📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸਾਸਨਵਂਸਪ੍ਪਦੀਪਿਕਾ

ਬੁਦ੍ਧਂ ¶ ਸੁਮਾਲੀ ਦ੍ਵਿਪਦੁਤ੍ਤਮੋ ਤਮੋ,

ਹਨ੍ਤ੍ਵਾਨ ਬੋਧੇਸਿਧ ਪਙ੍ਕਜਂ ਕਜਂ;

ਮਗ੍ਗਗ੍ਗਸੇਲਮ੍ਹਿ ਸੁਞਟ੍ਠਿਤੋ ਠਿਤੋ,

ਸੋ ਮਂ ਚਿਰਂ ਪਾਤੁ ਸੁਖਂ ਸਦਾ ਸਦਾ.

ਸੀਹਲ਼ਦ੍ਦੀਪਤੋਯੇਵ,

ਆਗਤੇਹਿ ਦਿਸਨ੍ਤਰੇ;

ਭਿਕ੍ਖੂਹਿ ਯਾਚਿਤੋ ਕਸ੍ਸਂ,

ਸਾਸ੍ਨਵਂਸਪ੍ਪਦੀਪਿਕਂ.

ਕਾਮਞ੍ਚ ਪੋਰਾਣੇਹਿ ਯਾ,

ਸਾਸ੍ਨਵਂਸਪ੍ਪਦਿਪਿਕਾ;

ਵਿਤ੍ਥਾਰ ਵਾਚਨਾਮਗ੍ਗਾ,

ਵਿਰਚਿਤਾ ਵਿਨਿਚ੍ਛਯਾ.

ਸਾ ¶ ਪਨ ਮਰਮ੍ਮਭਾਸਾਯ,

ਕਤਤ੍ਤਾਯੇਵ ਏਤੇਸਂ;

ਦੀਪਨ੍ਤਰਨਿਵਾਸਿਨਂ,

ਵਹਾਤਿ ਸੁਟ੍ਠੁਨਾਤ੍ਥਂ.

ਤਸ੍ਮਾ ਹਿ ਮੂਲਭਾਸਾਯ,

ਕਰਿਸ੍ਸਾਮਿ ਅਹਂ ਹਵੇ;

ਸਂਸਨ੍ਦਿਤ੍ਵਾਨ ਗਨ੍ਥੇਹਿ,

ਤਂ ਸਲ੍ਲਕ੍ਖੇਨ੍ਤੁ ਸਾਧਵੋਤਿ.

ਤਤ੍ਰਾਯਂਮਾਤਿਕਾ –

੧. ਨਵਟ੍ਠਾਨਾਗਤਸਾਸਨਵਂਸਕਥਾਮਗ੍ਗੋ,

੨. ਸੀਹਲ਼ਦੀਪਿਕਸਾਸਨਵਂਸਕਥਾਮਗ੍ਗੋ,

੩. ਸੁਵਣ੍ਣਭੂਮਿਸਾਸਨਵਂਸਕਥਾਮਗ੍ਗੋ,

੪. ਯੋਨਕਰਟ੍ਠਸਾਸਨਵਂਸਕਥਾਮਗ੍ਗੋ,

੫. ਵਨਵਾਸੀਰਟ੍ਠਸਾਸਨਵਂਸਕਥਾਮਗ੍ਗੋ,

੬. ਅਪਰਨ੍ਤਰਟ੍ਠਸਾਸਨਵਂਸਕਥਾਮਗ੍ਗੋ,

੭. ਕਸ੍ਮੀਰਗਨ੍ਧਾਰਰਟ੍ਠਸਾਸਨਵਂਸਕਥਾਮਗ੍ਗੋ,

੮. ਮਹਿਂਸਕਰਟ੍ਠਸਾਸਨਵਂਸਕਥਾਮਗ੍ਗੋ,

੯. ਮਹਾਰਟ੍ਠਸਾਸਨਵਂਸਵਥਾਮਗ੍ਗੋ,

੧੦. ਚਿਨਰਟ੍ਠਸਾਸਨਵਂਸਕਥਾਮਗ੍ਗੋਚਾਤਿ.

੧. ਨਵਟ੍ਠਾਨਾਗਤਸਾਸਨਵਂਸਕਥਾਮਗ੍ਗੋ

੧. ਤਤ੍ਥ ਚ ਨਵਟ੍ਠਾਨਾਗਤਸਾਸਨਵਂਸਕਥਾਮਗ੍ਗੋ ਏਵਂ ਵੇਦਿਤਬ੍ਬੋ. ਅਮ੍ਹਾਕਞ੍ਹਿ ਭਗਵਾ ਸਮ੍ਮਾਸਮ੍ਬੁਦ੍ਧੋ ਵੇਨੇਯ੍ਯਾਨਂ ਹਿਤਤ੍ਥਾਯ ਹਤ੍ਥਗਤਂ ਸੁਖਂ ਅਨਾਦਿਯਿਤ੍ਵਾ ਦੀਪਙ੍ਕਰਸ੍ਸ ਭਗਵਤੋ ਪਾਦਮੂਲੇ ਬ੍ਯਾਕਰਣਂ ਨਾਮ ਮਞ੍ਜੂਸਕ ਪੁਪ੍ਫਂ ਪਿਲਨ੍ਧਿਤ੍ਵਾ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਖ੍ਯੇ ਯਾਨਿ ਅਨੇਕਾਸੁ ਜਾਤੀਸੁ ਅਤ੍ਤਨੋ ਖੇਦਂ ਅਨਪੇਕ੍ਖਿਤ੍ਵਾ ਸਮਤਿਂਸਪਾਰਮਿਯੋ ¶ ਪੂਰੇਤ੍ਵਾ ਵੇਸ੍ਸਨ੍ਤਰਤ੍ਤਭਾਵਤੋ ਚਵਿਤ੍ਵਾ ਤੁਸਿਤਪੁਰੇ ਦੇਵਸੁਖਂ ਅਨੁਭਵਿ.

ਤਦਾ ਦੇਵੇਹਿ ਉਯ੍ਯੋਜਿਯਮਾਨੋ ਹੁਤ੍ਵਾ ਕਪਿਲਵਤ੍ਥੁਮ੍ਹਿ ਹੋਸਮਤਰਞ੍ਞਾ ਪਭੁਤਿ ਅਸਮ੍ਭਿਨ੍ਨਾਤ੍ਤਿਯਵਂਸਿਕਸ੍ਸ ਸੁਦ੍ਧੋ ਧਨਸ੍ਸਨਾਮ ਮਹਾਰਞ੍ਞੋ ਅਗ੍ਗਮਹੇਸਿਯਾ ਅਸਮ੍ਭਿਨ੍ਨਾਤ੍ਤਿਯਵਂ ਸਿਕਾਯ ਮਾਯਾਯ ਕੁਚ੍ਛੀਸ੍ਮਿਂ ਆਸਾਲ਼ਿਮਾਸਸ੍ਸ ਪੁਣ੍ਣਮਿਯਂ ਗੁਰੁਵਾਰੇ ਪਟਿਸਨ੍ਧਿਂ ਗਹੇਤ੍ਵਾ ਅਸਮਾਸਚ੍ਚਯੇਨ ਵੇਸਾਖਮਾਸਸ੍ਸ ਪੁਣ੍ਣਮਿਯਂ ਸੁਕ੍ਕਵਾਰੇ ਵਿਜਾਯਿਤ੍ਵਾ ਸੋਲ਼ਸਵਸ੍ਸਿਕਕਾਲੇ ਰਜ੍ਜਸਮ੍ਪਤ੍ਤਿਂ ਪਤ੍ਵਾ ਏਕੂਨਤਿਂਸਵਸ੍ਸਾਨਿ ਅਤਿਕ੍ਕਮਿਤ੍ਵਾ ਮਙ੍ਗਲਉਯ੍ਯਾਨਂ ਨਿਕ੍ਖਮਨਕਾਲੇ ਦੇਵੇਹਿ ਦਸ੍ਸਿਤਾਨਿ ਚਤ੍ਤਾਰਿ ਨਿਮਿਤ੍ਤਾਨਿ ਪਸ੍ਸਿਤ੍ਵਾ ਸਂਵੇਗਂ ਆਪਜ੍ਜਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਅਨੋਮਾਯਨਾਮ ਨਦਿਯਾ ਤੀਰੇ ਭਮਰ ਵਣ੍ਣਸਨ੍ਨਿਭਾਨਿ ਕੇਸਾਨਿ ਛਿਨ੍ਦਿਤ੍ਵਾ ਦੇਵਦਤ੍ਤਿਯਕਾਸਾਵਂ ਪਟਿਚ੍ਛਾਦੇਤ੍ਵਾ ਨੇ ਰਞ੍ਜਰਾਯਨਾਮ ਨਦਿਯਾ ਤੀਰੇ ਵੇਸਾਖਮਾਸਸ੍ਸ ਪੁਣ੍ਣਮਿਯਂ ਪਚ੍ਚੂਸਕਾਲੇ ਸੁਜਾਤਾਯਨਾਮ ਸੇਟ੍ਠਿਧੀਤਾਯ ਦਿਨ੍ਨਂ ਪਾਯਾਸਂ ਏਕੂਨਪਣ੍ਣਾਸਵਾਰੇਨ ਪਰਿਭੁਞ੍ਜਿਤ੍ਵਾ ਪੁਰਿਮਿਕਾਨਂ ਸਮ੍ਮਾਸਮ੍ਬੁਦ੍ਧਾਨਂ ਧਮ੍ਮਤਾਯ ਸੁਵਣ੍ਣਪਾਤਿਂ ਨਦਿਯਂ ਓਤਾਰੇਤ੍ਵਾ ਮਹਾਬੋਧਿਮਣ੍ਡਂ ਉਪਸਙ੍ਕਮਿਤ੍ਵਾ ਅਪਰਾਜਿਤਪਲ੍ਲਙ੍ਕੇ ਨਿਸੀਦਿਤ੍ਵਾ ਅਨਮਤਗ੍ਗਸਂ ਸਾਰਤੋ ਪਟ੍ਠਾਯ ਅਤ੍ਤਾਨਂ ਛਾਯਾ ਵਿਯ ਅਨੁਯਨ੍ਤਾਨਂ ਅਨੇਕਸਤਕਿਲੇਸਵੇਰੀਨਂ ਸੀਸਂ ਚਤੂਹਿ ਮਗ੍ਗਸਤ੍ਥੇਹਿ ਛਿਨ੍ਦਿਤ੍ਵਾ ਤਿਲੋਕਗ੍ਗਮਹਾਧਮ੍ਮਰਾਜਤ੍ਤਂ ਪਤ੍ਵਾ ਪਞ੍ਚਤਾਲੀਸਵਸ੍ਸਾਨਂ ਤੇਸੁ ਤੇਸੁ ਠਾਨੇਸੁ ਤੇਸਂ ਤੇਸਂ ਸਤ੍ਤਾਨਂ ਮਹਾਕਰੁਣਾਸਮਾਪਤ੍ਤਿਜਾਲਂ ਪਤ੍ਥਾਰੇਤ੍ਵਾ ਦੇਸਨਾਞਾਣਂ ਵਿਜਮ੍ਭੇਤ੍ਵਾ ਧਮ੍ਮਂ ਦੇਸੇਤ੍ਵਾ ਸਾਸਨਂ ਪਤਿਟ੍ਠਾਪੇਸਿ. ਪਤਿਟ੍ਠਾਪੇਤ੍ਵਾ ਚ ਪਨ ਅਸੀਤਿਵਸ੍ਸਾਯੁਕਕਾਲੇ ਵਿਜ੍ਜੋਤਯਿਤ੍ਵਾ ਨਿਬ੍ਬਾਯਨਪ੍ਪ ਦਾਪਜਾਲਂ ਵਿਯ ਅਨੁਪਾਦਿਸੇਸਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਮਚ੍ਚੁ ਧਮ੍ਮਸ੍ਸ ਚ ਨਾਮ ਤੀਸੁ ਲੋਕੇਸੁ ਅਤਿਮਮਾਯਿਤਬ੍ਬੋ ਏਸ, ਅਤਿਗਰੁਕਾਤਬ੍ਬੋ ਏਸ, ਅਤਿਭਾਯਿਤਬ੍ਬੋ ਏਸਾਤਿ ਵਿਜਾਨਨਸਭਾਵੋ ਨਤ੍ਥਿ. ਭਗਵਨ੍ਤਂਯੇਵ ਤਾਵ ਤਿਲੋਕਗ੍ਗਪੁਗ੍ਗਲਂ ਆਦਾਯ ¶ ਗਚ੍ਛਤਿ, ਕਿਂਮਙ੍ਗਂ ਪਨ ਅਮ੍ਹੇ ਯੇਵਾ ਤੇਵਾ, ਅਹੋਵਤਅਚ੍ਛਰਿਯਾ ਸਙ੍ਖਾਰਧਮ੍ਮੋਤਿ. ਹੋਨ੍ਤਿ ਚੇਤ੍ਥ–

ਮਚ੍ਚੁਧਮ੍ਮੋ ਚ ਨਾਮੇਸ,

ਨਿਲ੍ਲਜ੍ਜੋ ਚ ਅਨੋਤ੍ਤਪ੍ਪੀ;

ਤਿਲੋਕਗ੍ਗਂਵ ਆਦਾਯ,

ਗਚ੍ਛੀ ਪਗੇਵ ਅਞ੍ਞੇਸੁ.

ਯਥਾ ਗੋਘਾਤਕੋ ਚੋਰੋ,

ਮਾਰੇਤੁਂਯੇਵ ਆਰਭਿ;

ਗੋਣਂ ਲਦ੍ਧਾਨ ਲੋਕਮ੍ਹਿ,

ਪਯੋਜਨਂਵ ਏਤ੍ਤਕਂ.

ਤਥੇਵ ਮਚ੍ਚੁਰਾਜਾ ਚ,

ਹਿਨ੍ਦਗੂਨਂ ਗੁਣਂ ਇਧ;

ਨ ਵਿਜਾਨਾਤਿ ਏਸੋ ਹਿ,

ਮਾਰੇਤੁਂਯੇਵ ਆਰਭੀਤਿ.

ਸਤ੍ਤਾਹਪਰਿਨਿਬ੍ਬੁਤੇ ਚ ਭਗਵਤਿ ਆਯਸ੍ਮਾ ਮਹਾਕਸ੍ਸਪੋ ਤਿਯਡ੍ਢਸਤਾਧਿਕੇਹਿ ਸਹਸ੍ਸਮਤ੍ਤੇਹਿ ਭਿਕ੍ਖੂਹਿ ਸਦ੍ਧਿ ਪਾਵਾਤੋ ਕੁਸੀਨਾਰਾਯਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਭਗਵਾ ਸਮ੍ਮਾਸਮ੍ਬੁਦ੍ਧੋ ਪਰਿਨਿਬ੍ਬੁਤੋਤਿ ਸੁਤ੍ਵਾ ਅਵੀਤਸੋਕ ਭਿਕ੍ਖੂ ਰੋਦਨ੍ਤੇ ਦਿਸ੍ਵਾ ਵੁਦ੍ਧਪਬ੍ਬਜਿਤੋ ਸੁਭਦ੍ਦਾਨਾਮ ਭਿਕ੍ਖੁ ਏਵਂ ਵਦਤਿ– ਮਾ ਆਵੁਸੋ ਪਰਿਦੇਵਿਤ੍ਥ, ਨਤ੍ਥੇਤ੍ਥ ਸੋਚਿਤਬ੍ਬੋਨਾਮਕੋਚਿ, ਪੁਬ੍ਬੇ ਮਯਂ ਭਵਾਮ ਸਮਣੇਨ ਗੇ,ਭਮੇਨ ਉਪਦ੍ਦੁਤਾ– ਇਦਂ ਕਰੋਥ ਇਦਂ ਤੁਮ੍ਹਾਕਂ ਕਪ੍ਪਤਿ, ਮਾ ਇਦਂ ਕਰਿਤ੍ਥ ਨ ਇਦਂ ਤੁਮ੍ਹਾਕਂ ਕਪ੍ਪਤੀਤਿ, ਸੇਯ੍ਯਥਾਪਿ ਇਣਸਾਧਿਕੇਨ ਦਾਸੋਤਿ, ਇਦਾਨਿ ਪਨ ਮਯਂ ਯਂ ਯਂ ਇਚ੍ਛਾਮ, ਤਂ ਤਂ ਸਕ੍ਕਾ ਕਾਤੁਂ, ਯਂ ਯਂ ਪਨ ਨ ਇਚ੍ਛਾਮ,ਤਂ ਤਂ ਸਕ੍ਕਾ ਅਕਾਤੁਨ੍ਤਿ. ਤਂ ਸੁਤ੍ਵਾ ਈਦਿਸਂ ਪਨ ਵੇਰੀਪੁਗ੍ਗਲਂ ਪਟਿਚ੍ਚ ਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਸਾਸਨਂ ਖਿਪ੍ਪਂ ਅਨ੍ਤਰਧਾਰੇਯ੍ਯ, ਇਦਾਨਿ ਸੁਵਣ੍ਣਕ੍ਖਨ੍ਧਸਦਿਸੋ ਸਰੀਰੋ ਸਂਵਿਜ੍ਜਮਾਨੋ ¶ ਯੇਵ ਦੁਕ੍ਖੇਨ ਨਿਪ੍ਫਾਦਿਤੇ ਸਾਸਨੇ ਮਹਾਭਯਂ ਉਪ੍ਪਜ੍ਜਿ ਚ, ਈਦਿਸੋ ਪੁਗ੍ਗਲੋ ਅਞ੍ਞਂ ਈਦਿਸਂ ਪੁਗ੍ਗਲਂ ਸਹਾਯਂ ਲਭਿਤ੍ਵਾ ਵੁਦ੍ਧਿਮਾਪਜ੍ਜਨ੍ਤੋ ਹਾਪੇਤੁਂ ਸਕ੍ਕੁਣੇਯ੍ਯ ਮਞ੍ਞੇਤਿ ਚਿਤ੍ਤਕ੍ਖੇਦਂ ਪਤ੍ਵਾ ਧਮ੍ਮਸਂਵੇਗਂ ਲਭਿਤ੍ਵਾ ਇਮਂ ਭਿਕ੍ਖੁਂ ਇਧੇਵ ਸੇਤਵਤ੍ਥਂ ਨਿਵਾਸਾਪੇਤ੍ਵਾ ਸਰੀਰੇ ਭਸ੍ਮੇਨ ਵਿਕਿਰਿਤ੍ਵਾ ਬਹਿਦ੍ਧਾ ਕਰਿਸ੍ਸਾਮੀਤਿ ਚਿਨ੍ਤੇਸਿ.

ਤਦਾ ਆਯਸ੍ਮਤੋ ਮਹਾਕਸ੍ਸਪਤ੍ਥੇਰਸ੍ਸ ਏਤਦਹੋਸਿ,– ਇਦਾਨਿ ਸਮਣਸ੍ਸ ਗੋਤਮਸ੍ਸ ਸਰੀਰਂ ਸਂਵਿਜ੍ਜਮਾਨਂਯੇਵ ਪਰਿਸਾ ਵਿਵਾਦਂ ਕਰੋਨ੍ਤੀਤਿ ਮਨੁਸ੍ਸਾ ਉਪਵਦਿਸ੍ਸਨ੍ਤਿਤਿ. ਤਤੋ ਪਚ੍ਛਾ ਇਮਂ ਵਿਤਕ੍ਕਂ ਵੂਪਸਮੇਤ੍ਵਾ ਖਮਿਤ੍ਵਾ ਸਮ੍ਮਾਸਮ੍ਬੁਦ੍ਧੋ ਭਗਵਾ ਪਰਿਨਿਬ੍ਬਾਯਮਾਨੋਪਿ ਤੇਨ ਪਨ ਦੇਸਿਤੋ ਧਮ੍ਮੋ ਸਂਵਿਜ੍ਜਤਿ, ਤੇਨ ਦੇਸਿਤਸ੍ਸ ਧਮ੍ਮਸ੍ਸ ਥਿਰਂ ਪਤਿਟ੍ਠਾਪਨਤ੍ਥਾਯ ਸਙ੍ਗਾਯਿਯਮਾਨਂ ਈਦਿਸੇਹਿ ਪੁਗ੍ਗਲੇਹਿ ਸਾਸਨਂ ਨ ਅਨ੍ਤਰਧਾਯਿਸ੍ਸਤਿ, ਚਿਰਂ ਠਸ੍ਸਤਿ ਯੇਵਾਤਿ ਮਨਸਿਕਰਿਤ੍ਵਾ ਭਗਵਤੋ ਦਿਨ੍ਨਪਂਸੁ ਕੂਲਚੀਵਰਾਦਿਵਸੇਨ ਧਮ੍ਮਾਨੁਗ੍ਗਹਂ ਅਨੁਸ੍ਸਰਿਤ੍ਵਾ ਭਗਵਤੋ ਪਰਿਨਿਬ੍ਬਾਨਤੋ ਤਤਿਯੇ ਮਾਸੇ ਆਸਾਲ਼ਿਮਾਸਸ੍ਸ ਪੁਣ੍ਣਮਿਤੋ ਪਞ੍ਚਮੇ ਦਿਵਸੇ ਰਾਜਗਹੇ ਸਤ੍ਤਪਣ੍ਣਿਗੁਹਾਯਂ ਆਜਾਤਸਤ੍ਤੁਂਨਾਮ ਰਾਜਾਨਂ ਨਿਸ੍ਸਾਯ ਪਞ੍ਚਹਿ ਅਰਹਨ੍ਤ ਸਤੇਹਿ ਸਦ੍ਧਿਂ ਸਤ੍ਤਮਾਸੇਹਿ ਪਠਮਂ ਸਙ੍ਗਾਯਨਂ ਅਕਾਸਿ.

ਤਦਾ ਅਟ੍ਠਚਤ੍ਤਾਲੀਸਾਧਿਕਸਤਕਲਿਯੁਗਂ ਅਨਵਸੇਸਤੋ ਅਪਨੇਤ੍ਵਾ ਕਲਿਯੁਗੇਨ ਸਾਸਨਂ ਸਮਂ ਕਤ੍ਵਾ ਠਪੇਸਿ. ਯਦਾ ਪਨ ਅਜਾਤਸਤ੍ਤੁ ਰਞ੍ਞੋ ਰਜ੍ਜਂ ਪਤ੍ਵਾ ਅਟ੍ਠਵਸ੍ਸਾਨਿ ਅਹੇਸੁਂ, ਤਦਾ ਮਰਮ੍ਮਰਟ੍ਠੇ ਤਙ੍ਕੋਸਙ੍ਗਤ੍ਵਪੁਰੇ ਜਮ੍ਬੁਦੀਪਧਜਸ੍ਸਨਾਮ ਰਞ੍ਞੋ ਰਜ੍ਜਂ ਪਤ੍ਵਾ ਅਤਿਰੇਕਪਞ੍ਚਵਸ੍ਸਾਨਿ ਅਹੇਸੁਨ੍ਤਿ.

ਇਮਿਸ੍ਸਞ੍ਚ ਪਠਮਸਙ੍ਗੀਤਿਯਂ ਆਯਸ੍ਮਾ ਮਹਾਕਸ੍ਸਪੋ ਆਯਸ੍ਮਾ ਉਪਾਲਿ ਆਯਸ੍ਮਾ ਆਨਨ੍ਦੋ ਆਯਸ੍ਮਾ ਅਨੁਰੁਦ੍ਧੋ ਚਾਤਿ ਏਵਮਾਦਯੋ ਪਞ੍ਚਸਤਪ੍ਪਮਾਣਾ ਮਹਾਥੇਰਾ ਪਠਮਂ ਸਙ੍ਗਾਯਿਤ੍ਵਾ ਸਾਸਨਂ ਅਨੁਗ੍ਗਹੇਸੁਂ. ਏਵਂ ¶ ਸੁਭਦ੍ਦਸ੍ਸ ਦੁਟ੍ਠਪਬ੍ਬਜਿਤਸ੍ਸ ਦੁਟ੍ਠਵਚਨਂ ਸਾਸਨਸ੍ਸ ਅਨੁਗ੍ਗਹੇ ਕਾਰਣਂਨਾਮ ਅਹੋਸਿ. ਸੁਭਦ੍ਦੋ ਚ ਨਾਮ ਦੁਟ੍ਠਪਬ੍ਬਜਿਤੋ ਆਤੁਮਾਨਗਰਵਾਸੀ ਅਹੋਸਿ ਕਪ੍ਪਕਕੁਲਿਕੋ. ਸੋ ਯਦਾ ਭਗਵਾ ਆਤੁਮਾਨਗਰਂ ਗਚ੍ਛਤਿ, ਤਦਾ ਅਤ੍ਤੇਨੋ ਪੁਤ੍ਤੇ ਦ੍ਵੇ ਸਾਮਣੇਰੇ ਕਪ੍ਪਕਕਮ੍ਮਂ ਕਾਰਾਪੇਤ੍ਵਾ ਲਦ੍ਧੇਹਿ ਤਣ੍ਡੁਲਤੇਲਾਦੀਹਿ ਵਤ੍ਥੂਹਿ ਯਾਗੁਂ ਪਚਿਤ੍ਵਾ ਸਸਙ੍ਘਸ੍ਸ ਬੁਦ੍ਧਸ੍ਸ ਅਦਾਸਿ. ਭਗਵਾ ਪਨ ਤਾਨਿ ਅਪ੍ਪਟਿਗ੍ਗਹੇਤ੍ਵਾ ਕਾਰਣਂ ਪੁਚ੍ਛਿਤ੍ਵਾ ਵਿਗਰਹਿਤ੍ਵਾ ਅਕਪ੍ਪਿਯਸਮਾਦਾਨਦੁਕ੍ਕਟਾਪਤ੍ਤਿਂ ਕਪ੍ਪਕਪੁਬ੍ਬਸ੍ਸ ਭਿਕ੍ਖੁਸ੍ਸ ਖੁਰਧਾਰਣਦੁਕ੍ਕਟਾਪਤ੍ਤਿਞ੍ਚ ਪਞ੍ਞਾਪੇਸਿ. ਤਂ ਕਾਰਣਂ ਪਟਿਚ੍ਚ ਵੇਰਂ ਬਨ੍ਧਿਤ੍ਵਾ ਸਾਸਨਂ ਵਿਦ੍ਧਂਸਿਤੁਕਾਮਤਾਯ ਤਤ੍ਤਕਅਯੋਗੁਲ਼ਂ ਗਿਲਿਤ੍ਵਾ ਉਗ੍ਗੀਰਨ੍ਤੋ ਵਿਯ ਈਦਿਸਦੁਟ੍ਠਵਚਨਂ ਵਦੀਤਿ.

ਅਜਾਤਸਤ੍ਤੁਰਾਜਾ ਚ ਤੁਮ੍ਹਾਕਂ ਧਮ੍ਮਚਕ੍ਕਂ ਹੋਤੁ, ਮਮ ਆਣਾਚਕ੍ਕਂ ਪਵਤ੍ਤਿਸ੍ਸਾਮਿ, ਵਿਸ੍ਸਟ੍ਠਾ ਹੁਤ੍ਵਾ ਸਙ੍ਗਾਯਨ੍ਤੂਤਿ ਅਨੁਗ੍ਗਹੇਸਿ. ਤੇਨੇਸ ਪਠਮਂ ਸਾਸਨਾਨੁਗ੍ਗਹੋ ਰਾਜਾਤਿ ਵੇਦਿਤਬ੍ਬੋ, ਮਹਾਕਸ੍ਸਪਾਦੀਨਞ੍ਚ ਅਰਹਨ੍ਤਾਨਂ ਪਞ੍ਚਸਤਾਨਂ ਸਿਸਾਪਰਮ੍ਪਰਾ ਅਨੇਕਾ ਹੋਨ੍ਤਿ, ਗਣਨਪਥਂ ਵੀਤਿਵਤ੍ਤਾ. ਯਮੇਤ੍ਥ ਇਤੋ ਪਰਂ ਵਤ੍ਤਬ੍ਬਂ, ਤਂ ਅਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਤੇ ਪਨ ਮਹਾਥੇਰਾ ਸਙ੍ਗਾਯਿਤ੍ਵਾ ਪਰਿਨਿਬ੍ਬਾਯਿਂਸੂਤਿ. ਹੋਨ੍ਤਿ ਚੇਤ੍ਥ–

ਇਦ੍ਧਿਮਨ੍ਤੋ ਚ ਯੇ ਥੇਰਾ,

ਪਠਮਸ੍ਸਙ੍ਗੀਤਿਂ ਕਤ੍ਵਾ;

ਸਾਸਨਂ ਪਗ੍ਗਹਿਤ੍ਵਾਨ,

ਮਚ੍ਚੂਵਸਂਵ ਸਮ੍ਪਤ੍ਤਾ.

ਕਿਞ੍ਚਾਪਿ ਇਦ੍ਧਿਯੋ ਸਨ੍ਤਿ,

ਤਥਾਪਿ ਤਾ ਜਹਿਤ੍ਵਾਨ;

ਨਿਬ੍ਬਾਯਿਂਸੁ ਵਸਂ ਮਚ੍ਚੁ,

ਪਤ੍ਵਾ ਤੇ ਛਿਨ੍ਨਪਕ੍ਖਾਵ.

ਕਾ ¶ ਕਥਾਵ ਚ ਅਮ੍ਹਾਕਂ,

ਅਮ੍ਹਾਕਂ ਗਹਣੇ ਪਨ;

ਮਚ੍ਚੁਨੋ ਨਤ੍ਥਿ ਸਾਰੋ ਚ,

ਏਵਂ ਧਾਰੇਯ੍ਯ ਪਣ੍ਡਿਤੋਤਿ.

ਅਯਂ ਪਠਮਸਙ੍ਗੀਤਿਕਥਾ ਸਙ੍ਖੇਪੋ.

ਤਤੋ ਪਰਂ ਵਸ੍ਸਸਤਂ ਤੇਸਂ ਸਿਸ੍ਸਪਰਮ੍ਪਰਾ ਸਾਸਨਂ ਧਾਰੇਤ੍ਵਾ ਆਗਮਂਸੁ. ਅਥਾਨੁਕ੍ਕਮੇਨ ਗਚ੍ਛਨ੍ਤੇਸੁ ਰਤ੍ਤਿਦਿਵੇਸੁ ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਕਪ੍ਪਤਿ ਸਿਙ੍ਗਿਲੋਣਕਪ੍ਪਾ, ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ, ਕਪ੍ਪਤਿ ਗਾਮਨ੍ਤਰਕਪ੍ਪੋ, ਕਪ੍ਪਤਿ ਆਵਾਸਕਪ੍ਪੋ, ਕਪ੍ਪਤਿ ਅਨੁਮਤਿਕਪ੍ਪੋ, ਕਪ੍ਪਤਿ ਆਚਿਣ੍ਣਕਪ੍ਪੋ, ਕਪ੍ਪਤਿ ਆਮਥਿਤਕਪ੍ਪੋ, ਕਪ੍ਪਤਿ ਜਲ਼ੋਗਿਂ ਪਾਤੁਂ, ਕਪ੍ਪਤਿ ਅਦਸਕਂ ਨਿਸੀਦਨਂ, ਕਪ੍ਪਤਿ ਜਾਤਰੂਪਰਜਤਨ੍ਤਿ ਇਮਾਨਿ ਦਸਵਤ੍ਥੂਨਿ ਦੀਪੇਸੁਂ.

ਤੇਸਂ ਸੁਸੁਨਾਗਪੁਤ੍ਤੋ ਕਾਲ਼ਾਸੋਕੋਨਾਮ ਰਾਜਾ ਪਕ੍ਖੋ ਅਹੋਸਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵਜ੍ਜੀਸੁ ਚਾਰਿਕਂ ਚਰਮਾਨੋ ਵੇਸਾਲਿਕਾ ਕਿਰ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਦਸਵਤ੍ਥੂਨਿ ਦਿਪੇਨ੍ਤੀਤਿ ਸੁਤ੍ਵਾ ਨ ਖੋ ਪਨੇਤਂ ਪ੍ਪਤਿਰੂਪਂ, ਯ੍ਵਾਹਂ ਦਸਬਲਸ੍ਸ ਸਾਸਨਵਿਪਤ੍ਤਿਂ ਸੁਤ੍ਵਾ ਅਪ੍ਪੋਸ੍ਸੁਕ੍ਕੋ ਭਵੇਯ੍ਯਂ, ਸਨ੍ਧਾਹਂ ਅਧਮ੍ਮਵਾਦਿਨੋ ਨਿਗ੍ਗਹੇਤ੍ਵਾ ਧਮ੍ਮਂ ਦੀਪੇਸ੍ਸਾਮੀਤਿ ਚਿਨ੍ਤਯਨ੍ਤੋ ਯੇਨ ਵੇਸਾਲੀ, ਤਦਵਸਰਿ. ਤਦਾ ਆਯਸ੍ਮਾ ਮਹਾਯਸੋ ਰੇਵਤਸਬ੍ਬਕਾਮਿਆਦੀਹਿ ਸਤ੍ਤਸਤੇਹਿ ਅਰਹਨ੍ਤੇਹਿ ਸਦ੍ਧਿਂ ਸਙ੍ਗਾਯਿਸ੍ਸਾਮੀਤਿ ਵੇਸਾਲਿਯਂ ਵਾਲੁਕਾਰਾਮਂ ਆਗਚ੍ਛਿ. ਵਜ੍ਜਿਪੁਤ੍ਤਕਾਚ ਭਿਕ੍ਖੂ ਉਪਾਰਮ੍ਭਚਿਤ੍ਤਾ ਕਾਲ਼ਾਸੋਕਂਨਾਮ ਰਾਜਾਨਂ ਉਪਸਙ੍ਕਮਿਤ੍ਵਾ ਮਯਂ ਖੋ ਮਹਾਰਾਜ ਇਮਸ੍ਮਿਂ ਮਹਾਵਨਾਰਾਮੇ ਗਨ੍ਧਕੁਟਿਂ ਰਕ੍ਖਿਤ੍ਵਾ ਵਸ੍ਸਾਮ, ਇਦਾਨਿ ਮਹਾਰਾਜ ਅਧਮ੍ਮਵਾਦਿਨੋ ਅਞ੍ਞੇ ਭਿਕ੍ਖੂ ਵਿਲੁਮ੍ਪਿਤੁਕਾਮਾ ਵਿਦ੍ਧਂਸਿਤੁਕਾਮਾ ਆਗਤਾਤਿ ਆਰੋਚੇਸੁਂ. ਕਾਲ਼ਾਸੋਕੋ ¶ ਚ ਮਹਾਰਾਜਾ ਆਗਨ੍ਤੁਕਾਨਂ ਭਿਕ੍ਖੂਨਂ ਅਪ੍ਪਵਿਸਨਤ੍ਥਾਯ ਨਿਵਾਰੇਥਾਤਿ ਅਮਚ੍ਚੇ ਪੇਸੇਸਿ. ਅਮਚ੍ਚਾਚ ਨਿਵਾਰੇਤੁਂ ਗਚ੍ਛਨ੍ਤਾ ਦੇਵਤਾਨਂ ਆਨੁਭਾਵੇਨ ਭਿਕ੍ਖੂ ਨ ਪਸ੍ਸਨ੍ਤਿ. ਤਦਹੇਵ ਚ ਰਤ੍ਤਿਭਾਗੇ ਕਾਲ਼ਾਸੋਕਮਹਾਰਾਜਾ ਲੋਹਕੁਮ੍ਭੀਨਿਰਯੇ ਪਤਨਾਕਾਰੇਨ ਸੁਪਿਨਂ ਪਸ੍ਸਿ. ਤਸ੍ਸ ਰਞ੍ਞੋ ਭਗਿਨਿ ਨਨ੍ਦਾਨਾਮ ਥੇਰੀ ਆਕਾਸੇਨ ਆਗਚ੍ਛਨ੍ਤਿ ਧਮ੍ਮਵਾਦਿਨੋ ਮਹਾਥੇਰੇ ਨਿਗ੍ਗਣ੍ਹਿਤ੍ਵਾ ਅਧਮ੍ਮਵਾਦੀਨਂ ਭਿਕ੍ਖੂਨਂ ਪਗ੍ਗਹਣੇ ਦੋਸਬਹੁਲਤਂ ਪਕਾਸੇਤ੍ਵਾ ਸਾਸਨਸ੍ਸ ਪਗ੍ਗਹਣਤ੍ਥਾਯ ਓਵਾਦਂ ਅਕਾਸਿ.

ਕਾਲ਼ਾਸੋਕਰਾਜਾ ਚ ਸਂਵੇਗਪ੍ਪਤ੍ਤੋ ਹੁਤ੍ਵਾ ਆਯਸ੍ਮਨ੍ਤਾਨਂ ਮਹਾਯਸਤ੍ਥੇਰਾਦੀਨਂ ਖਮਾਪੇਤ੍ਵਾ ਅਜਾਤਸਤ੍ਤੁਰਾਜਾ ਵਿਯ ਸਙ੍ਗਾਯਨੇ ਪਗ੍ਗਹਂ ਅਕਾਸਿ.

ਮਹਾਯਸਤ੍ਥੇਰਾਦਯੋ ਚ ਕਾਲ਼ਾਸੋਕਂ ਰਾਜਾਨਂ ਨਿਸ੍ਸਾਯ ਵਾਲੁਕਾਰਾਮੇ ਵਜ੍ਜਿਪੁਤ੍ਤਕਾਨਂ ਭਿਕ੍ਖੂਨਂ ਪਕਾਸਿਤਾਨਿ ਅਧਮ੍ਮਵਤ੍ਥੂਨਿ ਭਿਨ੍ਦਿਤ੍ਵਾ ਅਟ੍ਠਤਿ ਮਾਸੇਹਿ ਦੁਤਿਯਸਙ੍ਗਾਯਨਂ ਅਕਂਸੁ.

