📜
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਸੁਤ੍ਤਵਨ੍ਦਨਾ
ਧਮ੍ਮਤ੍ਥ ¶ ਦੇਸਨਾ ਵੇਧ,
ਚਤੁਗਮ੍ਭੀਰ ਦੁਦ੍ਦਸਂ;
ਧਮ੍ਮਂ ਲੋਕਸ੍ਸ ਦੇਸੇਨ੍ਤਂ,
ਧਮ੍ਮਰਾਜਂ ਨਮਾਮਹਂ;
ਬੁਦ੍ਧੋ ¶ ਪਚ੍ਚੇਕਬੁਦ੍ਧੋ ਚ,
ਅਰਹਾ ਚਕ੍ਕਵਤ੍ਤੀਤਿ;
ਥੂਪਾਥੂਪਾਰਹਂ ਵਨ੍ਦੇ,
ਚਤੁਥੂਪਾਰਹੇਸੁ ਤਂ;
ਪੇਤਸੇਯ੍ਯੋ ¶ ਕਾਮਭੋਗੀ,
ਸੀਹਸੇਯ੍ਯੋ ਤਥਾਗਤੋ;
ਸਯਨ੍ਤਂ ਚਤੁਸੇਯ੍ਯੇਸੁ,
ਚਤੁਤ੍ਥੇਨ ਨਮੇ ਜਿਨਂ;
ਅਣ੍ਡਜਾ ਜਲਾਬੁਜਾ ਚ;
ਸਂਸੇਦਜੋ ਪਪਾਤਿਕਾ;
ਚਤੁਯੋਨਿ ਪਰਿਚ੍ਛੇਦ,
ਞਾਣਵਨ੍ਤਂ ਨਮੇ ਜਿਨਂ;
ਸੁਤਬੁਦ੍ਧੋਨੁਬੁਦ੍ਧੋ ¶ ਚ,
ਪਚ੍ਚੇਕੋ ਜਿਨਬੁਦ੍ਧੋਤਿ;
ਚਤੁਤ੍ਥਂ ਚਤੁਬੁਦ੍ਧੇਸੁ,
ਵਨ੍ਦਾਮਿ ਲੋਕਨਾਯਕਂ;
ਰਾਹੁਗ੍ਗਂ ¶ ਅਤ੍ਤਭਾਗੀਨਂ,
ਮਨ੍ਧਾਤਾ ਕਾਮਭੋਗੀਨਂ;
ਮਾਰੋ ਅਧਿਪਤੇਯ੍ਯਾਨਂ,
ਬੁਦ੍ਧੋ ਲੋਕੇ ਸਦੇਵਕੇ;
ਚਤੁਅਗ੍ਗ ਪਞ੍ਞਤ੍ਤੀਨਂ,
ਅਗ੍ਗਪਤ੍ਤਂ ਨਮੇ ਜਿਨਂ.
ਦਾਨਂ ¶ ਪਿਯਕਥਾ ਅਤ੍ਥ,
ਚਰਿਯਾ ਸਦਿਸਤ੍ਤਤਾ;
ਚਤੁਸਙ੍ਗਹ ਵਤ੍ਥੂਹਿ,
ਅਸਙ੍ਖਿਯੇਸੁ ਜਾਤਿਸੁ;
ਲੋਕਸ੍ਸ ਸਙ੍ਗਹੇਤਾਰਂ,
ਵਨ੍ਦਾਮਿ ਲੋਕਨਾਯਕਂ;
ਲੋਭੋ ਦੋਸੋ ਚ ਮੋਹੋਤਿ,
ਅਨ੍ਤੋ ਪਚ੍ਚਤ੍ਥਿਕੇ ਤਯੋ;
ਦੁਜ੍ਜਯੇ ¶ ਸਬ੍ਬਵੇਰੀਹਿ,
ਸਞ੍ਜਿਤਂਪਿ ਸੁਧਿਂ ਨਮੇ;
ਜਾਤਿ ਪੁਞ੍ਞ ਮਹਤ੍ਤਾਨਿ,
ਗੁਣਮਹਤ੍ਤਮੁਤ੍ਤਮਂ;
ਤਿਮਹਤ੍ਥੇਹਿ ਸਮ੍ਪਨ੍ਨਂ,
ਵਨ੍ਦਾਮਿ ਲੋਕਨਾਯਕਂ;
ਹੇਤੁ ¶ ਫਲ ਸਮ੍ਪਦਾਯੋ,
ਸਤ੍ਤੁਪਕਾਰਸਮ੍ਪਦਾ;
ਤਿਸਮ੍ਪਦਾਹਿ ਸਮ੍ਪਨ੍ਨਂ,
ਵਨ੍ਦਾਮਿ ਲੋਕਨਾਯਕਂ.
ਞਾਣਪ੍ਪਹਾਨਾਨੁਭਾਵ,
ਸੁਰੂਪਕਾਰਸਮ੍ਪਦਾ;
ਚਤੁਫਲ ਸਮ੍ਪਦਾਹਿ,
ਤਂ ਸਮ੍ਪਨ੍ਨਂ ਨਮੇ ਜਿਨਂ.
ਆਸਯੋ ¶ ਚ ਪਯੋਗੋਤਿ,
ਸਤ੍ਤੁਪਕਾਰ ਸਮ੍ਪਦਾ;
ਦੁਵਿਧਾ ਯਸ੍ਸ ਸਮ੍ਪਨ੍ਨਾ,
ਸਮ੍ਮਾ ਮਂ ਪਾਤੁ ਸੋ ਜਿਨੋ.
ਮਹੋਸਧੇ ਵੇਸ੍ਸਨ੍ਤਰੇ,
ਪਚ੍ਛਿਮਭਵਿਕੇ ਤਥਾ;
ਤਿਜਾਤੀਸੁ ਨਮੇ ਵਾਚਂ,
ਭਾਸੇਨ੍ਤਂ ਜਾਯਨਕ੍ਖਣੇ.
ਨੇਮਿਮ੍ਹਿ ¶ ਸਾਧਿਨੇ ਚੇਵ,
ਮਨ੍ਧਾਤਰਿ ਚ ਗੁਤ੍ਤਿਲੇ;
ਚਤੂਸੁ ਮਨੁਜਤ੍ਤੇਨ,
ਦੇਵਲੋਕਂ ਗਤਂ ਨਮੇ.
