📜
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਜਿਨਾਲਙ੍ਕਾਰ
ਪਣਾਮਦੀਪਨੀਗਾਥਾ
ਯੋ ਲੋਕਤ੍ਥਾਯ ਬੁਦ੍ਧੋ ਧਨਸੁਤਭਰਿਯਾਅਙ੍ਗਜੀਵੇ ਚਜਿਤ੍ਵਾ ਪੂਰੇਤ੍ਵਾ ਆਰਮਿਯੋ ਤਿਦਸਮਨੁਪਮੇ ਬੋਧਿਪਕ੍ਖੀਯਧਮ੍ਮੇ,
ਪਤ੍ਵਾ ਬੋਧਿਂ ਵਿਸੁਦ੍ਧਂ ਸਕਲਗੁਣਦਦਂ ਸੇਟ੍ਠਭੂਤੋ ਤਿਲੋਕੇ,
ਕਤ੍ਵਾ ਦੁਕ੍ਖਸ੍ਸ ਅਨ੍ਤਂ ਕਤਸੁਭਜਨਤਂ ਦੁਕ੍ਖਤੋ ਮੋਚਯਿਤ੍ਥ.
ਨਤ੍ਵਾਨਾਹਂ ਜਿਨਨ੍ਤਂ ਸਮੁਪਚਿਤਸੁਭਂ ਸਬ੍ਬਲੋਕੇਕਬਨ੍ਧੁਂ,
ਨਾਹੁ ਯੇਨਪਿ ਤੁਲ੍ਯੋ ਕੁਸਲਮਹਿਮਤੋ ਉਤ੍ਤਮੋ ਭੂਤਲੋਕੇ ਤਸ੍ਸੇਵਾਯਂ ਉਵਿਮ੍ਹਂ ਸੁਵਿਪੁਲਮਮਲਂ ਬੋਧਿਸਮ੍ਭਾਰਭੂਤਂ,
ਹੇਤੁਂ ਹੇਤ੍ਵਾਨੁਰੂਪਂ ਸੁਗਤਗਤਫਲਂ ਭਾਸਤੋ ਮੇ ਸੁਣਾਥ.
ਯੋਗਾਵਚਰਸਮ੍ਪਤ੍ਤਿਦੀਪਨੀਗਾਥਾ
ਜਾਤੋ ਯੋ ਨਵਮੇ ਖਣੇ ਸੁਤਧਰੋ ਸੀਲੇਨ ਸੁਦ੍ਧਿਨ੍ਦ੍ਰਿਯੋ ਸਂਸਾਰਂ ਅਯਤੋ ਭਵਕ੍ਕਯਕਰਂ ਦਿਸ੍ਵਾ ਸਿਵਂ ਖੇਮਤੋ,
ਤਂ ਸਮ੍ਪਾਪਕਮਗ੍ਗਦੇਸਕਮੁਨਿਂ ਸਮ੍ਪੂਜਯਨ੍ਤੋ ਤਤੋ ਉਦ੍ਧਾਨੁਸ੍ਸਤਿਭਾਵਨਾਦਿਕਮਤੋ ਸਮ੍ਪਾਦਯੇ ਤਂ ਸਿਵਂ.
ਵਤ੍ਥੁਵਿਸੋਧਨੀਗਾਥਾ
ਬੁਦ੍ਧੋਤਿ ਕੋ ਬੁਦ੍ਧਗੁਣੋ ਤਿ ਕੋ ਸੋ,
ਅਚਿਨ੍ਤਯਾਦਿਤ੍ਤਮੁਪਾਗਤੋ ਯੋ;
ਅਨਞ੍ਞਸਾਧਾਰਣਭੂਤਮਤ੍ਥਂ,
ਅਕਾਸਿ ਕਿਂ ਸੋ ਕਿਮਵੋਚ ਬੁਦ੍ਧੋ.
ਵਿਸੁਦ੍ਧਖਨ੍ਧਸਨ੍ਤਾਨੋ ਬੁਦ੍ਧੋਤਿ ਨਿਯਮੋ ਕਤੋ,
ਖਨ੍ਧਸਨ੍ਤਾਨਸੁਦ੍ਧੀ ਤੁ ਗੁਣੋਤਿ ਨਿਯਮੋ ਕਤੋ.
ਅਕਾਸਿ ਕਿਚ੍ਚਾਨਿ ਦਿਨੇਸੁ ਪਞ੍ਚ,
ਪਸਾਦਯਞ੍ਚਿਦ੍ਧਿਬਲੇਨ ਸੇਨ;
ਜਨਾਨਸੇਸਂ ਚਰਿਯਾਨੁਕੂਲਂ,
ਞਤ੍ਵਾਨਵੋਚਾਨੁਸਯਪ੍ਪਹਾਨਂ.
ਅਨਞ੍ਞਸਾਧਾਰਣਦੀਪਨੀਗਾਥਾ
ਅਬ੍ਭੁਗ੍ਗਤਾ ਯਸ੍ਸ ਗੁਣਾ ਅਨਨ੍ਤਾ,
ਤਿਬੁਦ੍ਧਖੇਤ੍ਤੇਕਦਿਵਾਕਰੋਤਿ;
ਜਾਨਾਤਿ ਸੋ ਲੋਕਮਿਮਂ ਪਰਞ੍ਚ,
ਸਚੇਤਨਞ੍ਚੇਵ ਅਚੇਤਨਞ੍ਚ;
ਸਕਸ੍ਸ ਸਨ੍ਤਾਨਗਤਂ ਪਰੇਸਂ,
ਬ੍ਯਤੀਤਮਪ੍ਪਤ੍ਤਕਮਤ੍ਰਭੂਤਂ.
ਅਨਨ੍ਤਸਤ੍ਤੇਸੁ ਚ ਲੋਕਧਾਤੁਸੁ,
ਏਕੋਵ ਸਬ੍ਬੇਪਿ ਸਮਾ ਨ ਤੇਨ;
ਦਿਸਾਸੁ ਪੁਬ੍ਬਾਦਿਸੁ ਚਕ੍ਕਵਾਲ਼ਾ,
ਸਹਸ੍ਸਸਙ੍ਖਾਯਪਿ ਅਪ੍ਪਮੇਯ੍ਯਾ;
ਯੇ ਤੇਸੁ ਦੇਵਾ ਮਨੁਜਾ ਚ ਬ੍ਰਹ੍ਮਾ,
ਏਕਤ੍ਥ ਸਙ੍ਗਮ੍ਮ ਹਿ ਮਨ੍ਤਯਨ੍ਤਾ.
ਅਨਾਦਿਕਾਲਾਗਤਨਾਮਰੂਪਿਨਂ,
ਯਥਾਸਕਂ ਹੇਤੁਫਲਤ੍ਤਵੁਤ੍ਤਿਨਂ;
ਤਬ੍ਭਾਵਭਾਵਿਤ੍ਤਮਸਮ੍ਭੁਣਨ੍ਤਾ,
ਨਾਨਾਵਿਪਲ੍ਲਾਸਮਨੁਪਵਿਟ੍ਠਾ.
ਕਮ੍ਮਪ੍ਪਵਤ੍ਤਿਞ੍ਚ ਫਲਪ੍ਪਵਤ੍ਤਿਂ,
ਏਕਤ੍ਤਨਾਨਤ੍ਤਨਿਰੀਹਧਮ੍ਮਤਂ;
ਵਿਞ੍ਞਤ੍ਤਿਸਨ੍ਤਾਨਘਨੇਨ ਛਨ੍ਨਤੋ,
ਸਿਵਞ੍ਜਸਂ ਨੋ ਭਣਿਤੁਂ ਸਮਤ੍ਥਾ.
ਏਕੋ ਵ ਸੋ ਸਨ੍ਤਿਕਰੋ ਪਭਙ੍ਕਰੋ,
ਸਙ੍ਖਾਯ ਞੇਯ੍ਯਾਨਿ ਅਸੇਸਿਤਾਨਿ;
ਤੇਸਞ੍ਹਿ ਮਜ੍ਝੇ ਪਰਮਾਸਮ੍ਭੀਵਦਂ,
ਸਿਵਞ੍ਜਸਂ ਦੀਪਯਿਤੁਂ ਸਮਤ੍ਥੋ.
ਸੋ ਗੋਤਮੋ ਸਕ੍ਯਸੁਤੋ ਮੁਨਿਨ੍ਦੋ,
ਸਬ੍ਬਸ੍ਸ ਲੋਕਸ੍ਸ ਪਦੀਪਭੂਤੋ;
ਅਨਨ੍ਤਸਤ੍ਤੇ ਭਵਬਨ੍ਧਨਮ੍ਹਾ,
ਮੋਚੇਸਿ ਕਾਰੁਞ੍ਞਫਲਾਨੁਪੇਕ੍ਖੀ.
ਅਭਿਨੀਹਾਰਦੀਪਨੀਗਾਥਾ
ਵਦੇਥ ਤਸ੍ਸੀਧ ਅਨਪ੍ਪਕਂ ਗੁਣਂ,
ਨ ਤੇਨ ਤੁਲ੍ਯੋ ਪਰਮੋ ਚ ਵਿਜ੍ਜਤਿ;
ਕਿਂ ਤਂ ਗੁਣਂ ਤਂ ਸਦਿਸੇਨ ਦਿਨ੍ਨਂ,
ਸਯਂਕਤਂ ਕਿਨ੍ਨੁ ਅਧਿਚ੍ਚਲਦ੍ਧਂ.
ਨਾਧਿਚ੍ਚਲਦ੍ਧਂ ਨ ਚ ਪੁਬ੍ਬਬੁਦ੍ਧਾ,
ਬ੍ਰਹ੍ਮਾਦਿਨਂ ਸਮ੍ਮੁਤਿਯਾ ਬਹੂਨਂ;
ਸਯਂਕਤੇਨੇਵ ਅਨੋਪਮੇਨ,
ਦਾਨਾਦਿਨਾ ਲਦ੍ਧਮਿਦਂ ਵਿਪਾਕਂ.
ਇਤੋ ਚਤੁਨ੍ਨਂ ਅਸਙ੍ਖਿਯਾਨਂ,
ਸਤਂਸਹਸ੍ਸਾਨਧਿਕਾਨਮਤ੍ਥਕੇ;
ਕਪ੍ਪੇ ਅਤੀਤਮ੍ਹਿ ਸੁਮੇਧਤਾਪਸੋ,
ਵੇਹਾਯਸਂ ਗਚ੍ਛਤਿ ਇਦ੍ਧਿਯਾ ਤਦਾ.
ਦਿਪਙ੍ਕਰੋ ਨਾਮ ਜਿਨੋ ਸਸਙ੍ਘੋ,
ਰਮ੍ਮਂ ਪੁਰਂ ਯਾਤਿ ਵਿਰੋਚਮਾਨੋ;
ਮਨੁਸ੍ਸਦੇਵੇਹਿਭਿਪੂਜਿਯਨ੍ਤੋ,
ਸਹਸ੍ਸਰਂਸਿ ਵਿਯ ਭਾਣੁਮਾ ਨਭੇ.
ਤਸ੍ਸਞ੍ਜਸਂ ਕਾਤੁਬਹੁਸ੍ਸਹਾਨਂ,
ਬੁਦ੍ਧੋਤਿ ਸੁਤ੍ਵਾ ਸੁਮਨੋ ਪਤੀਤੋ;
ਮਮਜ੍ਜ ਦੇਹਂ ਪਨਿਮਸ੍ਸ ਦਤ੍ਵਾ,
ਬੁਦ੍ਧੋ ਅਹਂ ਹੇਸ੍ਸਮਨਾਗਤੇਦਿਸੋ.
ਤਸ੍ਮਿਞ੍ਜਸੇ ਕਨ੍ਦਰਤਮ੍ਹਿ ਪਙ੍ਕੇ,
ਕਤ੍ਵਾਨ ਸੇਤੁਂ ਸਯਿ ਸੋ ਸਦੇਹਂ;
ਬੁਦ੍ਧੋ ਅਯਂ ਗਚ੍ਛਤੁ ਪਿਟ੍ਠਿਯਾ ਮਮਂ,
ਬੋਧਿਸ੍ਸਚੇ ਹੇਸ੍ਸਤਿ ਮੇ ਅਨਾਗਤੇ.
ਉਸ੍ਸੀਸਕਂ ਯਾਤਿ ਜਿਨੋ ਹਿ ਤਸ੍ਸ,
ਅਜ੍ਝਾਸਯੋ ਸਿਜ੍ਝਤਿਮਸ੍ਸਨਾਗਤੇ;
ਞਤ੍ਵਾਨ ਬ੍ਯਾਕਾਸਿ ਅਸੇਸਤੋ ਹਿ,
ਬੁਦ੍ਧੋ ਅਯਂ ਹੇਸ੍ਸਤਿਨਾਗਤੇਸੁ.
ਸੁਤ੍ਵਾਨ ਪਤ੍ਤੋ ਵ ਮਹਾਭਿਸੇਕਂ,
ਲਦ੍ਧਂ ਵ ਬੋਧਿਂ ਸਮਨੁਸ੍ਸਰਨ੍ਤੋ;
ਪੂਜੇਤ੍ਵਾ ਯਾਤੇ ਮੁਨਿਦੇਵਮਾਨੁਸੇ,
ਉਟ੍ਠਾਯ ਸੋ ਸਮ੍ਮਸਿ ਪਾਰਮੀ ਦਸ.
ਦਲ਼੍ਹਂ ਗਹੇਤ੍ਵਾ ਸਮਤਿਂਸਪਾਰਮੀ,
ਸਿਕ੍ਖਤ੍ਤਯਞ੍ਚਸ੍ਸ ਜਿਨਸ੍ਸ ਸਨ੍ਤਿਕੇ;
ਕਾਤੁਂ ਸਮਤ੍ਥੋ ਪਿ ਭਵਸ੍ਸ ਪਾਰਂ,
ਸਤ੍ਤੇਸੁ ਕਾਰੁਞ੍ਞਬਲਾ ਭਵਂ ਗਤੋ.
ਉਪ੍ਪਨ੍ਨੁਪ੍ਪਨ੍ਨਕੇ ਸੋ ਜਿਨਵਰਮਤੁਲੇ ਪੂਜਯਿਤ੍ਵਾ ਅਸੇਸਂ ਬੁਦ੍ਧੋ ਏਸੋ ਹਿ ਓਸੋ ਭਵਤਿ ਨਿਯਮਤੋ ਬ੍ਯਾਕਤੋ ਤੇਹਿ ਤੇਹਿ ਤੇਸਂ ਤੇਸਂ ਜਿਨਾਨਂ ਅਚਨਮਨੁਪਮਂ ਪੂਜਯਿਤ੍ਵਾ ਸਿਰੇਨ,
ਤਂ ਤਂ ਦੁਕ੍ਖਂ ਸਹਿਤ੍ਵਾ ਸਕਲਗੁਣਦਦਂ ਪਾਰਮੀ ਪੂਰਯਿਤ੍ਥ.
ਬੋਧਿਸਮ੍ਭਾਰਦੀਪਨੀਗਾਥਾ
ਸੋ ਦੁਕ੍ਖਖਿਨ੍ਨਜਨਦਸ੍ਸਨਦੁਕ੍ਖਖਿਨ੍ਨੋ,
ਕਾਰੁਞ੍ਞਮੇਵ ਜਨਤਾਯ ਅਕਾਸਿ ਨਿਚ੍ਚਂ;
ਤੇਸਂ ਹਿ ਮੋਚਨਮੁਪਾਯਮਿਦਨ੍ਤਿ ਞਤ੍ਵਾ,
ਤਾਦੀਪਰਾਧਮਪਿ ਅਤ੍ਤਨਿ ਰੋਪਯੀ ਸੋ.
