ.

‘‘ਸਾਸਵਾ ਏਵਾ’’ਤਿ ਸਾਸਵਾ ਨਾਮ ਲੋਕਿਯ ਧਮ੍ਮਾ. ‘‘ਉਸ੍ਸਾਹਨ੍ਤਾ ਵਿਯ ਹੋਨ੍ਤੀ’’ਤਿ ਅਬ੍ਯਾਪਾਰ ਧਮ੍ਮਤ੍ਤਾ ਵੁਤ੍ਤਂ. ਨ ਹਿ ਅਬ੍ਯਾਪਾਰ ਧਮ੍ਮਾਨਂ ਏਕਨ੍ਤੇਨ ਉਸ੍ਸਾਹੋ ਨਾਮ ਅਤ੍ਥਿ. ਫਲਸ੍ਸ ਨਿਬ੍ਬਤ੍ਤਨਤੋ ਫਲਤ੍ਥਾਯ ਉਸ੍ਸਾਹਨ੍ਤਾ ਵਿਯ ਹੋਨ੍ਤੀਤਿ. ‘‘ਆਕਿਰਿਤ੍ਵਾ’’ਤਿ ਪਤ੍ਥਰਿਤ੍ਵਾ. ਸੇਸਮੇਤ੍ਥ ਸੁਬੋਧਂ.

ਧਾਤੁਸਙ੍ਗਹੇ. ‘‘ਅਤ੍ਤਨੋ ਏਵ ਸਭਾਵਂ’’ਤਿ ਅਤ੍ਤਨੋ ਸਭਾਵਂ ਏਵਾਤਿਪਿ ਯੁਜ੍ਜਤਿ. ‘‘ਈਹਾ ਚ ਬ੍ਯਾਪਾਰੋ ਚਾ’’ਤਿ ਅਭਿਕ੍ਕਮਾਮਿ ਪਟਿਕ੍ਕਮਾਮੀਤਿਆਦਿਨਾ ਉਸ੍ਸਾਹੋ ਚ, ਅਭਿਕ੍ਕਮਨਾਦਿ ਬ੍ਯਾਪਾਰੋ ਚ. ‘‘ਨ ਚ ਜੀਵਯੋਗਾ’’ਤਿ ਨ ਚ ਲੋਕਿਯਮਹਾਜਨ ਸਮ੍ਮਤੇਨ ਜੀਵੇਨ ਯੁਤ੍ਤਾ. ਅਟ੍ਠਕਥਾਪਾਠੇ. ਯਾਯਤਿ ਏਤ੍ਥਾਤਿ ਯਨ੍ਤਂ. ਉਦੁਕ੍ਖਲਂ. ਯਨ੍ਤ ਚਕ੍ਕਯਟ੍ਠਿਨਾਮ ਯਨ੍ਤ ਚਕ੍ਕਸਮ੍ਬਨ੍ਧਾ ਮੁਸਲਯਟ੍ਠਿ. ਅਰਣੀ ਵੁਚ੍ਚਤਿ ਅਗ੍ਗਿਨਿਬ੍ਬਤ੍ਤਕਤ੍ਥਾਯ ਕਤਾ ਦ੍ਵੇ ਸਾਰਘਟਿਕਾ. ਅਧਰਾਰਣੀ ਨਾਮ ਹੇਟ੍ਠਾਰਣੀ. ਉਤ੍ਤਰਾਰਣੀ ਨਾਮ ਉਦ੍ਧਾਰਣੀ. ‘‘ਸਲ੍ਲਮਿਵਾ’’ਤਿ ਕਣ੍ਡੋਵਿਯ. ‘‘ਸੂਲਮਿਵਾ’’ਤਿ ਵਿਜ੍ਝਨਕਦਣ੍ਡੋ ਵਿਯ. ‘‘ਆਤੁਰਾਵਿਯਾ’’ਤਿ ਤੇਹਿਸਲ੍ਲਸੂਲੇਹਿ ਵਿਦ੍ਧਗਿਲਾਨਾ ਵਿਯ. ਅਯਥਾਭੁਚ੍ਚ ਨਿਮਿਤ੍ਤਂ ਨਾਮ ਅਯਥਾਭੂਤਂ ਸਤ੍ਤਪੁਗ੍ਗਲਾਦਿਨਿਮਿਤ੍ਤਂ. ‘‘ਵਨਮਿਗੋ ਵਿਯਾ’’ਤਿ ਤਿਣ ਰੂਪੇ ਪੁਰਿਸ ਸਞ੍ਞਾਲਾਭੋ ਵਨਮਿਗੋ ਵਿਯ. ‘‘ਅਙ੍ਗਾਰਕਾਸੁਯਂ’’ਤਿ ਅਙ੍ਗਾਰਕੂਪੇ. ‘‘ਨਾਨਾਵਿਧੁਪਦ੍ਦਵ ਨਿਮਿਤ੍ਤਤੋ’’ਤਿ ਨਾਨਾਵਿਧਾਨਂ ਉਪਦ੍ਦਵਾਨਂ ਉਪ੍ਪਤ੍ਤਿ ਪਚ੍ਚਯਤੋ. ‘‘ਵਨਮਕ੍ਕਟੋ ਵਿਯਾ’’ਤਿ ਵਨਵਾਨਰੋ ਵਿਯ. ਦੁਕ੍ਖੇਨ ਦਮਨਂ ਅਸ੍ਸਾਤਿ ਦੁਦ੍ਦਮਨੋ. ‘‘ਅਸ੍ਸਖਲ਼ੁਙ੍ਕੋ’’ਤਿ ਦੁਟ੍ਠ ਅਸ੍ਸੋ. ‘‘ਯਤ੍ਥ ਕਾਮਨਿਪਾਤਿਤੋ’’ਤਿ ਯਸ੍ਮਿਂ ਯਸ੍ਮਿਂ ਆਰਮ੍ਮਣੇ ਪਤਿਤੁਂ ਕਾਮੇਤਿ ਇਚ੍ਛਤਿ, ਤਤ੍ਥ ਤਤ੍ਥ ਨਿਪਾਤਿਤੋ. ਪੁਗ੍ਗਲਵਸੇ ਅਵਤ੍ਤਿਤ੍ਵਾ ਆਰਮ੍ਮਣੇਸੁ ਯਦਿਚ੍ਛਕਂ ਨਿਪਤਨਤੋਤਿ ਵੁਤ੍ਤਂ ਹੋਤਿ. ‘‘ਰਙ੍ਗਨਟੋ ਵਿਯਾ’’ਤਿ ਸਮਜ੍ਜਨਟਕੋ ਵਿਯ. ਸਭਾਵਤੋ ਅਤ੍ਥਿ ਸਂਵਿਜ੍ਜਤੀਤਿ ਸਨ੍ਤੋ. ਤਥੋਤਿ ਚ ਅਵਿਤਥੋਤਿ ਚ ਅਤ੍ਥਤੋ ਏਕਂ. ਅਞ੍ਞੋ ਪਕਾਰੋ ਅਞ੍ਞਥਾ. ਨਤ੍ਥਿ ਅਞ੍ਞਥਾ ਅਸ੍ਸਾਤਿ ਅਨਞ੍ਞਥਂ. ਦੁਕ੍ਖਦੁਕ੍ਖਂ ਨਾਮ ਕਾਯਿਕਦੁਕ੍ਖ ਚੇਤਸਿਕਦੁਕ੍ਖਂ. ‘‘ਕਮ੍ਮਜਾਨਂ’’ਤਿ ਵਿਪਾਕਕ੍ਖਨ੍ਧਕਟਤ੍ਤਾ ਰੂਪਾਨਂ. ‘‘ਉਪ੍ਪਤ੍ਤਿਯਾ’’ਤਿ ਉਪ੍ਪਾਦਤ੍ਥਾਯ. ‘‘ਪਗੇਵਾ’’ਤਿ ਪੁਰੇਤਰਮੇਵ. ‘‘ਉਪ੍ਪਨ੍ਨਂ ਪੀ’’ਤਿ ਉਪ੍ਪਨ੍ਨਮ੍ਪਿ ਚਕ੍ਖੁ. ‘‘ਪਵਤ੍ਤਿਯਾ’’ਤਿ ਸਨ੍ਤਾਨਟ੍ਠਿਤਿਯਾ ਠਿਤਤ੍ਥਾਯ. ‘‘ਪਟਿਜਗ੍ਗਨ ਦੁਕ੍ਖਂ’’ਤਿ ਸੋਧਨ ਦੁਕ੍ਖਂ. ਪਚ੍ਚਯਵੇਕਲ੍ਲਂ ਨਾਮ ਆਹਾਰਚ੍ਛੇਦਾਦਿਕਂ. ਨਨੁ ਭਿਜ੍ਜਨਭਯੇਨ ਪਗੇਵ ਪਚ੍ਚਯਸਮ੍ਪਾਦਨਂ ਨਾਮ ਸਙ੍ਖਾਰ ਦੁਕ੍ਖਮੇਵ ਸਿਯਾਤਿ. ਸਚ੍ਚਂ. ਇਧ ਪਨ ਆਸਨ੍ਨੇ ਭਿਜ੍ਜਨਨਿਮਿਤ੍ਤਂ ਦਿਸ੍ਵਾ ਕਤਂ ਪਚ੍ਚਯ ਸਮ੍ਪਾਦਨਂ ਅਧਿਪ੍ਪੇਤਂ. ‘‘ਰਕ੍ਖਾਵਰਣਗੁਤ੍ਤਿ ਸਂਵਿਧਾਨ ਦੁਕ੍ਖਂ’’ਤਿ ਨਾਨਾਭਯਤੋ ਰਕ੍ਖਣਸ੍ਸ ਚ ਆਵਰਣਸ੍ਸ ਚ ਗੋਪਨਸ੍ਸ ਚ ਸਂਵਿਧਾਨ ਦੁਕ੍ਖਂ. ‘‘ਤਦੁਭਯੇਨ ਸਹੇਵ ਸਿਜ੍ਝਤੀ’’ਤਿ ਕਸਿਗੋਰਕ੍ਖਾਦੀਨਿ ਸਙ੍ਖਾਰ ਕਮ੍ਮਾਨਿ ਵਾ ਰਕ੍ਖਾਵਰਣ ਗੁਤ੍ਤਿਸਂ ਵਿਧਾਨਾਦੀਨਿਵਾ ਕਰੋਨ੍ਤਾਨਂ ਤਂ ਦੁਕ੍ਖ ਦੁਕ੍ਖਂ ਤਦੁਭਯੇਨ ਦੁਕ੍ਖੇਨ ਸਹੇਵ ਸਿਜ੍ਝਤਿ. ‘‘ਤੇਸਂ’’ਤਿ ਚਕ੍ਖਾਦੀਨਿ ਅਸ੍ਸਾਦੇਨ੍ਤਾਨਂ ਨ ਮੁਚ੍ਚਤੀਤਿ ਸਮ੍ਬਨ੍ਧੋ. ‘‘ਪਵਤ੍ਤਿ ਨਿਰੋਧ ਭੂਤਸ੍ਸਾ’’ਤਿ ਪਵਤ੍ਤਿਯਾ ਨਿਰੋਧ ਭੂਤਸ੍ਸ. ‘‘ਤਂ ਪਜਹਤਿ ਯੇਵਾ’’ਤਿ ਤਂ ਲੋਭਂ ਪਜਹਤਿਯੇਵ. ‘‘ਯਾਵਦੇਵਾ’’ਤਿ ਉਪਰਿਮਪਰਿਯਨ੍ਤੇਨ. ਅਹਂ ਅਸ੍ਮੀਤਿ ਪਵਤ੍ਤੋ ਮਾਨੋ ਅਸ੍ਮਿਮਾਨੋ. ਤਸ੍ਸ ਸਮੁਗ੍ਘਾਤਨਂ ਸਮੁਚ੍ਛਿਨ੍ਦਨਂ. ‘‘ਪਰਿਞ੍ਞਾਤੇਸੂ’’ਤਿ ਤੇਸੁ ਅਨੁਸਯਿਤਾਯ ਤਣ੍ਹਾਯ ਪਹਾਨਵਸੇਨ ਪਰਿਞ੍ਞਾਤੇਸੁ. ‘‘ਤਬ੍ਬਿਪਰੀਤੇਨ ਪਨਾ’’ਤਿ ਤਤੋ ਵਿਪਰੀਤੇਨ ਪਨ. ਅਸ੍ਮਿਮਾਨਸ੍ਸ ਅਨਧਿਟ੍ਠਾਨਭੂਤਾਤਿਆਦਿ ਅਤ੍ਥੇਨ. ਅਨਿਨ੍ਦ੍ਰਿਯਬਦ੍ਧ ਧਮ੍ਮਾ ਨਾਮ ਪਥਵੀਪਬ੍ਬਤਾਦੀਸੁ ਪਵਤ੍ਤਾ ਰੂਪ ਧਮ੍ਮਾ.

ਸਤ੍ਤੇ ਅਨੁਕ੍ਕਣ੍ਠਮਾਨੇ ਕਰੋਤੀਤਿ ਸਮ੍ਬਨ੍ਧੋ. ‘‘ਇਤੀ’’ਤਿ ਤਸ੍ਮਾ. ਤੇਸਂ ਸਤ੍ਤਾਨਂ. ਦੁਜ੍ਜਹੋ ਨਾਮ ਨਤ੍ਥਿ. ਤਸ੍ਮਾ ਲੋਭੋਯੇਵ ਦੁਕ੍ਖਸਮੁਦਯਾਰਿਯ ਸਚ੍ਚਂ ਨਾਮਾਤਿ ਯੋਜਨਾ. ਸਾਸਵਾ ਕੁਸਲਾ ਕੁਸਲ ਧਮ੍ਮਾ ਸਮੁਦਯਸਚ੍ਚਂ ਨਾਮ, ਦੁਕ੍ਖ ਸਚ੍ਚਭੂਤਾਨਂ ਵਿਪਾਕਕ੍ਖਨ੍ਧਕਟਤ੍ਤਾ ਰੂਪਾਨਂ ਸਮੁਦਯਤ੍ਤਾ ਸਂਵਡ੍ਢਨਤ੍ਤਾ. ਮੂਲਭਾਵੇਨ ਵੁਤ੍ਤਾ ‘ਅਵਿਜ੍ਜਾ ਪਚ੍ਚਯਾ ਸਙ੍ਖਾਰਾ’ਤਿਆਦੀਸੁ. ‘‘ਨਨ੍ਦਨਸਦਿਸਂ’’ਤਿ ਦੇਵਲੋਕੇ ਨਨ੍ਦਨਵਨੁਯ੍ਯਾਨਸਦਿਸਂ. ‘‘ਆਦਿਪਭਵਪਧਾਨਭੂਤਾ’’ਤਿ ਦੁਕ੍ਖ ਧਮ੍ਮਾਨਂ ਆਦਿਭੂਤਾ, ਪਭਵਭੂਤਾ, ਪਧਾਨਭੂਤਾ. ‘‘ਪਭਵਭੂਤਾ’’ਤਿ ਚ ਪਥਮੁਪ੍ਪਤ੍ਤਿਹੇਤੁਭੂਤਾ. ‘‘ਤੇਸਂ’’ਤਿ ਦੁਕ੍ਖ ਧਮ੍ਮਾਨਂ.

‘‘ਕਤ੍ਥਚੀ’’ਤਿ ਕਾਮਭਵਾਦੀਸੁ ਕਿਸ੍ਮਿਞ੍ਚਿਭਵੇ. ‘‘ਕਦਾਚੀ’’ਤਿ ਅਤੀਤਾਦਿਕਾਲੇਸੁ ਕਿਸ੍ਮਿਞ੍ਚਿਕਾਲੇ. ‘‘ਕੇਸਞ੍ਚੀ’’ਤਿ ਦੇਵਮਨੁਸ੍ਸਾਦੀਸੁ ਸਤ੍ਤੇਸੁ ਕੇਸਞ੍ਚਿਸਤ੍ਤਾਨਂ. ‘‘ਕੁਤੋਚੀ’’ਤਿ ਬਹੂਸੁਕਾਰਣੇਸੁ ਕੁਤੋਚਿਕਾਰਣਾ. ‘‘ਕਥਞ੍ਚੀ’’ਤਿ ਕੇਨਚਿਪਕਾਰੇਨ.

‘‘ਪਰਿਣਾਮੋ’’ਤਿ ਪਰਿਣਮਨਂ ਅਞ੍ਞਥਾਭਾਵੋ. ‘‘ਤਂ ਸਮਙ੍ਗੀਨਂ’’ਤਿ ਤੇਹਿ ਚਕ੍ਖਾਦੀਹਿ ਸਮਙ੍ਗੀਨਂ ਪੁਗ੍ਗਲਂ. ਪਾਲ਼ਿਪਾਠੇ. ‘‘ਆਦਿਤ੍ਤਂ’’ਤਿਆਦੀਪਿਤਂ ਸਮੁਜ੍ਜਲਨ੍ਤਂ. ‘‘ਕੇਨਾ’’ਤਿ ਕਰਣਭੂਤੇਨ ਕੇਨ ਅਗ੍ਗਿਨਾ. ਤਥਾ ਅਰਿਯਮਗ੍ਗੋ ਵਿਪਰਿਣਾਮ ਧਮ੍ਮੋ ਚ ਹੋਤਿ. ਸੋਵਿਪਰਿਣਾਮ ਦੁਕ੍ਖੇਨਪਿ ਪੁਗ੍ਗਲਂ ਭੁਸਂ ਪੀਲ਼ੇਤਿਯੇਵਾਤਿ ਯੋਜਨਾ. ‘‘ਨਾ’’ਤਿ ਨ ਸਿਯਾ. ਸਮਨਂ ਵੂਪਸਮਨਂ ਸਨ੍ਤਿ. ਸਬ੍ਬਦੁਕ੍ਖਾਨਂ ਸਨ੍ਤੀਤਿ ਵਿਗ੍ਗਹੋ. ਸਬ੍ਬਂ ਵਟ੍ਟਦੁਕ੍ਖਨ੍ਤਿ ਸਮ੍ਬਨ੍ਧੋ. ‘‘ਤਸ੍ਸਾ’’ਤਿ ਅਰਿਯਮਗ੍ਗਸ੍ਸ. ‘‘ਪਵਤ੍ਤਮਾਨਾ ਚਾ’’ਤਿ ਸਨ੍ਤਤਿਠਿਤਿਵਸੇਨ ਵਤ੍ਤਮਾਨਾ ਚ. ‘‘ਮਹਨ੍ਤਂ ਪਰਿਲ਼ਾਹਦੁਕ੍ਖਂ’’ਤਿ ਸੋਕ ਪਰਿਦੇਵ ਦੁਕ੍ਖ ਦੋਮਨਸ੍ਸੁਪਾਯਾਸਾਨਂ ਪਵਤ੍ਤਿਵਸੇਨ ਮਹਨ੍ਤਂ ਪਰਿਲ਼ਾਹ ਦੁਕ੍ਖਂ. ਨਿਬ੍ਬਾਨਸ੍ਸ ਅਨੁਪ੍ਪਾਦ ਧਮ੍ਮਤ੍ਤਾ ਉਪ੍ਪਾਦਤ੍ਥਾਯ ਪਚ੍ਚਯੋ ਨਾਮ ਨਤ੍ਥਿ. ਤਥਾ ਅਪ੍ਪਵਤ੍ਤਿ ਧਮ੍ਮਤ੍ਤਾ ਪਵਤ੍ਤਤ੍ਥਾਯ. ਸਮ੍ਪਾਪੁਣਿਤਬ੍ਬਤ੍ਤਾ ਪਨ ਸਮ੍ਪਾਪਨਤ੍ਥਾਯ ਪਚ੍ਚਯੋ ਅਤ੍ਥੀਤਿ ਆਹ ‘‘ਸਮ੍ਪਾਪਕ ਪਚ੍ਚਯਾਭਿਸਙ੍ਖਰਣਲੇਸਂ’’ਤਿ. ਸਮ੍ਪਾਪਕ ਪਚ੍ਚਯਾ ਨਾਮ ਅਰਿਯ ਮਗ੍ਗੋ ਚ ਤਸ੍ਸ ਪਚ੍ਚਯਾ ਚ.

ਭਵਾਭਵਸਙ੍ਖਾਤਸ੍ਸ ਦੁਕ੍ਖਕ੍ਖਨ੍ਧਸ੍ਸਾਤਿ ਸਮ੍ਬਨ੍ਧੋ. ‘‘ਤਦੇਵਾ’’ਤਿ ਤਂ ਦੁਕ੍ਖਕ੍ਖਨ੍ਧਂ ਏਵ. ਅਨੁਪੁਨਪ੍ਪੁਨਂ ਪਦੀਯਤੇ ਅਨੁਪ੍ਪਦਾਨਂ. ‘‘ਨਿਯ੍ਯਾਤਨਟ੍ਠੋ’’ਤਿ ਹਨ੍ਦ ਗਣ੍ਹਾਤਿ ਸਮ੍ਪਟਿਚ੍ਛਾਪਨਟ੍ਠੋ. ‘‘ਤਤੋ’’ਤਿ ਵਟ੍ਟਦੁਕ੍ਖਤੋ. ‘‘ਮੁਚ੍ਚਨੂਪਾਯਸ੍ਸਾ’’ਤਿ ਦਾਨਸੀਲਨਿਕ੍ਖਮਾਦਿਕਸ੍ਸ ਮੁਚ੍ਚਨੂਪਾਯਸ੍ਸ. ‘‘ਨਿਸ੍ਸਰਣਵਿਮੁਤ੍ਤਿਯਾ’’ਤਿ ਨਿਸ੍ਸਰਣ ਸਙ੍ਖਾਤਾਯ ਵਿਮੁਤ੍ਤਿਯਾ. ਸਙ੍ਖਾਰ ਦੁਕ੍ਖਸ੍ਸ ਅਭਾਵਟ੍ਠੋ. ‘‘ਸਮ੍ਮੋਹਸ੍ਸ ਪਹਾਨਵਸੇਨਾ’’ਤਿ ਏਤੇਨ ਇਧ ਦਸ੍ਸਨਂ ਨਾਮ ਇਤੋ ਪਟ੍ਠਾਯ ਚਤੂਸੁ ਸਚ੍ਚੇਸੁ ਅਸਮ੍ਮੋਹ ਭਾਵਪਤ੍ਤਿ ਏਵ ਆਲੋਕਪਤ੍ਤਿ ਏਵ ਵੁਚ੍ਚਤੀਤਿ ਦਸ੍ਸੇਤਿ. ਤੇਨਾਹ ‘‘ਪਟਿਵਿਜ੍ਝਨਟ੍ਠੋ’’ਤਿ. ਤਣ੍ਹਾਯ ਦਾਸੋ ਤਣ੍ਹਾਦਾਸੋ. ਤਣ੍ਹਾਦਾਸਸ੍ਸ ਭਾਵੋ ਤਣ੍ਹਾਦਾਸਬ੍ਯਂ. ਪਰਵਸਤੋ ਵਿਮੁਤ੍ਤਿਵਸੇਨ ਅਪਰਾਧੀਨਤਾ ਭੁਜਿਸ੍ਸਭਾਵੋ ਨਾਮ. ਲੋਕਿਯਮਗ੍ਗਾਹਿ ਤਣ੍ਹਾਦਾਸਬ੍ਯਂ ਨਾਤਿਵਤ੍ਤਨ੍ਤਿ. ਤਣ੍ਹਾਵਸਂ ਪੂਰਯਮਾਨਾ ਤਣ੍ਹਾਵਿਸਯਂ ਵਿਪਾਕਂ ਜਨੇਨ੍ਤਿ. ਅਯਂ ਅਰਿਯਮਗ੍ਗੋ ਏਵ ਤਣ੍ਹਾਯ ਅਨਾਰਮ੍ਮਣਭਾਵੇ ਠਿਤੋ ਤਣ੍ਹਾਦਾਸਬ੍ਯਂ ਅਤਿਵਤ੍ਤਤਿ. ਤਣ੍ਹਾਵਸਂ ਭਿਨ੍ਦਮਾਨੋ ਤਣ੍ਹਾਯ ਅਵਿਸਯਂ ਵਿਪਾਕਂ ਜਨੇਤੀਤਿ ਅਧਿਪ੍ਪਾਯੋ. ‘‘ਦੁਕ੍ਖਮੁਤ੍ਤਿਯਾ’’ਤਿ ਦੁਕ੍ਖਤੋ ਮੁਚ੍ਚਨਤ੍ਥਂ. ‘‘ਦੁਕ੍ਖਵਡ੍ਢਿਯਾ’’ਤਿ ਦੁਕ੍ਖਵਡ੍ਢਨਤ੍ਥਾਯ. ਸੇਸਮੇਤ੍ਥ ਸੁਬੋਧਂ. ‘‘ਖਯਵਿਰਾਗ ਨਿਰੋਧ ਭੂਤੋ’’ਤਿ ਏਤ੍ਥ ਕਿਲੇਸ ਧਮ੍ਮਾਨਂ ਵਿਰਜ੍ਜਨਂ ਵਿਗਮਨਂ ਅਨ੍ਤਰਧਾਨਂ ਵਿਰਾਗੋ. ‘‘ਅਨਤ੍ਥ ਪਦਾਨੀ’’ਤਿ ਅਹਿਤਪਦਾਨਿ. ਭਯਾਦੀਨਵਪਦਾਨਿ. ‘‘ਦ੍ਵਾਰਛਕ੍ਕਆਰਮ੍ਮਣ ਛਕ੍ਕਭੇਦੇਨਾ’’ਤਿ ਦ੍ਵਾਰਛਕ੍ਕਂ ਧਮ੍ਮਾਰਮ੍ਮਣਂ ਹੋਤਿ. ਏਵਂਸਤਿ, ਆਰਮ੍ਮਣ ਛਕ੍ਕਨ੍ਤਿ ਨ ਵਤ੍ਤਬ੍ਬਂ ਧਮ੍ਮਾਰਮ੍ਮਣਸ੍ਸ ਵਿਸੁਂ ਗਹਿਤਤ੍ਤਾਤਿ. ਨੋ ਨਵਤ੍ਤਬ੍ਬਂ. ਕਸ੍ਮਾ, ਦ੍ਵਾਰਛਕ੍ਕਤੋ ਸੇਸਾਨਂ ਧਮ੍ਮਾਰਮ੍ਮਣਾਨਂ ਅਤ੍ਥਿਤਾਯਾਤਿ ਦਸ੍ਸੇਤੁਂ ‘‘ਏਤ੍ਥ ਚਾ’’ਤਿਆਦਿ ਵੁਤ੍ਤਂ. ਪਰਤੋ ‘‘ਏਤ੍ਥਪੀ’’ਤਿਆਦੀਸੁ ਏਸੇਵਨਯੋਤਿ.

ਸਬ੍ਬਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

ਸਮੁਚ੍ਚਯਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.

੮. ਪਚ੍ਚਯਸਙ੍ਗਹਅਨੁਦੀਪਨਾ

੧੬੬. ਯੇਹਿਪਕਾਰੇਹਿ ਯਥਾ. ਤੇਸਂ ਵਿਭਾਗੋ ਤਂ ਵਿਭਾਗੋ. ਅਯਞ੍ਚਨਿਦ੍ਦੇਸੋ ਏਕਸੇਸਨਿਦ੍ਦੇਸੋ, ਵਿਚ੍ਛਾਲੋਪਨਿਦ੍ਦੇਸੋਵਾਤਿ ਦਸ੍ਸੇਤੁਂ ‘‘ਤੇਸਂ’’ਤਿਆਦਿਮਾਹ. ਨ ਸਮੇਤਿ. ਗਾਥਾਯਂ ‘ਯੇਸਂ’ਤਿਆਦਿਨਾ ਤੀਹਿ-ਯ-ਸਦ੍ਦੇਹਿ ਦਸ੍ਸਿਤਾਨਂ ਤਿਣ੍ਣਂ ਅਤ੍ਥਾਨਂ-ਤ-ਸਦ੍ਦਤ੍ਥ ਸਮ੍ਭਵਤੋ. ਤ-ਸਦ੍ਦਤ੍ਥਾਨਞ੍ਚ ਅਨੁਸਨ੍ਧਿਯਂ ਪਰਿਪੁਣ੍ਣਂ ਕਤ੍ਵਾ ਵਤ੍ਤਬ੍ਬਤੋ. ‘‘ਸਮੁਪ੍ਪਜ੍ਜਤੀ’’ਤਿ ਸੁਟ੍ਠੁ ਪਰਿਪੁਣ੍ਣਂ ਕਤ੍ਵਾ ਉਪ੍ਪਜ੍ਜਤਿ, ਪਾਤੁਭਵਤਿ. ‘‘ਅਵਿਨਾ’’ਤਿ ਅਵਿਨਾ ਹੁਤ੍ਵਾ. ‘‘ਸਹਜਾਤ ਧਮ੍ਮੇਹੀ’’ਤਿ ਅਵਿਜ੍ਜਾ ਪਚ੍ਚਯਾ ਸਙ੍ਖਾਰਾਤਿਆਦੀਸੁ ਸਙ੍ਖਾਰਾਦੀਨਂ ਸਹਜਾਤ ਧਮ੍ਮੇਹਿ ਸਹੇਵ ਉਪ੍ਪਜ੍ਜਨਂ. ‘‘ਕਲਾਪਵਸੇਨਾ’’ਤਿ ਸੁਦ੍ਧ ਧਮ੍ਮ ਕਲਾਪਵਸੇਨ. ‘‘ਸਾਮਞ੍ਞ ਲਕ੍ਖਣਂ’’ਤਿ ਸਾਧਾਰਣ ਲਕ੍ਖਣਂ. ‘‘ਅਤ੍ਥੋ’’ਤਿ ਇਦਪ੍ਪਚ੍ਚਯਤਾ ਸਦ੍ਦਸ੍ਸ ਅਤ੍ਥੋ. ‘‘ਅਯਮਤ੍ਥੋ ਪਟਿਕ੍ਖਿਤ੍ਤੋ’’ਤਿ ‘ਸਮੁਪ੍ਪਜ੍ਜਨਂ ਸਮੁਪ੍ਪਾਦੋ’ਤਿ ਅਯਂਭਾਵਸਾਧਨਤ੍ਥੋ ਪਟਿਕ੍ਖਿਤ੍ਤੋ. ‘‘ਅਯਮੇਵਾ’’ਤਿ ਅਯਂ ਭਾਵਸਾਧਨਤ੍ਥੋ ਏਵ. ਜਰਾਮਰਣਂ ਸਮ੍ਭਵਤੀਤਿ ਯੋਜਨਾ. ‘‘ਉਪ੍ਪਾਦਾਵਾ ਤਥਾਗਤਾਨਂ’’ਤਿ ਸਮ੍ਮਾਸਮ੍ਬੁਦ੍ਧਾਨਂ ਉਪ੍ਪਾਦੇਵਾ ਸਤਿ. ‘‘ਅਨੁਪ੍ਪਾਦਾਵਾ’’ਤਿ ਅਨੁਪ੍ਪਾਦੇਵਾ ਸਤਿ. ‘‘ਠਿਤਾਵ ਸਾਧਾਤੂ’’ਤਿ ਜਾਤਿਯਾ ਸਤਿ ਜਰਾਮਰਣਸ੍ਸ ਪਵਤ੍ਤਿਸਭਾਵੋ ਲੋਕੇ ਠਿਤੋਯੇਵ. ਕਤਮਾ ਪਨ ਸਾਧਾਤੂਤਿ ਆਹ ‘‘ਧਮ੍ਮਟ੍ਠਿਤਤਾ’’ਤਿਆਦਿਂ. ਤਤ੍ਥ ‘‘ਧਮ੍ਮਟ੍ਠਿਤਤਾ’’ਤਿ ਕੇਨਚਿ ਅਕਤਾ ਸਭਾਵਟ੍ਠਿਤਤਾ. ‘‘ਧਮ੍ਮਨਿਯਾਮਤਾ’’ਤਿ ਸਭਾਵਨਿਯਾਮਤਾ. ‘‘ਤਤ੍ਰ ਤਥਤਾ’’ਤਿ ਤਸ੍ਮਿਂ ਸਾਮਞ੍ਞਲਕ੍ਖਣੇ ਸਙ੍ਖਤ ਧਮ੍ਮਾਨਂ ਤਥਤਾ. ਸਾਮਞ੍ਞ ਲਕ੍ਖਣਮੇਵ ਪਟਿਚ੍ਚਸਮੁਪ੍ਪਾਦੋ ਨਾਮਾਤਿ ਦਸ੍ਸੇਤਿ, ਨ ਅਵਿਜ੍ਜਾਦਿਕੋ ਪਚ੍ਚਯ ਧਮ੍ਮੋ. ਕਸ੍ਮਾ, ਤੇਹਿ ਵਚਨੇਹਿ ਧਮ੍ਮਨਿਯਾਮਤਾ ਮਤ੍ਤਸ੍ਸ ਦਸ੍ਸਿਤਤ੍ਤਾ. ਅਵਿਜ੍ਜਾਦੀਨਂ ਧਮ੍ਮ ਸਰੂਪਾਨਂ ਅਦਸ੍ਸਿਤਤ੍ਤਾ. ‘‘ਧਮ੍ਮਨਿਯਾਮਤਾਮਤ੍ਤਂ’’ਤਿ ਚ ਯਥਾ ਵੁਤ੍ਤਸਾਮਞ੍ਞ ਲਕ੍ਖਣਮੇਵ ਵੁਚ੍ਚਤਿ. ਯਦਿ ਭਾਵਸਾਧਨਂ ਇਚ੍ਛੇਯ੍ਯ, ਭਾਵਸਾਧਨਂ ਨਾਮ ਕਤ੍ਤੁਰਹਿਤਂ ਭਵੇਯ੍ਯ. ਕਤ੍ਤੁਰਹਿਤੇ ਚ ਸਤਿ, ਕਥਂ ਪਟਿਚ੍ਚ ਕ੍ਰਿਯਾਯ ਸਮਾਨਕਤ੍ਤੁਕਤਾ ਲਬ੍ਭਤਿ. ਅਲਦ੍ਧੇ ਚ ਸਮਾਨਕਤ੍ਤੁਕਤ੍ਤੇ ਕਥਞ੍ਚ ਪੁਬ੍ਬਕਾਲੇਤ੍ਵਾ ਪਚ੍ਚਯਸਮ੍ਭਵੋਤਿ. ਅਯਂ ਭਾਵਸਾਧਨਂ ਇਚ੍ਛਨ੍ਤਸ੍ਸ ਬ੍ਯਞ੍ਜਨਯੁਤ੍ਤਿਵਿਰੋਧੋ. ਤਂ ਪਰਿਹਰਨ੍ਤੋ ਨ ਚੇਤ੍ਥਾਤਿਆਦਿਮਾਹ. ਗਮ੍ਭੀਰੋਚਾਨਨ੍ਦ ਪਟਿਚ੍ਚਸਮੁਪ੍ਪਾਦੋ ਗਮ੍ਭੀਰਾਵ ਭਾਸੋਚਾਤਿ ਭਗਵਤਾ ਵੁਤ੍ਤਂ. ਭਾਵਸਾਧਨੇ ਚ ਕਤੇ ਉਪ੍ਪਜ੍ਜਨ ਕ੍ਰਿਯਾਮਤ੍ਤਂ ਨਾਮ ਵਿਸੁਂ ਏਕੋ ਧਮ੍ਮੋ ਨ ਹੋਤੀਤਿ ਕਥਂ ਤਂ ਗਮ੍ਭੀਰਂ ਸਿਯਾਤਿ. ਅਯਂ ਭਾਵਸਾਧਨਂ ਇਚ੍ਛਨ੍ਤਸ੍ਸ ਗਮ੍ਭੀਰਵਚਨ ਵਿਰੋਧੋ. ਤਂ ਪਰਿਹਰਨ੍ਤੋ ‘‘ਸਙ੍ਖਤ ਧਮ੍ਮੇਸੁ ਚਾ’’ਤਿਆਦਿਮਾਹ. ਅਪਿ ਚ ਸਙ੍ਖਤ ਲਕ੍ਖਣਂ ਨਾਮ ਸਙ੍ਖਤ ਧਮ੍ਮਤੋਪਿ ਗਮ੍ਭੀਰਂ ਹੋਤਿ. ਤਥਾਹਿ ਚਿਤ੍ਤਂ ਨਾਮ ਸਙ੍ਖਤ ਧਮ੍ਮੋ. ਤਞ੍ਚ ਅਤ੍ਥਿ ਮੇਚਿਤ੍ਤਂ ਨਾਮਾਤਿ ਸਤ੍ਤਾਨਂ ਪਾਕਟਂ ਹੋਤਿ. ਤਸ੍ਸ ਪਨ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਅਪਾਕਟਂ ਹੋਤਿ ਸੁਟ੍ਠੁ ਸਨ੍ਤਤਿਯਾ ਪਟਿਚ੍ਛਨ੍ਨਂ. ਤਥਾ ਵੇਦਨਾ ਨਾਮ ਸੁਖਾਵਾ ਦੁਕ੍ਖਾਵਾ ਸਙ੍ਖਤ ਧਮ੍ਮੋ. ਸਾ ਚ ਅਤ੍ਥਿ ਮੇਵੇਦਨਾਤਿ ਸਤ੍ਤਾਨਂ ਪਾਕਟਾ ਹੋਤਿ. ਤਸ੍ਸਾ ਪਨ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਅਪਾਕਟਂ ਹੋਤਿ ਸੁਟ੍ਠੁ ਸਨ੍ਤਤਿਯਾ ਪਟਿਚ੍ਛਨ੍ਨਂ. ਏਵਂ ਸੇਸੇਸੁ ਨਾਮਧਮ੍ਮੇਸੁ ਚ ਰੂਪਧਮ੍ਮੇਸੁ ਚ. ਯਤੋ ਸਤ੍ਤਸੁ ਵਿਸੁਦ੍ਧੀਸੁ ਸਙ੍ਖਤ ਧਮ੍ਮ ਵਵਤ੍ਥਾਨ ਸਙ੍ਖਾਤਂ ਦਿਟ੍ਠਿਵਿਸੁਦ੍ਧਿਞਾਣਞ੍ਚ ਅਵਿਜ੍ਜਾਦਿਪਚ੍ਚਯ ਪਰਿਗ੍ਗਹ ਸਙ੍ਖਾਤਂ ਕਙ੍ਖਾਵਿਤਰਣ ਵਿਸੁਦ੍ਧਿਞਾਣਞ੍ਚ ਪਥਮਂ ਸਮ੍ਪਾਦੇਤ੍ਵਾ ਪਚ੍ਛਾ ਦਸਵਿਧਾਨਿ ਸਙ੍ਖਤ ਲਕ੍ਖਣਾਨੁਪਸ੍ਸਨਾ ਞਾਣਾਨਿ ਸਮ੍ਪਾਦੇਤਬ੍ਬਾਨਿ ਹੋਨ੍ਤੀਤਿ. ਯਥਾ ਚ ਅਨਿਚ੍ਚਤਾ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਸਙ੍ਖਤ ਧਮ੍ਮਤੋ ਗਮ੍ਭੀਰਂ ਹੋਤਿ. ਤਥਾ ਇਦਮ੍ਪਿ ਪਟਿਚ੍ਚਸਮੁਪ੍ਪਾਦ ਸਙ੍ਖਾਤਂ ਸਙ੍ਖਤ ਲਕ੍ਖਣਂ ਸਙ੍ਖਤ ਧਮ੍ਮਤੋ ਗਮ੍ਭੀਰਂ ਹੋਤੀਤਿ ਦਟ੍ਠਬ੍ਬਂ.

‘‘ਤਬ੍ਭਾਵਭਾਵੀਭਾਵੋ’’ਤਿ ਏਤ੍ਥ ਭਵਤਿ ਸਂਵਿਜ੍ਜਤੀਤਿ ਭਾਵੋ. ਸੋ ਸੋ ਅਵਿਜ੍ਜਾਦਿਕੋ ਭਾਵੋ ਤਬ੍ਭਾਵੋ. ਤਬ੍ਭਾਵੇ ਭਵਨ੍ਤਿ ਸਮ੍ਭਵਨ੍ਤਿ ਸੀਲੇਨਾਤਿ ਤਬ੍ਭਾਵਭਾਵਿਨੋ. ਸਙ੍ਖਾਰਾਦਯੋ. ‘‘ਭਾਵੋ’’ਤਿ ਉਪ੍ਪਤ੍ਤਿਕਾਰਣਂ. ਤਬ੍ਭਾਵਭਾਵੀਨਂ ਭਾਵੋਤਿ ਤਬ੍ਭਾਵਭਾਵਿ ਭਾਵੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਤਸ੍ਮਿਂ ਤਸ੍ਮਿਂ’’ਤਿਆਦਿਮਾਹ. ਅਪਿ ਚ ‘‘ਭਾਵੋ’’ਤਿ ਵਿਜ੍ਜਮਾਨਤਾ ਵੁਚ੍ਚਤਿ. ਤਸ੍ਸ ਤਸ੍ਸ ਪਚ੍ਚਯ ਧਮ੍ਮਸ੍ਸ ਭਾਵੋਤਿ ਤਬ੍ਭਾਵੋ. ਤਬ੍ਭਾਵੇ ਸਤਿ ਭਵਨ੍ਤਿ ਸਮ੍ਭਵਨ੍ਤਿ ਧਮ੍ਮਤਾਯਾਤਿ ਤਬ੍ਭਾਵਭਾਵਿਨੋ. ਤੇਸਂ ਭਾਵੋਤਿਪਿ ਯੁਜ੍ਜਤਿਯੇਵ. ‘‘ਹੇਤ੍ਵਾਦਿ ਪਚ੍ਚਯ ਸਤ੍ਤਿਨਿਯਾਮਂ’’ਤਿ ਹੇਤੁਪਚ੍ਚਯੋ, ਆਰਮ੍ਮਣ ਪਚ੍ਚਯੋ, ਤਿਆਦੀਸੁ ਹੇਤੁਸਦ੍ਦ ਆਰਮ੍ਮਣ ਸਦ੍ਦਾਦਯੋ ਲੋਭਾਦੀਨਂ ਰੂਪਾਰਮ੍ਮਣਾਦੀਨਞ੍ਚ ਧਮ੍ਮਾਨਂ ਤਂ ਤਂ ਪਚ੍ਚਯ ਸਤ੍ਤਿਵਿਸੇਸਂ ਦੀਪੇਨ੍ਤਿ. ਤੇਸਞ੍ਚ ਸੋ ਸੋ ਪਚ੍ਚਯ ਸਤ੍ਤਿਵਿਸੇਸੋ ਵਿਸੁਂ ਧਮ੍ਮਨਿਯਾਮੋ ਹੋਤਿ, ਏਵਂ ਹੇਤ੍ਵਾਦਿ ਪਚ੍ਚਯਸਤ੍ਤਿਨਿਯਾਮਂ ਨਿਵਤ੍ਤੇਤਿ. ‘‘ਤਥਾ ਤਥਾ’’ਤਿ ਮੂਲਟ੍ਠਗੋਚਰਵਿਸਯਟ੍ਠਾਦਿਕੇਨ ਤੇਨ ਤੇਨ ਪਚ੍ਚਯਾਕਾਰੇਨ. ਸੋ ਹਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਪਚ੍ਚਯ ਧਮ੍ਮੁਦ੍ਧਾਰ ਮਤ੍ਤੇ ਅਠਤ੍ਵਾ’’ਤਿ ਪਚ੍ਚਯ ਧਮ੍ਮਾਨਂ ਨਾਮ ਸਞ੍ਞਾਵਸੇਨ ਉਦ੍ਧਰਣਮਤ੍ਤਂ ਅਕਤ੍ਵਾਤਿ ਅਧਿਪ੍ਪਾਯੋ. ‘‘ਆਹਚ੍ਚਾ’’ਤਿ ਆਹਨਿਤ੍ਵਾ ਤਂ ਤਂ ਪਚ੍ਚਯਸਤ੍ਤਿ ਵਿਸੇਸਂ ਪਾਪੇਤ੍ਵਾਤਿ ਅਤ੍ਥੋ. ਤੇਨਾਹ ‘‘ਮਤ੍ਥਕਂ ਪਾਪੇਤ੍ਵਾ’’ਤਿ. ਪਚ੍ਚਯਸਤ੍ਤਿ ਵਿਸੇਸੋ ਹਿ ਹੇਤੁਫਲਦੀਪਨੇ ਤਤੋ ਉਤ੍ਤਰਿ ਵਤ੍ਤਬ੍ਬ ਕਿਚ੍ਚਾਭਾਵਤੋ ਮਤ੍ਥਕਂ ਨਾਮ ਹੋਤੀਤਿ. ‘‘ਅਨੋਸਕ੍ਕਮਾਨਾ’’ਤਿ ਅਨਿਵਤ੍ਤਮਾਨਾ. ‘‘ਏਤਾਯਾ’’ਤਿ ਪਚ੍ਚਯ ਸਤ੍ਤਿਯਾ. ਪਪਞ੍ਚੇਨ੍ਤੇ ਆਚਰਿਯੇ.

ਏਤਸ੍ਮਾ ਕਾਰਣਾ ਫਲਂ ਏਤਦੇਵ ਪਟਿਚ੍ਚ ਅਨਾਗਤਪਕ੍ਖਤੋ ਪਚ੍ਚੁਪ੍ਪਨ੍ਨਪਕ੍ਖਂ ਆਗਚ੍ਛਤਿ ਪਾਤੁਬ੍ਭਵਤੀਤਿ ਪਚ੍ਚਯੋ. ਉਪ੍ਪਤ੍ਤਿਕਾਰਣਂ ਪਵਤ੍ਤਿਕਾਰਣਞ੍ਚ. ਤਤ੍ਥ ਉਪ੍ਪਤ੍ਤਿਕਾਰਣਂ ਜਨਕਪਚ੍ਚਯੋ. ਪਵਤ੍ਤਿਕਾਰਣਂ ਉਪਤ੍ਥਮ੍ਭਕ ਪਚ੍ਚਯੋ. ‘‘ਏਤੇਨਾ’’ਤਿ ਹੇਤੁਨਾ. ‘‘ਕਾਯਵਚੀ ਮਨੋਕਮ੍ਮਂ’’ਤਿ ਏਤ੍ਥ ‘‘ਕਮ੍ਮਂ’’ਤਿ ਕ੍ਰਿਯਾਵੁਚ੍ਚਤਿ, ਗਮਨ ਠਾਨ ਨਿਸਜ੍ਜਸਯਨਾਦਿਕਂ ਕਾਯਿਕ ਕ੍ਰਿਯਞ੍ਚ. ਆਲਾਪ ਸਲ੍ਲਾਪ ਕਥਨ ਸਜ੍ਝਾਯਨ ਗਾਯਨਾਦਿਕਂ ਵਾਚਸਿਕ ਕ੍ਰਿਯਞ੍ਚ. ਵਿਜਾਨਨ ਚਿਨ੍ਤਨ ਵੀਮਂਸਨਾਦਿਕਂ ਮਾਨਸਿਕ ਕ੍ਰਿਯਞ੍ਚ. ‘‘ਅਭਿਸਙ੍ਖਰੋਨ੍ਤੀ’’ਤਿ ਅਭਿਨਿਪ੍ਫਾਦੇਨ੍ਤਿ. ‘‘ਏਤੇਹੀ’’ਤਿ ਏਤੇਹਿ ਲੋਕਿਯਕੁਸਲਾ ਕੁਸਲ ਚੇਤਨਾ ਧਮ੍ਮੇਹਿ. ਅਪਿ ਚ ਸਙ੍ਖਰੋਨ੍ਤਿ ਸਤ੍ਤਾ ਏਤੇਹੀਤਿ ਸਙ੍ਖਾਰਾ. ‘‘ਸਙ੍ਖਰੋਨ੍ਤੀ’’ਤਿ ਕਿਂ ਸਙ੍ਖਰੋਨ੍ਤਿ. ਅਤ੍ਤਭਾਵਂ ਸਙ੍ਖਰੋਨ੍ਤਿ. ਭਵਾਭਵਂ ਸਙ੍ਖਰੋਨ੍ਤਿ. ਦਿਟ੍ਠਧਮ੍ਮਿਕਮ੍ਪਿ ਅਤ੍ਥਂ ਵਾ ਅਨਤ੍ਥਂ ਵਾ ਸਙ੍ਖਰੋਨ੍ਤਿ. ਸਮ੍ਪਰਾਯਿਕਮ੍ਪਿ ਅਤ੍ਥਂ ਵਾ ਅਨਤ੍ਥਂ ਵਾ ਸਙ੍ਖਰੋਨ੍ਤੀਤਿਆਦਿਨਾ. ਚਕ੍ਖੁਮ੍ਪਿ ਸਙ੍ਖਰੋਨ੍ਤਿ, ਸੋਤਂਪਿ ਸਙ੍ਖਰੋਨ੍ਤੀਤਿਆਦਿਨਾ. ਦਸ੍ਸਨਮ੍ਪਿ ਸਙ੍ਖਰੋਨ੍ਤਿ, ਸਵਨਮ੍ਪਿ ਸਙ੍ਖਰੋਨ੍ਤੀਤਿਆਦਿਨਾ ਚ ਵਤ੍ਤੁਂ ਵਟ੍ਟਤਿਯੇਵ. ‘‘ਵਿਜਾਨਾਤੀ’’ਤਿ ਵਿਵਿਧੇਨ ਜਾਨਾਤਿ. ਭੂਤੇਨਪਿ ਜਾਨਾਤਿ, ਅਭੂਤੇਨਪਿ ਜਾਨਾਤਿ. ‘‘ਨਮਤੀ’’ਤਿ ਗੋਚਰ ਵਿਸਯਤ੍ਥਾਯ ਨਮਤਿ. ‘‘ਰੁਪ੍ਪਤੀ’’ਤਿ ਕੁਪ੍ਪਤਿ, ਖੋਭਤਿ. ‘‘ਫੁਸਤੀ’’ਤਿ ਸਂਹਨਤਿ. ‘‘ਵੇਦਯਤੀ’’ਤਿ ਵਿਦਿਤਂ ਕਰੋਤਿ. ਤਂ ਤਂ ਆਰਮ੍ਮਣਂ ਲਗ੍ਗਨਵਸੇਨ ਭੁਸਂ ਨਹਤਿ ਬਨ੍ਧਤਿ, ਮੁਞ੍ਚਿਤੁਂ ਨ ਦੇਤੀਤਿ ਤਣ੍ਹਾਤਿਪਿ ਯੁਜ੍ਜਤਿ. ‘‘ਉਪਾਦਿਯਤੀ’’ਤਿ ਦਲ਼੍ਹਂ ਗਣ੍ਹਾਤਿ. ਤੇਨਾਹ ‘‘ਅਮੁਞ੍ਚਗ੍ਗਾਹਂ ਗਣ੍ਹਾਤੀ’’ਤਿ. ਭਵਤੀਤਿ ਭਵੋ. ਉਪਪਤ੍ਤਿਭਵੋ. ਭਵਨ੍ਤਿ ਏਤੇਨਾਤਿ ਭਵੋ. ਕਮ੍ਮਭਵੋ. ‘‘ਜਨਨਂ’’ਤਿ ਅਭਿਨਵਸ੍ਸ ਪਾਤੁਬ੍ਭਵਨਂ. ‘‘ਜੀਰਣਂ’’ਤਿ ਅਭਿਨਵਭਾਵਤੋ ਹਾਯਨਂ. ‘‘ਸੋਚਨਂ’’ਤਿ ਚਿਤ੍ਤਸਨ੍ਤਾਪਨਂ. ‘‘ਪਰਿਦੇਵਨਂ’’ਤਿ ਰੋਦਨਂ. ‘‘ਦੁਕ੍ਖਂ’’ਤਿ ਕਾਯਰੁਜ੍ਜਨਂ. ‘‘ਦੋਮਨਸ੍ਸਂ’’ਤਿ ਚਿਤ੍ਤਰੁਜ੍ਜਨਂ. ‘‘ਵਿਸੀਦਨਂ’’ਤਿ ਬਾਲ਼੍ਹਂ ਚਿਤ੍ਤਕਿਲਮਥਭਾਵੇਨ ਵਿਰੂਪਂ ਹੁਤ੍ਵਾ ਚਿਤ੍ਤਸ੍ਸਸੀਦਨਂ. ਥਾਮਬਲਖਿਯ੍ਯਨਂ. ਯਤੋ ਅਸ੍ਸਾਸਪਸ੍ਸਾਸਾਨਂ ਵਿਰੂਪਪ੍ਪਵਤ੍ਤਿਵਾ ਤਙ੍ਖਣੇ ਸਬ੍ਬਸੋ ਉਪਰੁਜ੍ਝਨਂ ਵਾ ਹੋਤੀਤਿ. ‘‘ਕੇਨਚਿ ਸੁਖੇਨਾ’’ਤਿ ਦੁਕ੍ਖਸਚ੍ਚਤੋ ਵਿਮੁਤ੍ਤੇਨ ਕੇਨਚਿ ਸਨ੍ਤਿਸੁਖੇਨ.

‘‘ਦੁਕ੍ਖਪ੍ਪਟਿਚ੍ਛਾਦਿਕਾ’’ਤਿ ਭਯਟ੍ਠੇਨ ਦੁਕ੍ਖਭੂਤਾਨਂ ਤੇਭੂਮਿਕ ਧਮ੍ਮਾਨਂ ਦੁਕ੍ਖਭਾਵਪ੍ਪਟਿਚ੍ਛਾਦਿਕਾ. ‘‘ਸਮੁਦਯਪ੍ਪਟਿਚ੍ਛਾਦਿਕਾ’’ਤਿ ਤਣ੍ਹਾਯ ਦੁਕ੍ਖ ਸਮੁਦਯ ਭਾਵਪ੍ਪਟਿਚ੍ਛਾਦਿਕਾ. ‘‘ਨਿਰੋਧਪ੍ਪਟਿਚ੍ਛਾਦਿਕਾ’’ਤਿ ਤਣ੍ਹਾਨਿਰੋਧਸ੍ਸੇਵ ਦੁਕ੍ਖਨਿਰੋਧ ਭਾਵਪ੍ਪਟਿਚ੍ਛਾਦਿਕਾ. ‘‘ਮਗ੍ਗਪ੍ਪਟਿਚ੍ਛਾਦਿਕਾ’’ਤਿ ਅਟ੍ਠਙ੍ਗੀਕ ਮਗ੍ਗਸ੍ਸੇਵ ਦੁਕ੍ਖਨਿਰੋਧ ਮਗ੍ਗਭਾਵਪ੍ਪਟਿਚ੍ਛਾਦਿਕਾ. ਪੁਬ੍ਬਨ੍ਤੋ ਵੁਚ੍ਚਤਿ ਅਤੀਤੇਕਾਲੇ ਭਵਪਰਮ੍ਪਰਾ. ਅਪਰਨ੍ਤੋ ਵੁਚ੍ਚਤਿ ਅਨਾਗਤੇ ਭਵਪਰਮ੍ਪਰਾ. ਪੁਬ੍ਬਨ੍ਤਾ ਪਰਨ੍ਤੋ ਵੁਚ੍ਚਤਿ ਤਦੁਭਯਂ. ‘‘ਪਟਿਚ੍ਚਸਮੁਪ੍ਪਾਦਪ੍ਪਟਿਚ੍ਛਾਦਿਕਾ’’ਤਿ ਪਚ੍ਚੁਪ੍ਪਨ੍ਨਭਵੇ ਖਨ੍ਧਾਨਂ ਪਟਿਚ੍ਚਸਮੁਪ੍ਪਾਦਪ੍ਪਟਿਚ੍ਛਾਦਿਕਾ. ‘‘ਸੁਤ੍ਤਨ੍ਤਿਕਨਯੇਨਾ’’ਤਿ ਅਭਿਧਮ੍ਮੇਪਿ ਵਿਭਙ੍ਗੇ ਸੁਤ੍ਤਨ੍ਤ ਭਾਜਨੀਯਂ ਨਾਮ ਆਗਤਂ. ਤੇਨ ਸੁਤ੍ਤਨ੍ਤ ਭਾਜਨੀਯਨਯੇਨ. ਸਾਸਵਾ ਕੁਸਲਾ ਕੁਸਲ ਚੇਤਨਾ ਸਙ੍ਖਾਰਾ ਨਾਮਾਤਿ ਯੋਜਨਾ. ‘‘ਅਭਿਧਮ੍ਮਨਯੇਨਾ’’ਤਿ ਵਿਭਙ੍ਗੇ ਅਭਿਧਮ੍ਮਭਾਜਨੀਯਨਯੇਨ. ਅਟ੍ਠਕਥਾਪਾਠੇ. ਅਵਿਜ੍ਜਾ ਕਿਰਿਯ ਧਮ੍ਮਾਨਂ ਨੇਵ ਉਪਨਿਸ੍ਸਯ ਪਚ੍ਚਯਤ੍ਤਂ ਲਭਤਿ. ਕੁਸਲਾ ਕੁਸਲਮੂਲਾਨਿ ਕਿਰਿਯ ਧਮ੍ਮਾਨਂ ਨ ਉਪਨਿਸ੍ਸਯ ਪਚ੍ਚਯਤ੍ਤਂ ਲਭਨ੍ਤੀਤਿ ਯੋਜਨਾ. ਕਿਰਿਯ ਧਮ੍ਮਾ ਅਵਿਜ੍ਜਾਤੋ ਚ ਕੁਸਲਾ ਕੁਸਲ ਮੂਲੇਹਿ ਚ ਉਪਨਿਸ੍ਸਯ ਪਚ੍ਚਯਂ ਨ ਲਭਨ੍ਤੀਤਿ ਵੁਤ੍ਤਂ ਹੋਤਿ. ‘‘ਪਚ੍ਚਯਾਕਾਰੋ’’ਤਿ ਪਟਿਚ੍ਚ ਸਮੁਪ੍ਪਾਦੋ. ‘‘ਅਵਿਜ੍ਜਾਵਿਰਾਗਾ’’ਤਿ ਅਵਿਜ੍ਜਾ ਵਿਗਮਨਤੋ. ਤੇਸਂਪਿਕਿਰਿਯ ਧਮ੍ਮਾਨਂ. ਵਿਞ੍ਞਾਣਾਦੀਸੁਪਿ ਕਿਰਿਯ ਵਿਞ੍ਞਾਣਂ, ਕਿਰਿਯ ਨਾਮਂ, ਕਿਰਿਯ ਮਨਾਯਤਨਂ, ਕਿਰਿਯਫਸ੍ਸੋ, ਕਿਰਿਯ ਵੇਦਨਾਤਿ ਅਤ੍ਥਿਤਾਯ ‘‘ਏਸਨਯੋ ਵਿਞ੍ਞਾਣਾਦੀਸੁਪੀ’’ਤਿ ਵੁਤ੍ਤਂ. ‘‘ਕੁਸਲਾ ਕੁਸਲ ਵਿਪਾਕਸਮ੍ਪਯੁਤ੍ਤਂ’’ਤਿ ਕੁਸਲ ਵਿਞ੍ਞਾਣ ਸਮ੍ਪਯੁਤ੍ਤਂ, ਅਕੁਸਲਵਿਞ੍ਞਾਣਸਮ੍ਪਯੁਤ੍ਤਂ, ਵਿਪਾਕ ਵਿਞ੍ਞਾਣ ਸਮ੍ਪਯੁਤ੍ਤਂ. ‘‘ਤਂ ਅਨੁਪਪਨ੍ਨਂ’’ਤਿ ਪਵਤ੍ਤਿਵਿਪਾਕਵਿਞ੍ਞਾਣ ਸਹਗਤਸ੍ਸ ਖਨ੍ਧਤ੍ਤਯਸ੍ਸ ਤਂ ਸਹਜਾਤਸ੍ਸ ਚਿਤ੍ਤਜਰੂਪਸ੍ਸ ਚ ਅਵਸਿਟ੍ਠਤ੍ਤਾ ਤਂ ਨ ਸਮ੍ਪਨ੍ਨਂਤਿ ਅਤ੍ਥੋ. ਤਤ੍ਥ ਹਿ ਵਿਞ੍ਞਾਣਪਦੇ ਪਵਤ੍ਤਿਵਸੇਨ ਦ੍ਵਤ੍ਤਿਂਸਵਿਧਂ ਵਿਪਾਕਚਿਤ੍ਤਂ ਵਿਞ੍ਞਾਣਂ ਨਾਮਾਤਿ ਵੁਤ੍ਤਂ. ਏਵਞ੍ਚਸਤਿ, ਨਾਮ ਰੂਪਪਦੇਪਿ ਪਵਤ੍ਤਿਵਸੇਨ ਤਦੁਭਯਂ ਪਵਤ੍ਤਿਵਿਞ੍ਞਾਣਸਹਗਤਂਪਿ ਗਹੇਤਬ੍ਬਮੇਵਾਤਿ. ‘‘ਤਂ ਤਂ ਵਿਞ੍ਞਾਣ ਸਮ੍ਪਯੁਤ੍ਤਾ’’ਤਿ ਪਟਿਸਨ੍ਧਿਵਿਞ੍ਞਾਣ ਪਵਤ੍ਤਿ ਵਿਞ੍ਞਾਣਸਮ੍ਪਯੁਤ੍ਤਾ. ‘‘ਤਣ੍ਹੁਪਾਦਾਨਾਨਿਪਾਕਟਾਨੀ’’ਤਿ ਛ ਤਣ੍ਹਾ ਰੂਪਤਣ੍ਹਾ ਸਦ੍ਦਤਣ੍ਹਾਦਿਵਸੇਨ. ਚਤ੍ਤਾਰਿ ਉਪਾਦਾਨਾਨਿ ਕਾਮੁਪਾਦਾਨਾਦਿਵਸੇਨਾਤਿ ਏਵਂ ਪਾਕਟਾਨਿਯੇਵ. ‘‘ਲਕ੍ਖਣਮਤ੍ਤਾਨੀ’’ਤਿ ਸਙ੍ਖਤ ਧਮ੍ਮਾਨਂ ਸਙ੍ਖਤਭਾਵਸਲ੍ਲਕ੍ਖਣ ਨਿਮਿਤ੍ਤਮਤ੍ਤਾਨਿ. ‘‘ਞਾਤਿਬ੍ਯਸਨਾਦੀਹੀ’’ਤਿ ਞਾਤਿਵਿਨਾਸਨਾਦੀਹਿ. ‘‘ਞਾਤਿਬ੍ਯਸਨਾਦਿਨਿਮਿਤ੍ਤਂ’’ਤਿ ਞਾਤਿਵਿਨਾਸਨਾਦਿਕਾਰਣਾ.

‘‘ਖਨ੍ਧਦੁਕ੍ਖੇ’’ਤਿ ਪਚ੍ਚਕ੍ਖਨ੍ਧਸਙ੍ਖਾਤੇ ਦੁਕ੍ਖਸਚ੍ਚੇ. ਖਨ੍ਧਪ੍ਪਵਤ੍ਤਿ ਮਗ੍ਗੋ ਨਾਮ ਤਣ੍ਹਾਸਮੁਦਯੋ ਏਵ. ਖਨ੍ਧਨਿਰੋਧ ਮਗ੍ਗੋ ਨਾਮ ਅਰਿਯਮਗ੍ਗੋ. ‘‘ਖਨ੍ਧ ਸਮੁਦਯਭੂਤਾ’’ਤਿ ਖਨ੍ਧਪ੍ਪਵਤ੍ਤਿਯਾ ਕਾਰਣਭੂਤਾ. ‘‘ਅਵਿਜ੍ਜਾਨਿ ਵੁਟਾਨਂ’’ਤਿ ਅਵਿਜ੍ਜਾਯਨੀਵਾਰਿਤਾਨਂ ਪਿਹਿਤਾਨਂ. ‘‘ਅਪ੍ਪਹੀਨ ਭਵਾਭਿਲਾਸਾਨਂ’’ਤਿ ਮਗ੍ਗੇਨ ਅਪ੍ਪਹੀਨ ਭਵਪਤ੍ਥਨਾਨਂ. ਅਪ੍ਪਹੀਨਭਵਤਣ੍ਹਾਨਨ੍ਤਿ ਵੁਤ੍ਤਂ ਹੋਤਿ. ‘‘ਵਿਬਨ੍ਧੋ’’ਤਿ ਅਨ੍ਤਰਾਯੋ. ‘‘ਉਦਯਭੂਤਾਨਂ’’ਤਿ ਵਡ੍ਢਿਭੂਤਾਨਂ. ‘‘ਅਵਸ੍ਸਯੋ’’ਤਿ ਨਿਸ੍ਸਯੋ. ਸੁਖਵੇਦਨਾ ਵਿਸੇਸਤੋ ਤਣ੍ਹਾਯ ਪਚ੍ਚਯੋ ਹੋਤੀਤਿ ਵੁਤ੍ਤਂ ‘‘ਸੁਖਵੇਦਨਾਸਦਿਸੋ’’ਤਿਆਦਿ. ਦੋਮਨਸ੍ਸਾਨਂ ਪਨ ਤਸ੍ਸਾ ਪਚ੍ਚਯਭਾਵੋ ਪਰਤੋ ਪਰਿਯੇਟ੍ਠਿਤਣ੍ਹਾਯਂ ਪਾਕਟੋ ਭਵਿਸ੍ਸਤਿ. ਉਪੇਕ੍ਖਾ ਵੇਦਨਾਪਿ ਦੁਕ੍ਖੇਨ ਪੀਲ਼ਿਤਸ੍ਸ ਸੁਖਠਾਨੇ ਤਿਟ੍ਠਤਿ. ਸੁਖਂ ਵਿਯ ਤਂ ਪਤ੍ਥੇਤੀਤਿ. ਸਮੁਦਾ ਚਰਿਤ੍ਵਾ ਪਰਿਚਯਿਤ੍ਵਾ. ‘‘ਤਣ੍ਹਾ ਏਵਾ’’ਤਿ ਕਾਮਤਣ੍ਹਾ ਏਵ. ‘‘ਅਤ੍ਤਨਿ ਚਾ’’ਤਿ ਦਿਟ੍ਠਿਯਞ੍ਚਾਤਿ ਅਧਿਪ੍ਪਾਯੋ. ‘‘ਅਤ੍ਤਨੋ ਆਰਮ੍ਮਣੇਸੂ’’ਤਿ ਅਤ੍ਤ ਜੀਵ ਲੋਕਾਦੀਸੁ ਦਿਟ੍ਠਿਯਾਗਹਿਤਾ ਰਮ੍ਮਣੇਸੁ. ‘‘ਅਸ੍ਸਾਦਨ ਖਮਨਰੋਚਨਭੂਤਾਯਾ’’ਤਿ ਸਾਧੁਵਤਾਯਂ ਮਮਦਸ੍ਸਨਨ੍ਤਿ ਏਵਂ ਰਜ੍ਜਨ ਤੁਸ੍ਸਨ ਕਨ੍ਤਿਭੂਤਾਯ. ‘‘ਉਪਾਦਾਨੀਯਸ੍ਸਾ’’ਤਿ ਦਲ਼੍ਹਂ ਗਹੇਤਬ੍ਬਸ੍ਸ. ‘‘ਅਤ੍ਥਸ੍ਸਾ’’ਤਿ ਅਤ੍ਤਨੋ ਅਤ੍ਤਾਦਿਕਸ੍ਸ ਅਤ੍ਥਸ੍ਸ. ਗਾਥਾਯਂ.‘‘ਭਵਂ ਹੋਤੀ’’ਤਿ ਭਵਨ੍ਤੋ ਵਡ੍ਢਨ੍ਤੋ ਹੋਤਿ. ‘‘ਪਰਾਭਵੋ’’ਤਿ ਵਿਨਾਸਨ੍ਤੋ.