ਸਙ੍ਖਾਰੋ ਰੂਪਵਿਕਾਰੋ,
ਲਕ੍ਖਣਂ ਵਾਨਨਿਸ੍ਸਟਂ;
ਨਿਬ੍ਬਾਨਂ ¶ ਪਞ੍ਞਤ੍ਤਿਚੇਤਿ,
ਪਞ੍ਚ ਞੇਯ੍ਯਨ੍ਤਗੁਂ ਨਮੇ.
ਪੁਤ੍ਤ ਦਾਰ ਪਰਿਚ੍ਚਾਗਾ,
ਰਜ੍ਜਙ੍ਗਂ ਜੀਵ ਚਾਗੀਤਿ;
ਪਞ੍ਚ ਮਹਾਪਰਿਚ੍ਚਾਗੇ,
ਕਰਂ ਸੁਦੁਕ੍ਕਰੇ ਨਮੇ.
ਰੂਪਞ੍ਚ ¶ ਵੇਦਨਾ ਸਞ੍ਞਾ,
ਸਙ੍ਖਾਰਾ ਵਿਞ੍ਞਾਣਨ੍ਤਿਮੇ;
ਪਞ੍ਚਕ੍ਖਨ੍ਧੇ ਪਰਿਜਾਨਂ,
ਤਿਪਰਿਞ੍ਞਾਹਿ ਤਂ ਨਮੇ.
ਮਨੁਸ੍ਸ ਦੇਵ ਗਤਿਯੋ,
ਪੇਤੋ ਚ ਨਿਰਯੋ ਤਥਾ;
ਤਿਰਚ੍ਛਾਨੋਤਿ ਪਞ੍ਚੇਤਾ,
ਛਿਨ੍ਦਨ੍ਤਂ ਗਤਿਯੋ ਨਮੇ;
ਦੇਵਪੁਤ੍ਤੋ ¶ ਕਿਲੇਸੋ ਚ,
ਅਭਿਸਙ੍ਖਾਰ ਮਾਰਕੋ;
ਖਨ੍ਧੋ ਮਚ੍ਚੂਤਿ ਪਞ੍ਚੇਤੇ,
ਮਾਰੇ ਵਿਜਿਤਵਂ ਨਮੇ.
ਪੁਰੇਭਤ੍ਤਂ ਪਚ੍ਛਾਭਤ੍ਤਂ,
ਪੁਰਿਮਞ੍ਚੇਵ ਮਜ੍ਝਿਮਂ;
ਪਚ੍ਛਿਮਨ੍ਤਿ ਸਦਾ ਪਞ੍ਚ,
ਬੁਦ੍ਧਕਿਚ੍ਚਂ ਕਰਂ ਨਮੇ.
ਰੂਪਾ ¶ ਸਦ੍ਦਾ ਗਨ੍ਧਾ ਰਸਾ,
ਫੋਟ੍ਠਬ੍ਬਾ ਚ ਮਨੋਰਮਾ;
ਪਞ੍ਚ ਕਾਮਗੁਣੇ ਹਿਤ੍ਵਾ,
ਖੇਲ਼ਂਵ ਨਿਗ੍ਗਤਂ ਨਮੇ.
ਰਾਗਸਲ੍ਲਂ ¶ ਦੋਸਸਲ੍ਲਂ,
ਮੋਹਾ ਮਾਨੋ ਚ ਦਿਟ੍ਠੀਤਿ;
ਵਨ੍ਦੇ ਵਜ੍ਜਾਤਿਵਜ੍ਜਨ੍ਤਂ,
ਪਞ੍ਚਸਲ੍ਲਪਨੂਦਨਂ.
ਦੀਘੋ ਮਜ੍ਝਿਮ ਸਂਯੁਤ੍ਤਾ,
ਅਙ੍ਗੁਤ੍ਤਰੋ ਚ ਖੁਦ੍ਦਕੋ;
ਇਤਿ ਪਞ੍ਚ ਨਿਕਾਯੇਹਿ,
ਸੁਵਿਨੇਨ੍ਤਂ ਪਜਂ ਨਮੇ.
ਇਸ੍ਸਰਿਯਂ ¶ ਯਸੋ ਧਮ੍ਮੋ,
ਕਾਮੋ ਸਿਰੀ ਪਯਤ੍ਤੀਤਿ;
ਭਗ੍ਯੇਹਿ ਛਹਿ ਸਮ੍ਪਨ੍ਨਂ,
ਵਨ੍ਦਾਮਿ ਲੋਕਨਾਯਕਂ.
ਪਿਯਾਪਿਯਂ ¶ ਭੂਤਾਭੂਤਂ,
ਅਤ੍ਥਾਨਤ੍ਥਂ ਯਥਾਰਹਂ;
ਮਿਸ੍ਸਾ ਛਸੁ ਸੁਵਾਚਂਵ,
ਭਾਸਨ੍ਤਂ ਅਤ੍ਥਕਂ ਨਮੇ.
ਅਲਸੋ ਚ ਪਮਾਦੋ ਚ,
ਅਨੁਟ੍ਠਾਨਂ ਅਸਂਯਮੋ;
ਨਿਦ੍ਦਾ ਤਨ੍ਤੀਤਿ ਛਿਦ੍ਦੇਹਿ,
ਛਹਿ ਮੁਤ੍ਤਂ ਸਦਾ ਨਮੇ.
ਮਹਾਕਰੁਣਾਸਮਾਪਤ੍ਤਿ ¶ ,
ਯਮਕਪ੍ਪਾਟਿਹਾਰਿਯਂ;
ਆਸਯਾਨੁਸਯੇ ਞਾਣਂ,
ਇਨ੍ਦ੍ਰਿਯਾਨ ਪਰੋਪਰੇ;
ਸਬ੍ਬਞ੍ਞੁਤਾ ਨਾਵਰਣਂ,
ਛਾ ਸਾਧਾਰਣਿਕਂ ਨਮੇ.
ਕਾਮਚ੍ਛਨ੍ਦੋ ¶ ਚ ਬ੍ਯਾਪਾਦੋ,
ਥਿਨਮਿਦ੍ਧਞ੍ਚ ਸਂਸਯੋ;
ਅਵਿਜ੍ਜੁਦ੍ਧਚ੍ਚ ਕੁਕ੍ਕੁਚ੍ਚਂ,
ਛਵਿਨੀਵਰਣਂ ਨਮੇ.