ਦਾਨਾਦਿਨੇਕਵਰਪਾਰਮਿਸਾਗਰੇਸੁ,
ਓਗਾਲ਼੍ਹਤਾਯਪਿ ਪਦੁਟ੍ਠਜਨੇਨ ਦਿਨ੍ਨਂ;
ਦੁਕ੍ਖਂ ਤਥਾ ਅਤਿਮਹਨ੍ਤਤਰਮ੍ਪਿ ਕਿਞ੍ਚਿ,
ਨਾਞ੍ਞਾਸਿ ਸਤ੍ਤਹਿਤਮੇਵੇਅ ਗਵੇਸਯਨ੍ਤੋ.
ਛੇਤ੍ਵਾਨ ਸੀਸਂ ਹਿ ਸਕਂ ਦਦਨ੍ਤੋ,
ਮਂਸਂ ਪਚਿਤ੍ਵਾਨ ਸਕਂ ਦਦਨ੍ਤੋ;
ਸੋ ਚਤ੍ਤਗਤ੍ਤੋ ਪਣਿਧਾਨਕਾਲੇ,
ਦੁਟ੍ਠਸ੍ਸ ਕਿਂ ਦੁਸ੍ਸਤਿ ਛੇਦਨੇਨ.
ਏਵਂ ਅਨਨ੍ਤਮਪਿ ਜਾਤਿਸਤੇਸੁ ਦੁਕ੍ਖਂ,
ਪਤ੍ਵਾਨ ਸਤ੍ਤਹਿਤਮੇਵ ਗਵੇਸਯਨ੍ਤੋ;
ਦੀਪਙ੍ਕਰੇ ਗਹਿਤਸੀਲਸਮਾਧਿਪਞ੍ਞਂ,
ਪਾਲੇਸਿ ਯਾਵ ਸਕਬੋਧਿਤਲੇ ਸੁਨਿਟ੍ਠੋ.
ਯਦਾਭਿਨੀਹਾਰਮਕਾ ਸੁਮੇਧੋ,
ਯਦਾ ਚ ਮਦ੍ਦਿਂ ਅਦਦਾ ਸਿਵਿਨ੍ਦੋ;
ਏਤ੍ਥਨ੍ਤਰੇ ਜਾਤਿਸੁ ਕਿਞ੍ਚਿਪੇਕਂ,
ਨਿਰਤ੍ਥਕਂ ਨੋ ਅਗਮਾਸਿ ਤਸ੍ਸ.
ਮਹਾਸਮੁਦ੍ਦੇ ਜਲਬਿਨ੍ਦੁਤੋਪਿ,
ਤਦਨ੍ਤ੍ਰੇ ਜਾਤਿ ਅਨਪ੍ਪਕਾ ਵ;
ਨਿਰਨ੍ਤਰਂ ਪੂਰਿਤਪਾਰਮੀਨਂ,
ਕਥਂ ਪਮਾਣਂ ਉਪਮਾ ਕੁਹਿਂ ਵਾ.
ਯੋ ਮਗ੍ਗਪਸ੍ਸੇ ਮਧੁਰਮ੍ਬਬੀਜਂ,
ਛਾਯਾਫਲਤ੍ਥਾਯ ਮਹਾਜਨਾਨਂ;
ਰੋਪੇਸਿ ਤਸ੍ਮਿਂ ਹਿ ਖਣੇਵ ਤੇਨ,
ਛਾਯਾਫਲੇ ਪੁਞ੍ਞਮਲਦ੍ਧਮੁਦ੍ਧਂ.
ਤਥੇਵ ਸਂਸਾਰਪਥੇ ਜਨਾਨਂ,
ਹਿਤਾਯ ਅਤ੍ਤਨਮਭਿਰੋਪਿਤਕ੍ਖਣੇ;
ਸਿਦ੍ਧਂ ਵ ਪੁਞ੍ਞੂਪਰਿ ਤਸ੍ਸ ਤਸ੍ਮਿਂ,
ਧਨਙ੍ਗਜੀਵਂ ਪਿ ਹਰਨ੍ਤਿ ਯੇ ਯੇ.
ਸੋ ਸਾਗਰੇ ਜਲਧਿਕਂ ਰੁਹਿਰਂ ਅਦਾਸਿ,
ਭੂਮਾਪਰਾਜਿਯ ਸਮਂਸਮਦਾਸਿ ਦਾਨਂ;
ਮੇਰੁਪ੍ਪਮਾਣਮਧਿਕਞ੍ਚ ਸਮੋਲ਼ਿਸੀਸਂ,
ਖੇ ਤਾਰਕਾਧਿਕਤਰਂ ਨਯਨਂ ਅਦਾਸਿ.
ਗਬ੍ਭੋਕ੍ਕਨ੍ਤਿਦੀਪਨੀਗਾਥਾ
ਗਮ੍ਭੀਰਪਾਨਦਾਨਾਦਿਸਾਗਰੇਸੁ ਹਿ ਥਾਮਸਾ;
ਤਰਨ੍ਤੋ ਮਦ੍ਦਿਦਾਨੇਨ ਨਿਟ੍ਠਾਪੇਤ੍ਵਾਨ ਪਾਰਮੀ.
ਵਸਨ੍ਤੋ ਤੁਸੀਤੇ ਕਾਯੇ ਬੋਧਿਪਰਿਪਾਕਮਾਗਮ੍ਮ;
ਆਯਾਚਨਾਯ ਚ ਦੇਵਾਨਂ ਮਾਤੁਗਬ੍ਭਮੁਪਾਗਮਿ.
ਸਤੋ ਚ ਸਮ੍ਪਜਾਨੋ ਚ ਮਾਤੁਕੁਚ੍ਛਿਮ੍ਹਿ ਓਕ੍ਕਮਿ;
ਤਸ੍ਸ ਓਕ੍ਕਨ੍ਤਿਯਂ ਸਬ੍ਬਾ ਦਸਸਹਸ੍ਸੀ ਪਕਮ੍ਪਿਤ੍ਥ.
ਤਤੋ ਪੁਬ੍ਬਨਿਮਿਤ੍ਤਾਨਿ ਦ੍ਵਤ੍ਤਿਂਸਾਨਿ ਤਦਾ ਸਿਯੁਂ;
ਤੁਟ੍ਠਹਟ੍ਠਾ ਵ ਸਾ ਮਾਤਾ ਪੁਤ੍ਤਂ ਪਸ੍ਸਤਿ ਕੁਚ੍ਛਿਯਂ.
ਵਿਜਾਯਨਮਙ੍ਗਲਦੀਪਨੀਗਾਥਾ
ਸਾ ਪੁਣ੍ਣਗਬ੍ਭਾ ਦਸਮਾਸਤੋ ਪਰਂ,
ਗਨ੍ਤ੍ਵਾਨ ਫੁਲ੍ਲਂ ਵਰਲੁਮ੍ਬਿਨੀਵਨਂ;
ਠਿਤਾ ਗਹੇਤ੍ਵਾ ਵਰਸਾਲਸਾਖਂ,
ਵਿਜਾਯਿ ਤਂ ਪੁਤ੍ਤਵਰਂ ਸੁਖੇਨ.
ਤਦਾ ਸਹਸ੍ਸੀਦਸਲੋਕਧਾਤੁਸੁ,
ਦੇਵਾ ਚ ਨਾਗਾ ਅਸੁਰਾ ਚ ਯਕ੍ਖਾ;
ਨਾਨਾਦਿਸਾ ਮਙ੍ਗਲਚਕ੍ਕਵਾਲ਼ਂ,
ਸੁਮਙ੍ਗਲਂ ਮਙ੍ਗਲਮਾਗਮਿਂਸੁ.
ਅਨੇਕਸਾਖਞ੍ਚ ਸਹਸ੍ਸਮਣ੍ਡਲਂ,
ਛਤ੍ਤਂ ਮਰੂ ਧਾਰਯੁਮਨ੍ਤਲਿਕ੍ਖੇ;
ਸੁਵਣ੍ਣਦਣ੍ਡਾ ਵਿਪਤਨ੍ਤਿ ਚਾਮਰਾ,
ਖਜ੍ਜਿਂਸੁ ਭੇਰੀ ਚ ਨਦਿਂਸੁ ਸਙ੍ਖਾ.
ਮਲੇਨਕੇਨਾਪਿ ਅਨੂਪਲਿਤ੍ਤੋ,
ਠਿਤੋ ਵ ਪਾਦਾਨਿ ਪਸਾਰਯਨ੍ਤੋ;
ਕਥੀ ਵ ਧਮ੍ਮਾਸਨਤੋਤਰਨ੍ਤੋ,
ਜਾਤੋ ਯਥਾਦਿਚ੍ਚਵਰੋ ਨਭਮ੍ਹਾ.
ਖੀਣਾਸਵਾ ਬ੍ਰਹ੍ਮਗਣੋਪਗਨ੍ਤ੍ਵਾ,
ਸੁਵਣ੍ਣਜਾਲੇਨ ਪਟਿਗ੍ਗਹੇਸੁਂ;
ਤਤੋ ਚ ਦੇਵਾਜਿਨਚਮ੍ਮਕੇਨ,
ਤਤੋ ਦੁਕੂਲੇਨ ਚ ਤਂ ਮਨੁਸ੍ਸਾ.
ਤੇਸਂ ਪਿ ਹਤ੍ਥਾ ਵਰਭੂਮਿਯਂ ਠਿਤੋ,
ਦਿਸਾ ਵਿਲੋਕੇਸਿ ਸਬ੍ਬਾ ਸਮਨ੍ਤਤੋ;
ਵਦਿਂਸੁ ਦੇਵਾ ਪਿ ਚ ਬ੍ਰਹ੍ਮਕਾਯਿਕਾ,
ਤਯਾ ਸਮੋ ਕਤ੍ਥਚਿ ਨਤ੍ਥਿ ਉਤ੍ਤਰੋ.
ਗਨ੍ਤ੍ਵਾਨ ਉਤ੍ਤਰਂ ਸਤ੍ਤ ਪਦਵਾਰੇਹਿ ਵਿਕ੍ਕਮੋ,
ਸੀਹਨਾਦਂ ਨਦੀ ਤੇਸਂ ਦੇਵਤਾਨਂ ਹਿ ਸਾਵਯਂ.
ਤਤੋ ਪੁਤ੍ਤਂ ਗਹੇਤ੍ਵਾਨ ਗਤਾ ਮਾਤਾ ਸਕਙ੍ਘਰਂ,
ਮਾਤਾ ਸਤ੍ਤਮਿਯਂ ਗਨ੍ਤ੍ਵਾ ਦੇਅਪੁਤ੍ਤਤ੍ਤਮਾਗਮਿ.
ਤੇ ਬ੍ਰਹ੍ਮਣਾ ਪਞ੍ਚਮਿਯਂ ਸੁਭੁਤ੍ਤਾ,
ਨਾਮਂ ਗਹੇਤੁਂ ਵਰਲਕ੍ਖਣਾਨਿ;
ਦਿਸ੍ਵਾਨ ਏਕਙ੍ਗੁਲਿਮੁਕ੍ਖਿਪਿਂਸੁ,
ਬੁਦ੍ਧੋ ਅਯਂ ਹੇਸ੍ਸਤਿ ਵੀਤਰਾਗੋ.
ਜਿਣ੍ਣਞ੍ਚ ਦਿਸ੍ਵਾ ਬ੍ਯਾਧਿਕਂ ਮਤਞ੍ਚ,
ਅਵ੍ਹਾਯਿਤਂ ਪਬ੍ਬਜਿਤਞ੍ਚ ਦਿਸ੍ਵਾ;
ਓਹਾਯ ਪਬ੍ਬਜ੍ਜਮੁਪੇਤਿ ਕਾਮੇ,
ਬੁਦ੍ਧੋ ਅਯਂ ਹੇਸ੍ਸਤਿ ਵੀਤਰਾਗੋ.
ਅਗਾਰਿਯਸਮ੍ਪਤ੍ਤਿਦੀਪਨੀਗਾਥਾ
ਕਾਲਕ੍ਕਮੇਨ ਚਨ੍ਦੋ ਵ ਵਡ੍ਢਨ੍ਤੋ ਵਡ੍ਢਿਤੇ ਕੁਲੇ,
ਪੁਞ੍ਞੋਦਯੇਨੁਦੇਨ੍ਤੋ ਸੋ ਭਾਣੁਮਾ ਵਿਯ ਅਮ੍ਬਰੇ.
ਸਿਦ੍ਧਥਕੋ ਹਿ ਸਿਦ੍ਧਤ੍ਥੋ ਲਦ੍ਧਾ ਦੇਵਿਂ ਯਸੋਧਰਂ,
ਚਤ੍ਤਾਲੀਸਸਹਸ੍ਸੇਹਿ ਪੂਰਿਤ੍ਥੀਹਿ ਪੁਰਕ੍ਖਿਤੋ.
ਰਮ੍ਮਸੁਰਮ੍ਮਸੁਭੇਸੁ ਘਰੇਸੁ,
ਤਿਣ੍ਣਮੁਤੂਨਮਨੁਚ੍ਛਵਿਕੇਸੁ;
ਦਿਬ੍ਬਸੁਖਂ ਵਿਯ ਭੁਞ੍ਜਿ ਸੁਖਂ ਸੋ,
ਅਚ੍ਛਰਿਯਬ੍ਭੁਤਰਾਜਵਿਭੂਤਿਂ.
ਨੇਕ੍ਖਮ੍ਮਜ੍ਝਾਸਯਦੀਪਨੀਯਮਕਗਾਥਾ
ਨਮੋ ਤਸ੍ਸ ਯਤੋ ਮਹਿਮਤੋ ਯਸ੍ਸ ਤਮੋ ਨ
ਦਿਸ੍ਵਾ ਨਿਮਿਤ੍ਤਾਨਿ ਮਦਚ੍ਛਿਦਾਨਿ,
ਥੀਨਂ ਵਿਰੂਪਾਨਿ ਰਤਚ੍ਛਿਦਾਨਿ;
ਪਾਪਾਨਿ ਕਮ੍ਮਾਨਿ ਸੁਖਚ੍ਛਿਦਾਨਿ,
ਲਦ੍ਧਾਨਿ ਞਾਣਾਨਿ ਭਵਚ੍ਛਿਦਾਨਿ.
ਪਦਿਤ੍ਤਗੇਹਾ ਵਿਯ ਭੇਰਵਂ ਰਵਂ,
ਰਵਂ ਸਮ੍ਮੁਟ੍ਠਾਯ ਗਤੋ ਮਹੇਸਿ;
ਮਹੇਸਿਮੋਲੋਕਿਯਪੁਤ੍ਤਮਤ੍ਤਨੋ,
ਤਨੋਸਿ ਨੋ ਪੇਮਮਹੋਘਮਤ੍ਤਨੋ.
ਉਮ੍ਮਾਰਉਮ੍ਮਾਰਗਤੁਦ੍ਧਰਿਤ੍ਵਾ,
ਪਦਂ ਪਦਂ ਯਾਤਨਰਾਸਭਸ੍ਸ;
ਅਲਂ ਅਲਂਕਾਰਤਰੇਨ ਗਨ੍ਤੁਂ,
ਮਤੀ ਮਤੀਵੇਤਿਮਨਙ੍ਗਭਙ੍ਗੇ.