‘‘ਅਦ੍ਧਾਨਵਨ੍ਤੇ ਧਮ੍ਮੇ’’ਤਿ ਤੇਕਾਲਿਕਸਙ੍ਖਤ ਧਮ੍ਮੇ. ਅਪਤਮਾਨੇ ਕਤ੍ਵਾਤਿ ਪਾਠਸੇਸੋ. ਯਥਾ ਉਪਾਦਾਨਂਤਿ ਦਿਸ੍ਵਾ ਉਪਾਦਾਰੂਪਂਤਿ ਪਦੇ ਆਦਾਸਦ੍ਦੋ ਵਿਞ੍ਞਾਯਤਿ. ਨ ਉਪੁਬ੍ਬ ਪਦਸਦ੍ਦੋ. ਇਤਰਥਾ ਉਪਾਦਾਨਨ੍ਤਿ ਨਸਿਜ੍ਝਤਿ. ਏਵਂ ਅਦ੍ਧਾ, ਅਦ੍ਧਾਨ, ਪਦੇਸੁਪਿ. ਤੇਨਾਹ ‘‘ਅਦ੍ਧਾਨਂ’’ਤਿ ਨਸਿਜ੍ਝਤੀਤਿ. ਸਂਖਿਪਨ੍ਤਿ ਵੀਸਤਾਕਾਰਾ ਏਤੇਸੂਤਿ ਸਙ੍ਖੇਪਾ. ਸਙ੍ਗਹਾ. ‘‘ਵਟ੍ਟਧਮ੍ਮਾ’’ਤਿ ਸਙ੍ਖਾਰਾਦਯੋ ਧਮ੍ਮਾ. ‘‘ਏਤ੍ਥਾ’’ਤਿ ਏਤਾਸੁ ਅਵਿਜ੍ਜਾਤਣ੍ਹਾਸੁ. ਕਥਂ ਤਿਟ੍ਠਨ੍ਤੀਤਿ ਆਹ ‘‘ਤਦਾਯਤ੍ਤਵੁਤ੍ਤਿਤਾਯਾ’’ਤਿ. ‘‘ਪਤਿਟ੍ਠਾ’’ਤਿ ਸੁਪ੍ਪਤਿਟ੍ਠਿਤਟ੍ਠਾਨਾਨਿ. ‘‘ਪਭਵਾ’’ਤਿ ਵਟ੍ਟਧਮ੍ਮਪਰਮ੍ਪਰਪ੍ਪਵਤ੍ਤਿਯਾ ਮੂਲ ਪਧਾਨ ਕਾਰਣਾਨਿ. ਤਤ੍ਥ ਹੇਤੁ ਚ ਦੇਸੇਤਬ੍ਬੋ ਹੋਤਿ. ਇਤਰਥਾ ਇਸ੍ਸਰਨਿਮ੍ਮਾਨਦਿਟ੍ਠਿ ਅਹੇਤੁਕ ਦਿਟ੍ਠੀਨਂ ਓਕਾਸੋ ਸਿਯਾਤਿ. ਫਲਞ੍ਚ ਦੇਸੇਤਬ੍ਬਂ ਹੋਤਿ. ਇਤਰਥਾ ਉਚ੍ਛੇਦਦਿਟ੍ਠਿਯਾ ਓਕਾਸੋ ਸਿਯਾਤਿ. ‘‘ਅਦ੍ਧੁਨੋ’’ਤਿ ਦੀਘਕਾਲਸ੍ਸ. ‘‘ਨਿਵਤ੍ਤੇਤੀ’’ਤਿ ਸਮੁਚ੍ਛਿਨ੍ਦਤਿ. ‘‘ਅਹੇਤੂ ਅਪਚ੍ਚਯਾ ਸਤ੍ਤਾ ਪਵਤ੍ਤਨ੍ਤੀ’’ਤਿ ਪੁਬ੍ਬਹੇਤੁਰਹਿਤਾ ਪੁਬ੍ਬਪਚ੍ਚਯਰਹਿਤਾ ਹੁਤ੍ਵਾ ਇਮੇਸਤ੍ਤਾ ਪਵਤ੍ਤਨ੍ਤਿ. ‘‘ਅਵਿਜ੍ਜਾਦੀਹਿ ਸਾਧੇਤਬ੍ਬੋ ਨ ਹੋਤੀ’’ਤਿ ਭਵਪਰਮ੍ਪਰਾਸੁ ਨਿਚ੍ਚੋ ਹੁਤ੍ਵਾ ਸਨ੍ਧਾਵਨ੍ਤਸ੍ਸ ਅਵਿਜ੍ਜਾਦੀਹਿ ਕਤ੍ਤਬ੍ਬ ਕਿਚ੍ਚਂ ਨ ਹੋਤੀਤਿ ਅਧਿਪ੍ਪਾਯੋ. ‘‘ਕੇਸਞ੍ਚਿ ਨ ਸਮ੍ਭਵਨ੍ਤਿਯੇਵਾ’’ਤਿ ਅਨਾਗਾਮੀਨਂ ਅਰਹਨ੍ਤਾਨਞ੍ਚ ਨ ਸਮ੍ਭਵਨ੍ਤਿਯੇਵ. ਮਹਾਆਦੀਨਵਰਾਸਿਦਸ੍ਸਨਤ੍ਥਂ ਸੋਕਾਦਿਵਚਨਂ ਹੋਤੀਤਿ ਯੋਜਨਾ. ‘‘ਤੇਸਂ’’ਤਿ ਅਞ੍ਞੇਸਂ ਪਚ੍ਚਯਾਨਂ. ‘‘ਲਦ੍ਧਾ’’ਤਿ ਅਤ੍ਥਤੋ ਲਦ੍ਧਾ. ‘‘ਤਦਵਿਨਾਭਾਵਿਭਾਵਲਕ੍ਖਣੇਨਾ’’ਤਿ ਏਤ੍ਥ ਤੇਨ ਤੇਨ ਪਚ੍ਚਯੇਨ ਅਵਿਨਾਭਾਵੀਨਂ ਭਾਵੋ, ਸੋ ਏਵ ਲਕ੍ਖਣਨ੍ਤਿ ਵਿਗ੍ਗਹੋ. ‘‘ਪਰਤ੍ਥ ਪੀ’’ਤਿ ਇਤੋ ਪਰੇਸੁ ਤਣ੍ਹੁਪਾਦਾਨ ਭਵਗ੍ਗਹਣੇਨਾਤਿਆਦੀਸੁਪਿ. ‘‘ਆਦਿਤੋ’’ਤਿਆਦਿਮ੍ਹਿ. ਵਿਭਾਵਨਿਪਾਠੇ. ‘‘ਕਿਲੇਸਭਾਵਸਾਮਞ੍ਞਤੋ’’ਤਿ ਕਿਲੇਸਭਾਵੇਨ ਸਮਾਨਤ੍ਤਾ ਸਦਿਸਤ੍ਤਾ. ‘‘ਲਕ੍ਖਿਤਬ੍ਬ ਧਮ੍ਮੇਹੀ’’ਤਿ ਵਿਞ੍ਞਾਣਾਦੀਹਿ. ‘‘ਪਥਮੇਨ ਦੁਤੀਯਸ੍ਸਾ’’ਤਿ ਪਥਮਸਙ੍ਖੇਪੇਨ ਸਦ੍ਧਿਂ ਦੁਤੀਯਸ੍ਸ ਸਙ੍ਖੇਪਸ੍ਸ ਏਕਾ ਸਨ੍ਧੀਤਿਆਦਿਨਾ ਯੋਜੇਤਬ੍ਬਂ. ‘‘ਲੋਕਸ੍ਸ ਪਾਕਟ ਵੋਹਾਰੇਨਾ’’ਤਿ ਕਿਲੇਸਧਮ੍ਮਾ ਕਮ੍ਮਧਮ੍ਮਾ ਚ ਲੋਕੇ ਹੇਤੂਤਿ ਪਾਕਟਾ ਹੋਨ੍ਤਿ. ਵਿਪਾਕਧਮ੍ਮਾ ਪਨ ਫਲਨ੍ਤਿ ਪਾਕਟਾ. ਏਵਂ ਲੋਕੇ ਪਾਕਟ ਵੋਹਾਰੇਨ. ਇਧ ਪਨ ਕਿਲੇਸਧਮ੍ਮਕਮ੍ਮਧਮ੍ਮਾ ਵਾ ਹੋਨ੍ਤੁ, ਵਿਪਾਕਧਮ੍ਮਾ ਵਾ, ਯੋ ਯੋ ਪਚ੍ਚਯਪਕ੍ਖੇ ਠਿਤੋ, ਸੋ ਸੋ ਹੇਤੂਤਿਪਿ ਵਤ੍ਤਬ੍ਬੋਯੇਵ. ਯੋ ਯੋ ਪਚ੍ਚਯੁਪ੍ਪਨ੍ਨ ਪਕ੍ਖੇ ਠਿਤੋ, ਸੋ ਸੋ ਫਲਨ੍ਤਿਦਸ੍ਸੇਨ੍ਤੋ ‘‘ਹੇਤੁਫਲਸਦ੍ਦਾਪਨਾ’’ਤਿਆਦਿਮਾਹ. ਅਟ੍ਠਕਥਾ ਪਾਠੇ. ‘‘ਸਜ੍ਜਨ੍ਤਸ੍ਸਾ’’ਤਿ ਸਂਵਿਦਹਨ੍ਤਸ੍ਸ. ‘‘ਆਯੂਹਨ ਸਙ੍ਖਾਰਾ ਨਾਮਾ’’ਤਿਆਦਿਤੋ ਪਟ੍ਠਾਯ ਸਮੁਚ੍ਚਯਨਸਙ੍ਖਾਰਾ ਨਾਮ. ‘‘ਦਕ੍ਖਿਣਂ’’ਤਿ ਦਾਨਵਤ੍ਥੁਂ. ਦਕ੍ਖਿਣੋਦਕਂ ਵਾ. ‘‘ਏਤ੍ਥ ਚਾ’’ਤਿ ਇਮਸ੍ਮਿਂ ਤਤੀਯਪਞ੍ਚਕੇ ਚ. ‘‘ਵੁਤ੍ਤਨਯੇਨੇ ਵਾ’’ਤਿ ਪਥਮਪਞ੍ਚਕੇ ਵੁਤ੍ਤਨਯੇਨੇਵ. ਵਿਭਾਵਨਿਪਾਠੇ. ‘‘ਆਯਤਿਂ ਪਟਿਸਨ੍ਧਿਯਾ ਪਚ੍ਚਯਚੇਤਨਾ ਭਵੋ ਨਾਮਾ’’ਤਿ ਇਦਂ ਉਦ੍ਦੇਸਪਾਲ਼ਿਯਂ ਯਥਾਦਿਟ੍ਠਪਾਠਵਸੇਨੇਵ ਵੁਤ੍ਤਂ. ਤਥਾ ਪੁਰਿਮਕਮ੍ਮਭਵਸ੍ਮਿਂ ਇਧ ਪਟਿਸਨ੍ਧਿਯਾ ਪਚ੍ਚਯਚੇਤਨਾ ਸਙ੍ਖਾਰਾ ਨਾਮਾਤਿ ਇਦਞ੍ਚ. ਇਧ ਪਨ ਪੁਬ੍ਬੇਯੇਵ ਦ੍ਵੀਸੁਹੇਤੁਪਞ੍ਚਕੇਸੁ ਦ੍ਵਿਨ੍ਨਂ ਸਙ੍ਖਾਰ ਕਮ੍ਮਭਵਾਨਂ ਸਙ੍ਗਹਿਤਤ੍ਤਾ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਦ੍ਵਿਨ੍ਨਂ ਸਙ੍ਖਾਰ ਕਮ੍ਮਭਵਾਨਂ ਵਿਸੇਸੋ ਯੁਤ੍ਤੋ. ਤੇਨਾਹ ‘‘ਤਂ ਇਧ ਨ ਯੁਜ੍ਜਤੀ’’ਤਿ. ‘‘ਸਙ੍ਗਹਿਤਤ੍ਤਾ’’ਤਿ ਪੁਬ੍ਬੇਯੇਵ ਸਙ੍ਗਹਿਤਤ੍ਤਾ. ‘‘ਏਤਂ’’ਤਿ ਵਿਭਾਵਨਿ ਵਚਨਂ. ‘‘ਧਮ੍ਮਵਿਭਾਗਰਕ੍ਖਣਤ੍ਥਂ’’ਤਿ ਵਿਭਙ੍ਗੇ ਭਵਪਦੇ ਉਪਪਤ੍ਤਿਭਵਸ੍ਸਪਿ ਵਿਭਤ੍ਤਤ੍ਤਾ ਏਵਂ ਵਿਭਤ੍ਤਸ੍ਸ ਧਮ੍ਮਵਿਭਾਗਸ੍ਸ ਰਕ੍ਖਣਤ੍ਥਂ. ਫਲਪਞ੍ਚਕਤੋ ਅਨਞ੍ਞਂਪਿ ਉਪਪਤ੍ਤਿਭਵਂ ਅਞ੍ਞਂਵਿਯ ਕਤ੍ਵਾ ‘ਉਪਪਤ੍ਤਿਭਵਸਙ੍ਖਾਤੋ ਭਵੇਕਦੇਸੋ’ਤਿ ਵੁਤ੍ਤਂ. ਸੋ ਚ ਉਪਪਤ੍ਤਿਭਵੋ ਨਾਮ ਪਚ੍ਚੁਪ੍ਪਨ੍ਨਹੇਤੂਹਿ ਨਿਬ੍ਬਤ੍ਤਤ੍ਤਾ ਚਤੁਤ੍ਥੇ ਫਲਪਞ੍ਚਕੇ ਏਵ ਸਙ੍ਗਹਿਤੋ. ਤਸ੍ਮਾ ਤੇਨ ਉਪਪਤ੍ਤਿਭਵਸਦ੍ਦੇਨ ਚਤੁਤ੍ਥ ਪਞ੍ਚਕਮੇਵ ਗਹਿਤਨ੍ਤਿ ਯੁਤ੍ਤਂ. ਇਤਰਥਾ ਦ੍ਵੇ ਫਲਪਞ੍ਚਕਾਨਿ ਵਿਪਾਕਵਟ੍ਟਨ੍ਤਿ ਵੁਤ੍ਤੇ ਸਿਦ੍ਧਮੇਵ ਹੋਤਿ. ਏਵਞ੍ਚਸਤਿ ਅਵਸੇਸਾ ਚਾਤਿ ਏਤ੍ਥ ਦੁਤੀਯਫਲਪਞ੍ਚਕਮੇਵ ਅਵਸਿਟ੍ਠਂ ਹੋਤੀਤਿ ਦਟ੍ਠਬ੍ਬਂ. ‘‘ਅਵਿਜ੍ਜਾ ਨਾਮ ਮੋਹੋ, ਸੋ ਚ ਅਕੁਸਲ ਮੂਲ’’ਨ੍ਤਿਆਦਿ ਅਭਿਧਮ੍ਮੇ ਮੂਲਯਮਕੇ ਮੂਲਨਾਮੇਨ ਆਗਤਤ੍ਤਾ ਵੁਤ੍ਤਂ. ਦ੍ਵੀਸੁਪਨਭਵ ਚਕ੍ਕੇਸੁ ਪੁਰਿਮਚਕ੍ਕੇ ਅਵਿਜ੍ਜਾ ਆਦਿ ਹੋਤਿ. ਪਚ੍ਛਿਮਚਕ੍ਕੇ ਤਣ੍ਹਾ. ਆਦਿ ਚ ਨਾਮ ਮੂਲਨ੍ਤਿ ਚ ਸੀਸਨ੍ਤਿ ਚ ਵਤ੍ਤੁਂ ਵਟ੍ਟਤੀਤਿ ਪਰਿਯਾਯਂ ਦਸ੍ਸੇਤੁਂ ‘‘ਅਥਵਾ’’ਤਿਆਦਿ ਵੁਤ੍ਤਂ.‘‘ਆਗਮਨਸਮ੍ਭਾਰੇਸੂ’’ਤਿ ਅਤੀਤਭਵਤੋ ਇਮਂਭਵਂ ਆਗਮਨਸਮ੍ਭਾਰੇਸੁ. ਤਣ੍ਹਾ ਏਵ ਸੀਸਂ ਕਤ੍ਵਾ ਵੁਤ੍ਤਾਤਿ ਯੋਜਨਾ. ‘‘ਤੇਸਂ ਅਨ੍ਤਰੇ’’ਤਿ ਅਵਿਜ੍ਜਾਸਙ੍ਖਾਰਾਨਂ ਅਨ੍ਤਰੇ. ਤਣ੍ਹਾਯ ਓਕਾਸੋ ਨਤ੍ਥੀਤਿ ਕਸ੍ਮਾ ਵੁਤ੍ਤਂ. ਨਨੁ ਅਵਿਜ੍ਜਾਯ ਸਤਿ, ਤਣ੍ਹਾ ਨਾਮ ਏਕਨ੍ਤੇਨ ਸਮ੍ਭਵਤਿਯੇਵ. ਸਾ ਚ ਸਙ੍ਖਾਰਾਨਂ ਬਲਵਪਚ੍ਚਯੋ ਹੋਤਿ. ਤਸ੍ਮਾ ਸਾ ਅਵਿਜ੍ਜਾ ਪਚ੍ਚਯਾ ਤਣ੍ਹਾ, ਤਣ੍ਹਾ ਪਚ੍ਚਯਾ ਸਙ੍ਖਾਰਾਤਿ ਵਤ੍ਤਬ੍ਬਾ ਸਿਯਾਤਿ. ਤਂ ਪਰਿਹਰਿਤੁਂ ‘‘ਅਯਞ੍ਹੀ’’ਤਿਆਦਿਵੁਤ੍ਤਂ. ਪਟਿਲੋਮਪਟਿਚ੍ਚਸਮੁਪ੍ਪਾਦੋ ਨਾਮ ਅਵਿਜ੍ਜਾਨਿਰੋਧਾ ਸਙ੍ਖਾਰਨਿਰੋਧੋਤਿ ਏਵਂ ਪਵਤ੍ਤੋ ਪਟਿਚ੍ਚਸਮੁਪ੍ਪਾਦੋ. ‘‘ਜਰਾਮਰਣਮੁਚ੍ਛਯਾਤਿਆਦਿ ਨਵਤ੍ਤਬ੍ਬਂ ਸਿਯਾ’’ਤਿ ਜਰਾਮਰਣਮੁਚ੍ਛਾਯਾਤਿਆਦਿਵਚਨਂ ਅਨੁਲੋਮਪਟਿਚ੍ਚਸਮੁਪ੍ਪਾਦ ਸਮ੍ਬਨ੍ਧ ਵਚਨਨ੍ਤਿ ਕਤ੍ਵਾ ਵੁਤ੍ਤਂ. ‘‘ਉਪਰਿਵਟ੍ਟਮੂਲ ਧਮ੍ਮਪ੍ਪਟਿਪਾਦਕਾਨਂ’’ਤਿ ਉਪਰਿ ਦੁਤਿਯਾਨਾਗਤਭਾਵਾਦੀਸੁ ਅਵਿਜ੍ਜਾਤਣ੍ਹਾ ਸਙ੍ਖਾਤਾਨਂ ਵਟ੍ਟਮੂਲਧਮ੍ਮਾਨਂ ਨਿਯੋਜਕਾਨਂ. ‘‘ਤੇ ਪੀ’’ਤਿ ਸੋਕਾਦਯੋ ਦੁਕ੍ਖਧਮ੍ਮਾਪਿ. ‘‘ਆਸਵਸਮ੍ਭੂਤਾ’’ਤਿ ਆਸਵੇਹਿ ਸਮ੍ਭੂਤਾ ਸਞ੍ਜਾਤਾ. ‘‘ਤੇਸਂ’’ਤਿ ਸੋਕਾਦੀਨਂ ਦੁਕ੍ਖਧਮ੍ਮਾਨਂ. ‘‘ਜਰਾਮਰਣਙ੍ਗੇ ਗਹਣਂ’’ਤਿ ਦ੍ਵਾਦਸਸੁ ਅਙ੍ਗੇਸੁ ਜਰਾਮਰਣਙ੍ਗੇ ਸਙ੍ਗਹਣਂ. ‘‘ਪਵਡ੍ਢਤੀ’’ਤਿ ਭੁਸਂ ਵਡ੍ਢਤਿ. ‘‘ਆਸਵਸਮੁਦਯਾ’’ਤਿ ਆਸਵਸਮੁਪ੍ਪਾਦਾ. ‘‘ਅਵਿਜ੍ਜਾਸਮੁਦਯੋ’’ਤਿ ਅਵਿਜ੍ਜਾਸਮੁਪ੍ਪਾਦੋ. ‘‘ਅਵਿਜ੍ਜਾਪਚ੍ਚਯਾਸਙ੍ਖਾਰਾਤੀ’’ਤਿ ਏਤ੍ਥ ਇਤਿਸਦ੍ਦੋ ਆਦਿਅਤ੍ਥੋ. ‘‘ਨਾਨਾਬ੍ਯਸਨ ਫੁਟ੍ਠਸ੍ਸਾ’’ਤਿ ਞਾਤਿਬ੍ਯਸਨਾਦੀਹਿ ਨਾਨਾਬ੍ਯਸਨੇਹਿ ਫੁਟ੍ਠਸ੍ਸ, ਵਿਹਿਂਸਿਤਸ੍ਸ. ‘‘ਯਤੋ’’ਤਿ ਯਂ ਕਾਰਣਾ, ਅਵਿਜ੍ਜਾਤਣ੍ਹਾਨਂ ਵਡ੍ਢਨਕਾਰਣਾ. ‘‘ਵਟ੍ਟਂ’’ਤਿ ਸਙ੍ਖਾਰਾਦਿਕਂ ਭਵਚਕ੍ਕਂ. ਸਂਮੁਯ੍ਹਨਂ ਸਮ੍ਮੋਹੋ. ਪਰਿਯੇਸਨਂ ਪਰਿਯੇਟ੍ਠਿ. ਵਿਪਚ੍ਚਤੀਤਿ ਵਿਪਾਕੋ. ਵਿਪਾਕੋ ਏਵ ਵੇਪਕ੍ਕਂ. ਸਮ੍ਮੋਹੋ ਵੇਪਕ੍ਕਂ ਅਸ੍ਸਾਤਿ ਸਮ੍ਮੋਹਵੇਪਕ੍ਕਂ. ਤਥਾ ਪਰਿਯੇਟ੍ਠਿਵੇ ਪਕ੍ਕਞ੍ਚਾਤਿ ਇਮਮਤ੍ਥਂ ਦਸ੍ਸੇਤਿ ‘‘ਤਦੁਭਯਂ’’ਤਿਆਦਿਨਾ. ਤਦੁਭਯਂ ਵਿਪਾਕਂ ਏਤਸ੍ਸਾਤਿ ਕਤ੍ਵਾ ਦੁਕ੍ਖਂ ਸਮ੍ਮੋਹਵੇਪਕ੍ਕਨ੍ਤਿ ਚ ਪਰਿਯੇਟ੍ਠਿਵੇਪਕ੍ਕਨ੍ਤਿ ਚ ਵੁਚ੍ਚਤੀਤਿ ਯੋਜਨਾ. ਅਪਿ ਚ, ਸਮ੍ਮੋਹਂ ਵਿਪਾਚੇਤਿ ਸਞ੍ਜਨੇਤੀਤਿ ਸਮ੍ਮੋਹ ਵੇਪਕ੍ਕਂ. ਏਵਂ ਪਰਿਯੇਟ੍ਠਿਵੇਪਕ੍ਕਨ੍ਤਿਪਿ ਯੁਜ੍ਜਤਿ. ‘‘ਕਿਚ੍ਛਂ’’ਤਿ ਕਸਿਰਂ ਦੁਕ੍ਖਂ ਆਪਨ੍ਨੋ. ‘‘ਮਿਯ੍ਯਤੀ’’ਤਿ ਮਰਤਿ. ‘‘ਚ ਵਤੀ’’ਤਿ ਸਙ੍ਕਮਤਿ. ‘‘ਉਪਪਜ੍ਜਤੀ’’ਤਿ ਭਵਨ੍ਤਰਂ ਉਪੇਤਿ. ‘‘ਅਥ ਚ ਪਨਾ’’ਤਿ ਏਵਂਭੂਤਸ੍ਸ ਸਤੋ. ‘‘ਜਰਾਮਰਣਸ੍ਸਾ’’ਤਿ ਜਰਾਮਰਣ ਸਙ੍ਖਾਤਸ੍ਸ ਇਮਸ੍ਸ ਦੁਕ੍ਖਸ੍ਸਾਤਿ ਸਮ੍ਬਨ੍ਧੋ. ‘‘ਨਿਸ੍ਸਰਣਂ’’ਤਿ ਨਿਗ੍ਗਮਨਂ. ‘‘ਨਪ੍ਪਜਾਨਾਤੀ’’ਤਿ ਅਯਂ ਲੋਕੋ ਨਪ੍ਪਜਾਨਾਤਿ. ‘‘ਆਗਤਿਯਾ’’ਤਿ ਇਮਸ੍ਮਿਂ ਭਵੇ ਪਟਿਸਨ੍ਧਿਵਿਞ੍ਞਾਣੁਪ੍ਪਤ੍ਤਿਵਸੇਨ ਆਗਮਨੇਨ. ‘‘ਗਤਿਯਾ ਚਾ’’ਤਿ ਅਨਾਗਤਭਵੇ ਜਾਤਿਪਾਤੁਬ੍ਭਾਵਵਸੇਨ ਗਮਨੇਨ ਚ. ਆਦਿਸਙ੍ਖਾਤੋ ਪੁਬ੍ਬਪਰਿਯਨ੍ਤੋ ਯਸ੍ਸ ਅਤ੍ਥੀਤਿਆਦਿਮਨ੍ਤਂ. ਨ ਆਦਿਮਨ੍ਤਂ ਅਨਾਦਿਮਨ੍ਤਂ. ‘‘ਵਟ੍ਟਪ੍ਪਵਤ੍ਤਸ੍ਸਾ’’ਤਿ ਤਿਵਿਧਵਟ੍ਟਸਙ੍ਖਾਤਸ੍ਸ ਪਬਨ੍ਧਪ੍ਪਵਤ੍ਤਸ੍ਸ. ਜਾਤਿਯਾ ਵੁਤ੍ਤਾਯ ਸਬ੍ਬਾਨਿ ਤਸ੍ਸਾ ਨਿਦਾਨਾਨਿ ਵੁਤ੍ਤਾਨਿ ਏਵ ਹੋਨ੍ਤੀਤਿ ਕਤ੍ਵਾ ‘‘ਜਾਤਿਯਾ ਏਵ ਵਾ’’ਤਿ ਵੁਤ੍ਤਂ. ‘‘ਇਚ੍ਚੇਵਂ’’ਤਿ ਇਤਿ ਏਵਂ. ਤਤ੍ਥ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿਆਦਿਨਾ ਨਯੇਨ ਪਟ੍ਠਪੇਸਿ ਮਹਾਮੁਨੀਤਿ ਸਮ੍ਬਨ੍ਧੋ. ਆਚਰਿਯ ਵਾਦੇਪਨ ‘‘ਇਚ੍ਚੇਵਂ’’ਤਿ ਜਰਾਮਰਣ ਮੁਚ੍ਛਾਯਾਤਿਆਦਿਨਾਨਯੇਨ. ਆਬਨ੍ਧਂ ਅਨਾਦਿਕਨ੍ਤਿ ਸਮ੍ਬਨ੍ਧੋ. ਇਧਪਿ ਤਮੇਵ ਸਮ੍ਬਨ੍ਧਂ ਗਹੇਤ੍ਵਾ ਯੋਜੇਤਿ ‘‘ਇਚ੍ਚੇਵਂ ਆਬਨ੍ਧਨ੍ਤਿ. ਲ. ਪੁਨਪ੍ਪੁਨਂ ਆਬਨ੍ਧਂ’’ਤਿ. ਅਵਿਜ੍ਜਾ ਆਦਿਮ੍ਹਿ ਵੁਤ੍ਤਾ. ਤਸ੍ਮਾ ਸਾ ਸਯਂ ਅਹੇਤੁ ਅਪਚ੍ਚਯਾ ਹੁਤ੍ਵਾ ਵਟ੍ਟਸ੍ਸ ਆਦਿਪਚ੍ਚਯਭੂਤਾ ਹੋਤੀਤਿ ਚੋਦਨਾ. ਤਂ ਪਰਿਹਰਤਿ ‘‘ਵਟ੍ਟਸ੍ਸਾ’’ਤਿਆਦਿਨਾ. ‘‘ਵਟ੍ਟਕਥਾਯ ਸੀਸਭੂਤਤ੍ਤਾ’’ਤਿ ਵਟ੍ਟਸ੍ਸ ਆਦਿਨਾਮ ਨਤ੍ਥਿ. ਤਸ੍ਸ ਪਨ ਪਵਤ੍ਤਿ ਨਿਵਤ੍ਤਿਯੋ ਅਤ੍ਥਿ. ਜਾਨਨ੍ਤੇਹਿ ਤਾਸਂ ਪਕਾਸਨਤ੍ਥਾਯ ਪਟਿਚ੍ਚਸਮੁਪ੍ਪਾਦਕਥਾਨਾਮ ਵਟ੍ਟਕਥਾ ਏਕਨ੍ਤੇਨ ਕਥੇਤਬ੍ਬਾ ਹੋਤਿ. ਕਥੇਨ੍ਤੇਹਿ ਚ ਵਟ੍ਟਧਮ੍ਮਾਨਂ ਮਜ੍ਝੇ ਕਤਮਸ੍ਸ ਧਮ੍ਮਸ੍ਸ ਕਿਚ੍ਚਂ ਵਟ੍ਟਪ੍ਪਵਤ੍ਤਤ੍ਥਾਯ ਪਧਾਨਤਰਂ ਹੋਤੀਤਿ ਜਾਨਿਤਬ੍ਬਂ ਹੋਤਿ. ਤਦਾ ਕਿਚ੍ਚਵਸੇਨ ਪਧਾਨਤਰਂ ਏਕਂ ਧਮ੍ਮਂ ਮੂਲਂ ਸੀਸਂ ਕਤ੍ਵਾ ਵਟ੍ਟਕਥਾ ਕਥੇਤਬ੍ਬਾਤਿ. ਇਦਂ ਵਟ੍ਟਕਥਾਯ ਸੀਸਂ ਨਾਮ. ਤਤ੍ਥ ਅਵਿਜ੍ਜਾ ਨਾਮ ਮੋਹੋ. ਸੋ ਚ ਮੁਯ੍ਹਨਕਿਰਿਯਾ. ਅਨ੍ਧਭਾਵਕਰਣਞ੍ਚਸ੍ਸ ਕਿਚ੍ਚਂ. ਨ ਚ ਪਞ੍ਞਾ ਚਕ੍ਖੁਸ੍ਸ ਅਨ੍ਧਭਾਵਕਰਣ ਸਦਿਸਂ ਅਞ੍ਞਂ ਵਟ੍ਟਸ੍ਸ ਪਵਤ੍ਤਤ੍ਥਾਯ ਪਧਾਨਕਿਚ੍ਚਂ ਨਾਮ ਅਤ੍ਥਿ. ਤਸ੍ਮਾ ਅਵਿਜ੍ਜਾ ਏਵੇਤ੍ਥ ਸਬ੍ਬਪ੍ਪਧਾਨ ਕਿਚ੍ਚਤ੍ਤਾ ਵਟ੍ਟਕਥਾਯ ਸੀਸਭੂਤਾ ਹੋਤਿ. ਏਵਂ ਵਟ੍ਟਕਥਾਯ ਸੀਸਭੂਤਤ੍ਤਾ ਸਾ ਆਦਿਮ੍ਹਿ ਵੁਤ੍ਤਾਤਿ. ‘‘ਅਨਾਦਿਕਭਾਵੋ ਏਵ ਦਸ੍ਸਿਤੋ’’ਤਿ ਅਨਾਦਿਕਭਾਵੋ ਦਸ੍ਸਿਤੋ ਏਵ. ਨੋ ਨ ਦਸ੍ਸਿਤੋਤਿ ਅਤ੍ਥੋ. ਇਤਿ ਏਤਂ ਅਤ੍ਥਜਾਤਂ ਪਚ੍ਚਕ੍ਖਤੋ ਸਿਦ੍ਧਂ. ‘‘ਇਧਾ’’ਤਿ ਇਮਸ੍ਮਿਂਭਵੇ. ‘‘ਤਸ੍ਸਾ’’ਤਿ ਅਤੀਤ ਭਵਪਰਿਯਾਪਨ੍ਨਾਯ ਅਵਿਜ੍ਜਾਯ. ‘‘ਅਞ੍ਞਾਯ ਅਵਿਜ੍ਜਾਯ ਏਵਾ’’ਤਿ ਅਤੀਤਭਵਤੋਪਿ ਪੁਰਿਮਭਵੇ ਸਿਦ੍ਧਾਯ ਅਞ੍ਞਾਯ ਅਵਿਜ੍ਜਾਯ ਏਵ. ‘‘ਤਸ੍ਸਾਪੀ’’ਤਿ ਪੁਰਿਮਤਰਭਵੇ ਅਵਿਜ੍ਜਾਯਪਿ. ‘‘ਅਤ੍ਤਭਾਵੋ’’ਤਿ ਪੁਰਿਮਤਰੋ ਅਤ੍ਤਭਾਵੋ. ‘‘ਪਧਾਨ ਪਚ੍ਚਯਭੂਤਤ੍ਤਾ’’ਤਿ ਪੁਬ੍ਬੇ ਵੁਤ੍ਤਨਯੇਨ ਅਨ੍ਧਭਾਵਕਰਣ ਕਿਚ੍ਚਤ੍ਤਾ ਵਟ੍ਟਪ੍ਪਵਤ੍ਤਿਯਾ ਪਧਾਨ ਪਚ੍ਚਯਭੂਤਾ ਹੋਤਿ. ਏਵਂ ਪਧਾਨਪਚ੍ਚਯਭੂਤਤ੍ਤਾ. ‘‘ਤਸ੍ਸ ਤਸ੍ਸਾਤਿ ਨਿਟ੍ਠਾਨਮੇਵ ਨ ਪਞ੍ਞਾਯੇਯ੍ਯਾ’’ਤਿ ਤਸ੍ਸ ਪਚ੍ਚਯਸ੍ਸ ਪਚ੍ਚਯੋ ਵਤ੍ਤਬ੍ਬੋ. ਤਸ੍ਸਪਿ ਪਚ੍ਚਯਸ੍ਸ ਪਚ੍ਚਯੋ ਵਤ੍ਤਬ੍ਬੋਤਿ ਏਵਂ ਵਸ੍ਸਸਤਮ੍ਪਿ ਵਸ੍ਸਸਹਸ੍ਸਂਪਿ ਨਿਟ੍ਠਾਨਮੇਵ ਨ ਪਞ੍ਞਾਯੇਯ੍ਯ. ‘‘ਵੁਤ੍ਤੋਯੇਵਾ’’ਤਿ ਅਵਿਜ੍ਜਾਯ ਪਚ੍ਚਯੋ ਵੁਤ੍ਤੋਯੇਵ. ‘‘ਪਞ੍ਚਨੀਵਰਣਾਤਿਸ੍ਸਵਚਨੀਯਂ’’ਤਿ ਪਞ੍ਚਨੀਵਰਣ ਧਮ੍ਮਾ ਅਵਿਜ੍ਜਾਯ ਆਹਾਰੋਤਿ ਵਚਨੀਯਂ ਭਵੇਯ੍ਯ. ਤਤ੍ਥ ‘‘ਆਹਾਰੋ’’ਤਿ ਬਲਵਪਚ੍ਚਯੋ ਵੁਚ੍ਚਤੀਤਿ.

ਪਟਿਚ੍ਚਸਮੁਪ੍ਪਾਦਨਯਾਨੁਦੀਪਨਾ ਨਿਟ੍ਠਿਤਾ.

੧੬੭. ਪਟ੍ਠਾਨਨਯੇ. ‘‘ਹੇਤੁ ਚ ਸੋ ਪਚ੍ਚਯੋ ਚਾ’’ਤਿ ਏਤ੍ਥ ਲੋਭੋ ਹੇਤੁਜਾਤਿਕਤ੍ਤਾ ਹੇਤੁ ਚ ਹੋਤਿ. ਆਰਮ੍ਮਣਾਨਨ੍ਤਰਾਦਿ ਪਚ੍ਚਯੇਨ ਅਞ੍ਞਧਮ੍ਮਸ੍ਸ ਪਚ੍ਚਯੋ ਚ ਹੋਤੀਤਿ ਅਤ੍ਥਸ੍ਸ ਸਮ੍ਭਵਤੋ ‘‘ਹੇਤੁ ਹੁਤ੍ਵਾ ਪਚ੍ਚਯੋ’’ਤਿ ਵਣ੍ਣੇਤਿ. ਏਵਂ ਵਣ੍ਣਿਤੇਪਿ ‘‘ਹੇਤੁ ਹੁਤ੍ਵਾ ਪਚ੍ਚਯੋ’’ਤਿ ਹੇਤੁ ਹੋਨ੍ਤੋ ਪਚ੍ਚਯੋਤਿ ਅਤ੍ਥੇ ਸਤਿ, ਸੋ ਯੇਵਤ੍ਥੋ ਸਮ੍ਭਵਤੀਤਿ ‘‘ਪੁਨ ਹੇਤੁਭਾਵੇਨ ਪਚ੍ਚਯੋ’’ਤਿ ਵਣ੍ਣੇਤਿ. ਏਤ੍ਥ ਸਿਯਾ, ਹੇਤੁ ਚ ਸੋ ਪਚ੍ਚਯੋ ਚਾਤਿ ਏਤ੍ਥ ਪਦ ਦ੍ਵਯਂ ਏਕਧਮ੍ਮਾਧਿਕਰਣਤ੍ਤਾ ਤੁਲ੍ਯਾਧਿਕਰਣਂ ਹੋਤਿ. ਹੇਤੁਭਾਵੇਨ ਪਚ੍ਚਯੋਤਿ ਏਤ੍ਥ ਪਨ ਪਦਦ੍ਵਯਂ ਤੁਲ੍ਯਾਧਿਕਰਣਂ ਨ ਹੋਤਿ. ਪੁਰਿਮ ਪਦਞ੍ਹਿ ਧਮ੍ਮ ਭਾਵਪ੍ਪਧਾਨਂ, ਪਚ੍ਛਿਮਂ ਧਮ੍ਮਪ੍ਪਧਾਨਨ੍ਤਿ. ਏਵਂ ਸਨ੍ਤੇ ਤੁਲ੍ਯਾਧਿਕਰਣਂ ਵਾਕ੍ਯਂ ਭਿਨ੍ਨਾਧਿਕਰਣਂ ਕਤ੍ਵਾ ਵਣ੍ਣੇਤੀਤਿ ਨ ਯੁਤ੍ਤਮੇਤਨ੍ਤਿ. ਨੋ ਨ ਯੁਤ੍ਤਂ. ਮੁਖ੍ਯੋਪਚਾਰਮਤ੍ਤੇਨ ਨਾਨਤ੍ਥਤ੍ਤਾ. ਪਚ੍ਛਿਮਵਾਕ੍ਯਂਹਿ ਮੁਖ੍ਯਵਚਨਂ. ਪੁਰਿਮਵਾਕ੍ਯਂ ਉਪਚਾਰ ਵਚਨਂ. ਉਪਚਾਰਵਚਨੇ ਚ ਉਪਚਾਰਤ੍ਥੋ ਯੁਜ੍ਜਤਿ. ਮੁਖ੍ਯਵਚਨੇ ਮੁਖ੍ਯਤ੍ਥੋਤਿ. ‘‘ਹੇਟ੍ਠਾਵੁਤ੍ਤਮੇਵਾ’’ਤਿ ਪਕਿਣ੍ਣਕਸਙ੍ਗਹੇ ਵੁਤ੍ਤਮੇਵ. ਹਿਨੋਨ੍ਤਿ ਏਤ੍ਥਾਤਿ ਹੇਤੁ. ਹਿਨੋਨ੍ਤਿ ਏਤੇਨਾਤਿ ਹੇਤੁ. ਤਤ੍ਥ ‘‘ਹਿਨੋਨ੍ਤੀ’’ਤਿ ਸੁਟ੍ਠੁਪਤਿਟ੍ਠਹਨ੍ਤਿ. ਕੇ ਪਤਿਟ੍ਠਹਨ੍ਤੀਤਿ ਆਹ ‘‘ਸਹਜਾਤ ਧਮ੍ਮਾ’’ਤਿ. ਕਥਞ੍ਚ ਸੁਟ੍ਠੁਪਤਿਟ੍ਠਹਨ੍ਤੀਤਿ ਆਹ ‘‘ਵੁਦ੍ਧਿ ਵਿਰੁਲ਼੍ਹਿ ਵੇਪੁਲ੍ਲਪਤ੍ਤਵਸੇਨਾ’’ਤਿ. ਕਸ੍ਮਾ ਤੇ ਸੁਟ੍ਠੁ ਪਤਿਟ੍ਠਹਨ੍ਤੀਤਿ. ਪਤਿਟ੍ਠਿਤਟ੍ਠਾਨਸ੍ਸ ਪਤਿਟ੍ਠਿਤਕਾਰਣਸ੍ਸ ਵਾ ਥਾਮਬਲਸਮ੍ਪਨ੍ਨਤ੍ਤਾਤਿ ਦਸ੍ਸੇਤੁਂ ‘‘ਆਰਮ੍ਮਣੇ ਦਲ਼੍ਹਨਿਪਾਤਿਨਾ ਥਾਮਬਲਸਮ੍ਪਨ੍ਨੇਨਾ’’ਤਿ ਵੁਤ੍ਤਂ. ਹੇਤੁਵਿਸੇਸਨਞ੍ਚੇਤਂ. ਆਰਮ੍ਮਣੇ ਦਲ਼੍ਹਨਿਪਾਤਿਮ੍ਹਿ ਥਾਮਬਲਸਮ੍ਪਨ੍ਨੇ ਏਤ੍ਥ ਧਮ੍ਮੇਤਿਪਿ ਯੋਜੇਤਬ੍ਬਂ. ਉਪਕਾਰਕੋਤਿ ਚ ਉਪਲਦ੍ਧਿਯੇਵਾਤਿ ਸਮ੍ਬਨ੍ਧੋ. ‘‘ਯਾਦਿਸੇਨਸਭਾਵੇਨਾ’’ਤਿ ਹੇਤੁਭਾਵਾਦਿਸਭਾਵੇਨ. ‘‘ਉਪਲਦ੍ਧਿਯੇਵਾ’’ਤਿ ਕਸ੍ਮਾ ਵੁਤ੍ਤਂ. ਨਨੁ ਉਪਕਾਰਕ ਸਦ੍ਦੋ ਕਤ੍ਤਾਰਂ ਵਾ ਕਾਰੇਤਾਰਂ ਵਾ ਵਦਤੀਤਿ. ਵੋਹਾਰਮਤ੍ਤੇਨ ਵਦਤਿ. ਧਮ੍ਮਤੋ ਪਨ ਕਤ੍ਤਾ ਵਾ ਕਾਰੇਤਾ ਵਾ ਨਤ੍ਥੀਤਿ ਦਸ੍ਸੇਤੁਂ ‘‘ਨ ਹਿ ਸਭਾਵ ਧਮ੍ਮੇਸੂ’’ਤਿਆਦਿਮਾਹ. ਯਦਿ ਧਮ੍ਮਤੋ ਕਤ੍ਤਾਵਾ ਕਾਰੇਤਾਵਾ ਨਤ੍ਥਿ. ਕਸ੍ਮਾ ਉਪਕਾਰਕੋਤਿ ਵੁਚ੍ਚਤੀਤਿ ਆਹ ‘‘ਤਥਾ ਉਪਲਦ੍ਧਿਯਂ ਪਨਾ’’ਤਿਆਦਿਂ.

ਆਰਮ੍ਮਣਪਚ੍ਚਯੇ. ‘‘ਅਜ੍ਝੋਲਮ੍ਬਮਾਨਾ’’ਤਿ ਆਰਮ੍ਮਣ ਕਰਣਵਸੇਨ ਅਧਿਓਲਮ੍ਬਮਾਨਾ. ‘‘ਆਰਮ੍ਮਣਭਾਵੇਨਾ’’ਤਿ ਗੋਚਰਵਿਸਯਭਾਵੇਨ.

ਅਧਿਪਤਿਪਚ੍ਚਯੇ. ‘‘ਗਰੁਕਤਾ’’ਤਿ ਅਸ੍ਸਾਦਨਾਭਿਨਨ੍ਦਨਾਦਿਵਸੇਨ ਵਾ ਸਦ੍ਧਾਪਸਾਦਾਦਿਵਸੇਨ ਵਾ ਗਰੁਕਤਾ. ‘‘ਸਾਮਿਨੋ ਵਿਯ ਦਾਸੇ’’ਤਿ ਸਾਮਿਨੋ ਅਤ੍ਤਨੋਦਾਸੇ ਅਤ੍ਤਨੋਵਸੇ ਵਤ੍ਤਯਮਾਨਾ ਵਿਯ. ਸਹਜਾਤਾਧਿਪਤਿ ਪਨ ਹੇਟ੍ਠਾ ਸਮੁਚ੍ਚਯ ਸਙ੍ਗਹੇ ਵੁਤ੍ਤੋਤਿ ਇਧ ਨ ਵੁਤ੍ਤੋ.

ਅਨਨ੍ਤਰਪਚ੍ਚਯਦ੍ਵਯੇ. ‘‘ਅਨ੍ਤਰਂ’’ਤਿ ਛਿਦ੍ਦਂ ਵਿਵਰਂ. ‘‘ਸਨ੍ਤਾਨਂ’’ਤਿ ਚਿਤ੍ਤਸਨ੍ਤਾਨਂ. ‘‘ਸਨ੍ਤਾਨਾਨੁਬਨ੍ਧਵਸੇਨਾ’’ਤਿ ਚਿਤ੍ਤਸਨ੍ਤਾਨਂ ਪੁਨਪ੍ਪੁਨਂ ਬਨ੍ਧਨਵਸੇਨ. ਉਪ੍ਪਾਦਨਨ੍ਤਿ ਸਮ੍ਬਨ੍ਧੋ. ‘‘ਧਮ੍ਮਨ੍ਤਰਸ੍ਸਾ’’ਤਿ ਨਾਮਕ੍ਖਨ੍ਧ ਧਮ੍ਮਨ੍ਤਰਸ੍ਸ. ‘‘ਅਨਨ੍ਤਰ ਪਚ੍ਚਯਤਾ’’ਤਿ ਅਨਨ੍ਤਰਪਚ੍ਚਯ ਕਿਚ੍ਚਨ੍ਤਿ ਵੁਤ੍ਤਂ ਹੋਤਿ. ਯਂ ਕਿਞ੍ਚਿ ਧਮ੍ਮਨ੍ਤਰਂ. ‘‘ਪੁਰਿਮਪਚ੍ਛਿਮਭਾਗਪ੍ਪਵਤ੍ਤਾਨਂ’’ਤਿ ਨਿਰੋਧਸ੍ਸ ਅਸਞ੍ਞੀਭਵਸ੍ਸ ਚ ਪੁਰਿਮਭਾਗੇ ਚ ਪਚ੍ਛਿਮਭਾਗੇ ਚ ਪਵਤ੍ਤਾਨਂ. ‘‘ਚਿਤ੍ਤੁਪ੍ਪਾਦਾਨਂ ਪੀ’’ਤਿ ਨਿਰੋਧਸ੍ਸ ਪੁਬ੍ਬਭਾਗੇ ਨੇਵਸਞ੍ਞਾਨਾਸਞ੍ਞਾਯਤਨ ਕੁਸਲ ਕ੍ਰਿਯ ਚਿਤ੍ਤੁਪ੍ਪਾਦਾਨਂ. ਪਚ੍ਛਾਭਾਗੇ ਅਨਾਗਾਮਿਫਲ ਅਰਹਤ੍ਤਫਲਚਿਤ੍ਤੁਪ੍ਪਾਦਾਨਂ. ਅਸਞ੍ਞੀਭਵਸ੍ਸ ਪੁਬ੍ਬਭਾਗੇ ਕਾਮਭਵੇ ਚੁਤਿ ਚਿਤ੍ਤੁਪ੍ਪਾਦਾਨਂ. ਪਚ੍ਛਾਭਾਗੇ ਕਾਮਭਵੇ ਏਵ ਪਟਿਸਨ੍ਧਿ ਚਿਤ੍ਤੁਪ੍ਪਾਦਾਨਂ. ਤੇਸੁ ਪਨ ਕਥਂ ਅਨਨ੍ਤਰਂ ਨਾਮ ਸਿਯਾ. ਦ੍ਵਿਨ੍ਨਂ ਦ੍ਵਿਨ੍ਨਂ ਪੁਰਿਮਭਾਗ ਪਚ੍ਛਿਮ ਭਾਗਾਨਂ ਮਜ੍ਝੇ ਅਚਿਤ੍ਤਕਸ੍ਸ ਕਾਲਸ੍ਸ ਅਚਿਤ੍ਤਕਸ੍ਸ ਰੂਪਸਨ੍ਤਾਨਸ੍ਸ ਚ ਅਨ੍ਤਰਿਕਤ੍ਤਾਤਿ ਚੋਦਨਾ. ਤਂ ਪਰਿਹਰਿਤੁਂ ‘‘ਨ ਹਿ ਅਭਾਵਭੂਤੋ’’ਤਿਆਦਿ ਵੁਤ੍ਤਂ. ‘‘ਤੇਸਂ’’ਤਿ ਦ੍ਵਿਨ੍ਨਂ ਦ੍ਵਿਨ੍ਨਂ ਚਿਤ੍ਤੁਪ੍ਪਾਦਾਨਂ. ਰੂਪਧਮ੍ਮੋ ਅਨ੍ਤਰਂ ਨ ਚ ਕਰੋਤਿ ਨਾਮ. ਅਰੂਪਧਮ੍ਮਾਨਂ ਅਨਨ੍ਤਰਤਾ ਨਾਮਾਤਿਆਦਿਨਾ ਯੋਜਨਾ ਹੋਤਿ. ‘‘ਤਥਾਪਵਤ੍ਤਨ ਸਮਤ੍ਥਤਾ’’ਤਿ ਏਕੀਭੂਤਾਨਂ ਵਿਯ ਅਤ੍ਤਨੋ ਅਨਨ੍ਤਰੇ ਧਮ੍ਮਨ੍ਤਰਂ ਉਪ੍ਪਾਦਨੇ ਸਮਤ੍ਥਤਾ.

ਸਹਜਾਤਪਚ੍ਚਯੇ. ‘‘ਯੇ ਪਨ ਧਮ੍ਮਾ’’ਤਿ ਪਚ੍ਚਯੁਪ੍ਪਨ੍ਨ ਧਮ੍ਮਾ. ‘‘ਅਤ੍ਤਨੀ’’ਤਿ ਪਚ੍ਚਯ ਧਮ੍ਮੋ ਵੁਚ੍ਚਤਿ.

‘‘ਅਞ੍ਞਮਞ੍ਞਂ ਉਪਤ੍ਥਮ੍ਭਨ੍ਤਂ ਤਿਦਣ੍ਡਂ ਵਿਯਾ’’ਤਿ ਭੂਮਿਯਂ ਅਞ੍ਞਮਞ੍ਞਂ ਨਿਸ੍ਸਾਯ ਉਸ੍ਸਿਤਾ ਤਯੋਦਣ੍ਡਾ ਅਞ੍ਞਮਞ੍ਞਂ ਉਪਤ੍ਥਮ੍ਭਨ੍ਤਾ ਵਿਯ. ‘‘ਪੁਰਿਮੇਨਾ’’ਤਿ ਪੁਰਿਮੇਨ ਸਹਜਾਤ ਪਚ੍ਚਯੇਨ. ‘‘ਇਤਰੀਤਰੋ ਪਤ੍ਥਮ੍ਭਨਂ’’ਤਿ ਅਞ੍ਞਮਞ੍ਞੋ ਪਤ੍ਥਮ੍ਭਨਂ.

‘‘ਸੂਦੋ’’ਤਿ ਭਤ੍ਤਕਾਰਕੋ. ‘‘ਉਕ੍ਖਲੀ’’ਤਿ ਭਤ੍ਤਪਚਨਕੁਮ੍ਭੀ. ‘‘ਵੁਟ੍ਠਿਧਾਰਾ’’ਤਿ ਮੇਘਵੁਟ੍ਠਿਧਾਰਾ. ‘‘ਉਪਨਿਸ੍ਸਯੋ’’ਤਿ ਭਤ੍ਤੁਪ੍ਪਤ੍ਤਿਯਾ ਉਪਨਿਸ੍ਸਯੋ. ‘‘ਤਾਸੁ ਅਸਤੀ’’ਤਿ ਸਾਲਿਕ੍ਖੇਤ੍ਤ ਵੁਟ੍ਠਿਧਾਰਾਸੁ ਅਸਤਿ. ‘‘ਬਲਵਤਰਟ੍ਠੇਨਾ’’ਤਿ ਬਲਵਤਰਨਿਸ੍ਸਯਟ੍ਠੇਨ. ‘‘ਪਕਤੂਪਨਿਸ੍ਸਯੋ’’ਤਿ ਏਤ੍ਥ ‘‘ਪਕਤੋ’’ਤਿ ਭੁਸਂ ਕਤੋ. ਤੇਨਾਹ ‘‘ਸੁਟ੍ਠੁਕਤੋ’’ਤਿ. ਕਰਣਞ੍ਚ ਅਤ੍ਤਨੋ ਸਨ੍ਤਾਨੇ ਸੁਟ੍ਠੁਉਪ੍ਪਾਦਨਞ੍ਚ ਸੁਟ੍ਠੁਉਪਸੇਵਨਞ੍ਚ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਪ੍ਪਕਾਰੇਨਾ’’ਤਿ ‘ਯਥਾ ਕਤੇ ਸਤੀ’ਤਿਆਦਿਨਾ ਵੁਤ੍ਤਪ੍ਪਕਾਰੇਨ.

‘‘ਨਿਸ੍ਸਯਾਰਮ੍ਮਣ ਧਮ੍ਮਾ ਏਵਾ’’ਤਿ ਨਿਸ੍ਸਯ ਪਚ੍ਚਯ ਧਮ੍ਮ ਆਰਮ੍ਮਣ ਪਚ੍ਚਯ ਧਮ੍ਮਾ ਏਵ. ‘‘ਪੁਰੇਜਾਤਤਾਮਤ੍ਤਵਿਸਿਟ੍ਠਾ’’ਤਿ ਏਤ੍ਥ ਮਤ੍ਤਸਦ੍ਦੇਨ ਨਿਸ੍ਸਯਾਰਮ੍ਮਣਸਤ੍ਤਿਤੋ ਵਿਸੁਂ ਪੁਰੇਜਾਤਸਤ੍ਤਿ ਨਾਮ ਨਤ੍ਥੀਤਿ ਦਸ੍ਸੇਤਿ. ਵਿਸੁਂ ਪੁਰੇਜਾਤਸਤ੍ਤਿ ਨਾਮ ਅਤ੍ਥੀਤਿਪਿ ਵਦਨ੍ਤਿ. ਤਂ ਵਾਦਂ ਦਸ੍ਸੇਤੁਂ ‘‘ਆਚਰਿਯਾਨਨ੍ਦਤ੍ਥੇਰੇਨਾ’’ਤਿਆਦਿਮਾਹ. ਏਤ੍ਥ ਪਞ੍ਚਵਤ੍ਥੂਨਿ ਚ ਪਞ੍ਚਾਰਮ੍ਮਣਾਨਿ ਚ ਪੁਰੇਜਾਤਤ੍ਤਾ ਏਵ ਸੁਟ੍ਠੁਬਲਵਤਾਯ ਪਞ੍ਚਵਿਞ੍ਞਾਣਾਨਂ ਵਤ੍ਥੁ ਕਿਚ੍ਚ ਆਰਮ੍ਮਣ ਕਿਚ੍ਚਾਨਿ ਸਾਧੇਨ੍ਤਿ. ਤਥਾ ਹਦਯਵਤ੍ਥੁ ਚ ਮਨੋਧਾਤੁ ਮਨੋਵਿਞ੍ਞਾਣਧਾਤੂ ਨਨ੍ਤਿ. ਅਯਂ ਵਿਸੁਂ ਪੁਰੇਜਾਤਸਤ੍ਤਿ ਵਿਸੇਸੋਤਿ ਵਦੇਯ੍ਯ. ਸਚ੍ਚਂ. ਸੁਦ੍ਧਮਨੋ ਦ੍ਵਾਰੇਪਨ ਇਧ ਠਤ੍ਵਾ ਨਿਰਯੇਸੁ ਏਵਰੂਪਾਨਿ ਨਿਰਯਗ੍ਗਿਰੂਪਾਨਿ ਅਤ੍ਥਿ. ਇਦਾਨਿ ਦੇਵੇਸੁ ਚ ਏਵਰੂਪਾਨਿ ਦਿਬ੍ਬਰੂਪਾਨਿ ਅਤ੍ਥੀਤਿ ਚਿਨ੍ਤਯਨ੍ਤਾਨਮ੍ਪਿ, ਤੇਸੁ ਪੁਰੇ ਏਵਰੂਪਾਨਿ ਉਪ੍ਪਜ੍ਜਿਂਸੂਤਿ ਵਾ, ਤੇਸੁ ਅਨਾਗਤੇ ਏਵਰੂਪਾਨਿ ਉਪ੍ਪਜ੍ਜਿਸ੍ਸਨ੍ਤੀਤਿ ਵਾ ਚਿਨ੍ਤਯਨ੍ਤਾਨਂਪਿਤਾਨਿ ਰੂਪਾਨਿ ਨਿਬ੍ਬਿਸੇਸਾਨਿ ਹੁਤ੍ਵਾ ਮਨੋਵਿਞ੍ਞਾਣਾਨਂ ਆਰਮ੍ਮਣ ਪਚ੍ਚਯਤ੍ਤਂ ਗਚ੍ਛਨ੍ਤਿ. ਤਤ੍ਥ ਪੁਰੇ ਜਾਤਾਨਿ ਹੁਤ੍ਵਾ ਤਦਾ ਵਿਜ੍ਜਮਾਨਾਨਿ ਪਚ੍ਚੁਪ੍ਪਨ੍ਨਰੂਪਾਨਿ ਆਰਮ੍ਮਣ ਪੁਰੇਜਾਤਪਚ੍ਚਯੋ. ਇਤਰਾਨਿ ਆਰਮ੍ਮਣ ਪਚ੍ਚਯੋ ਏਵ. ਨ ਚੇਤ੍ਥ ਪੁਰੇਜਾਤਾਨਂ ਪਚ੍ਚੁਪ੍ਪਨ੍ਨਰੂਪਾਨਂ ਪੁਰੇਜਾਤਤ੍ਤੇਨ ਵਿਸੇਸੋ ਅਤ੍ਥਿ. ਨ ਚ ਤਾਨਿ ਪੁਰੇਜਾਤਪਚ੍ਚਯੋ ਨ ਹੋਨ੍ਤਿ. ਯਦਿ ਵਿਸੁਂ ਪੁਰੇਜਾਤਸਤ੍ਤਿਵਿਸੇਸੋ ਪੁਰੇਜਾਤਪਚ੍ਚਯੋਤਿ ਵਦੇਯ੍ਯ. ਤਾਨਿ ਪੁਰੇਜਾਤਪਚ੍ਚਯੋ ਨਾਮ ਨ ਭਵੇਯ੍ਯੁਂ. ਕਸ੍ਮਾ, ਤਾਦਿਸਸ੍ਸ ਵਿਸੇਸਸ੍ਸ ਨਤ੍ਥਿਤਾਯ. ਨ ਚ ਨਭਵਨ੍ਤਿ. ਕਸ੍ਮਾ, ਪੁਰੇਜਾਤਮਤ੍ਤਵਿਸੇਸਸ੍ਸ ਅਤ੍ਥਿਤਾਯ. ਏਤ੍ਥ ਵਦੇਯ੍ਯੁਂ, ਪਞ੍ਚਦ੍ਵਾਰੇਸੁ ਪਨ ਪੁਬ੍ਬੇ ਵੁਤ੍ਤਨਯੇਨ ਵਿਸੁਂ ਪੁਰੇਜਾਤਸਤ੍ਤਿਵਿਸੇਸੋ ਦਿਸ੍ਸਤੀਤਿ. ਕਿਞ੍ਚਾਪਿਦਿਸ੍ਸਤਿ. ਸੋ ਪਨ ਬਹੁਵਿਧਾਨਂ ਨਿਸ੍ਸਯ ਪਚ੍ਚਯ ਆਰਮ੍ਮਣਪਚ੍ਚਯਾਨਂ ਮਜ੍ਝੇ ਨਿਸ੍ਸਯ ਸਤ੍ਤਿਵਿਸੇਸੋ ਏਵ, ਆਰਮ੍ਮਣ ਸਤ੍ਤਿਵਿਸੇਸੋ ਏਵ ਚਾਤਿ. ਅਪਿ ਚ ਵਿਸੁਂ ਪੁਰੇਜਾਤ ਸਤ੍ਤਿਵਿਸੇਸੋ ਨਾਮ ਨਤ੍ਥੀਤਿ ਇਦਂ ਯਥਾਵੁਤ੍ਤੇ ਸੁਦ੍ਧਮਨੋਦ੍ਵਾਰੇ ਤਬ੍ਬਿਸੇਸਾਭਾਵਂ ਸਨ੍ਧਾਯ ਵੁਤ੍ਤਂ. ਵਿਸੁਂ ਪੁਰੇਜਾਤ ਸਤ੍ਤਿਵਿਸੇਸੋ ਨਾਮ ਅਤ੍ਥੀਤਿ ਇਦਂ ਪਞ੍ਚਦ੍ਵਾਰੇਸੁ ਤਬ੍ਬਿਸੇਸਸ੍ਸ ਅਤ੍ਥਿਭਾਵਂ ਸਨ੍ਧਾਯ ਵੁਤ੍ਤਨ੍ਤਿ. ਯਂ ਰੁਚ੍ਚਤਿ, ਤਂ ਗਹੇਤਬ੍ਬਂ.

ਪਚ੍ਛਾਜਾਤਪਚ੍ਚਯੇ. ‘‘ਰੁਕ੍ਖਪੋਤਕਾਨਂ ਵਿਯਾ’’ਤਿ ਪਚ੍ਛਾ ਆਸਿਞ੍ਚਿਯਮਾਨਂ ਉਦਕਂ ਰੁਕ੍ਖਪੋਤਕਾਨਂ ਵੁਦ੍ਧਵਿਰੁਲ਼੍ਹਭਾਵਂ ਪਾਪੇਤ੍ਵਾ ਉਪਤ੍ਥਮ੍ਭਨਵਸੇਨ ਉਪਕਾਰਕੋ ਵਿਯਾਤਿ ਯੋਜਨਾ. ਆਹਾਰਂ ਆਸਿਂ ਸਤੀਤਿ ਆਹਾਰਾਸਾ. ਜਿਘਚ੍ਛਾ, ਪਿਪਾਸਾ, ਤਣ੍ਹਾ. ਤਾਯ ਸਮ੍ਪਯੁਤ੍ਤਾ ਚੇਤਨਾਤਿ ਵਿਗ੍ਗਹੋ. ਸਾ ਪਨ ਆਹਾਰਾਸਾ ਚੇਤਨਾ ਉਪਤ੍ਥਮ੍ਭਤਿ ਯੇਵਾਤਿ ਸਮ੍ਬਨ੍ਧੋ. ‘‘ਅਯਮਤ੍ਥੋ’’ਤਿ ‘ਸੁਪਾਕਟੇਨਾ’ਤਿਆਦਿਨਾ ਵੁਤ੍ਤੋ ਅਯਮਤ੍ਥੋ. ਸਬ੍ਬਾਚੇਸਾਵਿਚਾਰਣਾ ਗਿਜ੍ਝੋਪਮਾਯ ਉਪਮਾਮਤ੍ਤਭਾਵਂ ਨੀਵਾਰੇਤਾ ਹੋਤੀਤਿ.

ਆਸੇਵਨ੍ਤਿ ਤਂ ਪਚ੍ਚਯ ਧਮ੍ਮਂ ਪਚ੍ਚਯੁਪ੍ਪਨ੍ਨਾ ਧਮ੍ਮਾਤਿ ਆਸੇਵਨਂ. ਏਤੇਨ ਭੁਸੋ ਪਚ੍ਚਯੁਪ੍ਪਨ੍ਨ ਧਮ੍ਮੇਹਿ ਆਸੇਵਿਤਬ੍ਬਤ੍ਤਾ ਆਸੇਵਨਨ੍ਤਿ ਵੁਚ੍ਚਤੀਤਿ ਦਸ੍ਸੇਤੀਤਿ. ‘‘ਤਂ’’ਤਿ ਤਂ ਪੁਰਿਮਂ ਪੁਰਿਮਂ ਪਚ੍ਚਯ ਧਮ੍ਮਂ. ‘‘ਭਜਨ੍ਤੀ’’ਤਿ ਉਪੇਨ੍ਤਿ. ਕੇ ਭਜਨ੍ਤੀਤਿ ਆਹ ‘‘ਅਪਰਾਪਰਂ ਉਪ੍ਪਜ੍ਜਮਾਨਾ ਧਮ੍ਮਾ’’ਤਿ. ‘‘ਧਮ੍ਮਾ’’ਤਿ ਚ ਅਨਨ੍ਤਰੁਪ੍ਪਨ੍ਨਾ ਚਿਤ੍ਤਚੇਤਸਿਕਾ ਧਮ੍ਮਾ. ਕਥਞ੍ਚ ਤਂ ਤੇਭਜਨ੍ਤੀਤਿ ਆਹ ‘‘ਸੁਟ੍ਠੁਸੇਵਮਾਨਾ ਵਿਯ ਭਜਮਾਨਾ ਵਿਯ ਪਵਤ੍ਤਨ੍ਤੀ’’ਤਿ. ਵਿਯ ਸਦ੍ਦੇਨ ਲੋਕੇ ਕਿਞ੍ਚਿਜਨਂ ਕੇਚਿਜਨਾ ਕੇਨਚਿ ਅਤ੍ਥੇਨ ਸੁਟ੍ਠੁਸੇਵਨ੍ਤਾ ਵਿਯਾਤਿ ਦਸ੍ਸੇਤਿ. ਕਥਂ ਸੁਟ੍ਠੁਸੇਵਿਯਮਾਨਾ ਵਿਯ ਹੋਨ੍ਤੀਤਿ ਆਹ ‘‘ਤਸ੍ਸ ਪੁਰਿਮਸ੍ਸਾ’’ਤਿਆਦਿਂ. ਪੁਰਿਮਸ੍ਸ ਅਨਨ੍ਤਰਸ੍ਸ ਚਿਤ੍ਤੁਪ੍ਪਾਦਸ੍ਸਾਤਿ ਅਤ੍ਥੋ. ‘‘ਸਬ੍ਬਪਰਿਪੂਰਂ ਆਕਾਰਂ’’ਤਿ ਜਵਵੇਗਸਹਿਤੇਹਿ ਵਿਜਾਨਨ ਫੁਸਨਾਦੀਹਿ ਸਾਵਜ੍ਜਾਨ ਵਜ੍ਜਾਦੀਹਿ ਚ ਸਬ੍ਬੇਹਿ ਜਵਨਗੁਣੇਹਿ ਪਰਿਪੂਰਂ ਆਕਾਰਂ. ‘‘ਆਸੇਵੇਤੀ’’ਤਿ ਮਂ ਸੁਟ੍ਠੁ ਸੇਵਥਾਤਿ ਨਿਯੋਜੇਨ੍ਤਂ ਵਿਯ ਹੋਤਿ. ਤੇਨਾਹ ‘‘ਅਤ੍ਤਨੋ ਵਾਸਂ’’ਤਿਆਦਿਂ. ਤਤ੍ਥ ‘‘ਵਾਸਂ’’ਤਿ ਵਾਸਨਂ. ‘‘ਸੁਟ੍ਠੁ ਗਾਹਾਪੇਤੀ’’ਤਿ ਪਰਿਪੁਣ੍ਣਂ ਦੇਤੀਤਿ ਵੁਤ੍ਤਂ ਹੋਤਿ. ਏਤੇਨ ਯਥਾ ਲੋਕੇ ਏਕੋ ਪਰੇਸਂ ਯਥਿਚ੍ਛਿਤਂ ਦੇਤਿ. ਏਵਂ ਦੇਨ੍ਤਂ ਪਨ ਪਰੇ ਭਜਨ੍ਤਿਯੇਵ. ਮਂ ਭਜਥਾਤਿ ਨਿਯੋਜਨਕਿਚ੍ਚਂ ਨਤ੍ਥਿ. ਏਵਮੇਵ ਇਧਪਿ ਸੁਟ੍ਠੁਵਾਸਦਾਨਮੇਵ ਭਜਾਪਨਂ ਨਾਮਾਤਿ ਦਸ੍ਸੇਤਿ. ‘‘ਵਡ੍ਢੇਤਿ ਵਾ’’ਤਿ ਏਤੇਨ ਆਸੇਵਨਾ ਭਾਵਨਾ ਵਡ੍ਢਨਾਤਿ ਇਮਂਪਰਿਯਾਯਤ੍ਥਂ ਵਦਤਿ. ਪੁਰਿਮਾਭਿਯੋਗੋ ਨਾਮ ਆਦਿਤੋ ਪਟ੍ਠਾਯ ਸਜ੍ਝਾਯਨਾਦਿਕਮ੍ਮੇਸੁ ਯਥਾਸਤ੍ਤਿ ਯਥਾਬਲਂ ਵਾ ਯਾਮਕਰਣਂ. ਤਥਾ ਕਰੋਨ੍ਤਸ੍ਸ ਤਂ ਉਗ੍ਗਹਣ ਕਮ੍ਮਂ ਉਪਰੂਪਰਿ ਪਗੁਣਭਾਵਂ ਗਚ੍ਛਤੀਤਿ. ‘‘ਆਸੇਵਨਟ੍ਠੇਨਾ’’ਤਿ ਵਡ੍ਢਾਪਨਟ੍ਠੇਨ, ਉਪਕਾਰਕੋਤਿ ਸਮ੍ਬਨ੍ਧੋ. ‘‘ਸਜਾਤਿਯਾਨਂ’’ਤਿ ਕੁਸਲਾਦਿਭਾਵੇਨ ਸਮਾਨਜਾਤਿਕਾਨਂ.

ਕਾਯਙ੍ਗਾਭਿਸਙ੍ਖਰਣਂ ਨਾਮ ਕਾਯਸਞ੍ਚੇਤਨਾਕਿਚ੍ਚਂ. ਵਾਚਙ੍ਗਾਭਿਸਙ੍ਖਰਣਂ ਵਚੀਸਞ੍ਚੇਤਨਾਕਿਚ੍ਚਂ. ਚਿਤ੍ਤਙ੍ਗਾਭਿਸਙ੍ਖਰਣਂ ਮਨੋਸਞ੍ਚੇਤਨਾਕਿਚ੍ਚਂ. ‘‘ਕਿਰਿਯਾਭਾਵੇਨਾ’’ਤਿ ਦਸ੍ਸਨਸਵਨਾਦਿਕਿਚ੍ਚੇਸੁ ਗਮਨਠਾਨ ਨਿਸਜ੍ਜਾਦਿਕਿਚ੍ਚੇਸੁ ਸਂਵਿਧਾਨਕਿਰਿਯਾਭਾਵੇਨ. ‘‘ਵਤ੍ਥੁਮ੍ਹੀ’’ਤਿ ਗਬ੍ਭਵਤ੍ਥੁਮ੍ਹਿ. ਯਥਾਵੁਤ੍ਤਾਭਿਸਙ੍ਖਰਣਕਿਚ੍ਚਂ ਨਾਮ ਕਾਯਙ੍ਗਵਾਚਙ੍ਗ ਚਿਤ੍ਤਙ੍ਗਾਭਿਸਙ੍ਖਰਣ ਕਿਚ੍ਚਂ. ‘‘ਤਦਭਿਸਙ੍ਖਰਣਵੇਗਜਨਿਤਂ’’ਤਿ ਤਸ੍ਸ ਕਾਯਙ੍ਗਾਦਿਕਸ੍ਸ ਅਭਿਸਙ੍ਖਰਣਵੇਗੇਨ ਜਨਿਤਂ ਕਿਰਿਯਾਵਿਸੇਸ ਨਿਧਾਨਕਿਚ੍ਚਨ੍ਤਿ ਸਮ੍ਬਨ੍ਧੋ. ‘‘ਸਨ੍ਤਾਨੇ’’ਤਿ ਚਿਤ੍ਤਸਨ੍ਤਾਨੇ.

ਵਿਪਚ੍ਚਨਭਾਵੋ ਚ ਨਾਮ ਪਾਤੁਭਾਵੋਤਿ ਸਮ੍ਬਨ੍ਧੋ. ਨਿਰੁਸ੍ਸਾਹ ਸਨ੍ਤਭਾਵੋ ਨਾਮ ਕੁਸਲਾ ਕੁਸਲਾਨਂ ਵਿਯ ਕਾਯਙ੍ਗਵਾਚਙ੍ਗਾਭਿਸਙ੍ਖਰਣ ਕਿਚ੍ਚੇਸੁ ਚ ਆਯਤਿਂ ਵਿਪਚ੍ਚਨ ਕਿਚ੍ਚੇਸੁ ਚ ਨਿਰੁਸ੍ਸਾਹਭਾਵੇਨ ਸਨ੍ਤਭਾਵੋ. ਨ ਕਿਲੇਸੁ ਪਸਨ੍ਤਭਾਵੇਨ. ਚਿਤ੍ਤਾਭਿਸਙ੍ਖਰਣ ਕਿਚ੍ਚੇਸੁਪਨ ਸਮ੍ਪਯੁਤ੍ਤਚੇਤਨਾਵਸੇਨ ਯਥੋਪਟ੍ਠਿਤੇਸੁ ਆਰਮ੍ਮਣੇਸੁ ਸਮ੍ਪਯੁਤ੍ਤਧਮ੍ਮਾਨਂ ਏਕਤੋ ਸਨ੍ਨਿਪਾਤਗਮਨੁਸ੍ਸਾਹਮਤ੍ਤਂ ਅਤ੍ਥਿ. ਤਤੋਪਰਂ ਪਨ ਸੁਪਿਨ ਦਸ੍ਸਨ ਕਿਚ੍ਚਂਪਿ ਨਤ੍ਥੀਤਿ. ‘‘ਮਨ੍ਦਮਨ੍ਦਾਕਾਰੇਨਾ’’ਤਿ ਮਨ੍ਦਤੋ ਅਤਿਮਨ੍ਦਾਕਾਰੇਨ. ਕਿਞ੍ਚਿਜਾਨਨ ਚਿਤ੍ਤਂ ਨਾਮ ਕਮ੍ਮਾਦਿ ਆਰਮ੍ਮਣਂ ਅਪ੍ਪਮਤ੍ਤਕਂਪਿ ਜਾਨਨਂ ਵੀਥਿਚਿਤ੍ਤਂ. ਤਸ੍ਸ ਪਵਤ੍ਤਿਯਾ.

‘‘ਅਰੂਪਿਨੋ’’ਤਿ ਅਰੂਪਲਕ੍ਖਣ ਸਮਙ੍ਗਿਨੋ. ਨਾਮਲਕ੍ਖਣ ਸਮਙ੍ਗੀਨੋਤਿ ਵੁਤ੍ਤਂ ਹੋਤਿ. ‘‘ਜਨਯਨ੍ਤਾਪੀ’’ਤਿ ਸਹਜਾਤ ਧਮ੍ਮੇ ਜਨੇਨ੍ਤਾਪਿ. ‘‘ਸਨ੍ਤਾਨਟ੍ਠਿਤਿਯਾ’’ਤਿ ਪਬਨ੍ਧਪ੍ਪਤਿਟ੍ਠਾਨਸ੍ਸ.

‘‘ਕਸ੍ਮਾਪਨੇਤ੍ਥਾ’’ਤਿਆਦੀਸੁ. ‘‘ਭਾਵਿਨ੍ਦ੍ਰਿਯ ਦ੍ਵਯਂ’’ਤਿ ਇਤ੍ਥਿਨ੍ਦ੍ਰਿਯ ਪੁਰਿਸਿਨ੍ਦ੍ਰਿਯ ਦ੍ਵਯਂ. ‘‘ਇਧਾ’’ਤਿ ਇਮਸ੍ਮਿਂ ਇਨ੍ਦ੍ਰਿਯਪਚ੍ਚਯੇ. ਕਸ੍ਮਾ ਨ ਗਹਿਤਂ. ਨਨੁ ਇਤ੍ਥਿਲਿਙ੍ਗਾਦੀਨਂ ਪਵਤ੍ਤਿਕਾਰਣਤ੍ਤਾ ਇਧ ਗਹੇਤਬ੍ਬਮੇਵਾਤਿ ਅਧਿਪ੍ਪਾਯੋ. ਜਨਕਤ੍ਤਂ ਨਾਮ ਜਨਕ ਕਿਚ੍ਚਂ. ਏਵਂ ਸੇਸੇਸੁਪਿ. ‘‘ਏਤਂਤਯਂਪਿ ਨਤ੍ਥੀ’’ਤਿ ਜਨਕਤ੍ਤਾਦਿਕਿਚ੍ਚਤ੍ਤਯਂਪਿ ਨਤ੍ਥਿ. ਏਵਂਸਨ੍ਤੇਕਥਂ ਲਿਙ੍ਗਾਦੀਨਂ ਪਵਤ੍ਤਿਕਾਰਣਂ ਹੋਤੀਤਿਆਹ ‘‘ਕੇਵਲਂ ਪਨਾ’’ਤਿਆਦਿਂ. ‘‘ਦ੍ਵਯਂ’’ਤਿ ਇਤ੍ਥਿਭਾਵਪੁਮ੍ਭਾਵ ਦ੍ਵਯਂ. ਨ ਇਨ੍ਦ੍ਰਿਯ ਪਚ੍ਚਯਤ੍ਤੇਨ ਇਨ੍ਦ੍ਰਿਯਂ ਨਾਮ ਹੋਤਿ. ਯਥਾਹਿ ਏਕੋ ਰਾਜਾ ਅਤ੍ਤਨੋ ਵਿਜਿਤੇ ਗੇਹਾਨਿ ਕਰੋਨ੍ਤਿ. ਏਵਂ ਕਰੋਨ੍ਤੂਤਿ ਗੇਹਸਣ੍ਠਾਨਂ ਪਟ੍ਠਪੇਤਿ. ਸਬ੍ਬੇਜਨਾ ਤਥੇਵ ਕਰੋਨ੍ਤਿ, ਨੋ ਅਞ੍ਞਥਾ. ਤਤ੍ਥ ਰਾਜਾ ਗੇਹੁਪ੍ਪਤ੍ਤਿਯਾ ਚ ਗੇਹਟ੍ਠਿਤਿਯਾ ਚ ਕਿਞ੍ਚਿ ਕਿਚ੍ਚਂ ਨ ਕਰੋਤਿ. ਗੇਹਸਾਮਿਕਾਵਾ ਗੇਹਵਡ੍ਢਕਿਨੋ ਵਾ ਕਰੋਨ੍ਤਿ. ਕਰੋਨ੍ਤਾ ਪਨ ਰਞ੍ਞਾ ਪਟ੍ਠਪਿਤਂ ਸਣ੍ਠਾਨਂ ਅਨਤਿਕ੍ਕਮਿਤ੍ਵਾਵ ਕਰੋਨ੍ਤਿ. ਏਵਮੇਵ ਮਿਦਂ ਦਟ੍ਠਬ੍ਬਂ. ਉਪਗਨ੍ਤ੍ਵਾ ਝਾਯਨਟ੍ਠੇਨਾਤਿ ਸਮ੍ਬਨ੍ਧੋ. ਉਪਸਦ੍ਦੋ ਉਪਨਿਸ੍ਸਯ ਪਦੇਵਿਯ ਉਪਰਿ ਅਤ੍ਥੋ. ‘‘ਉਪਰੀ’’ਤਿ ਚ ਥਾਮਬਲਵੁਦ੍ਧਿਵਸੇਨਾਤਿ ਆਹ ‘‘ਤਸ੍ਮਿਂ ਵਾ’’ਤਿਆਦਿਂ. ‘‘ਤਸ੍ਮਿਂ’’ਤਿ ਆਰਮ੍ਮਣੇ.

‘‘ਸੁਗਤਿ ਦੁਗ੍ਗਤਿ ਨਿਬ੍ਬਾਨ ਸਮ੍ਪਾਪਕਟ੍ਠੇਨਾ’’ਤਿ ਵੁਤ੍ਤਂ. ਸੋ ਅਤ੍ਥੋ ਅਬ੍ਯਾਕਤਮਗ੍ਗਙ੍ਗੇਸੁ ਨਤ੍ਥਿ. ਏਵਞ੍ਚਸਤਿ ਤਾਨਿ ਕਥਂ ਮਗ੍ਗਪਚ੍ਚਯਤ੍ਤਂ ਗਚ੍ਛਨ੍ਤੀਤਿ ਆਹ ‘‘ਏਤ੍ਥ ਚਾ’’ਤਿਆਦਿਂ. ‘‘ਸਮ੍ਮਾਦਸ੍ਸਨਾਦਿਨਾ’’ਤਿ ਸਮ੍ਮਾਦਸ੍ਸਨ ਸਙ੍ਕਪ੍ਪਨਾਦਿਨਾ. ‘‘ਤੇਸਂ’’ਤਿ ਸਮ੍ਮਾਦਿਟ੍ਠੀਨਂ. ‘‘ਤੇਸਂ ਪੀ’’ਤਿ ਅਬ੍ਯਾਕਤ ਭੂਤਾਨਂ ਸਮ੍ਮਾਦਿਟ੍ਠੀਨਮ੍ਪਿ. ‘‘ਤੇਨੇਵਟ੍ਠੇਨਾ’’ਤਿ ਸਮ੍ਮਾਦਸ੍ਸਨਾਦਿਨਾ ਲਕ੍ਖਣਟ੍ਠੇਨ. ਅਥਵਾ. ‘‘ਤੇਨੇਵਟ੍ਠੇਨਾ’’ਤਿ ਸੁਗਤਿ ਨਿਬ੍ਬਾਨ ਸਮ੍ਪਾਪਕਟ੍ਠੇਨੇ ਵਾਤਿ ਅਤ੍ਥੋ. ਏਵਞ੍ਚਸਤਿ ਸਹੇਤੁਕਾ ਵਿਪਾਕ ਕ੍ਰਿਯਾ ਬ੍ਯਾਕਤਧਮ੍ਮਾਪਿ ਤੇਨੇਵਟ੍ਠੇਨ ਸਬ੍ਬਸੋ ਕੁਸਲਸਦਿਸਾ ਸਿਯੁਨ੍ਤਿ. ਨ ਸਿਯੁਂ, ਪਚ੍ਚਯ ਵੇਕਲ੍ਲਤ੍ਤਾ. ਵਿਪਾਕਾਬ੍ਯਾਕਤਾਹਿ ਕਮ੍ਮਵੇਗੇਨ ਸਨ੍ਤਾਨੇ ਪਤਿਤਮਤ੍ਤਤ੍ਤਾ ਨਿਰੁਸ੍ਸਾਹਸਨ੍ਤਸਭਾਵਤੋ ਤਂ ਸਮ੍ਪਯੁਤ੍ਤਾ ਚੇਤਨਾ ਨਾਨਕ੍ਖਣਿਕ ਕਮ੍ਮਪਚ੍ਚਯਤ੍ਤਂ ਨ ਗਚ੍ਛਤਿ. ਕਿਰਿਯਾਬ੍ਯਾਕਤਾ ਚ ਨਿਰਨੁਸਯਸਨ੍ਤਾਨੇ ਉਪ੍ਪਨ੍ਨਤ੍ਤਾ ਤਂ ਸਮ੍ਪਯੁਤ੍ਤਚੇਤਨਾਪਿ ਤਪ੍ਪਚ੍ਚਯਤ੍ਤਂ ਨ ਗਚ੍ਛਤਿਯੇਵ. ਤਸ੍ਮਾ ਤੇਸੁ ਵਿਪਾਕ ਕ੍ਰਿਯਾਬ੍ਯਾਕਤੇਸੁ ਸਮ੍ਮਾਦਿਟ੍ਠਾਦੀਨਿਪਿ ਸੁਗਤਿ ਸਮ੍ਪਾਪਕਟ੍ਠਂ ਨ ਸਾਧੇਨ੍ਤਿ. ਕਿਲੇਸਪ੍ਪਹਾਨ ਕਿਚ੍ਚਸ੍ਸ ਅਭਾਵਤੋ ਨਿਬ੍ਬਾਨ ਸਮ੍ਪਾਪਕਟ੍ਠਮ੍ਪਿ ਨਸਾਧੇਨ੍ਤਿ. ਸਭਾਵ ਲਕ੍ਖਣਵੇਕਲ੍ਲਤਾਪਨ ਤੇਸਂ ਸਮ੍ਮਾਦਿਟ੍ਠਾਦੀਨਂ ਨਤ੍ਥਿਯੇਵ. ਤਸ੍ਮਾ ਤਾਨਿ ਮਗ੍ਗਪਚ੍ਚਯੇ ਸਙ੍ਗਹਿਤਾਨੀਤਿ. ਇਨ੍ਦ੍ਰਿਯ ਧਮ੍ਮੇਸੁ ਅਰੂਪਿਨ੍ਦ੍ਰਿਯਾਨਂ ਆਧਿਪ੍ਪਚ੍ਚ ਕਿਚ੍ਚਂ ਅਰੂਪਧਮ੍ਮੇ ਸ੍ਵੇਵ ਫਰਤਿ. ਰੂਪਧਮ੍ਮਾ ਪਨ ਤਂ ਸਮੁਟ੍ਠਿਤਤ੍ਤਾ ਏਵ ਤਪ੍ਪਚ੍ਚਯੁਪ੍ਪਨ੍ਨੇਸੁ ਵੁਤ੍ਤਾ. ਤਥਾ ਹੇਤੁ ਕਮ੍ਮ ਮਗ੍ਗ ਝਾਨੇਸੁ. ਤੇਨ ਵੁਤ੍ਤਂ ‘‘ਏਸਨਯੋ ਕਮ੍ਮਿਨ੍ਦ੍ਰਿਯਝਾਨਪਚ੍ਚਯੇਸੁਪੀ’’ਤਿ. ਤਤ੍ਥ ਕਮ੍ਮਸਦ੍ਦੇਨ ਨਾਨਕ੍ਖਣਿਕ ਪਚ੍ਚਯੋ ਗਹੇਤਬ੍ਬੋ.

‘‘ਸਮ੍ਪਯੁਤ੍ਤਾਸਙ੍ਕਾ ਸਮ੍ਭਵਤੀ’’ਤਿ ਸਹਜਾਤਾ ਨਾਮਧਮ੍ਮਾ ਤਂ ਸਮੁਟ੍ਠਾਨ ਰੂਪੇਹਿ, ਪਚ੍ਛਾਜਾਤਾ ਚ ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਰੂਪੇਹਿ, ਵਤ੍ਥੁ ਧਮ੍ਮਾ ਚ ਤਨ੍ਨਿਸ੍ਸਿਤਨਾਮਧਮ੍ਮੇਹਿ ਕਾਲਤੋ ਚ ਠਾਨਤੋ ਚ ਏਕ ਸਮ੍ਬਨ੍ਧਤ੍ਤਾ ਤੇਸੁ ਸਮ੍ਪਯੁਤ੍ਤਾਸਙ੍ਕਾ ਸਮ੍ਭਵਤਿ. ‘‘ਵਿਪ੍ਪਯੁਤ੍ਤਪਚ੍ਚਯਪ੍ਪਸਙ੍ਗੋ ਨਤ੍ਥੀ’’ਤਿ ਆਰਮ੍ਮਣਾਨਨ੍ਤਰਾਦਿਪਚ੍ਚਯਾਪਿ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਸਮ੍ਪਯੁਤ੍ਤਾ ਨ ਹੋਨ੍ਤਿ. ਤਸ੍ਮਾ ਤੇਪਿ ਵਿਪ੍ਪਯੁਤ੍ਤਪਚ੍ਚਯ ਭਾਵੇਨ ਵਤ੍ਤਬ੍ਬਾਤਿ ਏਵਰੂਪੋ ਵਿਪ੍ਪਯੁਤ੍ਤਪਚ੍ਚਯਪ੍ਪਸਙ੍ਗੋ ਤੇਸੁ ਆਰਮ੍ਮਣ ਪਚ੍ਚਯਾਦੀਸੁ ਨਤ੍ਥੀਤਿ ਅਧਿਪ੍ਪਾਯੋ.

‘‘ਹੇਟ੍ਠਾਵੁਤ੍ਤਪ੍ਪਕਾਰੇਸੁ ਏਵਾ’’ਤਿ ਏਤ੍ਥ ਏਵਸਦ੍ਦੇਨ ਪਚ੍ਚਯਨ੍ਤਰਂ ਨ ਹੋਤੀਤਿ ਦਸ੍ਸੇਤਿ. ਯਦਿ ਪਚ੍ਚਯਨ੍ਤਰਂ ਨ ਹੋਤਿ, ਨ ਵਤ੍ਤਬ੍ਬੋਯੇਵ. ਕਸ੍ਮਾ, ਦੇਸਕਸ੍ਸ ਪੁਨਰੁਤ੍ਤਿਨਿਰਤ੍ਥਕਵਾਦਿਤਾ ਪਤ੍ਤਿਤੋਤਿ. ਨੋ ਨ ਵਤ੍ਤਬ੍ਬੋ. ਕਸ੍ਮਾ, ਲੋਕੇ ਯੋ ਸਯਂ ਨਤ੍ਥਿ, ਵਿਗਤੋ ਹੋਤਿ. ਸੋ ਕਸ੍ਸ ਪਚ੍ਚਯੋ ਭਵਿਤੁਂ ਅਰਹਤੀਤਿ ਏਵਰੂਪਸ੍ਸ ਮਿਚ੍ਛਾਭਿਨਿਵੇਸਸ੍ਸ ਪਹਾਨਤੋ. ਤੇਨ ਇਮਮਤ੍ਥਂ ਞਾਪੇਤਿ, ਲੋਕੇ ਕੇਚਿਧਮ੍ਮਾ ਸਯਂ ਅਤ੍ਥਿਕਾਲੇ ਏਵ ਅਞ੍ਞੇਸਂ ਪਚ੍ਚਯਾ ਹੋਨ੍ਤਿ, ਨੋ ਨਤ੍ਥਿਕਾਲੇ. ਕੇਚਿ ਧਮ੍ਮਾ ਸਯਂ ਨਤ੍ਥਿਕਾਲੇ ਏਵ ਅਞ੍ਞੇਸਂ ਪਚ੍ਚਯਾ ਹੋਨ੍ਤਿ, ਨੋ ਅਤ੍ਥਿਕਾਲੇਤਿ ਅਯਞ੍ਚਵਿਭਾਗੋ ਅਵਸ੍ਸਂ ਇਚ੍ਛਿਤਬ੍ਬੋ ਯੇਵਾਤਿ. ‘‘ਓਕਾਸਦਾਨਸਙ੍ਖਾਤੇਨਾ’’ਤਿ ਤਸ੍ਸ ਅਞ੍ਞਸ੍ਸ ਚਿਤ੍ਤੁਪ੍ਪਾਦਸ੍ਸ ਉਪ੍ਪਤ੍ਤਿਯਾ ਓਕਾਸਦਾਨਸਙ੍ਖਾਤੇਨ.

ਸੁਤ੍ਤਨ੍ਤੇ, ਅਤ੍ਥੀਤਿ ਅਯ ਮੇਕੋ ਅਨ੍ਤੋਤਿ ਸਤ੍ਤਾਨਂ ਸੇਟ੍ਠਸਾਰਭੂਤੋ ਅਤ੍ਤਾਨਾਮ ਅਨਮਤਗ੍ਗੇ ਸਂਸਾਰੇ ਨਿਚ੍ਚਕਾਲਂ ਅਤ੍ਥਿ. ਉਚ੍ਛੇਦੋ ਵਾ ਵਿਮੋਕ੍ਖੋ ਵਾ ਸਬ੍ਬਸੋ ਨਤ੍ਥਿ. ਅਯਂ ਸਸ੍ਸਤਵਾਦੋ ਨਾਮ ਏਕੋਵਿਸਮਨ੍ਤੋ ਏਕਾਵਿਸਮਾਕੋਟਿ. ਨਤ੍ਥੀਤਿ ਸਤ੍ਤੋਨਾਮ ਏਕਭਵਪਰਮੋ ਹੋਤਿ, ਮਰਣਤੋ ਪਰਂ ਨਤ੍ਥਿ. ਏਕਨ੍ਤੇਨ ਉਚ੍ਛਿਜ੍ਜਤਿ. ਅਯਂ ਉਚ੍ਛੇਦਵਾਦੋ ਨਾਮ ਦੁਤੀਯੋ ਵਿਸਮਨ੍ਤੋ ਦੁਤੀਯਾਵਿਸਮਕੋਟਿ. ਇਮੇ ਪਟਿਚ੍ਚ ਸਮੁਪ੍ਪਾਦਂ ਅਜਾਨਨ੍ਤਾਨਂ ਉਭੋਵਿਸਮਨ੍ਤਾ ਨਾਮ. ਜਾਨਨ੍ਤਾਨਂ ਪਨ ਤਾਦਿਸੋ ਅਤ੍ਤਾਨਾਮ ਨਤ੍ਥਿ, ਯੋ ਅਤ੍ਥੀਤਿ ਵਾ ਨਤ੍ਥੀਤਿ ਵਾ ਵਤ੍ਤਬ੍ਬੋ ਭਵੇਯ੍ਯ. ਸੁਦ੍ਧਧਮ੍ਮਪ੍ਪਬਨ੍ਧੋ ਏਵ ਅਤ੍ਥਿ. ਤਸ੍ਸ ਚ ਯਾਵ ਅਵਿਜ੍ਜਾ ਅਪ੍ਪਹੀਨਾ ਹੋਤਿ, ਤਾਵ ਉਚ੍ਛੇਦੋ ਨਾਮ ਨਤ੍ਥਿ. ਅਵਿਜ੍ਜਾਯ ਪਨ ਪਹੀਨਾਯ ਤਤੋਪਰਂ ਨ ਪਵਤ੍ਤਤਿ. ਅਤ੍ਥਿ ਨਾਮ ਨ ਹੋਤਿ. ਅਯਂ ਅਨ੍ਤਦ੍ਵਯਮੁਤ੍ਤੋ ਮਜ੍ਝਿਮਞਾਯੋ ਨਾਮ. ਬਹੁਂ ਨਾਨਤ੍ਥ ਸਮ੍ਭਵਂ ਵਣ੍ਣੇਨ੍ਤਿਯੇਵ. ਵਣ੍ਣੇਨ੍ਤਾਨਂਪਿ ਤੇਸਂ ਬਹੁ ਪਯੋਜਨਂ ਨਤ੍ਥਿ ਯੇਵਾਤਿ ਅਧਿਪ੍ਪਾਯੋ.