ਇਦ੍ਧਿਵਿਧਂ ਦਿਬ੍ਬਸੋਤਂ,
ਪਰਚਿਤ੍ਤ ਵਿਜਾਨਨਾ;
ਪੁਬ੍ਬੇਨਿਵਾਸਾਨੁਸ੍ਸਤਿ ¶ ,
ਦਿਬ੍ਬਚਕ੍ਖਾਸਵਕ੍ਖਯੋ;
ਛਲ਼ਭਿਞ੍ਞਾਹਿ ਸਮ੍ਪਨ੍ਨਂ,
ਵਨ੍ਦਾਮਿ ਪੁਰਿਸੁਤ੍ਤਮਂ.
ਨੀਲ ਪੀਤਾ ਚ ਓਦਾਤਾ,
ਮਞ੍ਜਿਟ੍ਠਾ ਚ ਪਭਸ੍ਸਰਾ;
ਲੋਹਿਤਾਤਿ ਛ ਰਂਸੀਹੀ,
ਵਿਜ੍ਜੋਤਨ੍ਤਂ ਸਦਾ ਨਮੇ.
ਅਸ੍ਸਾਦਾਦੀਨਵੋ ¶ ਚੇਵ,
ਨਿਸ੍ਸਰਣਫਲਂ ਤਥਾ;
ਉਪਾਯਾਣਤ੍ਤੀਤਿ ਛਧਾ,
ਸਦ੍ਧਮ੍ਮਦੇਸਕਂ ਨਮੇ.
ਰਾਗੋ ¶ ਦੋਸੋ ਚ ਮੋਹੋ ਚ,
ਵਿਤਕ੍ਕਚਰਿਯਾ ਤਥਾ;
ਸਦ੍ਧਾ ਬੁਦ੍ਧੀਤਿ ਭਾਜੇਨ੍ਤਂ,
ਤਾ ਛਲ਼ੇਚਰਿਯਾ ਨਮੇ.
ਰਜਤਂ ਕਨਕਂ ਮੁਤ੍ਤਾ,
ਮਣਿ ਵੇਲ਼ੁਰਿਯਾਨਿ ਚ;
ਵਜਿਰਞ੍ਚ ਪਵਾਲ਼ਨ੍ਤਿ,
ਸੇਟ੍ਠਿ ਸਤ੍ਤਧਨੋ ਵਿਯ.
ਸਦ੍ਧਾਸੀਲਂ ਸੁਤਂਚਾਗੋ,
ਹਿਰੀ ਓਤ੍ਤਪ੍ਪਿਯਂ ਧਨਂ,
ਪਞ੍ਞਾਧਨਨ੍ਤਿ ਸਮ੍ਬੁਦ੍ਧਂ,
ਵਨ੍ਦੇ ਸਤ੍ਤਮਹਾਧਨਂ.
ਚਕ੍ਕਂ ¶ ਹਤ੍ਥਿ ਅਸ੍ਸੋ ਮਣਿ,
ਗਹਪਤਿਤ੍ਥਿਯੋ ਤਥਾ;
ਸੁਪਰਿਣਾਯਕੋਚਾਤਿ,
ਸਤ੍ਤਰਤਨੋ ਚਕ੍ਕਵਤ੍ਤੀਵ.
ਸਤਿ ਧਮ੍ਮਵਿਚਯੋ ਚ,
ਤਥੇਵ ਵੀਰਿਯਂ ਪੀਤਿ;
ਪਸ੍ਸਦ੍ਧਿ ¶ ਸਮਾਧੁਪੇਕ੍ਖਾ,
ਸਦ੍ਧਮ੍ਮ ਚਕ੍ਕਵਤ੍ਤਿਕਂ;
ਸਤ੍ਤ ਬੋਜ੍ਝਙ੍ਗਰਤਨਂ,
ਨਮਾਮਿ ਪੁਰਿਸੁਤ੍ਤਮਂ.
ਯੁਗਨ੍ਧਰੋ ¶ ਈਸਧਰੋ,
ਕਰਵੀਕੋ ਸੁਦਸ੍ਸਨੋ;
ਨੇਮਿਨ੍ਧਰੋ ਵਿਨਤਕੋ,
ਅਸ੍ਸਕਣ੍ਣੋ ਮਹਾਨਗੇ;
ਸਤ੍ਤੇਤੇ ਹਤ੍ਥਰੂਪਂਵ,
ਸਮ੍ਪਸ੍ਸਨ੍ਤਂ ਜਿਨਂ ਨਮੇ.
ਕਣ੍ਣਮੁਣ੍ਡੋ ਅਨੋਤਤ੍ਤੋ,
ਕੁਣਾਲੋ ਰਥਕਾਰਕੋ;
ਸੀਹਪ੍ਪਪਾਤ ਛਦ੍ਦਨ੍ਤਾ,
ਮਨ੍ਦਾਕਿਨੀ ਮਹਾਸਰੇ;
ਸਤ੍ਤੇਤੇ ¶ ਸਬ੍ਬਥਾ ਪਸ੍ਸਂ,
ਦਿਟ੍ਠੇਵ ਪਾਤਿਕਂ ਨਮੇ.
ਮਨੁਸ੍ਸਤ੍ਤਂ ਲਿਙ੍ਗਸਮ੍ਪਤ੍ਤਿ,
ਹੇਤੁ ਸਤ੍ਥਾਰਦਸ੍ਸਨਂ;
ਪਬ੍ਬਜ੍ਜਾ ਗੁਣਸਮ੍ਪਤ੍ਤਿ,
ਅਧਿਕਾਰੋ ਚ ਛਨ੍ਦਤਾ;
ਅਟ੍ਠਧਮ੍ਮ ਸਮੋਧਾਨਾ,
ਭਿਨੀਹਾਰਨ੍ਤਗੁਂ ਨਮੇ.
ਵਿਸਟ੍ਠਂ ¶ ਮਞ੍ਜੁ ਵਿਞ੍ਞੇਯ੍ਯਂ,
ਸਵਨੀਯਾਵਿਸਾਰਿਣਾ;
ਗਮ੍ਭੀਰੋ ਬਿਨ੍ਦੁਨਿਨ੍ਨਾਦੋ,
ਅਟ੍ਠਙ੍ਗਿਕਸਰਂ ਨਮੇ.
ਚਤ੍ਤਾਰਿ ¶ ਰੂਪਝਾਨਾਨਿ,
ਤਥੇਵਾਰੂਪਝਾਨਾਨਿ;
ਤਾ ਸਮਾਪਤ੍ਤਿਯੋ ਅਟ੍ਠ,
ਸੇਵਨ੍ਤਂ ਰੁਚਿਯਾ ਨਮੇ.