ਉਮ੍ਮਾਰਉਮ੍ਮਾਰਗਤੋ ਮਹੇਸਿ,
ਅਨਙ੍ਗਭਙ੍ਗਂ ਸਮਚਿਨ੍ਤਯਿਤ੍ਥ;
ਕਿਂ ਮੇ ਜਰਾਮਚ੍ਚੁਮੁਖੇ ਠਿਤਸ੍ਸ,
ਨ ਮੇ ਵਸੇ ਕਾਮਵਸੇ ਠਿਤਸ੍ਸ.
ਕਾਮੇਨ ਕਾਮੇਨ ਨ ਸਾਧ੍ਯਮੋਕ੍ਖਂ,
ਮਾਨੇਨ ਮਾਨੇਨ ਮਮਤ੍ਥਿ ਕਿਞ੍ਚਿ;
ਮਾਰੋ ਸਸੇਨੋ ਹਿ ਅਵਾਰਣੀਯੋ,
ਯਨ੍ਤੇਨ ਉਚ੍ਛੁਂ ਵਿਯ ਮਦ੍ਦਤੀ ਮਂ.
ਆਦਿਤ੍ਤਮੁਯਾਤਪਯਾਤਮੂਨਂ,
ਅਤਾਣਾਲੇਣਾਸਰਣੇ ਜਨੇ ਤੇ;
ਦਿਸ੍ਵਾਨ ਦਿਸ੍ਵਾਨ ਸਿਵਂ ਮਯਾ ਤੇ,
ਕਾਮੇਨ ਕਾਮੇਨ ਕਥਂ ਵਿਨੇਯ੍ਯ.
ਵਿਜ੍ਜਾਵਿਜ੍ਜਾਯ ਚੁਤਞ੍ਚੁਪੇਤਂ,
ਅਸਾਰਸਾਰੂਪਗਤਞ੍ਜਨਂ ਜਨਂ;
ਵਿਜ੍ਜਾਯਵਿਜ੍ਜਾਯ ਯੁਤੋ ਚੁਤੋਹਂ,
ਪਹੋਮਿ ਤਾਰੇਤੁਮਸਙ੍ਗਹੋ ਗਤੋ.
ਮਗ੍ਗਨ੍ਤਿ ਨੋ ਦਿਟ੍ਠਿਗਤਾਪਵਗ੍ਗਂ,
ਅਗ੍ਗਾ ਤਿ ਤੇਵਾਹੁ ਜਨਾ ਸਮਗ੍ਗਾ;
ਨਗ੍ਗਂ ਅਹੋ ਮੋਹਤਮਸ੍ਸ ਵਗ੍ਗਂ,
ਵਗ੍ਗਂ ਹਨਿਸ੍ਸਾਮਿ ਤਮਗ੍ਗਮਗ੍ਗਾ.
ਪਸੇਯ੍ਹਕਾਰੇਨ ਅਸੇਯ੍ਹਦੁਕ੍ਖਂ,
ਜਨਾ ਜਨੇਨ੍ਤੀਹ ਜਨਾਨਮੇਵ;
ਪਸੇਯ੍ਹਕਾਰੇਨਾ ਅਸੇਯ੍ਹਦੁਕ੍ਖਂ,
ਪਾਪਂ ਨ ਜਾਨਨ੍ਤਿ ਤਤੋ ਨਿਦਾਨਂ.
ਤੇ ਓਘਯੋਗਾਸਵਸਂਕਿਲੇਸਾ,
ਤਮੇਵ ਨਾਸੇਨ੍ਤਿ ਤਤੋ ਸਮੁਟ੍ਠਿਤਾ;
ਏਕਨ੍ਤਿਕਂ ਜਾਤਿ ਜਰਾ ਚ ਮਚ੍ਚੁ,
ਨਿਰਨ੍ਤਰਂ ਤਂ ਬ੍ਯਸਨਞ੍ਚਨੇਕਂ.
ਚੀਰਂ ਕਿਲੇਸਾਨਸਮੁਜ੍ਜਲਨ੍ਤਂ,
ਦਿਸ੍ਵਾਨ ਸਤ੍ਤਾਨੁਸਯਂ ਸਯਮ੍ਭੂ;
ਸਾਧੇਮਿ ਬੋਧਿਂ ਵਿਨਯਾਮਿ ਸਤ੍ਤੇ,
ਪਚ੍ਛਾਪਿ ਪਸ੍ਸਾਮਿ ਸੁਤਂ ਸੁਤਨ੍ਤਂ.
ਤਂ ਦਿਬ੍ਬਚਕ੍ਕਂ ਖੁਰਚਕ੍ਕਮਾਲਂ,
ਰਜ੍ਜਂ ਸਸਾਰਜ੍ਜਸਮਜ੍ਜਮਜ੍ਜਂ;
ਤੇ ਬਨ੍ਧਵਾ ਬਨ੍ਧਨਮਾਗਤਾ ਪਰੇ,
ਸੁਤੋ ਪਸੂਤੋਯਮਨਙ੍ਗਦੂਤੋ.
ਸਮੁਜ੍ਜਲਨ੍ਤਂ ਵਸਤੀ ਸਤੀਸਿਰੀ,
ਸਿਰੀਸਪਾਗਾਰਮਿਦਂ ਮਹਾਵਿਸਂ;
ਦਦ੍ਦਲ੍ਲਮਾਨਾ ਯੁਵਤੀ ਵਤੀਮਾ,
ਸਕਣ੍ਟਕਾਯੇਵ ਸਮਞ੍ਜਸਞ੍ਜਸੇ.
ਯਸ੍ਸਾ ਵਿਰਾਜਿਤਸਿਰੀ ਸਿਰਿਯਾਪਿ ਨਤ੍ਥਿ,
ਤਸ੍ਸਾਵਲੋਕਿਯ ਨ ਤਿਤ੍ਤਿਵਸਾਨਮਤ੍ਥਿ;
ਗਚ੍ਛਾਮਿ ਹਨ੍ਦ ਤਵਨਙ੍ਗ ਸਿਰਪ੍ਪਭੇਦਂ,
ਮਤ੍ਤੇਭਕੁਮ੍ਭੁਪਰਿ ਸੀਹਵਿਲਾਸਗਾਮਿਂ.
ਭੋ ਭੋ ਅਨਙ੍ਗਸੁਚਿਰ ਪਿ ਪਨੁਣ੍ਣਬਾਣ,
ਬਾਣਾਨਿ ਸਂਹਰ ਪਨੁਣ੍ਣਮਿਤੋ ਨਿਰੋਧ;
ਰੋਧੇਨ ਚਾਪਦਗਤੋ ਮਨਸੋ ਨ ਸੋਚ,
ਸੋਚਂ ਤਵਪ੍ਪਨਵਲੋਕਿਯ ਯਾਮਿ ਸਨ੍ਤਿਂ.
ਰਤੀ ਰਤੀ ਕਾਮਗੁਣੇ ਵਿਵੇਕੇ,
ਅਲਂ ਅਲਨ੍ਤੇਵ ਵਿਚਿਨ੍ਤਯਨ੍ਤੋ;
ਮਨਂ ਮਨਙ੍ਗਾਲਯਸਮ੍ਪਦਾਲਯਂ,
ਤਹਿਂ ਤਹਿਂ ਦਿਟ੍ਠਬਾਲਾ ਵ ਪਕ੍ਕਮਿ.
ਪਾਦੁਦ੍ਧਾਰਵਿਮ੍ਹਯਦੀਪਨੀਗਾਥਾ
ਯਾਵਞ੍ਚਯਂ ਰਵਿ ਚਰਤ੍ਯਚਲੇਨ ਰੁਦ੍ਧੇ,
ਯਾਵਞ੍ਚ ਚਕ੍ਕਰਤਨਞ੍ਚ ਪਯਾਤਿ ਲੋਕੇ;
ਤਾਵਿਸ੍ਸਰੋ ਨਭਚਰੋ ਜਿਤਚਾਤੁਰਨ੍ਤੋ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਦੀਪੇ ਮਹਾ ਚ ਚਤੁਰਾਧਿਕਦ੍ਵੇਸਹਸ੍ਸੇ,
ਤਤ੍ਰਾਪਿ ਸੇਟ੍ਠਭਜਿਤਂ ਵਰਜਮ੍ਬੁਦੀਪਂ;
ਭੂਨਾਭਿਕਂ ਕਪਿਲਵਤ੍ਥੁਪੁਰਂ ਸੁਰਮ੍ਮਂ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਞਾਤੀਨਸੀਤਿ ਕੁਲਤੋ ਹਿ ਸਹਸ੍ਸ ਸਾਕ੍ਯੇ,
ਹਤ੍ਥਿਸ੍ਸਧਞ੍ਞਧਨਿਨੋ ਵਿਜਿਤਾਰਿਸਙ੍ਘੇ;
ਗੋਤ੍ਤੇਨ ਗੋਤਮਭਵਂ ਪਿਤਰਞ੍ਜਨਗ੍ਗਂ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਰਮ੍ਮਂ ਸੁਰਮ੍ਮਵਸਤਿਂ ਰਤਨੁਜ੍ਜਲਨ੍ਤਂ,
ਗਿਮ੍ਹੇਪਿ ਵਿਮ੍ਹਯਕਰਂ ਸੁਰਮਨ੍ਦਿਰਾਭਂ;
ਉਸ੍ਸਾਪਿਤਦ੍ਧਜਪਟਾਕਸਿਤਾਤਪਤ੍ਤਂ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਸਪੋਕ੍ਖਰਾ ਪੋਕ੍ਖਰਣੀ ਚਤਸ੍ਸੋ,
ਸੁਪੁਪ੍ਫਿਤਾ ਮਨ੍ਦਿਰਤੋ ਸਮਨ੍ਤਾ;
ਕੋਕਾ ਨਦਨ੍ਤੂਪਰਿ ਕੋਕਨਾਦੇ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਸਰੇ ਸਰੋਜੇ ਰੁਦਿਤਾਲ਼ਿਪਾਲ਼ਿ,
ਸਮਨ੍ਤਤੋ ਪਸ੍ਸਤਿ ਪਞ੍ਜਰਞ੍ਜਸਾ;
ਦਿਸ੍ਵਾਰਵਿਨ੍ਦਾਨਿ ਮੁਖਾਰਵਿਨ੍ਦਂ
ਨਾਥਸ੍ਸ ਲਜ੍ਜਾ ਵਿਯ ਸਂਕੁਜਨ੍ਤਿ.
ਮਧੁਰਾ ਮਧੁਰਾਭਿਰੁਤਾ,
ਚਰਿਤਾ ਪਦੁਮੇ ਪਦੁਮੇਲ਼ਿਗਣਾ;
ਵਸਤਿਂ ਅਧੁਨਾ ਮਧੁਨਾ,
ਅਕਰੁਂ ਜਹਿਤਂ ਕਿਮਿਦਂ ਪਤਿਨਾ.
ਤਮ੍ਹਾ ਰਸਂ ਮਧੁਕਰਾ ਭਵਨਂ ਹਰਿਤ੍ਵਾ,
ਨਿਨ੍ਨਾਦਿਨੋ ਸਮਧੁਰਂ ਮਧੁਰਂ ਕਰੋਨ੍ਤਿ;
ਨਾਦੇਨ ਨਾਦਮਤਿਰਿਚ੍ਚੁਪਵੀਣਯਨ੍ਤਿ,
ਨਚ੍ਚਨ੍ਤਿ ਤਾ ਸੁਰਪੁਰੇ ਵਣਿਤਾ ਵ ਤਾਵ.
ਸਞ੍ਚੋਦਿਤਾ ਪੀਣਪਯੋਧਰਾਧਰਾ,
ਵਿਰਾਜਿਤਾਨਙ੍ਗਜਮੇਖਲਾਖਲਾ;
ਸੁਰਙ੍ਗਣਾ ਵਙ੍ਗਜਫਸ੍ਸਦਾ ਸਦਾ,
ਰਮਾ ਰਮਾਪੇਨ੍ਤਿ ਵਰਙ੍ਗਦਾਗਦਾ.
ਕਰਾਤਿਰਤ੍ਤਾ ਰਤਿਰਤ੍ਤਰਾਮਾ,
ਤਾਲ਼ੇਨ੍ਤਿ ਤਾਲ਼ਾਵਚਰੇ ਸਮਨ੍ਤਾ;
ਨਚ੍ਚੁਗ੍ਗਤਾਨੇਕਸਹਸ੍ਸਹਤ੍ਥਾ,
ਸਕ੍ਕੋਪਿ ਕਿਂ ਸਕ੍ਯਸਮੋਤਿ ਚੋਦਯੁਂ.
ਵਿਸਾਲਨੇਤ੍ਤਾ ਹਸੁਲਾ ਸੁਮਜ੍ਝਾ,
ਨਿਮ੍ਬਤ੍ਥਨੀ ਵਿਮ੍ਹਯਗੀਤਸਦ੍ਦਾ;
ਅਲਙ੍ਕਤਾ ਮਲ੍ਲਧਰਾ ਸੁਵਤ੍ਥਾ,
ਨਚ੍ਚਨ੍ਤਿ ਤਾਲ਼ਾਵਚਰੇਹਿ ਘੁਟ੍ਠਾ.
ਯਾਸਂ ਹਿ ਲੋਕੇ ਉਪਮਾ ਨਤ੍ਥਿ,
ਤਾਸਂ ਹਿ ਫਸ੍ਸੇਸੁ ਕਥਾਵਕਾਸਾ;
ਤਂ ਤਾਦਿਸਂ ਕਾਮਰਤਿਂਨੁਭੋਨ੍ਤੋ,
ਹਿਤ੍ਵਾ ਕਥਂ ਨੁ ਪਦਮੁਦ੍ਧਰਿ ਸੋ ਨਿਰਾਸੋ.
ਪਾਦੇਪਾਦੇ ਵਲਯਵਿਰਵਾਮੇਖਲਾਵੀਣਾਨਾਦਾ,
ਗੀਤਂਗੀਤਂ ਪਤਿਰਤਿਕਰਂ ਗਾਯਤੀ ਗਾਯਤੀ ਸਾ;
ਹਤ੍ਥੇਹਤ੍ਥੇ ਵਲਯਚਲਿਤਾ ਸਮ੍ਭਮਂ ਸਮ੍ਭਮਨ੍ਤਿ,
ਦਿਸ੍ਵਾਦਿਸ੍ਵਾ ਇਤਿ ਰਤਿਕਰਂ ਯਾਤਿ ਹਾਹਾ ਕਿਮੀਹਾ.
