ਅਞ੍ਞ > ਲੇਡੀ ਸਯਾਡੋ ਗਨ੍ਥ-ਸਙ੍ਗਹੋ > ਪਟ੍ਠਾਨੁਦ੍ਦੇਸ ਦੀਪਨੀਪਾਠ

ਕਤਮੇ ਧਮ੍ਮਾ ਹੇਤੁਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ. ਲੋਭ ਸਹਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਚ ਰੂਪਕਲਾਪਾਧਮ੍ਮਾ ਚ ਦੋਸਸਹ ਜਾਤਾ ਮੋਹਸਹਜਾਤਾ ਅਲੋਭਸਹਜਾਤਾ ਅਦੋਸਸਹ ਜਾਤਾ ਅਮੋਹਸਹਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਚ ਰੂਪਕਲਾਪਾ ਧਮ੍ਮਾ ਚ ਹੇਤੁਪਚ੍ਚਯਤੋ ਉਪ੍ਪਨ੍ਨਾ ਹੇਤੁਪਚ੍ਚਯੁਪ੍ਪਨ੍ਨਾ ਧਮ੍ਮਾ.

ਸਹਜਾਤਰੂਪਕਲਾਪਾ ਨਾਮ ਸਹੇਤੁਕਪਟਿਸਨ੍ਧਿਕ੍ਖਣੇ ਕਮ੍ਮਜਰੂਪਾਨਿ ਚ ਪਵਤ੍ਤਿਕਾਲੇ ਸਹੇਤੁਕਚਿਤ੍ਤਜਰੂਪਾਨਿ ਚ. ਤਤ੍ਥ ਪਟਿਸਨ੍ਧਿਕ੍ਖਣੋ ਨਾਮ ਪਟਿਸਨ੍ਧਿਚਿਤ੍ਤਸ੍ਸ ਉਪ੍ਪਾਦਕ੍ਖਣੋ. ਪਵਤ੍ਤਿਕਾਲੋ ਨਾਮ ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕ੍ਖਣਤੋ ਪਟ੍ਠਾਯ ਯਾਵ ਚੁਤਿਕਾਲਂ ਵੁਚ੍ਚਤਿ.

ਕੇਨਟ੍ਠੇਨ ਹੇਤੁ, ਕੇਨਟ੍ਠੇਨ ਪਚ੍ਚਯੋਤਿ. ਮੂਲਟ੍ਠੇਨ ਹੇਤੁ, ਉਪਕਾਰਕਟ੍ਠੇਨ ਪਚ੍ਚਯੋਤਿ. ਤਤ੍ਥ ਮੂਲਯਮਕੇ ਵੁਤ੍ਤਾਨਂ ਲੋਭਾਦੀਨਂ ਮੂਲਧਮ੍ਮਾਨਂ ਮੂਲਭਾਵੋ ਮੂਲਟ੍ਠੋ ਨਾਮ. ਸੋ ਮੂਲਟ੍ਠੋ ਮੂਲਯਮਕਦੀਪਨਿਯਂ ਅਮ੍ਹੇਹਿ ਰੁਕ੍ਖੋਪਮਾਯ ਦੀਪਿਤੋਯੇਵ.

ਅਪਿ ਚ ਏਕੋ ਪੁਰਿਸੋ ਏਕਿਸ੍ਸਂ ਇਤ੍ਥਿਯਂ ਪਟਿਬਦ੍ਧ ਚਿਤ੍ਤੋ ਹੋਤਿ. ਸੋ ਯਾਵ ਤਂ ਚਿਤ੍ਤਂ ਨ ਜਹਤਿ, ਤਾਵ ਤਂ ਇਤ੍ਥਿਂ ਆਰਬ੍ਭ ਤਸ੍ਸ ਪੁਰਿਸਸ੍ਸ ਲੋਭਸਹਜਾਤਾਨਿ ਕਾਯਵਚੀਮਨੋਕਮ੍ਮਾਨਿ ਚ ਲੋਭਸਮੁਟ੍ਠਿਤਾਨਿ ਚਿਤ੍ਤਜਰੂਪਾਨਿ ਚ ਚਿਰਕਾਲਂਪਿ ਪਵਤ੍ਤਨ੍ਤਿ. ਸਬ੍ਬਾਨਿ ਚ ਤਾਨਿ ਚਿਤ੍ਤਚੇਤਸਿਕਰੂਪਾਨਿ ਤਸ੍ਸਂ ਇਤ੍ਥਿਯਂ ਰਜ੍ਜਨਲੋਭਮੂਲਕਾਨਿ ਹੋਨ੍ਤਿ. ਸੋ ਲੋਭੋ ਤੇਸਂ ਮੂਲਟ੍ਠੇਨ ਹੇਤੁ ਚ, ਉਪਕਾਰਕਟ੍ਠੇਨ ਪਚ੍ਚਯੋ ਚ. ਤਸ੍ਮਾ ਹੇਤੁਪਚ੍ਚਯੋ. ਏਸ ਨਯੋ ਸੇਸਾਨਿ ਰਜ੍ਜਨੀਯਵਤ੍ਥੂਨਿ ਆਰਬ੍ਭਰਜ੍ਜਨਵਸੇਨ ਉਪ੍ਪਨ੍ਨੇਸੁ ਲੋਭੇਸੁ, ਦੁਸ੍ਸਨੀਯਵਤ੍ਥੂਨਿ ਆਰਬ੍ਭ ਦੁਸ੍ਸਨਵਸੇਨ ਉਪ੍ਪਨ੍ਨੇਸੁ ਦੋਸੇਸੁ, ਮੁਯ੍ਹਨੀਯਵਤ੍ਥੂਨਿ ਆਰਬ੍ਭ ਮੁਯ੍ਹਨਵਸੇਨ ਉਪ੍ਪਨ੍ਨੇਸੁ ਮੋਹੇਸੁ ਚ.

ਤਤ੍ਥ ¶ ਯਥਾ ਰੁਕ੍ਖਸ੍ਸ ਮੂਲਾਨਿ ਸਯਂ ਅਨ੍ਤੋਪਥਵਿਯਂ ਸੁਟ੍ਠੁ ਪਤਿਟ੍ਠਹਿਤ੍ਵਾ ਪਥਵਿਰਸਞ੍ਚ ਆਪੋਰਸਞ੍ਚ ਗਹੇਤ੍ਵਾ ਤਂ ਰੁਕ੍ਖਂ ਯਾਵ ਅਗ੍ਗਾ ਅਭਿਹਰਨ੍ਤਿ, ਤੇਨ ਰੁਕ੍ਖੋ ਚਿਰਕਾਲਂ ਵਡ੍ਢਮਾਨੋ ਤਿਟ੍ਠਤਿ. ਤਥਾ ਲੋਭੋ ਚ ਤਸ੍ਮਿਂ ਤਸ੍ਮਿਂ ਵਤ੍ਥੁਮ੍ਹਿ ਰਜ੍ਜਨਵਸੇਨ ਸੁਟ੍ਠੁ ਪਤਿਟ੍ਠਹਿਤ੍ਵਾ ਤਸ੍ਸ ਤਸ੍ਸ ਵਤ੍ਥੁਸ੍ਸ ਪਿਯਰੂਪਰਸਞ੍ਚ ਸਾਤਰੂਪਰਸਞ੍ਚ ਗਹੇਤ੍ਵਾ ਸਮ੍ਪਯੁਤ੍ਤਧਮ੍ਮੇ ਯਾਵ ਕਾਯਵਚੀਵੀਤਿਕ੍ਕਮਾ ਅਭਿਹਰਤਿ, ਕਾਯ ਵੀਤਿਕ੍ਕਮਂ ਵਾ ਵਚੀਵੀਤਿਕ੍ਕਮਂ ਵਾ ਪਾਪੇਤਿ. ਤਥਾ ਦੋਸੋ ਚ ਦੁਸ੍ਸਨ ਵਸੇਨ ਅਪ੍ਪਿਯਰੂਪਰਸਞ੍ਚ ਅਸਾਤਰੂਪਰਸਞ੍ਚ ਗਹੇਤ੍ਵਾ, ਮੋਹੋ ਚ ਮੁਯ੍ਹਨਵਸੇਨ ਨਾਨਾਰਮ੍ਮਣੇਸੁ ਨਿਰਤ੍ਥਕਚਿਤ੍ਤਾਚਾਰਰਸਂ ਵਡ੍ਢੇਤ੍ਵਾਤਿ ਵਤ੍ਤਬ੍ਬਂ. ਏਵਂ ਅਭਿਹਰਨ੍ਤਾ ਤਯੋ ਧਮ੍ਮਾ ਰਜ੍ਜਨੀਯਾਦੀਸੁ ਵਤ੍ਥੂਸੁ ਸਮ੍ਪਯੁਤ੍ਤਧਮ੍ਮੇ ਮੋਦਮਾਨੇ ਪਮੋਦਮਾਨੇ ਕਰੋਨ੍ਤੋ ਵਿਯ ਚਿਰ ਕਾਲਂ ਪਵਤ੍ਤੇਨ੍ਤਿ. ਸਮ੍ਪਯੁਤ੍ਤਧਮ੍ਮਾ ਚ ਤਥਾ ਪਵਤ੍ਤਨ੍ਤਿ. ਸਮ੍ਪਯੁਤ੍ਤ ਧਮ੍ਮੇਸੁ ਚ ਤਥਾ ਪਵਤ੍ਤਮਾਨੇਸੁ ਸਹਜਾਤਰੂਪਕਲਾਪਾਪਿ ਤਥਾ ਪਵਤ੍ਤਨ੍ਤਿਯੇਵ. ਤਤ੍ਥ ਸਮ੍ਪਯੁਤ੍ਤਧਮ੍ਮੇ ਅਭਿਹਰਤੀਤਿ ਦ੍ਵੇ ਪਿਯਰੂਪ ਸਾਤਰੂਪਰਸੇ ਸਮ੍ਪਯੁਤ੍ਤਧਮ੍ਮਾਨਂ ਸਨ੍ਤਿਕਂ ਪਾਪੇਤੀਤਿ ਅਤ੍ਥੋ.

ਸੁਕ੍ਕਪਕ੍ਖੇ ਸੋ ਪੁਰਿਸੋ ਯਦਾਕਾਮੇਸੁ ਆਦੀਨਵਂ ਪਸ੍ਸਤਿ, ਤਦਾ ਸੋ ਤਂ ਚਿਤ੍ਤਂਜਹਤਿ, ਤਂ ਇਤ੍ਥਿਂ ਆਰਬ੍ਭ ਅਲੋਭੋ ਸਞ੍ਜਾ ਯਤਿ. ਪੁਬ੍ਬੇ ਯਸ੍ਮਿਂ ਕਾਲੇ ਤਂ ਇਤ੍ਥਿਂ ਆਰਬ੍ਭ ਲੋਭਮੂਲਕਾਨਿ ਅਸੁਦ੍ਧਾਨਿ ਕਾਯਵਚੀਮਨੋਕਮ੍ਮਾਨਿ ਵਤ੍ਤਨ੍ਤਿ. ਇਦਾਨਿ ਤਸ੍ਮਿਂ ਕਾਲੇਪਿ ਅਲੋਭਮੂਲਕਾਨਿ ਸੁਦ੍ਧਾਨਿ ਕਾਯਵਚੀਮਨੋਕਮ੍ਮਾਨਿ ਵਤ੍ਤਨ੍ਤਿ. ਪਬ੍ਬਜਿਤ ਸੀਲਸਂਵਰਾਨਿ ਵਾ ਝਾਨਪਰਿਕਮ੍ਮਾਨਿ ਵਾ ਅਪ੍ਪਨਾਝਾਨਾਨਿ ਵਾ ਵਤ੍ਤਨ੍ਤਿ. ਸੋ ਅਲੋਭੋ ਤੇਸਂ ਮੂਲਟ੍ਠੇਨ ਹੇਤੁ ਚ ਹੋਤਿ, ਉਪਕਾਰਕਟ੍ਠੇਨ ਪਚ੍ਚਯੋਚ. ਤਸ੍ਮਾ ਹੇਤੁਪਚ੍ਚਯੋ. ਏਸ ਨਯੋ ਸੇਸੇਸੁ ਲੋਭ ਪਟਿਪਕ੍ਖੇਸੁ ਅਲੋਭੇਸੁ, ਦੋਸਪਟਿਪਕ੍ਖੇਸੁ ਅਦੋਸੇਸੁ, ਮੋਹ ਪਟਿਪਕ੍ਖੇਸੁ ਅਮੋਹੇਸੁ ਚ.

ਤਤ੍ਥ ਰੁਕ੍ਖਮੂਲਾਨਿ ਵਿਯ ਅਲੋਭੋ ਲੋਭਨੇਯ੍ਯਵਤ੍ਥੂਸੁ ਲੋਭਂ ਪਹਾਯ ਲੋਭਵਿਵੇਕਸੁਖਰਸਂ ਵਡ੍ਢੇਤ੍ਵਾ ਤੇਨ ਸੁਖੇਨ ਸਮ੍ਪਯੁਤ੍ਤਧਮ੍ਮੇ ਮੋਦਮਾਨੇ ਪਮੋਦਮਾਨੇ ਕਰੋਨ੍ਤੋ ਵਿਯ ਯਾਵ ਝਾਨਸਮਾਪਤ੍ਤਿਸੁਖਾ ਵਾ ਯਾਵ ਮਗ੍ਗਫਲਸੁਖਾ ਵਾ ਵਡ੍ਢਾਪੇਤਿ. ਤਥਾ ਅਦੋਸੋ ਚ ਦੋਸਨੇਯ੍ਯਵਤ੍ਥੂਸੁ ਦੋਸਵਿਵੇਕਸੁਖਰਸਂ ਵਡ੍ਢੇਤ੍ਵਾ, ਅਮੋਹੋ ਚ ਮੋਹਨੇਯ੍ਯਵਤ੍ਥੂਸੁ ਮੋਹਵਿਵੇਕਸੁਖਰਸਂ ਵਡ੍ਢੇਤ੍ਵਾਤਿ ਵਤ੍ਤਬ੍ਬਂ. ਏਵਂ ਵਡ੍ਢਾਪੇਨ੍ਤਾ ਤਯੋ ਧਮ੍ਮਾ ਕੁਸਲੇਸੁ ਧਮ੍ਮੇਸੁ ਸਮ੍ਪਯੁਤ੍ਤਧਮ੍ਮੇ ਮੋਦਮਾਨੇ ਪਮੋਦਮਾਨੇ ਕਰੋਨ੍ਤੋ ਵਿਯ ਚਿਰ ਕਾਲਂਪਿ ਪਵਤ੍ਤੇਨ੍ਤਿ. ਸਮ੍ਪਯੁਤ੍ਤਧਮ੍ਮਾ ਚ ਤਥਾ ਪਵਤ੍ਤਨ੍ਤਿ. ਸਮ੍ਪਯੁਤ੍ਤ ਧਮ੍ਮੇਸੁ ਚ ਤਥਾ ਪਵਤ੍ਤਮਾਨੇਸੁ ਸਹਜਾਤਰੂਪਕਲਾਪਾਪਿ ਤਥਾ ਪਵਤ੍ਤਨ੍ਤਿਯੇਵ.

ਤਤ੍ਥ ¶ ਲੋਭਵਿਵੇਕਸੁਖਰਸਨ੍ਤਿ ਵਿਵਿਚ੍ਚਨਂ ਵਿਗਮਨਂ ਵਿਵੇਕੋ. ਲੋਭਸ੍ਸ ਵਿਵੇਕੋ ਲੋਭਵਿਵੇਕੋ. ਲੋਭਵਿਵੇਕੇ ਸੁਖਂ ਲੋਭਵਿਵੇਕਸੁਖਂ. ਲੋਭਵਿਵੇਕਂ ਪਟਿਚ੍ਚ ਉਪ੍ਪਨ੍ਨਸੁਖਨ੍ਤਿ ਵੁਤ੍ਤਂ ਹੋਤਿ. ਤਦੇਵ ਰਸੋ ਲੋਭਵਿਵੇਕਸੁਖਰਸੋਤਿ ਸਮਾਸੋ. ਅਯਂ ਅਭਿਧਮ੍ਮੇ ਪਟ੍ਠਾਨਨਯੋ.

ਹਤ੍ਤਨ੍ਤਨਯੋ ਪਨ ਅਵਿਜ੍ਜਾਸਙ੍ਖਾਤੋ ਮੋਹੋ ਚ ਤਣ੍ਹਾਸਙ੍ਖਾਤੋ ਲੋਭੋ ਚਾਤਿ ਦ੍ਵੇ ਧਮ੍ਮਾ ਸਬ੍ਬੇਸਂਪਿ ਵਟ੍ਟਦੁਕ੍ਖਧਮ੍ਮਾਨਂ ਮੂਲਾਨਿ ਹੋਨ੍ਤਿ. ਦੋਸੋ ਪਨ ਲੋਭਸ੍ਸ ਨਿਸ੍ਸਨ੍ਦਭੂਤਂ ਪਾਪਮੂਲਂ ਹੋਤਿ. ਵਿਜ੍ਜਾਸਙ੍ਖਾਤੋ ਅਮੋਹੋ ਚ ਨਿਕ੍ਖਮਧਾਤੁਸਙ੍ਖਾਤੋ ਅਲੋਭੋ ਚਾਤਿ ਦ੍ਵੇ ਧਮ੍ਮਾ ਵਿਵਟ੍ਟਧਮ੍ਮਾਨਂ ਮੂਲਾਨਿ ਹੋਨ੍ਤਿ. ਅਦੋਸੋ ਪਨ ਅਲੋਭਸ੍ਸ ਨਿਸ੍ਸਨ੍ਦਭੂਤਂ ਕਲ੍ਯਾਣਮੂਲਂ ਹੋਤਿ. ਏਵਂ ਛਬ੍ਬਿਧਾਨਿ ਮੂਲਾਨਿ ਸਹਜਾਤਾਨਂਪਿ ਅਸਹਜਾਤਾਨਂਪਿ ਨਾਮਰੂਪਧਮ੍ਮਾਨਂ ਪਚ੍ਚਯਾ ਹੋਨ੍ਤੀਤਿ. ਅਯਂ ਸੁਤ੍ਤਨ੍ਤੇਸੁ ਨਯੋ. ਹੇਤੁਪਚ੍ਚਯਦੀਪਨਾ ਨਿਟ੍ਠਿਤਾ.

ਕਤਮੋ ਆਰਮ੍ਮਣਪਚ੍ਚਯੋ. ਸਬ੍ਬੇਪਿ ਚਿਤ੍ਤਚੇਤਸਿਕਾ ਧਮ੍ਮਾ ਸਬ੍ਬੇਪਿ ਰੂਪਧਮ੍ਮਾ ਸਬ੍ਬਂਪਿ ਨਿਬ੍ਬਾਨਂ ਸਬ੍ਬਾਪਿ ਪਞ੍ਞਤ੍ਤਿਯੋ ਆਰਮ੍ਮਣ ਪਚ੍ਚਯੋ. ਨ ਹਿ ਸੋ ਨਾਮ ਏਕੋਪਿ ਧਮ੍ਮੋ ਅਤ੍ਥਿ, ਯੋ ਚਿਤ੍ਤ ਚੇਤਸਿਕਾਨਂ ਆਰਮ੍ਮਣਂ ਨ ਹੋਤਿ. ਸਙ੍ਖੇਪਤੋ ਪਨ ਆਰਮ੍ਮਣਂ ਛਬ੍ਬਿਧਂ ਹੋਤਿ ਰੂਪਾਰਮ੍ਮਣਂ ਸਦ੍ਦਾਰਮ੍ਮਣਂ ਗਨ੍ਧਾਰਮ੍ਮਣਂ ਰਸਾਰਮ੍ਮਣਂ ਫੋਟ੍ਠਬ੍ਬਾਰਮ੍ਮਣਂ ਧਮ੍ਮਾਰਮ੍ਮਣਨ੍ਤਿ.

ਕਤਮੇ ਧਮ੍ਮਾ ਆਰਮ੍ਮਣਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ. ਸਬ੍ਬੇਪਿ ਚਿਤ੍ਤ ਚੇਤਸਿਕਾਧਮ੍ਮਾ ਆਰਮ੍ਮਣਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ. ਨ ਹਿ ਕਿਞ੍ਚਿ ਚਿਤ੍ਤਂ ਨਾਮ ਅਤ੍ਥਿ, ਯਂ ਚਿਤ੍ਤਂ ਭੂਤੇਨ ਵਾ ਅਭੂਤੇਨ ਵਾ ਆਰਮ੍ਮਣੇਨ ਵਿਨਾ ਪਵਤ੍ਤਤਿ.

ਤਤ੍ਥ ਪਚ੍ਚੁਪ੍ਪਨ੍ਨਂ ਰੂਪਾਰਮ੍ਮਣਂ ਦੁਵਿਧਸ੍ਸ ਚਕ੍ਖੁਵਿਞ੍ਞਾਣਚਿਤ੍ਤਸ੍ਸ ਆਰਮ੍ਮਣਪਚ੍ਚਯੋ. ਪਚ੍ਚੁਪ੍ਪਨ੍ਨਂ ਸਦ੍ਦਾਰਮ੍ਮਣਂ ਦੁਵਿਧਸ੍ਸ ਸੋਤਵਿਞ੍ਞਾਣ ਚਿਤ੍ਤਸ੍ਸ. ਪਚ੍ਚੁਪ੍ਪਨ੍ਨਂ ਗਨ੍ਧਾਰਮ੍ਮਣਂ ਦੁਵਿਧਸ੍ਸ ਘਾਨਵਿਞ੍ਞਾਣਚਿਤ੍ਤਸ੍ਸ. ਪਚ੍ਚੁਪ੍ਪਨ੍ਨਂ ਰਸਾਰਮ੍ਮਣਂ ਦੁਵਿਧਸ੍ਸ ਜਿਵ੍ਹਾਵਿਞ੍ਞਾਣਚਿਤ੍ਤਸ੍ਸ. ਪਚ੍ਚੁਪ੍ਪਨ੍ਨਂ ਤਿਵਿਧਂ ਫੋਟ੍ਠਬ੍ਬਾਰਮ੍ਮਣਂ ਦੁਵਿਧਸ੍ਸ ਕਾਯਵਿਞ੍ਞਾਣਚਿਤ੍ਤਸ੍ਸ. ਪਚ੍ਚੁਪ੍ਪਨ੍ਨਾਨਿ ਤਾਨਿ ਪਞ੍ਚਾਰਮ੍ਮਣਾਨਿ ਤਿਵਿਧਸ੍ਸ ਮਨੋਧਾਤੁਚਿਤ੍ਤਸ੍ਸ ਆਰਮ੍ਮਣਪਚ੍ਚਯੋ. ਸਬ੍ਬਾਨਿ ਤਾਨਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਿ ਪਞ੍ਚਾਰਮ੍ਮਣਾਨਿ ਵਾ ਸਬ੍ਬਾਨਿ ਤੇਕਾਲਿਕਾਨਿ ਕਾਲਵਿਮੁਤ੍ਤਾਨਿ ਧਮ੍ਮਾਰਮ੍ਮਣਾਨਿ ਵਾ ਛ ਸਤ੍ਤਤਿਵਿਧਾਨਂ ਮਨੋਵਿਞ੍ਞਾਣਚਿਤ੍ਤਾਨਂ ਯਥਾਰਹਂ ਆਰਮ੍ਮਣਪਚ੍ਚਯੋ.

ਕੇਨਟ੍ਠੇਨ ਆਰਮ੍ਮਣਂ, ਕੇਨਟ੍ਠੇਨ ਪਚ੍ਚਯੋਤਿ. ਚਿਤ੍ਤ ਚੇਤਸਿਕੇਹਿ ਆਲਮ੍ਬਿਤਬ੍ਬਟ੍ਠੇਨ ਆਰਮ੍ਮਣਂ, ਉਪਕਾਰਕਟ੍ਠੇਨ ਪਚ੍ਚਯੋਤਿ.

ਆਲਮ੍ਬਿਤਬ੍ਬਟ੍ਠੇਨਾਤਿ ¶ ਚੇਤ੍ਥ ਆਲਮ੍ਬਣਕਿਰਿਯਾ ਨਾਮ ਚਿਤ੍ਤ ਚੇਤਸਿਕਾਨਂ ਆਰਮ੍ਮਣਗ੍ਗਹਣਕਿਰਿਯਾ, ਆਰਮ੍ਮਣੁਪਾਦਾਨ ਕਿਰਿਯਾ.

ਯਥਾ ਹਿ ਲੋਕੇ ਅਯੋਧਾਤੁਂ ਕਾਮੇਤਿ ਇਚ੍ਛਤੀਤਿ ਅਤ੍ਥੇਨ ਅਯੋਕਨ੍ਤਕੋ ਨਾਮ ਲੋਹਧਾਤੁਵਿਸੇਸੋ ਅਤ੍ਥਿ. ਸੋ ਅਯੋਖਨ੍ਧਸਮੀਪਂ ਸਮ੍ਪਤ੍ਤੋ ਤਂ ਅਯੋਖਨ੍ਧਂ ਕਾਮੇਨ੍ਤੋ ਵਿਯ ਇਚ੍ਛਨ੍ਤੋ ਵਿਯ ਅਯੋਖਨ੍ਧਾਭਿਮੁਖੋ ਚਞ੍ਚਲਤਿ. ਸਯਂ ਵਾ ਤਂ ਅਯੋਖਨ੍ਧਂ ਉਪਗਚ੍ਛਤਿ. ਅਯੋਖਨ੍ਧਂ ਵਾ ਅਤ੍ਤਾਭਿਮੁਖਂ ਆਕਡ੍ਢਤਿ, ਅਯੋਖਨ੍ਧੋ ਤਦਭਿਮੁਖੋ ਚਞ੍ਚਲਤਿ, ਤਂ ਵਾ ਉਪਗਚ੍ਛਤਿ. ਅਯਂ ਅਯੋਕਨ੍ਤਕਸ੍ਸ ਆਲਮ੍ਬਣਕਿਰਿਯਾ ਨਾਮ. ਏਵਮੇਵ ਚਿਤ੍ਤਚੇਤਸਿਕਾਨਂ ਆਰਮ੍ਮਣੇਸੁ ਆਲਮ੍ਬਣਕਿਰਿਯਾ ਦਟ੍ਠਬ੍ਬਾ. ਨ ਕੇਵਲਂ ਆਰਮ੍ਮਣੇਸੁ ਆਲਮ੍ਬਣ ਮਤ੍ਤਂ ਹੋਤਿ. ਅਥ ਖੋ ਚਿਤ੍ਤਚੇਤਸਿਕਾ ਧਮ੍ਮਾ ਸਤ੍ਤਸਨ੍ਤਾਨੇ ਉਪ੍ਪਜ੍ਜਮਾਨਾ ਛਸੁ ਦ੍ਵਾਰੇਸੁ ਆਰਮ੍ਮਣਾਨਂ ਆਪਾਤਾਗਮਨੇ ਏਵ ਖਣੇ ਖਣੇ ਉਪ੍ਪਜ੍ਜਨ੍ਤਿ. ਉਪ੍ਪਜ੍ਜਿਤ੍ਵਾ ਚ ਖਣੇ ਖਣੇ ਨਿਰੁਜ੍ਝਨ੍ਤਿ.

ਯਥਾ ਤਂ ਭੇਰਿਤਲੇ ਭੇਰਿਸਦ੍ਦਾ ਉਪ੍ਪਜ੍ਜਮਾਨਾ ਤਤ੍ਥ ਤਤ੍ਥ ਹਤ੍ਥੇਨ ਪਹਰਣਕਾਲੇ ਏਵ ਖਣੇ ਖਣੇ ਉਪ੍ਪਜ੍ਜਨ੍ਤਿ, ਉਪ੍ਪਜ੍ਜਿਤ੍ਵਾ ਚ ਖਣੇ ਖਣੇ ਨਿਰੁਜ੍ਝਨ੍ਤਿ. ਵੀਣਾਸਦ੍ਦਾ ਉਪ੍ਪਜ੍ਜਮਾਨਾ ਵੀਣਾਤਨ੍ਤੀਸੁ ਤਤ੍ਥ ਤਤ੍ਥ ਵੀਣਾਦਨ੍ਤਕੇਨ ਪਹਰਣਕਾਲੇ ਏਵ ਖਣੇ ਖਣੇ ਉਪ੍ਪਜ੍ਜਨ੍ਤਿ, ਉਪ੍ਪਜ੍ਜਿਤ੍ਵਾ ਚ ਖਣੇ ਖਣੇ ਨਿਰੁਜ੍ਝਨ੍ਤੀਤਿ. ਨਿਦ੍ਦਾਯਨ੍ਤਸ੍ਸ ਭਵਙ੍ਗਚਿਤ੍ਤਪ੍ਪਵਤ੍ਤਿ ਕਾਲੇਪਿ ਪੁਬ੍ਬਭਵੇ ਮਰਣਾਸਨ੍ਨਕਾਲੇ ਛਸੁ ਦ੍ਵਾਰੇਸੁ ਆਪਾਤ ਮਾਗਤਾਨਿ ਕਮ੍ਮ ਕਮ੍ਮਨਿਮਿਤ੍ਤ ਗਤਿਨਿਮਿਤ੍ਤਾਨਿ ਏਵ ਭਵਙ੍ਗਚਿਤ੍ਤਾਨਂ ਆਰਮ੍ਮਣਪਚ੍ਚਯੋਤਿ. ਆਰਮ੍ਮਣਪਚ੍ਚਯਦੀਪਨਾ ਨਿਟ੍ਠਿਤਾ.

ਦੁਵਿਧੋ ਅਧਿਪਤਿਪਚ੍ਚਯੋ ਆਰਮ੍ਮਣਾਧਿਪਤਿਪਚ੍ਚਯੋ ਸਹ ਜਾਤਾਧਿਪਤਿਪਚ੍ਚਯੋ ਚ. ਤਤ੍ਥ ਕਤਮੋ ਆਰਮ੍ਮਣਾਧਿਪਤਿਪਚ੍ਚਯੋ. ਆਰਮ੍ਮਣਪਚ੍ਚਯੇ ਵੁਤ੍ਤੇਸੁ ਆਰਮ੍ਮਣੇਸੁ ਯਾਨਿ ਆਰਮ੍ਮਣਾਨਿ ਅਤਿਇਟ੍ਠਾਨਿ ਹੋਨ੍ਤਿ ਅਤਿਕਨ੍ਤਾਨਿ ਅਤਿਮਨਾਪਾਨਿ ਗਰੁਕਤਾਨਿ. ਤਾਨਿ ਆਰਮ੍ਮਣਾਨਿ ਆਰਮ੍ਮਣਾਧਿਪਤਿਪਚ੍ਚਯੋ. ਤਤ੍ਥ ਅਤਿਇਟ੍ਠਾਨੀਤਿ ਸਭਾਵਤੋ ਇਟ੍ਠਾਨਿ ਵਾ ਹੋਨ੍ਤੁ ਅਨਿਟ੍ਠਾਨਿ ਵਾ, ਤੇਨ ਤੇਨ ਪੁਗ੍ਗਲੇਨ ਅਤਿਇਚ੍ਛਿਤਾਨਿ ਆਰਮ੍ਮਣਾਨਿ ਇਧ ਅਤਿਇਟ੍ਠਾਨਿ ਨਾਮ.

ਤਾਨਿ ਪਨ ਧਮ੍ਮਤੋ ਦ੍ਵੇ ਦੋਸਮੂਲਚਿਤ੍ਤੁਪ੍ਪਾਦੇ ਚ ਦ੍ਵੇ ਮੋਮੂਹ ਚਿਤ੍ਤੁਪ੍ਪਾਦੇ ਚ ਦੁਕ੍ਖਸਹਗਤਕਾਯਵਿਞ੍ਞਾਣਚਿਤ੍ਤੁਪ੍ਪਾਦੇ ਚ ਠਪੇਤ੍ਵਾ ਅਵਸੇਸਾਨਿ ਸਬ੍ਬਾਨਿ ਕਾਮਾਵਚਰਚਿਤ੍ਤਚੇਤਸਿਕਾਨਿ ਚ ਰੂਪਾਰੂਪ ਲੋਕੁਤ੍ਤਰਚਿਤ੍ਤਚੇਤਸਿਕਾਨਿ ਚ ਸਬ੍ਬਾਨਿ ਅਤਿਇਟ੍ਠਰੂਪਾਨਿ ਚ ਹੋਨ੍ਤਿ.

ਤੇਸੁਪਿ ¶ ਕਾਮਾਰਮ੍ਮਣਾਨਿ ਗਰੁਂ ਕਰੋਨ੍ਤਸ੍ਸੇਵ ਆਰਮ੍ਮਣਾ ਧਿਪਤਿਪਚ੍ਚਯੋ. ਗਰੁਂ ਅਕਰੋਨ੍ਤਸ੍ਸ ਆਰਮ੍ਮਣਾਧਿਪਤਿਪਚ੍ਚਯੋ ਨ ਹੋਤਿ. ਝਾਨਲਾਭਿਨੋ ਪਨ ਅਤ੍ਤਨਾ ਪਟਿਲਦ੍ਧਾਨਿ ਮਹਗ੍ਗਤਝਾਨਾਨਿ ਅਰਿਯਸਾਵਕਾ ਚ ਅਤ੍ਤਨਾ ਪਟਿਲਦ੍ਧੇ ਲੋਕੁਤ੍ਤਰਧਮ੍ਮੇ ਗਰੁਂ ਅਕਰੋਨ੍ਤਾ ਨਾਮ ਨਤ੍ਥਿ.

ਕਤਮੇ ਧਮ੍ਮਾ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ. ਅਟ੍ਠ ਲੋਭ ਮੂਲਚਿਤ੍ਤਾਨਿ ਅਟ੍ਠ ਕਾਮਾਵਚਰਕੁਸਲਚਿਤ੍ਤਾਨਿ ਚਤ੍ਤਾਰਿ ਕਾਮਾਵਚਰ ਞਾਣਸਮ੍ਪਯੁਤ੍ਤਕਿਰਿਯਚਿਤ੍ਤਾਨਿ ਅਟ੍ਠ ਲੋਕੁਤ੍ਤਰਚਿਤ੍ਤਾਨਿ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ.

ਤਤ੍ਥ ਲੋਕਿਯਾਨਿ ਛਲ਼ਾਰਮ੍ਮਣਾਨਿ ਲੋਭਮੂਲਚਿਤ੍ਤਾਨਂ ਪਚ੍ਚਯੋ. ਸਤ੍ਤਰਸ ਲੋਕਿਯਕੁਸਲਾਨਿ ਚਤੁਨ੍ਨਂ ਞਾਣਵਿਪ੍ਪਯੁਤ੍ਤ ਕੁਸਲਾਨਂ. ਤਾਨਿ ਕੁਸਲਾਨਿਚੇਵ ਹੇਟ੍ਠਿਮਮਗ੍ਗਫਲਾਨਿ ਚ ਨਿਬ੍ਬਾਨਞ੍ਚ ਚਤੁਨ੍ਨਂ ਞਾਣਸਮ੍ਪਯੁਤ੍ਤਕੁਸਲਾਨਂ. ਅਰਹਤ੍ਤਮਗ੍ਗਫਲਾਨਿ ਚ ਨਿਬ੍ਬਾਨਞ੍ਚ ਚਤੁਨ੍ਨਂ ਞਾਣਸਮ੍ਪਯੁਤ੍ਤਕਿਰਿਯਾਨਂ. ਨਿਬ੍ਬਾਨਂ ਅਟ੍ਠਨ੍ਨਂ ਲੋਕੁਤ੍ਤਰ ਚਿਤ੍ਤਾਨਨ੍ਤਿ.

ਕੇਨਟ੍ਠੇਨ ਆਰਮ੍ਮਣਂ, ਕੇਨਟ੍ਠੇਨ ਅਧਿਪਤਿ. ਆਲਮ੍ਬਿ ਤਬ੍ਬਟ੍ਠੇਨ ਆਰਮ੍ਮਣਂ, ਆਧਿਪਚ੍ਚਟ੍ਠੇਨ ਅਧਿਪਤਿ. ਕੋ ਆਧਿਪਚ੍ਚਟ੍ਠੋ. ਅਤ੍ਤਾਨਂ ਗਰੁਂ ਕਤ੍ਵਾ ਪਵਤ੍ਤੇਸੁ ਚਿਤ੍ਤਚੇਤਸਿਕੇਸੁ ਇਸ੍ਸਰਭਾਵੋ ਆਧਿਪਚ੍ਚਟ੍ਠੋ. ਲੋਕੇ ਸਾਮਿਕਾ ਵਿਯ ਆਰਮ੍ਮਣਾਧਿਪਤਿਪਚ੍ਚਯ ਧਮ੍ਮਾ ਦਟ੍ਠਬ੍ਬਾ, ਦਾਸਾ ਵਿਯ ਪਚ੍ਚਯੁਪ੍ਪਨ੍ਨਧਮ੍ਮਾ ਦਟ੍ਠਬ੍ਬਾ.

ਸੁਤਸੋਮਜਾਤਕੇ ਰਾਜਾ ਪੋਰਿਸਾਦੋ ਮਨੁਸ੍ਸਮਂਸਂ ਗਰੁਂ ਕਰੋਨ੍ਤੋ ਮਨੁਸ੍ਸਮਂਸਹੇਤੁ ਰਜ੍ਜਂ ਪਹਾਯ ਅਰਞ੍ਞੇ ਵਿਚਰਤਿ. ਤਤ੍ਥ ਮਨੁਸ੍ਸਮਂਸੇ ਗਨ੍ਧਰਸ ਧਮ੍ਮਾ ਆਰਮ੍ਮਣਾਧਿਪਤਿਪਚ੍ਚਯੋ. ਰਞ੍ਞੋ ਪੋਰਿਸਾਦਸ੍ਸ ਲੋਭਮੂਲਚਿਤ੍ਤਂ ਪਚ੍ਚਯੁਪ੍ਪਨ੍ਨਧਮ੍ਮੋ. ਰਾਜਾ ਸੁਤ ਸੋਮੋ ਸਚ੍ਚਧਮ੍ਮਂ ਗਰੁਂ ਕਤ੍ਵਾ ਸਚ੍ਚਧਮ੍ਮਹੇਤੁ ਰਜ੍ਜਸਮ੍ਪਤ੍ਤਿਞ੍ਚ ਞਾਤਿ ਸਙ੍ਘਞ੍ਚ ਅਤ੍ਤਨੋ ਜੀਵਿਤਞ੍ਚ ਛਟ੍ਟੇਤ੍ਵਾ ਪੁਨ ਰਞ੍ਞੋ ਪੋਰਿਸਾਦਸ੍ਸ ਹਤ੍ਥਂ ਉਪਗਤੋ. ਤਤ੍ਥ ਸਚ੍ਚਧਮ੍ਮੋ ਆਰਮ੍ਮਣਾਧਿਪਤਿਪਚ੍ਚਯੋ. ਰਞ੍ਞੋ ਸੁਤਸੋਮਸ੍ਸ ਕੁਸਲਚਿਤ੍ਤਂ ਪਚ੍ਚਯੁਪ੍ਪਨ੍ਨਧਮ੍ਮੋ. ਏਸਨਯੋ ਸਬ੍ਬੇਸੁ ਗਰੁਕਤੇਸੁ ਆਰਮ੍ਮਣੇਸੁ.

ਕਤਮੋ ਸਹਜਾਤਾਧਿਪਤਿਪਚ੍ਚਯੋ. ਅਧਿਪਤਿਭਾਵਂ ਪਤ੍ਤਾ ਚਤ੍ਤਾਰੋ ਧਮ੍ਮਾ ਅਧਿਪਤਿਪਚ੍ਚਯੋ, ਛਨ੍ਦੋ ਚਿਤ੍ਤਂ ਵੀਰਿਯਂ ਵੀਮਂਸਾ.

ਕਤਮੇ ਧਮ੍ਮਾ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ. ਅਧਿਪਤਿ ਸਮ੍ਪਯੁਤ੍ਤਾ ਚਿਤ੍ਤਚੇਤਸਿਕਾ ਚ ਅਧਿਪਤਿਸਮੁਟ੍ਠਿਤਾ ਚਿਤ੍ਤਜਰੂਪਧਮ੍ਮਾ ਚ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਸਹਜਾਤੋ, ਕੇਨਟ੍ਠੇਨ ਅਧਿਪਤਿ.

ਸਹੁਪ੍ਪਾਦਨਟ੍ਠੇਨ ਸਹਜਾਤੋ, ਸਹਜਾਤਾਨਂ ਧਮ੍ਮਾਨਂ ਅਭਿਭਵਨਟ੍ਠੇਨ ਅਧਿਪਤਿ. ਤਤ੍ਥ ਸਹੁਪ੍ਪਾਦਨਟ੍ਠੇਨਾਤਿ ¶ ਯੋ ਧਮ੍ਮੋ ਸਯਂ ਉਪ੍ਪਜ੍ਜਮਾਨੋ ਅਤ੍ਤਨਾ ਸਹਜਾਤਧਮ੍ਮੇ ਚ ਅਤ੍ਤਨਾ ਸਹੇਵ ਉਪ੍ਪਾਦੇਤਿ, ਤਸ੍ਸ ਅਤ੍ਤਨਾ ਸਹਜਾਤਧਮ੍ਮਾਨਂ ਸਹੁਪ੍ਪਾਦਨਟ੍ਠੇਨ.

ਅਭਿਭਵਨਟ੍ਠੇਨਾਤਿ ਅਜ੍ਝੋਤ੍ਥਰਣਟ੍ਠੇਨ. ਯਥਾ ਰਾਜਾ ਚਕ੍ਕਵਤ੍ਤਿ ਅਤ੍ਤਨੋ ਪੁਞ੍ਞਿਦ੍ਧਿਯਾ ਸਕਲਦੀਪਵਾਸਿਨੋ ਅਭਿਭਵਨ੍ਤੋ ਅਜ੍ਝੋਤ੍ਥਰਨ੍ਤੋ ਅਤ੍ਤਨੋ ਵਸੇ ਵਤ੍ਤਾਪੇਤਿ, ਸਕਲਦੀਪਵਾਸਿਨੋ ਚ ਤਸ੍ਸ ਵਸੇ ਵਤ੍ਤਨ੍ਤਿ. ਤਥਾ ਅਧਿਪਤਿਟ੍ਠਾਨਪਤ੍ਤਾ ਇਮੇ ਚਤ੍ਤਾਰੋ ਧਮ੍ਮਾ ਅਤ੍ਤਨੋ ਅਤ੍ਤਨੋ ਵਿਸਯੇ ਸਹਜਾਤਧਮ੍ਮੇ ਅਭਿਭਵਨ੍ਤਾ ਅਜ੍ਝੋਤ੍ਥਰਨ੍ਤਾ ਅਤ੍ਤਨੋ ਵਸੇ ਵਤ੍ਤਾਪੇਨ੍ਤਿ, ਸਹਜਾਤਧਮ੍ਮਾ ਚ ਤੇਸਂ ਵਸੇ ਵਤ੍ਤਨ੍ਤਿ. ਯਥਾ ਵਾ ਸਿਲਾਥਮ੍ਭੇ ਪਥਵਿਧਾਤੁ ਉਦਕਕ੍ਖਨ੍ਧੇ ਆਪੋਧਾਤੁ ਅਗ੍ਗਿਕ੍ਖਨ੍ਧੇ ਤੇਜੋਧਾਤੁ ਵਾਤਕ੍ਖਨ੍ਧੇ ਵਾਯੋਧਾਤੁ ਅਤ੍ਤਨਾ ਸਹਜਾਤਾ ਤਿਸ੍ਸੋ ਧਾਤੁਯੋ ਅਭਿਭਵਨ੍ਤਾ ਅਜ੍ਝੋਤ੍ਥਰਨ੍ਤਾ ਅਤ੍ਤਨੋ ਗਤਿਂ ਗਮਾਪੇਨ੍ਤਿ, ਸਹਜਾਤਧਾਤੁਯੋ ਚ ਤਾਸਂ ਗਤਿਂ ਗਚ੍ਛਨ੍ਤਿ, ਏਵਮੇਵ ਅਧਿਪਤਿਟ੍ਠਾਨਪਤ੍ਤਾ ਇਮੇ ਚਤ੍ਤਾਰੋ ਧਮ੍ਮਾ ਅਤ੍ਤਨੋ ਬਲੇਨ ਸਹਜਾਤਧਮ੍ਮੇ ਅਤ੍ਤਨੋ ਗਤਿਂ ਗਮਾਪੇਨ੍ਤਿ, ਸਹਜਾਤਧਮ੍ਮਾ ਚ ਤੇਸਂ ਗਤਿਂ ਗਚ੍ਛਨ੍ਤਿ, ਏਵਂ ਸਹਜਾਤਧਮ੍ਮਾਨਂ ਅਭਿਭਵਨਟ੍ਠੇਨ.