ਅਣਿਮਾ ਲਙ੍ਘਿਮਾ ਕਮ੍ਮਂ,
ਮਹਿਮਾ ਪਤ੍ਤਿਮਾ ਤਥਾ;
ਈਸਿਤਾ ¶ ਵਸਿਤਾ ਚੇਵ,
ਯਤ੍ਥਕਾਮਾਵਸਾਯਿਤਾ;
ਅਟ੍ਠਿਸ੍ਸਰਿਯ ਪੁਣ੍ਣਤ੍ਤਾ,
ਇਸ੍ਸਰਾਤਿਸ੍ਸਰਂ ਨਮੇ.
ਮਨੋਮਯਿਦ੍ਧਿਞਾਣਞ੍ਚ ¶ ,
ਛਲ਼ਭਿਞ੍ਞਾ ਵਿਪਸ੍ਸਨਾ;
ਅਟ੍ਠਵਿਜ੍ਜਾਹਿ ਸਮ੍ਪਨ੍ਨਂ,
ਵਨ੍ਦੇ ਤਿਲੋਕਕੇਤੁਕਂ.
ਜਾਤਿ ਜਰਾ ਰੁਜਾ ਕਾਲੋ,
ਚਤੁਰਾਪਾਯਦੁਕ੍ਖਾਤਿ;
ਅਟ੍ਠ ਸਂਵੇਗਵਤ੍ਥੂਨਿ,
ਭਾਸਨ੍ਤਂ ਵਿਵਿਧਂ ਨਮੇ.
ਸੁਤ੍ਤਙ੍ਗਂ ¶ ਵੇਯ੍ਯਾਕਰਣਂ,
ਗੇਯ੍ਯਂ ਗਾਥਾ ਚ ਜਾਤਕਂ;
ਅਬ੍ਭੂਤਧਮ੍ਮ ਵੇਦਲ੍ਲਾ,
ਉਦਾਨਮਿਤਿ ਵੁਤ੍ਤਕਂ;
ਨਵਙ੍ਗਂ ਸਬ੍ਬਲੋਕਸ੍ਸ,
ਦਦਨ੍ਤਂ ਸਾਸਨਂ ਨਮੇ.
ਯਾ ¶ ਸਮਾਪਤ੍ਤਿਯੋ ਅਟ੍ਠ,
ਨਿਰੋਧੋ ਚਾਤਿ ਤੇ ਨਵ,
ਅਨੁਪੁਬ੍ਬਵਿਹਾਰੇ ਤਂ,
ਸੇਵਨ੍ਤਂ ਰੁਚਿਯਾ ਨਮੇ.
ਏਕਤ੍ਤਞ੍ਚੇਵ ਨਾਨਤ੍ਤਂ,
ਕਾਯਸਞ੍ਞੀਹਿ ਯੋਗਤੋ,
ਚਤ੍ਤਾਰੋ ਤਥਾਰੁਪ੍ਪਾ ਚ,
ਅਸਞ੍ਞੀਚਾਤਿ ਤੇ ਨਵ,
ਸਤ੍ਤਵਾਸੇ ਵਿਭਜਿਤ੍ਵਾ,
ਪਕਾਸੇਨ੍ਤਂ ਨਮੇ ਜਿਨਂ.
ਸੇਯ੍ਯਸ੍ਸ ¶ ਸਦਿਸੋ ਸੇਯ੍ਯੋ,
ਹੀਨੋਤਿ ਤਿਵਿਧੋ ਵਿਧੋ,
ਤਥਾ ਸਦਿਸਹੀਨਾਨਂ,
ਨਵਵਿਧੇ ਨੁਦਂ ਨਮੇ.
ਅਨਤ੍ਥਂ ¶ ਮੇ ਚਰਤਿ ਚ,
ਤਥਾ ਚਰਿ ਚਰਿਸ੍ਸਤਿ,
ਮਿਤ੍ਤਸ੍ਸ ਅਰਿਨੋਤ੍ਵਤ੍ਥਂ,
ਨਵਾਘਾਤੇ ਜਹਂ ਨਮੇ.
ਦਾਨਂ ਸੀਲਞ੍ਚ ਨਿਕ੍ਖਮਂ,
ਪਞ੍ਞਾ ਵੀਰਿਯਪਞ੍ਚਮਂ,
ਖਨ੍ਤੀ ¶ ਸਚ੍ਚਮਧਿਟ੍ਠਾਨਂ,
ਮੇਤ੍ਤੁਪੇਕ੍ਖਾਤਿ ਤਾਦਸ,
ਪੂਰੇਤ੍ਵਾ ਪਾਰਮੀ ਵਨ੍ਦੇ,
ਸਮ੍ਮਾਸਮ੍ਬੋਧਿਮਜ੍ਝਵਂ;
ਕਾਲ਼ਾਵਕਞ੍ਚ ਗਙ੍ਗੇਯ੍ਯਂ,
ਪਣ੍ਡਰਂ ਤਮ੍ਬ ਪਿਙ੍ਗਲਂ,
ਗਨ੍ਧ ਮਙ੍ਗਲ ਹੇਮਞ੍ਚ,
ਉਪੋਸਥ ਛਦ੍ਦਨ੍ਤਿਮੇ.
ਧਾਰੇਤਿ ਦਸਪੋਸਾਨਂ,
ਨਾਗੋ ਕਾਲ਼ਾਵਕੋ ਬਲਂ;
ਸਹਸ੍ਸਕੋਟਿਪੋਸਾਨਂ ¶ ;
ਛਦ੍ਦਨ੍ਤੋਵਾਰਨੁਤ੍ਤਮੋ.
ਦਸ ਸਹਸ੍ਸਕੋਟੀਨਂ,
ਪੋਸਾਨਂ ਬਲਧਾਰਣਂ;
ਛਦ੍ਦਨ੍ਤਾਨਂ ਦਸਨ੍ਨਞ੍ਚ,
ਦਸਕਾਯਬਲਂ ਨਮੇ.
ਠਾਨਾਠਾਨੇ ¶ ਵਿਪਾਕੇ ਚ,
ਮਗ੍ਗੇ ਸਬ੍ਬਤ੍ਥਗਾਮਿਨਂ;
ਨਾਨਾਧਾਤੂਸੁ ਲੋਕੇਸੁ,
ਅਧਿਮੁਤ੍ਤਿਮ੍ਹਿ ਪਾਣਿਨਂ;
ਪਰੋਪਰਿਯਤ੍ਤੇ ਞਾਣਂ,
ਇਨ੍ਦ੍ਰਿਯਾਨਞ੍ਚ ਪਾਣਿਨਂ;
ਝਾਨਾਦੀਸੁ ਞਾਣਂ ਪੁਬ੍ਬੇ,
ਨਿਵਾਸੇ ਦਿਬ੍ਬਚਕ੍ਖੁ ਚ;
ਆਸਵਕ੍ਖਯਞਾਣਨ੍ਤਿ,
ਦਸਬਲਞਾਣਂ ਨਮੇ.