ਅਪੁਨਰਾਵਤ੍ਤਿਗਮਨਦੀਪਨੀਯਮਕਗਾਥਾ
ਅਨਨ੍ਤਕਾਲੋਪਚਿਤੇਨ ਤੇਨ,
ਪੁਞ੍ਞੇਨ ਨਿਬ੍ਬਤ੍ਤਵਿਮਾਨਯਾਨੇ;
ਤਸ੍ਮਿਂ ਦਿਨੇ ਜਾਤਸੁਤਂ ਪਜਾਪਤਿਂ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਤਂ ਜੀਵਮਾਨਂ ਪਿਤਰਞ੍ਚ ਮਾਤਰਂ,
ਤੇ ਞਾਤਕੇ ਤਾਦਿਸਿਯੋ ਚ ਇਤ੍ਥਿਯੋ;
ਤੇ ਤਾਦਿਸੇ ਰਮ੍ਮਕਰੇ ਨਿਕੇਤੇ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਖੋਮਞ੍ਚ ਪਤ੍ਤੁਣ੍ਣਦੁਕੂਲਚੀਨਂ,
ਸਕਾਸਿਕਂ ਸਾਧੁਸੁਗਨ੍ਧਵਾਸਿਤਂ;
ਨਿਵਾਸਿਤੋ ਸੋਭਤਿ ਵਾਸਵੋ ਵ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਵਿਧਿਪ੍ਪਕਾਸਾ ਨਿਧਿਯੋ ਚਤਸ੍ਸੋ,
ਸਮੁਗ੍ਗਤਾ ਭੂਤਧਰਾ ਵਸੁਨ੍ਧਰਾ;
ਸਤ੍ਤਾਵਸਤ੍ਤਾਵਸੁਧਾ ਸੁਧਾਸਾ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਸੁਵਣ੍ਣਥਾਲੇ ਸਤਰਾਜਿਕੇ ਸੁਭੇ,
ਸਾਧੁਂ ਸੁਗਨ੍ਧਂ ਸੁਚਿਸਾਲਿਭੋਜਨਂ;
ਭੁਤ੍ਵਾ ਸਵਾਸੀਹਿ ਵਿਲਾਸਿਨੀਹਿ,
ਹਿਤ੍ਵਾ ਗਤ ਸੋ ਸੁਗਤੋ ਗਤੋ ਵ.
ਮਨੁਞ੍ਞਗਨ੍ਧੇਨ ਅਸੁਞ੍ਞਗਨ੍ਧੋ,
ਸੁਗਨ੍ਧਗਨ੍ਧੇਨ ਵਿਲਿਤ੍ਤਗਤ੍ਤੋ;
ਸੁਗਨ੍ਧਵਾਤੇਨ ਸੁਵਿਜ੍ਜਿਤਙ੍ਗੋ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਸੁਲਕ੍ਖਣੇ ਹੇਵਭਿਲਕ੍ਖਿਤਙ੍ਗੋ,
ਪਸਾਧਿਤੋ ਦੇਵਪਸਾਧਨੇਨ;
ਵਿਰੋਚਮਾਨੋ ਸਮਰਾਜਿਨੀਹਿ,
ਹਿਤ੍ਵਾ ਗਤੋ ਸੋ ਸੁਗਤੋ ਗਤੋ ਵ.
ਨਾਨਾਸਨਾਨਿ ਸਯਨਾਨਿ ਨਿਵੇਸਨਾਨਿ,
ਭਾਭਾਨਿਭਾਨਿ ਰਤਨਾਕਰਸਨ੍ਨਿਭਾਨਿ;
ਤਤ੍ਰੁਸ੍ਸਿਤਾਨਿ ਰਤਨਦ੍ਧਜਭੂਸਿਤਾਨਿ,
ਹਿਤ੍ਵਾ ਵ ਤਾਨਿ ਹਿਮਬਿਨ੍ਦੁਸਮਾਨਿ ਤਾਨਿ.
ਨਾਨਾਵਿਧੇਹਿ ਰਤਨੇਹਿ ਸਮੁਜ੍ਜਲੇਹਿ,
ਨਾਰੀਹਿ ਨਿਚ੍ਚਮੁਪਗਾਯਿਤਹਮ੍ਮਿਯੇਹਿ;
ਰਜ੍ਜੇਹਿ ਚਕ੍ਕਰਤਨਾਦਿਵਿਭੂਸਿਤੇਹਿ,
ਯਾਤੋ ਤਤੋ ਹਿ ਮਹਿਤੋ ਪੁਰਿਸਸ੍ਸਰੇਹਿ.
ਦ੍ਵਿਪਾਦਬ੍ਯਾਸਯਮਕਗਾਥਾ
ਯਸੋਧਰਂ ਪੀਣਪਯੋਧਰਾਧਰਂ,
ਅਨਙ੍ਗਰਙ੍ਗਦ੍ਧਜਭੂਤਮਙ੍ਗਂ;
ਦੇਵਚ੍ਛਰਾਵੁਜ੍ਜਲਿਤਂ ਪਤਿਬ੍ਬਤਂ,
ਹਿਤ੍ਵਾ ਗਤੋ ਸੋ ਸੁਗਤੋ ਵ ਨੂਨ.
ਸਭਾਵਨਿਚ੍ਛਨ੍ਦਮਤਿਂ ਪਭਾਵਤਿਂ,
ਭਤ੍ਤੋ ਕੁਸੋ ਸਂਹਰਿ ਭਤ੍ਤਕਾਜਂ;
ਤਾਯਾਭਿਰੂਪਂ ਪਿ ਯਸੋਧਰਂ ਵਰਂ,
ਹਿਤ੍ਵਾ ਗਤੋ ਸੋ ਸੁਗਤੋ ਵ ਨੂਨ.
ਪੁਰੇ ਪੁਰੇ ਸਞ੍ਚਰਿ ਖਗ੍ਗਹਤ੍ਥੋ,
ਵਰਂ ਪਰਿਤ੍ਥੀਨਂ ਅਨਿਤ੍ਥਿਗਨ੍ਧੋ;
ਸਿਰਿਞ੍ਚ ਰਿਞ੍ਚਾਪਿ ਨ ਰਿਞ੍ਚਿ ਨਾਰਿਂ,
ਹਿਤ੍ਵਾਨਿਮਨ੍ਦਾਨਿ ਗਤੋ ਤਥਾਗਤੋ.
ਹਰਿਤ੍ਤਚੋ ਰਾਗਬਲੇਨ ਦੇਵਿਯਾ,
ਅਵਤ੍ਥਲਿਙ੍ਗੇਨ ਨ ਲਿਙ੍ਗਨੁਸ੍ਸਰਿ;
ਅਸੇਵਿ ਕਾਮਂ ਤਮਿਦਾਨਿ ਕਾਮਂ,
ਹਿਤ੍ਵਾ ਗਤੋ ਸੋ ਸੁਗਤੋ ਵ ਨੂਨ.
ਅਪਮੇਯ੍ਯਕਪ੍ਪੇਸੁ ਵਿਵੇਕਸੇਵੀ,
ਹਿਤ੍ਵਾ ਗਤੋ ਰਜ੍ਜਸਿਰਿਂ ਵਰਿਤ੍ਥਿਂ;
ਅਣੁਂ ਕਲਿਂ ਵਣ੍ਣਯਿ ਤਂ ਪੁਰਾਣਂ,
ਵਤ੍ਥਮ੍ਹਿ ਛਿਦ੍ਦਂ ਵਿਯ ਤੁਨ੍ਨਕਾਰੋ.
ਤਥਾਤਿ ਮਨ੍ਤ੍ਵਾਨ ਇਦਾਨਿਨਙ੍ਗੋ,
ਯਸੋਧਰਂ ਪਗ੍ਗਹਿਤੋ ਧਜਂ ਵ;
ਮਤ੍ਤੋ ਜਿਤੋਮ੍ਹੀ ਤਿ ਪਮਤ੍ਤਬਨ੍ਧੁ,
ਨ ਪਸ੍ਸਿ ਞਾਣਾਸਨਿਪਾਤਮਨ੍ਤਰਂ.
ਦਿਸ੍ਵਾਨ ਦੁਕ੍ਖਾਨਲਸਮ੍ਭਵਂਭਵਂ,
ਕਤ੍ਵਾ ਤਦੁਪ੍ਪਾਦਕਨਙ੍ਗਭਙ੍ਗਂ;
ਯਸੋਧਰਂ ਪੀਣਪਯੋਧਰਾਧਰਂ,
ਹਿਤ੍ਵਾ ਗਤੋ ਬੁਦ੍ਧਬਲਪ੍ਪਦਂ ਪਦਂ.
ਅਨਨ੍ਤਸਤ੍ਤਾਨਮਨਨ੍ਤਕਾਲੇ,
ਮਨਙ੍ਗਹੇਤ੍ਵਾਨ ਜਿਤੋ ਅਨਙ੍ਗੋ;
ਪਰਾਜਿਤੋ ਨੂਨ ਹਿ ਏਕਕਸ੍ਸ,
ਤਥਾਗਤੋ ਸੋ ਨ ਪੁਨਾਗਤੋ ਵ.
ਦਿਸ੍ਵਾਨ ਞਾਣਾਸਨਿਪਾਤਮਨ੍ਤਰਂ,
ਤਥਾਗਤੋ ਸੋ ਨ ਪੁਨਾਗਤੋ ਵ;
ਤਥਾਗਤੋ ਸੋ ਨ ਪੁਨਾਗਤੋ ਵ,
ਦਿਸ੍ਵਾਨਞਾਣਾਸਨਿਪਾਤਮਨ੍ਤਰਂ.
ਤਿਪਾਦਬ੍ਯਾਸਯਮਕਗਾਥਾ
ਤਥਾਗਤਚ੍ਛੇਰਮਹੋਸਿ ਤਸ੍ਸ,
ਤਥਾ ਹਿਮਾਰੋਪਿਤਦਾਹਸਨ੍ਤਿਂ;
ਤਥਾ ਹਿ ਮਾਰੋ ਪਿ ਤਦਾਹ ਸਨ੍ਤਿਂ,
ਤਥਾ ਹਿ ਮਾਰੋਪਿ ਤਦਾ ਹਸਨ੍ਤਿਂ.
ਪਾਦਬ੍ਯਾਸਮਹਾਯਮਕਗਾਥਾ
ਸਕਾਮਦਾਤਾ ਵਿਨਯਾਮਨਤਗੂ,
ਸਕਾਮਦਾਤਾ ਵਿਨਯਾਮਨਨ੍ਤਗੂ;
ਸਕਾਮਦਾਤਾ ਵਿਨਯਾਮਨਨ੍ਤਗੂ,
ਸਕਾਮਦਾਤਾ ਵਿਨਯਾਮਨਨ੍ਤਗੂ.
ਅਬ੍ਯਾਪੇਤਾਦ੍ਯਨ੍ਤਯਮਕਗਾਥਾ
ਰਵੇਰਵੇਰੋਰਭਿਮਾਰਭੇਰਵੇ,
ਰਵੇਰਵੇਰਿਵ ਭੇਰਵੇ ਰਵੇ;
ਰਵੇ ਰਵੇ ਸੂਦਿਤਗਾਰਵੇ ਰਵੇ,
ਰਵੇਰਵੇਦੇਸਿ ਜਿਨੋਰਵੇ ਰਵੇ.
ਪਟਿਲੋਮਯਮਕਗਾਥਾ
ਲੋਕਾਯਾਤਤਯਾ ਕਾਲੋ ਵਿਸੇਸਂ ਨ ਨ ਸਂਸੇਵਿ,
ਵਿਸੇਸਂ ਨ ਨ ਸਂਸੇਵਿ ਲੋਕਾ ਯਾਤਤਯਾ ਕਾਲੋ.
ਰਾਜਰਾਜਯਸੋਪੇਤਵਿਸੇਸਂ ਰਚਿਤਂ ਮਯਾ,
ਯਾਮਤਂ ਚਿਰਸਂਸੇਵਿਤਪੇਸੋ ਯਜਰਾਜਰਾ.
ਏਕਠਾਨਿਕਾਦਿਯਮਕਗਾਥਾ
ਆਕਙ੍ਖਕ੍ਖਾਕਙ੍ਖਙ੍ਗ ਕਙ੍ਖਾਗਙ੍ਗਾਖਾਗਹਕ,
ਕਙ੍ਖਾਗਾਹਕਕਙ੍ਖਾਘ ਹਾ ਹਾ ਕਙ੍ਖਾ ਕਹਂ ਕਹਂ.
ਅਪ੍ਪਗਬ੍ਭੋ ਅਪਗਬ੍ਭੋ ਅਮੋਹੋ ਮਾ ਪਮੋਹਕੋ,
ਮਗ੍ਗਮੁਖਂ ਮੋਖਮਾਹ ਮਾਹਾ ਮੋਹਮੂਹਕ੍ਖਮਂ.
ਪਾਪਾਪਾਪਭਵਂ ਪਸ੍ਸਂ ਪਾਪਾਪਭਵੁਗ੍ਗਤੋ,
ਪਾਪਾਪਾਪਭਵਾਸਙ੍ਗਾ ਪਾਪਾਪਾਪਭਵਾਗਤੋ.
ਕੁਸਲਾਕੁਸਲਂ ਪਸ੍ਸਂ ਕੁਸਲਾਕੁਸਲਂ ਚਜਿ,
ਕੁਸਲਾਕੁਸਲਾਸਙ੍ਗ ਕੁਸਲਾਕੁਸਲਾ ਚੁਤੋ.
ਅਕ੍ਖਰੁਤ੍ਤਰਿਕਯਮਕਗਾਥਾ
ਨੋਨਾਨਿਨੋ ਨਨੂਨਾਨਿ ਨਨੇਨਾਨਿ ਨਨਾਨਿਨੋ,
ਨੁਨ੍ਨਾਨੇਨਾਨਿ ਨੂਨ ਨ ਨਾਨਨਂ ਨਾਨਨੇਨ ਨੋ.
ਸਾਰੇ ਸੁਰਾਸੁਰੇ ਸਾਰੀ ਰਸਸਾਰਸਰਿਸ੍ਸਰੋ,
ਰਸਸਾਰਰਸੇ ਸਾਰਿ ਸੁਰਾਸੁਰਸਰਸ੍ਸਿਰੇ.
ਦੇਵਾਨਂ ਨਨ੍ਦਨੋ ਦੇਵੋ ਦੇਵਦੇਵ ਨ ਨਨ੍ਦਿ ਨੋ,
ਵੇਦਦੀਨੇਨ ਵੇਦਨ ਵੇਦਿ ਵੇਦਨ ਵੇਦਿਨੋ.
ਦੇਵਾਸਨੇ ਨਿਸਿਨ੍ਨੋ ਸੋ ਦੇਵਦੇਵੋ ਸਸਾਸਨੇ,
ਨਿਸਿਨ੍ਨਾਨਂ ਸਦੇਵਾਨਂ ਦੇਸੇਸਿ ਦਸ੍ਸਨਾਸਨਂ.
ਪਹੇਲ਼ਿਗਾਥਾ
ਦਸਨਾਵਗਤੋ ਸਞ੍ਞੋ ਅਨ੍ਧਸ੍ਸ ਤਮਦੋ ਰਵਿ,
ਅਟ੍ਠਮਾਪੁਣ੍ਣਸਙ੍ਕਪ੍ਪੋ ਪਾਤ੍ਵਨਞ੍ਞਮਨਞ੍ਞਿਵ.
ਬ੍ਯਾਪੇਤਾਦਿਯਮਕਗਾਥਾ
ਏਕਨ੍ਤਮੇਵ ਸਪਰਤ੍ਥਪਰੋ ਮਹੇਸਿ,
ਏਕਨ੍ਤਮੇਵ ਦਸਪਾਰਮਿਤਾਬਲੇਨ;
ਏਕਨ੍ਤਮੇਵ ਹਤਮਾਰਬਲੇਨ ਤੇਨ,
ਏਕਨ੍ਤਮੇਵ ਸੁਵਿਸੁਦ੍ਧਮਲਤ੍ਥ ਬੋਧਿਂ.
