📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਪਜ੍ਜਮਧੁ

ਆਨਨ੍ਦ ਰਞ੍ਞ ਰਤਨਾਦਿ ਮਹਾ ਯਤਿਨ੍ਦ,

ਨਿਚ੍ਚਪ੍ਪਬੁਦ੍ਧ ਪਦੁਮਪ੍ਪਿਯ ਸੇਵਿਨਙ੍ਗੀ;

ਬੁਦ੍ਧਪ੍ਪਿਯੇਨ ਘਨ ਬੁਦ੍ਧ ਗੁਣਪ੍ਪਿਯੇਨ,

ਥੇਰਾਲਿਨਾ ਰਚਿਤ ਪਜ੍ਜਮਧੁਂ ਪਿਬਨ੍ਤੁ.

੧.

ਉਣ੍ਣਾਪਪੁਣ੍ਣਸਸਿਮਣ੍ਦਲਤੋ ਗਲਿਤ੍ਵਾ,

ਪਾਦਮ੍ਬੁਜਙ੍ਗੁਲਿ ਦਲਟ੍ਠ ਸੁਧਾ ਲਵਾਨਂ;

ਪਨ੍ਤੀਵ ਸਤ੍ਥੁ ਨਖਪਨ੍ਤਿ ਪਜਾਵਿਸੇਸਂ,

ਪੀਣੇਤੁ ਸੁਦ੍ਧ ਸੁਖਿਤਮ੍ਮਣ ਤੁਣ੍ਡਪੀਤਾ.

੨.

ਖਿਤ੍ਤਾਯ ਮਾਰਰਿਪੁਨਾ ਪਰਿਵਤ੍ਯ ਸਤ੍ਥੁ,

ਪਾਦਸ੍ਸਯਾ ਜਿਤ ਦਿਸਾਯ ਸਿਤਤ੍ਤਲਾਯ;

ਯਾ ਜੇਤਿ ਕਞ੍ਚਨ ਸਰਾਵਲਿਯਾ ਸਿਰਿਂ ਸਾ,

ਦੇਤਨ੍ਗਿਨਂ ਰਣਜਯਙ੍ਗੁਲਿਪਨ੍ਤਿਕਨ੍ਤਾ.

੩.

ਸੋਵਣ੍ਣ ਵਣ੍ਣ ਸੁਖੁਮਚ੍ਛਵਿ ਸੋਮ੍ਮ ਕੁਮ੍ਮ,

ਪਿਟ੍ਠੀਵ ਪਿਟ੍ਠਿ ਕਮਤੁਨ੍ਨਤਿ ਭਾਤਿ ਯੇਸਂ;

ਤੇਸੁਪ੍ਪਤਿਟ੍ਠਿਤਸੁਕੋਮਲਦੀਘਪਣ੍ਹਿ,

ਪਾਦਾ ਜਿਨਸ੍ਸ ਪਦਦਨ੍ਤੁ ਪਦਂ ਜਨਸ੍ਸ.

੪.

ਅਚ੍ਛੇਰ ਪਙ੍ਕਜਸਿਰਂ ਸਿਰਿਯਾ ਸਕਾਯ,

ਯੇ ਮਦ੍ਦਿਨੋ ਵਿਯ ਚਰਨ੍ਤਿ ਸਰੋਜ ਸੀਸੇ;

ਸਞ੍ਚੁਮ੍ਬਿਤਾ ਵਿਯ ਚ ਤਾਨਿ ਪਰਾਗ ਰਾਗਾ,

ਤੇ ਨੀਰਜਾ ਮੁਨਿਪਦਾ ਪਦਦਨ੍ਤੁ ਲਕ੍ਖਿਂ.

੫.

ਅਗਾਮਿ ਕਾਲ ਜਨ ਮਙ੍ਗਲ ਭਤ੍ਤੁ ਭਾਵਂ,

ਵ੍ਯਾਕਤ੍ਤੁਮਤ੍ਰ ਕੁਸਲੇਨਿਵ ਨਿਮ੍ਮਿਤਾਨਿ;

ਯਾਤ੍ਰਾਸੁਮਟ੍ਠਸਤਮਙ੍ਗਲਕ੍ਖਣਾਨਿ,

ਸਾਧੇਤੁ ਨਂ ਪਦਯੁਗਂ ਜਯਮਙ੍ਗਲਾਨਿ.

੬.

ਸਸ੍ਸੇਵਿਜਨ੍ਤੁਵਰਸਨ੍ਤਿਪੁਰਪ੍ਪਵੇਸੇ,

ਨਿਚ੍ਚਂ ਸੁਸਜ੍ਜ ਠਪਿਤਾਨਿਵ ਮਙ੍ਗਲਾਯ;

ਯੇ ਤੇ ਦਧਨ੍ਤਿ ਕਲਮਙ੍ਗਲਲਕ੍ਖਣਾਨਿ,

ਵਤ੍ਤਨ੍ਤੁ ਤੇ ਜਿਨਪਦਾ ਜਯਮਙ੍ਗਲਾਯ.

੭.

ਸਬ੍ਬੇਭਿਭੂਯ ਸਪਦੇਸੁ ਨਿਪਾਤਨਸ੍ਸ,

ਸਞ੍ਞਾਣਕਂ ਵਿਯ ਯਦਸ੍ਸਿਤਸਬ੍ਬਲੋਕੋ;

ਪਾਦਾਤ੍ਯਧੋਕਤਤਿਲੋਕਸਿਰੋਵਰਾ ਪਿ,

ਲੋਕਂ ਪੁਣਨ੍ਤੁ ਜਯਮਙ੍ਗਲਕਾਰਣਾਨਿ.

੮.

ਲੋਕਤ੍ਤਯੇਕਸਰਣਤ੍ਤਵਿਭਾਵਨਾਯ,

ਸਜ੍ਜੋ ਵ ਤਿਟ੍ਠਤਿ ਯਹਿਂ ਸੁਵਿਭਤ੍ਤਲੋਕੋ;

ਤਂ ਸਬ੍ਬਲੋਕਪਟਿਬਿਮ੍ਬਿਤਦਪ੍ਪਣਾਭਂ,

ਪਾਦਦ੍ਵਯਂ ਜਨਸੁਸਜ੍ਜਨਹੇਤੁ ਹੋਤੁ.

੯.

ਲੋਕੁਤ੍ਤਰਾਯ ਸਿਰਿਯਾਧਿਗਮਾਯ ਸੁਟ੍ਠੁ,

ਰਜਨ੍ਤਿ ਯਤ੍ਥ ਦਿਗੁਣਾਨਿਵ ਪਾਤੁ ਭੂਤਾ;

ਚਕ੍ਕਾਸਨਾਭਿਸਹਨੇਮਿਸਹਸ੍ਸਰਾਨਿ,

ਤ੍ਯਙ੍ਘੀ ਦਿਸਨ੍ਤੁ ਸਕਲਿਸ੍ਸਰਿਯਂ ਜਨਸ੍ਸ.

੧੦.

ਯਤ੍ਰੁਲ੍ਲਸਨ੍ਤਿ ਦੁਵਿਧਾਨਿਵ ਪਾਤੂ ਭੂਤਾ,

ਧਮ੍ਮਸ੍ਸਸਬ੍ਬਭੁਵਨਸ੍ਸ ਚ ਇਸ੍ਸਰਤ੍ਤੇ;

ਚਕ੍ਕਾਨਿ ਚਕ੍ਕਸਦਿਸਾਨਿ ਸੁਦਸ੍ਸਨਸ੍ਸ,

ਤਾਨਜ੍ਜ ਜਨ੍ਤੁ ਸਰਣਾ ਚਰਣਾਨਿ ਹੋਨ੍ਤੁ.

੧੧.

ਸਤ੍ਤੇਸੁ ਵਚ੍ਛਤੁ ਸਿਰੀ ਸਿਰਿਵਚ੍ਛਕੇਨ,

ਸੋਵਤ੍ਥਿ ਸੋਤ੍ਥਿਮਨੁਤਿਟ੍ਠਤੁ ਪੁਗ੍ਗਲੇਸੁ;

ਨਨ੍ਦਿਂ ਜਨਾਨਮਨੁਵਤ੍ਤਤੁ ਨਨ੍ਦਿਵਤ੍ਤੀ,

ਸੀਸਾਨਲਂਕੁਰੁਤੁ ਪਾਦਵਤਂਸਕੋ ਪਿ.

੧੨.

ਭਦ੍ਦਾਯ ਪੀਠਮੁਪਗਚ੍ਛਤੁ ਭਦ੍ਦਪੀਠਂ,

ਵੁਦ੍ਧਿਂ ਜਨਾਨਮਨੁਵਤ੍ਤਤੁ ਵਦ੍ਧਮਾਨਂ;

ਪੁਣ੍ਣਤ੍ਤਮਙ੍ਗਿਮਨੁਕੁਬ੍ਬਤੁ ਪੁਣ੍ਣਕੁਮ੍ਭੋ,

ਪਾਤਿ ਚ ਪਾਤੁ ਸਤਤਂ ਜਨਤਂ ਅਪਾਯਾ.

੧੩.