ਮੂਲਗਨ੍ਧੋ ¶ ਸਾਰੋ ਫੇਗ੍ਗੁ,
ਤਚੋ ਪਪਟਿਕੋ ਰਸੋ;
ਪਤ੍ਤਂ ਪੁਪ੍ਫਂ ਫਲਞ੍ਚੇਵ,
ਗਨ੍ਧਗਨ੍ਧੋਤਿ ਸਂਵਰਂ;
ਸੁਗਨ੍ਧਂ ਦਸਗਨ੍ਧੇਹਿ,
ਵਿਲਿਮ੍ਪਨ੍ਤਂ ਸਦਾ ਨਮੇ.
ਸਮਾਧਿ ¶ ਞਾਣਵਿਪ੍ਫਾਰਾ,
ਅਧਿਟ੍ਠਾਨਂ ਵਿਕੁਬ੍ਬਨਾ;
ਮਨੋਮਯਾਰਿਯਾ ਇਦ੍ਧਿ,
ਤਥਾ ਕਮ੍ਮਵਿਪਾਕਜਾ.
ਵਿਜ੍ਜਾਮਯਾ ਪੁਞ੍ਞਵਤੋ;
ਪਯੋਗ ਪਚ੍ਚਯਿਦ੍ਧਿਤਿ;
ਅਗ੍ਗਪਤ੍ਤ ਦਸਿਦ੍ਧੀਨਂ,
ਪਾਟਿਹੇਰਂ ਕਰਂ ਨਮੇ.
ਮੁਤ੍ਤਾ ¶ ਮਣਿ ਵੇਲ਼ੁਰਿਯਂ,
ਸਙ੍ਖੋ ਸਲ੍ਲੋ ਪਵਾਲ਼ਕਂ;
ਸੁਵਣ੍ਣਂ ਰਜਤਂ ਲੋਹਿ,
ਤਙ੍ਕੋ ਮਸਾਰਗਲ੍ਲਨ੍ਤਿ;
ਦਸਧਾ ¶ ਰਤਨੇਹਿਗ੍ਗਂ,
ਭੋਗਿਂ ਪਞ੍ਞਾਮਣਿਂ ਨਮੇ.
ਸਿਥਿਲਂ ਧਨਿਤਂ ਦੀਘਂ,
ਰਸ੍ਸਞ੍ਚ ਗਰੁਕਂ ਲਹੁ;
ਨਿਗ੍ਗਹਿਤਂ ਵਿਮੁਤ੍ਤਞ੍ਚ,
ਸਮ੍ਬਨ੍ਧਞ੍ਚ ਵਵਤ੍ਥਿਤਂ;
ਵਿਵਰਨ੍ਤਂ ਨਮੇ ਧਮ੍ਮਂ,
ਦਸਬ੍ਯਞ੍ਜਨਭੇਦਿਤਂ.
ਪਸਾਦੋਜੋ ¶ ਮਧੁਰਤਾ,
ਸਮਤਾ ਸੁਖੁਮਾਲਤਾ;
ਸਿਲੇਸੋਦਾਰਤਾ ਕਨ੍ਤਿ,
ਅਤ੍ਥਬ੍ਯਤ੍ਤਿ ਸਮਾਧਯੋ;
ਦਸ ਸਦ੍ਦਗੁਣੋਪੇਤਂ,
ਧਮ੍ਮਂ ਪਾਤੁ ਕਰਂ ਨਮੇ.
ਲੋਭੋ ¶ ਦੋਸੋ ਮੋਹੋ ਮਾਨੋ,
ਉਦ੍ਧਚ੍ਚਂ ਦਿਟ੍ਠਿ ਸਂਸਯੋ;
ਅਹਿਰਿਕਮਨੋਤ੍ਤਪ੍ਪਂ,
ਥਿਨਨ੍ਤਿ ਸਬ੍ਬ ਦਾਹਕੇ;
ਕਿਲੇਸੇ ਦਸ ਤੇ ਸਦ੍ਧਿਂ,
ਵਾਸਨਾਯ ਜਹਂ ਨਮੇ.
ਸਤੇਰਾ ¶ ਦਣ੍ਡਮਣਿਕਾ,
ਮਚ੍ਛਵਿਲੋਲਗਗ੍ਗਰਾ;
ਸੁਕ੍ਖਾਸਨਿ ਕਪਿਸਿਸਾ,
ਵਿਚਕ੍ਕਾ ਸਞ੍ਞ ਕੁਕ੍ਕੁਟਾ;
ਨਵਾਸਨੀਹਿ ਫਾਲੇਨ੍ਤਂ,
ਤਿਬ੍ਬਂ ਪਞ੍ਞਾਸਨਿਂ ਨਮੇ.
ਰੋਦਨਾ ¶ ਕੋਧਾਵੁਧੋ ਚ,
ਉਜ੍ਝਨ੍ਤਿਸ੍ਸਰਿਯਂ ਤਥਾ;
ਪਟਿਸਙ੍ਖਾਨਂ,
ਖਨ੍ਤਿ ਅਟ੍ਠਬਲੇਸੁ ਤਂ;
ਪਥਵੀਸਦਿਸਂ ਵਨ੍ਦੇ,
ਅਟ੍ਠਮੇਨ ਵਿਨਾਯਕਂ.
ਕਾਮਰੋਗੋ ¶ ਚ ਪਟਿਘੋ,
ਮਾਨੋ ਦਿਟ੍ਠਿ ਚ ਸਂਸਯੋ;
ਭਵਰਾਗੋ ਅਵਿਜ੍ਜਾਤਿ,
ਸਤ੍ਤਾਨੁਸਯਿਨਂ ਨਮੇ.
ਤਿਤ੍ਥਿਯਾਪਕਤਿਮਹਾਸਾਵਕਾ,
ਅਗ੍ਗਸਾਵਕਾ ਪਚ੍ਚੇਕਬੁਦ੍ਧਸਮ੍ਬੁਦ੍ਧਾ;
ਵਿਸਿਟ੍ਠਂ ¶ ਸਬ੍ਬਥਾ ਛਸੁ,
ਪੁਬ੍ਬੇ ਨਿਵਾਸ ਵਿਞ੍ਞੂਸੁ;
ਤਿਲੋਕਮਕੁਟਂ ਨਮੇ.