ਏਤ੍ਥ ਵਦੇਯ੍ਯੁਂ, ਯਦਿ ਸਹਜਾਤਧਮ੍ਮਾਨਂ ਅਭਿਭਵਨਟ੍ਠੇਨ ਅਧਿਪਤਿਨਾਮ ਸਿਯਾ. ਏਵਂ ਸਤਿ ਤਿਟ੍ਠਤੁ ਛਨ੍ਦੋ, ਲੋਭੋ ਏਵ ਅਧਿਪਤਿਨਾਮ ਸਿਯਾ, ਸੋ ਹਿ ਛਨ੍ਦਤੋਪਿ ਬਲਵਤਰੋ ਹੁਤ੍ਵਾ ਸਹ ਜਾਤਧਮ੍ਮੇ ਅਭਿਭਵਨ੍ਤੋ ਪਵਤ੍ਤਤੀਤਿ. ਵੁਚ੍ਚਤੇ, ਬਾਲਪੁਥੁਜ੍ਜਨੇਸੁ ਏਵ ਲੋਭੋ ਛਨ੍ਦਤੋ ਬਲਵਤਰੋ ਹੋਤਿ, ਪਣ੍ਡਿਤੇਸੁ ਪਨ ਛਨ੍ਦੋ ਏਵ ਲੋਭਤੋ ਬਲਵਤਰੋ ਹੁਤ੍ਵਾ ਸਹਜਾਤਧਮ੍ਮੇ ਅਭਿ ਭਵਨ੍ਤੋ ਪਵਤ੍ਤਤਿ. ਸਚੇ ਹਿ ਲੋਭੋ ਏਵ ਛਨ੍ਦਤੋ ਬਲਵਤਰੋ ਸਿਯਾ, ਕਥਂ ਇਮੇ ਸਤ੍ਤਾ ਲੋਭਸ੍ਸ ਹਤ੍ਥਗਤਾ ਭਵਸਮ੍ਪਤ੍ਤਿ ਭੋਗਸਮ੍ਮਤ੍ਤਿਯੋ ਛਟ੍ਟੇਤ੍ਵਾ ਨੇਕ੍ਖਮ੍ਮਧਮ੍ਮੇ ਪੂਰੇਤ੍ਵਾ ਵਟ੍ਟਦੁਕ੍ਖਤੋ ਨਿਸ੍ਸਰੇਯ੍ਯੁਂ. ਯਸ੍ਮਾ ਪਨ ਛਨ੍ਦੋ ਏਵ ਲੋਭਤੋ ਬਲਵਤਰੋ ਹੋਤਿ, ਤਸ੍ਮਾ ਇਮੇ ਸਤ੍ਤਾ ਲੋਭਸ੍ਸ ਹਤ੍ਥਗਤਾ ਭਵਸਮ੍ਪਤ੍ਤਿ ਭੋਗਸਮ੍ਪਤ੍ਤਿਯੋ ਛਟ੍ਟੇਤ੍ਵਾ ਨੇਕ੍ਖਮ੍ਮਧਮ੍ਮੇ ਪੂਰੇਤ੍ਵਾ ਵਟ੍ਟਦੁਕ੍ਖਤੋ ਨਿਸ੍ਸਰਨ੍ਤਿ. ਤਸ੍ਮਾ ਛਨ੍ਦੋ ਏਵ ਲੋਭਤੋ ਬਲਵਤਰੋ ਹੋਤਿ, ਛਨ੍ਦੋ ਏਵ ਅਧਿਪਤਿ, ਨ ਲੋਭੋਤਿ. ਏਸ ਨਯੋ ਦੋਸਾਦੀਸੁਪੀਤਿ.

ਤਤ੍ਥ ਲੋਕੇ ਮਹਨ੍ਤੇਸੁ ਸੁਦੁਕ੍ਕਰੇਸੁ ਪੁਰਿਸਕਮ੍ਮੇਸੁ ਪਚ੍ਚੁਪਟ੍ਠਿਤੇਸੁ ਇਮੇ ਚਤ੍ਤਾਰੋ ਧਮ੍ਮਾ ਕਮ੍ਮਸਿਦ੍ਧਿਯਾ ਸਂਵਤ੍ਤਨ੍ਤਿ. ਕਥਂ.

ਹੀਨਚ੍ਛਨ੍ਦਾ ਬਹੁਜ੍ਜਨਾ ਮਹਨ੍ਤਾਨਿ ਸੁਦੁਕ੍ਕਰਾਨਿ ਪੁਰਿਸਕਮ੍ਮਾਨਿ ਦਿਸ੍ਵਾ ਨਿਵਤ੍ਤਚ੍ਛਨ੍ਦਾ ਹੋਨ੍ਤਿ. ਕਾਤੁਂ ਨ ਇਚ੍ਛਨ੍ਤਿ, ਅਮ੍ਹਾਕਂ ਅਵਿਸਯੋਤਿ ਨਿਰਪੇਕ੍ਖਾ ਠਪੇਨ੍ਤਿ. ਛਨ੍ਦਾਧਿਕੋ ਪਨ ਤਾਦਿਸਾਨਿ ਪੁਰਿਸਕਮ੍ਮਾਨਿ ਦਿਸ੍ਵਾ ਉਗ੍ਗਤਚ੍ਛਨ੍ਦੋ ਹੋਤਿ, ਅਤਿਵਿਯ ¶ ਕਾਤੁਂ ਇਚ੍ਛਤਿ, ਮਮ ਵਿਸਯੋ ਏਸੋਤਿ ਅਧਿਟ੍ਠਾਨਂ ਗਚ੍ਛਤਿ. ਸੋ ਛਨ੍ਦੇਨ ਅਭਿਕਡ੍ਢਿਤੋ ਯਾਵ ਤਂ ਕਮ੍ਮਂ ਨ ਸਿਜ੍ਝਤਿ, ਤਾਵ ਅਨ੍ਤਰਾ ਤਂ ਕਮ੍ਮਂ ਛਟ੍ਟੇਤੁਂ ਨ ਸਕ੍ਕੋਤਿ. ਏਵਞ੍ਚ ਸਤਿ ਅਤਿਮਹਨ੍ਤਂਪਿ ਤਂ ਕਮ੍ਮਂ ਏਕਸ੍ਮਿਂ ਕਾਲੇ ਸਿਦ੍ਧਂ ਭਵਿਸ੍ਸਤਿ.

ਹੀਨਵੀਰਿਯਾ ਚ ਬਹੁਜ੍ਜਨਾ ਤਾਦਿਸਾਨਿ ਕਮ੍ਮਾਨਿ ਦਿਸ੍ਵਾ ਨਿਵਤ੍ਤ ਵੀਰਿਯਾ ਹੋਨ੍ਤਿ, ਇਦਂ ਮੇ ਕਮ੍ਮਂ ਕਰੋਨ੍ਤਸ੍ਸ ਬਹੁਂ ਕਾਯਦੁਕ੍ਖਂ ਵਾ ਚੇਤੋਦੁਕ੍ਖਂ ਵਾ ਭਵਿਸ੍ਸਤੀਤਿ ਨਿਵਤ੍ਤਨ੍ਤਿ. ਵੀਰਿਯਾਧਿਕੋ ਪਨ ਤਾਦਿਸਾਨਿ ਪੁਰਿਸਕਮ੍ਮਾਨਿ ਦਿਸ੍ਵਾ ਉਗ੍ਗਤਵੀਰਿਯੋ ਹੋਤਿ, ਇਦਾਨੇਵ ਉਟ੍ਠਹਿਤ੍ਵਾ ਕਾਤੁਂ ਇਚ੍ਛਤਿ. ਸੋ ਚਿਰਕਾਲਂਪਿ ਤਂ ਕਮ੍ਮਂ ਕਰੋਨ੍ਤੋ ਬਹੁਂ ਕਾਯਦੁਕ੍ਖਂ ਵਾ ਚੇਤੋਦੁਕ੍ਖਂ ਵਾ ਅਨੁਭਵਨ੍ਤੋਪਿ ਤਸ੍ਮਿਂ ਵੀਰਿਯ ਕਮ੍ਮੇ ਨਨਿਬ੍ਬਿਨ੍ਦਤਿ, ਮਹਨ੍ਤੇਨ ਕਮ੍ਮਵੀਰਿਯੇਨ ਵਿਨਾ ਭਵਿਤੁਂ ਨ ਸਕ੍ਕੋਤਿ, ਤਾਦਿਸੇਨ ਵੀਰਿਯੇਨ ਰਤ੍ਤਿਦਿਵਂ ਖੇਪੇਨ੍ਤੋ ਚਿਤ੍ਤਸੁਖਂ ਵਿਨ੍ਦਤਿ. ਏਵਞ੍ਚ ਸਤਿ ਅਤਿਮਹਨ੍ਤਂਪਿ ਤਂ ਕਮ੍ਮਂ ਏਕਸ੍ਮਿਂ ਕਾਲੇ ਸਿਦ੍ਧਂ ਭਵਿਸ੍ਸਤਿ.

ਹੀਨਚਿਤ੍ਤਾ ਚ ਬਹੁਜ੍ਜਨਾ ਤਾਦਿਸਾਨਿ ਕਮ੍ਮਾਨਿ ਦਿਸ੍ਵਾ ਨਿਵਤ੍ਤਚਿਤ੍ਤਾ ਹੋਨ੍ਤਿ. ਪੁਨ ਆਰਮ੍ਮਣਂਪਿ ਨ ਕਰੋਨ੍ਤਿ. ਚਿਤ੍ਤਾਧਿਕੋ ਪਨ ਤਾਦਿਸਾਨਿ ਕਮ੍ਮਾਨਿ ਦਿਸ੍ਵਾ ਉਗ੍ਗਤਚਿਤ੍ਤੋ ਹੋਤਿ, ਚਿਤ੍ਤਂ ਵਿਨੋਦੇਤੁਂਪਿ ਨ ਸਕ੍ਕੋਤਿ, ਨਿਚ੍ਚਕਾਲਂ ਤਤ੍ਥ ਨਿਬਨ੍ਧਚਿਤ੍ਤੋ ਹੋਤਿ. ਸੋ ਚਿਤ੍ਤਵਸਿਕੋ ਹੁਤ੍ਵਾ ਚਿਰਕਾਲਂਪਿ ਤਂ ਕਮ੍ਮਂ ਕਰੋਨ੍ਤੋ ਬਹੁਂ ਕਾਯਦੁਕ੍ਖਂਵਾਪੀਤਿਆਦਿਨਾ ਛਨ੍ਦਾਧਿਪਤਿਨਯੇਨ ਵਤ੍ਤਬ੍ਬਂ.

ਮਨ੍ਦਪਞ੍ਞਾ ਚ ਬਹੁਜ੍ਜਨਾ ਤਾਦਿਸਾਨਿ ਕਮ੍ਮਾਨਿ ਦਿਸ੍ਵਾ ਨਿਵਤ੍ਤਪਞ੍ਞਾ ਹੋਨ੍ਤਿ, ਕਮ੍ਮਾਨਂ ਆਦਿਮ੍ਪਿ ਨ ਪਸ੍ਸਨ੍ਤਿ, ਅਨ੍ਤਪਿ ਨ ਪਸ੍ਸਨ੍ਤਿ, ਅਨ੍ਧਕਾਰੇ ਪਵਿਸਨ੍ਤਾ ਵਿਯ ਹੋਨ੍ਤਿ, ਤਾਨਿ ਕਮ੍ਮਾਨਿ ਕਾਤੁਂ ਚਿਤ੍ਤਂਪਿ ਨ ਨਮਤਿ. ਪਞ੍ਞਾਧਿਕੋ ਪਨ ਤਾਦਿਸਾਨਿ ਕਮ੍ਮਾਨਿ ਦਿਸ੍ਵਾ ਉਗ੍ਗਤਪਞ੍ਞੋ ਹੋਤਿ, ਕਮ੍ਮਾਨਂ ਆਦਿਂਪਿ ਪਸ੍ਸਤਿ, ਅਨ੍ਤਂਪਿ ਪਸ੍ਸਤਿ, ਫਲਂਪਿ ਪਸ੍ਸਤਿ, ਆਨਿਸਂਸਂਪਿ ਪਸ੍ਸਤਿ. ਸੁਖੇਨ ਕਮ੍ਮਸਿਦ੍ਧਿਯਾ ਨਾਨਾਉਪਾਯਂਪਿ ਪਸ੍ਸਤਿ. ਸੋ ਚਿਰਕਾਲਂਪਿ ਤਂ ਕਮ੍ਮਂ ਕਰੋਨ੍ਤੋਤਿਆਦਿਨਾ ਵੀਰਿਯਾਧਿਪਤਿਨਯੇਨ ਵਤ੍ਤਬ੍ਬਂ. ਇਧ ਪਨ ਮਹਤਿਯਾ ਕਮ੍ਮਵੀਮਂਸਾਯਾਤਿ ਚ ਤਾਦਿਸਿਯਾ ਕਮ੍ਮ ਵੀਮਂਸਾਯਾਤਿ ਚ ਵਤ੍ਤਬ੍ਬਂ.

ਏਵਂ ਲੋਕੇ ਮਹਨ੍ਤੇਸੁ ਸੁਦੁਕ੍ਕਰੇਸੁ ਪੁਰਿਸਕਮ੍ਮੇਸੁ ਪਚ੍ਚੁਪਟ੍ਠਿਤੇਸੁ ਇਮੇ ਚਤ੍ਤਾਰੋ ਧਮ੍ਮਾ ਕਮ੍ਮਸਿਦ੍ਧਿਯਾ ਸਂਵਤ੍ਤਨ੍ਤਿ. ਇਮੇਸਞ੍ਚ ਚਤੁਨ੍ਨਂ ਅਧਿਪਤੀਨਂ ਵਿਜ੍ਜਮਾਨਤ੍ਤਾ ਲੋਕੇ ਪੁਰਿਸਵਿਸੇਸਾ ਨਾਮ ਦਿਸ੍ਸਨ੍ਤਿ, ਸਬ੍ਬਞ੍ਞੁਬੁਦ੍ਧਾ ਨਾਮ ਦਿਸ੍ਸਨ੍ਤਿ, ਸਬ੍ਬਞ੍ਞੁਬੋਧਿਸਤ੍ਤਾ ਨਾਮ ਦਿਸ੍ਸਨ੍ਤਿ, ਪਚ੍ਚੇਕਬੁਦ੍ਧਾ ਨਾਮ ਦਿਸ੍ਸਨ੍ਤਿ, ਪਚ੍ਚੇਕਬੋਧਿਸਤ੍ਤਾਨਾਮ ਦਿਸ੍ਸਨ੍ਤਿ, ਅਗ੍ਗਸਾਵਕਾਨਾਮ ਮਹਾਸਾਵਕਾ ਨਾਮ ਸਾਵਕਬੋਧਿਸਤ੍ਤਾ ਨਾਮ ਦਿਸ੍ਸਨ੍ਤਿ. ਲੋਕੇਪਿ ਏਵਰੂਪਾਨਂ ਪੁਰਿਸਵਿਸੇਸਾਨਂ ਵਸੇਨ ਸਤ੍ਤ ਲੋਕਸ੍ਸ ਅਤ੍ਥਾਯ ਹਿਤਾਯ ਸੁਖਾਯ ਪਞ੍ਞਾਸਿਪ੍ਪਵਿਸੇਸਾ ਚ ਪਰਿਭੋਗਵਤ੍ਥੁਵਿਸੇਸਾ ਚ ਦਿਸ੍ਸਨ੍ਤੀਤਿ. ਅਧਿਪਤਿਪਚ੍ਚਯਦੀਪਨਾ ਨਿਟ੍ਠਿਤਾ.

ਕਤਮੋ ¶ ਅਨਨ੍ਤਰਪਚ੍ਚਯੋ. ਅਨਨ੍ਤਰੇ ਖਣੇ ਨਿਰੁਦ੍ਧੋ ਚਿਤ੍ਤ ਚੇਤਸਿਕਧਮ੍ਮਸਮੂਹੋ ਅਨਨ੍ਤਰਪਚ੍ਚਯੋ.

ਕਤਮੋ ਧਮ੍ਮੋ ਅਨਨ੍ਤਰਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨੋ. ਪਚ੍ਛਿਮੇ ਅਨਨ੍ਤਰੇ ਏਵ ਖਣੇ ਉਪ੍ਪਨ੍ਨੋ ਚਿਤ੍ਤਚੇਤਸਿਕਧਮ੍ਮਸਮੂਹੋ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨੋ.

ਏਕਸ੍ਮਿਂ ਭਵੇ ਪਟਿਸਨ੍ਧਿਚਿਤ੍ਤਂ ਪਠਮਭਵਙ੍ਗਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ, ਪਠਮ ਭਵਙ੍ਗਚਿਤ੍ਤਂ ਦੁਤਿਯਭਵਙ੍ਗਚਿਤ੍ਤਸ੍ਸ ਅਨਨ੍ਤਰਪਚ੍ਚਯੋਤਿਆਦਿਨਾ ਵਤ੍ਤਬ੍ਬੋ.

ਯਦਾ ਪਨ ਧਮ੍ਮਯਮਕੇ ਸੁਦ੍ਧਾਵਾਸਾਨਂ ਦੁਤਿਯੇ ਅਕੁਸਲੇ ਚਿਤ੍ਤੇ ਵਤ੍ਤਮਾਨੇਤਿ ਵੁਤ੍ਤਨਯੇਨ ਤਸ੍ਸ ਸਤ੍ਤਸ੍ਸ ਅਤ੍ਤਨੋ ਅਭਿਨਵਂ ਅਤ੍ਤਭਾਵਂ ਆਰਬ੍ਭ ਏਤਂ ਮਮ ਏਸੋਹਮਸ੍ਮਿ ਏਸੋ ਮੇ ਅਤ੍ਤਾਤਿ ਪਵਤ੍ਤਂ ਭਵਨਿਕਨ੍ਤਿਕ ਤਣ੍ਹਾਸਹਗਤਚਿਤ੍ਤਂ ਉਪ੍ਪਜ੍ਜਤਿ. ਤਦਾ ਪਠਮਂ ਦ੍ਵਿਕ੍ਖਤ੍ਤੁਂ ਭਵਙ੍ਗਂ ਚਲਤਿ. ਤਤੋ ਮਨੋਦ੍ਵਾਰਾਵਜ੍ਜਨਚਿਤ੍ਤਂ ਉਪ੍ਪਜ੍ਜਤਿ. ਤਤੋ ਸਤ੍ਤ ਭਵਨਿਕਨ੍ਤਿਕਜਵਨਾਨਿ ਉਪ੍ਪਜ੍ਜਨ੍ਤਿ. ਤਤੋ ਪਰਂ ਭਵਙ੍ਗਵਾਰੋ.

ਅਪਿ ਚ ਸੋ ਸਤ੍ਤੋ ਤਦਾ ਪਚ੍ਚੁਪ੍ਪਨ੍ਨਭਵੇ ਕਿਞ੍ਚਿ ਨ ਜਾਨਾਤਿ, ਪੁਬ੍ਬਭਵੇ ਅਤ੍ਤਨਾ ਅਨੁਭੂਤਂ ਆਰਮ੍ਮਣਂ ਅਨੁਸ੍ਸਰਮਾਨੋ ਅਚ੍ਛਤਿ. ਵਤ੍ਥੁਸ੍ਸ ਪਨ ਅਤਿਦੁਬ੍ਬਲਤ੍ਤਾ ਤਞ੍ਚ ਆਰਮ੍ਮਣਂ ਅਪਰਿਬ੍ਯਤ੍ਤਮੇਵ ਹੋਤਿ. ਤਂ ਆਰਬ੍ਭ ਉਦ੍ਧਚ੍ਚਸਹਗਤਚਿਤ੍ਤਮੇਵ ਬਹੁਲਂ ਪਵਤ੍ਤਤਿ.

ਯਦਾ ਗਬ੍ਭੋ ਥੋਕਂ ਵਡ੍ਢਮਾਨੋ ਹੋਤਿ ਅਤਿਰੇਕਦ੍ਵੇਮਾਸਂ ਗਤੋ, ਤਦਾ ਚਕ੍ਖਾਦੀਨਿ ਇਨ੍ਦ੍ਰਿਯਾਨਿ ਪਰਿਪੁਣ੍ਣਾਨਿ ਹੋਨ੍ਤਿ. ਏਵਂ ਸਨ੍ਤੇਪਿ ਮਾਤੁਗਬ੍ਭੇ ਆਲੋਕਾਦੀਨਂ ਪਚ੍ਚਯਾਨਂ ਅਭਾਵਤੋ ਚਕ੍ਖੁਵਿਞ੍ਞਾਣਾਦੀਨਿ ਚਤ੍ਤਾਰਿ ਵਿਞ੍ਞਾਣਾਨਿ ਨੁਪ੍ਪਜ੍ਜਨ੍ਤਿ, ਕਾਯਵਿਞ੍ਞਾਣਮਨੋਵਿਞ੍ਞਾਣਾਨਿ ਏਵ ਉਪ੍ਪਜ੍ਜਨ੍ਤਿ. ਸੋ ਸਤ੍ਤੋ ਮਾਤੁਯਾ ਇਰਿਯਾਪਥਪਰਿਵਤ੍ਤਨਾਦੀਸੁ ਬਹੂਨਿ ਦੁਕ੍ਖਦੋਮਨਸ੍ਸਾਨਿ ਪਚ੍ਚਨੁਭੋਤਿ. ਵਿਜਾਯਨਕਾਲੇ ਪਨ ਭੁਸਂ ਦੁਕ੍ਖਂ ਨਿਗਚ੍ਛਤਿਯੇਵ. ਵਿਜਾਯਿਤ੍ਵਾਪਿ ਯਾਵ ਵਤ੍ਥੁਰੂਪਾਨਿ ਮੁਦੂਨਿ ਹੋਨ੍ਤਿ, ਪਰਿਪਾਕਂ ਨ ਗਚ੍ਛਨ੍ਤਿ, ਤਾਵ ਸੋ ਅਤਿਮਨ੍ਦਰੂਪੋ ਉਤ੍ਤਾਨਸੇਯ੍ਯਕੋ ਹੁਤ੍ਵਾ ਅਚ੍ਛਤਿ. ਨ ਕਿਞ੍ਚਿ ਪਚ੍ਚੁਪ੍ਪਨ੍ਨਂ ਆਰਮ੍ਮਣਂ ਸਲ੍ਲਕ੍ਖੇਤਿ. ਯੇਭੁਯ੍ਯੇਨ ਪੁਰਿਮ ਭਵਾਨੁਸਾਰੀ ਏਵ ਤਸ੍ਸ ਵਿਞ੍ਞਾਣਂ ਹੋਤਿ. ਸਚੇ ਸੋ ਨਿਰਯ ਭਵਤੋ ਆਗਤੋ ਹੋਤਿ, ਸੋ ਵਿਰੂਪਮੁਖਬਹੁਲੋ ਹੋਤਿ. ਪੁਰਿਮਾਨਿ ਨਿਰਯਾਰਮ੍ਮਣਾਨਿ ਆਰਬ੍ਭ ਖਣੇ ਖਣੇ ਵਿਰੂਪਮੁਖਮਸ੍ਸ ਪਞ੍ਞਾਯਤਿ. ਅਥ ਦੇਵਲੋਕਤੋ ਆਗਤੋ ਹੋਤਿ, ਦਿਬ੍ਬਾਨਿ ਆਰਮ੍ਮਣਾਨਿ ਆਰਬ੍ਭ ਵਿਪ੍ਪਸਨ੍ਨਮੁਖਬਹੁਲੋ ਹੋਤਿ, ਖਣੇ ਖਣੇ ਮਿਹਿਤਮੁਖਮਸ੍ਸ ਪਞ੍ਞਾਯਤਿ.

ਯਦਾ ਪਨ ਵਤ੍ਥੁਰੂਪਾਨਿ ਤਿਕ੍ਖਾਨਿ ਹੋਨ੍ਤਿ, ਪਰਿਪਾਕਂ ਗਚ੍ਛਨ੍ਤਿ. ਵਿਞ੍ਞਾਣਾਨਿ ਚਸ੍ਸ ਸੁਵਿਸਦਾਨਿ ਪਵਤ੍ਤਨ੍ਤਿ. ਤਦਾ ਅਮਨ੍ਦਰੂਪੋ ਹੁਤ੍ਵਾ ਕੀਲ਼ਨ੍ਤੋ ਲੀਲ਼ਨ੍ਤੋ ਮੋਦਨ੍ਤੋ ¶ ਪਮੋਦਨ੍ਤੋ ਅਚ੍ਛਤਿ. ਪਚ੍ਚੁਪ੍ਪਨ੍ਨੇ ਆਰਮ੍ਮਣਾਨਿ ਸਲ੍ਲਕ੍ਖੇਤਿ. ਮਾਤੁਭਾਸਂ ਸਲ੍ਲਕ੍ਖੇਤਿ. ਇਧ ਲੋਕਾਨੁਸਾਰੀ ਵਿਞ੍ਞਾਣਮਸ੍ਸ ਬਹੁਲਂ ਪਵਤ੍ਤਤਿ. ਪੁਰਿਮਜਾਤਿਂ ਪਮੁਸ੍ਸਤਿ.

ਕਿਂ ਪਨ ਸਬ੍ਬੋਪਿ ਸਤ੍ਤੋ ਇਮਸ੍ਮਿਂ ਠਾਨੇ ਏਵ ਪੁਰਿਮਂ ਜਾਤਿਂ ਪਮੁਸ੍ਸਤੀਤਿ ਚੇ. ਨ ਸਬ੍ਬੋਪਿ ਸਤ੍ਤੋ ਇਮਸ੍ਮਿਂ ਠਾਨੇ ਏਵ ਪਮੁਸ੍ਸਤਿ. ਕੋਚਿ ਅਤਿਰੇਕਤਰਂ ਗਮ੍ਭਵਾਸਦੁਕ੍ਖੇਨ ਪਰਿਪੀਲ਼ਿਤੋ ਗਬ੍ਭੇ ਏਵ ਪਮੁਸ੍ਸਤਿ. ਕੋਚਿ ਵਿਜਾਯਨਕਾਲੇ, ਕੋਚਿ ਇਮਸ੍ਮਿਂ ਠਾਨੇ ਪਮੁਸ੍ਸਤਿ. ਕੋਚਿ ਇਤੋਪਰਮ੍ਪਿ ਦਹਰਕਾਲੇ ਨ ਪਮੁਸ੍ਸਤਿ. ਵੁਡ੍ਢਕਾਲੇ ਏਵ ਪਮੁਸ੍ਸਤਿ. ਕੋਚਿ ਯਾਵਜੀਵਂਪਿ ਨ ਪਮੁਸ੍ਸਤਿ. ਦ੍ਵੇ ਤਯੋ ਭਵੇ ਅਨੁਸ੍ਸਰਨ੍ਤੋਪਿ ਅਤ੍ਥਿਯੇਵ. ਇਮੇ ਜਾਤਿਸ੍ਸਰਸਤ੍ਤਾ ਨਾਮ ਹੋਨ੍ਤਿ.

ਤਤ੍ਥ ਵਿਜਾਯਨਕਾਲਤੋ ਪਟ੍ਠਾਯ ਛਦ੍ਵਾਰਿਕਵੀਥਿਚਿਤ੍ਤਾਨਿ ਪਵਤ੍ਤਨ੍ਤਿ. ਪਚ੍ਚੁਪ੍ਪਨ੍ਨਾਰਮ੍ਮਣਂ ਸਲ੍ਲਕ੍ਖਣਤੋ ਪਟ੍ਠਾਯ ਛਦ੍ਵਾਰਿਕਵੀਥਿ ਚਿਤ੍ਤਾਨਿ ਪਰਿਪੁਣ੍ਣਾਨਿ ਪਵਤ੍ਤਨ੍ਤਿ. ਸਬ੍ਬਤ੍ਥਪਿ ਪੁਰਿਮਂ ਪੁਰਿਮਂ ਅਨਨ੍ਤਰੇ ਨਿਰੁਦ੍ਧਂ ਚਿਤ੍ਤਂ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਅਨਨ੍ਤਰੇ ਉਪ੍ਪਨ੍ਨਸ੍ਸ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ ਹੋਤਿ. ਅਯਞ੍ਚ ਅਨਨ੍ਤਰਪਚ੍ਚਯੋ ਨਾਮ ਅਨਮਤਗ੍ਗੇ ਸਂਸਾਰੇ ਏਕਸ੍ਸ ਸਤ੍ਤਸ੍ਸ ਏਕਪ੍ਪਬਨ੍ਧੋ ਏਵ ਹੋਤਿ. ਯਦਾ ਸਤ੍ਤੋ ਅਰਹਤ੍ਤ ਮਗ੍ਗਂ ਲਭਿਤ੍ਵਾ ਖਨ੍ਧਪਰਿਨਿਬ੍ਬਾਨਂ ਪਾਪੁਣਾਤਿ, ਤਦਾ ਏਵ ਸੋ ਪਬਨ੍ਧੋ ਛਿਜ੍ਜਤਿ.

ਕੇਨਟ੍ਠੇਨ ਅਨਨ੍ਤਰੋ, ਕੇਨਟ੍ਠੇਨ ਪਚ੍ਚਯੋਤਿ. ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨ ਅਨਨ੍ਤਰੋ, ਉਪਕਾਰਕਟ੍ਠੇਨ ਪਚ੍ਚਯੋ. ਤਤ੍ਥ ਅਤ੍ਤਸਦਿਸਸ੍ਸਾਤਿ ਸਾਰਮ੍ਮਣ ਭਾਵੇਨ ਅਤ੍ਤਨਾ ਸਦਿਸਸ੍ਸ. ਸਾਰਮ੍ਮਣਭਾਵੇਨਾਤਿ ਚ ਯੋ ਧਮ੍ਮੋ ਆਰਮ੍ਮਣੇਨ ਵਿਨਾ ਨ ਪਵਤ੍ਤਤਿ, ਸੋ ਸਾਰਮ੍ਮਣੋ ਨਾਮ, ਏਵਂ ਸਾਰਮ੍ਮਣਭਾਵੇਨ. ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨਾਤਿ ਪੁਰਿਮਸ੍ਮਿਂ ਚਿਤ੍ਤੇ ਨਿਰੁਦ੍ਧੇਪਿ ਤਸ੍ਸ ਚਿਨ੍ਤਨਕਿਰਿਯਾਵੇਗੋ ਨ ਵੂਪਸਮ੍ਮਤਿ, ਪਚ੍ਛਿਮਂ ਚਿਤ੍ਤਂ ਉਪ੍ਪਾਦੇਤ੍ਵਾ ਏਵ ਵੂਪਸਮ੍ਮਤਿ, ਏਵਂ ਪਚ੍ਛਿਮਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨ.

ਤਤ੍ਥ ਪੁਰਿਮਾ ਪੁਰਿਮਾ ਮਾਤੁਪਰਮ੍ਪਰਾ ਵਿਯ ਅਨਨ੍ਤਰਪਚ੍ਚਯਪਰਮ੍ਪਰਾ ਦਟ੍ਠਬ੍ਬਾ. ਪਚ੍ਛਿਮਾ ਪਚ੍ਛਿਮਾ ਧੀਤੁਪਰਮ੍ਪਰਾ ਵਿਯ ਤਸ੍ਸ ਪਚ੍ਚਯੁਪ੍ਪਨ੍ਨਪਰਮ੍ਪਰਾ ਦਟ੍ਠਬ੍ਬਾ. ਏਵਂ ਸਨ੍ਤੇ ਅਰਹਨ੍ਤਾਨਂ ਸਬ੍ਬਪਚ੍ਛਿਮਂ ਪਰਿਨਿਬ੍ਬਾਨਚਿਤ੍ਤਮ੍ਪਿ ਪੁਨ ਪਟਿਸਨ੍ਧਿਚਿਤ੍ਤਸਙ੍ਖਾਤਂ ਧਮ੍ਮਨ੍ਤਰਂ ਉਪ੍ਪਾਦੇਯ੍ਯਾਤਿ. ਨ ਉਪ੍ਪਾਦੇਯ੍ਯ. ਕਸ੍ਮਾ, ਤਦਾ ਕਮ੍ਮਕਿਲੇਸਵੇਗਾਨਂ ਸਬ੍ਬਸੋ ਪਟਿਪ੍ਪਸ੍ਸਦ੍ਧਿਭਾਵੇਨ ਅਚ੍ਚਨ੍ਤਸਨ੍ਤਤਰਤ੍ਤਾ ਤਸ੍ਸ ਚਿਤ੍ਤਸ੍ਸਾਤਿ. ਅਨਨ੍ਤਰਪਚ੍ਚਯ ਦੀਪਨਾ ਨਿਟ੍ਠਿਤਾ.

ਪਚ੍ਚਯਧਮ੍ਮਵਿਭਾਗੋ ¶ ਚ ਪਚ੍ਚਯੁਪ੍ਪਨ੍ਨਧਮ੍ਮਵਿਭਾਗੋ ਚ ਅਨਨ੍ਤਪਚ੍ਚਯ ਸਦਿਸੋ.

ਕੇਨਟ੍ਠੇਨ ਸਮਨਨ੍ਤਰੋਤਿ. ਸੁਟ੍ਠੁ ਅਨਨ੍ਤਰਟ੍ਠੇਨ ਸਮਨਨ੍ਤਰੋ. ਯਥਾ ਸਿਲਾਥਮ੍ਭਾਦੀਸੁ ਰੂਪਕਲਾਪਾ ਏਕਾਬਦ੍ਧਾ ਸਮਾਨਾਪਿ ਰੂਪ ਧਮ੍ਮਭਾਵੇਨ ਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇ ਪਰਿਚ੍ਛੇਦਰੂਪਸਹਿਤਾ ਏਵ ਹੋਨ੍ਤਿ. ਦ੍ਵਿਨ੍ਨਂ ਰੂਪਕਲਾਪਾਨਂ ਮਜ੍ਝੇ ਅਨ੍ਤਰਂ ਨਾਮ ਵਿਵਰਂ ਨਾਮ ਅਤ੍ਥਿਯੇਵ. ਨ ਤਥਾ ਪੁਰਿਮਪਚ੍ਛਿਮਾਨਂ ਦ੍ਵਿਨ੍ਨਂ ਚਿਤ੍ਤਚੇਤਸਿਕ ਕਲਾਪਾਨਂ ਮਜ੍ਝੇ. ਤੇ ਪਨ ਅਰੂਪਧਮ੍ਮਭਾਵੇਨ ਅਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇ ਪਰਿਚ੍ਛੇਦਧਮ੍ਮਸ੍ਸ ਨਾਮ ਕਸ੍ਸਚਿ ਆਕਾਸਵਿਵਰਸ੍ਸ ਅਭਾਵਤੋ ਸਬ੍ਬਸੋ ਅਨ੍ਤਰ ਰਹਿਤਾ ਏਵ ਹੋਨ੍ਤਿ. ਲੋਕਸ੍ਸਪਿ ਦ੍ਵਿਨ੍ਨਂ ਕਲਾਪਾਨਂ ਅਨ੍ਤਰਂ ਨਾਮ ਨ ਦਿਸ੍ਸਤਿ. ਤਤੋ ਇਮੇ ਸਤ੍ਤਾ ਚਿਤ੍ਤਂ ਨਾਮ ਨਿਚ੍ਚਂ ਧੁਵਂ ਥਾਵਰਂ ਅਵਿਪਰਿਣਾਮਧਮ੍ਮਨ੍ਤਿ ਏਵਂ ਚਿਤ੍ਤੇ ਨਿਚ੍ਚਸਞ੍ਞਿਨੋ ਹੋਨ੍ਤਿ. ਏਵਂ ਸੁਟ੍ਠੁ ਅਨਨ੍ਤਰਟ੍ਠੇਨ ਸਮਨਨ੍ਤਰੋ. ਅਨਨ੍ਤਰਟ੍ਠੇਨਾਤਿ ਚ ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨਾਤਿ ਪੁਬ੍ਬੇ ਵੁਤ੍ਤਮੇਵ.

ਏਵਂ ਸਨ੍ਤੇ ਨਿਰੋਧਸਮਾਪਤ੍ਤਿਕਾਲੇ ਪੁਰਿਮਚਿਤ੍ਤਂ ਨਾਮ ਨੇਵ ਸਞ੍ਞਾਨਾਸਞ੍ਞਾਯਤਨਚਿਤ੍ਤਂ, ਪਚ੍ਛਿਮਚਿਤ੍ਤਂ ਨਾਮ ਅਰਿਯਫਲਚਿਤ੍ਤਂ, ਦ੍ਵਿਨ੍ਨਂ ਚਿਤ੍ਤਾਨਂ ਅਨ੍ਤਰੇ ਏਕਰਤ੍ਤਿਦਿਵਮ੍ਪਿ ਦ੍ਵੇਰਤ੍ਤਿਦਿਵਾਨਿਪਿ.ਲ. ਸਤ੍ਤਰਤ੍ਤਿਦਿਵਾਨਿਪਿ ਅਚਿਤ੍ਤਕੋ ਹੋਤਿ. ਅਸਞ੍ਞਸਤ੍ਤਭੂਮਿਯਂਪਿ ਪੁਰਿਮੇ ਕਾਮਭਵੇ ਚੁਤਿਚਿਤ੍ਤਂ ਪੁਰਿਮਚਿਤ੍ਤਂ ਨਾਮ. ਪਚ੍ਛਿਮੇ ਕਾਮਭਵੇ ਪਟਿਸਨ੍ਧਿਚਿਤ੍ਤਂ ਪਚ੍ਛਿਮਚਿਤ੍ਤਂ ਨਾਮ, ਦ੍ਵਿਨ੍ਨਂ ਚਿਤ੍ਤਾਨਂ ਅਨ੍ਤਰੇ ਅਸਞ੍ਞਸਤ੍ਤਭਵੇ ਪਞ੍ਚਕਪ੍ਪਸਤਾਨਿ ਪੁਗ੍ਗਲੋ ਅਚਿਤ੍ਤਕੋ ਤਿਟ੍ਠਤਿ. ਤਤ੍ਥ ਦ੍ਵੇ ਪੁਰਿਮਚਿਤ੍ਤਾਨਿ ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਪਚ੍ਚਯਸਤ੍ਤਿਰਹਿਤਾਨਿ ਹੋਨ੍ਤੀਤਿ. ਨ ਹੋਨ੍ਤਿ. ਮਹਨ੍ਤੇਹਿ ਪਨ ਭਾਵਨਾਪਣਿਧਿਬਲੇਹਿ ਪਟਿਬਾਹਿਤਤ੍ਤਾ ਪੁਰਿਮਚਿਤ੍ਤਾਨਿ ਚ ਨਿਰੁਜ੍ਝਮਾਨਾਨਿ ਅਨਨ੍ਤਰੇ ਧਮ੍ਮਨ੍ਤਰਸ੍ਸ ਉਪ੍ਪਾਦਨ ਸਤ੍ਤਿਸਹਿਤਾਨਿ ਏਵ ਨਿਰੁਜ੍ਝਨ੍ਤਿ. ਪਚ੍ਛਿਮਚਿਤ੍ਤਾਨਿ ਚ ਉਪ੍ਪਜ੍ਜਮਾਨਾਨਿ ਤਸ੍ਮਿਂ ਖਣੇ ਏਕਾਬਦ੍ਧਭਾਵੇਨ ਅਨੁਪ੍ਪਜ੍ਜਿਤ੍ਵਾ ਚਿਰਕਾਲੇ ਏਵ ਉਪ੍ਪਜ੍ਜਨ੍ਤਿ. ਨ ਚ ਏਤ੍ਤਕਮਤ੍ਤੇਨ ਪੁਰਿਮਚਿਤ੍ਤਾਨਂ ਅਨਨ੍ਤਰੇ ਧਮ੍ਮਨ੍ਤਰਸ੍ਸ ਉਪ੍ਪਾਦਨ ਸਤ੍ਤਿਨਾਮ ਨਤ੍ਥੀਤਿ ਚ, ਤੇ ਅਨਨ੍ਤਰਪਚ੍ਚਯਧਮ੍ਮਾ ਨਾਮ ਨ ਹੋਨ੍ਤੀਤਿ ਚ ਸਕ੍ਕਾ ਵਤ੍ਤੁਂ. ਯਥਾ ਤਂ ਰਞ੍ਞੋ ਯੋਧਾ ਨਾਮ ਅਤ੍ਥਿ, ਕਦਾਚਿ ਰਾਜਾ ਕਾਲਂ ਞਤ੍ਵਾ ਤੁਮ੍ਹੇ ਇਦਾਨਿ ਮਾਯੁਜ੍ਝਥ, ਯੁਦ੍ਧਕਾਲੋ ਨ ਹੋਤਿ, ਅਸੁਕਸ੍ਮਿਂ ਕਾਲੇ ਏਵ ਯੁਜ੍ਝਥਾਤਿ ਵਦੇਯ੍ਯ. ਤੇ ਚ ਤਦਾ ਅਯੁਜ੍ਝਮਾਨਾ ਵਿਚਰੇਯ੍ਯੁਂ. ਏਵਂ ਸਨ੍ਤੇਪਿ ਤੇਸਂ ਯੁਜ੍ਝਨਸਤ੍ਤਿ ਨਾਮ ਨਤ੍ਥੀਤਿ ਚ, ਤੇ ਯੋਧਾ ਨਾਮ ਨ ਹੋਨ੍ਤੀਤਿ ਚ ਨ ਸਕ੍ਕਾ ਵਤ੍ਤੁਨ੍ਤਿ.

ਏਤ੍ਥ ਵਦੇਯ੍ਯੁਂ, ਇਮਸ੍ਮਿਂ ਪਚ੍ਚਯੇ ਤੇ ਪਨ ਅਰੂਪਧਮ੍ਮਭਾਵੇਨ ਅਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇਪਰਿਚ੍ਛੇਦਧਮ੍ਮਸ੍ਸ ਨਾਮ ਕਸ੍ਸਚਿ ਅਭਾਵਤੋ ਸਬ੍ਬਸੋ ਅਨ੍ਤਰਰਹਿਤਾ ¶ ਏਵ ਹੋਨ੍ਤੀਤਿ ਵੁਤ੍ਤਂ. ਏਵਂ ਸਨ੍ਤੇ ਪੁਬ੍ਬੇ ਆਰਮ੍ਮਣ ਪਚ੍ਚਯੇ ਭੇਰਿਸਦ੍ਦਵੀਣਾਸਦ੍ਦੋਪਮਾਹਿ ਯੋ ਚਿਤ੍ਤਾਨਂ ਖਣੇ ਖਣੇ ਉਪ੍ਪਾਦੋ ਚ ਨਿਰੋਧੋ ਚ ਵੁਤ੍ਤੋ, ਸੋ ਅਮ੍ਹੇਹਿ ਕਥਂ ਪਚ੍ਚੇਤਬ੍ਬੋਤਿ. ਅਞ੍ਞਮਞ੍ਞਵਿਰੁਦ੍ਧਾਨਂ ਨਾਨਾਚਿਤ੍ਤਾਨਂ ਖਣਮਤ੍ਤੇਪਿ ਪੁਬ੍ਬਾਪਰ ਪਰਿਵਤ੍ਤਨਸ੍ਸ ਲੋਕੇ ਪਞ੍ਞਾਯਨਤੋ. ਅਯਮਤ੍ਥੋ ਪੁਬ੍ਬੇ ਚਿਤ੍ਤ ਯਮਕਦੀਪਨਿਯਂ ਵਿਤ੍ਥਾਰਤੋ ਵੁਤ੍ਤੋਯੇਵਾਤਿ. ਸਮਨਨ੍ਤਰਪਚ੍ਚਯ ਦੀਪਨਾ ਨਿਟ੍ਠਿਤਾ.