ਸੇਤਾਤਪਤ੍ਤਮਪਨੇਤਮਘਾਤਪੇ ਤਂ,

ਖਗ੍ਗੋ ਵਿਛਿਨ੍ਦਤੁ ਸਦਾ ਦੁਰਿਤਾਰਿਵਗ੍ਗੇ;

ਸਂਕ੍ਲੇਸਦਾਹਮਪਨੇਤੁ ਸਤਾਲਵਣ੍ਟ,

ਸਂਵੀਜਨੀ ਕੁਮਤਿਮਕ੍ਖਿਕਮੋਰਹਤ੍ਥੋ.

੧੪.

ਆਕਡ੍ਢਨੋ ਜਨਵਿਲੋਚਨਮਤ੍ਤਨਿਨ੍ਨਂ,

ਵਾਰੇਤੁ ਸਬ੍ਬਗਤਿਵਾਰਨਮਙ੍ਕੁਸੋ ਸੋ;

ਪਾਦਮ੍ਬੁਜਸ੍ਸਿਰਿਵਿਲਾਸਨਿਕੇਤਨਂ ਵ,

ਪਾਸਾਦਲਖਣਮੁਪੇਤੁ ਮਨੋਪਸਾਦਂ.

੧੫.

ਪਾਣੀਨਮਤ੍ਤਭਜਤਂ ਵਰਪੁਣ੍ਣਪਤ੍ਤਂ,

ਸਮ੍ਮਾ ਦਦਾਤੁ ਪਦਨਿਸ੍ਸਿਤਪੁਣ੍ਣਪਤ੍ਤੋ;

ਪਾਦੇਸੁ ਜਨ੍ਤੁ ਮਨਬਨ੍ਧਨਦਾਮਭੂਤਂ,

ਦਾਮਂ ਦਮੇਤੁ ਵਿਮਲਂ ਜਨਤਮ੍ਮਨਾਨਿ.

੧੬.

ਉਣ੍ਹੀਸਕੁਪ੍ਪਲਮਣੀਪਦੁਮੇਹਿ ਪਾਦਾ,

ਸਸ੍ਸੇਵਿਜਨ੍ਤੁਕਰਣਾਨਿ ਵਿਭੂਸਯਨ੍ਤੁ;

ਸਨ੍ਨੇਤ੍ਤਨਾਵੁਪਗਤਾਨਮਨਗ੍ਘਕਾਨਿ,

ਬੋਜ੍ਝਙ੍ਗਸਤ੍ਤਰਤਨਾਨਿ ਦਦੇ ਸਮੁਦ੍ਦੋ.

੧੭.

ਉਤ੍ਤੁਙ੍ਗ ਨਿਚ੍ਚਲਗੁਙਾ ਜਿਤਤਾਯ ਨਿਚ੍ਚਂ,

ਸੇਵੀਵ ਪਾਦਸਿਰਿ ਨਿਚ੍ਚ ਸਮੁਬ੍ਬਹਂ ਵ;

ਅਤ੍ਰਾਪਿ ਸਕ੍ਕਭਵਨੁਬ੍ਬਹਣੇ ਨਿਯੁਤ੍ਤੋ,

ਪਾਦਟ੍ਠਮੇਰੁ ਭਵਤਂ ਭਵਤਂ ਵਿਭੂਤ੍ਯਾ.

੧੮.

ਸੋ ਚਕ੍ਕਵਾਲ਼ਸਿਖਰੀ ਪ੍ਯਵਤਂ ਸਮਨ੍ਤਾ,

ਸਬ੍ਬੂਪਸਗ੍ਗਵਿਸਰਾਜਨਤਂ ਸਮਗ੍ਗਂ;

ਦੀਪਾ ਪੁਥੂਪਿ ਚਤੁਰੋ ਦ੍ਵਿਸਹਸ੍ਸ ਖੁਦ੍ਦਾ,

ਧਾਰੇਨ੍ਤ੍ਵਪਾਯਪਤਮਾਨਮਦਤ੍ਵ ਜਨ੍ਤੁਂ.

੧੯.

ਸੂਰੋ ਪਬੋਧਯਤੁ ਜਨ੍ਤੁ ਸਰੋਰੁਹਾਨਿ,

ਚਨ੍ਦੋ ਪਸਾਦ ਕੁਮੁਦਾਨਿ ਮਨੋਦਹੇਸੁ;

ਨਕ੍ਖਤ੍ਤਜਾਤਮਖਿਲਂ ਸੁਭਤਾਯ ਹੋਤੁ,

ਚਕ੍ਕਂ ਧਜਂ ਰਿਪੁਜਯਾਯ ਜਯਦ੍ਧਜਾਯ.

੨੦.

ਜੇਤੁਂ ਸਸਂਸਦ-ਸੁਦਸ੍ਸਨ-ਚਕ੍ਕਵਤ੍ਤਿ,

ਚਕ੍ਕਾਨੁਗਨ੍ਤਲਲਿਤਂ ਯਹਿਮਾਵਹੇਯ੍ਯ;

ਚਕ੍ਕਾਣੁਵਤ੍ਤਿ ਪਰਿਸਾਵਤ-ਚਕ੍ਕਵਤ੍ਤਿ,

ਨਂਵਤ੍ਤਤਂ ਪਦਯੁਗਂ ਜਨਤਾ ਹਿਤਾਯ.

੨੧.

ਪੁਜੇਤੁਮਾਗਤ ਵਤਾ ਵਜਿਰਾਸਨਟ੍ਠ,

ਮਿਨ੍ਦੇਨ ਛਡ੍ਡਿਤ ਮਹਾਵਿਜਯੁਤ੍ਤਰਾਖ੍ਯਂ;

ਸਂਖਂ ਪਵਿਟ੍ਠਮਿਵ ਮਾਰਭਯਾ ਪਦਾਧੋ,

ਪਾਦਟ੍ਠਸਂਖਮਿਹ ਵਤ੍ਤਤੁ ਸਨ੍ਤਿਯਾ ਵੋ.

੨੨.

ਸੋਵਣ੍ਣਮਚ੍ਛਯੁਗਲਂ ਸਿਵਭਤ੍ਤ ਭੋਗੇ,

ਇਚ੍ਛਾ ਬਹੂਪਕਰਣਂ ਭਵਤਂ ਜਨਾਨਂ;

ਕੁਮ੍ਭੀਲਧਿਗ੍ਗਹਿਤਤੋ ਵ ਪਦੁਤ੍ਥਚਿਤ੍ਤਾ,

ਪਾਦਮ੍ਬੁਜਾਕਰ ਵਿਗਾਹਿ ਤੁ ਨੋਪਹੋਨ੍ਤੁ.

੨੩.

ਸਤ੍ਤਾਪਗਾ ਜਨਮਨੋਜ ਮਲੇ ਜਹਨ੍ਤੁ,

ਸਂਕ੍ਲੇਸਦਾਹਮਪਨੇਨ੍ਤੁ ਦਹਾ ਚ ਸਤ੍ਤ;

ਸੇਲਾ ਚ ਸਤ੍ਤ ਵਿਦਧਨ੍ਤੁ ਜਨਸ੍ਸ ਤਾਨਂ,

ਲੋਕਪ੍ਪਸਿਦ੍ਧਿਜਨਨੇ ਭਵਤਂ ਪਤਾਕਾ.

੨੪.

ਪਾਟਙ੍ਕਿ ਸਨ੍ਤਿ ਗਮਨੇ ਭਵਤੂਪਕਾਰਾ,

ਦਾਹੇਤ੍ਤਨੇਸੁ ਜਹਤਂ ਪਦਚਾਮਰਂ ਤਂ;

ਸਲ੍ਲੋਕਲੋਚਨਮਹੁਸ੍ਸਵ-ਉਸ੍ਸਿਤਂ ਵ,

ਵਤ੍ਤੇਯ੍ਯ ਤੋਰਣਮਨੁਤ੍ਤਰਮਙ੍ਗਲਾਯ.

੨੫.

ਯਸ੍ਮਿਂ ਮਿਗਿਨ੍ਦ ਗਤ ਭੀਤਿ ਬਲਾਵ ਦਡ੍ਢ,

ਦਾਨਾ ਨਤਾ ਸਿਰਵਿਦਾਰਣ ਪੀਲ਼ਿਤਾਵ;

ਨਾਲਾਗਿਰੀ ਕਰਿਵਰੋ ਗਿਰਿਮੇਖਲੋ ਚ,

ਤਂ ਸੀਹਵਿਕ੍ਕਮਪਦਂ ਹਨਤਾ ਘਦਨ੍ਤਿਂ.

੨੬.

ਪਾਪਾਹਿਨੋ ਹਨਤੁ ਪਾਦਸੁਵਣ੍ਣਰਾਜਾ,

ਵ੍ਯਗ੍ਘਾਧਿਪੋ ਕਲਿਜਨੇ ਅਦਤਂ ਅਸੇਸਂ;

ਵਾਲਾਹ-ਅਸ੍ਸਪਤਿ ਸਮ੍ਪਤਿਤੁਂ ਅਦਤ੍ਵਾ,

ਪਾਯੇਸੁ ਪਾਪਯਤੁ ਸਨ੍ਤਿਪੁਰਮ੍ਪਜਾਯੋ.