ਤਦਾ ਚ ਮਜ੍ਝਿਮਦੇਸੇ ਪਾਤਲਿਪੁਤ੍ਤਨਗਰੇ ਸੁਸੁਨਾਗਰਞ੍ਞੋ ਪੁਤ੍ਤਭੂਤਸ੍ਸ ਕਾਲ਼ਾਸੋਕਰਞ੍ਞੋ ਅਤਿਸੇਕਂ ਪਤ੍ਵਾ ਦਸਵਸ੍ਸਾਨਿ ਅਹੇਸੁਂ. ਪਰਮ੍ਮਰਟ੍ਠੇ ਪਨ ਸਿਰਿਖੇਤ੍ਤਨਗਰੇ ਦ੍ਵਤ੍ਤਗੋਙ੍ਕਸ੍ਸਨਾਮ ਰਞ੍ਞੋ ਅਭਿਸਿਤ੍ਤਕਾਲਤੋ ਪੁਰੇ ਏਕਵਸ੍ਸਂ ਅਹੋਸਿ. ਜਿਨਸਾਸਨਂ ਪਨ ਵਸ੍ਸਸਤਂ ਅਹੋਸਿ.

ਇਮਿਸ੍ਸਞ੍ਚ ਦੁਤਿਯਸਙ੍ਗੀਤਿਯਂ ਮਹਾਯਸ ਰੇਵਤ ਸਬ੍ਬਕਾਮਿਪ੍ਪਮੁਖਾ ਸਤ੍ਤਸਤਪ੍ਪਮਾਣਾ ਮਹਾਥੇਰਾ ਦੁਤਿਯਂ ਸਙ੍ਖਾਯਿਤ੍ਵਾ ਦੁਤਿਯਂ ਸਾਸਨਂ ਪਗ੍ਗਹੇਸੁਂ.

ਆਯਸ੍ਮਾ ਮਹਾਯਸਤ੍ਥੇਰੋਚਨਾਮ ਪਞ੍ਚਹਿ ਏਤਦਗ੍ਗਲ਼ਾਨੇ ਹਿ ਭਗਵਤਾ ਥੋਮਿਤਸ੍ਸ ਆਨਨ੍ਦਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ ਅਹੋਸਿ. ਵਜ੍ਜਿਪੁਤ੍ਤਕਾਨਂ ਭਿਕ੍ਖੂਨਂ ਅਧਮ੍ਮਵਤ੍ਥੁਦੀਪਨਂ ਦੁਤਿਯਸਙ੍ਗੀਤਿਯਂ ਕਾਰਣਮੇਵ. ਕਾਲ਼ਾਸੋਕਰਾਜਾਚ ਪਗੇਵ ਅਧਮ੍ਮਵਾਦੀਭਿਕ੍ਖੂਨਂ ਸਹਾਯੋਪਿ ਸਮਾਨੋ ਪੁਨ ਧਮ੍ਮਵਾਦਿਭਿਕ੍ਖੂਨਂ ਸਹਾਯੋ ¶ ਹੁਤ੍ਵਾ ਅਨੁਗ੍ਗਹਂ ਅਕਾਸਿ. ਤਸ੍ਮਾ ਦੁਤਿਯਸਾਸਨਪਗ੍ਗਹੋ ਰਾਜਾਤਿ ਵੇਦਿਤਬ੍ਬੋ.

ਦੁਤਿਯਸਙ੍ਗੀਤਿਯਂ ਪਨ ਮਹਾਯਸਤ੍ਥੇਰ ਰੇਵਤ ਸਬ੍ਬਕਾਮਿਪ੍ਪਮੁਖਾਨਂ ਸਤ੍ਤਸਤਾਨਂ ਮਹਾਥੇਰਾਨਂ ਸਿਸ੍ਸਪਰਮ੍ਪਰਾ ਅਨੇਕਾ ਹੋਨ੍ਤਿ, ਗਣਨਪਥਂ ਵੀਤਿਵਤ੍ਤਾ. ਯਮੇਤ੍ਥ ਇਤੋ ਪਰਂ ਵਤ੍ਤਬ੍ਬ, ਤਂ ਅਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਤੇ ਪਨ ਮਹਾਥੇਰਾ ਦੁਤਿਯਂ ਸਙ੍ਗਾਯਿਤ੍ਵਾ ਪਰਿਨਿਬ੍ਬਾਯਿਂਸੂਤਿ. ਹੋਨ੍ਤਿ ਚੇਤ੍ਥ–

ਬੁਦ੍ਧਿਮਨ੍ਤੋ ਚ ਯੇ ਥੇਰਾ,

ਦੁਤਿਯਸ੍ਸਙ੍ਗਿਤਿਂ ਕਤ੍ਵਾ;

ਸਾਸਨਂ ਪਗ੍ਗਹਿਤ੍ਵਾਨ,

ਮਚ੍ਚੂਵਸਂਵ ਸਮ੍ਪਤ੍ਤਾ.

ਇਦ੍ਧਿਮਨ੍ਤੋਪਿ ਯੇ ਥੇਰਾ,

ਮਚ੍ਚੁਨੋ ਤਾਵ ਵਸਂ ਗਮੁਂ;

ਕਥਂਯੇਵ ਮਯਂ ਮੁਤ੍ਤਾ,

ਤਤੋ ਆਰਕ ਮੁਚ੍ਚਨਾਤਿ;

ਅਯਂ ਦੁਤਿਯਸਙ੍ਗੀਤਿਕਥਾਸਙ੍ਖੇਪੋ.

ਤਤੋ ਪਰਂ ਅਟ੍ਠਤਿਂਸਾਧਿਕਾਨਿ ਦ੍ਵੇਵਸ੍ਸਸਤਾਨਿ ਸਮ੍ਮਾਸਬ੍ਬੁਦ੍ਧਸ੍ਸ ਭਗਵਤੋ ਸਾਸਨਂ ਨਿਰਾਕੁਲਂ ਅਹੋਸਿ ਨਿਰਬ੍ਬੁਦਂ. ਅਟ੍ਠਤਿਂਸਾਧਿਕੇ ਪਨ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਪਾਟਲਿਪੁਤ੍ਤ ਨਗਰੇ ¶ ਸਿਰਿਧਮ੍ਮਾਸੋਕਸ੍ਸਨਾਮ ਰਞ੍ਞੋ ਕਾਲੇ ਨਿਗ੍ਰੋਧਸਾਮਣੇਰਂ ਪਟਿਚ੍ਚ ਬੁਦ੍ਧਸਾਸਨੇ ਪਸੀਦਿਤ੍ਵਾ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਬਾਹੁਲ੍ਲਂ ਅਹੋਸਿ. ਤਦਾ ਸਟ੍ਠਿਸਹਸ੍ਸਮਤ੍ਤਾ ਤਿਤ੍ਥਿਯਾ ਲਾਭਸਕ੍ਕਾਰਂ ਅਪੇਕ੍ਖਿਤ੍ਵਾ ਅਪਬ੍ਬਜਿਤਾਪਿ ਪਬ੍ਬਜਿਤਾਵਿਯ ਹੁਤ੍ਵਾ ਉਪਾਸਥਪਵਾਰਣਾਦਿਕਮ੍ਮੇਸੁ ਪਵਿਸਨ੍ਤਿ, ਸੇਯ੍ਯਥਾਪਿਨਾਮ ਹਂਸਾਨਂ ਮਜ੍ਝੇ ਬਕਾ, ਯਥਾ ਚ ਗੁਨ੍ਨਂ ਮਜ੍ਝੇ ਗਵਜਾ, ਯਥਾ ਚ ਸਿਨ੍ਧਵਾਨਂ ਮਜ੍ਝੇ ਗਦ੍ਰਭਾਤਿ.

ਤਦਾ ਭਿਕ੍ਖੁਸਙ੍ਘੋ ਇਦਾਨਿ ਅਪਰਿਸੁਦ੍ਧਾ ਪਰਿਸਾਤਿ ਮਨਸਿ ਕਰਿਤ੍ਵਾ ਉਪੋਸਥਂ ਨ ਅਕਾਸਿ. ਸਾਸਨੇ ਅਬ੍ਬੁਦਂ ਹੁਤ੍ਵਾ ਸਤ੍ਤਵਸ੍ਸਾਨਿ ਉਪੋਸਥਪਵਾਰਣਾਨਿ ਛਿਜ੍ਜਨ੍ਤਿ. ਸਿਰਿਧਮ੍ਮਾਸੋ ਕੋ ਚ ਰਾਜਾ ਤਂ ਸੁਤ੍ਵਾ ਤਂ ਅਧਿਕਰਣਂ ਵੂਪਸਮੇਹਿ ਉਪੋਸਥਂ ਕਾਰਾਪੇਹੀਤਿ ਏਕਂ ਅਮਚ੍ਚਂ ਪੇਸੇਸਿ. ਅਮਚ੍ਚੋ ਚ ਭਿਕ੍ਖੂ ਉਪੋਸਥਂ ਅਕਤ੍ਤੁਕਾਮੇ ਕਿਂ ਕਰਿਸ੍ਸਾਮੀਤਿ ਰਾਜਾਨਂ ਪਟਿਪੁਚ੍ਛਿਤੁਂ ਅਵਿਸਹਤਾਯ ਸਯਂ ਮੂਲ਼ੋ ਹੁਤ੍ਵਾ ਅਞ੍ਞੇਨ ਮੂਲ਼ੇਨ ਮਨ੍ਥੇਤ੍ਵਾ ਸਚੇ ਭਿਕ੍ਖੁਸਙ੍ਘੋ ਉਪੋਸਥਂ ਨ ਕਰੇਯ੍ਯ, ਭਿਕ੍ਖੁਸਙ੍ਘਂ ਘਾਤੇਤੁਕਾਮੋ ਮਹਾਰਾਜਾਤਿ ਸਯਂ ਮੂਲ਼ੋ ਹੁਤ੍ਵਾ ਮੂਲ਼ਸ੍ਸ ਸਨ੍ਤਿਕਾ ਮੂਲ਼ਵਚਨਂ ਸੁਤ੍ਵਾ ਵਿਹਾਰਂ ਗਨ੍ਤ੍ਵਾ ਉਪੋਸਥਂ ਅਕਤ੍ਤੁਕਾਮਂ ਭਿਕ੍ਖੁਸਙ੍ਘਂ ਘਾਤੇਸਿ.

ਰਾਜਾ ਚ ਤਂ ਸੁਤ੍ਵਾ ਅਯਂ ਬਾਲੋ ਮਯਾ ਅਨਾਣਤ੍ਤੋਵ ਹੁਤ੍ਵਾ ਈਦਿਸਂ ਲੁਦ੍ਦਕਮ੍ਮਂ ਅਕਾਸਿ, ਅਹਂ ਪਾਪਕਮ੍ਮਤੋ ਮੁਚ੍ਚਿਸ੍ਸਾਮਿਵਾ ਮਾਵਾਤਿ ਦ੍ਵਲ਼ਕਜਾਤੋ ਹੁਤ੍ਵਾ ਮਹਾਮੋਗ੍ਗਲਿਪੁਤ੍ਤ ਤਿਸ੍ਸਤ੍ਥੇਰਂ ਗਙ੍ਗਾਯ ਪਤਿਸੋਤਤੋ ਆਨੇਤ੍ਵਾ ਤਂ ਕਾਰਣਂ ਥੇਰਂ ਪੁਚ੍ਛਿ. ਥੇਰੋ ਚ ਦੀਪਕਤਿਤ੍ਤਿਰਜਾਤਕੇਨ ਅਚੇਤਨਤਾਯ ਪਾਪਕਮ੍ਮਤੋ ਮੋਚੇਸ੍ਸਸਿਤਿ ਵਿਸ੍ਸਜ੍ਜੇਸਿ, ਸਤ੍ਤਾਹਮ੍ਪਿ ਤਿਤ੍ਥਿਯਾਨਂ ਵਾਦਂ ਸਿਰਿਧਮ੍ਮਾਸੋਕਰਞ੍ਞੋ ਸਿਕ੍ਖਾਪੇਸਿ, ਵਾਦੇਨ ਵਾਦਂ ਤੁਲਯਿਤ੍ਵਾ ਸਟ੍ਠਿਸਹਸ੍ਸਮਤ੍ਤੇ ਤਿਤ੍ਥਿਯੇ ਸਾਸਨਬਾਹਿਰਂ ਅਕਾਸਿ. ਤਦਾ ਪਨ ਉਪੋਸਥਂ ਅਕਾਸਿ. ਭਗਵਤਾ ਵੁਤ੍ਤਨਿਯਾਮੇਨੇਵ ਕਥਾਵਤ੍ਥੁਞ੍ਚ ਭਿਕ੍ਖੁਸਙ੍ਘਮਜ੍ਝੇ ਬ੍ਯਾਕਾਸਿ ¶ . ਅਸੋਕਾਰਾਮੇ ਚ ਸਹਸ੍ਸਮਤ੍ਤਾ ਮਹਾਥੇਰਾ ਨਵਹਿ ਮਾਸੇਹਿ ਸਙ੍ਗਾਯਿਂਸੁਂ.

ਤਦਾ ਮਜ੍ਝਿਮਦੇਸੇ ਪਾਟਲਿਪੁਤ੍ਤਨਗਰੇ ਸਿਰਿਧਮ੍ਮਾਸੋਕਰਞ੍ਞੋ ਰਜ੍ਜਂ ਪਤ੍ਵਾ ਅਟ੍ਠਾਰਸਵਸ੍ਸਾਨਿ ਅਹੇਸੁਂ. ਮਰਮ੍ਮਰਟ੍ਠੇ ਪਨ ਸਿਰਿਖੇਤ੍ਤਨਗਰੇ ਰਮ੍ਬੋਙ੍ਕਸ੍ਸਨਾਮ ਰਞ੍ਞੋ ਰਜ੍ਜਂ ਪਤ੍ਵਾ ਦ੍ਵਾਦਸ ਵਸ੍ਸਾਨਿ ਅਹੇਸੁਨ੍ਤਿ.

ਇਮਿਸ੍ਸਞ੍ਚ ਤਤਿਯਸਙ੍ਗੀਤਿਯਂ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋਨਾਮ ਦੁਤਿਯਸਙ੍ਗਾਯਕੇਹਿ ਮਹਾਥੇਰੇਹਿ ਬ੍ਰਹ੍ਮਲੋ ਕਂ ਗਨ੍ਤ੍ਵਾ ਸਾਸਨਸ੍ਸ ਪਗ੍ਗਹਣਤ੍ਥਂ ਤਿਸ੍ਸਨਾਮ ਮਹਾਬ੍ਰਹ੍ਮਾਨਂ ਆਯਾਚਿਤ ਨਿਯਾਮੇਨ ਤਤੋ ਚਵਿਤ੍ਵਾ ਇਧ ਮੋਗ੍ਗਲਿਯਾਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਸਤ੍ਤੋ.

ਲਾਭਸਕ੍ਕਾਰਂ ਅਪੇਕ੍ਖਿਤ੍ਵਾ ਸਟ੍ਠਿਸਹਸ੍ਸਮਤਾਨਂ ਤਿਤ੍ਥਿਯਾਨਂ ਸਮਣਾਲਯਂ ਕਤ੍ਵਾ ਉਪੋਸਥਪਵਾਰਣਾਦੀਸੁ ਕਮ੍ਮੇਸੁ ਪਵੇਸਨਂ ਪਰਿਸਾਯ ਅਸੁਦ੍ਧਤ੍ਤਾ ਸਤ੍ਤਵਸ੍ਸਾਨਿ ਉਪੋਸਥਸ੍ਸ ਅਕਰਣਞ੍ਚ ਸਾਸਨਸ੍ਸ ਪਗ੍ਗਹਣੇ ਕਾਰਣਮੇਵ. ਮਹਾਮੋਗ੍ਗਲਿਪੁਤ੍ਤਤਿਸ੍ਸ ਮਜ੍ਝਨ੍ਤਿਕ ਮਹਾਰੇਵਪ੍ਪਮੁਖਾ ਮਹਾਥੇਰਾ ਤਤਿਯਂ ਸਙ੍ਗਾਯਿਤ੍ਵਾ ਤਤਿਯਂ ਸਾਸਨਂ ਪਗ੍ਗਹੇਸੁਂ.

ਸਿਰਿਧਮ੍ਮਾਸੋਕਰਾਜਾ ਚ ਤਿਤ੍ਥਿਯਾਨਂ ਵਾਦਂ ਸਲ੍ਲਕ੍ਖੇਤ੍ਵਾ ਤਿਤ੍ਥਿਯੇ ਬਹਿਸਾਸਨਕਰਣਾਦੀਹਿ ਸਾਸਨਸ੍ਸ ਪਗ੍ਗਹੋ ਰਾਜਾਤਿ ਵੇਦਿਤਬ੍ਬੋ. ਮਹਾਮੋਗ੍ਗਲਿਪੁਤ੍ਤਤਿਸ੍ਸ ਮਜ੍ਝਿਨ੍ਤਿਕ ਮਹਾਰੇਵਪ੍ਪਮੁਖਾਨਂ ਸਹਸ੍ਸਮਤ੍ਤਾਨਂ ਮਹਾਥੇਰਾਨਂ ਸਿਸ੍ਸਪਰਮ੍ਪਰਾ ਅਨੇਕਾ ਹੋਨ੍ਤਿ, ਗਣਨਪਥਂ ਵੀਤਿਵਤ੍ਤਾ. ਯਮੇਤ੍ਥ ਇਤੋ ਪਰਂ ਵਤ੍ਤਬ੍ਬਂ, ਤਂ ਅਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਤੇ ਪਨ ਮਹਾਥੇਰਾ ਤਤਿਯਂ ਸਙ੍ਗਾਯਿਤ੍ਵਾ ਪਰਿਨਿਬ੍ਬਾਯਿਂਸੂਤਿ. ਹੋਨ੍ਤਿ ਚੇਤ੍ਥ–

ਮਹਿਦ੍ਧਿਕਾਪਿ ਯੇ ਥੇਰਾ,

ਸਙ੍ਗਾਯਿਤ੍ਵਾਨ ਸਾਸਨੇ;

ਮਚ੍ਚੂਵਸਂਵ ਗਚ੍ਛਿਂਸੁ,

ਅਬ੍ਭਗਬ੍ਭਂਵ ਭਾਕਰੋ.

ਯਥਾ ¶ ਏਤੇਚ ਗਚ੍ਛਨ੍ਤਿ,

ਤਥਾ ਮਯਮ੍ਪਿ ਗਚ੍ਛਾਮ;

ਕੋਨਾਮ ਮਚ੍ਚੁਨਾ ਮੁਚ੍ਚੇ,

ਮਚ੍ਚੂਪਰਾਯਨਾ ਸਤ੍ਤਾ.

ਤਸ੍ਮਾ ਹਿ ਪਣ੍ਡਿਤੋ ਪੋਸੋ,

ਨਿਬ੍ਬਾਨਂ ਪਨ ਅਚ੍ਚੁਤਂ;

ਤਸ੍ਸੇਵ ਸਚ੍ਛਿਕਤ੍ਥਾਯ,

ਪੁਞ੍ਞਂ ਕਰੇਯ੍ਯ ਸਬ੍ਬਦਾਤਿ.

ਅਯਂ ਤਤਿਯਸਙ੍ਗੀਤਿਕਥਾਸਙ੍ਖੇਪੋ.

ਤਤੋ ਪਰਂ ਕਤ੍ਥ ਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਸਾਸਨਂ ਸੁਟ੍ਠੁ ਪਤਿਟ੍ਠਹਿਸ੍ਸਤੀਤਿ ਵਿਮਂਸਿਤ੍ਵਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਪਚ੍ਚਨ੍ਤਦੇਸੇ ਜਿਨਸਾਸਨਸ੍ਸ ਸੁਪ੍ਪਤਿਟ੍ਠਿਯਮਾਨਭਾਵਂ ਪਸ੍ਸਿਤ੍ਵਾ ਨਵਟ੍ਠਾਨਾਨਿ ਜਿਨਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਵਿਸੁਂ ਵਿਸੁਂ ਮਹਾਥੇਰੇ ਪੇਸੇਸਿ. ਸੇਯ੍ਯਥਿਦਂ. ਮਹਾਮਹਿਨ੍ਦਤ੍ਥੇਰਂ ਸੀਹਲ਼ਦੀਪਂ ਪੇਸੇਸਿ-ਤ੍ਵਂ ਏਤਂ ਦੀਪਂ ਗਨ੍ਤ੍ਵਾ ਤਤ੍ਥ ਸਾਸਨਂ ਪਤਿਟ੍ਠਪੇਹੀਤਿ, ਸੋਣਤ੍ਥੇਰਂ ਉਤ੍ਤਰਤ੍ਥੇਰਞ੍ਚਸੁਵਣ੍ਣਭੂਮਿਂ, ਮਹਾਰਕ੍ਖਿਤਤ੍ਥੇਰਂ ਯੋਨਕਲੋਕਂ, ਰਕ੍ਖਿਤਤ੍ਥੇਰਂ ਵਨਵਾਸੀਰਟ੍ਠਂ, ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਅਪਰਨ੍ਤਰਟ੍ਠਂ, ਮਜ੍ਝਨ੍ਤਿ ਕਤ੍ਥੇਰਂ ਕਸ੍ਮੀਰਗਨ੍ਧਾ ਰਰਟ੍ਠਂ, ਮਹਾਰੇਵਤ੍ਥੇਰਂ ਮਹਿਂਸਕਮਣ੍ਡਲਂ, ਮਹਾਧਮ੍ਮਰਕ੍ਖਿਤਤ੍ਥੇਰਂ ਮਹਾਰਟ੍ਠਂ, ਮਜ੍ਝਿਮਤ੍ਥੇਰਂ ਚੀਨਰਟ੍ਠਨ੍ਤਿ. ਤਤ੍ਥ ਚ ਉਪਸਮ੍ਪਦਪਹੋਨਕੇਨ ਸਙ੍ਘੇਨ ਸਦ੍ਧਿਂ ਪੇਸੇਸਿ. ਤੇ ਚ ਮਹਾਥੇਰਾ ਵਿਸੁਂ ਵਿਸੁਂ ਗਨ੍ਤ੍ਵਾ ਸਾਸਨਂ ਤਤ੍ਥ ਤਤ੍ਥ ਪਤਿਟ੍ਠਾਪੇਸੁਂ. ਪਤਿਟ੍ਠਾਪੇਤ੍ਵਾ ਚ ਤੇਸੁ ਤੇਸੁ ਠਾਨੇਸੁ ਭਿਕ੍ਖੂਨਂ ਕਾਸਾਵਪਜ੍ਜੋਤੇਨ ਵਿਜ੍ਜੋਤਮਾਨਾ ਅਬ੍ਭਹਿਮਧੂਰਜੋਰਾਹੁਸਙ੍ਖਾਤੇਹਿ ਵਿਮਤ੍ਤੋ ਵਿਯ ਨਿਸਾਨਾਥੋ ਜਿਨਸਾਸਨਂ ਅਨਨ੍ਤਰਾਯਂ ਹੁਤ੍ਵਾ ਪਤਿਟ੍ਠਾਸਿ.

ਤੇਸੁ ਪਨ ਨਵਸੁ ਠਾਨੇਸੁ ਸੁਵਣ੍ਣਭੂਮਿਨਾਮ ਅਧੁਨਾ ਸੁਧਮ੍ਮਨਗਰਮੇਵ. ਕਸ੍ਮਾ ਪਨੇਤਂ ਵਿਞ੍ਞਾਯਤੀਤਿ ਚੇ. ਮਗ੍ਗਾਨੁਮਾਨਤੋ ਠਾਨਾਨੁਮਾਨਤੋ ¶ ਵਾ. ਕਥਂ ਮਗ੍ਗਾਨੁਮਾਨਤੋ. ਇਤੋ ਕਿਰ ਸੁਵਣ੍ਣਭੂਮਿ ਸਤ੍ਤਮਤ੍ਤਾਨਿ ਯੋਜਨਸਤਾਨਿ ਹੋਨ੍ਤਿ, ਏਕੇਨ ਵਾਤੇ ਨ ਗਚ੍ਛਨ੍ਤੀ ਨਾਵਾ ਸਤ੍ਤਹਿ ਅਹੋਰਤ੍ਤੇਹਿ ਗਚ੍ਛਤਿ, ਅਥੇਕਸ੍ਮਿਂ ਸਮਯੇ ਏਵਂ ਗਚ੍ਛਨ੍ਤਿ ਨਾਵਾ ਸਤ੍ਤਾਹਮ੍ਪਿ ਨਦਿਯਾ ਵਟ੍ਟਮਚ੍ਛ ਪਿਟ੍ਠੇ ਨੇਵ ਗਤਾਤਿ ਅਟ੍ਠਕਥਾਯਂ ਵੁਤ੍ਤੇਨ ਸੀਹਲ਼ਦੀਪਤੋ ਸੁਵਣ੍ਣਭੂਮਿਂ ਗਤਮਗ੍ਗਪ੍ਪਮਾਣੇਨ ਸੁਖਮ੍ਮਪੁਰਤੋ ਸੀਹਲ਼ਦੀਪਂ ਗਤਮਗ੍ਗਪ੍ਪਮਾਣਂ ਸਮੇਤਿ. ਸੁਧਮ੍ਮੇ ਪੁਰਤੋ ਕਿਰ ਹਿ ਹਿਂਸਲ਼ਦੀਪਂ ਸਤ੍ਤਮਤ੍ਤਾਨਿ ਯੋਜਨਸਤਾਨਿ ਹੋਨ੍ਤਿ, ਉਜੁਂ ਵਾਯੁਆਗਮਨਕਾਲੇ ਗਚ੍ਛਨ੍ਤਿ ਵਾਯੁਨਾਵਾ ਸਤ੍ਤਹਿ ਅਹੋਰਤ੍ਤੇਹਿ ਸਮ੍ਪਾਪੁਣਾਤਿ. ਏਵਂਮਗ੍ਗਾਨੁਮਾਨਤੋ ਵਿਞ੍ਞਾਯਤਿ.

ਕਥਂ ਠਾਨਾਨੁਮਾਨਤੋ. ਸੁਵਣ੍ਣਭੂਮਿ ਕਿਰ ਮਹਾਸਮੁਦ੍ਦਸਮੀਪੇ ਤਿਟ੍ਠਤਿ, ਨਾਨਾਵੇਰਜ੍ਜਕਾਨਮ੍ਪਿ ਵਾਣਿਜਾਨਂ ਉਪਸਙ੍ਕਮਨਟ੍ਠਾਨਭੂਤਂ ਮਹਾਤਿਤ੍ਥਂ ਹੋਤਿ. ਤੇਨੇਵ ਮਹਾਜਨਕਕੁਮਾਰਾਦਯੋ ਚਮ੍ਪਾਨਗਰਾਦਿਤੋ ਸਂਵੋਹਾਰਤ੍ਥਾਯ ਨਾਵਾਯ ਸੁਵਣ੍ਣਭੂਮਿਂ ਆਗਮਂਸੂਤਿ. ਸੁਧਮ੍ਮਪੁਰਮ੍ਪਿ ਅਧੁਨਾ ਮਹਾਸਮੁਦ੍ਦਸਮੀਪੇਯੇਵ ਤਿਟ੍ਠਤਿ. ਏਵਂ ਠਾਨਾਨੁਮਾਸਤੋ ਵਿਞ੍ਞਾਯਤੀਤਿ.

ਅਪਰੇ ਪਨ ਸੁਵਣ੍ਣਭੂਮਿਨਾਮ ਹਰਿਭੁਞ੍ਜਰਟ੍ਠਂਯੇਵ, ਤਤ੍ਥ ਸੁ ਵਣ੍ਣਸ੍ਸ ਬਾਹੁਲ੍ਲਤ੍ਤਾਤਿ ਵਦਨ੍ਤਿ. ਅਞ੍ਞੇ ਪਨ ਸਿਯਾਮਰਟ੍ਠਂਯੇਵਾਤਿ ਵਦਨ੍ਤਿ. ਤਂ ਸਬ੍ਬਂ ਵਿਮਂਸਿਤਬ੍ਬਂ.

ਅਪਰਨ੍ਤਂ ਨਾਮ ਵਿਸੁਂ ਏਕਰਟ੍ਠਮੇਵਾਤਿ ਅਪਰੇ ਵਦਨ੍ਤਿ. ਅਞ੍ਞੇ ਪਨ ਅਪਰਨ੍ਤਂਨਾਮ ਸੁਨਾਪਰਨ੍ਤਰਟ੍ਠਮੇਵਾਤਿ ਵਦਨ੍ਤਿ. ਤਂ ਯੁਤ੍ਤਮੇਵ. ਕਸ੍ਮਾ ਅਪਰਨ੍ਤਂ ਨਾਮ ਸੁਨਾਪਰਨ੍ਤਰਟ੍ਠਮੇਵਾਤਿ ਵਿਞ੍ਞਾਯਤੀਤਿ ਚੇ. ਅਟ੍ਠਕਥਾਸੁ ਦ੍ਵੀਹਿ ਨਾਮੇਹਿ ਵੁਤ੍ਤਤ੍ਤਾ. ਉਪਰਿਪਣ੍ਣਾਸਅਟ੍ਠਕਥਾਯਞ੍ਹਿ ਸਲ਼ਾਯਤਨਸਂਯੁਤ੍ਤਟ੍ਠਕਥਾਯਞ੍ਚ ਅਟ੍ਠਕਥਾਚਰਿਯੇਹਿ ਸੁਨਾਪਰਨ੍ਤਰਟ੍ਠੇ ਕੋਣ੍ਡਧਾਨਤ੍ਥੇਰੇਨ ਸਲਾਕਾਦਾਨਾਧਿਕਾਰੇ ਲਦ੍ਧੇਤਦਗ੍ਗਟ੍ਠਾਨਤਂ ਦਸ੍ਸਨ੍ਤੇਹਿ ਅਪਰਨ੍ਤਰਟ੍ਠਂ ਸੁਨ ਸਦ੍ਦੇਨ ਯੋਜੇਤ੍ਵਾ ਵੁਤ੍ਤਂ. ਧਮ੍ਮਪਦਟ੍ਠਕਥਾਯਂ ਪਨ ਅਙ੍ਗੁਤ੍ਤਰਟ੍ਠਕਥਾਯਞ੍ਚ ਤਮੇਵ ਰਟ੍ਠਂ ਵਿਨਾ ਸੁਨਸਦ੍ਦੇਨ ਵੁਤ੍ਤਂ. ਸੁਨਸਦ੍ਦੋ ਚੇਤ੍ਥ ਪੁਤ੍ਤਪਰਿਯਾਯੋ. ਮਨ੍ਧਾਤੁਰਞ੍ਞੋ ਜੇਟ੍ਠਪੁਤ੍ਤੋ ਚਤੁਦ੍ਦੀਪਵਾਸਿ ਨੋ ¶ ਪਕ੍ਕੋਸਿਤ੍ਵਾ ਤੇਸਂ ਵਿਸੁਂ ਵਿਸੁਂ ਨਿਵਾਸਟ੍ਠਾਨਂ ਨਿਯ੍ਯਾਦੇਸਿ. ਤਤ੍ਥ ਉਤ੍ਤਰਦੀਪਵਾਸੀਨਂ ਠਾਨਂ ਕੁਰੁਰਟ੍ਠਂਨਾਮ, ਪੁਬ੍ਬਦੀਪਵਾਸੀਨਂ ਪਨ ਵੇਦੇਹਰਟ੍ਠਂਨਾਮ, ਪਚ੍ਛਿਮਦੀਪਵਾਸੀਨਂ ਅਪਰਨ੍ਤਂ ਨਾਮ. ਭਤ੍ਤਪਚ੍ਛਿਮਦੀਪੇ ਜਾਤਤ੍ਤਾ ਤੇ ਸੁਨਸਦ੍ਦੇਨ ਵੁਤ੍ਤਾ. ਤਤ੍ਰ ਜਾਤਾਪਿ ਹਿ ਤੇਸਂ ਪੁਤ੍ਤਾਤਿਵਾ ਸੁਨਾਤਿਵਾ ਵੁਤ੍ਤਾ, ਯਥਾ ਵਜ੍ਜਿਪੁਤ੍ਤਕਾ ਭਿਕ੍ਖੂਤਿ. ਵਤ੍ਤਿਚ੍ਛਾਵਸੇਨ ਵਾ ਵਾਚਾਸਿਲਿਟ੍ਠਵਸੇਨ ਚ ਇਦਮੇਵ ਸੁਨਸਦ੍ਦੇਨ ਵਿਸੇਸੇਤ੍ਵਾ ਵੋਹਰਨ੍ਤੀਤਿ ਦਟ੍ਠਬ੍ਬਂ.

ਯੋਨਕਰਟ੍ਠਂਨਾਮ ਯਵਨਮਨੁਸ੍ਸਾਨਂ ਨਿਵਾਸਟ੍ਠਾਨਮੇਵ, ਯਂਜਙ੍ਗਮਙ੍ਘਇਤਿ ਵੁਚ੍ਚਤਿ.

ਵਨਵਾਸੀਰਟ੍ਠਂਨਾਮ ਸਿਰਿਖੇਤ੍ਤਨਗਰਟ੍ਠਾਨਮੋ. ਕੇਚਿ ਪਨ ਵਨਵਾਸੀਰਟ੍ਠਂਨਾਮ ਏਕਂ ਰਟ੍ਠਮੇਵ, ਨ ਸਿਰਿਖੇਤ੍ਤਨਗਰਟ੍ਠਾਨਨ੍ਤਿ ਵਦਨ੍ਤਿ. ਤਂ ਨ ਸੁਨ੍ਦਰਂ. ਸਿਰਿਖੇਤ੍ਤਨਗਰਟ੍ਠਾਨਮੇਵ ਹਿ ਵਨਵਾਸੀਰਟ੍ਠਂ ਨਾਮ. ਕਸ੍ਮਾ ਪਨੇਤਂ ਵਿਞ੍ਞਾਯਤੀਤਿਚੇ. ਇਮਸ੍ਸ ਅਮ੍ਹਾਕਂ ਰਞ੍ਞੋ ਭਾਤਿਕਰਞ੍ਞੋ ਕਾਲੇ ਸਿਰਿਖੇਤ੍ਤਨਗਰੇ ਗੁਮ੍ਭੇਹਿ ਪਟਿਚ੍ਛਾਦਿਤੇ ਏਕਸ੍ਮਿਂ ਪਥਵਿਪੁਞ੍ਜੇ ਅਨ੍ਤੋ ਨਿਮ੍ਮੁਜ੍ਜਿਤ੍ਵਾ ਠਿਤਂ ਪੋਰਾਣਿਕਂ ਏਕਂ ਲੋਹਮਯਬੁਦ੍ਧਪਟਿਪਿਬ੍ਬਂ ਪਟਿਲਭਿ, ਤਸ੍ਸ ਚ ਪਲ੍ਲਙ੍ਕੇ ਇਦਂ ਵਨਵਾਸੀਰਟ੍ਠਵਾਸੀਨਂ ਪੂਜਨਤ੍ਥਾਯਾਤਿਆਦਿਨਾ ਪੋਰਾਣਲੇਖਨਂ ਦਿਸ੍ਸਤਿ, ਤਸ੍ਮਾ ਯੇਵੇਤਂ ਵਿਞ੍ਞਾਯਤੀਤਿ.

ਕਸ੍ਮੀਰਗਨ੍ਧਾਰਰਟ੍ਠਂਨਾਮ ਕਸ੍ਮੀਰਰਟ੍ਠਂ ਗਨ੍ਧਾਰਰਟ੍ਠਞ੍ਚ. ਤਾਨਿ ਪਨ ਰਟ੍ਠਾਨਿ ਏਕਾਬਦ੍ਧਾਨਿ ਹੁਤ੍ਵਾ ਤਿਟ੍ਠਨ੍ਤਿ. ਤੇਨੇਵ ਮਜ੍ਝਨ੍ਤਿ ਕਤ੍ਥੇਰਂ ਏਕਂ ਦ੍ਵੀਸੁ ਰਟ੍ਠੇਸੁ ਪੇਸੇਸਿ. ਜਨਪਦਤ੍ਤਾ ਪਨ ਨਪੁਂਸਕੇਕਤ੍ਤਂ ਭਵਤਿ. ਤਦਾ ਪਨ ਏਕਸ੍ਸ ਰਞ੍ਞੋ ਆਣਾਯ ਪਤਿਟ੍ਠਾਨਵਿਸਯਤ੍ਤਾ ਏਕਤ੍ਤਵਚਨੇਨ ਅਟ੍ਠਕਥਾਯਂ ਵੁਤ੍ਤਨ੍ਤਿਪਿ ਵਦਨ੍ਤਿ.

ਮਹਿਂਸਕਮਣ੍ਡਲਂਨਾਮ ਅਨ੍ਧਕਰਟ੍ਠਂ, ਯਂ ਯਕ੍ਖਪੁਰਰਟ੍ਠਨ੍ਤਿ ਵੁਚ੍ਚਤਿ.

ਮਹਾਰਟ੍ਠਂਨਾਮ ਮਹਾਨਗਰਰਟ੍ਠਂ. ਆਧੁਨਾ ਹਿ ਮਹਾਰਟ੍ਠਮੇਵ ਨ ਗਰਸਦ੍ਦੇਨ ਯੋਜੇਤ੍ਵਾ ਮਹਾਨਗਰਰਟ੍ਠਨ੍ਤਿ ਵੋਹਰਨ੍ਤੀਤਿ. ਸਿਯਾਮਰਟ੍ਠਨ੍ਤਿਪਿ ਵਦਨ੍ਤਿ ਆਚਰਿਯਾ.

