ਅਞ੍ਞ > ਵਂਸ-ਗਨ੍ਥ-ਸਙ੍ਗਹੋ

ਵਿਨਯਪਿਟਕਂ, ਅਭਿਧਮ੍ਮਪਿਟਕਂ ਸੁਤ੍ਤਨ੍ਤਪਿਟਕਨ੍ਤਿ. ਤਤ੍ਥ ਕਤਮਂ ਵਿਨਯ ਪਿਟਕਂ? ਪਾਰਾਜਿਕਕਣ੍ਡਂ, ਪਾਚਿਤ੍ਤਿਯਕਣ੍ਡਂ, ਮਹਾਵਗ੍ਗਕਣ੍ਡਂ, ਚੁਲ੍ਲਵਗ੍ਗਕਣ੍ਡਂ, ਪਰਿਵਾਰਕਣ੍ਡਨ੍ਤਿ. ਇਮਾਨਿ ਕਣ੍ਡਾਨਿ ਵਿਨਯਪਿਟਕਂ ਨਾਮ.

ਕਤਮਂ ਅਭਿਧਮ੍ਮਪਿਟਕਂ? ਧਮ੍ਮਸਙ੍ਗਣੀ-ਪਕਰਣਂ, ਵਿਭਙ੍ਗ-ਪਕਰਣਂ, ਧਾਤੁਕਥਾ-ਪਕਰਣਂ, ਪੁਗ੍ਗਲਪਞ੍ਞਤ੍ਤਿ-ਪਕਰਣਂ, ਕਥਾਵਤ੍ਥੁ-ਪਕਰਣਂ, ਯਮਕ-ਪਕਰਣਂ, ਪਟ੍ਠਾਨ-ਪਕਰਣਨ੍ਤਿ. ਇਮਾਨਿ ਸਤ੍ਤ ਪਕਰਣਾਨਿ ਅਭਿਧਮ੍ਮਪਿਟਕਂ ਨਾਮ. ਕਤਮਂ ਸੁਤ੍ਤਨ੍ਤਪਿਟਕਂ? ਸੀਲਕ੍ਖਨ੍ਧਵਗ੍ਗਾਦਿਕਂ, ਅਵਸੇਸਂ ਬੁਦ੍ਧਵਚਨਂ ਸੁਤ੍ਤਨ੍ਤਪਿਟਕਂ ਨਾਮ.

ਕਥਂ ਨਿਕਾਯਤੋ? ਨਿਕਾਯਾ ਪਞ੍ਚ ਵਿਧਾ ਹੋਨ੍ਤਿ. ਦੀਘਨਿਕਾਯੋ, ਮਜ੍ਝਿਮਨਿਕਾਯੋ, ਸਂਯੁਤ੍ਤਨਿਕਾਯੋ, ਅਙ੍ਗੁਤ੍ਤਰਨਿਕਾਯੋ, ਖੁਦ੍ਦਕਨਿਕਾਯੋਤਿ.

ਤਤ੍ਥ ਕਤਮੋ ਦੀਘ-ਨਿਕਾਯੋ? ਸੀਲਕ੍ਖਨ੍ਧਵਗ੍ਗੋ, ਮਹਾਵਗ੍ਗੋ, ਪਾਥਿਕਵਗ੍ਗੋਤਿ, ਇਮੇ ਤਯੋ ਵਗ੍ਗਾ ਦੀਘਨਿਕਾਯੋ ਨਾਮ. ਇਮੇਸੁ ਤੀਸੁ ਵਗ੍ਗੇਸੁ, ਚਤੁਤਿਂਸ ਵਗ੍ਗਾਨਿ ਚ ਹੋਨ੍ਤਿ. [ਚਤੁਤਿਂਸੇਵ ਸੁਤ੍ਤਨ੍ਤਾ, ਸੀਲਕ੍ਖਨ੍ਧਵਗ੍ਗਾਦਿਕਾ, ਯਸ੍ਸ ਭਵਨ੍ਤਿ ਸੋ ਯੇਵ ਦੀਘਨਿਕਾਯ ਨਾਮ ਹੋਤਿ.]

ਕਤਮੋ ਮਜ੍ਝਿਮਨਿਕਾਯੋ? ਮੂਲਪਣ੍ਣਾਸੋ, ਮਜ੍ਝਿਮਪਣ੍ਣਾਸੋ, ਉਪਰਿਪਣ੍ਣਾਸੋਤਿ, ਇਮੇ ਤਯੋ ਪਣ੍ਣਾਸਾ ਮਜ੍ਝਿਮਨਿਕਾਯੋ ਨਾਮ. ਇਮੇਸੁ ਤੀਸੁ ਪਣ੍ਣਾਸੇਸੁ ਦ੍ਵੇਪਞ੍ਞਾਸਾਧਿਕ-ਸੁਤ੍ਤ-ਸਤਾਨਿ ਹੋਨ੍ਤਿ [ਦਿਯਡ੍ਢਸਤਸੁਤ੍ਤਨ੍ਤਾ, ਦ੍ਵਿ ਸੁਤ੍ਤਂ ਯਸ੍ਸ ਸਨ੍ਤਿਸੋ, ਮਜ੍ਝਿਮਨਿਕਾਯੋ ਨਾਮੋ ਮੂਲਪਣ੍ਣਾਸਮਾਦਿ ਹੋਤਿ.]

ਕਤਮੋ ਸਂਯੁਤ੍ਤਨਿਕਾਯੋ? ਸਗਾਥਾਵਗ੍ਗੋ, ਨਿਦਾਨਵਗ੍ਗੋ, ਖਨ੍ਧਕਵਗ੍ਗੋ, ਸਲ਼ਾਯਤਨਵਗ੍ਗੋ, ਮਹਾਵਗ੍ਗੋਤਿ, ਇਮੇ ਪਞ੍ਚ ਵਗ੍ਗਾ ਸਂਯੁਤ੍ਤਨਿਕਾਯੋ ਨਾਮ. ਇਮੇਸੁ ਪਞ੍ਚਸੁ ਵਗ੍ਗੇਸੁ ਦ੍ਵਾਸਟ੍ਠਿਸੁਤ੍ਤਸਤ੍ਤਸਤਾਧਿਕਸਤ੍ਤ-ਸੁਤ੍ਤਸਹਸ੍ਸਾਨਿ ਹੋਨ੍ਤਿ. [ਦ੍ਵਾਸਟ੍ਠਿ-ਸਤ੍ਤ-ਸਤਾਨਿ, ਸਤ੍ਤਸਹਸ੍ਸਕਾਨਿ ਚ.] ਸੁਤ੍ਤਾਨਿ ਯਸ੍ਸ ਹੋਨ੍ਤਿ ਸੋ, ਸਗਾਥਾਦਿਕਵਗ੍ਗਕੋ, ਸਂਯੁਤ੍ਤਨਿਕਾਯੋ ਨਾਮੋ ਵੇਦਿਤਬ੍ਬੋ ਚ ਵਿਞ੍ਞੂਨਾਤਿ.

ਕਤਮੋ ਅਙ੍ਗੁਤ੍ਤਰਨਿਕਾਯੋ? ਏਕ੍ਕਨਿਪਾਤੋ, ਦੁਕ੍ਕਨਿਪਾਤੋ, ਤਿਕ੍ਕਨਿਪਾਤੋ, ਚਤੁਕ੍ਕਨਿਪਾਤੋ, ਪਞ੍ਚਕਨਿਪਾਤੋ, ਛਕ੍ਕਨਿਪਾਤੋ, ਸਤ੍ਤਕਨਿਪਾਤੋ, ਅਟ੍ਠਕਨਿਪਾਤੋ, ਨਵਕਨਿਪਾਤੋ, ਦਸਕਨਿਪਾਤੋ, ਏਕਾਦਸਨਿਪਾਤੋਤਿ, ਇਮੇ ਏਕਾਦਸ ਨਿਪਾਤਾ ਅਙ੍ਗੁਤ੍ਤਰਨਿਕਾਯੋ ਨਾਮ. ਇਮੇਸੁ ਏਕਾਦਸ ਨਿਪਾਤੇਸੁ ਸਤ੍ਤ-ਪਞ੍ਞਾਸ-ਪਞ੍ਚ-ਸਤਾਧਿਕਨਵ-ਸੁਤ੍ਤ-ਸਹਸ੍ਸਾਨਿ ਹੋਨ੍ਤਿ. [ਨਵਸੁਤ੍ਤਸਹਸ੍ਸਾਨਿ, ਪਞ੍ਚਸਤਮਤ੍ਤਾਨਿ ਚ, ਸਤ੍ਤਪਞ੍ਞਾਸਾਧਿਕਾਨਿ, ਸੁਤ੍ਤਾਨਿ ਯਸ੍ਸ ਹੋਨ੍ਤਿ ਸੋ, ਅਙ੍ਗੁਤ੍ਤਰਨਿਕਾਯੋਤਿ, ਏਕ੍ਕਨਿਪਾਤਕਾਦਿਕੋਤਿ.]

ਕਤਮੋ ਖੁਦ੍ਦਕਨਿਕਾਯੋ? ਖੁਦ੍ਦਕਪਾਠੋ, ਧਮ੍ਮਪਦਂ, ਉਦਾਨਂ, ਇਤਿਵੁਤ੍ਤਕਂ, ਸੁਤ੍ਤਨਿਪਾਤੋ, ਵਿਮਾਨਵਤ੍ਥੁ, ਪੇਤਵਤ੍ਥੁ, ਥੇਰਕਥਾ, ਥੇਰੀਕਥਾ, ਜਾਤਕਂ, ਮਹਾਨਿਦ੍ਦੇਸੋ, ਪਟਿਸਮ੍ਭਿਦਾਮਗ੍ਗੋ, ਅਪਦਾਨਂ, ਬੁਦ੍ਧਵਂਸੋ, ਚਰਿਯਾਪਿਟਕਂ, ਵਿਨਯਪਿਟਕਂ, ਅਭਿਧਮ੍ਮਪਿਟਕਨ੍ਤਿ. ਇਮੇਸੁ ਸਤ੍ਤਰਸਸੁ ਗਨ੍ਥੇਸੁ ਅਨੇਕਾਨਿ ਸੁਤ੍ਤ-ਸਹਸ੍ਸਾਨਿ ਹੋਨ੍ਤਿ. [ਅਨੇਕਾਨਿ ਸੁਤ੍ਤ-ਸਹਸ੍ਸਾਨਿ, ਨਿਦ੍ਦਿਟ੍ਠਾਨਿ ਮਹੇਸਿਨਾ, ਨਿਕਾਯੇ ਪਞ੍ਚਮੇ ਇਮੇ, ਖੁਦ੍ਦਕੇ ਇਤਿ ਵਿਸੁਤੇਤਿ.]

ਕਥਂ ਅਙ੍ਗਤੋ ਅਙ੍ਗਹਿ ਨਵ ਵਿਧਂ ਹੋਤਿ? ਸੁਤ੍ਤਂ, ਗੇਯ੍ਯਂ, ਵੇਯ੍ਯਾਕਰਣਂ, ਗਾਥਾ, ਉਦਾਨਂ, ਇਤਿਵੁਤ੍ਤਕਂ, ਜਾਤਕਂ, ਅਬ੍ਭੁਤਧਮ੍ਮਂ, ਵੇਦਲ੍ਲਨ੍ਤਿ, ਨਵਪ੍ਪਭੇਦਂ ਹੋਤਿ. ਤਤ੍ਥ ਉਭਤੋ ਵਿਭਙ੍ਗਨਿਦ੍ਦੇਸਖਨ੍ਧਕਪਰਿਵਾਰਾ, ਸੁਤ੍ਤਨਿਪਾਤੇ, ਮਙ੍ਗਲਸੁਤ੍ਤ, ਰਤਨਸੁਤ੍ਤ, ਤੁਵਟ੍ਟਕਸੁਤ੍ਤਾਨਿ. ਅਞ੍ਞਮ੍ਪਿ ਸੁਤ੍ਤਨਾਮਕਂ ਤਥਾਗਤਵਚਨਂ, ਸੁਤ੍ਤਨ੍ਤਿ ਵੇਦਿਤਬ੍ਬਂ. ਸਬ੍ਬਂ ਸਗਾਥਕਂ ਗੇਯ੍ਯਨ੍ਤਿ ਵੇਦਿਤਬ੍ਬਂ. ਵਿਸੇਸਨਸਂਯੁਤ੍ਤਕੇ ਸਕਲੋਪਿ ਸਗਾਥਕਵਗ੍ਗੋ, ਸਕਲਂ ਅਭਿਧਮ੍ਮਪਿਟਕਂ ਨਿਗਾਥਕਞ੍ਚ ਸੁਤ੍ਤਯਞ੍ਚ ਅਞ੍ਞਮ੍ਪਿ ਅਟ੍ਠਹਿ ਅਙ੍ਗੇਹਿ ਅਸਙ੍ਗਹਿਤਂ ਬੁਦ੍ਧਵਚਨਂ ਤਂ ਵੇਯ੍ਯਾਕਰਣਨ੍ਤਿ ਵੇਦਿਤਬ੍ਬਂ. ਧਮ੍ਮਪਦਂ, ਥੇਰਕਥਾ, ਥੇਰੀਕਥਾ, ਸੁਤ੍ਤਨਿਪਾਤੇ, ਨੋ ਸੁਤ੍ਤਨਾਮਿਕਾ ਸੁਦ੍ਧਿਕਗਾਥਾ, ਗਾਥਾਤਿ ਵੇਦਿਤਬ੍ਬਾ. ਸੋਮਨਸ੍ਸ ਞਾਣਮਯਿਕਗਾਥਾ ਪਟਿਕ-ਸਂਯੁਤ੍ਤਾ ਦ੍ਵੇ ਅਸੀਤਿਸੁਤ੍ਤਨ੍ਤਾ ਉਦਾਨਨ੍ਤਿ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ ਭਗਵਤਾਤਿਆਦਿਨਯਪ੍ਪਵਤ੍ਤਾ ਦਸੁਤ੍ਤਰਸਤਸੁਤ੍ਤਨ੍ਤਾ, ਇਤਿਵੁਤ੍ਤਕਨ੍ਤਿ ਵੇਦਿਤਬ੍ਬਾ. ਅਪਣ੍ਣਕਜਾਤਕਾਦੀਨਿ ਪਞ੍ਞਾਸਾਦਿਕਾਨਿ. ਪਞ੍ਚਜਾਤਕਸਤਾਨਿ, ਜਾਤਕਨ੍ਤਿ ਵੇਦਿਤਬ੍ਬਂ. ਚਤ੍ਤਾਰੋ ਮੇ ਭਿਕ੍ਖਵੇ ਅਚ੍ਛਰਿਯਾ ਅਭੂਤਧਮ੍ਮਾ, ਆਨਨ੍ਦੇਤਿਆਦਿਨਯਪ੍ਪਵਤ੍ਤਾ ਸਬ੍ਬੇਪਿ ਅਚ੍ਛਰਿਯ ਅਭੂਤਧਮ੍ਮਪਟਿਸਂਯੁਤ੍ਤਾ ਸੁਤ੍ਤਨ੍ਤਾ ਅਭੂਤਧਮ੍ਮਨ੍ਤਿ ਵੇਦਿਤਬ੍ਬਾ. ਚੁਲ੍ਲਵੇਦਲ੍ਲ, ਮਹਾਵੇਦਲ੍ਲ, ਸਮ੍ਮਾਦਿਟ੍ਠਿ, ਸਕ੍ਕਪਞ੍ਹ, ਸਙ੍ਖਾਰਭਾਜਨਿਯ, ਮਹਾਪੁਣ੍ਣਮਸੁਤ੍ਤਨ੍ਤਾਦਯੋ ਸਬ੍ਬੇਪਿ ਵੇਦਞ੍ਚ ਤੁਟ੍ਠਿਞ੍ਚ ਲਦ੍ਧਾ [ਪੁਚ੍ਛ] ਲਦ੍ਧਾ ਪੁਚ੍ਛਿਤਸੁਤ੍ਤਨ੍ਤਾ, ਵੇਦਲ੍ਲਨ੍ਤਿ ਵੇਦਿਤਬ੍ਬਾ. ਕਤਮਾਨਿ ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਦੁਜਾਨਾਨਿ, ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਸਚੇ ਵਿਤ੍ਥਾਰੇਨ ਕਥਿਸ੍ਸਂ ਅਤਿਪਪਞ੍ਚੋ ਭਵਿਸ੍ਸਤਿ. ਤਸ੍ਮਾ ਨਯ ਵਸੇਨ ਕਥਿਸ੍ਸਾਮਿ. ਏਕਂ ਵਤ੍ਥੁ, ਏਕੋ ਧਮ੍ਮਕ੍ਖਨ੍ਧੋ, ਏਕਂ ਨਿਦਾਨਂ ਏਕੋ ਧਮ੍ਮਕ੍ਖਨ੍ਧੋ, ਏਕਂ ਪਞ੍ਹਾ ਪੁਚ੍ਛਨ੍ਤਂ ਏਕੋ ਧਮ੍ਮਕ੍ਖਨ੍ਧੋ, ਏਕਂ ਪਞ੍ਹਾ ਵਿਸਜ੍ਜਨਂ ਏਕੋ ਧਮ੍ਮਕ੍ਖਨ੍ਧੋ, ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਕੇਨ ਭਾਸਿਤਾਨਿ, ਕਤ੍ਥ ਭਾਸਿਤਾਨਿ, ਕਦਾ ਭਾਸਿਤਾਨਿ, ਕਮਾਰਬ੍ਭ ਭਾਸਿਤਾਨਿ, ਕਿਮਤ੍ਥਂ ਭਾਸਿਤਾਨਿ, ਕੇਨ ਧਾਰਿਤਾਨਿ, ਕੇਨਾਭਤਾਨਿ, ਕਿਮਤ੍ਥਂ ਪਰਿਯਾਪੁਣਿਤਬ੍ਬਾਨਿ. ਤਤ੍ਰਾਯਂ ਵਿਸਜ੍ਜਨਾ, ਕੇਨ ਭਾਸਿਤਾਨੀਤਿ? ਬੁਦ੍ਧਾਨੁ ਬੁਦ੍ਧੇਹਿ ਭਾਸਿਤਾਨਿ. ਕਤ੍ਥ ਭਾਸਿਤਾਨੀਤਿ? ਦੇਵੇਸੁ ਚ ਮਾਨੁਸ੍ਸੇਸੁ ਚ, ਭਾਸਿਤਾਨਿ. ਕਦਾ ਭਾਸਿਤਾਨੀਤਿ? ਭਗਵਤੋ ਧਰਮਾਨਕਾਲੇ ਚੇਵ ਪਚ੍ਛਿਮਕਾਲੇ ਚ ਭਾਸਿਤਾਨਿ. ਕਤਮਾਰਬ੍ਭ ਭਾਸਿਤਾਨੀਤਿ? ਪਞ੍ਚਵਗ੍ਗਿਯਾਦਿਕੇ ਵੇਨੇਯ੍ਯ ਬਨ੍ਧਵੇ ਆਰਬ੍ਭ ਭਾਸਿਤਾਨੀਤਿ. ਕਿਮਤ੍ਥਂ ਭਾਸਿਤਾਨੀਤਿ? ਤਿਵਜ੍ਜਞ੍ਚ ਅਵਜ੍ਜਞ੍ਚ ਞਤ੍ਵਾ ਵਜ੍ਜਂ ਪਹਾਯ ਅਵਜ੍ਜੇ ਪਟਿਪਤ੍ਤਿਤ੍ਵਾ ਨਿਬ੍ਬਾਨਪਰਿਯਨ੍ਤੇ. ਦਿਟ੍ਠ-ਧਮ੍ਮਿਕਸਮ੍ਪਰਾਯਿਕਤ੍ਥੇ ਸਮ੍ਪਾਪੁਣਿਤੁਂ.