ਪਚ੍ਚਯੁਦ੍ਦੇਸਾਨੁਦੀਪਨਾ ਨਿਟ੍ਠਿਤਾ.

੧੬੮. ਪਚ੍ਚਯਨਿਦ੍ਦੇਸੇ. ‘‘ਪਞ੍ਚਧਾ’’ਤਿ ਪਞ੍ਚਵਿਧੇਹਿ ਪਚ੍ਚਯੇਹਿ. ‘‘ਏਕਧਾ’’ਤਿ ਏਕਵਿਧੇਨ ਪਚ੍ਚਯੇਨ. ਏਵਂ ਸੇਸੇਸੁਪਿ. ‘‘ਅਵਿਚ੍ਛੇਦਾਯਾ’’ਤਿ ਅਵਿਚ੍ਛੇਦਤ੍ਥਾਯ. ‘‘ਪਟਿਪਾਦਨਾਯਾ’’ਤਿ ਯੋਜਨਤ੍ਥਾਯ. ਯੋ ਕੋਚਿ ਚਿਤ੍ਤੁਪ੍ਪਾਦੋ ਅਵਿਰੁਦ੍ਧਸ੍ਸ ਯਸ੍ਸ ਕਸ੍ਸਚਿ ਚਿਤ੍ਤੁਪ੍ਪਾਦਸ੍ਸ ਪਚ੍ਚਯੋ ਨ ਨ ਹੋਤੀਤਿ ਯੋਜਨਾ. ‘‘ਪੁਨੁਪ੍ਪਨ੍ਨਾਨਂ’’ਤਿ ਨਿਰੁਜ੍ਝਿਤ੍ਵਾ ਪੁਨ ਉਪ੍ਪਨ੍ਨਾਨਂ. ‘‘ਪੁਰਿਮਾਨਿ ਜਵਨਾਨੀ’’ਤਿ ਏਤ੍ਥ ਮਗ੍ਗੋ ਗੋਤ੍ਰਭੁਤੋ ਆਸੇਵਨ ਪਚ੍ਚਯਂ ਲਭਤਿ. ਫਲਸ੍ਸ ਪਨ ਸੋ ਭਿਨ੍ਨਜਾਤਿਕਤ੍ਤਾ ਆਸੇਵਨ ਪਚ੍ਚਯੋ ਨ ਹੋਤਿ. ਫਲਂ ਪਨ ਸਬ੍ਬਸੋ ਆਸੇਵਨ ਮੁਤ੍ਤਂ ਹੋਤਿ. ਤਸ੍ਮਾ ਤਦੁਭਯਂ ਇਧ ਪੁਰਿਮਜਵਨਸਙ੍ਖ੍ਯਂ ਨ ਗਚ੍ਛਤੀਤਿ ਵੁਤ੍ਤਂ ‘‘ਮਗ੍ਗ ਫਲਜਵਨਵਜ੍ਜਾਨੀ’’ਤਿ. ਫਲਜਵਨਵਜ੍ਜਾਨਂ ਪਚ੍ਛਿਮਾਨਂ ਜਵਨਾਨਂ. ‘‘ਸਬ੍ਬਾਕਾਰਪਾਰਿਪੂਰਂ’’ਤਿ ਏਤ੍ਥ ਕੁਸਲਾਦਿਜਾਤਿਪਿ ਸਙ੍ਗਹਿਤਾਤਿ ਵੁਤ੍ਤਂ ‘‘ਜਾਤਿਮਤ੍ਤੇਨਪੀ’’ਤਿ. ਅਭਿਨ੍ਨਾ ਏਵ ਸਿਯੁਂ. ਨ ਪਨ ਭਿਨ੍ਨਾ ਹੋਨ੍ਤਿ. ਕਦਾਚਿ ਕੇਚਿਭਿਨ੍ਨਾ ਏਵ ਹੋਨ੍ਤਿ. ਤਸ੍ਮਾ ਭਿਨ੍ਨਜਾਤਿਕਾ ਧਮ੍ਮਾ. ਲ. ਨ ਸਕ੍ਕੋਨ੍ਤੀਤਿ ਯੋਜਨਾ. ‘‘ਕਾਮਾਵਚਰਭਾਵਤੋ ਮਹਗ੍ਗਤਾਨੁਤ੍ਤਰਭਾਵਪਤ੍ਤਿ ਨਾਮਾ’’ਤਿ ਚਿਤ੍ਤਸਨ੍ਤਾਨਸ੍ਸਾਤਿ ਅਧਿਪ੍ਪਾਯੋ. ਗੋਤ੍ਰ ਭੁਚਿਤ੍ਤਂ ਕਾਮਭੂਮਿ. ਝਾਨਚਿਤ੍ਤਂ ਮਹਗ੍ਗਤਭੂਮਿ. ਮਗ੍ਗਚਿਤ੍ਤਂ ਲੋਕੁਤ੍ਤਰ ਭੂਮਿ. ਕਮ੍ਮਚੇਤਨਾਯ ਨਿਰੁਦ੍ਧਾਯਪਿ ਤਸ੍ਸਾ ਪਵਤ੍ਤਾਕਾਰੋ ਨਨਿਰੁਜ੍ਝਤਿ. ਚਿਤ੍ਤਸਨ੍ਤਾਨਂ ਅਨੁਗਚ੍ਛਤਿ. ਸੋ ਏਵ ਆਯਤਿਂ ਵਿਪਾਕਧਮ੍ਮਰਾਸਿ ਹੁਤ੍ਵਾ ਪਾਤੁਬ੍ਭਵਤਿ. ਤਸ੍ਮਾ ਸੋ ਵਿਪਾਕਸ੍ਸ ਬੀਜਸਙ੍ਖ੍ਯਂ ਗਚ੍ਛਤਿ. ਸੋ ਚ ਯਾਵ ਨ ਵਿਪਚ੍ਚਤਿ. ਤਾਵ ਸਂਸਾਰਪ੍ਪਵਤ੍ਤਿਯਾ ਸਤਿ, ਅਨ੍ਤਰਾ ਵਿਨਟ੍ਠੋ ਨਾਮ ਨ ਹੋਤਿ. ਤਸ੍ਮਾ ਕਮ੍ਮਚੇਤਨਾ ਉਪ੍ਪਜ੍ਜਮਾਨਾ ਚਿਤ੍ਤਸਨ੍ਤਾਨੇ ਤਸ੍ਸ ਬੀਜਸ੍ਸ ਨਿਧਾਨਤ੍ਥਾਯ ਉਪ੍ਪਜ੍ਜਤਿ, ਨਿਰੁਜ੍ਝਮਾਨਾ ਚ ਨਿਦਹਿਤ੍ਵਾ ਏਵ ਨਿਰੁਜ੍ਝਤੀਤਿ ਵੁਤ੍ਤਂ ‘‘ਅਤ੍ਤਨੋ ਪਵਤ੍ਤਾਕਾਰਸਙ੍ਖਾਤ ਬੀਜਨਿਧਾਨਞ੍ਚਾ’’ਤਿ. ‘‘ਚੇਤਨਾਯ ਹੋਤੀ’’ਤਿ ਚੇਤਨਾਯ ਸਾਧਾਰਣਂ ਹੋਤਿ. ਪੁਰੇਜਾਤਾ ਸਾਲਰੁਕ੍ਖਪੋਤਕਾ ਪਚ੍ਚਯਾ ਹੋਨ੍ਤੀਤਿ ਸਮ੍ਬਨ੍ਧੋ. ਪੁਰਿਮਚਿਤ੍ਤਕ੍ਖਣੇਸੁ ਉਪ੍ਪਨ੍ਨਾ ਚਤੁਸਮੁਟ੍ਠਾਨਿਕਰੂਪਧਮ੍ਮਾਤਿ ਸਮ੍ਬਨ੍ਧਿਤਬ੍ਬਂ. ‘‘ਆਹਾਰਜਕਾਯੋ’’ਤਿ ਏਵਂ ਵੁਤ੍ਤਾਤਿ ਪਾਠਸੇਸੋ. ‘‘ਪਚ੍ਛਾ ਜਾਤੇਨਾ’’ਤਿ ਪਚ੍ਛਾਜਾਤਪਚ੍ਚਯੇਨ ਪਯੋਜਨਂ ਨਤ੍ਥਿ. ਜਿਣ੍ਣਪਤਰੁਕ੍ਖਸ੍ਸ ਉਦਕਾਸਿਞ੍ਚਨਂ ਵਿਯ ਹੋਤੀਤਿ ਅਧਿਪ੍ਪਾਯੋ. ‘‘ਯਦਗ੍ਗੇਨਾ’’ਤਿ ਯੇਨਕਾਰਣ ਕੋਟ੍ਠਾਸੇਨ. ‘‘ਵਤ੍ਥੁ ਰੂਪਂ’’ਤਿ ਨਿਰੋਧਾਸਨ੍ਨਂ ਹਦਯਵਤ੍ਥੁ ਰੂਪਂ. ‘‘ਏਵਮਯਂ ਪੀ’’ਤਿ ਏਵਂ ਅਯਂ ਪਚ੍ਛਾਜਾਤਪਚ੍ਚਯੋਪਿ. ਵਿਵਿਧੇਨ ਆਕਾਰੇਨ ਫਰਣਂ ਕਾਲਨ੍ਤਰ ਦੇਸਨ੍ਤਰ ਗਮਨਂ ਵਿਪ੍ਫਾਰੋ. ਮਹਨ੍ਤੋ ਵਿਪ੍ਫਾਰੋ ਯਸ੍ਸਾਤਿ ਸਮਾਸੋ. ‘‘ਵਤ੍ਥੁਮ੍ਹੀ’’ਤਿ ਹਦਯਵਤ੍ਥੁਮ੍ਹਿ. ਪਞ੍ਚਹਿ ਖਨ੍ਧੇਹਿ ਵੋਕਿਣ੍ਣੋ ਸਮ੍ਮਿਸ੍ਸੋਤਿ ਪਞ੍ਚਵੋਕਾਰੋ. ਕਾਮ ਰੂਪਭਵੋ. ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਤਿ. ਰੂਪਵਿਰਾਗਭਾਵਨਾਬਲੇਨ ਰੂਪਸ੍ਸ ਅਵਿਕ੍ਖਮ੍ਭਿਤਤ੍ਤਾਤਿ ਅਧਿਪ੍ਪਾਯੋ. ‘‘ਪੁਰੇਜਾਤਂ ਵਾ’’ਤਿ ਏਕਚਿਤ੍ਤਕ੍ਖਣਾਤੀਤੇ ਪੁਰੇਜਾਤਂ ਵਾ. ‘‘ਵਡ੍ਢਨਪਕ੍ਖੇ ਠਿਤਂ ਵਾ’’ਤਿ ਤਤੋ ਪਚ੍ਛਾ ਯਾਵ ਅਟ੍ਠਮ ਚਿਤ੍ਤਕ੍ਖਣਾ ਵਡ੍ਢਨਪਕ੍ਖੇ ਠਿਤਂ ਵਾ. ‘‘ਉਪ੍ਪਨ੍ਨਂ ਵਤ੍ਥੂ’’ਤਿ ਉਪ੍ਪਨ੍ਨਂ ਵਤ੍ਥੁਰੂਪਂ. ‘‘ਏਤ੍ਥਾ’’ਤਿ ਇਮਸ੍ਮਿਂ ਪੁਰੇਜਾਤ ਪਚ੍ਚਯੇ. ਕਿਞ੍ਚਾਪਿ ਦਿਸ੍ਸਤੀਤਿ ਸਮ੍ਬਨ੍ਧੋ. ‘‘ਪਚ੍ਚਨੀਯੇ’’ਤਿ ਪਚ੍ਚਨੀਯ ਵਾਰੇ. ‘‘ਤਂ’’ਤਿ ਆਰਮ੍ਮਣਪੁਰੇਜਾਤਂ. ਤਸ੍ਸ ਆਰਮ੍ਮਣਸ੍ਸ ਅਪਰਿਬ੍ਯਤ੍ਤਤ੍ਤਾਵਾਤਿ ਸਮ੍ਬਨ੍ਧੋ. ਕਾਰਣਂ ਵਦਨ੍ਤਿ ਪਟ੍ਠਾਨਟੀਕਾਚਰਿਯਾ. ਅਰੂਪਭਵੇ ਮਰਣਾਸਨ੍ਨਕਾਲੇ ਕਸ੍ਸਚਿ ਗਤਿਨਿਮਿਤ੍ਤੁ ਪਟ੍ਠਾਨਂ ਅਟ੍ਠਕਥਾਸੁ ਵੁਤ੍ਤਮੇਵ. ਏਵਞ੍ਚਸਤਿ, ਤਤ੍ਥ ਆਰਮ੍ਮਣ ਪੁਰੇਜਾਤਂ ਲਦ੍ਧਬ੍ਬਮੇਵ. ਪਟ੍ਠਾਨੇਪਨ ਤਸ੍ਮਿਂਭਵੇ ਸਬ੍ਬਂ ਪੁਰੇਜਾਤਪਚ੍ਚਯਂ ਪਟਿਕ੍ਖਿਪਤਿ. ਕਸ੍ਮਾ ਇਤਿ ਚੇ, ਵਤ੍ਥੁ ਪੁਰੇਜਾਤਪਚ੍ਚਯਸ੍ਸ ਤਤ੍ਥ ਅਲਦ੍ਧਬ੍ਬਤ੍ਤਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਆਰੁਪ੍ਪੇਵਿਯਾ’’ਤਿ ਵੁਤ੍ਤਂ. ਏਤ੍ਥ ਚ ਪਟ੍ਠਾਨੇ ਅਰੂਪਭਵੇ ਦ੍ਵੇਪਿ ਪੁਰੇਜਾਤਪਚ੍ਚਯਾ ਪਟਿਕ੍ਖਿਤ੍ਤਾ, ਤਸ੍ਮਾ ਸਬ੍ਬੇਪਿ ਅਰੂਪ ਪੁਗ੍ਗਲਾ ਸਬ੍ਬਂਪਿ ਰੂਪਧਮ੍ਮਂ ਆਰਮ੍ਮਣਂ ਨ ਕਰੋਨ੍ਤੀਤਿਪਿ ਵਦਨ੍ਤਿ. ਏਵਞ੍ਚ ਕਤ੍ਵਾ ਆਰਮ੍ਮਣ ਸਙ੍ਗਹਦੀਪਨਿਯਂ ‘ਅਸਞ੍ਞੀਭਵਤੋ ਚੁਤਾਨਂ ਵਿਯ ਅਰੂਪਭਵਤੋ ਚੁਤਾਨਂਪਿ ਗਤਿਨਿਮਿਤ੍ਤਭੂਤਂ ਕਾਮਪਟਿਸਨ੍ਧਿਯਾ ਆਰਮ੍ਮਣਂ ਭਵਨ੍ਤਰੇ ਕੇਨਚਿਦ੍ਵਾਰੇਨ ਅਗ੍ਗਹਿਤਂ, ਕੇਵਲਂ ਕਮ੍ਮਬਲੇਨੇਵ ਉਪਟ੍ਠਾਪਿਤ’ਨ੍ਤਿ ਵੁਤ੍ਤਂ. ‘‘ਗੂਥਕੁਣਪਾਦੀਨੀ’’ਤਿ ਗੂਥਞ੍ਚ ਮਤਪੂਤਿਸਰੀਰਾਨਿ ਚ. ‘‘ਏਵਂ ਵੁਤ੍ਤੇਹੀ’’ਤਿ ਪਟ੍ਠਾਨੇ ਵੁਤ੍ਤੇਹਿ. ਤੇ ਪਨ ਅਕੁਸਲਾ ਧਮ੍ਮਾ ਕਥਂ ਚਤੁਭੂਮਿਕ ਕੁਸਲਾਨਂ ਉਪਨਿਸ੍ਸਯ ਪਚ੍ਚਯਾ ਹੋਨ੍ਤੀਤਿ ਆਹ ‘‘ਤਤ੍ਥ ਆਨਨ੍ਤਰਿਯ ਵਜ੍ਜਾਨੀ’’ਤਿਆਦਿਂ. ਤਤ੍ਥ ਆਨਨ੍ਤਰਿਯ ਕਮ੍ਮਕਤਾਨਂ ਕਿਲੇਸਾਵਰਣ ਕਮ੍ਮਾਵਰਣੇਹਿ ਸਮਨ੍ਨਾਗਤਤ੍ਤਾ ਝਾਨਮਗ੍ਗਪ੍ਪਟਿਲਾਭੋ ਨਾਮ ਨਤ੍ਥੀਤਿ ਵੁਤ੍ਤਂ ‘‘ਆਨਨ੍ਤਰਿਯ ਵਜ੍ਜਾਨੀ’’ਤਿ. ‘‘ਤਾਨੀ’’ਤਿ ਰਾਗਾਦੀਨਿ ਅਕੁਸਲਾਨਿ ਚਤੁਭੂਮਿਕ ਕੁਸਲਾਨਂ ਉਪ੍ਪਤ੍ਤਿਯਾ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ‘‘ਸਮਤਿਕ੍ਕਮਮੁਖੇਨਾ’’ਤਿ ਪਟ੍ਠਾਨੇ ਅਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਉਪਨਿਸ੍ਸਯ ਪਚ੍ਚਯੇਨ ਪਚ੍ਚਯੋਤਿ ਏਤਸ੍ਸ ਪਞ੍ਹਸ੍ਸ ਵਿਭਙ੍ਗੇ ਪਾਣਂ ਹਨ੍ਤ੍ਵਾ ਤਸ੍ਸ ਪਟਿਘਾ ਤਤ੍ਥਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਝਾਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤੀਤਿ ਵੁਤ੍ਤਂ. ਤਤ੍ਥ ‘‘ਤਸ੍ਸ ਪਟਿਘਾਤਤ੍ਥਾਯਾ’’ਤਿ ਤਸ੍ਸ ਪਾਣਾਤਿਪਾਤਕਮ੍ਮਸ੍ਸ ਪਟਿਹਨਨਤ੍ਥਾਯ ਪਹਾਨਤ੍ਥਾਯ ਸਮਤਿਕ੍ਕਮਨਤ੍ਥਾਯਾਤਿ ਵੁਤ੍ਤਂ ਹੋਤਿ. ਸੋ ਚੇ ਪਾਣਾਤਿਪਾਤੀ ਪੁਗ੍ਗਲੋ ਪੁਨ ਸਂਵੇਗਂ ਆਪਜ੍ਜਿਤ੍ਵਾ ਤਸ੍ਸ ਕਮ੍ਮਸ੍ਸ ਸਮਤਿਕ੍ਕਮਨਤ੍ਥਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥ ਕਮ੍ਮਂ ਕਰੋਤਿ. ਤਦਾ ਤਂ ਪਾਣਾਤਿ ਪਾਤਕਮ੍ਮਂ ਤਂ ਪੁਗ੍ਗਲਂ ਦਾਨਕਮ੍ਮੇਨਿਯੋਜੇਤਿ ਨਾਮ. ਤਥਾ ਸੀਲਕਮ੍ਮੇ ਉਪੋਸਥ ਕਮ੍ਮੇਤਿ. ਯਥਾਹਿ ਰਾਜਾ ਏਵਂ ਵਦੇਯ੍ਯ ਇਮਸ੍ਮਿਂ ਦਿਵਸੇ ਯੋ ਉਪੋਸਥਂ ਨੁਪਵਸਤਿ, ਤਂ ਘਾਤੇਸ੍ਸਾਮੀਤਿ. ਤਦਾ ਸਬ੍ਬੇਪਿ ਨਾਗਰਾ ਉਪੋਸਥਂ ਉਪਵਸੇਯ੍ਯੁਂ. ਏਵਮਿਦਂ ਦਟ੍ਠਬ੍ਬਂ. ਰਾਜਾਵਿਯ ਹਿ ਤਸ੍ਸ ਪਾਣਾਤਿਪਾਤਕਮ੍ਮਂ. ਨਾਗਰਾ ਵਿਯ ਸੋ ਪਾਣਘਾਤਕੋ. ਉਪੋਸਥ ਕਮ੍ਮ ਕੁਸਲਾਨਿ ਵਿਯ ਤਸ੍ਸ ਦਾਨਸੀਲ ਉਪੋਸਥ ਕਮ੍ਮ ਕੁਸਲਾਨੀਤਿ. ‘‘ਝਾਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤੀ’’ਤਿ ਪਦੇਸੁਪਿ ਏਸੇਵਨਯੋ. ਏਵਂ ਸਮਤਿਕ੍ਕਮਮੁਖੇਨ ਏਕਂਪਿ ਅਕੁਸਲਂ ਸਬ੍ਬਾਨਿ ਚਤੁਭੂਮਿਕ ਕੁਸਲਾਨਿ ਉਪਨਿਸ੍ਸਯ ਸਤ੍ਤਿਯਾ ਜਨੇਤਿ ਪਵਤ੍ਤੇਤੀਤਿ ਵੇਦਿਤਬ੍ਬਂ. ‘‘ਤਾਨਿਯੇਵ ਸਬ੍ਬਾਨੀ’’ਤਿ ਆਨਨ੍ਤਰਿਯ ਕਮ੍ਮਸਹਿਤਾਨਿਸਬ੍ਬਾਨਿ ਅਕੁਸਲਾਨਿਯੇਵ ਸਬ੍ਬੇਸਂ ਅਕੁਸਲਾਨਂ ਅਬ੍ਯਾਕਤ ਧਮ੍ਮਾਨਂ ਉਪ੍ਪਤ੍ਤਿਯਾ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ਦਾਨਸੀਲਾਦਯੋ ਕੁਸਲਾ ਧਮ੍ਮਾ. ਸੁਟ੍ਠੁ ਬਲਵਂ ਕਮ੍ਮਂ ਅਧਿਪ੍ਪੇਤਂ, ਨ ਦੁਬ੍ਬਲਂ. ਉਪਨਿਸ੍ਸਯਟ੍ਠਾਨਤ੍ਤਾ. ਤੇਸਂਪਿ ਰੂਪਧਮ੍ਮਾਨਂ ਬਲਵਨਿਸ੍ਸਯਾ ਨਨੁਹੋਨ੍ਤੀਤਿ ਸਮ੍ਬਨ੍ਧੋ. ਕਥਂ ਹੋਨ੍ਤੀਤਿ ਆਹ ‘‘ਬਹਿਦ੍ਧਾਰੁਕ੍ਖਤਿਣਾਦੀਨਂ’’ਤਿਆਦਿਂ. ਤਤ੍ਥ ਪਥਵੀਰਸ ਆਪੋਰਸਵਸ੍ਸੋਦਕ ਬੀਜਾਨਿ ਰੁਕ੍ਖਤਿਣਾਦੀਨਂ ਬਲਵਨਿਸ੍ਸਯਾ ਹੋਨ੍ਤਿ. ਮੂਲਭੇਸਜ੍ਜਾਦੀਨਿ ਅਜ੍ਝਤ੍ਤਂ ਸਨ੍ਤਾਨਂ ਬਲਵਨਿਸ੍ਸਯਾ ਹੋਨ੍ਤੀਤਿ ਯੋਜਨਾ. ‘‘ਪਕਤਸ੍ਸੇਵਾ’’ਤਿ ਪਥਮਤਰਂ ਕਤਸ੍ਸ ਉਪ੍ਪਾਦਨਾਦਿਕਮ੍ਮਸ੍ਸੇਵ. ‘‘ਨ ਏਵਂ ਰੂਪਸਨ੍ਤਾਨੇਨਾ’’ਤਿ ਏਵਂ ਰੂਪਸਨ੍ਤਾਨੇਨ ਉਪ੍ਪਾਦਿਤਾ ਉਪਸੇਵਿਤਾ ਧਮ੍ਮਾ ਨਤ੍ਥਿ. ‘‘ਤਂ’’ਤਿ ਉਤੁਬੀਜਾਦਿਕਂ. ਕਮ੍ਮਾਦਿਕਞ੍ਚ. ‘‘ਪਕਤਂ’’ਤਿ ਪੁਰੇਤਰਂ ਉਪ੍ਪਾਦਿਤਞ੍ਚ ਉਪਸੇਵਿਤਞ੍ਚ. ਸਚੇਤਨਸ੍ਸੇਵ ਚੇਤਨਂ ਪਕਪ੍ਪਨਂ ਪਕਰਣਨ੍ਤਿ ਸਮ੍ਬਨ੍ਧੋ. ਚੇਤਨਂ ਪਕਪ੍ਪਨਂ ਪਕਰਣਂ ਨਾਮਾਤਿ ਅਤ੍ਥੋ. ‘‘ਪਕਪ੍ਪਨਂ’’ਤਿ ਚ ਸਂਵਿਧਾਨਂ. ‘‘ਕਿਞ੍ਚੀ’’ਤਿ ਕਿਞ੍ਚਿਕਮ੍ਮਾਦਿਕਂ ਉਤੁਭੋਜਨਾਦਿਕਞ੍ਚ. ਅਤ੍ਤਨੋ ਚ ਉਪ੍ਪਨ੍ਨਾ ਰਾਗਾਦਯੋ ਪਰਸ੍ਸ ਚ ਸਨ੍ਤਾਨੇ ਪਰਸ੍ਸ ਚ ਉਪ੍ਪਨ੍ਨਾ ਰਾਗਾਦਯੋ ਅਤ੍ਤਨੋ ਚ ਸਨ੍ਤਾਨੇਤਿ ਯੋਜਨਾ. ‘‘ਨਿਦਸ੍ਸਨਂ’’ਤਿ ਉਦਾਹਰਣਂ ਹੋਤਿ. ਮਨੋਪਦੋਸਿਕਦੇਵਾ ਅਞ੍ਞਮਞ੍ਞਂ ਦਿਸ੍ਵਾ ਅਤ੍ਤਨੋ ਮਨਂ ਪਦੂਸੇਨ੍ਤਿ. ਬਾਲ਼੍ਹਂ ਇਸ੍ਸਾਧਮ੍ਮਂ ਉਪ੍ਪਾਦੇਨ੍ਤਿ. ਤਸ੍ਮਿਂਯੇਵ ਖਣੇ ਚਵਨ੍ਤਿ. ਤੇਸਂ ਦ੍ਵੇ ਇਸ੍ਸਾਧਮ੍ਮਾ ਅਞ੍ਞਮਞ੍ਞਸ੍ਸ ਬਲਵਨਿਸ੍ਸਯਾ ਹੋਨ੍ਤੀਤਿ. ਕਾਮਾਵਚਰ ਕੁਸਲਸ੍ਸ ਬਲਵਨਿਸ੍ਸਯਾ ਹੋਨ੍ਤੀਤਿਆਦਿਨਾ ਯੋਜੇਤਬ੍ਬਂ. ਵਿਭਾਵਨਿਪਾਠੇ. ਝਾਨ ਮਗ੍ਗ ਫਲ ਵਿਪਸ੍ਸਨਾਦਿਭੇਦਂ ਆਲਮ੍ਬਣਂ ਪਚ੍ਚਵੇਕ੍ਖਨ ਅਸ੍ਸਾਦਨਾਦਿ ਧਮ੍ਮੇ ਅਤ੍ਤਾਧੀਨੇ ਕਰੋਤੀਤਿ ਯੋਜਨਾ. ‘‘ਅਤ੍ਤਾਧੀਨੇ’’ਤਿ ਅਤ੍ਤਾਯਤ੍ਤੇ ਅਤ੍ਤਾਬਦ੍ਧੇ. ਪਟ੍ਠਾਨੇ ਪਞ੍ਹਵਾਰੇ ਦਾਨਂ ਦਤ੍ਵਾ ਸੀਲਂਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਪੁਬ੍ਬੇ ਸੁਚਿਣ੍ਣਾਨਿ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤੀਤਿਆਦਿਨਾ ਆਗਤਤ੍ਤਾਦਾਨ ਸੀਲ. ਲ. ਨਿਬ੍ਬਾਨਾਨਿ ਚੇਵਾਤਿ ਵੁਤ੍ਤਂ. ਰਾਗਂ ਗਰੁਂਕਤ੍ਵਾ ਅਸ੍ਸਾਦੇਨ੍ਤਿ, ਅਭਿਨਨ੍ਦਤੀਤਿਆਦਿਨਾ, ਚਕ੍ਖੁਂ ਗਰੁਂ ਕਤ੍ਵਾ ਅਸ੍ਸਾਦੇਨ੍ਤੀਤਿਆਦਿਨਾ ਚ ਆਗਤਤ੍ਤਾ ‘‘ਰਾਗ ਦਿਟ੍ਠਿ ਚਕ੍ਖੁ ਸੋਤਾਦੀਨਿਚਾ’’ਤਿ ਵੁਤ੍ਤਂ. ‘‘ਪਰਤ੍ਥ ਪੀ’’ਤਿ ਪਰਤੋ ਨਿਸ੍ਸਯ ਪਚ੍ਚਯਾਦੀਸੁਪਿ. ‘‘ਸੋ ਏਵਾ’’ਤਿ ਪਚ੍ਚੁਪਤ੍ਥਮ੍ਭਕੋ ਏਵ. ‘‘ਕਿਞ੍ਚੀ’’ਤਿ ਕਿਞ੍ਚਿਮਤ੍ਤਂਪਿ. ਮਹਾਭੂਤੇ ਕਿਞ੍ਚਿ ਉਪਤ੍ਥਮ੍ਭੇਤੁਂ ਨ ਸਕ੍ਕੋਨ੍ਤੀਤਿ ਯੋਜਨਾ. ਨਨੁ ਆਹਾਰ ਰੂਪਂ ਮਹਾਭੂਤੇ ਉਪਤ੍ਥਮ੍ਭੇਤੁਂ ਸਕ੍ਕੋਤਿ. ਜੀਵਿਤਰੂਪਞ੍ਚ ਕਮ੍ਮਜਮਹਾਭੂਤੇ ਅਨੁਪਾਲੇਤੁਨ੍ਤਿ. ਸਚ੍ਚਂ. ਇਧ ਪਨ ਸਹਜਾਤਪਚ੍ਚਯ ਕਿਚ੍ਚਂ ਅਧਿਪ੍ਪੇਤਂ. ਤੇਸਞ੍ਚ ਦ੍ਵਿਨ੍ਨਂ ਸਹਜਾਤਪਚ੍ਚਯ ਕਿਚ੍ਚਂ ਨਤ੍ਥਿ. ਤਂ ਪਰਤੋ ਆਵੀ ਭਵਿਸ੍ਸਤੀਤਿ. ‘‘ਵਤ੍ਥੁ ਵਿਪਾਕਾਨਂ’’ਤਿ ਵਤ੍ਥੁਰੂਪਂ ਵਿਪਾਕਾਨਂ. ਪਟ੍ਠਾਨਪਾਠੇ. ਆਰਮ੍ਮਣਞ੍ਚ, ਨਿਸ੍ਸਯੋ ਚ, ਪੁਰੇਜਾਤਞ੍ਚ, ਵਿਪ੍ਪਯੁਤ੍ਤੋ ਚ, ਅਤ੍ਥਿ ਚ, ਅਵਿਗਤੋ ਚਾ,ਤਿ ਛਸੁਪਚ੍ਚਯੇਸੁ ਘਟਿਤੇਸੁ ਤੀਣਿ ਵਿਸਜ੍ਜਨਾਨਿ ਲਬ੍ਭਨ੍ਤੀਤਿ ਯੋਜਨਾ. ਤੀਣਿ ਵਿਸਜ੍ਜਨਾਨਿ ਨਾਮ ਵਤ੍ਥੁ ਕੁਸਲਾਨਂ ਖਨ੍ਧਾਨਂ ਛ ਹਿ ਪਚ੍ਚਯੇਹਿ ਪਚ੍ਚਯੋ. ਵਤ੍ਥੁ ਅਕੁਸਲਾਨਂ, ਵਤ੍ਥੁ ਅਬ੍ਯਾਕਤਾਨਨ੍ਤਿ. ਏਤ੍ਥ ਚ ਅਤ੍ਤਨੋ ਅਜ੍ਝਤ੍ਤਂ ਵਤ੍ਥੁਂ ਆਰਬ੍ਭ ਵਤ੍ਥੁ ਮੇ ਅਨਿਚ੍ਚਨ੍ਤਿਆਦਿਨਾ ਸਮ੍ਮਸਨ੍ਤਸ੍ਸ ਵਤ੍ਥੁਰੂਪਂ ਕੁਸਲਾਨਂ ਖਨ੍ਧਾਨਂ ਛਹਿ ਪਚ੍ਚਯੇਹਿ ਪਚ੍ਚਯੋ. ਏਤਂ ਮਮ, ਏਸੋ ਹਮਸ੍ਮਿ, ਏਸੋ ਮੇ ਅਤ੍ਤਾ,ਤਿ ਉਪਾਦਿਯਨ੍ਤਸ੍ਸ ਵਤ੍ਥੁ ਰੂਪਂ ਅਕੁਸਲਾਨਂ. ਉਭਯਤ੍ਥਪਿ ਆਵਜ੍ਜਨਕ੍ਖਣੇ ਅਬ੍ਯਾਕਤਾਨਂ. ਅਰਹਤੋ ਪਨ ਤਂ ਅਨਿਚ੍ਚਨ੍ਤਿਆਦਿਨਾ ਸਮ੍ਮਸਨ੍ਤਸ੍ਸ ਕ੍ਰਿਯਾਬ੍ਯਾਕਤਾਨਂ ਖਨ੍ਧਾਨਨ੍ਤਿ. ਤੇਨਾਹ ‘‘ਪਚ੍ਚੁਪ੍ਪਨ੍ਨਂ ਵਤ੍ਥੁਂ’’ਤਿਆਦਿਂ. ਤਤ੍ਥ ‘‘ਪਚ੍ਚੁਪ੍ਪਨ੍ਨਂ ਵਤ੍ਥੁਂ’’ਤਿ ਅਤ੍ਤਨੋ ਪਚ੍ਚੁਪ੍ਪਨ੍ਨਂ ਵਤ੍ਥੁਂ. ਅਧਿਟ੍ਠਾਨਵਿਧਾਨੇ ਪਨ ਆਕਾਸ ਗਮਨੇ ਰੂਪਕਾਯਂ ਆਰਬ੍ਭਚਿਤ੍ਤਂ ਵਿਯ ਕਾਯਂ ਲਹੁਕਂ ਅਧਿਟ੍ਠਹਨ੍ਤਸ੍ਸ ਤਪ੍ਪਰਿਯਾਪਨ੍ਨਂ ਵਤ੍ਥੁ ਅਭਿਞ੍ਞਾਚਿਤ੍ਤ ਦ੍ਵਯਸ੍ਸਾਤਿ ਯੋਜੇਤਬ੍ਬਂ. ‘‘ਅਨਿਟ੍ਠੇਠਾਨੇ’’ਤਿ ਜਵਨਚਿਤ੍ਤਸ੍ਸ ਆਵਜ੍ਜਨੇਨ ਵਿਨਾ ਉਪ੍ਪਜ੍ਜਨਂ ਨਾਮ ਕਤ੍ਥਚਿ ਇਚ੍ਛਿਤਬ੍ਬਂ ਹੋਤਿ. ਕਤ੍ਥਚਿ ਅਨਿਚ੍ਛਿਤਬ੍ਬਂ. ਤਤ੍ਥ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਨੇ, ਮਗ੍ਗਵੀਥੀਸੁ ਗੋਤ੍ਰਭੁਵੋਦਾਨਟ੍ਠਾਨੇ, ਆਗਨ੍ਤੁਕ ਭਵਙ੍ਗਟ੍ਠਾਨੇਤਿ ਇਦਂ ਇਚ੍ਛਿਤਬ੍ਬਟ੍ਠਾਨਂ ਨਾਮ. ਇਤੋ ਅਞ੍ਞਂ ਅਨਿਚ੍ਛਿਤਟ੍ਠਾਨਂ ਨਾਮ. ਏਵਂ ਅਨਿਚ੍ਛਿਤਬ੍ਬੇ ਠਾਨੇਤਿ ਅਤ੍ਥੋ. ‘‘ਪਕਤਿਕਾਲੇ’’ਤਿ ਮਰਣਾਸਨ੍ਨਕਾਲਤੋ ਅਞ੍ਞਸ੍ਮਿਂਕਾਲੇ. ‘‘ਤਾਨਿਵਾ’’ਤਿ ਅਤ੍ਤਨੋ ਅਤ੍ਤਨੋ ਨਿਸ੍ਸਯਵਤ੍ਥੂਨਿਵਾ. ‘‘ਅਞ੍ਞਂ ਵਾ’’ਤਿ ਵਤ੍ਥੁਤੋ ਅਞ੍ਞਂ ਰੂਪਾਦਿਕਂ ਵਾ. ‘‘ਭਿਨ੍ਨਾਰਮ੍ਮਣਾਨਿ ਨਾਮਾ’’ਤਿ ਅਞ੍ਞਂ ਆਵਜ੍ਜਨਸ੍ਸ ਆਰਮ੍ਮਣਂ, ਅਞ੍ਞਂ ਜਵਨਾਨਨ੍ਤਿ ਏਵਂ ਜਵਨਾਨਿ ਆਵਜ੍ਜਨੇਨ ਭਿਨ੍ਨਾਰਮ੍ਮਣਾਨਿ ਵਾ. ਤੇਨ ਵੁਤ੍ਤਂ ‘‘ਪਚ੍ਛਾਉਪ੍ਪਨ੍ਨਾਨੀ’’ਤਿਆਦਿ. ‘‘ਤੇਸਂ’’ਤਿ ਵੀਥਿਚਿਤ੍ਤਾਨਂ. ‘‘ਤਦੇਵਾ’’ਤਿ ਤਂ ਏਵਵਤ੍ਥੁ ਰੂਪਂ. ‘‘ਵਤ੍ਥੁ ਚਾ’’ਤਿ ਨਿਸ੍ਸਯੋ ਚ. ‘‘ਤੇਸਂ’’ਤਿ ਅਟ੍ਠਕਥਾਚਰਿਯਾਨਂ. ਨ ਹਿ ਗਹੇਤੁਂ ਸਕ੍ਕੋਨ੍ਤੀਤਿ ਸਮ੍ਬਨ੍ਧੋ. ਸੇਸਮੇਤ੍ਥ ਸੁਬੋਧਂ. ‘‘ਕਸ੍ਮਾ ਵੁਤ੍ਤਂ’’ਤਿਆਦੀਸੁ. ‘‘ਤਸ੍ਸ ਯਕ੍ਖਸ੍ਸਾ’’ਤਿ ਇਨ੍ਦਕਨਾਮਸ੍ਸ ਤਸ੍ਸਯਕ੍ਖਸ੍ਸ. ‘‘ਇਤਰੇਸਂਪੀ’’ਤਿ ਸਂਸੇਦਜੋਪਪਾਤਿਕਾਨਂਪਿ. ‘‘ਦੁਵਿਧੇਨਾ’’ਤਿ ਰੂਪਜਨਨ ਕਿਚ੍ਚਂ ਰੂਪੂਪਤ੍ਥਮ੍ਭਨ ਕਿਚ੍ਚਨ੍ਤਿ ਏਵਂ ਦੁਵਿਧੇਨ. ਅਥਵਾ ‘‘ਦੁਵਿਧੇਨਾ’’ਤਿ ਅਜ੍ਝਤ੍ਤਾਹਾਰਸ੍ਸ ਉਪਤ੍ਥਮ੍ਭਨਂ ਬਹਿਦ੍ਧਾਹਾਰਸ੍ਸ ਉਪਤ੍ਥਮ੍ਭਨਨ੍ਤਿ ਏਵਂ ਦੁਵਿਧੇਨ. ‘‘ਤਥਾਰੂਪਾਨਞ੍ਚਾ’’ਤਿ ਅਪ੍ਪਨਾਪਤ੍ਤਕਮ੍ਮਵਿਸੇਸੇਨ ਸਿਦ੍ਧਾਨਞ੍ਚ. ‘‘ਅਜ੍ਝਤ੍ਤਾਹਾਰੋਪੀ’’ਤਿ ਪਿਸਦ੍ਦੇਨ ਯਥਾਵੁਤ੍ਤਜੀਵਿਤਿਨ੍ਦ੍ਰਿਯਞ੍ਚ ਅਰੂਪਾਹਾਰੇ ਚ ਸਮ੍ਪਿਣ੍ਡੇਤਿ. ‘‘ਵਤ੍ਥੁਵਿਪਾਕਾਨਂ’’ਤਿ ਵਤ੍ਥੁਰੂਪਂ ਵਿਪਾਕਾਨਂ. ‘‘ਸਬ੍ਬਥਾ’’ਤਿ ਅਬ੍ਯਾਯਪਦਂ. ਤਞ੍ਚ ਸਬ੍ਬਵਿਭਤ੍ਤਿਯੁਤ੍ਤਂ. ਇਧ ਪਨ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਸਬ੍ਬਥਾ’’ਤਿ ਸਬ੍ਬਪ੍ਪਕਾਰਨ੍ਤਿ. ਪਕਾਰੋ ਚ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਕਥਂ ਵੇਦਿਤਬ੍ਬੋਤਿ ਆਹ ‘‘ਤਿਵਿਧੋ’’ਤਿਆਦਿਂ. ‘‘ਸਹਜਾਤੇ ਸਙ੍ਗਹੇਤਬ੍ਬਂ’’ਤਿ ਪਚ੍ਚਯਭਾਵੇਨ ਸਙ੍ਗਹੇਤਬ੍ਬਂ. ਸਹਜਨਨਂ ਨਾਮ ਅਤ੍ਤਨਾ ਸਹ ਜਨੇਨ੍ਤਸ੍ਸ ਸਹਜਨਨਂ. ਤਞ੍ਚ ਕਮ੍ਮਚਿਤ੍ਤਾਦੀਨਂ ਵਿਯ ਵਿਸੁਂ ਜਨਨਕਿਚ੍ਚਂ ਨ ਹੋਤਿ. ਅਤ੍ਤਨਿ ਉਪ੍ਪਜ੍ਜਨ੍ਤੇ ਏਵ ਇਤਰਾਨਿ ਰੂਪਾਨਿ ਉਪ੍ਪਜ੍ਜਨ੍ਤਿ. ਅਨੁਪ੍ਪਜ੍ਜਨ੍ਤੇ ਨ ਉਪ੍ਪਜ੍ਜਨ੍ਤੀਤਿ ਏਵਰੂਪਂ ਜਨਨਕਿਚ੍ਚਂ ਵੇਦਿਤਬ੍ਬਂ.‘‘ਵਿਨਾਵ ਸਹੁਪ੍ਪਾਦਨਕਿਚ੍ਚੇਨਾ’’ਤਿ ਅਤ੍ਤਨਾ ਸਹੁਪ੍ਪਾਦਨਕਿਚ੍ਚੇ ਆਹਾਰਸ੍ਸ ਬ੍ਯਾਪਾਰੋ ਨਤ੍ਥੀਤਿ ਅਧਿਪ੍ਪਾਯੋ. ਤੇਨੇਵ ਸਹਜਾਤਾਨਿ ਉਪਤ੍ਥਮ੍ਭਨ੍ਤੋਪਿ ਸਹਜਾਤਪਚ੍ਚਯਤ੍ਤਂ ਨ ਗਚ੍ਛਤੀਤਿ. ਏਸਨਯੋ ਰੂਪਜੀਵਿਤਿਨ੍ਦ੍ਰਿਯੇਪਿ. ਤੇਨ ਵੁਤ੍ਤਂ ‘‘ਜੀਵਿਤਂਪੀ’’ਤਿਆਦਿ. ‘‘ਤੀਸੂ’’ਤਿ ਆਰਮ੍ਮਣਞ੍ਚ ਉਪਨਿਸ੍ਸਯੋ ਚ ਅਤ੍ਥਿਚਾਤਿ ਇਮੇਸੁ ਤੀਸੁ. ਆਰਮ੍ਮਣਾਧਿਪਤਿਮ੍ਹਿ ਪੁਰੇਜਾਤਾ ਰਮ੍ਮਣਾਧਿਪਤਿਪਿ ਅਤ੍ਥਿ. ਸੋ ਪੁਰੇਜਾਤਤ੍ਥਿ ਪਚ੍ਚਯੋ ਏਵਾਤਿ ਅਤ੍ਥਿਪਚ੍ਚਯੇ ਸਙ੍ਗਹਿਤੋ. ‘‘ਤਸ੍ਮਿਂ ਕਤੇ ਪਵਤ੍ਤਮਾਨਾਨਂ’’ਤਿ ਤਸ੍ਮਿਂ ਕਮ੍ਮੇ ਕਤੇ ਤਸ੍ਸ ਕਤਤ੍ਤਾ ਏਵ ਪਵਤ੍ਤਮਾਨਾਨਂ. ਆਰਮ੍ਮਣਾਕਾਰੋ ਗੋਚਰਵਿਸਯਾਕਾਰੋ. ‘‘ਸਨ੍ਤਾਨਵਿਸੇਸਂ ਕਤ੍ਵਾ’’ਤਿ ਬੀਜਨਿਧਾਨਂ ਕਤ੍ਵਾਤਿ ਅਧਿਪ੍ਪਾਯੋ. ‘‘ਤੇ’’ਤਿ ਆਰਮ੍ਮਣਪਚ੍ਚਯ ਕਮ੍ਮ ਪਚ੍ਚਯਾ. ‘‘ਅਕਾਲਿਕੋ’’ਤਿ ਮਗ੍ਗਚੇਤਨਾਵਸੇਨ ਅਕਾਲਿਕੋ. ਸੋਹਿ ਅਤ੍ਤਨੋ ਅਨਨ੍ਤਰੇਫਲਂ ਜਨੇਤਿ. ਤਸ੍ਮਾ ਆਗਮੇਤਬ੍ਬਸ੍ਸ ਆਯਤਿਕਾਲਸ੍ਸ ਅਭਾਵਾ ਅਕਾਲਿਕੋਤਿ ਵੁਚ੍ਚਤਿ. ਅਵਸੇਸੋ ਨਾਨਕ੍ਖਣਿਕਪਚ੍ਚਯੋ ਕਾਲਿਕੋ. ‘‘ਪਚ੍ਚਯਟ੍ਠੇਨਾ’’ਤਿ ਪਚ੍ਚਯਕਿਚ੍ਚੇਨ. ਲੋਕਪ੍ਪਵਤ੍ਤਿਯਾ ਕਮ੍ਮਹੇਤੁਕਤ੍ਤਾਤਿ ਸਮ੍ਬਨ੍ਧੋ. ‘‘ਫਲਹੇਤੂ ਪਚਾਰੇਨਾ’’ਤਿ ਫਲਭੂਤਾਯ ਸਬ੍ਬਲੋਕਪ੍ਪਵਤ੍ਤਿਯਾ ਹੇਤੁਭੂਤਸ੍ਸ ਕਮ੍ਮਸ੍ਸ ਨਾਮਂ ਫਲਮ੍ਹਿ ਆਰੋਪੇਤ੍ਵਾ ਵੋਹਾਰੇਨ ਸਬ੍ਬੇਪਿ ਤੇਵੀਸਤਿਪਚ੍ਚਯਾ ਕਮ੍ਮਸਭਾਵਂ ਨਾਤਿਵਤ੍ਤਨ੍ਤੀਤਿ ਯੋਜਨਾ. ਕਮ੍ਮਪਚ੍ਚਯ ਸਙ੍ਖ੍ਯਂ ਗਚ੍ਛਨ੍ਤੀਤਿ ਵੁਤ੍ਤਂ ਹੋਤਿ. ‘‘ਵਿਜ੍ਜਮਾਨਾ ਯੇਵਾ’’ਤਿ ਅਤ੍ਥਿਪਚ੍ਚਯਾ ਏਵਾਤਿ ਵੁਤ੍ਤਂ ਹੋਤਿ. ‘‘ਸਾਸਨਯੁਤ੍ਤਿਯਾ ਵਿਰੁਦ੍ਧਮੇਵਾ’’ਤਿ ਏਤ੍ਥ ਸਾਸਨਯੁਤ੍ਤਿ ਨਾਮ ਤੀਣਿਪਿਟਕਾਨਿ. ‘‘ਵਿਰੁਦ੍ਧਮੇਵਾ’’ਤਿ ਆਰਮ੍ਮਣ ਪਚ੍ਚਯਭੂਤਾ ਸਬ੍ਬੇ ਪਥਵੀ ਪਬ੍ਬਤ ਨਦੀਸਮੁਦ੍ਦ ਅਜਟਾਕਾਸਾਦਯੋ ਚ ਸਬ੍ਬਾਪਞ੍ਞਤ੍ਤਿਯੋ ਚ ਨਿਬ੍ਬਾਨਞ੍ਚ ਕਮ੍ਮਸਙ੍ਖ੍ਯਂ ਗਚ੍ਛਨ੍ਤੀਤਿ ਵਦਨ੍ਤੋ ਚ, ਸਬ੍ਬੇ ਅਤੀਤਾਨਾਗਤ ਧਮ੍ਮਾ ਅਤ੍ਥਿਪਚ੍ਚਯਾ ਏਵਾਤਿ ਵਦਨ੍ਤੋ ਚ, ਤੀਹਿ ਪਿਟਕੇਹਿਪਿ ਵਿਰੁਜ੍ਝਤਿਯੇਵ. ਪਟ੍ਠਾਨਪਾਲ਼ਿਯਾ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਅਤ੍ਥਿ ਸਦ੍ਦੋਹਿ ਪਟ੍ਠਾਨੇ ਪਚ੍ਚੁਪ੍ਪਨ੍ਨਭਾਵੇਨ ਵਿਜ੍ਜਮਾਨਤ੍ਥੋ. ਨ ਪਰਮਤ੍ਥ ਧਮ੍ਮ ਭਾਵੇਨ. ਨਾਪਿਲੋਕ ਸਮ੍ਮੁਤਿਵਸੇਨ. ਨ ਹਿ ਪਰਮਤ੍ਥ ਧਮ੍ਮ ਭੂਤਾਪਿ ਅਤੀਤਾਨਾਗਤਧਮ੍ਮਾ ਇਧ ਅਤ੍ਥਿ ਸਙ੍ਖ੍ਯਂ ਗਚ੍ਛਨ੍ਤਿ. ਨਾਪਿਪਞ੍ਞਤ੍ਤਿ ਹੋਤਿ. ‘‘ਅਞ੍ਞਮਞ੍ਞਪ੍ਪਟਿਬਦ੍ਧਓਕਾਸੇ’’ਤਿ ਅਞ੍ਞਮਞ੍ਞਂ ਨਿਸ੍ਸਯਨਿਸ੍ਸਿਤਭਾਵੇ ਨ ਪਟਿਬਦ੍ਧੇ ਕਾਮਰੂਪਭਵੋਕਾਸੇ. ‘‘ਯਤੋ’’ਤਿ ਯਮ੍ਹਾਪਟਿਸਨ੍ਧਿ ਵਿਞ੍ਞਾਣਤੋ. ‘‘ਯਤੋ’’ਤਿ ਵਾ ਯਮ੍ਹਾਸੀਸਤੋ, ਯਮ੍ਹਾਬੀਜਤੋ ਨਿਬ੍ਬਤ੍ਤੀਤਿ ਯੋਜਨਾ. ‘‘ਬੀਜਤੋ ਵਿਯ ਮਹਾਰੁਕ੍ਖਸ੍ਸਾ’’ਤਿ ਬੀਜਪਚ੍ਚਯਾ ਕਲ਼ੀਰਙ੍ਕੁਰਾਦਿਕਸ੍ਸ ਮਹਾਰੁਕ੍ਖਸਨ੍ਤਾਨਸ੍ਸ ਨਿਬ੍ਬਤ੍ਤਿਵਿਯ. ਪਾਲ਼ਿਪਾਠੇ. ‘‘ਨ ਓਕ੍ਕਮਿਸ੍ਸਥਾ’’ਤਿ ਸਚੇ ਨ ਓਕ੍ਕਮੇਯ੍ਯ. ‘‘ਸਮੁਚ੍ਚਿਸ੍ਸਥਾ’’ਤਿ ਅਪਿਨੁਖੋ ਸਮੁਚ੍ਚੇਯ੍ਯ, ਵਡ੍ਢੇਯ੍ਯ. ‘‘ਵੋਕ੍ਕਮਿਸ੍ਸਥਾ’’ਤਿ ਸਚੇ ਵਿਗਮੇਯ੍ਯ, ਵਿਨਾਸੇਯ੍ਯ. ‘‘ਅਭਿਨਿਬ੍ਬਤ੍ਤਿਸ੍ਸਥਾ’’ਤਿ ਅਪਿਨੁਖੋ ਅਭਿਨਿਬ੍ਬਤ੍ਤੇਯ੍ਯ, ਪਾਤੁਭਵੇਯ੍ਯ. ‘‘ਵੋਚ੍ਛਿਜ੍ਜਿਸ੍ਸਥਾ’’ਤਿ ਸਚੇਉਚ੍ਛਿਜ੍ਜੇਯ੍ਯ. ‘‘ਆਪਜ੍ਜਿਸ੍ਸਥਾ’’ਤਿ ਅਪਿਨੁਖੋ ਆਪਜ੍ਜੇਯ੍ਯ. ‘‘ਯਦਿਦਂ’’ਤਿ ਯਂ ਇਦਂ. ‘‘ਇਦਂ’’ਤਿ ਨਿਪਾਤਮਤ੍ਤਂ. ‘‘ਵਿਞ੍ਞਾਣਂ’’ਤਿ ਪਟਿਸਨ੍ਧਿਵਿਞ੍ਞਾਣਂ. ਯਂ ਵਿਞ੍ਞਾਣਂ ਅਤ੍ਥਿ. ਏਸੇਵ ਵਿਞ੍ਞਾਣ ਧਮ੍ਮੋਤਿ ਯੋਜਨਾ. ‘‘ਰੂਪੁਪ੍ਪਤ੍ਤਿਯਾ’’ਤਿ ਰੂਪੁਪ੍ਪਾਦਸ੍ਸ. ਵਿਞ੍ਞਾਣਂ ਪਚ੍ਚਯੋ ਏਤਸ੍ਸਾਤਿ ਵਿਞ੍ਞਾਣ ਪਚ੍ਚਯਾ. ਰੂਪੁਪ੍ਪਤ੍ਤਿ. ‘‘ਰੂਪਪ੍ਪਵੇਣਿਯਾ’’ਤਿ ਕਮ੍ਮਜਰੂਪਸਨ੍ਤਤਿਯਾ. ‘‘ਉਤੁਆਹਾਰਾਪੀ’’ਤਿ ਅਜ੍ਝਤ੍ਤ ਉਤੁਅਜ੍ਝਤ੍ਤ ਆਹਾਰਾਪਿ. ਇਦਞ੍ਚ ਸਮ੍ਭਵਯੁਤ੍ਤਿ ਵਸੇਨ ਵੁਤ੍ਤਂ. ਅਤ੍ਥਤੋ ਪਨ ਪੁਰਿਮੁਪ੍ਪਨ੍ਨਾਯ ਰੂਪਪ੍ਪਵੇਣਿਯਾ ਅਸਤਿ, ਅਜ੍ਝਤ੍ਤਂ ਤੇ ਉਤੁਆਹਾਰਾਪਿ ਨਤ੍ਥਿਯੇਵ. ਬਹਿਦ੍ਧਾ ਉਤੁਪਨ ਅਸਤਿਪਿ ਪੁਰਿਮੁਪ੍ਪਨ੍ਨਾਯ ਰੂਪਪ੍ਪਵੇਣਿਯਾ ਰੂਪਂ ਨ ਜਨੇਤੀਤਿ ਨ ਵਤ੍ਤਬ੍ਬਂ. ਟੀਕਾਪਾਠੇ. ‘‘ਅਰੂਪਂ ਪਨਾ’’ਤਿ ਅਰੂਪਭੂਮਿਪਨ. ‘‘ਯਸ੍ਮਿਂਰੂਪੇ’’ਤਿ ਕਮ੍ਮਜਰੂਪੇ. ‘‘ਪਚ੍ਚਯਭਾਵੋ ਅਤ੍ਥੀ’’ਤਿ ਪਚ੍ਛਿਮਰੂਪੁਪ੍ਪਤ੍ਤਿਯਾ ਪਚ੍ਚਯਸਤ੍ਤਿ ਅਤ੍ਥਿ. ਕਸ੍ਮਾ ਵਿਞ੍ਞਾਯਤੀਤਿ ਚੇ. ‘‘ਪੁਤ੍ਤਸ੍ਸਾ’’ਤਿਆਦਿਮਾਹ. ‘‘ਬੀਜਭਾਵਸਙ੍ਖਾਤਂ’’ਤਿ ਅਮ੍ਬਬੀਜਾਦੀਨਂ ਬੀਜਭਾਵਸਙ੍ਖਾਤਂ. ‘‘ਨਿਯਾਮਰੂਪਂ ਨਾਮਾ’’ਤਿ ਉਤੁਵਿਸੇਸਮਾਹ. ‘‘ਯਥਾ ਵਾ ਤਥਾ ਵਾ’’ਤਿ ਅਨਿਯਮਤੋਤਿ ਵੁਤ੍ਤਂ ਹੋਤਿ. ‘‘ਯੋਨਿਭਾਵਸਙ੍ਖਾਤਂ’’ਤਿ ਤਂ ਤਂ ਗੋਤ੍ਤਕੁਲਜਾਤੀਨਂ ਜਾਤਿਭਾਵਸਙ੍ਖਾਤਂ. ‘‘ਨਿਯਾਮਰੂਪਂ’’ਤਿ ਉਤੁਵਿਸੇਸ ਸਙ੍ਖਾਤਂ ਨਿਯਾਮਰੂਪਂ. ਸਦਿਸਾਨਿ ਰੂਪਸਣ੍ਠਾਨਾਨਿ ਯੇਸਨ੍ਤਿ ਵਿਗ੍ਗਹੋ. ‘‘ਪਟਿਸਨ੍ਧਿਰੂਪਸ੍ਸੇਵ ਆਨੁਭਾਵੋ’’ਤਿ ਕਲਲਕਾਲਾਦੀਸੁ ਉਪ੍ਪਨ੍ਨਸ੍ਸ ਪਟਿਸਨ੍ਧਿਰੂਪਸ੍ਸੇਵ ਆਨੁਭਾਵੋ. ਪੁਨ ਤਮੇਵਤ੍ਥਂ ਵਿਸੇਸੇਤ੍ਵਾ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿਮਾਹ. ‘‘ਸਮੁਦਾਗਤਂ’’ਤਿ ਸੁਟ੍ਠੁ ਉਪਰੂਪਰਿਆਗਤਂ. ਇਤ੍ਥਿਭਾਵਾਦਿਰੂਪਂ ਬੀਜਰੂਪਞ੍ਚ ਨਿਯਾਮੇਤੀਤਿ ਸਮ੍ਬਨ੍ਧੋ. ‘‘ਨਿਯਾਮਕਂ’’ਤਿ ਨਾਨਾਵਣ੍ਣਸਣ੍ਠਾਨਾਦੀਨਂ ਨਿਯਾਮਕਂ. ‘‘ਤਤ੍ਥ ਇਮਸ੍ਮਿਂ ਭਵੇ’’ਤਿਆਦੀਸੁ. ਧਨਞ੍ਚ ਧਞ੍ਞਞ੍ਚ ਤਤੋ ਅਵਸੇਸਾ ਸਬ੍ਬੇਉਪਭੋਗਪਰਿਭੋਗਾਚਾਤਿ ਵਿਗ੍ਗਹੋ. ਵਿਜ੍ਜਾ ਚ ਸਿਪ੍ਪਞ੍ਚ ਨਾਨਾਬਹੁਸ੍ਸੁਤਞ੍ਚ ਪਰਿਯਤ੍ਤਿ ਚਾਤਿ ਦ੍ਵਨ੍ਦੋ. ‘‘ਅਨਾਗਤਾਨਂ ਤਾਸਂ’’ਤਿ ਤਾਸਂ ਅਭਿਨਵਧਨਧਞ੍ਞਾਦਿਸਮ੍ਪਤ੍ਤੀਨਂ. ‘‘ਉਪਨਿਸ੍ਸਯ ਪਚ੍ਚਯਤਾ’’ਤਿ ਪੁਬ੍ਬਯੋਗਕਮ੍ਮਸ੍ਸ ਉਪਨਿਸ੍ਸਯ ਪਚ੍ਚਯਤਾ. ਤਤ੍ਥ ਧਨਧਞ੍ਞਭੋਗਾਨਂ ਪਟਿਲਾਭਤ੍ਥਾਯ ਪੁਬ੍ਬਯੋਗਕਰਣਂ ਨਾਮ ਕਸਿਕਮ੍ਮ ਵਾਣਿਜ੍ਜਕਮ੍ਮਾਦੀਨਂ ਕਰਣਂ. ਤਤ੍ਥ ਕਸਿਕਮ੍ਮੇ ਤਾਵ ਧਨਧਞ੍ਞਭੋਗਾਨਂ ਪਟਿਲਾਭਤ੍ਥਾਯ ਕਸਿਕਮ੍ਮਕਰਣੇ ਧਨਧਞ੍ਞਭੋਗਾ ਅਨਾਗਤੂਪਨਿਸ੍ਸਯ ਪਚ੍ਚਯੋ. ਇਦਾਨਿ ਕਸਿਕਮ੍ਮਕਰਣਂ ਤਸ੍ਸ ਪਚ੍ਚਯੁਪ੍ਪਨ੍ਨਂ. ਧਨਧਞ੍ਞ ਭੋਗਾਨਂ ਪਟਿਲਾਭਪਰਿਭੋਗਕਾਲੇਸੁ ਕਸਿਕਮ੍ਮਕਰਣਂ ਅਤੀਤੂਪਨਿਸ੍ਸਯ ਪਚ੍ਚਯੋ. ਤੇਸਂ ਪਟਿਲਾਭੋ ਚ ਪਰਿਭੋਗੋ ਚ ਤਸ੍ਸ ਪਚ੍ਚਯੁਪ੍ਪਨ੍ਨੋ. ਕਸਿਕਮ੍ਮਕਰਣਕ੍ਖਣੇ ਪਨ ਖੇਤ੍ਤ, ਵਤ੍ਥੁ, ਬੀਜ, ਮੇਘਵੁਟ੍ਠਿਯੋ ਚ ਨਙ੍ਗਲਾਦੀਨਿ ਕਸਿਭਣ੍ਡਾਨਿ ਚ ਗੋਮਹਿਂਸਾ ਚ ਕਮ੍ਮਕਾਰਕ ਪੁਰਿਸਾ ਚ ਪਚ੍ਚੁਪ੍ਪਨ੍ਨੂਪਨਿਸ੍ਸਯੋ. ਕਸਿਕਮ੍ਮਕਰਣਂ ਤਸ੍ਸ ਪਚ੍ਚਯੁਪ੍ਪਨ੍ਨਂ. ਕਮ੍ਮਸਾਧਿਕਸ੍ਸ ਮਾਤਾਪਿਤਾਦਯੋ ਪੁਬ੍ਬਪੁਰਿਸਾ ਤਸ੍ਸ ਕਮ੍ਮਸ੍ਸ ਅਤੀਤੂਪਨਿਸ੍ਸਯ ਪਚ੍ਚਯੋ. ਤਂ ਕਮ੍ਮਂ ਤਸ੍ਸ ਪਚ੍ਚਯੁਪ੍ਪਨ੍ਨਨ੍ਤਿ. ਏਵਂ ਸੇਸੇਸੁਪਿ. ਸੇਸਂ ਸੁਵਿਞ੍ਞੇਯ੍ਯਂ.

‘‘ਪਞ੍ਚਵਿਧ’’ਨ੍ਤਿਆਦੀਸੁ. ‘‘ਸਣ੍ਠਾਨਤ੍ਤਂ’’ਤਿ ਅਣੁ, ਤਜ੍ਜਾਰੀ, ਰਥਰੇਣੁ, ਲਿਕ੍ਖਾਦੀਨਿ ਉਪਾਦਾਯ ਸਬ੍ਬੇਸਂ ਰੂਪਸਣ੍ਠਾਨਾਨਂ ਭਾਵੋ ਸਣ੍ਠਾਨਤ੍ਤਂ. ‘‘ਭਾਵੋ’’ਤਿ ਚ ਤੇਸਂ ਪਵਤ੍ਤਿ ਵੁਚ੍ਚਤਿ. ‘‘ਪਵਤ੍ਤਿ ਹੇਤੂ’’ਤਿ ਚ ਪਰਮਤ੍ਥ ਰੂਪ ਧਮ੍ਮਾ ਏਵ. ‘‘ਅਨੁਪਗਮਨਤੋ’’ਤਿ ਏਤ੍ਥ ਸਭਾਵਤੋ ਅਤਿਸੁਖੁਮਤ੍ਤਾ ਅਨੁਪਗਮਨਂ ਵੇਦਿਤਬ੍ਬਂ. ਅਧਿਵਚਨਸਙ੍ਖਾਤਂ ਨਾਮਾਭਿਧਾਨਨ੍ਤਿ ਵਿਗ੍ਗਹੋ. ‘‘ਅਧਿਵਚਨਂ’’ਤਿ ਚ ਅਤ੍ਥਪ੍ਪਕਾਸਕਤ੍ਤਾ ਅਧਿਕਂ ਵਚਨਂ ਅਧਿਵਚਨਂ. ‘‘ਨਾਮਾਭਿਧਾਨ’’ਨ੍ਤਿ ਚ ਨਾਮਪਞ੍ਞਤ੍ਤਿ ਵੁਚ੍ਚਤਿ. ‘‘ਗਹੇਤਬ੍ਬ ਭਾਵੋ’’ਤਿ ਇਦਂ ਚਿਤ੍ਤਂ ਨਾਮ, ਅਯਂ ਫਸ੍ਸੋਨਾਮਾਤਿਆਦਿਨਾ ਕਥੇਨ੍ਤਾਨਂ ਸਨ੍ਤਿਕਾ ਨਾਮਾਭਿਧਾਨਂ ਸੁਤ੍ਵਾ ਤਦਨੁਰੂਪਸ੍ਸ ਸਭਾਵਤ੍ਥਸ੍ਸ ਜਾਨਨਵਸੇਨ ਞਾਣੇਨ ਗਹੇਤਬ੍ਬਭਾਵੋ. ਨਾਮ ਪਞ੍ਞਤ੍ਤਾਨੁਸਾਰੇਨ ਜਾਨਿਤਬ੍ਬਤ੍ਤਾ ਨਾਮਨ੍ਤਿ ਵੁਚ੍ਚਤੀਤਿ ਵੁਤ੍ਤਂ ਹੋਤਿ. ਆਰਮ੍ਮਣੇ ਨਮਤੀਤਿ ਨਾਮਂ. ਆਰਮ੍ਮਣਿਕ ਧਮ੍ਮਾ ਵਾ ਏਤ੍ਥ ਨਮਨ੍ਤੀਤਿ ਨਾਮਨ੍ਤਿਪਿ ਯੁਜ੍ਜਤਿ.

ਇਮਸ੍ਮਿਂ ਪਚ੍ਚਯਸਙ੍ਗਹੇ ਪਚ੍ਚਯਧਮ੍ਮੇਸੁ ਪਞ੍ਞਤ੍ਤੀਨਂਪਿ ਸਙ੍ਗਹਿਤਤ੍ਤਾ ਪਞ੍ਞਤ੍ਤਿ ਸਙ੍ਗਹੋਪਿ ਥੇਰੇਨ ਇਧ ਨਿਕ੍ਖਿਤ੍ਤੋ. ਤਤ੍ਥ ‘‘ਪਞ੍ਞਾਵੀਯਤੀ’’ਤਿ ਏਤ੍ਥ ਪਞ੍ਞਾਪਨਂ ਨਾਮ ਵੋਹਾਰਟ੍ਠਪਨਂ. ਤਞ੍ਚਠਪਨਂ ਦ੍ਵੀਹਿਕਾਰਣੇਹਿ ਸਿਜ੍ਝਤਿ ਵਦਨ੍ਤਾਨਂ ਵੋਹਾਰੇਨ ਚ, ਸੁਣਨ੍ਤਾਨਂ ਸਮ੍ਪਟਿਚ੍ਛਨੇਨ ਚਾਤਿ ਦਸ੍ਸੇਤੁਂ ‘‘ਅਯਂ ਪੀ’’ਤਿਆਦਿਮਾਹ. ‘‘ਸਮ੍ਪਟਿਚ੍ਛੀਯਤੀ’’ਤਿ ਯਥਾ ਪੁਬ੍ਬਪੁਰਿਸੇਹਿ ਵੋਹਰੀਯਤਿ, ਤਥਾ ਪਚ੍ਛਿਮ ਜਨਪਰਮ੍ਪਰਾਹਿ ਵੋਹਰੀਯਤੀਤਿ ਵੁਤ੍ਤਂ ਹੋਤਿ. ਪਕਾਰੇਨ ਞਾਪੀਯਤੀਤਿ ਪਞ੍ਞਤ੍ਤੀਤਿਪਿ ਯੁਜ੍ਜਤਿ. ‘‘ਬ੍ਯਞ੍ਜਨਤ੍ਥੋ’’ਤਿ ਮਨੁਸ੍ਸ, ਦੇਵ, ਪਥਵੀ, ਪਬ੍ਬਤਾਦਿਕੋ ਸਦ੍ਦਤ੍ਥੋ. ‘‘ਪਞ੍ਞਾ ਪੀਯਨ੍ਤੀ’’ਤਿ ਪਕਾਰੇਨ ਠਪੀਯਨ੍ਤਿ. ਸਦ੍ਦਪਞ੍ਞਤ੍ਤਿਂ ਆਹਾਤਿ ਅਧਿਕਾਰੋ. ਅਧਿਮਤ੍ਤਭਾਵਪ੍ਪਕਾਰੋ ਨਾਮ ਪਥਵੀਪਬ੍ਬਤਾਦੀਸੁ ਪਥਵੀਧਾਤੁਯਾ ਅਧਿਮਤ੍ਤ ਭਾਵਵਿਸੇਸੋ. ਨਦੀ ਸਮੁਦ੍ਦੋਦਕਾਦੀਸੁ ਆਪੋਧਾਤੁਯਾ. ਅਗ੍ਗਿਕ੍ਖਨ੍ਧੇਸੁ ਤੇਜੋਧਾਤੁਯਾ. ਵਾਤਕ੍ਖਨ੍ਧੇਸੁ ਵਾਯੋਧਾਤੁਯਾਤਿ ਏਵਂ ਅਧਿਮਤ੍ਤ ਭਾਵਵਿਸੇਸੋ. ਵਿਵਿਧੇਨ ਪਕਾਰੇਨ ਪਰਿਣਮਨਂ ਵਿਪਰਿਣਾਮੋਤਿ ਆਹ ਤਥਾ ਤਥਾ ਵਿਪਰਿਣਾਮਾਕਾਰਨ੍ਤਿ. ਪਥਵੀਪਬ੍ਬਤਾਦਿਵੋਹਾਰੋ ਸਣ੍ਠਿਤਾਕਾਰਂ ਨਿਸ੍ਸਾਯ ਪਵਤ੍ਤੋ ਨ ਹੋਤਿ. ਪਥਵੀ ਨਾਮ ਏਵਂ ਸਣ੍ਠਾਨਾ, ਪਬ੍ਬਤੋ ਨਾਮ ਏਵਂ ਸਣ੍ਠਾਨੋਤਿ ਸਣ੍ਠਾਨਨਿਯਮੋ ਨਤ੍ਥਿ. ਪਂਸੁਸਿਲਾਨਂ ਰਾਸਿਪੁਞ੍ਜਪ੍ਪਵਤ੍ਤਿਮਤ੍ਤੇਨ ਵੋਹਾਰੋ ਸਿਦ੍ਧੋਤਿ ਵੁਤ੍ਤਂ ‘‘ਨ ਹਿ ਇਧ ਸਣ੍ਠਾਨਂ ਪਧਾਨਂ’’ਤਿ. ‘‘ਕਟ੍ਠਾਦਯੋ ਏਵ ਵੁਚ੍ਚਨ੍ਤੀ’’ਤਿ ਤੇ ਏਵਸਣ੍ਠਾਨਨਾਨਤ੍ਤਂ ਪਟਿਚ੍ਚ ਨਾਨਾਵੋਹਾਰੇਨ ਵੁਚ੍ਚਨ੍ਤਿ. ਪਥਵੀ ਪਬ੍ਬਤ ਨਦੀ ਸਮੁਦ੍ਦਾਦੀਸੁ ਵਿਯ ਭੂਤਾਨਂ ਪਵਤ੍ਤਿਵਿਸੇਸਾਕਾਰੇਨਾਤਿ ਵੁਤ੍ਤਂ ‘‘ਨ ਹਿ ਇਧ ਸਮੂਹੋ ਪਧਾਨਂ’’ਤਿ. ‘‘ਉਪਾਦਾਪਞ੍ਞਤ੍ਤੀ’’ਤਿ ਪਞ੍ਚਕ੍ਖਨ੍ਧ ਧਮ੍ਮੇ ਉਪਾਦਾਯ ਤੇਹਿ ਅਨਞ੍ਞਂ ਏਕੀਭੂਤਂ ਕਤ੍ਵਾ ਪਞ੍ਞਤ੍ਤਿ. ਨ ਆਕਾਸ ਪਞ੍ਞਤ੍ਤਿ ਦਿਸਾਦੇਸਪਞ੍ਞਤ੍ਤਿਯੋ ਵਿਯ ਤੇਹਿ ਖਨ੍ਧੇਹਿ ਮੁਞ੍ਚਿਤ੍ਵਾ ਪਞ੍ਞਤ੍ਤਿ. ‘‘ਯਤੋ’’ਤਿ ਯਮ੍ਹਾਦਿਸਤੋ. ‘‘ਲਦ੍ਧਪ੍ਪਕਾਸਤ੍ਤਾ’’ਤਿ ਲਦ੍ਧਪ੍ਪਭਾਸਤ੍ਤਾ. ‘‘ਅਹਸ੍ਸਾ’’ਤਿ ਦਿਵਸਸ੍ਸ. ਉਦ੍ਧੁਮਾਤਕਾਦੀਨਿ ‘ਉਦ੍ਧੁਮਾਤਕਂ ਪਟਿਕੂਲਂ’ਤਿਆਦਿਨਾ ਪਟਿਕੂਲਵਸੇਨ ਮਨਸਿਕਰੋਨ੍ਤਸ੍ਸਪਿ ਨਿਮਿਤ੍ਤਂ ਉਪਟ੍ਠਹਨ੍ਤਂ ਭੂਤਵਿਕਾਰਪ੍ਪਕਾਰੇਨ ਉਪਟ੍ਠਹਤੀਤਿ ਕਤ੍ਵਾ ਭੂਤਨਿਮਿਤ੍ਤੇ ਸਙ੍ਗਣ੍ਹਾਤਿ. ‘‘ਅਟ੍ਠਕਥਾਯਂ’’ਤਿ ਪੁਗ੍ਗਲਪਞ੍ਞਤ੍ਤਿ ਅਟ੍ਠਕਥਾਯਂ. ‘‘ਤਾਸਂ’’ਤਿ ਭੂਮਿਪਬ੍ਬਤਾਦਿਕਾਨਂ ਅਤ੍ਥ ਪਞ੍ਞਤ੍ਤੀਨਂ. ‘‘ਤਥਾ ਤਥਾ’’ਤਿ ਅਯਂ ਭੂਮਿ, ਅਯਂ ਪਬ੍ਬਤੋ, ਤਿਆਦਿਨਾ ਤੇਨ ਤੇਨ ਵੋਹਾਰੇਨ. ਅਤ੍ਥਾਨਂ ਪਰਮਤ੍ਥਾਨਂ ਛਾਯਾਤਿ ਅਤ੍ਥਚ੍ਛਾਯਾ. ‘‘ਛਾਯਾ’’ਤਿ ਚ ਨਿਮਿਤ੍ਤਚ੍ਛਾਯਾਯੋ ਵੁਚ੍ਚਨ੍ਤਿ. ਅਤ੍ਥਚ੍ਛਾਯਾਨਂ ਆਕਾਰੋ ਅਤ੍ਥਚ੍ਛਾਯਾਕਾਰੋ. ‘‘ਆਕਾਰੋ’’ਤਿ ਚ ਨਾਨਾਸਮੂਹ ਨਾਨਾਸਣ੍ਠਾਨਾਦਿਕੋ ਆਕਾਰੋ. ਅਤ੍ਥੋਤਿ ਵਾ ਸਦ੍ਦਾਭਿਧੇਯ੍ਯੋ ਵਚਨਤ੍ਥੋ. ਸੋਯੇਵ ਸਮੂਹਾਕਾਰਾਦਿ ਨਿਮਿਤ੍ਤ ਮਤ੍ਤਤ੍ਤਾ ਅਤ੍ਥਚ੍ਛਾਯਾਕਾਰੋਤਿ ਵੁਚ੍ਚਤੀਤਿ ਇਮਮਤ੍ਥਂ ਦਸ੍ਸੇਤਿ ‘‘ਸਦ੍ਦਾਭਿਧੇਯ੍ਯ ਸਙ੍ਖਾਤੇਨਾ’’ਤਿਆਦਿਨਾ. ‘‘ਦਬ੍ਬਪ੍ਪਟਿਬਿਮ੍ਬਾਕਾਰੇਨਾ’’ਤਿ ਦਬ੍ਬਸਙ੍ਖਾਤੇਨ ਪਟਿਬਿਮ੍ਬਾਕਾਰੇਨ. ‘‘ਓਲਮ੍ਬਿਯਾ’’ਤਿ ਅਵਲਮ੍ਬਿਤ੍ਵਾ. ‘‘ਗਣਨੂਪਗਂ ਕਤ੍ਵਾ’’ਤਿ ਅਯ ਮੇਕੋ ਅਤ੍ਥੋ, ਇਦਮੇਕਂ ਵਤ੍ਥੂਤਿ ਏਵਂ ਗਣਨੂਪਗਂ ਕਤ੍ਵਾ. ‘‘ਇਮੇਛਾ’’ਤਿ ਇਮੇ ਛਸਦ੍ਦਪਞ੍ਞਤ੍ਤਿ ਵੋਹਾਰਾ ਨਾਮ ਨਾਮਕਮ੍ਮਾਦਿ ਨਾਮ. ‘‘ਅਤ੍ਤਨੀ’’ਤਿ ਨਾਮਪਦ ਸਙ੍ਖਾਤੇ ਅਤ੍ਤਨਿ. ਅਤ੍ਥ ਵਿਸਯਂ ਏਵ ਹੁਤ੍ਵਾ ਪਵਤ੍ਤਤਿ ਭਾਸਞ੍ਞੂਨਨ੍ਤਿ ਅਧਿਪ੍ਪਾਯੋ. ‘‘ਨਾਮੇ ਸਤੀ’’ਤਿ ਅਕ੍ਖਰਸਮੂਹੋ ਪਦਂ, ਪਦਸਮੂਹੋ ਵਾਕ੍ਯਨ੍ਤਿ ਏਵਂ ਵੁਤ੍ਤੇ ਨਾਮਪਦੇ ਵਿਜ੍ਜਮਾਨੇ ਸਤਿ. ‘‘ਤਦੁਗ੍ਗਣ੍ਹਨ੍ਤਾਨਂ’’ਤਿ ਤਂ ਤਂ ਨਾਮਪਦਂ ਵਾਚੁਗ੍ਗਤਕਰਣ ਵਸੇਨ ਉਗ੍ਗਣ੍ਹਨ੍ਤਾਨਂ ਜਨਾਨਂ. ‘‘ਤਦਤ੍ਥਾ’’ਤਿ ਤਸ੍ਸ ਤਸ੍ਸ ਨਾਮ ਪਦਸ੍ਸ ਅਤ੍ਥਾ. ‘‘ਆਗਚ੍ਛਨ੍ਤਿ ਯੇਵਾ’’ਤਿ ਭਾਸਞ੍ਞੂਨਂ ਞਾਣਾਭਿਮੁਖਂ ਆਗਚ੍ਛਨ੍ਤਿਯੇਵ. ਏਤੇਨ ਅਤ੍ਤਨਿ ਅਤ੍ਥਸ੍ਸ ਨਾਮਨਂ ਨਾਮ ਅਤ੍ਥਜੋਤਨ ਕਿਚ੍ਚਮੇਵਾਤਿ ਦੀਪੇਤਿ. ‘‘ਸੁਣਨ੍ਤਾਨਂ ਞਾਣਂ’’ਤਿ ਏਤ੍ਥ ‘‘ਞਾਣਂ’’ਤਿ ਉਪਲਕ੍ਖਣ ਵਚਨਂ, ਅਕੁਸਲ ਵਿਞ੍ਞਾਣਸ੍ਸਪਿ ਅਧਿਪ੍ਪੇਤਤ੍ਤਾ. ‘‘ਤਂ ਤਂ ਅਤ੍ਥਾਭਿਮੁਖਂ ਨਾਮੇਤੀ’’ਤਿ ਆਰਮ੍ਮਣ ਕਰਣਵਸੇਨ ਨਾਮੇਤਿ. ‘‘ਨਾਮਗ੍ਗਹਣ ਵਸੇਨਾ’’ਤਿ ਅਯਂ ਅਸੁਕੋਨਾਮ ਹੋਤੂਤਿ ਏਵਂ ਨਾਮਗ੍ਗਹਣਵਸੇਨ. ‘‘ਧਾਰੀਯਤੀ’’ਤਿ ਯਾਵਜੀਵਂਪਿ ਅਪ੍ਪਮੁਸ੍ਸਮਾਨਂ ਕਤ੍ਵਾ ਧਾਰੀਯਤਿ. ਨੀਹਰਿਤ੍ਵਾ ਵੁਚ੍ਚਤਿ ਅਤ੍ਥੋ ਏਤਾਯਾਤਿ ਨਿਰੁਤ੍ਤਿ. ‘‘ਏਤਾਯਾ’’ਤਿ ਕਰਣਭੂਤਾਯ ਏਤਾਯਨਾਮਜਾਤਿਯਾ. ‘‘ਅਵਿਦਿਤਪਕ੍ਖੇ’’ਤਿ ਨਾਮਪਦਂ ਅਸ੍ਸੁਤਕਾਲੇ ਅਵਿਞ੍ਞਾਤਪਕ੍ਖੇ. ‘‘ਤਤੋ ਨੀਹਰਿਤ੍ਵਾ’’ਤਿ ਅਵਿਦਿਤਪਕ੍ਖਤੋ ਞਾਣੇਨ ਨੀਹਰਿਤ੍ਵਾ. ‘‘ਕਥੀਯਤੀ’’ਤਿ ਤਂ ਸੁਤਕਾਲੇ ਵਦਨ੍ਤੇਨ ਸੁਣਨ੍ਤਸ੍ਸ ਆਚਿਕ੍ਖੀਯਤਿ ਜਾਨਾਪੀਯਤਿ. ‘‘ਅਤ੍ਥਸ੍ਸਾ’’ਤਿ ਅਵਿਦਿਤਪਕ੍ਖੇ ਠਿਤਸ੍ਸ ਅਤ੍ਥਸ੍ਸ. ‘‘ਏਤਸ੍ਸੇ ਵਾ’’ਤਿ ਨਾਮਪਦਸ੍ਸੇਵ. ਨਾਮਪਦਨ੍ਤਿ ਚ ਕ੍ਰਿਯ ਪਦਂਪਿ, ਉਪਸਗ੍ਗਪਦਮ੍ਪਿ, ਨਿਪਾਤਪਦਮ੍ਪਿ, ਪਾਟਿਪਦਿਕਪਦਂਪਿ, ਇਧ ਨਾਮਪਦਨ੍ਤ੍ਵੇਵ ਵੁਚ੍ਚਤਿ. ‘‘ਵਿਸੇਸਨਭੂਤਾਨਂ’’ਤਿ ਅਞ੍ਞਪਦਤ੍ਥਸਮਾਸੇ ਸਮਾਸਪਦਾਨਂ ਅਤ੍ਥਾ ਵਿਸੇਸਨਾ ਨਾਮ. ਏਵਂ ਵਿਸੇਸਨਭੂਤਾਨਂ. ‘‘ਪੁਗ੍ਗਲਸ੍ਸਾ’’ਤਿ ਅਞ੍ਞਪਦਤ੍ਥਭੂਤਸ੍ਸ ਅਭਿਞ੍ਞਾਲਾਭੀ ਪੁਗ੍ਗਲਸ੍ਸ. ‘‘ਵਦਨ੍ਤੀ’’ਤਿ ਆਨਨ੍ਦਾਚਰਿਯਂ ਸਨ੍ਧਾਯ ਵੁਤ੍ਤਂ. ਸੋ ਹਿ ਧਮ੍ਮਸਙ੍ਗਣਿਯਂ ਪਞ੍ਞਤ੍ਤਿਦੁਕਨਿਦ੍ਦੇਸੇ ਮੂਲਟੀਕਾਯਂ ਤਥਾ ਵਦਤਿ. ‘‘ਤਬ੍ਭਾਵਂ’’ਤਿ ਅਕ੍ਖਰ ਪਦਬ੍ਯਞ੍ਜਨਭਾਵਂ. ‘‘ਅਸ੍ਸਾ’’ਤਿ ਨਾਮਪਞ੍ਞਤ੍ਤਿਯਾ. ਅਕ੍ਖਰਪਦਬ੍ਯਞ੍ਜਨਂ ਗੋਚਰੋ ਆਰਮ੍ਮਣਂ ਅਸ੍ਸਾਤਿ ਵਿਗ੍ਗਹੋ. ‘‘ਅਨੁਸਾਰੇਨਾ’’ਤਿ ਅਨੁਗਮਨੇਨ. ‘‘ਲੋਕਸਙ੍ਕੇਤ ਨਿਮ੍ਮਿਤਾ’’ਤਿ ਲੋਕਸਙ੍ਕੇਤਞ੍ਞਾਣੇਨ ਪਵਤ੍ਤਿਤਾ. ‘‘ਲੋਕਸਙ੍ਕੇਤਞ੍ਞਾਣਂ’’ਤਿ ਚ ਇਦਂ ਨਾਮਂ ਇਮਸ੍ਸਤ੍ਥਸ੍ਸ ਨਾਮਂ, ਅਯਮਤ੍ਥੋ ਇਮਸ੍ਸ ਨਾਮਸ੍ਸ ਅਤ੍ਥੋਤਿ ਏਵਂ ਪੁਰੇਤਰਂ ਲੋਕਸਞ੍ਞਾਣ ਜਾਨਨਕਞ੍ਞਾਣਂ. ‘‘ਅਤੀਤ ਸਦ੍ਦਮਤ੍ਤਾਰਮ੍ਮਣਾ’’ਤਿ ਸੋਤਵਿਞ੍ਞਾਣ ਵੀਥਿਯਾ ਆਰਮ੍ਮਣਂ ਹੁਤ੍ਵਾ ਨਿਰੁਦ੍ਧਂ ਅਤੀਤ ਸਦ੍ਦਮਤ੍ਤਂ ਕੁਰੁਮਾਨਾ. ‘‘ਤੇਨ ਵੁਤ੍ਤਵਚਨੇ’’ਤਿ ਤੇਨ ਸਿਕ੍ਖਂ ਪਚ੍ਚਕ੍ਖਨ੍ਤੇਨ ਭਿਕ੍ਖੁਨਾ ਸਿਕ੍ਖਂ ਪਚ੍ਚਕ੍ਖਾਮੀਤਿ ਵੁਤ੍ਤਵਚਨੇ. ਪਚ੍ਚੁਪ੍ਪਨ੍ਨਂ ਸਦ੍ਦਂ ਸੋਤਵਿਞ੍ਞਾਣ ਵੀਥਿਯਾ, ਅਤੀਤਞ੍ਚ ਸਦ੍ਦਂ ਮਨੋਵਿਞ੍ਞਾਣ ਵੀਥਿਯਾਤਿ ਯੋਜਨਾ. ‘‘ਤਾਨਿ ਅਕ੍ਖਰਾਨੀ’’ਤਿ ਸਿਕ੍ਖਂ ਪਚ੍ਚਕ੍ਖਾਮੀਤਿ ਵਾਕ੍ਯੇ ਅਵਯਵਕ੍ਖਰਾਨਿ. ‘‘ਅਯਂ ਅਕ੍ਖਰ ਸਮੂਹੋ’’ਤਿ ਇਦਂ ਨਾਮਪਦਨ੍ਤਿ ਵੁਤ੍ਤਂ ਹੋਤਿ. ਏਤਸ੍ਸ ਅਤ੍ਥਸ੍ਸ. ‘‘ਵਿਨਿਚ੍ਛਯਵੀਥਿਂ’’ਤਿ ਅਕ੍ਖਰ ਪਦਸਲ੍ਲਕ੍ਖਣਵੀਥਿਞ੍ਚ. ‘‘ਏਕਕ੍ਖਰੇ ਸਦ੍ਦੇ’’ਤਿ ‘ਗੋ’ ਇਚ੍ਚਾਦਿਕੇ ਏਕਕ੍ਖਰੇ ਪਞ੍ਞਤ੍ਤਿ ਸਦ੍ਦੇ. ‘‘ਯਾ’’ਤਿ ਨਾਮ ਪਞ੍ਞਤ੍ਤਿ. ‘‘ਵਦਨ੍ਤਸ੍ਸ ਮਨਸਾ’’ਤਿ ਸਮ੍ਬਨ੍ਧੋ. ‘‘ਪੁਬ੍ਬਭਾਗੇ’’ਤਿ ਯਂ ਕਿਞ੍ਚਿ ਅਤ੍ਥਂ ਪਰੇਸਂ ਵਤ੍ਤੁਕਾਮੋ ਵਦਨ੍ਤੋ ਤਸ੍ਸ ਤਸ੍ਸ ਅਤ੍ਥਸ੍ਸ ਨਾਮਂ ਪਥਮਂ ਮਨੋਦ੍ਵਾਰਵੀਥਿਯਾ ਨਿਯਮੇਤ੍ਵਾ ਏਵ ਵਦਤਿ, ਤਂ ਨਾਮਂ ਪੁਬ੍ਬਭਾਗੇ ਵਦਨ੍ਤੇਨ ਮਨਸਾ ਵਵਤ੍ਥਾਪਿਤਾ ਨਾਮਪਞ੍ਞਤ੍ਤੀਤਿ ਵੁਚ੍ਚਤਿ. ਪਟਿਪਾਟਿਕਥਨਂ ਪਵਤ੍ਤਿਕ੍ਕਮਕਥਨਂ. ‘‘ਵੁਤ੍ਤਂ’’ਤਿ ਅਟ੍ਠਕਥਾਸੁ ਵੁਤ੍ਤਂ. ਤਥਾ ਅਦ੍ਧਮਤ੍ਤਿਕਨ੍ਤਿ ਚ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਵੁਤ੍ਤਂ’’ਤਿ ਚ ਸਦ੍ਦਸਤ੍ਥੇਸੁ ਵੁਤ੍ਤਂ.