੨੭.

ਛਦ੍ਦਨ੍ਤ ਦਨ੍ਤਿ ਲਲਿਤਂ ਗਲਿਤਂ ਰੁਸਮ੍ਹਾ,

ਲੁਦ੍ਦੇਤ੍ਤ ਦੁਬ੍ਭਿਨਿ ਦਿਸੇ ਅਚਲਂ ਦਧਾਨੋ;

ਪਾਦਟ੍ਠਹਤ੍ਥਿਪਤਿ ਸਮ੍ਪਤਿ ਜਨ੍ਤੁਤਾਸੇ,

ਤਾਸੇਤੁ ਹਾਸਮਪਰਨ੍ਦਿਸਤਂ ਸਤਾਨਂ.

੨੮.

ਸਬ੍ਬਙ੍ਗਿਨੋ ਚਰਣੁਪੋਸਥ ਹਤ੍ਥਿਰਾਜਾ,

ਪਾਪੇਤੁ ਸਬ੍ਬਚਤੁਦੀਪਿਕਰਜ੍ਜਲਕ੍ਖਿਂ;

ਕਿਤ੍ਤੀਵ ਪਾਦਪਰਿਚਾਰਿਕਤਾ ਨਿਯੁਤ੍ਤਾ,

ਕੇਲਸਸੇਲਪਟਿਮਾ ਹਿਤਮਾਚਰੇਯ੍ਯ.

੨੯.

ਸਾਮਿਸ੍ਸ ਹਂਸਸਮਯੇ ਦਹਪਾਸਬਦ੍ਧ,

ਮਾਸੀਨ ਵੇਸਗਮਕੋ ਵਿਯ ਪਾਦਹਂਸੋ;

ਨਿਗ੍ਘੋਸ ਗਨ੍ਤਿਜਿਤਤੋ ਵਿਯ ਮੂਗਪਕ੍ਖੋ,

ਯਾਰੇਤੁ ਸਬ੍ਬ ਜਨਤਾ ਭਵਗਨ੍ਤੁਕਤ੍ਤਂ.

੩੦.

ਓਹਾਯ ਦਿਬ੍ਬਸਰਸਿਂ ਖਿਲਲੋਕ ਸਬ੍ਬ,

ਰਮ੍ਮਙ੍ਘਿਵਾਪਿਮਵਗਾਹਿਤਵਾਵ ਪਾਦੇ;

ਏਰਾਵਣੋ ਕਰਿਵਰੋ ਮਨਸਾਭਿਰੁਲ਼੍ਹੇ,

ਜਨ੍ਤੁਂ ਪੁਰਿਨ੍ਦਦਪੁਰਂ ਨਯਤਂ ਵ ਸੀਘਂ.

੩੧.

ਹਿਤ੍ਵਾ ਸਕਮ੍ਭਵਨਮਙ੍ਘਿਨਿਸੇਵਨਤ੍ਥ,

ਮਾਗਮ੍ਮ ਰਮ੍ਮ ਤਰਤਾਯਿਹ ਨਿਸ੍ਸਿਤੋ ਵ;

ਪਾਲੇਤ੍ਵ ਮੂਨਿ ਪਦਵਾਪਿਤਰਙ੍ਗਭਙ੍ਗਿ,

ਮਨ੍ਗੀ ਕਰੋਨ੍ਤਤਨੁਵਾਸੁਕਿ ਨਾਗਰਾਜਾ.

੩੨.

ਨਾਥਸ੍ਸ ਕਞ੍ਚਨਸਿਖਾਵਲਜਾਤਿਲੀਲ,

ਮਾਵਿਕਰਂ ਵ ਪਦਨਿਸ੍ਸਿਤਮੋਰਰਾਜਾ;

ਤਂ ਧਮ੍ਮਦੇਸਨਰਵੇਨਿਵ ਲੁਦ੍ਦਕਸ੍ਸ,

ਲੋਕਸ੍ਸ ਪਾਪਫਣਿਨੋ ਹਨਤਂ ਅਸੇਸਂ.

੩੩.

ਸਂਸਾਰਸਾਗਰਗਤੇ ਸਧਨੇ ਜਨੇ ਤੇ,

ਨੇਤਮ੍ਪਦੇ ਕਲਚਤੁਮ੍ਮੁਖਹੇਮਨਾਵਾ;

ਨਿਬ੍ਬਾਣਪਟ੍ਟਨਵਰਂ ਭਰੁਕਚ੍ਛਕਨ੍ਤਂ,

ਸੁਪ੍ਪਾਰਪਣ੍ਡਿਤ ਗਤਾ ਵਿਯ ਆਸੁਨਾਵਾ.

੩੪.

ਸਮ੍ਬੋਧਿ ਞਾਣ ਪਰਿਪਾਚਯਤੋ ਮੁਨਿਸ੍ਸ,

ਭਤ੍ਤੋ ਯਥਾ ਹਿਮਵਤਦ੍ਦਿ ਸਮਾਧਿਹੇਤੁ;

ਏਵਮ੍ਮਨੇਨ ਭਜਤਂ ਹਿਮਵਦ੍ਦਿਪਾਦੇ,

ਸਮ੍ਬੋਧਿਞਾਣ ਪਰਿਪਾਚਨਹੇਤੁ ਹੋਤੁ.

੩੫.

ਦਲ਼੍ਹਂ ਪਰਾਜਿਤਤਯਾ ਮੁਨਿਨਾ ਸਰੇਨ,

ਸੁਞ੍ਞਸ੍ਸਰੋਪਗਤ ਪਞ੍ਜਰ ਬਨ੍ਧਨੋਵ;

ਸੋ ਪਾਦਪਞ੍ਜਰਗਤੋ ਕਰਵੀਕਪਕ੍ਖੀ,

ਸਬ੍ਬੇਸਮਪ੍ਪੀਯਾਵਚਞ੍ਜਹਤਾ ਭਵਨ੍ਤਂ.

੩੬.

ਤੇ ਚਕ੍ਕਵਾਕ ਮਕਰਾ ਅਪਿ ਕੋਞ੍ਚ ਜੀਵਂ,

ਜੀਵਾਦਿ ਪਕ੍ਖਿਵਿਸਰਾ ਸਰਸੀਵ ਭੁਤ੍ਤਂ;

ਵੇਸ੍ਸਨ੍ਤਰੇਨ ਚਰਣਮ੍ਬੁਜਿ ਨਿਬ੍ਭਜਨ੍ਤਾ,

ਜਨ੍ਤੁ ਤਹਿਂ ਵਿਯ ਪਦੇ ਸੁਰਮੇਨ੍ਤੁ ਨਿਚ੍ਚਂ.

੩੭.

ਤਂ ਚਨ੍ਦਕਿਨ੍ਨਰਗਤਿਂਵ ਗਤਸ੍ਸ ਬੋਧਿ,

ਸਤ੍ਤਸ੍ਸ ਤਸ੍ਸ ਸਪਜਾਪਤਿਕਸ੍ਸ ਭਾਵਂ;

ਸਂਸੂਚਯਨ੍ਤ ਪਦ ਕਿਨ੍ਨਰ ਕਿਨ੍ਨਰੀ ਵੇ,

ਸਾਮਗ੍ਗਿਮਗ੍ਗ ਪਟਿ ਪਤ੍ਤਿਸੁ ਪਾਪਯਨ੍ਤੁ.

੩੮.

ਸਂਰਾਜਧਾਨਿਮੁਸਭੋ ਵਹਤਗ੍ਗ ਭਾਰਂ,

ਪੀਤਿਪ੍ਪਯੋ ਪਜਨਯੇਯ੍ਯ ਸਵਚ੍ਛਧੇਨੁ;

ਸਸ੍ਸੇਵਿਨੋ ਅਭਿਰਮੇਨ੍ਤੁ ਛਕਾਮਸਗ੍ਗਾ,

ਧਾਰੇਨ੍ਤੁ ਝਾਯਿਮਿਹ ਸੋਲ਼ਸ ਧਾਤੁਧਾਮਾ.

੩੯.

ਸੁਤ੍ਵਾ ਜਿਨਸ੍ਸ ਕਰਵੀਕ ਸਰਮ੍ਮਨੁਞ੍ਞਂ,

ਅਞ੍ਞੋਞ੍ਞ ਭੀਤਿਰਹਿਤਾ ਅਪਿ ਪਚ੍ਚਨੀਕਾ;

ਹਿਤ੍ਵਾ ਗਤਿਂ ਵਿਯ ਠਿਤਾ ਪਦਸਤ੍ਤਰੂਪਾ,

ਸਬ੍ਬਂ ਭਵਸ੍ਸਿਤ ਜਨਾਨਗਤਿਂ ਹਨਨ੍ਤੁ.

੪੦.