ਚਿਨਰਟ੍ਠਂਨਾਮ ¶ ਹਿਮਵਨ੍ਤੇਨ ਏਕਾਬਦ੍ਧਂ ਹੁਤ੍ਵਾ ਠਿਤਂ ਚੀਨਰਟ੍ਠਂ ਯੇ ਵਾਤਿ.

ਇਦਂ ਸਾਸਨਸ੍ਸ ਨਵਸੁ ਠਾਨੇਸੁ ਵਿਸੁਂ ਵਿਸੁਂ ਪਤਿਟ੍ਠਾਨਂ.

ਇਦਾਨਿ ਆਦਿਤੋ ਪਟ੍ਠਾਯ ਥੇਰਪਰਮ੍ਪਰਕਥਾ ਵਤ੍ਤਬ੍ਬਾ. ਸਮ੍ਮਾਸਮ੍ਬੁਦ੍ਧਸ੍ਸ ਹਿ ਭਗਵਤੋ ਸਦ੍ਧਿਵਿਹਾਰਿਕੋ ਉਪਾਲਿਤ੍ਥੇ ਰੋ,ਤਸ੍ਸ ਸਿਸ੍ਸੋ ਦਾਸਕਤ੍ਥੇਰੋ, ਤਸ੍ਸ ਸਿਸ੍ਸੋ ਸੋਣਕਤ੍ਥੇਰੋ, ਤਸ੍ਸ ਸਿਸ੍ਸੋ ਸਿਗ੍ਗਵਤ੍ਥੇਰੋ ਚਨ੍ਦਵਜ੍ਜਿਤ੍ਥੇ ਰੋ ਚ, ਤੇਸਂ ਸਿਸ੍ਸੋ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋਤਿ ਇਮੇ ਪਞ੍ਚਮਹਾਥੇਰਾ ਸਾਸਨਵਂਸੇ ਆਦਿਭੂਤਾ ਆਚਰਿਯਪਰਮ੍ਪਰਾਨਾਮ. ਤੇਸਞ੍ਹਿ ਸਿਸ੍ਸਪਰਮ੍ਪਰਭੂਤਾ ਥੇਰਪਰਮ੍ਪਰਾ ਯਾਵਜ੍ਜਤਨਾ ਨ ਉਪਚ੍ਛਿਨ੍ਧਨ੍ਤਿ. ਆਚਰਿਯਪਰਮ੍ਪਰਾਯ ਚ ਲਜ੍ਜਿਭਿਕ੍ਖੂ ਯੇਵ ਪਵੇਸੇਤ੍ਵਾ ਕਥੇਤਬ੍ਬਾ ਨੋ ਅਲਜ੍ਜਿਭਿਕ੍ਖੂ. ਅਲਜ੍ਜੀਭਿਕ੍ਖੂ ਨਾਮ ਹਿ ਬਹੁਸ੍ਸੁਤਾਪਿ ਸਮਾਨਾ ਲਾਭਗਰੁਲੋਕਗਰੁਆਦਿਹਿ ਧਮ੍ਮਤਨ੍ਤਿ ਨਾਸੇਤ੍ਵਾ ਸਾਸਨਵਰੇ ਮਹਾਭਯਂ ਉਪ੍ਪਾਦੇਨ੍ਤੀਤਿ. ਸਾਸਨਰਕ੍ਖਨਕਮ੍ਮਂਨਾਮ ਹਿ ਲਜ੍ਜੀਨਂਯੇਵ ਵਿਸਯੋ ਨੋ ਅਲਜ੍ਜੀਨਂ. ਤੇਨਾਹੁ ਪੋਰਾਣਾ ਥੇਰਾ, ਅਨਾਗਤੇ ਸਾਸਨਂ ਕੋ ਨਾਮ ਰਕ੍ਖਿਸ੍ਸਤੀਤਿ ਅਨੁਪੇਕ੍ਖਿਤ੍ਵਾ ਅਨਾਗਤੇ ਸਾਸਨਂ ਲਜ੍ਜਿਨੋ ਰਕ੍ਖਿਸ੍ਸਨ੍ਤਿ, ਲਜ੍ਜਿਨੋ ਰਕ੍ਖਿਸ੍ਸਨ੍ਤਿ, ਲਜ੍ਜਿਨੋ ਰਕ੍ਖਿਸ੍ਸਨ੍ਤੀਤਿ ਤਿਕ੍ਖਾਤ੍ਤੁਂ ਵਾਚਂ ਨਿਚ੍ਛਾਰੇਸੁਂ. ਏਵਂ ਮਜ੍ਝਿਮਦੇਸੇਪਿ ਅਲਜ੍ਜੀਪੁਗ੍ਗਲਾ ਬਹੁ ਸਨ੍ਤੀਤਿ ਵੇਦਿਤਬ੍ਬਾ.

ਪਰਿਨਿਬ੍ਬਾਨਤੋ ਹਿ ਭਗਵਤੋ ਵਸ੍ਸਸਤਾਨਂ ਉਪਰਿ ਪੁਬ੍ਬੇ ਵੁਤ੍ਤਨਯੇਨੇਵ ਵਜ੍ਜਿਪੁਤ੍ਤਕਾ ਭਿਕ੍ਖੂ ਅਧਮ੍ਮਵਤ੍ਥੂਨਿ ਦੀਪੇਤ੍ਵਾ ਪਠਮਸਙ੍ਗੀਤਿਕਾਲੇ ਬਹਿਕਤੇਹਿ ਪਾਪਭਿਕ੍ਖੂਹਿ ਸਦ੍ਧਿਂ ਮਨ੍ਤੇਤ੍ਵਾ ਸਹਾਯਂ ਗਵੇਸੇਤ੍ਵਾ ਮਹਾਸਙ੍ਗੀਤਿਵੋਹਾਰੇਨ ਮਹਾਥੇਰਾ ਵਿਯ ਸਙ੍ਗੀਤਿਂ ਅਕਂਸੁ. ਕਤ੍ਵਾ ਚ ਵਿਸੁਂ ਗਣਾ ਅਹੇਸੁਂ. ਅਹੋਵਤ ਇਦਂ ਹਾਸਿਤਬ੍ਬਕਮ੍ਮਂ, ਸੇਯ੍ਯਥਾਪਿ ਨਾਮ ਜਰਸਿਙ੍ਗਾਲੋ ਚਤੁਪਦਸਾਮਞ੍ਞੇਨ ਮਾਨਂ ਜਪ੍ਪੇਤ੍ਵਾ ਅਤ੍ਤਾਨਂ ਸੀਹਂ ਵਿਯ ਮਞ੍ਞਿਤ੍ਵਾ ਸੀਹੋ ਵਿਯ ਸੀਹਨਾਦਂ ਨਦੀਤਿ. ਤੇ ਪਾਵਚਨਂ ਯਥਾ ਭੂਤਂ ¶ ਅਜਾਨਿਤ੍ਵਾ ਸਦ੍ਦਚ੍ਛਾਯਾਮਤ੍ਤੇਨ ਯਥਾਭੂਤਂ ਅਤ੍ਥਂ ਨਾਮ ਸਿਂਸੁ. ਕਿਞ੍ਚਿ ਪਾਵਚਨਮ੍ਪੀ ਅਪਨੇਸੁਂ. ਤਞ੍ਚ ਸਕਗਣੇਯੇਵ ਹੋਤਿ, ਨ ਧਮ੍ਮਵਾਦੀਗਣੇ. ਧਮ੍ਮਵਿਨਯਂ ਵਿਕੋਪੇਤ੍ਵਾ ਯਥਿਚ੍ਛਿਤ ਵਸੇਨੇਵ ਚਰਿਂਸੁ. ਅਯਂ ਪਨ ਮਹਾਸਙ੍ਗੀਤਿਨਾਮ ਏਕੋ ਅਧਮ੍ਮਵਾਦੀਗਣੋ.

ਤਤੋ ਪਚ੍ਛਾ ਕਾਲਂ ਅਤਿਕ੍ਕਨ੍ਤੇ ਤਤੋਯੇਵ ਅਞ੍ਞਮਞ੍ਞਂ ਵਾਦਤੋ ਭਿਜ੍ਜਿਤ੍ਵਾ ਗੋਕੁਲਿਕੋਨਾਮ ਏਕੋ ਗਣੋ ਏਕਬ੍ਯੋਹਾਰੋਨਾਮ ਏਕੋਤਿ ਦ੍ਵੇ ਗਣਾ ਭਿਜ੍ਜਿਂਸੁ. ਤਤੋ ਪਚ੍ਛਾ ਗੋਕੁਲਿਕਗਣਗਣਤੋਯੇਵ ਅਞ੍ਞਮਞ੍ਞਂ ਭਿਜ੍ਜਿਤ੍ਵਾ ਬਹੁਸ੍ਸੁਤਿਕੋਨਾਮ ਏਕੋ ਗਣੋ ਪਞ੍ਞਤ੍ਤਿਵਾਦੋਨਾਮ ਏਕੋਤਿ ਦ੍ਵੇ ਗਣਾ ਭਿਜ੍ਜਿਂਸੁ. ਪੁਨਪਿ ਤੇਹਿਯੇਵ ਗਣੇਹਿ ਚੇਤਿਯਵਾਦੋਨਾਮ ਏਕੋ ਗਣੋ ਭਿਜ੍ਜਿ.

ਤਤੋ ਪਚ੍ਛਾ ਚਿਰਕਾਲਂ ਅਤਿਕ੍ਕਨ੍ਤੇ ਧਮ੍ਮਵਾਦੀਗਣੇਹਿ ਵਿਸਭਾਗਗਣਂ ਪਵਿਸਿਤ੍ਵਾ ਮਹਿਂਸਾਸਕੋਨਾਮ ਏਕੋਗਣੋ ਵਜ੍ਜਿਪੁਤ੍ਤਕੋਨਾਮ ਏਕੋਤਿ ਦ੍ਵੇ ਗਣਾ ਭਿਜ੍ਜਿਂਸੁ. ਤਤੋ ਪਚ੍ਛਾਪਿ ਵਜ੍ਜਿਪੁਤ੍ਤਕਗਣਤੋਯੇਵ ਅਞ੍ਞਮਞ੍ਞਂ ਭਿਜ੍ਜਿਤ੍ਵਾ ਧਮ੍ਮੁਤ੍ਤਰਿਕੋਨਾਮ ਏਕੋ ਗਣੋ, ਭਦ੍ਦਯਾਨਿਕੋਨਾਮ ਏਕੋ, ਛਨ੍ਨਾਗਾਰਿਕੋਨਾਮ ਏਕੋ, ਸਮੁਤਿਕੋਨਾਮ ਏਕੋਤਿ ਚਤ੍ਤਾਰੋ ਗਣਾ ਭਿਜ੍ਜਿਂਸੁ.

ਪੁਨਪਿ ਮਹਿਂਸਾਸਕਗਣਤੋ ਅਞ੍ਞਮਞ੍ਞਂ ਭਿਜ੍ਜਿਤ੍ਵਾ ਸਬ੍ਬਤ੍ਥਿਵਾਦੋਨਾਮ ਏਕੋ ਗਣੋ, ਧਮ੍ਮਗੁਤ੍ਤਿਕੋਨਾਮ ਏਕੋ, ਕਸ੍ਸਪਿਯੋਨਾਮ ਏਕੋ, ਸਙ੍ਕਨ੍ਤਿਕੋਨਾਮ ਏਕੋ, ਸੁਤ੍ਤਵਾਦੋ ਨਾਮ ਏਕੋਤਿ ਪਞ੍ਚ ਗਣਾ ਭਿਜ੍ਜਿਂਸੁ.

ਏਵਂ ਮਜ੍ਝਿਮਦੇਸੇ ਦੁਤਿਯਸਙ੍ਗੀਤਿਂ ਸਙ੍ਗਾਯਨ੍ਤਾਨਂ ਮਹਾਥੇਰਾਨਂ ਧਮ੍ਮਵਾਦੀਥੇਰਵਾਦਗਣਤੋ ਵਿਸੁਂ ਵਿਸੁਂ ਭਿਜ੍ਜਮਾਨਾ ਅਧਮ੍ਮਵਾਦੀਗਣਾ ਸਤ੍ਤਰਸ ਅਹੇਸੁਂ. ਤੇ ਚ ਅਧਮ੍ਮਵਾਦੀਗਣਾ ਸਾਸਨੇ ਥੇਰਪਰਮ੍ਪਰਾਯ ਅਨਨ੍ਤੋ ਗਧਾ. ਤੇ ਹਿ ਸਾਸਨੇ ਉਪਕਾਰਾ ਨ ਹੋਨ੍ਤਿ, ਥੇਰਪਰਮ੍ਪਰਾਯ ਚ ਪਵੇਸੇਤ੍ਵਾ ਗਣ੍ਹਿਤੁਂ ਨ ਸਕ੍ਕਾ, ਯਥਾ ਹਂਸਗਣੇ ਬਕੋ, ਯਥਾ ਚ ਗੋ ਗਣੇ ¶ ਗਵਜੋ, ਯਥਾ ਚ ਸੁਵਣ੍ਣਗਣੇ ਹਾਰਕੁਟੋਤਿ.

ਮਹਾਕਸ੍ਸਪਤ੍ਥੇਰਾਦਿਤੋ ਪਨ ਆਗਤਾ ਥੇਰਪਰਮ੍ਪਰਾ ਉਪਾਲਿ ਦਾਸਕੋ ਚੇਵਾਤਿਆਦਿਨਾ ਪਰਿਵਾਰਖਨ੍ਧਕੇ ਸਮਨ੍ਤਪਾਸਾਦਿਕਟ੍ਠਕਥਾਯਞ੍ਚ ਆਗਤਨਯੇਨੇਵ ਵੇਦਿਤਬ੍ਬਾ.

ਉਪਾਲਿਤ੍ਥੇਰਾਦੀਨਂ ਪਰਿਸੁਦ੍ਧਾਚਾਰਾਦੀਨਿ ਅਨੁਮਾਨੇਤ੍ਵਾ ਯਾਵ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਾ, ਤਾਵ ਤੇਸਂ ਥੇਰਾਨਂ ਪਰਿਸੁਦ੍ਧਾ ਚਾਰਾਦੀਨੀਤਿ ਸਕ੍ਕਾ ਞਾਤੁਂ, ਸੇਯ੍ਯਥਾਪਿ ਨਦਿਯਾ ਉਪਰਿਸੋਤੇ ਮੇਘਵਸ੍ਸਾਨਿ ਅਨੁਮਾਨੇਤ੍ਵਾ ਅਧੋਸੋਤੇ ਨਦਿਯਾ ਉਦਕਸ੍ਸ ਬਾਹੁਲ੍ਲਭਾਵੋ ਵਿਞ੍ਞਾਤੁਂ ਸਕ੍ਕਾਤਿ ਅਯਂ ਕਾਰਣਾਨੁਮਾਨਨਯੋ ਨਾਮ.

ਯਾਵ ਪਨ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਾ, ਤਾਵ ਥੇਰਾਨਂ ਪਰਿਸੁਦ੍ਧਾਚਾਰਾਦੀਨਿ ਅਨੁਮਾਨੇਤ੍ਵਾ ਉਪਾਲਿਤ੍ਥੇਰਸ੍ਸ ਪਰਿਸੁਦ੍ਧਾਚਾਰਾਦੀਨੀਤਿ ਸਕ੍ਕਾ ਞਾਤੁਂ, ਸੇਯ੍ਯਥਾਪਿ ਨਾਮ ਉਪਰਿਧੂਮਂ ਪਸ੍ਸਿਤ੍ਵਾ ਅਨੁਮਾਨੇਤ੍ਵਾ ਅਗ੍ਗਿ ਅਤ੍ਥੀਤਿ ਸਕ੍ਕਾ ਞਾਤੁਨ੍ਤਿ ਅਯਂ ਫਲਾਨੁਮਾਨਨ ਯੋ ਨਾਮ.

ਅਦਿਭੂਤਸ੍ਸ ਪਨ ਉਪਾਲਿਤ੍ਥੇਰਸ੍ਸ ਅਵਸਾਨਭੂਤਸ੍ਸ ਚ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਪਰਿਸੁਦ੍ਧਾਚਾਰਾਦੀਨਿ ਅਨੁਮਾਨੇਤ੍ਵਾ ਮਜ੍ਝੇ ਦਾਸਕਸੋਣਸਿਗ੍ਗਵਾਦੀਨਂ ਥੇਰਾਨਂ ਪਰਿਸੁਦ੍ਧਾਚਾਰਾਦੀਨਿਤਿ ਸਕ੍ਕਾ ਞਾਤੁਂ, ਸੇਯ੍ਯਥਾਪਿ ਨਾਮ ਸਿਲਾਪਟ੍ਟਸ੍ਸ ਓਰਭਾਗੇ ਪਾਰਭਾਗੇ ਚ ਮਿਗਪਦਵਲ਼ਞ੍ਜਨਂ ਦਿਸ੍ਵਾ ਅਨੁਮਾਨੇਤ੍ਵਾ ਮਜ੍ਝੇ ਅਪਾਕਟਂ ਪਦਵਲ਼ਞ੍ਚਨਂ ਅਤ੍ਥੀਤਿ ਸਕ੍ਕਾ ਞਾਤੁਨ੍ਤਿ ਅਯਂ ਮਿਗਪਦਵਲ਼ਞ੍ਜਨ ਨਯੋ ਨਾਮ.

ਏਵਂ ਤੀਹਿ ਨਯੇਹਿ ਅਯਂ ਥੇਰਵਾਦਗਣੋ ਧਮ੍ਮਵਾਦੀਲਜ੍ਜਿਪੇਸਲੋਤਿ ਵੇਦਿਤਬ੍ਬੋ. ਏਵਮੁਪਰਿਪਿ ਨਯੋ ਨੇਤਬ੍ਬੋ. ਥੇਰਪਰਮ੍ਪਰਾ ਚ ਯਾਵ ਪੋਤ੍ਥਕਾਰੁਲ਼ਾ ਪਰਿਵਾਰਖਨ੍ਧਕੇ ਸਮਨ੍ਤ ਪਾਸਾਦਿਕਾਯਞ੍ਚ ਤਤੋ ਮਹਿਨ੍ਦੋ ਇਟ੍ਟਿਯੋਤਿਆਦਿਨਾ ਵੁਤ੍ਤ ਨਯੇਨ ਵੇਦਿਤਬ੍ਬਾਤਿ.

ਇਤਿ ਸਾਸਨਵਂਸੇ ਨਵਟ੍ਠਾਨਾਗਤਸਾਸਨਵਂਸਕਥਾਮਗ੍ਗੋ

ਨਾਮ ਪਠਮੋ ਪਰਿਚ੍ਛੇਦੋ.

੨. ਸੀਹਲ਼ਦੀਪਿਕਸਾਸਨਵਂਸਕਥਾਮਗ੍ਗੋ

੨. ਇਦਾਨਿ ¶ ਸੀਹਲ਼ਦੀਪਸਾਸਨਕਥਾਮਗ੍ਗਂ ਵਤ੍ਤੁਂ ਓਕਾਸੋ ਅਨੁਪ੍ਪਤ੍ਤੋ, ਤਸ੍ਮਾ ਤਂ ਵਕ੍ਖਾਮਿ.

ਸੀਹਲ਼ਦੀਪਞ੍ਹਿ ਸਾਸਨਸ੍ਸ ਪਤਿਟ੍ਠਾਨਭੂਤਤ੍ਤਾ ਚੇਤਿਯਗਬ੍ਭਸਦਿਸਂ ਹੋਤਿ. ਸਮ੍ਮਾਸਮ੍ਬੁਦ੍ਧੋ ਕਿਰ ਸੀਹਲ਼ਦੀਪਂ ਧਰਮਾਨਕਾਲੇਪਿ ਤਿਕ੍ਖਤ੍ਤੁਂ ਅਗਮਾਸਿ. ਪਠਮਂ ਯਕ੍ਖਾਨਂ ਦਮਨਤ੍ਥਂ ਏਕਕੋਵ ਗਨ੍ਤ੍ਵਾ ਯਕ੍ਖੇ ਦਮੇਤ੍ਵਾ ਮਯਿ ਪਰਿਨਿਬ੍ਬੁਤੇ ਸੀਹਲ਼ਦੀਪੇ ਸਾਸਨਂ ਪਤਿਟ੍ਠਹਿਸ੍ਸਤੀਤਿ ਤਮ੍ਬਪਣ੍ਣਿਦੀਪੇ ਆਰਕ੍ਖਂ ਕਰੋਨ੍ਤੋ ਤਿਕ੍ਖਤ੍ਤੁਂ ਦੀਪਂ ਆਵਿਞ੍ਛਿ. ਦੁਤਿਯਂ ਮਾਤੁਲਭਾਗਿਨੇਯ੍ਯਾਨਂ ਨਾਗਰਾ ਜੂਨਂ ਦਮਨਤ੍ਥਾਯ ਏਕਕੋਵ ਗਨ੍ਤ੍ਵਾ ਤੇ ਦਮੇਤ੍ਵਾ ਅਗਮਾਸਿ. ਤਤਿਯਂ ਪਞ੍ਚਭਿਕ੍ਖੁਸਤਪਰਿਵਾਰੋ ਗਨ੍ਤ੍ਵਾ ਮਹਾਚੇਤਿਯਟ੍ਠਾਨੇ ਚ ਥੂਪਾਰਾਮਚੇਤਿਯਟ੍ਠਾਨੇ ਚ ਮਹਾਬੋਧਿਪਤਿਟ੍ਠਿਤਟ੍ਠਾਨੇ ਚ ਮਹਿਯਙ੍ਗਣਚੇਤਿਯਟ੍ਠਾਨੇ ਚ ਮੁਦਿਙ੍ਗਣਚੇਤਿਯਟ੍ਠਾਨੇ ਚ ਦੀਘਵਾਪਿ ਚੇਤਿਯਟ੍ਠਾਨੇ ਚ ਕਲ੍ਯਾਣਿਯਚੇਤਿਯਟ੍ਠਾਨੇ ਚ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸੀਦਿ.

ਤਦਾ ਚ ਪਨ ਸਾਸਨਂ ਓਗਾਹੇਤ੍ਵਾਨ ਤਾਵ ਤਿਟ੍ਠਤਿ. ਪਚ੍ਛਾ ਪਨ ਯਥਾਵੁਤ੍ਤਤ੍ਥੇਰਪਰਮ੍ਪਰਾਯ ਸਮਭਿਨਿਵਿਟ੍ਠੇਨ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਪੇਸਿਤੋ ਮਹਿਨ੍ਦਤ੍ਥੇਰੋ ਜਿਨਚਕ੍ਕੇ ਪਞ੍ਚਤਿਂਸਾਧਿਕੇ ਦ੍ਵਿਸਤੇ ਸਮ੍ਪਤ੍ਤੇ ਦੁਤਿਯਕਤ੍ਤਿਕਮਾਸੇ ਇਟ੍ਟਿਯੇਨ ਉਤ੍ਤਿਯੇਨ ਸਮ੍ਬੁਲੇਨ ਭਦ੍ਦਸਾਲੇਨ ਚਾਤਿ ਏਤੇਹਿ ਥੇਰੇਹਿ ਸਦ੍ਧਿਂ ਸੀਹਲ਼ਦੀਪਂ ਅਗਮਾਸਿ. ਸੋਣੁਤ੍ਤਰਤ੍ਥੇਰਾਦਯੋ ਜਿਨਚਕ੍ਕੇ ਪਞ੍ਚਤਿਂਸਾਧਿਕੇ ਦ੍ਵਿਸਤੇ ਸਮ੍ਪਤ੍ਤੇ ਦੁਤਿਯਕਤ੍ਤਿਕਮਾਸੇਯੇਵ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਅਤ੍ਤਨੋ ਅਤ੍ਤਨੋ ਸਮ੍ਪਤ੍ਤਭਾਰਭੂਤਂ ਤਂ ਤਂ ਠਾਨਂ ਅਗਮਂਸੁ.

ਮਹਾਮਹਿਨ੍ਦਤ੍ਥੇਰੋ ਪਨ ਸਤ੍ਤਮਾਸਾਨਿ ਆਗਮੇਤ੍ਵਾ ਜਿਨਚਕ੍ਕੇ ਛਤ੍ਤਿਂਸਾਧਿਕੇ ਦ੍ਵਿਸਤੇ ਸਮ੍ਪਤ੍ਤੇ ਜੇਟ੍ਠਮਾਸਸ੍ਸ ਪੁਣ੍ਣਮਿਯਂ ਸੀਹਲ਼ਦੀਪਂ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਅਗਮਾਸਿ. ਤੇਨੇਵ ਤੇਸੁ ਨਵਸੁ ਠਾਨੇਸੁ ਸੀਹਲ਼ਦੀਪਂ ਛਤ੍ਤਿਂਸਾਧਿਕੇ ਦ੍ਵਿਸ ਤੇ ¶ ਅਗਮਾਸਿ. ਅਞ੍ਞਾਨਿ ਪਨ ਅਟ੍ਠ ਠਾਨਾਨਿ ਪਞ੍ਚਤਿਂਸਾਧਿਕਦ੍ਵਿਸਤੇਯੇਵ ਅਗਮਾਸੀਤਿ ਵਿਸੁਂਵ ਵਤ੍ਥਪੇਤਬ੍ਬੋ.

ਕਸ੍ਮਾ ਪਨ ਮਹਾਮਹਿਨ੍ਦਤ੍ਥੇਰੋ ਸਤ੍ਤਮਾਸਾਨਿ ਆਗਮੇਤ੍ਵਾ ਸਬ੍ਬਪਚ੍ਛਾ ਸੀਹਲ਼ਦੀਪਂ ਗਚ੍ਛਤੀਤਿ. ਸੀਹਲ਼ਦੀਪੇ ਮੁਟਭਿਵੋ ਨਾਮ ਰਾਜਾ ਜਰਾਦੁਬ੍ਬਲੋ ਅਹੋਤਿ, ਸਾਸਨਂ ਪਗ੍ਗਹੇਤੁਂ ਅਸਮਤ੍ਥੋ, ਤਸ੍ਸ ਪਨ ਪੁਤ੍ਤੋ ਦੇਵਾਨਂ ਪਿਯ ਤਿਸ੍ਸੋ ਨਾਮ ਰਾਜਕੁਮਾਰੋ ਦਹਰੋ ਸਾਸਨਂ ਪਗ੍ਗਹੇਤੁਂ ਸਮਤ੍ਥੋ ਭਵਿਸ੍ਸਤਿ, ਸੋ ਚ ਦੇਵਾਨਂ ਵਿਯਤਿਸ੍ਸੋ ਰਜ੍ਜਂ ਤਾਵ ਲਭਤੁ ਵੇਦਿਸ੍ਸਕਗਿਰਿਨਗਰੇ ਮਾਤੁਯਾ ਸਦ੍ਧਿਂ ਞਾਤਕੇ ਤਾਵ ਪਸ੍ਸਾਮੀਤਿ ਅਪੇਕ੍ਖਿਤ੍ਵਾ ਸਤ੍ਤਮਾਸਾਨਿ ਆਗਮੇਤ੍ਵਾ ਛਤ੍ਤਿਂਸਾਧਿਕਦ੍ਵਿਸਤੇਯੇਵ ਜਿਨਚਕ੍ਕੇ ਮਹਾਮਹਿਨ੍ਦਤ੍ਥੇਰੋ ਸੀਹਲ਼ਦੀਪਂ ਗਚ੍ਛਤੀਤਿ ਵੇਦਿਤਬ੍ਬਂ.

ਮਹਾਮਹਿਨ੍ਦਤ੍ਥੇਰੋ ਚ ਇਟ੍ਟਿਯਾਦੀਹਿ ਥੇਰੇਹਿ ਚਤੂਹਿ ਭਾਗਿਨੇਯ੍ਯੇਨ ਸੁਮਨਸਾਮਣੇਰੇਨ ਭਣ੍ਡੁਕੇਨ ਨਾਮ ਉਪਾਸਕੇ ਨ ਚਾਤਿ ਏਤੇਹਿ ਸਦ੍ਧਿਂ ਛਤ੍ਤਿਂਸਾਧਿਕੇ ਦ੍ਵਿਸਤੇ ਜਿਨਚਕ੍ਕੇ ਜੇਟ੍ਠਮਾਸਪੁਣ੍ਣਮਿਯਂ ਸੁਵਣ੍ਣਹਂਸਾ ਵਿਯ ਜੇਟ੍ਠਮਾਸੇ ਨਭਂ ਉਗ੍ਗਨ੍ਤ੍ਵਾ ਆਕਾਸਮਗ੍ਗੇਨ ਅਨੁਰਾਧਪੁਰਸ੍ਸ ਪੁਰਤ੍ਥਿਮਦਿਸਾਭਾਗੇ ਮਿਸ੍ਸ ਕਪਬ੍ਬਤਕੂਟੇ ਪਤਿਟ੍ਠਾਸਿ.

ਜੇਟ੍ਠਮਾਸਸ੍ਸ ਚ ਪੁਣ੍ਣਮਿਯਂ ਲਙ੍ਕਾਦੀਪੇ ਜੇਟ੍ਠਮੂਲਨਕ੍ਖਤ੍ਤਸਭਾ ਹੁਤ੍ਵਾ ਮਨੁਸ੍ਸਾ ਛਣਂ ਅਕਂਸੁ. ਤੇਨੇਵਾਹ ਸਾਰਤ੍ਥਦੀਪਨਿਯਂ ਨਾਮ ਵਿਨਯਡੀਕਾਯਂ, ਜੇਟ੍ਠਮਾਸਸ੍ਸ ਪੁਣ੍ਣਮਿਯਂ ਜੇਟ੍ਠਨਕ੍ਖਤ੍ਤਂ ਮੂਲਨਕ੍ਖਤ੍ਤਂ ਵਾ ਹੋਤੀਤਿ. ਤਤ੍ਥ ਚ ਪੁਣ੍ਣਮਿਨਕ੍ਖਤ੍ਤਂ ਰਾਜਮਤ੍ਤਨ੍ਤੇ ਪੁਣ੍ਣਮਿਨਕ੍ਖਤ੍ਤਵਿਚਾਰਣਨਯੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਦੇਵਾਨਂ ਪਿਯ ਤਿਸ੍ਸੋ ਚ ਰਾਜਾ ਨਕ੍ਖਤ੍ਤਂ ਨਾਮ ਘੋਸਾਪੇਤ੍ਵਾ ਛਣਂ ਕਾਰੇਥਾਤਿ ਅਮਚ੍ਚੇ ਆਣਾਪੇਤ੍ਵਾ ਚਤ੍ਤਾਲੀ ਸਪੁਰਿਸਸਹਸ੍ਸਪਰਿਵਾਰੋ ਨਗਰਮ੍ਹਾ ਨਿਕ੍ਖਮਿਤ੍ਵਾ ਯੇਨ ਮਿਸ੍ਸ ਕਪਬ੍ਬਤੋ, ਤੇਨ ਪਾਯਾਸਿ ਮਿਗਵਂ ਕੀਲ਼ਿਤੁਕਾਮੋ. ਅਥ ਤਸ੍ਮਿਂ ਪਬ੍ਬਤੇ ਅਧਿਵਤ੍ਥਾ ਏਕਾ ਦੇਵਤਾ ਮਿਗਰੂਪੇਨ ਰਾਜਾਨਂ ਫਲੋਭੇਤ੍ਵਾ ਪਕ੍ਕੋਸਿਤ੍ਵਾ ਥੇਰਸ੍ਸ ਅਭਿਮੁਖਂ ਅਕਾਸਿ.

ਥੇਰੋ ¶ ਰਾਜਾਨਂ ਆਗਚ੍ਛਨ੍ਤਂ ਦਿਸ੍ਵਾ ਮਮਂਯੇਵ ਰਾਜਾ ਪਸ੍ਸਤੁ ਮਾ ਇਤਰੇਤਿ ਅਧਿਟ੍ਠਹਿਤ੍ਵਾ ਤਿਸ੍ਸ ਤਿਸ੍ਸ ਇਤੋ ਏਹੀਤਿ ਆਹ. ਰਾਜਾ ਤਂ ਸੁਤ੍ਵਾ ਚਿਨ੍ਤੇਸਿ, ਇਮਸ੍ਮਿਂ ਦੀਪੇ ਜਾਤੋ ਸਕਲੋਪਿ ਮਨੁਸ੍ਸੋ ਮਂ ਤਿਸ੍ਸੋਤਿ ਨਾਮਂ ਗਹੇਤ੍ਵਾ ਆਲਪਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਅਯਂ ਪਨ ਭਿਨ੍ਨਭਿਨ੍ਨਪਟਧਰੋ ਭਣ੍ਡੁਕਾਸਾਵ ਵਸਨੋ ਮਂ ਨਾਮੇਨ ਆਲਪਤਿ, ਕੋ ਨੁਖੋ ਅਯਂ ਭਵਿਸ੍ਸਤਿ, ਮਨੁਸ੍ਸੋ ਵਾ ਅਮਨੁਸ੍ਸੋ ਵਾਤਿ. ਥੇਰੋ ਆਹ,–

ਸਮਣਾ ਮਯਂ ਮਹਾਰਾਜ, ਧਮ੍ਮਰਾਜਸ੍ਸ ਸਾਵਕਾ;

ਤਵੇਵ ਅਨੁਕਮ੍ਪਾਯ, ਜਮ੍ਬੁਦੀਪਾ ਇਧਾਗਤਾਤਿ.

ਤਦਾ ਚ ਦੇਵਾਨਂ ਪਿਯਤਿਸ੍ਸੋ ਰਾਜਾ ਅਸੋਕਰਞ੍ਞਾ ਪੇਸਿਤੇਨ ਅਭਿਸੇਕੇਨ ਏਕਮਾਸਾਭਿਸਿਤ੍ਤੋ ਅਹੋਸਿ. ਵਿਸਾਖਪੁਣ੍ਣਮਾਯਂ ਹਿਸ੍ਸ ਅਭਿਸੇਕਮਕਂਸੁ. ਸੋ ਚ ਅਸੋਕਰਞ੍ਞਾ ਪੇਸਿਤੇ ਧਮ੍ਮਪਣ੍ਣਾਕਾਰੇ ਰਤਨਤ੍ਤਯਗੁਣਪ੍ਪਟਿਸਂਯੁਤ੍ਤਂ ਸਾਸਨਪ੍ਪਵਤ੍ਤਿਂ ਅਚਿਰਸੁਤਂ ਅਨੁਸ੍ਸਰਮਾਨੋ ਤਂ ਥੇਰਸ੍ਸ ਸਮਣਾ ਮਯਂ ਮਹਾਰਾਜ, ਧਮ੍ਮਰਾਜਸ੍ਸ ਸਾਵਕਾਤਿ ਵਚਨਂ ਸੁਤ੍ਵਾ ਅਯ੍ਯਾ ਨੁਖੋ ਆਗਤਾਤਿ ਤਾਵਦੇਵ ਆਵੁਧਂ ਨਿਕ੍ਖਿਪਿਤ੍ਵਾ ਏਕਮਨ੍ਤਂ ਨਿਸੀਦਿ ਸਮ੍ਮੋਦਨੀਯਂ ਕਥਂ ਕਥਯਮਾਨੋ. ਯਥਾਹ,–

ਆਵੁਧਂ ਨਿਕ੍ਖਿਪਿਤ੍ਵਾਨ, ਏਕਮਨ੍ਤਂ ਉਪਾਵਿਸਿ;

ਨਿਸਜ੍ਜ ਰਾਜਾ ਸਮ੍ਮੋਦਿ, ਬਹੁਂ ਅਤ੍ਥੂਪਸਞ੍ਹਿਤਨ੍ਤਿ.

ਸਮ੍ਮੋਦਨੀਯਂ ਕਥਞ੍ਚ ਕੁਰੁਮਾਨੇਯੇਵ ਤਸ੍ਮਿਂ ਤਾਨਿਪਿ ਚਤ੍ਤਾਲੀਸਪੁਰਿਸਸਹਸ੍ਸਾਨਿ ਆਗਨ੍ਤ੍ਵਾ ਸਮ੍ਪਰਿਵਾਰੇਸੁਂ. ਤਦਾਥੇਰੋ ਇਤਰੇਪਿ ਛ ਜਨੇ ਦਸ੍ਸੇਸਿ. ਰਾਜਾ ਦਿਸ੍ਵਾ ਇਮੇ ਕਦਾ ਆਗਤਾਤਿ ਆਹ. ਮਯਾ ਸਦ੍ਧਿਂਯੇਵ ਮਹਾਰਾਜਾਤਿ. ਇਦਾਨਿ ਪਨ ਜਮ੍ਬੁਦੀਪੇ ਅਞ੍ਞੇਪਿ ਏਵਰੂਪਾ ਸਮਣਾ ਸਨ੍ਤੀਤਿ. ਸਨ੍ਤਿ ¶ ਮਹਾਰਾਜ ਏਤਰਹਿਜਮ੍ਬੁਦੀਪੋ ਕਾਲਾਵਪਜ੍ਜੋਤੋ ਇਸਿਵਾਤਪਟਿਵਾਤੋ, ਤਸ੍ਮਿਂ–

ਤੇਵਿਜ੍ਜਾ ਇਦ੍ਧਿਪਤ੍ਤਾ ਚ, ਚੇਤੋਪਰਿਯਕੋਵਿਦਾ;

ਖੀਣਾਸਵਾ ਅਰਹਨ੍ਤੋ, ਬਹੂ ਬੁਦ੍ਧਸ੍ਸ ਸਾਵਕਾਤਿ.

