📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਨਮਕ੍ਕਾਰਪਾਲ਼ਿ

੧.

ਸੁਗਤਂ ਸੁਗਤਂ ਸੇਟ੍ਠਂ, ਕੁਸਲਂਕੁਸਲਂ ਜਹਂ;

ਅਮਤਂ ਅਮਤਂ ਸਨ੍ਤਂ, ਅਸਮਂ ਅਸਮਂ ਦਦਂ.

ਸਰਣਂ ਸਰਣਂ ਲੋਕਂ, ਅਰਣਂ ਅਰਣਂ ਕਰਂ;

ਅਭਯਂ ਅਭਯਂ ਠਾਨਂ, ਨਾਯਕਂ ਨਾਯਕਂ ਨਮੇ.

੨.

ਨਯਨਸੁਭਗਕਾਯਙ੍ਗਂ,

ਮਧੁਰਵਰਸਰੋਪੇਤਂ;

ਅਮਿਤਗੁਣਗਣਾਧਾਰਂ,

ਦਸਬਲਮਤੁਲਂ ਵਨ੍ਦੇ.

੩.

ਯੋ ਬੁਦ੍ਧੋ ਧਿਤਿਮਾਞ੍ਞਧਾਰਕੋ,

ਸਂਸਾਰੇ ਅਨੁਭੋਸਿ ਕਾਯਿਕਂ;

ਦੁਕ੍ਖਂ ਚੇਤਸਿਕਞ੍ਚ ਲੋਕਤੋ,

ਤਂ ਵਨ੍ਦੇ ਨਰਦੇਵਮਙ੍ਗਲਂ.

੪.

ਬਾਤ੍ਤਿਂਸਤਿਲਕ੍ਖਣਚਿਤ੍ਰਦੇਹਂ,

ਦੇਹਜ੍ਜੁਤਿਨਿਗ੍ਗਤਪਜ੍ਜਲਨ੍ਤਂ;

ਪਞ੍ਞਾਧਿਤਿਸੀਲਗੁਣੋਘਵਿਨ੍ਦਂ,

ਵਨ੍ਦੇ ਮੁਨਿਮਨ੍ਤਿਮਜਾਤਿਯੁਤ੍ਤਂ.

੫.

ਪਾਤੋਦਯਂ ਬਾਲਦਿਵਾਕਰਂਵ,

ਮਜ੍ਝੇ ਯਤੀਨਂ ਲਲਿਤਂ ਸਿਰੀਹਿ;

ਪੁਣ੍ਣਿਨ੍ਦੁਸਙ੍ਕਾਸਮੁਖਂ ਅਨੇਜਂ,

ਵਨ੍ਦਾਮਿ ਸਬ੍ਬਞ੍ਞੁਮਹਂ ਮੁਨਿਨ੍ਦਂ.

੬.

ਉਪੇਤਪੁਞ੍ਞੋ ਵਰਬੋਧਿਮੂਲੇ,

ਸਸੇਨਮਾਰਂ ਸੁਗਤੋ ਜਿਨਿਤ੍ਵਾ;

ਅਬੋਜ੍ਝਿ ਬੋਧਿਂ ਅਰੁਣੋਦਯਮ੍ਹਿ,

ਨਮਾਮਿ ਤਂ ਮਾਰਜਿਨਂ ਅਭਙ੍ਗਂ.

੭.

ਰਾਗਾਦਿਛੇਦਾਮਲਞਾਣਖਗ੍ਗਂ,

ਸਤੀਸਮਞ੍ਞਾਫਲਕਾਭਿਗਾਹਂ;

ਸੀਲੋਘਲਙ੍ਕਾਰਵਿਭੂਸਿਤਂ ਤਂ,

ਨਮਾਮਿਭਿਞ੍ਞਾਵਰਮਿਦ੍ਧੁਪੇਤਂ.

੮.

ਦਯਾਲਯਂ ਸਬ੍ਬਧਿ ਦੁਕ੍ਕਰਂ ਕਰਂ,

ਭਵਣ੍ਣਵਾਤਿਕ੍ਕਮਮਗ੍ਗਤਂ ਗਤਂ;

ਤਿਲੋਕਨਾਥਂ ਸੁਸਮਾਹਿਤਂ ਹਿਤਂ,

ਸਮਨ੍ਤਚਕ੍ਖੁਂ ਪਣਮਾਮਿ ਤਂਮਿਤਂ.

੯.

ਤਹਿਂ ਤਹਿਂ ਪਾਰਮਿਸਞ੍ਚਯਂ ਚਯਂ,

ਗਤਂ ਗਤਂ ਸਬ੍ਭਿ ਸੁਖਪ੍ਪਦਂ ਪਦਂ;

ਨਰਾਨਰਾਨਂ ਸੁਖਸਮ੍ਭਵਂ ਭਵਂ,

ਨਮਾਨਮਾਨਂ ਜਿਨਪੁਙ੍ਗਵਂ ਗਵਂ.

੧੦.

ਮਗ੍ਗਙ੍ਗਨਾਵਂ ਮੁਨਿਦਕ੍ਖਨਾਵਿਕੋ,

ਈਹਾਫਿਯਂ ਞਾਣਕਰੇਨ ਗਾਹਕੋ;

ਆਰੁਯ੍ਹ ਯੋ ਤਾਯ ਬਹੂ ਭਵਣ੍ਣਵਾ,

ਤਾਰੇਸਿ ਤਂ ਬੁਦ੍ਧਮਘਪ੍ਪਹਂ ਨਮੇ.

੧੧.

ਸਮਤਿਂਸਤਿਪਾਰਮਿਸਮ੍ਭਰਣਂ,

ਵਰਬੋਧਿਦੁਮੇ ਚਤੁਸਚ੍ਚਦਸਂ;

ਵਰਮਿਦ੍ਧਿਗਤਂ ਨਰਦੇਵਹਿਤਂ,

ਤਿਭਵੂਪਸਮਂ ਪਣਮਾਮਿ ਜਿਨਂ.

੧੨.

ਸਤਪੁਞ੍ਞਜਲਕ੍ਖਣਿਕਂ ਵਿਰਜਂ,

ਗਗਨੂਪਮਧਿਂ ਧਿਤਿਮੇਰੁਸਮਂ;

ਜਲਜੂਪਮਸੀਤਲਸੀਲਯੁਤਂ,

ਪਥਵੀਸਹਨਂ ਪਣਮਾਮਿ ਜਿਨਂ.

੧੩.

ਯੋ ਬੁਦ੍ਧੋ ਸੁਮਤਿ ਦਿਵੇ ਦਿਵਾਕਰੋਵ,

ਸੋਭਨ੍ਤੋ ਰਤਿਜਨਨੇ ਸਿਲਾਸਨਮ੍ਹਿ;

ਆਸੀਨੋ ਸਿਵਸੁਖਦਂ ਅਦੇਸਿ ਧਮ੍ਮਂ,

ਦੇਵਾਨਂ ਤਮਸਦਿਸਂ ਨਮਾਮਿ ਨਿਚ੍ਚਂ.

੧੪.

ਯੋ ਪਾਦਪਙ੍ਕਜਮੁਦੁਤ੍ਤਲਰਾਜਿਕੇਹਿ,

ਲੋਕੇਹਿ ਤੀਹਿਵਿਕਲੇਹਿ ਨਿਰਾਕੁਲੇਹਿ;

ਸਮ੍ਪਾਪੁਣੇ ਨਿਰੁਪਮੇਯ੍ਯਤਮੇਵ ਨਾਥੋ,

ਤਂ ਸਬ੍ਬਲੋਕਮਹਿਤਂ ਅਸਮਂ ਨਮਾਮਿ.

੧੫.

ਬੁਦ੍ਧਂ ਨਰਾਨਰਸਮੋਸਰਣਂ ਧਿਤਤ੍ਤਂ,

ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਂ;

ਅਤ੍ਥਾਭਿਕਾਮਨਰਦੇਵਹਿਤਾਵਹਂ ਤਂ,

ਵਨ੍ਦਾਮਿ ਕਾਰੁਣਿਕਮਗ੍ਗਮਨਨ੍ਤਞਾਣਂ.

੧੬.

ਅਖਿਲਗੁਣਨਿਧਾਨੋ ਯੋ ਮੁਨਿਨ੍ਦੋਪਗਨ੍ਤ੍ਵਾ,

ਵਨਮਿਸਿਪਤਨਵ੍ਹਂ ਸਞ੍ਞਤਾਨਂ ਨਿਕੇਤਂ;

ਤਹਿਮਕੁਸਲਛੇਦਂ ਧਮ੍ਮਚਕ੍ਕਂ ਪਵਤ੍ਤੋ,

ਤਮਤੁਲਮਭਿਕਨ੍ਤਂ ਵਨ੍ਦਨੇਯ੍ਯਂ ਨਮਾਮਿ.

੧੭.

ਸੁਚਿਪਰਿਵਾਰਿਤਂ ਸੁਰੁਚਿਰਪ੍ਪਭਾਹਿ ਰਤ੍ਤਂ,

ਸਿਰਿਵਿਸਰਾਲਯਂ ਗੁਪਿਤਮਿਨ੍ਦ੍ਰਿਯੇਹੁਪੇਤਂ;

ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪਚਿਤ੍ਤਂ,

ਸੁਰਨਰਪੂਜਿਤਂ ਸੁਗਤਮਾਦਰਂ ਨਮਾਮਿ.

੧੮.

ਮਗ੍ਗੋਲ਼ੁਮ੍ਪੇਨ ਮੁਹਪਟਿਘਾਸਾਦਿਉਲ੍ਲੋਲਵੀਚਿਂ,

ਸਂਸਾਰੋਘਂ ਤਰਿ ਤਮਭਯਂ ਪਾਰਪਤ੍ਤਂ ਪਜਾਨਂ;

ਤਾਣਂ ਲੇਣਂ ਅਸਮਸਰਣਂ ਏਕਤਿਤ੍ਥਂ ਪਤਿਟ੍ਠਂ,

ਪੁਞ੍ਞਕ੍ਖੇਤ੍ਤਂ ਪਰਮਸੁਖਦਂ ਧਮ੍ਮਰਾਜਂ ਨਮਾਮਿ.

੧੯.

ਕਣ੍ਡਮ੍ਬਂਮੂਲੇ ਪਰਹਿਤਕਰੋ ਯੋ ਮੁਨਿਨ੍ਦੋ ਨਿਸਿਨ੍ਨੋ,

ਅਚ੍ਛੇਰਂ ਸੀਘਂ ਨਯਨਸੁਭਗਂ ਆਕੁਲਣ੍ਣਗ੍ਗਿਜਾਲਂ;

ਦੁਜ੍ਜਾਲਦ੍ਧਂਸਂ ਮੁਨਿਭਿਜਹਿਤਂ ਪਾਟਿਹੇਰਂ ਅਕਾਸਿ,

ਵਨ੍ਦੇ ਤਂ ਸੇਟ੍ਠਂ ਪਰਮਰਤਿਜਂ ਇਦ੍ਧਿਧਮ੍ਮੇਹੁਪੇਤਂ.

੨੦.

ਮੁਨਿਨ੍ਦਕ੍ਕੋ ਯ੍ਵੇਕੋ ਦਯੁਦਯਰੁਣੋ ਞਾਣਵਿਤ੍ਥਿਣ੍ਣਬਿਮ੍ਬੋ,

ਵਿਨੇਯ੍ਯਪ੍ਪਾਣੋਘਂ ਕਮਲਕਥਿਤਂ ਧਮ੍ਮਰਂਸੀਵਰੇਹਿ;

ਸੁਬੋਧੇਸੀ ਸੁਦ੍ਧੇ ਤਿਭਵਕੁਹਰੇ ਬ੍ਯਾਪਿਤਕ੍ਕਿਤ੍ਤਿਨਞ੍ਚ,

ਤਿਲੋਕੇਕਚ੍ਚਕ੍ਖੁਂ ਦੁਖਮਸਹਨਂ ਤਂ ਮਹੇਸਿਂ ਨਮਾਮਿ.

੨੧.

ਯੋ ਜਿਨੋ ਅਨੇਕਜਾਤਿਯਂ ਸਪੁਤ੍ਤਦਾਰਮਙ੍ਗਜੀਵਿਤਮ੍ਪਿ,

ਬੋਧਿਪੇਮਤੋ ਅਲਗ੍ਗਮਾਨਸੋ ਅਦਾਸਿਯੇਵ ਅਤ੍ਥਿਕਸ੍ਸ;

ਦਾਨਪਾਰਮਿਂ ਤਤੋ ਪਰਂ ਅਪੂਰਿ ਸੀਲਪਾਰਮਾਦਿਕਮ੍ਪਿ,

ਤਾਸਮਿਦ੍ਧਿਯੋਪਯਾਤਮਗ੍ਗਤਂ ਤਮੇਕਦੀਪਕਂ ਨਮਾਮਿ.

੨੨.

ਦੇਵਾਦੇਵਾਤਿਦੇਵਂ ਨਿਧਨਵਪੁਧਰਂ ਮਾਰਭਙ੍ਗਂ ਅਭਙ੍ਗਂ,

ਦੀਪਂ ਦੀਪਂ ਪਜਾਨਂ ਜਯਵਰਸਯਨੇ ਬੋਧਿਪਤ੍ਤਂਧਿਪਤ੍ਤਂ;

ਬ੍ਰਹ੍ਮਾਬ੍ਰਹ੍ਮਾਗਤਾਨਂ ਵਰਗਿਰਕਥਿਕਂ ਪਾਪਹੀਨਂ ਪਹੀਨਂ,

ਲੋਕਾਲੋਕਾਭਿਰਾਮਂ ਸਤਤਮਭਿਨਮੇ ਤਂ ਮੁਨਿਨ੍ਦਂ ਮੁਨਿਨ੍ਦਂ.

੨੩.

ਬੁਦ੍ਧੋ ਨਿਗ੍ਰੋਧਬਿਮ੍ਬੋ ਮੁਦੁਕਰਚਰਣੋ ਬ੍ਰਹ੍ਮਘੋਸੇਣਿਜਙ੍ਘੋ,

ਕੋਸਚ੍ਛਾਦਙ੍ਗਜਾਤੋ ਪੁਨਰਪਿ ਸੁਗਤੋ ਸੁਪ੍ਪਤਿਟ੍ਠਿਤਪਾਦੋ;

ਮੂਦੋਦਾਤੁਣ੍ਣਲੋਮੋ ਅਥਮਪਿ ਸੁਗਤੋ ਬ੍ਰਹ੍ਮੁਜੁਗ੍ਗਤ੍ਤਭਾਵੋ,

ਨੀਲਕ੍ਖੀ ਦੀਘਪਣ੍ਹੀ ਸੁਖੁਮਮਲਛਵੀ ਥੋਮ੍ਯਰਸਗ੍ਗਸਗ੍ਗੀ.

੨੪.

ਚਤ੍ਤਾਲੀਸਗ੍ਗਦਨ੍ਤੋ ਸਮਕਲਪਨਜੋ ਅਨ੍ਤਰਂਸਪ੍ਪਪੀਨੋ,

ਚਕ੍ਕੇਨਙ੍ਕਿਤਪਾਦੋ ਅਵਿਰਲ਼ਦਸਨੋ ਮਾਰਜੁਸ੍ਸਙ੍ਖਪਾਦੋ.

ਤਿਟ੍ਠਨ੍ਤੋ ਨੋਨਮਨ੍ਤੋਭਯਕਰਮੁਦੁਨਾ ਜਣ੍ਣੁਕਾਨਾਮਸਨ੍ਤੋ,

ਵਟ੍ਟਕ੍ਖਨ੍ਧੋ ਜਿਨੋ ਗੋਤਰੁਣਪਖੁਮਕੋ ਸੀਹਪੁਬ੍ਬਡ੍ਢਕਾਯੋ.

੨੫.

ਸਤ੍ਤਪ੍ਪੀਨੋ ਚ ਦੀਘਙ੍ਗੁਲਿ ਮਥ ਸੁਗਤੋ ਲੋਮਕੂਪੇਕਲੋਮੋ,

ਸਮ੍ਪਨ੍ਨੋਦਾਤਦਾਠੋ ਕਨਕਸਮਤਚੋ ਨੀਲਮੁਦ੍ਧਗ੍ਗਲੋਮੋ.

ਸਮ੍ਬੁਦ੍ਧੋ ਥੂਲਜਿਵ੍ਹੋ ਅਥ ਸੀਹਹਨੁਕੋ ਜਾਲਿਕਪ੍ਪਾਦਹਤ੍ਥੋ,

ਨਾਥੋ ਉਣ੍ਹੀਸਸੀਸੋ ਇਤਿਗੁਣਸਹਿਤਂ ਤਂ ਮਹੇਸਿਂ ਨਮਾਮਿ.

੨੬.

ਬੁਦ੍ਧੋਬੁਦ੍ਧੋਤਿਘੋਸੋ ਅਤਿਦੁਲਭਤਰੋ ਕਾ ਕਥਾ ਬੁਦ੍ਧਭਾਵੋ,

ਲੋਕੇ ਤਸ੍ਮਾ ਵਿਭਾਵੀ ਵਿਵਿਧਹਿਤਸੁਖਂ ਸਾਧਵੋ ਪਤ੍ਥਯਨ੍ਤਾ.

ਇਟ੍ਠਂ ਅਤ੍ਥਂ ਵਹਨ੍ਤਂ ਸੁਰਨਰਮਹਿਤਂ ਨਿਬ੍ਭਯਂ ਦਕ੍ਖਿਣੇਯ੍ਯਂ,

ਲੋਕਾਨਂ ਨਨ੍ਦਿਵਡ੍ਢਂ ਦਸਬਲਮਸਮਂ ਤਂ ਨਮਸ੍ਸਨ੍ਤੁ ਨਿਚ੍ਚਂ.

੨੭.

ਪੁਞ੍ਞੇਨੇਤੇਨ ਸੋਹਂ ਨਿਪੁਣਮਤਿ ਸਤੋ ਸਮ੍ਪਰਾਯੇ ਚ ਤਿਤ੍ਤੋ,

ਦਕ੍ਖੋ ਦਿਟ੍ਠੁਜ੍ਜੁਪਞ੍ਞੋ ਅਵਿਕਲਵੀਰਿਯੋ ਭੋਗਵਾ ਸਂਵਿਭਾਗੀ.

ਤਿਕ੍ਖੋ ਸੂਰੋ ਧਿਤਤ੍ਤੋ ਸਪਰਹਿਤਚਰੋ ਦੀਘਜੀਵੀ ਅਰੋਗੋ,

ਧਞ੍ਞੋ ਵਣ੍ਣੋ ਯਸਸ੍ਸੀ ਅਤਿਬਲਵਧਰੋ ਕਿਤ੍ਤਿਮਾ ਖਨ੍ਤੁਪੇਤੋ.

੨੮.

ਸਦ੍ਧੋ ਦਾਤਙ੍ਗੁਪੇਤੋ ਪਰਮਸਿਰਿਧਰੋ ਦਿਟ੍ਠਧਮ੍ਮੇ ਵਿਰਤ੍ਤੋ,

ਲਜ੍ਜੀ ਕਲ੍ਯਾਣਮਿਤ੍ਤੋ ਅਭਿਰਤਕੁਸਲੋ ਪਞ੍ਚਸੀਲਾਦਿਰਕ੍ਖੋ.

ਅਪ੍ਪਿਚ੍ਛੋ ਅਪ੍ਪਕੋਧੋ ਅਤਿਵੁਜੁਹਦਯੋ ਇਦ੍ਧਿਮਾ ਅਪ੍ਪਮੇਯ੍ਯੋ,

ਪਾਸਂਸੋ ਪੇਮਵਾਚੋ ਸੁਜਨਗੁਣਵਿਦੂ ਮਾਮਕੋ ਸੋ ਭਵੇਯ੍ਯਂ.

੨੯.

ਇਤ੍ਥਂ ਅਸਙ੍ਖਯੇ ਨਾਥ, ਗੁਣੇ ਲਕ੍ਖਣਦੀਪਿਤੇ;

ਗਾਥਾਸੁ ਸੂਚਕਾਸ੍ਵੇਕ, ਗਾਥਮ੍ਪਿ ਸਰਤੇ ਬੁਧੋ.

੩੦.

ਚਤੁਰਾਪਾਯਮੁਤ੍ਤੋ ਸੋ, ਸਾਧਕਤ੍ਥਦ੍ਵਯਸ੍ਸ ਚ;

ਹਤੂਪਦ੍ਦਵਜਾਲੋ ਚ, ਲਾਭੀ ਹਿਤਸੁਖਸ੍ਸ ਚ.

੩੧.

ਅਧਿਪੋ ਨਰਦੇਵਾਨਂ, ਚਤੁਦੀਪਿਸ੍ਸਰੋਪਿ ਵਾ;

ਭਵੇਯ੍ਯ ਅਨ੍ਤਿਮੇ ਦੇਹੇ, ਤਮਞ੍ਞਂ ਸੇਤਛਤ੍ਤਕਂ.

੩੨.

ਭਾਵਨਾਯਾਨਮਾਰੁਯ੍ਹ, ਸਮਮੇਸ੍ਸਤਿ ਸੁਬ੍ਬਤੋ;

ਇਮਸ੍ਮਿਂ ਅਤ੍ਤਭਾਵੇਪਿ, ਅਰੋਗੋ ਦੀਘਜੀਵਿਕੋ.

੩੩.

ਪੂਜਿਤੋ ਸਬ੍ਬਲੋਕੇਹਿ, ਭਾਵਨਾਭਿਰਤੀਮਨੋ;

ਜਨਪ੍ਪਿਯੋ ਮਨਾਪੋ ਚ, ਕਾ ਕਥਾਖਿਲਧਾਰਣੇ.

ਨਮਕ੍ਕਾਰਪਾਲ਼ਿ ਨਿਟ੍ਠਿਤਾ.

ਨਮਕ੍ਕਾਰਟੀਕਾ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧.

ਸੁਗਤਨ੍ਤ੍ਯਾਦਿਵਣ੍ਣੇਹਿ, ਪਸਤ੍ਥਞ੍ਚ ਸੁਖਦ੍ਦਦਂ;

ਵਨ੍ਦਨ੍ਤਾਨਂ ਜਿਨਂ ਨਤ੍ਵਾ, ਧਮ੍ਮਂ ਸੁਦ੍ਧਂ ਗਣੁਤ੍ਤਮਂ.

੨.

ਨਮਕ੍ਕਾਰਂ ਹਿਤਤ੍ਥੀਹਿ, ਪੋਰਾਣਾਚਰਿਯੇਹਿ ਚ;

ਲਿਖਿਤ੍ਵਾ ਠਪਿਤਂ ਪੁਞ੍ਞ, ਬੁਦ੍ਧਿਯਾ ਤੇਨ ਵਨ੍ਦਿਨਂ.

੩.

ਤਸ੍ਸਤ੍ਥਵਣ੍ਣਨਂ ਕਸ੍ਸਂ, ਗਮ੍ਭੀਰਤ੍ਥਸੁਬੋਧਨਂ;

ਮੋਵਿਪੁਨਾਮੇਨ ਸਨ੍ਤੇਨ, ਸੀਲੁਪੇਤੇਨ ਯਾਚਿਤੋ.

੪.

ਵਣ੍ਣਨ੍ਤੋਪਿ ਚ ਤਸ੍ਸਤ੍ਥਂ, ਤਂ ਤਂ ਅਟ੍ਠਕਥਾਦਿਸੁ;

ਵੁਤ੍ਤਞਾਯੇਨ ਕਸ੍ਸਾਮਿ, ਸਦ੍ਧਾ ਸੁਣਾਥ ਸਾਧਵੋ.

੫.

ਨਮਨਂ ਨਮਤੀਤੀ ਵਾ, ਨਮਤੀ ਤੇਨ ਵਾ ਨਮੋ;

ਤਸ੍ਸ ਕਾਰੋਨ੍ਤਿ ਤਾਹੀਤਿ, ਨਮਕ੍ਕਾਰੋਤਿ ਵੁਚ੍ਚਤਿ.

੬.

ਤਞ੍ਚ ਬੁਦ੍ਧਘੋਸਾਚਰਿ, ਯੇਨ ਪੁਬ੍ਬਸੁਤਂ ਕਤਂ;

ਬੁਦ੍ਧਘੋਸੁਪ੍ਪਤ੍ਤਿਯਞ੍ਚ, ਤਂ ਤਂ ਪਨ ਕਥਾਦਿਸੁ.

੭.

ਨ ਦਿਟ੍ਠਂ ਕਤਕਾਰਣਂ, ਤਸ੍ਮਾ ਹਿਤਤ੍ਥਿਕੇਹਿ ਚ;

ਪੋਰਾਣਾਚਰਿਯੇਹੀ ਚ, ਠਪਿਤਨ੍ਤਿ ਮਯਾ ਵੁਤ੍ਤਂ;

ਤਂ ਕਾਰਣਂ ਵਿਞ੍ਞੂਹੀ ਚ, ਵਿਚਾਰੇਤ੍ਵਾ ਵਿਜਾਨਿਤਨ੍ਤਿ.

੧.

ਸੁਗਤਂ ਸੁਗਤਂ ਸੇਟ੍ਠਂ, ਕੁਸਲਂਕੁਸਲਂ ਜਹਂ;

ਅਮਤਂ ਅਮਤਂ ਸਨ੍ਤਂ, ਅਸਮਂ ਅਸਮਂ ਦਦਂ.

ਸਰਣਂ ਸਰਣਂ ਲੋਕਂ, ਅਰਣਂ ਅਰਣਂ ਕਰਂ;

ਅਭਯਂ ਅਭਯਂ ਠਾਨਂ, ਨਾਯਕਂ ਨਾਯਕਂ ਨਮੇ.

੧. [ਕ] ਇਦਾਨਿ ਪਠਮਂ ਤਾਵ ਸੁਗਤਨ੍ਤ੍ਯਾਦੀਹਿ ਅਟ੍ਠਾਰਸਹਿ ਗੁਣੇਹਿ ਥੋਮੇਤ੍ਵਾ ਬੁਦ੍ਧਸ੍ਸ ਵਨ੍ਦਿਤੁਕਾਮੇਨ ਸੁਗਤਨ੍ਤਿਆਦਿ ਗਾਥਾਦ੍ਵਯਂ ਆਰਦ੍ਧਂ. ਅਯਂ ਪਨ ਸਬ੍ਬਪਾਦਾਦਿਯਮਕਪਥ੍ਯਾ ਵਤ੍ਤਗਾਥਾਤਿ ਦਟ੍ਠਬ੍ਬਂ. ਤਂ ਪਨ ਯਮਕਂ ਸੁਬੋਧਾਲਙ੍ਕਾਰੇ ਕਿਲਿਟ੍ਠਦੋਸਨ੍ਤਿ ਵੁਤ੍ਤਂ.

ਵੁਤ੍ਤਞ੍ਹਿ ਤਤ੍ਥ –

‘‘ਯਂ ਕਿਲਿਟ੍ਠਪਦਂ ਮਨ੍ਦਾ, ਭਿਧੇਯ੍ਯਂ ਯਮਕਾਦਿਕਂ;

ਕਿਲਿਟ੍ਠਪਦਦੋਸੇਵ, ਤਮ੍ਪਿ ਅਨ੍ਤੋ ਕਰੀਯਤੀ’’ਤਿ.

ਅਯਂ ਪਨੇਤ੍ਥ ਪਤੀਤਸਦ੍ਦਰਚਿਤਤ੍ਤਾਯੇਵ ਪਸਾਦਗੁਣ ਸਙ੍ਖਾਤੇਨ ਸਦ੍ਦਾਲਙ੍ਕਾਰੇਨ ਸਂਯੁਤ੍ਤਾ ਹੋਤਿ. ਤਸ੍ਮਾ ਤਂ ਯਮਕਂ ਸੁਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਵਂ ਪਰਾਸੁ ਯਮਕਗਾਥਾਸੁ. ਤੇਨ ਵੁਤ੍ਤਂ ਪੁਨਾ ਲਙ੍ਕਾਰੇ –

‘‘ਪਤੀਤਸਦ੍ਦਰਚਿਤਂ, ਸਿਲਿਟ੍ਠਪਦਸਨ੍ਧਿਕਂ;

ਪਸਾਦਗੁਣਸਂਯੁਤ੍ਤਂ, ਯਮਕਂ ਮਤਮੇਦਿਸ’’ਨ੍ਤਿ.

ਤਤ੍ਥ ਸੁਗਤਨ੍ਤਿ ਸੋਭਨਗਮਨਤ੍ਤਾ ਸੁਨ੍ਦਰਂ ਠਾਨਂ ਗਤਤ੍ਤਾ ਸਮ੍ਮਾ ਗਤਤ੍ਤਾ ਚ ਸੁਗਤੋ, ਸੋ ਹਿ ਸੋਭਨਂ ਅਰਿਯਮਗ੍ਗੇਨ ਗਚ੍ਛਤੀਤਿ ਸੁਗਤੋਤਿ ਵੁਚ੍ਚਤਿ, ਸੁਪੁਬ੍ਬੋ ਗਮੁਧਾਤੁ ਤ. ਸੁਸਦ੍ਦੋ ਸੋਭਨਤ੍ਥੋ. ਅਰਿਯਮਗ੍ਗਗਮਨੇਨ ਪਰਿਸੁਦ੍ਧਂ ਅਨਵਜ੍ਜਂ ਖੇਮਂ ਦਿਸਂ ਅਸਜ੍ਜਮਾਨੋ ਗਤੋਤਿ ਅਤ੍ਥੋ. ਤਞ੍ਚ ਗਮਨਂ ਦੁਵਿਧਂ ਹੋਤਿ ਕਾਯਗਮਨਂ, ਞਾਣਗਮਨਞ੍ਚਾਤਿ. ਤਤ੍ਥ ਭਗਵਤੋ ਵੇਨੇਯ੍ਯਜਨੁਪਸਙ੍ਕਮਨਂ ਏਕਨ੍ਤੇਨ ਤੇਸਂ ਹਿਤਸੁਖਸ੍ਸ ਨਿਪ੍ਫਾਦ ਨਤੋ ਸੋਭਨਂ ਕਾਯੇਨ ਗਮਨਂ ਕਾਯਗਮਨਂ ਨਾਮ. ਸਯਮ੍ਭੂ ਞਾਣੇਨ ਪਨ ਸਕਲਮ੍ਪਿ ਲੋਕਂ ਪਰਿਞ੍ਞਾਭਿਸਮਯਵਸੇਨ ਪਰਿਜਾਨਨਤੋ ਞਾਣੇਨ ਗਮਨਂ ਞਾਣਗਮਨਂ ਨਾਮ. ਇਧ ਪਨ ਞਾਣਗਮਨਂ ਅਧਿਪ੍ਪੇਤਂ. ਅਙ੍ਗੁਤ੍ਤਰਟੀਕਾਯਂ ਪਨ ‘‘ਸੋਭਨਂ ਗਤਂ ਗਮਨਂ ਏਤਸ੍ਸਾਤਿ ਸੁਗਤੋ’’ਤਿ ਵੁਤ੍ਤਂ. ਸੁਨ੍ਦਰਂ ਠਾਨਂ ਗਚ੍ਛਤੀਤਿ ਸੁਗਤੋਤਿ ਚ ਵੁਚ੍ਚਤਿ, ਆਰਮ੍ਮਣਕਰਣਵਸੇਨ ਅਮਤਂ ਨਿਬ੍ਬਾਨਂ ਗਤੋਤਿ ਅਤ੍ਥੋ. ਸਮ੍ਮਾ ਅਵਿਪਰੀਤਂ ਚੇਸ ਗਚ੍ਛਤੀਤਿ ਸੁਗਤੋਤਿ ਵੁਚ੍ਚਤਿ. ਸੁਸਦ੍ਦੋ ਸਮ੍ਮਾਸਦ੍ਦਤ੍ਥੋ. ਤੇਨ ਤੇਨ ਮਗ੍ਗੇਨ ਯੇ ਕਿਲੇਸਾ ਪਹੀਨਾ, ਤੇ ਕਿਲੇਸੇ ਨ ਪੁਨੇਤਿ ਨ ਪਚ੍ਚੇਤਿ ਨ ਪਚ੍ਚਾਗਚ੍ਛਤੀਤਿ ਅਤ੍ਥੋ. ਅਥ ਵਾ ਸਮ੍ਮਾ ਆਗਚ੍ਛਤੀਤਿ ਸੁਗਤੋਤਿ ਚ ਵੁਚ੍ਚਤਿ, ਦੀਪਙ੍ਕਰਪਾਦਮੂਲਤੋ ਪਭੁਤਿ ਯਾਵ ਬੋਧਿਮਣ੍ਡਾ ਤਾਵ ਸਮਤਿਂਸਪਾਰਮਿਪੂਰਿਕਾਯ ਸਮ੍ਮਾਪਟਿਪਤ੍ਤਿਯਾ ਸਬ੍ਬਲੋਕਸ੍ਸ ਹਿਤਸੁਖਮੇਵ ਕਰੋਨ੍ਤੋ ਸਸ੍ਸਤਂ ਉਚ੍ਛੇਦਂ ਕਾਮਸੁਖਂ ਅਤ੍ਤਕਿਲਮਥਞ੍ਚਾਤਿ ਇਮੇ ਚਨ੍ਤੇ ਅਨੁਪਗਚ੍ਛਨ੍ਤੋ ਆਗਤੋਤਿ ਅਤ੍ਥੋ. ਤਂ ਸੁਗਤਂ ਬੁਦ੍ਧਂ ਨਮੇ ਨਮਾਮੀਤਿ ਸਮ੍ਬਨ੍ਧੋ.

ਪੁਨ ਸੁਗਤਨ੍ਤਿ ਸਮ੍ਮਾ ਗਦਤ੍ਤਾ ਸੁਗਤੋ. ਸੋ ਹਿ ਸਮ੍ਮਾ ਗਦਤਿ ਭਾਸਤੀਤਿ ਸੁਗਤੋਤਿ ਵੁਚ੍ਚਤਿ. ਸੁਪੁਬ੍ਬਗਦਧਾਤੁ ਭਾਸਾਯਂ ਵਿਯਤ੍ਤਿਯਂ ਵਾਚਾਯਂ ਵਾ, ਤ, ਦਸ੍ਸ ਤੋ. ਛਸੁ ਵਾਚਾਸੁ ਯੁਤ੍ਤਟ੍ਠਾਨੇ ਯੁਤ੍ਤਮੇਵ ਦ੍ਵਿਵਾਚਂ ਭਾਸਤੀਤਿ ਅਤ੍ਥੋ. ਵੁਤ੍ਤਞ੍ਹਿ ਮਜ੍ਝਿਮਪਣ੍ਣਾਸਪਾਲ਼ਿਯਂ ਅਭਯਰਾਜਕੁਮਾਰਸੁਤ੍ਤੇ –

੧

. ‘‘ਰਾਜਕੁਮਾਰ ਯਂ ਤਥਾਗਤੋ ਤਂ ਵਾਚਂ ਜਾਨਾਤਿ ਅਭੂਤਂ ਅਤਚ੍ਛਂ ਅਨਤ੍ਥਸਂਹਿਤਂ, ਸਾ ਚ ਪਰੇਸਂ ਅਪ੍ਪਿਯਾ ਅਮਨਾਪਾ, ਨ ਤਂ ਤਥਾਗਤੋ ਵਾਚਂ ਭਾਸਤਿ. ੨. ਯਮ੍ਪਿ ਤਥਾਗਤੋ ਵਾਚਂ ਜਾਨਾਤਿ ਭੂਤਂ ਤਚ੍ਛਂ ਅਨਤ੍ਥਸਂਹਿਤਂ, ਸਾ ਚ ਪਰੇਸਂ ਅਪ੍ਪਿਯਾ ਅਮਨਾਪਾ. ਤਮ੍ਪਿ ਤਥਾਗਤੋ ਵਾਚਂ ਨ ਭਾਸਤਿ. ੩. ਯਞ੍ਚ ਖੋ ਤਥਾਗਤੋ ਵਾਚਂ ਜਾਨਾਤਿ ਭੂਤਂ ਤਚ੍ਛਂ ਅਤ੍ਥਸਂਹਿਤਂ, ਸਾ ਚ ਪਰੇਸਂ ਅਪ੍ਪਿਯਾ ਅਮਨਾਪਾ, ਤਤ੍ਰਕਾਲਞ੍ਞੂ ਤਥਾਗਤੋ ਹੋਤਿ ਤਸ੍ਸਾ ਵਾਚਾਯ ਵੇਯ੍ਯਾਕਰਣਾਯ. ੪. ਯਂ ਤਥਾਗਤੋ ਵਾਚਂ ਜਾਨਾਤਿ ਅਭੂਤਂ ਅਤਚ੍ਛਂ ਅਨਤ੍ਥਸਂਹਿਤਂ, ਸਾ ਚ ਪਰੇਸਂ ਪਿਯਾ ਮਨਾਪਾ, ਨ ਤਂ ਤਥਾਗਤੋ ਵਾਚਂ ਭਾਸਤਿ. ੫. ਯਮ੍ਪਿ ਤਥਾਗਤੋ ਜਾਨਾਤਿ ਭੂਤਂ ਤਚ੍ਛਂ ਅਨਤ੍ਥਸਂਹਿਤਂ, ਸਾ ਚ ਪਰੇਸਂ ਪਿਯਾ ਮਨਾਪਾ, ਤਮ੍ਪਿ ਤਥਾਗਤੋ ਵਾਚਂ ਨ ਭਾਸਤਿ. ੬. ਯਞ੍ਚ ਖੋ ਤਥਾਗਤੋ ਵਾਚਂ ਜਾਨਾਤਿ ਭੂਤਂ ਤਚ੍ਛਂ ਅਤ੍ਥਸਂਹਿਤਂ, ਸਾ ਚ ਪਰੇਸਂ ਪਿਯਾ ਮਨਾਪਾ. ਤਤ੍ਰ ਕਾਲਞ੍ਞੂ ਤਥਾਗਤੋ ਹੋਤਿ ਤਸ੍ਸਾ ਵਾਚਾਯ ਵੇਯ੍ਯਾਕਰਣਾਯਾ’’ਤਿ.

ਏਤ੍ਥ ਪਾਲ਼ਿਯਂ ਪਨੇਸਾ ਸੁਖਗ੍ਗਹਣਤ੍ਥਂ ਸਙ੍ਖੇਪੇਨ ਵੇਦਿਤਬ੍ਬਾ. ਕਥਂ ਹੇਸਾ ਅਭੂਤਾ ਅਨਤ੍ਥਸਂਹਿਤਾ ਅਪ੍ਪਿਯਾ ਵਾਚਾ ਚ, ਭੂਤਾ ਅਨਤ੍ਥਸਂਹਿਤਾ ਅਪ੍ਪਿਯਾ ਵਾਚਾ ਚ, ਭੂਤਾ ਅਤ੍ਥ ਸਂਹਿਤਾ ਅਪ੍ਪਿਯਾ ਵਾਚਾ ਚ, ਅਭੂਤਾ ਅਨਤ੍ਥਸਂਹਿਤਾ ਪਿਯਾ ਵਾਚਾ ਚ, ਭੂਤਾ ਅਨਤ੍ਥਸਂਹਿਤਾ ਪਿਯਾ ਵਾਚਾ ਚ, ਭੂਤਾ ਅਤ੍ਥਸਂਹਿਤਾ ਪਿਯਾ ਵਾਚਾ ਚਾਤਿ ਛਬ੍ਬਿਧਾ ਹੋਤੀਤਿ. ਤਤ੍ਥ ਅਚੋਰਂਯੇਵ ਚੋਰੋ ਅਯਨ੍ਤਿਆਦਿਵਸੇਨ ਵਤ੍ਤਬ੍ਬਵਾਚਾ ਪਠਮਵਾਚਾ ਨਾਮ. ਚੋਰਂਯੇਵ ਚੋਰੋ ਅਯਨ੍ਤਿਆਦਿਵਸੇਨ ਵਤ੍ਤਬ੍ਬਵਾਚਾ ਦੁਤਿਯਵਾਚਾ ਨਾਮ. ਅਕਤਪੁਞ੍ਞਤਾਯ ਦੁਗ੍ਗਤੋ ਦੁਬ੍ਬਣ੍ਣੋ ਅਪ੍ਪੇਸਕ੍ਖੋ, ਇਧ ਪਨ ਠਤ੍ਵਾਪਿ ਪੁਨ ਪੁਞ੍ਞਂ ਨ ਕਰੋਤਿ, ਦੁਤਿਯਚਿਤ੍ਤਵਾਰੇ ਕਥਂ ਚਤੂਹਿ ਅਪਾਯੇਹਿ ਮੁਚ੍ਚਿਸ੍ਸਤੀਤਿ ਏਵਂ ਮਹਾਜਨਸ੍ਸ ਅਤ੍ਥਪੁਰੇਕ੍ਖਾਰੇਨ ਧਮ੍ਮਪੁਰੇਕ੍ਖਾਰੇਨ ਅਨੁਸਾਸਨੀਪੁਰੇਕ੍ਖਾਰੇਨ ਵਤ੍ਤਬ੍ਬਵਾਚਾ ਤਤਿਯਵਾਚਾ ਨਾਮ. ਏਕੋ ਧੁਤ੍ਤੋ ਆਹ-ਮਯ੍ਹਂ ਭੋ ਮਾਤੁ ਮਯਿ ਕੁਚ੍ਛਿਗਤੇ ਕਪਿਟ੍ਠਫਲਦੋਹਲ਼ੋ ਅਹੋਸਿ. ਸਾ ਅਞ੍ਞਂ ਕਪਿਟ੍ਠਹਾਰਕਂ ਅਲਭਮਾਨਾ ਮਂਯੇਵ ਪੇਸੇਸਿ. ਅਹਂ ਗਨ੍ਤ੍ਵਾ ਰੁਕ੍ਖਂ ਅਭਿਰੁਹਿਤੁਂ ਅਸਕ੍ਕੋਨ੍ਤੋ ਅਤ੍ਤਨਾਵ ਅਤ੍ਤਾਨਂ ਪਾਦੇ ਗਹੇਤ੍ਵਾ ਮੁਗ੍ਗਰਂ ਵਿਯ ਰੁਕ੍ਖਸ੍ਸ ਉਪਰਿ ਖਿਪਿਂ. ਅਥ ਸਾਖਤੋ ਸਾਖਂ ਵਿਚਰਨ੍ਤੋ ਫਲਾਨਿ ਗਹੇਤ੍ਵਾ ਓਤਰਿਤੁਂ ਅਸਕ੍ਕੋਨ੍ਤੋ ਘਰਂ ਗਨ੍ਤ੍ਵਾ ਨਿਸ੍ਸੇਣਿਂ ਆਹਰਿਤ੍ਵਾ ਓਰੁਯ੍ਹ ਮਾਤੁ ਸਨ੍ਤਿਕੇ ਗਨ੍ਤ੍ਵਾ ਫਲਾਨਿ ਮਾਤੁਯਾ ਅਦਾਸਿਂ. ਤਾਨਿ ਪਨ ਮਹਨ੍ਤਾਨਿ ਹੋਨ੍ਤਿ ਚਾਟਿਪ੍ਪ ਮਾਣਾਨਿ. ਤਤੋ ਮੇ ਮਾਤਰਾ ਏਕਾਸਨੇ ਨਿਸਿਨ੍ਨਾਯ ਸਮਸਟ੍ਠਿਫਲਾਨਿ ਖਾਦਿਤਾਨੀਤਿ. ਏਵਮਾਦਿਵਸੇਨ ਵਤ੍ਤਬ੍ਬਵਾਚਾ ਚਤੁਤ੍ਥਵਾਚਾ ਨਾਮ. ਆਮਿਸਹੇਤੁ ਚਾਟੁਕਮ੍ਯਤਾਦਿਵਸੇਨ ਨਾਨਪ੍ਪਕਾਰਕਂ ਪਰੇਸਂ ਥੋਮਨਾ ਵਾਚਾ ਚੇਵ ਰਾਜਕਥਂ ਚੋਰਕਥਨ੍ਤਿਆਦਿਨਯਪ੍ਪਵਤ੍ਤਾ ਤਿਰਚ੍ਛਾਨਕਥਾ ਚ ਪਞ੍ਚਮਵਾਚਾ ਨਾਮ. ਅਰਿਯਸਚ੍ਚਸਨ੍ਨਿਸ੍ਸਿਤਾ ਧਮ੍ਮਕਥਾ ਛਟ੍ਠਮਵਾਚਾ ਨਾਮ. ਤਂ ਪਨ ਵਸ੍ਸਸਤਮ੍ਪਿ ਸੁਣਨ੍ਤਾ ਪਣ੍ਡਿਤਾ ਨੇਵ ਤਿਤ੍ਤਿਂ ਗਚ੍ਛਨ੍ਤਿ. ਤਾਸੁ ਪਨ ਭਗਵਾ ਤਤਿਯਛਟ੍ਠਮਾ ਦ੍ਵਿਵਾਚਾਏਵ ਭਾਸਤਿ. ਤਸ੍ਮਾ ਸਪ੍ਪੁਰਿਸੇਹਿ ਸਾਯੇਵ ਦ੍ਵਿਵਾਚਾ ਵਤ੍ਤਬ੍ਬਾਤਿ. ਅਯਂ ਤਦਟ੍ਠਕਥਾਯਂ ਆਗਤੋ ਸਙ੍ਖੇਪਨਯੋ. ਵਿਸੁਦ੍ਧਿਮਗ੍ਗ ਮਹਾਟੀਕਾਯਂ ਪਨ ਸਾਰਤ੍ਥਦੀਪਨੀਟੀਕਾਯਞ੍ਚ ਤਦਞ੍ਞਾਕਾਰੇਨ ਵਣ੍ਣਿਤੋ. ਤਾਸੁ ਪਨ ਤਂ ਓਲੋਕੇਤ੍ਵਾ ਗਹੇਤਬ੍ਬਨ੍ਤਿ. ਅਯਂ ਪਨੇਤ੍ਥ ਸਙ੍ਗਹਗਾਥਾ –

‘‘ਯੋ ਭੂਤਮਤ੍ਥਸਂਹੀਤਂ, ਪਰੇਸਮਪ੍ਪਿਯਾ ਵਾਚਂ;

ਭੂਤਮਤ੍ਥਸਹੀਤਞ੍ਚ, ਪਰੇਸਂ ਪਿਯਵਾਚਨ੍ਤਿ;

ਦ੍ਵਿਵਾਚਂ ਯੁਤ੍ਤਟ੍ਠਾਨੇਵ, ਵਦਤੀਤਿ ਸੁਗਤੋਤਿ;

ਵੁਚ੍ਚਤੀ ਚ ਦਕਾਰਸ੍ਸ, ਕਤ੍ਵਾ ਤਕਾਰਵਿਞ੍ਞੁਨਾ’’ਤਿ.

ਸੇਟ੍ਠਨ੍ਤਿ ਗੁਣਮਹਨ੍ਤਤ੍ਤਾ ਪਸਤ੍ਥਤਰਂ. ਸੋ ਹਿ ਪਸਤ੍ਥਾਨਂ ਵਿਸੇਸੇਨ ਪਸਤ੍ਥੋਤਿ ਸੇਟ੍ਠੋਤਿ ਵੁਚ੍ਚਤਿ. ਪਸਤ੍ਥਪਦਂ, ਵਿਸੇਸਤਦ੍ਧਿਤੇ ਇਟ੍ਠਪਚ੍ਚਯੋ. ਪਸਤ੍ਥਸਦ੍ਦਸ੍ਸ ਸੋ, ਪਸਤ੍ਥਾਨਂ ਪਚ੍ਚੇਕਬੁਦ੍ਧਾਰਿਯਸਾਵਕਾਦੀਨਂ ਸੀਲਸਮਾਧਿਪਞ੍ਞਾਦਿ ਗੁਣੇਹਿ ਵਿਸੇਸੇਨ ਪਸਤ੍ਥੋਤਿ ਅਤ੍ਥੋ. ਅਥ ਵਾ ਸੁਨ੍ਦਰੇ ਸਤਿਪਟ੍ਠਾਨਾਦਿਭੇਦੇ ਧਮ੍ਮੇ ਏਸਤਿ ਗਵੇਸਤਿ ਏਸਿਂ ਗਵੇਸਿਨ੍ਤਿ ਵਾ ਸੇਟ੍ਠੋ, ਬੁਦ੍ਧੋ. ਸੁਪੁਬ੍ਬੋਏਸ ਗਵੇਸਨੇ ਤ. ਤਸ੍ਸ ਰਟ੍ਠੋ. ਸੁਸਦ੍ਦੋ ਸੁਨ੍ਦਰਤ੍ਥੋ. ਸਨ੍ਤੇਹਿ ਸਪ੍ਪੁਰਿਸੇਹਿ ਏਸਿਤਬ੍ਬੋ ਗਵੇਸਿਤਬ੍ਬੋਤਿ ਵਾ ਸੇਟ੍ਠੋ. ਸਨ੍ਤਸਦ੍ਦੂਪਪਦੋ ਇਸ ਗਵੇਸਨੇ ਤ, ਸਨ੍ਤਸਦ੍ਦਸ੍ਸ ਸੋ, ਇਕਾਰਸ੍ਸੇ, ਤਸ੍ਸ ਟ੍ਠੋ. ਸਨ੍ਤੇਹਿ ਸਪ੍ਪੁਰਿਸੇਹਿ ਇਚ੍ਛਿਯਤਿ ਕਨ੍ਤਿਯ ਤੀਤਿ ਵਾ ਸੇਟ੍ਠੋ. ਸਨ੍ਤਸਦ੍ਦੂਪਪਦੋ ਇਸੁ ਇਚ੍ਛਾਕਨ੍ਤੀਸੁ ਤ. ਅਥ ਵਾ ਸਨ੍ਤਾਨਂ ਸਪ੍ਪੁਰਿਸਾਨਂ ਹਿਤਸੁਖਂ ਇਚ੍ਛਤੀਤਿ ਸੇਟ੍ਠੋ, ਬੁਦ੍ਧੋ. ਕਤ੍ਤੁਸਾਧਨੋਯਂ. ਸੁਨ੍ਦਰੇ ਸਤਿਪਟ੍ਠਾਨਾ ਦਿਭੇਦੇ ਧਮ੍ਮੇ ਏਸੇਤਿ ਬੁਦ੍ਧੇਤੀਤਿ ਵਾ ਸੇਟ੍ਠੋ. ਹੇਤੁ ਕਤ੍ਤੁਸਾਧਨੋਯਂ. ਸੁਪੁਬ੍ਬਏਸਧਾਤੁ ਬੁਦ੍ਧਿਯਂ ਤ. ਤਂ ਸੇਟ੍ਠਂ.

ਕੁਸਲਂਕੁਸਲਂ ਜਹਨ੍ਤਿ ਏਤ੍ਥ ਕੁਸਲਂ ਅਕੁਸਲਂ ਜਹਨ੍ਤਿ ਪਦਵਿਭਾਗੋ ਕਾਤਬ੍ਬੋ. ਕੁਚ੍ਛਿਤਂ ਪਾਪਧਮ੍ਮਂ ਸਲਯਤਿ ਚਲਯਤਿ ਕਮ੍ਪੇਤਿ ਵਿਦ੍ਧਂਸੇਤੀਤਿ ਕੁਸਲਂ, ਚਤੁਭੂਮਿਕਕੁਸਲਂ ਲਬ੍ਭਤਿ. ਕੁਪੁਬ੍ਬੋ ਸਲਧਾਤੁ ਅ. ਤਤ੍ਥ ਕਾਮਾਵਚਰਕੁਸਲਂ ਤਦਙ੍ਗਪ੍ਪਹਾਨੇਨ ਪਾਪਧਮ੍ਮਂ ਸਲਯਤਿ ਚਲਯਤਿ, ਮਹਗ੍ਗਤ ਕੁਸਲਂ ਵਿਕ੍ਖਮ੍ਭਨਪ੍ਪਹਾਨੇਨ ਸਲਯਤਿ ਕਮ੍ਪੇਤਿ, ਲੋਕੁਤ੍ਤਰ ਕੁਸਲਂ ਸਮੁਚ੍ਛੇਦਪ੍ਪਹਾਨੇਨ ਸਲਯਤਿ ਵਿਦ੍ਧਂਸੇਤੀਤਿ ਅਤ੍ਥੋ.

ਅਥ ਵਾ ਕੁਚ੍ਛਿਤਂ ਅਪਾਯਦ੍ਵਾਰਂ ਸਲਨ੍ਤਿ ਸਂਵਰਨ੍ਤਿ ਪਿਦਹਨ੍ਤਿ ਸਾਧਵੋ ਏਤੇਨਾਤਿ ਕੁਸਲਂ, ਕਰਣਸਾਧਨੋਯਂ. ਇਧ ਪਨ ਜਹਨ੍ਤਿ ਵੁਤ੍ਤਤ੍ਤਾ ਤੇਭੂਮਕਕੁਸਲਮੇਵਾਧਿਪ੍ਪੇਤਂ. ਤਂ ਪਨ ਅਨਵਜ੍ਜਸੁਖਵਿਪਾਕਲਕ੍ਖਣਂ, ਅਕੁਸਲਵਿਦ੍ਧਂਸਨਰਸਂ, ਵੋਦਾਨ ਪਚ੍ਚੁਪਟ੍ਠਾਨਂ, ਇਟ੍ਠਵਿਪਾਕਪਚ੍ਚੁਪਟ੍ਠਾਨਂ ਵਾ, ਯੋਨਿਸੋਮਨਸਿਕਾਰ ਪਦਟ੍ਠਾਨਂ. ਨ ਕੁਸਲਂ ਅਕੁਸਲਂ, ਮਿਤ੍ਤਪਟਿਪਕ੍ਖੋ ਅਮਿਤ੍ਤੋ ਵਿਯ ਪਹਾਯਕਪਹਾਤਬ੍ਬਭਾਵੇਨ ਕੁਸਲਪਟਿਪਕ੍ਖਨ੍ਤਿ ਅਤ੍ਥੋ. ਤਂ ਪਨ ਸਾਵਜ੍ਜਦੁਕ੍ਖਵਿਪਾਕਲਕ੍ਖਣਂ, ਸਾਵਜ੍ਜਾਨਿਟ੍ਠਵਿਪਾਕ ਲਕ੍ਖਣਂ ਵਾ, ਅਨਤ੍ਥਜਨਨਰਸਂ, ਅਨਿਟ੍ਠਵਿਪਾਕਪਚ੍ਚੁਪਟ੍ਠਾਨਂ, ਅਯੋਨਿਸੋਮਨਸਿਕਾਰਪਦਟ੍ਠਾਨਂ. ਪੁਞ੍ਞਾਭਿਸਙ੍ਖਾਰਆਨੇਞ੍ਜਾ ਭਿਸਙ੍ਖਾਰਸਙ੍ਖਾਤਂ ਕੁਸਲਂ ਅਪੁਞ੍ਞਾਭਿਸਙ੍ਖਾਰਸਙ੍ਖਾਤਂ ਅਕੁਸਲਞ੍ਚ ਕੁਸਲਂਕੁਸਲਂ. ਤਂ ਪਨ ਪਦਂ ਜਹਨ੍ਤਿਪਦੇ ਕਮ੍ਮਂ.

ਜਹਨ੍ਤਿ ਮਗ੍ਗਕ੍ਖਣੇ ਸਮੁਚ੍ਛੇਦਪ੍ਪਹਾਨੇਨ ਫਲਕ੍ਖਣੇ ਪਟਿਪ੍ਪਸ੍ਸਮ੍ਭਨਪ੍ਪਹਾਨੇਨ ਪਜਹਨ੍ਤਂ ਵਿਦ੍ਧਂਸੇਨ੍ਤਨ੍ਤਿ ਅਤ੍ਥੋ. ਤਞ੍ਹਿ ਅਰਹਤ੍ਤਮਗ੍ਗਞਾਣੇਨ ਜਹਤਿ ਪਜਹਤਿ, ਫਲਞਾਣੇਨ ਜਹਿਂ ਪਜਹਿਂ ਪਟਿਪ੍ਪਸ੍ਸਮ੍ਭਿਨ੍ਤਿ ਵਾ ਜਹੋ, ਬੁਦ੍ਧੋ. ਹਾਧਾਤੁ ਚਾਗੇ ਅ. ਕਿਞ੍ਚਾਪਿ ਪਨੇਤ੍ਥ ਕੁਸਲਂ ਮਗ੍ਗੇਨ ਪਹਾਤਬ੍ਬਧਮ੍ਮੇ ਨ ਵੁਤ੍ਤਂ, ਵਟ੍ਟਮੂਲਭੂਤੇ ਅਵਿਜ੍ਜਾਤਣ੍ਹਾਦਿਕਿਲੇਸੇ ਪਨ ਅਰਹਤ੍ਤਮਗ੍ਗ ਞਾਣੇਨ ਜਹਿਤੇ ਲੋਕਿਯਕੁਸਲੁਪ੍ਪਤ੍ਤਿਯਾ ਮੂਲਭੂਤਾਯ ਅਵਿਜ੍ਜਾਤਣ੍ਹਾਯ ਅਭਾਵਾ ਪੁਞ੍ਞਾਭਿਸਙ੍ਖਾਰੋ ਸਂਸਾਰੇ ਪੁਨ ਪਟਿਸਨ੍ਧਿਯਾ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤਿ, ਤਸ੍ਮਾ ਵਟ੍ਟਮੂਲਭੂਤੇ ਕਿਲੇਸੇ ਜਹਿਤੇ ਫਲੂਪਚਾਰੇਨ ਕੁਸਲਮ੍ਪਿ ਜਹਿਤਂ ਨਾਮ ਹੋਤਿ. ਰੂਪਂ ਭਿਕ੍ਖਵੇ ਨ ਤੁਮ੍ਹਾਕਂ ਤਂ ਪਜਹਥਾਤਿਆਦੀਸੁ ਵਿਯ. ਅਰਹਨ੍ਤੇਨ ਹਿ ਅਭਿਸਮਾਚਾਰਿਕਵਤ੍ਤਂ ਕਤਮ੍ਪਿ ਕੁਸਲਨ੍ਤਿ ਨ ਵੁਤ੍ਤਂ, ਕ੍ਰਿਯਾਤਿ ਪਨ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਵੁਤ੍ਤਞ੍ਹਿ ਨਿਦਾਨਵਗ੍ਗਸਂਯੁਤ੍ਤਟ੍ਠਕਥਾਯਂ ‘‘ਖੀਣਾਸਵੇਨ ਹਿ ਕਤਂ ਕਮ੍ਮਂ ਨੇਵ ਕੁਸਲਂ ਹੋਤਿ ਨਾਕੁਸਲਂ, ਅਵਿਪਾਕਂ ਹੁਤ੍ਵਾ ਕ੍ਰਿਯਮਤ੍ਤੇ ਤਿਟ੍ਠਤੀ’’ਤਿ.

ਅਙ੍ਗੁਤ੍ਤਰਟ੍ਠਕਥਾਯਞ੍ਚ ‘‘ਅਰਹਤ੍ਤਮਗ੍ਗੋ ਚ ਕੁਸਲਾਕੁਸਲ ਕਮ੍ਮਕ੍ਖਯਾਯ ਸਂਵਤ੍ਤਤੀਤਿ ਏਵਂ ਤੇਨ ਤਂ ਭਿਜ੍ਜਤੀ’’ਤਿ ਵੁਤ੍ਤਂ.

ਤੇਨ ਵੁਤ੍ਤਂ ਚੂਲ਼ਨਿਦ੍ਦੇਸਪਾਲ਼ਿਯਂ ‘‘ਅਰਹਤ੍ਤਮਗ੍ਗਞਾਣੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ ਨਿਰੋਧੇਨ ਯੇ ਉਪ੍ਪਜ੍ਜੇਯ੍ਯੁਂ ਨਾਮਞ੍ਚ ਰੂਪਞ੍ਚ, ਏਤ੍ਥੇਤੇ ਨਿਰੁਜ੍ਝਨ੍ਤਿ ਵੂਪਸਮਨ੍ਤਿ ਅਤ੍ਥਂ ਗਚ੍ਛਨ੍ਤਿ ਪਟਿਪ੍ਪਸ੍ਸਮ੍ਭਨ੍ਤੀ’’ਤਿ.

ਅਮਤਨ੍ਤਿ ਮਰਣਵਿਰਹਿਤਂ. ਸੋ ਜਿਨੋ ਹਿ ਨ ਮਤੋ ਅਮਤੋ, ਮਰਣਧਮ੍ਮਸ੍ਸ ਨਿਬ੍ਬਤ੍ਤਕਾਨਂ ਕਿਲੇਸਾਨਂ ਅਰਹਤ੍ਤ ਮਗ੍ਗੇਨ ਸਮੁਚ੍ਛਿਨ੍ਦਿਤਤ੍ਤਾ ਪੁਨ ਮਰਣਤੋ ਵਿਰਹਿਤੋਤਿ ਵਾ ਅਮਤੋ. ਅਥ ਵਾ ਨਿਬ੍ਬਾਨੇ ਆਰਮ੍ਮਣਕਰਣਵਸੇਨ ਅਧਿਗਤੇ ਨਤ੍ਥਿ ਮਤਂ ਮਰਣਂ ਯਸ੍ਸ ਜਿਨਸ੍ਸਾਤਿ ਅਮਤੋਤਿ ਵੁਚ੍ਚਤਿ. ਜਿਨੇਨ ਹਿ ਖਨ੍ਧਮਚ੍ਚੁਮਾਰਂ ਅਜਿਤੋਪਿ ਕਿਲੇਸਮਾਰਂ ਜਯਿਤ੍ਵਾ ਤੇਸਂ ਅਵਸ੍ਸਂ ਜਿਯਮਾਨਤ੍ਤਾ ਫਲੂਪਚਾਰੇਨ ਅਮਤੋਤਿ ਵੁਚ੍ਚਤੀਤਿ ਵੇਦਿਤਬ੍ਬਂ.

ਪੁਨ ਅਮਤਨ੍ਤਿ ਅਮਤਨਿਬ੍ਬਾਨਸਮਨ੍ਨਾਗਤਂ. ਨਤ੍ਥਿ ਮਤਂ ਮਰਣਂ ਏਤ੍ਥਾਤਿ ਅਮਤਂ, ਨਿਬ੍ਬਾਨਂ. ਤਂ ਪਨ ਸਨ੍ਤਿਲਕ੍ਖਣਂ, ਅਚ੍ਚੁਤਰਸਂ, ਅਨਿਮਿਤ੍ਤਪਚ੍ਚੁਪਟ੍ਠਾਨਂ, ਨਿਸ੍ਸਰਣਪਚ੍ਚੁਪਟ੍ਠਾਨਂ ਵਾ, ਨਿਬ੍ਬਾਨਸ੍ਸ ਪਨ ਪਦਟ੍ਠਾਨਂ ਨ ਲਬ੍ਭਤਿ.

ਵੁਤ੍ਤਞ੍ਹਿ ਮਿਲਿਨ੍ਦਪਞ੍ਹੇ ਨਾਗਸੇਨਤ੍ਥੇਰੇਨ ‘‘ਨ ਕੇਨਚਿ ਕਾਰਣੇਨ ਨਿਬ੍ਬਾਨਂ ਉਪ੍ਪਜ੍ਜਤੀ’’ਤਿ.

ਤਂ ਅਸ੍ਸ ਅਤ੍ਥੀਤਿ ਅਮਤੋ, ਜਿਨੋ. ਸਦ੍ਧਾਦਿਤੋ ਣਾਤਿ ਸੁਤ੍ਤੇਨ ਅਸ੍ਸਥ੍ਯਤ੍ਥੇ ਣਪਚ੍ਚਯੋ. ਸਦ੍ਧੋ ਪਞ੍ਞੋਤਿਆਦੀਸੁ ਵਿਯ. ਅਸ੍ਸ ਜਿਨਸ੍ਸ ਚਤੁਮਗ੍ਗਞਾਣੇਨ ਸਚ੍ਛਿਕਤਂ ਅਮਤਂ ਨਿਬ੍ਬਾਨਂ ਅਤ੍ਥੀਤਿ ਅਤ੍ਥੋ, ਤਂ ਅਮਤਂ.

ਸਨ੍ਤਨ੍ਤਿ ਸਬ੍ਬਕਿਲੇਸਦਰਥੇਹਿ ਚ ਵਟ੍ਟਦੁਕ੍ਖੇਹਿ ਚ ਸੁਵੂਪਸਨ੍ਤਂ. ਸੋ ਹਿ ਬੁਦ੍ਧੋ ਸਬ੍ਬਕਿਲੇਸਦਰਥਵਟ੍ਟਦੁਕ੍ਖੇਹਿ ਸਮਿਤ੍ਥ ਵੂਪਸਮਿਤ੍ਥਾਤਿ ਸਨ੍ਤੋਤਿ ਵੁਚ੍ਚਤਿ. ਸਮੁਧਾਤੁ ਉਪਸਮੇ ਤ. ਧਾਤ੍ਵਨ੍ਤਸ੍ਸ ਲੋਪਂ ਤਪਚ੍ਚਯਸ੍ਸਨ੍ਤੋਆਦੇਸਂ ਕਤ੍ਵਾ ਪਦਸਿਦ੍ਧਿ ਵੇਦਿਤਬ੍ਬਾ. ਸਂਸਾਰਵਟ੍ਟੇ ਦਰਥਕਾਰਕਾਨਂ ਕਿਲੇਸਾਨਂ ਬੋਧਿਮਣ੍ਡੇ ਅਰਹਤ੍ਤਮਗ੍ਗਞਾਣੇਨ ਸਮੁਚ੍ਛਿਨ੍ਦਿਤਤ੍ਤਾ ਸੀਤਿਭੂਤੋ ਸਨ੍ਤਕਾਯਚਿਤ੍ਤੋਤਿ ਵੁਤ੍ਤਂ ਹੋਤਿ, ਤਂ ਸਨ੍ਤਂ.

ਅਸਮਨ੍ਤਿ ਸੀਲਾਦਿਗੁਣੇਹਿ ਕੇਨਚਿ ਪੁਗ੍ਗਲੇਨ ਅਸਦਿਸਂ, ਸੋ ਹਿ ਬੁਦ੍ਧੋ ਨਤ੍ਥਿ ਸੀਲਾਦਿਗੁਣੇਹਿ ਸਮੋ ਸਦਿਸੋ ਏਤਸ੍ਸਾਤਿ ਅਸਮੋਤਿ ਵੁਚ੍ਚਤਿ. ਇਮਸ੍ਮਿਂ ਸਤ੍ਤਲੋਕੇ ਸੀਲ ਸਮਾਧਿਪਞ੍ਞਾਦਿਗੁਣੇਹਿ ਬੁਦ੍ਧੇਨ ਸਦਿਸੋ ਕੋਚਿ ਮਨੁਸ੍ਸੋ ਵਾ ਦੇਵੋ ਵਾ ਬ੍ਰਹ੍ਮਾ ਵਾ ਨਤ੍ਥੀਤਿ ਅਤ੍ਥੋ. ਭਗਵਤੋ ਹਿ ਅਸੀਤਿ ਅਨੁਬ੍ਯਞ੍ਜਨਪਟਿਮਣ੍ਡਿਤ ਬਾਤ੍ਤਿਂਸ ਮਹਾਪੁਰਿਸਲਕ੍ਖਣੇਹਿ ਵਿਚਿਤ੍ਰਰੂਪਕਾਯੋ ਚ ਸਬ੍ਬਾਕਾਰੇਹਿ ਪਰਿਸੁਦ੍ਧਸੀਲਕ੍ਖਨ੍ਧਾਦਿਗੁਣ ਰਤਨਸਮਿਦ੍ਧੋ ਧਮ੍ਮਕਾਯੋ ਚ ਪੁਞ੍ਞਮਹਤ੍ਤਥਾਮਮਹਤ੍ਤ ਇਦ੍ਧਿਮਹਤ੍ਤਯਸਮਹਤ੍ਤਪਞ੍ਞਾਮਹਤ੍ਤਾਦਿਗੁਣੇਹਿ ਚ ਪਰਮੁਕ੍ਕਂਸਗਤੋ ਚ ਅਤ੍ਥਿ, ਤਸ੍ਮਾ ਭਗਵਾ ਸੀਲਾਦਿਗੁਣੇਹਿ ਕੇਨਚਿ ਅਸਮੋ ਅਸਦਿਸੋਤਿ ਵੁਤ੍ਤਂ ਹੋਤਿ.

ਅਸਮਂ ਦਦਨ੍ਤਿ ਲੋਕਿਯਧਮ੍ਮੇਨ ਅਸਦਿਸਂ ਮਗ੍ਗਫਲਨਿਬ੍ਬਾਨ ਧਮ੍ਮਂ ਵੇਨੇਯ੍ਯਾਨਂ ਸਤ੍ਤਾਨਂ ਦੇਸਨਾਞਾਣੇਨ ਦਾਯਕਂ. ਏਤ੍ਥ ਚ ਅਸਮਨ੍ਤਿ ਨਤ੍ਥਿ ਏਤ੍ਥ ਏਤੇਸਂ ਵਾ ਸਮੋ ਸਦਿਸੋ ਲੋਕਿਯਧਮ੍ਮੋਤਿ ਅਸਮੋ, ਮਗ੍ਗਫਲਨਿਬ੍ਬਾਨਂ ਲਬ੍ਭਤਿ. ਅਥ ਵਾ ਅਸਮਨ੍ਤਿ ਅਞ੍ਞੇਸਂ ਧਮ੍ਮਾਨਂ ਅਗ੍ਗਭਾਵਤੋ ਚਤੁਬ੍ਬਿਧੇਨ ਅਰਿਯ ਮਗ੍ਗੇਨ ਸਚ੍ਛਿਕਾਤਬ੍ਬਂ ਨਿਬ੍ਬਾਨਂ ਵੁਚ੍ਚਤਿ. ਵੁਤ੍ਤਞ੍ਹੇਤਂ ਭਗਵਤਾ ‘‘ਯਾਵਤਾ ਭਿਕ੍ਖਵੇ ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ. ਤਸ੍ਸ ਪਨ ਪਦਸ੍ਸ ਦਦਨ੍ਤਿਪਦੇਨ ਕਮ੍ਮਭਾਵੇਨ ਸਮ੍ਬਨ੍ਧੋ. ਦਦਾਤੀਤਿ ਦਦੋ, ਬੁਦ੍ਧੋ. ਦਾਧਾਤੁ ਅ, ਸੋ ਕੇਨਚਿ ਲੋਕਿਯਧਮ੍ਮੇਨ ਅਸਮਂ ਅਸਦਿਸਂ ਮਗ੍ਗਫਲਨਿਬ੍ਬਾਨਸਙ੍ਖਾਤਂ ਲੋਕੁਤ੍ਤਰਧਮ੍ਮਂ ਮਹਾਕਰੁਣਾਪ੍ਪਧਾਨੇਨ ਅਮਤਾਧਿਗਮਪਟਿਪਤ੍ਤਿਦਸ੍ਸਨੇਨ ਦੇਸਨਾਞਾਣੇਨ ਵੇਨੇਯ੍ਯਾਨਂ ਸਤ੍ਤਾਨਂ ਦਾਤਾਤਿ ਅਤ੍ਥੋ. ਤਂ ਅਸਮਂ ਦਦਂ.

(ਖ) ਦੁਤਿਯਗਾਥਾਯਂ ਪਨ ਸਰਣਨ੍ਤਿ ਸਬ੍ਬਸਤ੍ਤਲੋਕਸ੍ਸ ਪਟਿਸਰਣਭੂਤੋ ਪਰਾਯਣੋ ਲੇਣੋ ਤਾਣੋਤਿ ਵੁਤ੍ਤਂ ਹੋਤਿ. ਸੋ ਹਿ ਬੁਦ੍ਧੋ ਸਰਨ੍ਤਿ ਪਟਿਸਰਨ੍ਤਿ ਏਤ੍ਥ ਸਤ੍ਤਲੋਕਾਤਿ ਸਰਣੋਤਿ ਵੁਚ੍ਚਤਿ. ਸਰਧਾਤੁ ਯੁ. ਅਥ ਵਾ ਸਰਨ੍ਤਿ ਓਸਰਨ੍ਤਿ ਸਮੋਸਰਨ੍ਤਿ ਏਤ੍ਥ ਸਤ੍ਤਲੋਕਾਤਿ ਸਰਣੋਤਿ ਵੁਚ੍ਚਤਿ. ਸਰਨ੍ਤਿ ਚਿਨ੍ਤੇਨ੍ਤਿ ਏਤ੍ਥ ਸਦ੍ਧਾ ਪਸਨ੍ਨਾ ਦੇਵਮਨੁਸ੍ਸਾ ਸਰਣਮਿਦਨ੍ਤਿ ਸਰਣੋਤਿ ਚ. ਸਰਨ੍ਤਿ ਪਟਿਵਿਜ੍ਝਨ੍ਤਿ ਏਤ੍ਥੁਪਗਤਾ ਦੇਵਮਨੁਸ੍ਸਾ ਸਦ੍ਧਮ੍ਮਨ੍ਤਿ ਸਰਣੋਤਿ ਚ ਵੁਚ੍ਚਤਿ. ਸਰ ਚਿਨ੍ਤਾਯਂ ਯੁ. ਸਰਣਗਮਨਟ੍ਠਾਨੇ ਪਨ ਸਰਤਿ ਹਿਂਸਤਿ ਭਯਂ ਸਨ੍ਤਾਪਂ ਦੁਕ੍ਖਂ ਕਿਲੇਸਞ੍ਚਾਤਿ ਸਰਣਂ. ਰਤਨਤ੍ਤ ਯਨ੍ਤਿ ਅਟ੍ਠਕਥਾਸੁ ਵੁਤ੍ਤਂ. ਤਂ ਸਰਣਂ.

ਪੁਨ ਸਰਣਂ ਲੋਕਨ੍ਤਿ ਸਤ੍ਤਸਙ੍ਖਾਰੋਕਾਸਸਙ੍ਖਤਂ ਲੋਕਂ ਸਰਨ੍ਤਂ ਜਾਨਨ੍ਤਂ. ਏਤ੍ਥ ਹਿ ਲੋਕਯਤਿ ਪਤਿਟ੍ਠਯਤਿ ਏਤ੍ਥ ਪੁਞ੍ਞਾਪੁਞ੍ਞਞ੍ਚ ਤਬ੍ਬਿਪਾਕੋ ਚਾਤਿ ਲੋਕੋ, ਸਤ੍ਤ ਲੋਕੋ ਲਬ੍ਭਤਿ. ਲੋਕਧਾਤੁ ਪਤਿਟ੍ਠਾਯਂ ਣ. ਲੁਜ੍ਜਤਿ ਪਲੁਜ੍ਜਤੀਤਿ ਲੋਕੋ, ਸਙ੍ਖਾਰਲੋਕੋ. ਲੁਜਧਾਤੁਣ. ਲੋਕਿਯਤਿ ਵਿਚਿਤ੍ਤਾਕਾਰੇਨ ਦਿਸ੍ਸਤੀਤਿ ਲੋਕੋ, ਲੋਕਿਯਨ੍ਤਿ ਪਤਿਟ੍ਠਿਯਨ੍ਤਿ ਏਤ੍ਥ ਵਾ ਜਙ੍ਗਮਾ ਚ ਥਾਵਰਾ ਚਾਤਿ ਲੋਕੋ, ਚਕ੍ਕਵਾਲ਼ਸਙ੍ਖਤੋ ਓਕਾਸਲੋਕੋ ਲਬ੍ਭਤਿ. ਲੋਕਧਾਤੁਣ. ਏਤ੍ਥ ਚ ਸਸ੍ਸਤੋ ਲੋਕੋਤਿ ਵਾ ਅਸਸ੍ਸਤੋ ਲੋਕੋਤਿ ਵਾਤਿ ਆਗਤਟ੍ਠਾਨੇ ਇਨ੍ਦ੍ਰਿਯਬਦ੍ਧਾਨਂ ਰੂਪਾਦੀਨਂ ਖਨ੍ਧਾਨਂ ਸਮੂਹੋ ਸਨ੍ਤਾਨੋ ਚ ਸਤ੍ਤੋਯੇਵ ਲੋਕੋ ਸਤ੍ਤਲੋਕੋਤਿ ਵਚਨਤ੍ਥੇਨ ਸਤ੍ਤਲੋਕੋਤਿ ਵੇਦਿਤਬ੍ਬੋ. ਏਕੋ ਲੋਕੋ ਸਬ੍ਬੇ ਸਤ੍ਤਾ ਆਹਾ ਰਟ੍ਠਿਤਿਕਾਤਿ ਆਗਤਟ੍ਠਾਨੇ ਇਨ੍ਦ੍ਰਿਯਬਦ੍ਧਾਨਂ ਵਾ ਅਨਿਨ੍ਦ੍ਰਿਯਬਦ੍ਧਾਨਂ ਵਾ ਖਨ੍ਧਾਨਂ ਸਮੂਹੋ ਸਨ੍ਤਾਨੋ ਚ ਪਚ੍ਚਯੇਹਿ ਸਙ੍ਖਰਿਯਨ੍ਤੀਤਿ ਸਙ੍ਖਾਰਾ, ਸਙ੍ਖਾਰਾਏਵ ਲੋਕੋ ਸਙ੍ਖਾਰਲੋਕੋਤਿ ਵਚਨਤ੍ਥੇਨ ਸਙ੍ਖਾਰਲੋਕੋਤਿ.

‘‘ਯਾਵਤਾ ਚਨ੍ਦਿਮਸੂਰਿਯਾ ਪਰਿਹਰਨ੍ਤਿ,

ਦਿਸਾ ਭਨ੍ਤਿ ਵਿਰੋਚਮਾਨਾ;

ਤਾਵ ਸਹਸ੍ਸਧਾ ਲੋਕੋ,

ਏਤ੍ਥ ਤੇ ਵਤ੍ਤਤਿ ਵਸੋ’’ਤਿ.

ਆਗਤਟ੍ਠਾਨੇ ਅਨਿਨ੍ਦ੍ਰਿਯਬਦ੍ਧਾਨਂ ਰੂਪਾਦੀਨਂ ਸਮੂਹੋ ਸਨ੍ਤਾਨੋ ਚ ਅਵਕਸਨ੍ਤਿ ਪਤਿਟ੍ਠਹਨ੍ਤਿ ਏਤ੍ਥਾਤਿ ਓਕਾਸੋ, ਸੋਯੇਵ ਲੋਕੋ ਓਕਾਸਲੋਕੋਤਿ ਵਚਨਤ੍ਥੇਨ ਓਕਾਸ ਲੋਕੋਤਿ ਵੇਦਿਤਬ੍ਬੋ, ਤਂ ਲੋਕਂ. ਸਰਤਿ ਜਾਨਾਤਿ ਅਜਾਨੀਤਿ ਵਾ ਸਰਣੋ, ਬੁਦ੍ਧੋ. ਸਰ ਚਿਨ੍ਤਾਯਂ ਯੁ. ਲੋਕਂ ਸਰਣਨ੍ਤਿ ਸਮ੍ਬਨ੍ਧੋ. ਬੁਦ੍ਧੋ ਪਨ ਸਤ੍ਤਲੋਕਂ, ਸਙ੍ਖਾਰਲੋਕਂ, ਓਕਾਸਲੋਕਂ, ਕਿਲੇਸਲੋਕਂ, ਭਵਲੋਕਂ, ਇਨ੍ਦ੍ਰਿਯ ਲੋਕਂ, ਖਨ੍ਧਲੋਕਂ, ਆਯਤਨਲੋਕਂ ਧਾਤੁਲੋਕਞ੍ਚਾਤਿਆਦਿਮਨੇਕਲੋਕਂ ਅਨਾਵਰਣਞਾਣੇਨ ਪਟਿਵਿਜ੍ਝਤੀਤਿ ਵੁਤ੍ਤਂ ਹੋਤਿ.

ਅਰਣਨ੍ਤਿ ਨਿਕ੍ਕਿਲੇਸਂ, ਕਿਲੇਸਸਙ੍ਖਾਤਰਣਵਿਰਹਿਤਂ ਵਾ. ਰਣਸਦ੍ਦੋ ਚ ਕਿਲੇਸੇਸੁ ਚ ਯੁਦ੍ਧੇ ਚੁਣ੍ਣਵਿਚੁਣ੍ਣਕਰਣੇ ਚ ਦਿਸ੍ਸਤਿ. ਤਥਾ ਹਿ ਸਰਣਾ ਧਮ੍ਮਾ ਅਰਣਾ ਧਮ੍ਮਾਤਿਆਦੀਸੁ ਕਿਲੇਸੇਸੁ ਦਿਸ੍ਸਤਿ. ਤੇ ਹਿ ਰਣਨ੍ਤਿ ਕਨ੍ਦਨ੍ਤਿ ਸਤ੍ਤਾ ਏਤੇਹੀਤਿ ਰਣਾਤਿ ਵੁਚ੍ਚਨ੍ਤਿ.

‘‘ਧਨੁਗ੍ਗਹੋ ਅਸਦਿਸੋ, ਰਾਜਪੁਤ੍ਤੋ ਮਹਬ੍ਬਲੋ;

ਸਬ੍ਬਾਮਿਤ੍ਤੇ ਰਣਂ ਕਤ੍ਵਾ, ਸਂਯਮਂ ਅਜ੍ਝੁਪਾਗਮੀ’’ਤਿ.

ਅਸਦਿਸਜਾਤਕੇ ਯੁਦ੍ਧੇ ਦਿਸ੍ਸਤਿ. ਰਣਂ ਕਤ੍ਵਾਤਿ ਹਿ ਯੁਦ੍ਧਂ ਕਤ੍ਵਾ, ਸਂਯਮਨ੍ਤਿ ਸਂਯਤਂ ਇਸਿਪਬ੍ਬਜ੍ਜਂ ਅਜ੍ਝੁਪਾਗਮੀਤਿ ਅਤ੍ਥੋ. ਤਿਣਞ੍ਚ ਕਟ੍ਠਞ੍ਚ ਰਣਂ ਕਰੋਨ੍ਤੋ, ਧਾਵਿਂਸੁ ਤੇ ਅਟ੍ਠਦਿਸਾ ਸਮਨ੍ਤਤੋਤਿ ਛਦ੍ਦਨ੍ਤਜਾਤਕੇ ਚੁਣ੍ਣਵਿਚੁਣ੍ਣਕਰਣੇ ਦਿਸ੍ਸਤਿ. ਰਣਂ ਕਰੋਨ੍ਤੋਤਿ ਹਿ ਚੁਣ੍ਣਂ ਵਿਚੁਣ੍ਣਂ ਕਰੋਨ੍ਤੋ. ਤੇਤਿ ਸਬ੍ਬੇ ਅਟ੍ਠਸਹਸ੍ਸਨਾਗਾਤਿ ਅਤ੍ਥੋ. ਇਧ ਪਨ ਕਿਲੇਸੇ ਦਟ੍ਠਬ੍ਬੋ. ਅਯਂ ਪਨੇਤ੍ਥ ਵਚਨਤ੍ਥੋ. ਰਣਨ੍ਤਿ ਸਤ੍ਤੇ ਰਾਗਾਦਯੋ ਚੁਣ੍ਣੇਨ੍ਤਿ ਪੀਲ਼ੇਨ੍ਤੀਤਿ ਰਣਾ, ਰਣਨ੍ਤਿ ਸਤ੍ਤਾ ਏਤੇਹਿ ਕਨ੍ਦਨ੍ਤਿ ਪਰਿਦੇਵਨ੍ਤੀਤਿ ਵਾ ਰਣਾ, ਕਿਲੇਸਾ. ਰਣਧਾਤੁ ਸਦ੍ਦੇ ਅ. ਨਤ੍ਥਿ ਰਣਾ ਕਿਲੇਸਾ ਏਤਸ੍ਸਾਤਿ ਅਰਣੋਤਿ ਵੁਚ੍ਚਤਿ. ਜਿਨਸ੍ਸ ਕਿਲੇਸਮਾਰਸ੍ਸ ਬੋਧਿਮੂਲੇ ਜਿਯਮਾਨਤ੍ਤਾ ਰਣਾ ਕਿਲੇਸਾ ਨ ਸਨ੍ਤੀਤਿ ਅਤ੍ਥੋ. ਤਂ ਅਰਣਂ.

ਅਰਣਂ ਕਰਨ੍ਤਿ ਵੇਨੇਯ੍ਯਸਨ੍ਤਾਨੇ ਰਣਸਙ੍ਖਤਕਿਲੇਸਸ੍ਸ ਅਭਾਵਕਰਣਂ. ਏਤ੍ਥ ਚ ਰਣਨ੍ਤਿ ਏਤਂ ਯੇਹਿ ਅਭਿਭੂਤਾ ਸਤ੍ਤਾ ਕਨ੍ਦਨ੍ਤਿ ਪਰਿਦਵਨ੍ਤਿ ਏਤੇਸਂ ਰਾਗਾਦੀਨਂ ਅਧਿਵਚਨਂ. ਤੇਸਂ ਅਭਾਵਂ ਵੇਨੇਯ੍ਯਸਨ੍ਤਾਨੇ ਦੇਸਨਾਞਾਣੇਨ ਕਰੋਤਿ ਅਤ੍ਥੋ. ਅਥ ਵਾ ਕਰੋਤੀਤਿ ਕਰੋ, ਬੁਦ੍ਧੋ. ਤਂ ਕਰਂ.

ਅਭਯਨ੍ਤਿ ਜਾਤਿਭਯਾਦੀਨਂ ਅਭਾਵਤੋ ਨਿਬ੍ਭਯਂ. ਏਤ੍ਥ ਹਿ ਭਯਂ ਚਿਤ੍ਤੁਤ੍ਰਾਸਭਯਂ, ਞਾਣਭਯਂ, ਆਰਮ੍ਮਣਭਯਂ, ਓਤ੍ਤਪ੍ਪ ਭਯਞ੍ਚਾਤਿ ਚਤੁਬ੍ਬਿਧਂ ਹੋਤਿ. ਤਤ੍ਥ ਭਾਯਤਿ ਚਿਤ੍ਤੇਨਾਤਿ ਭਯਂ, ਚਿਤ੍ਤੁਤ੍ਰਾਸਭਯਂ. ਞਾਣੇਨ ਤੀਰੇਤ੍ਵਾ ਭਾਯਤੀਤਿ ਭਯਂ, ਞਾਣਂ. ਭਾਯਤਿ ਏਤਸ੍ਮਾਤਿ ਭਯਂ, ਆਰਮ੍ਮਣਭਯਂ. ਭਾਯਤਿ ਏਤੇਨ ਪਾਪਤੋਤਿ ਭਯਂ, ਓਤ੍ਤਪ੍ਪਭਯਂ. ਭੀਧਾਤੁ ਭਯੇ ਣ.

ਮਹਾਨਿਦ੍ਦੇਸਪਾਲ਼ਿਯਂ ਪਨ ਆਗਤਾਨਿ ਜਾਤਿਭਯਂ, ਜਰਾਭਯਂ, ਬ੍ਯਾਧਿਭਯਂ, ਮਰਣਭਯਂ, ਰਾਜਭਯਂ, ਚੋਰਭਯਂ, ਅਗ੍ਗਿਭਯਂ, ਉਦਕਭਯਂ, ਅਤ੍ਤਾਨੁਵਾਦਭਯਂ, ਪਰਾਨੁਵਾਦਭਯਂ, ਦਣ੍ਡਭਯਂ, ਦੁਗ੍ਗਤਿਭਯਂ, ਊਮਿਭਯਂ, ਕੁਮ੍ਭੀਲ਼ਭਯਂ, ਆਵਟ੍ਟਭਯਂ, ਸੁਸੁਕਭਯਂ, ਆਜੀਵਿਕਭਯਂ, ਅਸਿਲੋਕਭਯਂ, ਪਰਿਸਯਸਾਰਜ੍ਜਭਯਂ, ਮਦਨ ਭਯਂ, ਦੁਗ੍ਗਤਿਭਯਨ੍ਤਿਆਦੀਨਿ ਗਹਿਤਾਨਿ. ਨਤ੍ਥਿ ਭਯਾਨਿ ਏਤਸ੍ਸਾਤਿ ਅਭਯੋ, ਬੁਦ੍ਧੋ. ਤਸ੍ਸ ਭਯਾਨਂ ਕਾਰਣ ਭੂਤਾਨਂ ਸਬ੍ਬਕਿਲੇਸਾਨਂ ਅਰਹਤ੍ਤਮਗ੍ਗੇਨ ਸਮੁਚ੍ਛਿਨ੍ਦਿਤਤ੍ਤਾ ਸਬ੍ਬਭਯਂ ਨਤ੍ਥੀਤਿ ਅਤ੍ਥੋ.

ਪੁਨ ਅਭਯਂ ਠਾਨਂ ਨਾਯਕਨ੍ਤਿ ਏਤ੍ਥ ਅਭਯਨ੍ਤਿਪਦਂ ਠਾਨਨ੍ਤਿਪਦੇ ਵਿਸੇਸਨਂ. ਠਾਨਨ੍ਤਿਪਦਂ ਨਾਯਕਨ੍ਤਿਪਦੇ ਕਮ੍ਮਂ. ਭਯਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਨਤ੍ਥਿ ਸਬ੍ਬਭਯਂ ਏਤ੍ਥ ਨਿਬ੍ਬਾਨੇਤਿ ਅਭਯਂ, ਨਿਬ੍ਬਾਨਂ. ਬੁਦ੍ਧਪਚ੍ਚੇਕਬੁਦ੍ਧ ਅਰਹਨ੍ਤਾ ਠਨ੍ਤਿ ਉਪ੍ਪਜ੍ਜਨ੍ਤਿ ਏਤ੍ਥਾਤਿ ਠਾਨਂ, ਨਿਬ੍ਬਾਨਂ. ਵੇਨੇਯ੍ਯਸਤ੍ਤੇ ਨੇਤੀਤਿ ਨਾਯਕੋ, ਬੁਦ੍ਧੋ. ਨੀਧਾਤੁ ਨਯਨੇ ਣ੍ਵੁ. ਸੋ ਬੁਦ੍ਧੋ ਭਬ੍ਬੇ ਕੁਲਪੁਤ੍ਤੇ ਮਗ੍ਗਾਧਿ ਗਮਪ੍ਪਤ੍ਤਿਯਾ ਧਮ੍ਮਦੇਸਨਾਯ ਮਗ੍ਗਫਲਞਾਣਂ ਅਧਿਗਮੇਨ੍ਤੋ ਨਿਬ੍ਬਾਨਟ੍ਠਾਨਂ ਨੇਤੀਤਿ ਅਤ੍ਥੋ, ਤਂ ਨਾਯਕਂ.

ਪੁਨ ਨਾਯਕਂ ਨਮੇਤਿ ਨਾਯਕਂ ਬੁਦ੍ਧਂ ਅਹਂ ਨਮੇ ਨਮਾਮੀਤਿ ਸਮ੍ਬਨ੍ਧੋ. ਤਤ੍ਥ ਨਾਯਕਨ੍ਤਿ ਵੇਨੇਯ੍ਯਸਤ੍ਤੇ ਸਂਸਾਰਣ੍ਣਵਤੋ ਨਿਬ੍ਬਾਨਪਾਰਂ ਨੇਤੀਤਿ ਨਾਯਕੋ, ਬੁਦ੍ਧੋ. ਸੋ ਹਿ ਯਥਾ ਨਾਵਿਕੋ ਜਨੇ ਨਾਵਾਯ ਓਰਿਮਤੀਰਤੋ ਪਾਰਿਮਤੀਰਂ ਨੇਤਿ, ਏਵਂ ਸਤ੍ਤੇ ਮਗ੍ਗਙ੍ਗਨਾਵਾਯ ਸਂਸਾਰਣ੍ਣਵਤੋ ਨਿਬ੍ਬਾਨ ਪਾਰਂ ਨੇਤਿ ਪਾਪੁਣੇਤੀਤਿ ਅਤ੍ਥੋ. ਅਥ ਵਾ ਨਾਯਕਨ੍ਤਿ ਤਿਣ੍ਣਂ ਲੋਕਾਨਂ ਜੇਟ੍ਠਭਾਵਗਮਨਤ੍ਤਾ ਨਾਯਕੋ ਜੇਟ੍ਠ ਸੇਟ੍ਠਵੁਡ੍ਢਤਰੋ. ਸੋ ਹਿ ਜੇਟ੍ਠਭਾਵਂ ਨੇਤਿ ਗਚ੍ਛਤਿ ਪਾਪੁਣਾਤੀਤਿ ਨਾਯਕੋਤਿ ਵੁਚ੍ਚਤਿ. ਨੀਧਾਤੁ ਗਤਿਮ੍ਹਿ ਣ੍ਵੁ. ਸੋ ਪਨ ਇਧ ਲੋਕੇ ਅਵਿਜ੍ਜਣ੍ਡਗਤਾਨਂ ਸਬ੍ਬਪਜਾਨਂ ਪਠਮਤਰਂ ਅਵਿਜ੍ਜਣ੍ਡਕੋਸਂ ਅਰਹਤ੍ਤਮਗ੍ਗੇਨ ਪਦਾਲੇਤ੍ਵਾ ਅਰਿਯਾਯ ਜਾਤਿਯਾ ਜਾਤਤ੍ਤਾ ਸਬ੍ਬਸਤ੍ਤਾਨਂ ਸੇਟ੍ਠਜੇਟ੍ਠਵੁਡ੍ਢਤਰਭਾਵਂ ਗਤੋਤਿ ਅਤ੍ਥੋ. ਤਂ ਨਾਯਕਂ. ਨਮੇਤਿ ਅਹਂ ਤੀਹਿ ਦ੍ਵਾਰੇਹਿ ਸਕ੍ਕਚ੍ਚਂ ਨਮਾਮੀਤਿ ਅਤ੍ਥੋ. ਏਤ੍ਥ ਹਿ ਵਤ੍ਤਮਾਨਮਿਵਿਭਤ੍ਤਿਯਾ ਕ੍ਵਚਿਧਾਤੁਤ੍ਯਾਦਿਸੁਤ੍ਤੇਨ ਏਆਦੇਸੋ ਹੋਤਿ. ਅਯਂ ਪਨੇਤ੍ਥ ਵਾਚ੍ਚਤ੍ਥਾਦਿਨਯੋ. ਨਮੇਤਿਪਦਸ੍ਸ ਆਖ੍ਯਾਤਪਦਤ੍ਤਾ ਵਚਨਤ੍ਥੋ ਨ ਕਾਤਬ੍ਬੋ. ਵੁਤ੍ਤਞ੍ਹਿ ਸਦ੍ਦਵਿਦੂਹਿ –

‘‘ਰੁਲ਼੍ਹੀਖ੍ਯਾਤਂ ਨਿਪਾਤਞ੍ਚੁ, ਪਸਗ੍ਗਾਲਪਨਂ ਤਥਾ;

ਸਬ੍ਬਨਾਮਨ੍ਤਿਮੇਤੇਸੁ, ਨ ਕਤੋ ਵਿਗ੍ਗਹੋ ਛਸੂ’’ਤਿ.

ਤਂ ਪਨ ਪਦਂ ਨਮੁਧਾਤੁਵਤ੍ਤਮਾਨਅਮ੍ਹਯੋਗਪਰਸ੍ਸਪਦਮਿਵਿਭਤ੍ਯਨ੍ਤਂ ਆਖ੍ਯਾਤਪਦਂ. ਨਮੁਧਾਤੁਯਾ ਵਾਚ੍ਚਤ੍ਥੋ ਨਮਨਕ੍ਰਿਯਾ ਸਙ੍ਖਾਤੋ ਕੁਸਲਚਿਤ੍ਤੁਪ੍ਪਾਦੋ ਪਧਾਨਵਸੇਨ ਲਬ੍ਭਤਿ. ਮਿਵਿਭਤ੍ਤਿਯਾ ਵਾਚ੍ਚਤ੍ਥੋ ਤੇਨ ਚਿਤ੍ਤੁਪ੍ਪਾਦੇਨ ਉਪਲਕ੍ਖਿਤੋ ਉਪ੍ਪਾਦ ਵਨ੍ਤੋ ਤਦਾਕਾਰੋ ਪੁਗ੍ਗਲੋ ਅਪ੍ਪਧਾਨਵਸੇਨ ਲਬ੍ਭਤਿ. ਪਦਸਮੁਦਾਯਸ੍ਸ ਪਨ ਵਾਚ੍ਚਤ੍ਥੋ ਕਤ੍ਤੁਕਮ੍ਮਭਾਵੇਸੁ ਕਤ੍ਤੁਭੂਤੋ ਅਤੀਤਾਦਿਕਾਲੇਸੁ ਪਚ੍ਚੁਪ੍ਪਨ੍ਨਕਾਲਭੂਤੋ ਧਾਤ੍ਵਤ੍ਥ ਕਿਰਿਯਾਵਿਸੇਸੋਵ ਲਬ੍ਭਤਿ. ਅਯਮੇਤ੍ਥ ਸਙ੍ਖੇਪੋ.

ਵਿਤ੍ਥਾਰੋ ਪਨੇਵਂ ਵੇਦਿਤਬ੍ਬੋ. ਨਮੁਧਾਤੁਯਾ ਵਚ੍ਚਂ ਸੁਗਤਾਦਿ ਬੁਦ੍ਧਗੁਣਂ ਆਰਮ੍ਮਣਂ ਕਤ੍ਵਾ ਵਨ੍ਦਨਾਕਾਰਪ੍ਪਵਤ੍ਤੋ ਕਾਯਵਚੀ ਵਿਞ੍ਞਤ੍ਤਿਸਮੁਟ੍ਠਾਪਕੋ ਸਦ੍ਧਾਚੇਤਨਾਪਞ੍ਞਾਪਧਾਨੋ ਕੁਸਲ ਚਿਤ੍ਤੁਪ੍ਪਾਦੋ ਚ ਦ੍ਵੇ ਵਿਞ੍ਞਤ੍ਤਿਯੋ ਅਸਮੁਟ੍ਠਾਪੇਤ੍ਵਾ ਮਨੋਦ੍ਵਾਰੇ ਵਨ੍ਦਨਾਕਾਰਪ੍ਪਵਤ੍ਤੋ ਕੁਸਲਚਿਤ੍ਤੁਪ੍ਪਾਦੋ ਚ ਮੁਖ੍ਯੇਨ ਲਬ੍ਭਤਿ. ਬੁਦ੍ਧਗੁਣਾਨੁਸ੍ਸਰਣਵਸੇਨ ਪਵਤ੍ਤੋ ਯੋਨਿਸੋਮਨਸਿਕਾ ਰਾਦਿਪੁਰੇਚਰਾਨੁਚਰਕੁਸਲਚਿਤ੍ਤੁਪ੍ਪਾਦੋ ਫਲੂਪਚਾਰੇਨ. ਦਿਟ੍ਠਧਮ੍ਮਿ ਕਸਮ੍ਪਰਾਯਿਕਸਙ੍ਖਾਤਂ ਪਚ੍ਛਿਮਪਚ੍ਛਿਮਫਲਂ ਰੋਗਾਦਿਅਨ੍ਤਰਾਯਾਨਂ ਅਭਾਵਞ੍ਚ ਵਾ ਸਗ੍ਗਮੋਕ੍ਖਸਮ੍ਪਤ੍ਤਿਸੁਖਞ੍ਚ ਕਾਰਣੂਪਚਾਰੇਨ, ਪੁਰੇ ਪੁਰੇ ਵਨ੍ਦਨਾ ਸਦਿਸ੍ਯੂਪਚਾਰੇਨ, ਵਨ੍ਦਨਸ੍ਸ ਨਾਮਪਞ੍ਞਤ੍ਤਿ ਠਾਨੂਪਚਾਰੇਨ, ਵਤ੍ਥੁਦ੍ਵਾਰਾਰਮ੍ਮਣਂ ਠਾਨੂਪਚਾਰੇਨ, ਵਨ੍ਦਨ ਗੁਣੇਨ ਲਕ੍ਖਿਤਂ ਪੁਗ੍ਗਲਦਬ੍ਬਂ ਗੁਣੂਪਚਾਰੇਨ. ਉਕ੍ਕਟ੍ਠਮਜ੍ਝ ਮੁਦੁਤ੍ਤਮਤ੍ਤਭਾਵੋ ਗੁਣ੍ਯੂਪਚਾਰੇਨ, ਅਵਯਵਭੂਤਾ ਵਨ੍ਦਨਾ ਏਕਦੇਸੂਪਚਾਰੇਨ. ਸਮੂਹਭੂਤਾ ਵਨ੍ਦਨਾ ਏਕਦੇਸ੍ਯੂਪਚਾਰੇਨ, ਪੁਬ੍ਬਪੁਬ੍ਬਕੁਸਲਚਿਤ੍ਤੁਪ੍ਪਾਦੋ ਸਮੀਪੂਪਚਾਰੇਨ, ਪਚ੍ਛਿਮਪਚ੍ਛਿਮ ਕੁਸਲਚਿਤ੍ਤੁਪ੍ਪਾਦੋ ਸਮੀਪ੍ਯੂਪਚਾਰੇਨ, ਪਣਾਮਕੁਸਲਚਿਤ੍ਤੁਪ੍ਪਾਦਭੂਤਾਨਂ ਪਰਮਤ੍ਥਧਮ੍ਮਾਨਂ ਨਿਬ੍ਯਾਪਾਰਭਾਵੋ ਤਦ੍ਧਮ੍ਮੂਪਚਾਰੇਨ. ਤੇਸਂ ਏਵਂ ਧਮ੍ਮਤਾਭਾਵੋ ਅਤਦ੍ਧਮ੍ਮੂਪਚਾਰੇਨ, ਵਨ੍ਦਨਾਕਾਰੋ ਅਭੇਦਭੇਦੂਪਚਾਰੇਨ. ਵਨ੍ਦਨਸਤ੍ਤਿ ਭੇਦਅਭੇਦੂਪਚਾਰੇਨ ਲਬ੍ਭਤਿ. ਮਿਵਿਭਤ੍ਤਿਯਾ ਵਾਚ੍ਚਂ ਤਂਮੁਖ੍ਯਾਦੀਹਿ ਲਕ੍ਖਿਤੋ ਕਤ੍ਤੁ ਕ੍ਰਿਯਾਵਿਸੇਸੇਨ ਚ ਵਤ੍ਤਮਾਨਵਿਭਤ੍ਤਿਸਙ੍ਖਾਤੇਨ ਵਿਭਤ੍ਤਿਵਿਸੇ ਸੇਨ ਚ ਪਰਸ੍ਸਪਦਸਙ੍ਖਾਤੇਨ ਪਦਵਿਸੇਸੇਨ ਚ ਉਤ੍ਤਮਪੁਰਿਸ ਵਿਸੇਸੇਨ ਚ ਅਮ੍ਹਯੋਗਵਿਸੇਸੇਨ ਚ ਸਬ੍ਬਧਾਤੁਵਿਸੇਸੇਨ ਚ ਏਕਵਚਨਵਿਸੇਸੇਨ ਚ ਪਚ੍ਚੁਪ੍ਪਨ੍ਨਕਾਲਵਿਸੇਸੇਨ ਚ ਧਾਤ੍ਵਤ੍ਥਕ੍ਰਿਯਾਵਿਸੇਸੇਨ ਚ ਅਲਿਙ੍ਗ ਵਿਸੇਸੇਨ ਚ ਭੂਵਾਦਿਗਣ ਵਿਸੇਸੇਨ ਚ ਨੋਵਿਕਰਣਵਿਸੇਸੇਨ ਚ ਭਾਵਕਮ੍ਮਕਤ੍ਤੂਸੁਕਤ੍ਤੁਵਿਸੇਸੇਨ ਚ ਲਕ੍ਖਿਤੋ ਅਹਂਸਙ੍ਖਾਤੋ ਖਨ੍ਧਸਙ੍ਖਤੋ ਸਨ੍ਤਾਨੋ ਅਪ੍ਪਧਾਨੇਨ ਲਬ੍ਭਤਿ. ਕ੍ਰਿਯਾਪਦਸ੍ਸ ਕ੍ਰਿਯਾਯ ਪਧਾਨੇਨ ਵਾਚਕਤ੍ਤਾ ਧਾਤ੍ਵਤ੍ਥੋਵ ਪਧਾਨੇਨ ਲਬ੍ਭਤਿ. ਅਪਚ੍ਚਯਸ੍ਸ ਵਾਚ੍ਚਂ ਭੂਵਾਦਿਗਣਜੋਤਕਾ ਰੂਪਸਿਦ੍ਧਿਮਤ੍ਤਾ ਪਦ ਸਿਲਿਟ੍ਠਤਾ ਲਬ੍ਭਤਿ.

ਅਥ ਵਾ ਯੋ ਅਹਂ ਨਮਾਮੀਤਿ ਸੋ ਨਮੇ. ਸਾਮਞ੍ਞਤ੍ਥ ਵਿਗ੍ਗਹੋਯਂ. ਵਾਚ੍ਚਤ੍ਥੋ ਪਨ ਵੁਤ੍ਤਨਯੇਨ ਵੇਦਿਤਬ੍ਬੋ. ਨਮਨਞ੍ਚੇਤ੍ਥ ਬੁਦ੍ਧਸ੍ਸ ਸੀਲਾਦਿਅਨਨ੍ਤਗੁਣੇਸੁ ਨਿਨ੍ਨਪਬ੍ਭਾਰਤਾਵਸੇਨ ਪਣਾਮਕ੍ਰਿਯਾਭਿਨਿਪ੍ਫਾਦਿਕਾ ਕੁਸਲਚੇਤਨਾ. ਸਾ ਚ ਵਨ੍ਦਨੇਯ੍ਯ ਵਨ੍ਦਨਕਾਨਂ ਖੇਤ੍ਤਜ੍ਝਾਸਯਸਮ੍ਪਦਾਹਿ ਦਿਟ੍ਠਧਮ੍ਮਵੇਦਨੀਯਭੂਤਾ ਯਥਾਲਦ੍ਧਸਮ੍ਪਤ੍ਤਿਨਿਮਿਤ੍ਤਕਸ੍ਸ ਪੁਰਿਮਕਮ੍ਮਸ੍ਸ ਅਨੁਬਲਪ੍ਪਦਾਨ ਵਸੇਨ ਤਨ੍ਨਿਬ੍ਬਤ੍ਤਿਤਵਿਪਾਕਸਨ੍ਤਤਿਯਾ ਅਨ੍ਤਰਾਯਕਰਾਨਿ ਉਪਪੀਲ਼ਕਉਪਚ੍ਛੇਦਕਕਮ੍ਮਾਨਿ ਪਟਿਬਾਹਿਤ੍ਵਾ ਪਵਤ੍ਤਿਕਾਲੇ ਰੋਗਾਦਿਅਨ੍ਤਰਾਯਾਨਮਪ੍ਪਵਤ੍ਤਿਂ ਸਾਧੇਤਿ. ਸਮ੍ਪਰਾਯੇ ਚ ਉਪਪਜ੍ਜਵੇਦਨੀਯਭੂਤਾ ਸਗ੍ਗਮੋਕ੍ਖਸਮ੍ਪਤ੍ਤਿਸੁਖਂ ਨਿਬ੍ਬਤ੍ਤੇਤੀਤਿ.

ਅਯਂ ਪਨੇਤ੍ਥ ਦਸ੍ਸਨਤ੍ਥਨਯੋ. ਨਮੇਤਿਇਮਿਨਾ ਬੁਦ੍ਧਸ੍ਸ ਸੁਗਤਾਦਿਗੁਣਂ ਆਰਬ੍ਭ ਪਵਤ੍ਤਾ ਤਿਵਿਧਾ ਪਣਾਮਕੁਸਲ ਚੇਤਨਾ ਮੁਖ੍ਯੇਨ ਦਸ੍ਸੇਤਿ. ਤਂ ਦਸ੍ਸਨੇਨ ਤਸ੍ਸਾ ਕਾਰਣਭੂਤਾ ਯੋਨਿਸੋਮਨਸਿਕਾਰਾਦਯੋ ਚ ਚਤੁਚਕ੍ਕਸਮ੍ਪਤ੍ਤਿਞ੍ਚ ਬੁਦ੍ਧੁਪ੍ਪਾਦਨਵਮਖੇਤ੍ਤਞ੍ਚ ਪੁਬ੍ਬਭਾਗੇ ਪਵਤ੍ਤਂ ਸਦ੍ਧਾਪਞ੍ਞਾਪਧਾਨਂ ਕੁਸਲਚਿਤ੍ਤੁਪ੍ਪਾਦਞ੍ਚ ਫਲੂਪਚਾਰੇਨ ਦੀਪੇਤਿ. ਤਦ੍ਦੀਪਨੇਨ ਤਸ੍ਸਾ ਫਲਭੂਤਂ ਦਿਟ੍ਠਧਮ੍ਮਰੋਗਾਦਿਅਨ੍ਤਰਾਯਵਿਸੋਸਨਞ੍ਚ ਸਗ੍ਗਮੋਕ੍ਖ ਸੁਖਞ੍ਚ ਪਠਮਕਾਰਣੂਪਚਾਰੇਨ ਪਕਾਸੇਤਿ. ਤਪ੍ਪਕਾਸਨੇਨ ਬੁਦ੍ਧਸ੍ਸ ਪਣਾਮਾਰਹਭਾਵਂ ਦੁਤਿਯਕਾਰਣੂਪਚਾਰੇਨ ਵਿਭਾਵੇਤਿ. ਤਂਵਿਭਾਵਨੇਨ ਵਨ੍ਦਕਸ੍ਸ ਮੇ ਖੇਤ੍ਤਙ੍ਗਤਭਾਵਞ੍ਚ ਪਣਾਮੇ ਤਬ੍ਬਭਾਵਞ੍ਚ ਤਤਿਯਕਾਰਣੂਪਚਾਰੇਨ ਅਨੁਭਾਵੇਤਿ.

ਅਯਂ ਪਨੇਤ੍ਥ ਅਲਙ੍ਕਾਰਨਯੋ. ਨਮੇਤਿਵਾਚਕਪਦਸ੍ਸ ਵਾਚ੍ਚਭੂਤਾ ਤਿਵਿਧਾ ਬੁਦ੍ਧਪਣਾਮਕੁਸਲਚੇਤਨਾ ਸਮਟ੍ਠਾਯੀ ਭਾਵੋ ਨਾਮ. ਕਸ੍ਮਾ, ਸਰੀਰਤ੍ਤਾ. ਅਥ ਵਾ ਤਿਵਿਧਾਯ ਬੁਦ੍ਧਪਣਾ ਮਕੁਸਲਚੇਤਨਾਯ ਸਮ੍ਪਯੁਤ੍ਤੋ ਸਮਾਧਿਪ੍ਪਧਾਨੋ ਮਹਾ ਕੁਸਲਚਿਤ੍ਤੁਪ੍ਪਾਦੋ ਸਮਟ੍ਠਾਯੀਭਾਵੋ ਨਾਮ. ਕਸ੍ਮਾ, ਬੁਦ੍ਧਸ੍ਸ ਸੁਗਤਾਦਿਗੁਣਾਰਮ੍ਮਣੇ ਏਕਗ੍ਗਤ੍ਤਾ ਸਮਾਹਿਤਚਿਤ੍ਤਤ੍ਤਾ ਵਾ. ਸੋਯੇਵ ਪਨ ਸਨ੍ਤਰਸੋ ਨਾਮ. ਕਸ੍ਮਾ, ਬੁਦ੍ਧਪਣਾਮਚੇਤਨਾ ਕੁਸਲਙ੍ਗੇਨ ਅਕੁਸਲਙ੍ਗਸ੍ਸ ਪਹੀਨਤ੍ਤਾ. ਬੁਦ੍ਧਨ੍ਤਿਪਾਠਸੇਸ ਪਦਸ੍ਸ ਵਾਚ੍ਚਭੂਤੋ ਬੁਦ੍ਧਦਬ੍ਬੋ ਆਰਮ੍ਮਣਵਿਭਾਵੋ ਨਾਮ. ਕਸ੍ਮਾ, ਤਸ੍ਸ ਪਣਾਮਕੁਸਲਚਿਤ੍ਤੁਪ੍ਪਾਦਸ੍ਸ ਆਰਮ੍ਮਣਪਚ੍ਚਯੇਨ ਉਪਕਾਰਤ੍ਤਾ. ਬੁਦ੍ਧਸ੍ਸ ਸੁਗਤਨ੍ਤ੍ਯਾਦਿਗੁਣੋ ਉਦ੍ਦੀਪਨਵਿਭਾਵੋ ਨਾਮ. ਕਸ੍ਮਾ, ਪਣਾਮਸ੍ਸ ਕਾਰਣਤ੍ਤਾ. ਕਾਰਣਭੂਤਂ ਤਂ ਸਮਟ੍ਠਾਯੀਭਾਵਂ ਉਪਾਦਾਯ ਜਾਨਿਤਬ੍ਬੋ ਦਿਟ੍ਠਧਮ੍ਮਰੋਗਾ ਦਿਅਨ੍ਤਰਾਯਾਭਾਵੋ ਚ ਸਮ੍ਪਰਾਯੇ ਸਗ੍ਗਮੋਕ੍ਖਸੁਖਸਮ੍ਪਤ੍ਤਿ ਚ ਆਨੁਭਾਵੋ ਨਾਮ. ਕਸ੍ਮਾ, ਆਨਿਸਂਸਫਲਤ੍ਤਾ.

ਤਤ੍ਥ ਹਿ ਕਿਞ੍ਚਾਪਿ ਆਨੁਭਾਵਦੀਪਕਂ ਪਦਂ ਨਤ੍ਥਿ. ਕਾਰਣਸ੍ਸ ਪਨ ਫਲੇਨ ਵਿਨਾਭਾਵਤੋ ਕਾਰਣਸ੍ਸ ਫਲਂ ਵਿਞ੍ਞੇਯ੍ਯਨ੍ਤਿ. ਅਥ ਵਾ ਨਮੇਤਿਪਦਸ੍ਸ ਸਾਮਤ੍ਥਿਯਤੋ ਆਨੁਭਾਵੋ ਦਸ੍ਸਿਤੋਯੇਵਾਤਿ ਦਟ੍ਠਬ੍ਬੋ. ਆਵਿਭੂਤੋ ਉਸ੍ਸੁਕੋ ਚ ਬੁਦ੍ਧਪਣਾਮਸ੍ਸ ਆਨਿਸਂਸਪਜਾਨਨਾ ਮਤਿ ਚ ਅਲਸਾਭਾਵੋ ਚ ਚਿਤ੍ਤਪ੍ਪਸਾਦੋ ਚ ਸਮਾਧਿਤ੍ਯਾਦਿ ਚ ਬ੍ਯਭਿਚਾਰੀਭਾਵੋ ਨਾਮ. ਲੋਮਹਂਸਾਦਿਭਾਵੋ ਸਤ੍ਵਂਕਾਭਾਵੋ ਨਾਮਾਤਿ ਅਲਙ੍ਕਾਰ ਨਯੋ ਵੇਦਿਤਬ੍ਬੋ. ਏਵਂ ਪਚ੍ਛਿਮਪਚ੍ਛਿਮਗਾਥਾਸੂਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸੁਗਤਂ ਸੋਭਨਗਤਂ ਸੁਨ੍ਦਰਨਿਬ੍ਬਾਨਟ੍ਠਾਨਂ ਗਤਂ ਵਾ ਸਮ੍ਮਾ ਗਤਂ ਵਾ, ਸੁਗਤਂ ਸਮ੍ਮਾ ਵਚਨਂ ਗਦਂ ਭਾਸਨਂ, ਸੇਟ੍ਠਂ ਪਸਤ੍ਥਤਰਂ ਸਤਿਪਟ੍ਠਾਨਾਦਿਭੇਦੇ ਧਮ੍ਮੇ ਗਵੇਸਨ੍ਤਂ ਵਾ ਸਨ੍ਤੇਹਿ ਗਵੇਸਿਤਬ੍ਬਂ ਵਾ ਸਤ੍ਤਾਨਂ ਹਿਤਸੁਖਂ ਇਚ੍ਛਿਤਂ ਵਾ, ਕੁਸਲਂਕੁਸਲਂ ਕੁਸਲਂਅਕੁਸਲਂ, ਜਹਂ ਜਹਿਤਂ, ਅਮਤਂ ਮਰਣਵਿਰਹਿਤਂ ਅਮਤਂ ਅਮਤਨਿਬ੍ਬਾਨਸਮਨ੍ਨਾ ਗਤਂ, ਸਨ੍ਤਂ ਕਿਲੇਸਦਰਥਵੂਪਸਮਂ, ਅਸਮਂ ਲੋਕਿਯਧਮ੍ਮੇਨ ਅਸਦਿਸਂ ਮਗ੍ਗਫਲਨਿਬ੍ਬਾਨਧਮ੍ਮਂ. ਦਦਂ ਦਾਤਂ ਦਾਯਕਂ ਵਾ, ਸਰਣਂ ਸਬ੍ਬਸਤ੍ਤਲੋਕਸ੍ਸ ਪਟਿਸਰਣਭੂਤਂ. ਲੋਕਂ ਸਤ੍ਤਸਙ੍ਖ ਰੋਕਾਸਸਙ੍ਖਤਂ ਤਿਲੋਕਂ, ਸਰਣਂ ਜਾਨਨ੍ਤਂ, ਅਰਣਂ ਨਿਕ੍ਕਿਲੇਸਂ, ਕਿਲੇਸਸਙ੍ਖਾਤਰਣਵਿਰਹਿਤਂ ਵਾ. ਅਰਣਂ ਸਤ੍ਤੇਸੁ ਕਿਲੇਸਰਜਸ੍ਸਾਭਾਵਂ, ਕਰਂ ਦੇਸਨਾਞਾਣੇਨ ਕਤਂ, ਅਭਯਂ ਨਿਬ੍ਭਯਂ, ਅਭਯਂ ਨਿਬ੍ਭਯਟ੍ਠਾਨਂ ਨਿਬ੍ਬਾਨਦਿਸਂ, ਨਾਯਕਂ ਸਤ੍ਤੇ ਨਿਬ੍ਬਾਨਪਾਰਂ ਨੇਨ੍ਤਂ, ਨਾਯਕਂ ਤਿਲੋਕਾਨਂ ਜੇਟ੍ਠਂ ਪਾਮੋਕ੍ਖਂ ਬੁਦ੍ਧਂ ਸਕ੍ਕਚ੍ਚਂ ਤੀਹਿ ਦ੍ਵਾਰੇਹਿ ਅਹਂ ਨਮੇ ਨਮਾਮੀਤਿ.

ਪਠਮਵਨ੍ਦਨਗਾਥਾਦ੍ਵਯਵਣ੍ਣਨਾ ਸਮਤ੍ਤਾ.

੨.

ਨਯਨਸੁਭਗਕਾਯਙ੍ਗਂ,

ਮਧੁਰਵਰਸਰੋਪੇਤਂ;

ਅਮਿਤਗੁਣਗਣਾਧਾਰਂ,

ਦਸਬਲਮਤੁਲਂ ਵਨ੍ਦੇ.

੨. ਏਵਂ ਪਠਮਂ ਗਾਥਾਦ੍ਵਯੇਨ ਬੁਦ੍ਧਸ੍ਸ ਨਮਸ੍ਸਿਤ੍ਵਾ ਇਦਾਨਿ ਨਯਨਸੁਭਗਕਾਯਙ੍ਗਨ੍ਤ੍ਯਾਦੀਹਿ ਪਞ੍ਚਹਿ ਗੁਣੇਹਿ ਥੋਮਿਤ੍ਵਾ ਬੁਦ੍ਧਂ ਵਨ੍ਦਿਤੁਂ ਨਯਨਸੁਭਗਕਾਯਙ੍ਗਨ੍ਤਿਆਦਿਗਾਥਮਾਹ. ਅਯਂ ਪਨ ਨ ਨ ਮਗਣਯੁਤ੍ਤਤ੍ਤਾ ਨਵਕ੍ਖਰੇਹਿ ਲਕ੍ਖਿਤਾ ਭੁਜਗਸੁ ਸੁਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਭੁਜਗਸੁਸੁਮਤਾ ਨਾਮੋ’’ਤਿ.

ਅਯਂ ਪਨੇਤ੍ਥ ਯੋਜਨਾ. ਯਸ੍ਸਂ ਪਟਿਪਾਦਂ ਨਾ ਚ ਦ੍ਵੇ ਨਗਣਾਮੋ ਚ ਮਗਣੋ ਚ ਯਦਿ ਸਿਯਾ. ਸਾ ਭੁਜਗਸੁਸੁ ਗਾਥਾਤਿ ਮਤਾ ਞਾਤਬ੍ਬਾਤਿ. ਤਤ੍ਥ ਪਨ ਨਯਨਸੁਭਗਕਾਯਙ੍ਗਨ੍ਤਿ ਸਬ੍ਬਸਤ੍ਤਾਨਂ ਚਕ੍ਖੁਸ੍ਸ ਸੋਭਨਂ ਗਤੇਨ ਕਾਯਙ੍ਗੇਨਸਮਨ੍ਨਾਗਤਂ. ਏਤ੍ਥ ਹਿ ਨਯਨਨ੍ਤਿ ਸਮਵਿਸਮਂ ਦਸ੍ਸੇਨ੍ਤਂ ਅਤ੍ਤਭਾਵਂ ਨੇਤੀਤਿ ਨਯਨਂ, ਚਕ੍ਖੁ ਲਬ੍ਭਤਿ. ਨੀਧਾਤੁ ਯੁ. ਸੁਭਂ ਸੋਭਨਂ ਗਚ੍ਛਤੀਤਿ ਸੁਭਗਂ, ਕਾਯਙ੍ਗਂ ਲਬ੍ਭਤਿ. ਸੁਭਸਦ੍ਦੂਪਪਦੋ ਗਮੁਧਾਤੁ ਕ੍ਵਿ. ਕਾਯਸ੍ਸ ਅਙ੍ਗਂ ਅਵਯਵਂ ਕਾਯਙ੍ਗਂ. ਭਗਵਤੋ ਕਾਯਙ੍ਗਂ ਲਬ੍ਭਤਿ. ਛਟ੍ਠੀਤਪ੍ਪੁਰਿਸਸਮਾਸੋਯਂ. ਨਯਨਸ੍ਸ ਸੁਭਗਂ ਨਯਨਸੁਭਗਂ, ਤਂ ਕਾਯਙ੍ਗਂ ਯਸ੍ਸ ਬੁਦ੍ਧਸ੍ਸਾਤਿ ਨਯਨਸੁਭਗ ਕਾਯਙ੍ਗੋ, ਬੁਦ੍ਧੋ. ਸੋ ਹਿ ਰੂਪਕਾਯਸ੍ਸ ਦਸ੍ਸਨਾ ਨੁਤ੍ਤਰਿਯਗੁਣਯੋਗਤੋ ਸਬ੍ਬਸਤ੍ਤਾਨਂ ਪਸਾਦਚਕ੍ਖੁਸ੍ਸ ਸੋਭਨਂ ਗਤੇਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਚ ਅਸੀਤ੍ਯਾ ਨੁਬ੍ਯਞ੍ਜਨਲਕ੍ਖਣੇਹਿ ਚ ਲਕ੍ਖਿਤੇਨ ਕਾਯਙ੍ਗੇਨ ਸਮਨ੍ਨਾਗਤੋਤਿ ਅਤ੍ਥੋ.

ਮਧੁਰਵਰਸਰੋਪੇਤਨ੍ਤਿ ਪਿਯਪੇਮਨੀਯਉਤ੍ਤਮਸਦ੍ਦੇਨ ਸਮਨ੍ਨਾਗਤਂ, ਸੋ ਹਿ ਭਗਵਾ ਮਧਿਯਤਿ ਪਿਯਤਿ ਪੇਮਿਯਤਿ ਵਾਤਿ ਮਧੁਰੋ. ਮਧਧਾਤੁ ਉਰੋ. ਵੁਤ੍ਤਞ੍ਹਿ ਮਜ੍ਝਿਮਪਣ੍ਣਾਸਟੀਕਾਯਂ ‘‘ਮਧੁਰੋਤਿ ਪਿਯੋ ਪੇਮਨੀਯੋ ਅਪਲਿਬੁਦ੍ਧੋ’’ਤਿ. ਅਥ ਵਾ ਮਧਿਯਤਿ ਅਸ੍ਸਾਦਿਯਤੀਤਿ ਮਧੁਰੋ, ਮਧਤਿ ਸਬ੍ਬਸਤ੍ਤਾਨਂ ਪੀਤਿਂ ਉਨ੍ਦੇਤਿ ਵਡ੍ਢੇਤੀਤਿ ਮਧੁਰੋ, ਮਧਧਾਤੁ ਉਨ੍ਦੇ ਉਰੋ. ਤੇਨ ਵੁਤ੍ਤਂ ਸਦ੍ਦਨੀਤਿਯਂ ‘‘ਮਧ ਉਨ੍ਦੇ’’ਤਿ. ਵਰਿਤਬ੍ਬੋ ਇਚ੍ਛਿਤਬ੍ਬੋ ਪਤ੍ਥਿਤਬ੍ਬੋ ਵਾਤਿ ਵਰੋ, ਸਰੋ. ਵਰਧਾਤੁ ਇਚ੍ਛਾਯਂ ਅ. ਸਰਤਿ ਗਚ੍ਛਤਿ ਸੋਤਵਿਞ੍ਞਾਣਾਰਮ੍ਮਣਭਾਵਨ੍ਤਿ ਸਰੋ, ਸਦ੍ਦੋ. ਸਰਧਾਤੁ ਗਤਿਯਂ ਅ. ਸਰਤਿ ਗਚ੍ਛਤਿ ਸੁਯ੍ਯਮਾਨਤਨ੍ਤਿ ਵਾ ਸਰੋ, ਸਰਿਯਤਿ ਸੁਣਿਯਤੀਤਿ ਵਾ ਸਰੋ, ਭਗਵਤੋ ਅਟ੍ਠਙ੍ਗਸਮਨ੍ਨਾਗਤੋ ਸਦ੍ਦੋ ਲਬ੍ਭਤਿ. ਉਪਸਮ੍ਪਜ੍ਜਤੀਤਿ ਉਪੇਤੋ, ਉਪਪੁਬ੍ਬਇਧਾਤੁ ਤ. ਮਧੁਰੋ ਚ ਵਰੋ ਚ ਸੋ ਸਰੋ ਚਾਤਿ ਮਧੁਰਵਰਸਰੋ, ਤੇਨ ਉਪੇਤੋ ਸਮ੍ਪਨ੍ਨੋ ਸਮਨ੍ਨਾਗਤੋਤਿ ਮਧੁਰਵਰਸਰੋਪੇਤੋਤਿ ਵੁਚ੍ਚਤਿ. ਭਗਵਤੋ ਪਨ ਹਦਯ ਵਤ੍ਥੁਨੋ ਸੁਵਿਸੁਦ੍ਧਤ੍ਤਾ ਪਿਤ੍ਤਸੇਮ੍ਹਾਦੀਹਿ ਅਪਲਿਬੁਦ੍ਧਤ੍ਤਾ ਦੇਵ ਮਨੁਸ੍ਸੇਹਿ ਮਧੁਰੇਨ ਪਿਯੇਨ ਮਨਾਪਿਯੇਨ ਵਰੇਨ ਇਚ੍ਛਿਤਪਤ੍ਥਿ ਤੇਨ ਅਟ੍ਠਙ੍ਗਸਮਨ੍ਨਾਗਤੇਨ ਸਰੇਨ ਸਦ੍ਦੇਨ ਉਪੇਤੋ ਸਮ੍ਪਨ੍ਨੋ ਸਮਨ੍ਨਾਗਤੋਤਿ ਵੁਤ੍ਤਂ ਹੋਤਿ.

ਏਤ੍ਥ ਚ ਕਿਞ੍ਚਾਪਿ ਸਰੋਪੇਤਨ੍ਤਿ ਸਾਮਞ੍ਞਵਸੇਨ ਵੁਤ੍ਤਂ, ਭਗਵਤੋ ਸਰੋ ਪਨ ਵਿਸਟ੍ਠੋ ਚ, ਵਿਞ੍ਞੇਯ੍ਯੋ, ਮਞ੍ਜੁ, ਸਵਨੀਯੋ, ਬਿਨ੍ਦੁ, ਅਵਿਸਾਰੀ, ਗਮ੍ਭੀਰੋ, ਨਿਨ੍ਨਾਦਿ ਚਾਤਿ ਵਿਸੇਸੇਨ ਅਟ੍ਠਙ੍ਗਸਮਨ੍ਨਾਗਤੋਤਿ ਅਤ੍ਥੋ ਦਟ੍ਠਬ੍ਬੋ. ਵੁਤ੍ਤਞ੍ਹਿ ਮਜ੍ਝਿਮ ਪਣ੍ਣਾਸੇ ਬ੍ਰਹ੍ਮਾਯੁਸੁਤ੍ਤੇ ‘‘ਅਟ੍ਠਙ੍ਗਸਮਨ੍ਨਾਗਤੋ ਖੋ ਪਨਸ੍ਸ ਗੋਤਮਸ੍ਸ ਮੁਖਤੋ ਘੋਸੋ ਨਿਚ੍ਛਰਤਿ ਵਿਸਟ੍ਠੋ ਚ, ਵਿਞ੍ਞੇਯ੍ਯੋ ਚ, ਮਞ੍ਜੁ ਚ, ਸਵਨੀਯੋ ਚ, ਬਿਨ੍ਦੁ ਚ, ਅਵਿਸਾਰੀ ਚ, ਗਮ੍ਭੀਰੋ ਚ, ਨਿਨ੍ਨਾਦਿ ਚ. ਯਥਾਪਰਿਸਂ ਖੋ ਪਨ ਸੋ ਭਵਂ ਗੋਤਮੋ ਸਰੇਨ ਵਿਞ੍ਞਾਪੇਤਿ, ਨ ਚਸ੍ਸ ਬਹਿਦ੍ਧਾ ਪਰਿਸਾਯ ਘੋਸੋ ਨ ਨਿਚ੍ਛਰਤੀ’’ਤਿ.

ਤਸ੍ਸਾਟ੍ਠਕਥਾਯਂ ਪਨ ਵਿਸਟ੍ਠੋਤਿ ਸਿਨਿਦ੍ਧੋ ਅਪਲਿਬੁਦ੍ਧੋ. ਵਿਞ੍ਞੇਯ੍ਯੋਤਿ ਵਿਞ੍ਞਾਪਨੀਯੋ ਪਾਕਟੋ. ਵਿਸਟ੍ਠਤ੍ਤਾਯੇਵ ਚੇਸ ਵਿਞ੍ਞੇਯ੍ਯੋ ਹੋਤਿ. ਮਞ੍ਜੂਤਿ ਮਧੁਰੋ. ਸਵਨੀਯੋਤਿ ਸੋਤਸੁਖੋ, ਮਧੁਰਤ੍ਤਾਯੇਵ ਚੇਸ ਸਵਨੀਯੋ ਹੋਤਿ. ਬਿਨ੍ਦੂਤਿ ਸਮ੍ਪਿਣ੍ਡਿਤੋ. ਅਵਿਸਾਰੀਤਿ ਅਵਿਸਟੋ. ਬਿਨ੍ਦੁਤ੍ਤਾਯੇਵ ਚੇਸ ਅਵਿਸਾਰੀ ਹੋਤਿ. ਗਮ੍ਭੀਰੋਤਿ ਗਮ੍ਭੀਰਸਮੁਟ੍ਠਿਤੋ. ਨਿਨ੍ਨਾਦੀਤਿ ਨਿਨ੍ਨਦਵਾ. ਗਮ੍ਭੀਰਤ੍ਤਾਯੇਵ ਚੇਸ ਨਿਨ੍ਨਾਦਿ ਹੋਤਿ. ਯਥਾਪਰਿਸਨ੍ਤਿ ਚਕ੍ਕਵਾਲ਼ਪਰਿਯਨ੍ਤਾਪਿ ਏਕਬਦ੍ਧਂ ਪਰਿਸਂ ਵਿਞ੍ਞਾਪੇਤਿ. ਬਹਿਦ੍ਧਾਤਿ ਅਙ੍ਗੁਲਿਮਤ੍ਤਮ੍ਪਿ ਪਰਿਸਤੋ ਬਹਿਦ੍ਧਾ ਨ ਗਚ੍ਛਤਿ. ਕਸ੍ਮਾ. ਸੋ ਏਵਰੂਪੋ ਮਧੁਰਸਰੋ ਅਕਾਰਣਾ ਮਾ ਨਸ੍ਸੀਤਿ. ਇਤਿ ਭਗਵਤੋ ਘੋਸੋ ਪਰਿਸਾਯ ਮਤ੍ਤਕੇਨੇਵ ਚਰਤੀਤਿ ਵਣ੍ਣਿਤੋਤਿ. ਅਭਿਧਾਨਪ੍ਪਦੀਪਿਕਾਯਞ੍ਚ ਵੁਤ੍ਤਾ ਸਙ੍ਗਹਗਾਥਾ –

‘‘ਵਿਸਟ੍ਠਮਞ੍ਜੁਵਿਞ੍ਞੇਯ੍ਯਾ, ਸਵਨੀਯਾਵਿਸਾਰਿਨੋ;

ਬਿਨ੍ਦੁਗਮ੍ਭੀਰਨਿਨ੍ਨਾਦਿ, ਤ੍ਯੇਵਮਟ੍ਠਙ੍ਗਿਕੋ ਸਰੋ’’ਤਿ.

ਯਥਾ ਹਿ ਬ੍ਰਹ੍ਮੁਨੋ ਸਰੋ ਪਿਤ੍ਤਸੇਮ੍ਹੇਹਿ ਅਪਲਿਬੁਦ੍ਧਤ੍ਤਾ ਵਿਸੁਦ੍ਧੋ ਮਧੁਰੋ ਹੋਤਿ. ਯਥਾ ਚ ਸੀਹਬ੍ਯਗ੍ਘਾਦੀਹਿ ਵਾਲ਼ਮਿਗੇਹਿ ਅਨੁਬਨ੍ਧਾ ਧਾਵਨ੍ਤਾ ਖੁਦ੍ਦਕਮਿਗਾ ਕਰਵੀਕਸਕੁਣਸ੍ਸ ਵਿਕੂਜਮਾਨਂ ਸਦ੍ਦਂ ਸੁਤ੍ਵਾ ਸਰਸ੍ਸ ਮਧੁਰਤ੍ਤਾ ਮਰਣਭਯਂ ਹਿਤ੍ਵਾ ਅਧਾਵਿਤ੍ਵਾ ਉਕ੍ਖਿਤ੍ਤਪਾਦਂ ਅਨਿਕ੍ਖਿਪਿਤ੍ਵਾ ਤਿਟ੍ਠਨ੍ਤਾ ਸੁਣਨ੍ਤਿ, ਏਵਂ ਕਰਵੀਕਸ੍ਸ ਸਦ੍ਦੋ ਧਮ੍ਮਤਾਭਾਵੇਨ ਮਧੁਰੋ ਪਿਯੋ ਮਨਾਪੋ ਹੋਤਿ. ਏਵਂ ਭਗਵਤਾ ਕਤਂ ਕਮ੍ਮਂ ਵਤ੍ਥੁਂ ਸੋਧੇਤਿ, ਵਤ੍ਥੁਸ੍ਸ ਸੁਦ੍ਧਤ੍ਤਾ ਪਿਤ੍ਤਸੇਮ੍ਹੇਹਿ ਚ ਅਪਲਿਬੁਦ੍ਧਤ੍ਤਾ ਭਗਵਤੋ ਨਾਭਿਤੋ ਸਮੁਟ੍ਠਹਨ੍ਤੋ ਸਰੋਪਿ ਅਟ੍ਠਙ੍ਗਸਮਨ੍ਨਾਗਤੋ ਸੁਵਿਸੁਦ੍ਧੋ ਅਤਿਮਧੁਰੋ ਅਤਿਪਿਯੋ ਅਤਿਮਨਾਪੋ ਹੋਤਿ. ਸਾ ਪਨੇਸਾ ਹੀਨੂਪਮਾ ਹੋਤਿ, ਭਗਵਤੋ ਹਿ ਸਰੋ ਤੇਹਿ ਸਦ੍ਦੇਹਿ ਸਤਭਾਗੇਨ ਸਹਸ੍ਸਭਾਗੇਨ ਅਤਿਮਧੁਰੋ ਅਤਿਪਿਯੋ ਅਤਿਮਨਾਪੋ ਹੋਤਿ, ਤਥਾ ਹਿ ਧਮ੍ਮਾਸੋ ਕਰਞ੍ਞੋ ਅਸਨ੍ਧਿਮਿਤ੍ਤਾ ਦੇਵੀ ਕਰਵੀਕਸਕੁਣਸ੍ਸ ਮਧੁਰਸਦ੍ਦਂ ਸੁਤ੍ਵਾ ਚਿਨ੍ਤੇਸਿ ‘‘ਇਮਸ੍ਸ ਤਿਰਚ੍ਛਾਨਸ੍ਸ ਮਧੁਰੋ ਸਦ੍ਦੋ, ਕੋ ਨਾਮ ਸਬ੍ਬਞ੍ਞੁਤਞਾਣਸਿਰਿਂ ਪਤ੍ਤਸ੍ਸ ਭਗਵਤੋ ਅਤਿਮਧੁਰੋ ਸਦ੍ਦੋ’’ਤਿ, ਪੀਤਿਂ ਉਪ੍ਪਾਦੇਤ੍ਵਾ ਤਂ ਪੀਤਿਂ ਅਵਿਜਹਿਤ੍ਵਾ ਸਤ੍ਤਹਿ ਜਙ੍ਘਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਤਿ, ਤਸ੍ਮਾ ਭਗਵਤੋ ਮਧੁਰਵਰਸਰੋਪੇਤਨ੍ਤਿ ਥੋਮੇਤੀਤਿ.

ਅਮਿਤਗੁਣਗਣਾਧਾਰਨ੍ਤਿ ਅਪਰਿਮਿਣਿਤਬ੍ਬਸੀਲਾਦਿਗੁਣਸਮੂਹਾਨਂ ਪਤਿਟ੍ਠਾਨਭੂਤਂ. ਏਤ੍ਥ ਚ ਸਮਿਤੋਤਿ ਪਰਿਮਿਣਿਤਬ੍ਬੋਤਿ ਮਿਤੋ, ਮਾਧਾਤੁ ਪਰਿਮਾਣੇ ਤ, ਨ ਮਿਤੋ ਅਮਿਤੋ. ਗੁਣੋਤਿ ਸੀਲਾਦਯੋ ਧਮ੍ਮਾ. ਤੇ ਹਿ ਗੁਣੇਨ੍ਤਿ ਤਂਸਮਙ੍ਗੀਪੁਗ੍ਗਲਂ ਪਕਾਸੇਨ੍ਤੀਤਿ ਗੁਣਾਤਿ ਵੁਚ੍ਚਨ੍ਤਿ. ਗੁਣਧਾਤੁ ਪਕਾਸਨੇ ਅ. ਮਣਿਸਾਰਮਞ੍ਜੂਸਾਟੀਕਾਯਂ ਪਨ ‘‘ਗੁਣਨ੍ਤਿ ਅਤ੍ਤਨੋ ਆਧਾਰਂ ਪਾਕਟਂ ਕਰੋਨ੍ਤੀਤਿ ਗੁਣਾ’’ਤਿ ਵੁਤ੍ਤਂ.

ਸਦ੍ਦਨੀਤਿਧਾਤੁਮਾਲਾਯਞ੍ਚ ‘‘ਗੁਣ ਆਮਨ੍ਤਨੇ, ਗੁਣੋਤਿ ਸੀਲਾਦਯੋ ਧਮ੍ਮਾ, ਕੇਨਟ੍ਠੇਨ ਤੇ ਗੁਣਾ, ਗੋਣਾਪਿਯਤਿ ਆਮਨ੍ਤਾਪਿਯਤਿ ਅਤ੍ਤਨਿ ਪਤਿਟ੍ਠਿਤੋ ਪੁਗ੍ਗਲੋ ਦਟ੍ਠੁਂ ਸੋਤੁਂ ਪੂਜਿਤੁਞ੍ਚ ਇਚ੍ਛਨ੍ਤੇਹਿ ਜਨੇਹੀਤਿ ਗੁਣੋ. ਏਤ੍ਥ ਕਿਞ੍ਚਾਪਿ ਸੀਲਾਦਿ ਧਮ੍ਮਾਨਂ ਆਮਨ੍ਤਾਪਨਂ ਨਤ੍ਥਿ, ਤਥਾਪਿ ਤਂਹੇਤੁ ਆਮਨ੍ਤਨਂ ਨਿਮਨ੍ਤਨਞ੍ਚ ਤੇਯੇਵ ਕਰੋਨ੍ਤਿ ਨਾਮਾਤਿ ਏਵਂ ਵੁਤ੍ਤਂ. ਅਞ੍ਞੇ ਪਨ ਗੁਞ੍ਜਨ੍ਤੇ ਅਬ੍ਯਯਨ੍ਤੇ ਇਤਿ ਗੁਣਾਤਿ ਅਤ੍ਥਂ ਵਦਨ੍ਤਿ. ਤਦਨੁਰੂਪਂ ਪਨ ਧਾਤੁਸਦ੍ਦਂਨ ਪਸ੍ਸਾਮ. ਗੁਣ ਆਮਨ੍ਤਨੇ ਇਚ੍ਚੇਵ ਪਸ੍ਸਾਮ. ਵਿਚਾਰੇਤ੍ਵਾ ਗਹੇਤਬ੍ਬ’’ਨ੍ਤਿ ਵੁਤ੍ਤਂ. ਅਮਿਤੋ ਗੁਣੋ ਅਮਿਤਗੁਣੋ, ਤੇਸਂ ਗਣੋ ਸਮੂਹੋ ਅਮਿਤਗੁਣਗਣੋ, ਤੇਸਂ. ਆਧਾਰਤਿ ਤਿਟ੍ਠਤਿ ਏਤ੍ਥਾਤਿ ਅਮਿਤਗੁਣਗਣਾਧਾਰੋ, ਜਿਨੋ ਲਬ੍ਭਤਿ. ਸੋ ਪਨ ਸਮੁਦ੍ਦੋਦਕਂ ਨਾਲ਼ਿਪਤ੍ਤੇਨ ਅਪਰਿਮਿਤਂ ਵਿਯ ਕੇਨਚਿ ਅਪਰਿਮਿਤਾਨਂ ਸੀਲਾਦਿਗੁਣਸਮੂਹਾਨਂ ਆਧਾਰੋ ਪਤਿਟ੍ਠਾਨਭੂਤੋਤਿ ਅਤ੍ਥੋ.

ਦਸਬਲਨ੍ਤਿ ਅਞ੍ਞੇਹਿ ਅਸਾਧਾਰਣਂ ਤਥਾਗਤਦਸਬਲਸਮ੍ਪਨ੍ਨਂ. ਏਤ੍ਥ ਹਿ ਬਲਨ੍ਤਿ ਕੇਹਿਚਿ ਵਿਰੁਦ੍ਧੇਹਿ ਕਾਰਣੇ ਹਿ ਬਲਨ੍ਤਿ ਨ ਕਮ੍ਪੇਨ੍ਤਿ ਥਿਰਨ੍ਤੀਤਿ ਬਲਂ, ਦਸ ਬਲਾਨਿ ਯਸ੍ਸ ਸੋਤਿ ਦਸਬਲੋ, ਬੁਦ੍ਧੋ. ਤਂ ਪਨ ਦੁਵਿਧਂ ਹੋਤਿ ਤਥਾ ਗਤਸ੍ਸ ਦਸਬਲਂ ਕਾਯਦਸਬਲਞ੍ਚ, ਞਾਣਦਸਬਲਞ੍ਚਾਤਿ. ਤੇਸੁ ਹਿ ਕਾਯਬਲਂ ਹਤ੍ਥਿਕੁਲਾਨੁਸਾਰੇਨ ਵੇਦਿਤਬ੍ਬਂ. ਵੁਤ੍ਤਞ੍ਹੇਤਂ ਪੋਰਾਣੇਹਿ –

‘‘ਕਾਲ਼ਾ ਵਕਞ੍ਚ ਗਙ੍ਗੇਯ੍ਯਂ, ਪਣ੍ਡਰਂ ਤਮ੍ਬਪਿਙ੍ਗਲਂ;

ਗਨ੍ਧ ਮਙ੍ਗਲਹੇਮਞ੍ਚ, ਉਪੋਸਥਂ ਛਦ੍ਦਨ੍ਤਿਮੇ ਦਸਾ’’ਤਿ.

ਇਮਾਨਿ ਹਿ ਦਸ ਹਤ੍ਥਿਕੁਲਾਨਿ. ਤਤ੍ਥ ਕਾਲ਼ਾਵਕਨ੍ਤਿ ਪਕਤਿਹਤ੍ਥਿਕੁਲਂ ਦਟ੍ਠਬ੍ਬਂ. ਯਂ ਦਸਨ੍ਨਂ ਪੁਰਿਸਾਨਂ ਕਾਯਬਲਂ, ਤਂ ਏਕਸ੍ਸ ਕਾਲ਼ਾਵਕਹਤ੍ਥਿਨੋ. ਯਂ ਦਸਨ੍ਨਂ ਕਾਲ਼ਾਵਕਾਨਂ ਬਲਂ, ਤਂ ਏਕਸ੍ਸ ਗਙ੍ਗੇਯ੍ਯਸ੍ਸ. ਯਂ ਦਸਨ੍ਨਂ ਗਙ੍ਗੇਯ੍ਯਾਨਂ, ਤਂ ਏਕਸ੍ਸ ਪਣ੍ਡਰਸ੍ਸ. ਯਂ ਦਸਨ੍ਨਂ ਪਣ੍ਡਰਾਨਂ, ਤਂ ਏਕਸ੍ਸ ਤਮ੍ਬਸ੍ਸ. ਯਂ ਦਸਨ੍ਨਂ ਤਮ੍ਬਾਨਂ, ਤਂ ਏਕਸ੍ਸ ਪਿਙ੍ਗਲਸ੍ਸ. ਯਂ ਦਸਨ੍ਨਂ ਪਿਙ੍ਗਲਾਨਂ, ਤਂ ਏਕਸ੍ਸ ਗਨ੍ਧਹਤ੍ਥਿਨੋ. ਯਂ ਦਸਨ੍ਨਂ ਗਨ੍ਧਹਤ੍ਥੀਨਂ, ਤਂ ਏਕਸ੍ਸ ਮਙ੍ਗਲਸ੍ਸ. ਯਂ ਦਸਨ੍ਨਂ ਮਙ੍ਗਲਾਨਂ, ਤਂ ਏਕਸ੍ਸ ਹੇਮਵਤਸ੍ਸ. ਯਂ ਦਸਨ੍ਨਂ ਹੇਮਵਤਾਨਂ, ਤਂ ਉਪੋਸਥਸ੍ਸ. ਯਂ ਦਸਨ੍ਨਂ ਉਪੋਸਥਾਨਂ, ਤਂ ਏਕਸ੍ਸ ਛਦ੍ਦਨ੍ਤਸ੍ਸ. ਯਂ ਦਸਨ੍ਨਂ ਛਦ੍ਦਨ੍ਤਾਨਂ, ਤਂ ਏਕਸ੍ਸ ਤਥਾਗਤਸ੍ਸ, ਨਾਰਾਯਨਸਙ੍ਘਾਤਬਲਨ੍ਤਿਪਿ ਇਦਮੇਵ ਵੁਚ੍ਚਤਿ. ਤਦੇਤਂ ਪਕਤਿਹਤ੍ਥੀਨਂ ਗਣਨਾਯ ਹਤ੍ਥਿਕੋਟਿਸਹਸ੍ਸਾਨਂ. ਪੁਰਿਸਗਣਨਾਯ ਦਸਨ੍ਨਂ ਪੁਰਿਸਕੋਟਿਸਹਸ੍ਸਾਨਂ ਬਲਂ ਹੋਤਿ. ਇਦਂ ਤਥਾਗਤਸ੍ਸ ਕਾਯਬਲਂ ਹੋਤਿ. ਇਦਂ ਪਨ ਤਾਸੁ ਤਾਸੁ ਪਾਲ਼ੀਸੁ ਨ ਆਗਤਂ. ਅਟ੍ਠਕਥਾਸੁਯੇਵ ਆਗਤਂ. ਤੇਨ ਵੁਤ੍ਤਂ ਦਸਕ ਨਿਪਾਤ ਅਙ੍ਗੁਤ੍ਤਰਟੀਕਾਯਂ ‘‘ਦਸ ਬਲਞਾਣਂ ਪਨ ਪਾਲ਼ਿਯਂ ਆਗਤਮੇਵ. ਨ ਕਾਯਬਲਂ ਵਿਯ ਅਟ੍ਠ ਕਥਾਰੂਲ਼੍ਹਮੇਵਾਤਿ ਅਧਿਪ੍ਪਾਯੋ’’ਤਿ. ਏਤ੍ਥ ਚ ਨਾਰਾਯਨ ਸਙ੍ਘਾਤ ਬਲਨ੍ਤਿ ਏਤ੍ਥ ਨਾਰਾ ਵੁਚ੍ਚਨ੍ਤਿ ਰਸ੍ਮਿਯੋ, ਤਾ ਬਹੂ ਨਾਨਾਵਿਧਾ ਇਤੋ ਉਪ੍ਪਜ੍ਜਨ੍ਤੀਤਿ ਨਾਰਾਯਨਂ, ਵਜਿਰਂ. ਤਸ੍ਮਾ ਨਾਰਾਯਨਸਙ੍ਘਾਤ ਬਲਨ੍ਤਿ ਵਜਿਰਸਙ੍ਘਾਤਬਲਨ੍ਤਿ ਅਤ੍ਥੋਤਿ.

ਞਾਣਦਸਬਲਂ ਪਨ ਵਿਭਙ੍ਗਪਾਲ਼ਿਯਞ੍ਚ ਮੂਲਪਣ੍ਣਾਸੇ ਮਹਾ ਸੀਹਨਾਦਸੁਤ੍ਤੇ ਦਸਕਨਿਪਾਤਅਙ੍ਗੁਤ੍ਤਰਪਾਲ਼ਿਯਞ੍ਚ ਵਿਤ੍ਥਾਰੇਨ ਆਗਤਮੇਵ. ਸੁਖਗ੍ਗਹਣਤ੍ਥਂ ਪਨ ਸਙ੍ਖੇਪੇਨ ਦਸ੍ਸਯਿਸ੍ਸਾਮਿ. ਸੇਯ੍ਯਥਿਦਂ. ਠਾਨਾਟ੍ਠਾਨਞਾਣਞ੍ਚ, ਕਮ੍ਮਸਮਾਦਾਨਾਨਂ ਵਿਪਾਕਞਾਣਂ, ਸਬ੍ਬਤ੍ਥਗਾਮਿਨਿਪਟਿਪਦਾਞਾਣਂ, ਅਨੇਕਧਾਤੁ ਨਾਨਾਧਾਤੁ ਲੋਕ ਞਾਣਂ, ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਞਾਣਂ, ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਿਞਾਣਂ, ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਞਾਣਂ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ, ਸਤ੍ਤਾਨਂ ਚੁਤੂਪਪਾਤਂ ਞਾਣਂ, ਆਸਵਾਨਂ ਖਯਞਾਣਞ੍ਚਾਤਿ. ਅਯਂ ਪਨ ਕਮੋ ਅਭਿਧਮ੍ਮਵਿਭਙ੍ਗਪਾਲ਼ਿਯਂ ਆਗਤਕ੍ਕਮੋ.

ਚੁਤੂਪਪਾਤਞਾਣਟ੍ਠਾਨੇ ਪਨ ਮੂਲਪਣ੍ਣਾਸਪਾਲ਼ਿਯਂ ਮਹਾਸੀਹਨਾਦਸੁਤ੍ਤੇ ਚ ਦਸਕਨਿਪਾਤਅਙ੍ਗੁਤ੍ਤਰਪਾਲ਼ਿਯਂ ਦਿਬ੍ਬਚਕ੍ਖੁਞਾਣਂ ਆਗਤਂ. ਅਤ੍ਥਤੋ ਪਨ ਦਿਬ੍ਬਚਕ੍ਖੁਞਾਣੇਨ ਚੁਤੂਪਪਾਤਸ੍ਸ ਪਸ੍ਸਿਤਤ੍ਤਾ ਸਦਿਸਮੇਵਾਤਿ. ਤਤ੍ਥ ਹਿ ਠਾਨਾਟ੍ਠਾਨਞਾਣਨ੍ਤਿ ਕਾਰਣਾਕਾਰਣਂ ਯਥਾਭੂਤਂ ਜਾਨਨਞਾਣਂ. ਕਾਰਣਞ੍ਹਿ ਯਸ੍ਮਾ ਤਤ੍ਥ ਫਲਂ ਤਿਟ੍ਠਤਿ ਤਦਾਯਤ੍ਤਵੁਤ੍ਤਿਤਾਯ ਉਪ੍ਪਜ੍ਜਤਿ ਚੇਵ ਪਵਤ੍ਤਤਿ ਚ, ਤਸ੍ਮਾ ਠਾਨਨ੍ਤਿ ਵੁਚ੍ਚਤਿ. ਕਮ੍ਮਸਮਾਦਾਨਾਨਂ ਵਿਪਾਕਞਾਣਨ੍ਤਿ ਸਮਾਦਿਯਿਤ੍ਵਾ ਕਤਾਨਂ ਅਤੀਤਾਨਾਗਤ ਪਚ੍ਚੁਪ੍ਪਨ੍ਨਾਨਂ ਕੁਸਲਾਕੁਸਲਕਮ੍ਮਾਨਂ ਸੁਗਤਿਦੁਗ੍ਗਤਿਪਟਿਸਨ੍ਧਿਸਙ੍ਖਾਤਂ ਵਿਪਾਕਂ ਨਿਬ੍ਬਾਨਫਲਞ੍ਚ ਯਥਾਭੂਤਂ ਪਜਾਨਨਞਾਣਂ. ਸਬ੍ਬਤ੍ਥ ਗਾਮਿਨਿਪਟਿਪਦਂ ਞਾਣਨ੍ਤਿ ਸਬ੍ਬਗਤਿਗਾਮਿਨਿਞ੍ਚ ਪਟਿਪਦਂ ਮਗ੍ਗਂ ਯਥਾਭੂਤਂ ਪਜਾਨਨਞਾਣਂ. ਤਤ੍ਥ ਚ ਪਟਿਪਦਨ੍ਤਿ ਪਟਿਪਜ੍ਜਤਿ ਪਾਪੁਣਾਤਿ ਏਤੇਨਾਤਿ ਪਟਿਪਦਂ, ਮਗ੍ਗਂ. ਗਤਿਗਾਮਿਨਿਨ੍ਤਿ ਨਿਰਯਾਦਿਪਞ੍ਚਗਤਿਗਾਮਿਨਿਂ. ਅਗਤਿਗਾਮਿਨਿਨ੍ਤਿ ਨਿਬ੍ਬਾਨਗਾਮਿਨਿਂ. ਵੁਤ੍ਤਞ੍ਹਿ ‘‘ਨਿਬ੍ਬਾਨਞ੍ਚਾਹਂ ਸਾਰਿਪੁਤ੍ਤ ਪਜਾਨਾਮਿ ਨਿਬ੍ਬਾਨਗਾਮਿਨਿਞ੍ਚ ਪਟਿਪਦ’’ਨ੍ਤਿ.

ਅਨੇਕਧਾਤੁਨਾਨਾਧਾਤੁਲੋਕਂ ਞਾਣਨ੍ਤਿ ਏਤ੍ਥ ਅਨੇਕ ਧਾਤੂਤਿ ਚਕ੍ਖੁਧਾਤੁਆਦੀਹਿ ਕਾਮਧਾਤੂਹਿ ਵਾ ਬਹੁਧਾਤੁਂ. ਨਾਨਾਧਾਤੂਤਿ ਤਾਸਂਯੇਵ ਧਾਤੂਨਂ ਵਿਲਕ੍ਖਣਤ੍ਤਾ ਵਿਸਦਿਸ ਸਭਾਵਤ੍ਤਾ ਨਾਨਾਪ੍ਪਕਾਰਧਾਤੁਂ. ਲੋਕਨ੍ਤਿ ਖਨ੍ਧਾਯਤਨ ਧਾਤੁਲੋਕਂ. ਞਾਣਨ੍ਤਿ ਯਥਾਭੂਤਂ ਪਜਾਨਨਞਾਣਂ. ਸਤ੍ਤਾਨਂ ਅਧਿਮੁਤ੍ਤਿਕਤਂ ਞਾਣਨ੍ਤਿ ਸਤ੍ਤਾਨਂ ਹੀਨਾਦੀਹਿ ਅਧਿਮੁਤ੍ਤੀਹਿ ਨਾਨਾਧਿਮੁਤ੍ਤਿਕਭਾਵਂ ਯਥਾਭੂਤਂ ਪਜਾਨਨਞਾਣਂ. ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਿਞਾਣਨ੍ਤਿ ਏਤ੍ਥ ਪਰਸਤ੍ਤਾਨਨ੍ਤਿ ਪਧਾਨਸਤ੍ਤਾਨਂ. ਪਰਪੁਗ੍ਗਲਾਨਨ੍ਤਿ ਤਤੋ ਪਰੇਸਂ ਹੀਨਸਤ੍ਤਾਨਂ. ਏਕਤ੍ਥਮੇਵ ਵਾ ਏਤਂ ਪਦਦ੍ਵਯਂ ਵੇਨੇਯ੍ਯਵਸੇਨ ਦ੍ਵੇਧਾ ਵੁਤ੍ਤਂ. ਇਨ੍ਦ੍ਰਿਯਪਰੋਪਰਿਯਤ੍ਤਿਞਾਣਨ੍ਤਿ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਪਰਭਾਵਂ ਵਡ੍ਢਞ੍ਚ ਅਪਰਭਾਵਂ ਹਾਨਿਞ੍ਚ ਯਥਾਭੂਤਂ ਪਜਾਨਨਞਾਣਂ.

ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਞਾਣਨ੍ਤਿ ਏਤ੍ਥ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਨ੍ਤਿ ਪਠਮਾਦੀਨਂ ਚਤੁਨ੍ਨਂ ਝਾਨਾਨਂ, ਰੂਪੀ ਰੂਪਾਨਿ ਪਸ੍ਸਤੀਤਿਆਦੀਨਂ ਅਟ੍ਠਨ੍ਨਂ ਵਿਮੋਕ੍ਖਾਨਂ, ਸਵਿਤਕ੍ਕਸਵਿਚਾਰਾਦੀਨਂ ਤਿਣ੍ਣਂ ਸਮਾਧੀਨਂ, ਪਠਮਜ੍ਝਾਨ ਸਮਾਪਤ੍ਤਿਆਦੀਨਞ੍ਚ ਨਵਨ੍ਨਂ ਅਨੁਪੁਬ੍ਬਸਮਾਪਤ੍ਤੀਨਂ. ਸਂਕਿਲੇਸਨ੍ਤਿ ਹਾਨਭਾਗਿਯਧਮ੍ਮਂ. ਵੋਦਾਨਨ੍ਤਿ ਵਿਸੇਸਭਾਗਿਯਧਮ੍ਮਂ. ਵੁਟ੍ਠਾਨਨ੍ਤਿ ਯੇਨ ਕਾਰਣੇਨ ਝਾਨਾਦੀਹਿ ਵੁਟ੍ਠਹਨ੍ਤਿ, ਤਂ ਕਾਰਣਂ. ਞਾਣਨ੍ਤਿ ਯਥਾਭੂਤਂ ਪਜਾਨਨਞਾਣਂ. ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਨ੍ਤਿ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਾਨੁਸ੍ਸਰਣਸਙ੍ਖਾਤਂ ਪਜਾਨਨਞਾਣਂ. ਸਤ੍ਤਾਨਂ ਚੁਤੂਪਪਾਤਂ ਞਾਣਨ੍ਤਿ ਸਤ੍ਤਾਨਂ ਚੁਤਿਞ੍ਚ ਉਪਪਾਤਞ੍ਚ ਪਜਾਨਨਂ ਦਿਬ੍ਬਚਕ੍ਖੁਞਾਣਂ. ਆਸਵਾਨਂ ਖਯਞਾਣਨ੍ਤਿ ਕਾਮਾਸਵਾਦੀਨਂ ਖਯਸਙ੍ਖਾਤਂ ਆਸਵਨਿਰੋਧਂ ਨਿਬ੍ਬਾਨਂ ਯਥਾਭੂਤਂ ਪਜਾਨਨ ਞਾਣਨ੍ਤਿ. ਇਮਾਨਿ ਪਨ ਞਾਣਾਨਿ ਅਞ੍ਞੇਹਿ ਅਸਾਧਾਰਣਾਨਿ ਤਥਾਗਤਸ੍ਸ ਦਸਬਲਞਾਣਾਨੀਤਿ ਦਟ੍ਠਬ੍ਬਾਨਿ.

ਹੋਨ੍ਤਿ ਚੇਤ੍ਥ –

‘‘ਠਾਨਾਟ੍ਠਾਨਂ ਵਿਪਾਕਞ੍ਚ, ਞਾਣਂ ਪਟਿਪਦਂ ਞਾਣਂ;

ਅਨੇਕਧਾਤੁਲੋਕਞ੍ਚ, ਸਤ੍ਤਾਨਂ ਅਧਿਮੁਤ੍ਤਿਕਂ. [ਸਾ ਪਨੇਸਾ ਸੇਤਵਵਿਪੁਲਾਗਾਥਾਤਿ ਦਟ੍ਠਬ੍ਬਾ;]

ਇਨ੍ਦ੍ਰਿਯਪਰਾਪਰਞ੍ਚ, ਝਾਨਾਦਿਨਂ ਸਂਕਿਲੇਸਂ;

ਵੋਦਾਨਂ ਵੁਟ੍ਠਾਨਂ ਞਾਣਂ, ਪੁਬ੍ਬੇਨਿਵਾਸਾਨੁਸ੍ਸਤਿਂ;

ਸਤ੍ਤਾਨਂ ਚੁਤੂਪਪਾਤਂ, ਆਸਵਕ੍ਖਯਂ ਞਾਣਨ੍ਤਿ;

ਦਸਿਮਾਨਿ ਬੁਦ੍ਧਸ੍ਸ ਚਾ, ਸਾਧਾਰਣਾਨਿ ਞਾਣਾਨੀ’’ਤਿ. [ਸਾ ਪਨੇਸਾ ਸਾਮਞ੍ਞਗਾਥਾਤਿ ਦਟ੍ਠਬ੍ਬਾ;]

ਨਨੁ ਦਸਬਲਞਾਣਂ ਨਾਮ ਪਾਟਿਯੇਕ੍ਕਂ ਨਤ੍ਥਿ, ਸਬ੍ਬਞ੍ਞੁਤਞਾਣਮੇਵ ਹੋਤਿ, ਅਥ ਕਸ੍ਮਾ ਤਂ ਞਾਣਂ ਦਸਭੇਦੇਨ ਵੁਤ੍ਤਨ੍ਤਿ. ਵੁਚ੍ਚਤੇ. ਅਞ੍ਞਮੇਵ ਹਿ ਦਸਬਲਞਾਣਂ, ਅਞ੍ਞਂ ਸਬ੍ਬਞ੍ਞੁਤਞਾਣਂ, ਦਸਬਲਞ੍ਹਿ ਸਕਸਕਕਿਚ੍ਚਮੇਵ ਜਾਨਾਤਿ. ਸਬ੍ਬਞ੍ਞੁਤਞਾਣਂ ਪਨ ਤਮ੍ਪਿ ਤਤੋ ਅਵਸੇਸਮ੍ਪਿ ਪਜਾਨਾਤਿ. ਦਸਬਲਞਾਣੇਸੁ ਹਿ ਪਠਮਂ ਕਾਰਣਾਕਾਰਣਮੇਵ ਜਾਨਾਤਿ. ਦੁਤਿਯਂ ਕਮ੍ਮਨ੍ਤਰ ਵਿਪਾਕਨ੍ਤਰਮੇਵ. ਤਤਿਯਂ ਕਮ੍ਮਪਰਿਚ੍ਛੇਦਮੇਵ. ਚਤੁਤ੍ਥਂ ਧਾਤੁ ਨਾਨਤ੍ਤਕਾਰਣਮੇਵ. ਪਞ੍ਚਮਂ ਸਤ੍ਤਾਨਂ ਅਜ੍ਝਾਸਯਾਧਿਮੁਤ੍ਤਿਮੇਵ. ਛਟ੍ਠਂ ਇਨ੍ਦ੍ਰਿਯਾਨਂ ਤਿਕ੍ਖਮੁਦੁਭਾਵਮੇਵ. ਸਤ੍ਤਮਂ ਝਾਨਾਦੀਹਿ ਸਦ੍ਧਿਂ ਤੇਸਂ ਸਂਕਿਲੇਸਾਦਿਮੇਵ. ਅਟ੍ਠਮਂ ਪੁਬ੍ਬੇ ਨਿਵੁਤ੍ਥਖਨ੍ਧਸਨ੍ਤਤਿਮੇਵ. ਨਵਮਂ ਸਤ੍ਤਾਨਂ ਚੁਤਿਪਟਿਸਨ੍ਧਿਮੇਵ. ਦਸਮਂ ਸਚ੍ਚਪਰਿਚ੍ਛੇਦਮੇਵ. ਸਬ੍ਬਞ੍ਞੁਤਞਾਣਂ ਪਨ ਏਤੇਹਿ ਜਾਨਿਤਬ੍ਬਞ੍ਚ ਤਤੋ ਉਤ੍ਤਰਿਞ੍ਚ ਪਜਾਨਾਤਿ. ਏਤੇਸਂ ਪਨ ਕਿਚ੍ਚਂ ਨ ਸਬ੍ਬਂ ਕਰੋਤਿ. ਤਞ੍ਹਿ ਝਾਨਂ ਹੁਤ੍ਵਾ ਅਪ੍ਪੇਤੁਂ ਨ ਸਕ੍ਕੋਤਿ. ਇਦ੍ਧਿ ਹੁਤ੍ਵਾ ਵਿਕੁਬ੍ਬਿਤੁਂ ਨ ਸਕ੍ਕੋਤਿ. ਮਗ੍ਗੋ ਹੁਤ੍ਵਾ ਕਿਲੇਸੇ ਖੇਪੇਤੁਂ ਨ ਸਕ੍ਕੋਤਿ. ਏਵਂ ਤੇਸਂ ਞਾਣਦ੍ਵਯਾਨਂ ਵਿਸੇਸੋਤਿ. ਤਂ ਪਨ ਇਧ ਞਾਣਦ੍ਵਯਂ ਅਧਿਪ੍ਪੇਤਨ੍ਤਿ.

ਅਤੁਲਨ੍ਤਿ ਸੀਲਾਦੀਹਿ ਗੁਣੇਹਿ ਕੇਨਚਿ ਪੁਗ੍ਗਲੇਨ ਅਸਦਿਸਂ. ਅਯਂ ਪਨੇਤ੍ਥ ਵਚਨਤ੍ਥੋ. ਤੁਲਨਂ ਉਮ੍ਮਾਨਂ ਤੁਲਾ, ਤੁਲ ਸਦਿਸ੍ਯਂ. ਸਦ੍ਦਨੀਤਿਯਞ੍ਹਿ ‘‘ਤੁਲ ਉਮ੍ਮਾਨੇ’’ਤਿ ਵੁਤ੍ਤਂ. ਅਥ ਵਾ ਤੁਲਿਯਤਿ ਪਮਿਯਤਿ ਏਤਾਯਾਤਿ ਤੁਲਾ, ਪਕਤਿਤੁਲਾ. ਤੁਲਾ ਵਿਯਾਤਿ ਤੁਲਾ, ਞਾਣਂ. ਤਾਯ ਸਮ੍ਮਿਤੋ ਤੁਲੋ. ਸਮ੍ਮਿਤ ਤਦ੍ਧਿਤੇ ਅਪਚ੍ਚਯੋ. ਤੁਲਸਦਿਸਞਾਣੇਨ ਸਮ੍ਮਿਤੋ ਪੁਗ੍ਗਲੋ. ਨ ਤੁਲੋ ਅਤੁਲੋ. ਕਮ੍ਮਧਾਰਯਮਿਸ੍ਸਕਤਪ੍ਪੁਰਿਸ ਸਮਾਸੋਯਂ. ਸੀਲਾਦਿਗੁਣੇਹਿ ਕੇਨਚਿ ਪੁਗ੍ਗਲੇਨ ਅਸਦਿਸੋ ਭਗਵਾ ਲਬ੍ਭਤਿ. ਅਥ ਵਾ ਨਤ੍ਥਿ ਤੁਲੋ ਸਦਿਸੋ ਪੁਗ੍ਗਲੋ ਏਤਸ੍ਸਾਤਿ ਅਤੁਲੋ, ਭਗਵਾ. ਅਤਗ੍ਗੁਣਸਂਵਿਞ੍ਞਾਣੋਯਂ ਬਹੁਬ੍ਬੀਹਿ. ਸੀਲਾਦਿਗੁਣੇਹਿ ਕੇਨਚਿ ਅਸਦਿਸੋ ਅਗ੍ਗਪੁਗ੍ਗਲੋਤਿ ਅਤ੍ਥੋ. ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਭਾਵਤੋ. ਯਥਾਹ ‘‘ਯਾਵਤਾ ਭਿਕ੍ਖਵੇ ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ ਚਤੁਪ੍ਪਦਾ ਵਾ, ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤਿ, ਵਿਰਾਗੋ ਸੇਟ੍ਠੋ ਧਮ੍ਮਾਨਂ ਦ੍ਵਿਪਦਾਨਞ੍ਚ ਚਕ੍ਖੁਮਾ’’ਤਿ. ਤਂ ਅਤੁਲਂ ਬੁਦ੍ਧਨ੍ਤਿ ਸਮ੍ਬਨ੍ਧੋ. ਵਨ੍ਦੇਤਿ ਬੁਦ੍ਧਸ੍ਸ ਨਯਨਸੁਭਗਕਾਯਙ੍ਗਾਦਿਗੁਣਂ ਅਨੁਸ੍ਸਰਿਤ੍ਵਾ ਤੀਹਿ ਦ੍ਵਾਰੇਹਿ ਸਕ੍ਕਚ੍ਚਂ ਅਹਂ ਵਨ੍ਦਾਮੀਤਿ ਅਤ੍ਥੋ. ਏਤ੍ਥ ਚ ਮਿਵਿਭਤ੍ਤਿਯਾ ਮਹਾਵਿਸਯਸੁਤ੍ਤੇਨ ਏਕਾਰਾ ਦੇਸੋਤਿ ਦਟ੍ਠਬ੍ਬੋ. ਵਨ੍ਦਨਾ ਪਨ ਤਿਵਿਧਾ ਹੋਤਿ ਕਾਯਵਚੀਮਨੋਵਨ੍ਦਨਾਵਸੇਨਾਤਿ. ਯਥਾਹ ‘‘ਤਿਸ੍ਸੋ ਇਮਾ ਭਿਕ੍ਖਵੇ ਵਨ੍ਦਨਾ. ਕਤਮਾ ਤਿਸ੍ਸੋ. ਕਾਯੇਨ ਵਨ੍ਦਤਿ, ਵਾਚਾਯ ਵਨ੍ਦਤਿ, ਮਨਸਾ ਵਨ੍ਦਤੀ’’ਤਿ.

ਤਤ੍ਥ ਯੋਨਿਸੋ ਮਨਸਿਕਾਰਚਿਤ੍ਤਂ ਪਚ੍ਚੁਪਟ੍ਠਾਪੇਤ੍ਵਾ ਜਾਣੁਦ੍ਵਯਕਪ੍ਪਰਦ੍ਵਯਨਲਾਟਸਙ੍ਖਾਤਾਨਿ ਪਞ੍ਚ ਅਙ੍ਗਾਨਿ ਭੂਮਿਯਂ ਪਤਿਟ੍ਠਾਪੇਤ੍ਵਾ ਵਨ੍ਦਨੇਯ੍ਯਾਨਂ ਅਭਿਮੁਖਂ ਨਿਪਤਨ੍ਤੋ ਕਾਯੇਨ ਵਨ੍ਦਤਿ ਨਾਮ. ਯਂ ਸਨ੍ਧਾਯ ‘‘ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ’’ਤਿ ਅਟ੍ਠ ਕਥਾਦੀਸੁ ਵੁਤ੍ਤਂ. ਬੁਦ੍ਧਗੁਣਪਦਾਨਿ ਵਾਚਾਯ ਪਵਤ੍ਤੇਨ੍ਤੋ ਵਾਚਾਯ ਵਨ੍ਦਤਿ ਨਾਮ. ਵਿਪਸ੍ਸਿਸ੍ਸ ਨਮਤ੍ਥੁ, ਸਿਖਿਸ੍ਸਾਪਿ ਨਮਤ੍ਥੁ, ਵੇਸ੍ਸ ਭੁਸ੍ਸ ਨਮਤ੍ਥੁ, ਕਕੁਸਨ੍ਧਸ੍ਸ ਨਮਤ੍ਥੁ, ਕੋਣਾਗਮਨਸ੍ਸ ਨਮਤ੍ਥੁ, ਕਸ੍ਸਪਸ੍ਸ ਨਮਤ੍ਥੁ, ਅਙ੍ਗੀਰਸ੍ਸਸ੍ਸ ਨਮਤ੍ਥੁ ਤ੍ਯਾਦੀਸੁਪਿ ਵਾਚਾਵਨ੍ਦਨਾਯੇਵ. ਬੁਦ੍ਧਾਦਿ ਗੁਣਾਨਿ ਅਨੁਸ੍ਸਰਨ੍ਤੋ ਮਨਸਾ ਵਨ੍ਦਤਿ ਨਾਮਾਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਨਯਨਸੁਭਗਕਾਯਙ੍ਗਂ ਸਬ੍ਬਸਤ੍ਤਾਨਂ ਚਕ੍ਖੁਸ੍ਸ ਸੋਭਨਂ ਗਤੇਨ ਕਾਯਙ੍ਗੇਨ ਸਮਨ੍ਨਾਗਤਂ, ਮਧੁਰਵਰਸਰੋਪੇਤਂ ਪਿਯਪੇਮਨੀਯੇਨ ਅਸ੍ਸਾਦਿ ਯੇਨ ਉਤ੍ਤਮਸਦ੍ਦੇਨ ਸਮਨ੍ਨਾਗਤਂ, ਅਮਿਤਗੁਣਗਣਾਧਾਰਂ ਅਪਰਿਮਿਣਿਤਬ੍ਬਸੀਲਾਦਿਗੁਣਸਮੂਹਾਨਂ ਪਤਿਟ੍ਠਾਨਭੂਤਂ, ਦਸਬਲਂ ਅਨਞ੍ਞਸਾਧਾਰਣੇਨ ਤਥਾਗਤਸ੍ਸ ਕਾਯਞਾਣਦਸ ਬਲੇਨ ਸਮਨ੍ਨਾਗਤਂ, ਅਤੁਲਂ ਸੀਲਾਦਿਗੁਣੇਹਿ ਕੇਨਚਿ ਅਸਦਿਸਂ ਬੁਦ੍ਧਂ ਤੀਹਿ ਦ੍ਵਾਰੇਹਿ ਸਕ੍ਕਚ੍ਚਂ ਅਹਂ ਵਨ੍ਦੇ ਵਨ੍ਦਾਮੀਤਿ.

ਦੁਤਿਯਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੩.

ਯੋ ਬੁਦ੍ਧੋ ਧਿਤਿਮਾਞ੍ਞਧਾਰਕੋ,

ਸਂਸਾਰੇ ਅਨੁਭੋਸਿ ਕਾਯਿਕਂ;

ਦੁਕ੍ਖਂ ਚੇਤਸਿਕਞ੍ਚ ਲੋਕਤੋ,

ਤਂ ਵਨ੍ਦੇ ਨਰਦੇਵ ਮਙ੍ਗਲਂ.