ਪਚ੍ਚਯਧਮ੍ਮਵਿਭਾਗੋ ਚ ਪਚ੍ਚਯੁਪ੍ਪਨ੍ਨਧਮ੍ਮਵਿਭਾਗੋਚ ਵੁਚ੍ਚਤਿ. ਏਕਤੋ ਉਪ੍ਪਨ੍ਨਾ ਸਬ੍ਬੇਪਿ ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਂ ਸਹਜਾਤ ਪਚ੍ਚਯਾ ਚ ਹੋਨ੍ਤਿ ਸਹਜਾਤਪਚ੍ਚਯੁਪ੍ਪਨ੍ਨਾ ਚ. ਪਟਿਸਨ੍ਧਿਨਾਮਕ੍ਖਨ੍ਧਾ ਚ ਪਟਿਸਨ੍ਧਿਸਹਜਾਤਂ ਹਦਯਵਤ੍ਥੁ ਚ ਅਞ੍ਞਮਞ੍ਞਂ ਸਹਜਾਤਪਚ੍ਚਯਾ ਚ ਹੋਨ੍ਤਿ ਸਹਜਾਤਪਚ੍ਚਯੁਪ੍ਪਨ੍ਨਾ ਚ. ਸਬ੍ਬਾਨਿ ਮਹਾਭੂਤਾਨਿਪਿ ਅਞ੍ਞਮਞ੍ਞਂ ਸਹਜਾਤਪਚ੍ਚਯਾ ਚ ਹੋਨ੍ਤਿ ਪਚ੍ਚਯੁਪ੍ਪਨ੍ਨਧਮ੍ਮਾ ਚ. ਪਟਿਸਨ੍ਧਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਸਬ੍ਬਾਨਿ ਕਮ੍ਮਜਰੂਪਾਨਿ ਚ ਪਵਤ੍ਤਿਕਾਲੇ ਤਸ੍ਸ ਤਸ੍ਸ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਤੇਨ ਤੇਨ ਚਿਤ੍ਤੇਨ ਜਾਤਾਨਿ ਸਬ੍ਬਾਨਿ ਚਿਤ੍ਤਜਰੂਪਾਨਿ ਚ ਸਹਜਾਤਚਿਤ੍ਤਸ੍ਸ ਪਚ੍ਚਯੁਪ੍ਪਨ੍ਨਾਨਿ ਨਾਮ. ਸਬ੍ਬਾਨਿ ਉਪਾਦਾਰੂਪਾਨਿ ਸਹਜਾਤਮਹਾਭੂਤਾਨਂ ਪਚ੍ਚਯੁਪ੍ਪਨ੍ਨਾਨਿ ਨਾਮ.

ਕੇਨਟ੍ਠੇਨ ਸਹਜਾਤੋ, ਕੇਨਟ੍ਠੇਨ ਪਚ੍ਚਯੋ. ਸਹ ਜਾਨਨਟ੍ਠੇਨ ਸਹਜਾਤੋ, ਉਪਕਾਰਕਟ੍ਠੇਨ ਪਚ੍ਚਯੋ. ਤਤ੍ਥ ਸਹਜਾਨਨਟ੍ਠੇਨਾਤਿ ਯੋ ਧਮ੍ਮੋ ਜਾਯਮਾਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਧਮ੍ਮੇਹਿ ਸਹੇਵ ਸਯਞ੍ਚ ਜਾਯਤਿ ਉਪ੍ਪਜ੍ਜਤਿ, ਅਤ੍ਤਨੋ ਪਚ੍ਚਯੁਪ੍ਪਨ੍ਨੇ ਚ ਧਮ੍ਮੇ ਅਤ੍ਤਨਾ ਸਹੇਵ ਜਨੇਤਿ ਉਪ੍ਪਾਦੇਤਿ, ਤਸ੍ਸ ਸੋ ਅਤ੍ਥੋ ਸਹਜਾਨਨਟ੍ਠੋ ਨਾਮ.

ਯਥਾ ਸੂਰਿਯੋ ਨਾਮ ਉਦਯਨ੍ਤੋ ਸੂਰਿਯਾਤਪੇ ਚ ਸੂਰਿਯਾ ਲੋਕੇ ਚ ਅਤ੍ਤਨਾ ਸਹੇਵ ਜਨਯਨ੍ਤੋ ਉਦੇਤਿ. ਯਥਾ ਚ ਪਦੀਪੋ ਨਾਮ ਜਲਨ੍ਤੋ ਪਦੀਪਾਤਪੇ ਚ ਪਦੀਪਾਲੋਕੇ ਚ ਅਤ੍ਤਨਾ ਸਹੇਵ ਜਨਯਨ੍ਤੋ ਜਲਤਿ. ਏਵਮੇਵਂ ਅਯਂ ਪਚ੍ਚਯਧਮ੍ਮੋ ਉਪ੍ਪਜ੍ਜਮਾਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਧਮ੍ਮੇ ਅਤ੍ਤਨਾ ਸਹੇਵ ਉਪ੍ਪਾਦੇਤਿ. ਤਤ੍ਥ ਸੂਰਿਯੋ ਵਿਯ ਏਕਮੇਕੋ ਨਾਮ ਧਮ੍ਮੋ, ਸੂਰਿਯਾਤਪਾ ਵਿਯ ਤਂਸਮ੍ਪਯੁਤ੍ਤਧਮ੍ਮਾ, ਸੂਰਿਯਾਲੋਕਾ ਵਿਯ ਸਹਜਾਤਰੂਪਧਮ੍ਮਾ. ਤਥਾ ਸੂਰਿਯੋ ਵਿਯ ਏਕਮੇਕੋ ਮਹਾਭੂਤਰੂਪਧਮ੍ਮੋ, ਸੂਰਿਯਾਤਪਾ ਵਿਯ ਸਹਜਾਤਮਹਾਭੂਤਧਮ੍ਮਾ, ਸੂਰਿਯਾਲੋਕਾ ਵਿਯ ਸਹਜਾਤਉਪਾਦਾਰੂਪਧਮ੍ਮਾ, ਏਸ ਨਯੋ ਪਦੀਪੁਪਮਾਯਪੀਤਿ. ਸਹਜਾਤਪਚ੍ਚਯਦੀਪਨਾ ਨਿਟ੍ਠਿਤਾ.

ਸਹਜਾਤਪਚ੍ਚਯੇ ¶ ਵਿਭਤ੍ਤੇਸੁ ਧਮ੍ਮੇਸੁ ਯੋ ਯੋ ਪਚ੍ਚਯ ਧਮ੍ਮੋਤਿ ਵੁਤ੍ਤੋ, ਸੋ ਸੋ ਏਵ ਇਧ ਪਚ੍ਚਯਧਮ੍ਮੋ ਚੇਵ ਪਚ੍ਚਯੁਪ੍ਪਨ੍ਨ ਧਮ੍ਮੋ ਚ ਹੋਤਿ. ਸਬ੍ਬੇਪਿ ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਸ੍ਸ ਪਚ੍ਚਯਧਮ੍ਮਾ ਚ ਹੋਨ੍ਤਿ ਅਞ੍ਞਮਞ੍ਞਸ੍ਸ ਪਚ੍ਚਯੁਪ੍ਪਨ੍ਨਧਮ੍ਮਾ. ਸਹਜਾਤਾ ਚਤ੍ਤਾਰੋ ਮਹਾਭੂਤਾ ਅਞ੍ਞਮਞ੍ਞਸ੍ਸ ਪਚ੍ਚਯਧਮ੍ਮਾ ਚ ਹੋਨ੍ਤਿ ਅਞ੍ਞਮਞ੍ਞਸ੍ਸ ਪਚ੍ਚਯੁਪ੍ਪਨ੍ਨਧਮ੍ਮਾ ਚ. ਪਟਿਸਨ੍ਧਿਨਾਮਕ੍ਖਨ੍ਧਾ ਚ ਪਟਿਸਨ੍ਧਿ ਸਹਜਾਤਂ ਹਦਯਵਤ੍ਥੁਰੂਪਞ੍ਚ ਅਞ੍ਞਮਞ੍ਞਸ੍ਸ ਪਚ੍ਚਯਧਮ੍ਮਾ ਚ ਹੋਨ੍ਤਿ ਅਞ੍ਞਮਞ੍ਞਸ੍ਸ ਪਚ੍ਚਯੁਪ੍ਪਨ੍ਨਧਮ੍ਮਾ ਚ. ਅਤ੍ਥੋ ਸੁਵਿਞ੍ਞੇਯ੍ਯੋਯੇਵ.

ਯਥਾ ਅਞ੍ਞਮਞ੍ਞਂ ਨਿਸ੍ਸਾਯ ਉਸ੍ਸਾਪਿਤਾ ਤਯੋ ਦਣ੍ਡਾ ਅਞ੍ਞਮਞ੍ਞਸ੍ਸ ਨਿਸ੍ਸਯਾ ਚ ਹੋਨ੍ਤਿ, ਅਞ੍ਞਮਞ੍ਞਂ ਨਿਸ੍ਸਿਤਾ ਚ. ਤੇਸੁ ਏਕਮੇਕਸ੍ਮਿਂ ਉਸ੍ਸਿਤੇ ਸਬ੍ਬੇ ਉਸ੍ਸਿਤਾ ਹੋਨ੍ਤਿ, ਏਕਮੇਕਸ੍ਮਿਂ ਪਤਨ੍ਤੇ ਸਬ੍ਬੇ ਪਤਨ੍ਤਿ. ਏਵਂ ਅਞ੍ਞਮਞ੍ਞਧਮ੍ਮਾ ਚ ਦਟ੍ਠਬ੍ਬਾ.

ਏਤ੍ਥ ਵਦੇਯ੍ਯੁਂ, ਸਬ੍ਬੇ ਚੇਤਸਿਕਾ ਧਮ੍ਮਾ ਚਿਤ੍ਤਪਚ੍ਚਯਂ ਅਲਭ ਮਾਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਨ੍ਤੀਤਿ ਯੁਤ੍ਤਂ. ਕਸ੍ਮਾ. ਫੁਸਨਾਦੀਨਂ ਚੇਤਸਿਕ ਕਿਚ੍ਚਾਨਂ ਵਿਜਾਨਨਕਿਚ੍ਚਪੁਬ੍ਬਙ੍ਗਮਤ੍ਤਾ, ਮਨੋਪੁਬ੍ਬਙ੍ਗਮਾਤਿ ਹਿ ਵੁਤ੍ਤਂ. ਚਿਤ੍ਤਂ ਪਨ ਚੇਤਸਿਕਪਚ੍ਚਯਂ ਅਲਭਮਾਨਂ ਉਪ੍ਪਜ੍ਜਿਤੁਂ ਨ ਸਕ੍ਕੋਤੀਤਿ ਨ ਯੁਜ੍ਜੇਯ੍ਯਾਤਿ. ਵੁਚ੍ਚਤੇ, ਚੇਤਸਿਕਧਮ੍ਮਾ ਨਾਮ ਚਿਤ੍ਤਸ੍ਸ ਸਹਾਯਙ੍ਗਾਨਿ ਹੋਨ੍ਤਿ. ਤਸ੍ਮਾ ਤੇਹਿ ਵਿਨਾ ਚਿਤ੍ਤਮ੍ਪਿ ਉਪ੍ਪਜ੍ਜਿਤੁਂ ਨ ਸਕ੍ਕੋਤਿਯੇਵ. ਏਸੇਵ ਨਯੋ ਚਤੂਸੁ ਮਹਾਭੂਤੇਸੁਪੀਤਿ. ਉਪਾਦਾਰੂਪਾਨਿ ਪਨ ਮਹਾਭੂਤਾਨਂ ਨਿਸ੍ਸਨ੍ਦਮਤ੍ਤਤ੍ਤਾ ਸਹਾਯਙ੍ਗਾਨਿ ਨ ਹੋਨ੍ਤੀਤਿ. ਨਨੁ ਆਹਾਰਰੂਪਞ੍ਚ ਜੀਵਿਤਰੂਪਞ੍ਚ ਪਚ੍ਚਯਵਿਸੇਸਤ੍ਤਾ ਸਹਾਯਙ੍ਗਂ ਹੋਤੀਤਿ. ਵੁਚ੍ਚਤੇ, ਠਿਤਿਯਾ ਏਵ ਸਹਾਯਙ੍ਗਂ ਹੋਤਿ. ਨ ਉਪ੍ਪਾਦੇ. ਇਧ ਪਨ ਉਪ੍ਪਾਦੇ ਸਹਾਯਙ੍ਗਂ ਅਧਿਪ੍ਪੇਤਨ੍ਤਿ. ਅਞ੍ਞਮਞ੍ਞਪਚ੍ਚਯਦੀਪਨਾ ਨਿਟ੍ਠਿਤਾ.

ਤਿਵਿਧੋ ਨਿਸ੍ਸਯਪਚ੍ਚਯੋ, ਸਹਜਾਤਨਿਸ੍ਸਯੋ ਵਤ੍ਥੁ ਪੁਰੇਜਾਤਨਿਸ੍ਸਯੋ ਵਤ੍ਥਾਰਮ੍ਮਣਪੁਰੇਜਾਤਨਿਸ੍ਸਯੋ.

ਤਤ੍ਥ ਕਤਮੋ ਸਹਜਾਤਨਿਸ੍ਸਯੋ. ਸਬ੍ਬੋ ਸਹਜਾਤ ਪਚ੍ਚਯੋ ਸਹਜਾਤਨਿਸ੍ਸਯੋ. ਤਸ੍ਮਾ ਤਤ੍ਥ ਪਚ੍ਚਯਵਿਭਾਗੋ ਚ ਪਚ੍ਚਯੁਪ੍ਪਨ੍ਨਵਿਭਾਗੋ ਚ ਸਹਜਾਤਪਚ੍ਚਯੇ ਵੁਤ੍ਤਨਯੇਨ ਵੇਦਿਤਬ੍ਬੋ.

ਕਤਮੋ ਪਨ ਵਤ੍ਥੁਪੁਰੇਜਾਤਨਿਸ੍ਸਯੋ. ਛ ਵਤ੍ਥੂਨਿ ਚਕ੍ਖੁ ਵਤ੍ਥੁ ਸੋਤਵਤ੍ਥੁ ਘਾਨਵਤ੍ਥੁ ਜਿਵ੍ਹਾਵਤ੍ਥੁ ਕਾਯਵਤ੍ਥੁ ਹਦਯਵਤ੍ਥੁ. ਇਮਾਨਿ ਛਵਤ੍ਥੂਨਿ ਪਵਤ੍ਤਿਕਾਲੇ ਸਤ੍ਤਾਨਂ ਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇ ਜਾਤਨਿਸ੍ਸਯੋ.

ਵਤ੍ਥੁਰੂਪਮੇਵ ¶ ਪੁਰੇਜਾਤਂ ਹੁਤ੍ਵਾ ਨਿਸ੍ਸਯੋ ਵਤ੍ਥੁਪੁਰੇਜਾਤ ਨਿਸ੍ਸਯੋ. ਤਤ੍ਥ ਚਿਤ੍ਤਚੇਤਸਿਕਾਨਂ ਨਿਸ੍ਸਯਟ੍ਠਾਨਟ੍ਠੇਨ ਵਤ੍ਥੁ ਨਾਮ. ਪੁਰੇਜਾਤਨ੍ਤਿ ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਸ੍ਸ ਧਮ੍ਮਸ੍ਸ ਉਪ੍ਪਤ੍ਤਿਕ੍ਖਣਤੋ ਪੁਰਿਮੇ ਖਣੇ ਜਾਤਂ.

ਤਤ੍ਥ ਪਟਿਸਨ੍ਧਿਚਿਤ੍ਤਂ ਤਦਾ ਪੁਰੇਜਾਤਸ੍ਸ ਵਤ੍ਥੁਰੂਪਸ੍ਸ ਅਭਾਵਤੋ ਅਤ੍ਤਨਾ ਸਹੁਪ੍ਪਨ੍ਨਮੇਵ ਹਦਯਵਤ੍ਥੁਰੂਪਂ ਨਿਸ੍ਸਾਯ ਉਪ੍ਪਜ੍ਜਤਿ. ਪਠਮ ਭਵਙ੍ਗਚਿਤ੍ਤਂ ਪਨ ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਹਦਯ ਵਤ੍ਥੁਰੂਪਂ ਨਿਸ੍ਸਾਯ ਉਪ੍ਪਜ੍ਜਤਿ. ਦੁਤਿਯਭਵਙ੍ਗਚਿਤ੍ਤਂ ਪਠਮਭਵਙ੍ਗਚਿਤ੍ਤੇਨ ਸਹੁਪ੍ਪਨ੍ਨਂ ਨਿਸ੍ਸਾਯ ਉਪ੍ਪਜ੍ਜਤਿ. ਏਵਂ ਤਤਿਯਭਵਙ੍ਗਚਿਤ੍ਤਂ ਦੁਤਿਯ ਭਵਙ੍ਗਚਿਤ੍ਤੇਨ ਸਹੁਪ੍ਪਨ੍ਨਨ੍ਤਿਆਦਿਨਾ ਯਾਵਮਰਣਾਸਨ੍ਨਕਾਲਾ ਦ੍ਵਿਨ੍ਨਂ ਮਨੋਧਾਤੁਮਨੋਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇਜਾਤਨਿਸ੍ਸਯੋ ਵੇਦਿਤਬ੍ਬੋ.

ਯਥਾ ਵੀਣਾਸਦ੍ਦਾ ਨਾਮ ਵੀਣਾਤਨ੍ਤੀਸੁ ਵੀਣਾਦਣ੍ਡਕੇਹਿ ਪਹਰਣਵੇਗੇਨ ਏਵ ਜਾਯਨ੍ਤਿ, ਨੋ ਅਞ੍ਞਥਾ. ਤਥਾ ਪਞ੍ਚਵਿਞ੍ਞਾਣਾਨਿ ਨਾਮ ਪਞ੍ਚਵਤ੍ਥੁਸਙ੍ਖਾਤੇਸੁ ਪਞ੍ਚਦ੍ਵਾਰੇਸੁ ਪਞ੍ਚਨ੍ਨਂ ਆਰਮ੍ਮਣਾਨਂ ਆਪਾਤਾ ਗਮਨਵੇਗੇਨ ਏਵ ਜਾਯਨ੍ਤਿ, ਨੋ ਅਞ੍ਞਥਾ.

ਆਪਾਤਾਗਮਨਞ੍ਚ ਤੇਸਂ ਦ੍ਵਾਰਾਰਮ੍ਮਣਾਨਂ ਠਿਤਿਪਤ੍ਤਕਾਲੇ ਏਵ ਹੋਤਿ. ਆਪਾਤਾਗਮਨਪਚ੍ਚਯਾ ਚ ਦ੍ਵਿਕ੍ਖਤ੍ਤੁਂ ਭਵਙ੍ਗਂ ਚਲਤਿ. ਭਵਙ੍ਗਚਲਨ ਪਚ੍ਚਯਾ ਚ ਆਵਜ੍ਜਨਂ ਉਪ੍ਪਜ੍ਜਤਿ. ਆਵਜ੍ਜਨਪਚ੍ਚਯਾ ਚ ਤਾਨਿ ਪਞ੍ਚਵਿਞ੍ਞਾਣਾਨਿ ਉਪ੍ਪਜ੍ਜਨ੍ਤਿ. ਤਸ੍ਮਾ ਚਕ੍ਖਾਦੀਨਿ ਪਞ੍ਚਵਤ੍ਥੂਨਿ ਪੁਰੇ ਅਤੀਤਭਵਙ੍ਗਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਉਪ੍ਪਨ੍ਨਾਨਿ ਏਵ ਪਞ੍ਚਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇਜਾਤਪਚ੍ਚਯਾ ਹੋਨ੍ਤਿ.

ਮਰਣਾਸਨ੍ਨਕਾਲੇ ਪਨ ਸਬ੍ਬਾਨਿ ਛ ਵਤ੍ਥੂਨਿ ਚੁਤਿਚਿਤ੍ਤਤੋ ਪੁਰੇ ਸਤ੍ਤਰਸਮਸ੍ਸ ਭਵਙ੍ਗਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਏਵ ਉਪ੍ਪਜ੍ਜਨ੍ਤਿ, ਤਤੋ ਪਰਂ ਨ ਉਪ੍ਪਜ੍ਜਨ੍ਤਿ. ਤਸ੍ਮਾ ਮਰਣਾਸਨ੍ਨਕਾਲੇ ਭਵਙ੍ਗਚਿਤ੍ਤਾਨਿ ਚ ਸਬ੍ਬਾਨਿ ਛਦ੍ਵਾਰਿਕਵੀਥਿਚਿਤ੍ਤਾਨਿ ਚ ਚੁਤਿਚਿਤ੍ਤਞ੍ਚ ਪੁਰੇਤਰਂ ਉਪ੍ਪਨ੍ਨਾਨਿ ਤਾਨਿਯੇਵ ਅਤ੍ਤਨੋ ਅਤ੍ਤਨੋ ਵਤ੍ਥੂਨਿ ਨਿਸ੍ਸਾਯ ਉਪ੍ਪਜ੍ਜਨ੍ਤਿ. ਅਯਂ ਵਤ੍ਥੁਪੁਰੇਜਾਤ ਨਿਸ੍ਸਯੋ.

ਕਤਮੋ ਪਨ ਵਤ੍ਥਾਰਮ੍ਮਣਪੁਰੇਜਾਤਨਿਸ੍ਸਯੋ. ਯਦਾ ਅਤ੍ਤਨੋ ਅਜ੍ਝਤ੍ਤਂ ਵਤ੍ਥੁਰੂਪਂ ਆਰਬ੍ਭ ਯਂ ਰੂਪਂ ਨਿਸ੍ਸਾਯ ਮਮ ਮਨੋਵਿਞ੍ਞਾਣਂ ਵਤ੍ਤਤਿ, ਏਤਂ ਮਮ ਏਸੋ ਹਮਸ੍ਮਿ ਏਸੋ ਮੇ ਅਤ੍ਤਾਤਿ ਏਵਂ ਤਣ੍ਹਾਮਾਨ ਦਿਟ੍ਠੀਹਿ ਗਹਣਵਸੇਨ ਵਾ ਏਤਂ ਅਨਿਚ੍ਚਂ ਏਤਂ ਦੁਕ੍ਖਂ ਏਤਂ ਅਨਤ੍ਤਾਤਿ ਏਵਂ ਸਮ੍ਮਸਨਵਸੇਨ ਵਾ ਆਵਜ੍ਜਨਾਦੀਨਿ ਮਨੋਦ੍ਵਾਰਿਕਵੀਥਿ ਚਿਤ੍ਤਾਨਿ ਪਵਤ੍ਤਨ੍ਤਿ. ਤਦਾ ਤਂ ਤਂ ਵਤ੍ਥੁਰੂਪਂ ਪਚ੍ਚੇਕਂ ਤੇਸਂ ਨਿਸ੍ਸਯਵਤ੍ਥੁ ਚ ਹੋਤਿ ਤੇਸਂ ਆਰਮ੍ਮਣਞ੍ਚ. ਤਸ੍ਮਾ ਤਂ ਤਂ ਹਦਯਰੂਪਂ ਤਸ੍ਸ ਤਸ੍ਸ ਚਿਤ੍ਤੁਪ੍ਪਾਦਸ੍ਸ ਵਤ੍ਥਾਰਮ੍ਮਣਪੁਰੇਜਾਤਪਚ੍ਚਯੋ ਹੋਤਿ. ਅਯਂ ਵਤ੍ਥਾਰਮ੍ਮਣ ਪੁਰੇਜਾਤਨਿਸ੍ਸਯੋ. ਏਵਂ ਨਿਸ੍ਸਯਪਚ੍ਚਯੋ ਤਿਵਿਧੋ ਹੋਤਿ.

ਇਧ ¶ ਸੁਤ੍ਤਨ੍ਤਨਿਸ੍ਸਯੋਪਿ ਵਤ੍ਤਬ੍ਬੋ. ਇਮੇ ਮਨੁਸ੍ਸਾ ਵਾ ਤਿਰਚ੍ਛਾਨਗਤਾ ਵਾ ਰੁਕ੍ਖਾਦਯੋ ਵਾ ਮਹਾਪਥਵਿਯਂ ਪਤਿਟ੍ਠਿਤਾ, ਮਹਾ ਪਥਵੀ ਚ ਹੇਟ੍ਠਾ ਮਹਾਉਦਕਕ੍ਖਨ੍ਧੇ, ਮਹਾਉਦਕਕ੍ਖਨ੍ਧੋ ਚ ਹੇਟ੍ਠਾ ਮਹਾਵਾਤਕ੍ਖਨ੍ਧੇ, ਮਹਾਵਾਤਕ੍ਖਨ੍ਧੋ ਚ ਹੇਟ੍ਠਾ ਅਜਟਾਕਾਸੇ, ਮਨੁਸ੍ਸਾ ਗੇਹੇਸੁ, ਭਿਕ੍ਖੂ ਵਿਹਾਰੇਸੁ, ਦੇਵਾ ਦਿਬ੍ਬਵਿਮਾਨੇਸੂਤਿਆਦਿਨਾ ਸਬ੍ਬਂ ਲੋਕਪ੍ਪਵਤ੍ਤਿਂ ਞਤ੍ਵਾ ਨਿਸ੍ਸਯਪਚ੍ਚਯੋ ਵੇਦਿਤਬ੍ਬੋ. ਨਿਸ੍ਸਯਪਚ੍ਚਯਦੀਪਨਾ ਨਿਟ੍ਠਿਤਾ.

ਤਿਵਿਧੋ ਉਪਨਿਸ੍ਸਯਪਚ੍ਚਯੋ, ਆਰਮ੍ਮਣੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯੋ ਪਕਤੂਪਨਿਸ੍ਸਯੋ. ਤਤ੍ਥ ਆਰਮ੍ਮਣੂਪ ਨਿਸ੍ਸਯੋ ਆਰਮ੍ਮਣਾਧਿਪਤਿਪਚ੍ਚਯਸਦਿਸੋ, ਅਨਨ੍ਤਰੂਪਨਿਸ੍ਸਯੋ ਅਨਨ੍ਤਰਪਚ੍ਚਯਸਦਿਸੋ.

ਕਤਮੋ ਪਕਤੂਪਨਿਸ੍ਸਯੋ. ਸਬ੍ਬੇਪਿ ਅਤੀਤਾਨਾਗਤ ਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਬਹਿਦ੍ਧਾਭੂਤਾ ਚਿਤ੍ਤਚੇਤਸਿਕਰੂਪਧਮ੍ਮਾ ਚ ਨਿਬ੍ਬਾਨਞ੍ਚ ਪਞ੍ਞਤ੍ਤਿ ਚ ਸਬ੍ਬੇਸਂ ਪਚ੍ਚੁਪ੍ਪਨ੍ਨਾਨਂ ਚਿਤ੍ਤਚੇਤਸਿਕਾਨਂ ਧਮ੍ਮਾਨਂ ਯਥਾਰਹਂ ਪਕਤੂਪਨਿਸ੍ਸਯੋ.

ਤਤ੍ਥ ਅਤੀਤੋ ਪਰਿਨਿਬ੍ਬੁਤੋ ਅਮ੍ਹਾਕਂ ਬੁਦ੍ਧੋ ਚ ਧਮ੍ਮੋ ਚ ਅਰਿਯਸਾਵਕਸਙ੍ਘੋ ਚ ਸਮ੍ਮੁਤਿਸਙ੍ਘਪਰਮ੍ਪਰਾ ਚ ਅਮ੍ਹਾਕਂ ਪਚ੍ਛਿਮ ਜਨਾਨਂ ਕੁਸਲੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਤਥਾ ਲੋਕੇ ਅਤੀਤਾ ਕਾਲਙ੍ਕਤਾ ਮਾਤਾਪਿਤਰੋ ਚ ਆਚਰਿਯਾ ਚ ਪਣ੍ਡਿਤਸਮਣਬ੍ਰਾਹ੍ਮਣਾ ਚ ਪਾਕਟਾ ਨਾਨਾਤਿਤ੍ਥਾਚਰਿਯਾ ਚ ਮਹਿਦ੍ਧਿਕਾ ਮਹਾਨੁਭਾਵਾ ਪੋਰਾਣਕਰਾਜਾਨੋ ਚ ਪਚ੍ਛਿਮਕਾਨਂ ਜਨਾਨਂ ਕੁਸਲੁਪ੍ਪਤ੍ਤਿਯਾ ਵਾ ਅਕੁਸਲੁਪ੍ਪਤ੍ਤਿਯਾ ਵਾ ਸੁਖਦੁਕ੍ਖੁਪ੍ਪਤ੍ਤਿਯਾ ਵਾ ਪਕਤੂਪਨਿਸ੍ਸਯੋ. ਤਥਾ ਹਿ ਤੇ ਪਚ੍ਛਿਮਕਾਨਂ ਜਨਾਨਂ ਅਤ੍ਥਾਯ ਨਾਨਾਸਦ੍ਧਮ੍ਮਪਞ੍ਞਤ੍ਤਿਯੋ ਵਾ ਨਾਨਾਅਸਦ੍ਧਮ੍ਮਪਞ੍ਞਤ੍ਤਿਯੋ ਵਾ ਨਾਨਾਲੋਕੂਪਕਰਣਾਨਿ ਵਾ ਪੁਰੇ ਪਟ੍ਠਪੇਸੁਂ. ਪਚ੍ਛਿਮਜਨਾ ਚ ਤੇਹਿ ਪਟ੍ਠਪਿਤੇਸੁ ਦਾਨਸੀਲਾਦਿਧਮ੍ਮੇਸੁ ਵਾ ਲੋਕਚਾਰਿਤ੍ਤ ਕੁਲਗੋਤ੍ਤਚਾਰਿਤ੍ਤ ਧਮ੍ਮੇਸੁ ਵਾ ਨਾਨਾਦਿਟ੍ਠਿਵਾਦੇਸੁ ਵਾ ਨਾਨਾਕਮ੍ਮਾਯਤਨਸਿਪ੍ਪਾਯਤਨ ਵਿਜ੍ਜਾਠਾਨੇਸੁ ਵਾ ਯਥਾਪਟ੍ਠਪਿਤੇਸੁ ਗਾਮਨਿਗਮਨਗਰਖੇਤ੍ਤਵਤ੍ਥੁ ਤਲ਼ਾਕਪੋਕ੍ਖਰਣਿਆਵਾਟਾਦੀਸੁ ਵਾ ਗੇਹਰਥਸਕਟਨਾਵਾ ਸਮ੍ਪੋਤਸਮ੍ਬਨ੍ਧਾਦੀਸੁ ਵਾ ਜਾਤਰੂਪਰਜਤਮਣਿਮੁਤ੍ਤਾਦੀਸੁ ਵਾ ਦਾਯਜ੍ਜਂ ਪਟਿਪਜ੍ਜਨ੍ਤਾ ਲੋਕੇ ਵਡ੍ਢਨ੍ਤਿ.

ਅਨਾਗਤੋਪਿ ਮੇਤ੍ਤੇਯ੍ਯੋ ਨਾਮ ਬੁਦ੍ਧੋ ਚ ਤਸ੍ਸ ਧਮ੍ਮੋ ਚ ਤਸ੍ਸ ਸਙ੍ਘੋ ਚ ਏਤਰਹਿ ਬਹੁਜ੍ਜਨਾਨਂ ਪਾਰਮਿਪੁਞ੍ਞਪ੍ਪਵਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਤਥਾ ਇਮਸ੍ਮਿਂ ਭਵੇ ਚ ਪਚ੍ਛਿਮੇ ਕਾਲੇ ਪਟਿਲਭਿਸ੍ਸਮਾਨਾ ਇਸ੍ਸਰਿਯਟ੍ਠਾਨਧਨਧਞ੍ਞਸਮ੍ਪਤ੍ਤਿਯੋ ਪੁਰਿਮੇ ਕਾਲੇ ਠਿਤਾਨਂ ਮਹਾਜਨਾਨਂ ਨਾਨਾਭਿਸਙ੍ਖਾਰੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯ ਪਚ੍ਚਯੋ. ਅਨਾਗਤਭਵੇ ਚ ਅਨੁਭਵਿਸ੍ਸਮਾਨਾ ਭਵਸਮ੍ਪਤ੍ਤਿ ਭੋਗ ਸਮ੍ਪਤ੍ਤਿਯੋ ¶ ਮਗ੍ਗਫਲਨਿਬ੍ਬਾਨਸਮ੍ਪਤ੍ਤਿਯੋ ਚ ਏਤਰਹਿ ਪਚ੍ਚੁਪ੍ਪਨ੍ਨਭਵੇ ਠਿਤਾਨਂ ਦਾਨਸੀਲਾਦਿਪੁਞ੍ਞਕਿਰਿਯੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਯਥਾ ਹਿ ਲੋਕੇ ਹੇਮਨ੍ਤੇ ਕਾਲੇ ਧਞ੍ਞਪ੍ਫਲਾਨਿ ਲਭਿਸ੍ਸਾਮਾਤਿ ਵਸ੍ਸਿਕੇ ਕਾਲੇ ਕਸ੍ਸਨਵਪ੍ਪਨਕਮ੍ਮਾਨਿ ਆਰਭਨ੍ਤਿ, ਕਮ੍ਮੇ ਸਿਦ੍ਧੇ ਤਂ ਤਂ ਧਨਂ ਲਭਿਸ੍ਸਾਮਾਤਿ ਪੁਬ੍ਬਭਾਗੇ ਤਂ ਤਂ ਵੀਰਿਯਕਮ੍ਮਂ ਵਾ ਤਂ ਤਂ ਪਞ੍ਞਾਕਮ੍ਮਂ ਵਾ ਆਰਭਨ੍ਤਿ. ਤਤ੍ਥ ਧਞ੍ਞਪ੍ਫਲਪ੍ਪਟਿਲਾਭੋ ਚ ਤਂ ਤਂ ਧਨਪ੍ਪਟਿ ਲਾਭੋਚ ਤਂ ਤਂ ਕਮ੍ਮਾਰਮ੍ਭਸ੍ਸ ਅਨਾਗਤਪਕਤੂਪਨਿਸ੍ਸਯਪਚ੍ਚਯੋ ਤਂ ਤਂ ਕਮ੍ਮਾਰਮ੍ਭੋ ਚ ਧਞ੍ਞਪ੍ਫਲਪ੍ਪਟਿਲਾਭਸ੍ਸ ਚ ਤਂ ਤਂ ਧਨਪ੍ਪਟਿ ਲਾਭਸ੍ਸ ਚ ਅਤੀਤਪਕਤੂਪਨਿਸ੍ਸਯਪਚ੍ਚਯੋ. ਏਵਮੇਵ ਪਚ੍ਛਿਮੇ ਅਨਾਗਤੇ ਕਾਲੇ ਨਾਨਾਕਮ੍ਮਪ੍ਫਲਾਨਿ ਸਮ੍ਪਸ੍ਸਨ੍ਤਾ ਪਤ੍ਥਯਨ੍ਤਾ ਮਹਾਜਨਾ ਪੁਰਿਮੇ ਪਚ੍ਚੁਪ੍ਪਨ੍ਨੇ ਕਾਲੇ ਨਾਨਾਪੁਞ੍ਞਕਮ੍ਮਾਨਿ ਆਰਭਨ੍ਤਿ. ਤਤ੍ਥ ਪੁਞ੍ਞਪ੍ਫਲਾਨਿ ਪੁਞ੍ਞਕਮ੍ਮਾਨਂ ਅਨਾਗਤਪਕਤੂਪਨਿਸ੍ਸਯਪਚ੍ਚਯੋ. ਪੁਞ੍ਞਕਮ੍ਮਾਨਿ ਪੁਞ੍ਞਪ੍ਫਲਾਨਂ ਅਤੀਤਪਕਤੂਪਨਿਸ੍ਸਯਪਚ੍ਚਯੋ. ਤਸ੍ਮਾ ਅਨਾਗਤਪਕਤੂਪਨਿਸ੍ਸਯੋਪਿ ਅਤੀਤਪਕਤੂਪਨਿਸ੍ਸਯੋ ਵਿਯ ਅਤਿਮਹਨ੍ਤੋ ਪਚ੍ਚਯੋ ਹੋਤਿ.

ਪਚ੍ਚੁਪ੍ਪਨ੍ਨਾ ਬੁਦ੍ਧਾਯੋ ਪਚ੍ਚਯਾ ਪਚ੍ਚੁਪ੍ਪਨ੍ਨਾਨਂ ਮਨੁਸ੍ਸਦੇਵਬ੍ਰਹ੍ਮਾਨਂ ਪਚ੍ਚੁਪ੍ਪਨ੍ਨਾ ਮਾਤਾਪਿਤਰੋ ਪਚ੍ਚੁਪ੍ਪਨ੍ਨਾਨਂ ਪੁਤ੍ਤਧੀਤਾਦੀਨਂ ਪਚ੍ਚੁਪ੍ਪਨ੍ਨਪਕਤੂਪ ਨਿਸ੍ਸਯੋ ਨਾਮ. ਸੋ ਸੁਪਾਕਟੋਯੇਵ.

ਅਜ੍ਝਤ੍ਤਭੂਤਾ ਪਕਤੂਪਨਿਸ੍ਸਯਧਮ੍ਮਾ ਨਾਮ ਬੁਦ੍ਧਾਦੀਸੁ ਸਵਿਞ੍ਞਾਣਕਸਨ੍ਤਾਨੇਸੁ ਉਪ੍ਪਨ੍ਨਾ ਪਚ੍ਚਯਧਮ੍ਮਾ. ਬਹਿਦ੍ਧਾਭੂਤਾ ਪਕਤੂਪਨਿਸ੍ਸਯਧਮ੍ਮਾ ਨਾਮ ਸਤ੍ਤਾਨਂ ਪਤਿਟ੍ਠਾਨਭੂਤਾ ਪਥਵਿਪਬ੍ਬਤਨਦੀ ਸਮੁਦ੍ਦਾਦਯੋ ਤੇਸਂ ਤੇਸਂ ਸਤ੍ਤਾਨਂ ਬਹੂਪਕਾਰਾ ਅਰਞ੍ਞਵਨਰੁਕ੍ਖ ਤਿਣਪੁਬ੍ਬਣ੍ਣਾਪਰਣ੍ਣਾਦਯੋ ਚਨ੍ਦਸੂਰਿਯਗਹਨਕ੍ਖਤ੍ਤਾਦਯੋ ਵਸ੍ਸੋਦਕਅਗ੍ਗਿਵਾਤਸੀਤਉਣ੍ਹਾਦਯੋ ਚ ਸਬ੍ਬੇਪਿ ਤੇ ਸਤ੍ਤਾਨਂ ਕੁਸਲੁਪ੍ਪਤ੍ਤਿਯਾ ਵਾ ਅਕੁਸਲੁਪ੍ਪਤ੍ਤਿਯਾ ਵਾ ਸੁਖੁਪ੍ਪਤ੍ਤਿਯਾ ਵਾ ਦੁਕ੍ਖੁਪ੍ਪਤ੍ਤਿਯਾ ਵਾ ਬਲਵਪਚ੍ਚਯਾ ਹੋਨ੍ਤਿ.

ਇਮੇ ਜਨਾ ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਿਸ੍ਸਾਮਾਤਿ ਬੋਧਿਪਕ੍ਖਿਯ ਧਮ੍ਮੇ ਵਾ ਭਾਵੇਨ੍ਤਿ, ਅਨਾਗਤੇ ਬੁਦ੍ਧਕਾਲੇ ਪਰਿਨਿਬ੍ਬਾਯਿਸ੍ਸਾਮਾਤਿ ਪਾਰਮੀਧਮ੍ਮੇ ਵਾ ਪਰਿਪੂਰੇਨ੍ਤਿ. ਤਤ੍ਥ ਨਿਬ੍ਬਾਨਂ ਤੇਸਂ ਧਮ੍ਮਾਨਂ ਉਪ੍ਪਤ੍ਤਿਯਾ ਬਲਵਪਚ੍ਚਯੋ ਹੋਤਿ.

ਲੋਕੇ ਨਾਨਾਵੋਹਾਰਭੂਤਾ ਨਾਮਪਞ੍ਞਤ੍ਤਿਯੋ ਚ ਬੁਦ੍ਧ ਸਾਸਨੇ ਤਿਪਿਟਕਪਰਿਯਤ੍ਤਿਧਮ੍ਮਭੂਤਾ ਨਾਮਪਞ੍ਞਤ੍ਤਿਯੋ ਚ ਤੇਸਂ ਤੇਸਂ ਅਤ੍ਥਾਨਂ ਜਾਨਨਤ੍ਥਾਯ ਬਲਵਪਚ੍ਚਯੋ.

ਤਤ੍ਥ ਸਙ੍ਖਤਧਮ੍ਮਾ ਨਾਮ ਪਚ੍ਚਯੇ ਸਤਿ ਉਪ੍ਪਜ੍ਜਨ੍ਤਿ, ਅਸਤਿ ਨੁਪ੍ਪਜ੍ਜਨ੍ਤਿ. ਉਪ੍ਪਜ੍ਜਿਤ੍ਵਾਪਿ ਪਚ੍ਚਯੇ ਸਤਿ ਤਿਟ੍ਠਨ੍ਤਿ, ਅਸਤਿ ਨ ਤਿਟ੍ਠਨ੍ਤਿ. ਤਸ੍ਮਾ ਤੇਸਂ ਉਪ੍ਪਤ੍ਤਿਯਾ ਵਾ ਠਿਤਿਯਾ ਵਾ ਪਚ੍ਚਯੋ ਨਾਮ ਇਚ੍ਛਿਤਬ੍ਬੋ. ਨਿਬ੍ਬਾਨਂ ਪਨ ਪਞ੍ਞਤ੍ਤਿ ਚ ਅਸਙ੍ਖਤਧਮ੍ਮਾ ਹੋਨ੍ਤਿ ¶ ਅਜਾਤਿਧਮ੍ਮਾ ਅਨੁਪ੍ਪਾਦਧਮ੍ਮਾ ਨਿਚ੍ਚ ਧਮ੍ਮਾ ਧੁਵਧਮ੍ਮਾ. ਤਸ੍ਮਾ ਤੇਸਂ ਉਪ੍ਪਾਦਾਯ ਵਾ ਠਿਤਿਯਾ ਵਾ ਪਚ੍ਚਯੋ ਨਾਮ ਨਤ੍ਥੀਤਿ.

ਕੁਸਲੋ ਕੁਸਲਸ੍ਸ ਉਪਨਿਸ੍ਸਯੋ. ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤੀਤਿਆਦਿਨਾ ਸੁਪਾਕਟੋ. ਤਥਾ ਰਾਗਂ ਉਪਨਿਸ੍ਸਾਯ ਪਾਣਂ ਹਨਤਿ, ਅਦਿਨ੍ਨਂ ਆਦਿਯਤੀਤਿਆਦਿਨਾ ਸਪ੍ਪਾਯਂ ਉਤੁਂ ਸਪ੍ਪਾਯਂ ਭੋਜਨਂ ਉਪਨਿਸ੍ਸਾਯ ਕਾਯਿਕਂ ਸੁਖਂ ਪਚ੍ਚਨੁਭੋਤੀਤਿਆਦਿਨਾ ਚ ਅਕੁਸਲੋ ਅਕੁਸਲਸ੍ਸ, ਅਬ੍ਯਾਕਤੋ ਅਬ੍ਯਾਕਤਸ੍ਸ ਉਪਨਿਸ੍ਸਯੋਪਿ ਸੁਪਾਕਟੋ.

ਕੁਸਲੋ ਪਨ ਅਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਦਾਨਂ ਦਤ੍ਵਾ ਤੇਨ ਦਾਨੇਨ ਅਤ੍ਤਾਨਂ ਉਕ੍ਕਂਸੇਤਿ, ਪਰਂ ਵਮ੍ਭੇਤਿ. ਤਥਾ ਸੀਲ ਸਮ੍ਪਨ੍ਨੋ ਹੁਤ੍ਵਾ ਸਮਾਧਿਸਮ੍ਪਨ੍ਨੋ ਹੁਤ੍ਵਾ ਪਞ੍ਞਾਸਮ੍ਪਨ੍ਨੋ ਹੁਤ੍ਵਾ ਅਤ੍ਤਾਨਂ ਉਕ੍ਕਂਸੇਤਿ, ਪਰਂ ਵਮ੍ਭੇਤਿ.

ਕੁਸਲੋ ਅਬ੍ਯਾਕਤਸ੍ਸਪਿ ਬਲਵੂਪਨਿਸ੍ਸਯੋ. ਸਬ੍ਬਾਨਿ ਚਤੁਭੂਮਿਕਕੁਸਲਕਮ੍ਮਾਨਿ ਵਾ ਕਮ੍ਮਪਰਿਵਾਰਾਨਿ ਕੁਸਲਾਨਿ ਵਾ ਕਾਲਨ੍ਤਰੇ ਚਤੁਭੂਮਿਕਾਨਂ ਵਿਪਾਕਾਬ੍ਯਾਕਤਾਨਂ ਬਲਵੂਪਨਿਸ੍ਸਯੋ. ਦਾਨਪਾਰਮਿਂ ਪੂਰੇਨ੍ਤਾ ਪੂਰਣਕਾਲੇ ਬਹੁਂ ਕਾਯਿਕਦੁਕ੍ਖਂ ਪਚ੍ਚਨੁਭਵਨ੍ਤਿ. ਤਥਾ ਸੀਲਪਾਰਮਿਂ ਨਿਕ੍ਖਮਪਾਰਮਿਂ ਪਞ੍ਞਾਪਾਰਮਿਂ ਵੀਰਿਯਪਾਰਮਿਂ ਖਨ੍ਤਿਪਾਰਮਿਂ ਸਚ੍ਚਪਾਰਮਿਂ ਅਧਿਟ੍ਠਾਨਪਾਰਮਿਂ ਮੇਤ੍ਤਾਪਾਰਮਿਂ ਉਪੇਕ੍ਖਾ ਪਾਰਮਿਂ. ਏਸੇਵ ਨਯੋ ਝਾਨਭਾਵਨਾ ਮਗ੍ਗਭਾਵਨਾਸੁਪਿ.