ਬੁਦ੍ਧਚਕ੍ਖੁ ਸਮਨ੍ਤਾ ਚ,
ਞਾਣਂ ਯਂ ਦਿਬ੍ਬਚਕ੍ਖੁ ਚ;
ਧਮ੍ਮੋਤਿ ਪਞ੍ਚ ਚਕ੍ਖੂਹਿ,
ਦਸ੍ਸਾਵਿਂ ਮਾਰਜਿਂ ਨਮੇ.
ਖੁਦ੍ਦਕਾ ¶ ਖਣਿਕਾ ਓਕ੍ਕਨ੍ਤਿਕਾ ਚ,
ਫਰਣਾ ਤਥਾ ਉਬ੍ਬੇਗਾ;
ਪਞ੍ਚ ਪੀਤੀਹਿ ਪਿਨੇਨ੍ਤਂ,
ਰੁਚਿਯਾ ਚ ਨਮਾਮਹਂ.
ਦੁਕ੍ਖਂ ਸਮੁਦਯਸਚ੍ਚਂ,
ਨਿਰੋਧੋ ਮਗ੍ਗਸਚ੍ਚਕਂ;
ਚਤੁਸਚ੍ਚਮਭਿਜਾਨਂ ¶ ,
ਚਤੁਕਿਚ੍ਚੇਹਿ ਤਂ ਨਮੇ.
ਪੀਲ਼ਨਾ ਸਙ੍ਖਤਤ੍ਥੋ ਚ,
ਤਪੋ ਵਿਪਰਿਣਾਮਨਾ;
ਦੁਕ੍ਖਸਚ੍ਚਂ ਚਤੁਕ੍ਕੇਹਿ,
ਵਿਭਤ੍ਤਾਵਿਂ ਮੁਨਿਂ ਨਮੇ.
ਆਯੂਹਨਂ ¶ ਨਿਦਾਨਞ੍ਚ,
ਸਂਯੋਗੋ ਪਲਿਬੋਧਨਂ;
ਚਤੁਕ੍ਕੇਹਿ ਸਮੁਦਯਂ,
ਵਿਭਤ੍ਤਾਵਿਂ ਮੁਨਿਂ ਨਮੇ.
ਨਿਸ੍ਸਰਣਞ੍ਚ ਵਿਵੇਕੋ,
ਅਸਙ੍ਖਤਾਮਤਂ ਤਥਾ;
ਨਿਰੋਧਞ੍ਚ ਚਤੁਕ੍ਕੇਹਿ,
ਵਿਭਤ੍ਤਾਵਿਂ ਮੁਨਿਂ ਨਮੇ.
ਨਿਯ੍ਯਾਨਿਕੋ ¶ ਚ ਹੇਤ੍ਵਤ੍ਥੋ,
ਦਸ੍ਸਨਾਧਿਪਤੇਯ੍ਯਕਂ;
ਮਗ੍ਗਸਚ੍ਚਂ ਚਤੁਕ੍ਕੇਹਿ,
ਵਿਭਤ੍ਤਾਵਿਂ ਮੁਨਿਂ ਨਮੇ.
ਸਤ੍ਥਕੋ ¶ ਚ ਅਸਮ੍ਮੋਹੋ,
ਸਪ੍ਪਾਯੋ ਚੇਵ ਗੋਚਰੋ;
ਚਤੁਸਮ੍ਪਜਞ੍ਞਾ ਵਿਨਾ,
ਭਾਵਿਂ ਨਮੇ ਤਥਾਗਤਂ.
ਪਹਿਨਾਖਿਲ ਦੁਕ੍ਖਾਹਂ,
ਭਵਸਾਗਰ ਪਾਰਗੁਂ;
ਵਨ੍ਦੇ ਸਾਰਗੁਣੋਪੇਤਂ,
ਤੇਨਮ੍ਹਿ ਭਵਪਾਰਗੋ.
ਰੂਪਾਰੂਪਵਿਲਾਸਗ੍ਗ ¶ ,
ਰੂਪਾਚਿਨ੍ਤੇਯ੍ਯ ਸਂਯੁਤ੍ਤਂ;
ਵਨ੍ਦੇ ਸਾਰਗੁਣੋਪੇਤਂ,
ਤੇਨਮ੍ਹਾਤੁਲਰੂਪਵਾ.
ਇਦ੍ਧਿ ¶ ਇਦ੍ਧਿ ਵਿਲਾਸਗ੍ਗ,
ਇਦ੍ਧਿ ਚਿਨ੍ਤੇਯ੍ਯ ਸਂਯੁਤ੍ਤਂ;
ਵਨ੍ਦੇ ਸਾਰਗੁਣੇਪੇਤਂ,
ਤੇਨਮ੍ਹਾ ਤੁਲਇਦ੍ਧਿਮਾ.
ਵਾਚਾ ਵਾਚਾ ਵਿਲਾਸਗ੍ਗ,
ਵਾਚਾ ਚਿਨ੍ਤੇਯ੍ਯ ਸਂਯੁਤ੍ਤਂ;
ਵਨ੍ਦੇ ਸਾਰਗੁਣੋਪੇਤਂ,
ਤੇਨਮ੍ਹਾ ਤੁਲਵਾਚਕੋ.
ਞਾਣ ¶ ਞਾਣ ਵਿਲਾਸਗ੍ਗ,
ਞਾਣਾਚਿਨ੍ਤੇਯ੍ਯ ਸਂਯੁਤ੍ਤਂ;
ਵਨ੍ਦੇ ਸਾਰਗੁਣੋਪੇਤਂ,
ਤੇਨਮ੍ਹਾ ਤੁਲਞਾਣਵਾ.
ਸਜ੍ਝਂ ਹੇਮਞ੍ਚ ਰਤਨਂ,
ਗੇਹਂ ਵਤ੍ਥਞ੍ਚ ਭੋਜਨਂ;
ਤਦਞ੍ਞੇਪਿ ¶ ਯਥਾਚਿਤ੍ਤਂ,
ਮਾਪੇਯ੍ਯਾਹਂ ਨਮੇ ਜਿਨਂ.
ਸਜ੍ਝਂ ਹੇਮਞ੍ਚ ਰਤਨਂ,
ਗੇਹਂ ਵਤ੍ਥਞ੍ਚ ਭੋਜਨਂ;
ਤਦਞ੍ਞੇਪਿ ਯਥਾਚਿਤ੍ਤਂ,
ਮਾਪੇਯ੍ਯਂ ਕਮ੍ਮਜਿਦ੍ਧਿਯਾ.