ਮਹਾਪਧਾਨਦੀਪਨੀਗਾਥਾ
ਓਰੋਹਿਤੋਤੋਹਿਤਪਾਪਧਮ੍ਮੋ,
ਛਨ੍ਨੇਨ ਸ ਛਨ੍ਨਹਯੇਨ ਗਨ੍ਤ੍ਵਾ;
ਅਨੋਮਤੀਰਮ੍ਹਿ ਅਨੋਮਸਤ੍ਤੋ,
ਅਨੋਮਪਬ੍ਬਜ੍ਜਮੁਪਾਗਤੋ ਸੋ.
ਨਿਰਾਮਿਸਂ ਪੀਤਿਸੁਖਂ ਅਨੂਪਮਂ,
ਅਨੂਪਿਯੇ ਅਮ੍ਬਵਨੇ ਅਲਤ੍ਥ;
ਸਰੂਪਸੋਭਾਯ ਵਿਰੂਪਸੋਭਂ,
ਸਰਾਜਿਕਂ ਰਾਜਗਹਂ ਕਰਿਤ੍ਥ.
ਤਤੋ ਅਲ਼ਾਰ ਊਦਕਤਾਪਸਾਨਂ,
ਝਾਨੇਨਸਨ੍ਤੁਟ੍ਠਮਨੋ ਵਿਹਾਯ;
ਮਹਾਪਧਾਨਾਯ ਉਰੁਵੇਲਭੂਮਿਂ,
ਗਤੋ ਸਿਖਪ੍ਪਤ੍ਤਮਕਾਸਿ ਦੁਕ੍ਕਰਂ.
ਨ ਕਾਮਤੋ ਨੇਵਤਿਦੁਕ੍ਕਰਮ੍ਹਿ,
ਸਬ੍ਬਞ੍ਞੁਤਾ ਸਿਜ੍ਝਤਿ ਮਜ੍ਝਿਮਾਯ;
ਞਤ੍ਵਾਨ ਤਂ ਪੁਬ੍ਬਗੁਣੋਪਲਦ੍ਧਂ,
ਧਮ੍ਮਂ ਸਮਾਨੇਤੁਮਗਾ ਸੁਬੋਧਿਂ.
ਮਾਰਪਰਾਜਯਦੀਪਨੀਗਾਥਾ
ਤਿਬੁਦ੍ਧਖੇਤ੍ਤਮ੍ਹਿ ਤਿਸੇਤਛਤ੍ਤਂ,
ਲਦ੍ਧਾਨ ਲੋਕਾਧਿਪਤੀ ਭਵੇਯ੍ਯ;
ਗਨ੍ਤ੍ਵਾਨ ਬੋਧਿਮ੍ਹਿਪਰਾਜਿਤਾਸਨੇ,
ਯੁਦ੍ਧਾਯ ਮਾਰੇਨਚਲੋ ਨਿਸੀਦਿ.
ਦਤ੍ਵਾਨ ਮਂਸਂ ਰਜ੍ਜਂ ਪਿਤਾ ਸੁਦ੍ਧੋਦਨੋ ਤਦਾ,
ਨਮਸ੍ਸਮਾਨੋ ਸਿਰਸਾ ਸੇਤਛਤ੍ਤੇਨ ਪੂਜਯਿ.
ਸਯਂ ਨਾਰਾਯਨਬਲੋ ਅਭਿਞ੍ਞਾਬਲਪਾਰਗੂ,
ਜੇਤੁਂ ਸਬ੍ਬਸ੍ਸ ਲੋਕਸ੍ਸ ਬੋਧਿਮਣ੍ਡਂਉਪਾਗਮਿ.
ਤਦਾ ਵਸਵਤ੍ਤੀਰਾਜਾ ਛਕਾਮਵਚਰਿਸ੍ਸਰੋ,
ਸਸੇਨਾਵਾਹਨੋ ਬੋਧਿਮਣ੍ਡਂ ਯੁਦ੍ਧਾਯੁਪਾਗਮਿ.
ਏਥ ਗਣ੍ਹਥ ਬਨ੍ਧਥ ਛਟ੍ਟੇਥ ਚੇਟਕਂ ਇਮਂ,
ਮਨੁਸ੍ਸਕਲਲੇ ਜਾਤੋ ਕਿਮਿਹਨ੍ਤਿ ਨ ਮਞ੍ਞਤਿ.
ਜਲਨ੍ਤਂ ਨਵਵਿਧਂ ਵਸ੍ਸਂ ਵਸ੍ਸਾਪੇਤਿ ਅਨਪ੍ਪਕਂ,
ਧੂਮਨ੍ਧਕਾਰਂ ਕਤ੍ਵਾਨ ਪਾਤੇਸਿ ਅਸਿਨਂ ਬਹੁਂ.
ਚਕ੍ਕਾਵੁਧਂ ਖਿਪੇਨ੍ਤੋ ਪਿ ਨਾਸਕ੍ਖਿ ਕਿਞ੍ਚਿ ਕਾਤਵੇ,
ਗਹੇਤਬ੍ਬਂ ਹਿ ਗਹਣਂ ਅਪਸ੍ਸਨ੍ਤੋ ਇਤਿਬ੍ਰਵਿ.
ਸਿਦ੍ਧਤ੍ਥ ਕਸ੍ਮਾ ਆਸਿ ਨੁ ਆਸਨੇ ਮਮ ਸਨ੍ਤਕੇ,
ਉਟ੍ਠੇਹਿ ਆਸਨਾ ਨੋ ਚੇ ਫਾਲੇਮਿ ਹਦਯਂ ਤਵ.
ਸਪਾਦਮੂਲੇ ਕੀਲ਼ਨ੍ਤਂ ਪਸ੍ਸਨ੍ਤੋ ਤਰੁਣਂ ਸੁਤਂ,
ਪਿਤਾ ਵੁਦਿਕ੍ਖਿ ਤਂ ਮਾਰਂ ਮੇਤ੍ਤਾਯਨ੍ਤੋ ਦਯਪਰੋ.
ਤਦਾ ਸੋ ਅਸਮ੍ਭਿਵਾਚਂ ਸੀਹਨਾਦਂ ਨਦੀ ਮੁਨਿ,
ਨ ਜਾਨਾਤਿ ਸਯਂ ਮਯ੍ਹਂ ਦਾਸਭਾਵਪਿਯਂ ਖਲ਼ੋ.
ਯੇਨ ਕੇਨਚਿ ਕਮ੍ਮੇਨ ਜਾਤੋ ਦੇਵਪੁਰੇ ਵਰੇ,
ਸਕਂ ਗਤਿਂ ਅਜਾਨਨ੍ਤੋ ਲੋਕਜੇਟ੍ਠੋਤਿ ਮਞ੍ਞਤਿ.
ਅਨਨ੍ਤਲੋਕਖਾਤੁਮ੍ਹਿ ਸਤ੍ਤਾਨਂ ਹਿ ਕਤਂ ਸੁਭਂ,
ਮਯ੍ਹੇਕਪਾਰਮਿਯਾ ਪਿ ਕਲਂ ਨਗ੍ਘਤਿ ਸੋਲ਼ਸਿਂ.
ਤਿਰਚ੍ਛਾਨੋ ਸਸੋ ਹੁਤ੍ਵਾ ਦਿਸ੍ਵਾ ਯਾਚਕਮਾਗਤਂ,
ਪਚਿਤ੍ਵਾਨ ਸਕਂ ਮਂਸਂ ਪਤਿਇਓਗ੍ਗਿਮ੍ਹਿ ਦਾਤਵੇ.
ਏਵਂ ਅਨਨ੍ਤਕਾਲੇਸੁ ਕਤਂ ਦੁਕ੍ਕਰਕਾਰਿਕਂ,
ਕੋ ਹਿ ਨਾਮ ਕਰੇਯ੍ਯਞ੍ਞੋ ਅਨੁਮ੍ਮਤ੍ਤੋ ਸਚੇਤਨੋ.
ਏਵਂ ਅਨਨ੍ਤਪੁਞ੍ਞੇਹਿ ਸਿਦ੍ਧਂ ਦੇਹਮਿਮਂ ਪਨ,
ਯਥਾਭੁਤਂ ਅਜਾਨਨ੍ਤੋ ਮਨੁਸ੍ਸੋਸੀ ਤਿ ਮਞ੍ਞਤਿ.
ਨਾਹਂ ਮਨੁਸ੍ਸੋਮਨੁਸ੍ਸੋ ਨ ਬ੍ਰਹ੍ਮਾ ਨ ਚ ਦੇਵਤਾ,
ਜਰਾਮਰਣਂ ਲੋਕਸ੍ਸ ਦਸ੍ਸੇਤੁਂ ਪਨਿਧਾਗਤੋ.
ਅਨੁਪਲਿਤ੍ਤੋ ਲੋਕੇਨ ਜਾਤੋਨਨ੍ਤਜਿਨੋ ਅਹਂ,
ਬੁਦ੍ਧੋ ਬੋਧਿਤਲੇ ਹੁਤ੍ਵਾ ਤਾਰੇਮਿ ਜਨਤਂ ਬਹੁਂ.
ਸਮਨ੍ਤਾ ਧਜਿਨਂ ਦਿਸ੍ਵਾ ਯੁਦ੍ਧਂ ਮਾਰਂ ਸਵਾਹਨਂ,
ਯੁਦ੍ਧਾਯ ਪਚ੍ਚੁਗਚ੍ਛਾਮਿ ਮਾ ਮਂ ਠਾਨਾ ਅਚਾਵਯਿ.
ਯਨ੍ਤੇ ਤਂ ਨਪ੍ਪਸਹਤਿ ਸੇਨਂ ਲੋਕੋ ਸਦੇਵਕੋ,
ਤਨ੍ਤੇ ਪਞ੍ਞਾਯ ਗਚ੍ਛਾਮਿ ਆਮਂ ਪਤ੍ਤਂ ਵ ਅਸ੍ਮਨਾ.
ਇਚ੍ਛਨ੍ਤੋ ਸਾਸਪੇ ਗਬ੍ਭੇ ਚਙ੍ਕਮਾਮਿ ਇਤੋ ਚਿਤੋ,
ਇਚ੍ਛਨ੍ਤੋ ਲੋਕਧਾਤੁਮ੍ਹਿ ਅਤ੍ਤਭਾਵੇਨ ਛਾਦਯਿ.
ਏਤੇ ਸਬ੍ਬੇ ਗਹੇਤ੍ਵਾਨ ਚੁਣ੍ਣੇਤੁਂ ਅਚ੍ਛਰਾਯਪਿ,
ਅਤ੍ਥਿ ਥਾਮਂ ਬਲਂ ਮਯ੍ਹਂ ਪਾਣਘਾਤੋ ਨ ਵਟ੍ਟਤਿ.
ਇਮਸ੍ਸ ਗਣ੍ਡੁਪ੍ਪਾਦਸ੍ਸ ਆਯੁਧੇਨ ਬਲੇਨ ਕਿਂ,
ਮਯ੍ਹਂ ਹਿ ਤੇਨ ਪਾਪੇਨ ਸਲ੍ਲਾਪੋ ਪਿ ਨ ਯੁਜ੍ਜਤਿ.
ਪਲ੍ਲਙ੍ਕਂ ਮਮ ਭਾਵਾਯ ਕਿਮਤ੍ਥਞ੍ਞੇਨ ਸਕ੍ਖਿਨਾ,
ਕਮ੍ਪਿਤਾ ਮਦ੍ਦਿਯਾ ਦਾਨਾ ਸਕ੍ਖਿ ਹੋਤਿ ਅਯਂ ਮਹੀ.
ਇਤਿ ਵਤ੍ਵਾ ਦਕ੍ਖਿਣਂ ਬਾਹੁਂ ਪਥਵਿਯਾ ਪਣਮਯਿ,
ਤਦਾ ਕਮ੍ਪਿਤ੍ਥ ਪਥਵੀ ਮਹਾਘੋਸੋ ਅਜਾਯਥ.
ਪਥਵੀਘੋਸੇਨ ਆਕਾਸੇ ਗਜ੍ਜਨ੍ਤੋ ਅਸਨਿ ਫਲਿ,
ਤਸ੍ਮਿਂ ਮਜ੍ਝੇ ਗਤੋ ਮਾਰੋ ਸਪਰਿਸੋ ਭਯਤਜ੍ਜਿਤੋ.
ਮਹਾਵਾਤਸਮੁਦ੍ਧਤਭਸ੍ਮਂ ਵ ਵਿਕਿਰਿਯ੍ਯਥ,
ਮਹਾਘੋਸੋ ਅਜਾਯਿਤ੍ਥ ਸਿਦ੍ਧਤਸ੍ਸ ਜਯੋ ਇਤਿ.
ਅਭਿਸਮ੍ਬੋਧਿਦੀਪਨੀਗਾਥਾ
ਪੁਰਤੋ ਗਚ੍ਛਤਿ ਚਨ੍ਦੋ ਰਜਤਚਕ੍ਕਂ ਵ ਅਮ੍ਬਰੇ,
ਸਹਸ੍ਸਰਂਸਿ ਸੁਰਿਯੋ ਪਚ੍ਛਿਮੇਨੁਪਗਚ੍ਛਤਿ.
ਮਜ੍ਝੇ ਬੋਧਿਦੁਮਚ੍ਛਤ੍ਤੇ ਪਲ੍ਲਙ੍ਕੇ ਅਪ੍ਪਰਾਜਿਤੇ,
ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਧਮ੍ਮਂ ਸਮ੍ਮਸਤੇ ਮੁਨਿ.
ਸਕ੍ਕੋ ਤਸ੍ਮਿਂ ਖਣੇ ਸਙ੍ਖਂ ਧਮਨ੍ਤੋ ਅਭਿਧਾਵਤਿ,
ਬ੍ਰਹ੍ਮਾ ਤਿਯੋਜਨਂ ਛਤ੍ਤਂ ਧਾਰੇਤਿ ਮੁਨਿਮੁਦ੍ਧਨਿ.
ਮਣਿਤਾਲਵਣ੍ਟਂ ਤੁਸੀਤੋ ਸੁਯਾਮੋ ਵਾਲ਼ਬੀਜਨਿਂ,
ਨਾਨਾਮਙ੍ਗਲਭਣ੍ਡਾਨਿ ਗਹਿਤੋ ਸੇਸਦੇਵਤਾ.
ਏਵਂ ਦਸਸਹਸ੍ਸਮ੍ਹਿ ਸਕ੍ਕੋ ਬ੍ਰਹ੍ਮਾ ਚ ਦੇਵਤਾ,
ਸਙ੍ਖਾਦੀਨੀ ਧਮਨ੍ਤਾ ਚ ਚਕ੍ਕਵਾਲ਼ਮ੍ਹਿ ਪੂਰਯੁਂ.
ਮਙ੍ਗਲਾਨਿ ਗਹੇਤ੍ਵਾਨ ਤਿਟ੍ਠਨ੍ਤਿ ਕਾਚਿ ਦੇਵਤਾ,
ਧਜਮਾਲ ਗਹੇਤ੍ਵਾਨ ਤਥਾ ਪੁਣ੍ਣਘਟਾਦਯੋ.
ਤਤ੍ਥ ਨਚ੍ਚਨ੍ਤਿ ਗਾਯਨ੍ਤਿ ਸੇਲ਼ੇਨ੍ਤਿ ਵਾਦਯਨ੍ਤਿ ਚ,
ਦੇਵਾ ਦਸਸਹਸ੍ਸਮ੍ਹਿ ਤੁਟ੍ਠਹਟ੍ਠਾ ਪਮੋਦਿਤਾ.