ਕੇਨ ਧਾਰਿਤਾਨੀਤਿ? ਅਨੁਬੁਦ੍ਧੇਹਿ ਚੇਵ ਸਿਸ੍ਸਾਨੁਸਿਸ੍ਸੇਹਿ ਚ ਧਾਰਿਤਾਨਿ. ਕੇਨਾ ਭਤਾਨੀਤਿ? ਆਚਰਿਯ ਪਰਂਪਰੇਹਿ ਆਭਤਾਨਿ. ਕਿਮਤ੍ਥਂ ਪਰਿਯਾਪੁਣਿਤਬ੍ਬਾਨੀਤਿ? ਵਜ੍ਜਞ੍ਚ ਅਵਜ੍ਜਞ੍ਚ ਞਤ੍ਵਾ ਵਜ੍ਜਂ ਪਹਾਯ ਅਵਜ੍ਜੇ ਪਟਿਪਤ੍ਤਿਤ੍ਵਾ ਨਿਬ੍ਬਾਨਪਰਿਯਨ੍ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ, ਸਂਪਾਪੁਣਿਤੁਂ, ਯਦੇਵਂ ਤਾਯ ਨਿਬ੍ਬਾਨਪਰਿਯਨ੍ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ ਸਾਧਿਕਾਨਿ ਹੋਨ੍ਤਿ. ਤੇਵ ਤਤ੍ਥ ਕੇਹਿ ਅਪ੍ਪਮਤ੍ਤੇਨ ਪਰਿਯਾਪੁਣਿਤਬ੍ਬਾਨਿ ਧਾਰੇਤਬ੍ਬਾਨਿ ਧਾਰੇਤਬ੍ਬਾਨਿ ਵਾਚੇਤਬ੍ਬਾਨਿ ਸਜ੍ਝਾਯਂ ਕਾਤਬ੍ਬਾਨੀਤਿ [ਇਤਿ ਚੁਲ੍ਲਗਨ੍ਥਵਂਸੇ ਪਿਟਕਤ੍ਤਯ ਦੀਪਕੋ ਨਾਮ ਪਠਮੋ ਪਰਿਚ੍ਛੇਦੋ.]

ਆਚਰਿਯੋ ਪਨ ਅਤ੍ਥਿ. ਪੋਰਾਣਾਚਰਿਯਾ ਅਤ੍ਥਿ, ਅਟ੍ਠਕਥਾਚਰਿਯਾ ਅਤ੍ਥਿ, ਗਨ੍ਥਕਾਰਕਾਚਰਿਯਾ ਅਤ੍ਥਿ, ਤਿਵਿਧਨਾਮਿਕਾਚਰਿਯਾ. ਕਤਮੇ ਪੋਰਾਣਾਚਰਿਯਾ? ਪਠਮਸਙ੍ਗਾਯਨਾਯਂ ਪਞ੍ਚਸਤਾ ਖੀਣਾਸਵਾ ਪਞ੍ਚਨ੍ਨਂ ਨਿਕਾਯਾਨਂ ਨਾਮਞ੍ਚ ਅਤ੍ਥਞ੍ਚ ਅਧਿਪ੍ਪਾਯਞ੍ਚ ਯਦਞ੍ਚ ਬ੍ਯਞ੍ਜਨ ਸੋਧਨਞ੍ਚ ਅਵਸੇਸਂ ਕਿਚ੍ਚਂ ਕਰਿਂਸੁ. ਦੁਤਿਯਸਙ੍ਗਾਯਨਾਯਂ ਸਤ੍ਤਸਤਾ ਖੀਣਾਸਵਾ ਤੇਸਂਯੇਵ ਸਦ੍ਦਤ੍ਥਾਦਿਕਂ ਕਿਚ੍ਚਂ ਪੁਨ ਕਰਿਂਸੁ. ਤਤਿਯਸਙ੍ਗਾਯਨਾਯਂ ਸਹਸ੍ਸਮਤ੍ਤਾ ਖੀਣਾਸਵਾ ਤੇਸਂਯੇਵ ਸਦ੍ਦਤ੍ਥਾਦਿਕਂ ਕਿਚ੍ਚਂ ਪੁਨ ਕਰਿਂਸੁ. ਇਚ੍ਚੇਵਂ ਦ੍ਵੇਸਤਾਧਿਕਾ ਦ੍ਵੇਸਹਸ੍ਸ ਖੀਣਾਸਵਾ ਮਹਾਕਚ੍ਚਾਯਨਂ ਠਪੇਤ੍ਵਾ ਅਵਸੇਸਾ ਪੋਰਾਣਾਚਰਿਯਾ ਨਾਮ. ਯੇ ਪੋਰਾਣਾਚਰਿਯਾ ਤੇਯੇਵ ਅਟ੍ਠਕਥਾਚਰਿਯਾ ਨਾਮ. ਕਤਮੇ ਗਨ੍ਥਕਾਰਕਾਚਰਿਯਾ? ਮਹਾਅਟ੍ਠਕਥਿਕਾਪੇਭਦਅਨੇਕਾਚਰਿਯਾ ਗਨ੍ਥਕਾਰਕਾਚਰਿਯਾ ਨਾਮ. ਕਤਮੇ ਤਿਵਿਧ ਨਾਮਾਚਰਿਯਾ ਮਹਾਕਚ੍ਚਾਯਨੋ ਤਿਵਿਧਨਾਮਂ. ਕਤਮੇ ਗਨ੍ਥਾ ਮਹਾਕਚ੍ਚਾਯਨੇਨ ਕਤਾ? ਕਚ੍ਚਾਯਨਗਨ੍ਥੋ, ਮਹਾਨਿਰੁਤ੍ਤਿਗਨ੍ਥੋ, ਚੁਲ੍ਲਨਿਰੁਤ੍ਤਿਗਨ੍ਥੋ, ਯਮਕਗਨ੍ਥੋ, ਨੇਤ੍ਤਿਗਨ੍ਥੋ, ਪੇਟਕੋਪਦੇਸਗਨ੍ਥੋਤਿ, ਇਮੇ ਛ ਗਨ੍ਥਾ ਮਹਾਕਚ੍ਚਾਯਨੇਨ ਕਤਾ. ਕਤਮੇ ਅਨੇਕਾਚਰਿਯੇਨ ਕਤਾ ਗਨ੍ਥਾ? ਮਹਾਪਚ੍ਚਰਿਕਾਚਰਿਯੋ ਮਹਾਪਚ੍ਚਰਿਯਂ ਨਾਮ ਗਨ੍ਥਂ ਅਕਾਸਿ. ਮਹਾਕੁਰੁਨ੍ਦਿਕਾਚਰਿਯੋ ਕੁਰੁਨ੍ਦਿ ਨਾਮ ਗਨ੍ਥਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਮਹਾਪਚ੍ਚਰਿਯ ਗਨ੍ਥਸ੍ਸ ਅਟ੍ਠਕਥਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਕੁਰੁਨ੍ਦਿ ਗਨ੍ਥਸ੍ਸ ਅਟ੍ਠਕਥਂ ਅਕਾਸਿ, ਮਹਾਬੁਦ੍ਧਘੋਸਾ ਨਾਮਚਰਿਯੋ ਵਿਸੁਦ੍ਧਿਮਗ੍ਗੋ ਦੀਘਨਿਕਾਯਸ੍ਸ ਸੁਮਙ੍ਗਲਵਿਲਾਸਨਿ ਨਾਮ ਅਟ੍ਠਕਥਾ, ਮਜ੍ਝਿਮਨਿਕਾਯਸ੍ਸ ਪਪਞ੍ਚਸੂਦਨੀ ਨਾਮ ਅਟ੍ਠਕਥਾ, ਸਂਯੁਤ੍ਤਨਿਕਾਯਸ੍ਸ ਸਾਰਤ੍ਥਪ੍ਪਕਾਸਿਨੀ ਨਾਮ ਅਟ੍ਠਕਥਾ, ਅਙ੍ਗੁਤ੍ਤਰਨਿਕਾਯਸ੍ਸ ਮਨੋਰਥਪੂਰਣੀ ਨਾਮ ਅਟ੍ਠਕਥਾ, ਪਞ੍ਚਵਿਨਯ ਗਨ੍ਥਾਨਂ ਸਮਨ੍ਤਪਾਸਾਦਿਕਾ ਨਾਮ ਅਟ੍ਠਕਥਾ, ਸਤ੍ਤਨ੍ਨਂ ਅਭਿਧਮ੍ਮਗਨ੍ਥਾਨਂ ਪਰਮਤ੍ਥਕਥਾ ਨਾਮ ਅਟ੍ਠਕਥਾ, ਪਾਤਿਮੋਕ੍ਖ ਸਂਖਾਤਾਯ ਮਾਤਿਕਾਯ ਕਙ੍ਖਾਵਿਤਰਣੀਤਿ ਵਿਸੁਦ੍ਧਿ ਨਾਮ ਅਟ੍ਠਕਥਾ, ਧਮ੍ਮਪਦਸ੍ਸ ਅਟ੍ਠਕਥਾ, ਜਾਤਕਸ੍ਸ ਅਟ੍ਠਕਥਾ, ਖੁਦ੍ਦਕਪਾਠਸ੍ਸ ਅਟ੍ਠਕਥਾ, ਸੁਤ੍ਤਨਿਪਾਤਸ੍ਸ ਅਟ੍ਠਕਥਾ, ਅਪਦਾਨਸ੍ਸ ਅਟ੍ਠਕਥਾਤਿ, ਇਮੇ ਤੇਰਸ ਗਨ੍ਥੇ ਅਕਾਸਿ. ਬੁਦ੍ਧਦਤ੍ਤੋਨਾਮਾਚਰਿਯੋ ਵਿਨਯ ਵਿਨਿਚ੍ਛਯੋ, ਉਤ੍ਤਰਵਿਨਿਚ੍ਛਯੋ, ਅਭਿਧਮ੍ਮਾਵਤਾਰੋ, ਬੁਦ੍ਧਵਂਸਸ੍ਸ ਮਧੁਰਤ੍ਥਵਿਲਾਸਿਨੀ ਨਾਮ ਅਟ੍ਠਕਥਾਤਿ, ਇਮੇ ਚਤ੍ਤਾਰੋ ਗਨ੍ਥੇ ਅਕਾਸਿ. ਆਨਨ੍ਦੋਨਾਮਾਚਰਿਯਾ ਸਤ੍ਤਾਭਿਧਮ੍ਮਗਨ੍ਥਟ੍ਠਕਥਾਯ ਮੂਟੀਕਂ ਨਾਮ ਟੀਕਂ ਅਕਾਸਿ. ਧਮ੍ਮਪਾਲਾਚਰਿਯੋ ਨੇਤ੍ਤਿਪ੍ਪਕਰਣਟ੍ਠਕਥਾ, ਇਤਿਵੁਤ੍ਤਕਟ੍ਠਕਥਾ, ਉਦਾਨਟ੍ਠਕਥਾ, ਚਰਿਯਾਪਿਟਕਟ੍ਠਕਥਾ, ਥੇਰਕਥਟ੍ਠਕਥਾ, ਥੇਰੀਕਥਟ੍ਠਕਥਾ, ਵਿਮਾਨਵਤ੍ਥੁਸ੍ਸ ਵਿਮਲਵਿਲਾਸਿਨਿ ਨਾਮ ਅਟ੍ਠਕਥਾ, ਪੇਤਵਤ੍ਥੁਸ੍ਸ ਵਿਮਲਵਿਲਾਸਿਨਿ ਨਾਮ ਅਟ੍ਠਕਥਾ, ਵਿਸੁਦ੍ਧਿਮਗ੍ਗਸ੍ਸ ਪਰਮਤ੍ਥਮਞ੍ਜੂਸਾ ਨਾਮ ਟੀਕਾ, ਦੀਘਨਿਕਾਯਸ੍ਸ ਅਟ੍ਠਕਥਾਦੀਨਂ ਚਤੁਨ੍ਨਂ ਅਟ੍ਠਕਥਾਨਂ ਲੀਨਤ੍ਥਪ੍ਪਕਾਸਨਿ ਨਾਮ ਟੀਕਾ, ਜਾਤਕਟ੍ਠਕਥਾਯ ਲੀਨਤ੍ਥਪ੍ਪਕਾਸਨਿ ਨਾਮ ਟੀਕਾ, ਨੇਤ੍ਤਿਪਕਰਣਟ੍ਠਕਥਾਯ ਟੀਕਾ, ਬੁਦ੍ਧਵਂਸਟ੍ਠਕਥਾਯ ਪਰਮਤ੍ਥਦੀਪਨੀ ਨਾਮ ਟੀਕਾ, ਅਭਿਧਮ੍ਮਟ੍ਠਕਥਾਯਟੀਕਾ ਲੀਨਤ੍ਥਵਣ੍ਣਨਾ ਨਾਮ ਅਨੁਟੀਕਾਤਿ ਇਮੇ ਚੁਦ੍ਦਸ ਮਤ੍ਤੇ ਗਨ੍ਥੇ ਅਕਾਸਿ.

ਦ੍ਵੇ ਪੁਬ੍ਬਾਚਰਿਯਾਨਾਮਾ ਚਰਿਯਾਨਿਰੁਤ੍ਤਿ ਮਞ੍ਜੂਸਂ ਨਾਮ ਚੁਲ੍ਲਨਿਰੁਤ੍ਤਿ ਟੀਕਞ੍ਚ ਮਹਾਨਿਰੁਤ੍ਤਿ ਸਙ੍ਖੇਪਞ੍ਚ ਅਕਂਸੁ. ਮਹਾਵਜਿਰਬੁਦ੍ਧਿਨਾਮਾਚਰਿਯੋ ਵਿਨਯਗਣ੍ਠਿਨਾਮ ਪਕਰਣਂ ਅਕਾਸਿ. ਦੀਪਙ੍ਕਰਸਙ੍ਖਾਤੋ ਵਿਮਲਬੁਦ੍ਧਿ ਨਾਮਾਚਰਿਯੋ ਮੁਖਮਤ੍ਤਦੀਪਨੀ ਨਾਮਕਂ ਨ੍ਯਾਸਪ੍ਪਕਰਣਂ ਅਕਾਸਿ. ਚੁਲ੍ਲਵਜਿਰਬੁਦ੍ਧਿ ਨਾਮਾਚਰਿਯੋ ਅਤ੍ਥਬ੍ਯਾਖ੍ਯਾਨਂ ਨਾਮ ਪਕਰਣਂ ਅਕਾਸਿ.

ਦੀਪਙ੍ਕਰੋ ਨਾਮਾਚਰਿਯੋ ਰੂਪਸਿਦ੍ਧਿ ਪਕਰਣਂ, ਰੂਪਸਿਦ੍ਧਿ ਟੀਕਂ, ਸਮ੍ਪਪਞ੍ਚ ਸੁਤ੍ਤਞ੍ਚੇਤਿ ਤਿਵਿਧਂ ਪਕਰਣਂ ਅਕਾਸਿ. ਆਨਨ੍ਦਾਚਰਿਯਸ੍ਸ ਜੇਟ੍ਠਸਿਸ੍ਸੋ ਧਮ੍ਮਪਾਲੋ ਨਾਮਾਚਰਿਯੋ ਸਚ੍ਚਸਙ੍ਖੇਪਂ ਨਾਮ ਪਕਰਣਂ ਅਕਾਸਿ. ਕਸ੍ਸਪੋ ਨਾਮਾਚਰਿਯੋ ਮੋਹਵਿਚ੍ਛੇਦਨੀ, ਵਿਮਤਿਚ੍ਛੇਦਨੀ, ਦਸਬੁਦ੍ਧਵਂਸੋ, ਅਨਾਗਤਵਂਸੋਤਿ, ਚਤੁਵਿਧਂ ਪਕਰਣਂ ਅਕਾਸਿ.

ਮਹਾਨਾਮੋ ਨਾਮਾਚਰਿਯੋ, ਸਦ੍ਧਮ੍ਮਪਕਾਸਨੀ ਨਾਮ ਪਟਿਸਮ੍ਭਿਦਾਮਗ੍ਗਸ੍ਸ ਅਟ੍ਠਕਥਂ ਅਕਾਸਿ. ਦੀਪਵਂਸੋ, ਥੂਪਵਂਸੋ, ਬੋਧਿਵਂਸੋ, ਚੂਲਵਂਸੋ, ਮਹਾਵਂਸੋ, ਪਟਿਸਮ੍ਭਿਦਾਮਗ੍ਗਟ੍ਠਕਥਾ ਗਣ੍ਠਿ ਚੇਤਿ ਇਮੇ ਛ ਗਨ੍ਥਾ ਮਹਾਨਾਮਾਚਰਿ ਵਿਸੁਂ ਵਿਸੁਂ ਕਤਾ.