ਅਕੁਸਲੋ ਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਇਧੇਕਚ੍ਚੋ ਪਾਪਂ ਕਤ੍ਵਾ ਪਚ੍ਛਾ ਵਿਪ੍ਪਟਿਸਾਰੀ ਹੁਤ੍ਵਾ ਤਸ੍ਸ ਪਾਪਸ੍ਸ ਪਹਾਨਾਯ ਦਾਨਸੀਲਝਾਨਮਗ੍ਗਕੁਸਲਾਨਿ ਸਮ੍ਪਾਦੇਤਿ. ਤਂ ਪਾਪਂ ਤੇਸਂ ਕੁਸਲਾਨਂ ਬਲਵੂਪਨਿਸ੍ਸਯੋ.

ਅਕੁਸਲੋ ਅਬ੍ਯਾਕਤਸ੍ਸਪਿ ਬਲਵੂਪਨਿਸ੍ਸਯੋ. ਇਧ ਬਹੂ ਜਨਾ ਦੁਚ੍ਚਰਿਤਾਨਿ ਕਤ੍ਵਾ ਚਤੂਸੁ ਅਪਾਯੇਸੁ ਪਤਿਤ੍ਵਾ ਅਪਾਯਦੁਕ੍ਖਂ ਪਚ੍ਚਨੁਭਵਨ੍ਤਿ. ਦਿਟ੍ਠਧਮ੍ਮੇਪਿ ਕੇਚਿ ਅਤ੍ਤਨੋ ਵਾ ਪਰਸ੍ਸ ਵਾ ਦੁਚ੍ਚਰਿਤਕਮ੍ਮ ਪਚ੍ਚਯਾ ਬਹੁਂ ਦੁਕ੍ਖਂ ਪਚ੍ਚਨੁਭਵਨ੍ਤਿ. ਕੇਚਿ ਦੁਚ੍ਚਰਿਤਕਮ੍ਮੇਨ ਧਨਂ ਲਭਿਤ੍ਵਾ ਸੁਖਂ ਪਚ੍ਚਨੁਭਵਨ੍ਤਿ. ਬਹੁਜ੍ਜਨਾ ਰਾਗਮੂਲਕਂ ਬਹੁਂ ਦੁਕ੍ਖਂ ਪਚ੍ਚਨੁਭਵਨ੍ਤਿ, ਦੋਸਮੂਲਕਂ ਦਿਟ੍ਠਿਮੂਲਕਂ ਮਾਨਮੂਲਕਨ੍ਤਿ.

ਅਬ੍ਯਾਕਤੋ ਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਧਨ ਸਮ੍ਪਤ੍ਤਿਯਾ ਦਾਨਂ ਦੇਤਿ, ਸੀਲਂ ਪੂਰੇਤਿ, ਪਞ੍ਞਂ ਪੂਰੇਤਿ, ਭਾਵਨਾਸਪ੍ਪਾਯਂ ਆਵਾਸਂ ਵਾ ਲੇਣਂ ਵਾ ਗੁਹਂਵਾ ਰੁਕ੍ਖਂ ਵਾ ਅਰਞ੍ਞਂ ਵਾ ਪਬ੍ਬਤਂ ਵਾ ਗੋਚਰਗਾਮਂ ਵਾ ਉਤੁਸਪ੍ਪਾਯਂ ਵਾ ਆਹਾਰਸਪ੍ਪਾਯਂ ਵਾ ਲਭਿਤ੍ਵਾ ਤਂ ਤਂ ਭਾਵਨਂ ਭਾਵੇਤਿ.

ਅਬ੍ਯਾਕਤੋ ਅਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਲੋਕੇ ਚਕ੍ਖੁਸਮ੍ਪਦਂ ਨਿਸ੍ਸਾਯ ਬਹੂਨਿ ਦਸ੍ਸਨਮੂਲਾਨਿ ਅਕੁਸਲਾਨਿ ਉਪ੍ਪਜ੍ਜਨ੍ਤਿ. ਏਸ ਨਯੋ ਸੋਤਸਮ੍ਪਦਾਦੀਸੁ ¶ . ਤਥਾ ਹਤ੍ਥਸਮ੍ਪਦਂ ਪਾਦਸਮ੍ਪਦਂ ਸਤ੍ਥਸਮ੍ਪਦਂ ਆਵੁਧਸਮ੍ਪਦਨ੍ਤਿਆਦਿਨਾਪਿ ਵਤ੍ਤਬ੍ਬੋ. ਏਵਂ ਉਪਨਿਸ੍ਸਯੋ ਤਿਵਿਧੋ ਹੋਤਿ.

ਇਧ ਸੁਤ੍ਤਨ੍ਤੂਪਨਿਸ੍ਸਯੋਪਿ ਵਤ੍ਤਬ੍ਬੋ. ਕਲ੍ਯਾਣਮਿਤ੍ਤਂ ਉਪ ਨਿਸ੍ਸਾਯ ਪਾਪਮਿਤ੍ਤਂ ਉਪਨਿਸ੍ਸਾਯ ਗਾਮਂ ਉਪਨਿਸ੍ਸਾਯ ਅਰਞ੍ਞਂ ਉਪਨਿਸ੍ਸਾਯਾਤਿਆਦਿਨਾ ਬਹੂਸੁ ਠਾਨੇਸੁ ਆਗਤੋ. ਅਪਿ ਚ ਪਞ੍ਚਨਿਯਾਮਧਮ੍ਮਾ ਸਤ੍ਤਲੋਕ ਸਙ੍ਖਾਰਲੋਕ ਓਕਾਸਲੋਕ ਸਙ੍ਖਾਤਾਨਂ ਤਿਣ੍ਣਂ ਲੋਕਾਨਂ ਅਵਿਚ੍ਛਿਨ੍ਨਪ੍ਪਵਤ੍ਤਿਯਾ ਬਲਵਪਚ੍ਚਯਾ ਹੋਨ੍ਤਿ. ਅਯਞ੍ਚ ਅਤ੍ਥੋ ਨਿਯਾਮਦੀਪਨਿਯਂ ਅਮ੍ਹੇਹਿ ਵਿਤ੍ਥਾਰਤੋ ਦੀਪਿਤੋਤਿ.

ਕੇਨਟ੍ਠੇਨ ਆਰਮ੍ਮਣੂਪਨਿਸ੍ਸਯੋਤਿ. ਅਧਿਪਤਿਭੂਤਂ ਆਰਮ੍ਮਣਮੇਵ ਆਰਮ੍ਮਣਿਕਧਮ੍ਮਾਨਂ ਬਲਵਨਿਸ੍ਸਯਟ੍ਠੇਨ ਆਰਮ੍ਮਣੂਪ ਨਿਸ੍ਸਯੋ.

ਕੇਨਟ੍ਠੇਨ ਅਨਨ੍ਤਰੂਪਨਿਸ੍ਸਯੋਤਿ. ਪੁਰਿਮਂ ਅਨਨ੍ਤਰਚਿਤ੍ਤਮੇਵ ਪਚ੍ਛਿਮਸ੍ਸ ਅਨਨ੍ਤਰਚਿਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯ ਬਲਵਨਿਸ੍ਸਯਟ੍ਠੇਨ ਅਨਨ੍ਤਰੂਪਨਿਸ੍ਸਯੋ. ਮਾਤਾ ਵਿਯ ਪੁਰਿਮਚਿਤ੍ਤਂ, ਪੁਤ੍ਤੋ ਵਿਯ ਪਚ੍ਛਿਮਚਿਤ੍ਤਂ. ਯਥਾ ਮਾਤਾ ਅਤ੍ਤਨੋ ਅਨਨ੍ਤਰੇ ਪੁਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯ ਬਲਵੂਪ ਨਿਸ੍ਸਯੋ ਹੋਤਿ, ਤਥਾ ਪੁਰਿਮਚਿਤ੍ਤਂ ਪਚ੍ਛਿਮਚਿਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯਾਤਿ.

ਕੇਨਟ੍ਠੇਨ ਪਕਤੂਪਨਿਸ੍ਸਯੋਤਿ. ਪਕਤਿਯਾਵ ਲੋਕੇ ਪਣ੍ਡਿਤਾਨਂ ਪਾਕਟੋ ਉਪਨਿਸ੍ਸਯੋ ਪਕਤੂਪਨਿਸ੍ਸਯੋ.

ਏਤ੍ਥ ਚ ਅਨਨ੍ਤਰੂਪਨਿਸ੍ਸਯਾਨੁਭਾਵੋ ਅਨਨ੍ਤਰਚਿਤ੍ਤੇ ਏਵ ਫਰਤਿ. ਪਕਤੂਪਨਿਸ੍ਸਯਾਨੁਭਾਵੋ ਪਨ ਦੂਰੇਪਿ ਫਰਤਿਯੇਵ. ਤਥਾ ਹਿ ਇਮਸ੍ਮਿਂ ਭਵੇ ਪੁਰਿਮੇਸੁ ਦਿਵਸੇਸੁ ਵਾ ਮਾਸੇਸੁ ਵਾ ਸਂਵਚ੍ਛਰੇਸੁ ਵਾ ਦਿਟ੍ਠਸੁਤਘਾਯਿਤਸਾਯਿਤਫੁਸਿਤਵਿਞ੍ਞਾਤਾਨਿ ਆਰਮ੍ਮਣਾਨਿ ਪਚ੍ਛਾਤਥਾਰੂਪੇ ਪਚ੍ਚਯੇ ਸਤਿ ਵਸ੍ਸਸਤੇਪਿ ਮਨੋਦ੍ਵਾਰੇ ਆਪਾਤਂ ਆਗਚ੍ਛਨ੍ਤਿ. ਇਦਂ ਨਾਮ ਪੁਬ੍ਬੇ ਮਯਾ ਦਿਟ੍ਠਂ ਸੁਤਨ੍ਤਿਆਦਿਨਾ ਸਤ੍ਤਾ ਅਨੁਸ੍ਸਰਨ੍ਤਿ. ਓਪਪਾਤਿਕਸਤ੍ਤਾ ਪਨ ਪੁਰਿਮਭਵਂਪਿ ਅਨੁਸ੍ਸਰਨ੍ਤਿ. ਤਥਾ ਮਨੁਸ੍ਸੇਸੁਪਿ ਅਪ੍ਪੇਕਚ੍ਚੇ ਜਾਤਿਸ੍ਸਰਸਞ੍ਞਾਲਾਭਿਨੋ. ਤਥਾ ਪੁਬ੍ਬੇ ਅਨੇਕਸਤਸਹਸ੍ਸੇਸੁ ਦਿਟ੍ਠਾਦੀਸੁ ਵਤ੍ਥੂਸੁ ਪਚ੍ਛਾ ਏਕਸ੍ਮਿਂ ਖਣੇ ਏਕਂ ਵਤ੍ਥੁਂ ਦਿਸ੍ਵਾ ਵਾ ਸੁਤ੍ਵਾ ਵਾ ਤਸ੍ਮਿਂ ਏਵ ਖਣੇ ਬਹੂਸੁਪਿ ਤੇਸੁ ਮਨੋਵਿਞ੍ਞਾਣਸਨ੍ਤਾਨਂ ਫਰਮਾਨਂ ਪਵਤ੍ਤਤੀਤਿ. ਉਪਨਿਸ੍ਸਯਪਚ੍ਚਯ ਦੀਪਨਾ ਨਿਟ੍ਠਿਤਾ.

ਤਿਵਿਧੋ ਪੁਰੇਜਾਤਪਚ੍ਚਯੋ. ਵਤ੍ਥੁਪੁਰੇਜਾਤਪਚ੍ਚਯੋ ਚ ਆਰਮ੍ਮਣਪੁਰੇਜਾਤਪਚ੍ਚਯੋ ਚ ਵਤ੍ਥਾਰਮ੍ਮਣਪੁਰੇਜਾਤਪਚ੍ਚਯੋ ਚ.

ਤਤ੍ਥ ¶ ਵਤ੍ਥੁਪੁਰੇਜਾਤੋ ਚ ਵਤ੍ਥਾਰਮ੍ਮਣਪੁਰੇਜਾਤੋ ਚ ਪੁਬ੍ਬੇ ਨਿਸ੍ਸਯਪਚ੍ਚਯੇ ਨਿਸ੍ਸਯਨਾਮੇਨ ਵੁਤ੍ਤਾ ਏਵ.

ਆਰਮ੍ਮਣਪੁਰੇਜਾਤੋ ਨਾਮ ਪਚ੍ਚੁਪ੍ਪਨ੍ਨਾਨਿ ਅਟ੍ਠਾਰਸਨਿਪ੍ਫਨ੍ਨਰੂਪਾਨਿ ਏਵ. ਤੇਸੁਪਿ ਪਚ੍ਚੁਪ੍ਪਨ੍ਨਾਨਿ ਰੂਪਸਦ੍ਦਾਦੀਨਿ ਪਞ੍ਚਾਰਮ੍ਮਣਾਨਿ ਪਞ੍ਚਨ੍ਨਂ ਪਞ੍ਚਵਿਞ੍ਞਾਣ ਵੀਥਿਚਿਤ੍ਤਾਨਂ ਨਿਯਮਤੋ ਆਰਮ੍ਮਣਪੁਰੇਜਾਤਪਚ੍ਚਯਾ ਹੋਨ੍ਤਿ. ਯਥਾ ਹਿ ਵੀਣਾਸਦ੍ਦਾ ਨਾਮ ਵੀਣਾਤਨ੍ਤੀਸੁ ਵੀਣਾਦਣ੍ਡਕੇਨ ਪਹਰਣ ਪਚ੍ਚਯਾ ਏਵ ਉਪ੍ਪਜ੍ਜਨ੍ਤਿ. ਏਵਞ੍ਚ ਸਤਿ ਤੇ ਸਦ੍ਦਾ ਪੁਰੇਜਾਤਾਹਿ ਵੀਣਾਤਨ੍ਤਿ ਵੀਣਾਦਣ੍ਡਕੇਹਿ ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਨ੍ਤਿ. ਏਵਮੇਵਂ ਪਞ੍ਚ ਵਿਞ੍ਞਾਣ ਵੀਥਿਚਿਤ੍ਤਾਨਿਪਿ ਪਞ੍ਚਸੁ ਵਤ੍ਥੁਦ੍ਵਾਰੇਸੁ ਪਞ੍ਚਨ੍ਨਂ ਆਰਮ੍ਮਣਾਨਂ ਆਪਾਤਾਗਮਨ ਪਚ੍ਚਯਾ ਏਵ ਉਪ੍ਪਜ੍ਜਨ੍ਤਿ. ਆਪਾਤਾਗਮਨਞ੍ਚ ਤੇਸਂ ਦ੍ਵਿਨ੍ਨਂ ਠਿਤਿਪਤ੍ਤਕਾਲੇ ਏਵ ਹੋਤਿ. ਨ ਕੇਵਲਞ੍ਚ ਤਸ੍ਮਿਂ ਕਾਲੇ ਤਾਨਿ ਪਞ੍ਚਾਰਮ੍ਮਣਾਨਿ ਤੇਸੁ ਪਞ੍ਚਵਤ੍ਥੂਸੁ ਏਵ ਆਪਾਤਮਾਗਚ੍ਛਨ੍ਤਿ. ਅਥ ਖੋ ਭਵਙ੍ਗਮਨੋਦ੍ਵਾਰੇਪਿ ਆਪਾਤਂ ਆਗਚ੍ਛਨ੍ਤਿਯੇਵ. ਤਸ੍ਮਿਂ ਆਪਾਤਗਮਨਤ੍ਤਾ ਏਵ ਤਂ ਭਵਙ੍ਗਮ੍ਪਿ ਦ੍ਵਿਕ੍ਖਤ੍ਤੁਂ ਚਲਿਤ੍ਵਾ ਉਪਚ੍ਛਿਜ੍ਜਤਿ, ਭਵਙ੍ਗੁਪਚ੍ਛੇਦੇ ਏਵ ਤਾਨਿ ਵੀਥਿਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਏਵਞ੍ਚ ਸਤਿ ਤਾਨਿ ਵੀਥਿਚਿਤ੍ਤਾਨਿ ਪੁਰੇਜਾਤੇਹਿ ਵਤ੍ਥੁ ਦ੍ਵਾਰਾਰਮ੍ਮਣੇਹਿ ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਨ੍ਤੀਤਿ. ਤਾਨਿ ਪਨ ਸਬ੍ਬਾਨਿਪਿ ਅਟ੍ਠਾਰਸਨਿਪ੍ਫਨ੍ਨਰੂਪਾਨਿ ਨਿਰੁਦ੍ਧਾਨਿ ਹੁਤ੍ਵਾ ਅਤੀਤਾਨਿਪਿ ਹੋਨ੍ਤਿ, ਅਨੁਪ੍ਪਨ੍ਨਾਨਿ ਹੁਤ੍ਵਾ ਅਨਾਗਤਾਨਿਪਿ ਹੋਨ੍ਤਿ. ਉਪ੍ਪਨ੍ਨਾਨਿ ਹੁਤ੍ਵਾ ਪਚ੍ਚੁਪ੍ਪਨ੍ਨਾਨਿਪਿ ਹੋਨ੍ਤਿ. ਸਬ੍ਬਾਨਿਪਿ ਮਨੋਵਿਞ੍ਞਾਣਵੀਥਿਚਿਤ੍ਤਾਨਂ ਆਰਮ੍ਮਣਾਨਿ ਹੋਨ੍ਤਿ. ਤੇਸੁ ਪਚ੍ਚੁਪ੍ਪਨ੍ਨਾਨਿ ਏਵ ਤੇਸਂ ਆਰਮ੍ਮਣਪੁਰੇਜਾਤਪਚ੍ਚਯਾ ਹੋਨ੍ਤਿ. ਯਦਾ ਦੂਰੇ ਵਾ ਪਟਿਚ੍ਛਨ੍ਨੇ ਵਾ ਠਿਤਂ ਤਂ ਤਂ ਆਰਮ੍ਮਣਵਤ੍ਥੁਂ ਮਨਸਾ ਏਵ ਆਰਮ੍ਮਣਂ ਕਰੋਤਿ, ਤਦਾ ਤਂ ਤਂ ਵਤ੍ਥੁ ਸਚੇ ਤਤ੍ਥ ਤਤ੍ਥ ਵਿਜ੍ਜਮਾਨਂ ਹੋਤਿ, ਪਚ੍ਚੁਪ੍ਪਨ੍ਨਂ ਨਾਮ ਹੋਤਿ. ਪੁਰੇਜਾਤਪਚ੍ਚਯਦੀਪਨਾ ਨਿਟ੍ਠਿਤਾ.

ਪਚ੍ਛਿਮਂ ਪਚ੍ਛਿਮਂ ਪਚ੍ਚੁਪ੍ਪਨ੍ਨਂ ਚਿਤ੍ਤਂ ਪੁਰੇਜਾਤਸ੍ਸ ਪਚ੍ਚੁਪ੍ਪਨ੍ਨਸ੍ਸ ਚਤੁ ਸਮੁਟ੍ਠਾਨਿਕਸ੍ਸ ਰੂਪਕਾਯਸ੍ਸ ਵੁਡ੍ਢਿਵਿਰੁਲ਼੍ਹਿਯਾ ਪਚ੍ਛਾਜਾਤਪਚ੍ਚਯੋ. ਯਥਾ ਤਂ ਪਚ੍ਛਿਮਵਸ੍ਸੇਸੁ ਅਨੁਵਸ੍ਸਂ ਵਸ੍ਸਮਾਨਾਨਿ ਵਸ੍ਸੋਦਕਾਨਿ ਪੁਰਿਮਵਸ੍ਸੇਸੁ ਜਾਤਾਨਂ ਰੁਕ੍ਖਪੋਤਕਾਨਂ ਵੁਡ੍ਢਿਵਿਰੁਲ਼੍ਹਿਯਾ ਪਚ੍ਛਾਜਾਤ ਪਚ੍ਚਯਾ ਹੋਨ੍ਤੀਤਿ.

ਤਤ੍ਥ ਪਚ੍ਛਿਮਂ ਪਚ੍ਛਿਮਂ ਚਿਤ੍ਤਨ੍ਤਿ ਪਠਮਭਵਙ੍ਗਤੋ ਪਟ੍ਠਾਯ ਯਾਵ ਚੁਤਿ ਚਿਤ੍ਤਾ ਸਬ੍ਬਂ ਚਿਤ੍ਤਂ ਵੁਚ੍ਚਤਿ. ਪੁਰੇਜਾਤਸ੍ਸਾਤਿ ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਂ ਕਮ੍ਮਜਰੂਪਕਾਯਂ ਆਦਿਂ ਕਤ੍ਵਾ ਅਜ੍ਝਤ੍ਤਸਨ੍ਤਾਨਪਰਿਯਾਪਨ੍ਨੋ ਸਬ੍ਬੋ ਚਤੁਸਮੁਟ੍ਠਾਨਿਕਰੂਪਕਾਯੋ ਵੁਚ੍ਚਤਿ.

ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਸ੍ਸ ਕਮ੍ਮਜਰੂਪਕਾਯਸ੍ਸ ਪਠਮ ਭਵਙ੍ਗਾਦੀਨਿ ਪਨ੍ਨਰਸਭਵਙ੍ਗਚਿਤ੍ਤਾਨਿ ਪਚ੍ਛਾਜਾਤਪਚ੍ਚਯਾ ਹੋਨ੍ਤਿ. ਪਟਿਸਨ੍ਧਿ ਚਿਤ੍ਤਂ ਪਨ ਤੇਨ ਕਾਯੇਨ ਸਹੁਪ੍ਪਨ੍ਨਤ੍ਤਾ ¶ ਪਚ੍ਛਜਾਤਂ ਨ ਹੋਤਿ. ਸੋਲ਼ਸਮਭਵਙ੍ਗਚਿਤ੍ਤਞ੍ਚ ਤਸ੍ਸ ਕਾਯਸ੍ਸ ਭਿਜ੍ਜਨਕ੍ਖੇਤ੍ਤੇ ਉਪ੍ਪਨ੍ਨਤ੍ਤਾ ਪਚ੍ਚਯੋ ਨ ਹੋਤਿ. ਤਸ੍ਮਾ ਪਨ੍ਨਰਸਭਵਙ੍ਗਚਿਤ੍ਤਾਨੀਤਿ ਵੁਤ੍ਤਂ.

ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕ੍ਖਣੇ ਪਨ ਦ੍ਵੇ ਰੂਪਕਾਯਾ ਉਪ੍ਪਜ੍ਜਨ੍ਤਿ ਕਮ੍ਮਜਰੂਪਕਾਯੋ ਚ ਉਤੁਜਰੂਪਕਾਯੋਚ. ਤਥਾ ਭਙ੍ਗਕ੍ਖਣੇਪਿ. ਪਠਮਭਵਙ੍ਗਸ੍ਸ ਉਪ੍ਪਾਦਕ੍ਖਣੇ ਪਨ ਤਯੋ ਰੂਪਕਾਯਾ ਉਪ੍ਪਜ੍ਜਨ੍ਤਿ ਕਮ੍ਮਜਰੂਪਕਾਯੋ ਚ ਉਤੁਜਰੂਪਕਾਯੋ ਚ ਚਿਤ੍ਤਜਰੂਪਕਾਯੋ ਚ. ਯਦਾ ਬਹਿਦ੍ਧਾਹਾਰਪ੍ਫਰਣਂ ਲਭਿਤ੍ਵਾ ਅਜ੍ਝਤ੍ਤਾਹਾਰੋ ਆਹਾਰਜਰੂਪਕਾਯਂ ਜਨੇਤਿ, ਤਤੋ ਪਟ੍ਠਾਯ ਚਤੁਸਮੁਟ੍ਠਾਨਿਕਾ ਚਤ੍ਤਾਰੋ ਰੂਪਕਾਯਾ ਦੀਪ ਜਾਲਾ ਵਿਯ ਪਵਤ੍ਤਨ੍ਤਿ. ਤੇ ਉਪ੍ਪਾਦਕ੍ਖਣਂ ਅਤਿਕ੍ਕਮ੍ਮ ਯਾਵ ਠਿਤਿਭਾਵੇਨ ਧਰਨ੍ਤਿ, ਤਾਵ ਪਨ੍ਨਰਸਚਿਤ੍ਤਾਨਿ ਤੇਸਂ ਕਾਯਾਨਂ ਪਚ੍ਛਾਜਾਤਪਚ੍ਚਯਾ ਹੋਨ੍ਤਿਯੇਵ.

ਵੁਡ੍ਢਿਵਿਰੁਲ਼੍ਹਿਯਾਤਿ ਚਤੁਸਮੁਟ੍ਠਾਨਿਕਰੂਪਸਨ੍ਤਤਿਯਾ ਉਪਰੂਪਰਿ ਵੁਡ੍ਢਿਯਾ ਚ ਵਿਰੁਲ਼੍ਹਿਯਾ ਚ. ਤਥਾਹਿ ਪੁਰਿਮਾ ਪੁਰਿਮਾ ਚਤ੍ਤਾਰੋ ਰੂਪਕਾਯਾ ਸਚੇ ਪਚ੍ਛਾਜਾਤ ਪਚ੍ਚਯਂ ਪੁਨਪ੍ਪੁਨਂ ਲਭਨ੍ਤਿ, ਏਵਂ ਸਤਿ ਤੇ ਨਿਰੁਜ੍ਝਨ੍ਤਾਪਿ ਪਚ੍ਛਾਰੂਪਸਨ੍ਤਤਿਪਰਮ੍ਪਰਾਨਂ ਵੁਡ੍ਢਿਯਾ ਚ ਵਿਰੁਲ਼੍ਹਿਯਾ ਚ ਵੇਪੁਲ੍ਲਾਯ ਚ ਬਲਵ ਪਚ੍ਚਯਾ ਹੁਤ੍ਵਾ ਨਿਰੁਜ੍ਝਨ੍ਤੀਤਿ. ਪਚ੍ਛਾਜਾਤਪਚ੍ਚਯਦੀਪਨਾ ਨਿਟ੍ਠਿਤਾ.

ਦ੍ਵਾਦਸ ਅਕੁਸਲਚਿਤ੍ਤਾਨਿ ਸਤ੍ਤਰਸ ਲੋਕਿਯਕੁਸਲ ਚਿਤ੍ਤਾਨਿ ਆਵਜ੍ਜਨਦ੍ਵਯਵਜ੍ਜਿਤਾਨਿ ਅਟ੍ਠਾਰਸਕਿਰਿਯਚਿਤ੍ਤਾਨੀਤਿ ਸਤ੍ਤ ਚਤ੍ਤਾਲੀਸਂ ਲੋਕਿਯਜਵਨਚਿਤ੍ਤਾਨਿ ਆਸੇਵਨਪਚ੍ਚਯੋ. ਤੇਸੁ ਨਿਰਨ੍ਤਰਪ੍ਪਵਤ੍ਤਂ ਜਵਨਸਨ੍ਤਤਿਂ ਪਤ੍ਵਾ ਪੁਰਿਮਂ ਪੁਰਿਮਂ ਜਵਨਚਿਤ੍ਤਂ ਆਸੇਵਨ ਪਚ੍ਚਯੋ. ਚਤੂਹਿ ਮਗ੍ਗਚਿਤ੍ਤੇਹਿ ਪਚ੍ਛਿਮਂ ਪਚ੍ਛਿਮਂ ਚਿਤ੍ਤਂ ਆਸੇਵਨਪਚ੍ਚਯੁਪ੍ਪਨ੍ਨਂ.

ਕੇਨਟ੍ਠੇਨ ਆਸੇਵਨਨ੍ਤਿ. ਉਪਰੂਪਰਿਪਗੁਣਭਾਵਵਡ੍ਢਨਤ੍ਥਂਥਾਮ ਬਲਵਡ੍ਢਨਤ੍ਥਞ੍ਚ ਪਰਿਵਾਸਗ੍ਗਾਹਾਪਨਟ੍ਠੇਨ.

ਤਤ੍ਥ ਪਗੁਣਭਾਵੋਤਿ ਪੁਨਪ੍ਪੁਨਂ ਸਜ੍ਝਾਯਿਤਸ੍ਸ ਪਾਲ਼ਿਪਾਠਸ੍ਸ ਸੁਖੇਨ ਪਵਤ੍ਤਨਂ ਵਿਯ ਜਵਨਟ੍ਠਾਨਜਵਨਕਿਚ੍ਚਸਙ੍ਖਾਤੇ ਠਾਨਕਿਚ੍ਚਵਿਸੇਸੇ ਪਚ੍ਛਿਮ ਪਚ੍ਛਿਮਚਿਤ੍ਤਸ੍ਸ ਸੁਖੇਨ ਪਵਤ੍ਤਨਂ. ਪਰਿਵਾਸੋ ਨਾਮ ਕੋਸੇਯ੍ਯਵਤ੍ਥਂ ਪੁਨਪ੍ਪੁਨਂ ਸੁਗਨ੍ਧੇਨ ਪਰਿਵਾਸਨਂ ਵਿਯ ਚਿਤ੍ਤਸਨ੍ਤਾਨੇ ਪੁਨਪ੍ਪੁਨ੍ਨਂ ਰਜ੍ਜਨਦੁਸ੍ਸਨਾਦਿਨਾ ਵਾ ਅਰਜ੍ਜਨ ਅਦੁਸ੍ਸਨਾਦਿਨਾ ਵਾ ਪਰਿਵਾਸਨਂ. ਪੁਰਿਮਸ੍ਮਿਂ ਜਵਨਚਿਤ੍ਤੇ ਨਿਰੁਦ੍ਧੇਪਿ ਤਸ੍ਸ ਜਵਨਵੇਗੋ ਨ ਨਿਰੁਜ੍ਝਤਿ, ਪਚ੍ਛਿਮਂ ਚਿਤ੍ਤਸਨ੍ਤਾਨਂ ਫਰਮਾਨੋ ਪਵਤ੍ਤਤਿਯੇਵ. ਤਸ੍ਮਾ ਪਚ੍ਛਿਮਂ ਪਚ੍ਛਿਮਂ ਜਵਨਚਿਤ੍ਤਂ ਉਪ੍ਪਜ੍ਜਮਾਨਂ ਤੇਨ ਵੇਗੇਨ ਪਗ੍ਗਹਿਤਂ ਬਲਵਤਰਂ ਹੁਤ੍ਵਾ ਉਪ੍ਪਜ੍ਜਤਿ. ਏਵਂ ¶ ਪੁਰਿਮਚਿਤ੍ਤਂ ਅਤ੍ਤਨੋ ਪਰਿਵਾਸਂ ਪਚ੍ਛਿਮਚਿਤ੍ਤਂ ਗਣ੍ਹਾਪੇਤਿ. ਪਚ੍ਛਿਮਞ੍ਚ ਚਿਤ੍ਤਂ ਪੁਰਿਮਸ੍ਸ ਚਿਤ੍ਤਸ੍ਸ ਪਰਿਵਾਸਂ ਗਹੇਤ੍ਵਾ ਪਵਤ੍ਤਤਿ. ਏਵਂ ਸਨ੍ਤੇਪਿ ਸੋ ਆਸੇਵਨਵੇਗੋ ਪਕਤਿਯਾ ਸਤ੍ਤਹਿ ਚਿਤ੍ਤਵਾਰੇਹਿ ਪਰਿਕ੍ਖਯਂ ਗਚ੍ਛਤਿ, ਤਤੋ ਪਰਂ ਤਦਾਰਮ੍ਮਣਵਿਪਾਕ ਚਿਤ੍ਤਂ ਵਾ ਉਪ੍ਪਜ੍ਜਤਿ, ਭਵਙ੍ਗ ਚਿਤ੍ਤਵਾਰੋ ਵਾ ਪਵਤ੍ਤਤਿ.

ਇਧ ਸੁਤ੍ਤਨ੍ਤਾਸੇਵਨਪਚ੍ਚਯੋਪਿ ਵਤ੍ਤਬ੍ਬੋ. ਸਤਿਪਟ੍ਠਾਨਂ ਭਾਵੇਤਿ, ਸਮ੍ਮਪ੍ਪਧਾਨਂ ਭਾਵੇਤਿ, ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ, ਧਮ੍ਮ ਵਿਚਯਸਮ੍ਬੋਜ੍ਝਙ੍ਗਂ ਭਾਵੇਤਿ, ਸਮ੍ਮਾਦਿਟ੍ਠਿਂ ਭਾਵੇਤਿ, ਸਮ੍ਮਾਸਙ੍ਕਪ੍ਪਂ ਭਾਵੇਤੀਤਿਆਦਿਨਾ ਬਹੂਸੁ ਠਾਨੇਸੁ ਵੁਤ੍ਤੋ. ਤਤ੍ਥ ਭਾਵੇਤੀਤਿ ਏਕਂਪਿ ਦਿਵਸਂ ਭਾਵੇਤਿ, ਸਤ੍ਤਪਿ ਦਿਵਸਾਨਿ ਭਾਵੇਤਿ, ਏਕਂਪਿ ਮਾਸਂ ਭਾਵੇਤਿ, ਸਤ੍ਤਪਿ ਮਾਸਾਨਿ ਭਾਵੇਤਿ, ਏਕਂਪਿ ਸਂਵਚ੍ਛਰਂ ਭਾਵੇਤਿ, ਸਤ੍ਤਪਿ ਸਂਵਚ੍ਛਰਾਨਿ ਭਾਵੇਤੀਤਿ ਅਤ੍ਥੋ.

ਪੁਰਿਮਪੁਰਿਮੇਸੁ ਭਵੇਸੁ ਆਸੇਵਿਤਾਨਿ ਭਾਵਿਤਾਨਿ ਬਹੁਲੀ ਕਤਾਨਿ ਕੁਸਲਾਨਿ ਵਾ ਅਕੁਸਲਾਨਿ ਵਾ ਪਚ੍ਛਿਮਪਚ੍ਛਿਮੇਸੁ ਭਵੇਸੁ ਬਲਵਤਰਾਨਂ ਕੁਸਲਾਨਂ ਵਾ ਅਕੁਸਲਾਨਂ ਵਾ ਉਪ੍ਪਤ੍ਤਿਯਾ ਆਸੇਵਨ ਪਚ੍ਚਯੋ.

ਕਾਲਨ੍ਤਰੇ ਵਾ ਭਵਨ੍ਤਰੇ ਵਾ ਤਾਦਿਸਾਨਂ ਕੁਸਲਾਕੁਸਲਾਨਂ ਉਪ੍ਪਤ੍ਤਿਯਾ ਪਚ੍ਚਯੋ ਉਪਨਿਸ੍ਸਯਪਚ੍ਚਯੋ ਨਾਮ. ਤੇਸਂਯੇਵ ਬਲਵਤਰਤ੍ਥਾਯ ਪਚ੍ਚਯੋ ਆਸੇਵਨਪਚ੍ਚਯੋ ਨਾਮ.

ਲੋਕੇਪਿ ਮਹਨ੍ਤੇਸੁ ਚਿਤ੍ਤਭਾਵਨਾਕਮ੍ਮੇਸੁ ਵਾਚਾ ਭਾਵਨਾਕਮ੍ਮੇਸੁ ਕਾਯਭਾਵਨਾਕਮ੍ਮੇਸੁ ਅਙ੍ਗਪਚ੍ਚਙ੍ਗਭਾਵਨਾਕਮ੍ਮੇਸੁ ਕਮ੍ਮਾਯਤਨਸਿਪ੍ਪਾਯਤਨਵਿਜ੍ਜਾਠਾਨੇਸੁ ਚ ਆਸੇਵਨਾ ਭਾਵਨਾ ਬਹੁਲੀਕਮ੍ਮਾਨਂ ਨਿਸ੍ਸਨ੍ਦਗੁਣਾ ਨਾਮ ਸਨ੍ਦਿਸ੍ਸਨ੍ਤਿਯੇਵ.

ਸਬ੍ਬੇਸਂ ਖਣਿਕਧਮ੍ਮਾਨਂ ਮਜ੍ਝੇ ਏਵਰੂਪਸ੍ਸ ਆਸੇਵਨ ਪਚ੍ਚਯਸ੍ਸ ਵਿਜ੍ਜਮਾਨਤ੍ਤਾ ਪੁਰਿਸਬਲਪੁਰਿਸਥਾਮਾਨਂ ਉਪਰੂਪਰਿ ਵਡ੍ਢਨ ਵਸੇਨ ਚਿਰਕਾਲਂ ਪਵਤ੍ਤਿਤਾਨਿ ਪੁਰਿਸਕਮ੍ਮਾਨਿ ਨਿਪ੍ਫਤ੍ਤਿਂ ਪਾਪੁਣਨ੍ਤਿ, ਸਬ੍ਬਞ੍ਞੁਬੁਦ੍ਧਭਾਵਂਪਿ ਗਚ੍ਛਨ੍ਤਿ. ਆਸੇਵਨਪਚ੍ਚਯਦੀਪਨਾ ਨਿਟ੍ਠਿਤਾ.

ਦੁਵਿਧੋ ਕਮ੍ਮਪਚ੍ਚਯੋ ਸਹਜਾਤਕਮ੍ਮਪਚ੍ਚਯੋ ਨਾਨਾਕ੍ਖਣਿਕ ਕਮ੍ਮਪਚ੍ਚਯੋ.

ਤਤ੍ਥ ਖਣਤ੍ਤਯਸਮਙ੍ਗਿ ਭੂਤਾ ਸਬ੍ਬਾਪਿ ਕੁਸਲਾਕੁਸਲਾ ਬ੍ਯਾਕਤਚੇਤਨਾ ਸਹਜਾਤਕਮ੍ਮ ਪਚ੍ਚਯੋ. ਚੇਤਨਾਸਮ੍ਪਯੁਤ੍ਤਾ ਸਬ੍ਬੇਪਿ ਚਿਤ੍ਤਚੇਤਸਿਕਾ ਧਮ੍ਮਾਚ ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਾ ਕਮ੍ਮਜਰੂਪਧਮ੍ਮਾ ਚ ਪਵਤ੍ਤਿਕਾਲੇ ਸਬ੍ਬੇਪਿ ਚਿਤ੍ਤਜਰੂਪਧਮ੍ਮਾ ਚ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ.

ਅਤੀਤਾ ¶ ਕੁਸਲਾਕੁਸਲਚੇਤਨਾ ਨਾਨਾਕ੍ਖਣਿਕਕਮ੍ਮ ਪਚ੍ਚਯੋ. ਬਾਤ੍ਤਿਂਸਵਿਧਾ ਲੋਕਿਯਵਿਪਾਕ ਚਿਤ੍ਤਚੇਤਸਿਕਾ ਧਮ੍ਮਾ ਚ ਸਬ੍ਬੇ ਕਮ੍ਮਜਰੂਪਧਮ੍ਮਾ ਚ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਕਮ੍ਮਨ੍ਤਿ. ਕਿਰਿਯਾਵਿਸੇਸਟ੍ਠੇਨ ਕਮ੍ਮਂ. ਚੇਤਨਾ ਹਿ ਕਿਰਿਯਾ ਵਿਸੇਸੋ ਹੋਤਿ ਸਬ੍ਬਕਮ੍ਮੇਸੁ ਜੇਟ੍ਠਕਤ੍ਤਾ. ਤਾ ਹਿ ਸਬ੍ਬੇਸੁ ਕਾਯਵਚੀਮਨੋਕਮ੍ਮੇਸੁ ਪਚ੍ਚੁਪਟ੍ਠਿਤੇਸੁ ਤਸ੍ਸ ਤਸ੍ਸ ਕਮ੍ਮਸ੍ਸ ਨਿਪ੍ਫਤ੍ਤਤ੍ਥਾਯ ਸਮ੍ਪਯੁਤ੍ਤਧਮ੍ਮੇ ਚੇਤੇਤਿ ਕਪ੍ਪੇਤਿ ਸਂਵਿਦਹਤਿ, ਏਕਤੋ ਉਟ੍ਠਾਪੇਤਿ, ਤਸ੍ਮਾ ਸਬ੍ਬਕਮ੍ਮੇਸੁ ਜੇਟ੍ਠਕਾ ਹੋਤਿ. ਇਤਿ ਕਿਰਿਯਾਵਿਸੇਸਟ੍ਠੇਨ ਕਮ੍ਮਂ ਨਾਮ. ਕਰੋਨ੍ਤਿ ਏਤੇਨਾਤਿ ਵਾ ਕਮ੍ਮਂ. ਕਿਂ ਕਰੋਨ੍ਤਿ. ਕਾਯਿਕਕਿਰਿਯਂਪਿ ਕਰੋਨ੍ਤਿ, ਵਾਚਸਿਕਕਿਰਿਯਂਪਿ ਕਰੋਨ੍ਤਿ, ਮਾਨਸਿਕਕਿਰਿਯਂਪਿ ਕਰੋਨ੍ਤਿ. ਤਤ੍ਥ ਕਾਯਿਕਕਿਰਿਯਾ ਨਾਮ ਗਮਨਠਾਨ ਨਿਸਜ੍ਜਾਦਯੋ ਅਭਿਕ੍ਕਮਨਪਟਿਕ੍ਕਮਨਾਦਯੋ ਅਨ੍ਤਮਸੋ ਅਕ੍ਖਿਦਲਾਨਂ ਉਕ੍ਖਿਪਨਨਿਕ੍ਖਿਪਨਾਨਿਪਿ. ਵਾਚਸਿਕਕਿਰਿਯਾ ਨਾਮ ਵਾਚਾਪਵਤ੍ਤਨਕਿਰਿਯਾ. ਮਾਨਸਿਕਕਿਰਿਯਾ ਨਾਮ ਸੁਚਿਨ੍ਤਿਤ ਦੁਚਿਨ੍ਤਿਤਕਿਰਿਯਾ, ਅਨ੍ਤਮਸੋ ਪਞ੍ਚ ਵਿਞ੍ਞਾਣਾਨਂ ਦਸ੍ਸਨਕਿਚ੍ਚਸਵਨਕਿਚ੍ਚਾਦੀਨਿਪਿ. ਸਬ੍ਬਾਪਿ ਇਮਾ ਕਿਰਿਯਾਯੋ ਏਤਾਯ ਚੇਤਨਾਯ ਸਤ੍ਤਾ ਕਰੋਨ੍ਤਿ, ਸਂਵਿਦਹਨ੍ਤਿ, ਤਸ੍ਮਾ ਸਾ ਚੇਤਨਾ ਕਮ੍ਮਂ ਨਾਮ.

ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਨ ਸਹ ਜਾਯਤੀਤਿ ਸਹਜਾਤਂ. ਸਹਜਾਤਞ੍ਚ ਤਂ ਕਮ੍ਮਞ੍ਚਾਤਿ ਸਹਜਾਤਕਮ੍ਮਂ. ਸਹਜਾਤਕਮ੍ਮਂ ਹੁਤ੍ਵਾ ਪਚ੍ਚਯੋ ਸਹਜਾਤਕਮ੍ਮ ਪਚ੍ਚਯੋ. ਸਹਜਾਤਕਮ੍ਮਭਾਵੇਨ ਪਚ੍ਚਯੋਤਿ ਵੁਤ੍ਤਂ ਹੋਤਿ.

ਅਞ੍ਞੋ ਕਮ੍ਮਸ੍ਸ ਉਪ੍ਪਤ੍ਤਿਕ੍ਖਣੋ ਅਞ੍ਞੋ ਵਿਪਾਕਸ੍ਸ ਉਪ੍ਪਤ੍ਤਿਕ੍ਖਣੋਤਿ ਏਵਂ ਵਿਸੁਂ ਵਿਸੁਂ ਉਪ੍ਪਤ੍ਤਿਕ੍ਖਣੋ ਏਤਸ੍ਸਾਤਿ ਨਾਨਾਕ੍ਖਣਿਕਂ. ਨਾਨਾਕ੍ਖਣਿਕਞ੍ਚ ਤਂ ਕਮ੍ਮਞ੍ਚਾਤਿ ਨਾਨਾਕ੍ਖਣਿਕਕਮ੍ਮਂ. ਨਾਨਾਕ੍ਖਣਿਕਕਮ੍ਮਂ ਹੁਤ੍ਵਾ ਪਚ੍ਚਯੋ ਨਾਨਾਕ੍ਖਣਿਕਕਮ੍ਮਪਚ੍ਚਯੋ. ਨਾਨਾਕ੍ਖਣਿਕਕਮ੍ਮਪਚ੍ਚਯਭਾਵੇਨ ਪਚ੍ਚਯੋਤਿ ਵੁਤ੍ਤਂ ਹੋਤਿ. ਅਰਿਯਮਗ੍ਗਸਮ੍ਪਯੁਤ੍ਤਾ ਚੇਤਨਾ ਅਤ੍ਤਨੋ ਨਿਰੁਦ੍ਧਾਨਨ੍ਤਰੇ ਏਵ ਅਰਿਯਫਲਵਿਪਾਕਂ ਜਨੇਤਿ, ਸਾਪਿ ਨਾਨਾਕ੍ਖਣਿਕਾ ਏਵ ਹੋਤਿ.