ਭਨ੍ਤੇ ਕੇਨ ਆਗਤਤ੍ਥਾਤਿ. ਨੇਵ ਮਹਾਰਾਜ ਉਦਕੇਨ, ਨ ਥਲੇਨਾਤਿ. ਰਾਜਾ ਆਕਾਸੇਨ ਆਗਤਾਤਿ ਅਞ੍ਞਾਸਿ. ਥੇਰੋ ਅਤ੍ਥਿ ਨੁਖੋ ਰਞ੍ਞੋ ਪਸ੍ਸਾਵੇਯ੍ਯਤ੍ਤਿਕਨ੍ਤਿ ਵੀਮਂਸਨਤ੍ਥਾਯ ਆਸਨ੍ਨਂ ਅਮ੍ਬਰੁਕ੍ਖਂ ਆਰਬ੍ਭ ਪਞ੍ਹਂ ਪੁਚ੍ਛਿ, –

ਕਿਨ੍ਨਾਮੋ ਮਹਾਰਾਜ ਅਯਂ ਰੁਕ੍ਖੋਤਿ. ਅਮ੍ਬਰੁਕ੍ਖੋ ਨਾਮ ਭਨ੍ਤੇਤਿ. ਇਮਂ ਪਨ ਮਹਾਰਾਜ ਅਮ੍ਬਂ ਮੁਞ੍ਚਿਤ੍ਵਾ ਅਞ੍ਞੋ ਅਮ੍ਬੋ ਅਤ੍ਥਿ ਵਾ ਨਤ੍ਥਿ ਵਾਤਿ. ਅਤ੍ਥਿ ਭਨ੍ਤੇ ਅਞ੍ਞੇਪਿ ਬਹੂ ਅਮ੍ਬਰੁਕ੍ਖਾਤਿ. ਇਮਞ੍ਚ ਅਮ੍ਬਂ ਤੇ ਚ ਅਮ੍ਬੇ ਮੁਞ੍ਚਿਤ੍ਵਾ ਅਤ੍ਥਿ ਨੁਖੋ ਮਹਾਰਾਜ ਅਞ੍ਞੇ ਰੁਕ੍ਖਾਤਿ. ਅਤ੍ਥਿ ਭਨ੍ਤੇ, ਤੇ ਪਨ ਨ ਅਮ੍ਬਰੁਕ੍ਖਾਤਿ. ਅਞ੍ਞੇ ਚ ਅਮ੍ਬੇ ਅਨਮ੍ਬੇ ਚ ਮੁਞ੍ਚਿਤ੍ਵਾ ਅਤ੍ਥਿ ਪਨ ਅਞ੍ਞੋ ਰੁਕ੍ਖੋਤਿ. ਅਯਮੇਵ ਭਨ੍ਤੇ ਅਮ੍ਬ ਰੁਕ੍ਖੋਤਿ. ਸਾਧੁ ਮਹਾਰਾਜ ਪਣ੍ਡਿਤੋਸੀਤਿ.

ਅਤ੍ਥਿ ਪਨ ਮਹਾਰਾਜ ਤੇ ਞਾਤਕਾਤਿ. ਅਤ੍ਥਿ ਭਨ੍ਤੇ ਬਹੂਜਨਾਤਿ. ਤੇ ਮੁਞ੍ਚਿਤ੍ਵਾ ਕੇਚਿ ਅਞ੍ਞਾਤਕਾਪਿ ਅਤ੍ਥਿ ਮਹਾਰਾਜਾਤਿ. ਅਞ੍ਞਾਤਕਾ ਭਨ੍ਤੇ ਞਾਤਕੇਹਿ ਬਹੁਤਰਾਤਿ. ਤਵਞਾਤਕੇ ਚ ਅਞ੍ਞਾਤਕੇ ਚ ਮੁਞ੍ਚਿਤ੍ਵਾ ਅਤ੍ਥਞ੍ਞੋ ਕੋਚਿ ਮਹਾਰਾਜਾਤਿ. ਅਹਮੇਵ ਭਨ੍ਤੇਤਿ. ਸਾਧੁ ਮਹਾਰਾਜ ਅਤ੍ਤਾ ਨਾਮ ਅਤ੍ਤਨੋ ਨੇਵ ਞਾਤਕੋ ਨ ਅਞ੍ਞਾਤਕੋਤਿ.

ਅਥ ਥੇਰੋ ਪਣ੍ਡਿਤੋ ਰਾਜਾ ਸਕ੍ਖਿਸ੍ਸਤਿ ਧਮ੍ਮਂ ਅਞ੍ਞਾਤੁਨ੍ਤਿ ਚੂਲ਼ਹਤ੍ਥਿਪਦੋਪਮਸੁਤ੍ਤਂ ਕਥੇਸਿ. ਕਥਾਪਰਿਯੋਸਾਨੇ ਰਾਜਾ ਤੀਸੁ ਸਰਣੇਸੁ ਪਤਿਟ੍ਠਹਿ ਸਦ੍ਧਿਂ ਚਤ੍ਤਾਲੀਸਾਯ ਪਾਣਸਹਸ੍ਸੇਹੀਤਿ. ਤਤੋ ਪਰਂ ਯਂ ਯਂ ਵਤ੍ਤਬ੍ਬਂ, ਤਂ ਤਂ ਸਮਨ੍ਤਪਾਸਾਦਿਕਾਦੀਸੁ ਵੁਤ੍ਤਨਯੇਨ ਵੇਦਿਤਬ੍ਬਂ.

ਇਚ੍ਚੇਵਂ ਸੀਹਲ਼ਦੀਪੇ ਸਾਸਨਾਨੁਗ੍ਗਹਣ ਮਹਿਨ੍ਦਤ੍ਥੇਰਤੋ ਆਗਤਾ ¶ ਸਿਸ੍ਸਪਰਮ੍ਪਰਾ ਬਹੂ ਹੋਨ੍ਤਿ, ਗਣਨਪਥਂ ਵੀਤਿ ਵਤ੍ਤਾ. ਕਥਂ. ਮਹਾਮਹਿਨ੍ਦਤ੍ਥੇਰਸ੍ਸ ਸਿਸ੍ਸੋ ਅਰਿਟ੍ਠੋ ਨਾਮ ਥੇਰੋ, ਤਸ੍ਸ ਸਿਸ੍ਸੋ ਤਿਸ੍ਸਦਤ੍ਤੋ, ਤਸ੍ਸ ਸਿਸ੍ਸੋ ਕਾਲ਼ਸੁਮਨੋ, ਤਸ੍ਸ ਸਿਸ੍ਸੋ ਦੀਘੋ, ਤਸ੍ਸ ਸਿਸ੍ਸੋ ਦੀਘ ਸੁਮਨੋ, ਤਸ੍ਸ ਸਿਸ੍ਸੋ ਕਾਲ਼ਸੁਮਨੋ, ਤਸ੍ਸ ਸਿਸ੍ਸੋ ਨਾਗੋ, ਤਸ੍ਸ ਸਿਸ੍ਸੋ ਬੁਦ੍ਧਰਕ੍ਖਿਤੋ, ਤਸ੍ਸ ਸਿਸ੍ਸੋ ਤਿਸ੍ਸੋ, ਤਸ੍ਸ ਸਿਸ੍ਸੋ ਰੇਵੋ, ਤਸ੍ਸ ਸਿਸ੍ਸੋ ਸੁਮਨੋ, ਤਸ੍ਸ ਸਿਸ੍ਸੋ ਚੂਲ਼ਨਾਗੋ, ਤਸ੍ਸ ਸਿਸ੍ਸੋ ਧਮ੍ਮਪਾਲਿ ਏਤਾ, ਤਸ੍ਸ ਸਿਸ੍ਸੋ ਖੇਮੋ, ਤਸ੍ਸ ਸਿਸ੍ਸੋ ਉਪਲਿਸ੍ਸੋ, ਤਸ੍ਸ ਸਿਸ੍ਸੋ ਫੁਸ੍ਸਦੇਵੋ, ਤਸ੍ਸ ਸਿਸ੍ਸੋ ਸੁਮਨੋ, ਤਸ੍ਸ ਸਿਸ੍ਸੋ ਮਹਾਪਦੁਮੋ, ਤਸ੍ਸ ਸਿਸ੍ਸੋ ਮਹਾਸੀਵੋ, ਤਸ੍ਸ ਸਿਸ੍ਸੋ ਉਪਾਲਿ, ਤਸ੍ਸ ਸਿਸ੍ਸੋ ਮਹਾਨਾਗੋ, ਤਸ੍ਸ ਸਿਸ੍ਸੋ ਅਭਯੋ, ਤਸ੍ਸ ਸਿਸ੍ਸੋ ਤਿਸ੍ਸੋ, ਤਸ੍ਸ ਸਿਸ੍ਸੋ ਸੁਮਨੋ, ਤਸ੍ਸ ਸਿਸ੍ਸੋ ਚੂਲ਼ਾਭਯੋ, ਤਸ੍ਸ ਸਿਸ੍ਸੋ ਤਿਸ੍ਸੋ, ਤਸ੍ਸ ਸਿਸ੍ਸੋ ਚੂਲ਼ਦੇਵੋ, ਤਸ੍ਸ ਸਿਸ੍ਸੋ ਸੀਵੋਤਿ. ਅਯਂ ਯਾਵ ਪੋਤ੍ਥਕਾਰੁਲ਼ਸਙ੍ਖਾਤਾ ਚਤੁਤ੍ਥਸਙ੍ਗੀਤਿਕਾ, ਤਾਵ ਥੇਰਪਰਮ੍ਪਰਾਤਿ ਦਟ੍ਠਬ੍ਬਾ.

ਵੁਤ੍ਤਞ੍ਹੇਤਂ ਅਟ੍ਠਕਥਾਯਂ,– ਯਾਵਜ੍ਜਭਨਾ ਤੇਸਂਯੇਵ ਅਨ੍ਤੇਵਾਸਿਕਪਰਮ੍ਪਰਭੂਤਾਯ ਆਚਰਿਯਪਰਮ੍ਪਰਾਯ ਆਭਤਨ੍ਤਿਤਿ ਵੇਦਿਤਬ੍ਬਨ੍ਤਿ.

ਏਵਂ ਤੇਸਂ ਸਿਸ੍ਸਪਰਮ੍ਪਰਭੂਤਾ ਆਚਰਿਯਪਰਮ੍ਪਰਾ ਯਾਵਜ੍ਜਤਨਾ ਸਾਸਨੇ ਪਾਕਟਾ ਹੁਤ੍ਵਾ ਆਗਚ੍ਛਨ੍ਤੀਤਿ ਵੇਦਿਤਬ੍ਬ.

ਸਾਸਨੇ ਵਿਨਯਧਰੇਹਿ ਨਾਮ ਤਿਲਕ੍ਖਣਸਮ੍ਪਨ੍ਨੇਹਿ ਭਵਿਤਬ੍ਬਂ. ਤੀਣਿ ਹਿ ਵਿਨਯਧਰਸ੍ਸ ਲਕ੍ਖਣਾਨਿ ਇਚ੍ਛਿ ਤਬ੍ਬਾਨਿ. ਕਤਮਾਨਿ ਤੀਣਿ. ਸੁਤ੍ਤਞ੍ਚਸ੍ਸ ਸ੍ਵਾਗਤਂ ਹੋਤਿ ਸੁਪ੍ਪਵਤ੍ਤਿ ਸੁਵਿਨਿਚ੍ਛਿਤਂ ਸੁਤ੍ਤਤੋ ਅਨੁਬ੍ਯਞ੍ਜਨਤੋਤਿ ਇਦਮੇਕਂ ਲਕ੍ਖਣਂ, ਵਿਨਯੇ ਖੋ ਪਨ ਠਿਤੋ ਹੋਤਿ ਅਸਂਹੀਰੋਤਿ ਇਦਂ ਦੁਤਿਯਂ, ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤਿ ਸੁਮਨਸਿਕਤਾ ਸੁਪਧਾਰਿਤਾਤਿ ਇਦਂ ਤਤਿਯਂ.

ਤਤ੍ਥ ¶ ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤੀਤਿ ਥੇਰਪਰਮ੍ਪਰਾ ਵਂਸਪਰਮ੍ਪਰਾ ਚਸ੍ਸ ਸੁਟ੍ਠੁਗਹਿਤਾ ਹੋਤਿ. ਸੁਮਨਸਿਕਤਾਤਿ ਸੁਟ੍ਠੁ ਮਨਸਿਕਤਾ, ਆਵਜ੍ਜਿਤਮਤ੍ਤੇ ਞਜ੍ਜਲਿ ਤਪ੍ਪਦੀਪੋ ਵਿਯ ਹੋਤਿ.

ਸੁਪਧਾਰਿਤਾਤਿ ਸੁਟ੍ਠੁ ਉਪਧਾਰਿਤਾ, ਪੁਬ੍ਬਾਪਰਾਨੁਸਨ੍ਧਿਤੋ ਅਤ੍ਥਤੋ ਕਾਰਣਤੋ ਚ ਉਪ ਧਾਰਿਤਾ. ਅਤ੍ਤਨੋ ਮਤਿਂ ਪਹਾਯ ਆਚਰਿਯਸੁਦ੍ਧਿਯਾ ਵਤ੍ਤਾ ਹੋਤਿ, ਮਯ੍ਹਂ ਆਚਰਿਯੋ ਅਸੁਕਾਚਰਿਯਸ੍ਸ ਸਨ੍ਤਿਕੇ ਉਗ੍ਗਣ੍ਹਿ, ਸੋ ਅਸੁਕਸ੍ਸਾਤਿ ਏਵਂ ਸਬ੍ਬਂ ਆਚਰਿਯਪਰਮ੍ਪਰਂ ਥੇਰ ਵਾਦਙ੍ਗਂ ਆਹਰਿਤ੍ਵਾ ਯਾਵ ਉਪਾਲਿਤ੍ਥੇਰੋ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਉਗ੍ਗਣ੍ਹੀਤਿ ਪਾਪੇਤ੍ਵਾ ਠਪੇਤਿ. ਤਤੋਪਿ ਆਹਰਿਤ੍ਵਾ ਉਪਾਲਿਤ੍ਥੇਰੋ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਉਗ੍ਗਣ੍ਹਿ, ਦਾਸਕਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਉਪਾਲਿਤ੍ਥੇਰਸ੍ਸ, ਸੋਣਕਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਦੋਸਕਤ੍ਥੇਰਸ੍ਸ, ਸਿਗ੍ਗਵਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਸੋਣਕਤ੍ਥੇਰਸ੍ਸ, ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਸਿਗ੍ਗਵਤ੍ਥੇਰਸ੍ਸ ਚਣ੍ਡ ਵਜ੍ਜਿਤ੍ਥੇਰਸ੍ਸ ਚਾਤਿ ਏਵਂ ਸਬ੍ਬਂ ਆਚਰਿਯਪਰਮ੍ਪਰਂ ਥੇਰਵਾਦਙ੍ਗਂ ਆਹਰਿਤ੍ਵਾ ਅਤ੍ਤਨੋ ਆਚਰਿਯਂ ਪਾਪੇਤ੍ਵਾ ਠਪੇਤਿ. ਏਵਂ ਉਗ੍ਗਹਿਤਾ ਹਿ ਆਚਰਿਯਪਰਮ੍ਪਰਾ ਸੁਗ੍ਗਹਿਤਾ ਹੋਤਿ.

ਏਵਂ ਅਸਕ੍ਕੋਨ੍ਤੇਨ ਪਨ ਦ੍ਵੇ ਤਯੋ ਪਰਿਵਟ੍ਟਾ ਉਗ੍ਗਹੇਤਬ੍ਬਾ. ਸਬ੍ਬਪਚ੍ਛਿਮੇਨ ਹਿ ਨਯੇਨ ਯਥਾ ਆਚਰਿਯੋ ਚ ਆਚਰਿਯਾਚਰਿਯੋ ਚ ਪਾਲ਼ਿਞ੍ਚ ਪਰਿਪੁਞ੍ਛਞ੍ਚ ਵਦਨ੍ਤਿ, ਤਥਾ ਞਾਤੁਂ ਵਤ੍ਤਤੀਤਿ.

ਯਥਾ ਵੁਤ੍ਤਤ੍ਥੇਰਪਰਮ੍ਪਰਾ ਪਨ ਭਗਵਤੋ ਧਰਮਾਨਕਾਲਤੋ ਪਟ੍ਠਾਯ ਯਾਵ ਪੋਤ੍ਥਕਾਰੁਲ਼ਾ ਮੁਖਪਾਠੇਨੇਵ ਪਿਟਕਤ੍ਤਯਂ ਧਾਰੇਸੁਂ, ਪਰਿਪੁਣ੍ਣਂ ਪਨ ਕਤ੍ਵਾ ਪੋਤ੍ਥਕੇ ਲਿਖਿਤ੍ਵਾ ਨ ਠਪੇਨ੍ਤਿ. ਏਵਂ ਮਹਾਥੇਰਾ ਦੁਕ੍ਕਰਕਮ੍ਮਂ ਕਤ੍ਵਾ ਸਾਸਨਂ ਪਗ੍ਗਣ੍ਹਿਂਸੁ. ਤਤ੍ਰਿਦਂ ਵਤ੍ਥੁ,–

ਸੀਹਲ਼ਦੀਪੇ ਕਿਰ ਚਣ੍ਡਾਲਤਿਸ੍ਸਭਯੇਨ ਸਙ੍ਖੁਬ੍ਭਿਤ੍ਵਾ ਦੇਵੋ ¶ ਚ ਅਵਸ੍ਸਿਤ੍ਵਾ ਦੁਬ੍ਭਿਕ੍ਖਭਯਂ ਉਪ੍ਪਜ੍ਜਿ. ਤਦਾ ਅਕ੍ਕੋ ਦੇਵਾਨਮਿਨ੍ਦੋ ਆਗਨ੍ਤ੍ਵਾ ਤੁਮ੍ਹੇ ਭਨ੍ਤੇ ਪਿਟਕਂ ਧਾਰੇਤੁਂ ਨ ਸਕ੍ਖਿਸ੍ਸਥ, ਨਾਵਂ ਪਨ ਆਰੂਹਿਤ੍ਵਾ ਜਮ੍ਬੁਦੀਪਂ ਗਚ੍ਛਥ, ਸਚੇ ਨਾਵਾ ਅਪ੍ਪਹੋਨਕਾ ਭਵੇਯ੍ਯ, ਕਟ੍ਠੇਨ ਵਾ ਵੇਲ਼ੁਨਾ ਵਾ ਤਰਥ, ਅਭਯਤ੍ਥਾਯ ਪਨ ਮਯਂ ਰਕ੍ਖਿਸ੍ਸਾਮਾਤਿ ਆਹ.

ਤਦਾ ਸਟ੍ਠਿਮਤ੍ਤਾ ਭਿਕ੍ਖੂ ਸਮੁਦ੍ਦਤੀਰਂ ਗਨ੍ਤ੍ਵਾ ਪੁਨ ਏਤਦਹੋਸਿ,– ਮਯਂ ਜਮ੍ਬੁਦੀਪਂ ਨ ਗਚ੍ਛਿਸ੍ਸਾਮ, ਇਧੇਵ ਵਸਿਤ੍ਵਾ ਤੇਪਿਟਕਂ ਧਾਰਿਸ੍ਸਾਮਾਤਿ. ਤਤੋ ਪਚ੍ਛਾ ਨਾਵਾ ਤਿਤ੍ਥਤੋ ਨਿਵਤ੍ਤਿਤ੍ਵਾ ਸੀਹਲ਼ਦੀਪੇਕਦੇਸਂ ਮਲਯਜਨਪਦਂ ਗਨ੍ਤ੍ਵਾ ਮੂਲਫਲਾਦੀਹਿਯੇਵ ਯਾਪੇਤ੍ਵਾ ਸਜ੍ਝਾਯਂ ਅਕਂਸੁ. ਛਾਤਕਭਯੇਨ ਅਤਿਪੀਲ਼ਿਤਾ ਹੁਤ੍ਵਾ ਏਵਮ੍ਪਿ ਕਾਤੁਂ ਅਸਕ੍ਕੋਨ੍ਤੋ ਵਾਲ਼ੁਕਤਲੇ ਉਰਂ ਠਪੇਤ੍ਵਾ ਸੀਸੇਨ ਸੀਸਂ ਅਭਿਮੁਖਂ ਕਤ੍ਵਾ ਵਾਚਂ ਅਨਿਚ੍ਛਾਰੇਤ੍ਵਾ ਮਨਸਾਯੇਵ ਅਕਂਸੁ. ਏਵਂ ਦ੍ਵਾਦਸਵਸ੍ਸਾਨਿ ਸਦ੍ਧਿਂ ਅਟ੍ਠਕਥਾਯ ਤੇਪਿਟਕਂ ਰਕ੍ਖਿਤ੍ਵਾ ਸਾਸਨਂ ਅਨੁਗ੍ਗਹੇਸੁਂ.

ਦ੍ਵਾਦਸਵਸ੍ਸੇਸੁ ਪਨ ਅਤਿਕ੍ਕਨ੍ਤੇਸੁ ਤਂ ਭਯਂ ਵੂਪਸਮਿਤ੍ਵਾ ਪੁਬ੍ਬੇ ਜਮ੍ਬੁਦੀਪਂ ਗਚ੍ਛਨ੍ਤਾ ਸਤ੍ਤਭਿਕ੍ਖੁਸਤਾ ਆਗਨ੍ਤ੍ਵਾ ਸੀਹਲ਼ਦੀਪੇਕਦੇਸਂ ਰਾਮਜਨਪਦੇ ਮਣ੍ਡਲਾਰਾਮਵਿਹਾਰਂ ਆਪਜ੍ਜਿਂਸੁ. ਤੇਪਿ ਸਟ੍ਠਿਮਤ੍ਤਾ ਭਿਕ੍ਖੂ ਤਮੇਵ ਵਿਹਾਰਂ ਗਨ੍ਤ੍ਵਾ ਅਞ੍ਞਮਞ੍ਞਂ ਸਮ੍ਮਨ੍ਤੇਤ੍ਵਾ ਸਜ੍ਝਾਯਿਂਸੁ. ਤਦਾ ਅਞ੍ਞਮਞ੍ਞਂ ਸਮੇਨ੍ਤਿ, ਨ ਵਿਰੁਜ੍ਝਨ੍ਤਿ, ਗਙ੍ਗਾਦਕੇਨ ਵਿਯ ਯਮੁਨੋਦਕਂ ਸਂਸਨ੍ਦੇਨ੍ਤਿ. ਏਵਂ ਪਿਟਕਤ੍ਤਯਂ ਮੁਖਪਾਠੇਨੇਵ ਧਾਰੇਤ੍ਵਾ ਮਹਾਥੇਰਾ ਦੁਕ੍ਕਰਕਮ੍ਮਂ ਕਰੋਨ੍ਤੀਤਿ ਵੇਦਿਤਬ੍ਬਾ.

ਯਮ੍ਪਿ ਪਰਿਯਤ੍ਤਿਂ ਏਕਪਦਮਤ੍ਤਮ੍ਪਿ ਅਵਿਰਜ੍ਝਿਤ੍ਵਾ ਧਾਰੇਨ੍ਤਿ, ਤਂ ਦੁਕ੍ਕਰਕਮ੍ਮਮੇਵ.

ਸੀਹਲ਼ਦੀਪੇ ਕਿਰ ਪੁਨਬ੍ਬਸੁਕਸ੍ਸ ਨਾਮ ਕੁਟੁਮ੍ਬਿਕਸ੍ਸ ਪੁਤ੍ਤੋ ਤਿਸ੍ਸਤ੍ਥੇਰੋ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਇਮਂ ਜਮ੍ਬੁਦੀਪਂ ਆਗਨ੍ਤ੍ਵਾ ਯੋਨਕਧਮ੍ਮਰਕ੍ਖਿਤਤ੍ਥੇਰਸ੍ਸ ਸਨ੍ਤਿਕੇ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਗਚ੍ਛਨ੍ਤੋ ਨਾਵਂ ਅਭਿਰੂਹਨਤਿਤ੍ਥੇ ਏਕਸ੍ਮਿਂ ਪਦੇ ਉਪ੍ਪਨ੍ਨਕਙ੍ਖੋ ਯੋਜਨਸਤਮਗ੍ਗਂ ਨਿਵਤ੍ਤਿਤ੍ਵਾ ਆਚਰਿਯਸ੍ਸ ਸਨ੍ਤਿਕਂ ਆਗਚ੍ਛਨ੍ਤੋ ¶ ਅਨ੍ਤਰਾਮਗ੍ਗੇ ਏਕਸ੍ਸ ਕੁਟੁਮ੍ਬਿਕਸ੍ਸ ਪਞ੍ਹਂ ਕਥੇਸਿ. ਸੋ ਪਸੀਦਿਤ੍ਵਾ ਸਤਸਹਸ੍ਸਗ੍ਘਨਕਂ ਕਮ੍ਪਲਂ ਅਦਾਸਿ. ਸੋਪਿ ਤਂ ਆਹਰਿਤ੍ਵਾ ਆਚਰਿਯਸ੍ਸ ਅਦਾਸਿ. ਥੇਰੋ ਵਾ ਸਿਯਾ ਕੋਟ੍ਟੇਤ੍ਵਾ ਨਿਸੀਦਨਟ੍ਠਾਨੇ ਪਰਿਭਣ੍ਡਂ ਕਾਰੇਸਿ. ਕਿਮਤ੍ਥਾਯਾਤਿ. ਪਚ੍ਛਿਮਾਯ ਜਨਤਾਯ ਅਨੁਗ੍ਗਹਤ੍ਥਾਯ. ਏਵਂ ਕਿਰਸ੍ਸ ਅਹੋਸਿ,– ਅਮ੍ਹਾਕਂ ਗਤਮਗ੍ਗਂ ਆਵਜ੍ਜਿਤ੍ਵਾ ਅਨਾਗਤੇ ਸਬ੍ਰਹ੍ਮਚਾਰਿਨੋ ਪਟਿਪਤ੍ਤਿਂ ਪੂਰੇਤਬ੍ਬਂ ਮਞ੍ਞਿਸ੍ਸਨ੍ਤੀਤਿ. ਤਿਸ੍ਸਤ੍ਥੇਰੋਪਿ ਆਚਰਿਯਸ੍ਸ ਸਨ੍ਤਿਕੇ ਕਙ੍ਖਂ ਛਿਨ੍ਦਿਤ੍ਵਾ ਸੀਹਲ਼ਦੀਪਮੇਵ ਸਕਟ੍ਠਾਨਂ ਆਗਮਾਸੀਤਿ. ਇਚ੍ਚੇਵਂ ਪਰਿਯਤ੍ਤਿਂ ਏਕਪਦਮਤ੍ਤਮ੍ਪਿ ਅਵਿਰਜ੍ਝਿਤ੍ਵਾ ਧਾਰਣਮ੍ਪਿ ਦੁਕ੍ਕਰਕਮ੍ਮਮੇਵਾਤਿ ਦਟ੍ਠਬ੍ਬਂ.

ਯਮ੍ਪਿ ਯੇਭੁਯ੍ਯੇਨ ਪਗੁਣਂ ਨ ਕਰੋਨ੍ਤਿ, ਤਸ੍ਸ ਅਨਨ੍ਤਰਧਾਨਤ੍ਥਾਯ ਅਸਮ੍ਮੋਸਤ੍ਥਾਯ ਉਗ੍ਗਹਧਾਰਣਾਦਿਵਸੇਨ ਰਕ੍ਖਨਮ੍ਪਿ ਕਰੋਨ੍ਤਿ, ਤਂ ਦੁਕ੍ਕਰਕਮ੍ਮਮੇਵ.

ਸੀਹਲ਼ਦੀਪੇਯੇਵ ਕਿਰ ਮਹਾਭਯੇ ਏਕਸ੍ਸੇਵ ਭਿਕ੍ਖੁਨੋ ਮਹਾਨਿਦ੍ਦੇਸੋ ਪਗੁਣੋ ਅਹੋਸਿ. ਅਥ ਚਤੁਨਿਕਾਯਿਕਤਿਸ੍ਸਤ੍ਥੇਰਸ੍ਸ ਉਪਜ੍ਝਾਯੋ ਮਹਾਤਿਪਿਟਕਤ੍ਥੇਰੋ ਨਾਮ ਮਹਾਰਕ੍ਖਿਤਤ੍ਥੇਰਂਆਹ,– ਆਵੁਸੋ ਮਹਾਰਕ੍ਖਿਤ ਅਸੁਕਸ੍ਸ ਸਨ੍ਤਿਕੇ ਮਹਾਨਿਦ੍ਦੇਸਂ ਗਣ੍ਹਾਹੀਤਿ. ਪਾਪੋਕਿਰਾਯਂ ਭਨ੍ਤੇ ਨ ਗਣ੍ਹਾਮੀਤਿ. ਗਣ੍ਹਾਵੁਸੋ ਅਹਂ ਤੇ ਸਨ੍ਤਿਕੇ ਨਿਸੀਦਿਸ੍ਸਾਮੀਤਿ. ਸਾਧੁ ਭਨ੍ਤੇ ਤੁਮ੍ਹੇਸੁ ਨਿਸਿਨ੍ਨੇਸੁ ਗਣ੍ਹਿਸ੍ਸਾਮੀਤਿ ਪਟ੍ਠਪਤ੍ਵਾ ਰਤ੍ਤਿਨ੍ਦਿਵਂ ਨਿਰਨ੍ਤਰਂ ਪਰਿਯਾਪੁਣਨ੍ਤੋ ਓਸਾਨਦਿਵਸੇ ਹੇਟ੍ਠਾਮਞ੍ਚੇ ਇਤ੍ਥਿਂ ਦਿਸ੍ਵਾ ਭਨ੍ਤੇ ਸੁਤਂਯੇਵ ਮੇ ਪੁਬ੍ਬੇ, ਸਚਾਹਂ ਏਵਂ ਜਾਨੇਯ੍ਯਂ, ਨ ਈਦਿਸਸ੍ਸ ਸਨ੍ਤਿਕੇ ਧਮ੍ਮਂ ਪਰਿਯਾਪੁਣੇਯ੍ਯਨ੍ਤਿ ਆਹ. ਤਸ੍ਸ ਪਨ ਸਨ੍ਤਿਕੇ ਬਹੂ ਮਹਾਥੇਰਾ ਉਗ੍ਗਣ੍ਹਿਤ੍ਵਾ ਮਹਾਨਿਦ੍ਦੇਸਂ ਪਤਿਟ੍ਠਾਪੇਸੁਂ. ਏਵਂ ਯਂ ਯੇਭੁਯ੍ਯੇਨ ਪਗੁਣਂ ਨ ਕਰੋਨ੍ਤਿ, ਤਸ੍ਸ ਅਨਨ੍ਤਰਧਾਨਤ੍ਥਾਯ ਅਸਮ੍ਮੋਸਤ੍ਤਾਯ ਉਗ੍ਗਹਧਾਰਣਾਦਿਵਸੇਨ ਰਕ੍ਖਨਮ੍ਪਿ ਦੁਕ੍ਕਰਕਮ੍ਮਂ ਯੇਵਾਤਿ ਦਟ੍ਠਬ੍ਬਂ.

ਇਚ੍ਚੇਵਂ ਭਗਵਤੋ ਧਰਮਾਨਕਾਲਤੋ ਪਭੁਤਿ ਚਿਰਕਾਲਂ ਯਥਾਵੁਤ੍ਤਮਹਾਥੇਰਪਰਮ੍ਪਰਾ ਪਰਿਯਤ੍ਤਿਂ ਮੁਖਪਾਠੇਨੇਵ ਧਾਰੇਸੁਂ ¶ . ਅਹੋਵਤ ਪੋਰਾਣਿਕਾਨਂ ਮਹਾਥੇਰਾਨਂ ਸਤਿਪਞ੍ਞਾਸਮਾਧਿਵੇਪੁਲ੍ਲਤਾਯ ਹਿ ਤੇ ਮੁਖਪਾਠੇਨੇਵ ਧਾਰੇਤੁ ਸਕ੍ਕਾਤਿ. ਮੁਖਪਾਠੇਨੇਵ ਪੋਰਾਣਕਤ੍ਥੇਰਾਨਂ ਪਰਿਯਤ੍ਤਿਧਾਰਣਂ ਪਞ੍ਚਨਵੁਤਾਧਿਕਾਨਿ ਚਤੁਸਤਾਨਿ ਅਹੋਸਿ.

ਭਗਵਤੋ ਪਰਿਨਿਬ੍ਬਾਨਤੋ ਮਹਾਵਂਸਸਾਰਤ੍ਥਸਙ੍ਗਹੇਸੁ ਆਗਤਨਯੇਨ ਜਿਨਚਕ੍ਕੇ ਪਣ੍ਣਾਸ੍ਸਾਧਿਕੇ ਚਤੁਸਤੇ ਸਮ੍ਪਤ੍ਤੇ ਤਮ੍ਬਪਣ੍ਣਿਦੀਪੇ ਰਾਜੂਨਂ ਅਟ੍ਠਾਰਸਮਕੋ’ਸਦ੍ਧਾਤਿਸ੍ਸਸ੍ਸ ਨਾਮ ਰਞ੍ਞੋ ਪੁਤ੍ਤੋ ਵਟ੍ਟਗਾਮਣਿ ਨਾਮ ਰਾਜਾ ਰਜ੍ਜਂ ਪਤ੍ਵਾ ਛਵਸ੍ਸਕਾਲੇ ਅਨਾਗਤੇ ਸਤ੍ਤਾ ਹੀਨਸਤਿਪਞ੍ਞਾਸਮਾਧਿਕਾ ਹੁਤ੍ਵਾ ਨ ਸਕ੍ਖਿਸ੍ਸਨ੍ਤਿ ਮੁਖਪਾਠੇਨ ਧਾਰੇਤੁਨ੍ਤਿ ਉਪਪਰਿਕ੍ਖਿਤ੍ਵਾ ਪੁਬ੍ਬੇ ਵੁਤ੍ਤੇਹਿ ਮਹਾਥੇਰੇਹਿ ਅਨੁਪੁਬ੍ਬੇਨ ਆਗਤਾ ਪਞ੍ਚਮਤ੍ਤਾ ਮਹਾਥੇਰਸਤਾ ਵਟ੍ਟਗਾਮਣਿਰਾਜਾਨਂ ਨਿਸ੍ਸਾਯ ਤਮ੍ਬਪਣ੍ਣਿਦੀਪੇਕਦੇਸੇ ਮਲਯਜਨਪਦੇ ਆਲੋਕਲੇਣੇ ਅਟ੍ਠਕਥਾਯ ਸਹਪਿਟਕਤ੍ਤਯਂ ਪੋਤ੍ਥਕੇ ਆਰੋਪੇਸੁਂ.

ਤਞ੍ਚ ਯਥਾਵੁਤ੍ਤਸਙ੍ਗੀਤਿਯੋ ਉਪਨਿਧਾਯ ਚਤੁਤ੍ਥਸਙ੍ਗੀਤਿਯੇਵ ਨਾਮਾਤਿ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ ਸਾਰਤ੍ਥਦੀਪਨਿਯਂ ਨਾਮ ਵਿਨਯਟੀਕਾਯਂ,– ਚਤੁਤ੍ਥਸਙ੍ਗੀਤਿਸਦਿਸਾ ਹਿ ਪੋਤ੍ਥਕਾਰੋਹਸਙ੍ਗੀਤੀਤਿ.

ਸੀਹਲ਼ਦੀਪੇ ਪਨ ਵਟ੍ਟਗਾਮਣਿਰਾਜਾ ਮਰਮ੍ਮਰਟ੍ਠੇ ਸਿਰਿਖੇਤ੍ਤਨਗਰੇ ਏਕੋ ਨਾਮ ਕੁਕ੍ਕੁਟਸੀਸਰਾਜਾ ਚ ਏਕਕਾਲੇਨ ਰਜ੍ਜਂ ਕਾਰੇਸਿ. ਅਮਰਪੁਰਮਾਪਕਸ੍ਸ ਰਞ੍ਞੋ ਕਾਲੇ ਸੀਹਲ਼ਦੀਪਭਿਕ੍ਖੁਹਿ ਇਧ ਪੇਸਿਤਸਨ੍ਦੇਸਕਥਾਯਂ ਪਨ ਤੇਤ੍ਤਿਂਸਾਧਿਕਚਤੁਸਤੇ ਸਮ੍ਪਤ੍ਤੇ ਪੋਤ੍ਥਕਾਰੁਲ਼ਂ ਅਕਂਸੂਤਿ ਆਗਤਂ. ਵੁਤ੍ਤਞ੍ਹੇਤਂ ਤਤ੍ਥ,– ਤੇਤ੍ਤਿਂਸਾਧਿਕਚਤੁਵਸ੍ਸਸਤਪਰਿਮਾਣਕਾਲਨ੍ਤਿ.

ਇਦਂ ਸੀਹਲ਼ਦੀਪੇ ਯਾਵ ਪੋਤ੍ਥਕਾਰੁਲ਼੍ਹਾ

ਸਾਸਨਸ੍ਸ ਪਤਿਟ੍ਠਾਨਂ.

ਅਥਾਪਰਂ ¶ ਜਮ੍ਬੁਦੀਪੇ ਸੀਹਲ਼ਦੀਪੇ ਚ ਭਿਕ੍ਖੂ ਵਿਸੁਂ ਵਿਸੁਂ ਗਣਵਸੇਨ ਭਿਜ੍ਜਿਂਸੁ, ਯਥਾ ਅਨੋਤਤ੍ਤਦਹਤੋ ਨਿਕ੍ਖਮਨਨਦਿਯਾ ਗਙ੍ਗਾਯਮੁਨਾਦਿਵਸੇਨ ਭਿਜ੍ਜਨ੍ਤੀਤਿ. ਤਤ੍ਥ ਜਮ੍ਬੁਦੀਪੇ ਗਣਾਨਂ ਭਿਜ੍ਜਮਾਨਤਂ ਉਪਰਿਯੇਵ ਵਕ੍ਖਾਮ.