ਸੋਵਣ੍ਣ ਕਾਹਲ਼ ਯੁਗੋ ਪਮਮਿਨ੍ਦਿਰਾਯ,

ਸਨ੍ਨੀਰਪੁਪ੍ਫ ਮੁਕੁਲੋਪਮਮੁਸ੍ਸਵਾਯ;

ਨਿਚ੍ਚਂ ਸੁਸਜ੍ਜ ਠਪਿਤਂ ਮੁਨਿ ਤਿਟ੍ਠਤਨ੍ਤੇ,

ਜਙ੍ਘਾਦ੍ਵਯਂ ਜਨਵਿਲੋਚਨ ਮਙ੍ਗਲਾਯ.

੪੧.

ਲਖ੍ਯਾ ਵਿਲਾਸ ਮੁਕੁਰਦ੍ਵਯ ਸਨ੍ਨਿਕਾਸਂ,

ਤਾਡਙ੍ਕ ਮਣ੍ਡਨ ਵਿਡਮ੍ਬਕਮਂਸੁ ਸਣ੍ਡਂ;

ਜਾਨੁਦ੍ਵਯਂ ਲਲ਼ਿਤ ਸਾਗਰ ਬੁਬ੍ਬਲਾਭਂ,

ਹੋਤਂ ਜਗਤ੍ਤਯ ਨਿਜਤ੍ਤ ਵਿਭੂਸਿਤੁਨ੍ਤੇ.

੪੨.

ਛਦ੍ਦਨ੍ਤਿ ਦਿਨ੍ਨ ਵਰਦਨ੍ਤ ਯੁਗੋਪਮਾਨਾ,

ਤਂ ਹਤ੍ਥਿ ਸੋਣ੍ਡ ਕਮ ਪੁਣ੍ਣ ਗੁਣਾ ਤਵੋਰੂ;

ਲੀਲ ਪਯੋਧਿ ਸਿਰਿ ਕੇਲ਼ਿ ਸੁਵਣ੍ਣਰਮ੍ਭਾ,

ਖਨ੍ਧਾਵ ਦੇਨ੍ਤੁ ਪਰਿਪੁਣ੍ਣ ਗੁਨੇ ਜਨਾਨਾਂ.

੪੩.

ਜਙ੍ਘਕ੍ਖ ਕਦ੍ਵ੍ਯ ਸਮਪ੍ਪਿਤ ਚਿਤ੍ਤਪਾਦ,

ਚਕ੍ਕਦ੍ਵਯੀ ਮਨਮਨੋਜਹਯੋ ਮੁਨੇ ਤੇ;

ਸੋਨੀ ਰਥੋ ਸਿਰਿਵਹੋ ਮਨਸਾ ਭਿਰੁਲ਼੍ਹਂ,

ਲੋਕਤ੍ਤਯਂ ਸਿਵਪੁਰਂ ਲਹੁ ਪਾਪਯਾਤੁ.

੪੪.

ਰਮ੍ਮੋਰ ਪਾਕਟ ਤਟਾਕ ਤਟਾ ਸਵਨ੍ਤ,

ਰੋਮਾਵਲੀ ਜਲ ਪਨਾਲਿਕ ਕੋਟਿਕਟ੍ਠਾ;

ਨਾਭੀ ਗਭੀਰ ਸਰਸੀ ਸਿਰਿ ਕੇਲ਼ਿਤਾ ਤੇ,

ਸਸ੍ਸੇਵਿਨਂ ਵ੍ਯਸਨ ਘਮ੍ਮਮਲਂ ਸਮੇਤੁ.

੪੫.

ਕਨ੍ਤਿਚ੍ਛਟਾ ਲੁਲ਼ਿਤ ਰੂਪ ਪਯੋਧਿ ਨਾਭਿ,

ਆਵਟ੍ਟ ਵਟ੍ਟਿਤ ਨਿਮੁਜ੍ਜਿਤ ਸਬ੍ਬਲੋਕੋ;

ਸੋਭਗ੍ਗ ਤੋਯ ਨਿਵਹਂ ਵਿਸਸੋ ਪਿਵਿਤ੍ਵਾ,

ਲੋਕੁਤ੍ਤਰਾਦਿ ਸੁਖ ਮੁਚ੍ਛਿਤਤਂ ਪਯਾਤੁ.

੪੬.

ਗਮ੍ਭੀਰ ਚਿਤ੍ਤਰਹਦਂ ਪਰਿਪੂਰਯਿਤ੍ਵਾ,

ਤਂ ਸਨ੍ਦਮਾਨ ਕਰੁਣਮ੍ਬੁ ਪਵਾਹ ਤੁਲ੍ਯਾ;

ਰੋਮਾਲਿਵਲ੍ਲਿਹਰਿ ਨਾਭਿ ਸੁਭਾਲਵਾਲਾ,

ਦੇਤਂ ਲਹੁਂ ਸਿਵਫਲਂ ਭਜਤਂ ਮੁਨੇ ਤੇ.

੪੭.

ਚਾਰੂਰ ਸਾਰਿਫਲਕੋ ਕੁਟਿਲਗ੍ਗ ਲੋਮ,

ਪਨ੍ਤੀ ਵਿਭਤ੍ਤਿ ਸਹਿਤੋ ਸਿਰਿ ਕੇਲ਼ਿ ਸਜ੍ਜੋ;

ਸਗ੍ਗਾਪਵਗ੍ਗ ਸੁਖ ਜੂਤਕ ਕੇਲ਼ਿ ਹੇਤੁ,

ਹੋਤਂ ਤਿਲੋਕ ਸੁਖ ਜੂਤਕ ਸੋਣ੍ਡਕਾਨਂ.

੪੮.

ਗਮ੍ਭੀਰ ਚਿਤ੍ਤ ਰਹਦੋ ਦਰ ਗਾਹਮਾਨ,

ਮੇਤ੍ਤਾਦਯਾ ਕਰਿ ਵਧੂ ਕਰ ਸਨ੍ਨਿ ਕਾਸਾ;

ਸਬ੍ਬਙ੍ਗਿਨਂ ਸਿਵਫਲਂ ਤਨੁ ਦੇਵ ਰੁਕ੍ਖੇ,

ਸਾਖਾ ਸਖਾ ਤਵ ਭੁਜਾ ਭਜਤਂ ਦਦਨ੍ਤੁ.

੪੯.

ਨਿਹਾਰ ਬਿਨ੍ਦੁ ਸਹਿਤਗ੍ਗਦਲੋਪ ਸੋਭਿ,

ਬ੍ਯਾਲਮ੍ਬ ਰਤ੍ਤ ਪਦੁਮਦ੍ਵਯ ਭਙ੍ਗਿ ਭਾਜਾ;

ਪਾਪਾਰਿਸੀਸਲੁਨਤੇਨਿਵ ਰਤ੍ਤ ਰਤ੍ਤਾ,

ਰਤ੍ਤਾ ਕਰਾ ਤਵ ਭਵੁਮ੍ਭੁਵਿ ਮਙ੍ਗਲਾਯ.

੫੦.

ਰੁਪਸ੍ਸਿਰੀ ਚਰਿਤ ਚਙ੍ਕਮ ਵਿਬ੍ਭਮਾ ਤੇ,

ਪਿਟ੍ਠੀ ਯਥਾ ਕਲਲ ਮੁਦ੍ਧਨਿ ਸੇਤੁ ਭੂਤਾ;

ਏਵਂ ਭਵਣ੍ਣਵ ਸਮੁਤ੍ਤਰਣਾਯ ਸੇਤੁ,

ਹੋਤਮ੍ਮਹਾਕਨਕ ਸਂਕਮ ਸਨ੍ਨਿਕਾਸਾ.

੫੧.

ਸਦ੍ਧਮ੍ਮ ਦੇਸਨ ਮਨੋਹਰ ਭੇਰਿਨਾਦ,

ਸਂਚਾਰਣੇ ਸਿਵਪੁਰਂ ਵਿਸਿਤੁਂ ਜਨਾਨਂ;

ਗੀਵਾ ਸੁਵਣ੍ਣਮਯ ਚਾਰੁ ਮੁਤਿਙ੍ਗ ਭੇਰਿ,

ਭਾਵਮ੍ਭਜਾ ਭਵਤੁ ਭੂਤ ਵਿਭੂਤਿਯਾ ਤੇ.

੫੨.

ਲਖੀ ਨਿਵਾਸ ਵਦਨਮ੍ਬੁਜ ਮਤ੍ਤ ਨਿਨ੍ਨ,

ਮਾਕਡ੍ਢਯਂ ਜਨ ਵਿਲੋਚਨ ਚਞ੍ਚਰੀਕੇ;

ਸੋਰਬ੍ਭ ਧਮ੍ਮ ਮਕਰਨ੍ਦ ਨਿਸਨ੍ਦਮਾਨਂ,

ਪਿਣੇਤੁ ਤੇਨ ਸਰਸੇਨ ਸਭਾ ਜਨੇ ਤੇ.

੫੩.

ਲਖੀ ਸਮਾਰੁਹਿਤ ਵਤ੍ਤਰਥੇ ਰਥਙ੍ਗ,

ਦ੍ਵਨ੍ਦਾਨੁ ਕਾਰਿ ਮਿਗ ਰਾਜ ਕਪੋਲ ਲੀਲਂ;

ਤਾਦਙ੍ਕ ਮਣ੍ਡਲਯੁਗਂ ਵਿਯ ਕਣ੍ਣਭਾਜਂ,

ਗਣ੍ਡਤ੍ਥਲਦ੍ਵ੍ਯਮਲਂਕੁਰੁਤਂ ਜਨਤ੍ਤੇ.