ਏਤ੍ਥ ਚ ਏਕਾ ਦਾਨਕੁਸਲਚੇਤਨਾ ਅਤ੍ਤਨਾ ਸਹਜਾਤਾਨਂ ਚਿਤ੍ਤਚੇਤਸਿਕਾਨਞ੍ਚ ਕਾਯਿਕਵਾਚਸਿਕਕਿਰਿਯਾਭੂਤਾਨਂ ਚਿਤ੍ਤਜਰੂਪਾਨਞ੍ਚ ਸਹਜਾਤਕਮ੍ਮਪਚ੍ਚਯੋ. ਤਾਯ ਚੇਤਨਾਯ ਆਯਤਿਂ ਕਾਲਨ੍ਤਰੇ ਉਪ੍ਪਜ੍ਜਮਾਨਸ੍ਸ ਵਿਪਾਕਕ੍ਖਨ੍ਧਸ੍ਸ ਚ ਕਮ੍ਮਜਰੂਪਕ੍ਖਨ੍ਧਸ੍ਸ ਚ ਨਾਨਾਕ੍ਖਣਿਕ ਕਮ੍ਮਪਚ੍ਚਯੋ. ਏਵਂ ਏਕਾ ਕਮ੍ਮਪਥਪਤ੍ਤਾ ਸੁਚਰਿਤਦੁਚ੍ਚਰਿਤਚੇਤਨਾ ਦ੍ਵੀਸੁ ਕਾਲੇਸੁਦ੍ਵਿਨ੍ਨਂ ਪਚ੍ਚਯੁਪ੍ਪਨ੍ਨਾਨਂ ਦ੍ਵੀਹਿ ਪਚ੍ਚਯਸਤ੍ਤੀਹਿ ਪਚ੍ਚਯੋ ਹੋਤੀਤਿ.

ਏਤ੍ਥ ਚ ਨਾਨਾਕ੍ਖਣਿਕਕਮ੍ਮਪਚ੍ਚਯੇ ਕਮ੍ਮਨ੍ਤਿ ਕਿਰਿਯਾਵਿਸੇਸੋ. ਸੋ ਪਨ ਚੇਤਨਾਯ ਨਿਰੁਦ੍ਧਾਯਪਿ ਅਨਿਰੁਜ੍ਝਿਤ੍ਵਾ ਤਂ ਚਿਤ੍ਤਸਨ੍ਤਾਨਂ ਅਨੁਗਚ੍ਛਤਿਯੇਵ. ਯਦਾ ¶ ਵਿਪਚ੍ਚਿਤੁਂ ਓਕਾਸਂ ਲਭਤਿ, ਤਦਾ ਸੋ ਕਿਰਿਯਾ ਵਿਸੇਸੋ ਚੁਤਿਨਨ੍ਤਰੇ ਏਕੋ ਅਤ੍ਤਭਾਵੋ ਹੁਤ੍ਵਾ ਵਿਪਚ੍ਚਤਿ ਪਾਤੁਭਵਤਿ. ਓਕਾਸਂ ਪਨ ਅਲਭਮਾਨਾ ਭਵਸਤਂਪਿ ਭਵਸਹਸ੍ਸਂਪਿ ਭਵਸਤਸਹਸ੍ਸਂਪਿ ਤਂ ਸਨ੍ਤਾਨਂ ਅਨੁਗਚ੍ਛਤਿਯੇਵ. ਮਹਗ੍ਗਤਕਮ੍ਮਂ ਪਨ ਲਦ੍ਧੋਕਾਸੇ ਸਤਿ ਦੁਤਿਯਭਵੇ ਬ੍ਰਹ੍ਮਲੋਕੇ ਏਕੋ ਬ੍ਰਹ੍ਮਤ੍ਤਭਾਵੋ ਹੁਤ੍ਵਾ ਵਿਪਚ੍ਚਤਿ ਪਾਤੁਭਵਤਿ. ਸੁਪਰਿਪਕ੍ਕਕਮ੍ਮਤ੍ਤਾ ਪਨ ਦੁਤਿਯਭਵੇਯੇਵ ਖੀਯਤਿ, ਤਤੋ ਪਰਂ ਨਾਨੁਗਚ੍ਛਤੀਤਿ. ਕਮ੍ਮਪਚ੍ਚਯਦੀਪਨਾ ਨਿਟ੍ਠਿਤਾ.

ਛਤ੍ਤਿਂਸਵਿਧਾ ਵਿਪਾਕਭੂਤਾ ਸਹਜਾਤਚਿਤ੍ਤਚੇਤਸਿਕਾ ਧਮ੍ਮਾ ਵਿਪਾਕ ਪਚ੍ਚਯੋ. ਤੇਯੇਵ ਅਞ੍ਞਮਞ੍ਞਞ੍ਚ ਪਟਿਸਨ੍ਧਿਕ੍ਖਣੇ ਕਮ੍ਮਜਰੂਪਾਨਿ ਚ ਪਵਤ੍ਤਿਕ੍ਖਣੇ ਵਿਪਾਕ ਚਿਤ੍ਤਜਾਤਾਨਿ ਚਿਤ੍ਤਜਰੂਪਾਨਿ ਚ ਵਿਪਾਕਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਵਿਪਾਕੋਤਿ. ਵਿਪਚ੍ਚਨਟ੍ਠੇਨ ਵਿਪਾਕੋ. ਵਿਪਚ੍ਚਨਂ ਨਾਮ ਮੁਦੁਤਰੁਣਭਾਵਂ ਅਤਿਕ੍ਕਮ੍ਮ ਵਿਪਕ੍ਕਭਾਵਂ ਆਪਜ੍ਜਨਂ. ਕਸ੍ਸ ਪਨ ਧਮ੍ਮਸ੍ਸ ਮੁਦੁਤਰੁਣਭਾਵੋ, ਕਸ੍ਸ ਵਿਪਕ੍ਕਭਾਵੋਤਿ. ਨਾਨਾਕ੍ਖਣਿਕਕਮ੍ਮਪਚ੍ਚਯ ਸਙ੍ਖਾਤਸ੍ਸ ਅਤੀਤਕਮ੍ਮਸ੍ਸ ਮੁਦੁਤਰੁਣਭਾਵੋ, ਤਸ੍ਸੇਵ ਕਮ੍ਮਸ੍ਸ ਵਿਪਕ੍ਕਭਾਵੋ.

ਤਤ੍ਥ ਏਕਸ੍ਸ ਕਮ੍ਮਸ੍ਸ ਚਤਸ੍ਸੋ ਅਵਤ੍ਥਾਯੋ ਹੋਨ੍ਤਿ ਚੇਤਨਾ ਵਤ੍ਥਾ ਕਮ੍ਮਾਵਤ੍ਥਾ ਨਿਮਿਤ੍ਤਾਵਤ੍ਥਾ ਵਿਪਾਕਾਵਤ੍ਥਾਤਿ.

ਤਤ੍ਥ ਤਾਯ ਚੇਤਨਾਯ ਨਿਰੁਦ੍ਧਾਯਪਿ ਤਸ੍ਸਾ ਕਿਰਿਯਾ ਵਿਸੇਸੋ ਨ ਨਿਰੁਜ੍ਝਤਿ, ਤਂ ਚਿਤ੍ਤਸਨ੍ਤਾਨਂ ਅਨੁਗਚ੍ਛਤਿਯੇਵ. ਅਯਂ ਕਮ੍ਮਾਵਤ੍ਥਾ ਨਾਮ.

ਨਿਮਿਤ੍ਤਾਵਤ੍ਥਾਤਿ ਤਂ ਕਮ੍ਮਂ ਯਦਾ ਵਿਪਚ੍ਚਿਤੁਂ ਓਕਾਸਂ ਲਭਤਿ, ਤਦਾ ਮਰਣਾਸਨ੍ਨਕਾਲੇ ਤਸ੍ਸ ਪੁਗ੍ਗਲਸ੍ਸ ਤਮੇਵ ਕਮ੍ਮਂ ਵਾ ਪਚ੍ਚੁਪਟ੍ਠਾਤਿ, ਸੋ ਪੁਗ੍ਗਲੋ ਤਦਾ ਦਾਨਂ ਦੇਨ੍ਤੋ ਵਿਯ ਸੀਲਂ ਰਕ੍ਖਨ੍ਤੋ ਵਿਯ ਪਾਣਘਾਤਂ ਵਾ ਕਰੋਨ੍ਤੋ ਵਿਯ ਹੋਤਿ. ਕਮ੍ਮਨਿਮਿਤ੍ਤਂ ਵਾ ਪਚ੍ਚੁਪਟ੍ਠਾਤਿ, ਦਾਨ ਵਤ੍ਥੁਆਦਿਕਂ ਵਾ ਸਤ੍ਥਾਦਿਕਂ ਵਾ ਅਞ੍ਞਂ ਵਾਪਿ ਪੁਬ੍ਬੇ ਤਸ੍ਸ ਕਮ੍ਮਸ੍ਸ ਉਪਕਰਣਭੂਤਂ ਆਰਮ੍ਮਣਂ ਤਦਾ ਤਸ੍ਸ ਪੁਗ੍ਗਲਸ੍ਸ ਹਤ੍ਥਗਤਂ ਵਿਯ ਹੋਤਿ. ਗਤਿਨਿਮਿਤ੍ਤਂ ਵਾ ਪਚ੍ਚੁਪਟ੍ਠਾਤਿ, ਦਿਬ੍ਬਵਿਮਾਨਾਦਿਕਂ ਵਾ ਨਿਰਯਗ੍ਗਿਜਾਲਾਦਿਕਂ ਵਾ ਉਪ੍ਪਜ੍ਜਮਾਨਭਵੇ ਉਪਲਭਿਤਬ੍ਬਂ ਵਾ ਅਨੁਭਵਿਤਬ੍ਬਂ ਵਾ ਆਰਮ੍ਮਣਂ ਤਦਾ ਦਿਸ੍ਸਮਾਨਂ ਹੋਤਿ. ਅਯਂ ਨਿਮਿਤ੍ਤਾ ਵਤ੍ਥਾ ਨਾਮ.

ਵਿਪਾਕਾਵਤ੍ਥਾਤਿ ਸਚੇ ਸੋ ਪੁਗ੍ਗਲੋ ਤਥਾ ਪਚ੍ਚੁਪਟ੍ਠਿਤਂ ਤਂ ਕਮ੍ਮਂ ਵਾ ਕਮ੍ਮਨਿਮਿਤ੍ਤਂ ਵਾ ਗਤਿਨਿਮਿਤ੍ਤਂ ਵਾ ਏਕਂ ਆਰਮ੍ਮਣਂ ਅਮੁਞ੍ਚਮਾਨੋ ਮਰਤਿ, ਤਦਾ ਤਂ ਕਮ੍ਮਂ ਤਸ੍ਮਿਂਭਵੇ ਵਿਪਚ੍ਚਤਿ, ਤਂ ਕਮ੍ਮਂ ਤਸ੍ਮਿਂਭਵੇ ਏਕੋ ਅਤ੍ਤਭਾਵੋ ਹੁਤ੍ਵਾ ਪਾਤੁਭਵਤਿ ¶ . ਤਤ੍ਥ ਪੁਰਿਮਾਸੁ ਤੀਸੁ ਅਵਤ੍ਥਾਸੁ ਤਂ ਕਮ੍ਮਂ ਮੁਦੁਤਰੁਣਭੂਤਂ ਹੋਤਿ, ਪਚ੍ਛਿਮਂ ਪਨ ਵਿਪਾਕਾਵਤ੍ਥਂ ਪਤ੍ਵਾ ਵਿਪਕ੍ਕਭੂਤਂ ਹੋਤਿ. ਤੇਨ ਵੁਤ੍ਤਂ ਵਿਪਚ੍ਚਨਂ ਨਾਮ ਮੁਦੁਤਰੁਣਭਾਵਂ ਅਤਿਕ੍ਕਮ੍ਮ ਵਿਪਕ੍ਕਭਾਵਂ ਆਪਜ੍ਜਨਨ੍ਤਿ. ਏਵਂ ਵਿਪਕ੍ਕਭਾਵਂ ਆਪਨ੍ਨੋ ਚਿਤ੍ਤ ਚੇਤਸਿਕਧਮ੍ਮਸਮੂਹੋ ਵਿਪਾਕੋ ਨਾਮ.

ਤਤ੍ਥ ਯਥਾ ਅਮ੍ਬਪ੍ਫਲਾਨਿ ਨਾਮ ਯਦਾ ਵਿਪਕ੍ਕਭਾਵਂ ਆਪਜ੍ਜਨ੍ਤਿ, ਤਦਾ ਸਬ੍ਬਸੋ ਸਿਨਿਦ੍ਧਰੂਪਾਨਿ ਹੋਨ੍ਤਿ. ਏਵਮੇਵਂ ਵਿਪਾਕਧਮ੍ਮਾ ਨਾਮ ਨਿਰੁਸ੍ਸਾਹਾ ਨਿਬ੍ਯਾਪਾਰਾ ਹੁਤ੍ਵਾ ਸਬ੍ਬਸੋ ਸਨ੍ਤਰੂਪਾ ਹੋਨ੍ਤਿ. ਤੇਸਂ ਸਨ੍ਤਰੂਪਤ੍ਤਾਯੇਵ ਭਵਙ੍ਗਚਿਤ੍ਤਾਨਂ ਆਰਮ੍ਮਣਂ ਅਵਿਭੂਤਂ ਹੋਤਿ, ਭਵਙ੍ਗਤੋ ਵੁਟ੍ਠਾਨਕਾਲੇ ਤਂ ਆਰਮ੍ਮਣਂ ਨ ਜਾਨਾਤਿ. ਤਥਾਹਿ ਰਤ੍ਤਿਯਂ ਨਿਦ੍ਦਾਯਨ੍ਤਸ੍ਸ ਪੁਰਿਮਭਵੇ ਮਰਣਾਸਨ੍ਨਕਾਲੇ ਯਥਾਗਹਿਤਂ ਕਮ੍ਮਾਦਿਕਂ ਆਰਮ੍ਮਣਂ ਆਰਬ੍ਭ ਭਵਙ੍ਗਸੋਤਂ ਪਵਤ੍ਤਮਾਨਂਪਿ ਤਸ੍ਸ ਭਵਙ੍ਗਸੋਤਸ੍ਸ ਤਂ ਆਰਮ੍ਮਣਂ ਆਰਬ੍ਭ ਇਦਂ ਨਾਮ ਮੇ ਪੁਰਿਮਭਵੇ ਆਰਮ੍ਮਣਂ ਦਿਟ੍ਠਨ੍ਤਿ ਕਸ੍ਸਚਿ ਜਾਨਨਵੀਥਿਚਿਤ੍ਤਸ੍ਸ ਉਪ੍ਪਤ੍ਤਿਯਾ ਪਚ੍ਚਯੋ ਨ ਹੋਤਿ. ਸੋ ਪੁਗ੍ਗਲੋ ਨਿਦ੍ਦਾਯਨਕਾਲੇਪਿ ਉਟ੍ਠਾਨਕਾਲੇਪਿ ਪੁਰਿਮਭਵਸਿਦ੍ਧਂ ਤਂ ਨਿਮਿਤ੍ਤਂ ਨ ਜਾਨਾਤਿ. ਏਵਂ ਨਿਰੁਸ੍ਸਾਹਨਿਬ੍ਯਾਪਾਰਸਨ੍ਤਰੂਪ ਭਾਵੇਨ ਉਪਕਾਰਕਤਾ ਵਿਪਾਕਪਚ੍ਚਯਤਾ ਨਾਮਾਤਿ. ਵਿਪਾਕ ਪਚ੍ਚਯਦੀਪਨਾ ਨਿਟ੍ਠਿਤਾ.

ਦੁਵਿਧੋ ਆਹਾਰਪਚ੍ਚਯੋ ਰੂਪਾਹਾਰਪਚ੍ਚਯੋ ਅਰੂਪਾਹਾਰ ਪਚ੍ਚਯੋ.

ਤਤ੍ਥ ਰੂਪਾਹਾਰਪਚ੍ਚਯੋ ਨਾਮ ਕਬਲ਼ੀਕਾਰਾਹਾਰਸਙ੍ਖਾਤਂ ਓਜ ਰੂਪਂ ਵੁਚ੍ਚਤਿ. ਸੋ ਚ ਅਜ੍ਝਤ੍ਤਾਹਾਰੋ ਬਹਿਦ੍ਧਾਹਾਰੋਤਿ ਦੁਵਿਧੋ. ਕਬਲ਼ੀਕਾਰਾਹਾਰਭਕ੍ਖਾਨਂ ਸਤ੍ਤਾਨਂ ਸਬ੍ਬੇਪਿ ਚਤੁਸਮੁਟ੍ਠਾਨਿਕਰੂਪਧਮ੍ਮਾ ਤਸ੍ਸ ਦੁਵਿਧਸ੍ਸ ਰੂਪਾਹਾਰਸ੍ਸ ਪਚ੍ਚਯੁਪ੍ਪਨ੍ਨਾ.

ਅਰੂਪਾਹਾਰੋ ਪਨ ਤਿਵਿਧੋ ਫਸ੍ਸਾਹਾਰੋ ਮਨੋਸਞ੍ਚੇਤਨਾ ਹਾਰੋ ਵਿਞ੍ਞਾਣਾਹਾਰੋ ਚ. ਤਯੋਪੇਤੇ ਧਮ੍ਮਾ ਸਹਜਾਤਾਨਂ ਨਾਮਰੂਪਧਮ੍ਮਾਨਂ ਆਹਾਰਪਚ੍ਚਯੋ ਹੋਨ੍ਤਿ. ਸਹਜਾਤਾ ਚ ਨਾਮਰੂਪ ਧਮ੍ਮਾ ਤੇਸਂ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਆਹਾਰੋਤਿ. ਭੁਸਂ ਹਰਣਟ੍ਠੇਨ ਆਹਾਰੋ. ਭੁਸਂ ਹਰਣਟ੍ਠੇਨਾਤਿਚ ਦਲ਼੍ਹਂ ਪਵਤ੍ਤਾਪਨਟ੍ਠੇਨ, ਚਿਰਕਾਲਂ ਠਿਤਿਯਾ ਵੁਡ੍ਢਿਯਾ ਵਿਰੁਲ਼੍ਹਿਯਾ ਵੇਪੁਲ੍ਲਾਯ ਉਪਤ੍ਥਮ੍ਭਨਟ੍ਠੇਨਾਤਿ ਵੁਤ੍ਤਂ ਹੋਤਿ. ਜਨਨਕਿਚ੍ਚਯੁਤ੍ਤੋਪਿ ਆਹਾਰੋ ਉਪਤ੍ਥਮ੍ਭਨਕਿਚ੍ਚਪ੍ਪਧਾਨੋ ਹੋਤੀਤਿ.

ਤਤ੍ਥ ਦੁਵਿਧੋ ਰੂਪਾਹਾਰੋ ਅਜ੍ਝਤ੍ਤਸਨ੍ਤਾਨੇ ਚਤੁਸਮੁਟ੍ਠਾਨਿਕਂ ਰੂਪਕਾਯਂ ਉਪਬ੍ਰੂਹਯਨ੍ਤੋ ਭੁਸਂ ਹਰਤਿ, ਦਲ਼੍ਹਂ ਪਵਤ੍ਤੇਤਿ, ਚਿਰਂ ਅਦ੍ਧਾਨਂ ਗਮੇਤਿ, ਤਂ ਤਂ ਆਯੁਕਪ੍ਪਪਰਿਯੋਸਾਨਂ ਪਾਪੇਤੀਤਿ ਆਹਾਰੋ.

ਫਸ੍ਸਾਹਾਰੋ ¶ ਆਰਮ੍ਮਣੇਸੁ ਇਟ੍ਠਾਨਿਟ੍ਠਰਸਂ ਨੀਹਰਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ. ਮਨੋਸਞ੍ਚੇਤਨਾਹਾਰੋ ਕਾਯਵਚੀ ਮਨੋਕਮ੍ਮੇਸੁ ਉਸ੍ਸਾਹਂ ਜਨੇਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ. ਵਿਞ੍ਞਾਣਾਹਾਰੋ ਆਰਮ੍ਮਣਵਿਜਾਨਨਟ੍ਠੇਨ ਪੁਬ੍ਬਙ੍ਗਮਕਿਚ੍ਚਂ ਵਹਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ, ਦਲ਼੍ਹਂ ਪਵਤ੍ਤੇਤਿ, ਚਿਰਂ ਅਦ੍ਧਾਨਂ ਗਮੇਤੀਤਿ ਆਹਾਰੋ. ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਨ੍ਤੋ ਸਹਜਾਤਰੂਪਧਮ੍ਮੇਪਿ ਭੁਸਂ ਹਰਤਿਯੇਵ.

ਇਧ ਸੁਤ੍ਤਨ੍ਤਨਯੋਪਿ ਵਤ੍ਤਬ੍ਬੋ. ਯਥਾ ਸਕੁਣਾ ਨਾਮ ਚਕ੍ਖੂਹਿ ਦਿਸਾਵਿਦਿਸਂ ਵਿਭਾਵੇਤ੍ਵਾ ਪਤ੍ਤੇਹਿ ਰੁਕ੍ਖਤੋ ਰੁਕ੍ਖਂ ਵਨਤੋ ਵਨਂ ਆਕਾਸੇਨ ਪਕ੍ਖਨ੍ਦਿਤ੍ਵਾ ਤੁਣ੍ਡਕੇਹਿ ਫਲਾਫਲਾਨਿ ਤੁਦਿਤ੍ਵਾ ਯਾਵਜੀਵਂ ਅਤ੍ਤਾਨਂ ਯਾਪੇਨ੍ਤਿ. ਤਥਾ ਇਮੇ ਸਤ੍ਤਾ ਛਹਿ ਵਿਞ੍ਞਾਣੇਹਿ ਆਰਮ੍ਮਣਾਨਿ ਵਿਭਾਵੇਤ੍ਵਾ ਛਹਿ ਮਨੋਸਞ੍ਚੇਤਨਾਹਾਰੇਹਿ ਆਰਮ੍ਮਣਵਤ੍ਥੁਪ੍ਪਟਿਲਾਭਤ੍ਥਾਯ ਉਸ੍ਸੁਕ੍ਕਨਂ ਕਤ੍ਵਾ ਛਹਿ ਫਸ੍ਸਾਹਾਰੇਹਿ ਆਰਮ੍ਮਣੇਸੁ ਰਸਂ ਪਾਤੁਭਵਨ੍ਤਂ ਕਤ੍ਵਾ ਸੁਖਦੁਕ੍ਖਂ ਅਨੁਭਵਨ੍ਤਿ. ਵਿਞ੍ਞਾਣੇਹਿ ਵਾ ਆਰਮ੍ਮਣਾਨਿ ਵਿਭਾਵੇਤ੍ਵਾ ਨਾਮਰੂਪ ਸਮ੍ਪਤ੍ਤਿਂ ਸਾਧੇਨ੍ਤਿ. ਫਸ੍ਸੇਹਿ ਆਰਮ੍ਮਣੇਸੁ ਰਸਂ ਪਾਤੁਭਵਨ੍ਤਂ ਕਤ੍ਵਾ ਆਰਮ੍ਮਣਰਸਾਨੁਭਵਨਂ ਵੇਦਨਂ ਸਮ੍ਪਾਦੇਤ੍ਵਾ ਤਣ੍ਹਾਵੇਪੁਲ੍ਲਂ ਆਪਜ੍ਜਨ੍ਤਿ. ਚੇਤਨਾਹਿ ਤਣ੍ਹਾਮੂਲਕਾਨਿ ਨਾਨਾਕਮ੍ਮਾਨਿ ਪਸਵੇਤ੍ਵਾ ਭਵਤੋ ਭਵਂ ਸਂਸਰਨ੍ਤਿ. ਏਵਂ ਆਹਾਰਧਮ੍ਮਾਨਂ ਮਹਨ੍ਤਂ ਆਹਾਰਕਿਚ੍ਚਂ ਵੇਦਿਤਬ੍ਬਨ੍ਤਿ. ਆਹਾਰਪਚ੍ਚਯਦੀਪਨਾ ਨਿਟ੍ਠਿਤਾ.

ਤਿਵਿਧੋ ਇਨ੍ਦ੍ਰਿਯਪਚ੍ਚਯੋ ਸਹਜਾਤਿਨ੍ਦ੍ਰਿਯਪਚ੍ਚਯੋ ਪੁਰੇ ਜਾਤਿਨ੍ਦ੍ਰਿਯਪਚ੍ਚਯੋ ਰੂਪਜੀਵਿਤਿਨ੍ਦ੍ਰਿਯਪਚ੍ਚਯੋ.

ਤਤ੍ਥ ਪਨ੍ਨਰਸਿਨ੍ਦ੍ਰਿਯਧਮ੍ਮਾ ਸਹਜਾਤਿਨ੍ਦ੍ਰਿਯਪਚ੍ਚਯੋ ਨਾਮ, ਜੀਵਿਤਿਨ੍ਦ੍ਰਿਯਂ ਮਨਿਨ੍ਦ੍ਰਿਯਂ ਸੁਖਿਨ੍ਦ੍ਰਿਯਂ ਦੁਕ੍ਖਿਨ੍ਦ੍ਰਿਯਂ ਸੋਮਨਸ੍ਸਿਨ੍ਦ੍ਰਿਯਂ ਦੋਮਨਸ੍ਸਿਨ੍ਦ੍ਰਿਯਂ ਉਪੇਕ੍ਖਿਨ੍ਦ੍ਰਿਯਂ ਸਦ੍ਧਿਨ੍ਦ੍ਰਿਯਂ ਵੀਰਿਯਿਨ੍ਦ੍ਰਿਯਂ ਸਤਿਨ੍ਦ੍ਰਿਯਂ ਸਮਾਧਿਨ੍ਦ੍ਰਿਯਂ ਪਞ੍ਞਿਨ੍ਦ੍ਰਿਯਂ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਅਞ੍ਞਿਨ੍ਦ੍ਰਿਯਂ ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ. ਤੇਹਿ ਸਹਜਾਤਾ ਚਿਤ੍ਤਚੇਤਸਿਕਧਮ੍ਮਾ ਚ ਰੂਪਧਮ੍ਮਾ ਚ ਤਸ੍ਸ ਪਚ੍ਚਯੁਪ੍ਪਨ੍ਨਾ.

ਪਞ੍ਚਿਨ੍ਦ੍ਰਿਯਰੂਪਾਨਿ ਪੁਰੇਜਾਤਿਨ੍ਦ੍ਰਿਯਪਚ੍ਚਯੋ, ਚਕ੍ਖੁਨ੍ਦ੍ਰਿਯਂ ਸੋਤਿਨ੍ਦ੍ਰਿਯਂ ਘਾਨਿਨ੍ਦ੍ਰਿਯਂ ਜਿਵ੍ਹਿਨ੍ਦ੍ਰਿਯਂ ਕਾਯਿਨ੍ਦ੍ਰਿਯਂ. ਪਞ੍ਚਵਿਞ੍ਞਾਣਚਿਤ੍ਤ ਚੇਤਸਿਕ ਧਮ੍ਮਾ ਤਸ੍ਸ ਪਚ੍ਚਯੁਪ੍ਪਨ੍ਨਾ.

ਏਕਂ ਰੂਪਜੀਵਿਤਿਨ੍ਦ੍ਰਿਯਂ ਰੂਪਜੀਵਿਤਿਨ੍ਦ੍ਰਿਯਪਚ੍ਚਯੋ. ਸਬ੍ਬਾਨਿ ਕਮ੍ਮਜ ਰੂਪਾਨਿ ਜੀਵਿਤਰੂਪਵਜ੍ਜਿਤਾਨਿ ਤਸ੍ਸ ਪਚ੍ਚਯੁਪ੍ਪਨ੍ਨਾਨਿ.

ਕੇਨਟ੍ਠੇਨ ਇਨ੍ਦ੍ਰਿਯਨ੍ਤਿ. ਇਸ੍ਸਰਿਯਟ੍ਠੇਨ ਇਨ੍ਦ੍ਰਿਯਂ. ਤਤ੍ਥ ਕਤ੍ਥ ਇਸ੍ਸਰਿਯਨ੍ਤਿ. ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਸੁ ਧਮ੍ਮੇਸੁ ਇਸ੍ਸਰਿਯਂ. ਕਸ੍ਮਿਂ ਕਸ੍ਮਿਂ ਕਿਚ੍ਚੇ ਇਸ੍ਸਰਿਯਨ੍ਤਿ ¶ . ਅਤ੍ਤਨੋ ਅਤ੍ਤਨੋ ਕਿਚ੍ਚੇ ਇਸ੍ਸਰਿਯਂ. ਨਾਮਜੀਵਿਤਂ ਸਮ੍ਪਯੁਤ੍ਤਧਮ੍ਮਾਨਂ ਜੀਵਨਕਿਚ੍ਚੇ ਇਸ੍ਸਰਿਯਂ. ਜੀਵਨਕਿਚ੍ਚੇਤਿ ਆਯੁਵਡ੍ਢਨਕਿਚ੍ਚੇ, ਸਨ੍ਤਤਿਠਿਤਿਯਾ ਚਿਰਕਾਲਠਿਤਿਕਿਚ੍ਚੇਤਿ ਅਤ੍ਥੋ. ਮਨਿਨ੍ਦ੍ਰਿਯਂ ਆਰਮ੍ਮਣਗ੍ਗਹਣਕਿਚ੍ਚੇ ਸਮ੍ਪਯੁਤ੍ਤਧਮ੍ਮਾਨਂ ਇਸ੍ਸਰਿਯਂ. ਅਵਸੇਸੋ ਇਨ੍ਦ੍ਰਿਯਟ੍ਠੋ ਪੁਬ੍ਬੇ ਇਨ੍ਦ੍ਰਿਯਯਮਕਦੀਪਨਿਯਂ ਵੁਤ੍ਤੋਯੇਵ.

ਏਤ੍ਥ ਵਦੇਯ੍ਯ, ਦ੍ਵੇ ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯਧਮ੍ਮਾ ਇਨ੍ਦ੍ਰਿਯਭੂਤਾ ਸਮਾਨਾਪਿ ਕਸ੍ਮਾ ਇਨ੍ਦ੍ਰਿਯਪਚ੍ਚਯੇ ਵਿਸੁਂ ਨ ਗਹਿਤਾਤਿ. ਪਚ੍ਚਯਕਿਚ੍ਚਸ੍ਸ ਅਭਾਵਤੋ. ਤਿਵਿਧਞ੍ਹਿ ਪਚ੍ਚਯਕਿਚ੍ਚਂ ਜਨਨਕਿਚ੍ਚਞ੍ਚ ਉਪਤ੍ਥਮ੍ਭਨਕਿਚ੍ਚਞ੍ਚ ਅਨੁਪਾਲਨਕਿਚ੍ਚਞ੍ਚ. ਤਤ੍ਥ ਯੋ ਪਚ੍ਚਯੋ ਪਚ੍ਚਯੁਪ੍ਪਨ੍ਨਧਮ੍ਮਸ੍ਸ ਉਪ੍ਪਾਦਾਯ ਪਚ੍ਚਯੋ ਹੋਤਿ, ਯਸ੍ਮਿਂ ਅਸਤਿ ਪਚ੍ਚਯੁਪ੍ਪਨ੍ਨੋ ਧਮ੍ਮੋ ਨ ਉਪ੍ਪਜ੍ਜਤਿ, ਤਸ੍ਸ ਪਚ੍ਚਯਕਿਚ੍ਚਂ ਜਨਨਕਿਚ੍ਚਂ ਨਾਮ. ਯਥਾ ਅਨਨ੍ਤਰਪਚ੍ਚਯੋ. ਯੋ ਪਚ੍ਚਯੋ ਪਚ੍ਚਯੁਪ੍ਪਨ੍ਨਧਮ੍ਮਸ੍ਸ ਠਿਤਿਯਾ ਚ ਵੁਡ੍ਢਿਯਾ ਚ ਵਿਰੁਲ਼੍ਹਿਯਾ ਚ ਪਚ੍ਚਯੋ ਹੋਤਿ, ਯਸ੍ਮਿਂ ਅਸਤਿ ਪਚ੍ਚਯੁਪ੍ਪਨ੍ਨੋ ਧਮ੍ਮੋ ਨ ਤਿਟ੍ਠਤਿ ਨ ਵਡ੍ਢਤਿ ਨ ਵਿਰੂਹਤਿ, ਤਸ੍ਸ ਪਚ੍ਚਯਕਿਚ੍ਚਂ ਉਪਤ੍ਥਮ੍ਭਨਕਿਚ੍ਚਂ ਨਾਮ. ਯਥਾ ਪਚ੍ਛਾਜਾਤਪਚ੍ਚਯੋ. ਯੋ ਪਚ੍ਚਯੋ ਪਚ੍ਚਯੁਪ੍ਪਨ੍ਨਸ੍ਸ ਧਮ੍ਮਸ੍ਸ ਪਵਤ੍ਤਿਯਾ ਪਚ੍ਚਯੋ ਹੋਤਿ, ਯੇਨ ਵਿਨਾ ਪਚ੍ਚਯੁਪ੍ਪਨ੍ਨੋ ਧਮ੍ਮੋ ਚਿਰਕਾਲਂ ਨ ਪਵਤ੍ਤਤਿ, ਸਨ੍ਤਤਿ ਗਮਨਂ ਛਿਜ੍ਜਤਿ, ਤਸ੍ਸ ਪਚ੍ਚਯ ਕਿਚ੍ਚਂ ਅਨੁਪਾਲਨਕਿਚ੍ਚਂ ਨਾਮ. ਯਥਾ ਰੂਪ ਜੀਵਿਤਿਨ੍ਦ੍ਰਿਯਪਚ੍ਚਯੋ. ਏਤੇ ਪਨ ਦ੍ਵੇ ਇਨ੍ਦ੍ਰਿਯਧਮ੍ਮਾ ਤੇਸੁ ਤੀਸੁ ਪਚ੍ਚਯ ਕਿਚ੍ਚੇਸੁ ਏਕਕਿਚ੍ਚਂਪਿ ਨਸਾਧੇਨ੍ਤਿ, ਤਸ੍ਮਾ ਏਤੇ ਦ੍ਵੇ ਧਮ੍ਮਾ ਇਨ੍ਦ੍ਰਿਯ ਪਚ੍ਚਯੇ ਵਿਸੁਂ ਨ ਗਹਿਤਾਤਿ.

ਏਤਂ ਸਨ੍ਤੇ ਏਤੇ ਦ੍ਵੇ ਧਮ੍ਮਾ ਇਨ੍ਦ੍ਰਿਯਾਤਿਪਿ ਨ ਵਤ੍ਤਬ੍ਬਾਤਿ. ਨੋ ਨ ਵਤ੍ਤਬ੍ਬਾ. ਕਸ੍ਮਾ. ਇਨ੍ਦ੍ਰਿਯਕਿਚ੍ਚਸਬ੍ਭਾਵਤੋਤਿ. ਕਿਂ ਪਨ ਏਤੇਸਂ ਇਨ੍ਦ੍ਰਿਯਕਿਚ੍ਚਨ੍ਤਿ. ਲਿਙ੍ਗਨਿਮਿਤ੍ਤਕੁਤ੍ਤਆਕਪ੍ਪੇਸੁ ਇਸ੍ਸਰਤਾ ਇਨ੍ਦ੍ਰਿਯ ਕਿਚ੍ਚਂ. ਤਥਾ ਹਿ ਯਸ੍ਸ ਪੁਗ੍ਗਲਸ੍ਸ ਪਟਿਸਨ੍ਧਿਕ੍ਖਣੇ ਇਤ੍ਥਿਨ੍ਦ੍ਰਿਯਰੂਪਂ ਉਪ੍ਪਜ੍ਜਤਿ, ਤਸ੍ਸ ਸਨ੍ਤਾਨੇ ਚਤੂਹਿ ਕਮ੍ਮਾਦੀਹਿ ਪਚ੍ਚਯੇਹਿ ਉਪ੍ਪਨ੍ਨਾ ਪਞ੍ਚਕ੍ਖਨ੍ਧ ਧਮ੍ਮਾ ਇਤ੍ਥਿਭਾਵਾਯ ਪਰਿਣਮਨ੍ਤਿ, ਸੋ ਅਤ੍ਤਭਾਵੋ ਏਕਨ੍ਤੇਨ ਇਤ੍ਥਿਲਿਙ੍ਗ ਇਤ੍ਥਿਨਿਮਿਤ੍ਤ ਇਤ੍ਥਿਕੁਤ੍ਤ ਇਤ੍ਥਾਕਪ੍ਪਯੁਤ੍ਤੋ ਹੋਤਿ, ਨੋ ਅਞ੍ਞਥਾ. ਨ ਚ ਇਤ੍ਥਿਨ੍ਦ੍ਰਿਯਰੂਪਂ ਤੇ ਪਞ੍ਚਕ੍ਖਨ੍ਧਧਮ੍ਮੇ ਜਨੇਤਿ, ਨ ਚ ਉਪਤ੍ਥਮ੍ਭਤਿ, ਨਾਪਿ ਅਨੁਪਾਲੇਤਿ, ਅਥ ਖੋ ਤੇ ਧਮ੍ਮਾ ਅਤ੍ਤਨੋ ਅਤ੍ਤਨੋ ਪਚ੍ਚਯੇਹਿ ਉਪ੍ਪਜ੍ਜਮਾਨਾ ਏਵਞ੍ਚੇਵਞ੍ਚ ਉਪ੍ਪਜ੍ਜਨ੍ਤੂਤਿ ਆਣਂ ਠਪੇਨ੍ਤਂ ਵਿਯ ਤੇਸੁ ਅਤ੍ਤਨੋ ਅਨੁਭਾਵਂ ਪਵਤ੍ਤੇਤਿ. ਤੇ ਚ ਧਮ੍ਮਾ ਤਥੇਵ ਉਪ੍ਪਜ੍ਜਨ੍ਤਿ, ਨੋ ਅਞ੍ਞਥਾਤਿ. ਅਯਂ ਇਤ੍ਥਿਨ੍ਦ੍ਰਿਯਰੂਪਸ੍ਸ ਇਤ੍ਥਿਲਿਙ੍ਗਾਦੀਸੁ ਇਸ੍ਸਰਤਾ. ਏਸ ਨਯੋ ਪੁਰਿਸਿਨ੍ਦ੍ਰਿਯਰੂਪਸ੍ਸ ਪੁਰਿਸਲਿਙ੍ਗਾਦੀਸੁ ਇਸ੍ਸਰਤਾਯਂ. ਏਵਂ ਏਤੇ ਦ੍ਵੇ ਧਮ੍ਮਾ ਲਿਙ੍ਗਾਦੀਸੁ ਇਨ੍ਦ੍ਰਿਯਕਿਚ੍ਚ ਸਬ੍ਭਾਵਤੋ ਇਨ੍ਦ੍ਰਿਯਾ ਨਾਮ ਹੋਨ੍ਤੀਤਿ.

ਹਦਯਵਤ੍ਥੁਰੂਪਂ ਪਨ ਦ੍ਵਿਨ੍ਨਂ ਵਿਞ੍ਞਾਣਧਾਤੂਨਂ ਨਿਸ੍ਸਯਵਤ੍ਥੁਕਿਚ੍ਚਂ ਸਾਧਯਮਾਨਂਪਿ ਤਾਸੁ ਇਨ੍ਦ੍ਰਿਯਕਿਚ੍ਚਂ ਨ ਸਾਧੇਤਿ. ਨ ਹਿ ਭਾਵਿਤ ਚਿਤ੍ਤਸ੍ਸ ਪੁਗ੍ਗਲਸ੍ਸ ਹਦਯਰੂਪੇ ਪਸਨ੍ਨੇਵਾ ¶ ਅਪ੍ਪਸਨ੍ਨੇ ਵਾ ਜਾਤੇਪਿ ਮਨੋਵਿਞ੍ਞਾਣਧਾਤੁਯੋ ਤਦਨੁਵਤ੍ਤਿਕਾ ਹੋਨ੍ਤੀਤਿ. ਇਨ੍ਦ੍ਰਿਯ ਪਚ੍ਚਯਦੀਪਨਾ ਨਿਟ੍ਠਿਤਾ.

ਸਤ੍ਤ ਝਾਨਙ੍ਗਾਨਿ ਝਾਨਪਚ੍ਚਯੋ, ਵਿਤਕ੍ਕੋ ਵਿਚਾਰੋ ਪੀਤਿ ਸੋਮਨਸ੍ਸਂ ਦੋਮਨਸ੍ਸਂ ਉਪੇਕ੍ਖਾ ਏਕਗ੍ਗਤਾ. ਤੇਹਿ ਸਹਜਾਤਾ ਪਞ੍ਚਵਿਞ੍ਞਾਣਵਜ੍ਜਿਤਾ ਚਿਤ੍ਤਚੇਤਸਿਕਧਮ੍ਮਾ ਚ ਰੂਪਧਮ੍ਮਾ ਚ ਤਸ੍ਸ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਝਾਨਨ੍ਤਿ. ਉਪਨਿਜ੍ਝਾਯਨਟ੍ਠੇਨ ਝਾਨਂ. ਉਪਨਿਜ੍ਝਾਯ ਨਟ੍ਠੇਨਾਤਿ ਚ ਮਨਸਾ ਆਰਮ੍ਮਣਂ ਉਪਗਨ੍ਤ੍ਵਾ ਨਿਜ੍ਝਾਯਨਟ੍ਠੇਨ ਪੇਕ੍ਖਨਟ੍ਠੇਨ. ਯਥਾ ਹਿ ਇਸ੍ਸਾਸੋ ਦੂਰੇ ਠਤ੍ਵਾ ਖੁਦ੍ਦਕੇ ਲਕ੍ਖਮਣ੍ਡਲੇ ਸਰਂ ਪਵੇਸੇਨ੍ਤੋ ਹਤ੍ਥੇਹਿ ਸਰਂ ਉਜੁਕਞ੍ਚ ਨਿਚ੍ਚਲਞ੍ਚ ਕਤ੍ਵਾ ਮਣ੍ਡਲਞ੍ਚ ਵਿਭੂਤਂ ਕਤ੍ਵਾ ਚਕ੍ਖੁਨਾ ਨਿਜ੍ਝਾਯਨ੍ਤੋ ਪਵੇਸੇਤਿ. ਏਵਮੇਵ ਇਮੇਹਿ ਅਙ੍ਗੇਹਿ ਚਿਤ੍ਤਂ ਉਜੁਕਞ੍ਚ ਨਿਚ੍ਚਲਞ੍ਚ ਕਤ੍ਵਾ ਆਰਮ੍ਮਣਞ੍ਚ ਵਿਭੂਤਂ ਕਤ੍ਵਾ ਨਿਜ੍ਝਾਯਨ੍ਤੋ ਪੁਗ੍ਗਲੋ ਉਪਨਿਜ੍ਝਾਯਤੀਤਿ ਵੁਚ੍ਚਤਿ. ਏਵਂ ਉਪਨਿਜ੍ਝਾਯਿਤ੍ਵਾ ਯਂਕਿਞ੍ਚਿ ਕਾਯਕਮ੍ਮਂ ਵਾ ਵਚੀਕਮ੍ਮਂ ਵਾ ਮਨੋਕਮ੍ਮਂ ਵਾ ਕਰੋਨ੍ਤੋ ਅਵਿਰਜ੍ਝਮਾਨੋ ਕਰੋਤਿ.

ਤਤ੍ਥ ਕਾਯਕਮ੍ਮਂ ਨਾਮ ਅਭਿਕ੍ਕਮਪ੍ਪਟਿਕ੍ਕਮਾਦਿਕਂ ਵੁਚ੍ਚਤਿ. ਵਚੀਕਮ੍ਮਂ ਨਾਮ ਅਕ੍ਖਰਵਣ੍ਣਪਰਿਪੁਣ੍ਣਂ ਵਚੀਭੇਦਕਰਣਂ ਵੁਚ੍ਚਤਿ. ਮਨੋਕਮ੍ਮਂ ਨਾਮ ਯਂਕਿਞ੍ਚਿ ਮਨਸਾ ਆਰਮ੍ਮਣਵਿਭਾਵਨਂ ਵੁਚ੍ਚਤਿ. ਦਾਨਕਮ੍ਮਂ ਵਾ ਪਾਣਾਤਿਪਾਤ ਕਮ੍ਮਂ ਵਾ ਅਨੁਰੂਪੇਹਿ ਝਾਨਙ੍ਗੇਹਿ ਵਿਨਾ ਦੁਬ੍ਬਲੇਨ ਚਿਤ੍ਤੇਨ ਕਾਤੁਂ ਨ ਸਕ੍ਕਾ ਹੋਤਿ. ਏਸ ਨਯੋ ਸੇਸੇਸੁ ਕੁਸਲਾਕੁਸਲ ਕਮ੍ਮੇਸੂਤਿ.