ਨਵੋ ਮਹਾਨਾਮੋ ਨਾਮਾਚਰਿਯੋ ਨਵਂ ਮਹਾਵਂਸ ਨਾਮ ਪਕਰਣਂ ਅਕਾਸਿ. ਉਪਸੇਨੋ ਨਾਮਾਚਰਿਯੋ ਸਦ੍ਧਮ੍ਮਪਜ੍ਜੋਤਿਕਂ ਨਾਮ ਮਹਾਨਿਦ੍ਦੇਸਸ੍ਸ ਅਟ੍ਠਕਥਂ ਅਕਾਸਿ. ਮੋਗ੍ਗਲਾਨੋ ਨਾਮਾਚਰਿਯੋ ਮੋਗ੍ਗਲਾਨਬ੍ਯਾਕਰਣਂ ਨਾਮ ਪਕਰਣਂ ਅਕਾਸਿ. ਸਙ੍ਘਰਕ੍ਖਿਤੋ ਨਾਮਾਚਰਿਯੋ, ਸੁਬੋਧਾਲਙ੍ਕਾਰਂ ਨਾਮ ਪਕਰਣਂ ਅਕਾਸਿ. ਵੁਤ੍ਤੋਦਯਕਾਰੋ ਨਾਮਾਚਰਿਯੋ ਵੁਤ੍ਤੋਦਯਂ ਨਾਮ ਪਕਰਣਂ ਅਕਾਸਿ. ਧਮ੍ਮਸਿਰਿ ਨਾਮਾਚਰਿਯੋ ਖੁਦ੍ਦਕਸਿਕ੍ਖਂ ਨਾਮ ਪਕਰਣਂ ਅਕਾਸਿ. ਪੁਰਾਣਖੁਦ੍ਦਸਿਕ੍ਖਾਯ ਟੀਕਾ, ਮੂਲਸਿਕ੍ਖਾ ਚੇਤਿ, ਇਮੇ ਦ੍ਵੇ ਗਨ੍ਥਾ ਦ੍ਵੇਹਾਚਰਿਯੇਹਿ ਵਿਸੁਂ ਵਿਸੁਂ ਕਤਾ.

ਅਨੁਰੁਦ੍ਧੋ ਨਾਮਾਚਰਿਯੋ ਪਰਮਤ੍ਥਵਿਨਿਚ੍ਛਯਂ, ਨਾਮਰੂਪਪਰਿਚ੍ਛੇਦਂ, ਅਭਿਧਮ੍ਮਤ੍ਥਸਙ੍ਗਹਂ ਚੇਤਿ ਤਿਵਿਧਂ ਪਕਰਣਂ ਅਕਾਸਿ. ਖੇਮੋ ਨਾਮਾਚਰਿਯੋ ਖੇਮਂ ਨਾਮ ਪਕਰਣਂ ਅਕਾਸਿ. ਸਾਰਿਪੁਤ੍ਤੋ ਨਾਮਾਚਰਿਯੋ ਵਿਨਯਟ੍ਠਕਥਾਯ ਸਾਰਤ੍ਥਦੀਪਨੀ ਨਾਮ ਟੀਕਂ; ਵਿਨਯਸਙ੍ਗਹਪਕਰਣਂ, ਵਿਨਯਸਙ੍ਗਹਸ੍ਸਟੀਕਂ; ਅਙ੍ਗੁਤ੍ਤਰਟ੍ਠਕਥਾਯ ਸਾਰਤ੍ਥਮਞ੍ਜੂਸਂ ਨਾਮ ਨਵਂ ਟੀਕਂ; ਪਞ੍ਚਿਕਾ ਟੀਕਞ੍ਚੇਤਿ, ਇਮੇ ਪਞ੍ਚ ਗਨ੍ਥੇ ਅਕਾਸਿ. ਬੁਦ੍ਧਨਾਗੋ ਨਾਮਾਚਰਿਯੋ ਵਿਨਯਤ੍ਥਮਞ੍ਜੂਸਂ ਨਾਮ ਕਙ੍ਖਾਵਿਤਰਣੀਯਾ ਟੀਕਂ ਅਕਾਸਿ. ਨਵੋ ਮੋਗ੍ਗਲਾਨੋ ਨਾਮਾਚਰਿਯੋ ਅਭਿਧਾਨਪ੍ਪਦੀਪਿਕਂ ਨਾਮ ਪਕਰਣਂ ਅਕਾਸਿ. ਵਾਚਿਸ੍ਸਰੋ ਨਾਮਾਚਰਿਯੋ ਮਹਾਸਾਮਿ ਨਾਮ ਸੁਬੋਧਾਲਙ੍ਕਾਰਸ੍ਸ ਟੀਕਾ, ਵੁਤ੍ਤੋਦਯ ਵਿਵਰਣਂ, ਸੁਮਙ੍ਗਲਪ੍ਪਸਾਦਨਿ ਨਾਮ ਖੁਦ੍ਦਸਿਕ੍ਖਾਯ ਟੀਕਾ; ਸਮ੍ਬਨ੍ਧਚਿਨ੍ਤਾ, ਸਮ੍ਬਨ੍ਧਚਿਨ੍ਤਾਯ ਟੀਕਾ; ਬਾਲਾਵਤਾਰੋ, ਮੋਗ੍ਗਲਾਨਬ੍ਯਾਕਰਣਸ੍ਸ ਪਞ੍ਚਿਕਾਯ ਟੀਕਾ; ਯੋਗਵਿਨਿਚ੍ਛਯੋ, ਵਿਨਯਵਿਨਿਚ੍ਛਯਸ੍ਸ ਟੀਕਾ, ਉਤ੍ਤਰਵਿਨਿਚ੍ਛਯਸ੍ਸ ਟੀਕਾ, ਨਾਮਰੂਪ-ਪਰਿਚ੍ਛੇਦਸ੍ਸ ਵਿਭਾਗੋ, ਸਦ੍ਦਤ੍ਥਸ੍ਸ ਪਦਰੂਪਵਿਭਾਵਨਂ; ਖੇਮਸ੍ਸ ਪਕਰਣਸ੍ਸ ਟੀਕਾ, ਸੀਮਾਲਙ੍ਕਾਰੋ, ਮੂਲਸਿਕ੍ਖਾਯ ਟੀਕਾ, ਰੂਪਵਿਭਾਗੋ, ਪਚ੍ਚਯਸਙ੍ਗਹੋ, ਸਚ੍ਚਸਙ੍ਖੇਪਸ੍ਸ ਟੀਕਾ ਚੇਤਿ, ਇਮੇ ਅਟ੍ਠਾਰਸ ਗਨ੍ਥੇ ਅਕਾਸਿ.

ਸੁਮਙ੍ਗਲੋ ਨਾਮਾਚਰਿਯੋ ਅਭਿਧਮ੍ਮਾਵਤਾਰਸ੍ਸਟੀਕਂ, ਅਭਿਧਮ੍ਮਤ੍ਥਸਙ੍ਗਹਸ੍ਸਟੀਕਞ੍ਚ ਦੁਵਿਧਂ ਪਕਰਣਂ ਅਕਾਸਿ. ਬੁਦ੍ਧਪਿਯੋ ਨਾਮਾਚਰਿਯੋ ਸਾਰਤ੍ਥਸਙ੍ਗਹਂ ਨਾਮ ਪਕਰਣਂ ਅਕਾਸਿ. ਧਮ੍ਮਕਿਤ੍ਤਿ ਨਾਮਾਚਰਿਯੋ ਦਨ੍ਤਧਾਤੁ ਪਕਰਣਂ ਅਕਾਸਿ. ਮੇਧਙ੍ਕਰੋ ਨਾਮਾਚਰਿਯੋ ਜਿਨਚਰਿਤਂ ਨਾਮ ਪਕਰਣਂ ਅਕਾਸਿ. ਬੁਦ੍ਧਰਕ੍ਖਿਤੋ ਨਾਮਾਚਰਿਯੋ ਜਿਨਲਙ੍ਕਾਰਂ, ਜਿਨਲਙ੍ਕਾਰਸ੍ਸ ਟੀਕਞ੍ਚਾਤਿ ਦੁਵਿਧਂ ਪਕਰਣਂ ਅਕਾਸਿ. ਉਪਤਿਸ੍ਸੋ ਨਾਮਾਚਰਿਯੋ ਅਨਾਗਤਵਂਸਸ੍ਸ ਅਟ੍ਠਕਥਂ ਅਕਾਸਿ.

ਕਙ੍ਖਾਵਿਤਰਣੀਯਾ ਲੀਨਤ੍ਥਪ੍ਪਕਾਸਿਨਿ, ਨਿਸਨ੍ਦੇਹੋ, ਧਮ੍ਮਾਨੁਸਾਰਣੀ, ਞੇਯ੍ਯਾਸਨ੍ਤਤਿ, ਞੇਯ੍ਯਾਸਨ੍ਤਤਿਯਾ ਟੀਕਾ, ਸੁਮਤਾਦਾਵਤਾਰੋ, ਲੋਕਪਞ੍ਞਤ੍ਤਿ ਪਕਰਣਂ, ਤਥਾਗਤੁਪ੍ਪਤ੍ਤਿ ਪਕਰਣਂ, ਨਲਾਟਧਾਤੁ ਵਣ੍ਣਨਾ, ਸੀਹਲ਼ਵਤ੍ਥੁ, ਧਮ੍ਮਦੀਪਕੋ, ਪਟਿਪਤ੍ਤਿਸਙ੍ਗਹੋ, ਵਿਸੁਦ੍ਧਿਮਗ੍ਗਣ੍ਠਿ, ਅਭਿਧਮ੍ਮਗਣ੍ਠਿ, ਨੇਤ੍ਤਿਪਕਰਣਗਣ੍ਠਿ, ਵਿਸੁਦ੍ਧਿਮਗ੍ਗਚੁਲ੍ਲਨਵਟੀਕਾ, ਸੋਤਬ੍ਬਮਾਲਿਨੀ, ਪਸਾਦਜਨਨੀ, ਓਕਾਸਲੋਕੋ, ਸੁਬੋਧਾਲਙ੍ਕਾਰਸ੍ਸ ਨਵ ਟੀਕਾ ਚੇਤਿ, ਇਮੇ ਵੀਸਤਿ ਗਨ੍ਥਾ ਵੀਸਤਾਚਰਿਯੇਹਿ ਵਿਸੁਂ ਵਿਸੁਂ ਕਤਾ.

ਸਦ੍ਧਮ੍ਮਸਿਰਿ ਨਾਮਾਚਰਿਯੋ ਸਦ੍ਦਤ੍ਥਭੇਦਚਿਨ੍ਤਾ ਨਾਮ ਪਕਰਣਂ ਅਕਾਸਿ. ਦੇਵੋ ਨਾਮਾਚਰਿਯੋ ਸੁਮਨ ਕੂਟਵਣ੍ਣਨਂ ਨਾਮ ਪਕਰਣਂ ਅਕਾਸਿ. ਚੁਲ੍ਲਬੁਦ੍ਧਘੋਸੋ ਨਾਮਾਚਰਿਯੋ ਸੋਤਤ੍ਥਕਿਨਿਦਾਨਂ ਨਾਮ ਪਕਰਣਂ ਅਕਾਸਿ. ਰਟ੍ਠਪਾਲੋ ਨਾਮਾਚਰਿਯੋ ਮਧੁਰਸਙ੍ਗਾਹਣੀਕਿਤ੍ਤਿ ਨਾਮ ਪਕਰਣਂ ਅਕਾਸਿ. ਸੁਭੂਤਚਨ੍ਦੋ ਨਾਮਾਚਰਿਯੋ ਲਿਙ੍ਗਤ੍ਥਵਿਵਰਣ-ਪਕਰਣਂ ਅਕਾਸਿ. ਅਗ੍ਗਵਂਸੋ ਨਾਮਾਚਰਿਯੋ ਸਦ੍ਦਨੀਤਿ ਪਕਰਣਂ ਨਾਮ ਅਕਾਸਿ. ਵਜਿਰਬੁਦ੍ਧਿ ਨਾਮਾਚਰਿਯੋ ਮਹਾਟੀਕਂ ਨਾਮ ਨ੍ਯਾਸਪਕਰਣਟੀਕਂ ਅਕਾਸਿ. ਗੁਣਸਾਗਰੋ ਨਾਮਾਚਰਿਯੋ ਮੁਖਮਤ੍ਤਸਾਰਂ, ਮੁਖਮਤ੍ਤਸਾਰਸ੍ਸ ਟੀਕਞ੍ਚ ਦੁਵਿਧਂ ਪਕਰਣਂ ਅਕਾਸਿ. ਅਭਯੋ ਨਾਮਾਚਰਿਯੋ ਸਦ੍ਦਤ੍ਥਭੇਦਚਿਨ੍ਤਾਯ ਮਹਾਟੀਕਂ ਅਕਾਸਿ. ਞਾਣਸਾਗਰੋ ਨਾਮਾਚਰਿਯੋ ਲਿਙ੍ਗਤ੍ਥਵਿਵਰਣਪ੍ਪਕਾਸਨਂ ਨਾਮ ਪਕਰਣਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਗੂਲ਼ਤ੍ਥਟੀਕਂ, ਬਾਲਪ੍ਪਬੋਧਨਞ੍ਚ ਦੁਵਿਧਂ ਪਕਰਣਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਸਦ੍ਦਤ੍ਥ-ਭੇਦਚਿਨ੍ਤਾਯ ਮਜ੍ਝਿਮਟੀਕਂ ਅਕਾਸਿ. ਉਤ੍ਤਮੋ ਨਾਮਾਚਰਿਯੋ ਬਾਲਾਵਤਾਰਟੀਕਂ, ਲਿਙ੍ਗਤ੍ਥਵਿਵਰਣਟੀਕਞ੍ਚ ਦੁਵਿਧਂ ਪਕਰਣਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਸਦ੍ਦਤ੍ਥਭੇਦਚਿਨ੍ਤਾਯ ਨਵ-ਟੀਕਂ ਅਕਾਸਿ. ਏਕੋ ਅਮਚ੍ਚੋ ਅਭਿਧਾਨਪ੍ਪਦੀਪਿਕਾਯਟੀਕਂ, ਗਣ੍ਠਿਪਕਰਣਸ੍ਸ ਦਣ੍ਡੀਪ੍ਪਕਰਣਸ੍ਸ ਮਾਗਧਭੂਤਂ ਟੀਕਂ, ਕੋਲਦ੍ਧਜਨਸ੍ਸ ਸਕਟਭਾਸਾਯ ਕਤਟੀਕਞ੍ਚ ਤਿਵਿਧਂ ਪਕਰਣਂ ਅਕਾਸਿ. ਧਮ੍ਮਸੇਨਾਪਤਿ ਨਾਮਾਚਰਿਯੋ ਕਾਰਿਕਂ, ਏਤਿਮਾਸਪਿਦੀਪਨੀ, ਮਨੋਹਾਰਞ੍ਚ ਤਿਵਿਧਂ ਪਕਰਣਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਕਾਰਿਕਾਯ ਟੀਕਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਏਤਿਮਾਸਪਿਦੀਪਿਕਾਯ ਟੀਕਂ ਅਕਾਸਿ.

ਅਞ੍ਞਤਰੋ ਆਚਰਿਯੋ ਸਦ੍ਦਬਿਨ੍ਦੁ ਨਾਮ ਪਕਰਣਂ ਅਕਾਸਿ. ਸਦ੍ਧਮ੍ਮਗੁਰੁ ਨਾਮਾਚਰਿਯੋ ਸਦ੍ਦਵੁਤ੍ਤਿਪ੍ਪਕਾਸਕਂ ਨਾਮ ਪਕਰਣਂ ਅਕਾਸਿ. ਸਾਰਿਪੁਤ੍ਤੋ ਨਾਮਾਚਰਿਯੋ ਸਦ੍ਦਵੁਤ੍ਤਿਪ੍ਪਕਾਸਕਸ੍ਸ ਟੀਕਂ ਅਕਾਸਿ. ਅਞ੍ਞਤਰੋ ਆਚਰਿਯੋ ਕਚ੍ਚਾਯਨਸਾਰਂ ਨਾਮ ਪਕਰਣਂ ਕਚ੍ਚਾਯਨਸਾਰਸ੍ਸ ਟੀਕਞ੍ਚ ਦੁਵਿਧਂ ਪਕਰਣਂ ਅਕਾਸਿ. ਨਵੋ ਮੇਧਙ੍ਕਰੋ ਨਾਮਾਚਰਿਯੋ ਲੋਕਦੀਪਕਸਾਰਂ ਨਾਮ ਪਕਰਣਂ ਅਕਾਸਿ. ਅਗ੍ਗਪਣ੍ਡਿਤੋ ਨਾਮਾਚਰਿਯੋ ਲੋਕੁਪ੍ਪਤ੍ਤਿ ਨਾਮ ਪਕਰਣਂ ਅਕਾਸਿ. ਚੀਵਰੋ ਨਾਮਾਚਰਿਯੋ ਜਙ੍ਘਦਾਸਕਸ੍ਸ ਟੀਕਂ ਅਕਾਸਿ. ਮਾਤਿਕਤ੍ਥਦੀਪਨੀ, ਅਭਿਧਮ੍ਮਤ੍ਥਸਙ੍ਗਹਵਣ੍ਣਨਾ, ਸੀਮਾਲਙ੍ਕਾਰਸ੍ਸਟੀਕਾ, ਵਿਨਯਸਮੁਟ੍ਠਾਨਦੀਪਨੀ ਟੀਕਾ, ਗਣ੍ਠਿ ਸਾਰੋ, ਪਟ੍ਠਾਨਗਣਨਾ ਨਯੋ, ਸੁਤ੍ਤਨਿਦ੍ਦੇਸੋ, ਪਾਤਿਮੋਕ੍ਖੋ, ਚੇਤਿ, ਇਮੇ ਅਟ੍ਠ ਗਨ੍ਥੇ ਸਦ੍ਧਮ੍ਮਜੋਤਿਪਾਲਾਚਰਿਯੋ ਅਕਾਸਿ. ਵਿਮਲਬੁਦ੍ਧਿ ਨਾਮਾਚਰਿਯੋ ਅਭਿਧਮ੍ਮ-ਪਨ੍ਨਰਸਟ੍ਠਾਨਂ ਨਾਮ ਪਕਰਣਂ ਅਕਾਸਿ. ਨਵੋ ਵਿਮਲਬੁਦ੍ਧਿ ਨਾਮਾਚਰਿਯੋ ਸਦ੍ਦਸਾਰਤ੍ਥਜਾਲਿਨੀ, ਸਦ੍ਦਸਾਰਤ੍ਥਜਾਲਿਨਿਯਾ ਟੀਕਾ, ਵੁਤ੍ਤੋਦਯ ਟੀਕਾ, ਪਰਮਤ੍ਥਮਞ੍ਜੂਸਾ ਨਾਮ ਅਭਿਧਮ੍ਮਸਙ੍ਗਹਟੀਕਾਯ ਅਨੁਟੀਕਾ ਦਸਗਣ੍ਠਿਵਣ੍ਣਨਾ, ਮਾਗਧਭੂਤਾਵਿਦਗ੍ਗਮੁਖਮਣ੍ਡਨਟੀਕਾ ਚੇਤਿ ਇਮੇ ਛ ਗਨ੍ਥੇ ਅਕਾਸਿ. ਅਞ੍ਞਤਰੋ ਆਚਰਿਯੋ ਪਞ੍ਚਪਕਰਣਟੀਕਾਯ ਨਵਾਨੁਟੀਕਂ ਅਕਾਸਿ. ਅਰਿਯਵਂਸੋ ਨਾਮਾਚਰਿਯੋ ਅਭਿਧਮ੍ਮਸਙ੍ਗਹ-ਟੀਕਾਯ [ਪਰਮਤ੍ਥ] ਮਣਿਸਾਰਮਞ੍ਜੂਸਂ ਨਾਮ ਨਵਾਨੁਟੀਕਂ ਅਕਾਸਿ. ਅਭਿਧਮ੍ਮਤ੍ਥਸਙ੍ਗਹਸ੍ਸ ਟੀਕਾ, ਪੇਟਕੋਪਦੇਸਸ੍ਸ ਟੀਕਾ, ਚਤੁਭਾਣਵਾਰਸ੍ਸ ਅਟ੍ਠਕਥਾ, ਮਹਾਸਾਰਪਕਾਸਨੀ, ਮਹਾਦੀਪਨੀ, ਸਾਰਤ੍ਥਦੀਪਨੀ ਗਤਿ ਪਕਰਣਂ, ਹਤ੍ਥਸਾਰੋ, ਭੁਮ੍ਮਸਙ੍ਗਹੋ, ਭੁਮ੍ਮਨਿਦ੍ਦੇਸੋ, ਦਸਵਤ੍ਥੁਕਾਯਵਿਰਤਿਟੀਕਾ, ਜੋਤਨਾ ਨਿਰੁਤ੍ਤਿ, ਵਿਭਤ੍ਤਿਕਥਾ, ਕਚ੍ਚਾਯਨਵਿਵਰਣਾ, ਸਦ੍ਧਮ੍ਮਮਾਲਿਨੀ, ਪਞ੍ਚਗਤਿ ਵਣ੍ਣਨਾ, ਬਾਲਚਿਤ੍ਤਪਬੋਧਨਂ, ਧਮ੍ਮਚਕ੍ਕਸੁਤ੍ਤਸ੍ਸ ਨਵਟ੍ਠਕਥਾ, ਦਨ੍ਤਧਾਤੁ ਪਕਰਣਸ੍ਸ ਟੀਕਾ ਚੇਤਿ, ਇਮੇ ਵੀਸਤਿ ਗਨ੍ਥਾ ਨਾਨਾਚਰਿਯੇਹਿ ਕਤਾ, ਅਞ੍ਞਾਨਿ ਪਨ ਪਕਰਣਾਨਿ ਅਤ੍ਥਿ.