ਗਾਥਾਯਂ. ‘‘ਮਤ੍ਤਾ’’ਤਿ ਏਕਵਿਜ੍ਜੁਪ੍ਪਾਦਕ੍ਖਣਂ ਵੁਚ੍ਚਤਿ. ਏਕਾ ਮਤ੍ਤਾਯਸ੍ਸਾਤਿ ਏਕਮਤ੍ਤੋ. ‘‘ਦੀਘਮੁਚ੍ਚਤੇ’’ਤਿ ਦੀਘੋ ਨਾਮ ਵੁਚ੍ਚਤੇ. ‘‘ਪ੍ਲੁਤੋ’’ਤਿ ਨਾਨਪ੍ਪਕਾਰੇਨ ਰੁਤੋ ਗਾਯਿਤੋਤਿ ਪਰੁਤੋ. ਸੋ ਏਵ ਰਕਾਰਸ੍ਸ ਲਕਾਰਂ ਕਤ੍ਵਾ ਪਕਾਰੇ ਚ ਸਰਲੋਪਂ ਕਤ੍ਵਾ ਪ੍ਲੁਤੋਤਿ ਵੁਚ੍ਚਤਿ. ਗੀਤਨ੍ਤਿ ਵੁਤ੍ਤਂ ਹੋਤਿ. ‘‘ਪਰਮਤ੍ਥ ਸਦ੍ਦਸਙ੍ਘਾਟਾਨਂ’’ਤਿ ਪਰਮ੍ਪਰਾ ਪਵਤ੍ਤਾਨਂ ਪਰਮਤ੍ਥ ਸਦ੍ਦਰਾਸੀਨਂ. ‘‘ਅਨੇਕਕੋਟਿਸਤਸਹਸ੍ਸਾਨਿ ਚਿਤ੍ਤਾਨੀ’’ਤਿ ਜਵਨਵੀਥੀਨਂ ਅਨ੍ਤਰਨ੍ਤਰਾ ਭਵਙ੍ਗਚਿਤ੍ਤੇਹਿ ਸਦ੍ਧਿਂ ਅਨੇਕਕੋਟਿਸਤਸਹਸ੍ਸਾਨਿ ਚਿਤ੍ਤਾਨਿ.

ਪਟ੍ਠਾਨਨਯਾਨੁਦੀਪਨਾ ਨਿਟ੍ਠਿਤਾ.

ਪਚ੍ਚਯਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

੯. ਕਮ੍ਮਟ੍ਠਾਨਸਙ੍ਗਹਅਨੁਦੀਪਨਾ

੧੭੦. ਕਮ੍ਮਟ੍ਠਾਨਸਙ੍ਗਹੇ. ਵਿਦਿਤੋ ਵਿਞ੍ਞਾਤੋ ਨਾਮਰੂਪ ਵਿਭਾਗੋ ਯੇਨਾਤਿ ਵਿਗ੍ਗਹੋ. ਯੋਗੀ ਪੁਗ੍ਗਲੋ. ‘‘ਕਿਲੇਸੇ ਸਮੇਤੀ’’ਤਿ ਕਾਮਚ੍ਛਨ੍ਦਾਦਿਕੇ ਨੀਵਰਣਕਿਲੇਸੇ ਉਪਸਮੇਤਿ. ‘‘ਤਥਾ ਪਵਤ੍ਤੋ’’ਤਿ ਭਾਵਨਾਵਸੇਨ ਪਵਤ੍ਤੋ. ਵੂਪਸਮਨਵਸੇਨ ਵਾ ਪਵਤ੍ਤੋ. ‘‘ਤਾਯਾ’’ਤਿ ਤਾਯਭਾਵਨਾ ਪਞ੍ਞਾਯ, ਪਸ੍ਸਨ੍ਤੀਤਿ ਸਮ੍ਬਨ੍ਧੋ. ‘‘ਪਸ੍ਸਿਤਂ’’ਤਿ ਸਮਨੁਪਸ੍ਸਿਤਂ. ਕਥਂ ਕਸਿਣਭਾਵਨਾਦਿਕਂ ਯੋਗਕਮ੍ਮਂ ਅਤ੍ਤਾਵ ਅਤ੍ਤਨੋ ਠਾਨਂ ਹੋਤੀਤਿ ਵੁਤ੍ਤਂ ‘‘ਆਦਿਮਜ੍ਝਪਰਿਯੋਸਾਨਾਨਂਹੀ’’ਤਿਆਦਿ. ਵਿਭਾਵਨਿਪਾਠੇ. ‘‘ਪਦਟ੍ਠਾਨਤਾਯਾ’’ਤਿ ਏਤੇਨ ਤਿਟ੍ਠਤਿ ਅਨਿਵਤ੍ਤਮਾਨਂ ਪਵਤ੍ਤਤਿ ਏਤੇਨਾਤਿ ਠਾਨਨ੍ਤਿ ਅਤ੍ਥੇਨ ਪਦਟ੍ਠਾਨਮੇਵ ਠਾਨਨ੍ਤਿ ਵੁਚ੍ਚਤੀਤਿ ਦੀਪੇਤਿ. ‘‘ਸੁਖਵਿਸੇਸਾਨਂ’’ਤਿ ਝਾਨਸੁਖ ਮਗ੍ਗਸੁਖ ਫਲਸੁਖਾਨਂ. ‘‘ਦਸਕਸਿਣਾਨੀ’’ਤਿਆਦੀਸੁ ਮੁਖ੍ਯਤੋ ਵਾ ਉਪਚਾਰਤੋ ਵਾ ਦ੍ਵਿਧਾਪਿ ਅਤ੍ਥਂ ਦਸ੍ਸੇਤੁਂ ‘‘ਦਸਕਸਿਣਾਨੀ’’ਤਿਆਦਿ ਵੁਤ੍ਤਂ. ‘‘ਸੇਸਾਨਿਪੀ’’ਤਿ ਅਪ੍ਪਮਞ੍ਞਾਦੀਨਿ ਸੇਸਕਮ੍ਮਟ੍ਠਾਨਾਨਿਪਿ. ਯਂ ਯਂ ਅਨੁਰੂਪਂ ਯਥਾਨੁਰੂਪਂ. ‘‘ਸਮੁਦਾਚਰਣਂ’’ਤਿ ਪੁਨਪ੍ਪੁਨਂ ਭੁਸਂ ਪਵਤ੍ਤਨਂ. ‘‘ਸਂਸਗ੍ਗ ਭੇਦੋ’’ਤਿ ਏਕਮੇਕਸ੍ਸ ਪੁਗ੍ਗਲਸ੍ਸ ਕਸ੍ਸਚਿ ਦ੍ਵੇਚਰਿਯਾ, ਕਸ੍ਸਚਿ ਤਿਸ੍ਸੋਤਿਆਦਿਨਾ ਸਮ੍ਮਿਸ੍ਸ ਵਿਭਾਗੋ. ਅਟ੍ਠਕਥਾਯਂ’’ਤਿ ਵਿਸੁਦ੍ਧਿਮਗ੍ਗ ਅਟ੍ਠਕਥਾਯਂ. ‘‘ਸਬ੍ਬਾਯਪਿ ਅਪ੍ਪਨਾਯਾ’’ਤਿ ਝਾਨਪ੍ਪਨਾਯ ਚ ਮਗ੍ਗਪ੍ਪਨਾਯ ਚ ਫਲਪ੍ਪਨਾਯ ਚ. ‘‘ਯਾ ਆਸਨ੍ਨੇ ਪਵਤ੍ਤਾ ਦੂਰੇ ਪਵਤ੍ਤਾਤਿ ਅਧਿਕਾਰੋ. ‘‘ਇਤਰਾ ਪਨਾ’’ਤਿ ਦੂਰੇ ਪਵਤ੍ਤਾਪਨ. ‘‘ਤਾਸਂ ਪਨਾ’’ਤਿ ਤਿਸ੍ਸਨ੍ਨਂ ਭਾਵਨਾਨਂ ਪਨ. ‘‘ਤੇਸਂ ਪੀ’’ਤਿ ਦ੍ਵਿਨ੍ਨਂ ਨਿਮਿਤ੍ਤਾਨਂਪਿ. ‘‘ਵਿਦਤ੍ਥਿਚਤੁਰਙ੍ਗੁਲਂ’’ ਨਾਮ ਵਿਤ੍ਥਾਰਤੋ ਚਤੁਰਙ੍ਗੁਲਾਧਿਕਂ ਵਿਦਤ੍ਥਿਪ੍ਪਮਾਣਂ. ਵਿਦਤ੍ਥਿਪ੍ਪਮਾਣਂ ਵਾ ਚਤੁਰਙ੍ਗੁਲਪ੍ਪਮਾਣਂ ਵਾਤਿਪਿ ਯੁਜ੍ਜਤਿ. ਤਥਾਹਿ ਵਿਸੁਦ੍ਧਿਮਗ੍ਗੇ ਵਾਯੋਕਸਿਣ ਵਿਧਾਨੇ ਚਤੁਰਙ੍ਗੁਲਪ੍ਪਮਾਣਂ ਸੀਸਂ ਵਾਤੇਨ ਪਹਰਿਯਮਾਨਂ ਦਿਸ੍ਵਾਤਿ ਵੁਤ੍ਤਂ. ਖਲਮਣ੍ਡਲਂ ਨਾਮ ਕਸ੍ਸਕਾਨਂ ਕਸ੍ਸਮਦ੍ਦਨਭੂਮਿਭਾਗਮਣ੍ਡਲਂ. ‘‘ਕਤਂ ਵਾ’’ਤਿ ਨੀਲਾਦਿਵਣ੍ਣਵਿਸੇਸਰਹਿਤਂ ਅਰੁਣਵਣ੍ਣਂ ਮਤ੍ਤਿਕਕ੍ਖਣ੍ਡਂ ਉਦਕੇਨ ਮਦ੍ਦਿਤ੍ਵਾ ਚਕ੍ਕਮਣ੍ਡਲਂ ਵਿਯ ਪਰਿਮਣ੍ਡਲਂ ਸੁਮਟ੍ਠਤਲਂ ਪਥਵਿਮਣ੍ਡਲਂ ਕਰੋਨ੍ਤਿ. ਏਵਂ ਕਤਂ ਵਾ. ‘‘ਅਕਤਂ ਵਾ’’ਤਿ ਕਤ੍ਥਚਿ ਭੂਮਿਭਾਗੇ ਕੇਨਚਿ ਅਕਤਂ ਸਯਂ ਜਾਤਂ ਵਾ. ‘‘ਕਸਿਣੇਨ ਜਮ੍ਬੁਦੀਪਸ੍ਸਾ’’ਤਿ ਏਤ੍ਥ.

ਬੁਦ੍ਧੋਤਿ ਕਿਤ੍ਤਯਨ੍ਤਸ੍ਸ, ਕਾਯੇ ਭਵਤਿ ਯਾ ਪੀਤਿ;

ਵਰਮੇਵ ਹਿ ਸਾਪੀਤਿ, ਕਸਿਣੇਨਪਿ ਜਮ੍ਬੁਦੀਪਸ੍ਸਾਤਿ.

ਗਾਥਾਸੇਸੋ. ਤਤ੍ਥ ਜਮ੍ਬੁਦੀਪਸ੍ਸ ਕਸਿਣਤੋ ਸਾਪੀਤਿਵਰਾ ਏਵਾਤਿ ਯੋਜਨਾ. ‘‘ਕਸਿਣਤੋ’’ਤਿ ਚ ਸਕਲਮਣ੍ਡਲਤੋ. ਸਕਲਸ੍ਸ ਜਮ੍ਬੁਦੀਪਮਣ੍ਡਲਸ੍ਸ ਇਸ੍ਸਰਿਯਾਧਿਪਤਿਤੋ ਪੀਤਿ ਵੁਤ੍ਤਂ ਹੋਤਿ. ‘‘ਸਨ੍ਨਿਵਿਟ੍ਠਾ’’ਤਿ ਸਮਂ ਸਣ੍ਠਿਤਾ. ‘‘ਸਣ੍ਠਾਨ ਪਞ੍ਞਤ੍ਤੀ’’ਤਿ ਮਣ੍ਡਲਸਣ੍ਠਾਨੇਨ ਉਪਟ੍ਠਿਤਾ ਨਿਮਿਤ੍ਤਪਞ੍ਞਤ੍ਤਿ ਏਵ ਵੁਚ੍ਚਤਿ. ‘‘ਫੁਟ੍ਠਟ੍ਠਾਨੇ’’ਤਿ ਕਾਯੇਵਾ ਰੁਕ੍ਖਗ੍ਗਾਦੀਸੁਵਾ ਵਾਤੇਨ ਪਹਤਟ੍ਠਾਨੇ. ‘‘ਵਾਯੁ ਵਟ੍ਟੀ’’ਤਿ ਵਾਤਪਰਿਮਣ੍ਡਲਂ. ਚਨ੍ਦਸੂਰਿਯਾਨਂ ਅਗ੍ਗਿਸ੍ਸ ਚ ਓਭਾਸੇਨ ਵਿਸਿਟ੍ਠਾਤਿ ਸਮਾਸੋ. ‘‘ਵਿਸਿਟ੍ਠਾ’’ਤਿ ਵਿਸੇਸਿਤਾ.

‘‘ਧੂਮਾਤਂ’’ਤਿ ਧੂਮਾਯਿਤਂ. ਧੂਮਪੂਰਿਤਪਟਂ ਵਿਯਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਸੂਨਭਾਵਂ ਗਤਂ’’ਤਿ. ਅਨ੍ਤੇ ਕਕਾਰੋ ਨਿਨ੍ਦਤ੍ਥਜੋਤਕੋਤਿ ਵੁਤ੍ਤਂ ‘‘ਕੁਚ੍ਛਿਤਤ੍ਤਾ’’ਤਿ. ਜੇਗੁਚ੍ਛਿ ਤਬ੍ਬਤ੍ਤਾਤਿ ਅਤ੍ਥੋ. ‘‘ਛਵਸਰੀਰਸ੍ਸਾ’’ਤਿ ਲਾਮਕਸਰੀਰਸ੍ਸ. ‘‘ਤਦੇਵਾ’’ਤਿ ਛਵਸਰੀਰਮੇਵ. ਵਿਪੁਬ੍ਬਕਂ ਵਿਚ੍ਛਿਨ੍ਨਕਂ ਨਾਮਾਤਿ ਸਮ੍ਬਨ੍ਧੋ. ਤਤ੍ਥ ਵਿਸੇਸੇਨ ਨੀਲਨ੍ਤਿਵਿਨੀਲਂ. ਤਮੇਵ ਕੁਚ੍ਛਿਤਤ੍ਤਾ ਵਿਨੀਲਕਂ. ‘‘ਤਦੇਵ ਪੁਨ ਪਚ੍ਚਿਤ੍ਵਾ’’ਤਿ ਵਿਨੀਲਕਸਰੀਰਮੇਵ ਪੁਨ ਕਾਲਾਤਿਕ੍ਕਮੇ ਪਚ੍ਚਿਤ੍ਵਾ. ਪੂਤਿਲੋਹਿਤਾਨਂ ਪਰਿਪਕ੍ਕਭਾਵਂ ਪਤ੍ਵਾਤਿ ਅਤ੍ਥੋ. ਤਤੋ ਤਤੋ ਦ੍ਵਾਰਚ੍ਛਿਦ੍ਦਤੋ. ਯੁਤ੍ਤਂ ਤਦੇਵ ਸਰੀਰਨ੍ਤਿ ਸਮ੍ਬਨ੍ਧੋ. ਵਿਚ੍ਛਿਨ੍ਨਕਂ ਨਾਮ, ਵਿਚ੍ਛਿਦ੍ਦਕਨ੍ਤਿਪਿ ਪਠਨ੍ਤਿ. ‘‘ਅਪਕਡ੍ਢਿਤ੍ਵਾ’’ਤਿ ਖਣ੍ਡਾਨਿ ਸਰੀਰਤੋ ਮੋਚੇਤ੍ਵਾ ਤਂ ਤਂ ਪਦੇਸਂ ਕਡ੍ਢਿਤ੍ਵਾ. ‘‘ਪਗ੍ਘਰਿਤਲੋਹਿਤ ਸਰੀਰਂ’’ਤਿ ਛਿਨ੍ਨਵਿਦ੍ਧਟ੍ਠਾਨੇਸੁ ਵਣਮੁਖੇਹਿ ਪਗ੍ਘਰਿਤਲੋਹਿਤਸਰੀਰਂ.

‘‘ਬੁਦ੍ਧਾਨੁਸ੍ਸਤੀ’’ਤਿ ਏਤ੍ਥ ਬੁਦ੍ਧਸਦ੍ਦੋ ਗੁਣ੍ਯੂਪਚਾਰ ਵਚਨਂ ਹੋਤਿ. ਗੁਣਿਨੋ ਦਬ੍ਬਸ੍ਸ ਨਾਮੇਨ ਗੁਣਾਨਂ ਗਹੇਤਬ੍ਬਤ੍ਤਾਤਿ ਵੁਤ੍ਤਂ ‘‘ਬੁਦ੍ਧਗੁਣਸ੍ਸ ਅਨੁਸ੍ਸਤਿ ਬੁਦ੍ਧਾਨੁਸ੍ਸਤੀ’’ਤਿ. ਏਸਨਯੋ ਧਮ੍ਮਾਨੁਸ੍ਸਤਾਦੀਸੁ. ‘‘ਅਰਹਤਾਦੀ’’ਤਿ ਅਰਹਤਾਦਿਗੁਣੋ. ਵਿਗਤਾਨਿ ਦੁਸ੍ਸਿਲ੍ਯਾਦਿ ਮਲਾਨਿ ਚ ਮਚ੍ਛੇਰਞ੍ਚ ਯਸ੍ਸ ਤਂ ਵਿਗਤਮਲਮਚ੍ਛੇਰਂ. ਤਸ੍ਸ ਭਾਵੋਤਿ ਵਿਗ੍ਗਹੋ. ‘‘ਅਤ੍ਤਨਾ ਅਧਿਗਤਨਿਬ੍ਬਾਨਞ੍ਚਾ’’ਤਿ ਏਤੇਨ ਅਰਿਯਪੁਗ੍ਗਲਾਨਂ ਕਿਲੇਸਾਨਂ ਅਚ੍ਚਨ੍ਤਵੂਪਸਮੋ ਵੁਤ੍ਤੋ. ‘‘ਯਂ ਆਰਬ੍ਭਾ’’ਤਿ ਯਂ ਪੁਗ੍ਗਲਂ ਆਰਬ੍ਭ. ਹਿਤੂਪਸਂਹਾਰੋ ਨਾਮ ਅਯਂ ਪੁਗ੍ਗਲੋ ਅਵੇਰੋ ਹੋਤੁ, ਅਬ੍ਯਾਪਜ੍ਜੋ ਹੋਤੂਤਿਆਦਿਨਾ ਅਵੇਰਤਾਦੀਨਿ ਹਿਤਸੁਖਾਨਿ ਤਸ੍ਮਿਂ ਪੁਗ੍ਗਲੇ ਚਿਤ੍ਤੇਨ ਉਪਸਂਹਰਣਂ. ਕਰੁਣਾ, ਮੁਦਿਤਾ, ਹੇਟ੍ਠਾ ਚੇਤਸਿਕਸਙ੍ਗਹੇ ਵੁਤ੍ਤਤ੍ਥਾ ਏਵ. ਹਿਤੂਪਸਂਹਾਰੋ ਚ ਹਿਤਮੋਦਨਾ ਚ ਅਹਿਤਾਪਨਯਨਞ੍ਚਾਤਿ ਦ੍ਵਨ੍ਦੋ. ਤਤ੍ਥ ਹਿਤੂਪਸਂਹਾਰੋ ਮੇਤ੍ਤਾਯ ਕਿਚ੍ਚਂ. ਹਿਤਮੋਦਨਾ ਮੁਦਿਤਾਯ. ਅਹਿਤਾਪਨਯਨਂ ਕਰੁਣਾਯ ਕਿਚ੍ਚਂ. ਤਤ੍ਥ ਪਰਂ ਹਿਤਸੁਖਸਮ੍ਪਨ੍ਨਂ ਦਿਸ੍ਵਾ ਤੇਨ ਪਰਹਿਤੇਨ ਅਤ੍ਤਨਿ ਪੀਤਿਪਾਮੋਜ੍ਜਵਡ੍ਢਨਂ ਹਿਤਮੋਦਨਾ ਨਾਮ. ਪਰਂ ਦੁਕ੍ਖਿਤਂ ਦਿਸ੍ਵਾ ਅਯਂ ਇਮਮ੍ਹਾਦੁਕ੍ਖਾ ਮੁਚ੍ਚਤੁ, ਮਾਕਿਲਮਤੂਤਿ ਏਵਂ ਚਿਤ੍ਤੇਨ ਪਰਸ੍ਮਿਂ ਅਹਿਤਸ੍ਸ ਦੁਕ੍ਖਸ੍ਸ ਅਪਨਯਨਂ ਅਹਿਤਾਪਨਯਨਂ ਨਾਮ. ‘‘ਤੇਸਂ’’ਤਿ ਪਰਸਤ੍ਤਾਨਂ. ਸਸ੍ਸ ਅਤ੍ਤਨੋ ਇਦਨ੍ਤਿ ਸਕਂ. ‘‘ਇਦਂ’’ ਸੁਖਦੁਕ੍ਖਕਾਰਣਂ. ਅਤ੍ਤਨਾ ਕਤਕਮ੍ਮਂ ਏਵ ਸਕਂ ਯੇਸਂ ਤੇ ਕਮ੍ਮਸ੍ਸਕਾ. ਪਰਸਤ੍ਤਾ ਏਵ. ਤੇਸਂ ਭਾਵੋ. ਤਸ੍ਸ ਅਨੁਬ੍ਰੂਹਨਨ੍ਤਿ ਵਿਗ੍ਗਹੋ. ‘‘ਸੀਮਸਮ੍ਭੇਦੋ’’ਤਿ ਅਤ੍ਤਾ ਚ ਪਿਯਪੁਗ੍ਗਲੋ ਚ ਮਜ੍ਝਤ੍ਤਪੁਗ੍ਗਲੋ ਚ ਵੇਰਿਪੁਗ੍ਗਲੋ ਚਾਤਿ ਚਤਸ੍ਸੋ ਸੀਮਾ. ਸਮ੍ਭਿਨ੍ਦਨਂ ਸਮ੍ਭੇਦੋ. ਸਮ੍ਮਿਸ੍ਸਨਂ ਅਨਾਨਤ੍ਤਕਰਣਨ੍ਤਿ ਅਤ੍ਥੋ. ਸੀਮਾਨਂ ਸਮ੍ਭੇਦੋ ਸੀਮਸਮ੍ਭੇਦੋ. ਸਬ੍ਬਾ ਇਤ੍ਥਿਯੋ, ਸਬ੍ਬੇਪੁਰਿਸਾਤਿਆਦਿਨਾ ਓਧਿਸੋ ਪਰਿਚ੍ਛੇਦਤੋ ਫਰਣਂ ਓਧਿਸੋਫਰਣਂ ਨਾਮ. ਸਬ੍ਬੇਸਤ੍ਤਾ, ਸਬ੍ਬੇਪਾਣਾ, ਸਬ੍ਬੇਭੂਤਾਤਿਆਦਿਨਾ ਅਨੋਧਿਸੋ ਅਪਰਿਚ੍ਛੇਦਤੋ ਫਰਣਂ ਅਨੋਧਿਸੋਫਰਣਂ ਨਾਮ. ਪੁਰਤ੍ਥਿਮਾਯਦਿਸਾਯ ਸਬ੍ਬੇਸਤ੍ਤਾ ਅਵੇਰਾਹੋਨ੍ਤੂਤਿਆਦਿਨਾ ਦਿਸਾਵਿਭਾਗਵਸੇਨ ਫਰਣਂ ਦਿਸਾਫਰਣਂ ਨਾਮ. ‘‘ਤਂ ਸਮਙ੍ਗੀਨੋ ਚਾ’’ਤਿ ਤਾਹਿ ਅਪ੍ਪਮਞ੍ਞਾਹਿ ਸਮਙ੍ਗੀਨੋ ਪੁਗ੍ਗਲਾ. ‘‘ਨਿਚ੍ਚਂ ਸੋਮ੍ਮਹਦਯਭਾਵੇਨਾ’’ਤਿ ਸਬ੍ਬਕਾਲਂ ਸਨ੍ਤਸੀਤਲ ਹਦਯਭਾਵੇਨ. ਬ੍ਰਹ੍ਮਸਦ੍ਦੋ ਵਾ ਸੇਟ੍ਠਪਰਿਯਾਯੋ ‘ਬ੍ਰਹ੍ਮਂ ਪੁਞ੍ਞਂ ਪਸਵਤੀ’ਤਿਆਦੀਸੁ ਵਿਯ. ਅਸਿਤਬ੍ਬਂ ਭੁਞ੍ਜਿਤਬ੍ਬਨ੍ਤਿ ਅਸਿਤਂ. ਪਞ੍ਚਭੋਜਨਂ. ਪਾਤਬ੍ਬਨ੍ਤਿ ਪੀਤਂ. ਅਟ੍ਠਵਿਧਂ ਪਾਨਂ. ਦਨ੍ਤੇਨ ਖਾਯਿਤਬ੍ਬਂ ਖਾਦਿਤਬ੍ਬਨ੍ਤਿ ਖਾਯਿਤਂ. ਪੂਵਕ੍ਖਜ੍ਜਫਲਕ੍ਖਜ੍ਜਾਦਿਕਂ ਨਾਨਾਖਾਦਨੀਯਂ. ਅਙ੍ਗੁਲੀਹਿਪਿ ਗਹੇਤ੍ਵਾ ਸਾਯਿਤਬ੍ਬਂ ਲੇਹਿਤਬ੍ਬਨ੍ਤਿ ਸਾਯਿਤਂ. ਮਧੁਪ੍ਫਾਣਿਤਾਦਿਕਂ ਸਾਯਨੀਯਂ. ਸਰਸਪ੍ਪਟਿਕੂਲਤਾ ਨਾਮ ਅਤ੍ਤਨੋ ਸਭਾਵਤੋ ਪਟਿਕੂਲਤਾ. ਚਤੁਬ੍ਬਿਧੋਪਿ ਹਿ ਆਹਾਰੋ ਭਾਜਨੇਸੁ ਵਾ ਹਤ੍ਥਮੁਖਾਦੀਸੁ ਵਾ ਯਤ੍ਥ ਯਤ੍ਥ ਸਮ੍ਮਕ੍ਖੇਤਿ, ਲਗ੍ਗਤਿ, ਲਿਮ੍ਪਤਿ. ਤਂ ਉਦਕੇਨ ਧੋਵਿਤਬ੍ਬਂ ਹੋਤਿ. ਅਧੋਤਂ ਪਨ ਤਮ੍ਪਿ ਜੇਗੁਚ੍ਛਨੀਯਂ ਹੋਤਿ. ਆਸਯਤੋ ਪਟਿਕੂਲਤਾ ਨਾਮ ਤਸ੍ਸ ਅਜ੍ਝੋਹਰੀਯਮਾਨਸ੍ਸ ਕਣ੍ਠਾਦੀਸੁ ਠਿਤੇਹਿ ਪਿਤ੍ਤਸੇਮ੍ਹਾਦੀਹਿ ਆਸਯੇਹਿ ਸਮ੍ਮਿਸ੍ਸਨਵਸੇਨ ਪਟਿਕੂਲਤਾ. ਨਿਧਾਨਤੋ ਪਟਿਕੂਲਤਾ ਨਾਮ ਨਿਧਾਨਤੋ ਪਟਿਕੂਲਤਾ. ‘‘ਨਿਧਾਨਂ’’ਤਿ ਚ ਆਮਾਸਯੋ ਵੁਚ੍ਚਤਿ. ਪਕ੍ਕਤੋ ਪਟਿਕੂਲਤਾ ਨਾਮ ਤਸ੍ਸ ਨਿਧਾਨਗਤਸ੍ਸ ਪਰਿਪਕ੍ਕਕਾਲੇ ਗੂਥਮੁਤ੍ਤਾਦਿਭਾਵਪਤ੍ਤਿਤੋ ਪਟਿਕੂਲਤਾ. ਅਪਕ੍ਕਤੋ ਪਟਿਕੂਲਤਾ ਨਾਮ ਤਸ੍ਮਿਂ ਅਪਰਿਪਕ੍ਕੇ ਅਜਿਣ੍ਣੇ ਸਤਿ ਸਰੀਰੇ ਨਾਨਾਰੋਗੁਪ੍ਪਤ੍ਤਿਵਸੇਨ ਪਟਿਕੂਲਤਾ. ਫਲਤੋ ਪਟਿਕੂਲਤਾ ਨਾਮ ਤਸ੍ਸ ਪਰਿਪਕ੍ਕਕਾਲਤੋ ਪਟ੍ਠਾਯ ਸਰੀਰੇ ਕੇਸਲੋਮਾਦੀਨਂ ਪਟਿਕੂਲਰਾਸੀਨਂ ਵਡ੍ਢਨਵਸੇਨ ਪਟਿਕੂਲਤਾ. ਨਿਸ੍ਸਨ੍ਦਤੋ ਪਟਿਕੂਲਤਾ ਨਾਮ ਤਸ੍ਸ ਨ ਵਹਿਦ੍ਵਾਰੇਹਿ ਵਾ ਲੋਮਕੂਪੇਹਿਵਾ ਅਞ੍ਞੇਹਿ ਨਾਨਾਵਣਮੁਖੇਹਿ ਵਾ ਉਗ੍ਘਰਣ ਪਗ੍ਘਰਣਾਦਿਵਸੇਨ ਪਟਿਕੂਲਤਾ. ‘‘ਤਤ੍ਥਾ’’ਤਿ ਤਸ੍ਮਿਂ ਚਤੁਬ੍ਬਿਧੇ ਆਹਾਰੇ. ‘‘ਨਿਕਨ੍ਤਿਪ੍ਪਹਾਨਸਞ੍ਞਾ’’ਤਿ ਕਨ੍ਤਾਰਮਗ੍ਗੇ ਮਾਤਾਪਿਤੂਨਂ ਕਨ੍ਤਾਰਨਿਤ੍ਤਰਣਤ੍ਥਾਯ ਪੁਤ੍ਤ ਮਂਸਖਾਦਨੇ ਵਿਯ ਅਤਿ ਮਨੁਞ੍ਞੇਪਿ ਆਹਾਰੇ ਰਸਤਣ੍ਹਾ ਪਹਾਨਵਸੇਨ ਪਵਤ੍ਤਾ ਸਞ੍ਞਾ. ‘‘ਸਲਕ੍ਖਣਾਦਿਵਸੇਨਾ’’ਤਿ ਸਲਕ੍ਖਣਸਸਮ੍ਭਾਰਾਦਿਵਸੇਨ. ‘‘ਰਾਗੇਨ ਚਰਤੀ’’ਤਿ ਏਤ੍ਥ ‘‘ਰਾਗੇਨਾ’’ਤਿ ਕਰਣਤ੍ਥੇ, ਇਤ੍ਥਮ੍ਭੂਤਲਕ੍ਖਣੇਵਾ ਕਰਣ ਵਚਨਂ. ਤਤ੍ਥ ਕਰਣਤ੍ਥੇਤਾਵ ‘‘ਰਾਗੇਨ ਚਰਤੀ’’ਤਿ ਚਤੂਸੁ ਇਰਿਯਾਪਥੇਸੁ ਯੇਭੂਯ੍ਯੇਨ ਰਾਗਚਿਤ੍ਤੇਨ ਚਰਤਿ. ਰਾਗਚਿਤ੍ਤੇਨ ਨਿਯ੍ਯਮਾਨੋ ਵਿਚਰਤੀਤਿ ਵੁਤ੍ਤਂ ਹੋਤਿ. ਇਤ੍ਥਮ੍ਭੂਤ ਲਕ੍ਖਣੇ ਪਨ ‘‘ਰਾਗੇਨ ਚਰਤੀ’’ਤਿ ਤੇਸੁ ਰਾਗਕੇਤੁ ਰਾਗਧਜੋ ਹੁਤ੍ਵਾ ਵਿਚਰਤੀਤਿ ਵੁਤ੍ਤਂ ਹੋਤਿ. ‘‘ਅਸ੍ਸਾ’’ਤਿ ਤਸ੍ਸਪੁਗ੍ਗਲਸ੍ਸ. ‘‘ਉਸ੍ਸਨ੍ਨੋ’’ਤਿ ਉਗ੍ਗਤੋ ਪਾਕਟਤਰੋ. ਬਹੁਤਰੋਤਿਪਿ ਵਦਨ੍ਤਿ. ‘‘ਪਹਾਨਾਯਾ’’ਤਿ ਏਤ੍ਥ ਇਤਿਸਦ੍ਦੋ ਆਦਿ ਅਤ੍ਥੋ. ਤੇਨ ਕਰੁਣਾ ਭਾਵੇਤਬ੍ਬਾ ਵਿਹਿਂਸਾਯ ਪਹਾਨਾਯ. ਮੁਦਿਤਾ ਭਾਵੇਤਬ੍ਬਾ ਅਰਤਿਯਾ ਪਹਾਨਾਯਾਤਿ ਇਮਂ ਪਾਲ਼ਿਸੇਸਂ ਸਙ੍ਗਣ੍ਹਾਤਿ. ‘‘ਨਿਸ੍ਸਰਣਤਾਵਚਨਤੋ’’ਤਿ ਨਿਸ੍ਸਰਣਞ੍ਹੇਤਂ ਬ੍ਯਾਪਾਦਸ੍ਸ ਯਦਿਦਂ ਮੇਤ੍ਤਾਚੇਤੋ ਵਿਮੁਤ੍ਤਿ. ਨਿਸ੍ਸਰਣਞ੍ਹੇਤਂ ਵਿਹੇਸਾਯਯਦਿਦਂ ਕਰੁਣਾ ਚੇਤੋਵਿਮੁਤ੍ਤਿ. ਨਿਸ੍ਸਰਣਞ੍ਹੇਤਂ ਅਰਤਿਯਾ ਯਦਿਦਂ ਮੁਦਿਤਾ ਚੇਤੋ ਵਿਮੁਤ੍ਤੀਤਿ ਏਵਂ ਨਿਸ੍ਸਰਣ ਭਾਵਵਚਨਤੋ ਚ. ਚਤਸ੍ਸੋ ਅਪ੍ਪਮਞ੍ਞਾਯੋ. ਲ. ਦੋਸ ਚਰਿਤਸ੍ਸਾਤਿ ਵੁਤ੍ਤਂ. ‘‘ਦੋਸ ਵਤ੍ਥੁਤ੍ਤਾਭਾਵਤੋ ਚਾ’’ਤਿ ਦੋਸੁਪ੍ਪਤ੍ਤਿਯਾ ਵਤ੍ਥੁ ਭਾਵਸ੍ਸਕਰਣ ਭਾਵਸ੍ਸ ਅਭਾਵਤੋ ਚ. ਨੀਲਾਦੀਨਿ ਚਤ੍ਤਾਰਿ ਕਸਿਣਾਨਿ ਦੋਸ ਚਰਿਤਸ੍ਸਾਤਿ ਵੁਤ੍ਤਂ. ਕਸ੍ਮਾਪਨੇਤ੍ਥ ਦੋਸ ਚਰਿਤਸ੍ਸ ਉਪੇਕ੍ਖਾ ਸਪ੍ਪਾਯਕਾਰਣਂ ਵਿਸੁਂ ਨ ਵੁਤ੍ਤਨ੍ਤਿ. ਅਞ੍ਞਕਾਰਣਤ੍ਤਾ ਨ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਏਤ੍ਥ ਚਾ’’ਤਿਆਦਿਮਾਹ. ‘‘ਤਿਸ੍ਸੋ’’ਤਿ ਤਿਸ੍ਸੋ ਅਪ੍ਪਮਞ੍ਞਾਯੋ. ‘‘ਮਨਾਪਿਯਰੂਪਾਨੀ’’ਤਿ ਮਨਾਪਿਯਵਣ੍ਣਾਨਿ. ਵਿਕ੍ਖਿਤ੍ਤਚਿਤ੍ਤੋ ਚ ਹੋਤੀਤਿ ਅਧਿਕਾਰੋ. ‘‘ਤਸ੍ਸਾ’’ਤਿ ਪਮਾਦ ਬਹੁਲਸ੍ਸ ਵਿਕ੍ਖਿਤ੍ਤਚਿਤ੍ਤਸ੍ਸ ਚ ਪੁਗ੍ਗਲਸ੍ਸ. ਵੁਤ੍ਤਂ ਸਿਯਾ. ਵਿਸੁਦ੍ਧਿ ਮਗ੍ਗੇ ਪਨ ਏਵਂ ਵੁਤ੍ਤਂ ਨਤ੍ਥੀਤਿ ਅਧਿਪ੍ਪਾਯੋ. ਵਿਭਾਵਨਿਪਾਠੇ. ‘‘ਬੁਦ੍ਧਿਵਿਸਯ ਭਾਵੇਨਾ’’ਤਿ ਵੁਤ੍ਤਂ. ਯਦਿ ਬੁਦ੍ਧਿਵਿਸਯਤ੍ਤਾ ਮੋਹਚਰਿਤਸ੍ਸ ਸਪ੍ਪਾਯਂ. ਬੁਦ੍ਧਿਵਿਸਯਭੂਤਾਨਿ ਮਰਣ ਉਪਸਮਸਞ੍ਞਾ ਵਵਤ੍ਥਾਨਾਨਿਪਿ ਮੋਹਚਰਿਤਸ੍ਸ ਸਪ੍ਪਾਯਾਨਿ ਸਿਯੁਨ੍ਤਿ ਵੁਤ੍ਤਂ ‘‘ਏਵਞ੍ਹਿਸਤੀ’’ਤਿਆਦਿਂ. ‘‘ਭੂਤਕਸਿਣਾਨੀ’’ਤਿ ਪਥਵੀਕਸਿਣਾਦੀਨਿ ਮਹਾਭੂਤਕਸਿਣਾਨਿ. ‘‘ਤਤ੍ਥਾਪੀ’’ਤਿ ਵਾ ਤੇਸੁ ਚਤ੍ਤਾਲੀਸ ਕਮ੍ਮਟ੍ਠਾਨੇਸੁਪਿ. ਏਵਂਸਤਿ ਵਣ੍ਣਕਸਿਣਾਨਂ ਪੁਥੁਲਖੁਦ੍ਦਕਤਾਪਿ ਏਤ੍ਥ ਸਙ੍ਗਹਿਤਾ ਹੋਤੀਤਿ. ‘‘ਮਹਨ੍ਤਂ’’ਤਿ ਵਿਦਤ੍ਥਿ ਚਤੁਰਙ੍ਗੁਲਤੋ ਮਹਨ੍ਤਂ. ਯਦਿ ਏਵਸਦ੍ਦੋ ਯਥਾਰੁਤਮੇਵ ਯੁਜ੍ਜੇਯ੍ਯ. ਏਵਂਸਤਿ ਖੁਦ੍ਦਕਂ ਵਿਤਕ੍ਕਚਰਿਤਸ੍ਸੇਵ ਸਪ੍ਪਾਯਂ, ਨ ਬੁਦ੍ਧਿਚਰਿਤਾਦੀਨਨ੍ਤਿ ਏਵਮਤ੍ਥੋਪਿ ਗਣ੍ਹੇਯ੍ਯ. ਅਥ ਬੁਦ੍ਧਿਚਰਿਤਸ੍ਸ ਪਨ ਅਸਪ੍ਪਾਯਂ ਨਾਮ ਨਤ੍ਥੀਤਿ ਅਟ੍ਠਕਥਾਵਚਨੇਨ ਵਿਰੁਜ੍ਝੇਯ੍ਯਾਤਿ ਇਮਿਨਾ ਅਧਿਪ੍ਪਾਯੇਨ ‘‘ਖੁਦ੍ਦਕਨ੍ਤਿ ਪਦੇਯੁਜ੍ਜਤੀ’’ਤਿ ਵੁਤ੍ਤਂ. ਅਥਵਾ, ਪੁਥੁਲਂ ਮੋਹਚਰਿਤਸ੍ਸ, ਖੁਦ੍ਦਕਂ ਵਿਤਕ੍ਕਚਰਿਤਸ੍ਸੇਵ, ਨਮੋਹਚਰਿਤਸ੍ਸਾਤਿ ਅਤ੍ਥੇ ਸਤਿ, ਬੁਦ੍ਧਿਚਰਿਤਾਦੀਨਂ ਪਨ ਪੁਥੁਲਂਪਿ ਖੁਦ੍ਦਕਂਪਿ ਅਨੁਞ੍ਞਾਤਂ ਹੋਤੀਤਿ ਦਟ੍ਠਬ੍ਬਂ. ‘‘ਸਬ੍ਬਞ੍ਚੇਤਂ’’ਤਿ ਸਬ੍ਬਞ੍ਚ ਏਤਂਚਰਿਤਵਿਭਾਗਵਚਨਂ. ਉਜੁਵਿਪਚ੍ਚਨੀਕਵਸੇਨ ਤੀਸੁ ਅਕੁਸਲ ਚਰਿਤੇਸੁ ਪੁਗ੍ਗਲੇਸੁ. ਵਿਤਕ੍ਕ ਚਰਿਤੇ ਚ ਅਤਿਸਪ੍ਪਾਯਤਾਯ ਸਦ੍ਧਾਬੁਦ੍ਧਿ ਚਰਿਤੇਸੂਤਿ ਅਧਿਪ੍ਪਾਯੋ. ਤੇਨਾਹ ‘‘ਰਾਗਾਦੀਨਂ ਪਨ ਅਵਿਕ੍ਖਮ੍ਭਿਕਾ’’ਤਿਆਦਿਂ.

‘‘ਬੁਦ੍ਧਧਮ੍ਮ. ਲ. ਗੁਣਾਨਂ’’ਤਿ ਏਤ੍ਥ ਗੁਣਸਦ੍ਦੋ ਪੁਬ੍ਬਪਦੇਸੁ ਯੋਜੇਤਬ੍ਬੋ ਬੁਦ੍ਧਗੁਣਾਨਞ੍ਚ ਧਮ੍ਮਗੁਣਾਨਞ੍ਚਾਤਿਆਦਿਨਾ. ‘‘ਤਤ੍ਥਾ’’ਤਿ ਤਸ੍ਮਿਂ ਗੁਣਪਦੇ. ਨ ਤਪ੍ਪੇਤੀਤਿ ਅਤਪ੍ਪਨੀਯੋ. ਤਪ੍ਪਨਂ ਸਨ੍ਤੁਟ੍ਠਿਂ ਨ ਜਨੇਤੀਤਿ ਅਤ੍ਥੋ. ਸਂਵੇਜਨਂ ਸਂਵੇਗਂ ਜਨੇਤੀਤਿ ਸਂਵੇਜਨਿਯੋ. ‘‘ਧਮ੍ਮੋ’’ਤਿ ਸਭਾਵੋ. ਸਂਵੇਜਨਿਯੋ ਧਮ੍ਮੋ ਯਸ੍ਸਾਤਿ ਸਂਵੇਜਨਿਯ ਧਮ੍ਮਂ. ਮਰਣਂ. ‘‘ਪਞ੍ਚਮਜ੍ਝਾਨਸਮਾਧਿਸ੍ਸਾ’’ਤਿ ਰੂਪਾਵਚਰ ਪਞ੍ਚਮਜ੍ਝਾਨ ਸਮਾਧਿਸ੍ਸ. ‘‘ਉਦਯਮਤ੍ਤਾਨੀ’’ਤਿ ਵਡ੍ਢਿਤਮਤ੍ਤਾਨਿ. ‘‘ਤਤ੍ਥਾ’’ਤਿ ਪਟਿਕੂਲਾਰਮ੍ਮਣੇਸੁ. ‘‘ਪੁਬ੍ਬਚ੍ਛਟ੍ਟਕਸ੍ਸਾ’’ਤਿ ਪੁਰਾਣਚ੍ਛਟ੍ਟਕਸ੍ਸ. ਗੂਥਮੁਤ੍ਤਵਿਸ੍ਸਜ੍ਜਨ ਕਸ੍ਸਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਗੂਥਰਾਸਿ ਦਸ੍ਸਨੇ ਵਿਯਾ’’ਤਿ. ਨ ਤੇ ਕਦਾਚਿ ਸੋਮਨਸ੍ਸੇਨ ਵਿਨਾ ਅਪ੍ਪਨਂ ਪਾਪੁਣਨ੍ਤਿ. ਬ੍ਯਾਪਾਦਵਿਹਿਂਸਾ ਅਰਤੀਨਂ ਦੂਰਿਭਾਵੇਨ ਸੋਮਨਸ੍ਸੁਪ੍ਪਤ੍ਤਿਯਾ ਅਤਿਸੁਕਰਤ੍ਤਾ ਪਞ੍ਚਮਜ੍ਝਾਨੇ ਵਿਯ ਸੁਖਸੋਮਨਸ੍ਸਾਨਞ੍ਚ ਅਵਿਕ੍ਖਮ੍ਭਨਤੋ. ‘‘ਉਦਾਸਿਨਪਕ੍ਖੇ’’ਤਿ ਅਜ੍ਝੁਪੇਕ੍ਖਨਪਕ੍ਖੇ. ‘‘ਦਲ਼੍ਹਂ’’ਤਿ ਭੁਸਂ. ‘‘ਵਿਭੂਤਂ’’ਤਿ ਪਾਕਟਂ. ਨਿਮਿਤ੍ਤਂ ਦਲ਼੍ਹਵਿਭੂਤਂ ਕਤ੍ਵਾ ਗਹਣਂ ਦਲ਼੍ਹ ਵਿਭੂਤਗ੍ਗਹਣਂ. ‘‘ਕਸ੍ਸਚਿ ਆਰਮ੍ਮਣਸ੍ਸਾ’’ਤਿ ਬੁਦ੍ਧਗੁਣਾਦਿ ਆਰਮ੍ਮਣਸ੍ਸ. ‘‘ਪਟਿਭਾਗਨਿਮਿਤ੍ਤਂ’’ਤਿ ਏਤ੍ਥ ਪਟਿਭਾਗਸਦ੍ਦੋ ਤਸ੍ਸ ਦਿਸੇ ਪਵਤ੍ਤੋਤਿ ਆਹ ‘‘ਤਾਦਿਸੇ’’ਤਿਆਦਿਂ. ‘‘ਤਂਸਣ੍ਠਾਨੇ’’ਤਿ ਏਤੇਨ ਪਥਵਿਮਣ੍ਡਲਾਦੀਸੁ ਵਿਯ ਸਣ੍ਠਾਨਾਕਾਰੇਨ ਠਿਤੇਸੁ ਸਭਾਵ ਧਮ੍ਮ ਪੁਞ੍ਜੇਸੁ ਏਵ ਤਸ੍ਸਦਿਸਂ ਪਟਿਭਾਗਨਿਮਿਤ੍ਤਂ ਨਾਮ ਸਿਜ੍ਝਤੀਤਿ ਦਸ੍ਸੇਤਿ. ‘‘ਏਵ’’ਨ੍ਤਿ ਸਮਥਸਙ੍ਗਹੇ ਤਾਵ ਦਸਕਸਿਣਾਨਿ, ਦਸਅਸੁਭਾਤਿਆਦਿਨਾ ਵੁਤ੍ਤੇਨ ਵਚਨਕ੍ਕਮੇਨ. ‘‘ਉਗ੍ਗਹਕੋਸਲ੍ਲਂ’’ਤਿ ਭਾਵਨਾਕਮ੍ਮਂ ਆਰਭਿਤੁਕਾਮੇਨ ਭਿਕ੍ਖੁਨਾ ਆਚਰਿਯਸ੍ਸ ਸਨ੍ਤਿਕੇ ਸਬ੍ਬਸ੍ਸ ਕਮ੍ਮਟ੍ਠਾਨ ਵਿਧਾਨਸ੍ਸ ਉਗ੍ਗਹਣਂ ਉਗ੍ਗਹੋ. ਤਸ੍ਮਿਂ ਕੋਸਲ੍ਲਂ ਉਗ੍ਗਹਕੋਸਲ੍ਲਂ. ਅਪਿਚੇਤ੍ਥ. ਸਬ੍ਬਂ ਉਗ੍ਗਹਿਤੁਂ ਅਸਕ੍ਕੋਨ੍ਤੇਨ ਯਂ ਅਤ੍ਤਨਾ ਆਰਭਿਸ੍ਸਤਿ. ਤਸ੍ਸ ਏਕਸ੍ਸ ਵਿਧਾਨਂ ਪਰਿਪੁਣ੍ਣਂ ਉਗ੍ਗਹੇਤਬ੍ਬਂ. ‘‘ਉਗ੍ਗਣ੍ਹਨ੍ਤਸ੍ਸਾ’’ਤਿ ਏਤ੍ਥ ਉਕਾਰੋ ਉਪਰਿ ਅਤ੍ਥੋ. ‘‘ਗਹਣਂ’’ਤਿ ਚ ਯਥਾ ਚਿਤ੍ਤੇ ਅਵਿਨਸ੍ਸਮਾਨਂ ਹੁਤ੍ਵਾ ਲਬ੍ਭਤਿ, ਤਥਾ ਕਤ੍ਵਾ ਚਿਤ੍ਤੇਨ ਗਹਣਨ੍ਤਿ ਦਸ੍ਸੇਤੁਂ ‘‘ਉਪਰੂਪਰੀ’’ਤਿਆਦਿ ਵੁਤ੍ਤਂ. ‘‘ਸਮਨੁਪਸ੍ਸਨ੍ਤਸ੍ਸਾ’’ਤਿ ਸਮ੍ਮਾ ਪੁਨਪ੍ਪੁਨਂ ਚਕ੍ਖੁਨਾ ਦਸ੍ਸਨਸਦਿਸਂ ਕਰੋਨ੍ਤਸ੍ਸ. ਪਰਿਤੋ ਸਮਨ੍ਤਤੋ ਕਰਣਂ ਪਰਿਕਮ੍ਮਂ. ਤਸ੍ਮਿਂ ਨਿਮਿਤ੍ਤਗ੍ਗਹਣਕਮ੍ਮੇ ਯਂ ਯਂ ਕਤ੍ਤਬ੍ਬਵਿਧਾਨਂ ਅਤ੍ਥਿ, ਤਂ ਤਂ ਪਰਿਪੁਣ੍ਣਂ ਕਤ੍ਵਾ ਗਹਣਨ੍ਤਿ ਵੁਤ੍ਤਂ ਹੋਤਿ. ਭਾਵਨਾਤਿ ਵਡ੍ਢਨਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਪੁਨਪ੍ਪੁਨ’’ਨ੍ਤਿਆਦਿਮਾਹ. ‘‘ਨਿਰਨ੍ਤਰਂ ਪਦਹਨ੍ਤਸ੍ਸਾ’’ਤਿ ਰਤ੍ਤਿਦਿਵਂ ਨਿਰਨ੍ਤਰਂ ਆਰਭਨ੍ਤਸ੍ਸ. ਉਗ੍ਗਹ ਨਿਮਿਤ੍ਤੇ ਸਣ੍ਠਾਨਂ ਗਣ੍ਹਨ੍ਤੋਪਿ ਵਣ੍ਣਰੂਪਾਦਿਨਾ ਸਭਾਵ ਧਮ੍ਮੇਨ ਸਹੇਵ ਗਣ੍ਹਾਤਿ. ਪਟਿਭਾਗਨਿਮਿਤ੍ਤੇ ਪਨ ਸਭਾਵਧਮ੍ਮਂ ਮੁਞ੍ਚਿਤ੍ਵਾ ਤਸ੍ਸ ਦਿਸਂ ਨਿਮਿਤ੍ਤ ਪਞ੍ਞਤ੍ਤਿ ਸਙ੍ਖਾਤਂ ਸੁਦ੍ਧਸਣ੍ਠਾਨਮੇਵ ਗਣ੍ਹਾਤਿ. ਏਤ੍ਥ ਸਿਯਾ, ਪਟਿਭਾਗਨਿਮਿਤ੍ਤੇਪਿ ਵਣ੍ਣੋ ਨਾਮ ਸਨ੍ਦਿਸ੍ਸਤਿ ਯੇਵਾਤਿ. ਸਚ੍ਚਂ. ਸੋ ਪਨ ਪਟਿਭਾਗਮਤ੍ਤਂ ਹੋਤਿ. ਨ ਏਕਨ੍ਤਵਣ੍ਣੋ. ਤੇਨਾਹ ‘‘ਤਪ੍ਪਟਿਭਾਗਂ ਵਤ੍ਥੁ ਧਮ੍ਮਵਿਮੁਚ੍ਚਿਤਂ’’ਤਿ. ‘‘ਸਨ੍ਨਿਸਿਨ੍ਨਂ’’ਤਿ ਅਚਲਂ. ‘‘ਪਵੇਸਿਤਂ’’ਤਿ ਭਾਵਨਾਚਿਤ੍ਤਸ੍ਸ ਅਬ੍ਭਨ੍ਤਰੇ ਪਕ੍ਖਿਤ੍ਤਂ ਵਿਯ ਹੋਤੀਤਿ ਅਧਿਪ੍ਪਾਯੋ. ਓਭਾਸਤੀਤਿ ਓਭਾਸੋ. ਓਭਾਸੋ ਹੁਤ੍ਵਾ ਜਾਤਨ੍ਤਿ ਓਭਾਸਜਾਤਂ. ਓਭਾਸਨਂ ਵਾ ਓਭਾਸੋ. ਜਾਤੋ ਓਭਾਸੋ ਅਸ੍ਸਾਤਿ ਓਭਾਸਜਾਤਂ. ‘‘ਪਾਤੇਨ੍ਤੀ’’ਤਿ ਪਟਿਪਾਤੇਨ੍ਤਿ. ਪੁਨ ਉਪ੍ਪਜ੍ਜਨਵਸੇਨ ਉਟ੍ਠਾਤੁਂ ਨ ਦੇਨ੍ਤਿ. ‘‘ਏਤਾਯਾ’’ਤਿ ਕਤ੍ਤੁ ਅਤ੍ਥੇ ਕਰਣਵਚਨਂ. ‘‘ਨਿਮਿਤ੍ਤਰਕ੍ਖਣਵਿਧਾਨਂ’’ਤਿ ਸਮੁਪ੍ਪਨ੍ਨਸ੍ਸ ਨਿਮਿਤ੍ਤਸ੍ਸ ਅਨਸ੍ਸਨਤ੍ਥਾਯ ਸਤ੍ਤਵਿਧੇਹਿ ਪਲਿਬੋਧ ਧਮ੍ਮੇਹਿ ਰਕ੍ਖਣਤ੍ਥਂ. ਕਤਮੇ ਪਨ ਤੇਸਤ੍ਤਵਿਧਾ ਪਲਿਬੋਧਧਮ੍ਮਾ ਨਾਮਾਤਿ. ਇਧ ਅਮ੍ਹੇਹਿ ਵਤ੍ਤਬ੍ਬਂ ਨਤ੍ਥਿ. ਵਿਸੁਦ੍ਧਿ ਮਗ੍ਗੇ ਏਵ ਤੇ ਵੁਤ੍ਤਾਤਿ ਦਸ੍ਸੇਤੁਂ ਗਾਥਮਾਹ. ‘‘ਆਵਾਸੋ’’ਤਿ ਅਸਪ੍ਪਾਯਾਵਾਸੋ. ‘‘ਗੋਚਰੋ’’ਤਿ ਅਸਪ੍ਪਾਯਗੋਚਰਗਾਮੋ. ‘‘ਭਸ੍ਸਂ’’ਤਿ ਅਸਪ੍ਪਾਯਵਚਨਂ. ਏਵਂ ਪੁਗ੍ਗਲਾਦੀਸੁ. ‘‘ਸੇਵੇਥਾ’’ਤਿ ਸੇਵੇਯ੍ਯ. ‘‘ਏਵਞ੍ਹਿਪਟਿਪਜ੍ਜਤੋ’’ਤਿ ਏਵਂਹਿਵਜ੍ਜਿਤਬ੍ਬੇ ਵਜ੍ਜਨਵਸੇਨ ਸੇਵਿਤਬ੍ਬੇ ਸੇਵਨਵਸੇਨ ਪਟਿਪਜ੍ਜਨ੍ਤਸ੍ਸ. ‘‘ਕਾਮਤਣ੍ਹਾਯ ਵਿਸਯਭਾਵਂ ਅਤਿਕ੍ਕਮਿਤ੍ਵਾ’’ਤਿ ਏਤੇਨ ਕਾਮਭੂਮਿ ਕਾਮਭਵਸਮਤਿਕ੍ਕਮੋ, ਰੂਪਭੂਮਿਰੂਪਭਵ ਓਕ੍ਕਮੋ ਚ ਵੁਤ੍ਤੋ. ਵਸਨਂ ਵਸੀ. ਸਤ੍ਤਿ. ਸਾਮਤ੍ਥਿਯਨ੍ਤਿ ਅਤ੍ਥੋ. ਵਸਿਂ ਭੂਤਂ ਪਤ੍ਤਨ੍ਤਿ ਵਸਿਭੂਤਂ. ਵਸੀ ਏਵ ਵਸਿਤਾ. ਯਥਾ ਪਾਰਮਿਤਾਤਿ. ‘‘ਤਤੋ ਵਿਚਾਰਨ੍ਤਿ’’ ਏਤ੍ਥ ਇਤਿਸਦ੍ਦੋ ਆਦਿਅਤ੍ਥੋ. ਤੇਨ ਤਤੋ ਪੀਤਿਂਤਿਆਦਿਂ ਸਙ੍ਗਣ੍ਹਾਤਿ. ਇਚ੍ਛਨ੍ਤਾਨਂ ਤੇਸਂ ਸਬ੍ਬਞ੍ਞੁਬੁਦ੍ਧਾਨਂ. ‘‘ਯਤ੍ਥਾ’’ਤਿ ਯੇਸੁਦ੍ਵੀਸੁਭਵਙ੍ਗੇਸੁ. ‘‘ਭਵਙ੍ਗਚਾਰੇ’’ਤਿ ਭਵਙ੍ਗਪ੍ਪਵਤ੍ਤਿਯਂ. ‘‘ਦਨ੍ਧਾਯਿਤਤ੍ਤਂ’’ਤਿ ਦਨ੍ਧਂ ਹੁਤ੍ਵਾ ਅਯਤਿ ਪਵਤ੍ਤਤੀਤਿ ਦਨ੍ਧਾਯਿਤਂ. ਤਸ੍ਸ ਭਾਵੋ ਦਨ੍ਧਾਯਿਤਤ੍ਤਂ. ‘‘ਠਪੇਤੁਂ’’ਤਿ ਅਧਿਟ੍ਠਾਨਂ ਕਤ੍ਵਾ ਠਪੇਤੁਂ. ਤਤੋ ਅਨਤਿਕ੍ਕਮਿਤੁਂ. ‘‘ਯਤ੍ਥਿਚ੍ਛਕਂ’’ਤਿਆਦੀਨਿ ਕ੍ਰਿਯਾਵਿਸੇਸਨਪਦਾਨਿ. ‘‘ਯਤ੍ਥਿਚ੍ਛਕਂ’’ਤਿ ਯਤ੍ਥ ਯਤ੍ਥ ਠਾਨੇ ਇਚ੍ਛਾਨੁ ਰੂਪਂ. ਯਦਿਚ੍ਛਕਨ੍ਤਿਯਸ੍ਮਿਂ ਯਸ੍ਮਿਂ ਖਣੇ ਇਚ੍ਛਾਨੁ ਰੂਪਂ. ‘‘ਯਾਵਤਿਚ੍ਛਕਂ’’ਤਿ ਯਤ੍ਤਕੇਨ ਪਮਾਣੇਨ ਇਚ੍ਛਾਨੁ ਰੂਪਂ. ‘‘ਵਿਤਕ੍ਕਾਦਿਕਂ ਓਲ਼ਾਰਿਕਙ੍ਗਂ ਪਹਾਨਾਯਾ’’ਤਿ ਏਤ੍ਥ ਕਸ੍ਸ ਬਲੇਨ ਪਹਾਨਂ ਹੋਤਿ. ਤਂ ਤਂ ਵਿਰਾਗ ਭਾਵਨਾ ਬਲੇਨ ਪਹਾਨਂ ਹੋਤਿ. ਕਾਚ ਤਂ ਤਂ ਵਿਰਾਗਭਾਵਨਾ ਨਾਮ ਹੋਤਿ. ਅਜ੍ਝਾਸਯ ਵਿਸੇਸ ਪਰਿਗ੍ਗਹਿਤਾ ਉਪਚਾਰਭਾਵਨਾ ਏਵਾਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਪਥਮਜ੍ਝਾਨਂ ਤਾਵਾ’’ਤਿਆਦਿ ਵੁਤ੍ਤਂ. ‘‘ਆਤਾਪਵੀਰਿਯਂ’’ਤਿ ਯੇਨਵੀਰਿਯੇਨ ਯੋਗਿਨੋ ਅਤ੍ਤਾਨਂ ਵਾ ਕਿਲੇਸ ਧਮ੍ਮੇ ਵਾ ਆਤਾਪੇਨ੍ਤਿ ਪਰਿਤਾਪੇਨ੍ਤਿ. ਤਂ ਆਤਾਪਵੀਰਿਯਂ ਨਾਮ. ਉਗ੍ਘਾਟੀਯਮਾਨਮ੍ਪਿ ਆਕਾਸਮੇਵ ਹੋਤਿ. ਤਂ ਆਰਬ੍ਭ ਉਪਰਿਝਾਨਨ੍ਤਰੁਪ੍ਪਤ੍ਤਿਯਾ ਭਾਵਨਂ ਕਰੋਨ੍ਤਸ੍ਸਪਿ ਪੁਨਪ੍ਪੁਨਂ ਤਮੇਵ ਪਞ੍ਚਮਜ੍ਝਾਨਂ ਉਪ੍ਪਜ੍ਜਤਿ. ਆਰਮ੍ਮਣੇ ਚ ਅਨਤਿਕ੍ਕਨ੍ਤੇ ਝਾਨਂਪਿ ਅਨਤਿਕ੍ਕਨ੍ਤਮੇਵ ਹੋਤੀਤਿ. ‘‘ਤਤ੍ਥਾ’’ਤਿ ਤਸ੍ਮਿਂ ਆਕਾਸਕਸਿਣੇ. ‘‘ਤਦਤਿਕ੍ਕਮਨਸਮ੍ਭਵੋ’’ਤਿ ਕਸਿਣ ਨਿਮਿਤ੍ਤਾਤਿਕ੍ਕਮਨਸਮ੍ਭਵੋ. ‘‘ਯਥਾਦਿਟ੍ਠੇ’’ਤਿ ਝਾਨਚਕ੍ਖੁਨਾ ਦਿਟ੍ਠਪ੍ਪਕਾਰੇ. ‘‘ਸਮ੍ਭਾਵੇਤ੍ਵਾ’’ਤਿ ਥੋਮੇਤ੍ਵਾ. ਸਮ੍ਮਾ ਅਨੁਸ੍ਸਰਣਂ ਸਮਨੁਸ੍ਸਰਣਂ. ‘‘ਇਤਰੇਸਂਪਿ ਵਾ’’ਤਿ ਪੁਥੁਜ੍ਜਨ ਪਣ੍ਡਿਤਾਨਂਪਿ ਵਾ. ਮਰਣ ਸਞ੍ਞਾ ਵਵਤ੍ਥਾਨੇਸੁ ਪਰਿਕਮ੍ਮਞ੍ਚ ਸਮਾਧਿਯਤਿ, ਉਪਚਾਰੋ ਚ ਸਮ੍ਪਜ੍ਜਤੀਤਿ ਯੋਜਨਾ ਤਿਕ੍ਖਪਞ੍ਞਾਨਂ ਪਨ ਪੁਥੁਜ੍ਜਨਾਨਂਪਿ ਸਤਂ ਬੁਦ੍ਧਗੁਣਾਦੀਸੁਪਿ ਉਪਚਾਰ ਸਮ੍ਭਵੋ ਅਟ੍ਠਕਥਾਯਂ ਵੁਤ੍ਤੋਯੇਵ. ‘‘ਸਮਥਜ੍ਝਾਨੇਸੂ’’ਤਿ ਇਦਂ ਅਧਿਕਾਰਵਸੇਨ ਵੁਤ੍ਤਂ. ਵਿਪਸ੍ਸਨਾ ਕਮ੍ਮਂਪਿ ਗਹੇਤਬ੍ਬਮੇਵਾਤਿ ਦਟ੍ਠਬ੍ਬਂ. ਪੁਬ੍ਬੇਦਾਨਂ ਦਤ੍ਵਾ ਇਮਿਨਾ ਪੁਞ੍ਞੇਨ ਆਯਤਿਂ ਝਾਨਾਭਿਞ੍ਞਾਯੋ ਵਾ ਮਗ੍ਗਫਲਾਨਿ ਵਾ ਪਟਿਲਭਿਸ੍ਸਾਮੀਤਿ ਪਤ੍ਥਨਂ ਕਤ੍ਵਾ ਆਗਤੋਪਿ ਕਤਾਧਿਕਾਰੋ ਏਵਾਤਿਪਿ ਵਦਨ੍ਤਿ. ਕਤਮੋ ਪਨ ਕਤਾਧਿਕਾਰੋ ਨਾਮਾਤਿ ਆਹ ‘‘ਆਸਨ੍ਨਭਵੇ’’ਤਿਆਦਿਂ. ਅਟ੍ਠਵਿਧੇਸੁ ਚਤੁਕ੍ਕਨਯਵਸੇਨ, ਨਵਵਿਧੇਸੁ ਪਞ੍ਚਕਨਯਵਸੇਨ ਵੁਤ੍ਤੋਤਿ ਤੇਸਂ ਵਾਦੀਨਂ ਸਾਧਕਵਚਨਂ. ਵਿਚਾਰੇਤ੍ਵਾ ਪਨ ਗਹੇਤਬ੍ਬਂ. ਆਕਾਸ ਕਸਿਣੇਨ ਵਿਨਾ ਅਰੂਪਜ੍ਝਾਨਾਨਿ ਲਭਿਤ੍ਵਾ ਪੁਨ ਅਭਿਞ੍ਞਤ੍ਥਾਯ ਪਰਿਕਮ੍ਮੇਕਤੇ ਆਕਾਸਕਸਿਣੇਪਿ ਕਤ੍ਤਬ੍ਬਤ੍ਤਾ ਤਸ੍ਸ ਅਭਿਞ੍ਞਾਪਾਦਕਤਾ ਸਮ੍ਭਵੋ ਵੁਤ੍ਤੋਤਿ ਅਤ੍ਥਸ੍ਸ ਸਮ੍ਭਵਤੋ. ਪੁਬ੍ਬੇ ਅਭਾਵਿਤ ਭਾਵਨੋਤਿ ਚ ਅਕਤਾਧਿਕਾਰੋਤਿ ਚ ਅਤ੍ਥਤੋ ਏਕਂ. ‘‘ਆਦਿਕਮ੍ਮਿਕੋ’’ਤਿ ਅਭਿਞ੍ਞਾਕਮ੍ਮੇ ਆਦਿਕਮ੍ਮਿਕੋ. ‘‘ਤਾਦਿਸਾਨਂ’’ਤਿ ਪੁਬ੍ਬੇ ਅਕਤਾਧਿਕਾਰਾਨਂ ਅਭਾਵਿਤਭਾਵਨਾਨਂ ਇਦਾਨਿ ਇਦ੍ਧਿਵਿਕੁਬ੍ਬਨਂ ਕਰਿਸ੍ਸਾਮੀਤਿ ਆਰਭਨ੍ਤਾਨਂ ਅਭਿਞ੍ਞਾਕਮ੍ਮੇ ਆਦਿਕਮ੍ਮਿਕਕੁਲਪੁਤ੍ਤਾਨਨ੍ਤਿ ਸਮ੍ਬਨ੍ਧੋ. ‘‘ਇਦ੍ਧਿਵਿਕੁਬ੍ਬਨਂ’’ਤਿ ਚ ਉਪਲਕ੍ਖਣਵਚਨਂ. ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸਵਨਂ ਕਰਿਸ੍ਸਾਮੀਤਿਆਦਿਕਂਪਿ ਗਹੇਤਬ੍ਬਂ. ਇਦਞ੍ਚ ਆਦਿਕਮ੍ਮਿਕਵਿਧਾਨਾਧਿਕਾਰਤ੍ਤਾ ਵੁਤ੍ਤਂ. ਅਭਿਞ੍ਞਾਸੁ ਵਸਿਪਤ੍ਤਾਨਮ੍ਪਿ ਤਂ ਪਞ੍ਚਮਜ੍ਝਾਨਂ ਛਸੁਆਰਮ੍ਮਣੇਸੁ ਯਥਾਰਹਂ ਅਪ੍ਪੇਤਿਯੇਵ. ‘‘ਅਧਿਟ੍ਠਾਤਬ੍ਬਂ’’ਤਿ ਯਥਿਚ੍ਛਿਤ ਨਿਪ੍ਫਤ੍ਤਤ੍ਥਾਯ ਸਤਂ ਹੋਤੁ ਸਹਸ੍ਸਂ ਹੋਤੂਤਿਆਦਿਨਾ ਚਿਤ੍ਤੇਨ ਅਭਿਵਿਧਾਤਬ੍ਬਂ. ਅਭਿਨੀਹਰਿਤਬ੍ਬਨ੍ਤਿ ਵੁਤ੍ਤਂ ਹੋਤਿ. ‘‘ਸਤਂ ਹੋਮਿ, ਸਹਸ੍ਸਂ ਹੋਮੀਤਿ ਵਾ’’ਤਿ ਅਤ੍ਤਾਨਂ ਸਤਂ ਵਾ ਸਹਸ੍ਸਂ ਵਾ ਨਿਮ੍ਮਿਨਨਵਸੇਨ ਵੁਤ੍ਤਂ. ਸੇਸਂ ਪਨ ਅਞ੍ਞਥਾਨਿਮ੍ਮਿਨਨਵਸੇਨ. ਸੋਤੁਂ ਵਾ ਸਦ੍ਦਂ, ਪਸ੍ਸਿਤੁਂ ਵਾ ਰੂਪਂ, ਜਾਨਿਤੁਂ ਵਾ ਪਰਚਿਤ੍ਤਂ. ਅਨੁਸ੍ਸਰਿਤੁਂ ਵਾ ਪੁਬ੍ਬੇਨਿਵੁਤ੍ਥਂ. ਅਟ੍ਠਕਥਾਪਾਠੇ. ‘‘ਅਧਿਟ੍ਠਾਤੀ’’ਤਿ ਅਭਿਞ੍ਞਾਯ ਅਧਿਟ੍ਠਾਤਿ. ਅਭਿਵਿਧਾਤਿ ਨਿਬ੍ਬਤ੍ਤੇਤੀਤਿ ਵੁਤ੍ਤਂ ਹੋਤਿ. ਦੁਵਿਧਂਹਿ ਅਧਿਟ੍ਠਾਨਂ ਪਰਿਕਮ੍ਮੇਨ ਅਧਿਟ੍ਠਾਨਂ ਅਭਿਞ੍ਞਾਯ ਅਧਿਟ੍ਠਾਨਨ੍ਤਿ. ਇਧ ਪਨ ਅਭਿਞ੍ਞਾਯ ਅਧਿਟ੍ਠਾਨਂ ਵੁਤ੍ਤਂ. ‘‘ਅਧਿਟ੍ਠਾਨ ਚਿਤ੍ਤੇਨਾ’’ਤਿ ਅਭਿਞ੍ਞਾਚਿਤ੍ਤੇਨਾਤਿ ਵੁਤ੍ਤਂ ਹੋਤਿ. ‘‘ਪਰਿਕਮ੍ਮਚਿਤ੍ਤਸ੍ਸਾ’’ਤਿ ਪੁਬ੍ਬਭਾਗੇ ਆਵਜ੍ਜਨ ਪਰਿਕਮ੍ਮ ਅਧਿਟ੍ਠਾਨਪਰਿਕਮ੍ਮਚਿਤ੍ਤਸ੍ਸ. ਪਚ੍ਛਿਮਂ ਪਨ ਪਾਦਕਜ੍ਝਾਨ ਸਮਾਪਜ੍ਜਨਂ. ਪਰਿਕਮ੍ਮਚਿਤ੍ਤਸ੍ਸ ਸਮਾਧਾਨਤ੍ਥਾਯਾਤਿ ਵੁਤ੍ਤਂ. ਪਰਿਕਮ੍ਮਚਿਤ੍ਤੇ ਸਮਾਹਿਤੇ ਕਿਂ ਪਯੋਜਨਨ੍ਤਿ ਆਹ ‘‘ਤਥਾਹੀ’’ਤਿਆਦਿਂ. ‘‘ਸੇਸਾਭਿਞ੍ਞਾਸੁਪਿ ਯਥਾਰਹਂ ਵਤ੍ਤਬ੍ਬੋ’’ਤਿ ਦਿਬ੍ਬਸੋਤਪਰਿਕਮ੍ਮੇ ਤੇਨੇਵਪਰਿਕਮ੍ਮ ਸਮਾਧਿਞ੍ਞਾਣਸੋਤੇਨ ਆਸਨ੍ਨੇ ਦਿਬ੍ਬਵਿਸਯਂਪਿ ਸਦ੍ਦਂ ਸੁਣਾਤੀਤਿਆਦਿਨਾ ਵਤ੍ਤਬ੍ਬੋ. ‘‘ਇਤਿ ਕਤ੍ਵਾ’’ਤਿ ਇਤਿ ਮਨਸਿਕਤ੍ਵਾ. ‘‘ਤਂ’’ਤਿ ਪਚ੍ਛਿਮਂ ਪਾਦਕਜ੍ਝਾਨ ਸਮਾਪਜ੍ਜਨਂ. ‘‘ਇਧ ਨਗਹਿਤਨ੍ਤਿ ਦਟ੍ਠਬ੍ਬਂ’’ਤਿ ਥੇਰਸ੍ਸ ਮਤੇਨ ਦਟ੍ਠਬ੍ਬਨ੍ਤਿ ਅਧਿਪ੍ਪਾਯੋ. ਇਧ ਪਨ ਆਦਿਕਮ੍ਮਿਕਵਿਧਾਨਪ੍ਪਧਾਨਤ੍ਤਾ ਪਚ੍ਛਿਮਂਪਿ ਪਾਦਕਜ੍ਝਾਨ ਸਮਾਪਜ੍ਜਨਂ ਵਤ੍ਤਬ੍ਬਮੇਵਾਤਿ. ‘‘ਕਾਯਗਤਿਕਂ ਅਧਿਟ੍ਠਹਿਤ੍ਵਾ’’ਤਿ ਅਯਂ ਕਾਯੋ ਵਿਯ ਇਦਂ ਚਿਤ੍ਤਂਪਿ ਦਨ੍ਧਗਮਨਂ ਹੋਤੂਤਿ ਏਵਂ ਚਿਤ੍ਤਂ ਕਾਯਗਤਿਕਂ ਕਰਣੇਨ ਅਧਿਟ੍ਠਹਿਤ੍ਵਾ. ‘‘ਦਿਸ੍ਸਮਾਨੇਨ ਕਾਯੇਨਾ’’ਤਿ ਦਨ੍ਧਗਮਨੇਨ ਗਚ੍ਛਨ੍ਤਤ੍ਤਾ ਬਹੁਜਨਾਨਮ੍ਪਿ ਦਿਸ੍ਸਮਾਨੇਨ ਰੂਪਕਾਯੇਨ. ਤਬ੍ਬਿ ਪਰੀਤੇਨ ਸੀਘਗਮਨਂ ਵੇਦਿਤਬ੍ਬਂ. ‘‘ਆਰਮ੍ਮਣਮਤ੍ਤਂ ਹੋਤੀ’’ਤਿ ਅਨਿਪ੍ਫਨ੍ਨਰੂਪਂ ਸਨ੍ਧਾਯ ਵੁਤ੍ਤਂ. ‘‘ਆਰਮ੍ਮਣ ਪੁਰੇਜਾਤਂ’’ਤਿ ਨਿਪ੍ਫਨ੍ਨਰੂਪਂ. ਇਤਰਂ ਪਨ ਹਦਯ ਵਤ੍ਥੁਰੂਪਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਪਰਚਿਤ੍ਤ ਵਿਜਾਨਨਟ੍ਠਾਨੇ ਅਟ੍ਠਕਥਾਟੀਕਾਚਰਿਯਾਨਂ ਵਿਚਾਰਣਾ ਅਤ੍ਥੀਤਿ ਤਂ ਦਸ੍ਸੇਤੁਂ ‘‘ਏਤ੍ਥ ਚ ਅਟ੍ਠਕਥਾਯਂ ਤਾਵਾ’’ਤਿਆਦਿ ਵੁਤ੍ਤਂ. ‘‘ਅਟ੍ਠਕਥਾਯਂ’’ਤਿ ਧਮ੍ਮਸਙ੍ਗਣਿ ਅਟ੍ਠਕਥਾਯਂਪਿ ਵਿਸੁਦ੍ਧਿਮਗ੍ਗ ਅਟ੍ਠਕਥਾਯਂਪਿ. ‘‘ਖਣਿਕਵਸੇਨਾ’’ਤਿ ਖਣਿਕਪਚ੍ਚੁਪ੍ਪਨ੍ਨਵਸੇਨ. ਆਵਜ੍ਜਨੇ ਨਿਰੁਦ੍ਧੇਤਿ ਸਮ੍ਬਨ੍ਧੋ. ‘‘ਏਕਂ ਚਿਤ੍ਤਂ’’ਤਿ ਪਰਸ੍ਸ ਚਿਤ੍ਤਂ. ਤਦੇਵ ਅਤੀਤਂ ਚਿਤ੍ਤਂ ਗਣ੍ਹਨ੍ਤਿ. ‘‘ਤਾਨੀ’’ਤਿ ਜਵਨਾਨਿ. ‘‘ਤੇਸਂ’’ਤਿ ਜਵਨਾਨਂ. ‘‘ਤੇਨਾ’’ਤਿ ਆਵਜ੍ਜਨੇਨ. ‘‘ਇਤਰਥਾ’’ਤਿ ਅਞ੍ਞਥਾ ਸਨ੍ਤਤਿ ਅਦ੍ਧਾਵਸੇਨ ਵੁਤ੍ਤਨ੍ਤਿ ਗਹਿਤੇ ਸਤਿ. ਵੁਤ੍ਤੋ ਸਿਯਾ. ਕਸ੍ਮਾ, ਸਨ੍ਤਤਿ ਅਦ੍ਧਾਵਸੇਨ ਪਚ੍ਚੁਪ੍ਪਨ੍ਨੇ ਗਹਿਤੇ ਸਤਿ, ਸਬ੍ਬਾਯ ਏਕਜਵਨਵੀਥਿਯਾ ਏਕਪਚ੍ਚੁਪ੍ਪਨ੍ਨਤ੍ਤਾ. ‘‘ਸਬ੍ਬਾਨਿ ਚਿਤ੍ਤਾਨੀ’’ਤਿ ਜਵਨਚਿਤ੍ਤਾਨਿ. ‘‘ਸਹੁਪ੍ਪਨ੍ਨਾਨੀ’’ਤਿ ਇਦਂ ਸਹੁਪ੍ਪਨ੍ਨਾਨਂਪਿ ਅਤ੍ਥਿਤਾਯ ਵੁਤ੍ਤਂ. ਆਵਜ੍ਜਨਾਦੀਨਿ ਪਨ ਖਣਭੇਦਂ ਨਗਣ੍ਹਨ੍ਤਿ. ਸਬ੍ਬਂ ਪਰਸ੍ਸ ਚਿਤ੍ਤਂ ਏਕਚਿਤ੍ਤਮਿਵ ਗਣ੍ਹਨ੍ਤਿ. ਤਸ੍ਮਾ ਕਾਲਭੇਦੋਪਿ ਨਤ੍ਥੀਤਿ ਦਟ੍ਠਬ੍ਬਂ. ‘‘ਨਿਬ੍ਬਾਨਞ੍ਚਾ’’ਤਿ ਵੁਤ੍ਤਂ, ਕਥਂ ਨਿਬ੍ਬਾਨਂ ਪੁਬ੍ਬੇਨਿਵੁਤ੍ਥਂ ਨਾਮ ਸਿਯਾਤਿ. ਅਤੀਤੇ ਪਰਿਨਿਬ੍ਬੁਤਾਨਂ ਮਗ੍ਗਫਲਾਨਿ ਅਨੁਸ੍ਸਰਣਕਾਲੇ ਤੇਸਂ ਆਰਮ੍ਮਣਭੂਤਂ ਨਿਬ੍ਬਾਨਂਪਿ ਅਨੁਸ੍ਸਰਤਿਯੇਵ. ਤਤ੍ਥ ਤੇਸਂ ਮਗ੍ਗਫਲਾਨਂ ਅਤੀਤਤ੍ਤਾ ਨਿਬ੍ਬਾਨਂਪਿ ਪੁਬ੍ਬੇਨਿਵੁਤ੍ਥਂ ਨਾਮ ਹੋਤੀਤਿ.