ਅਯਞ੍ਚ ਅਤ੍ਥੋ ਵਿਤਕ੍ਕਾਦੀਨਂ ਝਾਨਙ੍ਗਧਮ੍ਮਾਨਂ ਵਿਸੁਂ ਵਿਸੁਂ ਸਭਾਵ ਲਕ੍ਖਣੇਹਿ ਦੀਪੇਤਬ੍ਬੋ. ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣਾਭਿਨਿਰੋਪਨ ਲਕ੍ਖਣੋ ਵਿਤਕ੍ਕੋ, ਸੋ ਚਿਤ੍ਤਂ ਆਰਮ੍ਮਣੇ ਦਲ਼੍ਹਂ ਨਿਯੋਜੇਤਿ. ਆਰਮ੍ਮਣਾਨੁਮਜ੍ਜਨਲਕ੍ਖਣੋ ਵਿਚਾਰੋ, ਸੋ ਚਿਤ੍ਤਂ ਆਰਮ੍ਮਣੇ ਦਲ਼੍ਹਂ ਸਂਯੋਜੇਤਿ. ਆਰਮ੍ਮਣਸਮ੍ਪਿਯਾਯਨਲਕ੍ਖਣਾਪੀਤਿ, ਸਾ ਚਿਤ੍ਤਂ ਆਰਮ੍ਮਣੇ ਪਰਿਤੁਟ੍ਠਂ ਕਰੋਤਿ. ਤਿਸ੍ਸੋਪਿ ਵੇਦਨਾ ਆਰਮ੍ਮਣਰਸਾਨੁ ਭਵਨਲਕ੍ਖਣਾ, ਤਾਪਿ ਚਿਤ੍ਤਂ ਆਰਮ੍ਮਣੇ ਇਟ੍ਠਾਨਿਟ੍ਠਮਜ੍ਝਤ੍ਤਰਸਾਨੁਭਵਨ ਕਿਚ੍ਚੇਨ ਦਲ਼੍ਹਪ੍ਪਟਿਬਦ੍ਧਂ ਕਰੋਨ੍ਤਿ. ਸਮਾਧਾਨਲਕ੍ਖਣਾ ਏਕਗ੍ਗਤਾ, ਸਾਪਿ ਚਿਤ੍ਤਂ ਆਰਮ੍ਮਣੇ ਨਿਚ੍ਚਲਂ ਕਤ੍ਵਾ ਠਪੇਤੀਤਿ. ਝਾਨਪਚ੍ਚਯਦੀਪਨਾ ਨਿਟ੍ਠਿਤਾ.

ਦ੍ਵਾਦਸ ਮਗ੍ਗਙ੍ਗਾਨਿ ਮਗ੍ਗਪਚ੍ਚਯੋ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾ ਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ ਮਿਚ੍ਛਾਦਿਟ੍ਠਿ ¶ ਮਿਚ੍ਛਾਸਙ੍ਕਪ੍ਪੋ ਮਿਚ੍ਛਾਵਾਯਾਮੋ ਮਿਚ੍ਛਾਸਮਾਧਿ. ਸੇਸਾ ਮਿਚ੍ਛਾਵਾਚਾ ਮਿਚ੍ਛਾਕਮ੍ਮਨ੍ਤੋ ਮਿਚ੍ਛਾਆਜੀਵੋਤਿ ਤਯੋ ਧਮ੍ਮਾ ਵਿਸੁਂ ਚੇਤਸਿਕਧਮ੍ਮਾ ਨ ਹੋਨ੍ਤਿ. ਮੁਸਾਵਾਦਾਦਿਵਸੇਨ ਪਵਤ੍ਤਾਨਂ ਚਤੁਨ੍ਨਂ ਅਕੁਸਲਖਨ੍ਧਾਨਂ ਨਾਮਂ. ਤਸ੍ਮਾ ਤੇ ਮਗ੍ਗਪਚ੍ਚਯੇ ਵਿਸੁਂ ਨ ਗਹਿਤਾਤਿ. ਸਬ੍ਬੇ ਸਹੇਤੁਕਾ ਚਿਤ੍ਤ ਚੇਤਸਿਕਧਮ੍ਮਾ ਚ ਸਹੇਤੁਕਚਿਤ੍ਤਸਹ ਜਾਤਾ ਰੂਪਧਮ੍ਮਾ ਚ ਤਸ੍ਸ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਮਗ੍ਗੋਤਿ. ਸੁਗਤਿਦੁਗ੍ਗਤਿਨਿਬ੍ਬਾਨ ਦਿਸਾਦੇਸਸਮ੍ਪਾ ਪਨਟ੍ਠੇਨ ਮਗ੍ਗੋ. ਸਮ੍ਮਾਦਿਟ੍ਠਿਆਦਿਕਾਨਿ ਹਿ ਅਟ੍ਠ ਸਮ੍ਮਾਮਗ੍ਗਙ੍ਗਾਨਿ ਸੁਗਤਿ ਦਿਸਾਦੇਸਞ੍ਚ ਨਿਬ੍ਬਾਨਦਿਸਾਦੇਸਞ੍ਚ ਸਮ੍ਪਾਪਨਤ੍ਥਾਯ ਸਂਵਤ੍ਤਨ੍ਤਿ. ਚਤ੍ਤਾਰਿ ਮਿਚ੍ਛਾਮਗ੍ਗਙ੍ਗਾਨਿ ਦੁਗ੍ਗਤਿਦਿਸਾਦੇਸਂ ਸਮ੍ਪਾਪਨਤ੍ਥਾਯ ਸਂਵਤ੍ਤਨ੍ਤੀਤਿ.

ਤਤ੍ਥ ਝਾਨਪਚ੍ਚਯੋ ਆਰਮ੍ਮਣੇ ਚਿਤ੍ਤਂ ਉਜੁਂ ਕਰੋਤਿ, ਥਿਰਂ ਕਰੋਤਿ, ਅਪ੍ਪਨਾਪਤ੍ਤਂ ਕਰੋਤਿ. ਅਪ੍ਪਨਾਪਤ੍ਤਂ ਨਾਮ ਗਮ੍ਭੀਰੇ ਉਦਕੇ ਪਕ੍ਖਿਤ੍ਤੋ ਮਚ੍ਛੋਵਿਯ ਕਸਿਣਨਿਮਿਤ੍ਤਾਦਿਕੇ ਨਿਮਿਤ੍ਤਾਰਮ੍ਮਣੇ ਅਨੁਪਵਿਟ੍ਠਂ ਚਿਤ੍ਤਂ ਪਵੁਚ੍ਚਤਿ. ਮਗ੍ਗਪਚ੍ਚਯੋ ਵਟ੍ਟਪਥੇ ਚੇਤਨਾਕਮ੍ਮਂ ਵਿਵਟ੍ਟਪਥੇ ਭਾਵਨਾਕਮ੍ਮਂ ਉਜੁਂ ਕਰੋਤਿ, ਥਿਰਂ ਕਰੋਤਿ, ਕਮ੍ਮਪਥਪਤ੍ਤਂ ਕਰੋਤਿ, ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਕਰੋਤਿ, ਭੂਮਨ੍ਤਰਪਤ੍ਤਂ ਕਰੋਤਿ. ਅਯ ਮੇਤੇਸਂ ਦ੍ਵਿਨ੍ਨਂ ਪਚ੍ਚਯਾਨਂ ਵਿਸੇਸੋ.

ਤਤ੍ਥ ਕਮ੍ਮਪਥਪਤ੍ਤਂ ਨਾਮ ਪਾਣਾਤਿਪਾਤਾਦੀਨਂ ਕੁਸਲਾਕੁਸਲ ਕਮ੍ਮਾਨਂ ਅਙ੍ਗਪਾਰਿਪੂਰਿਯਾ ਪਟਿਸਨ੍ਧਿਜਨਨੇ ਸਮਤ੍ਥਭਾਵਸਙ੍ਖਾਤਂ ਕਮ੍ਮਗਤਿਂ ਪਤ੍ਤਂ ਚੇਤਨਾਕਮ੍ਮਂ. ਭੂਮਨ੍ਤਰਪਤ੍ਤਂ ਨਾਮ ਭਾਵਨਾਨੁਕ੍ਕਮੇਨ ਕਾਮ ਭੂਮਿਤੋ ਪਟ੍ਠਾਯ ਯਾਵ ਲੋਕੁਤ੍ਤਰਭੂਮਿਯਾ ਏਕਸ੍ਮਿਂਇਰਿਯਾਪਥੇਪਿ ਉਪਰੂਪਰਿਭੂਮਿਂ ਪਤ੍ਤਂ ਭਾਵਨਾਕਮ੍ਮਂ. ਅਯਞ੍ਚ ਅਤ੍ਥੋ ਝਾਨਪਚ੍ਚਯੇ ਵੁਤ੍ਤਨਯੇਨ ਸਮ੍ਮਾਦਿਟ੍ਠਿਆਦਿਕਾਨਂ ਮਗ੍ਗਙ੍ਗਧਮ੍ਮਾਨਂ ਵਿਸੁਂ ਵਿਸੁਂ ਸਭਾਵ ਲਕ੍ਖਣੇਹਿ ਦੀਪੇਤਬ੍ਬੋਤਿ. ਮਗ੍ਗਪਚ੍ਚਯਦੀਪਨਾ ਨਿਟ੍ਠਿਤਾ.

ਸਮ੍ਪਯੁਤ੍ਤਪਚ੍ਚਯੋ ਵਿਪ੍ਪਯੁਤ੍ਤਪਚ੍ਚਯੋਤਿ ਏਕਂ ਦੁਕ੍ਕਂ. ਅਤ੍ਥਿ ਪਚ੍ਚਯੋ ਨਤ੍ਥਿ ਪਚ੍ਚਯੋਤਿ ਏਕਂ ਦੁਕ੍ਕਂ. ਵਿਗਤਪਚ੍ਚਯੋ ਅਵਿਗਤ ਪਚ੍ਚਯੋਤਿ ਏਕਂ ਦੁਕ੍ਕਂ. ਇਮਾਨਿ ਤੀਣਿ ਪਚ੍ਚਯਦੁਕ੍ਕਾਨਿ ਵਿਸੁਂ ਪਚ੍ਚਯ ਵਿਸੇਸਾਨਿ ਨ ਹੋਨ੍ਤਿ. ਪੁਬ੍ਬੇ ਆਗਤੇਸੁ ਪਚ੍ਚਯੇਸੁ ਕੇਚਿ ਪਚ੍ਚਯਾ ਅਤ੍ਤਨੋ ਪਚ੍ਚਯੁਪ੍ਪਨ੍ਨੇਹਿ ਸਮ੍ਪਯੁਤ੍ਤਾ ਹੁਤ੍ਵਾ ਪਚ੍ਚਯਤ੍ਤਂ ਗਚ੍ਛਨ੍ਤਿ, ਕੇਚਿ ਵਿਪ੍ਪਯੁਤ੍ਤਾ ਹੁਤ੍ਵਾ, ਕੇਚਿ ਵਿਜ੍ਜਮਾਨਾ ਹੁਤ੍ਵਾ, ਕੇਚਿ ਅਵਿਜ੍ਜਮਾਨਾ ਹੁਤ੍ਵਾ, ਕੇਚਿ ਵਿਗਤਾ ਹੁਤ੍ਵਾ, ਕੇਚਿ ਅਵਿਗਤਾ ਹੁਤ੍ਵਾ ਪਚ੍ਚਯਤ੍ਤਂ ਗਚ੍ਛਨ੍ਤੀਤਿ ਦਸ੍ਸਨਤ੍ਥਂ ਇਮਾਨਿ ਤੀਣਿ ਪਚ੍ਚਯਦੁਕ੍ਕਾਨਿ ਵੁਤ੍ਤਾਨਿ.

ਏਤ੍ਥ ¶ ਚ ਅਤ੍ਥੀਤਿ ਖੋ ਕਚ੍ਚਾਨ ਅਯਮੇਕੋ ਅਨ੍ਤੋ, ਨਤ੍ਥੀਤਿ ਖੋ ਦੁਤਿਯੋ ਅਨ੍ਤੋਤਿ ਏਵਰੂਪੇਸੁ ਠਾਨੇਸੁ ਅਤ੍ਥਿਨਤ੍ਥਿਸਦ੍ਦਾ ਸਸ੍ਸਤੁਚ੍ਛੇਦੇਸੁਪਵਤ੍ਤਨ੍ਤਿ, ਤਸ੍ਮਾ ਏਵਰੂਪਾਨਂ ਅਤ੍ਥਾਨਂ ਨਿਵਤ੍ਤਨਤ੍ਥਂ ਪੁਨ ਵਿਗਤਦੁਕ੍ਕਂ ਵੁਤ੍ਤਂ.

ਸਬ੍ਬੇਪਿ ਸਹਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਸ੍ਸ ਪਚ੍ਚਯਾ ਚੇਵ ਹੋਨ੍ਤਿ ਪਚ੍ਚਯੁਪ੍ਪਨ੍ਨਾ ਚ.

ਕੇਨਟ੍ਠੇਨ ਸਮ੍ਪਯੁਤ੍ਤੋ. ਏਕੁਪ੍ਪਾਦਤਾ ਏਕਨਿਰੋਧਤਾ ਏਕਵਤ੍ਥੁਕਤਾ ਏਕਾਰਮ੍ਮਣਤਾਤਿ ਇਮੇਹਿ ਚਤੂਹਿ ਸਮ੍ਪਯੋਗਙ੍ਗੇਹਿ ਸਮਨ੍ਨਾਗਤੋ ਹੁਤ੍ਵਾ ਸਂਯੁਤ੍ਤੋ ਏਕੀਭਾਵਂ ਗਤੋਤਿ ਸਮ੍ਪਯੁਤ੍ਤੋ.

ਤਤ੍ਥ ਏਕੀਭਾਵਂ ਗਤੋਤਿ ਚਕ੍ਖੁਵਿਞ੍ਞਾਣਂ ਫਸ੍ਸਾਦੀਹਿ ਸਤ੍ਤਹਿ ਚੇਤਸਿਕੇਹਿ ਸਹ ਏਕੀਭਾਵਂ ਗਤਂ ਹੋਤਿ, ਦਸ੍ਸਨਨ੍ਤਿ ਏਕਂ ਵੋਹਾਰਂ ਗਚ੍ਛਤਿ. ਅਟ੍ਠ ਧਮ੍ਮਾ ਵਿਸੁਂ ਵਿਸੁਂ ਵੋਹਾਰਂ ਨ ਗਚ੍ਛਨ੍ਤਿ, ਵਿਨਿਬ੍ਭੁਜ੍ਜਿਤ੍ਵਾ ਵਿਞ੍ਞਾਤੁਂ ਨ ਸਕ੍ਕੋਤਿ. ਏਸ ਨਯੋ ਸੇਸੇਸੁ ਸਬ੍ਬਚਿਤ੍ਤੁਪ੍ਪਾਦੇਸੂਤਿ. ਸਮ੍ਪਯੁਤ੍ਤਪਚ੍ਚਯਦੀਪਨਾ ਨਿਟ੍ਠਿਤਾ.

ਚਤੁਬ੍ਬਿਧੋ ਵਿਪ੍ਪਯੁਤ੍ਤਪਚ੍ਚਯੋ, ਸਹਜਾਤੋ ਵਤ੍ਥੁਪੁਰੇ ਜਾਤੋ ਵਤ੍ਥਾਰਮ੍ਮਣਪੁਰੇਜਾਤੋ ਪਚ੍ਛਾਜਾਤੋਤਿ.

ਤਤ੍ਥ ਸਹਜਾਤਵਿਪ੍ਪਯੁਤ੍ਤੋ ਨਾਮ ਦ੍ਵਿਸੁ ਸਹਜਾਤਪਚ੍ਚਯ ਪਚ੍ਚਯੁਪ੍ਪਨ੍ਨੇਸੁ ਨਾਮਰੂਪੇਸੁ ਨਾਮਂ ਵਾ ਰੂਪਸ੍ਸ ਰੂਪਂ ਵਾ ਨਾਮਸ੍ਸ ਵਿਪ੍ਪਯੁਤ੍ਤਂ ਹੁਤ੍ਵਾ ਪਚ੍ਚਯੋ. ਤਤ੍ਥ ਨਾਮਨ੍ਤਿ ਪਵਤ੍ਤਿਕਾਲੇ ਚਤੁਕ੍ਖਨ੍ਧਨਾਮਂ, ਰੂਪਸ੍ਸਾਤਿ ਚਿਤ੍ਤਜਰੂਪਸ੍ਸ, ਰੂਪਨ੍ਤਿ ਪਟਿਸਨ੍ਧਿਕ੍ਖਣੇ ਹਦਯਵਤ੍ਥੁਰੂਪਂ, ਨਾਮਸ੍ਸਾਤਿ ਪਟਿਸਨ੍ਧਿਚਤੁਕ੍ਖਨ੍ਧਨਾਮਸ੍ਸ. ਸੇਸਾ ਤਯੋਪਿ ਵਿਪ੍ਪਯੁਤ੍ਤਪਚ੍ਚਯਾ ਪੁਬ੍ਬੇ ਵਿਭਤ੍ਤਾ ਏਵਾਤਿ. ਵਿਪ੍ਪਯੁਤ੍ਤਪਚ੍ਚਯਦੀਪਨਾ ਨਿਟ੍ਠਿਤਾ.

ਸਤ੍ਤਵਿਧੋ ਅਤ੍ਥਿਪਚ੍ਚਯੋ, ਸਹਜਾਤਤ੍ਥਿਪਚ੍ਚਯੋ ਵਤ੍ਥੁਪੁਰੇ ਜਾਤਤ੍ਥਿ ਪਚ੍ਚਯੋ ਆਰਮ੍ਮਣਪੁਰੇਜਾਤਤ੍ਥਿਪਚ੍ਚਯੋ ਵਤ੍ਥਾਰਮ੍ਮਣਪੁਰੇ ਜਾਤਤ੍ਥਿਪਚ੍ਚਯੋ ਪਚ੍ਛਾਜਾਤਤ੍ਥਿਪਚ੍ਚਯੋ ਰੂਪਾਹਾਰਤ੍ਥਿਪਚ੍ਚਯੋ ਰੂਪ ਜੀਵਿਤਿਨ੍ਦ੍ਰਿਯਤ੍ਥਿਪਚ੍ਚਯੋਤਿ.

ਤਤ੍ਥ ਸਹਜਾਤਪਚ੍ਚਯੋ ਏਵ ਸਹਜਾਤਤ੍ਥਿਪਚ੍ਚਯੋ ਨਾਮ. ਏਸ ਨਯੋ ਸੇਸੇਸੁ ਛਸੁ. ਪਚ੍ਚਯਪਚ੍ਚਯੁਪ੍ਪਨ੍ਨਵਿਭਾਗੋਪਿ ਹੇਟ੍ਠਾ ਤਤ੍ਥ ਤਤ੍ਥ ਵੁਤ੍ਤੋਯੇਵ.

ਕੇਨਟ੍ਠੇਨ ¶ ਅਤ੍ਥਿਪਚ੍ਚਯੋ. ਸਯਂ ਖਣਿਕਪਚ੍ਚੁਪ੍ਪਨ੍ਨਤਾ ਸਙ੍ਖਾਤੇਨ ਅਤ੍ਥਿਭਾਵੇਨ ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ ਪਚ੍ਚਯੋ ਅਤ੍ਥਿਪਚ੍ਚਯੋ. ਅਤ੍ਥਿਪਚ੍ਚਯਦੀਪਨਾ ਨਿਟ੍ਠਿਤਾ.

ਸਬ੍ਬੋ ਅਨਨ੍ਤਰਪਚ੍ਚਯੋ ਨਤ੍ਥਿ ਪਚ੍ਚਯੋ ਨਾਮ. ਤਥਾ ਵਿਗਤ ਪਚ੍ਚਯੋ. ਅਵਿਗਤਪਚ੍ਚਯੋਪਿ ਅਤ੍ਥਿਪਚ੍ਚਯੇਨ ਸਬ੍ਬਸਦਿਸੋ. ਅਤ੍ਥੀਤਿਚ ਅਵਿਗਤੋਤਿ ਚ ਅਤ੍ਥਤੋ ਏਕਮੇਵ. ਤਥਾ ਨਤ੍ਥੀਤਿ ਚ ਵਿਗਤੋਤਿਚ. ਨਤ੍ਥਿਵਿਗਤਅਵਿਗਤਪਚ੍ਚਯਦੀਪਨਾ ਨਿਟ੍ਠਿਤਾ.

ਪਚ੍ਚਯਸਭਾਗੋ ਵੁਚ੍ਚਤੇ. ਪਞ੍ਚਦਸ ਸਹਜਾਤਜਾਤਿਕਾ ਹੋਨ੍ਤਿ, ਚਤ੍ਤਾਰੋ ਮਹਾਸਹਜਾਤਾ ਚਤ੍ਤਾਰੋ ਮਜ੍ਝਿਮਸਹਜਾਤਾ ਸਤ੍ਤ ਖੁਦ੍ਦਕਸਹਜਾਤਾ. ਤਤ੍ਥ ਚਤ੍ਤਾਰੋ ਮਹਾਸਹਜਾਤਾ ਨਾਮ ਸਹਜਾਤੋ ਸਹਜਾਤਨਿਸ੍ਸਯੋ ਸਹਜਾਤਤ੍ਥਿ ਸਹਜਾਤ ਅਵਿਗਤੋ. ਚਤ੍ਤਾਰੋ ਮਜ੍ਝਿਮਸਹਜਾਤਾ ਨਾਮ ਅਞ੍ਞਮਞ੍ਞੋ ਵਿਪਾਕੋ ਸਮ੍ਪਯੁਤ੍ਤੋ ਸਹਜਾਤਵਿਪ੍ਪਯੁਤ੍ਤੋ. ਸਤ੍ਤ ਖੁਦ੍ਦਕਸਹ ਜਾਤਾ ਨਾਮ ਹੇਤੁ ਸਹਜਾਤਾਧਿਪਤਿ ਸਹਜਾਤਕਮ੍ਮਂ ਸਹ ਜਾਤਾਹਾਰੋ ਸਹਜਾਤਿਨ੍ਦ੍ਰਿਯਂ ਝਾਨਂ ਮਗ੍ਗੋ.

ਤਯੋ ਰੂਪਾਹਾਰਾ, ਰੂਪਾਹਾਰੋ ਰੂਪਾਹਾਰਤ੍ਥਿ ਰੂਪਾਹਾਰਾ ਵਿਗਤੋ.

ਤੀਣਿ ਰੂਪਜੀਵਿਤਿਨ੍ਦ੍ਰਿਯਾਨਿ, ਰੂਪਜੀਵਿਤਿਨ੍ਦ੍ਰਿਯਂ ਰੂਪਜੀਵਿਤਿਨ੍ਦ੍ਰਿਯਤ੍ਥਿ ਰੂਪਜੀਵਿਤਿਨ੍ਦ੍ਰਿਯਾਵਿਗਤਂ.

ਸਤ੍ਤਰਸ ਪੁਰੇਜਾਤਜਾਤਿਕਾ ਹੋਨ੍ਤਿ, ਛ ਵਤ੍ਥੁਪੁਰੇਜਾਤਾ ਛ ਆਰਮ੍ਮਣਪੁਰੇਜਾਤਾ ਪਞ੍ਚ ਵਤ੍ਥਾਰਮ੍ਮਣਪੁਰੇਜਾਤਾ. ਤਤ੍ਥ ਛ ਵਤ੍ਥੁਪੁਰੇਜਾਤਾ ਨਾਮ ਵਤ੍ਥੁਪੁਰੇਜਾਤੋ ਵਤ੍ਥੁਪੁਰੇਜਾਤਨਿਸ੍ਸਯੋ ਵਤ੍ਥੁਪੁਰੇਜਾਤਿਨ੍ਦ੍ਰਿਯਂ ਵਤ੍ਥੁਪੁਰੇਜਾਤਵਿਪ੍ਪਯੁਤ੍ਤਂ ਵਤ੍ਥੁਪੁਰੇਜਾਤਤ੍ਥਿ ਵਤ੍ਥੁ ਪੁਰੇਜਾਤਅਵਿਗਤੋ. ਛ ਆਰਮ੍ਮਣਪੁਰੇਜਾਤਾ ਨਾਮ ਆਰਮ੍ਮਣ ਪੁਰੇਜਾਤੋ ਕਿਞ੍ਚਿਆਰਮ੍ਮਣਂ ਕੋਚਿ ਆਰਮ੍ਮਣਾਧਿਪਤਿ ਕੋਚਿ ਆਰਮ੍ਮਣੂਪਨਿਸ੍ਸਸੋ ਆਰਮ੍ਮਣਪੁਰੇਜਾਤਤ੍ਥਿ ¶ ਆਰਮ੍ਮਣਪੁਰੇਜਾਤ ਅਵਿਗਤੋ. ਕਿਞ੍ਚਿ ਆਰਮ੍ਮਣਨ੍ਤਿਆਦੀਸੁ ਕਿਞ੍ਚਿਕੋਚਿਵਚਨੇਹਿ ਪਚ੍ਚੁਪ੍ਪਨ੍ਨਂ ਨਿਪ੍ਫਨ੍ਨਰੂਪਂ ਗਯ੍ਹਤਿ. ਪਞ੍ਚ ਵਤ੍ਥਾਰਮ੍ਮਣਪੁਰੇਜਾਤਾ ਨਾਮ ਵਤ੍ਥਾਰਮ੍ਮਣ ਪੁਰੇਜਾਤੋ ਵਤ੍ਥਾਰਮ੍ਮਣਪੁਰੇਜਾਤਨਿਸ੍ਸਯੋ ਵਤ੍ਥਾਰਮ੍ਮਣਪੁਰੇ ਜਾਤ ਵਿਪ੍ਪਯੁਤ੍ਤੋ ਵਤ੍ਥਾਰਮ੍ਮਣਪੁਰੇਜਾਤਤ੍ਥਿ ਵਤ੍ਥਾਰਮ੍ਮਣਪੁਰੇਜਾਤ ਅਵਿਗਤੋ.

ਚਤ੍ਤਾਰੋ ਪਚ੍ਛਾਜਾਤਜਾਤਿਕਾ ਹੋਨ੍ਤਿ, ਪਚ੍ਛਾਜਾਤੋ ਪਚ੍ਛਾਜਾਤਵਿਪ੍ਪਯੁਤ੍ਤੋ ਪਚ੍ਛਾਜਾਤਤ੍ਥਿ ਪਚ੍ਛਾਜਾਤਅਵਿਗਤੋ.

ਸਤ੍ਤ ਅਨਨ੍ਤਰਾ ਹੋਨ੍ਤਿ, ਅਨਨ੍ਤਰੋ ਸਮਨਨ੍ਤਰੋ ਅਨਨ੍ਤਰੂਪ ਨਿਸ੍ਸਯੋ ਆਸੇਵਨਂ ਅਨਨ੍ਤਰਕਮ੍ਮਂ ਨਤ੍ਥਿ ਵਿਗਤੋ. ਏਤ੍ਥ ਚ ਅਨਨ੍ਤਰ ਕਮ੍ਮਂ ਨਾਮ ਅਰਿਯਮਗ੍ਗਚੇਤਨਾ, ਸਾ ਅਤ੍ਤਨੋ ਅਨਨ੍ਤਰੇ ਅਰਿਯਫਲਂ ਜਨੇਤਿ.

ਪਞ੍ਚ ਵਿਸੁਂ ਪਚ੍ਚਯਾ ਹੋਨ੍ਤਿ, ਅਵਸੇਸਂ ਆਰਮ੍ਮਣਂ ਅਵਸੇਸੋ ਆਰਮ੍ਮਣਾਧਿਪਤਿ ਅਵਸੇਸੋ ਆਰਮ੍ਮਣੂਪ ਨਿਸ੍ਸਯੋ ਸਬ੍ਬੋ ਪਕਤੂਪਨਿਸ੍ਸਯੋ ਅਵਸੇਸਂ ਨਾਨਾਕ੍ਖਣਿਕ ਕਮ੍ਮਂ. ਇਤਿ ਵਿਤ੍ਥਾਰਤੋ ਪਟ੍ਠਾਨਪਚ੍ਚਯਾ ਚਤੁਪਞ੍ਞਾਸਪ੍ਪਭੇਦਾ ਹੋਨ੍ਤੀਤਿ.

ਤਤ੍ਥ ਸਬ੍ਬੇ ਸਹਜਾਤਜਾਤਿਕਾ ਚ ਸਬ੍ਬੇ ਪੁਰੇਜਾਤ ਜਾਤਿਕਾ ਸਬ੍ਬੇ ਪਚ੍ਛਾਜਾਤਜਾਤਿਕਾ ਰੂਪਾਹਾਰੋ ਰੂਪਜੀਵਿਤਿਨ੍ਦ੍ਰਿਯਨ੍ਤਿ ਇਮੇ ਪਚ੍ਚੁਪ੍ਪਨ੍ਨਪਚ੍ਚਯਾ ਨਾਮ. ਸਬ੍ਬੇ ਅਨਨ੍ਤਰਜਾਤਿਕਾ ਸਬ੍ਬਂ ਨਾਨਾਕ੍ਖਣਿਕ ਕਮ੍ਮਨ੍ਤਿ ਇਮੇ ਅਤੀਤਪਚ੍ਚਯਾ ਨਾਮ. ਆਰਮ੍ਮਣਂ ਪਕਤੂਪਨਿਸ੍ਸਯੋਤਿ ਇਮੇ ਤੇਕਾਲਿਕਾ ਚ ਨਿਬ੍ਬਾਨਪਞ੍ਞਤ੍ਤੀਨਂ ਵਸੇਨ ਕਾਲਵਿਮੁਤ੍ਤਾ ਚ ਹੋਨ੍ਤਿ.

ਨਿਬ੍ਬਾਨਞ੍ਚ ਪਞ੍ਞਤ੍ਤਿ ਚਾਤਿ ਇਮੇ ਦ੍ਵੇ ਧਮ੍ਮਾ ਅਪ੍ਪਚ੍ਚਯਾ ਨਾਮ ਅਸਙ੍ਖਤਾ ਨਾਮ. ਕਸ੍ਮਾ. ਅਜਾਤਿਕਤ੍ਤਾ. ਯੇਸਞ੍ਹਿ ਜਾਤਿ ਨਾਮ ਅਤ੍ਥਿ, ਉਪ੍ਪਾਦੋ ਨਾਮ ਅਤ੍ਥਿ. ਤੇ ਸਪ੍ਪਚ੍ਚਯਾਨਾਮ ਸਙ੍ਖਤਾ ਨਾਮ ਪਟਿਚ੍ਚਸਮੁਪ੍ਪਨ੍ਨਾ ਨਾਮ. ਇਮੇ ਦ੍ਵੇ ਧਮ੍ਮਾ ਅਜਾਤਿਕਤ੍ਤਾ ਅਨੁਪ੍ਪਾਦਤ੍ਤਾ ਅਜਾਤਿਪਚ੍ਚਯਤ੍ਤਾਚ ਅਪ੍ਪਚ੍ਚਯਾ ਨਾਮ ਅਸਙ੍ਖਤਾ ਨਾਮਾਤਿ.

ਸਪ੍ਪਚ੍ਚਯੇਸੁ ਚ ਧਮ੍ਮੇਸੁ ਸਙ੍ਖਤੇਸੁ ਏਕੋਪਿ ਧਮ੍ਮੋ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰੀਤਧਮ੍ਮੋ ਨਾਮ ਨਤ੍ਥਿ. ਅਥ ਖੋ ਸਬ੍ਬੇ ਤੇ ਖਯਟ੍ਠੇਨ ਅਨਿਚ੍ਚਾ ਏਵ ਹੋਨ੍ਤਿ. ਕਸ੍ਮਾ. ਸਯਞ੍ਚ ਪਚ੍ਚਯਾਯਤ੍ਤਵੁਤ੍ਤਿ ਕਤ੍ਤਾ ਪਚ੍ਚਯਾਨਞ੍ਚ ਅਨਿਚ੍ਚਧਮ੍ਮਤ੍ਤਾ. ਨਨੁ ਨਿਬ੍ਬਾਨਞ੍ਚ ਪਞ੍ਞਤ੍ਤਿ ਚ ਪਚ੍ਚਯਾ ਹੋਨ੍ਤਿ. ਤੇ ਚ ਨਿਚ੍ਚਾ ਧੁਵਾਤਿ. ਸਚ੍ਚਂ. ਕੇਵਲੇਨ ਪਨ ਨਿਬ੍ਬਾਨਪਚ੍ਚਯੇਨ ਵਾ ਪਞ੍ਞਤ੍ਤਿਪਚ੍ਚਯੇਨ ਵਾ ਉਪ੍ਪਨ੍ਨੋ ਨਾਮ ਨਤ੍ਥਿ, ਬਹੂਹਿ ਪਚ੍ਚਯੇਹਿ ਏਵ ਉਪ੍ਪਨ੍ਨੋ, ਤੇ ਪਨ ਪਚ੍ਚਯਾ ਅਨਿਚ੍ਚਾ ਏਵ ਅਧੁਵਾਤਿ.

ਯੇ ¶ ਚ ਧਮ੍ਮਾ ਅਨਿਚ੍ਚਾ ਹੋਨ੍ਤਿ, ਤੇ ਨਿਚ੍ਚਕਾਲਂ ਸਤ੍ਤੇ ਤਿਵਿਧੇਹਿ ਦੁਕ੍ਖਦਣ੍ਡੇਹਿ ਪਟਿਪ੍ਪੀਲ਼ੇਨ੍ਤਿ ਬਾਧੇਨ੍ਤਿ, ਤਸ੍ਮਾ ਤੇ ਧਮ੍ਮਾ ਭਯਟ੍ਠੇਨ ਦੁਕ੍ਖਾ ਏਵ ਹੋਨ੍ਤਿ. ਤਤ੍ਥ ਤਿਵਿਧਾ ਦੁਕ੍ਖਦਣ੍ਡਾ ਨਾਮ ਦੁਕ੍ਖਦੁਕ੍ਖਤਾ ਸਙ੍ਖਾਰ ਦੁਕ੍ਖਤਾ ਵਿਪਰਿਣਾਮਦੁਕ੍ਖਤਾ.

ਯੇ ਕੇਚਿ ਅਨਿਚ੍ਚਾ ਏਵ ਹੋਨ੍ਤਿ, ਏਕਸ੍ਮਿਂ ਇਰਿਯਾਪਥੇਪਿ ਪੁਨਪ੍ਪੁਨਂ ਭਿਜ੍ਜਨ੍ਤਿ, ਤੇ ਕਥਂ ਯਾਵਜੀਵਂ ਨਿਚ੍ਚਸਞ੍ਞਿਤਾਨਂ ਸਤ੍ਤਪੁਗ੍ਗਲਾਨਂ ਅਤ੍ਤਾ ਨਾਮ ਭਵੇਯ੍ਯੁਂ, ਸਾਰਾ ਨਾਮ ਭਵੇਯ੍ਯੁਂ. ਯੇ ਚ ਦੁਕ੍ਖਾ ਏਵ ਹੋਨ੍ਤਿ, ਤੇ ਕਥਂ ਦੁਕ੍ਖਪ੍ਪਟਿਕੁਲਾਨਂ ਸੁਖਕਾਮਾਨਂ ਸਤ੍ਤਾਨਂ ਅਤ੍ਤਾ ਨਾਮ ਭਵੇਯ੍ਯੁਂ, ਸਾਰਾ ਨਾਮ ਭਵੇਯ੍ਯੁਂ. ਤਸ੍ਮਾ ਤੇ ਧਮ੍ਮਾ ਅਸਾਰਕਟ੍ਠੇਨ ਅਨਤ੍ਤਾ ਏਵ ਹੋਨ੍ਤਿ.

ਅਪਿ ਚ ਯਸ੍ਮਾ ਇਮਾਯ ਚਤੁਵੀਸਤਿਯਾ ਪਚ੍ਚਯਦੇਸਨਾਯ ਇਮਮਤ੍ਥਂ ਦਸ੍ਸੇਤਿ. ਸਬ੍ਬੇਪਿ ਸਙ੍ਖਤਧਮ੍ਮਾ ਨਾਮ ਪਚ੍ਚਯਾਯਤ੍ਤਵੁਤ੍ਤਿਕਾ ਏਵ ਹੋਨ੍ਤਿ, ਸਤ੍ਤਾਨਂ ਵਸਾਯਤ੍ਤਵੁਤ੍ਤਿਕਾ ਨ ਹੋਨ੍ਤਿ. ਪਚ੍ਚਯਾਯਤ੍ਤ ਵੁਤ੍ਤਿਕੇਸੁ ਚ ਤੇਸੁ ਨ ਏਕੋਪਿ ਧਮ੍ਮੋ ਅਪ੍ਪਕੇਨ ਪਚ੍ਚਯੇਨ ਉਪ੍ਪਜ੍ਜਤਿ. ਅਥ ਖੋ ਬਹੂਹਿ ਏਵ ਪਚ੍ਚਯੇਹਿ ਉਪ੍ਪਜ੍ਜਤੀਤਿ, ਤਸ੍ਮਾ ਅਯਂ ਦੇਸਨਾ ਧਮ੍ਮਾਨਂ ਅਨਤ੍ਤਲਕ੍ਖਣਦੀਪਨੇ ਮਤ੍ਥਕਪਤ੍ਤਾ ਹੋਤੀਤਿ.

ਪਚ੍ਚਯਘਟਨਾਨਯੋ ਵੁਚ੍ਚਤੇ. ਏਕੇਕਸ੍ਮਿਂ ਪਚ੍ਚਯੁਪ੍ਪਨ੍ਨੇ ਬਹੁਨ੍ਨਂ ਪਚ੍ਚਯਾਨਂ ਸਮੋਧਾਨਂ ਪਚ੍ਚਯਘਟਨਾ ਨਾਮ. ਯੇਨ ਪਨ ਧਮ੍ਮਾ ਸਪ੍ਪਚ੍ਚਯਾ ਸਙ੍ਖਤਾ ਪਟਿਚ੍ਚਸਮੁਪ੍ਪਨ੍ਨਾਤਿ ਵੁਚ੍ਚਨ੍ਤਿ, ਸਬ੍ਬੇ ਤੇ ਧਮ੍ਮਾ ਉਪ੍ਪਾਦੇ ਚ ਠਿਤਿਯਞ੍ਚ ਇਮੇਹਿ ਚਤੁਵੀਸਤਿਯਾ ਪਚ੍ਚਯੇਹਿ ਸਹਿਤਤ੍ਤਾ ਸਪ੍ਪਚ੍ਚਯਾ ਨਾਮ, ਸਪ੍ਪਚ੍ਚਯਤ੍ਤਾ ਸਙ੍ਖਤਾ ਨਾਮ, ਸਙ੍ਖਤਤ੍ਤਾ ਪਟਿਚ੍ਚਸਮੁਪ੍ਪਨ੍ਨਾ ਨਾਮ. ਕਤਮੇ ਪਨ ਤੇ ਧਮ੍ਮਾਤਿ. ਏਕਵੀਸਸਤਚਿਤ੍ਤਾਨਿ ਚ ਦ੍ਵਿਪਞ੍ਞਾਸਚੇਤਸਿਕਾਨਿ ਚ ਅਟ੍ਠਵੀਸਤਿ ਰੂਪਾਨਿ ਚ.

ਤਤ੍ਥ ਏਕਵੀਸਸਤਚਿਤ੍ਤਾਨਿ ਧਾਤੁਵਸੇਨ ਸਤ੍ਤਵਿਧਾਨਿ ਭਵਨ੍ਤਿ, ਚਕ੍ਖੁ ਵਿਞ੍ਞਾਣਧਾਤੁ ਸੋਤਵਿਞ੍ਞਾਣਧਾਤੁ ਘਾਨਵਿਞ੍ਞਾਣਧਾਤੁ ਜਿਵ੍ਹਾ ਵਿਞ੍ਞਾਣਧਾਤੁ ਕਾਯਵਿਞ੍ਞਾਣਧਾਤੁ ਮਨੋਧਾਤੁ ਮਨੋਵਿਞ੍ਞਾਣ ਧਾਤੂਤਿ. ਤਤ੍ਥ ਚਕ੍ਖੁਵਿਞ੍ਞਾਣਦ੍ਵਯਂ ਚਕ੍ਖੁਵਿਞ੍ਞਾਣਧਾਤੁ ਨਾਮ. ਸੋਤਵਿਞ੍ਞਾਣਦ੍ਵਯਂ ਸੋਤਵਿਞ੍ਞਾਣਧਾਤੁ ਨਾਮ. ਘਾਨਵਿਞ੍ਞਾਣਦ੍ਵਯਂ ਘਾਨਵਿਞ੍ਞਾਣਧਾਤੁ ਨਾਮ. ਜਿਵ੍ਹਾਵਿਞ੍ਞਾਣਦ੍ਵਯਂ ਜਿਵ੍ਹਾਵਿਞ੍ਞਾਣਧਾਤੁ ਨਾਮ. ਕਾਯਵਿਞ੍ਞਾਣਦ੍ਵਯਂ ਕਾਯਵਿਞ੍ਞਾਣਧਾਤੁ ¶ ਨਾਮ. ਪਞ੍ਚਦ੍ਵਾਰਾਵਜ੍ਜਨ ਚਿਤ੍ਤਞ੍ਚ ਸਮ੍ਪਟਿਚ੍ਛਨਚਿਤ੍ਤਦ੍ਵਯਞ੍ਚ ਮਨੋਧਾਤੁ ਨਾਮ. ਸੇਸਾਨਿ ਅਟ੍ਠਸਤਂ ਚਿਤ੍ਤਾਨਿ ਮਨੋਵਿਞ੍ਞਾਣਧਾਤੁ ਨਾਮ.

ਦ੍ਵਿਪਞ੍ਞਾਸਚੇਤਸਿਕਾਨਿ ਚ ਰਾਸਿਵਸੇਨ ਚਤੁਬ੍ਬਿਧਾਨਿ ਭਵਨ੍ਤਿ, ਸਤ੍ਤ ਸਬ੍ਬਚਿਤ੍ਤਿਕਾਨਿ ਚ ਛ ਪਕਿਣ੍ਣਕਾਨਿ ਚ ਚੁਦ੍ਦਸ ਪਾਪਾਨਿਚ ਪਞ੍ਚਵੀਸਤਿ ਕਲ੍ਯਾਣਾਨਿ ਚ.

ਚਤੁਵੀਸਤਿਪਚ੍ਚਯੇਸੁ ਚ ਪਨ੍ਨਰਸਪਚ੍ਚਯਾ ਸਬ੍ਬਚਿਤ੍ਤੁਪ੍ਪਾਦ ਸਾਧਾਰਣਾ ਹੋਨ੍ਤਿ, ਆਰਮ੍ਮਣਞ੍ਚ ਅਨਨ੍ਤਰਞ੍ਚ ਸਮਨਨ੍ਤਰਞ੍ਚ ਸਹ ਜਾਤੋ ਚ ਅਞ੍ਞਮਞ੍ਞਞ੍ਚ ਨਿਸ੍ਸਯੋ ਚ ਉਪਨਿਸ੍ਸਯੋ ਚ ਕਮ੍ਮਞ੍ਚ ਆਹਾਰੋ ਚ ਇਨ੍ਦ੍ਰਿਯਞ੍ਚ ਸਮ੍ਪਯੁਤ੍ਤੋ ਚ ਅਤ੍ਥਿ ਚ ਨਤ੍ਥਿ ਚ ਵਿਗਤੋ ਚ ਅਵਿਗਤੋ ਚ. ਨ ਹਿ ਕਿਞ੍ਚਿ ਚਿਤ੍ਤਂ ਵਾ ਚੇਤਸਿਕਂ ਵਾ ਆਰਮ੍ਮਣੇਨ ਵਿਨਾ ਉਪ੍ਪਨ੍ਨਂ ਨਾਮ ਅਤ੍ਥਿ. ਤਥਾ ਅਨਨ੍ਤਰਾਦੀਹਿ ਚ. ਅਟ੍ਠਪਚ੍ਚਯਾ ਕੇਸਞ੍ਚਿ ਚਿਤ੍ਤੁਪ੍ਪਾਦਾਨਂ ਪਚ੍ਚਯਾ ਸਾਧਾਰਣਾ ਹੋਨ੍ਤਿ, ਹੇਤੁ ਚ ਅਧਿਪਤਿ ਚ ਪੁਰੇ ਜਾਤੋ ਚ ਆਸੇਵਨਞ੍ਚ ਵਿਪਾਕੋ ਚ ਝਾਨਞ੍ਚ ਮਗ੍ਗੋ ਚ ਵਿਪ੍ਪਯੁਤ੍ਤੋ ਚ. ਤਤ੍ਥ ਹੇਤੁ ਸਹੇਤੁਕਚਿਤ੍ਤੁਪ੍ਪਾਦਾਨਂ ਏਵ ਸਾਧਾਰਣਾ, ਅਧਿਪਤਿ ਚ ਸਾਧਿਪਤਿਜਵਨਾਨਂ ਏਵ, ਪੁਰੇਜਾਤੋ ਚ ਕੇਸਞ੍ਚਿ ਚਿਤ੍ਤੁਪ੍ਪਾਦਾਨਂ ਏਵ, ਆਸੇਵਨਞ੍ਚ ਕੁਸਲਾਕੁਸਲਕਿਰਿਯਜਵਨਾਨਂ ਏਵ, ਵਿਪਾਕੋ ਚ ਵਿਪਾਕਚਿਤ੍ਤੁਪ੍ਪਾਦਾਨਂ ਏਵ, ਝਾਨਞ੍ਚ ਮਨੋਧਾਤੁ ਮਨੋਵਿਞ੍ਞਾਣਧਾਤੁ ਚਿਤ੍ਤੁਪ੍ਪਾਦਾਨਂ ਏਵ, ਮਗ੍ਗੋ ਚ ਸਹੇਤੁਕਚਿਤ੍ਤੁਪ੍ਪਾਦਾਨਂ ਏਵ, ਵਿਪ੍ਪਯੁਤ੍ਤੋ ਚ ਅਰੂਪਲੋਕੇ ਚਿਤ੍ਤੁਪ੍ਪਾਦਾਨਂ ਨਤ੍ਥਿ, ਏਕੋ ਪਚ੍ਛਾਜਾਤੋ ਰੂਪਧਮ੍ਮਾਨਂ ਏਵ ਵਿਸੁਂਭੂਤੋ ਹੋਤਿ.