ਕਤਮਾਨਿ ਸਦ੍ਧਮ੍ਮੋ ਪਾਯਨੋ, ਬਾਲਪ੍ਪਬੋਧਨਪਕਰਣਸ੍ਸ ਟੀਕਾ ਚ, ਜਿਨਾਲਙ੍ਕਾਰਪਕਰਣਸ੍ਸ ਨਵਟੀਕਾ ਚ, ਲਿਙ੍ਗਤ੍ਥਵਿਵਰਣਂ, ਲਿਙ੍ਗਵਿਨਿਚ੍ਛਯੋ; ਪਾਤਿਮੋਕ੍ਖਵਿਵਰਣਂ, ਪਰਮਤ੍ਥਕਥਾਵਿਵਰਣਂ, ਸਮਨ੍ਤਪਾਸਾਦਿਕਾ ਵਿਵਰਣਂ, ਚਤੁਭਾਣਵਾਰਟ੍ਠਕਥਾ ਵਿਵਰਣਂ, ਅਭਿਧਮ੍ਮਤ੍ਥਸਙ੍ਗਹਵਿਵਰਣਂ, ਸਚ੍ਚਸਙ੍ਖੇਪਵਿਵਰਣਂ, ਸਦ੍ਦਤ੍ਥਭੇਦਚਿਨ੍ਤਾਵਿਵਰਣਂ, ਸਦ੍ਦਵੁਤ੍ਤਿਵਿਵਰਣਂ, ਕਚ੍ਚਾਯਨਸਾਰਵਿਵਰਣਂ, ਅਭਿਧਮ੍ਮਤ੍ਥਸਙ੍ਗਹਸ੍ਸ ਟੀਕਾ ਵਿਵਰਣਂ, ਮਹਾਵੇਸ੍ਸਨ੍ਤਰਾਜਾਤਕਸ੍ਸ ਵਿਵਰਣਂ, ਸਕ੍ਕਾਭਿਮਤਂ, ਮਹਾਵੇਸ੍ਸਨ੍ਤਰਜਾਤਕਸ੍ਸ ਨਵਟ੍ਠਕਥਾ, ਪਠਮ ਸਂਬੋਧਿ, ਲੋਕਨੇਤ੍ਤਿ ਚ, ਬੁਦ੍ਧਘੋਸਾਚਰਿਯਨਿਦਾਨਂ ਮਿਲਿਨ੍ਦਪਞ੍ਹਾ ਵਣ੍ਣਨਾ, ਚਤੁਰਾ ਰਕ੍ਖਾ, ਚਤੁਰਕ੍ਖਾਯ ਅਟ੍ਠਕਥਾ, ਸਦ੍ਦਵੁਤ੍ਤਿਪਕਰਣਸ੍ਸ ਨਵਟੀਕਾ, ਇਚ੍ਚੇਵਂ ਪਞ੍ਚਵੀਸਤਿ ਪਮਾਣਾਨਿ ਪਕਰਣਾਨਿ ਲਙ੍ਕੋ ਦੀਪਾਦੀਸੁਟ੍ਠਾਨੇਸੁ ਪਣ੍ਡਿਤੇਹਿ ਕਤਾਨਿ ਅਹੇਸੁਂ, ਸਮ੍ਬੁਦ੍ਧੇਗਾਥਾ ਚ, ਨਰਦੇਵ ਨਾਮ ਗਾਥਾ ਚ, ਦਾਤਵੇ ਚੀਰਤ੍ਤਿ ਗਾਥਾ ਚ, ਵੀਸਤਿ ਓਵਾਦਗਾਥਾ ਚ, ਦਾਨਸਤ੍ਤਰਿ, ਸੀਲਸਤ੍ਤਰਿ, ਸਪ੍ਪਾਦਾਨਵਣ੍ਣਨਾ, ਅਨਨ੍ਤਬੁਦ੍ਧਵਨ੍ਦਨਗਾਥਾ ਚ, ਅਟ੍ਠਵੀਸਤਿ ਬੁਦ੍ਧਵਨ੍ਦਨਗਾਥਾ ਚ, ਅਤੀਤਾਨਾਗਤਪਚ੍ਚੁਪ੍ਪਨ੍ਨਵਨ੍ਦਨਗਾਥਾ ਚ, ਅਸੀਤਿਮਹਾਸਾਵਕਵਨ੍ਦਨਗਾਥਾ ਚ, ਨਵਹਾਰਗੁਣਵਣ੍ਣਨਾ ਚਾਤਿ, ਇਮੇ ਬੁਦ੍ਧਪਣਾਮ-ਗਾਥਾਦਿਕਾ ਗਾਥਾ ਯੋ ਪਣ੍ਡਿਤੇਹਿ ਲਙ੍ਕਾਦੀਪਾਦਿਸੁਟ੍ਠਾਨੇਸੁ ਕਤਾ ਅਹੇਸੁਂ [ਇਤਿ ਚੁਲ੍ਲਗਨ੍ਥਵਂਸੇ ਗਨ੍ਥਕਾਰਕਾਚਰਿਯ ਦੀਪਕੋ ਨਾਮ ਦੁਤਿਯੋ ਪਰਿਚ੍ਛੇਦੋ]

੩. ਆਚਰਿਯਾਨਂ ਸਞ੍ਜਾਤਟ੍ਠਾਨਪਰਿਚ੍ਛੇਦੋ

ਆਚਰਿਯੇਸੁ ਚ ਅਤ੍ਥਿ ਜਮ੍ਬੁਦੀਪਿਕਾਚਰਿਯਾ ਅਤ੍ਥਿ, ਲਙ੍ਕਾਦੀਪਿਕਾਚਰਿਯਾ. ਕਤਮੇ ਜਮ੍ਬੁਦੀਪਿਕਾਚਰਿਯਾ? ਕਤਮੇ ਲਙ੍ਕਾਦੀਪਿਕਾਚਰਿਯਾ? ਮਹਾਕਚ੍ਚਾਯਨੋ ਜਮ੍ਬੁਦੀਪਿਕਾਚਰਿਯੋ ਸੋ ਹਿ ਅਵਨ੍ਤਿਰਟ੍ਠੇ ਉਜ੍ਜੇਨੀ ਨਗਰੇ ਚਨ੍ਦਪਜ੍ਜੋਤਸ੍ਸ ਨਾਮ ਰਞ੍ਞੋ ਪੁਰੋਹਿਤੋ ਹੁਤ੍ਵਾ ਕਾਮਾਨਂ ਆਦੀਨਵਂ ਦਿਸ੍ਵਾ, ਘਰਾਵਾਸਂ ਪਹਾਯ ਸਤ੍ਥੁਸਾਸਨੇ ਪਬ੍ਬਜ੍ਜਿਤ੍ਵਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਅਕਾਸਿ. ਮਹਾਅਟ੍ਠਕਥਾਚਰਿਯੋ ਜਮ੍ਬੁਦੀਪਿਕੋ, ਮਹਾਪਚ੍ਚਰਿਕਾਚਰਿਯੋ, ਮਹਾਕੁਰੁਨ੍ਦਿਕਾਚਰਿਯੋ, ਅਞ੍ਞਤਰੋ ਆਚਰਿਯਾ ਦ੍ਵੇਤਿ ਇਮੇ ਚ ਭੂਵਾਚਰਿਯਾ. ਲਙ੍ਕਾਦੀਪਿਕਾਚਰਿਯਾ ਨਾਮ ਤੇ ਕਿਰ ਬੁਦ੍ਧਘੋਸਾਚਰਿਯਸ੍ਸ ਪੂਰੇ ਭੂਤਾਚਰਿਯੇ ਕਾਲੇ ਅਹੇਸੁਂ. ਮਹਾਬੁਦ੍ਧਘੋਸਾਚਰਿਯੋ ਜਮ੍ਬੁਦੀਪਿਕੋ. ਸੋ ਕਿਰ ਮਗਧਰਟ੍ਠੇ ਘੋਸਕਗਾਮੇ ਰਞ੍ਞੋ ਪੁਰੋਹਿਤਸ੍ਸ ਕੇਸਿ ਨਾਮ ਬ੍ਰਾਹ੍ਮਣਸ੍ਸ ਪੁਤ੍ਤੋ, ਸਤ੍ਥੁਸਾਸਨੇ ਪਬ੍ਬਜ੍ਜਿਤ੍ਵਾ ਲਙ੍ਕਾਦੀਪਂ ਗਤੋ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਅਕਾਸਿ.

ਬੁਦ੍ਧਦਤ੍ਤਾਚਰਿਯੋ, ਆਨਨ੍ਦਾਚਰਿਯੋ, ਧਮ੍ਮਪਾਲਾਚਰਿਯੋ, ਦ੍ਵੇ ਬੁਬ੍ਬਾਚਰਿਯੋ, ਮਹਾਵਜਿਰ-ਬੁਦ੍ਧਾਚਰਿਯੋ, ਚੁਲ੍ਲਵਜਿਰ-ਬੁਦ੍ਧਾਚਰਿਯੋ, ਵਿਮਲਬੁਦ੍ਧਸਙ੍ਖਾਤੋ ਦੀਪਙ੍ਕਰਾਚਰਿਯੋ, ਚੁਲ੍ਲਦੀਪਙ੍ਕਰਾਚਰਿਯੋ, ਚੁਲ੍ਲਧਮ੍ਮਪਾਲਾਚਰਿਯੋ, ਕਸ੍ਸਪਾਚਰਿਯੋਤਿ ਇਮੇ ਏਕਾਦਸਚਰਿਯਾ ਜਮ੍ਬੁਦੀਪਿਕਾ ਹੇਟ੍ਠਾ ਵੁਤ੍ਤਪਕਾਰੇ ਗਨ੍ਥੇ ਅਕਂਸੁ. ਮਹਾਨਾਮਾਚਰਿਯੋ, ਅਞ੍ਞਤਰਾਚਰਿਯਾ, ਚੁਲ੍ਲਮਹਾਨਾਮਾਚਰਿਯੋ, ਉਪਸੇਨਾਚਰਿਯੋ, ਮੋਗ੍ਗਲਾਨਾਚਰਿਯੋ, ਸਙ੍ਘਰਕ੍ਖਿਤਾਚਰਿਯੋ, ਵੁਤ੍ਤੋਦਯਕਾਰਾਚਰਿਯੋ, ਧਮ੍ਮਸਿਰਾਚਰਿਯੋ, ਅਞ੍ਞਤਰਾ ਦ੍ਵਾਚਰਿਯਾ, ਅਨੁਰੁਦ੍ਧਾਚਰਿਯੋ, ਖੇਮਾਚਰਿਯੋ, ਸਾਰਿਪੁਤ੍ਤਾਚਰਿਯੋ, ਬੁਦ੍ਧਨਾਗਾਚਰਿਯੋ, ਚੁਲ੍ਲਮੋਗ੍ਗਲਾਨਾਚਰਿਯੋ, ਵਾਚਿਸ੍ਸਵਾਚਰਿਯੋ, ਸੁਮਙ੍ਗਲਾਚਰਿਯੋ, ਬੁਦ੍ਧਪਿਯਾਚਰਿਯੋ, ਧਮ੍ਮਕਿਤ੍ਤਿ ਆਚਰਿਯੋ ਮੇਧਙ੍ਕਰਾਚਰਿਯੋ, ਬੁਦ੍ਧਰਕ੍ਖਿਤਾਚਰਿਯੋ, ਉਪਤਿਸ੍ਸਾ ਚਰਿਯੋ, ਅਞ੍ਞਤਰਾ ਵੀਸਤਾਚਰਿਯਾ, ਸਦ੍ਧਮ੍ਮਸਿਰਾਚਰਿਯੋ, ਦੇਵਾਚਰਿਯੋ, ਚੁਲ੍ਲਬੁਦ੍ਧਘੋਸਾਚਰਿਯੋ, ਸਾਰਿਪੁਤ੍ਤਾਚਰਿਯੋ, ਰਟ੍ਠਪਾਲਾਚਰਿਯੋਤਿ ਇਮੇ ਦ੍ਵੇ ਪਞ੍ਞਾਸਾਚਰਿਯਾ ਲਙ੍ਕਾਦੀਪਿਕਾਚਰਿਯਾ ਨਾਮ. ਸੁਭੂਤਚਨ੍ਦਾਚਰਿਯੋ, ਅਗ੍ਗਵਂਸਾਚਰਿਯੋ, ਨਵੋ ਵਜਿਰਬੁਦ੍ਧਾਚਰਿਯੋ, ਗੁਣਸਾਗਰਾਚਰਿਯੋ, ਅਭਯਾਚਰਿਯੋ, ਞਾਣਸਾਗਰਾਚਰਿਯੋ, ਅਞ੍ਞਤਰਾ ਦ੍ਵਾਚਰਿਯਾ, ਉਤ੍ਤਮਾਚਰਿਯੋ, ਅਞ੍ਞਤਰੋ ਆਚਰਿਯੋ, ਅਞ੍ਞਤਰੋ ਮਹਾਮਚ੍ਚੋ, ਧਮ੍ਮਸੇਨਾਪਤਾਚਰਿਯੋ, ਅਞ੍ਞਤਰਾ ਤਯੋ ਆਚਰਿਯਾ, ਸਦ੍ਧਮ੍ਮਗੁਰੁ ਆਚਰਿਯੋ, ਸਾਰਿਪੁਤ੍ਤਾਚਰਿਯੋ, ਅਞ੍ਞਤਰੋ ਏਕਾ ਆਚਰਿਯੋ, ਮੇਧਙ੍ਕਰਾਚਰਿਯੋ, ਅਗ੍ਗਪਣ੍ਡਿਤਾਚਰਿਯੋ, ਚੀਵਰਾਚਰਿਯੋ, ਸਦ੍ਧਮ੍ਮਜੋਤਿਪਾਲਾਚਰਿਯੋ, ਵਿਮਲਬੁਦ੍ਧਾਚਰਿਯੋਤਿ ਇਮੇ ਤੇਵੀਸਤਿ ਆਚਰਿਯਾ ਜਮ੍ਬੁਦੀਪਿਕਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਪੁਕ੍ਕਾਮ ਸਙ੍ਖਾਤੇ ਅਰਿਮਦ੍ਦਨ ਨਗਰੇ ਅਕਂਸੁ.

ਨਵੋਵਿਮਲਬੁਦ੍ਧਾਚਰਿਯੋ ਜਮ੍ਬੁਦੀਪਿਕੋ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਪਂਯਨਗਰੇ ਅਕਾਸਿ. ਅਞ੍ਞਤਰਾਚਰਿਯੋ ਅਰਿਯਵਂਸਾਚਰਿਯੋਤਿ ਇਮੇ ਦ੍ਵਾਚਰਿਯਾ ਜਮ੍ਬੁਦੀਪਿਕਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਅਤਿ [ਨਵਿ] ਪੁਰੇ ਅਕਂਸੁ, ਅਞ੍ਞਤਰਾ ਵੀਸਤਾਚਰਿਯਾ ਜਮ੍ਬੁਦੀਪਿਕਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਗਨ੍ਥੇ ਕਿਞ੍ਚਿ ਪੁਰਾਦਿਘਰੇ ਅਕਂਸੁ.

[ਇਤਿ ਚੁਲ੍ਲਗਨ੍ਥਵਂਸੇ ਆਚਰਿਯਾਨਂ ਸਞ੍ਜਾਤਟ੍ਠਾਨ ਦੀਪਕੋ ਨਾਮ ਤਤਿਯੋ ਪਰਿਚ੍ਛੇਦੋ.]