‘‘ਯਂ ਯਂ ਅਧਿਟ੍ਠਾਤੀ’’ਤਿ ਯਂ ਯਂ ਸਤਾਦਿਕਂ ਸਂਵਿਧਾਤਿ. ‘‘ਯਥਾ ਯਥਾ ਅਧਿਟ੍ਠਾਤੀ’’ਤਿ ਯੇਨ ਯੇਨ ਆਵਿਭਾਵਾਦਿਕੇਨ ਪਕਾਰੇਨ ਸਂਵਿਧਾਤਿ. ‘‘ਪਕਤਿਵਣ੍ਣਂ’’ਤਿ ਪਕਤਿਸਣ੍ਠਾਨਂ. ‘‘ਤਸ੍ਸੇਵਾ’’ਤਿ ਪਕਤਿਵਣ੍ਣਸ੍ਸੇਵ. ਦੇਵਾਨਂ ਪਸਾਦਸੋਤਨ੍ਤਿ ਸਮ੍ਬਨ੍ਧੋ. ‘‘ਆਰਮ੍ਮਣ ਸਮ੍ਪਟਿਚ੍ਛਨ ਸਮਤ੍ਥਂ’’ਤਿ ਆਰਮ੍ਮਣਸ੍ਸ ਉਪਟ੍ਠਾਨਂ ਸਮ੍ਪਟਿਚ੍ਛਨ ਸਮਤ੍ਥਂ. ਤਦੇਵ ਚੇਤੋਪਰਿਯਞਾਣਨ੍ਤਿਪਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਚੇਤੋ’’ਤਿ ਚਿਤ੍ਤਂ. ‘‘ਪਰਿਚ੍ਛਿਜ੍ਜਾ’’ਤਿ ਇਦਂ ਸਰਾਗਚਿਤ੍ਤਂ, ਇਦਂ ਵਿਰਾਗਚਿਤ੍ਤਨ੍ਤਿਆਦਿਨਾ ਪਰਿਚ੍ਛਿਨ੍ਦਿਤ੍ਵਾ. ‘‘ਗੋਚਰ ਨਿਵਾਸਵਸੇਨਾ’’ਤਿ ਗੋਚਰਂ ਕਤ੍ਵਾ ਨਿਵਸਨਵਸੇਨ. ਸਬ੍ਬਞ੍ਞੁਤਞ੍ਞਾਣਗਤਿਕਂ ਸਬ੍ਬਞ੍ਞੁਬੁਦ੍ਧਾਨਂ ਅਨਾਗਤਂ ਸਞ੍ਞਾਣਨ੍ਤਿ ਅਧਿਪ੍ਪਾਯੋ. ਅਨਾਗਤੇ ਸਤ੍ਤਦਿਵਸਤੋ ਓਰਿਮਾ ਚਿਤ੍ਤਚੇਤਸਿਕ ਧਮ੍ਮਾ ਚੇਤੋਪਰਿਯਞ੍ਞਾਣਸ੍ਸ ਵਿਸਯੋਤਿ ਕਤ੍ਵਾ ਅਨਾਗਤੇ ਸਤ੍ਤਦਿਵਸਤੋਤਿ ਵੁਤ੍ਤਂ. ਪਟ੍ਠਾਯ ਪਵਤ੍ਤਮਾਨਾਤਿ ਪਾਠਸੇਸੋ. ਇਮਸ੍ਮਿਂ ਦਿਵਸੇ ਚ ਅਨਾਗਤਪਕ੍ਖੇ ਸਬ੍ਬਂਪਿ ਆਰਮ੍ਮਣਂ ਪਕਤਿਞਾਣਸ੍ਸ ਵਿਸਯੋਤਿ ਕਤ੍ਵਾ ‘‘ਦੁਤੀਯਦਿਵਸਤੋ ਪਟ੍ਠਾਯਾ’’ਤਿ ਵੁਤ੍ਤਂ. ‘‘ਏਤਂ’’ਤਿ ਏਤਂ ਅਨਾਗਤਂ ਸਞ੍ਞਾਣਂ. ‘‘ਯਥਾ ਚੇਤਂ’’ਤਿ ਯਥਾ ਚ ਏਤਂ ਇਮਸ੍ਮਿਂ ਭਵੇ ਅਨਾਗਤ ਧਮ੍ਮੇ ਜਾਨਾਤਿ. ‘‘ਅਸਾਧਾਰਣਕਾਲਵਸੇਨਾ’’ਤਿ ਅਞ੍ਞੇਨਞਾਣੇਨ ਅਸਾਧਾਰਣ ਕਾਲਵਸੇਨ. ਪਚ੍ਚੁਪ੍ਪਨ੍ਨਭਵੋਹਿ ਅਞ੍ਞਞ੍ਞਾਣਸਾਧਾਰਣੋਤਿ.

ਸਮਥਕਮ੍ਮਟ੍ਠਾਨਾਨੁਦੀਪਨਾ ਨਿਟ੍ਠਿਤਾ.

੧੭੧. ਵਿਪਸ੍ਸਨਾਕਮ੍ਮਟ੍ਠਾਨੇ. ‘‘ਯਥਾਦਿਟ੍ਠਂ’’ਤਿ ਸਕ੍ਕਾਯਦਿਟ੍ਠਿਯਾ ਯਥਾਦਿਟ੍ਠਂ. ਨਿਚ੍ਚਨਿਮਿਤ੍ਤਂ ਨਾਮ ਸਤ੍ਤਪੁਗ੍ਗਲਾਦਿਨਿਮਿਤ੍ਤਮੇਵ. ਸਤ੍ਤਨਿਮਿਤ੍ਤਞ੍ਹਿ ਪਞ੍ਞਤ੍ਤਿ ਧਮ੍ਮਤ੍ਤਾ ਖਣੇਖਣੇ ਖਯਵਯਭੇਦਾਭਾਵਤੋ ਸੋ ਏਵਗਚ੍ਛਤਿ ਸੋ ਏਵ ਤਿਟ੍ਠਤੀਤਿਆਦਿਨਾ ਨਿਚ੍ਚਾਕਾਰਸਣ੍ਠਿਤਂ ਹੋਤੀਤਿ. ‘‘ਧੁਵਨਿਮਿਤ੍ਤਂ’’ਤਿ ਥਿਰਨਿਮਿਤ੍ਤਂ. ਇਦਮ੍ਪਿ ਸੋ ਗਚ੍ਛਨ੍ਤੋਪਿ ਨਨਸ੍ਸਤਿ, ਤਿਟ੍ਠਨ੍ਤੋਪਿ ਨਨਸ੍ਸਤੀਤਿਆਦਿਨਾ ਥਿਰਾਕਾਰਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਸੁਖਨਿਮਿਤ੍ਤਂ’’ਤਿ ਖਣੇਖਣੇ ਖਯਵਯਭੇਦ ਦੁਕ੍ਖਾਨਂ ਅਭਾਵਤੋ ਸੁਖਿਤੋ ਨਿਦ੍ਦੁਕ੍ਖੋ ਨਿਬ੍ਭਯੋਤਿਆਦਿਨਾ ਸੁਖਾਕਾਰਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਅਤ੍ਤਨਿਮਿਤ੍ਤਂ’’ਤਿ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ, ਠਾਤੁਂ ਇਚ੍ਛਨ੍ਤੋ ਤਿਟ੍ਠਤੀਤਿਆਦਿਨਾ ਵਸਵਤ੍ਤਨਾਕਾਰ ਸਣ੍ਠਿਤਂ ਸਤ੍ਤਨਿਮਿਤ੍ਤਮੇਵ. ‘‘ਕਿਰਿਯਾ’’ਤਿ ਭਾਵਨਾਕਿਰਿਯਾ.

ਵਿਸੁਜ੍ਝਤੀਤਿ ਵਿਸੁਦ੍ਧਿ. ਵਿਸੋਧੇਤੀਤਿ ਵਾ ਵਿਸੁਦ੍ਧਿ. ਸੀਲਮੇਵ ਵਿਸੁਦ੍ਧਿ ਸੀਲਵਿਸੁਦ੍ਧੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਨਿਚ੍ਚਸੀਲਮੇਵਾ’’ਤਿਆਦਿਮਾਹ. ਤਤ੍ਥ ਨਿਚ੍ਚਸੀਲਮੇਵ ਉਪਰਿਝਾਨਾਦਿਵਿਸੇਸਾਨਂ ਅਧਿਟ੍ਠਾਨ ਕਿਚ੍ਚਸਾਧਕਤ੍ਤਾ ਇਧ ਅਧਿਪ੍ਪੇਤਨ੍ਤਿ ਵੁਤ੍ਤਂ ‘‘ਨਿਚ੍ਚਸੀਲਮੇਵਾ’’ਤਿ. ਸਮਾਧਿ ਅਧਿਪ੍ਪੇਤੋ. ਵਕ੍ਖਤਿਹਿ ‘‘ਦੁਵਿਧੋਪਿ ਸਮਾਧਿ ਚਿਤ੍ਤਵਿਸੁਦ੍ਧਿ ਨਾਮਾ’’ਤਿ. ਏਤੇਨ ਵਿਸੁਜ੍ਝਤਿ ਏਤਾਯਾਤਿ ਵਿਸੁਦ੍ਧਿ. ਚਿਤ੍ਤਸ੍ਸ ਵਿਸੁਦ੍ਧਿ ਚਿਤ੍ਤਵਿਸੁਦ੍ਧਿ. ਸਮਾਧਿ ਏਵਾਤਿਪਿ ਦੀਪੇਤਿ. ਵਿਸੁਜ੍ਝਨਂ ਵਾ ਵਿਸੁਦ੍ਧਿ. ਚਿਤ੍ਤਸ੍ਸ ਵਿਸੁਦ੍ਧਿ ਚਿਤ੍ਤਵਿਸੁਦ੍ਧਿ. ਅਤ੍ਥਤੋਪਨ ਵਿਸੁਦ੍ਧਚਿਤ੍ਤਮੇਵ ਵੁਚ੍ਚਤੀਤਿਪਿ ਯੁਜ੍ਜਤਿ. ਵਿਸੁਦ੍ਧਿਸਦ੍ਦ ਸਮ੍ਪਨ੍ਨੇ ਹਿ ਸਤਿ, ਚਿਤ੍ਤਵਿਸੁਦ੍ਧਿ ਇਚ੍ਚੇਵ ਵੁਚ੍ਚਤਿ. ਨ ਸਮਾਧਿਵਿਸੁਦ੍ਧੀਤਿ. ‘‘ਸੋਲ਼ਸਵਿਧਂ ਕਙ੍ਖਂ’’ਤਿ ਅਹੋਸਿਂ ਨੁ ਖੋ ਅਹ ਮਤੀਤਮਦ੍ਧਾਨਨ੍ਤਿਆਦਿਨਾ ਸੁਤ੍ਤਨ੍ਤੇਆਗਤਂ ਸੋਲ਼ਸਵਿਧਂ ਵਿਚਿਕਿਚ੍ਛਂ. ‘‘ਅਟ੍ਠਵਿਧਂ ਵਾ ਕਙ੍ਖਂ’’ਤਿ ਸਤ੍ਥਰਿਕਙ੍ਖਤੀਤਿਆਦਿਨਾ ਅਭਿਧਮ੍ਮੇ ਆਗਤਂ ਅਟ੍ਠਵਿਧਂ ਵਿਚਿਕਿਚ੍ਛਂ. ਵਿਸਮਹੇਤੁਦਿਟ੍ਠਿ ਨਾਮ ਸਤ੍ਤਾਨਂ ਉਪ੍ਪਤ੍ਤਿਯਾ ਅਕਾਰਣਮੇਵ ਕਾਰਣਂ ਕਤ੍ਵਾ ਗਹਣਦਿਟ੍ਠਿ. ‘‘ਮਨਸਿਕਾਰਵਿਧੀ’’ਤਿ ਅਨਿਚ੍ਚਲਕ੍ਖਣਾਦੀਸੁ ਮਨਸਿਕਾਰਵਿਧਿ. ਅਨੁਪਾਯਭੂਤੋ ਮਨਸਿਕਾਰੋ ਨਾਮ ਨਿਚ੍ਚਾਦਿਵਸੇਨ ਮਨਸਿਕਾਰੋ. ਅਧਿਮਾਨਵਤ੍ਥੁ ਨਾਮ ਓਭਾਸਾਦੀਨਿ. ‘‘ਮਗ੍ਗਤੋ’’ਤਿ ਮਗ੍ਗਭਾਵੇਨ. ‘‘ਅਮਗ੍ਗਤੋ’’ਤਿ ਅਮਗ੍ਗਭਾਵੇਨ. ‘‘ਦਸ੍ਸਨਞ੍ਚਾ’’ਤਿ ਤੇਸਂਅਧਿਮਾਨਵਤ੍ਥੂਨਂ ਅਨਿਚ੍ਚਤਾਦਿਦਸ੍ਸਨਞ੍ਚ. ਤਮੇਵ ਵਿਸੁਦ੍ਧਿਨਾਮਾਤਿ ਸਮ੍ਬਨ੍ਧੋ. ‘‘ਸਮ੍ਮੋਹਮਲਤੋ’’ਤਿ ਚਤੁਸਚ੍ਚਪ੍ਪਟਿਚ੍ਛਾਦਕ ਸਮ੍ਮੋਹਮਲਤੋ. ਨਨੁ ਦਸ੍ਸਨਨ੍ਤਿ ਞਾਣਮੇਵ. ਏਵਂਸਤਿ, ਞਾਣਨ੍ਤਿ ਵੁਤ੍ਤੇ ਸਿਦ੍ਧੇ ਕਤ੍ਵਾ ਦਸ੍ਸਨਸਦ੍ਦੇਨ ਸਹ ਞਾਣਦਸ੍ਸਨਨ੍ਤਿ ਵੁਤ੍ਤਨ੍ਤਿ ਆਹ ‘‘ਏਤ੍ਥਚਾ’’ਤਿਆਦਿਂ. ‘‘ਸੁਤਮਯਾਦਿਵਸੇਨਾ’’ਤਿ ਸੁਤਮਯ ਚਿਨ੍ਤਾਮਯਵਸੇਨ. ਤਤ੍ਥ ਯਥਾਸੁਤਸ੍ਸ ਪਾਲ਼ਿਧਮ੍ਮਸ੍ਸ ਅਤ੍ਥਮਤ੍ਤਜਾਨਨਂ ਸੁਤਮਯਞ੍ਞਾਣਂ ਨਾਮ. ਅਤ੍ਥਂ ਞਤ੍ਵਾ ਅਤ੍ਥਾਨੁਰੂਪਸ੍ਸ ਸਭਾਵਲਕ੍ਖਣਸ੍ਸ ਚਿਨ੍ਤਨਾਵਸੇਨ ਉਪ੍ਪਨ੍ਨਂ ਞਾਣਂ ਚਿਨ੍ਤਾਮਯਞ੍ਞਾਣਂ ਨਾਮ. ‘‘ਅਨੁਮਾਨਾਦਿਞਾਣਂਪੀ’’ਤਿ ਨਾਮਰੂਪ ਧਮ੍ਮੇਸੁ ਸਭਾਵਾਨੁਮਾਨਞ੍ਞਾਣ ਸਭਾਵਜਾਨਨਞ੍ਞਾਣਂਪਿ. ‘‘ਅਤ੍ਤਪਚ੍ਚਕ੍ਖਞ੍ਞਾਣਮੇਵਾ’’ਤਿ ਅਤ੍ਤਨਾ ਪਚ੍ਚਕ੍ਖਕਰਣਞ੍ਞਾਣਮੇਵ. ‘‘ਸਬ੍ਬਤ੍ਥਾ’’ਤਿ ਮਗ੍ਗਾਮਗ੍ਗਞ੍ਞਾਣਦਸ੍ਸਨਾਦੀਸੁ ਸਬ੍ਬੇਸੁ ਠਾਨੇਸੁ. ਏਤ੍ਥ ਚ ਦਸਸੁ ਵਿਪਸ੍ਸਨਾਞਾਣੇਸੁਪਿ ਵਿਪਸ੍ਸਨਾ ਵਚਨੇਨ ਪਚ੍ਚਕ੍ਖਦਸ੍ਸਨਮੇਵ ਅਧਿਪ੍ਪੇਤਨ੍ਤਿ ਕਤ੍ਵਾ ਸਬ੍ਬਤ੍ਥਗ੍ਗਹਣਂ ਕਤਨ੍ਤਿ ਦਟ੍ਠਬ੍ਬਂ. ਸਮ੍ਮਸਨਞ੍ਞਾਣਤੋ ਪਟ੍ਠਾਯ ਹਿ ਦਸ੍ਸਨਮੇਵ ਅਧਿਪ੍ਪੇਤਂ. ਨ ਸਭਾਵਜਾਨਨਮਤ੍ਤਂ. ਯਤੋ ਚਕ੍ਖੁਨਾ ਪਸ੍ਸਨ੍ਤਸ੍ਸੇਵ ਸੁਟ੍ਠੁ ਪਚ੍ਚਕ੍ਖਤੋ ਦਸ੍ਸਨਤ੍ਥਾਯ ਪੁਨਪ੍ਪੁਨਂ ਭਾਵਨਾ ਕਮ੍ਮਂ ਨਾਮ ਤਤ੍ਥ ਇਚ੍ਛਿਤਬ੍ਬਂ ਹੋਤਿ.

‘‘ਧਮ੍ਮਾ’’ਤਿ ਸਙ੍ਖਤ ਧਮ੍ਮਾ. ਅਨਿਚ੍ਚਤਾ ਏਵ ਲਕ੍ਖਣਨ੍ਤਿ ਅਨਿਚ੍ਚਲਕ੍ਖਣਂ. ਅਨਿਚ੍ਚਾਨਂ ਵਾ ਸਙ੍ਖਤ ਧਮ੍ਮਾਨਂ ਲਕ੍ਖਣਨ੍ਤਿ ਅਨਿਚ੍ਚਲਕ੍ਖਣਨ੍ਤਿਪਿ ਯੁਜ੍ਜਤਿ. ‘‘ਅਭਿਣ੍ਹਸਮ੍ਪਟਿਪ੍ਪੀਲ਼ਨਾਕਾਰੋ’’ਤਿ ਯਥਾ ਸੀਘਸੋਤਾਯਂ ਨਦਿਯਂ ਨਾਵਾਯ ਉਦ੍ਧਂ ਗਚ੍ਛਨ੍ਤਂ ਸਾਨਾਵਾ ਅਭਿਸਙ੍ਖਰਣਦੁਕ੍ਖੇਨ ਅਭਿਣ੍ਹਂ ਸੁਟ੍ਠੁ ਪਟਿਪ੍ਪੀਲ਼ੇਤਿ. ਕਸ੍ਮਾ, ਅਸਤਿ ਅਭਿਸਙ੍ਖਾਰੇ ਤਙ੍ਖਣੇ ਏਵ ਅਧੋਵੁਯ੍ਹਨਤੋ. ਅਧੋਵੁਯ੍ਹਨਞ੍ਹਿ ਨਾਵਾਯ ਪਕਤਿ ਕਿਚ੍ਚਂ. ਉਦ੍ਧਂ ਆਰੂਹਨਂ ਅਭਿਸਙ੍ਖਾਰ ਸਿਦ੍ਧਂ. ਏਵਮੇਵਂ ਸੀਘਸੋਤੇ ਸਂਸਾਰੇ ਅਤ੍ਤਭਾਵੇਨ ਉਦ੍ਧਂ ਖਣਤੋ ਖਣਂ ਦਿਵਸਤੋ ਦਿਵਸਂ ਗਚ੍ਛਨ੍ਤਂ ਪੁਗ੍ਗਲਂ ਅਯਂ ਅਤ੍ਤਭਾਵੋ ਅਭਿਸਙ੍ਖਰਣ ਦੁਕ੍ਖੇਨ ਅਭਿਣ੍ਹਂ ਸੁਟ੍ਠੁ ਪਟਿਪ੍ਪੀਲ਼ੇਤਿ. ਕਸ੍ਮਾ, ਅਸਤਿ ਅਭਿਸਙ੍ਖਾਰੇ, ਪਚ੍ਚਯਵੇਕਲ੍ਲੇ ਚ ਸਤਿ, ਤਙ੍ਖਣੇ ਏਵ ਵਿਪਰਿਣਮਨਤੋ. ਵਿਪਰਿਣਮਨਞ੍ਹਿ ਅਤ੍ਤਭਾਵਸ੍ਸ ਪਕਤਿ ਕਿਚ੍ਚਂ. ਉਦ੍ਧਂਗਮਨਂ ਅਭਿਸਙ੍ਖਾਰ ਸਿਦ੍ਧਂ. ਏਵਂ ਅਭਿਣ੍ਹ ਸਮ੍ਪਟਿਪ੍ਪੀਲ਼ਨਂ ਵੇਦਿਤਬ੍ਬਂ. ਏਤ੍ਥ ਚ ਸਂਸਾਰਸ੍ਸ ਸੀਘਸੋਤਤਾ ਨਾਮ ਅਤ੍ਤਭਾਵਪਰਿਯਾਪਨ੍ਨਾਨਂ ਨਾਮ ਰੂਪਧਮ੍ਮਾਨਂ ਪਵਤ੍ਤਿਨਿਵਤ੍ਤਿ ਸੀਘਤਾ ਵੁਚ੍ਚਤਿ. ਏਤ੍ਥ ਚ ਮਰਣਂ ਦੁਵਿਧਂ ਸਮ੍ਮੁਤਿ ਮਰਣਞ੍ਚ ਪਰਮਤ੍ਥ ਮਰਣਞ੍ਚ. ਤਤ੍ਥ ਸਮ੍ਮੁਤਿ ਮਰਣਂ ਨਾਮ ਸਮ੍ਮੁਤਿ ਸਚ੍ਚਭੂਤਸ੍ਸ ਸਤ੍ਤਸ੍ਸ ਮਰਣਂ. ਤਂ ਏਕਭਵਪਰਿਯਨ੍ਤੇ ਸਨ੍ਦਿਸ੍ਸਤਿ. ਪਰਮਤ੍ਥ ਮਰਣਂ ਨਾਮ ਪਰਮਤ੍ਥ ਸਚ੍ਚਭੂਤਾਨਂ ਨਾਮਰੂਪ ਧਮ੍ਮਾਨਂ ਮਰਣਂ. ਇਦਮੇਵ ਏਕਨ੍ਤਮਰਣਂ, ਸਚ੍ਚਮਰਣਂ, ਸਭਾਵਮਰਣਂ ਹੋਤਿ. ਇਮਸ੍ਮਿਂ ਵਿਪਸ੍ਸਨਾ ਕਮ੍ਮੇ ਇਦਂ ਪਰਮਤ੍ਥ ਮਰਣਂ ਏਵ ਅਨਿਚ੍ਚਤਾਤਿ ਚ ਵੁਚ੍ਚਤਿ. ਧਮ੍ਮਾਨਂ ਸੁਸਾਨਕ੍ਖੇਤ੍ਤਨ੍ਤਿ ਚ ਸੁਸਾਨਭੂਮੀਤਿ ਚ ਵੁਚ੍ਚਤੀਤਿ. ਸਾ ਚ ਸੁਸਾਨਭੂਮਿਨਾਮ ਸਤ੍ਤਾਨਂ ਪਟਿਸਨ੍ਧਿਤੋ ਪਟ੍ਠਾਯ ਸਨ੍ਤਾਨਂ ਅਨੁਬਨ੍ਧਤਿਯੇਵ. ਅਨੁਬਨ੍ਧਤ੍ਤਾ ਚ ਸਤ੍ਤਾਨਂ ਪਟਿਸਨ੍ਧਿਤੋ ਪਟ੍ਠਾਯ ਸੋ ਨਾਮ ਸਮਯੋ ਨਤ੍ਥਿ, ਯਤ੍ਥ ਸਤ੍ਤਾ ਨ ਮਰਨ੍ਤੀਤਿ. ਇਦਞ੍ਚ ਅਨੁਬਨ੍ਧਨਂ ਸਤ੍ਤਾਨਂ ਅਭਿਣ੍ਹਸਮ੍ਪਟਿਪ੍ਪੀਲ਼ਨਮੇਵ ਹੋਤਿ. ਤੇਸਂ ਸਬ੍ਬਿਰਿਯਾਪਥੇਸੁ ਜੀਵਿਤਸ੍ਸ ਚ ਅਙ੍ਗਪਚ੍ਚਙ੍ਗਾਨਞ੍ਚ ਕਾਯਵਚੀਮਨੋ ਕਮ੍ਮਾਨਞ੍ਚ ਸਮ੍ਬਾਧਪਤ੍ਤਿਤੋ. ਅਵਸਵਤ੍ਤਨਾਕਾਰੋ ਪਨ ਅਭਿਸਙ੍ਖਾਰ ਦੁਕ੍ਖਂ ਅਭਿਣ੍ਹਂ ਪਚ੍ਚਨੁਭਵਨ੍ਤਾਨਂ ਪਾਕਟੋਯੇਵ. ਵਸਵਤ੍ਤਨੇਹਿ ਸਤਿ, ਅਭਿਸਙ੍ਖਰਣ ਕਿਚ੍ਚਸ੍ਸ ਓਕਾਸੋ ਨਤ੍ਥਿ. ਵਸਵਤ੍ਤਨੇਨੇਵ ਯਥਿਚ੍ਛਿ ਤਸ੍ਸ ਕਿਚ੍ਚਸ੍ਸ ਸਮ੍ਪਜ੍ਜਨਤੋ. ਲੋਕਸ੍ਮਿਞ੍ਹਿ ਸਬ੍ਬਂਪਿ ਅਭਿਸਙ੍ਖਾਰ ਕਿਚ੍ਚਂ ਨਾਮ ਅਨ੍ਤਮਸੋ ਅਸ੍ਸਾਸਨਪਸ੍ਸਾਸਨ ਕਿਚ੍ਚਂ ਉਪਾਦਾਯ ਧਮ੍ਮਾਨਂ ਵਸਵਤ੍ਤਨਾਭਾਵਤੋ ਕਰੋਨ੍ਤੀਤਿ.

ਅਨਿਚ੍ਚਸ੍ਸ ਧਮ੍ਮਸ੍ਸ ਅਨੁਅਨੁਪਸ੍ਸਨਾਤਿ ਸਮ੍ਬਨ੍ਧੋ. ‘‘ਅਨੁਅਨੁਪਸ੍ਸਨਾ’’ਤਿ ਚ ਞਾਣਚਕ੍ਖੁਨਾ ਪੁਨਪ੍ਪੁਨਂ ਨਿਜ੍ਝਾਯਨਾ ਓਲੋਕਨਾ. ‘‘ਧਮ੍ਮਾਨਂ’’ਤਿ ਪਞ੍ਚਕ੍ਖਨ੍ਧ ਧਮ੍ਮਾਨਂ. ‘‘ਯਤ੍ਥ ਯਤ੍ਥਾ’’ਤਿ ਯਸ੍ਮਿਂ ਯਸ੍ਮਿਂ ਸਰੀਰਙ੍ਗੇ. ‘‘ਪੁਰਾਣ ਧਮ੍ਮਾਨਂ’’ਤਿ ਪੁਰਾਣਾਨਂ ਪਾਤੁਬ੍ਭੂਤਾਨਂ, ਵਡ੍ਢਿਤਾਨਞ੍ਚ ਧਮ੍ਮਕੋਟ੍ਠਾਸਾਨਂ ਅਨ੍ਤਰਧਾਨਂ ਵਯੋ ਵੁਚ੍ਚਤਿ. ਵਿਪਸ੍ਸਨਾ ਕਮ੍ਮਂ ਪਤ੍ਵਾ ਖਣਿਕਵਸੇਨ ਏਕੇਕਧਮ੍ਮਵਿਭਾਗਵਸੇਨ ਚ ਅਨੁਪਸ੍ਸਨਾ ਕਿਚ੍ਚਂ ਨਤ੍ਥੀਤਿ ਆਹ ‘‘ਸਮੂਹ ਸਨ੍ਤਤਿਵਸੇਨ ਪਨਾ’’ਤਿ. ਏਕੇਕਧਮ੍ਮਵਿਭਾਗਵਸੇਨ ਅਨੁਪਸ੍ਸਨਾਪਿ ਪਨ ਪਕਤਿਯਾ ਸੁਪਾਕਟੇਸੁ ਚਿਤ੍ਤਵੇਦਨਾਦੀਸੁ ਇਚ੍ਛਿਤਬ੍ਬਾਯੇਵ. ‘‘ਅਨਿਚ੍ਚਤਾਯ ਪਰਮਾਕੋਟੀ’’ਤਿ ਤਤੋ ਉਤ੍ਤਰਿ ਅਨਿਚ੍ਚਤਾ ਨਾਮ ਨਤ੍ਥੀਤਿ ਅਧਿਪ੍ਪਾਯੋ. ਧਮ੍ਮਾਨਂ ਤਥਾ ਤਥਾ ਭਾਯਿਤਬ੍ਬਪ੍ਪਕਾਰੋ ਨਾਮ ਪਞ੍ਚਕ੍ਖਨ੍ਧੇ ‘ਅਨਿਚ੍ਚਤੋ, ਦੁਕ੍ਖਤੋ, ਰੋਗਤੋ, ਗਣ੍ਡਤੋ, ਸਲ੍ਲਤੋ, ਅਘਤੋ, ਆਬਾਧਤੋ, ਤਿਆਦਿਨਾ ਵੁਤ੍ਤੋ ਭਾਯਿਤਬ੍ਬਪ੍ਪਕਾਰੋ. ਤਸ੍ਸ ਸਮਨੁਪਸ੍ਸਨਾਞਾਣਂ ਭਯਞਾਣਂ. ਏਤੇਨ ਅਪਾਯਦੁਕ੍ਖ ਸਂਸਾਰ ਦੁਕ੍ਖਭੀਰੁਕੇਹਿ ਜਨੇਹਿ ਭਾਯਿਤਬ੍ਬਨ੍ਤਿ ਭਯਂ. ਤੇ ਵਾ ਭਾਯਨ੍ਤਿ ਏਤਸ੍ਮਾਤਿ ਭਯਂ. ਭਯਸ੍ਸ ਸਮਨੁ ਪਸ੍ਸਨਾਞਾਣਂ ਭਯਞਾਣਨ੍ਤਿ ਇਮਮਤ੍ਥਂ ਦਸ੍ਸੇਤਿ. ‘‘ਕਿਞ੍ਚਿਭਯਵਤ੍ਥੁਂ’’ਤਿ ਸੀਹਬ੍ਯਗ੍ਘਾਦਿਕਂ ਭਯਵਤ੍ਥੁਂ. ‘‘ਪਟਿਸ੍ਸਰਣੇ’’ਤਿ ਗੁਹਾਲੇਣਾਦਿਕੇ ਪਟਿਸ੍ਸਰਣੇ. ‘‘ਤੇਸਂ’’ਤਿ ਭਿਜ੍ਜਨਸਭਾਵਾਨਂ ਧਮ੍ਮਾਨਂ. ‘‘ਤੇਹੀ’’ਤਿ ਭਿਜ੍ਜਨਸਭਾਵੇਹਿ. ਉਕ੍ਕਣ੍ਠਤਾ ਨਾਮ ਚਿਤ੍ਤਸ੍ਸ ਵਿਰੁਦ੍ਧਤਾ ਨਿਕ੍ਖਮਾਭਿਮੁਖਤਾ. ‘‘ਚਤ੍ਤਾਲੀਸਾਯ ਆਕਾਰੇਹੀ’’ਤਿ ਪਞ੍ਚਕ੍ਖਨ੍ਧੇ ‘ਅਨਿਚ੍ਚਤੋ, ਦੁਕ੍ਖਤੋ, ਰੋਗਤੋ, ਗਣ੍ਡਤੋ, ਸਲ੍ਲਤੋ, ਅਘਤੋ, ਆਬਾਧਤੋ, ਪਰਤੋ, ਪਲੋਕਤੋ, ਈਤਿਤੋ,. ਉਪਦ੍ਦਵਤੋ, ਭਯਤੋ, ਉਪਸਗ੍ਗਤੋ, ਚਲਤੋ, ਪਭਙ੍ਗੁਤੋ, ਅਦ੍ਧੁਵਤੋ, ਅਤਾਣਤੋ, ਅਲੇਣਤੋ, ਅਸ੍ਸਰਣਤੋ, ਰਿਤ੍ਤਤੋ,. ਤੁਚ੍ਛਤੋ, ਸੁਞ੍ਞਤੋ, ਅਨਤ੍ਤਤੋ, ਆਦੀਨਵਤੋ, ਵਿਪਰਿਣਾਮ ਧਮ੍ਮਤੋ, ਅਸਾਰਕਤੋ, ਅਘਮੂਲਤੋ, ਵਧਕਤੋ, ਵਿਭਵਤੋ, ਸਾਸਵਤੋ,. ਸਙ੍ਖਤਤੋ, ਮਾਰਾਮਿਸਤੋ, ਜਾਤਿਧਮ੍ਮਤੋ, ਜਰਾਧਮ੍ਮਤੋ, ਬ੍ਯਾਧਿਧਮ੍ਮਤੋ, ਮਰਣਧਮ੍ਮਤੋ, ਸੋਕਪਰਿਦੇਵਧਮ੍ਮਤੋ, ਦੁਕ੍ਖਦੋਮਨਸ੍ਸ ਧਮ੍ਮਤੋ, ਉਪਾਯਾਸ ਧਮ੍ਮਤੋ, ਸਂਕਿਲੇਸਿਕ ਧਮ੍ਮਤੋ, ਪਸ੍ਸਨ੍ਤੋ ਸੁਞ੍ਞਤੋ ਲੋਕਂ ਅਵੇਕ੍ਖਤੀਤਿ ਏਵਂ ਮਹਾਨਿਦ੍ਦੇਸੇ ਮੋਘਪਞ੍ਹਨਿਦ੍ਦੇਸੇ ਆਗਤੇਹਿ ਚਤ੍ਤਾਲੀਸਾਯ ਆਕਾਰੇਹਿ. ਤਤ੍ਥ ਪਞ੍ਚਕ੍ਖਨ੍ਧੇ ਅਨਿਚ੍ਚਤੋ ਪਸ੍ਸਨ੍ਤੋਤਿਆਦਿਨਾ ਯੋਜੇਤਬ੍ਬਂ. ‘‘ਅਨਿਚ੍ਚਤੋ’’ਤਿ ਚ ਅਨਿਚ੍ਚਭਾਵੇਨਾਤਿ ਅਤ੍ਥੋ. ਸਬ੍ਬੇਪਿ ਪਞ੍ਚਕ੍ਖਨ੍ਧਾ ਅਨਿਚ੍ਚਾ ਏਵਾਤਿ ਪਸ੍ਸਨ੍ਤੋਤਿ ਵੁਤ੍ਤਂ ਹੋਤਿ. ਕਥਂ ਪਨ ਅਨਿਚ੍ਚਤੋ ਪਸ੍ਸਨ੍ਤੋ ਸੁਞ੍ਞਤੋ ਲੋਕਂ ਅਵੇਕ੍ਖਤੀਤਿ. ਨਿਚ੍ਚਗੁਣ ਸੁਞ੍ਞਤਾਯ ਸੁਞ੍ਞਤੋ ਪਞ੍ਚਕ੍ਖਨ੍ਧਭੂਤਂ ਲੋਕਂ ਅਵੇਕ੍ਖਤਿ. ਸੇਸਪਦੇਸੁਪਿ ਏਸੇਵਨਯੋ. ਤਤ੍ਥ ‘‘ਅਨਿਚ੍ਚਾ ਏਵਾ’’ਤਿ ਪਟਿਸਨ੍ਧਿਕ੍ਖਣਤੋ ਪਟ੍ਠਾਯ ਯਦਾਕਦਾਚਿ ਮਰਣ ਧਮ੍ਮਤ੍ਤਾ ਅਨਿਚ੍ਚਾ ਏਵ. ‘‘ਦੁਕ੍ਖਾ ਏਵਾ’’ਤਿ ਅਨਿਚ੍ਚ ਧਮ੍ਮਤ੍ਤਾਯੇਵ ਦੁਕ੍ਖਾ ਏਵ. ਯਦਨਿਚ੍ਚਂ, ਤਂ ਦੁਕ੍ਖਂਤਿਹਿ ਵੁਤ੍ਤਂ. ਦੁਕ੍ਖ ਸਚ੍ਚਧਮ੍ਮਤ੍ਤਾ ਵਾ. ‘‘ਰੋਗਾ ਏਵਾ’’ਤਿ ਰੋਗਜਾਤਿਕਤ੍ਤਾ ਰੋਗਾ ਏਵ. ਯੇਹਿ ਕੇਚਿ ਲੋਕੇ ਚਕ੍ਖੁ ਰੋਗਾਦਿਕਾ ਅਨੇਕਸਹਸ੍ਸਾ ਰੋਗਾ ਨਾਮ ਸਨ੍ਦਿਸ੍ਸਨ੍ਤਿ. ਸਬ੍ਬੇਤੇ ਇਮੇਪਞ੍ਚਕ੍ਖਨ੍ਧਾ ਏਵ. ਇਤੋ ਅਞ੍ਞੋਕੋਚਿ ਰੋਗੋ ਨਾਮ ਨਤ੍ਥਿ. ਤਸ੍ਮਾ ਤੇ ਏਕਨ੍ਤੇਨ ਰੋਗਜਾਤਿਕਾ ਏਵਾਤਿ. ਅਪਿ ਚ, ਦੁਕ੍ਖਸਚ੍ਚ ਧਮ੍ਮਤ੍ਤਾਤੀਹਿ ਦੁਕ੍ਖਤਾਹਿ ਚਤੂਹਿ ਦੁਕ੍ਖਟ੍ਠੇਹਿ ਚ ਅਭਿਣ੍ਹਸਮ੍ਪਟਿਪ੍ਪੀਲ਼ਨਤੋ ਰੁਜ੍ਜਨਟ੍ਠੇਨ ਰੋਗਾ ਏਵ. ਤਤ੍ਥ ‘‘ਤੀਹਿ ਦੁਕ੍ਖਤਾਹੀ’’ਤਿ ਦੁਕ੍ਖਦੁਕ੍ਖਤਾ ਸਙ੍ਖਾਰ ਦੁਕ੍ਖਤਾ ਵਿਪਰਿਣਾਮ ਦੁਕ੍ਖਤਾਤਿ ਇਮਾਹਿ ਤੀਹਿਦੁਕ੍ਖਤਾਹਿ. ‘‘ਚਤੂਹਿ ਦੁਕ੍ਖਟ੍ਠੇਹੀ’’ਤਿ ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ,ਤਿ ਇਮੇਹਿ ਚਤੂਹਿ ਦੁਕ੍ਖਟ੍ਠੇਹਿ. ਦੁਕ੍ਖ ਕਿਚ੍ਚੇਹੀਤਿ ਅਤ੍ਥੋ. ਏਸਨਯੋ ਗਣ੍ਡਾਦੀਸੁ. ਤਤ੍ਥ ਗਣ੍ਡੋਨਾਮ ਪੀਲ਼ਕਾਬਾਧੋ. ਸਲ੍ਲਂ ਨਾਮ ਵਿਜ੍ਝਨਟ੍ਠੇਨ ਕਿਲੇਸ ਸਲ੍ਲਞ੍ਚ ਦੁਕ੍ਖਸਲ੍ਲਞ੍ਚ. ਅਘਨ੍ਤਿ ਨਿਰਤ੍ਥਕਂ. ਇਮੇ ਚ ਖਨ੍ਧਾ ਵਿਪਤ੍ਤਿਪਰਿਯੋਸਾਨਤ੍ਤਾ ਨਿਰਤ੍ਥਕਾ ਏਵ ਹੋਨ੍ਤਿ. ਸਬ੍ਬਾਸਮ੍ਪਤ੍ਤਿਯੋ ਵਿਪਤ੍ਤਿਪਰਿਯੋਸਾਨਾਤਿ ਹਿ ਵੁਤ੍ਤਂ. ਅਵਿਸ੍ਸਾਸਿਕਟ੍ਠੇਨ ਪਰੇ ਏਵ. ਨ ਹਿ ਤੇ ਏਤਂ ਮਮ, ਏਸੋ ਹਮਸ੍ਮਿ, ਏਸੋ ਮੇ ਅਤ੍ਤਾਤਿ ਏਵਂ ਵਿਸ੍ਸਾਸਂ ਅਰਹਨ੍ਤਿ. ਤਥਾ ਵਿਸ੍ਸਾਸਂ ਕਰੋਨ੍ਤਸ੍ਸ ਨਾਨਾਦੁਕ੍ਖੇਹਿ ਨਿਚ੍ਚਂ ਵਿਹਿਂਸਨਤੋ. ਪਟਿਸਨ੍ਧਿਤੋ ਪਟ੍ਠਾਯ ਯਦਾਕਦਾਚਿ ਪਲੁਜ੍ਜਨਧਮ੍ਮਤ੍ਤਾ ਪਲੋਕਧਮ੍ਮਾ ਏਵ. ‘‘ਈਤੀ’’ਤਿ ਅਨ੍ਤਰਾਯੋ ਵੁਚ੍ਚਤਿ. ਖਨ੍ਧਾ ਅਨ੍ਤਰਾਯ ਜਾਤਿਕਾ ਏਵਾਤਿ ਵੁਤ੍ਤਂ ਹੋਤਿ. ਅਜ੍ਝਤ੍ਤਭਾਵਂ ਉਪਗਨ੍ਤ੍ਵਾ ਦੁਤਤ੍ਤਾ ਵਿਬਾਧਕਤ੍ਤਾ ਉਪਦ੍ਦਵਾ ਏਵ. ਭਾਯਿਤਬ੍ਬਤ੍ਤਾ ਭਯਾ ਏਵ. ਅਨਤ੍ਤਾ ਏਵ ਸਮਾਨਾ ਅਜ੍ਝਤ੍ਤਭਾਵਂ ਉਪਗਨ੍ਤ੍ਵਾ ਸਜ੍ਜਨਤੋ ਲਗ੍ਗਨਤੋ ਦੁਮ੍ਮੋ ਚਯਤੋ ਉਪਸਗ੍ਗਾ ਏਵ. ਨਿਚ੍ਚਕਾਲਂ ਲੋਕਧਮ੍ਮੇਹਿ ਚਲਨਤ੍ਤਾ ਵਿਪ੍ਫਨ੍ਦਨਤ੍ਤਾ ਚਲਾਏਵ. ਨਾਨਪ੍ਪਕਾਰੇਨ ਭਞ੍ਜਨਧਮ੍ਮਤ੍ਤਾ ਪਭਙ੍ਗੁਨੋ ਏਵ. ਖਣਮਤ੍ਤਮ੍ਪਿ ਅਥਿਰਤ੍ਤਾ ਅਦ੍ਧੁਵਾ ਏਵ. ਜਰਾਮਰਣਾਦਿਤੋ ਅਪਾਯਵਿਨਿਪਤਨਾਦਿਤੋ ਭਯਤੋ ਤਾਯਤਿ ਰਕ੍ਖਤੀਤਿ ਤਾਣਂ. ਤੇ ਚ ਖਨ੍ਧਾ ਕਸ੍ਸਚਿਤਾਣਾ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਤਾਣਂ ਨਾਮ ਨਤ੍ਥਿ. ਤਸ੍ਮਾ ਅਤਾਣਾ ਏਵ. ਭਯਤੋ ਭੀਰੁਕਾ ਜਨਾ ਲੀਯਨ੍ਤਿ ਨਿਲੀਯਨ੍ਤਿ ਏਤ੍ਥਾਤਿ ਲੇਣਂ. ਤੇ ਚ ਕਸ੍ਸਚਿਲੇਣਾ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਲੇਣਂ ਨਾਮ ਨਤ੍ਥਿ. ਤਸ੍ਮਾ ਅਲੇਣਾ ਏਵ. ਭਯਂ ਸਰਤਿਹਿਂਸਤੀਤਿ ਸਰਣਂ. ਤੇ ਚ ਕਸ੍ਸਚਿਸਰਣਂ ਨ ਹੋਨ੍ਤਿ. ਤੇਸਞ੍ਚ ਕਿਞ੍ਚਿਸਰਣਂ ਨਾਮ ਨਤ੍ਥਿ. ਤਸ੍ਮਾ ਅਸ੍ਸਰਣਾ ਏਵ. ਨਿਚ੍ਚਤਾਦੀਹਿ ਸਬ੍ਬੇਹਿ ਸੋਭਣਗੁਣੇਹਿ ਸਬ੍ਬਸੋ ਰਹਿਤਤ੍ਤਾ ਤੁਚ੍ਛਤ੍ਤਾ ਸੁਞ੍ਞਤ੍ਤਾਰਿਤ੍ਤਾ ਏਵ. ਤੁਚ੍ਛਾ ਏਵ. ਸੁਞ੍ਞਾ ਏਵ. ਅਤ੍ਤਾ ਵੁਚ੍ਚਤਿ ਯਸ੍ਸਕਸ੍ਸਚਿ ਕੋਚਿ ਸਾਰਭੂਤੋ ਪਟਿਸ੍ਸਰਣੋ. ਤੇ ਸਯਞ੍ਚ ਕਸ੍ਸਚਿ ਅਤ੍ਤਾਨ ਹੋਨ੍ਤਿ. ਅਤ੍ਤਨੋ ਚ ਕੋਚਿ ਅਤ੍ਤਾਨਾਮ ਨਤ੍ਥਿ. ਤਸ੍ਮਾ ਅਨਤ੍ਤਾ ਏਵ. ਅਨਿਚ੍ਚਤਾਦੀਹਿ ਆਦੀਨਵੇਹਿ ਦੋਸੇਹਿ ਸਮ੍ਪੁਣ੍ਣਤ੍ਤਾ ਆਦੀਨਵਾ ਏਵ. ਵਿਪਰਿਣਾਮ ਸਭਾਵਤ੍ਤਾ ਵਿਪਰਿਣਾਮਾ ਏਵ. ਸਾਰਭੂਤਸ੍ਸ ਕਸ੍ਸਚਿ ਅਧਿਟ੍ਠਾਨਸ੍ਸ ਅਭਾਵਾ ਅਸਾਰਾਏਵ. ਅਘਸ੍ਸ ਸਬ੍ਬਨਿਰਤ੍ਥਕਸ੍ਸ ਪਤਿਟ੍ਠਾਨਤ੍ਤਾ ਅਘਮੂਲਾ ਏਵ. ਤੇ ਸਯਂ ਮਰਣ ਧਮ੍ਮਸਮਙ੍ਗੀਨੋ ਹੁਤ੍ਵਾ ਤੇਨ ਮਰਣਸਤ੍ਥੇਨ ਮਰਣਾਵੁਧੇਨ ਸਂਸਾਰੇ ਸਤ੍ਤਾਨਂ ਨਿਚ੍ਚਂ ਮਾਰਕਤ੍ਤਾ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਤ੍ਤਾ ਵਧਕਾ ਏਵ. ਨਿਚ੍ਚਸੁਖਹਿਤ ਵੁਡ੍ਢਿਵਿਗਤਤ੍ਤਾ ਵਿਭਵਾ ਏਵ. ਆਸਵੇਹਿ ਪਰਿਗ੍ਗਹਿਤਤ੍ਤਾ ਸਾਸਵਾ ਏਵ. ਨਿਚ੍ਚਕਾਲਂ ਪਚ੍ਚਯਾਯਤ੍ਤਵੁਤ੍ਤਿਕਤ੍ਤਾ ਸਙ੍ਖਤਾ ਏਵ. ਕਿਲੇਸਮਾਰਮਚ੍ਚੁਮਾਰਾਨਂ ਆਮਿਸਾਹਾਰਤ੍ਤਾ ਮਾਰਾਮਿਸਾ ਏਵ. ਅਨਿਚ੍ਛਨ੍ਤਸ੍ਸੇਵ ਸਤੋ ਚਕ੍ਖੁਰੋਗਾਦਿਭਾਵੇਨ ਅਪਾਯਭਵਾਦਿਭਾਵੇਨ ਜਾਤਸਭਾਵਤ੍ਤਾ ਜਾਤਿਧਮ੍ਮਾ ਏਵ. ਅਨਿਚ੍ਛਨ੍ਤਸ੍ਸੇਵ ਸਤੋ ਹਾਯਨਮਰਣਸਭਾਵਤ੍ਤਾ ਜਰਾਮਰਣ ਧਮ੍ਮਾ ਏਵ. ਸੋਕਾਦੀਨਂ ਵਤ੍ਥੁਭਾਵੇਨ ਧਾਰਣਤ੍ਤਾ ਸੋਕਾਦਿ ਧਮ੍ਮਾ ਏਵ. ਤਣ੍ਹਾ ਸਂਕਿਲੇਸ ਦਿਟ੍ਠਿਸਂਕਿਲੇਸ ਦੁਚ੍ਚਰਿਤ ਸਂਕਿਲੇਸੇਹਿ ਨਿਯੁਤ੍ਤਤ੍ਤਾ ਸਂਕਿਲੇਸਿਕ ਧਮ੍ਮਾ ਏਵਾਤਿ. ਤੇਨ ਵੁਤ੍ਤਂ ‘‘ਚਤ੍ਤਾਲੀਸਾਯ ਆਕਾਰੇਹੀ’’ਤਿ. ‘‘ਪਟਿਸਙ੍ਖਾਨਵਸੇਨਾ’’ਤਿ ਪਰਿਵੀਮਂਸਨਵਸੇਨ.‘‘ਨਿਕਨ੍ਤਿਯਾ’’ਤਿ ਨਿਕਨ੍ਤਿਤਣ੍ਹਾਯ. ‘‘ਪਰਿਯਾਦਿਨ੍ਨਾਯਾ’’ਤਿ ਸੁਕ੍ਖਭਾਵਪਤ੍ਤਾਯ. ‘‘ਭਯਞ੍ਚਾ’’ਤਿ ਭਯਞਾਣਵਸੇਨ ਉਪ੍ਪਨ੍ਨਂ ਓਤ੍ਤਪ੍ਪਭਯਞ੍ਚ.

ਲੋਕੇ ਅਤ੍ਤਜੀਵਾ ਨਾਮ ਸਤ੍ਤਾਨਂ ਅਜ੍ਝਤ੍ਤ ਧਮ੍ਮੇਸੁ ਸਾਰਧਮ੍ਮਾ ਹੋਨ੍ਤਿ. ਤੇਸੁ ਵਿਗਤੇਸੁ ਸੇਸਧਮ੍ਮਾ ਨਿਸ੍ਸਤ੍ਤ ਨਿਜ੍ਜੀਵਭਾਵਂ ਪਤ੍ਵਾ ਫੇਗ੍ਗੁਭੂਤਾ ਕਚਵਰਭੂਤਾਤਿ ਲੋਕਸ੍ਸ ਅਭਿਮਾਨੋ. ਤੇ ਚ ਅਤ੍ਤਜੀਵਾ ਨਾਮ ਸਬ੍ਬਸੋ ਨਤ੍ਥੀਤਿ ਦਿਟ੍ਠੇ ਖਨ੍ਧੇਸੁ ਕਚਵਰਭਾਵਦਸ੍ਸਨਂ ਅਤ੍ਤਜੀਵ ਸੁਞ੍ਞਤਾ ਦਸ੍ਸਨਂ ਨਾਮ. ‘‘ਵਿਮੁਚ੍ਚਮਾਨੋ’’ਤਿ ਏਤੇਨ ਵਿਮੁਚ੍ਚਤੀਤਿ ਵਿਮੋਕ੍ਖੋਤਿ ਅਤ੍ਥਂ ਦਸ੍ਸੇਤਿ. ਵਿਮੁਚ੍ਚਨ੍ਤਿ ਏਤੇਨਾਤਿ ਵਿਮੋਕ੍ਖੋਤਿਪਿ ਯੁਜ੍ਜਤਿ. ‘‘ਨਿਮਿਤ੍ਤਾਨੀ’’ਤਿ ਵਿਪਲ੍ਲਾਸਧਮ੍ਮੇਹਿ ਨਿਮ੍ਮਿਤਾਨਿ ਨਿਚ੍ਚਨਿਮਿਤ੍ਤ ਸੁਖਨਿਮਿਤ੍ਤ ਅਤ੍ਤਨਿਮਿਤ੍ਤ ਜੀਵਨਿਮਿਤ੍ਤਾਨਿ. ਸਤ੍ਤ ਪੁਗ੍ਗਲ ਇਤ੍ਥਿ ਪੁਰਿਸ ਹਤ੍ਥ ਪਾਦ ਸੀਸ ਗੀਵਾਦੀਨਿ ਨਿਮਿਤ੍ਤਾਨਿ ਚ. ਤਤ੍ਥ ਸਙ੍ਖਾਰਾਨਂ ਖਣਿਕ ਧਮ੍ਮਤ੍ਤਾ ਅਨਿਚ੍ਚਾਨਂਯੇਵ ਸਤਂ ਸਨ੍ਤਤਿ ਘਨੇਨ ਪਟਿਚ੍ਛਨ੍ਨਤ੍ਤਾ ਹਿਯ੍ਯੋਪਿ ਸੋ ਏਵ, ਅਜ੍ਜਪਿ ਸੋ ਏਵਾਤਿਆਦਿਨਾ ਨਿਚ੍ਚਾਕਾਰੇਨ ਉਪਟ੍ਠਾਨਂ ਨਿਚ੍ਚਨਿਮਿਤ੍ਤਂ ਨਾਮ. ਕਿਲੇਸਮਲੇਹਿ ਪਰਿਗ੍ਗਹਿਤਤ੍ਤਾ ਅਸੁਭਾਨਂਯੇਵ ਸਤਂ ਅਵਿਜ੍ਜਾਯ ਪਟਿਚ੍ਛਨ੍ਨਤ੍ਤਾ ਇਦਂ ਇਟ੍ਠਂ, ਕਨ੍ਤਂ, ਮਨਾਪਂ, ਪਿਯਰੂਪ, ਨ੍ਤਿਆਦਿਨਾ ਸੁਭਾਕਾਰੇਨ ਉਪਟ੍ਠਾਨਂ ਸੁਭਨਿਮਿਤ੍ਤਂ ਨਾਮ. ਭਯਟ੍ਠੇਨ ਅਖੇਮਟ੍ਠੇਨ ਦੁਕ੍ਖਾਨਂਪਿ ਸਤਂ ਤਾਯੇਵ ਪਟਿਚ੍ਛਨ੍ਨਤ੍ਤਾ ਇਦਂ ਸੁਖਂ, ਨਿਬ੍ਭਯਂ, ਖੇਮਂ, ਸਾਤਰੂਪ, ਨ੍ਤਿਆਦਿਨਾ ਸੁਖਾਕਾਰੇਨ ਉਪਟ੍ਠਾਨਂ ਸੁਖਨਿਮਿਤ੍ਤਂ ਨਾਮ. ਪਚ੍ਚਯਾ ਯਤ੍ਤਵੁਤ੍ਤਿਕਤ੍ਤਾ ਪਚ੍ਚਯੇਨ ਵਿਨਾ ਕੇਵਲਂ ਅਤ੍ਤਨੋ ਵਸਾਯਤ੍ਤਵੁਤ੍ਤਿਤਾ ਭਾਵਤੋ ਅਨਤ੍ਤਾਨਂਯੇਵ ਸਤਂ ਅਤ੍ਤਨੋ ਇਚ੍ਛਾਵਸੇਨ ਕਰੋਤਿ, ਕਥੇਤਿ, ਚਿਨ੍ਤੇਤਿ, ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ, ਠਾਤੁਂ ਇਚ੍ਛਨ੍ਤੋ ਤਿਟ੍ਠਤੀ, ਤਿਆਦਿਨਾ ਵਸਵਤ੍ਤਨਾਕਾਰੇਨ ਉਪਟ੍ਠਾਨਂ ਅਤ੍ਤਨਿਮਿਤ੍ਤਂ ਨਾਮ. ਤਥਾ ਸਤ੍ਤੋਨਾਮ ਸਤ੍ਤਾਹਂਪਿ ਜੀਵਤਿ, ਮਾਸਂਪਿ ਜੀਵਤਿ, ਸਂਵਚ੍ਛਰਂਪਿ ਜੀਵਤੀਤਿਆਦਿਨਾ ਜੀਵਾਕਾਰੇਨ ਉਪਟ੍ਠਾਨਂ ਜੀਵਨਿਮਿਤ੍ਤਂ ਨਾਮ. ਨਨੁ ਚੇਤ੍ਥ ਅਤ੍ਤਨੋ ਇਚ੍ਛਾਵਸੇਨ ਕਰੋਤੀਤਿਆਦੀਸੁ ਇਚ੍ਛਾਨਾਮ ਤਣ੍ਹਾਵਾਛਨ੍ਦੋ ਵਾ. ਤਦੁਭਯਮ੍ਪਿ ਚਿਤ੍ਤਸਮ੍ਪਯੁਤ੍ਤਂ. ਕਰਣਞ੍ਚ ਨਾਮ ਕਾਯਿਕਕ੍ਰਿਯਾਭੂਤਾਨਂ ਚਿਤ੍ਤਜਰੂਪਕਲਾਪਾਨਂ ਪਵਤ੍ਤਿਵਿਸੇਸੋ. ਏਵਞ੍ਚਸਤਿ ਤੇਸਂ ਚਿਤ੍ਤਵਸੇਨ ਪਵਤ੍ਤਤ੍ਤਾ ਅਤ੍ਤਨੋ ਇਚ੍ਛਾਵਸੇਨ ਕਰੋਤੀਤਿ ਇਦਂ ਅਭਿਧਮ੍ਮਵਿਰੁਦ੍ਧਂ ਨ ਹੋਤੀਤਿ. ਨ ਨ ਹੋਤਿ. ਅਤ੍ਤਨੋਤਿ ਚ ਕਰੋਤੀਤਿ ਚ ਵੁਤ੍ਤਤ੍ਤਾ. ਨ ਹਿ ਅਤ੍ਤਾਨਾਮ ਅਤ੍ਥਿ, ਯੋ ਅਤ੍ਤਨੋਤਿ ਵੁਚ੍ਚੇਯ੍ਯ. ਨ ਚ ਕਤ੍ਤਾਨਾਮ ਅਤ੍ਥਿ, ਯੋ ਕਰੋਤੀਤਿ ਵੁਚ੍ਚੇਯ੍ਯ. ਇਧ ਪਨ ਤਸ੍ਮਿਂ ਸਮਯੇ ਪਵਤ੍ਤਂ ਖਨ੍ਧਪਞ੍ਚਕਮੇਵ ਅਤ੍ਤਾਤਿ ਚ ਕਤ੍ਤਾਤਿ ਚ ਗਹੇਤ੍ਵਾ ਅਤ੍ਤਨੋਤਿ ਚ ਕਰੋਤੀਤਿ ਚ ਵੁਤ੍ਤਂ. ‘‘ਅਵਸ੍ਸਯੋ ਹੋਤੀ’’ਤਿ ਪਤਿਟ੍ਠਾ ਹੋਤਿ. ‘‘ਵਿਧਮਿਤ੍ਵਾ’’ਤਿ ਞਾਣੇਨ ਅਨ੍ਤਰਧਾਪੇਤ੍ਵਾ. ਸਭਾਵਤੋ ਵਿਜ੍ਜਮਾਨਾਨਿ ਨ ਹੋਨ੍ਤੀਤਿ ਦਸ੍ਸਨਞਾਣੇਨ ਵਿਨਿਚ੍ਛਯਂ ਪਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਭਾਵਦਸ੍ਸਨਂ ਨਾਮ ਸੋਕਦੁਕ੍ਖਾਦੀਨਂ ਅਭਾਵਦਸ੍ਸਨਂ.

‘‘ਤਂ ਤਂ ਘਨਵਿਨਿਬ੍ਭੁਜ੍ਜਨਵਸੇਨਾ’’ਤਿ ਸਮੂਹਸਨ੍ਤਤਿ ਘਨਾਦੀਨਂ ਭਿਨ੍ਦਨ ਛਿਨ੍ਦਨਵਸੇਨ. ਤਤ੍ਥ ਸਮੂਹਘਨਭਿਨ੍ਦਨਂ ਆਦਿਤੋ ਧਮ੍ਮਵਵਤ੍ਥਾਨਞਾਣਕਿਚ੍ਚਂ. ਤਦਾ ਅਤ੍ਤਦਿਟ੍ਠਿ ਵਿਕ੍ਖਮ੍ਭਿਤਾ ਹੋਤਿ. ਜੀਵਦਿਟ੍ਠਿ ਚ ਨਾਮ ਸੁਖੁਮਤਰਾ ਅਤ੍ਤਦਿਟ੍ਠਿ ਏਵ ਵੁਚ੍ਚਤਿ. ਮਗ੍ਗਕ੍ਖਣਂ ਪਤ੍ਵਾ ਏਵ ਤਦੁਭਯਂਪਿ ਸਬ੍ਬਸੋ ਸਮੁਚ੍ਛਿਨ੍ਦਤੀਤਿ ਦਟ੍ਠਬ੍ਬਂ. ‘‘ਪਣਿਹਿਤਗੁਣਸ੍ਸਾ’’ਤਿ ਪਤ੍ਥਿਤਗੁਣਸ੍ਸ.

‘‘ਪਾਤਿਮੋਕ੍ਖ’’ਨ੍ਤਿ ਏਤ੍ਥ ‘‘ਪਤੀ’’ਤਿ ਜੇਟ੍ਠਕੋ ਵੁਚ੍ਚਤਿ. ‘‘ਮੁਖਂ’’ਤਿ ਮੂਲਕਾਰਣਂ. ਪਤਿ ਚ ਸੋ ਮੁਖਞ੍ਚਾਤਿ ਪਤਿਮੁਖਂ. ਪਤਿਮੁਖਮੇਵ ਪਾਤਿਮੋਕ੍ਖਨ੍ਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਤਂ ਹੀ’’ਤਿਆਦਿਮਾਹ. ਸਬ੍ਬਲੋਕਿਯਸੀਲਾਨਿ ਨਾਮ ਚਤੁਪਾਰਿਸੁਦ੍ਧਿਸੀਲਾਨਿ. ਤੇਸਂ ਮਜ੍ਝੇ. ‘‘ਜੇਟ੍ਠਕਤ੍ਤਾ’’ਤਿ ਜੇਟ੍ਠਕਸੀਲਤ੍ਤਾ. ‘‘ਤਮੇਵਾ’’ਤਿ ਵਿਨਯਪਞ੍ਞਤ੍ਤਿਸੀਲਮੇਵ +. ‘‘ਯੇਸਂ ਧਮ੍ਮਾਨਂ’’ਤਿ ਉਦ੍ਧਚ੍ਚ ਮੁਟ੍ਠਸ੍ਸਚ੍ਚਾਦਿ ਧਮ੍ਮਾਨਂ. ‘‘ਵਿਪ੍ਫਨ੍ਦਿਤਾਨਿ ਨਾਮਾ’’ਤਿ ਵਿਪ੍ਪਕਿਣ੍ਣਾਨਿ ਨਾਮਾਤਿ ਅਧਿਪ੍ਪਾਯੋ. ਤੇਨਾਹ ‘‘ਲੋਲਾਨਿ ਨਾਮਾ’’ਤਿ. ‘‘ਤਦਨੁਬਨ੍ਧਾ’’ਤਿ ਤਾਨਿਵਿਪ੍ਫਨ੍ਦਿਤਾਨਿ ਇਨ੍ਦ੍ਰਿਯਾਨਿ ਅਨੁਗਤਾ. ‘‘ਬੁਦ੍ਧਪ੍ਪਟਿਕੁਟ੍ਠੇਹੀ’’ਤਿ ਬੁਦ੍ਧੇਨਭਗਵਤਾ ਪਟਿਕ੍ਕੋਸਿਤੇਹਿ ਨੀਵਾਰਿਤੇਹਿ. ‘‘ਮਿਚ੍ਛਾਪਯੋਗੇਹੀ’’ਤਿ ਅਟ੍ਠਕੁਲਦੂਸਨਕਮ੍ਮੇਹਿ ਚੇਵ ਏਕਵੀਸਤਿਅਨੇਸਨਕਮ੍ਮੇਹਿ ਚ. ‘‘ਤਿਵਿਧਕੁਹਨਵਤ੍ਥੂਹੀ’’ਤਿ ਪਚ੍ਚਯਪ੍ਪਟਿਸੇਵਨਞ੍ਚ, ਸਾਮਨ੍ਤਜਪ੍ਪਨਞ੍ਚ, ਇਰਿਯਾ ਪਥ ਸਨ੍ਨਿਸ੍ਸਿਤਞ੍ਚਾਤਿ ਇਮੇਹਿ ਤਿਵਿਧੇਹਿ ਕੁਹਨਵਤ੍ਥੂਹਿ. ਤਿਵਿਧੇਹਿ ਅਚ੍ਛਰਿਯ ਕਮ੍ਮਵਿਧਾਨੇਹੀਤਿ ਵੁਤ੍ਤਂ ਹੋਤਿ. ਪਰਿਸੁਜ੍ਝਤੀਤਿ ਪਰਿਸੁਦ੍ਧਿ. ਪਰਿਸੁਦ੍ਧਿ ਏਵ ਪਾਰਿਸੁਦ੍ਧਿ. ‘‘ਸਮ੍ਮੋਹਸ੍ਸਾ’’ਤਿ ਧਾਤੁਮਨਸਿਕਾਰਾਦੀਸੁ ਸਮ੍ਮੁਯ੍ਹਨਸ੍ਸ. ‘‘ਗੇਧਸ੍ਸਾ’’ਤਿ ਸਮ੍ਮੋਹਤ੍ਤਾਯੇਵ ਪਚ੍ਚਯੇਸੁ ਭਤ੍ਤਨਿਕ੍ਖਿਤ੍ਤਕਾ ਕਸ੍ਸਵਿਯ ਗੇਧਸ੍ਸ, ਅਭਿਕਙ੍ਖਸ੍ਸ. ‘‘ਮਦਸ੍ਸਾ’’ਤਿ ਲਾਭਸਕ੍ਕਾਰਾ ਦਿਮੂਲਕਸ੍ਸ ਮਾਨਮਦਸ੍ਸ. ‘‘ਪਮਾਦਸ੍ਸਾ’’ਤਿ ਕੁਸਲੇਸੁ ਧਮ੍ਮੇਸੁ ਪਮਾਦਸ੍ਸ ਮੁਟ੍ਠਸ੍ਸਚ੍ਚਸ੍ਸ. ਤਂ ਤਂ ਪਯੋਜਨ ਮਰਿਯਾਦੋ ਨਾਮ ਚੀਵਰਪਚ੍ਚਯੇ ਤਾਵ ਸੀਤਪ੍ਪਟਿਘਾਤਾਦਿਕੋ ਪਯੋਜਨਮਰਿਯਾਦੋ. ‘‘ਮਰਿਯਾਦੋ’’ਤਿ ਚ ਯਾਵਦੇਵਾਤਿ ਪਦੇਨ ਦਸ੍ਸਿਤੋ ਸੀਤਪ੍ਪਟਿਘਾਤਾਦਿਕੋ ਚੀਵਰਪ੍ਪਯੋਜਨ ਪਰਿਚ੍ਛੇਦੋ. ਸੋ ਚ ਚੀਵਰਪਚ੍ਚਯੇ ਸਮ੍ਮੋਹਾਦਿਕੇ ਸਾਵਜ੍ਜਪਕ੍ਖੇ ਅਪਤਨਤ੍ਥਾਯ ਠਪਿਤੋ. ਤੇਨ ਵੁਤ੍ਤਂ ‘‘ਸਮ੍ਮੋਹਸ੍ਸ ਗੇਧਸ੍ਸ ਮਦਸ੍ਸ ਪਮਾਦਸ੍ਸ ਪਹਾਨਤ੍ਥਂ’’ਤਿ. ਏਸਨਯੋ ਪਿਣ੍ਡਪਾਤਪਚ੍ਚਯਾਦੀਸੁਪਿ. ਏਤੇਨ ਪਚ੍ਚਵੇਕ੍ਖਨਾਪਾਠੇਸੁ ਅਯਮਤ੍ਥੋ ਦਸ੍ਸਿਤੋ. ਇਧ ਭਿਕ੍ਖੁ ਚੀਵਰਂ ਪਟਿਸੇਵਤਿ ਯਾਵਦੇਵ ਸੀਤਸ੍ਸ ਪਟਿਘਾਤਾਯ ਉਣ੍ਹਸ੍ਸ ਪਟਿਘਾਤਾਯਾਤਿਆਦੀਸੁ ਯਾਵਦੇਵ ਸੀਤਸ੍ਸ ਪਟਿਘਾਤਾਯ ਪਟਿਸੇਵਤਿ. ਨ ਤਤੋ ਉਤ੍ਤਰਿ ਸਮ੍ਮੋਹਤ੍ਥਾਯ ਗੇਧਤ੍ਥਾਯ ਮਦਤ੍ਥਾਯ ਪਮਾਦਤ੍ਥਾਯ ਪਟਿਸੇਵਤੀਤਿਆਦਿ. ਏਵਞ੍ਚਸਤਿ, ਯਂ ਚੀਵਰਂ ਪਟਿਸੇਵਨ੍ਤਸ੍ਸ ਸਮ੍ਮੋਹਗੇਧਮਦਪ੍ਪਮਾਦਾ ਉਪ੍ਪਜ੍ਜਨ੍ਤਿ. ਤਂ ਨ ਸੇਵਿਤਬ੍ਬਂ. ਇਤਰਂ ਸੇਵਿਤਬ੍ਬਨ੍ਤਿ ਦਸ੍ਸਿਤਂ ਹੋਤੀਤਿ.