ਧਮ੍ਮਾਮਤਰਸਸ੍ਸਾਦਂ ਲਭਿਸ੍ਸਾਮਸ੍ਸ ਸਨ੍ਤਿਕੇ,
ਨਯਨਾਮਤਰਸਸ੍ਸਾਦਂ ਪਾਟਿਹਾਰਿਯਞ੍ਚ ਪਸ੍ਸਿਤੁਂ.
ਜਾਰਮਰਣਕਨ੍ਤਾਰਾ ਸੋਕੋਪਾਯਾਸਸਲ੍ਲਤੋ,
ਮੋਚੇਸਿ ਕਾਮਪਾਸਮ੍ਹਾ ਦੇਸੇਨ੍ਤੋ ਅਮਤਂ ਪਦਂ.
ਇਤਿ ਤੁਟ੍ਠੇਹਿ ਦੇਵੇਹਿ ਪੂਜਿਯਨ੍ਤੋ ਨਰਾਸਭੋ,
ਕਿਞ੍ਚਿ ਪੂਜਂ ਅਚਿਨ੍ਤੇਨ੍ਤੋ ਚਿਨ੍ਤੇਨ੍ਤੋ ਧਮ੍ਮਮੁਤ੍ਤਮਂ.
ਸਬ੍ਬਤ੍ਥਸਾਧਿਤੋ ਸਨ੍ਤੋ ਸਿਦ੍ਧਤ੍ਥੋ ਅਪ੍ਪਰਾਜਿਤੋ,
ਚਕ੍ਕਵਾਲ਼ਸਿਲਾਸਾਣਿਪਾਕਾਰੇਹਿ ਮਨੋਰਮੇ.
ਤਾਰਾਮਣਿਖਚਿਤਾਕਾਸਵਿਤਾਨੇ ਚਨ੍ਦਦੀਪਕੇ,
ਮਾਨਾਰਤਮਪਜ੍ਜੋਤੇ ਮਾਲਾਗਨ੍ਧਾਦਿਪੂਜਿਤੇ.
ਦਿਬ੍ਬੇਹਿ ਛਣਭੇਰੀਹਿ ਘੁਟ੍ਠੇ ਮਙ੍ਗਲਗੀਤਿਯਾ,
ਚਕ੍ਕਵਾਲ਼ੇ ਸੁਪ੍ਪਾਸਾਦੇ ਬੋਧਿਮਣ੍ਡਮਹਾਤਲੇ.
ਬੋਧਿਰੁਕ੍ਖਮਣਿਚ੍ਛਤ੍ਤੇ ਪਲ੍ਲਙ੍ਕੇ ਅਪ੍ਪਰਾਜਿਤੇ,
ਨਿਸ੍ਸਿਨ੍ਨੋ ਪਠਮੇ ਯਾਮੇ ਪੁਰਿਮਂ ਜਾਤਿਮਨੁਸ੍ਸਰਿ.
ਨਮਰੂਪਾਮਨੁਪ੍ਪਤ੍ਤਿ ਸੁਦਿਟ੍ਠਾ ਹੋਤਿ ਤੇਨਿਧਾ,
ਸਕ੍ਕਾਤਦਿਟ੍ਠਿ ਤੇਨਸ੍ਸ ਪਹੀਨਾ ਹੋਤਿ ਸਬ੍ਬਸੋ.
ਤਤੋ ਹਿ ਦੁਤਿਯੇ ਯਾਮੇ ਯਥਾਯਮ੍ਮੁਪਗੇ ਸਰਿ,
ਸੁਦਿਟ੍ਠਂ ਹੋਤਿ ਤੇਨਸ੍ਸ ਕਮ੍ਮਕ੍ਲੇਸੇਹਿ ਸਮ੍ਭਵਂ.
ਕਙ੍ਖਾਵਿਤਰਣੀ ਨਾਮ ਞਾਣਨ੍ਤਂ ਸਮੁਪਾਗਤਂ,
ਤੇਨਸੇਸ ਪਹੀਯਿਤ੍ਥ ਕਙ੍ਖਾ ਸੋਲ਼ਸਧਾ ਠਿਤਾ.
ਤਤੋ ਸੋ ਤਤਿਯੇ ਯਾਮੇ ਦ੍ਵਾਦਸਙ੍ਗੇ ਅਸੇਸਤੋ,
ਸੋ ਪਟਿਚ੍ਚਸਮੁਪ੍ਪਾਦੇ ਞਾਣਮੋਤਾਰਯੀ ਮੁਨਿ.
ਅਵਿਜ੍ਜਵਾਦ੍ਯਾਨੁਲੋਮੇਨ ਜਰਾਦਿਪਟਿਲੋਮਤੋ,
ਸਮ੍ਮਸਨ੍ਤੋ ਯਥਾਭੂਤਂ ਞਾਣਦਸ੍ਸਨਮਾਗਮਿ.
ਕਪ੍ਪਕੋਟਿਸਤੇਨਾਪਿ ਅਪ੍ਪਮੇਯ੍ਯੇਸੁ ਜਾਤਿਸੁ,
ਲੋਭਂ ਅਸੇਸਦਾਨੇਨ ਵਿਨਾਸੇਨ੍ਤੋ ਪੁਨਪ੍ਪੁਨਂ.
ਸੀਲੇਨ ਖਨ੍ਤਿਮੇਤ੍ਤਾਯ ਕੋਖਦੋਸਂ ਨਿਵਾਰੇਸਿ,
ਪਞ੍ਞਾਯ ਮੋਹਂ ਛੇਤ੍ਵਾਨ ਮਿਚ੍ਛਾਦਿਟ੍ਠਿ ਤਥੇਵ ਚ.
ਗਰੂਪਸੇਵਨਾਦੀਹਿ ਵਿਚਿਕਿਚ੍ਛਂ ਵਿਨੋਦਯਂ,
ਮਾਨੁਦ੍ਧਚ੍ਚਂ ਵਿਨੋਦੇਨ੍ਤੋ ਕੁਲੇ ਜੇਟ੍ਠੋਪਚਾਯਿਨਾ.
ਨੇਕ੍ਖਮ੍ਮੇਨ ਵਿਨਾਸੇਨ੍ਤੋ ਕਾਮਰਾਗਂ ਪੁਨਪ੍ਪੁਨਂ,
ਸਚ੍ਚੇਨ ਵਿਸਂਵਾਦਂ ਕੋਸਜ੍ਜਂ ਵੀਰਿਯੇਨ ਚ.
ਏਵਂ ਦਾਨਾਦਿਨਾ ਤਂ ਤਂ ਕਿਲੇਸਙ੍ਗਂ ਵਿਨੋਦਯਂ,
ਸੁਵਡ੍ਢਿਤਾ ਮਹਾਪਞ੍ਞਾ ਕਥਂ ਸਨ੍ਤਿਂ ਨ ਰੂਹਤਿ.
ਸੁਦੁਕ੍ਕਰਂ ਕਰਿਤ੍ਵਾਨ ਦਾਨਾਦਿਪਚ੍ਚਯਂ ਪੁਰੇ,
ਨ ਕਿਞ੍ਚਿ ਭਵਸਮ੍ਪਤ੍ਤਿਂ ਪਤ੍ਥੇਸਿ ਬੋਧਿਮੁਤ੍ਤਮਂ.
ਪਣਿਧਾਨਮ੍ਹਾ ਪਟ੍ਠਾਯ ਕਤਂ ਪੁਞ੍ਞਞ੍ਚ ਪਤ੍ਥਨਂ,
ਏਕ੍ਕਤ੍ਥ ਦਾਨਿ ਸਮ੍ਪਤ੍ਤਿਂ ਦੇਤਿ ਬੋਧਿਂ ਅਸਂਸਯਂ.
ਤਤੋ ਸੋ ਸਬ੍ਬਸਙ੍ਖਾਰੇ ਅਨਿਚ੍ਚਦੁਕ੍ਖਨਤ੍ਤਤੋ,
ਸਮ੍ਮਸਨ੍ਤੋਨੁਲੋਮੇਨ ਨਿਬ੍ਬਾਨਂ ਸਮੁਪਾਗਮਿ.
ਸਵਾਸਨੇ ਕਿਲੇਸੇ ਸੋ ਝਾਪੇਨ੍ਤੋਨੁਮਤ੍ਤਂ ਪਿ ਚ,
ਅਰਹਤ੍ਤਪ੍ਪਤ੍ਤਿਯਾ ਸੁਦ੍ਧੋ ਬੁਦ੍ਧੋ ਬੋਧਿਤਲੇ ਅਹੁ.
ਪਤ੍ਤੋ ਵਿਮੇਤ੍ਤਿਂ ਵਰਸੇਤਛਤ੍ਤਂ,
ਸੋ ਪੀਤਿਵੇਗੇਨ ਉਦਾਨੁਦੀਰਯਿ;
ਛੇਤ੍ਵਾਨ ਮਾਰੇ ਵਿਜਿਤਾਰਿਸਙ੍ਘੋ,
ਤਿਬੁਦ੍ਧਖੇਤ੍ਤੇਕਦਿਵਾਕਰੋ ਅਹੁ.
ਰਾਜਾਧਿਰਾਜਾ ਵਰਮੇਵਮਾਸਿ,
ਤਿਛਤ੍ਤਧਾਰਿ ਵਰਧਮ੍ਮਰਾਜਾ;
ਮਹਾਸਹਸ੍ਸਂ ਪਿ ਚ ਲੋਕਧਾਤੁਂ,
ਸਰੇਨ ਵਿਞ੍ਞਾਪਯਿਤੁਂ ਸਮਤ੍ਥੋ.
ਬੁਦ੍ਧੋ ਲੋਕਾਲੋਕੇ ਲੋਕੇ,
ਜਾਤੋ ਸਤ੍ਤੋ ਕੋਨੁਮ੍ਮਤ੍ਤੋ;
ਸੁਦ੍ਧਂ ਬੁਦ੍ਧਂ ਓਘਾ ਤਿਣ੍ਣਂ,
ਸਦ੍ਧੋ ਪਞ੍ਞੋ ਕੋ ਨੋ ਵਨ੍ਦੇ.
ਭਜਿਤਂ ਚਜਿਤਂ ਪਵਨਂ ਭਵਨਂ,
ਜਹਿਤਂ ਗਹਿਤਂ ਸਮਲਂ ਅਮਲਂ;
ਸੁਗਤਂ ਅਗਤਂ ਸੁਗਤਿਂ ਅਗਤਿਂ,
ਨਮਿਤਂ ਅਮਿਤਂ ਨਮਤਿਂ ਸੁਮਤਿਂ.
ਧਮ੍ਮਚਕ੍ਕਪਵਤ੍ਤਨਦੀਪਨੀਗਾਥਾ
ਸਮ੍ਮਾਸਮ੍ਬੋਧਿਞਾਨਂ ਹਤਸਕਲਮਲਂ ਸੁਦ੍ਧਤੋ ਚਾਤਿਸੁਦ੍ਧਂ,
ਅਦ੍ਧਾ ਲਦ੍ਧਾ ਸੁਲਦ੍ਧਂ ਵਤਮਿਤਿ ਸਤਤਂ ਚਿਨ੍ਤਯਨ੍ਤੋ ਸੁਬੋਧਿਂ;
ਸਤ੍ਤਾਹਂ ਸਤ੍ਤਮੇਵਂ ਵਿਵਿਧਫਲਸੁਖਂ ਵਿਤਿਨਾਮੇਸਿ ਕਾਲਂ,
ਬ੍ਰਹ੍ਮੇਨਾਯਾਚਿਤੋ ਸੋ ਇਸਿਪਤਨਵਨੇ ਵਤ੍ਤਯੀ ਧਮ੍ਮਚਕ੍ਕਂ.
ਪਾਟਿਹਾਰਿਯਦੀਪਨੀਗਾਥਾ
ਬ੍ਰਹ੍ਮਸ੍ਸ ਸਦ੍ਦਂ ਕਰਵੀਕਭਾਣਿਂ,
ਯਥਿਚ੍ਛਿਤਂ ਸਾਵਯਿਤੁਂ ਸਮਤ੍ਥਂ;
ਸਚ੍ਚਂ ਪਿਯਂ ਭੂਤਹਿਤਂ ਵਦਨ੍ਤਂ,
ਨ ਪੂਜਯੇ ਕੋ ਹਿ ਨਰੋ ਸਚੇਤਨੋ.
ਇਦ੍ਧਿ ਚ ਆਦੇਸਨਾਨੁਸਾਸਨੀ,
ਪਾਟਿਹੀਰੇ ਭਗਵਾ ਵਸੀ ਅਹੁ;
ਕਤ੍ਵਾਨ ਅਚ੍ਛੇਰਸੁਪਾਟਿਹੀਰਂ,
ਦੇਸੇਸਿ ਧਮ੍ਮਂ ਅਨੁਕਮ੍ਪਿਮਂ ਪਜਂ.
ਨਵਗੁਣਦੀਪਨੀਗਾਥਾ
ਏਵਂ ਹਿ ਬੁਦ੍ਧਤ੍ਤਮੁਪਾਗਤੋ ਸੋ,
ਦੇਸੇਸਿ ਧਮ੍ਮਂ ਸਨਰਾਮਰਾਨਂ;
ਨਾਨਾਨਯੇਹੀਭਿਸਮੇਸਿ ਸਤ੍ਤੇ,
ਤਸ੍ਮਾ ਹਿ ਝਾਤੋ ਤਿਭਵੇਸੁ ਨਾਥੋ.
ਅਦ੍ਧਾ ਲਦ੍ਧਾ ਧਮ੍ਮਾਲੋਕਂ,
ਦਿਟ੍ਠਾ ਪਤ੍ਤਾ ਞਾਤਾ ਸਚ੍ਚਂ;
ਤਿਞ੍ਞਾਰਾਗਾਦੋਸਮੋਹਾ,
ਥੋਮੇਸੁਂ ਤੇ ਦੇਵਾ ਬ੍ਰਹ੍ਮਾ.
ਮੁਨਿਰਾਜਵਰੋ ਨਰਰਾਜਵਰੋ,
ਦਿਵਿਦੇਵਵਰੋ ਸੁਚਿਬ੍ਰਹ੍ਮਵਰੋ;
ਸਕਪਾਪਹਰੋ ਪਰਪਾਪਹਰੋ,
ਸਕਵੁਡ੍ਢਿਕਰੋ ਪਰਵੁਡ੍ਢਿਕਰੋ.
ਸਨਰਾਮਰੁਬ੍ਰਹ੍ਮਗਣੇਭਿ ਰੁਤਾ,
ਅਰਹਾਦਿਗੁਣਾ ਵਿਪੁਲਾ ਵਿਮਲਾ;
ਨਵਧਾ ਵਸੁਧਾਗਗਣੇ,
ਸਕਲੇ ਤਿਦਿਵੇ ਤਿਭਵੇ ਵਿਸਟਾ.
ਯੇ ਪਿਸ੍ਸ ਤੇ ਭਗਵਤੋ ਚ ਅਚਿਨ੍ਤਿਯਾਦੀ,
ਸੁਦ੍ਧਾਤਿਸੁਦ੍ਧਤਰਬੁਦ੍ਧਗੁਣਾ ਹਿ ਸਬ੍ਬੇ;
ਸਙ੍ਖੇਪਤੋ ਨਵਵਿਧੇਸੁ ਪਦੇਸੁ ਖਿਤ੍ਤਾ,
ਵਕ੍ਖਾਮਿ ਦਾਨਿ ਅਰਹਾਦਿਗੁਣੇ ਅਹਂ ਪਿ.