ਗਨ੍ਥਾ ਪਨ ਸਿਯਾ ਆਯਾਚਨੇਨ ਆਚਰਿਯੇਹਿ ਕਤਾ, ਸਿਯਾ ਅਨਾਯਾਚਨੇਨ ਆਚਰਿਯੇਹਿ ਕਤਾ. ਕਤਮੇ ਗਨ੍ਥਾ ਆਯਾਚਨੇਨ, ਕਤਮੇ ਅਨਾਯਾਚਨੇਨ ਕਤਾ? ਮਹਾਕਚ੍ਚਾਯਨ ਗਨ੍ਥੋ, ਮਹਾਅਟ੍ਠਕਥਾ ਗਨ੍ਥੋ, ਮਹਾਪਚ੍ਚਰਿਯ ਗਨ੍ਥੋ, ਮਹਾਕੁਰੁਨ੍ਦਿ ਗਨ੍ਥੋ, ਮਹਾਪਚ੍ਚਰਿਯਗਨ੍ਥਸ੍ਸ ਅਟ੍ਠਕਥਾ ਗਨ੍ਥੋ, ਮਹਾਕੁਰੁਨ੍ਦਿ ਗਨ੍ਥਸ੍ਸ ਅਟ੍ਠਕਥਾ ਗਨ੍ਥੋਤਿ. ਇਮੇਹਿ ਛ ਗਨ੍ਥੇਹਿ ਅਤ੍ਤਨੋ ਮਤਿਯਾ ਸਾਸਨੁਗ੍ਗਹਨਤ੍ਥਾਯ ਸਦ੍ਧਮ੍ਮਠਿਤਿਯਾ ਕਤਾ.

ਬੁਦ੍ਧਘੋਸਾਚਰਿਯ ਗਨ੍ਥੇਸੁ ਪਨ ਵਿਸੁਦ੍ਧਿਮਗ੍ਗੋ, ਸਙ੍ਘਪਾਲੇਨ ਨਾਮ ਸਙ੍ਘਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਦੀਘਨਿਕਾਯਸ੍ਸ ਅਟ੍ਠਕਥਾ ਗਨ੍ਥੋ ਦਾਠਾ ਨਾਮੇਨ ਸਙ੍ਘਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਮਜ੍ਝਿਮਨਿਕਾਯਸ੍ਸ ਅਟ੍ਠਕਥਾ ਗਨ੍ਥੋ ਬੁਦ੍ਧਮਿਤ੍ਤਨਾਮੇਨ ਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਸਂਯੁਤ੍ਤਨਿਕਾਯਸ੍ਸ ਅਟ੍ਠਕਥਾ ਗਨ੍ਥੋ ਜੋਤਿਪਾਲੇਨ ਨਾਮ ਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਅਙ੍ਗੁਤ੍ਤਰਨਿਕਾਯਸ੍ਸ ਅਟ੍ਠਕਥਾ ਗਨ੍ਥੋ ਭਦ੍ਦਨ੍ਤਾ ਨਾਮ ਥੇਰੇਨ ਸਹਆਜੀਵਕੇਨ ਉਪਾਸਕੇਨ ਚ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਸਮਨ੍ਤਪਾਸਾਦਿਕਾ ਨਾਮ ਅਟ੍ਠਕਥਾ ਗਨ੍ਥੋ ਬੁਦ੍ਧਸਿਰਿ ਨਾਮੇਨ ਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਸਤ੍ਤਨ੍ਨਂ ਅਭਿਧਮ੍ਮ-ਗਨ੍ਥਾਨਂ ਅਟ੍ਠਕਥਾ ਗਨ੍ਥੋ ਚੁਲ੍ਲਬੁਦ੍ਧਘੋਸੇਨ ਭਿਕ੍ਖੁਨਾ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਧਮ੍ਮਪਦਸ੍ਸਅਟ੍ਠਕਥਾ ਗਨ੍ਥੋ ਕੁਮਾਰਕਸ੍ਸਪਨਾਮੇਨ ਥੇਰੇਨ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਜਾਤਕਸ੍ਸਅਟ੍ਠਕਥਾ ਗਨ੍ਥੋ ਅਤ੍ਥਦਸ੍ਸੀ, ਬੁਦ੍ਧਮਿਤ੍ਤ, ਬੁਦ੍ਧਪਿਯਦੇਵ ਸਙ੍ਖਾਤੇਹਿ ਤੀਹਿ ਥੇਰੇਹਿ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ. ਖੁਦ੍ਦਕਪਾਠਸ੍ਸ ਅਟ੍ਠਕਥਾ ਗਨ੍ਥੋ, ਸੁਤ੍ਤਨਿਪਾਤਸ੍ਸ ਅਟ੍ਠਕਥਾ ਗਨ੍ਥੋ ਅਤ੍ਤਨੋ ਮਤਿਯਾ ਬੁਦ੍ਧਘੋਸਾਚਰਿਯੇਨ ਕਤੋ. ਅਪਦਾਨਸ੍ਸ ਅਟ੍ਠਕਥਾ ਗਨ੍ਥੋ ਪਞ੍ਚਨਿਕਾਯ ਵਿਞ੍ਞੂਹਿ ਪਞ੍ਚਹਿ ਥੇਰੇਹਿ ਆਯਾਚਿਤੇਨ ਬੁਦ੍ਧਘੋਸਾਚਰਿਯੇਨ ਕਤੋ.

ਬੁਦ੍ਧਘੋਸਾਚਰਿਯ-ਗਨ੍ਥਦੀਪਨਾ ਨਿਟ੍ਠਿਤਾ.

ਬੁਦ੍ਧਤ੍ਤਾਚਰਿਯ ਗਨ੍ਥੇਸੁ ਪਨ ਵਿਨਯ-ਵਿਨਿਚ੍ਛਯਗਨ੍ਥੋ ਅਤ੍ਤਨੋ ਸਿਸ੍ਸੇਨ ਬੁਦ੍ਧਸੀਹੇਨ ਨਾਮ ਥੇਰੇਨ ਆਯਾਚਿਤੇਨ ਬੁਦ੍ਧਤ੍ਤਾਚਰਿਯਾ ਕਤੋ. ਉਤ੍ਤਰ-ਵਿਨਿਚ੍ਛਯਗਨ੍ਥੋ ਸਙ੍ਘਪਾਲੇਨ ਨਾਮੇਨ ਥੇਰੇਨ ਆਯਾਚਿਤੇਨ ਬੁਦ੍ਧਦਤ੍ਤਾਚਰਿਯੇਨ ਕਤੋ. ਅਭਿਧਮ੍ਮਾਵਤਾਰੋ ਨਾਮ ਗਨ੍ਥੋ ਅਤ੍ਤਨੋ ਸਿਸ੍ਸੇਨ ਸੁਮਤਿ ਥੇਰੇਨ ਆਯਾਚਿਤੇਨ ਬੁਦ੍ਧਦਤ੍ਤਾਚਰਿਯੇਨ ਕਤੋ. ਬੁਦ੍ਧਵਂਸਸ੍ਸ ਅਟ੍ਠਕਥਾ ਗਨ੍ਥੋ ਤੇਨੇਵ ਬੁਦ੍ਧਸੀਹਨਾਮ ਥੇਰੇਨ ਆਯਾਚਿਤੇਨ ਬੁਦ੍ਧਦਤ੍ਤਾਚਰਿਯੇਨ ਕਤੋ.

ਬੁਦ੍ਧਦਤ੍ਤਾਚਰਿਯ-ਗਨ੍ਥਦੀਪਨਾ ਨਿਟ੍ਠਿਤਾ.

ਅਭਿਧਮ੍ਮਕਥਾਯ ਮੂਲਟੀਕਾ ਨਾਮ ਟੀਕਾ ਗਨ੍ਥੋ ਬੁਦ੍ਧਮਿਤ੍ਤਾ ਨਾਮ ਥੇਰੇਨ ਆਯਾਚਿਤੇਨ ਆਨਨ੍ਦਾਚਰਿਯੇਨ ਕਤੋ.

ਨੇਤ੍ਤਿਪਕਰਣਸ੍ਸ ਅਟ੍ਠਕਥਾ ਗਨ੍ਥੋ ਧਮ੍ਮਰਕ੍ਖਿਤ ਨਾਮ ਥੇਰੇਨ ਆਯਾਚਿਤੇਨ ਧਮ੍ਮਪਾਲਾਚਰਿਯੇਨ ਕਤੋ. ਇਤਿਵੁਤ੍ਤਕਅਟ੍ਠਕਥਾ ਗਨ੍ਥੋ, ਉਦਾਨਅਟ੍ਠਕਥਾ ਗਨ੍ਥੋ, ਚਰਿਯਾਪਿਟਕਅਟ੍ਠਕਥਾ ਗਨ੍ਥੋ, ਥੇਰਕਥਾਅਟ੍ਠਕਥਾ ਗਨ੍ਥੋ, ਥੇਰਿਕਥਾਅਟ੍ਠਕਥਾ ਗਨ੍ਥੋ, ਵਿਮਾਨਵਤ੍ਥੁਅਟ੍ਠਕਥਾ ਗਨ੍ਥੋ, ਪੇਤਵਤ੍ਥੁਅਟ੍ਠਕਥਾ ਗਨ੍ਥੋ, ਇਮੇ ਸਤ੍ਤ ਗਨ੍ਥਾ ਅਤ੍ਤਨੋ ਮਤਿਯਾ ਧਮ੍ਮਪਾਲਾਚਰਿਯੇਨ ਕਤੋ. ਵਿਸੁਦ੍ਧਿਮਗ੍ਗਟੀਕਾ ਗਨ੍ਥੋ ਦਾਠਾ ਨਾਮੇਨ ਨਾਮ ਥੇਰੇਨ ਆਯਾਚਿਤੇਨ ਧਮ੍ਮਪਾਲਾਚਰਿਯੇਨ ਕਤੋ, ਦੀਘਨਿਕਾਯ-ਅਟ੍ਠਕਥਾਦੀਨਂ ਚਤੁਨ੍ਨਂ ਅਟ੍ਠਕਥਾਨਂ ਟੀਕਾ ਗਨ੍ਥੋ, ਅਭਿਧਮ੍ਮਟ੍ਠਕਥਾਯ ਅਨੁਟੀਕਾ ਗਨ੍ਥੋ, ਨੇਤ੍ਤਿਪਕਰਣਟ੍ਠਕਥਾਯ ਟੀਕਾ ਗਨ੍ਥੋ, ਬੁਦ੍ਧਵਂਸਟ੍ਠਕਥਾਯ ਟੀਕਾ ਗਨ੍ਥੋ, ਜਾਤਕਟ੍ਠਕਥਾਯ ਟੀਕਾ ਗਨ੍ਥੋ ਚੇਤਿ ਇਮੇ ਪਞ੍ਚ ਗਨ੍ਥਾ ਅਤ੍ਤਨੋ ਮਤਿਯਾ ਧਮ੍ਮਪਾਲਾਚਰਿਯੇਨ ਕਤੋ.

ਧਮ੍ਮਪਾਲਾਚਰਿਯ-ਗਨ੍ਥਦੀਪਨਾ ਨਿਟ੍ਠਿਤਾ.

ਨਿਰੁਤ੍ਤਿਮਞ੍ਜੂਸਾ ਨਾਮ ਚੁਲ੍ਲਨਿਰੁਤ੍ਤਿਟੀਕਾ ਗਨ੍ਥੋ, ਮਹਾਨਿਰੁਤ੍ਤਿਸਙ੍ਖੇਪੋ ਨਾਮ ਗਨ੍ਥੋ ਚ ਅਤ੍ਤਨੋ ਮਤਿਯਾ ਪੁਬ੍ਬਾਚਰਿਯੇਹਿ ਵਿਂਸੁ ਕਤੋ.

ਪਞ੍ਚ ਵਿਨਯਪਕਰਣਾਨਂ ਵਿਨਯਗਣ੍ਠਿ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਮਹਾਵਜਿਰਬੁਦ੍ਧਾਚਰਿਯੇਨ ਕਤੋ. ਨ੍ਯਾਸਸਙ੍ਖਾਤੋ ਮੁਖਮਤ੍ਤਦੀਪਨੀ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਵਿਮਲਬੁਦ੍ਧਿ ਆਚਰਿਯੇਨ ਕਤੋ. ਅਤ੍ਥਬ੍ਯਕ੍ਖ੍ਯਾਨੋ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਚੁਲ੍ਲਵਜਿਰਬੁਦ੍ਧਾਚਰਿਯੇਨ ਕਤੋ. ਰੂਪਸਿਦ੍ਧਿ ਤਸ੍ਸ ਚ ਗਨ੍ਥਸ੍ਸ ਟੀਕਾ ਗਨ੍ਥੋ ਸਬ੍ਬ ਪਞ੍ਚਸੁਤ੍ਤਞ੍ਚ ਅਤ੍ਤਨੋ ਮਤਿਯਾ ਦੀਪਙ੍ਕਰਾਚਰਿਯੇਨ ਕਤੋ. ਸਚ੍ਚਸਙ੍ਖੇਪੋ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਚੁਲ੍ਲਧਮ੍ਮਪਾਲਾਚਰਿਯੇਨ ਕਤੋ. ਮੋਹਚ੍ਛੇਦਨੀ ਗਨ੍ਥੋ, ਵਿਮਤਿਚ੍ਛੇਦਨੀ ਗਨ੍ਥੋ, ਦਸ ਬੁਦ੍ਧਵਂਸੋ, ਅਨਾਗਤਵਂਸੋ ਚ. ਅਤ੍ਤਨੋ ਮਤਿਯਾ ਕਸ੍ਸਪਾਚਰਿਯੇਨ ਕਤੋ. ਪਟਿਸਮ੍ਭਿਦਾਮਗ੍ਗਸ੍ਸ ਅਟ੍ਠਕਥਾ ਗਨ੍ਥੋ ਮਹਾਨਾਮੇਨ ਉਪਾਸਕੇਨ ਆਯਾਚਿਤੇਨ ਮਹਾਨਾਮਾਚਰਿਯੇਨ ਕਤੋ. ਦੀਪਵਂਸੋ, ਥੂਪਵਂਸੋ, ਬੋਧਿਵਂਸੋ, ਚੁਲ੍ਲਵਂਸੋ, ਪੋਰਾਣਵਂਸੋ, ਮਹਾਵਂਸੋ ਚਾਤਿ ਇਮੇ ਛ ਗਨ੍ਥਾ ਅਤ੍ਤਨੋ ਮਤਿਯਾ ਮਹਾਨਾਮਾਚਰਿਯੇਹਿ ਵਿਸੁਂ ਕਤਾ. ਨਵੋ ਮਹਾਵਂਸਗਨ੍ਥੋ ਅਤ੍ਤਨੋ ਮਤਿਯਾ ਚੁਲ੍ਲਮਹਾਨਾਮਾਚਰਿਯੇਨ ਕਤੋ. ਸਦ੍ਧਮ੍ਮਪਜ੍ਜੋਤਿਕਾ ਨਾਮ ਮਹਾਨਿਦ੍ਦੇਸਸ੍ਸ ਅਟ੍ਠਕਥਾ ਗਨ੍ਥੋ ਦੇਵੇਨ ਥੇਰੇਨ ਆਯਾਚਿਤੇਨ ਉਪਸੇਨਾਚਰਿਯੇਨ ਕਤੋ. ਮੋਗ੍ਗਲਾਨਬ੍ਯਾਕਰਣਗਨ੍ਥੇ ਅਤ੍ਤਨੋ ਮਤਿਯਾ ਮੋਗ੍ਗਲਾਨਾਚਰਿਯੇਨ ਕਤੋ. ਸੁਬੋਧਾਲਙ੍ਕਾਰ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਸਙ੍ਘਰਕ੍ਖਿਤਾਚਰਿਯੇਨ ਕਤੋ. ਵੁਤ੍ਤੋਦਯ ਗਨ੍ਥੋ ਅਤ੍ਤਨੋ ਮਤਿਯਾ ਵੁਤ੍ਤੋਦਯਕਾਰਾਚਰਿਯੇਨ ਕਤੋ. ਖੁਦ੍ਦਸਿਕ੍ਖਾ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਧਮ੍ਮਸਿਰਾਚਰਿਯੇਨ ਕਤੋ. ਪੋਰਾਣਖੁਦ੍ਦਸਿਕ੍ਖਾ ਟੀਕਾ ਚ ਮੂਲਸਿਕ੍ਖਾ ਚਾਤਿ, ਇਮੇ ਦ੍ਵੇ ਗਨ੍ਥੇ ਅਤ੍ਤਨੋ ਮਤਿਯਾ ਅਞ੍ਞਤਰੇਹਿ ਦ੍ਵਿਹਾਚਰਿਯੇਹਿ ਵਿਂਸੁ ਕਤਾ.