੩. ਏਵਂ ਤਤਿਯਗਾਥਾਯ ਬੁਦ੍ਧਸ੍ਸ ਵਨ੍ਦਿਤ੍ਵਾ ਇਦਾਨਿ ਸਮਾਧਿ ਆਦੀਹਿ ਚਤੂਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਯੋ ਬੁਦ੍ਧੋ ਧਿਤਿਮਾਞ੍ਞਧਾਰਕੋ ਤਿਆਦਿਗਾਥਮਾਹ. ਅਯਂ ਪਨ ਮਸਜਗਣ ਗਰੁਯੁਤ੍ਤਤ੍ਤਾ ਦਸਕ੍ਖਰੇਹਿ ਲਕ੍ਖਿਤਾ ਸੁਦ੍ਧਵਿਰਾ ਜਿਤਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ-ਮ੍ਸਾ ਜ੍ਗਾ ਸੁਦ੍ਧਵਿਰਾ ਜਿਤਂ ਮਤਨ੍ਤਿ. ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਮ੍ਸਾ ਮਸਗਣਾ ਚ ਜ੍ਗਾ ਜਗਣਗਰੁਕਾ ਚ ਚੇ ਸਿਯ੍ਯੁਂ, ਤਂ ਵੁਤ੍ਤਂ ਸੁਦ੍ਧਵਿਰਾਜਿਤਨ੍ਤਿ ਮਤਂ ਞਾਤਬ੍ਬਨ੍ਤਿ. ਧਿਤਿਮਾ ਅਞ੍ਞਧਾਰਕੋ ਯੋ ਬੁਦ੍ਧੋ ਲੋਕਤੋ ਸਂਸਾਰੇ ਕਾਯਿਕਂ ਦੁਕ੍ਖਞ੍ਚ ਚੇਤਸਿਕਂ ਦੁਕ੍ਖਞ੍ਚ ਅਨੁਭੋਸਿ ਨਰਦੇਵਮਙ੍ਗਲਂ, ਤਂ ਬੁਦ੍ਧਂ ਅਹਂ ਵਨ੍ਦੇਤਿ ਸਮ੍ਬਨ੍ਧੋ.

ਤਤ੍ਥ ਹਿ ਯੋਤਿ ਅਨਿਯਮਨਿਦ੍ਦੇਸੋ. ਯੋ ਯਾਦਿਸੋਤਿ ਅਤ੍ਥੋ. ਤਸ੍ਸ ਚ ਅਨਿਯਮਵਾਚਕ ਸਬ੍ਬਨਾਮਪਦਤ੍ਤਾ ਵਚਨਤ੍ਥੋ ਨ ਕਾਤਬ੍ਬੋ. ਤਸ੍ਸ ਪਨ ਯ ਓਤਿ ਪਦਵਿਭਾਗੋ ਕਾਤਬ੍ਬੋ. ਤੇਸੁ ਚ ਯਸਦ੍ਦਸ੍ਸ ਵਾਚ੍ਚਂ ਅਨਿਯਮੋ ਬੁਦ੍ਧਦਬ੍ਬੋ ਅਪ੍ਪਧਾਨੇਨ ਲਬ੍ਭਤਿ, ਤਸ੍ਸ ਯਾਦਿਸਯੁਤ੍ਤਜਚ੍ਚਨਾਮਗੋਤ੍ਤਸੀਲਵਿਹਾਰੀ ਗੋਚਰਸਙ੍ਖਾਤਂ ਅਨਿਯਮਸਾਮਞ੍ਞਾਕਾਰਤ੍ਤਗੁਣਮੇਵ ਪਧਾਨੇਨ ਲਬ੍ਭਤਿ. ਪਠਮਾਸਿਵਿਭਤ੍ਤਿਯਾ ਕਾਰਿਯਭੂਤਸ੍ਸ ਓਕਾਰਸ੍ਸ ਵਾਚ੍ਚਂ ਪਕਤੂਪਨਿਸ੍ਸਯਸਙ੍ਖਾਤਂ ਕਤ੍ਤੁਕਾਰਕੇਕਵਚਨਸਙ੍ਖ੍ਯਂ ਲਬ੍ਭਤਿ. ਅਥ ਵਾ ਸਬ੍ਬਨਾਮਭਾਵਂ ਯਾਤਿ ਗਚ੍ਛਤੀਤਿ ਯੋ, ਅਨਿਯਮਵਾਚਕਭਾਵਂ ਯਾਤਿ ਗਚ੍ਛਤੀਤਿ ਵਾ ਯੋ, ਸਬ੍ਬਨਾਮ ਭਾਵੇਨ ਯਾਤਿ ਪਵਤ੍ਤਤੀਤਿ ਵਾ ਯੋ, ਸਬ੍ਬਨਾਮਭਾਵੇਨ ਯਾਤਬ੍ਬੋ ਞਾਤਬ੍ਬੋਤਿ ਵਾ ਯੋ, ਯਾਤਬ੍ਬੋ ਞਾਤਬ੍ਬੋ ਏਤੇਨ ਵਾ ਅਨਿਯਮਤ੍ਥੋਤਿ ਯੋ.

ਤੇਨਾਹੁ ਪੋਰਾਣਾ –

‘‘ਨਾਨਾਕਾਰਣਂ ਪਟਿਚ੍ਚ, ਧਾਤੁਪਚ੍ਚਯਵਿਗ੍ਗਹਂ;

ਚਿਨ੍ਤਕਾਨਂ ਪਭਾਵੋਵ, ਪਧਾਨਂ ਹੋਤਿ ਚਿਨ੍ਤਨੇ’’ਤਿ.

ਬੁਦ੍ਧੋਤਿ ਪਟਿਵਿਦ੍ਧਚਤੁਸਚ੍ਚਧਮ੍ਮੋ. ਅਯਂ ਪਨੇਤ੍ਥ ਵਚਨਤ੍ਥੋ. ਬੁਜ੍ਝਤਿ ਚਤ੍ਤਾਰਿ ਸਚ੍ਚਾਨੀਤਿ ਬੁਦ੍ਧੋ, ਭਗਵਾ. ਸੁਦ੍ਧਕਤ੍ਤੁਸਾਧਨੋਯਂ. ਬੁਧਧਾਤੁ ਤ. ਬੋਧੇਤਾ ਪਜਾਯਾਤਿ ਵਾ ਬੁਦ੍ਧੋ, ਹੇਤੁ ਕਤ੍ਤੁਸਾਧਨੋਯਂ. ਅਞ੍ਞੇਸਂ ਚਤ੍ਤਾਰਿ ਸਚ੍ਚਾਨਿ ਬੋਧੇਤੀਤਿ ਅਤ੍ਥੋ. ਅਥ ਵਾ ਅਨਞ੍ਞਬੋਧਿਤੋ ਹੁਤ੍ਵਾ ਸਵਾਸਨਾਯ ਸਮ੍ਮੋਹਨਿਦ੍ਦਾਯ ਬੁਜ੍ਝਤਿ ਜਾਗਰੋਤੀਤਿ ਬੁਦ੍ਧੋ, ਦਿਨਕਰਕਿਰਣ ਸਮਾਗਮੇਨ ਪਰਮਰੁਚਿਰਸਿਰੀਸੋਭਗ੍ਗਪ੍ਪਤ੍ਤਿਯਾ ਵਿਕਸਿਤਮਿਵ ਪਦੁਮਂ ਅਗ੍ਗਮਗ੍ਗਞਾਣਸਮਾਗਮੇਨ ਅਪਰਿਮਿਤਗੁਣਗਣਾਲਙ੍ਕਤ ਸਬ੍ਬਞ੍ਞੁਤਞਾਣਪ੍ਪਤ੍ਤਿਯਾ ਬੁਜ੍ਝਤਿ ਵਿਕਸਤੀਤਿ ਵਾ ਬੁਦ੍ਧੋ, ਨਿਬ੍ਬਾਨ ਸਙ੍ਖਾਤਂ ਏਕਾਯਨਮਗ੍ਗਂ ਬੁਜ੍ਝਤਿ ਗਚ੍ਛਤੀਤਿ ਵਾ ਬੁਦ੍ਧੋ. ਬੁਧਸਦ੍ਦੋ ਹਿ ਞਾਣਾਦੀਸੁ ਚਤੂਸ੍ਵਤ੍ਥੇਸੁ ਵਤ੍ਤਤਿ.

ਤੇਨ ਵੁਤ੍ਤਂ –

‘‘ਞਾਣੇ ਵਿਕਸਨੇ ਚੇਵ, ਗਮਨੇ ਚਾਪਿ ਜਾਗਰੇ;

ਚਤੂਸ੍ਵੇਤੇਸੁ ਅਤ੍ਥੇਸੁ, ਬੁਧਸਦ੍ਦੋ ਪਵਤ੍ਤਤੀ’’ਤਿ.

ਅਥ ਵਾ ਸਬ੍ਬਞੇਯ੍ਯਧਮ੍ਮੇ ਬੁਜ੍ਝਤਿ ਜਾਨਾਤੀਤਿ ਬੁਦ੍ਧੋ, ਪਾਰਮਿ ਭਾਵਿਤਾਯ ਪਞ੍ਞਾਯ ਸਬ੍ਬੇ ਸਙ੍ਖਤਾਸਙ੍ਖਤਧਮ੍ਮੇ ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤੀਤਿ ਵਾ ਬੁਦ੍ਧੋ, ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾਤਿ ਅਧਿਗਤਞਾਣਗੁਣਵਿਸੇਸੇਹਿ ਬੁਜ੍ਝਿਤਬ੍ਬੋਤਿ ਵਾ ਬੁਦ੍ਧੋ, ਭਗਵਤਾ ਬੁਜ੍ਝਿਤਬ੍ਬਂ ਞਾਤਬ੍ਬਨ੍ਤਿ ਬੁਦ੍ਧਂ. ਕਿਂ ਤਂ, ਸਬ੍ਬਞ੍ਞੁਤ ਞਾਣਂ, ਤਦਸ੍ਸਤ੍ਥੀਤਿ ਬੁਦ੍ਧੋ, ਭਗਵਾ. ਅਤ੍ਥਤੋ ਪਨ ਪਾਰਮਿਤਾ ਭਾਵਿਤੋ ਸਯਮ੍ਭੂਞਾਣੇਨ ਸਹ ਵਾਸਨਾਯ ਵਿਹਤਵਿਦ੍ਧਸ੍ਤ ਨਿਰਵਸੇਸਕ੍ਲੇਸੋ ਮਹਾਕਰੁਣਾਸਬ੍ਬਞ੍ਞੁਤਞਾਣਾਦਿਅਪਰਿ ਮੇਯ੍ਯਗੁਣਗਣਾਧਾਰੋ ਖਨ੍ਧਸਨ੍ਤਾਨੋ ਬੁਦ੍ਧੋ. ਯਥਾਹ ‘‘ਬੁਦ੍ਧੋਤਿ ਯੋ ਸੋ ਭਗਵਾ ਸਯਮ੍ਭੂ ਅਨਾਚਰਿਯਕੋ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਸਾਮਂ ਸਚ੍ਚਾਨਿ ਅਭਿਸਮ੍ਬੁਜ੍ਝਿ, ਤਤ੍ਥ ਚ ਸਬ੍ਬਞ੍ਞੁਤਂ ਪਤ੍ਤੋ, ਬਲੇਸੁ ਚ ਵਸੀਭਾਵ’’ਨ੍ਤਿ.

ਏਤ੍ਥ ਚ ਬੁਦ੍ਧੋ ਨਾਮ ਸਬ੍ਬਞ੍ਞੁਬੁਦ੍ਧ, ਪਚ੍ਚੇਕਬੁਦ੍ਧ, ਚਤੁਸਚ੍ਚਬੁਦ੍ਧ, ਸੁਤ ਬੁਦ੍ਧਵਸੇਨ ਚਤੁਬ੍ਬਿਧੋ ਹੋਤਿ. ਤਤ੍ਥ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਸਮਤਿਂਸਪਾਰਮਿਯੋ ਪੂਰੇਤ੍ਵਾ ਸਮ੍ਬੋਧਿਪ੍ਪਤ੍ਤੋ ਸਬ੍ਬਞ੍ਞੁਬੁਦ੍ਧੋ ਨਾਮ. ਕਪ੍ਪਸਤਸਹਸ੍ਸਾਧਿਕਾਨਿ ਦ੍ਵੇ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾ ਸਯਮ੍ਭੂਪਤ੍ਤੋ ਪਚ੍ਚੇਕਬੁਦ੍ਧੋ ਨਾਮ. ਅਵਸੇਸਾ ਖੀਣਾਸਵਾ ਚਤੁਸਚ੍ਚਬੁਦ੍ਧੋ ਨਾਮ. ਬਹੁਸ੍ਸੁਤੋ ਸੁਤਬੁਦ੍ਧੋ ਨਾਮ. ਇਧ ਪਨ ਸਬ੍ਬਞ੍ਞੁਬੁਦ੍ਧੋ ਅਧਿਪ੍ਪੇਤੋ.

ਧਿਤਿਮਾਞ੍ਞਧਾਰਕੋਤਿ ਏਤ੍ਥ ਧਿਤਿਮਾ ਅਞ੍ਞਧਾਰਕੋਤਿ ਪਦਚ੍ਛੇਦੋ ਕਾਤਬ੍ਬੋ. ਧਿਤਿਮਾਤਿ ਸਮਾਧਿਵਨ੍ਤੋ, ਸਮ੍ਪਯੁਤ੍ਤ ਧਮ੍ਮੇ ਏਕਾਰਮ੍ਮਣੇ ਧਾਰੇਤੀਤਿ ਧਿਤਿ, ਸਮਾਧਿ. ਧਾਧਾਤੁਤਿ. ਆਕਾਰਸ੍ਸ ਇਕਾਰਾਦੇਸੋ. ਧਿਯਤਿ ਠਪੇਤਿ ਏਕਾਰਮ੍ਮਣੇ ਸਮ੍ਪਯੁਤ੍ਤਧਮ੍ਮੇਤਿ ਧਿਤਿ, ਚਿਤ੍ਤੇਨ ਯੋਗੇਨੇਵੇਸੋ ਏਕਾ ਰਮ੍ਮਣੇ ਪਤਿਟ੍ਠਾਪਨਵਸੇਨ ਚਿਤ੍ਤਸ੍ਸ ਆਰਮ੍ਮਣੇ ਨਿਚ੍ਚਲਭਾਵੇਨ ਪਤਿਟ੍ਠਾਪੇਤੀਤਿ ਅਤ੍ਥੋ. ਧਿਤਿ ਅਸ੍ਸ ਅਤ੍ਥੀਤਿ ਧਿਤਿਮਾ, ਬੁਦ੍ਧੋ. ਸੋ ਹਿ ਯਥਾ ਮਹਾਮੇਰੁ ਚਤੂਹਿ ਦਿਸਾਹਿ ਭੁਸਂ ਆਗਤੇਹਿ ਵਾਤੇਹਿ ਨ ਸਮਿਞ੍ਜਤਿ, ਏਵਂ ਪਟਿਪਕ੍ਖੇਹਿ ਮਿਚ੍ਛਾਵਾਦ ਵਾਤੇਹਿ ਚ ਇਟ੍ਠਾਨਿਟ੍ਠਾਰਮ੍ਮਣੇਹਿ ਚ ਲਾਭਾਲਾਭ ਯਸਾਯਸ ਨਿਨ੍ਦਾ ਪਸਂਸ ਸੁਖਦੁਕ੍ਖਸਙ੍ਖਾਤੇਹਿ ਲੋਕਧਮ੍ਮੇਹਿ ਚ ਨ ਸਮਿਞ੍ਜਤਿ, ਸਮਾਧਿਵਨ੍ਤੋਯੇਵ ਹੋਤੀਤਿ ਵੁਤ੍ਤਂ ਹੋਤਿ.

ਅਞ੍ਞਧਾਰਕੋਤਿ ਅਰਹਤ੍ਤਫਲਹਾਰਕੋ. ਵਿਮੁਤ੍ਤਿਸਙ੍ਖਾਤਂ ਅਰਹਤ੍ਤਫਲਸੇਤਚ੍ਛਤ੍ਤਂ ਧਾਰੇਨ੍ਤੋ ਵਾ. ਜਾਨਾਤਿ ਪਠਮ ਮਗ੍ਗੇਨ ਦਿਟ੍ਠਸਚ੍ਚਸ੍ਸ ਆਮਰਿਯਾਦਂ ਅਨਤਿਕ੍ਕਮਿਤ੍ਵਾ ਵਾਤਿ ਅਞ੍ਞਂ, ਅਰਹਤ੍ਤਫਲਂ. ਆਪੁਬ੍ਬਞਾਧਾਤੁ ਕ੍ਵਿ. ਆਸਦ੍ਦੋ ਮਰਿਯਾਦਤ੍ਥੋ. ਸਂਯੋਗਪਰਤ੍ਤਾ ਆਕਾਰਸ੍ਸ ਰਸ੍ਸੋ, ਤਂ ਧਾਰੇਤੀਤਿ ਅਞ੍ਞਧਾਰਕੋ. ਅਞ੍ਞਸਦ੍ਦੂਪਪਦਧਰਧਾਤੁ ਣ੍ਵੁ. ਸਂਸਾਰੇਤਿ ਖਨ੍ਧਧਾਤੁਆਯਤਨਾਨਂ ਅਬ੍ਬੋਚ੍ਛਿਨ੍ਨਂ ਪਵਤ੍ਤਮਾਨੇ ਸਂਸਾਰਵਟ੍ਟੇ.

ਵੁਤ੍ਤਞ੍ਹਿ ਅਟ੍ਠਕਥਾਯਂ –

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ਸਂਸਾਰੋਤਿ ਪਵੁਚ੍ਚਤੀ’’ਤਿ.

ਖਨ੍ਧਧਾਤੁਆਯਤਨਾਨਂ ਅਞ੍ਞਮਞ੍ਞਸਮ੍ਬਨ੍ਧੇਨ ਸਂਪੁਨਪ੍ਪੁਨਂ ਸਰਤਿ ਗਚ੍ਛਤਿ ਪਵਤ੍ਤਤੀਤਿ ਸਂਸਾਰੋ. ਸਂਪੁਬ੍ਬਸਰਧਾਤੁ ਗਤਿਮ੍ਹਿ ਣ. ਅਥ ਵਾ ਖਨ੍ਧਾਯਤਨਧਾਤੁਯੋ ਸਂ ਅਬ੍ਬੋਚ੍ਛਿਨ੍ਨਂ ਸਰਨ੍ਤਿ ਗਚ੍ਛਨ੍ਤਿ ਪਵਤ੍ਤਨ੍ਤਿ ਏਤ੍ਥਾਤਿ ਸਂਸਾਰੋਤਿ ਵਚਨਤ੍ਥੋ ਕਾਤਬ੍ਬੋ, ਤਸ੍ਮਿਂ. ਅਨੁਭੋਸੀਤਿ ਅਨੁਪੁਨਪ੍ਪੁਨਂ ਅਭੁਞ੍ਜਿ, ਅਵੇਦਯੀਤਿ ਅਤ੍ਥੋ. ਕਾਯਿਕਨ੍ਤਿ ਕਾਯੇ ਸਰੀਰੇ ਪਵਤ੍ਤਂ ਕਾਯਿਕਂ. ਚੇਤਸਿਕਨ੍ਤਿ ਚੇਤਸਿ ਪਵਤ੍ਤਂ ਚੇਤਸਿਕਂ. ਤਂ ਪਨ ਪਦਦ੍ਵਯਂ ਦੁਕ੍ਖਨ੍ਤਿਪਦੇ ਵਿਸੇਸਨਂ. ਦੁਕ੍ਖਨ੍ਤਿ ਵਟ੍ਟਦੁਕ੍ਖਂ. ਦੁਕ੍ਖਨਂ ਦੁਕ੍ਖਂ, ਅਥ ਵਾ ਦੁਕ੍ਖਯਤੀਤਿ ਦੁਕ੍ਖਂ, ਦੁਕ੍ਖਧਾਤੁ ਅ. ਇਦਂ ਪਨ ਨਿਬ੍ਬਚਨਂ ਕਾਰਿਤਵਸੇਨ ਵੁਤ੍ਤਂ. ਯਸ੍ਸ ਉਪ੍ਪਜ੍ਜਤਿ, ਤਂ ਦੁਕ੍ਖਿਤਂ ਕਰੋਤੀਤਿ ਵੁਤ੍ਤਂ ਹੋਤਿ. ਲੋਕਤੋਤਿ ਸਤ੍ਤਲੋਕਹੇਤੁ. ਲੋਕਿਯਨ੍ਤਿ ਪਵਤ੍ਤਨ੍ਤਿ ਏਤ੍ਥ ਪੁਞ੍ਞਾਪੁਞ੍ਞਾਨਿ ਤਬ੍ਬਿਪਾਕੋ ਚਾਤਿ ਲੋਕੋ. ਲੋਕਧਾਤੁ ਣ. ਅਥ ਵਾ ਕੁਸਲਾਦੀਨਿ ਲਾਤਿ ਗਣ੍ਹਾਤੀਤਿ ਲੋਕੋ. ਲਾਧਾਤੁ ਓਕਪਚ੍ਚਯੋ. ਸਤ੍ਤ ਲੋਕੋਵ ਲਬ੍ਭਤਿ. ਧਿਤਿਮਾ ਅਞ੍ਞਧਾਰਕੋ ਯੋ ਬੁਦ੍ਧੋ ਸਂਸਾਰਵਟ੍ਟੇ ਨਿਮੁਗ੍ਗਾਨਂ ਸਤ੍ਤਾਨਮਨੁਦਯਾਯ ਸਂਸਾਰਵਟ੍ਟਦੁਕ੍ਖਤੋ ਪਮੋਚੇਤੁਕਾਮੋ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਅਤਿਦੁਕ੍ਕਰਾਨਿ ਸਮਤਿਂਸਪਾਰਮਿਯੋ ਪਞ੍ਚ ਮਹਾ ਪਰਿਚ੍ਚਾਗੇ ਚ ਕਰੋਨ੍ਤੋ ਸਤ੍ਤਲੋਕਹੇਤੁ ਕਾਯਿਕਂ ਚੇਤਸਿਕਂ ਸਂਸਾਰਵਟ੍ਟਦੁਕ੍ਖਂ ਅਨੁਭਵਸੀਤਿ ਵੁਤ੍ਤਂ ਹੋਤਿ. ਤਨ੍ਤਿ ਤਾਦਿਸਂ ਬੁਦ੍ਧਂ. ਵਨ੍ਦੇਤਿ ਵਨ੍ਦਾਮਿ.

ਨਰਦੇਵਮਙ੍ਗਲਨ੍ਤਿ ਨਰਦੇਵਾਨਂ ਮਙ੍ਗਲਭੂਤਂ. ਅਯਂ ਪਨੇਤ੍ਥ ਵਚਨਤ੍ਤੋ. ਨਿਰਯਂ ਨੇਤਿ ਪਾਪੁਣਾਤੀਤਿ ਨਰੋ, ਮਨੁਸ੍ਸੋ. ਨਿਧਾਤੁ ਪਾਪੁਨਨੇ ਅਰੋ. ਅਰਿਯਮਨੁਸ੍ਸੋ ਪਨ ਭੂਤਪੁਬ੍ਬਗਤਿਕ ਨਯੇਨ ਨਰੋ ਨਾਮਾਤਿ. ਅਥ ਵਾ ਸੇਟ੍ਠਭਾਵਂ ਨੇਤੀਤਿ ਨਰੋ, ਉਤ੍ਤਮਂ ਪਬ੍ਬਜ੍ਜਂ ਨੇਤੀਤਿ ਅਤ੍ਥੋ. ਵਿਮਾਨਵਤ੍ਥੁਅਟ੍ਠਕਥਾਯਂ ਪਨ ਜੇਟ੍ਠਭਾਵਂ ਨੇਤੀਤਿ ਨਰੋ. ਪੁਤ੍ਤਭਾਤੁਭੂਤੋਪਿ ਹਿ ਪੁਗ੍ਗਲੋ ਮਾਤੁਜੇਟ੍ਠਭਗਿਨੀਨਂ ਪਿਤੁਟ੍ਠਾਨੇ ਤਿਟ੍ਠਤਿ, ਪਗੇਵ ਭਤ੍ਤੁਭੂਤੋ ਇਤਰਾਸਨ੍ਤਿ ਵੁਤ੍ਤਂ. ਵਿਸੁਦ੍ਧਿਮਗ੍ਗਮਹਾਟੀਕਾਯਂ ਪਨ ਨਰਤੀਤਿ ਨਰੋ, ਪੁਰਿਸੋ. ਯਥਾ ਹਿ ਪਠਮਪਕਤਿਭੂਤੋ ਸਤ੍ਤੋ ਇਤਰਾਯ ਪਕਤਿਯਾ ਸੇਟ੍ਠਟ੍ਠੇਨ ਪੁਰਿਉਚ੍ਚੇ ਠਾਨੇ ਸੇਤਿ ਪਵਤ੍ਤਤੀਤਿ ਪੁਰਿਸੋਤਿ ਵੁਚ੍ਚਤਿ, ਏਵਂ ਨਯਨਟ੍ਠੇਨ ਨਰੋਤਿ ਵੁਚ੍ਚਤਿ. ਪੁਤ੍ਤਭਾਤੁ ਭੂਤੋਪਿ ਹਿ ਪੁਗ੍ਗਲੋ ਮਾਤੁਜੇਟ੍ਠਭਗਿਨੀਨਂ ਪਿਤੁਠਾਨੇ ਤਿਟ੍ਠਤਿ. ਪਗੇਵ ਇਤਰਾ ਇਤਰਾਸਨ੍ਤਿ ਵੁਤ੍ਤਂ. ਤਸ੍ਮਾ ਇਧ ਪਨ ਨਰਨ੍ਤਿ ਸਾਮਞ੍ਞੇਨ ਵੁਤ੍ਤਮ੍ਪਿ ਵਿਸੇਸੇਨ ਪੁਰਿਸਨਰਨ੍ਤਿ ਵਿਞ੍ਞਾਯਤਿ ਪਧਾਨਨਯੇਨ ਗਹਣਸ੍ਸ ਯੁਤ੍ਤਤ੍ਤਾ. ਦਿਬ੍ਬਨ੍ਤਿ ਕਾਮਗੁਣ ਝਾਨਾਭਿਞ੍ਞਾਚਿਤ੍ਤਿਸ੍ਸਰਿਯਾਦੀਹਿ ਕੀਲ਼ਨ੍ਤੀਤਿ ਦੇਵਾ. ਦਿਵੁਧਾਤੁ ਣ. ਅਥ ਵਾ ਸਰੀਰਾਲਙ੍ਕਾਰਜੁਤਿਯਾ ਦਿਬ੍ਬਨ੍ਤੀਤਿ ਦੇਵਾ. ਦੇਵਾ ਚ ਨਾਮ ਤਿਵਿਧਾ ਹੋਨ੍ਤਿ ਸਮ੍ਮੁਤਿਦੇਵਾ, ਉਪਪਤ੍ਤਿਦੇਵਾ, ਵਿਸੁਦ੍ਧਿਦੇਵਾ ਚਾਤਿ. ਤਤ੍ਥ ਮਹਾਸਮ੍ਮਤਕਾਲਤੋ ਪਟ੍ਠਾਯ ਲੋਕੇਨ ਦੇਵਾਤਿ ਸਮ੍ਮਤਤ੍ਤਾ ਰਾਜਾਨੋ ਦੇਵਿਯੋ ਰਾਜਕੁਮਾਰਾ ਚ ਸਮ੍ਮੁਤਿਦੇਵਾ ਨਾਮ. ਦੇਵਲੋਕੇ ਉਪਪਨ੍ਨਾ ਉਪਪਤ੍ਤਿਦੇਵਾ ਨਾਮ. ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾ ਵਿਸੁਦ੍ਧਿਦੇਵਾ ਨਾਮ. ਇਧ ਪਨ ਉਪਪਤ੍ਤਿਦੇਵਾ ਅਧਿਪ੍ਪੇਤਾ.

ਮਙ੍ਗਲਨ੍ਤਿ ਮਙ੍ਗਲਭੂਤਂ. ਤਨ੍ਤਿਪਦੇ ਵਿਸੇਸਨਂ. ਮਙ੍ਗਨ੍ਤਿ ਵਡ੍ਢੇਨ੍ਤਿ ਸਬ੍ਬਸਮ੍ਪਤ੍ਤੀਹਿ ਸਤ੍ਤਾਨਂ ਏਤੇਨਾਤਿ ਮਙ੍ਗਲੋ, ਬੁਦ੍ਧੋ. ਮਙ੍ਗਲ ਧਾਤੁ ਵਡ੍ਢਨੇ ਅਲੋ. ਅਥ ਵਾ ਮਙ੍ਗਂ ਵੁਚ੍ਚਤਿ ਪਾਪਂ, ਤਂ ਵੇਨੇਯ੍ਯਾਨਂ ਦੇਸਨਾਯ ਲੁਨਾਤਿ ਛਿਨ੍ਦਤੀਤਿ ਮਙ੍ਗਲੋ, ਬੁਦ੍ਧੋ. ਮਙ੍ਗਸਦ੍ਦੂਪਪਦਲੁਧਾਤੁ ਕ੍ਵਿ. ਨਰਾ ਚ ਦੇਵਾ ਚ ਨਰਦੇਵਾ, ਤੇਸਂ ਮਙ੍ਗਲੋ ਨਰਦੇਵਮਙ੍ਗਲੋ, ਬੁਦ੍ਧੋ. ਸੋ ਪਨ ਮਨੁਸ੍ਸਦੇਵਬ੍ਰਹ੍ਮਾਨਂ ਪੂਜਨੀਯਤ੍ਤਾ ਚ ਸਙ੍ਖੇ, ਚਕ੍ਕਂ, ਪੁਣ੍ਣਕੁਮ੍ਭੋ, ਗਰਾ, ਸਿਰੀ, ਸੇਤਚ੍ਛਤ੍ਤਂ, ਅਙ੍ਕੁਸੋ, ਧਜਂ, ਸੋਵਤ੍ਤਿਕਞ੍ਚਾਤਿ ਅਟ੍ਠਹਿ ਲੋਕਿਯਮਙ੍ਗਲੇਹਿ ਸੇਟ੍ਠਤ੍ਤਾ ਉਤ੍ਤਮਤ੍ਤਾ ਚ ਮਙ੍ਗਲੋ ਨਾਮਾਤਿ ਵੁਚ੍ਚਤਿ, ਤਸ੍ਮਾ ਬੁਦ੍ਧਸ੍ਸ ਨਰਦੇਵਮਙ੍ਗਲਨ੍ਤਿ ਥੋਮੇਤੀਤਿ ਅਧਿਪ੍ਪਾਯੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਧਿਤਿਮਾ ਸਮਾਧਿਵਨ੍ਤੋ ਅਞ੍ਞਧਾਰਕੋ ਅਰਹਤ੍ਤਫਲਧਾਰਕੋ ਅਰਹਤ੍ਤਫਲਸੇ ਤਚ੍ਛਤ੍ਤਂ ਧਾਰੇਨ੍ਤੋ ਵਾ, ਯੋ ਯਾਦਿਸੋ ਬੁਦ੍ਧੋ, ਸਂਸਾਰੇ ਸਂਸਾਰਵਟ੍ਟੇ, ਕਾਯਿਕਂ ਕਾਯੇ ਪਵਤ੍ਤਂ ਦੁਕ੍ਖਞ੍ਚ ਵਟ੍ਟਦੁਕ੍ਖਞ੍ਚ ਚੇਤਸਿ ਪਵਤ੍ਤਂ ਦੁਕ੍ਖਞ੍ਚ ਵਟ੍ਟਦੁਕ੍ਖਞ੍ਚ, ਲੋਕਤੋ ਲੋਕਹੇਤੁ, ਅਨੁਭੋਸਿ ਪੁਨਪ੍ਪੁਨਂ ਅਭਵਸਿ ਅਵੇਦਯਿ, ਨਰਦੇਵਮਙ੍ਗਲਂ ਨਰਦੇਵਾਨਂ ਮਙ੍ਗਲਭੂਤਂ, ਤਂ ਤਾਦਿਸਂ ਬੁਦ੍ਧਂ ਅਹਂ ਵਨ੍ਦੇ ਵਨ੍ਦਾਮੀਤਿ.

ਤਤਿਯਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੪.

ਬਾਤ੍ਤਿਂਸਤਿਲਕ੍ਖਣਚਿਤ੍ਰਦੇਹਂ,

ਦੇਹਜ੍ਜੁਤਿਨਿਗ੍ਗਤਪਜ੍ਜਲਨ੍ਤਂ;

ਪਞ੍ਞਾਧਿਤਿਸੀਲਗੁਣੋਘਵਿਨ੍ਦਂ,

ਵਨ੍ਦੇ ਮੁਨਿਮਨ੍ਤਿਮਜਾਤਿਯੁਤ੍ਤਂ.

੪. ਏਵਂ ਤਤਿਯਗਾਥਾਯ ਬੁਦ੍ਧਸ੍ਸ ਨਤ੍ਵਾ ਇਦਾਨਿ ਬਾਤ੍ਤਿਂਸਤਿਲਕ੍ਖਣਚਿਤ੍ਰਦੇਹਨ੍ਤ੍ਯਾਦੀਹਿ ਛਹਿ ਗੁਣੇਹਿ ਥੋਮਿਤ੍ਵਾ ਮੁਨਿਨੋ ਵਨ੍ਦਿਤੁਕਾਮੋ ਬਾਤ੍ਤਿਂਸਤਿ ਲਕ੍ਖਣ ਚਿਤ੍ਰ ਦੇਹ ਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਤ ਜ ਜ ਗਣ ਗਰੁਦ੍ਵਯ ਯੁਤ੍ਤਤ੍ਤਾ ਏਕਾਦਸਕ੍ਖਰੇਹਿ ਲਕ੍ਖਿਤਾ ਉਪਟ੍ਠਿਤਾ ਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ਤ੍ਜਾ ਜ੍ਗਾ ਗਰੁਨਾਯਮੁਪਟ੍ਠਿਤਾ ਸਾ’’ਤਿ. ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਤ੍ਜਾ ਤਜਗਣਾ ਚ ਜ੍ਗਾਜਗਣਗਰੂ ਚ ਗਰੁਨਾ ਪਾਦਨ੍ਤਗਰੁਨਾ ਚੇ ਯੁਤ੍ਤਾ, ਸਾ ਅਯਂ ਗਾਥਾ ਉਪਟ੍ਠਿਤਾ ਨਾਮਾਤਿ. ਏਤ੍ਥ ਚ ਏਕ ਗਰੁਕੇ ਸਤਿਪਿ ਦ੍ਵਿਗਰੁਕੇਪਿ ਲਕ੍ਖਣਸਮਾਨਤ੍ਤਾ ਉਪਟ੍ਠਿਤਾ ਗਾਥਾ ਨਾਮਾਤਿ ਦਟ੍ਠਬ੍ਬਾ. ਤਤ੍ਥ ਬਾਤ੍ਤਿਂਸਤਿ ਲਕ੍ਖਣ ਚਿਤ੍ਰ ਦੇਹਨ੍ਤਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਵਿਚਿਤ੍ਰਂ ਸਰੀਰਵਨ੍ਤਂ. ਏਤ੍ਥ ਚ ਦ੍ਵੀਹਿ ਅਧਿਕਂ ਤਿਂਸਂ ਬਾਤ੍ਤਿਂਸਤਿ. ਦ੍ਵਿਸਦ੍ਦਸ੍ਸ ਬਾਦੇਸੋ. ਲਕ੍ਖਿਯਤਿ ਲਕ੍ਖਿਤਬ੍ਬਂ ਬੁਦ੍ਧਸਰੀਰਂ ਏਤੇਨਾਤਿ ਲਕ੍ਖਣਂ. ਦਿਹਤਿ ਉਪਚਯਤਿ ਵਡ੍ਢਤਿ ਵਾ ਏਤ੍ਥ ਕੁਸਲਾ ਕੁਸਲਨ੍ਤਿ ਦੇਹਂ, ਸਰੀਰਂ. ਦਿਹਧਾਤੁ ਉਪਚਯੇ ਵਡ੍ਢਨੇ ਵਾ ਣ. ਬਾਤ੍ਤਿਂਸਤਿ ਮਹਾਪੁਰਿਸਲਕ੍ਖਣੇਹਿ ਚਿਤ੍ਰਂ ਵਿਚਿਤ੍ਰਂ ਦੇਹਂ ਸਰੀਰਂ ਯਸ੍ਸ ਸੋਤਿ ਬਾਤ੍ਤਿਂਸਤਿਲਕ੍ਖਣਚਿਤ੍ਰਦੇਹੋ, ਮੁਨਿ ਲਬ੍ਭਤਿ.

ਇਦਂ ਪਨੇਤ੍ਥ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਰੂਪਸ੍ਸ ਸਙ੍ਖੇਪ ਦਸ੍ਸਨਂ. ਸੁਪ੍ਪਤਿਟ੍ਠਿਤਪਾਦੋ ਚ, ਆਯਤਪਣ੍ਹਿ, ਦੀਘਙ੍ਗੁਲਿ, ਮੁਦੁਤ ਲੁਣਹਤ੍ਥਪਾਦੋ, ਜਾਲਹਤ੍ਥਪਾਦੋ, ਉਸ੍ਸਙ੍ਖਪਾਦੋ, ਏਣਿਜਙ੍ਘੋ, ਠਿਤਕੋਵ ਅਨੋਨਮਨ੍ਤੋ ਉਭੋਹਿ ਪਾਣਿਤਲੇਹਿ ਜਾਣੁ ਕਾਨਿ ਪਰਿਮਸਤਿ ਪਰਿਮਜ੍ਜਤਿ, ਕੋਸੋਹਿਤਵਤ੍ਥਗੁਯ੍ਹੋ, ਸੁਵਣ੍ਣ ਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ, ਸੁਖੁਮਚ੍ਛਵੀ, ਏਕੇਕਲੋਮੋ, ਉਦ੍ਧਗ੍ਗਲੋਮੋ, ਬ੍ਰਹ੍ਮੁਜੁਗਤ੍ਤੋ, ਸਤ੍ਤੁਸ੍ਸਦੋ, ਸੀਹਪੁਬ੍ਬਦ੍ਧ ਕਾਯੋ, ਚਿਤਨ੍ਤਰਂਸੋ, ਨਿਗ੍ਰੋਧਪਰਿਮਣ੍ਡਲੋ, ਸਮਵਟ੍ਟਕ੍ਖਨ੍ਧੋ, ਰਸਗ੍ਗਰਸੀ, ਸੀਹਹਨੁ, ਚਤ੍ਤਾਲੀਸਦਨ੍ਤੋ, ਸਮਦਨ੍ਤੋ, ਅਵਿਰਲ਼ਦਨ੍ਤੋ, ਸੁਸੁਕ੍ਕਦਾਠੋ, ਪਹੂਤਜਿਵ੍ਹੋ, ਬ੍ਰਹ੍ਮਸ੍ਸਰੋ ਕਰਵੀਕਭਾਣਿ, ਅਤਿਨੀਲਨੇਤ੍ਤੋ, ਗੋਪਖੁਮੋ, ਉਣ੍ਣਾ ਭਮੁ ਕਨ੍ਤਰੇ ਜਾਤੋ, ਉਣ੍ਹੀਸਸੀਸੋ ਚਾਤਿ ਦ੍ਵਤ੍ਤਿਂਸਵਿਧਾਨਿ ਹੋਨ੍ਤਿ ਮਹਾਪੁਰਿਸਲਕ੍ਖਣਾਨਿ.

ਤੇਨ ਵੁਤ੍ਤਂ ਪਾਥੇਯ੍ਯਵਗ੍ਗੇ ਲਕ੍ਖਣਸੁਤ੍ਤੇ ‘‘ਕਤਮਾਨਿ ਤਾਨਿ ਭਿਕ੍ਖਵੇ ਦ੍ਵਤ੍ਤਿਂਸਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਾਨਿ, ਯੇਹਿ ਸਮਨ੍ਨਾਗਤਸ੍ਸ ਮਹਾਪੁਰਿਸਸ੍ਸ ਦ੍ਵੇ ਗਤਿਯੋ ਭਵਨ੍ਤਿ, ਅਨਞ੍ਞਾ. ਸਚੇ ਅਗਾਰਂ ਅਜ੍ਝਾਵਸਤਿ ਰਾਜਾ ਹੋਤਿ ਚਕ੍ਕਵਤ੍ਤਿ…ਪੇ… ਸਚੇ ਖੋਪਨ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ, ਅਰਹਂ ਹੋਤਿ ਸਮ੍ਮਾ ਸਮ੍ਬੁਦ੍ਧੋ ਲੋਕੇ ਵਿਵਟਚ੍ਛਦੋ ੧. ਇਧ ਭਿਕ੍ਖਵੇ ਮਹਾ ਪੁਰਿਸੋ ਸੁਪ੍ਪਤਿਟ੍ਠਿਤਪਾਦੋ ਹੋਤਿ. ਯਮ੍ਪਿ ਭਿਕ੍ਖਵੇ ਮਹਾ ਪੁਰਿਸੋ ਸੁਪ੍ਪਤਿਟ੍ਠਿਤਪਾਦੋ ਹੋਤਿ. ਇਦਮ੍ਪਿ ਭਿਕ੍ਖਵੇ ਮਹਾ ਪੁਰਿਸਸ੍ਸ ਮਹਾਪੁਰਿਸਲਕ੍ਖਣਂ ਭਵਤਿ ੨. ਪੁਨ ਚਪਰਂ ਭਿਕ੍ਖਵੇ ਮਹਾਪੁਰਿਸਸ੍ਸ ਹੇਟ੍ਠਾਪਾਦਤਲੇਸੁ ਚਕ੍ਕਾਨਿ ਜਾਤਾਨਿ ਹੋਨ੍ਤਿ ਸਹਸ੍ਸਾਰਾਨਿ ਸਨੇਮਿਕਾਨਿ ਸਨਾਭਿਕਾਨਿ ਸਬ੍ਬਾ ਕਾਰਪਰਿਪੂਰਾਨਿ. ਇਦਮ੍ਪਿ ਭਿਕ੍ਖਵੇ ਮਹਾਪੁਰਿਸਸ੍ਸ ਮਹਾਪੁਰਿਸ ਲਕ੍ਖਣਂ ਭਵਤਿ ੩. ਪੁਨ ਚਪਰਂ ਭਿਕ੍ਖਵੇ ਮਹਾਪੁਰਿਸੋ ਆਯਤਪਣ੍ਹੀ ਹੋਤਿ ੪. ਦੀਘਙ੍ਗੁਲੀ ਹੋਤਿ ੫. ਮੁਦੁਤਲੁਣ ਹਤ੍ਥਪਾਦੋ ਹੋਤਿ ੬. ਜਾਲਹਤ੍ਥਪਾਦੋ ਹੋਤਿ ੭. ਉਸ੍ਸਙ੍ਖਪਾਦੋ ਹੋਤਿ ੮. ਏਣਿਜਙ੍ਘੋ ਹੋਤਿ ੯. ਠਿਤਕੋਵ ਅਨੋਨਮਨ੍ਤੋ ਉਭੋਹਿ ਪਾਣਿਤਲੇਹਿ ਜਾਣੁਕਾਨਿ ਪਰਿਮਸਤਿ ਪਰਿਮਜ੍ਜਤਿ ੧੦. ਕੋਸੋਹਿਤਵਤ੍ਥਗੁਯ੍ਹੋ ਹੋਤਿ ੧੧. ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ੧੨. ਸੁਖੁਮਚ੍ਛਵੀ ਹੋਤਿ ਸੁਖੁਮਤ੍ਤਾ ਛਵਿਯਾ ਰਜੋਜਲ੍ਲਂ ਕਾਯੇ ਨ ਉਪਲਿਮ੍ਪਤਿ ੧੩. ਏਕੇਕਲੋਮੋ ਹੋਤਿ, ਏਕੇਕਾਨਿ ਲੋਮਾਨਿ ਲੋਮਕੂਪੇਸੁ ਜਾਤਾਨਿ ੧੪. ਉਦ੍ਧਗ੍ਗਲੋਮੋ ਹੋਤਿ. ਉਦ੍ਧਗ੍ਗਾਨਿ ਲੋਮਾਨਿ ਜਾਤਾਨਿ ਨੀਲਾਨਿ ਅਞ੍ਜਨਵਣ੍ਣਾਨਿ ਕੁਣ੍ਡਲਾ ਵਤ੍ਤਾਨਿ ਪਦਕ੍ਖਿਣਾਵਤ੍ਤਕਜਾਤਾਨਿ ੧੫. ਬ੍ਰਹ੍ਮੁਜੁਗਤ੍ਤੋ ਹੋਤਿ ੧੬. ਸਤ੍ਤੁਸ੍ਸਦੋ ਹੋਤਿ ੧੭. ਸੀਹਪੁਬ੍ਬਦ੍ਧ ਕਾਯੋ ਹੋਤਿ ੧੮. ਚਿਤਨ੍ਤਰਂਸੋ ਹੋਤਿ ੧੯. ਨਿਗ੍ਰੋਧਪਰਿਮਣ੍ਡਲੋ ਹੋਤਿ, ਯਾਵਤਕ੍ਵਸ੍ਸ ਬ੍ਯਾਮੋ, ਤਾਵ ਤਕ੍ਵਸ੍ਸ ਕਾਯੋ ੨੦. ਸਮਵਟ੍ਟਕ੍ਖਨ੍ਧੋ ਹੋਤਿ ੨੧. ਰਸਗ੍ਗ ਸਗ੍ਗੀ ਹੋਤਿ ੨੨. ਸੀਹਹਨੁ ਹੋਤਿ ੨੩. ਚਤ੍ਤਾਲੀਸਦਨ੍ਤੋ ਹੋਤਿ ੨੪. ਸਮਦਨ੍ਤੋ ਹੋਤਿ ੨੫. ਅਵਿਰਲ਼ਦਨ੍ਤੋ ਹੋਤਿ ੨੬. ਸੁਸੁਕ੍ਕਦਾਠੋ ਹੋਤਿ ੨੭. ਪਹੂਤਜਿਵ੍ਹੋ ਹੋਤਿ ੨੮. ਬ੍ਰਹ੍ਮਸ੍ਸਰੋ ਹੋਤਿ ਕਰਵੀਕਭਾਣਿ ੨੯. ਅਤਿਨੀਲਨੇਤ੍ਤੋ ਹੋਤਿ ੩੦. ਗੋਪਖੁਮੋ ਹੋਤਿ ੩੧. ਉਣ੍ਣਾ ਭਮੁਕਨ੍ਤਰੇ ਜਾਤਾ ਹੋਤਿ ਓਦਾਤਾ ਮੁਦੁਤੂਲ ਸਨ੍ਨਿਭਾ. ਯਮ੍ਪਿ ਭਿਕ੍ਖਵੇ ਮਹਾਪੁਰਿਸਸ੍ਸ ਉਣ੍ਣਾ ਭਮੁਕਨ੍ਤਰੇ ਜਾਤਾ ਹੋਤਿ ਓਦਾਤਾ ਮੁਦੁਤੂਲਸਨ੍ਨਿਭਾ. ਇਦਮ੍ਪਿ ਭਿਕ੍ਖਵੇ ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਂ ਭਵਤਿ ੩੨. ਪੁਨ ਚਪਰਂ ਭਿਕ੍ਖਵੇ ਮਹਾਪੁਰਿਸੋ ਉਣ੍ਹੀਸਸੀਸੋ ਹੋਤਿ. ਯਮ੍ਪਿ ਭਿਕ੍ਖਵੇ ਮਹਾਪੁਰਿਸੋ ਉਣ੍ਹੀਸਸੀਸੋ ਹੋਤਿ. ਇਦਮ੍ਪਿ ਭਿਕ੍ਖਵੇ ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਂ ਭਵਤਿ. ਇਮਾਨਿ ਖੋ ਤਾਨਿ ਭਿਕ੍ਖਵੇ ਦ੍ਵਤ੍ਤਿਂਸਮਹਾਪੁਰਿਸਸ੍ਸ ਮਹਾਪੁਰਿਸ ਲਕ੍ਖਣਾਨੀ’’ਤਿ. ਏਤੇਸਂ ਪਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਂ ਅਤ੍ਥੋ ਪਚ੍ਛਾ ਆਵਿਭਵਿਸ੍ਸਤੀਤਿ.

ਦੇਹਜ੍ਜੁਤਿਨਿਗ੍ਗਤਪਜ੍ਜਲਨ੍ਤਨ੍ਤਿ ਭਗਵਤੋ ਰੂਪਕਾਯਤੋ ਨਿਕ੍ਖਨ੍ਤੇਹਿ ਛਬ੍ਬਣ੍ਣਰਂਸੀਸਙ੍ਖਾਤੇਹਿ ਓਭਾਸੇਹਿ ਪਰਿਸਮਨ੍ਤਤੋ ਵਿਜ੍ਜੋਤਵਨ੍ਤਂ. ਜਵਤਿ ਦਿਬ੍ਬਤੀਤਿ ਜੁਤਿ. ਜੁਧਾਤੁਤਿ. ਨਿਗਚ੍ਛਤਿ ਨਿਚ੍ਛਰਤੀਤਿ ਨਿਗ੍ਗਤਾ, ਰਸ੍ਮਿ. ਨਿਪੁਬ੍ਬਗਮੁਧਾਤੁ ਤ. ਪਕਾਰੇਨ ਜਲਤੇ ਦਿਬ੍ਬਤੇ ਪਜ੍ਜਲਨ੍ਤਂ. ਏਤ੍ਥ ਚ ਦੇਹਨਿਗ੍ਗਤਜੁਤੀਤਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਪਦਵਿਪਰਿਯਾਯੇਨ ਦੇਹਜ੍ਜੁਤਿਨਿਗ੍ਗਤਨ੍ਤਿ ਵੁਤ੍ਤਂ. ਤਸ੍ਮਾ ਦੇਹਤੋ ਨਿਗ੍ਗਤਾ ਜੁਤੀਤਿ ਸਮਾਸੋ ਦਟ੍ਠਬ੍ਬੋ. ਦੇਹਤੋ ਰੂਪਕਾਯਤੋ ਨਿਗ੍ਗਤੇਹਿ ਨਿਚ੍ਛਰੇਹਿ ਜੁਤੀਹਿ ਰਂਸੀਹਿ ਪਜ੍ਜਲਨ੍ਤਂ ਯਸ੍ਸ ਸੋਤਿ ਦੇਹਜ੍ਜੁਤਿ ਨਿਗ੍ਗਤਪਜ੍ਜਲਨ੍ਤੋ, ਮੁਨਿ ਲਬ੍ਭਤਿ. ਮੁਨਿਨੋ ਹਿ ਪੁਰਤ੍ਥਿਮਕਾਯਤੋ ਛਬ੍ਬਣ੍ਣਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗ ਹੇਸਿ. ਪਚ੍ਛਿਮਕਾਯਤੋ ਦਕ੍ਖਿਣਹਤ੍ਥਤੋ ਵਾਮਹਤ੍ਥਤੋ ਛਬ੍ਬਣ੍ਣਾ ਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਉਪਰਿ ਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਵਤ੍ਤੇਹਿ ਮੋਰਗੀਵਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਹੇਟ੍ਠਾਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਘਨਪਥਵਿਯਂ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ, ਏਵਂ ਸਮਨ੍ਤਾ ਅਸੀਤਿਹਤ੍ਥਮਤ੍ਤਂ ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਕਞ੍ਚਨਦਣ੍ਡਦੀਪਿਕਾਹਿ ਨਿਚ੍ਛਰਿਤ੍ਵਾ ਆਕਾਸਂ ਪਕ੍ਖਨ੍ਦਜਾਲਾ ਵਿਯ ਚਤੁਦ੍ਦੀਪਿਕ ਮਹਾਮੇਘਤੋ ਨਿਕ੍ਖਨ੍ਤਵਿਜ੍ਜੁਲਤਾ ਵਿਯ ਵਿਧਾਵਿਂਸੂਤਿ ਵੁਤ੍ਤਂ ਹੋਤਿ. ਤਸ੍ਮਾ ਦੇਹਜ੍ਜੁਤਿਨਿਗ੍ਗਤਪਜ੍ਜਲਨ੍ਤਨ੍ਤਿ ਥੋਮੇਤੀਤਿ.

ਪਞ੍ਞਾਧਿਤਿ ਸੀਲ ਗੁਣੋਘਵਿਨ੍ਦਨ੍ਤਿ ਏਤ੍ਥ ਪਞ੍ਞਾਤਿ ਸਬ੍ਬਞ੍ਞੁਤ ਞਾਣਂ. ਧਿਤੀਤਿ ਝਾਨਮਗ੍ਗਫਲਸਮ੍ਪਯੁਤ੍ਤਸਮਾਧਿ. ਸੀਲਨ੍ਤਿ ਪਚ੍ਚੇਕ ਬੁਦ੍ਧਾਰਿਯਸਾਵਕੇਹਿ ਅਸਾਧਾਰਣਂ ਸੁਵਿਸੁਦ੍ਧਂ ਚਤੁਪਾਰਿਸੁਦ੍ਧਿਸੀਲਂ. ਓਘਨ੍ਤਿ ਸਮੂਹਂ. ਵਿਨ੍ਦਨ੍ਤਿ ਲਦ੍ਧਂ. ਪਕਾਰੇਨ ਯਥਾਸਭਾਵਂ ਸਬ੍ਬਞੇਯ੍ਯਧਮ੍ਮਂ ਵਾ ਜਾਨਾਤਿ ਪਟਿਵਿਜ੍ਝਤੀਤਿ ਪਞ੍ਞਾ. ਸਬ੍ਬਞ੍ਞੁਤ ਞਾਣਂ. ਪਪੁਬ੍ਬਞਾਧਾਤੁ ਅ. ਸਾ ਪਨੇਸਾ ਪਜਾਨਨਲਕ੍ਖਣਾ ਪਟਿਵੇਧਲਕ੍ਖਣਾ ਓਭਾਸਨਲਕ੍ਖਣਾ ਚ, ਵਿਸਯੋਭਾਸ ਰਸਾ, ਅਸਮ੍ਮੋਹਪਚ੍ਚੁਪਟ੍ਠਾਨਾ, ਸਮਾਧਿਪਦਟ੍ਠਾਨਾ. ਧਿਤਿਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਸੀਲਤੀਤਿ ਸੀਲਂ. ਕਾਯਵਚੀਕਮ੍ਮਾਨਿ ਸਮ੍ਮਾ ਦਹਤਿ ਸਮ੍ਮਾ ਠਪੇਤੀਤਿ ਅਤ੍ਥੋ. ਅਥ ਵਾ ਸੀਲਤਿ ਸਮਾਧਿਯਤਿ ਕਾਯਕਮ੍ਮਾਦੀਨਂ ਸੁਸਿਲ੍ਯ ਭਾਵੇਨ ਨ ਵਿਪ੍ਪਕਿਰਤੀਤਿ ਸੀਲਂ, ਸੀਲਨ੍ਤਿ ਸਮਾਦਹਨ੍ਤਿ ਚਿਤ੍ਤਂ ਏਤੇਨਾਤਿ ਵਾ ਸੀਲਂ, ਚਤੁਪਾਰਿਸੁਦ੍ਧਿਸੀਲਂ. ਸੀਲਧਾਤੁ ਅ. ਇਦਂ ਪਨ ਪਤਿਟ੍ਠਾਪਨਲਕ੍ਖਣਂ, ਦੁਸ੍ਸਿਲ੍ਯਵਿਦ੍ਧਂਸਨਰਸਂ ਅਨਵਜ੍ਜਰਸਂ ਵਾ, ਸੋਚੇਯ੍ਯਪਚ੍ਚੁਪਟ੍ਠਾਨਂ, ਹਿਰਿਓਤ੍ਤਪ੍ਪਪਦਟ੍ਠਾਨਂ. ਗੁਣਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਉਹਨਤਿ ਸਮੂਹਂ ਕਰੋਤਿ ਏਤ੍ਥ ਅਵਯਵਨ੍ਤਿ ਓਘੋ, ਸਮੂਹੋ. ਉਪੁਬ੍ਬਹਨਧਾਤੁ ਣ. ਉਸ੍ਸ ਓ. ਹਨਸ੍ਸ ਘੋ. ਅਭਿਧਾਨਪ੍ਪਦੀਪਿਕਾਟੀਕਾਯਂ ਪਨ ‘‘ਅਵਯਵਂ ਬ੍ਯਪਿਯਤਿ ਗਚ੍ਛਤੀਤਿ ਓਘੋ’’ਤਿ ਵੁਤ੍ਤਂ. ਵਿਨ੍ਦਨਂਲਭਨਂ ਵਿਨ੍ਦਂ, ਵਿਨ੍ਦਿਯਿਤ੍ਥ ਲਬ੍ਭਿਤ੍ਥਾਤਿ ਵਾ ਵਿਨ੍ਦਂ, ਪਞ੍ਞਾ ਚ ਧਿਤਿ ਚ ਸੀਲਞ੍ਚ ਤਂ ਗੁਣਞ੍ਚਾਤਿ ਪਞ੍ਞਾਧਿਤਿਸੀਲਗੁਣਾ, ਤੇਸਂ ਓਘੋ ਸਮੂਹੋਤਿ ਤਥਾ, ਤਂ ਵਿਨ੍ਦਂ ਲਭਨਂ ਯਸ੍ਸਾਤਿ ਪਞ੍ਞਾਧਿਤਿਸੀਲਗੁਣੋਘਵਿਨ੍ਦੋ, ਮੁਨਿ. ਅਥ ਵਾ ਵਿਨ੍ਦਂ ਲਭਿਤਬ੍ਬਂ ਪਞ੍ਞਾਧਿਤਿਸੀਲਗੁਣੋਘਂ ਯੇਨਾਤਿ ਪਞ੍ਞਾਧਿਤਿਸੀਲਗੁਣੋਘਵਿਨ੍ਦੋ. ਤਤਿਯਾਬਹੁਬ੍ਬੀਹਿ ਸਮਾਸੋਯਂ. ਵਿਨ੍ਦਾਨਂ ਲਭਿਤਬ੍ਬਾਨਂ ਪਞ੍ਞਾਧਿਤਿਸੀਲ ਸਙ੍ਖਾਤਾਨਂ ਗੁਣਾਨਂ ਸਮੂਹੋ ਅਤ੍ਥੀਤਿ ਅਤ੍ਥੋ. ਤਂ.

ਵਨ੍ਦੇਤਿ ਅਹਂ ਵਨ੍ਦਾਮਿ. ਮੁਨਿਨ੍ਤਿ ਬੁਦ੍ਧਂ. ਮੁਨਾਤਿ ਜਾਨਾਤਿ ਪਰਿਚ੍ਛਿਨ੍ਦਤਿ ਵਾ ਹਿਤਾਹਿਤਨ੍ਤਿ ਮੁਨਿ, ਬੁਦ੍ਧੋ. ਮੁਨਧਾਤੁ ਞਾਣੇ ਇ. ਅਥ ਵਾ ਮੁਨਾਤਿ ਜਾਨਾਤਿ ਉਭੋ ਅਤ੍ਥੇਤਿ ਮੁਨਿ, ਖਨ੍ਧਾਦਿ ਲੋਕੇ ਤੁਲਂ ਆਰੋਪੇਤ੍ਵਾ ਮਿਨਨ੍ਤੋ ਵਿਯ ਇਮੇ ਅਜ੍ਝਤ੍ਤਿਕਾ ਖਨ੍ਧਾ ਇਮੇ ਬਾਹਿਰਾਤਿਆਦਿਨਾ ਨਯੇਨ ਇਧਲੋਕਤ੍ਥਞ੍ਚ ਪਰਲੋਕਤ੍ਥਞ੍ਚ ਭਗਵਾ ਜਾਨਾਤੀਤਿ ਅਤ੍ਥੋ. ਸੋ ਪਨੇਸ ਅਗਾਰਿਯਮੁਨਿ, ਅਨਾਗਾਰਿਯਮੁਨਿ, ਸੇਖਮੁਨਿ, ਅਸੇਖਮੁਨਿ, ਪਚ੍ਚੇਕਮੁਨਿ, ਮੁਨਿਮੁਨਿ ਚਾਤਿ ਅਨੇਕਵਿਧੋ. ਤਤ੍ਥ ਅਗਾਰਿਯਮੁਨੀਤਿ ਗਿਹਿਪਿ ਆਗਤਫਲੋ ਵਿਞ੍ਞਾਤਸਾਸਨੋ. ਅਨਾਗਾਰਿਯਮੁਨੀਤਿ ਤਥਾਰੂਪੋਵ ਪਬ੍ਬਜਿਤੋ. ਸੇਖਮੁਨੀਤਿ ਸਤ੍ਤ ਸੇਕ੍ਖਾ. ਅਸੇਖਮੁਨੀਤਿ ਖੀਣਾਸਵੋ. ਪਚ੍ਚੇਕਮੁਨੀਤਿ ਪਚ੍ਚੇਕਬੁਦ੍ਧੋ. ਮੁਨਿਮੁਨੀਤਿ ਸਮ੍ਮਾਸਮ੍ਬੁਦ੍ਧੋ. ਤੇਸੁ ਪਨ ਇਧ ਮੁਨਿਮੁਨਿ ਅਧਿਪ੍ਪੇਤੋ, ਤਂ ਮੁਨਿਂ. ਅਨ੍ਤਿਮਜਾਤਿਯੁਤ੍ਤਨ੍ਤਿ ਅਨ੍ਤਿਮੇਨ ਚਰਿਮਭਵੇਨ ਯੁਤ੍ਤਂ. ਅਵਸਾਨਂ ਅਮਤਿ ਗਚ੍ਛਤੀਤਿ ਅਨ੍ਤਂ. ਅਮਧਾਤੁ ਤ. ਮਸ੍ਸ ਨੋ. ਅਨ੍ਤੇ ਭਵੋ ਅਨ੍ਤਿਮੋ, ਚਰਿਮਭਵੋ. ਜਾਨਨਂ ਨਿਬ੍ਬਤ੍ਤਨਂ ਜਾਤਿ, ਖਨ੍ਧਾਨਂ ਪਵਤ੍ਤਿ. ਕਮ੍ਮੇਨ ਜਨਿਯਤਿ ਨਿਬ੍ਬਤ੍ਤਿਯਤੀਤਿ ਵਾ ਜਾਤਿ. ਉਪਪਤ੍ਤਿਭਵੋ ਲਬ੍ਭਤਿ. ਜਾਨਿਧਾਤੁਤਿ. ਧਾਤ੍ਵਨ੍ਤ ਲੋਪੋ. ਅਨ੍ਤਿਮਜਾਤਿਯਾ ਯੁਤ੍ਤੋਤਿ ਅਨ੍ਤਿਮਜਾਤਿਯੁਤ੍ਤੋ, ਮੁਨਿ. ਆਯਤਿਞ੍ਹਿ ਤੀਸੁ ਭਵੇਸੁ ਪਟਿਸਨ੍ਧਿਜਨਕਾਨਂ ਸਬ੍ਬ ਕਿਲੇਸਾਨਂ ਬੋਧਿਪਲ੍ਲਙ੍ਕੇਯੇਵ ਅਗ੍ਗਮਗ੍ਗੇਨ ਸਮੁਚ੍ਛਿਨ੍ਦਿਤਤ੍ਤਾ ਭਗਵਤੋ ਅਨਾਗਤੇ ਪੁਨਬ੍ਭਵੋ ਨਤ੍ਥਿ, ਤਸ੍ਮਾ ਅਯਂ ਅਰਿਯਜਾਤਿ ਪਚ੍ਛਿਮਤ੍ਤਭਾਵਯੁਤ੍ਤੋਤਿ ਵੁਤ੍ਤਂ ਹੋਤਿ.

ਤੇਨ ਵੁਤ੍ਤਂ ਧਮ੍ਮਚਕ੍ਕਪਵਤ੍ਤਨਸੁਤ੍ਤੇ –

‘‘ਞਾਣਞ੍ਚ ਮੇਦਸ੍ਸਨਂ ਉਦਪਾਦਿ, ਅਕੁਪ੍ਪਾਮੇ ਵਿਮੁਤ੍ਤਿ, ਅਯਮਨ੍ਤਿਮਾ ਜਾਤਿ, ਨਤ੍ਥਿਦਾਨਿ ਪੁਨਬ੍ਭਵੋ’’ਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਬਾਤ੍ਤਿਂਸਤਿਲਕ੍ਖਣਚਿਤ੍ਰਂ ਦੇਹਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਵਿਚਿਤ੍ਰਂ ਰੂਪਕਾਯਵਨ੍ਤਂ, ਦੇਹਜ੍ਜੁਤਿਨਿਗ੍ਗਤ ਪਜ੍ਜਲਨ੍ਤਂ ਰੂਪਕਾਯਤੋ ਨਿਗ੍ਗਤੇਹਿ ਛਬ੍ਬਣ੍ਣਰਂ ਸੀਹਿ ਪਰਿਸਮਨ੍ਤਤੋ ਵਿਜ੍ਜੋਤਵਨ੍ਤਂ, ਪਞ੍ਞਾਧਿਤਿਸੀਲਗੁਣੋ ਘਵਿਨ੍ਦਂ ਪਞ੍ਞਾਧਿਤਿਸੀਲਸਙ੍ਖਤਾਨਂ ਗੁਣਾਨਂ ਸਮੂਹਂ ਲਭਨਵਨ੍ਤਂ, ਵਿਨ੍ਦਿਤਬ੍ਬਾਨਂ ਪਞ੍ਞਾਧਿਤਿਸੀਲਸਙ੍ਖਾਤਾਨਂ ਗੁਣਾਨਂ ਸਮੂਹਵਨ੍ਤਂ ਵਾ, ਅਨ੍ਤਿਮਜਾਤਿਯੁਤ੍ਤਂ ਚਰਿਮਭਵੇਨ ਚਰਿਮਤ੍ਤਭਾਵੇਨ ਵਾ ਯੁਤ੍ਤਂ ਮੁਨਿਂ ਬੁਦ੍ਧਂ ਅਹਂ ਤੀਹਿ ਦ੍ਵਾਰੇਹਿ ਸਕ੍ਕਚ੍ਚਂ ਵਨ੍ਦੇ ਵਨ੍ਦਾਮੀਤਿ.

ਚਤੁਤ੍ਥਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੫.

ਪਾਤੋਦਯਂ ਬਾਲਦਿਵਾਕਰਂਵ,

ਮਜ੍ਝੇ ਯਤੀਨਂ ਲਲਿਤਂ ਸਿਰੀਹਿ;

ਪੁਣ੍ਣਿਨ੍ਦੁਸਙ੍ਕਾਸਮੁਖਂ ਅਨੇਜਂ,

ਵਨ੍ਦਾਮਿ ਸਬ੍ਬਞ੍ਞੁਮਹਂ ਮੁਨਿਨ੍ਦਂ.

੫. ਏਵਂ ਚਤੁਤ੍ਥਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਸਿਰੀਹਿ ਲਲਿਤਨ੍ਤ੍ਯਾਦੀਹਿ ਚਤੂਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਪਾਤੋਦਯਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਤ ਤ ਜ ਗਣਦ੍ਵਿਗਰੂਹਿ ਯੁਤ੍ਤਤ੍ਤਾ ਏਕਾਦਸਕ੍ਖਰੇਹਿ ਲਕ੍ਖਿਤਾ ਇਨ੍ਦਵਜਿਰਾ ਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਇਨ੍ਦਾਦਿਕਾ ਤਾ ਵਜਿਰਾ ਜਗਾਗੋ’’ਤਿ. ਤਸ੍ਸਤ੍ਥੋ, ਯਸ੍ਸਂ ਪਟਿਪਾਦਂ ਤਾ ਦ੍ਵੇਤ ਗਣਾ ਚ ਜਗਾ ਜਗਣ ਗਰੁ ਚ ਗੋ ਗਰੁ ਚ ਚੇ ਭਵਨ੍ਤਿ, ਸਾ ਇਨ੍ਦਾ ਦਿਕਾ ਇਨ੍ਦਸਦ੍ਦਆਦਿਕਾ ਵਜਿਰਾ ਵਜਿਰਾਗਾਥਾ ਨਾਮਾਤਿ.

ਤਤ੍ਥ ਪਾਤੋਦਯਨ੍ਤਿ ਏਤ੍ਥ ਪਾਤੋ ਉਦਯਨ੍ਤਿ ਪਦਚ੍ਛੇਦੋ ਕਾਤਬ੍ਬੋ. ਪਗੇ ਪੁਬ੍ਬਣ੍ਹਸਮਯੇ ਪਾਚੀਨਲੋਕਧਾਤੁਤੋ ਉਗ੍ਗਤਨ੍ਤਿ ਅਤ੍ਥੋ. ਪਾਤੋ ਪਗੇ ਪਾਚੀਨਲੋਕਧਾਤੁਤੋ ਉਦੇਤਿ ਉਗ੍ਗਚ੍ਛਤੀਤਿ ਪਾਤੋਦਯੋ, ਸੂਰਿਯੋ. ਪਾਤੋਪੁਬ੍ਬ ਉਦਧਾਤੁ ਉਗ੍ਗਮਨੇ ਅਯੋ, ਤਂ ਪਾਤੋਦਯਂ. ਬਾਲਦਿਵਾ ਕਰਂ ਵਾਤਿ ਬਾਲਦਿਵਾਕਰਂ ਇਵਾਤਿਪਦਚ੍ਛੇਦੋ. ਬਾਲਦਿਵਾਕਰਂ ਵਾਤਿ ਨਿਗ੍ਗਤਾਭਿਨਵਸੂਰਿਯਂ ਵਿਯ. ਏਤ੍ਥ ਚ ਬਾਲੋਤਿ ਸਮ੍ਪਤਿ ਜਾਤੋ ਤਰੁਣਦਾਰਕੋ ਪੋਤਕੋ ਵਾ. ਸੋ ਹਿ ਬਲਤਿ ਅਸ੍ਸਸਿਤਪਸ੍ਸਸਿਤਮਤ੍ਤੇਨ ਜੀਵਤਿ ਨ ਸੇਟ੍ਠੇਨ ਪਞ੍ਞਾਜੀਵਿਤੇਨਾਤਿ ਬਾਲੋ, ਤਰੁਣਦਾਰਕੋ. ਬਲਧਾਤੁ ਪਾਣਨੇ ਜੀਵਾਯਂ ਵਾ. ਸੂਰਿਯਰਂਸਿਨਾ ਦਿਵਤਿ ਦਿਬ੍ਬਤੀਤਿ ਦਿਵਾ. ਦਿਵੁਧਾਤੁ ਅ. ਅਥ ਵਾ ਦੀਯਤਿ ਖੀਯਤਿ ਅਨ੍ਧਕਾਰੋ ਏਤੇਨਾਤਿ ਦਿਵਾ. ਦੀਧਾਤੁ ਖਯੇ ਅ, ਵਾਗਮੋ. ਤਂ ਕਰੋਤੀਤਿ ਦਿਵਾਕਰੋ, ਦਿਵਾ ਦਿਵਸੇ ਵਾ ਕਰੋ ਆਭਾ ਯਸ੍ਸਾਤਿ ਦਿਵਾਕਰੋ, ਸੂਰਿਯੋ. ਬਾਲਸਦਿਸੋ ਦਿਵਾਕਰੋ ਬਾਲਦਿਵਾਕਰੋ. ਅਥ ਵਾ ਬਾਲੋ ਇਵ ਦਿਵਾਕਰੋਤਿ ਬਾਲਦਿਵਾਕਰੋ, ਨਵੁਗ੍ਗਤਸੂਰਿਯੋ. ਸੋ ਪਨ ਆਕਾਸੇ ਨਕ੍ਖਤ੍ਤਤਾਰਾਨਂ ਮਜ੍ਝੇ ਸਹਸ੍ਸਰਂਸੀਹਿ ਲਲਤਿ ਵਿਲਾਸਤਿ ਵਿਯਾਤਿ ਅਤ੍ਥੋ.

ਯਤੀਨਨ੍ਤਿ ਭਿਕ੍ਖੂਨਂ. ਤੇ ਹਿ ਯਤਨ੍ਤਿ ਉਟ੍ਠਹਨ੍ਤਿ ਘਟਨ੍ਤਿ ਵਾਯਮਨ੍ਤਿ ਕੁਸਲੇ ਧਮ੍ਮੇਤਿ ਯਤੀਤਿ ਵੁਚ੍ਚਨ੍ਤਿ. ਯਤ ਧਾਤੁ ਪਤਿਯਤਨੇ ਵਾਯਾਮੇ ਵਾ ਇ. ਅਥ ਵਾ ਯਮਨ੍ਤਿ ਉਪਰਮਨ੍ਤਿ ਅਕੁਸਲੇ ਧਮ੍ਮੇਤਿ ਯਤੀਤਿ ਵੁਚ੍ਚਨ੍ਤਿ. ਯਮੁਧਾਤੁ ਉਪਰਮੇ ਇ. ਧਾਤ੍ਵਨ੍ਤਲੋਪੋ. ਤੇਸਂ ਯਤੀਨਂ. ਲਲਿਤਨ੍ਤਿ ਵਿਲਾਸਿਤਂ. ਲਲਤਿ ਵਿਲਾਸੇਤੀਤਿ ਲਲਿਤੋ, ਮੁਨਿ. ਲਲਧਾਤੁ ਵਿਲਾਸੇ ਤ. ਤਂ. ਸਿਰੀਹੀਤਿ ਭਗਵਤੋ ਕਾਯਙ੍ਗਸੋਭਗ੍ਗਪਤ੍ਤੇਹਿ ਸਿਰੀਹਿ, ਬਾਤ੍ਤਿਂਸਲਕ੍ਖਣਾਸੀਤ੍ਯਾ ਨੁਬ੍ਯਞ੍ਜਨਛਬ੍ਬਣ੍ਣਰਂਸੀਸਙ੍ਖਤੇਹਿ ਸਮ੍ਪਤ੍ਤਿਸਿਰੀਹਿ ਵਾ. ਕਤਪੁਞ੍ਞੇ ਨਿਸ੍ਸਯਤੀਤਿ ਸਿਰੀ. ਸਿਧਾਤੁ ਸੇਵਾਯਂ ਰਪਚ੍ਚਯੋ ਇਤ੍ਥਿ ਲਿਙ੍ਗਜੋਤਕਈਪਚ੍ਚਯੋ ਚ. ਕਤਪੁਞ੍ਞੇਹਿ ਸੇਵਿਯਤੀਤਿ ਵਾ ਸਿਰੀ, ਸਮ੍ਪਤ੍ਤਿ. ਮੂਲਟੀਕਾਯਂ ਪਨ ‘‘ਸਿਰੀਤਿ ਪਞ੍ਞਾਪੁਞ੍ਞਾਨ ਮੇਤਂ ਅਧਿਵਚਨ’’ਨ੍ਤਿ ਵੁਤ੍ਤਂ. ਯਤੀਨਂ ਭਿਕ੍ਖੂਨਂ ਮਜ੍ਝੇ ਸਿਰੀਹਿ ਲਲਿਤਂ ਵਿਲਾਸਿਤਨ੍ਤਿ ਸਮ੍ਬਨ੍ਧੋ. ਏਤ੍ਥ ਚ ਇਦਂ ਵੁਤ੍ਤਂ ਹੋਤਿ, ਯਥਾ ਪਾਤੋ ਉਦਿਤੋ ਉਗ੍ਗਤੋ ਸੂਰਿਯੋ ਆਕਾਸੇ ਨਕ੍ਖਤ੍ਤਤਾਰਾਨਂ ਮਜ੍ਝੇ ਸਹਸ੍ਸਰਂਸੀਹਿ ਲਲਤਿ ਵਿਲਾਸਤਿ, ਏਵਂ ਮੁਨਿ ਲੋਕੇ ਯਤੀਨਂ ਭਿਕ੍ਖੂਨਂ ਮਜ੍ਝੇ ਬਾਤ੍ਤਿਂਸਲਕ੍ਖਣਾ ਸੀਤ੍ਯਾਨੁਬ੍ਯਞ੍ਜਨਛਬ੍ਬਣ੍ਣਰਂਸੀਹਿ ਅਲਙ੍ਕਤੇਹਿ ਸਰੀਰਸੋਭਗ੍ਗ ਪਤ੍ਤੀਹਿ ਸਮ੍ਪਤ੍ਤਿਸਿਰੀਹਿ ਲਲਤਿ ਵਿਲਾਸਤੀਤਿ.

ਪੁਣ੍ਣਿਨ੍ਦੁਸਙ੍ਕਾਸਮੁਖਨ੍ਤਿ ਪੁਣ੍ਣਚਨ੍ਦੇਨ ਸਦਿਸਂ ਆਨਨਸਮ੍ਪਨ੍ਨਂ. ਯਥਾ ਹਿ ਚਨ੍ਦੋ ਕਾਲ਼ਪਕ੍ਖੇ ਪਾਟਿਪਦਦਿਵਸਤੋ ਪਟ੍ਠਾਯ ਦਿਨੇ ਦਿਨੇ ਊਨੋ ਹੋਤਿ, ਏਵਂ ਨ ਮੁਨਿਨੋ ਮੁਖਂ ਆਨਨਂ ਊਨਂ. ਭਗਵਤੋ ਪਨ ਮੁਖਂ ਨਿਚ੍ਚਂ ਪਰਿਪੁਣ੍ਣਚਨ੍ਦਮਣ੍ਡਲਂ ਵਿਯ ਅਨੂਨਂ ਹੁਤ੍ਵਾ ਸੋਭਤਿ, ਤਸ੍ਮਾ ਪੁਣ੍ਣਸਦ੍ਦੇਨ ਵਿਸੇਸੇਤ੍ਵਾ ਪੁਣ੍ਣਿਨ੍ਦੁਸਙ੍ਕਾਸਮੁਖਨ੍ਤਿ ਥੋਮੇਤਿ. ਸੋਲ਼ਸਕਲੇਹਿ ਪੂਰੇਤੀਤਿ ਪੁਣ੍ਣਂ. ਪੂਰਧਾਤੁ ਤ, ਤਸ੍ਸ ਣ੍ਣੋ. ਇਦਤਿ ਨਕ੍ਖਤ੍ਤਤਾਰਾਨਂ ਇਸ੍ਸਰਿਯਂ ਕਰੋਤੀਤਿ ਇਨ੍ਦੁ, ਇਦਿਧਾਤੁ ਇਸ੍ਸਰਿਯਂ ਉ. ਪੁਣ੍ਣਂ ਪਰਿਪੁਣ੍ਣਂ ਇਨ੍ਦੁ ਪੁਣ੍ਣਿਨ੍ਦੁ, ਚਨ੍ਦੋ. ਸਙ੍ਕਾਸਨ੍ਤਿ ਸਦਿਸਂ. ਸਙ੍ਕਾਸਸਦ੍ਦੋ ਹਿ ਉਪਮਾਵਾਚਕੋ ਨਿਪਾਤੋ. ਵੁਤ੍ਤਞ੍ਹਿ

ਸੁਬੋਧਾਲਙ੍ਕਾਰੇ –

‘‘ਇਵਾਦਿ ਇਵ ਵਾ ਤੁਲ੍ਯ, ਸਮਾਨਨਿਭਸਨ੍ਨਿਭਾ;

ਯਥਾ ਸਙ੍ਕਾਸ ਤੁਲਿਤ, ਪ੍ਪਕਾਸ ਪਤਿਰੂਪਕਾ’’ਤ੍ਯਾਦਿ.

ਪੁਣ੍ਣਚਨ੍ਦਂ ਵਿਯ ਮੁਖਤਿ ਸੋਭਤੀਤਿ ਮੁਖਂ, ਆਨਨਂ. ਮੁਖਧਾਤੁ ਅ. ਪੁਣ੍ਣਿਨ੍ਦੁਨਾ ਸਙ੍ਕਾਸਂ ਸਦਿਸਂ ਮੁਖਂ ਆਨਨਂ ਯਸ੍ਸ ਸੋਤਿ ਪੁਣ੍ਣਿਨ੍ਦੁਸਙ੍ਕਾਸਮੁਖੋ, ਮੁਨਿਨ੍ਦੋ. ਤਂ. ਮੁਨਿਨ੍ਦਸ੍ਸ ਪਨ ਪੁਣ੍ਣ ਚਨ੍ਦਸ੍ਸ ਸਹਸ੍ਸਰਂਸੀਹਿ ਸਸ੍ਸਿਰਿਕੋ ਵਿਯ ਭਿਕ੍ਖੂਨਂ ਮਜ੍ਝੇ ਬਾਤ੍ਤਿਂਸ ਮਹਾਪੁਰਿਸ ਲਕ੍ਖਣਾਸੀਤ੍ਯਾਨੁਬ੍ਯਞ੍ਜਨ ਪਟਿਮਣ੍ਡਿਤੇਹਿ ਸਿਰੀਹਿ ਚ ਬ੍ਯਾਮਪ੍ਪਭਾਪਰਿਕ੍ਖਿਤ੍ਤੇਹਿ ਆਵੇਲ਼ਾਵੇਲ਼ਾ ਯਮਕਾਯਮਕਾ ਗੁਮ੍ਬਾਗੁਮ੍ਬਾ ਹੁਤ੍ਵਾ ਵਿਨਿਚ੍ਛਰਨ੍ਤੀਹਿ ਘਨਬੁਦ੍ਧਰਸ੍ਮਿਸਙ੍ਖਾਤੇਹਿ ਅਲਙ੍ਕਿਤੋ ਸਸ੍ਸਿਰਿਕਮੁਖੋ ਹੋਤੀਤਿ ਵੁਤ੍ਤਂ ਹੋਤਿ. ਤਸ੍ਮਾ ਪੁਣ੍ਣਿਨ੍ਦੁਸਙ੍ਕਾਸਮੁਖਨ੍ਤਿ ਥੋਮੇਤਿ.

ਅਨੇਜਨ੍ਤਿ ਨਿਤ੍ਤਣ੍ਹਂ. ਲਾਭਾਲਾਭਾਦਿਂ ਪਟਿਚ੍ਚ ਏਜਤਿ ਕਮ੍ਪਤੀਤਿ ਏਜਾ, ਤਣ੍ਹਾ. ਏਜਧਾਤੁ ਕਮ੍ਪਨੇ ਅ, ਨਤ੍ਥਿ ਏਜਾ ਯਸ੍ਸਾਤਿ ਅਨੇਜੋ, ਮੁਨਿਨ੍ਦੋ. ਵੁਤ੍ਤਞ੍ਹਿ ਮਹਾਨਿਦ੍ਦੇਸਪਾਲ਼ਿਯਂ ‘‘ਲਾਭਾਲਾਭ ਯਸਾਯਸ ਨਿਨ੍ਦਾਨਿਨ੍ਦ ਸੁਖਦੁਕ੍ਖੇਹਿ ਨ ਇਞ੍ਜਤੀਤਿ ਅਨੇਜੋ, ਭਗਵਾ ਲਬ੍ਭਤੀ’’ਤਿ.

ਸਬ੍ਬਞ੍ਞੁਨ੍ਤਿ ਪਟਿਵਿਦ੍ਧ ਸਬ੍ਬਞੇਯ੍ਯਧਮ੍ਮਂ. ਸਙ੍ਖਰਵਿਕਾਰਲਕ੍ਖਣਨਿਬ੍ਬਾਨ ਪਞ੍ਞਤ੍ਤਿਵਸੇਨ ਪਞ੍ਚਵਿਧਂ ਸਬ੍ਬਂ ਞੇਯ੍ਯਧਮ੍ਮਂ ਜਾਨਾਤਿ ਪਟਿਵਿਜ੍ਝਤਿ ਸੀਲੇਨਾਤਿ ਸਬ੍ਬਞ੍ਞੂ, ਮੁਨਿਨ੍ਦੋ. ਸਬ੍ਬਸਦ੍ਦੂਪਪਦ ਞਾਧਾਤੁ ਰੂ. ਏਤ੍ਥ ਚ ਸਬ੍ਬੇ ਸਙ੍ਖਤਧਮ੍ਮਾ ਸਙ੍ਖਰਾ ਨਾਮ ਸਕਸਕਪਚ੍ਚਯੇਹਿ ਸਙ੍ਖਰਿਯਨ੍ਤੀਤਿ ਕਤ੍ਵਾ. ਵਿਞ੍ਞਤ੍ਤਿਦ੍ਵਯਂ ਲਹੁਤਾਦਿਤ੍ਤਯਞ੍ਚ ਵਿਕਾਰੋ ਨਾਮ ਚਤੂਹਿ ਮਹਾਭੂਤੇਹਿ ਵਿਰੂਪਂ ਕਰਿਯਤੀਤਿ ਕਤ੍ਵਾ. ਵਿਞ੍ਞਤ੍ਤਿਦ੍ਵਯਸ੍ਸ ਯਥਾਕ੍ਕਮਂ ਚਿਤ੍ਤਜਵਾਯੋਧਾਤੁ ਚਿਤ੍ਤਜਪਥਵੀ ਧਾਤੂਨਂ ਵਿਸੇਸਗੁਣਤ੍ਤਾ, ਲਹੁਤਾਦਿਤ੍ਤਯਸ੍ਸ ਚ ਚਿਤ੍ਤੋ ਤ੍ਵਾਹਾਰਜਨਿਪ੍ਫਨ੍ਨਰੂਪਾਨਂ ਵਿਸੇਸਗੁਣਤ੍ਤਾ. ਫਸ੍ਸਾਦਿਧਮ੍ਮਾਨਂ ਫੁਸਨਾਦਿਲਕ੍ਖਣਞ੍ਚ ਪਥਵੀਧਾਤ੍ਵਾਦੀਨਂ ਕਕ੍ਖਲ਼ਾਦਿਲਕ੍ਖਣਞ੍ਚ, ਚਿਤ੍ਤਸ੍ਸ ਆਰਮ੍ਮਣਵਿਜਾਨਨਲਕ੍ਖਣਞ੍ਚ, ਨਿਬ੍ਬਾਨਸ੍ਸ ਸਨ੍ਤਿਲਕ੍ਖਣਞ੍ਚ, ਰੂਪਸ੍ਸ ਰੁਪ੍ਪਨਲਕ੍ਖਣਞ੍ਚ, ਨਾਮਸ੍ਸ ਨਮਨਲਕ੍ਖਣਞ੍ਚ, ਅਨਿਚ੍ਚਤਾਦਿਤ੍ਤਯਾਨਿ ਚ ਉਪਚਯਾਦਿਚਤ੍ਤਾਰਿ ਲਕ੍ਖਣਰੂਪਾਨਿ ਚ ਲਕ੍ਖਣਾਨਿ ਨਾਮ ਲਕ੍ਖਿਯਨ੍ਤਿ ਏਤੇਨ ਲਕ੍ਖਿਤਬ੍ਬਾ ਧਮ੍ਮਾਤਿ ਕਤ੍ਵਾ. ਅਸਙ੍ਖਤਧਾਤੁਨਿਬ੍ਬਾਨਂ ਨਾਮ ਵਾਨਂ ਵੁਚ੍ਚਤਿ ਤਣ੍ਹਾ, ਤਤੋ ਨਿਕ੍ਖਨ੍ਤਨ੍ਤਿ ਕਤ੍ਵਾ. ਪਰਿਚ੍ਛੇਦਰੂਪਂ ਇਤ੍ਥਿਪੁਰਿਸਾਦਿਘਟਪਟਾਦਯੋ ਸਬ੍ਬ ਵੋਹਾਰਤ੍ਥਾ ਚ ਪਞ੍ਞਤ੍ਤਿ ਨਾਮ ਪਞ੍ਞਾਪਿਯਤਿ ਪਕਾਰੇਨ ਞਾਪਿਯਤੀਤਿ ਕਤ੍ਵਾ. ਏਤ੍ਥ ਚ ਸਙ੍ਖਾਰਨਿਬ੍ਬਾਨਾਨਿ ਪਰਮਤ੍ਥਧਮ੍ਮਾ ਹੋਨ੍ਤਿ. ਵਿਕਾਰਾਦੀਸੁ ਪਨ ਵਿਕਾਰਲਕ੍ਖਣਾਨਿ ਪਞ੍ਞਤ੍ਤਿਵਿਸੇਸਤ੍ਤਾ ਵਿਸੁਂ ਵੁਤ੍ਤਾਨਿ. ਇਮੇਹਿ ਦ੍ਵੀਹਿ ਵਿਨਿਮੁਤ੍ਤਾ ਪਨ ਪਰਿਚ੍ਛੇਦਰੂਪਾ ਸਬ੍ਬਵੋਹਾਰਤ੍ਥਾ ਪਞ੍ਞਤ੍ਤੀਤਿ ਵੁਤ੍ਤਾਤਿ ਵੇਦਿਤਬ੍ਬਾ. ਅਪਦਾਨ ਅਟ੍ਠਕਥਾਯਂ ਪਨ ‘‘ਸਬ੍ਬਂ ਅਤੀਤਾਦਿਭੇਦਂ ਹਤ੍ਥਾਮਲਕਂ ਵਿਯ ਜਾਨਾਤੀਤਿ ਸਬ੍ਬਞ੍ਞੂ’’ਤਿ ਵੁਤ੍ਤਂ.

ਸਬ੍ਬਞ੍ਞੂਤਿ ਚ ਕਮਸਬ੍ਬਞ੍ਞੂ, ਸਕਿਂ ਸਬ੍ਬਞ੍ਞੂ, ਸਤਤਸਬ੍ਬਞ੍ਞੂ, ਸਤ੍ਤਿ ਸਬ੍ਬਞ੍ਞੂ, ਞਾਤਸਬ੍ਬਞ੍ਞੂ ਚਾਤਿ ਪਞ੍ਚਵਿਧਾ ਹੋਤਿ ਸਬ੍ਬਞ੍ਞੂ. ਤਤ੍ਥ ਯਥਾਕ੍ਕਮਂ ਸਬ੍ਬਂ ਜਾਨਨਧਮ੍ਮੋ ਕਮਸਬ੍ਬਞ੍ਞੂ ਨਾਮ. ਏਕਾਵਜ੍ਜਨੇਨ ਜਵਨਵਾਰੇਨ ਜਾਨਿਤਬ੍ਬਂ ਚਤੁਸਚ੍ਚਧਮ੍ਮਂ ਜਾਨਨਧਮ੍ਮੋ ਸਕਿਂਸਬ੍ਬਞ੍ਞੂ ਨਾਮ. ਚਕ੍ਖੁਵਿਞ੍ਞਾਣਾਦੀਨਂ ਨਿਯਤਾਰਮ੍ਮਣਤ੍ਤਂ ਜਾਨਨਧਮ੍ਮੋ ਸਤਤਸਬ੍ਬਞ੍ਞੂ ਨਾਮ. ਏਕਪ੍ਪਹਾਰੇਨ ਸਬ੍ਬਧਮ੍ਮਂ ਜਾਨਨਸਮਤ੍ਥੋ ਧਮ੍ਮੋ ਸਤ੍ਤਿਸਬ੍ਬਞ੍ਞੂ ਨਾਮ. ਆਵਜ੍ਜਨਾਭੇਦੇਨ ਜਾਨਿਤਬ੍ਬਂ ਸਬ੍ਬਧਮ੍ਮਂ ਜਾਨਨਧਮ੍ਮੋ ਞਾਤਸਬ੍ਬਞ੍ਞੂ ਨਾਮ. ਤੇਸੁ ਚ ਸਕਿਂ ਸਬ੍ਬਞ੍ਞੂ ਸਤ੍ਤਿਸਬ੍ਬਞ੍ਞੂਵਸੇਨ ਦ੍ਵੇ ਧਮ੍ਮਾ ਮਗ੍ਗਞਾਣਾਨਿਯੇਵ. ਤਦਵਸੇਸਾ ਸਬ੍ਬਞ੍ਞੁਤਞਾਣਾਨਿ ਹੋਨ੍ਤਿ. ਤਂ ਸਬ੍ਬਞ੍ਞੁਂ.

ਮੁਨਿਨ੍ਦਨ੍ਤਿ ਏਤ੍ਥ ਮੁਨਿਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਮੁਨੀਨਂ ਇਨ੍ਦੋ ਇਸ੍ਸਰੋ ਮੁਨਿਨ੍ਦੋ, ਤਂ ਮੁਨਿਨ੍ਦਂ ਅਹਂ ਵਨ੍ਦਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਪਾਤੋਦਯਂ ਪਗੇਵ ਉਦਯਂ ਉਗ੍ਗਤਂ, ਬਾਲਦਿਵਾਕਰਂਵ ਨਵੁਗ੍ਗਤਸੂਰਿਯਮਾਣਵੋਇਵ, ਯਤੀਨਂ ਭਿਕ੍ਖੂਨਂ ਮਜ੍ਝੇ ਸਿਰੀਹਿ ਬਾਤ੍ਤਿਂਸਮਹਾਪੁਰਿਸਲਕ੍ਖਣਾ ਸੀਤ੍ਯਾਨੁਬ੍ਯਞ੍ਜਨਸਮ੍ਪਤ੍ਤਿਸਙ੍ਖਾਤੇਹਿ ਸਿਰੀਹਿ ਲਲਿਤਂ ਵਿਲਾਸਿਤਂ, ਪੁਣ੍ਣਿਨ੍ਦੁਸਙ੍ਕਾਸਮੁਖਂ ਪੁਣ੍ਣਚਨ੍ਦੇਨ ਸਦਿਸਂ ਆਨਨਵਨ੍ਤਂ, ਅਨੇਜਂ ਨਿਤ੍ਤਣ੍ਹਂ, ਲੋਕਧਮ੍ਮੇਹਿ ਅਨਿਞ੍ਜਨਂ ਵਾ, ਸਬ੍ਬਞ੍ਞੁਂ ਸਬ੍ਬਧਮ੍ਮ ਵਿਜਾਨਨ੍ਤਂ, ਮੁਨਿਨ੍ਦਂ ਬੁਦ੍ਧਂ ਸਕ੍ਕਚ੍ਚਂ ਤੀਹਿ ਦ੍ਵਾਰੇਹਿ ਅਹਂ ਵਨ੍ਦਾਮੀਤਿ.

ਪਞ੍ਚਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੬.

ਉਪੇਤਪੁਞ੍ਞੋ ਵਰਬੋਧਿਮੂਲੇ,

ਸਸੇਨਮਾਰਂ ਸੁਗਤੋ ਜਿਨਿਤ੍ਵਾ;

ਅਬੋਜ੍ਝਿ ਬੋਧਿਂ ਅਰੁਣੋਦਯਮ੍ਹਿ,

ਨਮਾਮਿ ਤਂ ਮਾਰਜਿਨਂ ਅਭਙ੍ਗਂ.

੬. ਏਵਂ ਪਞ੍ਚਮਗਾਥਾਯ ਮੁਨਿਨ੍ਦਂ ਵਨ੍ਦਿਤ੍ਵਾ ਇਦਾਨਿ ਮਾਰਜਿਨਗੁਣੇਨ ਥੋਮਿਤ੍ਵਾ ਵਨ੍ਦਿਤੁਕਾਮੋ ਉਪੇਤਪੁਞ੍ਞੋ ਤ੍ਯਾਦਿਗਾਥਮਾਹ. ਅਯਂ ਪਨ ਜ ਤ ਜ ਗਣ ਦ੍ਵਿਗਰੁਯੁਤ੍ਤਤ੍ਤਾ ਏਕਾਦਸਕ੍ਖਰੇਹਿ ਲਕ੍ਖਿਤਾ ਉਪੇਨ੍ਦਵਜਿਰਾਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਉਪਾਦਿਕਾ ਸਾਵ ਜਤਾ ਜਗਾ ਗੋ’’ਤਿ. ਤਸ੍ਸਤ੍ਥੋ, ਯਸ੍ਸਂ ਪਟਿਪਾਦਂ ਜਤਾ ਜਗਣ ਤਗਣਾ ਚ ਜਗਾ ਜਗਣਗਰੂ ਚ ਗੋ ਗਰੁ ਚ ਚੇ ਸਿਯਾ, ਸਾਵ ਸਾਗਾਥਾਏਵ ਉਪਾਦਿਕਾ ਉਪਸਦ੍ਦਾਦਿਕਾ ਇਨ੍ਦਵਜਿਰਾਗਾਥਾ ਨਾਮਾਤਿ.

ਉਪੇਤਪੁਞ੍ਞੋ ਯੋ ਸੁਗਤੋ ਵਰਬੋਧਿਮੂਲੇ ਸਸੇਨ ਮਾਰਂ ਜਿਨਿਤ੍ਵਾ ਅਰੁਣੋਦਯਮ੍ਹਿ ਬੋਧਿਂ ਅਬੋਜ੍ਝਿ ਮਾਰਜਿਨਂ ਅਭਙ੍ਗਂ, ਤਂ ਸੁਗਤਂ ਅਹਂ ਨਮਾਮੀਤਿ ਸਮ੍ਬਨ੍ਧੋ. ਤਤ੍ਥ ਉਪੇਤਪੁਞ੍ਞੋਤਿ ਸਮ੍ਪਨ੍ਨਦਾਨਸੀਲਾਦਿਪਾਰਮੀਪੁਞ੍ਞਵਾ. ਦਾਨਸੀਲਾਦਿ ਪਾਰਮੀਪੁਞ੍ਞੇਨ ਸਮਨ੍ਨਾਗਤੋ ਵਾ. ਦਾਨਸੀਲਾਦਿਪਾਰਮੀਪੁਞ੍ਞੇਨ ਉਪੇਤੋ ਸਮੁਪੇਤੋ ਉਪਗਤੋ ਸਮੁਪਗਤੋ ਸਮ੍ਪਨ੍ਨੋ ਸਮਨ੍ਨਾਗਤੋਤਿ ਅਤ੍ਥੋ. ਅਯਂ ਪਨੇਤ੍ਥ ਵਚਨਤ੍ਥੋ, ਉਪਨ੍ਨੋ ਸਮ੍ਪਨ੍ਨੋ ਹੁਤ੍ਵਾ ਏਤਿ ਗਚ੍ਛਤਿ ਪਵਤ੍ਤਤੀਤਿ ਉਪੇਤਂ, ਪੁਞ੍ਞਂ. ਉਪਪੁਬ੍ਬਇਧਾਤੁ ਗਤਿਯਂ ਤ. ਪੁਨਾਤਿ ਅਤ੍ਤਨੋ ਕਾਰਕਨ੍ਤਿ ਪੁਞ੍ਞਂ, ਪਾਰਮੀਪੁਞ੍ਞਂ ਲਬ੍ਭਤਿ. ਪੁਧਾਤੁ ਪੀਣਨੇ ਸੋਧਨੇ ਵਾ ਣ੍ਯੋ. ਤਸ੍ਸ ਞੋ. ਤਤ੍ਥ ਅਤ੍ਤਨੋ ਕਾਰਕਨ੍ਤਿ ਪੁਨਪ੍ਪੁਨਂ ਪਵਤ੍ਤਿਯਾ ਸਚਿਤ੍ਤਸਨ੍ਤਤਿਞ੍ਚ ਸਂਜਨਿਤਪਣੀਤਰੂਪਵਿਸਟੇਨ ਸਨਿਸ੍ਸਯ ਰੂਪਸਨ੍ਤਤਿਞ੍ਚ ਪੁਨਾਤਿ ਪੀਣੇਤਿ ਸੋਧੇਤਿ ਵਾਤਿ ਅਤ੍ਥੋ. ਅਯਂ ਪਟਿਸਮ੍ਭਿਦਾਮਗ੍ਗਗਣ੍ਠਿਪਦੇ ਵੁਤ੍ਤੋ. ਪੂਰੇਤਿ ਅਜ੍ਝਾਸਯਨ੍ਤਿ ਵਾ ਪੁਞ੍ਞਂ. ਪੂਰਧਾਤੁ ਣ੍ਯ. ਯੋ ਪੁਗ੍ਗਲੋ ਪੁਞ੍ਞਂ ਕਰੋਤਿ ਤਸ੍ਸ ਅਜ੍ਝਾਸਯਂ ਪੂਰੇਤੀਤਿ ਅਤ੍ਥੋ.

ਅਥ ਵਾ ਪੁਜ੍ਜਞ੍ਚ ਭਵਂ ਨਿਬ੍ਬਤ੍ਤੇਤੀਤਿ ਪੁਞ੍ਞਂ. ਨਿਬ੍ਬਤ੍ਤਿਤਦ੍ਧਿਤਾਯਂ. ਪੂਜ ਪਦਂ ਣ੍ਯਪਚ੍ਚਯੋ. ਯੋ ਪੁਞ੍ਞਂ ਕਰੋਤਿ, ਤਸ੍ਸ ਪੂਜਿਤਬ੍ਬਂ ਭਵਂ ਪਵਤ੍ਤੇਤੀਤਿ ਅਤ੍ਥੋ. ਤੇਨ ਵੁਤ੍ਤਂ ਸਮ੍ਮੋਹਵਿਨੋਦਨੀ ਅਟ੍ਠਕਥਾਯਂ ‘‘ਪੁਨਾਤਿ ਅਤ੍ਤਨੋ ਕਾਰਕਂ ਪੂਰੇਤਿ ਚਸ੍ਸ ਅਜ੍ਝਾਸਯਂ ਪੁਜ੍ਜਞ੍ਚ ਭਵਂ ਨਿਬ੍ਬਤ੍ਤੇਤੀਤਿ ਪੁਞ੍ਞੋ’’ਤਿ. ਮੂਲਟੀਕਾਯਞ੍ਚ ‘‘ਪੁਨਾਤੀਤਿ ਸੋਧੇਤਿ ਅਪੁਞ੍ਞਫਲਤੋ ਦੁਕ੍ਖਸਂਕਿਲੇਸਤੋ ਚ ਹਿਤਜ੍ਝਾਸਯੇਨ ਪੁਞ੍ਞਂ ਕਰੋਤੀਤਿ ਤਂ ਨਿਪ੍ਫਾਦਨੇਨ ਕਾਰਕਸ੍ਸਜ੍ਝਾਸਯਂ ਪੂਰੇਤੀਤਿ ਪੁਞ੍ਞੋ. ਪੂਰਕੋ ਪੁਜ੍ਜਨਿਬ੍ਬਤ੍ਤਕੋ ਚ ਨਿਰੁਤ੍ਤਿਲਕ੍ਖਣੇਨ ਪੁਞ੍ਞੋਤਿ ਵੇਦਿਤਬ੍ਬੋ’’ਤਿ ਵੁਤ੍ਤਂ. ਵਿਸੁਦ੍ਧਿਮਗ੍ਗਮਹਾਟੀਕਾਯਞ੍ਚ- ‘‘ਪੁਨਾਤਿ ਅਤ੍ਤਨੋ ਸਨ੍ਤਾਨਂ ਅਪੁਞ੍ਞਫਲਤੋ ਦੁਕ੍ਖਸਂਕਿਲੇਸਤੋ ਚ ਵਿਸੋਧੇਤੀਤਿ ਪੁਞ੍ਞਂ. ਹਿਤਸੁਖਜ੍ਝਾਸਯੇਨ ਪੁਞ੍ਞਂ ਕਰੋਤੀਤਿ ਤਂਨਿਪ੍ਫਾਦਨੇਨ ਕਾਰਕਸ੍ਸ ਅਜ੍ਝਾਸਯਂ ਪੂਰੇਤਿ, ਪੁਜ੍ਜਭਵਂ ਨਿਬ੍ਬਤ੍ਤੇਤੀਤਿ ਵਾ ਪੁਞ੍ਞਂ. ਇਤਿ ਪੂਰਕੋ ਪੁਜ੍ਜਨਿਬ੍ਬਤ੍ਤਕੋ ਚ ਨਿਰੁਤ੍ਤਿਨਯੇਨ ਪੁਞ੍ਞਨ੍ਤਿ ਵੇਦਿਤਬ੍ਬੋ’’ਤਿ ਵੁਤ੍ਤਂ. ਉਪੇਤਂ ਸਮ੍ਪਨ੍ਨਂ ਪੁਞ੍ਞਂ ਪਾਰਮੀਪੁਞ੍ਞਂ ਯਸ੍ਸ ਸੋਤਿ ਉਪੇਤਪੁਞ੍ਞੋ, ਸੁਗਤੋ ਲਬ੍ਭਤਿ.

ਵਰਬੋਧਿਮੂਲੇਤਿ ਉਤ੍ਤਮਸ੍ਸ ਬੋਧਿਰੁਕ੍ਖਸ੍ਸ ਸਮੀਪੇ. ਤਤ੍ਥ ਵਰੋਤਿ ਵਰਿਤਬ੍ਬੋ ਪਤ੍ਥਿਤਬ੍ਬੋ ਇਚ੍ਛਿਤਬ੍ਬੋਤਿ ਵਾ ਵਰੋ. ਬੋਧਿਮੂਲੇਤਿ ਏਤ੍ਥ ਬੋਧੀਤਿ ਵੁਚ੍ਚਤਿ ਰੁਕ੍ਖੋਪਿ, ਮਗ੍ਗੋਪਿ, ਸਬ੍ਬਞ੍ਞੁਤਞਾਣਮ੍ਪਿ, ਨਿਬ੍ਬਾਨਮ੍ਪਿ. ਤਤ੍ਥ ਹਿ ਬੋਧਿਰੁਕ੍ਖਮੂਲੇ ਪਠਮਾਭਿ ਸਮ੍ਬੁਦ੍ਧੋਤਿ ਚ, ਅਨ੍ਤਰਾ ਚ ਬੋਧਿਂ ਅਨ੍ਤਰਾ ਚ ਗਯਨ੍ਤਿ ਚ ਆਗਤਟ੍ਠਾਨੇ ਰੁਕ੍ਖੋ. ਬੋਧੀਤਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣਨ੍ਤਿ ਆਗਤਟ੍ਠਾਨੇ ਮਗ੍ਗੋ. ਪਪ੍ਪੋਤਿ ਬੋਧਿਂ ਵਰਭੂਰਿ ਮੇਧਸੋਤਿ ਆਗਤਟ੍ਠਾਨੇ ਸਬ੍ਬਞ੍ਞੁਤਞਾਣਂ. ਪਤ੍ਵਾਨ ਬੋਧਿਂ ਅਮਤਂ ਅਸਙ੍ਖਤਨ੍ਤਿ ਆਗਤਟ੍ਠਾਨੇ ਨਿਬ੍ਬਾਨਂ ਬੋਧੀਤਿ ਵੁਚ੍ਚਤਿ. ਇਧ ਪਨ ਬੋਧਿਰੁਕ੍ਖੋਤਿ ਅਧਿਪ੍ਪੇਤੋ. ਅਯਂ ਪਨ ਤੇਸਂ ਵਚਨਤ੍ਥੋ. ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਸਬ੍ਬਂ ਞੇਯ੍ਯਧਮ੍ਮਮ੍ਪਿ ਏਤ੍ਥਾਤਿ ਬੋਧਿ, ਬੋਧਿਰੁਕ੍ਖੋ. ਬੁਧਧਾਤੁ ਣਿ. ਬੁਜ੍ਝਤਿ ਚਤ੍ਤਾਰਿ ਸਚ੍ਚਾਨੀਤਿ ਬੋਧਿ, ਮਗ੍ਗੋ. ਬੁਜ੍ਝਤਿ ਸਬ੍ਬਞੇਯ੍ਯਧਮ੍ਮਨ੍ਤਿ ਬੋਧਿ, ਸਬ੍ਬਞ੍ਞੁਤਞਾਣਂ. ਅਰਿਯੇਨ ਬੁਜ੍ਝਿਤਬ੍ਬਨ੍ਤਿ ਬੋਧਿ, ਨਿਬ੍ਬਾਨਂ ਲਬ੍ਭਤਿ. ਵਰੋ ਉਤ੍ਤਮੋ ਬੋਧਿਰੁਕ੍ਖੋਤਿ ਵਰਬੋਧਿ, ਤਸ੍ਸ ਮੂਲਂ ਸਮੀਪਂ ਵਰਬੋਧਿਮੂਲਂ, ਤਸ੍ਮਿਂ.

ਸਸੇਨਮਾਰਨ੍ਤਿ ਸਹ ਸੇਨਾਯ ਪਵਤ੍ਤਂ ਮਾਰਰਾਜਂ. ਤਤ੍ਥ ਸਿਯਤਿ ਬਨ੍ਧਿਯਤੀਤਿ ਸੇਨਾ. ਸਿਧਾਤੁ ਬਨ੍ਧਨੇਯੁ. ਤਾਯ ਸਹ ਪਵਤ੍ਤਤੀਤਿ ਸਸੇਨੋ, ਮਾਰਰਾਜਾ. ਅਨਤ੍ਥੇ ਨਿਯੋਜੇਨ੍ਤੋ ਗੁਣਮਾਰਣੇਨ ਸਤ੍ਤੇ ਮਾਰੇਤੀਤਿ ਮਾਰੋ. ਮਰਧਾਤੁ ਣ. ਸਤ੍ਤਾਨਂ ਕੁਸਲਂ ਮਾਰੇਤਿ ਵਿਨਾਸੇਤੀਤਿ ਵਾ ਮਾਰੋ. ਸਸੇਨੋ ਚ ਸੋ ਮਾਰੋ ਚਾਤਿ ਸਸੇਨਮਾਰੋ, ਮਾਰਰਾਜਾ. ਤਂ. ਜਿਨਿਤ੍ਵਾਤਿ ਪਦੇ ਕਮ੍ਮਂ. ਉਪੇਤਪੁਞ੍ਞੋ ਯੋ ਸੁਗਤੋਤਿ ਸਮ੍ਬਨ੍ਧੋ. ਸੁਗਤਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਜਿਨਿਤ੍ਵਾਤਿ ਵਿਸਾਖਪੁਣ੍ਣਮਿਯਂ ਬੁਦ੍ਧਦਿਨੇ ਅਨਤ੍ਥਙ੍ਗਤੇਯੇਵ ਸੂਰਿਯੇ ਪਾਰਮੀਪੁਞ੍ਞਤੇਜੇਨ ਵਿਜਯਿਤ੍ਵਾਤਿ ਅਤ੍ਥੋ. ਅਬੋਜ੍ਝੀਤਿ ਪਟਿਵਿਜ੍ਝਿ ਅਧਿਗਮਿ ਵਾ. ਬੋਧਿਨ੍ਤਿ ਅਨੁਤ੍ਤਰਂ ਸਮ੍ਮਾ ਸਮ੍ਬੋਧਿਂ, ਅਰਹਤ੍ਤਮਗ੍ਗਸਬ੍ਬਞ੍ਞੁਤਞਾਣਨ੍ਤਿ ਅਤ੍ਥੋ. ਸਬ੍ਬਞ੍ਞੁਤ ਞਾਣਪਦਟ੍ਠਾਨਞ੍ਹਿ ਮਗ੍ਗਞਾਣਂ, ਮਗ੍ਗਞਾਣਪਦਟ੍ਠਾਨਞ੍ਚ ਸਬ੍ਬਞ੍ਞੁਤਞਾਣਂ ਬੋਧੀਤਿ ਵੁਚ੍ਚਤਿ. ਤਂ ਬੋਧਿਂ.

ਅਰੁਣੋਦਯਮ੍ਹੀਤਿ ਅਰੁਣਉਦਯਮ੍ਹੀਤਿ ਪਦਚ੍ਛੇਦੋ. ਅਰੁਣੁਗ੍ਗਮਨਵੇਲਾਯਨ੍ਤਿ ਅਤ੍ਥੋ. ਤਤ੍ਥ ਆਸਮਨ੍ਤਤੋ ਆਲੋਕਂ ਕਰੋਨ੍ਤੋ ਉਨਤਿ ਗਚ੍ਛਤੀਤਿ ਅਰੁਣੋ. ਆਪੁਬ੍ਬਉਨਧਾਤੁ ਗਤਿਮ੍ਹਿ ਣ. ਆਕਾਰਸ੍ਸ ਰਸ੍ਸੋ. ਰਕਾਰਾਗਮੋ. ਨਸ੍ਸ ਣੋ. ਸੂਰਿਯਸ੍ਸ ਉਦਯਤੋ ਪੁਬ੍ਬੇ ਉਗ੍ਗਤਰਂਸਿ ਅਰੁਣੋ ਨਾਮਾਤਿ ਅਤ੍ਥੋ. ਵੁਤ੍ਤਞ੍ਹਿ ਦਸਕਨਿਪਾਤ ਅਙ੍ਗੁਤ੍ਤਰਪਾਲ਼ਿਯਂ ‘‘ਸੂਰਿਯਸ੍ਸ ਭਿਕ੍ਖਵੇ ਉਦਯਤੋ ਏਤਂ ਪੁਬ੍ਬਙ੍ਗਮਂ ਏਤਂ ਪੁਬ੍ਬਨਿਮਿਤ੍ਤਂ ਯਦਿਦਂ ਅਰੁਣੁਗ੍ਗਂ, ਏਵਮੇਵ ਖੋ ਭਿਕ੍ਖਵੇ ਕੁਸਲਾਨਂ ਧਮ੍ਮਾਨਂ ਏਤਂ ਪੁਬ੍ਬਙ੍ਗਮਂ ਏਤਂ ਪੁਬ੍ਬਨਿਮਿਤ੍ਤਂ ਯਦਿਦਂ ਸਮ੍ਮਾਦਿਟ੍ਠੀ’’ਤਿ. ਯਂ ਸਨ੍ਧਾਯ ਵੁਤ੍ਤਂ ਅਭਿਧਾਨਪ੍ਪਦੀਪਿਕਾਯਂ ‘‘ਸੂਰਸ੍ਸੋਦਯਤੋ ਪੁਬ੍ਬੁ, ਟ੍ਠਿਤਰਂਸਿ ਸਿਯਾਰੁਣੋ’’ਤਿ. ਅਭਿਧਾਨਪ੍ਪਦੀਪਿਕਾਟੀਕਾਯਂ ਪਨ ‘‘ਅਰੁਣਵਣ੍ਣਤਾਯ ਅਰਤਿ ਗਚ੍ਛਤੀਤਿ ਅਰੁਣੋ’’ਤਿ ਵੁਤ੍ਤਂ. ਉਦੇਤਿ ਉਗ੍ਗਚ੍ਛਤੀਤਿ ਉਦਯੋ, ਸੂਰਿਯੋ. ਉਦਿਧਾਤੁ ਅ. ਉਦਯਸ੍ਸ ਸੂਰਿਯਸ੍ਸ ਅਰੁਣੋ ਉਗ੍ਗਤਰਂਸੀਤਿ ਅਰੁਣੋਦਯੋ. ਤਸ੍ਸਂ ਅਰੁਣੁਗ੍ਗਮਨਵੇਲਾਯਂ. ਬੋਧਿਂ ਅਬੋਜ੍ਝੀਤਿ ਸਮ੍ਬਨ੍ਧੋ.

ਭਗਵਾ ਹਿ ਵਿਸਾਖਪੁਣ੍ਣਮਿਯਂ ਅਨਤ੍ਥਙ੍ਗਤੇਯੇਵ ਸੂਰਿਯੇ ਮਾਰਬਲਂ ਵਿਧਮੇਤ੍ਵਾ ਚੀਵਰੂਪਰਿ ਪਤਮਾਨੇਹਿ ਬੋਧਿਰੁਕ੍ਖਙ੍ਕਰੇਹਿ ਰਤ੍ਤਪਵਾਲ਼ਪਲ੍ਲਵੇਹਿ ਵਿਯ ਪੂਜਯਮਾਨੋ ਰਤ੍ਤਿਯਾ ਪਠਮਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਿਤ੍ਵਾ ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਪਚ੍ਛਿਮਯਾਮੇ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪਟਿਲੋਮਂ ਮਨਸਿਕਰਿਤ੍ਵਾ ਆਨਾਪਾਨਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਤਦੇਵ ਪਾਦਕਂ ਕਤ੍ਵਾ ਮਹਾਵਜਿਰਞਾਣਸਙ੍ਖਾਤਂ ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗਪਟਿਪਾਟਿਯਾ ਅਧਿਗਤੇਨ ਚਤੁਤ੍ਥਮਗ੍ਗਞਾਣੇਨ ਸਬ੍ਬਕਿਲੇਸੇ ਖੇਪੇਤ੍ਵਾ ਯਦਾ ਅਰੁਣੋ ਉਗ੍ਗਮਿਸ੍ਸਤਿ, ਤਦਾ ਸਬ੍ਬਞ੍ਞੁਤਞਾਣਾਦਿਸਬ੍ਬ ਬੁਦ੍ਧਗੁਣੇ ਪਟਿਵਿਜ੍ਝਿ ਅਧਿਗਮੀਤਿ ਵੁਤ੍ਤਂ ਹੋਤਿ.

ਮਾਰਜਿਨਨ੍ਤਿ ਪਞ੍ਚਮਾਰਾਨਂ ਵਿਜਿਤਾਵਿਂ. ਦੇਵਪੁਤ੍ਤ ਕਿਲੇਸਾਭਿ ਸਙ੍ਖਾਰਖਨ੍ਧਮਚ੍ਚੁਸਙ੍ਖਾਤੇ ਪਞ੍ਚਮਾਰੇ ਜਿਨਾਤਿ ਅਜਿਨਿ ਜਿਨਿਸ੍ਸਤੀਤਿ ਮਾਰਜਿਨੋ, ਸੁਗਤੋ. ਦੇਵਪੁਤ੍ਤਕਿਲੇਸਾਭਿਸਙ੍ਖਰਸਙ੍ਖਤਂ ਮਾਰਤ੍ਤਯਂ ਜਿਨਾਤਿ ਅਜਿਨਿ, ਖਨ੍ਧਮਚ੍ਚੁਸਙ੍ਖਤਂ ਮਾਰਦ੍ਵਯਂ ਅਵਸ੍ਸਂ ਜਿਨਿਸ੍ਸਤੀਤਿ ਅਤ੍ਥੋ. ਯਦਿ ਏਵਂ ਕਸ੍ਮਾ ਵਿਜਿਤਾਵਿਨ੍ਤਿ ਵੁਤ੍ਤਨ੍ਤਿ. ਅਵਿਰਦ੍ਧਂ ਏਕਨ੍ਤੇਨ ਜਿਯਮਾਨਤ੍ਤਾਤਿ. ਅਭਙ੍ਗਨ੍ਤਿ ਸਸੇਨਮਾਰਸ੍ਸ ਭਞ੍ਜਿਤੁਂ ਵਿਦ੍ਧਂਸਿਤੁਂ ਅਸਮਤ੍ਥਂ. ਯਸ੍ਸ ਕਸ੍ਸਚਿ ਭਞ੍ਜਿਤੁਂ ਵਿਦ੍ਧਂਸਿਤੁਂ ਅਸਮਤ੍ਥਂ ਵਾ. ਤਤ੍ਰਾਯਂ ਵਚਨਤ੍ਥੋ. ਮਾਰੇਨ ਯੇਨ ਕੇਨਚਿ ਭਞ੍ਜਿਤੁਂ ਨ ਸਕ੍ਕੋਤੀਤਿ ਅਭਙ੍ਗੋ, ਤੇਨ ਵਾ ਨ ਭਞ੍ਜਿਯਤਿ ਨ ਵਿਦ੍ਧਂਸਿਯਤੀਤਿ ਅਭਙ੍ਗੋ, ਸੁਗਤੋ. ਨਪੁਬ੍ਬ ਭਨ੍ਜਧਾਤੁ ਤ. ਤਸ੍ਸ ਧਾਤ੍ਵਨ੍ਤੇਨ ਗਕਾਰਾਦੇਸੋ. ਅਥ ਵਾ ਭਨ੍ਜਤਿ ਵਿਦ੍ਧਂਸਤੀਤਿ ਭਙ੍ਗੋ, ਮਾਰੋ. ਯੋ ਕੋਚਿ ਵਾ. ਨਤ੍ਥਿ ਭਙ੍ਗੋ ਮਾਰੋ ਯੋ ਕੋਚਿ ਵਾ ਯਸ੍ਸਾਤਿ ਅਭਙ੍ਗੋ, ਸੁਗਤੋ. ਤਂ ਅਭਙ੍ਗਂ. ਤਨ੍ਤਿ ਸੁਗਤਂ. ਮਾਰਜਿਨਂ ਅਭਙ੍ਗਂ ਤਂ ਸੁਗਤਂ ਅਹਂ ਨਮਾਮੀਤਿ ਸਮ੍ਬਨ੍ਧੋ.

ਇਮਿਸ੍ਸਂ ਪਨ ਗਾਥਾਯਂ ਏਕਨਿਪਾਤਜਾਤਕਟ੍ਠਕਥਾਯਂ, ਅਪਦਾਨਟ੍ਠਕਥਾਯਞ੍ਚ ਆਗਤਨਯੇਨ ਬੁਦ੍ਧਸ੍ਸ ਮਾਰਵਿਜਯਾਦਿਂ ਸੋਤੁਜਨਾਨਂ ਬਹੁਸ੍ਸੁਤਤ੍ਥਂ ਸਙ੍ਖੇਪੇਨ ਵੇਦਿਤਬ੍ਬਂ. ਬੋਧਿ ਸਤ੍ਤੋ ਹਿ ਮਹਾਸਮ੍ਪਤ੍ਤਿਂ ਅਨੁਭਵਿਤ੍ਵਾ ਹਤ੍ਥਗਤਂ ਚਕ੍ਕਵਤ੍ਤਿਰਜ੍ਜਂ ਖੇਲ਼ਪਿਣ੍ਡਂ ਵਿਯ ਅਨਪੇਕ੍ਖੋ ਛਟ੍ਟੇਤ੍ਵਾ ਏਕੂਨਤਿਂਸਵਸ੍ਸੇ ਆਸਲ਼੍ਹਿਪੁਣ੍ਣਮਾਯ ਉਤ੍ਤਰਸਲ਼੍ਹਨਕ੍ਖਤ੍ਤੇਨ ਯੁਤ੍ਤੇ ਮਹਾਭਿਨਿਕ੍ਖਮਂ ਨਿਕ੍ਖਮਿਤ੍ਵਾ ਅਨੋਮਨਦੀਤੀਰੇ ਘਟੀਕਾਰਬ੍ਰਹ੍ਮੁਨਾ ਦਿਨ੍ਨਂ ਅਰਹਤ੍ਤ ਧਜਭੂਤਂ ਅਟ੍ਠਪਰਿਕ੍ਖਾਰਂ ਪਟਿਗ੍ਗਹੇਤ੍ਵਾ ਨਿਵਾਸੇਤ੍ਵਾ ਸਮਣਪਬ੍ਬਜ੍ਜਂ ਕਤ੍ਵਾ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਂ ਚਰਿਤ੍ਵਾ ਨਿਗ੍ਰੋਧਰੁਕ੍ਖਮੂਲੇ ਸੇਨਨਿਗਮੇ ਸੇਨਕੁਟੁਮ੍ਬਿਕਸ੍ਸ ਧੀਤਰਾਯ ਸੁਜਾਤਾਯ ਸਹ ਸਤਸਹਸ੍ਸਗ੍ਘਿਯਾ ਸੁਵਣ੍ਣਪਾਤਿਯਾ ਦਿਨ੍ਨਂ ਸਬ੍ਬਂ ਅਪ੍ਪੋਦਕਂ ਮਧੁਪਾਯਾਸਂ ਏਕਟ੍ਠਿਤਾਲਪਕ੍ਕਪ੍ਪਮਾਣਂ ਏਕੂਨਪਞ੍ਞਾਸਾਲੋਪਂ ਪਰਿਭੁਞ੍ਜਿਤ੍ਵਾ ਸਾਯਨ੍ਹਸਮਯੇ ਦੇਵਤਾਹਿ ਅਲਙ੍ਕਤੇਨ ਮਗ੍ਗੇਨ ਬੋਧਿਰੁਕ੍ਖਾਭਿਮੁਖੋ ਗਚ੍ਛਨ੍ਤੇ ਅਨ੍ਤਰਮਗ੍ਗੇ ਸੋਤ੍ਥਿਯੇਨ ਨਾਮ ਤਿਣਹਾਰਕੇਨ ਦਿਨ੍ਨਂ ਅਟ੍ਠਮੁਟ੍ਠਿਕਤਿਣਂ ਗਹੇਤ੍ਵਾ ਬੋਧਿਮਣ੍ਡਂ ਆਰੁਯ੍ਹ ਇਦਂ ਠਾਨਂ ਸਬ੍ਬਬੁਦ੍ਧਾਨਂ ਅਵਿਜਹਿਤਂ ਅਚਲਟ੍ਠਾਨਂ ਕਿਲੇਸਭਞ੍ਜਨਟ੍ਠਾਨਨ੍ਤਿ ਞਤ੍ਵਾ ਤਾਨਿ ਤਿਣਾਨਿ ਅਗ੍ਗੇ ਗਹੇਤ੍ਵਾ ਚਾਲੇਸਿ. ਤਾਵਦੇਵ ਚੁਦ੍ਦਸਹਤ੍ਥੋ ਪਲ੍ਲਙ੍ਕੋ ਅਹੋਸਿ. ਤਾਨਿਪਿ ਤਿਣਾਨਿ ਤਥਾਰੂਪੇਨ ਸਣ੍ਠਾਨੇਨ ਸਨ੍ਥਰਿਂਸੁ ਸਣ੍ਠਹਿਂਸੁ ਵਾ. ਯਥਾਰੂਪਂ ਸੁਕੁਸਲੋਪਿ ਵਿਚਿਤ੍ਤਕਾਰੋ ਵਾ ਪੋਤ੍ਥਤਾਰੋ ਵਾ ਆਲਿਖਿਤੁਮ੍ਪਿ ਸਮਤ੍ਥੋ ਨਤ੍ਥਿ. ਬੋਧਿ ਸਤ੍ਤੋ ਬੋਧਿਖਨ੍ਧਂ ਪਿਟ੍ਠਿਤੋ ਕਤ੍ਵਾ ਪੁਰਤ੍ਥਾਭਿਮੁਖੋ ਦਲ਼੍ਹਮਾਨਸੋ ਹੁਤ੍ਵਾ –

‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸੁਸ੍ਸਤੁ;

ਉਪਸੁਸ੍ਸਤੁ ਨਿਸੇਸਂ, ਸਰੀਰੇ ਮਂਸਲੋਹਿਤ’’ਨ੍ਤਿ.

ਨ ਤ੍ਵੇਵ ਸਮ੍ਮਾਸਮ੍ਬੋਧਿਂ ਅਪਤ੍ਵਾ ਇਮਂ ਪਲ੍ਲਙ੍ਕਂ ਭਿਨ੍ਦਿਸ੍ਸਾਮੀਤਿ ਅਸਨਿਸਤਸਨ੍ਨਿਪਾਤੇਨਪਿ ਅਭੇਜ੍ਜਰੂਪਂ ਤਂ ਪਲ੍ਲਙ੍ਕਂ ਅਭਞ੍ਜਿਤ੍ਵਾ ਨਿਸੀਦਿ. ਤਸ੍ਮਿਂ ਸਮਯੇ ਮਾਰੋ ਦੇਵਪੁਤ੍ਤੋ ਸਿਦ੍ਧਤ੍ਥਕੁਮਾਰੋ ‘‘ਮਯ੍ਹਂ ਵਸਂ ਅਤਿਕ੍ਕਮਿਤੁਕਾਮੋ, ਨ ਦਾਨਿ ਅਸ੍ਸ ਅਤਿਕ੍ਕਮਿਤੁਂ ਦਸ੍ਸਾਮੀ’’ਤਿ ਮਾਰਬਲਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਤਮਤ੍ਥਂ ਆਰੋਚੇਤ੍ਵਾ ਮਾਰਘੋਸਨਂ ਨਾਮ ਘੋਸਾਪੇਤ੍ਵਾ ਮਾਰਬਲਂ ਆਦਾਯ ਨਿਕ੍ਖਮਿ. ਸਾ ਮਾਰਸੇਨਾ ਮਾਰਸ੍ਸ ਪੁਰਤੋ ਦ੍ਵਾਦਸ ਯੋਜਨਾ ਹੋਨ੍ਤਿ. ਦਕ੍ਖਿਣਤੋ ਚ ਵਾਮਤੋ ਚ ਦ੍ਵਾਦਸ ਯੋਜਨਾ. ਪਚ੍ਛਤੋ ਚਕ੍ਕਵਾਲ਼ਪਰਿਯਨ੍ਤਂ ਕਤ੍ਵਾ ਠਿਤਾ, ਉਦ੍ਧਂ ਨਵਯੋਜਨੁਬ੍ਬੇਧਾ. ਯਸ੍ਸਾ ਉਨ੍ਨਾਦਨ੍ਤਿਯਾ ਉਨ੍ਨਾਦਸਦ੍ਦੋ ਯੋਜਨਸਹਸ੍ਸਤੋ ਪਟ੍ਠਾਯ ਪਥਵੀਉਨ੍ਦ੍ਰਿਯਸਦ੍ਦੋ ਵਿਯ ਸੁਯ੍ਯਤਿ. ਅਥ ਮਾਰੋ ਦੇਵਪੁਤ੍ਤੋ ਦਿਯਡ੍ਢਯੋਜਨਸਤਿਕਂ ਗਿਰਿਮੇਖਲਂ ਨਾਮ ਹਤ੍ਥਿਂ ਅਭਿਰੂਹਿਤ੍ਵਾ ਬਾਹੁਸਹਸ੍ਸਂ ਮਾਪੇਤ੍ਵਾ ਨਾਨਾਵੁਧਾਨਿ ਅਗ੍ਗਹੇਸਿ. ਅਵਸੇਸਾਯਪਿ ਮਾਰਪਰਿਸਾਯ ਦ੍ਵੇ ਜਨਾ ਏਕਸਦਿਸਂ ਆਵੁਧਂ ਨ ਗਣ੍ਹਿਂਸੁ. ਨਾਨਪ੍ਪਕਾਰਵਣ੍ਣਾ ਨਾਨਪ੍ਪਕਾਰ ਮੁਖਾ ਹੁਤ੍ਵਾ ਮਹਾਸਤ੍ਤਂ ਅਜ੍ਝੋਤ੍ਥਰਮਾਨਾ ਆਗਮਂਸੁ.

ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਪਨ ਮਹਾਸਤ੍ਤਸ੍ਸ ਥੁਤਿ ਯੋ ਵਦਮਾਨਾ ਅਟ੍ਠਂਸੁ. ਸਕ੍ਕੋ ਦੇਵਰਾਜਾ ਵਿਜਯੁਤ੍ਤਰਸਙ੍ਖਂ ਧਮਮਾਨੋ ਅਟ੍ਠਾਸਿ. ਸੋ ਕਿਰ ਸਙ੍ਖੋ ਵੀਸਹਤ੍ਥਸਤਿਕੋ ਹੋਤਿ. ਸਕਿਂ ਵਾਤਂ ਗਾਹਾਪੇਤ੍ਵਾ ਧਮਨ੍ਤੋ ਚਤ੍ਤਾਰੋ ਮਾਸੇ ਸਦ੍ਦਂ ਕਰਿਤ੍ਵਾ ਨਿਸ੍ਸਦ੍ਦੋ ਹੋਤਿ. ਮਹਾਕਾਲ਼ਨਾਗ ਰਾਜਾ ਅਤਿਰੇਕਪਦਸਤੇਨ ਵਣ੍ਣਂ ਵਦਨ੍ਤੋ ਅਟ੍ਠਾਸਿ. ਮਹਾਬ੍ਰਹ੍ਮਾ ਸੇਤਚ੍ਛਤ੍ਤਂ ਧਾਰਯਮਾਨੋ ਅਟ੍ਠਾਸਿ. ਮਾਰ ਬਲੇ ਪਨ ਬੋਧਿਮਣ੍ਡਲਂ ਉਪਸਙ੍ਕਮਨ੍ਤੇ ਤੇਸਂ ਏਕੋਪਿ ਠਾਤੁਂ ਨਾਸਕ੍ਖਿ. ਸਮ੍ਮੁਖ ਸਮ੍ਮੁਖਟ੍ਠਾਨੇਨੇਵ ਪਲਾਯਿਂਸੁ. ਕਾਲ਼ੋ ਨਾਮ ਨਾਗਰਾਜਾ ਪਥਵਿਂ ਨਿਮੁਜ੍ਜਿਤ੍ਵਾ ਪਞ੍ਚਯੋਜਨਸਤਿਕਂ ਮਨ੍ਤਿਰਕਨਾਗਭਵਨਂ ਗਨ੍ਤ੍ਵਾ ਉਭੋਹਿ ਹਤ੍ਥੇਹਿ ਮੁਖਂ ਪਿਦਹਿਤ੍ਵਾ ਨਿਪਨ੍ਨੋ. ਸਕ੍ਕੋ ਵਿਜਯੁਤ੍ਤਰਸਙ੍ਖਂ ਪਿਟ੍ਠਿਯਂ ਕਤ੍ਵਾ ਚਕ੍ਕਵਾਲ਼ਮੁਖ ਵਟ੍ਟਿਯਂ ਅਟ੍ਠਾਸਿ. ਮਹਾਬ੍ਰਹ੍ਮਾ ਸੇਤਚ੍ਛਤ੍ਤਂ ਕੋਟਿਯਂ ਗਹੇਤ੍ਵਾ ਬ੍ਰਹ੍ਮਲੋਕਮੇਵ ਅਗਮਾਸਿ. ਏਕਦੇਵਤਾਪਿ ਠਾਤੁਂ ਸਮਤ੍ਥੋ ਨਾਮ ਨਾਹੋਸਿ. ਮਹਾਪੁਰਿਸੋ ਏਕਕੋਵ ਨਿਸੀਦਿ. ਮਾਰੋਪਿ ਅਤ੍ਤਨੋ ਪਰਿਸਂ ਆਹ ‘‘ਤਾਤ ਸੁਦ੍ਧੋਦਨਪੁਤ੍ਤੇਨ ਸਿਦ੍ਧਤ੍ਥੇਨ ਸਦਿਸੋ ਅਞ੍ਞੋ ਪੁਰਿਸੋ ਨਾਮ ਨਤ੍ਥਿ, ਮਯਂ ਸਮ੍ਮੁਖਾ ਯੁਦ੍ਧਂ ਦਾਤੁਂ ਨ ਸਕ੍ਖਿਸ੍ਸਾਮ, ਪਚ੍ਛਾ ਭਾਗੇਨ ਦਸ੍ਸਾਮਾ’’ਤਿ. ਮਹਾਪੁਰਿਸੋਪਿ ਤੀਣਿ ਪਸ੍ਸਾਨਿ ਓਲੋਕੇਤ੍ਵਾ ਸਬ੍ਬਦੇਵਤਾਨਂ ਪਲਾਯਿਤਤ੍ਤਾ ਸੁਞ੍ਞਾਨਿ ਅਦ੍ਦਸ. ਪੁਨ ਉਤ੍ਤਰਪਸ੍ਸੇਨ ਮਾਰਬਲਂ ਅਜ੍ਝੋਤ੍ਥਰਮਾਨਂ ਦਿਸ੍ਵਾ ‘‘ਅਯਂ ਏਤ੍ਤਕੋ ਜਨੋ ਮਂ ਏਕਕਂ ਸਨ੍ਧਾਯ ਮਹਨ੍ਤਂ ਵਾਯਾਮਂ ਕਰੋਤਿ, ਇਮਸ੍ਮਿਂ ਠਾਨੇ ਮਯ੍ਹਂ ਮਾਤਾ ਵਾ ਪਿਤਾ ਵਾ ਭਾਤਾ ਵਾ ਅਞ੍ਞੋ ਕੋਚਿ ਞਾਤਕੋ ਵਾ ਨਤ੍ਥਿ, ਇਮਾ ਪਨ ਦਸ ਪਾਰਮਿਯੋਵ ਮਯ੍ਹਂ ਦੀਘਰਤ੍ਤਂ ਪੁਤ੍ਤਪਰਿਜਨਸਦਿਸਾ, ਤਸ੍ਮਾ ਮਯਾ ਪਾਰਮਿਯੋਵ ਫਲਕਂ ਕਤ੍ਵਾ ਪਾਰਮਿਸਤ੍ਥੇਨੇਵ ਪਹਰਿਤ੍ਵਾ ਅਯਂ ਬਲਕਾਯੋ ਮਯਾ ਵਿਦ੍ਧਂਸੇਤੁਂ ਵਟ੍ਟਤੀ’’ਤਿ ਦਸ ਪਾਰਮਿਯੋ ਆਵਜ੍ਜਮਾਨੋ ਨਿਸੀਦਿ.

ਅਥ ਮਾਰੋ ਦੇਵਪੁਤ੍ਤੋ ਏਤੇਨੇਵ ਸਿਦ੍ਧਤ੍ਥਂ ਪਲਾਪੇਸ੍ਸਾਮੀਤਿ ਵਾਤਮਣ੍ਡਲਂ ਸਮੁਟ੍ਠਾਪੇਸਿ. ਤਙ੍ਖਣਞ੍ਞੇਯੇਵ ਪੁਰਤ੍ਥਿਮਾ ਦਿਭੇਦਾ ਵਾਤਾ ਸਮੁਟ੍ਠਹਿਤ੍ਵਾ ਅਡ੍ਢਯੋਜਨਏਕਯੋਜਨ ਦ੍ਵਿਯੋਜਨਤਿਯੋਜਨਪ੍ਪਮਾਣਾਨਿ ਪਬ੍ਬਤਕੂਟਾਨਿ ਪਦਾਲੇਤ੍ਵਾ ਵਨਗਚ੍ਛਰੁਕ੍ਖਾਦੀਨਿ ਉਦ੍ਧਂ ਮੂਲਾਨਿ ਕਤ੍ਵਾ ਸਾਮਨ੍ਤਾ ਗਾਮਨਿਗਮੇ ਚੁਣ੍ਣਵਿਚੁਣ੍ਣਂ ਕਾਤੁਂ ਸਮਤ੍ਥਾਪਿ ਮਹਾਪੁਰਿਸਸ੍ਸ ਪੁਞ੍ਞਤੇਜੇਨ ਮਹਾਨੁਭਾਵੇਨ ਬੋਧਿਸਤ੍ਤਂ ਪਤ੍ਵਾ ਚੀਵਰਕਣ੍ਣਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿਂਸੁ. ਤਤੋ ਉਦਕੇਨ ਅਜ੍ਝੋਤ੍ਥਰਿਤ੍ਵਾ ਮਾਰੇਸ੍ਸਾਮਾਤਿ ਮਹਾਵਸ੍ਸਂ ਸਮੁਟ੍ਠਾਪੇਸਿ. ਤਸ੍ਸਾਨੁਭਾਵੇਨ ਉਪਰੂਪਰਿ ਸਤਪਟਲਸਹਸ੍ਸਪਟਲਾਦਿਭੇਦਾ ਵਲ਼ਾਹਕਾ ਉਟ੍ਠਹਿਤ੍ਵਾ ਵਸ੍ਸਿਂਸੁ. ਵੁਟ੍ਠਿਧਾਰਾਵੇਗੇਨ ਪਥਵੀ ਭਿਨ੍ਨਾ ਅਹੋਸਿ. ਵਨਰੁਕ੍ਖਾਦੀਨਂ ਉਪਰਿਭਾਗੇਨ ਮਹਾਮੇਘੋ ਆਗਨ੍ਤ੍ਵਾ ਮਹਾ ਸਤ੍ਤਸ੍ਸ ਚੀਵਰੇ ਉਸ੍ਸਾਵਬਿਨ੍ਦੁਗ੍ਗਹਣਮਤ੍ਤਮ੍ਪਿ ਤੇਮੇਤੁਂ ਨਾਸਕ੍ਖਿ. ਤਤੋ ਪਾਸਾਣਵਸ੍ਸਂ ਸਮੁਟ੍ਠਾਪੇਸਿ. ਮਹਨ੍ਤਾਨਿ ਪਬ੍ਬਤਕੂਟਾਨਿ ਧੂਮਾਯਨ੍ਤਾਨਿ ਪਜ੍ਜਲਨ੍ਤਾਨਿ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਮਾਲਾਗੁਲ਼ਭਾਵਂ ਆਪਜ੍ਜਿਂਸੁ. ਤਤੋ ਪਹਰਵਸ੍ਸਂ ਸਮੁਟ੍ਠਾਪੇਸਿ. ਏਕਤੋਧਾਰਾ ਉਭਤੋਧਾਰਾ ਅਸਿਸਤ੍ਤਿਖੁਰਪ੍ਪਾਦਯੋ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਂ ਪਤ੍ਵਾ ਦਿਬ੍ਬਪੁਪ੍ਫਾਨਿ ਅਹੇਸੁਂ. ਤਤੋ ਅਙ੍ਗਾਰਵਸ੍ਸਂ ਸਮੁਟ੍ਠਾਪੇਸਿ. ਕਿਂਸੁਕਵਣ੍ਣਾ ਅਙ੍ਗਾਰਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬ ਪੁਪ੍ਫਾਨਿ ਹੁਤ੍ਵਾ ਵਿਕਿਰਿਂਸੁ. ਤਤੋ ਕੁਕ੍ਕੁਲ਼ਵਸ੍ਸਂ ਸਮੁਟ੍ਠਾਪੇਸਿ. ਅਚ੍ਚੁਣ੍ਹੋ ਅਗ੍ਗਿਵਣ੍ਣੋ ਕੁਕ੍ਕੁਲ਼ੋ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਚਨ੍ਦਨਚੁਣ੍ਣਂ ਹੁਤ੍ਵਾ ਨਿਪਤਤਿ. ਤਤੋ ਵਾਲ਼ੁਕਵਸ੍ਸਂ ਸਮੁਟ੍ਠਾਪੇਸਿ. ਅਤਿਸੁਖੁਮਵਾਲ਼ਿਕਾ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਨਿਪਤਿਂਸੁ. ਤਤੋ ਕਲਲਵਸ੍ਸਂ ਸਮੁਟ੍ਠਾਪੇਸਿ. ਤਂ ਕਲਲਵਸ੍ਸਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਆਕਾਸੇ ਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਵਿਲੇਪਨਂ ਹੁਤ੍ਵਾ ਪਤਤਿ. ਤਤੋ ਇਮਿਨਾ ਭਿਂਸੇਤ੍ਵਾ ਸਿਦ੍ਧਤ੍ਥਂ ਪਲਾਪੇਸ੍ਸਾਮੀਤਿ ਅਨ੍ਧਕਾਰਂ ਸਮੁਟ੍ਠਾਪੇਸਿ. ਤਂ ਚਤੁਰਙ੍ਗਸਮਨ੍ਨਾਗਤਂ ਅਨ੍ਧਕਾਰਂ ਵਿਯ ਮਹਾਤਮਂ ਹੁਤ੍ਵਾ ਬੋਧਿਸਤ੍ਤਂ ਪਤ੍ਵਾ ਸੂਰਿਯਪ੍ਪਭਾ ਵਿਹਤਂ ਵਿਯ ਅਨ੍ਤਰਧਾਯਤਿ.

ਏਵਂ ਮਾਰੋ ਇਮਾਹਿ ਨਵਹਿ ਵਾਤਵਸ੍ਸਪਾਸਾਣਪਹਰਅਙ੍ਗਾਰ ਕੁਕ੍ਕੁਲ਼ਵਾਲ਼ੁਕ ਕਲਲਅਨ੍ਧਕਾਰਵੁਟ੍ਠੀਹਿ ਬੋਧਿਸਤ੍ਤਂ ਪਲਾਪੇਤੁਂ ਅਸਕ੍ਕੋਨ੍ਤੋ ‘‘ਕਿਂ ਭਣੇ ਤਿਟ੍ਠਥ ਇਮਂ ਸਿਦ੍ਧਤ੍ਥਕੁਮਾਰਂ ਗਣ੍ਹਥ ਹਨਥ ਪਲਾਪੇਥਾ’’ਤਿ ਪਰਿਸਂ ਆਣਾਪੇਤ੍ਵਾ ਸਯਮ੍ਪਿ ਗਿਰਿਮੇਖਲਸ੍ਸ ਹਤ੍ਥਿਨੋ ਖਨ੍ਧੇ ਨਿਸਿਨ੍ਨੋ ਚਕ੍ਕਾਵੁਧਂ ਆਦਾਯ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਸਿਦ੍ਧਤ੍ਥ ਉਟ੍ਠਾਹਿ ਏਤਸ੍ਮਾ ਪਲ੍ਲਙ੍ਕਾ, ਨਾਯਂ ਤੁਮ੍ਹਾਕਂ ਪਾਪੁਣਾਤਿ, ਮਯ੍ਹਂਏਵ ਪਾਪੁਣਾਤੀ’’ਤਿ ਆਹ. ਮਹਾਸਤ੍ਤੋ ਤਸ੍ਸ ਵਚਨਂ ਸੁਤ੍ਵਾ ਅਵੋਚ ‘‘ਮਾਰ ਨੇਵ ਤਯਾ ਦਸਪਾਰਮਿਯੋ ਪੂਰਿਤਾ, ਨ ਉਪਪਾਰਮਿਯੋ ਨ ਪਰਮਤ੍ਥ ਪਾਰਮਿਯੋ ਨਾਪਿ ਪਞ੍ਚਮਹਾਪਰਿਚ੍ਚਾਗਾ ਪਰਿਚ੍ਚਤ੍ਤਾ ਨ ਞਾਤਤ੍ਥਚਰਿਯਾ ਨ ਲੋਕਤ੍ਥਚਰਿਯਾ ਨ ਬੁਦ੍ਧਤ੍ਥਚਰਿਯਾ ਪੂਰਿਤਾ, ਸਬ੍ਬਾ ਤਾ ਮਯਾਯੇਵ ਪੂਰਿਤਾ, ਤਸ੍ਮਾ ਨਾਯਂ ਪਲ੍ਲਙ੍ਕੋ ਤੁਯ੍ਹਂ ਪਾਪੁਣਾਤਿ, ਮਯ੍ਹਮੇਵ ਪਾਪੁਣਾਤੀ’’ਤਿ. ਮਾਰੋ ਕੁਦ੍ਧੋ ਕੋਧਵੇਗਂ ਅਸਹਨ੍ਤੋ ਮਹਾਪੁਰਿਸਸ੍ਸ ਚਕ੍ਕਾਵੁਧਂ ਵਿਸ੍ਸਜ੍ਜੇਸਿ. ਤਂ ਤਸ੍ਸ ਦਸਪਾਰਮਿਯੋ ਆਵਜ੍ਜਨ੍ਤਸ੍ਸ ਉਪਰਿਭਾਗੇ ਮਾਲਾਵਿਤਾਨਂ ਹੁਤ੍ਵਾ ਅਟ੍ਠਾਸਿ. ਤਂ ਕਿਰ ਖੁਰਚਕ੍ਕਾਵੁਧਂ ਅਞ੍ਞਦਾ ਤੇਨ ਕੁਦ੍ਧੇਨ ਵਿਸ੍ਸਟ੍ਠਂ ਏਕਘਨਪਾਸਾਣ ਥਮ੍ਭੇ ਵਂਸਕਲ਼ੀਰੇ ਵਿਯ ਛਿਨ੍ਦਨ੍ਤਂ ਗਚ੍ਛਤਿ. ਇਦਾਨਿ ਪਨ ਤਸ੍ਮਿਂ ਮਾਲਾਵਿਤਾਨਂ ਹੁਤ੍ਵਾ ਠਿਤੇ ਅਵਸੇਸਾ ਮਾਰਪਰਿਸਾ ਇਦਾਨਿ ਪਲ੍ਲਙ੍ਕਤੋ ਵੁਟ੍ਠਾਯ ਪਲਾਯਿਸ੍ਸਤੀਤਿ ਮਹਨ੍ਤਮਹਨ੍ਤਾਨਿ ਸੇਲਕੂਟਾਨਿ ਵਿਸ੍ਸਜ੍ਜੇਸੁਂ. ਤਾਨਿਪਿ ਮਹਾਪੁਰਿਸਸ੍ਸ ਪਾਰਮਿਯੋ ਆਵਜ੍ਜਨ੍ਤਸ੍ਸ ਮਾਲਾਗੁਲ਼ਭਾਵਂ ਆਪਜ੍ਜਿਤ੍ਵਾ ਭੂਮਿਯਂ ਪਤਿਂਸੁ.

ਦੇਵਤਾ ਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤਾ ਗੀਵਂ ਪਸਾਰੇਤ੍ਵਾ ਸੀਸਂ ਉਕ੍ਖਿਪਿਤ੍ਵਾ ‘‘ਨਟ੍ਠੋ ਵਤ ਭੋ ਸਿਦ੍ਧਤ੍ਥਕੁਮਾਰਸ੍ਸ ਰੂਪਗ੍ਗਪ੍ਪਤ੍ਤੋ ਅਤ੍ਤਭਾਵੋ, ਕਿਂ ਨੁ ਖੋ ਕਰਿਸ੍ਸਤੀ’’ਤਿ ਓਲੋਕੇਨ੍ਤਿ. ਤਤੋ ਮਹਾਪੁਰਿਸੋ ਪੂਰਿਤਪਾਰਮੀਨਂ ਬੋਧਿਸਤ੍ਤਾਨਂ ਅਭਿ ਸਮ੍ਬੁਜ੍ਝਨਦਿਵਸੇ ਪਤ੍ਤਪਲ੍ਲਙ੍ਕੋ ਮਯ੍ਹਂਵ ਪਾਪੁਣਾਤੀਤਿ ਵਤ੍ਵਾ ਠਿਤਂ ਮਾਰਂ ਆਹ ‘‘ਮਾਰ ਤੁਯ੍ਹਂ ਦਾਨਸ੍ਸ ਦਿਨ੍ਨਭਾਵੇ ਕੋ ਸਕ੍ਖੀ’’ਤਿ. ਮਾਰੋ ‘‘ਏਤ੍ਤਕਾ ਜਨਾ ਸਕ੍ਖਿਨੋ’’ਤਿ ਮਾਰ ਬਲਾਭਿਮੁਖਂ ਹਤ੍ਥਂ ਪਸਾਰੇਤਿ. ਤਸ੍ਮਿਂ ਖਣੇ ਮਾਰਪਰਿਸਾਯ ‘‘ਅਹਂ ਸਕ੍ਖੀ ਅਹਂ ਸਕ੍ਖੀ’’ਤਿ ਪਵਤ੍ਤਸਦ੍ਦੋ ਪਥਵੀਉਨ੍ਦ੍ਰਿਯਸਦ੍ਦਸਦਿਸੋ ਅਹੋਸਿ. ਅਥ ਖੋ ਮਾਰੋ ਮਹਾਪੁਰਿਸਂ ਆਹ ‘‘ਸਿਦ੍ਧਤ੍ਥ ਤੁਯ੍ਹਂ ਦਾਨਸ੍ਸ ਦਿਨ੍ਨਭਾਵੇ ਕੋ ਸਕ੍ਖੀ’’ਤਿ. ਮਹਾਪੁਰਿਸੋ ‘‘ਤੁਯ੍ਹਂ ਤਾਵ ਦਾਨਸ੍ਸ ਦਿਨ੍ਨਭਾਵੇ ਸਚੇਤਨਾ ਸਕ੍ਖਿਨੋ. ਮਯ੍ਹਂ ਪਨ ਇਮਸ੍ਮਿਂ ਠਾਨੇ ਸਚੇਤਨੋ ਕੋਚਿ ਸਕ੍ਖੀ ਨਾਮ ਨਤ੍ਥਿ. ਤਿਟ੍ਠਤੁ ਤਾਵ ਮੇ ਅਵਸੇਸਤ੍ਤਭਾਵੇਸੁ ਦਿਨ੍ਨਦਾਨਂ, ਵੇਸ੍ਸਨ੍ਤਰਤ੍ਤਭਾਵੇ ਪਨ ਠਤ੍ਵਾ ਮਯ੍ਹਂ ਸਤ੍ਤਸਤ੍ਤਕ ਮਹਾਦਾਨਸ੍ਸ ਦਿਨ੍ਨਭਾਵੇ ਅਚੇਤਨਾਪਿ ਘਨਮਹਾਪਥਵੀ ਸਕ੍ਖੀ’’ਤਿ ਚੀਵਰਗਬ੍ਭਨ੍ਤਰਤੋ ਦਕ੍ਖਿਣਹਤ੍ਥਂ ਨੀਹਰਿਤ੍ਵਾ ਵੇਸ੍ਸਨ੍ਤਰਤ੍ਤਭਾਵੇ ਮਯ੍ਹਂ ਸਤ੍ਤਸਤ੍ਤਕਮਹਾਦਾਨਸ੍ਸ ਦਿਨ੍ਨਭਾਵੇ ਤ੍ਵਂ ਸਕ੍ਖਿ ਨ ਸਕ੍ਖੀਤਿ ਮਹਾਪਥਵਿਯਾਭਿਮੁਖਂ ਹਤ੍ਥਂ ਪਸਾਰੇਸਿ. ਮਹਾ ਪਥਵੀ ‘‘ਅਹਂ ਤੇ ਦਾਨਸ੍ਸ ਸਕ੍ਖੀ’’ਤਿ ਵਿਰਵਸਹਸ੍ਸੇਨ ਵਿਰਵਸਤਸਹਸ੍ਸੇਨ ਮਾਰਬਲਂ ਅਵਤ੍ਥਰਮਾਨਾ ਵਿਯ ਉਨ੍ਨਦਿ.

ਤਤੋ ਮਹਾਪੁਰਿਸੇ ਦਿਨ੍ਨਂ ਤੇ ਸਿਦ੍ਧਤ੍ਥ ਮਹਾਦਾਨਂ ਉਤ੍ਤਮ ਦਾਨਨ੍ਤਿ ਵੇਸ੍ਸਨ੍ਤਰਦਾਨਂ ਸਮ੍ਮਸਨ੍ਤੇ ਦਿਯਡ੍ਢਯੋਜਨਸਤਿਕੋ ਗਿਰਿਮੇਖਲੋ ਹਤ੍ਥੀ ਜਾਣੁਕੇਹਿ ਪਤਿਟ੍ਠਾਸਿ. ਮਾਰਪਰਿਸਾ ਦਿਸਾਵਿਦਿਸਾ ਪਲਾਯਿਂਸੁ. ਦ੍ਵੇ ਏਕਮਗ੍ਗੇਨ ਗਤਾ ਨਾਮ ਨਤ੍ਥਿ. ਸੀਸਾਭਰਣਾਨਿ ਚੇਵ ਵਤ੍ਥਾਭਰਣਾਨਿ ਚ ਪਹਾਯ ਸਮ੍ਮੁਖ ਸਮ੍ਮੁਖਟ੍ਠਾਨੇ ਦਿਸਾਵਿਦਿਸਾਹਿਯੇਵ ਪਲਾਯਿਂਸੁ. ਤਤੋ ਦੇਵਸਙ੍ਘੋ ਪਲਾਯਮਾਨਂ ਮਾਰਬਲਂ ਦਿਸ੍ਵਾ ਮਾਰਸ੍ਸ ਪਰਾਜਯੋ ਜਾਤੋ. ਸਿਦ੍ਧਤ੍ਥਕੁਮਾਰਸ੍ਸ ਜਯੋ. ਜਯਪੂਜਂ ਕਰਿਸ੍ਸਾਮਾਤਿ ਨਾਗਾ ਨਾਗਾਨਂ, ਸੁਪਣ੍ਣਾ ਸੁਪਣ੍ਣਾਨਂ, ਦੇਵਤਾ ਦੇਵਤਾਨਂ, ਬ੍ਰਹ੍ਮਾਨੋ ਬ੍ਰਹ੍ਮਾਨਂ ਪੇਸੇਤ੍ਵਾ ਗਨ੍ਧਮਾਲਾਦਿ ਹਤ੍ਥਾ ਮਹਾਪੁਰਿਸਸ੍ਸ ਸਨ੍ਤਿਕਂ ਬੋਧਿਪਲ੍ਲਙ੍ਕਂ ਆਗਮਂਸੁ. ਏਵਂ ਗਤੇਸੁ ਚ ਪਨੇਤੇਸੁ –

‘‘ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ,

ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਿਸੁਂ ਬੋਧਿਮਣ੍ਡੇ ਪਮੋਦਿਤਾ,

ਜਯਂ ਤਦਾ ਨਾਗਗਣਾ ਮਹੇਸਿਨੋ.

ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ,

ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਿਸੁਂ ਬੋਧਿਮਣ੍ਡੇ ਪਮੋਦਿਤਾ,

ਜਯਂ ਤਦਾ ਸੁਪਣ੍ਣਸਙ੍ਘਾ ਮਹੇਸਿਨੋ.

ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ,

ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਿਸੁਂ ਬੋਧਿਮਣ੍ਡੇ ਪਮੋਦਿਤਾ,

ਜਯਂ ਤਦਾ ਦੇਵਗਣਾ ਮਹੇਸਿਨੋ.

ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ,

ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਿਸੁਂ ਬੋਧਿਮਣ੍ਡੇ ਪਮੋਦਿਤਾ,

ਜਯਂ ਤਦਾ ਬ੍ਰਹ੍ਮਗਣਾਪਿ ਤਾਦਿਨੋ’’ਤਿ.

ਅਵਸੇਸੇਸੁ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾ ਮਾਲਾਗਨ੍ਧਵਿਲੇਪਨੇਹਿ ਚ ਪੂਜਯਮਾਨਾ ਨਾਨਪ੍ਪਕਾਰ ਥੁਤਿਯੋ ਚ ਵਦਮਾਨਾ ਅਟ੍ਠਂਸੁ. ਏਵਂ ਅਨਤ੍ਥਙ੍ਗਤੇਯੇਵ ਸੂਰਿਯੇ ਮਹਾਪੁਰਿਸੋ ਮਾਰਬਲਂ ਵਿਧਮੇਤ੍ਵਾ ਚੀਵਰੂਪਰਿ ਪਤ ਮਾਨੇਹਿ ਬੋਧਿਰੁਕ੍ਖਙ੍ਕੁਰੇਹਿ ਰਤ੍ਤਪਵਾਲ਼ਪਲ੍ਲਵੇਹਿ ਵਿਯ ਪੂਜਯਮਾਨੋ ਪਠਮਯਾਮੇ ਪੁਬ੍ਬੇਨਿਵਾਸਞਾਣਂ ਅਨੁਸ੍ਸਰਿਤ੍ਵਾ ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਪਚ੍ਛਿਮਯਾਮੇ ਪਟਿਚ੍ਚ ਸਮੁਪ੍ਪਾਦੇ ਞਾਣਂ ਓਤਾਰੇਸਿ. ਅਥਸ੍ਸ ਦ੍ਵਾਦਸਪਦਿਕਂ ਪਚ੍ਚਯਾ ਕਾਰਂ ਵਟ੍ਟਵਿਵਟ੍ਟਵਸੇਨ ਅਨੁਲੋਮਤੋ ਪਟਿਲੋਮਤੋ ਸਮ੍ਮਸਨ੍ਤਸ੍ਸ ਦਸਸਹਸ੍ਸਿਲੋਕਧਾਤੁ ਉਦਕਪਰਿਯਨ੍ਤਂ ਕਤ੍ਵਾ ਦ੍ਵਾਦਸਕ੍ਖਤ੍ਤੁਂ ਸਮ੍ਪਕਮ੍ਪਿ. ਮਹਾਪੁਰਿਸੇਨ ਪਨ ਦਸਸਹਸ੍ਸਿ ਲੋਕਧਾਤੁਂ ਉਨ੍ਨਾਦੇਤ੍ਵਾ ਅਰੁਣੁਗ੍ਗਮਨਵੇਲਾਯਂ ਸਬ੍ਬਞ੍ਞੁਤ ਞਾਣਂ ਪਟਿਵਿਜ੍ਝੀਤਿ ਵੁਤ੍ਤਂ ਹੋਤਿ. ਇਧ ਪਨ ਵੁਤ੍ਤਾਵਸੇਸਂ ਤਾਸੁ ਚ ਓਲੋਕੇਤ੍ਵਾ ਗਹੇਤਬ੍ਬਨ੍ਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਉਪੇਤਪੁਞ੍ਞੋ ਸਮ੍ਪਨ੍ਨ ਦਾਨਾਦਿਪਾਰਮੀਪੁਞ੍ਞਵਾ ਦਾਨਾਦਿਪਾਰਮੀਪੁਞ੍ਞੇਨ ਸਮ੍ਪਨ੍ਨੋ ਵਾ, ਯੋ ਸੁਗਤੋ ਵਰਬੋਧਿਮੂਲੇ ਉਤ੍ਤਮਸ੍ਸ ਬੋਧਿਰੁਕ੍ਖਸ੍ਸ ਸਮੀਪੇ, ਸਸੇਨਮਾਰਂ ਸੇਨਾਯ ਸਹ ਪਵਤ੍ਤਂ ਮਾਰਰਾਜਂ, ਜਿਨਿਤ੍ਵਾ ਪਾਰਮੀਪੁਞ੍ਞਤੇਜੇਨ ਵਿਜਯਿਤ੍ਵਾ, ਅਰੁਣੋਦਯਮ੍ਹਿ ਵਿਸਾਖਪੁਣ੍ਣਮਿਯਂ ਅਰੁਣੁਗ੍ਗਮਨਵੇਲਾਯਂ, ਬੋਧਿਂ ਅਰਹਤ੍ਤਮਗ੍ਗਞਾਣ ਸਬ੍ਬਞ੍ਞੁਤਞਾਣਸਙ੍ਖਾਤਂ ਬੋਧਿਂ, ਅਬੋਜ੍ਝਿ ਪਟਿਵਿਜ੍ਝਿ ਅਧਿਗਮਿ ਵਾ, ਮਾਰਜਿਨਂ ਪਞ੍ਚਮਾਰਾਨਂ ਵਿਜਿਤਾਵਿਂ, ਅਭਙ੍ਗਂ ਸਸੇਨਮਾਰੋ ਯੋ ਕੋਚਿ ਵਾ ਭਿਨ੍ਦਿਤੁਂ ਅਸਮਤ੍ਥਂ ਤਂ ਸੁਗਤਂ ਅਹਂ ਨਮਾਮੀਤਿ.

ਛਟ੍ਠਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੭.

ਰਾਗਾਦਿ ਛੇਦਾਮਲਞਾਣਖਗ੍ਗਂ,

ਸਤੀਸਮਞ੍ਞਾਫਲਕਾਭਿਗਾਹਂ;

ਸੀਲੋਘਲਙ੍ਕਾਰਵਿਭੂਸਿਤਂ ਤਂ,

ਨਮਾਮਿਭਿਞ੍ਞਾਵਰਮਿਦ੍ਧੁਪੇਤਂ.

੭. ਏਵਂ ਛਟ੍ਠਮਗਾਥਾਯ ਸੁਗਤਂ ਵਨ੍ਦਿਤ੍ਵਾ ਇਦਾਨਿ ਅਰਹਤ੍ਤ ਮਗ੍ਗਞਾਣਾਦੀਹਿ ਚਤੂਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਰਾਗਾਦਿਤ੍ਯਾਦਿਗਾਥਮਾਹ. ਅਯਂ ਪਨ ਇਨ੍ਦਵਜਿਰ ਉਪੇਨ੍ਦਵਜਿਰ ਗਾਥਾਦ੍ਵਯਸ੍ਸ ਲਕ੍ਖਣਸ੍ਸ ਮਿਸ੍ਸਕਤ੍ਤਾ ਏਕਾਦਸਕ੍ਖਰੇਹਿ ਲਕ੍ਖਿਤਾ ਉਪਜਾਤਿਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਅਨਨ੍ਤਰੋਦੀਰਿਤਲਕ੍ਖਣਾ ਚੇ, ਪਾਦਾਵਿਮਿਸ੍ਸਾ ਉਪਜਾਤਿਯੋ ਤਾ’’ਤਿ. ਤਸ੍ਸਤ੍ਥੋ. ਯਸ੍ਸਾ ਵੁਤ੍ਤਿਯਾ ਅਨਨ੍ਤਰੋ ਦੀਰਿਤਲਕ੍ਖਣਾ ਅਨਨ੍ਤਰੇ ਉਦੀਰਿਤਂ ਵੁਤ੍ਤਂ ਇਨ੍ਦਵਜਿਰੋਪੇਨ੍ਦ ਵਜਿਰਗਾਥਾਨਂ ਲਕ੍ਖਣਵਨ੍ਤਾ ਪਾਦਾ ਵਿਮਿਸ੍ਸਾ ਸਂਸਟ੍ਠਾ ਚੇ ਭਵਨ੍ਤਿ, ਤਾ ਵੁਤ੍ਤਿਯੋ ਉਪਜਾਤਿਯੋ ਨਾਮਾਤਿ.

ਤਤ੍ਥ ਰਾਗਾਦਿਛੇਦਾਮਲ ਞਾਣਖਗ੍ਗਨ੍ਤਿ ਏਤ੍ਥ ਰਾਗਆਦਿਛੇਦ ਅਮਲਞਾਣਖਗ੍ਗਨ੍ਤਿਪਦਚ੍ਛੇਦੋ. ਰਾਗਾਦਿਕਿਲੇਸਂ ਛਿਨ੍ਦਨ੍ਤਂ ਮਲਵਿਰ ਹਿਤਂ ਅਰਹਤ੍ਤਮਗ੍ਗਞਾਣਸਙ੍ਖਾਤਂ ਅਸਿਵਨ੍ਤਨ੍ਤਿ ਅਤ੍ਥੋ. ਤਤ੍ਰਾਯਂ ਵਚਨਤ੍ਥੋ. ਰੂਪਾਦੀਸੁ ਰਞ੍ਜਤੀਤਿ ਰਾਗੋ. ਰਨ੍ਜਧਾਤੁ ਰਾਗੇ ਣ. ਰਾਗੋ ਆਦਿ ਯੇਸਨ੍ਤੇਤਿ ਰਾਗਾਦਯੋ, ਕਿਲੇਸਾ. ਤੇ ਛਿਨ੍ਦਤੀਤਿ ਰਾਗਾਦਿਛੇਦਂ, ਅਰਹਤ੍ਤਮਗ੍ਗਞਾਣਂ. ਅਪਾਯਂ ਮਲਤਿ ਧਾਰੇਤੀਤਿ ਮਲਂ, ਰਾਗਾਦਿ. ਅਥ ਵਾ ਮਲਤਿ ਸਂਕਿਲਿਸ੍ਸਤਿ ਏਤੇਨਾਤਿ ਮਲਂ. ਮਲਧਾਤੁ ਸਂਕਿਲੇਸਨੇ ਅ. ਮਲਤੋ ਵਿਰਹਿਤਂ ਅਮਲਂ, ਞਾਣਂ. ਚਤ੍ਤਾਰਿ ਸਚ੍ਚਾਨਿ ਜਾਨਾਤਿ ਪਟਿਵਿਜ੍ਝਤੀਤਿ ਞਾਣਂ, ਅਰਹਤ੍ਤਮਗ੍ਗਞਾਣਂ. ਰਾਗਾਦਿਛੇਦਞ੍ਚ ਅਮਲਞ੍ਚ ਤਂ ਞਾਣਞ੍ਚਾਤਿ ਰਾਗਾਦਿਛੇਦਾਮਲਞਾਣਂ. ਰੁਕ੍ਖਾਦਿਂ ਖਗ੍ਗਤਿ ਛਿਨ੍ਦਤਿ ਏਤੇਨਾਤਿ ਵਾ ਖਗ੍ਗਂ, ਪਕਤਿਅਸਿ. ਖਗ੍ਗਂ ਵਿਯਾਤਿ ਖਗ੍ਗਂ, ਞਾਣਂ. ਰਾਗਾਦਿਛੇਦਾਮਲਞਾਣਸਙ੍ਖਤਂ ਖਗ੍ਗਂ ਯਸ੍ਸ ਸੋਤਿ ਰਾਗਾਦਿਛੇਦਾਮਲਞਾਣਖਗ੍ਗੋ, ਬੁਦ੍ਧੋ. ਰਾਗਾਦਿਕਿਲੇਸਂ ਛਿਨ੍ਦਨ੍ਤੇਨ ਮਲਵਿਰ ਹਿਤੇਨ ਅਗ੍ਗਮਗ੍ਗਞਾਣਸਙ੍ਖਤੇਨ ਅਸਿਨਾ ਸਮਨ੍ਨਾਗਤੋਤਿ ਅਤ੍ਥੋ. ਤਂ.

ਸਤੀਸਮਞ੍ਞਾ ਫਲਕਾਭਿਗਾਹਨ੍ਤਿ ਏਤ੍ਥ ਸਤਿਸਮਞ੍ਞਾਫਲਕ ਅਭਿਗਾਹਨ੍ਤਿਪਦਚ੍ਛੇਦੋ. ਸਮ੍ਮਾਸਤਿਨਾਮਿਕਂ ਫਲਕਂ ਦਲ਼੍ਹਗਾਹ ਕਨ੍ਤਿ ਅਤ੍ਥੋ. ਤਤ੍ਰਾਯਂ ਵਚਨਤ੍ਥੋ. ਸਰਣਂ ਸਤਿ, ਸਰਤਿ ਸਮ੍ਪਯੁਤ੍ਤਧਮ੍ਮਾ ਏਤਾਯਾਤਿ, ਸਰਤੀਤਿ ਵਾ ਸਤਿ. ਸਰਧਾਤੁਤਿ. ਅਥ ਵਾ ਪਮਾਦਂ ਸਰਤਿ ਹਿਂਸਤੀਤਿ ਸਤਿ, ਸਮ੍ਮਾਸਤਿ. ਸਰਧਾਤੁ ਹਿਂਸਾਯਂਤਿ. ਸਮ੍ਮਾ ਆਜਾਨਾਤਿ ਏਤਾਯਾਤਿ ਸਮਞ੍ਞਾ, ਸਤਿਇਤਿ ਸਮਞ੍ਞਾ ਸਤਿਸਮਞ੍ਞਾ, ਅਸਿਆਦਿਸਤ੍ਥਂ ਫਲਤਿ ਨਿਵਾਰੇਤੀਤਿ ਫਲਕਂ, ਖੇਟਕਂ. ਫਲਧਾਤੁ ਨਿਵਾਰਣੇ ਣ੍ਵੁ. ਸਤਿਸਮਞ੍ਞਂ ਫਲਕਂ ਅਭਿਦਲ਼੍ਹਂ ਗਣ੍ਹਤੀਤਿ ਸਤਿਸਮਞ੍ਞਾਫਲ ਕਾਭਿਗਾਹੋ, ਬੁਦ੍ਧੋ ਲਬ੍ਭਤਿ. ਯਥਾ ਹਿ ਸੇਨਾਯ ਫਲਕਂ ਅਸਿਆਦਿਸਤ੍ਥਂ ਰਕ੍ਖਤਿ, ਏਵਂ ਸਤਿਸਂਵਰੋ ਚਕ੍ਖਾਦਿ ਦ੍ਵਾਰੇਸੁ ਰੂਪਾਦਿਆਰਮ੍ਮਣਂ ਪਵਿਸਿਤੁਂ ਅਦਤ੍ਵਾ ਰਕ੍ਖਤਿ. ਤਸ੍ਮਾ ਭਗਵਾ ਸਤਿਧਮ੍ਮੋ ਸਬ੍ਬਾਕੁਸਲਾਨਂ ਰਕ੍ਖਕਤ੍ਤਾ ਸਬ੍ਬਕੁਸਲ ਧਮ੍ਮਾਨਂ ਉਪਕਾਰਤ੍ਤਾ ਸਬ੍ਬਤ੍ਥਾਨਂ ਸਾਧਕਤ੍ਤਾ ਚ ਸਤਿਫਲਕਂ ਦਲ਼੍ਹਂ ਗਣ੍ਹਤੀਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹਿ ‘‘ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਅਪ੍ਪਮਾਦਮੂਲਕਾ ਅਪ੍ਪਮਾਦਸਮੋਸਰਣਾ, ਅਪ੍ਪਮਾਦੋ ਤੇਸਂ ਧਮ੍ਮਾਨਂ ਅਗ੍ਗਮਕ੍ਖਾਯਤੀ’’ਤਿ ਚ. ‘‘ਸਤਿਂ ਖ੍ਵਾਹਂ ਭਿਕ੍ਖਵੇ ਸਬ੍ਬਤ੍ਥਿਕਂ ਵਦਾਮੀ’’ਤਿ ਚ.

ਸੀਲੋਘਲਙ੍ਕਾਰਵਿਭੂਸਿਤਨ੍ਤਿ ਸੀਲਓਘਅਲਙ੍ਕਾਰ ਵਿਭੂ ਸਿਤਨ੍ਤਿ ਪਦਚ੍ਛੇਦੋ. ਵਿਸੁਦ੍ਧਸੀਲਾਨਂ ਸਮੂਹਸਙ੍ਖਾਤੇਨ ਅਲਙ੍ਕਾਰੇਨ ਵਿਭੂਸਿਤਨ੍ਤਿ ਅਤ੍ਥੋ. ਤਤ੍ਥ ਸੀਲਨ੍ਤਿ ਲੋਕੁਤ੍ਤਰ ਸੀਲਂ. ਤਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਂ ਪਨ ਚੇਤਨਾ ਸੀਲਂ, ਚੇਤਸਿਕਂ ਸੀਲਂ, ਸਂਵਰੋ ਸੀਲਂ, ਅਵੀਤਿਕ੍ਕਮੋ ਸੀਲਞ੍ਚਾਤਿ ਚਤੁਬ੍ਬਿਧਂ ਹੋਤਿ. ਤਤ੍ਥ ਚੇਤਨਾ ਸੀਲਂ ਨਾਮ ਪਾਣਾਤਿਪਾਤਾ ਦੀਹਿ ਵਾ ਵਿਰਮਨ੍ਤਸ੍ਸ ਵਤ੍ਤਪਟਿਪਤ੍ਤਿਂ ਵਾ ਪੂਰੇਨ੍ਤਸ੍ਸ ਚੇਤਨਾ. ਚੇਤਸਿਕਸੀਲਂ ਨਾਮ ਪਾਣਾਤਿਪਾਤਾਦੀਹਿ ਵਿਰਮਨ੍ਤਸ੍ਸ ਵਿਰਤਿ. ਸਂਵਰੋ ਸੀਲਨ੍ਤਿ ਏਤ੍ਥ ਸਂਵਰੋ ਪਾਤਿਮੋਕ੍ਖਸਂਵਰੋ, ਸਤਿ ਸਂਵਰੋ, ਞਾਣਸਂਵਰੋ, ਖਨ੍ਤਿਸਂਵਰੋ, ਵੀਰਿਯਸਂਵਰੋ ਚਾਤਿ ਪਞ੍ਚਵਿਧੋ ਹੋਤਿ, ਸਬ੍ਬਮੇਤਂ ਸਂਵਰੋ ਸੀਲਂ ਨਾਮ. ਅਵੀਤਿਕ੍ਕਮੋ ਸੀਲਂ ਨਾਮ ਸਮਾਦਿਨ੍ਨਸੀਲਸ੍ਸ ਕਾਯਿਕਵਾਚਸਿਕੋ ਅਨਤਿਕ੍ਕਮੋਤਿ. ਵੁਤ੍ਤਞ੍ਹੇਤਂ ਪਟਿਸਮ੍ਭਿਦਾਯਂ ‘‘ਕਿਂਸੀਲਨ੍ਤਿਚੇਤਨਾ ਸੀਲਂ, ਚੇਤਸਿਕਂ ਸੀਲਂ, ਸਂਵਰੋ ਸੀਲਂ, ਅਵੀਤਿਕ੍ਕਮੋ ਸੀਲ’’ਨ੍ਤਿ. ਇਧ ਪਨ ਅਵੀਤਿਕ੍ਕਮੋ ਸੀਲਂ ਨਾਧਿਪ੍ਪੇਤਂ. ਕਸ੍ਮਾ. ਭਗਵਤੋ ਸਮਾਦਿਨ੍ਨਸਿਕ੍ਖਾਪਦਸ੍ਸ ਅਭਾਵਤੋ. ਬੁਦ੍ਧਾਨਞ੍ਹਿ ਸਿਕ੍ਖਾਪਦਂ ਨਾਮ ਨਤ੍ਥੀਤਿ. ਓਘੋਤਿ ਸਮੂਹੋ. ਓਘਸਦ੍ਦੋ ਹਿ ਸਮੂਹਵਾਚਕੋ. ਤੇਨ ਵੁਤ੍ਤਂ ਅਭਿਧਾਨਪ੍ਪਦੀਪਿਕਾਯਂ –

‘‘ਸਮੂਹੋ ਗਣਸਙ੍ਘਾਤਾ, ਸਮੁਦਾਯੋ ਚ ਸਞ੍ਚਯੋ;

ਸਨ੍ਦੋਹੋ ਨਿਵਹੋ ਓਘੋ, ਵਿਸਰੋ ਨਿਕਰੋ ਚਯੋ’’ਤ੍ਯਾਦਿ.