ਯੋ ਚੀਧ ਜਾਤੋ ਅਰਹਂ ਨਿਰਾਸੋ,
ਸਮ੍ਮਾਭਿਸਮ੍ਬੁਦ੍ਧਸਮਨ੍ਤਚਕ੍ਖੁ;
ਸਮ੍ਪਨ੍ਨਵਿਜ੍ਜਾਚਰਣੋਘਤਿਣ੍ਣੋ,
ਸਮ੍ਮਾਗਤੋ ਸੋ ਸੁਗਤੋ ਗਤੋ ਵ.
ਅਵੇਦਿ ਸੋ ਲੋਕਮਿਮਂ ਪਰਞ੍ਚ,
ਅਮੁਤ੍ਤਰੋ ਸਾਰਥਿਦਮ੍ਮਸਤ੍ਤੇ;
ਸਦੇਵਕਾਨਂ ਵਰਸਤ੍ਥੁਕਿਚ੍ਚਂ,
ਅਕਾਸਿ ਬੁਦ੍ਧੋ ਭਗਵਾ ਵਿਸੁਦ੍ਧੋ.
ਗੁਣਦੀਪਨੀਗਾਥਾ
ਨ ਤਸ੍ਸ ਅਦਿਟ੍ਠਨਮਿਧਤ੍ਥਿ ਕਿਞ੍ਚਿ,
ਅਤੋ ਅਵਿਞ੍ਞਾਤਮਜਾਨਿਤਬ੍ਬਂ;
ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਞੇਯ੍ਯਂ,
ਤਥਾਗਤੋ ਤੇਨ ਸਮਨ੍ਤਚਕ੍ਖੁ.
ਇਤਿ ਮਹਿਤਮਨਨ੍ਤਾਕਿਤ੍ਤਿਸਮ੍ਭਾਰਸਾਰਂ,
ਸਕਲਦਸਸਹਸ੍ਸੀਲੋਕਧਾਤੁਮ੍ਹਿ ਨਿਚ੍ਚਂ;
ਉਪਚਿਤਸੁਭਹੇਤੁਪਯੁਤਾਨਨ੍ਤਕਾਲਂ,
ਤਦਿਹ ਸੁਗਤਬੋਧਿਸਾਧੁਕਂ ਚਿਨ੍ਤਨੀਯਂ;
ਤਕ੍ਕਬ੍ਯਾਕਰਣਞ੍ਚ ਧਮ੍ਮਵਿਨਯਂ ਸੁਤ੍ਵਾ ਪਿ ਯੋ ਪਞ੍ਞਵਾ,
ਤੇਨਾਯਂ ਸੁਚਿਸਾਰਭੂਤਵਚਨਂ ਵਿਞ੍ਞਾਯਤੇ ਕੇਵਲਂ;
ਹੇਤੁਞ੍ਚਾਪਿ ਫਲੇਨ ਤੇਨ ਸਫਲਂ ਸਮ੍ਪਸ੍ਸਮਾਨੋ ਤਤੋ ਬੋਧਿਂ ਸਦ੍ਦਹਤੇਵ ਤਸ੍ਸ ਮਹਤਾਵਾਯਮਤੋ ਸਮ੍ਭਵਂ.
ਯੋ ਸਦ੍ਦਹਨ੍ਤੋ ਪਨ ਤਸ੍ਸ ਬੋਧਿਂ,
ਵੁਤ੍ਤਾਨੁਸਾਰੇਨ ਗੁਣੇਰਹਾਦੀ;
ਕਥੇਤਿ ਚਿਨ੍ਤੇਨ੍ਤਿ ਚ ਸੋ ਮੁਹੁਤ੍ਤਂ,
ਓਹਾਯ ਪਾਪਾਨਿ ਉਪੇਤਿ ਸਨ੍ਤਿਂ.
ਸਦ੍ਧੇਯ੍ਯਾ ਤੇ ਚਿਨ੍ਤੇਯ੍ਯਾ ਤੇ,
ਵਨ੍ਦੇਯ੍ਯਾ ਤੇ ਪੂਜੇਯ੍ਯਾਤੇ;
ਬੁਦ੍ਧੋਲੋਕਾਲੋਕੇ ਲੋਕੇ,
ਜਾਤੇ ਨੇਤਂ ਪਤ੍ਥੇਨ੍ਤੇਨ.
ਪੂਜਾਨਿਧਾਨਦੀਪਨੀਗਾਥਾ
ਤਸਮਾ ਹਿ ਜਾਤੋਵਰਕਮ੍ਹਿ ਤਸ੍ਸ,
ਆਯਤ੍ਤਕੇ ਮਙ੍ਗਲਚਕ੍ਕਵਾਲ਼ੇ;
ਭੂਤੇਹਿ ਵਤ੍ਥੂਹਿ ਮਨੋਰਮੇਹਿ,
ਪੂਜੇਮਿ ਤਂ ਪੂਜਿਤ੍ਪੂਜਿਤਂ ਪੁਰੇ.
ਸੋਹਂ ਅਜ੍ਜ ਪਨੇਤਸ੍ਮਿਂ ਚਕ੍ਕਵਾਲ਼ਮ੍ਹਿ ਪੁਪ੍ਫਿਤੇ,
ਥਲਜੇ ਜਲਜੇ ਵਾਪਿ ਸੁਗਨ੍ਧੇ ਚ ਅਗਨ੍ਧਕੇ.
ਮਨੁਸ੍ਸੇਸੁ ਅਨੇਕਤ੍ਥ ਤਲ਼ਾਕੁਯ੍ਯਾਨਵਾਪਿਸੁ,
ਪਵਨੇ ਹਿਮਵਨ੍ਤਸ੍ਮਿਂ ਤਤ੍ਥ ਸਤ੍ਤ ਮਹਾਸਰੇ.
ਪਰਿਤ੍ਤਦੀਪੇ ਦ੍ਵਿਸਹਸ੍ਸੇ ਮਹਾਦੀਪੇ ਸੁਪੁਪ੍ਫਿਤੇ,
ਸਤ੍ਤਪਰਿਭਣ੍ਡਸੇਲੇਸੁ ਸਿਨੇਰੁਪਬ੍ਬਤੁਤ੍ਤਮੇ.
ਕੁਮੁਦੁਪ੍ਪਲਕਾਦੀਨਿ ਨਾਗਾਨਂ ਭਵਨੇਸੁਪਿ,
ਪਾਟਲਾਦੀਨਿ ਪੁਪ੍ਫਾਨਿ ਅਸੁਰਾਨਂ ਹਿ ਆਲਯੇ.
ਕੋਵਿਲ਼ਾਰਾਦਿਕਾਨਿ ਤੁ ਦੇਵਤਾਨਂ ਹਿ ਆਲਯੇ,
ਏਵਮਾਦੀ ਅਨੇਕਤ੍ਥ ਪੁਪ੍ਫਿਤੇ ਧਰਣੀਰੁਹੇ.
ਚਮ੍ਪਕਾ ਸਲਲਾ ਨਿਮ੍ਬਾ ਨਾਗਪੁਨ੍ਨਾਗਕੇਤਕਾ,
ਵਸ੍ਸਿਕਾ ਮਲ੍ਲਿਕਾ ਸਾਲਾ ਕੋਵਿਲ਼ਾਰਾ ਚ ਪਾਟਲਿ.
ਇਨ੍ਦੀਵਰਾ ਅਸੋਕਾ ਚ ਕਣਿਕਾਰਾ ਚ ਮਕੁਲਾ,
ਪਦੁਮਾ ਪੁਣ੍ਡਰਿਕਾ ਚ ਸੋਗਨ੍ਧਿਕੁਮੁਦੁਪ੍ਪਲਾ.
ਏਤੇ ਚਞ੍ਞੇ ਚ ਰੁਕ੍ਖਾ ਚ ਵਲ੍ਲਿਯੋ ਚਾਪਿ ਪੁਪ੍ਫਿਤਾ,
ਸੁਗਨ੍ਧਾ ਸੁਖਸਮ੍ਫਸ੍ਸਾ ਨਾਨਾਵਣ੍ਣਨਿਭਾ ਸੁਭਾ.
ਵਿਚਿਤ੍ਰਾ ਨੀਲਾਨੇਕਾਨਿ ਪੀਤਾ ਲੋਹਿਤਕਾਨਿ ਚ,
ਕਾਲ਼ਾ ਸੇਤਾ ਚ ਮਞ੍ਜਟ੍ਠ ਨੇਕਵਣ੍ਣਾ ਸੁਪੁਪ੍ਫਿਤਾ.
ਸੋਭਤੇ ਪਬ੍ਬਤੇ ਹੇਟ੍ਠਾ ਸਰੇਹਿ ਵਨਰਾਜਿਹਿ,
ਸਨ੍ਦਮਾਨਾਹਿ ਗਙ੍ਗਾਹਿ ਹਿਮਵਾ ਰਤਨਾਕਰੋ.
ਪਤ੍ਤਕਿਞ੍ਜਕ੍ਖਰੇਣੂਹਿ ਓਕਿਣ੍ਣਂ ਹੋਤਿ ਤਂ ਵਨਂ,
ਭਮਰਾ ਪੁਪ੍ਫਗਨ੍ਧੇਹਿ ਸਮਨ੍ਤਾ ਅਭਿਨਾਦਿਤਾ.
ਅਥੇਤ੍ਤ ਸਕੁਣਾ ਸਨ੍ਤਿ ਦਿਜਾ ਮਞ੍ਜੁਸ੍ਸਰਾ ਸੁਭਾ,
ਕੂਜਨ੍ਤਮੁਪਕੂਜਨ੍ਤਿ ਉਤੁਸਮ੍ਪੁਪ੍ਫਿਤੇ ਦੁਮੇ.
ਨਿਚ੍ਛਰਾਨਂ ਨਿਪਾਤੇਨ ਪਬ੍ਬਤਾ ਅਭਿਨਾਦਿਤਾ,
ਪਞ੍ਚਙ੍ਗਿਕਾਨਿ ਤੂਰਿਯਾਨਿ ਦਿਬ੍ਬਾਨਿ ਵਿਯ ਸੁਯ੍ਯਰੇ.
ਤਤ੍ਥ ਨਚ੍ਚਨ੍ਤਿ ਤਸ੍ਮਿਂ ਜਲਨ੍ਤਗ੍ਗਿਸਿਖੂਪਮਾ,
ਤਸ੍ਮਿਂ ਹਿ ਕਿਨ੍ਨਰਾ ਕਿਚ੍ਚਂ ਪਦੀਪੇਨ ਕਰੀਯਤਿ.
ਮੁਤ੍ਤਾਜਾਲਾਵ ਦਿਸ੍ਸਨ੍ਤਿ ਨਿਚ੍ਛਰਾਨਂ ਹਿ ਪਾਤਕਾ,
ਪਜ੍ਜਲਨ੍ਤਾ ਵ ਤਿਟ੍ਠਨ੍ਤਿ ਮਣਿਵੇਲ਼ੁਰਿਯਾਦਯੋ.
ਕਾਲ਼ਾਨੁਸਾਰਿ ਤਗ੍ਗਰਂ ਕਪ੍ਪੂਰਂ ਹਰਿਚਨ੍ਦਨਂ,
ਸਕੁਣਾਨਂ ਹਿ ਸਦ੍ਦੇਨ ਮਯੂਰਾਨਂ ਹਿ ਕੇਕਯਾ.
ਭਮਰਾਨਂ ਹਿ ਨਿਨ੍ਨਾਦਾ ਕੋਞ੍ਚਨਾਦੇਨ ਹਤ੍ਥਿਨਂ,
ਵਿਜਮ੍ਭਿਤੇਨ ਵਾਲ਼ਾਨਂ ਕਿਨ੍ਨਰਾਨਂ ਹਿ ਗੀਤਿਯਾ;
ਪਬ੍ਬਤਾਨਂ ਹਿ ਓਭਾਸਾ ਮਣੀਨਂ ਜੋਤਿਯਾਪਿ ਚ,
ਵਿਚਿਤ੍ਰਬ੍ਭਵਿਤਾਨੇਹਿ ਦੁਮਾਨਂ ਪੁਪ੍ਫਧੂਪਿਯਾ;
ਏਵਂ ਸਬ੍ਬਙ੍ਗਸਮ੍ਪਨ੍ਨਂ ਕਿਂ ਸਿਯਾ ਨਨ੍ਦਨਂ ਵਨਂ.
ਏਵਂ ਸੁਸਮ੍ਫੁਲ੍ਲਵਨਂ ਹਿ ਯਂ ਯਂ,
ਤਹਿਂ ਤਹਿਂ ਪੁਪ੍ਫਿਤਪੁਪ੍ਫਿਤਂ ਸੁਭਂ;
ਮਾਲਂ ਸੁਸਦ੍ਦਞ੍ਚ ਮਨੁਞ੍ਞਗਨ੍ਧਂ,
ਪੂਜੇਮਿ ਤਂ ਪੂਜਿਤਪੂਜਿਤਂ ਪੁਰਾ.
ਨਾਗਲੋਕੇ ਮਨੁਸ੍ਸੇ ਚ ਦੇਵੇ ਬ੍ਰਹ੍ਮੇ ਚ ਯਂ ਸਿਯਾ,
ਸਾਮੁਦ੍ਦਿਕਂ ਭੂਮਿਗਤਂ ਆਕਾਸਟ੍ਠਞ੍ਚ ਯਂ ਧਮਂ.
ਰਜਤਂ ਜਾਤਰੂਪਞ੍ਚ ਮੁਤ੍ਤਾ ਵੇਲ਼ੁਰਿਯਾ ਮਣਿ,
ਮਸਾਰਗਲ੍ਲਂ ਫਲਿਕਂ ਲੋਹਿਤਙ੍ਗਂ ਪਵਾਲ਼ਕਂ.
ਯੋ ਸੋ ਅਨਨ੍ਤਕਪ੍ਪੇਸੁ ਪੂਰੇਤ੍ਵਾ ਦਸਪਾਰਮੀ,
ਬੁਦ੍ਧੋ ਬੋਧੇਸਿ ਸਤ੍ਤਾਨਂ ਤਸ੍ਸ ਪੂਜੇਮਿ ਤਂ ਧਨਂ.
ਖੋਮਂ ਕੋਸੇਯ੍ਯਂ ਕਪ੍ਪਾਸਂ ਸਾਣਂ ਭਙ੍ਗਞ੍ਚ ਕਮ੍ਬਲਂ,
ਦੁਕੂਲਾਨਿ ਚ ਦਿਬ੍ਬਾਨਿ ਦੁਸ੍ਸਾਨਿ ਵਿਵਿਧਾਨਿ ਤੇ.
ਅਨਨ੍ਤਵਤ੍ਥਦਾਨੇਨ ਹਿਰੋਤ੍ਤਪ੍ਪਾਦਿਸਂਵਰਂ,
ਯਸ੍ਸ ਸਿਦ੍ਧਂ ਸਿਯਾ ਤਸ੍ਸ ਦੁਸ੍ਸਾਨਿ ਪੁਜਯਾਮਹਂ.
ਪਵਨੇ ਜਾਤਰੁਕ੍ਖਾਨਂ ਨਾਨਾਫਲਰਸੁਤ੍ਤਮਂ,
ਅਮ੍ਬਾ ਕਪਿਟ੍ਠਾ ਪਨ੍ਸਾ ਚੋਚਮੋਚਾਦਿਨਪ੍ਪਕਾ.