ਪਰਮਤ੍ਥਵਿਨਿਚ੍ਛਯਂ ਨਾਮ ਗਨ੍ਥੋ ਸਙ੍ਘਰਕ੍ਖਿਤੇਨ ਥੇਰੇਨ ਆਯਾਚਿਤੇਨ ਅਨੁਰੁਦ੍ਧਾਚਰਿਯੇਨ ਕਤੋ. ਨਾਮਰੂਪ-ਪਰਿਚ੍ਛੇਦੋ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਅਨੁਰੁਦ੍ਧਾਚਰਿਯੇਨ ਕਤੋ. ਅਭਿਧਮ੍ਮਤ੍ਥਸਙ੍ਗਹਂ ਨਾਮ ਗਨ੍ਥੋ ਨਮ੍ਮ ਨਾਮੇਨ ਉਪਾਸਕੇਨ ਆਯਾਚਿਤੇਨ ਅਨੁਰੁਦ੍ਧਾਚਰਿਯੇਨ ਕਤੋ. ਖੇਮੋ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਖੇਮਾਚਰਿਯੇਨ ਕਤੋ. ਸਾਰਤ੍ਥਦੀਪਨੀ ਨਾਮ ਵਿਨਯਟ੍ਠਕਥਾਯ ਟੀਕਾ ਗਨ੍ਥੋ, ਵਿਨਯਸਙ੍ਗਹਂ, ਵਿਨਯਸਙ੍ਗਹਸ੍ਸ ਟੀਕਾ ਗਨ੍ਥੋ, ਅਙ੍ਗੁਤ੍ਤਰਟ੍ਠਕਥਾਯ ਨਵੋ ਟੀਕਾ ਗਨ੍ਥੋਤਿ ਇਮੇ ਚਤ੍ਤਾਰੋ ਗਨ੍ਥਾ ਪਰਕ੍ਕਮਬਾਹੁ ਨਾਮੇਨ ਲਙ੍ਕਾਦੀਪਿਸ੍ਸਰੇਨ ਰਞ੍ਞਾ ਆਯਾਚਿਤੇਨ ਸਾਰਿਪੁਤ੍ਤਾਚਰਿਯੇਨ ਕਤੋ. ਸਕਟਸਦ੍ਦਸਤ੍ਥਸ੍ਸ ਪਞ੍ਚਿਕਾਯ ਟੀਕਾ ਗਨ੍ਥੋ ਅਤ੍ਤਨੋ ਮਤਿਯਾ ਸਾਰਿਪੁਤ੍ਤਾਚਰਿਯੇਨ ਕਤੋ. ਕਙ੍ਖਾਵਿਤਰਣਿਯਾ ਵਿਨਯਤ੍ਥਮਞ੍ਜੂਸਾ ਨਾਮ ਟੀਕਾ ਗਨ੍ਥੋ ਸੁਮੇਧਾ ਨਾਮਥੇਰੇਨ ਆਯਾਚਿਤੇਨ ਬੁਦ੍ਧਨਾਗਾਚਰਿਯੇਨ ਕਤੋ. ਅਭਿਧਾਨਪ੍ਪਦੀਪਿਕੋ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਚੂਲਮੋਗ੍ਗਲਾਨਾਚਰਿਯੇਨ ਕਤੋ. ਸੁਬੋਧਾਲਙ੍ਕਾਰਸ੍ਸ ਮਹਾਸਾਮਿ ਨਾਮ ਟੀਕਾ, ਵੁਤ੍ਤੋਦਯ ਵਿਵਰਣਞ੍ਚਾਤਿ ਇਮੇ ਦ੍ਵੇ ਗਨ੍ਥਾ ਅਤ੍ਤਨੋ ਮਤਿਯਾ ਵਾਚਿਸ੍ਸਰੇਨ ਕਤਾ. ਖੁਦ੍ਦਸਿਕ੍ਖਾਯ ਸੁਮਙ੍ਗਲਪ੍ਪਸਾਦਨਿ ਨਾਮ ਨਵੋ ਟੀਕਾ ਗਨ੍ਥੋ ਸੁਮਙ੍ਗਲੇਨ ਆਯਾਚਿਤੇਨ ਨਵਾਚਿਸ੍ਸਰੇਨ ਕਤੋ. ਸਮ੍ਬਨ੍ਧਚਿਨ੍ਤਾਟੀਕਾ ਬਾਲਾਵਤਾਰੋ, ਮੋਗ੍ਗਲਾਨਬ੍ਯਾਕਰਣਸ੍ਸ ਟੀਕਾ ਚਾਤਿ ਇਮੇ ਤਯੋ ਗਨ੍ਥਾ, ਸੁਮਙ੍ਗਲ, ਬੁਦ੍ਧਮਿਤ੍ਤ, ਮਹਾਕਸ੍ਸਪ ਸਙ੍ਖਾਤੇਹਿ ਤੀਹਿ ਥੇਰੇਹਿ ਚ, ਧਮ੍ਮਕਿਤ੍ਤਿ ਨਾਮ ਉਪਾਸਕੇਨ, ਵਾਨਿਜ੍ਜਾ ਭਾਤੁ ਉਪਾਸਕੇਨ ਚ ਆਯਾਚਿਤੇਨ ਵਾਚਿਸ੍ਸਰੇਨ ਕਤੋ. ਨਾਮਰੂਪਪਰਿਚ੍ਛੇਦਸ੍ਸ ਵਿਭਾਗੋ, ਸਦ੍ਦਤ੍ਥਸ੍ਸ ਪਦਰੂਪ-ਵਿਭਾਵਨਂ, ਖੇਮਪਕਰਣਸ੍ਸ ਟੀਕਾ, ਸੀਮਾਲਙ੍ਕਾਰੋ, ਮੂਲਸਿਕ੍ਖਾਯ ਟੀਕਾ, ਰੂਪਵਿਭਾਗੋ, ਪਚ੍ਚਯਸਙ੍ਗਹੋ ਚਾਤਿ ਇਮੇ ਸਤ੍ਤ ਗਨ੍ਥਾ ਅਤ੍ਤਨੋ ਮਤਿਯਾ ਵਾਚਿਸ੍ਸਰੇਨ ਕਤਾ. ਸਚ੍ਚਸਙ੍ਖੇਪਸ੍ਸ ਟੀਕਾ ਗਨ੍ਥੋ ਸਾਰਿਪੁਤ੍ਤ-ਨਾਮੇਨ ਥੇਰੇਨ ਆਯਾਚਿਤੇਨ ਵਾਚਿਸ੍ਸਰੇਨ ਕਤੋ. ਅਭਿਧਮ੍ਮਾਵਤਾਰਸ੍ਸ ਟੀਕਾ, ਅਭਿਧਮ੍ਮਤ੍ਥਸਙ੍ਗਹਸ੍ਸ ਟੀਕਾ ਚਾਤਿ ਇਮੇ ਦ੍ਵੇ ਗਨ੍ਥਾ ਅਤ੍ਤਨੋ ਮਤਿਯਾ ਸੁਮਙ੍ਗਲਾਚਰਿਯੇਨ ਕਤਾ. ਸਾਰਤ੍ਥਸਙ੍ਗਹਂ ਨਾਮ ਗਨ੍ਥੋ ਅਤ੍ਤਨੋ ਮਤਿਯਾ ਬੁਦ੍ਧਪ੍ਪਿਯੇਨ ਕਤੋ ਦਨ੍ਤਧਾਤੁਵਣ੍ਣਨਾ ਨਾਮ ਪਕਰਣਂ

ਲਙ੍ਕਾਦੀਪਿਸ੍ਸਰਸ੍ਸ ਰਞ੍ਞੋ ਸੇਨਾਪਤਿਨਾ ਆਯਾਚਿਤੇਨ ਧਮ੍ਮਕਿਤ੍ਤਿਨਾਮਾਚਰਿਯੇਨ ਕਤਂ. ਜਿਨਚਰਿਤਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਮੇਧਙ੍ਕਰਾਚਰਿਯੇਨ ਕਤਂ. ਜਿਨਾਲਙ੍ਕਾਰੋ, ਜਿਨਾਲਙ੍ਕਾਰਸ੍ਸ ਟੀਕਾ ਅਤ੍ਤਨੋ ਮਤਿਯਾ ਬੁਦ੍ਧਰਕ੍ਖਿਤਾਚਰਿਯੇਨ ਕਤੋ. ਅਮਤਧਰਸ੍ਸ ਨਾਮ ਅਨਾਗਤਵਂਸਸ੍ਸ ਅਤ੍ਤਨੋ ਮਤਿਯਾ ਅਟ੍ਠਕਥਾ ਉਪਤਿਸ੍ਸਾਚਰਿਯੇਨ ਕਤਾ. ਕਙ੍ਖਾਵਿਤਰਣੀਯਾ ਲੀਨਤ੍ਥਪਕਾਸਿਨੀ, ਨਿਸਨ੍ਦੇਹੋ, ਧਮ੍ਮਾਨੁਸਾਰਣੀ, ਞੇਯ੍ਯਾ-ਸਨ੍ਤਤਿ, ਞੇਯ੍ਯਾ-ਸਨ੍ਤਤਿਯਾ ਟੀਕਾ, ਸੁਮਤਾਵਤਾਰੋ, ਲੋਕਪਞ੍ਞਤ੍ਤਿ ਪਕਰਣਂ, ਤਥਾਗਤੁਪ੍ਪਤ੍ਤਿ ਪਕਰਣਂ, ਨਲਾਟਧਾਤੁਵਣ੍ਣਨਾ, ਸੀਹਲ਼ਵਤ੍ਥੁ, ਧਮ੍ਮਦੀਪਕੋ ਪਟਿਪਤ੍ਤਿ ਸਙ੍ਗਹੋ, ਵਿਸੁਦ੍ਧਿਮਗ੍ਗਸ੍ਸ ਗਣ੍ਠਿ, ਅਭਿਧਮ੍ਮਗਣ੍ਠਿ, ਨੇਤ੍ਤਿਪਕਰਣਗਣ੍ਠਿ, ਵਿਸੁਦ੍ਧਿਮਗ੍ਗਚੂਲ-ਨਵਟੀਕਾ, ਸੋਤਬ੍ਬਮਾਲਿਨੀ, ਪਸਾਦਜਨਨੀ, ਓਕਸ੍ਸਲੋਕੋ, ਸੁਬੋਧਾਲਙ੍ਕਾਰਸ੍ਸ ਨਵ ਟੀਕਾ ਚੇਤਿ, ਇਮੇ ਵੀਸਤਿ ਗਨ੍ਥਾ ਅਤ੍ਤਨੋ ਮਤਿਯਾ ਵੀਸਤਾਚਰਿਯੇਹਿ ਵਿਂਸੁ ਵਿਂਸੁ ਕਤਾ.

ਸਦ੍ਦਤ੍ਥ ਭੇਦਚਿਨ੍ਤਾ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਸਦ੍ਧਮ੍ਮਸਿਰਿਨਾਮਾਚਰਿਯੇਨ ਕਤਂ. ਸੁਮਨ-ਕੂਟਵਣ੍ਣਨਂ ਨਾਮ ਪਕਰਣਂ, ਰਾਹੁਲਾ ਨਾਮ ਥੇਰੇਨ ਆਯਾਚਿਤੇਨ ਵਾਚਿਸ੍ਸਰੇਨਦੇਵਥੇਰੇਨ ਕਤਂ. ਸੋਤਤ੍ਥ ਕਿਂ ਮਹਾਨਿਦਾਨਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਚੁਲ੍ਲਬੁਦ੍ਧਘੋਸਾਚਰਿਯੇਨ ਕਤਂ. ਮਧੁਰਸਙ੍ਗਾਹਨਿ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਰਟ੍ਠਪਾਲਾਚਰਿਯੇਨ ਕਤਂ. ਲਿਙ੍ਗਤ੍ਥਵਿਵਰਣਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਸੁਭੂਤਚਨ੍ਦਾਚਰਿਯੇਨ ਕਤਂ. ਸਦ੍ਦਨੀਤਿਪਕਰਣਂ ਅਤ੍ਤਨੋ ਮਤਿਯਾ ਅਗ੍ਗਵਂਸਾਚਰਿਯੇਨ ਕਤਂ. ਨ੍ਯਾਸਪਕਰਣਸ੍ਸ ਮਹਾਟੀਕਾ ਨਾਮ ਟੀਕਾ ਅਤ੍ਤਨੋ ਮਤਿਯਾ ਵਜਿਰਬੁਦ੍ਧਾਚਰਿਯੇਨ ਕਤਾ. ਮੁਖਮਤ੍ਤਸਾਰੋ ਅਤ੍ਤਨੋ ਮਤਿਯਾ ਗੁਣਸਾਗਰਾਚਰਿਯੇਨ ਕਤੋ. ਮੁਖਮਤ੍ਤਸਾਰਸ੍ਸ ਟੀਕਾ ਸੁਤਸਮ੍ਪਨ੍ਨ ਨਾਮੇਨ ਧਮ੍ਮਰਾਜਿਨੋ ਗੁਰੁਨਾ ਸਙ੍ਘਥੇਰੇਨ ਆਯਾਚਿਤੇਨ ਗੁਣਸਾਗਰਾਚਰਿਯੇਨ ਕਤਾ. ਸਦ੍ਦਤ੍ਥਭੇਦਚਿਨ੍ਤਾਯ ਮਹਾਟੀਕਾ ਅਤ੍ਤਨੋ ਮਤਿਯਾ ਅਭਯਾਚਰਿਯੇਨ ਕਤਾ. ਲਿਙ੍ਗਤ੍ਥਵਿਵਰਣਪ੍ਪਕਾਸਕਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਞਾਣਸਾਗਰਾਚਰਿਯੇਨ ਕਤਂ. ਗੁਲ਼੍ਹਤ੍ਥਸ੍ਸ ਟੀਕਾ ਬਾਲਪ੍ਪਬੋਧਨਞ੍ਚ ਦੁਵਿਧਂ ਪਕਰਣਂ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਂ. ਸਦ੍ਦਤ੍ਥਭੇਦਚਿਨ੍ਤਾਯ ਮਜ੍ਝਿਮਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਾ. ਬਾਲਾਵਤਾਰਸ੍ਸ ਟੀਕਾ, ਲਿਙ੍ਗਤ੍ਥਵਿਵਰਣਾ ਟੀਕਾ ਚ ਅਤ੍ਤਨੋ ਮਤਿਯਾ ਉਤ੍ਤਮਾਚਰਿਯੇਨ ਕਤਾ. ਸਦ੍ਦਤ੍ਥਭੇਦਚਿਨ੍ਤਾਯ ਨਵ ਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਾ. ਅਭਿਧਾਨਪ੍ਪਦੀਪਿਕਾਯ ਟੀਕਾ ਦਣ੍ਡੀਪਕਰਣਸ੍ਸ ਮਗਘ-ਭੂਤਾ ਟੀਕਾ ਚਾਤਿ ਦੁਵਿਧਾ ਟੀਕਾਯੋ ਅਤ੍ਤਨੋ ਮਤਿ, ਸੀਹਸੂਰ ਨਾਮ ਰਞ੍ਞੋ ਏਕੇਨ ਅਮਚ੍ਚੇਨ ਕਤਾ. ਕੋਲਦ੍ਧਜਨਸ੍ਸਟੀਕਾ ਪਾਸਾਦਿਕੇਨ ਨਾਮ ਥੇਰੇਨ ਆਯਾਚਿਤੇਨ ਤੇਨੇਵ ਮਹਾਮਚ੍ਚੇਨ ਕਤਾ. ਕਾਰਿਕਂ ਨਾਮ ਪਕਰਣਂ ਞਾਣਗਮ੍ਭੀਰਨਾਮੇਨ ਭਿਕ੍ਖੁਨਾ ਆਯਾਚਿਤੇਨ ਧਮ੍ਮਸੇਨਾਪਤਾਚਰਿਯੇਨ ਕਤਂ. ਏਤਿਮਾਸਮਿਦੀਪਨੀ [ਵਾ ਏਤਿਮਾਸਮਿਦੀਪਿਕਾ] ਨਾਮ ਪਕਰਣਂ ਮਨੋਹਾਰਞ੍ਚ ਅਤ੍ਤਨੋ ਮਤਿਯਾ ਤੇਨੇਵ ਧਮ੍ਮਸੇਨਾਪਤਾਚਰਿਯੇਨ ਕਤਂ. ਕਾਰਿਕਾਯ ਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਾ. ਏਤਿਮਾਸਮਿਦੀਪਿਕਾਯ ਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਾ.

ਸਦ੍ਦਬਿਨ੍ਦੁਪਕਰਣਂ ਅਤ੍ਤਨੋ ਮਤਿਯਾ ਧਮ੍ਮਰਾਜਸ੍ਸ ਗੁਰੁਨਾ ਅਞ੍ਞਤਰਾਚਰਿਯੇਨ ਕਤਂ. ਸਦ੍ਦਵੁਤ੍ਤਿਪ੍ਪਕਾਸਕਂ ਨਾਮ ਪਕਰਣਂ ਅਞ੍ਞਤਰੇਨ ਭਿਕ੍ਖੁਨਾ ਆਯਾਚਿਤੇਨ ਸਦ੍ਧਮ੍ਮਗੁਰੁ ਨਾਮਾਚਰਿਯੇਨ ਕਤਂ. ਸਦ੍ਦਵੁਤ੍ਤਿਪ੍ਪਕਾਸਕਸ੍ਸ ਟੀਕਾ ਅਤ੍ਤਨੋ ਮਤਿਯਾ ਸਾਰਿਪੁਤ੍ਤਾਚਰਿਯੇਨ ਕਤਾ.

ਕਚ੍ਚਾਯਨ ਸਾਰੋ ਚ ਕਚ੍ਚਾਯਨਸਾਰਸ੍ਸ ਟੀਕਾ ਚਾਤਿ ਦੁਵਿਧਂ ਪਕਰਣਂ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਂ. ਲੋਕਦੀਪਕਸਾਰਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਨਵੇਨਮੇਧਙ੍ਕਰਾਚਰਿਯੇਨ ਕਤਂ. ਲੋਕੁਪ੍ਪਤ੍ਤਿਪਕਰਣਂ ਅਤ੍ਤਨੋ ਮਤਿਯਾ ਅਗ੍ਗਪਣ੍ਡਿਤਾਚਰਿਯੇਨ ਕਤਂ. ਜਙ੍ਘਦਾਸਕਸ੍ਸ ਟੀਕਾ ਭੂਤਾ ਮਗਧਟੀਕਾ ਅਤ੍ਤਨੋ ਮਤਿਯਾ ਚੀਵਰਾਚਰਿਯੇਨ ਕਤਾ. ਮਾਤਿਕਤ੍ਥਦੀਪਨੀ, ਅਭਿਧਮ੍ਮਤ੍ਥਸਙ੍ਗਹਵਣ੍ਣਨਾ, ਸੀਮਾਲਙ੍ਕਾਰਸ੍ਸਟੀਕਾ, ਗਣ੍ਠਿਸਾਰੋ, ਪਟ੍ਠਾਨਗਣਨਾਨਯੋ ਚਾਤਿ ਇਮੇ ਪਞ੍ਚ ਪਕਰਣਾਨਿ ਅਤ੍ਤਨੋ ਮਤਿਯਾ ਸਦ੍ਧਮ੍ਮਜੋਤਿਪਾਲਾਚਰਿਯੇਨ ਕਤਾਨਿ. ਸਙ੍ਖੇਪਵਣ੍ਣਨਾ ਪਰਕ੍ਕਮਬਾਹੁ-ਨਾਮੇਨ ਜਮ੍ਬੁਦੀਪਿਸ੍ਸਰੇਨ ਰਞ੍ਞੋ ਆਯਾਚਿਤੇ ਤੇਨੇਵ ਸਦ੍ਧਮ੍ਮਜੋਤਿਪਾਲਾਚਰਿਯੇਨ ਕਤਾ. ਕਚ੍ਚਾਯਨਸ੍ਸ ਸੁਤ੍ਤਨਿਦ੍ਦੇਸੋ ਅਤ੍ਤਨੋ ਸਿਸ੍ਸੇਨ ਧਮ੍ਮਚਾਰਿਨਾ ਥੇਰੇਨ ਆਯਾਚਿਤੇਨ ਸਦ੍ਧਮ੍ਮਜੋਤਿਪਾਲਾਚਰਿਯੇਨ ਕਤੋ. ਵਿਨਯਸਮੁਟ੍ਠਾਨਦੀਪਨੀ ਨਾਮ ਪਕਰਣਂ, ਅਤ੍ਤਨੋ ਗੁਰੁਨਾ ਸਙ੍ਘਥੇਰੇਨ ਆਯਾਚਿਤੇਨ ਸਦ੍ਧਮ੍ਮ-ਜੋਤਿਪਾਲਾਚਰਿਯੇਨ ਕਤਂ.