ਅਵਹਨਤਿ ਗਚ੍ਛਤਿ ਪਵਤ੍ਤਤਿ ਅਵਯਵਂ ਏਤ੍ਥਾਤਿ ਓਘੋ, ਸਮੂਹੋ. ਅਵਪੁਬ੍ਬਹਨਧਾਤੁ ਗਤਿਮ੍ਹਿ ਣੋ. ਅਵਸ੍ਸ ਓ, ਹਨਸ੍ਸ ਘੋ. ਅਭਿਧਾਨਪ੍ਪਦੀਪਿਕਾਟੀਕਾਯਂ ਪਨ ‘‘ਅਵਯਵਂ ਕਤ੍ਵਾ ਬ੍ਯਾਪਿਯਤਿ ਗਚ੍ਛਤੀਤਿ ਓਘੋ’’ਤਿ ਵੁਤ੍ਤਂ. ਸੀਲਾਨਂ ਓਘੋ ਸਮੂਹੋ ਸੀਲੋਘੋ. ਅਲਙ੍ਕਾਰੋਤਿ ਪਿਲ਼ਨ੍ਧਨੋ. ਅਲਂ ਵਿਭੁਸਂ ਤਂ ਸਮਙ੍ਗੀਪੁਗ੍ਗਲਂ ਕਰੋਤਿ ਅਨੇਨਾਤਿ ਅਲਙ੍ਕਾਰੋ, ਸੀਲਂ. ਅਲਂਸਦ੍ਦੂਪਪਦਕਰਧਾਤੁ ਣੋ. ਸੀਲੋਘੋ ਏਵ ਅਲਙ੍ਕਾਰੋ ਸੀਲੋਘਾਲਙ੍ਕਾਰੋ, ਤੇਨ ਵਿਭੂ ਸਿਯਤੀਤਿ ਸੀਲੋਘਲਙ੍ਕਾਰਵਿਭੂਸਿਤੋ, ਬੁਦ੍ਧੋ. ਤੇਨ ਪਨ ਅਞ੍ਞੇਹਿ ਅਸਾਧਾਰਣੇਨ ਲੋਕੁਤ੍ਤਰਸੀਲਾਲਙ੍ਕਾਰੇਨ ਵਿਭੂਸਿਤੋ. ਨ ਚੀਵਰਾਦਿਨਾਲਙ੍ਕਾਰੇਨਾਤਿ ਅਤ੍ਥੋ. ਸੀਲਾਲਙ੍ਕਾਰੇਨ ਹਿ ਸਦਿਸੋ ਅਲਙ੍ਕਾਰੋ ਨਾਮ ਨਤ੍ਥਿ. ਤਂ ਸੀਲੋਘਲਙ੍ਕਾਰਵਿਭੂਸਿਤਂ.

ਨਮਾਮਿਭਿਞ੍ਞਾਵਰਮਿਦ੍ਧੁਪੇਤਨ੍ਤਿ ਏਤ੍ਥ ਨਮਾਮਿ ਅਭਿਞ੍ਞਾਵਰਂ ਇਦ੍ਧਿ ਉਪੇਤਨ੍ਤਿ ਪਦਚ੍ਛੇਦੋ. ਤਤ੍ਥ ਨਮਾਮੀਤਿ ਵਨ੍ਦਾਮਿ. ਅਭਿਞ੍ਞਾਵਰਮਿਦ੍ਧੁਪੇਤਨ੍ਤਿ ਅਭਿਞ੍ਞਾਸਙ੍ਖਾਤਾਯ ਉਤ੍ਤਮਾਯ ਇਦ੍ਧਿਯਾ ਸਮਨ੍ਨਾਗਤਨ੍ਤਿ ਅਤ੍ਥੋ. ਅਭਿਵਿਸੇਸੇਨ ਜਾਨਾਤੀਤਿ ਅਭਿਞ੍ਞਾ, ਛਬ੍ਬਿਧਂ ਞਾਣਂ. ਤਞ੍ਹਿ ਇਦ੍ਧਿਵਿਧਦਿਬ੍ਬਸੋਤ ਪਰਚਿਤ੍ਤ ਵਿਜਾਨਨ ਪੁਬ੍ਬੇਨਿਵਾਸਾਨੁਸ੍ਸਤਿ ਚੁਤੂਪਪਾਤ ਆਸਵਕ੍ਖਯ ਞਾਣਵਸੇਨ ਛਬ੍ਬਿਧਂ ਹੋਤਿ. ਤਤ੍ਥ ਇਦ੍ਧਿਵਿਧਞਾਣਨ੍ਤਿ ਏਕੋਪਿ ਹੁਤ੍ਵਾ ਬਹੁਧਾ ਹੋਤੀਤਿਆਦਿਨਯਪ੍ਪਵਤ੍ਤੇ ਇਦ੍ਧਿਵਿਧੇ ਜਾਨਨ ਞਾਣਂ. ਦਿਬ੍ਬਸੋਤਞਾਣਨ੍ਤਿ ਦੂਰਸਨ੍ਤਿਕਾਦਿਭੇਦਸਦ੍ਦਾਰਮ੍ਮਣਾਯ ਦਿਬ੍ਬਸੋਤਧਾਤੁਯਾ ਜਾਨਨਞਾਣਂ. ਪਰਚਿਤ੍ਤਵਿਜਾਨਨਞਾਣਨ੍ਤਿ ਪਰਸਤ੍ਤਾਨਂ ਚਿਤ੍ਤਪਰਿਚ੍ਛੇਦਸ੍ਸ ਵਿਜਾਨਨਞਾਣਂ. ਪੁਬ੍ਬੇਨਿਵਾਸਾ ਨੁਸ੍ਸਤਿਞਾਣਨ੍ਤਿ ਅਤ੍ਤਸਨ੍ਤਾਨੇ ਵੁਤ੍ਥਵਸੇਨ ਚੇਵ ਗੋਚਰ ਨਿਵਾਸਵਸੇਨ ਚ ਪੁਬ੍ਬੇ ਅਤੀਤਭਵੇਸੁ ਖਨ੍ਧਾਦੀਨਂ ਅਨੁਸ੍ਸਰਣ ਸਤਿਯਾ ਸਮ੍ਪਯੁਤ੍ਤਂ ਞਾਣਂ. ਚੁਤੂਪਪਾਤਞਾਣਨ੍ਤਿ ਸਤ੍ਤਾਨਂ ਚੁਤਿਯਞ੍ਚ ਉਪਪਾਤੇ ਚ ਜਾਨਨਞਾਣਂ. ਏਤ੍ਥ ਚ ਅਟ੍ਠਕਥਾਸੁ ਚੁਤੂਪਪਾਤਞਾਣਟ੍ਠਾਨੇ ਤਸ੍ਸ ਸਾਧਕਤ੍ਤਾ ਦਿਬ੍ਬਚਕ੍ਖੁਞਾਣਨ੍ਤਿ ਵੁਤ੍ਤਂ. ਆਸਵਕ੍ਖਯਞਾਣਨ੍ਤਿ ਸਚ੍ਚਪਰਿਚ੍ਛੇਦਸ੍ਸ ਜਾਨਨਂ ਅਰਹਤ੍ਤ ਮਗ੍ਗਞਾਣਨ੍ਤਿ. ਵਰਨ੍ਤਿ ਉਤ੍ਤਮਂ. ਇਦ੍ਧੀਤਿ ਇਜ੍ਝਨਂ ਸਮਿਜ੍ਝਨਂ. ਇਜ੍ਝਤਿ ਸਮਿਜ੍ਝਤੀਤਿ ਵਾ ਇਦ੍ਧਿ. ਇਧਧਾਤੁਤਿ. ਅਭਿਞ੍ਞਾਸਙ੍ਖਾਤਾਯ ਵਰਾਯ ਇਦ੍ਧਿਯਾ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋਤਿ ਅਭਿਞ੍ਞਾਵਰਮਿਦ੍ਧੁਪੇਤੋ, ਬੁਦ੍ਧੋ. ਤਂ ਅਭਿਞ੍ਞਾਵਰਮਿਦ੍ਧੁਪੇਤਂ. ਤਂ ਬੁਦ੍ਧਂ ਅਹਂ ਨਮਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਰਾਗਾਦਿਛੇਦਾਮਲਞਾਣ ਖਗ੍ਗਂ ਰਾਗਾਦਿਕਿਲੇਸਂ ਛਿਨ੍ਦਨ੍ਤਂ ਮਲਵਿਰਹਿਤਂ ਅਰਹਤ੍ਤਮਗ੍ਗਞਾਣ ਸਙ੍ਖਾਤਂ ਅਸਿਵਨ੍ਤਂ, ਸਤੀਸਮਞ੍ਞਾਫਲਕਾਭਿਗਾਹਂ ਸਮ੍ਮਾ ਸਤਿਨਾਮਿਕਂ ਫਲਕਂ ਦਲ਼੍ਹਗਹਣਂ, ਸੀਲੋਘਲਙ੍ਕਾਰਵਿਭੂਸਿਤਂ ਸੀਲਾਨਂ ਸਮੂਹਸਙ੍ਖਾਤੇਨ ਅਲਙ੍ਕਾਰੇਨ ਵਿਭੂਸਿਤਂ, ਅਭਿਞ੍ਞਾ ਵਰਮਿਦ੍ਧੁਪੇਤਂ ਅਭਿਞ੍ਞਾਸਙ੍ਖਾਤਾਯ ਵਰਾਯ ਉਤ੍ਤਮਾਯ ਇਦ੍ਧਿਯਾ ਉਪੇਤਂ ਸਮੁਪੇਤਂ ਸਮਨ੍ਨਾਗਤਂ ਤਂ ਬੁਦ੍ਧਂ ਅਹਂ ਨਮਾਮੀਤਿ.

ਸਤ੍ਤਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੮.

ਦਯਾਲਯਂ ਸਬ੍ਬਧਿ ਦੁਕ੍ਕਰਂ ਕਰਂ,

ਭਵਣ੍ਣਵਾਤਿਕ੍ਕਮਮਗ੍ਗਤਂ ਗਤਂ;

ਤਿਲੋਕਨਾਥਂ ਸੁਸਮਾਹਿਤਂ ਹਿਤਂ,

ਸਮਨ੍ਤਚਕ੍ਖੁਂ ਪਣਮਾਮਿ ਤਂਮਿਤਂ.

੮. ਏਵਂ ਸਤ੍ਤਮਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਮਹਾਕਰੁਣਾ ਦੀਹਿ ਨਵਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਦਯਾਲਯਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਜ ਤ ਜ ਰਗਣੇਹਿ ਯੁਤ੍ਤਤ੍ਤਾ ਦ੍ਵਾਦਸਕ੍ਖਰੇਹਿ ਲਕ੍ਖਿਤਾ ਚਤੁਪਾਦਨ੍ਤਯਮਕਾ ਵਂਸਟ੍ਠਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਵਦਨ੍ਤਿ ਵਂਸਟ੍ਠਮਿਦਂ ਜਤਾ ਜਰਾ’’ਤਿ. ਤਸ੍ਸਤ੍ਥੋ, ਯਸ੍ਸਂ ਪਟਿਪਾਦਂ ਜਤਾ ਜਤਗਣਾ ਚ ਜਰਾ ਜਰਗਣਾ ਚ ਚੇ ਭਵਨ੍ਤਿ, ਇਦਂ ਵੁਤ੍ਤਂ ਵਂਸਟ੍ਠਂ ਵਂਸਟ੍ਠਗਾਥਾ ਨਾਮਾਤਿ ਮੁਨਯੋ ਇਸਯੋ ਵਦਨ੍ਤੀਤਿ.

ਤਤ੍ਥ ਦਯਾਲਯਨ੍ਤਿ ਮਹਾਕਰੁਣਾਯ ਚ, ਮੇਤ੍ਤਾਯ ਚ ਆਧਾਰਂ. ਦਯਾਸਦ੍ਦੋ ਹਿ ਕਰੁਣਾਯ ਚ, ਮੇਤ੍ਤਾਯ ਚ ਵਤ੍ਤਤਿ. ਅਦਯਾਪਨ੍ਨੋਤਿ ਏਤ੍ਥ ਹਿ ਕਰੁਣਾਯ ਵਤ੍ਤਤਿ. ਨਿਕ੍ਕਰੁਣਿਕਤਂ ਆਪਨ੍ਨੋਤਿ ਅਤ੍ਥੋ. ਦਯਾਪਨ੍ਨੋਤਿ ਏਤ੍ਥ ਮੇਤ੍ਤਾਯ ਮੇਤ੍ਤਚਿਤ੍ਤਤਂ ਆਪਨ੍ਨੋਤਿ ਅਤ੍ਥੋ. ਇਧ ਪਨ ਤਦੁਭਯਮ੍ਪਿ ਵਟ੍ਟਤਿ. ਤਸ੍ਮਾ ਦਯਾ ਚ ਦਯਾ ਚ ਦਯਾਤਿ ਸਦ੍ਦਸਰੂਪੇਕਸੇਸੋ ਕਾਤਬ੍ਬੋ. ਵਚਨਤ੍ਥੋ ਪਨੇਤ੍ਥ ਏਵਂ ਵੇਦਿਤਬ੍ਬੋ. ਦਯਤਿ ਹਿਂਸਤਿ ਕਾਰੁਣਿਕਨ੍ਤਿ ਦਯਾ, ਮਹਾਕਰੁਣਾ. ਦਯਧਾਤੁ ਹਿਂਸਾਯਂ ਅ. ਯਾ ਕਰੁਣਾ ਯਾਵ ਯਥਾਧਿਪ੍ਪੇਤਂ ਪਰਸ੍ਸ ਹਿਤਨਿਪ੍ਫਤ੍ਤਿਂ ਨ ਪਾਪੁਣਾਤਿ, ਤਾਵ ਕਾਰੁਣਿਕਂ ਹਿਂਸਤੀਤਿ ਅਤ੍ਥੋ. ਦਯਤਿ ਹਿਂਸਤਿ ਅਪਨੇਤਿ ਪਰਦੁਕ੍ਖਨ੍ਤਿ ਵਾ ਦਯਾ. ਅਥ ਵਾ ਦਯਤਿ ਅਤ੍ਤਨੋ ਸੁਖਮ੍ਪਿ ਪਹਾਯ ਖੇਦਂ ਗਣ੍ਹਾਤਿ ਸਜ੍ਜਨੋ ਏਤਾਯਾਤਿ ਦਯਾ, ਦਯਤਿ ਅਨੁਗ੍ਗਣ੍ਹਾਤਿ ਪਾਪਜਨਮ੍ਪਿ ਏਤਾਯਾਤਿ ਵਾ ਦਯਾ, ਦਯਨ੍ਤਿ ਗਣ੍ਹਨ੍ਤਿ ਬੋਧਿਸਤ੍ਤਾ ਸਮ੍ਮਾਸਮ੍ਬੋਧਿਂ ਏਤਾਯਾਤਿ ਵਾ ਦਯਾ, ਬੋਧਿਸਤ੍ਤਾ ਬੁਦ੍ਧਭਾਵਾਯ ਅਭਿਨੀਹਾਰਕਰਣ ਕਾਲੇ ਹਤ੍ਥਗਤਮ੍ਪਿ ਅਗ੍ਗਫਲਂ ਛਟ੍ਟੇਤ੍ਵਾ ਮਹਾਕਰੁਣਾਯ ਸਂਸਾਰਸਾਗਰਤੋ ਸਤ੍ਤੇ ਸਮੁਦ੍ਧਰਿਤੁਕਾਮਾ ਅਨਸ੍ਸਾਸ ਕਰਂ ਮਹਨ੍ਤਂ ਸਂਸਾਰਦੁਕ੍ਖਞ੍ਚ ਪਚ੍ਛਿਮਭਵੇ ਸਹ ਅਮਤ ਧਾਤੁਪਟਿਲਾਭੇਨ ਅਨੇਕਗੁਣਸਮਲਙ੍ਕਤਂ ਸਬ੍ਬਞ੍ਞੁਤਞਾਣਞ੍ਚ ਗਣ੍ਹਨ੍ਤੀਤਿ ਅਤ੍ਥੋ. ਦਯਤਿ ਦਦਾਤਿ ਸਤ੍ਤਾਨਂ ਅਭਯਂ ਏਤਾਯਾਤਿ ਦਯਾ, ਮੇਤ੍ਤਾ. ਦਯਧਾਤੁ ਦਾਨੇ ਅ. ਦਯਤਿ ਗਚ੍ਛਤਿ ਵਿਭਾਗਂ ਅਕਤ੍ਵਾ ਸਤ੍ਤੇਸੁ ਸਮਂ ਪਵਤ੍ਤਤੀਤਿ ਦਯਾ. ਯਥਾ ਉਦਕਂ ਸਬ੍ਬਸਤ੍ਤੇਸੁ ਸੀਤੇਨ ਸਮਂ ਫਰਤਿ ਰਜੋਮਲਞ੍ਚ ਪਵਾਹੇਤਿ, ਏਵਂ ਮੇਤ੍ਤਾ ਪਾਪਕਲ੍ਯਾਣਜਨੇਸੁ ਵਿਭਾਗਂ ਅਕਤ੍ਵਾ ਸਮਂ ਪਵਤ੍ਤਤੀਤਿ ਅਤ੍ਥੋ.

ਅਪਰੋ ਨਯੋ. ਦਯਨ੍ਤਿ ਅਨੁਰਕ੍ਖਨ੍ਤਿ ਸਤ੍ਤੇ ਏਤਾਯ, ਸਯਂ ਵਾ ਅਨੁਦ੍ਦਯਤਿ ਅਨੁਦ੍ਦਯਮਤ੍ਤਮੇਵ ਵਾ ਏਤਨ੍ਤਿ ਦਯਾ, ਕਰੁਣਾਮੇਤ੍ਤਾ ਲਬ੍ਭਨ੍ਤਿ. ਤਾਯ ਆਲਯਤਿ ਪਤਿਟ੍ਠਤਿ ਏਤ੍ਥਾਤਿ ਦਯਾਲਯੋ, ਬੁਦ੍ਧੋ. ਭਗਵਾ ਹਿ ਦੇਵਦਤ੍ਤਾਦੀਸੁ ਵਿਰੋਧਿ ਸਤ੍ਤੇਸੁ ਚ ਅਵਿਰੋਧਿਸਤ੍ਤੇਸੁ ਓਰਸੇ ਰਾਹੁਲੇ ਚ ਸਮਂ ਨਿਚ੍ਚਂ ਹਿਤਜ੍ਝਾਸਯਤਾਯ ਮਹਾਕਰੁਣਾਯ ਮੇਤ੍ਤਾਯ ਚ ਠਿਤੋ, ਤਸ੍ਮਾ ਦਯਾਲਯਨ੍ਤਿ ਥੋਮੇਤੀਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹੇਤਂ ਅਪਦਾਨਪਾਲ਼ਿਯਂ –

‘‘ਵਧਕੇ ਦੇਵਦਤ੍ਤੇ ਚ, ਚੋਰੇ ਅਙ੍ਗੁਲਿਮਾਲਕੇ;

ਧਨਪਾਲੇ ਰਾਹੁਲੇ ਚ, ਸਮਚਿਤ੍ਤੋ ਮਹਾਮੁਨੀ’’ਤਿ.

ਸਬ੍ਬਧੀਤਿ ਸਬ੍ਬਸ੍ਮਿਂ ਅਤ੍ਤਭਾਵੇ. ਬੁਦ੍ਧਭਾਵਾਯ ਅਭਿਨੀਹਾਰਤੋ ਪਟ੍ਠਾਯ ਸਬ੍ਬਤ੍ਤਭਾਵੇਸੂਤਿ ਅਤ੍ਥੋ. ਦੁਕ੍ਕਰਨ੍ਤਿ ਦੁਕ੍ਖੇਨ ਕਰਿਤਬ੍ਬਂ ਪਞ੍ਚਮਹਾਪਰਿਚ੍ਚਾਗਾਦਿਕਮ੍ਮਂ ਦੁਕ੍ਖੇਨ ਕਰਿਤਬ੍ਬਨ੍ਤਿ ਦੁਕ੍ਕਰਂ, ਪਞ੍ਚਮਹਾਪਰਿਚ੍ਚਾਗਾਦਿਕਮ੍ਮਂ ਲਬ੍ਭਤਿ. ਏਤ੍ਥ ਚ ਪਞ੍ਚਮਹਾ ਪਰਿਚ੍ਚਾਗੋਤਿ ਧਨਪਰਿਚ੍ਚਾਗੋ, ਅਙ੍ਗਪਰਿਚ੍ਚਾਗੋ, ਪੁਤ੍ਤਪਰਿਚ੍ਚਾਗੋ, ਭਰਿਯਪਰਿਚ੍ਚਾਗੋ, ਜੀਵਿਤਪਰਿਚ੍ਚਾਗੋ ਚਾਤਿ ਪਞ੍ਚਵਿਧੋ ਹੋਤਿ. ਤਤ੍ਥ ਹਤ੍ਥਿਅਸ੍ਸ ਦਾਸਿਦਾਸਾਦਿ ਸਵਿਞ੍ਞਾਣਕਸ੍ਸ ਧਨਸ੍ਸ ਵਾ ਮੁਤ੍ਤਾਮਣਿਰਜਤਾਦਿ ਅਵਿਞ੍ਞਾਣਕਸ੍ਸ ਧਨਸ੍ਸ ਵਾ ਪਰਿਚ੍ਚਾਗੋ ਧਨਪਰਿਚ੍ਚਾਗੋ ਨਾਮ. ਹਤ੍ਥਪਾਦਚਕ੍ਖੁਕਣ੍ਣਨਾਸਾਦਿਸਰੀਰਾਵ ਯਵਸ੍ਸ ਪਰਿਚ੍ਚਾਗੋ ਅਙ੍ਗਪਰਿਚ੍ਚਾਗੋ ਨਾਮ. ਪੁਤ੍ਤਸ੍ਸ ਚ ਧੀਤੁਯਾ ਚ ਪਰਿਚ੍ਚਾਗੋ ਪੁਤ੍ਤਪਰਿਚ੍ਚਾਗੋ ਨਾਮ. ਭਰਿਯਾਯ ਪਰਿਚ੍ਚਾਗੋ ਭਰਿਯਪਰਿਚ੍ਚਾਗੋ ਨਾਮ. ਜੀਵਿਤਿਨ੍ਦ੍ਰਿਯਪਟਿਬਦ੍ਧਸ੍ਸ ਸਰੀਰਸ੍ਸ ਪਰਿਚ੍ਚਾਗੋ ਜੀਵਿਤਪਰਿਚ੍ਚਾਗੋ ਨਾਮ. ਕਿਞ੍ਚਾਪਿ ਪਨ ਧਨਪਰਿਚ੍ਚਾਗਾ ਦਯੋ ਦਾਨਪਾਰਮਿਯਂਯੇਵ ਅਨ੍ਤੋਗਧਾ, ਤਥਾਪਿ ਪਰਿਚ੍ਚਾਗ ਵਿਸੇਸਭਾਵਦਸ੍ਸਨਤ੍ਥਞ੍ਚੇਵ ਸੁਦੁਕ੍ਕਰਭਾਵਦਸ੍ਸਨਤ੍ਥਞ੍ਚ ਮਹਾਪਰਿਚ੍ਚਾਗਵਸੇਨ ਵਿਸੁਂ ਕਤਨ੍ਤਿ ਅਧਿਪ੍ਪਾਯੋ. ਮਹਾਪਦਾਨਸੁਤ੍ਤਟੀਕਾਯਂ ਪਨ ‘‘ਅਙ੍ਗਪਰਿਚ੍ਚਾਗੋ, ਨਯਨਪਰਿਚ੍ਚਾਗੋ, ਅਤ੍ਤਪਰਿਚ੍ਚਾਗੋ, ਰਜ੍ਜਪਰਿਚ੍ਚਾਗੋ, ਪੁਤ੍ਤਦਾਰਪਰਿਚ੍ਚਾਗੋਤਿ ਇਮੇ ਪਞ੍ਚ ਮਹਾਪਰਿਚ੍ਚਾਗਾ. ਤਤ੍ਥਪਿ ਕਾਮਂ ਅਙ੍ਗਪਰਿਚ੍ਚਾਗਾਦਯੋਪਿ ਦਾਨਪਾਰਮੀਯੇਵ. ਤਥਾਪਿ ਪਰਿਚ੍ਚਾਗਵਿਸੇਸਭਾਵਦਸ੍ਸਨਤ੍ਥਞ੍ਚੇਵ ਸੁਦੁਕ੍ਕਰਭਾਵਦਸ੍ਸਨਤ੍ਥਞ੍ਚ ਮਹਾਪਰਿਚ੍ਚਾਗਾਨਂ ਵਿਸੁਂ ਗਹਣਂ. ਤਤੋਯੇਵ ਚ ਅਙ੍ਗਪਰਿਚ੍ਚਾਗਤੋਪਿ ਵਿਸੁਂ ਨਯਨਪਰਿਚ੍ਚਾਗਗ੍ਗਹਣਂ. ਪਰਿਚ੍ਚਾਗਭਾਵਸਾਮਞ੍ਞੇਪਿ ਰਜ੍ਜਪਰਿਚ੍ਚਾਗ ਪੁਤ੍ਤਦਾਰਪਰਿਚ੍ਚਾਗਗ੍ਗਹਣਂ ਕਤ’’ਨ੍ਤਿ ਵੁਤ੍ਤਂ. ਤਂ ਦੁਕ੍ਕਰਂ. ਇਦਂ ਪਨ ਕਰਨ੍ਤਿ ਏਤਸ੍ਸ ਕਮ੍ਮਪਦਂ. ਕਰਨ੍ਤਿ ਕਰੋਨ੍ਤਂ, ਕਰੋਤੀਤਿ ਕਰੋ, ਬੁਦ੍ਧੋ. ਤਂ.

ਭਵਣ੍ਣਵਾਤਿਕ੍ਕਮਮਗ੍ਗਤਨ੍ਤਿ ਏਤ੍ਥ ਭਵਅਣ੍ਣਵਅਤਿਕ੍ਕਮਂ ਅਗ੍ਗਤਨ੍ਤਿ ਪਦਚ੍ਛੇਦੋ. ਭਵਣ੍ਣਵਾਤਿਕ੍ਕਮਨ੍ਤਿ ਕਾਮਰੂਪਅਰੂਪਭਵਸਙ੍ਖਤਾ ਅਣ੍ਣਵਾ ਸਮੁਦ੍ਦਤੋ ਅਤਿਕ੍ਕਨ੍ਤਂ. ਭਵਨ੍ਤਿ ਸਤ੍ਤਾ ਏਤ੍ਥਾਤਿ ਭਵੋ. ਅਣ੍ਣੋ ਵੁਚ੍ਚਤਿ ਉਦਕਂ. ਤਂ ਏਤਸ੍ਮਿਂ ਅਤ੍ਥੀਤਿ ਅਣ੍ਣਵਾ, ਸਮੁਦ੍ਦੋ. ਭਵਸਙ੍ਖਾਤੋ ਅਣ੍ਣਵੋਤਿ ਭਵਣ੍ਣਵਾ, ਮਹਾਸਮੁਦ੍ਦੋ. ਬਹੂਹਿ ਊਮਿਵੇਗਾਦੀਹਿ ਭਯੇਹਿ ਓਕਿਣ੍ਣੋ ਵਿਯ ਤਿਵਿਧੋਪਿ ਭਵੋ ਬਹੂਹਿ ਜਾਤਿਜਰਾਮਰਣਾਦੀਹਿ ਦੁਕ੍ਖਭਯੇਹਿ ਓਕਿਣ੍ਣੋ ਹੋਤਿ, ਤਸ੍ਮਾ ਭਵਣ੍ਣਵਾਤਿ ਵੁਚ੍ਚਤਿ. ਤਂ ਅਤਿਕ੍ਕਮਿਤ੍ਥ ਉਤ੍ਤਰਿਤ੍ਥਾਤਿ ਭਵਣ੍ਣਵਾਤਿਕ੍ਕਮੋ, ਬੁਦ੍ਧੋ. ਤਸ੍ਸ ਹਿ ਗਮ੍ਭੀਰੇ ਮਹਾਉਦਕਕ੍ਖਨ੍ਧੇ ਮਹਾਸਮੁਦ੍ਦੇ ਉਦਕਂ ਅਬ੍ਬੋਚ੍ਛਿਨ੍ਨਂ ਪਵਤ੍ਤਤਿ ਸਨ੍ਦਤਿਇਵ ਤਿਭਵਸਙ੍ਖਤੇ ਸਂਸਾਰੇ ਪਟਿਸਨ੍ਧਿਚੁਤਿਯੋ ਅਬ੍ਬੋਚ੍ਛਿਨ੍ਨਂ ਨਿਬ੍ਬਤ੍ਤਕਾਨਂ ਦਿਯਡ੍ਢਸਹਸ੍ਸਕਿਲੇਸਾਨਂ ਬੋਧਿਮਣ੍ਡੇ ਅਰਹਤ੍ਤਮਗ੍ਗਞਾਣੇਨ ਅਸੇਸਂ ਵਿਦ੍ਧਂਸਿਤਤ੍ਤਾ ਤੀਸੁ ਭਵੇਸੁ ਪੁਨਬ੍ਭਵੋ ਨਤ੍ਥਿ. ਤਸ੍ਮਾ ਬੁਦ੍ਧਂ ਭਵਣ੍ਣਵਾਤਿਕ੍ਕਮਨ੍ਤਿ ਅਭਿਤ੍ਥਵਿਤੁਂ ਅਰਹਤੀਤਿ ਵੁਤ੍ਤਂ ਹੋਤਿ. ਤਂ ਭਵਣ੍ਣਵਾਤਿਕ੍ਕਮਂ.

ਅਗ੍ਗਤਨ੍ਤਿ ਸਬ੍ਬਸਤ੍ਤਾਨਂ ਸੇਟ੍ਠਭਾਵਂ. ਅਯਂ ਪਨੇਤ੍ਥ ਅਗ੍ਗਸਦ੍ਦੋ ਆਦਿਕੋਟਿਕੋਟ੍ਠਾਸਸੇਟ੍ਠੇਸੁ ਦਿਸ੍ਸਤਿ. ਤਥਾ ਹੇਸ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਨ੍ਤਿਆਦੀਸੁ ਆਦਿਮ੍ਹਿ ਦਿਸ੍ਸਤਿ. ਤੇਨੇਵ ਅਙ੍ਗੁਲਗ੍ਗੇਨ ਤਂ ਅਙ੍ਗੁਲਗ੍ਗਂ ਪਰਾਮਸੇਯ੍ਯਾਤਿਆਦੀਸੁ ਕੋਟਿਯਂ. ਅਨੁਜਾਨਾਮਿ ਭਿਕ੍ਖਵੇ ਵਿਹਾਰਗ੍ਗੇਨ ਵਾ ਪਰਿਵੇਣਗ੍ਗੇਨ ਵਾ ਭਾਜੇਤੁਨ੍ਤਿਆਦੀਸੁ ਕੋਟ੍ਠਾਸੇ. ਅਗ੍ਗੋ ਹਮਸ੍ਮਿ ਲੋਕਸ੍ਸਾਤਿਆਦੀਸੁ ਸੇਟ੍ਠੇ. ਸ੍ਵਾਯਮਿਧਪਿ ਸੋਯੇਵ ਦਟ੍ਠਬ੍ਬੋ. ਦੇਵਮਨੁਸ੍ਸਾਨਂ ਸੇਟ੍ਠਭਾਵਂ ਅਜਤਿ ਗਚ੍ਛਤੀਤਿ ਅਗ੍ਗੋ, ਬੁਦ੍ਧੋ. ਅਸਦਿਸਟ੍ਠੇਨ ਗੁਣਵਿਸਿਟ੍ਠਟ੍ਠੇਨ ਅਸਮਸਮਟ੍ਠੇਨ ਚ ਅਗ੍ਗੋ ਸੇਟ੍ਠੋ ਨਾਮਾਤਿ ਅਤ੍ਥੋ. ਅਥ ਵਾ ਦੁਲ੍ਲਭਪਾਤੁ ਭਾਵਤੋ ਅਚ੍ਛਰਿਯਮਨੁਸ੍ਸਭਾਵਤੋ ਬਹੁਜਨਹਿਤਸੁਖਾਵਹਤੋ ਅਦੁਤਿਯਅਸਹਾਯਾਦਿਭਾਵਤੋ ਚ ਭਗਵਾ ਲੋਕੇ ਅਗ੍ਗੋ ਸੇਟ੍ਠੋ ਨਾਮਾਤਿ ਅਤ੍ਥੋ. ਵੁਤ੍ਤਞ੍ਹਿ ਅਙ੍ਗੁਤ੍ਤਰਪਾਲ਼ਿਯਂ ‘‘ਯਾਵਤਾ ਭਿਕ੍ਖਵੇ ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ ਚਤੁਪ੍ਪਦਾ ਵਾ ਬਹੁਪ੍ਪਦਾ ਵਾ, ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ. ਅਗ੍ਗਸ੍ਸ ਭਾਵੋ ਅਗ੍ਗਤਂ. ਤਂ ਪਨ ਗਤਨ੍ਤਿਏਤਸ੍ਸ ਕਮ੍ਮਪਦਂ. ਗਤਨ੍ਤਿ ਪਤ੍ਤਂ, ਪਾਪੁਣਨ੍ਤਨ੍ਤਿ ਅਤ੍ਥੋ.

ਤਿਲੋਕਨਾਥਨ੍ਤਿ ਕਾਮਰੂਪਅਰੂਪਸਙ੍ਖਤਾਨਂ ਤਿਣ੍ਣਂ ਲੋਕਾਨਂ ਪਟਿਸਰਣਂ. ਏਤ੍ਥ ਚ ਲੋਕਸਦ੍ਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਯੋ ਲੋਕਾ ਤਿਲੋਕਾ. ਨਾਥਸਦ੍ਦੋ ਪਨ ਨਿਪ੍ਫਨ੍ਨਾਨਿਪ੍ਫਨ੍ਨਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਨਿਪ੍ਫਨ੍ਨਨਾਥਸਦ੍ਦੋ ਪਟਿਸਰਣਤ੍ਥੋ ਹੋਤਿ ਸਙ੍ਕੇਤਵਸੇਨ. ਤਥਾ ਹਿ ਵੁਤ੍ਤਂ ਅਟ੍ਠਕਥਾਯਂ ‘‘ਸਙ੍ਕੇਤਵਚਨਂ ਸਚ੍ਚਂ, ਲੋਕਸਮ੍ਮੁਤਿਕਾਰਣ’’ਨ੍ਤਿ. ਤਿਲੋਕਾਨਂ ਨਾਥੋ ਪਟਿਸਰਣੋਤਿ ਤਿਲੋਕਨਾਥੋ, ਬੁਦ੍ਧੋ. ਸਬ੍ਬਾਨਤ੍ਥਪਰਿਹਾਰ ਪੁਬ੍ਬਙ੍ਗਮਾਯ ਨਿਰਵਸੇਸਹਿਤਸੁਖਵਿਧਾਨਤਪ੍ਪਰਾਯਨਿਰਤਿਸਯਾਯ ਪਯੋਗਸਮ੍ਪਤ੍ਤਿਯਾ ਚ ਸਦੇਵਮਨੁਸ੍ਸਾਯ ਪਜਾਯ ਅਚ੍ਚਨ੍ਤੁਪਕਾਰਿਤਾਯ ਅਪਰਿਮਿਤਨਿਰੁਪਮਪ੍ਪਭਾਵਗੁਣਵਿਸੇਸਸਮਙ੍ਗਿਤਾਯ ਚ ਸਬ੍ਬਸਤ੍ਤੁਤ੍ਤਮੋ ਭਗਵਾ ਅਪਰਿਮਾਣਾਸੁ ਲੋਕਧਾਤੂਸੁ ਅਪਰਿਮਾਣਾਨਂ ਸਤ੍ਤਾਨਂ ਏਕਪਟਿਸਰਣੋ ਨਾਮਾਤਿ ਅਤ੍ਥੋ.

ਨਿਪ੍ਫਨ੍ਨਨਾਥਸਦ੍ਦੋ ਪਨ ਯਾਚਨੇ, ਉਪਤਾਪੇ, ਇਸ੍ਸਰਿਯੇ, ਆਸੀਸੇ ਚਾਤਿ ਚਤੂਸ੍ਵਤ੍ਥੇਸੁ ਵਤ੍ਤਤਿ. ਤਤ੍ਥ ਯਾਚਨੇ ਨਾਥਤਿ ਯਾਚਤੀਤਿ ਨਾਥੋ, ਬੁਦ੍ਧੋ. ਨਾਥਧਾਤੁ ਅ. ਸੋ ਪਨ ਵੇਨੇਯ੍ਯਸਤ੍ਤੇ ਅਤ੍ਤਨੋ ਹਿਤਕਰਣੇ ਯਾਚਿਤ੍ਵਾਪਿ ਨਿਯੋਜੇਤੀਤਿ ਅਤ੍ਥੋ. ਅਥ ਵਾ ਭਗਵਾ ਸਾਧੁ ਭਿਕ੍ਖਵੇ ਭਿਕ੍ਖੁ ਕਾਲੇਨ ਕਾਲਂ ਅਤ੍ਤਸਮ੍ਪਤ੍ਤਿਂ ਪਚ੍ਚਵੇਕ੍ਖੇਯ੍ਯਾਤਿਆਦਿਨਾ ਸਤ੍ਤਾਨਂ ਤਂ ਤਂ ਹਿਤਪਟਿਪਤ੍ਤਿਂ ਯਾਚਿਤ੍ਵਾਪਿ ਕਰੁਣਾਯ ਸਮੁਸ੍ਸਾਹਿਤੋ ਤੇ ਤਤ੍ਥ ਨਿਯੋਜੇਤਿ. ਤਸ੍ਮਾ ਨਾਥੋ ਨਾਮਾਤਿ ਅਤ੍ਥੋ. ਉਪਤਾਪੇ ਨਾਥਤਿ ਵੇਨੇਯ੍ਯਗਤੇ ਕਿਲੇਸੇ ਉਪਤਾਪੇਤੀਤਿ ਨਾਥੋ, ਬੁਦ੍ਧੋ. ਧਮ੍ਮਦੇਸਨਾਯ ਵੇਨੇਯ੍ਯਸਨ੍ਤਾਨੇ ਕਿਲੇਸੇ ਵਿਦ੍ਧਂਸਾਪੇਤੀਤਿ ਅਤ੍ਥੋ. ਇਸ੍ਸਰਿਯੇ ਨਾਥਤਿ ਇਸ੍ਸਰਿਯਤਿ ਸਤ੍ਤੇਤਿ ਨਾਥੋ. ਪਰਮੇਨ ਪਨ ਚਿਤ੍ਤਿਸ੍ਸਰਿਯੇਨ ਸਮਨ੍ਨਾਗਤੋ ਭਗਵਾ ਸਬ੍ਬਸਤ੍ਤੇ ਧਮ੍ਮੇਨ ਇਸਤਿ ਅਭਿਭਵਤੀਤਿ ਅਤ੍ਥੋ. ਆਸੀਸੇ ਪਨ ਨਾਥਤਿ ਆਸੀਸਤੀਤਿ ਨਾਥੋ. ਵੇਨੇਯ੍ਯਾਨਂ ਹਿਤਸੁਖਂ ਮੇਤ੍ਤਾਯ ਨਵਸੇਨ ਪਤ੍ਥੇਤੀਤਿ ਅਤ੍ਥੋ. ਤਿਲੋਕਾਨਂ ਨਾਥੋ ਤਿਲੋਕਨਾਥੋ, ਬੁਦ੍ਧੋ. ਤਂ ਤਿਲੋਕਨਾਥਂ.

ਸੁਸਮਾਹਿਤਨ੍ਤਿ ਲਾਭਾਲਾਭਾਦਿਲੋਕਧਮ੍ਮੇਹਿ ਅਚਲ ਮਾਨਤ੍ਤਾ ਸੁਨ੍ਦਰਸਮਾਧਿਵਨ੍ਤਂ. ਸਂਸਮਂ ਆਧਿਯਤਿ ਏਕਾਰਮ੍ਮਣੇ ਸਮ੍ਪਯੁਤ੍ਤਧਮ੍ਮੇ ਠਪੇਤਿ ਏਤੇਨਾਤਿ ਸਮਾਧਿ. ਸਂਪੁਬ੍ਬ ਧਾ ਧਾਤੁ ਇ. ਸੁਨ੍ਦਰੋ ਪਸਤ੍ਥੋ ਵਾ ਸਮਾਧਿ ਸੁਸਮਾਧਿ. ਤਂ ਅਸ੍ਸ ਅਤ੍ਥੀਤਿ ਸੁਸਮਾਹਿਤੋ, ਬੁਦ੍ਧੋ. ਅਸ੍ਸਥ੍ਯਤ੍ਥੇ ਤੋ. ਪਬ੍ਬਤੋਤਿਆਦੀਸੁ ਵਿਯ. ਧਸ੍ਸ ਹੋ. ਚਤੂਹਿ ਦਿਸਾਹਿ ਆਗਤੇਹਿ ਵਾਤੇਹਿ ਅਚਲਮਾਨੋ ਮਹਾਮੇਰੁਪਬ੍ਬਤੋ ਵਿਯ ਭਗਵਾ ਲਾਭਾਲਾਭਾਦਿਲੋਕਧਮ੍ਮੇਹਿ ਚ ਮਿਚ੍ਛਾਵਾਦ ਵਾਤੇਹਿ ਚ ਅਚਲਮਾਨੇਨ ਸਮਾਧਿਨਾ ਸਮਨ੍ਨਾਗਤੋਤਿ ਅਤ੍ਥੋ. ਤਂ ਸੁਸਮਾਹਿਤਂ.

ਹਿਤਨ੍ਤਿ ਮਨੁਸ੍ਸਦੇਵਬ੍ਰਹ੍ਮਸਙ੍ਖਾਤਾਨਂ ਸਬ੍ਬਸਤ੍ਤਾਨਂ ਪਯੋਜਨ ਧਾਰੇਨ੍ਤਂ. ਕਾਰਣਾਨੁਰੂਪਂ ਹਿਨੋਤਿ ਪਵਤ੍ਤਤੀਤਿ ਹਿਤਂ, ਪਯੋਜਨਂ. ਹਿਧਾਤੁ ਗਤਿਯਂ ਤ. ਤਂ ਧਾਰੇਤੀਤਿ ਹਿਤੋ, ਬੁਦ੍ਧੋ. ਕਿਤਨ੍ਤ ਸਮਾਸੋਯਂ. ਹਿਤਧਰਨ੍ਤਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਾਯ ਉਤ੍ਤਰ ਪਦਲੋਪੇਨ ਹਿਤਨ੍ਤਿ ਵਤ੍ਤਬ੍ਬਂ. ਯਥਾ ਸਮਜ੍ਜਨੀ ਪਦੀਪੋਤਿ. ਅਥ ਵਾ ਦੁਕ੍ਖਂ ਹਿਂਸਤੀਤਿ ਹਿਤਂ. ਹਿਂਸਧਾਤੁ ਹਿਂਸਾਯਂ ਤਪਚ੍ਚਯੋ. ਯਥਾ ਚ ਬ੍ਯਾਧਿਯਾ ਓਸਮਂ ਰੋਗੀਨਂ ਹਿਤਨ੍ਤਿ ਵੁਚ੍ਚਤਿ, ਏਵਂ ਦੁਕ੍ਖਹਨਨਤੋ ਹਿਤਂ ਨਾਮ ਹੋਤਿ. ਸੁਖਂ ਵਿਦਧਾਤੀਤਿ ਵਾ ਹਿਤਂ. ਧਾਧਾਤੁ ਧਾਰਣੇ ਤ. ਯਥਾ ਚ ਰੁਧਿਰਮਂਸਾਦਿ ਧਾਤੁ ਵਡ੍ਢਨਂ ਰਸਾਯਤਨਂ ਕਿਸ੍ਸਾਨਂ ਹਿਤਨ੍ਤਿ ਵੁਚ੍ਚਤਿ, ਏਵਂ ਸੁਖਵਹਨਤੋ ਹਿਤਨ੍ਤਿ ਵੁਚ੍ਚਤਿ. ਪਯੋਜਨਂ ਤਂ ਧਾਰੇਤੀਤਿ ਹਿਤੋ, ਬੁਦ੍ਧੋ. ਸੋ ਪਨ ਧਮ੍ਮਦੇਸਨਾਯ ਵੇਨੇਯ੍ਯਜਨਾਨਂ ਦੁਕ੍ਖਾਪਨਯਨਮ੍ਪਿ ਞਾਣਪਰਿਪਾਚਨਮ੍ਪਿ ਕਤ੍ਵਾ ਲੋਕਿਯਲੋਕੁਤ੍ਤਰਹਿਤਸੁਖਂ ਧਾਰੇਤੀਤਿ ਵੁਤ੍ਤਂ ਹੋਤਿ. ਤਂ ਹਿਤਂ.

ਸਮਨ੍ਤਚਕ੍ਖੁਨ੍ਤਿ ਏਤ੍ਥ ਚਕ੍ਖੁ ਨਾਮ ਬੁਦ੍ਧਚਕ੍ਖੁ, ਧਮ੍ਮਚਕ੍ਖੁ, ਞਾਣ ਚਕ੍ਖੁ, ਸਮਨ੍ਤਚਕ੍ਖੁ, ਦਿਬ੍ਬਚਕ੍ਖੂਤਿ ਪਞ੍ਚਵਿਧਂ ਹੋਤਿ. ਤਤ੍ਥ ਅਦ੍ਦਸਂ ਖੋ ਅਹਂ ਭਿਕ੍ਖਵੇ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋਤਿ ਇਦਂ ਬੁਦ੍ਧਚਕ੍ਖੁ ਨਾਮ. ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਨ੍ਤਿ ਇਦਂ ਹੇਟ੍ਠਿਮਮਗ੍ਗਤ੍ਤ ਯਸਙ੍ਖਾਤਂ ਧਮ੍ਮਚਕ੍ਖੁ ਨਾਮ. ਚਕ੍ਖੁਂ ਉਦਪਾਦੀਤਿ ਇਦਂ ਞਾਣਚਕ੍ਖੁ ਨਾਮ. ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞਾਣਨ੍ਤਿ ਇਦਂ ਸਮਨ੍ਤਚਕ੍ਖੁ ਨਾਮ. ਅਦ੍ਦਸਂ ਖੋ ਅਹਂ ਭਿਕ੍ਖਵੇ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨਾਤਿ ਇਦਂ ਦਿਬ੍ਬਚਕ੍ਖੁ ਨਾਮ. ਇਧ ਪਨ ਸਮਨ੍ਤਚਕ੍ਖੁ ਅਧਿਪ੍ਪੇਤਂ. ਪਰਿਸਮਨ੍ਤਤੋ ਸਬ੍ਬਞੇਯ੍ਯਧਮ੍ਮਂ ਪਸ੍ਸਨ੍ਤਂ ਸਬ੍ਬਞ੍ਞੁਤਞਾਣਵਨ੍ਤਨ੍ਤਿ ਅਤ੍ਥੋ. ਅਯਂ ਪਨੇਤ੍ਥ ਵਚਨਤ੍ਥੋ. ਸਮਨ੍ਤਤੋ ਸਬ੍ਬਞੇਯ੍ਯਧਮ੍ਮਂ ਚਕ੍ਖਤਿ ਪਸ੍ਸਤੀਤਿ ਸਮਨ੍ਤਚਕ੍ਖੁ, ਸਬ੍ਬਞ੍ਞੁਤਞਾਣਂ. ਚਕ੍ਖਧਾਤੁ ਉ. ਤੇਨ ਵੁਤ੍ਤਂ ਮਹਾਨਿਦ੍ਦੇਸਪਾਲ਼ਿਯਂ ‘‘ਸਮਨ੍ਤਚਕ੍ਖੁ ਵੁਚ੍ਚਤਿ ਸਬ੍ਬਞ੍ਞੁਤਞਾਣ’’ਨ੍ਤਿ. ਸਮਨ੍ਤਚਕ੍ਖੁ ਅਸ੍ਸ ਅਤ੍ਥੀਤਿ ਸਮਨ੍ਤਚਕ੍ਖੁ, ਬੁਦ੍ਧੋ. ਵੁਤ੍ਤਞ੍ਹੇਤਂ ਪਟਿਸਮ੍ਭਿਦਾਮਗ੍ਗੇ –

‘‘ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚਿ,

ਅਥੋ ਅਵਿਞ੍ਞਾਤਮਜਾਨਿਤਬ੍ਬਂ;

ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਂ,

ਤਥਾਗਤੋ ਤੇਨ ਸਮਨ੍ਤਚਕ੍ਖੂ’’ਤਿ.

ਤਸ੍ਸਤ੍ਥੋ. ਤਸ੍ਸ ਤਥਾਗਤਸ੍ਸ ਅਦ੍ਦਿਟ੍ਠਂ ਅਪਸ੍ਸਨ੍ਤਂ ਕਿਞ੍ਚਿ ਧਮ੍ਮਜਾਤਂ ਇਧਲੋਕੇ ਨ ਅਤ੍ਥਿ. ਅਥੋ ਅਵਿਞ੍ਞਾਤਂ ਅਵਿਦਿਤਂ ਅਪਾਕਟਂ ਵਾ ਅਜਾਨਿਤਬ੍ਬਂ ਧਮ੍ਮਜਾਤਂ ਨ ਅਤ੍ਥਿ. ਨੇਯ੍ਯਂ ਞਾਤਬ੍ਬਂ ਯਂ ਧਮ੍ਮਜਾਤਂ ਅਤ੍ਥਿ. ਸਬ੍ਬਂ ਤਂ ਧਮ੍ਮਜਾਤਂ ਤਥਾਗਤੋ ਅਭਿਞ੍ਞਾਸਿ ਪਟਿਵਿਜ੍ਝਿ. ਤੇਨ ਤਸ੍ਮਾ ਤਥਾਗਤੋ ਸਮਨ੍ਤਚਕ੍ਖੁ ਨਾਮਾਤਿ. ਤਂ ਸਮਨ੍ਤਚਕ੍ਖੁਂ.

ਪਣਮਾਮਿ ਤਂਮਿਤਨ੍ਤਿ ਏਤ੍ਥ ਪਣਮਾਮਿ ਤਂ ਅਮਿਤਨ੍ਤਿ ਪਦਚ੍ਛੇਦੋ. ਅਮਿਤਂ ਤਂ ਬੁਦ੍ਧਂ ਅਹਂ ਪਣਮਾਮੀਤਿ ਸਮ੍ਬਨ੍ਧੋ. ਤਤ੍ਥ ਅਮਿਤਨ੍ਤਿ ਅਪਰਿਮੇਯ੍ਯਂ ਞਾਣੇਨ ਅਪਰਿਚ੍ਛਿਨ੍ਨਂ ਵਾ, ਸੀਲਸਮਾਧਿ ਪਞ੍ਞਾਦਿਗੁਣਵਨ੍ਤਂ. ਅਮਿਤਬ੍ਬਂ ਞਾਣੇਨ ਅਪਰਿਚ੍ਛਿਨ੍ਦਿਤਬ੍ਬਨ੍ਤਿ ਵਾ ਅਮਿਤਂ, ਸੀਲਾਦਿਗੁਣਂ. ਨਪੁਬ੍ਬ ਮਾਧਾਤੁ ਪਰਿਮਾਣੇ ਤ. ਤਂ ਅਸ੍ਸ ਅਤ੍ਥੀਤਿ ਅਮਿਤੋ, ਬੁਦ੍ਧੋ. ਯਥਾ ਹਿ ਮਹਾਸਮੁਦ੍ਦੇ ਨ ਸੁਕਰਂ ਉਦਕਸ੍ਸ ਪਮਾਣਂ ਗਣੇਤੁਂ ਏਤ੍ਤਕਾਨਿ ਉਦਕਾਲ਼੍ਹਕਾਨੀਤਿ ਵਾ, ਏਤ੍ਤਕਾਨਿ ਉਦਕਾਲ਼੍ਹਕਸਤਾਨੀਤਿ ਵਾ, ਏਤ੍ਤਕਾਨਿ ਉਦਕਾਲ਼੍ਹਕਸਹਸ੍ਸਾਨੀਤਿ ਵਾ, ਏਤ੍ਤਕਾਨਿ ਉਦਕਾਲ਼੍ਹਕਸਤਸਹਸ੍ਸਾਨੀਤਿ ਵਾਤਿ. ਅਥ ਖੋ ਅਸਙ੍ਖ੍ਯੇਯ੍ਯੋ ਅਪ੍ਪਮੇਯ੍ਯੋ ਮਹਾਉਦਕਕ੍ਖਨ੍ਧੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ, ਏਵਮੇਵ ਬੁਦ੍ਧਸ੍ਸ ਨ ਸੁਕਰਂ ਸੀਲਾਦਿਗੁਣਸ੍ਸ ਪਮਾਣਂ ਗਣੇਤੁਂ ਏਤ੍ਤਕਂ ਸੀਲਗੁਣਂ, ਏਤ੍ਤਕੋ ਸਮਾਧਿਗੁਣੋ, ਏਤ੍ਤਕਾ ਪਞ੍ਞਾਗੁਣਾਤਿਆਦਿਨਾਤਿ. ਅਥ ਖੋ ਅਸਙ੍ਖ੍ਯੇਯ੍ਯੋ ਅਪ੍ਪਮੇਯ੍ਯੋ ਮਹਾਗੁਣਕ੍ਖਨ੍ਧੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਤੇਨਵੁਤ੍ਤਂ ਅਪਦਾਨਪਾਲ਼ਿਯਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਾਨ’’ਨ੍ਤਿ ਚ.

‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;

ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮਸਹਸ੍ਸਤੋ’’ਤਿ ਚ.

ਤੇਨ ਬੁਦ੍ਧਂ ਅਮਿਤਨ੍ਤਿ ਥੋਮੇਤੀਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਦਯਾਲਯਂ ਮਹਾਕਰੁਣਾਯ ਮੇਤ੍ਤਾਯ ਆਧਾਰਂ. ਸਬ੍ਬਧਿ ਸਬ੍ਬਸ੍ਮਿਂ ਅਤ੍ਤਭਾਵੇ, ਦੁਕ੍ਕਰਂ ਦੁਕ੍ਖੇਨ ਕਰਿਤਬ੍ਬਂ ਪਞ੍ਚਮਹਾਪਰਿਚ੍ਚਾਗਾਦਿਕਮ੍ਮਂ ਕਰਂ ਕਰੋਨ੍ਤਂ, ਭਵਣ੍ਣਵਾਤਿਕ੍ਕਮਂ ਤਿਭਵਸਙ੍ਖਾਤਸਮੁਦ੍ਦਤੋ ਅਤਿਕ੍ਕਨ੍ਤਂ, ਅਗ੍ਗਤਂ ਸਬ੍ਬਸਤ੍ਤਾਨਂ ਸੇਟ੍ਠਭਾਵਂ, ਗਤਂ ਪਤ੍ਤਂ, ਤਿਲੋਕਨਾਥਂ ਕਾਮਰੂਪ ਅਰੂਪਸਙ੍ਖਾਤਸ੍ਸ ਤਿਲੋਕਸ੍ਸ ਪਟਿਸਰਣਂ, ਸੁਸਮਾਹਿਤਂ ਸੁਨ੍ਦਰ ਸਮਾਧਿਵਨ੍ਤਂ, ਹਿਤਂ ਸਬ੍ਬਸਤ੍ਤਾਨਂ ਲੋਕਿਯਲੋਕੁਤ੍ਤਰਸਙ੍ਖਾਤਂ ਅਤ੍ਥਧਾਰਣਂ, ਸਮਨ੍ਤਚਕ੍ਖੁਂ ਪਰਿਸਮਨ੍ਤਤੋ ਸਬ੍ਬਞੇਯ੍ਯਧਮ੍ਮਂ ਪਸ੍ਸਨ੍ਤਂ ਸਬ੍ਬਞ੍ਞੁਤਞਾਣਵਨ੍ਤਂ, ਅਮਿਤਂ ਅਪਰਿਮੇਯ੍ਯਂ ਸੀਲਾਦਿਗੁਣਵਨ੍ਤਂ, ਤਂ ਬੁਦ੍ਧਂ ਅਹਂ ਪਣਮਾਮਿ ਵਨ੍ਦਾਮੀਤਿ.

ਅਟ੍ਠਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੯.

ਤਹਿਂ ਤਹਿਂ ਪਾਰਮਿਸਞ੍ਚਯਂ ਚਯਂ,

ਗਤਂ ਗਤਂ ਸਬ੍ਭਿ ਸੁਖਪ੍ਪਦਂ ਪਦਂ;

ਨਰਾਨਰਾਨਂ ਸੁਖਸਮ੍ਭਵਂ ਭਵਂ,

ਨਮਾਨਮਾਨਂ ਜਿਨਪੁਙ੍ਗਵਂ ਗਵਂ.

੯. ਏਵਂ ਅਟ੍ਠਮਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਪਾਰਮਿਸਞ੍ਚਯਂ ਚਯਨ੍ਤ੍ਯਾਦੀਹਿ ਪਞ੍ਚਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਤਹਿਂ ਤਹਿਂ ਪਾਰਮਿਸਞ੍ਚਯਂਚਯਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਜਤਜਰ ਗਣੇਹਿ ਯੁਤ੍ਤਤ੍ਤਾ ਦ੍ਵਾਦਸਕ੍ਖਰੇਹਿ ਲਕ੍ਖਿਤਾ ਸਬ੍ਬਪਾਦਾਦ੍ਯਨ੍ਤਯਮਕਾ ਵਂਸਟ੍ਠਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਵਦਨ੍ਤਿ ਵਂਸਟ੍ਠਮਿਦਂ ਜਤਾ ਜਰਾ’’ਤਿ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਤਤ੍ਥ ਤਹਿਂ ਤਹਿਨ੍ਤਿ ਤਸ੍ਮਿਂ ਤਸ੍ਮਿਂ ਭਵੇ ਅਤ੍ਤਭਾਵੇ ਵਾ, ਬੁਦ੍ਧਵਰਂ ਪਣਿਧਾਨਤੋ ਪਟ੍ਠਾਯ ਤੇਸੁ ਤੇਸੁ ਭਵੇਸੁ ਅਤ੍ਤਭਾਵੇਸੁ ਵਾਤਿ ਅਤ੍ਥੋ. ਪਾਰਮਿਸਞ੍ਚਯਨ੍ਤਿ ਦਾਨਾਦਿਪਾ ਰਮੀਨਂ ਸਮੂਹਂ. ਏਤ੍ਥ ਚ ਪਾਰਮੀ ਨਾਮ ਦਾਨਸੀਲਨੇਕ੍ਖਮ੍ਮਪਞ੍ਞਾ ਵੀਰਿਯ ਖਨ੍ਤਿਸਚ੍ਚਅਧਿਟ੍ਠਾਨਮੇਤ੍ਤਾਉਪੇਕ੍ਖਾਵਸੇਨ ਦਸਵਿਧਾ ਹੋਤਿ. ਵੁਤ੍ਤਞ੍ਚ ਬੁਦ੍ਧਵਂਸੇ –

‘‘ਦਾਨਂ ਸੀਲਞ੍ਚ ਨੇਕ੍ਖਮ੍ਮਂ, ਪਞ੍ਞਾ ਵੀਰਿਯੇਨ ਪਞ੍ਚਮਂ;

ਖਨ੍ਤਿਸਚ੍ਚਮਧਿਟ੍ਠਾਨਂ, ਮੇਤ੍ਤੁਪੇਕ੍ਖਾਤਿ ਤੇ ਦਸਾ’’ਤਿ.

ਅਯਂ ਪਨ ਪਾਰਮੀਸਦ੍ਦਸ੍ਸ ਵਚਨਤ੍ਥੋ. ਦਾਨਸੀਲਾਦਿਗੁਣ ਵਿਸੇਸਯੋਗੇਨ ਸਤ੍ਤੁਤ੍ਤਮਤਾਯ ਮਹਾਬੋਧਿਸਤ੍ਤੋ ਪਰਮੋ. ਤਸ੍ਸ ਅਯਂ ਭਾਵੋ ਕਮ੍ਮਨ੍ਤਿ ਵਾ ਪਾਰਮੀ, ਦਾਨਾਦਿ ਕ੍ਰਿਯਾਵ ਲਬ੍ਭਤਿ. ਸਨ੍ਤਕਭਾਵਕਮ੍ਮਤਦ੍ਧਿਤੇ ਣਪਚ੍ਚਯੋ. ਇਤ੍ਥਿਲਿਙ੍ਗਜੋਤਕ ਈਪਚ੍ਚਯੋ ਚ. ਅਥ ਵਾ ਦਾਨਾਦੀਨਿ ਪੂਰੇਤੀਤਿ ਪਰਮੋ. ਦਾਨਾਦਿਗੁਣਾਨਂ ਪੂਰਕੋ ਪਾਲਕੋ ਚ ਬੋਧਿਸਤ੍ਤੋ. ਪੂਰਧਾਤੁ ਅਮਪਚ੍ਚਯੋ. ਪਰੇ ਸਤ੍ਤੇ ਮਵਤਿ ਅਤ੍ਤਨਿ ਬਨ੍ਧਤਿ ਗੁਣਵਿਸੇਸਯੋਗੇਨਾਤਿ ਵਾ ਪਰਮੋ, ਬੋਧਿਸਤ੍ਤੋ. ਪਰਸਦ੍ਦੂਪਪਦ ਮੁਧਾਤੁ ਬਨ੍ਧਨੇ ਕ੍ਵਿ. ਪਰਂ ਅਤਿਰੇਕਂ ਮਜ੍ਜਤਿ ਕਿਲੇਸਮਲਤੋਤਿ ਵਾ ਪਰਮੋ. ਪਰਸਦ੍ਦੂਪ ਪਦ ਮਜ੍ਜਧਾਤੁ ਸਂਸੁਦ੍ਧਿਯਂ ਕ੍ਵਿ. ਪਰਸਦ੍ਦੋ ਅਤਿਰੇਕਤ੍ਥੋ. ਪਰਂ ਸੇਟ੍ਠਂ ਨਿਬ੍ਬਾਨਂ ਵਿਸੇਸੇਨ ਮਯਤਿ ਗਚ੍ਛਤੀਤਿ ਵਾ ਪਰਮੋ. ਪਰਸਦ੍ਦੂਪਪਦ ਮਯਧਾਤੁ ਗਤਿਯਂ ਕ੍ਵਿ. ਧਾਤ੍ਵਨ੍ਤਲੋਪੋ. ਪਰ ਸਦ੍ਦੋ ਸੇਟ੍ਠਤ੍ਥੋ. ਪਰਂ ਲੋਕਂ ਪਮਾਣਭੂਤੇਨ ਞਾਣ ਵਿਸੇਸੇਨ ਇਧਲੋਕਮਿਵ ਮੁਨਾਤਿ ਪਰਿਚ੍ਛਿਨ੍ਦਤੀਤਿ ਵਾ ਪਰਮੋ. ਪਰਸਦ੍ਦੂਪ ਪਦ ਮੁਨਧਾਤੁ ਪਰਿਚ੍ਛਿਨ੍ਦਨੇ ਕ੍ਵਿ. ਪਰਂ ਅਤਿ ਵਿਯ ਸੀਲਾਦਿਗੁਣਗਣਂ ਅਤ੍ਤਨੋ ਸਨ੍ਤਾਨੇ ਮਿਨੋਤਿ ਪਕ੍ਖਿਪਤੀਤਿ ਵਾ ਪਰਮੋ. ਪਰਸਦ੍ਦੂਪਪਦ ਮਿਧਾਤੁ ਪਕ੍ਖਿਪਨੇ ਕ੍ਵਿ. ਪਰਸਦ੍ਦੋ ਅਤਿਰੇਕਵਾਚਕੋ. ਪਰਂ ਅਤ੍ਤਭੂਤਧਮ੍ਮਕਾਯਤੋ ਅਞ੍ਞਂ ਪਟਿਪਕ੍ਖਂ ਵਾ ਤਦਨਤ੍ਥਕਰਂ ਕਿਲੇਸਚੋਰਗਣਂ ਮਿਨਾਤਿ ਹਿਂਸਤੀਤਿ ਵਾ ਪਰਮੋ, ਮਹਾਬੋਧਿਸਤ੍ਤੋ. ਪਰਸਦ੍ਦੂਪਪਦ ਮਿਧਾਤੁ ਹਿਂਸਾਯਂ ਕ੍ਵਿ. ਪਰਸਦ੍ਦੋ ਅਞ੍ਞਵਾਚਕੋ, ਪਟਿਪਕ੍ਖਵਾਚਕੋ ਵਾ. ਪਰਮਸ੍ਸ ਅਯਨ੍ਤਿਆਦਿਨਾ ਵੁਤ੍ਤਨਯੇਨ ਪਾਰਮੀਤਿ. ਅਪਿ ਚ ਪਾਰੇ ਨਿਬ੍ਬਾਨੇ ਮਜ੍ਜਤਿ ਸੁਜ੍ਝਤੀਤਿ ਪਾਰਮੀ, ਮਹਾਬੋਧਿ ਸਤ੍ਤੋ. ਸੁਦ੍ਧਕਤ੍ਤੁਸਾਧਨੋਯਂ. ਪਾਰਸਦ੍ਦੂਪਪਦ ਮਜਧਾਤੁ ਸਂਸੁਦ੍ਧਿਯਂ ਕ੍ਵਿ. ਈ ਚ. ਪਾਰੇ ਨਿਬ੍ਬਾਨੇ ਸਤ੍ਤੇ ਮਜ੍ਜਤਿ ਸੋਧੇਤੀਤਿ ਵਾ ਪਾਰਮੀ, ਹੇਤੁਕਤ੍ਤੁਸਾਧਨੋਯਂ.

ਪਾਰੇਨਿਬ੍ਬਾਨੇ ਸਤ੍ਤੇ ਮਵਤਿ ਬਨ੍ਧਤਿ ਯੋਜੇਤੀਤਿ ਵਾ ਪਾਰਮੀ. ਪਾਰਂ ਨਿਬ੍ਬਾਨਂ ਮਯਤਿ ਗਚ੍ਛਤਿ ਸਤ੍ਤੇ ਚ ਮਾਯੇਤਿ ਗਮੇਤਿ ਵਾ ਪਾਰਮੀ. ਪਾਰਂ ਨਿਬ੍ਬਾਨਂ ਯਾਥਾਵਤੋ ਮੁਨਾਤਿ ਪਰਿਚ੍ਛਿਨ੍ਦਤੀਤਿ ਵਾ ਪਾਰਮੀ. ਪਾਰੇ ਨਿਬ੍ਬਾਨੇ ਸਤ੍ਤੇ ਮਿਨੋਤਿ ਪਕ੍ਖਿਪਤੀਤਿ ਵਾ ਪਾਰਮੀ. ਮਿਧਾਤੁ ਪਕ੍ਖਿਪਨੇ ਈ. ਪਾਰੇ ਨਿਬ੍ਬਾਨੇ ਸਤ੍ਤਾਨਂ ਮਿਨਾਤਿ ਹਿਂਸਤੀਤਿ ਵਾ ਪਾਰਮੀ, ਮਹਾਬੋਧਿਸਤ੍ਤੋ. ਤਸ੍ਸ ਅਯਂ ਭਾਵੋ ਕਮ੍ਮਨ੍ਤਿ ਦਾਨਾਦਿਕ੍ਰਿਯਾ ਪਾਰਮੀਤਿ. ਇਮਿਨਾ ਵੁਤ੍ਤਨਯੇਨ ਪਾਰਮੀਸਦ੍ਦਸ੍ਸ ਵਚਨਤ੍ਥੋ ਵੇਦਿਤਬ੍ਬੋ. ਕਿਞ੍ਚਾਪਿ ਪਨ ਪਾਰਮੀਸਦ੍ਦਸ੍ਸ ਨਿਬ੍ਬਚਨਂ ਸਙ੍ਖੇਪੇਨ ਵੁਤ੍ਤਂ. ਸੋਤੂਨਂ ਪਨ ਨਿਰੁਤ੍ਤਿਨਯਕੋਸਲ੍ਲਤ੍ਥਂ ਵਿਤ੍ਥਾਰੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਸਾ ਪਨ ਦਸਪਾਰਮੀ, ਦਸਉਪਪਾਰਮੀ, ਦਸਪਰਮਤ੍ਥਪਾਰਮੀ ਚਾਤਿ ਤਿਵਿਧਾ ਹੋਤਿ. ਤਤ੍ਥ ਸਵਿਞ੍ਞਾਣਾਵਿਞ੍ਞਾਣਕਂ ਧਨਂ ਪਰਿਚ੍ਚਾਗਂ ਕਤ੍ਵਾ ਪੂਰਿਤਾ ਬੋਧਿਸਮ੍ਭਾਰਾ ਦਸਪਾਰਮਿਯੋ ਨਾਮ. ਹਤ੍ਥ ਪਾਦ ਕਣ੍ਣ ਨਾਸਾਦਿਅਙ੍ਗਪਚ੍ਚਙ੍ਗਪਰਿਚ੍ਚਾਗਂ ਕਤ੍ਵਾ ਪੂਰਿਤਾ ਬੋਧਿਸਮ੍ਭਾਰਾ ਦਸਉਪਪਾਰਮਿਯੋ ਨਾਮ. ਜੀਵਿਤਿਨ੍ਦ੍ਰਿਯਪਰਿਚ੍ਚਾਗਂ ਕਤ੍ਵਾ ਪੂਰਿਤਾ ਬੋਧਿਸਮ੍ਭਾਰਾ ਦਸ ਪਰਮਤ੍ਥਪਾਰਮਿਯੋ ਨਾਮਾਤਿ. ਦਾਨਾਦਿਪਾਰਮੀਨਂ ਪਨ ਅਤ੍ਥੋ ਚਰਿਯਪਿਟਕਅਟ੍ਠਕਥਾਦੀਸੁ ਗਹੇਤਬ੍ਬੋ. ਅਵਯਵਂ ਸਙ੍ਗਹਵਸੇਨ ਚਯਤਿ ਗਚ੍ਛਤਿ ਪਵਤ੍ਤਤੀਤਿ ਸਞ੍ਚਯੋ, ਸਂਪੁਬ੍ਬ ਚਿਧਾਤੁ ਗਤਿਯਂ ਣ. ਸਞ੍ਚਿਨੋਤਿ ਅਵਯਵਨ੍ਤਿ ਵਾ ਸਞ੍ਚਯੋ, ਸਮੂਹੋ. ਪਾਰਮੀਨਂ ਸਞ੍ਚਯੋ ਸਮੂਹੋਤਿ ਪਾਰਮਿਸਞ੍ਚਯੋ, ਤਂ ਪਾਰਮਿਸਞ੍ਚਯਂ. ਤਂ ਪਨ ਚਯਨ੍ਤਿ ਏਤਸ੍ਸ ਕਮ੍ਮਂ. ਚਯਨ੍ਤਿ ਉਪਚਿਤਂ, ਪਰਿਸਮ੍ਭੂਤਨ੍ਤਿ ਅਤ੍ਥੋ. ਚਯਤਿ ਉਪਚਿਨਾਤੀਤਿ ਚਯੋ, ਚਿਯਿਤ੍ਥ ਉਪਚਿਯਿਤ੍ਥਾਤਿ ਵਾ ਚਯੋ, ਬੁਦ੍ਧੋ. ਚਿਧਾਤੁ ਉਪਚਯੇ ਣ. ਤਂ ਚਯਂ. ਸਬ੍ਭਿਗਤਨ੍ਤਿ ਸਮ੍ਬਨ੍ਧੋ.

ਤਤ੍ਥ ਸਬ੍ਭੀਤਿ ਸਨ੍ਤੇਹਿ ਸਪ੍ਪੁਰਿਸੇਹਿ. ਰਾਗਾਦਿਕਿਲੇਸੇ ਸਮੇਨ੍ਤਿ ਉਪਸਮੇਨ੍ਤੀਤਿ ਸਨ੍ਤਾ, ਸਪ੍ਪੁਰਿਸਾ. ਸਮੁਧਾਤੁ ਉਪਸਮੇਤ, ਅਨ੍ਤਪਚ੍ਚਯੋ ਵਾ. ਸਨ੍ਤੇਹੀਤਿ ਵਤ੍ਤਬ੍ਬੇ ਸ੍ਮਾਹਿਸ੍ਮਿਂਨਂ ਮ੍ਹਾ ਭਿਮ੍ਹਿਵਾਤਿ ਸੁਤ੍ਤੇਨ ਹਿਵਿਭਤ੍ਤਿਯਾ ਭਿਕਾਰਂ ਸਨ੍ਤਸਦ੍ਦਸ੍ਸ ਸੋ ਭੇ ਬੋ ਚਨ੍ਤੇਤਿ ਸੁਤ੍ਤੇਨ ਭਕਾਰੇ ਪਰੇ ਸਨ੍ਤਸਦ੍ਦਸ੍ਸ ਸਕਾਰਂ ਕਤ੍ਵਾ ਅਨ੍ਤੇ ਚ ਬਕਾਰਾਗਮਂ ਕਤ੍ਵਾ ਸਬ੍ਭੀਤਿ ਵੁਤ੍ਤਂ. ਤੇਹਿ ਸਬ੍ਭਿ. ਤਂ ਪਨ ਗਤਨ੍ਤਿ ਏਤਸ੍ਸ ਅਵੁਤ੍ਤਕਤ੍ਤਾ. ਗਤਨ੍ਤਿ ਉਪਗਮਿਤਬ੍ਬਂ. ਤਞ੍ਹਿ ਦੇਵਮਨੁਸ੍ਸੇਹਿ ਗਮਿਯਤਿ ਉਪਗਮਿਯਤਿ ਉਪਸਙ੍ਕਮਿਯਤੀਤਿ ਗਤੋਤਿ ਵੁਚ੍ਚਤਿ. ਤਂ ਬੁਦ੍ਧਂ ਅਤ੍ਥਕਾਮੇਹਿ ਸਪ੍ਪੁਰਿਸੇਹਿ ਦੇਵਮਨੁਸ੍ਸੇਹਿ ਸੀਲਾਦਿਅਨਨ੍ਤਗੁਣਿਕਤ੍ਤਾ ਸਰਣਨ੍ਤਿ ਅਭਿਮਾਨਾ ਪਯਿਰੁਪਾਸਿਤਬ੍ਬੋਤਿ ਵੁਤ੍ਤਂ ਹੋਤਿ. ਤਂ ਗਤਂ. ਸੁਖਪ੍ਪਦਂ ਪਦਂ ਗਤਨ੍ਤਿ ਸਮ੍ਬਨ੍ਧੋ. ਤਤ੍ਥ ਸੁਖਪ੍ਪਦਨ੍ਤਿ ਅਚ੍ਚਨ੍ਤਸੁਖਸ੍ਸ ਪਤਿਟ੍ਠਾਨਭੂਤਂ. ਸੁਖਨਂ ਸੁਖਂ, ਤਸ੍ਸ ਪਜ੍ਜਤਿ ਤਿਟ੍ਠਤਿ ਏਤ੍ਥਾਤਿ ਸੁਖਪ੍ਪਦਂ, ਨਿਬ੍ਬਾਨਂ. ਪਦਨ੍ਤਿ ਨਿਬ੍ਬਾਨਂ. ਤਞ੍ਹਿ ਬੁਦ੍ਧਾਦੀਹਿ ਅਰਿਯੇਹਿ ਪਜ੍ਜਿਯਤਿ ਗਮਿਯਤੀਤਿ ਪਦਨ੍ਤਿ ਵੁਚ੍ਚਤਿ. ਗਤਨ੍ਤਿ ਅਗਮਿਨ੍ਤਿ ਗਤੋ, ਬੁਦ੍ਧੋ. ਦੁਕ੍ਖਾਦਿਅਸਮ੍ਮਿਸ੍ਸਸ੍ਸ ਏਕਨ੍ਤਸੁਖਸ੍ਸ ਪਤਿਟ੍ਠਾਨਭੂਤਂ ਨਿਬ੍ਬਾਨਂ ਆਰਮ੍ਮਣਕਰਣਵਸੇਨ ਅਪਾਪੁਣਿਨ੍ਤਿ ਵੁਤ੍ਤਂ ਹੋਤਿ. ਤਂ ਗਤਂ.

ਨਰਾਨਰਾਨਨ੍ਤਿ ਨਰਅਨਰਾਨਨ੍ਤਿ ਪਦਚ੍ਛੇਦੋ. ਮਨੁਸ੍ਸਦੇਵਾਨਨ੍ਤਿ ਅਤ੍ਥੋ. ਪਬ੍ਬਜ੍ਜਾਦਿਸੇਟ੍ਠਭਾਵਂ ਨਰਤਿ ਨੇਤੀਤਿ ਨਰੋ, ਨਰੀਯਤਿ ਸਕੇਨ ਕਮ੍ਮੇਨ ਨਿਯਤੀਤਿ ਵਾ ਨਰੋ, ਮਨੁਸ੍ਸੋ, ਸਤ੍ਤੋ ਵਾ. ਨਰਧਾਤੁ ਨਯਨੇ ਅ. ਨ ਨਰੋ ਅਨਰੋ, ਦੇਵੋ. ਨਰੋ ਚ ਅਨਰੋ ਚ ਨਰਾਨਰੋ, ਤੇਸਂ ਨਰਾਨਰਾਨਂ. ਤਂ ਪਨ ਸੁਖਸਮ੍ਭਵਨ੍ਤਿ ਪਦੇ ਸਮ੍ਬਨ੍ਧੋ.

ਸੁਖਸਮ੍ਭਵਨ੍ਤਿ ਲੋਕਿਯਲੋਕੁਤ੍ਤਰਸੁਖਸ੍ਸ ਕਾਰਣਂ. ਤਿਵਿਧਸੁਖਸ੍ਸ ਲਭਨਕਾਰਣਭੂਤਂ ਪੁਞ੍ਞਂ ਵਾ. ਸੁਖਯਤੀਤਿ ਸੁਖਂ. ਤਿਵਿਧਸੁਖਂ. ਯਸ੍ਸ ਉਪ੍ਪਜ੍ਜਤਿ, ਤਂ ਸੁਖਿਤਂ ਕਰੋਤੀਤਿ ਅਤ੍ਥੋ. ਅਥ ਵਾ ਸੁਟ੍ਠੁ ਦੁਕ੍ਖਂ ਖਨਤੀਤਿ ਸੁਖਂ. ਸੁਪੁਬ੍ਬਖਨੁਧਾਤੁ ਅਵਧਾਰਣੇ ਅ. ਸਮ੍ਭਵਤਿ ਸੁਖਸਙ੍ਖਾਤਂ ਫਲਂ ਅਨੇਨ ਪੁਞ੍ਞੇਨਾਤਿ ਸਮ੍ਭਵਂ, ਪੁਞ੍ਞਕਰਣਂ. ਸਂਪੁਬ੍ਬਭੂਧਾਤੁ ਸਤ੍ਤਾਯਂਣ. ਸੁਖਸ੍ਸ ਸਮ੍ਭਵਂ ਸੁਖਸਮ੍ਭਵਂ, ਤਂ ਪਨ ਭਵਨ੍ਤਿਪਦੇ ਕਮ੍ਮਂ. ਭਵਨ੍ਤਿ ਨਿਬ੍ਬਤ੍ਤੇਨ੍ਤਂ. ਤਂ ਸੁਖਸਮ੍ਭਵਂ ਭਾਵੇਤਿ ਨਿਬ੍ਬਤ੍ਤੇਤੀਤਿ ਭਵੋ, ਬੁਦ੍ਧੋ. ਤਂ ਭਵਂ. ਸੋ ਹਿ ਮਹਾਕਰੁਣਾਪੁਬ੍ਬਙ੍ਗਮਾਯ ਧਮ੍ਮਦੇਸਨਾਯ ਦੇਵਮਨੁਸ੍ਸਾਨਂ ਲੋਕਿਯਲੋਕੁਤ੍ਤਰਸੁਖਸ੍ਸ ਲਭਨਕਾਰਣਭੂਤਂ ਦਾਨਸੀਲਭਾਵਨਾਸਙ੍ਖਾਤਂ ਪੁਞ੍ਞਂ ਕਾਰੇਤਿ, ਤਸ੍ਮਾ ਭਗਵਤੋ ਨਰਾਨਰਾਨਂ ਸੁਖਸਮ੍ਭਵਂ ਭਵਨ੍ਤਿ ਥੋਮੇਤੀਤਿ ਦਟ੍ਠਬ੍ਬਂ.

ਨਮਾਨਮਾਨਨ੍ਤਿ ਪਦਸ੍ਸ ਨਮੇ ਅਨਮਾਨਨ੍ਤਿ ਪਦਚ੍ਛੇਦੋ. ਨਮੇਤਿ ਅਹਂ ਨਮਾਮੀਤਿ ਅਤ੍ਥੋ. ਏਤ੍ਥ ਚ ਮਿਵਿਭਤ੍ਤਿਯਾ ਏਕਾਰਾਦੇਸੋਤਿ ਵੇਦਿਤਬ੍ਬੋ. ਅਨਮਾਨਨ੍ਤਿ ਅਨਮੇਨ੍ਤਾਨਂ ਅਵਨ੍ਦਨ੍ਤਾਨਂ ਅਨਾਦਰਾਨਨ੍ਤਿ ਅਤ੍ਥੋ. ਤਂ ਪਨ ਗਵਨ੍ਤਿਏਤਸ੍ਸ ਵਿਸੇਸਨਂ. ਗਵਨ੍ਤਿ ਗੋਣਸਦਿਸਾਨਂ ਬਾਲਾਨਂ. ਗਵਨ੍ਤਿ ਹਿ ਛਟ੍ਠੀਬਹੁਵਚਨਨ੍ਤਨਾਮਪਦਂ. ਤਤੋ ਨਮਂ ਪਤਿਮ੍ਹਾਲੁਤ੍ਤੇ ਚ ਸਮਾਸੇਤਿ ਸੁਤ੍ਤੇ ਸਮਭਿਨਿਵਿਟ੍ਠੇਨ ਚਗ੍ਗਹਣੇਨ ਨਂਵਚਨਸ੍ਸ ਅਂ ਆਦੇਸਞ੍ਚ ਗੋਇਚ੍ਚੇਤਸ੍ਸ ਓਕਾਰਸ੍ਸ ਅਵਾਦੇਸਂ ਕਤ੍ਵਾ ਰੂਪਸਿਦ੍ਧਿ ਵੇਦਿਤਬ੍ਬਾ. ਗਚ੍ਛਨ੍ਤੀਤਿ ਗਾਵੋ, ਗੋਣਾ. ਗਾਵੋ ਵਿਯਾਤਿ ਗਾਵੋ, ਤੇਸਂ ਗਵਂ ਬਾਲਾਨਂ. ਤਂ ਪਨ ਜਿਨਪੁਙ੍ਗਵਨ੍ਤਿਪਦੇ ਛਟ੍ਠੀਕਮ੍ਮਂ. ਜਿਨਪੁਙ੍ਗਵਨ੍ਤਿ ਜਯਨ੍ਤਪੁਰਿਸੁਤ੍ਤਮਂ ਬੁਦ੍ਧਂ ਨਮੇ ਨਮਾਮੀਤਿ ਸਮ੍ਬਨ੍ਧੋ. ਏਤ੍ਥ ਚ ਪੁਙ੍ਗਵ ਸਦ੍ਦੋ ਕਮ੍ਮਧਾਰਯਸਮਾਸੇ ਸੇਟ੍ਠਤ੍ਥਵਾਚਕੋ. ਮੁਨਿਪੁਙ੍ਗਵੋਤਿਆਦੀਸੁ ਵਿਯ. ਵੁਤ੍ਤਞ੍ਚ ਅਮਰਕੋਸੇ –

‘‘ਉਤ੍ਤਰਸ੍ਮਿਂ ਪਦੇ ਬ੍ਯਗ੍ਘ, ਪੁਙ੍ਗਵੋਸਭਕੁਞ੍ਜਰਾ;

ਸੀਹਸਦ੍ਦੂਲਨਾਗਾਦ੍ਯਾ, ਪੁਮੇ ਸੇਟ੍ਠਤ੍ਥਗੋਚਰਾ’’ਤਿ.

ਤਸ੍ਸਤ੍ਥੋ. ਕਮ੍ਮਧਾਰਯਸਮਾਸੇ ਉਤ੍ਤਰਪਦੇ ਵਤ੍ਤਮਾਨਾ ਬ੍ਯਗ੍ਘਪੁਙ੍ਗਵੋਸਭਕੁਞ੍ਜਰਾ ਬ੍ਯਗ੍ਘਪੁਙ੍ਗਵਉਸਭਕੁਞ੍ਜਰਸਦ੍ਦਾ ਚ ਸੀਹ ਸਦ੍ਦੂਲਨਾਗਾਦ੍ਯਾ ਸੀਹ ਸਦ੍ਦੂਲ ਨਾਗਾਸਦ੍ਦਾ ਚ ਪੁਮੇ ਸੇਟ੍ਠਤ੍ਥ ਵਾਚਕਾਤਿ. ਅਯਂ ਪਨੇਤ੍ਥ ਵਚਨਤ੍ਥੋ. ਗੋ ਵਿਯ ਬੁਦ੍ਧਗੁਣੇ ਅਜਾਨਨ੍ਤੇ ਅਨਮਨ੍ਤੇ ਅਞ੍ਞਦਿਟ੍ਠਿਕੇ ਬਾਲੇ ਜਿਨਾਤਿ ਅਜਿਨੀਤਿ ਵਾ ਜਿਨੋ. ਪਕਟ੍ਠਭਾਵਂ ਪਧਾਨਭਾਵਂ ਵਾ ਉਦ੍ਧਂ ਗਚ੍ਛਤੀਤਿ ਪੁਙ੍ਗਵੋ. ਪਉਪੁਬ੍ਬ ਗਮੁਧਾਤੁ ਗਤਿਯਂ ਅਵਪਚ੍ਚਯੋ. ਨਿਗ੍ਗਹਿਤਾ ਗਮੋ. ਤਸ੍ਸ ਕਵਗ੍ਗਨ੍ਤਂ ਧਾਤ੍ਵਨ੍ਤਲੋਪਞ੍ਚ ਯਦਾਦਿਨਾ ਕਤ੍ਵਾ ਰੂਪਸਿਦ੍ਧਿ ਵੇਦਿਤਬ੍ਬਾ. ਜਿਨੋ ਚ ਸੋ ਪੁਙ੍ਗਵੋ ਚਾਤਿ ਜਿਨਪੁਙ੍ਗਵੋ, ਬੁਦ੍ਧੋ. ਸੋ ਪਨ ਗੁਨ੍ਨਂ ਵਿਯ ਬੁਦ੍ਧਾਨਂ ਸੀਲਾਦਿਕੇ ਅਪ੍ਪਮੇਯ੍ਯਗੁਣੇ ਅਜਾਨਨ੍ਤਾਨਂ ਅਨਮਨ੍ਤਾਨਂ ਅਗਾਰਵਨ੍ਤਾਨਂ ਅਵਨ੍ਦਨ੍ਤਾਨਂ ਅਞ੍ਞ ਦਿਟ੍ਠਿਗਤਿਕਾਨਂ ਬਾਲਾਨਂ ਅਸਤ੍ਥੇਨ ਪਾਰਮੀਪੁਞ੍ਞਤੇਜੇਨ ਅਜਿਨੀਤਿ ਵੁਤ੍ਤਂ ਹੋਤਿ. ਤਂ ਜਿਨਪੁਙ੍ਗਵਨ੍ਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਤਹਿਂ ਤਹਿਂ ਤਸ੍ਮਿਂ ਤਸ੍ਮਿਂ ਭਵੇ, ਅਤ੍ਤਭਾਵੇ ਵਾ, ਪਾਰਮਿਸਞ੍ਚਯਂ ਦਾਨਾਦਿਪਾਰਮੀਨਂ ਸਮੂਹਂ, ਚਯਂ ਉਪਚਿਤਂ ਪਰਿਸਮ੍ਭੂਤਂ, ਸਬ੍ਭਿ ਸਨ੍ਤੇਹਿ ਸਪ੍ਪੁਰਿਸੇਹਿ, ਗਤਂ ਉਪਗਮਿਤਬ੍ਬਂ ਪਯਿਰੁਪਾਸਿਤਬ੍ਬਂ, ਸੁਖਪ੍ਪਦਂ ਅਚ੍ਚਨ੍ਤਸੁਖਸ੍ਸ ਪਤਿਟ੍ਠਾਨ ਭੂਤਂ, ਪਦਂ ਨਿਬ੍ਬਾਨਂ ਗਤਂ ਪਤ੍ਤਂ ਅਗਮਿਂ, ਨਰਾਨਰਾਨਂ ਮਨੁਸ੍ਸਦੇਵਾਨਂ, ਸੁਖਸਮ੍ਭਵਂ ਲੋਕਿਯਲੋਕੁਤ੍ਤਰਸੁਖਸ੍ਸ ਕਾਰਣਂ ਤਿਵਿਧ ਸੁਖਸ੍ਸ ਲਭਨਕਾਰਣਭੂਤਂ ਪੁਞ੍ਞਂ ਵਾ ਭਵਂ ਨਿਬ੍ਬਤ੍ਤੇਨ੍ਤਂ, ਅਨਮਾਨਂ ਅਨਮਨ੍ਤਾਨਂ ਅਨਾਦਰਾਨਂ ਅਵਨ੍ਦਨ੍ਤਾਨਂ ਵਾ, ਗਵਂ ਗੋਣਸਦਿਸਾਨਂ ਬਾਲਾਨਂ ਜਿਨਪੁਙ੍ਗਵਂ ਜਯਨ੍ਤਪੁਰਿਸੁਤ੍ਤਮਂ ਬੁਦ੍ਧਂ ਅਹਂ ਨਮੇ ਨਮਾਮੀਤਿ.

ਨਵਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੦.

ਮਗ੍ਗਙ੍ਗਨਾਵਂ ਮੁਨਿਦਕ੍ਖਨਾਵਿਕੋ,

ਈਹਾਫਿਯਂ ਞਾਣਕਰੇਨ ਗਾਹਕੋ;

ਆਰੁਯ੍ਹ ਯੋ ਤਾਯ ਬਹੂ ਭਵਣ੍ਣਵਾ,

ਤਾਰੇਸਿ ਤਂ ਬੁਦ੍ਧਮਘਪ੍ਪਹਂ ਨਮੇ.

੧੦. ਏਵਂ ਨਵਮਗਾਥਾਯ ਬੁਦ੍ਧਂ ਨਤ੍ਵਾ ਇਦਾਨਿ ਬਹੂ ਸਤ੍ਤੇ ਤਿਭਵਸਙ੍ਖਾਤਾ ਸਂਸਾਰਸਮੁਦ੍ਦਤੋ ਤਾਰੇਨ੍ਤੇਨ ਗੁਣੇਨ ਚ ਸਤ੍ਤਾਨਂ ਦੁਕ੍ਖਪ੍ਪਹਾਨੇਨ ਗੁਣੇਨ ਚ ਥੋਮਿਤ੍ਵਾ ਬੁਦ੍ਧਂ ਵਨ੍ਦਿਤੁ ਕਾਮੋ ਮਗ੍ਗਙ੍ਗਨਾਵਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਤਤ ਜਰ ਗਣੇਹਿ ਰਚਿਤਤ੍ਤਾ ਦ੍ਵਾਦਸਕ੍ਖਰੇਹਿ ਯੁਤ੍ਤਾ ਇਨ੍ਦਵਂਸ ਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਸਾਯਿਨ੍ਦਵਂਸਾ ਖਲੁ ਯਤ੍ਥ ਤਾ ਜਰਾ’’ਤਿ.

ਤਸ੍ਸਤ੍ਥੋ. ਯਤ੍ਥ ਯਸ੍ਸਂ ਗਾਥਾਯਂ ਤਾ ਤਗਣਦ੍ਵਯਞ੍ਚ ਜਰਾ ਜਗਣ ਰਗਣਾ ਚ ਚੇ ਸਿਯੁਂ, ਸਾ ਗਾਥਾ ਖਲੁ ਏਕਨ੍ਤਂ ਇਨ੍ਦਵਂਸਗਾਥਾ ਨਾਮਾਤਿ.

ਤਤ੍ਥ ਯੋ ਮੁਨਿਦਕ੍ਖਨਾਵਿਕੋਤਿ ਸਮ੍ਬਨ੍ਧੋ. ਯੋ ਬੁਦ੍ਧ ਸਙ੍ਖਾਤੋ ਛੇਕੋ ਨਾਵਾਜੇਟ੍ਠਕੋਤਿ ਅਤ੍ਥੋ. ਤਤ੍ਥ ਮੁਨੀਤਿ ਉਭੋ ਲੋਕੇ ਮੁਨਾਤਿ ਜਾਨਾਤੀਤਿ ਮੁਨਿ, ਭਗਵਾ. ਮੁਨਧਾਤੁ ਞਾਣੇ ਇ. ਅਥ ਵਾ ਮੋਨਂ ਵੁਚ੍ਚਤਿ ਸਬ੍ਬਞ੍ਞੁਤਞਾਣਂ, ਤਂ ਅਸ੍ਸ ਅਤ੍ਥੀਤਿ ਮੁਨਿ, ਭਗਵਾ. ਅਸ੍ਸਥ੍ਯਤ੍ਥੇ ਇਪਚ੍ਚਯੋ. ਵੁਤ੍ਤਞ੍ਹਿ ਏਕਨਿਪਾਤੇ ਵਣ੍ਣਪਥਜਾਤਕਟ੍ਠਕਥਾਯਂ ‘‘ਮੁਨੀਤਿ ਮੋਨਂ ਵੁਚ੍ਚਤਿ ਞਾਣਂ. ਕਾਯ ਮੋਨੇਯ੍ਯਾਦੀਸੁ ਵਾ ਅਞ੍ਞਤਰੇਨ ਸਮਨ੍ਨਾਗਤਤ੍ਤਾ ਪੁਗ੍ਗਲੋ ਮੁਨੀਤਿ ਵੁਚ੍ਚਤਿ. ਸੋ ਪਨੇਸ ਅਗਾਰਿਯਮੁਨਿ, ਅਨਗਾਰਿਯਮੁਨਿ, ਸੇਕ੍ਖਮੁਨਿ, ਅਸੇਕ੍ਖਮੁਨਿ, ਪਚ੍ਚੇਕਮੁਨਿ, ਮੁਨਿਮੁਨੀਤਿ ਅਨੇਕਵਿਧੋ. ਤਤ੍ਥ ਅਗਾਰਿਯਮੁਨੀਤਿ ਗਿਹਿ ਆਗਤਫਲੋ ਵਿਞ੍ਞਾਤਸਾਸਨੋ. ਅਨਗਾਰਿਯਮੁਨੀਤਿ ਤਥਾਰੂਪੋਵ ਪਬ੍ਬਜਿਤੋ. ਸੇਕ੍ਖਮੁਨੀਤਿ ਸਤ੍ਤਸੇਕ੍ਖਾ. ਅਸੇਕ੍ਖਮੁਨੀਤਿ ਖੀਣਾਸਵੋ. ਪਚ੍ਚੇਕਮੁਨੀਤਿ ਪਚ੍ਚੇਕਸਮ੍ਬੁਦ੍ਧੋ. ਮੁਨਿਮੁਨੀਤਿ ਸਮ੍ਮਾਸਮ੍ਬੁਦ੍ਧੋ’’ਤਿ. ਇਧ ਪਨ ਮੁਨਿਮੁਨਿ ਅਧਿਪ੍ਪੇਤੋ.

ਦਕ੍ਖੋਤਿ ਛੇਕੋ. ਸਮੁਦ੍ਦਤਰਣੇ ਦਕ੍ਖਤਿ ਕੁਸਲਤ੍ਤਂ ਗਚ੍ਛਤੀਤਿ ਦਕ੍ਖੋ, ਨਾਵਿਕੋ. ਦਕ੍ਖਧਾਤੁ ਗਤਿਯਂ ਅ. ਅਥ ਵਾ ਦਕ੍ਖਤਿ ਕੁਸਲਕਮ੍ਮੇ ਅਞ੍ਞਸ੍ਮਿਞ੍ਚ ਕਿਚ੍ਚਾਕਿਚ੍ਚੇ ਅਦਨ੍ਧਤਾਯ ਸੀਘਂ ਗਚ੍ਛਤੀਤਿ ਦਕ੍ਖੋ, ਯੋਕੋਚਿ ਕੁਸਲੋ ਪੁਗ੍ਗਲੋ. ਦਕ੍ਖਧਾਤੁ ਸੀਘਤ੍ਥੇ ਅ. ਦਕ੍ਖੋ ਵਿਯਾਤਿ ਦਕ੍ਖੋ, ਬੁਦ੍ਧੋ. ਨੀਤਤ੍ਥੇਨ ਪਨ ਬੁਦ੍ਧੋ ਸਤ੍ਤਾਨਂ ਸਂਸਾਰਸਮੁਦ੍ਦਤੋ ਉਦ੍ਧਾਰਣਸ੍ਸ ਕਾਰਣਂ ਦਕ੍ਖਤਿ ਪਰਿਚ੍ਛਿਨ੍ਦਤਿ ਞਾਣੇਨਾਤਿ ਦਕ੍ਖੋਤਿ ਵੁਚ੍ਚਤਿ. ਨਾਵਿਕੋਤਿ ਸਮੁਦ੍ਦਤੀਰਂ ਨਾਵਾਯ ਤਰਤੀਤਿ ਨਾਵਿਕੋ, ਨਾਵਾਜੇਟ੍ਠਕੋ. ਤਰਤਿਤਦ੍ਧਿਤੇ ਣਿਕੋ. ਨਾਵਿਕੋ ਵਿਯਾਤਿ ਨਾਵਿਕੋ, ਬੁਦ੍ਧੋ. ਨੀਤਤ੍ਥੇਨ ਪਨ ਬੁਦ੍ਧੋ ਨਿਬ੍ਬਾਨਂ ਪਾਰਂ ਅਟ੍ਠਮਗ੍ਗਙ੍ਗਨਾਵਾਯ ਤਰਤੀਤਿ ਨਾਵਿਕੋਤਿ ਵੁਚ੍ਚਤਿ. ਦਕ੍ਖੋ ਨਾਵਿਕੋ ਦਕ੍ਖਨਾਵਿਕੋ, ਮੁਨਿ ਚ ਸੋ ਦਕ੍ਖਨਾਵਿਕੋਚਾਤਿ ਮੁਨਿਦਕ੍ਖਨਾਵਿਕੋ, ਕਮ੍ਮਧਾਰਯਸਮਾਸੋਯਂ. ਅਥ ਵਾ ਦਕ੍ਖਨਾਵਿਕੋ ਵਿਯ ਦਕ੍ਖੋ ਮੁਨੀਤਿ ਮੁਨਿਦਕ੍ਖਨਾਵਿਕੋ, ਬੁਦ੍ਧੋ. ਉਪਮਾਕਮ੍ਮਧਾਰਯਸਮਾਸੋਯਂ. ਯਥਾ ਹਿ ਸਮੁਦ੍ਦਤਰਣੇ ਛੇਕੋ ਨਾਵਿਕੋ ਮਨੁਸ੍ਸੇ ਸਮੁਦ੍ਦਪਾਰਂ ਨੇਤਿ, ਏਵਂ ਬੁਦ੍ਧੋ ਵੇਨੇਯ੍ਯਸਤ੍ਤੇ ਨਿਬ੍ਬਾਨਪਾਰਂ ਨੇਤੀਤਿ ਵੁਤ੍ਤਂ ਹੋਤਿ.

ਮਗ੍ਗਙ੍ਗਨਾਵਂ ਆਰੁਯ੍ਹਾਤਿ ਸਮ੍ਬਨ੍ਧੋ. ਮਗ੍ਗਙ੍ਗਨਾਵਨ੍ਤਿ ਅਟ੍ਠਮਗ੍ਗਙ੍ਗ ਸਙ੍ਖਾਤਂ ਨਾਵਂ. ਆਰੁਯ੍ਹਾਤਿ ਆਰੋਹਿਤ੍ਵਾਤਿ ਅਤ੍ਥੋ. ਕਿਲੇਸੇ ਮਾਰੇਨ੍ਤੋ ਆਰਮ੍ਮਣਕਰਣਵਸੇਨ ਨਿਬ੍ਬਾਨਂ ਗਚ੍ਛਤੀਤਿ ਮਗ੍ਗੋ. ਮਾਰਸਦ੍ਦੂਪਪਦ ਗਮੁਧਾਤੁ ਕ੍ਵਿ. ਮਾਰੇਨ੍ਤ ਗੋਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ਮਗ੍ਗੋਤਿ ਵੁਤ੍ਤਂ. ਅਥ ਵਾ ਨਿਬ੍ਬਾਨਂ ਮਗ੍ਗਤਿ ਗਵੇਸਤੀਤਿ ਮਗ੍ਗੋ. ਮਗ੍ਗਧਾਤੁ ਗਵੇਸਨੇ ਅ. ਨਿਬ੍ਬਾਨਤ੍ਥਿਕੇਹਿ ਮਗ੍ਗਿਯਤਿ ਗਵੇਸਿਯਤੀਤਿ ਵਾ ਮਗ੍ਗੋ. ਏਕਨ੍ਤਤੋ ਜਾਤਿ ਜਰਾਬ੍ਯਾਧਿਮਰਣਦੁਕ੍ਖਾਦੀਹਿ ਪੀਲ਼ਿਤੇਹਿ ਸਤ੍ਤੇਹਿ ਦੁਕ੍ਖਕ੍ਖਯਂ ਨਿਬ੍ਬਾਨਂ ਪਾਪੁਣਤ੍ਥਾਯ ਮਗ੍ਗਿਤਬ੍ਬੋ ਗਵੇਸਿਤਬ੍ਬੋਤਿ ਮਗ੍ਗੋ, ਚਤੁਮਗ੍ਗੋ. ਵੁਤ੍ਤਞ੍ਹਿ ‘‘ਮਗ੍ਗੋਤਿ ਕੇਨਟ੍ਠੇਨ ਨਿਬ੍ਬਾਨਂ ਮਗ੍ਗਨਟ੍ਠੇਨ ਨਿਬ੍ਬਾਨਤ੍ਥਿਕੇਹਿ ਮਗ੍ਗਨੀਯਟ੍ਠੇਨ ਚਾ’’ਤਿ. ਅਙ੍ਗਤਿ ਗਚ੍ਛਤਿ ਫਲਨਿਬ੍ਬਾਨਂ ਏਤੇਨਾਤਿ ਅਙ੍ਗਂ. ਅਗਿਧਾਤੁ ਗਮਨੇ ਅ. ਮਗ੍ਗਸ੍ਸ ਅਙ੍ਗਂ ਕਾਰਣਨ੍ਤਿ ਮਗ੍ਗਙ੍ਗਂ, ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤ ਸਮ੍ਮਾਆਜੀਵ ਸਮ੍ਮਾਵਾਯਾਮ ਸਮ੍ਮਾਸਤਿ ਸਮ੍ਮਾਸਮਾਧਿਵਸੇਨ ਅਟ੍ਠਮਗ੍ਗਙ੍ਗਂ ਲਬ੍ਭਤਿ. ਨੁਯਤਿ ਥਵੀਯਤੀਤਿ ਨਾਵਾ. ਨੁਧਾਤੁ ਥਵਿਯਂ ਅਵੋ. ਅਥ ਵਾ ਓਰਤੋ ਪਾਰਂ ਨੇਤੀਤਿ ਨਾਵਾ, ਭਾਰਂ ਨਯਨ੍ਤਿ ਏਤਾਯਾਤਿ ਵਾ ਨਾਵਾ. ਨਿਧਾਤੁ ਨਯਨੇ ਅਵੋ. ਮਗ੍ਗਙ੍ਗਸਙ੍ਖਾਤਾ ਨਾਵਾ ਮਗ੍ਗਙ੍ਗਨਾਵਾ. ਅਥ ਵਾ ਨਾਵਾ ਵਿਯ ਮਗ੍ਗਙ੍ਗਨ੍ਤਿ ਮਗ੍ਗਙ੍ਗ ਨਾਵਾ. ਯਥਾ ਹਿ ਨਾਵਾ ਅਤ੍ਤਨਿ ਆਰੁਲ਼੍ਹੇ ਮਨੁਸ੍ਸੇ ਸਮੁਦ੍ਦ ਨਦੀਪਾਰਂ ਨੇਤਿ, ਏਵਂ ਅਟ੍ਠਮਗ੍ਗਙ੍ਗਧਮ੍ਮਾ ਅਤ੍ਤਾਨਂ ਪਟਿਪਜ੍ਜਨ੍ਤੇ ਨਿਬ੍ਬਾਨ ਪਾਰਂ ਨੇਨ੍ਤੀਤਿ ਵੁਤ੍ਤਂ ਹੋਤਿ. ਤਂ ਮਗ੍ਗਙ੍ਗਨਾਵਂ.

ਈਹਾਫਿਯਨ੍ਤਿ ਵੀਰਿਯਸਙ੍ਖਾਤਂ ਦਬ੍ਬਿਸਾਰਕਂ. ਵੁਤ੍ਤਞ੍ਹਿ ਸੁਤ੍ਤਨਿ ਪਾਤਅਟ੍ਠਕਥਾਯਂ ‘‘ਫਿਯੇਨਾਤਿ ਦਬ੍ਬਿਸਾਰਕੇਨਾ’’ਤਿ. ਈਹਤਿ ਆਰਬ੍ਭਤੀਤਿ ਈਹਾ. ਈਹਤਿ ਵਾਯਮਤਿ ਚੇਤਯਤਿ ਏਤੇਨਾਤਿ ਵਾ ਈਹਾ, ਵੀਰਿਯਂ. ਸਦ੍ਦਨੀਤਿਯਂ ਪਨ ‘‘ਈਹ ਚੇਤਾਯ’’ਨ੍ਤਿ ਵੁਤ੍ਤਂ. ਫਾਤਿ ਵਡ੍ਢੇਤਿ ਉਦਕਂ ਏਤੇਨਾਤਿ ਫਿਯਂ. ਫਾਧਾਤੁ ਵਡ੍ਢਿਯਂ ਇਯੋ. ਫਾਤਿ ਘਟ੍ਟੇਤਿ ਉਦਕਨ੍ਤਿ ਵਾ ਫਿਯਂ. ਅਥ ਵਾ ਫਾਯਤਿ ਗਚ੍ਛਤਿ ਨਾਵਂ ਏਤੇਨਾਤਿ ਫਿਯਂ. ਦਬ੍ਬਿਸਾਰਕਂ. ਫਾਯਿ ਧਾਤੁ ਗਤਿਯਂ ਅ. ਆਕਾਰਸ੍ਸ ਇ. ਈਹਾਸਙ੍ਖਾਤਂ ਫਿਯਨ੍ਤਿ ਈਹਾਫਿਯਂ. ਫਿਯਂ ਵਿਯ ਈਹਾਤਿ ਈਹਾਫਿਯਂ. ਯਥਾ ਹਿ ਫਿਯੇਨ ਨਾਵਾ ਇਚ੍ਛਿਤਟ੍ਠਾਨਂ ਗਚ੍ਛਤਿ, ਏਵਂ ਈਹਾਸਙ੍ਖਾਤੇਨ ਵੀਰਿਯੇਨ ਤਂ ਤਂ ਕਿਚ੍ਚਂ ਸਾਧੇਤਿ, ਇਚ੍ਛਿਤਂ ਨਿਬ੍ਬਾਨਟ੍ਠਾਨਂ ਗਚ੍ਛਤੀਤਿ ਅਧਿਪ੍ਪਾਯੋ. ਤਂ ਪਨ ਗਾਹਕੋਤਿ ਪਦੇ ਕਮ੍ਮਂ. ਞਾਣਕਰੇਨਾਤਿ ਸਬ੍ਬਞ੍ਞੁਤਞਾਣਸਙ੍ਖਾਤੇਨ ਹਤ੍ਥੇਨ. ਸਬ੍ਬਂ ਞੇਯ੍ਯਧਮ੍ਮਂ ਜਾਨਾਤੀਤਿ ਞਾਣਂ, ਸਬ੍ਬਞ੍ਞੁਤਞਾਣਂ. ਤਂ ਤਂ ਕਮ੍ਮਂ ਕਰੋਤੀਤਿ ਕਰੋ, ਹਤ੍ਥੋ. ਞਾਣਸਙ੍ਖਾਤੋ ਕਰੋ ਞਾਣ ਕਰੋ, ਕਰਂ ਵਿਯ ਞਾਣਨ੍ਤਿ ਵਾ ਞਾਣਕਰੋ, ਤੇਨ ਞਾਣਕਰੇਨ. ਗਾਹਕੋਤਿ ਦਲ਼੍ਹਗਣ੍ਹਮਾਨੋ ਹੁਤ੍ਵਾ. ਤਾਯਾਤਿ ਅਟ੍ਠਮਗ੍ਗਙ੍ਗ ਸਙ੍ਖਾਤਾਯ ਤਾਯ ਨਾਵਾਯ, ਬਹੂਤਿ ਅਨੇਕੇ ਵੇਨੇਯ੍ਯਸਤ੍ਤੇ. ਭਵਣ੍ਣਵਾਤਿ ਤਿਭਵਸਙ੍ਖਾਤਾ ਸਂਸਾਰਵਟ੍ਟਸਙ੍ਖਾਤਾ ਵਾ ਮਹਾਸਮੁਦ੍ਦਤੋ. ਤਸ੍ਸ ਪਨ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਤਾਰੇਸੀਤਿ ਓਤਿਣ੍ਣੇਸਿ, ਅਤਿਕ੍ਕਮੇਸੀਤਿ ਅਤ੍ਥੋ. ਬੁਦ੍ਧਨ੍ਤਿ ਪਟਿਵਿਦ੍ਧਚਤੁਸਚ੍ਚਧਮ੍ਮਂ. ਅਘਪ੍ਪਹਨ੍ਤਿ ਸਤ੍ਤਾਨਂ ਦੁਕ੍ਖਪ੍ਪਜ ਹਨ੍ਤਂ. ਦੁਕ੍ਖਵਿਦ੍ਧਂਸੇਨ੍ਤਨ੍ਤਿ ਅਤ੍ਥੋ. ਅਥ ਵਾ ਅਘਪ੍ਪਹਨ੍ਤਿ ਸਤ੍ਤਾਨਂ ਕਿਲੇਸਪ੍ਪਜਹਨ੍ਤਂ. ਕਿਲੇਸਵਿਦ੍ਧਂਸੇਨ੍ਤਨ੍ਤਿ ਅਤ੍ਥੋ. ਏਤ੍ਥ ਹਿ ਅਘਸਦ੍ਦੋ ਦੁਕ੍ਖੇ ਕਿਲੇਸੇ ਚ ਵਤ੍ਤਤਿ. ਤਤ੍ਥ ਹਿ ਦੁਕ੍ਖਂ ਅਘਯਤਿ ਦੁਕ੍ਖਯਤੀਤਿ ਅਘਨ੍ਤਿ ਚ, ਅਘਯਤਿ ਦੁਕ੍ਖਾਕਾਰੇਨ ਪਵਤ੍ਤਤੀਤਿ ਵਾ ਅਘਨ੍ਤਿ ਚ ਵੁਚ੍ਚਤਿ. ਕਿਲੇਸੋ ਪਨ ਅਘਯਨ੍ਤਿ ਪਾਪਂ ਕਰੋਨ੍ਤਿ ਸਤ੍ਤਾ ਏਤੇਨਾਤਿ ਅਘੋਤਿ ਵੁਚ੍ਚਤਿ. ਅਘਧਾਤੁ ਪਾਪਕਰਣੇ ਅ. ਅਘਂ ਪਜਹਤਿ ਵਿਦ੍ਧਂਸੇਤੀਤਿ ਅਘਪ੍ਪਹੋ, ਬੁਦ੍ਧੋ. ਅਘਸਦ੍ਦੂਪਪਦਪਪੁਬ੍ਬਹਾਧਾਤੁ ਚਾਗੇ. ਬੁਦ੍ਧੋ ਵੇਨੇਯ੍ਯਸਤ੍ਤਾਨਂ ਦੁਕ੍ਖਞ੍ਚ ਕਿਲੇਸਞ੍ਚ ਧਮ੍ਮਦੇਸਨਾਯ ਅਪਨੇਤੀਤਿ ਅਤ੍ਥੋ. ਏਤ੍ਥ ਚ ਪਠਮਵਿਕਪ੍ਪੇ ਦੁਕ੍ਖਸ੍ਸ ਅਪ੍ਪਹਾਤਬ੍ਬਧਮ੍ਮਤ੍ਤਾ ਮਗ੍ਗੇਨ ਅਪ੍ਪਹਾਤਬ੍ਬਮ੍ਪਿ ਫਲੂਪਚਾਰੇਨ ਦੁਕ੍ਖਪ੍ਪਜਹਨ੍ਤਨ੍ਤਿ ਵੁਤ੍ਤਂ. ਤਨ੍ਤਿ ਮੁਨਿਦਕ੍ਖਨਾਵਿਕਂ ਅਹਂ ਨਮੇ ਨਮਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਯੋ ਮੁਨਿਦਕ੍ਖਨਾਵਿਕੋ ਯੋ ਬੁਦ੍ਧਸਙ੍ਖਾਤੋ ਛੇਕੋ ਨਾਵਾਜੇਟ੍ਠਕੋ, ਮਗ੍ਗਙ੍ਗਨਾਵਂ ਅਟ੍ਠਮਗ੍ਗਙ੍ਗਸਙ੍ਖਾਤਂ ਨਾਵਂ ਆਰੁਯ੍ਹ ਆਰੋਹਿਤ੍ਵਾ ਈਹਾਫਿਯਂ ਵੀਰਿਯਸਙ੍ਖਾਤਂ ਦਬ੍ਬਿਸਾਰਕਂ, ਞਾਣਕਰੇਨ ਸਬ੍ਬਞ੍ਞੁਤਞਾਣਸਙ੍ਖਾਤੇਨ ਹਤ੍ਥੇਨ, ਗਾਹਕੋ ਦਲ਼੍ਹਂ ਗਣ੍ਹਮਾਨੋ ਹੁਤ੍ਵਾ ਤਾਯ ਅਟ੍ਠਮਗ੍ਗਙ੍ਗਨਾਵਾਯ, ਬਹੂ ਅਨੇਕੇ ਵੇਨੇਯ੍ਯਸਤ੍ਤੇ ਭਵਣ੍ਣਵਾ ਤਿਭਵਸਙ੍ਖਾਤਮਹਾਸਮੁਦ੍ਦਤੋ, ਤਾਰੇਸਿ ਓਤਾਰੇਸਿ, ਬੁਦ੍ਧਂ ਪਟਿਵਿਦ੍ਧਚਤੁਸਚ੍ਚਧਮ੍ਮਂ ਅਘਪ੍ਪਹਂ ਸਤ੍ਤਾਨਂ ਦੁਕ੍ਖਵਿਦ੍ਧਂਸੇਨ੍ਤਂ ਕਿਲੇਸ ਵਿਦ੍ਧਂਸੇਨ੍ਤਂ ਵਾ ਤਂ ਮੁਨਿਦਕ੍ਖਨਾਵਿਕਂ ਅਹਂ ਨਮੇ ਨਮਾਮੀਤਿ.

ਦਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੧.

ਸਮਤਿਂਸਤਿਪਾਰਮਿਸਮ੍ਭਰਣਂ,

ਵਰਬੋਧਿਦੁਮੇ ਚਤੁਸਚ੍ਚਦਸਂ;

ਵਰਮਿਦ੍ਧਿਗਤਂ ਨਰਦੇਵਹਿਤਂ,

ਤਿਭਵੂਪਸਮਂ ਪਣਮਾਮਿ ਜਿਨਂ.

੧੧. ਏਵਂ ਦਸਮਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਸਮਤਿਂ ਸਤਿਪਾਰਮਿਸਮ੍ਭਰਣਾਦੀਹਿ ਪਞ੍ਚਹਿ ਗੁਣੇਹਿ ਥੋਮਿਤ੍ਵਾ ਜਿਨਂ ਵਨ੍ਦਿਤੁਕਾਮੋ ਸਮਤਿਂਸਤਿਪਾਰਮਿਸਮ੍ਭਰਣਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਚਤੂਹਿ ਸਗਣੇਹਿ ਰਚਿਤਤ੍ਤਾ ਦ੍ਵਾਦਸਕ੍ਖਰੇਹਿ ਯੁਤ੍ਤਾ ਤੋਟਕਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਇਹ ਤੋਟਕ ਮਮ੍ਬੁਧਿਸੇਹਿ ਮਿਤ’’ਨ੍ਤਿ. ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਅਮ੍ਬੁਧਿਸੇਹਿ ਚਤੂਹਿ ਸਗਣੇਹਿ ਮਿਤਂ ਪਮਿਤਂ ਰਚਿਤਂ ਲਕ੍ਖਿਤਂ ਵਾ ਵੁਤ੍ਤਂ ਇਧ ਜਗਤਿਛਨ੍ਦੇ ਤੋਟਕਂ ਨਾਮਾਤਿ.

ਤਤ੍ਥ ਪਨ ਸਮਤਿਂਸਤਿਪਾਰਮਿਸਮ੍ਭਰਣਨ੍ਤਿ ਦਸਪਾਰਮਿਯੋ, ਦਸ ਉਪਪਾਰਮਿਯੋ, ਦਸ ਪਰਮਤ੍ਥਪਾਰਮਿਯੋ ਚਾਤਿ ਸਮਤਿਂਸਪਾਰਮਿਯੋ ਸਮ੍ਭੂਤਂ, ਪਰਿਪੂਰਿਤਨ੍ਤਿ ਅਤ੍ਥੋ. ਤਾਸਂ ਪਨ ਵਿਸੇਸੋ ਪਾਰਮਿਸਦ੍ਦਸ੍ਸ ਚ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਸਮ੍ਭਰਿਤ੍ਥ ਪਰਿਪੂਰਯਿਤ੍ਥਾਤਿ ਸਮ੍ਭਰਣੋ, ਜਿਨੋ. ਸਂਪੁਬ੍ਬਭਰਧਾਤੁ ਪੂਰਣੇ ਯੁ. ਸਮਤਿਂਸਪਾਰਮਿਯੋ ਸਮ੍ਭਰਣੋਤਿ ਸਮਤਿਂਸਤਿਪਾਰਮਿਸਮ੍ਭਰਣੋ, ਜਿਨੋ. ਦੀਪਙ੍ਕਰਬੁਦ੍ਧਸ੍ਸ ਪਾਦਮੂਲੇ ਲਦ੍ਧਬ੍ਯਾਕਰਣਤੋ ਪਟ੍ਠਾਯ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਸਮਤਿਂਸਪਾਰਮਿਯੋ ਪੂਰਯਿਤ੍ਥਾਤਿ ਅਤ੍ਥੋ. ਤਂ ਸਮਤਿਂਸਤਿਪਾਰਮਿਸਮ੍ਭਰਣਂ. ਵਰਬੋਧਿਦੁਮੇਤਿ ਉਤ੍ਤਮਬੋਧਿਰੁਕ੍ਖਮੂਲੇ. ਏਤ੍ਥ ਚ ਵਰਬੋਧਿਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਦਵਤਿ ਗਚ੍ਛਤਿ ਮੂਲਖਨ੍ਧਤਚਸਾਖ ਵਿਟਪ ਪਲ੍ਲਵ ਫਲੇਹਿ ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਂ ਰਜਤ ਸੁਵਣ੍ਣਮਣਿ ਸਨ੍ਤਾ ਰੁਚੀਹਿ ਅਤਿਸੋਭਨਂ ਵਾ ਪਾਪੁਣਾਤੀਤਿ ਦੁਮੋ, ਬੋਧਿਸਤ੍ਤਸ੍ਸ ਵਿਜਾਤਦਿਵਸੇਯੇਵ ਬੋਧਿਸਤ੍ਤੇਨ ਸਦ੍ਧਿਂ ਸਹ ਜਾਤੋ ਸਤਹਤ੍ਥੁਬ੍ਬੇਧੋ ਅਸਤ੍ਥਦੁਮਰਾਜਾ ਲਬ੍ਭਤਿ. ਦੁਧਾਤੁ ਗਤਿਮ੍ਹਿ ਅਮੋ. ਅਪਦਾਨਟ੍ਠਕਥਾਯਂ ਪਨ ‘‘ਦੁਨਾਤਿ ਕਮ੍ਪਤੀਤਿ ਦੁਮੋ. ਦੁਮਤਿ ਪੂਰੇਤਿ ਆਕਾਸਤਲਨ੍ਤਿ ਵਾ ਦੁਮੋ’’ਤਿ ਵੁਤ੍ਤਂ. ਵਰੋ ਬੋਧਿ ਵਰਬੋਧਿ, ਵਰਬੋਧਿ ਚ ਸੋ ਦੁਮੋ ਚਾਤਿ ਵਰਬੋਧਿਦੁਮੋ, ਤਸ੍ਮਿਂ.

ਚਤੁਸਚ੍ਚਦਸਨ੍ਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਮਗ੍ਗਞਾਣੇਨ ਪਟਿਵਿਜ੍ਝਿਤਂ. ਏਤ੍ਥ ਚ ਸਚ੍ਚਸਦ੍ਦੋ ਅਨੇਕੇਸ੍ਵਤ੍ਥੇਸੁ ਦਿਸ੍ਸਤਿ. ਸੇਯ੍ਯਥਿਦਂ. ਸਚ੍ਚਂ ਭਣੇ ਨ ਕੁਜ੍ਝੇਯ੍ਯਾਤਿਆਦੀਸੁ ਵਾਚਾਸਚ੍ਚੇ. ਸਚ੍ਚੇ ਠਿਤਾ ਸਮਣਬ੍ਰਾਹ੍ਮਣਾਤਿਆਦੀਸੁ ਵਿਰਤਿਸਚ੍ਚੇ. ਕਸ੍ਮਾ ਨੁ ਸਚ੍ਚਾਨਿ ਵਦਨ੍ਤਿ ਨਾਨਾ ਪਵਾਦਿਯਾਸੇ ਕੁਸਲਾਵਦਾਨਾਤਿਆਦੀਸੁ ਦਿਟ੍ਠਿਸਚ੍ਚੇ. ਏਕਞ੍ਹਿ ਸਚ੍ਚਂ ਨ ਦੁਤਿਯਮਤ੍ਥੀਤਿਆਦੀਸੁ ਪਰਮਤ੍ਥਸਚ੍ਚੇ ਨਿਬ੍ਬਾਨੇ ਚੇਵ ਮਗ੍ਗੇ ਚ, ਚਤੁਨ੍ਨਂ ਸਚ੍ਚਾਨਂ ਕਤਿ ਕੁਸਲਾਤਿਆਦੀਸੁ ਅਰਿਯਸਚ੍ਚੇ. ਸ੍ਵਾਯਮਿਧਾਪਿ ਅਰਿਯਸਚ੍ਚੇ ਵਤ੍ਤਤੀਤਿ ਵੇਦਿਤਬ੍ਬੋ. ਸਥਨਂ ਸਚ੍ਚਂ, ਅਵਿਤਥਂ. ਸਥਧਾਤੁ ਅਵਿਤਥੇ ਣ੍ਯੋ. ਯਥਾ ਹਿ ਅਗ੍ਗੀਨਂ ਸਭਾਵੋ ਏਕਨ੍ਤਂ ਉਣ੍ਹੋਯੇਵ ਹੋਤਿ, ਨ ਸੀਤਲੋ, ਏਵਂ ਦੁਕ੍ਖਾਦੀਨਂ ਪੀਲ਼ਨਾਦਿ ਸਭਾਵਂ ਏਕਨ੍ਤਂ ਸਚ੍ਚਂ ਤਥਂ ਅਵਿਤਥਂ ਅਨਞ੍ਞਥਂ ਹੋਤਿ. ਤਂ ਪਨ ਚਤੁਬ੍ਬਿਧਂ ਹੋਤਿ ਦੁਕ੍ਖਸਚ੍ਚਂ, ਸਮੁਦਯਸਚ੍ਚਂ, ਨਿਰੋਧਸਚ੍ਚਂ, ਮਗ੍ਗਸਚ੍ਚਞ੍ਚਾਤਿ. ਤਤ੍ਥ ਦੁਕ੍ਖਸਚ੍ਚਨ੍ਤਿ ਦੁਕ੍ਖਚ੍ਛਿਤਂ ਖਂ ਤੁਚ੍ਛਨ੍ਤਿ ਦੁਕ੍ਖਂ. ਕਮ੍ਮਧਾਰਯਸਮਾਸੋਯਂ. ਵੁਤ੍ਤਞ੍ਹੇਤਂ ਸਚ੍ਚਵਿਭਙ੍ਗਟ੍ਠਕਥਾਯਂ ‘‘ਦੁਇਤਿ ਅਯਂਸਦ੍ਦੋ ਕੁਚ੍ਛਿਤੇ ਦਿਸ੍ਸਤਿ. ਕੁਚ੍ਛਿਤਞ੍ਹਿ ਪੁਤ੍ਤਂ ਦੁਪੁਤ੍ਤੋਤਿ ਵਦਨ੍ਤਿ. ਖਂਸਦ੍ਦੋ ਪਨ ਤੁਚ੍ਛੇ. ਤੁਚ੍ਛਞ੍ਹਿ ਆਕਾਸਂ ਖਨ੍ਤਿ ਵੁਚ੍ਚਤਿ. ਇਦਞ੍ਚ ਪਠਮਸਚ੍ਚਂ ਕੁਚ੍ਛਿਤਂ. ਅਨੇਕਉਪਦ੍ਦਵਾਧਿਟ੍ਠਾਨਤੋ, ਤੁਚ੍ਛਂਬਾਲਜਨਪਰਿਕਪ੍ਪਿਤਧੁਵਸੁਭਸੁਖਤ੍ਤਭਾਵਵਿਰਹਿਤਤੋ. ਤਸ੍ਮਾ ਕੁਚ੍ਛਿਤਤ੍ਤਾ ਤੁਚ੍ਛਤ੍ਤਾ ਚ ਦੁਕ੍ਖਨ੍ਤਿ ਵੁਚ੍ਚਤੀ’’ਤਿ. ਦੁਕ੍ਖਞ੍ਚ ਤਂ ਸਚ੍ਚਞ੍ਚਾਤਿ ਦੁਕ੍ਖਸਚ੍ਚਂ. ਤੇਭੂਮਿਕਵਟ੍ਟਂ ਲਬ੍ਭਤਿ.

ਸਮੁਦਯਸਚ੍ਚਨ੍ਤਿ ਅਯਤਿ ਪਵਤ੍ਤਤਿ ਦੁਕ੍ਖਫਲਂ ਏਤੇਨਾਤਿ ਅਯੋ, ਲੋਭੋ. ਅਯਧਾਤੁ ਗਤਿਮ੍ਹਿ ਅ. ਸਂ ਅਵਸੇਸ ਪਚ੍ਚਯਸਂਯੋਗੇ ਸਤਿ ਉ ਦੁਕ੍ਖੁਪ੍ਪਤ੍ਤਿਯਾ ਅਯੋ ਕਾਰਣੋਤਿ ਸਮੁਦਯੋ. ਛਟ੍ਠੀਤਪ੍ਪੁਰਿਸਸਮਾਸੋਯਂ. ਵੁਤ੍ਤੇਞ੍ਹੇਤਂ ਸਚ੍ਚ ਵਿਭਙ੍ਗਟ੍ਠਕਥਾਯਂ ‘‘ਸਂਇਤਿ ਚ ਅਯਂਸਦ੍ਦੋ ਸਮਾਗਮੋ ਸਮੇਤਨ੍ਤਿਆਦੀਸੁ ਸਂਯੋਗਂ ਦੀਪੇਤਿ. ਉਇਤਿ ਅਯਂਸਦ੍ਦੋ ਉਪ੍ਪਨ੍ਨਂ ਉਦਿਤਨ੍ਤਿਆਦੀਸੁ ਉਪ੍ਪਤ੍ਤਿਂ. ਅਯਸਦ੍ਦੋ ਪਨ ਕਾਰਣਂ ਦੀਪੇਤਿ. ਇਦਞ੍ਚਾਪਿ ਦੁਤਿਯਸਚ੍ਚਂ ਅਵਸੇਸਪਚ੍ਚਯਸਮਾਯੋਗੇ ਸਤਿ ਦੁਕ੍ਖਸ੍ਸੁਪ੍ਪਤ੍ਤਿਕਾਰਣਂ. ਇਤਿ ਦੁਕ੍ਖਸ੍ਸ ਸਂਯੋਗੇ ਉਪ੍ਪਤ੍ਤਿਕਾਰਣਤ੍ਤਾ ਦੁਕ੍ਖਸਮੁਦਯਨ੍ਤਿ ਵੁਚ੍ਚਤੀ’’ਤਿ. ਸਮੁਦਯੋ ਚ ਸੋ ਸਚ੍ਚਞ੍ਚਾਤਿ ਸਮੁਦਯਸਚ੍ਚਂ, ਲੋਭਸਙ੍ਖਾਤਾ ਤਣ੍ਹਾ ਲਬ੍ਭਤਿ. ਨਿਰੋਧਸਚ੍ਚਨ੍ਤਿ ਰੋਧਤਿ ਚਰਤਿ ਪਵਤ੍ਤਤੀਤਿ ਰੋਧੋ, ਤੇਭੂਮਿਕਵਟ੍ਟਧਮ੍ਮੋ. ਰੋਧਧਾਤੁ ਚਰਣੇ ਣ. ਨਤ੍ਥਿ ਤੇਭੂਮਿਕਵਟ੍ਟਧਮ੍ਮਸ੍ਸ ਰੋਧੋ ਚਰਣਂ ਏਤ੍ਥਾਤਿ ਨਿਰੋਧੋ, ਨਿਬ੍ਬਾਨਂ. ਅਥ ਵਾ ਨਿਰੁਜ੍ਝਤਿ ਸਂਸਾਰਦੁਕ੍ਖਂ ਏਤ੍ਥਾਤਿ ਨਿਰੋਧੋ, ਨਿਬ੍ਬਾਨਂ. ਰੁਧਿਧਾਤੁ ਆਵਰਣੇ ਣ. ਵੁਤ੍ਤਞ੍ਹੇਤਂ ਸਚ੍ਚਵਿਭਙ੍ਗਟ੍ਠ ਕਥਾਯਂ ‘‘ਤਤਿਯਸਚ੍ਚਂ ਪਨ ਯਸ੍ਮਾ ਨਿਸਦ੍ਦੋ ਅਭਾਵਂ. ਰੋਧ ਸਦ੍ਦੋ ਚਾਰਕਂ ਦੀਪੇਤਿ. ਤਸ੍ਮਾ ਅਭਾਵੋ ਏਤ੍ਥ ਸਂਸਾਰ ਚਾਰਕਸਙ੍ਖਾਤਸ੍ਸ ਦੁਕ੍ਖਰੋਧਸ੍ਸ ਸਬ੍ਬਗਤਿਸੁਞ੍ਞਤ੍ਤਾ. ਸਮਧਿ ਗਤੇ ਵਾ ਤਸ੍ਮਿਂ ਸਂਸਾਰਚਾਰਕਸਙ੍ਖਾਤਸ੍ਸ ਦੁਕ੍ਖਰੋਧਸ੍ਸ ਅਭਾਵੋ ਹੋਤਿ ਤਪ੍ਪਟਿਪਕ੍ਖਤ੍ਤਾਤਿਪਿ ਦੁਕ੍ਖਨਿਰੋਧਨ੍ਤਿ ਵੁਚ੍ਚਤੀ’’ਤਿ. ਦੁਕ੍ਖਸ੍ਸ ਵਾ ਅਨੁਪ੍ਪਾਦਨਿਰੋਧਪਚ੍ਚਯਤ੍ਤਾ ਦੁਕ੍ਖਨਿਰੋਧਨ੍ਤਿ. ਨਿਰੋਧੋ ਚ ਸੋ ਸਚ੍ਚਞ੍ਚਾਤਿ ਨਿਰੋਧਸਚ੍ਚਂ. ਨਿਬ੍ਬਾਨਂ. ਮਗ੍ਗਸਚ੍ਚਨ੍ਤਿ ਦੁਕ੍ਖਨਿਰੋਧਂ ਨਿਬ੍ਬਾਨਂ ਮਗ੍ਗਤਿ ਗਚ੍ਛਤਿ ਏਤੇਨਾਤਿ ਮਗ੍ਗੋ. ਅਟ੍ਠਙ੍ਗਿਕੋ ਮਗ੍ਗੋ. ਮਗ੍ਗਧਾਤੁ ਗਤਿਯਂ ਅ. ਵੁਤ੍ਤਞ੍ਹੇਤਂ ਸਚ੍ਚ ਵਿਭਙ੍ਗਟ੍ਠਕਥਾਯਂ ‘‘ਚਤੁਤ੍ਥਸਚ੍ਚਂ ਪਨ ਯਸ੍ਮਾ ਏਤਂ ਦੁਕ੍ਖਨਿਰੋਧਂ ਗਚ੍ਛਤਿ ਆਰਮ੍ਮਣਵਸੇਨ ਤਦਭਿਮੁਖਭੂਤਤ੍ਤਾ ਪਟਿਪਦਾ ਚ ਹੋਤਿ ਦੁਕ੍ਖਨਿਰੋਧਪ੍ਪਤ੍ਤਿਯਾ. ਤਸ੍ਮਾ ਦੁਕ੍ਖਨਿਰੋਧਗਾਮਿਨਿਪਟਿਪਦਾਤਿ ਵੁਚ੍ਚਤੀ’’ਤਿ. ਮਗ੍ਗੋ ਚ ਸੋ ਸਚ੍ਚਞ੍ਚਾਤਿ ਮਗ੍ਗਸਚ੍ਚਂ. ਅਟ੍ਠਙ੍ਗਿਕੋ ਮਗ੍ਗੋ ਲਬ੍ਭਤਿ. ਯਸ੍ਮਾ ਪਨੇਤਾਨਿ ਬੁਦ੍ਧਾਦਯੋ ਅਰਿਯਾ ਪਟਿਵਿਜ੍ਝਨ੍ਤਿ, ਤਸ੍ਮਾ ਅਰਿਯਸਚ੍ਚਾਨੀਤਿਪਿ ਵੁਚ੍ਚਨ੍ਤਿ. ਅਥ ਵਾ ਬੁਦ੍ਧਾਦੀਹਿ ਅਰਿਯੇਹਿ ਪਟਿਵਿਜ੍ਝਿਯਨ੍ਤਿ, ਤਸ੍ਮਾ ਅਰਿਯਸਚ੍ਚਾਨੀਤਿਪਿ ਵੁਚ੍ਚਨ੍ਤਿ.

ਤੇਸਂ ਪਨ ਲਕ੍ਖਣਾਦੀਨਿ ਏਵਂ ਵੇਦਿਤਬ੍ਬਾਨਿ. ਏਤ੍ਥ ਹਿ ਬਾਧਨਲਕ੍ਖਣਂ ਦੁਕ੍ਖਸਚ੍ਚਂ, ਸਨ੍ਤਾਪਨਰਸਂ, ਪਵਤ੍ਤਿਪਚ੍ਚੁਪਟ੍ਠਾਨਂ, ਪਭਵਲਕ੍ਖਣਂ ਸਮੁਦਯਸਚ੍ਚਂ, ਅਨੁਪਚ੍ਛੇਦਕਰਣਰਸਂ, ਪਲਿਬੋਧਪਚ੍ਚੁਪਟ੍ਠਾਨਂ. ਸਨ੍ਤਿਲਕ੍ਖਣਂ ਨਿਰੋਧਸਚ੍ਚਂ, ਅਚ੍ਚੁਤਿਰਸਂ, ਅਨਿਮਿਤ੍ਤਪਚ੍ਚੁਪਟ੍ਠਾਨਂ. ਨਿਯ੍ਯਾਨਲਕ੍ਖਣਂ ਮਗ੍ਗਸਚ੍ਚਂ, ਕਿਲੇਸਪ੍ਪਹਾਨ ਕਰਣਰਸਂ, ਵੁਟ੍ਠਾਨਪਚ੍ਚੁਪਟ੍ਠਾਨਨ੍ਤਿ. ਏਤੇਸੁ ਪਨ ਚਤੂਸੁ ਸਚ੍ਚੇਸੁ ਪਠਮਤਤਿਯਸਚ੍ਚਾਨਿ ਫਲਾਨਿ ਹੋਨ੍ਤਿ. ਦੁਤਿਯ ਚਤੁਤ੍ਥਸਚ੍ਚਾਨਿ ਹੇਤੂਨਿ ਹੋਨ੍ਤਿ. ਪੁਰਿਮਾਨਿ ਦ੍ਵੇਸਚ੍ਚਾਨਿ ਦੁਦ੍ਦ ਸਤ੍ਤਾ ਗਮ੍ਭੀਰਾਨਿ. ਪਚ੍ਛਿਮਾਨਿ ਦ੍ਵੇਸਚ੍ਚਾਨਿ ਗਮ੍ਭੀਰਤ੍ਤਾ ਦੁਦ੍ਦਸਾਨਿ.

ਅਪਿ ਚ ਖੋ ਪਨ ਦੁਕ੍ਖਨਿਰੋਧਂ ਅਰਿਯਸਚ੍ਚਂ ਗਮ੍ਭੀਰਞ੍ਚੇਵ ਦੁਦ੍ਦਸਞ੍ਚਾਤਿ ਵੇਦਿਤਬ੍ਬਂ. ਏਕੇਕਸ੍ਸ ਪਨ ਸਚ੍ਚਸ੍ਸ ਚਤੁਨ੍ਨਂ ਚਤੁਨ੍ਨਂ ਅਤ੍ਥਾਨਂ ਵਸੇਨ ਸੋਲ਼ਸ ਸਚ੍ਚਟ੍ਠਾ ਹੋਨ੍ਤਿ. ਤੇਨ ਵੁਤ੍ਤਂ ਪਟਿਸਮ੍ਭਿਦਾ ਮਗ੍ਗਪਾਲ਼ਿਯਂ ‘‘ਦੁਕ੍ਖਸ੍ਸ ਪੀਲ਼ਨਟ੍ਠੋ ਸਙ੍ਖਤਟ੍ਠੋ ਸਨ੍ਤਾਪਟ੍ਠੋ ਵਿਪਰਿਣਾਮਟ੍ਠੋ, ਇਮੇ ਚਤ੍ਤਾਰੋ ਦੁਕ੍ਖਸ੍ਸ ਦੁਕ੍ਖਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਦੁਕ੍ਖਂ ਤਥਟ੍ਠੇਨ ਸਚ੍ਚਂ. ਸਮੁਦਯਸ੍ਸ ਆਯੂਹਨਟ੍ਠੋ ਨਿਦਾਨਟ੍ਠੋ ਸਂਯੋਗਟ੍ਠੋ ਪਲਿਬੋਧਟ੍ਠੋ, ਇਮੇ ਚਤ੍ਤਾਰੋ ਸਮੁਦਯਸ੍ਸ ਸਮੁਦਯਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਸਮੁਦਯੋ ਤਥਟ੍ਠੇਨ ਸਚ੍ਚਂ. ਨਿਰੋਧਸ੍ਸ ਨਿਸ੍ਸਰਣਟ੍ਠੋ ਵਿਵੇਕਟ੍ਠੋ ਅਸਙ੍ਖਤਟ੍ਠੋ ਅਮਤਟ੍ਠੋ, ਇਮੇ ਚਤ੍ਤਾਰੋ ਨਿਰੋਧਸ੍ਸ ਨਿਰੋਧਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ, ਏਵਂ ਨਿਰੋਧੋ ਤਥਟ੍ਠੇਨ ਸਚ੍ਚਂ. ਮਗ੍ਗਸ੍ਸ ਨਿਯ੍ਯਾਨਟ੍ਠੋ ਹੇਤ੍ਵਟ੍ਠੋ ਦਸ੍ਸਨਟ੍ਠੋ ਅਧਿਪਤੇਯ੍ਯਟ੍ਠੋ, ਇਮੇ ਚਤ੍ਤਾਰੋ ਮਗ੍ਗਸ੍ਸ ਮਗ੍ਗਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ, ਏਵਂ ਮਗ੍ਗੋ ਤਥਟ੍ਠੇਨ ਸਚ੍ਚ’’ਨ੍ਤਿ.

ਦਸ੍ਸਨਂ ਦਸਂ, ਦਿਸਤਿ ਪਸ੍ਸਤੀਤਿ ਵਾ ਦਸਂ, ਚਤੁਮਗ੍ਗਞਾਣਂ. ਦਿਸਧਾਤੁ ਅਪੇਕ੍ਖਨੇ ਅ. ਚਤੁਨ੍ਨਂ ਸਚ੍ਚਾਨਂ ਦਸ੍ਸਨਂ ਅਸ੍ਸਾਤਿ ਚਤੁਸਚ੍ਚਦਸੋ, ਜਿਨੋ. ਅਥ ਵਾ ਚਤ੍ਤਾਰਿ ਸਚ੍ਚਾਨਿ ਅਦਸ੍ਸਿ ਅਪਸ੍ਸੀਤਿ ਚਤੁਸਚ੍ਚਦਸੋ, ਜਿਨੋ. ਸੋ ਚਤ੍ਤਾਰਿ ਸਚ੍ਚਾਨਿ ਚਤੁਮਗ੍ਗਞਾਣੇਨ ਅਪ੍ਪਟਿਵਿਜ੍ਝੀਤਿ ਅਤ੍ਥੋ. ਤਂ ਚਤੁਸਚ੍ਚਦਸਂ. ਚਤੁਸਚ੍ਚਞਾਣਂ ਪਨ ਦੁਵਿਧਂ ਹੋਤਿ ਅਨੁਬੋਧਞਾਣਞ੍ਚ, ਪਟਿਵੇਧ ਞਾਣਞ੍ਚਾਤਿ. ਤਤ੍ਥ ਅਨੁਬੋਧਞਾਣਂ ਲੋਕਿਯਂ ਅਨੁਸ੍ਸਵਾਦਿਵਸੇਨ ਨਿਰੋਧੇ ਮਗ੍ਗੇ ਚ ਪਵਤ੍ਤਤਿ, ਪਟਿਵੇਧਞਾਣਂ ਲੋਕੁਤ੍ਤਰਂ ਨਿਰੋਧਮਾਰਮ੍ਮਣਂ ਕਤ੍ਵਾ ਕਿਚ੍ਚਤੋ ਚਤ੍ਤਾਰਿਪਿ ਸਚ੍ਚਾਨਿ ਪਟਿਵਿਜ੍ਝਤਿ. ਯਥਾਹ ਯੋ ਭਿਕ੍ਖਵੇ ਦੁਕ੍ਖਂ ਪਸ੍ਸਤਿ, ਦੁਕ੍ਖਸਮੁਦਯਮ੍ਪਿ ਸੋ ਪਸ੍ਸਤਿ. ਦੁਕ੍ਖਨਿਰੋਧਮ੍ਪਿ ਪਸ੍ਸਤਿ, ਦੁਕ੍ਖਨਿਰੋਧਗਾਮਿਨਿਪਟਿ ਪਦਮ੍ਪਿ ਪਸ੍ਸਤੀਤਿ ਸਬ੍ਬਂ ਵਤ੍ਤਬ੍ਬਂ. ਚਤੁਸਚ੍ਚਪਟਿਵੇਧਞਾਣਂ ਪਨ ਅਨੁਬੋਧਞਾਣੇਨ ਵਿਨਾ ਨ ਪਵਤ੍ਤਤਿ, ਤਸ੍ਮਾ ਅਨੁਬੋਧ ਞਾਣਤ੍ਥਾਯ ਪੁਬ੍ਬੇ ਚਤੁਸਚ੍ਚਕਮ੍ਮਟ੍ਠਾਨਂ ਪਣ੍ਡਿਤੇਨ ਸਮਾਰਮ੍ਭਿ ਤਬ੍ਬਨ੍ਤਿ. ਨਨੁ ਚ ਅਰਿਯਸਾਵਕਾ ਚਤ੍ਤਾਰਿ ਸਚ੍ਚਾਨਿ ਪਟਿਵਿਜ੍ਝਨ੍ਤਿ. ਅਥ ਕਸ੍ਮਾ ਜਿਨੋਯੇਵ ਚਤੁਸਚ੍ਚਦਸਨ੍ਤਿ ਥੋਮਿਤੋਤਿ. ਭਗਵਾ ਪਨ ਅਰਿਯਸਾਵਕੇਹਿ ਵਿਸਿਟ੍ਠੇਨ ਅਨਞ੍ਞੋਪਦੇਸੇਨ ਅਰਹਤ੍ਤਮਗ੍ਗਞਾਣੇਨ ਚਤ੍ਤਾਰਿ ਸਚ੍ਚਾਨਿ ਪਟਿਵਿਜ੍ਝਨ੍ਤਿ. ਤਸ੍ਮਾ ਭਗਵਾਯੇਵ ਚਤੁਸਚ੍ਚਦਸਨ੍ਤਿ ਅਭਿਤ੍ਥਵਿਤੋਤਿ. ਤਤ੍ਥ ਪਨ ਠਪੇਤ੍ਵਾ ਤਣ੍ਹਞ੍ਚ ਨਿਬ੍ਬਾਨਞ੍ਚ ਅਵਸੇਸਧਮ੍ਮਾ ਦੁਕ੍ਖਸਚ੍ਚਂ ਨਾਮ. ਅਟ੍ਠਸਤਤਣ੍ਹਾਵਿਚਰਿਤਾ ਸਮੁਦਯਸਚ੍ਚਂ ਨਾਮ. ਨਿਬ੍ਬਾਨਂ ਨਿਰੋਧ ਸਚ੍ਚਂ ਨਾਮ. ਅਟ੍ਠਙ੍ਗਿਕੋ ਮਗ੍ਗੋ ਮਗ੍ਗਸਚ੍ਚਂ ਨਾਮ. ਵੁਤ੍ਤਂ ਪਨ ਅਭਿਧਮ੍ਮਤ੍ਥਸਙ੍ਗਹੇ –

‘‘ਦੁਕ੍ਖਂ ਤੇਭੂਮਕਂ ਵਟ੍ਟਂ, ਤਣ੍ਹਾ ਸਮੁਦਯੋ ਭਵੇ;

ਨਿਰੋਧੋ ਨਾਮ ਨਿਬ੍ਬਾਨਂ, ਮਗ੍ਗੋ ਲੋਕੁਤ੍ਤਰੋ ਮਤੋ’’ਤਿ.

ਵਰਮਿਦ੍ਧਿਗਤਨ੍ਤਿ ਵਰਂ ਇਦ੍ਧਿਗਤਂ. ਉਤ੍ਤਮਂ ਅਤੀਤਬੁਦ੍ਧਾਨਂ ਇਦ੍ਧਿਂ ਪਤ੍ਤਨ੍ਤਿ ਅਤ੍ਥੋ. ਅਥ ਵਾ ਉਤ੍ਤਮਾਨਂ ਇਦ੍ਧੀਨਂ ਪਤਿਟ੍ਠਾਨਭੂਤਨ੍ਤਿ ਅਤ੍ਥੋ. ਇਜ੍ਝਨਂ ਸਮਿਜ੍ਝਨਂ ਇਦ੍ਧਿ, ਇਜ੍ਝਤਿ ਸਮਿਜ੍ਝਤਿ ਨਿਪ੍ਪਜ੍ਜਤੀਤਿ ਵਾ ਇਦ੍ਧਿ. ਇਦ੍ਧਿਵਿਧਞਾਣਞ੍ਚ ਅਰਹਤ੍ਤਮਗ੍ਗੋ ਚ ਲਬ੍ਭਤਿ. ਵੁਤ੍ਤਞ੍ਹਿ ਵਿਸੁਦ੍ਧਿਮਗ੍ਗੇ ‘‘ਤਥਾ ਨੇਕ੍ਖਮ੍ਮਂ ਇਜ੍ਝਤੀਤਿ ਇਦ੍ਧੀਤਿ ਚ ਅਰਹਤ੍ਤਮਗ੍ਗੋ ਇਜ੍ਝਤੀਤਿ ਇਦ੍ਧੀ’’ਤਿ ਚ. ਅਥ ਵਾ ਇਜ੍ਝਨ੍ਤਿ ਸਤ੍ਤਾ ਏਤਾਯ ਇਦ੍ਧਾ ਵੁਦ੍ਧਾ ਉਕ੍ਕਂਸਗਤਾ ਹੋਨ੍ਤੀਤਿ ਇਦ੍ਧਿ, ਅਟ੍ਠਸਮਾਪਤ੍ਤਿਯੋ ਚ ਚਤ੍ਤਾਰੋ ਮਗ੍ਗਾ ਚ ਲਬ੍ਭਨ੍ਤਿ. ਇਧਧਾਤੁ ਵੁਡ੍ਢਿਯਨ੍ਤਿ ਪਚ੍ਚਯੋ. ਅਥ ਵਾ ਤਪਚ੍ਚਯੋ ਇਤ੍ਥਿਲਿਙ੍ਗਜੋਤਕੋ ਈਪਚ੍ਚਯੋ ਚ. ਇਦ੍ਧਿਂ ਅਗਮਿਨ੍ਤਿ ਇਦ੍ਧਿਗਤੋ, ਜਿਨੋ. ਅਥ ਵਾ ਗਚ੍ਛਤਿ ਪਤਿਟ੍ਠਹਤਿ ਏਤ੍ਥਾਤਿ ਗਤੋ, ਵਰਾਨਂ ਉਤ੍ਤਮਾਨਂ ਇਦ੍ਧੀਨਂ ਗਤੋ ਪਤਿਟ੍ਠਾਨਭੂਤੋਤਿ ਵਰਮਿਦ੍ਧਿਗਤੋ, ਜਿਨੋ. ਤਂ ਵਰਮਿਦ੍ਧਿਗਤਂ. ਕਿਞ੍ਚਾਪਿ ਪਨ ਅਰਿਯਸਾਵਕਾ ਇਦ੍ਧਿਪ੍ਪਤ੍ਤਾ ਹੋਨ੍ਤਿ, ਬੁਦ੍ਧਾ ਪਨ ਵਿਸੇਸਤੋ ਏਤਾਯ ਅਭਿਞ੍ਞਾਯ ਇਦ੍ਧਾ ਸਮਿਦ੍ਧਾ ਵੁਦ੍ਧਾ ਅਤਿਉਕ੍ਕਂਸਗਤਾ ਹੋਨ੍ਤਿ, ਤਸ੍ਮਾ ਬੁਦ੍ਧੋਯੇਵ ਵਰਮਿਦ੍ਧਿਗਤਨ੍ਤਿ ਅਭਿਤ੍ਥਵਿਤੁਂ ਅਰਹਤੀਤਿ ਵੇਦਿਤਬ੍ਬੋ.

ਨਰਦੇਵਹਿਤਨ੍ਤਿ ਮਨੁਸ੍ਸਦੇਵਾਨਂ ਲੋਕਿਯਲੋਕੁਤ੍ਤਰ ਸਙ੍ਖਾਤਂ ਹਿਤਂ ਪਯੋਜਨਂ ਧਾਰਣਂ. ਤੇਸਂ ਪਨ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਿਭਵੂਪਸਮਨ੍ਤਿ ਤਿਭਵਉਪਸਮਂ. ਪੁਨਬ੍ਭਵਾਭਿਨਿਬ੍ਬਤ੍ਤਿਯਾ ਅਭਾਵਤੋ ਕਾਮਰੂਪਅਰੂਪਸਙ੍ਖਾਤੇਹਿ ਤੀਹਿ ਭਵੇਹਿ ਤੀਸੁ ਭਵੇਸੁ ਪੁਨਬ੍ਭਵਾਭਿਨਿਬ੍ਬਤ੍ਤਿਤੋ ਵਾ ਉਪਸਮਿਤਂ ਨਿਬ੍ਬੁਤਂ ਨਿਰੁਦ੍ਧਨ੍ਤਿ ਅਤ੍ਥੋ. ਭਵਨ੍ਤਿ ਸਤ੍ਤਾ ਏਤ੍ਥਾਤਿ ਭਵੋ, ਤਯੋ ਭਵਾ ਤਿਭਵਾ, ਤੇਹਿ ਉਪਸਮਿਤ੍ਥਾਤਿ ਤਿਭਵੂਪਸਮੋ, ਜਿਨੋ. ਤਂ ਤਿਭਵੂਪਸਮਂ. ਭਗਵਤੋ ਪਨ ਬੋਧਿਪਲ੍ਲਙ੍ਕੇਵ ਕਾਮਰੂਪਾਰੂਪਸਙ੍ਖਾਤੇਸੁ ਤੀਸੁ ਭਵੇਸੁ ਪਟਿਸਨ੍ਧਿਜਨਕਾਨਂ ਅਵਿਜ੍ਜਾਤਣ੍ਹਾਮੂਲਕਾਨਂ ਪੁਞ੍ਞਾਦਿਸਙ੍ਖਾਰਾਨਂ ਅਰਹਤ੍ਤਮਗ੍ਗਞਾਣੇਨ ਨਿਰਵਸੇਸਂ ਪਹੀਨਤ੍ਤਾ ਪੁਨਬ੍ਭਵਾਭਿਨਿਬ੍ਬਤ੍ਤਿ ਨਤ੍ਥਿ. ਤਸ੍ਮਾ ਭਗਵਨ੍ਤਂਯੇਵ ਵਿਸੇਸੇਨ ਤਿਭਵੂਪਸਮਨ੍ਤਿ ਥੋਮੇਤੀਤਿ ਵੁਤ੍ਤਂ ਹੋਤਿ. ਜਿਨਨ੍ਤਿ ਪਞ੍ਚਮਾਰਜਯਨ੍ਤਂ ਬੁਦ੍ਧਂ. ਪਣਮਾਮੀਤਿ ਅਹਂ ਞਾਣਸਮ੍ਪਯੁਤ੍ਤਚਿਤ੍ਤੇਨ ਆਦਰਂ ਵਨ੍ਦਾਮੀਤਿ ਯੋਜਨਾ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸਮਤਿਂਸਤਿ ਸਮ੍ਭਰਣਂ ਸਮਤਿਂਸਪਾਰਮਿਯੋ ਸਮ੍ਭੂਤਂ ਪਰਿਪੂਰਿਤਂ, ਵਰਬੋਧਿਦੁਮੇ ਉਤ੍ਤਮਬੋਧਿਰੁਕ੍ਖਮੂਲੇ, ਚਤੁਸਚ੍ਚਦਸਂ ਚਤ੍ਤਾਰਿ ਅਰਿਯਸਚ੍ਚਾਨਿ ਮਗ੍ਗਞਾਣੇਨ ਪਸ੍ਸਨ੍ਤਂ ਪਟਿਵਿਜ੍ਝਨ੍ਤਂ, ਵਰਮਿਦ੍ਧਿਗਤਂ ਉਤ੍ਤਮਂ ਅਤੀਤ ਬੁਦ੍ਧਾਨਂ ਇਦ੍ਧਿਪਤ੍ਤਂ ਉਤ੍ਤਮਾਨਂ ਇਦ੍ਧੀਨਂ ਪਤਿਟ੍ਠਾਨਭੂਤਂ ਵਾ, ਨਰਦੇਵਹਿਤਂ ਮਨੁਸ੍ਸਦੇਵਾਨਂ ਲੋਕਿਯਲੋਕੁਤ੍ਤਰਸਙ੍ਖਾਤਂ ਪਯੋਜਨਂ ਧਾਰਣਂ, ਤਿਭਵੂਪਸਮਂ ਕਾਮਰੂਪਅਰੂਪਸਙ੍ਖਾਤੇਹਿ ਤੀਹਿ ਭਵੇਹਿ ਉਪਸਮਿਤਂ, ਕਾਮਰੂਪਾਰੂਪਸਙ੍ਖਾਤੇਸੁ ਤੀਸੁ ਭਵੇਸੁ ਪੁਨਬ੍ਭਵਾ ਭਿਨਿਬ੍ਬਤ੍ਤਿਤੋ ਉਪਸਮਿਤਂ ਨਿਬ੍ਬੁਤਂ ਵਾ, ਜਿਨਂ ਪਞ੍ਚਮਾਰਜਯਨ੍ਤਂ ਬੁਦ੍ਧਂ ਪਣਮਾਮਿ ਅਹਂ ਞਾਣਸਮ੍ਪਯੁਤ੍ਤਚਿਤ੍ਤੇਨ ਆਦਰਂ ਵਨ੍ਦਾਮੀਤਿ.

ਏਕਾਦਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੨.

ਸਤਪੁਞ੍ਞਜਲਕ੍ਖਣਿਕਂ ਵਿਰਜਂ,

ਗਗਨੂਪਮਧਿਂ ਧਿਤਿਮੇਰੁਸਮਂ;

ਜਲਜੂਪਮਸੀਤਲਸੀਲਯੁਤਂ,

ਪਥਵੀਸਹਨਂ ਪਣਮਾਮਿ ਜਿਨਂ.

੧੨. ਏਵਂ ਏਕਾਦਸਮਗਾਥਾਯ ਜਿਨਂ ਵਨ੍ਦਿਤ੍ਵਾ ਇਦਾਨਿ ਸਤਪੁਞ੍ਞਜਲਕ੍ਖਣਿਕਨ੍ਤ੍ਯਾਦੀਹਿ ਛਹਿ ਗੁਣੇਹਿ ਥੋਮਿਤ੍ਵਾ ਜਿਨਂ ਵਨ੍ਦਿਤੁ ਕਾਮੋ ਸਤਪੁਞ੍ਞਜਲਕ੍ਖਣਿਕਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਚਤੂਹਿ ਸ ਗਣੇਹਿ ਰਚਿਤਤ੍ਤਾ ਦ੍ਵਾਦਸਕ੍ਖਰੇਹਿ ਯੁਤ੍ਤਾ ਤੋਟਕਗਾਥਾਤਿ ਦਟ੍ਠਬ੍ਬਾ. ਸਾਧਕਂ ਪਨ ਅਨਨ੍ਤਰਗਾਥਾਵਣ੍ਣਨਾਯਂ ਵੁਤ੍ਤਮੇਵ.

ਤਤ੍ਥ ਸਤਪੁਞ੍ਞਜਲਕ੍ਖਣਿਕਨ੍ਤਿ ਅਨੇਕਪਾਰਮੀਪੁਞ੍ਞਤੇਜੇਨ ਜਾਤੇਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਨ ਸਮ੍ਪਨ੍ਨਂ. ਏਤ੍ਥ ਚ ਸਤਸਦ੍ਦੋ ਅਨੇਕਸਙ੍ਖ੍ਯਾਵਾਚਕੋ. ਸਤਤੇਜੋ ਸਹਸ੍ਸਰਂ ਸੀਤਿਆਦੀਸੁ ਵਿਯ. ਸਤੇਨ ਅਨੇਕੇਨ ਪਾਰਮੀਪੁਞ੍ਞਤੇਜੇਨ ਜਾਤਨ੍ਤਿ ਸਤਪੁਞ੍ਞਜਂ, ਲਕ੍ਖਿਯਤਿ ਲਕ੍ਖਿਤਬ੍ਬਂ ਬੁਦ੍ਧਦਬ੍ਬਂ ਏਤੇਹੀਤਿ ਲਕ੍ਖਣਂ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਦਿ. ਲਕ੍ਖਧਾਤੁ ਦਸ੍ਸਨਙ੍ਕੇਸੁਯੁ. ਸਤਪੁਞ੍ਞਜਞ੍ਚ ਤਂ ਲਕ੍ਖਣਞ੍ਚਾਤਿ ਸਤਪੁਞ੍ਞਜ ਲਕ੍ਖਣਂ. ਤਂ ਅਸ੍ਸ ਅਤ੍ਥੀਤਿ ਸਤਪੁਞ੍ਞਜਲਕ੍ਖਣਿਕੋ, ਜਿਨੋ. ਤਂ. ਭਗਵਾ ਹਿ ਅਨਨ੍ਤੇਸੁ ਚਕ੍ਕਵਾਲ਼ੇਸੁ ਸਬ੍ਬੇ ਸਤ੍ਤਾ ਏਕੇਕਂ ਪੁਞ੍ਞਕਮ੍ਮਂ ਸਤਕ੍ਖਤ੍ਤੁਂ ਕਰੇਯ੍ਯੁਂ. ਏਤ੍ਤਕੇਹਿ ਜਨੇਹਿ ਕਤਂ ਪੁਞ੍ਞਕਮ੍ਮਂ ਬੋਧਿਸਤ੍ਤੋ ਏਕੋਵ ਏਕੇਕਂ ਸਤਗੁਣਂ ਕਤ੍ਵਾ ਨਿਬ੍ਬਤ੍ਤੇਨ ਪਾਰਮੀਪੁਞ੍ਞਤੇਜੇਨ ਜਾਤੇਹਿ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣੇਹਿ ਚ ਅਸੀਤਿਅਨੁਬ੍ਯਞ੍ਜਨ ਲਕ੍ਖਣੇ ਹਿ ਚ ਸਮ੍ਪਨ੍ਨੋਤਿ ਸਤਪੁਞ੍ਞਜਲਕ੍ਖਣਿਕਨ੍ਤਿ ਥੋਮੇਤੀਤਿ ਅਧਿਪ੍ਪਾਯੋ. ਵੁਤ੍ਤਞ੍ਹਿ ਬੁਦ੍ਧਵਂਸਟ੍ਠਕਥਾਯਂ –

‘‘ਸਤਪੁਞ੍ਞ ਲਕ੍ਖਣੋਤਿ ਅਨਨ੍ਤੇਸੁ ਚਕ੍ਕਵਾਲ਼ੇਸੁ ਸਬ੍ਬੇ ਸਤ੍ਤਾ ਏਕੇਕਂ ਪੁਞ੍ਞਕਮ੍ਮਂ ਸਤਕ੍ਖਤ੍ਤੁਂ ਕਰੇਯ੍ਯੁਂ, ਏਤ੍ਤਕੇਹਿ ਜਨੇਹਿ ਕਤਕਮ੍ਮਂ ਬੋਧਿਸਤ੍ਤੋ ਸਯਮੇਵ ਏਕੋ ਸਤਗੁਣਂ ਕਤ੍ਵਾ ਨਿਬ੍ਬਤ੍ਤੋ. ਤਸ੍ਮਾ ਸਤਪੁਞ੍ਞਲਕ੍ਖਣੋਤਿ ਵੁਚ੍ਚਤਿ. ਕੇਚਿ ਪਨ ਸਤੇਨ ਸਤੇਨ ਪੁਞ੍ਞਕਮ੍ਮੇਨ ਨਿਬ੍ਬਤ੍ਤਂ ਏਕੇਕਲਕ੍ਖਣੋਤਿ ਵਦਨ੍ਤਿ. ਏਵਂ ਸਨ੍ਤੇ ਯੋ ਕੋਚਿ ਬੁਦ੍ਧੋ ਭਵੇਯ੍ਯਾਤਿ. ਤਂ ਅਟ੍ਠਕਥਾਸੁ ਪਟਿਕ੍ਖਿਤ੍ਤ’’ਨ੍ਤਿ. ਪਾਥੇਯ੍ਯਟ੍ਠਕਥਾਯਂ ਪਨ ‘‘ਸਤ ਪੁਞ੍ਞਲਕ੍ਖਣਨ੍ਤਿ ਸਤੇਨ ਸਤੇਨ ਪੁਞ੍ਞਕਮ੍ਮੇਨ ਨਿਬ੍ਬਤ੍ਤਂ ਏਕੇਕਂ ਲਕ੍ਖਣਂ. ਏਵਂ ਸਨ੍ਤੇ ਯੋ ਕੋਚਿ ਬੁਦ੍ਧੋ ਭਵੇਯ੍ਯਾਤਿ ਨ ਰੋਚਯਿਂਸੁ. ਅਨਨ੍ਤੇਸੁ ਪਨ ਚਕ੍ਕਵਾਲ਼ੇਸੁ ਸਬ੍ਬੇ ਸਤ੍ਤਾ ਏਕੇਕਂ ਕਮ੍ਮਂ ਸਤਕ੍ਖਤ੍ਤੁਂ ਕਰੇਯ੍ਯੁਂ. ਏਤ੍ਤਕੇਹਿ ਜਨੇਹਿ ਕਤਂ ਕਮ੍ਮਂ ਬੋਧਿਸਤ੍ਤੋ ਏਕੋਵ ਏਕੇਕਂ ਸਤਗੁਣਂ ਕਤ੍ਵਾ ਨਿਬ੍ਬਤ੍ਤੋ. ਤਸ੍ਮਾ ਸਤਪੁਞ੍ਞਲਕ੍ਖਣੋਤਿ ਇਮਮਤ੍ਥਂ ਰੋਚਯਿਂਸੂ’’ਤਿ ਵੁਤ੍ਤਂ. ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਂ ਪਨ ਉਪਰਿ ਆਵਿਭਵਿਸ੍ਸਤੀਤਿ.

ਵਿਰਜਨ੍ਤਿ ਰਾਗਰਜਾਦੀਨਂ ਅਭਾਵਾ ਵਿਗਤਰਜਂ. ਰਞ੍ਜਤਿ ਸਞ੍ਜਤਿ ਰੂਪਾਦਿਆਰਮ੍ਮਣੇਸੂਤਿ ਰਜੋ, ਰਾਗਾਦਿਰਜੋ. ਰਨ੍ਜਧਾਤੁ ਰਾਗੇ ਅ. ਵਿਗਤੋ ਰਜੋ ਅਸ੍ਸਾਤਿ ਵਿਰਜੋ, ਜਿਨੋ. ਤਂ ਵਿਰਜਂ. ਜਿਨੋ ਹਿ ਬੋਧਿਪਲ੍ਲਙ੍ਕੇਯੇਵ ਸਬ੍ਬਕਿਲੇਸਮਾਰ ਰਜਸ੍ਸ ਜਯਿਤਤ੍ਤਾ ਵਿਗਤਰਜੋਤਿ ਅਤ੍ਥੋ. ਗਗਨੂਪਮਧਿਨ੍ਤਿ ਏਤ੍ਥ ਧੀ ਵੁਚ੍ਚਤਿ ਸਬ੍ਬਞ੍ਞੁਤਞਾਣਂ. ਤਸ੍ਮਾ ਆਕਾਸੂਪਮਸਬ੍ਬਞ੍ਞੁਤ ਞਾਣਵਨ੍ਤਨ੍ਤਿ ਅਤ੍ਥੋ. ਗਚ੍ਛਨ੍ਤਿ ਏਤ੍ਥ ਵਿਹਙ੍ਗਮਾਦਯੋਤਿ ਗਗਨਂ, ਆਕਾਸੋ. ਗਮੁਧਾਤੁ ਗਤਿਯਂ ਯੁ. ਮਕਾਰਸ੍ਸ ਗੋ. ਉਪਮਿਯਤੇ ਉਪਮਾ. ਭਾਵਸਾਧਨੋਯਂ. ਉਪਪੁਬ੍ਬਮਾਧਾਤੁ ਪਰਿਮਾਨੇ ਅ. ਸਬ੍ਬਞੇਯ੍ਯਧਮ੍ਮਂ ਧਰਤਿ ਜਾਨਾਤੀਤਿ ਧੀ, ਸਬ੍ਬਞ੍ਞੁਤ ਞਾਣਂ. ਧਰਧਾਤੁ ਞਾਣੇ ਕ੍ਵਿ, ਇਤ੍ਥਿਲਿਙ੍ਗਜੋਤਕਈਪਚ੍ਚਯੋ ਚ. ਗਗਨੇਨ ਆਕਾਸੇਨ ਯੁਤ੍ਤਾ ਉਪਮਾ ਗਗਨੂਪਮਾ, ਤਂ ਸਦਿਸਂ ਧੀ ਸਬ੍ਬਞ੍ਞੁਤਞਾਣਂ ਯਸ੍ਸਾਤਿ ਗਗਨੂਪਮਧਿ, ਜਿਨੋ. ਤਂ ਗਗਨੂਪਮਧਿਂ. ਅਯਂ ਪਨ ਅਨਨ੍ਤਾਦਿਗੁਣਹੀਨਤ੍ਤਾ ਧਮ੍ਮਹੀਨੋਪਮਾ ਨਾਮ. ਵੁਤ੍ਤਞ੍ਹਿ ਸੁਬੋਧਾਲਙ੍ਕਾਰੇ ‘‘ਧਮ੍ਮਹੀਨਾਮੁਖਮ੍ਭੋਜ, ਸਦਿਸਂ ਮੁਨਿਨੋ ਇਤੀ’’ਤਿ. ਯਥਾ ਹਿ ਆਕਾਸੋ ਅਨਨ੍ਤੋਤਿ ਵੁਤ੍ਤਤ੍ਤਾ ਆਕਾਸੋ ਅਨਨ੍ਤੋ ਹੁਤ੍ਵਾ ਵਿਤ੍ਥਰਤਿ, ਏਵਂ ਭਗਵਤੋ ਅਨਨ੍ਤਂ ਬੁਦ੍ਧਞਾਣਨ੍ਤਿ ਵੁਤ੍ਤਤ੍ਤਾ ਸਬ੍ਬਞ੍ਞੁਤਞਾਣਸ੍ਸ ਅਨਨ੍ਤਾਰਮ੍ਮਣਤ੍ਤਾ ਚ ਞਾਣਂ ਅਨਨ੍ਤਂ ਹੁਤ੍ਵਾ ਵਿਤ੍ਥਰਤਿ. ਤਸ੍ਮਾ ਗਗਨੂਪਮਧਿਨ੍ਤਿ ਥੋਮੇਤੀਤਿ.

ਧਿਤਿਮੇਰੁਸਮਨ੍ਤਿ ਏਤ੍ਥ ਧਿਤਿ ਵੁਚ੍ਚਤਿ ਸਮਾਧਿ. ਸਿਨੇਰੁਪਬ੍ਬਤ ਸਦਿਸਂ ਅਚਲਸਮਾਧਿਵਨ੍ਤਨ੍ਤਿ ਅਤ੍ਥੋ. ਧਿਯਤਿ ਠਪਿਯਤਿ ਸਮ੍ਪਯੁਤ੍ਤਧਮ੍ਮੇ ਏਕਾਰਮ੍ਮਣੇ ਏਤੇਨਾਤਿ ਧਿਤਿ, ਭਗਵਤੋ ਲੋਕਿਯਲੋਕੁਤ੍ਤਰਝਾਨਸਮਾਧਿ. ਧਿਧਾਤੁ ਧਾਰਣੇਤਿ. ਰਂਸਿਯਾ ਅਨ੍ਧਕਾਰਂ ਮਿਨਾਤਿ ਹਿਂਸਤੀਤਿ ਮੇਰੁ, ਪਬ੍ਬਤਰਾਜਾ. ਮੀਧਾਤੁ ਹਿਂਸਾਯਂ ਰੁਪਚ੍ਚਯੋ. ਇਮਂ ਵਚਨਤ੍ਥਞ੍ਹਿ ਸਿਨੇਰੁਸ੍ਸ ਪਾਚੀਨਪਸ੍ਸਂ ਰਜਤਮਯਂ, ਦਕ੍ਖਿਣਪਸ੍ਸਂ ਮਣਿਮਯਂ, ਪਚ੍ਛਿਮਪਸ੍ਸਂ ਫਲ੍ਲਿਕਮਯਂ, ਉਤ੍ਤਰਪਸ੍ਸਂ ਸੁਵਣ੍ਣਮਯਂ ਹੋਤੀਤਿ ਵੁਤ੍ਤਵਚਨਂ ਸਨ੍ਧਾਯ ਵੁਤ੍ਤਂ. ਅਥ ਵਾ ਮਿਨਾਤਿ ਹਿਂਸਤਿ ਸਬ੍ਬੇ ਪਬ੍ਬਤੇ ਅਤ੍ਤਨੋ ਉਚ੍ਚਤਰਟ੍ਠੇਨਾਤਿ ਮੇਰੁ, ਮੇਰੁਨਾ ਸਮੋ ਧਿਤਿ ਸਮਾਧਿ ਯਸ੍ਸਾਤਿ ਧਿਤਿਮੇਰੁਸਮੋ, ਜਿਨੋ. ਤਂ ਧਿਤਿਮੇਰੁ ਸਮਂ. ਯਥਾ ਹਿ ਮੇਰੁਰਾਜਾ ਅਟ੍ਠਹਿ ਦਿਸਾਹਿ ਆਗਤੇਹਿ ਵਾਤੇਹਿ ਨ ਕਮ੍ਪਤਿ ਨ ਚਲਤਿ, ਏਵਂ ਜਿਨੋ ਕਾਮਚ੍ਛਨ੍ਦਾਦਿਨੀਵਰਣੇ ਪਜਹਿਤ੍ਵਾ ਲੋਕੁਤ੍ਤਰਜ੍ਝਾਨਸਮਾਧਿਨਾ ਸਮਨ੍ਨਾਗਤਤ੍ਤਾ ਅਟ੍ਠਹਿ ਲੋਕਧਮ੍ਮੇਹਿ ਚ ਮਿਚ੍ਛਾਦਿਟ੍ਠਿਵਾਤੇਹਿ ਚ ਨ ਕਮ੍ਪਤਿ ਨ ਚਲਤੀਤਿ ਧਿਤਿਮੇਰੁਸਮਨ੍ਤਿ ਥੋਮੇਤਿ.

ਜਲਜੂਪਮਸੀਤਲਸੀਲਯੁਤਨ੍ਤਿ ਉਦਕਜਾਤਪ੍ਪਦੁਮਸਦਿਸੇਨ ਅਤਿਸੀਤਲੇਨ ਅਸਙ੍ਖ੍ਯੇਯ੍ਯਸੀਲੇਨ ਸਂਯੁਤ੍ਤਂ. ਵੁਤ੍ਤਞ੍ਹਿ ਅਪਦਾਨ ਪਾਲ਼ਿਯਂ ‘‘ਸੀਲਂ ਤਸ੍ਸ ਅਸਙ੍ਖ੍ਯੇਯ੍ਯ’’ਨ੍ਤਿ. ਤਦਟ੍ਠਕਥਾਯਞ੍ਚ ‘‘ਭਗਵਤੋ ਪਨ ਸੀਲਂ ਅਸਙ੍ਖ੍ਯੇਯ੍ਯਮੇਵਾ’’ਤਿ. ਜਲਤਿ ਦਿਬ੍ਬਤੀਤਿ ਜਲਂ, ਉਦਕਂ. ਜਲਧਾਤੁ ਦਿਤ੍ਤਿਯਂ ਅ. ਜਲੇ ਉਦਕੇ ਜਾਤਂ ਜਲਜਂ, ਪਦੁਮਂ. ਜਲਜੇਨ ਪਦੁਮੇਨ ਉਪਮਂ ਸਦਿਸਨ੍ਤਿ ਜਲਜੂਪਮਂ, ਸੀਲਂ. ਸੁਖਤ੍ਥਿਕੇਹਿ ਸੇਵਿਯਤੀਤਿ ਸੀਤਲਂ, ਸੀਲਂ. ਸਿਧਾਤੁ ਸੇਵਾਯਂ ਤਲਪਚ੍ਚਯੋ. ਅਥ ਵਾ ਸੀਤਗੁਣਂ ਲਾਤਿ ਗਣ੍ਹਾਤੀਤਿ ਸੀਤਲਂ, ਸੀਲਂ. ਸੀਤਸਦ੍ਦੂਪਪਦ ਲਾਧਾਤੁ ਗਹਣੇ ਕ੍ਵਿ. ਉਦਕੇ ਪਨ ਜਾਤਂ ਪਦੁਮਂ ਉਦਕੇਨ ਉਣ੍ਹਸ੍ਸ ਸਮਿਤਤ੍ਤਾ ਸੀਤਲਂ ਵਿਯ. ਸੀਲਂ ਪਨ ਬੁਦ੍ਧਸ੍ਸ ਕਿਲੇਸਤਾ ਪਨਸ੍ਸ ਸਮੇਤਤ੍ਤਾ ਅਚ੍ਚਨ੍ਤਸੀਤਲਂ ਹੋਤਿ. ਸੁਰਕ੍ਖਿਤਞ੍ਹਿ ਵਿਸੁਦ੍ਧਂ ਸੀਲਂ ਕਿਲੇਸਪ੍ਪਹਾਨੇਨ ਸਤ੍ਤਾਨਂ ਕਿਲੇਸਪਰਿਲ਼ਾਹਂ ਉਪਸਮੇਤਿ ਨ ਹਰਿਤਚਨ੍ਦਨਂ ਮੁਤ੍ਤਾਹਾਰੋ ਮਣਿ ਉਦਕਂ ਵਾਤੋ ਚਨ੍ਦਕਿਰਣੋ ਚ. ਤਸ੍ਮਾ ਸੀਲਮੇਵ ਸੀਤਲਨ੍ਤਿ ਅਚ੍ਚਨ੍ਤਸੀਤਲਨ੍ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ਵਿਸੁਦ੍ਧਿਮਗ੍ਗੇ –

‘‘ਨ ਤਂ ਸਜਲਦਾ ਵਾਤਾ, ਨ ਚਾਪਿ ਹਰਿਚਨ੍ਦਨਂ;

ਨੇਵ ਹਾਰਾ ਨ ਮਣਯੋ, ਨ ਚਨ੍ਦਕਿਰਣਙ੍ਕੁਰਾ;

ਸਮਯਨ੍ਤੀਧ ਸਤ੍ਤਾਨਂ, ਪਰਿਲ਼ਾਹਂ ਸੁਰਕ੍ਖਿਤਂ;

ਯਂ ਸਮੇਤਿਦਂ ਅਰਿਯਂ, ਸੀਲਂ ਅਚ੍ਚਨ੍ਤਸੀਤਲ’’ਨ੍ਤਿ.