੫੪.

ਲਾਵਣ੍ਣ ਮਣ੍ਣਵ ਪਵਾਲ਼ ਲਤਾ ਦ੍ਵਯਾਭਂ,

ਤਨ੍ਦੇਹ ਦੇਵ ਤਰੁ ਪਲ੍ਲਵ ਕਨ੍ਤੇ ਮਨ੍ਤਂ;

ਵਤ੍ਤਾਰਵਿਨ੍ਦ ਮਕਰਨ੍ਦ ਪਰਾਜਿਸੋਭਂ,

ਰਤ੍ਤਾਧਰਦ੍ਵਯਮਧੋ ਕੁਰੁਤਂ ਜਨਾਘਂ.

੫੫.

ਉਣ੍ਣਾ ਸਕੁਨ੍ਤਿਗਤ ਮਤ੍ਥਕ ਨਤ੍ਥੁ ਕੂਪ,

ਸੁਬ੍ਭੂ ਲਕਾਰ ਸਹਿਤੋਟ੍ਠ ਪਵਾਲ਼ ਨਾਵਾ;

ਗਤ੍ਤੁਤ੍ਤਰਰਣ੍ਣਵ ਗਤਾ ਤਵ ਜਨ੍ਤੁਕਾਨਂ,

ਹੋਤਂ ਭਵਣ੍ਣਵ ਸਮੁਤ੍ਤਰਨਯ ਨਾਥ.

੫੬.

ਇਸਂ ਵਿਕਾਸ ਪਦੁਮੋਦਰ ਕੇਸਰਾਲਿ,

ਲੀਲਾ ਵਿਨਦ੍ਧ ਰੁਚਿਰਾ ਤਵ ਦਨ੍ਤ ਪਨ੍ਤਿ;

ਵਾਨੀ ਵਧੂ ਧਰਿਤ ਮਾਲਤਿ ਮਾਲ੍ਯ ਤੁਲ੍ਯਾ,

ਤਸ੍ਸਂ ਜਾਨਸ੍ਸ ਮਨਰਞ੍ਜਨ ਮਾਚਰੇਯ੍ਯ.

੫੭.

ਸਦ੍ਧਮ੍ਮ ਨਿਜ੍ਝਰ ਸੁਰਤ੍ਤ ਸਿਲਾਤਲਾਭਾ,

ਜਿਵ੍ਹਾ ਵਚੀ ਨਟ ਵਧੂ ਕਲ ਰਙ੍ਗ ਭੂਤਾ;

ਸਦ੍ਧਮ੍ਮ ਸੇਟ੍ਠ ਤਰਣੀ ਨਿਹਿਤਪ੍ਪਿਯਾ ਤੇ,

ਸਂਸਾਰ ਸਾਗਰ ਸਮੁਤ੍ਤਰਣਾਯ ਹੋਤੁ.

੫੮.

ਦਨ੍ਤਂਸੁ ਕਞ੍ਚੁਕੀਤ ਰਤ੍ਤਧਰੋ ਪਧਾਨੇ,

ਜਿਵ੍ਹਾ ਸੁਰਤ੍ਤ ਸਯਨੇ ਮੁਖ ਮਨ੍ਦਿਰਟ੍ਠੇ;

ਆਮੋਕ੍ਖ ਮੁਤ੍ਤਿ ਵਧੁਯਾ ਸਯਿਤਾਯ ਤੁਯ੍ਹਂ,

ਕੁਬ੍ਬਨ੍ਤੁ ਸਂਗਮ ਮਲਂ ਜਨ ਸੋਤੁ ਕਾਮਿ.

੫੯.

ਉਣ੍ਣਾ ਤਥਾਭਿਨਵ ਪਤ੍ਤ ਵਰਾਭਿ ਰਾਮਾ,

ਲੀਲੋਲ੍ਲਸਨ੍ਤ ਭਮੁਕਦ੍ਵਯ ਨੀਲ ਪਤ੍ਤਾ;

ਘਾਨੋਰੁ ਚਾਰੁ ਕਦਲੀ ਵਦਨਾ ਲਵਾਲਾ,

ਤੁਯ੍ਹਂ ਪਵਤ੍ਤਤੁ ਚਿਰਂ ਜਨ ਮਙ੍ਗਲਾਯ.

੬੦.

ਬਾਲਤ੍ਥਲੀ ਹਰਿ ਸਿਲਾਤਲ ਪਿਟ੍ਠਿਕਟ੍ਠ,

ਭੂਵਲ੍ਲਰਿਦ੍ਵਯ ਮਯੂਰ ਯੁਗਸ੍ਸ ਤੁਯ੍ਹਂ;

ਪਞ੍ਚਪ੍ਪਭਾ ਰੁਚਿਰ ਪਿਚ੍ਛ ਯੁਗਸ੍ਸਿਰੀਕਂ,

ਨੇਤ੍ਤਦ੍ਵਯਂ ਮਨਸਿ ਪੁਞ੍ਛਤੁ ਪਾਪਧੂਲਿਂ.

੬੧.

ਇਨ੍ਦੀਵਰਾਨ੍ਤਗਤ ਭਿਙ੍ਗਿਕ ਪਨ੍ਤਿ ਭਙ੍ਗਿ,

ਪਞਮ੍ਬੁਜਸ੍ਸਰਤਤੇ ਵਿਯ ਗਚ੍ਛਪਨ੍ਤੀ;

ਨੇਤ੍ਤਮ੍ਬੁਜਸ੍ਸਿਰਿ ਤਿਰੋਕਰਣੀਵ ਤੁਯ੍ਹਂ,

ਪਮ੍ਹਾਵਲੀ ਸਿਰਿਗਤੇਹ ਤਿਰੋ ਕਰੋਨ੍ਤੁ.

੬੨.

ਵਤ੍ਤੁਲ੍ਲਸਮ੍ਬੁਜ ਵਿਲੋਚਨ ਹਂਸ ਤੁਣ੍ਡ,

ਕਞ੍ਜਂਸੁ ਪਿਞ੍ਜਰ ਮੁਲਾਲ ਲਤਾ ਦ੍ਵ੍ਯਾਭਂ;

ਦੋਲਾਦ੍ਵਯਂਵ ਸਵਣਦ੍ਵ੍ਯਮਤ੍ਤ ਲਕ੍ਖ੍ਯਾ,

ਹੋਤਂ ਤਵਜ੍ਜ ਜਨਤਾ ਮਤਿਚਾਰਹੇਤੁ.

੬੩.

ਵਮ੍ਮੀਕ ਮਤ੍ਥਕ ਸਯਾਨਕ ਭੂਰਿਦਤ੍ਤ,

ਭੋਗਿਨ੍ਦ ਭੋਗਵਲਿ ਵਿਬ੍ਭਮਮਾ ਵਹਨ੍ਤਿ;

ਘਾਨੋਪਰਿਟ੍ਠਿਤਮੁਨੇ ਤਵ ਤੁਣ੍ਣਮੁਣ੍ਣਾ,

ਤਗ੍ਗਾਹਿਨੋ ਵਿਯ ਜਨਸ੍ਸ ਦਦਾਤੁ ਵਿਤ੍ਤਂ.

੬੪.

ਰੂਪਿਨ੍ਦਿਰਾਯ ਵਿਜਯੇ ਖਿਲ ਲੋਕ ਰੂਪਂ,

ਘਾਣੋਰੁ ਚਾਰੁ ਪਰਿਘੋਪਰਿ ਬਦ੍ਧ ਸਿਦ੍ਧਾ;

ਨੀਲਾਭ ਵਾਤ ਵਿਲੁਥਨ੍ਤ ਵਯਦ੍ਧਜਾਭਾ,

ਤਿਟ੍ਠਨ੍ਤੁ ਸਜ੍ਜ ਦੁਰਿਤਾਰਿ ਜਯਾਯ ਤੇ ਭੂ.

੬੫.

ਉਣ੍ਣਸ੍ਸਿਤੋਪਲ ਨਿਵੇਸਿਤ ਬੁਨ੍ਦ ਸਨ੍ਧਿ,

ਘਾਣੋਰੁ ਪਿਣ੍ਡਕਮਘਾ ਤਪ ਰੁਨ੍ਧਿਤੁਨ੍ਤੇ;

ਹੋਤਮ੍ਮੁਖਮ੍ਬੁਜ ਸਿਰੀ ਸਿਰਸੁਸ੍ਸਿਤਾਭਂ,

ਭੂ ਨੀਲ ਪਟ੍ਟਿਕ ਲਲਾਤ ਸੁਵਣ੍ਣ ਛਤ੍ਤਂ.

੬੬.

ਰੁਪਙ੍ਕ ਵੇਦਨ ਵਿਲੋਚਨ ਬਾਨ ਦਿਟ੍ਠੀ,

ਧਾਰਾ ਨਿਸਾਨ ਮਣਿਵਟ੍ਟ ਸਿਰੀ ਸਿਰੋ ਤੇ;

ਸਿਦ੍ਧਾ ਮਤੋਸਧ ਕਤਞ੍ਜਨ ਪੁਞ੍ਜ ਲਕ੍ਖੀ,

ਹੋਤਂ ਜਨਸ੍ਸ ਨਯਨਾਮਯ ਨਾਸਨਾਯ.