ਸਤ੍ਤਪਕਰਣਾਨਿ ਪਨ ਤੇਨ ਪੁਕ੍ਕਾਮਨਗਰੇ ਕਤਾਨਿ. ਸਙ੍ਖੇਪਵਣ੍ਣਨਾਵ ਲਙ੍ਕਾਦੀਪੇ ਕਤਾ. ਅਭਿਧਮ੍ਮ-ਪਨ੍ਨਰਸਟ੍ਠਾਨਵਣ੍ਣਾਨਂ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਨਵੇਨ-ਵਿਮਲਬੁਦ੍ਧਾਚਰਿਯੇਨ ਕਤਾ. ਸਦ੍ਦਸਾਰਤ੍ਥਜਾਲਿਨੀ ਨਾਮ ਪਕਰਣਂ ਅਤ੍ਤਨੋ ਮਤਿਯਾ ਨਵੇਨ-ਵਿਮਲਬੁਦ੍ਧਾਚਰਿਯੇਨ ਕਤਂ. ਸਦ੍ਦਸਾਰਤ੍ਥ-ਜਾਲਿਨਿਯਾ ਟੀਕਾ, ਪਂਯਨਗਰੇ ਰਞ੍ਞੋ ਗੁਰੁਨਾ ਸਙ੍ਘਰਾਜੇਨ ਆਯਾਚਿਤੇਨ ਤੇਨੇਵ ਨਵੇਨ ਵਿਮਲਬੁਦ੍ਧਾਚਰਿਯੇਨ ਕਤਾ. ਵੁਤ੍ਤੋਦਯਸ੍ਸ ਟੀਕਾ, ਅਭਿਧਮ੍ਮਸਙ੍ਗਹਸ੍ਸ ਟੀਕਾਯ ਪਰਮਤ੍ਥਮਞ੍ਜੂਸਾ ਨਾਮ ਅਨੁਟੀਕਾ, ਦਸਗਣ੍ਠਿਵਣ੍ਣਨਂ ਨਾਮ ਪਕਰਣਂ, ਮਗਧਭੂਤਵਿਦਗ੍ਗਮੁਖਮਣ੍ਡਨਿਯਾਟੀਕਾ ਚਾਤਿ ਇਮਾਨਿ ਚਤ੍ਤਾਰਿ ਪਕਰਣਾਨਿ ਅਤ੍ਤਨੋ ਮਤਿਯਾ ਤੇਨੇਵ ਨਵੇਨ ਵਿਮਲਬੁਦ੍ਧਾਚਰਿਯੇਨ ਕਤਾਨਿ.

ਪਞ੍ਚਪਕਰਣਟੀਕਾਯ ਨਵਾਨੁਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰੋ ਚਰਿਯੇਨ ਕਤਾ. ਅਭਿਧਮ੍ਮਸਙ੍ਗਹਸ੍ਸ ਨਵਟੀਕਾ ਅਤ੍ਤਨੋ ਮਤਿਯਾ ਅਞ੍ਞਤਰਾਚਰਿਯੇਨ ਕਤਾ. ਅਭਿਧਮ੍ਮਤ੍ਥਸਙ੍ਗਹਟੀਕਾਯ [ਮਣਿ] ਮਞ੍ਜੂਸਾ [ਮਣਿਸਾਰਮਞ੍ਜੂਸਾ] ਨਾਮ ਨਵਾਨੁਟੀਕਾ ਅਤ੍ਤਨੋ ਮਤਿਯਾ ਅਰਿਯਵਂਸਾਚਰਿਯੇਨ ਕਤਾ.

ਪੇਟਕੋਪਦੇਸਸ੍ਸ ਟੀਕਾ ਅਤ੍ਤਨੋ ਮਤਿਯਾ ਉਦੁਮ੍ਬਰਿਨਾਮਾਚਰਿਯੇਨ ਪੁਕ੍ਕਾਮਨਗਰੇ ਕਤਾ. ਚਤੁਭਾਣਵਾਰਸ੍ਸ ਅਟ੍ਠਕਥਾ, ਮਹਾਸਾਰਪਕਾਸਿਨਿ, ਮਹਾਦੀਪਨੀ, ਸਾਰਤ੍ਥਦੀਪਨੀ, ਗਤਿਪਕਰਣਂ, ਹਤ੍ਥਾਸਾਰੋ, ਭੁਮ੍ਮਸਙ੍ਗਹੋ, ਭੁਮ੍ਮਨਿਦ੍ਦੇਸੋ, ਦਸਵਤ੍ਥੁਕਾਯਵਿਰਤਿਟੀਕਾ, ਚੋਦਨਾਨਿਰੁਤ੍ਤਿ, ਵਿਭਤ੍ਤਿਕਥਾ, ਸਦ੍ਧਮ੍ਮਮਾਲਿਨਿ, ਪਞ੍ਚਗਤਿਵਣ੍ਣਨਾ, ਬਾਲਚਿਤ੍ਤ-ਪਬੋਧਨਂ, ਧਮ੍ਮਚਕ੍ਕਸੁਤ੍ਤਸ੍ਸ ਨਵਟ੍ਠਕਥਾ, ਦਨ੍ਤਧਾਤੁ-ਪਕਰਣਸ੍ਸ ਟੀਕਾ ਚ ਸਦ੍ਧਮ੍ਮੋਪਾਯਨੋ ਬਾਲਪ੍ਪਬੋਧਨਟੀਕਾ ਚ, ਜਿਨਾਲਙ੍ਕਾਰਸ੍ਸ ਨਵਟੀਕਾ ਚ, ਲਿਙ੍ਗਤ੍ਥ-ਵਿਵਰਣਂ, ਲਿਙ੍ਗਤ੍ਥ-ਵਿਨਿਚ੍ਛਯੋ, ਪਾਤਿਮੋਕ੍ਖਵਿਵਰਣਂ, ਪਰਮਤ੍ਥਕਥਾਵਿਵਰਣਂ, ਸਮਨ੍ਤਪਾਸਾਦਿਕਵਿਵਰਣਂ, ਚਤੁਭਾਣਵਾਰਟ੍ਠਕਥਾ ਵਿਵਰਣਂ, ਅਭਿਧਮ੍ਮਸਙ੍ਗਹਵਿਵਰਣਂ, ਸਚ੍ਚਸਙ੍ਖੇਪਵਿਵਰਣਂ, ਸਦ੍ਦਤ੍ਥਭੇਦਚਿਨ੍ਤਾਵਿਵਰਣਂ, ਸਦ੍ਦਵੁਤ੍ਤਿਵਿਵਰਣਂ, ਕਚ੍ਚਾਯਨਸਾਰਵਿਵਰਣਂ, ਕਚ੍ਚਾਯਨਵਿਵਰਣਂ, ਅਭਿਧਮ੍ਮਸਙ੍ਗਹਸ੍ਸਟੀਕਾਵਿਵਰਣਂ, ਮਹਾਵੇਸ੍ਸਨ੍ਤਰਜਾਤਕਸ੍ਸ ਵਿਵਰਣਂ, ਸਕ੍ਕਾਭਿਮਤਂ, ਮਹਾਵੇਸ੍ਸਨ੍ਤਰਜਾਤਕਸ੍ਸ ਨਵਟ੍ਠਕਥਾ, ਪਠਮ-ਸਮ੍ਬੋਧਿ ਚ ਲੋਕਨੇਤ੍ਤਿ, ਬੁਦ੍ਧਘੋਸਾਚਰਿਯਨਿਦਾਨਂ, ਮਿਲਿਨ੍ਦ-ਪਞ੍ਹੋ ਵਣ੍ਣਨਾ, ਚਤੁਰਾਰਕ੍ਖਾ, ਚਤੁਰਾਰਕ੍ਖਾਯਅਟ੍ਠਕਥਾ, ਸਦ੍ਦਵੁਤ੍ਤਿਪ੍ਪਕਰਣਸ੍ਸ ਨਵਟੀਕਾ ਚਾਤਿ ਇਮਾਨਿ, ਤਿਚਤ੍ਤਾਲੀਸ ਪਕਰਣਾਨਿ ਅਤ੍ਤਨੋ ਮਤਿਯਾ ਸਾਸਨਸ੍ਸ ਜਾਤਿਯਾ ਸਦ੍ਧਮ੍ਮਸ੍ਸ ਠਿਤਿਯਾ ਚ ਲਙ੍ਕਾਦੀਪਾਦੀਸੁ ਵਿਂਸੁ ਵਿਂਸੁ ਕਤਾਨਿ.

ਸਮ੍ਬੁਦ੍ਧੇ ਗਾਥਾ ਚ…ਪੇ… ਨਵਹਾਰਗੁਣਵਣ੍ਣਨਾ ਚਾਤਿ ਇਮੇ ਬੁਦ੍ਧਪਣਾਮਾਦਿਕਾ ਗਾਥਾਯੋ. ਅਤ੍ਤਨੋ ਅਤ੍ਤਨੋ ਬੁਦ੍ਧਗੁਣਪਕਾਸਨਤ੍ਥਾਯ ਅਤ੍ਤਨੋ ਚ ਪਰੇ ਚ ਅਨਨ੍ਤਪਞ੍ਞਾਪਵਤ੍ਤਨਤ੍ਥਾਯ ਚ ਪਣ੍ਡਿਤੇਹਿ ਲਙ੍ਕਾਦੀਪਾਦੀਸੁ ਵਿਂਸੁ ਵਿਂਸੁ ਕਤਾ.

[ਇਤਿ ਚੁਲ੍ਲ-ਗਨ੍ਥਵਂਸੇ ਆਯਾਚਕਾਚਰਿਯਦੀਪਕੋ ਨਾਮ ਚਤੁਤ੍ਥੋ ਪਰਿਚ੍ਛੇਦੋ.]

ਨਾਮਂ ਆਰੋਪਨਂ ਪੋਤ੍ਥਕਂ ਗਨ੍ਥਕਾਰਸ੍ਸ ਚ. ਲੇਖਂਲੇਖਾਪਨਞ੍ਚੇਵ, ਵਦਾਮਿ ਤਦਨਨ੍ਤਰਨ੍ਤਿ. ਤਤ੍ਥ ਚਤੁਰਾਸੀਤਿਯਾ ਧਮ੍ਮਕ੍ਖਨ੍ਧਸਹਸ੍ਸਾਨਿ ਪਿਟਕ, ਨਿਕਾਯਙ੍ਗ, ਵਗ੍ਗ, ਨਿਪਾਤਾਦਿਕਂ ਨਾਮਂ, ਕੇਨਾਰੋਪਿਤਂ, ਕਤ੍ਥ ਆਰੋਪਿਤਂ, ਕਦਾ ਆਰੋਪਿਤਂ, ਕਿਮਤ੍ਥਂ ਆਰੋਪਿਤਨ੍ਤਿ? ਤਤ੍ਰਾਯਂ ਪਿਵਿਸਜ੍ਜਨਾਕੇਨ ਆਰੋਪਿਤਨ੍ਤਿ ਪਞ੍ਚਸਤਖੀਣਾਸਵੇਹਿ ਆਰੋਪਿਤਂ. ਤੇਹਿ ਸਬ੍ਬਬੁਦ੍ਧਵਚਨਂ ਸਙ੍ਗਾਯਨ੍ਤਿ, ਇਦਂ ਪਿਟਕਂ, ਅਯਂ ਨਿਕਾਯੋ, ਇਦਂ ਅਙ੍ਗਂ, ਅਯਂ ਵਗ੍ਗੋ, ਅਯਂ ਨਿਪਾਤੋਤਿ. ਏਵਮਾਦਿਕਂ ਨਾਮਂ ਆਰੋਪੇਨ੍ਤਿ. ਕਤ੍ਥ ਆਰੋਪਿਤਨ੍ਤਿ? ਰਾਜਗਹੇ ਵੇਭਾਰਪਬ੍ਬਤਸ੍ਸ ਪਾਦੇ ਧਮ੍ਮਮਣ੍ਡਪ੍ਪੇ ਆਰੋਪਿਤਂ. ਕਦਾ ਆਰੋਪਿਤਨ੍ਤਿ? ਭਗਵਤੋ ਪਰਿਨਿਬ੍ਬੁਤੇ ਪਠਮਸਙ੍ਗਾਯਨਕਾਲੇ ਆਰੋਪਿਤਂ. ਕਿਮਤ੍ਥਂ ਆਰੋਪਿਤਨ੍ਤਿ? ਧਮ੍ਮਕ੍ਖਨ੍ਧਾਨਂ ਵੋਹਾਰਸੁਖਤ੍ਥਾਯ ਸੁਖਧਾਰਣਤ੍ਥਾਯ ਚ ਆਰੋਪਿਤਂ. ਸਙ੍ਗੀਤਿਕਾਲੇ ਪਞ੍ਚਸਤਾ ਖੀਣਾਸਵਾ ਤੇਸਞ੍ਚ ਧਮ੍ਮਕ੍ਖਨ੍ਧਾਨਂ ਨਾਮ ਵਗ੍ਗਨਿਪਾਤਤੋ. ਇਮਸ੍ਸ ਧਮ੍ਮਕ੍ਖਨ੍ਧਸ੍ਸ ਅਯਂ ਨਾਮੋ ਹੋਤੁ, ਇਮਸ੍ਸ ਚ ਪਕਰਣਸ੍ਸ ਅਯਂ ਨਾਮੋਤਿ, ਅਬ੍ਰਵੁਂ ਸਬ੍ਬਂ ਨਾਮਾਦਿਕਂ ਕਿਚ੍ਚਂ ਅਕਂਸੁ. ਤੇ ਖੀਣਾਸਵਾ, ਯਦਿ ਨਾਮਾਦਿਕਂ ਕਿਚ੍ਚਂ ਅਕਤਂ ਨ ਸੁਪਾਕਤਂ ਤਸ੍ਮਾ ਵੋਹਾਰਸੁਖਤ੍ਥਾਯਨਾਮਾਦਿਕਂ ਕਿਚ੍ਚਂ ਕਤਂ ਅਨਾਗਤੇ ਪਨਤ੍ਥਾਯ ਨਾਮਾਦਿਕਂ ਪਵਤ੍ਤਿਤਂ ਅਸਞ੍ਜਾਤਨਾਮੋ ਨ ਸੁਟ੍ਠੁ ਪਾਕਤੋ ਸਬ੍ਬਸੋ ਭਵੇਤਿ. ਧਮ੍ਮਕ੍ਖਨ੍ਧਾਨਂ ਨਾਮ ਦੀਪਨਾ ਨਿਟ੍ਠਿਤਾ.

ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਕੇਨ ਪੋਤ੍ਥਕੇ ਆਰੋਪਿਤਾਨਿ, ਕਦਾ ਆਰੋਪਿਤਾਨਿ, ਕਿਮਤ੍ਥਂ ਆਰੋਪਿਤਾਨੀਤਿ. ਤਤ੍ਰਾਯਂ ਵਿਸਜ੍ਜਨਾ ਕੇਨਾਰੋਪਿਤਾਨਿਤਿ? ਖੀਣਾਸਵਮਹਾਨਾਗੇਹਿ ਆਰੋਪਿਤਾਨਿ. ਕਤ੍ਥ ਆਰੋਪਿਤਾਨੀਤਿ? ਲਙ੍ਕਾਦੀਪੇ ਆਰੋਪਿਤਾਨਿ. ਕਦਾ ਆਰੋਪਿਤਾਨੀਤਿ? ਸਦ੍ਧਾਤਿਸ੍ਸਸ੍ਸਰਾਜਿਨੋ ਪੁਤ੍ਤਸ੍ਸ ਵਟ੍ਟਗਾਮਨਿ ਰਾਜਸ੍ਸ ਕਾਲੇ ਆਰੋਪਿਤਾਨਿ. ਕਿਮਤ੍ਥਂ ਆਰੋਪਿਤਾਨੀਤਿ? ਧਮ੍ਮਕ੍ਖਨ੍ਧਾਨਂ ਅਵਿਧਂਸਨਤ੍ਥਾਯ ਸਦ੍ਧਮ੍ਮਟ੍ਠਿਤਿਯਾ ਚ ਆਰੋਪਿਤਾਨਿ.

ਧਰਮਾਨੋ ਹਿ ਭਗਵਾ, ਅਮ੍ਹਾਕਂ ਸੁਗਤੋਧੀਰੋ;

ਨਿਕਾਯੇ ਪਞ੍ਚਦੇਸੇਤਿ, ਯਾਵ ਨਿਬ੍ਬਾਨਗਮਨਾ.

ਸਬ੍ਬੇਪਿ ਤੇ ਭਿਕ੍ਖੁ ਆਦਿ, ਮਨਸਾ ਵਚਸਾਹਾਰੋ;

ਸਬ੍ਬੇ ਚ ਵਾਚੁਗ੍ਗਤਾ ਹੋਨ੍ਤਿ, ਮਹਾਪਞ੍ਞਾਸਤਿਵਰਾ.

ਨਿਬ੍ਬੂਤੇ ਲੋਕਨਾਥਮ੍ਹਿ, ਤਤੋ ਵਸ੍ਸਸਤਂ ਭਵੇ;

ਅਰਿਯਾਨਰਿਯਾ ਚਾਪਿ ਚ, ਸਬ੍ਬੇ ਵਾਚੁਗ੍ਗਤਾ ਧੁਵਂ.

ਤਤੋ ਪਰਂ ਅਟ੍ਠਰਸਂ, ਦ੍ਵਿਸਤਂਵਸ੍ਸ ਗਣਨਂ;

ਸਬ੍ਬੇ ਪੁਥੁਜ੍ਜਨਾ ਚੇਵ, ਅਰਿਯਾ ਚ ਸਬ੍ਬੇਪਿਤੇ.

ਮਨਸਾਵਚਸਾਯੇਵ, ਵਾਚੁਗ੍ਗਤਾਵ ਸਬ੍ਬਦਾ;

ਦੁਟ੍ਠਗਾਮਣਿਰਞ੍ਞੋ ਚ, ਕਾਲੇ ਵਾਚੁਗ੍ਗਤਾ ਧੁਵਂ.

ਅਰਿਯਾਨਰਿਯਾਪਿ ਚ, ਨਿਕਾਯੇ ਧਾਰਣਾਸਦਾ;

ਤਤੋ ਪਰਮ੍ਹਿ ਰਾਜਾ ਚ, ਤਤੋ ਚੁਤੋ ਚ ਤੁਸਿਤੇ.

ਉਪ੍ਪਜ੍ਜਿ ਦੇਵ ਲੋਕੇ ਸੋ, ਦੇਵੇਹਿ ਪਰਿਵਾਰਿਤੋ;

ਸਦ੍ਧਾ ਤਿਸ੍ਸੋਤਿ ਨਾਮੇਨ, ਤਸ੍ਸ ਕਨਿਟ੍ਠਕੋ ਹਿਤੋ.