ਅਯਂ ਪਨ ਤਸ੍ਸ ਗਾਥਾਦ੍ਵਯਸ੍ਸਤ੍ਥੋ. ਸੁਰਕ੍ਖਿਤਂ ਸੁਟ੍ਠੁਰਕ੍ਖਿਤਂ ਅਰਿਯਂ ਵਿਸੁਦ੍ਧਂ ਅਚ੍ਚਨ੍ਤਸੀਤਲਂ ਇਦਂ ਸੀਲਂ ਇਧਲੋਕੇ ਸਤ੍ਤਾਨਂ ਯਂ ਪਰਿਲ਼ਾਹਂ ਸਮੇਤਿ, ਤਂ ਪਰਿਲ਼ਾਹਂ ਸਜਲਦਾ ਉਦਕਦਦੇਨ ਮੇਘੇਨ ਸਹ ਪਵਤ੍ਤਾ ਵਾਤਾ ਸੀਤਵਾਤਾ ਨ ਸਮਯਨ੍ਤਿ ਹਰਿਤਚਨ੍ਦਨਞ੍ਚਾਪਿ ਨ ਸਮਯਤਿ. ਹਾਰਾ ਮੁਤ੍ਤਾਹਾਰਾ ਨੇਵ ਸਮਯਨ੍ਤਿ. ਮਣਯੋ ਵੇਲ਼ੁਰਿਯਾਦਿਮਣਿਯੋ ਨ ਸਮਯਨ੍ਤਿ. ਚਨ੍ਦਕਿਰਣਙ੍ਕੁਰਾ ਚਨ੍ਦਸ੍ਸ ਰਂਸਿਅਙ੍ਕੁਰਾ ਨ ਸਮਯਨ੍ਤੀਤਿ. ਸੀਲਤਿ ਸਮਾਧਿਯਤਿ ਕਾਯਕਮ੍ਮਾਦੀਨਂ ਸੁਸੀਲ੍ਯਵਸੇਨ ਨ ਵਿਪ੍ਪਕਿਰਤੀਤਿ ਸੀਲਂ. ਸੀਲਧਾਤੁ ਸਮਾਧਿਮ੍ਹਿ ਅ. ਅਥ ਵਾ ਸੀਲਨ੍ਤਿ ਸਮਾਦਹਨ੍ਤਿ ਚਿਤ੍ਤਂ ਏਤੇਨਾਤਿ ਸੀਲਂ, ਸੀਲੇਨ੍ਤਿ ਵਾ ਏਤੇਨ ਕੁਸਲੇ ਧਮ੍ਮੇ ਉਪਧਾਰੇਨ੍ਤਿ ਆਭੁਸੋ ਧਾਰੇਨ੍ਤਿ ਸਾਧਵੋਤਿ ਸੀਲਂ, ਚੇਤਨਾਧਮ੍ਮੋ, ਕੁਸਲਚਿਤ੍ਤੁਪ੍ਪਾਦੋ ਵਾ ਲਬ੍ਭਤਿ. ਸੀਲਧਾਤੁ ਉਪਧਾਰਣੇ ਅ. ਵੁਤ੍ਤਞ੍ਹੇਤਂ ਵਿਸੁਦ੍ਧਿਮਗ੍ਗਟ੍ਠਕਥਾਯਂ ‘‘ਕੇਨਟ੍ਠੇਨ ਸੀਲਨ੍ਤਿ ਸੀਲਨਟ੍ਠੇਨ ਸੀਲਂ. ਕਿਮਿਦਂ ਸੀਲਂ ਨਾਮ, ਸਮਾਧਾਨਂ ਵਾ, ਕਾਯਕਮ੍ਮਾਦੀਨਂ ਸੁਸੀਲ੍ਯਵਸੇਨ ਅਵਿਪ੍ਪਕਿਣ੍ਣਤਾਤਿ ਅਤ੍ਥੋ. ਉਪਧਾਰਣਂ ਵਾ, ਕੁਸਲਾਨਂ ਧਮ੍ਮਾਨਂ ਪਤਿਟ੍ਠਾਨਵਸੇਨ ਆਧਾਰਭਾਵੋਤਿ ਅਤ੍ਥੋ’’ਤਿ. ਜਲਜੂਪਮੇਨ ਪਦੁਮਸਦਿਸੇਨ ਸੀਤਲੇਨ ਅਚ੍ਚਨ੍ਤਸੀਤਲੇਨ ਸੀਲੇਨ ਅਸਙ੍ਖ੍ਯੇਯ੍ਯਸੀਲੇਨ ਯੁਤ੍ਤੋਤਿ ਜਲਜੂਪਮਸੀਤਲਸੀਲਯੁਤੋ, ਜਿਨੋ. ਤਂ ਜਲਜੂਪਮਸੀਤਲਸੀਲਯੁਤਂ. ਯਥਾ ਹਿ ਉਦਕੇ ਜਾਤਂ ਪਦੁਮਂ ਜਲੇਨ ਸੀਤਲਂ ਹੋਤਿ, ਏਵਂ ਭਗਵਤੋ ਮਗ੍ਗਸੀਲੇਨ ਕਿਲੇਸੁਪਤਾਪਨਸ੍ਸ ਪਹੀਨਤ੍ਤਾ ਤਂ ਸੀਤਲਂ ਅਚ੍ਚਨ੍ਤਸੀਤਲਂ. ਤੇਨ ਸਮ੍ਪਯੁਤ੍ਤੋਤਿ ਜਲਜੂਪਮਸੀਤਲਸੀਲ ਯੁਤਨ੍ਤਿ ਥੋਮੇਤੀਤਿ ਵੁਤ੍ਤਂ ਹੋਤਿ.

ਪਥਵੀਸਹਨਨ੍ਤਿ ਪਥਵੀ ਵਿਯ ਖਨ੍ਤਿਸਮ੍ਪਨ੍ਨਂ ਖਨ੍ਤਿਵਨ੍ਤਂ ਵਾ. ਪਥਨ੍ਤਿ ਪਤਿਟ੍ਠਹਨ੍ਤਿ ਏਤ੍ਥ ਤਰੁਪਬ੍ਬਤਾਦਯੋਤਿ ਪਥਵੀ, ਭੂਮਿ. ਪਥਧਾਤੁ ਪਤਿਟ੍ਠਾਯਂ ਵੀਪਚ੍ਚਯੋ. ਅਥ ਵਾ ਪੁਥੁ ਹੁਤ੍ਵਾ ਜਾਤਨ੍ਤਿ ਪਥਵੀ. ਜਾਤਤਦ੍ਧਿਤਤ੍ਥੇ ਵੀਪਚ੍ਚਯੋ. ਸਹਯਤੇ ਖਮਿਯਤੇ ਸਹਨਂ, ਸਹਤਿ ਖਮਤੀਤਿ ਵਾ ਸਹਨਂ, ਅਧਿਵਾਸਨਖਨ੍ਤਿ. ਸਹਧਾਤੁ ਖਨ੍ਤਿਯਂ ਯੁ. ਪਥਵੀ ਵਿਯ ਸਹਨਂ ਖਮਨਂ ਯਸ੍ਸ ਸੋਤਿ ਪਥਵੀਸਹਨੋ, ਜਿਨੋ. ਤਂ ਪਥਵੀਸਹਨਂ. ਯਥਾ ਹਿ ਪਥਵੀ ਅਤ੍ਤਨੋ ਉਪਰਿ ਪਕ੍ਖਿਤ੍ਤਂ ਸੁਚਿਮ੍ਪਿ ਅਸੁਚਿਮ੍ਪਿ ਸਬ੍ਬਂ ਸਹਤਿ, ਨ ਪਟਿਘਾਨੁਨਯਂ ਕਰੋਤਿ, ਏਵਂ ਜਿਨੋ ਇਟ੍ਠਾਰਮ੍ਮਣਮ੍ਪਿ ਅਨਿਟ੍ਠਾਰਮ੍ਮਣਮ੍ਪਿ ਸਬ੍ਬਂ ਸਹਤਿ, ਨ ਤਤ੍ਥ ਪਟਿਘਾਨੁਨਯਂ ਕਰੋਤੀਤਿ ਪਥਵੀਸਹਨਨ੍ਤਿ ਥੋਮੇਤੀਤਿ ਅਧਿਪ੍ਪਾਯੋ. ਤੇਨ ਵੁਤ੍ਤਂ ਅਪਦਾਨਪਾਲ਼ਿਯਂ –

‘‘ਲਾਭਾਲਾਭੇ ਨ ਸਜ੍ਜਨ੍ਤਿ, ਸਮ੍ਮਾਨਨਵਿਮਾਨਨੇ;

ਪਥਵੀਸਦਿਸਾ ਬੁਦ੍ਧਾ, ਤਸ੍ਮਾ ਤੇ ਨ ਵਿਰਾਧਿਯਾ’’ਤਿ.

ਅਹਂ ਜਿਨਂ ਪਣਮਾਮਿ ਵਨ੍ਦਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸਤਪੁਞ੍ਞਜਲਕ੍ਖਣਿਕਂ ਅਨੇਕਪਾਰਮੀਪੁਞ੍ਞਤੇਜੇਨ ਜਾਤੇਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਨ ਸਮ੍ਪਨ੍ਨਂ, ਵਿਰਜਂ ਰਾਗਰਜਾਦੀਨਂ ਅਭਾਵਾ ਵਿਗਤਰਜਂ, ਗਗਨੂਪਮਧਿਂ ਆਕਾਸੂਪਮਸਬ੍ਬਞ੍ਞੁਤਞਾਣਵਨ੍ਤਂ, ਧਿਤਿਮੇਰੁਸਮਂ ਸਿਨੇਰੁਪਬ੍ਬਤਸਦਿਸਂ ਅਚਲਸਮਾਧਿਵਨ੍ਤਂ, ਜਲਜੂਪਮਸੀਤਲ ਸੀਲਯੁਤਂ. ਉਦਕਜਾਤਪ੍ਪਦੁਮਸਦਿਸੇਨ ਅਚ੍ਚਨ੍ਤਅਤਿਸੀਤਲੇਨ ਅਸਙ੍ਖ੍ਯੇਯ੍ਯਸੀਲੇਨ ਸਮ੍ਪਯੁਤ੍ਤਂ, ਪਥਵੀਸਹਨਂ ਪਥਵੀ ਵਿਯ ਖਨ੍ਤਿਸਮ੍ਪਨ੍ਨਂ, ਖਨ੍ਤਿਵਨ੍ਤਂ ਵਾ, ਜਿਨਂ ਪਞ੍ਚਮਾਰਵਿਜਯਂ ਬੁਦ੍ਧਂ ਅਹਂ ਸਕ੍ਕਚ੍ਚਂ ਪਣਮਾਮਿ ਵਨ੍ਦਾਮੀਤਿ.

ਦ੍ਵਾਦਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੩.

ਯੋ ਬੁਦ੍ਧੋ ਸੁਮਤਿ ਦਿਵੇ ਦਿਵਾਕਰੋਵ,

ਸੋਭਨ੍ਤੋ ਰਤਿਜਨਨੇ ਸਿਲਾਸਨਮ੍ਹਿ;

ਆਸੀਨੋ ਸਿਵਸੁਖਦਂ ਅਦੇਸਿ ਧਮ੍ਮਂ,

ਦੇਵਾਨਂ ਤਮਸਦਿਸਂ ਨਮਾਮਿ ਨਿਚ੍ਚਂ.

੧੩. ਏਵਂ ਦ੍ਵਾਦਸਮਗਾਥਾਯ ਜਿਨਂ ਵਨ੍ਦਿਤ੍ਵਾ ਇਦਾਨਿ ਤਾਵਤਿਂਸਪੁਰੇ ਮਾਤੁਦੇਵਪੁਤ੍ਤਪ੍ਪਮੁਖਾਨਂ ਉਪਪਤ੍ਤਿਦੇਵਾਨਂ ਅਭਿਧਮ੍ਮਂ ਦੇਸਕ ਗੁਣੇਨ ਅਭਿਤ੍ਥਵਿਤ੍ਵਾ ਵਨ੍ਦਿਤੁਕਾਮੋ ਯੋ ਬੁਦ੍ਧੋ ਸੁਮਤਿਤ੍ਯਾਦਿਗਾਥਮਾਹ. ਅਯਂ ਪਨ ਮ ਨ ਜ ਰ ਗਣੇਹਿ ਚ ਏਕਗਰੁਨਾ ਚ ਤੀਹਿ ਯਤੀਹਿ ਚ ਦਸਹਿ ਯਤੀਹਿ ਚ ਰਚਿਤਤ੍ਤਾ ਤੇਰਸਕ੍ਖਰ ਸਂਯੁਤ੍ਤਾ ਪਹਸ੍ਸਿਣੀਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹੇਤਂ ਵੁਤ੍ਤੋਦਯੇ ‘‘ਮ੍ਨਾ ਜਰਾ ਗੋ ਤਿਦਸਯਤਿਪ੍ਪਹਸ੍ਸਿਣੀ ਸਾ’’ਤਿ.

ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਮ੍ਨਾ ਮਗਣ ਨਗਣਾ ਚ ਜਰਾ ਜ ਗਣ ਰਗਣਾ ਚ ਗੋ ਗਰੁ ਚ ਤਿਦਸਯਤਿ ਤਿਯਤਿ ਚ ਦਸਯਤਿ ਚ ਚੇ ਸਿਯਾ, ਸਾ ਗਾਥਾ ਪਹਸ੍ਸਿਣੀਗਾਥਾ ਨਾਮਾਤਿ. ਤਤ੍ਥ ਸੁਮਤਿ ਯੋ ਬੁਦ੍ਧੋ ਧਮ੍ਮਂ ਦੇਵਾਨਂ ਅਦੇਸੀਤਿ ਸਮ੍ਬਨ੍ਧੋ. ਯੋਤਿ ਅਨਿਯਮਵਾਚਕਸਬ੍ਬਨਾਮਪਦਂ. ਤਸ੍ਸ ਵਚਨਤ੍ਥੋ ਨ ਕਾਤਬ੍ਬੋ. ਵੁਤ੍ਤਞ੍ਹਿ ਸਦ੍ਦਵਿਦੂਹਿ –

‘‘ਰੁਲ਼੍ਹੀਖ੍ਯਾਤਂ ਨਿਪਾਤਞ੍ਚੁ, ਪਸਗ੍ਗਾਲਪਨਂ ਤਥਾ;

ਸਬ੍ਬਨਾਮਨ੍ਤਿ ਏਤੇਸੁ, ਨ ਕਤੋ ਵਿਗ੍ਗਹੋ ਛਸੂ’’ਤਿ.

ਅਥ ਵਾ ਸਬ੍ਬਨਾਮਭਾਵਂ ਯਾਤੀਤਿ ਯੋ, ਅਨਿਯਮਵਾਚਕ ਭਾਵਂ ਯਾਤੀਤਿ ਵਾ ਯੋ. ਸਬ੍ਬਨਾਮਭਾਵੇਨ ਯਾਤਿ ਪਵਤ੍ਤਤੀਤਿ ਵਾ ਯੋ. ਅਨਿਯਮਵਾਚਕਭਾਵੇਨ ਯਾਤਿ ਪਵਤ੍ਤਤੀਤਿ ਵਾ ਯੋ. ਸਬ੍ਬਨਾਮਭਾਵੇਨ ਯਾਤਬ੍ਬੋ ਞਾਤਬ੍ਬੋਤਿ ਵਾ ਯੋ, ਯਾਤਬ੍ਬੋ ਞਾਤਬ੍ਬੋ ਏਤੇਨ ਅਨਿਯਮਤ੍ਥੋਤਿ ਵਾ ਯੋ. ਸਬ੍ਬਨਾਮਸਙ੍ਖਾਤਂ ਯਇਤਿਪਦਂ ਲਬ੍ਭਤਿ. ਯੋ ਯਾਦਿ ਸੋਤਿ ਅਤ੍ਥੋ. ਬੁਦ੍ਧੋਤਿ ਪਟਿਵਿਦ੍ਧਚਤੁਸਚ੍ਚਧਮ੍ਮੋ, ਪਟਿਵਿਦ੍ਧਸਬ੍ਬਞੇਯ੍ਯਧਮ੍ਮੋ ਵਾ. ਤਸ੍ਸ ਪਨ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਸੁਮਤੀਤਿ ਸੁਨ੍ਦਰਸਬ੍ਬਞ੍ਞੁਤਞਾਣਵਾਤੋ, ਦੇਸਨਾਞਾਣਵਾਤੋ ਵਾ. ਅਦੇਸਿ ਧਮ੍ਮਂ ਦੇਵਾਨਨ੍ਤਿ ਵੁਚ੍ਚਮਾਨਤ੍ਤਾ ਹਿ ਇਧ ਸਬ੍ਬਞ੍ਞੁਤ ਞਾਣਂ ਸੁਮਤੀਤਿ ਵੁਚ੍ਚਤਿ. ਮਨਤਿ ਜਾਨਾਤਿ ਸਬ੍ਬਞੇਯ੍ਯਧਮ੍ਮਂ ਦੇਸੇਤਬ੍ਬਧਮ੍ਮਂ ਵਾਤਿ ਮਤਿ. ਮਨਧਾਤੁ ਞਾਣੇਤਿ. ਸੁਨ੍ਦਰਾ ਮਤਿ ਸੁਮਤਿ, ਸਬ੍ਬਞੇਯ੍ਯਧਮ੍ਮਾਨਂ ਯਥਾਸਭਾਵਜਾਨਨਸਮਤ੍ਥਂ ਤੇਸਂ ਦੇਸੇ ਤਬ੍ਬਪ੍ਪਕਾਰਜਾਨਨਸਮਤ੍ਥਂ ਬੋਧੇਤਬ੍ਬਪੁਗ੍ਗਲਾਨਂ ਆਸਯਾਧਿ ਮੁਤ੍ਤਿਯਾਦਿਵਿਭਾਵਨਸਮਤ੍ਥਞ੍ਚਾਤਿ ਤਿਸਮਤ੍ਥਸਮ੍ਪਨ੍ਨਂ ਸਬ੍ਬਞ੍ਞੁਤਞਾਣਂ ਲਬ੍ਭਤਿ. ਸੁਮਤੀਤਿ ਇਮਿਨਾ ਹਿ ਸਬ੍ਬਞ੍ਞੁਤਞਾਣਮੇਵ ਅਭਿਧਮ੍ਮਕਥਾਯ ਸਮੁਟ੍ਠਾਨਭਾਵੇ ਸਮਤ੍ਥਂ. ਨਾਞ੍ਞਨ੍ਤਿ ਇਮਮਤ੍ਥਂ ਦੀਪੇਨ੍ਤੋ ਅਭਿਧਮ੍ਮਕਥਾਯ ਅਨਞ੍ਞਸਾਧਾਰਣਭਾਵਂ ਦਸ੍ਸੇਤਿ. ਸੁਨ੍ਦਰਾ ਮਤਿ ਅਸ੍ਸ ਅਸ੍ਮਿਂ ਵਾ ਅਤ੍ਥੀਤਿ ਸੁਮਤਿ, ਬੁਦ੍ਧੋ. ਸਮਾਸਨ੍ਤ ਤਦ੍ਧਿਤਾਯਂ. ਤਦਸ੍ਸਤ੍ਥੀਤਿਵੀ ਚਾਤਿ ਸੁਤ੍ਤੇ ਚਸਦ੍ਦੇਨ ਅਪਚ੍ਚਯੋ. ਯਥਾ ਪੀਤਿਸੁਖਨ੍ਤਿ. ਵੁਤ੍ਤਞ੍ਹਿ ਪਾਰਾਜਿਕਣ੍ਡਟ੍ਠਕਥਾਯਂ ‘‘ਅਯਞ੍ਚ ਪੀਤਿ ਇਦਞ੍ਚ ਸੁਖਂ ਅਸ੍ਸ ਝਾਨਸ੍ਸ ਅਸ੍ਮਿਂ ਵਾ ਝਾਨੇ ਅਤ੍ਥੀਤਿ ਇਦਂ ਝਾਨਂ ਪੀਤਿਸੁਖਨ੍ਤਿ ਵੁਚ੍ਚਤੀ’’ਤਿ.

ਦਿਵੇਤਿ ਦਿਵਸੇ. ਸੂਰਿਯੋਭਾਸੇਨ ਦਿਬ੍ਬਤਿ ਏਤ੍ਥਾਤਿ ਦਿਵੋ. ਦਿਵੁਧਾਤੁ ਜੁਤਿਯਂ ਅ. ਤਸ੍ਮਿਂ ਦਿਵੇ. ਦਿਵਾ ਕਰੋਵਾਤਿ ਸੂਰਿਯੋ ਇਵ. ਦਿਵਾਦਿਨਂ ਕਰੋਤੀਤਿ ਦਿਵਾਕਰੋ, ਸੂਰਿਯੋ. ਦਿਵਾਸਦ੍ਦੂਪ ਪਦ ਕਰਧਾਤੁ ਕਰਣੇ ਅ. ਅਥ ਵਾ ਦਿਵਾ ਦਿਵਸੇ ਕਰੋ ਰਂਸਿ ਅਸ੍ਸਾਤਿ ਦਿਵਾਕਰੋ. ਕਰਸਦ੍ਦੋ ਹਿ ਰਂਸਿਵਾਚਕੋ. ਸੋਭਨ੍ਤੋਤਿ ਵਿਰੋਚਮਾਨੋ ਹੁਤ੍ਵਾ. ਸੁਭਤਿ ਵਿਰੋਚਤਿ ਛਬ੍ਬਣ੍ਣਰਂਸਿਆਦੀਹੀਤਿ ਸੋਭਨ੍ਤੋ, ਬੁਦ੍ਧੋ. ਸੁਭਧਾਤੁ ਸੋਭੇ, ਦਿਤ੍ਤਿਯਂ ਵਾ ਅਨ੍ਤਪਚ੍ਚਯੋ. ਭਗਵਾ ਹਿ ਛਬ੍ਬਣ੍ਣਰਂਸੀਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਅਸੀਤ੍ਯਾਨੁਬ੍ਯਞ੍ਜਨਲਕ੍ਖਣੇਹਿ ਚ ਦੇਵਾਨਂ ਮਜ੍ਝੇ ਸੋਭਤਿ ਵਿਰੋਚਤੀਤਿ ਅਤ੍ਥੋ. ਰਤਿਜਨਨੇਤਿ ਦੇਵਾਨਂ ਅਤਪ੍ਪਕਪੀਤਿਸੋਮਨਸ੍ਸੁਪ੍ਪਾਦਨੇ, ਪੇਮੁਪ੍ਪਾਦਨੇ ਵਾ. ਰਮਨਂ ਰਤਿ. ਰਮੁਧਾਤੁ ਕੀਲ਼ਾਯਨ੍ਤਿ. ਤਂ ਜਨੇਤਿ ਉਪ੍ਪਾਦੇਤੀਤਿ ਰਤਿਜਨਨਂ. ਸਿਲਾਸਨਂ. ਰਤਿਸਦ੍ਦੂਪਪਦ ਜਨਧਾਤੁ ਜਨਨੇ ਯੁ. ਤਸ੍ਮਿਂ ਰਤਿਜਨਨੇ.

ਸਿਲਾਸਨਮ੍ਹੀਤਿ ਤਿਦਸਾਲਯੇ, ਪਾਰਿਚ੍ਛਤ੍ਤਕਮੂਲੇ ਜਾਤੇ ਨਿਕ੍ਖਿਤ੍ਤੇ ਵਾ ਦੀਘਤੋ ਸਟ੍ਠਿਯੋਜਨੇ ਵਿਤ੍ਥਾਰਤੋ ਪਣ੍ਣਾਸ ਯੋਜਨੇ ਪੁਥੁਲਤੋ ਪਨ੍ਨਰਸਯੋਜਨੇ ਵਣ੍ਣਤੋ ਜਯਸੁਮਨਪੁਪ੍ਫਸਦਿਸੇ ਰਤ੍ਤਕਮ੍ਪਲਵਣ੍ਣੇ ਵਾ ਸਣ੍ਹਸੁਖੁਮੇ ਪਣ੍ਡੁਕਮ੍ਪ ਲਨਾਮਕੇ ਸਿਲਾਸਨੇ. ਸਕ੍ਕੇਨ ਸੇਵਿਯਤੀਤਿ ਸਿਲਂ. ਪਾਸਾਣੋ. ਸਿਧਾਤੁ ਸੇਵਾਯਂ ਅਲਪਚ੍ਚਯੋ. ਆਸਿਯਤਿ ਏਤ੍ਥਾਤਿ ਆਸਨਂ. ਅਥ ਵਾ ਆਗਨ੍ਤ੍ਵਾ ਸੇਵਿਯਤਿ ਏਤ੍ਥਾਤਿ ਆਸਨਂ. ਆਪੁਬ੍ਬਸਿਧਾਤੁ ਸੇਵਾਯਂ ਯੁ. ਸਿਲਂਏਵ ਆਸਨਂ ਸਿਲਾਸਨਂ. ਪਣ੍ਡੁਕਮ੍ਪਲਸਿਲਾਸਨਂ ਲਬ੍ਭਤਿ. ਤਸ੍ਮਿਂ ਸਿਲਾਸਨਮ੍ਹਿ. ਆਸੀਨੋਤਿ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਆਗਮ੍ਮ ਸਨ੍ਨਿਸਿਨ੍ਨਾਨਂ ਦੇਵਾਨਂ ਗਣੇਨ ਪਰਿਵਾਰਿਤੋ ਹੁਤ੍ਵਾ ਨਿਸੀਦਨ੍ਤੋ. ਆਸੀਦਨਂ ਨਿਸਜ੍ਜਨਂ ਆਸੀਨੋ. ਆਸਮਨ੍ਤਤੋ ਸੀਦਤਿ ਵਸਤੀਤਿ ਵਾ ਆਸੀਨੋ. ਅਭਿਧਮ੍ਮਕਥਾਭਿਮੁਖਂ ਸੀਦਤਿ ਨਿਸਜ੍ਜਤੀਤਿ ਵਾ ਆਸੀਨੋ, ਬੁਦ੍ਧੋ. ਆਪੁਬ੍ਬਸੀਦਧਾਤੁ ਨਿਸਜ੍ਜਾਯਂ. ਵਿਸਰਣ ਗਤ੍ਯਾਵਸਾਨੇਸੁ ਵਾ ਤਪਚ੍ਚਯੋ. ਤਸ੍ਸ ਈਣਾਦੇਸੋ, ਣਸ੍ਸਨਤ੍ਤਂ, ਧਾਤ੍ਵਨ੍ਤਲੋਪੋ. ਸਿਵਸੁਖਦਨ੍ਤਿ ਨਿਬ੍ਬਾਨਸੁਖਦਾਯਕਂ. ਅਰਿਯੇਹਿ ਸੇਵਿਯਤੀਤਿ ਸਿਵਂ, ਨਿਬ੍ਬਾਨਂ. ਸਿਧਾਤੁ ਸੇਵਾਯਂ ਅਵੋ. ਅਥ ਵਾ ਰਾਗਗ੍ਗਿਆਦੀਹਿ ਸਮਤਿ ਉਪਸਮਤਿ ਏਤ੍ਥਾਤਿ ਸਿਵਂ, ਨਿਬ੍ਬਾਨਂ. ਸਮੁਧਾਤੁ ਉਪਸਮੇ ਰਿਵੋ. ਅਭਿਧਾਨਪ੍ਪਦੀਪਿਕਟੀਕਾਯਂ ਪਨ ‘‘ਸਿਵਂ ਖੇਮਭਾਵਂ ਕਰੋਤੀਤਿ ਸਿਵਂ, ਸਂਸਾਰਭੀਰੁਕੇਹਿ ਸੇਵਿਤਬ੍ਬਤ੍ਤਾ ਵਾ ਸਿਵਂ. ਯਦਾਦਿਨਾ ਵਪਚ੍ਚਯੋ’’ਤਿ ਵੁਤ੍ਤਂ. ਸੁਖਯਤੀਤਿ ਸੁਖਂ. ਯਸ੍ਸੁਪ੍ਪਜ੍ਜਤਿ, ਤਂ ਸੁਖਿਤਂ ਕਰੋਤੀਤਿ ਅਤ੍ਥੋ. ਅਥ ਵਾ ਸੁਟ੍ਠੁ ਦੁਕ੍ਖਂ ਖਨਤੀਤਿ ਸੁਖਂ. ਸੁਪੁਬ੍ਬ ਖਨੁਧਾਤੁ ਅਵਦਾਰਣੇ ਕ੍ਵਿ. ਸਿਵਸ੍ਸ ਨਿਬ੍ਬਾਨਸ੍ਸ ਸੁਖਂ ਸਿਵਸੁਖਂ, ਤਂ ਦਦਾਤੀਤਿ ਸਿਵਸੁਖਦਂ, ਅਭਿਧਮ੍ਮਧਮ੍ਮੋ. ਸਿਵਸੁਖਸਦ੍ਦੂਪਪਦਦਾਧਾਤੁ ਅ. ਯੋ ਹਿ ਅਭਿਧਮ੍ਮਧਮ੍ਮਂ ਸੁਣਾਤਿ, ਸੋ ਤਸ੍ਸ ਨਿਬ੍ਬਾਨਸੁਖਂ ਦਦਾਤੀਤਿ ਅਤ੍ਥੋ.

ਅਦੇਸਿ ਧਮ੍ਮਂ ਦੇਵਾਨਨ੍ਤਿ ਦੇਵਾਨਂ ਧਮ੍ਮਂ ਅਦੇਸੀਤਿ ਸਮ੍ਬਨ੍ਧੋ. ਏਤ੍ਥ ਚ ਧਮ੍ਮਨ੍ਤਿ ਨਾਨਾਨਯਵਿਚਿਤ੍ਤਂ ਗਮ੍ਭੀਰਂ ਸਣ੍ਹਸੁਖੁਮਂ ਦੁਦ੍ਦਸਂ ਅਭਿਧਮ੍ਮ ਧਮ੍ਮਂ. ਅਤ੍ਤਨੋ ਸਭਾਵਂ ਧਾਰੇਤੀਤਿ ਧਮ੍ਮੋ, ਪਣ੍ਡਿਤੇਹਿ ਧਾਰਿਯਤਿ ਨ ਬਾਲੇਹੀਤਿ ਵਾ ਧਮ੍ਮੋ, ਅਭਿਧਮ੍ਮਪਿਟਕਂ. ਧਰਧਾਤੁ ਧਾਰਣੇ ਰਮ੍ਮਪਚ੍ਚਯੋ. ਤਂ ਧਮ੍ਮਂ. ਦੇਵਾਨਨ੍ਤਿ ਪੁਬ੍ਬੇ ਮਨੁਸ੍ਸਲੋਕੇ ਮਾਤੁਭੂਤਦੇਵਪੁਤ੍ਤਪ੍ਪਮੁਖਾਨਂ ਉਪਪਤ੍ਤਿਦੇਵਾਨਂ. ਵੁਤ੍ਤਞ੍ਹੇਤਂ ਅਟ੍ਠਸਾਲਿਨੀਅਟ੍ਠਕਥਾਯਂ –

‘‘ਮਾਤਰਂ ਪਮੁਖਂ ਕਤ੍ਵਾ, ਤਸ੍ਸਾ ਪਞ੍ਞਾਯ ਤੇਜਸਾ;

ਅਭਿਧਮ੍ਮਕਥਾਮਗ੍ਗਂ, ਦੇਵਾਨਂ ਸਮ੍ਪਵਤ੍ਤਯੀ’’ਤਿ.

ਏਤ੍ਥ ਚ ਮਾਤਰਨ੍ਤਿਪਦਸ੍ਸ ਪੁਬ੍ਬੇ ਮਨੁਸ੍ਸਲੋਕੇ ਮਾਤੁਭੂਤਂ ਦੇਵਪੁਤ੍ਤਨ੍ਤਿ ਅਤ੍ਥੋ ਦਟ੍ਠਬ੍ਬੋ. ਵੁਤ੍ਤਞ੍ਹੇਤਂ ਜਿਨਾਲਙ੍ਕਾਰਪਾਲ਼ਿਯਂ –

‘‘ਤਤੋ ਪੁਤ੍ਤਂ ਗਹੇਤ੍ਵਾਨ, ਗਤਾ ਮਾਤਾ ਸਕਂ ਘਰਂ;

ਸਤ੍ਤਮਿਯਂ ਚੁਤਾ ਗਨ੍ਤ੍ਵਾ, ਦੇਵਪੁਤ੍ਤਤ੍ਤਮਾਗਮੀ’’ਤਿ.

ਤਟ੍ਟੀਕਾਯਞ੍ਚ ‘‘ਬੋਧਿਸਤ੍ਤਮਾਤਾ ਗਬ੍ਭਵੁਟ੍ਠਾਨਤੋ ਸਤ੍ਤਮੇ ਦਿਵਸੇ ਕਾਲਙ੍ਕਤ੍ਵਾ ਤੁਸਿਤਪੁਰੇ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੀ’’ਤਿ ਵੁਤ੍ਤਂ. ਏਤ੍ਥ ਚ ਦੇਵਪੁਤ੍ਤਸਦ੍ਦੇਨ ਵੁਤ੍ਤਮੇਵ. ਕਾਲ਼ੁਦਾਯੀ ਥੇਰਗਾਥਾਅਟ੍ਠਕਥਾਯਞ੍ਚ ‘‘ਪਰਿਵਾਰਿਤਾਤਿ ਚ ਇਤ੍ਥਿਲਿਙ੍ਗਨਿਦ੍ਦੇਸੋ ਪੁਰਿਮਤ੍ਤਭਾਵਸਿਦ੍ਧਂ ਇਤ੍ਥਿਭਾਵਂ ਦੇਵਤਾਭਾਵਂ ਵਾ ਸਨ੍ਧਾਯ ਕਤੋ. ਦੇਵੂਪਪਤ੍ਤਿ ਪਨ ਪੁਰਿਸਭਾਵੇਨ ਜਾਤਾ’’ਤਿ ਵੁਤ੍ਤਂ. ਜਾਤਕਟੀਕਾਯਞ੍ਚ ‘‘ਦੇਵੋਰੋਹਨੇਤਿ ਮਾਤੁਦੇਵਪੁਤ੍ਤਸ੍ਸ ਤੇਮਾਸਂ ਅਭਿਧਮ੍ਮਪਿਟਕਂ ਦੇਸੇਤ੍ਵਾ ਦੇਵੋਰੋਹਨਕਾਲੇ’’ਤਿ ਮਾਤੁਦੇਵਪੁਤ੍ਤਸਦ੍ਦੇਨ ਵੁਤ੍ਤਂ. ਅਭਿਧਮ੍ਮਾਵਤਾਰਟੀਕਾਯਞ੍ਚ ‘‘ਦੇਵਾਨਨ੍ਤਿ ਤਦਾ ਧਮ੍ਮਪਟਿਗ੍ਗਾਹਕਾਨਂ ਦਸਸਹਸ੍ਸਚਕ੍ਕਵਾਲ਼ਾਧਿਵਾਸੀਨਂ ਮਾਤੁਦੇਵਪੁਤ੍ਤਪ੍ਪਮੁਖਾਨਂ ਉਪਪਤ੍ਤਿਦੇਵਾਨ’’ਨ੍ਤਿ ਮਾਤੁਦੇਵਪੁਤ੍ਤ ਸਦ੍ਦੇਨ ਵੁਤ੍ਤਂ. ਸਿਰੀਮਹਾਮਾਯਾਸਤ੍ਥੇ ਚ ‘‘ਸਿਰੀਮਹਾਮਾਯਾ ਦੇਵੀਪਿ ਸਤ੍ਤਦਿਵਸੇਯੇਵ ਵਸਿਤ੍ਵਾ ਕਾਲਙ੍ਕਤ੍ਵਾ ਅਤ੍ਤਨੋ ਪੁਞ੍ਞਾਨੁਭਾਵੇਨ ਤੁਸਿਤਭਵਨੇ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੀ’’ਤਿ ਦੇਵਪੁਤ੍ਤਸਦ੍ਦੇਨ ਵੁਤ੍ਤਂ. ਮਣਿਦੀਪਟੀਕਾਯਞ੍ਚ ‘‘ਮਾਤਰਨ੍ਤਿ ਪੁਬ੍ਬੇ ਮਨੁਸ੍ਸਲੋਕੇ ਮਾਤੁਭੂਤਂ ਦੇਵਪੁਤ੍ਤਨ੍ਤਿ ਅਤ੍ਥੋ. ਸਿਰੀਮਹਾਮਾਯਾ ਹਿ ਬੋਧਿਸਤ੍ਤਂ ਵਿਜਾਯਿਤ੍ਵਾ ਸਤ੍ਤਾਹਮਤ੍ਤਂ ਠਤ੍ਵਾ ਇਤੋ ਚਵਿਤ੍ਵਾ ਤੁਸਿਤਭਵਨੇ ਪੁਰਿਸਭਾਵੇਨੇਵ ਨਿਬ੍ਬਤ੍ਤੋ, ਨ ਇਤ੍ਥਿਭਾਵੇਨਾ’’ਤਿ ਵੁਤ੍ਤਂ. ਤਸ੍ਮਾ ਮਾਤਰਨ੍ਤਿਪਦਸ੍ਸ ਮਾਤੁਭੂਤਂ ਦੇਵਪੁਤ੍ਤਨ੍ਤਿ ਅਤ੍ਥੋ ਮੁਖ੍ਯੇਨ ਦਟ੍ਠਬ੍ਬੋ.

ਮਧੁਸਾਰਤ੍ਥ ਦੀਪਨੀਟੀਕਾਯਂ ਪਨ –

‘‘ਸੁਦ੍ਧੋਦਨੋ ਨਾਮ ਪਿਤਾ ਮਹੇਸਿਨੋ,

ਬੁਦ੍ਧਸ੍ਸ ਮਾਤਾ ਪਨ ਮਾਯਾ ਨਾਮ.

ਬੋਧਿਸਤ੍ਤਂ ਪਰਿਹਰਿਯ ਕੁਚ੍ਛਿਨਾ,

ਕਾਯਸ੍ਸ ਭੇਦਾ ਤਿਦਿਵਸ੍ਮਿਂ ਮੋਦਤਿ;

ਸਾ ਗੋਤਮੀ ਕਾਲਂਕਤਾ ਇਤੋ ਚੁਤਾ,

ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤਾ;

ਆਮੋਦਤਿ ਕਾਮਗੁਣੇਹਿ ਪਞ੍ਚਹਿ,

ਪਰਿਵਾਰਿਤਾ ਦੇਵਗਣੇਹਿ ਤੇਹੀ’’ਤਿ; ਥੇਰਾਪਾਲ਼ਿ;

ਤਦਟ੍ਠਕਥਾਯਂ ‘‘ਪਰਿਵਾਰਿਤਾਤਿ ਚ ਇਤ੍ਥਿਲਿਙ੍ਗਨਿਦ੍ਦੇਸੋ ਪੁਰਿਮਤ੍ਤ ਭਾਵਸਿਦ੍ਧਂ ਇਤ੍ਥਿਭਾਵਂ ਦੇਵਤਾਭਾਵਂ ਵਾ ਸਨ੍ਧਾਯ ਕਤੋ. ਦੇਵੂਪਪਤ੍ਤਿ ਪਨ ਪੁਰਿਸਭਾਵੇਨ ਜਾਤਾਤਿ ਵੁਤ੍ਤਤ੍ਤਾ ਮਾਤਰਨ੍ਤਿ ਮਨੁਸ੍ਸਤ੍ਤਭਾਵਵਸੇਨ ਵੁਤ੍ਤ’’ਨ੍ਤਿ ਵਦਨ੍ਤਿ. ਥੇਰਟ੍ਠਕਥਾ ਪਨ ਨਸਙ੍ਗਹਾਰੁਲ਼੍ਹਾ. ਅਞ੍ਞਟ੍ਠਕਥਾਟੀਕਾਸੁ ਚ ਤਾਦਿਸਂ ਵਚਨਂ ਨਤ੍ਥਿ. ਪਤ੍ਥਨਾਕਾਲੇ ਚ ਬੁਦ੍ਧਮਾਤਾ ਹੁਤ੍ਵਾ ਪਚ੍ਛਾ ਪੁਰਿਸੋ ਹੋਮੀਤਿ ਪਤ੍ਥਨਾ ਨਤ੍ਥਿ. ਤਿਂਸਧਮ੍ਮਤਾਯਞ੍ਚ ਬੁਦ੍ਧਮਾਤੁਯਾ ਪੁਰਿਸਭਾਵੋ ਨਾਮ ਨਤ੍ਥਿ. ਤਸ੍ਮਾ ਤਂ ਵੀਮਂਸਿਤਬ੍ਬਨ੍ਤਿਪਿ ਵਿਦੂ ਵਦਨ੍ਤੀਤਿ ਵੁਤ੍ਤਂ. ਤਂ ਪਨ ਨ ਗਹੇਤਬ੍ਬਂ. ਕਸ੍ਮਾ, ਸਂਸਯਵਚਨੇਨ ਵੀਮਂਸਿਤਬ੍ਬਨ੍ਤਿ ਵਿਦੂਵਦਨ੍ਤੀਤਿ ਚ ਵੁਤ੍ਤਤ੍ਤਾ ਚ ਯਥਾਵੁਤ੍ਤਟ੍ਠਕਥਾਟੀਕਾਵਚਨੇਹਿ ਉਜੁਕਂ ਵਿਰੁਦ੍ਧਤ੍ਤਾ ਚ. ਦੇਵਤਾਸਦ੍ਦੋ ਹਿ ਦੇਵਪੁਤ੍ਤੇ ਬ੍ਰਹ੍ਮੇ ਦੇਵਧੀਤਾਯ ਚ ਵਤ੍ਤਤਿ. ਤਥਾਹੇਸ ‘‘ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ’’ਤਿਆਦੀਸੁ ਦੇਵਪੁਤ੍ਤੇ. ਵੁਤ੍ਤਞ੍ਹਿ ਖੁਦ੍ਦਕਪਾਠਅਟ੍ਠਕਥਾਯਂ ‘‘ਅਞ੍ਞਤਰਾਤਿ ਅਨਿਯਮਿਤ ਨਿਦ੍ਦੇਸੋ. ਸਾ ਹਿ ਨਾਮਗੋਤ੍ਤਤੋ ਅਪਾਕਟਾ. ਤਸ੍ਮਾ ਅਞ੍ਞਤਰਾਤਿ ਵੁਤ੍ਤਾ. ਦੇਵੋਯੇਵ ਦੇਵਤਾ. ਇਤ੍ਥਿਪੁਰਿਸਸਾਧਾਰਣਮੇਵੇਤਂ. ਇਧ ਪਨ ਪੁਰਿਸੋਏਵ. ਸੋ ਦੇਵਪੁਤ੍ਤੋ. ਕਿਨ੍ਤੁਸਾਧਾਰਣਨਾਮਵਸੇਨ ਦੇਵਤਾਤਿ ਵੁਤ੍ਤੋ’’ਤਿ. ਸੁਨੀਤਤ੍ਥੇਰਅਪਦਾਨ ਪਾਲ਼ਿਯਂ ਆਗਤਾਸੁ ‘‘ਤਥਾ ਤਾ ਦੇਵਤਾ ਸਤ੍ਤਸਤਾ ਉਲ਼ਾਰਾ ਬ੍ਰਹ੍ਮਾ ਵਿਮਾਨਾ ਅਭਿਨਿਕ੍ਖਮਿਤ੍ਵਾ’’ਤਿਆਦੀਸੁ ਬ੍ਰਹ੍ਮੇ. ਪਦੀਪਵਿਮਾਨਵਤ੍ਥੁਪਾਲ਼ਿਯਂ ਵੁਤ੍ਤਾਸੁ –

‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਤਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ’’ਤਿ.

ਆਦੀਸੁ ਦੇਵਧੀਤਾਯ. ਏਵਂ ਪਨ ਪਰਿਵਾਰਿਤਾਸਦ੍ਦੋਪਿ ਵੇਦਿਤਬ੍ਬੋ. ਤਸ੍ਮਾ ਆਚਰਿਯਧਮ੍ਮਪਾਲਤ੍ਥੇਰੇਨ ਕਤਾਯ ਥੇਰਟ੍ਠਕਥਾਯ ਵੁਤ੍ਤਵਚਨਂ ਜਾਤਕਟੀਕਾਯ ਵੁਤ੍ਤਵਚਨਞ੍ਚ ਆਚਰਿਯਸੁਮਙ੍ਗਲਤ੍ਥੇਰੇਨ ਕਤਾਯ ਅਭਿਧਮ੍ਮਾਵਤਾਰਟੀਕਾਯ ਵੁਤ੍ਤਵਚਨਂ ਪਮਾਣਂ ਕਤ੍ਵਾ ਮਾਤੁਦੇਵਪੁਤ੍ਤੋਤਿ ਅਤ੍ਥੋਯੇਵ ਦਟ੍ਠਬ੍ਬੋ. ਏਤਰਹਿ ਪਨ ਕੇਚਿ ਆਚਰਿਯਾ ਥੇਰਾਪਾਲ਼ਿਯਂ ਆਗਤਂ ਪਰਿਵਾਰਿਤਾਸਦ੍ਦਞ੍ਚ ਮਧੁਸਾਰਤ੍ਥਦੀਪਨੀਟੀਕਾਵਚਨਞ੍ਚ ਪਟਿਚ੍ਚ ਮਾਤੁਦੇਵਧੀਤਾਤਿ ਵਦਨ੍ਤਿ. ਤਂ ਪਨ ਤੇਸਂ ਮਤਿਮਤ੍ਤਨ੍ਤਿ ਦਟ੍ਠਬ੍ਬਂ. ਅਦੇਸੀਤਿ ਮਹਾਕਰੁਣਾਪੁਬ੍ਬਙ੍ਗਮੇਨ ਸਬ੍ਬਞ੍ਞੁਤਞਾਣੇਨ ਕਥੇਸਿ. ਅਸਦਿਸਂ ਤਨ੍ਤਿ ਸਮ੍ਬਨ੍ਧੋ. ਏਤ੍ਥ ਚ ਤਨ੍ਤਿ ਬੁਦ੍ਧਂ. ਅਸਦਿਸਨ੍ਤਿ ਅਪ੍ਪਟਿਪੁਗ੍ਗਲਂ. ਨਤ੍ਥਿ ਏਤਸ੍ਸ ਸਦਿਸੋ ਪਟਿਪੁਗ੍ਗਲੋਤਿ ਅਸਦਿਸੋ, ਬੁਦ੍ਧੋ. ਸਦੇਵਕੇ ਲੋਕੇ ਸੀਲਾਦਿਗੁਣੇਨ ਬੁਦ੍ਧੇਨ ਸਦਿਸੋ ਕੋਚਿ ਪੁਗ੍ਗਲੋ ਨਤ੍ਥੀਤਿ ਅਤ੍ਥੋ. ਤੇਨਾਹ ਵਿਨਯਮਹਾਵਗ੍ਗਪਾਲ਼ਿਯਂ –

‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ’’ਤਿ.

ਨਿਚ੍ਚਨ੍ਤਿਸਤਤਂ ਸਮਿਤਂ, ਸਬ੍ਬਕਾਲਂ ਨਿਰਨ੍ਤਰਨ੍ਤਿ ਅਤ੍ਥੋ. ਅਸਦਿਸਂ ਤਂ ਬੁਦ੍ਧਂ ਨਿਚ੍ਚਂ ਨਮਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸੁਮਤਿ ਸੁਨ੍ਦਰਸਬ੍ਬਞ੍ਞੁਤ ਞਾਣਵਾਤੋ, ਦੇਸਨਾਞਾਣਵਾਤੋ ਵਾ. ਯੋ ਯਾਦਿਸੋ ਬੁਦ੍ਧੋ. ਦਿਵੇ ਦਿਵਸੇ ਦਿਵਾਕਰੋਵ ਸੂਰਿਯੋਇਵ, ਸੋਭਨ੍ਤੋ ਵਿਰੋਚਮਾਨੋ ਹੁਤ੍ਵਾ, ਰਤਿਜਨਨੇ ਦੇਵਾਨਂ ਅਤਪ੍ਪਕਪੀਤਿ ਸੋਮਨਸ੍ਸੁਪ੍ਪਾਦਨੇ, ਪੇਮੁਪ੍ਪਾਦਨੇ ਵਾ, ਸਿਲਾਸਨਮ੍ਹਿ ਪਣ੍ਡੁ ਕਮ੍ਪਲਨਾਮਕੇ ਸਿਲਾਸਨੇ, ਆਸੀਨੋ ਨਿਸੀਦਨ੍ਤੋ ਹੁਤ੍ਵਾ ਸਿਵਸੁਖਦਂ ਨਿਬ੍ਬਾਨਸੁਖਦਾਯਕਂ, ਧਮ੍ਮਂ ਅਭਿਧਮ੍ਮਧਮ੍ਮਂ, ਦੇਵਾਨਂ ਮਾਤੁ ਪੁਬ੍ਬਦੇਵਪੁਤ੍ਤਪ੍ਪਮੁਖਾਨਂ ਉਪਪਤ੍ਤਿਦੇਵਾਨਂ ਅਦੇਸਿ ਕਥੇਸਿ. ਅਸਦਿਸਂ ਅਪ੍ਪਟਿਪੁਗ੍ਗਲਂ ਤਂ ਬੁਦ੍ਧਂ ਅਹਂ ਨਿਚ੍ਚਂ ਸਤਤਂ ਨਮਾਮਿ ਵਨ੍ਦਾਮੀਤਿ.

ਤੇਰਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੪.

ਯੋ ਪਾਦਪਙ੍ਕਜਮੁਦੁਤ੍ਤਲਰਾਜਿਕੇਹਿ,

ਲੋਕੇਹਿ ਤੀਹਿਵਿਕਲੇਹਿ ਨਿਰਾਕੁਲੇਹਿ;

ਸਮ੍ਪਾਪੁਣੇ ਨਿਰੁਪਮੇਯ੍ਯਤਮੇਵ ਨਾਥੋ,

ਤਂ ਸਬ੍ਬਲੋਕਮਹਿਤਂ ਅਸਮਂ ਨਮਾਮਿ.

੧੪. ਏਵਂ ਤੇਰਸਮਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਬੁਦ੍ਧਸ੍ਸ ਪਾਦਤਲੇ ਵਿਚਿਤ੍ਤਪ੍ਪਵਤ੍ਤੇਹਿ ਅਟ੍ਠਸਤਚਕ੍ਕਲਕ੍ਖਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਯੋ ਪਾਦਪਙ੍ਕਜਤ੍ਯਾਦਿਗਾਥਮਾਹ. ਅਯਂ ਪਨ ਤ ਭ ਜ ਜ ਗਣੇਹਿ ਚ ਗਰੁਦ੍ਵਯੇਨ ਰਚਿਤਤ੍ਤਾ ਚੁਦ੍ਦਸਕ੍ਖਰੇਹਿ ਯੁਤ੍ਤਾ ਵਸਨ੍ਤਤਿਲਕਾਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹੇਤਂ ਵੁਤ੍ਤੋਦਯੇ ‘‘ਵੁਤ੍ਤਾ ਵਸਨ੍ਤਤਿਲਕਾ ਤ ਭ ਜਾ ਜਗਾ ਗੋ’’ਤਿ. ਤਸ੍ਸਾਯਮਤ੍ਥੋ. ਯਸ੍ਸਂ ਪਟਿਪਾਦਂ ਤ ਭ ਜਾ ਤ ਭ ਜ ਗਣਾ ਚ ਜਗਾ ਜਗਣਗਰੁਕਾ ਚ ਗੋ ਗਰੁ ਚ ਚੇ ਭਵਨ੍ਤਿ, ਸਾ ਗਾਥਾ ਵਸਨ੍ਤਤਿਲਕਾਗਾਥਾਤਿ ਛਨ੍ਦਾਚਰਿਯੇਹਿ ਵੁਤ੍ਤਾਤਿ.

ਤਤ੍ਥ ਪਨ ਯੋ ਨਾਥੋ ਅਵਿਕਲੇਹਿ ਨਿਰਾਕੁਲੇਹਿ ਪਾਦਪਙ੍ਕਜਮੁਦੁਤ੍ਤਲੇਹਿਤੀਹਿ ਲੋਕੇਹਿ ਨਿਰੁਪਮੇਯ੍ਯਤਂ ਸਮ੍ਪਾਪੁਣੇਏਵ ਸਬ੍ਬਲੋਕਮਹਿਤਂ ਅਸਮਂ ਤਂ ਨਾਥਂ ਅਹਂ ਨਮਾਮੀਤਿ ਸਮ੍ਬਨ੍ਧੋ. ਏਤ੍ਥ ਪਨ ਸਦ੍ਦਕ੍ਕਮੇਨ ਅਦਸ੍ਸੇਤ੍ਵਾ ਅਤ੍ਥਕ੍ਕਮੇਨ ਵਣ੍ਣਨਂ ਦਸ੍ਸਯਿਸ੍ਸਾਮ. ਯੋ ਨਾਥੋਤਿ ਯੋ ਯਾਦਿਸੋ ਸਬ੍ਬਸਤ੍ਤਾਨਂ ਪਟਿਸਰਣੋ ਬੁਦ੍ਧੋ. ਤਂ ਪਨ ਪਦਂ ਸਮ੍ਪਾਪੁਣੇਏਵਾਤਿਪਦੇ ਕਤ੍ਤੁਭਾਵੇਨ ਸਮ੍ਬਨ੍ਧਿਤਬ੍ਬਂ. ਨਾਥਸ੍ਸ ਪਨ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਵਿਕਲੇਹੀਤਿ ਕੇਨਚਿ ਅਵੇਕਲ੍ਲੇਹਿ ਸਬ੍ਬਪਾਦਚਕ੍ਕਲਕ੍ਖਣੇਹਿ ਸਮ੍ਪੁਣ੍ਣੇਹੀਤਿ ਅਤ੍ਥੋ. ਵਿਰੂਪਂ ਕਲਤਿ ਗਚ੍ਛਤੀਤਿ ਵਿਕਲੋ. ਵਿਪੁਬ੍ਬਕਲਧਾਤੁ ਗਤਿਯਂ ਅ. ਨਤ੍ਥਿ ਕਿਞ੍ਚਿ ਵਿਕਲਂ ਏਤਿਸ੍ਸਾ ਰਾਜਿਯਾਤਿ ਅਵਿਕਲਾ, ਪਾਦਰਾਜਿ. ਪਾਦਦ੍ਵਯੇ ਪਰਿਬ੍ਯਤ੍ਤਂ ਸਣ੍ਠਾਨਰੂਪਂ ਕਿਞ੍ਚਿ ਵਿਕਲਂ ਨਤ੍ਥੀਤਿ ਅਤ੍ਥੋ. ਤੇਹਿ ਅਵਿਕਲੇਹਿ.

ਨਿਰਾਕੁਲੇਹੀਤਿ ਆਕੁਲਵਿਰਹਿਤੇਹਿ. ਪਾਦਚਕ੍ਕਲਕ੍ਖਣਾਨਂ ਅਞ੍ਞਮਞ੍ਞਂ ਅਸਂਮਿਸ੍ਸੇਹਿ ਅਸਂਸਟ੍ਠੇਹੀਤਿ ਅਤ੍ਥੋ. ਆਭੁਸੋ ਕੁਲਤਿ ਬਨ੍ਧਤੀਤਿ ਆਕੁਲਂ, ਆਪੁਬ੍ਬ ਕੁਲਧਾਤੁ ਬਨ੍ਧਨੇ ਅ. ਅਥ ਵਾ ਆਭੁਸੋ ਕੁਲਤਿ ਆਵਰਤਿ ਸੋਭਨਨ੍ਤਿ ਆਕੁਲਂ, ਨਤ੍ਥਿ ਆਕੁਲਂ ਅਞ੍ਞਮਞ੍ਞਮਿਸ੍ਸਂ ਏਤਿਸ੍ਸਾ ਪਾਦਰਾਜਿ ਯਾਤਿ ਨਿਰਾਕੁਲਾ, ਪਾਦਰਾਜਿ. ਤੇਹਿ ਨਿਰਾਕੁਲੇਹਿ. ਤਂ ਪਨ ਪਦਦ੍ਵਯਂ ਪਾਦਪਙ੍ਕਜਮੁਦੁਤ੍ਤਲਰਾਜਿਕੇਹੀਤਿਪਦੇ ਵਿਸੇਸਨਂ. ਪਾਦਪਙ੍ਕਜਮੁਦੁਤ੍ਤਲਰਾਜਿਕੇਹੀਤਿ ਪਾਦਸਙ੍ਖਾਤਪਦੁਮਸ੍ਸ ਸਣ੍ਹ ਤਲੇ ਜਾਤੇਹਿ ਅਟ੍ਠਸਤਚਕ੍ਕਲਕ੍ਖਣਰਾਜਿਕੇਹਿ ਪਦਤਿ ਗਚ੍ਛਤਿ ਏਤੇਨਾਤਿ ਪਾਦੋ. ਪਦਧਾਤੁ ਗਤਿਮ੍ਹਿਣ. ਪਙ੍ਕੇ ਕਦ੍ਦਮੇ ਜਾਤਨ੍ਤਿ ਪਙ੍ਕਜਂ, ਪਦੁਮਂ. ਪਾਦਸਙ੍ਖਾਤਂ ਪਙ੍ਕਜਂ ਪਾਦਪਙ੍ਕਜਂ. ਪਙ੍ਕਜਂਇਵ ਪਾਦੋ ਵਾ ਪਾਦਪਙ੍ਕਜਂ, ਪਾਦੋ. ਸਣ੍ਹਭਾਵੇਨ ਮੁਦਤਿ ਪਵਤ੍ਤਤੀਤਿ ਮੁਦੁ, ਮੁਦਧਾਤੁ ਗਤਿਯਂ ਉ. ਤਲਤਿ ਪਤਿਟ੍ਠਤਿ ਏਤ੍ਥਾਤਿ ਤਲਂ. ਤਲਧਾਤੁ ਪਤਿਟ੍ਠਾਯਂ ਅ. ਮੁਦੁ ਚ ਤਂ ਤਲਞ੍ਚਾਤਿ ਮੁਦੁਤ੍ਤਲਂ, ਪਾਦਪਙ੍ਕਜਸ੍ਸ ਮੁਦੁਤ੍ਤਲਂ ਪਾਦਪਙ੍ਕਜਮੁਦੁਤ੍ਤਲਂ, ਰਾਜਤਿ ਦਿਸ੍ਸਤੀਤਿ ਰਾਜਿਕਾ, ਰਾਜਤਿ ਸੋਭਤਿ ਏਤੇਨਾਤਿ ਰਾਜਿਕਾ. ਰਾਜਧਾਤੁ ਸੋਭਨੇ ਣਿਕੋ. ਪਾਦਪਙ੍ਕਜ ਮੁਦੁਤ੍ਤਲੇ ਜਾਤਂ ਅਟ੍ਠਸਤਚਕ੍ਕਲਕ੍ਖਣਸਙ੍ਖਾਤਂ ਰਾਜਿਕਨ੍ਤਿ ਪਾਦਪਙ੍ਕਜਮੁਦੁਤ੍ਤਲਰਾਜਿਕਂ, ਤੇਹਿ.

ਤਂ ਪਨ ਅਟ੍ਠਸਤਪਾਦਚਕ੍ਕਲਕ੍ਖਣਂ ਨਾਮੇਵਂ ਵੇਦਿਤਬ੍ਬਂ. ਭਗਵਤੋ ਪਾਦਪਙ੍ਕਜਮੁਦੁਤਲਸ੍ਸ ਮਜ੍ਝੇ ਨਾਭਿ ਦਿਸ੍ਸਤਿ. ਨਾਭਿਪਟਿਚ੍ਛਿਨ੍ਨਾ ਵਟ੍ਟਲੇਖਾ ਦਿਸ੍ਸਤਿ. ਨਾਭਿਮੁਖਪਰਿਕ੍ਖੇਪਪਟ੍ਟੋ ਦਿਸ੍ਸਤਿ. ਪਨਾਲ਼ਿਮੁਖਂ ਦਿਸ੍ਸਤਿ. ਅਰਾ ਦਿਸ੍ਸਨ੍ਤਿ. ਅਰੇਸੁ ਵਟ੍ਟਲੇਖਾ ਦਿਸ੍ਸਨ੍ਤਿ. ਨੇਮਿ ਦਿਸ੍ਸਤਿ. ਨੇਮਿਮਣਿਕਾ ਦਿਸ੍ਸਨ੍ਤਿ. ਇਦਂ ਤਾਵ ਪਾਲ਼ਿਆਗਤਮੇਵ. ਸਮ੍ਪਹੁਲਵਾਰੋ ਪਨ ਅਨਾਗਤੋ, ਸੋ ਏਵਂ ਦਟ੍ਠਬ੍ਬੋ. ਸਤ੍ਤਿ, ਸਿਰੀਵਚ੍ਛੋ, ਨਨ੍ਦਿਯਾਵਟ੍ਟਂ, ਸੋਵਤ੍ਤਿਕੋ, ਵਟਂਸਕੋ, ਵਡ੍ਢਮਾਨਕਂ, ਮਚ੍ਛਯੁਗਲਂ, ਭਦ੍ਦਪੀਠਂ, ਅਙ੍ਕੁਸਂ, ਤੋਮਰੋ, ਪਾਸਾਦੋ, ਤੋਰਣਂ, ਸੇਤਚ੍ਛਤ੍ਤਂ, ਖਗ੍ਗੋ, ਤਾਲਵਣ੍ਡਂ, ਮੋਰਹਤ੍ਥਕੋ, ਵਾਲ਼ਬੀਜਨਿ, ਉਣ੍ਹੀਸਂ, ਪਤ੍ਤੋ, ਮਣਿਕੁਸੁਮਦਾਮਂ, ਨੀਲੁਪ੍ਪਲਂ, ਰਤ੍ਤੁਪ੍ਪਲਂ, ਸੇਤੁਪ੍ਪਲਂ, ਪਦੁਮਂ, ਪੁਣ੍ਡਰਿਕਂ, ਪੁਣ੍ਣਘਟੋ, ਪੁਣ੍ਣਪਾਤਿ, ਸਮੁਦ੍ਦੋ, ਚਕ੍ਕਵਾਲ਼ਂ, ਹਿਮਵਾ, ਸਿਨੇਰੁ, ਚਨ੍ਦਿਮਸੂਰਿਯਾ, ਨਕ੍ਖਤ੍ਤਾਨਿ, ਚਤ੍ਤਾਰੋ ਮਹਾਦੀਪਾ, ਦ੍ਵੇਪਰਿਤ੍ਤਦੀਪਸਹਸ੍ਸਾਨਿ ਅਨ੍ਤਮਸੋ ਚਕ੍ਕਵਤ੍ਤਿ ਰਞ੍ਞੋ ਪਰਿਸਂ ਉਪਾਦਾਯ ਸਬ੍ਬੋ ਚਕ੍ਕਲਕ੍ਖਣਸ੍ਸੇਵ ਪਰਿਵਾਰੋਤਿ ਏਤ੍ਤਕਮੇਵ ਮਜ੍ਝਿਮਪਣ੍ਣਾਸਟ੍ਠਕਥਾਯਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਜਿਨਾਲਙ੍ਕਾਰਟੀਕਾਯਂ ਪਨ ‘‘ਹੇਟ੍ਠਾਪਾਦਤਲੇਸੁ ਚਕ੍ਕਾਨਿ ਜਾਤਾਨੀਤਿ ਚਕ੍ਕਲਕ੍ਖਣਂ ਨਾਮ ਦ੍ਵੀਸੁ ਪਾਦਤਲੇਸੁ ਦ੍ਵੇ ਚਕ੍ਕਾਨਿ ਏਕੇਕਸ੍ਮਿਂ ਸਹਸ੍ਸਮਤ੍ਤਾ ਅਰਾ ਯੁਤ੍ਤਾ ਹੋਨ੍ਤਿ. ਨੇਮਿਵਲਯਂ ਸੁਵਣ੍ਣਵਣ੍ਣਂ. ਨਾਭਿ ਇਨ੍ਦਨੀਲਮਣਿਵਣ੍ਣਾ. ਤਸ੍ਮਿਂ ਮਜ੍ਝੇ ਚ ਨਾਭਿਪਰਿਯਨ੍ਤੇ ਚ ਨਾਭਿਮੁਖੇ ਚ ਵਟ੍ਟਲੇਖਾ ਮਜ੍ਝੇ ਛਿਦ੍ਦਂ ਚਕ੍ਕਪਰਿਯਨ੍ਤੇ ਨੇਮਿਤੋ ਬਹਿਦ੍ਧਾ ਵਟ੍ਟੇ. ਸਤ੍ਤਿ, ਸਿਰੀਵਚ੍ਛੋ, ਨਨ੍ਦਿਯਾਵਟ੍ਟਂ, ਸੋਵਤ੍ਤਿਕੋ, ਵਟਂਸਕਂ, ਵਡ੍ਢਮਾਨਕਂ, ਭਦ੍ਦਪੀਠਂ, ਅਙ੍ਕੁਸੋ, ਪਾਸਾਦਂ, ਤੋਰਣਂ, ਸੇਤਚ੍ਛਤ੍ਤਂ, ਖਗ੍ਗਂ, ਤਾਲਵਣ੍ਡਂ, ਮਯੂਰਹਤ੍ਥਂ, ਚਾਮਰਂ, ਉਣ੍ਹੀਸਂ, ਪਤ੍ਤਂ, ਮਣਿ, ਸੁਮਨਦਾਮਂ, ਨੀਲੁਪ੍ਪਲਂ, ਰਤ੍ਤੁਪ੍ਪਲਂ, ਰਤ੍ਤਪਦੁਮਂ, ਸੇਤਪਦੁਮਂ, ਪੁਣ੍ਡਰਿਕਂ, ਪੁਣ੍ਣਕਲਸਂ, ਪੁਣ੍ਣਪਤ੍ਤਂ, ਸਮੁਦ੍ਦੋ, ਚਕ੍ਕਵਾਲ਼ਪਬ੍ਬਤੋ, ਹਿਮਵਨ੍ਤਪਬ੍ਬਤੋ, ਮੇਰੁਪਬ੍ਬਤੋ, ਸੂਰਿਯਮਣ੍ਡਲਂ, ਚਨ੍ਦਮਣ੍ਡਲਂ, ਨਕ੍ਖਤ੍ਤਂ, ਸਪਰਿਵਾਰਾ ਚਤੁਮਹਾਦੀਪਾ, ਸਪਰਿਵਾਰੋ ਸਤ੍ਤਰਤਨਸਮਙ੍ਗੀ ਚਕ੍ਕਵਤ੍ਤਿ, ਦਕ੍ਖਿਣਾਵਟ੍ਟ ਸੇਤਸਙ੍ਖਂ, ਸੁਵਣ੍ਣਮਚ੍ਛਯੁਗਲ਼ਂ, ਚਕ੍ਕਾਵੁਧਂ, ਸਤ੍ਤਮਹਾਗਙ੍ਗਾ, ਸਤ੍ਤਕੁਲਪਬ੍ਬਤਾ, ਸਤ੍ਤਸੀਦਨ੍ਤਸਾਗਰਾ, ਸੁਵਣ੍ਣ ਹਂਸਰਾਜਾ, ਸਂਸੁਮਾਰੋ, ਧਜਪਟਾਕੋ, ਸੁਵਣ੍ਣਸਿਵਿਕਾ, ਸੁਵਣ੍ਣਵਾਲ਼ਬੀਜਨਿ, ਕੇਲਾਸਪਬ੍ਬਤੋ, ਸੀਹਰਾਜਾ, ਬ੍ਯਗ੍ਘਰਾਜਾ, ਵਲਾਹਕਅਸ੍ਸਰਾਜਾ, ਉਪੋਸਥਛਦ੍ਦਨ੍ਤਹਤ੍ਥਿਰਾਜਾ, ਵਾਸੁਕੀਨਾਗਰਾਜਾ, ਹਂਸਰਾਜਾ, ਉਸਭਰਾਜਾ, ਏਰਾਵਣ ਹਤ੍ਥਿਰਾਜਾ, ਸੁਵਣ੍ਣਮਕਰਂ, ਚਤੁਮੁਖਸੁਵਣ੍ਣਨਾਵਾ, ਸਵਚ੍ਛਕਾ ਧੇਨੁ, ਕਿਂਪੁਰਿਸੋ, ਕਿਨ੍ਨਰੀ, ਕਰਵੀਕੋ, ਮਯੂਰਰਾਜਾ, ਕੋਞ੍ਚਰਾਜਾ, ਚਕ੍ਕਵਾਕਰਾਜਾ, ਜੀਵਞ੍ਜੀਵਕਰਾਜਾ ਛ ਦੇਵਲੋਕਾ, ਸੋਲ਼ਸ ਬ੍ਰਹ੍ਮਲੋਕਾਤਿ ਇਮੇ ਏਤ੍ਤਕਾ ਅਗ੍ਗਮਙ੍ਗਲਲਕ੍ਖਣਾ ਪਾਦਤਲੇ ਪਞ੍ਞਾਯਨ੍ਤੀ’’ਤਿ ਵੁਤ੍ਤਂ. ਇਮਿਨਾ ਚ ਵਚਨੇਨ ਅਟ੍ਠਸਤ ਪਾਦਚਕ੍ਕਲਕ੍ਖਣਂ ਪਰਿਪੁਣ੍ਣਂ ਵੇਦਿਤਬ੍ਬਨ੍ਤਿ.

ਤੀਹਿ ਲੋਕੇਹੀਤਿ ਸਮ੍ਬਨ੍ਧੋ. ਤੀਹਿ ਕਾਮਰੂਪਾਰੂਪ ਲੋਕੇਹੀਤਿ ਅਤ੍ਥੋ. ਤਸ੍ਸ ਪਨ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਂ ਪਨੇਤਂ ਕਤ੍ਵਤ੍ਥੇ ਕਰਣਵਚਨਂ. ਤਸ੍ਸ ਪਨ ਪਦਸ੍ਸ ਨਿਰੁਪਮੇਯ੍ਯਾਤਿ ਪਦੇਨ ਕਤ੍ਤੁਭਾਵੇਨ ਸਮ੍ਬਨ੍ਧੋ. ਨਿਰੁਪਮੇਯ੍ਯਤਨ੍ਤਿ ਅਪ੍ਪਮੇਯ੍ਯਭਾਵਂ. ਉਪਮਿਤਬ੍ਬਨ੍ਤਿ ਉਪਮੇਯ੍ਯਂ. ਉਪਪੁਬ੍ਬ ਮਾਧਾਤੁ ਪਮਾਨੇ ਣ੍ਯੋ. ਉਪਮੇਯ੍ਯਸ੍ਸ ਭਾਵੋ ਉਪਮੇਯ੍ਯਤਂ. ਨਤ੍ਥਿ ਉਪਮੇਯ੍ਯਤਂ ਅਸ੍ਸ ਰਾਜਿਕਸ੍ਸਾਤਿ ਨਿਰੁਪਮੇਯ੍ਯਤਂ. ਅਥ ਵਾ ਨਤ੍ਥਿ ਉਪਮੇਯ੍ਯਂ ਏਤਸ੍ਸ ਰਾਜਿਕਸ੍ਸਾਤਿ ਨਿਰੁਪਮੇਯ੍ਯੋ, ਪਾਦਚਕ੍ਕਲਕ੍ਖਣਰਾਜਿਕੋ ਲਬ੍ਭਤਿ. ਤਸ੍ਸ ਭਾਵੋ ਨਿਰੁਪਮੇਯ੍ਯਤਂ. ਤਂ ਪਨ ਪਦਂ ਸਮ੍ਪਾਪੁਣੇ ਏਵਾਤਿਪਦੇ ਕਮ੍ਮਂ. ਸਮ੍ਪਾਪੁਣੇਏਵਾਤਿ ਸਮ੍ਬਨ੍ਧੋ. ਸਮ੍ਮਾ ਗਚ੍ਛਤਿਏਵਾਤਿ ਅਤ੍ਥੋ. ਕਸ੍ਮਾ ਪਨ ਤੀਹਿ ਲੋਕੇਹਿ ਪਾਦਪਙ੍ਕਜਮੁਦੁਤਲੇਹਿ ਨਿਰੁਪਮੇਯ੍ਯਤਂ ਪਾਪੁਣਾਤੀਤਿ. ਬੁਦ੍ਧਤੋ ਅਞ੍ਞਸ੍ਸ ਕਸ੍ਸਚਿ ਦੇਵਮਨੁਸ੍ਸਸ੍ਸ ਪਾਦਤਲਮਜ੍ਝੇ ਪਾਦਚਕ੍ਕਲਕ੍ਖਣਸ੍ਸ ਅਭਾਵਤੋ. ਭਗਵਤੋ ਹਿ ਪਾਦਪਙ੍ਕਜਮੁਦੁਤਲੇ ਪਾਰਮਿਪੁਞ੍ਞਾਨੁਭਾਵੇਨ ਨਿਬ੍ਬਤ੍ਤਾਨਿ ਅਟ੍ਠਸਤਪਾਦਚਕ੍ਕਲਕ੍ਖਣਾਨਿ ਸਮ੍ਪਾਪੁਣਨ੍ਤਿ, ਨ ਅਞ੍ਞੇਸਂ. ਤਸ੍ਮਾ ਨਿਰੁਪਮੇਯ੍ਯਤਂ ਪਾਪੁਣਾਤੀਤਿ.

ਸਬ੍ਬਲੋਕਮਹਿਤਨ੍ਤਿ ਸਬ੍ਬਲੋਕੇਨ ਪੂਜਿਤਂ. ਸਬ੍ਬੇਨ ਦੇਵਮਨੁਸ੍ਸਲੋਕੇਨ ਮਹਿਤਬ੍ਬੋ ਪੂਜਿਤਬ੍ਬੋਤਿ ਸਬ੍ਬਲੋਕ ਮਹਿਤੋ, ਨਾਥੋ ਲਬ੍ਭਤਿ. ਤਂ. ਉਪ੍ਪਨ੍ਨੇ ਹਿ ਤਥਾਗਤੇ ਯੇ ਕੇਚਿ ਮਹੇਸਕ੍ਖਾ ਦੇਵਮਨੁਸ੍ਸਾ ਬੁਦ੍ਧਸ੍ਸ ਪੂਜੇਨ੍ਤਿ, ਪਗੇਵ ਅਞ੍ਞਾ. ਤਥਾ ਹਿ ਬ੍ਰਹ੍ਮਾ ਸਹਮ੍ਪਤਿ ਸਿਨੇਰੁਮਤ੍ਤੇਨ ਰਤਨ ਦਾਮੇਨ ਤਥਾਗਤਂ ਪੂਜੇਤਿ. ਯਥਾਬਲਞ੍ਚ ਅਞ੍ਞੇਪਿ ਦੇਵਾ ਮਨੁਸ੍ਸਾ ਚ ਬਿਮ੍ਬਿਸਾਰਕੋਸਲਰਾਜਾਦਯੋ ਨਿਬ੍ਬੁਤਮ੍ਪਿ ਭਗਵਨ੍ਤਂ ਉਦ੍ਦਿਸ੍ਸ ਛਨ੍ਨਵੁਤਿਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਅਸੋਕ ਮਹਾਰਾਜਾ ਸਕਲਜਮ੍ਬੁਦੀਪੇ ਚਤੁਰਾਸੀਤਿਵਿਹਾਰਸਹਸ੍ਸਾਨਿ ਪਤਿਟ੍ਠਾਪੇਤਿ. ਕਾ ਕਥਾ ਪਨ ਅਞ੍ਞੇਸਂ ਪੂਜਾਤਿ ਵੁਤ੍ਤਂ ਹੋਤਿ.

ਅਸਮਨ੍ਤਿ ਸਬ੍ਬਮਨੁਸ੍ਸਦੇਵਬ੍ਰਹ੍ਮੇਹਿ ਅਸਦਿਸਂ. ਅਪ੍ਪਟਿਪੁਗ੍ਗਲਨ੍ਤਿ ਅਤ੍ਥੋ. ਨਤ੍ਥਿ ਸਮੋ ਸਦਿਸੋ ਪੁਗ੍ਗਲੋ ਅਸ੍ਸਾਤਿ ਅਸਮੋ, ਨਾਥੋ. ਸੋ ਪਨ ਅਸੀਤਿਅਨੁਬ੍ਯਞ੍ਜਨਪਟਿਮਣ੍ਡਿਤ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣ ਵਿਚਿਤ੍ਰਰੂਪਕਾਯੋ. ਸਬ੍ਬਾਕਾਰ ਪਰਿਸੁਦ੍ਧ ਸੀਲਕ੍ਖਨ੍ਧਾਦਿਗੁਣਰਤਨਸਮਿਦ੍ਧਧਮ੍ਮਕਾਯੋ. ਪੁਞ੍ਞਮਹਤ੍ਤ ਥਾਮਮਹਤ੍ਤਇਦ੍ਧਿਮਹਤ੍ਤ ਯਸਮਹਤ੍ਤ ਪਞ੍ਞਾਮਹਤ੍ਤਾਨਂ ਪਰਮੁਕ੍ਕਂਸ ਗਤੋ ਚ ਹੋਤਿ, ਤਸ੍ਮਾ ਤਥਾਗਤੇਨ ਸਮੋ ਸਦਿਸੋ ਨਾਮ ਨਤ੍ਥੀਤਿ ਅਤ੍ਥੋ. ਤਂ ਅਸਮਂ. ਤਨ੍ਤਿ ਨਾਥਂ ਅਹਂ ਨਮਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਯੋ ਨਾਥੋ ਯੋ ਯਾਦਿਸੋ ਸਬ੍ਬਸਤ੍ਤਾਨਂ ਪਟਿਸਰਣੋ ਬੁਦ੍ਧੋ, ਅਵਿਕਲੇਹਿ ਕੇਹਿਚਿ ਅਵੇਕਲ੍ਲੇਹਿ, ਨਿਰਾਕੁਲੇਹਿ ਆਕੁਲਵਿਰਹਿਤੇਹਿ, ਪਾਦਪਙ੍ਕਜ ਮੁਦੁਤ੍ਤਲਰਾਜਿਕੇਹਿ ਪਾਦਸਙ੍ਖਾਤਪਦੁਮਸ੍ਸ ਸਣ੍ਹਤਲੇ ਜਾਤੇਹਿ ਅਟ੍ਠਸਤਚਕ੍ਕਲਕ੍ਖਣਰਾਜਿਕੇਹਿ, ਤੀਹਿ ਲੋਕੇਹਿ ਕਤ੍ਤੁਭੂਤੇਹਿ, ਨਿਰੁਪਮੇਯ੍ਯਤਂ ਅਪ੍ਪਮੇਯ੍ਯਭਾਵਂ ਅਪ੍ਪਮਿਤਬ੍ਬ ਭਾਵਂ ਵਾ, ਸਮ੍ਪਾਪੁਣੇਏਵ ਸਮ੍ਮਾ ਗਚ੍ਛਤਿਏਵ, ਸਬ੍ਬਲੋਕਮਹਿਤਂ ਸਬ੍ਬਲੋਕੇਨ ਪੂਜਿਤਂ, ਅਸਮਂ ਸਬ੍ਬਮਨੁਸ੍ਸਦੇਵਬ੍ਰਹ੍ਮੇਹਿ ਅਸਦਿਸਂ ਤਂ ਨਾਥਂ ਅਹਂ ਨਮਾਮੀਤਿ.

ਚੁਦ੍ਦਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੫.

ਬੁਦ੍ਧਂ ਨਰਾਨਰਸਮੋਸਰਣਂ ਧਿਤਤ੍ਤਂ,

ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਂ;

ਅਤ੍ਥਾਭਿਕਾਮਨਰਦੇਵਹਿਤਾਵਹਂ ਤਂ,

ਵਨ੍ਦਾਮਿ ਕਾਰੁਣਿਕਮਗ੍ਗਮਨਨ੍ਤਞਾਣਂ.

੧੫. ਏਵਂ ਚੁਦ੍ਦਸਮਗਾਥਾਯ ਨਾਥਂ ਨਤ੍ਵਾ ਇਦਾਨਿ ਨਰਾਨਰਸ ਮੋਸਰਣਨ੍ਤ੍ਯਾਦੀਹਿ ਸਤ੍ਤਹਿ ਗੁਣੇਹਿ ਥੋਮਿਤ੍ਵਾ ਬੁਦ੍ਧਂ ਵਨ੍ਦਿਤੁ ਕਾਮੋ ਬੁਦ੍ਧਂ ਨਰਾਨਰਸਮੋਸਰਣਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਤਭਜਜਗਣੇਹਿ ਗਰੁਦ੍ਵਯੇਨ ਚ ਰਚਿਤਤ੍ਤਾ ਚੁਦ੍ਦਸਕ੍ਖਰੇਹਿ ਯੁਤ੍ਤਾ ਵਸਨ੍ਤਤਿਲਕਾਗਾਥਾਤਿ ਦਟ੍ਠਬ੍ਬਾ. ਸਾਧਕਂ ਪਨੇਤ੍ਥ ਹੇਟ੍ਠਾ ਵੁਤ੍ਤਮੇਵ.

ਤਤ੍ਥ ਪਨ ਨਰਾਨਰਸਮੋਸਰਣਨ੍ਤਿ ਏਤ੍ਥ ਨਰਅਨਰਸਮਂ ਓਸਰਣਨ੍ਤਿ ਪਦਵਿਭਾਗੋ. ਮਨੁਸ੍ਸਦੇਵਾਨਂ ਸਮਂ ਓਸਰਣਂ ਸਨ੍ਨਿਪਤਿਤਟ੍ਠਾਨਨ੍ਤਿ ਅਤ੍ਥੋ. ਨਰਾਨਰਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਸਮਂ ਅਵਸਰਨ੍ਤਿ ਸਨ੍ਨਿਪਤਨ੍ਤਿ ਏਤ੍ਥਾਤਿ ਸਮੋਸਰਣੋ, ਬੁਦ੍ਧੋ. ਸਮਅਵਪੁਬ੍ਬ ਸਰਧਾਤੁ ਗਤਿਯਂ ਯੁ. ਨਰਾਨਰਾਨਂ ਮਨੁਸ੍ਸਦੇਵਾਨਂ ਸਮੋਸਰਣੋ ਨਰਾਨਰਸਮੋਸਰਣੋ, ਬੁਦ੍ਧੋ. ਯਥਾ ਹਿ ਮਹਾਨਿਗ੍ਰੋਧੋ ਫਲਕਾਮਾਨਂ ਸਕੁਣ ਸਮੂਹਾਨਂ ਸਮੋਸਰਣਂ ਹੋਤਿ, ਏਵਂ ਬੁਦ੍ਧੋ ਲੋਕਿਯ ਲੋਕੁਤ੍ਤਰਸਮ੍ਪਤ੍ਤਿਕਾਮਾਨਂ ਮਨੁਸ੍ਸਦੇਵਾਨਂ ਸਮੋਸਰਣੋ ਸਨ੍ਨਿਪਤਿਤੋ ਪਟਿਸਰਣੋ ਵਾ ਹੋਤਿ. ਤਸ੍ਮਾ ਨਰਾਨਰਸਮੋਸਰਣਨ੍ਤਿ ਥੋਮੇਤਿ.

ਧਿਤਤ੍ਤਨ੍ਤਿ ਸਮਾਹਿਤਚਿਤ੍ਤਂ. ਏਤ੍ਥ ਅਤ੍ਤਸਦ੍ਦੋ ਅਤ੍ਤਸਮ੍ਮਾ ਪਣਿਧਿ ਚਾਤਿਆਦੀਸੁ ਅਤ੍ਤਸਦ੍ਦੋ ਵਿਯ ਚਿਤ੍ਤਵਾਚਕੋ ਦਟ੍ਠਬ੍ਬੋ. ਧਿਯਤਿ ਠਪਿਯਤਿ ਏਤ੍ਥ ਏਤੇਨ ਵਾ ਏਕਾਰਮ੍ਮਣੇ ਸਮ੍ਪਯੁਤ੍ਤ ਧਮ੍ਮਾਤਿ ਧਿਤੋ, ਸਮਾਧਿ. ਧਾਧਾਤੁ ਪਤਿਟ੍ਠਾਯਂ ਤ. ਆਰਮ੍ਮਣਂ ਅਦਤਿ ਆਦਦਾਤੀਤਿ ਅਤ੍ਤਂ, ਚਿਤ੍ਤਂ. ਅਦਧਾਤੁ ਆਦਾਨੇ ਤ. ਧਿਤਂ ਸਮਾਹਿਤਂ ਅਤ੍ਤਂ ਚਿਤ੍ਤਂ ਯਸ੍ਸਾਤਿ ਧਿਤਤ੍ਤੋ, ਬੁਦ੍ਧੋ. ਤਂ ਧਿਤਤ੍ਤਂ.

ਪਞ੍ਞਾਪਦੀਪਜੁਤਿਯਾਤਿ ਅਰਹਤ੍ਤਮਗ੍ਗਞਾਣਸਙ੍ਖਾਤਪਦੀਪੋਭਾਸੇਨ ਕਰਣਭੂਤੇਨ. ਪਜਾਨਾਤੀਤਿ ਪਞ੍ਞਾ, ਅਰਹਤ੍ਤਮਗ੍ਗ ਞਾਣਂ. ਯਥਾਸਭਾਵਂ ਸਬ੍ਬਪ੍ਪਕਾਰੇਹਿ ਚਤੁਸਚ੍ਚਧਮ੍ਮਂ ਪਟਿਵਿਜ੍ਝਤੀਤਿ ਅਤ੍ਥੋ. ਪਞ੍ਞਾਵ ਞੇਯ੍ਯਾਵਰਣਪ੍ਪਹਾਨਤੋ ਸਬ੍ਬਪਕਾਰੇਹਿ ਧਮ੍ਮਸਭਾਵਂ ਦੀਪੇਤੀਤਿ ਪਞ੍ਞਾਪਦੀਪੋ. ਜੋਤੇਤੀਤਿ ਜੁਤਿ, ਪਞ੍ਞਾਪਦੀਪੋਭਾਸੋ. ਜੁਧਾਤੁ ਦਿਤ੍ਤਿਯਨ੍ਤਿ. ਪਞ੍ਞਾ ਪਦੀਪੋਏਵ ਜੁਤਿ ਪਞ੍ਞਾਪਦੀਪਜੁਤਿ. ਅਥ ਵਾ ਪਞ੍ਞਾਪਦੀਪਸ੍ਸ ਜੁਤਿ ਪਞ੍ਞਾਪਦੀਪਜੁਤਿ, ਅਯਂ ਪਨ ਸਮਾਸੋ ਅਭੇਦਭੇਦੂ ਪਚਾਰੇਨ ਦਟ੍ਠਬ੍ਬੋ. ਤਾਯ ਪਞ੍ਞਾਪਦੀਪਜੁਤਿਯਾ.

ਵਿਹਤਨ੍ਧਕਾਰਨ੍ਤਿ ਹਨਿਤਬ੍ਬਅਵਿਜ੍ਜਾਸਙ੍ਖਾਤਮੋਹਤਮਂ. ਸਵਾਸਨਕਿਲੇਸਪ੍ਪਹਾਨਤੋ ਵਿਸੇਸੇਨ ਹਨਿਤਬ੍ਬੋਤਿ ਵਿਹਤੋ. ਵਿਪੁਬ੍ਬਹਨਧਾਤੁ ਹਿਂਸਾਯਂ ਤ. ਅਨ੍ਧਂ ਤਮਂ ਕਰੋਤੀਤਿ ਅਨ੍ਧਕਾਰੋ, ਅਵਿਜ੍ਜਾਸਙ੍ਖਾਤਮੋਹੋ. ਵਿਸਯਸਭਾਵਪਟਿਚ੍ਛਾਦਨਤੋ ਅਨ੍ਧਕਾਰਸਰਿਕ੍ਖਕਤਾਯ ਮੋਹੋ ਅਨ੍ਧਕਾਰੋਤਿ ਵੁਚ੍ਚਤਿ. ਅਥ ਵਾ ਅਨ੍ਧਂ ਪਞ੍ਞਾਚਕ੍ਖੁਅਨ੍ਧਂ ਕਰੋਤੀਤਿ ਅਨ੍ਧਕਾਰੋ, ਮੋਹੋ. ਅਨ੍ਧਸਦ੍ਦੂਪਪਦ ਕਰਧਾਤੁ ਣ. ਵਿਹਤੋ ਅਨ੍ਧਕਾਰੋ ਯੇਨ ਸੋਤਿ ਵਿਹਤਨ੍ਧਕਾਰੋ, ਬੁਦ੍ਧੋ. ਤਂ ਵਿਹਤਨ੍ਧਕਾਰਂ. ਯਥਾ ਹਿ ਲੋਕੇ ਪਦੀਪੋ ਅਤ੍ਤਨੋ ਜੁਤਿਯਾ ਅਨ੍ਧਕਾਰਂ ਹਨਤਿ, ਏਵਂ ਬੁਦ੍ਧਸ੍ਸ ਅਰਹਤ੍ਤਮਗ੍ਗਪਞ੍ਞਾਪਿ ਅਵਿਜ੍ਜਨ੍ਧਕਾਰਂ ਹਨਤੀਤਿ ਵੁਤ੍ਤਾ. ਅਯਂ ਪਨ ਹੀਨੂਪਮਾਤਿ ਵੁਚ੍ਚਤਿ. ਪਞ੍ਞਾਵਤੋ ਹਿ ਏਕਪਲ੍ਲਙ੍ਕੇਨਪਿ ਨਿਸਿਨ੍ਨਸ੍ਸ ਦਸਸਹਸ੍ਸਿ ਲੋਕਧਾਤੁ ਏਕਪਜ੍ਜੋਤਾ ਹੋਤਿ. ਵੁਤ੍ਤਞ੍ਹੇਤਂ ਭਗਵਤਾ ‘‘ਚਤ੍ਤਾਰੋਮੇ ਭਿਕ੍ਖਵੇ ਪਜ੍ਜੋਤਾ. ਕਤਮੇ ਚਤ੍ਤਾਰੋ. ਚਨ੍ਦਪਜ੍ਜੋਤੋ, ਸੂਰਿਯਪਜ੍ਜੋਤੋ, ਅਗ੍ਗਿਪਜ੍ਜੋਤੋ, ਪਞ੍ਞਾ ਪਜ੍ਜੋਤੋ. ਇਮੇ ਖੋ ਭਿਕ੍ਖਵੇ ਚਤ੍ਤਾਰੋ ਪਜ੍ਜੋਤਾ. ਏਤਦਗ੍ਗਂ ਭਿਕ੍ਖਵੇ ਇਮੇਸਂ ਚਤੁਨ੍ਨਂ ਪਜ੍ਜੋਤਾਨਂ ਯਦਿਦਂ ਪਞ੍ਞਾ ਪਜ੍ਜੋਤੋ’’ਤਿ.

ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਨ੍ਤਿ ਏਤ੍ਥ ਪਨ ਪਞ੍ਞਾਪਦੀਪ ਜੁਤਿਯਾਤਿਇਮਿਨਾ ਬੁਦ੍ਧਸ੍ਸ ਅਰਹਤ੍ਤਮਗ੍ਗਞਾਣਂ ਮੁਖ੍ਯੇਨ ਦਸ੍ਸੇਤਿ. ਤਂ ਦਸ੍ਸਨੇਨ ਪਾਰਮੀਞਾਣਞ੍ਚ ਵਿਪਸ੍ਸਨਾਞਾਣਞ੍ਚ ਹੇਟ੍ਠਿਮਮਗ੍ਗਫਲ ਞਾਣਞ੍ਚ ਫਲੂਪਚਾਰੇਨ ਦੀਪੇਤਿ. ਤਦ੍ਦੀਪਕੇਨ ਅਵਿਜ੍ਜਨ੍ਧਕਾਰਪ੍ਪਹਾਨਂ ਪਠਮਕਾਰਣੂਪਚਾਰੇਨ ਪਕਾਸੇਤਿ. ਤਪ੍ਪਕਾਸਨੇਨ ਅਰਹਤ੍ਤ ਫਲਞਾਣਲਭਨਂ ਦੁਤਿਯਕਾਰਣੂਪਚਾਰੇਨ ਵਿਭਾਵੇਤਿ. ਤਂ ਵਿਭਾਵਨੇਨ ਸਬ੍ਬਞ੍ਞੁਤਞਾਣਾਦਿਸਬ੍ਬਬੁਦ੍ਧਗੁਣਲਭਨਂ ਤਤਿਯ ਕਾਰਣੂਪਚਾਰੇਨ ਆਨੁਭਾਵੇਤਿ.

ਨਨੁ ਚ ਸਬ੍ਬੇਸਮ੍ਪਿ ਖੀਣਾਸਵਾਨਂ ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਤਾ ਸਮ੍ਭਵਤਿ, ਅਥ ਕਸ੍ਮਾ ਅਞ੍ਞਸਾਧਾਰਣਾਵਿਸੇਸ ਗੁਣੇਨ ਬੁਦ੍ਧਸ੍ਸ ਥੋਮਨਾ ਕਤਾਤਿ. ਸਵਾਸਨਪ੍ਪਹਾਨੇਨ ਅਨਞ੍ਞਸਾਧਾਰਣਵਿਸੇਸਤਾਯ ਸਮ੍ਭਵਤੋ. ਸਬ੍ਬੇਸਮ੍ਪਿ ਹਿ ਖੀਣਾਸਵਾਨਂ ਸਤਿਪਿ ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਤ੍ਤੇ ਅਰਿਯਸਾਵਕਪਚ੍ਚੇਕਬੁਦ੍ਧਾਨਂ ਸਵਾਸਨਾਯ ਕਿਲੇਸਪ੍ਪਹਾਨਂ ਨ ਵਿਜ੍ਜਤਿ. ਸਮ੍ਮਾਸਮ੍ਬੁਦ੍ਧਾਨਂਯੇਵ ਸਵਾਸਨਪ੍ਪਹਾਨੇਨ ਕਿਲੇਸਪ੍ਪਹਾਨਸ੍ਸ ਵਿਸੇਸੋ ਵਿਜ੍ਜਤੀਤਿ ਸਾਤਿਸਯਵਸੇਨ ਅਵਿਜ੍ਜਨ੍ਧਕਾਰਪ੍ਪਹਾਨੇਨ ਭਗਵਨ੍ਤਂਯੇਵ ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਨ੍ਤਿ ਥੋਮੇਤੀਤਿ.

ਅਤ੍ਥਾਭਿਕਾਮਨ੍ਤਿ ਸਤ੍ਤਲੋਕਸ੍ਸ ਲੋਕਿਯਲੋਕੁਤ੍ਤਰ ਸਙ੍ਖਾਤਂ ਪਯੋਜਨਂ ਅਤਿਵਿਯ ਇਚ੍ਛਨ੍ਤਂ. ਕਾਰਣਾਨੁਰੂਪਂ ਅਸਤਿ ਭਵਤੀਤਿ ਅਤ੍ਥਂ, ਫਲਂ. ਅਸਧਾਤੁ ਭੁਵਿਮ੍ਹਿ ਥ. ਤਂ ਅਭਿਅਤਿਰੇਕਂ ਕਾਮੇਤਿ ਇਚ੍ਛਤੀਤਿ ਅਤ੍ਥਾਭਿਕਾਮੋ, ਬੁਦ੍ਧੋ. ਅਤ੍ਥਸਦ੍ਦੂਪਪਦ ਅਭਿਪੁਬ੍ਬਕਮੁਧਾਤੁ ਇਚ੍ਛਾਯਂ ਣ. ਤਂ ਅਤ੍ਥਾਭਿਕਾਮਂ. ਨਰਦੇਵਹਿਤਾਵਹਨ੍ਤਿ ਮਨੁਸ੍ਸਦੇਵਾਨਂ ਹਿਤਂ ਧਾਰਕਂ. ਹਿਤਂ ਨਰਤਿ ਨੇਤੀਤਿ ਨਰੋ, ਮਨੁਸ੍ਸੋ. ਅਥ ਵਾ ਨਰਿਯਤਿ ਸਕੇਨ ਕਮ੍ਮੇਨ ਨਿਯ੍ਯਤੀਤਿ ਨਰੋ, ਮਨੁਸ੍ਸੋ. ਨਰਧਾਤੁ ਨਯਨੇ ਅ. ਵੁਤ੍ਤਞ੍ਹਿ ‘‘ਕਮ੍ਮੇਨ ਨਿਯ੍ਯਤਿ ਲੋਕੋ’’ਤਿ. ਕਾਮਗੁਣ ਝਾਨਾਭਿਞ੍ਞਚਿਤ੍ਤਿਸ੍ਸਰਿਯਾਦੀਹਿ ਦਿਬ੍ਬਨ੍ਤਿ ਕੀਲ਼ਨ੍ਤੀਤਿ ਦੇਵਾ, ਤੇਸੁ ਵਾ ਵਿਹਰਨ੍ਤੀਤਿ ਦੇਵਾ, ਦਿਵੁਧਾਤੁ ਕੀਲ਼ਾਦੀਸੁ ਣ. ਨਰਾ ਚ ਦੇਵਾ ਚ ਨਰਦੇਵਾ. ਹਿਨੋਤਿ ਵਡ੍ਢਤੀਤਿ ਹਿਤਂ, ਫਲਂ. ਹਿਧਾਤੁ ਵਡ੍ਢਨੇ ਤ. ਨਰਦੇਵਾਨਂ ਹਿਤਂ ਨਰਦੇਵਹਿਤਂ, ਤਂ ਆਵਹਤੀਤਿ ਨਰਦੇਵਹਿਤਾਵਹੋ, ਬੁਦ੍ਧੋ. ਨਰਦੇਵਹਿਤਸਦ੍ਦੂਪਪਦਆਪੁਬ੍ਬ ਵਹਧਾਤੁ ਹਰਣੇ ਣ. ਬੁਦ੍ਧੋ ਹਿ ਸਬ੍ਬਦੇਵਮਨੁਸ੍ਸਾਨਂ ਲੋਕਿਯਲੋਕੁਤ੍ਤਰਸਮ੍ਪਤ੍ਤਿਅਤ੍ਥਂ ਧਮ੍ਮਦੇਸਨਾਯ ਧਾਰੇਤੀਤਿ ਵੁਤ੍ਤਂ ਹੋਤਿ, ਤਂ ਨਰਦੇਵਹਿਤਾਵਹਂ. ਕਾਰੁਣਿਕਮਗ੍ਗਮਨਨ੍ਤ ਞਾਣਨ੍ਤਿ ਏਤ੍ਥ ਕਾਰੁਣਿਕਂ ਅਗ੍ਗਂ ਅਨਨ੍ਤਞਾਣਨ੍ਤਿਪਦਚ੍ਛੇਦੋ. ਤਤ੍ਥ ਕਾਰੁਣਿਕਨ੍ਤਿ ਸਬ੍ਬਸਤ੍ਤੇਸੁ ਮਹਾਕਰੁਣਾਯ ਯੁਤ੍ਤਂ, ਮਹਾਕਰੁਣਵਨ੍ਤਂ ਵਾ. ਕਿਰਤੀਤਿ ਕਰੁਣਾ. ਕਿਰਧਾਤੁ ਅਪਨਯਨੇ ਉਣਪਚ੍ਚਯੋ. ਪਰਦੁਕ੍ਖਂ ਵਿਕ੍ਖਿਪਤਿ ਅਪਨੇਤੀਤਿ ਅਤ੍ਥੋ.

ਅਥ ਵਾ ਕਿਨਾਤੀਤਿ ਕਰੁਣਾ. ਕਿਧਾਤੁ ਹਿਂਸਾਯਂ ਰੁਣਪਚ੍ਚਯੋ. ਪਰਦੁਕ੍ਖੇ ਸਤਿ ਕਾਰੁਣਿਕਂ ਹਿਂਸਤਿ ਵਿਬਾਧਤੀਤਿ ਅਤ੍ਥੋ. ਪਰਦੁਕ੍ਖੇ ਸਤਿ ਸਾਧੂਨਂ ਹਦਯਕਮ੍ਪਨਂ ਕਰੋਤੀਤਿ ਵਾ ਕਰੁਣਾ. ਕਰਧਾਤੁ ਉਣਪਚ੍ਚਯੋ. ਅਥ ਵਾ ਕਂ ਵੁਚ੍ਚਤਿ ਸੁਖਂ, ਤਂ ਰੁਨ੍ਧਤੀਤਿ ਕਰੁਣਾ. ਕਂਸਦ੍ਦੂਪਪਦ ਰੁਧਿਧਾਤੁ ਆਵਰਣੇ ਯੁਪਚ੍ਚਯੋ. ਏਸਾ ਹਿ ਪਰਦੁਕ੍ਖਾਪਨਯਨਕਾਮਤਾ ਲਕ੍ਖਣਾ. ਅਤ੍ਤਸੁਖਨਿਰਪੇਕ੍ਖਤਾਯ ਕਾਰੁਣਿਕਾਨਂ ਸੁਖਂ ਰੁਨ੍ਧਤਿ ਵਿਬਾਧਤੀਤਿ ਅਤ੍ਥੋ. ਕਰੁਣਾਯ ਮਹਾਕਰੁਣਾਯ ਯੁਤ੍ਤੋ ਕਾਰੁਣਿਕੋ. ਕਰੁਣਾ ਅਸ੍ਸ ਅਤ੍ਥੀਤਿ ਵਾ ਕਾਰੁਣਿਕੋ, ਬੁਦ੍ਧੋ. ਤਂ ਕਾਰੁਣਿਤਂ. ਅਗ੍ਗਨ੍ਤਿ ਜਾਤਿਪੁਞ੍ਞ ਗੁਣਮਹਤ੍ਤਭਾਵੇਨ ਸਬ੍ਬਸਤ੍ਤੁਤ੍ਤਮਂ ਸੇਟ੍ਠਭਾਵਂ ਅਜਤਿ ਗਚ੍ਛਤੀਤਿ ਅਗ੍ਗੋ, ਬੁਦ੍ਧੋ. ਅਜਧਾਤੁ ਗਤਿਯਂ ਅ. ਜਸ੍ਸ ਗੋ. ਬੁਦ੍ਧੋ ਹਿ ਅਸਮ੍ਭਿਨ੍ਨਖਤ੍ਤਿਯਵਂਸੇ ਜਾਤਤ੍ਤਾ ਜਾਤਿਵਸੇਨ ਚ ਪੂਰਿਤਪਾਰਮੀਪੁਞ੍ਞਤ੍ਤਾ ਪੁਞ੍ਞਵਸੇਨ ਚ ਅਪਰਿਮਿਤਨਿਰੁਪਮਸੀਲਾਦਿ ਗੁਣਵਿਸੇਸੇਨ ਸਮਨ੍ਨਾਗਤਤ੍ਤਾ ਗੁਣਵਸੇਨ ਚ ਅਨਨ੍ਤਲੋਕਧਾਤੂਸੁ ਸਬ੍ਬਸਤ੍ਤੁਤ੍ਤਮਭਾਵਂ ਗਚ੍ਛਤੀਤਿ ਅਗ੍ਗੋ. ਨਿਬ੍ਬਾਨਂ ਅਜਤਿ ਗਚ੍ਛਤੀਤਿ ਵਾ ਅਗ੍ਗੋ. ਅਥ ਵਾ ਅਜੇਤਿ ਖੇਪੇਤਿ ਕਿਲੇਸੇਤਿ ਅਗ੍ਗੋ, ਬੁਦ੍ਧੋ. ਅਜਧਾਤੁ ਖੇਪਨੇ ਅ. ਤਂ ਅਗ੍ਗਂ. ਅਨਨ੍ਤਞਾਣਨ੍ਤਿ ਗਣਨਵਸੇਨ ਚ ਸਭਾਵਵਸੇਨ ਚ ਵਿਸਯਵਸੇਨ ਚ ਅਨ੍ਤਵਿਰਹਿਤਞਾਣਂ. ਕੇਨਚਿ ਪੁਗ੍ਗਲੇਨ ਞਾਣੇਨ ਅਨਨ੍ਤਂ ਅਪਰਿਚ੍ਛਿਨ੍ਨਂ, ਸਬ੍ਬਞ੍ਞੁਤਞਾਣਵਨ੍ਤਂ ਵਾ. ਨਤ੍ਥਿ ਅਨ੍ਤਂ ਯਸ੍ਸਾਤਿ ਅਨਨ੍ਤਂ, ਞਾਣਂ. ਸਬ੍ਬਞੇਯ੍ਯਧਮ੍ਮਂ ਜਾਨਾਤੀਤਿ ਞਾਣਂ, ਸਬ੍ਬਞ੍ਞੁਤਞਾਣਂ. ਅਨਨ੍ਤਂ ਞਾਣਂ ਯਸ੍ਸ ਸੋਤਿ ਅਨਨ੍ਤਞਾਣੋ, ਬੁਦ੍ਧੋ. ਬੁਦ੍ਧਸ੍ਸ ਹਿ ਞਾਣਂ ਕੋਚਿ ਮਨੁਸ੍ਸੋ ਵਾ ਦੇਵੋ ਵਾ ਬ੍ਰਹ੍ਮਾ ਵਾ ਏਤ੍ਤਕਨ੍ਤਿ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕੋਤਿ, ਤਸ੍ਮਾ ਅਨਨ੍ਤਂ ਅਪਰਿਮਾਣਂ ਹੋਤੀਤਿ ਵੁਤ੍ਤਂ ਹੋਤਿ.

ਵੁਤ੍ਤਞ੍ਹੇਤਂ ਸਾਰਿਪੁਤ੍ਤਤ੍ਥੇਰਅਪਦਾਨੇ –

‘‘ਸਕ੍ਕਾ ਸਮੁਦ੍ਦੇ ਉਦਕਂ, ਪਮੇਤੁਂ ਅਲ਼੍ਹਕੇਨ ਵਾ;

ਨਤ੍ਵੇਵ ਤਵ ਸਬ੍ਬਞ੍ਞੁ, ਞਾਣਂ ਸਕ੍ਕਾ ਪਮੇਤਵੇ’’ਤਿ.

ਕਾਰੁਣਿਕਮਗ੍ਗਮਨਨ੍ਤਞਾਣਨ੍ਤਿ ਏਤ੍ਥ ਚ ਕਰੁਣਗ੍ਗਹਣੇਨ ਸਮ੍ਮਾਸਮ੍ਬੋਧਿਯਾ ਮੂਲਂ ਦਸ੍ਸੇਤਿ, ਮਹਾਕਰੁਣਾਸਞ੍ਚੋਦਿਤਮਾਨਸੋ ਹਿ ਭਗਵਾ ਸਂਸਾਰਪਙ੍ਕਤੋ ਸਤ੍ਤਾਨਂ ਸਮੁਦ੍ਧਰਣਤ੍ਥਂ ਦੀਪਙ੍ਕਰਪਾਦਮੂਲੇ ਕਤਾਭਿਨੀਹਾਰੋ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਅਨੁਪੁਬ੍ਬੇਨ ਪਾਰਮਿਯੋ ਪੂਰੇਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਧਿਗਤੋਤਿ ਕਰੁਣਾ ਸਮ੍ਮਾਸਮ੍ਬੋਧਿਯਾ ਮੂਲਨ੍ਤਿ. ਅਗ੍ਗਨ੍ਤਿ ਏਤੇਨ ਭਗਵਤੋ ਅਪਰਿਮਿਤਨਿਰੁਪਮਸੀਲਾਦਿਗੁਣਸਮਙ੍ਗੀਤਾਯ ਅਪਰਿਮਾਣਾਸੁ ਲੋਕਧਾਤੂਸੁ ਅਪਰਿਮਾਣਾਨਂ ਸਤ੍ਤਾਨਂ ਉਤ੍ਤਮਭਾਵਂ ਦਸ੍ਸੇਤਿ. ਅਨਨ੍ਤਞਾਣਨ੍ਤਿਏਤੇਨ ਸਮ੍ਮਾਸਮ੍ਬੋਧਿਂ ਦਸ੍ਸੇਤਿ. ਸਬ੍ਬਞ੍ਞੁਤਞਾਣਪਦਟ੍ਠਾਨਞ੍ਹਿ ਅਗ੍ਗਮਗ੍ਗਞਾਣਂ, ਅਗ੍ਗਮਗ੍ਗਞਾਣਪਦਟ੍ਠਾਨਞ੍ਚ ਸਬ੍ਬਞ੍ਞੁਤਞਾਣਂ ਸਮ੍ਮਾਸਮ੍ਬੋਧੀਤਿ ਵੁਚ੍ਚਤਿ. ਤਸ੍ਸ ਚ ਸਾਮਤ੍ਥਿਯੇਨ ਚਤੁਪਟਿਸਮ੍ਭਿਦਾਞਾਣਂ ਚਤੁਵੇਸਾਰਜ੍ਜਞਾਣਂ ਛਅਸਾਧਾਰਣਞਾਣਾਨਿ ਚ ਛਅਭਿਞ੍ਞਾ ਅਟ੍ਠਸੁ ਪਰਿਸਾਸੁ ਅਕਮ੍ਪਨ ਞਾਣਾਨਿ ਦਸਬਲਞਾਣਾਨਿ ਸੋਲ਼ਸਞਾਣਚਰਿਯਾ ਚ ਚਤੁਚਤ੍ਤਾਰੀਸਞਾਣਵਤ੍ਥੂਨਿ ਸਤ੍ਤਸਤ੍ਤਤਿਞਾਣਵਤ੍ਥੂਨਿ ਚਾਤਿ ਏਵਮਾਦੀਨਂ ਅਨੇਕੇਸਂ ਪਞ੍ਞਾਪਭੇਦਾਨਂ ਵਸੇਨ ਞਾਣਾਚਾਰਂ ਦਸ੍ਸੇਤੀਤਿ. ਤਂ ਬੁਦ੍ਧਂ ਅਹਂ ਵਿਪ੍ਪਸਨ੍ਨੇਨ ਚੇਤਸਾ ਵਨ੍ਦਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਨਰਾਨਰਸਮੋਸਰਣਂ ਮਨੁਸ੍ਸਦੇਵਾਨਂ ਸਮਂ ਓਸਰਣਂ ਸਨ੍ਨਿਪਤਿਤਟ੍ਠਾਨਂ, ਧਿਤਤ੍ਤਂ ਸਮਾਹਿਤਚਿਤ੍ਤਂ, ਪਞ੍ਞਾਪਦੀਪਜੁਤਿਯਾ ਅਰਹਤ੍ਤਮਗ੍ਗਞਾਣਸਙ੍ਖਾਤ ਪਦੀਪੋਭਾਸੇਨ ਕਰਣਭੂਤੇਨ ਵਿਹਤਨ੍ਧਕਾਰਂ ਹਨਿਤਬ੍ਬ ਅਵਿਜ੍ਜਾਸਙ੍ਖਾਤਮੋਹਤਮਂ, ਅਤ੍ਥਾਭਿਕਾਮਂ ਸਤ੍ਤਲੋਕਸ੍ਸ ਲੋਕਿਯਲੋਕੁਤ੍ਤਰਸਙ੍ਖਾਤਪਯੋਜਨਂ ਅਤਿਵਿਯ ਇਚ੍ਛਨ੍ਤਂ, ਨਰਦੇਵਹਿਤਾਵਹਂ ਮਨੁਸ੍ਸਦੇਵਾਨਂ ਹਿਤਂ ਧਾਰਕਂ, ਕਾਰੁਣਿਕਂ ਸਬ੍ਬਸਤ੍ਤੇਸੁ ਮਹਾਕਰੁਣਾਯ ਯੁਤ੍ਤਂ ਮਹਾਕਰੁਣਵਨ੍ਤਂ ਵਾ, ਅਗ੍ਗਂ ਜਾਤਿਪੁਞ੍ਞਗੁਣਮਹਤ੍ਤਭਾਵੇਨ ਸਬ੍ਬਸਤ੍ਤੁਤ੍ਤਮਂ, ਅਨਨ੍ਤ ਞਾਣਂ ਗਣਵਸੇਨ ਚ ਸਭਾਵਵਸੇਨ ਚ ਵਿਸਯਵਸੇਨ ਚ ਅਨ੍ਤਵਿਰਹਿਤਞਾਣਂ, ਅਨਨ੍ਤਂ ਸਬ੍ਬਞ੍ਞੁਤਞਾਣਵਨ੍ਤਂ ਵਾ ਤਂ ਬੁਦ੍ਧਂ ਅਹਂ ਵਿਪ੍ਪਸਨ੍ਨੇਨ ਚੇਤਸਾ ਵਨ੍ਦਾਮੀਤਿ.

ਪਨ੍ਨਰਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੬.

ਅਖਿਲਗੁਣਨਿਧਾਨੋ ਯੋ ਮੁਨਿਨ੍ਦੋਪਗਨ੍ਤ੍ਵਾ,

ਵਨਮਿਸਿਪਤਨਵ੍ਹਂ ਸਞ੍ਞਤਾਨਂ ਨਿਕੇਤਂ;

ਤਹਿਮਕੁਸਲਛੇਦਂ ਧਮ੍ਮਚਕ੍ਕਂ ਪਵਤ੍ਤੋ,

ਤਮਤੁਲਮਭਿਕਨ੍ਤਂ ਵਨ੍ਦਨੇਯ੍ਯਂ ਨਮਾਮਿ.

੧੬. ਏਵਂ ਪਨ੍ਨਰਸਮਗਾਥਾਯ ਬੁਦ੍ਧਂ ਵਨ੍ਦਿਤ੍ਵਾ ਇਦਾਨਿ ਇਸਿਪਤਨ ਮਿਗਦਾਯੇ ਧਮ੍ਮਚਕ੍ਕਪਵਤ੍ਤਨਾਦਿਗੁਣੇਹਿ ਥੋਮਿਤ੍ਵਾ ਮੁਨਿਨ੍ਦਂ ਵਨ੍ਦਿਤੁ ਕਾਮੋ ਅਖਿਲਗੁਣਨਿਧਾਨੋ ਤ੍ਯਾਦਿਗਾਥਮਾਹ. ਅਯਂ ਪਨ ਨਨਮਯਯਗਣੇਹਿ ਰਚਿਤਤ੍ਤਾ ਪਨ੍ਨਰਸਕ੍ਖਰੇਹਿ ਯੁਤ੍ਤਾ ਮਾਲਿਨੀ ਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਨਨਮਯਯਯੁਤਾਯਂ ਮਾਲਿਨੀਭੋਗਿਸੀਹੀ’’ਤਿ. ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਭੋਗਿਸੀਹਿ ਅਟ੍ਠਸਤ੍ਤਯਤੀਹਿ ਯੁਤ੍ਤਾ ਚ ਨਨਮਯਯਯੁਤਾ ਨਨਗਣਮਗਣ ਯਯਗਣੇਹਿ ਯੁਤ੍ਤਾ ਚ ਚੇ ਸਿਯੁਂ, ਅਯਂ ਗਾਥਾ ਮਾਲਿਨੀਗਾਥਾ ਨਾਮਾਤਿ. ਏਤ੍ਥ ਚ ਭੋਗਿਸੀਹੀਤਿ ਭੋਗਇਸੀਹੀਤਿ ਪਦਚ੍ਛੇਦੋ. ਭੋਗਸਦ੍ਦੋ ਅਟ੍ਠਸਙ੍ਖ੍ਯਾ ਵਾਚਕੋ. ਇਸਿਸਦ੍ਦੋ ਸਤ੍ਤਸਙ੍ਖ੍ਯਾਵਾਚਕੋਤਿ ਦਟ੍ਠਬ੍ਬੋ.

ਤਤ੍ਥ ਅਖਿਲਗੁਣਨਿਧਾਨੋਤਿ ਸਬ੍ਬਲੋਕਿਯਲੋਕੁਤ੍ਤਰ ਸਙ੍ਖਾਤਾਨਂ ਸੀਲਸਮਾਧਿਪਞ੍ਞਾਦਿਗੁਣਸਮੂਹਾਨਂ ਪਤਿਟ੍ਠਾਨੋ. ਏਤ੍ਥ ਚ ਅਖਿਲਸਦ੍ਦੋ ਅਨਵਸੇਸਵਾਚਕੋ. ਸਬ੍ਬੋਤਿ ਅਤ੍ਥੋ. ਵੁਤ੍ਤਞ੍ਹਿ ਮਧੁਟੀਕਾਯਂ ‘‘ਖਿਲਸਦ੍ਦੋ ਹੇਤ੍ਥ ਅਵਸੇਸਵਾਚਕੋ’’ਤਿ. ਨ ਖਿਲਂ ਅਖਿਲਂ. ਅਥ ਵਾ ਨ ਖੀਯਤੀਤਿ ਅਖਿਲਂ, ਸਬ੍ਬਂ. ਨਪੁਬ੍ਬਖਿਧਾਤੁ ਖਯੇ ਲੋ. ਗੁਣਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਖਿਲਾਨਿ ਸਬ੍ਬਾਨਿ ਗੁਣਾਨਿ ਅਖਿਲਗੁਣਾਨਿ, ਤੇਸਂ ਨਿਧਾਤਿ ਤਿਟ੍ਠਤਿ ਏਤ੍ਥਾਤਿ ਅਖਿਲਗੁਣਨਿਧਾਨੋ, ਮੁਨਿਨ੍ਦੋ ਲਬ੍ਭਤਿ. ਯੋਤਿ ਯੋ ਯਾਦਿਸੋ. ਮੁਨਿਨ੍ਦੋਪਗਨ੍ਤ੍ਵਾਤਿ ਏਤ੍ਥ ਮੁਨਿਨ੍ਦੋ ਉਪਗਨ੍ਤ੍ਵਾਤਿ ਪਦਚ੍ਛੇਦੋ. ਮੁਨਿਨ੍ਦੋਤਿ ਅਗਾਰਿਯਮੁਨਿ, ਅਨਗਾਰਿਯਮੁਨਿ, ਸੇਕ੍ਖਮੁਨਿ, ਅਸੇਕ੍ਖਮੁਨਿ, ਪਚ੍ਚੇਕ ਮੁਨਿਵਸੇਨ ਪਞ੍ਚਨ੍ਨਂ ਮੁਨੀਨਂ ਇਨ੍ਦੋ ਇਸ੍ਸਰੋਤਿ ਅਤ੍ਥੋ. ਤਸ੍ਸ ਪਨ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਖਿਲਗੁਣਨਿਧਾਨੋ ਯੋ ਮੁਨਿਨ੍ਦੋ ਸਞ੍ਞਤਾਨਂ ਨਿਕੇਤਂ ਇਸਿਪਤਨਅਵ੍ਹਂ ਵਨਂ ਉਪਗਨ੍ਤ੍ਵਾ ਤਹਿਂ ਅਕੁਸਲਛੇਦਂ ਧਮ੍ਮਚਕ੍ਕਂ ਪਵਤ੍ਤੋਤਿ ਸਮ੍ਬਨ੍ਧੋ.

ਵਨਮਿਸਿਪਤਨਵ੍ਹਨ੍ਤਿ ਵਨਂ ਇਸਿਪਤਨਅਵ੍ਹਨ੍ਤਿ ਪਦਚ੍ਛੇਦੋ. ਏਤ੍ਥ ਵਨਨ੍ਤਿ ਮਿਗਦਾਯਵਨਂ. ਤਞ੍ਹਿ ਵਿਵੇਕਕਾਮੇਹਿ ਵਨਿਤਬ੍ਬਂ ਸਮ੍ਭਜਿਤਬ੍ਬਂ ਏਤ੍ਥਾਤਿ ਵਨਨ੍ਤਿ ਵੁਚ੍ਚਤਿ. ਵਨਧਾਤੁ ਸਮ੍ਭਤ੍ਤਿਯਂ ਕ੍ਵਿ. ਇਸਿਪਤਨਵ੍ਹਨ੍ਤਿ ਇਸਿਪਤਨਨਾਮਿਕਂ ਇਸੀਨਂ ਪਤਨਟ੍ਠਾਨਤ੍ਤਾ ਇਸਿਪਤਨਨ੍ਤਿ ਵੋਹਰਿਤਬ੍ਬਂ ਵਾ, ਸੀਲਕ੍ਖਨ੍ਧਾਦਿਕੇ ਏਸਨ੍ਤਿ ਗਵੇਸਨ੍ਤੀਤਿ ਇਸਿ, ਪਚ੍ਚੇਕਬੁਦ੍ਧਾਦਯੋ. ਇਸਧਾਤੁ ਗਵੇਸਨੇ ਇਪਚ੍ਚਯੋ. ਤੇ ਪਤਨ੍ਤਿ ਸਨ੍ਨਿਪਤਨ੍ਤਿ ਏਤ੍ਥਾਤਿ ਇਸਿਪਤਨਂ, ਵਨਂ. ਇਸਿਸਦ੍ਦੂਪਪਦਪਤਧਾਤੁ ਗਤਿਯਂ ਯੁ. ਅਥ ਵਾ ਇਸੀਨਂ ਪਤਨਂ ਇਸਿਪਤਨਂ, ਵਨਂ. ਅਵ੍ਹੇਤਬ੍ਬਂ ਵੋਹਰਿਤਬ੍ਬਨ੍ਤਿ ਅਵ੍ਹਂ. ਆਪੁਬ੍ਬਵ੍ਹੇਧਾਤੁ ਅਵ੍ਹਯਨੇ ਕ੍ਵਿ. ਸਂਯੋਗਪਰਤ੍ਤਾ ਆਕਾਰਸ੍ਸ ਰਸ੍ਸਾਦੇਸੋ. ਇਸਿਪਤਨਨ੍ਤਿ ਅਵ੍ਹੇਤਬ੍ਬਨ੍ਤਿ ਇਸਿਪਤਨਵ੍ਹਂ, ਵਨਂ. ਸਞ੍ਞਤਾਨਨ੍ਤਿ ਕਾਯਵਚੀਮਨੋਸਂਯਮਨ੍ਤਾਨਂ ਸਾਧੂਨਂ. ਸਂਯਮਨ੍ਤੀਤਿ ਸਞ੍ਞਤਾ, ਪਚ੍ਚੇਕਬੁਦ੍ਧਾਦਯੋ ਸਾਧੂ. ਸਂਪੁਬ੍ਬਯਮੁਧਾਤੁ ਉਪਰਮੇ ਤ. ਤੇਸਂ ਸਞ੍ਞਤਾਨਂ. ਨਿਕੇਤਨ੍ਤਿ ਵਸਨਟ੍ਠਾਨਂ, ਰਮ੍ਮਣਟ੍ਠਾਨਂ ਵਾ. ਨਿਕਿਤਤਿ ਨਿਵਸਤਿ ਰਮ੍ਮਤਿ ਵਾ ਏਤ੍ਥਾਤਿ ਨਿਕੇਤਂ, ਵਨਂ. ਨਿਪੁਬ੍ਬ ਕਿਤਧਾਤੁ ਨਿਵਾਸੇ ਣ. ਉਪਗਨ੍ਤ੍ਵਾਤਿ ਗਮਿਤ੍ਵਾ. ਤਹਿਨ੍ਤਿ ਤਸ੍ਮਿਂ ਇਸਿਪਤਨਨਾਮਕੇ ਮਿਗਦਾਯਵਨੇ. ਅਕੁਸਲਛੇਦਨ੍ਤਿ ਅਕੁਸਲਸ੍ਸ ਸਮੁਚ੍ਛੇਦਂ. ਅਕੁਸਲਂ ਛਿਨ੍ਦਤਿ ਸਮੁਚ੍ਛਿਨ੍ਦਤਿ ਏਤੇਨ ਸੁਤ੍ਤੇਨਾਤਿ ਅਕੁਸਲਛੇਦਂ, ਧਮ੍ਮਚਕ੍ਕ ਪਵਤ੍ਤਨਸੁਤ੍ਤਂ. ਅਕੁਸਲਸਦ੍ਦੂਪਪਦਛਿਦਿਧਾਤੁ ਦ੍ਵਿਧਾਕਰਣੇ ਣ.

ਧਮ੍ਮਚਕ੍ਕਨ੍ਤਿ ਧਮ੍ਮਚਕ੍ਕਪਵਤ੍ਤਨਸੁਤ੍ਤਂ. ਏਤ੍ਥ ਹਿ ਚਕ੍ਕਸਦ੍ਦੋ ਸਮ੍ਪਤ੍ਤਿਯਂ, ਲਕ੍ਖਣੇ, ਰਥਙ੍ਗੇ, ਇਰਿਯਾਪਥੇ, ਦਾਨੇ, ਰਤਨ ਧਮ੍ਮਖੁਰਚਕ੍ਕਾਦੀਸੁ ਚ ਦਿਸ੍ਸਤਿ. ਚਤ੍ਤਾਰਿਮਾਨਿ ਭਿਕ੍ਖਵੇ ਚਕ੍ਕਾਨਿ, ਯੇਹਿ ਸਮਨ੍ਨਾਗਤਾਨਂ ਦੇਵਮਨੁਸ੍ਸਾਨਨ੍ਤਿਆਦੀਸੁ ਹਿ ਸਮ੍ਪਤ੍ਤਿਯਂ ਦਿਸ੍ਸਤਿ. ਪਾਦਤਲੇਸੁ ਚਕ੍ਕਾਨਿ ਜਾਤਾਨੀਤਿ ਏਤ੍ਥ ਲਕ੍ਖਣੇ. ਚਕ੍ਕਂਵ ਵਹਤੋ ਪਦਨ੍ਤਿ ਏਤ੍ਥ ਰਥਙ੍ਗੇ. ਚਤੁਚਕ੍ਕਂ ਨਵਦ੍ਵਾਰਨ੍ਤਿ ਏਤ੍ਥ ਇਰਿਯਾਪਥੇ. ਦਦਂ ਭੁਞ੍ਜ ਮਾ ਚ ਪਮਾਦੋ ਚਕ੍ਕਂ ਵਤ੍ਤਯ ਸਬ੍ਬਪਾਣੀਨਨ੍ਤਿ ਏਤ੍ਥ ਦਾਨੇ. ਦਿਬ੍ਬਚਕ੍ਕਰਤਨਂ ਪਾਤੁਰਹੋਸੀਤਿ ਏਤ੍ਥ ਰਤਨਚਕ੍ਕੇ. ਮਯਾ ਪਵਤ੍ਤਿਤਂ ਚਕ੍ਕਨ੍ਤਿ ਏਤ੍ਥ ਧਮ੍ਮਚਕ੍ਕੇ. ਇਚ੍ਛਾਹਤਸ੍ਸ ਪੋਸਸ੍ਸ ਚਕ੍ਕਂ ਭਮਤਿ ਮਤ੍ਥਕੇਤਿ ਏਤ੍ਥ ਖੁਰਚਕ੍ਕੇ. ਖੁਰਪਰਿਯਨ੍ਤੇਨ ਚਕ੍ਕੇਨਾਤਿ ਏਤ੍ਥ ਪਹਰਣਚਕ੍ਕੇ. ਅਸਨਿਵਿਚਕ੍ਕਨ੍ਤਿ ਏਤ੍ਥ ਅਸਨਿਮਣ੍ਡਲੇ. ਇਧ ਪਨਾਯਂ ਧਮ੍ਮਚਕ੍ਕੇ ਦਟ੍ਠਬ੍ਬੋ. ਤਞ੍ਹਿ ਸਤਿਪਟ੍ਠਾਨਾਦਿਧਮ੍ਮਂ ਚਕ੍ਕੇਤਿ ਪਵਤ੍ਤੇਤੀਤਿ ਧਮ੍ਮਚਕ੍ਕਨ੍ਤਿ ਵੁਚ੍ਚਤਿ. ਅਰਿਯਸਚ੍ਚਾਦਿਧਮ੍ਮਂ ਵਾ ਚਕ੍ਕੇਤਿ ਪਵਤ੍ਤੇਤੀਤਿ ਚਕ੍ਕਨ੍ਤਿ. ਅਥ ਵਾ ਧਮ੍ਮਤੋ ਅਨਪੇਤਤ੍ਤਾ ਧਮ੍ਮਞ੍ਚ ਤਂ ਆਣਾਚਕ੍ਕਞ੍ਚਾਤਿ ਧਮ੍ਮਚਕ੍ਕਂ. ਧਮ੍ਮੇਨ ਞਾਯੇਨ ਚਕ੍ਕਨ੍ਤਿ ਧਮ੍ਮਚਕ੍ਕਂ, ਤੇਨ ਵੁਤ੍ਤਂ ਪਟਿਸਮ੍ਭਿਦਾਯਂ ‘‘ਧਮ੍ਮਚਕ੍ਕਨ੍ਤਿ ਕੇਨਟ੍ਠੇਨ ਧਮ੍ਮਚਕ੍ਕਂ. ਧਮ੍ਮਞ੍ਚ ਪਵਤ੍ਤੇਤਿ ਚਕ੍ਕਞ੍ਚਾਤਿ ਧਮ੍ਮਚਕ੍ਕਂ, ਚਕ੍ਕਞ੍ਚ ਪਵਤ੍ਤੇਤਿ ਧਮ੍ਮਞ੍ਚਾਤਿ ਧਮ੍ਮਚਕ੍ਕਂ, ਧਮ੍ਮੇਨ ਪਵਤ੍ਤੇਤੀਤਿ ਧਮ੍ਮਚਕ੍ਕਂ, ਧਮ੍ਮਚਰਿਯਾਯ ਪਵਤ੍ਤੇਤੀਤਿ ਧਮ੍ਮਚਕ੍ਕਂ, ਧਮ੍ਮੇ ਠਿਤੋ ਪਵਤ੍ਤੇਤੀਤਿ ਧਮ੍ਮਚਕ੍ਕ’’ਨ੍ਤਿਆਦਿ. ਅਪਿ ਚ ਧਮ੍ਮਚਕ੍ਕਨ੍ਤਿ ਪਟਿਵੇਧਞਾਣਮ੍ਪਿ ਦੇਸਨਾਞਾਣਮ੍ਪਿ. ਤਤ੍ਥ ਪਟਿਵੇਧਞਾਣਂ ਨਾਮ ਯੇਨ ਞਾਣੇਨ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋ ਚਤ੍ਤਾਰਿ ਸਚ੍ਚਾਨਿ ਸੋਲ਼ਸਹਾਕਾਰੇਹਿ ਸਟ੍ਠਿਨਯਸਹਸ੍ਸੇਹਿ ਪਟਿਵਿਜ੍ਝਿ. ਦੇਸਨਾਞਾਣਂ ਨਾਮ ਯੇਨ ਞਾਣੇਨ ਤਿਪਰਿਵਟ੍ਟਂ ਦ੍ਵਾਦਸਾਕਾਰਂ ਧਮ੍ਮਚਕ੍ਕਂ ਪਵਤ੍ਤੇਸਿ. ਉਭਯਮ੍ਪੇਤਂ ਦਸਬਲਸ੍ਸ ਉਰੇ ਜਾਤਞਾਣਮੇਵ. ਤੇਸੁ ਪਨ ਧਮ੍ਮਦੇਸਨਾਞਾਣਂ ਅਧਿਪ੍ਪੇਤਂ. ਸੁਤ੍ਤਂ ਪਨ ਠਾਨੂਪਚਾਰੇਨ ਧਮ੍ਮਚਕ੍ਕਨ੍ਤਿ ਵੁਚ੍ਚਤਿ. ਪਵਤ੍ਤੋਤਿ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਦ੍ਵੇਮੇ ਭਿਕ੍ਖਵੇ ਅਨ੍ਤਾ ਪਬ੍ਬਜਿਤੇਨ ਨ ਸੇਵਿਤਬ੍ਬਾਤਿਆਦਿਨਾ ਅਦੇਸਯਿ.

ਤਮਤੁਲਮਭਿਕਨ੍ਤਨ੍ਤਿ ਤਂ ਅਤੁਲਂ ਅਭਿਕਨ੍ਤਨ੍ਤਿ ਪਦਚ੍ਛੇਦੋ. ਏਤ੍ਥ ਤਨ੍ਤਿ ਮੁਨਿਨ੍ਦਂ. ਅਤੁਲਨ੍ਤਿ ਸੀਲਾਦੀਹਿ ਗੁਣੇਹਿ ਕੇਨਚਿ ਅਸਦਿਸਂ. ਨਤ੍ਥਿ ਤੁਲੋ ਸਦਿਸੋ ਪੁਗ੍ਗਲੋ ਏਤਸ੍ਸਾਤਿ ਅਤੁਲੋ, ਮੁਨਿਨ੍ਦੋ. ਤਸ੍ਸ ਹਿ ਅਪਰਿਮਾਣਾਸੁ ਲੋਕ ਧਾਤੂਸੁ ਸੀਲਾਦੀਹਿ ਗੁਣੇਹਿ ਸਦਿਸੋ ਪੁਗ੍ਗਲੋ ਨਤ੍ਥਿ. ਅਸਦਿਸੇਹਿ ਬੁਦ੍ਧੇਹਿ ਸਮੋਤਿ ਅਤ੍ਥੋ. ਅਭਿਕਨ੍ਤਨ੍ਤਿ ਸਬ੍ਬਦੇਵਮਨੁਸ੍ਸੇਹਿ ਅਤਿਵਿਯ ਕਨ੍ਤਂ ਕਮਨੀਯਂ ਸਰੀਰਵਣ੍ਣਵਨ੍ਤਂ. ਅਤਿਰੇਕਂ ਤੁਸਿਤਬ੍ਬਸਰੀਰਵਣ੍ਣਸਮ੍ਪਨ੍ਨਂ ਵਾ. ਅਭਿਕ੍ਕਨ੍ਤਵਣ੍ਣਨ੍ਤਿ ਹਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਕਕਾਰਲੋਪਞ੍ਚ ਵਣ੍ਣਪਦਲੋਪਂ ਕਤ੍ਵਾ ਵੁਤ੍ਤਸਨ੍ਧਿਵਸੇਨ ਅਭਿਕਨ੍ਤਨ੍ਤਿ ਵੁਤ੍ਤਂ. ਉਤ੍ਤਰਪਦਲੋਪ ਵਸੇਨ ਵਾ. ਮੁਨਿਨ੍ਦਸ੍ਸ ਪਨ ਸਰੀਰਵਣ੍ਣਂ ਸਬ੍ਬਦੇਵਮਨੁਸ੍ਸੇਹਿ ਅਤਿਵਿਯ ਅਤਿਰੇਕਂ ਵਾ ਕਮਿਯਤਿ ਤੋਸਿਯਤੀਤਿ ਅਭਿਕਨ੍ਤਨ੍ਤਿ ਵੁਚ੍ਚਤਿ. ਅਭਿਪੁਬ੍ਬਕਮੁਧਾਤੁ ਇਚ੍ਛਾਕਨ੍ਤੀਸੁ ਤ. ਅਭਿਕਨ੍ਤਂ ਵਣ੍ਣਂ ਸਰੀਰਵਣ੍ਣਂ ਯਸ੍ਸ ਸੋਤਿ ਅਭਿਕਨ੍ਤੋ, ਮੁਨਿਨ੍ਦੋ. ਤਸ੍ਸ ਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਚ ਅਸੀਤ੍ਯਾਨੁਬ੍ਯਞ੍ਜਨ ਲਕ੍ਖਣੇਹਿ ਚ ਛਬ੍ਬਣ੍ਣਰਂਸੀਹਿ ਚ ਸੁਵਣ੍ਣਵਣ੍ਣੇਨ ਚ ਸਮਨ੍ਨਾ ਗਤਤ੍ਤਾ ਸਰੀਰਸੋਭਗ੍ਗਪ੍ਪਤ੍ਤਿਤੋ ਸਬ੍ਬਦੇਵਮਨੁਸ੍ਸੇਹਿ ਅਤਿਵਿਯ ਕਮਨੀਯੋ ਤੁਟ੍ਠੋ ਸਰੀਰਵਣ੍ਣੋ ਅਤ੍ਥੀਤਿ ਅਭਿਕਨ੍ਤਨ੍ਤਿ ਥੋਮੇਤਿ. ਤਂ ਅਭਿਕਨ੍ਤਂ. ਵਨ੍ਦਨੇਯ੍ਯਨ੍ਤਿ ਦੇਵਮਨੁਸ੍ਸਾਨਂ ਵਨ੍ਦਨਾਰਹਂ. ਤੇਹਿ ਵਨ੍ਦਿਤਬ੍ਬਂ ਵਾ, ਵਨ੍ਦਿਯਤੇ ਥੋਮਿਯਤੇ ਵਾ ਵਨ੍ਦਨਂ. ਭਾਵਸਾਧਨੋਯਂ. ਵਨ੍ਦਧਾਤੁ ਵਦਿਧਾਤੁ ਵਾ ਅਭਿਵਾਦਨਥੁਤੀਸੁ ਯੁ. ਤਂ ਅਰਹਤੀਤਿ ਵਨ੍ਦਨੇਯ੍ਯੋ, ਮੁਨਿਨ੍ਦੋ. ਵਨ੍ਦਪਦਂ ਅਰਹਤਿਤਦ੍ਧਿਤੇ ਣੇਯ੍ਯੋ.

ਅਥ ਵਾ ਦੇਵਮਨੁਸ੍ਸੇਹਿ ਵਨ੍ਦਿਤਬ੍ਬਂ ਥੋਮਿਤਬ੍ਬਨ੍ਤਿ ਵਾ ਵਨ੍ਦਨੇਯ੍ਯੋ, ਮੁਨਿਨ੍ਦੋ. ਸੋ ਹਿ ਆਦਿਮਜ੍ਝਪਰਿਯੋਸਾਨ ਗੁਣੇਹਿ ਸਮਨ੍ਨਾਗਤਤ੍ਤਾ ਸਬ੍ਬਦੇਵਮਨੁਸ੍ਸਾਨਂ ਵਨ੍ਦਨਾਰਹੋ ਤੇਹਿ ਵਾ ਵਨ੍ਦਿਤਬ੍ਬੋ ਹੋਤਿ. ਤਤ੍ਥ ਚ ਆਦਿਗੁਣਂ ਨਾਮ ਕਰੁਣਾਨਿਦਾਨਂ ਸੀਲਂ ਪਾਣਾਤਿਪਾਤਾਦਿਵਿਰਤਿਪ੍ਪਵਤ੍ਤਿਤੋ. ਮਜ੍ਝ ਗੁਣਂ ਨਾਮ ਸਮਾਧਿ ਝਾਨਤ੍ਤਯਯੋਗਤੋ. ਪਰਿਯੋਸਾਨਗੁਣਂ ਨਾਮ ਪਞ੍ਞਾ ਤਤੋ ਉਤ੍ਤਰਿ ਕਰਣੀਯਾਭਾਵਤੋਤਿ ਵਿਸੇਸੇਨ ਭਗਵਤੋ ਵਨ੍ਦਨੇਯ੍ਯਨ੍ਤਿ ਥੋਮੇਤਿ. ਅਹਂ ਤੀਹਿ ਦ੍ਵਾਰੇਹਿ ਨਮਾਮਿ ਵਨ੍ਦਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਅਖਿਲਨਿਧਾਨੋ ਸਬ੍ਬ ਲੋਕਿਯਲੋਕੁਤ੍ਤਰਸਙ੍ਖਾਤਾਨਂ ਸੀਲਸਮਾਧਿਪਞ੍ਞਾਦਿਗੁਣ ਸਮੂਹਾਨਂ ਪਤਿਟ੍ਠਾਨੋ ਯੋ ਯਾਦਿਸੋ ਮੁਨਿਨ੍ਦੋ ਪਞ੍ਚਨ੍ਨਂ ਮੁਨੀਨਂ ਇਨ੍ਦੋ ਇਸ੍ਸਰੋ ਭਗਵਾ, ਸਞ੍ਞਤਾਨਂ ਕਾਯਵਚੀਮਨੋਸਂਯ ਮਨ੍ਤਾਨਂ ਸਾਧੂਨਂ, ਨਿਕੇਤਂ ਵਸਨਟ੍ਠਾਨਂ ਰਮ੍ਮਣਟ੍ਠਾਨਂ ਵਾ, ਇਸਿਪਤਨਵ੍ਹਂ ਇਸਿਪਤਨਨਾਮਿਕਂ ਇਸਿਪਤਨਨ੍ਤਿ ਵੋਹਰਿਤਬ੍ਬਂ ਵਾ, ਵਨਂ ਮਿਗਦਾਯਵਨਂ, ਉਪਗਨ੍ਤ੍ਵਾ ਗਮਿਤ੍ਵਾ ਤਹਿਂ ਤਸ੍ਮਿਂ ਇਸਿਪਤਨਨਾਮਕੇ ਮਿਗਦਾਯ ਵਨੇ, ਅਕੁਸਲਸ੍ਸ ਸਮੁਚ੍ਛੇਦਂ, ਧਮ੍ਮਚਕ੍ਕਂ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਂ, ਪਵਤ੍ਤੋ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਅਦੇਸਯਿ, ਅਤੁਲਂ ਸੀਲਾਦੀਹਿ ਗੁਣੇਹਿ ਕੇਨਚਿ ਅਸਦਿਸਂ, ਅਭਿਕਨ੍ਤਂ ਸਬ੍ਬਦੇਵਮਨੁਸ੍ਸੇਹਿ ਅਤਿਵਿਯ ਕਨ੍ਤਂ ਕਮਨੀਯਂ ਤੁਟ੍ਠਿ ਸਰੀਰਵਣ੍ਣਵਨ੍ਤਂ, ਵਨ੍ਦਨੇਯ੍ਯਂ ਦੇਵ ਮਨੁਸ੍ਸਾਨਂ ਵਨ੍ਦਨਾਰਹਂ ਤੇਹਿ ਵਾ ਵਨ੍ਦਿਤਬ੍ਬਂ, ਤਂ ਮੁਨਿਨ੍ਦਂ ਅਹਂ ਤੀਹਿ ਦ੍ਵਾਰੇਹਿ ਨਮਾਮਿ ਵਨ੍ਦਾਮੀਤਿ.

ਸੋਲ਼ਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੭.

ਸੁਚਿਪਰਿਵਾਰਿਤਂ ਸੁਰੁਚਿਰਪ੍ਪਭਾਹਿ ਰਤ੍ਤਂ,

ਸਿਰਿਵਿਸਰਾਲਯਂ ਗੁਪਿਤਮਿਨ੍ਦ੍ਰਿਯੇਹੁਪੇਤਂ;

ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪਚਿਤ੍ਤਂ,

ਸੁਰਨਰਪੂਜਿਤਂ ਸੁਗਤਮਾਦਰਂ ਨਮਾਮਿ.

੧੭. ਏਵਂ ਸੋਲ਼ਸਮਗਾਥਾਯ ਮੁਨਿਨ੍ਦਂ ਵਨ੍ਦਿਤ੍ਵਾ ਇਦਾਨਿ ਸੁਚਿਪਰਿਵਾਰਿਤਨ੍ਤ੍ਯਾਦੀਹਿ ਸਤ੍ਤਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਸੁਚਿਪਰਿਵਾਰਿਤਨ੍ਤ੍ਯਾਦਿਗਾਥਮਾਹ. ਅਯਂ ਪਨ ਨ ਜਭਜਰਗਣੇਹਿ ਚ ਏਕਗਰੁਨਾ ਚ ਰਚਿਤਤ੍ਤਾ ਸੋਲ਼ਸਕ੍ਖਰੇਹਿ ਯੁਤ੍ਤਾਵਾਣਿਨੀਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਨਜਭਜਰਾ ਯਦਾ ਭਵਤਿ ਵਾਣਿਨੀ ਗਯੁਤ੍ਤਾ’’ਤਿ. ਤਸ੍ਸਤ੍ਥੋ. ਯਸ੍ਸਂ ਪਟਿਪਾਦਂ ਨਜਭਜਰਾ ਨਗਣ ਜਗਣ ਭਗਣ ਜਗਣ ਰਗਣਾ ਯਦਾ ਗਯੁਤ੍ਤਾ ਪਾਦਨ੍ਤਗਰੁਨਾ ਸਂਯੋਗਾ ਚੇ ਸਿਯੁਂ, ਤਦਾ ਸਾ ਵੁਤ੍ਤਾ ਵਾਣਿਨੀ ਵਾਣਿਨੀਗਾਥਾ ਨਾਮ ਭਵਤੀਤਿ.

ਤਤ੍ਥ ਸੁਚਿਪਰਿਵਾਰਿਤਨ੍ਤਿ ਰਾਗਾਦਿਮਲਵਿਸੁਦ੍ਧਾਹਿ ਅਰਿਯਸਾਵਕਾਦਿਪਰਿਸਾਹਿ ਪਰਿਕ੍ਖਾਰਿਤਂ ਕਿਲੇਸਮਲਵਿਸੁਦ੍ਧਂ ਪਰਿਕ੍ਖਾਰਵਨ੍ਤਂ ਵਾ. ਰਾਗਾਦਿਮਲੇਹਿ ਸੁਚਤਿ ਸੁਜ੍ਝਤੀਤਿ ਸੁਚਿ, ਪਰਿਸਾ. ਸੁਚਧਾਤੁ ਸੋਚੇਯ੍ਯੇ ਇ. ਪਰਿਸਮਨ੍ਤਤੋ ਅਰਿਯਭਿਕ੍ਖੁਆਦੀਹਿ ਦੇਵ ਮਨੁਸ੍ਸੇਹਿ ਵਾਰਿਯਤਿ ਪਰਿਕ੍ਖਰਿਯਤੀਤਿ ਪਰਿਵਾਰੋ, ਸੁਗਤੋ. ਪਰਿਪੁਬ੍ਬਵਰਧਾਤੁ ਆਵਰਣੇ ਪਰਿਕ੍ਖਾਰੇ ਵਾ ਣ. ਸੁਚੀਹਿ ਪਰਿਸਾਹਿ ਪਰਿਵਾਰਿਤੋ ਸੁਚਿਪਰਿਵਾਰਿਤੋ, ਸੁਗਤੋ. ਤਤਿਯ ਤਪ੍ਪੁਰਿਸਸਮਾਸੋਯਂ. ਭਗਵਤੋ ਹਿ ਸਦਾ ਰਾਗਾਦਿਮਲ ਵਿਸੁਦ੍ਧੇਹਿ ਅਰਿਯਭਿਕ੍ਖੁਆਦੀਹਿ ਚਤੂਹਿ ਪਰਿਸਾਹਿ ਅਟ੍ਠਹਿ ਪਰਿਸਾਹਿ ਵਾ ਪਰਿਵਾਰਿਤੋ ਹੋਤੀਤਿ ਅਧਿਪ੍ਪਾਯੋ. ਅਥ ਵਾ ਸੁਚਿਪਰਿਸੁਦ੍ਧਂ ਪਰਿਵਾਰਿਤਂ ਯਸ੍ਸ ਸੋਤਿ ਸੁਚਿਪਰਿਵਾਰਿਤੋ, ਸੁਗਤੋ. ਸੁਰੁਚਿਰਪ੍ਪਭਾਹੀਤਿ ਸੁਟ੍ਠੁ ਕਨ੍ਤਿਤਸਰੀਰਨਿਕ੍ਖਨ੍ਤ ਬ੍ਯਾਮਮਤ੍ਤਰਂਸੀਹਿ ਕਰਣਭੂਤੇਹਿ ਸੁਟ੍ਠੁ ਰੁਚਿਯਤਿ ਕਮਿਯਤਿ ਤੁਸਿਯਤੀਤਿ ਸੁਰੁਚਿਰਾ, ਰਂਸਿ. ਸੁਪੁਬ੍ਬ ਰੁਚਧਾਤੁ ਰੋਚਨੇ ਇਰੋ. ਪਕਾਰੇਨ ਭਾਤਿ ਦਿਬ੍ਬਤੀਤਿ ਪਭਾ, ਰਂਸਿ. ਪਪੁਬ੍ਬ ਭਾਧਾਤੁ ਦਿਬ੍ਬਨੇ ਕ੍ਵਿ. ਸੁਰੁਚਿਰਾ ਚ ਸਾ ਪਭਾ ਚਾਤਿ ਸੁਰੁਚਿਰਪ੍ਪਭਾ, ਤਾਹਿ ਸੁਰੁਚਿਰਪ੍ਪਭਾਹਿ. ਰਤ੍ਤਨ੍ਤਿ ਨਿਚ੍ਚਂ ਰਞ੍ਜਿਤਬ੍ਬਕਾਯਂ. ਰਞ੍ਜਿਯਤੀਤਿ ਰਤ੍ਤੋ, ਕਾਯੋ. ਰਨ੍ਜਧਾਤੁ ਰਾਗੇ ਤ. ਰਤ੍ਤੋ ਕਾਯੋ ਯਸ੍ਸ ਸੋਤਿ ਰਤ੍ਤੋ, ਸੁਗਤੋ. ਉਤ੍ਤਰਪਦਲੋਪਸਮਾ ਸੋਯਂ. ਰੂਪਸ੍ਸ ਭਵੋ ਰੂਪਂ ਵਿਯ, ਤਂ ਰਤ੍ਤਂ. ਭਗਵਤੋ ਹਿ ਸਰੀਰਤੋ ਨਿਚ੍ਚਂ ਨਿਕ੍ਖਨ੍ਤੇਹਿ ਬ੍ਯਾਮਮਤ੍ਤਰਂਸੀਹਿ ਰਞ੍ਜਿਤਬ੍ਬੋ ਰੂਪਕਾਯੋ ਅਤ੍ਥੀਤਿ ਵੁਤ੍ਤਂ ਹੋਤਿ.

ਸਿਰਿਵਿਸਰਾਲਯਨ੍ਤਿ ਪਞ੍ਞਾਪੁਞ੍ਞਸਙ੍ਖਾਤਲਕ੍ਖਿਸਮੂਹਾਨਂ ਪਤਿਟ੍ਠਾਨਂ. ਏਤ੍ਥ ਚ ਸਿਰੀਤਿ ਪਞ੍ਞਾਪੁਞ੍ਞਾਨਮੇਤਂ ਅਧਿਵਚਨਂ. ਅਥ ਵਾ ਪੁਞ੍ਞਨਿਬ੍ਬਤ੍ਤਾ ਸਰੀਰਸੋਭਗ੍ਗਾਦਿਸਮ੍ਪਤ੍ਤਿ. ਸਾ ਹਿ ਕਤਪੁਞ੍ਞੇ ਸਿਯਤਿ ਨਿਸ੍ਸਯਤਿ, ਕਤਪੁਞ੍ਞੇਹਿ ਵਾ ਸਿਯਤਿ ਨਿਸ੍ਸਿਯਤੀਤਿ ਸਿਰੀਤਿ ਵੁਚ੍ਚਤਿ, ਪਞ੍ਞਾਪੁਞ੍ਞਂ, ਇਸ੍ਸਰਿਯਂ ਵਾ. ਸਰੀਰਸੋਭਗ੍ਗਾਦਿ ਸਮ੍ਪਤ੍ਤਿ ਵਾ ਲਬ੍ਭਤਿ. ਵੁਤ੍ਤਞ੍ਹਿ ਵਿਮਾਨਵਤ੍ਥੁਅਟ੍ਠਕਥਾਦੀਸੁ ‘‘ਸਿਰੀਤਿ ਬੁਦ੍ਧਿਪੁਞ੍ਞਾਨਂ ਅਧਿਵਚਨਨ੍ਤਿ ਚ. ਸਿਰੀਤਿ ਇਸ੍ਸਰਿਯਨ੍ਤਿ ਚ ਸਿਰੀਤਿ ਰੂਪਕਾਯਸਮ੍ਪਤ੍ਤੀ’’ਤਿ ਚ. ਸਿਧਾਤੁ ਸੇਵਾਯਂ, ਰਪਚ੍ਚਯੋ ਚ, ਇਤ੍ਥਿਲਿਙ੍ਗਜੋਤਕਈਪਚ੍ਚਯੋ ਚ. ਸਿਰੀਤਿ ਹਿ ਦੀਘਵਸੇਨ ਵਤ੍ਤਬ੍ਬੇ ਗਾਥਾਬਨ੍ਧਤ੍ਤਾ ਛਨ੍ਦਾਨੁਰਕ੍ਖਣਤ੍ਥਂ ਰਸ੍ਸਵਸੇਨ ਵੁਤ੍ਤਂ. ਵਿਸਰਾਲਯਨ੍ਤਿ ਵਿਸਰਆਲਯਨ੍ਤਿ ਪਦਚ੍ਛੇਦੋ. ਵਿਸਰੋਤਿ ਸਮੂਹੋ. ਵਿਸਨ੍ਤਿ ਪਵਿਸਨ੍ਤਿ ਅਵਯਵਾ ਯਸ੍ਮਿਂ ਸਮੂਹੇਤਿ ਵਿਸਰੋ, ਸਮੂਹੋ. ਵਿਸਧਾਤੁ ਪਵੇਸਨੇ ਅਰਪਚ੍ਚਯੋ. ਅਥ ਵਾ ਵਿਸਰਨ੍ਤਿ ਸਮੋਸਰਨ੍ਤਿ ਅਵਯਵਾ ਯਸ੍ਮਿਨ੍ਤਿ ਵਿਸਰੋ. ਵਿਪੁਬ੍ਬ ਸਰਧਾਤੁ ਸਮੋਸਰਣੇ ਅ. ਪੋਤ੍ਥਕੇਸੁ ਪਨ ਵਿਸਯਾਲ ਯਨ੍ਤਿ ਯਕਾਰੇਨ ਪਾਠੋ ਦਿਸ੍ਸਤਿ. ਨ ਸੋ ਯੁਜ੍ਜਤਿ. ਕਸ੍ਮਾ, ਵਿਸਰਸਦ੍ਦਸ੍ਸੇਵ ਸਮੂਹਵਾਚਕਤ੍ਤਾ. ਵੁਤ੍ਤਞ੍ਹਿ ਅਭਿਧਾਨਪ੍ਪ ਦੀਪਿਕਾਯਂ –

‘‘ਸਮੂਹੋ ਗਣਸਙ੍ਘਾਤਾ,

ਸਮੁਦਾਯੋ ਚ ਸਞ੍ਚਯੋ;

ਸਨ੍ਦੋਹੋ ਨਿਵਹੋ ਓਘੋ,

ਵਿਸਰੋ ਨਿਕਰੋ ਚਯੋ’’ਤ੍ਯਾਦਿ.

ਆਲਯਨ੍ਤਿ ਪਤਿਟ੍ਠਾਨਂ. ਆਲਯਨ੍ਤਿ ਪਤਿਟ੍ਠਨ੍ਤਿ ਏਤ੍ਥਾਤਿ ਆਲਯੋ, ਸੁਗਤੋ. ਆਪੁਬ੍ਬ ਲਿਧਾਤੁ ਅਲ੍ਲਿਯਨੇ ਣ. ਸਿਰੀਨਂ ਪਞ੍ਞਾਸਙ੍ਖਾਤਲਕ੍ਖੀਨਂ ਵਿਸਰੋ ਸਮੂਹੋ ਸਿਰੀਵਿਸਰੋ, ਤੇਸਂ ਆਲਯੋ ਸਿਰੀਵਿਸਰਾਲਯੋ, ਸੁਗਤੋ. ਤਂ ਸਿਰਿਵਿਸਰਾਲਯਂ. ਗੁਪਿਤਮਿਨ੍ਦ੍ਰਿਯੇਹੁਪੇਤਨ੍ਤਿ ਗੋਪਿਤਬ੍ਬੇਹਿ ਸਂਵਰਿਤਬ੍ਬੇਹਿ ਚਕ੍ਖਾਦੀਹਿ ਛਹਿ ਇਨ੍ਦ੍ਰਿਯੇਹਿ ਉਪੇਤਂ ਸਮੁਪੇਤਂ ਸਮਨ੍ਨਾਗਤਂ. ਗੁਪਿਯਨ੍ਤਿ ਰਕ੍ਖਿਯਨ੍ਤੀਤਿ ਗੁਪਿਤਾਨਿ. ਗੁਪਧਾਤੁ ਰਕ੍ਖਨੇ ਤ. ਇਦਨ੍ਤਿ ਸਹਜਾਤਧਮ੍ਮੇ ਇਸ੍ਸਰਿਯਂ ਕਰੋਨ੍ਤੀਤਿ ਇਨ੍ਦ੍ਰਿਯਾਨਿ. ਇਦਿਧਾਤੁ ਪਰਮਿਸ੍ਸਰਿਯੇ ਇਯੋ. ਗੁਪਿਤਾਨਿ ਇਨ੍ਦ੍ਰਿਯਾਨਿ ਗੁਪਿਤਮਿਨ੍ਦ੍ਰਿਯਾਨਿ, ਚਕ੍ਖਾਦਿਇਨ੍ਦ੍ਰਿਯਾਨਿ ਲਬ੍ਭਨ੍ਤਿ. ਤੇਹਿ. ਉਪੇਤਿ ਸਮ੍ਪਜ੍ਜਤੀਤਿ ਉਪੇਤੋ, ਸੁਗਤੋ. ਉਪਪੁਬ੍ਬ ਇਧਾਤੁ ਗਤਿਯਂ ਤ, ਤਂ ਉਪੇਤਂ. ਕਿਞ੍ਚਾਪਿ ਬੁਦ੍ਧਤੋ ਅਞ੍ਞੇਹਿ ਅਰਿਯਸਾਵਕਾਦੀਹਿ ਪੁਗ੍ਗਲੇਹਿ ਚਕ੍ਖਾਦਿਇਨ੍ਦ੍ਰਿਯਾਨਿ ਰਕ੍ਖਿਤਾਨਿ. ਬੁਦ੍ਧੋਯੇਵ ਪਨ ਬੋਧਿਪਲ੍ਲਙ੍ਕੇ ਸਹ ਵਾਸਨਾਯ ਸਬ੍ਬ ਕਿਲੇਸਾਨਂ ਅਰਹਤ੍ਤਮਗ੍ਗੇਨ ਵਿਦ੍ਧਂਸਿਤਤ੍ਤਾ ਵਿਸਿਟ੍ਠੇਨ ਚਕ੍ਖਾਦਿ ਇਨ੍ਦ੍ਰਿਯਂ ਰਕ੍ਖਿਤੋ ਹੋਤੀਤਿ ਤਸ੍ਸ ਗੁਪਿਤਮਿਨ੍ਦ੍ਰਿਯੇਹੁਪੇਤਨ੍ਤਿ ਥੋਮੇਤਿ.

ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪਚਿਤ੍ਤਨ੍ਤਿ ਸੂਰਿਯਮਣ੍ਡਲ ਚਨ੍ਦਮਣ੍ਡਲਾਦੀਹਿ ਪਾਦਚਕ੍ਕਲਕ੍ਖਣੇਹਿ ਅਭਿਵਿਚਿਤ੍ਰਪਾਦਂ. ਉਪਸਦ੍ਦੋ ਚੇਤ੍ਥ ਭੁਸਟ੍ਠਵਾਚਕੋ. ਅਭਿਵਿਚਿਤ੍ਰਂ ਸੂਰਿਯਮਣ੍ਡਲ ਚਨ੍ਦਮਣ੍ਡਲਾਦਿਂ ਪਾਦਚਕ੍ਕਲਕ੍ਖਣਵਨ੍ਤਂ ਵਾ. ਏਤ੍ਥ ਚ ਰਵੀਤਿ ਸੂਰਿਯੋ, ਸੋ ਹਿ ਰਵਤਿ ਸੀਘਂ ਗਚ੍ਛਤੀਤਿ ਰਵੀਤਿ ਵੁਚ੍ਚਤਿ. ਰੁਧਾਤੁ ਗਤਿਯਂ ਣਿ. ਵੁਤ੍ਤਞ੍ਹਿ ਪਾਥੇਯ੍ਯਟ੍ਠਕਥਾਯਂ ‘‘ਚਨ੍ਦੋ ਉਜੁਕਂ ਸਣਿਕਂ ਗਚ੍ਛਤਿ, ਸੂਰਿਯਸ੍ਸ ਪਨ ਉਜੁਕਂ ਗਮਨਂ ਸੀਘ’’ਨ੍ਤਿ. ਣ੍ਵਾਦਿ ਮੋਗ੍ਗਲ੍ਲਾਨੇ ਪਨ ‘‘ਰੁਸਦ੍ਦੇ ਇ. ਓ ਅਵਾਦੇਸੋ. ਰਵਤਿ ਗਜ੍ਜਤੀਤਿ ਰਵਿ. ਆਦਿਚ੍ਚੋ’’ਤਿ ਵੁਤ੍ਤਂ. ਅਭਿਧਾਨ ਟੀਕਾਯਞ੍ਚ ‘‘ਰਵਨ੍ਤਿ ਏਤੇਨ ਸਤ੍ਤਾ ਪਭਾਵਿਤਤ੍ਤਾਤਿ ਰਵੀ’’ਤਿ ਵੁਤ੍ਤਂ. ਸਸੀਤਿ ਚਨ੍ਦੋ. ਸੋ ਹਿ ਸਸਤਿ ਤਿਣੇਨ ਪਾਣਤਿ ਜੀਵਤੀਤਿ ਸਸੋ, ਸਸਪਣ੍ਡਿਤੋ. ਸਸਧਾਤੁ ਪਾਣੇ ਅ. ਸਸਰੂਪਲਕ੍ਖਣਮੇਤ੍ਥ ਅਤ੍ਥੀਤਿ ਸਸੀਤਿ ਵੁਚ੍ਚਤਿ. ਅਤੀਤੇ ਹਿ ਸਸਰਾਜਾ ਬ੍ਰਾਹ੍ਮਣਵੇਸੇਨ ਆਗਨ੍ਤ੍ਵਾ ਯਾਚਕਸ੍ਸ ਸਕ੍ਕਰਞ੍ਞੋ ਅਙ੍ਗਾਰਰਾਸਿਮ੍ਹਿ ਲਙ੍ਘਿਤ੍ਵਾ ਜੀਵਿਤਂ ਪਰਿਚ੍ਚਜਿਤ੍ਵਾ ਕਾਯਂ ਅਦਾਸਿ. ਅਥ ਪਨ ਸਕ੍ਕੋ ਰਾਜਾ ਤਸ੍ਸ ਸਸਪਣ੍ਡਿਤਸ੍ਸ ਜੀਵਿਤਪਰਿਚ੍ਚਜਿਤਸ੍ਸ ਜੀਵਿਤਦਾਨਗੁਣੋ ਸਕਲਕਪ੍ਪਂ ਪਾਕਟੋ ਹੋਤੂਤਿ ਪਬ੍ਬਤਂ ਪੀਲ਼ੇਤ੍ਵਾ ਪਬ੍ਬਤਰਸਂ ਆਦਾਯ ਚਨ੍ਦਮਣ੍ਡਲੇ ਸਸਰੂਪਲਕ੍ਖਣਂ ਲਿਖਿਤ੍ਵਾ ਠਪੇਸਿ. ਤਸ੍ਮਾ ਚਨ੍ਦੋ ਸਸੀਤਿ ਲੋਕੇਹਿ ਵੋਹਰਿਯਤਿ. ਤਸ੍ਸ ਪਨ ਵਿਤ੍ਥਾਰੋ ਸਸਪਣ੍ਡਿਤਜਾਤਕੇ ਪਸ੍ਸਿਤ੍ਵਾ ਗਹੇਤਬ੍ਬੋ.

ਅਥ ਵਾ ਸਸਤਿ ਹਿਂਸਤਿ ਉਣ੍ਹਗੁਣਨ੍ਤਿ ਸਸੀਤਿ ਵੁਚ੍ਚਤਿ. ਸਸੁਧਾਤੁ ਹਿਂਸਾਯਂ ਈਪਚ੍ਚਯੋ. ਮਣ੍ਡਿਯਤਿ ਵਿਭੂਸਿਯਤਿ ਪਰਿਚ੍ਛੇਦਕਰਣਵਸੇਨਾਤਿ ਮਣ੍ਡਲਂ. ਮਣ੍ਡਧਾਤੁ ਮਡਿਧਾਤੁ ਵਾ ਵਿਭੂਸਨੇ ਅਲੋ. ਅਥ ਵਾ ਮਣ੍ਡਂ ਵਿਭੂਸਨਂ ਪਰਿਸਮਨ੍ਤਤੋ ਲਾਤਿ ਗਣ੍ਹਾਤੀਤਿ ਮਣ੍ਡਲਂ. ਮਣ੍ਡਸਦ੍ਦੂਪਪਦ ਲਾਧਾਤੁ ਗਹਣੇ ਕ੍ਵਿ. ਰਵਿਨੋ ਮਣ੍ਡਲਂ ਰਵਿਮਣ੍ਡਲਂ, ਸਸਿਨੋ ਮਣ੍ਡਲਂ ਸਸਿਮਣ੍ਡਲਂ, ਰਵਿਮਣ੍ਡਲਞ੍ਚ ਸਸਿਮਣ੍ਡਲਞ੍ਚ ਰਵਿਸਸਿਮਣ੍ਡਲਂ, ਮਣ੍ਡਲਸਦ੍ਦੋ ਰਵਿਸਦ੍ਦੇਪਿ ਯੋਜੇਤਬ੍ਬੋ. ਮਣ੍ਡਲਸਦ੍ਦਸ੍ਸ ਦ੍ਵਨ੍ਦਪਦਤੋ ਸੁਯ੍ਯਮਾਨਤ੍ਤਾ. ਪਭੁਤੀਤਿਆਦਿ. ਸੋ ਹਿ ਆਦ੍ਯਤ੍ਥਵਾਚਕੋ ਅਬ੍ਯਯਨਿਪਾਤੋ. ਰਵਿਸਸਿਮਣ੍ਡਲਂ ਪਭੁਤਿਆਦਿ ਯਸ੍ਸਾਤਿ ਰਵਿਸਸਿਮਣ੍ਡਲਪ੍ਪਭੁਤਿ, ਪਾਦਚਕ੍ਕਲਕ੍ਖਣਂ ਲਬ੍ਭਤਿ. ਲਕ੍ਖਿਯਤਿ ਲਕ੍ਖਿਤਬ੍ਬਂ ਏਤੇਨਾਤਿ ਲਕ੍ਖਣਂ, ਪਾਦਪ੍ਪ ਵਤ੍ਤਚਕ੍ਕਲਕ੍ਖਣਂ, ਰਵਿਸਸਿਮਣ੍ਡਲਪ੍ਪਭੁਤਿ ਚ ਤਂ ਲਕ੍ਖਣਞ੍ਚਾਤਿ ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣਂ, ਤੇਨ ਉਪਚਿਤ੍ਤਂ ਅਤਿਵਿਚਿਤ੍ਰਂ ਪਾਦਂ ਯਸ੍ਸ ਸੋਤਿ ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪ ਚਿਤ੍ਤੋ, ਸੁਗਤੋ. ਅਥ ਵਾ ਉਪਚਿਤ੍ਤਂ ਅਤਿਵਿਚਿਤ੍ਰਂ ਰਵਿਸਸਿ ਮਣ੍ਡਲਪ੍ਪਭੁਤਿਲਕ੍ਖਣਂ ਪਾਦਚਕ੍ਕਲਕ੍ਖਣਂ ਅਸ੍ਸਾਤਿ ਤਥਾ, ਸੁਗਤੋ. ਤਂ.

ਸੁਰਨਰਪੂਜਿਤਨ੍ਤਿ ਦੇਵਮਨੁਸ੍ਸੇਹਿ ਪੂਜਿਤਬ੍ਬਂ. ਸੁਰਨ੍ਤਿ ਇਸ੍ਸਰਿਯ ਕੀਲ਼ਾਦੀਹਿ ਦਿਬ੍ਬਨ੍ਤੀਤਿ ਸੁਰਾ, ਦੇਵਾ. ਸੁਰਧਾਤੁ ਦਿਬ੍ਬਨੇ ਅ. ਅਥ ਵਾ ਸੁਰਤਿ ਇਸਤਿ ਦੇਵਿਸ੍ਸਰਿਯਂ ਪਾਪੁਣਾਤਿ ਵਿਰੋਚਤਿ ਚਾਤਿ ਸੁਰਾ, ਦੇਵਾ. ਸੁਰਧਾਤੁ ਇਸ੍ਸਰਿਯਦਿਤ੍ਤੀਸੁ ਅ. ਸੁਨ੍ਦਰਾ ਰਾਵਾਚਾ ਏਤੇਸਨ੍ਤਿ ਵਾ ਸੁਰਾ, ਦੇਵਾ. ਖਨ੍ਧਸਨ੍ਤਾਨਂ ਸਕਕਮ੍ਮਂ ਵਾ ਨਰਨ੍ਤਿ ਨਿਯਨ੍ਤੀਤਿ ਨਰਾ, ਮਨੁਸ੍ਸਾ. ਨਰਧਾਤੁ ਨਯਨੇ ਅ. ਸੁਰਾ ਚ ਨਰਾ ਚ ਸੁਰਨਰਾ, ਤੇਹਿ ਪੂਜਿਤਬ੍ਬੋਤਿ ਸੁਰਨਰ ਪੂਜਿਤੋ, ਸੁਗਤੋ. ਤਂ. ਸੁਗਤਨ੍ਤਿ ਬੁਦ੍ਧਂ. ਸੋ ਹਿ ਸੋਭਨਂ ਗਤਂ ਗਮਨਂ ਏਤਸ੍ਸਾਤਿ ਸੁਗਤੋਤਿ ਵੁਚ੍ਚਤਿ. ਭਗਵਤੋ ਹਿ ਵੇਨੇਯ੍ਯਜਨੂਪਸਙ੍ਕਮਨਂ ਏਕਨ੍ਤੇਨ ਤੇਸਂ ਹਿਤਸੁਖਨਿਪ੍ਫਾਦਨਤੋ ਸੋਭਨਂ. ਤਥਾ ਲਕ੍ਖਣਾਨੁਬ੍ਯਞ੍ਜਨਪ੍ਪਟਿ ਮਣ੍ਡਿਤਰੂਪਕਾਯਤਾਯ ਦੁਤਵਿਲਮ੍ਬਿਤਖਲਿਤਾਨੁਕਡ੍ਢਨਨਿਪ੍ਪਿਲ਼ਿਨੁਕ੍ਕੁਟਿਕ ਕੁਟਿਲਾਕੁਟਿਲਤਾਦਿ ਦੋਸਰਹਿਤ ਮਵਹਸਿਤ ਰਾਜਹਂਸਉਸਭ ਵਾਰਣ ਮਿਗਰਾਜਗਮਨਂ ਕਾਯਗਮਨਂ. ਞਾਣਗਮਨਞ੍ਚ ਵਿਪੁਲ ਨਿਮ੍ਮਲ ਕਰੁਣਾ ਸਤਿ ਵੀਰਿਯਾਦਿ ਗੁਣਵਿਸੇਸ ਸਹਿਤ ਅਭਿਨੀਹਾਰਤੋ ਯਾਵ ਮਹਾਬੋਧਿ ਅਨਵਜ੍ਜਤਾਯ ਸੋਭਨਮੇਵਾਤਿ.

ਅਥ ਵਾ ਸਯਮ੍ਭੂਞਾਣੇਨ ਸਕਲਮ੍ਪਿ ਲੋਕਂ ਪਰਿਞ੍ਞਾਭਿ ਸਮਯਵਸੇਨ ਪਰਿਜਾਨਨ੍ਤੋ ਞਾਣੇਨ ਸਮ੍ਮਾ ਗਤੋ ਅਵਗਤੋਤਿ ਸੁਗਤੋ, ਤਥਾ ਲੋਕਸਮੁਦਯਂ ਪਹਾਨਾਤਿਸਮਯਵਸੇਨ ਪਜਹਨ੍ਤੋ ਅਨੁਪ੍ਪਤ੍ਤਿਧਮ੍ਮਤਂ ਆਪਾਦੇਨ੍ਤੋ ਸਮ੍ਮਾ ਗਤੋ ਅਵਗਤੋਤਿ ਸੁਗਤੋ, ਲੋਕਨਿਰੋਧਂ ਨਿਬ੍ਬਾਨਂ ਸਚ੍ਛਿਕਿਰਿਯਾਭਿਸਮਯਵਸੇਨ ਸਮ੍ਮਾ ਗਤੋ ਅਵਗਤੋਤਿ ਸੁਗਤੋ, ਲੋਕਨਿਰੋਧਗਾਮਿਨਿਪ੍ਪਟਿਪਦਂ ਭਾਵਨਾਭਿ ਸਮਯਵਸੇਨ ਸਮ੍ਮਾ ਗਤੋ ਪਟਿਪਨ੍ਨੋਤਿ ਸੁਗਤੋ, ਸੋਤਾਪਤ੍ਤਿਮਗ੍ਗੇਨ ਯੇ ਕਿਲੇਸਾ ਪਹੀਨਾ, ਤੇ ਕਿਲੇਸੇ ਨ ਪੁਨੇਤਿ ਨ ਪਚ੍ਚੇਤਿ ਨ ਪਚ੍ਚਾਗਚ੍ਛਤੀਤਿ ਸੁਗਤੋਤਿਆਦਿਨਾ ਨਯੇਨ ਅਯਮਤ੍ਥੋ ਵਿਭਾਵੇਤਬ੍ਬੋ. ਅਥ ਵਾ ਸੁਨ੍ਦਰਂ ਠਾਨਂ ਸਮ੍ਮਾਸਮ੍ਬੋਧਿਂ ਨਿਬ੍ਬਾਨਮੇਵ ਵਾ ਗਤੋ ਅਧਿਗਤੋਤਿ ਸੁਗਤੋ. ਯਸ੍ਮਾ ਵਾ ਭੂਤਂ ਤਚ੍ਛਂ ਅਤ੍ਥਸਂਹਿਤਂ ਵੇਨੇਯ੍ਯਾਨਂ ਯਥਾਰਹਂ ਯੁਤ੍ਤਮੇਵ ਚ ਧਮ੍ਮਂ ਭਾਸਤਿ, ਤਸ੍ਮਾ ਸਮ੍ਮਾ ਗਦਤੀਤਿ ਸੁਗਤੋ ਦਕਾਰਸ੍ਸ ਤਕਾਰਂ ਕਤ੍ਵਾ. ਇਤਿ ਸੋਭਨ ਗਮਨਤਾਦੀਹਿ ਸੁਗਤੋ, ਤਂ ਸੁਗਤਂ. ਆਦਰਨ੍ਤਿ ਸਕ੍ਕਚ੍ਚਂ, ਆਦਰਨਂ ਆਦਰੋ. ਆਪੁਬ੍ਬ ਦਰਧਾਤੁ ਆਦਰੇ ਣ. ਤਂ ਆਦਰਂ. ਨਮਾਮੀਤਿ ਅਹਂ ਵਨ੍ਦਾਮੀਤਿ ਅਤ੍ਥੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸੁਚਿਪਰਿਵਾਰਿਤਂ ਰਾਗਾਦਿਮਲ ਵਿਸੁਦ੍ਧਾਹਿ ਅਰਿਯਸਾਵਕਾਦਿਪਰਿਸਾਹਿ ਪਰਿਕ੍ਖਾਰਿਤਂ ਕਿਲੇਸਮਲਵਿਸੁਦ੍ਧਂ ਪਰਿਕ੍ਖਾਰਵਨ੍ਤਂ ਵਾ, ਸੁਰੁਚਿਰਪ੍ਪਭਾਹਿ ਸੁਟ੍ਠੁ ਕਨ੍ਤਿਤ ਸਰੀਰਨਿਕ੍ਖਨ੍ਤਬ੍ਯਾਮਮਤ੍ਤਰਂਸੀਹਿ ਕਰਣਭੂਤੇਹਿ, ਰਤ੍ਤਂ ਨਿਚ੍ਚਂ ਰਞ੍ਜਿਤਬ੍ਬਕਾਯਂ, ਸਿਰਿਵਿਸਰਾਲਯਂ ਪਞ੍ਞਾਪੁਞ੍ਞਸਙ੍ਖਾਤਲਕ੍ਖਿਸ ਮੂਹਾਨਂ ਪਤਿਟ੍ਠਾਨਂ, ਗੁਪਿਤਮਿਨ੍ਦ੍ਰਿਯੇਹਿ ਗੁਪਿਤਬ੍ਬੇਹਿ ਸਂਵਰਿਤਬ੍ਬੇਹਿ ਛਹਿ ਚਕ੍ਖਾਦਿਇਨ੍ਦ੍ਰਿਯੇਹਿ, ਉਪੇਤਂ ਸਮੁਪੇਤਂ ਸਮਨ੍ਨਾਗਤਂ, ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪਚਿਤ੍ਤਂ ਸੂਰਿਯਮਣ੍ਡਲਚਨ੍ਦਮਣ੍ਡਲਾਦੀਹਿ ਪਾਦਚਕ੍ਕਲਕ੍ਖਣੇਹਿ ਅਭਿਵਿਚਿਤ੍ਰਪਾਦਂ, ਅਭਿਵਿਚਿਤ੍ਰਂ ਸੂਰਿਯ ਮਣ੍ਡਲਚਨ੍ਦਮਣ੍ਡਲਾਦਿਂ ਪਾਦਚਕ੍ਕਲਕ੍ਖਣਵਨ੍ਤਂ ਵਾ, ਸੁਰਨਰਪੂਜਿਤਂ ਦੇਵਮਨੁਸ੍ਸੇਹਿ ਪੂਜਿਤਬ੍ਬਂ, ਸੁਗਤਂ ਬੁਦ੍ਧਂ ਆਦਰਂ ਸਕ੍ਕਚ੍ਚਂ ਅਹਂ ਨਮਾਮਿ ਵਨ੍ਦਾਮੀਤਿ.