ਤਸ੍ਮਿਂ ਗਨ੍ਧਰਸਂ ਓਜਂ ਬੁਦ੍ਧਸੇਟ੍ਠਸ੍ਸ ਪੂਜਿਤਂ,
ਵਨ੍ਦਾਮਿ ਸਿਰਸਾ ਨਿਚ੍ਚਂ ਵਿਪ੍ਪਸਨ੍ਨੇਨ ਚੇਤਸਾ.
ਪੂਜੇਮਿ ਪਠਮਂ ਤਸ੍ਸ ਪਣਿਧਾਨਂ ਅਚਿਨ੍ਤਿਯਂ,
ਚਕ੍ਕਵਾਲ਼ਮ੍ਹਿ ਸਬ੍ਬੇਹਿ ਵਿਜ੍ਜਮਾਨੇਹਿ ਵਤ੍ਥੁਹਿ.
ਦਸਨ੍ਨਂ ਪਾਰਮੀਨਨ੍ਤੁ ਪੂਰਿਤਟ੍ਠਾਨਮੁਤ੍ਤਮਂ,
ਤਤੋ ਸਾਲਵਨੇ ਰਮ੍ਮੇ ਜਾਤਟ੍ਠਾਨਂ ਚਰਿਮਕਂ.
ਛਬ੍ਬਸਾਨਿ ਪਧਾਨਸ੍ਮਿਂ ਕਰਣਂ ਦੁਕ੍ਕਰਕਾਰਿਕਂ,
ਅਪ੍ਪਰਾਜਿਤਪਲ੍ਲਙ੍ਕਂ ਬੁਦ੍ਧਂ ਬੁਦ੍ਧਗੁਣਂ ਨਮੇ.
ਚੁਦ੍ਦਸ ਬੁਦ੍ਧਞਾਣਾਨਿ ਅਟ੍ਠਰ੍ਸ ਆਵੇਣਿਕਂ,
ਪੂਜੇਮਿ ਦਸਬਲਞਾਣਂ ਚਤੁਵੇਸਾਰਜ੍ਜਮੁਤ੍ਤਮਂ.
ਆਸਯਾਨੁਸਯਞਾਣਂ ਇਨ੍ਦ੍ਰਿਯਾਨਂ ਪਰੋਪਰਂ,
ਯਮਕਪਾਟਿਹੀਰਞ੍ਚ ਞਾਣਂ ਸਬ੍ਬਞ੍ਞੁਤਂ ਪਿ ਚ.
ਮਹਾਕਰੁਣਾਪਤ੍ਤਿਞਾਣਂ ਅਨਾਵਰਣ੍ਮਿਤਿ ਚ,
ਛ ਅਸਾਧਾਰਣਾਨੇਤੇ ਞਤ੍ਵਾਨ ਪੂਜਯਾਮਹਂ.
ਤਤੋ ਚ ਸਤ੍ਤਸਤ੍ਤਾਹੇ ਧਮ੍ਮਸਮ੍ਮਸਿਤਂ ਨਮੇ,
ਬ੍ਰਹ੍ਮੁਨਾ ਯਾਚਿਤਟ੍ਠਾਨਂ ਧਮ੍ਮਂ ਦੇਸਯਿਤੁਂ ਵਰਂ.
ਇਸਿਪਤਨੇ ਮਿਗਦਾਯੇ ਧਮ੍ਮਚਕ੍ਕਪਵਤ੍ਤਨਂ,
ਤਤੋ ਵੇਲ਼ੁਵਨਾਰਾਮੇ ਵਸਿਤਠਾਨਞ੍ਚ ਪੂਜਯੇ.
ਤਤੋ ਜੇਤਵਨਂ ਰਮ੍ਮਂ ਚਿਰਵੁਤ੍ਥਂ ਮਹੇਸਿਨਾ,
ਅਸਾਧਾਰਣਮਞ੍ਞੇਸਂ ਯਮਕਪਾਟਿਹਰਿਯਂ.
ਪਾਰਿਚ੍ਛਤ੍ਤਕਮੂਲਮ੍ਹਿ ਅਭਿਧਮ੍ਮਞ੍ਚ ਦੇਸਨਂ,
ਸਙ੍ਕਸ੍ਸਨਗਰਦ੍ਵਾਰੇ ਦੇਵੋਰੋਹਣਕਂ ਪਿ ਚ.
ਤਤੋ ਚ ਹਿਮਵਨ੍ਤਸ੍ਮਿਂ ਮਹਾਸਮਯਦੇਸਨਂ,
ਵੁਤ੍ਤਾਨੇਤਾਨਿ ਠਾਨਾਨਿ ਨਤ੍ਵਾਨ ਪੁਜਯਾਮਹਂ.
ਚਤੁਰਾਸੀਤਿਸਹਸ੍ਸੇਹਿ ਧਮ੍ਮਕ੍ਖਨ੍ਧੇਹਿ ਸਙ੍ਗਹਂ,
ਪਿਟਕਤ੍ਤਯਂ ਯਥਾਵੁਤ੍ਤਵਿਧਿਨਾ ਪੂਜਯਾਮਹਂ.
ਮਾਰਸ੍ਸ ਅਤ੍ਤਨੋ ਆਯੁਸਙ੍ਖਾਰੋਸਜ੍ਜਨਂ ਨਮੇ,
ਕੁਸਿਨਾਰਾਯ ਮਲ੍ਲਾਨਂ ਯਮਕਸਾਲਮਨ੍ਤਰੇ.
ਪਣਿਧਾਨਮ੍ਹਿ ਪਟ੍ਠਾਯ ਕਤਂ ਕਿਚ੍ਚਂ ਅਸੇਸਤੋ,
ਨਿਟ੍ਠਪੇਤ੍ਵਾਨ ਸੋ ਸਬ੍ਬਂ ਪਰਿਨਿਬ੍ਬਾਯਿਨਾਸਵੋ.
ਏਵਂ ਨਿਬ੍ਬਾਯਮਾਨਸ੍ਸ ਕਤਕਿਚ੍ਚਸ੍ਸ ਤਾਦਿਨੋ,
ਚਿਰਗਤਾ ਮਹਾਕਰੁਣਾ ਨ ਨਿਬ੍ਬਾਯਿਤ੍ਥ ਕਿਞ੍ਚਿਪਿ.
ਸ੍ਵਾਯਂ ਧਮ੍ਮੋ ਵਿਨਯੋ ਚ ਦੇਸਿਤੋ ਸਾਧੁਕਂ ਮਯਾ,
ਮਮਚ੍ਚਯੇਨ ਸੋ ਸਤ੍ਥਾ ਧਾਤੁ ਚਾਪਿ ਸਰੀਰਜਾ.
ਅਪ੍ਪਰਾਜਿਤਪਲ੍ਲਙ੍ਕਂ ਬੋਧਿਰੁਕ੍ਖਞ੍ਚ ਉਤ੍ਤਮਂ,
ਮਮਚ੍ਚਯੇਨ ਸਤ੍ਥਾ ਤਿ ਅਨੁਜਾਨਿ ਮਹਾਮੁਨਿ.
ਮਮ ਠਨੇ ਠਪੇਤ੍ਵਾਨ ਧਾਤੁਬੋਧਿਞ੍ਚ ਪੂਜਿਤਂ,
ਅਨੁਜਾਨਾਮਿ ਤੁਮ੍ਹਾਕਂ ਸਾਧਨਤ੍ਥਂ ਸਿਵਞ੍ਜਸਂ.
ਤਸ੍ਮਾ ਹਿ ਤਸ੍ਸ ਸਦ੍ਧਮ੍ਮਂ ਉਗ੍ਗਣ੍ਹਿਤ੍ਵਾ ਯਥਾਤਥਂ,
ਯੋ ਦੇਸੇਤਿ ਸਮ੍ਬੁਦ੍ਧੋ ਤਿ ਨਤ੍ਵਾਨ ਪੂਜਯਾਮਹਂ.
ਤਸ੍ਮਾ ਸਾਸਪਮਤ੍ਤਂ ਪਿ ਜਿਨਧਾਤੁਂ ਅਸੇਸਿਯ,
ਵਿਤ੍ਥਿਨ੍ਨਚਕ੍ਕਵਾਲ਼ਮ੍ਹਿ ਨਤ੍ਵਾਨ ਪੂਜਯਾਮਹਂ.
ਪਰਮ੍ਪਰਾਭਤਾਨਂ ਹਿ ਇਮਮ੍ਹਾ ਬੋਦ੍ਧਿਰੁਕ੍ਖਤੋ,
ਸਬ੍ਬੇਸਂ ਬੋਧਿਰੁਕ੍ਖਾਨਂ ਨਤ੍ਵਾਨ ਪੂਜਯਾਮਹਂ.
ਯਂ ਯਂ ਪਰਿਭੁਞ੍ਜਿ ਭਗਵਾ ਪਤ੍ਤਚੀਵਰਮਾਦਿਕਂ,
ਸਬ੍ਬਂ ਪਰਿਭੋਗਧਾਤੁਂ ਨਤ੍ਵਾਨ ਪੂਜਯਾਮਹਂ.
ਯਤ੍ਥ ਕਤ੍ਥਚਿ ਸਯਿਤੋ ਆਸਿਨ੍ਨੋ ਚਙ੍ਕਮੇਪਿ ਵਾ,
ਪਾਦਲਞ੍ਛਨ੍ਕਂ ਕਤ੍ਵਾ ਠਿਤੋ ਨਤ੍ਵਾਨ ਪੂਜਯੇ.
ਨ ਸਞ੍ਜਾਨਨ੍ਤਿ ਯੇ ਬੁਦ੍ਧਂ ਏਵਰੂਪੋ ਤਿ ਞਾਤ੍ਵੇ,
ਕਤਂ ਤਂ ਪਟਿਮਂ ਸਬ੍ਬਂ ਨਤ੍ਵਾਨ ਪੂਜਯਾਮਹਂ.
ਏਵਂ ਬੁਦ੍ਧਞ੍ਚ ਧਮ੍ਮਞ੍ਚ ਸਙ੍ਘਞ੍ਚ ਅਨੁਤ੍ਤਰਂ,
ਚਕ੍ਕਵਾਲ਼ਮ੍ਹਿ ਸਬ੍ਬੇਹਿ ਵਤ੍ਥੂਹਿ ਪੂਜਯਾਮਹਂ.
ਪਤ੍ਥਨਾਦੀਪਨੀਗਾਥਾ
ਅਸ੍ਮਿਂ ਚ ਪੁਬ੍ਬੇਪਿ ਚ ਅਤ੍ਤਭਾਵੇ,
ਸਬ੍ਬੇਹਿ ਪੁਞ੍ਞੇਹਿ ਮਯਾ ਕਤੇਹਿ;
ਪੂਜਾਵਿਧਾਨੇਹਿ ਚ ਸਞ੍ਞਮੇਹਿ,
ਭਵੇ ਭਵੇ ਪੇਮਨਿਯੋ ਭਵੇਯ੍ਯਂ.
ਸਦ੍ਧਾ ਹਿਰੋਤ੍ਤਪ੍ਪਬਹੁਸ੍ਸੁਤਤ੍ਤਂ,
ਪਰਕ੍ਕਮੋ ਚੇਵ ਸਤਿਸ੍ਸਮਾਧਿ;
ਨਿਬ੍ਬੇਧਭਾਗੀ ਵਜਿਰੂਪਮਾਤਿ,
ਪਞ੍ਞਾ ਚ ਮੇ ਸਿਜ੍ਝਤੁ ਯਾਵ ਬੋਧਿਂ.
ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ,
ਦਿਟ੍ਠਿਞ੍ਚ ਮਾਨਂ ਵਿਚਿਕਿਚ੍ਛਿਤਞ੍ਚ;
ਮਚ੍ਛੇਰੇਇਸ੍ਸਾਮਲਵਿਪ੍ਪਹੀਨੋ,
ਅਨੁਦ੍ਧਤੋ ਅਚ੍ਚਪਲੋ ਭਵੇਯ੍ਯਂ.
ਭਵੇਯ੍ਯਹਂ ਕੇਨਚਿ ਨਪ੍ਪਸੇਯ੍ਹੋ,
ਭੋਗੋ ਚ ਦਿਨ੍ਨੇਹਿ ਪਟੇਹਿ;
ਭੋਗੋ ਚ ਕਾਯੋ ਚ ਮਮੇਸ ਲਦ੍ਧੋ,
ਪਰੂਪਕਾਰਾਯ ਭਵੇਯ੍ਯਂ ਨੂਨ.
ਧਮ੍ਮੇਨਾ ਮਾਲਾਪਿਤਰੋ ਭਰੇਯ੍ਯਂ,
ਵੁਡ੍ਢਪਚਾਯੀ ਚ ਬਹੂਪਕਾਰੀ;
ਞਾਤੀਸੁ ਮਿਤ੍ਤੇਸੁ ਸਪਤ੍ਤਕੇਸੁ,
ਵੁਡ੍ਢਿਂ ਕਰੇਯ੍ਯਂ ਹਿਤਮਤ੍ਤਨੋ ਚ.
ਮੇਤ੍ਤੇਯ੍ਯਨਾਥਂ ਉਪਸਙ੍ਕਮਿਤ੍ਵਾ,
ਤਸ੍ਸਤ੍ਤਭਾਵਂ ਅਭਿਪੂਜਯਿਤ੍ਵਾ;
ਲਦ੍ਧਾਨ ਵੇਯ੍ਯਾਕਰਣਂ ਅਨੂਨਂ,
ਬੁਦ੍ਧੋ ਅਯਂ ਹੇਸ੍ਸਤਿਨਾਗਤੇਸੁ.
ਲੋਕੇਨ ਕੇਨਾਪਿ ਅਨੁਪਲਿਤ੍ਤੋ,
ਦਾਨੇ ਰਤੋ ਸੀਲਗੁਣੇ ਸੁਸਾਣ੍ਠਿਤੋ;
ਨੇਕ੍ਖਮ੍ਮਭਾਗਿ ਵਰਞਾਣਲਾਭੀ,
ਭਵੇਯ੍ਯਹਂ ਥਾਮਬਲੁਪਪਨ੍ਨੋ.
ਸੀਸਂ ਸਮਂਸਮਂ ਮਮ ਹਤ੍ਥਪਾਦੇ,
ਸਂਛਿਨਦਮਾਨੇਪਿ ਕਰੇਯ੍ਯਖਨ੍ਤਿਂ;
ਸਚ੍ਚੇ ਠਿਤੋ ਕਾਲੁਮਧਿਟ੍ਠਿਤੇ ਵ,
ਮੇਤ੍ਤਾਯੁਪੇਕ੍ਖਾਯ ਯੁਤੋ ਭਵੇਯ੍ਯਂ.
ਮਹਾਪਰਿਚ੍ਚਾਗਂ ਕਤ੍ਵਾ ਪਞ੍ਚ,
ਸਮ੍ਬੋਧਿਮਗ੍ਗਂ ਅਵਿਰਾਧਯਨ੍ਤੋ;
ਛੇਤ੍ਵਾ ਕਿਲੇਸੇ ਚਿਤਪਞ੍ਚਮਾਰੋ,
ਬੁਦ੍ਧੋ ਭਵਿਸ੍ਸਾਮਿ ਅਨਾਗਤੇਸੁ.