੬੭.

ਸਕ੍ਖਨ੍ਧ ਬਾਹੁਯੁਗ ਤੋਰਨ ਮਜ੍ਝ ਗੀਵਾ,

ਧਰਪ੍ਪਿਤਸ੍ਸਿਰਿਘਤੋ ਪਰਿ ਮੁਸ੍ਸਵਾਯ;

ਨੀਲੁਪ੍ਪਲਾਵ ਠਪਿਤਾ ਸਵਿਭਤ੍ਤਿ ਕਨ੍ਤੇ,

ਕੇਸਾ ਭਵਨ੍ਤੁ ਭੁਵਨਤ੍ਤਯ ਮਙ੍ਗਲਾਯ.

੬੮.

ਹੇਮਗ੍ਘਿਯੇ ਠਪਿਤ ਨੀਲ ਸਿਲਾ ਕਪਾਲੇ,

ਪਜ੍ਜੋਤ ਜਾਲ ਲਲਿਤਂ ਮੁਨਿ ਸਾਰਯਨ੍ਤੀ;

ਰੂਪਸ੍ਸਿਰੀ ਸਿਰਸਿ ਭੂਸਿਤ ਹੇਮ ਮਾਲਾ,

ਕਾਰਾ ਕਰੋਤੁ ਸੁਭਗਂ ਤਵ ਕੇਤੁ ਮਾਲਾ.

੬੯.

ਭ੍ਯਾਮਪ੍ਪਭਾਲਿ ਤਵ ਕਞ੍ਚਨ ਮੋਰ ਕਾਲੇ,

ਸੁਰੋਦਯੇ ਵਿਤਤ ਚਨ੍ਦਕ ਚਕ੍ਕਲਕ੍ਖੀ;

ਮੇਘਾਵਨਦ੍ਧ ਸਿਖਰੁਨ੍ਨਤ ਹੇਮ ਸੇਲਾ,

ਯਨ੍ਤਿਨ੍ਦਚਾਪ ਵਿਕਤੀਵ ਦਦਾਤੁ ਸੋਭਂ.

੭੦.

ਪਟ੍ਠਾਯ ਤੇ ਪਣਿਧਿਤੋ ਸੁਚਿ ਦਾਨ ਸੀਲ,

ਨੇਕ੍ਖਮ੍ਮ ਪਞ੍ਞ ਵਿਰਿਯਕ੍ਖਮ ਸਚ੍ਚਧਿਟ੍ਠਾ;

ਮੇਤ੍ਤਾ ਉਪੇਕ੍ਖਿਤਿ ਇਮੇ ਦਸ ਪੂਰਤੋਵ,

ਪੂਰੇਨ੍ਤੁ ਪਾਰਮਿ ਗੁਣਾ ਜਨਤਾਨਮਤ੍ਤੇ.

੭੧.

ਪਤ੍ਤੁਤ੍ਤਰੁਤ੍ਤਰਦਸਾ ਪਣਿਧਾਨ ਬੀਜਾ,

ਚੇਤੋਰਧਰਾਯ ਕਰੁਣਾ ਜਲ ਸੇਖ ਵੁਦ੍ਧਾ;

ਸਬ੍ਬਞ੍ਞੁ ਞਾਣ ਫਲਦਾ ਸਤਿ ਵਾਟ ਗੁਤ੍ਤਾ,

ਤਂ ਸਮ੍ਫਲਨ੍ਦਿਸਤੁ ਪਾਰਮਿਤਾ ਲਤਾ ਤੇ.

੭੨.

ਆਬੋਧਿ ਪੁਣ੍ਣਮਿ ਪਦਿਟ੍ਠ ਦਿਨਾਦਿਤੋ ਤੇ,

ਸਮ੍ਭਾਰ ਕਾਲ ਸਿਤ ਪਕ੍ਖ ਕਮਾਭਿ ਵੁਦ੍ਧੋ;

ਸਮ੍ਪੁਣ੍ਣ ਪਾਰਮਿ ਗੁਣਾਮਤਰਂਸਿ ਤਂਵ,

ਸਬ੍ਬਙ੍ਗਿ ਕੁਨ੍ਦ ਕੁਮੁਦਾਨਿ ਪਬੋਧਯੇਯ੍ਯ.

੭੩.

ਆਪਚ੍ਛਿਮਬ੍ਭਵ ਸਿਵਪ੍ਫਲ ਲਾਭ ਦਾਨਾ,

ਦਾਨਪ੍ਪਬਨ੍ਧਮਪਿਦਾਨ ਫਲਪ੍ਪਭਨ੍ਦਂ;

ਸਂਵਡ੍ਢਯਿ ਤ੍ਵਂ ਅਭਿਪਤ੍ਥਨਤੋ ਯਥੇਵਂ,

ਜਨ੍ਤੁਤ੍ਤਰੁਤ੍ਤਰ ਫਲਂ ਖਲੁ ਸਮ੍ਭੁਨਨ੍ਤੁ.

੭੪.

ਆਰਮ੍ਭਤੋਪ੍ਪਭੁਤਿ ਯਾਵ ਤਵਗ੍ਗਮਗ੍ਗਾ,

ਵਿਕ੍ਖਾਲਿਤ ਘਕਲੁਸਂ ਸੁਚਿ ਸੀਲ ਤੋਯਂ;

ਮੇਤ੍ਤਾ ਦਯਾ ਮਧੁਰ ਸੀਤਲਤਾਯੁਪੇਤਂ,

ਸੋਧੇਤੁ ਤ੍ਵਂਵ ਭਵ ਨਿਸ੍ਸਿਤ ਜਨ੍ਤੁ ਮੇਤਂ.

੭੫.

ਆਪਚ੍ਚਿਮਤ੍ਤਮਭਿਨਿਕ੍ਖਮਨਾਭਿਯੋਗਾ,

ਪਟ੍ਠਾਯ ਤਮ੍ਪਭਵਤੋ ਪਰਿਪੁਣ੍ਣ ਗੇਹਾ;

ਤ੍ਵਂ ਸਬ੍ਬ ਜਾਤਿ ਗਹਤੋ ਅਪਿ ਨਿਕ੍ਖਮਿਤ੍ਥੋ,

ਏਵਂ ਜਨਾ ਭਵ ਦੁਖਾ ਖਲੁ ਨਿਕ੍ਖਮਨ੍ਤੁ.

੭੬.

ਏਕਗ੍ਗਤੋ ਪਲ ਤਲੇ ਨਿਸਿਤਾ ਚਿਰਨ੍ਧਿ,

ਧਾਰਾ ਸੁਚਿਤ੍ਤੁ ਸੁਤਲੇ ਸਤਿ ਦਣ੍ਡ ਬਦ੍ਧੇ;

ਨਿਬ੍ਬਿਜ੍ਝਿ ਲਕ੍ਖਣ ਧਨੁਟ੍ਠਿਤਿ ਸਨ੍ਤਿ ਲਕ੍ਖਂ,

ਖਿਤ੍ਤਾ ਤਯੋਨਮਨੁ ਵਿਜ੍ਝਤੁ ਜਨ੍ਤੁ ਖਿਤ੍ਤਾ.

੭੭.

ਤ੍ਵਂ ਪਾਰਮੀ ਜਲ ਨਿਧਿਂ ਚਤੁਰਿਹ ਬਾਹੁ,

ਸਤ੍ਤੀਹਿ ਸੁਤ੍ਤਰਿ ਚਿਰਂ ਜਨਕੋਵ ਸਿਨ੍ਧੁਂ;

ਸਮ੍ਪਨ੍ਨ ਵਿਕ੍ਕਮ ਫਲੋਸਿ ਯਥਾ ਚਸੋਵ,

ਏਵਂ ਜਨਾ ਵਿਰਿਯਤਪ੍ਫਲਮੇ ਧਯਨ੍ਤੁ.

੭੮.

ਸਤ੍ਤ ਪਰਧ ਦਹਨੇਸੁ ਚਿਰਂ ਸੁਧਨ੍ਤਂ,

ਖਨ੍ਤੀ ਸੁਵਣ੍ਣ ਕਤ ਰੂਪ ਸਮਨ੍ਤਿਮਤ੍ਤਾ;

ਸਬ੍ਬਾ ਪਰਾਧਮਸਹਿ ਤ੍ਵਂਅਸਯ੍ਹਮੇਵਂ,

ਸਬ੍ਬੇ ਜਨਾਪਿ ਖਮਨੇਨ ਭਜਨ੍ਤੁ ਸਨ੍ਤਿਂ.

੭੯.