ਤਤ੍ਰਾਯਂ ਦੀਪਨਾ. ਸਤ੍ਤ ਸਬ੍ਬਚਿਤ੍ਤਿਕਾਨਿ ਚੇਤਸਿਕਾਨਿ ਨਾਮ, ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਏਕਗ੍ਗਤਾ ਜੀਵਿਤਂ ਮਨਸਿਕਾਰੋ. ਤਤ੍ਥ ਚਿਤ੍ਤਂ ਅਧਿਪਤਿਜਾਤਿਕਞ੍ਚ ਆਹਾਰਪਚ੍ਚਯੋ ਚ ਇਨ੍ਦ੍ਰਿਯਪਚ੍ਚਯੋ ਚ. ਫਸ੍ਸੋ ਆਹਾਰਪਚ੍ਚਯੋ. ਵੇਦਨਾ ਇਨ੍ਦ੍ਰਿਯਪਚ੍ਚਯੋ ਚ ਝਾਨ ਪਚ੍ਚਯੋ ਚ. ਚੇਤਨਾ ਕਮ੍ਮਪਚ੍ਚਯੋ ਚ ਆਹਾਰਪਚ੍ਚਯੋ ਚ. ਏਕਗ੍ਗਤਾ ਇਨ੍ਦ੍ਰਿਯਪਚ੍ਚਯੋ ਚ ਝਾਨ ਪਚ੍ਚਯੋ ਚ ਮਗ੍ਗਪਚ੍ਚਯੋ ਚ. ਜੀਵਿਤਂ ਇਨ੍ਦ੍ਰਿਯਪਚ੍ਚਯੋ. ਸੇਸਾ ਦ੍ਵੇ ਧਮ੍ਮਾ ਵਿਸੇਸਪਚ੍ਚਯਾ ਨ ਹੋਨ੍ਤਿ.

ਚਕ੍ਖੁਵਿਞ੍ਞਾਣੇ ਸਤ੍ਤ ਸਬ੍ਬਚਿਤ੍ਤਿਕਾਨਿ ਚੇਤਸਿਕਾਨਿ ਲਬ੍ਭਨ੍ਤਿ, ਵਿਞ੍ਞਾਣੇਨ ਸਦ੍ਧਿਂ ਅਟ੍ਠ ਨਾਮਧਮ੍ਮਾ ਹੋਨ੍ਤਿ. ਸਬ੍ਬੇ ਤੇ ਧਮ੍ਮਾ ਸਤ੍ਤਹਿ ਪਚ੍ਚਯੇਹਿ ਅਞ੍ਞਮਞ੍ਞਸ੍ਸ ਪਚ੍ਚਯਾ ਹੋਨ੍ਤਿ ਚਤੂਹਿ ਮਹਾਸਹਜਾਤੇਹਿ ਚ ਵਿਪ੍ਪਯੁਤ੍ਤਵਜ੍ਜਿਤੇਹਿ ਤੀਹਿ ਮਜ੍ਝਿਮਸਹਜਾਤੇਹਿ ਚ. ਤੇਸ੍ਵੇਵ ਅਟ੍ਠਸੁ ਧਮ੍ਮੇਸੁ ਵਿਞ੍ਞਾਣਂ ਸੇਸਾਨਂ ਸਤ੍ਤਨ੍ਨਂ ਧਮ੍ਮਾਨਂ ਆਹਾਰਪਚ੍ਚਯੇਨ ਚ ਇਨ੍ਦ੍ਰਿਯਪਚ੍ਚਯੇਨ ਚ ਪਚ੍ਚਯੋ ਹੋਤਿ. ਫਸ੍ਸੋ ਆਹਾਰਪਚ੍ਚਯੇਨ, ਵੇਦਨਾ ਇਨ੍ਦ੍ਰਿਯਪਚ੍ਚਯਮਤ੍ਤੇਨ, ਚੇਤਨਾ ਕਮ੍ਮਪਚ੍ਚਯੇਨ ਚ ਆਹਾਰ ਪਚ੍ਚਯੇਨ ਚ, ਏਕਗ੍ਗਤਾ ਇਨ੍ਦ੍ਰਿਯਪਚ੍ਚਯਮਤ੍ਤੇਨ ¶ , ਜੀਵਿਤਂ ਸੇਸਾਨਂ ਸਤ੍ਤਨ੍ਨਂ ਧਮ੍ਮਾਨਂ ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ ਹੋਤਿ. ਚਕ੍ਖੁਵਤ੍ਥੁਰੂਪਂ ਪਨ ਤੇਸਂ ਅਟ੍ਠਨ੍ਨਂ ਧਮ੍ਮਾਨਂ ਛਹਿ ਵਤ੍ਥੁਪੁਰੇਜਾਤੇਹਿ ਤਸ੍ਮਿਂ ਚਕ੍ਖੁਵਤ੍ਥੁਮ੍ਹਿ ਆਪਾਤਮਾਗਤਾਨਿ ਪਚ੍ਚੁਪ੍ਪਨ੍ਨਾਨਿ ਰੂਪਾਰਮ੍ਮਣਾਨਿ ਤੇਸਂ ਚਤੂਹਿ ਆਰਮ੍ਮਣ ਪੁਰੇਜਾਤੇਹਿ, ਅਨਨ੍ਤਰਨਿਰੁਦ੍ਧਂ ਪਞ੍ਚਦ੍ਵਾਰਾਵਜ੍ਜਨਚਿਤ੍ਤਞ੍ਚ ਪਞ੍ਚਹਿ ਅਨਨ੍ਤਰੇਹਿ, ਪੁਬ੍ਬੇ ਕਤਂ ਕੁਸਲਕਮ੍ਮਂ ਵਾ ਅਕੁਸਲਕਮ੍ਮਂ ਵਾ ਕੁਸਲਵਿਪਾਕਾਨਂ ਵਾ ਅਕੁਸਲਵਿਪਾਕਾਨਂ ਵਾ ਤੇਸਂ ਨਾਨਾਕ੍ਖਣਿਕਕਮ੍ਮਪਚ੍ਚਯੇਨ, ਕਮ੍ਮ ਸਹਾਯਭੂਤਾਨਿ ਪੁਰਿਮਭਵੇ ਅਵਿਜ੍ਜਾਤਣ੍ਹੂਪਾਦਾਨਾਨਿ ਚ ਇਮਸ੍ਮਿਂ ਭਵੇ ਆਵਾਸਪੁਗ੍ਗਲਉਤੁਭੋਜਨਾਦਯੋ ਚ ਤੇਸਂ ਅਟ੍ਠਨ੍ਨਂ ਧਮ੍ਮਾਨਂ ਪਕਤੂਪਨਿਸ੍ਸਯਪਚ੍ਚਯੇਨ ਪਚ੍ਚਯਾ ਹੋਨ੍ਤਿ. ਇਮਸ੍ਮਿਂ ਚਿਤ੍ਤੇ ਹੇਤੁ ਚ ਅਧਿਪਤਿ ਚ ਪਚ੍ਛਾਜਾਤੋ ਚ ਆਸੇਵਨਞ੍ਚ ਝਾਨਞ੍ਚ ਮਗ੍ਗੋਚਾਤਿ ਛਪਚ੍ਚਯਾ ਨ ਲਬ੍ਭਨ੍ਤਿ, ਅਟ੍ਠਾਰਸਪਚ੍ਚਯਾ ਲਬ੍ਭਨ੍ਤਿ. ਯਥਾ ਚ ਇਮਸ੍ਮਿਂ ਚਿਤ੍ਤੇ, ਤਥਾ ਸੋਤਵਿਞ੍ਞਾਣਾਦੀਸੁਪਿ ਛ ਪਚ੍ਚਯਾ ਨ ਲਬ੍ਭਨ੍ਤਿ, ਅਟ੍ਠਾਰਸਪਚ੍ਚਯਾ ਲਬ੍ਭਨ੍ਤੀਤਿ.

ਪਞ੍ਚਵਿਞ੍ਞਾਣੇਸੁ ਪਚ੍ਚਯਘਟਨਾਨਯੋ ਨਿਟ੍ਠਿਤੋ.

ਅਹੇਤੁਕ ਚਿਤ੍ਤੁਪ੍ਪਾਦੇਸੁ ਪਚ੍ਚਯਘਟਨਾਨਯੋ

ਛ ਪਕਿਣ੍ਣਕਾਨਿ ਚੇਤਸਿਕਾਨਿ ਨਾਮ, ਵਿਤਕ੍ਕੋ ਵਿਚਾਰੋ ਅਧਿਮੋਕ੍ਖੋ ਵੀਰਿਯਂ ਪੀਤਿ ਛਨ੍ਦੋ. ਤਤ੍ਥ ਵਿਤਕ੍ਕੋ ਝਾਨਪਚ੍ਚਯੋ ਚ ਮਗ੍ਗਪਚ੍ਚਯੋ ਚ. ਵਿਚਾਰੋ ਝਾਨਪਚ੍ਚਯੋ. ਵੀਰਿਯਂ ਅਧਿਪਤਿਜਾਤਿਕਞ੍ਚ ਇਨ੍ਦ੍ਰਿਯਪਚ੍ਚਯੋ ਚ ਮਗ੍ਗਪਚ੍ਚਯੋ ਚ. ਪੀਤਿ ਝਾਨਪਚ੍ਚਯੋ. ਛਨ੍ਦੋ ਅਧਿਪਤਿਜਾਤਿਕੋ. ਅਧਿਮੋਕ੍ਖੋ ਪਨ ਵਿਸੇਸਪਚ੍ਚਯੋ ਨ ਹੋਤਿ.

ਪਞ੍ਚਦ੍ਵਾਰਾਵਜ੍ਜਨਚਿਤ੍ਤਞ੍ਚ ਸਮ੍ਪਟਿਚ੍ਛਨਚਿਤ੍ਤਦ੍ਵਯਞ੍ਚ ਉਪੇਕ੍ਖਾਸਨ੍ਤੀਰਣ ਦ੍ਵਯਞ੍ਚਾਤਿ ਪਞ੍ਚਸੁ ਚਿਤ੍ਤੇਸੁ ਦਸ ਚੇਤਸਿਕਾਨਿ ਲਬ੍ਭਨ੍ਤਿ, ਸਤ੍ਤ ਸਬ੍ਬ ਚਿਤ੍ਤਿਕਾਨਿ ਚ ਪਕਿਣ੍ਣਕੇਸੁ ਵਿਤਕ੍ਕੋ ਚ ਵਿਚਾਰੋ ਚ ਅਧਿਮੋਕ੍ਖੋ ਚ. ਵਿਞ੍ਞਾਣੇਨ ਸਦ੍ਧਿਂ ਪਚ੍ਚੇਕਂ ਏਕਾਦਸ ਨਾਮਧਮ੍ਮਾ ਹੋਨ੍ਤਿ. ਇਮੇਸੁ ਚਿਤ੍ਤੇਸੁ ਝਾਨਕਿਚ੍ਚਂ ਲਬ੍ਭਤਿ. ਵੇਦਨਾ ਚ ਏਕਗ੍ਗਤਾ ਚ ਵਿਤਕ੍ਕੋ ਚ ਵਿਚਾਰੋ ਚ ਝਾਨਪਚ੍ਚਯਂ ਸਾਧੇਨ੍ਤਿ. ਪਞ੍ਚਦ੍ਵਾਰਾਵਜ੍ਜਨਚਿਤ੍ਤਂ ਪਨ ਕਿਰਿਯਚਿਤ੍ਤਂ ਹੋਤਿ, ਵਿਪਾਕਪਚ੍ਚਯੋ ਨਤ੍ਥਿ. ਨਾਨਾਕ੍ਖਣਿਕਕਮ੍ਮਞ੍ਚ ਉਪਨਿਸ੍ਸਯਟ੍ਠਾਨੇ ਤਿਟ੍ਠਤਿ. ਵਿਪਾਕਪਚ੍ਚਯੇਨ ਸਦ੍ਧਿਂ ਛ ਪਚ੍ਚਯਾ ਨ ਲਬ੍ਭਨ੍ਤਿ. ਝਾਨਪਚ੍ਚਯੇਨ ਸਦ੍ਧਿਂ ਅਟ੍ਠਾਰਸਪਚ੍ਚਯਾ ਲਬ੍ਭਨ੍ਤਿ. ਸੇਸੇਸੁ ਚਤੂਸੁ ਵਿਪਾਕਚਿਤ੍ਤੇਸੁ ਪਞ੍ਚ ਪਚ੍ਚਯਾ ਨ ਲਬ੍ਭਨ੍ਤਿ. ਵਿਪਾਕਪਚ੍ਚਯੇਨ ਚ ਝਾਨਪਚ੍ਚਯੇਨ ਚ ਸਦ੍ਧਿਂ ਏਕੂਨਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਸੋਮਨਸ੍ਸਸਨ੍ਤੀਰਣੇ ਪੀਤਿਯਾ ਸਦ੍ਧਿਂ ਏਕਾਦਸਚੇਤਸਿਕਾ ਯੁਜ੍ਜਨ੍ਤਿ, ਮਨੋਦ੍ਵਾਰਾਵਜ੍ਜਨਚਿਤ੍ਤੇ ਚ ਵੀਰਿਯੇਨ ਸਦ੍ਧਿਂ ਏਕਾਦਸਾਤਿ ਵਿਞ੍ਞਾਣੇਨ ਸਦ੍ਧਿਂ ਦ੍ਵਾਦਸ ¶ ਨਾਮਧਮ੍ਮਾ ਹੋਨ੍ਤਿ. ਹਸਿਤੁਪ੍ਪਾਦਚਿਤ੍ਤੇ ਪਨ ਪੀਤਿਯਾ ਚ ਵੀਰਿਯੇਨ ਚ ਸਦ੍ਧਿਂ ਦ੍ਵਾਦਸ ਚੇਤਸਿਕਾਨਿ ਯੁਜ੍ਜਨ੍ਤਿ. ਵਿਞ੍ਞਾਣੇਨ ਸਦ੍ਧਿਂ ਤੇਰਸ ਨਾਮਧਮ੍ਮਾ ਹੋਨ੍ਤਿ. ਤਤ੍ਥ ਸੋਮਨਸ੍ਸਸਨ੍ਤੀਰਣੇ ਝਾਨਙ੍ਗੇਸੁ ਪੀਤਿਮਤ੍ਤਂ ਅਧਿਕਂ ਹੋਤਿ, ਪੁਬ੍ਬੇ ਉਪੇਕ੍ਖਾਸਨ੍ਤੀਰਣਦ੍ਵਯੇ ਵਿਯ ਪਞ੍ਚਪਚ੍ਚਯਾ ਨ ਲਬ੍ਭਨ੍ਤਿ. ਏਕੂਨਵੀਸਤਿਪਚ੍ਚਯਾ ਲਬ੍ਭਨ੍ਤਿ. ਮਨੋਦ੍ਵਾਰਾ ਵਜ੍ਜਨਚਿਤ੍ਤੇ ਚ ਵੀਰਿਯਮਤ੍ਤਂ ਅਧਿਕਂ ਹੋਤਿ, ਤਞ੍ਚ ਇਨ੍ਦ੍ਰਿਯਕਿਚ੍ਚ ਝਾਨ ਕਿਚ੍ਚਾਨਿਸਾਧੇਤਿ. ਅਧਿਪਤਿਕਿਚ੍ਚਞ੍ਚ ਮਗ੍ਗਕਿਚ੍ਚਞ੍ਚ ਨ ਸਾਧੇਤਿ. ਕਿਰਿਯ ਚਿਤ੍ਤਤ੍ਤਾਵਿਪਾਕਪਚ੍ਚਯੋ ਚ ਨਤ੍ਥਿ. ਪੁਬ੍ਬੇ ਪਞ੍ਚਦ੍ਵਾਰਾਵਜ੍ਜਨਚਿਤ੍ਤੇ ਵਿਯ ਵਿਪਾਕ ਪਚ੍ਚਯੇਨ ਸਦ੍ਧਿਂ ਛ ਪਚ੍ਚਯਾ ਨ ਲਬ੍ਭਨ੍ਤਿ. ਝਾਨਪਚ੍ਚਯੇਨ ਸਦ੍ਧਿਂ ਅਟ੍ਠਰਸ ਪਚ੍ਚਯਾ ਲਬ੍ਭਨ੍ਤਿ. ਹਸਿਤੁਪ੍ਪਾਦਚਿਤ੍ਤੇਪਿ ਕਿਰਿਯਚਿਤ੍ਤਤ੍ਤਾ ਵਿਪਾਕਪਚ੍ਚਯੋ ਨਤ੍ਥਿ, ਜਵਨਚਿਤ੍ਤਤ੍ਤਾ ਪਨ ਆਸੇਵਨਂ ਅਤ੍ਥਿ, ਵਿਪਾਕਪਚ੍ਚਯੇਨ ਸਦ੍ਧਿਂ ਪਞ੍ਚ ਪਚ੍ਚਯਾ ਨ ਲਬ੍ਭਨ੍ਤਿ. ਆਸੇਵਨਪਚ੍ਚਯੇਨ ਸਦ੍ਧਿਂ ਏਕੂਨਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਅਹੇਤੁਕਚਿਤ੍ਤੁਪ੍ਪਾਦੇਸੁ ਪਚ੍ਚਯਘਟਨਾਨਯੋ ਨਿਟ੍ਠਿਤੋ.

ਅਕੁਸਲਚਿਤ੍ਤੁਪ੍ਪਾਦੇਸੁ ਪਚ੍ਚਯਘਟਨਾਨਯੋ

ਦ੍ਵਾਦਸ ਅਕੁਸਲਚਿਤ੍ਤਾਨਿ, ਦ੍ਵੇ ਮੋਹਮੂਲਿਕਾਨਿ ਅਟ੍ਠ ਲੋਭ ਮੂਲਿਕਾਨਿ ਦ੍ਵੇ ਦੋਸਮੂਲਿਕਾਨਿ. ਚੁਦ੍ਦਸ ਪਾਪਚੇਤਸਿਕਾਨਿ ਨਾਮ ਮੋਹੋ ਅਹਿਰਿਕਂ ਅਨੋਤ੍ਤਪ੍ਪਂ ਉਦ੍ਧਚ੍ਚਨ੍ਤਿ ਇਦਂ ਮੋਹਚਤੁਕ੍ਕਂ ਨਾਮ. ਲੋਭੋ ਦਿਟ੍ਠਿ ਮਾਨੋਤਿ ਇਦਂ ਲੋਭਤਿਕ੍ਕਂ ਨਾਮ. ਦੋਸੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਨ੍ਤਿ ਇਦਂ ਦੋਸਚਤੁਕ੍ਕਂ ਨਾਮ. ਥਿਨਂ ਮਿਦ੍ਧਂ ਵਿਚਿਕਿਚ੍ਛਾਤਿ ਇਦਂ ਵਿਸੁਂ ਤਿਕ੍ਕਂ ਨਾਮ.

ਤਤ੍ਥ ਲੋਭੋ ਦੋਸੋ ਮੋਹੋਤਿ ਤਯੋ ਮੂਲਧਮ੍ਮਾ ਹੇਤੁਪਚ੍ਚਯਾ, ਦਿਟ੍ਠਿ ਮਗ੍ਗਪਚ੍ਚਯੋ, ਸੇਸਾ ਦਸਧਮ੍ਮਾ ਵਿਸੇਸਪਚ੍ਚਯਾ ਨ ਹੋਨ੍ਤਿ.

ਤਤ੍ਥ ਦ੍ਵੇ ਮੋਹਮੂਲਿਕਾਨਿ ਨਾਮ ਵਿਚਿਕਿਚ੍ਛਾਸਮ੍ਪਯੁਤ੍ਤਚਿਤ੍ਤਂ ਉਦ੍ਧਚ੍ਚ ਸਮ੍ਪਯੁਤ੍ਤਚਿਤ੍ਤਂ. ਤਤ੍ਥ ਵਿਚਿਕਿਚ੍ਛਾਸਮ੍ਪਯੁਤ੍ਤਚਿਤ੍ਤੇ ਪਨ੍ਨਰਸ ਚੇਤਸਿਕਾਨਿ ਉਪ੍ਪਜ੍ਜਨ੍ਤਿ ਸਤ੍ਤ ਸਬ੍ਬਚਿਤ੍ਤਿਕਾਨਿ ਚ ਵਿਤਕ੍ਕੋ ਵਿਚਾਰੋ ਵੀਰਿਯਨ੍ਤਿ ਤੀਣਿ ਪਕਿਣ੍ਣਕਾਨਿ ਚ ਪਾਪਚੇਤਸਿਕੇਸੁ ਮੋਹਚਤੁਕ੍ਕਞ੍ਚ ਵਿਚਿਕਿਚ੍ਛਾ ਚਾਤਿ, ਚਿਤ੍ਤੇਨ ਸਦ੍ਧਿਂ ਸੋਲ਼ਸ ਨਾਮਧਮ੍ਮਾ ਹੋਨ੍ਤਿ. ਇਮਸ੍ਮਿਂ ਚਿਤ੍ਤੇ ਹੇਤੁ ਪਚ੍ਚਯੋਪਿ ਮਗ੍ਗਪਚ੍ਚਯੋਪਿ ਲਬ੍ਭਨ੍ਤਿ. ਤਤ੍ਥ ਮੋਹੋ ਹੇਤੁਪਚ੍ਚਯੋ, ਵਿਤਕ੍ਕੋ ਚ ਵੀਰਿਯਞ੍ਚ ਮਗ੍ਗਪਚ੍ਚਯੋ, ਏਕਗ੍ਗਤਾ ਪਨ ਵਿਚਿਕਿਚ੍ਛਾਯ ਦੁਟ੍ਠਤ੍ਤਾ ਇਮਸ੍ਮਿਂ ਚਿਤ੍ਤੇ ਇਨ੍ਦ੍ਰਿਯਕਿਚ੍ਚਞ੍ਚ ਮਗ੍ਗਕਿਚ੍ਚਞ੍ਚ ਨ ਸਾਧੇਤਿ, ਝਾਨਕਿਚ੍ਚਮਤ੍ਤਂ ਸਾਧੇਤਿ. ਅਧਿਪਤਿ ਚ ਪਚ੍ਛਾਜਾਤੋ ਵਿਪਾਕੋ ਚਾਤਿ ਤਯੋ ਪਚ੍ਚਯਾਨ ਲਬ੍ਭਨ੍ਤਿ, ਸੇਸਾ ਏਕਵੀਸਤਿਪਚ੍ਚਯਾ ਲਬ੍ਭਨ੍ਤਿ. ਉਦ੍ਧਚ੍ਚਸਮ੍ਪਯੁਤ੍ਤਚਿਤ੍ਤੇਪਿ ਵਿਚਿਕਿਚ੍ਛਂ ਪਹਾਯ ਅਧਿਮੋਕ੍ਖੇਨ ਸਦ੍ਧਿਂ ਪਨ੍ਨਰਸੇਵ ਚੇਤਸਿਕਾਨਿ, ਸੋਲ਼ਸੇਵ ਨਾਮਧਮ੍ਮਾ ਹੋਨ੍ਤਿ ¶ . ਇਮਸ੍ਮਿਂ ਚਿਤ੍ਤੇ ਏਕਗ੍ਗਤਾ ਇਨ੍ਦ੍ਰਿਯ ਕਿਚ੍ਚਞ੍ਚ ਝਾਨਕਿਚ੍ਚਞ੍ਚ ਮਗ੍ਗਕਿਚ੍ਚਞ੍ਚ ਸਾਧੇਤਿ, ਤਯੋ ਪਚ੍ਚਯਾ ਨ ਲਬ੍ਭਨ੍ਤਿ, ਏਕਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਅਟ੍ਠਸੁ ਲੋਭਮੂਲਿਕਚਿਤ੍ਤੇਸੁ ਪਨ ਸਤ੍ਤ ਸਬ੍ਬਚਿਤ੍ਤਿਕਾਨਿ ਚ ਛ ਪਕਿਣ੍ਣਕਾਨਿ ਚ ਪਾਪੇਸੁ ਮੋਹਚਤੁਕ੍ਕਞ੍ਚ ਲੋਭਤਿਕ੍ਕਞ੍ਚ ਥਿਨਮਿਦ੍ਧਞ੍ਚਾਤਿ ਦ੍ਵਾਵੀਸਤਿ ਚੇਤਸਿਕਾਨਿ ਉਪ੍ਪਜ੍ਜਨ੍ਤਿ. ਤੇਸੁ ਲੋਭੋ ਚ ਮੋਹੋਚਾਤਿ ਦ੍ਵੇ ਮੂਲਾਨਿ ਹੇਤੁਪਚ੍ਚਯੋ. ਛਨ੍ਦੋ ਚ ਚਿਤ੍ਤਞ੍ਚ ਵੀਰਿਯਞ੍ਚਾਤਿ ਤਯੋ ਅਧਿਪਤਿਜਾਤਿਕਾ ਕਦਾਚਿ ਅਧਿਪਤਿਕਿਚ੍ਚਂ ਸਾਧੇਨ੍ਤਿ, ਆਰਮ੍ਮਣਾਧਿਪਤਿਪਿ ਏਤ੍ਥ ਲਬ੍ਭਤਿ. ਚੇਤਨਾ ਕਮ੍ਮਪਚ੍ਚਯੋ. ਤਯੋ ਆਹਾਰਾ ਆਹਾਰਪਚ੍ਚਯੋ. ਚਿਤ੍ਤਞ੍ਚ ਵੇਦਨਾ ਚ ਏਕਗ੍ਗਤਾ ਚ ਜੀਵਿਤਞ੍ਚ ਵੀਰਿਯਞ੍ਚਾਤਿ ਪਞ੍ਚ ਇਨ੍ਦ੍ਰਿਯਧਮ੍ਮਾ ਇਨ੍ਦ੍ਰਿਯਪਚ੍ਚਯੋ. ਵਿਤਕ੍ਕੋ ਚ ਵਿਚਾਰੋ ਚ ਪੀਤਿ ਚ ਵੇਦਨਾ ਚ ਏਕਗ੍ਗਤਾਚਾਤਿ ਪਞ੍ਚ ਝਾਨਙ੍ਗਾਨਿ ਝਾਨਪਚ੍ਚਯੋ. ਵਿਤਕ੍ਕੋ ਚ ਏਕਗ੍ਗਤਾ ਚ ਦਿਟ੍ਠਿ ਚ ਵੀਰਿਯਞ੍ਚਾਤਿ ਚਤ੍ਤਾਰਿ ਮਗ੍ਗਙ੍ਗਾਨਿ ਮਗ੍ਗਪਚ੍ਚਯੋ. ਪਚ੍ਛਾਜਾਤੋ ਚ ਵਿਪਾਕੋ ਚਾਤਿ ਦ੍ਵੇ ਪਚ੍ਚਯਾ ਨ ਲਬ੍ਭਨ੍ਤਿ. ਸੇਸਾ ਦ੍ਵਾਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਦ੍ਵੀਸੁ ਦੋਸਮੂਲਿਕਚਿਤ੍ਤੇਸੁ ਪੀਤਿਞ੍ਚ ਲੋਭਤਿਕ੍ਕਞ੍ਚ ਪਹਾਯ ਦੋਸਚਤੁਕ੍ਕੇਨ ਸਦ੍ਧਿਂ ਦ੍ਵਾਵੀਸਤਿ ਏਵ ਚੇਤਸਿਕਾਨਿ, ਦੋਸੋ ਚ ਮੋਹੋ ਚ ਦ੍ਵੇ ਮੂਲਾਨਿ, ਤਯੋ ਅਧਿਪਤਿ ਜਾਤਿਕਾ, ਤਯੋ ਆਹਾਰਾ, ਪਞ੍ਚ ਇਨ੍ਦ੍ਰਿਯਾਨਿ, ਚਤ੍ਤਾਰਿ ਝਾਨਙ੍ਗਾਨਿ, ਤੀਣਿ ਮਗ੍ਗਙ੍ਗਾਨਿ. ਏਤ੍ਥਾਪਿ ਦ੍ਵੇ ਪਚ੍ਚਯਾ ਨ ਲਬ੍ਭਨ੍ਤਿ, ਦ੍ਵਾਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਅਕੁਸਲਚਿਤ੍ਤੁਪ੍ਪਾਦੇਸੁ ਪਚ੍ਚਯਘਟਨਾਨਯੋ ਨਿਟ੍ਠਿਤੋ.

ਏਕਨਵੁਤਿ ਸੋਭਣਚਿਤ੍ਤਾਨਿ ਨਾਮ, ਚਤੁਵੀਸਤਿ ਕਾਮ ਸੋਭਣਚਿਤ੍ਤਾਨਿ ਪਨ੍ਨਰਸ ਰੂਪਚਿਤ੍ਤਾਨਿ ਦ੍ਵਾਦਸ ਅਰੂਪਚਿਤ੍ਤਾਨਿ ਚਤ੍ਤਾਲੀਸ ਲੋਕੁਤ੍ਤਰਚਿਤ੍ਤਾਨਿ. ਤਤ੍ਥ ਚਤੁਵੀਸਤਿ ਕਾਮਸੋਭਣ ਚਿਤ੍ਤਾਨਿ ਨਾਮ ਅਟ੍ਠ ਕਾਮਕੁਸਲਚਿਤ੍ਤਾਨਿ ਅਟ੍ਠ ਕਾਮਸੋਭਣਵਿਪਾਕ ਚਿਤ੍ਤਾਨਿ ਅਟ੍ਠ ਕਾਮਸੋਭਣਕਿਰਿਯਚਿਤ੍ਤਾਨਿ.

ਪਞ੍ਚ ਵੀਸਤਿ ਕਲ੍ਯਾਣਚੇਤਸਿਕਾਨਿ ਨਾਮ, ਅਲੋਭੋ ਅਦੋਸੋ ਅਮੋਹੋਚੇਤਿ ਤੀਣਿ ਕਲ੍ਯਾਣਮੂਲਿਕਾਨਿ ਚ ਸਦ੍ਧਾ ਚ ਸਤਿ ਚ ਹਿਰੀ ਚ ਓਤ੍ਤਪ੍ਪਞ੍ਚ ਤਤ੍ਰਮਜ੍ਝਤ੍ਤਤਾ ਚ ਕਾਯਪਸ੍ਸਦ੍ਧਿ ਚ ਚਿਤ੍ਤ ਪਸ੍ਸਦ੍ਧਿ ਚ ਕਾਯਲਹੁਤਾ ਚ ਚਿਤ੍ਤਲਹੁਤਾ ਚ ਕਾਯਮੁਦੁਤਾ ਚ ਚਿਤ੍ਤ ਮੁਦੁਤਾ ਚ ਕਾਯਕਮ੍ਮਞ੍ਞਤਾ ਚ ਚਿਤ੍ਤ ਕਮ੍ਮਞ੍ਞਤਾ ਚ ਕਾਯਪਾਗੁਞ੍ਞਤਾ ਚ ਚਿਤ੍ਤਪਾਗੁਞ੍ਞਤਾ ਚ ਕਾਯੁਜੁਕਤਾ ਚ ਚਿਤ੍ਤੁਜੁਕਤਾ ¶ ਚ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋਤਿ ਤਿਸ੍ਸੋ ਵਿਰਤਿਯੋ ਚ ਕਰੁਣਾ ਮੁਦਿਤਾਤਿ ਦ੍ਵੇ ਅਪ੍ਪਮਞ੍ਞਾਯੋ ਚ.

ਤਤ੍ਥ ਤੀਣਿ ਕਲ੍ਯਾਣਮੂਲਾਨਿ ਹੇਤੁਪਚ੍ਚਯੋ, ਅਮੋਹੋ ਪਨ ਅਧਿਪਤਿਪਚ੍ਚਯੇ ਵੀਮਂਸਾਧਿਪਤਿਨਾਮ, ਇਨ੍ਦ੍ਰਿਯਪਚ੍ਚਯੇ ਪਞ੍ਞਿਨ੍ਦ੍ਰਿਯਂ ਨਾਮ, ਮਗ੍ਗਪਚ੍ਚਯੇ ਸਮ੍ਮਾਦਿਟ੍ਠਿ ਨਾਮ. ਸਦ੍ਧਾ ਇਨ੍ਦ੍ਰਿਯਪਚ੍ਚਯੇ ਸਦ੍ਧਿਨ੍ਦ੍ਰਿਯਂ ਨਾਮ. ਸਤਿ ਇਨ੍ਦ੍ਰਿਯਪਚ੍ਚਯੇ ਸਤਿਨ੍ਦ੍ਰਿਯਂ ਨਾਮ, ਮਗ੍ਗਪਚ੍ਚਯੇ ਸਮ੍ਮਾਸਤਿ ਨਾਮ. ਤਿਸ੍ਸੋ ਵਿਰਤਿਯੋ ਮਗ੍ਗਪਚ੍ਚਯੋ, ਸੇਸਾ ਸਤ੍ਤਰਸ ਧਮ੍ਮਾ ਵਿਸੇਸਪਚ੍ਚਯਾ ਨ ਹੋਨ੍ਤਿ.

ਅਟ੍ਠਸੁ ਕਾਮਕੁਸਲਚਿਤ੍ਤੇਸੁ ਅਟ੍ਠਤਿਂਸ ਚੇਤਸਿਕਾਨਿ ਸਙ੍ਗਯ੍ਹਨ੍ਤਿ, ਸਤ੍ਤ ਸਬ੍ਬਚਿਤ੍ਤਿਕਾਨਿ ਛ ਪਕਿਣ੍ਣਕਾਨਿ ਪਞ੍ਚਵੀਸਤਿ ਕਲ੍ਯਾਣਾਨਿ. ਤੇਸੁ ਚ ਪੀਤਿ ਚਤੂਸੁ ਸੋਮਨਸ੍ਸਿਕੇਸੁ ਏਵ, ਅਮੋਹੋ ਚਤੂਸੁ ਞਾਣਸਮ੍ਪਯੁਤ੍ਤੇਸੁ ਏਵ, ਤਿਸ੍ਸੋ ਵਿਰਤਿਯੋ ਸਿਕ੍ਖਾਪਦਸੀਲਪੂਰਣ ਕਾਲੇ ਏਵ, ਦ੍ਵੇ ਅਪ੍ਪਮਞ੍ਞਾਯੋ ਸਤ੍ਤੇਸੁ ਕਾਰੁਞ੍ਞਮੋਦਨਾਕਾਰੇਸੁ ਏਵਾਤਿ. ਇਮੇਸੁਪਿ ਅਟ੍ਠਸੁ ਚਿਤ੍ਤੇਸੁ ਦ੍ਵੇ ਵਾ ਤੀਣਿ ਵਾ ਕਲ੍ਯਾਣਮੂਲਾਨਿ ਹੇਤੁਪਚ੍ਚਯੋ, ਛਨ੍ਦੋ ਚ ਚਿਤ੍ਤਞ੍ਚ ਵੀਰਿਯਞ੍ਚ ਵੀਮਂਸਾਚਾਤਿ ਚਤੂਸੁ ਅਧਿਪਤਿਜਾਤਿਕੇਸੁ ਏਕਮੇਕੋਵ ਕਦਾਚਿ ਅਧਿਪਤਿਪਚ੍ਚਯੋ. ਚੇਤਨਾ ਕਮ੍ਮਪਚ੍ਚਯੋ. ਤਯੋ ਆਹਾਰਾ ਆਹਾਰਪਚ੍ਚਯੋ. ਚਿਤ੍ਤਞ੍ਚ ਵੇਦਨਾ ਚ ਏਕਗ੍ਗਤਾ ਚ ਜੀਵਿਤਞ੍ਚ ਸਦ੍ਧਾ ਚ ਸਤਿ ਚ ਵੀਰਿਯਞ੍ਚ ਪਞ੍ਞਾਚਾਤਿ ਅਟ੍ਠ ਇਨ੍ਦ੍ਰਿਯਾਨਿ ਇਨ੍ਦ੍ਰਿਯਪਚ੍ਚਯੋ. ਵਿਤਕ੍ਕੋ ਚ ਵਿਚਾਰੋ ਚ ਪੀਤਿ ਚ ਵੇਦਨਾ ਚ ਏਕਗ੍ਗਤਾਚਾਤਿ ਪਞ੍ਚਝਾਨਙ੍ਗਾਨਿ ਝਾਨਪਚ੍ਚਯੋ. ਪਞ੍ਞਾ ਚ ਵਿਤਕ੍ਕੋ ਚ ਤਿਸ੍ਸੋ ਵਿਰਤਿਯੋ ਚ ਸਤਿ ਚ ਵੀਰਿਯਞ੍ਚ ਏਕਗ੍ਗਤਾਚਾਤਿ ਅਟ੍ਠ ਮਗ੍ਗਙ੍ਗਾਨਿ ਮਗ੍ਗਪਚ੍ਚਯੋ. ਇਮੇਸੁਪਿ ਅਟ੍ਠਸੁ ਚਿਤ੍ਤੇਸੁ ਪਚ੍ਛਾਜਾਤੋ ਚ ਵਿਪਾਕੋਚਾਤਿ ਦ੍ਵੇ ਪਚ੍ਚਯਾ ਨ ਲਬ੍ਭਨ੍ਤਿ, ਸੇਸਾ ਦ੍ਵਾਵੀਸਤਿਪਚ੍ਚਯਾ ਲਬ੍ਭਨ੍ਤਿ.

ਅਟ੍ਠਸੁ ਕਾਮਸੋਭਣਕਿਰਿਯਚਿਤ੍ਤੇਸੁ ਤਿਸ੍ਸੋ ਵਿਰਤਿਯੋ ਨ ਲਬ੍ਭਨ੍ਤਿ, ਕੁਸਲੇਸੁ ਵਿਯ ਦ੍ਵੇ ਪਚ੍ਚਯਾ ਨ ਲਬ੍ਭਨ੍ਤਿ, ਦ੍ਵਾਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਅਟ੍ਠਸੁ ਕਾਮਸੋਭਣਵਿਪਾਕੇਸੁ ਤਿਸ੍ਸੋ ਵਿਰਤਿਯੋ ਚ ਦ੍ਵੇ ਅਪ੍ਪਮਞ੍ਞਾਯੋ ਚ ਨ ਲਬ੍ਭਨ੍ਤਿ. ਅਧਿਪਤਿਪਚ੍ਚਯੋ ਚ ਪਚ੍ਛਾਜਾਤੋ ਚ ਆਸੇਵਨਞ੍ਚਾਤਿ ਤਯੋ ਪਚ੍ਚਯਾ ਨ ਲਬ੍ਭਨ੍ਤਿ, ਏਕਵੀਸਤਿ ਪਚ੍ਚਯਾ ਲਬ੍ਭਨ੍ਤਿ.

ਉਪਰਿ ਰੂਪਾਰੂਪਲੋਕੁਤ੍ਤਰਚਿਤ੍ਤੇਸੁਪਿ ਦ੍ਵਾਵੀਸਤਿਪਚ੍ਚਯਤੋ ਅਤਿਰੇਕਂ ਨਤ੍ਥਿ. ਤਸ੍ਮਾ ਚਤੂਸੁ ਞਾਣਸਮ੍ਪਯੁਤ੍ਤਕਾਮਕੁਸਲ ਚਿਤ੍ਤੇਸੁ ਵਿਯ ਇਮੇਸੁ ਪਚ੍ਚਯਘਟਨਾ ਵੇਦਿਤਬ੍ਬਾ.

ਏਵਂ ਸਨ੍ਤੇ ਕਸ੍ਮਾ ਤਾਨਿ ਚਿਤ੍ਤਾਨਿ ਕਾਮਚਿਤ੍ਤਤੋ ਮਹਨ੍ਤ ਤਰਾਨਿ ਚ ਪਣੀਤਤਰਾਨਿ ਚ ਹੋਨ੍ਤੀਤਿ. ਆਸੇਵਨਮਹਨ੍ਤਤ੍ਤਾ. ਤਾਨਿ ਹਿ ਚਿਤ੍ਤਾਨਿ ਭਾਵਨਾਕਮ੍ਮਵਿਸੇਸੇਹਿ ¶ ਸਿਦ੍ਧਾਨਿ ਹੋਨ੍ਤਿ, ਤਸ੍ਮਾ ਤੇਸੁ ਆਸੇਵਨਪਚ੍ਚਯੋ ਮਹਨ੍ਤੋ ਹੋਤਿ. ਆਸੇਵਨ ਮਹਨ੍ਤਤ੍ਤਾ ਚ ਇਨ੍ਦ੍ਰਿਯਪਚ੍ਚਯੋਪਿ ਝਾਨਪਚ੍ਚਯੋਪਿ ਮਗ੍ਗਪਚ੍ਚਯੋਪਿ ਅਞ੍ਞੇਪਿ ਵਾ ਤੇਸਂ ਪਚ੍ਚਯਾ ਮਹਨ੍ਤਾ ਹੋਨ੍ਤਿ. ਪਚ੍ਚਯਾਨਂ ਉਪਰੂਪਰਿ ਮਹਨ੍ਤਤ੍ਤਾ ਤਾਨਿ ਚਿਤ੍ਤਾਨਿ ਉਪਰੂਪਰਿ ਚ ਕਾਮਚਿਤ੍ਤਤੋ ਮਹਨ੍ਤਤਰਾਨਿ ਚ ਪਣੀਤਤਰਾਨਿ ਚ ਹੋਨ੍ਤੀਤਿ.

ਚਿਤ੍ਤੁਪ੍ਪਾਦੇਸੁ ਪਚ੍ਚਯਘਟਨਾਨਯੋ ਨਿਟ੍ਠਿਤੋ.

ਰੂਪਕਲਾਪੇਸੁ ਪਚ੍ਚਯਘਟਨਾਨਯੋ ਵੁਚ੍ਚਤੇ. ਅਟ੍ਠਵੀਸਤਿ ਰੂਪਾਨਿ ਨਾਮ, ਚਤ੍ਤਾਰਿ ਮਹਾਭੂਤਾਨਿ ਪਥਵੀ ਆਪੋ ਤੇਜੋ ਵਾਯੋ. ਪਞ੍ਚ ਪਸਾਦਰੂਪਾਨਿ ਚਕ੍ਖੁ ਸੋਤਂ ਘਾਨਂ ਜਿਵ੍ਹਾ ਕਾਯੋ. ਪਞ੍ਚ ਗੋਚਰਰੂਪਾਨਿ ਰੂਪਂ ਸਦ੍ਦੋ ਗਨ੍ਧੋ ਰਸੋ ਫੋਟ੍ਠਬ੍ਬਂ. ਤਤ੍ਥ ਫੋਟ੍ਠਬ੍ਬਂ ਤਿਵਿਧਂ ਪਥਵੀਫੋਟ੍ਠਬ੍ਬਂ ਤੇਜੋਫੋਟ੍ਠਬ੍ਬਂ ਵਾਯੋਫੋਟ੍ਠਬ੍ਬਂ. ਦ੍ਵੇ ਭਾਵਰੂਪਾਨਿ ਇਤ੍ਥਿਭਾਵਰੂਪਂ ਪੁਮ੍ਭਾਵਰੂਪਂ. ਏਕਂ ਜੀਵਿਤਰੂਪਂ, ਏਕਂ ਹਦਯਰੂਪਂ. ਏਕਂ ਆਹਾਰਰੂਪਂ. ਏਕਂ ਆਕਾਸਧਾਤੁਰੂਪਂ. ਦ੍ਵੇ ਵਿਞ੍ਞਤ੍ਤਿਰੂਪਾਨਿ ਕਾਯਵਿਞ੍ਞਤ੍ਤਿਰੂਪਂ ਵਚੀਵਿਞ੍ਞਤ੍ਤਿ ਰੂਪਂ. ਤੀਣਿ ਵਿਕਾਰਰੂਪਾਨਿ ਲਹੁਤਾ ਮੁਦੁਤਾ ਕਮ੍ਮਞ੍ਞਤਾ. ਚਤ੍ਤਾਰਿ ਲਕ੍ਖਣਰੂਪਾਨਿ ਉਪਚਯੋ ਸਨ੍ਤਤਿ ਜਰਤਾ ਅਨਿਚ੍ਚਤਾ.