ਸਤ੍ਤਬੋਜ੍ਝਙ੍ਗ ¶ ਰਤਨੋ,
ਸਦ੍ਧਾਦਿਰਤਨੋ ਮੁਨਿ;
ਸਤਿਪ੍ਪਭੁਤਿਰਤਨੋ,
ਵਨ੍ਦੇ ਤਂ ਪੁਰਿਸੁਤ੍ਤਮਂ.
ਚਕ੍ਕਾਦਿਸਤ੍ਤਰਤਨਂ,
ਮੁਤ੍ਤਾਦਿਰਤਨਂ ਸੁਭਂ;
ਵਤ੍ਥਪ੍ਪਭੁਤਿਰਤਨਂ,
ਛਨ੍ਦਕ੍ਖਣੇ ਲਭਾਮਹਂ.
ਸਮ੍ਪੁਣ੍ਣਚਿਤ੍ਤਸਙ੍ਕਪ੍ਪੋ ¶ ,
ਯਥਾਕਙ੍ਖਿਤਮਾਪਕੋ,
ਕੇਨਚਿਨਭਿਭੂਤੋ ਯੋ,
ਸਬ੍ਬਾਭਿਭੂ ਨਮੇ ਜਿਨਂ.
ਸਮ੍ਪੁਣ੍ਣਚਿਤ੍ਤਸਙ੍ਕਪ੍ਪੋ ¶ ,
ਯਥਾਕਙ੍ਖਿਤਮਾਪਕੋ,
ਕੇਨਚਿਨਭਿਭੂਤਮ੍ਹਿ,
ਸਬ੍ਬਾਭਿਭੂ ਭਵੇ ਭਵੇ.
ਦਸ ਛਦ੍ਦਨ੍ਤਰਾਜਾਵ,
ਦਸ ਕਾਯਬਲੋ ਮੁਨਿ;
ਦਸ ਞਾਣਬ੍ਬਲੋਤੁਲ੍ਯੋ,
ਵਨ੍ਦੇ ਤਂ ਸਮਣੁਤ੍ਤਮਂ.
ਅਤਿਕਾਯਜਵੋ ¶ ਬੁਦ੍ਧੋ,
ਰਞ੍ਞਾਜਵਨਹਂਸਤੋ;
ਕਾ ਕਥਾ ਞਾਣਵੇਗਸ੍ਸ,
ਵਨ੍ਦੇ ਤਂ ਸਮਣੁਤ੍ਤਮਂ.
ਛਦ੍ਦਨ੍ਤਨਾਗਰਾਜਾਵ,
ਭਵੇ ਭਵੇ ਮਹਬ੍ਬਲੋ;
ਰਾਜਾਜਵਨਹਂਸੋਵ,
ਪਰਮਗ੍ਗਜਵੋ ਭਵੇ.
ਉਦਕਾ ¶ ਕਾਸਚਾਰੀ ਚ,
ਮਹਿਨਿਮੁਜ੍ਜਕੋ ਜਿਨੋ;
ਮਾਪਕੋ ਚ ਯਥਾ ਚਿਤ੍ਤਂ,
ਵਨ੍ਦੇ ਤਂ ਞੇਯ੍ਯਪਾਰਗੁਂ.
ਉਦਕਾ ਕਾਸਚਾਰੀ ਚ,
ਮਹਿਨਿਮੁਜ੍ਜਕੋ ਭਵੇ;
ਮਾਪਕੋ ਚ ਯਥਾਚਿਤ੍ਤਂ,
ਭਵਸੋ ਕਮ੍ਮਜਿਦ੍ਧਿਯਾ.
ਗਾਮੇ ¶ ਵਨੇ ਚ ਸਬ੍ਬਤ੍ਥ,
ਦੇਵੇਹਿ ਮਨੁਸ੍ਸੇਹਿ ਚ;
ਆਭਤਾਨਨ੍ਤਲਾਭਸ੍ਸ,
ਸਦਾ ਯਸ੍ਸ ਮਹੇਸਿਨੋ;
ਪਤ੍ਤਲਾਭਗ੍ਗਤਂ ਲੋਕਂ,
ਤਂ ਵਨ੍ਦੇ ਮੁਨਿਪੁਙ੍ਗਵਂ.
ਗਾਮੇ ¶ ਵਨੇ ਚ ਸਬ੍ਬਤ੍ਥ,
ਦੇਵੇਹਿ ਮਨੁਸ੍ਸੇਹਿ ਚ;
ਆਭਤਾ ਨਨ੍ਤਲਾਭੋ ਮੇ,
ਸਦਾ ਹੋਤੁ ਭਵਾਭਵੇ.
ਪੁਞ੍ਞਸ੍ਸਿਮਸ੍ਸ ਤੇਜੇਨ,
ਯਥਾ ਚਿਤ੍ਤਂ ਸਮਿਜ੍ਝਤੁ;
ਸਬ੍ਬਿਚ੍ਛਾ ¶ ਸਬ੍ਬਚਿਨ੍ਤਾ ਚ,
ਖਿਪ੍ਪਂ ਮੇ ਜਾਤਿਜਾਤਿਯਂ.
ਨਤ੍ਥੀਤਿ ਵਚਨਂ ਦੁਕ੍ਖਂ,
ਦੇਹੀਤਿ ਵਚਨਂ ਤਥਾ;
ਤਸ੍ਮਾ ਨਤ੍ਥੀਤਿ ਦੇਹੀਤਿ,
ਮਾ ਮੇ ਹੋਤੁ ਭਵਾਭਵੇ.
ਸਬ੍ਬਂ ¶ ਪਰਵਸਂ ਦੁਕ੍ਖਂ,
ਸਬ੍ਬਮਿਸ੍ਸਰਿਯਂ ਸੁਖਂ;
ਸਬ੍ਬਂ ਪਰਵਸਮਤ੍ਥੁ,
ਸਬ੍ਬਮਿਸ੍ਸਰਿਯਂ ਭਵੇ.
ਵਿਤਕ੍ਕੇਨ੍ਤੋ ਭਜ੍ਜਕਾਯੋ,
ਸਬ੍ਬਾਵੁਧ ਵਾਰਣੋ ਚ;
ਛਦ੍ਦਨ੍ਤ ਵਾਰਣਬਲੋ,
ਭਵੇਯ੍ਯਂ ਜਾਤਿਜਾ ਤਿਯਂ.