ਸਤ੍ਤਰਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੮.

ਮਗ੍ਗੋਲ਼ੁਮ੍ਪੇਨ ਮੁਹਪਟਿਘਾਸਾਦਿਉਲ੍ਲੋਲਵੀਚਿਂ,

ਸਂਸਾਰੋਘਂ ਤਰਿ ਤਮਭਯਂ ਪਾਰਪਤ੍ਤਂ ਪਜਾਨਂ;

ਤਾਣਂ ਲੇਣਂ ਅਸਮਸਰਣਂ ਏਕਤਿਤ੍ਥਂ ਪਤਿਟ੍ਠਂ,

ਪੁਞ੍ਞਕ੍ਖੇਤ੍ਤਂ ਪਰਮਸੁਖਦਂ ਧਮ੍ਮਰਾਜਂ ਨਮਾਮਿ.

੧੮. ਏਵਂ ਸਤ੍ਤਰਸਮਗਾਥਾਯ ਸੁਗਤਂ ਵਨ੍ਦਿਤ੍ਵਾ ਇਦਾਨਿ ਸਂਸਾਰੋਘਂ ਤਰਿਤਾਦੀਹਿ ਨਵਹਿ ਗੁਣੇਹਿ ਥੋਮਿਤ੍ਵਾ ਵਨ੍ਦਿਤੁਕਾਮੋ ਮਗ੍ਗੋਲ਼ੁਮ੍ਪੇਨਤ੍ਯਾਦਿਗਾਥਮਾਹ. ਅਯਂ ਪਨ ਮ ਭ ਨ ਤ ਤ ਗਣੇਹਿ ਚ ਗਰੁਦ੍ਵਯੇਨ ਚ ਰਚਿਤਤ੍ਤਾ ਸਤ੍ਤਰਸਕ੍ਖਰੇਹਿ ਯੁਤ੍ਤਾ ਮਨ੍ਦਕ੍ਕਨ੍ਤਾਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਮਨ੍ਦਕ੍ਕਨ੍ਤਾ ਮ ਭ ਨ ਤਤ ਗਾ ਗੋ ਯੁਗੁਤ੍ਵਸ੍ਸ ਕੇਹੀ’’ਤਿ. ਤਸ੍ਸਾ ਪਨਾਯਮਤ੍ਥੋ. ਯਸ੍ਸਂ ਪਟਿਪਾਦਂ ਯੁਗੁਤ੍ਵਸ੍ਸਕੇਹਿ ਚਤੁ ਛ ਸਤ੍ਤਯਤੀਹਿ ਮ ਭ ਨ ਤ ਤ ਗਾ ਮਗਣ ਭਗਣ ਨਗਣ ਤਗਣ ਤਗਣ ਗਰੂ ਚ ਗੋ ਗਰੁ ਚ ਚੇ ਯੁਤ੍ਤਾ, ਮਨ੍ਦਕ੍ਕਨ੍ਤਾਗਾਥਾਨਾਮਾਤਿ. ਯੁਗੁਤ੍ਵਸ੍ਸਕੇਹੀਤਿ ਏਤ੍ਥ ਚ ਯੁਗਸਦ੍ਦਸ੍ਸ ਮਗ੍ਗਫਲਚਤੁਬ੍ਬਿਧਪੁਰਿਸਯੁਗਲ਼ਵਾਚਕਤ੍ਤਾ ਯੁਗਸਦ੍ਦੋ ਚਤੁਸਙ੍ਖ੍ਯਾਵਾਚਕੋ, ਉਤੂਨਂ ਹੇਮਨ੍ਤਸਿਸਿਰ ਵਸ੍ਸਨ੍ਤ ਗਿਮ੍ਹ ਵਸ੍ਸਾਨ ਸਰਦ ਉਤੁਵਸੇਨ ਛਬ੍ਬਿਧਤ੍ਤਾ ਉਤੁਸਦ੍ਦੋ ਛਸਙ੍ਖ੍ਯਾਵਾਚਕੋ. ਅਸ੍ਸਸਦ੍ਦੋ ਸਤ੍ਤਸਙ੍ਖ੍ਯਾਵਾਚਕੋਤਿ ਵੇਦਿਤਬ੍ਬੋ. ਛਪ੍ਪਚ੍ਚਯਟੀਕਾਦੀਸੁ ਹਿ ‘‘ਅਸ੍ਸਸਦ੍ਦਸ੍ਸ ਸਤ੍ਤਸਙ੍ਖ੍ਯਾਵਾਚਕਭਾਵੋ ਵੁਤ੍ਤੋ’’ਤਿ.

ਤਤ੍ਥ ਪਨ ਯੋ ਧਮ੍ਮਰਾਜਾ ਮੁਹਪਟਿਘਾਸਾਦਿਉਲ੍ਲੋਲਵੀਚਿਂ ਸਂਸਾਰੋਘਂ ਮਗ੍ਗੋਲ਼ੁਮ੍ਪੇਨ ਤਰਿ, ਅਭਯਂ ਪਾਰਪਤ੍ਤਂ ਪਜਾਨਂ ਤਾਣਂ ਲੇਣਂ ਅਸਮਸਰਣਂ ਏਕਤਿਤ੍ਥਂ ਪਤਿਟ੍ਠਂ ਪੁਞ੍ਞਕ੍ਖੇਤ੍ਤਂ ਪਰਮਸੁਖਦਂ ਤਂ ਧਮ੍ਮਰਾਜਂ ਅਹਂ ਨਮਾਮੀਤਿ ਸਮ੍ਬਨ੍ਧੋ. ਏਤਿਸ੍ਸਂ ਪਨ ਅਤ੍ਥਕ੍ਕਮੇਨ ਵਣ੍ਣਯਿਸ੍ਸਾਮਿ. ਮੁਹਪਟਿਘਾਸਾਦਿ ਉਲ੍ਲੋਲਵੀਚਿਨ੍ਤਿ ਮੋਹਦੋਸਤਣ੍ਹਾਦਿਸਙ੍ਖਾਤਂ ਮਹਾਤਰਙ੍ਗ ਖੁਦ੍ਦਊਮਿਕਂ. ਮੁਯ੍ਹਨ੍ਤਿ ਏਤੇਨ ਸਮ੍ਪਯੁਤ੍ਤਧਮ੍ਮਾ, ਸਯਂ ਵਾ ਮੁਯ੍ਹਤਿ, ਮੁਯ੍ਹਨਮਤ੍ਤਮੇਵੇਤਨ੍ਤਿ ਮੁਹੋ, ਮੋਹੋ. ਮੁਹਧਾਤੁ ਵੇਖਿਤ੍ਤੇ ਣ. ਪਟਿਹਞ੍ਞਨ੍ਤਿ ਸਮ੍ਪਯੁਤ੍ਤਧਮ੍ਮਾ, ਸਯਂ ਵਾ ਪਟਿਹਞ੍ਞਤਿ ਪਟਿਹਞ੍ਞਨਮਤ੍ਤਮੇਵੇਤਨ੍ਤਿ ਪਟਿਘੋ, ਦੋਸੋ. ਪਟਿਪੁਬ੍ਬ ਹਨਧਾਤੁ ਹਿਂਸਾਗਤੀਸੁ ਅ. ਹਨਸ੍ਸ ਘੋ. ਅਸਨਂ ਇਚ੍ਛਨਂ ਆਸਾ, ਇਸਤਿ ਇਚ੍ਛਤੀਤਿ ਵਾ ਆਸਾ, ਤਣ੍ਹਾ. ਇਸੁਧਾਤੁ ਇਚ੍ਛਾਯਂ ਅ. ਇਸ੍ਸ ਆ. ਮੁਹੋ ਚ ਪਟਿਘੋ ਚ ਆਸਾ ਚ ਮੁਹਪਟਿਘਾਸਾ, ਤੇ ਆਦਿ ਯੇਸਨ੍ਤੇਤਿ ਮੁਹਪਟਿਘਾਸਾਦਿ, ਲੋਭਾਦਿਕਿਲੇਸਾ ਲਬ੍ਭਨ੍ਤਿ. ਏਤ੍ਥ ਚ ਆਦਿਸਦ੍ਦੇਨ ਮਾਨ ਦਿਟ੍ਠਿ ਵਿਚਿਕਿਚ੍ਛਾ ਥਿਨ ਉਦ੍ਧਚ੍ਚ ਅਹਿਰਿਕ ਅਨੋਤ੍ਤਪ੍ਪਕਿਲੇਸੇ ਚ ਅਕੁਸਲਚਿਤ੍ਤੁਪ੍ਪਾਦੇ ਚ ਸਙ੍ਗਣ੍ਹਾਤਿ. ਉਦ੍ਧਂ ਉਦਕਂ ਲੋਲਤਿ ਆਕੁਲੇਤੀਤਿ ਉਲ੍ਲੋਲੋ, ਮਹਾਤਰਙ੍ਗੋ. ਉਪੁਬ੍ਬਲੋਲ ਧਾਤੁ ਉਮ੍ਮਾਦਨੇ ਣ. ਤੀਰਂ ਉਲਤਿ ਗਚ੍ਛਤੀਤਿ ਵਾ ਉਲ੍ਲੋਲੋ. ਉਲਧਾਤੁ ਗਤਿਯਂ ਓਲਪਚ੍ਚਯੋ. ਵਿਮ੍ਹਯਂ ਵਿਚਿਤ੍ਤਂ ਚਿਨੋਤੀਤਿ ਵੀਚਿ, ਖੁਦ੍ਦਕਊਮਿ. ਵਿਪੁਬ੍ਬ ਚਿਧਾਤੁ ਚਯੇ ਕ੍ਵਿ. ਉਲ੍ਲੋਲੋ ਚ ਵੀਚਿ ਚ ਉਲ੍ਲੋਲਵੀਚਿ. ਕੇਸੁਚਿ ਪੋਤ੍ਥਕੇਸੁ ਚ ਕੁਲ੍ਲੋਲਵੀਚਿਨ੍ਤਿਪਾਠੋ ਦਿਸ੍ਸਤਿ. ਨ ਸੋ ਯੁਜ੍ਜਤਿ, ਕਸ੍ਮਾ, ਕੁਲ੍ਲਸਦ੍ਦਸ੍ਸ ਉਲ਼ੁਮ੍ਪਤ੍ਥਵਾਚਕਤ੍ਤਾ. ਉਲ੍ਲੋਲਸਦ੍ਦੋਯੇਵ ਹਿ ਮਹਾਤਰਙ੍ਗਤ੍ਥ ਵਾਚਕੋ ਹੋਤੀਤਿ. ਵੁਤ੍ਤਞ੍ਹਿ ਅਭਿਧਾਨਪ੍ਪਦੀਪਿਕਾਯਂ ‘‘ਉਲ੍ਲੋਲੋ ਤੁ ਚ ਕਲ੍ਲੋਲੋ, ਮਹਾਵੀਚਿਸੁ ਕਥ੍ਯਤੇ’’ਤਿ.

ਮੂਲਪਣ੍ਣਾਸਟ੍ਠਕਥਾਯਞ੍ਚ ‘‘ਕੁਲ੍ਲੋ ਨਾਮ ਤਰਣਤ੍ਥਾਯ ਕਲਾਪਂ ਕਤ੍ਵਾ ਬਨ੍ਧੋ. ਪਤ੍ਥਰਿਤ੍ਵਾ ਬਦ੍ਧਾ ਪਨ ਪਦਰਚਾਟਿ ਆਦਯੋ ਉਲ਼ੁਮ੍ਪੋ’’ਤਿ ਵੁਤ੍ਤੋ. ਮੁਹਪਟਿਘਾਸਾਦਿਏਵ ਉਲ੍ਲੋਲਵੀਚਿ. ਸਾ ਅਸ੍ਮਿਂ ਸਂਸਾਰੋਘੇ ਅਤ੍ਥੀਤਿ ਮੁਹਪਟਿਘਾਸਾਦਿਉਲ੍ਲੋਲਵੀਚਿ. ਸਮਾਸਨ੍ਤਤਦ੍ਧਿਤਾਯਂ. ਪੀਤਿਸੁਖਂ, ਮਹਾਸਨ੍ਨਂ, ਰਤ੍ਤਿਦਿਵਨ੍ਤ੍ਯਾਦੀਸੁ ਵਿਯ. ਏਵਂ ਪਨੇਤ੍ਥ ਵਚਨਤ੍ਥੋ ਕਾਤਬ੍ਬੋ. ਪੀਤਿ ਚ ਸੁਖਞ੍ਚ ਪੀਤਿਸੁਖਂ, ਤਂ ਅਸ੍ਸ ਝਾਨਸ੍ਸ ਅਤ੍ਥਿ, ਤਸ੍ਮਿਂ ਵਾ ਵਿਜ੍ਜਤੀਤਿ ਪੀਤਿਸੁਖਂ, ਝਾਨਂ. ਮਹਨ੍ਤਂ ਆਸਨਂ ਮਹਾਸਨਂ, ਤਸ੍ਸ ਭਾਵੋ ਮਹਾਸਨ੍ਨਂ. ਰਤ੍ਤਿ ਚ ਦਿਵਾ ਚ ਰਤ੍ਤਿਦਿਵਂ. ਰਤ੍ਤਿਦਿਵਂ ਕਤਂ ਰਤ੍ਤਿਦਿਵਨ੍ਤਿ. ਅਥ ਵਾ ਉਲ੍ਲੋਲਵੀਚਿ ਵਿਯ ਮੁਹਪਟਿਘਾਸਾਦਿ ਉਲ੍ਲੋਲਵੀਚਿ, ਸਂਸਾਰੋਘਂ ਲਬ੍ਭਤਿ. ਉਪਮਾ ਬਹੁਬ੍ਬੀਹਿਸਮਾਸੋਯਂ. ਯਥਾ ਪਨ ਮਹਾਸਮੁਦ੍ਦੇ ਭਾਯਿਤਬ੍ਬਾ ਮਹਾਤਰਙ੍ਗਊਮਿਵੇਗਾਦਯੋ ਚ ਸਂਸੁਮਾਰ ਤਿਮਿ ਤਿਪਿਙ੍ਗਲਾਦਿ ਮਚ੍ਛਮਕਾਰਾਦਯੋ ਚ ਓਕਿਣ੍ਣਾ ਹੋਨ੍ਤਿ, ਏਵਂ ਮੋਹਾਦਿਕਿਲੇਸਾ ਚ ਅਕੁਸਲਚਿਤ੍ਤੁਪ੍ਪਾਦਾ ਚ ਤੇਹਿ ਨਿਬ੍ਬਤ੍ਤਾ ਭਯਾਨਕਾ ਬਹੂ ਜਾਤਿਜਰਾਬ੍ਯਾਧਿਮਰਣਦੁਕ੍ਖਾਦਯੋ ਚ ਖਨ੍ਧਾਦਯੋ ਚ ਓਕਿਣ੍ਣਾ ਹੋਨ੍ਤੀਤਿ ਵੁਤ੍ਤਂ ਹੋਤਿ. ਸਂਸਾਰੋਘਨ੍ਤਿ ਸਂਸਾਰਸਙ੍ਖਾਤਂ ਓਘਂ ਸਮੁਦ੍ਦਜਲਪ੍ਪਵਾਹਂ. ਸਂਪੁਨਪ੍ਪੁਨਂ ਅਬ੍ਬੋਚ੍ਛਿਨ੍ਨਂ ਵਾ ਸਰਤਿ ਗਚ੍ਛਤਿ ਪਵਤ੍ਤਤੀਤਿ ਸਂਸਾਰੋ. ਸਂਪੁਬ੍ਬਸਰਧਾਤੁ ਗਤਿਯਂ ਣ. ਖਨ੍ਧਧਾਤੁਆਯਤ ਨਾਨਂ ਅਬ੍ਬੋਚ੍ਛਿਨ੍ਨਂ ਪਵਤ੍ਤਤੀਤਿ ਅਤ੍ਥੋ. ਤੇਨ ਵੁਤ੍ਤਂ ਅਟ੍ਠਕਥਾਸੁ –

‘‘ਖਨ੍ਧਾਨਞ੍ਚ ਪਟਿਪਾਟਿ, ਧਾਤੁਆਯਤਨਾਨ ਚ;

ਅਬ੍ਬੋਚ੍ਛਿਨ੍ਨਂ ਵਤ੍ਤਮਾਨਾ, ਸਂਸਾਰੋਤਿ ਪਵੁਚ੍ਚਤੀ’’ਤਿ.

ਸਤ੍ਤੇ ਓਤ੍ਥਰਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਹੇਟ੍ਠਾ ਹਨਤਿ ਹਰਤੀਤਿ ਓਘੋ, ਜਲਪ੍ਪਵਾਹੋ. ਅਵਪੁਬ੍ਬ ਹਨਧਾਤੁ ਹਰਣੇ ਣ. ਹਨਸ੍ਸ ਘੋ. ਅਵਸਦ੍ਦੋ ਓਤ੍ਥਰਣਤ੍ਥੋ. ਅਤ੍ਤਨਿ ਪਤਿਤੇ ਸਤ੍ਤੇ ਹੇਟ੍ਠਾ ਕਤ੍ਵਾ ਹਨੇਤਿ ਓਸੀਦਾਪੇਤੀਤਿ ਵਾ ਓਘੋ, ਜਲਪ੍ਪਵਾਹੋ. ਅਵਪੁਬ੍ਬ ਹਨਧਾਤੁ ਓਸੀਦਾਪਨੇ ਣ. ਅਵਸਦ੍ਦੋ ਹੇਟ੍ਠਾਭਾਗਤ੍ਥੋ. ਓਘੋ ਵਿਯਾਤਿ ਓਘੋ, ਸਂਸਾਰੋ. ਅਥ ਵਾ ਸਤ੍ਤਸਙ੍ਖਾਰੇ ਓਤ੍ਥਰਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਅਭਿਭਵਿਤ੍ਵਾ ਵਟ੍ਟਸ੍ਮਿਂ ਹਨਤਿ ਹਰਤੀਤਿ ਓਘੋ, ਓਹਨੇਤਿ ਓਸੀਦਾਪੇਤਿ ਵਟ੍ਟਸ੍ਮਿਂ ਸਤ੍ਤਸਙ੍ਖਾਰੇਤਿ ਵਾ ਓਘੋ, ਰਾਗਾਦਿ ਕਿਲੇਸਾ ਲਬ੍ਭਨ੍ਤਿ. ਸਂਸਾਰੋਏਵ ਓਘੋ ਸਂਸਾਰੋਘੋ, ਤਂ ਸਂਸਾਰੋਘਂ.

ਮਗ੍ਗੋਲ਼ੁਮ੍ਪੇਨਾਤਿ ਏਤ੍ਥ ਮਗ੍ਗਓਲ਼ੁਮ੍ਪੇਨਾਤਿ ਪਦਚ੍ਛੇਦੋ. ਅਟ੍ਠਮਗ੍ਗਙ੍ਗਸਙ੍ਖਾਤੇਨ ਕੁਲ੍ਲੇਨਾਤਿ ਅਤ੍ਥੋ. ਏਤ੍ਥ ਚ ਮਗ੍ਗੋ ਵੁਚ੍ਚਤਿ ਅਟ੍ਠਙ੍ਗਿਕਮਗ੍ਗੋ. ਮਗ੍ਗਨ੍ਤਿ ਗਚ੍ਛਨ੍ਤਿ ਬੁਦ੍ਧਾ ਚ ਅਰਿਯਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਨ੍ਤਿ ਮਗ੍ਗੋ. ਅਟ੍ਠਙ੍ਗਿਕੋ ਮਗ੍ਗੋ. ਮਗ੍ਗਧਾਤੁ ਗਤਿਯਂ ਅ. ਵੁਤ੍ਤਞ੍ਹਿ ਪਟਿਸਮ੍ਭਿਦਾਮਗ੍ਗੇ ‘‘ਏਤੇਨ ਮਗ੍ਗੇਨ ਬੁਦ੍ਧਾ ਚ ਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ ਅਟ੍ਠਙ੍ਗਿਕੋ ਮਗ੍ਗੋ’’ਤਿ. ਅਥ ਵਾ ਨਿਬ੍ਬਾਨਂ ਮਗ੍ਗਤਿ ਗਵੇਸਤੀਤਿ ਮਗ੍ਗੋ, ਨਿਬ੍ਬਾਨਤ੍ਥਿਕੇਹਿ ਮਗ੍ਗਿਯਤਿ ਗਵੇਸਿਯਤੀਤਿ ਵਾ ਮਗ੍ਗੋ, ਅਟ੍ਠਙ੍ਗਿਕੋ ਮਗ੍ਗੋ. ਞਾਣੇਨ ਦਸ੍ਸਿਯਤੀਤਿ ਅਤ੍ਥੋ. ਮਗ੍ਗਧਾਤੁ ਗਵੇਸਨੇ ਅ. ਵੁਤ੍ਤਞ੍ਹੇਤਂ ਮਹਾਵਗ੍ਗਸਂਯੁਤ੍ਤਟ੍ਠਕਥਾਯਂ ‘‘ਮਗ੍ਗੋਤਿ ਕੇਨਟ੍ਠੇਨ ਮਗ੍ਗੋ, ਨਿਬ੍ਬਾਨਂ ਮਗ੍ਗਨਟ੍ਠੇਨ ਨਿਬ੍ਬਾਨਤ੍ਥਿਕੇਹਿ ਮਗ੍ਗਨਿਯਟ੍ਠੇਨ ਚਾ’’ਤਿ. ਅਥ ਵਾ ਮਗ੍ਗਿਯਤਿ ਪਟਿਪਜ੍ਜਿਯਤੀਤਿ ਮਗ੍ਗੋ, ਨਿਬ੍ਬਾਨਤ੍ਥਿਕੇਹਿ ਅਟ੍ਠਙ੍ਗਿਕੋ ਮਗ੍ਗੋ ਪਟਿਪਜ੍ਜਿਯਤੀਤਿ ਅਤ੍ਥੋ. ਉਲ਼ੁ ਵੁਚ੍ਚਤਿ ਉਦਕਂ, ਤਤੋ ਪਾਤਿ ਰਕ੍ਖਤੀਤਿ ਉਲ਼ੁਪੋ, ਸੋਯੇਵ ਨਿਗ੍ਗਹਿਤਾਗਮਵਸੇਨ ਉਲ਼ੁਮ੍ਪੋ, ਕੁਲ੍ਲੋ. ਉਲ਼ੁਸਦ੍ਦੂਪਪਦਪਾਧਾਤੁ ਰਕ੍ਖਨੇ ਕ੍ਵਿ. ਮਗ੍ਗੋਏਵ ਉਲ਼ੁਮ੍ਪੋ ਮਗ੍ਗੋਲ਼ੁਮ੍ਪੋ, ਮਗ੍ਗਸਙ੍ਖਾਤੋ ਵਾ ਉਲ਼ੁਮ੍ਪੋ ਤਥਾ, ਮਗ੍ਗਸਦਿਸੋ ਵਾ ਉਲ਼ੁਮ੍ਪੋ ਤਥਾ, ਮਗ੍ਗੋ ਵਿਯ ਵਾ ਉਲ਼ੁਮ੍ਪੋ ਤਥਾ, ਮਗ੍ਗੋ ਚ ਉਲ਼ੁਮ੍ਪੋ ਚ ਮਗ੍ਗੋਲ਼ੁਮ੍ਪੋ. ਅਥ ਵਾ ਉਲ਼ੁਮ੍ਪੋਏਵ ਮਗ੍ਗੋ ਮਗ੍ਗੋਲ਼ੁਮ੍ਪੋ, ਉਲ਼ੁਮ੍ਪਸਙ੍ਖਾਤੋ ਵਾ ਮਗ੍ਗੋ ਤਥਾ, ਉਲ਼ੁਮ੍ਪ ਸਦਿਸੋ ਵਾ ਮਗ੍ਗੋ ਤਥਾ, ਉਲ਼ੁਮ੍ਪੋ ਵਿਯ ਵਾ ਮਗ੍ਗੋ ਤਥਾ, ਉਲ਼ੁਮ੍ਪੋ ਚ ਮਗ੍ਗੋ ਚ ਮਗ੍ਗੋਲ਼ੁਮ੍ਪੋਤਿ ਏਵਂ ਰੂਪਕਸਦਿਸਉਪਮਾ ਸਮੁਪੇਕ੍ਖਤ੍ਥਵਸੇਨ ਚ ਪਰਪਕ੍ਖ ਸਕਪਕ੍ਖਤ੍ਥਵਸੇਨ ਚ ਵਚਨਤ੍ਥੋ ਵੇਦਿਤਬ੍ਬੋ. ਤੇਨ ਮਗ੍ਗੋਲ਼ੁਮ੍ਪੇਨ. ਤਰੀਤਿ ਅਤਰਿ. ਧਮ੍ਮਰਾਜਾ ਹਿ ਅਟ੍ਠਮਗ੍ਗਙ੍ਗਨਾਵਾਯ ਸਂਸਾਰੋਘਂ ਤਰਿਤ੍ਵਾ ਨਿਬ੍ਬਾਨਤੀਰਂ ਪਾਪੁਣਾਤਿ. ਅਤੀਤਾ ਬੁਦ੍ਧਾ ਪਾਪੁਣਿਂਸੁ. ਅਨਾਗਤਾ ਬੁਦ੍ਧਾ ਪਾਪੁਣਿਸ੍ਸਨ੍ਤੀਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹਿ ਮਹਾਵਗ੍ਗਸਂਯੁਤ੍ਤੇ

‘‘ਏਕਾਯਨਂ ਜਾਤਿਖਯਨ੍ਤਦਸ੍ਸੀ,

ਮਗ੍ਗਂ ਪਜਾਨਾਤਿ ਹਿਤਾਨੁਕਮ੍ਪੀ;

ਏਤੇਨ ਮਗ੍ਗੇਨ ਤਰਿਂਸੁ ਪੁਬ੍ਬੇ,

ਤਰਿਸ੍ਸਨ੍ਤਿਯੇਵ ਤਰਨ੍ਤਿ ਓਘ’’ਨ੍ਤਿ; ਬੁਦ੍ਧਵਂਸੇ ਚ

‘‘ਸਂਸਾਰਸੋਤਂ ਛਿਨ੍ਦਿਤ੍ਵਾ, ਵਿਦ੍ਧਂਸੇਤ੍ਵਾ ਤਯੋ ਭਵੇ;

ਧਮ੍ਮਨਾਵਂ ਸਮਾਰੁਯ੍ਹ, ਤਾਰੇਮਿ ਜਨਤਂ ਬਹੁ’’ਨ੍ਤਿ.

ਅਭਯਨ੍ਤਿ ਜਾਤਿਜਰਾਬ੍ਯਾਧਿਮਰਣਭਯਾਦੀਨਂ ਅਭਾਵਤੋ ਨਿਬ੍ਭਯਂ. ਸੋ ਹਿ ਭਗਵਾ ਨਤ੍ਥਿ ਭਯਂ ਏਤਸ੍ਸਾਤਿ ਅਭਯੋਤਿ ਵੁਚ੍ਚਤਿ. ਅਥ ਵਾ ਅਭਯਨ੍ਤਿ ਖੇਮਂ. ਤਞ੍ਹਿ ਨਿਬ੍ਬਾਨਂ ਨਤ੍ਥਿ ਜਾਤਿਆਦਿਭਯਂ ਏਤ੍ਥਾਤਿ ਅਭਯਨ੍ਤਿ ਵੁਚ੍ਚਤਿ. ਏਤਸ੍ਮਿਂ ਪਨ ਦੁਤਿਯਵਿਕਪ੍ਪੇ ਤਂ ਪਦਂ ਪਾਰਨ੍ਤਿਪਦੇ ਵਿਸੇਸਨਂ. ਪਾਰਪਤ੍ਤਨ੍ਤਿ ਏਤ੍ਥ ਪਾਰਨ੍ਤਿ ਸਂਸਾਰਵਟ੍ਟਸ੍ਸ ਪਰਤੀਰਟ੍ਠੇਨ ਵੁਚ੍ਚਤਿ ਨਿਬ੍ਬਾਨਂ. ਤਞ੍ਹਿ ਉਦਕਂ ਪਾਤਿ ਰਕ੍ਖਤੀਤਿ ਪਾਰਂ, ਸਮੁਦ੍ਦਪਾਰਂ. ਪਾਧਾਤੁ ਰਕ੍ਖਨੇ ਅਰੋ. ਅਥ ਵਾ ਪਾਰੇਤਿ ਸਮਤ੍ਥੇਤਿ ਤਰਙ੍ਗਾਦਯੋ ਵਾਰੇਤੁਨ੍ਤਿ ਪਾਰਂ. ਪਾਰਧਾਤੁ ਸਮਤ੍ਥਿਯਂ ਅ. ਪਾਰਂ ਵਿਯਾਤਿ ਪਾਰਨ੍ਤਿ ਵੁਚ੍ਚਤਿ. ਨੀਤਤ੍ਥੇਨ ਪਨ ਏਵਂ ਵਚਨਤ੍ਥੋ ਕਾਤਬ੍ਬੋ. ਜਾਤਿ ਭਯਾਦਿਂ ਪਾਤਿ ਰਕ੍ਖਤਿ ਏਤ੍ਥਾਤਿ ਪਾਰਂ, ਪਾਰੇਤਿ ਸਮਤ੍ਥੇਤਿ ਏਤ੍ਥ ਵਾ ਜਾਤਿਭਯਾਦਯੋ ਵਾਰੇਤੁਨ੍ਤਿ ਪਾਰਂ, ਨਿਬ੍ਬਾਨਂ. ਤਂ ਪਜ੍ਜਿਤ੍ਥ ਅਧਿਗਮਿਤ੍ਥਾਤਿ ਪਾਰਪਤ੍ਤੋ, ਧਮ੍ਮਰਾਜਾ. ਪਾਰਸਦ੍ਦੂਪਪਦ ਪਦਧਾਤੁ ਗਤਿਯਂ ਤ. ਅਥ ਵਾ ਮੁਤ੍ਤੋ ਮੋਚੇਯ੍ਯਨ੍ਤਿਆਦਿਨਾ ਨਯੇਨ ਪਵਤ੍ਤਸ੍ਸ ਮਹਾਭਿਨੀਹਾਰਸ੍ਸ ਸਕਲਸ੍ਸ ਸਂਸਾਰਦੁਕ੍ਖਸ੍ਸ ਵਾ ਸਬ੍ਬਞ੍ਞੁਤਞਾਣਾਦਿਗੁਣਾਨਂ ਵਾ ਪਾਰਂ ਪਰਿਯਨ੍ਤਂ ਪਤ੍ਤੋ ਗਤੋਤਿ ਪਾਰਪਤ੍ਤੋ, ਧਮ੍ਮਰਾਜਾ. ਪਾਰਸਦ੍ਦੋ ਹਿ ਪਰਿਯਨ੍ਤ ਵਾਚਕੋ. ਤਂ ਪਾਰਪਤ੍ਤਂ. ਪਜਾਨਨ੍ਤਿ ਸਬ੍ਬਸਤ੍ਤਾਨਂ. ਤੇਹਿ ਕਮ੍ਮਕਿਲੇਸੇਹਿ ਪਕਾਰੇਨ ਜਨਿਯਤਿ ਨਿਬ੍ਬਤ੍ਤਿਯਤੀਤਿ ਪਜਾਤਿ ਵੁਚ੍ਚਨ੍ਤਿ. ਤੇਸਂ ਪਜਾਨਂ.

ਤਾਣਨ੍ਤਿ ਤਾਯਨਟ੍ਠੇਨ ਤਾਣਂ. ਸਤ੍ਤਾਨਂ ਸਂਸਾਰ ਭਯਤੋ ਤਾਯਤਿ ਰਕ੍ਖਤੀਤਿ ਤਾਣੋ, ਧਮ੍ਮਰਾਜਾ. ਤਾਧਾਤੁ ਰਕ੍ਖਨੇ ਯੁ. ਅਥ ਵਾ ਤਾਣਨ੍ਤਿ ਸਤ੍ਤਾਨਂ ਸਂਸਾਰਵਟ੍ਟਦੁਕ੍ਖਤੋ ਪਰਿਪਾਲਨਟ੍ਠੇਨ ਤਾਣਂ. ਸੋ ਹਿ ਧਮ੍ਮਰਾਜਾ ਸਤ੍ਤਾਨਂ ਸਂਸਾਰਵਟ੍ਟਦੁਕ੍ਖਤੋ ਧਮ੍ਮਦੇਸਨਾਯ ਮਗ੍ਗ ਫਲਨਿਬ੍ਬਾਨਸੁਖਂ ਦਦਨ੍ਤੋ ਤਾਯਤਿ ਪਾਲੇਤੀਤਿ ਤਾਣੋਤਿ ਵੁਚ੍ਚਤਿ. ਤਂ ਤਾਣਂ. ਲੇਣਨ੍ਤਿ ਨਿਲੀਯਨਟ੍ਠੇਨ ਲੇਣਂ, ਜਾਤਿਭਯਾਦੀਹਿ ਪੀਲ਼ਿਤੇਹਿ ਸਤ੍ਤੇਹਿ ਲੀਯਨ੍ਤਿ ਨਿਲੀਯਨ੍ਤਿ ਏਤ੍ਥਾਤਿ ਲੇਣੋ, ਧਮ੍ਮਰਾਜਾ. ਲੀਧਾਤੁ ਨਿਲੀਯਨੇ ਯੁ. ਅਥ ਵਾ ਲੇਣਨ੍ਤਿ ਸਂਸਾਰਭਯਂ ਪਸ੍ਸਨ੍ਤੇਹਿ ਨਿਲੀਯਨਟ੍ਠੇਨ ਲੇਣਂ. ਸੋ ਹਿ ਧਮ੍ਮਰਾਜਾ ਸਂਸਾਰਨਿਸ੍ਸਰਣਤ੍ਥਿਕੇਹਿ ਲੀਯਨ੍ਤਿ ਨਿਲੀਯਨ੍ਤਿ ਏਤ੍ਥਾਤਿ ਲੇਣੋਤਿ ਵੁਚ੍ਚਤਿ. ਤਂ ਲੇਣਂ. ਧਮ੍ਮਰਾਜਾ ਹਿ ਸਂਸਾਰਭਯੇਹਿ ਪੀਲ਼ਿਤਾਨਂ ਸਬ੍ਬਸਤ੍ਤਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਠਾਨਂ ਹੋਤੀਤਿ ਵੁਤ੍ਤਂ ਹੋਤਿ.

ਅਸਮਸਰਣਨ੍ਤਿ ਸਬ੍ਬਸਤ੍ਤਾਨਂ ਅਸਦਿਸਅਵਸ੍ਸਯਨਂ, ਨਤ੍ਥਿ ਏਤਸ੍ਸ ਸਮੋ ਸਦਿਸੋ ਸੀਲਾਦਿਗੁਣੇਨਾਤਿ ਅਸਮੋ, ਧਮ੍ਮਰਾਜਾ. ਸਰਤਿ ਗਚ੍ਛਤਿ ਅਵਸ੍ਸਯਤਿ ਏਤ੍ਥਾਤਿ ਸਰਣੋ, ਧਮ੍ਮਰਾਜਾ. ਸਰਧਾਤੁ ਗਤਿਮ੍ਹਿ ਯੁ. ਅਸਮੋ ਅਸਦਿਸੋ ਹੁਤ੍ਵਾ ਸਰਣੋਤਿ ਅਸਮਸਰਣੋ, ਧਮ੍ਮਰਾਜਾ. ਸਮ੍ਭਾਵ ਨਾਕਮ੍ਮਧਾਰਯਸਮਾਸੋਯਂ. ਧਮ੍ਮਰਾਜਾ ਹਿ ਸਬ੍ਬਸਮ੍ਪਤ੍ਤਿਸੁਖਾਨਂ ਦਾਯਕਤ੍ਤਾ ਸਬ੍ਬਸਤ੍ਤਾਨਂ ਅਨਞ੍ਞਸਾਧਾਰਣਂ ਅਸਮਂ ਸਰਣਂ ਅਵਸ੍ਸਯਨਂ ਪਰਾਯਨਂ ਹੋਤੀਤਿ ਅਤ੍ਥੋ. ਤਂ ਅਸਮਸਰਣਂ. ਏਕਤਿਤ੍ਥਨ੍ਤਿ ਨਿਬ੍ਬਾਨਪਾਰਗਮਨਾਨਂ ਏਕਤਿਤ੍ਥਭੂਤਂ. ਤਰਨ੍ਤਿ ਉਤ੍ਤਰਨ੍ਤਿ ਏਤ੍ਥ ਏਤੇਨ ਵਾ ਨਜ੍ਜਸਮੁਦ੍ਦਾਦਿਨ੍ਤਿ ਤਿਤ੍ਥਂ. ਨਜ੍ਜਸਮੁਦ੍ਦਾਦੀਨਂ ਪਾਰਿਮਤੀਰਗਮਨਤ੍ਥਂ ਓਤਰਣਟ੍ਠਾਨਂ ਲਬ੍ਭਤਿ. ਤਰਧਾਤੁ ਓਤਰਣੇ ਥ. ਰਸ੍ਸ ਤੋ, ਇਕਾਰਾਗਮੋ. ਮਨੁਸ੍ਸਾਨਂ ਏਕਂ ਤਿਤ੍ਥਂ ਏਕਤਿਤ੍ਥਂ, ਤਂ ਵਿਯਾਤਿ ਏਕਤਿਤ੍ਥੋ, ਧਮ੍ਮਰਾਜਾ. ਯਥਾ ਹਿ ਤਿਤ੍ਥੇਨ ਨਜ੍ਜਾਦਿਂ ਤਰਨ੍ਤਾ ਮਨੁਸ੍ਸਾ ਪਾਰਿਮਤੀਰਂ ਸੁਖਂ ਪਾਪੁਣਨ੍ਤਿ, ਨ ਅਤਿਤ੍ਥੇਨ, ਏਵਂ ਸੇਟ੍ਠਭੂਤੇਨ ਬੁਦ੍ਧਤਿਤ੍ਥੇਨ ਸਂਸਾਰੋਘਂ ਤਰਨ੍ਤਾ ਵੇਨੇਯ੍ਯਸਤ੍ਤਾ ਨਿਬ੍ਬਾਨਪਾਰਂ ਸੁਖਂ ਪਾਪੁਣਨ੍ਤਿ, ਨ ਅਤਿਤ੍ਥੇਨ ਅਞ੍ਞਤਿਤ੍ਥਿਯੇਨ, ਤਸ੍ਮਾ ਧਮ੍ਮਰਾਜਂ ਏਕਤਿਤ੍ਥੋਤਿ ਥੋਮੇਤਿ. ਨੀਤਤ੍ਥੇਨ ਪਨ ਏਕੋ ਸੇਟ੍ਠੋ ਹੁਤ੍ਵਾ ਨਿਬ੍ਬਾਨਪਾਰਂ ਤਰਨ੍ਤਿ ਉਤ੍ਤਰਨ੍ਤਿ ਏਤ੍ਥਾਤਿ ਏਕ ਤਿਤ੍ਥੋ, ਧਮ੍ਮਰਾਜਾ. ਖੇਮਂ ਨਿਬ੍ਬਾਨਪਾਰਂ ਤਰਿਤੁਕਾਮਾ ਵੇਨੇਯ੍ਯਸਤ੍ਤਾ ਏਤ੍ਥ ਬੁਦ੍ਧਤਿਤ੍ਥੇ ਦੇਸਿਤਧਮ੍ਮਂ ਸੁਤ੍ਵਾ ਦੇਸਿਤਧਮ੍ਮਾਨੁਰੂਪਂ ਪਟਿਪਜ੍ਜਿਤ੍ਵਾ ਸਂਸਾਰੋਘਂ ਅਟ੍ਠਮਗ੍ਗਙ੍ਗਨਾਵਾਯ ਛਿਨ੍ਦਿਤ੍ਵਾ ਖੇਮਂ ਨਿਬ੍ਬਾਨਪਾਰਂ ਸੁਖਂ ਤਰਨ੍ਤਿ, ਇਤਿਤਸ੍ਮਾ ਏਤ੍ਥਾਤਿਪਦੇਨ ਨਿਦ੍ਦਿਟ੍ਠੋ ਸੋ ਬੁਦ੍ਧੋ ਸਬ੍ਬਸਤ੍ਤਾਨਂ ਏਕੋ ਸੇਟ੍ਠੋ ਤਿਤ੍ਥੋ ਨਾਮ. ਨ ਅਞ੍ਞਤਿਤ੍ਥਿਯਾ ਏਕਤਿਤ੍ਥਾ ਨਾਮ ਹੋਨ੍ਤੀਤਿ ਅਤ੍ਥੋ. ਤਂ ਏਕਤਿਤ੍ਥਂ.

ਪਤਿਟ੍ਠਨ੍ਤਿ ਸਬ੍ਬਸਤ੍ਤਾਨਂ ਮਹਾਦੀਪਂ ਵਿਯ ਪਤਿਟ੍ਠਂ ਆਧਾਰਭੂਤਂ. ਪਟਿਸਰਣਂ ਲੇਣਂ ਪਰਾਯਨਨ੍ਤਿ ਅਤ੍ਥੋ. ਪਤਿਟ੍ਠਹਨ੍ਤਿ ਏਤ੍ਥਾਤਿ ਪਤਿਟ੍ਠੋ, ਧਮ੍ਮਰਾਜਾ. ਪਤਿਪੁਬ੍ਬਟ੍ਠਾਧਾਤੁ ਗਤਿਨਿਵਤ੍ਤਿਮ੍ਹਿ ਅ. ਧਮ੍ਮਰਾਜਾ ਹਿ ਸਬ੍ਬਸੁਖਤ੍ਥਿਕਾਨਂ ਸਤ੍ਤਾਨਂ ਮਹਾਦੀਪੋ ਵਿਯ ਪਤਿਟ੍ਠੋ ਪਟਿਸਰਣੋ ਲੇਣੋ ਪਰਾਯਨੋ ਹੋਤੀਤਿ ਅਤ੍ਥੋ, ਤਂ ਪਤਿਟ੍ਠਂ. ਪੁਞ੍ਞਕ੍ਖੇਤ੍ਤਨ੍ਤਿ ਨਿਬ੍ਬਾਨਸੁਖਤ੍ਥਿਕਾਨਂ ਪੁਞ੍ਞਬੀਜਸ੍ਸ ਖੇਤ੍ਤਭੂਤਂ. ਪੁਞ੍ਞਤ੍ਥਿਕਾਨਂ ਪੁਞ੍ਞਬੀਜਸ੍ਸ ਵਪਨਠਾਨਂ ਖੇਤ੍ਤਭੂਤਂ ਵਾ, ਅਤ੍ਤਨੋ ਕਾਰਕਂ ਪਵਤਿ ਸੋਧੇਤੀਤਿ ਪੁਞ੍ਞਂ, ਕੁਸਲਂ. ਪੁਧਾਤੁ ਸੋਧਨੇ ਣ੍ਯੋ. ਅਥ ਵਾ ਪਰਂ ਪੁਜ੍ਜਭਾਵਂ ਜਨੇਤੀਤਿ ਪੁਞ੍ਞਂ, ਸਦਾ ਪੂਜਿਤਂ ਵਾ ਜਨੇਤੀਤਿ ਪੁਞ੍ਞਂ, ਕੁਸਲਂ. ਪੂਜਸਦ੍ਦੂਪਪਦ ਜਨਧਾਤੁ ਣ੍ਯੋ. ਨਿਰੁਤ੍ਤਿਨਯੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ਅਵਸੇਸਂ ਅਪੁਞ੍ਞਂ ਪੁਨਾਤਿ ਸੋਧੇਤੀਤਿ ਵਾ ਪੁਞ੍ਞਂ, ਕੁਸਲਂ. ਪੁਧਾਤੁ ਸੋਧਨੇ ਣ੍ਯੋ. ਖਿਤ੍ਤਂ ਵੁਤ੍ਤਂ ਬੀਜਂ ਤਾਯਤਿ ਰਕ੍ਖਤੀਤਿ ਖੇਤ੍ਤਂ, ਕੇਦਾਰਾਦਿ. ਖਿਪਸਦ੍ਦੂਪਪਦ ਤਾਧਾਤੁ ਰਕ੍ਖਨੇ ਕ੍ਵਿ. ਬੀਜਾਨਿ ਵਪਨ੍ਤਾਨਂ ਮਨੁਸ੍ਸਾਨਂ ਮਹਪ੍ਫਲਭਾਵਕਰਣੇਨ ਬੀਜਂ ਰਕ੍ਖਤੀਤਿ ਅਤ੍ਥੋ. ਅਥ ਵਾ ਖਿਪਨ੍ਤਿ ਵਪਨ੍ਤਿ ਏਤ੍ਥ ਬੀਜਾਨੀਤਿ ਖੇਤ੍ਤਂ. ਖਿਪਧਾਤੁ ਪੇਰਣੇ ਖੇਪੇ ਵਾ ਤ. ਖੇਤ੍ਤਂ ਵਿਯਾਤਿ ਖੇਤ੍ਤੋ. ਧਮ੍ਮਰਾਜਾ. ਨੀਤਤ੍ਥੇਨ ਪਨ ਪੁਞ੍ਞਬੀਜਾਨਿ ਵਪਨ੍ਤਾਨਂ ਸਤ੍ਤਾਨਂ ਮਹਪ੍ਫਲ ਭਾਵਕਰਣੇਨ ਖਿਤ੍ਤਂ ਵੁਤ੍ਤਂ ਪੁਞ੍ਞਬੀਜਂ ਤਾਯਤਿ ਰਕ੍ਖਤੀਤਿ ਖੇਤ੍ਤੋ. ਅਥ ਵਾ ਨਿਬ੍ਬਾਨਤ੍ਥਿਕੇਹਿ ਪੁਞ੍ਞਬੀਜਾਨਿ ਖਿਪਿਯਨ੍ਤਿ ਵਪਿਯਨ੍ਤਿ ਏਤ੍ਥਾਤਿ ਖੇਤ੍ਤੋ. ਧਮ੍ਮਰਾਜਾਤਿ ਕਾਤਬ੍ਬੋ. ਪੁਞ੍ਞਾਨਂ ਖੇਤ੍ਤਂ ਪੁਞ੍ਞਕ੍ਖੇਤ੍ਤੋ, ਧਮ੍ਮਰਾਜਾ. ਯਥਾ ਹਿ ਰਞ੍ਞੋ ਵਾ ਅਮਚ੍ਚਾਦੀਨਂ ਵਾ ਸਾਲੀਨਂ ਵਾ ਯਵਾਨਂ ਵਾ ਵਿਰੂਹਨਟ੍ਠਾਨਂ ਰਞ੍ਞੋ ਵਾ ਅਮਚ੍ਚਾਦੀਨਂ ਵਾ ਸਾਲਿਖੇਤ੍ਤਂ ਯਵਖੇਤ੍ਤਨ੍ਤਿ ਵੁਚ੍ਚਤਿ. ਏਵਂ ਧਮ੍ਮਰਾਜਾ ਸਬ੍ਬਲੋਕਸ੍ਸ ਪੁਞ੍ਞਮਹਬ੍ਬਲਭਾਵਕਰਣੇਨ ਪੁਞ੍ਞਾਨਂ ਵਿਰੂਹ ਨਟ੍ਠਾਨਂ ਧਮ੍ਮਰਾਜਂ ਨਿਸ੍ਸਾਯ ਸਤ੍ਤਲੋਕਸ੍ਸ ਨਾਨਾਪ੍ਪਕਾਰਹਿਤ ਸੁਖਸਂਵਤ੍ਤਨਿਕਾਨਿ ਪੁਞ੍ਞਾਨਿ ਵਿਰੂਹਨ੍ਤਿ, ਤਸ੍ਮਾ ਧਮ੍ਮਰਾਜਾ ਪੁਞ੍ਞਕ੍ਖੇਤ੍ਤਨ੍ਤਿ ਅਭਿਤ੍ਥਵਿਤੋਤਿ ਵੁਤ੍ਤਂ ਹੋਤਿ. ਤਂ ਪੁਞ੍ਞਕ੍ਖੇਤ੍ਤਂ.

ਪਰਮਸੁਖਦਨ੍ਤਿ ਉਤ੍ਤਮਂ ਨਿਬ੍ਬਾਨਸੁਖਂ ਦਦਮਾਨਂ. ਵੁਤ੍ਤਞ੍ਹਿ ‘‘ਨਿਬ੍ਬਾਨਂ ਪਰਮਂ ਸੁਖ’’ਨ੍ਤਿ. ਏਤ੍ਥ ਚ ਪਰਮਸਦ੍ਦੋ ਉਤ੍ਤਮਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿ ਪਦਿਕੋ. ਅਥ ਵਾ ਪਰਂ ਅਤਿਰੇਕਂ ਅਰਿਯੇਹਿ ਮਾਨਿਤਬ੍ਬਨ੍ਤਿ ਪਰਮਂ, ਨਿਬ੍ਬਾਨਂ. ਪਰਪੁਬ੍ਬਮਾਧਾਤੁ ਮਾਨੇ ਅ. ਪਕਾਰੇਨ ਅਰਿਯੇਹਿ ਰਮਿਯਤਿ ਏਤ੍ਥਾਤਿ ਵਾ ਪਰਮਂ, ਨਿਬ੍ਬਾਨਂ. ਪਪੁਬ੍ਬਰਮੁਧਾਤੁ ਰਮਨੇ ਣ. ਅਭਿਧਾਨਟੀਕਾਯਂ ਪਨ ‘‘ਪਰਂ ਪਚ੍ਚਨੀਕਂ ਮਾਰੇਤੀਤਿ ਪਰਮਂ. ਪਕਟ੍ਠਭਾਵੇ ਰਮਤੀਤਿ ਪਰਮਂ. ਣੋ’’ਤਿ ਵੁਤ੍ਤਂ. ਤਸ੍ਸ ਸੁਖਂ ਪਰਮਸੁਖਂ. ਪਰਮਂ ਉਤ੍ਤਮਂ ਵਾ ਸੁਖਂ ਪਰਮਸੁਖਂ. ਤਂ ਦਦਾਤੀਤਿ ਪਰਮਸੁਖਦੋ, ਧਮ੍ਮਰਾਜਾ. ਪਰਮਸੁਖਸਦ੍ਦੂਪਪਦ ਦਾਧਾਤੁ ਦਾਨੇ ਕ੍ਵਿ. ਧਮ੍ਮਰਾਜਾ ਪਨ ਵੇਨੇਯ੍ਯਸਤ੍ਤਾਨਂ ਧਮ੍ਮਦੇਸਨਾਯ ਚ ਚਤੁਪਚ੍ਚਯਪ੍ਪਟਿਗ੍ਗਹਣੇਨ ਚ ਨਿਬ੍ਬਾਨਸੁਖਂ ਦੇਤੀਤਿ ਵੁਤ੍ਤਂ ਹੋਤਿ. ਤਂ ਪਰਮਸੁਖਦਂ. ਧਮ੍ਮਰਾਜਨ੍ਤਿ ਬੁਦ੍ਧਂ. ਸੋ ਹਿ ਲੋਕਿਯ ਲੋਕੁਤ੍ਤਰਧਮ੍ਮੇਹਿ ਦੇਵਮਨੁਸ੍ਸਾਨਂ ਰਞ੍ਜੇਤਿ ਤੋਸੇਤੀਤਿ ਧਮ੍ਮਰਾਜਾਤਿ. ਅਥ ਵਾ ਪਾਰਮੀਧਮ੍ਮੇਨੇਵ ਬੁਦ੍ਧਤ੍ਤਂ ਪਤ੍ਵਾ ਰਾਜਾ ਜਾਤੋਤਿ ਧਮ੍ਮਰਾਜਾਤਿ. ਪਾਰਮੀਧਮ੍ਮੇਨੇਵ ਜਾਤੋ ਵਾ ਰਾਜਾਤਿ ਧਮ੍ਮਰਾਜਾਤਿ ਚ ਵੁਚ੍ਚਤਿ. ਤਂ ਧਮ੍ਮਰਾਜਂ ਅਹਂ ਨਮਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਯੋ ਧਮ੍ਮਰਾਜਾ ਮੁਹ ਪਟਿਘਾਸਾਦਿਉਲ੍ਲੋਲਵੀਚਿਂ ਮੋਹਦੋਸਤਣ੍ਹਾਦਿਸਙ੍ਖਾਤਂ ਮਹਾਤਰਙ੍ਗ ਖੁਦ੍ਦਕਊਮਿਕਂ, ਸਂਸਾਰੋਘਂ ਸਂਸਾਰਸਙ੍ਖਾਤਂ ਓਘਂ ਸਮੁਦ੍ਦਜਲਪ੍ਪਵਾਹਂ. ਮਗ੍ਗੋਲ਼ੁਮ੍ਪੇਨ ਅਟ੍ਠਮਗ੍ਗਙ੍ਗਸਙ੍ਖਾਤੇਨ ਕੁਲ੍ਲੇਨ ਤਰਿ ਅਤਰਿਂ, ਅਭਯਂ ਖੇਮਂ, ਜਾਤਿਆਦੀਨਂ ਅਭਾਵਤੋ ਨਿਬ੍ਭਯਂ ਵਾ, ਪਾਰਪਤ੍ਤਂ ਨਿਬ੍ਬਾਨਪਾਰਂ ਪਤ੍ਤਂ ਅਧਿਗਤਂ, ਪਜਾਨਂ ਸਬ੍ਬ ਸਤ੍ਤਾਨਂ, ਤਾਣਂ ਤਾਯਨਟ੍ਠੇਨ ਤਾਣਂ ਰਕ੍ਖਣਂ. ਲੇਣਂ ਨਿਲੀਯਨਟ੍ਠੇਨ ਲੇਣਂ ਨਿਲੀਯਨਂ, ਅਸਮਸਰਣਂ ਸਬ੍ਬਸਤ੍ਤਾਨਂ ਅਸਦਿਸਅਵਸ੍ਸਯਨਂ, ਏਕਤਿਤ੍ਥਂ ਨਿਬ੍ਬਾਨਪਾਰਗਮਨਾਨਂ ਏਕਤਿਤ੍ਥ ਭੂਤਂ, ਪਤਿਟ੍ਠਂ ਸਬ੍ਬਸਤ੍ਤਾਨਂ ਮਹਾਦੀਪਂ ਵਿਯ ਪਤਿਟ੍ਠਂ ਆਧਾਰਭੂਤਂ, ਪੁਞ੍ਞਕ੍ਖੇਤ੍ਤਂ ਨਿਬ੍ਬਾਨਸੁਖਤ੍ਥਿਕਾਨਂ ਪੁਞ੍ਞਬੀਜਸ੍ਸ ਖੇਤ੍ਤਭੂਤਂ, ਪੁਞ੍ਞਤ੍ਥਿਕਾਨਂ ਪੁਞ੍ਞਬੀਜਸ੍ਸ ਵਪਨਟ੍ਠਾਨਂ ਖੇਤ੍ਤਭੂਤਂ ਵਾ, ਪਰਮਸੁਖਂ ਉਤ੍ਤਮਂ ਨਿਬ੍ਬਾਨਸੁਖਂ ਦਦਮਾਨਂ, ਧਮ੍ਮਰਾਜਂ ਬੁਦ੍ਧਂ ਲੋਕਿਯਲੋਕੁਤ੍ਤਰ ਧਮ੍ਮੇਹਿ ਪਜਾਨਂ ਰਞ੍ਜਾਪਨਂ ਵਾ, ਪਾਰਮੀਧਮ੍ਮੇਨੇਵ ਬੁਦ੍ਧਭਾਵਂ ਜਾਤਂ ਬੁਦ੍ਧਂ ਵਾ, ਅਹਂ ਤੀਹਿ ਦ੍ਵਾਰੇਹਿ ਨਮਾਮੀਤਿ.

ਅਟ੍ਠਾਰਸਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੧੯.

ਕਣ੍ਡਮ੍ਬਂਮੂਲੇ ਪਰਹਿਤਕਰੋ ਯੋ ਮੁਨਿਨ੍ਦੋ ਨਿਸਿਨ੍ਨੋ;

ਅਚ੍ਛੇਰਂ ਸੀਘਂ ਨਯਨਸੁਭਗਂ ਆਕੁਲਣ੍ਣਗ੍ਗਿਜਾਲਂ;

ਦੁਜ੍ਜਾਲਦ੍ਧਂਸਂ ਮੁਨਿਭਿਜਹਿਤਂ ਪਾਟਿਹੇਰਂ ਅਕਾਸਿ;

ਵਨ੍ਦੇ ਤਂ ਸੇਟ੍ਠਂ ਪਰਮਰਤਿਜਂ ਇਦ੍ਧਿਧਮ੍ਮੇਹੁਪੇਤਂ.

੧੯. ਏਵਂ ਅਟ੍ਠਾਰਸਮਗਾਥਾਯ ਧਮ੍ਮਰਾਜਂ ਵਨ੍ਦਿਤ੍ਵਾ ਇਦਾਨਿ ਸਾਵਤ੍ਥਿਯਂ ਕਣ੍ਡਮ੍ਬਮੂਲੇ ਇਦ੍ਧਿਪਾਟਿਹੇਰਾਦੀਹਿ ਗੁਣੇਹਿ ਮੁਨਿਨ੍ਦਸ੍ਸ ਥੋਮੇਤ੍ਵਾ ਵਨ੍ਦਿਤੁਕਾਮੋ ਕਣ੍ਡਮ੍ਬਂਮੂਲੇਤ੍ਯਾਦਿ ਗਾਥਮਾਹ. ਅਯਂ ਪਨ ਮਤਨਯਯਯਗਣੇਹਿ ਚ ਪਞ੍ਚ ਯਤਿ ਛਯਤਿ ਸਤ੍ਤਯ ਤੀਹਿ ਚ ਰਚਿਤਤ੍ਤਾ ਅਟ੍ਠਾਰਸਕ੍ਖਰੇਹਿ ਯੁਤ੍ਤਾ ਕੁਸੁਮਿਤਲਤਾ ਵੇਲ੍ਲਿਤਾਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਮੋ ਤੋ ਨੋ ਯੋ ਯਾ ਕੁਸੁਮਿਤਲਤਾ ਵੇਲ੍ਲਿਤਾਕ੍ਖੁਤ੍ਵਿਸੀਹੀ’’ਤਿ. ਅਯਂ ਪਨੇਤ੍ਥ ਯੋਜਨਾ. ਯਸ੍ਸਂ ਪਟਿਪਾਦਂ ਅਕ੍ਖੁਤ੍ਵਿਸੀਹਿ ਪਞ੍ਚਯਤਿ ਛਯਤਿ ਸਤ੍ਤਯਤੀਹਿ ਮੋਗਣੋ ਚ ਤੋਗਣੋ ਚ ਨੋਗਣੋ ਚ ਯੋਗਣੋ ਚ ਯਾ ਯਗਣਦ੍ਵਯਞ੍ਚ ਚੇ ਯੁਤ੍ਤਾ, ਸਾ ਗਾਥਾ ਕੁਸੁਮਿਤਲਤਾ ਵੇਲ੍ਲਿਤਾ ਕੁਸੁਮਿਤਲਤਾ ਵੇਲ੍ਲਿਤਾ ਗਾਥਾ ਨਾਮਾਤਿ. ਏਤ੍ਥ ਚ ਅਕ੍ਖਸਦ੍ਦਸ੍ਸ ਪਞ੍ਚਿਨ੍ਦ੍ਰਿਯਵਾਚਕਤ੍ਤਾ ਅਕ੍ਖਸਦ੍ਦੋ ਪਞ੍ਚਸਙ੍ਖ੍ਯਾਵਾਚਕੋਤਿ ਵੇਦਿਤਬ੍ਬੋ. ਉਤੂਨਂ ਹੇਮਨ੍ਤਸਿਸੀਰਵਸ੍ਸਨ੍ਤਗਿਮ੍ਹਵਸ੍ਸਾਨਸਰਦਵਸੇਨ ਛਬ੍ਬਿਧਤ੍ਤਾ ਉਤੁਸਦ੍ਦੋ ਛਸਙ੍ਖ੍ਯਾਵਾਚਕੋਤਿ. ਇਸਿਸਦ੍ਦੋ ਵਿਪਸ੍ਸੀਆਦੀਨਂ ਬੁਦ੍ਧਾਨਂ ਸਤ੍ਤਵਿਧਤ੍ਤਾ ਸਤ੍ਤਸਙ੍ਖ੍ਯਾਵਾਚਕੋਤਿ ਵੇਦਿਤਬ੍ਬੋਤਿ.

ਤਤ੍ਥ ਪਨ ਪਰਹਿਤਕਰੋ ਯੋ ਮੁਨਿਨ੍ਦੋ ਕਣ੍ਡਮ੍ਬਮੂਲੇ ਨਿਸਿਨ੍ਨੋ ਪਾਟਿਹੇਰਂ ਸੀਘਂ ਅਕਾਸਿ, ਤਂ ਮੁਨਿਨ੍ਦਂ ਅਹਂ ਵਨ੍ਦੇ ਵਨ੍ਦਾਮੀਤਿ ਸਮ੍ਬਨ੍ਧੋ. ਅਤ੍ਥਕ੍ਕਮੇਨ ਪਨੇਤ੍ਥ ਵਣ੍ਣਯਿਸ੍ਸਾਮਿ. ਪਰਹਿਤਕਰੋਤਿ ਅਤ੍ਤਨਾ ਪਰੇਸਂ ਸਬ੍ਬਸਤ੍ਤਾਨਂ ਹਿਤਂ ਅਤ੍ਥਂ ਕਰੋਨ੍ਤੋ. ਹਿਨੋਤਿ ਵਡ੍ਢਤਿ ਸੁਖਂ ਏਤੇਨਾਤਿ ਹਿਤਂ, ਅਤ੍ਥਂ ਪਯੋਜਨਂ ਵਾ. ਹਿਧਾਤੁ ਵਡ੍ਢਨੇ ਤ. ਤਂਸਮਙ੍ਗਿਨੋ ਲੋਕਿਯਲੋਕੁਤ੍ਤਰਸੁਖਂ ਵਡ੍ਢਤੀਤਿ ਅਤ੍ਥੋ. ਪਰੇਸਂ ਹਿਤਂ ਪਰਹਿਤਂ, ਤਂ ਕਰੋਤੀਤਿ ਪਰਹਿਤਕਰੋ, ਮੁਨਿਨ੍ਦੋ. ਸੋ ਹਿ ਦੀਪਙ੍ਕਰਸ੍ਸ ਭਗਵਤੋ ਪਾਦਮੂਲੇ ਲਦ੍ਧਬ੍ਯਾਕਰਣਤੋ ਪਟ੍ਠਾਯ ਅਤ੍ਤਨੋ ਸੁਖਂ ਪਜਹਨ੍ਤੋ ਸਤ੍ਤਲੋਕਸ੍ਸ ਹਿਤਸੁਖਤ੍ਥਾਯ ਕਪ੍ਪਸਤ ਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਸਮਤਿਂਸਪਾਰਮਿਯੋ ਪਞ੍ਚਮਹਾਪਰਿਚ੍ਚਾਗੇ ਚ ਕਰੋਨ੍ਤੋ ਸਬ੍ਬਞ੍ਞੁਬੁਦ੍ਧਭਾਵਂ ਪਤ੍ਤਕਾਲੇ ਚ ਪਞ੍ਚਚਤ੍ਤਾਲੀਸਵਸ੍ਸਾਨਿ ਧਮ੍ਮ ਦੇਸਨਾਯ ਸਤ੍ਤਲੋਕਸ੍ਸ ਲੋਕਿਯਲੋਕੁਤ੍ਤਰਹਿਤ ਸੁਖਂ ਕਰੋਤੀਤਿ ਪਰਹਿਤਕਰੋਤਿ ਥੋਮੇਤਿ. ਯੋਤਿ ਯੋ ਯਾਦਿਸੋ. ਮੁਨਿਨ੍ਦੋਤਿ ਬੁਦ੍ਧੋ. ਸੋ ਹਿ ਅਗਾਰਿਯ ਮੁਨਿ, ਅਨਗਾਰਿਯਮੁਨਿ, ਸੇਕ੍ਖਮੁਨਿ, ਅਸੇਕ੍ਖਮੁਨਿ, ਪਚ੍ਚੇਕਮੁਨਿਵਸੇਨ ਪਞ੍ਚਨ੍ਨਂ ਮੁਨੀਨਂ ਇਨ੍ਦੋਤਿ ਮੁਨਿਨ੍ਦੋਤਿ ਵੁਚ੍ਚਤਿ. ਕਣ੍ਡਮ੍ਬਮੂਲੇਤਿ ਏਤ੍ਥ ਕਣ੍ਡਅਮ੍ਬਮੂਲੇਤਿ ਪਦਚ੍ਛੇਦੋ. ਛਨ੍ਦਾਨੁਰਕ੍ਖਣਤ੍ਥਂ ਬਿਨ੍ਦਾਗਮੋ. ਕਣ੍ਡਨਾਮਿਕੇਨ ਪਸੇਨਦੀਕੋਸਲਰਞ੍ਞੋ ਉਯ੍ਯਾਨਪਾਲੇਨ ਰੋਪਿਤਸ੍ਸ ਸੇਤਮ੍ਬਰੁਕ੍ਖਸ੍ਸ ਸਮੀਪੇਤਿ ਅਤ੍ਥੋ. ਏਤ੍ਥ ਚ ਕਣ੍ਡਨ੍ਤਿ ਤਸ੍ਸੇਵ ਨਾਮਂ. ਅਥ ਵਾ ਕਂ ਵੁਚ੍ਚਤਿ ਸੁਖਂ, ਤਂ ਡੇਤਿ ਗਚ੍ਛਤਿ ਪਾਪੁਣਾਤੀਤਿ ਕਣ੍ਡੋ, ਉਯ੍ਯਾਨਪਾਲੋ. ਕਂਸਦ੍ਦੂਪਪਦਡਿ ਧਾਤੁ ਗਤਿਯਂ ਣ. ਕਂ ਵੁਚ੍ਚਤਿ ਵਾ ਉਦਕਂ, ਤਂ ਰੁਕ੍ਖੇਸੁ ਸਿਞ੍ਚਨਂ ਟਿਨਾਤਿ ਜਾਨਾਤੀਤਿ ਕਣ੍ਡੋ, ਉਯ੍ਯਾਨਪਾਲੋ ਉਯ੍ਯਾਨ ਨਾਯਕੋ ਵਾ. ਫਲਕਾਮੇਹਿ ਜਨੇਹਿ ਅਮਿਯਤਿ ਗਮਿਯਤੀਤਿ ਅਮ੍ਬੋ, ਸੇਤਮ੍ਬਰੁਕ੍ਖੋ. ਅਮਧਾਤੁ ਗਤਿਯਂ ਬੋ. ਕਣ੍ਡਨਾਮਿਕੇਨ ਉਯ੍ਯਾਨਪਾਲੇਨ ਰੋਪਿਤੋ ਅਮ੍ਬੋ ਕਣ੍ਡਮ੍ਬੋ, ਤਸ੍ਸ ਮੂਲਂ ਸਮੀਪਨ੍ਤਿ ਕਣ੍ਡਮ੍ਬਮੂਲਂ, ਤਸ੍ਮਿਂ ਕਣ੍ਡਮ੍ਬਮੂਲੇ.

ਨਿਸਿਨ੍ਨੋਤਿ ਵਸਮਾਨੋ. ਵਿਮ੍ਹਾਪਨਿਯਟ੍ਠੇਨ ਅਚ੍ਛੇਰਂ. ਅਯਞ੍ਹਿ ਅਚ੍ਛੇਰਸਦ੍ਦੋ ਵਿਮ੍ਹਯਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿ ਪਦਿਕੋ. ਅਥ ਵਾ ਆਭੁਸੋ ਵਿਮ੍ਹਯੋ ਚਰਤਿ ਪਵਤ੍ਤਤੀਤਿ ਅਚ੍ਛੇਰਂ, ਪਾਟਿਹੇਰਂ. ਆਪੁਬ੍ਬ ਚਰਧਾਤੁ ਗਤਿਯਂ ਅ. ਚਰਧਾਤੁਸ੍ਸਚ੍ਛੇਰਾਦੇਸੋ. ਆਕਾਰਸ੍ਸ ਰਸ੍ਸੋ. ਅਨ੍ਧਸ੍ਸ ਪਬ੍ਬਤਾਰੋਹਨਂ ਵਿਯ ਨਿਚ੍ਚਂ ਨ ਚਰਤਿ ਨ ਪਵਤ੍ਤਤੀਤਿ ਅਚ੍ਛੇਰਂ, ਪਾਟਿਹੇਰਂ. ਨਪੁਬ੍ਬ ਚਰਧਾਤੁ ਗਤਿਯਂ ਅ. ਯਥਾ ਹਿ ਅਨ੍ਧਸ੍ਸ ਪਬ੍ਬਾਤਾਰੋਹਨਂ ਨਿਚ੍ਚਂ ਨ ਹੋਤਿ, ਕਦਾਚਿਯੇਵ ਹੋਤਿ, ਏਵਮੇਵ ਭਗਵਤੋ ਪਾਟਿਹਾਰਿਯਂ ਨਿਚ੍ਚਂ ਨ ਹੋਤਿ, ਕਦਾਚਿਯੇਵ ਹੋਤਿ. ਤਸ੍ਮਾ ਤਂ ਅਚ੍ਛੇਰਨ੍ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ਨੇਤ੍ਤਿਅਟ੍ਠਕਥਾਯਂ ‘‘ਯਂ ਅਭਿਣ੍ਹਂ ਨ ਪਵਤ੍ਤਤਿ, ਤਂ ਅਚ੍ਛਰਿਯ’’ਨ੍ਤਿ. ਅਥ ਵਾ ਅਚ੍ਛਰਂ ਪਹਰਿਤੁਂ ਯੋਗ੍ਗਨ੍ਤਿ ਅਚ੍ਛਰਿਯਂ. ਯੋਗ੍ਗਤਦ੍ਧਿਤੇ ਣਿਯਪਚ੍ਚਯੋ. ਅਚ੍ਛਰਿਯਨ੍ਤਿ ਹਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਇਯਸਦ੍ਦਲੋਪੇਨ ਅਚ੍ਛੇਰਨ੍ਤਿ ਵੁਤ੍ਤਂ. ਵੁਤ੍ਤਞ੍ਹੇਤਂ ਸੀਲਕ੍ਖਨ੍ਧਵਗ੍ਗਟ੍ਠਕਥਾਯਂ ‘‘ਅਨ੍ਧਸ੍ਸ ਪਬ੍ਬਤਾਰੋਹਨਂ ਵਿਯ ਨਿਚ੍ਚਂ ਨ ਹੋਤੀਤਿ ਅਚ੍ਛਰਿਯਂ. ਅਯਂ ਤਾਵ ਸਦ੍ਦਨਯੋ. ਅਯਂ ਪਨ ਅਟ੍ਠਕਥਾਨਯੋ, ਅਚ੍ਛਰਾਯੋਗ੍ਗਨ੍ਤਿ ਅਚ੍ਛਰਿਯਂ, ਅਚ੍ਛਰਂ ਪਹਰਿਤੁਂ ਯੁਤ੍ਤਨ੍ਤਿ ਅਤ੍ਥੋ’’ਤਿ. ਨਯਨਸੁਭਗਨ੍ਤਿ ਦੇਵਮਨੁਸ੍ਸਾਨਂ ਪਸਾਦਚਕ੍ਖੁਸ੍ਸ ਸੋਭਨਪਤ੍ਤਂ. ਸਮਵਿਸਮਂ ਦਸ੍ਸੇਨ੍ਤਂ ਅਤ੍ਤਭਾਵਂ ਨੇਤੀਤਿ ਨਯਨਂ, ਪਸਾਦਚਕ੍ਖੁ. ਨੀਧਾਤੁ ਨਯੇ ਯੁ. ਤਸ੍ਸ ਸੁਭਂ ਸੋਭਨਂ ਗਚ੍ਛਤੀਤਿ ਨਯਨਸੁਭਗਂ, ਪਾਟਿਹੇਰਂ. ਨਯਨਸੁਭ ਸਦ੍ਦੂਪਪਦਗਮੁਧਾਤੁ ਗਤਿਯਂ ਕ੍ਵਿ. ਤਂ ਨਯਨਸੁਭਗਂ.

ਆਕੁਲਣ੍ਣਗ੍ਗਿਜਾਲਨ੍ਤਿ ਏਤ੍ਥ ਆਕੁਲਅਣ੍ਣਅਗ੍ਗਿਜਾਲਨ੍ਤਿ ਪਦਚ੍ਛੇਦੋ. ਪਰਿਕਿਣ੍ਣ ਉਦਕਧਾਰ ਅਗ੍ਗਿਸਿਖਾਵਨ੍ਤਂ. ਅਥ ਵਾ ਪਰਿਸਮਨ੍ਤਤੋ ਕੁਲਂ ਪਕਿਣ੍ਣਂ ਅਞ੍ਞਮਞ੍ਞਮਿਸ੍ਸਕਂ ਯਮਕਂ ਯਮਕਂ ਉਦਕਜਾਲਅਗ੍ਗਿਜਾਲਵਨ੍ਤਨ੍ਤਿ ਅਤ੍ਥੋ. ਆਭੁਸੋ ਕੁਲਤਿ ਉਦਕਗ੍ਗਿਜਾਲਂ ਅਞ੍ਞਮਞ੍ਞਮਿਸ੍ਸਕਂ ਕਰੋਤੀਤਿ ਆਕੁਲਂ, ਉਦਕਗ੍ਗਿਜਾਲਂ. ਆਪੁਬ੍ਬਕੁਲਧਾਤੁ ਕਰਣੇ ਅ. ਆਭੁਸਂ ਕੁਲਤਿ ਬਨ੍ਧਤਿ ਅਞ੍ਞਮਞ੍ਞਨ੍ਤਿ ਵਾ ਆਕੁਲਂ. ਅਥ ਵਾ ਆਸਮਨ੍ਤਤੋ ਕੁਲਤਿ ਯਮਕਂ ਯਮਕਂ ਉਦਕਗ੍ਗਿਜਾਲਂ ਪਵਤ੍ਤਤੀਤਿ ਆਕੁਲਂ, ਉਦਕਗ੍ਗਿਜਾਲਂ. ਉਦਕਜਾਲਂ ਅਗ੍ਗਿਜਾਲੇਨ ਅਗ੍ਗਿਜਾਲਞ੍ਚ ਉਦਕਜਾਲੇਨ ਸਮ੍ਮਿਸ੍ਸੋ ਹੋਤੀਤਿ ਅਤ੍ਥੋ. ਅਨਨ੍ਤਿ ਜੀਵਨ੍ਤਿ ਏਤੇਨ ਸਤ੍ਤਾਤਿ ਅਣ੍ਣਂ, ਉਦਕਂ. ਅਨਧਾਤੁ ਜੀਵਾਯਂ ਅ. ਨਸ੍ਸ ਣੋ. ਤਸ੍ਸ ਦ੍ਵਿਤ੍ਤਂ. ਦ੍ਵਿਭਾਵੋ ਵਾ. ਅਥ ਵਾ ਅਰਤਿ ਗਚ੍ਛਤਿ ਤਂ ਤਂ ਠਾਨਨ੍ਤਿ ਅਣ੍ਣਂ. ਅਰਧਾਤੁ ਗਤਿਮ੍ਹਿਤੋ. ਤਸ੍ਸ ਅਨ੍ਨਾਦੇਸੋ, ਧਾਤ੍ਵਨ੍ਤਲੋਪੋ, ਨ੍ਨਸ੍ਸ ਣ੍ਣਤ੍ਤਂ. ਅਣ੍ਣਸ੍ਸ ਧਾਰਂ ਅਣ੍ਣਂ. ਉਤ੍ਤਰਪਦਲੋਪੇਨ. ਕੁਟਿਲਭਾਵੇਨ ਅਜਤਿ ਗਚ੍ਛਤੀਤਿ ਅਗ੍ਗਿ, ਅਜਧਾਤੁ ਗਤਿਯਂ ਇ. ਜਸ੍ਸ ਗ੍ਗੋ. ਜਲਤਿ ਦਿਬ੍ਬਤੀਤਿ ਜਾਲਂ, ਸਿਖਂ. ਜਲਧਾਤੁ ਦਿਤ੍ਤਿਯਂ ਣ. ਅਗ੍ਗਿਨੋ ਜਾਲਂ ਅਗ੍ਗਿਜਾਲਂ. ਅਣ੍ਣਞ੍ਚ ਅਗ੍ਗਿਜਾਲਞ੍ਚ ਅਣ੍ਣਗ੍ਗਿਜਾਲਂ, ਆਕੁਲਂ ਪਰਿਕਿਣ੍ਣਂ ਅਣ੍ਣਗ੍ਗਿਜਾਲਂ ਅਸ੍ਸਾਤਿ ਆਕੁਲਣ੍ਣਗ੍ਗਿਜਾਲਂ, ਯਮਕ ਪਾਟਿਹੇਰਂ ਲਬ੍ਭਤਿ. ਤਂ ਆਕੁਲਣ੍ਣਗ੍ਗਿਜਾਲਂ.

ਦੁਜ੍ਜਾਲਦ੍ਧਂਸਨ੍ਤਿ ਦੁਟ੍ਠੁ ਦਿਟ੍ਠਿਵਾਦਸਙ੍ਖਾਤਜਾਲਂ ਵਿਦ੍ਧਂਸਿਤਂ. ਦੁਟ੍ਠੁ ਜਲਤਿ ਬਨ੍ਧਤਿ ਸਂਸਾਰਵਟ੍ਟੇਤਿ ਦੁਜ੍ਜਾਲਂ, ਦਿਟ੍ਠਿਵਾਦਜਾਲਂ. ਤਿਤ੍ਥਿਯ ਵਾਦੋ ਹਿ ਨਤ੍ਥਿ ਦਿਨ੍ਨਨ੍ਤਿਆਦਿਨਯਪਵਤ੍ਤੋ ਸਂਸਾਰਤੋ ਨਿਸ੍ਸਰਿਤੁਮਪ੍ਪਦਾਨਵਸੇਨ ਜਾਲਸਦਿਸਤ੍ਤਾ ਦੁਜ੍ਜਾਲਨ੍ਤਿ ਅਤ੍ਥੋ. ਦੁਪੁਬ੍ਬ ਜਲਧਾਤੁ ਬਨ੍ਧਨੇ ਣੋ. ਤਂ ਧਂਸਤਿ ਵਿਦ੍ਧਂਸਤੀਤਿ ਦੁਜ੍ਜਾਲਦ੍ਧਂਸਂ, ਯਮਕਪਾਟਿਹਾਰਿਯਂ. ਮੁਨਿਭਿਜਹਿਤਨ੍ਤਿ ਮੁਨਿਭਿ ਅਜਹਿਤਨ੍ਤਿ ਪਦਚ੍ਛੇਦੋ. ਤਤ੍ਥ ਮੁਨਿਭੀਤਿ ਸਬ੍ਬਸਮ੍ਮਾਸਮ੍ਬੁਦ੍ਧੇਹਿ. ਤੇ ਹਿ ਮੋਨਂ ਵੁਚ੍ਚਤਿ ਸਬ੍ਬਞ੍ਞੁਤਞਾਣਂ, ਤਂ ਏਤੇਸਂ ਅਤ੍ਥੀਤਿ ਮੁਨੀਤਿ ਵੁਚ੍ਚਨ੍ਤਿ. ਕਾਯਮੋਨੇਯ੍ਯ ਵਚੀਮੋਨੇਯ੍ਯ ਮਨੋਮੋਨੇਯ੍ਯਂ ਏਤੇਸਂ ਅਤ੍ਥੀਤਿ ਵਾ ਮੁਨਿ. ਅਸ੍ਸਤ੍ਥਿਤਦ੍ਧਿਤੇ ਣੀਪਚ੍ਚਯੋ. ਅਥ ਵਾ ਇਧਲੋਕ ਪਰਲੋਕਂ ਅਤ੍ਤਹਿਤ ਪਰਹਿਤਂ ਹਿਤਾਹਿਤਞ੍ਚ ਮੁਨਨ੍ਤਿ ਜਾਨਨ੍ਤੀਤਿ ਮੁਨੀਤਿ ਵੁਚ੍ਚਨ੍ਤਿ. ਤੇਹਿ ਮੁਨੀਭਿ.

ਅਜਹਿਤਨ੍ਤਿ ਅਵਿਜਹਿਤਂ ਅਪਰਿਚ੍ਚਤ੍ਤਂ ਵਾ, ਹਾਤਬ੍ਬਂ ਚਜਿਤਬ੍ਬਨ੍ਤਿ ਜਹਿਤਂ. ਹਾਧਾਤੁ ਚਾਗੇ ਤ. ਨ ਜਹਿਤਂ ਅਜਹਿਤਂ, ਪਾਟਿਹੇਰਂ. ਤਂ ਅਜਹਿਤਂ. ਭਗਵਤੋ ਹਿ ਸਾਵਤ੍ਥਿਨਗਰਸ੍ਸ ਦਕ੍ਖਿਣਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ ਕਤਂ ਪਾਟਿਹਾਰਿਯਞ੍ਚ ਭਗਵਾ ਪਨ ਤਸ੍ਮਿਂ ਪਾਟਿਹਾਰਿਯਾਵਸਾਨੇ ਤਾਵਤਿਂਸਪੁਰਂ ਗਤੋ, ਤਸ੍ਮਿਂ ਪਾਰਿਛਤ੍ਤਕਮੂਲਮ੍ਹਿ ਪਣ੍ਡੁਕਮ੍ਬਲਨਾਮਕੇ ਸਿਲਾਸਨੇ ਸਨ੍ਨਿਸਿਨ੍ਨੋ ਦੇਵਾਨਂ ਅਭਿਧਮ੍ਮਕਥਾਯ ਦੇਸਨਾ ਚ ਸਬ੍ਬਸਮ੍ਮਾਸਮ੍ਬੁਦ੍ਧੇਹਿ ਅਵਿਜਹਿਤਾ ਧਮ੍ਮਤਾਯੇਵ ਹੋਤੀਤਿ ਵੁਤ੍ਤਂ ਹੋਤਿ. ਬੁਦ੍ਧਵਂਸਟ੍ਠਕਥਾਯਞ੍ਹਿ ਸਮਤਿਂਸਧਮ੍ਮਤਾਪਕਾਸਨੇ ਸਾਵਤ੍ਥਿ ਨਗਰਦ੍ਵਾਰੇ ਯਮਕਪਾਟਿਹਾਰਿਯਕਰਣਂ. ਤਾਵਤਿਂਸੇ ਭਵਨੇ ਅਭਿਧਮ੍ਮਦੇਸਨਾਤਿ ਧਮ੍ਮਤਾਭਾਵੇਨ ਵੁਤ੍ਤਂ. ਤਸ੍ਮਾ ਪਾਟਿਹੇਰਂ ਮੁਨੀਭਿਜਹਿਤਨ੍ਤਿ ਥੋਮੇਤਿ.

ਪਾਟਿਹੇਰਨ੍ਤਿ ਪਚ੍ਚਨੀਕਪਟਿਹਰਣਵਸੇਨ ਪਾਟਿਹਾਰਿਯਂ, ਪਟਿਪਕ੍ਖੇ ਤਿਤ੍ਥਿਯੇ ਮਦ੍ਦਿਤ੍ਵਾ ਹਿਨੋਤਿ ਪਵਤ੍ਤਤੀਤਿ ਪਾਟਿਹੇਰਂ. ਪਟਿਪੁਬ੍ਬਹਿਧਾਤੁ ਗਤਿਯਂ ਣੋ. ਹਿਸ੍ਸ ਹੇਰਣਿਦੇਸੋ. ਅਥ ਵਾ ਭਗਵਤੋ ਚ ਸਾਸਨਸ੍ਸ ਚ ਪਟਿਪਕ੍ਖੇ ਤਿਤ੍ਥਿਯੇ ਹਰਤਿ ਅਪਨੇਤੀਤਿ ਪਾਟਿਹੇਰਂ, ਇਦ੍ਧਿਵਿਧਞਾਣਂ. ਪਟਿਪੁਬ੍ਬਹਰਧਾਤੁ ਅਪਨਯਨੇ ਣੋ. ਪਟਿਹਰਤਿ ਅਪਨੇਤਿ ਸਤ੍ਤਾਨਂ ਦਿਟ੍ਠਿਮਾਨੋਪਗਤਾਨਿ ਚਿਤ੍ਤਾਨੀਤਿ ਵਾ ਪਾਟਿਹੇਰਂ. ਅਪ੍ਪਸਨ੍ਨਾਨਂ ਪਸਾਦਂ ਆਹਰਤੀਤਿ ਵਾ ਪਾਟਿਹੇਰਂ. ਸਮਾਹਿਤੇ ਚਿਤ੍ਤੇ ਵਿਗਤੂਪਕ੍ਕਿਲੇਸੇ ਕਤਕਿਚ੍ਚੇਨ ਪਟਿਪਚ੍ਛਾ ਹਰਿਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਵਾ ਪਾਟਿਹੇਰਂ. ਪਟੀਤਿ ਹਿ ਅਯਂਸਦ੍ਦੋ ਪਚ੍ਛਾਤਿ ਏਤਸ੍ਸ ਅਤ੍ਥਂ ਬੋਧੇਤਿ. ਤਸ੍ਮਿਂ ਪਟਿਪਵਿਟ੍ਠਮ੍ਹਿ ਅਞ੍ਞੋ ਆਗਚ੍ਛਿ ਬ੍ਰਾਹ੍ਮਣੋਤਿਆਦੀਸੁ ਵਿਯ. ਅਥ ਵਾ ਪਟਿਪੁਨਪ੍ਪੁਨਂ ਉਦਕਗ੍ਗਿਜਾਲਂ ਅਬ੍ਬੋਚ੍ਛਿਨ੍ਨਂ ਯਮਕਂ ਯਮਕਂ ਹੁਤ੍ਵਾ ਹਰਤਿ ਪਵਤ੍ਤਤੀਤਿ ਪਾਟਿਹੇਰਂ, ਯਮਕਪਾਟਿਹਾਰਿਯਂ. ਤਞ੍ਚ ਪਨ ਇਦ੍ਧਿਪਾਟਿਹਾਰਿਯ, ਆਦੇਸਨਾਪਾਟਿਹਾਰਿਯ, ਅਨੁਸਾ ਸਨੀ ਪਾਟਿਹਾਰਿਯਵਸੇਨ ਤਿਵਿਧਂ ਹੋਤਿ. ਤੇਸੁ ਪਨ ਇਧ ਇਦ੍ਧਿਪਾਟਿਹਾਰਿਯਂ ਅਧਿਪ੍ਪੇਤਨ੍ਤਿ. ਸੀਘਨ੍ਤਿ ਖਿਪ੍ਪਂ ਆਸੁਂ ਲਹੁਂ ਵਾ. ਤਂ ਪਨ ਅਕਾਸੀਤਿਪਦੇ ਕ੍ਰਿਯਾਵਿਸੇਸਨਂ. ਸੇਤਿ ਲਹੁ ਹੁਤ੍ਵਾ ਪਵਤ੍ਤਤੀਤਿ ਸੀਘਂ. ਸਿਧਾਤੁ ਗਤਿਮ੍ਹਿ ਘਪਚ੍ਚਯੋ. ਦੀਘੋ. ਅਕਾਸੀਤਿ ਅਕਰਿ.

ਏਤ੍ਥ ਚ ਪਾਟਿਹਾਰਿਯਮੇਵਂ ਵੇਦਿਤਬ੍ਬਂ. ਭਗਵਾ ਹਿ ਅਭਿਸਮ੍ਬੋਧਿਤੋ ਸਤ੍ਤਮੇ ਸਂਵਚ੍ਛਰੇ ਸਾਵਤ੍ਥਿਨਗਰਸ੍ਸ ਦਕ੍ਖਿਣਦ੍ਵਾਰੇ ਕਣ੍ਡਮ੍ਬਰੁਕ੍ਖਮੂਲੇ ਦੇਵਾਨਮਿਨ੍ਦੇਨ ਸਕ੍ਕੇਨ ਆਣਾਪਿਤੇਨ ਵਿਸੁਕਮ੍ਮਦੇਵਪੁਤ੍ਤੇਨ ਨਿਮ੍ਮਿਤੇ ਦ੍ਵਾਦਸਯੋਜਨੇ ਰਤਨ ਮਣ੍ਡਪੇ ਭਗਵਤਾ ਨਿਮ੍ਮਿਤੇ ਯੋਜਨਪ੍ਪਮਾਣੇ ਰਤਨਪਲ੍ਲਙ੍ਕੇ ਰਤਨਚਙ੍ਕਮੇ ਚ ਨਿਸੀਦਿਤ੍ਵਾ ਤਿਯੋਜਨਿਕੇ ਦਿਬ੍ਬਸੇਤਚ੍ਛਤ੍ਤੇ ਧਾਰਯਮਾਨੇ ਸਮਨ੍ਤਤੋ ਦ੍ਵਾਦਸਯੋਜਨਾਯ ਪਰਿਸਾਯ ਅਤ੍ਥਾਦਾਨਪਰਿਦੀਪਨਂ ਤਿਤ੍ਥਿਯਮਦ੍ਦਨਂ ਉਪਰਿਮਕਾਯਤੋ ਅਗ੍ਗਿਕ੍ਖਨ੍ਧੋ ਪਵਤ੍ਤਤਿ, ਹੇਟ੍ਠਿਮਕਾਯਤੋ ਉਦਕਧਾਰਾ ਪਵਤ੍ਤਤਿ, ਹੇਟ੍ਠਿਮਕਾਯਤੋ ਅਗ੍ਗਿਕ੍ਖਨ੍ਧੋ, ਉਪਰਿਮਕਾਯਤੋ ਉਦਕਧਾਰਾ. ਪੁਰਤ੍ਥਿਮਕਾਯਤੋ ਅਗ੍ਗਿਕ੍ਖਨ੍ਧੋ, ਪਚ੍ਛਿਮਕਾਯਤੋ ਉਦਕਧਾਰਾ. ਪਚ੍ਛਿਮਕਾਯਤੋ ਅਗ੍ਗਿਕ੍ਖਨ੍ਧੋ, ਪੁਰਤ੍ਥਿਮਕਾਯਤੋ ਉਦਕਧਾਰਾ, ਦਕ੍ਖਿਣਅਕ੍ਖਿਤੋ ਅਗ੍ਗਿਕ੍ਖਨ੍ਧੋ, ਵਾਮਅਕ੍ਖਿਤੋ ਉਦਕਧਾਰਾ. ਵਾਮਅਕ੍ਖਿਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਅਕ੍ਖਿਤੋ ਉਦਕਧਾਰਾ. ਦਕ੍ਖਿਣਕਣ੍ਣਸੋਤਤੋ ਅਗ੍ਗਿਕ੍ਖਨ੍ਧੋ, ਵਾਮਕਣ੍ਣਸੋਤਤੋ ਉਦਕਧਾਰਾ. ਵਾਮਕਣ੍ਣਸੋਤਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਕਣ੍ਣਸੋਤਤੋ ਉਦਕਧਾਰਾ. ਦਕ੍ਖਿਣ ਨਾਸਿਕਾਸੋਤਤੋ ਅਗ੍ਗਿਕ੍ਖਨ੍ਧੋ, ਵਾਮਨਾਸਿਕਾਸੋ ਤਤੋ ਉਦਕਧਾਰਾ. ਵਾਮਨਾਸਿਕਾਸੋਤਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਨਾਸਿਕਾਸੋਤਤੋ ਉਦਕਧਾਰਾ. ਦਕ੍ਖਿਣਅਂਸਕੂਟਤੋ ਅਗ੍ਗਿਕ੍ਖਨ੍ਧੋ, ਵਾਮਅਂਸਕੂਟਤੋ ਉਦਕਧਾਰਾ. ਵਾਮਅਂਸਕੂਟਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਅਂਸਕੂਟਤੋ ਉਦਕਧਾਰਾ. ਦਕ੍ਖਿਣਹਤ੍ਥਤੋ ਅਗ੍ਗਿਕ੍ਖਨ੍ਧੋ, ਵਾਮਹਤ੍ਥਤੋ ਉਦਕਧਾਰਾ. ਵਾਮਹਤ੍ਥਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਹਤ੍ਥਤੋ ਉਦਕਧਾਰਾ. ਦਕ੍ਖਿਣਪਸ੍ਸਤੋ ਅਗ੍ਗਿਕ੍ਖਨ੍ਧੋ, ਵਾਮਪਸ੍ਸਤੋ ਉਦਕਧਾਰਾ. ਵਾਮਪਸ੍ਸਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਪਸ੍ਸਤੋ ਉਦਕਧਾਰਾ. ਦਕ੍ਖਿਣਪਾਦਤੋ ਅਗ੍ਗਿਕ੍ਖਨ੍ਧੋ, ਵਾਮਪਾਦਤੋ ਉਦਕਧਾਰਾ. ਵਾਮਪਾਦਤੋ ਅਗ੍ਗਿਕ੍ਖਨ੍ਧੋ, ਦਕ੍ਖਿਣਪਾਦਤੋ ਉਦਕਧਾਰਾ. ਅਙ੍ਗੁਲਙ੍ਗੁਲੇਹਿ ਅਗ੍ਗਿਕ੍ਖਨ੍ਧੋ, ਅਙ੍ਗੁਲਨ੍ਤਰਿਕਾਹਿ ਉਦਕਧਾਰਾ. ਅਙ੍ਗੁਲਨ੍ਤਰਿਕਾਹਿ ਅਗ੍ਗਿਕ੍ਖਨ੍ਧੋ, ਅਙ੍ਗੁਲਙ੍ਗੁਲੇਹਿ ਉਦਕਧਾਰਾ. ਏਕੇਕਲੋਮਤੋ ਅਗ੍ਗਿਕ੍ਖਨ੍ਧੋ, ਏਕੇਕਲੋਮਤੋ ਉਦਕਧਾਰਾ. ਲੋਮਕੂਪਤੋ ਲੋਮਕੂਪਤੋ ਅਗ੍ਗਿਕ੍ਖਨ੍ਧੋ, ਲੋਮਕੂਪਤੋ ਲੋਮਕੂਪਤੋ ਉਦਕਧਾਰਾ ਪਵਤ੍ਤਤਿ. ਛਨ੍ਨਂ ਵਣ੍ਣਾਨਂ ਨੀਲਾਨਂ ਪੀਤਾਨਂ ਲੋਹਿਤਕਾਨਂ ਓਦਾਤਾਨਂ ਮਞ੍ਜਟ੍ਠਾਨਂ ਪਭਸ੍ਸਰਾਨਂ ਉਬ੍ਬਹਨਭੂਤਾਨਂ ਯਮਕਾ ਯਮਕਾ ਵਣ੍ਣਾ ਪਵਤ੍ਤਨ੍ਤਿ. ਭਗਵਾ ਚਙ੍ਕਮਤਿ, ਨਿਮ੍ਮਿਤੋ ਤਿਟ੍ਠਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਤਿਟ੍ਠਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਨਿਸੀਦਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਭਗਵਾ ਸੇਯ੍ਯਂ ਕਪ੍ਪੇਤਿ, ਨਿਮ੍ਮਿਤੋ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾ. ਨਿਮ੍ਮਿਤੋ ਚਙ੍ਕਮਤਿ, ਭਗਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਤਿਟ੍ਠਤਿ, ਭਗਵਾ ਚਙ੍ਕਮਤਿ ਵਾ ਨਿਸੀਦਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਨਿਸੀਦਤਿ, ਭਗਵਾ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਸੇਯ੍ਯਂ ਵਾ ਕਪ੍ਪੇਤਿ. ਨਿਮ੍ਮਿਤੋ ਸੇਯ੍ਯਂ ਕਪ੍ਪੇਤਿ, ਭਗਵਾ ਚਙ੍ਕਮਤਿ ਵਾ ਤਿਟ੍ਠਤਿ ਵਾ ਨਿਸੀਦਤਿ ਵਾਤਿ ਵਿਵਿਧਂ ਯਮਕਪਾਟਿਹਾਰਿਯਂ ਤਿਤ੍ਥਿਯਾਨਂ ਮਦ੍ਦਨਤ੍ਥਾਯ ਅਕਾਸੀਤਿ. ਏਤ੍ਥ ਚ ਪਨ ਯੋ ਕੋਚਿ ਏਵਰੂਪਂ ਪਾਟਿਹਾਰਿਯਂ ਕਾਤੁਂ ਸਮਤ੍ਥੋ ਚੇ. ਸੋ ਆਗਚ੍ਛਤੂਤਿ ਚੋਦਨਾਸਦਿਸਤ੍ਤਾ ਵੁਤ੍ਤਂ ਅਤ੍ਥਾਦਾਨਪਰਿਦੀਪਨਨ੍ਤਿ. ਅਤ੍ਥਾਦਾਨਞ੍ਹਿ ਅਨੁਯੋਗੋ, ਪਟਿਪਕ੍ਖਸ੍ਸ ਅਤ੍ਥਸ੍ਸ ਆਦਾਨਂ ਗਹਣਨ੍ਤਿ ਕਤ੍ਵਾ, ਤਸ੍ਸ ਪਰਿਦੀਪਨਂ ਅਤ੍ਥਾਦਾਨਪਰਿਦੀਪਨਂ. ਤਿਤ੍ਥਿਯਮਦ੍ਦਨਨ੍ਤਿ ਪਾਟਿਹਾਰਿਯਂ ਕਰਿਸ੍ਸਾਮਾਤਿ ਕੁਹਾਯਨਵਸੇਨ ਪੁਬ੍ਬੇ ਉਟ੍ਠਿਤਾਨਂ ਤਿਤ੍ਥਿਯਾਨਂ ਮਦ੍ਦਨਂ. ਤਞ੍ਚ ਤਥਾ ਕਾਤੁਂ ਅਸਮਤ੍ਥਤਾ ਸਮ੍ਪਾਦਨਮੇਵ. ਤਦੇਤਂ ਪਦਦ੍ਵਯਂ ਯਮਕਪਾਟਿਹਾਰਿਯਨ੍ਤਿ ਏਤੇਨ ਸਮ੍ਬਨ੍ਧਿਤਬ੍ਬਨ੍ਤਿ.

ਸੇਟ੍ਠਨ੍ਤਿ ਪਸਤ੍ਥਤਰਂ. ਤਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਪਰਮਰਤਿਜਨ੍ਤਿ ਦੇਵਮਨੁਸ੍ਸਾਨਂ ਉਤ੍ਤਮਰਤਿਂ ਜਨਕਂ. ਪਰਮਾਨਂ ਉਤ੍ਤਮਸਾਧੂਨਂ ਚਿਤ੍ਤਰਮਨਂ ਜਨਾਪੇਤਂ ਵਾ, ਏਤ੍ਥ ਚ ਪਠਮਵਿਕਪ੍ਪੇ ਪਰਮਸਦ੍ਦੋ ਉਤ੍ਤਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ ਨਿਪਾਤੋ. ਦੁਤਿਯਵਿਕਪ੍ਪੇ ਸਾਧੁਵਾਚਕੋ ਨਿਪ੍ਫਨ੍ਨਪਾਟਿਪਦਿਕੋ. ਦੇਵਮਨੁਸ੍ਸਾਨਂ ਪਰਮਂ ਉਤ੍ਤਮਂ ਰਤਿਂ ਜਨੇਤੀਤਿ ਪਰਮਰਤਿਜੋ, ਮੁਨਿਨ੍ਦੋ. ਪਰਮਰਤਿਸਦ੍ਦੂਪਪਦ ਜਨਧਾਤੁ ਜਨਨੇ ਕ੍ਵਿ. ਅਥ ਵਾ ਪਕਾਰੇਨ ਸਦ੍ਧਮ੍ਮੇ ਰਮਨ੍ਤੀਤਿ ਪਰਮਾ, ਸਾਧੂ ਲਬ੍ਭਨ੍ਤਿ. ਪਪੁਬ੍ਬ ਰਮੁਧਾਤੁ ਕੀਲ਼ਾਯਂ ਅ. ਤੇਸਂ ਚਿਤ੍ਤਸ੍ਸ ਰਤਿਂ ਰਮਨਂ ਜਨੇਤੀਤਿ ਪਰਮਰਤਿਜੋ, ਮੁਨਿਨ੍ਦੋ. ਤਂ ਪਰਮਰਤਿਜਂ. ਸੋ ਹਿ ਧਮ੍ਮ ਦੇਸਨਾਯ ਚ ਪਾਟਿਹਾਰਿਯੇਨ ਇਦ੍ਧਿਯਾ ਸਰੀਰਸੋਭਗ੍ਗ ਸਮ੍ਪਤ੍ਤਿਆਦੀਹਿ ਚ ਦੇਵਮਨੁਸ੍ਸਾਨਂ ਚਿਤ੍ਤਸ੍ਸ ਅਭਿਰਤਿਂ ਅਭਿਕ੍ਕਨ੍ਤਂ ਜਨੇਤੀਤਿ ਪਰਮਰਤਿਜਨ੍ਤਿ ਥੋਮੇਤਿ.

ਇਦ੍ਧਿਧਮ੍ਮੇਹੁਪੇਤਨ੍ਤਿ ਇਦ੍ਧਿਧਮ੍ਮੇਹਿ ਉਪੇਤਨ੍ਤਿ ਪਦਚ੍ਛੇਦੋ. ਇਦ੍ਧਿ ਧਮ੍ਮੇਹੀਤਿ ਅਚਿਨ੍ਤੇਯ੍ਯਅਪ੍ਪਮੇਯ੍ਯੇਹਿ ਬੁਦ੍ਧਇਦ੍ਧਿਸਙ੍ਖਾਤਗੁਣੇਹਿ. ਧਮ੍ਮਸਦ੍ਦੋ ਹਿ ਗੁਣੇ ਵਤ੍ਤਤਿ ਬੁਦ੍ਧਧਮ੍ਮਾਤਿਆਦੀਸੁ ਵਿਯ. ਇਜ੍ਝਨਂ ਸਮਿਜ੍ਝਨਂ ਇਦ੍ਧਿ. ਇਜ੍ਝਤਿ ਸਮਿਜ੍ਝਤੀਤਿ ਵਾ ਇਦ੍ਧਿ. ਇਜ੍ਝਤਿ ਸਮਿਜ੍ਝਤਿ ਯਥਿਚ੍ਛਿਤਤ੍ਥੋ ਏਤਾਯਾਤਿ ਇਦ੍ਧਿ. ਇਧਧਾਤੁ ਵੁਦ੍ਧਿਯਂ ਇ, ਤਿਪਚ੍ਚਯੋ ਵਾ. ਭਗਵਾ ਏਤਾਯ ਇਦ੍ਧਿਯਾ ਯਥਿਚ੍ਛਿਤਤ੍ਥੋ ਇਦ੍ਧੋ ਵੁਦ੍ਧੋ ਉਕ੍ਕਂਸਗਤੋ ਹੋਤੀਤਿ ਅਤ੍ਥੋ. ਧਾਰੇਤਿ ਪਕਾਸੇਤਿ ਤਂਸਮਙ੍ਗਿਨੋ ਦਬ੍ਬਨ੍ਤਿ ਧਮ੍ਮੋ, ਗੁਣੋ. ਇਦ੍ਧਿਏਵ ਧਮ੍ਮੋ ਇਦ੍ਧਿਧਮ੍ਮੋ, ਤੇਹਿ ਧਮ੍ਮੇਹਿ. ਉਪੇਤਨ੍ਤਿ ਸਮਨ੍ਨਾਗਤਂ. ਉਪਗਚ੍ਛਤਿ ਸਮ੍ਪਜ੍ਜਤੀਤਿ ਉਪੇਤੋ, ਮੁਨਿਨ੍ਦੋ. ਉਪਪੁਬ੍ਬਇਧਾਤੁ ਗਤਿਯਂ ਤ. ਤਂ ਉਪੇਤਂ.

ਇਦ੍ਧਿ ਪਨ ਅਧਿਟ੍ਠਾਨਾ ਇਦ੍ਧਿ, ਵਿਕੁਪ੍ਪਨਾ ਇਦ੍ਧਿ, ਮਨੋਮਯਾ ਇਦ੍ਧਿ, ਞਾਣਵਿਪ੍ਫਾਰਾ ਇਦ੍ਧਿ, ਸਮਾਧਿਵਿਪ੍ਫਾਰਾ ਇਦ੍ਧਿ, ਅਰਿਯਾ ਇਦ੍ਧਿ, ਕਮ੍ਮਵਿਪਾਕਜਾ ਇਦ੍ਧਿ, ਪੁਞ੍ਞਵਤੋ ਇਦ੍ਧਿ, ਵਿਜ੍ਜਾਮਯਾ ਇਦ੍ਧਿ, ਤਤ੍ਥ ਤਤ੍ਥ ਸਮ੍ਮਾਪਯੋਗਪਚ੍ਚਯਾ ਇਜ੍ਝਨਟ੍ਠੇਨ ਇਦ੍ਧਿ ਚਾਤਿ ਦਸਵਿਧਾ ਹੋਤਿ. ਤਤ੍ਥ ਪਕਤਿਯਾ ਏਕੋ ਬਹੁਕਂ ਆਪਜ੍ਜਤਿ. ਸਤਂ ਵਾ ਸਹਸ੍ਸਂ ਵਾ ਆਵਜ੍ਜਿਤ੍ਵਾ ਞਾਣੇਨ ਅਧਿਟ੍ਠਾਤਿ ਬਹੁਕੋ ਹੋਮੀਤਿ ਏਵਂ ਵਿਭਜਿਤ੍ਵਾ ਦਸ੍ਸਿਤਾ ਇਦ੍ਧਿ ਅਧਿਟ੍ਠਾਨ ਵਸੇਨ ਨਿਪ੍ਫਨ੍ਨਤ੍ਤਾ ਅਧਿਟ੍ਠਾਨਾ ਇਦ੍ਧਿ ਨਾਮ. ਪਕਤਿਵਣ੍ਣਂ ਵਿਜਹਿਤ੍ਵਾ ਕੁਮਾਰਵਣ੍ਣਂ ਵਾ ਦਸ੍ਸੇਤਿ ਨਾਗਵਣ੍ਣਂ ਵਾ ਸੁਪਣ੍ਣਵਣ੍ਣਂ ਵਾ ਯਕ੍ਖਵਣ੍ਣਂ ਵਾ…ਪੇ… ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤੀਤਿ ਏਵਂ ਆਗਤਾ ਇਦ੍ਧਿ ਪਕਤਿਵਣ੍ਣਵਿਜਹਨਵਿਕਾਰਵਸੇਨ ਪਵਤ੍ਤਤ੍ਤਾ ਵਿਕੁਪ੍ਪਨਾ ਇਦ੍ਧਿ ਨਾਮ. ਇਧ ਭਿਕ੍ਖੁ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਅਭਿਨਿਮ੍ਮਿਨਾਤਿ ਰੂਪਂ ਮਨੋਮਯਨ੍ਤਿ ਇਮਿਨਾ ਨਯੇਨ ਆਗਤਾ ਇਦ੍ਧਿ ਸਰੀਰਬ੍ਭਨ੍ਤਰੇ ਅਞ੍ਞਸ੍ਸੇਵ ਮਨੋਮਯਸ੍ਸ ਸਰੀਰਸ੍ਸ ਨਿਪ੍ਫਤ੍ਤਿਵਸੇਨ ਪਵਤ੍ਤਤ੍ਤਾ ਮਨੋਮਯਾ ਇਦ੍ਧਿ ਨਾਮ. ਞਾਣੁਪ੍ਪਤ੍ਤਿਤੋ ਪੁਬ੍ਬੇ ਵਾ ਪਚ੍ਛਾ ਵਾ ਤਙ੍ਖਣੇ ਵਾ ਞਾਣਾਨੁਭਾਵਨਿਬ੍ਬਤ੍ਤਾ ਵਿਸੇਸਾ ਞਾਣਵਿਪ੍ਫਾਰਾ ਇਦ੍ਧਿ ਨਾਮ. ਏਤ੍ਥ ਚ ਆਯਸ੍ਮਤੋ ਬਾਕੁਲਤ੍ਥੇਰਸ੍ਸ ਚ ਆਯਸ੍ਮਤੋ ਸਂਕਿਚ੍ਚਤ੍ਥੇਰਸ੍ਸ ਚ ਆਯਸ੍ਮਤੋ ਭੂਤਪਾਲਤ੍ਥੇਰਸ੍ਸ ਚ ਞਾਣਵਿਪ੍ਫਾਰਾ ਇਦ੍ਧਿ ਵੇਦਿਤਬ੍ਬਾ. ਸਮਾਧਿਤੋ ਪੁਬ੍ਬੇ ਵਾ ਪਚ੍ਛਾ ਵਾ ਤਙ੍ਖਣੇ ਵਾ ਸਮਥਾਨੁਭਾਵੇਨ ਨਿਬ੍ਬਤ੍ਤਾ ਵਿਸੇਸਾ ਸਮਾਧਿਵਿਪ੍ਫਾਰਾ ਇਦ੍ਧਿ ਨਾਮ. ਏਤ੍ਥ ਚ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਚ ਆਯਸ੍ਮਤੋ ਸਞ੍ਜੀਵਤ੍ਥੇਰਸ੍ਸ ਚ ਆਯਸ੍ਮਤੋ ਖਾਣੁਕੋਣ੍ਡਞ੍ਞਤ੍ਥੇਰਸ੍ਸ ਚ ਉਤ੍ਤਰਾਯ ਉਪਾਸਿਕਾਯ ਚ ਸਾਮਾਵਤਿਯਾ ਉਪਾਸਿਕਾਯ ਚ ਸਮਾਧਿਵਿਪ੍ਫਾਰਾ ਇਦ੍ਧਿ ਵੇਦਿਤਬ੍ਬਾ.

ਪਟਿਕੂਲਾਦੀਸੁ ਅਪ੍ਪਟਿਕੂਲਸਞ੍ਞੀ ਵਿਹਾਰਾਦਿਕਾ ਪਨ ਅਰਿਯਾ ਇਦ੍ਧਿ ਨਾਮ. ਪਕ੍ਖਿਦੇਵਾਦੀਨਂ ਵੇਹਾਸਗਮਨਾਦਿਕਾ ਕਮ੍ਮ ਵਿਪਾਕਜਾ ਇਦ੍ਧਿ ਨਾਮ. ਯਥਾਹ ‘‘ਕਤਮਾ ਵਿਪਾਕਜਾ ਇਦ੍ਧਿ. ਸਬ੍ਬੇਸਂ ਪਕ੍ਖੀਨਂ ਸਬ੍ਬੇਸਂ ਦੇਵਾਨਂ ਏਕਚ੍ਚਾਨਂ ਮਨੁਸ੍ਸਾਨਂ ਏਕਚ੍ਚਾ ਨਞ੍ਚ ਵਿਨਿਪਾਤਿਕਾਨਂ ਅਯਂ ਕਮ੍ਮਵਿਪਾਕਜਾ ਇਦ੍ਧੀ’’ਤਿਆਦਿ. ਚਕ੍ਕਵਤ੍ਤਿਆਦੀਨਂ ਵੇਹਾਸਗਮਨਾਦਿਕਾ ਪਨ ਪੁਞ੍ਞਵਤੋ ਇਦ੍ਧਿ ਨਾਮ. ਯਥਾਹ ‘‘ਕਤਮਾ ਪੁਞ੍ਞਵਤੋ ਇਦ੍ਧਿ. ਰਾਜਾ ਚਕ੍ਕਵਤ੍ਤਿ ਵੇਹਾਸਂ ਗਚ੍ਛਤਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯ ਅਨ੍ਤਮਸੋ ਅਸ੍ਸਬਨ੍ਧਗੋਬਨ੍ਧਪੁਰਿਸੇ ਉਪਾਦਾਯ. ਜੋਤਿਕਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧਿ. ਜਟਿਲਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧਿ. ਘੋਸਕਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧਿ. ਮੇਣ੍ਡਕਸ੍ਸ ਗਹਪਤਿਸ੍ਸ ਪੁਞ੍ਞਵਤੋ ਇਦ੍ਧਿ. ਪਞ੍ਚਨ੍ਨਂ ਮਹਾਪੁਞ੍ਞਾਨਂ ਪੁਞ੍ਞਵਤੋ ਇਦ੍ਧੀ’’ਤਿ. ਵਿਜ੍ਜਾਧਰਾਦੀਨਂ ਵੇਹਾਸਗਮਨਾਦਿਕਾ ਪਨ ਵਿਜ੍ਜਾਮਯਾ ਇਦ੍ਧਿ ਨਾਮ. ਏਤ੍ਥ ਚ ਆਦਿਸਦ੍ਦੇਨ ਆਕਾਸੇ ਅਨ੍ਤਲਿਕ੍ਖੇ ਹਤ੍ਥਿਮ੍ਪਿ ਦਸ੍ਸੇਤਿ. ਅਸ੍ਸਮ੍ਪਿ…ਪੇ… ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤਿ ਤ੍ਯਾਦਿਂ ਸਙ੍ਗਣ੍ਹਾਤਿ. ਤੇਨ ਤੇਨ ਸਮ੍ਮਾਪਯੋਗੇਨ ਤਸ੍ਸ ਤਸ੍ਸ ਕਮ੍ਮਸ੍ਸ ਇਜ੍ਝਨਂ ਤਤ੍ਥ ਤਤ੍ਥ ਸਮ੍ਮਾ ਪਯੋਗਪਚ੍ਚਯਾ ਇਜ੍ਝਨਟ੍ਠੇਨ ਇਦ੍ਧਿ ਨਾਮ.

ਅਯਂ ਪਨੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਪਟਿਸਮ੍ਭਿਦਾਮਗ੍ਗੇ ਇਦ੍ਧਿਕਥਾਯ ਚ ਵਿਸੁਦ੍ਧਿਮਗ੍ਗਟ੍ਠਕਥਾਯ ਚ ਗਹੇਤਬ੍ਬੋ. ਤਾਸੁ ਪਨ ਇਦ੍ਧੀਸੁ ਭਗਵਤੋ ਠਪੇਤ੍ਵਾ ਵਿਜ੍ਜਾਮਯਿਦ੍ਧਿਂ ਅਵਸੇਸਾ ਅਤ੍ਥੀਤਿ ਵੇਦਿਤਬ੍ਬਾ. ਅਥ ਵਾ ਭਗਵਤੋ ਤੀਹਿ ਵਿਜ੍ਜਾਹਿ ਚ ਅਟ੍ਠਹਿ ਵਿਜ੍ਜਾਹਿ ਚ ਸਮਨ੍ਨਾਗਤਤ੍ਤਾ ਸਬ੍ਬਾ ਬੁਦ੍ਧਇਦ੍ਧਿਯੋ ਸਨ੍ਤੀਤਿ ਵਿਜ੍ਜਾਮਯਿਦ੍ਧਿਪਿ ਲਬ੍ਭਤੀਤਿ ਦਟ੍ਠਬ੍ਬਾ. ਤਂ ਮੁਨਿਨ੍ਦਂ ਅਹਂ ਵਨ੍ਦੇ ਵਨ੍ਦਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਤ੍ਥਯੋਜਨਾ. ਪਰਹਿਤਕਰੋ ਅਤ੍ਤਨਾ ਪਰੇਸਂ ਸਬ੍ਬਸਤ੍ਤਾਨਂ ਅਤ੍ਥਂ ਪਯੋਜਨਂ ਕਰੋਨ੍ਤੋ, ਯੋ ਮੁਨਿਨ੍ਦੋ ਯੋ ਯਾਦਿਸੋ ਬੁਦ੍ਧੋ, ਕਣ੍ਡਮ੍ਬਂਮੂਲੇ ਕਣ੍ਡਨਾਮਿਕੇਨ ਪਸੇਨਦਿਕੋਸਲਰਞ੍ਞੋ ਉਯ੍ਯਾਨਪਾਲੇਨ ਰੋਪਿਤਸ੍ਸ ਸੇਤਮ੍ਬਰੁਕ੍ਖਸ੍ਸ ਸਮੀਪੇ ਸਨ੍ਨਿਸਿਨ੍ਨੋ ਵਸਮਾਨੋ ਅਚ੍ਛੇਰਂ ਵਿਮ੍ਹਾਪਨੀਯਂ ਨਯਨਸੁਭਗਂ ਦੇਵਮਨੁਸ੍ਸਾਨਂ ਪਸਾਦ ਚਕ੍ਖੁਸ੍ਸ ਸੋਭਨਪਤ੍ਤਂ ਆਕੁਲਣ੍ਣਗ੍ਗਿਜਾਲਂ ਪਰਿਕਿਣ੍ਣਉਦਕ ਧਾਰਅਗ੍ਗਿਸਿਖਵਨ੍ਤਂ ਪਰਿਸਮਨ੍ਤਤੋ ਕੁਲਂ ਪਰਿਕਿਣ੍ਣਂ ਅਞ੍ਞਮਞ੍ਞ ਮਿਸ੍ਸਕਂ ਯਮਕਂ ਯਮਕਂ ਉਦਕਜਾਲਅਗ੍ਗਿਜਾਲਵਨ੍ਤਂ ਵਾ, ਦੁਜ੍ਜਾਲਦ੍ਧਂਸਂ ਦੁਟ੍ਠੁਂ ਮਿਚ੍ਛਾਦਿਟ੍ਠਿਵਾਦਸਙ੍ਖਾਤਂ ਜਾਲਂ ਵਿਦ੍ਧਂਸਿਤਂ, ਮੁਨਿਭਿਜਹਿਤਂ ਸਬ੍ਬਸਮ੍ਮਾਸਮ੍ਬੁਦ੍ਧੇਹਿ ਅਵਿਜਹਿਤਂ, ਪਾਟਿਹੇਰਂ ਪਚ੍ਚਨੀਕ ਪਟਿਹਾਰਕਂ ਪਾਟਿਹਾਰਿਯਂ ਉਦਕਗ੍ਗਿਯਮਕਂਯਮਕਂ ਪਾਟਿਹਾਰਿਯਂ ਵਾ, ਸੀਘਂ ਖਿਪ੍ਪਂ ਅਕਾਸਿ ਅਕਰਿ, ਸੇਟ੍ਠਂ ਪਸਤ੍ਥਤਰਂ, ਪਰਮਰਤਿਜਂ ਦੇਵਮਨੁਸ੍ਸਾਨਂ ਉਤ੍ਤਮਰਤਿਂ ਜਨਕਂ ਉਤ੍ਤਮਾਨਂ ਸਾਧੂਨਂ ਚਿਤ੍ਤਰਮਨਂ ਜਨਾਪੇਤਂ ਵਾ, ਇਦ੍ਧਿਧਮ੍ਮੇਹਿ ਅਚਿਨ੍ਤੇਯ੍ਯਅਪ੍ਪਮੇਯ੍ਯੇਹਿ ਬੁਦ੍ਧਇਦ੍ਧਿ ਗੁਣੇਹਿ ਉਪੇਤਂ ਸਮਨ੍ਨਾਗਤਂ, ਤਂ ਮੁਨਿਨ੍ਦਂ ਅਹਂ ਸਿਰਸਾ ਵਨ੍ਦੇ ਵਨ੍ਦਾਮੀਤਿ.

ਏਕੂਨਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੦. ਮੁਨਿਨ੍ਦਕ੍ਕੋ ਯ੍ਵੇਕੋ ਦਯੁਦਯਰੁਣੋ ਞਾਣਵਿਤ੍ਥਿਣ੍ਣਬਿਮ੍ਬੋ, ਵਿਨੇਯ੍ਯਪ੍ਪਾਣੋਘਂ ਕਮਲਕਥਿਤਂ ਧਮ੍ਮਰਂਸੀਵਰੇਹਿ. ਸੁਬੋਧੇਸੀ ਸੁਦ੍ਧੇ ਤਿਭਵਕੁਹਰੇ ਬ੍ਯਾਪਿਤਕ੍ਕਿਤ੍ਤਿਨਞ੍ਚ, ਤਿਲੋਕੇਕਚ੍ਚਕ੍ਖੁਂ ਦੁਖਮਸਹਨਂ ਤਂ ਮਹੇਸਿਂ ਨਮਾਮਿ.

੨੦. ਏਵਂ ਏਕੂਨਵੀਸਤਿਮਾਯ ਗਾਥਾਯ ਮੁਨਿਨ੍ਦਂ ਵਨ੍ਦਿਤ੍ਵਾ ਇਦਾਨਿ ਵਿਨੇਯ੍ਯਪ੍ਪਾਣੋਘਂ ਧਮ੍ਮਦੇਸਨਾਯ ਚਤੁਸਚ੍ਚਧਮ੍ਮਂ ਬੋਧਨੇਯ੍ਯਾਦੀਹਿ ਨਵਹਿ ਗੁਣੇਹਿ ਥੋਮਿਤ੍ਵਾ ਮੁਨਿਨ੍ਦਕ੍ਕਂ ਵਨ੍ਦਿਤੁਕਾਮੋ ਮੁਨਿਨ੍ਦਕ੍ਕੋਤ੍ਯਾਦਿਗਾਥਮਾਹ. ਅਯਂ ਪਨ ਯ ਮ ਨ ਸ ਰ ਰਗਣੇਹਿ ਚ ਏਕਗਰੁਨਾ ਚ ਛਯਤੀਹਿ ਚ ਸਤ੍ਤਯਤੀਹਿ ਚ ਰਚਿਤਤ੍ਤਾ ਏਕੂਨਵੀਸਤਕ੍ਖਰਾ ਮੇਘਵਿਪ੍ਫੁਜ੍ਜਿਤਾਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਰਸੁਤ੍ਵਸ੍ਸੇਹਿ ਯ੍ਮਾ ਨ ਸ ਰ ਰ ਗਰੂ ਮੇਘਵਿਪ੍ਫੁਜ੍ਜਿਤਾ ਸਾ’’ਤਿ. ਅਯਂ ਪਨੇਤ੍ਥ ਯੋਜਨਾ. ਯਸ੍ਸਂ ਪਟਿਪਾਦਂ ਰਸੁਤ੍ਵਸ੍ਸੇਹਿ ਛ ਛ ਸਤ੍ਤ ਯਤੀਹਿ ਯ੍ਮਾ ਯਗਣਮਗਣਾ ਚ ਨ ਸ ਰਰ ਗਰੂ ਨਗਣ ਸਗਣ ਰਗਣ ਰਗਣ ਏਕਗਰੁ ਚ ਚੇ ਯੁਤ੍ਤਾ, ਸਾ ਗਾਥਾ ਮੇਘਵਿਪ੍ਫੁਜ੍ਜਿਤਾ ਮੇਘ ਵਿਪ੍ਫੁਜ੍ਜਿਤਾ ਗਾਥਾ ਨਾਮਾਤਿ. ਏਤ੍ਥ ਚ ਰਸਾਨਂ ਕਸਾਵ ਤਿਤ੍ਤ ਮਧੁਰਲਵਣ ਅਮ੍ਬਿਲ ਕਟੁਕਵਸੇਨ ਛਬ੍ਬਿਧਤ੍ਤਾ ਰਸਸਦ੍ਦੋ ਛਸਙ੍ਖ੍ਯਾਵਾਚਕੋਤਿ ਦਟ੍ਠਬ੍ਬੋ. ਉਤੂਨਂ ਹੇਮਨ੍ਤ ਸਿਸੀਰ ਵਸਨ੍ਤ ਗਿਮ੍ਹਵਸ੍ਸਾਨਸਰਦਵਸੇਨ ਛਬ੍ਬਿਧਤ੍ਤਾ ਉਤੁਸਦ੍ਦੋ ਛਸਙ੍ਖ੍ਯਾਵਾਚਕੋਤਿ. ਅਸ੍ਸਸਦ੍ਦੋ ਸਤ੍ਤਸਙ੍ਖ੍ਯਾਵਾਚਕੋਤਿ ਦਟ੍ਠਬ੍ਬੋ. ਅਸ੍ਸਸਦ੍ਦਸ੍ਸ ਹਿ ਸਤ੍ਤਸਙ੍ਖ੍ਯਾਵਾਚਕਭਾਵੋ ਛਨ੍ਦਟੀਕਾਸੁ ਵੁਤ੍ਤੋਤਿ.

ਤਤ੍ਥ ਪਨ ਦਯੁਦਯਰੁਣੋ ਞਾਣਵਿਤ੍ਥਿਣ੍ਣਬਿਮ੍ਬੋ ਏਕੋ ਯੋ ਮੁਨਿਨ੍ਦਕ੍ਕੋ ਸੁਦ੍ਧੇ ਤਿਭਵਕੁਹਰੇ ਕਮਲਕਥਿਤਂ ਵਿਨੇਯ੍ਯਪ੍ਪਾਣੋਘਂ ਧਮ੍ਮਰਂਸੀਵਰੇਹਿ ਸੁਬੋਧੇਸਿ ਬ੍ਯਾਪਿਤਕ੍ਕਿਤ੍ਤਿ ਨਞ੍ਚ ਤਿਲੋਕੇਕਚ੍ਚਕ੍ਖੁਂ ਦੁਖਮਸਹਨਂ ਮਹੇਸਿਂ ਤਂ ਮੁਨਿਨ੍ਦਕ੍ਕਂ ਨਮਾਮੀਤਿ ਯੋਜਨਾ.

ਇਮਿਸ੍ਸਾ ਗਾਥਾਯ ਚ ਅਤ੍ਥਕ੍ਕਮੇਨੇਵ ਸੁਖਜਾਨਨਤ੍ਥਂ ਵਣ੍ਣਯਿਸ੍ਸਾਮ, ਨ ਸਦ੍ਦਕ੍ਕਮੇਨ. ਦਯੁਦਯਰੁਣੋਤਿਪਦਸ੍ਸ ਦਯਾਉਦਯਅਰੁਣੋਤਿ ਪਦਵਿਭਾਗੋ ਕਾਤਬ੍ਬੋ. ਮਹਾਕਰੁਣਾਸਙ੍ਖਾਤਉਦਯਪਬ੍ਬਤੁਗ੍ਗਤਸੂਰਿਯਾਰੁਣੋ. ਅਥ ਵਾ ਉਦਯਪਬ੍ਬਤਤੋ ਉਗ੍ਗਤਸੂਰਿਯਾਰੁਣੋ ਵਿਯ ਮਹਾਕਰੁਣਾ ਵਾਤਿ ਅਤ੍ਥੋ. ਏਤ੍ਥ ਚ ਦਯਾਸਦ੍ਦੋ ਕਰੁਣਾਮੇਤ੍ਤਾਸੁ ਵਤ੍ਤਤਿ. ਅਦਯਾਤਿ ਵੁਚ੍ਚਤਿ ਨਿਕ੍ਕਰੁਣਤਨ੍ਤਿ ਏਤ੍ਥ ਹਿ ਕਰੁਣਾਯਂ. ਦਯਾਪਨ੍ਨੋਤਿ ਏਤ੍ਥ ਮੇਤ੍ਤਾਯਂ ਵਤ੍ਤਤਿ. ਮੇਤ੍ਤਾਚਿਤ੍ਤਤਂ ਆਪਨ੍ਨੋਤਿ ਅਤ੍ਥੋ. ਇਧ ਪਨ ਕਰੁਣਾ ਅਧਿਪ੍ਪੇਤਾ.

ਅਯਂ ਪਨ ਵਚਨਤ੍ਥੋ. ਦਯਤਿ ਹਿਂਸਤਿ ਕਾਰੁਣਿਕਂ ਯਾਵ ਯਥਾਧਿਪ੍ਪੇਤਂ ਪਰਸ੍ਸ ਹਿਤਨਿਬ੍ਬਤ੍ਤਿਂ ਨ ਪਾਪੁਣਾਤਿ ਤਾਵਾਤਿ ਦਯਾ, ਮਹਾਕਰੁਣਾ. ਦਯਧਾਤੁ ਹਿਂਸਾਯਂ ਅ. ਦਯਤਿ ਅਨੁਗ੍ਗਣ੍ਹਾਤਿ ਪਾਪਜਨਮ੍ਪਿ ਏਤਾਯਾਤਿ ਵਾ ਦਯਾ. ਦਯਧਾਤੁ ਅਨੁਗ੍ਗਹਣੇ. ਦਯਤਿ ਅਤ੍ਤਨੋ ਸੁਖਮ੍ਪਿ ਪਹਾਯ ਖੇਦਂ ਗਣ੍ਹਾਤੀਤਿ ਵਾ ਦਯਾ. ਦਯਧਾਤੁ ਗਹਣੇ. ਅਥ ਵਾ ਦਯਨ੍ਤਿ ਗਣ੍ਹਨ੍ਤਿ ਏਤਾਯ ਬੋਧਿਸਤ੍ਤਾ ਸਂਸਾਰਦੁਕ੍ਖਞ੍ਚ ਸਬ੍ਬਞ੍ਞੁਤਞਾਣਞ੍ਚਾਤਿ ਦਯਾ, ਮਹਾਕਰੁਣਾ. ਮਹਾਬੋਧਿਸਤ੍ਤਾ ਹਿ ਬੁਦ੍ਧਭਾਵਾਯ ਅਭਿਨੀਹਾਰਕਰਣਕਾਲੇ ਹਤ੍ਥਗਤਮ੍ਪਿ ਅਰਹਤ੍ਤ ਫਲਂ ਛਟ੍ਟੇਤ੍ਵਾ ਸਂਸਾਰਸਾਗਰਤੋ ਸਤ੍ਤੇ ਸਮੁਦ੍ਧਰਿਤੁਕਾਮਾ ਅਨਸ੍ਸਾਸਕਰਂ ਅਤਿਭਯਾਨਕਂ ਸਂਸਾਰਦੁਕ੍ਖਂ ਪਚ੍ਛਿਮਭਵੇ ਚ ਸਹ ਅਮਤਧਾਤੁਪਟਿਲਾਭੇਨ ਅਨੇਕਗੁਣਸਮਲਙ੍ਕਤਂ ਸਬ੍ਬਞ੍ਞੁਤਞਾਣਞ੍ਚ ਗਣ੍ਹਨ੍ਤੀਤਿ ਅਤ੍ਥੋ. ਕਰੁਣਾਮੂਲਕਾ ਹਿ ਸਬ੍ਬੇ ਬੁਦ੍ਧਗੁਣਾ. ਤੇਨ ਵੁਤ੍ਤਂ ਅਙ੍ਗੁਤ੍ਤਰਟੀਕਾਯਂ ‘‘ਸਬ੍ਬੇਸਞ੍ਚ ਬੁਦ੍ਧਗੁਣਾਨਂ ਕਰੁਣਾ ਆਦਿ, ਤਨ੍ਨਿਦਾਨਭਾਵਤੋ’’ਤਿ.

ਅਪਿ ਚ ਦਯਨ੍ਤਿ ਅਨੁਰਕ੍ਖਨ੍ਤਿ ਸਤ੍ਤੇ ਏਤਾਯ, ਸਯਂ ਵਾ ਅਨੁਦ੍ਦਯਤਿ ਅਨੁਦਯਮਤ੍ਤਮੇਵ ਵਾ ਏਤਨ੍ਤਿ ਦਯਾ. ਦਯਧਾਤੁ ਅਨੁਰਕ੍ਖਣੇ ਅਪਚ੍ਚਯੋ. ਉਦੇਤਿ ਵਡ੍ਢੇਤੀਤਿ ਉਦਯੋ, ਪਬ੍ਬਤੋ. ਉਦਿਧਾਤੁ ਪਸਵਨੇ ਣ. ਆਸਮਨ੍ਤਤੋ ਆਲੋਕਂ ਕਰੋਨ੍ਤੋ ਉਣਤਿ ਗਚ੍ਛਤੀਤਿ ਅਰੁਣੋ, ਸੂਰਿਯਰਂਸੀ ਵਿਸੇਸੋ. ਆਪੁਬ੍ਬਉਣਧਾਤੁ ਗਤਿਯਂ ਣ. ਦਯਾਸਙ੍ਖਾਤਤੋ ਉਦਯਪਬ੍ਬਤਤੋ ਉਗ੍ਗਤਸੂਰਿਯਸ੍ਸ ਅਰੁਣੋ ਯਸ੍ਸਾਤਿ ਦਯੁਦਯਰੁਣੋ. ਅਥ ਵਾ ਉਦਯਪਬ੍ਬਤਤੋ ਉਗ੍ਗਤਸੂਰਿਯਾਰੁਣੋ ਵਿਯ ਦਯਾ ਮਹਾਕਰੁਣਾ ਯਸ੍ਸਾਤਿ ਦਯੁਦਯਰੁਣੋ, ਮੁਨਿਨ੍ਦਕ੍ਕੋ. ਯਥਾ ਹਿ ਉਗ੍ਗਤਸੂਰਿਯਸ੍ਸ ਅਰੁਣੋ ਆਲੋਕਸ੍ਸ ਆਦਿ ਹੋਤਿ, ਏਵਂ ਬੋਧਿਸਤ੍ਤੋ ਦੀਪਙ੍ਕਰਬੁਦ੍ਧਸ੍ਸ ਪਾਦਮੂਲੇ ਕਰੋਪਯਾਤਂ ਨਿਬ੍ਬਾਨਸੁਖਮੋਸਜ੍ਜ ਮਹਾਕਰੁਣਾਯ ਸਂਸਾਰਸਮੁਦ੍ਦਤੋ ਸਤ੍ਤੇ ਸਮੁਦ੍ਧਰਿਤੁਕਾਮੋ ਬੁਦ੍ਧਭਾਵਾਯ ਸੁਦੁਕ੍ਕਰਾ ਦਾਨਾਦਯੋ ਦਸ ਪਾਰਮਿਯੋ ਚ ਪਞ੍ਚ ਮਹਾਪਰਿਚ੍ਚਾਗੇ ਚ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਅਕਾਸੀਤਿ ਕਰੁਣਾ ਬੁਦ੍ਧਭਾਵਾਯ ਆਦਿ. ਤਸ੍ਮਾ ਬੁਦ੍ਧਸ੍ਸੇਵ ਦਯੁਦਯਰੁਣੋਤਿ ਅਭਿਤ੍ਥਵਿਤੁਂ ਅਰਹਤੀਤਿ ਵੁਤ੍ਤਂ ਹੋਤਿ.

ਞਾਣਵਿਤ੍ਥਿਣ੍ਣਬਿਮ੍ਬੋਤਿ ਸਬ੍ਬਞ੍ਞੁਤਞਾਣਸਙ੍ਖਾਤੋ ਵਿਤ੍ਥਾਰ ਪਰਿਮਣ੍ਡਲੋ. ਵਿਤ੍ਥਾਰਚਕ੍ਕਵਾਲ਼ਮਣ੍ਡਲਂ ਵਿਯ ਵਿਪੁਲਾਰਮ੍ਮਣ ਸਬ੍ਬਞ੍ਞੁਤਞਾਣਵਾ. ਸਙ੍ਖਤਾਸਙ੍ਖਤਭੇਦਂ ਸਬ੍ਬੇਞੇਯ੍ਯਧਮ੍ਮਂ ਜਾਨਾਤੀਤਿ ਞਾਣਂ, ਸਬ੍ਬਞ੍ਞੁਤਞਾਣਂ. ਞਾਧਾਤੁ ਅਵਬੋਧਨੇਯੁ. ਵਿਸੇਸੇਨ ਤਨੋਤਿ ਵਿਤ੍ਥਾਰੇਤੀਤਿ ਵਿਤ੍ਥਿਣ੍ਣਂ, ਞਾਣਂ. ਵਿਪੁਬ੍ਬਤਨੁਧਾਤੁ ਵਿਤ੍ਥਾਰੇ ਤਪਚ੍ਚਯੋ. ਤਸ੍ਸ ਇਣ੍ਣਾਦੇਸੋ. ਧਾਤ੍ਵਨ੍ਤਸ੍ਸ ਲੋਪੋ, ਅਸਰੂਪਦ੍ਵਿਤ੍ਤਂ. ਅਥ ਵਾ ਵਿਤ੍ਥਰਤਿ ਪਤ੍ਥਰਤੀਤਿ ਵਿਤ੍ਥਿਣ੍ਣਂ. ਥਰਧਾਤੁਮੇਵੇਤ੍ਥ ਵਿਸੇਸੋ. ਵਮਤਿ ਪਰਿਮਣ੍ਡਲਾਕਾਰੇਨ ਗਚ੍ਛਤਿ ਪਵਤ੍ਤਤੀਤਿ ਬਿਮ੍ਬਂ, ਞਾਣਮਣ੍ਡਲਂ. ਵਮਧਾਤੁ ਗਤਿਯਂ ਬੋ. ਅਸ੍ਸਿ. ਵਸ੍ਸ ਬੋ.

ਣ੍ਵਾਦਿਮੋਗ੍ਗਲ੍ਲਾਨੇ ਪਨ ‘‘ਵਮ ਉਗ੍ਗਿਰਣੇ ਬ. ਵਮਿਸ੍ਸ ਵਸ੍ਸ ਬਿਤ੍ਤਂ. ਵਮਤਿ ਉਗ੍ਗਿਰਤੀਤਿ ਬਿਮ੍ਬਂ, ਸਰੀਰ’’ਨ੍ਤਿ ਵੁਤ੍ਤਂ. ਤਂ ਪਨ ਬਿਮ੍ਬਸਦ੍ਦਸ੍ਸ ਸਰੀਰਵਾਚਕੇ ਯੁਤ੍ਤਮੇਵ. ਨ ਪਰਿਮਣ੍ਡਲਵਾਚਕੇ. ਇਧ ਪਨ ਬਿਮ੍ਬਸਦ੍ਦਸ੍ਸ ਪਰਿਮਣ੍ਡਲਵਾਚਕਤ੍ਤਾ. ਆਚਰਿਯਾ ਪਨ ਇਧ ਬਿਮ੍ਬਸਦ੍ਦਸ੍ਸ ਅਤ੍ਥਂ ਚਕ੍ਕਮਣ੍ਡਲਨ੍ਤਿ ਵਦਨ੍ਤਿ. ਤਂ ਪਨ ਵਿਚਾਰੇਤਬ੍ਬਂ. ਕਸ੍ਮਾ, ਅਭਿਧਾਨਪ੍ਪਦੀਪਿਕਾਯਂ ‘‘ਬਿਮ੍ਬਂ ਤੁ ਪਟਿਬਿਮ੍ਬੇ ਚ, ਮਣ੍ਡਲੇ ਬਿਮ੍ਬਿਕਾਫਲੇ’’ਤਿ ਚ. ਤਟ੍ਟੀਕਾਯਞ੍ਚ ‘‘ਮਣ੍ਡਲੇ ਪਟਿਮਣ੍ਡਲੇ’’ਤਿ ਚ ਵੁਤ੍ਤਤ੍ਤਾ. ਞਾਣਂ ਸਬ੍ਬਞ੍ਞੁਤਞਾਣਸਙ੍ਖਾਤਂ ਵਿਤ੍ਥਿਣ੍ਣਂ ਵਿਤ੍ਥਾਰਂ ਬਿਮ੍ਬਂ ਪਰਿਮਣ੍ਡਲਂ ਅਸ੍ਸਾਤਿ ਞਾਣਵਿਤ੍ਥਿਣ੍ਣਬਿਮ੍ਬੋ. ਅਥ ਵਾ ਵਿਤ੍ਥਿਣ੍ਣਂ ਵਿਤ੍ਥਾਰਂ ਬਿਮ੍ਬਂ ਚਕ੍ਕਵਾਲ਼ਪਰਿਮਣ੍ਡਲਂ ਵਿਯ ਵਿਪੁਲਾਰਮ੍ਮਣਂ ਞਾਣਂ ਸਬ੍ਬਞ੍ਞੁਤਞਾਣਂ ਅਸ੍ਸਾਤਿ ਞਾਣਵਿਤ੍ਥਿਣ੍ਣਬਿਮ੍ਬੋ, ਮੁਨਿਨ੍ਦਕ੍ਕੋ. ਯਥਾ ਹਿ ਚਕ੍ਕਵਾਲ਼ਸ੍ਸ ਅਨਨ੍ਤਤ੍ਤਾ ਚਕ੍ਕਵਾਲ਼ਮਣ੍ਡਲਂ ਵਿਪੁਲਂ ਮਹਨ੍ਤਂ ਹੋਤਿ, ਏਵ ਮੇਵ ਬੁਦ੍ਧਸ੍ਸ ਸਬ੍ਬਞ੍ਞੁਤਞਾਣਂ ਅਨਨ੍ਤਾਰਮ੍ਮਣਤ੍ਤਾ ਵਿਪੁਲਂ ਮਹਨ੍ਤਂ. ਤਸ੍ਮਾ ਤਸ੍ਸ ਞਾਣਵਿਤ੍ਥਿਣ੍ਣਬਿਮ੍ਬੋਤਿ ਥੋਮੇਤੀਤਿ. ਯ੍ਵੇਕੋਤਿ ਯੋ ਏਕੋਤਿ ਪਦਚ੍ਛੇਦੋ. ਯੇਕੋਤਿਪਿ ਕਤ੍ਥਚਿ ਪਾਠੋ. ਤਸ੍ਸ ਪਨ ਯੋ ਏਕੋਤਿ ਪਦਚ੍ਛੇਦੋ ਕਾਤਬ੍ਬੋ. ਤਂ ਪਨ ਪਾਠਦ੍ਵਯਂ ਯੁਤ੍ਤਮੇਵ. ਯ੍ਵੇਕੋਤਿ ਹਿ ਪਾਠੇ ਆਦੇਸਸਨ੍ਧਿ ਹੋਤਿ. ਯੇਕੋਤਿ ਪਾਠੇ ਪਨ ਲੋਪਸਨ੍ਧੀਤਿ ਅਯਮੇਤੇਸਂ ਵਿਸੇਸੋ. ਯੋ ਮੁਨਿਨ੍ਦਕ੍ਕੋਤਿ ਸਮ੍ਬਨ੍ਧੋ.

ਏਕੋਤਿ ਅਸਹਾਯੋ, ਅਦੁਤਿਯਕੋ ਏਕ ਬੁਦ੍ਧਭੂਤੋਤਿ ਅਤ੍ਥੋ. ਏਤ੍ਥ ਚ ਏਕਸਦ੍ਦੋ ਅਞ੍ਞਸੇਟ੍ਠਾਸਹਾਯ ਸਙ੍ਖ੍ਯਾਦੀਸੁ ਦਿਸ੍ਸਤਿ. ਤਥਾਹੇਸ ਸਸ੍ਸਤੋ ਅਤ੍ਤਾ ਚ ਲੋਕੋ ਚ, ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਇਤ੍ਥੇਕੇ ਅਭਿਵਦਨ੍ਤੀਤਿਆਦੀਸੁ ਅਞ੍ਞਤ੍ਥੇ ਦਿਸ੍ਸਤਿ. ਚੇਤਸੋ ਏਕੋਦਿਭਾਵਨ੍ਤਿਆਦੀਸੁ ਸੇਟ੍ਠੇ. ਏਕੋ ਵੂਪਕਟ੍ਠੋਤਿਆਦੀਸੁ ਅਸਹਾਯੇ. ਏਕੋਵ ਖੋ ਭਿਕ੍ਖਵੇ ਖਣੋ ਚ ਸਮਯੋ ਚ ਬ੍ਰਹ੍ਮਚਰਿਯਾਯਾਤਿਆਦੀਸੁ ਸਙ੍ਖ੍ਯਾਯਂ. ਇਧ ਪਨ ਅਸਹਾਯੇ ਅਧਿਪ੍ਪੇਤੋ. ਅਯਂ ਪਨਸ੍ਸ ਵਚਨਤ੍ਥੋ. ਅਸਹਾਯੋ ਹੁਤ੍ਵਾ ਏਤਿ ਗਚ੍ਛਤਿ ਪਵਤ੍ਤਤੀਤਿ ਏਕੋ, ਅਦੁਤਿਯਕੋ ਹੁਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਏਤਿ ਜਾਨਾਤਿ ਪਟਿਵਿਜ੍ਝਤੀਤਿ ਵਾ ਏਕੋ, ਮੁਨਿਨ੍ਦਕ੍ਕੋ. ਏਧਾਤੁ ਇਧਾਤੁ ਵਾ ਞਾਣਗਤੀਸੁ ਣ੍ਵੁ. ਅਥ ਵਾ ਏਕੋ ਭਗਵਾ ਪਬ੍ਬਜ੍ਜਸਙ੍ਖਾਤੇਨ ਏਕੋ. ਅਦੁਤਿਯਟ੍ਠੇਨ ਏਕੋ, ਤਣ੍ਹਾਯ ਪਹਾਨਟ੍ਠੇਨ ਏਕੋ, ਏਕਨ੍ਤਵੀਤਰਾਗੋਤਿ ਏਕੋ, ਏਕਨ੍ਤਵੀਤਦੋਸੋਤਿ ਏਕੋ, ਏਕਨ੍ਤਵੀਤਮੋਹੋਤਿ ਏਕੋ, ਏਕਨ੍ਤਨਿਕ੍ਕਿਲੇਸੋਤਿ ਏਕੋ, ਏਕਾਯ ਮਗ੍ਗਂ ਗਤੋਤਿ ਏਕੋ, ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋਤਿ ਏਕੋਤਿਆਦਿਨਾ ਆਗਤੇਨ ਮਹਾਨਿਦ੍ਦੇਸਨਯੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਅਪਿ ਚ ਅਨਨ੍ਤਚਕ੍ਕਵਾਲ਼ੇਸੁਯੇਵ ਏਕੋਵ ਬੁਦ੍ਧੋ ਏਤਿ ਉਪ੍ਪਜ੍ਜਤਿ ਵਿਕਸਤਿ ਵਾਤਿ ਏਕੋ. ਵੁਤ੍ਤਞ੍ਹਿ ਏਕਨਿਪਾਤ ਅਙ੍ਗੁਤ੍ਤਰ ਪਾਲ਼ਿਯਂ ‘‘ਅਟ੍ਠਾਨਮੇਤਂ ਭਿਕ੍ਖਵੇ ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤਿ. ਠਾਨਞ੍ਚ ਖੋ ਏਤਂ ਭਿਕ੍ਖਵੇ ਵਿਜ੍ਜਤਿ, ਯਂ ਏਕਿਸ੍ਸਾ ਲੋਕਧਾਤੁਯਾ ਏਕੋਵ ਅਰਹਂ ਸਮ੍ਮਾਸਮ੍ਬੁਦ੍ਧੋ ਉਪ੍ਪਜ੍ਜੇਯ੍ਯ, ਠਾਨਮੇਤਂ ਵਿਜ੍ਜਤੀ’’ਤਿ. ਤਦਟ੍ਠਕਥਾਯਞ੍ਚ ‘‘ਏਕਿਸ੍ਸਾ ਲੋਕਧਾਤੁਯਾਤਿ ਦਸਸਹਸ੍ਸਿਲੋਕਧਾਤੁਯਾ. ਤੀਣਿ ਹਿ ਖੇਤ੍ਤਾਨਿ ਜਾਤਿਕ੍ਖੇਤ੍ਤਂ ਆਣਕ੍ਖੇਤ੍ਤਂ ਵਿਸਯਕ੍ਖੇਤ੍ਤਨ੍ਤਿ. ਤਤ੍ਥ ਜਾਤਿਕ੍ਖੇਤ੍ਤਂ ਨਾਮ ਦਸਸਹਸ੍ਸਿਲੋਕਧਾਤੁ. ਸਾ ਹਿ ਤਥਾਗਤਸ੍ਸ ਮਾਤੁਕੁਚ੍ਛਿਂ ਓਕ੍ਕਮਨਕਾਲੇ ਨਿਕ੍ਖਮਨਕਾਲੇ ਸਮ੍ਬੋਧਿਕਾਲੇ ਧਮ੍ਮਚਕ੍ਕਪ੍ਪਵਤ੍ਤਨੇ ਆਯੁ ਸਙ੍ਖਾਰਵੋਸ੍ਸਜ੍ਜਨੇ ਪਰਿਨਿਬ੍ਬਾਨੇ ਚ ਕਮ੍ਪਤਿ, ਕੋਟਿਸਤਸਹਸ੍ਸ ਚਕ੍ਕਵਾਲ਼ਂ ਪਨ ਆਣਕ੍ਖੇਤ੍ਤਂ ਨਾਮ. ਆਟਾਨਾਟਿਯਪਰਿਤ੍ਤ ਮੋਰਪਰਿਤ੍ਤਧਜਗ੍ਗਪਰਿਤ੍ਤ ਰਤਨਪਰਿਤ੍ਤਾਦੀਨਞ੍ਹਿ ਏਤ੍ਥ ਆਣਾ ਪਵਤ੍ਤਤਿ. ਵਿਸਯਕ੍ਖੇਤ੍ਤਸ੍ਸ ਪਨ ਪਰਿਮਾਣਂ ਨਤ੍ਥਿ. ਬੁਦ੍ਧਾਨਞ੍ਹਿ ਯਾਵਤਕਂ ਞਾਣਂ, ਤਾਵਤਕਂ ਞੇਯ੍ਯਂ. ਯਾਵਤਕਂ ਞੇਯ੍ਯਂ, ਤਾਵਤਕਂ ਞਾਣਂ. ਞਾਣਪਰਿਯਨ੍ਤਿਕਂ ਞੇਯ੍ਯਂ, ਞੇਯ੍ਯਪਰਿਯਨ੍ਤਿਕਂ ਞਾਣਨ੍ਤਿ ਵਚਨਤੋ ਅਵਿਸਯੋ ਨਾਮ ਨਤ੍ਥਿ. ਇਮੇਸੁ ਪਨ ਤੀਸੁ ਖੇਤ੍ਤੇਸੁ ਠਪੇਤ੍ਵਾ ਇਮਂ ਚਕ੍ਕਵਾਲ਼ਂ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਸੁਤ੍ਤਂ ਨਤ੍ਥਿ. ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥਿ. ਤੀਣਿ ਹਿ ਪਿਟਕਾਨਿ ਵਿਨਯਪਿਟਕਂ, ਸੁਤ੍ਤਨ੍ਤਪਿਟਕਂ, ਅਭਿਧਮ੍ਮਪਿਟਕਂ. ਤਿਸ੍ਸੋ ਸਂਗੀਤਿਯੋ ਮਹਾਕਸ੍ਸਪਤ੍ਥੇਰਸ੍ਸ ਸਂਗੀਤਿ, ਯਸਤ੍ਥੇਰਸ੍ਸ ਸਂਗੀਤਿ, ਮੋਗ੍ਗਲਿਪੁਤ੍ਤਤ੍ਥੇਰਸ੍ਸ ਸਂਗੀਤਿ, ਇਮਾ ਤਿਸ੍ਸੋ ਸਂਗੀਤਿਯੋ ਆਰੁਲ਼੍ਹੇ ਤੇਪਿਟਕੇ ਬੁਦ੍ਧਵਚਨੇ ਇਮਂ ਚਕ੍ਕਵਾਲ਼ਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਸੁਤ੍ਤਂ ਨਤ੍ਥਿ. ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥੀ’’ਤਿ.

ਏਤ੍ਥ ਚ ਏਕਿਸ੍ਸਾ ਲੋਕਧਾਤੁਯਾਤਿ ਦਸਸਹਸ੍ਸਿ ਲੋਕਧਾਤੁਯਾਤਿ ਇਦਂ ਜਾਤਿਕ੍ਖੇਤ੍ਤਂ ਸਨ੍ਧਾਯ ਵੁਤ੍ਤਂ. ਦਸਸਹਸ੍ਸਿਲੋਕਧਾਤੁ ਹਿ ਇਮਂ ਲੋਕਧਾਤੁਂ ਪਰਿਵਾਰੇਤ੍ਵਾ ਠਿਤਾ ਹੋਤਿ. ਤਤ੍ਤਕਾਨਂਯੇਵ ਜਾਤਿਕ੍ਖੇਤ੍ਤਭਾਵੋ ਧਮ੍ਮਤਾ ਵਸੇਨ ਵੇਦਿਤਬ੍ਬੋ. ਇਮੇਸੁ ਪਨ ਤੀਸੁ ਖੇਤ੍ਤੇਸੂਤਿ ਇਮਿਨਾ ਦਸਸਹਸ੍ਸਿਲੋਕਧਾਤੁਸਙ੍ਖਾਤੇ ਜਾਤਿਕ੍ਖੇਤ੍ਤੇ ਕੋਟਿਸਤਸਹਸ੍ਸਚਕ੍ਕਵਾਲ਼ਸਙ੍ਖਾਤੇ ਆਣਕ੍ਖੇਤ੍ਤੇ ਅਨਨ੍ਤਚਕ੍ਕਵਾਲ਼ ਸਙ੍ਖਾਤੇ ਵਿਸਯਕ੍ਖੇਤ੍ਤੇ ਚਾਤਿ ਇਮੇਸੁ ਤੀਸੁ ਬੁਦ੍ਧਕ੍ਖੇਤ੍ਤੇਸੁ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਬੁਦ੍ਧਾ ਨੁਪ੍ਪਜ੍ਜਨ੍ਤੀਤਿ ਦਸ੍ਸੇਤਿ. ਤਿਵਿਧਞ੍ਹਿ ਬੁਦ੍ਧਕ੍ਖੇਤ੍ਤਂ ਦਸ੍ਸੇਤ੍ਵਾ ਇਮੇਸੁ ਪਨ ਤੀਸੁ ਖੇਤ੍ਤੇਸੂਤਿ ਆਧਾਰਭਾਵੇਨ ਵੁਤ੍ਤਂ, ਨ ਨਿਦ੍ਧਾਰਣਭਾਵੇਨ. ਕਸ੍ਮਾ, ਅਟ੍ਠਕਥਾਯਂ ਨਿਦ੍ਧਾਰਣੀਯਪਦਸ੍ਸ ਅਭਾਵਤੋ. ਸਤਿ ਹਿ ਅਟ੍ਠਕਥਾਚਰਿਯੋ ਤਸ੍ਸ ਪਦਸ੍ਸ ਨਿਦ੍ਧਾਰਣਤ੍ਥੇ ਅਧਿਪ੍ਪੇਤੇ ਇਮੇਸੁ ਤੀਸੁ ਖੇਤ੍ਤੇਸੁ ਆਣਕ੍ਖੇਤ੍ਤੇ ਠਪੇਤ੍ਵਾ ਇਮਂ ਚਕ੍ਕਵਾਲ਼ਨ੍ਤਿਆਦਿ ਵੁਚ੍ਚੇਯ੍ਯ. ਨ. ਤਸ੍ਮਾ ਤਸ੍ਸ ਪਦਸ੍ਸ ਆਧਾਰਤ੍ਥੋਯੇਵ ਗਹੇਤਬ੍ਬੋ. ਪੁਬ੍ਬਨਿਸ੍ਸਯਾ ਚਰਿਯੇਹਿ ਚ ਤਸ੍ਸ ਪਦਸ੍ਸ ਆਧਾਰਭਾਵੇਨ ਅਤ੍ਥਯੋਜਨਾ ਕਤਾਤਿ. ਤਥੇਵ ਪਨ ਅਭਿਧਮ੍ਮਞਾਣਵਿਭਙ੍ਗਪਾਲ਼ਿਯਞ੍ਚ, ਤਦਟ੍ਠਕਥਾਯਞ੍ਚ ਉਪਰਿਪਣ੍ਣਾਸੇ ਬਹੁਧਾਤੁਸੁਤ੍ਤਪਾਲ਼ਿਯਞ੍ਚ, ਤਦਟ੍ਠਕਥਾਯਞ੍ਚ ਨੇਤ੍ਤਿਪਾਲ਼ਿਯਞ੍ਚ ਤਦਟ੍ਠਕਥਾਯਞ੍ਚ ਤਂ ਕਾਰਣਂ ਆਗਤਮੇਵਾਤਿ. ਤਂ ਅਙ੍ਗੁਤ੍ਤਰਟੀਕਾਯਂ ਪਨ ‘‘ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥੀਤਿ ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨਵਿਜ੍ਜਤੀਤਿਆਦਿ. ਇਮਿਸ੍ਸਾ ਲੋਕਧਾਤੁਯਾ ਠਤ੍ਵਾ ਵਦਨ੍ਤੇਨ ਭਗਵਤਾ ਕਿਂਪਨਾਵੁਸੋ ਸਾਰਿਪੁਤ੍ਤ ਅਤ੍ਥੇਤਰਹਿ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਭਗਵਤਾ ਸਮਸਮੋ ਸਮ੍ਬੋਧਿਯਨ੍ਤਿ ਏਵਂ ਪੁਟ੍ਠੋਹਂ ਭਨ੍ਤੇ ਨੋਤਿ ਵਦੇਯ੍ਯਨ੍ਤਿ ਵਤ੍ਵਾ ਤਸ੍ਸ ਕਾਰਣਂ ਦਸ੍ਸੇਤੁਂ ਅਟ੍ਠਾਨਮੇਤਂ ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਨ੍ਤਿ ਇਮਂ ਸੁਤ੍ਤਂ ਆਹਰਨ੍ਤੇਨ ਧਮ੍ਮ ਸੇਨਾਪਤਿਨਾ ਚ ਬੁਦ੍ਧਕ੍ਖੇਤ੍ਤਭੂਤਂ ਇਮਂ ਲੋਕਧਾਤੁਂ ਠਪੇਤ੍ਵਾ ਅਞ੍ਞਤ੍ਥ ਅਨੁਪ੍ਪਤ੍ਤਿ ਵੁਤ੍ਤਾ ਹੋਤੀਤਿ ਅਧਿਪ੍ਪਾਯੋ’’ਤਿ ਵੁਤ੍ਤਂ. ਤਥੇਵ ਪਨ ਞਾਣਵਿਭਙ੍ਗਮੂਲਟੀਕਾਯਂ, ਉਪਰਿਪਣ੍ਣਾਸਬਹੁਧਾਤੁ ਸੁਤ੍ਤਟੀਕਾਯਞ੍ਚ ਵੁਤ੍ਤਂ. ਏਤ੍ਥ ਚ ਇਮਂ ਲੋਕਧਾਤੁਂ ਠਪੇਤ੍ਵਾ ਅਞ੍ਞਤ੍ਥ ਅਨੁਪ੍ਪਤ੍ਤਿ ਵੁਤ੍ਤਾ ਹੋਤੀਤਿ ਇਮਿਨਾ ਬੁਦ੍ਧਕ੍ਖੇਤ੍ਤਭੂਤਤੋ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਬੁਦ੍ਧਾਨਂ ਅਨੁਪ੍ਪਤ੍ਤਿ ਦਸ੍ਸਿਤਾ ਹੋਤਿ. ਅਞ੍ਞਤ੍ਥਾਤਿ ਹਿ ਸਾਮਞ੍ਞੇਨ ਵੁਤ੍ਤੇਪਿ ਅਟ੍ਠਕਥਾਯਂ ਵੁਤ੍ਤੇਨ ਇਮੇਸੁ ਤੀਸੁ ਖੇਤ੍ਤੇਸੂਤਿ ਸਦ੍ਦਨ੍ਤਰਸਨ੍ਨਿਧਾਨੇਨ ਅਨਨ੍ਤਚਕ੍ਕਵਾਲ਼ਭੂਤੋ ਵਿਸੇਸਤ੍ਥੋ ਗਹੇਤਬ੍ਬੋ. ਸਾਮਞ੍ਞਵਚਨੋਪਿ ਹਿ ਸਦ੍ਦੋ ਸਦ੍ਦਨ੍ਤਰਸਨ੍ਨਿਧਾਨੇਨ ਵਿਸੇਸਵਿਸਯੋਤਿ.

ਅਯਂ ਪਨੇਤ੍ਥ ਅਪਰੋ ਨਯੋ. ਅਟ੍ਠਕਥਾਯਂ ਵੁਤ੍ਤੇ ਬੁਦ੍ਧਾ ਹਿ ਉਪ੍ਪਜ੍ਜਮਾਨਾ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਉਪ੍ਪਜ੍ਜਨ੍ਤਿ. ਉਪ੍ਪਜ੍ਜਨਟ੍ਠਾਨੇ ਪਨ ਵਾਰਿਤੇ ਇਤੋ ਅਞ੍ਞੇਸੁ ਚਕ੍ਕਵਾਲ਼ੇਸੁ ਨੁਪ੍ਪਜ੍ਜਨ੍ਤੀਤਿ ਵਾਰਿਤਮੇਵ ਹੋਤੀਤਿਏਤ੍ਥ ਵਾਕ੍ਯੇ ਇਮਸ੍ਮਿਂ ਯੇਵਾਤਿਪਦੇ ਸਮਭਿਨਿਵਿਟ੍ਠੋ ਏਵਸਦ੍ਦੋ ਨਿਵਤ੍ਤਾਪਨਾਵਧਾਰਣਤ੍ਥੋ. ਏਤੇਨ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇਸਂ ਬੁਦ੍ਧਾਨਂ ਉਪ੍ਪਤ੍ਤਿਂ ਨਿਵਤ੍ਤੇਤਿ. ਯਦਿਪਿ ਹਿ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇ ਬੁਦ੍ਧਾ ਉਪ੍ਪਜ੍ਜੇਯ੍ਯੁਂ. ਏਵਂ ਸਨ੍ਤੇਸੁ ਸਙ੍ਖਤਾਸਙ੍ਖਤਭੇਦਂ ਸਬ੍ਬਧਮ੍ਮਂ ਜਾਨਨ੍ਤੋ ਪਸ੍ਸਨ੍ਤੋ ਅਮ੍ਹਾਕਂ ਭਗਵਾ ਅਞ੍ਞਚਕ੍ਕਵਾਲ਼ੇਸੁ ਅਞ੍ਞੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਏਵਂ ਵੁਚ੍ਚੇਯ੍ਯ. ਨ. ਤਣ੍ਹਙ੍ਕਰਾਦਯੋ ਹਿ ਅਟ੍ਠਵੀਸਤਿ ਸਮ੍ਬੁਦ੍ਧਾ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਚਕ੍ਕਵਾਲ਼ੇਸੁ ਉਪ੍ਪਜ੍ਜਨ੍ਤੀਤਿਵਚਨਂ ਤੇਪਿਟਕੇ ਬੁਦ੍ਧਵਚਨੇ ਨਤ੍ਥਿ, ਤਥਾ ਅਟ੍ਠਕਥਾ ਟੀਕਾਸੁ ਚ. ਤਸ੍ਮਾ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਅਨਨ੍ਤ ਚਕ੍ਕਵਾਲ਼ੇਸੁ ਅਞ੍ਞੇ ਬੁਦ੍ਧਾ ਨੁਪ੍ਪਜ੍ਜਨ੍ਤੀਤਿ ਦਟ੍ਠਬ੍ਬਾ. ਵੁਤ੍ਤਞ੍ਹੇਤਂ ਸੁਤ੍ਤਨ੍ਤਮਹਾਵਗ੍ਗਟ੍ਠਕਥਾਯਂ ਮਹਾਸਮਯਸੁਤ੍ਤਵਣ੍ਣਨਾਯਂ –

‘‘ਅਥਸ੍ਸ ਏਤਦਹੋਸਿ ਮਾਦਿਸੋ ਬੁਦ੍ਧੋਯੇਵ ਸਕ੍ਕੁਣੇਯ੍ਯ. ਅਤ੍ਥਿ ਪਨ ਕਤ੍ਥਚਿ ਅਞ੍ਞੋ ਬੁਦ੍ਧੋਤਿ ਅਨਨ੍ਤਾਸੁ ਲੋਕਧਾਤੂਸੁ ਅਨਨ੍ਤਞਾਣਂ ਪਤ੍ਥਰਿਤ੍ਵਾ ਓਲੋਕੇਨ੍ਤੋ ਅਞ੍ਞਂ ਬੁਦ੍ਧਂ ਨ ਅਦ੍ਦਸ. ਅਨਚ੍ਛਰਿਯਞ੍ਚੇਤਂ, ਯਂ ਇਦਾਨਿ ਅਤ੍ਤਨਾ ਸਮਂ ਨ ਪਸ੍ਸੇਯ੍ਯ. ਯੋ ਜਾਤਦਿਵਸੇਪਿ ਬ੍ਰਹ੍ਮਜਾਲਸੁਤ੍ਤਵਣ੍ਣਨਾਯਂ ਵੁਤ੍ਤਨਯੇਨ ਅਤ੍ਤਨਾ ਸਮਂ ਅਪਸ੍ਸਨ੍ਤੋ ਅਗ੍ਗੋਹਮਸ੍ਮਿ ਲੋਕਸ੍ਸਾਤਿ ਅਪ੍ਪਟਿਵਤ੍ਤਿਯਂ ਸੀਹਨਾਦਂ ਨਦਿ. ਏਵਂ ਅਞ੍ਞਂ ਅਤ੍ਤਨਾ ਸਮਂ ਅਪਸ੍ਸਿਤ੍ਵਾ ਚਿਨ੍ਤੇਸੀ’’ਤਿ. ਤਥੇਵੇਤਂ. ਪੁਰਾਭੇਦਸੁਤ੍ਤ ਮਹਾਨਿਦ੍ਦੇਸਟ੍ਠਕਥਾਯਞ੍ਚ, ਤਂ ਮਹਾਸਮਯਸੁਤ੍ਤਟੀਕਾਯਞ੍ਚ ਏਕਿਸ੍ਸਾ ਲੋਕਧਾਤੁਯਾਤਿ ਸੁਤ੍ਤੇ ਆਗਤਨਯੇਨ ਸਬ੍ਬਤ੍ਥੇਵ ਪਨ ਅਪੁਬ੍ਬਂ ਅਚਰਿਮਂ ਦ੍ਵੇ ਬੁਦ੍ਧਾ ਨਾਮ ਨ ਹੋਨ੍ਤੇਵ. ਤੇਨੇਵਾਹ ‘‘ਅਨਨ੍ਤਾਸੁ ਲੋਕ ਧਾਤੂਸੁ…ਪੇ… ਨ ਅਦ੍ਦਸਾ’’ਤਿ ਸਂਵਣ੍ਣੇਤਿ.

ਅਪਣ੍ਣਕਜਾਤਕਟ੍ਠਕਥਾਯਞ੍ਚ ‘‘ਸਤ੍ਥਾ ਉਪਾਸਕਾ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਪਰਿਚ੍ਛੇਦਂ ਕਤ੍ਵਾ ਅਪਰਿਮਾਣਾਸੁ ਲੋਕਧਾਤੂਸੁ ਸੀਲਾਦੀਹਿ ਗੁਣੇਹਿ ਬੁਦ੍ਧੇਨ ਸਦਿਸੋ ਨਾਮ ਨਤ੍ਥਿ. ਕੁਤੋ ਅਧਿਕਤਰੋ…ਪੇ… ਆਹਾ’’ਤਿ ਵੁਤ੍ਤਂ. ਇਮਾਸੁ ਦ੍ਵੀਸੁ ਅਟ੍ਠਕਥਾਸੁ ਚ ਅਨਨ੍ਤਾਸੁ ਲੋਕਧਾਤੂਸੂਤਿ ਚ ਅਪਰਿਮਾਣਾਸੁ ਲੋਕਧਾਤੂਸੂਤਿ ਚ ਅਨਨ੍ਤਅਪਰਿਮਾਣ ਸਦ੍ਦੇਨ ਵੁਤ੍ਤਂ. ਤੇਹਿ ਦ੍ਵੀਹਿ ਸਦ੍ਦੇਹਿ ਟੀਕਾਵਚਨੇਨ ਚ ਅਨਨ੍ਤਾਸੁ ਲੋਕਧਾਤੂਸੁ ਅਞ੍ਞੇਸਂ ਬੁਦ੍ਧਾਨਂ ਅਨੁਪ੍ਪਤ੍ਤਿਂ ਦਸ੍ਸੇਤਿ.

ਸਮ੍ਮੋਹਵਿਨੋਦਨੀਅਟ੍ਠਕਥਾਯ ਯੋਜਨਾਯਂ ਪਨ ਇਮੇਸੁ ਪਨਾਤਿਆਦਿਨਾ ਕੋਟਿਸਤਸਹਸ੍ਸ ਚਕ੍ਕਵਾਲ਼ਤੋ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਨ ਉਪ੍ਪਜ੍ਜਨ੍ਤੀਤਿ ਞਾਪੇਤਿ. ਮਯਂ ਪਨ ਏਵਂ ਵਿਤਕ੍ਕਯਾਮ. ਅਞ੍ਞਸ੍ਮਿਂ ਚਕ੍ਕਵਾਲ਼ੇਤਿ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਸਬ੍ਬੇਸੁਪਿ ਤੀਸੁ ਬੁਦ੍ਧਕ੍ਖੇਤ੍ਤੇਸੂਤਿ ਅਤ੍ਥੇ ਗਯ੍ਹਮਾਨੇ ਸਤਿ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਨ ਉਪ੍ਪਜ੍ਜਨ੍ਤੀਤਿ ਵਿਞ੍ਞਾਯਤਿ. ਯਦਿ ਪਨ ਅਞ੍ਞਸ੍ਮਿਂ ਚਕ੍ਕਵਾਲ਼ੇਤਿ ਇਤੋ ਅਞ੍ਞਸ੍ਮਿਂ ਜਾਤਿਆਣਾਖੇਤ੍ਤਭੂਤੇ ਚਕ੍ਕਵਾਲ਼ੇਤਿ ਅਤ੍ਥੇ ਗਹਿਤੇ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾਨਂ ਉਪ੍ਪਤ੍ਤਿ ਭਵੇਯ੍ਯਾਤਿ ਵਿਞ੍ਞਾਯਤਿ. ‘‘ਅਟ੍ਠਾਨਮੇਤਂ ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ’’ਤਿਆਦਿਪਾਲ਼ਿਯਾ ਚ. ‘‘ਅਟ੍ਠਾਨਮੇਤਂ ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਰਾਜਾਨੋ ਚਕ੍ਕਵਤ੍ਤੀ’’ਤਿਆਦਿਪਾਲ਼ਿਯਾ ਸਦ੍ਧਿਂ ਕਥਨਤੋ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਬੁਦ੍ਧਾਨਂ ਅਨੁਪ੍ਪਤ੍ਤਿ ਵਿਯ ਅਞ੍ਞਿਸ੍ਸਾ ਲੋਕਧਾਤੁਯਾ ਚਕ੍ਕਵਤ੍ਤਿਰਞ੍ਞੋ ਅਨੁਪ੍ਪਤ੍ਤਿ ਭਵੇਯ੍ਯ. ਕਥਾਵਤ੍ਥੁਪ੍ਪਕਰਣੇ ਚ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾਨਂ ਉਪ੍ਪਤ੍ਤਿ ਨ ਪਟਿਸੇਧਿਤਾ. ਤਸ੍ਮਾ ਆਣਕ੍ਖੇਤ੍ਤਭੂਤਤੋ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਸ੍ਸ ਭਵੇਯ੍ਯਾਤਿ ਅਯਂ ਅਮ੍ਹਾਕਂ ਖਨ੍ਤਿ. ਵੀਮਂਸੇਤ੍ਵਾ ਗਹੇਤਬ੍ਬਨ੍ਤਿ ਵੁਤ੍ਤਂ.

ਏਤ੍ਥ ਚ ਯਂ ਕਥਾਵਤ੍ਥੁਪ੍ਪਕਰਣੇ ਚ…ਪੇ… ਨ ਪਟਿਸੇਧਿਤਾਤਿ ਵੁਤ੍ਤਂ. ਤਂ ਪਨ ਕਥਾਵਤ੍ਥੁਪਾਲ਼ਿਯਂ ਨਤ੍ਥੇਵ. ਇਮਿਸ੍ਸਾ ਪਨ ਸਬ੍ਬਦਿਸਾਕਥਾਯਂ ਪਰਵਾਦੀਨਂ ਪਰਿਕਪ੍ਪਵਚਨਮਤ੍ਤਮੇਵ ਅਤ੍ਥਿ. ਤੇਨ ਵੁਤ੍ਤਂ ਤਸ੍ਸਂ ਪਾਲ਼ਿਯਂ ‘‘ਸਬ੍ਬਦਿਸਾ ਬੁਦ੍ਧਾ ਤਿਟ੍ਠਨ੍ਤੀਤਿ. ਆਮਨ੍ਤਾ. ਪੁਰਤ੍ਥਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ. ਨਹੇਵਂ ਵਤ੍ਤਬ੍ਬੇ…ਪੇ… ਪੁਰਤ੍ਥਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ. ਆਮਨ੍ਤਾ. ਕਿਨ੍ਨਾਮੋ ਸੋ ਭਗਵਾ ਕਿਂਜਚ੍ਚੋ ਕਿਂਗੋਤ੍ਤੋ, ਕਿਨ੍ਨਾਮਾ ਤਸ੍ਸ ਭਗਵਤੋ ਮਾਤਾਪਿਤਰੋ, ਕਿਨ੍ਨਾਮਂ ਤਸ੍ਸ ਭਗਵਤੋ ਸਾਵਕਯੁਗਂ, ਕੋ ਨਾਮੋ ਤਸ੍ਸ ਭਗਵਤੋ ਉਪਟ੍ਠਕੋ, ਕਿਂਦਿਸਂ ਚੀਵਰਂ ਧਾਰੇਤਿ, ਕਿਂਦਿਸਂ ਪਤ੍ਤਂ ਧਾਰੇਤਿ. ਕਤਰਸ੍ਮਿਂ ਗਾਮੇ ਵਾ ਨਿਗਮੇ ਵਾ ਨਗਰੇ ਵਾ ਰਟ੍ਠੇ ਵਾ ਜਨਪਦੇ ਵਾਤਿ. ਨਹੇਵਂ ਵਤ੍ਤਬ੍ਬੇ’’ਤ੍ਯਾਦਿ.