‘‘ਪਚ੍ਚਤ੍ਤਸਭਾਵੋ’’ਤਿ ਪਚ੍ਚੇਕਸਭਾਵੋ. ‘‘ਕਾਰਿਯਸਙ੍ਖਾਤਂ’’ਤਿ ਕਾਤਬ੍ਬਂ ਅਭਿਨਿਪ੍ਫਾਦੇਤਬ੍ਬਨ੍ਤਿ ਕਾਰਿਯਂ. ਆਸਨ੍ਨਪ੍ਫਲਂ. ਤੇਨਾਹ ‘‘ਅਗ੍ਗਿਸ੍ਸਧੂਮੋਵਿਯਾ’’ਤਿ. ਆਸਨ੍ਨਕਾਰਣਂ ਪਦਟ੍ਠਾਨਂ ਨਾਮ ਅਗ੍ਗਿਕਾਰਕੋ ਵਿਯ. ਪਜ੍ਜਤਿ ਗਚ੍ਛਤਿ ਪਵਤ੍ਤਤਿ ਫਲਂ ਏਤੇਨਾਤਿ ਪਦਂ. ਤਿਟ੍ਠਤਿ ਫਲਂ ਏਤ੍ਥਾਤਿ ਠਾਨਂ. ਉਭਯਂਪਿ ਕਾਰਣ ਪਰਿਯਾਯੋ ਏਵ. ਤੇਨ ਅਤਿਸ੍ਸਯਤ੍ਥੋਪਿ ਸਿਜ੍ਝਤੀਤਿ ਆਹ ‘‘ਆਸਨ੍ਨਕਾਰਣਂ’’ਤਿ. ‘‘ਸਦ੍ਧਿਂ ਸਞ੍ਞਾ ਚਿਤ੍ਤ ਵਿਪਲ੍ਲਾਸੇਹੀ’’ਤਿ ਦਿਟ੍ਠਿਸਮ੍ਪਯੁਤ੍ਤੇਹੀਤਿ ਅਧਿਪ੍ਪਾਯੋ. ਦਿਟ੍ਠਿਵਿਪ੍ਪਯੁਤ੍ਤਾ ਪਨ ਸਞ੍ਞਾ ਚਿਤ੍ਤ ਵਿਪਲ੍ਲਾਸਾ ਵਿਕ੍ਖਮ੍ਭਿਤੁਂ ਸਕ੍ਕੋਤੀਤਿ ਨ ਵਤ੍ਤਬ੍ਬਾ. ‘‘ਸਾਸਨ ਧਮ੍ਮੇ’’ਤਿ ਅਨਤ੍ਤਲਕ੍ਖਣ ਸੁਤ੍ਤਨ੍ਤਾਦਿਕੇ ਸੁਞ੍ਞਤ ਧਮ੍ਮਪ੍ਪਟਿਸਂਯੁਤ੍ਤੇ ਦੇਸਨਾਧਮ੍ਮੇ. ‘‘ਦਿਟ੍ਠਿਵਿਪਲ੍ਲਾਸੋ ਵਿਕ੍ਖਮ੍ਭਿਤੋ’’ਤਿ ਤਾਦਿਸਂ ਧਮ੍ਮਦੇਸਨਂ ਸੁਤ੍ਵਾ ਦੇਸਕੇ ਸਤ੍ਥਰਿ ਚ ਦੇਸਿਤੇ ਧਮ੍ਮੇ ਚ ਸਦ੍ਧਂ ਪਟਿਲਭਿਤ੍ਵਾ ਸਚ੍ਚਮੇਵ ਭਗਵਾ ਆਹ, ਅਹਂ ਪਨ ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ,ਤਿ ਗਣ੍ਹਾਮਿ, ਮਿਚ੍ਛਾਵਤਾਯਂ ਮਮਗਾਹੋਤਿ ਏਵਂ ਵਿਕ੍ਖਮ੍ਭਿਤੋ ਹੋਤਿ. ਤਤੋ ਪਟ੍ਠਾਯ ਏਸੋ ਮੇ ਅਤ੍ਤਾਤਿ ਵਦਨ੍ਤੋਪਿ ਦਿਟ੍ਠਿਸਮ੍ਪਯੁਤ੍ਤਚਿਤ੍ਤੇਨ ਨ ਵਦਤਿ. ਦਿਟ੍ਠਿਵਿਪ੍ਪਯੁਤ੍ਤਚਿਤ੍ਤੇਨ ਏਵ ਵਦਤੀਤਿ ਅਧਿਪ੍ਪਾਯੋ. ਇਦਮ੍ਪਨ ਦਲ਼੍ਹਗ੍ਗਾਹ ਵਿਕ੍ਖਮ੍ਭਨਮਤ੍ਤਂ ਏਵ. ਨ ਅਤ੍ਤਦਸ੍ਸਨ ਵਿਕ੍ਖਮ੍ਭਨਂ. ਤਂ ਪਨ ਧਮ੍ਮਵਵਤ੍ਥਾਨਞ੍ਞਾਣੇ ਸਿਦ੍ਧੇ ਏਵ ਸਿਜ੍ਝਤੀਤਿਪਿ ਵਦਨ੍ਤਿ. ਚਤੁਨ੍ਨਂ ਆਹਾਰਾਨਂ ਵਸੇਨ ਚਤੁਧਾ ਨਾਮਰੂਪਂ ਪਰਿਗ੍ਗਹੇਤਬ੍ਬਮੇਵ. ਕਸ੍ਮਾ, ਚਤ੍ਤਾਰੋ ਆਹਾਰੇ ਪਰਿਗ੍ਗਹੇਤ੍ਵਾ ਤੇਸ੍ਵੇਵ ਲਕ੍ਖਣਤ੍ਤਯਂ ਸਮਨੁਪਸ੍ਸਨ੍ਤਸ੍ਸ ਅਨ੍ਤੇ ਲੋਕੁਤ੍ਤਰਞ੍ਞਾਣਦਸ੍ਸਨਪ੍ਪਟਿਲਾਭਕਿਚ੍ਚਸ੍ਸ ਸਿਦ੍ਧਤ੍ਤਾਤਿ ਅਧਿਪ੍ਪਾਯੋ. ਪਞ੍ਚਧਾਤਿਆਦੀਸੁ ਏਸਨਯੋ. ਆਦਿਕਮ੍ਮਿਕਾਨਂ ਅਵਿਸਯੋ, ਵਿਸੁਂ ਵਿਸੁਂ ਲਕ੍ਖਣ ਰਸਾਦੀਹਿ ਪਰਿਗ੍ਗਹੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਪਰਿਗ੍ਗਹਣੇ ਸਕ੍ਕੋਨ੍ਤਸ੍ਸਪਿ ਵਿਪਸ੍ਸਨਾ ਕਮ੍ਮੇ ਵਿਸੁਂ ਵਿਸੁਂ ਪਸ੍ਸਿਤੁਂ ਅਸਕ੍ਕੁਣੇਯ੍ਯਤ੍ਤਾ ਚ. ਤਥਾਹਿ ਵਕ੍ਖਤਿ ‘‘ਕਲਾਪਵਸੇਨ ਸਂਖਿਪਿਤ੍ਵਾ’’ਤਿ. ‘‘ਅਞ੍ਞਸ੍ਸ ਕਸ੍ਸਚੀ’’ਤਿ ਅਤ੍ਤਜੀਵਾਦਿਕਸ੍ਸ. ਸੋ ਕਰੋਤਿ ਕੁਸਲਾਕੁਸਲਂ ਕਮ੍ਮਂ. ਸੋ ਪਟਿਸਂਵੇਦੇਤਿ ਭਵਨ੍ਤਰਂ ਪਤ੍ਵਾ ਤਬ੍ਬਿਪਾਕਂ. ਸਂਸਰਤਿ ਭਵਤੋ ਭਵਂ. ਸਨ੍ਧਾਵਤਿ ਕਮ੍ਮਵੇਗੇਨ ਖਿਤ੍ਤੋ. ਸੁਦ੍ਧੇ ਨਾਮੇ ਏਵ ਵਾ ਰੂਪੇ ਏਵ ਵਾ ਈਹਾਬ੍ਯਾਪਾਰਾਨਂ ਅਭਾਵਦਸ੍ਸਨਤੋਤਿ ਯੋਜਨਾ. ਪੁਗ੍ਗਲਸਤ੍ਤਾਨਂ ਕ੍ਰਿਯਾਯੋਤਿ ਸਞ੍ਞਿਤਾਤਿ ਵਿਗ੍ਗਹੋ. ‘‘ਅਤ੍ਤਾਤਿ ਪਵਤ੍ਤਾ ਦਿਟ੍ਠੀ’’ਤਿ ਕਾਰਕ ਦਿਟ੍ਠਿ. ‘‘ਤਦਤ੍ਥਾ ਭਿਨਿਵੇਸਵਸੇਨਾ’’ਤਿ ਸਤ੍ਤੋ, ਪੁਗ੍ਗਲੋ, ਤਿਆਦਿ ਵੋਹਾਰਸ੍ਸ ਸਬ੍ਭਾਵਤੋ ਤਸ੍ਸ ਅਤ੍ਥਭੂਤੋ ਸਤ੍ਤਪੁਗ੍ਗਲਾਦਿਕੋਪਿ ਸਭਾਵਤੋ ਅਤ੍ਥਿਯੇਵ. ਨੋ ਨਤ੍ਥੀਤਿ ਏਵਂ ਦਲ਼੍ਹਂ ਹਦਯੇ ਸਨ੍ਨਿਧਾਨਕਰਣ ਵਸੇਨ. ‘‘ਅਤਿਧਾਵਨਞ੍ਚਾ’’ਤਿ ਵੋਹਾਰ ਪਞ੍ਞਤ੍ਤਿਮਤ੍ਤੇ ਅਟ੍ਠਤ੍ਵਾ ਤਂ ਅਤਿਕ੍ਕਮਿਤ੍ਵਾ ਪਞ੍ਚਕ੍ਖਨ੍ਧੇ ਸਤ੍ਤਾਦਿਭਾਵੇਨ ਗਹਣਞ੍ਚਾਤਿ ਅਧਿਪ੍ਪਾਯੋ.

‘‘ਕਮ੍ਮਚਿਤ੍ਤੋਤੁਕਾਹਾਰਵਸੇਨਾ’’ਤਿ ਏਤ੍ਥ ਕਕਾਰੋ ਸਨ੍ਧਿ ਵਸੇਨ ਆਗਮੋ. ਕਮ੍ਮਵਸੇਨ ਚਿਤ੍ਤਵਸੇਨ ਉਤੁਵਸੇਨ ਆਹਾਰਵਸੇਨਾਤਿ ਅਤ੍ਥੋ. ਅਨੁਰੂਪਾਨਂ ਪਚ੍ਚਯਾਨਂ ਸਾਮਗ੍ਗੀਤਿ ਵਿਗ੍ਗਹੋ. ‘‘ਅਞ੍ਞਥਾ ਪਵਤ੍ਤਿਯਾ’’ਤਿ ਅਞ੍ਞੇਨ ਪਕਾਰੇਨ ਪਵਤ੍ਤਨਸ੍ਸ. ‘‘ਹੇਤੁਸਮ੍ਭਾਰਪਚ੍ਚਯੇਹੀ’’ਤਿ ਹੇਤੁਪਚ੍ਚਯ ਸਮ੍ਭਾਰਪਚ੍ਚਯੇਹਿ. ਜਨਕ ਪਚ੍ਚਯਾ ਹੇਤੁਪਚ੍ਚਯਾ ਨਾਮ. ਪਰਿਵਾਰਪਚ੍ਚਯਾ ਸਮ੍ਭਾਰਪਚ੍ਚਯਾ ਨਾਮ. ‘‘ਕਮ੍ਮਪ੍ਪਵਤ੍ਤਿਯਾ’’ਤਿ ਕਮ੍ਮਪ੍ਪਵਤ੍ਤਿਤੋ. ‘‘ਵਿਪਾਕਪ੍ਪਵਤ੍ਤਿਯਾ’’ਤਿ ਵਿਪਾਕਪ੍ਪਵਤ੍ਤਿਤੋ. ਏਕਸ੍ਸ ਸਤ੍ਤਸ੍ਸ ਅਨਮਤਗ੍ਗੇ ਸਂਸਾਰੇ ਸਂਸਰਨ੍ਤਸ੍ਸ ਰੂਪਕਾਯੋਪਿ ਅਤ੍ਥਿ ਨਾਮਕਾਯੋਪਿ ਅਤ੍ਥਿ. ਤਤੋ ਅਞ੍ਞੋ ਕੋਚਿਸਭਾਵੋ ਨਾਮ ਨਤ੍ਥਿ. ਦ੍ਵੇ ਚ ਕਾਯਾ ਪਞ੍ਚਵੋਕਾਰੇ ਸਂਸਰਨ੍ਤਸ੍ਸ ਏਕਤੋ ਪਵਤ੍ਤਨ੍ਤਿ. ਅਸਞ੍ਞਸਤ੍ਤੇ ਸਂਸਰਨ੍ਤਸ੍ਸ ਰੂਪਕਾਯੋ ਏਵ ਪਵਤ੍ਤਤਿ. ਸੋ ਏਵ ਤਤ੍ਥ ਏਕੋਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ਅਰੂਪੇ ਸਂਸਰਨ੍ਤਸ੍ਸ ਨਾਮ ਕਾਯੋ ਏਵ ਪਵਤ੍ਤਤਿ. ਸੋ ਏਵ ਤਤ੍ਥ ਏਕੋ ਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ‘‘ਸਙ੍ਖ੍ਯਂ ਗਚ੍ਛਤੀ’’ਤਿ ਚ ਪਞ੍ਞਤ੍ਤਿਮਤ੍ਤਂ ਗਚ੍ਛਤੀਤਿ ਅਧਿਪ੍ਪਾਯੋ. ਤੇਸੁ ਚ ਕਾਯੇਸੁ ਰੂਪਕਾਯੇ ਚੁਤਿ ਪਟਿਸਨ੍ਧੀਨਂ ਅਞ੍ਞਮਞ੍ਞਂ ਅਨਨ੍ਤਰ ਪਚ੍ਚਯਤਾ ਨਾਮ ਨਤ੍ਥਿ. ਏਕਮੇਕਸ੍ਮਿਂ ਭਵੇ ਏਕਮੇਕੋ ਹੁਤ੍ਵਾ ਚੁਤਿਕਾਲੇ ਭਿਜ੍ਜਤਿ. ਰੂਪਸਨ੍ਤਤਿ ਛਿਜ੍ਜਤਿ. ਪਟਿਸਨ੍ਧਿਰੂਪੇਨ ਸਹ ਪਚ੍ਚਯ ਪਚ੍ਚਯੁਪ੍ਪਨ੍ਨਤਾ ਪਬਨ੍ਧੋ ਨਪ੍ਪਵਤ੍ਤਤਿ. ਨਾਮ ਕਾਯੇ ਪਨ ਚੁਤਿ ਪਟਿਸਨ੍ਧੀਨਂ ਅਞ੍ਞਮਞ੍ਞਂ ਅਨਨ੍ਤਰਪਚ੍ਚਯਤਾ ਅਤ੍ਥਿ. ਚੁਤਿਕਾਲੇਪਿ ਨਾਮਸਨ੍ਤਤਿ ਨ ਛਿਜ੍ਜਤਿ. ਪਟਿਸਨ੍ਧਿ ਨਾਮੇਨ ਸਹ ਪਚ੍ਚਯ ਪਚ੍ਚਯੁਪ੍ਪਨ੍ਨਤਾ ਪਬਨ੍ਧੋ ਪਵਤ੍ਤਤਿਯੇਵ. ਤਤ੍ਥ ਪਟਿਚ੍ਚਸਮੁਪ੍ਪਾਦ ਕੁਸਲੋ ਭਿਕ੍ਖੁ ਪਟਿਚ੍ਚਸਮੁਪ੍ਪਾਦਞ੍ਞਾਣੇ ਠਤ੍ਵਾ ਏਕਸ੍ਮਿਂਭਵੇ ਏਕਸ੍ਸ ਸਤ੍ਤਸ੍ਸ ਪਵਤ੍ਤਿਂ ਪਸ੍ਸਨ੍ਤੋ ਸਤ੍ਤਂ ਨਾਮ ਨ ਪਸ੍ਸਤਿ. ਪੁਗ੍ਗਲਂ ਨਾਮ ਨ ਪਸ੍ਸਤਿ. ਅਹਨ੍ਤਿਪਿ ਨ ਪਸ੍ਸਤਿ. ਪਰੋਤਿਪਿ ਨ ਪਸ੍ਸਤਿ. ਅਹਂ ਅਤੀਤੇਸੁ ਭਵੇਸੁ ਅਹੋਸਿਨ੍ਤਿਪਿ ਨ ਪਸ੍ਸਤਿ. ਇਮਸ੍ਮਿਂਭਵੇ ਅਸ੍ਮੀਤਿਪਿ ਨ ਪਸ੍ਸਤਿ. ਅਨਾਗਤੇਸੁ ਭਵਿਸ੍ਸਾਮੀਤਿਪਿ ਨ ਪਸ੍ਸਤਿ. ਅਥ ਖੋ ਅਵਿਜ੍ਜਾ ਪਚ੍ਚਯਾ ਸਙ੍ਖਾਰਾ ਪਵਤ੍ਤਨ੍ਤਿ. ਸਙ੍ਖਾਰ ਪਚ੍ਚਯਾ ਭਵਨ੍ਤਰੇ ਵਿਞ੍ਞਾਣਂ ਪਵਤ੍ਤਤੀਤਿਆਦਿਨਾ ਨਯੇਨ ਨਾਮਰੂਪ ਧਮ੍ਮਾਨਂ ਹੇਤੁਫਲ ਪਰਮ੍ਪਰਾਵਸੇਨ ਅਵਿਚ੍ਛੇਦਪ੍ਪਵਤ੍ਤਿਮੇਵ ਪਸ੍ਸਤਿ. ਏਕਸ੍ਮਿਂਭਵੇ ਪਵਤ੍ਤਿਂ ਪਸ੍ਸਨ੍ਤੇ ਸਤਿ, ਅਨਮਤਗ੍ਗੇਸਂਸਾਰੇ ਅਨਨ੍ਤੇਸੁ ਭਵੇਸੁ ਤਸ੍ਸ ਸਤ੍ਤਸ੍ਸ ਪਵਤ੍ਤਿ ਦਿਟ੍ਠਾ ਏਵ ਹੋਤਿ ਤਤ੍ਥਪਿ ਏਵਮੇਵ, ਤਤ੍ਥਪਿ ਏਵਮੇਵਾਤਿ. ਤਦਾ ਤਸ੍ਸ ਸੋਲ਼ਸਵਿਧਾ ਕਙ੍ਖਾ ਪਹੀਯਤੀਤਿ ਇਮਮਤ੍ਥਂ ‘‘ਦਸ੍ਸੇਨ੍ਤੋ ਅਨਮਤਗ੍ਗੇ ਸਂਸਾਰੇ’’ਤਿਆਦਿਮਾਹ. ਤਤ੍ਥ ਕਤਮਾ ਸੋਲ਼ਸਵਿਧਾ ਕਙ੍ਖਾਤਿ. ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨਂ. ਨ ਨੁ ਖੋ ਅਹੋਸਿਂ. ਕਿਂ ਨੁ ਖੋ ਅਹੋਸਿਂ. ਕਥਂ ਨੁ ਖੋ ਅਹੋਸਿਂ. ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨਨ੍ਤਿ ਏਵਂ ਪੁਬ੍ਬਨ੍ਤੇ ਪਞ੍ਚਵਿਧਾ ਕਙ੍ਖਾਵੁਤ੍ਤਾ. ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ. ਨ ਨੁ ਖੋ ਭਵਿਸ੍ਸਾਮਿ. ਕਿਂ ਨੁ ਖੋ ਭਵਿਸ੍ਸਾਮਿ. ਕਥਂ ਨੁ ਖੋ ਭਵਿਸ੍ਸਾਮਿ. ਕਿਂ ਹੁਤ੍ਵਾ ਕਿਂ ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਨ੍ਤਿ ਏਵਂ ਅਪਰਨ੍ਤੇ ਪਞ੍ਚਵਿਧਾ ਕਙ੍ਖਾ ਵੁਤ੍ਤਾ. ਅਹਂ ਨੁ ਖੋ ਸ੍ਮਿ. ਨੋ ਨੁ ਖੋ ਸ੍ਮਿ. ਕਿਨ੍ਨੁ ਖੋ ਸ੍ਮਿ. ਕਥਂ ਨੁ ਖੋ ਸ੍ਮਿ. ਅਹਂ ਨੁ ਖੋ ਸਤ੍ਤੋ ਕੁਤੋ ਆਗਤੋ. ਸੋ ਕੁਹਿਂ ਗਾਮੀ ਭਵਿਸ੍ਸਾਮੀਤਿ ਏਵਂ ਪਚ੍ਚੁਪ੍ਪਨ੍ਨੇ ਛਬ੍ਬਿਧਾ ਕਙ੍ਖਾ ਵੁਤ੍ਤਾ. ਇਮਾ ਸੋਲ਼ਸਵਿਧਾ ਕਙ੍ਖਾਤਿ. ਤਤ੍ਥ ਅਹੋਸਿਂ ਨੁ ਖੋ, ਨ ਨੁ ਖੋ ਅਹੋਸਿਨ੍ਤਿ ਇਮਿਨਾ ਪਦਦ੍ਵਯੇਨ ਅਤੀਤਕਾਲੇ ਅਤ੍ਤਨੋ ਅਤ੍ਥਿ ਨਤ੍ਥਿਭਾਵੇ ਕਙ੍ਖਤਿ. ਸਚੇ ਅਤ੍ਥਿ, ਕਿਂ ਨੁ ਖੋ ਅਹੋਸਿਨ੍ਤਿ ਕਙ੍ਖਤਿ. ਕੇਨਚਿ ਹੇਤੁਨਾ ਪਚ੍ਚਯੇਨ ਵਾ ਅਹੋਸਿਂ. ਕੇਨਚਿ ਇਦ੍ਧਿਮਨ੍ਤੇਨ ਵਾ ਨਿਮ੍ਮਿਤੋ ਅਹੋਸਿਂ. ਅਹੇਤੁ ਅਪਚ੍ਚਯਾ ਵਾ ਅਨਿਮ੍ਮਿਤੋ ਵਾ ਸਯਂਜਾਤੋ ਅਹੋਸਿਨ੍ਤਿ ਅਤ੍ਥੋ. ਯਦਿ ਤੇਸੁਪਕਾਰੇਸੁ ਅਞ੍ਞਤਰੇਨ ਅਹੋਸਿਂ. ਕਥਂ ਨੁ ਖੋ ਅਹੋਸਿਂ. ਅਪਾਦਕੋਵਾ ਅਹੋਸਿਂ. ਦ੍ਵਿਪਾਦਕੋ ਵਾ. ਚਤੁਪ੍ਪਾਦਕੋਵਾ. ਬਹੁਪ੍ਪਾਦਕੋਵਾ. ਰੂਪੀਵਾ. ਅਰੂਪੀਵਾ. ਸਞ੍ਞੀਵਾ. ਅਸਞ੍ਞੀਵਾ ਇਚ੍ਚਾਦਿ. ਅਥ ਤੇਸੁ ਅਪਾਦਕਾਦੀਸੁ ਅਞ੍ਞਤਰੋ ਅਹਂ ਅਹੋਸਿਂ. ਕਿਂ ਹੁਤ੍ਵਾ ਕਿਂ ਅਹੋਸਿਂ. ਪਥਮਭਵੇ ਕਿਂ ਹੁਤ੍ਵਾ ਦੁਤੀਯ ਭਵਾਦੀਸੁ ਕਿਂ ਅਹੋਸਿਨ੍ਤਿ ਇਦਂ ਭਵਪਰਮ੍ਪਰਾਵਸੇਨ ਵੁਤ੍ਤਂ. ਏਸਨਯੋ ਅਪਰਨ੍ਤੇਪਿ. ਪਚ੍ਚੁਪ੍ਪਨ੍ਨੇ ‘‘ਅਹਂ ਨੁ ਖੋ ਸ੍ਮਿ, ਨੋ ਨੁ ਖੋ ਸ੍ਮੀ’’ਤਿ ਯਥਾ ਖੁਦ੍ਦਕਵਤ੍ਥੁ ਵਿਭਙ੍ਗੇ ਅਟ੍ਠਸਤਤਣ੍ਹਾਵਿਚਰਿਤੇਸੁ. ਸਤਸ੍ਮੀਤਿ ਹੋਤਿ. ਸੀਤਸ੍ਮੀਤਿ ਹੋਤੀਤਿ ਵੁਤ੍ਤਂ. ਤਤ੍ਥ ‘‘ਸਤਸ੍ਮੀ’’ਤਿ ਅਹਂ ਸਸ੍ਸਤੋ ਵਾ ਭਵਾਮਿ. ‘‘ਸੀਤਸ੍ਮੀ’’ਤਿ ਅਹਂ ਉਚ੍ਛਿਨ੍ਨੋਵਾ ਭਵਾਮੀਤਿ ਅਤ੍ਥੋ. ਯਥਾ ਚ. ਅਤ੍ਥੀਤਿ ਖੋ ਏਕੋ ਅਨ੍ਤੋ. ਨਤ੍ਥੀਤਿ ਖੋ ਦੁਤੀਯੋ ਅਨ੍ਤੋਤਿ ਵੁਤ੍ਤਂ. ਤਤ੍ਥ ‘‘ਅਤ੍ਥੀ’’ਤਿ ਅਤ੍ਤਾਨਾਮ ਭਵਾਭਵੇਸੁ ਨਿਚ੍ਚਕਾਲਂ ਅਤ੍ਥਿ. ‘‘ਨਤ੍ਥੀ’’ਤਿ ਤਥਾ ਨਤ੍ਥਿ, ਉਚ੍ਛਿਜ੍ਜਤਿ. ਨ ਹੋਤਿ ਪਰਮ੍ਮਰਣਾਤਿ ਅਤ੍ਥੋ. ਤਥਾ ਇਧਾਪਿ ਅਹਂ ਨੁ ਖੋ ਸ੍ਮਿ. ਨੋ ਨੁ ਖੋ ਸ੍ਮੀਤਿ ਕਙ੍ਖਤਿ. ਤਤ੍ਥ ‘‘ਅਹਂ ਨੁ ਖੋਸ੍ਮੀ’’ਤਿ ਅਯਂ ਅਹਂ ਨਾਮ ਭਵਾਭਵੇਸੁ ਨਿਚ੍ਚਕਾਲਂ ਅਸ੍ਮਿ ਨੁ ਖੋ, ਮਮ ਅਤ੍ਤਾਨਾਮ ਸਸ੍ਸਤੋ ਹੁਤ੍ਵਾ ਸਬ੍ਬਕਾਲਂ ਅਤ੍ਥਿ ਨੁ ਖੋਤਿ ਵੁਤ੍ਤਂ ਹੋਤਿ. ‘‘ਨੋ ਨੁ ਖੋ ਸ੍ਮੀ’’ਤਿ ਤਥਾ ਨੋ ਅਸ੍ਮਿ ਨੁ ਖੋ. ਮਮ ਅਤ੍ਤਾ ਤਥਾ ਨਤ੍ਥਿ ਨੁ ਖੋਤਿ ਅਤ੍ਥੋ. ਏਤ੍ਥ ਚ ‘‘ਭਵਾਭਵੇਸੂ’’ਤਿ ਪਵਤ੍ਤੇਪਿ ਪਚ੍ਚੁਪ੍ਪਨ੍ਨੇ ਵਤ੍ਤਮਾਨਂ ਅਤ੍ਤਾਨਂ ਗਹੇਤ੍ਵਾ ਪਵਤ੍ਤਾ ਪਚ੍ਚੁਪ੍ਪਨ੍ਨੇ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ‘‘ਕਿਂ ਨੁ ਖੋ ਸ੍ਮੀ’’ਤਿ ਅਹਂ ਨਾਮ ਸਨ੍ਤੋ ਜਾਤੋ ਕਿਂ ਨੁ ਖੋ ਅਸ੍ਮਿ. ਕੇਨਚਿ ਹੇਤੁਨਾ ਪਚ੍ਚਯੇਨ ਵਾ ਅਸ੍ਮਿ ਨੁ ਖੋ. ਕੇਨਚਿ ਇਦ੍ਧਿਮਨ੍ਤੇਨ ਵਾ ਨਿਮ੍ਮਿਤੋ ਭਵਾਮਿ ਨੁ ਖੋ. ਉਦਾਹੁ ਅਹੇਤੁ ਅਪਚ੍ਚਯਾ ਵਾ ਕੇਨਚਿ ਅਨਿਮ੍ਮਿਤੋ ਵਾ ਸਯਂ ਨੁ ਖੋ ਭਵਾਮਿ ਨੁ ਖੋਤਿ ਅਤ੍ਥੋ. ‘‘ਕਥਂ ਨੁ ਖੋ ਸ੍ਮੀ’’ਤਿ ਏਤ੍ਥ ਪਨ ਅਪਦਾਦੀਹਿ ਅਯੋਜੇਤ੍ਵਾ ਅਹਂ ਨੁ ਖੋ ਕਿਂ ਗੋਤ੍ਤੋ ਭਵਾਮਿ. ਗੋਤਮਗੋਤ੍ਤੋ ਵਾ ਵਾਸੇਟ੍ਠ ਗੋਤ੍ਤੋ ਵਾ ਤਿਆਦਿਨਾ ਯੋਜੇਤਬ੍ਬਂ. ਆਦਿ ਕਪ੍ਪਕਾਲੇ ਤਾਨਿ ਗੋਤ੍ਤਾਨਿ ਏਤਰਹਿ ਸਮ੍ਭੇਦਂ ਗਚ੍ਛਨ੍ਤਿ. ਤਸ੍ਮਾ ਤੇਸੁ ਕਙ੍ਖਨ੍ਤੋ ਕਙ੍ਖਤਿਯੇਵ. ‘‘ਅਹਂ ਕੁਤੋ ਆਗਤੋ’’ਤਿ ਅਹਂ ਅਤੀਤੇ ਕੁਤੋਭਵਤੋ ਆਗਤੋ ਅਸ੍ਮਿ. ‘‘ਸੋਕੁਹਿਂਗਾਮੀ ਭਵਿਸ੍ਸਾਮੀ’’ਤਿ ਸੋ ਅਹਂ ਆਯਤਿਂ ਭਵੇ ਕੁਹਿਂ ਗਾਮਿਕੋ ਭਵਿਸ੍ਸਾਮੀਤਿ ਕਙ੍ਖਤਿ. ‘‘ਕਙ੍ਖਾਯ ਅਤਿਕ੍ਕਮੋ’’ਤਿ ਸੋ ਭਿਕ੍ਖੁ ਪਟਿਚ੍ਚਸਮੁਪ੍ਪਾਦੇ ਅਵਿਜ੍ਜਾਦਿਕਂ ਅਤੀਤਹੇਤੁ ਪਞ੍ਚਕਂ ਪਸ੍ਸਨ੍ਤੋ ਤਸ੍ਮਿਂਭਵੇ ਸਬ੍ਬਂਪਿ ਪਟਿਚ੍ਚਸਮੁਪ੍ਪਾਦਂ ਪਸ੍ਸਤਿਯੇਵ. ਏਵਂ ਪਸ੍ਸਨ੍ਤੋ ਨ ਤਤ੍ਥ ਅਹਂ ਨਾਮ ਕੋਚਿ ਅਤ੍ਥਿ, ਯਂ ਪਟਿਚ੍ਚ ਅਤੀਤ ਵਿਸਯਾ ਪਞ੍ਚਵਿਧਾ ਕਙ੍ਖਾ ਉਪ੍ਪਜ੍ਜਤਿ. ਧਮ੍ਮ ਮਤ੍ਤਮੇਵ ਤਤ੍ਥ ਅਤ੍ਥੀਤਿ ਏਵਂ ਅਤੀਤੇ ਕਙ੍ਖਾ ਵਤ੍ਥੁਸ੍ਸ ਅਭਾਵਦਸ੍ਸਨੇਨ ਪਞ੍ਚਵਿਧਾਯ ਕਙ੍ਖਾਯ ਅਤਿਕ੍ਕਮੋ ਹੋਤਿ. ਨਨੁ ਤਥਾ ਪਸ੍ਸਨ੍ਤਸ੍ਸਪਿ ਕਥਂ ਨੁ ਖੋ ਸ੍ਮਿ, ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋਤਿ ਅਯਂ ਕਙ੍ਖਾ ਅਤ੍ਥਿਯੇਵ. ਤਥਾ ਪਸ੍ਸਨ੍ਤੋਪਿ ਹਿ ਵਿਨਾ ਪੁਬ੍ਬੇਨਿਵਾਸਞ੍ਞਾਣੇਨ ਅਤੀਤੇ ਭਵੇ ਅਹਂ ਦ੍ਵਿਪਾਦਕੋ ਅਹੋਸਿਨ੍ਤਿਵਾ ਚਤੁਪ੍ਪਾਦਕੋ ਅਹੋਸਿਨ੍ਤਿ ਵਾ ਤਤੋ ਚੁਤੋ ਅਸੁਕਭਵੇ ਉਪ੍ਪਨ੍ਨੋਤਿ ਵਾ ਨ ਜਾਨਾਤਿ ਨ ਪਸ੍ਸਤੀਤਿ. ਵੁਚ੍ਚਤੇ. ਸਾ ਪਨ ਕਙ੍ਖਾ ਧਮ੍ਮ ਮਤ੍ਤਪ੍ਪਵਤ੍ਤਿ ਦਸ੍ਸਨਤੋ ਪਟ੍ਠਾਯ ਅਨ੍ਤਰਾਯਿਕ ਕਙ੍ਖਾ ਨ ਹੋਤਿ. ਵਿਚਿਕਿਚ੍ਛਾ ਪਟਿਰੂਪਿਕਾ ਏਵ. ਸਾ ਹਿ ਅਰਿਯਾਨਂਪਿ ਲਬ੍ਭਤਿ ਯੇਵਾਤਿ. ਤਥਾ ਅਨਾਗਤੇ ਫਲਪਞ੍ਚਕਂ ਪਸ੍ਸਨ੍ਤੋ ਅਪਰਨ੍ਤੇ ਪਞ੍ਚਵਿਧਂ ਕਙ੍ਖਂ ਅਤਿਕ੍ਕਮਤਿ. ਪਚ੍ਚੁਪ੍ਪਨ੍ਨੇ ਫਲਪਞ੍ਚਕਞ੍ਚ ਹੇਤੁਪਞ੍ਚਕਞ੍ਚ ਪਸ੍ਸਨ੍ਤੋ ਪਚ੍ਚੁਪ੍ਪਨ੍ਨੇ ਕਙ੍ਖਾ ਛਕ੍ਕਂ ਅਤਿਕ੍ਕਮਤਿ. ਸੇਸਂ ਸਬ੍ਬਂ ਪੁਬ੍ਬਨ੍ਤੇ ਵੁਤ੍ਤਨਯਮੇਵਾਤਿ. ਅਟ੍ਠਵਿਧਾਯ ਕਙ੍ਖਾਯ ਅਤਿਕ੍ਕਮਨੇ ਪਨ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪ੍ਪਟਿਲੋਮਂ ਪਸ੍ਸਨ੍ਤੋ ਦੇਸਨਾ ਧਮ੍ਮੇ ਚ ਲੋਕੁਤ੍ਤਰ ਧਮ੍ਮੇਸੁ ਚ ਕਙ੍ਖਂ ਅਤਿਕ੍ਕਮਤਿ. ਧਮ੍ਮੇ ਕਙ੍ਖਾਤਿਕ੍ਕਮਨੇਨ ਸਹੇਵ ਦੇਸੇਨ੍ਤੇ ਸਤ੍ਥਰਿ ਚ, ਯਥਾਨੁਸਿਟ੍ਠਂ ਪਟਿਪਨ੍ਨੇ ਸਙ੍ਘੇ ਚ, ਤੀਸੁ ਸਿਕ੍ਖਾਸੁ ਚ, ਯਥਾਵੁਤ੍ਤੇ ਪੁਬ੍ਬਨ੍ਤੇ ਚ, ਅਪਰਨ੍ਤੇ ਚ, ਪੁਬ੍ਬਨ੍ਤਾ ਪਰਨ੍ਤੇਸੁ ਚ, ਪਟਿਚ੍ਚਸਮੁਪ੍ਪਾਦੇਨ ਸਹ ਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਚ ਸਬ੍ਬਂ ਕਙ੍ਖਂ ਅਤਿਕ੍ਕਮਤਿਯੇਵ. ਤੇਨਾਹ ‘‘ਸਭਾਵ ਧਮ੍ਮਪ੍ਪਵਤ੍ਤਿਯਾ’’ਤਿਆਦਿਂ. ਤਤ੍ਥ ‘‘ਸਭਾਵਧਮ੍ਮਪ੍ਪਵਤ੍ਤਿਯਾ ਚਾ’’ਤਿ ਪਚ੍ਚਯਪਰਮ੍ਪਰਾਵਸੇਨ ਸਭਾਵਧਮ੍ਮਾਨਂ ਪਰਮ੍ਪਰਪ੍ਪਵਤ੍ਤਿਯਾ ਚ. ਧਮ੍ਮਸੁ ਧਮ੍ਮਤਾ ਨਾਮ ਦੇਸਨਾ ਧਮ੍ਮਸ੍ਸ ਸ੍ਵਾਕ੍ਖਾਤਤਾਦਿਭਾਵੇਨ ਸੁਨ੍ਦਰ ਧਮ੍ਮਤਾ. ਅਨਵਜ੍ਜਧਮ੍ਮਤਾ. ਬੁਦ੍ਧਸੁਬੁਦ੍ਧਤਾ ਨਾਮ ਤਂ ਧਮ੍ਮਂ ਦੇਸੇਨ੍ਤਸ੍ਸ ਬੁਦ੍ਧਸ੍ਸ ਸਬ੍ਬਞ੍ਞੁਬੁਦ੍ਧਤਾ.

ਪਰਿਯੁਟ੍ਠਿਤਾਨਂ ਦਿਟ੍ਠਿਵਿਚਿਕਿਚ੍ਛਾਨਂ ਵਿਕ੍ਖਮ੍ਭਨਂ ਨਾਮ ਹੇਟ੍ਠਾ ਧਮ੍ਮਵਵਤ੍ਥਾਨ ਵਸੇਨ ਪਚ੍ਚਯਪਰਿਗ੍ਗਹਵਸੇਨ ਚ ਸਿਜ੍ਝਤਿ. ਵਿਪਸ੍ਸਨਾ ਕਮ੍ਮਂ ਪਨ ਅਨੁਸਯਭੂਤਾਨਂ ਦਿਟ੍ਠਿਵਿਚਿਕਿਚ੍ਛਾਨਂ ਸਲ੍ਲਿਖਨਤ੍ਥਾਯ ਕਰੀਯਤੀਤਿ ਵੁਤ੍ਤਂ ‘‘ਅਨੁਸਯ ਸਮੂਹਨਨਤ੍ਥਞ੍ਚਾ’’ਤਿਆਦਿ. ‘‘ਤਤ੍ਥ ਪਨਾ’’ਤਿ ਤਸ੍ਮਿਂ ਪਟਿਸਮ੍ਭਿਦਾ ਮਗ੍ਗੇ ਪਨ. ਵਿਭਤ੍ਤੇਸੂਤਿ ਪਾਠਸੇਸੋ. ‘‘ਯਸ੍ਸਾ’’ਤਿ ਯੋਗੀ ਪੁਗ੍ਗਲਸ੍ਸ. ‘‘ਯਂ ਦੂਰੇ ਸਨ੍ਤਿਕੇਵਾ’’ਤਿ ਯਂ ਦੂਰੇ ਪਵਤ੍ਤਂ ਰੂਪਂ ਵਾ, ਸਨ੍ਤਿਕੇ ਪਵਤ੍ਤਂ ਰੂਪਂਵਾਤਿ ਪਾਠਸੇਸੋ. ‘‘ਤਦਤ੍ਥਸ੍ਸ ਪਨਾ’’ਤਿ ਸਮ੍ਮਸਿਤਧਮ੍ਮੁਦ੍ਧਾਰਤ੍ਥਸ੍ਸ. ‘‘ਞਾਣੇਨ ਦਲ਼੍ਹਂ ਗਹੇਤ੍ਵਾ’’ਤਿ ਧਮ੍ਮਵਵਤ੍ਥਾਨਞ੍ਞਾਣੇਨ ਸੁਟ੍ਠੁਵਿਭੂਤਂ ਕਤ੍ਵਾਤਿ ਅਧਿਪ੍ਪਾਯੋ. ਇਦਾਨਿ ਯਂ ਯਂ ਦਲ਼੍ਹਂ ਗਹੇਤਬ੍ਬਂ. ਤਂ ਤਂ ਸਰੂਪਤੋ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿਮਾਹ. ਪੁਨ ਦਲ਼੍ਹਂ ਗਹਿਤਸ੍ਸ ਰੂਪਸ੍ਸ ਅਨਿਚ੍ਚਲਕ੍ਖਣਂ ਦਸ੍ਸੇਤੁਂ ‘‘ਸਾ ਚ ਕ੍ਰਿਯਾ’’ਤਿਆਦਿ ਵੁਤ੍ਤਂ. ‘‘ਨਸ੍ਸਨ੍ਤੀ’’ਤਿ ਭਿਜ੍ਜਨ੍ਤਿ. ਅਨਿਚ੍ਚਤਂ ਗਚ੍ਛਨ੍ਤਿ. ‘‘ਵਿਤ੍ਥਮ੍ਭਨ ਕ੍ਰਿਯਾ’’ਤਿ ਏਤ੍ਥ ਵਿਵਿਧੇਨ ਥਮ੍ਭਨਂ ਵਿਤ੍ਥਮ੍ਭਨਂ. ਨਾਨਾਦਿਸਾਭਿਮੁਖਵਸੇਨ ਥਮ੍ਭਨਂ ਵਹਨਨ੍ਤਿ ਅਤ੍ਥੋ. ‘‘ਇਮਾਸਞ੍ਚਾ’’ਤਿ ਚਤੁਨ੍ਨਂ ਮਹਾਭੂਤਾਨਞ੍ਚ. ਵਿਸੁਂ ਵਿਸੁਨ੍ਤਿ ਵੁਤ੍ਤਤ੍ਤਾ ਤਾਸਂ ਅਞ੍ਞਮਞ੍ਞਞ੍ਚ ਸਹਜਾਤੇਸੁ ਗਹਣਂ ਸਮ੍ਭਵਤੀਤਿ ਵੁਤ੍ਤਂ ‘‘ਆਪਾਦੀਨਂ’’ਤਿ. ਆਪਾਦੀਨਂ ਸੇਸਮਹਾਭੂਤਾਨਞ੍ਚਾਤਿ ਅਤ੍ਥੋ. ਸਨ੍ਤਤਿਯਾ ਸਰੀਰਾਨਿ ਸਨ੍ਤਤਿ ਸਰੀਰਾਨਿ. ‘‘ਤਥਾ ਤਥਾ ਕਪ੍ਪੇਤ੍ਵਾ’’ਤਿ ਰੂਪਧਮ੍ਮਾਨਂ ਸਨ੍ਤਤਿ ਪਰਿਵਤ੍ਤਿ ਨਾਮ ਅਭਿਕ੍ਕਮਨ੍ਤਸ੍ਸ ਏਵਂ ਭਵੇਯ੍ਯ, ਪਟਿਕ੍ਕਮਨ੍ਤਸ੍ਸ ਏਵਂ ਭਵੇਯ੍ਯ, ਤਥਾ ਸਮਿਞ੍ਜਨ੍ਤਸ੍ਸ ਪਸਾਰੇਨ੍ਤਸ੍ਸਾਤਿਆਦਿਨਾ ਪਰਿਕਪ੍ਪੇਤ੍ਵਾ. ‘‘ਸੇਸਖਨ੍ਧੇਸੁਪਿ ਤਂ ਤਂ ਸਨ੍ਤਤਿ ਨਾਨਤ੍ਤਂ’’ਤਿ ਵੇਦਨਾਕ੍ਖਨ੍ਧੇ ਤਾਵ ਕਾਯੇ ਕਾਯਿਕਸੁਖਸਨ੍ਤਤਿ ਦੁਕ੍ਖਸਨ੍ਤਤੀਨਂ ਨਾਨਤ੍ਤਂ. ਚਿਤ੍ਤੇ ਸੋਮਨਸ੍ਸ ਦੋਮਨਸ੍ਸ ਸਨ੍ਤਤੀਨਂ. ਉਪੇਕ੍ਖਾ ਸਨ੍ਤਤਿ ਪਨ ਅਵਿਭੂਤਾ ਹੋਤਿ. ਕਪ੍ਪੇਤ੍ਵਾ ਗਹੇਤਬ੍ਬਾ. ਯਦਾ ਚਿਤ੍ਤੇ ਸੋਮਨਸ੍ਸ ਦੋਮਨਸ੍ਸਾਨਿ ਨ ਸਨ੍ਦਿਸ੍ਸਨ੍ਤਿ, ਤਦਾ ਇਦਾਨਿ ਉਪੇਕ੍ਖਾ ਮੇ ਵੇਦਨਾ ਪਵਤ੍ਤਤੀਤਿ ਵਾ, ਯਦਾ ਤਾਨਿ ਸਨ੍ਦਿਸ੍ਸਨ੍ਤਿ, ਤਦਾ ਸਾ ਨਿਰੁਜ੍ਝਤੀਤਿ ਵਾ ਏਵਂ ਤਕ੍ਕੇਤ੍ਵਾ ਸਮ੍ਮਸਿਤਬ੍ਬਾਤਿ ਵੁਤ੍ਤਂ ਹੋਤਿ. ਸਞ੍ਞਾਕ੍ਖਨ੍ਧੇ ਰੂਪਸਞ੍ਞਾਸਦ੍ਦਸਞ੍ਞਾਦੀਨਂ ਵਸੇਨ. ਸਙ੍ਖਾਰਕ੍ਖਨ੍ਧੇ ਰੂਪਸਞ੍ਚੇਤਨਾ ਸਦ੍ਦਸਞ੍ਚੇਤਨਾਦੀਨਂ ਵਸੇਨ, ਨਾਨਾਵਿਤਕ੍ਕ ਵਿਚਾਰਾਦੀਨਂ ਵਸੇਨ, ਲੋਭਾਲੋਭ ਦੋਸਾਦੋਸ ਮੋਹਾਮੋਹਾਦੀਨਂ ਵਸੇਨ ਚ. ਵਿਞ੍ਞਾਣਕ੍ਖਨ੍ਧੇ ਚਕ੍ਖੁਵਿਞ੍ਞਾਣਾਦੀਨਂ, ਕੁਸਲਾ ਕੁਸਲਵਿਞ੍ਞਾਣਾਦੀਨਞ੍ਚ ਵਸੇਨ ਸਨ੍ਤਤਿ ਨਾਨਤ੍ਤਂ ਵੇਦਿਤਬ੍ਬਂ. ਵਿਸ੍ਸਾਸਂ ਕਰੋਤੀਤਿ ਵਤ੍ਵਾ ਤਦਤ੍ਥਂ ਵਿਵਰਤਿ ‘‘ਏਤਂ ਮੇ’’ਤਿਆਦਿਨਾ. ਤਤ੍ਥ ਤਯੋਵਿਸ੍ਸਾਸਾ ਤਣ੍ਹਾਵਿਸ੍ਸਾਸੋ, ਮਾਨਵਿਸ੍ਸਾਸੋ, ਦਿਟ੍ਠਿਵਿਸ੍ਸਾਸੋ. ਤਤ੍ਥ ਏਤਂ ਮਮਾਤਿ ਤਣ੍ਹਾਵਿਸ੍ਸਾਸੋ. ਏਸੋਹਮਸ੍ਮੀਤਿ ਮਾਨਵਿਸ੍ਸਾਸੋ. ਏਸੋ ਮੇ ਅਤ੍ਤਾਤਿ ਦਿਟ੍ਠਿਵਿਸ੍ਸਾਸੋ. ‘‘ਪਰਿਹਰਤੀ’’ਤਿ ਭਵਾਭਵੇਸੁ ਪਰਿਗ੍ਗਹੇਤ੍ਵਾ ਹਰਤਿ ਵਹਤਿ. ‘‘ਪਰਮਜ੍ਝਤ੍ਤਭਾਵੇਨਾ’’ਤਿ ਪਧਾਨਅਜ੍ਝਤ੍ਤਭਾਵੇਨ. ਅਜ੍ਝਤ੍ਤਸਾਰਭਾਵੇਨਾਤਿ ਵੁਤ੍ਤਂ ਹੋਤਿ. ‘‘ਪਰਿਗ੍ਗਹਿਤੋ’’ਤਿ ਏਸੋ ਮੇ ਅਤ੍ਤਾਤਿ ਦਿਟ੍ਠਿਪਰਿਗ੍ਗਹੇਨ ਪਰਿਗ੍ਗਹਿਤੋ. ਤਯੋ ਹਿ ਪਰਿਗ੍ਗਹਾ ਤਣ੍ਹਾ ਪਰਿਗ੍ਗਹੋ, ਮਾਨਪਰਿਗ੍ਗਹੋ, ਦਿਟ੍ਠਿਪਰਿਗ੍ਗਹੋਤਿ. ਵਸੇ ਸਬ੍ਬਸੋ ਵਤ੍ਤਨ੍ਤੋ ਨਾਮ ਕੇਵਲਂ ਵਸਾਯਤ੍ਤਵੁਤ੍ਤਿਕੋ ਏਵ ਸਿਯਾ, ਨ ਪਚ੍ਚਯਾਯਤ੍ਤਵੁਤ੍ਤਿਕੋਤਿ ਦਸ੍ਸੇਨ੍ਤੋ ‘‘ਯਥਾਵੁਤ੍ਤੇਹੀ’’ਤਿਆਦਿਮਾਹ. ਤਤ੍ਥ ‘‘ਯਥਾਵੁਤ੍ਤੇਹੀ’’ਤਿ ਸਬ੍ਬਸਙ੍ਗਹੇ ਵੁਤ੍ਤਪ੍ਪਕਾਰੇਹਿ ਕਮ੍ਮਾਭਿਸਙ੍ਖਰਣਾਦੀਹਿ. ‘‘ਤਥਾਪਰਿਗ੍ਗਹੇਤਬ੍ਬੋ’’ਤਿ ਏਸੋ ਮੇ ਅਤ੍ਤਾਤਿ ਏਵਂ ਪਰਮਜ੍ਝਤ੍ਤਭਾਵੇਨ ਪਰਿਗ੍ਗਹੇਤਬ੍ਬੋ. ਤਥਾ ਹਿ ਯੋ ਅਤ੍ਤਨੋ ਵਸੇਨ ਵਤ੍ਤਤਿ, ਤਸ੍ਮਿਂ ਅਤ੍ਤਨੋ ਸਾਮਿਭਾਵੋ ਨਤ੍ਥਿ. ਯਸ੍ਮਿਞ੍ਚ ਸਾਮਿਭਾਵੋ ਨਤ੍ਥਿ, ਤਸ੍ਮਿਂ ਰੂਪਾਦਿਕੇ ਧਮ੍ਮੇ ਅਤ੍ਤਾਨਂ ਸਾਮਿਕਂ ਕਤ੍ਵਾ ਏਸੋ ਮਮ ਅਤ੍ਤਾਤਿ ਪਰਿਗ੍ਗਹੋ ਨਾਮ ਮਿਚ੍ਛਾ ਏਵ. ਤਥਾ ਯੋ ਚ ਖਣਿਕ ਧਮ੍ਮੋ ਹੋਤਿ, ਖਣੇ ਖਣੇ ਭਿਜ੍ਜਤਿ, ਤਂ ਰੂਪਾਦਿਕਂ ਖਨ੍ਧਪਞ੍ਚਕਂ ਅਤ੍ਤਨੋ ਸਾਰਂ ਕਤ੍ਵਾ ਤਥਾ ਪਰਿਗ੍ਗਹੋਪਿ ਮਿਚ੍ਛਾ ਏਵ. ਏਤ੍ਥ ਚ ‘‘ਮਿਚ੍ਛਾ ਏਵਾ’’ਤਿ ਪਰਮਤ੍ਥ ਸਚ੍ਚਂ ਪਤ੍ਵਾ ਮਿਚ੍ਛਾ ਏਵ. ਵਿਪਲ੍ਲਾਸੋ ਏਵਾਤਿ ਵੁਤ੍ਤਂ ਹੋਤਿ. ‘‘ਸੁਖਂ ਵਿਦ੍ਧਂਸੇਤੀ’’ਤਿ ਕਾਯਿਕਸੁਖਞ੍ਚ ਚੇਤਸਿਕ ਸੁਖਞ੍ਚ ਵਿਦ੍ਧਂਸੇਤਿ. ਵਿਨਾਸੇਤਿ. ‘‘ਨਾਨਾਦੁਕ੍ਖਂ ਜਨੇਤੀ’’ਤਿ ਕਾਯਿਕਦੁਕ੍ਖਞ੍ਚ ਚੇਤਸਿਕ ਦੁਕ੍ਖਞ੍ਚ ਜਨੇਤਿ ਉਪ੍ਪਾਦੇਤਿ. ‘‘ਇਦਞ੍ਚ ਰੂਪਂ ਏਦਿਸਮੇਵ ਹੋਤੀ’’ਤਿ ਕਥਂ ਹੋਤਿ. ਮਨੁਸ੍ਸਤ੍ਤਭਾਵੇ ਠਿਤਾਨਂ ਸਤ੍ਤਾਨਂ ਯਥਾਪਵਤ੍ਤਂ ਮਨੁਸ੍ਸ ਸੁਖਂ ਵਿਦ੍ਧਂਸੇਤਿ, ਜਿਣ੍ਣਭਿਨ੍ਨਭਾਵਂ ਪਾਪੇਤਿ, ਨਾਨਾਦੁਕ੍ਖਂ ਜਨੇਤਿ. ਸਯਂ ਅਪਾਯਤ੍ਤਭਾਵਂ ਗਹੇਤ੍ਵਾ ਤੇਸਂ ਨਾਨਾਅਪਾਯ ਦੁਕ੍ਖਂ ਜਨੇਤਿ. ਤਥਾ ਦੇਵਤ੍ਤਭਾਵੇ ਸਕ੍ਕਤ੍ਤਭਾਵੇ ਬ੍ਰਹ੍ਮਤ੍ਤਭਾਵੇ ਠਿਤਾਨਨ੍ਤਿਆਦਿਨਾ ਵਤ੍ਤਬ੍ਬਂ. ਤਥਾ ਮਨੁਸ੍ਸਤ੍ਤਭਾਵੇ ਠਿਤਾਨਂ ਨਾਨਾਵਿਪਰਿਣਾਮ ਕਿਚ੍ਚੇਹਿ ਯਥਾਪਵਤ੍ਤਂ ਸੁਖਂ ਵਿਦ੍ਧਂਸੇਤਿ, ਨਾਨਾਪਚ੍ਚਯਾਭਿਸਙ੍ਖਰਣਕਿਚ੍ਚੇਹਿ ਨਾਨਾਦੁਕ੍ਖਂ ਜਨੇਤਿ. ਤੇਨ ਵੁਤ੍ਤਂ ‘‘ਇਦਞ੍ਚ ਰੂਪਂ ਏਦਿਸਮੇਵਾ’’ਤਿ. ‘‘ਸਾਰੋਨਾਮ ਥਾਮਬਲਵਿਸੇਸੋ ਵੁਚ੍ਚਤੀ’’ਤਿ ਏਤੇਨ ਥਾਮਬਲਵਿਸੇਸੇਨ ਸਮ੍ਪਨ੍ਨਂ ਵਤ੍ਥੁਂਪਿ ਸਙ੍ਗਣ੍ਹਾਤਿ. ‘‘ਅਸਾਰਕਟ੍ਠੇਨਾ’’ਤਿ ਏਤ੍ਥ ਸਾਰੋ ਏਵ ਸਾਰਕਂ, ਨ ਸਾਰਕਂ ਅਸਾਰਕਨ੍ਤਿ ਇਮਮਤ੍ਥਂ ਸਨ੍ਧਾਯ ‘‘ਰੂਪਂ ਪਨ ਸਯਂਪਿ ਏਵਰੂਪੋ ਸਾਰੋ ਨ ਹੋਤੀ’’ਤਿ ਵੁਤ੍ਤਂ. ਸਤ੍ਤਾਨਂ ਅਤ੍ਤਸਾਰੋ ਜੀਵਸਾਰੋ ਨ ਹੋਤੀਤਿ ਅਤ੍ਥੋ. ਨਤ੍ਥਿ ਸਾਰੋ ਏਤਸ੍ਸਾਤਿ ਅਸਾਰਕਨ੍ਤਿ ਇਮਮਤ੍ਥਂ ਸਨ੍ਧਾਯ ‘‘ਨ ਚ ਏਵਰੂਪੇਨ ਸਾਰੇਨ ਯੁਤ੍ਤਂ’’ਤਿ ਵੁਤ੍ਤਂ. ਅਤ੍ਤਸਾਰੇਨ ਜੀਵਸਾਰੇਨ ਸਂਯੁਤ੍ਤਂ ਹੋਤੀਤਿ ਅਤ੍ਥੋ. ਤਤ੍ਥ ਪੁਰਿਮੋ ਅਤ੍ਥੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤੀਤਿ ਇਦਂ ਸਨ੍ਧਾਯ ਵੁਤ੍ਤੋ. ਪਚ੍ਛਿਮੋ ਰੂਪਵਨ੍ਤਂ ਵਾ ਅਤ੍ਤਾਨਂ, ਅਤ੍ਤਨਿ ਵਾ ਰੂਪਂ, ਰੂਪਸ੍ਮਿਂ ਵਾ ਅਤ੍ਤਾਨਂਤਿ ਇਮਾਨਿ ਸਨ੍ਧਾਯ ਵੁਤ੍ਤੋ. ਏਤੇਨ ਅਸਾਰਕਟ੍ਠੇਨਾਤਿ ਅਸਾਰਭਾਵੇਨ, ਅਸਾਰਯੁਤ੍ਤਭਾਵੇਨ ਵਾਤਿ ਚ. ਅਨਤ੍ਤਾਤਿ ਏਤ੍ਥਪਿ ਨ ਅਤ੍ਤਾ ਅਨਤ੍ਤਾ, ਨਤ੍ਥਿ ਅਤ੍ਤਾ ਏਤਸ੍ਸਾਤਿ ਵਾ ਅਨਤ੍ਤਾਤਿ ਚ ਦ੍ਵਿਧਾ ਅਤ੍ਥੋ ਸਿਜ੍ਝਤਿ. ‘‘ਯਞ੍ਚਾ’’ਤਿ ਯਞ੍ਚ ਰੂਪਂ. ‘‘ਪੀਲ਼ੇਤੀ’’ਤਿ ਤਂ ਸਮਙ੍ਗੀ ਪੁਗ੍ਗਲਂ ਪੀਲ਼ੇਤਿ. ਏਤੇਨ ਅਨਤ੍ਤਭਾਵੇ ਸਿਦ੍ਧੇ ਦੁਕ੍ਖਭਾਵੋਪਿ ਸਿਦ੍ਧੋਤਿ ਦਸ੍ਸੇਤਿ. ‘‘ਤਿਣ੍ਣਂ ਵਯਾਨਂ ਵਸੇਨ ਅਦ੍ਧਾਭੇਦੋ ਯੋਜੇਤਬ੍ਬੋ’’ਤਿ ਪਥਮਵਯੇ ਪਵਤ੍ਤਂ ਰੂਪਂ ਦੁਤੀਯਵਯਂ ਨ ਪਾਪੁਣਾਤਿ, ਪਥਮਵਯੇ ਏਵ ਨਿਰੁਜ੍ਝਤੀਤਿਆਦਿਨਾ ਅਦ੍ਧਾਪਚ੍ਚੁਪ੍ਪਨ੍ਨੇ ਅਨ੍ਤੋਗਧਭੇਦੋ ਯੋਜੇਤਬ੍ਬੋ. ‘‘ਸਭਾਗੇਕਸਨ੍ਤਾਨਵਸੇਨਾ’’ਤਿ ਸਭਾਗਾਨਂ ਧਮ੍ਮਾਨਂ ਸਭਾਗਟ੍ਠੇਨ ਏਕੀਭੂਤਾ ਸਨ੍ਤਤਿ ਸਭਾਗੇਕਸਨ੍ਤਤਿ. ‘‘ਸਭਾਗਾਨਂ ਧਮ੍ਮਾਨਂ’’ਤਿ ਚ ਚਿਤ੍ਤਜੇਸੁਤਾਵ ਨਿਰਨ੍ਤਰਪ੍ਪਵਤ੍ਤੇਨ ਲੋਭਸਮ੍ਪਯੁਤ੍ਤਚਿਤ੍ਤੇਨ ਸਹਜਾਤਾ ਰੂਪਧਮ੍ਮਾ ਸਭਾਗਰੂਪਧਮ੍ਮਾ ਨਾਮ. ਤਥਾ ਨਾਮ ਧਮ੍ਮਾ ਚ. ਏਵਂ ਦੋਸਸਮ੍ਪਯੁਤ੍ਤਾਦੀਸੁਪਿ. ਉਤੁਜੇਸੁ ਨਿਰਨ੍ਤਰਪ੍ਪਵਤ੍ਤੇਨ ਸੀਤਉਤੁਨਾ ਸਮੁਟ੍ਠਿਤਾ ਰੂਪਧਮ੍ਮਾ ਸਭਾਗਰੂਪ ਧਮ੍ਮਾ ਨਾਮ. ਤਥਾ ਉਣ੍ਹਉਤੁਨਾ ਸਮੁਟ੍ਠਿਤਾ. ਏਸਨਯੋ ਆਹਾਰਜੇਸੁਪੀਤਿ ਏਵਂ ਸਭਾਗੇਕਸਨ੍ਤਤਿਵਸੇਨ. ‘‘ਸਮ੍ਪਾਪੁਣਿਤੁਂ’’ਤਿ ਞਾਣੇਨ ਸਮ੍ਪਾਪੁਣਿਤੁਂ. ‘‘ਅਦ੍ਧਾਸਨ੍ਤਤਿਵਸੇਨਾ’’ਤਿ ਏਤ੍ਥ ਸਨ੍ਤਤਿਵਸੇਨ ਸਮ੍ਮਸਨਂ ਵਿਸੇਸਤੋ ਅਧਿਪ੍ਪੇਤਂ. ਏਵਞ੍ਚ ਕਤ੍ਵਾ ਹੇਟ੍ਠਾ ਅਨਿਚ੍ਚਂ ਖਯਟ੍ਠੇਨਾਤਿ ਪਦੇ ਚਤੁਨ੍ਨਂ ਮਹਾਭੂਤਾਨਂ ਸਨ੍ਤਤਿ ਵਿਭਾਗਨਯੋ ਸੁਟ੍ਠੁ ਦਸ੍ਸਿਤੋਤਿ. ‘‘ਅਨਿਚ੍ਚਲਕ੍ਖਣ ਦਸ੍ਸਨਮੇਵ ਪਧਾਨਂ’’ਤਿ ਇਮਸ੍ਮਿਂ ਞਾਣੇਪਿ ਉਦਯਬ੍ਬਯਞ੍ਞਾਣੇਪਿ ਭਙ੍ਗਞ੍ਞਾਣੇਪਿ ਅਨਿਚ੍ਚਲਕ੍ਖਣ ਦਸ੍ਸਨਮੇਵ ਪਧਾਨਂ. ਭਯਞ੍ਞਾਣੇ ਚ ਆਦੀਨਵਞ੍ਞਾਣੇ ਚ ਨਿਬ੍ਬਿਦਾਞਾਣੇ ਚ ਦੁਕ੍ਖਲਕ੍ਖਣ ਦਸ੍ਸਨਂ ਪਧਾਨਂ. ਉਪਰਿ ਚਤੂਸੁ ਞਾਣੇਸੁ ਅਨਤ੍ਤਲਕ੍ਖਣ ਦਸ੍ਸਨਂ ਪਧਾਨਨ੍ਤਿ. ‘‘ਸਮੁਦਿਤੇਸੂ’’ਤਿ ਅਞ੍ਞਮਞ੍ਞਂ ਅਵਿਨਾਭਾਵਸਹਾਯਭਾਵੇਨ ਸਮੁਪ੍ਪਨ੍ਨੇਸੁ. ਇਦਞ੍ਚ ਅਵਿਜ੍ਜਾਸਮੁਦਯਾ ਰੂਪਸਮੁਦਯੋ. ਤਣ੍ਹਾਸਮੁਦਯਾ ਉਪਾਦਾਨ ਸਮੁਦਯੋ. ਆਹਾਰ ਸਮੁਦਯਾ ਰੂਪਸਮੁਦਯੋਤਿ ਪਾਲ਼ਿਵਸੇਨ ਵੁਤ੍ਤਂ. ਅਪ੍ਪਹੀਨ ਵਸੇਨਾਤਿ ਪਾਲ਼ਿਪਦੇ ਪਨ ਅਵਿਜ੍ਜਾ ਤਣ੍ਹਾ ਦਿਟ੍ਠਾਨੁਸਯਾਨਂ ਅਪ੍ਪਹੀਨਟ੍ਠੇਨ ਸਨ੍ਤਾਨੇ ਵਿਜ੍ਜਮਾਨਤਾ ਏਵ ਪਮਾਣਨ੍ਤਿ ਦਟ੍ਠਬ੍ਬਂ. ‘‘ਸਮੁਦੇਨ੍ਤੀ’’ਤਿ ਪਟਿਸਨ੍ਧਿਤੋ ਪਟ੍ਠਾਯ ਏਕਤੋ ਉਦੇਨ੍ਤਿ. ਉਪਰੂਪਰਿ ਏਨ੍ਤਿ. ਆਗਚ੍ਛਨ੍ਤੀਤਿ ਅਤ੍ਥੋ. ਏਕਭਵਭਾਵੇਨ ਪਾਤੁਬ੍ਭਵਨ੍ਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਯਾਵਮਰਣਕਾਲਾ’’ਤਿਆਦਿਂ. ‘‘ਪਸਵਨ੍ਤੀ’’ਤਿ ਪਵਡ੍ਢਮਾਨਾ ਸਵਨ੍ਤਿ, ਪਵਤ੍ਤਨ੍ਤਿ, ਸਨ੍ਦਨ੍ਤਿ. ‘‘ਤੇਸੁ ਪਨਾ’’ਤਿ ਅਵਿਜ੍ਜਾ ਤਣ੍ਹੁਪਾਦਾਨ ਕਮ੍ਮੇਸੁ. ‘‘ਨਿਰੁਜ੍ਝਨ੍ਤੀ’’ਤਿ ਤਸ੍ਮਿਂਭਵੇ ਏਵ ਨਿਰੁਜ੍ਝਨ੍ਤਿ. ਤਸ੍ਮਿਂ ਭਵੇ ਨਿਰੋਧੋ ਨਾਮ ਭਵਨ੍ਤਰੇ ਪੁਨ ਅਨੁਪ੍ਪਾਦੋ ਯੇਵਾਤਿ ਵੁਤ੍ਤਂ ‘‘ਭਵਨ੍ਤਰੇ’’ਤਿਆਦਿ. ‘‘ਤਂ ਸਨ੍ਤਤਿਯਂ’’ਤਿ ਤਸ੍ਮਿਂ ਪਚ੍ਚੁਪ੍ਪਨ੍ਨ ਭਵੇਤਿ ਵੁਤ੍ਤਂ ਹੋਤਿ. ‘‘ਪੁਨ ਅਨੁਪ੍ਪਾਦਸਙ੍ਖਾਤਂ ਨਿਰੋਧਂ’’ਤਿ ਸਨ੍ਤਤਿ ਨਿਰੋਧੋ ਨਾਮ ਵੁਤ੍ਤੋ. ਨ ਨਿਬ੍ਬਾਨ ਨਿਰੋਧੋ. ਏਤਾਹਿ ਪਚ੍ਚਯੇ ਸਤਿ, ਭਵਨ੍ਤਰੇ ਉਪ੍ਪਜ੍ਜੀਸ੍ਸਨ੍ਤਿ ਯੇਵਾਤਿ. ਇਦਾਨਿ ਯਥਾਪਵਤ੍ਤ ਸਨ੍ਤਤੀਸੁ ਪਰਿਯਾਪਨ੍ਨਾਨਂ ਸਬ੍ਬਪਚ੍ਛਿਮਾਨਂ ਨਾਮਰੂਪਾਨਂ ਖਣਿਕਨਿਰੋਧਵਸੇਨ ਅਤ੍ਥਂ ਵਦਨ੍ਤੋ ‘‘ਯਥਾਪਵਤ੍ਤ ਸਨ੍ਤਤਿਯੋ ਵਾ ਛਿਜ੍ਜਨ੍ਤਿ ਭਿਜ੍ਜਨ੍ਤੀ’’ਤਿ ਵੁਤ੍ਤਂ. ‘‘ਉਦਯਬ੍ਬਯਂ ਸਮਨੁਪਸ੍ਸਨ੍ਤਸ੍ਸ ਚਾ’’ਤਿ ਏਤ੍ਥ ਕਤਮੋ ਉਦਯੋ ਨਾਮ, ਕਤਮੋ ਵਯੋ ਨਾਮ, ਕਥਞ੍ਚ ਤਦੁਭਯਂ ਸਮਨੁਪਸ੍ਸਤੀਤਿ ਆਹ ‘‘ਉਦਯਬ੍ਬਯਂ ਪਸ੍ਸਨ੍ਤਸ੍ਸਾਤਿ ਏਤ੍ਥ ਯਥਾ ਨਾਮਾ’’ਤਿਆਦਿਂ. ਤਤ੍ਥ ‘‘ਤਮੋ ਖਨ੍ਧੋ’’ਤਿ ਤਮੋਰਾਸਿ. ‘‘ਵੇਤੀ’’ਤਿ ਵਿਗਚ੍ਛਤਿ. ਅਨ੍ਤਰ ਧਾਯਤਿ.‘‘ਉਦਯੋ’’ਤਿ ਉਪ੍ਪਾਦੋ ਚੇਵ ਵਡ੍ਢਿ ਚ. ‘‘ਵਯੋ’’ਤਿ ਵਿਗਮਨਂ, ਅਨ੍ਤਰਧਾਨਂ. ‘‘ਨਾਨਾਪਯੋਗਵਸੇਨਵਾ’’ਤਿ ਸਮਿਞ੍ਜਨਪ੍ਪਸਾਰਣਾਦਿ ਨਾਨਾਪਯੋਗਵਸੇਨ ਵਾ. ਉਦਯਪਕ੍ਖਾਨਂ ਨਾਨਾਸਨ੍ਤਤੀਨਂ ਉਦਯਞ੍ਚ ਉਦਯਤੋ. ਵਯਪਕ੍ਖਾਨਂ ਨਾਨਾਸਨ੍ਤਤੀਨਂ ਵਯਞ੍ਚ ਵਯਤੋਤਿ ਯੋਜਨਾ.

ਬੋਜ੍ਝਙ੍ਗ ਧਮ੍ਮੇਹਿ ਸਮ੍ਪਨ੍ਨਤ੍ਤਾ ਆਰਾਧੇਤਿ ਅਤ੍ਤਨੋ ਚਿਤ੍ਤਂਤਿ ਆਰਦ੍ਧੋ. ਤੁਟ੍ਠਚਿਤ੍ਤੋਤਿ ਅਤ੍ਥੋ. ਵਿਪਸ੍ਸਤੀਤਿ ਵਿਪਸ੍ਸਕੋ. ਆਰਦ੍ਧੋ ਹੁਤ੍ਵਾ ਵਿਪਸ੍ਸਕੋ ਆਰਦ੍ਧਵਿਪਸ੍ਸਕੋ. ਦੁਵਿਧੋਹਿ ਵਿਪਸ੍ਸਕੋ ਤਰੁਣ ਵਿਪਸ੍ਸਕੋ ਚ ਆਰਦ੍ਧ ਵਿਪਸ੍ਸਕੋ ਚ. ਤਤ੍ਥ ਖਨ੍ਧਾਨਂ ਉਦਯਬ੍ਬਯਂ ਸੁਟ੍ਠੁ ਅਪਸ੍ਸਨ੍ਤੋ ਦੁਬ੍ਬਲਵਿਪਸ੍ਸਕੋ ਤਰੁਣ ਵਿਪਸ੍ਸਕੋ ਨਾਮ. ਖਨ੍ਧਾਨਂ ਉਦਯਬ੍ਬਯਂ ਸੁਟ੍ਠੁ ਪਸ੍ਸਨ੍ਤੋ ਵਿਪਸ੍ਸਨਾ ਕਮ੍ਮੇ ਆਰਾਧਿਤ ਚਿਤ੍ਤੋ ਬਲਵਵਿਪਸ੍ਸਕੋ ਆਰਦ੍ਧਵਿਪਸ੍ਸਕੋ ਨਾਮ. ਯਂ ਸਨ੍ਧਾਯ ਵੁਤ੍ਤਂ.

[ਕ]

‘ਸੁਞ੍ਞਾਗਾਰੇ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤੀ ਹੋਤਿ, ਸਮ੍ਮ ਧਮ੍ਮਂ ਵਿਪਸ੍ਸਤੋ,ਤਿ ਚ.

[ਖ]

‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਉਦਯਬ੍ਬਯਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਉਦਯਬ੍ਬਯਂ,ਤਿ ਚ.