ਸੁਭਲਕ੍ਖਣਸਮ੍ਪਨ੍ਨੋ ¶ ,
ਸੁਵਣ੍ਣਵਣ੍ਣਵਾ ਭਵੇ;
ਬ੍ਰਹ੍ਮਸ੍ਸਰੋ ਕਰਵਿਕ,
ਭਾਣੀ ਚ ਜਾਤਿਜਾਤਿਯਂ.
ਭੂਰਿਮਪਞ੍ਞੋ ਸਿਪ੍ਪਾਨਂ,
ਸਬ੍ਬੇਸਂ ਕੁਸਲੋ ਭਵੇ;
ਵਿਸਜ੍ਜੇਤੁਂ ਸਮਤ੍ਥੋਵ,
ਸਬ੍ਬਪੁਚ੍ਛਾਨਂ ਠਾਨਸੋ.
ਵੇਰਾਧਂਸੀਯ ¶ ਭੋਗਾ ਚ,
ਅਨਨ੍ਤਾਖੀਣ ਭੋਗਵਾ;
ਅਨਨ੍ਤਾਭਜ੍ਜ ਪਰਿਸੋ,
ਭਵਸੋ ਪਾਪੁਣੇ ਸਿਵਂ.
ਮਾ ¶ ਨਸ੍ਸੇਯ੍ਯਂ ਪਸਯ੍ਹੇਯ੍ਯਂ,
ਉਸ੍ਸੁਕ੍ਕੇਹਿ ਪ੍ਯਹਂ ਸਹ;
ਪਞ੍ਚਵੇਰੇਹਿ ਕੋਟੀਹਿ,
ਭਣ੍ਡਂ ਵਾ ਅਕਾਤੁਕਾਮਿਤਂ.
ਮੇਘਂ ਵਾਤਞ੍ਚ ਰਤਨਂ,
ਧਞ੍ਞਂ ਵਤ੍ਥਞ੍ਚ ਭੋਜਨਂ;
ਸਬ੍ਬਿਚ੍ਛਿਤਂ ਤਦਞ੍ਞਮ੍ਪਿ,
ਮਾਪੇਯ੍ਯਂ ਕਮ੍ਮਜਿਦ੍ਧਿਯਾ.
ਪੁਞ੍ਞੇਨੇਤੇਨ ¶ ਨਿਬ੍ਬਾਨਂ,
ਸਨ੍ਤਂ ਪਪ੍ਪੋਮਿ ਤਾਵਤਾ;
ਭਵੇਯ੍ਯਂ ਸਬ੍ਬਜਾਤੀਸੁ,
ਚਤੁਸਮ੍ਪਤ੍ਤਿਯਾ ਸਦਾ;
ਚਤੁਚਕ੍ਕੇਨ ਸਮ੍ਪਨ੍ਨੋ,
ਸਦ੍ਧਮ੍ਮੇਹਿ ਚ ਸਤ੍ਤਹਿ.
ਸਮ੍ਮਾਦਿਟ੍ਠਿ ¶ ਵਸੁਪੇਤੇ,
ਕੁਲਮ੍ਹਿ ਸੇਟ੍ਠਸਮ੍ਮਤੇ,
ਸਬ੍ਬਸਕ੍ਕਤ ਸਂਸੁਦ੍ਧੇ;
ਭਵੇ ਤਿਹੇਤੁਸਨ੍ਧਿਕੋ.
ਘਾਸਚ੍ਛਾਦਨਂ ਭੋਗਞ੍ਚ,
ਨੇਵ ਹਤ੍ਥੇਨ ਕਾਤੁਨ,
ਭੁਞ੍ਜੇਯ੍ਯਮਿਦ੍ਧਿਯਾਤ੍ਵੇਵ,
ਮਾਪੇਤ੍ਵਾ ਯਾਵਦਤ੍ਥਕਂ.
ਮਨੁਸ੍ਸਾਨਂ ¶ ਅਤਿਕ੍ਕਮ੍ਮ,
ਦੇਵਾਨਂ ਵਿਯ ਭੋਜਨਂ,
ਵਤ੍ਥਂ ਭੋਗੋ ਚ ਮੇ ਹੋਨ੍ਤੁ,
ਪਰਿਵਾਰਾਤਿਸੁਨ੍ਦਰਾ.
ਦਸਾਸੁਤ੍ਤਂਪਿ ਮੇ ਭੋਗਂ,
ਪਞ੍ਚਵੇਰਾ ਭਵੇ ਭਵੇ;
ਮਾਗਣ੍ਹੇਯ੍ਯੁਞ੍ਚ ਨਸ੍ਸੇਯ੍ਯੁਂ,
ਅਸੋਕੋ ਭੋਗਹੇਤੁਮੇ.
ਸਬ੍ਬਙ੍ਗਸੁਭ ¶ ਸਮ੍ਪਨ੍ਨੋ,
ਸਿਙ੍ਗੀਨਿਕ੍ਖ ਸਵਣ੍ਣ ਵਾ;
ਬਾਤ੍ਤਿਂਸ ਲਕ੍ਖਣੂਪੇਤੋ,
ਅਤਪ੍ਪਨ ਰੂਪ ਵਾ ਭਵੇ.
ਕਾਯੋ ਚਨ੍ਦਨਗਨ੍ਧੋ ਚ,
ਮੁਖਂ ਉਪ੍ਪਲਗਨ੍ਧਿਕਂ;
ਅਟ੍ਠਙ੍ਗਿਕੋ ¶ ਕਰਵਿਕ,
ਮਞ੍ਜੂਘੋਸੋ ਚ ਮੇ ਹੋਤੁ.
ਤਿਕ੍ਖ ਗਮ੍ਭੀਰ ਪਞ੍ਞੋ ਚ,
ਹਾਸਾਤਿਜਵਪਞ੍ਞਵਾ,
ਭੂਰਿ ਨਿਬ੍ਬੇਧ ਪਞ੍ਞੋ ਚ;
ਸਬ੍ਬਪਞ੍ਹਵਿਸਜ੍ਜਨੋ.
ਅਨ੍ਤੋ ¶ ਸੋਲ਼ਸਵਸ੍ਸਸ੍ਸ,
ਤਿਪੇਟਕਧਰੋ ਭਵੇ;
ਸਬ੍ਬਕਮ੍ਮੇਸੁ ਸਿਪ੍ਪੇਸੁ,
ਵਿਜ੍ਜਾਠਾਨੇਸੁ ਪਾਰਗੂ.