ਤਦਟ੍ਠਕਥਾਯਂ ਪਨ ‘‘ਇਦਾਨਿ ਸਬ੍ਬਦਿਸਾਕਥਾ ਨਾਮ ਹੋਤਿ. ਤਤ੍ਥ ਚਤੂਸੁ ਦਿਸਾਸੁ ਹੇਟ੍ਠਾ ਉਪਰੀਤਿ ਸਮਨ੍ਤਤੋ ਲੋਕਧਾਤੁਸਨ੍ਨਿਵੇਸਂ ਸਬ੍ਬਲੋਕਧਾਤੂਸੁ ਚ ਬੁਦ੍ਧੋ ਅਤ੍ਥੀਤਿ ਅਤ੍ਤਨੋ ਵਿਕਪ੍ਪਸਿਪ੍ਪਂ ਉਪ੍ਪਾਦੇਤ੍ਵਾ ਸਬ੍ਬਦਿਸਾਸੁ ਬੁਦ੍ਧਾ ਤਿਟ੍ਠਨ੍ਤੀਤਿ ਯੇਸਂ…ਪੇ… ਸੇਯ੍ਯਥਾਪਿ ਮਹਾਸਙ੍ਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ. ਪਟਿਞ੍ਞਾ ਇਤਰਸ੍ਸ. ਪੁਰਤ੍ਥਿਮਾਯਾਤਿ ਪੁਟ੍ਠੋ ਸਕ੍ਯਮੁਨਿਂ ਸਨ੍ਧਾਯ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਲਦ੍ਧਿਵਸੇਨ ਅਞ੍ਞਲੋਕਧਾਤੁਯਂ ਠਿਤਂ ਸਨ੍ਧਾਯ ਪਟਿਜਾਨਾਤਿ. ਕਿਨ੍ਨਾਮੋ ਸੋ ਭਗਵਾਤਿਆਦਿ ਸਚੇ ਤ੍ਵਂ ਜਾਨਾਸਿ. ਨਾਮਾਦਿਵਸੇਨ ਨਂ ਕਥੇਹੀਤਿ ਚੋਦਨਤ੍ਥਂ ਵੁਤ੍ਤਂ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ’’ਤਿ ਵੁਤ੍ਤਂ. ਏਤ੍ਥ ਚ ਚਤੂਸੁ ਦਿਸਾਸੁ…ਪੇ… ਸੇਯ੍ਯਥਾਪਿ ਮਹਾਸਙ੍ਘਿਕਾਨਨ੍ਤਿ ਇਮਿਨਾ ਪਰਵਾਦੀਨਂ ਲਦ੍ਧਿਂ ਦਸ੍ਸੇਤਿ. ਤਤ੍ਥ ਪਨ ਚਤੂਸੁ ਦਿਸਾਸੁ ਚ ਹੇਟ੍ਠਾ ਚ ਉਪਰਿ ਚ ਇਤਿ ਏਵਂ ਸਮਨ੍ਤਤੋ ਲੋਕਧਾਤੁਸਨ੍ਨਿਵੇਸਂ ਅਤ੍ਥੀਤਿ ਯੋਜਨਾ. ਯੇਸਂ…ਪੇ… ਮਹਾਸਙ੍ਘਿਕਾਨਨ੍ਤਿ ਯੇਸਂ ਪਰਵਾਦੀਨਂ ਲਦ੍ਧਿ ਹੋਤਿ. ਕੇਸਂ ਲਦ੍ਧਿ ਵਿਯ. ਮਹਾਸਙ੍ਘਿਕਾਨਂ ਲਦ੍ਧਿ ਸੇਯ੍ਯਥਾਪੀਤਿ ਅਤ੍ਥੋ. ਤੇ ਸਨ੍ਧਾਯਾਤਿ ਤੇ ਪਰਵਾਦੀਪੁਗ੍ਗਲੇ ਸਨ੍ਧਾਯ ਞਾਣੇਨ ਧਾਰੇਤ੍ਵਾ ਸਲ੍ਲਕ੍ਖੇਤ੍ਵਾਤਿ ਅਤ੍ਥੋ. ਪੁਚ੍ਛਾ ਸਕਵਾਦਿਸ੍ਸਾਤਿ ਸਕਵਾਦਿਸ੍ਸ ਸਬ੍ਬਦਿਸਾਸੁ ਬੁਦ੍ਧਾ ਤਿਟ੍ਠਨ੍ਤੀਤਿ ਪੁਚ੍ਛਾ ਹੋਤਿ. ਪਟਿਞ੍ਞਾ ਇਤਰਸ੍ਸਾਤਿ ਪਰਵਾਦਿਸ੍ਸ ਪਟਿਜਾਨਨਾ ਹੋਤਿ. ਪੁਰਤ੍ਥਿਮਾਯਾਤਿ ਪੁਟ੍ਠੋਤਿ ਸਕਵਾਦਿਨਾ ਪੁਰਤ੍ਥਿ ਮਾਯਾਤਿਆਦਿਨਾ ਪੁਚ੍ਛਿਤੇ ਸਤਿ. ਸਕ੍ਯਮੁਨਿਨ੍ਤਿ ਸਕ੍ਯਵਂਸ ਖਤ੍ਤਿਯਜਾਤਿਭੂਤਂ ਅਮ੍ਹਾਕਂ ਗੋਤਮਬੁਦ੍ਧਂ ਸਨ੍ਧਾਯ. ਪਟਿਕ੍ਖਿਪਤੀਤਿ ਪਰਵਾਦੀਪੁਗ੍ਗਲੋ ਅਪਨੇਤਿ. ਪੁਨ ਪੁਟ੍ਠੋਤਿ ਸਕਵਾਦਿਨਾ ਪੁਨ ਪੁਰਤ੍ਥਿਮਾਯ ਬੁਦ੍ਧੋ ਤਿਟ੍ਠਤੀਤਿ ਪੁਚ੍ਛਿਤੇ ਸਤਿ. ਲਦ੍ਧਿਵਸੇਨਾਤਿ ਅਤ੍ਤਨੋ ਅਞ੍ਞਲੋਕਧਾਤੁਯਂ ਬੁਦ੍ਧੋ ਅਤ੍ਥਿ ਚ ਉਪ੍ਪਜ੍ਜਤਿ ਚਾਤਿ ਮਿਚ੍ਛਾਲਦ੍ਧਿਵਸੇਨ ਪਟਿਜਾਨਾਤੀਤਿ ਪਰਵਾਦੀ ਪੁਗ੍ਗਲੋ ਪਟਿਜਾਨਾਤਿ. ਯਦਿ ਪਨ ਅਞ੍ਞਲੋਕਧਾਤੁਯਂ ਬੁਦ੍ਧੋ ਤਿਟ੍ਠਤਿ. ਏਵਂ ਸਤਿ ਤਸ੍ਸ ਨਾਮਗੋਤ੍ਤਾਦਿਂ ਤ੍ਵਂ ਕਥੇਹੀਤਿ ਸਕਵਾਦਿਸ੍ਸ ਚੋਦਨਾਵਚਨਂ ਦਸ੍ਸੇਤੁਂ ਕਿਨ੍ਨਾਮੋ ਸੋ ਭਗਵਾਤਿਆਦਿਮਾਹ. ਇਮਿਨਾ ਚ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇਸਂ ਬੁਦ੍ਧਾਨਂ ਅਭਾਵਂ ਦਸ੍ਸੇਤਿ. ਤੇਨ ਵੁਤ੍ਤਂ ਕਥਾਵਤ੍ਥੁਪਾਲ਼ਿਯਂ ‘‘ਕਿਨ੍ਨਾਮੋ ਸੋ ਭਗਵਾ ਕਿਂਜਚ੍ਚੋ…ਪੇ… ਜਨਪਦੇਵਾਤਿ. ਨਹੇਵਂ ਵਤ੍ਤਬ੍ਬੇ’’ਤਿ.

ਏਤ੍ਥ ਚ ਪਨ ਸਕਵਾਦਿਨਾ ਕਿਨ੍ਨਾਮੋਤ੍ਯਾਦਿਨਾ ਪੁਚ੍ਛਿਤੇ ਪਰਵਾਦੀਪੁਗ੍ਗਲੋ ਅਤ੍ਤਨੋ ਲਦ੍ਧਿਯਾ ਸਬ੍ਬਲੋਕਧਾਤੂਸੁ ਉਪ੍ਪਜ੍ਜਮਾਨਾਨਂ ਬੁਦ੍ਧਾਨਂ ਨਾਮਾਦਿਂ ਅਜਾਨਨ੍ਤੋ ਅਪਸ੍ਸਨ੍ਤੋ ਨ ਹੇਵਂ ਵਤ੍ਤਬ੍ਬੇਤਿ ਪਟਿਕ੍ਖਿਪਤਿ. ਤਸ੍ਮਾ ਪਨੇਤ੍ਥ ਸਕਵਾਦੀ ਪੁਗ੍ਗਲਸ੍ਸ ਲਦ੍ਧਿਯਾ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇਸਂ ਬੁਦ੍ਧਾਨਂ ਉਪ੍ਪਜ੍ਜਨਾਭਾਵੋ ਵਿਞ੍ਞਾਯਤਿ. ਯਦਿਪਿ ਹਿ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਅਞ੍ਞਬੁਦ੍ਧਾ ਉਪ੍ਪਜ੍ਜੇਯ੍ਯੁਂ. ਏਵਂ ਸਨ੍ਤੇਸੁ ਬੁਦ੍ਧਸ੍ਸ ਮਤਿਂ ਯਥਾਭੂਤਤੋ ਜਾਨਨ੍ਤੋ ਪਸ੍ਸਨ੍ਤੋ ਮਹਾਪਞ੍ਞੋ ਇਦ੍ਧਿਮਾ ਦਿਬ੍ਬਚਕ੍ਖੁਆਦੀਹਿ ਛਲ਼ਭਿਞ੍ਞੇਹਿ ਸਮ੍ਪਨ੍ਨੋ ਪਟਿਸਮ੍ਭਿਦਾ ਪਤ੍ਤੋ ਸਤ੍ਥਾਰਾ ਦਿਨ੍ਨਮਾਤਿਕਾਨਯੇਨ ਕਥਾਵਤ੍ਥੁਪਾਲ਼ਿਂ ਦੇਸੇਨ੍ਤੋ ਆਯਸ੍ਮਾ ਮਹਾਮੋਗ੍ਗਲਿਪੁਤ੍ਤਤ੍ਥੇਰੋ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਅਞ੍ਞਬੁਦ੍ਧਾਨਂ ਉਪ੍ਪਤ੍ਤਿਂ ਕਥੇਯ੍ਯ ਚ. ਨਾਤਿ. ਤਸ੍ਮਾ ਅਯਂ ਕਥਾਵਤ੍ਥੁਪਾਲ਼ਿ ਚ ਤਦਟ੍ਠਕਥਾਵਚਨਞ੍ਚ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਅਞ੍ਞਬੁਦ੍ਧਾਨਂ ਅਭਾਵਦੀਪਨੇ ਸਬ੍ਬਟ੍ਠਕਥਾਟੀਕਾਸੁ ਵੁਤ੍ਤਵਚਨੇਹਿ ਦਲ਼੍ਹਤਰਂ ਪਧਾਨਵਚਨਮੇਵ ਹੋਤੀਤਿ ਦਟ੍ਠਬ੍ਬਂ.

ਨ ਪਨ ਬੁਦ੍ਧਾਏਵ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਨ ਉਪ੍ਪਜ੍ਜੇਯ੍ਯੁਂ, ਅਥ ਖੋ ਲਦ੍ਧਬ੍ਯਾਕਰਣਾ ਮਹਾਬੋਧਿਸਤ੍ਤਾ ਚ ਪਚ੍ਚੇਕਬੋਧਿ ਸਤ੍ਤਾ ਅਗ੍ਗਸਾਵਕਮਹਾਸਾਵਕਬੋਧਿਸਤ੍ਤਾ ਪਰਿਪਾਕਿਨ੍ਦ੍ਰਿਯਾ ਸਾਵਕਬੋਧਿਸਤ੍ਤਾ ਚ ਬੁਦ੍ਧਕ੍ਖੇਤ੍ਤਭੂਤੇ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਉਪ੍ਪਜ੍ਜਨ੍ਤਿ, ਨ ਅਞ੍ਞਤ੍ਥ. ਕਸ੍ਮਾ, ਤੇਸੁ ਬੁਦ੍ਧਾਨਂ ਅਨੁਪ੍ਪਨ੍ਨਤ੍ਤਾ, ਤੇਸਂ ਪਨ ਅਭਿਨੀਹਾਰੋ ਪਾਰਮੀਸਮ੍ਭਰਣਂ ਞਾਣਪਰਿਪਾਚਨਞ੍ਚ ਤਸ੍ਮਿਂਏਵ ਸਮਿਜ੍ਝਤਿ, ਨ ਅਞ੍ਞਤ੍ਥ. ਤੇਨ ਵੁਤ੍ਤਂ ਮਹਾਪਦਾਨ ਸੁਤ੍ਤਟੀਕਾਯਂ –

‘‘ਪੁਰਿਮਬੁਦ੍ਧਾਨਂ ਮਹਾਬੋਧਿਸਤ੍ਤਾਨਂ ਪਚ੍ਚੇਕਬੁਦ੍ਧਾਨਞ੍ਚ ਨਿਬ੍ਬਤ੍ਤਿਯਾ ਸਾਵਕਬੋਧਿਸਤ੍ਤਾਨਂ ਸਾਵਕਬੋਧਿਯਾ ਅਭਿਨੀਹਾਰੋ ਸਾਵਕਪਾਰਮਿਯਾ ਸਮ੍ਭਰਣਂ ਪਰਿਪਾਚਨਞ੍ਚ ਬੁਦ੍ਧਕ੍ਖੇਤ੍ਤਭੂਤੇ ਇਮਸ੍ਮਿਂ ਚਕ੍ਕਵਾਲ਼ੇ ਜਮ੍ਬੁਦੀਪੇਏਵ ਇਜ੍ਝਤਿ, ਨ ਅਞ੍ਞਤ੍ਥਾ’’ਤਿ. ਤਥੇਵੇਤਂ ਏਕਨਿਪਾਤਅਙ੍ਗੁਤ੍ਤਰਟੀਕਾਯਞ੍ਚਾਤਿ.

ਏਤਰਹਿ ਪਨ ਅਪਰੇ ਆਚਰਿਯਾ ‘‘ਆਣਕ੍ਖੇਤ੍ਤਭੂਤਤੋ ਕੋਟਿਸਤਸਹਸ੍ਸਚਕ੍ਕਵਾਲ਼ਤੋ ਅਞ੍ਞੇਸੁ ਚਕ੍ਕਵਾਲ਼ੇਸੁ ਬੁਦ੍ਧਾ ਉਪ੍ਪਜ੍ਜਨ੍ਤੀ’’ਤਿ ਵਦਨ੍ਤਿ. ਤੇਸਂ ਪਨ ਵਚਨਂ ਅਯੁਤ੍ਤਮੇਵ. ਕਸ੍ਮਾ, ਅਟ੍ਠਕਥਾਯਂ ਵੁਤ੍ਤੇ ਅਞ੍ਞਸ੍ਮਿਂ ਚਕ੍ਕਵਾਲ਼ੇਤਿ ਏਤ੍ਥ ਅਞ੍ਞਸਦ੍ਦਸ੍ਸ ਠਪੇਤ੍ਵਾ ਇਮਂ ਚਕ੍ਕਵਾਲ਼ਨ੍ਤਿਪਦਤੋ ਅਞ੍ਞਸ੍ਸ ਅਪਾਦਾਨਸ੍ਸ ਅਸਮ੍ਭਵਤੋ ਚ ਅਨਨ੍ਤਚਕ੍ਕਵਾਲ਼ੇਸੁ ਬਹੂਸੁ ਬੁਦ੍ਧੇਸੁ ਉਪ੍ਪਨ੍ਨੇਸੁ ਬੁਦ੍ਧਸ੍ਸ ਅਨਚ੍ਛਰਿਯਤ੍ਤਾ ਚ. ਅਚ੍ਛਰਿਯਮਨੁਸ੍ਸੋ ਹਿ ਸਮ੍ਮਾਸਮ੍ਬੁਦ੍ਧੋ. ਵੁਤ੍ਤਞ੍ਹਿ ਏਕਨਿਪਾਤ ਅਙ੍ਗੁਤ੍ਤਰਪਾਲ਼ਿਯਂ

‘‘ਏਕਪੁਗ੍ਗਲੋ ਭਿਕ੍ਖਵੇ ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਅਚ੍ਛਰਿਯਮਨੁਸ੍ਸੋ. ਕਤਮੋ ਏਕਪੁਗ੍ਗਲੋ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ. ਅਯਂ ਖੋ ਭਿਕ੍ਖਵੇ ਏਕਪੁਗ੍ਗਲੋ ਲੋਕੇ ਉਪ੍ਪਜ੍ਜਤਿ ਅਚ੍ਛਰਿਯਮਨੁਸ੍ਸੋ’’ਤਿ. ਅਞ੍ਞਂ ਪਨ ਕਾਰਣਂ ਮਯਾ ਹੇਟ੍ਠਾ ਵੁਤ੍ਤਨਯੇਨਪਿ ਵਿਞ੍ਞੂਹਿ ਵਿਞ੍ਞਾਤਬ੍ਬਨ੍ਤਿ. ਅਞ੍ਞੇ ਪਨ ਆਚਰਿਯਾ ਬੁਦ੍ਧਅਪਦਾਨਪਾਲ਼ਿਯਂ –

‘‘ਦਿਸਾ ਦਸਵਿਧਾ ਲੋਕੇ, ਯਾਯਤੋ ਨਤ੍ਥਿ ਅਨ੍ਤਕਂ;

ਤਸ੍ਮਿਞ੍ਚ ਦਿਸਾਭਾਗਮ੍ਹਿ, ਬੁਦ੍ਧਕ੍ਖੇਤ੍ਤੇ ਅਸਙ੍ਖਯਾ;

ਪਭਾ ਪਕਿਤ੍ਤਿਤਾ ਮਯ੍ਹਂ, ਯਮਕਾ ਰਂਸਿਵਾਹਨਾ;

ਏਤ੍ਥਨ੍ਤਰੇ ਰਂਸਿਜਾਲਂ, ਆਲੋਕੋ ਵਿਪੁਲੋ ਭਵੇ’’ਤਿ.

ਵੁਤ੍ਤਾਸੁ ਦ੍ਵੀਸੁ ਗਾਥਾਸੁ ਪਠਮਗਾਥਾਯ ਅਤ੍ਥਂ ਬੁਦ੍ਧਸ੍ਸ ਅਨਾਧਿਪ੍ਪਾਯੇਨ ਗਹੇਤ੍ਵਾ ਮਿਚ੍ਛਾਞਾਣੇਨ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਉਪ੍ਪਜ੍ਜਮਾਨਾ ਬੁਦ੍ਧਾ ਅਸਙ੍ਖਯਾਤਿ ਵਦਨ੍ਤਿ. ਤੇਸਂ ਪਨੇਤਂ ਅਯੁਤ੍ਤਮੇਵ ਅਸੁਨ੍ਦਰਮੇਵ. ਕਸ੍ਮਾ, ਪਾਲ਼ਿਯਾ ਚ ਅਟ੍ਠਕਥਾਟੀਕਾਵਚਨੇਹਿ ਚ ਵਿਰੁਦ੍ਧਤ੍ਤਾ ਚ ਤਸ੍ਸਾ ਗਾਥਾਯ ਅਤ੍ਥਗ੍ਗਹਣਸ੍ਸ ਮਿਚ੍ਛਤ੍ਤਾ ਚ. ਇਮਾਯ ਹਿ ਪਾਲ਼ਿਯਾ ਗਾਥਾਯ ਵਾ ਅਞ੍ਞਾਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਅਤ੍ਥੇ ਗਯ੍ਹਮਾਨੇ ਅਟ੍ਠਕਥਾਸੁ ਇਮੇਸੁ ਪਨ ਤੀਸੁ ਖੇਤ੍ਤੇਸੁ ਠਪੇਤ੍ਵਾ ਇਮਂ ਚਕ੍ਕਵਾਲ਼ਂ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਸੁਤ੍ਤਂ ਨਤ੍ਥਿ, ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥੀਤਿ ਵੁਤ੍ਤਵਚਨੇਨ ਚ, ਤੀਣਿ ਹਿ ਪਿਟਕਾਨਿ…ਪੇ… ਇਮਾ ਤਿਸ੍ਸੋ ਸਂਗੀਤਿਯੋ ਆਰੁਲ਼੍ਹੇ ਤੇਪਿਟਕੇ ਬੁਦ੍ਧਵਚਨੇ…ਪੇ… ਸੁਤ੍ਤਂ ਨਤ੍ਥਿ. ਨ ਉਪ੍ਪਜ੍ਜਨ੍ਤੀਤਿ ਪਨ ਅਤ੍ਥੀਤਿ ਵੁਤ੍ਤਵਚਨੇਨ ਚ ਉਜੁਕਂ ਵਿਰੁਜ੍ਝਤਿ ਚ. ਭਦ੍ਦਨ੍ਤਮਹਾ ਬੁਦ੍ਧਘੋਸਾਦਯੋ ਅਟ੍ਠਕਥਾਚਰਿਯਾ ਤਂ ਪਾਲ਼ਿਂ ਨ ਪਸ੍ਸਨ੍ਤੀਤਿ ਅਤ੍ਤਨੋ ਦੁਗ੍ਗਹਿਤੇਨ ਅਟ੍ਠਕਥਾਚਰਿਯਾਨਂ ਅਬ੍ਭਕ੍ਖਾਨਂ ਆਪਜ੍ਜਤਿ ਚ. ਕਿਂ ਪਨੇਤੇ ਤਿਪਿਟਕਧਰਾ ਤਿਕ੍ਖਵਿਸਦਜਵਨ ਗਮ੍ਭੀਰਾਦਿਞਾਣਿਕਾ ਅਟ੍ਠਕਥਾਚਰਿਯਾ ਨ ਪਸ੍ਸੇਯ੍ਯੁਂ. ਪਸ੍ਸੇਯ੍ਯੁਂ ਏਵ. ਤਸ੍ਮਾ ਅਯੁਤ੍ਤਮੇਵ. ਅਟ੍ਠਕਥਾਸੁ ਪਨ ਆਗਤਂ ਸੁਤ੍ਤਂ ਨਤ੍ਥੀਤਿਆਦਿਵਚਨਮੇਵ ਯੁਤ੍ਤਤਰਂ ਹੋਤੀਤਿ ਦਟ੍ਠਬ੍ਬਂ.

ਏਤ੍ਥ ਚ ਬੁਦ੍ਧਕ੍ਖੇਤ੍ਤੇਤਿਪਦਂ ਤਸ੍ਮਿਞ੍ਚ ਦਿਸਾਭਾਗਮ੍ਹੀਤਿਪਦੇ ਵਿਸੇਸਨਂ, ਅਸਙ੍ਖਯਾਤਿਪਦਂ ਦੁਤਿਯਗਾਥਾਯ ਪਭਾਤਿਪਦਸ੍ਸ ਵਿਸੇਸਨਨ੍ਤਿ ਦਟ੍ਠਬ੍ਬਂ. ਅਯਂ ਪਨੇਤ੍ਥ ਯੋਜਨਾ. ਲੋਕੇ ਚਕ੍ਕਵਾਲ਼ਲੋਕੇ ਦਸਵਿਧਾ ਦਸ ਕੋਟ੍ਠਾਸਾ ਦਿਸਾ ਹੋਨ੍ਤਿ. ਤਤ੍ਥ ਕੋਟ੍ਠਾਸੇ ਯਾਯਤੋ ਯਾਯਨ੍ਤਸ੍ਸ ਗਚ੍ਛਨ੍ਤਸ੍ਸ ਮੇ ਅਨ੍ਤਕਂ ਪਰਿਯੋਸਾਨਂ ਨਤ੍ਥਿ. ਬੁਦ੍ਧਕ੍ਖੇਤ੍ਤੇ ਬੁਦ੍ਧਸ੍ਸ ਦਸਸਹਸ੍ਸਿਸਙ੍ਖਾਤਜਾਤਿਕ੍ਖੇਤ੍ਤਭੂਤੇ ਤਸ੍ਮਿਞ੍ਚ ਦਿਸਾਭਾਗਮ੍ਹਿ ਮਯ੍ਹਂ ਅਸਙ੍ਖਯਾ ਸਙ੍ਖਾਰਹਿਤਾ ਯਮਕਾ ਯੁਗਲ਼ਾ ਯੁਗਲ਼ਾ ਹੁਤ੍ਵਾ ਰਂਸਿਵਾਹਨਾ ਰਂਸਿਵਹਨ੍ਤਾ ਰਂਸਿਮੁਞ੍ਚਮਾਨਾ ਵਾ ਪਭਾ ਚਕ੍ਕਰਤਨਮਣਿਰਤਨਾਦੀਨਂ ਆਲੋਕਾ ਪਕਿਤ੍ਤਿਤਾ ਪਾਕਟਾ ਪਤ੍ਥਰਿਤਾ ਵਾ. ਏਤ੍ਥਨ੍ਤਰੇ ਦਸਸਹਸ੍ਸਚਕ੍ਕਵਾਲ਼ਨ੍ਤਰੇ ਰਂਸਿਜਾਲਂ ਰਂਸਿਸਮੂਹੇਨ ਵਿਪੁਲੋ ਬਹੁਤਰੋ ਆਲੋਕੋ ਭਵੇ ਅਹੋਸਿਨ੍ਤਿ. ਅਯਮਤ੍ਥੋ ਚਕ੍ਕਿਨ੍ਦਾਭਿਸਿਰੀਸਦ੍ਧਮ੍ਮ ਧਜਮਹਾਧਮ੍ਮਰਾਜਾਧਿਰਾਜਗੁਰੂਤਿਲਦ੍ਧਲਞ੍ਛਿਤੇਨ ਆਚਰਿਯਬੁਧੇਨ ਲਿਖਿਤੋਤਿ ਦਟ੍ਠਬ੍ਬੋ.

ਭਗਵਾ ਹਿ ਇਮਾਹਿ ਗਾਥਾਹਿ ਚਕ੍ਕਵਤ੍ਤਿਰਾਜਕਾਲੇ ਮਯ੍ਹਂਚਕ੍ਕਰਤਨਮਣੀਰਤਨਾਦੀਨਂ ਅਸਙ੍ਖਯਾ ਪਭਾ ਬੁਦ੍ਧਕ੍ਖੇਤ੍ਤਭੂਤੇ ਦਸਸਹਸ੍ਸਿਚਕ੍ਕਵਾਲ਼ੇ ਪਾਕਟਾ ਪਤ੍ਥਰਿਤਾਤਿ ਦਸ੍ਸੇਤਿ. ਨ ਅਨਨ੍ਤਚਕ੍ਕਵਾਲ਼ੇਸੁ ਉਪ੍ਪਜ੍ਜਨਬੁਦ੍ਧਾਨਂ ਅਸਙ੍ਖਯਭਾਵਨ੍ਤਿ.

ਵੁਤ੍ਤਞ੍ਹੇਤਂ ਬੁਦ੍ਧਅਪਦਾਨਟ੍ਠਕਥਾਯਂ ‘‘ਦਿਸਾ ਦਸਵਿਧਾ ਲੋਕੇਤਿ ਚਕ੍ਕਵਾਲ਼ਲੋਕੇ ਦਸਵਿਧਾ ਦਸਕੋਟ੍ਠਾਸਾ ਦਿਸਾ ਹੋਨ੍ਤਿ. ਤਤ੍ਥ ਕੋਟ੍ਠਾਸੇ ਯਾਯਤੋ ਯਾਯਨ੍ਤਸ੍ਸ ਗਚ੍ਛਨ੍ਤਸ੍ਸ ਅਨ੍ਤਕਂ ਨਤ੍ਥੀਤਿ ਅਤ੍ਥੋ. ਚਕ੍ਕਵਤ੍ਤਿਕਾਲੇ ਤਸ੍ਮਿਂ ਮਯਾ ਗਤਟ੍ਠਾਨੇ ਦਿਸਾਭਾਗੇ ਵਾ ਬੁਦ੍ਧਕ੍ਖੇਤ੍ਤੇ ਬੁਦ੍ਧਵਿਸਯਾ ਅਸਙ੍ਖਯਾ ਸਙ੍ਖਾਰਹਿਤਾ. ਪਭਾ ਪਕਿਤ੍ਤਿਤਾਤਿ ਤਦਾ ਚਕ੍ਕਵਤ੍ਤਿ ਰਾਜਕਾਲੇ ਮਯ੍ਹਂ ਪਭਾ ਚਕ੍ਕਰਤਨਮਣਿਰਤਨਾਦੀਨਂ ਪਭਾ ਆਲੋਕਾ ਯਮਕਾ ਯੁਗਲ਼ਾ ਯੁਗਲ਼ਾ ਹੁਤ੍ਵਾ ਰਂਸਿਵਾਹਨਾ ਰਂਸਿਮੁਞ੍ਚਮਾਨਾ ਪਕਿਤ੍ਤਿਤਾ ਪਾਕਟਾ. ਏਤ੍ਥਨ੍ਤਰੇ ਦਸਸਹਸ੍ਸਚਕ੍ਕਵਾਲ਼ਨ੍ਤਰੇ ਰਂਸਿਜਾਲਂ ਰਂਸਿਸਮੂਹਂ ਆਲੋਕੋ ਵਿਪੁਲੋ ਬਹੁਤਰੋ ਭਵੇ ਅਹੋਸਿਨ੍ਤਿ ਅਤ੍ਥੋ’’ਤਿ. ਏਤ੍ਥ ਚ ਪਠਮਗਾਥਾਯ ਪੁਬ੍ਬਡ੍ਢਸ੍ਸ ਏਕਵਾਕ੍ਯਭਾਵਤੋ ਦਿਸਾ ਦਸਵਿਧਾ ਲੋਕੇਤਿ ਚਕ੍ਕਵਾਲ਼ਲੋਕੇ…ਪੇ… ਅਨ੍ਤਕਂ ਨਤ੍ਥੀਤਿ ਅਤ੍ਥੋਤਿ ਵੁਤ੍ਤਂ. ਅਪਰਡ੍ਢਸ੍ਸ ਦੁਤਿਯਗਾਥਾਯਂ ਅਨ੍ਤੋਗਧਤ੍ਤਾ ਚਕ੍ਕਵਤ੍ਤਿਕਾਲੇ…ਪੇ… ਅਸਙ੍ਖਯਾ ਸਙ੍ਖਾਰਹਿਤਾ ਪਭਾ ਪਕਿਤ੍ਤਿਤਾਤਿ ਤਦਾ ਚਕ੍ਕਵਤ੍ਤਿਕਾਲੇ…ਪੇ… ਭਵੇ ਅਹੋਸਿਨ੍ਤਿ ਅਤ੍ਥੋਤਿ ਵੁਤ੍ਤਂ. ਤਸ੍ਮਾ ਅਸਙ੍ਖਯਾਤਿਪਦਂ ਦੁਤਿਯਗਾਥਾਯ ਪਭਾਤਿਪਦਸ੍ਸ ਵਿਸੇਸਨਨ੍ਤਿ ਦਟ੍ਠਬ੍ਬਂ.

ਜਿਨਾਲਙ੍ਕਾਰਟੀਕਾਯਂ ਪਨ ਏਵਮਸ੍ਸ ਸਬ੍ਬਧਮ੍ਮੇਸੁ ਅਪ੍ਪਟਿਹਤ ਞਾਣਾਚਾਰਂ ਦਸ੍ਸੇਤ੍ਵਾ ਇਦਾਨਿ ਲੋਕੇ ਤਾਦਿਸਸ੍ਸ ਅਞ੍ਞਸ੍ਸ ਅਭਾਵਂ ਦਸ੍ਸੇਨ੍ਤੋ ਆਹ.

‘‘ਅਨਨ੍ਤਸਤ੍ਤੇਸੁ ਚ ਲੋਕਧਾਤੁਸੁ,

ਏਕੋਵ ਸਬ੍ਬੇਪਿ ਸਮਾ ਨ ਤੇਨਾ’’ਤਿ.

ਤਤ੍ਥ ਅਨਨ੍ਤਲੋਕਧਾਤੂਸੁ ਏਕੇਕਿਸ੍ਸਂ ਲੋਕਧਾਤੁਯਾ ਅਨਨ੍ਤਸਤ੍ਤੇਸੁ ਤੇਨ ਤਥਾਗਤੇਨ ਸਮੋ ਏਕੋਪਿ ਨਤ੍ਥਿ. ਸਚੇ ਏਕੋ ਪਨ ਸਮੋ ਨ ਭਵੇਯ੍ਯ. ਸਬ੍ਬੇ ਸਤ੍ਤਾ ਏਕਜ੍ਝਂ ਹੁਤ੍ਵਾ ਸਮਾ ਭਵੇਯ੍ਯੁਨ੍ਤਿ ਚੇ. ਤਥਾਪਿ ਨਤ੍ਥਿ, ਸਬ੍ਬੇ ਏਕਜ੍ਝਂ ਹੁਤ੍ਵਾਪਿ ਇਮਿਨਾ ਏਕਕੇਨ ਸਮਾ ਨ ਹੋਨ੍ਤੀਤਿ ਅਧਿਪ੍ਪਾਯੋਤਿ ਵੁਤ੍ਤਂ. ਏਤ੍ਥ ਚ ਅਨਨ੍ਤਲੋਕਧਾਤੁਸੂਤਿਆਦਿਨਾ ਇਤੋ ਚਕ੍ਕਵਾਲ਼ਤੋ ਅਞ੍ਞੇਸੁ ਅਨਨ੍ਤਚਕ੍ਕਵਾਲ਼ੇਸੁ ਅਞ੍ਞੇਸਂ ਬੁਦ੍ਧਾਨਂ ਅਭਾਵਂ ਦਸ੍ਸੇਤਿ. ਏਵਂ ਪਨ ਮਯਾ ਪਥਵੋਜਂ ਉਦ੍ਧਰਿਤ੍ਵਾ ਦਸ੍ਸਿਤੋ ਵਿਯ ਦਸ੍ਸਿਤੇਹਿ ਅਤਿਦਲ਼੍ਹਤਰੇਹਿ ਸਾਧਕਵਚਨੇਹਿ ਇਤੋ ਚਕ੍ਕਵਾਲ਼ਤੋ ਅਞ੍ਞਚਕ੍ਕਵਾਲ਼ੇਸੁ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਮਿਚ੍ਛਾਵਾਦੋ ਸੂਰਿਯੋ ਅਨ੍ਧਕਾਰਂ ਪਟਿਹਨਤਿ ਵਿਯ ਪਟਿਹਨਿਯਤਿ ਅਪਨਿਯਤੀਤਿ ਸਦ੍ਧਹਕਂ ਦਟ੍ਠਬ੍ਬੋਤਿ.

ਮੁਨਿਨ੍ਦਕ੍ਕੋਤਿ ਮੁਨਿਨ੍ਦ ਅਕ੍ਕੋਤਿ ਪਦਚ੍ਛੇਦੋ. ਬੁਦ੍ਧਾਦਿਚ੍ਚੋਤਿ ਅਤ੍ਥੋ. ਸਬ੍ਬਧਮ੍ਮੇ ਮਨਤਿ ਜਾਨਾਤੀਤਿ ਮੁਨਿ. ਮਨਧਾਤੁ ਞਾਣੇ ਇ. ਮਕਾਰੇ ਅਸ੍ਸੁਤ੍ਤਂ. ਅਥ ਵਾ ਮੁਨਾਤਿ ਸਬ੍ਬਧਮ੍ਮੇ ਸਕ ਸਾਮਞ੍ਞਲਕ੍ਖਣਾਦਿਨਾ ਪਟਿਵਿਜ੍ਝਤੀਤਿ ਮੁਨਿ. ਮੁਨਤਿ ਹਿਤਾਹਿਤਂ ਪਰਿਚ੍ਛਿਨ੍ਦਤੀਤਿ ਵਾ ਮੁਨਿ, ਭਗਵਾ. ਮੁਨਧਾਤੁ ਪਟਿਵਿਜ੍ਝਨੇ, ਚਤੁਸਚ੍ਚਧਮ੍ਮੇ ਮੁਨਾਤਿ ਜਾਨਾਤੀਤਿ ਵਾ ਮੋਨਂ. ਚਤੁਮਗ੍ਗਞਾਣਂ. ਵੁਤ੍ਤਞ੍ਹਿ ਸਂਯੁਤ੍ਤਟ੍ਠਕਥਾਯਂ ‘‘ਮੋਨਨ੍ਤਿ ਚਤੁਮਗ੍ਗਞਾਣਂ. ਤਞ੍ਹਿ ਮੁਨਾਤੀਤਿ ਮੋਨਂ, ਚਤੁਸਚ੍ਚਧਮ੍ਮੇ ਜਾਨਾਤੀਤਿ ਅਤ੍ਥੋ’’ਤਿ. ਮੋਨਂ ਅਸ੍ਸ ਅਤ੍ਥੀਤਿ ਮੁਨਿ, ਭਗਵਾ. ਮੁਨਿ ਚ ਸੋ ਇਨ੍ਦਤਿ ਵੇਨੇਯ੍ਯਸਤ੍ਤੇ ਧਮ੍ਮੇਨ ਅਭਿਭਵਤਿ ਇਨ੍ਦੋ ਚਾਤਿ ਮੁਨਿਨ੍ਦੋ, ਭਗਵਾ. ਅਥ ਵਾ ਮੁਨੀਨਂ ਪਞ੍ਚਮੁਨੀਨਂ ਇਨ੍ਦੋਤਿ ਮੁਨਿਨ੍ਦੋ, ਭਗਵਾ. ਨ ਕਮਤਿ ਨ ਗਚ੍ਛਤਿ ਪਾਦੇਨ ਅਤ੍ਤਨੋ ਪੁਞ੍ਞਜਵਿਮਾਨੇਨ ਗਚ੍ਛਤੀਤਿ ਅਕ੍ਕੋ, ਆਦਿਚ੍ਚੋ. ਨਪੁਬ੍ਬ ਕਮੁਧਾਤੁ ਗਤਿਯਂ ਕ੍ਵਿ. ਧਾਤ੍ਵਨ੍ਤਲੋਪੋ. ਕਸ੍ਸ ਦ੍ਵਿਤ੍ਤਂ. ਅਥ ਵਾ ਯੁਗਨ੍ਧਰੁਬ੍ਬੇਧਪ੍ਪਮਾਣੇ ਆਕਾਸੇ ਅਰਤਿ ਗਚ੍ਛਤੀਤਿ ਅਕ੍ਕੋ. ਅਰਧਾਤੁ ਗਮਨੇ ਕਪਚ੍ਚਯੋ. ਕਸ੍ਸ ਦ੍ਵਿਤ੍ਤਂ. ਤਂ ਤਂ ਰਾਸਿਤੋ ਤਂ ਤਂ ਰਾਸਿਂ ਅਰਤਿ ਯਾਤੀਤਿ ਵਾ ਅਕ੍ਕੋ. ਅਥ ਵਾ ਮਹਨ੍ਤਜੁਤਤਾਯ ਅਕ੍ਕਿਯਤਿ ਅਭਿਤ੍ਥਵਿਯਤਿ ਤਪ੍ਪਸਨ੍ਨੇਹਿ ਜਨੇਹੀਤਿ ਅਕ੍ਕੋ, ਆਦਿਚ੍ਚੋ. ਅਕ੍ਕਧਾਤੁ ਥਵਨੇ ਅ. ਮੁਨਿਨ੍ਦੋ ਚ ਸੋ ਅਕ੍ਕੋ ਚਾਤਿ ਮੁਨਿਨ੍ਦਕ੍ਕੋ, ਅਕ੍ਕੋ ਆਦਿਚ੍ਚੋ ਵਿਯ ਵਾ ਮੁਨਿਨ੍ਦੋਤਿ ਮੁਨਿਨ੍ਦਕ੍ਕੋ, ਬੁਦ੍ਧੋ. ਯਥਾ ਹਿ ਸੂਰਿਯੋ ਅਤ੍ਤਨੋ ਸਹਸ੍ਸਰਂਸਿਯਾ ਏਕਚਕ੍ਕਵਾਲ਼ੇ ਤਿਮਿਰਨ੍ਧਕਾਰਂ ਵਿਧਮੇਤ੍ਵਾ ਦਿਨੇ ਦਿਨੇ ਨਵਯੋਜਨਸਤਸਹਸ੍ਸਪ੍ਪਦੇਸਂ ਕੋਟਿਸਹਸ੍ਸਪ੍ਪਦੇਸਂ ਵਾ ਦਸਦਿਸਂ ਵਾ ਓਭਾਸੇਤ੍ਵਾ ਵਿਰੋਚਮਾਨੋ ਚਰਤਿ, ਏਵਮੇਵ ਭਗਵਾਪਿ ਅਤ੍ਤਨੋ ਸਦ੍ਧਮ੍ਮਰਂ ਸਿਯਾ ਬੁਦ੍ਧਕ੍ਖੇਤ੍ਤਭੂਤੇਸੁ ਦਸਸਹਸ੍ਸਚਕ੍ਕਵਾਲ਼ੇਸੁ ਵਿਨੇਯ੍ਯਾਨਂ ਅਵਿਜ੍ਜਨ੍ਧਕਾਰਂ ਵਿਧਮੇਤ੍ਵਾ ਦਿਨੇ ਦਿਨੇ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਵੇਨੇਯ੍ਯਸਤ੍ਤਸਮੂਹਂ ਚਤੁਸਚ੍ਚਧਮ੍ਮੋਭਾਸੇਨ ਜੋਤਯਮਾਨੋ ਵਿਰੋਚਨਂ ਚਰਤੀਤਿ ਠਾਨਾਨੁਰੂਪਂ ਮੁਨਿਨ੍ਦਕ੍ਕੋਤਿ ਥੋਮੇਤਿ. ਅਯਂ ਸਮਾਸੋਪਮਾ ਹੀਨੂਪਮਾਤਿ ਦਟ੍ਠਬ੍ਬਾ.

ਸੁਦ੍ਧੇਤਿ ਰਾਗਾਦਿਮਲੇਹਿ ਵਿਸੁਦ੍ਧੇ. ਸੁਜ੍ਝਤਿ ਵਿਸੁਜ੍ਝਤੀਤਿ ਸੁਦ੍ਧੋ, ਤਿਭਵੋ. ਸੁਧਧਾਤੁ ਸੋਚੇਯ੍ਯੇਤਿ. ਤਿਭਵ ਕੁਹਰੇਤਿ ਤਿਭਵਸਙ੍ਖਾਤਕਮਲਸਰੇ. ਕਮਲਸਰਂ ਵਿਯ ਤਿਭਵਸ੍ਮਿਂ ਵਾ ਭਵਨ੍ਤਿ ਸਤ੍ਤਾ ਏਤ੍ਥਾਤਿ ਭਵੋ. ਭੂਧਾਤੁ ਸਤ੍ਤਾਯਂ ਣ. ਤਯੋ ਭਵਾ ਤਿਭਵਾ, ਕਾਮਰੂਪਾਰੂਪਭੂਮਿ ਲਬ੍ਭਤਿ. ਕੁਂ ਵੁਚ੍ਚਤਿ ਉਦਕਂ, ਤਂ ਹਰਤੀਤਿ ਕੁਹਰੋ. ਕੁਪੁਬ੍ਬਹਰਧਾਤੁ ਹਰਣੇ ਅ. ਤਯੋ ਭਵਾ ਚ ਤੇ ਕੁਹਰੋ ਚਾਤਿ ਤਿਭਵਕੁਹਰੋ, ਕੁਹਰੋ ਵਿਯ ਤਯੋ ਭਵਾਤਿ ਵਾ ਤਥਾ. ਤਸ੍ਮਿਂ ਤਿਭਵਕੁਹਰੇ. ਕਮਲ ਕਥਿਤਨ੍ਤਿ ਉਪ੍ਪਲਨ੍ਤਿ ਕਥੇਤਬ੍ਬਂ ਕਂ ਜਲਂ ਅਲਯਤਿ ਵਿਭੂਸਯਤੀਤਿ ਕਮਲਂ, ਉਪ੍ਪਲਂ. ਕਂਸਦ੍ਦੂਪਪਦ ਅਲਧਾਤੁ ਵਿਭੂਸਨੇ ਅ. ਅਥ ਵਾ ਕਮਿਯਤਿ ਇਚ੍ਛਿਯਤੀਤਿ ਕਮਲਂ. ਕਮੁਧਾਤੁ ਇਚ੍ਛਾਯਂ ਅਲਪਚ੍ਚਯੋ. ਕਮਲਨ੍ਤਿ ਉਪ੍ਪਲਨ੍ਤਿ ਕਥਿਯਤੀਤਿ ਕਮਲਕਥਿਤਂ. ਵਿਨੇਯ੍ਯਪ੍ਪਾਣੋਘਨ੍ਤਿ ਵਿਨੇਯ੍ਯਪਾਣਓਘਨ੍ਤਿ ਪਦਵਿਭਾਗੋ. ਵਿਨੇਤਬ੍ਬਸਤ੍ਤਸਮੂਹਨ੍ਤਿ ਅਤ੍ਥੋ. ਵਿਨੇਤਬ੍ਬੋ ਦਮੇਤਬ੍ਬੋ ਸਤ੍ਥਾਰਾਤਿ ਵਿਨੇਯ੍ਯੋ, ਸਤ੍ਤੋ. ਵਿਪੁਬ੍ਬਨਿਧਾਤੁ ਦਮਨੇ ਣ੍ਯੋ. ਪਣਨ੍ਤਿ ਜੀਵਨ੍ਤਿ ਸਤ੍ਤਾ ਅਨੇਨਾਤਿ ਪਾਣਂ, ਜੀਵਿਤਿਨ੍ਦ੍ਰਿਯਂ. ਪਣਧਾਤੁ ਜੀਵਾਯਂ ਣ. ਤਂ ਅਸ੍ਸ ਅਤ੍ਥਿ ਤਸ੍ਮਿਂ ਵਾ ਵਿਜ੍ਜਤੀਤਿ ਪਾਣੋ, ਸਤ੍ਤੋ. ਅਸ੍ਸਤ੍ਥਿਤਦ੍ਧਿਤੇ ਣਪਚ੍ਚਯੋ. ਵਿਨੇਯ੍ਯੋ ਚ ਸੋ ਪਾਣੋ ਚਾਤਿ ਵਿਨੇਯ੍ਯਪ੍ਪਾਣੋ. ਅਵਯਵੇਨ ਸਹ ਹਨਤਿ ਗਚ੍ਛਤਿ ਪਵਤ੍ਤਤੀਤਿ ਓਘੋ, ਸਮੂਹੋ. ਅਵਪੁਬ੍ਬ ਹਨਧਾਤੁ ਗਤਿਯਂ ਣੋ. ਅਵਸ੍ਸ ਓ. ਹਨਸ੍ਸ ਘੋ. ਵਿਨੇਯ੍ਯਪ੍ਪਾਣਾਨਂ ਓਘੋ ਸਮੂਹੋਤਿ ਵਿਨੇਯ੍ਯਪ੍ਪਾਣੋਘੋ, ਤਂ.

ਧਮ੍ਮਰਂਸਿਵਰੇਹੀਤਿ ਉਤ੍ਤਮਧਮ੍ਮਸਙ੍ਖਾਤਰਂਸੀਹਿ. ਏਤ੍ਥ ਚ ਧਮ੍ਮੋਤਿ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਸਤ੍ਤੇ ਚਤੂਸੁ ਅਪਾਯੇਸੁ ਵਟ੍ਟਦੁਕ੍ਖੇਸੁ ਚ ਅਪਤਮਾਨੇ ਕਤ੍ਵਾ ਧਾਰੇਤੀਤਿ ਧਮ੍ਮੋ. ਧਰਧਾਤੁ ਧਾਰਣੇ ਰਮ੍ਮਪਚ੍ਚਯੋ. ਧਾਰੇਤਿ ਚ ਅਪਾਯਾਦਿਨਿਬ੍ਬਤ੍ਤਕਕਿਲੇਸਂ ਵਿਦ੍ਧਂਸੇਤੀਤਿ ਅਤ੍ਥੋ. ਚਤੁਰਿਯਮਗ੍ਗੋ ਚ ਨਿਬ੍ਬਾਨਞ੍ਚ ਨਿਪ੍ਪਰਿਯਾਯਤੋ ਲਬ੍ਭਤਿ. ਕਸ੍ਮਾ, ਅਰਿਯਮਗ੍ਗਸ੍ਸ ਕਿਲੇਸਾਨਂ ਸਮੁਚ੍ਛੇਦਪ੍ਪਹਾਨਵਸੇਨ ਸਮੁਚ੍ਛੇਦਕਤ੍ਤਾ, ਨਿਬ੍ਬਾਨਸ੍ਸ ਚ ਨਿਸ੍ਸਰਣਪ੍ਪਹਾਨਵਸੇਨ ਤਸ੍ਸ ਆਰਮ੍ਮਣਭਾਵਂ ਪਤ੍ਵਾ ਤਦਤ੍ਥਸਿਦ੍ਧਿਹੇਤੁਤ੍ਤਾ. ਚਤੁਰਿਯਫਲਞ੍ਚ ਪਰਿਯਤ੍ਤਿਧਮ੍ਮੋ ਚ ਪਰਿਯਾਯਤੋ ਲਬ੍ਭਤਿ. ਕਸ੍ਮਾ, ਫਲਸ੍ਸ ਮਗ੍ਗੇਨ ਵਿਦ੍ਧਂਸਿ ਤਬ੍ਬਾਨਂ ਕਿਲੇਸਾਨਂ ਪਟਿਪ੍ਪਸ੍ਸਮ੍ਭਨਪ੍ਪਹਾਨਵਸੇਨ ਮਗ੍ਗਾਨੁਕੂਲਪ੍ਪ ਵਤ੍ਤਤ੍ਤਾ. ਪਰਿਯਤ੍ਤਿਧਮ੍ਮਸ੍ਸ ਚ ਤਦਙ੍ਗਪ੍ਪਹਾਨਵਸੇਨ ਤਦਧਿਗਮ ਹੇਤੁਤ੍ਤਾ. ਅਥ ਵਾ ਕਿਲੇਸੇ ਧੁਨਾਤਿ ਕਮ੍ਪਤਿ ਚਲਤਿ ਵਿਦ੍ਧਂਸੇਤੀਤਿ ਧਮ੍ਮੋ, ਚਤੁਰਿਯਮਗ੍ਗੋ. ਧੁਨਧਾਤੁ ਕਮ੍ਪਨੇ ਰਮ੍ਮੋ. ਅਰਿਯੇਹਿ ਧਾਰਿਯਤਿ ਪਟਿਵਿਜ੍ਝਿਯਤਿ ਸਚ੍ਛਿਕਰਿਯਤਿ ਆਰਮ੍ਮਣ ਕਰਣਵਸੇਨਾਤਿ ਧਮ੍ਮੋ, ਨਿਬ੍ਬਾਨਂ. ਧਰਧਾਤੁ ਞਾਣੇ. ਧਂਸੇਤਿ ਪਟਿਪ੍ਪਸ੍ਸਮ੍ਭੇਤਿ ਮਗ੍ਗਪ੍ਪਹੀਨਕਿਲੇਸਵਾਸਨਨ੍ਤਿ ਧਮ੍ਮੋ, ਅਰਿਯਫਲਂ. ਧਂਸਧਾਤੁ ਵਿਦ੍ਧਂਸਨੇ. ਅਤ੍ਤਨੋ ਸਭਾਵਂ ਧਾਰੇਤਿ ਚ ਧਾਰਿਯਤਿ ਚ ਪਣ੍ਡਿਤੇਹਿ ਨ ਬਾਲੇਹੀਤਿ ਧਮ੍ਮੋ, ਪਰਿਯਤ੍ਤਿਧਮ੍ਮੋ. ਧਮ੍ਮੋ ਚ ਧਮ੍ਮੋ ਚ ਧਮ੍ਮੋ ਚ ਧਮ੍ਮੋ ਚਾਤਿ ਧਮ੍ਮੋ ਏਕ ਸੇਸਨਯੇਨ, ਦਸਵਿਧੋ ਧਮ੍ਮੋ ਲਬ੍ਭਤਿ. ਵੁਤ੍ਤਞ੍ਹੇਤਂ ਛਤ੍ਤਵਿਮਾਨੇ –

‘‘ਰਾਗਵਿਰਾਗਮਨੇਜਮਸੋਕਂ,

ਧਮ੍ਮਮਸਙ੍ਖਤਮਪ੍ਪਟਿਕੂਲਂ;

ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਂ,

ਧਮ੍ਮਮਿਮਂ ਸਰਣਤ੍ਤਮੁਪੇਹੀ’’ਤਿ.

ਅਯਂ ਪਨੇਤ੍ਥ ਯੋਜਨਾ. ਮਾਣਵ ਰਾਗਵਿਰਾਗਂ ਰਾਗਵਿਗਤਂ ਇਮਂ ਧਮ੍ਮਂ ਮਗ੍ਗਧਮ੍ਮਞ੍ਚ ਅਨੇਜਂ ਏਜਾਸਙ੍ਖਾਤਤਣ੍ਹਾਵਿਰਹਿਤਂ ਅਸੋਕਂ ਸੋਕਵਿਰਹਿਤਂ ਇਮਂ ਧਮ੍ਮਂ ਫਲਧਮ੍ਮਞ੍ਚ, ਅਸਙ੍ਖਤਂ ਸਙ੍ਖਤਵਿਰਹਿਤਂ ਇਮਂ ਧਮ੍ਮਂ ਨਿਬ੍ਬਾਨਧਮ੍ਮਞ੍ਚ. ਅਪ੍ਪਟਿਕੂਲਂ ਅਵਿਰੋਧਨਂ ਮਧੁਰਂ ਅਤ੍ਥਬ੍ਯਞ੍ਜਨ ਸਮ੍ਪਨ੍ਨਤ੍ਤਾ ਮਧੁਰਂ, ਪਗੁਣਂ ਪਕਟ੍ਠਗੁਣਂ ਸੁਵਿਭਤ੍ਤਂ ਸੁਟ੍ਠੁ ਵਿਭਜਿਤਬ੍ਬਂ, ਇਮਂ ਧਮ੍ਮਂ ਪਰਿਯਤ੍ਤਿਧਮ੍ਮਞ੍ਚ ਸਰਣਤ੍ਤਂ ਸਰਣਭਾਵਂ ਉਪੇਹਿ ਉਪਗਚ੍ਛਾਹੀਤਿ.

ਏਤ੍ਥ ਹਿ ਕਾਮਰਾਗਾਦਿਭੇਦੋ ਸਬ੍ਬੋਪਿ ਰਾਗੋ ਵਿਰਜ੍ਜਤਿ ਪਹਿਯਤਿ ਏਤੇਨਾਤਿ ਰਾਗਵਿਰਾਗੋਤਿ ਮਗ੍ਗੋ ਕਥਿਤੋ. ਏਜਾਸਙ੍ਖਾਤਾਯ ਤਣ੍ਹਾਯ ਅਨ੍ਤੋਨਿਜ੍ਝਾਨਲਕ੍ਖਣਸ੍ਸ ਚ ਸੋਕਸ੍ਸ ਤਦੁਪ੍ਪਤ੍ਤਿਯਾ ਸਬ੍ਬਸੋ ਪਰਿਕ੍ਖੀਣਤ੍ਤਾ ਅਨੇਜਮ ਸੋਕਨ੍ਤਿ ਫਲਂ ਕਥਿਤਂ. ਕੇਨਚਿ ਪਚ੍ਚਯੇਨ ਅਸਙ੍ਖਤਤ੍ਤਾ ਧਮ੍ਮਮਸਙ੍ਖਤਨ੍ਤਿ ਨਿਬ੍ਬਾਨਂ ਕਥਿਤਂ. ਅਵਿਰੋਧਦੀਪਨਤੋ ਪਨ ਅਤ੍ਥਬ੍ਯਞ੍ਜਨਸ੍ਸ ਸਮ੍ਪਨ੍ਨਤਾਯ ਪਕਟ੍ਠਗੁਣਵਿਭਾਵਨਤੋ ਸੁਟ੍ਠੁ ਵਿਭਜਿਤਤ੍ਤਾ ਚ ਅਪ੍ਪਟਿਕੂਲਨ੍ਤਿਆਦਿਨਾ ਸਬ੍ਬੋਪਿ ਪਰਿਯਤ੍ਤਿ ਧਮ੍ਮੋ ਕਥਿਤੋ. ਵੁਤ੍ਤਞ੍ਹਿ ਤਦਟ੍ਠਕਥਾਯਂ ‘‘ਏਤ੍ਥ ਹਿ ਰਾਗਵਿਰਾਗਨ੍ਤਿ ਮਗ੍ਗੋ ਕਥਿਤੋ. ਅਨੇਜਮਸੋਕਨ੍ਤਿ ਫਲਂ. ਧਮ੍ਮਮਸਙ੍ਖਤਨ੍ਤਿ ਨਿਬ੍ਬਾਨਂ. ਅਪ੍ਪਟਿਕੂਲਂ ਮਧੁਰਮਿਮਂ ਪਗੁਣਂ ਸੁਵਿਭਤ੍ਤਨ੍ਤਿ ਪਿਟਕਤ੍ਤਯੇਨ ਵਿਭਤ੍ਤਾ ਸਬ੍ਬਧਮ੍ਮਕ੍ਖਨ੍ਧਾ’’ਤਿ. ਇਧ ਪਨ ਸਾਮਞ੍ਞਤੋ ਦਸਵਿਧੋ ਧਮ੍ਮੋ. ਵਿਸੇਸਤੋ ਪਨ ਪਰਿਯਤ੍ਤਿ ਧਮ੍ਮੋ ਅਧਿਪ੍ਪੇਤੋ. ਕਸ੍ਮਾ, ਸੁਬੋਧੇਸੀਤਿ ਵੁਚ੍ਚਮਾਨਤ੍ਤਾ. ਰਂਸੀਤਿ ਰਸਿਯਨ੍ਤਿ ਅਸ੍ਸਾਦਿਯਨ੍ਤੀਤਿ ਰਂਸੀ, ਰਸਨ੍ਤਿ ਅਸ੍ਸਾਦੇਨ੍ਤਿ ਸਤ੍ਤਾ ਏਤਾਯਾਤਿ ਵਾ ਰਂਸੀ, ਰਸਧਾਤੁ ਅਸ੍ਸਾਦਨੇ ਅ ਚ ਈ ਚ. ਅਥ ਵਾ ਰਸਿਯਤਿ ਸਿਨੇਹਿਯਤਿ ਤਂ ਜਨੇਹੀਤਿ ਰਂਸੀ. ਰਸਧਾਤੁ ਸਿਨੇਹੇ. ਨਿਗ੍ਗਹੀਤਾਗਮੋ.

ਵਰੋਤਿ ਉਤ੍ਤਮੋ, ਵਰਿਤਬ੍ਬੋ ਪਤ੍ਥਿਤਬ੍ਬੋਤਿ ਵਰੋ, ਵਰਤਿ ਨਿਵਾਰੇਤਿ ਹੀਨਨ੍ਤਿ ਵਾ ਵਰੋ. ਵਰਧਾਤੁ ਪਤ੍ਥਨੇ ਨਿਵਾਰਣੇ ਵਾ ਅ. ਧਮ੍ਮੋ ਚ ਸੋ ਰਂਸਿ ਚਾਤਿ ਧਮ੍ਮਰਂਸਿ, ਧਮ੍ਮਸ੍ਸ ਵਾ ਰਂਸਿ ਧਮ੍ਮਰਂਸਿ. ਅਯਂ ਪਨ ਸਮਾਸੋ ਅਭੇਦੂਪਚਾਰੇਨ ਵੁਤ੍ਤੋ. ਵਰੋ ਚ ਸੋ ਧਮ੍ਮਰਂਸਿ ਚਾਤਿ ਧਮ੍ਮਰਂਸਿਵਰੋ, ਤੇਹਿ ਧਮ੍ਮਰਂਸਿਵਰੇਹਿ. ਸੁਬੋਧੇਸੀਤਿ ਚਤੁਸਚ੍ਚਧਮ੍ਮਂ ਪਟਿਵਿਜ੍ਝਯਮਾਨੇਨ ਸੁਟ੍ਠੁ ਪਬੋਧੇਸਿ ਵਿਕਾਸੇਤੀਤਿ ਅਤ੍ਥੋ. ਯਥਾ ਹਿ ਸੂਰਿਯੋ ਅਤ੍ਤਨੋ ਰਂਸਿਯਾ ਫੁਸਯਿਤ੍ਵਾ ਕੁਹਰ ਸਙ੍ਖਾਤੇ ਸਰੇ ਜਾਤਂ ਉਪ੍ਪਲਂ ਵਿਕਾਸੇਤਿ, ਏਵਮੇਵ ਭਗਵਾਪਿ ਅਤ੍ਤਨੋ ਧਮ੍ਮਦੇਸਨਾਸਙ੍ਖਾਤਰਂਸਿਯਾ ਕਮਲਸਰਸਙ੍ਖਾਤੇ ਭਵਤ੍ਤਯੇ ਵਸਨ੍ਤਂ ਪੁਞ੍ਞੂਪਨਿਸ੍ਸਯਂ ਪਟਿਵਿਜ੍ਝਾਰਹਂ ਕਮਲ ਸਙ੍ਖਾਤਂ ਵਿਨੇਯ੍ਯਪ੍ਪਾਣੋਘਂ ਚਤੁਸਚ੍ਚਧਮ੍ਮਂ ਪਟਿਵਿਜ੍ਝਯਮਾਨੋ ਫਲਧਮ੍ਮੇਨ ਪਬੋਧੇਸਿ ਵਿਕਾਸੇਤੀਤਿ ਵੁਤ੍ਤਂ ਹੋਤਿ.

ਬ੍ਯਾਪਿਤਕ੍ਕਿਤ੍ਤਿਨਞ੍ਚਾਤਿ ਤਿਲੋਕੇ ਪਤ੍ਥਟਪਰਿਕਿਤ੍ਤਨਂ. ਸੀਲਾਦਿਗੁਣੇਹਿ ਪਤ੍ਥਟਥੁਤਿਘੋਸਿਕਨ੍ਤਿ ਅਤ੍ਥੋ. ਚਸਦ੍ਦੋ ਚੇਤ੍ਥ ਪਦਪੂਰਣਮਤ੍ਤੋਯੇਵ. ਵਿਸੇਸੇਨ ਵਿਵਿਧਂ ਵਾ ਆਪਤਿ ਵਡ੍ਢਤੀਤਿ ਬ੍ਯਾਪਿਤੋ. ਵਿਪੁਬ੍ਬਆਪਧਾਤੁ ਬ੍ਯਾਪਨੇ ਵਡ੍ਢਨੇ ਵਾ ਤ. ਬ੍ਯਾਪਨਂ ਵਾ ਬ੍ਯਾਪਿਤਂ. ਕਿਤ੍ਤਿਯਤੇ ਅਭਿਤ੍ਥਵਿਯਤੇ ਕਿਤ੍ਤਿਨਂ. ਭਾਵਸਾਧਨੋਯਂ. ਥੁਤਿਕ੍ਰਿਯਾ ਲਬ੍ਭਤਿ. ਕਿਤ੍ਤਿਯਤਿ ਅਭਿਤ੍ਥਵਿਯਤਿ ਦੇਵਮਨੁਸ੍ਸੇਹੀਤਿ ਕਿਤ੍ਤਿਨਂ, ਥੁਤਿਘੋਸੋ. ਕਿਤ੍ਤਧਾਤੁ ਅਭਿਤ੍ਥਵਨੇ ਯੁ. ਬ੍ਯਾਪਿਤੋ ਪਤ੍ਥਟੋ ਕਿਤ੍ਤਨੋ ਥੁਤਿਘੋਸੋ ਯਸ੍ਸ ਸੋਤਿ ਬ੍ਯਾਪਿਤਕ੍ਕਿਤ੍ਤਿਨੋ, ਮੁਨਿਨ੍ਦਕ੍ਕੋ. ਤਂ. ਭਗਵਤੋ ਹਿ ਤਿਲੋਕੇ ਦੇਵਮਨੁਸ੍ਸੇਹਿ ਸੀਲਾਦਿਗੁਣੇਹਿ ਚ ਅਰਹਂ ਸਮ੍ਮਾਸਮ੍ਬੁਦ੍ਧੋਤ੍ਯਾਦੀਹਿ ਗੁਣੇਹਿ ਚ ਥੋਮਿਤੋ ਕਿਤ੍ਤਿਸਦ੍ਦੋ ਯਾਵ ਭਵਗ੍ਗਂ ਅਬ੍ਭੁਗ੍ਗਚ੍ਛਤੀਤਿ ਬ੍ਯਾਪਿਤਕ੍ਕਿਤ੍ਤਿਨਨ੍ਤਿ ਥੋਮੇਤੀਤਿ ਵੁਤ੍ਤਂ ਹੋਤਿ.

ਤਿਲੋਕੇਕਚ੍ਚਕ੍ਖੁਨ੍ਤਿ ਤਿਲੋਕੇ ਏਕਚਕ੍ਖੂਤਿ ਪਦਚ੍ਛੇਦੋ. ਕਾਮਰੂਪ ਅਰੂਪਸਙ੍ਖਾਤਾਨਂ ਤਿਲੋਕਾਨਂ ਏਕਂ ਪਞ੍ਞਾਚਕ੍ਖੁਭੂਤਨ੍ਤਿ ਅਤ੍ਥੋ. ਤਯੋ ਲੋਕਾ ਤਿਲੋਕਂ. ਤਸ੍ਸ ਚਕ੍ਖੁ ਵਿਯ ਏਕ ਭੂਤਂਪਞ੍ਞਾਚਕ੍ਖੁ ਯਸ੍ਸ ਸੋਤਿ ਤਿਲੋਕੇਕਚ੍ਚਕ੍ਖੁ, ਮੁਨਿਨ੍ਦਕ੍ਕੋ. ਏਤ੍ਥ ਚ ਏਕਚਕ੍ਖੁਸਦ੍ਦਸ੍ਸ ਲੋਪੋ ਹੋਤਿ ਬ੍ਰਹ੍ਮਸ੍ਸਰੋਤਿਆਦੀਸੁ ਵਿਯ. ਅਥ ਵਾ ਤਿਲੋਕਸ੍ਸ ਏਕਂ ਪਞ੍ਞਾਚਕ੍ਖੁਂ ਭੂਤੋ ਪਤ੍ਤੋਤਿ ਤਿਲੋਕੇਕਚ੍ਚਕ੍ਖੁ, ਮੁਨਿਨ੍ਦਕ੍ਕੋ. ਤਿਲੋਕੇਕਚ੍ਚਕ੍ਖੁਭੂਤਨ੍ਤਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਭੂਤਸਦ੍ਦਲੋਪਂ ਕਤ੍ਵਾ ਤਿਲੋਕੇਕਚ੍ਚਕ੍ਖੁਨ੍ਤਿ ਵੁਤ੍ਤਂ. ਅਥ ਵਾ ਤਿਲੋਕਸ੍ਸ ਏਕਭੂਤੋ ਪਞ੍ਞਾਚਕ੍ਖੁ ਹੁਤ੍ਵਾ ਸਬ੍ਬਧਮ੍ਮੇ ਚਕ੍ਖਤਿ ਪਸ੍ਸਤੀਤਿ ਤਿਲੋਕੇਕਚ੍ਚਕ੍ਖੁ, ਮੁਨਿਨ੍ਦਕ੍ਕੋ. ਤਂ. ਭਗਵਾ ਹਿ ਪਞ੍ਞਾਚਕ੍ਖੁ ਮਯਤ੍ਤਾ ਸਤ੍ਤੇਸੁ ਚ ਤਦੁਪ੍ਪਾਦਨਤੋ ਤਿਲੋਕਸ੍ਸ ਚਕ੍ਖੁਭੂਤੋ ਞਾਣਭੂਤੋ ਧਮ੍ਮਭੂਤੋ ਬ੍ਰਹ੍ਮਭੂਤੋ ਹੋਤਿ. ਵੁਤ੍ਤਞ੍ਹਿ ਮਧੁਪਿਣ੍ਡਿਕਸੁਤ੍ਤੇ ‘‘ਸੋ ਹਾਵੁਸੋ ਭਗਵਾ ਜਾਨਂ ਜਾਨਾਤਿ, ਪਸ੍ਸਂ ਪਸ੍ਸਤਿ ਚਕ੍ਖੁਭੂਤੋ ਞਾਣਭੂਤੋ ਧਮ੍ਮਭੂਤੋ ਬ੍ਰਹ੍ਮਭੂਤੋ ਵਤ੍ਤਾ ਪਵਤ੍ਤਾ ਅਤ੍ਥਸ੍ਸ ਨਿਨ੍ਨੇਤਾ ਅਮਤਸ੍ਸ ਦਾਤਾ ਧਮ੍ਮਸ੍ਸਾਮੀ ਤਥਾਗਤੋ’’ਤਿ. ਤਸ੍ਮਾ ਤਿਲੋਕੇਕਚ੍ਚਕ੍ਖੁਨ੍ਤਿ ਥੋਮੇਤਿ.

ਦੁਖਮਸਹਨਨ੍ਤਿ ਪੁਥੁਜ੍ਜਨੇਹਿ ਅਤਿਦੁਕ੍ਖਮਿਤਟ੍ਠਾਨਂ ਖਮਨਂ. ਪੁਥੁਜ੍ਜਨੇਹਿ ਦੁਕ੍ਖੇਨ ਕਸਿਰੇਨ ਖਮਿਤਬ੍ਬਨ੍ਤਿ ਦੁਖਮਂ, ਇਟ੍ਠਾਨਿਟ੍ਠਾਦਿ ਆਰਮ੍ਮਣਂ. ਦੁਕ੍ਖਮਨ੍ਤਿ ਵਤ੍ਤਬ੍ਬੇ ਗਜ੍ਜਬਨ੍ਧਤ੍ਤਾ ਛਨ੍ਦਾਨੁਰਕ੍ਖਣਤ੍ਥਂ ਕਕਾਰਲੋਪਂ ਕਤ੍ਵਾ ਦੁਖਮਨ੍ਤਿ ਵੁਤ੍ਤਂ. ਤਂ ਸਹਤਿ ਖਮਤੀਤਿ ਦੁਖਮਸਹਨੋ, ਮੁਨਿਨ੍ਦਕ੍ਕੋ. ਸਹਧਾਤੁ ਪਰਿਸਹਨੇ ਯੁ. ਤਂ ਦੁਖਮਸਹਨਂ. ਭਗਵਾ ਹਿ ਪੁਥੁਜ੍ਜਨੇਹਿ ਸੁਦੁਕ੍ਖਮਿਤਂ ਇਟ੍ਠਾ ਨਿਟ੍ਠਾਦਿਆਰਮ੍ਮਣਂ ਸੀਤੁਣ੍ਹਾਦਿਂ ਲਾਭਾਲਾਭਯਸਾਯਸ ਨਿਨ੍ਦਪਸਂਸਸੁਖਦੁਕ੍ਖਸਙ੍ਖਾਤਂ ਲੋਕਧਮ੍ਮਞ੍ਚ ਅਤਿਵਿਯ ਖਮਤਿ ਅਧਿਵਾਸੇਤਿ, ਤਸ੍ਮਾ ਦੁਖਮਸਹਨਨ੍ਤਿ ਥੋਮੇਤਿ.

ਮਹੇਸਿਨ੍ਤਿ ਮਹਨ੍ਤਂ ਸੀਲਕ੍ਖਨ੍ਧਾਦਿਂ ਪਰਿਯੇਸਮਾਨਂ ਮਹਨ੍ਤਂ ਨਿਬ੍ਬਾਨਂ ਗਵੇਸਮਾਨਂ ਵਾ ਮਹਨ੍ਤੇ ਸੀਲਕ੍ਖਨ੍ਧਾਦਿਕੇ ਏਸਤਿ ਗਵੇਸਤਿ ਪਰਿਯੇਸਤੀਤਿ ਮਹੇਸੀ, ਮੁਨਿਨ੍ਦਕ੍ਕੋ. ਮਹਨ੍ਤਸਦ੍ਦੂਪ ਪਦ ਏਸਧਾਤੁ ਗਵੇਸਨੇ ਈ. ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ ‘‘ਮਹੇਸੀਤਿ ਮਹੇਸੀ. ਭਗਵਾ ਮਹਨ੍ਤਂ ਸੀਲਕ੍ਖਨ੍ਧਂ ਏਸਿ ਗਵੇਸਿ ਪਰਿਯੇਸੀਤਿ ਮਹੇਸੀ. ਮਹਨ੍ਤਂ ਸਮਾਧਿਕ੍ਖਨ੍ਧਂ ਮਹਨ੍ਤਂ ਪਞ੍ਞਾਕ੍ਖਨ੍ਧਂ ਮਹਨ੍ਤਂ ਵਿਮੁਤ੍ਤਿਕ੍ਖਨ੍ਧਂ ਮਹਨ੍ਤਂ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਂ ਏਸੀ ਗਵੇਸੀ ਪਰਿਯੇਸੀਤਿ ਮਹੇਸੀ’’ਤਿ. ਮਹਨ੍ਤੇ ਸਤ੍ਤਤਿਂਸਬੋਧਿਪਕ੍ਖਿਯ ਧਮ੍ਮੇ ਏਸਤਿ ਗਵੇਸਤੀਤਿ ਵਾ ਮਹੇਸੀ, ਮਹਨ੍ਤਂ ਨਿਬ੍ਬਾਨਂ ਏਸਤਿ ਗਵੇਸਤੀਤਿ ਵਾ ਮਹੇਸੀ. ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ ‘‘ਮਹਨ੍ਤੇ ਸਤਿਪਟ੍ਠਾਨੇ ਮਹਨ੍ਤੇ ਸਮ੍ਮਪ੍ਪਧਾਨੇ ਮਹਨ੍ਤੇ ਇਦ੍ਧਿਪਾਦੇ ਮਹਨ੍ਤਾਨਿ ਇਨ੍ਦ੍ਰਿਯਾਨਿ ਮਹਨ੍ਤਾਨਿ ਬਲਾਨਿ ਮਹਨ੍ਤੇ ਬੋਜ੍ਝਙ੍ਗੇ ਮਹਨ੍ਤਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਮਹਨ੍ਤਂ ਪਰਮਤ੍ਥਂ ਅਮਤਂ ਨਿਬ੍ਬਾਨਂ ਏਸੀ ਗਵੇਸੀ ਪਰਿਯੇਸੀਤਿ ਮਹੇਸੀ’’ਤਿ. ਅਥ ਵਾ ਮਹੇਸਕ੍ਖੇਹਿ ਸਤ੍ਤੇਹਿ ਏਸਿਯਤਿ ਗਵੇਸਿਯਤਿ ਪਰਿਯੇਸਿਯਤਿ ਅਮ੍ਹਾਕਂ ਕਹਂ ਬੁਦ੍ਧੋਤਿ ਮਹੇਸੀ. ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ ‘‘ਮਹੇਸਕ੍ਖੇਹਿ ਵਾ ਸਤ੍ਤੇਹਿ ਏਸਿਤੋ ਗਵੇਸਿਤੋ ਕਹਂ ਬੁਦ੍ਧੋ’’ਤ੍ਯਾਦਿ. ਤਂ ਮਹੇਸਿਂ. ਤਨ੍ਤਿ ਮੁਨਿਨ੍ਦਕ੍ਕਂ. ਅਹਂ ਸਿਰਸਾ ਨਮਾਮੀਤਿ ਸਮ੍ਬਨ੍ਧੋ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਦਯੁਦਯਰੁਣੋ ਮਹਾਕਰੁਣਾਸਙ੍ਖਾਤਉਦਯਪਬ੍ਬਤੁਗ੍ਗਤਸੂਰਿਯਾਰੁਣੋ, ਉਦਯਪਬ੍ਬ ਤਤੋ ਉਗ੍ਗਤਸੂਰਿਯਾਰੁਣੋ ਵਿਯ ਮਹਾਕਰੁਣਾ ਵਾ, ਞਾਣ ਵਿਤ੍ਥਿਣ੍ਣਬਿਮ੍ਬੋ ਸਬ੍ਬਞ੍ਞੁਤਞਾਣਸਙ੍ਖਾਤੋ ਵਿਤ੍ਥਾਰਪਰਿਮਣ੍ਡਲੋ, ਵਿਤ੍ਥਾਰਚਕ੍ਕਵਾਲ਼ਮਣ੍ਡਲਂ ਵਿਯ ਵਿਪੁਲਾਰਮ੍ਮਣਸਬ੍ਬਞ੍ਞੁਤਞਾਣਵਾ, ਏਕੋ ਅਸਹਾਯੋ ਏਕਬੁਦ੍ਧਭੂਤੋ, ਯੋ ਯਾਦਿਸੋ ਮੁਨਿਨ੍ਦਕ੍ਕੋ ਬੁਦ੍ਧਾਦਿਚ੍ਚੋ ਸੁਦ੍ਧੇ ਰਾਗਾਦਿਮਲੇਹਿ ਵਿਸੁਦ੍ਧੇ ਤਿਭਵ ਕੁਹਰੇ ਤਿਭਵਸਙ੍ਖਾਤਕਮਲਸਰੇ, ਕਮਲਕਥਿਤਂ ਉਪ੍ਪਲਨ੍ਤਿ ਕਥੇਤਬ੍ਬਂ, ਵਿਨੇਯ੍ਯਪ੍ਪਾਣੋਘਂ ਵਿਨੇਤਬ੍ਬਸਤ੍ਤਸਮੂਹਂ, ਧਮ੍ਮਰਂ ਸੀਵਰੇਹਿ ਉਤ੍ਤਮਧਮ੍ਮਸਙ੍ਖਾਤਰਂਸੀਹਿ, ਸੁਬੋਧੇਸਿ ਚਤੁਸਚ੍ਚਧਮ੍ਮਂ ਪਟਿਵੇਧਯਮਾਨੇਨ ਸੁਟ੍ਠੁ ਪਬੋਧੇਸਿ ਵਿਕਾਸੇਸਿ, ਬ੍ਯਾਪਿਤਕ੍ਕਿਤ੍ਤਿਨਂ ਤਿਲੋਕੇ ਪਤ੍ਥਟਪਰਿਕਿਤ੍ਤਨਂ, ਸੀਲਾਦਿਗੁਣੇਹਿ ਪਤ੍ਥਟਥੁਤਿਘੋਸਿਕਂ ਵਾ, ਤਿਲੋਕੇਕਚ੍ਚਕ੍ਖੁਂ ਕਾਮਰੂਪਅਰੂਪ ਸਙ੍ਖਾਤਾਨਂ ਤਿਲੋਕਾਨਂ ਏਕਂ ਪਞ੍ਞਾਚਕ੍ਖੁਭੂਤਂ, ਦੁਖਮਸਹਨਂ ਪੁਥੁਜ੍ਜਨੇਹਿ ਅਤਿਦੁਕ੍ਖਮਿਤਟ੍ਠਾਨਂ ਖਮਨਂ, ਮਹੇਸਿਂ ਮਹਨ੍ਤਂ ਸੀਲਕ੍ਖਨ੍ਧਾਦਿਂ ਪਰਿਯੇਸਮਾਨਂ ਮਹਨ੍ਤਂ ਨਿਬ੍ਬਾਨਂ ਗਵੇਸਮਾਨਂ ਵਾ, ਤਂ ਮੁਨਿਨ੍ਦਕ੍ਕਂ ਅਹਂ ਸਿਰਸਾ ਨਮਾਮਿ ਵਨ੍ਦਾਮੀਤਿ.

ਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੧.

ਯੋ ਜਿਨੋ ਅਨੇਕਜਾਤਿਯਂ ਸਪੁਤ੍ਤਦਾਰਮਙ੍ਗਜੀਵਿਤਮ੍ਪਿ;

ਬੋਧਿਪੇਮਤੋ ਅਲਗ੍ਗਮਾਨਸੋ ਅਦਾਸਿਯੇਵ ਅਤ੍ਥਿ ਕਸ੍ਸ;

ਦਾਨਪਾਰਮਿਂ ਤਤੋ ਪਰਂ ਅਪੂਰਿ ਸੀਲਪਾਰਮਾਦਿਕਮ੍ਪਿ;

ਤਾਸਮਿਦ੍ਧਿਯੋਪਯਾਤਮਗ੍ਗਤਂ ਤਮੇਕਦੀਪਕਂ ਨਮਾਮਿ.

੨੧. ਏਵਂ ਵੀਸਤਿਮਾਯ ਗਾਥਾਯ ਮੁਨਿਨ੍ਦਕ੍ਕਂ ਵਨ੍ਦਿਤ੍ਵਾ ਇਦਾਨਿ ਪੁਬ੍ਬੇ ਅਨੇਕਜਾਤਿਯਂ ਬੋਧਿਸਤ੍ਤਕਾਲੇ ਜੀਵਿਤਪਰਿਚ੍ਚਾਗਾਦੀਹਿ ਚ ਦਾਨਾਦਿਦਸਪਾਰਮਿਯੋ ਪੂਰੇਨ੍ਤੇਹਿ ਗੁਣੇਹਿ ਚ ਥੋਮੇਤ੍ਵਾ ਜਿਨਂ ਵਨ੍ਦਿਤੁਕਾਮੋ ਯੋ ਜਿਨੋ ਤ੍ਯਾਦਿਮਾਹ. ਅਯਂ ਪਨ ਰਜ ਰਜ ਰਜ ਗਣੇਹਿ ਚ ਗਰੁਲਹੂਹਿ ਚ ਰਚਿਤਤ੍ਤਾ ਵੀਸਤਕ੍ਖਰੇਹਿ ਲਕ੍ਖਿਤਾ ਵੁਤ੍ਤਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਵੁਤ੍ਤ ਮੀਦਿਸਨ੍ਤੁ ਨਾਮਤੋ ਰਜਾ ਰਜਾ ਰਜਾ ਗਰੁਲ੍ਲਹੂ ਚਾ’’ਤਿ.

ਅਯਂ ਪਨੇਤ੍ਥ ਯੋਜਨਾ. ਯਸ੍ਸਂ ਪਟਿਪਾਦਂ ਰਜਾ ਰਜਗਣਾ ਚ ਰਜਾ ਰਜਗਣਾ ਚ ਰਜਾ ਰਜਗਣਾ ਚ ਗਰੁਲ੍ਲਹੂ ਚ ਚੇ ਸਿਯ੍ਯੁਂ, ਈਦਿਸਨ੍ਤੁ ਈਦਿਸਂ ਪਨ ਗਾਥਾ ਨਾਮਤੋ ਨਾਮੇਨ ਵੁਤ੍ਤਂ ਵੁਤ੍ਤ ਗਾਥਾ ਨਾਮਾਤਿ.

ਤਤ੍ਥ ਪਨ ਯੋ ਜਿਨੋਤਿ ਯੋ ਬੁਦ੍ਧੋ. ਸੋ ਹਿ ਦੇਵਪੁਤ੍ਤਕਿਲੇਸਾਭਿਸਙ੍ਖਾਰਖਨ੍ਧਮਚ੍ਚੁਵਸੇਨ ਪਞ੍ਚਮਾਰੇ ਅਜਿਨਿ ਜਿਨਾਤਿ ਜਿਨਿਸ੍ਸਤੀਤਿ ਜਿਨੋਤਿ ਵੁਚ੍ਚਤਿ. ਨਨੁ ਚ ਬੁਦ੍ਧਸਾਵਕਾਪਿ ਪਞ੍ਚਮਾਰੇ ਜਿਨਤ੍ਤਾ ਜਿਨਾ ਨਾਮਾਤਿ ਚੇ. ਨ ਭਗਵਤੋ ਪਰੂਪ ਨਿਸ੍ਸਯਵਿਰਹਨਿਰਤਿਸਯਵਸੇਨ ਪਞ੍ਚਮਾਰਜਿਨਤ੍ਤਾ ਭਗਵਾਯੇਵ ਜਿਨੋ ਨਾਮਾਤਿ. ਵੁਤ੍ਤਞ੍ਹਿ ਧਾਤੁਕਥਾਮੂਲਟੀਕਾਯਂ –

‘‘ਤਤ੍ਥ ਬਲਵਿਧਮਨ ਵਿਸਯਾਤਿਕ੍ਕਮਵਸੇਨ ਦੇਵਪੁਤ੍ਤਮਾਰਸ੍ਸ, ਅਪਵਤ੍ਤਿਕਰਣਵਸੇਨ ਕਿਲੇਸਾਭਿਸਙ੍ਖਾਰਮਾਰਾਨਂ, ਸਮੁਦਯਪ੍ਪਹਾਨਪਰਿਞ੍ਞਾਵਸੇਨ ਖਨ੍ਧਮਾਰਸ੍ਸ, ਮਚ੍ਚੁਮਾਰਸ੍ਸ, ਚ ਬੋਧਿਮੂਲੇ ਏਵ ਭਞ੍ਜਿਤਤ੍ਤਾ ਪਰੂਪਨਿਸ੍ਸਯਰਹਿਤਂ ਨਿਰਤਿਸਯਂ ਤਂ ਭਞ੍ਜਨਂ ਉਪਾਦਾਯ ਭਗਵਾਏਵ ਮਾਰਭਞ੍ਜਨੋਤਿ ਥੋਮਿਤੋ’’ਤਿ.

ਅਨੇਕਜਾਤਿਯਨ੍ਤਿ ਅਨੇਕਸਂਸਾਰਭਵੇ. ਏਤ੍ਥ ਹਿ ਅਯਂ ਜਾਤਿਸਦ੍ਦੋ ਅਨੇਕਤ੍ਥੋ. ਤਥਾ ਹੇਸ ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋਤਿ ਏਤ੍ਥ ਭਵੇ ਆਗਤੋ. ਅਤ੍ਥਿ ਵਿਸਾਖੇ ਨਿਗਣ੍ਠਾ ਨਾਮ ਸਮਣਜਾਤੀਤਿ ਏਤ੍ਥ ਨਿਕਾਯੇ. ਤਿਰਿ ਨਾਮ ਤਿਣਜਾਤਿ ਨਾਭਿਯਾ ਉਗ੍ਗਨ੍ਤ੍ਵਾ ਨਭਂ ਆਹਚ੍ਚ ਠਿਤਾ ਅਹੋਸੀਤਿ ਏਤ੍ਥ ਪਞ੍ਞਤ੍ਤਿਯਂ. ਜਾਤਿ ਦ੍ਵੀਹਿ ਖਨ੍ਧੇਹਿ ਸਙ੍ਗਹਿਤਾਤਿ ਏਤ੍ਥ ਸਙ੍ਖਤਲਕ੍ਖਣੇ. ਯਂ ਮਾਤੁਕੁਚ੍ਛਿਯਂ ਪਠਮਂ ਚਿਤ੍ਤਂ ਉਪ੍ਪਨ੍ਨਂ ਪਠਮਂ ਵਿਞ੍ਞਾਣਂ ਪਾਤੁਭੂਤਂ. ਤਦੁਪਾਦਾਯ ਸਾਵਸ੍ਸ ਜਾਤੀਤਿ ਏਤ੍ਥ ਪਟਿਸਨ੍ਧਿਯਂ. ਸਮ੍ਪਤਿਜਾਤੋ ਆਨਨ੍ਦ ਬੋਧਿਸਤ੍ਤੋਤਿ ਏਤ੍ਥ ਪਸੂਤਿਯਂ. ਅਨੁਪਕੁਟ੍ਠੋ ਜਾਤਿਵਾਦੇਨਾਤਿ ਏਤ੍ਥ ਕੁਲੇ. ਯਤੋਹਂ ਭਗਿਨਿ ਅਰਿਯਾਯ ਜਾਤਿਯਾ ਜਾਤੋਤਿ ਏਤ੍ਥ ਅਰਿਯਸੀਲੇ. ਇਧ ਪਨਾਯਂ ਭਵੇ ਵਤ੍ਤਤਿ. ਤਸ੍ਮਾ ਅਨੇਕਸਂਸਾਰਭਵੇਤਿ ਅਤ੍ਥੋ ਵਿਞ੍ਞਾਤਬ੍ਬੋ. ਸੋ ਹਿ ਜਾਯਤਿ ਯੋਨਿ ਗਤਿਆਦਿ ਵਿਭਾਗੋਤਿ ਜਾਤੀਤਿ ਵੁਚ੍ਚਤਿ. ਅਥ ਵਾ ਜਾਯਨ੍ਤਿ ਨਿਬ੍ਬਤ੍ਤਨ੍ਤਿ ਏਤ੍ਥ ਖਨ੍ਧਾਦਯੋਤਿ ਜਾਤਿ, ਭਵੋ. ਜਨਿਧਾਤੁ ਨਿਬ੍ਬਤ੍ਤਨੇਤਿ. ਨ ਏਕਾ ਅਨੇਕਾ, ਅਨੇਕਾ ਚ ਸਾ ਜਾਤਿ ਚਾਤਿ ਅਨੇਕ ਜਾਤਿ. ਤਸ੍ਸਂ ਅਨੇਕਜਾਤਿਯਂ.

ਸਪੁਤ੍ਤਦਾਰਨ੍ਤਿ ਪੁਤ੍ਤੇਨ ਚ ਭਰਿਯਾਯ ਚ ਸਹਿਤਂ. ਅਤ੍ਤਨੋ ਕੁਲਂ ਪੁਨਾਤਿ ਪਵਤਿ ਸੋਧੇਤੀਤਿ ਵਾ ਪੁਤ੍ਤੋ. ਪੁਧਾਤੁ ਪਵਨੇ ਤ. ਮਾਤਾਪਿਤੂਨਂ ਮਨਂ ਪੂਰੇਤੀਤਿ ਵਾ ਪੁਤ੍ਤੋ. ਪੂਰਧਾਤੁ ਪੂਰਣੇ ਤ. ਪੁਤ੍ਤੋ ਚ ਧੀਤਾ ਚ ਪੁਤ੍ਤੋ. ਵਿਰੂਪੇਕ ਸੇਸੋਯਂ. ਸਾਮਿਕੇਨ ਧਰਿਯਤੇਤਿ ਦਾਰੋ. ਧਰਧਾਤੁ ਧਾਰਣੇ ਣੋ. ਧਸ੍ਸ ਦੋ. ਅਥ ਵਾ ਪੁਰਿਸੇਨ ਭੋਗਂ ਦੀਯਤੀਤਿ ਦਾਰੋ. ਦਾਧਾਤੁ ਦਾਨੇ ਰਪਚ੍ਚਯੋ. ਦਾਕੁਚ੍ਛਿਤਾ ਕਾਰੇਨ ਪੁਰਿਸੇਨ ਰਮਿਯਤਿ ਏਤ੍ਥਾਤਿ ਵਾ ਦਾਰੋ, ਭਰਿਯਾ. ਦਾਪੁਬ੍ਬਰਮੁਧਾਤੁ ਰਮਨੇ ਕ੍ਵਿ. ਦਾਸਦ੍ਦੋ ਕੁਚ੍ਛਿਤਤ੍ਥੋ. ਅਭਿਧਾਨਟੀਕਾਯਂ ਪਨ ‘‘ਦਾਰਯਨ੍ਤੇ ਯੇਨਾਤਿ ਦਾਰੋ, ਦਰ ਵਿਦਾਰਣੇ. ਅਕਤ੍ਤਰਿ ਚ ਕਾਰਕੇ ਸਞ੍ਞਾਯਂ ਣੋ’’ਤਿ ਵੁਤ੍ਤਂ. ਪੁਤ੍ਤੋ ਚ ਦਾਰੋ ਚ ਪੁਤ੍ਤਦਾਰੋ. ਸਮਾਹਾਰਦ੍ਵਨ੍ਦੇਪਿ ਹਿ ਪੁਲ੍ਲਿਙ੍ਗਂ ਇਚ੍ਛਨ੍ਤਿ ਆਚਰਿਯਾ. ਤੇਨ ਸਹ ਵਤ੍ਤਤਿ ਯਸ੍ਸਾਤਿ ਸਪੁਤ੍ਤਦਾਰੋ, ਪੁਤ੍ਤਦਾਰਪਰਿਚ੍ਚਾਗੋ. ਤਂ ਸਪੁਤ੍ਤਦਾਰਂ. ਅਙ੍ਗਜੀਵਿਤਮ੍ਪੀਤਿ ਹਤ੍ਥਪਾਦਕਣ੍ਣਨਾਸਚਕ੍ਖਾਦਿਸਰੀਰਾਵਯਵਞ੍ਚ ਜੀਵਿਤਿਨ੍ਦ੍ਰਿਯ ਪਟਿਬਦ੍ਧਸਕਲਸਰੀਰਞ੍ਚ ਅਙ੍ਗਤਿ ਗਚ੍ਛਤਿ ਕਾਯੇਤਿ ਅਙ੍ਗੋ, ਚਕ੍ਖਾਦਿਸਰੀਰਾਵਯਵੋ. ਅਗਿਧਾਤੁ ਗਤਿਯਂ ਅ. ਜੀਵਨ੍ਤਿ ਸਤ੍ਤਾ ਏਤੇਨਾਤਿ ਜੀਵਿਤਂ, ਜੀਵਿਤਿਨ੍ਦ੍ਰਿਯਂ. ਜੀਵਧਾਤੁ ਪਾਣਧਾਰਣੇ ਤ. ਅਙ੍ਗੋ ਚ ਜੀਵਿਤਞ੍ਚ ਅਙ੍ਗਜੀਵਿਤਂ. ਏਤ੍ਥ ਚ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਧਨਰਟ੍ਠਪਰਿਚ੍ਚਾਗਂ ਸਮ੍ਪਿਣ੍ਡੇਤਿ. ਵੁਤ੍ਤਞ੍ਹਿ ਸੀਲਕ੍ਖਨ੍ਧਟ੍ਠ ਕਥਾਯਂ –

‘‘ਅਙ੍ਗਪਰਿਚ੍ਚਾਗਂ ਜੀਵਿਤਧਨਰਜ੍ਜਪੁਤ੍ਤਦਾਰਪਰਿਚ੍ਚਾਗਨ੍ਤਿ ਇਮੇ ਪਞ੍ਚ ਮਹਾਪਰਿਚ੍ਚਾਗੇ ਪਰਿਚ੍ਚਜਿਤ੍ਵਾ’’ਤਿ. ਅਥ ਵਾ ਸਮ੍ਭਾਵਨਤ੍ਥੋ. ਤੇਨ ਭਗਵਾ ਸਬ੍ਬਞ੍ਞੁਤਞਾਣਹੇਤੁਪਿ ਪੁਤ੍ਤਦਾਰਅਙ੍ਗਜੀਵਿਤਮ੍ਪਿ ਅਲਗ੍ਗਮਾਨਸੋ ਪਰਿਚ੍ਚਜੇਤਿ, ਪਗੇਵ ਧਨਾਦਿਬਾਹਿਰਵਤ੍ਥੁ ਪਰਿਚ੍ਚਾਗੇਪੀਤਿ ਸਮ੍ਭਾਵੇਤਿ.

ਬੋਧਿਪੇਮਤੋਤਿ ਅਰਹਤ੍ਤਮਗ੍ਗਸਬ੍ਬਞ੍ਞੁਤਞਾਣਸਙ੍ਖਾਤਾਯ ਬੋਧਿਯਾ ਪਿਯਮਾਨਤ੍ਤਾ, ਹੇਤ੍ਵਤ੍ਥੇ ਹਿ ਤੋਪਚ੍ਚਯੋ. ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤੀਤਿ ਬੋਧਿ, ਅਰਹਤ੍ਤਮਗ੍ਗਞਾਣਂ. ਸਬ੍ਬ ਞੇਯ੍ਯਧਮ੍ਮੇ ਬੁਜ੍ਝਤੀਤਿ ਬੋਧਿ, ਸਬ੍ਬਞ੍ਞੁਤਞਾਣਂ. ਬੁਧਧਾਤੁ ਞਾਣੇ ਣ. ਇਤ੍ਥਿਲਿਙ੍ਗਜੋਤਕੋ ਈਪਚ੍ਚਯੋ ਚ. ਵੁਤ੍ਤਞ੍ਹਿ ਅਭਿਧਾਨਪ੍ਪਦੀਪਿਕਾਯਂ – ‘‘ਬੋਧਿ ਸਬ੍ਬਞ੍ਞੁਤਞਾਣੇ, ਅਰਿਯਮਗ੍ਗੇ ਚ ਨਾਰਿਯ’’ਨ੍ਤਿ. ਬੋਧਿ ਚ ਬੋਧਿ ਚ ਬੋਧਿ ਸਰੂਪੇਕਸੇ ਸਵਸੇਨ. ਪਿਯਨਂ ਪੇਮੋ, ਪਿਯਾਯਿਤਬ੍ਬੋਤਿ ਵਾ ਪੇਮੋ. ਪੀਧਾਤੁ ਤਪ੍ਪਨਕਨ੍ਤੀਸੁ ਮਨਿਪਚ੍ਚਯੋ. ਬੋਧਿਯਾ ਪੇਮੋ ਬੋਧਿਪੇਮੋ, ਤਤੋ ਬੋਧਿਪੇਮਤੋ. ਭਗਵਤਾ ਹਿ ਪੁਤ੍ਤਦਾਰਅਙ੍ਗਜੀਵਿਤੇਹਿਪਿ ਸਤਗੁਣੇਨ ਸਹਸ੍ਸਗੁਣੇਨ ਸਤ ਸਹਸ੍ਸਗੁਣੇਨਪਿ ਬੋਧਿਞਾਣਮੇਵ ਪਿਯਨ੍ਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹਿ ਵੇਸ੍ਸਨ੍ਤਰਜਾਤਕੇ –

‘‘ਨ ਮੇ ਦੇਸ੍ਸਾ ਉਭੋ ਪੁਤ੍ਤਾ, ਮਦ੍ਦੀ ਦੇਵੀ ਨ ਦੇਸ੍ਸਿਯਾ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਪਿਯੇ ਅਦਾਸਹ’’ਨ੍ਤਿ.

ਅਲਗ੍ਗਮਾਨਸੋਤਿ ਪੁਤ੍ਤਦਾਰਅਙ੍ਗਜੀਵਿਤਾਦੀਸੁ ਅਨਲ੍ਲੀਯਨ ਚਿਤ੍ਤੋ ਹੁਤ੍ਵਾ ਲਗਨਂ ਸਙ੍ਗਨਂ ਲਗ੍ਗੋ, ਲਗਤਿ ਸਙ੍ਗਤਿ ਅਲ੍ਲਯਤਿ ਵਾਤਿ ਲਗ੍ਗੋ. ਲਗਧਾਤੁ ਸਙ੍ਗੇ ਅਲ੍ਲੀਯਨੇ ਵਾ ਗਪਚ੍ਚਯੋ. ਨ ਲਗ੍ਗੋ ਅਲਗ੍ਗੋ, ਨਤ੍ਥਿ ਲਗ੍ਗੋ ਏਤ੍ਥ ਪੁਤ੍ਤਦਾਰ ਅਙ੍ਗਜੀਵਿਤਾਦੀਸੂਤਿ ਵਾ ਅਲਗ੍ਗੋ. ਮਨਤਿ ਜਾਨਾਤਿ ਆਰਮ੍ਮਣਨ੍ਤਿ ਮਨੋ. ਸੋਯੇਵ ਮਾਨਸੋ. ਅਲਗ੍ਗੋ ਮਾਨਸੋ ਯਸ੍ਸ ਸੋਤਿ ਅਲਗ੍ਗਮਾਨਸੋ, ਜਿਨੋ. ਅਤ੍ਥਿਕਸ੍ਸਾਤਿ ਪੁਤ੍ਤ ਦਾਰਾਦਿਂ ਕਾਮਿਕਸ੍ਸ, ਯਾਚਕਸ੍ਸ ਪਟਿਗ੍ਗਾਹਕਸ੍ਸ ਵਾਤਿ ਅਤ੍ਥੋ. ਅਤ੍ਥੋ ਕਾਮੋ ਅਸ੍ਸ ਅਤ੍ਥੀਤਿ ਅਤ੍ਥਿਕੋ, ਣਿਕੋ. ਤਸ੍ਸ ਅਤ੍ਥਿਕਸ੍ਸ. ਅਦਾਸਿਯੇਵਾਤਿ ਪੂਜਾਨੁਗ੍ਗਹਕਾਮਤਾਯ ਞਾਣਸਮ੍ਪਯੁਤ੍ਤਪਰਿਚ੍ਚਾਗਚੇਤਨਾਯ ਅਦਾਸਿਏਵਾਤਿ ਅਤ੍ਥੋ. ਬੋਧਿਸਤ੍ਤੋ ਹਿ ਪਾਰਮੀਪੂਰਣ ਕਾਲੇ ਸਰਾਗਸਦੋਸਸਮੋਹਸ੍ਸੇਵ ਸਤੋ ਆਗਤਾ ਗਤਾਨਂ ਯਾਚਕਾਨਂ ਅਲਙ੍ਕਤਪਟਿਯਤ੍ਤਂ ਸੀਸਂ ਕਨ੍ਤਿਤ੍ਵਾ ਗਲਲੋਹਿਤਂ ਨੀਹਰਿਤ੍ਵਾ ਸੁਅਞ੍ਜਿਤਾਨਿ ਅਕ੍ਖੀਨਿ ਉਪ੍ਪਾਟੇਤ੍ਵਾ ਕੁਲਵਂਸਪ੍ਪਦੀਪਂ ਪੁਤ੍ਤਂ ਮਨਾਪਚਾਰਿਨਿਂ ਭਰਿਯਞ੍ਚ ਖੇਲ਼ਪਿਣ੍ਡਮਿਵ ਅਨਪੇਕ੍ਖੋ ਪਰਿਚ੍ਚਜਿਤ੍ਵਾ ਦੀਯਮਾਨੋਵ ਸਮ੍ਮਾਸਮ੍ਬੋਧਿਞਾਣਂ ਲਦ੍ਧੁਂ ਸਕ੍ਕਾ, ਨ ਪੁਤ੍ਤਦਾਰਅਙ੍ਗਜੀਵਿਤਮ੍ਪਿ ਅਪਰਿਚ੍ਚਜਿਤ੍ਵਾ. ਪਞ੍ਚ ਹਿ ਮਹਾਪਰਿਚ੍ਚਾਗੇ ਅਪਰਿਚ੍ਚਜਿਤ੍ਵਾ ਬੁਦ੍ਧਭੂਤਪੁਬ੍ਬਾ ਨਾਮ ਨਤ੍ਥਿ. ਪਚ੍ਚੇਕਬੁਦ੍ਧਾਰਿਯਸਾਵਕਾ ਪਨ ਪੁਤ੍ਤਦਾਰਅਙ੍ਗਜੀਵਿਤਂ ਅਪਰਿਚ੍ਚਜਨ੍ਤਾਪਿ ਪਚ੍ਚੇਕਬੁਦ੍ਧਾਰਿਯਸਾਵਕਬੋਧਿਞਾਣਂ ਲਦ੍ਧੁਂ ਸਮਤ੍ਥਾਵ. ਤਸ੍ਮਾਯੇਵ ਭਗਵਨ੍ਤਂਯੇਵ ਸਪੁਤ੍ਤਦਾਰਮਙ੍ਗਜੀਵਿਤਮ੍ਪਿ ਬੋਧਿਪੇਮਤੋ ਅਲਗ੍ਗਮਾਨਸੋ ਅਦਾਸਿਯੇਵ ਅਤ੍ਥਿ ਕਸ੍ਸਾਤਿ ਥੋਮੇਤਿ. ਵੁਤ੍ਤਞ੍ਹੇਤਂ ਵੇਸ੍ਸਨ੍ਤਰਜਾਤਕਟ੍ਠ ਕਥਾਯਂ ‘‘ਸਬ੍ਬਬੋਧਿਸਤ੍ਤਾ ਧਨਪਰਿਚ੍ਚਾਗਂ, ਪੁਤ੍ਤਪਰਿਚ੍ਚਾਗਂ, ਭਰਿਯਪਰਿਚ੍ਚਾਗਂ, ਅਙ੍ਗਪਰਿਚ੍ਚਾਗਂ, ਜੀਵਿਤਪਰਿਚ੍ਚਾਗਨ੍ਤਿ ਇਮੇ ਪਞ੍ਚ ਮਹਾਪਰਿਚ੍ਚਾਗੇ ਅਪਰਿਚ੍ਚਜਿਤ੍ਵਾ ਬੁਦ੍ਧਭੂਤਪੁਬ੍ਬਾ ਨਾਮ ਨਤ੍ਥੀ’’ਤਿ.

ਏਵਂ ਪਞ੍ਚਹਿ ਮਹਾਪਰਿਚ੍ਚਾਗਗੁਣੇਹਿ ਭਗਵਤੋ ਥੋਮਨਂ ਕਤ੍ਵਾ ਇਦਾਨਿ ਦਾਨਾਦਿਪਾਰਮੀਪੂਰਣਗੁਣੇਨ ਥੋਮਨਂ ਕਤ੍ਤੁ ਕਾਮੋ ਦਾਨਪਾਰਮਿਨ੍ਤਿਆਦਿਮਾਹ. ਤਤ੍ਥ ਦਾਨਨ੍ਤਿ ਤਿਵਿਧਂ ਹੋਤਿ ਚਾਗਚੇਤਨਾ ਚ, ਵਿਰਤਿ ਚ, ਦੇਯ੍ਯਧਮ੍ਮੋ ਚਾਤਿ. ਸਦ੍ਧਾ ਹਿਰਿਯਂ ਕੁਸਲਞ੍ਚ ਦਾਨਨ੍ਤਿ ਆਗਤਟ੍ਠਾਨੇ ਹਿ ਚਾਗਚੇਤਨਾ ਦਾਨਂ ਨਾਮ. ਅਭਯਂ ਦੇਤੀਤਿ ਆਗਤਟ੍ਠਾਨੇ ਵਿਰਤੀ ਦਾਨਂ ਨਾਮ. ਦਾਨਂ ਦੇਤਿ ਅਨ੍ਨਂ ਪਾਨਨ੍ਤਿ ਆਗਤਟ੍ਠਾਨੇ ਦੇਯ੍ਯਧਮ੍ਮੋ ਦਾਨਂ ਨਾਮ. ਤਤ੍ਥ ਚਾਗਚੇਤਨਾ ਦੇਤਿ ਵਾ ਦੇਯ੍ਯਧਮ੍ਮਂ ਦੇਨ੍ਤਿ ਵਾ ਏਤਾਯ ਦੇਯ੍ਯਧਮ੍ਮਨ੍ਤਿ ਦਾਨਂ. ਵਿਰਤਿ ਅਵਖਣ੍ਡਨਟ੍ਠੇਨ ਲਵਨਟ੍ਠੇਨ ਵਾ ਦਾਨਂ. ਸਾ ਹਿ ਉਪ੍ਪਜ੍ਜਮਾਨਾ ਭਯਭੇਰਵਸਙ੍ਖਾਤਂ ਦੁਸ੍ਸਿਲ੍ਯਂ ਚੇਤਨਂ ਦਾਤਿ ਲੁਨਾਤਿ ਚਾਤਿ ਦਾਨਂ, ਦੇਯ੍ਯਧਮ੍ਮੋ ਦਿਯ੍ਯਤੀਤਿ ਦਾਨਂ. ਇਧ ਪਨ ਤਿਵਿਧਂ ਦਾਨਂ ਅਧਿਪ੍ਪੇਤਂ. ਪਾਰਮੀਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਥ ਵਾ ਪਾਰਂ ਨਿਬ੍ਬਾਨਂ ਏਤਿ ਗਚ੍ਛਤਿ ਏਤਾਯਾਤਿ ਪਾਰਮਿ. ਪਾਰਸਦ੍ਦੂਪਪਦ ਇਧਾਤੁ ਗਤਿਯਂ ਕ੍ਵਿ. ਪਾਰਂ ਇਤੀਤਿ ਪਦਚ੍ਛੇਦੋ ਕਾਤਬ੍ਬੋ. ਦਾਨਮੇਵ ਪਾਰਮੀ ਦਾਨਪਾਰਮੀ, ਤਂ ਦਾਨਪਾਰਮਿਂ. ਤਤੋਤਿ ਦਾਨਪਾਰਮਿਤੋ. ਪਰਨ੍ਤਿ ਅਞ੍ਞਂ. ਸੀਲਪਾਰਮਾਦਿਕਮ੍ਪੀਤਿ ਸੀਲਤੀਤਿ ਸੀਲਂ. ਸੀਲ ਧਾਤੁ ਸਮਾਧਿਮ੍ਹਿ ਅ. ਕਾਯਵਚੀਕਮ੍ਮਾਨਿ ਸਮਾਦਹਤਿ ਸਮਾਧਪੇਤੀਤਿ ਅਤ੍ਥੋ. ਸੀਲਤਿ ਸਮਾਧਿਯਤਿ ਕਾਯਕਮ੍ਮਾਦੀਨਂ ਸੁਸਿਲ੍ਯਵਸੇਨ ਨ ਵਿਪ੍ਪਕਿਰਤੀਤਿ ਵਾ ਸੀਲਂ, ਸੀਲਨ੍ਤਿ ਸਮਾਦਹਨ੍ਤਿ ਚਿਤ੍ਤਂ ਏਤੇਨਾਤਿ ਵਾ ਸੀਲਂ. ਅਥ ਵਾ ਸੀਲਯਤਿ ਉਪਧਾਰੇਤੀਤਿ ਸੀਲਂ, ਸੀਲਧਾਤੁ ਉਪਧਾਰਣੇ ਅ. ਕੁਸਲ ਧਮ੍ਮਾਨਂ ਪਤਿਟ੍ਠਾਨਭਾਵੇਨ ਆਭੁਸੋ ਧਾਰੇਤੀਤਿ ਅਤ੍ਥੋ. ਸੀਲੇਨ੍ਤਿ ਵਾ ਏਤੇਨ ਕੁਸਲੇ ਧਮ੍ਮੇ ਉਪਧਾਰੇਨ੍ਤਿ ਸਾਧਵੋਤਿ ਸੀਲਂ, ਸੀਲਿਯਤਿ ਉਪਧਾਰਿਯਤਿ ਸਪ੍ਪੁਰਿਸੇਹਿ ਹਦਯਮਂਸਨ੍ਤਰਂ ਉਪਨੇਤ੍ਵਾਤਿ ਵਾ ਸੀਲਂ, ਸੀਲੇਤਿ ਉਪਧਾਰੇਤਿ ਤਂ ਸਮਙ੍ਗੀ ਪੁਗ੍ਗਲਂ ਅਪਾਯੇਸੁ ਉਪ੍ਪਤ੍ਤਿਨੀਵਾਰਣਵਸੇਨ ਸੁਗ੍ਗਤਿ ਨਿਬ੍ਬਾਨਨ੍ਤਿ ਵਾ ਸੀਲਂ, ਸੀਲਮੇਵ ਪਾਰਮੀ ਸੀਲਪਾਰਮੀ, ਸਾ ਆਦਿ ਯਾਸਨ੍ਤੇਤਿ ਸੀਲਪਾਰਮਾਦਿਕਾ. ਏਤ੍ਥ ਚ ਆਦਿਸਦ੍ਦੇਨ ਨੇਕ੍ਖਮ੍ਮਪਞ੍ਞਾ ਵੀਰਿਯਖਨ੍ਤਿਸਚ੍ਚਅਧਿਟ੍ਠਾਨਮੇਤ੍ਤਾਉਪੇਕ੍ਖਾਪਾਰਮਿਂ ਸਙ੍ਗਣ੍ਹਾਤਿ. ਵੁਤ੍ਤਞ੍ਹੇਤਂ ਬੁਦ੍ਧਵਂਸਪਾਲ਼ਿਯਂ –

‘‘ਦਾਨਂ ਸੀਲਞ੍ਚ ਨੇਕ੍ਖਮ੍ਮਂ, ਪਞ੍ਞਾ ਵੀਰਿਯੇਨ ਪਞ੍ਚਮਂ;

ਖਨ੍ਤਿਸਚ੍ਚਮਧਿਟ੍ਠਾਨਂ, ਮੇਤ੍ਤੁਪੇਕ੍ਖਾ ਇਮਾ ਦਸਾ’’ਤਿ.

ਪਿਸਦ੍ਦੋ ਚੇਤ੍ਥ ਸਮ੍ਪਿਣ੍ਡਨਤ੍ਥੋ. ਤੇਨ ਪਞ੍ਚ ਮਹਾਪਰਿਚ੍ਚਾਗੇ ਸਮ੍ਪਿਣ੍ਡੇਤਿ.

ਅਪੂਰੀਤਿ ਸਮ੍ਮਾਸਮ੍ਬੋਧਤ੍ਥਾਯ ਪੂਰਣਂ ਅਕਾਸੀਤਿ ਅਤ੍ਥੋ. ਭਗਵਤੋ ਹਿ ਦੀਪਙ੍ਕਰਪਾਦਮੂਲੇ ਅਟ੍ਠ ਧਮ੍ਮੇ ਸਮੋਧਾਨੇਤ੍ਵਾ ਬੁਦ੍ਧਤ੍ਥਾਯ ਅਭਿਨੀਹਾਰਤੋ ਪਟ੍ਠਾਯ ਅਨੇਕਜਾਤੀਸੁ ਸਮ੍ਮਾਸਮ੍ਬੋਧਿਂ ਪਟਿਵਿਜ੍ਝਿਤੁਂ ਵਾਯਮਨ੍ਤੋ ਅਦਿਨ੍ਨਦਾਨਂ ਨਾਮ ਨਤ੍ਥਿ, ਅਰਕ੍ਖਿਤਸੀਲਂ ਨਾਮ ਨਤ੍ਥਿ. ਅਪੂਰਿਤਾ ਪਾਰਮੀ ਨਾਮ ਨਤ੍ਥਿ. ਅਤਿਬਹੁਮ੍ਪਿ ਪੂਰਣਂ ਅਕਾਸਿਯੇਵ. ਭਗਵਾ ਹਿ ਬੋਧਿਸਤ੍ਤ ਭੂਤੋ ਚਤੂਸੁ ਮਹਾਸਮੁਦ੍ਦੇਸੁ ਉਦਕਂ ਪਰਾਜੇਤ੍ਵਾ ਅਧਿਕਂ ਲੋਹਿਤਦਾਨਮਕਾਸਿ. ਸਕਲਪਥਵਿਯਾ ਪਂਸੁਂ ਪਰਾਜੇਤ੍ਵਾ ਅਧਿਕਂ ਮਂਸਮਦਾਸਿ. ਸਿਨੇਰੁਪਬ੍ਬਤਰਾਜਂ ਪਰਾਜੇਤ੍ਵਾ ਅਧਿਕਂ ਸੀਸਦਾਨਮਦਾਸਿ. ਆਕਾਸੇ ਤਾਰਕਸਮੂਹਂ ਪਰਾਜੇਤ੍ਵਾ ਅਧਿਕਂ ਨਯਨਮਦਾਸਿ.

ਤੇਨ ਵੁਤ੍ਤਂ ਜਿਨਾਲਙ੍ਕਾਰੇ –

‘‘ਸੋ ਸਾਗਰੇ ਜਲਧਿਕਂ ਰੁਧਿਰਂ ਅਦਾਸਿ,

ਭੂਮਿਂ ਪਰਾਜਿਯ ਸਮਂਸਮਦਾਸਿ ਦਾਨਂ;

ਮੇਰੁਪ੍ਪਮਾਣਮਧਿਕਞ੍ਚ ਸਮੋਲ਼ਿਸੀਸਂ,

ਖੇ ਤਾਰਕਾਧਿਕਤਰਂ ਨਯਨਂ ਅਦਾਸੀ’’ਤਿ.

ਵਸਨ੍ਤਤਿਲਕਗਾਥਾ.

ਤਤ੍ਥ ਚ ਸੋਤਿ ਸੋ ਏਵਂਵਿਧੋ ਬੋਧਿਸਤ੍ਤੋ. ਸਾਗਰੇਤਿ ਚਤੂਸੁ ਮਹਾਸਮੁਦ੍ਦੇਸੁ. ਜਲਧਿਕਨ੍ਤਿ ਉਦਕਤੋ ਅਧਿਕਂ ਕਤ੍ਵਾ. ਰੁਧਿਰਂ ਅਦਾਸੀਤਿ ਲੋਹਿਤਦਾਨਮਦਾਸਿ. ਭੂਮਿਂ ਪਰਾਜਿਯਾਤਿ ਪਂਸੁਪਥਵਿਯਾ ਪਂਸੁਂ ਪਰਾਜੇਤ੍ਵਾ ਅਤ੍ਤਨੋ ਸਰੀਰਮਂਸਂ ਅਧਿਕਂ ਅਦਾਸਿ. ਮੇਰੁਪ੍ਪਮਾਣਮਧਿਕਨ੍ਤਿ ਯੋਜਨ ਅਟ੍ਠਸਟ੍ਠਿਸਤਸਹਸ੍ਸੁਬ੍ਬੇਧਸ੍ਸ ਗਿਰਿਰਾਜਸ੍ਸ ਪਮਾਣਤੋਪਿ ਅਧਿਕਂ ਕਤ੍ਵਾ. ਸਮੋਲ਼ਿਸੀਸਨ੍ਤਿ ਮੋਲ਼ਿਯਾ ਸਹ ਅਭਿਸਿਤ੍ਤਸੀਸਂ ਅਦਾਸਿ. ਖੇਤਿ ਚਕ੍ਕਵਾਲ਼ਪਬ੍ਬਤਪਰਿਯਨ੍ਤੇ ਆਕਾਸੇ. ਤਾਰਕਾਧਿਕਤਰਨ੍ਤਿ ਨਕ੍ਖਤ੍ਤਾਦਿਤਾਰਕਰੂਪਤੋਪਿ ਅਧਿਕਂ ਕਤ੍ਵਾ. ਨਯਨਂ ਅਦਾਸੀਤਿ ਨੇਤ੍ਤਦਾਨਂ ਅਦਾਸੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਤਾਸਮਿਦ੍ਧਿਯੋਪਯਾਤਮਗ੍ਗਤਨ੍ਤਿ ਤਾਸਂ ਇਦ੍ਧਿਯਾ ਉਪਯਾਤਂ ਅਗ੍ਗਤਨ੍ਤਿ ਪਦਚ੍ਛੇਦੋ. ਤਾਸਨ੍ਤਿ ਤਾਸਂ ਪਾਰਮੀਨਂ. ਇਦ੍ਧਿਯਾਤਿ ਸਮਿਦ੍ਧਿਯਾ, ਹੇਤ੍ਵਤ੍ਥੇ ਚੇਤਂ ਕਰਣਵਚਨਂ. ਉਪਯਾਤਨ੍ਤਿ ਉਪਗਤਂ. ਅਗ੍ਗਤਨ੍ਤਿ ਸਬ੍ਬਸਤ੍ਤਾਨਂ ਉਤ੍ਤਮਭਾਵਂ, ਸੇਟ੍ਠਭੂਤਂ ਬੁਦ੍ਧਤ੍ਤਨ੍ਤਿ ਅਤ੍ਥੋ. ਤਂ ਪਨ ਪਦਂ ਉਪਯਾਤਨ੍ਤਿਪਦੇ ਕਮ੍ਮਂ. ਅਗ੍ਗਸਦ੍ਦੋ ਚੇਤ੍ਥ ਉਤ੍ਤਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਅਗ੍ਗਤਿ ਉਤ੍ਤਮਭਾਵਂ ਸੇਟ੍ਠਭੂਤਂ ਵਾ ਬੁਦ੍ਧਭਾਵਂ ਪਾਪੁਣਾਤੀਤਿ ਅਗ੍ਗੋ, ਜਿਨੋ. ਅਗ੍ਗਧਾਤੁ ਗਤਿਯਂ ਅ. ਅਗ੍ਗਸ੍ਸ ਭਾਵੋ ਅਗ੍ਗਤਂ. ਭਗਵਾ ਹਿ ਅਨਨ੍ਤਲੋਕਧਾਤੂਸੁ ਸਬ੍ਬ ਸਤ੍ਤਾਨਂ ਅਗ੍ਗੋ ਉਤ੍ਤਮਤਰੋ ਸੇਟ੍ਠਤਰੋਤਿ ਅਤ੍ਥੋ. ਵੁਤ੍ਤਞ੍ਹੇਤਂ ਦਸਨਿਪਾਤ ਅਙ੍ਗੁਤ੍ਤਰਪਾਲ਼ਿਯਂ –

‘‘ਯਾਵਤਾ ਭਿਕ੍ਖਵੇ ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ ਚਤੁਪ੍ਪਦਾ ਵਾ ਬਹੁਪ੍ਪਦਾ ਵਾ ਰੂਪਿਨੋ ਵਾ ਅਰੂਪਿਨੋ ਵਾ ਸਞ੍ਞਿਨੋ ਵਾ ਅਸਞ੍ਞਿਨੋ ਵਾ ਨੇਵਸਞ੍ਞੀਨਾਸਞ੍ਞਿਨੋ ਵਾ, ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ.

ਤਮੇਕਦੀਪਕਨ੍ਤਿ ਤਂ ਏਕਦੀਪਕਨ੍ਤਿ ਪਦਚ੍ਛੇਦੋ. ਤਨ੍ਤਿ ਜਿਨਂ. ਏਕਦੀਪਕਨ੍ਤਿ ਸਬ੍ਬਸਤ੍ਤਾਨਂ ਏਕਪਟਿਸਰਣਭੂਤਂ ਪਤਿਟ੍ਠਭੂਤਂ ਵਾ. ਦੀਪਕਸਦ੍ਦੋ ਹਿ ਪਟਿਸਰਣਪਤਿਟ੍ਠਵਾਚਕੋ ਨਿਪ੍ਫਨ੍ਨਪਾਟਿਪਦਿਕੋ. ਵੁਤ੍ਤਞ੍ਹਿ ਸਂਯੁਤ੍ਤਟ੍ਠਕਥਾਯਂ ‘‘ਪਤਿਟ੍ਠਾਪਨਟ੍ਠੇਨ ਦੀਪ’’ਨ੍ਤਿ. ਦੀਪਨ੍ਤਿ ਪਤਿਟ੍ਠਹਨ੍ਤਿ ਪਟਿਸਰਣਭਾਵੇਨ ਸਤ੍ਤਾ ਏਤ੍ਥਾਤਿ ਵਾ ਦੀਪਕੋ, ਜਿਨੋ. ਦੀਪਧਾਤੁ ਪਤਿਟ੍ਠਾਯਂ ਅਕੋ. ਏਕਸਦ੍ਦੋ ਸਙ੍ਖ੍ਯਾਵਾਚਕੋ. ਏਕੋ ਏਕਭੂਤੋ ਦੀਪਕੋਤਿ ਏਕਦੀਪਕੋ, ਜਿਨੋ. ਅਥ ਵਾ ਏਕਦੀਪਕਨ੍ਤਿ ਮਨੁਸ੍ਸਾਨਂ ਪਟਿਸਰਣਭੂਤਂ ਪਤਿਟ੍ਠਾਨਭੂਤਂ ਸਮੁਦ੍ਦਦੀਪਕਮਿਵ ਸਬ੍ਬਸਤ੍ਤਾਨਂ ਪਟਿਸਰਣਭੂਤਂ ਪਤਿਟ੍ਠਾਨਭੂਤਂ ਏਕਬੁਦ੍ਧਭੂਤਂ.

ਅਯਂ ਪਨੇਤ੍ਥ ਵਚਨਤ੍ਥੋ. ਜਲਮਜ੍ਝੇ ਦਿਪ੍ਪਤੀਤਿ ਦੀਪੋ. ਦ੍ਵਿਧਾ ਆਪੋਸਨ੍ਦਤਿ ਏਤ੍ਥਾਤਿ ਵਾ ਦੀਪੋ. ਸੋਯੇਵ ਦੀਪਕੋ. ਸੋਵਿਯ ਏਕੋ ਬੁਦ੍ਧੋ ਹੁਤ੍ਵਾ ਏਤਿ ਗਚ੍ਛਤਿ ਪਵਤ੍ਤਤੀਤਿ ਏਕਦੀਪਕੋ, ਜਿਨੋ. ਯਥਾ ਹਿ ਮਹਾਸਮੁਦ੍ਦੇ ਭਿਨ੍ਨਨਾਵਾਨਂ ਮਨੁਸ੍ਸਾਨਂ ਸਮੁਦ੍ਦਦੀਪੋ ਪਟਿਸਰਣੋ ਪਤਿਟ੍ਠੋ ਹੋਤਿ, ਏਵਂ ਜਿਨੋ ਸਂਸਾਰਸਾਗਰੇ ਅਲਬ੍ਭਨੇਯ੍ਯਪਤਿਟ੍ਠੇ ਓਸੀਦਨ੍ਤਾਨਂ ਸਬ੍ਬਸਤ੍ਤਾਨਂ ਏਕਬੁਦ੍ਧਭੂਤੋ ਪਟਿਸਰਣੋ ਪਤਿਟ੍ਠੋ ਹੋਤੀਤਿ ਏਕਦੀਪਕਨ੍ਤਿ ਥੋਮੇਤਿ. ਤਂ ਜਿਨਂ ਅਹਂ ਨਮਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਯੋ ਜਿਨੋ ਅਨੇਕ ਜਾਤਿਯਂ ਅਨੇਕਸਂਸਾਰਭਵੇ, ਸਪੁਤ੍ਤਦਾਰਂ ਪੁਤ੍ਤੇਨ ਚ ਭਰਿਯਾਯ ਚ ਸਹਿਤਂ, ਅਙ੍ਗਜੀਵਿਤਮ੍ਪਿ ਅਙ੍ਗਪਚ੍ਚਙ੍ਗਜੀਵਿਤਿਨ੍ਦ੍ਰਿਯਮ੍ਪਿ. ਅਥ ਵਾ ਹਤ੍ਥਪਾਦਕਣ੍ਣਨਾਸਚਕ੍ਖਾਦਿਸਰੀਰਾਵਯਵਞ੍ਚ ਜੀਵਿਤਿਨ੍ਦ੍ਰਿਯ ਪਟਿਬਦ੍ਧਸਕਲਸਰੀਰਞ੍ਚ, ਬੋਧਿਪੇਮਤੋ ਅਰਹਤ੍ਤਮਗ੍ਗ ਸਬ੍ਬਞ੍ਞੁਤਞਾਣਸਙ੍ਖਾਤਾਯ ਬੋਧਿਯਾ ਪਿਯਮਾਨਤ੍ਤਾ, ਅਲਗ੍ਗ ਮਾਨਸੋਤਿ ਪੁਤ੍ਤਦਾਰਅਙ੍ਗਜੀਵਿਤਾਦੀਸੁ ਅਨਲ੍ਲੀਯਨਚਿਤ੍ਤੋ ਹੁਤ੍ਵਾ, ਅਤ੍ਥਿਕਸ੍ਸ ਪੁਤ੍ਤਦਾਰਾਦਿਂ ਕਾਮਿਕਸ੍ਸ ਯਾਚਕਸ੍ਸ ਅਦਾਸਿਯੇਵ ਪਰਿਚ੍ਚਾਗਚੇਤਨਾਯ ਅਦਾਸਿਏਵ. ਦਾਨਪਾਰਮਿਮ੍ਪਿ ਤਤੋ ਦਾਨਪਾਰਮਿਤੋ ਪਰਂ ਅਞ੍ਞਂ ਸੀਲਪਾਰਮਾਦਿਕਮ੍ਪਿ ਸੀਲਪਾਰਮੀਆਦਿਕਮ੍ਪਿ, ਅਪੂਰਿ ਸਮ੍ਮਾਸਮ੍ਬੋਧਤ੍ਥਾਯ ਪੂਰਣਂ ਅਕਾਸਿ, ਤਾਸਂ ਪਾਰਮੀਨਂ ਇਦ੍ਧਿਯਾ ਸਮਿਦ੍ਧਿਯਾ ਅਗ੍ਗਤਂ ਉਤ੍ਤਮ ਭਾਵਂ ਸੇਟ੍ਠਬੁਦ੍ਧਤ੍ਤਂ ਵਾ, ਉਪਯਾਤਂ ਉਪਗਤਂ, ਏਕਦੀਪਕਂ ਸਬ੍ਬਸਤ੍ਤਾਨਂ ਏਕਪਟਿਸਰਣਭੂਤਂ ਏਕਪਤਿਟ੍ਠਾਨਭੂਤਂ ਵਾ, ਦੀਪਕਮਿਵ ਏਕਪਟਿਸਰਣਭੂਤਂ ਪਤਿਟ੍ਠਾਨਭੂਤਂ ਵਾ ਤਂ ਜਿਨਂ ਤੀਹਿ ਦ੍ਵਾਰੇਹਿ ਨਮਾਮੀਤਿ.

ਏਕਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੨.

ਦੇਵਾਦੇਵਾਤਿਦੇਵਂ ਨਿਧਨਵਪੁਧਰਂ ਮਾਰਭਙ੍ਗਂ ਅਭਙ੍ਗਂ,

ਦੀਪਂ ਦੀਪਂ ਪਜਾਨਂ ਜਯਵਰਸਯਨੇ ਬੋਧਿਪਤ੍ਤਂਧਿਪਤ੍ਤਂ;

ਬ੍ਰਹ੍ਮਾਬ੍ਰਹ੍ਮਾਗਤਾਨਂ ਵਰਗਿਰਕਥਿਕਂ ਪਾਪਹੀਨਂ ਪਹੀਨਂ,

ਲੋਕਾਲੋਕਾਭਿਰਾਮਂ ਸਤਤਮਭਿਨਮੇ ਤਂ ਮੁਨਿਨ੍ਦਂ ਮੁਨਿਨ੍ਦਂ.

੨੨. ਏਵਂ ਏਕਵੀਸਤਿਮਾਯ ਗਾਥਾਯ ਜਿਨਂ ਵਨ੍ਦਿਤ੍ਵਾ ਇਦਾਨਿ ਦੇਵਾਦੇਵਾਤਿਦੇਵਨ੍ਤ੍ਯਾਦੀਹਿ ਦਸਹਿ ਗੁਣੇਹਿ ਥੋਮੇਤ੍ਵਾ ਮੁਨਿਨ੍ਦਂ ਵਨ੍ਦਿਤੁਕਾਮੋ ਦੇਵਾਦੇਵਾਤਿਦੇਵਨ੍ਤਿਆਦਿਮਾਹ. ਅਯਂ ਪਨ ਮ ਰ ਭ ਨ ਯ ਯ ਗਣੇਹਿ ਚ ਤਿਮੁਨਿਯਤੀਹਿ ਚ ਰਚਿਤਤ੍ਤਾ ਏਕਵੀਸਤਕ੍ਖਰੇਹਿ ਯੁਤ੍ਤਾ ਆਦ੍ਯਨ੍ਤਯਮਕਾ ਸਦ੍ਧਰਾ ਗਾਥਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹਿ ਵੁਤ੍ਤੋਦਯੇ ‘‘ਮ੍ਰਾ ਭ੍ਨਾ ਯੋ ਯੋਤ੍ਰ ਯੇਨ ਤਿਮੁਨਿਯਤਿਯੁਤਾ ਸਦ੍ਧਰਾ ਕਿਤ੍ਤਿਤਾਯ’’ਨ੍ਤਿ.

ਅਯਂ ਪਨੇਤ੍ਥ ਯੋਜਨਾ. ਯਸ੍ਸਂ ਪਟਿਪਾਦਂ ਮ੍ਰਾ ਮਰਗਣਾ ਚ ਭ੍ਨਾ ਭਨਗਣਾ ਚ ਯੋਗਣੋ ਚ ਯੇਨ ਯਗਣੇਨ ਸਹ ਯੋਗਣੋ ਚ ਤਿਮੁਨਿਯਤਿਯੁਤਾ ਸਤ੍ਤਮਕ੍ਖਰਨ੍ਤੇਤੀਹਿ ਯਤੀਹਿ ਯੁਤ੍ਤਾ ਚ ਚੇ ਸਿਯੁਂ. ਅਤ੍ਰ ਇਮਸ੍ਮਿਂ ਪਕਤਿ ਛਨ੍ਦੇ ਅਯਂ ਗਾਥਾ ਸਦ੍ਧਰਾਗਾਥਾਤਿ ਕਿਤ੍ਤਿਤਾਤਿ. ਏਤ੍ਥ ਚ ਮੁਨਿਸਦ੍ਦੋ ਸਤ੍ਤਸਙ੍ਖ੍ਯਾਵਾਚਕੋਤਿ ਦਟ੍ਠਬ੍ਬੋ. ਏਕਸ੍ਮਿਂ ਪਾਦੇ ਸਤ੍ਤਮਕ੍ਖਰਨ੍ਤੇ ਸਤ੍ਤਮਕ੍ਖਰਨ੍ਤੇ ਯਤੀਨਂ ਤਿਪਰਿਵਤ੍ਤਤ੍ਤਾ ਤਿਮੁਨਿਯਤਿਯੁਤਾਤਿ ਵੁਤ੍ਤਂ. ਏਕਵੀਸਤਕ੍ਖਰਵਨ੍ਤੋਤਿ ਵੁਤ੍ਤਂ ਹੋਤਿ.

ਤਤ੍ਥ ਚ ਦੇਵਾਦੇਵਾਤਿਦੇਵਨ੍ਤਿ ਰਾਜਸਙ੍ਖਾਤਸਮ੍ਮੁਤਿਦੇਵ ਚਤੁਮਹਾਰਾਜਾਦਿਕਉਪਪਤ੍ਤਿਦੇਵਾਨਂ ਅਤਿਉਤ੍ਤਮਂ ਅਤਿਸੇਟ੍ਠਂ ਵਿਸੁਦ੍ਧਿਦੇਵਭੂਤਂ. ਏਤ੍ਥ ਹਿ ਦੇਵਾਤਿ ਸਮ੍ਮੁਤਿਦੇਵਾ. ਤੇ ਹਿ ਮਾਨੁਸ੍ਸਇਸ੍ਸਰਿਯਸਮ੍ਪਤ੍ਤੀਹਿ ਦਿਬ੍ਬਨ੍ਤੀਤਿ ਮਨੁਸ੍ਸਰਾਜਦੇਵੀ ਕੁਮਾਰਾ ਦੇਵਾਤਿ ਵੁਚ੍ਚਨ੍ਤਿ. ਪੁਨ ਦੇਵਾਤਿ ਉਪਪਤ੍ਤਿਦੇਵਾ. ਤੇ ਹਿ ਦਿਬ੍ਬਇਸ੍ਸਰਿਯਸਮ੍ਪਤ੍ਤੀਹਿ ਦਿਬ੍ਬਨ੍ਤੀਤਿ ਚਤੁਮਹਾਰਾਜਿਕਾ ਦੇਵਾ ਵੁਚ੍ਚਨ੍ਤਿ, ਦਿਬ੍ਬਨ੍ਤਿ ਕਾਮਗੁਣਾਦੀਹਿ ਕੀਲ਼ਨ੍ਤਿ ਲਲ਼ਨ੍ਤਿ, ਤੇਸੁ ਵਾ ਵਿਹਰਨ੍ਤਿ, ਵਿਜਯਸਮਤ੍ਥਤਾਯੋਗੇਨ ਪਚ੍ਚਤ੍ਥਿਕੇ ਵਿਜੇਤੁਂ ਇਚ੍ਛਨ੍ਤਿ, ਇਸ੍ਸਰਿਯਧਨਾਦਿਸਕ੍ਕਾਰਦਾਨਗ੍ਗਹਣਂ ਤਂ ਤਂ ਅਤ੍ਥਾਨੁਸਾਸਨਞ੍ਚ ਕਰੋਨ੍ਤਾ ਵੋਹਰਨ੍ਤਿ. ਪੁਞ੍ਞਾਤਿਸਯਯੋਗਾਨੁਭਾਵਪ੍ਪਤ੍ਤਾਯ ਜੁਤਿਯਾ ਜੋਤਨ੍ਤਿ. ਯਥਾਧਿਪ੍ਪੇਤਞ੍ਚ ਵਿਸਯਂ ਅਪ੍ਪਟਿਘਾਤੇਨ ਗਚ੍ਛਨ੍ਤਿ. ਯਥਿਚ੍ਛਿਤਨਿਪ੍ਫਾਦਨੇ ਚ ਸਕ੍ਕੋਨ੍ਤੀਤਿ ਦੇਵਾਤਿ ਵਿਸੁਦ੍ਧਿਮਗ੍ਗਮਹਾਟੀਕਾਯਂ ਆਗਤਨਯੇਨਪਿ ਵੇਦਿਤਬ੍ਬੋ. ਅਤਿਦੇਵਨ੍ਤਿ ਤੇਸਂ ਦੇਵਾਨਂ ਅਤਿਉਤ੍ਤਮਂ ਅਤਿਸੇਟ੍ਠਂ ਵਾ ਵਿਸੁਦ੍ਧਿ ਦੇਵਭੂਤਂ ਭਗਵਨ੍ਤਨ੍ਤਿ ਅਤ੍ਥੋ. ਸੋ ਹਿ ਤੇਸਂ ਸਮ੍ਮੁਤਿ ਉਪਪਤ੍ਤਿਦੇਵਾਨਂ ਸੀਲਾਦਿਗੁਣੇਹਿ ਅਤਿਰੇਕਤ੍ਤਾ ਅਤਿਰੇਕੋ ਦੇਵੋਤਿ ਭਗਵਾ ਅਤਿਦੇਵੋਤਿ ਵੁਚ੍ਚਤਿ. ਦੇਵੋ ਦੇਵਾਨਂ ਅਤਿਰੇਕੋ ਅਤਿਉਤ੍ਤਮੋ ਅਤਿਸੇਟ੍ਠੋ ਅਤਿਵਿਸਿਟ੍ਠੋ ਦੇਵੋ ਦੇਵਾਦੇਵਾਤਿਦੇਵੋ, ਵਿਸੁਦ੍ਧਿਦੇਵਭੂਤੋ ਮੁਨਿਨ੍ਦੋ ਲਬ੍ਭਤਿ. ਤਂ ਦੇਵਾਦੇਵਾਤਿਦੇਵਂ.

ਵੁਤ੍ਤਞ੍ਹਿ ਧਮ੍ਮਹਦਯਵਿਭਙ੍ਗੇ ‘‘ਦੇਵਾਤਿ ਤਯੋ ਦੇਵਾ ਸਮ੍ਮੁਤਿ ਦੇਵਾ, ਉਪਪਤ੍ਤਿਦੇਵਾ, ਵਿਸੁਦ੍ਧਿਦੇਵਾ. ਸਮ੍ਮੁਤਿਦੇਵਾ ਨਾਮ ਰਾਜਾਨੋ ਦੇਵਿਯੋ ਰਾਜਕੁਮਾਰਾ. ਉਪਪਤ੍ਤਿਦੇਵਾ ਨਾਮ ਚਤੁਮਹਾਰਾਜਿਕੇ ਦੇਵੇ ਉਪਾਦਾਯ ਤਦੁਪਰਿ ਦੇਵਾ. ਵਿਸੁਦ੍ਧਿਦੇਵਾ ਨਾਮ ਅਰਹਨ੍ਤੋ ਵੁਚ੍ਚਨ੍ਤੀ’’ਤਿ.

ਭਗਵਾ ਪਨ ਨਿਰਾਤਿਸਯਾਯ ਅਭਿਞ੍ਞਾਕੀਲ਼ਾਯ ਉਤ੍ਤਮੇਹਿ ਦਿਬ੍ਬਬ੍ਰਹ੍ਮਅਰਿਯਵਿਹਾਰੇਹਿ ਸਪਰਸਨ੍ਤਾਨਗਤਪਞ੍ਚਵਿਧਮਾਰਵਿਜ ਯਿਚ੍ਛਾਨਿਪ੍ਫਤ੍ਤਿਯਾਚਿਤ੍ਤਿਸ੍ਸਰਿਯ ਸਤ੍ਤਧਨਾਦਿ ਸਮ੍ਮਾਪਟਿਪਤ੍ਤਿ ਅਵੇਚ੍ਚਪ੍ਪਸਾਦਸਕ੍ਕਾਰਦਾਨਗ੍ਗਹਣਸਙ੍ਖਾਤੇਨ ਧਮ੍ਮਸਭਾਵਪੁਗ੍ਗਲਜ੍ਝਾਸਯਾਨੁਰੂਪਾਨੁਸਾਸਨੀਸਙ੍ਖਾਤੇਨ ਚ ਵੋਹਾਰਾਤਿਸਯੇਨ ਪਰਮਾਯ ਪਞ੍ਞਾਸਰੀਰਪ੍ਪਭਾਸਙ੍ਖਾਤਾਯ ਜੁਤਿਯਾ ਅਨਞ੍ਞਸਾਧਾਰਣਾਯ ਞਾਣਸਰੀਰਗਤਿਯਾ ਮਾਰਵਿਜਯ ਸਬ੍ਬਞ੍ਞੁਗੁਣਪਰਹਿਤ ਨਿਪ੍ਫਾਦਨੇਸੁ ਅਪ੍ਪਟਿਹਤਾਯ ਸਤ੍ਤਿਯਾ ਚ ਸਮਨ੍ਨਾਗਤਤ੍ਤਾ ਸਦੇਵਕੇਨ ਲੋਕੇਨ ਸਰਣਨ੍ਤਿ ਗਮਨੀਯਤੋ ਅਭਿਤ੍ਥਵਨੀਯਤੋ ਭਤ੍ਤਿਵਸੇਨ ਕਮਨੀਯਤੋ ਚ ਸਬ੍ਬੇ ਤੇ ਦੇਵੇ ਤੇਹਿ ਗੁਣੇਹਿ ਅਭਿਭੁਯ੍ਯ ਠਿਤਤ੍ਤਾ ਤੇਸਂ ਦੇਵਾਨਂ ਅਤਿਸੇਟ੍ਠੋ ਅਤਿਉਤ੍ਤਮੋ ਦੇਵੋਤਿ ਦੇਵਾਦੇਵਾਤਿਦੇਵੋਤਿ ਵਿਸੁਦ੍ਧਿਮਗ੍ਗ ਮਹਾਟੀਕਾਯਂ ਆਗਤਨਯੇਨਪਿ ਵੇਦਿਤਬ੍ਬੋ.

ਨਿਧਨਵਪੁਧਰਨ੍ਤਿ ਅਨ੍ਤਿਮਕਾਯਧਾਰਣਂ. ਏਤ੍ਥ ਚ ਨਿਧਨਸਦ੍ਦੋ ਪਰਿਯੋਸਾਨਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਨਿਧੇਤਿ ਪਰਿਯੋਸਾਨਂ ਕਰੋਤਿ ਏਤੇਨਾਤਿ ਨਿਧਨਂ. ਨਿਧੇਤਿ ਵਿਨਾਸੇਤਿ ਭਵਨ੍ਤਿ ਵਾ ਨਿਧਨਂ, ਅਨ੍ਤਿਮਕਾਯੋ ਲਬ੍ਭਤਿ. ਨਿਪੁਬ੍ਬ ਧਾ ਧਾਤੁ ਨਾਸੇ ਯੁ. ਵਪਤਿ ਕੁਸਲਾਕੁਸਲਬੀਜਮੇਤ੍ਥਾਤਿ ਵਪੁ, ਕਾਯੋ. ਵਪਧਾਤੁ ਬੀਜਸਨ੍ਤਾਨੇ ਉ. ਨਿਧਨਞ੍ਚ ਤਂ ਵਪੁ ਚਾਤਿ ਨਿਧਨਵਪੁ, ਤਂ ਧਾਰੇਤੀਤਿ ਨਿਧਨਵਪੁਧਰੋ, ਮੁਨਿਨ੍ਦੋ. ਤਂ ਨਿਧਨਵਪੁਧਰਂ. ਸੋ ਹਿ ਅਨਮਤਗ੍ਗਸਂਸਾਰਭਵੇਸੁ ਨਿਬ੍ਬਤ੍ਤੇਨ੍ਤਾਨਂ ਸਬ੍ਬਕਿਲੇਸਾਨਂ ਬੋਧਿਮਣ੍ਡੇ ਅਗ੍ਗਮਗ੍ਗਞਾਣਸਤ੍ਥੇਨ ਸਮੁਚ੍ਛਿਨ੍ਦਿ ਤਤ੍ਤਾ ਪੁਨਬ੍ਭਵਾਭਿਨਿਬ੍ਬਤ੍ਤਿ ਨਤ੍ਥਿ. ਅਯਞ੍ਹਿ ਬੁਦ੍ਧਭਾਵਜਾਤਿ ਅਨ੍ਤਿਮ ਭਵੋ ਹੋਤਿ, ਤਸ੍ਮਾ ਵਿਸੇਸੇਨ ਮੁਨਿਨ੍ਦਮੇਵ ਨਿਧਨਵਪੁਧਰਨ੍ਤਿ ਥੋਮੇਤਿ. ਵੁਤ੍ਤਞ੍ਹੇਤਂ ਅਙ੍ਗੁਤ੍ਤਰਪਾਲ਼ਿਯਂ ‘‘ਬੁਦ੍ਧੋ ਅਨ੍ਤਿਮ ਧਰੋ’’ਤਿ.

ਮਾਰਭਙ੍ਗਨ੍ਤਿ ਦੇਵਪੁਤ੍ਤਾਦਿਪਞ੍ਚਮਾਰੇ ਵਿਦ੍ਧਂਸਨਂ. ਮਾਰਸਦ੍ਦਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਪਞ੍ਚਮਾਰੇ ਭਞ੍ਜਤਿ ਅਭਞ੍ਜਿ ਭਞ੍ਜਿਸ੍ਸਤੀਤਿ ਮਾਰਭਙ੍ਗੋ, ਮੁਨਿਨ੍ਦੋ. ਮਾਰਸਦ੍ਦੂਪਪਦ ਭਨ੍ਜਧਾਤੁ ਅਵਮਦ੍ਦਨੇ ਤਪਚ੍ਚਯੋ. ਤਸ੍ਸ ਸਹ ਧਾਤ੍ਵਨ੍ਤੇਨ ਗੋਆਦੇਸੋ. ਨਕਾਰਸ੍ਸ ਨਿਗ੍ਗਹਿਤਾਦੇਸੋ. ਤਸ੍ਸ ਕਵਗ੍ਗਨ੍ਤਾਦੇਸੋ. ਤਂ ਮਾਰਭਙ੍ਗਂ. ਅਭਙ੍ਗਨ੍ਤਿ ਮਾਰਸੇਨਾਯ ਭਞ੍ਜਿਤੁਂ ਵਿਦ੍ਧਂਸਿਤੁਂ ਅਸਮਤ੍ਥਂ, ਭਞ੍ਜਿਯਤੇ ਭਙ੍ਗੋ. ਨਭਙ੍ਗੋ ਅਭਙ੍ਗੋ. ਅਥ ਵਾ ਮਾਰਸੇਨਾਯ ਨ ਭਞ੍ਜਿਯਤੀਤਿ ਅਭਙ੍ਗੋ. ਮਾਰਸੇਨਾਯ ਭਞ੍ਜਿਤੁਂ ਨ ਅਰਹਤੀਤਿ ਅਤ੍ਥੋ. ਮਾਰਸੇਨਾ ਭਞ੍ਜਿਤੁਂ ਨ ਸਮਤ੍ਥੋਤਿ ਵਾ ਅਭਙ੍ਗੋ, ਮੁਨਿਨ੍ਦੋ. ਤਂ ਅਭਙ੍ਗਂ.

ਦੀਪਂਦੀਪਂ ਪਜਾਨਨ੍ਤਿ ਏਤ੍ਥ ਪਜਾਨਂ ਦੀਪਂ ਦੀਪਨ੍ਤਿ ਸਮ੍ਬਨ੍ਧੋ. ਤਤ੍ਥ ਪਜਾਨਨ੍ਤਿ ਸਤ੍ਤਾਨਂ. ਤੇਹਿ ਕਮ੍ਮਕਿਲੇਸੇਹਿ ਪਜਾਯਨ੍ਤਿ ਨਿਬ੍ਬਤ੍ਤਿਯਨ੍ਤਿ, ਪਕਾਰੇਨ ਵਾ ਜਾਯਨ੍ਤਿ ਨਿਬ੍ਬਤ੍ਤਨ੍ਤਿ ਪਟਿਸਨ੍ਧਿਚੁਤਿਵਸੇਨਾਤਿ ਪਜਾਤਿ ਵੁਚ੍ਚਨ੍ਤਿ. ਦੀਪਨ੍ਤਿ ਪਞ੍ਞਾਪਦੀਪਂ. ਤਞ੍ਹਿ ਕੁਸਲਾਕੁਸਲੇ ਧਮ੍ਮੇ ਵਿਭਜਿਤ੍ਵਾ ਦੀਪੇਤਿ ਪਕਾਸੇਤਿ ਜੋਤੇਤੀਤਿ ਦੀਪਨ੍ਤਿ ਵੁਚ੍ਚਤਿ. ਅਥ ਵਾ ਦਿਪ੍ਪਤਿ ਜੋਤੇਤੀਤਿ ਦੀਪੋ. ਅਨ੍ਧਕਾਰਂ ਵਿਧਮੇਤ੍ਵਾ ਆਲੋਕਂ ਪਕਾਸੇਤੀਤਿ ਅਤ੍ਥੋ. ਦੀਪਧਾਤੁ ਦਿਤ੍ਤਿਯਂ ਅ. ਦੀਪਮਿਵਾਤਿ ਦੀਪਾ, ਪਞ੍ਞਾ. ਯਥਾ ਹਿ ਪਦੀਪੋ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਂ ਪਕਾਸੇਤਿ, ਏਵਂ ਪਞ੍ਞਾ ਅਵਿਜ੍ਜਨ੍ਧਕਾਰਂ ਹਨ੍ਤ੍ਵਾ ਧਮ੍ਮਾਲੋਕਂ ਪਕਾਸੇਤੀਤਿ ਵੁਤ੍ਤਂ ਹੋਤਿ. ਤਂ ਦੀਪਂ. ਪੁਨ ਦੀਪਨ੍ਤਿ ਦੀਪਕਂ ਪਕਾਸੇਨ੍ਤਨ੍ਤਿ ਅਤ੍ਥੋ. ਸੋ ਹਿ ਦੀਪੇਤਿ ਪਕਾਸੇਤੀਤਿ ਦੀਪੋਤਿ ਵੁਚ੍ਚਤਿ. ਮੁਨਿਨ੍ਦੋ ਹਿ ਪਯਿਰੁਪਾਸਨਵਸੇਨ ਗਤਾਗਤਾਨਂ ਵਿਨੇਯ੍ਯਸਤ੍ਤਾਨਂ ਧਮ੍ਮਦੇਸਨਾਯ ਚਤੁਮਗ੍ਗਞਾਣਾਦਿਪਞ੍ਞਾਪਦੀਪਂ ਪਕਾਸੇਤੀਤਿ ਵੁਤ੍ਤਂ ਹੋਤਿ. ਤਂ ਦੀਪਂ.

ਜਯਵਰਸਯਨੇਤਿ ਪਞ੍ਚਮਾਰਵਿਜਯਨ੍ਤਟ੍ਠਾਨਭੂਤੇ ਉਤ੍ਤਮ ਬੋਧਿਪਲ੍ਲਙ੍ਕਾਸਨੇ. ਪਞ੍ਚਮਾਰੇ ਜਿਨਾਤਿ ਏਤ੍ਥਾਤਿ ਜਯੋ, ਬੋਧਿਰੁਕ੍ਖਪਲ੍ਲਙ੍ਕੋ. ਜਿਧਾਤੁ ਜਯੇ ਣ. ਵਰਿਤਬ੍ਬੋ ਪਤ੍ਥਿ ਤਬ੍ਬੋਤਿ ਵਰੋ, ਵਰਧਾਤੁ ਪਤ੍ਥਨੇ ਅ. ਵਰਤਿ ਨਿਵਾਰੇਤਿ ਹੀਨਨ੍ਤਿ ਵਾ ਵਰੋ. ਵਰਧਾਤੁ ਨਿਵਾਰਣੇ ਅ. ਬੁਦ੍ਧੇਨ ਸੇਵਿਯਤਿ ਭਜਿਯਤਿ ਏਤ੍ਥਾਤਿ ਸਯਨੋ. ਸਿਧਾਤੁ ਸੇਵਾਯਂਯੁ. ਵਰੋ ਉਤ੍ਤਮੋ ਸਯਨੋ ਵਰਸਯਨੋ, ਜਯੋਏਵ ਵਰਸਯਨੋ ਜਯਵਰਸਯਨੋ, ਬੋਧਿਰੁਕ੍ਖਪਲ੍ਲਙ੍ਕੋ. ਤਸ੍ਮਿਂ.

ਬੋਧਿਪਤ੍ਤਂਧਿਪਤ੍ਤਨ੍ਤਿ ਬੋਧਿਪਤ੍ਤਂ ਅਧਿਪਤ੍ਤਨ੍ਤਿ ਪਦਚ੍ਛੇਦੋ. ਬੋਧਿਪਤ੍ਤਨ੍ਤਿ ਅਰਹਤ੍ਤਮਗ੍ਗਸਬ੍ਬਞ੍ਞੁਤਞਾਣਂ ਗਤਂ. ਏਤ੍ਥ ਚ ਬੋਧਿਸਦ੍ਦੋ ਰੁਕ੍ਖਮਗ੍ਗਞਾਣਸਬ੍ਬਞ੍ਞੁਤਞਾਣਨਿਬ੍ਬਾਨੇਸੁਪਿ ਵਤ੍ਤਤਿ. ਤਥਾ ਹੇਸ ਬੋਧਿਰੁਕ੍ਖਮੂਲੇ ਪਠਮਾਭਿਸਮ੍ਬੁਦ੍ਧੋਤਿਆਦੀਸੁ ਰੁਕ੍ਖੇ ਵਤ੍ਤਤਿ. ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣਨ੍ਤਿਆਦੀਸੁ ਮਗ੍ਗੇ. ਪਪ੍ਪੋਤਿ ਬੋਧਿਂ ਵਰਭੂਰੀ ਮੇਧਸੋਤਿਆਦੀਸੁ ਸਬ੍ਬਞ੍ਞੁਤਞਾਣੇ. ਪਤ੍ਵਾਨ ਬੋਧਿਂ ਅਮਤਂ ਅਸਙ੍ਖਤਨ੍ਤਿਆਦੀਸੁ ਨਿਬ੍ਬਾਨੇ. ਇਧ ਪਨ ਭਗਵਤੋ ਅਰਹਤ੍ਤਮਗ੍ਗਸਬ੍ਬਞ੍ਞੁਤਞਾਣਂ ਅਧਿਪ੍ਪੇਤਂ. ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤੀਤਿ ਬੋਧਿ, ਅਰਹਤ੍ਤ ਮਗ੍ਗਞਾਣਂ. ਸਬ੍ਬਞੇਯ੍ਯਧਮ੍ਮੇ ਬੁਜ੍ਝਤੀਤਿ ਬੋਧਿ, ਸਬ੍ਬਞ੍ਞੁਤਞਾਣਂ. ਬੁਧਧਾਤੁ ਞਾਣੇ ਣ ਈ ਚ. ਬੋਧਿ ਚ ਬੋਧਿ ਚ ਬੋਧਿ ਸਰੂਪੇਕਸੇਸਵਸੇਨ. ਤਂ ਅਪਜ੍ਜਿਂ ਅਗਮਿਨ੍ਤਿ ਬੋਧਿ ਪਤ੍ਤੋ, ਮੁਨਿਨ੍ਦੋ. ਤਂ ਬੋਧਿਪਤ੍ਤਂ. ਅਧਿਪਤ੍ਤਨ੍ਤਿ ਸਦੇਵਕੇ ਲੋਕੇ ਸਬ੍ਬਦੇਵਮਨੁਸ੍ਸਾਨਂ ਜੇਟ੍ਠਭਾਵਂ ਗਤਨ੍ਤਿ ਅਤ੍ਥੋ. ਸਬ੍ਬਦੇਵਮਨੁਸ੍ਸਾਨਂ ਅਧਿਕਂ ਜੇਟ੍ਠਭਾਵਂ ਵੁਡ੍ਢਤਰਭਾਵਂ ਪਤ੍ਤੋ ਗਤੋਤਿ ਅਧਿਪਤ੍ਤੋ, ਮੁਨਿਨ੍ਦੋ. ਤਂ ਅਧਿਪਤ੍ਤਂ. ਯਥਾ ਹਿ ਕੁਕ੍ਕੁਟਪੋਤਕਾਨਂ ਯੋ ਕੁਕ੍ਕੁਟਪੋਤਕੋ ਅਣ੍ਡਕੋਸਂ ਪਦਾਲੇਤ੍ਵਾ ਅਭਿਨਿਬ੍ਭਿਦੋ, ਸੋ ਤੇਸਂ ਜੇਟ੍ਠਭਾਵਂ ਵੁਡ੍ਢਤਰਭਾਵਂ ਗਤੋ, ਏਵਮੇਵ ਭਗਵਾ ਸਦੇਵਕੇ ਲੋਕੇ ਅਵਿਜ੍ਜਾ ਗਤਾਯ ਪਜਾਯ ਤਂ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਪਠਮਤਰਂ ਅਰਿਯਾਯ ਜਾਤਿਯਾ ਜਾਤਤ੍ਤਾ ਚ ਸੀਲਸਮਾਧਿਪਞ੍ਞਾਦਿ ਸਬ੍ਬਗੁਣੇਹਿ ਅਧਿਕਤ੍ਤਾ ਚ ਅਪ੍ਪਟਿਸਮਤ੍ਤਾ ਚ ਸਬ੍ਬਦੇਵਮਨੁਸ੍ਸਾਨਂ ਜੇਟ੍ਠਭਾਵਂ ਵੁਡ੍ਢਤਰਭਾਵਂ ਸੇਟ੍ਠਭਾਵਂ ਅਪ੍ਪਟਿਸਮਭਾਵਞ੍ਚ ਪਤ੍ਤੋ ਗਤੋਤਿ ਵੁਤ੍ਤਂ ਹੋਤਿ. ਤਸ੍ਮਾ ਅਧਿਪਤ੍ਤਨ੍ਤਿ ਥੋਮੇਤਿ.

ਬ੍ਰਹ੍ਮਾਬ੍ਰਹ੍ਮਾਗਤਾਨਨ੍ਤਿ ਬ੍ਰਹ੍ਮ ਅਬ੍ਰਹ੍ਮ ਆਗਤਾਨਨ੍ਤਿ ਪਦਚ੍ਛੇਦੋ. ਆਗਤਾਨਂ ਪਯਿਰੁਪਾਸਨਵਸੇਨ ਆਗਤਾਨਂ ਬ੍ਰਹ੍ਮ ਦੇਵਮਨੁਸ੍ਸਪਰਿਸਾਨਨ੍ਤਿ ਅਤ੍ਥੋ. ਤਤ੍ਥ ਬ੍ਰਹ੍ਮਾਤਿ ਬ੍ਰਹ੍ਮਪਾਰਿਸਜ੍ਜਾਦਿ ਬ੍ਰਹ੍ਮਾ. ਤੇ ਹਿ ਝਾਨਾਦਿਗੁਣੇਹਿ ਬ੍ਰੂਹਨ੍ਤਿ ਵਡ੍ਢਨ੍ਤੀਤਿ ਬ੍ਰਹ੍ਮਾਤਿ ਵੁਚ੍ਚਨ੍ਤਿ, ਅਬ੍ਰਹ੍ਮਾਤਿ ਦੇਵਮਨੁਸ੍ਸਾ. ਤੇ ਹਿ ਨ ਬ੍ਰਹ੍ਮਾ ਅਬ੍ਰਹ੍ਮਾਤਿ ਵੁਚ੍ਚਨ੍ਤਿ, ਆਗਚ੍ਛਨ੍ਤਿ ਪਯਿਰੁਪਾਸਨਵਸੇਨਾਤਿ ਆਗਤਾ, ਬ੍ਰਹ੍ਮਾ ਬ੍ਰਹ੍ਮਾਨੋ ਲਬ੍ਭਨ੍ਤਿ. ਆਪੁਬ੍ਬਗਮੁਧਾਤੁ ਗਤਿਯਂ ਤ. ਆਗਤਾ ਬ੍ਰਹ੍ਮਾ ਚ ਅਬ੍ਰਹ੍ਮਾ ਚਾਤਿ ਬ੍ਰਹ੍ਮਾਬ੍ਰਹ੍ਮਾਗਤਾ, ਤੇਸਂ. ਵਿਸੇਸਨ ਪਰਨਿਪਾਤਪਦਮੇਤਂ ਅਗ੍ਯਾਹਿਤੋਤਿਆਦੀਸੁ ਵਿਯ. ਤਂ ਪਨ ਪਦਂ ਵਰਗਿਰਕਥਿਕਨ੍ਤਿਪਦੇ ਸਮ੍ਪਦਾਨਂ. ਪਯਿਰੁਪਾਸਨਾਨਂ ਬ੍ਰਹ੍ਮ ਦੇਵਮਨੁਸ੍ਸਪਰਿਸਾਨਨ੍ਤਿ ਅਤ੍ਥੋ.

ਵਰਗਿਰਕਥਿਕਨ੍ਤਿ ਉਤ੍ਤਮਂ ਧਮ੍ਮਵਾਚਂ ਦੇਸੇਨ੍ਤਂ. ਸੇਟ੍ਠਵਾਚਾਯ ਧਮ੍ਮਂ ਦੇਸਮਾਨਂ ਵਾ, ਗਾਯਤਿ ਕਥਿਯਤੀਤਿ ਗਿਰਾ, ਵਾਚਾ. ਗਾਧਾਤੁ ਸਦ੍ਦੇ ਈਰੋ. ਵਰਾ ਸੇਟ੍ਠਾ ਗਿਰਾ ਵਾਚਾ ਵਰਗਿਰਾ. ਤਾਯ ਧਮ੍ਮਂ ਕਥੇਤੀਤਿ ਵਰਗਿਰਕਥਿਕੋ, ਮੁਨਿਨ੍ਦੋ. ਉਤ੍ਤਮਾਯ ਮਨਾਪਭੂਤਵਾਚਾਯ ਧਮ੍ਮਂ ਦੇਸੇਤੀਤਿ ਅਤ੍ਥੋ. ਤਂ.

ਪਾਪਹੀਨਨ੍ਤਿ ਲਾਮਕਅਕੁਸਲਕਿਲੇਸਂ. ਤਞ੍ਹਿ ਅਪਾਯਾਦਿ ਦੁਕ੍ਖਂ ਪਾਪੇਤੀਤਿ ਪਾਪੋਤਿ ਵੁਚ੍ਚਤਿ. ਅਕੁਸਲਕਿਲੇਸੋ. ਪਪੁਬ੍ਬਅਪਧਾਤੁ ਪਾਪੁਣਨੇ. ਕੁਸਲਧਮ੍ਮੇਨ ਹਾਤਬ੍ਬਂ ਚਜਿ ਤਬ੍ਬਨ੍ਤਿ ਹੀਨਨ੍ਤਿ ਵੁਚ੍ਚਤਿ. ਲਾਮਕਧਮ੍ਮੋ. ਹਾਧਾਤੁ ਚਾਗੇ ਤਪਚ੍ਚਯੋ, ਤਸ੍ਸਿਨੋ. ਪਾਪੋਏਵ ਹੀਨਂ ਪਾਪਹੀਨਂ. ਪਹੀਨਨ੍ਤਿ ਅਰਹਤ੍ਤਮਗ੍ਗਞਾਣੇਨ ਸੁਸਮੁਚ੍ਛਿਨ੍ਨਂ. ਪਜਹਤੀਤਿ ਪਹੀਨੋ, ਮੁਨਿਨ੍ਦੋ. ਪਪੁਬ੍ਬਹਾਧਾਤੁ ਚਾਗੇ ਇਨੋ. ਸਬ੍ਬੇ ਅਕੁਸਲਧਮ੍ਮੇ ਅਗ੍ਗਮਗ੍ਗਞਾਣੇਨ ਸਮੁਚ੍ਛਿਨ੍ਦਤੀਤਿ ਅਤ੍ਥੋ.

ਲੋਕਾਲੋਕਾਭਿਰਾਮਨ੍ਤਿ ਲੋਕਅਲੋਕਅਭਿਰਾਮਨ੍ਤਿ ਪਦਚ੍ਛੇਦੋ. ਮਨੁਸ੍ਸਲੋਕਦੇਵਬ੍ਰਹ੍ਮਲੋਕਾਨਂ ਅਭਿਰਾਮਟ੍ਠਾਨਭੂਤਨ੍ਤਿ ਅਤ੍ਥੋ. ਲੋਕੋਤਿ ਮਨੁਸ੍ਸ ਲੋਕੋ, ਸੋ ਹਿ ਲੋਕਯਤਿ ਪਤਿਟ੍ਠਹਤਿ ਪਵਤ੍ਤਤਿ ਵਾ ਏਤ੍ਥ ਪੁਞ੍ਞਾਪੁਞ੍ਞਂ ਤਬ੍ਬਿਪਾਕੋ ਚਾਤਿ ਲੋਕੋ, ਮਨੁਸ੍ਸ ਲੋਕੋ. ਲੋਕਧਾਤੁ ਪਤਿਟ੍ਠਾਯਂ ਅ. ਨ ਲੋਕੋ ਅਲੋਕੋ. ਦੇਵਬ੍ਰਹ੍ਮਲੋਕੋ. ਲੋਕੋ ਚ ਅਲੋਕੋ ਚ ਲੋਕਾਲੋਕਾ, ਤੇਸਂ ਸਤ੍ਤਲੋਕਾਨਂ ਅਭਿਅਧਿਕਂ ਰਮਨ੍ਤਿ ਏਤ੍ਥਾਤਿ ਲੋਕਾਲੋਕਾਭਿਰਾਮੋ. ਮੁਨਿਨ੍ਦੋ, ਤਂ. ਸੋ ਹਿ ਤਿਲੋਕਾਨਂ ਪੂਜਾਨੁਗ੍ਗਹਾਦਿਕਰਣਵਸੇਨ ਅਭਿਰਾਮਟ੍ਠਾਨਂ ਹੋਤੀਤਿ ਲੋਕਾਲੋਕਾਭਿਰਾਮਨ੍ਤਿ ਥੋਮੇਤਿ. ਸਤਤਨ੍ਤਿ ਨਿਚ੍ਚਂ. ਰਤ੍ਤਿਦਿਵਂ ਅਭਿਣ੍ਹਨ੍ਤਿ ਅਤ੍ਥੋ. ਮੁਨਿਨ੍ਦਨ੍ਤਿ ਪਞ੍ਚਮੁਨਿਸ੍ਸਰਂ, ਤਂ ਮੁਨਿਨ੍ਦਂ. ਅਭਿਨਮੇਤਿ ਅਹਂ ਅਭਿਸਕ੍ਕਚ੍ਚਂ ਨਮਾਮੀਤਿ ਸਮ੍ਬਨ੍ਧੋਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਦੇਵਾਦੇਵਾਤਿਦੇਵਂ ਸਮ੍ਮੁਤਿਦੇਵਉਪਪਤ੍ਤਿਦੇਵਾਨਂ ਅਤਿਉਤ੍ਤਮਂ ਵਿਸੁਦ੍ਧਿਦੇਵਭੂਤਂ ਨਿਧਨਵਪੁਧਰਂ ਅਨ੍ਤਿਮਕਾਯਧਾਰਣਂ, ਮਾਰਭਙ੍ਗਂ ਦੇਵਪੁਤ੍ਤਾਦਿਪਞ੍ਚਮਾਰੇ ਵਿਦ੍ਧਂਸਨਂ ਅਭਙ੍ਗਂ ਮਾਰਸੇਨਾਯ ਭਞ੍ਜਿਤੁਂ ਅਸਮਤ੍ਥਂ, ਮਾਰਸੇਨਾ ਭਞ੍ਜਨਾਰਹਂ ਵਾ, ਪਜਾਨਂ ਸਤ੍ਤਾਨਂ ਦੀਪਂ ਪਞ੍ਞਾਪਦੀਪਂ, ਕਮ੍ਮਭੂਤਂ ਦੀਪਂ ਦੀਪਕਂ ਪਕਾਸੇਨ੍ਤਂ, ਜਯਵਰਸਯਨੇ ਪਞ੍ਚਮਾਰਵਿਜਯਨ੍ਤਟ੍ਠਾਨਭੂਤੇ ਉਤ੍ਤਮਬੋਧਿਪਲ੍ਲਙ੍ਕਾਸਨੇ ਆਧਾਰਭੂਤੇ, ਬੋਧਿਪਤ੍ਤਂ ਅਰਹਤ੍ਤਮਗ੍ਗਸਬ੍ਬਞ੍ਞੁਤਞਾਣਂ ਗਤਂ ਅਧਿਪਤ੍ਤਂ ਸਦੇਵਕੇ ਲੋਕੇ ਸਬ੍ਬਦੇਵਮਨੁਸ੍ਸਾਨਂ ਜੇਟ੍ਠਭਾਵਂ ਗਤਂ, ਬ੍ਰਹ੍ਮਾ ਬ੍ਰਹ੍ਮਾਗਤਾਨਂ ਪਯਿਰੁਪਾਸਨਵਸੇਨ ਆਗਤਾਨਂ ਬ੍ਰਹ੍ਮਦੇਵ ਮਨੁਸ੍ਸਪਰਿਸਾਨਂ ਵਰਗਿਰਕਥਿਕਂ ਸੇਟ੍ਠਵਾਚਾਯ ਧਮ੍ਮਂ ਦੇਸਮਾਨਂ ਪਾਪਹੀਨਂ ਲਾਮਕਅਕੁਸਲਕਿਲੇਸਂ ਪਹੀਨਂ ਅਰਹਤ੍ਤਮਗ੍ਗ ਞਾਣੇਨ ਸੁਸਮੁਚ੍ਛਿਨ੍ਨਂ ਲੋਕਾਲੋਕਾਭਿਰਾਮਂ ਮਨੁਸ੍ਸ ਲੋਕਦੇਵਬ੍ਰਹ੍ਮਲੋਕਾਨਂ ਅਭਿਰਾਮਭੂਤਂ, ਮੁਨਿਨ੍ਦਂ ਪਞ੍ਚਮੁਨਿਸ੍ਸਰਂ ਤਂ ਮੁਨਿਨ੍ਦਂ ਸਤਤਂ ਨਿਚ੍ਚਂ ਅਭਿਣ੍ਹਂ ਅਹਂ ਅਭਿਨਮੇ ਅਭਿਸਕ੍ਕਚ੍ਚਂ ਨਮਾਮੀਤਿ.

ਦ੍ਵਾਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੩.

ਬੁਦ੍ਧੋ ਨਿਗ੍ਰੋਧਬਿਮ੍ਬੋ ਮੁਦੁਕਰਚਰਣੋ ਬ੍ਰਹ੍ਮਘੋਸੇਣਿਜਙ੍ਘੋ,

ਕੋਸਚ੍ਛਾਦਙ੍ਗਜਾਤੋ ਪੁਨਰਪਿ ਸੁਗਤੋ ਸੁਪ੍ਪਤਿਟ੍ਠਿਤਪਾਦੋ;

ਮੂਦੋਦਾਤੁਣ੍ਣਲੋਮੋ ਅਥਮਪਿ ਸੁਗਤੋ ਬ੍ਰਹ੍ਮੁਜੁਗ੍ਗਤ੍ਤਭਾਵੋ,

ਨੀਲਕ੍ਖੀ ਦੀਘਪਣ੍ਹੀ ਸੁਖੁਮਮਲਛਵੀ ਥੋਮ੍ਯਰਸਗ੍ਗਸਗ੍ਗੀ.

੨੪.

ਚਤ੍ਤਾਲੀਸਗ੍ਗਦਨ੍ਤੋ ਸਮਕਲਪਨਜੋ ਅਨ੍ਤਰਂਸਪ੍ਪਪੀਨੋ,

ਚਕ੍ਕੇਨਙ੍ਕਿਤਪਾਦੋ ਅਵਿਰਲ਼ਦਸਨੋ ਮਾਰਜੁਸ੍ਸਙ੍ਖਪਾਦੋ;

ਤਿਟ੍ਠਨ੍ਤੋ ਨੋਨਮਨ੍ਤੋਭਯਕਰਮੁਦੁਨਾ ਜਣ੍ਣੁਕਾਨਾਮਸਨ੍ਤੋ,

ਵਟ੍ਟਕ੍ਖਨ੍ਧੋ ਜਿਨੋ ਗੋਤਰੁਣਪਖੁਮਕੋ ਸੀਹਪੁਬ੍ਬਡ੍ਢਕਾਯੋ.

੨੫.

ਸਤ੍ਤਪ੍ਪੀਨੋ ਚ ਦੀਘਙ੍ਗੁਲਿ ਮਥ ਸੁਗਤੋ ਲੋਮਕੂਪੇਕਲੋਮੋ,

ਸਮ੍ਪਨ੍ਨੋਦਾਤਦਾਠੋ ਕਨਕਸਮਤਚੋ ਨੀਲਮੁਦ੍ਧਗ੍ਗਲੋਮੋ;

ਸਮ੍ਬੁਦ੍ਧੋ ਥੂਲਜਿਵ੍ਹੋ ਅਥ ਸੀਹਹਨੁਕੋ ਜਾਲਿਕਪ੍ਪਾਦਹਤ੍ਥੋ,

ਨਾਥੋ ਉਣ੍ਹੀਸਸੀਸੋ ਇਤਿਗੁਣਸਹਿਤਂ ਤਂ ਮਹੇਸਿਂ ਨਮਾਮਿ.

੨੩. ਏਵਂ ਦ੍ਵਾਵੀਸਤਿਮਾਯ ਗਾਥਾਯ ਮੁਨਿਨ੍ਦਸ੍ਸ ਪਣਾਮਂ ਕਤ੍ਵਾ ਇਦਾਨਿ ਬੁਦ੍ਧੋ ਨਿਗ੍ਰੋਧਬਿਮ੍ਬੋਤ੍ਯਾਦੀਹਿ ਤੀਹਿ ਗਾਥਾਹਿ ਬੁਦ੍ਧਸ੍ਸ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਮ੍ਪਨ੍ਨੇਹਿ ਗੁਣੇਹਿ ਥੋਮਿਤ੍ਵਾ ਮਹੇਸਿਂ ਵਨ੍ਦਿਤੁਕਾਮੋ ਬੁਦ੍ਧੋ ਨਿਗ੍ਰੋਧਬਿਮ੍ਬੋਤ੍ਯਾਦਿਗਾਥਾਤ੍ਤਯਮਾਹ. ਤਂ ਪਨ ਗਾਥਾਤ੍ਤਯਂ ਸਦ੍ਧਰਾਗਾਥਾਤਿ ਦਟ੍ਠਬ੍ਬਂ. ਸਾਧਕਂ ਪਨ ਹੇਟ੍ਠਾ ਵੁਤ੍ਤਮੇਵ.