ਅਯਮਿਧ ਅਧਿਪ੍ਪੇਤੋ. ਵਿਪਸ੍ਸਨਂ ਉਪੇਚ੍ਚ ਕਿਲੇਸੇਨ੍ਤਿ, ਮਲੀਨਭਾਵਂ ਗਮੇਨ੍ਤੀਤਿ ਵਿਪਸ੍ਸਨੁਪਕ੍ਕਿਲੇਸਾ. ਪਰਿਬਨ੍ਧਨ੍ਤਿ ਨੀਵਾਰੇਨ੍ਤੀਤਿ ਪਰਿਬਨ੍ਧਕਾਤਿ ਹੇਟ੍ਠਾ ਵੁਤ੍ਤਮੇਵ ਅਨ੍ਤਰਾਯਿਕ ਧਮ੍ਮਾਨਂ ਨਾਮਂ. ‘‘ਸਰੀਰੋਭਾਸੋ’’ਤਿ ਸਕਲਸਰੀਰਤੋ ਨਿਕ੍ਖਨ੍ਤੋ ਓਭਾਸੋ. ‘‘ਪਞ੍ਚਵਿਧਾ ਪੀਤੀ’’ਤਿ ਖੁਦ੍ਦਿਕਾ ਪੀਤਿ, ਖਣਿਕਾ ਪੀਤਿ, ਓਕ੍ਕਨ੍ਤਿਕਾ ਪੀਤਿ, ਉਬ੍ਬੇਗਾ ਪੀਤਿ, ਫਰਣਾ ਪੀਤੀਤਿ. ‘‘ਦੁਵਿਧਾ ਪਸ੍ਸਦ੍ਧੀ’’ਤਿ ਅਤਿਬਲਵਨ੍ਤੀ ਕਾਯਪਸ੍ਸਦ੍ਧਿਚੇਵ ਚਿਤ੍ਤਪਸ੍ਸਦ੍ਧਿ ਚ. ਵਿਪਸ੍ਸਨਾ ਕਮ੍ਮੇ ਓਕਪ੍ਪਨਾਕਾਰਪ੍ਪਵਤ੍ਤਾ ਸਦ੍ਧਾਏਵ ਅਧਿਮੁਚ੍ਚਨਟ੍ਠੇਨ ਅਧਿਮੋਕ੍ਖੋ ਸਦ੍ਧਾਧਿਮੋਕ੍ਖੋ. ‘‘ਵੀਰਿਯਂ’’ਤਿ ਤਸ੍ਮਿਂ ਕਮ੍ਮੇ ਅਨਿਕ੍ਖਿਤ੍ਤਧੁਰਂ ਪਗ੍ਗਹਿਤਸੀਸਂ ਵੀਰਿਯਂ. ‘‘ਸੁਖਂ’’ਤਿ ਚਿਤ੍ਤਸੁਖਂ. ਤੇਨਾਹ ‘‘ਸੋਮਨਸ੍ਸਂ’’ਤਿ. ‘‘ਵਿਪਸ੍ਸਨਾਞਾਣਂ’’ਤਿ ਇਨ੍ਦਵਿਸ੍ਸਟ੍ਠਵਜਿਰਸਦਿਸਂ ਬਲਵਵਿਪਸ੍ਸਨਾਞਾਣਂ. ‘‘ਸਤੀ’’ਤਿ ਤਸ੍ਮਿਂ ਕਮ੍ਮੇ ਅਪ੍ਪਮੁਟ੍ਠਾ ਸਤਿ. ‘‘ਤਤ੍ਰਮਜ੍ਝਤ੍ਤੁਪੇਕ੍ਖਾ’’ਤਿ ਚਿਤ੍ਤਸ੍ਸ ਲੀਨੁਦ੍ਧਚ੍ਚਾਦੀਹਿ ਵਿਸਮਨ੍ਤੇਹਿ ਵਿਮੁਤ੍ਤਾ ਤਤ੍ਰਮਜ੍ਝਤ੍ਤਤਾਸਙ੍ਖਾਤਾ ਉਪੇਕ੍ਖਾ. ‘‘ਆਵਜ੍ਜਨੁਪੇਕ੍ਖਾ’’ਤਿ ਵਸਿਭਾਵਪਤ੍ਤਾ ਆਵਜ੍ਜਨਸਙ੍ਖਾਤਾ ਉਪੇਕ੍ਖਾ. ‘‘ਆਲਯਂ’’ਤਿ ਤਣ੍ਹਾਲਯਂ. ‘‘ਕੁਰੁਮਾਨਾ’’ਤਿ ਕਰੋਨ੍ਤੀ. ‘‘ਸੁਖੁਮਾ ਤਣ੍ਹਾ’’ਤਿ ਕੁਸਲੇਹਿ ਮਿਸ੍ਸਕਤ੍ਤਾ ਇਦਂ ਅਕੁਸਲਨ੍ਤਿਪਿ ਜਾਨਿਤੁਂ ਅਸਕ੍ਕੁਣੇਯ੍ਯਾ ਸੁਖੁਮਤਣ੍ਹਾ. ‘‘ਨ ਵਤਮੇ’’ਤਿ ਮਮ ਨ ਉਪ੍ਪਨ੍ਨਪੁਬ੍ਬੋਵਤਾਤਿ ਯੋਜਨਾ. ‘‘ਅਸ੍ਸਾਦਸਹਿਤਾ’’ਤਿ ਓਭਾਸਾਦੀਸੁ ਅਸ੍ਸਾਦਤਣ੍ਹਾ ਸਹਿਤਾ. ‘‘ਅਧਿਮਾਨ ਵਸੇਨਾ’’ਤਿ ਅਧਿਕਤਰਂ ਮਞ੍ਞਨਾਵਸੇਨ. ‘‘ਤਾਵਦੇਵਾ’’ਤਿ ਨਿਕਨ੍ਤਿਯਾ ਉਪ੍ਪਤ੍ਤਿਕ੍ਖਣੇਯੇਵ. ‘‘ਨਿਕਾਮਨਾਕਾਰੋ’’ਤਿ ਇਚ੍ਛਨਾਕਾਰੋ. ਅਸ੍ਸਾਦਨਾਕਾਰੋ. ‘‘ਨਿਕਾਮਨਸ੍ਸਵਤ੍ਥੂ’’ਤਿ ਨਿਕਨ੍ਤਿਯਾ ਵਤ੍ਥੁ. ‘‘ਅਦ੍ਧਾ’’ਤਿ ਏਕਨ੍ਤੇਨ. ‘‘ਹਨ੍ਦਾ’’ਤਿ ਚਿਤ੍ਤਵਿਸ੍ਸਟ੍ਠਕਰਣੇ ਨਿਪਾਤਪਦਂ. ਇਦਾਨੇਵ ਨਂ ਵਿਸੋਧੇਮਿ, ਨ ਚਿਰਂ ਪਵਤ੍ਤਿਤੁਂ ਦਸ੍ਸਾਮੀਤਿ ਇਮਮਤ੍ਥਂ ਦੀਪੇਤਿ. ‘‘ਤੇਸ੍ਵੇਵਾ’’ਤਿ ਤੇਸੁਓਭਾਸਾਦੀਸੁ ਏਵ. ਅਟ੍ਠਕਥਾਯ ਨ ਸਮੇਤਿ. ਅਟ੍ਠਕਥਾਯਂ ਨਿਕਨ੍ਤਿ ਵਿਕ੍ਖਮ੍ਭਨਸ੍ਸ ਵਿਸੁਂ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਵਿਪਸ੍ਸਨਾਪਰਿਪਾਕੋ ਨਾਮ ਵਿਸੇਸਨ੍ਤਰਪ੍ਪਵਤ੍ਤੇਨ ਪਾਕਟੋਤਿ ਦਸ੍ਸੇਤੁਂ ‘‘ਸਙ੍ਖਾਰੁਪੇਕ੍ਖਾਭਾਵਂ ਪਤ੍ਤਾ’’ਤਿਆਦਿਮਾਹ. ਵੁਟ੍ਠਾਨਗਾਮਿਨਿ ਵਿਪਸ੍ਸਨਾਭਾਵਪਤ੍ਤੇਨਾਤਿ ਵੁਤ੍ਤਂ ਹੋਤਿ. ‘‘ਦ੍ਵੇ ਵਿਪਸ੍ਸਨਾ ਚਿਤ੍ਤਾਨੀ’’ਤਿ ਉਪਚਾਰਾਨੁਲੋਮਚਿਤ੍ਤਾਨਿ. ਸੋ ਹਿ ਵੁਟ੍ਠਾਨਨ੍ਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ਸਙ੍ਖਾਰ ਨਿਮਿਤ੍ਤਤੋ ਵਾ ਵੁਟ੍ਠਾਤਿ. ਨਿਬ੍ਬਾਨਂ ਆਰਬ੍ਭ ਪਵਤ੍ਤਿਤੋ. ਯਦਿ ਏਵਂ ਗੋਤ੍ਰਭੁਪਿ ਵੁਟ੍ਠਾਨਂ ਨਾਮ ਸਿਯਾਤਿ. ਨ ਸਿਯਾ. ਮਗ੍ਗਸ੍ਸ ਆਵਜ੍ਜਨਮਤ੍ਤੇ ਠਿਤਤ੍ਤਾ. ਪਟਿਵੇਧਕਿਚ੍ਚਸ੍ਸਚ ਸਮ੍ਮੋਹ ਸਮੁਚ੍ਛੇਦਕਿਚ੍ਚਸ੍ਸ ਅਭਾਵਤੋ. ‘‘ਸਯਂ’’ਤਿ ਮਗ੍ਗਸਙ੍ਖਾਤੋ ਸਯਂ. ‘‘ਤਂ ਸਮਙ੍ਗੀਪੁਗ੍ਗਲਂ ਵਾ’’ਤਿ ਤੇਨ ਮਗ੍ਗੇਨ ਸਮਙ੍ਗੀਪੁਗ੍ਗਲਂ ਵਾ. ‘‘ਵਟ੍ਟਪ੍ਪਵਤ੍ਤਤੋ ਚਾ’’ਤਿ ਆਯਤਿਂ ਭਵੇਸੁ ਅਪਾਯਵਟ੍ਟਪ੍ਪਵਤ੍ਤਤੋ ਵਾ, ਅਟ੍ਠਮ ਭਵਤੋ ਪਟ੍ਠਾਯ ਕਾਮਸੁਗਤਿ ਵਟ੍ਟਪ੍ਪਵਤ੍ਤਤੋ ਵਾ. ਅਵਸ੍ਸਂ ਵੁਟ੍ਠਾਨਂ ਗਮੇਤਿ ਸਮ੍ਪਾਪੇਤੀਤਿ ਵੁਟ੍ਠਾਨਗਾਮਿਨੀਤਿ ਵਚਨਤ੍ਥੋ. ‘‘ਅਵਸ੍ਸਂ ਵੁਟ੍ਠਾਨਂ ਗਚ੍ਛਨ੍ਤੀ’’ਤਿ ਇਧ ਠਿਤਾਨਂ ਵੁਟ੍ਠਾਨਤੋ ਨਿਵਤ੍ਤਿ ਨਾਮ ਨਤ੍ਥੀਤਿ ਅਧਿਪ੍ਪਾਯੋ. ਇਦਞ੍ਚ ਪਚ੍ਚੇਕਬੁਦ੍ਧਾਨਂ ਬੁਦ੍ਧਸਾਵਕਾਨਞ੍ਚ ਵਸੇਨ ਦਟ੍ਠਬ੍ਬਂ. ਸਬ੍ਬਞ੍ਞੁ ਬੋਧਿਸਤ੍ਤਾ ਪਨ ਪੁਬ੍ਬਬੁਦ੍ਧਾਨਂ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਾ ਕਮ੍ਮਂ ਆਰਭਨ੍ਤਾ ਅਨੁਲੋਮਞ੍ਞਾਣਂ ਆਹਚ੍ਚ ਠਪੇਨ੍ਤੀਤਿ ਅਟ੍ਠਕ ਥਾਸੁ ਵੁਤ੍ਤਂ. ਤਤ੍ਥ ‘‘ਆਹਚ੍ਚਾ’’ਤਿ ਇਦਂ ਸਙ੍ਖਾਰੁਪੇਕ੍ਖਾਞਾਣਸ੍ਸ ਮਤ੍ਥਕਪਤ੍ਤਿਦਸ੍ਸਨਤ੍ਥਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਆਵਜ੍ਜਨਟ੍ਠਾਨਿਯਂ’’ਤਿ ਤਤੋ ਪੁਬ੍ਬਭਾਗੇ ਕੇਨਚਿ ਚਿਤ੍ਤੇਨ ਅਗ੍ਗਹਿਤੇ ਨਿਬ੍ਬਾਨਾ ਰਮ੍ਮਣੇ ਆਵਜ੍ਜਨਟ੍ਠਾਨਿਯਂ. ‘‘ਤਂ’’ਤਿ ਗੋਤ੍ਰਭੁਞ੍ਞਾਣਂ. ਗੋਤ੍ਤਂ ਭਵਤਿ ਅਭਿਭਵਤਿ ਛਿਨ੍ਦਤੀਤਿ ਗੋਤ੍ਰਭੁ. ਗੋਤ੍ਤਂ ਵਾ ਅਭਿਸਮ੍ਭੁਣਾਤਿ ਪਾਪੁਣਾਤੀਤਿ ਗੋਤ੍ਰਭੂਤਿ ਵਚਨਤ੍ਥੋ. ਕਥਂ ਪਨ ਗੋਤ੍ਰਭੁ ਚਿਤ੍ਤਂ ਗੋਤ੍ਰਭੁਞ੍ਞਾਣਂ ਪੁਥੁਜ੍ਜਨਗੋਤ੍ਤਂ ਛਿਨ੍ਦਤਿ, ਅਰਿਯਗੋਤ੍ਤਂ ਪਾਪੁਣਾਤੀਤਿ ਯੁਜ੍ਜੇਯ੍ਯ, ਸੋਹਿ ਪੁਗ੍ਗਲੋ ਤਸ੍ਮਿਂਖਣੇ ਪੁਥੁਜ੍ਜਨਗੋਤ੍ਤਪਰਿਯਾਪਨ੍ਨੋਏਵਾਤਿ. ਸਚ੍ਚਂ. ਅਤ੍ਤਨਿ ਪਨ ਛਿਨ੍ਨਤ੍ਤਾ ਸਯਂ ਛਿਨ੍ਦਤਿ ਨਾਮ. ਨਿਬ੍ਬਾਨਸ੍ਸ ਚ ਅਰਿਯਗੋਚਰਤ੍ਤਾ ਤਂ ਆਰਮ੍ਮਣ ਕਰਣਵਸੇਨ ਅਰਿਯਗੋਤ੍ਤਂ ਪਾਪੁਣਾਤਿ ਨਾਮਾਤਿ ਦਟ੍ਠਬ੍ਬਂ. ਪਚ੍ਚਯਸਤ੍ਤਿਵਿਸੇਸੇਨ ਅਤ੍ਤਨੋ ਅਨਨ੍ਤਰੇ ਅਰਿਯਗੋਤ੍ਤਂ ਭਾਵੇਤਿ, ਪਾਤੁਭਾਵੇਤੀਤਿ ਗੋਤ੍ਰਭੂਤਿਪਿ ਯੁਜ੍ਜਤਿ. ‘‘ਪਰਿਚ੍ਛਿਜ੍ਜਾ’’ਤਿ ਪਰਿਚ੍ਛਿਨ੍ਦਿਤ੍ਵਾ. ਦਿਟ੍ਠਿਵਿਚਿਕਿਚ੍ਛਾਦੀਹਿ ਸਬ੍ਬਵਿਪ੍ਫਨ੍ਦਨੇਹਿ ਮੁਞ੍ਚਿਤ੍ਵਾਤਿ ਵੁਤ੍ਤਂ ਹੋਤਿ. ਸਮ੍ਮੋਹਸ੍ਸ ਪਹਾਨਮੇਵ ਦਟ੍ਠਬ੍ਬਂ. ਨ ਤੇ ਧਮ੍ਮੇ ਆਰਮ੍ਮਣ ਕਰਣ ਵਸੇਨ ਜਾਨਨਂ. ਕਥਂ ਤੇ ਧਮ੍ਮੇ ਆਰਮ੍ਮਣਂ ਅਕਰੋਨ੍ਤੋ ਮਗ੍ਗੋ ਤੇ ਧਮ੍ਮੇ ਪਰਿਜਾਨਾਤਿ ਨਾਮਾਤਿ. ਕਿਚ੍ਚਸਿਦ੍ਧਿ ਵਸੇਨ. ਸੋ ਹਿ ਸਮ੍ਮੋਹਂ ਪਜਹਨ੍ਤੋ ਆਰਮ੍ਮਣਂ ਕਰੋਨ੍ਤਾਨਿਪਿ ਹਿ ਪੁਬ੍ਬਭਾਗਞ੍ਞਾਣਾਨਿ ਤਪ੍ਪਹਾਨਕਿਚ੍ਚਸ੍ਸ ਅਸਾਧਕਤ੍ਤਾ ਦੁਕ੍ਖ ਸਚ੍ਚਂ ਪਰਿਜਾਨਨ੍ਤਾਨੀਤਿ ਨ ਵੁਚ੍ਚਨ੍ਤਿ. ਮਗ੍ਗੋ ਪਨ ਆਰਮ੍ਮਣਂ ਅਕਰੋਨ੍ਤੋਪਿ ਤਪ੍ਪਹਾਨਕਿਚ੍ਚਸ੍ਸ ਸਾਧਕਤ੍ਤਾਤਂ ਸਚ੍ਚਂ ਪਰਿਜਾਨਾਤੀਤਿ ਵੁਚ੍ਚਤਿ. ਕਸ੍ਮਾ. ਤਤੋ ਪਟ੍ਠਾਯ ਤਸ੍ਸਪੁਗ੍ਗਲਸ੍ਸ ਸਬ੍ਬਕਾਲਂ ਤਸ੍ਮਿਂਸਚ੍ਚੇ ਪਰਿਜਾਨਨ ਕਿਚ੍ਚਸ੍ਸ ਸਿਦ੍ਧਤ੍ਤਾ. ਯਥਾਹਿ ਏਕੋ ਪੁਰਿਸੋ ਚਕ੍ਖੁਮ੍ਹਿ ਪਿਤ੍ਤਸੇਮ੍ਹਾਦਿਦੋਸੇਹਿ ਪਲਿਬੁਦ੍ਧਤ੍ਤਾ ਅਨ੍ਧੋ ਹੋਤਿ. ਨ ਕਿਞ੍ਚਿ ਪਸ੍ਸਤਿ. ਯਦਾ ਪਨ ਸੋ ਏਕਂ ਤੇਜਵਨ੍ਤਂ ਅਞ੍ਜਨਂ ਲਭਿਤ੍ਵਾ ਚਕ੍ਖੁਂ ਅਞ੍ਜਯਨ੍ਤੋ ਸਬ੍ਬਰਤ੍ਤਿਂ ਨਿਦ੍ਦਾਯਤਿ. ਤਸ੍ਸ ਨਿਦ੍ਦਾਯਨ੍ਤਸ੍ਸੇਵ ਚਕ੍ਖੁਮ੍ਹਿ ਸਬ੍ਬਦੋਸਾ ਨਸ੍ਸਨ੍ਤਿ. ਚਕ੍ਖੁ ਵਿਪ੍ਪਸਨ੍ਨਂ ਹੋਤਿ. ਤਙ੍ਖਣਤੋ ਪਟ੍ਠਾਯ ਸੋ ਨਿਦ੍ਦਾਯਨ੍ਤੋਪਿ ਰੂਪਾਨਿ ਪਸ੍ਸਤੀਤਿ ਵੁਚ੍ਚਤਿ. ਕਸ੍ਮਾ, ਅਨ੍ਧਭਾਵਵਿਗਮੇਨ ਦਸ੍ਸਨਕਿਚ੍ਚਸ੍ਸ ਸਿਦ੍ਧਤ੍ਤਾ. ਏਵਮੇਵਮਿਦਂ ਦਟ੍ਠਬ੍ਬਨ੍ਤਿ. ਏਕਦੇਸੇਨ ਵਾ ਹੇਟ੍ਠਿਮਮਗ੍ਗੇਸੁ, ਅਨਵਸੇਸੇਨ ਵਾ ਅਰਹਤ੍ਤਮਗ੍ਗੇ. ‘‘ਅਪਚ੍ਛਾਵਤ੍ਤਿਕਂ’’ਤਿ ਏਤ੍ਥ ਪਚ੍ਛਤੋ ਆਵਤ੍ਤਨਂ ਪਚ੍ਛਾਵਤ੍ਤਂ. ਨਤ੍ਥਿ ਪਚ੍ਛਾਵਤ੍ਤਂ ਅਸ੍ਸਾਤਿ ਅਪਚ੍ਛਾਵਤ੍ਤਿਕਨ੍ਤਿ ਵਿਗ੍ਗਹੋ. ‘‘ਪੁਨ ਅਨੁਪ੍ਪਾਦਧਮ੍ਮਤਾਪਤ੍ਤਿਵਸੇਨ ਨਿਰੋਧਸਙ੍ਖਾਤਂ’’ਤਿ ਮਗ੍ਗਕ੍ਖਣੇ ਏਵ ਤਾਨਿਵਟ੍ਟਾਨਿ ਪੁਨ ਅਨੁਪ੍ਪਾਦਸਭਾਵਂ ਆਪਜ੍ਜਨ੍ਤਿ, ਨਿਰੁਜ੍ਝਨ੍ਤਿ. ਤਥਾ ਨਿਰੋਧਸਙ੍ਖਾਤਂ. ‘‘ਉਪ੍ਪਾਦਨਸਙ੍ਖਾਤਾਯ ਭਾਵਨਾਯਾ’’ਤਿ ਏਤੇਨ ਮਗ੍ਗਸ੍ਸ ਏਕਚਿਤ੍ਤਕ੍ਖਣਿਕਤ੍ਤਾ ਵਡ੍ਢਨਸਙ੍ਖਾਤਾਯ ਭਾਵਨਾਯ ਓਕਾਸੋ ਨਤ੍ਥੀਤਿ ਕਤ੍ਵਾ ਵੁਤ੍ਤਂ. ਅਰਿਯਮਗ੍ਗਂ ਪਟਿਲਾਭਤ੍ਥਾਯ ਪਨ ਪਵਤ੍ਤਿਤਾ ਪੁਬ੍ਬਭਾਗਭਾਵਨਾਪਿ ਮਗ੍ਗਭਾਵਨਾ ਏਵ. ਸਾ ਚ ਅਰਿਯਮਗ੍ਗਂ ਪਤ੍ਵਾ ਮਤ੍ਥਕਪਤ੍ਤਾ ਹੋਤਿ. ਤਸ੍ਮਾ ਅਰਿਯਮਗ੍ਗੋ ਏਵ ਮਤ੍ਥਕਪਤ੍ਤੋ ਭਾਵਨਾਨੁਤ੍ਤਰੋ ਹੋਤੀਤਿ ਇਮਿਨਾਪਰਿਯਾਯੇਨ ਵਡ੍ਢਨ ਸਙ੍ਖਾਤਾਯ ਭਾਵਨਾਯਾਤਿਪਿ ਯੁਜ੍ਜਤਿਯੇਵ. ਅਤ੍ਤਨੋ ਅਨਨ੍ਤਰੇ ਪਵਤ੍ਤਂ ਆਨਨ੍ਤਰਿਕਂ. ਆਨਨ੍ਤਰਿਕਂ ਫਲਂ ਏਤਸ੍ਸਾਤਿ ਵਿਗ੍ਗਹੋ. ਤਸ੍ਸ ਚ ਤਤੋਪਰਂ ਦ੍ਵੇ ਵਾ ਤੀਣਿ ਵਾ ਫਲਚਿਤ੍ਤਾਨਿ ਪਵਤ੍ਤਨ੍ਤੀਤਿ ਇਮਿਨਾ ਸਮ੍ਬਨ੍ਧੋ. ਅਪਨੀਤੋ ਅਗ੍ਗਿ ਏਤਸ੍ਮਾਤਿ ਅਪਨੀਤਗ੍ਗਿਕੋ. ‘‘ਨਿਬ੍ਬਾਪੇਨ੍ਤੋ ਵਿਯਾ’’ਤਿ ਏਤੇਨ ਪਟਿਪ੍ਪਸ੍ਸਮ੍ਭਨਪ੍ਪਹਾਨਕਿਚ੍ਚੇਨ ਮਗ੍ਗਾਨੁਕੁਲਪ੍ਪਵਤ੍ਤਿਂ ਦਸ੍ਸੇਤਿ. ‘‘ਤੇਸਂ’’ਤਿ ਤੇਸਂ ਚਕ੍ਖੂਨਂ. ਤਂ ਰੂਪਂ ਤਸ੍ਸ ਪਾਕਟਂ ਨ ਤਾਵ ਹੋਤੀਤਿ ਸਮ੍ਬਨ੍ਧੋ. ‘‘ਤਸ੍ਸਾ’’ਤਿ ਤਸ੍ਸ ਪੁਗ੍ਗਲਸ੍ਸ. ‘‘ਪਚ੍ਚਵੇਕ੍ਖਨਵਾਰੇਸੂ’’ਤਿ ਏਤ੍ਥ ਪਸਾਦਚਕ੍ਖੁਨਾ ਦਿਟ੍ਠੇ ਪਵਤ੍ਤਾ ਅਨੁਬਨ੍ਧਕ ਵੀਥਿਯੋਪਿ ਸਙ੍ਗਯ੍ਹਨ੍ਤਿ.

ਉਪਰਿਮਗ੍ਗੇਹਿ ਵਧਿਤਬ੍ਬਾ ਮਾਰੇਤਬ੍ਬਾਤਿ ਉਪਰਿਮਗ੍ਗਵਜ੍ਝਾ. ‘‘ਕਿਲੇਸਵਿਭਾਗੇਸੂ’’ਤਿ ਅਸੁਕਮਗ੍ਗੇਨ ਅਸੁਕਾਕਿਲੇਸਾ ਪਹੀਯਨ੍ਤੀਤਿ ਏਵਂ ਕਿਲੇਸਵਿਭਾਗੇਸੁ. ‘‘ਪਾਲ਼ਿਯਂ’’ਤਿ ਪਟਿਸਮ੍ਭਿਦਾ ਮਗ੍ਗਪਾਲ਼ਿਯਂ. ਵੁਚ੍ਚਮਾਨੇ ਪਨ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਮਗ੍ਗਙ੍ਗਬੋਜ੍ਝਙ੍ਗਾਦੀਨਂ ਪਚ੍ਚਵੇਕ੍ਖਨਂ ਨਾਮ ਮਗ੍ਗਪਚ੍ਚਵੇਕ੍ਖਨਮੇਵ. ਤਥਾ ਪਚ੍ਛਾ ਵਾ ਪਵਤ੍ਤਤੀਤਿ ਸਿਦ੍ਧਂ. ‘‘ਅਵਿਰੁਦ੍ਧਾ ਹੋਤੀ’’ਤਿ ਵਿਸੁਦ੍ਧਿਮਗ੍ਗੇਨ ਅਸਮੇਨ੍ਤਾਪਿ ਪਚ੍ਚਵੇਕ੍ਖਨ੍ਤਾਨਂ ਇਚ੍ਛਾਨੁਰੂਪਸਮ੍ਭਵਤੋਤਿ ਅਧਿਪ੍ਪਾਯੋ. ‘‘ਅਧਿਮਾਨਨਿਦ੍ਦੇਸ ਅਟ੍ਠਕਥਾਸੂ’’ਤਿ ਵਿਨਯੇ ਚਤੁਤ੍ਥਪਾਰਾਜਿਕੇ ਅਧਿਮਾਨਪਦਨਿਦ੍ਦੇਸ ਅਟ੍ਠਕਥਾਸੁ. ‘‘ਸੋ’’ਤਿ ਅਰਿਯਭੂਤੋ ਭਿਕ੍ਖੁ. ‘‘ਨੋ ਲਦ੍ਧੁਂ ਨ ਵਟ੍ਟਤੀ’’ਤਿ ਅਲਦ੍ਧੁਂ ਨ ਵਟ੍ਟਤੀਤਿ ਅਤ੍ਥੋ. ਲਦ੍ਧੁਂ ਨੋ ਨ ਵਟ੍ਟਤੀਤਿ ਵਾ ਯੋਜਨਾ. ਚਤੁਬ੍ਬਿਧਂ ਮਗ੍ਗਞ੍ਞਾਣਂ ਗਹਿਤਂ. ਞਾਣਦਸ੍ਸਨਵਿਸੁਦ੍ਧਿ ਨਾਮਾਤਿ ਵੁਤ੍ਤਤ੍ਤਾ.

‘‘ਅਭਿਨਿਵਿਸਨਂ’’ਤਿ ਅਜ੍ਝਤ੍ਤਂ ਦਲ਼੍ਹਤਰਂ ਪਤਿਟ੍ਠਾਨਂ. ‘‘ਨਿਖਾਤਸਿਨੇਰੁਪਾ ਦਸ੍ਸਵਿਯਾ’’ਤਿ ਤਸ੍ਸ ਪਵਤ੍ਤਨਂ ਵਿਯ. ‘‘ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਾਯ ਅਦਿਟ੍ਠਤ੍ਤਾ’’ਤਿ ਏਤੇਨ ਏਸੋ ਮੇ ਅਤ੍ਤਾ, ਨ ਪਰਸ੍ਸ ਅਤ੍ਤਾਤਿ ਏਵਂ ਅਤ੍ਤਾਨਂ ਅਤ੍ਤਸ੍ਸ ਸਾਮਿਕਂ ਕਤ੍ਵਾ ਗਹਣਕਾਰਣਂ ਵਦਤਿ. ਤਤ੍ਥ ਕੇਵਲਸਦ੍ਦੇਨ ਪਰਮਤ੍ਥ ਸਚ੍ਚਂ ਪਤ੍ਵਾ ਅਤ੍ਤਸ੍ਸੇਵ ਅਭਾਵਤੋ ਖਨ੍ਧਪਞ੍ਚਕਸ੍ਸ ਅਤ੍ਤਨੋਵਸਾਯਤ੍ਤ ਵੁਤ੍ਤਿਤਂ ਨਿਵਤ੍ਤੇਤਿ. ਸਮ੍ਮੁਤਿ ਸਚ੍ਚਂ ਪਨ ਪਤ੍ਵਾ ਅਤ੍ਤਸ੍ਸ ਵਿਜ੍ਜਮਾਨਤ੍ਤਾ ਮਹਾਜਨੋ ਅਤ੍ਤਨੋ ਖਨ੍ਧਪਞ੍ਚਕਂ ਅਤ੍ਤਨੋ ਵਸਾਯਤ੍ਤ ਵੁਤ੍ਤਿਂ ਮਞ੍ਞਮਾਨੋ ਏਸੋ ਮੇ ਅਤ੍ਤਾਤਿ ਗਣ੍ਹਾਤਿ. ‘‘ਖਣਭਙ੍ਗਸ੍ਸ ਚ ਅਦਿਟ੍ਠਤ੍ਤਾ’’ਤਿ ਏਤੇਨ ਏਸੋ ਮੇ ਸਾਰਟ੍ਠੇਨ ਅਤ੍ਤਾ. ਏਸੋ ਮਮ ਸਾਰੋ. ਏਤਂ ਮਮ ਸਰੀਰਂ. ਯਾਵ ਵਸ੍ਸਸਤਂਪਿ ਵਸ੍ਸਸਹਸ੍ਸਮ੍ਪਿ ਏਤਂ ਖਨ੍ਧਪਞ੍ਚਕਂ ਨ ਭਿਜ੍ਜਤਿ, ਨ ਵਿਨਸ੍ਸਤਿ. ਤਾਵ ਅਹਂ ਨ ਮਰਾਮਿ. ਯਦਾ ਏਤਂ ਭਿਜ੍ਜਤਿ, ਵਿਨਸ੍ਸਤਿ. ਤਦਾ ਅਹਂ ਮਰਾਮਿ. ਅਹਞ੍ਚ ਮਮ ਖਨ੍ਧਪਞ੍ਚਕਞ੍ਚ ਅਦ੍ਵਯਂ ਅਨਾਨਤ੍ਤਨ੍ਤਿ ਏਵਂ ਗਹਣਕਾਰਣਂ ਵਦਤਿ. ਤਤ੍ਥ ‘‘ਖਣਭਙ੍ਗਸ੍ਸਾ’’ਤਿ ਨਾਮਰੂਪਧਮ੍ਮਾਨਂ ਖਣੇ ਖਣੇ ਭਞ੍ਜਨਸ੍ਸ ਭਿਜ੍ਜਨਸ੍ਸ ਮਰਣਸ੍ਸ. ਇਦਮ੍ਪਨਮਰਣਂ ਸਮ੍ਮੁਤਿ ਸਚ੍ਚੇ ਨਤ੍ਥਿ. ਪਰਮਤ੍ਥ ਸਚ੍ਚੇ ਏਵ ਅਤ੍ਥਿ. ਤਸ੍ਮਾ ਤਂ ਅਪਸ੍ਸਨ੍ਤੋ ਮਹਾਜਨੋ ਅਤ੍ਤਨੋ ਖਨ੍ਧਪਞ੍ਚਕਂ ਅਤ੍ਤਨੋਸਾਰਂ ਮਞ੍ਞਮਾਨੋ ਏਸੋ ਮੇ ਅਤ੍ਤਾਤਿ ਗਣ੍ਹਾਤੀਤਿ. ‘‘ਤਂ ਦ੍ਵਯਂ ਸੁਦਿਟ੍ਠਂ ਕਤ੍ਵਾ’’ਤਿ ਖਨ੍ਧਪਞ੍ਚਕਸ੍ਸ ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਞ੍ਚ ਖਣਭਙ੍ਗਞ੍ਚ ਞਾਣ ਚਕ੍ਖੁਨਾ ਸੁਟ੍ਠੁਦਿਟ੍ਠਂ ਕਤ੍ਵਾ. ਤਤ੍ਥ ਪਞ੍ਚਨ੍ਨਂ ਖਨ੍ਧਾਨਂ ਪਟਿਚ੍ਚਸਮੁਪ੍ਪਾਦਂ ਸੁਟ੍ਠੁਪਸ੍ਸਨ੍ਤੋ ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਞ੍ਚ ਅਵਸਾਯਤ੍ਤ ਵੁਤ੍ਤਿਤਞ੍ਚ ਸੁਟ੍ਠੁ ਪਸ੍ਸਤਿ. ਯੋ ਚ ਅਤ੍ਤਨੋ ਵਸਾਯਤ੍ਤਵੁਤ੍ਤਿ ਨ ਹੋਤਿ. ਸੋ ਪਰਮਤ੍ਥਸਚ੍ਚਂ ਪਤ੍ਵਾ ਏਸੋ ਮਮ ਸਨ੍ਤਕਨ੍ਤਿਪਿ ਵਤ੍ਤੁਂ ਨਾਰਹਤਿ. ਕੁਤੋ ਮਮ ਅਤ੍ਤਾਤਿ. ਅਪਿ ਚ, ਸਤ੍ਤੋ ਨਾਮ ਸਭਾਵਤੋ ਨਤ੍ਥਿ. ਪਞ੍ਞਤ੍ਤਿਮਤ੍ਤਂ ਹੋਤਿ. ਯੋ ‘ਅਹਨ੍ਤਿ ਵਾ, ਮੇਤਿ ਵਾ, ਮਮਾਤਿ ਵਾ, ਗਯ੍ਹੇਯ੍ਯ. ਅਸਨ੍ਤੇ ਚ ਅਤ੍ਤਸ੍ਮਿਂ ਕੋ ਮਮ ਅਤ੍ਤਾ ਨਾਮ ਭਵੇਯ੍ਯਾਤਿ. ਖਣਭਙ੍ਗੋ ਹੋਤਿ. ਖਣੇ ਖਣੇ ਭਿਜ੍ਜਤਿ. ਸਤ੍ਤੋ ਚ ਨਾਮ ਏਕਸ੍ਮਿਂਭਵੇ ਆਦਿਮ੍ਹਿ ਸਕਿਂ ਏਵ ਜਾਯਤਿ. ਅਨ੍ਤੇ ਸਕਿਂ ਏਵ ਮਰਤਿ. ਅਨ੍ਤਰਾ ਵਸ੍ਸਸਤਂਪਿ ਵਸ੍ਸਸਹਸ੍ਸਂਪਿ ਮਰਣਂ ਨਾਮ ਨਤ੍ਥਿ. ਅਞ੍ਞਾਹਿ ਖਣਿਕਧਮ੍ਮਾਨਂ ਗਤਿ. ਅਞ੍ਞਾ ਸਤ੍ਤਸ੍ਸ. ਏਵਂਸਨ੍ਤੇ ਕਥਂ ਖਣਿਕਧਮ੍ਮਾ ਸਤ੍ਤਸ੍ਸ ਸਾਰਟ੍ਠੇਨ ਅਤ੍ਤਾਨਾਮ ਭਵੇਯ੍ਯੁਨ੍ਤਿ. ਤਸ੍ਮਾ ਤੇ ਅਵਸਵਤ੍ਤਨਟ੍ਠੇਨ ਅਸਾਰਕਟ੍ਠੇਨ ਚ ਅਨਤ੍ਤਾ ਏਵ. ਅਪਿਚ ‘‘ਅਵਸਵਤ੍ਤਨਟ੍ਠੇਨਾ’’ਤਿ ਏਤ੍ਥ ਵਸੋ ਨਾਮ ਸਤ੍ਤਸਨ੍ਤਾਨੇ ਏਕੋ ਪਧਾਨਧਮ੍ਮੋ. ਸਚੇ ਅਤ੍ਤਾਨਾਮ ਅਤ੍ਥਿ. ਸੋ ਏਵ ਪਧਾਨਭੂਤਸ੍ਸ ਵਸਸ੍ਸਪਿ ਅਤ੍ਤਾ ਭਵੇਯ੍ਯ. ਏਵਂਸਤਿ, ਯੋ ਵਸੋ, ਸੋ ਅਤ੍ਤਾ. ਯੋ ਅਤ੍ਤਾ, ਸੋ ਵਸੋਤਿ ਭਵੇਯ੍ਯ. ਤਥਾ ਚ ਸਤਿ, ਰੂਪਂ ਅਤ੍ਤਾਤਿ ਗਣ੍ਹਨ੍ਤੋ ਰੂਪਞ੍ਚ ਵਸਞ੍ਚ ਅਤ੍ਤਾਨਞ੍ਚ ਏਕਤ੍ਤਂ ਕਤ੍ਵਾ ਗਣ੍ਹਾਤਿ ਨਾਮ. ਤਥਾ ਵੇਦਨਂ ਅਤ੍ਤਾਤਿ. ਸਞ੍ਞਂ, ਸਙ੍ਖਾਰੇ, ਵਿਞ੍ਞਾਣਂ ਅਤ੍ਤਾਤਿ ਗਣ੍ਹਨ੍ਤੇਪਿ. ਏਵਞ੍ਚਸਤਿ, ਸਤ੍ਤੋ ਚ ਖਨ੍ਧਪਞ੍ਚਕਞ੍ਚ ਵਸੋ ਚ ਅਤ੍ਤਾ ਚ ਸਬ੍ਬਮੇਤਂ ਏਕਤ੍ਤਂ ਗਚ੍ਛਤਿ, ਏਕੋ ਸਤ੍ਤੋਤਿ ਸਙ੍ਖ੍ਯਂ ਗਚ੍ਛਤਿ. ਨ ਹਿ ਇਮਸ੍ਮਿਂ ਵਸਵਤ੍ਤਨਟ੍ਠੇ ਏਕਸ੍ਸਸਤ੍ਤਸ੍ਸ ਦ੍ਵੇ ਅਤ੍ਤਾ ਤਯੋ ਅਤ੍ਤਾ ਬਹੂਅਤ੍ਤਾਤਿ ਸਕ੍ਕਾ ਭਵਿਤੁਂ. ਅਥ ਯਥਾ ਯਥਾ ਸਤ੍ਤਸ੍ਸ ਵਸੋ ਵਤ੍ਤਤਿ, ਇਚ੍ਛਾ ਪਵਤ੍ਤਤਿ. ਤਥਾ ਤਥਾ ਖਨ੍ਧਪਞ੍ਚਕਮ੍ਪਿ ਨਿਚ੍ਚਕਾਲਂ ਸਤ੍ਤਸ੍ਸਵਸਂ ਅਨੁਗਚ੍ਛੇਯ੍ਯ. ਕਸ੍ਮਾ, ਸਤ੍ਤਸ੍ਸ ਚ ਖਨ੍ਧਪਞ੍ਚਕਸ੍ਸ ਚ ਵਸਸ੍ਸ ਚ ਨਾਨਤ੍ਤਾਭਾਵਤੋ. ਏਵਂ ਅਨੁਗਚ੍ਛਨ੍ਤੇ ਸਤਿ. ਰੂਪਂ ਮੇ ਅਤ੍ਤਾ, ਵੇਦਨਾ ਮੇ ਅਤ੍ਤਾਤਿਆਦਿਗ੍ਗਹਣਂ ਵਟ੍ਟੇਯ੍ਯ. ਸਭਾਵਤੋ ਅਵਿਰੁਦ੍ਧਂ ਭਵੇਯ੍ਯ. ਨ ਪਨ ਤਥਾ ਅਨੁਗਚ੍ਛਤਿ. ਨ ਹਿ ਦੁਬ੍ਬਣ੍ਣੋ ਦੁਰੂਪੋ ਪੁਰਿਸੋ ਅਤ੍ਤਨੋ ਰੂਪਕਾਯਂ ਅਤ੍ਤਨੋ ਵਸੇਨੇਵ ਸੁਵਣ੍ਣਂ ਸੁਰੂਪਂ ਕਾਤੁਂ ਸਕ੍ਕੋਤਿ. ਤਥਾ ਦੁਸ੍ਸਦ੍ਦੋਵਾ ਸੁਸਦ੍ਦਂ, ਦੁਗ੍ਗਨ੍ਧੋਵਾ ਸੁਗਨ੍ਧਂ. ਨ ਚ ਅਨ੍ਧੋਵਾ ਅਨਨ੍ਧਂ. ਬਧਿਰੋਵਾ ਅਬਧਿਰਂ. ਰੋਗੀਵਾ ਅਰੋਗਂ. ਕੁਟ੍ਠੀਵਾ ਅਕੁਟ੍ਠਂ. ਗਣ੍ਡੀਵਾ ਅਗਣ੍ਡਂ. ਜਿਣ੍ਣੋਵਾ ਤਰੁਣਂ. ਅਜਰਂ ਵਾ ਅਮਰਣਂ ਵਾ ਕਾਤੁਂ ਸਕ੍ਕੋਤਿ. ਨਾਪਿ ਅਪਾਯੇਸੁ ਚ ਅਪਤਨ੍ਤਂ. ਪਤਿਤ੍ਵਾ ਵਾ ਤਤੋ ਵਿਮੁਤ੍ਤਂ ਕਾਤੁਂ ਸਕ੍ਕੋਤਿ. ਤਥਾ ਦੇਵੋ ਵਾ ਦੇਵਤ੍ਤਾ ਅਚਾਵੇਤੁਂ. ਸਕ੍ਕੋਵਾ ਸਕ੍ਕਤ੍ਤਾ, ਮਾਰੋ ਵਾ ਮਾਰਤ੍ਤਾ, ਬ੍ਰਹ੍ਮਾ ਵਾ ਬ੍ਰਹ੍ਮਤ੍ਤਾਤਿ. ਏਸਨਯੋ ਸੇਸਖਨ੍ਧੇਸੁਪਿ. ਤਥਾ ਪਨ ਅਵਸਾਨੁਗਮਨਤੋ ਪਰਮਤ੍ਥ ਸਚ੍ਚਂ ਪਤ੍ਵਾ ਖਨ੍ਧਪਞ੍ਚਕੇ ਅਤ੍ਤਨੋ ਸਾਮਿਕਿਚ੍ਚਂ ਇਸ੍ਸਰਕਿਚ੍ਚਂ ਨਾਮ ਨਤ੍ਥਿ. ਅਸਾਮਿਕਮੇਵ ਤਂ ਹੋਤਿ, ਅਨਿਸ੍ਸਰਂ. ਤਥਾ ਚ ਸਤਿ, ਅਤ੍ਤਾਨਂ ਤਸ੍ਸ ਸਾਮਿਂ ਇਸ੍ਸਰਂ ਕਤ੍ਵਾ ਰੂਪਂ ਮੇ ਅਤ੍ਤਾਤਿ ਗਹਣਂ ਮਿਚ੍ਛਾਗਹਣਂ ਨਾਮ ਹੋਤੀਤਿ. ਲੋਕੇ ਪਨ ਮਹਾਜਨੋ ਧਮ੍ਮਾਨਂ ਪਟਿਚ੍ਚਸਮੁਪ੍ਪਾਦਂ ਨ ਜਾਨਨ੍ਤਿ, ਨ ਪਸ੍ਸਨ੍ਤਿ, ਨ ਪਟਿਵਿਜ੍ਝਨ੍ਤਿ. ਤੇਸਂ ਪਰਮ੍ਪਰ ਪਚ੍ਚਯਵਸੇਨ ਪਵਤ੍ਤਮਾਨੇ ਖਨ੍ਧਸਨ੍ਤਾਨੇ ਸਮ੍ਮੁਤਿ ਸਚ੍ਚਵਸੇਨ ਨਾਨਾਵਸਵਤ੍ਤਨਾਕਾਰਾ ਨਾਮ ਸਨ੍ਤਿ. ਨਾਨਾਸਾਮਿ ਇਸ੍ਸਰਾਧਿਪਤਿਵੋਹਾਰਾ ਚ ਲੋਕੇ ਸਨ੍ਦਿਸ੍ਸਨ੍ਤਿ. ਤੇ ਸਮ੍ਮੁਤਿ ਸਚ੍ਚਵਸੇਨ ਉਪ੍ਪਨ੍ਨੇਸੁ ਤੇਸੁ ਸਾਮਿਇਸ੍ਸਰਾਧਿਪਤਿ ਵੋਹਾਰੇਸੁ ਵੋਹਾਰਮਤ੍ਤੇ ਅਠਤ੍ਵਾ ਸਭਾਵਸਚ੍ਚਂ ਮਞ੍ਞਨ੍ਤਾ ਮਿਚ੍ਛਾਗਹਣਂ ਗਣ੍ਹਨ੍ਤਿ. ਏਤ੍ਥ ਸਿਯਾ. ਨ ਨੁ ਵਸੋਨਾਮ ਇਚ੍ਛਾ. ਸਤ੍ਤੋ ਚ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤਿ. ਠਾਤੁਂ ਇਚ੍ਛਨ੍ਤੋ ਤਿਟ੍ਠਤਿ. ਏਵਂਸਤਿ. ਤਸ੍ਸ ਖਨ੍ਧਪਞ੍ਚਕਂ ਤਸ੍ਸ ਵਸਾਯਤ੍ਤ ਵੁਤ੍ਤਿ ਏਵ ਹੋਤੀਤਿ. ਨ ਹੋਤਿ. ਕਸ੍ਮਾ, ਪਚ੍ਚਯਾਯਤ੍ਤ ਵੁਤ੍ਤਿਤ੍ਤਾ ਏਵ. ਤਥਾਹਿ ਗਨ੍ਤੁਂ ਇਚ੍ਛਾਨਾਮ ਬਹਿਦ੍ਧਾ ਧਨਹੇਤੁਵਾ ਉਪ੍ਪਜ੍ਜੇਯ੍ਯ. ਨਾਨਾਭੋਗਹੇਤੁ ਵਾ. ਅਞ੍ਞੇਨ ਵਾ ਨਾਨਾਕਾਰਣੇਨ. ਤਤ੍ਥ ਯੇਸਂ ਧਨੇ ਅਸਤਿ, ਯਂ ਯਂ ਦੁਕ੍ਖਂ ਆਗਚ੍ਛੇਯ੍ਯ ਕਾਯਿਕਂ ਵਾ ਚੇਤਸਿਕਂ ਵਾ. ਤੇਸਂ ਤਂ ਤਂ ਦੁਕ੍ਖਪਚ੍ਚਯਾ ਧਨਿਚ੍ਛਾ ਨਾਮ ਉਪ੍ਪਜ੍ਜਤਿ. ਧਨਿਚ੍ਛਾ ਪਚ੍ਚਯਾ ਗਨ੍ਤਿਚ੍ਛਾਦਯੋ ਉਪ੍ਪਜ੍ਜਨ੍ਤਿ. ਤਥਾ ਨਾਨਾਭੋਗਿਚ੍ਛਾ ਨਾਨਾਕਮ੍ਮਿਚ੍ਛਾਸੁ ਚਾਤਿ. ਨਾਨਾਦੁਕ੍ਖਭਯੁਪਦ੍ਦਵਮੂਲਿਕਾਸੁ ਇਚ੍ਛਾਸੁ ਵਤ੍ਤਬ੍ਬ ਮੇਵ ਨਤ੍ਥਿ. ਤਥਾ ਨਾਨਾਰਮ੍ਮਣਾਨਂ ਪਲੋਭਨ ਦੁਕ੍ਖਮੂਲਿਕਾਸੁ ਚ ਨਾਨਾਵਿਤਕ੍ਕਾਨਂ ਵਿਪ੍ਫਨ੍ਦਨਮੂਲਿਕਾਸੁ ਚ ਇਚ੍ਛਾਸੁ. ਏਵਂ ਵਸੋਪਿ ਪਚ੍ਚਯਾਯਤ੍ਤ ਵੁਤ੍ਤਿਕੋ ਏਵ ਹੋਤਿ. ‘‘ਗਮਨਂ’’ਤਿ ਗਮਨਾਕਾਰੇਨ ਪਵਤ੍ਤਂ ਖਨ੍ਧਪਞ੍ਚਕਂ. ਯੇਨਯੇਨਧਨਾਦਿਹੇਤੁਨਾ ਸੋ ਸੋ ਵਸੋ ਉਪ੍ਪਜ੍ਜਤਿ. ਗਮਨਮ੍ਪਿ ਤੇਨ ਤੇਨੇਵ ਉਪ੍ਪਜ੍ਜਤਿ ਆਹਾਰੁਪਤ੍ਥਮ੍ਭਨਾਦਿਪਚ੍ਚਯੇਨ ਚ. ਵਸੋ ਪਨ ਗਮਨਸ੍ਸ ਪਚ੍ਚਯੇਕ ਦੇਸਮਤ੍ਤਂ ਹੋਤਿ. ਸੋ ਹਿ ਤਦਞ੍ਞਪਚ੍ਚਯੇਹਿ ਵਿਨਾ ਸਯਂ ਉਪ੍ਪਜ੍ਜਿਤੁਂ ਨ ਸਕ੍ਕੋਤਿ. ਕੁਤੋ ਗਮਨਂ ਉਪ੍ਪਾਦੇਤੁਂ. ਏਵਂ ਠਾਨਾਦੀਸੁ. ਏਵਞ੍ਚ ਸਤਿ, ਇਦਂ ਖਨ੍ਧਪਞ੍ਚਕਂ ਪਚ੍ਚਯਾਯਤ੍ਤ ਵੁਤ੍ਤਿਕਨ੍ਤਿਚ੍ਚੇਵ ਵਤ੍ਤੁਂ ਅਰਹਤਿ. ਨੋ ਵਸਾਯਤ੍ਤ ਵੁਤ੍ਤਿਕਨ੍ਤਿ. ਅਪਿ ਚ ਗਨ੍ਤੁਂ ਇਚ੍ਛਨ੍ਤੋ ਗਚ੍ਛਤੀਤਿ ਪਞ੍ਞਤ੍ਤਿ ਮਤ੍ਤਭੂਤੋ ਸਤ੍ਤੋ ਗਚ੍ਛਤਿ. ਖਨ੍ਧਪਞ੍ਚਕਂ ਪਨ ਖਣਿਕ ਧਮ੍ਮਤ੍ਤਾ ਨ ਗਚ੍ਛਤਿ. ਉਪ੍ਪਨ੍ਨੁਪ੍ਪਨ੍ਨਂ ਤਤ੍ਥ ਤਤ੍ਥੇਵ ਭਿਜ੍ਜਤਿ. ਸਨ੍ਤਤਿ ਵਸੇਨ ਗਮਨਾਕਾਰ ਨਿਮਿਤ੍ਤਂ ਪਞ੍ਞਾਯਤਿ. ਏਵਂ ਅਵਸਵਤ੍ਤਨਂ ਹੋਤੀਤਿ. ਹੋਤੁ ਤਤ੍ਥ ਤਤ੍ਥੇਵ ਭਿਜ੍ਜਨਂ. ਅਵਿਚ੍ਛੇਦਪ੍ਪਵਤ੍ਤਿਯਾ ਸਤਿ, ਗਮਨਂ ਸਮ੍ਪਜ੍ਜਤਿਯੇਵ. ਗਮਨੇ ਚ ਸਮ੍ਪਜ੍ਜਮਾਨੇ ਖਣਿਕਭਿਜ੍ਜਨੇਨ ਦੋਸੋ ਨਤ੍ਥੀਤਿ ਚੇ. ਅਤ੍ਥਿ. ਖਣਿਕਮਰਣਞ੍ਹਿ ਸਤ੍ਤਸ੍ਸ ਸੁਸਾਨਭੂਮਿ ਨਾਮ ਹੋਤਿ. ਅਨ੍ਤਰਾਯੇਵਾ ਆਗਤੇ ਪਕ੍ਖਲਨ੍ਤੇ ਵਾ ਸਤਿ, ਗਚ੍ਛਨ੍ਤੋ ਸਤ੍ਤੋ ਯਦਾ ਕਦਾਚਿ ਮਰਣਂ ਵਾ ਨਿਗਚ੍ਛਤਿ ਮਰਣ ਮਤ੍ਤਂ ਵਾ ਦੁਕ੍ਖਨ੍ਤਿ. ਕਿਲੇਸੇ ਨਿਮਿਨਾਤਿ ਪਵਤ੍ਤੇਤੀਤਿ ਨਿਮਿਤ੍ਤਨ੍ਤਿ ਵਚਨਤ੍ਥੋ. ‘‘ਵਿਪਲ੍ਲਾਸਨਿਮਿਤ੍ਤਂ’’ਤਿ ਚ ਵਿਪਲ੍ਲਾਸ ਧਮ੍ਮਾਨਂ ਵਸੇਨ ਉਪਟ੍ਠਿਤਂ ਕਿਚ੍ਚ ਨਿਮਿਤ੍ਤਂ. ਤਣ੍ਹਾ ਏਵ ਪਣਿਧੀਤਿ ਸਮ੍ਬਨ੍ਧੋ. ਮਹਨ੍ਤਾਨਂ ਆਦੀਨਵਾਨਂ ਰਾਸਿ ਮਹਾਆਦੀਨਵਰਾਸਿ. ਖਨ੍ਧੇਸੁ ਸੁਞ੍ਞਤਲਕ੍ਖਣਂ ਨਾਮ ਅਤਿ ਗਮ੍ਭੀਰਂ ਹੋਤਿ. ਞਾਣਸ੍ਸੇਵ ਵਿਸਯਭੂਤਂ. ਸੁਞ੍ਞਤ ਦਸ੍ਸਨਞ੍ਚ ਦਿਟ੍ਠਿਯਾ ਉਜੁਪ੍ਪਟਿਪਕ੍ਖਨ੍ਤਿ ਆਹ ‘‘ਸਙ੍ਖਾਰੇਸੁ ਸੁਞ੍ਞਤਦਸ੍ਸਨਵਸੇਨਾ’’ਤਿਆਦਿਂ. ਤਤ੍ਥ ‘‘ਅਤ੍ਥ ਸਿਦ੍ਧਿ ਨਾਮਾ’’ਤਿ ਮਗ੍ਗਫਲਪ੍ਪਟਿਲਾਭਸਙ੍ਖਾਤਸ੍ਸ ਅਤ੍ਥਸ੍ਸ ਸਿਦ੍ਧਿ ਨਾਮ. ਅਤ੍ਤਾਤਿ ਅਭਿਨਿਵੇਸੋ ਅਤ੍ਤਾਭਿਨਿਵੇਸੋ. ਗਣ੍ਹਾਤੀਤਿ ਗਾਹੋ. ਉਪਾਦੀਯਤੀਤਿ ਅਤ੍ਥੋ. ਦਿਟ੍ਠਿਸਙ੍ਖਾਤੋ ਗਾਹੋ ਦਿਟ੍ਠਿਗ੍ਗਾਹੋ. ਅਤ੍ਥਾਭਿਨਿਵੇਸੋ ਚ ਸੋ ਦਿਟ੍ਠਿਗ੍ਗਾਹੋ ਚਾਤਿ ਵਿਗ੍ਗਹੋ. ਤਸ੍ਸ ਪਟਿਪਕ੍ਖਂ ਅਨਤ੍ਤਾਨੁਪਸ੍ਸਨਾਞਾਣਂ. ਅਨੁ ਅਨੁ ਭਵਨਂ ਆਨੁਭਾਵੋ. ਪਰਮ੍ਪਰਤੋ ਵਡ੍ਢਨਨ੍ਤਿ ਅਤ੍ਥੋ. ‘‘ਤਥਾ ਸਮਨੁਪਸ੍ਸਿਤ੍ਵਾ’’ਤਿ ਸੁਞ੍ਞਤਾ ਕਾਰੇਨ ਸਮਨੁਪਸ੍ਸਿਤ੍ਵਾ. ਵਿਮੁਞ੍ਚਨ੍ਤਸ੍ਸ ਅਰਿਯਪੁਗ੍ਗਲਸ੍ਸ. ‘‘ਅਨਿਚ੍ਚਲਕ੍ਖਣਂ ਨਾਮ ਨਾਤਿ ਗਮ੍ਭੀਰਂ ਹੋਤਿ. ਸਦ੍ਧਾਯਪਿ ਵਿਸਯਭੂਤਂ. ਉਨ੍ਨਤਿਲਕ੍ਖਣੋ ਚ ਅਹਂ ਮਾਨੋ ਖਨ੍ਧੇਸੁ ਨਿਚ੍ਚਧੁਵਵਿਪਲ੍ਲਾਸਮੂਲਕੋ ਸਦ੍ਧਾਯ ਚ ਪਟਿਪਕ੍ਖੋਤਿ ਆਹ ‘‘ਅਨਿਚ੍ਚਦਸ੍ਸਨਵਸੇਨਾ’’ਤਿਆਦਿਂ. ‘‘ਨਿਮਿਤ੍ਤਾਭਿਨਿਵੇਸਭੂਤਸ੍ਸਾ’’ਤਿ ਨਿਚ੍ਚਧੁਵਨਿਮਿਤ੍ਤਾਭਿਨਿਵੇਸਭੂਤਸ੍ਸ. ‘‘ਮਾਨਗ੍ਗਾਹਸ੍ਸਾ’’ਤਿ ਮਾਨਸਙ੍ਖਾਤਸ੍ਸ ਗਾਹਸ੍ਸ. ‘‘ਸਦ੍ਧਾਯ ਪੀ’’ਤਿਪਿਸਦ੍ਦੇਨ ਞਾਣਂ ਸਮ੍ਪਿਣ੍ਡੇਤਿ. ਦੁਕ੍ਖਲਕ੍ਖਣਂ ਨਾਮ ਭਯਸਂਵੇਗ ਜਨਕਂ ਹੋਤਿ. ਆਰਮ੍ਮਣੇਸੁ ਤਣ੍ਹਾਲੋਲਸ੍ਸ ਤਣ੍ਹਾਵਿਪ੍ਫਨ੍ਦਨਸ੍ਸ ਪਟਿਪਕ੍ਖਂ. ਵਿਸੇਸਤੋ ਸਮਾਧਿਸ੍ਸ ਅਨੁਰੂਪਨ੍ਤਿ ਆਹ ‘‘ਦੁਕ੍ਖਦਸ੍ਸਨ ਵਸੇਨਾ’’ਤਿਆਦਿਂ. ‘‘ਤਿਣ੍ਣਂ ਧਮ੍ਮਾਨਂ’’ਤਿ ਪਞ੍ਞਿਨ੍ਦ੍ਰਿਯ ਸਦ੍ਧਿਨ੍ਦ੍ਰਿਯ ਸਮਾਧਿਨ੍ਦ੍ਰਿਯ ਸਙ੍ਖਾਤਾਨਂ ਤਿਣ੍ਣਂ ਇਨ੍ਦ੍ਰਿਯ ਧਮ੍ਮਾਨਂ. ‘‘ਵਿਪਸ੍ਸਨਾ ਗਮਨਵਸੇਨੇ ਵਾ’’ਤਿ ਵੁਟ੍ਠਾਨਗਾਮਿਨਿ ਵਿਪਸ੍ਸਨਾ ਸਙ੍ਖਾਤਸ੍ਸ ਆਗਮਨ ਕਾਰਣਸ੍ਸ ਵਸੇਨੇਵ.

ਇਦਾਨਿ ਪੁਬ੍ਬੇ ਯਂ ਵੁਤ੍ਤਂ ‘ਸਤ੍ਤਅਰਿਯ ਪੁਗ੍ਗਲਵਿਭਾਗਸ੍ਸ ਪਚ੍ਚਯਭਾਵਪਤ੍ਤਿਯਾ ਚਾ’ਤਿ. ਤਤ੍ਥ ਸਤ੍ਤ ਅਰਿਯਪੁਗ੍ਗਲਵਿਭਾਗਂ ਦਸ੍ਸੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਧਮ੍ਮਾਨੁਸਾਰੀ ਨਾਮਾਤਿ ਏਤ੍ਥ ‘‘ਧਮ੍ਮੋ’’ਤਿ ਪਞ੍ਞਾ ਵੁਚ੍ਚਤਿ ‘ਸਚ੍ਚਂ, ਧਮ੍ਮੋ, ਧੀਤਿ, ਚਾਗੋ,ਤਿ ਏਤ੍ਥ ਵਿਯ. ਤਿਕ੍ਖਤਰਂ ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਪਞ੍ਞਾਬਲਾਨੁਸਾਰੇਨ ਆਦਿਮ੍ਹਿ ਮਗ੍ਗਂ ਲਭਤੀਤਿ ਵੁਤ੍ਤਂ ਹੋਤਿ. ਅਥਵਾ. ‘‘ਧਮ੍ਮੋ’’ਤਿ ਨਿਸ੍ਸਤ੍ਤਨਿਜ੍ਜੀਵਟ੍ਠੇਨ ਸਙ੍ਖਾਰ ਧਮ੍ਮੋ ਵੁਚ੍ਚਤਿ. ਸੁਞ੍ਞਤਦਸ੍ਸਨਞ੍ਚ ਨਾਮ ਵਿਸੇਸਤੋ ਸੁਦ੍ਧਧਮ੍ਮ ਦਸ੍ਸਨਂ ਨਾਮ. ਇਤਿ ਸੁਦ੍ਧਧਮ੍ਮਂ ਅਨੁਸ੍ਸਰਤਿ, ਞਾਣਗਤਿਯਾ ਅਨੁਗਚ੍ਛਤੀਤਿ ਧਮ੍ਮਾਨੁਸਾਰੀ. ਦਿਟ੍ਠਿਪਤ੍ਤੋਤਿ ਏਤ੍ਥ ਦਿਟ੍ਠਿਨਾਮ ਦਸ੍ਸਨਞ੍ਞਾਣਂ ਵੁਚ੍ਚਤਿ. ਆਦਿਤੋ ਪਟ੍ਠਾਯ ਪਰਿਸੁਦ੍ਧ ਦਸ੍ਸਨਸਮ੍ਪਨ੍ਨਤ੍ਤਾ ਦਿਟ੍ਠਿਬਲੇਨੇਵ ਸੁਖੇਨ ਤਂ ਤਂ ਮਗ੍ਗਫਲਂ ਪਤ੍ਤੋਤਿ ਦਿਟ੍ਠਿਪਤ੍ਤੋ. ਤੇਨੇਵ ਦਸ੍ਸਨ ਪਞ੍ਞਾਬਲੇਨ ਕਿਲੇਸਬਨ੍ਧਨਤੋ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸਙ੍ਖਾਰ ਧਮ੍ਮਾਨਂ ਖਣਿਕ ਧਮ੍ਮਭਾਵੇ ਸੁਟ੍ਠੁ ਸਦ੍ਦਹਨਂ ਅਵੇਚ੍ਚਪ੍ਪਸਾਦੋ ਸਦ੍ਧਾ ਨਾਮ. ਤਤ੍ਥ ‘‘ਅਵੇਚ੍ਚਪ੍ਪਸਾਦੋ’’ਤਿ ਞਾਣਸਮ੍ਪਯੁਤ੍ਤਪ੍ਪਸਾਦੋ. ‘‘ਞਾਣਂ’’ਤਿ ਚ ਸਙ੍ਖਾਰ ਧਮ੍ਮਾਨਂ ਖਣਿਕਭਾਵਨਿਮਿਤ੍ਤਾਨਂ ਦਸ੍ਸਨਞ੍ਞਾਣਂ. ਤਾਦਿਸੇ ਹਿ ਞਾਣੇ ਸਤਿ, ਤਤ੍ਥ ਅਵੇਚ੍ਚਪ੍ਪਸਾਦੋ ਨਾਮ ਜਾਯਤਿ, ਨੋ ਅਞ੍ਞਥਾਤਿ. ਸਦ੍ਧਂ ਅਨੁਸ੍ਸਰਤੀਤਿ ਸਦ੍ਧਾਨੁਸਾਰੀ. ਸਦ੍ਧਾਬਲੇਨੇਵ ਆਦਿਮ੍ਹਿ ਅਰਿਯਮਗ੍ਗਂ ਪਾਪੁਣਾਤੀਤਿ ਵੁਤ੍ਤਂ ਹੋਤਿ. ਸਦ੍ਧਾਬਲੇਨ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ‘‘ਕਾਯਸਕ੍ਖਿ ਨਾਮਾ’’ਤਿ ਏਤ੍ਥ ਸਕ੍ਖਂਤਿ ਸਨ੍ਦਿਟ੍ਠਂ. ਯਂ ਸਾਧਕਨ੍ਤਿਪਿ ਵੁਚ੍ਚਤਿ. ਅਤ੍ਤਨੋ ਕਾਯੇ ਏਵ ਲਦ੍ਧਂ ਸਕ੍ਖਂ ਯਸ੍ਸਾਤਿ ਕਾਯਸਕ੍ਖੀ. ਦੁਕ੍ਖਾਨੁ ਪਸ੍ਸੀ ਪੁਗ੍ਗਲੋ ਹਿ ਸਂਵੇਗ ਬਹੁਲੋ ਹੋਤਿ. ਸਂਵੇਗੋ ਚ ਪਧਾਨ ਵੀਰਿਯਸ੍ਸ ਪਦਟ੍ਠਾਨਂ. ਸਂਵਿਗ੍ਗੋ ਯੋਨਿਸੋ ਪਦਹਤੀਤਿ ਹਿ ਵੁਤ੍ਤਂ. ਤਸ੍ਮਾ ਸੋ ਸਂਵੇਗਵਸੇਨ ਭਾਵਨਂ ਅਨੁਯੁਞ੍ਜਨ੍ਤੋ ਯਂ ਯਂ ਪੁਰਿਸਥਾਮੇਨ ਪਤ੍ਤਬ੍ਬਂ ਹੋਤਿ. ਤਂ ਤਂ ਪਾਪੁਣਾਤਿ. ਪਾਪੁਣਨ੍ਤੋ ਚ ਅਤ੍ਤਨੋ ਕਾਯੇ ਏਵ ਸਕ੍ਖਂ ਲਭਤਿ. ਸਨ੍ਦਿਟ੍ਠਂ ਝਾਨਸੁਖਂ ਵਾ ਮਗ੍ਗਫਲਸੁਖਂ ਵਾ ਲਭਤੀਤਿ ਵੁਤ੍ਤਂ ਹੋਤਿ. ‘‘ਉਭਤੋਭਾਗ ਵਿਮੁਤ੍ਤੋ’’ਤਿ ਅਰੂਪਜ੍ਝਾਨੇਹਿ ਰੂਪਕਾਯਤੋ ਅਰਹਤ੍ਤਮਗ੍ਗਫਲੇਹਿ ਨਾਮਕਾਯਤੋਤਿ ਏਵਂ ਉਭੋਹਿ ਕਾਯਭਾਗੇਹਿ ਵਿਮੁਤ੍ਤੋ. ਏਤ੍ਥ ਚ ਤਯੋ ਅਰਿਯਪੁਗ੍ਗਲਾ ਪਞ੍ਞਾਧਿਕੋ ਚ ਸਦ੍ਧਾਧਿਕੋ ਚ ਵੀਰਿਯਾਧਿਕੋ ਚ. ਤਤ੍ਥ ਧਮ੍ਮਾਨੁਸਾਰੀ ਚ ਦਿਟ੍ਠਿਪਤ੍ਤੋ ਚ ਪਞ੍ਞਾਵਿਮੁਤ੍ਤੋ ਚ ਪਞ੍ਞਾਧਿਕੋ ਨਾਮ. ਸਦ੍ਧਾਨੁਸਾਰੀ ਚ ਸਦ੍ਧਾਵਿਮੁਤ੍ਤੋ ਚ ਸਦ੍ਧਾਧਿਕੋ ਨਾਮ. ਕਾਯਸਕ੍ਖੀ ਚ ਉਭਤੋਭਾਗਵਿਮੁਤ੍ਤੋ ਚ ਵੀਰਿਯਾਧਿਕੋ ਨਾਮਾਤਿ ਦਟ੍ਠਬ੍ਬਂ. ਅਯਞ੍ਚ ਪੁਗ੍ਗਲਵਿਭਾਗਨਯੋ ਪਟਿਸਮ੍ਭਿਦਾਮਗ੍ਗਨਯੇਨ ਵੁਤ੍ਤੋ. ਅਭਿਧਮ੍ਮੇ ਪਨ ਪੁਗ੍ਗਲ ਪਞ੍ਞਤ੍ਤਿਯਂ ਸਦ੍ਧਾਵਿਮੁਤ੍ਤੋ ਚ ਕਾਯਸਕ੍ਖੀ ਚ ਦ੍ਵੇਪੁਗ੍ਗਲਾ ਸੇਕ੍ਖੇਸੁ ਏਵ ਵੁਤ੍ਤਾ. ਅਰਹਤ੍ਤਂ ਪਤ੍ਤਾ ਪਨ ਏਤੇ ਦ੍ਵੇਪਿ ਪਞ੍ਞਾਵਿਮੁਤ੍ਤਾ ਏਵਾਤਿ ਦਟ੍ਠਬ੍ਬਾ. ਏਤ੍ਥ ਸਿਯਾ, ਸਙ੍ਖਾਰ ਧਮ੍ਮਾਨਂ ਖਣਿਕ ਧਮ੍ਮਭਾਵੇ ਸੁਟ੍ਠੁ ਸਦ੍ਦਹਨਂ ਅਵੇਚ੍ਚਪ੍ਪਸਾਦੋ ਸਦ੍ਧਾ ਨਾਮਾਤਿ ਵੁਤ੍ਤਂ. ਕਿਂ ਪਨ ਤਾਦਿਸੇਨ ਸਦ੍ਧਾਮਤ੍ਤੇਨ ਸੋਤਾਪਤ੍ਤਿ ਮਗ੍ਗਂ ਪਾਪੁਣਾਤੀਤਿ. ਏਤ੍ਥ ਅਮ੍ਹੇਹਿ ਵਤ੍ਤਬ੍ਬਂ ਨਤ੍ਥਿ. ਭਗਵਤਾ ਏਵ ਵੁਤ੍ਤਂ. ਯਥਾਹ ਮਹਾਵਗ੍ਗੇ ਓਕ੍ਕਨ੍ਤ ਸਂਯੁਤ੍ਤੇ ਚਕ੍ਖੁ ਭਿਕ੍ਖਵੇ ਅਨਿਚ੍ਚਂ ਵਿਪਰਿਣਾਮੀ ਅਞ੍ਞਥਾਭਾਵੀ, ਯੋ ਏਵਂ ਸਦ੍ਦਹਤਿ, ਏਵਂ ਅਧਿਮੁਚ੍ਚਤਿ. ਅਯਂ ਵੁਚ੍ਚਤਿ ਸਦ੍ਧਾਨੁਸਾਰੀ. ਓਕ੍ਕਨ੍ਤੋ ਅਰਿਯਭੂਮਿਂ. ਅਤਿਕ੍ਕਨ੍ਤੋ ਪੁਥੁਜ੍ਜਨਭੂਮਿਂ. ਸੋ ਯੇਨਕਮ੍ਮੇਨ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਉਪ੍ਪਜ੍ਜੇਯ੍ਯ. ਨ ਤਂ ਕਮ੍ਮਂ ਕਰੋਤੀਤਿ. ਸੋਤਂ ਭਿਕ੍ਖਵੇ ਅਨਿਚ੍ਚਂ. ਵਿਪਰਿਣਾਮੀ ਅਞ੍ਞਥਾਭਾਵੀਤਿਆਦਿਨਾ ਦ੍ਵਾਦਸਾਯਤਨਾਨਿ ਵਿਤ੍ਥਾਰੇ ਤਬ੍ਬਾਨਿ. ਤਤ੍ਥ ‘‘ਵਿਪਰਿਣਾਮੀ’’ਤਿ ਵਿਪਰਿਣਾਮੋ ਯਸ੍ਸ ਅਤ੍ਥੀਤਿ ਵਿਪਰਿਣਾਮੀ. ਵਿਪਰਿਣਾਮੋਤਿ ਚ ਖਣੇ ਖਣੇ ਜੀਰਣਤਾ ਭਿਜ੍ਜਨਤਾ ਵੁਚ੍ਚਤਿ. ‘‘ਅਞ੍ਞਥਾਭਾਵੀ’’ਤਿ ਤਸ੍ਸੇਵ ਵੇਵਚਨਂ. ‘‘ਏਵਂ ਅਧਿਮੁਚ੍ਚਤੀ’’ਤਿ ਏਤੇਨ ਞਾਣਸਮ੍ਪਯੁਤ੍ਤਸਦ੍ਧਂ ਦੀਪੇਤਿ. ਸਾ ਏਵ ਸੋਤਾਪਤ੍ਤਿਯਙ੍ਗੇਸੁ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ, ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋਤਿ ਵੁਤ੍ਤਾ. ਤਤ੍ਥ ਞਾਣਸਮ੍ਪਯੁਤ੍ਤਸਦ੍ਧਾ ਨਾਮ ਚਕ੍ਖਾਦੀਨਂ ਅਨਿਚ੍ਚਨਿਮਿਤ੍ਤ ਦਸ੍ਸਨਞ੍ਞਾਣੇਨ ਸਮ੍ਪਯੁਤ੍ਤਾ ਓਕਪ੍ਪਨਸਦ੍ਧਾ. ਅਨਿਚ੍ਚਨਿਮਿਤ੍ਤਞ੍ਚ ਨਾਮ ਰੂਪਂ ਅਨਿਚ੍ਚਂ ਖਯਟ੍ਠੇਨਾਤਿਪਦੇ ਵੁਤ੍ਤਨਯੇਨ ਚਕ੍ਖਾਦਿਨਿਸ੍ਸਯਾਨਂ ਮਹਾਭੂਤਾਨਂ ਸਨ੍ਤਤਿ ਪਰਿਵਤ੍ਤਨਾਦਿਕਂ ਵੁਚ੍ਚਤਿ. ਤਞ੍ਹਿ ਪਸ੍ਸਨ੍ਤੋ ਚਕ੍ਖਾਦੀਨਂ ਅਨਿਚ੍ਚਭਾਵੇ ਸਦ੍ਦਹਤਿ, ਅਧਿਮੁਚ੍ਚਤਿ. ਤਾਨਿਪਿ ਖਣੇ ਖਣੇ ਏਕਨ੍ਤੇਨ ਭਿਜ੍ਜਤਿ ਯੇਵਾਤਿ ਸਦ੍ਧਾਧਿਮੋਕ੍ਖਂ ਸਦ੍ਧਾਵਿਨਿਚ੍ਛਯਂ ਪਟਿਲਭਤੀਤਿ ਅਤ੍ਥੋ. ‘‘ਬੁਦ੍ਧੇ ਅਵੇਚ੍ਚਪ੍ਪਸਾਦੇਨਾ’’ਤਿ ਏਤ੍ਥ ਪਨ ਅਰਹਤਾ ਸਮ੍ਮਾਸਮ੍ਬੁਦ੍ਧਤਾਦੀਨਂ ਬੁਦ੍ਧਗੁਣਾਦੀਨਂ ਦਸ੍ਸਨਞ੍ਞਾਣੇਨ ਸਮ੍ਪਯੁਤ੍ਤੋ ਪਸਾਦੋ ਅਵੇਚ੍ਚਪ੍ਪਸਾਦੋ ਨਾਮ. ਅਰਿਯਭੂਮਿ ਨਾਮ ਦਿਟ੍ਠਾਨੁਸਯ ਵਿਚਿਕਿਚ੍ਛਾਨੁਸਯੇਹਿ ਪਰਿਸੁਦ੍ਧਾ ਅਵਤ੍ਥਾਭੂਮਿ ਵੁਚ੍ਚਤਿ. ਤੇਹਿ ਸਹਿਤਾ ਅਵਤ੍ਥਾਭੂਮਿ ਪੁਥੁਜ੍ਜਨਭੂਮਿ ਨਾਮ. ਕਥਂ ਪਨ ਤਸ੍ਸ ਪੁਗ੍ਗਲਸ੍ਸ ਪੁਥੁਜ੍ਜਨਭੂਮਿਂ ਅਤਿਕ੍ਕਨ੍ਤਤਾ ਅਰਿਯਭੂਮਿਂ ਓਕ੍ਕਨ੍ਤਤਾ ਚ ਵਿਞ੍ਞਾਯਤੀਤਿ ਆਹ ‘‘ਸੋ ਯੇਨਾ’’ਤਿਆਦਿਂ. ਯੋ ਅਤ੍ਤਨੋ ਜੀਵਿਤਹੇਤੁਪਿ ਕਿਞ੍ਚਿ ਕਮ੍ਮਪਥਪਤ੍ਤਂ ਅਪਾਯਗਾਮਿ ਕਮ੍ਮਂ ਨ ਕਰੋਤਿ. ਸੋ ਏਕਨ੍ਤੇਨ ਪੁਥੁਜ੍ਜਨਭੂਮਿਂ ਅਤਿਕ੍ਕਨ੍ਤੋ, ਅਰਿਯਭੂਮਿਂ ਓਕ੍ਕਨ੍ਤੋਤਿ ਵਿਞ੍ਞਾਯਤੀਤਿ ਵੁਤ੍ਤਂ ਹੋਤਿ. ਇਦਂ ਸਦ੍ਧਾਨੁਸਾਰਿਸੁਤ੍ਤਂ. ਅਪਰਂਪਿ ਵੁਤ੍ਤਂ ਚਕ੍ਖੁ ਭਿਕ੍ਖਵੇ ਵਿਪਰਿਣਾਮੀ ਅਞ੍ਞਥਾਭਾਵੀ. ਯਸ੍ਸ ਏਵਂ ਮਤ੍ਤਸੋ ਨਿਜ੍ਝਾਨਂ ਖਮਤਿ. ਅਯਂ ਵੁਚ੍ਚਤਿ ਧਮ੍ਮਾਨੁਸਾਰੀ ਤਿਆਦਿ. ਤਤ੍ਥ ‘‘ਮਤ੍ਤਸੋ ਨਿਜ੍ਝਾਨਂ ਖਮਤੀ’’ਤਿ ਸਦ੍ਧਾਨੁਸਾਰੀਵਿਯ ਸਦ੍ਦਹਨਮਤ੍ਤੇ ਅਟ੍ਠਤ੍ਵਾ ਚਕ੍ਖਾਦੀਨਂ ਤਾਦਿਸਂ ਅਨਿਚ੍ਚਤਂ ਸਮਨੁਪਸ੍ਸਨ੍ਤੋ ਥੋਕਂ ਥੋਕਂ ਦਸ੍ਸਨਂ ਲਭਤਿਯੇਵ. ਏਵਂਸਤਿ, ਚਕ੍ਖਾਦੀਨਿ ਤਸ੍ਸ ਪੁਗ੍ਗਲਸ੍ਸ ਨਿਜ੍ਝਾਨਂ ਓਲੋਕਨਂ ਮਤ੍ਤਸੋ ਖਮਨ੍ਤਿ ਨਾਮ. ਇਦਂ ਧਮ੍ਮਾਨੁਸਾਰਿਸੁਤ੍ਤਂ. ਅਪਰਂਪਿ ਵੁਤ੍ਤਂ ਚਕ੍ਖੁ ਭਿਕ੍ਖਵੇ ਅਨਿਚ੍ਚਂ ਵਿਪਰਿਣਾਮੀ ਅਞ੍ਞਥਾਭਾਵੀ. ਯੋ ਏਵਂ ਪਜਾਨਾਤਿ ਪਸ੍ਸਤਿ. ਅਯਂ ਵੁਚ੍ਚਤਿ ਸੋਤਾਪਨ੍ਨੋ ਤਿਆਦਿ. ਤਤ੍ਥ ‘‘ਪਜਾਨਾਤਿ ਪਸ੍ਸਤੀ’’ਤਿ ਧਮ੍ਮਾਨੁਸਾਰੀਵਿਯ ਮਤ੍ਤਸੋ ਨਿਜ੍ਝਾਨਕ੍ਖਮਮਤ੍ਤੇ ਅਟ੍ਠਤ੍ਵਾ ਪਞ੍ਞਾਯ ਪਜਾਨਾਤਿ, ਞਾਣਚਕ੍ਖੁਨੋ ਪਚ੍ਚਕ੍ਖਤੋ ਪਸ੍ਸਤੀਤਿ ਅਤ੍ਥੋ. ਇਦਂ ਦਿਟ੍ਠਿਪਤ੍ਤਾਦੀਨਂ ਸੁਤ੍ਤਂ.

‘‘ਯਥਾ ਸਕਂ ਫਲਂ’’ਤਿ ਏਤ੍ਥ ਸਸ੍ਸ ਅਤ੍ਤਨੋ ਇਦਂ ਸਕਂ. ਯਂ ਯਂ ਸਕਂ ਯਥਾਸਕਨ੍ਤਿ ਅਤ੍ਥਂ ਦਸ੍ਸੇਤਿ ਸੋਤਾਪਨ੍ਨਸ੍ਸਾਤਿਆਦਿਨਾ. ਫਲਸਮਾਪਤ੍ਤਿ ਵੀਥਿਯਂ ਪਨ ਅਨੁਲੋਮਜਵਨਾਨਿ ਏਵ ਫਲਾਨਂ ਆਸਨ੍ਨਕਾਰਣਾਨਿ, ਨ ਮਗ੍ਗਜਵਨਾਨੀਤਿ ਆਹ ‘‘ਨ ਮਗ੍ਗਾਗਮਨਵਸੇਨਾ’’ਤਿ. ‘‘ਸੋ’’ਤਿ ਮਗ੍ਗੋ. ਸਨ੍ਤੋ ਸਂਵਿਜ੍ਜਮਾਨੋ ਸਬ੍ਭਾਵੋ. ‘‘ਅਸ੍ਸਾ’’ਤਿ ਮਗ੍ਗਸ੍ਸ.

ਅਨਿਚ੍ਚਾਨੁਪਸ੍ਸਨਾ ਕਿਚ੍ਚਤੋ ਅਨਿਮਿਤ੍ਤਾ ਹੋਤਿ. ਸਭਾਵਤੋ ਸਨਿਮਿਤ੍ਤਾਏਵ. ਨਿਚ੍ਚਨਿਮਿਤ੍ਤਸਹਿਤਾਏਵ. ਯਤੋ ਸਾ ਏਸੋਹਮਸ੍ਮੀਤਿਗ੍ਗਹਣਂ ਲਭਤਿ. ਇਦਂਪਿ ਵਿਪਸ੍ਸਨਾਞਾਣਂ ਅਨਿਚ੍ਚਂ ਖਯਟ੍ਠੇਨਾਤਿ ਸਮਨੁਪਸ੍ਸਿਤਬ੍ਬਾ ਚ ਹੋਤੀਤਿ. ਤਤ੍ਥ ਚ ਅਭਿਧਮ੍ਮਂ ਪਤ੍ਵਾ ਸਭਾਵਪ੍ਪਧਾਨਂ ਹੋਤਿ, ਨ ਕਿਚ੍ਚਪ੍ਪਧਾਨਂ. ਤਸ੍ਮਾ ਅਭਿਧਮ੍ਮ ਨਯੇਨ ਵਿਪਸ੍ਸਨਾ ਅਤ੍ਤਨੋ ਨਿਮਿਤ੍ਤ ਨਾਮਂ ਮਗ੍ਗਸ੍ਸ ਦਾਤੁਂ ਨ ਸਕ੍ਕੋਤਿ. ਅਯਂ ਅਟ੍ਠਕਥਾਯ ਅਧਿਪ੍ਪਾਯੋ. ਕਿਲੇਸ ਧਮ੍ਮਾ ਨਾਮ ਯਸ੍ਸ ਉਪ੍ਪਜ੍ਜਨ੍ਤਿ, ਤਂ ਪੁਗ੍ਗਲਂ ਪਲਿਬੁਨ੍ਧਨ੍ਤਿ. ਸਮ੍ਬਾਧਂ ਕਰੋਨ੍ਤਿ. ਤਸ੍ਮਾ ਪਲਿਬੋਧਕਰਾਨਾਮ. ਤਂ ਪੁਗ੍ਗਲਂ ਨਿਚ੍ਚਨਿਮਿਤ੍ਤ ਸੁਭਨਿਮਿਤ੍ਤ ਸੁਖਨਿਮਿਤ੍ਤ ਅਤ੍ਤਨਿਮਿਤ੍ਤਾਨਿ ਗਾਹੇਨ੍ਤਿ. ਤਸ੍ਮਾ ਨਿਮਿਤ੍ਤਕਰਾਨਾਮ. ਤਂ ਪੁਗ੍ਗਲਂ ਆਰਮ੍ਮਣੇਸੁ ਭੁਸਂ ਨਿਹਿਤਂ ਨਿਵਿਟ੍ਠਂ ਕਰੋਨ੍ਤਿ. ਤਸ੍ਮਾ ਪਣਿਧਿਕਰਾਨਾਮ. ਤੇ ਚ ਮਗ੍ਗਫਲਾਨਿ ਆਰਮ੍ਮਣਂ ਨ ਕਰੋਨ੍ਤਿ. ਮਗ੍ਗਫਲੇਹਿ ਚ ਸਮ੍ਪਯੋਗਂ ਨ ਗਚ੍ਛਨ੍ਤਿ. ਏਵਂ ਆਰਮ੍ਮਣਕਰਣਾ ਦਿਵਸੇਨ ਮਗ੍ਗਫਲੇਸੁ ਤੇਸਂ ਅਭਾਵੋ. ਅਭਾਵਤ੍ਤਾਏਵ ਚ ਤਾਨਿ ਮਗ੍ਗਫਲਾਨਿ ਅਤ੍ਤਨੋ ਧਮ੍ਮਤਾਯ ਤੀਣਿਨਾਮਾਨਿ ਲਭਨ੍ਤੀਤਿ ਦਸ੍ਸੇਤੁਂ ‘‘ਆਰਮ੍ਮਣ ਕਰਣਵਸੇਨਵਾ’’ਤਿਆਦਿ ਵੁਤ੍ਤਂ. ‘‘ਅਤ੍ਤਨੋ ਸਭਾਵੇਨਾ’’ਤਿ ਅਤ੍ਤਨੋ ਧਮ੍ਮਤਾਯ.