ਤਤੋ ਲਦ੍ਧਰਟ੍ਠੋ ਹੋਤਿ, ਬੁਦ੍ਧਸਾਸਨਪਾਲਕੋ.

ਤਦਾ ਕਾਲੇ ਭਿਕ੍ਖੂ ਆਸੁਂ, ਸਬ੍ਬੇ ਵਾਚੁਗ੍ਗਤਾ ਸਦਾ;

ਨਿਕਾਯੇ ਪਞ੍ਚਵੇਧੇਵ, ਯਾਵ ਰਞ੍ਞੋ ਚ ਧਾਰਣਾ;

ਤਤੋ ਚੁਤੋ ਸੋ ਰਾਜਾ ਚ, ਤੁਸ੍ਸੀਤੇ ਉਪਪਜ੍ਜਤਿ;

ਦੇਵਲੋਕੇਟ੍ਠਿਤੋ ਸਨ੍ਤੋ, ਤਦਾ ਵਾਚੁਗ੍ਗਤਾ ਤਤੋ.

ਤਸ੍ਸ ਪੁਤ੍ਤਾਪਿ ਅਹੇਸੁਂ, ਅਨੇਕਾ ਵਰਜ੍ਜਂ ਗਤਾ;

ਅਨੁਕ੍ਕਮੇਨ ਚੁਤਤੇ, ਦੇਵਲੋਕਂ ਗਤਾ ਧੁਵਂ;

ਤਦਾਪਿਤੇ ਸਬ੍ਬੇ ਭਿਕ੍ਖੂ, ਵਾਚੁਗ੍ਗਤਾਵ ਸਬ੍ਬਦਾ;

ਨਿਕਾਯੇ ਪਞ੍ਚਵਿਧੇਵ, ਧਾਰਣਾਵਸਤਿਮਤਾ.

ਤਤੋ ਪਰਂ ਪੋਤ੍ਥਕੇਸੁ, ਨਿਕਾਯਾ ਪਞ੍ਚ ਪਿਟ੍ਠਿਤਾ;

ਤਦਾ ਅਟ੍ਠਕਥਾ ਟੀਕਾ, ਸਬ੍ਬੇ ਗਨ੍ਥਾ ਪੋਤ੍ਥਕੇ ਗਤਾ;

ਸਬ੍ਬੇ ਪੋਤ੍ਥੇਸੁ ਯੇ ਗਨ੍ਥਾ, ਪਾਲ਼ਿ ਅਟ੍ਠਕਥਾ ਟੀਕਾ;

ਸਂਟ੍ਠਿਤਾਸਂ ਠਿਤਾ ਹੋਨ੍ਤਿ, ਸਬ੍ਬੇਪਿ ਨੋ ਨ ਸਨ੍ਤਿਤੇ.

ਤਦਾ ਤੇ ਪੋਤ੍ਥਕੇਯੇਵ, ਨਿਕਾਯਾ ਪਿਠਿਤਾ ਖਿਲਾ;

ਤਦਾ ਅਟ੍ਠਕਥਾਦੀਨਿ, ਭਵਨ੍ਤੀਤਿ ਵਦਨ੍ਤਿ ਚ.

ਲਙ੍ਕਾਦੀਪਸ੍ਸ ਰਞ੍ਞੋਵ, ਸਦ੍ਧਾ ਤਿਸ੍ਸਸ੍ਸ ਰਾਜਿਨੋ.

ਪੁਤ੍ਤਕੋ ਲਙ੍ਕਾਦੀਪਸ੍ਸ, ਇਸ੍ਸਰੋ ਧਮ੍ਮਿਕੋ ਵਰੋ;

ਤਦਾ ਖੀਣਾਸਵਾ ਸਬ੍ਬੇ, ਓਲੋਕੇਨ੍ਤਿ ਅਨਗਤੇ.

ਖੀਣਾਸਵਾ ਪਸ੍ਸਨ੍ਤਿ ਤੇ, ਦੁਪਞ੍ਞੇਵ ਪੁਥੁਜ੍ਜਨੇ;

ਸਬ੍ਬੇਪਿ ਤੇ ਭਿਕ੍ਖੂ ਆਸੁਂ, ਬਹੁਂਤਰਾ ਪੁਥੁਜ੍ਜਨਾ;

ਨ ਸਕ੍ਖਿਸ੍ਸਨ੍ਤਿ ਤੇ ਪਞ੍ਚ, ਨਿਕਾਯੇ ਵਾਚੁਗ੍ਗਤਂ ਇਤਿ;

ਪੋਤ੍ਥਕੇਸੁ ਸਬ੍ਬੇ ਪਞ੍ਚ, ਆਰੋਪੇਨ੍ਤਿ ਖੀਣਾਸਵਾ.

ਸਦ੍ਧਮ੍ਮਟ੍ਠਿਤਿ ਚਿਰਤ੍ਤਾਯ, ਜਨਾਨਂ ਪੁਞ੍ਞਤ੍ਥਾਯ ਚ;

ਤਤੋ ਪਟ੍ਠਾਯਤੇ ਸਬ੍ਬੇ, ਨਿਕਾਯਾ ਹੋਨ੍ਤਿ ਪੋਤ੍ਥਕੇ;

ਅਟ੍ਠਕਥਾ ਟੀਕਾ ਸਬ੍ਬੇ, ਤੇ ਹੋਨ੍ਤਿ ਪੋਤ੍ਥਕੇਟ੍ਠਿਤਾ.

ਤਤੋ ਪਟ੍ਠਾਯਤੇ ਸਬ੍ਬੇ, ਭਿਕ੍ਖੁ ਆਦਿ ਮਹਾਗਣਾ;

ਪੋਤ੍ਥਕੇਸੁ ਠਿਤੇਯੇਵ, ਸਬ੍ਬੇ ਪਸ੍ਸਨ੍ਤਿ ਸਬ੍ਬਦਾ.

[ਪੋਤ੍ਥਕੇ ਆਰੋਪਨ ਦੀਪਕਾ ਨਿਟ੍ਠਿਤਾ.]

ਯੋ ਕੋਚਿ ਪਣ੍ਡਿਤੋ ਧੀਰੋ, ਅਟ੍ਠਕਥਾਦਿਕਂ ਗਨ੍ਥਂ ਕਰੋਤਿ ਵਾ ਕਾਰਾਪੇਤਿ ਵਾ, ਤਸ੍ਸ ਅਨਨ੍ਤਕੋ ਹੋਤਿ ਪੁਞ੍ਞਸਂਚਯੋ, ਅਨਨ੍ਤਕੋ ਹੋਤਿ ਪੁਞ੍ਞਾਨਿਸਂਸੋ. ਚਤੁਰਾਸੀਤਿ ਚੇਤਿਯਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਬੁਦ੍ਧਰੂਪਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਬੋਧਿਰੁਕ੍ਖਸਹਸ੍ਸਰੋਪਨਸਦਿਸੋ, ਚਤੁਰਾਸੀਤਿ ਵਿਹਾਰਸਹਸ੍ਸ ਕਰਣਸਦਿਸੋ, ਯੋ ਚ ਬੁਦ੍ਧਵਚਨਮਞ੍ਜੂਸਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਬੁਦ੍ਧਵਚਨਂ ਮਣ੍ਡਨਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਬੁਦ੍ਧਵਚਨਂ ਲੇਖਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਪੋਤ੍ਥਕਂ ਵਾ, ਯੋ ਚ ਪੋਤ੍ਥਕਮੂਲਂ ਵਾ, ਦੇਤਿ ਵਾ ਦਾਪੇਤਿ ਵਾ, ਯੋ ਚ ਤੇਲਂ ਵਾ ਚੁਣ੍ਣਂ ਵਾ, ਧਞ੍ਞਂ ਵਾ ਪੋਤ੍ਥਕਭਞ੍ਜਨਤ੍ਥਾਯ ਯਂ ਕਿਞ੍ਚਿ ਨਿਤ੍ਥਂ ਵਾ ਪੋਤ੍ਥਕਛਿਦ੍ਦੇ ਆਵੁਨਤ੍ਥਾਯ, ਯਂ ਕਿਞ੍ਚਿ ਸੁਤ੍ਤਂ ਵਾ ਕਟ੍ਠਫਲਕਦ੍ਵਯਂ ਵਾ ਪੋਤ੍ਥਕਂ ਪੁਟਨਤ੍ਥਾਯ ਯਂ ਕਿਞ੍ਚਿ ਵਤ੍ਥਂ ਵਾ, ਪੋਤ੍ਥਕ-ਬਨ੍ਧਨਤ੍ਥਾਯ, ਯਂ ਕਿਞ੍ਚਿ ਯੋਤ੍ਤਂ ਵਾ ਪੋਤ੍ਥਕਲਾਪ ਪੂਟਨਤ੍ਥਾਯ ਯਂ ਕਿਞ੍ਚਿ ਥਵਿਕਂ ਦੇਤਿ ਵਾ ਦਾਪੇਤਿ ਵਾ.

ਯੋ ਚ ਹਰਿਤਾਲੇਨ ਵਾ ਮਨੋਸਿਲਾਯ ਵਾ, ਸੁਵਣ੍ਣੇਨ ਵਾ ਰਜਤੇਨ ਵਾ ਪੋਤ੍ਥਕਮਣ੍ਡਨਂ ਵਾ ਕਟ੍ਠਫਲਕਮਣ੍ਡਨਂ ਵਾ ਕਰੋਤਿ ਵਾ ਕਾਰਾਪੇਤਿ ਵਾ, ਤਸ੍ਸ ਅਨਨ੍ਤਕੋ ਹੋਤਿ ਪੁਞ੍ਞਸਂਚਯੋ, ਅਨਨ੍ਤਕੋ ਹੋਤਿ ਪੁਞ੍ਞਾਨਿਸਂਸੋ. ਚਤੁਰਾਸੀਤਿ ਚੇਤਿਯਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਵਿਹਾਰਸਹਸ੍ਸ ਕਰਣਸਦਿਸੋ.

ਭਵੇ ਨਿਬ੍ਬਤ੍ਤਮਾਨੋ ਸੋ, ਸੀਲਗੁਣਮੁਪਾਗਤਾ;

ਮਹਾ ਤੇਜੋ ਸਦਾ ਹੋਤਿ, ਸੀਹਨਾਦੋ ਵਿਸਾਰਦੋ.

ਆਯੁਵਣ੍ਣਬਲੁਪ੍ਪੇਤੋ, ਧਮ੍ਮਕਾਮੋ ਭਵੇ ਸਦ੍ਦਾ;

ਦੇਵਮਨੁਸ੍ਸਲੋਕੇਸੁ, ਮਹੇਸਕ੍ਖੋ ਅਨਾਮਯੋ.

ਭਵੇ ਨਿਬ੍ਬਤ੍ਤਮਾਨੋ ਸੋ, ਪਞ੍ਞਵਾ ਸੁਸਮਾਹਿਤੋ;

ਅਧਿਪਚ੍ਚ ਪਰਿਵਾਰੋ, ਸਬ੍ਬਸੁਖਾਧਿ ਗਚ੍ਛਤਿ.

ਸਦ੍ਦੋਹੀਰਿਮਾ ਵਦਞ੍ਞੂ, ਸਂਵਿਗ੍ਗ ਮਾਨਸੋ ਭਵੇ;

ਅਙ੍ਗਪਚ੍ਚਙ੍ਗ ਸਮ੍ਪਨ੍ਨੋ, ਆਰੋਹ ਪਰਿਣਾਹਵਾ.

ਸਬ੍ਬੇ ਸਤ੍ਤਾਪਿ ਯੋ ਲੋਕੇ, ਸਬ੍ਬਤ੍ਥ ਪੂਜਿਤਾਭਵੇ;

ਦੇਵਮਨੁਸ੍ਸ ਸਞ੍ਚਰੋ, ਮਿਤ੍ਤਸਹਾਯ ਪਾਲਿਤੋ.

ਦੇਵਮਨੁਸ੍ਸ ਸਮ੍ਪਤ੍ਤਿਂ, ਅਨੁਭੋਤਿ ਪੁਨਪ੍ਪੁਨਂ;

ਅਰਹਤ੍ਤ ਫਲਂ ਪਤ੍ਤੋ, ਨਿਬ੍ਬਾਨਂ ਪਾਪੁਣਿਸ੍ਸਤਿ.

ਪਟਿਸਮ੍ਭਿਦਾ ਚਤਸ੍ਸੋ, ਅਭਿਞ੍ਞਾ ਛਬ੍ਬਿਧੇ ਵਰੇ;

ਵਿਮੋਕ੍ਖੇ ਅਟ੍ਠਕੇ ਸੇਟ੍ਠੇ, ਗਮਿਸ੍ਸਤਿ ਅਨਾਗਤੇ.

ਤਸ੍ਮਾਹਿ ਪਣ੍ਡਿਤੋ ਪੋਸੋ, ਸਂਪਸ੍ਸਂ ਹਿਤ ਮਤ੍ਤਨੋ;

ਕਾਰੇਯ੍ਯ ਸਾਮ ਗਨ੍ਥੇ ਚ, ਅਞ੍ਞੇ ਚਾਪਿ ਕਾਰਾਪਯੇ.

ਪੋਤ੍ਥਕੇ ਚ ਠਿਤੇ ਗਨ੍ਥੇ, ਪਾਲ਼ਿ ਅਟ੍ਠਕਥਾਦਿਕੇ;

ਧਮ੍ਮਮਞ੍ਜੂਸਾ ਗਨ੍ਥੇ ਚ, ਲੇਖਂ ਕਰੇ ਕਾਰਾਪਯੇ.

ਪੋਤ੍ਥਕਂ ਪੋਤ੍ਥਕਮੂਲਞ੍ਚ, ਤੇਸਂ ਚੁਲ੍ਲਥੂਸਮ੍ਪਿ ਚ;

ਪਿਲੋਤਿਕਾਦਿਕਂ ਸੁਤ੍ਤਂ, ਕਟ੍ਠਫਲਦ੍ਵਯਮ੍ਹਿ ਚ.

ਧਮ੍ਮਬਨ੍ਧਨਤ੍ਥਾਯ ਚ, ਯਂ ਕਿਞ੍ਚਿ ਮਹਗ੍ਘਂ ਵਤ੍ਥਂ;

ਧਮ੍ਮਬਨ੍ਧਨਯੋਤ੍ਤਞ੍ਚ, ਯਂ ਕਿਞ੍ਚਿ ਥਵਿਕਮ੍ਪਿ ਚ.

ਦਦੇਯ੍ਯ ਧਮ੍ਮਖੇਤ੍ਤਮ੍ਹਿ, ਵਿਪ੍ਪਸ੍ਸਨ੍ਨੇਨ ਚੇਤਸਾ;

ਅਞ੍ਞੋ ਚਾਪਿ ਦਜ੍ਜਾਪੇਯ੍ਯ, ਮਿਤ੍ਤਸਹਾਯਬਨ੍ਧਵੇਤਿ.

ਗਨ੍ਥਾਕਰਲੇਖਲੇਖਾਪਨਾਨਿਸਂਸ ਦੀਪਨਾ ਨਿਟ੍ਠਿਤਾ.

[ਇਤਿ ਚੂਲਗਨ੍ਥਵਂਸੇ ਪਕਿਣ੍ਣਕਦੀਪਕੋ ਨਾਮ ਪਞ੍ਚਮੋ ਪਰਿਚ੍ਛੇਦੋ.]

ਸੋਹਂ ਹਂਸਾਰਟ੍ਠ ਜਾਤੋ, ਨਨ੍ਤਪਞ੍ਞੋਤਿ ਵਿਸ੍ਸੁਤੋ

ਸਦ੍ਧਾ ਸੀਲ ਵੀਰਪ੍ਪੇਤੋ, ਧਮ੍ਮਰਸਂ ਗਵੇਸਨੋ.

ਸੋਹਂ ਤਤੋ ਗਨ੍ਤ੍ਵਾ ਚਿਮਂ, ਜਿਨ ਨਵਂ ਯਂ ਪੂਰਂ;

ਸਬ੍ਬ ਧਮ੍ਮਂ ਵਿਚਿਨਨ੍ਤੋ, ਵੀਸਤਿ ਵਸ੍ਸਮਾਗਤੋ.

ਸਬ੍ਬ ਧਮ੍ਮਂ ਵਿਸ੍ਸੇਜ੍ਜੇਨ੍ਤੋ, ਕਿਕਾਰੇ ਨੇਵ ਭਿਕ੍ਖੁਨੋ;

ਛ ਵਸ੍ਸਾਨਂ ਗਣਂ ਭਿਤ੍ਵਾ, ਕਾਮਾਨਂ ਅਭਿਮਦ੍ਦਨਂ.

ਸਨ੍ਤਿ ਸਭਾ ਚ ਨਿਬ੍ਬਾਨਂ, ਗਵੇਸਿਞ੍ਚ ਪੁਨਪ੍ਪੁਨਂ;

ਵਸਨ੍ਤੋਹਂ, ਵਨਾਰਮ੍ਮਂ, ਪਿਟਕਤ੍ਤਯ ਸਙ੍ਗਹਂ;

ਗਨ੍ਥਵਂਸਂ ਇਮਂ ਖੁਦ੍ਦਂ, ਅਰਿਯਸਙ੍ਘਦਾਸਕਨ੍ਤਿ.

ਇਤਿ ਪਾਮੋਜ੍ਜਤ੍ਥਾਯ ਅਰਞ੍ਞਵਾਸਿਨਾ, ਨਨ੍ਦਪਞ੍ਞਾਚਰਿਯੇਨ ਕਤੋ ਚੂਲ਼ਗਨ੍ਥਵਂਸੋ ਨਿਟ੍ਠਿਤੋ.

ਧਮ੍ਮਵਟਂਸਕਨਾਮੇਨ ਵਿਸੁਤੋ ਥੇਰੋ, ਯਂ ਪਕਰਣਂ ਲਿਕ੍ਖਿਤਂ ਤਂ ਪਰਿਪੁਣ੍ਣਂ ਤੇਨ ਪੁਞ੍ਞੇਨ ਤਂ ਪਿਟਕਂ ਪਰਿਸਿਪ੍ਪਂ ਪਰਿਨਿਟ੍ਠਿਤਂ.

ਮਮੇਵ ਸਿਸ੍ਸਸਮੂਹਾਨਞ੍ਚ ਪਰਿਸਿਪ੍ਪਂ ਪਰਿਨਿਟ੍ਠਿਤਂ. ਤਵੇ ਸਿਸ੍ਸਾਨੂ ਸਿਸ੍ਸਾਨਿ ਚ, ਪਰਿਸਿਪ੍ਪਂ ਪਰਿਨਿਟ੍ਠਿਤਂ.