ਲਕ੍ਖਾਧਿਕਂ ਚਤੁਰ ਸਂਖਿਯ ਕਪ੍ਪ ਕਾਲਂ,

ਸਚ੍ਚੇਨ ਸੁਟ੍ਠੁ ਪਰਿਭਾਵਿਤ ਵਾਚਿਨੋ ਤੇ;

ਵਾਚਾਯ ਸਚ੍ਚ ਫੁਸਿਤਾਯ ਸਮੇਨ੍ਤਿ ਜਨ੍ਤੁ,

ਏਵਂ ਵਿਸੁਦ੍ਧ ਵਚਨਾ ਜਨਤਾ ਭਵਨ੍ਤੁ.

੮੦.

ਆਦਿਨ੍ਨ ਧਮ੍ਮ ਮਹਿਯਤ੍ਥਿਰ ਸੁਪ੍ਪਤਿਟ੍ਠਾ,

ਧਿਟ੍ਠਾਨ ਪਾਰਮਿ ਮਹਾ ਵਜਿਰਦ੍ਦਿ ਤੁਯ੍ਹਂ;

ਸਤ੍ਤੇਨ ਕੇਨ ਪਿ ਯਥਾਹਿ ਅਭੇਜ੍ਜ ਨੇਜ੍ਜੋ,

ਏਵਂ ਜਨਾਪਿ ਕੁਸਲੇਸੁ ਅਧਿਟ੍ਠ ਹਨ੍ਤੁ.

੮੧.

ਤ੍ਵਂ ਸਬ੍ਬ ਸਤ੍ਤ ਚਿਰਭਾਵਿਤ ਮੇਤ੍ਤ ਚਿਤ੍ਤ,

ਤੋਯੇਹਿ ਸਂਸਮਿਤ ਕੋਧ ਮਹਾ ਹੁਤਾਸੋ;

ਲੋਕੁਤ੍ਤਰਂ ਤਦਿਤਰਂ ਹਿਤਮਾਵਹਿਤ੍ਥੋ,

ਏਵਂ ਜਨੇਸੁ ਜਨਤਾ ਹਿਤਮਾਵਹਨ੍ਤੂ.

੮੨.

ਮਿਤ੍ਤੋਪਕਾਰ ਪਟਿਪਕ੍ਖ ਜਨਾਪਕਾਰੇ,

ਤ੍ਵਂ ਨਿਬ੍ਬਿਕਾਰ ਮਨਸੋ ਚਿਰਭਾਵਨਾਯ;

ਪਤ੍ਤੋਸਿਲਾਭ ਪਭੁਤਟ੍ਟੁਸੁ ਨਿਬ੍ਬਿਕਾਰਂ,

ਏਵਂ ਜਨਾਨੁਨਯ ਕੋਪ ਨੁਦਾ ਭਵਨ੍ਤੁ.

੮੩.

ਸਮ੍ਪਨ੍ਨ ਹੇਤੁ ਵਿਭਵੋ ਤੁਸਿਤੇ ਵਿਮਾਨਂ,

ਯੁਤ੍ਤਂ ਗੁਣੇਹਿ ਨਵਭਿਪ੍ਪਦਵੀ ਵਿਮਾਨਂ;

ਤ੍ਵਂ ਵਾਧਿਪਰਮਿਧਿਰੋਹਿਨਿਯਾ ਤਿਲੋਕੋ,

ਆਰੋਹਤੁ ਭਯ ਸੁਖਂ ਪਦਵੀ ਵਿਮਾਨਂ.

੮੪.

ਤ੍ਵਂਵੇਰਹਂਸਿ ਸਮਬੁਜ੍ਝਿ ਯਥਾਚ ਸਮ੍ਮਾ,

ਸਮ੍ਪਨ੍ਨ ਵਿਜ੍ਜ ਚਰਣੋ ਸੁਗਤੋਸਿ ਹੋਨ੍ਤੁ;

ਲੋਕਂ ਵਿਦੋ ਪੁਰਿਸਦਮ੍ਮਸੁਸਾਰਥੀ ਸਿ,

ਸਤ੍ਥਾਸਿ ਬੁਜ੍ਝਿ ਭਗਵਾ ਸਿ ਤਥੇਵ ਜਨ੍ਤੁ.

੮੫.

ਸਚ੍ਚਿਤ੍ਤ ਭੂ ਨਿਦਹਿਤਂ ਜਨਤਾਯ ਤੁਯ੍ਹਂ,

ਕਲ੍ਯਾਣਵਣ੍ਣਰਤਨਣ੍ਣਵਜਾਤਿਭਿਨ੍ਨਂ;

ਦੁਕ੍ਖਗ੍ਗਿ ਚੋਰ ਜਲੁਪਦ੍ਦੁਤਜਾਤਿ ਗੇਹੇ,

ਤਸ੍ਸਾ ਸੁਖਂ ਭਵਤੁ ਜੀਵਿਤੁਮਾਪਦਾਯ.

੮੬.

ਵਾਚਾ ਵਿਚਿਤ੍ਤ ਵਰ ਤਨ੍ਤੁ ਗਤਙ੍ਗਿ ਕਣ੍ਠੇ,

ਸ੍ਵਾ ਮੁਤ੍ਤ ਸਗ੍ਗੁਣ ਮਹਾ ਰਤਨਾ ਵਲੀ ਤੇ;

ਵੇਵਣ੍ਣਿ ਯਤ੍ਤਨਿ ਭਵਂ ਸਕਲਮ੍ਪਹਾਯ,

ਹੋਤਞ੍ਜਨਸ੍ਸ ਸਿਰਿ ਸਙ੍ਗਮ ਮਙ੍ਗਲਾਯ.

੮੭.

ਤਂ ਸਗ੍ਗੁਣਤ੍ਥਵ ਦਹਟ੍ਠ ਸੁਤਿਪ੍ਪਨਾਲਿ,

ਨਿਸ੍ਸਨ੍ਦਮਾਨ ਗੁਣਨੀਰ ਨਿਪਾਨ ਤਿਨ੍ਤੇ;

ਖੇਤ੍ਤੇਤ੍ਤ ਸਞ੍ਞਿਨਿ ਜਨਾ ਕਤ ਲੋਮ ਹਂਸ,

ਬੀਜਙ੍ਕੁਰੀ ਕੁਸਲ ਸਸ੍ਸ ਫਲਂ ਲਭਨ੍ਤੁ.

੮੮.

ਆਪਾਯਿਕਪ੍ਪਭੁਤਿ ਦੁਕ੍ਖ ਨਿਦਾਘ ਕਾਲ,

ਸਨ੍ਤਾਪਿਤਾ ਨਿਖਿਲ ਲੋਕ ਮਨੋ ਕਦਮ੍ਬਾ;

ਤਂ ਵਙ੍ਣ ਮੇਘ ਫੁਸਨਾ ਹਸਨਙ੍ਕੁਰੇਹਿ,

ਇਦ੍ਧਾ ਭਵਨ੍ਤੁ ਮਤਿ ਵਲ੍ਲਰਿ ਵੇਲ੍ਲੀਤਾ ਤੇ.

੮੯.

ਹੇਤੁਦ੍ਦਸਾ ਫਲਦਸਾ ਸਮਵਟ੍ਠਿਤਂ ਤਂ,

ਸਬ੍ਬਤ੍ਥ ਸਤ੍ਤ ਹਿਤਮਾਵਹਣੇਨ ਸਿਦ੍ਧਂ;

ਚਿਨ੍ਤਾਪਥਾਤਿਗਨੁਭਾਵ ਵਿਭਾਵਨਨ੍ਤੇ,

ਭੂਤਾਨਮਤ੍ਥੁ ਚਰਿਤਬ੍ਭੁਤਮਤ੍ਥ ਸਿਧ੍ਯਾ.

੯੦.

ਅਙ੍ਗਾਰਕਾਸੁਮਭਿਲਙ੍ਘਿਯ ਦਾਨ ਕਾਲੇ,

ਭਤ੍ਤਤ੍ਤਨੋ ਪਦ ਪਟਿਚ੍ਛਕ ਪਙ੍ਕਜਾ ਚ;

ਯਾਤਕ੍ਖਣੇ ਤਵ ਪਦੇ ਧਟਮੁਟ੍ਠਹਿਤ੍ਵਾ,

ਪਙ੍ਕੇਰੁਹਾਂ ਸਿਵ ਮਧੁਂ ਸਰਤਂ ਦਦਨ੍ਤੁ.

੯੧.

ਸਚ੍ਚੇਨ ਮਚ੍ਛ ਪਤਿ ਵਸ੍ਸਿਤ ਵਸ੍ਸਧਾਰਾ,

ਸਤ੍ਤੇ ਦਯਾਯ ਤਵ ਵਸ੍ਸਿਤ ਵਸ੍ਸਧਾਰਾ;

ਗਿਮ੍ਹੇ ਜਨਸ੍ਸ ਸਮਯਿਂਸੁ ਯਥਾ ਤਥਾਤਾ,

ਧਮਮ੍ਬੁਵੁਟ੍ਠਿਵ ਸਮੇਨ੍ਤੁ ਕਿਲੇਸ ਦਾਹੇ.

੯੨.