ਸੀਹਲ਼ਦੀਪੇ ਪਨ ਗਣਾਨਂ ਭਿਜ੍ਜਮਾਨਤਾ ਏਵਂ ਦਟ੍ਠਬ੍ਬਾ. ਕਥਂ. ਸੀਹਲ਼ਦੀਪੇ ਹਿ ਸਾਸਨਸ੍ਸ ਪਤਿਟ੍ਠਮਾਨਕਾਲਤੋ ਅਟ੍ਠਾਰਸਾਧਿ ਕਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਵਟ੍ਟਗਾਮਣਿਰਞ੍ਞਾ ਕਾਰਾਵਿਤੇ ਅਭਯਗਿਰਿਵਿਹਾਰੇ ਪਰਿਵਾਰਖਨ੍ਧਕਂ ਪਾਠਤੋ ਚ ਅਤ੍ਥਤੋ ਚ ਵਿਪਲ੍ਲਾਸਂ ਕਤ੍ਵਾ ਮਹਾਵਿਹਾਰਵਾਸਿਗਣਤੋ ਪੁਥੁ ਹੁਤ੍ਵਾ ਏਕੋ ਗਣੋ ਭਿਜ੍ਜਿ, ਸੋ ਅਭਯਗਿਰਿਵਾਸਿਗਣੋ ਨਾਮ, ਧਮ੍ਮਰੁਚਿਗਣੋਤਿ ਚ ਤਸ੍ਸੇਵ ਨਾਮਂ.

ਅਭਯਗਿਰਿਵਾਸਿਗਣਸ੍ਸ ਭਿਜ੍ਜਮਾਨਤੋ ਦ੍ਵੇਚਤ੍ਤਾਲੀਸਾਧਿਕਤਿਵਸ੍ਸਸਤੇ ਸਮ੍ਪਤ੍ਤੇ ਮਹਾਸੇਨੇਨ ਨਾਮ ਰਞ੍ਞਾ ਕਾਰਾਪਿਤੇ ਜੇਤਵਨਵਿਹਾਰੇ ਭਿਕ੍ਖੂ ਉਭਤੋਵਿਸਙ੍ਗਪਾਠੇ ਵਿਪਰੀਤਵਸੇਨ ਅਭਿਸਙ੍ਖਰਿਤ੍ਵਾ ਅਭਯਗਿਰਿਵਾਸਿਗਣਤੋ ਵਿਸੁਂ ਏਕੋ ਗਣੋ ਅਹੋਸਿ, ਸੋ ਜੇਤਵਨਵਾਸਿਗਣੋ ਨਾਮ, ਸਾਗਲਿਯਗਣੋਤਿ ਚ ਤਸ੍ਸੇਵ ਨਾਮਂ.

ਜੇਤਵਨ ਵਾਸਿਗਣਸ੍ਸ ਭਿਜ੍ਜਮਾਨਕਾਲਤੋ ਏਕਪਞ੍ਞਾਸਵਸ੍ਸਾਧਿਕਾਨਂ ਤਿਣ੍ਣਂ ਵਸ੍ਸਸਤਾਨਂ ਉਪਰਿ ਕੁਰੁਨ੍ਦਵਾਸਿਨੋ ਚ ਕੋਲਮ੍ਬਵਾਸਿਨੋ ਚ ਭਿਕ੍ਖੂ ਭਾਗਿਨੇਯ੍ਯਂ ਦਾਠਾਪਤਿਂ ਨਾਮ ਰਾਜਾਨਂ ਨਿਸ੍ਸਾਯ ਉਭਤੋਵਿਭਙ੍ਗਪਰਿਵਾਰਖਨ੍ਧਕਪਾਠੇ ਵਿਪਰੀਤਵਸੇਨ ਅਭਿਸਙ੍ਖਰਿਤ੍ਵਾ ਵੁਤ੍ਤੇਹਿ ਦ੍ਵੀਹਿ ਗਣੇਹਿ ਵਿਸੁਂ ਹੁਤ੍ਵਾ ਮਹਾਵਿਹਾਰ ਵਾਸਿਗਣ੍ਹਤ੍ਤਮਂ ਤੁਲਯਿਤ੍ਵਾ ਉਪਧਾਰੇਤ੍ਵਾ ਮਹਾਵਿਹਾਰਨਾਮਂ ਗਹੇਤ੍ਵਾ ਏਕੋ ਗਣੋ ਭਿਜ੍ਜਿ. ਏਵਂ ਸੀਹਲ਼ਦੀਪੇ ਮਹਾਮਹਿਨ੍ਦਤ੍ਥੇਰਾਦੀਨਂ ਵਂਸਭੂਤੇਨ ਮਹਾਵਿਹਾਰਵਾਸਿ ਗਣੇਨ ਸਦ੍ਧਿਂ ਚਤ੍ਤਾਰੋ ਗਣਾ ਭਿਜ੍ਜਿਂਸੁ.

ਤਤ੍ਥ ਮਹਾਵਿਹਾਰਵਾਸਿ ਗਣੋਯੇਵ ਏਕੋ ਧਮ੍ਮਵਾਦੀ ਅਹੋਸਿ, ਸੇਸਾ ਪਨ ਅਧਮ੍ਮਵਾਦਿਨੋ. ਤੇ ਚ ਤਯੋ ਅਧਮ੍ਮਵਾਦਿਨੋ ਗਣਾ ਭੂਤਤ੍ਥਂ ਪਹਾਯ ਅਭੂਤਤ੍ਥੇਨ ਧਮ੍ਮਂ ਅਗਰੁਂ ਕਤ੍ਵਾ ਚਰਿਂਸੂਤਿ ¶ ਵਚਨਤੋ ਸੀਹਲ਼ਦੀਪੇ ਅਧਮ੍ਮਵਾਦਿਨੋ ਤਯੋਪਿ ਅਲਜ੍ਜਿਨੋ ਗਣਾ ਪਰਿਮਣ੍ਡਲਸੁਪ੍ਪਟਿਚ੍ਛਨ੍ਨਾਦਿਸਿਕ੍ਖਾਪਦਾਨਿ ਅਨਾਦਿਯਿਤ੍ਵਾ ਵਿਚਰਿਂਸੁ. ਤਤੋ ਪਟ੍ਠਾਯ ਸਾਸਨੇ ਏਕਚ੍ਚਾਨਂ ਭਿਕ੍ਖੂਨਂ ਨਾਨਪ੍ਪਕਾਰਵਸੇਨ ਨਿਵਾਸਨਪਾਰੁਪਨਾਦੀਨਿ ਦਿਸ੍ਸਨ੍ਤਿਤਿ ਵੇਦਿਤਬ੍ਬਂ.

ਅਧਮ੍ਮਵਾਦਿਗਣਾਨਂ ਭਿਜ੍ਜਮਾਨਕਾਲਤੋ ਸਤ੍ਤਵੀਸਾਧਿਕਾਨਂ ਪਞ੍ਚਸਤਾਨਂ ਵਸ੍ਸਾਨਞ੍ਚ ਉਪਰਿ ਸਿਰਿਸਙ੍ਘਬੋਧਿ ਨਾਮ ਰਾਜਾ ਮਹਾਵਿਹਾਰ ਗਣਸ੍ਸ ਪਕ੍ਖੋ ਹੁਤ੍ਵਾ ਅਧਮ੍ਮਵਾਦਿਨਾ ਤਯੋ ਗਣੇ ਨਿਗ੍ਗਹਿਤ੍ਵਾ ਜਿਨਸਾਸਨਂ ਪਗ੍ਗਹੇਸਿ. ਸੋ ਚ ਸਿਰਿਸਙ੍ਘ ਬੋਧਿਰਾਜਾ ਅਮ੍ਹਾਕਂ ਮਰਮ੍ਮਰਟ੍ਠੇ ਅਰਿਮਨ੍ਦਨਨਗਰੇ ਅਨੁਰੁਦ੍ਧੇਨ ਨਾਮ ਰਞ੍ਞਾ ਸਮਕਾਲਵਸੇਨ ਰਜ੍ਜਸਮ੍ਪਤ੍ਤਿਂ ਅਨੁਭਵਿ.

ਤਤੋ ਪਚ੍ਛਾ ਸੀਹਲ਼ਦੀਪੇ ਵੋਹਾਰਕਤਿਸ੍ਸਸ੍ਸ ਨਾਮ ਰਞ੍ਞੋ ਕਾਲੇ ਕਪਿਲੇਨ ਨਾਮ ਅਮਚ੍ਚੇਨ ਸਦ੍ਧਿਂ ਮਨ੍ਤੇਤ੍ਵਾ ਮਹਾਵਿਹਾਰ ਵਾਸਿਨੋ ਭਿਕ੍ਖੂ ਨਿਸ੍ਸਾਯ ਅਧਮ੍ਮਵਾਦਿਗਣੇ ਨਿਗ੍ਗਣ੍ਹਿਤ੍ਵਾ ਜਿਨਸਾਸਨਂ ਪਗ੍ਗਣ੍ਹਾਤਿ.

ਤਤੋ ਪਚ੍ਛਾ ਚ ਗੋਟ੍ਠਾਭਯਸ੍ਸ ਨਾਮ ਰਞ੍ਞੋ ਕਾਲੇ ਅਭਯਗਿਰਿ ਵਾਸਿਨੋ ਭਿਕ੍ਖੂ ਪਰਸਮੁਦ੍ਦਂ ਪਬ੍ਬਾਜੇਤ੍ਵਾ ਮਹਾਵਿਹਾਰ ਵਾਸਿਨੋ ਭਿਕ੍ਖੂ ਨਿਸ੍ਸਾਯ ਸਾਸਨਂ ਵਿਸੋਧਯਿ.

ਤਤੋ ਪਚ੍ਛਾਪਿ ਗੋਟ੍ਠਾਭਯਰਞ੍ਞੋ ਪੁਤ੍ਤਭੂਤਸ੍ਸ ਮਹਾਸੇਨਸ੍ਸ ਨਾਮ ਰਞ੍ਞੋ ਕਾਲੇ ਅਭਯਗਿਰਿਵਾਸੀਨਂ ਭਿਕ੍ਖੂਨਂ ਅਬ੍ਭਨ੍ਤਰੇ ਸਙ੍ਘਮਿਤ੍ਤੋ ਨਾਮ ਏਕੋ ਭਿਕ੍ਖੁ ਰਞ੍ਞੋ ਪਧਾਨਾਚਰਿਯੋ ਹੁਤ੍ਵਾ ਮਹਾਮਹਿਨ੍ਦਤ੍ਥੇਰਾਦੀਨਂ ਅਰਹਨ੍ਤਾਨਂ ਨਿਵਾਸਟ੍ਠਾਨਭੂਤਂ ਮਹਾਵਿਹਾਰਾਰਾਮਂ ਵਿਨਸ੍ਸਿਤੁਂ ਮਹਾਸੇਨਰਞ੍ਞਾ ਮਨ੍ਤੇਤ੍ਵਾ ਆਰਭਿ. ਤਦਾ ਨਵਵਸ੍ਸਾਨਿ ਮਹਾਵਿਹਾਰੇ ਭਿਕ੍ਖੁ ਸਞ੍ਞੋ ਅਹੋਸਿ. ਅਹੋਵਤ ਮਹਾਥੇਰਾਨਂ ਮਹਿਦ੍ਧਿਕਾਨਂ ਨਿਵਾਸਟ੍ਠਾਨਂ ਅਲਜ੍ਜਿਨੋ ਭਿਕ੍ਖੂ ਵਿਨਸ੍ਸਾਪੇਸੁਂ, ਸੁਵਣ੍ਣਹਂਸ੍ਸਾਨਂ ਨਿਵਾਸਟ੍ਠਾਨਂ ਕਾਕਾ ਵਿਯਾਤਿ.

ਜੇਤਵਨਵਾਸੀਨਞ੍ਚ ਭਿਕ੍ਖੂਨਂ ਅਬ੍ਭਨ੍ਤਰੇ ਏਕੋ ਤਿਸ੍ਸੋ ਨਾਮ ਭਿਕ੍ਖੁ ਤੇਨੇਵ ਰਞ੍ਞਾ ਮਨ੍ਤੇਤ੍ਵਾ ਮਹਾਵਿਹਾਰੇ ਸੀਮਂ ਸਮੂਹਨਿ ¶ . ਅਛੇਕਤ੍ਤਾ ਪਨ ਤੇਸਂ ਸੀਮਸਮੂਹਨਕਮ੍ਮਂ ਨ ਸਮ੍ਪਜ੍ਜੀਤਿ. ਅਹੋਵਤ ਦੁਸ੍ਸੀਲਾਨਂ ਪਾਪਕਾਨਂ ਕਮ੍ਮਂ ਅਚ੍ਛਰਿਯਂ, ਸੇਯ੍ਯਥਾਪਿ ਨਾਮ ਸਾਖਮਿਗੋ ਅਗ੍ਗਗ੍ਘੋ ਕਾਸਿਵਤ੍ਥਂ ਮਹਗ੍ਘਂ ਭਿਨ੍ਨਤਿ, ਏਵਮੇਵ ਭਿਨ੍ਦਿਤਬ੍ਬਵਤ੍ਥੁਨਾ ਭੇਦਕਪੁਗ੍ਗਲੋ ਅਤਿਵਿਯ ਦੂਰੋ ਅਹੋਸੀਤਿ. ਭਵਨ੍ਤਿ ਚੇਤ੍ਥ, –

ਯਥਾ ਸਾਖਮਿਗੋ ਪਾਪੋ, ਅਪ੍ਪਗ੍ਘੋਯੇਵ ਕਾਸਿਕਂ;

ਮਹਗ੍ਘਂ ਕਚ੍ਚ ਭਿਨ੍ਨਂਭਿਨ੍ਨਂ, ਮਹੁਸ੍ਸਾਹੇਨ ਛਿਨ੍ਦਤਿ.

ਏਵਂ ਅਧਮ੍ਮਵਾਦੀ ਪਾਪੋ, ਧਮ੍ਮਵਾਦਿਗਣਂ ਸੁਭਂ;

ਮਹੁਸ੍ਸਾਹੇਨ ਭਿਨ੍ਦਯਿ, ਅਹੋ ਅਚ੍ਛਰਿਯੋ ਅਯਂ.

ਆਰਕਾ ਦੂਰਤੋ ਆਸੁਂ, ਭਿਨ੍ਦਿਤਬ੍ਬੇਹਿ ਭੇਦਕਾ;

ਭੂਮਿਤੋਵ ਭਵਗ੍ਗਨ੍ਤੋ, ਅਹੋ ਕਮ੍ਮਂ ਅਜਾਨਤਨ੍ਤਿ.

ਇਚ੍ਚੇਵਂ ਅਧਮ੍ਮਵਾਦਿਗਣਾਨਂ ਬਲਵਤਾਯ ਧਮ੍ਮਵਾਦਿਗਣੋ ਪਰਿਹਾਯਤਿ. ਯਥਾ ਹਿ ਗਿਜ੍ਝਸਕੁਣਸ੍ਸ ਪਕ੍ਖਵਾਤੇਨ ਸੁਵਣ੍ਣਹਂਸਾ ਪਕਤਿਯਾ ਠਾਤੁਂ ਨ ਸਕ੍ਕੋਨ੍ਤਿ, ਏਵਮੇਵ ਅਧਮ੍ਮਵਾਦੀਨਂ ਬਲਵਤਾਯ ਧਮ੍ਮਵਾਦੀ ਪਰਿਹਾਯਤਿ. ਬ੍ਯਗ੍ਘਵਨੇ ਵਿਯ ਸੁਵਣ੍ਣਮਿਗੋ ਨਿਲ੍ਲਯਿਤ੍ਵਾ ਗੋਚਰਂ ਗਣ੍ਹਾਤਿ, ਯਥਾਰੁਚਿਵਸੇਨ ਧਮ੍ਮਂ ਚਰਿਤੁਂ ਓਕਾਸਂ ਨ ਲਭਿ.

ਸੀਹਲ਼ਦੀਪੇ ਸਾਸਨਸ੍ਸ ਪਤਿਟ੍ਠਾਨਤੋ ਦ੍ਵਿਸਤ੍ਤਤਾਧਿਕਾਨਂ ਚਤੁਸਤਾਨਂ ਵਸ੍ਸਸਹਸ੍ਸਾਨਞ੍ਚ ਉਪਰਿ ਸਮ੍ਮਾਸਮ੍ਬੁਦ੍ਧਸ੍ਸ ਪਰਿਨਿਬ੍ਬਾਨਤੋ ਅਟ੍ਠਸਤ੍ਤਸਤਾਧਿਕਾਨਂ ਵਸ੍ਸਸਹਸ੍ਸਾਨਂ ਉਪਰਿ ਮਹਾਰਾਜਾ ਨਾਮ ਭੂਪਾਲੋ ਰਜ੍ਜਂ ਕਾਰੇਸਿ. ਸੋ ਪਨ ਰਾਜਾ ਞਦੁਮ੍ਬਰਗਿਰਿਵਾਸਿਕਸ੍ਸਪਤ੍ਥੇਰਗ੍ਗਮੁਖਾ ਮਹਾਵਿਹਾਰਵਾਸਿਨੋ ਭਿਕ੍ਖੂ ਤਮੇਵ ਰਾਜਾਨਂ ਨਿਸ੍ਸਾਯ ਸਾਸਨੇ ਮਲਂ ਵਿਸੋਧੇਸੁਂ, ਯਥਾ ਹੇਰਞ੍ਞਿਕੋ ਹਿਰਞ੍ਞੇ ਮਲਨ੍ਤਿ.

ਮਹਾਵਿਹਾਰਵਾਸਿਗਣਤੋ ਅਞ੍ਞੇ ਅਧਮ੍ਮਵਾਦਿਨਾ ਉਪ੍ਪਬ੍ਬਾ ਜੇਤ੍ਵਾ ¶ ਵਿਸੋਧੇਸੁਂ. ਸੋ ਚ ਮਹਾਰਾਜਾ ਅਮ੍ਹਾਕਂ ਮਰਮ੍ਮਰਟ੍ਠੇ ਅਰਿਮਦ੍ਦਨਨਗਰੇ ਨਰਪਤਿਚਞ੍ਞਿਸੂਨਾ ਨਾਮ ਰਞ੍ਞਾ ਸਮਕਾਲ ਵਸੇਨ ਰਜ੍ਜਂ ਕਾਰੇਸੀਤਿ ਵੇਦਿਤਬ੍ਬੋ.

ਤਤੋ ਪਚ੍ਛਾ ਵਿ ਵਿਜਯਬਾਹੁਰਾਜਾਨਂ ਪਰਕ੍ਕਮਬਾਹੁਰਾਜਾਨਞ੍ਚ ਨਿਸ੍ਸਾਯ ਮਹਾਵਿਹਾਰ ਵਾਸਿਨੋ ਭਿਕ੍ਖੂ ਸਾਸਨਂ ਪਰਿਸੁਦ੍ਧਂ ਅਕਂਸੁ, ਅਧਮ੍ਮਵਾਦਿਨੋ ਸਬ੍ਬੇਪਿ ਉਪ੍ਪਬ੍ਬਾਜੇਤ੍ਵਾ ਮਹਾਵਿਹਾਰਵਾਸਿਗਣੋਯੇਵ ਏਕੋ ਪਤਿਟ੍ਠਹਿ, ਯਥਾ ਅਬ੍ਭਾਦਿਉਪਕ੍ਕਿਲੇਸਮਲੇਹਿ ਵਿਮੁਤ੍ਤੋ ਨਿਸਾਨਾਥੋਤਿ.

ਸਿਰਿਸਙ੍ਘਬੋਧਿਰਾਜਾ ਵੋਹਾਰਿਕਤਿਸ੍ਸਰਾਜਾ ਗੋਟ੍ਠਾਭਯਰਾਜਾਤਿ ਏਤੇ ਰਾਜਾਨੋ ਸਾਸਨਂ ਵਿਸੋਧੇਨ੍ਤੋਪਿ ਸਬ੍ਬੇਨ ਸਬ੍ਬਂ ਅਧਮ੍ਮਵਾਦਿਗਣਾਨਂ ਅਵਿਨਸ੍ਸਨਤੋ ਸਾਸਨਂ ਪਰਿਸੁਦ੍ਧਂ ਨ ਤਾਵ ਅਹੋਸਿ. ਸਿਰਿਸਙ੍ਘਬੋਧਿਰਞ੍ਞੋ ਮਹਾਰਞ੍ਞੋ ਵਿਜਯਬਾਹੁਰਞ੍ਞੋ ਪਰਕ੍ਕਮਬਾਹੁਰਞ੍ਞੋਤਿ ਏਤੇਸਂਯੇਵ ਰਾਜੂਨਂ ਕਾਲੇ ਸਬ੍ਬੇਨ ਸਬ੍ਬਂ ਅਧਮ੍ਮਵਾਦੀਨਂ ਵਿਨਸ੍ਸਨਤੋ ਸਾਸਨਂ ਪਰਿਸੁਦ੍ਧਂ ਅਹੋਸਿ. ਤਦਾ ਪਨ ਅਧਮ੍ਮਵਾਦਿਨਾ ਸੀਸਮ੍ਪਿ ਉਟ੍ਠਹਿਤੁਂ ਨ ਸਕ੍ਕਾ, ਯਥਾ ਅਰੁਣੁਗ੍ਗੇ ਕੋਸਿਯਾਤਿ.

ਅਪਰਭਾਗੇ ਪਨ ਚਿਰਂ ਕਾਲਂ ਅਤਿਕ੍ਕਨ੍ਤੇ ਮਿਚ੍ਛਾਦਿਟ੍ਠਿਕਾਨਂ ਵਿਜਾਤਿਯਾਨਂ ਭਯੇਨ ਲਙ੍ਕਾਦੀਪੇ ਸਾਸਨਂ ਓਸਕ੍ਕਿਤ੍ਵਾ ਗਣਪੂਰਣਮਤ੍ਤਸ੍ਸਪਿ ਭਿਕ੍ਖੁਸਙ੍ਘਸ੍ਸ ਅਵਿਜ੍ਜਮਾਨਤਾਯ ਮਹਾਵਿਜਯਬਾਹੁਰਞ੍ਞੋ ਕਾਲੇ ਰਾਮਞ੍ਞਦੇਸਤੋ ਸਙ੍ਘਂ ਆਨੇਤ੍ਵਾ ਸਾਸਨਂ ਪਤਿਟ੍ਠਾਪੇਸਿ.

ਤਤੋ ਪਚ੍ਛਾ ਚ ਵਿਮਲਧਮ੍ਮਸੂਰਿਯਸ੍ਸ ਨਾਮ ਰਞ੍ਞੋ ਕਾਲੇ ਰਕ੍ਖਾਪੁਰਰਟ੍ਠਤੋ ਸਙ੍ਘਂ ਆਨੇਤ੍ਵਾ ਸਾਸਨਂ ਪਤਿਟ੍ਠਾਪੇਸਿ. ਤਤੋ ਪਚ੍ਛਾ ਚ ਵਿਮਲਸ੍ਸ ਨਾਮ ਰਞ੍ਞੋ ਕਾਲੇ ਤਤੋਯੇਵ ਸਙ੍ਘਂ ਆਨੇਤ੍ਵਾ ਸਾਸਨਂ ਪਤਿਟ੍ਠਾਪੇਸਿ. ਤਤੋ ਪਚ੍ਛਾ ਚ ਕਿਤ੍ਤਿਸ੍ਸਿਰਿਰਾਜਸੀਹਸ੍ਸ ਨਾਮ ਰਞ੍ਞੋ ਕਾਲੇ ਸ੍ਯਾਮਰਟ੍ਠਤੋ ਸਙ੍ਘਂ ਆਨੇਤ੍ਵਾ ਤਥੇਵ ਅਕਾਸੀਤਿ.

ਅਯਂ ਸੀਹਲ਼ਦੀਪੇ ਸਾਸਨਸ੍ਸ ਓਸਕ੍ਕਨਕਥਾ.

ਤਤੋ ¶ ਪਚ੍ਛਾ ਜਿਨਸਾਸਨੇ ਨਵੁਤਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਬੁਦ੍ਧਦਾਸਸ੍ਸ ਨਾਮ ਰਞ੍ਞੋ ਕਾਲੇ ਏਕੋ ਧਮ੍ਮ ਕਥਿਕਤ੍ਥੇਰੋ ਠਪੇਤ੍ਵਾ ਵਿਨਯਪਿਟਕਂ ਅਭਿਧਮ੍ਮਪਿਟਕਞ੍ਚ ਅਵਸੇਸਂ ਸੁਤ੍ਤਨ੍ਤਪਿਟਕਂ ਸੀਹਲ਼ਭਾਸਾਯ ਪਰਿਵਤ੍ਤਿਤ੍ਵਾ ਅਭਿਸਙ੍ਖਰਿਤ੍ਵਾ ਠਪੇਸਿ. ਤਞ੍ਚ ਕਾਰਣਂ ਚੂਲ਼ਵਂਸੇ ਵੁਤ੍ਤਂ.

ਤਸ੍ਸ ਕਿਰ ਬੁਦ੍ਧਦਾਸਸ੍ਸ ਰਞ੍ਞੋ ਪੁਤ੍ਤਾ ਅਸੀਤਿਮਤ੍ਤਾ ਅਸੀਤਿਮਹਾਸਾਵਕਾਨਂ ਨਾਮੇਨੇਵ ਵੋਹਾਰਿਤਾ ਅਹੇਸੁਂ. ਤੇਸੁ ਪੁਤ੍ਤੇਸੁ ਸਾਰਿਪੁਤ੍ਤਤ੍ਥੇਰਸ੍ਸ ਨਾਮੇਨ ਵੋਹਾਰਿਤੋ ਏਕੋ ਉਪਤਿਸ੍ਸੋ ਨਾਮ ਰਾਜਕੁਮਾਰੋ ਪਿਤਰਿ ਦੇਵਙ੍ਗਤੇ ਦ੍ਵੇਚਤ੍ਤਾਲੀਸਵਸ੍ਸਾਨਿ ਰਜ੍ਜਂ ਕਰੇਸਿ.

ਤਤੋ ਪਚ੍ਛਾ ਕਨਿਟ੍ਠੋ ਮਹਾਨਾਮੋ ਨਾਮ ਰਾਜਕੁਮਾਰੋ ਦ੍ਵਾਵੀਸਵਸ੍ਸਾਨਿ ਰਜ੍ਜਂ ਕਾਰੇਸਿ. ਤਸ੍ਸ ਰਞ੍ਞੋ ਕਾਲੇ ਜਿਨ ਚਕ੍ਕੇ ਤੇਤ੍ਤਿਂਸਾਧਿਕਨਵਸਤਵਸ੍ਸੇ ਸੀਹਲ਼ਦੀਪੇ ਛਸਟ੍ਠਿਮਤ੍ਤਾਨਂ ਰਾਜੂਨਂ ਪੂਰਣਕਾਲੇ ਬੁਦ੍ਧਘੋਸੋ ਨਾਮ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਸੀਹਲ਼ਭਾਸਾਯ ਲਿਖਿਤੇ ਅਟ੍ਠਕਥਾਗਨ੍ਥੇ ਮਾਗਧਭਾਸਾਯ ਪਰਿਵਤ੍ਤਿਤ੍ਵਾ ਲਿਖਿ.

ਸੋ ਪਨ ਮਹਾਨਾਮ ਰਾਜਾ ਅਮ੍ਹਾਕਂ ਮਰਮ੍ਮਰਟ੍ਠੇ ਸਿਰਿਪਚ੍ਚਯਨਗਰੇ ਸਵਿਲਞ੍ਞਿਕ੍ਰੋਵਿ ਨਾਮਕੇਨ ਰਞ੍ਞਾ ਸਮਕਾਲੋ ਹੁਤ੍ਵਾ ਰਜ੍ਜਂ ਕਾਰੇਸਿ. ਪਰਿਤ੍ਤਨਿਦ੍ਦਾਨੇ ਪਨ ਬ੍ਰੂਮਵਿ?ਥੀ? ਨਾਮਕੇਨ ਰਞ੍ਞਾ ਸਮਕਾਲੋ ਹੁਤ੍ਵਾ ਰਜ੍ਜਂ ਕਾਰੇਸੀਤਿ ਵੁਤ੍ਤਂ. ਤਂ ਨ ਯੁਜ੍ਜਤਿਯੇਵ.

ਸੀਹਲ਼ਦੀਪੇ ਪਨ ਕਿਤ੍ਤਿਸ੍ਸਿਰਿਮੇਘੋ ਨਾਮ ਰਾਜਾ ਹੁਤ੍ਵਾ ਨਵਮੇ ਵਸ੍ਸੇ ਤਸ੍ਮਿਂਯੇਵ ਦੀਪੇ ਰਾਜੂਨਂ ਦ੍ਵਾਸਟ੍ਠਿਮਤ੍ਤਾਨਂ ਪੂਰਣਕਾਲੇ ਜਿਨਚਕ੍ਕੇ ਤਿਂਸਾਧਿਕੇ ਅਟ੍ਠਸਤਵਸ੍ਸੇ ਜਮ੍ਬੁਦੀਪੇ ਕਲਿਙ੍ਗਪੁਰਤੋ ਕੁਹਸਿਵਸ੍ਸ ਨਾਮ ਰਞ੍ਞੋ ਜਾਮਾਤਾ ਦਨ੍ਤਕੁਮਾਰੋ ਹੇਮਮਾਲਂ ਨਾਮ ਰਾਜਧੀਤਂ ਗਹੇਤ੍ਵਾ ਦਾਠਾਧਾਤੁਂ ਥੇਨੇਤ੍ਵਾ ਨਵਾਯ ਤਰਿਤ੍ਵਾ ਸੀਹਲ਼ਦੀਪਂ ਅਗਮਾਸਿ. ਜਿਨਚਕ੍ਕੇ ਤਿਂਸਾਧਿਕਅਟ੍ਠਵਸ੍ਸਸਤੇ ਜੇਟ੍ਠਤਿਸ੍ਸਰਾਜਾ ਨਵਵਸ੍ਸਾਨਿ ਰਜ੍ਜਂ ਕਾਰੇਸਿ.

ਬੁਦ੍ਧਦਾਸਰਾਜਾ ¶ ਏਕੂਨਤਿਂਸਤਿ ਵਸ੍ਸਾਨਿ ਉਪਲਿਸ੍ਸਰਾਜਾ ਚਦ੍ਵਿਚਤ੍ਤਾਲੀਸਵਸ੍ਸਾਨਿ ਮਹਾਨਾਮਰਾਜਾ ਦ੍ਵਾਵੀਸਵਸ੍ਸਾਨੀਤਿ ਸਬ੍ਬਾਨਿ ਸਮ੍ਪਿਣ੍ਡਿਤ੍ਵਾ ਜਿਨਸਾਸਨਂ ਦ੍ਵਤ੍ਤਿਂਸਾਧਿਕਨਵਵਸ੍ਸਸਤਪ੍ਪਮਾਣਂ ਹੋਤਿ.

ਤਸ੍ਮਿਞ੍ਚ ਕਾਲੇ ਯਦਾ ਦ੍ਵੀਹਿ ਵਸ੍ਸੇਹਿ ਊਨਂ ਅਹੋਸਿ, ਤਦਾ ਮਹਾਨਾਮਰਞ੍ਞੋ ਕਾਲੇ ਤਿਂਸਾਧਿਕਨਵਵਸ੍ਸਸਤਮਤ੍ਤੇ ਸਾਸਨੇ ਬੁਦ੍ਧਘੋਸੋ ਨਾਮ ਥੇਰੋ ਲਙ੍ਕਾਦੀਪਂ ਅਗਮਾਸਿ.

ਅਮਰਪੁਰਮਾਪਕਸ੍ਸ ਰਞ੍ਞੋ ਕਾਲੇ ਸੀਹਲ਼ਦੀਪਿਕੇਹਿ ਭਿਕ੍ਖੂਹਿ ਪੇਸਿਤਸਨ੍ਨੇਸਪਣ੍ਣੇ ਪਨ ਛਪਣ੍ਣਾਸਾਧਿਕਨਵਵਸ੍ਸਸਤਾਤਿਕ੍ਕਨ੍ਤੇ ਸੂਤਿ ਵੁਤ੍ਤਂ.

ਏਤ੍ਥ ਠਤ੍ਵਾ ਬੁਦ੍ਧਘੋਸਤ੍ਥੇਰਸ੍ਸ ਅਟ੍ਠੁਪ੍ਪਤ੍ਤਿਂਸਙ੍ਖੇਪਮਤ੍ਤਂ ਵਕ੍ਖਾਮ. ਕਥਂ. ਸੀਹਲ਼ਭਾਸਕ੍ਖਰੇਹਿ ਪਰਿਵਤ੍ਤਿਤਂ ਪਰਿਯਤ੍ਤਿਸਾਸਨਂ ਮਾਗਧਸਾਸਕ੍ਖਰੇਨ ਕੋ ਨਾਮ ਪੁਗ੍ਗਲੋ ਪਰਿਵਤ੍ਤਿਤੁਂ ਸਕ੍ਖਿਸ੍ਸਤੀਤਿ ਮਹਾਥੇਰਾ ਨਿਮਨ੍ਤਯਿਤ੍ਵਾ ਤਾਵਤਿਂਸਭਵਨਂ ਗਨ੍ਤ੍ਵਾ ਘੋਸਂ ਦੇਵਪੁਤ੍ਤਂ ਦਿਸ੍ਵਾ ਸਦ੍ਧਿਂ ਸਕ੍ਕੇਨ ਦੇਵਾਨਮਿਨ੍ਦੇਨ ਤਂ ਯਾਚਿਤ੍ਵਾ ਬੋਧਿਰੁਕ੍ਖਸਮੀਪੇ ਘੋਸਗਾਮੇ ਕੇਸਸ੍ਸ ਨਾਮ ਬ੍ਰਾਹ੍ਮਣਸ੍ਸ ਕੇਸਿਯਾ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਾਪੇਸੁਂ. ਖਾਦਥ ਭੋਨ੍ਤੋ ਪਿਵਥ ਭੋਨ੍ਤੋਤਿਆਦਿਨਾ ਬ੍ਰਾਹ੍ਮਣਾਨਂ ਅਞ੍ਞਮਞ੍ਞਂ ਘੋਸਕਾਲੇ ਵਿਜਾਯਨਤ੍ਤਾ ਘੋਸੋਤਿ ਨਾਮਂ ਅਕਾਸਿ. ਸਤ੍ਤਵਸ੍ਸਿਕਕਾਲੇ ਸੋ ਤਿਣ੍ਣਂ ਵੇਦਾਨਂ ਪਾਰਗੂ ਅਹੋਸਿ.

ਅਥ ਖੋ ਏਕੇਨ ਅਰਹਨ੍ਤੇਨ ਸਦ੍ਧਿਂ ਵੇਦਕਥਂ ਸਲ੍ਲਪਨ੍ਤੋ ਤਂ ਕਥਂ ਨਿਟ੍ਠਾਪੇਤ੍ਵਾ ਕੁਸਲਾ ਧਮ੍ਮਾ ਅਕੁਸਲਾ ਧਮ੍ਮਾ ਅਬ੍ਯਾਕਤਾ ਧਮ੍ਮਾਤਿਆਦਿਨਾ ਪਰਮਤ੍ਥਵੇਦਂ ਨਾਮ ਬੁਦ੍ਧਮਨ੍ਤਂ ਪੁਚ੍ਛਿ. ਤਦਾ ਸੋ ਸੁਤ੍ਵਾ ਉਗ੍ਗਣ੍ਹਿਤੁਕਾਮੋ ਹੁਤ੍ਵਾ ਤਸ੍ਸ ਅਰਹਨ੍ਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਦੇਵਸਿਕਂ ਦੇਵਸਿਕਂ ਪਿਟਕਤ੍ਤਯਂ ਸਟ੍ਠਿਮਤ੍ਤੇਹਿ ਪਦਸਹਸ੍ਸੇਹਿ ਸਜ੍ਝਾਯਂ ਅਕਾਸਿ, ਵਾਚੁਗ੍ਗਤਂ ਅਕਾਸਿ. ਏਕਮਾਸੇਨੇਵ ਤਿਣ੍ਣਂ ਪਿਟਕਾਨਂ ਪਾਰਗੂ ਅਹੋਸਿ.

ਤਤੋ ¶ ਪਚ੍ਚਾ ਰਹੋ ਏਕਕੋਵ ਨਿਸਿਨ੍ਨਸ੍ਸ ਏਤਦਹੋਸਿ,– ਬੁਦ੍ਧਭਾਸਿਤੇ ਪਿਟਕਤ੍ਤਯੇ ਮਮ ਵਾ ਪਞ੍ਞਾ ਅਧਿਕਾ, ਉਦਾਹੁ ਉਪਜ੍ਝਾਯਸ੍ਸ ਵਾਤਿ. ਤਂ ਕਾਰਣਂ ਞਤ੍ਵਾ ਉਪਜ੍ਝਾਚਰਿਯੋ ਨਿਗ੍ਗਹਂ ਕਤ੍ਵਾ ਓਵਦਿ. ਸੋ ਸਂਵੇਗਪ੍ਪਤ੍ਤੋ ਹੁਤ੍ਵਾ ਖਮਾਪੇਤੁਂ ਵਨ੍ਦਿ. ਉਪਜ੍ਝਾਚਰਿਯੋ ਤ੍ਵਂ ਆਵੁਸੋ ਸੀਹਲ਼ਦੀਪਂ ਗਨ੍ਤ੍ਵਾ ਪਿਟਕਤ੍ਤਯਂ ਸੀਹਲ਼ਸ੍ਸਾਸਕ੍ਖਰੇਨ ਲਿਖਿਤਂ ਮਾਗਧਭਾਸਕ੍ਖਰੇਨ ਲਿਖਾਹਿ, ਏਵਂ ਸਤਿ ਅਹਂ ਖਮਿਸ੍ਸਾਮੀਤਿ ਆਹ.