ਤਤ੍ਥ ਪਠਮਗਾਥਾਯਂ ਬੁਦ੍ਧੋਤਿ ਪਟਿਵਿਦ੍ਧਚਤੁਸਚ੍ਚਧਮ੍ਮੋ ਪਟਿਵਿਦ੍ਧਨਿਰਵਸੇਸਸਬ੍ਬਧਮ੍ਮੋ ਵਾ. ਤਂ ਪਨ ਪਦਂ ਨਿਗ੍ਰੋਧਬਿਮ੍ਬੋ ਤ੍ਯਾਦੀਸੁ ਪਦੇਸੁ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧਿਤਬ੍ਬਂ. ਸੋ ਹਿ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤੀਤਿ ਚ, ਨਿਰਵਸੇਸਸਬ੍ਬਧਮ੍ਮੇ ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤੀਤਿ ਚ ਬੁਦ੍ਧੋਤਿ ਵੁਚ੍ਚਤਿ. ਤੇਸੁ ਪਨ ਦ੍ਵੀਸੁ ਵਿਕਪ੍ਪੇਸੁ ਪਠਮਵਿਕਪ੍ਪੇ ਬੁਧਧਾਤੁਸ੍ਸ ਵਾਚ੍ਚਂ ਚਤੁਸਚ੍ਚਧਮ੍ਮਪਟਿਵਿਜ੍ਝਨਂ ਅਰਹਤ੍ਤਮਗ੍ਗਞਾਣਂ ਮੁਖ੍ਯੇਨ ਲਬ੍ਭਤਿ. ਹੇਟ੍ਠਾ ਮਗ੍ਗਫਲਞਾਣਞ੍ਚ ਵਿਪਸ੍ਸਨਾਞਾਣਞ੍ਚ ਪਾਰਮੀਞਾਣਞ੍ਚ ਫਲੂਪਚਾਰੇਨ. ਅਰਹਤ੍ਤਫਲਞਾਣਞ੍ਚ ਸਬ੍ਬਞ੍ਞੁਤਞਾਣਾਦਿਪਚ੍ਛਿਮਪਚ੍ਛਿਮਞਾਣਾਨਿ ਚ ਕਾਰਣੂਪਚਾਰੇਨ. ਤਪਚ੍ਚਯਸ੍ਸ ਵਾਚ੍ਚਂ ਤੇਨ ਮੁਖ੍ਯੋਪਚਾਰੇਨ ਉਪਲਕ੍ਖਿਤੋ ਅਪਰਿਮਿਤਗੁਣਗਣਾਲਙ੍ਕਾਰਂ ਖਨ੍ਧਪਞ੍ਚਕਂ ਪਟਿਚ੍ਚ ਬੁਦ੍ਧੋਬੁਦ੍ਧੋਤਿ ਪਞ੍ਞਤ੍ਤੋ ਸਤ੍ਤਵਿਸੇਸੋ ਲਬ੍ਭਤਿ. ਦੁਤਿਯ ਵਿਕਪ੍ਪੇ ਬੁਧਧਾਤੁਸ੍ਸ ਵਾਚ੍ਚਂ ਸਬ੍ਬਞੇਯ੍ਯਧਮ੍ਮਪਟਿਵਿਜ੍ਝਨਸਮਤ੍ਥਂ ਸਬ੍ਬਞ੍ਞੁਤਞਾਣਂ ਮੁਖ੍ਯੇਨ ਲਬ੍ਭਤਿ. ਚਤੁਮਗ੍ਗਫਲਞਾਣਞ੍ਚ ਵਿਪਸ੍ਸਨਾ ਪਾਰਮੀਞਾਣਞ੍ਚ ਫਲੂਪਚਾਰੇਨ. ਆਸਯਾਨੁਸਯਞਾਣਾਦਿਪਚ੍ਛਿਮ ਪਚ੍ਛਿਮਞਾਣਾਨਿ ਕਾਰਣੂਪਚਾਰੇਨ. ਤਪਚ੍ਚਯਸ੍ਸ ਵਾਚ੍ਚਂ ਤੇਨ ਮੁਖ੍ਯੋਪਚਾਰੇਨ ਉਪਲਕ੍ਖਿਤੋ ਅਪਰਿਮਾਣਗੁਣੋਘਾਲਙ੍ਕਤਂ ਖਨ੍ਧਪਞ੍ਚਕਂ ਪਟਿਚ੍ਚ ਬੁਦ੍ਧੋਬੁਦ੍ਧੋਤਿ ਪਞ੍ਞਤ੍ਤੋ ਸਤ੍ਤਵਿਸੇਸੋ ਲਬ੍ਭਤਿ. ਕਿਂਪਨੇਤ੍ਥ ਬੁਧਧਾਤੁਸ੍ਸ ਵਾਚ੍ਚਭੂਤਂ ਞਾਣਮੇਵ ਬੁਦ੍ਧੋ ਨਾਮ ਹੋਤਿ. ਉਦਾਹੁ ਤਪਚ੍ਚਯਸ੍ਸ ਵਾਚ੍ਚਭੂਤੋ ਖਨ੍ਧਸਨ੍ਤਾਨੋ ਬੁਦ੍ਧੋ ਨਾਮਾਤਿ. ਞਾਣੇਨ ਪਨ ਮਲਕਰ ਕਿਲੇਸਾਨਂ ਸਵਾਸਨਾਨਂ ਨਿਰਵਸੇਸਂ ਪਹੀਨਤ੍ਤਾ ਚਿਤ੍ਤ ਸਨ੍ਤਾਨੋ ਸੁਦ੍ਧੋ ਹੋਤਿ. ਤਸ੍ਸ ਪਨ ਸੁਦ੍ਧਤ੍ਤਾ ਤਸ੍ਸ ਨਿਸ੍ਸਯਭੂਤੋ ਰੂਪਕਾਯੋਪਿ ਸੁਦ੍ਧੋ ਹੋਤਿ. ਤਸ੍ਮਾ ਤਪਚ੍ਚਯਸ੍ਸ ਵਾਚ੍ਚਭੂਤੋ ਅਰਹਤ੍ਤਮਗ੍ਗਞਾਣਾਦੀਨਂ ਆਧਾਰਭੂਤੋ ਖਨ੍ਧਸਨ੍ਤਾਨੋ ਨਾਮਪਞ੍ਞਤ੍ਤਿਵੋਹਾਰੇਨ ਬੁਦ੍ਧੋ ਨਾਮਾਤਿ. ਤੇਨ ਵੁਤ੍ਤਂ ਪਟਿਸਮ੍ਭਿਦਾਮਗ੍ਗਟ੍ਠਕਥਾਯਂ –

‘‘ਸਬ੍ਬੇਸੁ ਧਮ੍ਮੇਸੁ ਅਪ੍ਪਟਿਹਤਞਾਣ ਨਿਮਿਤ੍ਤਾਨੁਤ੍ਤਰਵਿਮੋਕ੍ਖਾਧਿਗਮਪਰਿਭਾਵਿਤਂ ਖਨ੍ਧਸਨ੍ਤਾਨਂ ਉਪਾਦਾਯ ਪਣ੍ਣਤ੍ਤਿਕੋ ਸਬ੍ਬਞ੍ਞੁਤਪਦਟ੍ਠਾਨਂ ਵਾ ਸਚ੍ਚਾਭਿਸਮ੍ਬੋਧਿਮੁਪਾਦਾਯ ਪਣ੍ਣਤ੍ਤਿਕੋ ਸਤ੍ਤਵਿਸੇਸੋ ਬੁਦ੍ਧੋ’’ਤਿ.

ਪਰਮਤ੍ਥਭੂਤੇ ਹਿ ਖਨ੍ਧਸਨ੍ਤਾਨੇ ਵੋਹਾਰਸੁਖਤ੍ਥਂ ਸਤ੍ਤ ਪੁਗ੍ਗਲਾਦਿਵੋਹਾਰੋ ਆਰੋਪਿਤੋ. ਏਵਂ ਵੋਹਾਰਪ੍ਪਤ੍ਤੋ ਸਤ੍ਤੋ ਯਾਵ ਬੋਧਿਞਾਣਤ੍ਥਾਯ ਨ ਵਾਯਮਤਿ, ਪਣਿਧਾਨਂ ਨ ਕਰੋਤਿ. ਤਾਵ ਸਤ੍ਤੋਤ੍ਵੇਵ ਸਙ੍ਖਂ ਗਚ੍ਛਤਿ. ਯਤੋ ਪਨ ਪਟ੍ਠਾਯ ਬੋਧਿਞਾਣਤ੍ਥਾਯ ਵਾਯਮਤਿ, ਪਣਿਧਾਨਂ ਕਰੋਤਿ, ਤਦਾ ਬੋਧਿਸਤ੍ਤੋ ਨਾਮ ਵੋਹਾਰੋ ਹੋਤਿ. ਸੋ ਪਨ ਯਦਾ ਬੋਧਿਞਾਣਂ ਲਭਤਿ, ਤਦਾ ਬੁਦ੍ਧੋ ਨਾਮ ਵੋਹਾਰੋ ਹੋਤਿ. ਤਸ੍ਮਾ ਪਞ੍ਞਤ੍ਤਿਸਙ੍ਖਾਤੋ ਖਨ੍ਧਸਨ੍ਤਾਨੋ ਬੁਦ੍ਧੋ ਨਾਮਾਤਿ ਦਟ੍ਠਬ੍ਬੋ. ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ ‘‘ਬੁਦ੍ਧੋਤਿ ਨੇਤਂ ਨਾਮਂ ਮਾਤਰਾ ਕਤਂ, ਨ ਪਿਤਰਾ ਕਤਂ, ਨ ਭਾਤਰਾ ਕਤਂ, ਨ ਭਗਿਨਿਯਾ ਕਤਂ, ਨ ਮਿਤ੍ਤਾਮਚ੍ਚੇਹਿ ਕਤਂ, ਨ ਞਾਤਿਸਾ ਲੋਹਿਤੇਹਿ ਕਤਂ, ਨ ਸਮਣਬ੍ਰਾਹ੍ਮਣੇਹਿ ਕਤਂ, ਨ ਦੇਵਤਾਹਿ ਕਤਂ, ਵਿਮੋਕ੍ਖਨ੍ਤਿਕਮੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਬੋਧਿਯਾ ਮੂਲੇ ਸਹ ਸਬ੍ਬਞ੍ਞੁਤਞਾਣਸ੍ਸ ਪਟਿਲਾਭਾ ਸਚ੍ਛਿਕਾ ਪਞ੍ਞਤ੍ਤਿ ਯਦਿਦਂ ਬੁਦ੍ਧੋਤਿ ਤਂ ਬੁਦ੍ਧ’’ਨ੍ਤਿ. ਅਥ ਵਾ ਪਟ੍ਠਾਨਨਯੇਨ ਵਾ ਨਾਨਨ੍ਤਰਿਕਨਯੇਨ ਵਾ ਞਾਣਪ੍ਪਧਾਨੋ ਸੁਵਿਸੁਦ੍ਧਖਨ੍ਧਸਨ੍ਤਾਨੋ ਬੁਦ੍ਧੋ ਨਾਮਾਤਿ ਅਤ੍ਥੋਪਿ ਯੁਜ੍ਜਤੇਵਾਤਿ.

ਨਿਗ੍ਰੋਧਬਿਮ੍ਬੋਤਿ ਨਿਗ੍ਰੋਧਰੁਕ੍ਖਸ੍ਸ ਪਰਿਮਣ੍ਡਲੋ ਵਿਯ ਪਰਿਮਣ੍ਡਲਸਰੀਰੋ. ਅਧੋਭਾਗਂ ਰੁਨ੍ਧਤੀਤਿ ਨਿਗ੍ਰੋਧੋ, ਵਟਰੁਕ੍ਖੋ. ਨਿਪੁਬ੍ਬਰੁਧਧਾਤੁ ਆਵਰਣੇ ਣ, ਉਸ੍ਸੋ ਗਾਗਮੋ. ਵਮਤਿ ਉਗ੍ਗਿਰਤੀਤਿ ਬਿਮ੍ਬੋ, ਸਰੀਰੋ. ਵਮੁਧਾਤੁ ਉਗ੍ਗਿਰਣੇ ਬੋ. ਵਮਿਸ੍ਸ ਵਸ੍ਸ ਬਿਤ੍ਤਂ. ਨਿਗ੍ਰੋਧਸ੍ਸ ਪਰਿਮਣ੍ਡਲੋ ਵਿਯ ਪਰਿਮਣ੍ਡਲੋ ਬਿਮ੍ਬੋ ਸਰੀਰੋ ਯਸ੍ਸਾਤਿ ਨਿਗ੍ਰੋਧਬਿਮ੍ਬੋ, ਬੁਦ੍ਧੋ. ਨਿਗ੍ਰੋਧਪਰਿਮਣ੍ਡਲਬਿਮ੍ਬੋਤਿ ਵਤ੍ਤਬ੍ਬੇ ਪਰਿਮਣ੍ਡਲਸਦ੍ਦਲੋਪੇ ਨੇਵਂ ਵੁਤ੍ਤਂ. ਯਥਾ ਹਿ ਪਣ੍ਣਾਸਹਤ੍ਥਤਾਯ ਵਾ ਸਤਹਤ੍ਥਤਾਯ ਵਾ ਸਮਕ੍ਖਨ੍ਧਸਾਖੋ ਨਿਗ੍ਰੋਧੋ ਦੀਘਤੋਪਿ ਵਿਤ੍ਥਾਰਤੋਪਿ ਏਕਪ੍ਪਮਾਣੋਵ ਹੋਤਿ, ਏਵਂ ਕਾਯਤੋਪਿ ਬ੍ਯਾਮਤੋਪਿ ਏਕਪ੍ਪਮਾਣੋ. ਯਥਾ ਅਞ੍ਞੇਸਂ ਕਾਯੋ ਵਾ ਦੀਘੋ ਹੋਤਿ, ਬ੍ਯਾਮੋ ਵਾ ਨ ਏਵਂ ਵਿਸਮਪ੍ਪਮਾਣੋਤਿ ਅਤ੍ਥੋ. ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤੇ ‘‘ਨਿਗ੍ਰੋਧਪਰਿਮਣ੍ਡਲੋ ਖੋ ਪਨ ਭਵਂ ਗੋਤਮੋ. ਯਾਵਤਕ੍ਵਾਸ੍ਸ ਕਾਯੋ, ਤਾਵ ਤਕ੍ਵਾਸ੍ਸ ਬ੍ਯਾਮੋ. ਯਾਵਤਕ੍ਵਾਸ੍ਸ ਬ੍ਯਾਮੋ, ਤਾਵ ਤਕ੍ਵਾਸ੍ਸ ਕਾਯੋ’’ਤਿ.

ਮੁਦੁਕਰਚਰਣੋਤਿ ਸਣ੍ਹਹਤ੍ਥਪਾਦੋ. ਏਤ੍ਥ ਚ ਮੁਦੁਸਦ੍ਦੋ ਸਣ੍ਹਸੁਖੁਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਮੁਦੇਤਿ ਮੋਦਯਤਿ ਸਤ੍ਤੇਤਿ ਮੁਦੁ, ਸਣ੍ਹਹਤ੍ਥਪਾਦੋ. ਮੁਦਧਾਤੁ ਮੋਦਨੇ ਹਾਸੇ ਵਾ ਉ. ਤਂ ਤਂ ਕਮ੍ਮਂ ਕਰੋਤਿ ਏਤੇਨਾਤਿ ਕਰੋ, ਹਤ੍ਥੋ ਚਰਤਿ ਗਚ੍ਛਤਿ ਏਤੇਨ ਤਂ ਤਂ ਠਾਨਨ੍ਤਿ ਚਰਣੋ, ਪਾਦੋ. ਚਰਧਾਤੁ ਗਤਿਯਂ ਯੁ. ਮੁਦੁਕਰੋ ਚ ਚਰਣੋ ਚ ਯਸ੍ਸਾਤਿ ਮੁਦੁਕਰਚਰਣੋ, ਬੁਦ੍ਧੋ. ਸਪ੍ਪਿ ਮਣ੍ਡੇ ਓਸਾਰਿਤ੍ਵਾ ਠਪਿਤਂ ਸਤਵਾਰਂ ਵਿਹਤਕਪ੍ਪਾਸਪਟਲਂ ਵਿਯ ਮੁਦੁਜਾਤਮਤ੍ਤਕੁਮਾਰਸ੍ਸ ਵਿਯ ਚ ਨਿਚ੍ਚਕਾਲਂ ਮੁਦੁਹਤ੍ਥ ਪਾਦੋਤਿ ਅਤ੍ਥੋ.

ਬ੍ਰਹ੍ਮਘੋਸੇਣਿਜਙ੍ਘੋਤਿ ਬ੍ਰਹ੍ਮਘੋਸੋ ਏਣਿਜਙ੍ਘੋਤਿ ਪਦਚ੍ਛੇਦੋ. ਬ੍ਰਹ੍ਮਘੋਸੋਤਿ ਬ੍ਰਹ੍ਮੁਨੋ ਸਰੋ ਵਿਯ ਅਟ੍ਠਙ੍ਗ ਸਮ੍ਪਨ੍ਨਸਰਵਨ੍ਤੋਤਿ ਅਤ੍ਥੋ. ਝਾਨਾਦਿਗੁਣੇਹਿ ਬ੍ਰੂਹਤਿ ਵਡ੍ਢਤੀਤਿਬ੍ਰਹ੍ਮਾ. ਬ੍ਰੂਹਧਾਤੁ ਮਨਿਪਚ੍ਚਯੋ. ਘੁਸਿਯਤਿ ਸਦ੍ਦਿਯਤਿ ਕਥਿਯਤੀਤਿ ਘੋਸੋ, ਸਰੋ. ਘੁਸਧਾਤੁ ਸਦ੍ਦੇ ਣ. ਬ੍ਰਹ੍ਮੁਨੋ ਘੋਸੋ ਸਰੋ ਬ੍ਰਹ੍ਮਘੋਸੋ, ਸੋ ਵਿਯ ਘੋਸੋ ਸਰੋ ਯਸ੍ਸਾਤਿ ਬ੍ਰਹ੍ਮਘੋਸੋ, ਬੁਦ੍ਧੋ. ਯਥਾ ਹਿ ਮਹਾਬ੍ਰਹ੍ਮੁਨੋ ਪਿਤ੍ਤਸੇਮ੍ਹੇਹਿ ਅਪਲਿਬੁਦ੍ਧਤ੍ਤਾ ਸਰੋ ਵਿਸੁਦ੍ਧੋ ਹੋਤਿ, ਏਵਮੇਵ ਤਥਾਗਤੇਨਪਿ ਕਤਂ ਕਮ੍ਮਂ ਵਤ੍ਥੁਂ ਸੋਧੇਤਿ, ਵਤ੍ਥੁਸ੍ਸ ਸੁਦ੍ਧਤ੍ਤਾ ਨਾਭਿਤੋ ਪਟ੍ਠਾਯ ਸਮੁਟ੍ਠਹਨ੍ਤੋ ਸਰੋ ਵਿਸੁਦ੍ਧੋ ਅਟ੍ਠਙ੍ਗਸਮਨ੍ਨਾਗਤੋਤਿ ਅਤ੍ਥੋ. ਤਸ੍ਮਾ ਬ੍ਰਹ੍ਮਘੋਸੋ ਵਿਯ ਅਟ੍ਠਙ੍ਗਸਮਨ੍ਨਾਗਤਸਰਵਨ੍ਤੋਤਿ ਥੋਮੇਤਿ.

ਏਣਿਜਙ੍ਘੋਤਿ ਏਣਿਮਿਗਸ੍ਸ ਜਙ੍ਘਾ ਵਿਯ ਸੁਵਟ੍ਟਜਾਣੁਕੋ. ਏਤਿ ਗਚ੍ਛਤੀਤਿ ਏਣਿ, ਮਿਗੋ. ਇਧਾਤੁ ਗਤਿਯਂ ਣਿ. ਜਾਯਤਿ ਕਮਨਮੇਤਾਯਾਤਿ ਜਙ੍ਘੋ, ਜਾਣੁ. ਜਨਧਾਤੁ ਜਨਨੇ ਘੋ. ਨਸ੍ਸ ਨਿਗ੍ਗਹਿਤਾਦੇਸੋ. ਏਣਿਮਿਗਸ੍ਸ ਜਙ੍ਘੋ ਵਿਯ ਜਙ੍ਘੋ ਯਸ੍ਸ ਸੋਤਿ ਏਣਿਜਙ੍ਘੋ, ਬੁਦ੍ਧੋ. ਯਥਾ ਹਿ ਏਣਿਮਿਗਸ੍ਸ ਜਙ੍ਘੋ ਸੁਵਟ੍ਟੋ ਹੋਤਿ, ਏਵਮੇਵ ਬੁਦ੍ਧਸ੍ਸ ਮਂਸੁਸ੍ਸਦੇਨ ਪਰਿਪੁਣ੍ਣਜਙ੍ਘੋ. ਨ ਏਕਤੋ ਬਨ੍ਧਪਿਣ੍ਡਿਕਮਂਸੋ. ਸਮਨ੍ਤਤੋ ਸਮਸਣ੍ਠਿਤੇਨ ਮਂਸੇਨ ਪਰਿਕ੍ਖਿਤ੍ਤਾਹਿ ਸੁਵਟ੍ਟਿਤਾਹਿ ਸਾਲਿ ਗਬ੍ਭਯਵਗਬ੍ਭਸਦਿਸਾਹਿ ਜਙ੍ਘਾਹਿ ਸਮਨ੍ਨਾਗਤੋਤਿ ਅਤ੍ਥੋ. ਤਸ੍ਮਾ ਏਣਿਮਿਗਜਙ੍ਘਸਦਿਸੋ ਸੁਵਟ੍ਟਜਾਣੁਕੋਤਿ ਥੋਮੇਤਿ.

ਕੋਸਚ੍ਛਾਦਙ੍ਗਜਾਤੋਤਿ ਕੋਸਚ੍ਛਾਦਅਙ੍ਗਜਾਤੋਤਿ ਪਦਚ੍ਛੇਦੋ. ਉਸਭਵਾਰਣਾਦੀਨਂ ਅਙ੍ਗਜਾਤੋ ਵਿਯ ਸੁਵਣ੍ਣਪਦੁਮ ਕਣ੍ਣਿਕਸਦਿਸੇਨ ਵਤ੍ਥਕੋਸੇਨ ਪਟਿਚ੍ਛਨ੍ਨੇਨ ਗੁਯ੍ਹਙ੍ਗਜਾਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਕੁਸਤਿ ਤਿਟ੍ਠਤਿ ਏਤ੍ਥਾਤਿ ਕੋਸੋ. ਕੁਸਧਾਤੁ ਗਤਿਯਂ ਣ. ਛਾਦਿਯਤੀਤਿ ਛਾਦੋ. ਛਦਧਾਤੁ ਪਟਿਚ੍ਛਨ੍ਨੇ ਣ. ਕੋਸੇਨ ਛਾਦੋ ਕੋਸਚ੍ਛਾਦੋ. ਅਙ੍ਗੇ ਸਰੀਰਾਵਯਵੇ ਜਾਤਨ੍ਤਿ ਅਙ੍ਗਜਾਤਂ. ਕੋਸਚ੍ਛਾਦਂ ਅਙ੍ਗਜਾਤਂ ਬ੍ਯਞ੍ਜਨਂ ਯਸ੍ਸਾਤਿ ਕੋਸਚ੍ਛਾਦਙ੍ਗਜਾਤੋ, ਬੁਦ੍ਧੋ. ਭਗਵਤੋ ਹਿ ਉਸਭਵਾਰਣਾਦੀਨਂ ਅਙ੍ਗਜਾਤੋ ਵਿਯ ਸੁਵਣ੍ਣਪਦੁਮਕਣ੍ਣਿ ਕਸਦਿਸੇਨ ਕੋਸੋਹਿਤਵਤ੍ਥਗੁਯ੍ਹੇਨ ਬ੍ਯਞ੍ਜਨੇਨ ਸਮਨ੍ਨਾਗਤੋਤਿ ਅਤ੍ਥੋ. ਤਸ੍ਮਾ ਕੋਸਚ੍ਛਾਦਙ੍ਗਜਾਤਸਮ੍ਪਨ੍ਨੋਤਿ ਥੋਮੇਤਿ. ਪੁਨਰਪੀਤਿ ਪੁਨ ਅਪੀਤਿ ਪਦਚ੍ਛੇਦੋ. ਰਕਾਰਾ ਗਮੋ. ਪੁਨਾਤਿ ਏਸੋ ਅਤ੍ਥਨ੍ਤਰਤ੍ਥੇ ਨਿਪਾਤੋ. ਅਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਸੁਗਤੋਤਿ ਬੁਦ੍ਧੋ. ਸੋ ਹਿ ਸੁਨ੍ਦਰਂ ਨਿਬ੍ਬਾਨਂ ਗਚ੍ਛਤੀਤਿ ਸੁਗਤੋਤਿ ਵੁਚ੍ਚਤਿ.

ਸੁਪ੍ਪਤਿਟ੍ਠਿਤਪਾਦੋਤਿ ਸੁਵਣ੍ਣਪਾਦੁਕਤਲਮਿਵ ਭੂਮਿਯਂ ਸਮਂ ਸੁਟ੍ਠੁ ਪਤਿਟ੍ਠਿਤਪਾਦੋ. ਸਮਂ ਸੁਟ੍ਠੁ ਭੂਮਿਯਂ ਪਤਿਟ੍ਠਤੀਤਿ ਸੁਪ੍ਪਤਿਟ੍ਠਿਤੋ, ਪਾਦੋ. ਸੁ ਪਤਿ ਪੁਬ੍ਬੋ ਠਾ ਧਾਤੁ ਗਤਿਨਿਵਤ੍ਤਿਯਂ ਤ. ਪਜ੍ਜਤਿ ਗਚ੍ਛਤਿ ਏਤੇਨਾਤਿ ਪਾਦੋ. ਪਦਧਾਤੁ ਗਤਿਮ੍ਹਿ ਣ. ਸੁਪ੍ਪਤਿਟ੍ਠਿਤੋ ਪਾਦੋ ਯਸ੍ਸਾਤਿ ਸੁਪ੍ਪਤਿਟ੍ਠਿਤਪਾਦੋ, ਸੁਗਤੋ. ਯਥਾ ਹਿ ਅਞ੍ਞੇਸਂ ਭੂਮਿਯਂ ਪਾਦਂ ਠਪੇਨ੍ਤਾਨਂ ਅਗ੍ਗਤਲਂ ਵਾ ਪਣ੍ਹਿਂ ਵਾ ਪਸ੍ਸਂ ਵਾ ਪਠਮਂ ਫੁਸਤਿ ਵੇਮਜ੍ਝਂ ਵਾ ਪਨ ਛਿਦ੍ਦਂ ਹੋਤਿ, ਉਕ੍ਖਿਪਨ੍ਤਾਨਮ੍ਪਿ ਅਗ੍ਗਤਲਾਦੀਸੁ ਏਕਕੋਟ੍ਠਾਸੋਵ ਪਠਮਂ ਉਟ੍ਠਹਤਿ, ਨ ਏਵਂ ਤਸ੍ਸ. ਤਸ੍ਸ ਪਨ ਸੁਵਣ੍ਣਪਾਦੁਕਤਲਂ ਵਿਯ ਏਕਪ੍ਪਹਾਰੇਨੇਵ ਸਕਲਪਾਦਤਲਂ ਭੂਮਿਂ ਫੁਸਤਿ, ਭੂਮਿਤੋ ਉਟ੍ਠਹਤਿ. ਸਚੇਪਿ ਹਿ ਭਗਵਾ ਅਨੇਕਸਤਪੋਰਿਸਂ ਨਰਕਂ ਅਕ੍ਕਮਿਸ੍ਸਾਮੀਤਿ ਪਾਦਂ ਨੀਹਰਤਿ, ਤਾਵਦੇਵ ਨਿਨ੍ਨਟ੍ਠਾਨਂ ਵਾਤਪੂਰਿਤਂ ਵਿਯ ਕਮ੍ਮਾਰਭਸ੍ਤਂ ਉਨ੍ਨਮਿਤ੍ਵਾ ਪਥਵੀਸਮਂ ਹੋਤਿ, ਉਨ੍ਨਤਟ੍ਠਾਨਮ੍ਪਿ ਅਨ੍ਤੋ ਪਵਿਸਤਿ, ਦੂਰੇ ਅਕ੍ਕਮਿਸ੍ਸਾਮੀਤਿ ਅਭਿਨੀਹਰਨ੍ਤਸ੍ਸ ਸਿਨੇਰੁਪ੍ਪਮਾਣੋਪਿ ਪਬ੍ਬਤੋ ਸੇਦਿਤਵੇਤ੍ਥਙ੍ਕੁਰੋ ਵਿਯ ਨਮਿਤ੍ਵਾ ਪਾਦਸਮੀਪਂ ਆਗਚ੍ਛਤਿ. ਤਥਾ ਹਿਸ੍ਸ ਯਮਕਪਾਟਿਹਾਰਿਯਂ ਕਤ੍ਵਾ ਯੁਗਨ੍ਧਰਪਬ੍ਬਤਂ ਅਕ੍ਕਮਿਸ੍ਸਾਮੀਤਿ ਪਾਦੇ ਅਭਿਨੀਹਰਤੋ ਪਬ੍ਬਤੋ ਨਮਿਤ੍ਵਾ ਪਾਦਸਮੀਪਂ ਆਗਤੋ. ਸੋ ਤਂ ਅਕ੍ਕਮਿਤ੍ਵਾ ਦੁਤਿਯਪਾਦੇਨ ਤਾਵਤਿਂਸਭਵਨਂ ਅਕ੍ਕਮਿ. ਨ ਹਿ ਚਕ੍ਕਲਕ੍ਖਣੇਨ ਪਤਿਟ੍ਠਾਤਬ੍ਬਟ੍ਠਾਨਂ ਵਿਸਮਂ ਭਵਿਤੁਂ ਸਕ੍ਕੋਤਿ. ਖਾਣੁ ਵਾ ਕਣ੍ਡਕੋ ਵਾ ਸਕ੍ਖਰਕਥਲਾ ਵਾ ਉਚ੍ਚਾਰਪਸ੍ਸਾਵੋ ਵਾ ਖੇਲ਼ਸਿਙ੍ਘਣਿਕਾਦੀਨਿ ਵਾ ਪੁਰਿਮਤਰਾਵ ਅਪਗਚ੍ਛਨ੍ਤਿ. ਤਤ੍ਥ ਤਤ੍ਥੇਵ ਪਥਵਿਂ ਪਵਿਸਨ੍ਤਿ. ਤਥਾਗਤਸ੍ਸ ਹਿ ਸੀਲਤੇਜੇਨ ਪਞ੍ਞਾਤੇਜੇਨ ਧਮ੍ਮਤੇਜੇਨ ਦਸਨ੍ਨਂ ਪਾਰਮੀਨਂ ਆਨੁਭਾਵੇਨ ਅਯਂ ਮਹਾਪਥਵੀ ਸਮਾ ਮੁਦੁ ਪੁਪ੍ਫਾਕਿਣ੍ਣਾ ਹੋਨ੍ਤਿ. ਤਤ੍ਰ ਤਥਾਗਤੋ ਸਮਂ ਪਾਦਂ ਨਿਕ੍ਖਿਪਤਿ. ਸਮਂ ਉਦ੍ਧਰਤਿ, ਸਬ੍ਬਾਵਨ੍ਤੇਹਿ ਪਾਦਤਲੇਹਿ ਭੂਮਿਂ ਫੁਸਤਿ, ਤਸ੍ਮਾ ਸੁਪ੍ਪਤਿਟ੍ਠਿਤਪਾਦੋਤਿ ਥੋਮੇਤਿ.

ਮੂਦੋ ਦਾਤੁਣ੍ਣਲੋਮੋਤਿ ਮੁਦ ਓਦਾਤ ਉਣ੍ਣਲੋਮੋਤਿ ਪਦਚ੍ਛੇਦੋ. ਭਮੁਕਨ੍ਤਰੇ ਜਾਤੋ ਸਣ੍ਹਸੁਖੁਮੋ ਸੇਤੋ ਸੁਦ੍ਧੋ ਉਣ੍ਣਲੋਮਵਨ੍ਤੋਤਿ ਅਤ੍ਥੋ. ਏਤ੍ਥ ਚ ਮੁਦਸਦ੍ਦੋ ਸਣ੍ਹਸੁਖੁਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਮੁਦੇਤਿ ਮੁਦਯਤਿ ਸਤ੍ਤੇਤਿ ਮੁਦੋ, ਸੁਖੁਮੋ. ਮੁਦਧਾਤੁ ਮੋਦਨੇ ਅ. ਅਵਦਾਯਤਿ ਖਣ੍ਡਿਯਤੀਤਿ ਓਦਾਤੋ. ਅਵਪੁਬ੍ਬ ਦਾਧਾਤੁ ਅਵਖਣ੍ਡਨੇ ਤ. ਅਥ ਵਾ ਅਵਦਾਯਤਿ ਸੁਜ੍ਝਤੀਤਿ ਓਦਾਤੋ, ਯਥਾ ਵੋਦਾਨਨ੍ਤਿ. ਮੁਦੋ ਚ ਓਦਾਤੋ ਚ ਮੁਦੋਦਾਤੋ, ਉਣਤਿ ਉਦ੍ਧਂ ਗਚ੍ਛਤੀਤਿ ਉਣ੍ਣਾ, ਲੋਮੋ. ਉਣ੍ਣਸਦ੍ਦੋ ਹਿ ਲੋਕੇ ਲੋਮਸਦ੍ਦਪਰਿਯਾਯੋਤਿ ਵਦਨ੍ਤਿ ਆਚਰਿਯਾ. ਮਂਸਸ੍ਸ ਉਪਰਿ ਪਵਤ੍ਤਤੀਤਿ ਅਤ੍ਥੋ. ਉਣਧਾਤੁ ਗਤਿਯਂ ਣ. ਮਂਸਚਮ੍ਮਾਨਿ ਲੁਨਾਤਿ ਛਿਨ੍ਦਤੀਤਿ ਲੋਮੋ. ਲੁਧਾਤੁ ਛਿਨ੍ਦਨੇ ਮਨਿਪਚ੍ਚਯੋ. ਲੁਨਿਤਬ੍ਬੋਤਿ ਵਾ ਲੋਮੋ, ਉਣ੍ਣਾ ਚ ਸਾ ਲੋਮੋ ਚਾਤਿ ਉਣ੍ਣਲੋਮੋ, ਲੋਮਵਿਸੇਸੋ. ਮੁਦੋ ਦਾਤੋ ਉਣ੍ਣਲੋਮੋ ਯਸ੍ਸ ਸੋਤਿ ਮੁਦੋਦਾਤੁਣ੍ਣ ਲੋਮੋ, ਸੁਗਤੋ. ਉਣ੍ਣਾਲੋਮਂ ਪਨ ਭਗਵਤੋ ਦ੍ਵਿਨ੍ਨਂ ਭਮੁਕਾਨਂ ਵੇਮਜ੍ਝੇ ਨਾਸਿਮਤ੍ਥਕੇਯੇਵ ਜਾਤਂ. ਉਗ੍ਗਨ੍ਤ੍ਵਾ ਪਨ ਨਲਾਟਮਜ੍ਝੇ ਜਾਤਂ. ਸਪ੍ਪਿਮਣ੍ਡੇ ਓਸਾਰੇਤ੍ਵਾ ਠਪਿਤਸਤ ਵਿਤਤਕਪ੍ਪਾਸਪਟਲਂ ਵਿਯ ਮੁਦਂ. ਪਰਿਸੁਦ੍ਧਓਸਧਿਤਾਰਕਵਣ੍ਣਂ ਵਿਯ ਚ ਸਿਪ੍ਪਲਿਤੂਲਲਤਾਤੂਲਂ ਵਿਯ ਚ ਵਿਗਤਮਲੇਨ ਓਦਾਤਂ ਉਣ੍ਣਾਲੋਮਂ ਅਤ੍ਥਿ, ਨ ਅਞ੍ਞੇਸਨ੍ਤਿ ਅਤ੍ਥੋ. ਵੁਤ੍ਤਞ੍ਹੇਤਂ ਬ੍ਰਹ੍ਮਾਯੁਸੁਤ੍ਤੇ –

‘‘ਉਣ੍ਣਾ ਖੋ ਪਨਸ੍ਸ ਭੋਤੋ ਗੋਤਮਸ੍ਸ ਭਮੁਕਨ੍ਤਰੇ ਜਾਤਾ ਓਦਾਤਾ ਮੁਦੁ ਤੂਲਸਨ੍ਨਿਭਾ’’ਤਿ.

ਤਂ ਪਨੇਤਂ ਕੋਟਿਯਂ ਗਹੇਤ੍ਵਾ ਆਕਡ੍ਢਿਯਮਾਨਂ ਉਪਡ੍ਢ ਬਾਹੁਪ੍ਪਮਾਣਂ ਹੋਤਿ. ਵਿਸ੍ਸਟ੍ਠਂ ਦਕ੍ਖਿਣਾਵਟ੍ਟਵਸੇਨ ਆਵਟ੍ਟਿਤ੍ਵਾ ਉਦ੍ਧਗ੍ਗਾ ਹੁਤ੍ਵਾ ਸਨ੍ਤਿਟ੍ਠਤਿ. ਸੁਵਣ੍ਣਫਲਕਮਜ੍ਝੇ ਠਪਿਤਰਜਤ ਪੁਪ੍ਫੁਲ਼ਕਂ ਵਿਯ, ਸੁਵਣ੍ਣਘਟਤੋ ਨਿਕ੍ਖਮ੍ਮਮਾਨਂ ਖੀਰਧਾਰਂ ਵਿਯ ਅਰੁਣਪ੍ਪਭਾਰਞ੍ਜਿਤੇ ਗਗਨਤਲੇ ਓਸਧਿਤਾਰਕਂ ਵਿਯ ਚ ਅਤਿਮਨੋਹਰਾਯ ਸਿਰਿਯਾ ਵਿਰੋਚਤਿ, ਤਸ੍ਮਾ ਮੂਦੋਦਾਤੁਣ੍ਣਲੋਮੋਤਿ ਥੋਮੇਤਿ.

ਅਥਮਪੀਤਿ ਤਦਞ੍ਞਂ ਅਪਿ. ਸੁਗਤੋਤਿ ਬੁਦ੍ਧੋ. ਸੋ ਹਿ ਸੁਨ੍ਦਰਵਾਚਂ ਗਦਤਿ ਵਦਤੀਤਿ ਸੁਗਤੋਤਿ ਵੁਚ੍ਚਤਿ. ਬ੍ਰਹ੍ਮੁਜੁਗ੍ਗਤ੍ਤਭਾਵੋਤਿ ਬ੍ਰਹ੍ਮਉਜੁਉਗ੍ਗਤਅਤ੍ਤਭਾਵੋਤਿ ਪਦਵਿਭਾਗੋ. ਬ੍ਰਹ੍ਮੁਨੋ ਉਜੁ ਉਗ੍ਗਤਅਤ੍ਤਭਾਵੋ ਵਿਯ ਉਜੁਮੇਵ ਉਗ੍ਗਤਅਤ੍ਤਭਾਵੋ ਦੀਘਸਰੀਰੋਤਿ ਅਤ੍ਥੋ. ਬ੍ਰਹ੍ਮਾਯੁਸੁਤ੍ਤੇ ਪਨ ‘‘ਬ੍ਰਹ੍ਮੁਜੁਗਤ੍ਤੋ’’ਤਿਪਾਠੋ. ਤਦਟ੍ਠਕਥਾਯਞ੍ਚ ਬ੍ਰਹ੍ਮੁਜੁਗਤ੍ਤੋਤਿ ਬ੍ਰਹ੍ਮਾ ਵਿਯ ਉਜੁਗਤ੍ਤੋ ਉਜੁਮੇਵ ਉਗ੍ਗਤਦੀਘਸਰੀਰੋਤਿ ਵਿਵਰਤਿ. ਤਂ ਪਨ ਸਨ੍ਧਾਯ ਬ੍ਰਹ੍ਮੁਜੁਗ੍ਗਤ੍ਤਭਾਵੋਤਿ ਵੁਤ੍ਤਂ.

ਅਯਂ ਪਨੇਤ੍ਥ ਵਚਨਤ੍ਥੋ. ਝਾਨਾਦਿਗੁਣੇਹਿ ਉਪਰੂਪਰਿਬ੍ਰੂਹਤਿ ਵਡ੍ਢਤੀਤਿ ਬ੍ਰਹ੍ਮਾ. ਬ੍ਰੂਹਧਾਤੁ ਵਡ੍ਢਨੇ ਮ, ਅਰਤਿ ਅਵਙ੍ਕਭਾਵੇਨ ਪਵਤ੍ਤਤੀਤਿ ਉਜੁ, ਅਵਙ੍ਕੋ. ਅਰਧਾਤੁ ਗਤਿਯਂ ਜੁਪਚ੍ਚਯੋ. ਅਰਿਸ੍ਸ ਉਆਦੇਸੋ. ਉਦ੍ਧਂ ਗਚ੍ਛਤਿ ਪਾਪੁਣਾਤੀਤਿ ਉਗ੍ਗਤੋ. ਉਪੁਬ੍ਬ ਗਮੁਧਾਤੁ ਗਤਿਯਂ ਤੋ. ਆਹਿਤੋ ਆਰੋਪਿਤੋ ਅਹਂ ਮਾਨੋ ਏਤ੍ਥਾਤਿ ਅਤ੍ਤਾ, ਸਰੀਰੋ. ਆਪੁਬ੍ਬ ਧਾ ਧਾਤੁ ਰੋਪਨੇ ਮਨਿਪਚ੍ਚਯੋ ਤੁਪਚ੍ਚਯੋ ਵਾ. ਧਸ੍ਸ ਤੋ. ਮਸ੍ਸ ਤੋ. ਅਥ ਵਾ ਸੁਖਦੁਕ੍ਖਂ ਅਦਤਿ ਅਨੁਭਵਤੀਤਿ ਅਤ੍ਤਾ. ਅਦਧਾਤੁ ਅਨੁਭਵਨੇ ਮਨਿਪਚ੍ਚਯੋ. ਕਚ੍ਚਾਯਨਸਦ੍ਦਸਤ੍ਥੇ ਪਨ ‘‘ਸੁਖਦੁਕ੍ਖਂ ਅਦਤਿ ਭਕ੍ਖਤੀਤਿ ਅਤ੍ਤਾ, ਜਾਤਿਜਰਾਮਰਣਾਦੀਹਿ ਅਦਿਯਤੇ ਭਕ੍ਖਿਯਤੇਤਿ ਵਾ ਅਤ੍ਤਾ. ਆਤੁਮਾ’’ਤਿ ਵੁਤ੍ਤਂ. ਖ੍ਯਾਦੀਹਿ ਮਨਿਮਚ ਤੋਵਾਤਿ ਸੁਤ੍ਤੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਅਤ੍ਤਾਤਿ ਅਭਿਧਾਨਂ ਬੁਦ੍ਧਿ ਚ ਭਵਨ੍ਤਿ ਏਤਸ੍ਮਾਤਿ ਅਤ੍ਤਭਾਵੋ, ਰੂਪਕਾਯੋ. ਅਨੁਟੀਕਾਯਂ ਪਨ ‘‘ਆਹਿਤੋ ਅਹਂ ਮਾਨੋ ਏਤ੍ਥਾਤਿ ਅਤ੍ਤਾ, ਸੋਏਵ ਭਵਤਿ ਉਪ੍ਪਜ੍ਜਤਿ ਨ ਪਰਪਰਿਕਪ੍ਪਿਤੋ ਵਿਯ ਨਿਚ੍ਚੋਤਿ ਅਤ੍ਤਭਾਵੋ. ਅਤ੍ਤਾਤਿ ਵਾ ਦਿਟ੍ਠਿਗਤਿਕੇਹਿ ਗਹੇਤਬ੍ਬਾਕਾਰੇਨ ਭਵਤਿ ਪਵਤ੍ਤਤੀਤਿ ਅਤ੍ਤਭਾਵੋ’’ਤਿ ਵੁਤ੍ਤਂ. ਬ੍ਰਹ੍ਮੁਨੋ ਉਜੁਮੇਵ ਉਗ੍ਗਤੋ ਅਤ੍ਤਭਾਵੋ ਵਿਯ ਉਜੁਮੇਵ ਉਗ੍ਗਤੋ ਅਤ੍ਤਭਾਵੋ ਯਸ੍ਸ ਸੋਤਿ ਬ੍ਰਹ੍ਮੁਜੁਗ੍ਗਤ੍ਤਭਾਵੋ, ਸੁਗਤੋ. ਯੇਭੁਯ੍ਯੇਨ ਹਿ ਸਤ੍ਤਾ ਖਨ੍ਧੇ ਕਟਿਯਂ ਜਾਣੁਸੂਤਿ ਤੀਸੁ ਠਾਨੇਸੁ ਨਮਨ੍ਤਿ. ਥੋਕਂ ਕਟਿਯਂ ਨਮਨ੍ਤਾ ਪਚ੍ਛਤੋ ਨਮਨ੍ਤਿ. ਇਤਰੇਸੁ ਦ੍ਵੀਸੁ ਠਾਨੇਸੁ ਪੁਰਤੋ. ਦੀਘਸਰੀਰਾ ਪਨੇਕੇ ਪਸ੍ਸਾ ਵਙ੍ਕਾ ਹੋਨ੍ਤਿ, ਏਕੇ ਮੁਖਂ ਉਨ੍ਨਮੇਤ੍ਵਾ ਨਕ੍ਖਤ੍ਤਾਨਿ ਗਣਯਨ੍ਤਾ ਵਿਯ ਚਰਨ੍ਤਿ, ਏਕੇ ਅਪ੍ਪਮਂਸਲੋਹਿਤਾ ਸੂਲਸਦਿਸਾ ਹੋਨ੍ਤਿ, ਪਵੇਧਮਾਨਾ ਗਚ੍ਛਨ੍ਤਿ, ਤਥਾਗਤੋ ਪਨ ਉਜੁਮੇਵ ਉਗ੍ਗਨ੍ਤ੍ਵਾ ਦੀਘਪ੍ਪਮਾਣੋ ਦੇਵਨਗਰੇ ਉਸ੍ਸਿਤਸੁਵਣ੍ਣ ਤੋਰਣਂ ਵਿਯ ਹੋਤਿ. ਤਸ੍ਮਾ ਬ੍ਰਹ੍ਮੁਜੁਗ੍ਗਤ੍ਤਭਾਵੋਤਿ ਥੋਮੇਤਿ.

ਨੀਲਕ੍ਖੀਤਿ ਨੀਲਅਕ੍ਖੀਤਿ ਪਦਚ੍ਛੇਦੋ. ਅਤਿਨੀਲਨੇਤ੍ਤੇਨ ਸਮਨ੍ਨਾਗਤੋਤਿ ਅਤ੍ਥੋ. ਇਕ੍ਖਤਿ ਪਸ੍ਸਤਿ ਅਨੇਨ ਰੂਪਾਰਮ੍ਮਣਂ ਸਮਵਿਸਮਂ ਵਾਤਿ ਅਕ੍ਖਿ, ਨੇਤ੍ਤਂ. ਇਕ੍ਖਧਾਤੁ ਦਸ੍ਸਨੇ ਇ. ਇਸ੍ਸ ਅਤ੍ਤਂ. ਨੀਲਾ ਅਤਿਨੀਲਾ ਅਕ੍ਖਿ ਨੇਤ੍ਤਾ ਯਸ੍ਸਾਤਿ ਨੀਲਕ੍ਖਿ, ਸੁਗਤੋ. ਭਗਵਤੋ ਹਿ ਨ ਸਕਲਨੀਲਕ੍ਖਿਵ ਹੋਤਿ. ਨੀਲਯੁਤ੍ਤਟ੍ਠਾਨੇ ਪਨਸ੍ਸ ਉਮ੍ਮਾਰਪੁਪ੍ਫਸਦਿਸੇਨ ਅਤਿਵਿਸੁਦ੍ਧੇਨ ਨੀਲਵਣ੍ਣੇਨ ਸਮਨ੍ਨਾਗਤਾਨਿ ਅਕ੍ਖੀਨਿ ਹੋਨ੍ਤਿ. ਪੀਤਯੁਤ੍ਤਟ੍ਠਾਨੇ ਕਣਿਕਾਰਪੁਪ੍ਫਸਦਿਸੇਨ ਲੋਹਿਤਵਣ੍ਣੇਨ. ਲੋਹਿਤਯੁਤ੍ਤਟ੍ਠਾਨੇ ਬਨ੍ਧੁਜੀਵਕਪੁਪ੍ਫਸਦਿਸੇਨ ਲੋਹਿਤਵਣ੍ਣੇਨ. ਸੇਤ ਯੁਤ੍ਤਟ੍ਠਾਨੇ ਓਸਧਿਤਾਰਕਸਦਿਸੇਨ ਸੇਤਵਣ੍ਣੇਨ. ਕਾਲ਼ ਯੁਤ੍ਤਟ੍ਠਾਨੇ ਅਦ੍ਦਾਰਿਟ੍ਠਕਸਦਿਸੇਨ ਕਾਲ਼ਵਣ੍ਣੇਨ ਸਮਨ੍ਨਾਗਤਾਨਿ ਸੁਵਣ੍ਣਵਿਮਾਨੇ ਉਗ੍ਘਾਟਿਤਮਣਿਸੀਹਪਞ੍ਜਰਸਦਿਸਾਨਿ ਖਾਯਨ੍ਤਿ. ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ ‘‘ਮਂਸਚਕ੍ਖੁਮ੍ਹਿ ਭਗਵਤੋ ਪਞ੍ਚਵਣ੍ਣਾ ਸਂਵਿਜ੍ਜਨ੍ਤਿ. ਨੀਲੋ ਚ ਵਣ੍ਣੋ, ਪੀਤਕੋ ਚ ਵਣ੍ਣੋ, ਲੋਹਿਤਕੋ ਚ ਵਣ੍ਣੋ, ਕਣ੍ਹੋ ਚ ਵਣ੍ਣੋ, ਓਦਾਤੋ ਚ ਵਣ੍ਣੋ ਅਕ੍ਖਿਲੋਮਾਨਿ ਚ ਭਗਵਤੋ, ਯਤ੍ਥ ਚ ਅਕ੍ਖਿ ਲੋਮਾਨਿ ਪਤਿਟ੍ਠਿਤਾਨਿ. ਤਂ ਨੀਲਂ ਹੋਤਿ ਸੁਨੀਲਂ ਪਾਸਾਦਿਕਂ ਦਸ੍ਸਨੇਯ੍ਯਂ ਉਮ੍ਮਾਰਪੁਪ੍ਫਸਮਾਨਂ. ਤਸ੍ਸ ਪਰਤੋ ਪੀਤਕਂ ਹੋਤਿ ਸੁਪੀਤਕਂ ਸੁਵਣ੍ਣਵਣ੍ਣਂ ਪਾਸਾਦਿਕਂ ਦਸ੍ਸਨੇਯ੍ਯਂ ਕਣਿਕਾਰਪੁਪ੍ਫਸਮਾਨਂ. ਉਭਤੋ ਅਕ੍ਖਿਕੁਟਾਨਿ ਭਗਵਤੋ ਲੋਹਿਤਕਾਨਿ ਹੋਨ੍ਤਿ ਸੁਲੋਹਿਕਾਨਿ ਪਾਸਾਦਿਕਾਨਿ ਦਸ੍ਸਨੇਯ੍ਯਾਨਿ ਇਨ੍ਦਗੋਪਕਸਮਾਨਾਨਿ. ਮਜ੍ਝੇ ਕਣ੍ਹਂ ਹੋਤਿ ਸੁਕਣ੍ਹਂ ਅਲੂਖਂ ਸੁਦ੍ਧਂ ਪਾਸਾਦਿਕਂ ਦਸ੍ਸਨੇਯ੍ਯਂ ਅਦ੍ਦਾਰਿਟ੍ਠਕ ਸਮਾਨਂ. ਤਸ੍ਸ ਪਰਤੋ ਓਦਾਤਂ ਹੋਤਿ ਸੁਓਦਾਤਂ ਸੇਤਂ ਪਣ੍ਡਰਂ ਪਾਸਾਦਿਕਂ ਦਸ੍ਸਨੇਯ੍ਯਂ ਓਸਧਿਤਾਰਕਸਮਾਨ’’ਨ੍ਤਿ. ਭਗਵਾ ਪਨ ਤੇਨ ਮਂਸਚਕ੍ਖੁਨਾ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇਪਿ ਸਮਨ੍ਤਾ ਯੋਜਨਂ ਪਸ੍ਸਤਿ ਦਿਵਾ ਚੇਵ ਰਤ੍ਤਿਞ੍ਚ.

ਵੁਤ੍ਤਞ੍ਹਿ ਮਹਾਨਿਦ੍ਦੇਸੇ –

‘‘ਤੇਨ ਭਗਵਾ ਪਾਕਤਿਕੇਨ ਮਂਸਚਕ੍ਖੁਨਾ ਅਤ੍ਤਭਾਵ ਪਰਿਯਾਪਨ੍ਨੇਨ ਪੁਰਿਮਸੁਚਰਿਤਕਮ੍ਮਾਭਿਨਿਬ੍ਬਤ੍ਤੇਨ ਸਮਨ੍ਤਾ ਯੋਜਨਂ ਪਸ੍ਸਤਿ ਦਿਵਾ ਚੇਵ ਰਤ੍ਤਿਞ੍ਚ. ਯਦਾਪਿ ਚਤੁਰਙ੍ਗਸਮਨ੍ਨਾਗਤੋ ਅਨ੍ਧਕਾਰੋ ਹੋਤਿ, ਸੂਰਿਯੋ ਚ ਅਤ੍ਥਙ੍ਗਮਿਤੋ ਹੋਤਿ, ਕਾਲ਼ਪਕ੍ਖੋ ਚ ਉਪੋਸਥੋ ਹੋਤਿ, ਤਿਬ੍ਬੋ ਚ ਵਨਸਣ੍ਡੋ ਹੋਤਿ, ਮਹਾ ਚ ਕਾਲ਼ਮੇਘੋ ਅਬ੍ਭੁਟ੍ਠਿਤੋ ਹੋਤਿ, ਏਵਰੂਪੇਪਿ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇ ਸਮਨ੍ਤਾ ਯੋਜਨਂ ਪਸ੍ਸਤਿ. ਨਤ੍ਥਿ ਸੋ ਕੁਟ੍ਟੋ ਵਾ ਕਵਾਟਂ ਵਾ ਪਾਕਾਰੋ ਵਾ ਪਬ੍ਬਤੋ ਵਾ ਗਚ੍ਛੋ ਵਾ ਲਤਾ ਵਾ ਆਵਰਣਂ ਰੂਪਾਨਂ ਦਸ੍ਸਨਾਯਾ’’ਤਿ. ਤਸ੍ਮਾ ਉਪਲਕ੍ਖਣਨਯੇਨ ਨੀਲਕ੍ਖੀਤਿ ਥੋਮੇਤਿ.

ਦੀਘਪਣ੍ਹੀਤਿ ਆਯਤਪਣ੍ਹਿ. ਪਰਿਪੁਣ੍ਣਪਣ੍ਹੀਤਿ ਅਤ੍ਥੋ. ਪਸਤਿ ਬਾਧਤਿ ਅਨੇਨ ਪਰੇਸਨ੍ਤਿ ਪਣ੍ਹਿ, ਪਾਦਸ੍ਸ ਪਚ੍ਛਾਭਾਗੋ. ਪਸਧਾਤੁ ਬਾਧਨੇ ਣਿ. ਸਸ੍ਸ ਹੋ. ਣ੍ਵਾਦਿਮੋਗ੍ਗਲ੍ਲਾਨੇ ਪਨ ‘‘ਪਣ ਬ੍ਯਵਹਾਰਥੁਤੀਸੁ ਹਿ ਪਣਿਯਤਿ ਵੋਹਾਰਿਯਤੀਤਿ ਪਣ੍ਹਿ, ਪਾਦਸ੍ਸ ਪਚ੍ਛਾਭਾਗੋ’’ਤਿ ਵੁਤ੍ਤਂ. ਦੀਘਾ ਪਣ੍ਹਿ ਯਸ੍ਸ ਸੋਤਿ ਦੀਘਪਣ੍ਹਿ, ਸੁਗਤੋ. ਯਥਾ ਹਿ ਅਞ੍ਞੇਸਂ ਅਗ੍ਗ ਪਾਦੋ ਦੀਘੋ ਹੋਤਿ. ਪਣ੍ਹਿਮਤ੍ਥਕੇ ਜਙ੍ਘਾ ਪਤਿਟ੍ਠਾਤਿ ਪਣ੍ਹਿਂ ਤਚ੍ਛੇਤ੍ਵਾ ਠਪਿਤਾ ਵਿਯ ਹੋਤਿ. ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਚਤੂਸੁ ਕੋਟ੍ਠਾਸੇਸੁ ਦ੍ਵੇ ਕੋਟ੍ਠਾਸਾ ਅਗ੍ਗਪਾਦਾ ਹੋਨ੍ਤਿ. ਤਤਿਯੇ ਕੋਟ੍ਠਾਸੇ ਜਙ੍ਘਾ ਪਤਿਟ੍ਠਾਤਿ. ਚਤੁਤ੍ਥੇ ਕੋਟ੍ਠਾਸੇ ਆਰਗ੍ਗੇਨ ਵਟ੍ਟੇਤ੍ਵਾ ਠਪਿਤਾ ਵਿਯ ਰਤ੍ਤਕਮ੍ਬਲੇ ਗੇਣ੍ਡੁਕਸਦਿਸਾ ਪਣ੍ਹਿ ਹੋਤਿ. ਤਸ੍ਮਾ ਦੀਘਪਣ੍ਹੀਤਿ ਥੋਮੇਤਿ.

ਸੁਖੁਮਮਲਛਵੀਤਿ ਸੁਖੁਮ ਅਮਲ ਛਵੀਤਿ ਪਦਚ੍ਛੇਦੋ. ਸਣ੍ਹਮਲਵਿਸੁਦ੍ਧਤਚੋ ਸਣ੍ਹਮਲਵਿਰਹਿਤਤਚੋ ਵਾਤਿ ਅਤ੍ਥੋ. ਏਤ੍ਥ ਚ ਸੁਖੁਮਸਦ੍ਦੋ ਸਣ੍ਹਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਸੁਖਯਤਿ ਸਣ੍ਹਭਾਵੇਨਾਤਿ ਸੁਖੁਮਂ, ਸਣ੍ਹਂ. ਸੁਖਧਾਤੁ ਤਕ੍ਕਰਿਯਂ ਉਮਪਚ੍ਚਯੋ. ਤਂਸਮਙ੍ਗੀਪੁਗ੍ਗਲਂ ਕਿਲਿਟ੍ਠਂ ਮਲਤਿ ਧਾਰੇਤੀਤਿ ਮਲਂ, ਰਜਾਦਿਮਲਂ. ਮਲਧਾਤੁ ਧਾਰਣੇ ਅ, ਨਤ੍ਥਿ ਮਲਮੇਤਿਸ੍ਸਾਤਿ ਅਮਲਾ, ਛਵੀ. ਮਂਸਂ ਛਾਦੇਤੀਤਿ ਛਵੀ. ਛਦ ਧਾਤੁ ਸਂਵਰਣੇ ਰਵਪਚ੍ਚਯੋ ਈਪਚ੍ਚਯੋ ਚ. ਸੁਖੁਮਾ ਸਣ੍ਹਾ ਅਮਲਾ ਮਲਵਿਰਹਿਤਾ ਛਵੀ ਯਸ੍ਸਾਤਿ ਸੁਖੁਮਮਲਛਵੀ, ਸੁਗਤੋ. ਭਗਵਤੋ ਹਿ ਸੁਵਣ੍ਣਸਿਨਿਦ੍ਧਸਣ੍ਹਸਰੀਰਤ੍ਤਾ ਕਞ੍ਚਨਸਨ੍ਨਿਭ ਤਚਤ੍ਤਾ ਚ ਰੂਪਕਾਯੇ ਪਦੁਮਪਲਾਸੇ ਉਦਕਬਿਨ੍ਧੁ ਵਿਯ ਰਜੋਜਲ੍ਲਂ ਵਾ ਮਲਂ ਵਾ ਨ ਲਿਮ੍ਪਤਿ. ਵੁਤ੍ਤਞ੍ਹਿ ਮਜ੍ਝਿਮਪਣ੍ਣਾਸੇ ਬ੍ਰਹ੍ਮਾਯੁਸੁਤ੍ਤੇ –

‘‘ਸੁਖੁਮਚ੍ਛਵੀ ਖੋ ਪਨ ਭਵਂ ਗੋਤਮੋ ਸੁਖੁਮਤ੍ਤਾ ਛਵਿਯਾ ਰਜੋਜਲ੍ਲਂ ਕਾਯੇ ਨ ਉਪਲਿਮ੍ਪਤੀ’’ਤਿ. ਤਸ੍ਮਾ ਸੁਖੁਮ ਮਲਛਵੀਤਿ ਥੋਮੇਤਿ.

ਥੋਮ੍ਯਰਸਗ੍ਗਸਗ੍ਗੀਤਿ ਥੋਮ੍ਯਰਸ ਗਸ ਅਗ੍ਗੀਤਿ ਪਦਚ੍ਛੇਦੋ. ਥੋਮਿਤਬ੍ਬ ਰਸਹਰਣਸਤ੍ਤਸਹਸ੍ਸਨ੍ਹਾਰੂ ਉਦ੍ਧਗ੍ਗਿਕਾਤਿ ਅਤ੍ਥੋ. ਥੋਮਿਯਤੀਤਿ ਥੋਮ੍ਯੋ, ਨ੍ਹਾਰੁ. ਥੋਮਧਾਤੁ ਸੀਲਾਘਾਯਂ ਣ੍ਯੋ. ਮਧੁਰਾਦਿਭੇਦਂ ਰਸਂ ਗਸੇਨ੍ਤਿ ਅਨ੍ਤੋ ਪਵੇਸੇਨ੍ਤੀਤਿ ਰਸਗ੍ਗਸਾ, ਨ੍ਹਾਰੁ. ਰਸਸਦ੍ਦੂਪਪਦਗਸਧਾਤੁ ਅਦਨੇ ਅ. ਅਥ ਵਾ ਰਸਂ ਗਸਤਿ ਹਰਤਿ ਏਤੇਹੀਤਿ ਰਸਗ੍ਗਸਾ, ਨ੍ਹਾਰੁ. ਗਸਧਾਤੁ ਹਰਣੇ ਅ. ਧਾਤੁਸਦ੍ਦੋ ਹਿ ਅਨੇਕਤ੍ਥੋ. ਰਸਗ੍ਗਸਾਨਂ ਅਗ੍ਗਾਤਿ ਰਸਗ੍ਗਸਗ੍ਗਾ, ਤੇ ਏਤ੍ਥ ਸਨ੍ਤੀਤਿ ਰਸਗ੍ਗਸਗ੍ਗੀ, ਨ੍ਹਾਰੁ. ਅਸ੍ਸਥ੍ਯਤ੍ਥੇ ਈਪਚ੍ਚਯੋ. ਥੋਮ੍ਯੋ ਰਸਗ੍ਗਸਗ੍ਗੀ ਯਸ੍ਸ ਸੋਤਿ ਥੋਮ੍ਯਰਸਗ੍ਗਸਗ੍ਗੀ, ਸੁਗਤੋ. ਤਥਾਗਤਸ੍ਸ ਹਿ ਸਤ੍ਤਰਸਹਰਣਿਸਹਸ੍ਸਾਨਿ ਉਦ੍ਧਗ੍ਗਾਨਿ ਹੁਤ੍ਵਾ ਗੀਵਾਯਮੇਵ ਪਟਿਮੁਕ੍ਕਾਨਿ. ਤਿਲਫਲਮਤ੍ਤੋਪਿ ਆਹਾਰੋ ਜਿਵ੍ਹਗ੍ਗੇ ਠਪਿਤੋ ਸਬ੍ਬਂ ਕਾਯਂ ਅਨੁਫਰਤਿ. ਤੇਨੇਵ ਮਹਾਪਧਾਨਂ ਪਦਹਨ੍ਤਸ੍ਸ ਏਕਤਣ੍ਡੁਲਾਦੀਹਿਪਿ ਕਲ਼ਾਯਯੂਸਪਸਤੇਨਪਿ ਕਾਯਸ੍ਸ ਯਾਪਨਂ ਹੋਤਿ. ਅਞ੍ਞੇਸਂ ਪਨ ਤਥਾ ਅਭਾਵਾ ਨ ਸਕਲਕਾਯਂ ਓਜਾ ਫਰਤਿ. ਤੇਨ ਤੇ ਬਹ੍ਵਾਬਾਧਾ ਹੋਨ੍ਤਿ. ਇਦਂ ਲਕ੍ਖਣਂ ਅਪ੍ਪਾਬਾਧਤਾਸਙ੍ਖਾਤਸ੍ਸ ਨਿਸ੍ਸਨ੍ਦਫਲਸ੍ਸਵਸੇਨ ਪਾਕਟਂ ਹੋਤਿ, ਤਸ੍ਮਾ ਥੋਮ੍ਯਰਸਗ੍ਗਸਗ੍ਗੀਤਿ ਥੋਮੇਤਿ.

ਤੇਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੪. ਦੁਤਿਯਗਾਥਾਯਂ ਜਿਨੋਤਿ ਪਞ੍ਚਮਾਰਜਿਤਵਾ ਬੁਦ੍ਧੋ. ਤਸ੍ਸ ਪਨ ਪਦਸ੍ਸ ਸਮਚਤ੍ਤਾਲੀਸਗ੍ਗਦਨ੍ਤੋਤ੍ਯਾਦੀਹਿ ਪਦੇਹਿ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧੋ. ਚਤ੍ਤਾਲੀਸਗ੍ਗਦਨ੍ਤੋਤਿ ਚਤ੍ਤਾਲੀਸਅਗ੍ਗਦਨ੍ਤੋਤਿ ਪਦਚ੍ਛੇਦੋ. ਸਮਚਤ੍ਤਾਲੀਸ ਉਤ੍ਤਮਦਨ੍ਤੋਤਿ ਅਤ੍ਥੋ. ਏਤ੍ਥ ਚ ਅਗ੍ਗਸਦ੍ਦੋ ਉਤ੍ਤਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਉਤ੍ਤਮਭਾਵਂ ਅਜਤਿ ਗਚ੍ਛਤੀਤਿ ਅਗ੍ਗੋ, ਦਨ੍ਤੋ. ਦਂਸਤਿ ਵਿਦਂਸਤਿ ਭੋਜ੍ਜਮਨੇਨਾਤਿ ਦਨ੍ਤੋ. ਦਂਸਧਾਤੁ ਦਂਸਨੇ ਤ. ਤਸ੍ਸ ਨ੍ਤੋ ਧਾਤ੍ਵਨ੍ਤਲੋਪੋ. ਸਮਚਤ੍ਤਾਲੀਸਂ ਅਗ੍ਗੋ ਉਤ੍ਤਮੋ ਦਨ੍ਤੋ ਯਸ੍ਸਾਤਿ ਚਤ੍ਤਾਲੀਸਗ੍ਗਦਨ੍ਤੋ, ਜਿਨੋ. ਉਪਰਿਮਹਨੁਕੇ ਪਤਿਟ੍ਠਿਤਾ ਦਨ੍ਤਾ ਵੀਸਤਿ ਹੇਟ੍ਠਿਮੇ ਵੀਸਤੀਤਿ ਸਮਚਤ੍ਤਾਲੀਸਦਨ੍ਤਾ ਹੋਨ੍ਤੀਤਿ ਅਤ੍ਥੋ. ਅਞ੍ਞੇਸਞ੍ਹਿ ਪਰਿਪੁਣ੍ਣਦਨ੍ਤਾਨਮ੍ਪਿ ਦ੍ਵਤ੍ਤਿਂਸਦਨ੍ਤਾ ਹੋਨ੍ਤਿ. ਤਥਾ ਗਤਸ੍ਸ ਪਨ ਚਤ੍ਤਾਲੀਸਂ. ਤਸ੍ਮਾ ਚਤ੍ਤਾਲੀਸਗ੍ਗਦਨ੍ਤੋਤਿ ਥੋਮੇਤਿ.

ਸਮਕਲਪਨਜੋਤਿ ਕਕਚੇਨ ਛਿਨ੍ਦਿਤ੍ਵਾ ਠਪਿਤੋ ਵਿਯ ਸਮਦਨ੍ਤੋਤਿ ਅਤ੍ਥੋ. ਲਪਤਿ ਵਦਤਿ ਏਤੇਨਾਤਿ ਲਪਨਂ, ਮੁਖਂ. ਲਪਧਾਤੁ ਵਦਨੇ ਯੁ. ਤਸ੍ਮਿਂ ਲਪਨੇ ਮੁਖੇ ਜਾਤੋਤਿ ਲਪਨਜੋ, ਦਨ੍ਤੋ. ਤਪ੍ਪੁਰਿਸਸਮਾਸੋਯਂ, ਸਮਕੋ ਲਪਨਜੋ ਦਨ੍ਤੋ ਯਸ੍ਸਾਤਿ ਸਮਕਲਪਨਜੋ, ਜਿਨੋ. ਪਾਲ਼ਿਯਂ ਪਨ ‘‘ਸਮਦਨ੍ਤੋ’’ਤਿ ਪਾਠੋ ਅਤ੍ਥਿ. ਅਯਮੇਵਤ੍ਥੋ. ਅਞ੍ਞੇਸਞ੍ਹਿ ਕੇਚਿ ਦਨ੍ਤਾ ਉਚ੍ਚਾ, ਕੇਚਿ ਨੀਚਾਤਿ ਵਿਸਮਾ ਹੋਨ੍ਤਿ. ਤਥਾਗਤਸ੍ਸ ਪਨ ਅਯਪਟ੍ਟਛਿਨ੍ਨਸਙ੍ਖਪਟਲਂ ਵਿਯ ਸਮਾ ਹੋਨ੍ਤਿ. ਤਸ੍ਮਾ ਸਮਕਲਪਨਜੋਤਿ ਥੋਮੇਤਿ.

ਅਨ੍ਤਰਂਸਪ੍ਪਪੀਨੋਤਿ ਅਨ੍ਤਰਅਂਸਪੀਨੋਤਿ ਪਦਵਿਭਾਗੋ. ਗਾਥਾਬਨ੍ਧਵਸੇਨ ਛਨ੍ਦਾਨੁਰਕ੍ਖਣਤ੍ਥਂ ਪਕਾਰਾਗਮਂ ਕਤ੍ਵਾ ਏਵਂ ਵੁਤ੍ਤਂ. ਦ੍ਵਿਨ੍ਨਂ ਅਂਸਾਨਂ ਖਨ੍ਧਾਨਂ ਅਨ੍ਤਰਂ ਵੇਮਜ੍ਝੇ ਪਰਿਪੁਣ੍ਣਪਿਟ੍ਠਿਤਲੋਤਿ ਅਤ੍ਥੋ. ਏਤ੍ਥ ਚ ਅਂਸਸਦ੍ਦੋ ਖਨ੍ਧਤ੍ਥੇ ਵਤ੍ਤਤਿ. ਵੁਤ੍ਤਞ੍ਹੇਤਂ ਅਭਿਧਾਨਪ੍ਪਦੀਪਿਕਾਯਂ ‘‘ਅਂਸੋ ਨਿਤ੍ਥਿ ਭੁਜਸਿਰੋ, ਖਨ੍ਧੋ ਤਸ੍ਸਨ੍ਧਿ ਜਤ੍ਤੁ ਤ’’ਨ੍ਤਿ.

ਅਨਤਿ ਜੀਵਤਿ ਏਤੇਨਾਤਿ ਅਂਸੋ, ਖਨ੍ਧੋ. ਅਨਧਾਤੁ ਪਾਣੇ ਸੋਪਚ੍ਚਯੋ. ਨਸ੍ਸ ਨਿਗ੍ਗਹਿਤਾਦੇਸੋ. ਸਰੀਰਸ੍ਸ ਅਵਯਵਭਾਵੇਨ ਅਨਤਿ ਗਚ੍ਛਤਿ ਪਵਤ੍ਤਤੀਤਿ ਵਾ ਅਂਸੋ, ਦ੍ਵਿਨ੍ਨਂ ਅਂਸਾਨਂ ਖਨ੍ਧਾਨਂ ਅਨ੍ਤਰਂ ਵੇਮਜ੍ਝਨ੍ਤਿ ਅਨ੍ਤਰਂਸੋ, ਪਿਣਤਿ ਪੂਰਤੀਤਿ ਪੀਨੋ, ਪਿਟ੍ਠਿਤਲਂ. ਪਿਣਧਾਤੁ ਪਿਨਨੇ ਪੂਰਣੇ ਵਾ ਣ. ਣਸ੍ਸ ਨੋ. ਦ੍ਵਿਨ੍ਨਂ ਅਂਸਾਨਂ ਖਨ੍ਧਾਨਂ ਅਨ੍ਤਰਂ ਵੇਮਜ੍ਝੇ ਪੀਨਂ ਪਰਿਪੁਣ੍ਣਂ ਪਿਟ੍ਠਿਤਲਂ ਯਸ੍ਸਾਤਿ ਅਨ੍ਤਰਂਸਪ੍ਪਪੀਨੋ, ਜਿਨੋ. ਉਤ੍ਤਰਪਦਲੋਪਬਹੁਬ੍ਬੀਹਿਸਮਾਸੋਯਂ. ਅਞ੍ਞੇਸਞ੍ਹਿ ਤਂ ਠਾਨਂ ਨਿਨ੍ਨਂ ਹੋਤਿ, ਦ੍ਵੇ ਪਿਟ੍ਠਿਕੋਟ੍ਟਾ ਪਾਟਿਏਕ੍ਕਂ ਪਞ੍ਞਾਯਨ੍ਤਿ. ਤਥਾਗਤਸ੍ਸ ਪਨ ਕਟਿਤੋ ਪਟ੍ਠਾਯ ਮਂਸਪਟਲਂ ਯਾਵ ਖਨ੍ਧਾ ਉਗ੍ਗਮ੍ਮ ਸਮੁਸ੍ਸਿਤਸੁਵਣ੍ਣਫਲਕਂ ਵਿਯ ਪਿਟ੍ਠਿਂ ਛਾਦੇਤ੍ਵਾ ਪਤਿਟ੍ਠਿਤਂ. ਤਸ੍ਮਾ ਅਨ੍ਤਰਂਸਪ੍ਪਪੀਨੋਤਿ ਥੋਮੇਤਿ. ਪਾਲ਼ਿਯਂ ਪਨ ‘‘ਚਿਤਨ੍ਤਰਂਸੋ’’ਤਿ ਪਾਠੋ. ਤਦਟ੍ਠਕਥਾਯਞ੍ਚ ‘‘ਚਿਤਨ੍ਤਰਂ ਸੋਤਿ ਅਨ੍ਤਰਂਸਂ ਵੁਚ੍ਚਤਿ ਦ੍ਵਿਨ੍ਨਂ ਕੋਟ੍ਟਾਨਮਨ੍ਤਰਂ. ਤਂ ਪਰਿਪੁਣ੍ਣ ਮਸ੍ਸਾਤਿ ਅਨ੍ਤਰਂਸੋ’’ਤਿ ਵੁਤ੍ਤਂ.

ਚਕ੍ਕੇਨਙ੍ਕਿਤਪਾਦੋਤਿ ਚਕ੍ਕੇਨ ਅਙ੍ਕਿਤਪਾਦੋਤਿ ਪਦਚ੍ਛੇਦੋ. ਅਟ੍ਠਸਤਪਾਦਚਕ੍ਕਲਕ੍ਖਣੇਨ ਲਕ੍ਖਿਤਪਾਦਤਲੋਤਿ ਅਤ੍ਥੋ. ਚਕ੍ਕੇਨ ਅਟ੍ਠਸਤਪਾਦਚਕ੍ਕੇਨ ਅਙ੍ਕਿਤੋ ਲਕ੍ਖਿਤੋ ਪਾਦੋ ਯੇਨ ਸੋਤਿ ਚਕ੍ਕੇਨਙ੍ਕਿਤਪਾਦੋ, ਜਿਨੋ. ਤਤਿਯਾਬਹੁਬ੍ਬੀਹਿ ਸਮਾਸੋਯਂ. ਅਞ੍ਞੇਸਞ੍ਹਿ ਪਾਦਤਲੇ ਅਟ੍ਠਸਤਪਾਦਚਕ੍ਕ ਲਕ੍ਖਣਂ ਨਤ੍ਥਿ. ਤਥਾਗਤਸ੍ਸ ਪਾਦਤਲੇਏਵ ਵਿਚਿਤ੍ਰਂ ਅਟ੍ਠਸਤ ਪਾਦਚਕ੍ਕਲਕ੍ਖਣਂ ਅਤ੍ਥਿ. ਤਸ੍ਮਾ ਚਕ੍ਕੇਨਙ੍ਕਿਤਪਾਦੋਤਿ ਥੋਮੇਤਿ.

ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤੇ ‘‘ਹੇਟ੍ਠਾ ਖੋ ਪਨ ਤਸ੍ਸ ਭੋਤੋ ਗੋਤਮਸ੍ਸ ਪਾਦਤਲੇਸੁ ਚਕ੍ਕਾਨਿ ਜਾਤਾਨਿ ਸਹਸ੍ਸਾਰਾਨਿ ਸਨੇਮਿਕਾਨਿ ਸਨਾਭਿਕਾਨਿ ਸਬ੍ਬਾਕਾਰਪਰਿਪੂਰਾਨੀ’’ਤਿ. ਅਟ੍ਠਸਤਪਾਦਚਕ੍ਕਲਕ੍ਖਣਸਰੂਪਂ ਪਨ ਯੋ ਪਾਦਪਙ੍ਕਜਮੁਦੁਤ੍ਤਲਰਾ ਜਿਕੇਹੀਤਿ ਗਾਥਾਵਣ੍ਣਨਾਯਂ ਵੁਤ੍ਤਮੇਵਾਤਿ.

ਅਵਿਰਲ਼ਦਸਨੋਤਿ ਅਵਿਵਰਦਨ੍ਤੋ. ਅਵਿਵਰਦਨ੍ਤੇਨ ਸਮ੍ਪਨ੍ਨੋਤਿ ਅਤ੍ਥੋ. ਵਿਵਰਤਿ ਫੁਲ੍ਲਤੀਤਿ ਵਿਰਲ਼ੋ. ਵਰਧਾਤੁ ਫੁਲ੍ਲਨੇਲ਼ੋ. ਅਸ੍ਸਿ. ਨ ਵਿਰਲ਼ੋ ਅਵਿਰਲ਼ੋ, ਨਤ੍ਥਿ ਵਿਰਲ਼ੋ ਏਤਸ੍ਸਾਤਿ ਅਵਿਰਲ਼ੋ, ਦਨ੍ਤੋ. ਦਂਸਤਿ ਵਿਦਂਸਤਿ ਖਾਦਨੀਯਂ ਵਾ ਭੋਜਨੀਯਂ ਵਾ ਏਤੇਨਾਤਿ ਦਸਨੋ, ਦਨ੍ਤੋ. ਦਂਸਧਾਤੁ ਦਂਸਨੇ ਯੁ. ਨਿਗ੍ਗਹਿਤਲੋਪੋ. ਅਵਿਰਲ਼ੋ ਦਸਨੋ ਦਨ੍ਤੋ ਯਸ੍ਸਾਤਿ ਅਵਿਰਲ਼ਦਸਨੋ, ਜਿਨੋ. ਅਞ੍ਞੇਸਞ੍ਹਿ ਕੁਮ੍ਭਿਲਾਨਂ ਵਿਯ ਦਨ੍ਤਾ ਵਿਰਲ਼ਾ ਹੋਨ੍ਤਿ. ਮਚ੍ਛਮਂਸਾਦੀਨਿ ਖਾਦਨ੍ਤਾਨਂ ਦਨ੍ਤਨ੍ਤਰਂ ਪੂਰਤਿ. ਤਥਾਗਤਸ੍ਸ ਪਨ ਕਨਕਲਤਾਯ ਸਮੁਸ੍ਸਾਪਿਤਵਜਿਰ ਪਨ੍ਤਿ ਵਿਯ ਅਵਿਰਲ਼ਾ ਤੁਲਿਕਾਯ ਦਸ੍ਸਿਤਪਰਿਚ੍ਛੇਦਾ ਵਿਯ ਦਨ੍ਤਾ ਹੋਨ੍ਤਿ, ਤਸ੍ਮਾ ਅਵਿਰਲ਼ਦਸਨੋਤਿ ਥੋਮੇਤਿ.

ਮਾਰਜੁਸ੍ਸਙ੍ਖਪਾਦੋਤਿ ਮਾਰਜਿ ਉਸ੍ਸਙ੍ਖਪਾਦੋਤਿ ਪਦਚ੍ਛੇਦੋ. ਏਤ੍ਥ ਚ ਮਾਰਜੀਤਿ ਪਞ੍ਚਮਾਰਜਿਤਵਾ ਬੁਦ੍ਧੋ ਕਤ੍ਤੁਭੂਤੋ. ਸੋ ਹਿ ਪਞ੍ਚਮਾਰੇ ਜਿਤਵਾਤਿ ਮਾਰਜੀਤਿ ਵੁਚ੍ਚਤਿ. ਉਸ੍ਸਙ੍ਖਪਾਦੋਤਿ ਪਾਦਸ੍ਸ ਉਪਰਿ ਠਿਤੇਨ ਸਙ੍ਖਸਦਿਸਤ੍ਤਾ ਸਙ੍ਖਨਾਮਿਕੇਨ ਗੋਪ੍ਫਕੇਨ ਸਮਨ੍ਨਾਗਤੋਤਿ ਅਤ੍ਥੋ. ਸਂਸੁਟ੍ਠੁਂ ਪਥਵਿਂ ਖਨਤੀਤਿ ਸਙ੍ਖੇ. ਸਂਪੁਬ੍ਬਖਨੁਧਾਤੁ ਅਵਦਾਰਣੇ ਕ੍ਵਿ. ਅਪਦਾਨਟ੍ਠਕਥਾਯਂ ਪਨ ‘‘ਸਂਸੁਟ੍ਠੁਂ ਖਾਦਨ੍ਤੋ ਖਣਨ੍ਤੋ ਗਚ੍ਛਤੀਤਿ ਸਙ੍ਖੇ. ਸਮੁਦ੍ਦਜਲਪਰਿਯਨ੍ਤੇ ਚਰਮਾਨੋ ਗਚ੍ਛਤਿ ਚਰਤੀਤਿ ਅਤ੍ਥੋ’’ਤਿ ਵੁਤ੍ਤਂ. ਸਙ੍ਖੇ ਵਿਯਾਤਿ ਸਙ੍ਖੇ, ਗੋਪ੍ਫਕੋ. ਪਾਦਸ੍ਸ ਉਦ੍ਧਂ ਉਪਰਿ ਠਿਤਂ ਸਙ੍ਖਸਦਿਸਂ ਗੋਪ੍ਫਕ ਮਸ੍ਸਾਤਿ ਉਸ੍ਸਙ੍ਖਪਾਦੋ, ਜਿਨੋ. ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤਟ੍ਠਕਥਾਯਂ ‘‘ਉਦ੍ਧਂ ਪਤਿਟ੍ਠਿਤਗੋਪ੍ਫਕਤ੍ਤਾ ਉਸ੍ਸਙ੍ਖਾ ਪਾਦਾ ਅਸ੍ਸਾਤਿ ਉਸ੍ਸਙ੍ਖਪਾਦੋ’’ਤਿ. ਅਞ੍ਞੇਸਞ੍ਹਿ ਪਿਟ੍ਠਿਪਾਦੇ ਗੋਪ੍ਫਕਾ ਹੋਨ੍ਤਿ. ਤੇਨ ਤੇਸਂ ਪਾਦਾ ਆਣਿਬਦ੍ਧਾ ਵਿਯ ਬਦ੍ਧਾ ਹੋਨ੍ਤਿ. ਨ ਯਥਾਸੁਖਂ ਪਰਿਵਤ੍ਤਨ੍ਤਿ. ਗਚ੍ਛਨ੍ਤਾਨਂ ਪਾਦਤਲਾਨਿ ਨ ਦਿਸ੍ਸਨ੍ਤਿ. ਤਥਾਗਤਸ੍ਸ ਪਨ ਅਭਿਰੂਹਿਤ੍ਵਾ ਉਪਰਿ ਗੋਪ੍ਫਕਾ ਪਤਿਟ੍ਠਹਨ੍ਤਿ. ਤੇਨਸ੍ਸ ਨਾਭਿਤੋ ਪਟ੍ਠਾਯ ਉਪਰਿਮਕਾਯੋ ਨਾਵਾਯ ਠਪਿਤ ਸੁਵਣ੍ਣਪਟਿਮਾ ਵਿਯ ਨਿਚ੍ਚਲੋ ਹੋਤਿ. ਅਧੋਕਾਯੋਵ ਇਞ੍ਜਤਿ. ਸੁਖੇਨ ਪਾਦਾ ਪਰਿਵਤ੍ਤਨ੍ਤਿ. ਪੁਰਤੋਪਿ ਪਚ੍ਛਤੋ ਉਭਯਪਸ੍ਸੇਸੁਪਿ ਠਤ੍ਵਾ ਪਸ੍ਸਨ੍ਤਾਨਂ ਪਾਦਤਲਾਨਿ ਪਞ੍ਞਾਯਨ੍ਤਿ. ਨ ਹਤ੍ਥੀਨਂ ਵਿਯ ਪਚ੍ਛਤੋਯੇਵਾਤਿ. ਤਸ੍ਮਾ ਉਸ੍ਸਙ੍ਖਪਾਦੋਤਿ ਥੋਮੇਤਿ.

ਤਿਟ੍ਠਨ੍ਤੋ ਨੋਨਮਨ੍ਤੋਭਯਕਰਮੁਦੁਨਾ ਜਣ੍ਣੁਕਾਨਾਮ ਸਨ੍ਤੋਤਿ ਏਤ੍ਥ ਤਿਟ੍ਠਨ੍ਤੋ ਨੋ ਨਮਨ੍ਤੋ ਉਭਯ ਕਰਮੁਦੁਨਾ ਜਣ੍ਣੁਕਾਨਿ ਆਮਸਨ੍ਤੋਤਿ ਪਦਵਿਭਾਗੋ. ਤਿਟ੍ਠਨ੍ਤੋਤਿ ਠਿਤਕੋਵ. ਨੋਨਮਨ੍ਤੋਤਿ ਅਨਮਮਾਨੋ ਹੁਤ੍ਵਾ. ਉਭਯ ਕਰਮੁਦੁਨਾਤਿ ਸੁਖੁਮੇਨ ਹਤ੍ਥਦ੍ਵਯੇਨ. ਜਣ੍ਣੁਕਾਨੀਤਿ ਜਙ੍ਘਾਨਿ. ਜਾਯਤਿ ਗਮਨਾਗਮਨਂ ਅਨੇਨਾਤਿ ਜਣ੍ਣੁ, ਜਨਧਾਤੁ ਜਨਨੇ ਣੁ. ਸੋਏਵ ਜਣ੍ਣੁਕਾ, ਜਙ੍ਘੋਰੂਨਂ ਸਨ੍ਧਿ ਲਬ੍ਭਤਿ. ਤਾਨਿ. ਆਮਸਨ੍ਤੋਤਿ ਪਰਿਮਜ੍ਜਿਤੁਂ ਸਕ੍ਕੋਨ੍ਤੋ. ਏਤ੍ਥ ਚ ਤਿਟ੍ਠਨ੍ਤੋ ਨੋਨਮਨ੍ਤੋਤਿ ਇਮਿਨਾ ਤਥਾਗਤਸ੍ਸ ਅਖੁਜ੍ਜਅਵਾਮਨਭਾਵੋ ਦੀਪਿਤੋ. ਅਵਸੇਸਜਨਾ ਹਿ ਖੁਜ੍ਜਾ ਵਾ ਹੋਨ੍ਤਿ ਵਾਮਨਾ ਵਾ. ਖੁਜ੍ਜਾਨਂ ਉਪਰਿਮਕਾਯੋ ਅਪਰਿਪੁਣ੍ਣੋ ਹੋਤਿ ਵਾਮਨਾਨਂ ਹੇਟ੍ਠਿਮਕਾਯੋ. ਤੇ ਅਪਰਿਪੁਣ੍ਣਕਾਯਤ੍ਤਾ ਨ ਸਕ੍ਕੋਨ੍ਤਿ ਨੋਨਮਨ੍ਤੋ ਜਣ੍ਣੁਕਾਨਿ ਪਰਿਮਜ੍ਜਿਤੁਂ. ਤਥਾਗਤੋ ਪਨ ਪਰਿਪੁਣ੍ਣਉਭਯਕਾਯਤ੍ਤਾ ਸਕ੍ਕੋਤਿ, ਤਸ੍ਮਾ ਤਿਟ੍ਠਨ੍ਤੋ…ਪੇ… ਜਣ੍ਣੁਕਾ ਨਾਮਸਨ੍ਤੋਤਿ ਥੋਮੇਤਿ.

ਵਟ੍ਟਕ੍ਖਨ੍ਧੋਤਿ ਸੁਵਣ੍ਣਾਲਿਙ੍ਗੋ ਵਿਯ ਸਮਵਟ੍ਟਿਤਗਲਿਕੋ. ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤੇ ‘‘ਸਮਵਟ੍ਟਕ੍ਖਨ੍ਧੋ’’ਤਿ. ਪਰਿਮਣ੍ਡਲਾ ਕਾਰੇਨ ਵਟ੍ਟਤਿ ਪਵਤ੍ਤਤੀਤਿ ਵਟ੍ਟੋ, ਪਰਿਮਣ੍ਡਲੋ. ਵਟ੍ਟਧਾਤੁ ਵਟ੍ਟਨੇ ਅ. ਭੋਜਨਂ ਖਾਦਤਿ ਏਤੇਨ ਗਲੇਨਾਤਿ ਖਨ੍ਧੋ, ਗਲੋ. ਖਾਦਧਾਤੁ ਖਾਦਨੇ ਭਕ੍ਖਨੇ ਵਾ ਕ੍ਵਿਪਚ੍ਚਯੋ. ਖਾਦਾਮਗਮਾਨਂ ਖਨ੍ਧਨ੍ਧਗਨ੍ਧਾਤਿ ਸੁਤ੍ਤੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਅਭਿਧਾਨਟੀਕਾਯਂ ਪਨ ‘‘ਕਂ ਮਤ੍ਥਕਂ ਦਧਾਤੀਤਿ ਕਨ੍ਧੋ. ਸੋਏਵ ਕਕਾਰਸ੍ਸ ਖਕਾਰਕਰਣਵਸੇਨਾ’’ਤਿ ਵੁਤ੍ਤਂ. ਵਟ੍ਟੋ ਸਮਪਰਿਮਣ੍ਡਲੋ ਖਨ੍ਧੋ ਗਲੋ ਯਸ੍ਸਾਤਿ ਵਟ੍ਟਕ੍ਖਨ੍ਧੋ, ਜਿਨੋ. ਯਥਾ ਹਿ ਏਕੇ ਕੋਞ੍ਚਾ ਵਿਯ ਬਕਾ ਵਿਯ ਵਰਾਹਾ ਵਿਯ ਚ ਦੀਘਗਲਾ ਵਙ੍ਕਗਲਾ ਪੁਥੁਗਲਾ ਚ ਹੋਨ੍ਤਿ. ਕਥਨਕਾਲੇ ਸਿਰਾਜਲਂ ਪਞ੍ਞਾਯਤਿ. ਮਨ੍ਦੋ ਸਰੋ ਨਿਕ੍ਖਮਤਿ, ਨ ਏਵਂ ਤਸ੍ਸ. ਤਥਾਗਤਸ੍ਸ ਪਨ ਸੁਵਟ੍ਟਿਤਸੁਵਣ੍ਣਾਲਿਙ੍ਗਸਦਿਸੋ ਖਨ੍ਧੋ ਗਲੋ ਹੋਤਿ. ਕਥਨਕਾਲੇ ਸਿਰਾਜਲਂ ਨ ਪਞ੍ਞਾਯਤਿ. ਮੇਘਸ੍ਸ ਵਿਯ ਗਜ੍ਜਤੋ ਸਰੋ ਮਹਾ ਹੋਤਿ. ਤਸ੍ਮਾ ਵਟ੍ਟਕ੍ਖਨ੍ਧੋਤਿ ਥੋਮੇਤਿ.

ਪੁਨ ਜਿਨੋਤਿ ਬੁਦ੍ਧੋ ਕਤ੍ਤੁਭੂਤੋ. ਤਸ੍ਸ ਪਨ ਪਦਸ੍ਸ ਗੋਤਰੁਣਪਖੁਮਕੋਤ੍ਯਾਦੀਹਿ ਪਦੇਹਿ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧੋ. ਗੋਤਰੁਣਪਖੁਮਕੋਤਿ ਤਂਮੁਹੁਤ੍ਤਜਾਤਰਤ੍ਤ ਵਚ੍ਛਸ੍ਸ ਚਕ੍ਖੁਭਣ੍ਡੋ ਵਿਯ ਵਿਪ੍ਪਸਨ੍ਨਚਕ੍ਖੁਭਣ੍ਡੋ, ਵਿਪ੍ਪਸਨ੍ਨਚਕ੍ਖੁਭਣ੍ਡੇਨ ਸਮਨ੍ਨਾਗਤੋ ਵਾ. ਏਤ੍ਥ ਚ ਪਖੁਮਕੋਤਿ ਸਕਲਂ ਚਕ੍ਖੁਭਣ੍ਡਂ ਅਧਿਪ੍ਪੇਤਂ. ਚਕ੍ਖੁਭਣ੍ਡਨ੍ਤਿ ਚਕ੍ਖੁਪਰਿਵਾਰਂ. ਚਕ੍ਖੁਭਣ੍ਡਨ੍ਤਿ ਅਕ੍ਖਿਦਲਨ੍ਤਿ ਕੇਚਿ. ਅਕ੍ਖਿਦਲਪਤ੍ਤਨ੍ਤਿ ਵਦਨ੍ਤਿ ਅਞ੍ਞੇ. ਅਕ੍ਖਿਦਲੇ ਹਿ ਪਨ ਸਦ੍ਧਿਂ ਅਕ੍ਖਿਬਿਮ੍ਬਨ੍ਤਿ ਵੇਦਿਤਬ੍ਬਂ. ਅਯਂ ਪਨੇਤ੍ਥ ਵਚਨਤ੍ਥੋ. ਪਤਤਿ ਚਕ੍ਖੁਂ ਪਰਿਵਾਰੇਤਿ ਏਤੇਨਾਤਿ ਪਖੁਮਂ, ਪਮ੍ਹਾਦਿਪਰਿਵਾਰਂ. ਪਤਧਾਤੁ ਪਰਿਵਾਰੇ ਉਮੋ. ਤਕਾਰਸ੍ਸ ਖੋ. ਅਥ ਵਾ ਅਕ੍ਖਿਨੋ ਪਕ੍ਖਦ੍ਵਯੇ ਜਾਤਨ੍ਤਿ ਪਖੁਮਂ, ਪਮ੍ਹਂ. ਜਾਤਤਦ੍ਧਿਤੇ ਉਮੋ. ਪਕ੍ਖੁਮਨ੍ਤਿ ਵਤ੍ਤਬ੍ਬੇ ਕਕਾਰਲੋਪਵਸੇਨ ਪਖੁਮਨ੍ਤਿ ਵੁਚ੍ਚਤਿ. ਪਖੁਮਂਯੇਵ ਪਖੁਮਕੋ. ਗੋਤਰੁਣਸ੍ਸ ਤਂਮੁਹੁਤ੍ਤਜਾਤਰਤ੍ਤਵਚ੍ਛਸ੍ਸ ਪਖੁਮਂ ਵਿਯ ਪਖੁਮਂ ਯਸ੍ਸ ਸੋਤਿ ਗੋਤਰੁਣਪਖੁਮਕੋ, ਜਿਨੋ. ਗੋਤਰੁਣਸ੍ਸ ਤਂਮੁਹੁਤ੍ਤਜਾਤਰਤ੍ਤਵਚ੍ਛਸ੍ਸ ਪਖੁਮਸਦਿਸਂ ਵਿਪ੍ਪਸਨ੍ਨਚਕ੍ਖੁਭਣ੍ਡਂ ਅਤ੍ਥੀਤਿ ਅਤ੍ਥੋ. ਅਞ੍ਞੇਸਞ੍ਹਿ ਅਕ੍ਖਿਭਣ੍ਡੋ ਅਪਰਿਪੁਣ੍ਣੋ ਹੋਤਿ. ਹਤ੍ਥਿਮੂਸਿਕਕਾਕਾਦੀਨਂ ਅਕ੍ਖਿਸਦਿਸੇਹਿ ਵਿਨਿਗ੍ਗਤੇਹਿ ਗਮ੍ਭੀਰੇਹਿਪਿ ਅਕ੍ਖੀਹਿ ਸਮਨ੍ਨਾਗਤਾ. ਤਥਾਗਤਸ੍ਸ ਪਨ ਧੋਵਿਤ੍ਵਾ ਮਜ੍ਜਿਤ੍ਵਾ ਠਪਿਤਮਣਿਗੁਲ਼ਿਕਾ ਵਿਯ ਮੁਦੁਸਿਨਿਦ੍ਧਨੀਲ ਸੁਖੁਮਪਖੁਮਾਚਿਤਾਨਿ ਅਕ੍ਖੀਨਿ ਹੋਨ੍ਤਿ. ਤਸ੍ਮਾ ਗੋਤਰੁਣਪਖੁਮਕੋਤਿ ਥੋਮੇਤਿ.

ਸੀਹਪੁਬ੍ਬਡ੍ਢਕਾਯੋਤਿ ਸੀਹਸ੍ਸ ਪੁਬ੍ਬਡ੍ਢਕਾਯੋ ਵਿਯ ਪਰਿਪੁਣ੍ਣਕਾਯੋ. ਵਾਤਾਤਪਾਦਿਪਰਿਸ੍ਸਯਂ ਸਹਤਿ ਖਮਤੀਤਿ ਸੀਹੋ, ਸਹਧਾਤੁ ਖਮਨੇ ਅ. ਈਕਾਰਾਗਮੋ. ਅਥ ਵਾ ਸੂਕਰਮਹਿਂਸਾਦਯੋ ਸਤ੍ਤੇ ਹਿਂਸਤੀਤਿ ਸੀਹੋ. ਹਿਂਸਧਾਤੁ ਹਨਨੇ ਣ. ਹਿਂਸੋਤਿ ਵਤ੍ਤਬ੍ਬੇ ਅਕ੍ਖਰਵਿਪਰਿਯਾਯੇਨ ਸੀਹੋਤਿ ਵੁਚ੍ਚਤਿ. ਅਥ ਵਾ ਸਬ੍ਬਿਰਿਯਾਪਥੇਸੁ ਦਲ਼੍ਹਵੀਰਿਯਤ੍ਤਾ ਸੁਟ੍ਠੁ ਈਹਤਿ ਵਾਯਮਤੀਤਿ ਸੀਹੋ, ਕੇਸਰਸੀਹੋ. ਸੁਪੁਬ੍ਬ ਈਹਧਾਤੁ ਚੇਤਾਯਂ ਅ. ਤੇਨ ਵੁਤ੍ਤਂ ਸਦ੍ਦਨੀਤਿਯਂ ‘‘ਸਹਹਿਂਸ ਈਹਾਵਸਾ, ਸੀਹਸਦ੍ਦਗਤਿਂ ਵਦੇ’’ਤਿ. ਸੀਹਸ੍ਸ ਪੁਬ੍ਬਡ੍ਢੇ ਜਾਤੋ ਕਾਯੋ ਵਿਯ ਪਰਿਪੁਣ੍ਣਕਾਯੋ ਯਸ੍ਸਾਤਿ ਸੀਹਪੁਬ੍ਬਡ੍ਢਕਾਯੋ, ਜਿਨੋ. ਯਥਾ ਹਿ ਸੀਹਸ੍ਸ ਪੁਬ੍ਬਡ੍ਢਕਾਯੋਵ ਪਰਿਪੁਣ੍ਣੋ ਹੋਤਿ, ਨ ਏਵਂ ਤਸ੍ਸ. ਤਥਾਗਤਸ੍ਸ ਪਨ ਕਾਯੋ ਸਬ੍ਬਪਰਿਪੁਣ੍ਣੋਤਿ ਅਤ੍ਥੋ. ਸੀਹਸ੍ਸ ਪਨ ਪੁਰਿਮਕਾਯੋਵ ਪਰਿਪੁਣ੍ਣੋ ਹੋਤਿ, ਪਚ੍ਛਿਮ ਕਾਯੋ ਅਪਰਿਪੁਣ੍ਣੋ. ਤਥਾਗਤਸ੍ਸ ਪਨ ਸੀਹਸ੍ਸ ਪੁਬ੍ਬਡ੍ਢਕਾਯੋਇਵ ਸਬ੍ਬੋ ਕਾਯੋ ਪਰਿਪੁਣ੍ਣੋ. ਸੋਪਿ ਸੀਹਸ੍ਸੇਵ ਨ ਤਤ੍ਥ ਤਤ੍ਥ ਵਿਨਤੁਨ੍ਨਤਾਦਿਵਸੇਨ ਦੁਸ੍ਸਣ੍ਠਿਤ ਵਿਸਣ੍ਠਿਤੋ. ਦੀਘਯੁਤ੍ਤਟ੍ਠਾਨੇ ਪਨ ਦੀਘੋ. ਰਸ੍ਸਕਿਸਥੂਲ ਅਨੁਵਟ੍ਟਿਤਯੁਤ੍ਤਟ੍ਠਾਨੇਸੁ ਤਥਾਵਿਧੋਵ ਹੋਤਿ. ਵੁਤ੍ਤਞ੍ਹੇਤਂ ‘‘ਮਨਾਪਿਯੇ ਚ ਖੋ ਭਿਕ੍ਖਵੇ ਕਮ੍ਮਵਿਪਾਕੇ ਪਚ੍ਚੁਪਟ੍ਠਿਤੇ ਯੇਹਿ ਅਙ੍ਗੇਹਿ ਦੀਘੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਥੂਲਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਕਿਸੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਕਿਸਾਨਿ ਸਣ੍ਠਹਨ੍ਤਿ. ਯੇਹਿ ਅਙ੍ਗੇਹਿ ਵਟ੍ਟੇਹਿ ਸੋਭਤਿ, ਤਾਨਿ ਅਙ੍ਗਾਨਿ ਵਟ੍ਟਾਨਿ ਸਣ੍ਠਹਨ੍ਤੀ’’ਤਿ. ਇਤਿ ਨਾਨਾਚਿਤ੍ਤੇਨ ਪੁਞ੍ਞਚਿਤ੍ਤੇਨ ਚਿਤ੍ਤਿਤੋ ਦਸਹਿ ਪਾਰਮੀਹਿ ਸਜ੍ਜਿਤੋ ਤਥਾਗਤਸ੍ਸ ਅਤ੍ਤਭਾਵੋ ਤਸ੍ਸ ਲੋਕੇ ਸਬ੍ਬਸਿਪ੍ਪਿਨੋ ਵਾ ਇਦ੍ਧਿਮਨ੍ਤੋ ਵਾ ਪਤਿਰੂਪਕਮ੍ਪਿ ਕਾਤੁਂ ਨ ਸਕ੍ਕੋਨ੍ਤਿ. ਤਸ੍ਮਾ ਸੀਹਪੁਬ੍ਬਡ੍ਢਕਾਯੋਤਿ ਥੋਮੇਤਿ.

ਚਤੁਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੫. ਤਤਿਯ ਗਾਥਾਯਂ ਸੁਗਤੋਤਿ ਬੁਦ੍ਧੋ ਕਤ੍ਤੁਭੂਤੋ. ਤਸ੍ਸ ਪਨ ਪਦਸ੍ਸ ਸਤ੍ਤਪ੍ਪੀਨੋਤ੍ਯਾਦੀਹਿ ਪਦੇਹਿ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧੋ. ਸਤ੍ਤਪ੍ਪੀਨੋਤਿ ਦ੍ਵਿਹਤ੍ਥਪਾਦ ਅਂਸਕੂਟ ਏਕਗਲਵਸੇਨ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸਿਕੋਤਿ ਅਤ੍ਥੋ. ਆਚਰਿਯਾ ਪਨ ਪਰਿਪੁਣ੍ਣਦ੍ਵਿਹਤ੍ਥਪਾਦ ਅਂਸਕੂਟ ਖਨ੍ਧਸਙ੍ਖਾਤਸਤ੍ਤਟ੍ਠਾਨੋਤਿ ਅਤ੍ਥਂ ਵਦਨ੍ਤਿ. ਮਂਸੇਨ ਪੀਣਤਿ ਪਰਿਪੂਰਤੀਤਿ ਪੀਨੋ. ਪੀਣਤੇ ਪਰਿਪੂਰਤੇ ਵਾ ਪੀਨੋ. ਪੀਣਧਾਤੁ ਪੀਣਨੇ, ਪੂਰਣੇ ਵਾ ਣ. ਣਸ੍ਸ ਨੋ. ਦ੍ਵੇ ਹਤ੍ਥਪਿਟ੍ਠਿਯੋ ਦ੍ਵੇ ਪਾਦਪਿਟ੍ਠਿਯੋ ਦ੍ਵੇ ਅਂਸਕੂਟਾਨਿ ਏਕਗਲੋ ਚਾਤਿ ਸਤ੍ਤਸੁ ਠਾਨੇਸੁ ਪੀਨੋ ਪਰਿਪੁਣ੍ਣੋ ਮਂਸੋ ਅਸ੍ਸਾਤਿ ਸਤ੍ਤਪੀਨੋ, ਸੁਗਤੋ ਲਬ੍ਭਤਿ. ਅਞ੍ਞੇਸਞ੍ਹਿ ਹਤ੍ਥਪਾਦਪਿਟ੍ਠੀਸੁ ਨ੍ਹਾਰੁਜਾਲਾ ਪਞ੍ਞਾਯਨ੍ਤਿ ਅਂਸਕੂਟਗਲੇਸੁ ਅਟ੍ਠਿਕੋਟਿਯੋ. ਤੇ ਮਨੁਸ੍ਸਾ ਪੇਤਾ ਵਿਯ ਖਾਯਨ੍ਤਿ. ਨ ਤਥਾਗਤੋ. ਤਥਾਗਤੋ ਪਨ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸੁਸ੍ਸਦਤ੍ਤਾ ਨਿਗੁਲ਼ਨ੍ਹਾਰੁਜਾਲੇਹਿ ਹਤ੍ਥਪਿਟ੍ਠਾਦੀਹਿ ਵਟ੍ਟੇਤ੍ਵਾ ਠਪਿਤਸੁਵਣ੍ਣਵਣ੍ਣਾਲਿਙ੍ਗਸਦਿਸੇਨ ਗਲੇਨ ਸੀਲਾਰੂਪਕਂ ਵਿਯ ਚਿਤ੍ਤਕਮ੍ਮਰੂਪਕਂ ਵਿਯ ਚ ਖਾਯਤਿ, ਤਸ੍ਮਾ ਸਤ੍ਤਪ੍ਪੀਨੋਤਿ ਥੋਮੇਤਿ.

ਬ੍ਰਹ੍ਮਾਯੁਸੁਤ੍ਤੇ ਪਨ ‘‘ਸਤ੍ਤੁਸ੍ਸਦੋ’’ਤਿ ਪਾਠੋ. ਤਸ੍ਸ ਪਨ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸੁਸ੍ਸਦੋਤਿ ਅਤ੍ਥੋ ਦਟ੍ਠਬ੍ਬੋ.

ਦੀਘਙ੍ਗੁਲੀਤਿ ਦੀਘਅਙ੍ਗੁਲੀਤਿ ਪਦਚ੍ਛੇਦੋ. ਸਮਆਯਤਹਤ੍ਥ ਪਾਦਙ੍ਗੁਲੀਤਿ ਅਤ੍ਥੋ. ਅਙ੍ਗਤਿ ਉਦ੍ਧਂ ਗਚ੍ਛਤੀਤਿ ਅਙ੍ਗੁਲਿ. ਅਙ੍ਗਤਿ ਤਂ ਤਂ ਕਾਯਙ੍ਗਂ ਪਰਾਮਸਤਿ ਏਤਾਯਾਤਿ ਵਾ ਅਙ੍ਗੁਲਿ, ਕਰਸਾਖਾ. ਅਗਿਧਾਤੁ ਗਤਿਯਂ ਉਲਿਪਚ੍ਚਯੋ. ਅਥ ਵਾ ਅਙ੍ਗਂ ਕਾਯਙ੍ਗਂ ਉਲਤਿ ਗਚ੍ਛਤਿ ਪਰਾਮਸਤਿ ਏਤਾਯਾਤਿ ਅਙ੍ਗੁਲਿ, ਕਰਸਾਖਾ. ਅਙ੍ਗ ਸਦ੍ਦੂਪਪਦਉਲਧਾਤੁ ਗਤਿਯਂ ਇ. ਸਮਦੀਘਾ ਅਙ੍ਗੁਲਿ ਹਤ੍ਥ ਪਾਦਙ੍ਗੁਲਿ ਯਸ੍ਸ ਸੋਤਿ ਦੀਘਙ੍ਗੁਲਿ, ਸੁਗਤੋ. ਸਮਦੀਘਾ ਹਤ੍ਥਪਾਦਙ੍ਗੁਲਿ ਅਤ੍ਥੀਤਿ ਅਤ੍ਥੋ. ਯਥਾ ਹਿ ਅਞ੍ਞੇਸਂ ਕਾਚਿ ਅਙ੍ਗੁਲਿ ਦੀਘਾ ਹੋਤਿ ਕਾਚਿ ਰਸ੍ਸਾ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਮਕ੍ਕਟਸ੍ਸੇਵ ਦੀਘਹਤ੍ਥਪਾਦਙ੍ਗੁਲਿਯੋ ਮੂਲੇ ਥੂਲਾ ਅਨੁਪੁਬ੍ਬੇਨ ਗਨ੍ਤ੍ਵਾ ਅਗ੍ਗੇ ਤਨੁਕਾ ਨਿਯ੍ਯਾਸਤੇਲੇਨ ਮਦ੍ਦਿਤ੍ਵਾ ਵਟ੍ਟਿਤਹਰਿਤਾਲਵਟ੍ਟਸਦਿਸਾ ਹੋਨ੍ਤਿ. ਤਸ੍ਮਾ ਦੀਘਙ੍ਗੁਲੀਤਿ ਥੋਮੇਤਿ. ਮਥਾਤਿ ਮਅਥਾਤਿ ਪਦਚ੍ਛੇਦੋ. ਮਕਾਰੋ ਹਿ ਪਦਸਨ੍ਧਿਕਰੋ. ਅਥਾਤਿ ਅਤ੍ਥਨ੍ਤਰੇ ਨਿਪਾਤੋ. ਤਦਞ੍ਞਨ੍ਤਿ ਅਤ੍ਥੋ.

ਲੋਮਕੂਪੇਕਲੋਮੋਤਿ ਲੋਮਕੂਪਏਕਲੋਮੋਤਿ ਪਦਚ੍ਛੇਦੋ. ਏਕੇਕਲੋਮਕੂਪੇ ਏਕੇਕਜਾਤਲੋਮੋਤਿ ਅਤ੍ਥੋ. ਚਮ੍ਮਮਂਸਂ ਲੁਨਾਤਿ ਛਿਨ੍ਦਤੀਤਿ ਲੋਮੋ, ਵਡ੍ਢਮਾਨਂ ਲੁਨਿਤਬ੍ਬਨ੍ਤਿ ਵਾ ਲੋਮੋ, ਲੂਧਾਤੁ ਛੇਦਨੇ ਮਨਿਪਚ੍ਚਯੋ. ਕੁਵੁਚ੍ਚਤਿ ਉਦਕਂ, ਤਂ ਪਾਤਿ ਰਕ੍ਖਤੀਤਿ ਕੂਪੋ. ਕੁਪੁਬ੍ਬਪਾਧਾਤੁ ਰਕ੍ਖਨੇ ਕ੍ਵਿ. ਉਸ੍ਸ ਦੀਘੋ. ਕੂਪੋ ਵਿਯਾਤਿ ਕੂਪੋ, ਅਥ ਵਾ ਕੁਵੁਚ੍ਚਤਿ ਲੋਮਂ, ਤਂ ਪਾਤਿ ਰਕ੍ਖਤੀਤਿ ਕੂਪੋ. ਅਭਿਧਾਨਟੀਕਾਯਂ ਪਨ ‘‘ਕੁਸਦ੍ਦੇ ਪੋ. ਦੀਘਾਦਿ. ਕੂਪੋ. ਕੇਨ ਉਭਤੀਤਿ ਵਾ ਕੂਪੋ. ਭਸ੍ਸ ਪੋ’’ਤਿ ਵੁਤ੍ਤਂ. ਲੋਮਸ੍ਸ ਕੂਪੋ ਲੋਮਕੂਪੋ. ਤਸ੍ਮਿਂ ਤਸ੍ਮਿਂ ਜਾਤੋ ਏਕੇਕ ਲੋਮੋ ਯਸ੍ਸਾਤਿ ਲੋਮਕੂਪੇਕਲੋਮੋ, ਸੁਗਤੋ. ਯਥਾ ਹਿ ਅਞ੍ਞੇਸਂ ਏਕੇਕਸ੍ਮਿਮ੍ਪਿ ਲੋਮਕੂਪੇ ਅਨੇਕਾਨਿ ਲੋਮਾਨਿ ਜਾਯਨ੍ਤਿ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਏਕੇਕਸ੍ਮਿਂ ਲੋਮਕੂਪੇ ਏਕੇਕਲੋਮੋ ਜਾਯਤਿ. ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤੇ ‘‘ਏਕੇਕਲੋਮੋ ਖੋ ਪਨ ਭਵਂ ਗੋਤਮੋ. ਏਕੇਕਾਨਿ ਲੋਮਾਨਿ ਲੋਮਕੂਪੇਸੁ ਜਾਤਾ ਨੀ’’ਤਿ. ਤਸ੍ਮਾ ਲੋਮਕੂਪੇਕਲੋਮੋਤਿ ਥੋਮੇਤਿ.

ਸਮ੍ਪਨ੍ਨੋਦਾਤਦਾਠੋਤਿ ਸਮ੍ਪਨ੍ਨੋਓਦਾਤਦਾਠੋਤਿ ਪਦਚ੍ਛੇਦੋ. ਸਮ੍ਪਨ੍ਨਸੁਕ੍ਕਦਾਠੋਤਿ ਅਤ੍ਥੋ. ਸਮ੍ਪਜ੍ਜਤੀਤਿ ਸਮ੍ਪਨ੍ਨੋ. ਸਂਪੁਬ੍ਬਪਦਧਾਤੁ ਗਤਿਯਂ ਤ. ਤਸ੍ਸ ਅਨ੍ਨੋ. ਅਵਦਾਯਤਿ ਅਵਖਣ੍ਡਿਯਤਿ ਅਞ੍ਞਵਣ੍ਣੋਭਾਸਨ੍ਤਿ ਓਦਾਤੋ. ਅਵਪੁਬ੍ਬ ਦਾਧਾਤੁ ਅਵਖਣ੍ਡਨੇ ਤ. ਦਂਸਤਿ ਓਦਨਾਦਿਂ ਏਤਾਯਾਤਿ ਦਾਠੋ, ਦਨ੍ਤਵਿਸੇਸੋ. ਦਂਸਧਾਤੁ ਦਂਸਨੇ ਠੋ. ਦਂਸਿਸ੍ਸ ਦਾ. ਸਮ੍ਪਨ੍ਨੋ ਚ ਓਦਾਤੋ ਚ ਦਾਠੋ ਯਸ੍ਸਾਤਿ ਸਮ੍ਪਨ੍ਨੋ ਦਾਤਦਾਠੋ, ਸੁਗਤੋ. ਅਞ੍ਞੇਸਞ੍ਹਿ ਪੂਤਿਦਨ੍ਤਾ ਉਟ੍ਠਹਨ੍ਤਿ. ਤੇਨ ਕਾਚਿ ਦਾਠਾ ਕਾਲ਼ਾਪਿ ਵਿਵਣ੍ਣਾਪਿ ਹੋਨ੍ਤਿ. ਤਥਾਗਤੋ ਪਨ ਸੁਕ੍ਕਦਾਠੋ ਓਸਧਿਤਾਰਕਮ੍ਪਿ ਅਤਿਕ੍ਕਮ੍ਮ ਵਿਰੋਚਮਾਨਾਯ ਪਭਾਯ ਸਮਨ੍ਨਾਗਤਦਾਠੋ ਹੋਤਿ. ਪਾਲ਼ਿਯਂ ਪਨ ‘‘ਸੁਸੁਕ੍ਕਦਾਠੋ’’ਤਿ ਪਾਠੋ. ਅਯਮੇਵਤ੍ਥੋ. ਤਸ੍ਮਾ ਸਮ੍ਪਨ੍ਨੋਦਾਤਦਾਠੋਤਿ ਥੋਮੇਤਿ.

ਕਨਕਸਮਤਚੋਤਿ ਸੁਵਣ੍ਣੇਨ ਸਦਿਸਚਮ੍ਮੋ. ਕਨਤਿ ਦਿਬ੍ਬਤਿ ਓਭਾਸੇਨਾਤਿ ਕਨਕਂ. ਕਨਿਯਤਿ ਇਚ੍ਛਿਯਤਿ ਮਨੁਸ੍ਸੇ ਹੀਤਿ ਵਾ ਕਨਕਂ, ਸੁਵਣ੍ਣਂ. ਕਨਧਾਤੁ ਦਿਤ੍ਤਿਗਤਿਕਨ੍ਤੀਸੁ ਅਕਪਚ੍ਚਯੋ, ਸਂਸਦਿਸੇਨ ਅਮਤਿ ਗਚ੍ਛਤਿ ਪਵਤ੍ਤਤੀਤਿ ਸਮਂ. ਸਂਪੁਬ੍ਬਅਮਧਾਤੁ ਗਤਿਯਂ ਅ. ਤਚਤਿ ਮਂਸਂ ਛਾਦੇਤਿ ਸਂਵਰਤਿ ਵਾਤਿ ਤਚੋ, ਤਚਤਿ ਦਿਬ੍ਬਤਿ ਸੁਵਣ੍ਣੋਭਾਸੇਨਾਤਿ ਵਾ ਤਚੋ, ਚਮ੍ਮਂ. ਤਚਧਾਤੁ ਸਂਵਰਣਦਿਤ੍ਤੀਸੁ ਅ. ਕਨਕੇਨ ਸੁਵਣ੍ਣੇਨ ਸਮੋ ਸਦਿਸੋ ਤਚੋ ਯਸ੍ਸਾਤਿ ਕਨਕ ਸਮਤਚੋ, ਸੁਗਤੋ. ਯਥਾ ਹਿ ਅਞ੍ਞੇਸਂ ਤਚੋ ਕੋਚਿ ਨੀਲਤਚੋ ਸੇਤਤਚੋ ਪੀਤਤਚੋ ਹੋਤਿ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਨਿਸਦਾਯ ਘਂਸਿਤ੍ਵਾ ਗੇਰੁਕਪਰਿਕਮ੍ਮਂ ਕਤ੍ਵਾ ਠਪਿਤ ਘਨਸੁਵਣ੍ਣਰੂਪਕਂ ਵਿਯ ਕਞ੍ਚਨਸਦਿਸਤਚੋ ਹੋਤਿ. ਪਾਲ਼ਿਯਂ ਪਨ ‘‘ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ’’ਤਿ ਵੁਤ੍ਤੋ. ਏਤ੍ਥ ਚ ਸੁਵਣ੍ਣਵਣ੍ਣੋ ਵਿਯ ਵਣ੍ਣੋ ਯਸ੍ਸਾਤਿ ਸੁਵਣ੍ਣਵਣ੍ਣੋ, ਕਞ੍ਚਨੇਨ ਸਨ੍ਨਿਭਂ ਸਦਿਸਂ ਤਚਮਸ੍ਸਾਤਿ ਕਞ੍ਚਨਸਨ੍ਨਿਭਤ੍ਤਚੋਤਿ ਵਚਨਤ੍ਥੋ ਕਾਤਬ੍ਬੋ. ਏਤ੍ਥ ਚ ਸੁਵਣ੍ਣਵਣ੍ਣਨ੍ਤਿ ਇਮਿਨਾ ਤਥਾਗਤਸ੍ਸ ਘਨਸਿਨਿਦ੍ਧਸਣ੍ਹਸਰੀਰਤਂ ਦਸ੍ਸੇਤਿ. ਕਞ੍ਚਨਸਨ੍ਨਿਭਤ੍ਤਚੋਤਿ ਇਮਿਨਾ ਛਵਿਵਣ੍ਣਂ ਦਸ੍ਸੇਤਿ. ਅਥ ਵਾ ਵੇਵਚਨਮੇਤਂ ਪਦਦ੍ਵਯਂ. ਤਸ੍ਮਾ ਕਨਕਸਮਤਚੋਤਿ ਥੋਮੇਤਿ.

ਨੀਲਮੁਦ੍ਧਗ੍ਗਲੋਮੋਤਿ ਨੀਲਂ ਉਦ੍ਧਂ ਅਗ੍ਗਲੋਮੋਤਿ ਪਦਚ੍ਛੇਦੋ. ਨੀਲਂ ਉਦ੍ਧਂ ਅਗ੍ਗਾ ਕੋਟਿ ਹੁਤ੍ਵਾ ਮੁਖਸੋਭਂ ਉਲ੍ਲੋਕਯਮਾਨੋ ਵਿਯ ਠਿਤਲੋਮੋ, ਨੀਲਾਨਿ ਉਦ੍ਧਂ ਅਗ੍ਗਾਨਿ ਕੋਟੀਨਿ ਹੁਤ੍ਵਾ ਠਿਤਾਨਿ ਲੋਮਾਨਿ ਯਸ੍ਸਾਤਿ ਨੀਲਮੁਦ੍ਧਗ੍ਗਲੋਮੋ, ਸੁਗਤੋ. ਯਥਾ ਹਿ ਅਞ੍ਞੇਸਂ ਲੋਮਾਨਿ ਹੇਟ੍ਠਾ ਅਗ੍ਗਾਨਿ ਹੁਤ੍ਵਾ ਤਿਟ੍ਠਨ੍ਤਿ, ਨ ਏਵਂ ਤਥਾਗਤਸ੍ਸ. ਤਥਾਗਤਸ੍ਸ ਪਨ ਲੋਮਾਨਿ ਆਵਟ੍ਟਪਰਿਯੋਸਾਨੇ ਉਦ੍ਧਂ ਅਗ੍ਗਾਨਿ ਹੁਤ੍ਵਾ ਮੁਖਸੋਭਂ ਉਲ੍ਲੋਕਯਮਾਨਾਨਿ ਵਿਯ ਤਿਟ੍ਠਨ੍ਤਿ. ਵੁਤ੍ਤਞ੍ਹੇਤਂ ਬ੍ਰਹ੍ਮਾਯੁਸੁਤ੍ਤੇ ‘‘ਉਦ੍ਧਗ੍ਗਲੋਮੋ ਭਵਂ ਗੋਤਮੋ. ਉਦ੍ਧਗ੍ਗਾਨਿ ਲੋਮਾਨਿ ਜਾਤਾਨਿ ਨੀਲਾਨਿ ਅਞ੍ਜਨਵਣ੍ਣਾਨਿ ਕੁਣ੍ਡਲਾਵਟ੍ਟਾਨਿ ਪਦਕ੍ਖਿਣਾਵਟ੍ਟਕਜਾਤਾਨੀ’’ਤਿ. ਤਸ੍ਮਾ ਨੀਲਮੁਦ੍ਧਗ੍ਗਲੋਮੋਤਿ ਥੋਮੇਤਿ.

ਸਮ੍ਬੁਦ੍ਧੋਤਿ ਤਥਾਗਤੋ. ਸੋ ਹਿ ਅਨਞ੍ਞਬੁਦ੍ਧੋ ਹੁਤ੍ਵਾ ਸਾਮਂਯੇਵ ਚਤ੍ਤਾਰਿ ਸਚ੍ਚਾਨਿ ਬੁਜ੍ਝਤੀਤਿ ਸਮ੍ਬੁਦ੍ਧੋਤਿ ਵੁਚ੍ਚਤਿ. ਤਸ੍ਸ ਪਨ ਪਦਸ੍ਸ ਥੂਲਜਿਵ੍ਹੋਤ੍ਯਾਦੀਹਿ ਤੀਹਿ ਪਦੇਹਿ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧੋ.

ਥੂਲਜਿਵ੍ਹੋਤਿ ਮੁਦੁਦੀਘਪੁਥੁਲ ਜਿਵ੍ਹਾਯ ਸਮ੍ਪਨ੍ਨੋਤਿ ਅਤ੍ਥੋ. ਗਾਥਾਬਨ੍ਧਵਸੇਨ ਹਿ ਮੁਦੁਦੀਘਸਦ੍ਦਲੋਪਂ ਕਤ੍ਵਾ ਏਵਂ ਵੁਤ੍ਤਂ. ਤੇਨ ਵੁਤ੍ਤਂ ਅਟ੍ਠਕਥਾਯਂ ‘‘ਮੁਦੁਜਿਵ੍ਹਾ ਦੀਘਾ ਥੂਲਾ ਵਣ੍ਣ ਸਮ੍ਪਨ੍ਨਾ’’ਤਿ. ਥੂਲਤਿ ਬ੍ਰੂਹਤੀਤਿ ਥੂਲਾ, ਜਿਵ੍ਹਾ. ਥੂਲਧਾਤੁ ਬੁਦ੍ਧਿਯਂ ਅ. ਜੀਵਤਿ ਪਾਣਂ ਧਾਰੇਤੀਤਿ ਜਿਵ੍ਹਾ, ਰਸਨਾ. ਜੀਵਧਾਤੁ ਪਾਣਧਾਰਣੇ ਹਪਚ੍ਚਯੋ. ਜੀਵਨ੍ਤਿ ਸਤ੍ਤਾ ਏਤੇਨ ਰਸੇਨਾਤਿ ਜੀਵਿਤਂ, ਛਬ੍ਬਿਧਰਸੋ. ਤਂ ਅਵ੍ਹਾਯਤੀਤਿ ਜਿਵ੍ਹਾ, ਜਿਵ੍ਹਾਪਸਾਦਰੂਪਂ. ਸਮ੍ਭਾਰਜਿਵ੍ਹਾ ਠਾਨੂਪਚਾਰੇਨ ਲਬ੍ਭਤਿ. ਜੀਵਿਤਸਦ੍ਦੂਪਪਦ ਅਵ੍ਹਧਾਤੁ ਅਵ੍ਹਾਯਨੇ ਅ. ਜੀਵਿਤਅਵ੍ਹਾਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ਵਿਤਸਦ੍ਦਲੋਪਂ ਕਤ੍ਵਾ ਜਿਵ੍ਹਾਤਿ ਵੁਤ੍ਤਂ. ਥੂਲਾ ਮਹਨ੍ਤਾ ਦੀਘਾ ਮੁਦੁਕਾ ਜਿਵ੍ਹਾ ਯਸ੍ਸਾਤਿ ਥੂਲਜਿਵ੍ਹੋ, ਸਮ੍ਬੁਦ੍ਧੋ. ਅਞ੍ਞੇਸਞ੍ਹਿ ਜਿਵ੍ਹਾ ਥੂਲਾਪਿ ਹੋਤਿ ਕਿਸਾਪਿ ਰਸ੍ਸਾਪਿ ਥਦ੍ਧਾਪਿ ਵਿਸਮਾਪਿ. ਤਥਾਗਤਸ੍ਸ ਪਨ ਮੁਦੁਜਿਵ੍ਹਾ ਦੀਘਾ ਪੁਥੁਲਾ ਵਣ੍ਣ ਸਮ੍ਪਨ੍ਨਾ ਹੋਤਿ. ਸੋ ਤਂ ਲਕ੍ਖਣਂ ਪਰਿਯੇਸਿਤੁਂ ਆਗਤਾਨਂ ਬ੍ਰਹ੍ਮਾਯੁਬ੍ਰਾਹ੍ਮਣਾਦੀਨਂ ਕਙ੍ਖਾਵਿਨੋਦਨਤ੍ਥਂ ਜਿਵ੍ਹਾਯ ਮੁਦੁਕਤ੍ਤਾ ਤਂ ਜਿਵ੍ਹਂ ਕਥਿਨਸੂਚਿ ਵਿਯ ਵਟ੍ਟੇਤ੍ਵਾ ਉਭੋਪਿ ਨਾਸਿਕਾਸੋਤਾਨਿ ਪਰਾਮਸਤਿ, ਦੀਘਤ੍ਤਾ ਉਭੋ ਕਣ੍ਣਸੋਤਾਨਿ ਪਰਾਮਸਤਿ, ਪੁਥੁਲਤ੍ਤਾ ਕੇਸਨ੍ਤਪਰਿਯੋਸਾਨਂ ਕੇਵਲਮ੍ਪਿ ਨਲਾਟਂ ਪਟਿਚ੍ਛਾਦੇਤਿ, ਏਵਂ ਤਸ੍ਸਾ ਮੁਦੁਦੀਘਪੁਥੁਲਭਾਵਂ ਪਕਾਸੇਨ੍ਤੋ ਕਙ੍ਖਾਵਿਨੋਦੇਤਿ, ਏਵਂ ਤਿਲਕ੍ਖਣਸਮ੍ਪਨ੍ਨਂ ਜਿਵ੍ਹਂ ਸਨ੍ਧਾਯ ਥੂਲ ਜਿਵ੍ਹੋਤਿ ਥੋਮੇਤਿ. ਪਾਲ਼ਿਯਂ ਪਨ ‘‘ਪਹੂਤਜਿਵ੍ਹੋ’’ਤਿ ਪਾਠੋ. ਅਯਮੇਵਤ੍ਥੋ.

ਅਥਾਤਿ ਅਤ੍ਥਨ੍ਤਰਤ੍ਥੇ ਨਿਪਾਤੋ. ਤਦਞ੍ਞਨ੍ਤਿ ਅਤ੍ਥੋ. ਸੀਹਹਨੁਕੋਤਿ ਸੀਹਸ੍ਸ ਹੇਟ੍ਠਾ ਹਨੁ ਵਿਯ ਪਰਿਪੁਣ੍ਣ ਹਨੁਕੋ. ਸੀਹਸਦ੍ਦਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਹਨਤਿ ਓਦਨਾਦੀਨਂ ਵਣ੍ਣਵਿਸੇਸਂ ਨਾਸੇਤੀਤਿ ਹਨੁ. ਹਨਧਾਤੁ ਹਿਂਸਾਯਂ ਉ. ਸੀਹਸ੍ਸ ਹੇਟ੍ਠਾ ਹਨੁ ਵਿਯ ਹਨੁ ਯਸ੍ਸਾਤਿ ਸੀਹਹਨੁਕੋ, ਸਮ੍ਬੁਦ੍ਧੋ. ਸਮਾਸਨ੍ਤੇ ਕੋ. ਸੀਹਸ੍ਸ ਹਿ ਹੇਟ੍ਠਿਮਹਨੁਮੇਵ ਪਰਿਪੁਣ੍ਣਂ ਹੋਤਿ, ਨ ਉਪਰਿਮਂ. ਤਥਾਗਤਸ੍ਸ ਪਨ ਸੀਹਸ੍ਸ ਹੇਟ੍ਠਿਮਂ ਵਿਯ ਦ੍ਵੇਪਿ ਪਰਿਪੁਣ੍ਣਾਨਿ ਦ੍ਵਾਦਸਿਯਂ ਪਕ੍ਖਸ੍ਸ ਚਨ੍ਦਸਦਿਸਾਨਿ ਹੋਨ੍ਤਿ. ਤਸ੍ਮਾ ਸੀਹਹਨੁਕੋਤਿ ਥੋਮੇਤਿ.

ਜਾਲਿਕਪ੍ਪਾਦਹਤ੍ਥੋਤਿ ਕੁਸਲੇਨ ਵਡ੍ਢਕਿਨਾ ਵਾਤਪਾਨੇ ਸਮ੍ਮਾਯੋਜਿਤਜਾਲਂ ਵਿਯ ਚਮ੍ਮੇਨ ਅਪ੍ਪਟਿਬਦ੍ਧਹਤ੍ਥਪਾਦਙ੍ਗੁਲਨ੍ਤਰੋ. ਜਲਤਿ ਦਿਬ੍ਬਤੀਤਿ ਜਾਲਂ, ਜਲਧਾਤੁ ਦਿਤ੍ਤਿਯਂ ਣ. ਜਾਲਂ ਅਸ੍ਸ ਅਤ੍ਥਿ ਤਸ੍ਮਿਂ ਵਾ ਵਿਜ੍ਜਤੀਤਿ ਜਾਲਿਕਂ, ਵਾਤਪਾਨਂ. ਅਸ੍ਸਥ੍ਯਤ੍ਥੇ ਣਿਕੋ. ਅਥ ਵਾ ਜਾਲਂ ਏਵ ਜਾਲਿਕਂ. ਪਜ੍ਜਤਿ ਗਚ੍ਛਤਿ ਏਤੇਨਾਤਿ ਪਾਦੋ, ਚਰਣੋ. ਪਦਧਾਤੁ ਗਮਨੇ ਣ. ਤਂ ਤਂ ਭਾਰਂ ਹਰਤੀਤਿ ਹਤ੍ਥੋ, ਕਰੋ. ਹਰਧਾਤੁ ਹਰਣੇ ਥੋ. ਜਾਲਿਕਂ ਵਿਯ ਹਤ੍ਥਪਾਦਙ੍ਗੁਲਨ੍ਤਰਂ ਯਸ੍ਸਾਤਿ ਜਾਲਿਕਪ੍ਪਾਦਹਤ੍ਥੋ, ਸਮ੍ਬੁਦ੍ਧੋ. ਕੁਸਲੇਨ ਵਡ੍ਢਕਿਨਾ ਵਾਤਪਾਨੇ ਸਮ੍ਮਾਯੋਜਿਤਾਨਿ ਜਾਲਸਦਿਸਾਨਿ ਹਤ੍ਥਪਾਦਙ੍ਗੁਲਨ੍ਤਰਾਨਿ ਹੋਨ੍ਤਿ. ਨ ਚ ਚਮ੍ਮੇਨ ਪਟਿਬਦ੍ਧਅਙ੍ਗੁਲਨ੍ਤਰਾਨੀਤਿ ਅਤ੍ਥੋ. ਏਤ੍ਥ ਜਾਲਿਕਪ੍ਪਾਦਹਤ੍ਥਙ੍ਗੁਲਨ੍ਤਰਨ੍ਤਿ ਵਤ੍ਤਬ੍ਬੇ ਉਤ੍ਤਰਪਦਲੋਪੇਨ ਏਵਂ ਵੁਤ੍ਤਂ. ਚਮ੍ਮੇਨ ਪਟਿਬਦ੍ਧਹਤ੍ਥਪਾਦਙ੍ਗੁਲਨ੍ਤਰੋ ਹਿ ਫਣਹਤ੍ਥਕੋ ਪੁਰਿਸਦੋਸੇਨ ਉਪਹਤੋ ਪਬ੍ਬਜ੍ਜਮ੍ਪਿ ਨ ਲਭਤਿ. ਤਥਾਗਤਸ੍ਸ ਪਨ ਚਤਸ੍ਸੋ ਹਤ੍ਥਙ੍ਗੁਲਿਯੋ ਪਞ੍ਚਪਿ ਪਾਦਙ੍ਗੁਲਿਯੋ ਏਕਪ੍ਪਮਾਣਾ ਹੋਨ੍ਤਿ. ਤਾਸਂ ਏਕਪ੍ਪਮਾਣ ਤਾਯ ਯਵਲਕ੍ਖਣਂ ਅਞ੍ਞਮਞ੍ਞਂ ਪਟਿਵਿਜ੍ਝਿਤ੍ਵਾ ਤਿਟ੍ਠਤਿ. ਅਥਸ੍ਸ ਹਤ੍ਥਪਾਦਾ ਕੁਸਲੇਨ ਵਡ੍ਢਕਿਨਾ ਸਮ੍ਮਾਯੋਜਿਤਜਾਲਵਾਤ ਪਾਨਸਦਿਸਾ ਹੋਨ੍ਤਿ, ਤਸ੍ਮਾ ਜਾਲਿਕਪ੍ਪਾਦਹਤ੍ਥੋਤਿ ਥੋਮੇਤਿ. ਪਾਲ਼ਿਯਂ ਪਨ ‘‘ਜਾਲਹਤ੍ਥਪਾਦੋ’’ਤਿ ਪਾਠੋ. ਅਯਮੇਵਤ੍ਥੋ.

ਨਾਥੋਤਿ ਬੁਦ੍ਧੋ ਕਤ੍ਤੁਵਸੇਨ. ਸੋ ਹਿ ਨਾਥਤਿ ਵਿਨੇਯ੍ਯਾਨਂ ਹਿਤਪਟਿਪਤ੍ਤਿਂ ਯਾਚਤਿ, ਪਰਸਨ੍ਤਾਨਗਤਂ ਵਾ ਕਿਲੇਸਬ੍ਯਸਂ ਉਪਤਾਪੇਤਿ, ਪਰਮੇਨ ਚਿਤ੍ਤਿਸ੍ਸਰਿਯੇਨ ਸਮਨ੍ਨਾ ਗਤੋ. ਸਬ੍ਬਸਤ੍ਤੇ ਵਾ ਗੁਣੇਹਿ ਈਸਤਿ ਅਭਿਭਵਤਿ, ਵੇਨੇਯ੍ਯਾਨਂ ਹਿਤਸੁਖਂ ਵਾ ਆਸੀਸਤੀਤਿ ਨਾਥੋਤਿ ਵੁਚ੍ਚਤਿ. ਵੁਤ੍ਤਞ੍ਹਿ ਸਦ੍ਦਨੀਤਿਯਂ ‘‘ਨਾਥਧਾਤੁ ਯਾਚਨੇ ਉਪਤਾਪੇ ਇਸ੍ਸਰਿਯੇ ਆਸਿਸਨੇ ਚਾਤਿ ਚਤੂਸ੍ਵਤ੍ਥੇਸੁ ਪਵਤ੍ਤਤੀ’’ਤਿ.

ਤਸ੍ਸ ਪਨ ਪਦਸ੍ਸ ਉਣ੍ਹੀਸਸੀਸੋਤਿਪਦੇਨ ਤੁਲ੍ਯਲਿਙ੍ਗਤ੍ਤਭਾਵੇਨ ਸਮ੍ਬਨ੍ਧੋ. ਉਣ੍ਹੀਸਸੀਸੋਤਿ ਰਞ੍ਞੋ ਬਦ੍ਧਉਣ੍ਹੀਸ ਪਟ੍ਟੋ ਵਿਯ ਵਿਰੋਚਮਾਨੋ ਪਕਤਿਮਂਸਪਿਣ੍ਡਸਙ੍ਖਾਤੋ ਉਣ੍ਹੀਸਪਟ੍ਟਸੀਸੋ. ਨਲਾਟੇ ਨਹਿਯਤਿ ਬਨ੍ਧਿਯਤੀਤਿ ਉਣ੍ਹੀਸੋ. ਉਪੁਬ੍ਬਨਹਧਾਤੁ ਬਨ੍ਧਨੇ, ਈਸੋ. ਵਣ੍ਣਵਿਕਾਰੋ. ਵੁਤ੍ਤਞ੍ਹਿ ਜਾਲਿਨਿਯਂ –

‘‘ਵਣ੍ਣਾਗਮੋ ਵਣ੍ਣਵਿਪਰਿਯਾਯੋ,

ਦ੍ਵੇ ਚਾਪਰੇ ਵਣ੍ਣਵਿਕਾਰਨਾਸਾ;

ਧਾਤੂਨਮਤ੍ਥਾਤਿਸਯੇਨ ਯੋਗੋ,

ਤਦੁਚ੍ਚਤੇ ਪਞ੍ਚਵਿਧਂ ਨਿਰੁਤ੍ਤਿ’’ਨ੍ਤਿ.

ਤਤ੍ਥ ਚ ਅਵਿਜ੍ਜਮਾਨਸ੍ਸ ਆਗਮਾ ਵਣ੍ਣਾਗਮੋ ਨਾਮ. ਵਿਜ੍ਜਮਾਨਅਕ੍ਖਰਾਨਂ ਹੇਟ੍ਠੁਪਰਿਯਾਯਵਸੇਨ ਵਣ੍ਣਵਿਪਰਿਯਾਯੋ ਨਾਮ. ਅਞ੍ਞਕ੍ਖਰਸ੍ਸ ਅਞ੍ਞਕ੍ਖਰਾਪਜ੍ਜਨਤਾ ਵਣ੍ਣਵਿਕਾਰੋ ਨਾਮ. ਵਿਜ੍ਜਮਾਨਕ੍ਖਰਵਿਨਾਸੋ ਵਣ੍ਣਵਿਨਾਸੋ ਨਾਮ. ਤਤ੍ਥ ਤਤ੍ਥ ਯਥਾਯੋਗਂ ਵਿਸੇਸਤ੍ਥਯੋਗੋ ਧਾਤੂਨਂ ਅਤ੍ਥਾਤਿਸਯ ਯੋਗੋ ਨਾਮਾਤਿ ਅਧਿਪ੍ਪਾਯੋ. ਏਤ੍ਥ ਪਨ ਨਕਾਰਸ੍ਸ ਣਕਾਰਂ ਕਤਤ੍ਤਾ ਵਣ੍ਣਵਿਕਾਰੋਤਿ ਦਟ੍ਠਬ੍ਬੋ. ਮਾਲਾਦਿਂ ਸਿਯਤਿ ਬਨ੍ਧਿਯਤੀਤਿ ਸੀਸੋ, ਉਤ੍ਤਮਙ੍ਗੋ. ਸਿਧਾਤੁ ਬਨ੍ਧਨੇ ਈਸੋ. ਰਾਜੂਨਂ ਉਣ੍ਹੀਸਪਟ੍ਟੇਨ ਵੇਠਿਤਸੀਸੋ ਵਿਯ ਸੀਸੋ ਯਸ੍ਸਾਤਿ ਉਣ੍ਹੀਸਸੀਸੋ. ਅਥ ਵਾ ਰਾਜੂਨਂ ਉਣ੍ਹੀਸਂ ਵਿਯ ਸਬ੍ਬਤ੍ਥ ਪਰਿਮਣ੍ਡਲਸੀਸੋ ਯਸ੍ਸਾਤਿ ਉਣ੍ਹੀਸਸੀਸੋ, ਨਾਥੋ.

ਵੁਤ੍ਤਞ੍ਹਿ ਬ੍ਰਹ੍ਮਾਯੁਸੁਤ੍ਤਟ੍ਠਕਥਾਯਂ ‘‘ਉਣ੍ਹੀਸਸੀਸੋਤਿ ਇਦਂ ਪਰਿਪੁਣ੍ਣਨਲਾਟਞ੍ਚੇਵ ਪਰਿਪੁਣ੍ਣਸੀਸਞ੍ਚਾਤਿ ਦ੍ਵੇ ਅਤ੍ਥਵਸੇ ਪਟਿਚ੍ਚ ਵੁਤ੍ਤਂ. ਤਥਾਗਤਸ੍ਸ ਹਿ ਦਕ੍ਖਿਣਕਣ੍ਣਚੂਲ਼ਿਕਤੋ ਪਟ੍ਠਾਯ ਮਂਸਪਟਂ ਉਟ੍ਠਹਿਤ੍ਵਾ ਸਕਲਂ ਨਲਾਟਂ ਛਾਦਯਮਾਨਂ ਪੂਰਯਮਾਨਂ ਗਨ੍ਤ੍ਵਾ ਵਾਮਕਣ੍ਣਚੂਲ਼ਿਕਾਯ ਪਤਿਟ੍ਠਿਤਂ. ਰਞ੍ਞੋ ਬਦ੍ਧਉਣ੍ਹੀਸਪਟ੍ਟੋ ਵਿਯ ਵਿਰੋਚਤਿ. ਪਚ੍ਛਿਮਭਵਿਕਬੋਧਿਸਤ੍ਤਾਨਂ ਕਿਰ ਇਮਂ ਲਕ੍ਖਣਂ ਵਿਦਿਤ੍ਵਾ ਰਾਜੂਨਂ ਉਣ੍ਹੀਸਪਟ੍ਟਂ ਅਕਂਸੁ. ਅਯਂ ਤਾਵ ਏਕੋ ਅਤ੍ਥੋ. ਅਞ੍ਞੇ ਪਨ ਜਨਾ ਅਪਰਿਪੁਣ੍ਣਸੀਸਾ ਹੋਨ੍ਤਿ. ਕੇਚਿ ਕਪਿਸੀਸਾ, ਕੇਚਿ ਫਲਸੀਸਾ, ਕੇਚਿ ਅਟ੍ਠਿਸੀਸਾ, ਕੇਚਿ ਤੁਮ੍ਬ ਸੀਸਾ, ਕੇਚਿ ਪਬ੍ਭਾਰਸੀਸਾ. ਤਥਾਗਤਸ੍ਸ ਪਨ ਆਰਗ੍ਗੇਨ ਵਟ੍ਟੇਤ੍ਵਾ ਠਪਿਤਂ ਵਿਯ ਸੁਪਰਿਪੁਣ੍ਣਂ ਉਦਕਪੁਪ੍ਫੁਲਸਦਿਸਂ ਸੀਸਂ ਹੋਤਿ. ਤਤ੍ਥ ਪੁਰਿਮਨਯੇਨ ਉਣ੍ਹੀਸਵੇਠਿਤਸੀਸੋ ਵਿਯਾਤਿ ਉਣ੍ਹੀਸਸੀਸੋ. ਦੁਤਿਯਨਯੇਨ ਉਣ੍ਹੀਸਂ ਵਿਯ ਸਬ੍ਬਤ੍ਥ ਪਰਿਮਣ੍ਡਲ ਸੀਸੋਤਿ ਉਣ੍ਹੀਸਸੀਸੋ’’ਤਿ. ਤਟ੍ਟੀਕਾਯਞ੍ਚ ‘‘ਦ੍ਵੇ ਅਤ੍ਥ ਵਸੇ ਪਟਿਚ੍ਚ ਵੁਤ੍ਤਨ੍ਤਿ, ਯਸ੍ਮਾ ਬੁਦ੍ਧਾ ਚਕ੍ਕਵਤ੍ਤਿਨੋ ਚ ਪਰਿਪੁਣ੍ਣ ਨਲਾਟਤਾਯ ਪਰਿਪੁਣ੍ਣਸੀਸਬਿਮ੍ਬਤਾਯ ਉਣ੍ਹੀਸਸੀਸਾਤਿ ਵੁਚ੍ਚਨ੍ਤਿ. ਤਸ੍ਮਾ ਤੇ ਦ੍ਵੇ ਅਤ੍ਥਵਸੇ ਪਟਿਚ੍ਚ ਉਣ੍ਹੀਸਸੀਸੋਤਿ ਵੁਤ੍ਤ’’ਨ੍ਤਿ ਵਣ੍ਣੇਤਿ. ਤਸ੍ਮਾ ਉਣ੍ਹੀਸਸੀਸੋਤਿ ਥੋਮੇਤਿ.

ਇਤਿਗੁਣਸਹਿਤਨ੍ਤਿ ਇਮਿਨਾ ਵੁਤ੍ਤਪ੍ਪਕਾਰੇਨ ਨਿਗ੍ਰੋਧਬਿਮ੍ਬੋਤ੍ਯਾਦਿਨਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਗੁਣੇਨ ਸਮ੍ਪਨ੍ਨਂ. ਇਤਿਏਵਂ ਵੁਤ੍ਤਪ੍ਪਕਾਰਂ ਗੁਣਂ ਇਤਿਗੁਣਂ. ਤੇਨ ਸਹ ਇਤੋ ਪਤ੍ਤੋਤਿ ਇਤਿਗੁਣਸਹਿਤੋ, ਮਹੇਸੀ. ਅਞ੍ਞੇ ਹਿ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣੇਹਿ ਸਮ੍ਪਨ੍ਨਾ ਨ ਹੋਨ੍ਤਿ, ਚਕ੍ਕਵਤ੍ਤਿਰਾਜਾਨੋ ਮਹਾਪੁਰਿਸਲਕ੍ਖਣੇਹਿ ਸਮ੍ਪਨ੍ਨਾਪਿ ਠਪੇਤ੍ਵਾ ਕੋਸੋਹਿਤਵਤ੍ਥ ਗੁਯ੍ਹਲਕ੍ਖਣਂ ਅਵਸੇਸੇਹਿ ਸਮ੍ਪਨ੍ਨਾ ਹੋਨ੍ਤਿ. ਤਥਾਗਤੋਯੇਵ ਸਬ੍ਬਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ. ਤਸ੍ਮਾ ਭਗਵਨ੍ਤਂਯੇਵ ਇਤਿਗੁਣਸਹਿਤਨ੍ਤਿ ਥੋਮਨਂ ਅਰਹਤੀਤਿ ਵੁਤ੍ਤਂ ਹੋਤਿ. ਤਂ ਮਹੇਸਿਨ੍ਤਿ ਸੀਲਕ੍ਖਨ੍ਧਾਦਿਕੇ ਚ ਨਿਬ੍ਬਾਨਞ੍ਚ ਏਸਤਿ ਗਵੇਸਤੀਤਿ ਮਹੇਸੀ. ਤਂ ਮਹੇਸਿਂ ਅਹਂ ਤੀਹਿ ਦ੍ਵਾਰੇਹਿ ਨਮਾਮਿ ਵਨ੍ਦਾਮੀਤਿ ਸਮ੍ਬਨ੍ਧੋ.

ਪਞ੍ਚਵੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੩. ਅਯਂ ਪਨ ਇਮਾਸੁ ਤੀਸੁ ਗਾਥਾਸੁ ਸਙ੍ਖੇਪਤ੍ਥਯੋਜਨਾ. ਬੁਦ੍ਧੋ ਕਤ੍ਤੁਭੂਤੋ ਨਿਗ੍ਰੋਧਬਿਮ੍ਬੋ ਨਿਗ੍ਰੋਧਸ੍ਸ ਪਰਿਮਣ੍ਡਲੋ ਵਿਯ ਪਰਿਮਣ੍ਡਲਸਰੀਰੋ ਮੁਦੁਕਰਚਰਣੋ ਸਣ੍ਹਹਤ੍ਥਪਾਦੋ, ਬ੍ਰਹ੍ਮਘੋਸੋ ਬ੍ਰਹ੍ਮੁਨੋ ਸਰੋ ਵਿਯ ਅਟ੍ਠਙ੍ਗਸਮ੍ਪਨ੍ਨਸਰਵਨ੍ਤੋ, ਏਣਿਜਙ੍ਘਾ ਏਣਿਮਿਗਸ੍ਸ ਜਙ੍ਘਾ ਵਿਯ ਸੁਵਟ੍ਟਜਾਣੁਕੋ, ਕੋਸਚ੍ਛਾਦਙ੍ਗਜਾਤੋ ਉਸਭਵਾਰਣਾ ਦੀਨਂ ਅਙ੍ਗਜਾਤੋ ਵਿਯ ਸੁਵਣ੍ਣਪਦੁਮਕਣ੍ਣਿਕਸਦਿਸੇਨ ਵਤ੍ਥਕੋਸੇਨ ਪਟਿਚ੍ਛਨ੍ਨੇਨ ਗੁਯ੍ਹਙ੍ਗਜਾਤੇਨ ਸਮਨ੍ਨਾਗਤੋ, ਪੁਨਰਪਿ ਪੁਨਅਪਿ, ਸੁਗਤੋ ਬੁਦ੍ਧੋ ਸੁਪ੍ਪਤਿਟ੍ਠਿਤਪਾਦੋ ਸੁਵਣ੍ਣ ਪਾਦੁਕਤਲਮਿਵ ਭੂਮਿਯਂ ਸਮਂ ਸੁਟ੍ਠੁ ਪਤਿਟ੍ਠਿਤਪਾਦੋ, ਮੂਦੋ ਦਾਤੁਣ੍ਣਲੋਮੋ ਭਮੁਕਨ੍ਤਰੇ ਜਾਤੋ ਸਣ੍ਹਸੁਖੁਮੋ ਸੇਤੋ ਸੁਦ੍ਧੋ ਉਣ੍ਣਲੋਮਵਨ੍ਤੋ, ਅਥਮਪਿ ਤਦਞ੍ਞਂਅਪਿ, ਸੁਗਤੋ ਬੁਦ੍ਧੋ, ਬ੍ਰਹ੍ਮੁਜੁਗ੍ਗਤ੍ਤਭਾਵੋ ਬ੍ਰਹ੍ਮੁਨੋ ਉਜੁਉਗ੍ਗਤ ਅਤ੍ਤਭਾਵੋ ਵਿਯ ਉਜੁਮੇਵ ਅਤ੍ਤਭਾਵੋ, ਨੀਲਕ੍ਖੀ ਅਤਿਨੀਲਨੇਤ੍ਤੇਨ ਸਮਨ੍ਨਾਗਤੋ, ਦੀਘਪਣ੍ਹਿ ਆਯਤਪਣ੍ਹਿ ਪਰਿਪੁਣ੍ਣਪਣ੍ਹਿ ਵਾ, ਸੁਖੁਮਮਲਛਵੀ ਸਣ੍ਹਮਲਵਿਸੁਦ੍ਧਤਚੋ ਸਣ੍ਹਮਲ ਵਿਰਹਿਤਤਚੋ ਵਾ, ਥੋਮ੍ਯਰਸਗ੍ਗਸਗ੍ਗੀ ਥੋਮਿਤਬ੍ਬਸਤ੍ਤਰ ਸਹਰਣਸਹਸ੍ਸਨ੍ਹਾਰੁਉਦ੍ਧਗ੍ਗਿਕਾ.

੨੪. ਜਿਨੋ ਪਞ੍ਚਮਾਰਜਿਤਵਾ ਬੁਦ੍ਧੋ, ਚਤ੍ਤਾਲੀਸਗ੍ਗਦਨ੍ਤੋ ਸਮਚਤ੍ਤਾਲੀਸਉਤ੍ਤਮਦਨ੍ਤੋ, ਸਮਕਲਪਨਜੋ ਕਕਚੇਨ ਛਿਨ੍ਦਿਤ੍ਵਾ ਠਪਿਤੋ ਵਿਯ ਸਮਦਨ੍ਤੋ, ਅਨ੍ਤਰਂਸਪ੍ਪਪੀਨੋ ਦ੍ਵਿਨ੍ਨਂ ਅਂਸਾਨਂ ਖਨ੍ਧਾਨਂ ਅਨ੍ਤਰਂ ਵੇਮਜ੍ਝੇ ਪਰਿਪੁਣ੍ਣਪਿਟ੍ਠਿਤਲੋ, ਚਕ੍ਕੇਨਙ੍ਕਿਤਪਾਦੋ ਅਟ੍ਠਸਤਪਾਦਚਕ੍ਕਲਕ੍ਖਣੇਨ ਲਕ੍ਖਿਤ ਪਾਦਤਲੋ, ਅਵਿਰਲ਼ਦਸਨੋ ਅਵਿਵਰਦਨ੍ਤੇਨ ਸਮ੍ਪਨ੍ਨੋ, ਮਾਰਜਿ ਪਞ੍ਚਮਾਰਜਿਤਵਾ ਬੁਦ੍ਧੋ, ਉਸ੍ਸਙ੍ਖਪਾਦੋ ਪਾਦਸ੍ਸ ਉਪਰਿ ਠਿਤੇਨ ਸਙ੍ਖਸਦਿਸਤ੍ਤਾ ਸਙ੍ਖਨਾਮਿਕੇਨ ਗੋਪ੍ਫਕੇਨ ਸਮਨ੍ਨਾਗਤੋ, ਤਿਟ੍ਠਨ੍ਤੋ ਠਿਤਕੋਵ ਨੋਨਮਨ੍ਤੋ ਅਨਮਮਾਨੋ ਹੁਤ੍ਵਾ ਉਭਯਕਰਮੁਦੁਨਾ ਸੁਖੁਮੇਨ ਹਤ੍ਥਦ੍ਵਯੇਨ ਜਣ੍ਣੁਕਾਨਿ ਜਙ੍ਘਾਨਿ ਆਮਸਨ੍ਤੋ ਪਰਿਮਜ੍ਜਿਤੁਂ ਸਕ੍ਕੋਨ੍ਤੋ, ਵਟ੍ਟਕ੍ਖਨ੍ਧੋ ਸੁਵਣ੍ਣਾਲਿਙ੍ਗੋ ਵਿਯ ਸਮਵਟ੍ਟਿਤਗਲਿਕੋ, ਗੋਤਰੁਣ ਪਖੁਮਕੋ ਤਂਮੁਹੁਤ੍ਤਜਾਤਰਤ੍ਤਵਚ੍ਛਸ੍ਸ ਚਕ੍ਖੁਭਣ੍ਡੋ ਵਿਯ ਵਿਪ੍ਪਸਨ੍ਨਚਕ੍ਖੁਭਣ੍ਡੋ, ਵਿਪ੍ਪਸਨ੍ਨਚਕ੍ਖੁਭਣ੍ਡੇਨ ਸਮਨ੍ਨਾਗਤੋ ਵਾ, ਸੀਹਪੁਬ੍ਬਡ੍ਢਕਾਯੋ ਸੀਹਸ੍ਸ ਪੁਬ੍ਬਡ੍ਢਕਾਯੋ ਵਿਯ ਪਰਿਪੁਣ੍ਣਕਾਯੋ.

੨੫. ਸੁਗਤੋ ਬੁਦ੍ਧੋ, ਸਤ੍ਤਪੀਨੋ ਦ੍ਵਿਹਤ੍ਥਪਾਦਅਂਸਕੂਟਏਕਗਲਵਸੇਨ ਸਤ੍ਤਸੁ ਠਾਨੇਸੁ ਪਰਿਪੁਣ੍ਣਮਂਸਿਕੋ, ਦੀਘਙ੍ਗੁਲਿ ਸਮਆਯਤਹਤ੍ਥਪਾਦਙ੍ਗੁਲਿ, ਅਥ ਤਦਞ੍ਞਂ ਲੋਮ ਕੂਪੇਕਲੋਮੋ ਏਕੇਕਲੋਮਕੂਪੇ ਏਕੇਕਜਾਤਲੋਮੋ, ਸਮ੍ਪਨ੍ਨੋਦਾਤਦਾਠੋ ਸਮ੍ਪਨ੍ਨਸੁਕ੍ਕਦਾਠੋ, ਕਨਕ ਸਮਤਚੋ ਸੁਵਣ੍ਣੇਨ ਸਦਿਸਚਮ੍ਮੋ ਨੀਲਮੁਦ੍ਧਗ੍ਗਲੋਮੋ ਨੀਲਂ ਉਦ੍ਧਂ ਅਗ੍ਗਾ ਕੋਟਿ ਹੁਤ੍ਵਾ ਮੁਖਸੋਭਂ ਉਲ੍ਲੋਕਯਮਾਨੋ ਵਿਯ ਠਿਤਲੋਮੋ, ਸਮ੍ਬੁਦ੍ਧੋ ਤਥਾਗਤੋ, ਥੂਲਜਿਵ੍ਹੋ ਮੁਦੁਦੀਘਪੁਥੁਲਜਿਵ੍ਹਾਯ ਸਮ੍ਪਨ੍ਨੋ, ਅਥ ਤਦਞ੍ਞਂ, ਸੀਹਹਨੁਕੋ ਸੀਹਸ੍ਸ ਹੇਟ੍ਠਾਹਨੁ ਵਿਯ ਪਰਿਪੁਣ੍ਣਹਨੁਕੋ, ਜਾਲਿਕਪ੍ਪਾਦ ਹਤ੍ਥੋ ਕੁਸਲੇਨ ਵਡ੍ਢਕਿਨਾ ਵਾਤਪਾਨੇ ਸਮ੍ਮਾਯੋਜਿਤ ਜਾਲਂ ਵਿਯ ਚਮ੍ਮੇਨ ਅਪ੍ਪਟਿਬਦ੍ਧਹਤ੍ਥਪਾਦਙ੍ਗੁਲਨ੍ਤਰੋ, ਨਾਥੋ ਬੁਦ੍ਧੋ, ਉਣ੍ਹੀਸਸੀਸੋ ਰਞ੍ਞੋ ਉਣ੍ਹੀਸਪਟ੍ਟੋ ਵਿਯ ਵਿਰੋਚਮਾਨੋ ਪਕਤਿਮਂਸਪਿਣ੍ਡਸਙ੍ਖਾਤੋ ਉਣ੍ਹੀਸਪਟ੍ਟਸੀਸੋ, ਇਤਿ ਗੁਣਸਹਿਤਂ ਏਵਂ ਇਮਿਨਾ ਵੁਤ੍ਤਪ੍ਪਕਾਰੇਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਗੁਣੇਨ ਸਮਨ੍ਨਾਗਤਂ ਤਂ ਮਹੇਸਿਂ ਬੁਦ੍ਧਂ ਤੀਹਿ ਦ੍ਵਾਰੇਹਿ ਅਹਂ ਨਮਾਮਿ ਵਨ੍ਦਾਮੀਤਿ.

ਤੀਸੁ ਗਾਥਾਸੁ ਸਙ੍ਖੇਪਤ੍ਥਯੋਜਨਾ ਸਮਤ੍ਤਾ.

ਇਮਿਸ੍ਸਂ ਪਨ ਨਮਕ੍ਕਾਰਪਾਲ਼ਿਯਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਂ ਬੁਦ੍ਧਵਚਨਪਾਲ਼ਿਯਂ ਆਗਤਨਯਾਨੁਕ੍ਕਮੇਨ ਨ ਵੁਤ੍ਤਂ. ਗਾਥਾਬਨ੍ਧਵਸੇਨ ਛਨ੍ਦਾਨੁਰਕ੍ਖਣਤ੍ਥਮੇਵ ਪਨ ਨਿਗ੍ਰੋਧਬਿਮ੍ਬੋਤ੍ਯਾਦਿਨਾ ਅਕ੍ਕਮੇਨ ਵੁਤ੍ਤਂ. ਤਸ੍ਮਾ ਪਾਥੇਯ੍ਯਵਗ੍ਗੇ ਲਕ੍ਖਣਸੁਤ੍ਤੇ ਵੁਤ੍ਤਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਕ੍ਕਮਂ ਸਙ੍ਖੇਪੇਨ ਦਸ੍ਸਯਿਸ੍ਸਾਮ ਬਹੁਸ੍ਸੁਤਪਞ੍ਞਾਵਡ੍ਢਨਤ੍ਥਂ.

੧

. ਬੁਦ੍ਧੋ ਸੁਪ੍ਪਤਿਟ੍ਠਿਤਪਾਦੋ ੨. ਹੇਟ੍ਠਾਪਾਦਤਲੇਸੁ ਚਕ੍ਕਜਾਤੋ ੩. ਆਯਤਪਣ੍ਹਿ ੪. ਦੀਘਙ੍ਗੁਲਿ ੫. ਮੁਦੁਤਲੁਨ ਹਤ੍ਥਪਾਦੋ ੬. ਜਾਲਹਤ੍ਥਪਾਦੋ ੭. ਉਸ੍ਸਙ੍ਖਪਾਦੋ ੮. ਏਣਿਜਙ੍ਘੋ ੯. ਠਿਤਕੋਵ ਅਨੋਨਮਨ੍ਤੋ ਉਭੋਹਿ ਪਾਣਿਤਲੇਹਿ ਜਾਣੁਕਾਨਿ ਪਰਿਮਸਤਿ ੧੦. ਕੋਸੋਹਿਤ ਵਤ੍ਥਗੁਯ੍ਹੋ ੧੧. ਸੁਵਣ੍ਣਵਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ੧੨. ਸੁਖੁਮਚ੍ਛਵੀ ੧੩. ਏਕੇਕਲੋਮਕੂਪੇਸੁ ਏਕੇਕਲੋਮੋ ੧੪. ਨੀਲਮੁਦ੍ਧਗ੍ਗਲੋਮੋ ੧੫. ਬ੍ਰਹ੍ਮੁਜੁਗਤ੍ਤੋ ੧੬. ਸਤ੍ਤੁਸ੍ਸਦੋ ੧੭. ਸੀਹਪੁਬ੍ਬਡ੍ਢਕਾਯੋ ੧੮. ਚਿਤਨ੍ਤਰਂਸੋ ੧੯. ਨਿਗ੍ਰੋਧਪਰਿਮਣ੍ਡਲੋ ੨੦. ਸਮਵਟ੍ਟਕ੍ਖਨ੍ਧੋ ੨੧. ਰਸਗ੍ਗਸਗ੍ਗੀ ੨੨. ਸੀਹਹਨੁਕੋ ੨੩. ਚਤ੍ਤਾਲੀਸਦਨ੍ਤੋ ੨੪. ਸਮਦਨ੍ਤੋ ੨੫. ਅਵਿਰਲ਼ਦਨ੍ਤੋ ੨੬. ਸੁਸੁਕ੍ਕਦਾਠੋ ੨੭. ਪਹੁਤ ਜਿਵ੍ਹੋ ੨੮. ਬ੍ਰਹ੍ਮਸਰੋ ੨੯. ਅਭਿਨੀਲਨੇਤ੍ਤੋ ੩੦. ਗੋਪ ਖੁਮੋ ੩੧. ਉਣ੍ਣਾ ਭਮੁਕਨ੍ਤਰੇ ਜਾਤਾ ਓਦਾਤਾ ਮੁਦੁਤੂਲ ਸਨ੍ਨਿਭਾ ੩੨. ਉਣ੍ਹੀਸਸੀਸੋਤਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸ੍ਸ ਕਮੋ ਵੇਦਿਤਬ੍ਬੋ. ਇਮਾਨਿ ਪਨ ਭਗਵਤੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਪਾਰਮੀਪੁਞ੍ਞਕਮ੍ਮੇਨ ਯਥਾਰਹਂ ਕਮ੍ਮਸਰਿਕ੍ਖਕਂ ਲਬ੍ਭਨ੍ਤੀਤਿ ਵੇਦਿਤਬ੍ਬਾਨਿ. ਤਾਨਿ ਪਨ ਕਮ੍ਮਾਨਿ ਪਾਥੇਯ੍ਯਵਗ੍ਗੇ ਲਕ੍ਖਣਸੁਤ੍ਤੇ ਵੁਤ੍ਤਾਨਿ, ਤਾਨਿ ਪਨੇਤ੍ਥ ਓਲੋਕੇਤ੍ਵਾ ਗਹੇਤਬ੍ਬਾਨੀਤਿ.

ਤਿਸ੍ਸੋ ਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੬.

ਬੁਦ੍ਧੋਬੁਦ੍ਧੋਤਿਘੋਸੋ ਅਤਿਦੁਲਭਤਰੋ ਕਾ ਕਥਾ ਬੁਦ੍ਧਭਾਵੋ,

ਲੋਕੇ ਤਸ੍ਮਾ ਵਿਭਾਵੀ ਵਿਵਿਧਹਿਤਸੁਖਂ ਸਾਧਵੋ ਪਤ੍ਥਯਨ੍ਤਾ;

ਇਟ੍ਠਂ ਅਤ੍ਥਂ ਵਹਨ੍ਤਂ ਸੁਰਨਰਮਹਿਤਂ ਨਿਬ੍ਭਯਂ ਦਕ੍ਖਿਣੇਯ੍ਯਂ,

ਲੋਕਾਨਂ ਨਨ੍ਦਿਵਡ੍ਢਂ ਦਸਬਲਮਸਮਂ ਤਂ ਨਮਸ੍ਸਨ੍ਤੁ ਨਿਚ੍ਚਂ.

੨੬. ਏਵਂ ਸੁਗਤਨ੍ਤਿਆਦੀਹਿ ਪਞ੍ਚਵੀਸਤਿਵਨ੍ਦਨਗਾਥਾਹਿ ਬੁਦ੍ਧਸ੍ਸ ਪਣਾਮਂ ਕਤ੍ਵਾ ਇਦਾਨਿ ਤਸ੍ਸ ਵਨ੍ਦਨੇ ਉਯ੍ਯੋਜਨਂ ਕਰੋਨ੍ਤੋ ਆਹ ਬੁਦ੍ਧੋ ਬੁਦ੍ਧੋਤਿਘੋਸੋ ਤ੍ਯਾਦਿਗਾਥਂ. ਅਯਂ ਪਨ ਸਦ੍ਧਰਾਗਾਥਾਤਿ ਦਟ੍ਠਬ੍ਬੋ.

ਤਤ੍ਥ ਪਨ ਲੋਕੇ ਬੁਦ੍ਧੋ ਬੁਦ੍ਧੋਤਿ ਘੋਸੋ ਅਤਿਦੁਲਭਤਰੋ ਬੁਦ੍ਧਭਾਵੋ ਕਾ ਕਥਾਤਿ ਸਮ੍ਬਨ੍ਧੋ. ਏਤ੍ਥ ਚ ਲੋਕੇਤਿ ਮਨੁਸ੍ਸਲੋਕੇ ਤਿਲੋਕੇ ਵਾ ਅਨਨ੍ਤਚਕ੍ਕਵਾਲ਼ ਲੋਕੇ ਵਾ. ਬੁਦ੍ਧੋ ਬੁਦ੍ਧੋਤਿਘੋਸੋਤਿ ਬੁਦ੍ਧੋ ਬੁਦ੍ਧੋ ਇਤਿ ਕਿਤ੍ਤਿਸਦ੍ਦੋ ਥੁਤਿਸਦ੍ਦੋ ਵਾ. ਘੁਸਨਂ ਘੋਸੋ. ਘੁਸਿਯਤਿ ਕਥਿਯਤੀਤਿ ਵਾ ਘੋਸੋ, ਕਿਤ੍ਤਿਸਦ੍ਦੋ. ਘੁਸਧਾਤੁ ਸਦ੍ਦੇ ਣ. ਅਥ ਵਾ ਘੁਸਿਯਤਿ ਥਵਿਯਤੀਤਿ ਘੋਸੋ, ਥੁਤਿਸਦ੍ਦੋ. ਤੇਨ ਵੁਤ੍ਤਂ ਪਾਰਾਜਿਕਣ੍ਡਟ੍ਠਕਥਾਯਂ ‘‘ਕਿਤ੍ਤਿਸਦ੍ਦੋਤਿ ਕਿਤ੍ਤਿਏਵ. ਥੁਤਿਘੋਸੋ ਵਾ’’ਤਿ. ਬੁਦ੍ਧੋ ਬੁਦ੍ਧੋ ਇਤਿ ਪਵਤ੍ਤੋ ਘੋਸੋ ਥੁਤਿਘੋਸੋਤਿ ਬੁਦ੍ਧੋਬੁਦ੍ਧੋਤਿਘੋਸੋ. ਅਤਿਦੁਲਭਤਰੋਤਿ ਅਤਿਵਿਯ ਦੁਲ੍ਲਭਤਮੋ. ਦੁਲ੍ਲਭਤਰੋਤਿ ਹਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਲਕਾਰਲੋਪੇਨ ਦੁਲਭਤਰੋਤਿ ਵੁਤ੍ਤਂ. ਦੁਕ੍ਖੇਨ ਲਭਿਯਤੀਤਿ ਦੁਲ੍ਲਭੋ. ਦੁਪੁਬ੍ਬਲਭਧਾਤੁ ਲਭਨੇ ਅ. ਅਥ ਵਾ ਲਭਸ੍ਸ ਅਸਮਿਦ੍ਧਨ੍ਤਿ ਦੁਲ੍ਲਭੋ, ਦੁਬ੍ਭਿਜਾਨੇਯ੍ਯ ਅਬ੍ਯਯੀਭਾਵਸਮਾਸੋਯਂ. ਦੁਸਦ੍ਦੋ ਅਸਮਿਦ੍ਧਤ੍ਥੋ, ਯਥਾ ਦੁਬ੍ਭਿਕ੍ਖੋਤਿ. ਅਤਿ ਵਿਯ ਦੁਲ੍ਲਭੋਤਿ ਅਤਿਦੁਲਭੋ. ਤੇਸਂ ਵਿਸੇਸੇਨ ਅਤਿਦੁਲ੍ਲਭੋਤਿ ਅਤਿਦੁਲਭਤਰੋ. ਬੁਦ੍ਧਾ ਹਿ ਲੋਕੇ ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤਿ. ਤਸ੍ਮਾ ਬੁਦ੍ਧੋ ਬੁਦ੍ਧੋਤਿ ਘੋਸੋ ਅਤਿਦੁਲਭਤਰੋਤਿ ਵੁਤ੍ਤਂ. ਵੁਤ੍ਤਞ੍ਹੇਤਂ ਚੂਲ਼ਵਗ੍ਗਖਨ੍ਧਕੇ ‘‘ਘੋਸੋਪਿ ਖੋ ਏਸੋ ਗਹਪਤਿ ਦੁਲ੍ਲਭੋ ਲੋਕਸ੍ਮਿਂ, ਯਦਿਦਂ ਬੁਦ੍ਧੋ ਬੁਦ੍ਧੋ’’ਤਿ. ਯਥਾ ਚ ਹਿ ਲੋਕੇ ਉਦੁਮ੍ਬਰਿਕਪੁਪ੍ਫਂ ਦੁਲ੍ਲਭਂ. ਚਨ੍ਦਮ੍ਹਿ ਸਸਕਂ ਹਤ੍ਥੇਨ ਗਣ੍ਹਿਤੁਂ. ਵਾਯਸਾਨਂ ਖੀਰਂ, ਏਵਂ ਬੁਦ੍ਧਭਾਵੋ ਅਤਿਦੁਲ੍ਲਭਤਰੋਤਿ ਵੁਤ੍ਤਂ ਹੋਤਿ. ਅਯਂ ਪਨ ਹੀਨੂਪਮਾਤਿ ਦਟ੍ਠਬ੍ਬਾ. ਵੁਤ੍ਤਞ੍ਹੇਤਂ ਅਪਦਾਨਪਾਲ਼ਿਯਂ –

‘‘ਉਦੁਮ੍ਬਰਿਕਪੁਪ੍ਫਂਵ, ਚਨ੍ਦਮ੍ਹਿ ਸਸਕਂ ਯਥਾ;

ਵਾਯਸਾਨਂ ਯਥਾ ਖੀਰਂ, ਦੁਲ੍ਲਭਂ ਲੋਕਨਾਯਕ’’ਨ੍ਤਿ ਚ;

ਦੁਲ੍ਲਭੋ ਬੁਦ੍ਧੁਪ੍ਪਾਦੋ ਲੋਕਸ੍ਮਿ’’ਨ੍ਤਿ ਚ;

ਕਿਞ੍ਚਾਪਿ ਹਿ ਲੋਕੇ ਚਕ੍ਕਵਤ੍ਤਿਰਾਜੂਨਂ ਉਪ੍ਪਜ੍ਜਮਾਨੋ ਦੁਲ੍ਲਭੋ. ਏਕਸ੍ਮਿਮ੍ਪਿ ਪਨ ਕਪ੍ਪੇ ਚਕ੍ਕਵਤ੍ਤਿਰਾਜਾਨੋ ਅਨੇਕਾ ਉਪ੍ਪਜ੍ਜਨ੍ਤਿ. ਤਥਾਗਤਾ ਪਨ ਲੋਕੇ ਉਪ੍ਪਜ੍ਜਮਾਨਾਪਿ ਏਕਸ੍ਮਿਂ ਕਪ੍ਪੇ ਏਕ ਦ੍ਵਿਤਿ ਚਤੁ ਪਞ੍ਚ ਬੁਦ੍ਧਾਯੇਵ ਉਪ੍ਪਜ੍ਜਨ੍ਤਿ, ਨ ਤਦੁਤ੍ਤਰਿ. ਯਸ੍ਮਾ ਹਿ ਅਸਙ੍ਖ੍ਯੇਯ੍ਯੇਪਿ ਕਪ੍ਪੇ ਤਥਾਗਤਸੁਞ੍ਞੋ ਹੋਤਿ. ਤਸ੍ਮਾ ਤਥਾਗਤਸ੍ਸੇਵ ਕਦਾਚਿ ਕਰਹਚਿ ਉਪ੍ਪਜ੍ਜਨਤੋ ਬੁਦ੍ਧੋਬੁਦ੍ਧੋਤਿਘੋਸੋ ਅਤਿਦੁਲਭਤਰੋ ਕਾ ਕਥਾ ਬੁਦ੍ਧਭਾਵੋਤਿ ਵੁਤ੍ਤੋ. ਵੁਤ੍ਤਮ੍ਪਿ ਚੇਤਂ ਭਗਵਤਾ ਮਹਾਪਰਿਨਿਬ੍ਬਾਨਸਮਯੇ ‘‘ਦੇਵਤਾ ਆਨਨ੍ਦ ਉਜ੍ਝਾਯਨ੍ਤਿ. ਦੁਰਾਵਤਮ੍ਹਾ ਆਗਤਾ ਤਥਾਗਤਂ ਦਸ੍ਸਨਾਯ ਕਦਾਚਿ ਕਰਹਚਿ ਤਥਾਗਤਾ ਲੋਕੇ ਉਪ੍ਪਜ੍ਜਨ੍ਤਿ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ. ਅਜ੍ਜ ਰਤ੍ਤਿਯਾ ਪਚ੍ਚੂਸਸਮਯੇ ਤਥਾਗਤਸ੍ਸ ਪਰਿਨਿਬ੍ਬਾਨਂ ਭਵਿਸ੍ਸਤਿ. ਅਯਞ੍ਚ ਮਹੇਸਕ੍ਖੋ ਭਿਕ੍ਖੁ ਭਗਵਤੋ ਪੁਰਤੋ ਠਿਤੋ ਓਵਾਰੇਨ੍ਤੋ ਓਤਰੇਨ੍ਤੋ ਵਾ ਨ ਮਯਂ ਲਭਾਮ ਪਚ੍ਛਿਮੇ ਕਾਲੇ ਤਥਾਗਤਂ ਦਸ੍ਸਨਾਯਾ’’ਤਿ.