ਛਦ੍ਦਨ੍ਤ ਨਾਗ ਪਤਿਨਾ ਖਮਤਾ ਪਰਾਧਂ,

ਛੇਤ੍ਵਾ ਕਰੇ ਠਪਿਤ ਦਨ੍ਤਵਰਾਵ ਲੁਦ੍ਦਂ;

ਲੋਕੇ ਹਿਤਾਯ ਠਪਿਤਾ ਤਵ ਦਨ੍ਤ ਧਾਤੁ,

ਸੇਟ੍ਠਾ ਜਨਂ ਸਿਵ ਪੁਰਂ ਲਹੁ ਪਾਪਯਨ੍ਤੁ.

੯੩.

ਤਂ ਤੇਮਿਯਾਖ੍ਯ ਯਤਿਨੋਸ੍ਸਮ ਮਾਲਕਮ੍ਹਿ,

ਓਕਿਣ੍ਣ ਮੁਤ੍ਤ ਕਨਕਾ ਵੁਜ ਵਿਪ੍ਪਕਿਣ੍ਣਾ;

ਕਾਰੁਞ੍ਞ ਵਾਰਿਦ ਚੁਤੋ ਦਕ ਬਿਨ੍ਦੁ ਬਨ੍ਧੂ,

ਧਾਤੁ ਸਮੇਨ੍ਤੁ ਤਵ ਜਨ੍ਤੁਸੁ ਦੁਕ੍ਖਦਾਹੇ.

੯੪.

ਰਟ੍ਠਸ੍ਸ ਅਤ੍ਥ ਚਰਣਾਯ ਅਸਮ੍ਮੁਖਸ੍ਸ,

ਰਾਮੇਨ ਦਿਨ੍ਨ ਤਿਣ ਸਂਖਤ ਪਾਦੁਕਾਵ;

ਭੁਤ੍ਤਾ ਤਯਾ ਚਿਰਮਸਮ੍ਮੁਖ ਨਾਗਤਸ੍ਸ,

ਲੋਕਸ੍ਸ ਅਤ੍ਥਮਨੁ ਤਿਟ੍ਠਤੁ ਪਤ੍ਤ ਧਾਤੁ.

੯੫.

ਵੁਤ੍ਤੋ ਜਨਾਨਮੁਪਦਿਸ੍ਸ ਵਰਾਹ ਰਞ੍ਞਾ,

ਸਤ੍ਥਿਂ ਸਹਸ੍ਸ ਸਰਦਂ ਵਿਯ ਞਾਯ ਧਮ੍ਮੋ;

ਆਦੇਯ੍ਯ ਹੇਯ੍ਯਮੁਪਦਿਸ੍ਸ ਤਯਾ ਪਵੁਤ੍ਤੋ,

ਧਮ੍ਮੋ ਪਵਤ੍ਤਤੁ ਚਿਰਂ ਜਨਤਾ ਹਿਤਾਯ.

੯੬.

ਮਾਰਾਰਿ ਮਦ੍ਦਨ ਹਿਤਾਧਿਗਮਂ ਕਰੋਤਾ,

ਭਤ੍ਤੋ ਤਯਾ ਵਰ ਮਹਾ ਜਯ ਬੋਧਿ ਰਾਜਾ;

ਸਗ੍ਗਾ ਪਵਵਗ੍ਗ ਹਿਤਹੇਤੁ ਜਨਸ੍ਸ ਹਨ੍ਤ੍ਵਾ,

ਸਬ੍ਬਨ੍ਤਰਾਯਮਿਹ ਤਿਟ੍ਠਤੁ ਸੁਟ੍ਠੁ ਸਜ੍ਜੋ.

੯੭.

ਸਾਮੋਦ ਵਣ੍ਣ ਭਜਨੀ ਗੁਣ ਮਞ੍ਜਰੀਯਂ,

ਚਰਿਯਾ ਲਤਾ ਵਿਕਸਿਤਾ ਤਵ ਸਪ੍ਫਲਙ੍ਗਂ;

ਓਕਿਣ੍ਣ ਚਿਤ੍ਤ ਮਧੁਪੇ ਰਸ ਪੀਣਯਨ੍ਤਿ,

ਸਮ੍ਭਾਵਿਤਾ ਭੁਵਿ ਪਵਤ੍ਤਤੁ ਮਤ੍ਥਕੇਹਿ.

੯੮.

ਸਮ੍ਬੁਦ੍ਧ ਸੇਲਵਲਯਨ੍ਤਰ ਜਾਨਨਵ੍ਹਾ,

ਨੋਤ੍ਤਤ੍ਤਤੋ ਤਿਪਥਗਾ ਯਤਿ ਸਾਗਰਟ੍ਠਾ;

ਧਮ੍ਮਾ ਪਗਾ ਸੁਤਿ ਵਸੇ ਤਰਿਤੇ ਪੁਣਨ੍ਤਿ,

ਸਮ੍ਭਾਰ ਸਸ੍ਸਮਿਹ ਵਤ੍ਤਤੁ ਪਚਯਨ੍ਤਿ.

੯੯.

ਪਞ੍ਞਾਣ ਕੂਪ ਸਿਤ ਪਗ੍ਗਹ ਵਾਯੁ ਗਾਹੀ,

ਸਦ੍ਧਾ ਲਕਾਰ ਸਹਿਤਾ ਸਤਿ ਪੋਤ ਵਾਹਾ;

ਸਮ੍ਪਾਪਯਾਤੁ ਭਵ ਸਾਗਰ ਪਾਰ ਤੀਰ,

ਸਪ੍ਪਤ੍ਤਨਂ ਵਰਧਨੇ ਪਤਿ ਪਤ੍ਤਿ ਨਾਵਾ.

੧੦੦.

ਬੋਜ੍ਝਙ੍ਗ ਸਤ੍ਤ ਰਤਨਾਕਰ ਧਮ੍ਮ ਖਨ੍ਧ,

ਗਮ੍ਭੀਰ ਨੀਰ ਚਯ ਸਾਸਨ ਸਾਗਰੋ ਸਂ;

ਸੋ ਸੀਲ੍ਯਨਨ੍ਤ ਤਨੁ ਵੇਟਿਥ ਞਾਣ ਮਨ੍ਥ,

ਸੇਲੇਨ ਮਨ੍ਥਿਤਵਤਂ ਦਿਸਤਾ ਮਤਂ ਵੇ.

੧੦੧.

ਵੁਤ੍ਤੇਨ ਤੇਨ ਵਿਧਿਨਾ ਵਿਧਿਨਾ ਤਤੋ ਤਂ,

ਲਦ੍ਧਾ ਨੁਭੂਤਮਮਤਂ ਖਿਲ ਦੋਸ ਨਾਸਂ;

ਅਚ੍ਚਨ੍ਤ ਰੋਗ ਜਰਤਾ ਮਰਣਾ ਭਿ ਭੂਤਂ,

ਭੂਤਂ ਕਰੋਤੁ ਅਮਰਂ ਅਜਰਂ ਅਰੋਗਂ.

੧੦੨.

ਸਦ੍ਧਮ੍ਮ ਰਾਜ ਰਵਿਨਿਗ੍ਗਤ ਧਮ੍ਮਰਂਸਿ,

ਫੁਲ੍ਲੋ ਧੁਤਙ੍ਗਦਲ ਸਂਵਰ ਕੇਸਰਾਲਿ;

ਸਙ੍ਘਾਰਵਿਨ੍ਦ ਨਿਕਰੋ ਸਮਧੁਂ ਸਮਾਧਿ,

ਸਕ੍ਕਿਣ੍ਣਿਕੋ ਦਿਸਤੁ ਸਾਸਨ ਵਾਪਿ ਜਤੋ.

੧੦੩.

ਆਨਨ੍ਦ ਰਞ੍ਞ ਰਤਨਾਦਿ ਮਹਾ ਯਤਿਨ੍ਦ,

ਨਿਚ੍ਚਪ੍ਪਬੁਦ੍ਧ ਪਦੁਮਪ੍ਪਿਯ ਸੇਵਿਨਙ੍ਗੀ;

ਬੁਦ੍ਧਪ੍ਪਿਯੇਨ ਘਨ ਬੁਦ੍ਧ ਗੁਣਪ੍ਪਿਯੇਨ,

ਥੇਰਾਲਿਨਾ ਰਚਿਤ ਪਜ੍ਜਮਧੁਂ ਪਿਬਨ੍ਤੁ.

੧੦੪.

ਇਤ੍ਥਂ ਰੂਪ ਗੁਣਾਨੁਕਿਤ੍ਤਨਵਸਾ ਤਂ ਤਂ ਹਿਤਾ ਸਿਂ ਸਤੋ,

ਵਤ੍ਥਾਨੁਸ੍ਸਤਿ ਵਤ੍ਤਿਤ ਇਹ ਯਥਾ ਸਤ੍ਤੇਸੁ ਮੇਤ੍ਤਾ ਚ ਮੇ;

ਏਵਂ ਤਾਭਿ ਭਵਨ੍ਤ ਰੁਤ੍ਤਰ ਤਰਾ ਵਤ੍ਤਨ੍ਤੁ ਤਾ ਬੋਧਿ ਮੇ,

ਸਂਯੋਗੋਚ ਧਨੇਹਿ ਸਨ੍ਤਿਹਿ ਭਵੇ ਕਲ੍ਯਾਨ ਮਿਤ੍ਤੇਹਿ ਚ.