ਬੁਦ੍ਧਘੋਸੋ ਚ ਪਿਤਰਂ ਮਿਚ੍ਛਾਦਿਟ੍ਠਿਭਾਵਤੋ ਮੋਚੇਤ੍ਵਾ ਆਚਰਿਯਸ੍ਸ ਵਚਨਂ ਸਿਰਸਾ ਪਟਿਗ੍ਗਹੇਤ੍ਵਾ ਪਿਟਕਤ੍ਤਯਂ ਲਿਖਿਤੁਂ ਸੀਹਲ਼ਦੀਪਂ ਨਾਵਾਯ ਅਗਮਾਸਿ. ਤਦਾ ਸਮੁਦ੍ਦਮਜ੍ਝੇ ਤੀਹਿ ਦਿਵਸੇਹਿ ਤਰਨ੍ਤੇ ਬੁਦ੍ਧਦਤ੍ਤਤ੍ਥੇਰੋ ਚ ਸੀਹਲ਼ਦੀਪਤੋ ਨਾਵਾਯ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਦੇਵਾਨ ਆਨੁਭਾਵੇਨ ਅਞ੍ਞਮਞ੍ਞਂ ਪਸ੍ਸਿਤ੍ਵਾ ਕਾਰਣਂ ਪੁਚ੍ਛਿਤ੍ਵਾ ਜਾਨਿ. ਜਾਨਿਤ੍ਵਾ ਚ ਬੁਦ੍ਧਦਤ੍ਤਤ੍ਥੇਰੋ ਏਵਮਾਹ,- ਮਯਾ ਆਵੁਸੋ ਕਤੋ ਜਿਨਾਲਙ੍ਕਾਰੋ ਅਪ੍ਪਸ੍ਸਾਰੋਤਿ ਮਞ੍ਞਿਤ੍ਵਾ ਪਿਟਕਤ੍ਤਯਂ ਪਰਿਵਤ੍ਤਿਤੁਂ ਲਿਖਿਤੁਂ ਓਕਾਸਂ ਨਾਦਾਸੁਂ, ਤ੍ਵਂ ਪਨ ਪਿਟਕਤ੍ਤਯਂ ਸਂਵਣ੍ਣੇਹੀਤਿ ਵਤ੍ਵਾ ਅਤ੍ਤਨੋ ਸਕ੍ਕੇਨ ਦੇਵਾਨਮਿਨ੍ਦੇਨ ਦਿਨ੍ਨਂ ਹਰਿਤਕਿਫਲਂ ਅਯੋਮਯਲੇਖਨ ਦਣ੍ਡਂ ਨਿਸਿਤਸਿਲਞ੍ਚ ਬੁਦ੍ਧਘੋਸਤ੍ਥੇਰਸ੍ਸ ਅਦਾਸਿ. ਏਵਂ ਤੇਸਂ ਦ੍ਵਿਨ੍ਨਂ ਥੇਰਾਨਂ ਅਞ੍ਞਮਞ੍ਞਂ ਸਲ੍ਲਪਨ੍ਤਾਨਂਯੇਵ ਨਾਵਾ ਸਯਮੇਵ ਅਪਨੇਤ੍ਵਾ ਗਚ੍ਛਿਂਸੁ.

ਬੁਦ੍ਧਘੋਸਤ੍ਥੇਰੋ ਚ ਸੀਹਲ਼ਦੀਪਂ ਪਤ੍ਵਾ ਪਠਮਂ ਸਙ੍ਘਪਾਲਤ੍ਥੇਰਂ ਪਸ੍ਸਿਤ੍ਵਾ ਪਿਟਕਤ੍ਤਯਂ ਮਾਗਧਭਾਸਕ੍ਖਰੇਨ ਪਰਿਵਤ੍ਤੇਤੁਂ ਆਗਤੋਮ੍ਹੀਤਿ ਕਾਰਣਂ ਆਰੋਚੇਤ੍ਵਾ ਸੀਹਲ਼ਭਿਕ੍ਖੂ ਚ ਸੀਲੇ ਪਤਿਟ੍ਠਾਯਾਤਿਆਦਿਗਾਥਂ ਨਿਯ੍ਯਾਦੇਤ੍ਵਾ ਇਮਿਸ੍ਸਾ ਗਾਥਾਯ ਅਤ੍ਥਂ ਪਿਟਕਤ੍ਤਯਂ ਆਲੋਲੇਤ੍ਵਾ ਸਂਵਣ੍ਣੇਹੀਤਿ ਉਯ੍ਯੋਜੇਸੁਂ, ਤਸ੍ਮਿਂਯੇਵ ਦਿਵਸੇ ਸਾਯਨ੍ਹਕਾਲਤੋ ਪਟ੍ਠਾਯ ਯਥਾਵੁਤ੍ਤਗਾਥਂ ਪਮੁਖਂ ਕਤ੍ਵਾ ਵਿਸੁਦ੍ਧਿਮਗ੍ਗਂ ਅਕਾਸਿ. ਕਤ੍ਵਾ ਤਂ ਕਮ੍ਮਂ ਨਿਪ੍ਫਾਦੇਤ੍ਵਾ ਤਸ੍ਸ ਞਾਣਪ੍ਪਭਵਂ ਵੀਮਂਸੇਤੁਕਾਮੋ ਦੇਵਾਨਮਿਨ੍ਦੋ ਤਞ੍ਚ ਗਨ੍ਥਂ ਅਨ੍ਤਰਧਾਪੇਸਿ. ਪੁਨਾਪਿ ਥੇਰੋ ਅਕਾਸਿ ¶ . ਤਥੇਵ ਦੇਵਾਨਮਿਨ੍ਦੋ ਅਨ੍ਤਰਧਾਪੇਸਿ. ਪੁਨਾਪਿ ਥੇਰੋ ਅਕਾਸਿ. ਏਵਂ ਤਿਕ੍ਖਤ੍ਤੁਂ ਕਾਰਾਪੇਤ੍ਵਾ ਪੁਬ੍ਬਗਨ੍ਥੇਪਿ ਦਸ੍ਸੇਸਿ. ਤਿਣ੍ਣਮ੍ਪਿ ਗਨ੍ਥਾਨਂ ਅਞ੍ਞਮਞ੍ਞਂ ਏਕਪਦਮਤ੍ਤੇਨਪਿ ਵਿਸੇਸਤਾ ਨਤ੍ਥਿ ਸਙ੍ਘਪਾਲਤ੍ਥੇਰੋ ਚ ਤਂ ਆਰਾਧਯਿਤ੍ਵਾ ਪਿਟਕਤ੍ਤਯਂ ਨਿਯ੍ਯਾਦੇਸਿ. ਏਵਂ ਵਿਸੁਦ੍ਧਿਮਗ੍ਗੇ ਸਙ੍ਘਪਾਲਤ੍ਥੇਰਸ੍ਸ ਯਾਚਨਂ ਆਰਬ੍ਭ ਵਿਸੁਦ੍ਧਿਮਗ੍ਗੋ ਕਤੋਤਿ ਆਗਤਂ. ਬੁਦ੍ਧਘੋਸੁਪ੍ਪਤ੍ਤਿਕਥਾਯਂ ਪਨ ਸਙ੍ਘਰਾਜਤ੍ਥੇਰਸ੍ਸ ਆਯਾਚਨਂ ਆਰਬ੍ਭਾਤਿ ਆਗਤਂ.

ਅਯਂ ਬੁਦ੍ਧਘੋਸੁਪ੍ਪਤ੍ਤਿਕਥਾਯਂ ਆਗਤਨਯੇਨ ਦਸ੍ਸਿਤਬੁਦ੍ਧਘੋਸੁਪ੍ਪਤ੍ਤਿਕਥਾਸਙ੍ਖੇਪੋ.

ਚੂਲ਼ਵਂਸੇ ਪਨੇਵਂ ਆਗਤੋ. ਬੁਦ੍ਧਘੋਸਤ੍ਥੇਰੋ ਨਾਮ ਮਹਾਬੋਧਿਰੁਕ੍ਖਸਮੀਪੇ ਏਕਸ੍ਮਿਂ ਬ੍ਰਾਹ੍ਮਣਗਾਮੇ ਵਿਜਾਤੋ ਤਿਣ੍ਣਮ੍ਪਿ ਵੇਦਾਨਂ ਪਾਰਗੂ ਅਹੋਸਿ ਤੇਸੁ ਤੇਸੁ ਵਾਦੇਸੁ ਚ ਅਤਿਛੇਕੋ. ਸੋ ਅਞ੍ਞੇਹਿ ਚ ਸਦ੍ਧਿਂ ਪੁਚ੍ਛਾਬ੍ਯਾਕਰਣਕਮ੍ਮਂ ਕਤ੍ਤੁਕਾਮੋ ਜਮ੍ਬੁਨੀਪਤਲੇ ਆਹਿਣ੍ਡਨ੍ਤੋ ਏਕਂ ਵਿਹਾਰਂ ਪਤ੍ਵਾ ਤਸ੍ਮਿਂ ਵਾ ਆਗਨ੍ਤੁਕਭਾਵੇਨ ਨਿਸੀਦਿ. ਤਸ੍ਮਿਞ੍ਚ ਵਿਹਾਰੇ ਰੇਵਤੋ ਨਾਮ ਥੇਰੋ ਵਸਿ. ਤੇਨ ਥੇਰੇਨ ਸਦ੍ਧਿਂ ਭਲ੍ਲਪਨ੍ਤੋ ਸੋ ਬ੍ਰਾਹ੍ਮਣਮਾਣਵੋ ਤੀਸੁ ਵੇਦੇਸੁ ਅਲੋਲੇਤ੍ਵਾ ਪਞ੍ਹਂ ਪੁਚ੍ਛਿ. ਪੁਚ੍ਛਿਤਂ ਪੁਚ੍ਛਿਤਂ ਥੇਰੋ ਬ੍ਯਾਕਾਸਿ. ਥੇਰਸ੍ਸ ਪਨ ਪੁਚ੍ਛਿਤਂ ਪਞ੍ਹਂ ਮਾਣਵੋ ਨ ਸਕ੍ਕਾ ਬ੍ਯਾਕਾਤੁਂ. ਅਥ ਮਾਣਵੋ ਪੁਚ੍ਛਿ,–ਕੋ ਨਾਮਾਯਂ ਭਨ੍ਤੇ ਮਨ੍ਤੋਤਿ. ਬੁਦ੍ਧਮਨ੍ਤੋ ਨਾਮਾਯਨ੍ਤਿ ਵੁਤ੍ਤੇ ਉਗ੍ਗਣ੍ਹਿਤੁਕਾਮੋ ਹੁਤ੍ਵਾ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਪਿਟਕਤ੍ਤਯਂ ਉਗ੍ਗਣ੍ਹਿ. ਅਚਿਰਨੇਵ ਤਿਣ੍ਣਮ੍ਪਿ ਪਿਟਕਾਨਂ ਪਾਰਗੂ ਅਹੋਸਿ. ਬੁਦ੍ਧਸ੍ਸੇਵ ਘੋਸੋ ਯਸ੍ਸ ਅਤ੍ਥੀਤਿ ਬੁਦ੍ਧਘੋਸੋਤਿ ਨਾਮੇਨ ਪਾਕਟੋ ਅਹੋਸਿ.

ਬੁਦ੍ਧਘੋਸੋ ਚ ਆਯਸ੍ਮਤੋ ਰੇਵਤਸ੍ਸ ਸਨ੍ਤਿਕੇ ਨਿਸੀਦਨ੍ਤੋ ਞਾਣੋਦਯਂ ਨਾਮ ਗਨ੍ਥਂ ਅਟ੍ਠਸ੍ਸਾਲਿਨਿਞ੍ਚ ਨਾਮ ਗਨ੍ਥਂ ਅਕਾਸਿ. ਤਤੋ ਪਚ੍ਛਾ ਪਰਿਤ੍ਤਟ੍ਠਕਥਂ ਕਤ੍ਤੁਕਾਮੋ ਹੁਤ੍ਵਾ ਆਰਭਿ. ਤਦਾ ਆਚਰਿਯੋ ਏਵਮਾਹ,– ਜਮ੍ਬੁਦੀਪੇ ਪਨ ਆਵੁਸੋ ਪਾਲ਼ਿਮਤ੍ਤਂਯੇਵ ਅਤ੍ਥਿ, ਅਟ੍ਠਕਥਾ ਪਨ ਨਤ੍ਥਿ, ਆਚਰਿਯਵਾਦੋ ਚ ¶ ਭਿਨ੍ਨੋ ਹੁਤ੍ਵਾ ਅਤ੍ਥਿ, ਤੇਨੇਵ ਮਹਾਮਹਿਨ੍ਧਤ੍ਥੇਰੇਨ ਆਨਿਤਾ ਅਟ੍ਠਕਥਾ ਤੀਸੁ ਚ ਸਙ੍ਗੀਤੀਸੁ ਆਰੁਲ਼ੋ ਪਾਲ਼ਿਯੋ ਸਾਰਿਪੁਤ੍ਤਤ੍ਥੇਰਾਦੀਹਿ ਦੇਸਿਤੋ ਕਥਾਮਗ੍ਗੋ ਸੀਹਲ਼ਦੀਪੇ ਅਤ੍ਥਿ, ਤ੍ਵਂ ਗਨ੍ਤ੍ਵਾ ਮਾਗਧਭਾਸਕ੍ਖਰੇਨ ਲਿਖੇਹੀਤਿ ਉਯ੍ਯੋਜਿਯਮਾਨੋ ਬੁਦ੍ਧਘੋਸਤ੍ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਅਨੁਰਾਧਪੁਰੇ ਮਹਾਵਿਹਾਰਂ ਪਵਿਸਿਤ੍ਵਾ ਸਙ੍ਘਪਾਲਤ੍ਥੇਰਸ੍ਸ ਸਨ੍ਤਿਕੇ ਸਦ੍ਧਿਂ ਸੀਹਲ਼ਟ੍ਠਕਥਾਯ ਥੇਰਵਾਦੇ ਸੁਤ੍ਵਾ ਅਟ੍ਠਕਥਂ ਕਰਿਸ੍ਸਮੀਤਿ ਆਰੋਚੇਸਿ. ਸੀਹਲ਼ਭਿਕ੍ਖੂ ਚ ਪੁਬ੍ਬੇ ਵੁਤ੍ਤਨਯੇਨੇਵ ਸੀਲੇ ਪਤਿਟ੍ਠਾਯਾਤਿਆਦਿ ਗਾਥਾ ਨਿਯ੍ਯਾਦੇਸੁਂ. ਬੁਦ੍ਧਘੋਸੋ ਚ ਸਦ੍ਧਿਂ ਅਟ੍ਠਕਥਾਯ ਪਿਟਕਤ੍ਤਯਂ ਸਙ੍ਖਿਪਿਤ੍ਵਾ ਵਿਸੁਦ੍ਧਿਮਗ੍ਗਂ ਅਕਾਸਿ.

ਪੁਬ੍ਬੇ ਵੁਤ੍ਤਨਯੇਨੇਵ ਸਕ੍ਕੋ ਅਨ੍ਤਰਧਾਪੇਤ੍ਵਾ ਤਿਕ੍ਖਤ੍ਤੁਂ ਕਾਰਾਪੇਸਿ. ਸਙ੍ਘਪਾਲਤ੍ਥੇਰੋਪਿ ਅਰਾਧਯਿਤ੍ਵਾ ਪਿਟਕਤ੍ਤਯਂ ਨਿਯ੍ਯਾਦੇਸੀਤਿ.

ਕਿਞ੍ਚਾਪਿ ਨਾਨਾ ਗਨ੍ਥੇਸੁ ਨਾਨਾਕਾਰੇਹਿ ਬੁਦ੍ਧਘੋਸੁਪ੍ਪਤ੍ਤਿ ਆਗਤਾ, ਤਥਾਪਿ ਬੁਦ੍ਧਘੋਸਤ੍ਥੇਰਸ੍ਸ ਸੀਹਲ਼ਦੀਪਂ ਗਨ੍ਤ੍ਵਾ ਪਿਟਕਤ੍ਤਯਸ੍ਸ ਲਿਖਨਂ ਅਟ੍ਠਕਥਾਨਞ੍ਚ ਕਰਣਮੇਵ ਪਮਾਣਨ੍ਤਿ ਮਨੋਕਿਲਿਟ੍ਠਂ ਨ ਉਪ੍ਪਾਦੇਤਬ੍ਬਨ੍ਤਿ. ਬੁਦ੍ਧਘੋਸਤ੍ਥੇਰੋ ਵਿਕਟਤ੍ਤਯਂ ਲਿਖਿਤ੍ਵਾ ਜਮ੍ਬੁਦੀਪਂ ਪਚ੍ਚਾਗਮਾਸਿ.

ਇਚ੍ਚੇਵਂ ਪਾਲ਼ਿਭਾਸਾਯ ਪਰਿਯਤ੍ਤਿਂ ਪਰਿਵਤ੍ਤਿਤ੍ਵਾ ਪਚ੍ਛਾ ਆਚਰਿਯਪਰਮ੍ਪਰਸਿਸ੍ਸਾਨੁਸਿਸ੍ਸਵਸੇਨ ਸੀਹਲ਼ਦੀਪੇ ਜਿਨਚਕ੍ਕਂ ਮਜ੍ਝਨ੍ਤਿ ਕਂਸੁਮਾਸੀ ਵਿਯ ਅਤਿਦਿਬ੍ਬਤਿ, ਅਨੇਕਕੋਟਿਪ੍ਪਮਾਣੇਹਿ ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਅਰਹਨ੍ਤੇਹਿ ਲਙ੍ਕਾਦੀਪਂ ਅਤਿਸੋਭਤਿ, ਸਬ੍ਬਪਾਲਿਫੁਲ੍ਲੇਨ ਤਿਯੋਜਨਿਕਪਾਰਿਚ੍ਛਤ੍ਤਕਰੁਕ੍ਖੇਨ ਤਾਵਤਿਂਸਭਵਨਂ ਵਿਯ ਸਤਪਤ੍ਤਪਦੁਮਾਦੀਹਿ ਮਹਾਪੋਕ੍ਖਰਣੀ ਵਿਯ ਤੇਸੁ ਤੇਸੁ ਠਾਨੇਸੁ ਮਗ੍ਗਮਹਾਮਗ੍ਗਆਪਕਘਰਦ੍ਵਾਰਤਿਤ੍ਥਵਨਪਬ੍ਬਤਗੁਹਮਨ੍ਦਿਰਵਿਹਾਰਸਾਲਾਦੀਸੁ ਅਲਦ੍ਧਮਗ੍ਗਫਲਟ੍ਠਾਨਂ ਨਾਮ ਕਿਞ੍ਚਿ ਨਤ੍ਥਿ, ਥੋਕਂ ਆਗਮੇਤ੍ਵਾ ਪਿਣ੍ਡਾਯ ਪਤਿਟ੍ਠਮਾਨਪਦੇਸੇਪਿ ਮਗ੍ਗਫਲਾਨਿ ਲਭਿਂਸੁਯੇਵ.

ਮਗ੍ਗਫਲਾਨਿ ਸਚ੍ਛਿਕਰੋਨ੍ਤਾਨਂ ਪੁਗ੍ਗਲਾਨਂ ਬਾਹੁਲ੍ਲਤਾਯ ਅਯਂ ¶ ਪੁਥੁਜ੍ਜਨੋ ਅਯਂ ਪੁਥੁਜ੍ਜਨੋਤਿ ਅਙ੍ਗੁਲਿਂ ਪਸਾਰੇਤ੍ਵਾ ਦਸ੍ਸੇਤਬ੍ਬੋ ਹੋਤਿ. ਏਕਸ੍ਮਿਂ ਕਾਲੇ ਸੀਹਲ਼ਦੀਪੇ ਪੁਥੁਜ੍ਜਨ ਭਿਕ੍ਖੁ ਨਾਮ ਨਤ੍ਥਿ. ਤਥਾ ਹਿ ਵੁਤ੍ਤਂ ਵਿਭਙ੍ਗਟ੍ਠਕਥਾਯਂ, ਏਕਵਾਰਂ ਪੁਥੁਜ੍ਜਨਭਿਕ੍ਖੁ ਨਾਮ ਨਤ੍ਥੀਤਿ.

ਅਭਿਞ੍ਞਾਲਾਭੀਨਂ ਕਿਰ ਮਹਿਦ੍ਧਿਕਾਨਂ ਗਮਨਾਗਮਨਵਸੇਨ ਸੂਰਿਯੋਸ੍ਸਾਸਂ ਅਲਭਿਤ੍ਵਾ ਧਞ੍ਞਕੋਟ੍ਟਕਾ ਮਾਤੁਗਾਮਾ ਧਞ੍ਞਕੋਟ੍ਟਿਤੁਂ ਓਕਾਸਂ ਨ ਲਭਿਂਸੁ.

ਦੇਵਲੋਕਤੋ ਸੁਮਨਸਾਮਣੇਰੋ ਦਕ੍ਖਿਣਕ੍ਖਕਂ ਸੀਹਲ਼ਦੀਪਂ ਅਨੇਤ੍ਵਾ ਤਸ੍ਸ ਪਾਟਿਹਾਰਿਯਂ ਦਸ੍ਸਨਵਸੇਨ ਉਦ੍ਧਕਬਿਨ੍ਧੂਹਿ ਤਿਯੋਜਨਸਤਂ ਸਕਲਮ੍ਪਿ ਲਙ੍ਕਾਦੀਪਂ ਬ੍ਯਾਪਤ੍ਵਾ ਭਗਵਤਾ ਪਰਿਭੁਤ੍ਤਚੇਤਿਯਙ੍ਗਣਂ ਵਿਯ ਹੁਤ੍ਵਾ ਨਵਾਯ ਗਚ੍ਛਨ੍ਤਾ ਮਹਾਸਮੁਦ੍ਦੇ ਉਦਕਤੋ ਨਾਲ਼ਿਕੇਰਮਤ੍ਤਮ੍ਪਿ ਦਿਸ੍ਵਾ ਸਕਲਙ੍ਕਾਦੀਪਂ ਪੂਜੇਨ੍ਤਿ, ਮਹਾਮਹਿਨ੍ਦਤ੍ਥੇਰਸ੍ਸ ਸਨ੍ਤਿਕੇ ਅਰਿਟ੍ਠਤ੍ਥੇਰੇਨ ਸਦ੍ਧਿਂ ਪਞ੍ਚਮਤ੍ਤਾ ਭਿਕ੍ਖੁਸਤਾ ਪਠਮਂ ਤਾਵ ਵਿਨਯਪਿਟਕਂ ਉਗ੍ਗਣ੍ਹਿਂਸੂਤਿ ਇਮੇਹਿ ਕਾਰਣੇਹਿ ਲਙ੍ਕਾਦੀਪਂ ਜਿਨਚਕ੍ਕਸ੍ਸ ਪਤਿਟ੍ਠਾਨਂ ਹੁਤ੍ਵਾ ਵਰਦੀਪਨ੍ਤਿ ਨਾਮਂ ਪਟਿਲਭਿ.

ਸੀਹਲ਼ਦੀਪੇਯੇਵ ਪਿਟਕਤ੍ਤਯਂ ਪੋਤ੍ਥਕਾਰੁਲ਼ਵਸੇਨ ਪਤਿਟ੍ਠਾਪੇਤ੍ਵਾ ਤਤੋ ਪਚ੍ਛਾ ਚੋਰਨਾਗਸ੍ਸ ਨਾਮ ਰਞ੍ਞੋ ਕਾਲੇ ਸਕਲਲਙ੍ਕਾਦੀਪਂ ਦੁਬ੍ਭਿਕ੍ਖਭਯੇਨ ਪੀਲ਼ੇਤ੍ਵਾ ਪਿਟਕਤ੍ਤਯਂ ਧਾਰੇਨ੍ਤਾ ਭਿਕ੍ਖੂ ਜਮ੍ਬੁਦੀਪਂ ਆਗਮਂਸੁ. ਅਨਾਗਨ੍ਤ੍ਵਾ ਤਤ੍ਥੇਵ ਠਿਤਾਪਿ ਭਿਕ੍ਖੂ ਛਾਤਕਭਯੇਨ ਪੀਲ਼ੇਤ੍ਵਾ ਉਦਰਪਟਲਂ ਬਨ੍ਧਿਤ੍ਵਾ ਕੁਚ੍ਛਿਂ ਵਾਲੁਕਰਾਸਿਮ੍ਹਿ ਠਪੇਤ੍ਵਾ ਪਿਟਕਤ੍ਤਯਂ ਧਾਰੇਸੁਂ.

ਕੁਟ ਕਣ੍ਣਤਿਸ੍ਸਸ੍ਸ ਰਞ੍ਞੋ ਕਾਲੇਯੇਵ ਦੁਬ੍ਭਿਕ੍ਖਭਯਂ ਵੂਪਸਮਿਤ੍ਵਾ ਜਮ੍ਬੁਦੀਪਤੋ ਭਿਕ੍ਖੂ ਪੁਨ ਗਨ੍ਤ੍ਵਾ ਸੀਹਲ਼ਦੀਪੇ ਠਿਤੇਹਿ ਭਿਕ੍ਖੂਹਿ ਸਦ੍ਧਿਂ ਮਹਾਵਿਹਾਰੇ ਪਿਟਕਤ੍ਤਯਂ ਅਵਿਰੋਧਾਪੇਤ੍ਵਾ ਸਮਸਮਂ ਕਤ੍ਵਾ ਠਪੇਸੁਂ. ਠਪੇਤ੍ਵਾ ਚ ਪਨ ਸੀਹਲ਼ਦੀਪੇਯੇਵ ਸੁਟ੍ਠੁ ਧਾਰੇਸੁਂ.

ਤਤ੍ਥੇਵ ਅਟ੍ਠਕਥਾਯੋ ਬੁਦ੍ਧਘੋਸਤ੍ਥੇਰੋ ਮਾਗਧਭਾਸਾਯ ਪਰਿਵਤ੍ਤੇਤ੍ਵਾ ਵਿਰਚਿ. ਪਚ੍ਛਾ ਚ ਯੇਭੁਯ੍ਯੇਨ ਤਤ੍ਥੇਵ ਅਟ੍ਠਕਥਾਟੀਕਾਅਨੁਮਧੁਲਕ੍ਖਣਗਣ੍ਠਿਗਨ੍ਥਨ੍ਤਰਾਨਿ ¶ ਅਕਂਸੁ. ਪੁਨ ਸਾਸਨਂ ਨਭੇ ਰਵਿਨ੍ਦੁਵ ਪਾਕਟਨ੍ਤਿ.

ਤਤ੍ਥ ਬੁਦ੍ਧਵਂਸਟ੍ਠਕਥਂ ਬੁਦ੍ਧਦਤ੍ਤਤ੍ਥੇਰੇ ਅਕਾਸਿ. ਇਤਿਵੁਤ੍ਤੋਦਾਨਚਰਿਯਾਪਿਟਕਥੇਰਾਥੇਰੀਵਿਮਾਨਵਤ੍ਥੁਪੇਤਵਤ੍ਥੁਨੇਤ੍ਤਿਅਟ੍ਠਕਥਾਯੋ ਆਚਰਿਯਧਮ੍ਮਪਾਲਤ੍ਥੇਰੋ ਅਕਾਸਿ. ਸੋ ਚ ਆਚਰਿਯਧਮ੍ਮਪਾਲਤ੍ਥੇਰੋ ਸੀਹਲ਼ਦੀਪਸ੍ਸ ਸਮੀਪੇ ਦਮਿਲਰਟ੍ਠੇ ਬਦਰਤਿਤ੍ਥਮ੍ਹਿ ਨਿਵਾਸਿਤਤ੍ਤਾ ਸੀਹਲ਼ਦੀਪੇਯੇਵ ਸਙ੍ਗਹੇਤ੍ਵਾ ਵਤ੍ਤਬ੍ਬੋ.

ਪਟਿਸਮ੍ਭਿਦਾਮਗ੍ਗਟ੍ਠਕਥਂ ਮਹਾਨਾਮੋ ਨਾਮ ਥੇਰੋ ਆਕਾਸਿ. ਮਹਾਨਿਦ੍ਦੇਸਟ੍ਠਕਥਂ ਉਪਸੇਨੋ ਨਾਮ ਥੇਰੋ ਅਕਾਸਿ. ਅਭਿਧਮ੍ਮਟੀਕਂ ਪਨ ਆਨਨ੍ਦਤ੍ਥੇਰੋ ਅਕਾਸਿ. ਸਾ ਚ ਸਬ੍ਬਾਸਂ ਟੀਕਾਨਂ ਆਦਿਭੂਤਤ੍ਤਾ ਮੂਲਟੀਕਾਤਿ ਪਾਕਟਾ.

ਵਿਸੁਦ੍ਧਿਮਗ੍ਗਸ੍ਸ ਮਹਾਟੀਕਂ ਦੀਘਨਿਕਾਯਟ੍ਠਕਥਾਯ ਟੀਕਂ ਮਜ੍ਝਿਮਨਿਕਾਯਟ੍ਠਕਥਾਯ ਟੀਕਂ ਸਂਯੁਤ੍ਤਨਿਕਾਯਟ੍ਠਕਥਾਯ ਟੀਕਞ੍ਹਾਤਿ ਇਮਾਯੋ ਆਚਰਿਯਧਮ੍ਮਪਾਲਤ੍ਥੇਰੋ ਅਕਾਸਿ.

ਸਾਰਤ੍ਥਦੀਪਨਿਂ ਨਾਮ ਵਿਨਯਟੀਕਂ ਅਙ੍ਗੁਤ੍ਤਰਨਿਕਾਯਟੀਕਞ੍ਚ ਪਰਕ੍ਕਮਬਾਹੁਰਞ੍ਞਾ ਯਾਚਿਤੋ ਸਾਰਿਪੁਤ੍ਤਤ੍ਥੇਰੋ ਅਕਾਸਿ. ਵਿਮਤਿਵਿਨੋਦਨਿਂ ਨਾਮ ਵਿਨਯਟੀਕਂ ਦਮਿਲਰਟ੍ਠਵਾਸਿਕਸ੍ਸਪਤ੍ਥੇਰੋ ਅਕਾਸਿ.

ਅਨੁਟੀਕਂ ਪਨ ਆਚਰਿਯਧਮ੍ਮਪਾਲਤ੍ਥੇਰੋ. ਸਾ ਚ ਮੂਲਟੀਕਾਯ ਅਨੁਤ੍ਤਾਨਤ੍ਥਾਨਿ ਉਤ੍ਤਾਨਾਨਿ ਸਂਵਣ੍ਣਿਤਤ੍ਤਾ ਅਨੁਟੀਕਾ ਤਿਵੁਚ੍ਚਤਿ.

ਵਿਸੁਦ੍ਧਿਮਗ੍ਗਸ੍ਸ ਚੂਲ਼ਟੀਕਂ ਮਖੁਦੀਪਨਿਞ੍ਚ ਅਞ੍ਞੇਤਰਾ ਥੇਰਾ ਅਕਂਸੁ. ਸਾ ਚ ਮੂਲਟੀਕਾਯ ਅਤ੍ਥਾਵਸੇਸਾਤਿ ਚ ਅਨੁਤ੍ਤਾਨਤ੍ਥਾਤਿ ਚ ਕਤ੍ਵਾ ਮੂਲਟੀਕਾਯ ਸਦ੍ਧਿਂ ਸਂਸਨ੍ਦਿਤ੍ਵਾ ਕਤਤ੍ਤਾ ਮਧੁਰ ਸਤ੍ਤਾ ਚ ਮਧੁਦੀਪਨਿਨ੍ਤਿ ਵੁਚ੍ਚਤਿ. ਮੋਹਵਿਚ੍ਛੇਦਨਿਂ ਪਨ ਲਕ੍ਖਣਗਨ੍ਥਂ ਕਸ੍ਸਪਤ੍ਥੇਰੋ ਅਕਾਸਿ.

ਆਭਿਧਮ੍ਮਾਵਤਾਰਂ ਪਨ ਰੁਪਾਰੂਪਵਿਭਾਗਂ ਵਿਨਯਵਿਨਿਚ੍ਛਯਞ੍ਚ ਬੁਦ੍ਧ ਦਤ੍ਤਤ੍ਥੇਰੋ. ਵਿਨਯਸਙ੍ਗਹਂ ਸਾਰਿਪੁਤ੍ਤਤ੍ਥੇਰੋ. ਖੁਦ੍ਦਸਿਕ੍ਖਂ ਧਮ੍ਮਸਿਰਿਤ੍ਥੇਰੋ ¶ . ਪਰਮਤ੍ਥਵਿਨਿਚ੍ਛਯਂ ਨਾਮਰੂਪਪਰਿਚ੍ਛੇਦਂ ਅਭਿਧਮ੍ਮਤ੍ਥਸਙ੍ਗਞ੍ਚ ਅਨੁਰੁਦ੍ਧਤ੍ਥੇਰੋ. ਸਚ੍ਚਸਙ੍ਖੇਪਂ ਧਮ੍ਮਪਾਲਤ੍ਥੇਰੋ. ਖੇਮਂ ਖੇਮਤ੍ਥੇਰੋ. ਤੇ ਚ ਸਙ੍ਖੇਪਤੋ ਸਂਵਣ੍ਣਿਤਤ੍ਤਾ ਸੁਖੇਨ ਚ ਲਕ੍ਖਣਿਯਤ੍ਤਾ ਲਕ੍ਖਣਗਨ੍ਥਾਤਿ ਵੁਚ੍ਚਨ੍ਤਿ.

ਤੇਸਂ ਪਨ ਸਂਵਣ੍ਣਨਾਸੁ ਅਭਿਧਮ੍ਮਤ੍ਥਸਙ੍ਗਹਸ੍ਸ ਪੋਰਾਣਟੀਕਂ ਨਵਵਿਮਲਬੁਦ੍ਧਿਤ੍ਥੇਰੋ ਅਕਾਸਿ. ਸਚ੍ਚਂਸਙ੍ਖੇਪਨਾਮਰੂਪਪਰਿਚ੍ਛੇਦਖੇਮਾਅਭਿਧਮ੍ਮਾਵਤਾਰਾਨਂ ਪੋਰਾਣਟੀਕਂ ਵਾਚਿਸ੍ਸਰਮਹਾਸਾਮਿਤ੍ਥੇਰੋ. ਪਰਮਤ੍ਥਵਿਨਿਚ੍ਛਯਸ੍ਸ ਪੋਰਾਣਟੀਕਂ ਮਹਾਬੋਧਿਤ੍ਥੇਰੋ.

ਅਭਿਧਮਤ੍ਥਸਙ੍ਗਹਾਭਿਧਮ੍ਮਾਵਤਾਰਾਭਿਨਵ ਟੀਕਾਯੋ ਸੁਮਙ੍ਗਲਸਾਮਿਤ੍ਥੇਰੋ. ਸਚ੍ਚਸਙ੍ਖੇਪਾਭਿਨਵਟੀਕਂ ਅਰਞ੍ਞਵਾਸਿਤ੍ਥੇਰੋ. ਨਾਮਰੂਪਪਰਿਚ੍ਛੇਦਾਭਿਨਵਟੀਕਂ ਮਹਾਸਾਮਿਤ੍ਥੇਰੋ. ਪਰਮਤ੍ਥਵਿਨਿਚ੍ਛਯਾਭਿਨਵਟੀਕਂ ਅਞ੍ਞਤਰਤ੍ਥੇਰੋ. ਵਿਨਯਵਿਨਿਚ੍ਛਯਟੀਕਂ ਰੇਵਤਤ੍ਥੇਰੋ. ਖੁਦ੍ਦਸਿਕ੍ਖਾਯ ਪੁਰਾਣਟੀਕਂ ਮਹਾਯਸਤ੍ਥੇਰੋ. ਤਾਯਯੇਵ ਅਭਿਨਵਟੀਕਂ ਸਙ੍ਘਰਕ੍ਖਿਤਤ੍ਥੇਰੋਤਿ.

ਵਜਿਰਬੁਦ੍ਧਿਂ ਨਾਮ ਵਿਨਯਗਣ੍ਠਿਪਦਤ੍ਥਂ ਵਜਿਰਬੁਦ੍ਧਿਤ੍ਥੇਰੋ. ਚੂਲ਼ਗਣ੍ਠਿਂ ਮਜ੍ਝਿਮਗਣ੍ਠਿਂ ਮਹਾਗਣ੍ਠਿਞ੍ਚ ਸੀਹਲ਼ਦੀਪਵਾਸਿਨੋ ਥੇਰਾ. ਤੇ ਚ ਪਦਕ੍ਕਮੇਨ ਅਸਂਵਣ੍ਣੇਤ੍ਵਾ ਅਨੁਤ੍ਤਾਨਤ੍ਥਾਯੇਵ ਸਂਵਣ੍ਣਿਤਤ੍ਤਾ ਗਣ੍ਠਿਪਦਤ੍ਥਾਤਿ ਵੁਚ੍ਚਨ੍ਤਿ.