ਤਤ੍ਥ ਛ ਰੂਪਧਮ੍ਮਾ ਰੂਪਧਮ੍ਮਾਨਂ ਪਚ੍ਚਯਾ ਹੋਨ੍ਤਿ ਚਤ੍ਤਾਰਿ ਮਹਾਭੂਤਾਨਿ ਚ ਜੀਵਿਤਰੂਪਞ੍ਚ ਆਹਾਰਰੂਪਞ੍ਚ. ਤਤ੍ਥ ਚਤ੍ਤਾਰਿ ਮਹਾ ਭੂਤਾਨਿ ਅਞ੍ਞਮਞ੍ਞਸ੍ਸ ਪਞ੍ਚਹਿ ਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ ਸਹਜਾਤੇਨ ਚ ਅਞ੍ਞਮਞ੍ਞੇਨ ਚ ਨਿਸ੍ਸਯੇਨ ਚ ਅਤ੍ਥਿਯਾ ਚ ਅਵਿਗਤੇਨਚ. ਸਹਜਾਤਾਨਂ ਉਪਾਦਾਰੂਪਾਨਂ ਅਞ੍ਞਮਞ੍ਞਵਜ੍ਜਿਤੇਹਿ ਚਤੂਹਿ ਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ. ਜੀਵਿਤਰੂਪਂ ਸਹਜਾਤਾਨਂ ਕਮ੍ਮਜਰੂਪਾਨਂ ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ. ਆਹਾਰਰੂਪਂ ਸਹਜਾਤਾਨਞ੍ਚ ਅਸਹਜਾਤਾਨਞ੍ਚ ਸਬ੍ਬੇਸਂ ਅਜ੍ਝਤ੍ਤਰੂਪਧਮ੍ਮਾਨਂ ਆਹਾਰਪਚ੍ਚਯੇਨ ਪਚ੍ਚਯੋ.

ਤਤ੍ਥੇਵ ਤੇਰਸ ਰੂਪਧਮ੍ਮਾ ਨਾਮਧਮ੍ਮਾਨਂ ਵਿਸੇਸਪਚ੍ਚਯਾ ਹੋਨ੍ਤਿ, ਪਞ੍ਚਪਸਾਦਰੂਪਾਨਿ ਚ ਸਤ੍ਤ ਗੋਚਰਰੂਪਾਨਿ ਚ ਹਦਯਵਤ੍ਥੁਰੂਪਞ੍ਚ. ਤਤ੍ਥ ਪਞ੍ਚ ਪਸਾਦਰੂਪਾਨਿ ਪਞ੍ਚਨ੍ਨਂ ਵਿਞ੍ਞਾਣਧਾਤੂਨਂ ਮਾਤਰੋ ਵਿਯ ਪੁਤ੍ਤਕਾਨਂ ਵਤ੍ਥੁਪੁਰੇਜਾਤੇਨ ਚ ਵਤ੍ਥੁਪੁਰੇਜਾਤਿਨ੍ਦ੍ਰਿਯੇਨ ਚ ਵਤ੍ਥੁ ਪੁਰੇਜਾਤਵਿਪ੍ਪਯੁਤ੍ਤੇਨ ਚ ਪਚ੍ਚਯਾ ਹੋਨ੍ਤਿ. ਸਤ੍ਤ ਗੋਚਰਰੂਪਾਨਿ ਪਞ੍ਚਨ੍ਨਂ ਵਿਞ੍ਞਾਣਧਾਤੂਨਂ ਤਿਸ੍ਸਨ੍ਨਂ ਮਨੋਧਾਤੂਨਞ੍ਚ ਪਿਤਰੋ ਵਿਯ ਪੁਤ੍ਤਕਾਨਂ ਆਰਮ੍ਮਣਪੁਰੇਜਾਤੇਨ ਪਚ੍ਚਯਾ ਹੋਨ੍ਤਿ. ਹਦਯਵਤ੍ਥੁਰੂਪਂ ਦ੍ਵਿਨ੍ਨਂ ਮਨੋਧਾਤੁ ਮਨੋਵਿਞ੍ਞਾਣਧਾਤੂਨਂ ਰੁਕ੍ਖੋ ਵਿਯ ਰੁਕ੍ਖਦੇਵਤਾਨਂ ਯਥਾਰਹਂ ¶ ਪਟਿਸਨ੍ਧਿਕ੍ਖਣੇ ਸਹਜਾਤਨਿਸ੍ਸਯੇਨ ਪਵਤ੍ਤਿਕਾਲੇ ਵਤ੍ਥੁਪੁਰੇਜਾਤੇਨ ਚ ਵਤ੍ਥੁਪੁਰੇਜਾਤਵਿਪ੍ਪਯੁਤ੍ਤੇਨ ਚ ਪਚ੍ਚਯੋ ਹੋਤਿ.

ਤੇਵੀਸਤਿ ਰੂਪਕਲਾਪਾ. ਤਤ੍ਥ ਏਕਾਯ ਰਜ੍ਜੁਯਾ ਬਨ੍ਧਿਤਾਨਂ ਕੇਸਾਨਂ ਕੇਸਕਲਾਪੋ ਵਿਯ ਤਿਣਾਨਂ ਤਿਣਕਲਾਪੋ ਵਿਯ ਏਕੇਨ ਜਾਤਿਰੂਪੇਨ ਬਨ੍ਧਿਤਾਨਂ ਰੂਪਧਮ੍ਮਾਨਂ ਕਲਾਪੋ ਪਰਿਪਿਣ੍ਡਿਰੂਪ ਕਲਾਪੋ ਨਾਮ.

ਤਤ੍ਥ ਚਤ੍ਤਾਰਿ ਮਹਾਭੂਤਾਨਿ ਵਣ੍ਣੋ ਗਨ੍ਧੋ ਰਸੋ ਓਜਾਤਿ ਇਮੇ ਅਟ੍ਠ ਧਮ੍ਮਾ ਏਕੋ ਸਬ੍ਬਮੂਲਕਲਾਪੋ ਨਾਮ, ਸਬ੍ਬਮੂਲਟ੍ਠਕਨ੍ਤਿ ਚ ਵੁਚ੍ਚਤਿ.

ਨਵ ਕਮ੍ਮਜਰੂਪਕਲਾਪਾ, – ਜੀਵਿਤਨਵਕਂ ਵਤ੍ਥੁਦਸਕਂ ਕਾਯ ਦਸਕਂ ਇਤ੍ਥਿਭਾਵਦਸਕਂ ਪੁਮ੍ਭਾਵਦਸਕਂ ਚਕ੍ਖੁਦਸਕਂ ਸੋਤਦਸਕਂ ਘਾਨਦਸਕਂ ਜਿਵ੍ਹਾਦਸਕਂ. ਤਤ੍ਥ ਸਬ੍ਬਮੂਲਟ੍ਠਕਮੇਵਜੀਵਿਤਰੂਪੇਨ ਸਹ ਜੀਵਿਤਨਵਕਂ ਨਾਮ. ਏਤਦੇਵ ਕਮ੍ਮਜਕਲਾਪੇਸੁ ਮੂਲਨਵਕਂ ਹੋਤਿ. ਮੂਲਨਵਕਮੇਵ ਯਥਾਕ੍ਕਮਂ ਹਦਯਵਤ੍ਥੁਰੂਪਾਦੀਹਿ ਅਟ੍ਠਰੂਪੇਹਿ ਸਹ ਵਤ੍ਥੁਦਸਕਾਦੀਨਿ ਅਟ੍ਠਦਸਕਾਨਿ ਭਵਤਿ. ਤਤ੍ਥ ਜੀਵਿਤਨਵਕਞ੍ਚ ਕਾਯਦਸਕਞ੍ਚ ਭਾਵਦਸਕਾਨਿਚਾਤਿ ਚਤ੍ਤਾਰੋ ਕਲਾਪਾ ਸਕਲ ਕਾਯੇ ਪਵਤ੍ਤਨ੍ਤਿ. ਤਤ੍ਥ ਜੀਵਿਤਨਵਕਨ੍ਤਿ ਪਾਚਕਗ੍ਗਿ ਚ ਕਾਯਗ੍ਗਿ ਚ ਵੁਚ੍ਚਤਿ. ਪਾਚਕਗ੍ਗਿ ਨਾਮ ਪਾਚਕਤੇਜੋ ਕੋਟ੍ਠਾਸੋ, ਸੋ ਆਮਾਸਯੇ ਪਵਤ੍ਤਿਤ੍ਵਾ ਅਸਿਤਪੀਤਖਾਯਿਤਸਾਯਿਤਾਨਿ ਪਰਿਪਾਚੇਤਿ. ਕਾਯਗ੍ਗਿ ਨਾਮ ਸਕਲਕਾਯਬ੍ਯਾਪਕੋ ਉਸ੍ਮਾਤੇਜੋ ਕੋਟ੍ਠਾਸੋ, ਸੋ ਸਕਲ ਕਾਯੇ ਪਵਤ੍ਤਿਤ੍ਵਾ ਪਿਤ੍ਤਸੇਮ੍ਹਲੋਹਿਤਾਨਿ ਅਪੂਤੀਨਿ ਵਿਪ੍ਪਸਨ੍ਨਾਨਿ ਕਰੋਤਿ. ਤੇਸਂ ਦ੍ਵਿਨ੍ਨਂ ਵਿਸਮਵੁਤ੍ਤਿਯਾ ਸਤਿ ਸਤ੍ਤਾ ਬਹ੍ਵਾਬਾਧਾ ਹੋਨ੍ਤਿ, ਸਮਵੁਤ੍ਤਿਯਾ ਸਤਿ ਅਪ੍ਪਾਬਾਧਾ. ਤਦੁਭਯਂ ਜੀਵਿਤਨਵਕਂ ਸਤ੍ਤਾਨਂ ਆਯੁਂ ਸਮ੍ਪਾਦੇਤਿ. ਵਣ੍ਣਂ ਸਮ੍ਪਾਦੇਤਿ. ਕਾਯਦਸਕਂ ਸਕਲਕਾਯੇ ਸੁਖਸਮ੍ਫਸ੍ਸ ਦੁਕ੍ਖਸਮ੍ਫਸ੍ਸਾਨਿ ਸਮ੍ਪਾਦੇਤਿ. ਭਾਵ ਦਸਕਾਨਿ ਇਤ੍ਥੀਨਂ ਸਬ੍ਬੇ ਇਤ੍ਥਾਕਾਰੇ ਸਮ੍ਪਾਦੇਤਿ. ਪੁਰਿਸਾਨਂ ਸਬ੍ਬੇ ਪੁਰਿਸਾਕਾਰੇ ਸਮ੍ਪਾਦੇਹਿ. ਸੇਸਾਨਿ ਵਤ੍ਥੁਦਸਕਾਦੀਨਿ ਪਞ੍ਚਦਸਕਾਨਿ ਪਦੇਸਦਸਕਾਨਿ ਨਾਮ. ਤਤ੍ਥ ਵਤ੍ਥੁਦਸਕਂ ਹਦਯਕੋਸਬ੍ਭਨ੍ਤਰੇ ਪਵਤ੍ਤਿਤ੍ਵਾ ਸਤ੍ਤਾਨਂ ਨਾਨਾਪਕਾਰਾਨਿ ਸੁਚਿਨ੍ਤਿਤਦੁਚਿਨ੍ਤਿਤਾਨਿ ਸਮ੍ਪਾਦੇਤਿ. ਚਕ੍ਖੁਦਸਕਾਦੀਨਿ ਚਤ੍ਤਾਰਿ ਦਸਕਾਨਿ ਚਕ੍ਖੁਗੁਲ਼ ਕਣ੍ਣਬਿਲ ਨਾਸਬਿਲ ਜਿਵ੍ਹਾਤਲੇਸੁ ਪਵਤ੍ਤਿਤ੍ਵਾ ਦਸ੍ਸਨ ਸਵਨ ਘਾਯਨ ਸਾਯਨਾਨਿ ਸਮ੍ਪਾਦੇਤਿ.

ਅਟ੍ਠ ਚਿਤ੍ਤਜਰੂਪਕਲਾਪਾ, ਸਬ੍ਬਮੂਲਟ੍ਠਕਂ ਸਦ੍ਦਨਵਕਂ ਕਾਯ ਵਿਞ੍ਞਤ੍ਤਿਨਵਕਂ ਸਦ੍ਦਵਚੀਵਿਞ੍ਞਤ੍ਤਿਦਸਕਨ੍ਤਿ ਚਤ੍ਤਾਰੋ ਮੂਲਕਲਾਪਾ ਚ ਤੇਯੇਵ ਲਹੁਤਾ ਮੁਦੁਤਾ ਕਮ੍ਮਞ੍ਞਤਾਸਙ੍ਖਾਤੇਹਿ ਤੀਹਿ ਵਿਕਾਰ ਰੂਪੇਹਿ ਸਹ ਚਤ੍ਤਾਰੋ ਸਵਿਕਾਰਕਲਾਪਾ ਚ.

ਤਤ੍ਥ ¶ ਸਰੀਰਧਾਤੂਨਂ ਵਿਸਮਪ੍ਪਵਤ੍ਤਿਕਾਲੇ ਗਿਲਾਨਸ੍ਸ ਮੂਲ ਕਲਾਪਾਨਿ ਏਵ ਪਵਤ੍ਤਨ੍ਤਿ. ਤਦਾ ਹਿ ਤਸ੍ਸ ਸਰੀਰਰੂਪਾਨਿ ਗਰੂਨਿ ਵਾ ਥਦ੍ਧਾਨਿ ਵਾ ਅਕਮ੍ਮਞ੍ਞਾਨਿ ਵਾ ਹੋਨ੍ਤਿ, ਯਥਾਰੁਚਿ ਇਰਿਯਪਥਂਪਿ ਪਵਤ੍ਤੇਤੁਂ ਅਙ੍ਗ ਪਚ੍ਚਙ੍ਗਾਨਿਪਿ ਚਾਲੇਤੁਂ ਵਚਨਂਪਿ ਕਥੇਤੁਂ ਦੁਕ੍ਖੋ ਹੋਤਿ. ਸਰੀਰਧਾਤੂਨਂ ਸਮਪ੍ਪਵਤ੍ਤਿਕਾਲੇ ਪਨ ਅਗਿਲਾਨਸ੍ਸ ਗਰੁਥਦ੍ਧਾਦੀਨਂ ਸਰੀਰਦੋਸਾਨਂ ਅਭਾਵਤੋ ਸਵਿਕਾਰਾ ਪਵਤ੍ਤਨ੍ਤਿ. ਤੇਸੁ ਚ ਚਿਤ੍ਤਙ੍ਗਵਸੇਨ ਕਾਯਙ੍ਗ ਚਲਨੇ ਦ੍ਵੇ ਕਾਯਵਿਞ੍ਞਤ੍ਤਿਕਲਾਪਾ ਪਵਤ੍ਤਨ੍ਤਿ. ਚਿਤ੍ਤਵਸੇਨੇਵ ਮੁਖਤੋ ਵਚਨਸਦ੍ਦਪ੍ਪਵਤ੍ਤਿਕਾਲੇ ਦ੍ਵੇ ਵਚੀਵਿਞ੍ਞਤ੍ਤਿਕਲਾਪਾ, ਚਿਤ੍ਤਵਸੇਨੇਵ ਅਕ੍ਖਰਵਣ੍ਣਰਹਿਤਾਨਂ ਹਸਨਰੋਦਨਾਦੀਨਂ ਅਵਚਨਸਦ੍ਦਾਨਂ ਮੁਖਤੋ ਪਵਤ੍ਤਿਕਾਲੇ ਦ੍ਵੇ ਸਦ੍ਦਕਲਾਪਾ, ਸੇਸਕਾਲੇਸੁ ਦ੍ਵੇ ਆਦਿ ਕਲਾਪਾ ਪਵਤ੍ਤਨ੍ਤਿ.

ਚਤ੍ਤਾਰੋ ਉਤੁਜਰੂਪਕਲਾਪਾ, ਸਬ੍ਬਮੂਲਟ੍ਠਕਂ ਸਦ੍ਦਨਵਕਨ੍ਤਿ ਦ੍ਵੇ ਮੂਲਕਲਾਪਾ ਚ ਦ੍ਵੇ ਸਵਿਕਾਰਕਲਾਪਾ ਚ. ਤਤ੍ਥ ਅਯਂ ਕਾਯੋ ਯਾਵਜੀਵਂ ਇਰਿਯਾਪਥਸੋਤਂ ਅਨੁਗਚ੍ਛਨ੍ਤੋ ਯਾਪੇਤਿ, ਤਸ੍ਮਾ ਇਰਿਯਾਪਥਨਾਨਤ੍ਤਂ ਪਟਿਚ੍ਚ ਇਮਸ੍ਮਿਂ ਕਾਯੇ ਖਣੇ ਖਣੇ ਧਾਤੂਨਂ ਸਮਪ੍ਪਵਤ੍ਤਿਵਿਸਮਪ੍ਪਵਤ੍ਤਿਯੋ ਪਞ੍ਞਾਯਨ੍ਤਿ. ਤਥਾ ਉਤੁਨਾਨਤ੍ਤਂ ਪਟਿਚ੍ਚ ਆਹਾਰਨਾਨਤ੍ਤਂ ਪਟਿਚ੍ਚ ਵਾਤਾਤਪਸਪ੍ਫਸ੍ਸਨਾਨਤ੍ਤਂ ਪਟਿਚ੍ਚ ਕਾਯਙ੍ਗ ਪਰਿਹਾਰਨਾਨਤ੍ਤਂ ਪਟਿਚ੍ਚ ਅਤ੍ਤੂਪਕ੍ਕਮਪਰੂਪਕ੍ਕਮਨਾਨਤ੍ਤਂ ਪਟਿਚ੍ਚ. ਤਤ੍ਥ ਵਿਸਮਪ੍ਪਵਤ੍ਤਿਕਾਲੇ ਦ੍ਵੇ ਮੂਲਕਲਾਪਾ ਏਵ ਪਵਤ੍ਤਨ੍ਤਿ, ਸਮਪ੍ਪਵਤ੍ਤਿਕਾਲੇ ਦ੍ਵੇ ਸਵਿਕਾਰਾ. ਤੇਸੁ ਚ ਦ੍ਵੇ ਸਦ੍ਦਕਲਾਪਾ ਚਿਤ੍ਤਜਸਦ੍ਦਤੋ ਪਰਮ੍ਪਰਸਦ੍ਦੇਸੁ ਚ ਅਞ੍ਞੇਸੁ ਲੋਕੇ ਨਾਨਪ੍ਪਕਾਰਸਦ੍ਦੇਸੁ ਚ ਪਵਤ੍ਤਨ੍ਤਿ.

ਦ੍ਵੇ ਆਹਾਰਜਰੂਪਕਲਾਪਾ, – ਸਬ੍ਬਮੂਲਟ੍ਠਕਂ ਸਵਿਕਾਰਨ੍ਤਿ. ਇਮੇ ਦ੍ਵੇ ਕਲਾਪਾ ਸਪ੍ਪਾਯੇਨ ਵਾ ਅਸਪ੍ਪਾਯੇਨ ਵਾ ਆਹਾਰੇਨ ਜਾਤਾਨਂ ਸਮਰੂਪਵਿਸਮਰੂਪਾਨਂ ਵਸੇਨ ਵੇਦਿਤਬ੍ਬਾ.

ਆਕਾਸਧਾਤੁ ਚ ਲਕ੍ਖਣਰੂਪਾਨਿਚਾਤਿ ਪਞ੍ਚਰੂਪਾਨਿ ਕਲਾਪ ਮੁਤ੍ਤਾਨਿ ਹੋਨ੍ਤਿ. ਤੇਸੁ ਆਕਾਸਧਾਤੁ ਕਲਾਪਾਨਂ ਅਨ੍ਤਰਾ ਪਰਿਚ੍ਛੇਦ ਮਤ੍ਤਤ੍ਤਾ ਕਲਾਪਮੁਤ੍ਤਾ ਹੋਤਿ. ਲਕ੍ਖਣਰੂਪਾਨਿ ਸਙ੍ਖਤਭੂਤਾਨਂ ਰੂਪ ਕਲਾਪਾਨਂ ਸਙ੍ਖਤਭਾਵਜਾਨਨਤ੍ਥਾਯ ਲਕ੍ਖਣਮਤ੍ਤਤ੍ਤਾ ਕਲਾਪ ਮੁਤ੍ਤਾਨਿ.

ਇਮੇ ਤੇਵੀਸਤਿ ਕਲਾਪਾ ਅਜ੍ਝਤ੍ਤਸਨ੍ਤਾਨੇ ਲਬ੍ਭਨ੍ਤਿ. ਬਹਿਦ੍ਧਾ ਸਨ੍ਤਾਨੇ ਪਨ ਦ੍ਵੇ ਉਤੁਜਮੂਲਕਲਾਪਾ ਏਵ ਲਬ੍ਭਨ੍ਤਿ. ਤਤ੍ਥ ਦ੍ਵੇ ਰੂਪ ਸਨ੍ਤਾਨਾਨਿ ਅਜ੍ਝਤ੍ਤਸਨ੍ਤਾਨਞ੍ਚ ਬਹਿਦ੍ਧਾਸਨ੍ਤਾਨਞ੍ਚ. ਤਤ੍ਥ ਅਜ੍ਝਤ੍ਤਸਨ੍ਤਾਨਂ ਨਾਮ ਸਤ੍ਤਸਨ੍ਤਾਨਂ ਵੁਚ੍ਚਤਿ. ਬਹਿਦ੍ਧਾਸਨ੍ਤਾਨਂ ਨਾਮ ਪਥਵੀਪਬ੍ਬਤਨਦੀਸਮੁਦ੍ਦ ਰੁਕ੍ਖਤਿਣਾਦੀਨਿ ਵੁਚ੍ਚਤਿ. ਤਤ੍ਥ ਅਜ੍ਝਤ੍ਤਸਨ੍ਤਾਨੇ ਅਟ੍ਠਵੀਸਤਿ ਰੂਪਾਨਿ ਤੇਵੀਸਤਿ ਰੂਪਕਲਾਪਾਨਿ ਲਬ੍ਭਨ੍ਤਿ.

ਤਤ੍ਥ ¶ ਪਟਿਸਨ੍ਧਿਨਾਮਧਮ੍ਮਾ ਪਟਿਸਨ੍ਧਿਕ੍ਖਣੇ ਕਮ੍ਮਜਰੂਪਕਲਾਪਾਨਂ ਛਧਾ ਪਚ੍ਚਯਾ ਹੋਨ੍ਤਿ ਚਤੂਹਿ ਮਹਾਸਹਜਾਤੇਹਿ ਚ ਵਿਪਾਕੇਨ ਚ ਵਿਪ੍ਪਯੁਤ੍ਤੇਨ ਚ. ਹਦਯਵਤ੍ਥੁਰੂਪਸ੍ਸ ਪਨ ਅਞ੍ਞਮਞ੍ਞੇਨ ਸਹ ਸਤ੍ਤਧਾ ਪਚ੍ਚਯਾ ਹੋਨ੍ਤਿ. ਤੇਸ੍ਵੇਵ ਨਾਮਧਮ੍ਮੇਸੁ ਹੇਤੁਧਮ੍ਮਾ ਹੇਤੁਭਾਵੇਨ, ਚੇਤਨਾ ਕਮ੍ਮਭਾਵੇਨ, ਆਹਾਰਧਮ੍ਮਾ ਆਹਾਰਭਾਵੇਨ, ਇਨ੍ਦ੍ਰਿਯ ਧਮ੍ਮਾ ਇਨ੍ਦ੍ਰਿਯਭਾਵੇਨ, ਝਾਨਧਮ੍ਮਾ ਝਾਨ ਭਾਵੇਨ, ਮਗ੍ਗਧਮ੍ਮਾ ਮਗ੍ਗ ਭਾਵੇਨਾਤਿ ਯਥਾਰਹਂ ਛਧਾ ਪਚ੍ਚਯਾ ਹੋਨ੍ਤਿ. ਅਤੀਤਾਨਿ ਪਨ ਕੁਸਲਾਕੁਸਲਕਮ੍ਮਾਨਿ ਏਕਧਾਵ ਪਚ੍ਚਯਾ ਹੋਨ੍ਤਿ ਕਮ੍ਮਪਚ੍ਚਯੇਨ, ਪਠਮਭਵਙ੍ਗਾਦਿਕਾ ਪਚ੍ਛਾਜਾਤਾ ਪਵਤ੍ਤਨਾਮਧਮ੍ਮਾ ਪੁਰੇਜਾਤਾਨਂ ਕਮ੍ਮਜਰੂਪ ਕਲਾਪਾਨਂ ਏਕਧਾ ਪਚ੍ਚਯਾ ਹੋਨ੍ਤਿ ਪਚ੍ਛਾਜਾਤੇਨ. ਏਤ੍ਥ ਚ ਪਚ੍ਛਾਜਾਤ ਵਚਨੇਨ ਚਤ੍ਤਾਰੋ ਪਚ੍ਛਾਜਾਤਜਾਤਿਕਾ ਪਚ੍ਚਯਾ ਗਹਿਤਾ ਹੋਨ੍ਤਿ. ਅਤੀਤਾਨਿ ਚ ਕਮ੍ਮਾਨਿ ਏਕਧਾਵ ਪਚ੍ਚਯਾ ਹੋਨ੍ਤਿ. ਏਵਂ ਨਾਮਧਮ੍ਮਾ ਕਮ੍ਮਜਰੂਪਕਲਾਪਾਨਂ ਯਥਾਰਹਂ ਚੁਦ੍ਦਸਹਿ ਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ. ਇਧ ਦਸਪਚ੍ਚਯਾ ਨ ਲਬ੍ਭਨ੍ਤਿ ਆਰਮ੍ਮਣਞ੍ਚ ਅਧਿਪਤਿ ਚ ਅਨਨ੍ਤਰਞ੍ਚ ਸਮਨਨ੍ਤਰਞ੍ਚ ਉਪਨਿਸ੍ਸਯੋ ਚ ਪੁਰੇਜਾਤੋ ਚ ਆਸੇਵਨਞ੍ਚ ਸਮ੍ਪਯੁਤ੍ਤੋ ਚ ਨਤ੍ਥਿ ਚ ਵਿਗਤੋ ਚ.

ਪਵਤ੍ਤਿਕਾਲੇ ਰੂਪਜਨਕਾ ਨਾਮਧਮ੍ਮਾ ਅਤ੍ਤਨਾ ਸਹਜਾਤਾਨਂ ਚਿਤ੍ਤਜਰੂਪਕਲਾਪਾਨਂ ਪਞ੍ਚਧਾ ਪਚ੍ਚਯਾ ਹੋਨ੍ਤਿ ਚਤੂਹਿ ਮਹਾਸਹ ਜਾਤੇਹਿ ਚ ਵਿਪ੍ਪਯੁਤ੍ਤੇਨ ਚ. ਤੇਸ੍ਵੇਵ ਨਾਮਧਮ੍ਮੇਸੁ ਹੇਤੁਧਮ੍ਮਾ ਹੇਤੁਭਾਵੇਨ, ਅਧਿਪਤਿਧਮ੍ਮਾ ਅਧਿਪਤਿਭਾਵੇਨ, ਚੇਤਨਾ ਕਮ੍ਮਭਾਵੇਨ, ਵਿਪਾਕਧਮ੍ਮਾ ਵਿਪਾਕਭਾਵੇਨ, ਆਹਾਰਧਮ੍ਮਾ ਆਹਾਰ ਭਾਵੇਨ, ਇਨ੍ਦ੍ਰਿਯਧਮ੍ਮਾ ਇਨ੍ਦ੍ਰਿਯਭਾਵੇਨ, ਝਾਨਧਮ੍ਮਾ ਝਾਨਭਾਵੇਨ, ਮਗ੍ਗਧਮ੍ਮਾ ਮਗ੍ਗਭਾਵੇਨਾਤਿ ਯਥਾਰਹਂ ਅਟ੍ਠਧਾ ਪਚ੍ਚਯਾ ਹੋਨ੍ਤਿ. ਪਚ੍ਛਾਜਾਤਾ ਸਬ੍ਬੇ ਨਾਮਧਮ੍ਮਾ ਪੁਰੇਜਾਤਾਨਂ ਚਿਤ੍ਤਜਰੂਪਕਲਾਪਾਨਂ ਏਕਧਾ ਪਚ੍ਚਯਾ ਹੋਨ੍ਤਿ ਪਚ੍ਛਾਜਾਤੇਨ. ਏਵਂ ਨਾਮਧਮ੍ਮਾ ਚਿਤ੍ਤਜਰੂਪ ਕਲਾਪਾਨਂ ਯਥਾਰਹਂ ਚੁਦ੍ਦਸਹਿ ਪਚ੍ਚਯੇਹਿ ਪਚ੍ਚਯਾ ਹੋਨ੍ਤਿ. ਇਧਪਿ ਦਸ ਪਚ੍ਚਯਾ ਨ ਲਬ੍ਭਨ੍ਤਿ ਆਰਮ੍ਮਣਞ੍ਚ ਅਨਨ੍ਤਰਞ੍ਚ ਸਮਨਨ੍ਤਰਞ੍ਚ ਅਞ੍ਞਮਞ੍ਞਞ੍ਚ ਉਪਨਿਸ੍ਸਯੋ ਚ ਪੁਰੇਜਾਤੋ ਚ ਆਸੇਵਨਞ੍ਚ ਸਮ੍ਪਯੁਤ੍ਤੋ ਚ ਨਤ੍ਥਿ ਚ ਵਿਗਤੋ ਚ.

ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕਾਲਤੋ ਪਟ੍ਠਾਯ ਪਵਤ੍ਤਿਕਾਲੇ ਸਬ੍ਬੇਪਿ ਨਾਮਧਮ੍ਮਾ ਸਬ੍ਬੇਸਂ ਉਤੁਜਰੂਪਕਲਾਪਾਨਞ੍ਚ ਆਹਾਰਜਰੂਪ ਕਲਾਪਾਨਞ੍ਚ ਏਕਧਾ ਪਚ੍ਚਯਾ ਹੋਨ੍ਤਿ ਪਚ੍ਛਾਜਾਤਵਸੇਨ. ਏਤ੍ਥਪਿ ਪਚ੍ਛਾਜਾਤਵਚਨੇਨ ਚਤ੍ਤਾਰੋ ਪਚ੍ਛਾਜਾਤਜਾਤਿਕਾ ਗਹਿਤਾ ਹੋਨ੍ਤਿ, ਸੇਸਾ ਵੀਸਤਿ ਪਚ੍ਚਯਾ ਨ ਲਬ੍ਭਨ੍ਤਿ.

ਸਬ੍ਬੇਸੁ ਪਨ ਤੇਵੀਸਤਿਯਾ ਰੂਪਕਲਾਪੇਸੁਚਤ੍ਤਾਰੋਮਹਾ ਭੂਤਾ ਅਞ੍ਞਮਞ੍ਞਸ੍ਸ ਪਞ੍ਚਧਾ ਪਚ੍ਚਯਾ ਹੋਨ੍ਤਿ ਚਤੂਹਿ ਮਹਾਸਹ ਜਾਤੇਹਿ ਚ ਅਞ੍ਞਮਞ੍ਞੇਨ ਚ, ਸਹਜਾਤਾਨਂ ਉਪਾਦਾਰੂਪਾਨਂ ਚਤੁਧਾ ਪਚ੍ਚਯਾ ਹੋਨ੍ਤਿ ਚਤੂਹਿ ਮਹਾਸਹਜਾਤੇਹਿ ¶ . ਆਹਾਰਰੂਪਂ ਸਹਜਾਤਾਨਞ੍ਚ ਅਸਹਜਾਤਾਨਞ੍ਚ ਸਬ੍ਬੇਸਂ ਅਜ੍ਝਤ੍ਤਰੂਪਕਲਾਪਾਨਂ ਆਹਾਰ ਪਚ੍ਚਯੇਨ ਪਚ੍ਚਯੋ ਹੋਤਿ. ਨਵਸੁ ਕਮ੍ਮਜਰੂਪਕਲਾਪੇਸੁ ਜੀਵਿਤਰੂਪਂ ਸਹਜਾਤਾਨਮੇਵ ਰੂਪਾਨਂ ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ ਹੋਤਿ. ਏਵਂ ਅਜ੍ਝਤ੍ਤਰੂਪਧਮ੍ਮਾ ਅਜ੍ਝਤ੍ਤਰੂਪਧਮ੍ਮਾਨਂ ਸਤ੍ਤਧਾ ਪਚ੍ਚਯਾ ਹੋਨ੍ਤਿ. ਬਹਿਦ੍ਧਾ ਰੂਪਧਮ੍ਮਾ ਪਨ ਬਹਿਦ੍ਧਾਭੂਤਾਨਂ ਦ੍ਵਿਨ੍ਨਂ ਉਤੁਜਰੂਪਕਲਾਪਾਨਂ ਪਞ੍ਚਧਾ ਪਚ੍ਚਯਾ ਹੋਨ੍ਤੀਤਿ.

ਰੂਪਕਲਾਪੇਸੁ ਪਚ੍ਚਯਘਟਨਾਨਯੋ ਨਿਟ੍ਠਿਤੋ.

ਏਤ੍ਥ ਚ ਪਟ੍ਠਾਨਸਦ੍ਦਸ੍ਸ ਅਤ੍ਥੋ ਵਤ੍ਤਬ੍ਬੋ. ਪਧਾਨਂ ਠਾਨਨ੍ਤਿ ਪਟ੍ਠਾਨਂ. ਤਤ੍ਥ ਪਧਾਨਨ੍ਤਿ ਪਮੁਖਂ, ਠਾਨਨ੍ਤਿ ਪਚ੍ਚਯੋ, ਪਮੁਖਪਚ੍ਚਯੋ ਮੁਖ੍ਯਪਚ੍ਚਯੋ ਏਕਨ੍ਤਪਚ੍ਚਯੋਤਿ ਵੁਤ੍ਤਂ ਹੋਤਿ. ਸੋ ਚ ਏਕਨ੍ਤ ਪਚ੍ਚਯੋ ਏਕਨ੍ਤਪਚ੍ਚਯੁਪ੍ਪਨ੍ਨਂ ਪਟਿਚ੍ਚ ਵਤ੍ਤਬ੍ਬੋ.

ਦੁਵਿਧਞ੍ਹਿ ਪਚ੍ਚਯੁਪ੍ਪਨ੍ਨਂ ਮੁਖ੍ਯਪਚ੍ਚਯੁਪ੍ਪਨ੍ਨਂ ਨਿਸ੍ਸਨ੍ਦਪਚ੍ਚਯੁਪ੍ਪਨ੍ਨਨ੍ਤਿ. ਤਤ੍ਥ ਮੁਖ੍ਯਪਚ੍ਚਯੁਪ੍ਪਨ੍ਨਂ ਨਾਮ ਮੂਲਪਚ੍ਚਯੁਪ੍ਪਨ੍ਨਂ, ਨਿਸ੍ਸਨ੍ਦਪਚ੍ਚਯੁਪ੍ਪਨ੍ਨਂ ਨਾਮ ਪਰਮ੍ਪਰ ਪਚ੍ਚਯੁਪ੍ਪਨ੍ਨਂ. ਤਤ੍ਥ ਮੂਲਪਚ੍ਚਯੁਪ੍ਪਨ੍ਨਮੇਵ ਏਕਨ੍ਤਪਚ੍ਚਯੁਪ੍ਪਨ੍ਨਂ ਨਾਮ. ਤਞ੍ਹਿ ਅਤ੍ਤਨੋ ਪਚ੍ਚਯੇ ਸਤਿ ਏਕਨ੍ਤੇਨ ਉਪ੍ਪਜ੍ਜਤਿਯੇਵ, ਨੋ ਨੁਪ੍ਪਜ੍ਜਤਿ. ਪਰਮ੍ਪਰਪਚ੍ਚਯੁਪ੍ਪਨ੍ਨਂ ਪਨ ਅਨੇਕਨ੍ਤਪਚ੍ਚਯੁਪ੍ਪਨ੍ਨਂਨਾਮ, ਤਞ੍ਹਿ ਤਸ੍ਮਿਂ ਪਚ੍ਚਯੇ ਸਤਿਪਿ ਉਪ੍ਪਜ੍ਜਤਿ ਵਾ, ਨ ਵਾ ਉਪ੍ਪਜ੍ਜਤਿ. ਤਤ੍ਥ ਏਕਨ੍ਤਪਚ੍ਚਯੁਪ੍ਪਨ੍ਨਂ ਪਟਿਚ੍ਚ ਸੋ ਪਚ੍ਚਯੋ ਏਕਨ੍ਤਪਚ੍ਚਯੋ ਨਾਮ. ਸੋ ਏਵ ਇਮਸ੍ਮਿਂ ਮਹਾਪਕਰਣੇ ਵੁਤ੍ਤੋ. ਤਤੋ ਏਵ ਅਯਂ ਚਤੁਵੀਸਤਿਪਚ੍ਚਯਗਣੋ ਚ ਇਮਂ ਮਹਾ ਪਕਰਣਞ੍ਚ ਪਟ੍ਠਾਨਨ੍ਤਿ ਵੁਚ੍ਚਤਿ.

ਤਤ੍ਥ ਏਕਸ੍ਸ ਪੁਰਿਸਸ੍ਸ ਧਨਧਞ੍ਞਤ੍ਥਾਯ ਲੋਭੋ ਉਪ੍ਪਜ੍ਜਤਿ. ਸੋ ਲੋਭਵਸੇਨ ਉਟ੍ਠਾਯ ਅਰਞ੍ਞਂ ਗਨ੍ਤ੍ਵਾ ਏਕਸ੍ਮਿਂ ਪਦੇਸੇ ਖੇਤ੍ਤਾਨਿ ਕਰੋਤਿ, ਵਤ੍ਥੂਨਿ ਕਰੋਤਿ, ਉਯ੍ਯਾਨਾਨਿ ਕਰੋਤਿ. ਤੇਸੁ ਸਮ੍ਪਜ੍ਜਮਾਨੇਸੁ ਸੋ ਪੁਰਿਸੋ ਬਹੂਨਿ ਧਨਧਞ੍ਞਾਨਿ ਲਭਿਤ੍ਵਾ ਅਤ੍ਤਨਾ ਚ ਪਰਿਭੁਞ੍ਜਤਿ, ਪੁਤ੍ਤਦਾਰੇ ਚ ਪੋਸੇਤਿ, ਪੁਞ੍ਞਾਨਿ ਚ ਕਰੋਤਿ, ਪੁਞ੍ਞਫਲਾਨਿ ਚ ਆਯਤਿਂ ਪਚ੍ਚਨੁਭਵਿਸ੍ਸਤਿ. ਤਤ੍ਥ ਲੋਭਸਹ ਜਾਤਾਨਿ ਨਾਮਰੂਪਾਨਿ ਮੁਖ੍ਯਪਚ੍ਚਯੁਪ੍ਪਨ੍ਨਾਨਿ ਨਾਮ. ਤਤੋ ਪਰਂ ਯਾਵ ਆਯਤਿਂ ਭਵੇਸੁ ਪੁਞ੍ਞਫਲਾਨਿ ਪਚ੍ਚਨੁਭੋਤਿ, ਤਾਵ ਉਪ੍ਪਨ੍ਨਾਨਿ ਪਰਮ੍ਪਰਫਲਾਨਿ ਤਸ੍ਸ ਲੋਭਸ੍ਸ ਨਿਸ੍ਸਨ੍ਦਪਚ੍ਚਯੁਪ੍ਪਨ੍ਨਾਨਿ ਨਾਮ. ਤੇਸੁ ਦ੍ਵੀਸੁ ਪਚ੍ਚਯੁਪ੍ਪਨ੍ਨੇਸੁ ਮੁਖ੍ਯਪਚ੍ਚਯੁਪ੍ਪਨ੍ਨਮੇਵ ਪਟ੍ਠਾਨੇ ਵੁਤ੍ਤਂ. ਨਿਸ੍ਸਨ੍ਦਪਚ੍ਚਯੁਪ੍ਪਨ੍ਨਂ ਪਨ ਸੁਤ੍ਤਨ੍ਤਨਯੇਨ ਕਥੇਤਬ੍ਬਂ. ਤਤ੍ਥ ਸੁਤ੍ਤਨ੍ਤਨਯੋ ਨਾਮ ਇਮਸ੍ਮਿਂ ਸਤਿ ਇਦਂ ਹੋਤਿ, ਇਮਸ੍ਸ ਉਪ੍ਪਾਦਾ ਇਦਂ ਉਪ੍ਪਜ੍ਜਤੀਤਿ ਏਵਰੂਪੋ ਪਚ੍ਚਯਨਯੋ. ਅਪਿ ਚ ਲੋਭੋ ਦੋਸੋ ਮੋਹੋਤਿ ਤਯੋ ਧਮ੍ਮਾ ਸਕਲਸ੍ਸ ਸਤ੍ਤਲੋਕਸ੍ਸਪਿ ਸਙ੍ਖਾਰਲੋਕਸ੍ਸਪਿ ਓਕਾਸ ਲੋਕਸ੍ਸਪਿ ਵਿਪਤ੍ਤਿਯਾ ਮੂਲਟ੍ਠੇਨ ਹੇਤੂ ਨਾਮ. ਅਲੋਭੋ ਅਦੋਸੋ ਅਮੋਹੋਤਿ ¶ ਤਯੋ ਧਮ੍ਮਾ ਸਮ੍ਪਤ੍ਤਿਯਾ ਮੂਲਟ੍ਠੇਨ ਹੇਤੂਨਾਮਾਤਿ ਕਥੇਤਬ੍ਬਂ. ਏਸ ਨਯੋ ਸਬ੍ਬੇਸੁ ਪਟ੍ਠਾਨਪਚ੍ਚਯੇਸੁ ਯਥਾਰਹਂ ਵੇਦਿਤਬ੍ਬੋ. ਏਵਞ੍ਚ ਸਤਿ ਲੋਕੇ ਸਬ੍ਬਾ ਲੋਕਪ੍ਪਵਤ੍ਤਿਯੋ ਇਮੇਸਂ ਚਤੁਵੀਸਤਿਯਾ ਪਚ੍ਚਯਾਨਂ ਮੁਖ੍ਯ ਪਚ੍ਚਯੁਪ੍ਪਨ੍ਨੇਨ ਸਦ੍ਧਿਂ ਨਿਸ੍ਸਨ੍ਦਪਚ੍ਚਯੁਪ੍ਪਨ੍ਨਾ ਏਵ ਹੋਨ੍ਤੀਤਿ ਵੇਦਿਤਬ੍ਬੋਤਿ.

ਏਤ੍ਤਾਵਤਾ ਪਚ੍ਚਯਾਨਂ ਅਤ੍ਥਦੀਪਨਾ ਪਚ੍ਚਯਾਨਂ ਸਭਾਗਸਙ੍ਗਹੋ ਪਚ੍ਚਯਾਨਂ ਘਟਨਾਨਯੋਤਿ ਤੀਹਿ ਕਣ੍ਡੇਹਿ ਪਰਿਚ੍ਛਿਨ੍ਨਾ ਪਟ੍ਠਾਨੁਦ੍ਦੇਸ ਦੀਪਨੀ ਨਿਟ੍ਠਿਤਾ ਹੋਤਿ.

ਮ੍ਰਮ੍ਮਰਟ੍ਠੇ ਮ੍ौਂਜ੍ਵਾਨਗਰੇ ਲੇਡੀਤੀਅਰਞ੍ਞਵਿਹਾਰਵਾਸਿਨਾ ਮਹਾ ਥੇਰੇਨ ਕਤਾਯਂ ਪਚ੍ਚਯੁਦ੍ਦੇਸਦੀਪਨੀ.