ਬੁਦ੍ਧਭਾਵੋਤਿ ਬੁਦ੍ਧਸ੍ਸ ਭਾਵੋ. ਕਾ ਕਥਾਤਿ ਕਿਂ ਵਤ੍ਤਬ੍ਬੋਏਵਾਤਿ ਅਤ੍ਥੋ. ਕਸ੍ਮਾ ਪਨ ਬੁਦ੍ਧੋ ਅਤਿਦੁਲ੍ਲਭਤਰੋਤਿ ਚ, ਬੁਦ੍ਧੋ ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤੀਤਿ ਚ ਵੁਤ੍ਤਂ. ਨਨੁ ਬੁਦ੍ਧਾ ਲੋਕੇ ਅਨੇਕਾ ਉਪ੍ਪਜ੍ਜਨ੍ਤੀਤਿ. ਸਚ੍ਚਮੇਤਂ. ਬੁਦ੍ਧੋ ਨਾਮ ਪਨ ਅਨੇਕਾਸਙ੍ਖ੍ਯੇਯ੍ਯਵਾਰੇਨ ਵਾ ਅਨੇਕਾਸਙ੍ਖ੍ਯੇਯ੍ਯਦਿਵਸਮਾਸਸਂਵਚ੍ਛਰਂ ਵਾ ਅਨੇਕਾਸਙ੍ਖ੍ਯੇਯ੍ਯਕਪ੍ਪਂ ਵਾ ਦਸਪਾਰਮਿਯੋ ਚ ਪਞ੍ਚਮਹਾਪਰਿਚ੍ਚਾਗੇ ਚ ਪੂਰੇਤ੍ਵਾਵ ਭਵਿਤੁਂ ਸਕ੍ਕੋਤਿ, ਨ ਏਕੇਕਵਾਰਾਦਿਨਾ. ਅਥ ਖੋ ਪਨ ਅਨ੍ਤਮਸੋ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਸਪਾਰਮਿਯੋ ਚ ਪਞ੍ਚ ਮਹਾਪਰਿਚ੍ਚਾਗੇ ਚ ਪੂਰੇਤ੍ਵਾਵ ਬੁਦ੍ਧੋ ਭਵਿਤੁਂ ਸਕ੍ਕੋਤਿ. ਤਸ੍ਮਾ ਬੁਦ੍ਧੋ ਅਤਿਦੁਲ੍ਲਭਤਰੋਤਿ ਚ, ਬੁਦ੍ਧਾ ਕਦਾਚਿ ਕਰਹਚਿ ਉਪ੍ਪਜ੍ਜਨ੍ਤੀਤਿ ਚ ਵੁਤ੍ਤਨ੍ਤਿ.

ਏਵਂ ਬੁਦ੍ਧਸ੍ਸ ਅਤਿਦੁਲ੍ਲਭਤਰਤ੍ਤਾ ਚ ਕਦਾਚਿ ਕਰਹਚਿ ਉਪ੍ਪਨ੍ਨਤ੍ਤਾ ਚਏਵ ਬੁਦ੍ਧੋਬੁਦ੍ਧੋਤਿ ਕਿਤ੍ਤਯਨ੍ਤਸ੍ਸ ਮਹਪ੍ਫਲਂ ਹੋਤਿ. ਵੁਤ੍ਤਞ੍ਹੇਤਂ ਅਪਦਾਨੇ –

‘‘ਬੁਦ੍ਧੋਤਿ ਕਿਤ੍ਤਯਨ੍ਤਸ੍ਸ, ਕਾਯੇ ਭਵਤਿ ਯਾ ਪੀਤਿ;

ਵਰਮੇਵ ਹਿ ਸਾ ਪੀਤਿ, ਕਸਿਣੇਨਪਿ ਜਮ੍ਬੁਦੀਪਸ੍ਸਾ’’ਤਿ.

ਤਸ੍ਮਾਤਿ ਯਸ੍ਮਾ ਬੁਦ੍ਧੋ ਬੁਦ੍ਧੋਤਿ ਘੋਸੋ ਅਤਿਦੁਲ੍ਲਭਤਰੋ, ਬੁਦ੍ਧਭਾਵੋ ਕਾ ਕਥਾ. ਤਸ੍ਮਾ. ਵਿਭਾਵੀਤਿ ਮੇਧਾਵੀ. ਤੇ ਹਿ ਹਿਤਾਹਿਤਂ ਕਾਰਣਾਕਾਰਣਂ ਵਾ ਵਿਸੇਸੇਨ ਭਾਵੇਤਿ ਪਕਾਸੇਤੀਤਿ ਵਿਭਾਵਾ, ਪਞ੍ਞਾ. ਵਿਪੁਬ੍ਬ ਭੂਧਾਤੁ ਸਤ੍ਤਾਯਂ ਣ. ਸਾ ਏਤੇਸਂ ਅਤ੍ਥੀਤਿ ਵਿਭਾਵੀਤਿ ਵੁਚ੍ਚਨ੍ਤਿ, ਸਾਧਵੋ ਲਬ੍ਭਤਿ. ਤਂ ਪਨ ਸਾਧਵੋਤਿ ਪਦੇ ਵਿਸੇਸਨਂ.

ਵਿਵਿਧਹਿਤਸੁਖਨ੍ਤਿ ਨਾਨਪ੍ਪਕਾਰਂ ਲੋਕਿਯਲੋਕੁਤ੍ਤਰ ਸਙ੍ਖਾਤਂ ਹਿਤਸੁਖਂ. ਤਸ੍ਸ ਪਨ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਤਂ ਪਨ ਪਤ੍ਥਯਨ੍ਤਾਤਿਪਦੇ ਕਮ੍ਮਂ. ਸਾਧਵੋਤਿ ਸਪ੍ਪੁਰਿਸਾ. ਤੇ ਹਿ ਸਪਰਹਿਤਂ ਸਾਧੇਤਿ ਨਿਬ੍ਬਤ੍ਤੇਤੀਤਿ ਸਾਧਵੋਤਿ ਵੁਚ੍ਚਤਿ. ਸਾਧਧਾਤੁ ਸਂਸਿਦ੍ਧਿਯਂ ਅਵੋ. ਤਸ੍ਸ ਪਨ ਪਦਸ੍ਸ ਨਮਸ੍ਸਨ੍ਤੂਤਿ ਪਦੇਨ ਕਤ੍ਤੁਭਾਵੇਨ ਸਮ੍ਬਨ੍ਧੋ. ਪਤ੍ਥਯਨ੍ਤਾਤਿ ਯਾਚਨ੍ਤਾ. ਵਿਵਿਧਹਿਤਸੁਖਂ ਪਤ੍ਥਯਨ੍ਤਿ ਯਾਚਨ੍ਤੀਤਿ ਪਤ੍ਥਯਨ੍ਤਾ, ਸਾਧਵੋ. ਪਤ੍ਥਧਾਤੁ ਯਾਚਨੇ ਅਨ੍ਤੋ. ਯਕਾਰਾਗਮੋ. ਤਂ ਪਨ ਸਾਧਵੋਤਿਪਦੇ ਵਿਸੇਸਨਂ. ਇਟ੍ਠਨ੍ਤਿ ਕਾਮਯਮਾਨਂ. ਇਚ੍ਛਿਤਬ੍ਬਂ ਕਮਿਤਬ੍ਬਨ੍ਤਿ ਇਟ੍ਠਂ. ਇਸੁਧਾਤੁ ਇਚ੍ਛਾ ਕਨ੍ਤੀਸੁ ਤਪਚ੍ਚਯੋ. ਤਸ੍ਸ ਰਟ੍ਠੋ, ਧਾਤ੍ਵਨ੍ਤਲੋਪੋ. ਅਤ੍ਥਨ੍ਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਦਿਅਤ੍ਥਂ. ਅਤ੍ਥਿਯਤਿ ਪਤ੍ਥਿਯਤੀਤਿ ਅਤ੍ਥੋ, ਵਿਪਾਕਾਨਿਸਂਸਫਲਂ. ਅਤ੍ਥਧਾਤੁ ਯਾਚਨਾਯਂ ਅ. ਅਥ ਵਾ ਅਸਤਿ ਭਵਤਿ ਫਲਭਾਵੇਨਾਤਿ ਅਤ੍ਥੋ. ਅਸਧਾਤੁ ਭੁਵਿਮ੍ਹਿ ਥ. ਤਂ ਪਨ ਪਦਦ੍ਵਯਂ ਵਹਨ੍ਤਨ੍ਤਿਪਦੇ ਕਮ੍ਮਂ. ਵਹਨ੍ਤਨ੍ਤਿ ਧਾਰਕਂ. ਵਹਤਿ ਹਰਤੀਤਿ ਵਹਨ੍ਤੋ, ਬੁਦ੍ਧੋ. ਵਹਧਾਤੁ ਵਹਨੇ ਪਾਪੁਣਨੇ ਵਾ ਅਨ੍ਤੋ. ਬੁਦ੍ਧੋ ਹਿ ਸਤ੍ਤਾਨਂ ਲੋਕਿਯਲੋਕੁਤ੍ਤਰਹਿਤਸੁਖਂ ਧਮ੍ਮਦੇਸਨਾਯ ਧਾਰੇਤੀਤਿ ਅਤ੍ਥੋ.

ਸੁਰਨਰਮਹਿਤਨ੍ਤਿ ਦੇਵੇਹਿ ਚ ਮਨੁਸ੍ਸੇਹਿ ਚ ਚਤੁਪਚ੍ਚਯਾਦੀਹਿ ਪੂਜਿਤਂ. ਇਦਂ ਪਨੇਤ੍ਥ ਨਿਬ੍ਬਚਨਂ. ਇਸ੍ਸਰਿਯਕੀਲ਼ਾਦੀਹਿ ਸੁਰਨ੍ਤਿ ਦਿਬ੍ਬਨ੍ਤੀਤਿ ਸੁਰਾ, ਦੇਵਾ. ਸੁਰਧਾਤੁ ਦਿਤ੍ਤਿਯਂ. ਅਥ ਵਾ ਸੁਰਨ੍ਤਿ ਈਸਨ੍ਤਿ ਦੇਵਿਸ੍ਸਰਿਯਂ ਪਾਪੁਣਨ੍ਤਿ ਵਿਰੋਚਨ੍ਤਿ ਚਾਤਿ ਸੁਰਾ, ਦੇਵਾ. ਸੁਨ੍ਦਰਾ ਰਾ ਵਾਚਾ ਏਤੇਸਨ੍ਤਿ ਵਾ ਸੁਰਾ, ਦੇਵਾ. ਖਨ੍ਧਸਨ੍ਤਾਨਂ ਨਰਨ੍ਤਿ ਨੇਨ੍ਤੀਤਿ ਨਰਾ, ਮਨੁਸ੍ਸਾ. ਨਰਧਾਤੁ ਨਯਨੇ ਅ. ਸੁਰਾ ਚ ਨਰਾ ਚ ਸੁਰਨਰਾ. ਤੇਹਿ ਮਹਿਤਬ੍ਬਾ ਪੂਜਿਤਬ੍ਬਾਤਿ ਸੁਰਨਰਮਹਿਤੋ, ਬੁਦ੍ਧੋ. ਮਹਧਾਤੁ ਪੂਜਾਯਂ ਤ. ਤਂ ਸੁਰਨਰਮਹਿਤਂ. ਨਿਬ੍ਭਯਨ੍ਤਿ ਅਭਯਂ. ਭਿਯਤੇ ਭਯਂ. ਨਤ੍ਥਿ ਭਯਂ ਏਤਸ੍ਸਾਤਿ ਨਿਬ੍ਭਯੋ, ਬੁਦ੍ਧੋ. ਤਂ ਨਿਬ੍ਭਯਂ. ਤਥਾਗਤਸ੍ਸ ਅਟ੍ਠਸੁ ਪਰਿਸਾਸੁ ਕੇਨਚਿ ਕਾਰਣੇਨ ਭਯਂ ਹਦਯਚਲਨਂ ਕਮ੍ਪਨਂ ਨਤ੍ਥੀਤਿ ਅਤ੍ਥੋ.

ਦਕ੍ਖਿਣੇਯ੍ਯਨ੍ਤਿ ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਉਤ੍ਤਮਦਾਨਾਰਹਂ. ਦਾਤਬ੍ਬਾਤਿ ਦਕ੍ਖਿਣਾ, ਦੇਯ੍ਯਧਮ੍ਮਵਤ੍ਥੁ. ਦਾਧਾਤੁ ਦਾਨੇਕ੍ਖਿਣਪਚ੍ਚਯੋ. ਅਥ ਵਾ ਦਕ੍ਖਨ੍ਤਿ ਵਡ੍ਢਨ੍ਤਿ ਏਤਾਯ ਸਤ੍ਤਾ ਯਥਾਧਿਪ੍ਪੇਤਾਹਿ ਸਮ੍ਪਤ੍ਤੀਹੀਤਿ ਦਕ੍ਖਿਣਾ, ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਦਾਨਂ. ਦਕ੍ਖਧਾਤੁ ਵਡ੍ਢਨੇਯੁ, ਤਂ ਅਰਹਤੀਤਿ ਦਕ੍ਖਿਣੇਯ੍ਯੋ, ਬੁਦ੍ਧੋ. ਅਰਹਤਿਤਦ੍ਧਿਤੇ ਣੇਯ੍ਯੋ. ਅਥ ਵਾ ਦਕ੍ਖਿਣਾਯ ਹਿਤਂ ਅਨੁਰੂਪਂ ਮਹਪ੍ਫਲਕਰਣਤਾਯ ਵਿਸੋਧੇਤੀਤਿ ਦਕ੍ਖਿਣੇਯ੍ਯੋ, ਬੁਦ੍ਧੋ. ਵਿਸੋਧੇਤਿਤਦ੍ਧਿਤਾਯਂ. ਬੁਦ੍ਧੋਯੇਵ ਹਿ ਦਕ੍ਖਿਣਾਯ ਮਹਪ੍ਫਲਕਰਣਵਸੇਨ ਚ, ਵਿਸੋਧਨਵਸੇਨ ਚ, ਦੇਵਸਕ੍ਕਬ੍ਰਹ੍ਮੇਹਿ ਚ, ਕੋਸਲਰਾਜਾਦੀਹਿ ਚ, ਅਨਾਥਪਿਣ੍ਡਿਕਸੇਟ੍ਠਾਦੀਹਿ ਚ ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਂ ਉਤ੍ਤਮਦਾਨਂ ਵਿਸੇਸੇਨ ਅਰਹਤਿ, ਤਸ੍ਮਾ ਦਕ੍ਖਿਣੇਯ੍ਯਨ੍ਤਿ ਥੋਮੇਤਿ.

ਲੋਕਾਨਨ੍ਤਿ ਸਤ੍ਤਲੋਕਾਨਂ. ਤਸ੍ਸ ਪਨ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਨਨ੍ਦਿਵਡ੍ਢਨ੍ਤਿ ਪੀਤਿਯਾ ਵਡ੍ਢਾਪੇਨ੍ਤਂ. ਨਨ੍ਦਿਯਤੇ ਨਨ੍ਦਿ. ਭਾਵਸਾਧਨੋਯਂ. ਨਨ੍ਦਧਾਤੁ ਸਮਿਦ੍ਧਿਯਂ ਨਨ੍ਦਨੇ ਵਾ ਇ. ਪੀਤਿਯਾ ਅਧਿਵਚਨਮੇਤਂ. ਸਾ ਵਡ੍ਢੇਤਿ ਬੁਦ੍ਧੇਤੀਤਿ ਨਨ੍ਦਿਵਡ੍ਢੋ, ਬੁਦ੍ਧੋ. ਨਨ੍ਦਿਸਦ੍ਦੂਪਪਦਵਡ੍ਢਧਾਤੁ ਵਡ੍ਢਨੇ ਅ. ਬੁਦ੍ਧੋ ਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਸੀਤਾਨੁਬ੍ਯਞ੍ਜਨਲਕ੍ਖਣਸਮ੍ਪਨ੍ਨੇਨ ਚ ਸਬ੍ਬਞ੍ਞੁਤਞਾਣਾਦਿਗੁਣਸਮ੍ਪਨ੍ਨੇਨ ਧਮ੍ਮਦੇਸਨਾਯ ਚ ਲੋਕੇ ਸਬ੍ਬਸਤ੍ਤਾਨਂ ਪੀਤਿਂ ਵਡ੍ਢੇਤੀਤਿ ਅਤ੍ਥੋ. ਸਬ੍ਬਸਤ੍ਤਾਨਞ੍ਹਿ ਬੁਦ੍ਧਦਸ੍ਸਨੇ ਧਮ੍ਮਸਵਨੇ ਚ ਤਿਤ੍ਤੋ ਨਤ੍ਥਿ, ਤਸ੍ਮਾ ਲੋਕਾਨਂ ਨਨ੍ਦਿਵਡ੍ਢਨ੍ਤਿ ਥੋਮੇਤਿ. ਵੁਤ੍ਤਞ੍ਹੇਤਂ ਅਪਦਾਨਟ੍ਠਕਥਾਯਂ ‘‘ਪਕਤਿਯਾਏਵ ਹਿ ਬੁਦ੍ਧਦਸ੍ਸਨੇ ਪੁਣ੍ਣਚਨ੍ਦਸਮੁਦ੍ਦਰਾਜਦਸ੍ਸਨੇ ਅਤਿਤ੍ਤੋ ਲੋਕੋਤਿ. ਕਥਂ ਪਨ ਸਬ੍ਬਸਤ੍ਤਾਨਂ ਬੁਦ੍ਧਦਸ੍ਸਨੇ ਅਤਿਤ੍ਤੋ ਹੋਤੀ’’ਤਿ. ਬੁਦ੍ਧਸ੍ਸ ਪਨ ਬਾਤ੍ਤਿਂਸਮਹਾਪੁਰਿਸਲਕ੍ਖਣਾਦੀਹਿ ਸੀਲਾਦਿਅਸਾਧਾਰਣਗੁਣੇਹਿ ਚ ਅਧਿਕ ਸਮ੍ਪਨ੍ਨੋ ਹੁਤ੍ਵਾ ਸਬ੍ਬਦੇਵਮਨੁਸ੍ਸੇਹਿ ਅਤਿਵਿਰੋਚਮਾਨਤ੍ਤਾ. ਵੁਤ੍ਤਞ੍ਹੇਤਂ ਭਗਵਤਾ ਤਾਵਤਿਂਸੇ –

‘‘ਨ ਕੋਚਿ ਦੇਵੋ ਵਣ੍ਣੇਨ, ਸਮ੍ਬੁਦ੍ਧਂ ਅਤਿਰੋਚਤਿ;

ਸਬ੍ਬੇ ਦੇਵੇ ਅਧਿਗ੍ਗਯ੍ਹ, ਸਮ੍ਬੁਦ੍ਧੋਵ ਵਿਰੋਚਤੀ’’ਤਿ.

ਦਸਬਲਨ੍ਤਿ ਅਞ੍ਞੇਹਿ ਪਚ੍ਚੇਕਬੁਦ੍ਧਾਰਿਯਸਾਵਕੇਹਿ ਅਸਾਧਾਰਣੇਨ ਦਸਕਾਯਬਲੇਨ ਚ ਦਸਞਾਣਬਲੇਨ ਸਮ੍ਪਨ੍ਨਂ. ਤਞ੍ਹਿ ਕੇਹਿਚਿ ਵਿਰੁਦ੍ਧੇਹਿ ਕਾਰਣੇਹਿ ਬਲਨ੍ਤਿ ਨ ਕਮ੍ਪੇਨ੍ਤੀਤਿ ਬਲਨ੍ਤਿ ਵੁਚ੍ਚਤਿ. ਅਥ ਵਾ ਬਲਨ੍ਤਿ ਜੀਵਿਤਂ ਕਪ੍ਪੇਨ੍ਤਿ ਏਤੇਨਾਤਿ ਬਲਂ, ਕਾਯਬਲਂ. ਬਲਧਾਤੁ ਪਾਣੇ ਅ. ਬਲਨ੍ਤਿ ਭਾਰਂ ਵਹਿਤੁਂ ਸਕ੍ਕੁਣਨ੍ਤੀਤਿ ਵਾ ਬਲਂ, ਬਲਨ੍ਤਿ ਜਾਨਨ੍ਤਿ ਸਬ੍ਬਧਮ੍ਮਨ੍ਤਿ ਬਲਂ, ਞਾਣ ਬਲਂ. ਦਸਬਲਞ੍ਚ ਦਸਬਲਞ੍ਚ ਦਸਬਲਾਨਿ ਏਕਸੇਸਨਯੇਨ. ਤਾਨਿ ਯਸ੍ਸ ਸੋਤਿ ਦਸਬਲੋ, ਬੁਦ੍ਧੋ. ਇਧ ਪਨ ਸਾਮਞ੍ਞਵਸੇਨ ਵੁਤ੍ਤੋਪਿ ਵਿਸੇਸਟ੍ਠਾਨਿਯਤ੍ਤਾ ਭਗਵਤੋ ਦਸਕਾਯਬਲਾਨਿ ਚ, ਦਸਞਾਣਬਲਾਨਿ ਚ ਅਧਿਪ੍ਪੇਤਾਨਿ. ਤੇਸਂ ਪਨ ਸਰੂ ਪਤ੍ਥਂ ਨਯਨਸੁਭਗਕਾਯਙ੍ਗਨ੍ਤ੍ਯਾਦਿ ਗਾਥਾਵਣ੍ਣਨਾਯਂ ਵੁਤ੍ਤਮੇਵ.

ਅਸਮਨ੍ਤਿ ਸੀਲਾਦਿਗੁਣੇਹਿ ਕੇਨਚਿ ਅਸਦਿਸਂ. ਨਤ੍ਥਿ ਸਮੋ ਸਦਿਸੋ ਪੁਗ੍ਗਲੋ ਏਤਸ੍ਸਾਤਿ ਅਸਮੋ, ਬੁਦ੍ਧੋ. ਤਂ ਅਸਮਂ. ਤਨ੍ਤਿ ਤਾਦਿਸਂ ਗੁਣਸਮ੍ਪਨ੍ਨਂ ਬੁਦ੍ਧਂ. ਨਿਚ੍ਚਨ੍ਤਿ ਸਤਤਂ ਸਮਿਤਂ ਸਬ੍ਬਕਾਲਂ ਨਿਰਨ੍ਤਰਨ੍ਤਿ ਅਤ੍ਥੋ. ਨਮਸ੍ਸਨ੍ਤੂਤਿ ਅਭਿਵਨ੍ਦਨ੍ਤੂਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਲੋਕੇ ਤਿਲੋਕੇ ਮਨੁਸ੍ਸਲੋਕੇ ਵਾ, ਬੁਦ੍ਧੋਬੁਦ੍ਧੋਤਿਘੋਸੋ ਬੁਦ੍ਧੋ ਬੁਦ੍ਧੋਇਤਿ ਕਿਤ੍ਤਿਸਦ੍ਦੋ ਥੁਤਿਸਦ੍ਦੋ ਵਾ, ਅਤਿਦੁਲਭਤਰੋ ਅਤਿਵਿਯ ਦੁਲ੍ਲਭਤਮੋ, ਬੁਦ੍ਧਭਾਵੋ ਬੁਦ੍ਧਸ੍ਸ ਭਾਵੋ, ਕਾ ਕਥਾ ਕਿਂਵਤ੍ਤਬ੍ਬੋ ਏਵ, ਤਸ੍ਮਾ ਬੁਦ੍ਧੋਬੁਦ੍ਧੋਤਿ ਘੋਸਸ੍ਸ ਅਤਿਦੁਲ੍ਲਭਤਰਤ੍ਤਾ, ਵਿਭਾਵੀ ਮੇਧਾਵੀ ਵਿਵਿਧਹਿਤਸੁਖਂ ਨਾਨਪ੍ਪਕਾਰਂ ਲੋਕਿਯਲੋਕੁਤ੍ਤਰਸਙ੍ਖਾਤਂ ਹਿਤਸੁਖਂ ਪਤ੍ਥਯਨ੍ਤਾ ਯਾਚਨ੍ਤਾ, ਸਾਧਵੋ ਸਪ੍ਪੁਰਿਸਾ ਇਟ੍ਠਂ ਕਾਮਯਮਾਨਂ, ਅਤ੍ਥਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਦਿਅਤ੍ਥਂ, ਵਹਨ੍ਤਂ ਧਾਰਕਂ, ਸੁਰਨਰਮਹਿਤਂ ਦੇਵਮਨੁਸ੍ਸੇਹਿ ਪੂਜਿਤਂ, ਨਿਬ੍ਭਯਂ ਅਭਯਂ ਅਸਨ੍ਤਾਸਂ ਵਾ, ਦਕ੍ਖਿਣੇਯ੍ਯਂ ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਉਤ੍ਤਮਦਾਨਾਰਹਂ, ਲੋਕਾਨਂ ਸਤ੍ਤਲੋਕਾਨਂ ਨਨ੍ਦਿਵਡ੍ਢਂ ਪੀਤਿਯਾ ਵਡ੍ਢਾਪਨੇਨ੍ਤਂ. ਦਸਬਲਂ ਅਸਾਧਾਰਣੇਨ ਦਸਕਾਯਞਾਣਬਲੇਨ ਸਮ੍ਪਨ੍ਨਂ, ਅਸਮਂ ਸੀਲਾਦਿਗੁਣੇਹਿ ਕੇਨਚਿ ਅਸਦਿਸਂ ਤਂ ਤਾਦਿਸਂ ਗੁਣਸਮ੍ਪਨ੍ਨਂ ਬੁਦ੍ਧਂ ਨਿਚ੍ਚਂ ਸਤਤਂ ਸਮਿਤਂ ਸਬ੍ਬਕਾਲਂ ਨਿਰਨ੍ਤਰਂ, ਨਮਸ੍ਸਨ੍ਤੁ ਅਭਿਵਨ੍ਦਨ੍ਤੂਤਿ.

ਛਬ੍ਬੀਸਤਿਮਵਨ੍ਦਨਗਾਥਾਵਣ੍ਣਨਾ ਸਮਤ੍ਤਾ.

੨੭.

ਪੁਞ੍ਞੇਨੇਤੇਨ ਸੋਹਂ ਨਿਪੁਣਮਤਿ ਸਤੋ ਸਮ੍ਪਰਾਯੇ ਚ ਤਿਤ੍ਤੋ,

ਦਕ੍ਖੋ ਦਿਟ੍ਠੁਜ੍ਜੁਪਞ੍ਞੋ ਅਵਿਕਲਵੀਰਿਯੋ ਭੋਗਵਾ ਸਂਵਿਭਾਗੀ;

ਤਿਕ੍ਖੋ ਸੂਰੋ ਧਿਤਤ੍ਤੋ ਸਪਰਹਿਤਧਰੋ ਦੀਘਜੀਵੀ ਅਰੋਗੋ,

ਧਞ੍ਞੋ ਵਣ੍ਣੋ ਯਸਸ੍ਸੀ ਅਤਿਬਲਵਧਰੋ ਕਿਤ੍ਤਿਮਾ ਖਨ੍ਤੁਪੇਤੋ.

੨੮.

ਸਦ੍ਧੋ ਦਾਤਙ੍ਗੁਪੇਤੋ ਪਰਮਸਿਰਿਧਰੋ ਦਿਟ੍ਠਧਮ੍ਮੇ ਵਿਰਤ੍ਤੋ,

ਲਜ੍ਜੀ ਕਲ੍ਯਾਣਮਿਤ੍ਤੋ ਅਭਿਰਤਕੁਸਲੋ ਪਞ੍ਚਸੀਲਾਦਿਰਕ੍ਖੋ;

ਅਪ੍ਪਿਚ੍ਛੋ ਅਪ੍ਪਕੋਧੋ ਅਤਿਵੁਜੁਹਦਯੋ ਇਦ੍ਧਿਮਾ ਅਪ੍ਪਮੇਯ੍ਯੋ,

ਪਾਸਂਸੋ ਪੇਮਵਾਚੋ ਸੁਜਨਗੁਣਵਿਦੂ ਮਾਮਕੋ ਸੋ ਭਵੇਯ੍ਯਂ.

੨੭. ਏਵਂ ਬੁਦ੍ਧੋ ਬੁਦ੍ਧੋਤਿ ਘੋਸੋਤ੍ਯਾਦਿਗਾਥਾਯ ਬੁਦ੍ਧਵਨ੍ਦਨੇ ਉਯ੍ਯੋਜਨਂ ਕਤ੍ਵਾ ਇਦਾਨਿ ਸੁਗਤਨ੍ਤ੍ਯਾਦੀਹਿ ਗਾਥਾਹਿ ਬੁਦ੍ਧਂ ਵਨ੍ਦਿਤ੍ਵਾ ਪਣਿਧਿਂ ਕਰੋਨ੍ਤੋ ਆਹ ਪੁਞ੍ਞੇਨੇਤੇਨ ਸੋਹਨ੍ਤ੍ਯਾਦਿ ਗਾਥਾਦ੍ਵਯਂ. ਅਯਂ ਪਨ ਗਾਥਾਦ੍ਵਯਮ੍ਪਿ ਸਦ੍ਧਰਾਗਾਥਾਤਿ ਦਟ੍ਠਬ੍ਬਾ. ਤਤ੍ਥ ਪਠਮਗਾਥਾਯਂ ਸੋਅਹਂ ਏਤੇਨ ਪੁਞ੍ਞੇਨ ਸਮ੍ਪਰਾਯੇ ਨਿਪੁਣਮਤਿ ਚ ਸਤੋ ਚ…ਪੇ… ਖਨ੍ਤੁਪੇਤੋ ਚ ਭਵੇਯ੍ਯਨ੍ਤਿ ਸਮ੍ਬਨ੍ਧੋ. ਸੋਹਨ੍ਤਿ ਸੋ ਅਹਂ. ਬੁਦ੍ਧਸ੍ਸ ਨਮਕ੍ਕਾਰੋ ਸੋਅਹਨ੍ਤਿ ਅਤ੍ਥੋ. ਏਤੇਨ ਪੁਞ੍ਞੇਨਾਤਿ ਇਮਿਨਾ ਬੁਦ੍ਧਵਨ੍ਦਨਪੁਞ੍ਞਕਮ੍ਮੇਨ ਅਤ੍ਤਨੋ ਕਾਰਕਂ ਪਵਤਿ ਸੋਧੇਤੀਤਿ ਪੁਞ੍ਞਂ. ਪੁਧਾਤੁ ਸੋਧਨੇ ਣ੍ਯ. ਪੁਞ੍ਞਨ੍ਤਿ ਚ ਇਧ ਪਨ ਬੁਦ੍ਧਪਣਾਮਕ੍ਰਿਯਾਭਿਨਿਪ੍ਫਾਦਿਕਾ ਕੁਸਲਚੇਤਨਾ ਅਧਿਪ੍ਪੇਤਾ. ਸਾ ਚ ਵਨ੍ਦਨੇਯ੍ਯਵਨ੍ਦਕਾਨਂ ਖੇਤ੍ਤਜ੍ਝਾਸਯਸਮ੍ਪਦਾਹਿ ਦਿਟ੍ਠਧਮ੍ਮ ਵੇਦਨੀਯਭੂਤਾ ਯਥਾਲਦ੍ਧਸਮ੍ਪਤ੍ਤਿਨਿਮਿਤ੍ਤਕਸ੍ਸ ਕਮ੍ਮਸ੍ਸ ਅਨੁਬਲਪ੍ਪਦਾਨਵਸੇਨ ਤਨ੍ਨਿਬ੍ਬਤ੍ਤਿਤਵਿਪਾਕਸਨ੍ਤਤਿਯਾ ਅਨ੍ਤਰਾਯਕਰਾਨਿ ਉਪਪੀਲ਼ਕਉਪਚ੍ਛੇਦਕਕਮ੍ਮਾਨਿ ਪਟਿਬਾਹਿਤ੍ਵਾ ਤਨ੍ਨਿਦਾਨਾਨਂ ਯਥਾਧਿਪ੍ਪੇਤਸਿਦ੍ਧਿਵਿਬਨ੍ਧਕਾਨਂ ਰੋਗਾਦਿਅਨ੍ਤਰਾਯਾਨਮਪ੍ਪਵਤ੍ਤਿਂਸਾਧੇਤਿ ਚਾਤਿ ਅਤ੍ਥੋ ਚ ਵੇਦਿਤਬ੍ਬੋ. ਸਮ੍ਪਰਾਯੇ ਚਾਤਿ ਏਤ੍ਥ ਚਸਦ੍ਦੋ ਅਟ੍ਠਾਨਯੋਗੋ. ਸੋ ਚ ਨਿਪੁਣਮਤਿਤ੍ਯਾਦੀਸੁ ਪਦੇਸੁ ਯੋਜੇਤਬ੍ਬੋ. ਸਮ੍ਪਰਾਯੇਤਿ ਪਰਲੋਕੇ. ਸੋ ਹਿ ਸਮ੍ਪਰਾਯਿਤਬ੍ਬਾ ਉਪਗਮਿਤਬ੍ਬਾ ਏਤ੍ਥ ਸਤ੍ਤੇਹੀਤਿ ਚ, ਕਮ੍ਮਕਿਲੇਸਵਸੇਨ ਸਤ੍ਤੇਹਿ ਸਮ੍ਪਰਾਯਿਤਬ੍ਬਾ ਪਾਪੁਣਿਤਬ੍ਬਾਤਿ ਵਾ ਏਤ੍ਥਾਤਿ ਚ ਸਮ੍ਪਰਾਯੋਤਿ ਵੁਚ੍ਚਤਿ. ਸਂਪਰਿਪੁਬ੍ਬ ਅਯਧਾਤੁ ਹਿ ਗਤਿਯਂ ਣ. ਅਥ ਵਾ ਕਮ੍ਮਵਸੇਨ ਅਭਿਮੁਖੋ ਸਮ੍ਪਰੇਤਿ ਗਚ੍ਛਤਿ ਪਵਤ੍ਤਤੀਤਿ ਸਮ੍ਪਰਾਯੋਤਿ ਵੁਚ੍ਚਤਿ. ਸਂਪੁਬ੍ਬਪਰਧਾਤੁ ਗਤਿਯਂ ਣ੍ਯ. ਇਤਿ ਖੋ ਆਨਨ੍ਦ ਕੁਸਲਾਨਿ ਸੀਲਾਨਿ ਅਨੁਪੁਬ੍ਬੇਨ ਅਗ੍ਗਾਯ ਪਰੇਨ੍ਤੀਤਿਆਦੀਸੁ ਵਿਯ ਹਿ ਚੁਰਾਦਿ ਗਣਵਸੇਨ ਪਰਸਦ੍ਦਂ ਗਤਿਯਮਿਚ੍ਛਨ੍ਤਿ ਸਦ੍ਦਵਿਦੂ. ਤਸ੍ਮਿਂ ਸਮ੍ਪਰਾਯੇ.

ਨਿਪੁਣਮਤੀਤਿ ਸਣ੍ਹਸੁਖੁਮਪਞ੍ਞਵਾ ਚ. ਸਣ੍ਹਸੁਖੁਮਂ ਅਤ੍ਥਨ੍ਤਰਂ ਪਟਿਵਿਜ੍ਝਨਸਮਤ੍ਥਾਯ ਪਞ੍ਞਾਯ ਸਮ੍ਪਨ੍ਨੋ ਚ ਵਾ. ਏਤ੍ਥ ਚ ਨਿਪੁਣਸਦ੍ਦੋ ਸਣ੍ਹਸੁਖੁਮਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਹਿਤਾਹਿਤਂ ਮਨਤਿ ਜਾਨਾਤੀਤਿ ਮਤਿ, ਪਞ੍ਞਾ. ਮਨਧਾਤੁ ਞਾਣੇਤਿ. ਨਿਪੁਣਾ ਸਣ੍ਹਾ ਮਤਿ ਪਞ੍ਞਾ ਯਸ੍ਸ ਮੇਤਿ ਨਿਪੁਣਮਤਿ. ਸਤੋਤਿ ਸਤਿਮਾ ਚ. ਸਰਤੀਤਿ ਸਤਿ, ਸਰਧਾਤੁ ਚਿਨ੍ਤਾਯਨ੍ਤਿ. ਸਾ ਅਸ੍ਸ ਮੇ ਅਤ੍ਥੀਤਿ ਸਤੋ. ਤਿਤ੍ਤੋਤਿ ਤਪ੍ਪਨੋ ਚ. ਯਥਾਲਦ੍ਧਵਤ੍ਥੁਨਾ ਸਨ੍ਤੁਟ੍ਠੋ ਚਾਤਿ ਅਤ੍ਥੋ. ਤਿਸਨਂ ਤਪ੍ਪਨਂ ਤਿਤ੍ਤੋ. ਤਿਸਧਾਤੁ ਤਪ੍ਪਨੇ ਤਪਚ੍ਚਯੋ. ਸਕਾਰਸ੍ਸ ਤੋਆਦੇਸੋ. ਯਥਾਲਾਭ ਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋ ਸੋ ਚਾਤਿ ਤਿਵਿਧੇਨ ਸਨ੍ਤੋਸੇਨ ਸਨ੍ਤੁਟ੍ਠੋਤਿ ਵੁਤ੍ਤਂ ਹੋਤਿ.

ਦਕ੍ਖੋਤਿ ਤਂ ਤਂ ਕਿਚ੍ਚੇ ਛੇਕੋ ਚ ਕੁਸਲੋ ਚ ਵਾ. ਸੋ ਹਿ ਕੁਸਲਕਮ੍ਮੇ ਅਞ੍ਞਸ੍ਮਿਞ੍ਚ ਕਿਚ੍ਚਾਕਿਚ੍ਚੇ ਅਦਨ੍ਧਤਾਯ ਸੀਘਂ ਗਚ੍ਛਤੀਤਿ ਦਕ੍ਖੋ. ਦਕ੍ਖਧਾਤੁ ਸੀਘਤ੍ਥੇ ਅ. ਦਿਟ੍ਠੁਜ੍ਜੁਪਞ੍ਞੋਤਿ ਦਿਟ੍ਠਿਉਜੁਪਞ੍ਞੋਤਿ ਪਦਚ੍ਛੇਦੋ. ਉਜੁ ਦਿਟ੍ਠਿਪਞ੍ਞਾਯ ਸਮਨ੍ਨਾਗਤੋਤਿ ਅਤ੍ਥੋ. ਕੇਸੁਚਿ ਪੋਤ੍ਥਕੇਸੁ ਦਿਟ੍ਠਿਜ੍ਜੁ ਪਞ੍ਞੋਤਿ ਪਾਠੋ. ਦਿਟ੍ਠਿਉਜੁਪਞ੍ਞੋਤਿ ਪਦਚ੍ਛੇਦੋ, ਸੋਯੇ ਵਤ੍ਥੋ. ਉਜੂਤਿ ਅਕੁਟਿਲਭਾਵੇਨ ਭਵਤੀਤਿ ਉਜੁ, ਅਜ੍ਜਵੋ. ਉਜੁਧਾਤੁ ਅਜ੍ਜਵੇ ਕ੍ਵਿ. ਅਥ ਵਾ ਅਰਤਿ ਅਕੁਟਿਲਭਾਵੇਨ ਪਵਤ੍ਤਤੀਤਿ ਉਜੁ, ਅਵਙ੍ਕੋ. ਅਰਧਾਤੁ ਗਤਿਯਂ ਜੁਪਚ੍ਚਯੋ. ਅਰਿਸ੍ਸ ਉਆਦੇਸੋ. ਸਮ੍ਮਾ ਪਸ੍ਸਤੀਤਿ ਦਿਟ੍ਠਿ, ਮਤਿ. ਦਿਸਧਾਤੁ ਪਸ੍ਸਨੇ ਤਪਚ੍ਚਯੋ. ਤਸ੍ਸ ਰਟ੍ਠਾਦੇਸੋ. ਧਾਤ੍ਵਨ੍ਤਲੋਪੋ ਚ ਈ ਚ. ਉਜੁ ਅਜ੍ਜਵਾ ਦਿਟ੍ਠਿ ਮਤਿ ਦਿਟ੍ਠੁਜੁ ਵਿਸੇਸਨਪਰਨਿਪਾਤਵਸੇਨ. ਪਕਾਰੇਨ ਜਾਨਾਤਿ ਅਨਿਚ੍ਚਾਦਿਵਸੇਨ ਅਵਬੁਜ੍ਝਤੀਤਿ ਪਞ੍ਞਾ. ਪਪੁਬ੍ਬਞਾਧਾਤੁ ਅਵਬੋਧਨੇ ਅ. ਉਜੁਦਿਟ੍ਠਿ ਚ ਉਜੁਪਞ੍ਞਾ ਚ ਯਸ੍ਸ ਮੇਤਿ ਦਿਟ੍ਠੁਜ੍ਜੁਪਞ੍ਞੋ, ਪੁਗ੍ਗਲੋ. ਅਵਿਕਲਵੀਰਿਯੋਤਿ ਅਨੂਨਵੀਰਿਯੋ ਚ ਪਰਿਪੁਣ੍ਣਵੀਰਿਯੋ ਚਾਤਿ ਅਤ੍ਥੋ. ਵਿਹੀਨਂ ਕਰੋਤੀਤਿ ਵਿਕਲੋ. ਵਿਪੁਬ੍ਬਕਰਧਾਤੁ ਕਰਣੇ ਅ. ਰਸ੍ਸਲੋ. ਵੀਰਾਨਂ ਕਮ੍ਮਂ ਵੀਰਿਯਂ. ਅਵਿਕਲਂ ਅਨੂਨਂ ਵੀਰਿਯਂ ਅਸ੍ਸਮੇਤਿ ਅਵਿਕਲਵੀਰਿਯੋ. ਨ ਸਕ੍ਕਾ ਕੁਸੀਤੇਨੇਵ ਨਵਲੋਕੁਤ੍ਤਰਧਮ੍ਮਾ ਲਦ੍ਧੁਂ, ਆਰਦ੍ਧਵੀਰਿਯੇਨੇਵ ਸਕ੍ਕਾ. ਤਸ੍ਮਾ ਅਵਿਕਲਵੀਰਿਯੋਤਿ ਪਤ੍ਥੇਤੀਤਿ ਵੁਤ੍ਤਂ ਹੋਤਿ.

ਭੋਗਵਾਤਿ ਭੁਞ੍ਜਿਤਬ੍ਬਸਮ੍ਪਤ੍ਤਿਸੁਖੇਨ ਸਮ੍ਪਨ੍ਨੋ ਚ. ਭੁਞ੍ਜਿਤਬ੍ਬੋਤਿ ਭੋਗੋ, ਸਮ੍ਪਤ੍ਤਿ. ਭੁਜਧਾਤੁ ਪਾਲਨਬ੍ਯਵਹਰਣੇਸੁ ਣ. ਭੋਗੋ ਅਸ੍ਸ ਮੇ ਅਤ੍ਥੀਤਿ ਭੋਗਵਾ. ਸਂਵਿਭਾਗੀਤਿ ਸਂਵਿਭਜਨਸੀਲੋ ਚ ਸਂਵਿਭਜਨਸਮ੍ਪਨ੍ਨੋ ਚ ਵਾ, ਸਂਵਿਭਜਤਿ ਸੀਲੇਨਾਤਿ ਸਂਵਿਭਾਗੀ. ਸਂਵਿਭਜਨਸੀਲੋਤਿ ਵਾ ਸਂਵਿਭਾਗੀ, ਸਂਵਿਭਜਿਤੁਂ ਸੀਲਮਸ੍ਸਾਤਿ ਵਾ ਸਂਵਿਭਾਗੀ. ਸਂਵਿਭਾਗੇ ਸੀਲਮਸ੍ਸਾਤਿ ਸਂਵਿਭਾਗੀ. ਅਯਂ ਤਸ੍ਸੀਲਤ੍ਥੋ. ਸਂਵਿਭਜਤਿ ਧਮ੍ਮੇਨਾਤਿ ਸਂਵਿਭਜਨਧਮ੍ਮੋਤਿ ਵਾ. ਸਂਵਿਭਜਿਤੁਂ ਧਮ੍ਮੋ ਅਸ੍ਸਾਤਿ ਵਾ, ਸਂਵਿਭਜਨੇ ਧਮ੍ਮੋ ਅਸ੍ਸਾਤਿ ਵਾ ਸਂਵਿਭਾਗੀ. ਅਯਂ ਤਦ੍ਧਮ੍ਮਤ੍ਥੋ. ਸਂਵਿਭਜਨਂ ਸਾਧੁਕਾਰੋ ਅਸ੍ਸ ਅਤ੍ਥਿ. ਸਾਧੁਕਾਰਿਨਾ ਸਂਵਿਭਜਤੀਤਿ ਵਾ, ਸਂਵਿਭਜਿਤੁਂ ਸਾਧੁਕਾਰੀਤਿ ਵਾ, ਸਂਵਿਭਜਨੇ ਸਾਧੁਕਾਰੀਤਿ ਵਾ ਸਂਵਿਭਾਗੀ. ਅਯਂ ਤਸ੍ਸਾ ਧੁਕਾਰਤ੍ਥੋ. ਸਂਵਿਪੁਬ੍ਬ ਭਜਧਾਤੁ ਵਿਭਾਗੇ ਣ. ਜਸ੍ਸ ਗੋ. ਅਥ ਵਾ ਸਂਵਿਭਜਨਂ ਸਂਵਿਭਾਗੋ. ਸੋ ਮੇ ਅਸ੍ਸ ਅਤ੍ਥੀਤਿ ਸਂਵਿਭਾਗੀ. ਅਸ੍ਸਥ੍ਯਤ੍ਥੇ ਈ. ਪਰੇਸਂ ਯਾਚਕਾਨਂ ਅਨ੍ਨਾਦਿਦਾਨਵਤ੍ਥੁਂ ਨਿਚ੍ਚਂ ਪਰਿਚ੍ਚਜਨਕਾਰੀਤਿ ਵੁਤ੍ਤਂ ਹੋਤਿ.

ਤਿਕ੍ਖੋਤਿ ਤਿਕ੍ਖਪ੍ਪਞ੍ਞਵਾ ਚ ਨਿਸਾਨਪਞ੍ਞਵਾ ਵਾ. ਤਿਜਨਂ ਨਿਸਨਂ ਤਿਕ੍ਖਾ, ਪਞ੍ਞਾ. ਤਿਜਧਾਤੁ ਨਿਸਾਨੇ ਖ. ਜਸ੍ਸ ਕੋ. ਤਿਕ੍ਖਾ ਪਞ੍ਞਾ ਮੇ ਅਸ੍ਸ ਅਤ੍ਥੀਤਿ ਤਿਕ੍ਖੋ. ਅਸ੍ਸਥ੍ਯਤ੍ਥੇ ਣੋ. ਤਿਕ੍ਖ ਪਞ੍ਞਾਯ ਸਮ੍ਪਨ੍ਨੋ ਚਾਤਿ ਅਤ੍ਥੋ. ਪਞ੍ਞਾਯ ਚ ਸਬ੍ਬ ਕੁਸਲਾਨਂ ਧਮ੍ਮਾਨਂ ਸੇਟ੍ਠਤ੍ਤਾ ਮੂਲਕਾਰਣਤ੍ਤਾ ਚ ਤਿਕ੍ਖੋਤਿ ਪਤ੍ਥਨਂ ਕਰੋਤਿ. ਵੁਤ੍ਤਞ੍ਹਿ ਮਿਲਿਨ੍ਦਪਞ੍ਹੇ –

‘‘ਪਞ੍ਞਾ ਪਸਟ੍ਠਾ ਲੋਕਸ੍ਮਿਂ, ਕਤਾ ਸਦ੍ਧਮ੍ਮਟ੍ਠਿਤਿਯਾ;

ਪਞ੍ਞਾਯ ਵਿਮਤਿਂ ਹਨ੍ਤ੍ਵਾ, ਸਨ੍ਤਿਂ ਪਪ੍ਪੋਤਿ ਪਣ੍ਡਿਤੋ’’ਤਿ.

ਸੂਰੋਤਿ ਚਤੂਸੁ ਪਰਿਸਾਸੁ ਅਟ੍ਠਸੁ ਪਰਿਸਾਸੁ ਚ ਵੀਰੋ ਚ. ਸਤ੍ਤਿਵਨ੍ਤੋ ਨਿਬ੍ਭਯੋਤਿ ਅਤ੍ਥੋ. ਸੂਰਯਤੇ ਵਿਰਯਤੇ ਸੂਰੋ. ਭਾਵਸਾਧਨੋਯਂ. ਸੂਰਧਾਤੁ ਵਿਕ੍ਕਨ੍ਤਿਯਂ ਵੀਰੇ ਵਾ ਅ. ਅਥ ਵਾ ਅਭਿਰੁਅਛਮ੍ਭਿਅਨੁਤ੍ਰਾਸਭਾਵੇਨ ਸੂਰਤਿ ਗਚ੍ਛਤਿ ਪਵਤ੍ਤਤੀਤਿ ਸੂਰੋ. ਸੂਰਧਾਤੁ ਗਤਿਯਂ ਅ. ਸੀਹੋ ਵਿਯ ਪਰਿਸਮਜ੍ਝੇ ਸੂਰਵੀਰਸਮ੍ਪਨ੍ਨੋ ਚਾਤਿ ਅਤ੍ਥੋ. ਸਾਸਨਿ ਕੇਹਿ ਪਨ ਸਦ੍ਧਮ੍ਮਵਿਦੂਹਿ ਸੂਰਸਦ੍ਦਸ੍ਸ ਨਿਬ੍ਬਚਨਂ ਨ ਦਸ੍ਸਿਤਂ. ਕੇਵਲਂ ਪਨ ਸੂਰੋਤਿ ਵਿਸਿਟ੍ਠਸੂਰੋਤਿ ਅਤ੍ਥਵਿਵਰਣਮਤ੍ਤਮੇਵ ਦਸ੍ਸਿਤਂ. ਧਿਤਤ੍ਤੋਤਿ ਏਤ੍ਥ ਧਿਤ ਅਤ੍ਤੋਤਿ ਪਦਚ੍ਛੇਦੋ. ਧਿਤੋਤਿ ਸਮਾਧਿ. ਅਤ੍ਤਨ੍ਤਿ ਚਿਤ੍ਤਂ. ਏਕਗ੍ਗਚਿਤ੍ਤਸਮ੍ਪਨ੍ਨੋ ਚਾਤਿ ਅਤ੍ਥੋ. ਧਾਤਿ ਤਿਟ੍ਠਤਿ ਏਕਾਰਮ੍ਮਣੇਹਿ ਧਿਤੋ, ਏਕਾਰਮ੍ਮਣੇ ਸਮ੍ਪਯੁਤ੍ਤਧਮ੍ਮੇ ਧਾਰੇਤੀਤਿ ਵਾ ਧਿਤੋ, ਸਮਾਧਿ. ਧਾਧਾਤੁ ਧਾਰਣੇ ਤ. ਆਰਮ੍ਮਣਂ ਅਰਤਿ ਜਾਨਾਤੀਤਿ ਅਤ੍ਤਂ, ਚਿਤ੍ਤਂ. ਅਰਧਾਤੁ ਗਤਿਯਂ ਤ. ਰਸ੍ਸ ਤੋ. ਧਿਤੋ ਸਮਾਧਿ ਅਤ੍ਤਂ ਚਿਤ੍ਤਂ ਅਸ੍ਸ ਮੇਤਿ ਧਿਤਤ੍ਤੋ.

ਸਪਰਹਿਤਚਰੋਤਿ ਅਤ੍ਤਹਿਤਪਰਹਿਤਚਰੋ, ਅਤ੍ਤਨੋ ਚ ਪਰਸ੍ਸ ਚ ਅਤ੍ਥਂ ਪਟਿਪਨ੍ਨਕੋ ਚਾਤਿ ਅਤ੍ਥੋ. ਅਤ੍ਤਨੋ ਚ ਪਰਸ੍ਸ ਚ ਹਿਤਂ ਅਤ੍ਥਂ ਪਯੋਜਨਂ ਚਰਤਿ ਪਟਿਪਜ੍ਜਤੀਤਿ ਸਪਰਹਿਤਚਰੋ. ਸਪਰਹਿਤਸਦ੍ਦੂਪਪਦ ਚਰਧਾਤੁ ਚਰਣੇ ਅ. ਦੀਘਜੀਵੀਤਿ ਦੀਘਾਯੁਕੋ ਚ. ਦੀਘੇਨ ਜੀਵਿਤਿਨ੍ਦ੍ਰਿਯੇਨ ਸਮ੍ਪਨ੍ਨੋ ਵਾ. ਦੀਘੋ ਜੀਵੋ ਜੀਵਿਤਂ ਅਸ੍ਸ ਮੇਤਿ ਦੀਘਜੀਵਿ. ਆਯੁਕਪ੍ਪਮ੍ਪਿ ਦੀਘਜੀਵਿਤਸਮ੍ਪਨ੍ਨੋ ਚਾਤਿ ਅਤ੍ਥੋ. ਅਰੋਗੋਤਿ ਰੋਗਵਿਰਹੋ ਚ ਆਰੋਗ੍ਯਂ ਵਾ. ਰੁਜ੍ਜਤਿ ਭਞ੍ਜਤਿ ਅਙ੍ਗਪਚ੍ਚਙ੍ਗਾਨੀਤਿ ਰੋਗੋ, ਬ੍ਯਾਧਿ. ਰੁਜਧਾਤੁ ਭਙ੍ਗੇ ਣ. ਅਥ ਵਾ ਰੁਜ੍ਜਤਿ ਹਿਂਸਤੀਤਿ ਰੋਗੋ. ਰੁਜਧਾਤੁ ਹਿਂਸਾਯਂ ਣ. ਨਤ੍ਥਿ ਰੋਗੋ ਤਸ੍ਸ ਮੇਤਿ ਅਰੋਗੋ, ਛਨ੍ਨਵੁਤਿਰੋਗਾਨਂ ਅਭਾਵੋ ਭਵੇਯ੍ਯਨ੍ਤਿ ਅਤ੍ਥੋ. ਧਞ੍ਞੋਤਿ ਸਿਰੀਪੁਞ੍ਞਪਞ੍ਞਾਲਕ੍ਖਣਸਮ੍ਪਨ੍ਨੋ ਚ. ਧਞ੍ਞਸਦ੍ਦੋ ਹਿ ਸਿਰੀਪੁਞ੍ਞਪਞ੍ਞਾਲਕ੍ਖਣਵਾਚਕੋਤਿ ਦਟ੍ਠਬ੍ਬੋ. ਵੁਤ੍ਤਞ੍ਹਿ ਵੇਸ੍ਸਨ੍ਤਰਜਾਤਕੇ ‘‘ਧਞ੍ਞਂ ਮਙ੍ਗਲ ਸਮ੍ਮਤ’’ਨ੍ਤਿ ਚ. ਤੇਮਿਯਜਾਤਕੇ ‘‘ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਪੁਤ੍ਤਂ ਵਿਜਾਯੀ’’ਤਿ ਚ. ਇਦਂ ਪਨ ਨਿਬ੍ਬਚਨਂ. ਧਨਨਂ ਸਮ੍ਪਜ੍ਜਨਂ ਧਞ੍ਞਂ, ਸਿਰੀਪਞ੍ਞਾਪੁਞ੍ਞਲਕ੍ਖਣਾਨਂ ਸਮ੍ਪਨ੍ਨਨ੍ਤਿ ਅਤ੍ਥੋ. ਧਨਧਾਤੁ ਸਮ੍ਪਨ੍ਨੇ. ਧਾਤੂਨਂ ਅਨੇਕਤ੍ਥਤ੍ਤਾ ਣ੍ਯਪਚ੍ਚਯੋ. ਣਕਾਰਾਨੁਬਨ੍ਧੇ ਲੋਪੇ ਕਤੇ ਯਪਚ੍ਚਯੇਨ ਸਦ੍ਧਿਂ ਨਕਾਰਸ੍ਸ ਞਕਾਰਂ ਕਤ੍ਵਾ ਧਞ੍ਞਨ੍ਤਿ ਰੂਪਸਿਦ੍ਧਿ ਵੇਦਿਤਬ੍ਬਾ. ਅਥ ਵਾ ਧਨਂ ਸਿਰੀਪਞ੍ਞਾ ਪੁਞ੍ਞਲਕ੍ਖਣਸਮ੍ਪਦਂ ਅਸ੍ਸ ਮੇ ਅਤ੍ਥੀਤਿ ਧਞ੍ਞੋ. ਅਸ੍ਸਥ੍ਯਤ੍ਥੇ ਣ੍ਯੋ.

ਵਣ੍ਣੋਤਿ ਵਣ੍ਣਸਮ੍ਪਨ੍ਨੋ ਚ. ਏਤ੍ਥ ਚ ਵਣ੍ਣੋ ਦੁਵਿਧੋ ਹੋਤਿ ਸਰੀਰਵਣ੍ਣਗੁਣਵਣ੍ਣਵਸੇਨ. ਤਤ੍ਥ ਸਰੀਰ ਵਣ੍ਣੋ ਨਾਮ ਰੂਪਕਾਯਸ੍ਸ ਪਾਸਾਦਿਕਰੂਪਸਮ੍ਪਨ੍ਨਤਾ. ਗੁਣ ਵਣ੍ਣੋ ਨਾਮ ਸੀਲਸਮਾਧਿਪਞ੍ਞਾਦਿਗੁਣੇਨ ਚ ਧੁਤਙ੍ਗਾਦਿਪਟਿਪਦਾਗੁਣੇਨ ਚ ਸਮ੍ਪਨ੍ਨਤਾ. ਇਦਂ ਪਨ ਨਿਬ੍ਬਚਨਂ. ਵਣ੍ਣੇਤਿ ਵਿਕਾਰਮਾਪਨ੍ਨਾਨਂ ਹਦਯਙ੍ਗਤਭਾਵਂ ਪਕਾਸੇਤੀਤਿ ਵਣ੍ਣੋ, ਸਰੀਰਰੂਪਂ. ਵਣ੍ਣੇਤਿ ਅਤ੍ਤਨੋ ਦਬ੍ਬਂ ਪਕਾਸੇਤੀਤਿ ਵਣ੍ਣੋ, ਗੁਣੋ. ਵਣ੍ਣਧਾਤੁ ਪਕਾਸਨੇ ਅ. ਇਧ ਪਨ ਤਦੁਭਯਮ੍ਪਿ ਯੁਜ੍ਜਤਿ. ਵਣ੍ਣਂ ਅਸ੍ਸ ਮੇ ਅਤ੍ਥੀਤਿ ਵਣ੍ਣੋ. ਅਸ੍ਸਥ੍ਯਤ੍ਥੇ ਅ. ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨੋ ਕਿਤ੍ਤਿਵਨ੍ਤੋ ਵਾ. ਏਤ੍ਥ ਚ ਦੁਵਿਧੋ ਹੋਤਿ ਯਸੋ ਪਰਿਵਾਰਕਿਤ੍ਤਿਯਸਵਸੇਨ. ਤਤ੍ਥ ਯਜਿਯਤਿ ਪੂਜਿਯਤਿ ਏਤੇਨ ਪਰਿਵਾਰੇਨਾਤਿ ਯਸੋ, ਪਰਿਵਾਰੋ. ਯਜਧਾਤੁ ਪੂਜਾਯਂ ਅ. ਜਸ੍ਸ ਸੋ. ਅਥ ਵਾ ਯਾਤਿ ਗਚ੍ਛਤਿ ਪਾਪੁਣਾਤਿ ਸਾਮਿਕਸ੍ਸ ਪਰਿਵਾਰਨ੍ਤਿ ਯਸੋ, ਪਰਿਵਾਰੋ. ਯਾਧਾਤੁ ਗਤਿਯਂ ਸੋਪਚ੍ਚਯੋ. ਯਜਿਯਤਿ ਪੂਜਿਯਤਿ ਏਤੇਨਾਤਿ ਯਸੋ, ਕਿਤ੍ਤਿਸਦ੍ਦੋ. ਯਜਧਾਤੁ ਦੇਵਪੂਜਾਸਙ੍ਗਹਕਰਣਦਾਨਧਮ੍ਮੇਸੁ ਅ. ਜਸ੍ਸ ਸੋ. ਅਥ ਵਾ ਯਾਤਿ ਗਚ੍ਛਤਿ ਪਾਪੁਣਾਤਿ ਸਬ੍ਬਤ੍ਥ ਬ੍ਯਾਪਨਨ੍ਤਿ ਯਸੋ, ਕਿਤ੍ਤਿਘੋਸੋ ਥੁਤਿਸਦ੍ਦੋ ਵਾ. ਯਾਧਾਤੁ ਗਤਿਯਂ ਸੋਪਚ੍ਚਯੋ. ਯਸੋ ਚ ਯਸੋ ਚ ਯਸੋ ਏਕਸੇਸਨਯੇਨ. ਸੋ ਅਸ੍ਸ ਮੇ ਅਤ੍ਥੀਤਿ ਯਸਸ੍ਸੀ, ਅਸ੍ਸਥ੍ਯਤ੍ਥੇ ਸੀਪਚ੍ਚਯੋ.

ਅਤਿਬਲਵਧਰੋਤਿ ਅਤਿਬਲਵਨ੍ਤਧਾਰਕੋ ਚ ਅਤਿਵਿਯ ਕਾਯਬਲਞਾਣਬਲਵਨ੍ਤਂ ਧਾਰੇਤੀਤਿ ਅਤਿਬਲਵਧਰੋ. ਅਜਾਤਸਤ੍ਤੁਰਾਜਾਦਯੋ ਵਿਯ ਪਞ੍ਚਹਤ੍ਥਿ ਦਸਹਤ੍ਥਿਬਲਸ੍ਸ ਧਾਰਣਸਮਤ੍ਥੋ ਚ, ਸਾਰਿਪੁਤ੍ਤਤ੍ਥੇਰਾਦਯੋ ਵਿਯ ਞਾਣਬਲਸ੍ਸ ਧਾਰਣਸਮਤ੍ਥੋ ਚ ਭਵੇਯ੍ਯਨ੍ਤਿ ਅਤ੍ਥੋ. ਕਿਤ੍ਤਿਮਾਤਿ ਕਿਤ੍ਤਿਘੋਸਵਨ੍ਤੋ ਚ. ਕਿਤ੍ਤਿਯਤੇ ਕਥਿਯਤੇ ਗੁਣਨ੍ਤਿ ਕਿਤ੍ਤਿ, ਥੁਤਿਘੋਸੋ. ਕਿਤ੍ਤਧਾਤੁ ਸਦ੍ਦੇ ਇ. ਕਿਤ੍ਤਿਘੋਸੋ ਅਸ੍ਸ ਮੇ ਅਤ੍ਥੀਤਿ ਕਿਤ੍ਤਿਮਾ. ਅਸ੍ਸਥ੍ਯਤ੍ਥੇ ਮਨ੍ਤੁਪਚ੍ਚਯੋ. ਖਨ੍ਤੁਪੇਤੋਤਿ ਖਨ੍ਤਿਯਾ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ. ਖਮਨਂ ਸਹਨਂ ਖਨ੍ਤਿ. ਖਮੁਧਾਤੁ ਸਹਨੇ ਤਪਚ੍ਚਯੋ. ਤਸ੍ਸਨ੍ਤਿ ਤਾਯ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋਤਿ ਖਨ੍ਤੁਪੇਤੋ. ਖਨ੍ਤਿਵਾਦਤਾਪਸੋ ਵਿਯ ਖਨ੍ਤੁਪੇਤੋ ਚ ਭਵੇਯ੍ਯਨ੍ਤਿ ਅਤ੍ਥੋ. ਖਨ੍ਤਿਯਾ ਹਿ ਦੁਕ੍ਕਰਤ੍ਤਾ ਸਬ੍ਬਕੁਸਲ ਧਮ੍ਮਾਨਂ ਪਧਾਨਤ੍ਤਾ ਸੇਟ੍ਠਤਪਤ੍ਤਾ ਚ ਖਨ੍ਤੁਪੇਤੋਤਿ ਪਤ੍ਥਨਂ ਕਰੋਤਿ. ਵੁਤ੍ਤਞ੍ਹੇਤਂ ਭਗਵਤਾ ‘‘ਖਨ੍ਤੀ ਪਰਮਂ ਤਪੋ ਤਿਤਿਕ੍ਖਾ’’ਤਿ ਚ. ‘‘ਖਨ੍ਤ੍ਯਾ ਭਿਯ੍ਯੋ ਨ ਵਿਜ੍ਜਤੀ’’ਤਿ ਚ. ‘‘ਖਨ੍ਤੀਬਲਂ ਬਲਾਨੀਕ’’ਨ੍ਤਿ ਚ.

‘‘ਸੀਲਸਮਾਧਿਪਞ੍ਞਾਨਂ, ਖਨ੍ਤਿਪ੍ਪਧਾਨਕਾਰਣਂ;

ਸਬ੍ਬੇਪਿ ਕੁਸਲਾ ਧਮ੍ਮਾ, ਖਨ੍ਤ੍ਯਾਯਤ੍ਤਾਵ ਵਡ੍ਢਰੇ’’ਤਿ ਚ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸੋਹਂ ਸੋ ਅਹਂ, ਏਤੇਨ ਪੁਞ੍ਞੇਨ ਇਮਿਨਾ ਬੁਦ੍ਧਵਨ੍ਦਨਪੁਞ੍ਞਕਮ੍ਮੇਨ ਸਮ੍ਪਰਾਯੇ ਪਰਲੋਕੇ, ਨਿਪੁਣਮਤਿ ਚ ਸਣ੍ਹਸੁਖੁਮਪਞ੍ਞਵਾ ਚ, ਸਤੋ ਸਤਿਮਾ ਚ ਤਿਤ੍ਤੋ ਤਪ੍ਪਨੋ ਯਥਾਲਦ੍ਧਵਤ੍ਥੁਨਾ ਸਨ੍ਤੁਟ੍ਠੋ ਚ, ਦਕ੍ਖੋ ਤਂਤਂਕਿਚ੍ਚੇ ਛੇਕੋ ਚ, ਦਿਟ੍ਠੁਜ੍ਜੁਪਞ੍ਞੋ ਉਜੁਦਿਟ੍ਠਿ ਪਞ੍ਞਾਯ ਸਮ੍ਪਨ੍ਨੋ ਚ ਅਵੀਕਲਵੀਰਿਯੋ ਅਨੂਨਵੀਰਿਯੋ ਚ ਪਰਿਪੁਣ੍ਣਵੀਰਿਯੋ ਵਾ, ਭੋਗਵਾਭੁਞ੍ਜਿਤਬ੍ਬਸਮ੍ਪਤ੍ਤਿਸੁਖੇਨ ਸਮ੍ਪਨ੍ਨੋ ਚ ਸਂਵਿਭਾਗੀ ਸਂਵਿਭਜਨਸੀਲੋ ਚ ਤਿਕ੍ਖੋ ਤਿਕ੍ਖਪਞ੍ਞਵਾ ਚ, ਸੂਰੋਤਿ ਸਤ੍ਤਿਵਨ੍ਤੋ ਨਿਬ੍ਭਯੋ ਚ, ਧਿਤਤ੍ਤੋ ਸਮਾਹਿਤ ਚਿਤ੍ਤੋ ਚ ਏਕਗ੍ਗਚਿਤ੍ਤੋ ਵਾ, ਸਪਰਹਿਤਚਰੋ ਅਤ੍ਤਹਿਤ ਪਰਹਿਤਪਟਿਪਨ੍ਨਕੋ ਚ ਦੀਘਜੀਵੀ ਦੀਘਾਯੁਕੋ ਚ ਅਰੋਗੋ ਰੋਗਵਿਰਹੋ ਚ ਧਞ੍ਞੋ ਸਿਰੀਪੁਞ੍ਞਪਞ੍ਞਾਲਕ੍ਖਣਸਮ੍ਪਨ੍ਨੋ ਚ ਵਣ੍ਣੋ ਵਣ੍ਣਸਮ੍ਪਨ੍ਨੋ ਚ ਯਸਸ੍ਸੀ ਪਰਿਵਾਰਸਮ੍ਪਨ੍ਨੋ ਚ ਅਤਿਬਲਵਧਰੋ ਅਤਿਬਲਵਨ੍ਤਧਾਰਕੋ ਚ ਕਿਤ੍ਤਿਮਾ ਕਿਤ੍ਤਿ ਘੋਸਵਨ੍ਤੋ ਚ ਖਨ੍ਤੁਪੇਤੋ ਖਨ੍ਤਿਯਾ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ ਭਵੇਯ੍ਯਨ੍ਤਿ.

ਸਤ੍ਤਵੀਸਤਿਮਗਾਥਾਵਣ੍ਣਨਾ ਸਮਤ੍ਤਾ.

੨੮. ਏਵਂ ਪੁਞ੍ਞੇਨੇਤੇਨਤ੍ਯਾਦਿਗਾਥਾਯ ਸਮ੍ਪਰਾਯੇ ਪਣਿਧਿਂ ਕਤ੍ਵਾ ਇਦਾਨਿ ਦਿਟ੍ਠਧਮ੍ਮੇ ਪਤ੍ਥਨਂ ਕਤ੍ਤੁਕਾਮੋ ਸਦ੍ਧੋ ਦਾਤਙ੍ਗੁਪੇਤੋ ਤ੍ਯਾਦਿਗਾਥਮਾਹ. ਤਤ੍ਥ ਸਦ੍ਧੋਤਿ ਕਮ੍ਮਾਦਿ ਸਦ੍ਦਹਨਲਕ੍ਖਣਾਯ ਸਦ੍ਧਾਯ ਸਮ੍ਪਨ੍ਨੋ ਚ. ਸਦ੍ਦਹਨਂ ਸਦ੍ਧਾ, ਸਦ੍ਦਹਤੀਤਿ ਵਾ ਸਦ੍ਧਾ. ਸਦ੍ਦਹਨ੍ਤਿ ਸਮ੍ਪਯੁਤ੍ਤਧਮ੍ਮਾ ਏਤਾਯਾਤਿ ਸਦ੍ਧਾ. ਸਂਪੁਬ੍ਬਧਾਧਾਤੁ ਧਾਰਣੇ ਤ. ਸਾ ਪਨ ਕਮ੍ਮਾਦੀਸੁ ਸਦ੍ਦਹਨਲਕ੍ਖਣਾ. ਓਕਪ੍ਪਨਲਕ੍ਖਣਾ ਵਾ. ਪਸਾਦਰਸਾ. ਉਦਕਪ੍ਪਸਾਦਕਮਣਿ ਵਿਯ. ਪਕ੍ਖਨ੍ਦਨਰਸਾ ਵਾ. ਓਘੁਤ੍ਤਰਣੋ ਵਿਯ. ਅਕਾਲੁਸ੍ਸਿਯਪਚ੍ਚੁਪਟ੍ਠਾਨਾ ਅਧਿਮੁਤ੍ਤਿਪਚ੍ਚੁਪਟ੍ਠਾਨਾ ਵਾ, ਸਦ੍ਧੇਯ੍ਯਵਤ੍ਥੁਪਦਟ੍ਠਾਨਾ ਸੋਤਾਪਤ੍ਤਿਯਙ੍ਗਪਦਟ੍ਠਾਨਾ ਵਾ. ਸਾ ਹਤ੍ਥਵਿਤ੍ਤਬੀਜਾਨਿ ਵਿਯ ਦਟ੍ਠਬ੍ਬਾ. ਭਗਵਤਾ ਹਿ ਸਾ ਸਦ੍ਧਾ ‘‘ਸਦ੍ਧਾਹਤ੍ਥੋ ਮਹਾਨਾਗੋ’’ਤਿ ਚ. ‘‘ਸਦ੍ਧੀਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠ’’ਨ੍ਤਿ ਚ. ‘‘ਸਦ੍ਧਾਬੀਜਂ ਤਪੋ ਵੁਟ੍ਠੀ’’ਤਿ ਚ ‘‘ਸਦ੍ਧਾਯ ਤਰਤਿ ਓਘ’’ਨ੍ਤਿ ਚ ‘‘ਸਦ੍ਧਾ ਬਨ੍ਧਤਿ ਪਾਥੇਯ੍ਯਂ, ਸਦ੍ਧਾ ਦੁਤਿਯਾ ਪੁਰਿਸਸ੍ਸ ਹੋਤੀ’’ਤਿ ਚ, ‘‘ਸਦ੍ਧੇਸਿਕੋ ਭਿਕ੍ਖਵੇ ਅਰਿਯਸਾਵਕੋ’’ਤਿ ਚ, ‘‘ਸਦ੍ਧਾਧਨ’’ਨ੍ਤਿ ਚ.

‘‘ਯੇਸਂ ਅਤ੍ਥਿ ਸਦ੍ਧਾ ਬੁਦ੍ਧੇ, ਧਮ੍ਮੇ ਚ ਸਙ੍ਘਰਤਨੇ;

ਤੇ ਮਂ ਅਤਿਵਿਰੋਚਨ੍ਤਿ, ਆਯੁਨਾ ਯਸਸਾ ਸਿਰਿਯਾ’’ਤਿ.

ਚ. ‘‘ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤਿ, ਸਮਾਪਤ੍ਤਿਂ ਉਪ੍ਪਾਦੇਤੀ’’ਤਿ ਚ. ‘‘ਦੁਲ੍ਲਭਾ ਸਦ੍ਧਾਸਮ੍ਪਤ੍ਤੀ’’ਤਿ ਚ ਵੁਤ੍ਤਾ. ਤਸ੍ਮਾ ਸਦ੍ਧੋ ਚ ਭਵੇਯ੍ਯਨ੍ਤਿ ਪਤ੍ਥਨਂ ਕਰੋਤਿ.

ਸਾ ਚ ਪਨ ਚਤੁਬ੍ਬਿਧਾ ਹੋਤਿ ਆਗਮਸਦ੍ਧਾ, ਅਧਿਗਮਸਦ੍ਧਾ, ਓਕਪ੍ਪਨਸਦ੍ਧਾ, ਪਸਾਦਸਦ੍ਧਾ ਚਾਤਿ. ਤਤ੍ਥ ਸਬ੍ਬਞ੍ਞੁਬੋਧਿਸਤ੍ਤਾਨਂ ਅਭਿਨੀਹਾਰਤੋ ਆਗਤਤ੍ਤਾ ਆਗਮਸਦ੍ਧਾ ਨਾਮ. ਅਰਿਯਸਾਵਕਾਨਂ ਸਚ੍ਚਪਟਿਵੇਧੇਨ ਅਧਿਗਤਤ੍ਤਾ ਅਧਿਗਮਸਦ੍ਧਾ ਨਾਮ. ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਵੁਤ੍ਤੇ ਅਚਲਭਾਵੇਨ ਓਕਪ੍ਪਨਂ ਓਕਪ੍ਪਨਸਦ੍ਧਾ ਨਾਮ. ਬੁਦ੍ਧਾਦੀਸੁ ਪਸਾਦੁਪ੍ਪਤ੍ਤਿਮਤ੍ਤਾ ਪਸਾਦਸਦ੍ਧਾ ਨਾਮ. ਇਧ ਪਨ ਪਣਿਧਾਨਟ੍ਠਾਨਤ੍ਤਾ ਸਬ੍ਬਸਦ੍ਧਾ ਅਧਿਪ੍ਪੇਤਾ. ਸਦ੍ਧਾ ਅਸ੍ਸ ਮੇ ਅਤ੍ਥੀਤਿ ਸਦ੍ਧੋ. ਅਸ੍ਸਥ੍ਯਤ੍ਥੇ ਣ.

ਦਾਤਙ੍ਗੁਪੇਤੋਤਿ ਦਾਤਸ੍ਸ ਅਙ੍ਗਾਯ ਕਾਰਣਭੂਤਾਯ ਧਨਸਮ੍ਪਤ੍ਤਿਯਾ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ. ਦਾਤਬ੍ਬਵਤ੍ਥੁ ਚ, ਤਪ੍ਪਟਿਗ੍ਗਾਹਕਪੁਗ੍ਗਲੋ ਚ, ਸਦ੍ਧਾ ਚਾਤਿ ਤੀਹਿ ਅਙ੍ਗੇਹਿ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ ਵਾ. ਦਿਯਤੇ ਦਾਤਂ. ਭਾਵਸਾਧਨੋਯਂ. ਦਾਧਾਤੁ ਦਾਨੇ ਅ. ਅਙ੍ਗੀਯਤਿ ਞਾਯਤਿ ਏਤੇਨਾਤਿ ਅਙ੍ਗੋ, ਧਨਸਮ੍ਪਤ੍ਤਿ. ਦਾਤਸ੍ਸ ਅਙ੍ਗੋ ਦਾਤਙ੍ਗੋ, ਤੇਨ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋਤਿ ਦਾਤਙ੍ਗੁਪੇਤੋ, ਅਥ ਵਾ ਦਿਯਤੀਤਿ ਦਾਤਂ, ਦਾਨਵਤ੍ਥੁ. ਦਾਤਸ੍ਸ ਅਙ੍ਗੋ ਦਾਤਙ੍ਗੋ, ਤੇਨ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋਤਿ ਦਾਤਙ੍ਗੁਪੇਤੋ, ਦਾਤਬ੍ਬਵਤ੍ਥੁ ਚ, ਤਪ੍ਪਟਿਗ੍ਗਾਹਕ ਪੁਗ੍ਗਲੋ ਚ, ਸਦ੍ਧਾ ਚਾਤਿ ਤੀਹਿ ਅਙ੍ਗੇਹਿ ਸਮ੍ਪਜ੍ਜਾਮੀਤਿ ਪਤ੍ਥਨਂ ਕਰੋਤੀਤਿ ਵੁਤ੍ਤਂ ਹੋਤਿ. ਵੁਤ੍ਤਞ੍ਹਿ ਇਤਿਵੁਤ੍ਤਟ੍ਠਕਥਾਯਂ ‘‘ਸਦ੍ਧਾ ਦੇਯ੍ਯਧਮ੍ਮੋ ਪਟਿਗ੍ਗਾਹਕੋ ਚਾਤਿ ਇਮੇਸਂ ਤਿਣ੍ਣਂ ਸਮੁਖੀਭੂਤਕਾਲੇਯੇਵ ਹਿ ਦਾਨਂ ਸਮ੍ਭਵਤੀ’’ਤਿ.

ਪਰਮਸਿਰਿਧਰੋਤਿ ਉਤ੍ਤਮਸਿਰੀਧਾਰਕੋ ਚ. ਉਤ੍ਤਮਸਿਰਿਂ ਧਾਰਣਸਮਤ੍ਥੋ ਚ ਵਾ. ਏਤ੍ਥ ਚ ਸਿਰੀਤਿ ਪਞ੍ਞਾਪੁਞ੍ਞਸਰੀਰਸੋਭਗ੍ਗਸਮ੍ਪਤ੍ਤੀਨਮੇਤਂ ਅਧਿਵਚਨਂ. ਕਤਪੁਞ੍ਞੇਹਿ ਸੇਵਿਯਤੀਤਿ ਸਿਰੀ, ਕਤਪੁਞ੍ਞੇ ਪੁਗ੍ਗਲੇ ਸੇਵਤਿ ਨਿਸ੍ਸਯਤੀਤਿ ਵਾ ਸਿਰੀ, ਪਞ੍ਞਾਪੁਞ੍ਞਸਰੀਰਸੋਭਗ੍ਗਸਮ੍ਪਤ੍ਤਿ ਲਬ੍ਭਤਿ. ਸਿਧਾਤੁ ਸੇਵਾਯਂ ਇਰੋ ਈ ਚ. ਪਰਮਾ ਉਤ੍ਤਮਾ ਸਿਰੀ ਪਰਮਸਿਰੀ, ਤਂ ਧਾਰੇਤੀਤਿ ਪਰਮਸਿਰੀਧਰੋ, ਪਰਮਸਿਰਿਯਾ ਧਾਰਣਸਮਤ੍ਥੋਤਿ ਅਤ੍ਥੋ.

ਦਿਟ੍ਠਧਮ੍ਮੇਤਿ ਪਚ੍ਚਕ੍ਖਭੂਤੇ ਅਤ੍ਤਭਾਵੇ. ਏਤ੍ਥ ਚ ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਅਤ੍ਤਭਾਵੋ. ਸੋ ਹਿ ਪਸ੍ਸਿਤਬ੍ਬੋਤਿ ਦਿਟ੍ਠੋ, ਅਤ੍ਤਭਾਵੋ. ਦਿਟ੍ਠੋ ਪਸ੍ਸਿਤਬ੍ਬੋ ਧਮ੍ਮੋ ਸਭਾਵੋ ਅਸ੍ਸਾਤਿ ਦਿਟ੍ਠਧਮ੍ਮੋਤਿ ਵੁਚ੍ਚਤਿ. ਤਸ੍ਮਿਂ ਦਿਟ੍ਠਧਮ੍ਮੇ. ਵਿਰਤ੍ਤੋਤਿ ਕਾਮਗੁਣੇਸੁ ਵਿਗਤਰਤ੍ਤੋ ਚ, ਰਜ੍ਜਨਂ ਰਤ੍ਤੋ. ਰਨ੍ਜਧਾਤੁ ਰਾਗੇ. ਵਿਗਤੋ ਰਤ੍ਤੋ ਅਸ੍ਸ ਮੇਤਿ ਵਿਰਤ੍ਤੋ. ਲਜ੍ਜੀਤਿ ਪਾਪਹਿਰਿਵਨ੍ਤੋ ਚ, ਪਾਪਜਿਗੁਚ੍ਛਨਲਕ੍ਖਣਾਯ ਲਜ੍ਜਾਯ ਸਮ੍ਪਨ੍ਨੋ ਚ ਵਾ. ਅਥ ਵਾ ਲਜ੍ਜੀਤਿ ਹਿਰੋਤ੍ਤਪ੍ਪਸਮ੍ਪਨ੍ਨੋ ਚ. ਲਜ੍ਜੀਸਦ੍ਦੇਨ ਹਿ ਲਕ੍ਖਣਾਹਾਰਨਯੇਨ ਓਤ੍ਤਪ੍ਪਮ੍ਪਿ ਗਹੇਤਬ੍ਬਂ. ਕਸ੍ਮਾ, ਕੁਸਲ ਲਕ੍ਖਣਸਭਾਵੇਨ ਸਮਾਨਤ੍ਤਾ. ਵੁਤ੍ਤਞ੍ਹੇਤਂ ਨੇਤ੍ਤਿਪਾਲ਼ਿਯਂ –

‘‘ਵੁਤ੍ਤਮ੍ਹਿ ਏਕਧਮ੍ਮੇ, ਯੇ ਧਮ੍ਮਾ ਏਕਲਕ੍ਖਣਾ ਕੇਚਿ;

ਵੁਤ੍ਤਾ ਭਵਨ੍ਤਿ ਸਬ੍ਬੋ, ਸੋਹਾਰੋ ਲਕ੍ਖਣੋ ਨਾਮਾ’’ਤਿ.

ਲਜ੍ਜਤੀਤਿ ਲਜ੍ਜਾ, ਹਿਰਿ. ਲਜ੍ਜਧਾਤੁ ਹਿਰਿਯਂ. ਲਜ੍ਜਾ ਅਸ੍ਸ ਮੇ ਅਤ੍ਥੀਤਿ ਲਜ੍ਜਾ, ਕਾਯਦੁਚ੍ਚਰਿਤਾਦਿਤੋ ਹਿਰੋਤ੍ਤਪ੍ਪਸਮਨ੍ਨਾਗਤੋ ਚਾਤਿ ਅਤ੍ਥੋ. ਕਲ੍ਯਾਣਮਿਤ੍ਤੋਤਿ ਸੁਨ੍ਦਰਮਿਤ੍ਤ ਸਮ੍ਪਨ੍ਨੋ ਚ. ਕਲ੍ਯਾਣਸਦ੍ਦੋ ਹਿ ਸੁਨ੍ਦਰਵਾਚਕੋ ਅਨਿਪ੍ਫਨ੍ਨ ਪਾਟਿਪਦਿਕੋ. ਅਥ ਵਾ ਕਲ੍ਯਂ ਹਿਤਂ ਅਣਯਤਿ ਪਾਪਯਤੀਤਿ ਕਲ੍ਯਾਣੋ, ਸੁਮਿਤ੍ਤੋ. ਕਲ੍ਯਸਦ੍ਦੂਪਪਦਅਣਧਾਤੁ ਗਤਿਯਂ ਣ. ਮਿਜ੍ਜਤਿ ਸਿਨੇਹਤੀਤਿ ਮਿਤ੍ਤੋ, ਮਿਜ੍ਜਿਯਤਿ ਸਿਨੇਹਿਯਤੀਤਿ ਵਾ ਮਿਤ੍ਤੋ, ਮਿਦਧਾਤੁ ਸਿਨੇਹੇ ਤ. ਕਲ੍ਯਾਣੋ ਮਿਤ੍ਤੋ ਅਸ੍ਸ ਮੇਤਿ ਕਲ੍ਯਾਣਮਿਤ੍ਤੋ. ਹਿਤਧਰਸੁਮਿਤ੍ਤਸਮ੍ਪਨ੍ਨੋ ਚ ਭਵੇਯ੍ਯਨ੍ਤਿ ਅਤ੍ਥੋ. ਇਧ ਪਨ ਸਦ੍ਧਾਸੀਲਸੁਤਚਾਗਵੀਰਿਯਸਤਿ ਸਮਾਧਿਪਞ੍ਞਾਗੁਣੇਹਿ ਸਮਨ੍ਨਾਗਤੋ ਕਲ੍ਯਾਣਮਿਤ੍ਤੋ ਅਧਿਪ੍ਪੇਤੋ. ਤਂ ਪਨ ਸਨ੍ਧਾਯ ਭਗਵਤਾ ਸਿਙ੍ਗਾਲਸੁਤ੍ਤੇ –

‘‘ਉਪਕਾਰੋ ਚ ਯੋ ਮਿਤ੍ਤੋ, ਸੁਖਦੁਕ੍ਖੇ ਚ ਯੋ ਸਖਾ;

ਅਤ੍ਥਕ੍ਖਾਯੀ ਚ ਯੋ ਮਿਤ੍ਤੋ, ਯੋ ਚ ਮਿਤ੍ਤਾਨੁਕਮ੍ਪਕੋ;

ਏਤੇਪਿ ਮਿਤ੍ਤੇ ਚਤ੍ਤਾਰੋ, ਇਤਿ ਵਿਞ੍ਞਾਯ ਪਣ੍ਡਿਤੋ; ਸਕ੍ਕਚ੍ਚਂ

ਪਯਿਰੁਪਾਸੇਯ੍ਯ, ਮਾਤਾ ਪੁਤ੍ਤਂਵ ਓਰਸ’’ਨ੍ਤਿ ਵੁਤ੍ਤੋ.

ਵਿਸੁਦ੍ਧਿਮਗ੍ਗੇ ਚ –

‘‘ਪਿਯੋ ਗਰੁ ਭਾਵਨੀਯੋ, ਵਤ੍ਤਾ ਚ ਵਚਨਕ੍ਖਮੋ. ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋ ਚਾਟ੍ਠਾਨੇ ਨਿਯੋਜਯੇ’’ਤਿ ਵੁਤ੍ਤੋ. ਇਤਿ ਏਵਰੂਪਸ੍ਸ ਚ ਕਲ੍ਯਾਣਮਿਤ੍ਤਸ੍ਸ ਦੁਲ੍ਲਭਤ੍ਤਾ ਕਲ੍ਯਾਣਮਿਤ੍ਤੇਨ ਸਮ੍ਪਜ੍ਜਾਮੀਤਿ ਪਤ੍ਥਨਂ ਕਰੋਤੀਤਿ ਵੁਤ੍ਤਂ ਹੋਤਿ.

ਅਭਿਰਤਕੁਸਲੋਤਿ ਦਾਨਾਦਿਪੁਞ੍ਞਕੁਸਲਧਮ੍ਮੇਸੁ ਅਭਿਰਮਣੋ ਚ. ਕੁਚ੍ਛਿਤਂ ਅਪਾਯਦ੍ਵਾਰਂ ਸਲਨ੍ਤਿ ਸਂਵਰਨ੍ਤਿ ਪਿਦਹਨ੍ਤਿ ਸਾਧਵੋ ਏਤੇਨਾਤਿ ਕੁਸਲਂ, ਦਾਨਾਦਿਪੁਞ੍ਞਧਮ੍ਮਾ. ਕੁਪੁਬ੍ਬ ਸਲਧਾਤੁ ਸਂਵਰਣੇ ਅ. ਤੇਸੁ ਅਭਿਅਤਿਰੇਕਂ ਰਮਤੀਤਿ ਅਭਿਰਤਕੁਸਲੋ, ਕਿਤਨ੍ਤਸਮਾਸੋਯਂ. ਕੁਸਲਾਭਿਰਤੋਤਿ ਵਤ੍ਤਬ੍ਬੇ ਛਨ੍ਦਾਨੁਰਕ੍ਖਣਤ੍ਥਂ ਪਦਵਿਪਰਿਯਾਯੇਨ ਏਵਂ ਵੁਤ੍ਤਨ੍ਤਿ. ਅਥ ਵਾ ਅਭਿਅਤਿਰੇਕਂ ਰਮਨਂ ਅਭਿਰਤੋ, ਕੁਸਲੇਸੁ ਅਭਿਰਤੋ ਯਸ੍ਸ ਮੇਤਿ ਅਭਿਰਤਕੁਸਲੋ, ਨਿਚ੍ਚਂ ਕੁਸਲਪੁਞ੍ਞਸ੍ਸ ਕਰਣੇ ਅਭਿਰਤਚਿਤ੍ਤਸਮ੍ਪਨ੍ਨੋ ਚਾਤਿ ਅਤ੍ਥੋ.

ਪਞ੍ਚਸੀਲਾਦਿਰਕ੍ਖੋਤਿ ਪਞ੍ਚਸੀਲਾਦੀਨਂ ਰਕ੍ਖਿਤੁਂ ਸਮਤ੍ਥੋ ਚ. ਏਤ੍ਥ ਚ ਆਦਿਸਦ੍ਦੇਨ ਗਿਹੀਨਂ ਅਟ੍ਠਙ੍ਗੁਪੋਸਥਸੀਲਂ, ਸਾਮਣੇਰਾਨਂ ਦਸਙ੍ਗਸੀਲਞ੍ਚ, ਭਿਕ੍ਖੂਨਂ ਚਤੁਪਾਰਿਸੁਦ੍ਧਿਸੀਲਞ੍ਚ ਸਙ੍ਗਣ੍ਹਾਤਿ. ਪਞ੍ਚਸੀਲਂ ਆਦਿ ਯੇਸਂ ਤੇਤਿ ਪਞ੍ਚਸੀਲਾਦਿ, ਤਂ ਰਕ੍ਖਤਿ ਰਕ੍ਖਿਤੁਂ ਸਮਤ੍ਥੇਤੀਤਿ ਪਞ੍ਚਸੀਲਾਦਿਰਕ੍ਖੋ. ਗਹਟ੍ਠਾਨਂ ਨਿਚ੍ਚਸੀਲਵਸੇਨ ਪਞ੍ਚਸੀਲਂ ਸਤਿ ਉਸ੍ਸਾਹਸਮਤ੍ਥੇ ਉਪੋਸਥਙ੍ਗਵਸੇਨ ਅਟ੍ਠਙ੍ਗਸੀਲਂ ਦਸਙ੍ਗਸੀਲਞ੍ਚ ਅਖਣ੍ਡਂ ਅਚ੍ਛਿਦ੍ਦਂ ਅਸਬਲਂ ਅਕਮ੍ਮਾਸਂ ਕਤ੍ਵਾ ਰਕ੍ਖਿਤੁਂ ਸਾਮਣੇਰਸੀਲਵਸੇਨ ਦਸਸੀਲਞ੍ਚ, ਭਿਕ੍ਖੁਸੀਲਵਸੇਨ ਚਤੁਪਾਰਿਸੁਦ੍ਧਿਸੀਲਞ੍ਚ ਰਕ੍ਖਿਤੁਂ ਸਮਤ੍ਥੋ ਚਾਤਿ ਅਤ੍ਥੋ. ਭਗਵਤਾ ਹਿ ‘‘ਸੀਲਵਿਪਤ੍ਤਿਹੇਤੁ ਵਾ ਭਿਕ੍ਖਵੇ ਸਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਨ੍ਤੀ’’ਤਿ ਚ. ‘‘ਸੀਲਸਮ੍ਪਦਾਹੇਤੁ ਵਾ ਭਿਕ੍ਖਵੇ ਸਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤੀ’’ਤਿ ਚ. ‘‘ਸੀਲਸਮ੍ਪਨ੍ਨੋ ਮਹਨ੍ਤਂ ਭੋਗਕ੍ਖਨ੍ਧਂ ਅਧਿਗਚ੍ਛਤਿ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਚਤੁਪਰਿਸਂ ਵਿਸਾਰਦੋ ਉਪਸਙ੍ਕਮਤਿ ਅਮਙ੍ਕੁਭੂਤੋ. ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੀ’’ਤਿ ਚ ਵੁਤ੍ਤਤ੍ਤਾ ਚ. ਅਟ੍ਠਕਥਾਯਞ੍ਚ ‘‘ਸੀਲਾਲਙ੍ਕਾਰਸਦਿਸੋ ਅਲਙ੍ਕਾਰੋ ਨਤ੍ਥਿ, ਸੀਲਸਦਿਸਂ ਪੁਪ੍ਫਂ ਨਤ੍ਥਿ, ਸੀਲਗਨ੍ਧਸਦਿਸੋ ਗਨ੍ਧੋ ਨਤ੍ਥੀ’’ਤਿ ਚ. ‘‘ਸੀਲ ਸਮ੍ਪਤ੍ਤਿਞ੍ਹਿ ਨਿਸ੍ਸਾਯ ਤਿਸ੍ਸੋ ਵਿਜ੍ਜਾ ਪਾਪੁਣਾਤੀ’’ਤਿ ਚ. ‘‘ਆਦਿਮ੍ਹਿ ਸੀਲਂ ਵਿਸੋਧੇਯ੍ਯਾ’’ਤਿ ਚ. ‘‘ਸਤ੍ਤਾ ਸੀਲੇਨ ਵਿਸੁਜ੍ਝਨ੍ਤੀ’’ਤਿ ਚ. ‘‘ਸੀਲਂ ਸਾਸਨਸ੍ਸ ਆਦੀ’’ਤਿ ਚ. ‘‘ਸਤ੍ਤਸੁ ਵਿਸੁਦ੍ਧੀਸੁ ਸੀਲਵਿਸੁਦ੍ਧਿ ਸਰੀਰਂ ਨਾਮਾ’’ਤਿ ਚ. ‘‘ਸੀਲਂ ਨਾਮੇਤਂ ਅਵਸ੍ਸਯੋ ਪਤਿਟ੍ਠਾ ਆਰਮ੍ਮਣਂ ਤਾਣਂ ਲੇਣਂ ਗਤਿ ਪਰਾਯਨ’’ਨ੍ਤਿ ਚ ਵੁਤ੍ਤਤ੍ਤਾ ਪਞ੍ਚਸੀਲਾਦਿਰਕ੍ਖੋਤਿ ਪਤ੍ਥਨਂ ਕਰੋਤੀਤਿ ਵੁਤ੍ਤਂ ਹੋਤਿ.

ਅਪ੍ਪਿਚ੍ਛੋਤਿ ਅਨਿਚ੍ਛੋ ਚ, ਰੂਪਾਦਿਕਾਮਗੁਣੇਸੁ ਅਨਿਚ੍ਛਨ੍ਤੋਤਿ ਅਤ੍ਥੋ. ਅਭਾਵਤ੍ਥੋਹੇਤ੍ਥ ਅਪ੍ਪਸਦ੍ਦੋ. ਅਪ੍ਪਡਂਸਮਕਸਵਾ ਤਾਤਪਾਤਿਆਦੀਸੁ ਵਿਯ ਇਚ੍ਛਨਂ ਇਚ੍ਛਾ, ਰੂਪਾਦਿਕਾਮਗੁਣਂ ਇਚ੍ਛਤੀਤਿ ਵਾ ਇਚ੍ਛਾ, ਕਾਮਤਣ੍ਹਾ. ਇਸੁਧਾਤੁ ਇਚ੍ਛਾਕਨ੍ਤੀਸੁ ਅ. ਧਾਤ੍ਵਨ੍ਤਸ੍ਸਚ੍ਛੋ. ਨਤ੍ਥਿ ਇਚ੍ਛਾ ਯਸ੍ਸ ਮੇਤਿ ਅਪ੍ਪਿਚ੍ਛੋ, ਰੂਪਾਦੀਸੁ ਕਾਮੇਸੁ ਅਨਿਚ੍ਛਨ੍ਤੋ ਚਾਤਿ ਅਤ੍ਥੋ. ਅਪ੍ਪਿਚ੍ਛੋ ਪਨ ਚਤੁਬ੍ਬਿਧੋ ਹੋਤਿ ਪਚ੍ਚਯਅਪ੍ਪਿਚ੍ਛੋ, ਪਰਿਯਤ੍ਤਿਅਪ੍ਪਿਚ੍ਛੋ, ਧੁਤਙ੍ਗਅਪ੍ਪਿਚ੍ਛੋ, ਪਟਿਵੇਧਅਪ੍ਪਿਚ੍ਛੋ ਚਾਤਿ. ਤਤ੍ਥ ਚਤੂਸੁ ਪਚ੍ਚਯੇਸੁ ਅਪ੍ਪਿਚ੍ਛੋ ਪਚ੍ਚਯਅਪ੍ਪਿਚ੍ਛੋ. ਯੋ ਪਨ ਪਚ੍ਚਯੇ ਬਹੁਂ ਦੇਨ੍ਤੇ ਅਪ੍ਪਂ ਗਣ੍ਹਤਿ, ਅਪ੍ਪਂ ਦੇਨ੍ਤੇ ਅਪ੍ਪਤਰਂ ਵਾ ਗਣ੍ਹਤਿ ਨ ਵਾ ਗਣ੍ਹਤਿ. ਨ ਅਨਵਸੇਸਗਾਹੀ ਹੋਤਿ. ਅਯਂ ਪਚ੍ਚਯਅਪ੍ਪਿਚ੍ਛੋ ਨਾਮ. ਯੋ ਪਨ ਤੇਪਿਟਕੋਪਿ ਸਮਾਨੋ ਨ ਬਹੁਸ੍ਸੁਤਭਾਵਂ ਜਾਨਾਪੇਤੁਕਾਮੋ ਹੋਤਿ, ਅਯਂ ਪਰਿਯਤ੍ਤਿਅਪ੍ਪਿਚ੍ਛੋ ਨਾਮ. ਧੁਤਙ੍ਗਸਮਾਦਾਨਸ੍ਸ ਪਨ ਧੁਤਙ੍ਗਪਰਿਹਰਣਭਾਵਂ ਅਞ੍ਞੇਸਂ ਜਾਨਿਤੁਂ ਨ ਦੇਤਿ, ਅਯਂ ਧੁਤਙ੍ਗਅਪ੍ਪਿਚ੍ਛੋ ਨਾਮ. ਯੋ ਪਨ ਸੋਤਾਪਨ੍ਨਾਦੀਸੁ ਅਞ੍ਞਤਰੋ ਹੁਤ੍ਵਾ ਸੋਤਾਪਨ੍ਨਾਦਿਭਾਵਂ ਜਾਨਾਪੇਤੁਂ ਨ ਇਚ੍ਛਤਿ, ਅਯਂ ਅਧਿਗਮਅਪ੍ਪਿਚ੍ਛੋ ਨਾਮ. ਇਮੇਹਿ ਅਪ੍ਪਿਚ੍ਛਗੁਣੇਹਿ ਸਮ੍ਪਨ੍ਨੋ ਚ ਅਹਂ ਭਵੇਯ੍ਯਨ੍ਤਿ ਵੁਤ੍ਤਂ ਹੋਤਿ.

ਅਪ੍ਪਕੋਧੋਤਿ ਦੁਸ੍ਸਨਲਕ੍ਖਣਦੋਸਤੋ ਵਿਰਹਿਤੋ ਚ. ਸੋ ਹਿ ਕੁਜ੍ਝਤੀਤਿ ਕੋਧੋਤਿ ਵੁਚ੍ਚਤਿ. ਦੋਸਸ੍ਸੇਤਂ ਅਧਿਵਚਨਂ. ਨਤ੍ਥਿ ਕੋਧੋ ਅਸ੍ਸ ਮੇਤਿ ਅਪ੍ਪਕੋਧੋ.

ਕੁਦ੍ਧੋ ਅਤ੍ਥਂ ਨ ਜਾਨਾਤਿ, ਕੁਦ੍ਧੋ ਧਮ੍ਮਂ ਨ ਪਸ੍ਸਤਿ;

ਅਨ੍ਧਤਮਂ ਤਦਾ ਹੋਤਿ, ਯਂ ਕੋਧੋ ਸਹਤੇ ਨਰਨ੍ਤਿ.

ਵੁਤ੍ਤਦੇਸਨਂ ਮਨਸਿਕਰਿਤ੍ਵਾ ਅਪ੍ਪਕੋਧੋਤਿ ਪਤ੍ਥਨਂ ਕਰੋਤੀਤਿ ਵੁਤ੍ਤਂ ਹੋਤਿ.

ਅਤਿਵੁਜੁਹਦਯੋਤਿ ਅਤਿਏਵ ਉਜੁਚਿਤ੍ਤਸਮਨ੍ਨਾਗਤੋ ਚ. ਅਰਤਿ ਗਚ੍ਛਤਿ ਪਵਤ੍ਤਤਿ ਅਕੁਟਿਲਭਾਵੇਨਾਤਿ ਉਜੁ, ਅਜ੍ਜਵਂ. ਅਰਧਾਤੁ ਗਤਿਯਂ ਜੁ. ਅਰਿਸ੍ਸ ਉ. ਆਰਮ੍ਮਣਂ ਹਰਤੀਤਿ ਹਦਯਂ, ਚਿਤ੍ਤਂ. ਹਰਧਾਤੁ ਹਰਣੇ ਅਯ. ਰਸ੍ਸ ਦੋ. ਅਥ ਵਾ ਆਰਮ੍ਮਣਂ ਹਰਨ੍ਤਂ ਅਯਤਿ ਗਚ੍ਛਤਿ ਪਵਤ੍ਤਤੀਤਿ ਹਦਯਂ, ਚਿਤ੍ਤਂ. ਹਰਸਦ੍ਦੂਪਪਦ ਅਯਧਾਤੁ ਗਤਿਯਂ ਅ. ਉਜੁ ਚ ਤਂ ਹਦਯਞ੍ਚਾਤਿ ਉਜੁਹਦਯਂ. ਅਤਿਏਵ ਉਜੁ ਹਦਯਂ ਅਸ੍ਸ ਮੇਤਿ ਅਤਿਵੁਜੁਹਦਯੋ. ਗੋਮੁਤ੍ਤਵਙ੍ਕੋ ਚ ਚਨ੍ਦਲੇਖਾਵਙ੍ਕੋ ਚ ਨਙ੍ਗਲਕੋਟਿ ਵਙ੍ਕੋ ਚਾਤਿ ਤੀਹਿ ਵਙ੍ਕੇਹਿ ਵਿਗਤੋ ਹੁਤ੍ਵਾ ਅਤਿਵਿਯ ਉਜੁਚਿਤ੍ਤਸਮਨ੍ਨਾਗਤੋ ਚ ਭਵੇਯ੍ਯਨ੍ਤਿ ਅਤ੍ਥੋ. ਤਤ੍ਥ ਚ ਯੋ ਪਾਪਂ ਕਤ੍ਵਾਵ ਨ ਕਰੋਮੀਤਿ ਭਾਸਤਿ. ਸੋ ਗਨ੍ਤ੍ਵਾ ਪਚ੍ਚੋਸਕ੍ਕਨਤਾਯ ਗੋਮੁਤ੍ਤਵਙ੍ਕੋ ਨਾਮ. ਯੋ ਪਾਪਂ ਕਰੋਨ੍ਤੋਵ ਭਾਯਾਮਹਂ ਪਾਪਸ੍ਸਾਤਿ ਭਾਸਤਿ. ਸੋ ਯੇਭੁਯ੍ਯੇਨ ਕੁਟਿਲਤਾਯ ਚਨ੍ਦਲੇਖਾ ਵਙ੍ਕੋ ਨਾਮ. ਯੋ ਪਾਪਂ ਕਰੋਨ੍ਤੋਵ ਕੋ ਪਾਪਸ੍ਸ ਨ ਭਾਯੇਯ੍ਯਾਤਿ ਭਾਸਤਿ, ਸੋ ਨਾਤਿਕੁਟਿਲਤਾਯ ਨਙ੍ਗਲਕੋਟਿਵਙ੍ਕੋ ਨਾਮ ਹੋਤਿ. ਯਸ੍ਸ ਵਾ ਤੀਣਿ ਕਮ੍ਮਦ੍ਵਾਰਾਨਿ ਅਸੁਦ੍ਧਾਨਿ. ਸੋ ਗੋਮੁਤ੍ਤਵਙ੍ਕੋ ਨਾਮ ਹੋਤਿ. ਯਸ੍ਸ ਯਾਨਿ ਕਾਨਿਚਿ ਦ੍ਵੇ. ਸੋ ਚਨ੍ਦਲੇਖਾ ਵਙ੍ਕੋ ਨਾਮ. ਯਸ੍ਸ ਯਂਕਿਞ੍ਚਿ ਏਕਂ. ਸੋ ਨਙ੍ਗਲਕੋਟਿਵਙ੍ਕੋ ਨਾਮਾਤਿ ਵੇਦਿਤਬ੍ਬੋ.

ਇਦ੍ਧਿਮਾਤਿ ਇਦ੍ਧਿਯਾ ਸਮਨ੍ਨਾਗਤੋ ਚ, ਇਦ੍ਧਿਸਦ੍ਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਇਦ੍ਧਿ ਅਸ੍ਸ ਮੇ ਅਤ੍ਥੀਤਿ ਇਦ੍ਧਿਮਾ. ਅਸ੍ਸਥ੍ਯਤ੍ਥੇ ਮਨ੍ਤੁਪਚ੍ਚਯੋ. ਮਾਨੁਸ੍ਸਿਕਾਲੇ ਮਨੁਸ੍ਸਿਦ੍ਧਿਯਾ ਦੇਵੁਪ੍ਪਤ੍ਤਿਕਾਲੇ ਦੇਵਿਦ੍ਧਿਯਾ ਸਮਣੁਪ੍ਪਤ੍ਤਿਕਾਲੇ ਸਮਣਿਦ੍ਧਿਯਾ ਚ ਸਮ੍ਪੁਣ੍ਣੇਯ੍ਯਨ੍ਤਿ ਅਤ੍ਥੋ.

ਅਪ੍ਪਮੇਯ੍ਯੋਤਿ ਅਪ੍ਪਮੇਤਬ੍ਬੇਹਿ ਸੀਲਾਦਿਗੁਣੇਹਿ ਸਮ੍ਪਨ੍ਨੋ ਚ. ਪਮੇਤਬ੍ਬੋਤਿ ਪਮੇਯ੍ਯੋ. ਪਪੁਬ੍ਬਮਾਧਾਤੁ ਪਮਾਣੇ ਣ੍ਯ. ਨ ਪਮੇਯ੍ਯੋ ਅਪ੍ਪਮੇਯ੍ਯੋ, ਅਪ੍ਪਮੇਯ੍ਯੋ ਸੀਲਾਦਿਗੁਣੋ ਮੇ ਅਸ੍ਸ ਅਤ੍ਥੀਤਿ ਅਪ੍ਪਮੇਯ੍ਯੋ. ਅਸ੍ਸਥ੍ਯਤ੍ਥੇ ਣ. ਅਪ੍ਪਮੇਯ੍ਯੇਹਿ ਸੀਲਾਦਿਗੁਣੇਹਿ ਚ ਭੋਗਸਮ੍ਪਤ੍ਤੀਹਿ ਚ ਸਮ੍ਪਜ੍ਜਾਮੀਤਿ ਪਤ੍ਥਨਂ ਕਰੋਤੀਤਿ ਵੁਤ੍ਤਂ ਹੋਤਿ.

ਪਾਸਂਸੋਤਿ ਸੀਲਾਦਿਗੁਣੇਹਿ ਬੁਦ੍ਧਾਦਿਸਪ੍ਪੁਰਿਸਾਨਂ ਪਸਂਸਾਰਹੋ ਚ, ਪਸਂਸਿਯਤੇ ਥਵਿਯਤੇ ਪਸਂਸੋ. ਭਾਵ ਸਾਧਨੋਯਂ. ਪਪੁਬ੍ਬਸਂਸਧਾਤੁ ਥੁਤਿਯਂ, ਤਂ ਅਰਹਤੀਤਿ ਪਾਸਂਸੋ. ਅਰਹਤਿਤਦ੍ਧਿਤੇ ਣ. ਬੁਦ੍ਧਾਦਿਸਪ੍ਪੁਰਿਸੇਹਿ ਪਸਂਸਿ ਤਬ੍ਬੇਹਿ ਦਾਨਸੀਲਾਦਿਗੁਣੇਹਿ ਸਮ੍ਪਨ੍ਨੋ ਚ ਭਵੇਯ੍ਯਨ੍ਤਿ ਵੁਤ੍ਤਂ ਹੋਤਿ.

ਪੇਮਵਾਚੋਤਿ ਅਤ੍ਥਬ੍ਯਞ੍ਜਨਮਧੁਰਤਾਯ ਬੁਦ੍ਧਾਦਿਸਪ੍ਪੁਰਿਸੇਹਿ ਪੇਮਿਤਬ੍ਬਵਾਚਾਯ ਸਮ੍ਪਨ੍ਨੋ ਚ. ਪਿਯਤੇਤਿ ਪੇਮਾ, ਵਾਚਾ. ਪੀਧਾਤੁ ਤਪ੍ਪਨਕਨ੍ਤੀਸੁ ਇਮੋ. ਵਚਿਤਬ੍ਬਾਤਿ ਵਾਚਾ. ਵਚਧਾਤੁ ਵਿਯਤ੍ਤਿਯਂ ਵਾਚਾਯਂ ਣ. ਪੇਮਾ ਵਾਚਾ ਅਸ੍ਸ ਮੇਤਿ ਪੇਮ ਵਾਚੋ. ਬੁਦ੍ਧਾਦਿਸਪ੍ਪੁਰਿਸੇਹਿ ਪੇਮਿਯਾ ਚਤੁਰਙ੍ਗਸਮਨ੍ਨਾਗਤ ਵਾਚਾਯ ਸਮ੍ਪਨ੍ਨੋ ਚਾਤਿ ਅਤ੍ਥੋ. ਸਪ੍ਪੁਰਿਸਾਨਂ ਪਨ ਵਾਚਾ ਚਤੁਰਙ੍ਗਸਮਨ੍ਨਾਗਤਾ ਹੋਤਿ. ਸੁਭਾਸਿਤਵਾਚਾ ਚ ਧਮ੍ਮਵਾਚਾ ਪਿਯਵਾਚਾ ਸਚ੍ਚਵਾਚਾਤਿ. ਤਥਾਹੇਤਂ ਵੁਤ੍ਤਂ ਸਗਾਥਾਵਗ੍ਗ ਸਂਯੁਤ੍ਤੇ –

ਸੁਭਾਸਿਤਂ ਉਤ੍ਤਮਮਾਹੁ ਸਨ੍ਤੋ,

ਧਮ੍ਮਂ ਭਣੇ ਨਾਧਮ੍ਮਂ ਤਂ ਦੁਤਿਯਂ;

ਪਿਯਂ ਭਣੇ ਨਾਪ੍ਪਿਯਂ ਤਂ ਤਤਿਯਂ,

ਸਚ੍ਚਂ ਭਣੇ ਨਾਲਿਕਂ ਤਂ ਚਤੁਤ੍ਥਨ੍ਤਿ.

ਅਯਂ ਪਨੇਤ੍ਥ ਯੋਜਨਾ. ਸਨ੍ਤੋ ਸਪ੍ਪੁਰਿਸਾ ਉਤ੍ਤਮਂ ਸੁਭਾਸਿਤਂ ਸੁਟ੍ਠੁ ਭਾਸਿਤਂ ਵਾਚਂ ਆਹੁ, ਧਮ੍ਮਂ ਭਣੇ ਭਣੇਯ੍ਯ ਅਧਮ੍ਮਂ ਨ ਭਣੇ ਨ ਭਣੇਯ੍ਯ, ਦੁਤਿਯਂ ਤਂ ਵਾਚਂ ਆਹੁ, ਪਿਯਂ ਭਣੇ ਭਣੇਯ੍ਯ, ਅਪ੍ਪਿਯਂ ਨ ਭਣੇ ਨ ਭਣੇਯ੍ਯ, ਤਤਿਯਂ ਤਂ ਵਾਚਂ ਆਹੁ, ਸਚ੍ਚਂ ਭਣੇ ਭਣੇਯ੍ਯ ਅਲਿਕਂ ਨ ਭਣੇ ਨ ਭਣੇਯ੍ਯ, ਚਤੁਤ੍ਥਂ ਤਂ ਵਾਚਂ ਆਹੂਤਿ.

ਸੁਜਨਗੁਣਵਿਦੂਤਿ ਬੁਦ੍ਧਾਦਿਸਪ੍ਪੁਰਿਸਾਨਂ ਸੀਲਾਦਿਗੁਣਂ ਵਿਜਾਨਕੋ ਚ. ਸੁਨ੍ਦਰੋ ਜਨੋ ਸੁਜਨੋ. ਗੁਣਤਿ ਪਕਾਸੇਤਿ ਸੀਲਾਦਿਗੁਣਸਮਙ੍ਗਿਤਂ ਪੁਗ੍ਗਲਨ੍ਤਿ ਗੁਣਂ, ਸੀਲਾਦਿਗੁਣਂ. ਗੁਣਧਾਤੁ ਪਕਾਸਨੇ ਅ. ਸੁਜਨਾਨਂ ਬੁਦ੍ਧਾਦਿਸਪ੍ਪੁਰਿਸਾਨਂ ਗੁਣੋ ਸੁਜਨਗੁਣੋ, ਤਂ ਵਿਦਤਿ ਜਾਨਾਤੀਤਿ ਸੁਜਨਗੁਣਵਿਦੂ. ਸੁਜਨ ਗੁਣਸਦ੍ਦੂਪਪਦਵਿਦਧਾਤੁ ਞਾਣੇ ਊ. ਬੁਦ੍ਧਾਦਿਸਪ੍ਪੁਰਿਸਾਨਂ ਸੀਲਸਮਾਧਿਪਞ੍ਞਾਦਿਗੁਣਂ ਜਾਨਿਤੁਂ ਸਮਤ੍ਥੋ ਚ ਭਵੇਯ੍ਯਨ੍ਤਿ ਅਤ੍ਥੋ.

ਮਾਮਕੋਤਿ ਬੁਦ੍ਧਾਦਿਸਜ੍ਜਨਾਨਂ ਮਾਮਕੋ ਚ. ਮਮਾਯਤੀਤਿ ਮਾਮਕੋ. ਮਮਧਾਤੁ ਮਾਨਨੇ ਪੇਮੇ ਵਾ ਣ੍ਵੁ. ਤਸ੍ਸ ਅਕੋ. ਬੁਦ੍ਧਾਦਿਰਤਨਤ੍ਤਯਞ੍ਚ ਸਦ੍ਧਮ੍ਮਞ੍ਚ ਮਾਨਨ੍ਤੋ ਚ ਭਵੇਯ੍ਯਨ੍ਤਿ ਅਤ੍ਥੋ. ਸੋਤਿ ਸੋ ਅਹਂ. ਭਵੇਯ੍ਯਨ੍ਤਿ ਭਵਾਮੀਤਿ.

ਅਯਂ ਪਨੇਤ੍ਥ ਸਙ੍ਖੇਪਯੋਜਨਾ. ਸੋ ਅਹਂ ਦਿਟ੍ਠਧਮ੍ਮੇ ਪਚ੍ਚਕ੍ਖਭੂਤੇ ਅਤ੍ਤਭਾਵੇ, ਸਦ੍ਧੋ ਸਦ੍ਧਾਯ ਸਮਨ੍ਨਾਗਤੋ ਚ, ਦਾਤਙ੍ਗੁਪੇਤੋ ਦਾਤਸ੍ਸ ਅਙ੍ਗਾਯ ਕਾਰਣਭੂਤਾਯ ਧਨ ਸਮ੍ਪਤ੍ਤਿਯਾ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ, ਦਾਤਬ੍ਬ ਵਤ੍ਥੁ ਚ, ਤਪ੍ਪਟਿਗ੍ਗਾਹਕਪੁਗ੍ਗਲੋ ਚ, ਸਦ੍ਧਾ ਚਾਤਿ ਤੀਹਿ ਅਙ੍ਗੇਹਿ ਉਪੇਤੋ ਸਮੁਪੇਤੋ ਸਮਨ੍ਨਾਗਤੋ ਚ ਵਾ, ਪਰਮਸਿਰਿਧਰੋ ਉਤ੍ਤਮਸਿਰੀਧਾਰਕੋ ਚ, ਉਤ੍ਤਮਸਿਰਿਂ ਧਾਰਣਸਮਤ੍ਥੋ ਚ ਵਾ, ਵਿਰਤ੍ਤੋ ਕਾਮਗੁਣੇਸੁ ਵਿਗਤਰਤ੍ਤੋ ਚ, ਲਜ੍ਜੀ ਪਾਪਹਿਰਿਵਨ੍ਤੋ ਚ, ਪਾਪਜਿਗੁਚ੍ਛਨਲਕ੍ਖਣਾਯ ਲਜ੍ਜਾਯ ਸਮ੍ਪਨ੍ਨੋ ਚ ਵਾ, ਹਿਰੋਤ੍ਤਪ੍ਪਸਮਨ੍ਨਾਗਤੋ ਚ ਵਾ, ਕਲ੍ਯਾਣਮਿਤ੍ਤੋ ਸੁਨ੍ਦਰਮਿਤ੍ਤ ਸਮ੍ਪਨ੍ਨੋ ਚ, ਅਭਿਰਤਕੁਸਲੋ ਦਾਨਾਦਿਪੁਞ੍ਞਕੁਸਲਧਮ੍ਮੇਸੁ ਅਭਿਰਮਣੋ ਚ, ਪਞ੍ਚਸੀਲਾਦਿਰਕ੍ਖੋ ਪਞ੍ਚਸੀਲਾਦੀਨਿ ਰਕ੍ਖਿਤੁਂ ਸਮਤ੍ਥੋ ਚ, ਅਪ੍ਪਿਚ੍ਛੋ ਅਨਿਚ੍ਛੋ ਚ, ਰੂਪਾਦਿਕਾਮਗੁਣੇਸੁ ਅਨਿਚ੍ਛਨ੍ਤੋ ਚ ਵਾ, ਅਪ੍ਪਕੋਧੋ ਦੁਸ੍ਸਨਲਕ੍ਖਣਦੋਸਤੋ ਵਿਰਹਿਤੋ ਚ, ਅਤਿਵੁਜੁਹਦਯੋ ਅਤਿਏਵ ਉਜੁਚਿਤ੍ਤਸਮਨ੍ਨਾਗਤੋ ਚ, ਇਦ੍ਧਿਯਾ ਸਮਨ੍ਨਾਗਤੋ ਚ, ਅਪ੍ਪਮੇਯ੍ਯੋ ਅਪ੍ਪਮੇਯ੍ਯੇਹਿ ਸੀਲਾਦਿਗੁਣੇਹਿ ਸਮ੍ਪਨ੍ਨੋ ਚ, ਪਾਸਂਸੋ ਸੀਲਾਦਿਗੁਣੇਹਿ ਬੁਦ੍ਧਾਦਿਸਪ੍ਪੁਰਿਸਾਨਂ ਪਸਂਸਾਰਹੋ ਚ, ਪੇਮਵਾਚੋ ਅਤ੍ਥਬ੍ਯਞ੍ਜਨਮਧੁਰਤਾਯ ਬੁਦ੍ਧਾਦਿਸਪ੍ਪੁਰਿਸੇਹਿ ਪੇਮਿਤਬ੍ਬਵਾਚਾਯ ਸਮ੍ਪਨ੍ਨੋ ਚ, ਸੁਜਨਗੁਣਵਿਦੂ ਬੁਦ੍ਧਾਦਿਸਪ੍ਪੁਰਿਸਾਨਂ ਸੀਲਾਦਿਗੁਣਂ ਵਿਜਾਨਕੋ ਚ, ਮਾਮਕੋ ਬੁਦ੍ਧਾਦਿਸਜ੍ਜਨਾਨਂ ਮਾਮਕੋ ਚ, ਬੁਦ੍ਧਾਦਿਰਤਨਤ੍ਤਯਞ੍ਚ ਸਦ੍ਧਮ੍ਮਞ੍ਚ ਮਾਨਨ੍ਤੋ ਚ ਵਾ, ਭਵੇਯ੍ਯਂ ਭਵਾਮੀਤਿ.

ਅਟ੍ਠਵੀਸਤਿਮਗਾਥਾਵਣ੍ਣਨਾ ਸਮਤ੍ਤਾ.

੨੯.

ਇਤ੍ਥਂ ਅਸਙ੍ਖਯੇ ਨਾਥ, ਗੁਣੇ ਲਕ੍ਖਣਦੀਪਿਤੇ;

ਗਾਥਾਸੁ ਸੂਚਕਾਸ੍ਵੇਕ, ਗਾਥਮ੍ਪਿ ਸਰਤੇ ਬੁਧੋ.

੩੦.

ਚਤੁਰਾਪਾਯਮੁਤ੍ਤੋ ਸੋ, ਸਾਧਕਤ੍ਥਦ੍ਵਯਸ੍ਸ ਚ;

ਹਤੂਪਦ੍ਦਵਜਾਲੋ ਚ, ਲਾਭੀ ਹਿਤਸੁਖਸ੍ਸ ਚ.

੩੧.

ਅਧਿਪੋ ਨਰਦੇਵਾਨਂ, ਚਤੁਦੀਪਿਸ੍ਸਰੋਪਿ ਵਾ;

ਭਵੇਯ੍ਯ ਅਨ੍ਤਿਮੇ ਦੇਹੇ, ਤਮਞ੍ਞਂ ਸੇਤਛਤ੍ਤਕਂ.

੩੨.

ਭਾਵਨਾਯਾਨਮਾਰੁਯ੍ਹ, ਸਮਮੇਸ੍ਸਤਿ ਸੁਬ੍ਬਤੋ;

ਇਮਸ੍ਮਿਂ ਅਤ੍ਤਭਾਵੇਪਿ, ਅਰੋਗੋ ਦੀਘਜੀਵਿਕੋ.

੩੩.

ਪੂਜਿਤੋ ਸਬ੍ਬਲੋਕੇਹਿ, ਭਾਵਨਾਭਿਰਤੀਮਨੋ;

ਜਨਪ੍ਪਿਯੋ ਮਨਾਪੋ ਚ, ਕਾ ਕਥਾਖਿਲਧਾਰਣੇ.

੨੯. ਏਵਂ ਪੁਞ੍ਞੇਨੇਤੇਨਤ੍ਯਾਦਿ ਗਾਥਾਦ੍ਵਯੇਨ ਪਣਿਧਿਂ ਕਤ੍ਵਾ ਇਦਾਨਿ ਬੁਦ੍ਧਵਨ੍ਦਨਸ੍ਸ ਫਲਾਨਿਸਂਸਂ ਦਸ੍ਸੇਨ੍ਤੋ ਇਤ੍ਥਨ੍ਤ੍ਯਾਦਿ ਗਾਥਾਪਞ੍ਚਕਂ ਆਹ. ਤਂ ਪਨ ਮੂਲਾਚਰਿਯੇਹਿ ਨ ਵੁਤ੍ਤਂ, ਪਚ੍ਛਾ ਪਨ ਹਿਤਕਾਮੇਹਿ ਪਣ੍ਡਿਤੇਹਿ ਪਕ੍ਖਿਤ੍ਤਂ ਗਾਥਾਪਞ੍ਚਕਨ੍ਤਿ ਦਟ੍ਠਬ੍ਬਂ. ਤਾ ਪਨ ਗਾਥਾਯੋ ਪਥ੍ਯਾਵਤ੍ਤਗਾਥਾਤਿ ਦਟ੍ਠਬ੍ਬਾ.

ਤਾਸੁ ਪਨ ਪਠਮਗਾਥਾਯਂ ਇਤ੍ਥਂ ਅਸਙ੍ਖਯੇ ਲਕ੍ਖਣਦੀਪਿਤੇ ਨਾਥਗੁਣੇ ਸੂਚਕਾਸੁ ਗਾਥਾਸੁ ਏਕਗਾਥਮ੍ਪਿ ਯੋ ਬੁਧੋ ਸਰਤੇਤਿ ਸਮ੍ਬਨ੍ਧੋ. ਇਤ੍ਥਨ੍ਤਿ ਇਮਿਨਾ ਸੁਗਤਨ੍ਤਿਆਦਿਨਾ ਵੁਤ੍ਤਪ੍ਪਕਾਰੇਨ. ਅਸਙ੍ਖਯੇਤਿ ਏਤ੍ਤਕਾ ਬੁਦ੍ਧਗੁਣਾਤਿ ਗਣੇਤੁਂ ਅਸਮਤ੍ਥੇ. ਸਙ੍ਖਿਯਤੇ ਸਙ੍ਖਯਾ. ਸਙ੍ਖਿਯਤਿ ਗਣਿਯਤੀਤਿ ਵਾ ਸਙ੍ਖਯਾ. ਸਖਿਧਾਤੁ ਸਙ੍ਖ੍ਯਾਯਂ ਯਪਚ੍ਚਯੋ. ਅਥ ਵਾ ਸਙ੍ਖਿਤੁਂ ਨ ਸਕ੍ਕੋਨ੍ਤੀਤਿ ਅਸਙ੍ਖਯਾ. ਏਤ੍ਤਕਾ ਬੁਦ੍ਧਗੁਣਾ ਏਤ੍ਤਕਾ ਬੁਦ੍ਧਗੁਣਾਤਿ ਨਿਰਵਸੇਸਤੋ ਏਕਬੁਦ੍ਧੋਪਿ ਅਨੇਕਵਸ੍ਸ ਸਤਸਹਸ੍ਸਕੋਟਿਯਾਪਿ ਗਣੇਤੁਂ ਅਸਮਤ੍ਥੋਵ. ਪਗੇਵ ਪਨ ਅਞ੍ਞੇਤਿ ਅਤ੍ਥੋ. ਵੁਤ੍ਤਮ੍ਪਿ ਚੇਤਂ ਅਪਦਾਨੇ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ ਚ.

‘‘ਸਕ੍ਕਾ ਸਮੁਦ੍ਦੇ ਉਦਕਂ, ਪਮੇਤੁਂ ਆਲ਼੍ਹਕੇਨ ਵਾ;

ਨਤ੍ਵੇਵ ਤਵ ਸਬ੍ਬਞ੍ਞੁ, ਞਾਣਂ ਸਕ੍ਕਾ ਪਮੇਤਵੇ’’ਤਿ ਚ.

ਮਹਾਵਗ੍ਗਸਂਯੁਤ੍ਤਟ੍ਠਕਥਾਯਞ੍ਚ ‘‘ਅਪ੍ਪਮਾਣਾ ਹਿ ਬੁਦ੍ਧਾ ਤੇਸਂ ਬੁਦ੍ਧਾਪਿ ਅਨਵਸੇਸਤੋ ਵਣ੍ਣਂ ਵਤ੍ਤੁਂ ਅਸਮਤ੍ਥਾ, ਪਗੇਵ ਇਤਰਾ ਪਜਾ’’ਤਿ ਚ. ਲਕ੍ਖਣਦੀਪਿਤੇਤਿ ਉਪਲਕ੍ਖਣ ਨਯੇਨ ਪਕਾਸਿਤਬ੍ਬੇ. ਏਤ੍ਥ ਚ ਪਧਾਨਨਯੋ ਨਿਦਸ੍ਸਨ ਨਯੋ ਚ ਲਬ੍ਭਤਿ. ਨਾਥਗੁਣੇਤਿ ਬੁਦ੍ਧਸ੍ਸ ਸੀਲਸਮਾਧਿ ਪਞ੍ਞਾਦਿਗੁਣੇ. ਤਸ੍ਸ ਪਨ ਪਦਸ੍ਸ ਵਚਨਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਸੂਚਕਾਸ੍ਵੇਕਗਾਥਮ੍ਪੀਤਿ ਸੂਚਕਾਸੁ ਏਕਗਾਥਮ੍ਪੀਤਿ ਪਦਚ੍ਛੇਦੋ. ਸੂਚਕਾਸੂਤਿ ਪਕਾਸਕਾਸੁ. ਗਾਥਾਸੂਤਿ ਸੁਗਤਨ੍ਤ੍ਯਾਦਿਨਾ ਵੁਤ੍ਤਾਸੁ ਛਬ੍ਬੀਸਤਿਵਨ੍ਦਨਗਾਥਾਸੁ. ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਕਵੀਹਿ ਗਾਯਤਿ ਕਥਿਯਤੀਤਿ ਗਾਥਾ. ਪਜ੍ਜਵਿਸੇਸੋ. ਗੇਧਾਤੁ ਸਦ੍ਦੇ ਥ. ਗੇਧਾਤੁਸ੍ਸ ਗਾਦੇਸੋ. ਅਥ ਵਾ ਗਂ ਵੁਚ੍ਚਤਿ ਞਾਣਂ. ਤਂ ਤਿਟ੍ਠਤਿ ਏਤ੍ਥਾਤਿ ਗਾਥਾ. ਗਂਸਦ੍ਦੂਪਪਦਥਾਧਾਤੁ ਗਤਿਨਿਵਤ੍ਤਿਯਂ. ਗਂ ਵੁਚ੍ਚਤਿ ਞਾਣਂ, ਤੇਨ ਕਵੀਹਿ ਬਨ੍ਧਿਤ੍ਵਾ ਥਿਯਤਿ ਥਪਿਯਤੀਤਿ ਵਾ ਗਾਥਾ, ਤਾਸੁ ਗਾਥਾਸੁ. ਏਕਗਾਥਮ੍ਪੀਤਿ ਏਕਪਜ੍ਜਮ੍ਪਿ. ਏਤ੍ਥ ਚ ਪਿਸਦ੍ਦੋ ਗਰਹਤ੍ਥੋ. ਤੇਨ ਅਨੇਕਗਾਥਾਯ ਬੁਦ੍ਧਗੁਣਸਰਣੇ ਕਾ ਕਥਾਵਾਤਿ ਸਮ੍ਭਾਵੇਤਿ. ਬੁਧੋਤਿ ਯੋ ਪਣ੍ਡਿਤੋ. ਸੋ ਹਿ ਅਤ੍ਥਾਨਤ੍ਥਂ ਬੁਧਤਿ ਜਾਨਾਤੀਤਿਬੁਧੋਤਿ ਵੁਚ੍ਚਤਿ. ਸਰਤੇਤਿ ਸਰਤਿ. ਛਨ੍ਦਾਨੁਰਕ੍ਖਣਤ੍ਥਞ੍ਹਿ ਪਰਸ੍ਸਪਦਤਿਵਿਭਤ੍ਤਿਯਾ ਅਤ੍ਤਨੋਪਦਤੇਵਿਭਤ੍ਤਾਦੇਸੋ.

੩੦. ਸੋਤਿ ਸੋ ਬੁਧੋ ਭਵੇਯ੍ਯਾਤਿ ਸਮ੍ਬਨ੍ਧੋ. ਚਤੁਰਾਪਾਯਮੁਤ੍ਤੋਤਿ ਨਿਰਯਤਿਰਚ੍ਛਾਨਪੇਤਅਸੁਰਕਾਯਸਙ੍ਖਾਤੇਹਿ ਚਤੂਹਿ ਅਪਾਯੇਹਿ ਵਿਮੁਤ੍ਤੋ ਚ. ਪੁਞ੍ਞਸਮ੍ਮਤਾ ਅਯਾਯੇਭੁਯ੍ਯੇਨ ਅਪਗਤੋਤਿ ਅਪਾਯੋ. ਅਯਤੋ ਸੁਖਤੋ ਅਪਗਤੋਤਿ ਵਾ ਅਪਾਯੋ. ਅਬ੍ਯਯੀਭਾਵਸਮਾਸੋਯਂ. ਅਥ ਵਾ ਤਿਸ੍ਸੋ ਸਮ੍ਪਤ੍ਤਿਯੋ ਅਯਨ੍ਤਿ ਗਚ੍ਛਨ੍ਤਿ ਪਵਤ੍ਤਨ੍ਤਿ ਏਤੇਨਾਤਿ ਅਯੋ, ਪੁਞ੍ਞਂ. ਅਯਧਾਤੁ ਗਤਿਯਂ ਅ. ਪੁਞ੍ਞਤੋ ਅਯਤਿ ਗਚ੍ਛਤਿ ਪਵਤ੍ਤਤੀਤਿ ਵਾ, ਪੁਞ੍ਞਕਾਰੀਹਿ ਅਯਿਤਬ੍ਬੋ ਪਵਤ੍ਤੇਤਬ੍ਬੋਤਿ ਵਾ ਅਯੋ, ਸੁਖਂ. ਤਤੋ ਅਪਗਤੋਤਿ ਅਪਾਯੋ. ਚਤੁਰੋ ਅਪਾਯੋ ਚਤੁਰਾਪਾਯੋ, ਤੇਹਿ ਮੁਤ੍ਤੋ ਵਿਮੁਤ੍ਤੋਤਿ ਚਤੁਰਾਪਾਯਮੁਤ੍ਤੋ. ਸਾਧਕਤ੍ਥਦ੍ਵਯਸ੍ਸ ਚਾਤਿ ਸਾਧਕੋ ਅਤ੍ਥਦ੍ਵਯਸ੍ਸ ਚਾਤਿ ਪਦਚ੍ਛੇਦੋ. ਅਤ੍ਥਦ੍ਵਯਸ੍ਸਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਸਙ੍ਖਾਤਸ੍ਸ ਅਤ੍ਥਦ੍ਵਯਸ੍ਸ. ਏਤ੍ਥ ਚਸਦ੍ਦੋ ਅਟ੍ਠਾਨਯੋਗੋ. ਸੋ ਪਨ ਸਾਧਕੋ ਤ੍ਯਾਦੀਸੁ ਪਦੇਸੁ ਯੁਤ੍ਤੋ. ਸਾਧਕੋਤਿ ਨਿਪ੍ਫਾਦਕੋ ਚ. ਸੋ ਹਿ ਸਾਧੇਤਿ ਨਿਪ੍ਫਾਦੇਤੀਤਿ ਸਾਧਕੋਤਿ ਵੁਚ੍ਚਤਿ.

ਹਤੂਪਦ੍ਦਵਜਾਲੋ ਚਾਤਿ ਹਤੋ ਉਪਦ੍ਦਵਸਙ੍ਖਾਤਜਾਲੋ ਚ. ਹਨਯਿਤ੍ਥ ਅਪਨਯਿਤ੍ਥਾਤਿ ਹਤੋ. ਹਨਧਾਤੁ ਹਿਂਸਾਯਂ ਤ. ਉਪਗਨ੍ਤ੍ਵਾ ਦਵਤਿ ਹਿਂਸਤੀਤਿ ਉਪਦ੍ਦਵੋ, ਜਾਤਿਭਯਾਦਿ ਸੋਲ਼ਸਉਪਦ੍ਦਵੋ. ਉਪਪੁਬ੍ਬਦੁਧਾਤੁ ਹਿਂਸਾਯਂ, ਉਪਦ੍ਦਵਾ ਨਾਮ ਪਨ ਸੋਲ਼ਸਵਿਧਾ ਹੋਨ੍ਤਿ ਜਾਤਿਭਯਂ, ਜਰਾਭਯਂ, ਬ੍ਯਾਧਿਭਯਂ, ਮਰਣਭਯਂ, ਰਾਜਭਯਂ, ਚੋਰਭਯਂ, ਅਗ੍ਗਿਭਯਂ, ਉਦਕਭਯਂ, ਊਮਿਭਯਂ, ਕੁਮ੍ਭਿਲਭਯਂ, ਆਵਟ੍ਟਭਯਂ, ਸੁਸੁਕਾਭਯਂ, ਅਤ੍ਤਾਨੁਵਾਦਭਯਂ, ਪਰਾਨੁਵਾਦਭਯਂ, ਦਣ੍ਡਭਯਂ, ਦੁਗ੍ਗਤਿਭਯਞ੍ਚਾਤਿ. ਜਲਤਿ ਹਿਂਸਤਿ ਮਚ੍ਛੇ ਏਤੇਨਾਤਿ ਜਾਲਂ, ਮਚ੍ਛਜਾਲਂ. ਜਾਲਂ ਵਿਯਾਤਿ ਜਾਲੋ, ਉਪਦ੍ਦਵੋ. ਨਿਤਤ੍ਥੇਨ ਪਨ ਜਲਤਿ ਹਿਂਸਤਿ ਸਤ੍ਤੇ ਏਤੇਨਾਤਿ ਜਾਲੋ. ਉਪਦ੍ਦਵੋ. ਜਲਧਾਤੁ ਹਿਂਸਾਯਂ ਣ. ਹਤੋ ਉਪਦ੍ਦਵਸਙ੍ਖਾਤਜਾਲੋ ਯੇਨ ਸੋਤਿ ਹਤੂਪਦ੍ਦਵਜਾਲੋ. ਬੁਦ੍ਧਪਣਾਮਚੇਤਨਾਯ ਪਹਿਤੋ ਉਪਦ੍ਦਵਸਙ੍ਖਾਤਜਾਲੋ ਭਵੇਯ੍ਯਾਤਿ ਅਤ੍ਥੋ. ਲਾਭੀ ਹਿਤਸੁਖਸ੍ਸ ਚਾਤਿ ਹਿਤਸ੍ਸ ਚ ਸੁਖਸ੍ਸ ਚ ਲਾਭੀ ਚ. ਲਭਨਂ ਲਾਭੋ, ਤਂ ਅਸ੍ਸ ਅਤ੍ਥੀਤਿ ਲਾਭੀ, ਹਿਨੋਤਿ ਵਡ੍ਢਤੀਤਿ ਹਿਤਂ, ਅਤ੍ਥਂ. ਸੁਖਯਤੀਤਿ ਸੁਖਂ. ਯਸ੍ਸੁਪ੍ਪਜ੍ਜਤਿ, ਤਂ ਸੁਖਿਤਂ ਕਰੋਤੀਤਿ ਅਤ੍ਥੋ. ਅਥ ਵਾ ਸੁਟ੍ਠੁ ਦੁਕ੍ਖਂ ਖਨਤੀਤਿ ਸੁਖਂ. ਸੁਪੁਬ੍ਬ ਖਨੁਧਾਤੁ ਅਵਧਾਰਣੇ ਕ੍ਵਿ. ਹਿਤਞ੍ਚ ਸੁਖਞ੍ਚ ਹਿਤਸੁਖਂ, ਤਸ੍ਸ ਲਾਭੀ ਭਵੇਯ੍ਯਾਤਿ ਅਤ੍ਥੋ.

੩੧-੩੨. ਨਰਦੇਵਾਨਂ ਅਧਿਪੋ ਚ ਚਤੁਦੀਪਿਸ੍ਸਰੋਪਿ ਵਾ ਭਵੇਯ੍ਯਾਤਿ ਸਮ੍ਬਨ੍ਧੋ. ਨਰਦੇਵਾਨਨ੍ਤਿ ਨਰਾ ਚ ਦੇਵਾ ਚ ਨਰਦੇਵਾ, ਤੇਸਂ. ਕਮ੍ਮਤ੍ਥੇ ਚੇਤਂ ਛਟ੍ਠੀਵਚਨਂ. ਅਧਿਪੋਤਿ ਇਸ੍ਸਰੋ ਚ. ਸੋ ਹਿ ਅਤ੍ਤਾਧੀਨਂ ਪਾਤਿ ਰਕ੍ਖਤਿ ਧਮ੍ਮੇਨ ਵਾ ਅਧਿਅਭਿਭਵਿਤ੍ਵਾ ਪਾਤਿ ਰਕ੍ਖਤੀਤਿ ਅਧਿਪੋਤਿ ਵੁਚ੍ਚਤਿ. ਅਧਿਪੁਬ੍ਬਪਾਧਾਤੁ ਰਕ੍ਖਨੇ ਅ, ਨਰਾਨਂ ਅਧਿਪੋ ਇਸ੍ਸਰੋ ਮਨੁਸ੍ਸਰਾਜਾ ਚ ਦੇਵਾਨਂ ਅਧਿਪੋ ਇਸ੍ਸਰੋ ਦੇਵਰਾਜਾ ਚ ਭਵੇਯ੍ਯਾਤਿ ਅਤ੍ਥੋ. ਚਤੁਦੀਪਿਸ੍ਸਰੋਪਿ ਵਾਤਿ ਏਤ੍ਥ ਪਿਸਦ੍ਦੋ ਸਮ੍ਭਾਵਨਤ੍ਥੇ ਨਿਪਾਤੋ. ਤੇਨ ਪਗੇਵ ਏਕਦੀਪਿਸ੍ਸਰਰਾਜਭਾਵੋ ਚ, ਪਦੇ ਸਿਸ੍ਸਰਰਾਜਭਾਵੋ ਚਾਤਿ ਸਮ੍ਭਾਵੇਤਿ. ਵਾ ਸਦ੍ਦੋ ਪਦਪੂਰਣ ਮਤ੍ਤੋਯੇਵ. ਚਤੁਦੀਪਿਸ੍ਸਰੋਤਿ ਪੁਬ੍ਬਵਿਦੇਹੋ, ਅਪਰਗੋ ਯਾਨੋ, ਜਮ੍ਬੁਦੀਪੋ, ਉਤ੍ਤਰਕੁਰੁ ਚਾਤਿ ਚਤੁਨ੍ਨਂ ਦੀਪਾਨਂ ਇਸ੍ਸਰੋ ਚਕ੍ਕਵਤ੍ਤਿਰਾਜਾਪਿ ਭਵੇਯ੍ਯਾਤਿ ਅਤ੍ਥੋ. ਤਤ੍ਥ ਪੁਬ੍ਬਵਿਦੇਹੋਤਿ ਸਿਨੇਰੁਨੋ ਪੁਰੇ ਭਵਂ ਪੁਬ੍ਬਂ, ਵੇਦੇਨ ਪਞ੍ਞਾਯ ਈਹਨ੍ਤਿ ਵਾਯਮਨ੍ਤਿ ਏਤ੍ਥਾਤਿ ਵੇਦੇਹੋ, ਵਿਦਸਦ੍ਦੂਪਪਦ ਈਹਧਾਤੁ ਵਾਯਾਮੇ ਣ. ਸੋਯੇਵ ਵਿਦੇਹੋ. ਇਮਂ ਦੀਪਮੁਪਾਦਾਯ ਸਿਨੇਰੁਨੋ ਪੁਬ੍ਬਦਿਸਭਾਗਤ੍ਤਾ ਪੁਬ੍ਬੋ ਚ ਸੋ ਵਿਦੇਹੋ ਚਾਤਿ ਪੁਬ੍ਬਵਿਦੇਹੋ, ਪੁਬ੍ਬਦੀਪੋ.

ਅਪਰਗੋਯਾਨੋਤਿ ਸਿਨੇਰੁਨੋ ਅਪਰੇ ਪਚ੍ਛਿਮੇ ਭਵੋ ਅਪਰੋ. ਗਵੇਨ ਯਨ੍ਤਿ ਗਚ੍ਛਨ੍ਤਿ ਏਤ੍ਥਾਤਿ ਗੋਯਾਨੋ. ਗੋਸਦ੍ਦੂਪਪਦ ਯਾਧਾਤੁ ਗਮਨੇ ਯੁ. ਸਿਨੇਰੁਨੋ ਪਚ੍ਛਿਮ ਦਿਸਭਾਗਤ੍ਤਾ ਅਪਰੋ ਚ ਸੋ ਗੋਯਾਨੋ ਚਾਤਿ ਅਪਰਗੋਯਾਨੋ, ਪਚ੍ਛਿਮਦੀਪੋ. ਜਮ੍ਬੁਦੀਪੋਤਿ ਜਾਯਤੀਤਿ ਜਮ੍ਬੂ. ਯੋਜਨਸਤੁਬ੍ਬੇਧੋ ਰੁਕ੍ਖੋ. ਜਨਧਾਤੁ ਜਨਨੇ ਊ. ਨਸ੍ਸ ਮੋ. ਬਕਾਰਾਗਮੋ. ਜਲਮਜ੍ਝੇ ਦਿਪ੍ਪਤੀਤਿ ਦੀਪੋ, ਦਿਪ੍ਪਨ੍ਤਿ ਜੋਤਨ੍ਤਿ ਏਤ੍ਥ ਸਦ੍ਧਮ੍ਮਾਤਿ ਵਾ ਦੀਪੋ. ਦੀਪਧਾਤੁ ਦਿਤ੍ਤਿਯਂ ਅ. ਤਸ੍ਸ ਪਨ ਦ੍ਵਿਆਪੋਤਿ ਪਦਚ੍ਛੇਦਂ ਕਤ੍ਵਾ ਦ੍ਵਿਧਾ ਆਪੋ ਸਨ੍ਦਤਿ ਏਤ੍ਥਾਤਿ ਦੀਪੋਤਿ ਬਹੁਬ੍ਬੀਹਿਸਮਾਸੋਪਿ ਯੁਜ੍ਜਤਿ. ਜਮ੍ਬੁਯਾ ਲਕ੍ਖਿਤੋ ਪਞ੍ਞਾਤੋ ਵਾ ਦੀਪੋ ਜਮ੍ਬੁਦੀਪੋ, ਦਕ੍ਖਿਣਦੀਪੋ. ਉਤ੍ਤਰਕੁਰੂਤਿ ਸਿਨੇਰੁਨੋ ਉਤ੍ਤਰੇ ਭਵਾ ਉਤ੍ਤਰਾ. ਧਮ੍ਮਤਾਸਿਦ੍ਧਸ੍ਸ ਪਞ੍ਚਸੀਲਸ੍ਸ ਆਨੁਭਾਵੇਨ ਕਂ ਸੁਖਂ ਉਰੁਮਹਨ੍ਤਂ ਏਤ੍ਥਾਤਿ ਕੁਰੁ. ਬਹੁਬ੍ਬੀਹਿਸਮਾਸੋਯਂ. ਕੁਂ ਵੁਚ੍ਚਤਿ ਪਾਪਂ. ਤਂ ਰੁਨ੍ਧਨ੍ਤਿ ਏਤ੍ਥਾਤਿ ਵਾ ਕੁਰੁ. ਕੁਪੁਬ੍ਬਰੁਧਿਧਾਤੁ ਆਵਰਣੇ ਕ੍ਵਿ. ਧਾਤ੍ਵਨ੍ਤਸ੍ਸ ਲੋਪੋ. ਸਿਨੇਰੁਨੋ ਉਤ੍ਤਰਦਿਸਭਾਗਤ੍ਤਾ ਉਤ੍ਤਰੋ ਚ ਸੋ ਕੁਰੁ ਚਾਤਿ ਉਤ੍ਤਰਕੁਰੁ. ਉਤ੍ਤਰਦੀਪੋਤਿ ਚਤੁਨ੍ਨਂ ਦੀਪਾਨਂ ਇਸ੍ਸਰੋ ਚਤੁਦੀਪਿਸ੍ਸਰੋ, ਚਕ੍ਕਵਤ੍ਤਿਰਾਜਾ ਲਬ੍ਭਤਿ.

ਏਵਂ ਲੋਕਿਯਹਿਤਂ ਦਸ੍ਸੇਤ੍ਵਾ ਇਦਾਨਿ ਲੋਕੁਤ੍ਤਰਹਿਤਂ ਦਸ੍ਸੇਨ੍ਤੋ ਆਹ ਅਨ੍ਤਿਮੇ ਦੇਹੇ…ਪੇ… ਸੁਬ੍ਬਤੋਤਿ ਅਨ੍ਤਿਮੇ ਦੇਹੇ ਸੁਬ੍ਬਤੋ ਭਾਵਨਾਯਾਨਂ ਆਰੁਯ੍ਹ ਅਞ੍ਞਂ ਤਂ ਸੇਤਛਤ੍ਤਕਂ ਧਾਰੇਨ੍ਤੋ ਸਮਂ ਏਸ੍ਸਤੀਤਿ ਸਮ੍ਬਨ੍ਧੋ. ਤਤ੍ਥ ਪਨ ਅਤ੍ਥਕ੍ਕਮੇਨ ਵਣ੍ਣਯਿਸ੍ਸਾਮ. ਅਨ੍ਤਿਮੇਤਿ ਚਰਿਮੇ ਪਚ੍ਛਿਮੇ ਵਾ. ਅਨ੍ਤੇ ਪਰਿਯੋਸਾਨੇ ਭਵੋ ਅਨ੍ਤਿਮੋ, ਪਚ੍ਛਿਮਸਰੀਰੋ. ਤਸ੍ਮਿਂ. ਦੇਹੇਤਿ ਸਰੀਰੇ. ਦਿਹਤਿ ਉਪਚਿਯਤਿ ਵਡ੍ਢਤੀਤਿ ਦੇਹੋ, ਸਰੀਰੋ. ਦਿਹਧਾਤੁ ਉਪਚਯੇ ਣ. ਅਥ ਵਾ ਦਿਹਤਿ ਉਪਚਯਤਿ ਏਤੇਨ ਪੁਞ੍ਞਾਪੁਞ੍ਞਨ੍ਤਿ ਦੇਹੋ, ਪਚ੍ਛਿਮਭਵਭੂਤੇ ਭਬ੍ਬਕੁਲਪੁਤ੍ਤਭੂਤੇ ਵਾ ਸਰੀਰੇਤਿ ਅਤ੍ਥੋ. ਸੁਬ੍ਬਤੋਤਿ ਸੁਟ੍ਠੁ ਪਟਿਪਨ੍ਨਕੋ ਹੁਤ੍ਵਾ. ਸੁਟ੍ਠੁ ਵਤਂ ਪਟਿਪਨ੍ਨਂ ਅਸ੍ਸਾਤਿ ਸੁਬ੍ਬਤੋ. ਵਕਾਰਸ੍ਸਬ੍ਬੋ. ਭਾਵਨਾਯਾਨਮਾਰੁਯ੍ਹਾਤਿ ਭਾਵਨਾਯਾਨਂ ਆਰੁਯ੍ਹਾਤਿ ਪਦਚ੍ਛੇਦੋ. ਵਿਪਸ੍ਸਨਾਭਾਵਨਾਸਙ੍ਖਾਤਯਾਨਂ ਆਰੁਹਿਤ੍ਵਾਤਿ ਅਤ੍ਥੋ. ਭਾਵੇਤਬ੍ਬਾ ਵਡ੍ਢੇਤਬ੍ਬਾਤਿ ਭਾਵਨਾ. ਤੇਭੂਮਕ ਸਙ੍ਖਾਰਾਰਮ੍ਮਣਂ. ਅਥ ਵਾ ਤਦਾਰਮ੍ਮਣਂ ਭਾਵੇਤਿ ਵਡ੍ਢੇਤੀਤਿ ਭਾਵਨਾ, ਵਿਪਸ੍ਸਨਾਪਞ੍ਞਾ. ਭੂਧਾਤੁ ਸਤ੍ਤਾਯਂ ਵਡ੍ਢਨੇ ਵਾ ਯੁ. ਸਾ ਚ ਸਮਥਵਿਪਸ੍ਸਨਾ ਭਾਵਨਾਵਸੇਨ ਦੁਵਿਧਾ ਹੋਤਿ. ਤਤ੍ਥ ਇਧ ਪਨ ਅਞ੍ਞਂ ਸੇਤਛਤ੍ਤਕਨ੍ਤਿ ਸਦ੍ਦਨ੍ਤਰਸਨ੍ਨਿਟ੍ਠਾਨੇਨ ਵਿਪਸ੍ਸਨਾਭਾਵਨਾ ਅਧਿਪ੍ਪੇਤਾ. ਯਨ੍ਤਿ ਪਾਪੁਣਨ੍ਤਿ ਏਤੇਨ ਨਿਬ੍ਬਾਨਨ੍ਤਿ ਯਾਨਂ, ਅਨਿਚ੍ਚਾਦਿਵਿਪਸ੍ਸਨਾਞਾਣਂ. ਯਾਧਾਤੁ ਗਤਿਯਂ ਯੁ. ਭਾਵਨਾਸਙ੍ਖਾਤਂ ਯਾਨਂ ਭਾਵਨਾਯਾਨਂ, ਭਾਵਨਾ ਚ ਸਾ ਯਾਨਞ੍ਚਾਤਿ ਵਾ ਭਾਵਨਾਯਾਨਂ.

ਆਰੁਯ੍ਹਾਤਿ ਆਰੋਹਿਤ੍ਵਾ. ਪਕਤਿਯਾਨਸਦਿਸਂ ਅਨਿਚ੍ਚ ਦੁਕ੍ਖਅਨਤ੍ਤਯਾਨਂ ਆਰੁਹਿਤ੍ਵਾਤਿ ਅਤ੍ਥੋ. ਅਨਿਚ੍ਚਾਦਿਲਕ੍ਖਣੇਨ ਹਿ ਵਿਨਾ ਮਗ੍ਗਫਲਨਿਬ੍ਬਾਨਂ ਪਤ੍ਤੋ ਨਾਮ ਨਤ੍ਥਿ. ਤਸ੍ਮਾ ਭਾਵਨਾਯਾਨਮਾਰੁਯ੍ਹਾਤਿ ਵੁਤ੍ਤਂ. ਅਞ੍ਞਨ੍ਤਿ ਅਰਹਤ੍ਤਫਲਂ. ਤਞ੍ਹਿ ਪਠਮਮਗ੍ਗੇਨ ਆਦਿਟ੍ਠਮਰਿਯਾਦਂ ਅਨਤਿਕ੍ਕਮਿਤ੍ਵਾ ਚਤੁਸਚ੍ਚਧਮ੍ਮਂ ਅਵਬੁਜ੍ਝਤੀਤਿ ਅਞ੍ਞਨ੍ਤਿ ਵੁਚ੍ਚਤਿ. ਆਪੁਬ੍ਬਞਾਧਾਤੁ ਅਵਬੋਧਨੇ ਕ੍ਵਿ. ਆਸਦ੍ਦੋ ਮਰਿਯਾਦਤ੍ਥੋ. ਸੇਤਛਤ੍ਤਕਨ੍ਤਿ ਓਦਾਤਾਤਪਤ੍ਤਂ. ਸੇਵਿਯਤੀਤਿ ਸੇਤਂ, ਧਵਲਂ. ਸਿਧਾਤੁ ਸੇਵਾਯਂ ਤ. ਕਿਲੇਸਤਪਂ ਛਾਦੇਤੀਤਿ ਛਤ੍ਤਂ. ਛਦਧਾਤੁ ਸਂਵਰਣੇ ਤ. ਤਂਯੇਵ ਛਤ੍ਤਕਂ. ਸੇਤਞ੍ਚ ਤਂ ਛਤ੍ਤਕਞ੍ਚਾਤਿ ਸੇਤਛਤ੍ਤਕਂ. ਅਰਹਤ੍ਤਫਲਆਤਪਤ੍ਤਂ ਲਬ੍ਭਤਿ. ਅਞ੍ਞਂ ਅਰਹਤ੍ਤਫਲਸਙ੍ਖਾਤਂ ਸੇਤਛਤ੍ਤਕਂ ਧਾਰੇਨ੍ਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਸਮਨ੍ਤਿ ਨਿਬ੍ਬਾਨਂ. ਤਞ੍ਹਿ ਸਬ੍ਬਂ ਵਟ੍ਟਦੁਕ੍ਖਂ ਸਮਤਿ ਵੂਪਸਮਤਿ ਨਿਰੁਜ੍ਝਤਿ ਏਤ੍ਥਾਤਿ ਸਮਨ੍ਤਿ ਵੁਚ੍ਚਤਿ. ਏਸ੍ਸਤੀਤਿ ਪਾਪੁਣਿਸ੍ਸਤੀਤਿ.

ਇਦਾਨਿ ਦਿਟ੍ਠਧਮ੍ਮਿਕਤ੍ਥਂ ਦਸ੍ਸੇਨ੍ਤੋ ਇਮਸ੍ਮਿਂ ਅਤ੍ਤਭਾਵੇਪੀਤਿਆਦਿਮਾਹ. ਤਤ੍ਥ ਇਮਸ੍ਮਿਂ ਅਤ੍ਤਭਾਵੇਪਿ ਅਰੋਗੋ ਚ ਦੀਘਾਯੁਕੋ ਚ ਸਬ੍ਬਲੋਕੇਹਿ ਪੂਜਿਤੋ ਚ ਭਾਵਨਾਭਿ ਰਤਿਮਨੋ ਚ ਜਨਪ੍ਪਿਯੋ ਚ ਮਨਾਪੋ ਚ ਭਵੇਯ੍ਯਾਤਿ ਯੋਜਨਾ. ਅਤ੍ਤਭਾਵੇਪੀਤਿ ਏਤ੍ਥ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਸਮ੍ਪਰਾਯਿਕਤ੍ਥਂ ਸਮ੍ਪਿਣ੍ਡੇਤਿ. ਅਤ੍ਤਾਤਿ ਭਵਤਿ ਏਤੇਨ ਅਭਿਧਾਨਂ ਬੁਦ੍ਧਿ ਚਾਤਿ ਅਤ੍ਤਭਾਵੋ. ਖਨ੍ਧਪਞ੍ਚਕਸ੍ਸੇਤਮਧਿਵਚਨਂ. ਅਰੋਗੋਤਿ ਸਬ੍ਬਬ੍ਯਾਧਿਵਿਰਹੋ ਚ. ਸੋ ਹਿ ਨਤ੍ਥਿ ਰੋਗੋ ਅਸ੍ਸਾਤਿ ਅਰੋਗੋਤਿ ਵੁਚ੍ਚਤਿ. ਦੀਘਜੀਵਿਕੋਤਿ ਦੀਘਾਯੁਕੋ ਚ. ਸੋ ਹਿ ਦੀਘਾ ਜੀਵਿ ਆਯੁ ਅਸ੍ਸਾਤਿ ਦੀਘਜੀਵਿਕੋਤਿ ਵੁਚ੍ਚਤਿ.

੩੩. ਸਬ੍ਬਲੋਕੇਹੀਤਿ ਸਬ੍ਬਦੇਵਮਨੁਸ੍ਸੇਹਿ. ਪੂਜਿਤੋਤਿ ਪੂਜਿਤਬ੍ਬੋ ਚ. ਭਾਵਨਾਭਿਰਤਿਮਨੋਤਿ ਸਮਥਵਿਪਸ੍ਸਨਾ ਸਙ੍ਖਾਤਾਯ ਭਾਵਨਾਯ ਅਭਿਰਮਣਚਿਤ੍ਤੋ ਚ. ਜਨਪ੍ਪਿਯੋਤਿ ਸਬ੍ਬਜਨੇਹਿ ਪਿਯਾਯਿਤਬ੍ਬੋ ਚ. ਮਨਾਪੋਤਿ ਸਬ੍ਬਸਤ੍ਤਾਨਂ ਚਿਤ੍ਤਵਡ੍ਢਨਕੋ ਚ ਭਵੇਯ੍ਯਾਤਿ ਸਮ੍ਬਨ੍ਧੋ.

ਏਵਂ ਛਬ੍ਬੀਸਤਿਯਾ ਵਨ੍ਦਨਗਾਥਾਸੁ ਏਕਗਾਥਾਮਤ੍ਤਮ੍ਪਿ ਬੁਦ੍ਧਗੁਣਾਨੁਸ੍ਸਰਣੇ ਫਲਾਨਿਸਂਸਂ ਦਸ੍ਸੇਤ੍ਵਾ ਇਦਾਨਿ ਸਬ੍ਬਗਾਥਾਯੋ ਵਚਸਾ ਧਾਰੇਤ੍ਵਾ ਬੁਦ੍ਧਵਨ੍ਦਨੇ ਅਨੇਕਾਨਿ ਫਲਾਨਿਸਂਸਾਨਿ ਦਸ੍ਸੇਤੁਂ ਕਾ ਕਥਾਖਿਲਧਾਰਣੇਤਿ ਆਹ. ਤਤ੍ਥ ਕਾ ਕਥਾਖਿਲਧਾਰਣੇਤਿ ਕਾ ਕਥਾ ਅਖਿਲਧਾਰਣੇਤਿ ਪਦਚ੍ਛੇਦੋ. ਸਬ੍ਬਬੁਦ੍ਧਵਨ੍ਦਨਗਾਥਾਯ ਵਚਸਾ ਧਾਰਣੇ ਕਿਂ ਵਤ੍ਤਬ੍ਬਾ ਯੇਵਾਤਿ ਅਤ੍ਥੋ.

ਏਤ੍ਥ ਚ ਅਖਿਲਸਦ੍ਦੋ ਸਬ੍ਬਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਥ ਵਾ ਖਿਯਨਂ ਖਿਲਂ. ਖਿਧਾਤੁ ਖਯੇ ਲਪਚ੍ਚਯੋ. ਖਯਂ ਲਾਤਿ ਗਣ੍ਹਾਤੀਤਿ ਵਾ ਖਿਲਂ, ਅਪ੍ਪਕਂ. ਖਯਸਦ੍ਦੂਪਪਦਲਾਧਾਤੁ ਗਹਣੇ ਅ. ਨ ਖਿਲਂ ਅਖਿਲਂ, ਸਬ੍ਬਗਾਥਾਯੋ. ਧਾਰਿਯਤੇ ਧਾਰਣਂ, ਅਖਿਲਾਯ ਸਬ੍ਬਾਯ ਗਾਥਾਯ ਧਾਰਣਂ ਅਖਿਲਧਾਰਣਂ, ਤਸ੍ਮਿਂ. ਛਬ੍ਬੀਸਤਿਯਾ ਬੁਦ੍ਧਵਨ੍ਦਨਗਾਥਾਸੁ ਏਕਂ ਗਾਥਂ ਵਚਸਾ ਧਾਰਯਿਤ੍ਵਾ ਬੁਦ੍ਧਵਨ੍ਦਨੇ ਯਥਾਵੁਤ੍ਤਫਲਾਨਿਸਂਸਾਨਿ ਲਬ੍ਭਨ੍ਤਿ, ਪਗੇਵ ਪਨ ਸਬ੍ਬਬੁਦ੍ਧਵਨ੍ਦਨਗਾਥਾਯੋ ਵਚਸਾ ਧਾਰਯਿਤ੍ਵਾ ਦਿਨੇ ਦਿਨੇ ਬੁਦ੍ਧਵਨ੍ਦਨੇਤਿ ਅਤ੍ਥੋਤਿ. ਇਮਿਨਾ ਪਨ ਗਾਥਾਪਞ੍ਚਕੇਨ ਯਥਾਵੁਤ੍ਤ ਫਲਾਨਿਸਂਸਂ ਞਤ੍ਵਾ ਸਦ੍ਦਹਕੋ ਸਮ੍ਮਾਦਿਟ੍ਠਿਕੋ ਕੁਲਪੁਤ੍ਤੋ ਸਬ੍ਬਬੁਦ੍ਧਵਨ੍ਦਨਗਾਥਾਯੋ ਵਚਸਾ ਧਾਰਯਿਤ੍ਵਾ ਰਤ੍ਤਿਨ੍ਦਿਵਂ ਪੁਬ੍ਬਣ੍ਹਕਾਲੇ ਚ ਸਾਯਨ੍ਹਕਾਲੇ ਚ ਰਤ੍ਤਿਯਾ ਪਠਮਯਾਮੇ ਚ ਪਚ੍ਛਿਮਯਾਮੇ ਚ ਸਤਤਂ ਸਮਿਤਂ ਨਿਰਨ੍ਤਰਂ ਬੁਦ੍ਧਂ ਵਨ੍ਦੇਯ੍ਯਾਤਿ ਉਯ੍ਯੋਜਨਂ ਦਸ੍ਸੇਤੀਤਿ.

ਪਞ੍ਚਕਗਾਥਾਵਣ੍ਣਨਾ ਸਮਤ੍ਤਾ.

ਇਤਿ ਪੋਰਾਣਾਚਰਿਯੇਹਿ ਵਨ੍ਦਿਤਸ੍ਸ ਨਮਕ੍ਕਾਰਸ੍ਸ ਸਦ੍ਦਤ੍ਥਨਯੇਹਿ ਛਨ੍ਦਾਲਙ੍ਕਾਰਨਯੇਹਿ ਚ ਸਣ੍ਹਸੁਖੁਮਸੁਦੁਦ੍ਦਸ ਗਮ੍ਭੀਰਸ੍ਸ ਬੁਦ੍ਧਸ੍ਸ ਦੁਪ੍ਪਟਿਵਿਧਗੁਣਪਰਿਦੀਪਕਸ੍ਸ ਸਪ੍ਪੁਰਿਸਾਨਂ ਚਿਤ੍ਤਪਸਨ੍ਨਜਨਕਸ੍ਸ ਸਾਟ੍ਠਕਥੇ ਪਿਟਕਤ੍ਤਯੇ ਅਸਂਹਿਰ ਵਿਸਾਰਦਞਾਣਚਾਰਿਨਾ ਸਾਸਨਸੋਧਕੇਨ ਭਦ੍ਦਨ੍ਤਰੇਵ ਤਤ੍ਥੇਰਵਰੇਨ ਰਚਿਤਾ ਬੁਦ੍ਧਗੁਣਪ੍ਪਦੀਪਿਕਨਾਮਿਕਾ ਵਣ੍ਣਨਾ.

ਨਿਗਮਨ

ਇਦਂ ਪਨ ਪੁਰਂ ਨਿਮ੍ਮਿਤੇਨ ਸਿਰੀਪਵਰਵਿਜਯਾਨਨ੍ਤਯਸਪਣ੍ਡਿਤ ਤ੍ਰਿਭਵਨਾਦਿਤ੍ਯਾਧਿਪਤਿਮਹਾਧਮ੍ਮਰਾਜਾਧਿਰਾਜਾਤਿ ਲਞ੍ਛਿਤਨਾਮਿਕੇਨ ਪਿਟਕਤ੍ਤਯਪਾਲ਼ਿਂ ਸਿਲਾਰੂਲ਼੍ਹਂ ਕਾਰਯਿਤ੍ਵਾ ਪਞ੍ਚਮ ਸਙ੍ਗੀਤਿਕਰਣੇਨ ਤਿਮਹਾਧਮ੍ਮਰਾਜੇਨ ਰਤਨਾਪੁਞ੍ਜਨ੍ਤਿ ਸਮ੍ਮਤੇ ਰਾਜਧਾਨੀਭੂਤੇ ਨਾਨਾਕੁਲਸਂਕਿਣ੍ਣੇ ਪੁਞ੍ਞਧਞ੍ਞਵਨ੍ਤਾਨਂ ਸਾਧੂਨਞ੍ਚ ਸੀਲਸਮਾਧਿਪਞ੍ਞਵਨ੍ਤਾਨਂ ਭਿਕ੍ਖੂਨਞ੍ਚ ਨਿਵਾਸਭੂਤੇ ਬੁਦ੍ਧਧਮ੍ਮਸਙ੍ਘਰਤਨਾਕਰੇ ਚਨ੍ਦਿਮਸੂਰਿਯਾ ਵਿਯ ਬੁਦ੍ਧਸਾਸਨੁਜ੍ਜੋਤਨੇ ਮਨ੍ਤਲੇ ਨਗਰੇ ਇਤਿ ਪਰਿਕਿਤ੍ਤਿਤੇ ਮਹਾਰਾਮੇ ਦੇਸੇ ਵਸਨ੍ਤੇਨ ਉਪਾਸਕ ਗੁਣਸਮ੍ਪਨ੍ਨੇਨ ਨਾਮਿਕੇਨ ਉਪਾਸਕੇਨ ਚ ਤਸ੍ਸੁਪਟ੍ਠਾਕਾਯ ਨਾਮਿਕਾਯ ਉਪਾਸਿਕਾਯ ਚ ਸਮਕੁਸਲਚ੍ਛਨ੍ਦਂ ਕਤ੍ਵਾ ਨਿਬ੍ਬਾਨਸ੍ਸ ਸਚ੍ਛਿਕਰਣਤ੍ਥਾਯ ਕਾਰਿਤੇ ਮਨੋਰਮੇ ਸੁਵਣ੍ਣੇਨ ਲਿਮ੍ਪਿਤਤ੍ਤਾ ਸੁਵਣ੍ਣਵਤੀ ਨਾਮਿਕੇ ਦ੍ਵਿਭੁਮ੍ਮਿਕੇ ਮਹਿਟ੍ਠਕਵਿਹਾਰੇ ਅਟ੍ਠਹਿ ਦਿਸਾਹਿ ਆਗਤਾਨਂ ਸੁਤੇਸਨਭਿਕ੍ਖੂਨਂ ਸਾਟ੍ਠਕਥਂ ਪਿਟਕਤ੍ਤਯਂ ਦਿਨੇ ਦਿਨੇ ਸਤਤਂ ਨਿਰਨ੍ਤਰਂ ਵਾਚੇਨ੍ਤੇਨ ਅਧਿਵਸਨ੍ਤੇਨ ਸਾਟ੍ਠਕਥੇ ਪਿਟਕਤ੍ਤਯੇ ਅਸਂਹਿਰਵਿਸਾਰਦਞਾਣਚਾਰਿਨਾ ਮਨ੍ਤਲੇ ਪੁਰੇ ਪਰਿਯਤ੍ਤਿਸਾਸਨਹਿਤਧਮ੍ਮਾਚਰਿਯਗਣਸ੍ਸ ਜੇਟ੍ਠੁਕ੍ਕਟ੍ਠਭੂਤੇਨ ਰੇਵਤਾਭਿਪਣ੍ਡਿਤਧਜਸਾਸਨਵਂਸਮਹਾਧਮ੍ਮਰਾਜਗੁਰੂਤਿ ਚ ਅਗ੍ਗ ਮਹਾਪਣ੍ਡਿਤਾਤਿ ਚ ਲਦ੍ਧਲਞ੍ਛਿਤੇਨ ਮੂਲਦ੍ਵਾਦਸਸਾਸਨ ਕਰਮਹਾਗਣਸ੍ਸ ਜੇਟ੍ਠਮਹਾਨਾਯਕਭੂਤੇਨ ਸਾਸਨਾਪ੍ਰੁਞ੍ਞੋ ਆਚਰਿਯੋਤਿ ਵਿਸ੍ਸੁਤੇਨ ਸਾਸਨਸੋਧਕ ਮਹਾਨਾਯਕਤ੍ਥੇਰਵਰੇਨ ਪੋਰਾਣੇਹਿ ਤਤ੍ਥ ਤਤ੍ਥ ਪਾਲ਼ਿਯਂ ਭਗਵਤਾ ਵੁਤ੍ਤੇਹਿ ਬੁਦ੍ਧਗੁਣਪ੍ਪਕਾਸਕੇਹਿ ਬੁਦ੍ਧਗੁਣਪਦੇਹਿ ਥੋਮਿਤ੍ਵਾ ਵਨ੍ਦਿਤਸ੍ਸ ਅਤ੍ਥਬ੍ਯਞ੍ਜਨੇਨ ਛਨ੍ਦਾਲਙ੍ਕਾਰਨਯੇਨ ਚ ਪਥਵੀਸਨ੍ਧਾਰਕਸ੍ਸ ਉਦਕਕ੍ਖਨ੍ਧਸ੍ਸ ਵਿਯ ਗਮ੍ਭੀਰਸ੍ਸ ਪਬ੍ਬਤੇਨ ਪਟਿਚ੍ਛਾਦੇਤ੍ਵਾ ਠਪਿਤਸ੍ਸ ਵਤ੍ਥੁਸ੍ਸ ਵਿਯ ਅਤਿਦੁਦ੍ਦਸਸ੍ਸ ਸਤਧਾ ਭਿਨ੍ਨਸ੍ਸ ਵਾਲਸ੍ਸ ਅਗ੍ਗਕੋਟਿਯਾ ਵਿਯ ਅਤਿਸਣ੍ਹ ਸੁਖੁਮਸ੍ਸ ਪੁਥੁਜ੍ਜਨਞਾਣੇਨ ਬੁਦ੍ਧਸ੍ਸ ਦੁਪ੍ਪਟਿਵਿਧਗੁਣਪਰਿਦੀਪਕਸ੍ਸ ਨਮਕ੍ਕਾਰਸ੍ਸ ਲੀਨਤ੍ਥਪ੍ਪਕਾਸਨਾ ਬੁਦ੍ਧਗੁਣਪ੍ਪਦੀਪਿਕਨਾਮਿਕਾ ਸਂਵਣ੍ਣਨਾ ਤਾਸੁ ਤਾਸੁ ਅਟ੍ਠਕਥਾਟੀਕਾਸੁ ਆਗਤਂ ਸਂਵਣ੍ਣਨਾਨਯਂ ਨਿਸ੍ਸਾਯ ਪਞ੍ਞਾਪਾਟਵਤ੍ਥਾਯ ਸਾਸਨਵੁਦ੍ਧਿਯਾ ਚ ਕਤਾ.

ਏਤ੍ਤਾਵਤਾ ਚ –

ਸਮ੍ਪਤ੍ਤੇ ਚਕ੍ਕਵਸ੍ਸੇ ਸਾ, ਦ੍ਵਿਸਹਸ੍ਸੇ ਚਤੂਸਤੇ;

ਨਵਾਧਿਕਾਸਿਤੀਯਾ ਚ, ਸਕ੍ਕਰਾਜੇ ਚ ਸਮ੍ਪਤ੍ਤੇ.

ਸਤ੍ਤਤਿਸਤਸਹਸ੍ਸ, ਵਸ੍ਸੇ ਫੁਸ੍ਸਮਾਸਸ੍ਸੇਵ;

ਕਾਲਪਕ੍ਖਸਤ੍ਤਮੇ ਚ, ਬੁਦ੍ਧਦਿਨੇ ਸੁਨਿਟ੍ਠਿਤਾ; ਸਾਮਞ੍ਞ.

ਏਸਾ ਚ ਸਙ੍ਖਰੋਨ੍ਤੇਨ, ਯਂ ਪੁਞ੍ਞਂ ਪਸੁਤਂ ਮਯਾ;

ਅਞ੍ਞਮ੍ਪਿ ਤੇਨ ਪੁਞ੍ਞੇਨ, ਪਤ੍ਵਾ ਸਮ੍ਬੋਧਿਮੁਤ੍ਤਮਂ.

ਸਂਸਾਰਤੋ ਬਹੂ ਸਤ੍ਤੇ, ਤਾਰਯਿਤ੍ਵਾ ਤਣ੍ਹਕ੍ਖਯਂ;

ਨਿਬ੍ਬਾਨਂ ਸਚ੍ਛਿਕਾਰੇਯ੍ਯਂ, ਮਗ੍ਗਞਾਣੁਤ੍ਤਰੇਨ ਚ.

ਸਦਾ ਰਕ੍ਖਨ੍ਤੁ ਰਾਜਾਨੋ, ਧਮ੍ਮੇਨੇਵ ਪਜਂ ਇਮਂ;

ਸਬ੍ਬੇ ਸਤ੍ਤਾ ਸੁਖੀ ਹੋਨ੍ਤੁ, ਜੋਤੇਨ੍ਤੁ ਜਿਨਸਾਸਨਂ.

ਮ੍ਰਮ੍ਮਰਟ੍ਠੇ ਮਨੁਸ੍ਸਾ ਚ, ਸਬ੍ਬਦਾ ਨਿਰੁਪਦ੍ਦਵਾ;

ਨਿਚ੍ਚਂ ਕਲ੍ਯਾਣਸਙ੍ਕਪ੍ਪਾ, ਪਪ੍ਪੋਨ੍ਤੁ ਅਮਤਂ ਪਦਨ੍ਤਿ.

ਬੁਦ੍ਧਗੁਣਪ੍ਪਦੀਪਿਕਨਾਮਿਕਾ

ਨਮਕ੍ਕਾਰਟੀਕਾ ਸਮਤ੍ਤਾ.