ਅਭਿਧਾਨਪ੍ਪਦੀਪਿਕਂ ਪਨ ਮਹਾਮੋਗ੍ਗਲਾਨਤ੍ਥੇਰੋ. ਅਤ੍ਥਬ੍ਯਕ੍ਖਾਨਂ ਚੂਲ਼ਬੁਦ੍ਧਤ੍ਥੇਰੋ. ਵੁਤ੍ਤੋਦਯਂ ਸਮ੍ਬਨ੍ਧਚਿਨ੍ਤਨਂ ਸੁਬੋਧਾਲਙ੍ਕਾਰਞ੍ਚ ਸਙ੍ਘਰਕ੍ਖਿਤਤ੍ਥੇਰੋ. ਬ੍ਯਾਕਰਣਂ ਮੋਗ੍ਗਲਾਨਤ੍ਥੇਰੋ.

ਮਹਾਵਂਸਂ ਚੂਲ਼ਵਂਸਂ ਦੀਪਵਂਸਂ ਥੂਪਵਂਸਂ ਬੋਧਿਵਂਸਂ ਧਾਤੁਵਂ ਸਞ੍ਚ ਸੀਹਲ਼ਦੀਪਵਾਸਿਨੋ ਥੇਰਾ. ਦਾਠਾਧਾਤੁਵਂਸਂ ਪਨ ਧਮ੍ਮਕਿਤ੍ਤਿਤ੍ਥੇਰੋ ਅਕਾਸਿ. ਏਤੇ ਚ ਪਾਲ਼ਿਮੁਤ੍ਤਕਵਸੇਨ ਵੁਤ੍ਤਤ੍ਤਾ ਗਨ੍ਥਨ੍ਤਰਾਤਿ ਵੁਚ੍ਚਨ੍ਤਿ.

ਇਚ੍ਚੇਵਂ ਬੁਦ੍ਧਘੋਸਾਦਯੋ ਥੇਰ ਵਰਾ ਯਥਾਬਲਂ ਯਥਾਸਤ੍ਤਿਂ ਪਰਿਯਤ੍ਤਿਂ ਸਾਸਨਂ ਉਪਤ੍ਥਮ੍ਭੇਤ੍ਵਾ ਬਹੂਹਿ ਮੂਲੇਹਿ ਬਹੁਹਿਸਾਖਾਹਿ ਬਹੂਹਿ ਚ ਵਿਟਪੇਹਿ ਉਪਤ੍ਥਮ੍ਭਿਯਮਾਨੋ ਵੇਪੁਲ੍ਲਮਾ ਪਜ੍ਜਮਾਨੋ ¶ ਮਹਾਨਿਗ੍ਰੋਧਰੁਕ੍ਖੋ ਵਿਯ ਥਿਰਂ ਹੁਤ੍ਵਾ ਚਿਰਕਾਲਂ ਤਿਟ੍ਠਤੀਤਿ ਵੇਦਿਤਬ੍ਬਂ.

ਇਦਂ ਸੀਹਲ਼ਦੀਪੇ ਪੋਤ੍ਥਕਾਰੁਲ਼੍ਹਤੋ ਪਚ੍ਛਾ ਸਾਸਨਸ੍ਸ ਪਤਿਟ੍ਠਾਨਂ.

ਏਤੇਪਿ ਚ ਮਹਾਥੇਰੋ, ਯਥਾਸਤ੍ਤਿਂ ਯਥਾਬਲਂ;

ਅਟ੍ਠਕਥਾਦਯੋ ਕਤ੍ਵਾ, ਮਚ੍ਚੁਮੁਖਂ ਉਪਾਗਮੁਂ.

ਸੇਯ੍ਯਥਾਪਿ ਚ ਲੋਕਸ੍ਮਿਂ, ਓਭਾਸਿਤ੍ਵਾਨ ਚਨ੍ਦਿਮਾ;

ਆਵਹਿਤ੍ਵਾਨ ਸਤ੍ਤਾਨਂ, ਹਿਤਂ ਅਤ੍ਥਂਵ ਗਚ੍ਛਤਿ.

ਏਵਮੇਵ ਮਹਾਥੇਰਾ, ਞਾਣੋਭਾਸੇਹਿ ਭਾਸਿਯ;

ਆਵਹਿਤ੍ਵਾਨ ਸਤ੍ਤਾਨਂ, ਹਿਤਂ ਅਤ੍ਥਂਵ ਗਚ੍ਛਤਿ.

ਇਤਿ ਸਾਸਨਵਂਸੇ ਸੀਹਲ਼ਦੀਪਿਕਸਾਸਨਵਂਸਕਥਾਮਗ੍ਗੋ

ਨਾਮ ਦੁਤਿਯੋ ਪਰਿਚ੍ਛੇਦੋ.

੩. ਸੁਵਣ੍ਣਭੂਮਿਸਾਸਨਵਂਸਕਥਾਮਗ੍ਗੋ

੩. ਇਦਾਨਿ ਯਥਾਠਪਿਤਮਾਤਿਕਾਵਸੇਨ ਸੁਵਣ੍ਣਭੂਮਿ ਰਟ੍ਠੇ ਸਾਸਨਵਂਸਕਥਾਮਗ੍ਗਸ੍ਸ ਵਤ੍ਥੁਂ ਓਕਾਸੋ ਅਨੁਪ੍ਪਤ੍ਥੋ, ਤਸ੍ਮਾ ਸੁਵਣ੍ਣਭੂਮਿਰਟ੍ਠਸਾਸਨਵਂਸਕਥਾਮਗ੍ਗਂ ਆਰਭਿਸ੍ਸਾਮਿ.

ਤਤ੍ਥ ਸੁਵਣ੍ਣਭੂਮੀਤਿ ਤੀਸੁ ਰਾਮਞ੍ਞਰਟ੍ਠੇਸੁ ਏਕਸ੍ਸ ਨਾਮਂ. ਤੀਣਿਹਿ ਰਾਮਞ੍ਞਰਟ੍ਠਾਨਿ ਹੋਨ੍ਤਿ ਹਂਸਾਵਤੀਮੁਤ੍ਤਿਮਸੁਵਣ੍ਣਭੂਮਿਵਸੇਨ ਏਕਦੇਸੇਨ ਸਬ੍ਬਮ੍ਪਿ ਰਾਮਞ੍ਞਰਟ੍ਠਂ ਗਹੇਤਬ੍ਬਂ. ਤਤ੍ਥ ਪਨ ਉਕ੍ਕਲਾਪਜਨਪਦੇ ਤਪੁਸ੍ਸਭਲ੍ਲਿਕੇ ਆਦਿਂ ਕਤ੍ਵਾ ਭਗਵਤੋ ਅਭਿਸਮ੍ਬੁਜ੍ਝਿਤ੍ਵਾ ਸਤ੍ਤਸਤ੍ਤਾਹੇਸੁ ਅਤਿਕ੍ਕਨ੍ਤੇਸੁਯੇਵ ਆਸਾਲ਼੍ਹਿਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਦਿਵਸਤੋ ਪਟ੍ਠਾਯ ਰਾਮਞ੍ਞਰਟ੍ਠੇ ਸਾਸਨਂ ਪਤਿਟ੍ਠਤਿ.

ਇਦਂ ਰਾਮਞ੍ਞਰਟ੍ਠੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਭਗਵਤੋ ¶ ਅਭਿਸਮ੍ਬੁਦ੍ਧਕਾਲਤੋ ਪੁਬ੍ਬੇਯੇਵ ਅਪਰਣ੍ਣਕਰਟ੍ਠੇ ਸੁਭਿਨ੍ਨਨਗਰੇ ਤਿਸ੍ਸਰਞ੍ਞੋ ਕਾਲੇ ਏਕਸ੍ਸ ਅਮਚ੍ਚਸ੍ਸ ਤਿਸ੍ਸੋ ਜਯੋ ਚਾਤਿ ਦ੍ਵੇਪੁਤ੍ਤਾ ਅਹੇਸੁਂ. ਤੇ ਗਿਹਿਭਾਵੇ ਸਂਵੇਗਂ ਲਭਿਤ੍ਵਾ ਮਹਾਸਮੁਦ੍ਦਸ੍ਸ ਸਮੀਪੇ ਗਜ੍ਜਗਿਰਿਮ੍ਹਿ ਨਾਮ ਪਬ੍ਬਤੇ ਇਤ੍ਥੁਸਿਪਬ੍ਬਂ ਪਬ੍ਬਜਿਤ੍ਵਾ ਨਿਸੀਦਿਸੁਂ. ਤਦਾ ਨਾਗਿਯਾ ਵਿਜ੍ਜਾਧਰੋ ਸਨ੍ਤਵਂ ਕਤ੍ਵਾ ਦ੍ਵੇ ਅਣ੍ਡਾਨਿ ਵਿਜਾਯਿਤ੍ਵਾ ਸਾ ਨਾਗੀ ਲਜ੍ਜਾਯ ਤਾਨਿ ਵਿਜਹਿਤ੍ਵਾ ਗਚ੍ਛਿ.

ਤਦਾ ਜੇਟ੍ਠੋ ਤਿਸ੍ਸਕੁਮਾਰੋ ਤਾਨਿ ਲਭਿਤ੍ਵਾ ਕਨਿਟ੍ਠੇਨ ਸਦ੍ਧਿਂ ਵਿਭਜਿਤ੍ਵਾ ਏਕਂ ਏਕਸ੍ਸ ਸਨ੍ਤਿਕੇ ਠਪੇਸਿ. ਕਾਲੇ ਅਤਿਕ੍ਕਨ੍ਤੇ ਤੇਹਿ ਅਣ੍ਡੇਹਿ ਦ੍ਵੇ ਮਨੁਸ੍ਸਾ ਵਿਜਾਯਿਂਸੁ. ਤੇ ਦਸ ਵਸ੍ਸਵਯੇ ਸਮ੍ਪਤ੍ਤੇ ਕਨਿਟ੍ਠਸ੍ਸ ਅਣ੍ਡਤੋ ਵਿਜਾਯਨਦਹਰੋ ਕਾਲਂ ਕਤ੍ਵਾ ਮਜ੍ਝਿਮਦੇਸੇ ਮਿਥਿਲਨਗਰੇ ਗਵਂਪਤਿ ਨਾਮ ਕੁਮਾਰੋ ਉਪਜ੍ਜਿ. ਸੋ ਸਤ੍ਤਵਸ੍ਸਿਕਕਾਲੇ ਬੁਦ੍ਧਸ੍ਸ ਭਗਵਤੋ ਸਨ੍ਤਿਕੇ ਨਿਯ੍ਯਾਦੇਤ੍ਵਾ ਪਬ੍ਬਾਜੇਤ੍ਵਾ ਅਚਿਰੇਨੇਵ ਅਰਹਾ ਅਹੋਸਿ.

ਜੇਟ੍ਠਸ੍ਸ ਪਨ ਅਣ੍ਡਤੋ ਵਿਜਾਯਨਦਹਰੋ ਦ੍ਵਾਦਸਵਸ੍ਸਿਕਕਾਲੇ ਸਕ੍ਕੋ ਦੇਵਾਨਮਿਨ੍ਦੋ ਆਗਨ੍ਤ੍ਵਾ ਰਾਮਞ੍ਞਰਟ੍ਠੇ ਸੁਧਮ੍ਮਪੁਰਂ ਨਾਮ ਨਗਰਂ ਮਾਪੇਤ੍ਵਾ ਸੀਹਰਾਜਾਤਿ ਨਾਮੇਨ ਤਤ੍ਥ ਰਜ੍ਜਂ ਕਾਰਾਪੇਸਿ. ਸਿਲਾਲੋਨੇ ਪਨ ਸਿਰਿਮਾਸੋਕੋਤਿ ਨਾਮੇਨਾਤਿ ਵੁਤ੍ਤਂ. ਗਵਂਪਤਿਤ੍ਥੇਰੋ ਚ ਅਤ੍ਤਨਾ ਮਾਤਰਂ ਦਟ੍ਠੁਕਾਮੋ ਮਿਥਿਲਨਗਰਤੋ ਆਗਨ੍ਤੁਂ ਆਰਭਿ. ਤਦਾ ਦਿਬ੍ਬਚਕ੍ਖੁਨਾ ਮਾਤੁਯਾ ਕਾਲਙ੍ਕਤਭਾਵਂ ਞਤ੍ਵਾ ਇਦਾਨਿ ਮੇ ਮਾਤਾ ਕੁਹਿਂ ਉਪ੍ਪਜ੍ਜਤੀਤਿ ਆਵਜ੍ਜਨ੍ਤੋ ਬਾਹੁਲ੍ਲੇਨ ਨੇਸਾਦਕੇਵਟ੍ਟਾਨਂ ਨਿਵਾਸਨਟ੍ਠਾਨਭੂਤੇ ਦੇਸੇ ਉਪ੍ਪਜ੍ਜਤੀਤਿ ਞਤ੍ਵਾ ਸਚਾਹਂ ਗਨ੍ਤ੍ਵਾ ਨ ਓਵਾਦੇਯ੍ਯਂ, ਮਾਤਾ ਮੇ ਅਪਾਯਗਮਨਿਯਂ ਅਪੁਞ੍ਞਂ ਵਿਚਿਨਿਤ੍ਵਾ ਚਤੂਸੁ ਅਪਾਯੇਸੁ ਉਪ੍ਪਜ੍ਜੇਯ੍ਯਾਤਿ ਚਿਨ੍ਤੇਤ੍ਵਾ ਭਗਵਨ੍ਤਂ ਯਾਚਿਤ੍ਵਾ ਰਾਮਞ੍ਞਰਟ੍ਠਂ ਵੇਹਾਸਮਗ੍ਗੇਨ ਆਗਚ੍ਛਿ. ਰਾਮਞ੍ਞਰਟ੍ਠੇ ਸੁਧਮ੍ਮਪਰਂ ਪਤ੍ਵਾ ਅਤ੍ਤਨੋ ¶ ਭਾਤੁਨਾ ਸੀਹਰਾਜੇਨ ਸਦ੍ਧਿਂ ਰਟ੍ਠਵਾਸੀਨਂ ਧਮ੍ਮਂ ਦੇਸੇਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ.

ਅਥ ਸੀਹਰਾਜਾ ਆਹ, ਲੋਕੇਸੁ ਭਨ੍ਤੇ ਤ੍ਵਮਸਿ ਅਗ੍ਗਤਰੋ ਪੁਗ੍ਗਲੋਤਿ. ਨ ਮਹਾਰਾਜ ਅਹਂ ਅਗ੍ਗਤਰੋ, ਤੀਸੁ ਪਨ ਭਵੇਸੁ ਸਬ੍ਬੇਸਂ ਸਤ੍ਤਾਨਂ ਮਕੁਟਸਙ੍ਕਾਸੋ ਗੋਤਮੋ ਨਾਮ ਮਯ੍ਹਂ ਸਤ੍ਥਾ ਅਤ੍ਥਿ, ਇਦਾਨਿ ਮਜ੍ਝਿਮਦੇਸਂ ਰਾਜਗਹਂ ਪਟਿਵਸਤੀਤਿ. ਏਵਂ ਪਨ ਭਨ੍ਤੇ ਸਤਿ ਤੁਮ੍ਹਾਕਂ ਆਚਰਿਯਂ ਮਯਂ ਦਟ੍ਠੁਂ ਅਰਹਾਮ ਵਾ ਨੋ ਵਾਤਿ ਪੁਚ੍ਛਿ. ਗਵਂਪਤਿਤ੍ਥੇਰੋਚ ਆਮ ਮਹਾਰਾਜ ਅਰਹਥ ਭਗਵਨ੍ਤਂ ਦਟ੍ਠੁਂ, ਅਹਂ ਯਾਚਿਤ੍ਵਾ ਆਗਚ੍ਛਾਮੀਤਿ ਵਤ੍ਵਾ ਭਗਵਨ੍ਤਂ ਯਾਚਿ. ਭਗਵਾ ਚ ਅਭਿਸਮ੍ਬੁਜ੍ਝਿਤ੍ਵਾ ਅਟ੍ਠਮੇ ਵਸ੍ਸੇ ਸਦ੍ਧਿਂ ਅਨੇਕਸਤਭਿਕ੍ਖੂਹਿ ਰਾਮਞ੍ਞਰਟ੍ਠੇ ਸੁਖਮ੍ਮਪੁਰਂ ਆਕਾਸੇਨ ਆਗਮਾਸਿ. ਰਾਜਵਂਸੇ ਪਞ੍ਚਹਿ ਭਿਕ੍ਖੁਸਤੇਹਿ ਆਗਮਾਸੀਤਿ ਵੁਤ੍ਤਂ. ਸਿਲਾਲੇਖਨੇ ਪਨ ਵੀਸਤਿਸਹਸ੍ਸਮਤ੍ਤੇਹਿ ਭਿਕ੍ਖੂਹੀਤਿ ਵੁਤ੍ਤਂ. ਏਤ੍ਥ ਚ ਯਸ੍ਮਾ ਭਗਵਾ ਸਪਰਿਸੋਯੇਵ ਆਗਚ੍ਛਿ, ਨ ਏਕਕੋਤਿ ਏਤ੍ਤਕਮੇਵ ਇਚ੍ਛਿਤਬ੍ਬਂ, ਤਸ੍ਮਾ ਨਾਨਾ ਵਾਦਤਂ ਪਟਿਚ੍ਚ ਚਿਤ੍ਤਸ੍ਸਾਕੁਲਿਤਾ ਨ ਉਪ੍ਪਾਦੇਤਬ੍ਬਾਤਿ.

ਅਥ ਆਗਨ੍ਤ੍ਵਾ ਰਤਨਮਣ੍ਡਪੇ ਨਿਸੀਦਿਤ੍ਵਾ ਸਰਾਜਿਕਾਨਂ ਰਟ੍ਠਵਾਸੀਨਂ ਅਮਤਰਸਂ ਅਦਾਸਿ. ਤੀਸੁ ਸਰਣੇਸੁ ਪਞ੍ਚਸੁ ਚ ਸੀਲੇਸੁ ਪਤਿਟ੍ਠਾਪੇਸਿ. ਅਥ ਭਗਵਾ ਦਸ੍ਸਨਤ੍ਥਾਯ ਆਗਤਾਨਂ ਛਨ੍ਨਂ ਤਾਪਸਾਨਂ ਛ ਕੇਸਧਾਤੁਯੋ ਪੂਜਨਤ੍ਥਾਯ ਅਦਾਸਿ. ਤਤੋ ਪਚ੍ਛਾਸਤ੍ਤਤਿਂਸਵਸ੍ਸਾਨਿ ਪੂਰੇਤ੍ਵਾ ਪਰਿਨਿਬ੍ਬਾਨਕਾਲੇਪਿ ਭਗਵਤੋ ਅਧਿਟ੍ਠਾਨਾਨੁਰੂਪੇਨ ਚਿਤਕਟ੍ਠਾਨਤੋ ਤੇਤ੍ਤਿਂਸ ਦਨ੍ਤੇ ਗਹੇਤ੍ਵਾ ਗਵਂਪਤਿਤ੍ਥੇਰੋ ਸੁਧਮ੍ਮਪੁਰਂ ਆਨੇਤ੍ਵਾ ਸੀਹਰਞ੍ਞੋ ਦਤ੍ਵਾ ਤੇਤ੍ਤਿਂਸਚੇਤਿਯਾਨਿ ਪਤਿਟ੍ਠਾਪੇਸਿ. ਏਵਂ ਭਗਵਤੋ ਪਰਿਨਿਬ੍ਬਾਨਤੋ ਅਟ੍ਠਮੇਯੇਵ ਵਸ੍ਸੇ ਗਵਂਪਤਿਤ੍ਥੇਰੋ ਰਾਮਞ੍ਞ ਰਟ੍ਠੇ ਸੁਧਮ੍ਮਪੁਰੇ ਸਾਸਨਂ ਪਤਿਟ੍ਠਾਪੇਸਿ.

ਇਦਂ ਰਾਮਞ੍ਞਰਟ੍ਠੇ ਦੁਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਭਗਵਤੋ ¶ ਪਰਿਨਿਬ੍ਬੁਤਪਞ੍ਚਤਿਂਸਾਧਿਕਾਨਂ ਦ੍ਵਿਨ੍ਨਂ ਸਤਾਨਂ ਉਪਰਿਸੁਵਣ੍ਣਭੂਮਿਂ ਨਾਮ ਰਾਮਞ੍ਞਰਟ੍ਠਂ ਆਗਨ੍ਤ੍ਵਾ ਸੋਣਤ੍ਥੇਰੋ ਉਤ੍ਤਰਤ੍ਥੇਰੋਚਾਤਿ ਦ੍ਵੇ ਥੇਰਾ ਪਞ੍ਚਵਗ੍ਗਕਮ੍ਮਾਰਹੇਹਿ ਭਿਕ੍ਖੂਹਿ ਸਦ੍ਧਿਂ ਸਾਸਨਂ ਪਤਿਟ੍ਠਾਪੇਸੁਂ. ਤੇ ਚ ਥੇਰਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕਾਤਿ ਅਟ੍ਠਕਥਾਯਂ ਆਗਤਾ.

ਤਪੁਸ੍ਸਭਲ੍ਲਿਕੇ ਗਵਂਪਤਿਤ੍ਥੇਰਞ੍ਚ ਪਟਿਚ੍ਚ ਸਾਸਨਂ ਤਾਵ ਪਤਿਟ੍ਠਹਿ. ਤਞ੍ਚ ਨ ਸਬ੍ਬੇਨ ਸਬ੍ਬਂ ਓਗਾਹੇਤ੍ਵਾ ਯੇ ਯੇ ਪਨ ਸਦ੍ਧਾ ਪਸਨ੍ਨਾ, ਤੇ ਤੇ ਅਤ੍ਤਨੋ ਇਚ੍ਛਾਵਸੇਨੇਵ ਸਾਸਨਂ ਪਸੀਦਿਂਸੁ. ਪਚ੍ਛਾ ਪਨ ਸੋਣੁਤ੍ਤਰਤ੍ਥੇਰਾ ਮਹੁਸ੍ਸਾਹੇਨ ਆਚਰਿਯ ਆਣਤ੍ਤਿਯਾ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਉਸ੍ਸੁਕ੍ਕਂ ਆਪਨ੍ਨਾ ਪਤਿਟ੍ਠਾਪੇਸੁਂ. ਤੇਨ ਅਟ੍ਠਕਥਾਯਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਹੀਤਿ ਕਾਰਿਤਪਚ੍ਚਯਵਸੇਨ ਆਣਤ੍ਤਿਵਿਭਤ੍ਤਿਵਸੇਨਚ ਵੁਤ੍ਤਂ.

ਤਦਾ ਪਨ ਸੁਵਣ੍ਣਭੂਮਿਰਟ੍ਠੇ ਸੁਧਮ੍ਮਪੁਰੇ ਸਿਰਿਮਾਸੋਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਞ੍ਚ ਸੁਧਮ੍ਮਪੁਰਂ ਨਾਮ ਕੇਲਾਸਪਬ੍ਬਤਮੁਦ੍ਧਨਿ ਦਕ੍ਖਿਣਾਯ ਅਨੁਦਿਸਾਯ ਪੁਬ੍ਬਡ੍ਢਭਾਗੇਨ ਪਬ੍ਬਤਮੁਦ੍ਧਨਿ ਅਪਰਡ੍ਢਭਾਗੇਨ ਭੂਮਿਤਲੇ ਤਿਟ੍ਠਤਿ. ਤਂਯੇਵ ਗੁਲ਼ਪਾਚਕਾਨਂ ਮਸ੍ਸਾਨਂ ਗੇਹਸਦਿਸਾਨਿ ਗੇਹਾਨਿ ਯੇਭੁਯ੍ਯੇਨ, ਤੇਨੇਵ ਗੋਲ਼ਮਿਤ੍ਤਿਕ ਨਾਮੇਨਾਪਿ ਵੋਹਾਰਿਯਤਿ. ਤਸ੍ਸ ਪਨ ਨਗਰਸ੍ਸ ਮਹਾਸਮੁਦ੍ਦਸਮੀਪੇ ਠਿਤਤ੍ਤਾ ਦਕਯਕ੍ਖਿਨੀ ਸਬ੍ਬਦਾ ਆਗਨ੍ਤ੍ਵਾ ਰਾਜਗੇਹੇ ਜਾਤੇ ਜਾਤੇ ਕੁਮਾਰੇ ਖਾਦਿ.

ਸੋਣੁਤ੍ਤਰਤ੍ਥੇਰਾਨਂ ਸਮ੍ਪਤ੍ਤਦਿਵਸਯੇਵ ਰਾਜਗੇਹੇ ਏਕਂ ਪੁਤ੍ਤਂ ਵਿਜਾਯਿ. ਦਕਯਕ੍ਖਿਨੀਚ ਖਾਦਿਸ੍ਸਾਮੀਤਿ ਸਹ ਪਞ੍ਚਹਿ ਯਕ੍ਖਿਨਿਸਤੇਹਿ ਆਗਤਾ. ਤਂ ਦਿਸ੍ਵਾ ਮਨੁਸ੍ਸਾ ਭਾਯਿਤ੍ਵਾ ਮਹਾਵਿਰਵਂ ਰਵਨ੍ਤਿ. ਤਦਾ ਥੇਰਾ ਭਯਾਨਕਂ ਸੀਹਸੀਸਵਸੇਨ ਏਕਸੀਸਸਰੀਰਦ੍ਵਯਸਮ੍ਬਨ੍ਧਸਣ੍ਠਾਨਂ ਮਨੁਸੀਹਰੂਪਂ ਮਾਪੇਤ੍ਵਾ ਦਸ੍ਸੇਤ੍ਵਾ ਤਂ ਯਕ੍ਖਿਨਿਂ ਸਪਰਿਸਂ ਪਲਾਪੇਸੁਂ.

ਥੇਰਾ ਚ ਪੁਨ ਯਕ੍ਖਿਨਿਯਾ ਅਨਾਗਮਨਤ੍ਥਾਯ ਪਰਿਤ੍ਤਂ ਅਕਂਸੁਤਸ੍ਮਿਞ੍ਚ ਸਮਾਗਮੇ ਆਗਤਾਨਂ ਮਨੁਸ੍ਸਾਨਂ ਬ੍ਰਹ੍ਮਜਾਲਸੁਤ੍ਤਂ ਅਦੇਸਯ੍ਯੁਂ ¶ . ਸਟ੍ਠਿਮਤ੍ਤਸਹਸ੍ਸਾ ਸੋਤਾਪਨ੍ਨਾਦਿਪਰਾਯਨਾ ਅਹੇਸੁਂ. ਕੁਲਦਾਰਕਾਨਂ ਅਡ੍ਢੁਡ੍ਢਾਨਿ ਸਹਸ੍ਸਾਨਿ ਪਬ੍ਬਜਿਂਸੁ. ਕੁਲਧੀਤਾਨਂ ਪਨ ਦਿਘਡ੍ਢਸਹਸ੍ਸਂ. ਰਾਜਕੁਮਾਰਾਨਂ ਪਞ੍ਚਸਤਾਧਿਕਸਹਸ੍ਸਮਤ੍ਤਂ ਪਬ੍ਬਜਿਂਸੁ. ਅਵਸੇਸਾਪਿ ਮਨੁਸ੍ਸਾ ਸਰਣੇ ਪਤਿਟ੍ਠਹਿਂਸੁ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸੀਤਿ. ਵੁਤ੍ਤਞ੍ਚ ਅਟ੍ਠਕਥਾਯਂ,–

ਸੁਵਣ੍ਣਭੂਮਿਂ ਗਨ੍ਤ੍ਵਾਨ, ਸੋਣੁਤ੍ਤਰਾ ਮਹਿਦ੍ਧਿਕਾ;

ਪਿਸਾਚੇ ਨਿਦ੍ਧਮਿਤ੍ਵਾਨ, ਬ੍ਰਹ੍ਮਜਾਲੇ ਮਦੇਸਿਸੁਨ੍ਤਿ.

ਤਤੋ ਪਟ੍ਠਾਯ ਰਾਜਕੁਮਾਰਾਨਂ ਸੋਣੁਤ੍ਤਰਨਾਮੇਹਿਯੇਵ ਨਾਮਂ ਅਕਂਸੁ. ਅਵਸੇਸਦ੍ਵਾਰਕਾਨਮ੍ਪਿ ਰਕ੍ਖਸਭਯਤੋ ਵਿਮੋਚਨਤ੍ਥਂ ਤਾਲਪਤ੍ਤਭੁਜਪਤ੍ਤੇਸੁ ਥੇਰੇਹਿ ਮਾਪਿਤਂ ਮਨੁਸੀਹਰੂਪਂ ਦਸ੍ਸੇਤ੍ਵਾ ਮਤ੍ਥਕੇ ਠਪੇਸੁਂ. ਮਨੁਸ੍ਸਾਚ ਸਿਲਾਮਯਂ ਮਨੁਸੀਹਰੂਪਂ ਕਤ੍ਵਾ ਸੁਧਮ੍ਮਪੁਰਸ੍ਸ ਏਸਨ੍ਨੇ ਪਦੇਸੇ ਠਪੇਸੁਂ. ਤਂ ਯਾਵਜ੍ਜਤਨਾ ਅਤ੍ਥੀਤਿ. ਇਚ੍ਚੇਵਂ ਭਗਵਤੋ ਪਰਿਨਿਬ੍ਬਾਨਤੋ ਪਞ੍ਚਤਿਂਸਾਧਿਕੇ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਸੋਣੁਤ੍ਤਰਤ੍ਥੇਰਾ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਤ੍ਵਾ ਸਾਸਨਂ ਪਤਿਟ੍ਠਾਪੇਤ੍ਵਾ ਅਨੁਗ੍ਗਹਂ ਅਕਂਸੂਤਿ.

ਇਦਂ ਰਾਮਞ੍ਞਰਟ੍ਠੇ ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾ ਛਸਤਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਪੁਬ੍ਬੇ ਵੁਤ੍ਤੇਹਿ ਤੀਹਿ ਕਾਰਣੇਹਿ ਸਾਸਨਸ੍ਸ ਉਪ੍ਪਤ੍ਤਿਟ੍ਠਾਨਭੂਤਂ ਰਾਮਞ੍ਞਰਟ੍ਠਂ ਦਾਮਰਿਕਚੋਰਭਯੇਨ ਪਜ੍ਜਰਰੋਗਭਯੇਨ ਸਾਸਨਪਚ੍ਚਤ੍ਥਿਕਭਯੇਨਚਾਤਿ ਤੀਹਿ ਭਯੇਹਿ ਆਕੁਲਿਤਂ ਅਹੋਸਿ. ਤਦਾ ਚ ਤਤ੍ਥ ਸਾਸਨਂ ਦੁਬ੍ਬਲਂ ਅਹੋਸਿ, ਯਥਾ ਉਦਕੇ ਮਨ੍ਦੇ ਤਤ੍ਰਜਾਤਂ ਉਪ੍ਪਲਂ ਉਪ੍ਪਲਂ ਦੁਬ੍ਬਲਨ੍ਤਿ. ਤਤ੍ਥ ਭਿਕ੍ਖੂਪਿ ਸਾਸਨਂ ਯਥਾ ਕਾਮਂ ਪੂਰੇਤੁਂ ਨ ਸਕ੍ਕਾ.

ਸੂਰਿਯਕੁਮਾਰਸ੍ਸ ਨਾਮ ਮਨੋਹਰਿਰਞ੍ਞੋ ਪਨ ਕਾਲੇ ਸਾਸਨਂ ਅਤਿਵਿਯ ਦੁਬ੍ਬਲਂ ਅਹੋਸਿ. ਜਿਨਚਕ੍ਕੇ ਏਕਛਸਤਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਕਲਿਯੁਗੇਚ ਏਕੂਨਵੀਸਤਾਧਿਕੇ ¶ ਚਤੁਵਸ੍ਸਸਤੇ ਸਮ੍ਪਤ੍ਤੇ ਅਰਿਮਦ੍ਦਨਨਗਰੇ ਅਨੁਰੁਦ੍ਧਾ ਨਾਮ ਰਾਜਾ ਤਤੋ ਸਹ ਪਿਟਕੇਨ ਭਿਕ੍ਖੁਸਙ੍ਘਂ ਆਨੇਸਿ.

ਤਤੋ ਪਚ੍ਛਾ ਜਿਨਚਕ੍ਕੇ ਨਵਾਧਿਕੇ ਸਤ੍ਤਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਲਙ੍ਕਾਦੀਪੇ ਸਿਰਿਸਙ੍ਘਬੋਧਿਪਰਕ੍ਕਮਬਾਹੁਮਹਾਰਾਜਾ ਸਾਸਨਂ ਸੋਧੇਸਿ.

ਤਤੋ ਛਨ੍ਨਂ ਵਸ੍ਸਾਨਂ ਉਪਰਿ ਕਲਿਯੁਗੇ ਦ੍ਵਤ੍ਤਿਂਸਾਧਿਕੇ ਪਞ੍ਚਸਤੇ ਸਮ੍ਪਤ੍ਤੇ ਉਤ੍ਤਰਾਜੀਵੋ ਨਾਮ ਥੇਰੋ ਸਾਸਨੇ ਪਾਕਟੋ ਅਹੋਸਿ.

ਸੋ ਪਨ ਰਾਮਞ੍ਞਰਟ੍ਠਵਾਸਿਨੋ ਅਰਿਯਾਵਂਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਅਰਿਯਾਵਂਸਤ੍ਥੇਰੋ ਪਨ ਕਪ੍ਪੁਙ੍ਗਨਗਰਵਾਸਿਨੋ ਮਹਾਕਾਲ਼ਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਮਹਾਕਾਲ਼ਤ੍ਥੇਰੋ ਪਨ ਸੁਧਮ੍ਮਪੁਰਵਾਸਿਨੋ ਪ੍ਰਾਨਦਸ੍ਸਿਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਅਯਂ ਪਨ ਉਤ੍ਤਰਾਜੀਵਛਪ੍ਪਦਤ੍ਥੇਰਾਨਂ ਵਂਸਦੀਪਨਤ੍ਥਂ ਵੁਤ੍ਤਾ.

ਸੋ ਪਨ ਪ੍ਰਾਨਦਸ੍ਸਿਤ੍ਥੇਰੋ ਲੋਕਿਯਾਭਿਞ੍ਞਾਯੋ ਲਭਿਤ੍ਵਾ ਨਿਚ੍ਚਂ ਅਭਿਣ੍ਹਂ ਪਾਤੋਵ ਮਗਧਰਟ੍ਠੇ ਉਰੁਵੇਲਨਿਗਮੇ ਮਹਾਬੋਧਿਂ ਗਨ੍ਤ੍ਵਾ ਮਹਾਬੋਧਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪੁਨ ਆਗਨ੍ਤ੍ਵਾ ਸੁਧਮ੍ਮਪੁਰੇ ਪਿਣ੍ਡਾਯ ਚਰਿ. ਇਦਂ ਥੇਰਸ੍ਸ ਨਿਬਦ੍ਧਵਤ੍ਤੁਂ. ਅਯਞ੍ਚ ਅਤ੍ਥੋ ਸੁਧਮ੍ਮਪੁਰਤੋ ਮਗਧਰਟ੍ਠਂ ਗਨ੍ਤ੍ਵਾ ਉਰੁਵੇਲਨਿਗਮੇ ਵਾਣਿਜਕਮ੍ਮਂ ਕਰੋਨ੍ਤਾ ਤਦਾਕਾਰਂ ਪਸ੍ਸਿਤ੍ਵਾ ਪਚ੍ਚਾਗਮਨਕਾਲੇ ਸੁਧਮ੍ਮਪੁਰ ਵਾਸੀਨਂ ਕਥੇਸੁਂ, ਤਸ੍ਮਾ ਵਿਞ੍ਞਾਯਤਿ.

ਤਸ੍ਮਿਞ੍ਚ ਕਾਲੇ ਉਤ੍ਤਰਾਜੀਵਤ੍ਥੇਰੋ ਪਰਿਪੁਣ੍ਣਵੀਸਤਿਵਸ੍ਸੇਨ ਛਪ੍ਪਦੇਨ ਨਾਮ ਸਾਮਣੇਰੇਨ ਸਦ੍ਧਿਂ ਸੀਹਲ਼ਦੀਪਂ ਗਚ੍ਛਿ. ਸੀਹਲ਼ਦੀਪਵਾਸਿਨੋ ਚ ਭਿਕ੍ਖੂ ਮਯਂ ਮਹਾਮਹਿਨ੍ਦਤ੍ਥੇਰਸ੍ਸ ਵਂਸਿਕਾ ਭਵਾਮ, ਤੁਮ੍ਹੇਪਿ ਸੋਣੁਤ੍ਤਰਤ੍ਥੇਰਾਨਂ ਵਂਸਿਕਾ ਭਵਥ, ਤਸ੍ਮਾ ਮਯਂ ਏਕਵਂਸਿਕਾ ਭਵਾਮ ਸਮਾਨ ਵਾਦਿਕਾਤਿ ਵਤ੍ਵਾ ਛਪ੍ਪਦਸਾਮਣੇਰਸ੍ਸ ਉਪਸਮ੍ਪਦਕਮ੍ਮਂ ਅਕਂਸੁ. ਤਤੋ ਪਚ੍ਛਾ ਚੇਤਿਯ ਵਨ੍ਦਨਾਦੀਨਿ ਕਮ੍ਮਾਨਿ ਨਿਟ੍ਠਾਪੇਤ੍ਵਾ ਉਤ੍ਤਰਾਜੀਵਤ੍ਥੇਰੋ ਸਦ੍ਧਿਂ ਭਿਕ੍ਖੁਸਙ੍ਖੇਨ ਅਰਿਮਦ੍ਦਨਨਗਰਂ ਪਚ੍ਚਾਗਮਾਹਿ.