‘‘ਅਤ੍ਤਦਿਟ੍ਠਿਯਾ ਉਪ੍ਪਨ੍ਨਾਯ ਉਪ੍ਪਜ੍ਜਨ੍ਤੀ’’ਤਿ ਇਦਂ ਤਾਸਂ ਦਿਟ੍ਠਿਵਿਚਿਕਿਚ੍ਛਾਨਂ ਅਤ੍ਤਦਿਟ੍ਠਿਯਾ ਅਵਿਨਾਭਾਵਂ ਦੀਪੇਤਿ. ਨ ਪਨ ਅਤ੍ਤਦਿਟ੍ਠਿਯਾ ਤਾਹਿ ਅਵਿਨਾਭਾਵਨ੍ਤਿ ਦਟ੍ਠਬ੍ਬਂ. ਵਿਪਚ੍ਚਨ੍ਤੀਤਿ ਅਪਾਯੇਸੁ ਵਿਪਚ੍ਚਨ੍ਤਿ. ਅਪਾਯਪਟਿਸਨ੍ਧਿਂ ਜਨੇਨ੍ਤਿ. ਦਿਟ੍ਠਸਚ੍ਚਾਨਞ੍ਚ ਅਰਿਯਪੁਗ੍ਗਲਾਨਂ. ਦਿਟ੍ਠਿਵਿਚਿਕਿਚ੍ਛਾਸਮ੍ਪਯੁਤ੍ਤਾ ਅਕੁਸਲਧਮ੍ਮਾ ਦਿਟ੍ਠਿਵਿਚਿਕਿਚ੍ਛਾਗ੍ਗਹਣੇਨ ਗਹਿਤਾਤਿ ਆਹ ‘‘ਦਿਟ੍ਠਿਵਿਚਿਕਿਚ੍ਛਾ ਵਿਪ੍ਪਯੁਤ੍ਤਾ’’ਤਿ. ‘‘ਅਕੁਸਲਧਮ੍ਮਾਚੇ ਵਾ’’ਤਿ ਪਚ੍ਚੁਪ੍ਪਨ੍ਨਭੂਤਾ ਦਸਾਕੁਸਲਕਮ੍ਮਪਥ ਧਮ੍ਮਾ ਚੇਵ. ‘‘ਸਤ੍ਤਹਿ ਭਵੇਹੀ’’ਤਿ ਕ੍ਰਿਯਾਪਵਗ੍ਗੇ ਕਰਣਵਚਨਂ. ਯਥਾ ਸਤ੍ਤਹਿ ਮਾਸੇਹਿ ਵਿਹਾਰਂ ਨਿਟ੍ਠਾਪੇਤੀਤਿ. ਕ੍ਰਿਯਾਪਵਗ੍ਗੋਤਿਚ ਕ੍ਰਿਯਾਯਸੀਘਤਰਂ ਨਿਟ੍ਠਾਪਨਂ ਵੁਚ੍ਚਤਿ. ‘‘ਸਤ੍ਤਕ੍ਖਤ੍ਤੁਂ’’ਤਿ ਸਤ੍ਤਵਾਰਾ. ਤੀਣਿ ਸਂਯੋਜਨਾਨਿਨਾਮ ‘ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸਸਂਯੋਜਨਾਨਿ,. ‘‘ਅਵਿਨਿਪਾਤ ਧਮ੍ਮੋ’’ਤਿ ਵਿਰੂਪਂ ਹੁਤ੍ਵਾ ਪਤਨਂ ਵਿਨਿਪਾਤੋ. ਅਪਾਯਨਿਪਾਤੋਤਿ ਵੁਤ੍ਤਂ ਹੋਤਿ. ‘‘ਧਮ੍ਮੋ’’ਤਿ ਸਭਾਵੋ. ਨਤ੍ਥਿ ਵਿਨਿਪਾਤੋ ਧਮ੍ਮੋ ਯਸ੍ਸਾਤਿ ਵਿਗ੍ਗਹੋ. ‘‘ਨਿਯਤੋ’’ਤਿ ਸੁਗਤਿਭਵੇਸੁ ਨਿਯਤ ਗਤਿਕੋ. ਸਮ੍ਮਾ ਬੁਜ੍ਝਤੀਤਿ ਸਮ੍ਬੋਧਿ. ਮਗ੍ਗਞ੍ਞਾਣਂ. ‘‘ਪਰਾਯਨਂ’’ਤਿ ਪਰਭਾਗੇ ਗਨ੍ਤਬ੍ਬਟ੍ਠਾਨਂ ਵੁਚ੍ਚਤਿ. ਸਮ੍ਬੋਧਿਸਙ੍ਖਾਤਂ ਪਰਾਯਨਂ ਅਸ੍ਸਾਤਿ ਸਮ੍ਬੋਧਿਪਰਾਯਨੋ. ‘‘ਅਨਿਯਮਤ੍ਥੋ’’ਤਿ ਵਾਸਦ੍ਦਤ੍ਥੋਤਿ ਵੁਤ੍ਤਂ ਹੋਤਿ. ਵਾ ਸਦ੍ਦਤ੍ਥੇਸੁ ਚ ਅਨਿਯਮਤ੍ਥੋ. ਨ ਵਿਕਪ੍ਪਤ੍ਥੋ. ਵਿਕਪ੍ਪਤ੍ਥੇਹਿ ਸਤਿ ਦ੍ਵੇ ਏਵ ਸਤ੍ਤਕ੍ਖਤ੍ਤੁਪਰਮਾ ਲਬ੍ਭਨ੍ਤਿ. ਮਿਸ੍ਸਕਭਵੋਨ ਲਬ੍ਭਤਿ. ਅਨਿਯਮਤ੍ਥੇ ਤਯੋਪਿ ਲਬ੍ਭਨ੍ਤਿ. ਅਟ੍ਠਕਥਾਯਂ ਪਨ ਸਮੁਚ੍ਚਯਤ੍ਥਸ੍ਸ ਗਹਿਤਤ੍ਤਾ ਏਕੋ ਮਿਸ੍ਸਕਭਵੋ ਏਵ ਲਬ੍ਭਤਿ. ਨਨੁ ਚ ਸਦ੍ਦੋ ਨਾਮ ਸਮੁਚ੍ਚਯਤ੍ਥੇ ਪਾਕਟੋ, ਨ ਅਨਿਯਮਤ੍ਥੇ. ਤਸ੍ਮਾ ਸਮੁਚ੍ਚਯਤ੍ਥੋਵ ਇਧ ਯੁਤ੍ਤੋਤਿ ਚੇ. ਨ ਯੁਤ੍ਤੋ. ਕਸ੍ਮਾ. ਦ੍ਵਿਨ੍ਨਂ ਅਸਙ੍ਗਹਿਤਤ੍ਤਾ. ਅਟ੍ਠਕਥਾਯਂ ਪਨ ਸਮੁਚ੍ਚਯਤ੍ਥਂ ਗਹੇਤ੍ਵਾ ਤੇ ਦ੍ਵੇ ਪੁਗ੍ਗਲਾ ਇਮਸ੍ਮਿਂ ਪਾਠੇ ਅਸਙ੍ਗਹਿਤਾਤਿ ਵੁਤ੍ਤਂ. ਯਦਿ ਤੇ ਇਮਸ੍ਮਿਂ ਪਾਠੇ ਅਸਙ੍ਗਹਿਤਾ. ਕਤ੍ਥਤੇ ਸਙ੍ਗਹਿਤਾ ਭਵੇਯ੍ਯੁਂ. ਨ ਹਿ ਕੋਚਿ ਸਤ੍ਤਕ੍ਖਤ੍ਤੁ ਪਰਮੋ ਨਾਮ ਇਧ ਅਸਙ੍ਗਹਿਤੋਤਿ ਯੁਤ੍ਤੋਤਿ. ‘‘ਅਸ੍ਸਾ’’ਤਿ ਤਸ੍ਸਪਾਲ਼ਿਪਾਠਸ੍ਸ. ‘‘ਏਤ੍ਥ ਚ ਯਸ੍ਮਾ. ਲ. ਪਰਮੋ ਨਾਮ ਵੁਤ੍ਤੋ’’ਤਿ ਇਦਂ ਉਪਰਿ ‘ਯੇ ਕਾਮਭਵੇ ਯੇਵਾ’ਤਿਆਦਿਨਾ ‘ਯੇਦਿਟ੍ਠ ਧਮ੍ਮੇ ਵਾ’ਤਿਆਦਿਨਾ ਚ ਯੋਜੇਤਬ੍ਬਂ. ਸੋ ਚ ਸੁਕ੍ਖਵਿਪਸ੍ਸਕੋ ਵਾ ਪਰਿਹੀਨਜ੍ਝਾਨੋ ਵਾ ਦਟ੍ਠਬ੍ਬੋਤਿ ਸਮ੍ਬਨ੍ਧੋ. ‘‘ਪਾਲ਼ਿਯਂ’’ਤਿ ਪੁਗ੍ਗਲਪਞ੍ਞਤ੍ਤਿ ਪਾਲ਼ਿਯਂ. ‘‘ਇਧ ਨਿਟ੍ਠਾ’’ਤਿ ਇਮਸ੍ਮਿਂ ਕਾਮਲੋਕੇ ਆਸਵਕ੍ਖਯਂ ਪਤ੍ਵਾ ਖਨ੍ਧਪਰਿਨਿਬ੍ਬਾਨਪਤ੍ਤਿ ਵਸੇਨ ਨਿਟ੍ਠਾ. ਨਿਟ੍ਠਾਨਂ ਪਰਿਯੋਸਾਨਨ੍ਤਿ ਅਤ੍ਥੋ. ਕੁਲਤੋ ਕੁਲਂ ਗਚ੍ਛਤੀਤਿ ਕੋਲਂਕੋਲੋ. ਭਵਤੋ ਭਵਂ ਗਚ੍ਛਤੀਤਿ ਅਤ੍ਥੋ. ਏਕਮੇਵ ਪਟਿਸਨ੍ਧਿਸਙ੍ਖਾਤਂ ਭਵਬੀਜਂ ਅਸ੍ਸ ਅਤ੍ਥੀਤਿ ਏਕਬੀਜੀ. ਯੋ ਚ ਦਿਟ੍ਠੇਵ ਧਮ੍ਮੇ ਅਰਹਾ. ਤਸ੍ਸ ਚ ਇਧ ਨਿਟ੍ਠਾਤਿ ਯੋਜਨਾ. ਕੇਨ ਪਨ ਤਿਣ੍ਣਂ ਸੋਤਾਪਨ੍ਨਾਨਂ ਵਿਸੇਸੋ ਕਤੋਤਿ. ਸਤ੍ਤਕ੍ਖਤ੍ਤੁ ਪਰਮੋ ਤਾਵ ਕੇਵਲਂ ਪਥਮਮਗ੍ਗ ਸਮ੍ਪਯੁਤ੍ਤੇਹਿ ਇਨ੍ਦ੍ਰਿਯੇਹਿ ਕਤੋ. ਇਤਰੇ ਦ੍ਵੇ ਉਪਰਿਮਗ੍ਗਤ੍ਥਾਯ ਪਵਤ੍ਤਿਤੇਹਿ ਵਿਪਸ੍ਸਨਿਨ੍ਦ੍ਰਿਯੇਹਿ ਕਤੋਤਿ. ਤਤ੍ਥ ਸਤ੍ਤਕ੍ਖਤ੍ਤੁ ਪਰਮੋ ਸਬ੍ਬਮੁਦੁਕੋ ਹੋਤਿ. ਤਤੋ ਕੋਲਂਕੋਲੋ ਤਿਕ੍ਖੋ. ਸੋ ਪਨ ਛ ਭਵਿਕੋ, ਪਞ੍ਚਭਵਿਕੋ, ਚਤੁਭਵਿਕੋ, ਤਿਭਵਿਕੋ, ਦ੍ਵਿਭਵਿਕੋਤਿ ਪਞ੍ਚਵਿਧੋ. ਤਤ੍ਥ ਪਞ੍ਚਭਵਿਕੋ ਤਿਕ੍ਖੋ. ਸੇਸਾ ਅਨੁਕ੍ਕਮੇਨ ਤਿਕ੍ਖਤਰਾਤਿ ਦਟ੍ਠਬ੍ਬਾ. ਏਕਬੀਜੀ ਪਨ ਏਕਭਵਿਕੋ ਸਬ੍ਬਤਿਕ੍ਖੋ. ਤਤ੍ਥ ਸਤ੍ਤਕ੍ਖਤ੍ਤੁ ਪਰਮੋ ਕੇਵਲੇਨ ਪਥਮਮਗ੍ਗਾਨੁਭਾਵੇਨ ਸਿਦ੍ਧਤ੍ਤਾ ਸਬ੍ਬਮੁਦੁਕੋ ਹੋਤਿ. ਇਤਰੇ ਦ੍ਵੇਪਕਤਿਯਾ ਸਤ੍ਤਕ੍ਖਤ੍ਤੁ ਪਰਮਭਾਵੇ ਠਤ੍ਵਾ ਉਪਰਿਮਗ੍ਗਤ੍ਥਾਯ ਵਿਪਸ੍ਸਨਾ ਕਮ੍ਮਂ ਪਟ੍ਠਪੇਨ੍ਤਿ. ਤਦਾ ਤੇਸਂ ਇਨ੍ਦ੍ਰਿਯਾਨਿ ਪੁਨ ਵਿਸੇਸ ਪਤ੍ਤਾਨਿ ਹੋਨ੍ਤਿ, ਤਿਕ੍ਖਾਨਿ. ਤਸ੍ਮਾ ਤੇ ਸਤ੍ਤਕ੍ਖਤ੍ਤੁ ਪਰਮਤੋ ਤਿਕ੍ਖਾਨਾਮ ਹੋਨ੍ਤੀਤਿ. ‘‘ਸਤ੍ਤਵਾਰਤੋ ਓਰਂ ਵਾ’’ਤਿ ਇਦਂ ਕੋਲਂਕੋਲ ਏਕਬੀਜਿਨੋ ਸਨ੍ਧਾਯ ਵੁਤ੍ਤਂ. ‘‘ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਾਮੇਤੀ’’ਤਿ ਇਦਂ ਉਪਰਿਮੇ ਦ੍ਵੇਸੋਤਾਪਨ੍ਨੇ ਸਨ੍ਧਾਯ ਵੁਤ੍ਤਂ. ਸਤ੍ਤਕ੍ਖਤ੍ਤੁ ਪਰਮੋਪਨ ਪਥਮਮਗ੍ਗੇਨੇਵ ਨਿਯਮਿਤੋਤਿ ਦਟ੍ਠਬ੍ਬਂ. ਤਥਾਹਿ ਸੋਯੇਵ ਸਙ੍ਗਹਪਾਠੇ ਸਰੂਪਤੋ ਆਗਤੋ ਸੋਤਾਪਤ੍ਤਿ ਮਗ੍ਗਂ ਭਾਵੇਤ੍ਵਾ ਦਿਟ੍ਠਿਵਿਚਿਕਿਚ੍ਛਾਪਹਾਨੇਨ ਪਹੀਨਾਪਾਯਗਮਨੋ ਸਤ੍ਤਕ੍ਖਤ੍ਤੁ ਪਰਮੋ ਸੋਤਾਪਨ੍ਨੋ ਨਾਮ ਹੋਤੀਤਿ. ਇਤਰੇ ਪਨ ਦ੍ਵੇ ਪਾਲ਼ਿਯਂ ਸੋਤਾਪਨ੍ਨ ਪੁਗ੍ਗਲਵਿਭਾਗਟ੍ਠਾਨੇਸ੍ਵੇਵ ਆਗਤਾਤਿ. ‘‘ਯੇ ਪਨਾ’’ਤਿ ਯੇ ਸੋਤਾਪਨ੍ਨ ਪੁਗ੍ਗਲਾਪਨ. ਗਾਥਾਯਂ ‘‘ਇਤੋਸਤ੍ਤਾ’’ਤਿ ਇਮਸ੍ਮਿਂ ਮਨੁਸ੍ਸਲੋਕੇ ਸਤ੍ਤ ਸਂਸਰਾਨਿ. ‘‘ਤਤੋਸਤ੍ਤਾ’’ਤਿ ਤਸ੍ਮਿਂ ਦੇਵਲੋਕੇ ਸਤ੍ਤਾਤਿ ਅਤ੍ਥੋ. ਅਙ੍ਗੁਤ੍ਤਰਪਾਠੇ ‘‘ਤੇਨਚਿਤ੍ਤਪ੍ਪਸਾਦੇਨਾ’’ਤਿ ਮਹਾਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਤੁਂ ਸਮਤ੍ਥਸ੍ਸ ਸਤ੍ਥੁਗੁਣੇ ਚਿਤ੍ਤਪ੍ਪਸਾਦੋ ਜਾਯਤਿ. ਤੇਨ ਚਿਤ੍ਤਪ੍ਪਸਾਦੇਨ. ‘‘ਤੇਨ ਪਰਿਯਾਯੇਨਾ’’ਤਿ ਸਚੇ ਸੋ ਦੇਵੇਸੁ ਏਵ ਸਂਸਰਤਿ. ਸਤ੍ਤਕ੍ਖਤ੍ਤੁਂ ਓਪਪਾਤਿਕ ਪਟਿਸਨ੍ਧਿਯੋ ਗਣ੍ਹਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਿਸ੍ਸਤਿ. ਯਦਿ ਮਨੁਸ੍ਸੇਸੁ ਏਵ ਸਂਸਰਤਿ. ਸਤ੍ਤਗਬ੍ਭਸੇਯ੍ਯਕ ਪਟਿਸਨ੍ਧਿਯੋ ਗਣ੍ਹਿਤ੍ਵਾ ਏਤ੍ਥੇਵ ਪਰਿਨਿਬ੍ਬਾਯਿਸ੍ਸਤਿ. ਏਵਂ ਦੇਸਨਾ ਵਾਰੇਨ ਚੁਦ੍ਦਸ ਕਤ੍ਵਾ ਦੇਸਿਤੇਨ ਪਰਿਯਾਯੇਨਾਤਿ ਅਤ੍ਥੋ. ‘‘ਤਂ ਵੀਮਂਸਿਤਬ੍ਬਂ’’ਤਿ ਵਦਨ੍ਤੇਨ ਟੀਕਾਚਰਿਯੇਨ ਸਯਂ ਚੁਦ੍ਦਸਪਟਿਸਨ੍ਧਿਯੋਵ ਇਚ੍ਛਤੀਤਿ ਦੀਪੇਤਿ. ਇਦਾਨਿ ਤਂ ਚੁਦ੍ਦਸਪਟਿਸਨ੍ਧਿਵਾਦਂ ਪਟਿਕ੍ਖਿਪਨ੍ਤੋ ‘‘ਵਿਭਙ੍ਗੇ ਪਨਾ’’ਤਿਆਦਿਮਾਹ. ‘‘ਵਿਭਙ੍ਗੇ’’ਤਿ ਅਭਿਧਮ੍ਮੇ ਞਾਣਵਿਭਙ੍ਗੇ. ਨਤ੍ਥਿ ਠਾਨਮਸ੍ਸਾਤਿ ਅਟ੍ਠਾਨਂ. ‘‘ਠਾਨਂ’’ਤਿ ਮੂਲਕਾਰਣਂ. ਨਤ੍ਥਿ ਅਵਕਾਸੋ ਅਸ੍ਸਾਤਿ ਅਨਵਕਾਸੋ. ‘‘ਅਵਕਾਸੋ’’ਤਿ ਪਚ੍ਚਯਕਾਰਣਂ. ‘‘ਯਂ’’ਤਿ ਕ੍ਰਿਯਾਪਰਾਮਸਨਂ. ਯਂ ਨਿਬ੍ਬਤ੍ਤੇਯ੍ਯ, ਤਂ ਨਿਬ੍ਬਤ੍ਤਨਂ ਅਟ੍ਠਾਨਂ. ਸੋ ਨਿਬ੍ਬਤ੍ਤਨ ਧਮ੍ਮੋ ਅਨਵਕਾਸੋਤਿ ਯੋਜਨਾ. ‘‘ਅਭਿਸਙ੍ਖਾਰ ਵਿਞ੍ਞਾਣਸ੍ਸਾ’’ਤਿ ਸਤ੍ਤਭਵਤੋ ਉਦ੍ਧਂ ਕਾਮਭਵੇ ਪਟਿਸਨ੍ਧਿਜਨਕਸ੍ਸ ਕੁਸਲਾ ਕੁਸਲਕਮ੍ਮ ਵਿਞ੍ਞਾਣਸ੍ਸ. ‘‘ਨਿਰੋਧੇਨਾ’’ਤਿ ਸੋਤਾਪਤ੍ਤਿ ਮਗ੍ਗਕ੍ਖਣੇ ਏਵ ਨਿਰੋਧਨੇਨ. ਨਿਰੁਜ੍ਝਨ੍ਤੀਤਿ ਸਮ੍ਬਨ੍ਧੋ. ‘‘ਨਾਮਞ੍ਚ ਰੂਪਞ੍ਚਾ’’ਤਿ ਯੇ ਨਾਮ ਰੂਪਧਮ੍ਮਾ ਉਪ੍ਪਜ੍ਜੇਯ੍ਯੁਂ. ਏਤੇ ਨਾਮ ਰੂਪਧਮ੍ਮਾ ਏਤ੍ਥ ਏਤਸ੍ਮਿਂ ਅਭਿਸਙ੍ਖਾਰ ਵਿਞ੍ਞਾਣ ਨਿਰੋਧਕ੍ਖਣੇ ਨਿਰੁਜ੍ਝਨ੍ਤੀਤਿ ਯੋਜਨਾ. ‘‘ਯਥਾਵੁਤ੍ਤਨਯੇਨੇਵਾ’’ਤਿ ਤੇਨ ਪਰਿਯਾਯੇਨਾਤਿ ਵੁਤ੍ਤਪ੍ਪਕਾਰਨਯੇਨੇਵ. ‘‘ਤਦੇਕਟ੍ਠਮੋਹਸ੍ਸਾ’’ਤਿ ਤੇਨ ਰਾਗੇਨ ਤੇਨ ਦੋਸੇਨ ਏਕਸ੍ਮਿਂ ਚਿਤ੍ਤੇ ਏਕਤੋ ਠਿਤਸ੍ਸ ਮੋਹਸ੍ਸ. ਨ ਦਿਟ੍ਠਿਵਿਚਿਕਿਚ੍ਛਾ ਸਮ੍ਪਯੁਤ੍ਤਸ੍ਸ ਮੋਹਸ੍ਸ. ਤਸ੍ਸ ਪਥਮਮਗ੍ਗੇ ਏਵ ਪਹੀਨਤ੍ਤਾ. ਨਾਪਿ ਉਦ੍ਧਚ੍ਚਚਿਤ੍ਤਸਮ੍ਪਯੁਤ੍ਤਸ੍ਸ ਮੋਹਸ੍ਸ. ਤਸ੍ਸ ਚਤੁਤ੍ਥਮਗ੍ਗੇ ਏਵ ਪਹਾਤਬ੍ਬਤ੍ਤਾ. ਉਪ੍ਪਜ੍ਜਨ੍ਤਾ ਰਾਗਦੋਸਮੋਹਾ. ‘‘ਧਮ੍ਮਿਕੇਸੂ’’ਤਿ ਧਮ੍ਮੇਨ ਸਮੇਨ ਉਪ੍ਪਨ੍ਨੇਸੁ. ‘‘ਯਤੋ’’ਤਿ ਯਂਕਾਰਣਾ. ਬਲਵਨ੍ਤਕਾਰਣਾਤਿ ਅਤ੍ਥੋ. ‘‘ਤੇਸਂ’’ਤਿ ਸੋਤਾਪਨ੍ਨਾਨਂ. ‘‘ਸਲ੍ਲਿਖਨ ਵਸੇਨਾ’’ਤਿ ਬਹਲਪਕ੍ਖਂ ਥੂਲਭਾਗਂ ਸੁਟ੍ਠੁਲਿਖਨਵਸੇਨ. ਅਧਿਚ੍ਚੁਪ੍ਪਤ੍ਤਿ ਨਾਮ ਪੁਬ੍ਬੇ ਯਥਾਪਵਤ੍ਤਂ ਕਾਲਂ ਅਧਿਚ੍ਚ ਅਤਿਕ੍ਕਮ੍ਮ ਉਪ੍ਪਤ੍ਤਿ. ਉਪ੍ਪਜ੍ਜਨ੍ਤਾਨਮ੍ਪਿ ਰਾਗਦੋਸਮੋਹਾਨਂ. ‘‘ਤੇਸਂ ਪੀ’’ਤਿ ਸਕਦਾਗਾਮੀਨਮ੍ਪਿ. ‘‘ਮੇਥੁਨਵਤ੍ਥੁ ਸਮਾਯੋਗੋ ਇਚ੍ਛਿਤੋ’’ਤਿ ਜਾਯਮ੍ਪਤੀਨਂ ਮੇਥੁਨਕਮ੍ਮਸਮਾਯੋਗੋ ਨਾਮ ਸਕਦਾਗਾਮੀਨਂ ਅਤ੍ਥੀਤਿ ਇਚ੍ਛਿਤੋ. ਥੇਰੋਹਿ ਅਧਿਚ੍ਚੁਪ੍ਪਤ੍ਤਿਮਤ੍ਤਂ ਇਚ੍ਛਤਿ. ਪਰਿਯੁਟ੍ਠਾਨਮਨ੍ਦਤਂ ਨ ਇਚ੍ਛਤਿ. ਸਕਦਾਗਾਮੀਨਂ ਪੁਤ੍ਤਧੀਤਰੋਪਿ ਸਨ੍ਦਿਸ੍ਸਨ੍ਤੀਤਿ ਵਦਤਿ. ‘‘ਮਹਾਅਟ੍ਠਕਥਾਯਂ ਪਟਿਕ੍ਖਿਤ੍ਤੋ’’ਤਿ ਥੇਰਸ੍ਸ ਮਨੋਰਥਮਤ੍ਤਂਤਿ ਵਤ੍ਵਾ ਪਟਿਕ੍ਖਿਤ੍ਤੋ. ਇਦਂ ਸਬ੍ਬਂ ਅਟ੍ਠਸਾਲਿਨਿਯਂ ਵੁਤ੍ਤਂ. ‘‘ਛਕ੍ਕਨਿਪਾਤੇ’’ਤਿ ਅਙ੍ਗੁਤ੍ਤਰੇ ਛਕ੍ਕਨਿਪਾਤੇ. ‘‘ਮਿਗਾਸਾਲ਼ਵਤ੍ਥੁਮ੍ਹੀ’’ਤਿ ਮਿਗਾਸਾਲ਼ਨਾਮਿਕਾਯ ਉਪਾਸਿਕਾਯ ਵਤ੍ਥੁਮ੍ਹਿ. ਕੇਚਿ ਇਮਂ ਵਤ੍ਥੁਂ ਦਿਸ੍ਵਾ ਮਹਾਅਟ੍ਠਕਥਾਵਾਦਂ ਨ ਰੋਚੇਨ੍ਤਿ. ਮਹਾਸਿਵਤ੍ਥੇਰਵਾਦਂ ਰੋਚੇਨ੍ਤਿ. ‘‘ਅਬ੍ਰਹ੍ਮਚਾਰਿਨੋ’’ਤਿ ਮੇਥੁਨ ਧਮ੍ਮਾ ਅਪ੍ਪਟਿਵਿਰਤਸ੍ਸ. ‘‘ਸਕਦਾਗਾਮਿਤ੍ਤਂ ਬ੍ਯਾਕਤਂ’’ਤਿ ਤਸ੍ਮਿਂ ਕਾਲਙ੍ਕਤੇ ਸੋ ਬ੍ਰਾਹ੍ਮਣੋ ਇਧ ਸਕਦਾਗਾਮਿਭਾਵਂ ਪਤ੍ਵਾ ਤੁਸਿਤਾਕਾਯਂ ਉਪਪਨ੍ਨੋਤਿ ਏਵਂ ਤਸ੍ਸ ਯਂ ਸਕਦਾਗਾਮਿਤ੍ਤਂ ਭਗਵਤਾ ਬ੍ਯਾਕਤਂ. ‘‘ਅਧਿਗਮਵਸੇਨਾ’’ਤਿ ਸਕਦਾਗਾਮਿਭਾਵਂ ਪਟਿਲਾਭਵਸੇਨ. ਨ ਪਨ ਅਬ੍ਰਹ੍ਮਚਾਰਿਨੋ ਸਤੋ ਅਧਿਗਮਵਸੇਨਾਤਿ ਅਧਿਪ੍ਪਾਯੋ. ਮਰਣਾਸਨ੍ਨਕਾਲੇਪਿ ਹਿ ਸਿਕ੍ਖਾਪਦਾਧਿਟ੍ਠਾਨੇਨ ਸਹ ਉਪਰਿਮਗ੍ਗਫਲਾਧਿਗਮਨਂ ਨਾਮ ਤਿਕ੍ਖਪਞ੍ਞਸ੍ਸ ਅਰਿਯਸਾਵਕਸ੍ਸ ਨ ਦੁਕ੍ਕਰਨ੍ਤਿ. ਏਤੇਨ ਕੇਸਞ੍ਚਿ ਥੇਰਵਾਦਰੋਚਨਂ ਪਟਿਕ੍ਖਿਤ੍ਤਂ ਹੋਤਿ. ‘‘ਸਕਿਂਦੇਵ ਇਮਂਲੋਕਂ ਆਗਨ੍ਤ੍ਵਾ’’ਤਿ ਏਤੇਨ ਇਤੋ ਪਰਲੋਕਂ ਗਮਨਸ੍ਸ ਚ ਤਤੋ ਪੁਨ ਇਧਾਗਮਨਸ੍ਸ ਚ ਸਿਦ੍ਧਤ੍ਤਾ ਅਯਂ ਪੁਗ੍ਗਲੋ ਸੁਦ੍ਧੇਨ ਮਗ੍ਗਨਿਯਾਮੇਨ ਕਾਮਭਵੇ ਦ੍ਵਿਕ੍ਖਤ੍ਤੁ ਪਰਮੋਨਾਮ ਹੋਤੀਤਿ ਸਿਦ੍ਧੋ. ਕਥਂ. ਇਧ ਪਤ੍ਵਾ ਤਤ੍ਥ ਨਿਬ੍ਬਤ੍ਤਿਤ੍ਵਾ ਇਧ ਪਰਿਨਿਬ੍ਬਾਯੀ, ਤਤ੍ਥ ਪਤ੍ਵਾ ਇਧ ਨਿਬ੍ਬਤ੍ਤਿਤ੍ਵਾ ਤਤ੍ਥ ਪਰਿਨਿਬ੍ਬਾਯੀਤਿ. ਸੇਸਾਪਨ ਚਤ੍ਤਾਰੋ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ ਹੋਨ੍ਤੀਤਿ ਵਿਞ੍ਞਾਯਤਿ. ਕਤਮੇ ਚਤ੍ਤਾਰੋ. ਇਧ ਪਤ੍ਵਾ ਇਧ ਪਰਿਨਿਬ੍ਬਾਯੀ. ਤਤ੍ਥ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀ. ਇਧ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀ. ਤਤ੍ਥ ਪਤ੍ਵਾ ਇਧ ਪਰਿਨਿਬ੍ਬਾਯੀਤਿ. ਏਤ੍ਥ ਚ ਤੀਸੁ ਸੋਤਾਪਨ੍ਨੇਸੁ ਏਕੋਸਤ੍ਤਕ੍ਖਤ੍ਤੁ ਪਰਮੋ ਏਵ ਮਗ੍ਗਨਿਯਾਮੇਨ ਸਿਦ੍ਧੋ. ਸੇਸਾ ਪਨ ਦ੍ਵੇ ਸੋਤਾਪਨ੍ਨਾ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ. ਛ ਸਕਦਾਗਾਮੀਸੁ ਦ੍ਵੇ ਏਵ ਮਗ੍ਗਨਿਯਾਮੇਨ ਸਿਦ੍ਧਾ. ਸੇਸਾ ਪਨ ਚਤ੍ਤਾਰੋ ਵਿਪਸ੍ਸਨਾਨਿਯਾਮੇਨ ਸਿਦ੍ਧਾ. ਤਤ੍ਥ ਮਗ੍ਗਸਿਦ੍ਧੇਸੁ ਸੋਤਾਪਨ੍ਨ ਸਕਦਾਗਾਮੀਸੁ ਸਙ੍ਕਰੋ ਨਤ੍ਥਿ. ਵਿਪਸ੍ਸਨਾਸਿਦ੍ਧੇਸੁ ਪਨ ਸਙ੍ਕਰੋ ਅਤ੍ਥਿ. ਅਤ੍ਥਤੋ ਅਵਿਰੁਦ੍ਧੇ ਸਤਿ, ਵੋਹਾਰਮਤ੍ਤੇਨ ਸਙ੍ਕਰੇ ਦੋਸੋ ਨਤ੍ਥੀਤਿ ਦਟ੍ਠਬ੍ਬਂ. ਆਗਨ੍ਤ੍ਵਾਤਿ ਪਾਠਵਸੇਨ ਆਗਮਨਤੋਤਿ ਵੁਤ੍ਤਂ. ਆਗਨ੍ਤਾਤਿ ਪਨ ਪਾਠੋ ਯੁਤ੍ਤੋ. ਆਗਮਨਸੀਲੋ ਆਗਮਨ ਧਮ੍ਮੋ ਹੁਤ੍ਵਾ ਸਕਦਾਗਾਮੀ ਨਾਮਾਤਿ ਅਤ੍ਥੋ. ਅਨਾਗਨ੍ਤ੍ਵਾ ਇਤ੍ਥਤ੍ਤਨ੍ਤਿ ਏਤ੍ਥਪਿ ਏਸੇਵਨਯੋ. ਅਰਹਤੋ ਭਾਵੋ ਅਰਹਤ੍ਤਂ. ਅਰਹਤ੍ਤ ਮਗ੍ਗਂ. ਦਕ੍ਖਿਣਾਯ ਵਿਪਤ੍ਤਿਕਰਾਨਾਮ ਅਪ੍ਪਪ੍ਫਲ ਅਪ੍ਪਾਨਿਸਂਸਕਰਾ. ਸਮ੍ਪਤ੍ਤਿਕਰਾ ਨਾਮ ਮਹਪ੍ਫਲ ਮਹਾਨਿਸਂਸਕਰਾ. ਸੀਲਕ੍ਖਨ੍ਧਾਦਿਗੁਣਾ ਨਾਮ ਸੀਲਕ੍ਖਨ੍ਧ ਸਮਾਧਿਕ੍ਖਨ੍ਧ ਪਞ੍ਞਾਕ੍ਖਨ੍ਧ ਵਿਮੁਤ੍ਤਿਕ੍ਖਨ੍ਧ ਵਿਮੁਤ੍ਤਿਞ੍ਞਾਣ ਦਸ੍ਸਨਕ੍ਖਨ੍ਧਗੁਣਾ. ‘‘ਦਕ੍ਖਿਣੇਯ੍ਯੇਸੂ’’ਤਿ ਦਕ੍ਖਿਣਾਰਹ ਪੁਗ੍ਗਲੇਸੁ. ‘‘ਧੁਰਂ’’ਤਿ ਪਧਾਨਸੀਸਟ੍ਠਾਨਿਯਂ ਵੁਚ੍ਚਤਿ. ਸਦ੍ਧਾ ਏਵ ਧੁਰਂ ਅਸ੍ਸਾਤਿ ਸਦ੍ਧਾਧੁਰੋ. ਏਵਂ ਪਞ੍ਞਾਧੁਰੋ. ਕਸ੍ਮਾ ਪਨੇਤ੍ਥ ਵੀਰਿਯਧੁਰੋ ਨ ਗਹਿਤੋਤਿ. ਪਾਲ਼ਿਯਂ ਸਦ੍ਧਾਵਾਹੀ ਮਗ੍ਗਂ ਭਾਵੇਤਿ, ਪਞ੍ਞਾਵਾਹੀ ਮਗ੍ਗਂ ਭਾਵੇਤੀਤਿ ਵੁਤ੍ਤਂ. ਨ ਪਨ ਵੁਤ੍ਤਂ ਵੀਰਿਯਵਾਹੀ ਮਗ੍ਗਂ ਭਾਵੇਤੀਤਿ. ਤਸ੍ਮਾ ਨ ਗਹਿਤੋਤਿ. ਕਸ੍ਮਾ ਪਨ ਵੀਰਿਯਵਾਹੀ ਮਗ੍ਗਂ ਭਾਵੇਤੀਤਿ ਨ ਵੁਤ੍ਤਨ੍ਤਿ. ਵੁਚ੍ਚਤੇ. ਮਗ੍ਗਂ ਭਾਵੇਨ੍ਤਸ੍ਸ ਨਾਮ ਆਦਿਮ੍ਹਿ ਦਿਟ੍ਠਿਵਿਚਿਕਿਚ੍ਛਾਨਂ ਪਹਾਨਾਯ ਕਮ੍ਮਂ ਮਹਨ੍ਤਂ ਹੋਤਿ. ਕਸ੍ਮਾ, ਅਪਾਯਮੂਲਕਤ੍ਤਾ. ਤਤ੍ਥ ਸਦ੍ਧਾ ਚ ਵਿਚਿਕਿਚ੍ਛਾ ਚ ਦ੍ਵੇ ਉਜੁਪ੍ਪਟਿਪਕ੍ਖਾ ਹੋਨ੍ਤਿ. ਯਸ੍ਮਿਂ ਆਰਮ੍ਮਣੇ ਸਦ੍ਧਾ ਨਿਵਿਸਤਿ, ਤਸ੍ਮਿਂ ਵਿਚਿਕਿਚ੍ਛਾ ਨਤ੍ਥਿ. ਯਸ੍ਮਿਂ ਵਿਚਿਕਿਚ੍ਛਾ ਨਿਵਿਸਤਿ, ਤਸ੍ਮਿਂ ਸਦ੍ਧਾ ਨਤ੍ਥਿ. ਤਥਾ ਪਞ੍ਞਾਦਿਟ੍ਠਿਯੋ ਚ ਉਜੁਪ੍ਪਟਿਪਕ੍ਖਾ. ਯਤ੍ਥ ਪਞ੍ਞਾ, ਨ ਤਤ੍ਥ ਦਿਟ੍ਠਿ. ਯਤ੍ਥ ਦਿਟ੍ਠਿ, ਨ ਤਤ੍ਥ ਪਞ੍ਞਾਤਿ. ਅਪਿ ਚ ਸਦ੍ਧਾ ਅਤ੍ਤਨੋ ਵਿਸਯੇ ਦਿਟ੍ਠਿਂ ਵਿਧਮਤਿਯੇਵ. ਪਞ੍ਞਾਯ ਵਿਚਿਕਿਚ੍ਛਾਵਿਧਮਨੇ ਵਤ੍ਤਬ੍ਬਮੇਵ ਨਤ੍ਥਿ. ਤਸ੍ਮਾ ਆਰਦ੍ਧ ਵਿਪਸ੍ਸਕੋ ਅਨਿਚ੍ਚਾਦੀਸੁ ਅਵੇਚ੍ਚਪ੍ਪਸਾਦਮਤ੍ਤੇਨਪਿ ਦਿਟ੍ਠਿਵਿਚਿਕਿਚ੍ਛਾਯੋ ਪਜਹਿਤ੍ਵਾ ਸਦ੍ਧਾਨੁਸਾਰਿਭਾਵਞ੍ਚ ਸੁਟ੍ਠੁਤਰਂ ਪਸੀਦਿਤ੍ਵਾ ਸਦ੍ਧਾਵਿਮੁਤ੍ਤਭਾਵਞ੍ਚ ਪਾਪੁਣਾਤਿ. ਪਞ੍ਞਾਯ ਅਨਿਚ੍ਚਾਦੀਨਿ ਨਿਜ੍ਝਾਨਕ੍ਖਮਂ ਕਤ੍ਵਾ ਧਮ੍ਮਾਨੁਸਾਰਿਭਾਵਞ੍ਚ ਸੁਟ੍ਠੁਤਰਂ ਪਸ੍ਸਿਤ੍ਵਾ ਦਿਟ੍ਠਿਪਤ੍ਤਪਞ੍ਞਾ ਵਿਮੁਤ੍ਤਭਾਵਞ੍ਚ ਪਾਪੁਣਾਤਿ. ਵੀਰਿਯਂ ਪਨ ਦਿਟ੍ਠਿਵਿਚਿਕਿਚ੍ਛਾਨਂ ਪਟਿਪਕ੍ਖਮਤ੍ਤਮ੍ਪਿ ਨ ਹੋਤਿ. ਅਥ ਖੋ ਤਾਸਂ ਸਹਾਯੋਪਿ ਹੋਤਿ, ਧੁਰਭੂਤਞ੍ਚ. ਪਗ੍ਗਹਲਕ੍ਖਣਞ੍ਹਿ ਵੀਰਿਯਂ. ਤਂ ਸਦ੍ਧਂਪਿ ਪਗ੍ਗਣ੍ਹਾਤਿ, ਪਞ੍ਞਂਪਿ ਪਗ੍ਗਣ੍ਹਾਤਿ, ਦਿਟ੍ਠਿਂਪਿ ਪਗ੍ਗਣ੍ਹਾਤਿ, ਵਿਚਿਕਿਚ੍ਛਮ੍ਪਿ ਪਗ੍ਗਣ੍ਹਾਤਿਯੇਵ. ਕੁਤੋਪਨ ਅਤ੍ਤਨੋ ਸਭਾਵੇਨ ਦਿਟ੍ਠਿਵਿਚਿਕਿਚ੍ਛਾਯੋ ਪਜਹਿਤੁਂ ਸਕ੍ਖਿਸ੍ਸਤਿ. ਤਸ੍ਮਾ ਇਮਸ੍ਮਿਂ ਠਾਨੇ ਵੀਰਿਯਵਾਹੀਤਿ ਚ ਵੀਰਿਯਧੁਰੋਤਿ ਚ ਨ ਵੁਤ੍ਤੋਤਿ. ਕਾਯਸਕ੍ਖਿਮ੍ਹਿ ਪਨ ਸਦ੍ਧਾ ਚ ਪਞ੍ਞਾ ਚ ਸਮਬਲਾ ਹੋਨ੍ਤਿ. ਵੀਰਿਯਞ੍ਚ ਸਯਂ ਸਮ੍ਮਪ੍ਪਧਾਨਟ੍ਠਾਨੇ ਠਤ੍ਵਾ ਤਦੁਭਯਂ ਉਪਬ੍ਰੂਹੇਤਿ. ਸੋ ਚ ਪੁਗ੍ਗਲੋ ਤਦੁਭਯਬਲੇਨ ਦਿਟ੍ਠਿਵਿਚਿਕਿਚ੍ਛਾਦਯੋ ਪਜਹਿਤ੍ਵਾ ਕਾਯਸਕ੍ਖਿਭਾਵਂ ਪਾਪੁਣਾਤਿ. ਅਟ੍ਠਵਿਮੋਕ੍ਖੇ ਵਾ ਉਪ੍ਪਾਦੇਤ੍ਵਾ ਉਭਤੋਭਾਗ ਵਿਮੁਤ੍ਤਭਾਵਂ ਪਾਪੁਣਾਤਿ. ਇਮੇਸੁ ਪਨ ਦ੍ਵੀਸੁ ਪੁਗ੍ਗਲੇਸੁ ਵੀਰਿਯਸ੍ਸ ਥਾਮੋ ਸੁਟ੍ਠੁ ਪਾਕਟੋ. ਤਸ੍ਮਾ ਇਮੇ ਦ੍ਵੇ ਵੀਰਿਯਾਧਿਕਾਤ੍ਵੇਵ ਵਤ੍ਤਬ੍ਬਾ. ਨ ਵੀਰਿਯਧੁਰੋਤਿ. ਚਤੁਪ੍ਪਟਿਪਦਾ ਨਾਮ ਦੁਕ੍ਖਾਪਟਿਪਦਾ ਦਨ੍ਧਾਭਿਞ੍ਞਾ. ਦੁਕ੍ਖਾਪਟਿਪਦਾ ਖਿਪ੍ਪਾਭਿਞ੍ਞਾ. ਸੁਖਾਪਟਿਪਦਾ ਦਨ੍ਧਾਭਿਞ੍ਞਾ. ਸੁਖਾਪਟਿਪਦਾ ਖਿਪ੍ਪਾਭਿਞ੍ਞਾ. ਤਿਵਿਧਵਿਮੋਕ੍ਖੋ ਨਾਮ ਸੁਞ੍ਞਤੋ ਵਿਮੋਕ੍ਖੋ. ਅਨਿਮਿਤ੍ਤੋ ਵਿਮੋਕ੍ਖੋ. ਅਪ੍ਪਣਿਹਿਤੋ ਵਿਮੋਕ੍ਖੋ. ‘‘ਤਯੋ ਅਨ੍ਤਰਾ ਪਰਿਨਿਬ੍ਬਾਯਿਨੋ’’ਤਿ ਏਤ੍ਥ ਆਯੁਕਪ੍ਪਸ੍ਸ ਪਰਿਯਨ੍ਤਂ ਅਪਤ੍ਵਾ ਅਨ੍ਤਰਾ ਏਵ ਕਿਲੇਸਪਰਿਨਿਬ੍ਬਾਨਪਤ੍ਤਾ ਅਨ੍ਤਰਾਪਰਿਨਿਬ੍ਬਾਯੀ ਨਾਮ. ਸੋ ਤਿਵਿਧੋ. ਆਯੁਕਪ੍ਪਸ੍ਸ ਪਥਮਭਾਗੇ ਪਰਿਨਿਬ੍ਬਾਯੀ, ਦੁਤੀਯਭਾਗੇ, ਤਤੀਯਭਾਗੇਤਿ. ਇਮੇ ਤਯੋ ਅਨ੍ਤਰਾ ਪਰਿਨਿਬ੍ਬਾਯਿਨੋ ਨਾਮ. ਉਪਹਚ੍ਚਪਰਿਨਿਬ੍ਬਾਯੀ ਨਾਮ ਆਯੁਕਪ੍ਪ ਪਰਿਯਨ੍ਤੇ ਪਰਿਨਿਬ੍ਬਾਯੀ. ਉਦ੍ਧਂ ਮੁਖੋ ਵਟ੍ਟਸੋਤੋ ਏਤਸ੍ਸਾਤਿ ਉਦ੍ਧਂਸੋਤੋ. ਅਕਨਿਟ੍ਠਂ ਅਵਸ੍ਸਂ ਗਮਿਸ੍ਸਤੀਤਿ ਅਕਨਿਟ੍ਠਗਾਮੀ. ਵਿਪਸ੍ਸਨਾ ਕਮ੍ਮਂ ਸਸਙ੍ਖਾਰਂ ਸਪ੍ਪਯੋਗਂ ਕਤ੍ਵਾ ਪਰਿਨਿਬ੍ਬਾਯੀ ਸਸਙ੍ਖਾਰ ਪਰਿਨਿਬ੍ਬਾਯੀ. ਸਙ੍ਖਾਰਰਹਿਤੇਨ ਸੁਖੇਨ ਵਿਪਸ੍ਸਨਾ ਕਮ੍ਮੇਨ ਪਰਿਨਿਬ੍ਬਾਯੀ ਅਸਙ੍ਖਾਰ ਪਰਿਨਿਬ੍ਬਾਯੀ. ‘‘ਦ੍ਵਾਦਸ ਸੋਤਾਪਨ੍ਨਾ’’ਤਿ ਏਕਬੀਜਿਕਾ ਤਯੋ. ਤੇ ਏਵ ਚਤੂਹਿ ਪਟਿਪਦਾਹਿ ਗੁਣਿਤਾ ਦ੍ਵਾਦਸ. ਦ੍ਵਾਦਸ ਸਕਦਾਗਾਮਿਨੋ ਪੁਬ੍ਬੇ ਵੁਤ੍ਤਨਯਾ ਏਵ.

ਏਕਚ੍ਚਾਨਂ ਏਵ ਅਨਾਗਾਮਿ ਅਰਹਨ੍ਤਾਨਂ ਏਵ. ‘‘ਅਜ੍ਝੋਸਿਤਸ੍ਸਾ’’ਤਿ ਅਧਿਓਸਿਤਸ੍ਸ. ਮਮੇਵਿਦਨ੍ਤਿ ਨਿਟ੍ਠਾਨਂ ਕਤ੍ਵਾ ਠਪਿਤਸ੍ਸ. ਗਿਲਿਤ੍ਵਾ ਠਪਿਤਸ੍ਸਾਤਿ ਵੁਤ੍ਤਂ ਹੋਤਿ. ਬਹਲੇਨ ਥੂਲੇਨ ਕਾਮਰਾਗੇਨ ਵਿਮੁਤ੍ਤਾ ਬਹਲਰਾਗਵਿਮੁਤ੍ਤਾ. ਆਰੁਪ੍ਪੇਸੁ ਚ ਤਸ੍ਸੋ ਅਰੂਪਸਮਾਪਤ੍ਤਿਯੋ ਏਵ ਅਤ੍ਥਿ. ਨ ਚਤਸ੍ਸੋ ਰੂਪਸਮਾਪਤ੍ਤਿਯੋ. ਤਸ੍ਮਾ ਤਤ੍ਥ ਅਨੁਪੁਬ੍ਬਨਿਰੋਧੋ ਨ ਲਬ੍ਭਤਿ. ‘‘ਆਦਿਤੋ ਪਟ੍ਠਾਯਾ’’ਤਿ ਅਟ੍ਠਸੁ ਸਮਾਪਤ੍ਤੀਸੁ ਪਥਮਜ੍ਝਾਨ ਸਮਾਪਤ੍ਤਿਆਦਿ. ਤਤੋ ਪਟ੍ਠਾਯ. ਅਨੁਪੁਬ੍ਬਨਿਰੋਧੋ ਨਾਮ ਪਥਮਜ੍ਝਾਨੇ ਪਟਿਘਸਞ੍ਞਾਨਾਨਤ੍ਤਸਞ੍ਞਾਨਂ ਨਿਰੋਧੋ. ਪਟਿਘਸਞ੍ਞਾ ਨਾਮ ਪਞ੍ਚਵਿਞ੍ਞਾਣਸਞ੍ਞਾ. ਨਾਨਤ੍ਤਸਞ੍ਞਾ ਨਾਮ ਕਸਿਣ ਨਿਮਿਤ੍ਤਤੋ ਅਞ੍ਞੇਸੁ ਨਾਨਾਰਮ੍ਮਣੇਸੁ ਪਵਤ੍ਤਮਨੋਵਿਞ੍ਞਾਣ ਸਞ੍ਞਾ. ਦੁਤੀਯਜ੍ਝਾਨੇ ਵਿਤਕ੍ਕ ਵਿਚਾਰਾਨਂ ਨਿਰੋਧੋਤਿਆਦਿਨਾ ਅਨੁਪੁਬ੍ਬ ਨਿਰੋਧੋ. ‘‘ਤਤੋ ਪਞ੍ਚਮਜ੍ਝਾਨਂ’’ਤਿ ਪਞ੍ਚਕਨਯੇਨ ਵੁਤ੍ਤਂ. ਅਟ੍ਠਸਮਾਪਤ੍ਤਿ ਵਚਨਂ ਪਨ ਚਤੁਕ੍ਕਨਯੇਨ ਵੁਤ੍ਤਂ. ਤਦੁਭਯਂਪਿ ਪੁਗ੍ਗਲਾਨੁਰੂਪਂ ਲਬ੍ਭਤਿਯੇਵ. ਯੁਗਨਨ੍ਧਂ ਨਾਮ ਦ੍ਵਨ੍ਦਬਨ੍ਧਨਂ, ਸਮਥਵਿਪਸ੍ਸਨਾਨਂ ਯੁਗਨਨ੍ਧਨ੍ਤਿ ਵਿਗ੍ਗਹੋ. ‘‘ਸਮਾਪਜ੍ਜਨ ਵੁਟ੍ਠਾਨ ਵਿਪਸ੍ਸਨਾਵਸੇਨਾ’’ਤਿ ਏਤ੍ਥ ਵਸਿਭਾਵਪਤ੍ਤਂ ਸਮਾਪਜ੍ਜਨਞ੍ਚ ਵੁਟ੍ਠਾਨਞ੍ਚ ਗਹੇਤਬ੍ਬਂ. ਅਤ੍ਤਨੋ ਸਰੀਰਾ ਬਦ੍ਧੇਸੁ ਪਰਿਕ੍ਖਾਰੇਸੁ ਸਮਾਪਤ੍ਤਿਬਲੇਨੇਵ ਅਨ੍ਤਰਾਯਾਭਾਵਤੋ ਵਿਸੁਂ ਅਧਿਟ੍ਠਾਤਬ੍ਬ ਕਿਚ੍ਚਂ ਨਤ੍ਥੀਤਿ ਵੁਤ੍ਤਂ ‘‘ਅਤ੍ਤਨੋ ਸਰੀਰਾਬਦ੍ਧੇ ਪਰਿਕ੍ਖਾਰੇ ਠਪੇਤ੍ਵਾ’’ਤਿ. ‘‘ਨਾਨਾਬਦ੍ਧਾਨੀ’’ਤਿ ਨਾਨਾਠਾਨੇਹਿ ਆਬਦ੍ਧਾਨਿ. ਨਾਨਾਠਾਨੇਸੁ ਠਪਿਤਾਨੀਤਿ ਵੁਤ੍ਤਂ ਹੋਤਿ. ‘‘ਪਰਿਸ੍ਸਯੇਨਾ’’ਤਿ ਅਨ੍ਤਰਾਯੇਨ. ਮਾਵਿਨਸ੍ਸਨ੍ਤੂਤਿ ਵਾ ਨਾਨਾਬਦ੍ਧ ਅਵਿਕੋਪਨਂ ਅਧਿਟ੍ਠਾਤਬ੍ਬਂ. ਤਦਾ ਵੁਟ੍ਠਹਾਮੀਤਿਵਾ ਸਙ੍ਘਪ੍ਪਤਿਮਾਨਨਂ ਅਧਿਟ੍ਠਾਤਬ੍ਬਂ. ਏਵਂ ਸਤ੍ਥੁਪਕ੍ਕੋਸਨਂਪਿ. ‘‘ਅਦ੍ਧਾਨਪਰਿਚ੍ਛੇਦੋ’’ਤਿ ਅਤ੍ਤਨੋ ਜੀਵਿਤਕਾਲਸ੍ਸ ਉਪਪਰਿਕ੍ਖਣਂ. ਮਰਣਞ੍ਹਿ ਨਾਮ ਸਮਾਪਤ੍ਤਿਬਲੇਨਪਿ ਪਟਿਬਾਹਿਤੁਂ ਨ ਸਕ੍ਕਾਹੋਤਿ. ਅਨ੍ਤੋ ਸਮਾਪਤ੍ਤਿਯਞ੍ਚ ਮਰਣੇ ਸਤਿ ਸਬ੍ਰਹ੍ਮਚਾਰੀਸੁ ਕਤ੍ਤਬ੍ਬਵਤ੍ਤਂ ਨ ਕਰੇਯ੍ਯ. ਏਤਞ੍ਹਿ ਵਤ੍ਤਂ ਯਂ ਅਰਿਯਸਾਵਕਾਨਂ ਮਰਣਾਸਨ੍ਨੇ ਸਬ੍ਰਹ੍ਮਚਾਰੀਨਂ ਵਾ ਉਪਟ੍ਠਾਕਾਨਂ ਵਾ ਅਪ੍ਪਮਾਦਕਥਾਨੁ ਸਾਸਨਿਕਮ੍ਮਂ. ਸਮਾਪਤ੍ਤਿਯਂ ਵਾ ਅਞ੍ਞਤਿਤ੍ਥਿਯਾਨਂ ਗਰਹਾ ਵਿਵਜ੍ਜਨਤ੍ਥਂ. ਏਵਞ੍ਹਿ ਤੇ ਗਰਹੇਯ੍ਯੁਂ. ਗੋਤਮਸਾਵਕਾਨਂ ਨਿਰੋਧਸਮਾਪਤ੍ਤਿ ਨਾਮ ਏਕਂ ਮਰਣਮੁਖਂ. ਯਂ ਸਮਾਪਜ੍ਜਨ੍ਤੋ ਅਸੁਕੋ ਭਿਕ੍ਖੁ ਮਰਣਂ ਗਚ੍ਛਤਿ. ਅਨਰਿਯ ਕਮ੍ਮਂ ਹੇਤਨ੍ਤਿ.

‘‘ਯਦਤ੍ਥਂ’’ਤਿ ਪਟਿਪਤ੍ਤਿ ਰਸਸ੍ਸਾਦਤ੍ਥਂ. ‘‘ਤਦਤ੍ਥੇ’’ਤਿ ਤਸ੍ਮਿਂ ਅਤ੍ਥੇ. ਨਿਰਾਮਿਸ ਸੁਖਂ ਨਾਮ ਆਮਿਸਰਹਿਤ ਸੁਖਂ. ਦੁਵਿਧਞ੍ਹਿ ਸੁਖਂ ਸਾਮਿਸਸੁਖਞ੍ਚ ਨਿਰਾਮਿਸਸੁਖਞ੍ਚ. ਤਤ੍ਥ ਯੇ ਲੋਕੇ ਇਟ੍ਠ ਕਨ੍ਤ ਮਨਾਪਿਯਾ ਪਞ੍ਚਕਾਮਗੁਣਾ ਨਾਮ ਅਤ੍ਥਿ. ਤੇ ਕਿਲੇਸੇਹਿ ਆਮਸਿਤਬ੍ਬਤ੍ਤਾ ਆਮਿਸਾ ਨਾਮ. ਯਞ੍ਚਸੁਖਂ ਤੇ ਆਮਿਸੇ ਪਟਿਚ੍ਚ ਉਪ੍ਪਜ੍ਜਤਿ, ਤਂ ਸਾਮਿਸਸੁਖਂ ਨਾਮ. ਯਂ ਲੋਕੇ ਦਿਬ੍ਬਂ ਸੁਖਂ ਮਾਨੁਸਕਂ ਸੁਖਨ੍ਤਿ ਮਮਾਯਨ੍ਤਿ. ਯਞ੍ਚ ਅਨੁਭਵਨ੍ਤਂ ਮਹਾਜਨਂ ਸਬ੍ਬਾਨਿ ਅਪਾਯਭਯ ਵਟ੍ਟਭਯਾਨਿ ਸਮ੍ਪਰਿਵਾਰੇਨ੍ਤਿ. ਝਾਨਸੁਖ ਮਗ੍ਗਸੁਖ ਫਲਸੁਖ ਨਿਬ੍ਬਾਨਸੁਖਂ ਪਨ ਨਿਰਾਮਿਸਸੁਖਂ ਨਾਮ. ਯਂ ਨੇਕ੍ਖਮ੍ਮਸੁਖਨ੍ਤਿ ਚ ਪਵਿਵੇਕਸੁਖਨ੍ਤਿ ਚ ਉਪਸਮਸੁਖਨ੍ਤਿ ਚ ਸਮ੍ਬੋਧਿਸੁਖਨ੍ਤਿ ਚ ਵਿਮੁਤ੍ਤਿਸੁਖਨ੍ਤਿ ਚ ਅਰਿਯਸੁਖਨ੍ਤਿ ਚ ਅਨਵਜ੍ਜਸੁਖਨ੍ਤਿ ਚ ਵੁਚ੍ਚਤਿ. ਯਞ੍ਚ ਅਨੁਭਵਨ੍ਤਂ ਅਰਿਯਜਨਂ ਸਬ੍ਬਾਨਿ ਅਪਾਯਭਯ ਵਟ੍ਟਭਯਾਨਿ ਸਮ੍ਪਰਿਵਜ੍ਜਨ੍ਤਿ. ‘‘ਅਸ੍ਸਾਦਿਤਬ੍ਬਟ੍ਠੇਨਾ’’ਤਿ ਕਿਲੇਸਪਲਿਬੋਧੇਹਿ ਵਿਮੁਤ੍ਤਤ੍ਤਾ ਵਿਪੁਲ ਗਮ੍ਭੀਰ ਸਨ੍ਤ ਪਣੀਤਰਸਤ੍ਤਾ ਚ ਅਹੋਸੁਖਂ ਅਹੋਸੁਖਨ੍ਤਿ ਉਦਾਹਰਨ੍ਤੇਨਪਿ ਅਸ੍ਸਾਦਿਤਬ੍ਬਟ੍ਠੇਨਾਤਿ.

ਕਮ੍ਮਟ੍ਠਾਨਸਙ੍ਗਹਾਨੁਦੀਪਨਾ ਨਿਟ੍ਠਿਤਾ.

ਨਿਗਮਗਾਥਾਸੁ.

੨੬੨. ਚਰਿਤਬ੍ਬਨ੍ਤਿ ਚਾਰਿਤ੍ਤਂ. ਦਸਕੁਸਲਕਮ੍ਮਪਥਧਮ੍ਮਜਾਤਂ. ‘‘ਕੁਲਾਚਾਰੇਨਾ’’ਤਿ ਕੁਲਪਰਮ੍ਪਰਤੋ ਆਗਤੇਨ ਆਚਾਰੇਨ. ‘‘ਞਾਤਿ ਮਿਤ੍ਤ ਧਨ ਭੋਗਸਮ੍ਪਤ੍ਤਿਯਾ’’ਤਿ ਹੇਤੁਅਤ੍ਥੇ ਕਰਣਵਚਨਂ. ‘‘ਵਿਸਾਲੇ’’ਤਿ ਵਿਪੁਲੇ. ‘‘ਤੇਨਾ’’ਤਿ ਤਸ੍ਸਪਦਸ੍ਸ ਵਿਭਤ੍ਯਨ੍ਤ ਦਸ੍ਸਨਂ. ‘‘ਸਦ੍ਧਾਯਾ’’ਤਿ ਰਤਨਤ੍ਤਯੇ ਅਵੇਚ੍ਚਪ੍ਪਸਾਦਸਦ੍ਧਾਵਸੇਨ. ‘‘ਅਭਿਵੁਡ੍ਢਾਨਂ’’ਤਿ ਹਾਨਭਾਗਿਯ ਠਿਤਿਭਾਗਿਯਭਾਵਂ ਅਤਿਕ੍ਕਮ੍ਮਵਿਸੇਸਭਾਗਿਯ ਨਿਬ੍ਬੇਧਭਾਗਿਯ ਭਾਵਪਤ੍ਤਿਵਸੇਨ ਅਤਿਸ੍ਸਯ ਵੁਡ੍ਢਾਨਂ. ‘‘ਪਰਿਸੁਦ੍ਧਾਨਞ੍ਚਾ’’ਤਿ ਅਤ੍ਤੁਕ੍ਕਂਸਨ ਪਰਵਮ੍ਭਨਾਦਿ ਦੋਸੇਹਿ ਪਰਿਸੁਦ੍ਧਾਨਞ੍ਚ. ਨਂ ਨਂ ਜਨਂ ਪਾਤਿਰਕ੍ਖਤੀਤਿ ਨਮ੍ਪੋ. ਦਿਟ੍ਠਦਿਟ੍ਠੇਸੁ ਮੇਤ੍ਤਾਵਿਹਾਰੀਤਿ ਵੁਤ੍ਤਂ ਹੋਤਿ. ਆਵ੍ਹਾਤਬ੍ਬੋਤਿ ਅਵ੍ਹਯੋ. ਨਾਮਂ. ਨਮ੍ਪੋ ਇਤਿ ਅਵ੍ਹਯੋ ਅਸ੍ਸਾਤਿ ਨਮ੍ਪਵ੍ਹਯੋਤਿ ਵਚਨਤ੍ਥੋ. ‘‘ਪਣਿਧਾਯਾ’’ਤਿ ਪਤ੍ਥੇਤ੍ਵਾਤਿ ਅਤ੍ਥਂ ਨਿਵਤ੍ਤੇਤਿ ‘‘ਭੁਸਂ ਨਿਧਾਯਾ’’ਤਿਆਦਿਨਾ. ‘‘ਉਪਾਦਾਯ ਪਟਿਚ੍ਚਾ’’ਤਿ ਤਸ੍ਸ ਪਦਸ੍ਸ ਪਰਿਯਾਯਦਸ੍ਸਨਮੇਤਂ. ‘‘ਅਤ੍ਤਨੋ ਮਨ੍ਦਬੁਦ੍ਧੀਨਂ’’ਤਿ ਪਚ੍ਚਕ੍ਖੇ ਧਰਮਾਨਾਨਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਪਚ੍ਛਿਮ ਜਨਾਨਂ ਵਾ’’ਤਿ. ਅਨੁਕਮ੍ਪਨਂ ਅਨੁਕਮ੍ਪੋ. ਕਥਂ ਨੁ ਖੋ ਇਮੇ ਜਨਾ ਅਭਿਧਮ੍ਮਤ੍ਥੇਸੁ ਸੁਖੇਨ ਆਜਾਨੇਯ੍ਯੁਨ੍ਤਿ ਏਵਂ ਪਵਤ੍ਤੋ ਚਿਤ੍ਤਬ੍ਯਾਪਾਰੋ. ਅਤ੍ਥਤੋ ਅਨੁਦਯਸਙ੍ਖਾਤਾ ਕਰੁਣਾਯੇਵ. ਤੇਨਾਹ ‘‘ਅਨੁਦਯਂ ਕਾਰੁਞ੍ਞਂ’’ਤਿ. ‘‘ਪਤ੍ਥਿਤਂ’’ਤਿ ਵਾ ਸਾਧੁਵਤਸ੍ਸ ਯਂ ਥੇਰੋ ਏਵਰੂਪਂ ਪਕਰਣਂ ਕਰੇਯ੍ਯਾਤਿ ਏਵਂ ਚਿਰਕਾਲਂ ਪਤ੍ਥਿਤਂ ਆਸਿਂਸਿਤਨ੍ਤਿ ਅਤ੍ਥੋ. ‘‘ਖੁਦ੍ਦਸਿਕ੍ਖਾਟੀਕਾਯਂ’’ਤਿ ਪੋਰਾਣਟੀਕਂ ਸਨ੍ਧਾਯ ਵੁਤ੍ਤਂ. ਸੋਮਵਿਹਾਰੋਤ੍ਵੇਵ ਪਞ੍ਞਾਯਿਤ੍ਥ ਤਸ੍ਮਿਂ ਦੀਪੇਤਿ ਅਧਿਪ੍ਪਾਯੋ. ਗਾਥਾਯਂ ‘‘ਅਥਾ’’ਤਿ ਤਸ੍ਮਿਂਕਾਲੇ. ‘‘ਏਤ੍ਥਾ’’ਤਿ ਏਤਸ੍ਮਿਂ ਨਗਰੇ. ‘‘ਸਦ੍ਦੋ’’ਤਿ ਕਸ੍ਮਾ ਰਾਜਾ ਏਵਰੂਪਂ ਮਙ੍ਗਲਹਤ੍ਥਿਂ ਬ੍ਰਾਹ੍ਮਣਾਨਂ ਅਦਾਸਿ. ਨੇਤਂ ਪਤਿਰੂਪਂ ਯਂ ਰਞ੍ਞਾ ਕਤਨ੍ਤਿ ਏਵਂ ਪਵਤ੍ਤੋ ਅਮਨਾਪਸਦ੍ਦੋ. ‘‘ਭੇਰਵੋ’’ਤਿ ਭੀਰੁਤਾਜਨਕੋ ਭਯਾਨਕੋ. ‘‘ਸਿਵੀਨਂ’’ਤਿ ਸਿਵਿਰਟ੍ਠਵਾਸੀਨਂ. ‘‘ਰਟ੍ਠਵਡ੍ਢਨੇ’’ਤਿ ਰਟ੍ਠਂ ਵਡ੍ਢੇਤੀਤਿ ਰਟ੍ਠਵਡ੍ਢਨੋ. ਹਤ੍ਥਿਨਾਗੋ. ਸੋ ਹਿ ਲਕ੍ਖਣਸਮ੍ਪਨ੍ਨੋ ਆਜਾਨਿਯੋ ਹੋਤਿ. ਯਸ੍ਮਿਂ ਰਟ੍ਠੇ ਤਂ ਅਭਿਮਙ੍ਗਲਂ ਕਰੋਨ੍ਤਿ, ਤਸ੍ਮਿਂ ਰਟ੍ਠੇ ਦੇਵੋ ਸਮ੍ਮਾ ਵਸ੍ਸਤਿ, ਨਾਨਾਭਯੁਪਦ੍ਦਵਾ ਤਸ੍ਮਿਂ ਨੁਪ੍ਪਜ੍ਜਨ੍ਤੀਤਿ ਲੋਕਸਮ੍ਮਤੋ ਮਙ੍ਗਲਹਤ੍ਥੀ ਹੋਤਿ. ਤੇਨ ਵੁਤ੍ਤਂ ‘‘ਸਿਵੀਨਂ ਰਟ੍ਠਵਡ੍ਢਨੇ’’ਤਿ. ‘‘ਵਿਤ੍ਥਿਣ੍ਣੋ’’ਤਿ ਵਿਤ੍ਥਾਰਿਤੋ. ਅਤਿਵਿਤ੍ਥਾਰੋਤਿ ਵੁਤ੍ਤਂ ਹੋਤਿ. ਧਨੀਯਨ੍ਤਿ ਮਹਾਜਨੇਹਿ ਦਟ੍ਠੁਂ ਪਤ੍ਥੀਯਨ੍ਤੀਤਿ ਧਞ੍ਞਾ. ਮਹਿਦ੍ਧਿਕਾ. ਅਧਿਵਸਨ੍ਤਿ ਏਤ੍ਥਾਤਿ ਅਧਿਵਾਸੋ. ਧਞ੍ਞਾਨਂ ਅਧਿਵਾਸੋਤਿ ਸਮਾਸੋ. ਅਜ੍ਝਾਵਸਿਂਸੁ ਏਤ੍ਥਾਤਿ ਅਜ੍ਝਾਵੁਤ੍ਥਂ. ਕਿਤ੍ਤਿਗੁਣਵਸੇਨ ਉਦੇਨ੍ਤਿ ਉਗ੍ਗਚ੍ਛਨ੍ਤੀਤਿ ਉਦਿਤਾ. ਉਦਿਤਾਨਂਪਿ ਉਦਿਤੋਤਿ ਵਿਗ੍ਗਹੋ. ਤੇਨਾਹ ‘‘ਨਭਮਜ੍ਝੇ’’ਤਿਆਦਿਂ. ਸਾਰਜ੍ਜਨਂ ਸਾਰਦੋ. ਵਿਗਤੋ ਸਾਰਦੋ ਯਸ੍ਸਾਤਿ ਵਿਸਾਰਦੋ. ਵਿਸਾਰਦਸ੍ਸ ਭਾਵੋ ਵੇਸਾਰਜ੍ਜਂ. ਪਰਿਯਤ੍ਤਿਯਂ ਵੇਸਾਰਜ੍ਜਂ ਪਰਿਯਤ੍ਤਿਵੇਸਾਰਜ੍ਜਂ. ਤੇਪਿਟਕਪਰਿਯਤ੍ਤਿਯਂ ਵੇਯ੍ਯਤ੍ਤਿਯਞ੍ਞਾਣਂ. ਤਂ ਆਦਿ ਏਤਿਸ੍ਸਾ ਪਞ੍ਞਾਯਾਤਿ ਪਰਿਯਤ੍ਤਿਵੇਸਾਰਜ੍ਜਾਦਿ ਪਞ੍ਞਾ. ਪਾਪਤੋ ਲਜ੍ਜਨਸੀਲਾਤਿ ਲਜ੍ਜਿਨੋਤਿ ਆਹ ‘‘ਪਾਪਗਰਹਿਨੋ’’ਤਿ. ਪਾਪਂ ਧਮ੍ਮਂ ਗਰਹਨ੍ਤਿਆਦੀਨਵਂ ਕਥਯਨ੍ਤਿ ਸੀਲੇਨਾਤਿ ਪਾਪਗਰਹਿਨੋ. ‘‘ਅਨੁਸ੍ਸਰਨ੍ਤੂ’’ਤਿ ਪੁਨਪ੍ਪੁਨਂ ਸਰਨ੍ਤੁ. ਵਿਸੇਸੇਨ ਭਵਨ੍ਤਿ ਵੇਪੁਲ੍ਲਂ ਗਚ੍ਛਨ੍ਤੀਤਿ ਵਿਭਵਾ. ਪੁਞ੍ਞਾਨਿ ਚ ਤਾਨਿ ਵਿਭਵਾਚਾਤਿ ਪੁਞ੍ਞਵਿਭਵਾ. ਵਿਪੁਲਪੁਞ੍ਞਾਨੀਤਿ ਦਸ੍ਸੇਤੁਂ ‘‘ਵਿਪੁਲਾਨਂ’’ਤਿਆਦਿਮਾਹ. ਅਨੁਤ੍ਤਰਿਯ ਧਮ੍ਮਾ ਨਾਮ ਦਸ੍ਸਨਾਨੁਤ੍ਤਰਿਯ ਸਵਨਾਨੁਤ੍ਤਰਿਯਾਦਯੋ. ਲੋਕੇ ਬਹੂਸੁ ਦਸ੍ਸਨੇਸੁ ਇਤੋ ਉਤ੍ਤਰਂ ਅਞ੍ਞਂ ਦਸ੍ਸਨਂ ਨਾਮ ਨਤ੍ਥੀਤਿ ਦਸ੍ਸਨਾਨੁਤ੍ਤਰਿਯਂ. ਰਤਨਤ੍ਤਯਦਸ੍ਸਨਂ. ਚਤੁਸਚ੍ਚਦਸ੍ਸਨਞ੍ਚ. ਰਤਨਤ੍ਤਯਗੁਣਕਥਾਸਵਨਂ, ਖਨ੍ਧਾਯਤਨ ਧਾਤੁ ਸਚ੍ਚਪਟਿਚ੍ਚਸਮੁਪ੍ਪਾਦਕਥਾਸਵਨਞ੍ਚ ਸਵਨਾਨੁਤ੍ਤਰਿਯਂ ਨਾਮ. ਤੇਸੁ ਰਤਨਤ੍ਤਯਾਦੀਸੁ ਸਦ੍ਧਾ ਪਟਿਲਾਭੋ ਲਾਭਾਨੁਤ੍ਤਰਿਯਂ ਨਾਮ. ਤੇਸਮੇਵ ਪੁਨਪ੍ਪੁਨਂ ਸਰਣਂ ਅਨੁਸ੍ਸਤਾਨੁਤ੍ਤਰਿਯਂ ਨਾਮ. ਰਤਨਤ੍ਤਯੇ ਚਤੂਹਿ ਪਚ੍ਚਯੇਹਿ ਵਾ ਵਤ੍ਤਪ੍ਪਟਿਵਤ੍ਤਕਰਣੇਨ ਵਾ ਪਰਿਚਰਣਂ ਪਾਰਿਚਰਿਯਾਨੁਤ੍ਤਰਿਯਂ ਨਾਮ. ਬੁਦ੍ਧਪਞ੍ਞਤ੍ਤਾਸੁ ਤੀਸੁ ਸਿਕ੍ਖਾਸੁ ਸਮਾਦਾਯ ਸਿਕ੍ਖਨਂ ਸਿਕ੍ਖਾਨੁਤ੍ਤਰਿਯਂ ਨਾਮ. ਤਾਦਿਸੇ ਪਞ੍ਞਾਵਦਾਤਗੁਣਸੋਭਾਦਿਕੇ ਗੁਣੇ ਅਵਸ੍ਸਂ ਭਜਨ੍ਤਿ ਪਾਪੁਣਨ੍ਤੀਤਿ ਤਾਦਿਸਗੁਣਭਾਗਿਨੋ. ‘‘ਭਵਿਸ੍ਸਾਮਾ’’ਤਿ ਭਵਿਤੁਂ ਉਸ੍ਸਾਹਂ ਕਰਿਸ੍ਸਾਮਾਤਿ ਵੁਤ੍ਤਂ ਹੋਤਿ.

ਦੀਪਨਿਯਾ ਨਿਗਮਗਾਥਾਸੁ.

‘‘ਬਸ੍ਹ੍ਯੁਸੁਞ੍ਞਚਮ੍ਮੇਕਮ੍ਹੀ’’ਤਿ ਏਤ੍ਥ ‘‘ਬਸ੍ਹ੍ਯੂ’’ਤਿ ਅਟ੍ਠਸਙ੍ਖ੍ਯਾਯ ਸਙ੍ਕੇਤ ਵਚਨਂ. ‘‘ਚਮ੍ਮਂ’’ਤਿ ਦ੍ਵਿਸਙ੍ਖ੍ਯਾਯ. ਏਕਞ੍ਚ ਦੁਕਞ੍ਚ ਸੁਞ੍ਞਞ੍ਚ ਅਟ੍ਠਚਾਤਿ ਗਣਨਕ੍ਕਮੋ. ਸਹਸ੍ਸ ਦ੍ਵਿਸਤ ਅਟ੍ਠਸਙ੍ਖਾਤੇ ਸਾਕੇਤਿ ਅਤ੍ਥੋ. ਏਸਨਯੋ ਪਰਤੋ ‘‘ਨਵਪਞ੍ਚ ਚਮ੍ਮੇਕਮ੍ਹੀ’’ਤਿ ਪਦੇਪਿ. ਗਾਥਾਵਣ੍ਣਨਾਸੁ. ਨਗਰਤਿ ਨ ਚਵਤੀਤਿ ਨਗਰਂ. ਥਾਵਰਿਯਨ੍ਤਿ ਵੁਤ੍ਤਂ ਹੋਤਿ. ‘‘ਰਞ੍ਜੇਤੀ’’ਤਿ ਰਮੇਤਿ. ਖੇਮਸੁਭਿਕ੍ਖਤਾਦਿਗੁਣੇਹਿ ਅਨਾਗਤੇ ਜਨੇ ਗਮਾਪੇਤਿ, ਆਗਤੇ ਅਞ੍ਞਤ੍ਥ ਗਨ੍ਤੁਂ ਨ ਦੇਤੀਤਿ ਵੁਤ੍ਤਂ ਹੋਤਿ. ਰੋਹਿਤਮਿਗਾ ਨਾਮ ਸੁਵਣ੍ਣਵਣ੍ਣਮਿਗਾ. ‘‘ਸਾਕੇ’’ਤਿ ਸਾਕਨਾਮੇਨ ਰਞ੍ਞਾ ਪੁਨ ਸਙ੍ਖਤਤ੍ਤਾ ਇਮਂ ਕਲਿਯੁਗਂ ਸਾਕਨ੍ਤਿ ਵੁਚ੍ਚਤਿ. ਯਂ ਏਤਰਹਿ ਸਾਕ੍ਰਰਾਜਨ੍ਤਿਪਿ ਵੋਹਰਨ੍ਤਿ. ਸਾਕਰਾਜਾ ਚ ਨਾਮ ਉਤ੍ਤਰਾਪਥੇਸੁ ਏਕੋ ਗਨ੍ਧਾਰਰਾਜਾ. ਯਂ ਜੇਟ੍ਠਕਂ ਕਤ੍ਵਾ ਭਿਨ੍ਨਲਦ੍ਧਿਕਾ ਵਜ੍ਜੀਭਿਕ੍ਖੂ ਇਮਂ ਧਮ੍ਮ ਵਿਨਯਂ ਮਹਾਸਙ੍ਘੀਕਂ ਨਾਮ ਸਙ੍ਗਹਂ ਆਰੋਪੇਨ੍ਤਿ. ਸੋ ਚ ਧਮ੍ਮਵਿਨਯਸਙ੍ਗਹੋ ਉਤ੍ਤਰਾਪਥੇਸੁ ਵਤ੍ਤਤਿ. ਵੇਸਾਲਿਯਂ ਯਸਤ੍ਥੇਰ ਸਙ੍ਗਹੋ ਪਨ ਦਕ੍ਖਿਣਾਪਥੇਸੂਤਿ. ਚਤ੍ਤਾਰਿਯੁਗਾਨਿ ਨਾਮ ਲੋਕੇ ਪਞ੍ਞਪੇਨ੍ਤਿ ਸਤ੍ਯਯੁਗਂ, ਦ੍ਵਾਪਰਯੁਗਂ, ਤੇਤ੍ਰਯੁਗਂ, ਕਲਿਯੁਗ,ਨ੍ਤਿ. ਯੁਗਨ੍ਤਿ ਚ ਆਯੁਪਰਿਮਾਣਂ ਵੁਚ੍ਚਤਿ. ਇਦਾਨਿਪਨ ਕਲਿਯੁਗਂ ਵਤ੍ਤਤਿ. ਤੇਨ ਵੁਤ੍ਤਂ ‘‘ਸਾਕੇਤਿ ਕਲਿਯੁਗੇ’’ਤਿ. ਪਾਪਯੁਗੇਤਿ ਅਤ੍ਥੋ. ‘‘ਲ ਤੀ’’ਤਿ ਸਾਲਿਕ੍ਖੇਤ੍ਤਾਨਂ ਸੋਧਨਟ੍ਠਾਨਤ੍ਤਾ ਏਵਂ ਮ੍ਰਮ੍ਮਦੇਸਵੋਹਾਰੇਨ ਲਦ੍ਧਨਾਮਂ ਅਰਞ੍ਞਂ. ਤਂ ਪਨ ਮੁਂਰ੍ਵਾਨਗਰਸ੍ਸ ਏਸਨ੍ਨੇ ਪਞ੍ਚਧਨੁਸਤਿਕੇ ਪਦੇਸੇ ਜਾਤਂ. ‘‘ਵਿਸ੍ਸੁਤੇ’’ਤਿ ਵਿਸੇਸੇਨ ਕਿਤ੍ਤਿਤੇ. ਸਾਰਞ੍ਚ ਅਸਾਰਞ੍ਚ ਵਿਵੇਚੇਨ੍ਤਿ ਵਿਚਾਰੇਤ੍ਵਾ ਜਾਨਨ੍ਤਿਸੀਲੇਨਾਤਿ ਸਾਰਾਸਾਰ ਵਿਵੇਕਿਨੋਤਿ ਵਚਨਤ੍ਥੋਤਿ.

ਇਤਿ ਪਰਮਤ੍ਥਦੀਪਨਿਯਾ ਅਨੁਦੀਪਨਾ ਨਿਟ੍ਠਿਤਾ.

੧. ਪਰਮਤ੍ਥਦੀਪਨੀ ਨਾਮ, ਯੇਨ ਥੇਰੇਨ ਸਾ ਕਤਾ.

ਤੇਨੇਵੇ ਸਾ ਕਤਾ ਹੋਤਿ, ਅਯਂ ਤਸ੍ਸਾਨੁ ਦੀਪਨੀ.

੨. ਅਟ੍ਠਸਤ੍ਤਦ੍ਵਯੇਕਮ੍ਹਿ, ਸਾਕੇ ਸਾ ਜੇਟ੍ਠਮਾਸਕੇ.

ਕਾਲ਼ੇ ਨਵਮਿਯਂ ਦਿਵਾ, ਮਜ੍ਝਨ੍ਹਿਕੇ ਨਿਟ੍ਠਂ ਗਤਾ.

ਅਨੁਦੀਪਨੀ ਨਿਟ੍ਠਿਤਾ.