ਛਪ੍ਪਦਸ੍ਸ ਪਨ ਏਤਦਹੋਸਿ,- ਸਚਾਹਂ ਆਚਰਿਯੇਨ ਸਹ ਜਮ੍ਬੁਦੀਪਂ ¶ ਗਚ੍ਛੇਯ੍ਯਂ, ਬਹੂਹਿ ਞਾਤਿਬਲਿਬੋਧੇਹਿ ਪਰਿਯਤ੍ਤੁਗ੍ਗਹਣੇ ਅਨ੍ਤਰਾਯੋ ਭਵੇਯ੍ਯ, ਤੇਨ ਹਿ ਸੀਹਲ਼ਦੀਪੇਯੇਵ ਵਸਿਤ੍ਵਾ ਪਰਿਯਤ੍ਤਿਮੁਗ੍ਗਹੇਤ੍ਵਾ ਪਚ੍ਚਾਗਮਿਸ੍ਸਾਮੀਤਿ.

ਤਤੋ ਆਚਰਿਯਸ੍ਸ ਓਕਾਸਂ ਯਾਚਿਤ੍ਵਾ ਸੀਹਲ਼ਦੀਪੇਯੇਵ ਪਟਿਵਸਿ. ਸੀਹਲ਼ਦੀਪੇ ਵਸਿਤ੍ਵਾ ਯਾਵ ਲਦ੍ਧਤ੍ਥੇਰਸਮ੍ਮੁਤਿਕਾ ਪਰਿਯਤ੍ਤਿਂ ਪਰਿਯਾਪੁਣਿਤ੍ਵਾ ਪੁਨ ਜਮ੍ਬੁਦੀਪਂ ਪਚ੍ਚਾਗਨ੍ਤੁਕਾਮੋ ਅਹੋਸਿ. ਅਥ ਤਸ੍ਸ ਏਤਦਹੋਸਿ,– ਅਹਂ ਏਕਕੋਵ ਗਚ੍ਛਨ੍ਤੋ ਸਚੇ ਮਮ ਆਚਰਿਯੋ ਨਤ੍ਥਿ, ਸਚੇਪਿ ਜਮ੍ਬੁਦੀਪਵਾਸਿਨਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਵਿਨਯਕਮ੍ਮਂ ਕਾਤੁਂ ਨ ਇਚ੍ਛੇਯ੍ਯਂ, ਏਵਂ ਸਤਿ ਵਿਸੁਂ ਕਮ੍ਮਂ ਕਾਤੁਂ ਨ ਸਕ੍ਕੂਣੇਯ੍ਯਂ, ਤਸ੍ਮਾ ਪਿਟਕਧਰੇਹਿ ਚਤੂਹਿ ਥੇਰੇਹਿ ਸਦ੍ਧਿਂ ਗਚ੍ਚੇਯ੍ਯਂ, ਇਚ੍ਚੇਤਂ ਕੁਸਲਨ੍ਤਿ.

ਏਵਂ ਪਨ ਚਿਨ੍ਤੇਤ੍ਵਾ ਤਾਮਲਿਤ੍ਤਿਗਾਮਵਾਸਿਨਾ ਸਿਵਲਿਤ੍ਥੇਰੇਨ ਕਮ੍ਬੋਜਰਞ੍ਞੋ ਪੁਤ੍ਤਭੂਤੇਨ ਤਾਮਲਿਨ੍ਦਤ੍ਥੇਰੇਨ ਕਿਞ੍ਚਿਪੁਰਵਾਸਿਨਾ ਆਨਨ੍ਦਤ੍ਥੇਰੇਨ ਰਾਹੁਲਤ੍ਥੇਰੇਨਚਾਤਿ ਇਮੇਹਿ ਚਤੂਹਿ ਥੇਰੇਹਿ ਸਦ੍ਧਿਂ ਨਾਵਾਯ ਪਚ੍ਚਾਗਚ੍ਛਿ. ਤੇ ਚ ਥੇਰਾ ਪਿਟਕਧਰਾ ਅਹੇਸੁਂ ਦਕ੍ਖਾ ਥਾਮਸਮ੍ਪਨ੍ਨਾ ਚ. ਤੇਸੁ ਵਿਸੇਸਤੋ ਰਾਹੁਲਤ੍ਥੇਰੋ ਥਾਮਸਮ੍ਪਨ੍ਨੋ. ਕੁਸਿਮਨਗਰਂ ਸਮ੍ਪਤ੍ਤਕਾਲੇ ਉਪਕਟ੍ਠਵਸ੍ਸੂਪਗਮਨਕਾਲੋ ਹੁਤ੍ਵਾ ਅਰਿਮਦ੍ਦਨਨਗਰੇ ਆਚਰਿਯਸ੍ਸ ਸਨ੍ਤਿਕਂ ਅਸਮ੍ਪਾਪੁਣਿਤ੍ਵਾ ਕੁਸਿਮਨਗਰਯੇਵ ਵਸ੍ਸਂ ਉਪਗਮਿਂਸੁ. ਤੇਸਂ ਵਸ੍ਸੂਪਗਮਨਵਿਹਾਰਵਤ੍ਥੁ ਆਰਾਮਪਾਕਾਰੋ ਚ ਕੁਸਿਮਨਗਰਸ੍ਸ ਦਕ੍ਖਿਣਦਿਸਾਸਾਗੇ ਯਾਵਜ੍ਜਤਨਾ ਅਤ੍ਥਿ.

ਵਸ੍ਸਂਵੁਟ੍ਠਕਾਲੇ ਪਨ ਮਹਾਪਵਾਰਣਾਯ ਪਵਾਰੇਤ੍ਵਾ ਤੇ ਪਞ੍ਚ ਥੇਰਾ ਅਰਿਮਦ੍ਦਨਨਗਰਂ ਅਗਮਂਸੁ. ਉਤ੍ਤਰਾਜੀਵਤ੍ਥੇਰੋਚ ਅਰਿਮਦ੍ਦਨਨਗਰ ਵਾਸੀਹਿ ਭਿਕ੍ਖੂਹਿ ਵਿਸੁਂ ਹੁਤ੍ਵਾ ਸਙ੍ਘਕਮ੍ਮਾਨਿ ਅਕਾਸਿ. ਕਿਞ੍ਚਾਪਿ ਚੇਤ੍ਥ ਉਤ੍ਤਰਾਜੀਵਤ੍ਥੇਰਾਦਯੋ ਸੀਹਲ਼ਦੀਪਤੋ ਪਚ੍ਚਾਗਨ੍ਤ੍ਵਾ ਅਰਿਮਦ੍ਦਨਨਗਰੇ ਵਸਿਤ੍ਵਾ ਸਾਸਨਂ ਅਨੁਗ੍ਗਹੇਸੁਂ, ਰਾਮਞ੍ਞਰਟ੍ਠੇ ਪਨ ਜਾਤਤ੍ਤਾ ਪੁਬ੍ਬੇ ਚ ਤਤ੍ਥ ਨਿਵਾਸਤ੍ਤਾ ਇਧ ਦਸ੍ਸਿਤਾਤਿ ਦਟ੍ਠਬ੍ਬਾ.

ਤਸ੍ਮਿਞ੍ਚ ¶ ਕਾਲੇ ਦਲਨਗਰੇ ਪਦੀਪਜੇਯ੍ਯਗਾਮੇ ਜਾਤੋ ਸਾਰਿਪੁਤ੍ਤੋ ਨਾਮ ਮਹਲ੍ਲਕਸ੍ਸਮਣੇਰੋ ਏਕੋ ਅਰਿਮਦ੍ਦਨਨਗਰਂ ਗਨ੍ਤ੍ਵਾ ਆਨਨ੍ਦਤ੍ਥੇਰਸ੍ਸ ਸਨ੍ਤਿਕੇ ਉਪਸਮ੍ਪਜ੍ਜਿਤ੍ਵਾ ਪਰਿਯਤ੍ਤਿ ਪਰਿਯਪੁਣਿ. ਸੋ ਬਹੁਸ੍ਸੁਤੋ ਅਹੋਸਿ ਦਕ੍ਖੋ ਥਾਮਸਮ੍ਪਨ੍ਨੋ ਚ. ਤਮਤ੍ਥਂ ਸੁਤ੍ਵਾ ਨਰਪਤਿਚਞ੍ਞਿਸੂਰਾਜਾ ਚਿਨ੍ਤੇਸਿ,- ਸਚੇਸੋ ਅਙ੍ਗਪਚ੍ਚਙ੍ਗਸਮ੍ਪਨ੍ਨੋ ਭਵੇਯ੍ਯ, ਆਚਰਿਯਂ ਕਤ੍ਵਾ ਠਪੇਸ੍ਸਾਮਿ ਅਨੁਗ੍ਗਹੇਸ੍ਸਾਮੀਤਿ. ਰਾਜਾ ਏਵਂ ਚਿਨ੍ਤੇਤ੍ਵਾ ਰਾਜਪੁਰਿਸੇ ਪੇਸੇਤ੍ਵਾ ਵੀਮਂਸਾਪੇਸਿ. ਰਾਜਪੁਰਿਸਾ ਚ ਤਸ੍ਸ ਛਿਨ੍ਨਪਾਦਙ੍ਗੁਟ੍ਠਗ੍ਗਤਂ ਪਸ੍ਸਿਤ੍ਵਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਤਂ ਸੁਤ੍ਵਾ ਏਵਂ ਵਿਕਲਙ੍ਗਪਚ੍ਚਙ੍ਗੋ ਭਵੇਯ੍ਯ, ਪਧਾਨਾਚਰਿਯਟ੍ਠਾਨੇ ਠਪੇਤੁਂ ਨ ਯੁਤ੍ਤੋਤਿ ਕਤ੍ਵਾ ਪਧਾਨਾਚਰਿਯਭਾਵਂ ਨ ਅਕਾਸਿ. ਪੂਜਾਸਕ੍ਕਾ ਰਮਤ੍ਤੇਨੇਵ ਅਨੁਗ੍ਗਹਂ ਅਕਾਸਿ. ਏਕਸ੍ਮਿਞ੍ਚ ਕਾਲੇ ਧਮ੍ਮਵਿਲਾਸੋਤਿ ਲਞ੍ਛਂ ਦਤ੍ਵਾ ਰਾਮਞ੍ਞਰਟ੍ਠੇ ਸਾਸਨਂ ਸੋਧੇਤ੍ਵਾ ਪਰਿਸੁਦ੍ਧਂ ਕਰੋਹੀਤਿ ਰਾਮਞ੍ਞਰਟ੍ਠਂ ਪੇਸੇਸਿ.

ਸੋਚ ਰਾਮਞ੍ਞਰਟ੍ਠਂ ਗਨ੍ਤ੍ਵਾ ਦਲਨਗਰੇ ਬਹੁਨਂ ਭਿਕ੍ਖੂਨਂ ਧਮ੍ਮ ਵਿਨਯਂ ਵਾਚੇਤ੍ਵਾ ਸਾਸਨਂ ਪਗ੍ਗਹੇਸਿ. ਤਤ੍ਥ ਚ ਰਾਮਞ੍ਞਮਨੁਸ੍ਸਾ ਤਸ੍ਸ ਧਮ੍ਮਵਿਲਾਸਤ੍ਥੇਰਸ੍ਸ ਸਿਸ੍ਸਾਨੁਸਿਸ੍ਸਾ ਸੀਹਲ਼ਭਿਕ੍ਖੁ ਗਣਾਤਿ ਵੋਹਾਰਨ੍ਤਿ. ਇਚ੍ਚੇਵਂ ਸੀਹਲ਼ਦੀਪਿਕਸ੍ਸ ਆਨਨ੍ਦਤ੍ਥੇਰਸ੍ਸ ਸਿਸ੍ਸਂ ਧਮ੍ਮਵਿਲਾਸਂ ਪਟਿਚ੍ਚ ਰਾਮਞ੍ਞਰਟ੍ਠੇ ਸੀਹਲ਼ਦੀਪਤੋ ਸਾਸਨਸ੍ਸ ਆਗਤਮਗ੍ਗੋਤਿ.

ਇਦਂ ਰਾਮਞ੍ਞਰਟ੍ਠੇ ਚਤੁਤ੍ਥਂ ਸਾਸਨਸ੍ਸ ਪਤਿਟ੍ਠਾਨਂ.

ਤਸ੍ਮਿਞ੍ਚ ਕਾਲੇ ਮੁਤ੍ਤਿਮਨਗਰੇ ਅਗ੍ਗਮਹੇਸਿਯਾ ਆਚਰਿਯਾ ਬੁਦ੍ਧਵਂਸਤ੍ਥੇਰਮਹਾਨਾਗਤ੍ਥੇਰਾ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਹਾਰਵਾਸਿਗਣਵਂਸਭੂਤਾਨਂ ਭਿਕ੍ਖੂਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਣ੍ਹਿਤ੍ਵਾ ਮੁਤ੍ਤਿਮਨਗਰਂ ਪਚ੍ਚਾਗਨ੍ਤ੍ਵਾ ਮੁਤ੍ਤਿਮਨਗਰਵਾਸੀਤਿ ਭਿਕ੍ਖੂਹਿ ਵਿਸੁਂ ਹੁਤ੍ਵਾ ਸਙ੍ਘਕਮ੍ਮਾਨਿ ਕਤ੍ਵਾ ਸਾਸਨਂ ਪਗ੍ਗਹੇਸੁਂ. ਤੇਚ ਥੇਰੇ ¶ ਪਟਿਚ੍ਚ ਰਾਮਞ੍ਞਰਟ੍ਠੇ ਪੁਨ ਸੀਹਲ਼ਦੀਪਤੋ ਸਾਸਨਂ ਆਗਤਨ੍ਤਿ.

ਇਦਂ ਰਾਮਞ੍ਞਰਟ੍ਠੇ ਪਞ੍ਚਮਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾਚ ਮੁਤ੍ਤਿਮਨਗਰੇ ਸੇਤਿਭਿਨ੍ਦਸ੍ਸ ਰਞ੍ਞੋ ਮਾਤੁਯਾ ਆਚਰਿਯੋ ਮੇਧਙ੍ਕਰੋ ਨਾਮ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਸੀਹਲ਼ਦੀਪੇ ਅਰਞ੍ਞਵਾਸੀਨਂ ਮਹਾਥੇਰਾਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਹੇਤ੍ਵਾ ਪਰਿਯਤ੍ਤਿਂ ਪਰਿਯਾਪੁਣਿਤ੍ਵਾ ਸੁਵਣ੍ਣਰਜਤਮਯੇ ਤਿਪੁਸੀਸਚ੍ਛਨ੍ਨੇ ਸੇਤਿਭਿਨ੍ਦਸ੍ਸ ਰਞ੍ਞੋ ਮਾਤੁਯਾ ਕਾਰਾਵਿਤੇ ਵਿਹਾਰੇ ਨਿਸਿਦਿਤ੍ਵਾ ਸਾਸਨਂ ਅਨੁਗ੍ਗਹੇਸਿ. ਲੋਕਦੀਪਕਸਾਰਞ੍ਚ ਨਾਮ ਗਨ੍ਥਂ ਅਕਾਸਿ. ਅਥਾਪਰਿਮ੍ਪਿ ਮੁਤ੍ਤਿਮਨਗਰੇਯੇਵ ਸੁਵਣ੍ਣਸੋਭਣੋ ਨਾਮ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਵਿਹਾਰਵਾਸਿਗਣਵਂਸਭੂਤਾਨਂ ਥੇਰਾਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਹੇਤ੍ਵਾ ਮੁਤ੍ਤਿਮਨਗਰਮੇਵ ਪਚ੍ਚਾਗਚ੍ਛਿ.

ਸੋ ਪਨ ਥੇਰੋ ਅਰਞ੍ਞੇਯੇਵ ਵਸਿ. ਧੁਤਙ੍ਗਧਰੋ ਚ ਅਹੋਸਿ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾ ਕਾਮੋ ਦਕ੍ਖੋ ਥਾਮਸਮ੍ਪਨ੍ਨੋ ਚ. ਸੀਹਲ਼ਦੀਪੇ ਕਲਮ੍ਬੁਮ੍ਹਿ ਨਾਮ ਜਾਤਸ੍ਸਰੇ ਉਦਕੁਕ੍ਖੇਪਸੀਮਾਯਂ ਅਤਿਰੇਕਪਞ੍ਚਵਗ੍ਗੇਨ ਵਨਰਤਨਂ ਨਾਮ ਸਙ੍ਘਰਾਜਂ ਉਪਜ੍ਝਾਯਂ ਕਤ੍ਵਾ ਰਾਹੁਲਭਦ੍ਦਂ ਨਾਮ ਵਿਜਯਬਾਹੁਰਞ੍ਞੋ ਆਚਰਿਯਭੂਤਂ ਥੇਰਂ ਕਮ੍ਮਵਾਚਾਚਰਿਯਂ ਕਤ੍ਵਾ ਉਪਸਮ੍ਪਜ੍ਜਿ. ਸੋਚ ਥੇਰੋ ਪੁਨਾਗਨ੍ਤ੍ਵਾ ਮੁਤ੍ਤਿਮਨਗਰੇਯੇਵ ਵਸਿਤ੍ਵਾ ਗਣਂ ਵਡ੍ਢੇਤ੍ਵਾ ਸਾਸਨਂ ਅਨੁਗ੍ਗਹੇਸਿ. ਏਤੇ ਚ ਦ੍ਵੇ ਥੇਰੇ ਪਟਿਚ੍ਚ ਰਾਮਞ੍ਞਰਟ੍ਠੇ ਸੀਹਲ਼ਦੀਪਤੋ ਸਾਸਨਂ ਆਗਤਂ.

ਇਦਂ ਰਾਮਞ੍ਞਰਟ੍ਠੇ ਛਟ੍ਠਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾ ਸਾਸਨਵਸੇਨ ਦ੍ਵਿਵਸ੍ਸਾਧਿਕੇ ਦ੍ਵਿਸਹਸ੍ਸੇ ਕਲਿਯੁਗਤੋ ਏਕਾਸੀਤਿਕੇ ਸਮ੍ਪਤ੍ਤੇ ਹਂਸਾਵਤੀਨਗਰੇ ਸਿਰਿਪਰਮਮਹਾਧਮ੍ਮਰਾਜਾਤਿ ¶ ਲਦ੍ਧਨਾਮੋ ਧਮ੍ਮਚੇਤਿਯਰਾਜਾ ਕੁਸਿਮਮਣ੍ਡਲੇ ਹਂਸਾਵਤੀਮਣ੍ਡਲੇ ਮੁਤ੍ਤਿਮਮਣ੍ਡਲੇ ਚ ਰਟ੍ਠਵਾਸਿਨੋ ਸਪਜਂਵਿਯ ਧਮ੍ਮੇਨ ਸਮੇਨ ਰਕ੍ਖਿਤ੍ਵਾ ਰਜ੍ਜਂ ਕਾਰੇਸਿ. ਸੋ ਚ ਰਾਜਾ ਤੀਸੁ ਪਿਟਕੇਸੁ ਚਤੂਸੁ ਚ ਵੇਦੇਸੁ ਬ੍ਯਾਕਰਣਚ੍ਛਨ੍ਦਾਲਙ੍ਕਾਰਾਦੀਸੁ ਚ ਛੇਕੋ ਸਿਕ੍ਖਿਤਨਾਨਾਸਿਪ੍ਪੋ ਨਾਨਾਭਾਸਾਸੁ ਚ ਪਸੁਤੋ ਸਦ੍ਧਾਸੀਲਾਦਿਗੁਣੋਪੇਤੋ ਕੁਮੁਦਕੁਨ੍ਦਸਰਦਚਨ੍ਦਿਕਾਸਮਾਨਸਿਤਪਜਪਤਿਭੂਤੋ ਚ ਸਾਸਨੇ ਚ ਅਤਿਪ੍ਪਸਨ੍ਨੋ ਅਹੋਸਿ.

ਏਕਸ੍ਮਿਂ ਕਾਲੇ ਸੋ ਚਿਨ੍ਤੇਸਿ, ਭਗਵਤੋ ਸਾਸਨਂ ਨਾਮ ਪਬ੍ਬਜ੍ਜਉਪਸਮ੍ਪਦਤਾਵੇਨ ਸਮ੍ਬਨ੍ਧਂ, ਉਪਸਮ੍ਪਦਭਾਵੋ ਚ ਸੀਮਪਰਿਸਵਤ੍ਥੁ ਞਤ੍ਤਿਕਮ੍ਮਵਾਚਾਸਮ੍ਪਤ੍ਤੀਹਿ ਸਮ੍ਬਨ੍ਧੋਤਿ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਸੀਮਵਿਨਿਚ੍ਛਯਂ ਤਸ੍ਸਂ ਵਣ੍ਣਨਂ ਵਿਨਯਸਙ੍ਗਹਂ ਤਸ੍ਸਂਵਣ੍ਣਨਂ ਸੀਮਾਲਙ੍ਕਾਰ ਸੀਮਸਙ੍ਗਹਞ੍ਚ ਸਦ੍ਦਤੋ ਅਤ੍ਥਤੋ ਚ ਪੁਨਪ੍ਪੁਨਂ ਉਪਪਰਿਕ੍ਖਿਤ੍ਵਾ ਅਞ੍ਞਮਞ੍ਞਂ ਸਂਸਨ੍ਦਿਤ੍ਵਾ ਪੁਬ੍ਬਾਪਰਂ ਤੁਲਯਿਤ੍ਵਾ ਭਗਵਤੋ ਅਧਿਪ੍ਪਾਯੋ ਈਦਿਸੋ ਗਨ੍ਥਕਾਰਾਨਂ ਅਧਿਪ੍ਪਾਯੋ ਈਦਿਸੋਤਿ ਪਸ੍ਸਿਤ੍ਵਾ ਅਮ੍ਹਾਕਂ ਰਾਮਞ੍ਞਰਟ੍ਠੇ ਬਦ੍ਧਨਦੀਸਮੁਦ੍ਦਜਾਤੇਸ੍ਸਰਾਦਯੋ ਸੀਮਾਯੋ ਬਹੁਕਾਪਿ ਸਮਾਨਾ ਅਯਂ ਪਰਿਸੁਦ੍ਧਾਤਿ ਵਵਤ੍ਥਪੇਤੁਂ ਦੁਕ੍ਕਰਂ, ਏਵਂ ਸਤਿ ਸੀਮਪਰਿਸਾਪਰਿਸੁਦ੍ਧਾ ਭਵਿਤੁਂ ਦੁਕ੍ਕਰਾਤਿ ਪਟਿਭਾਤਿ.

ਤਤੋ ਪਚ੍ਛਾ ਰਾਮਞ੍ਞਰਟ੍ਠੇ ਤਿਪਿਟਕਧਰਬ੍ਯਤ੍ਤਪ੍ਪਟਿਬਲਤ੍ਥੇਰੇਹਿ ਮਨ੍ਤੇਤ੍ਵਾ ਰਞ੍ਞੋ ਪਟਿਭਾਨਾਨੁਰੂਪਂ ਸੀਮਪਰਿਸਾ ਪਰਿਸੁਦ੍ਧਾ ਭਵਿਤੁਂ ਦੁਕ੍ਕਰਾਤਿ ਥੇਰਾ ਵਿਨਿਚ੍ਛਨਿਂਸੁ.

ਅਥ ਰਾਜਾ ਏਵਮ੍ਪਿ ਚਿਨ੍ਤੇਸਿ,– ਅਹੋਵਤ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਪਞ੍ਚਵਸ੍ਸਸਹਸ੍ਸਾਨਿ ਪਤਿਟ੍ਠਤਿਸ੍ਸਤੀਤਿ ਗਨ੍ਥੇਸੁ ਵੁਤ੍ਤੋਪਿ ਸਮਾਨੋ ਅਭਿਸਮ੍ਬੁਦ੍ਧਤੋ ਚਤੁਸਟ੍ਠਾਧਿਕਦ੍ਵਿਸਹਸ੍ਸਮਤ੍ਤੇਨੇਵ ਕਾਲੇਨ ਸਾਸਨੇ ਮਲਂ ਹੁਤ੍ਵਾ ਉਪਸਮ੍ਪਦਕਮ੍ਮੇ ਕਙ੍ਖਾਟ੍ਠਾਨਂ ਤਾਵ ਉਪ੍ਪਜ੍ਜਿ, ਕਥਂ ਪਨ ਪਞ੍ਚਵਸ੍ਸਸਹਸ੍ਸਾਨਿ ਸਾਸਨਸ੍ਸ ਪਤਿਟ੍ਠਾਨਂ ਭਵਿਸ੍ਸਤੀਤਿ. ਏਵਂ ਧਮ੍ਮਸਂਵੇਗਂ ਉਪ੍ਪਾਦੇਤ੍ਵਾ ਪੁਨਾਪਿ ਏਵਂ ਚਿਨ੍ਤੇਸਿ,- ਏਵਂ ਏਤ੍ਤਕਂ ਸਾਸਨੇ ਮਲਂ ਦਿਸ੍ਸਮਾਨੋਪਿ ¶ ਸਮਾਨੋ ਉਪਸਮ੍ਪਦਕਮ੍ਮੇ ਕਙ੍ਖਾਟ੍ਠਾਨਂ ਦਿਸ੍ਸਮਾਨੋਪਿ ਸਮਾਨੋ ਪਰਿਸੁਦ੍ਧਤ੍ਥਾਯ ਅਨਾਰਭਿਤ੍ਵਾ ਮਾਦਿਸੋ ਅਪ੍ਪੋਸ੍ਸੁਕ੍ਕੋ ਮਜ੍ਝਤ੍ਤੋ ਨਿਸੀਦਿਤੁਂ ਅਯੁਤ੍ਤੋ, ਏਵਞ੍ਹਿ ਸਤਿ ਭਗਵਤਿ ਸਦ੍ਧੋ ਪਸਨ੍ਨੋਮ੍ਹੀਤਿ ਵਤ੍ਤਬ੍ਬਤਂ ਅਨਾਪਜ੍ਜੇਯ੍ਯਂ, ਤਸ੍ਮਾ ਸਾਸਨਂ ਨਿਮ੍ਮਲਂ ਕਾਤੁਂ ਆਰਭਿਸ੍ਸਾਮੀਤਿ.

ਕੁਤੋ ਨੁਖੋ ਦਾਨਿ ਸਾਸਨਂ ਆਹਰਿਤ੍ਵਾ ਥਿਰਂ ਪਤਿਟ੍ਠਾ ਪੇਯ੍ਯਨ੍ਤਿ ਆਵਜ੍ਜਨ੍ਤੋ ਏਵਂ ਚਿਨ੍ਤੇਸਿ,- ਭਗਵਤੋ ਕਿਰ ਪਰਿਨਿਬ੍ਬਾਨਤੋ ਛਤ੍ਤਿਂਸਾਧਿਕੇ ਦ੍ਵਿਸਤੇ ਸਮ੍ਪਤ੍ਤੇ ਮਹਾਮੋਗ੍ਗਲਿ ਪੁਤ੍ਤਤਿਸ੍ਸਤ੍ਥੇਰੋ ਮਹਾਮਹਿਨ੍ਦਤ੍ਥੇਰਂ ਪੇਸੇਤ੍ਵਾ ਸੀਹਲ਼ਦੀਪੇ ਸਾਸਨਂ ਪਤਿਟ੍ਠਾਪੇਸਿ, ਤਦਾ ਦੇਵਾਨਂ ਪਿਯਤਿਸ੍ਸਰਾਜਾ ਮਹਾਵਿਹਾਰਂ ਕਾਰਾਪੇਤ੍ਵਾ ਅਦਾਸਿ, ਸਾਸਨਵਰਞ੍ਚ ਏਕਾਸਿਤਾਧਿਕਾਨਿ ਦ੍ਵਿਵਸ੍ਸਸਤਾਨਿ ਵਿਮਲਂ ਹੁਤ੍ਵਾ ਪਤਿਟ੍ਠਹਿ, ਭਿਕ੍ਖੁਸਙ੍ਘੋਪਿ ਮਹਾਵਿਹਾਰ ਵਾਸਿਗਣਵਸੇਨ ਏਕਤੋਵ ਅਟ੍ਠਾਸਿ, ਤਤੋ ਪਚ੍ਛਾ ਅਭਯਗਿਰਿਵਾਸਿਜੇ ਤਵਨਵਾਸਿਵਸੇਨ ਦ੍ਵੇਧਾ ਹੁਤ੍ਵਾ ਭਿਜ੍ਜਿ, ਜਿਨਚਕ੍ਕੇ ਅਟ੍ਠਸਤ੍ਤਸਤਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਸਿਰਿਸਙ੍ਘਬੋਧਿਪਰਕ੍ਕਮਬਾਹੁਮਹਾਰਾਜਾ ਉਦੁਮ੍ਬਰਗਿਰਿਵਾਸਿ ਮਹਾਕਸ੍ਸਪਤ੍ਥੇਰਪ੍ਪਮੁਖਂ ਮਹਾਵਿਹਾਰ ਵਾਸਿਗਣਂ ਅਨੁਗ੍ਗਹੇਤ੍ਵਾ ਯਥਾਵੁਤ੍ਤੇ ਦ੍ਵੇਗਣੇ ਵਿਸੋਧੇਸਿ, ਸਾਸਨਂ ਨਿਮ੍ਮਲਂ ਅਕਾਸਿ, ਤਤੋ ਪਚ੍ਛਾ ਵਿਜਯਬਾਹੁਪਰਕ੍ਕਮਬਾਹੁਰਾਜੂਨਂ ਦ੍ਵਿਨ੍ਨਂ ਕਾਲੇਪਿ ਸਾਸਨਂ ਨਿਮ੍ਮਲਂ ਹੁਤ੍ਵਾਯੇਵ ਅਟ੍ਠਾਸਿ, ਤੇਨੇਵ ਬ੍ਯਤ੍ਤਪ੍ਪਟਿਬਲਭਿਕ੍ਖੂ ਆਯਾਚਿਤ੍ਵਾ ਸੀਹਲ਼ਦੀਪਂ ਗਨ੍ਤ੍ਵਾ ਪੁਨ ਸਿਕ੍ਖਂ ਗਣ੍ਹਾ ਪੇਸ੍ਸਾਮਿ, ਤੇਸਂ ਪਨ ਪਰਮ੍ਪਰਵਸੇਨ ਪਵਤ੍ਤਾਨਂ ਭਿਕ੍ਖੂਨਂ ਵਸੇਨ ਅਮ੍ਹਾਕਂ ਰਾਮਞ੍ਞਰਟ੍ਠੇ ਸਾਸਨਂ ਨਿਮ੍ਮਲਂ ਹੁਤ੍ਵਾ ਪਤਿਟ੍ਠਹਿਸ੍ਸਤੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਮੋਗ੍ਗਲਾਨਤ੍ਥੇਰਂ ਸੋਮਤ੍ਥੇਰਞ੍ਚ ਸੀਹਲ਼ਦੀਪਂ ਗਮਨਤ੍ਥਾਯ ਯਾਚਿ. ਥੇਰਾਚ ਸਾਸਨਪ੍ਪਟਿਯਤ੍ਤਕਮ੍ਮਮਿਦਨ੍ਤਿ ਮਨਸਿਕਰਿਤ੍ਵਾ ਪਟਿਞ੍ਞਂ ਅਕਂਸੁ.

ਰਾਜਾ ਚ ਦਾਠਾਧਾਤੁਪੂਜਨਤ੍ਥਾਯ ਭਿਕ੍ਖੁਸਙ੍ਘਸ੍ਸ ਪੂਜਨਤ੍ਥਾਯ ਭੂਵਨੇਕਬਾਹੁਰਞ੍ਞੋ ਪਣ੍ਣਾਕਾਰਤ੍ਥਾਯ ਦੇਯ੍ਯਧਮ੍ਮਪਣ੍ਣਾਕਾਰਵਤ੍ਥੂਨਿ ਪਟਿਯਾਦੇਤ੍ਵਾ ਚਿਤ੍ਰਦੂਤਂ ਰਾਮਦੂਤਨ੍ਤਿ ਇਮੇ ਦ੍ਵੇ ਅਮਚ੍ਚੇ ਦ੍ਵੀਸੁ ਨਾਵਾਸੁ ਨਾਯਕਟ੍ਠਾਨੇ ਠਪੇਤ੍ਵਾ ਕਲਿਯੁਗੇ ਸਤ੍ਤਤਿਂਸਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਮਾਘਮਾਸਸ੍ਸ ਪੁਣ੍ਣਮਿਤੋ ਏਕਾਦਸਮਿਯਂ ਸੂਰਵਾਰੇ ਚਿਤ੍ਰਦੂਤਂ ਸਦ੍ਧਿਂ ਮੋਗ੍ਗਲਾਨਤ੍ਥੇਰਪ੍ਪਮੁਖੇਹਿ ਭਿਕ੍ਖੂਹਿ ਏਕਾਯ ਨਾਵਾਯ ਗਮਾਪੇਸਿ. ਫਗ੍ਗੁਣਮਾਸਸ੍ਸ ਅਟ੍ਠਮਿਯਂ ਸੀਹਲ਼ਦੀਪੇ ਕਲਮ੍ਬੁਤਿਤ੍ਥਂ ਪਾਯਾਸਿ.

ਰਾਮਦੂਤਂ ਪਨ ਤਸ੍ਮਿਂਯੇਵ ਵਸ੍ਸੇ ਮਾਘਮਾਸਸ੍ਸ ਪੁਣ੍ਣਮਿਤੋ ਦ੍ਵਾਦਸਮਿਯਂ ਚਨ੍ਦਵਾਰੇ ਸਦ੍ਧਿਂ ਸੋਮਤ੍ਥੇਰਪ੍ਪਮੁਖੇਹਿ ਭਿਕ੍ਖੂਹਿ ਏਕਾਯ ਨਾਵਾਯ ਗਮਾਪੇਸਿ. ਉਜੁਕਂ ਪਨ ਵਾਤਂ ਅਲਭਿਤ੍ਵਾ ਚਿਤ੍ਰਮਾਸਸ੍ਸ ਜੁਣ੍ਹਪਕ੍ਖਨਵਮਿਯਂ ਸੀਹਲ਼ਦੀਪੇ ਵਲ੍ਲਿਗਾਮਂ ਪਾਯਾਸਿ.

ਤਤੋ ਪਚ੍ਛਾ ਤੇਪਿ ਦ੍ਵੇ ਅਮਚ੍ਚਾ ਦ੍ਵੀਸੁ ਨਾਵਾਸੁ ਆਭਤਾਨਿ ਦਾਤਬ੍ਬਪਣ੍ਣਾਕਾਰਵਤ੍ਥੂਨਿ ਸਨ੍ਦੇਸਪਣ੍ਣਾਨਿ ਚ ਭੂਵਨੇਕਬਾਹੁਰਞ੍ਞੋ ਭਿਕ੍ਖੂਸਙ੍ਘਸ੍ਸ ਚ ਅਦਾਸਿ. ਰਞ੍ਞਾ ਪੇਸਿਤਭਿਕ੍ਖੂਨਞ੍ਚ ਸਨ੍ਦੇਸਪਣ੍ਣੇ ਕਥਿਤਨਿਯਾਮੇਨੇਵ ਕਲ੍ਯਾਣਿਯਂ ਨਾਮ ਨਦਿਯਂ ਉਦਕੁਕ੍ਖੇਪਸੀਮਾਯਂ ਸਾਮਣੇਰਭੂਮਿਯਂ ਪਤਿਟ੍ਠਾਪੇਤ੍ਵਾ ਪੁਨ ਉਪਸਮ੍ਪਦਕਮ੍ਮਂ ਅਕਂਸੁ.

ਉਪਸਮ੍ਪਜ੍ਜਿਤ੍ਵਾ ਚ ਭੂਵਨੇਕਬਾਹੁਰਾਜਾ ਨਾਨਾਪ੍ਪਕਾਰੇ ਭਿਕ੍ਖੂਨਂ ਸਾਰੁਪ੍ਪੇ ਪਰਿਕ੍ਖਾਰੇ ਦਤ੍ਵਾ ਇਦਂ ਪਨ ਆਮਿਸਦਾਨਂ ਯਾਵ ਜੀਵਿਤਪਰਿਯੋਸਾਨਾਯੇਵ ਪਰਿਭੁਞ੍ਜਿਤਬ੍ਬਂ ਭਵਿਸ੍ਸਤਿ, ਨਾਮਲਞ੍ਛਂ ਪਨ ਨ ਜੀਰਿਸ੍ਸਤੀਤਿ ਕਤ੍ਵਾ ਰਾਮਦੂਤਸ੍ਸ ਨਾਵਾਯ ਪਖਾਨਭੂਤਸ੍ਸ ਸੋਮਤ੍ਥੇਰਸ੍ਸ ਸਿਰਿਸਙ੍ਘਬੋਧਿਸਾਮੀਤਿ ਨਾਮਂ ਅਦਾਸਿ. ਅਵਸੇਸਾਨਂ ਪਨ ਦਸਨ੍ਨਂ ਥੇਰਾਨਂ ਕਿਤ੍ਤਿਸਿਰਿਮੇਘਸਾਮਿ ਪਰਕ੍ਕਮਬਾਹੁਸਾਮਿ ਬੁਦ੍ਧਘੋਸਸਾਮਿ ਸੀਹਲ਼ਦੀਪਵਿਸੁਦ੍ਧਸਾਮਿ ਗੁਣਰਤਨਧਰਸਾਮੀ ਜਿਨਾਲਙ੍ਕਾਰਸਾਮਿ ਰਤਨਮਾਲਿਸਾਮਿ ਸਦ੍ਧਮ੍ਮਤੇਜਸਾਮਿ ਧਮ੍ਮਰਾਮਸਾਮਿ ਭੂਵਨੇਕਬਾਹੁਸਾਮੀਤਿ ਨਾਮਾਨਿ ਅਦਾਸਿ.

ਚਿਤ੍ਰਦੂਤਸ੍ਸ ¶ ਨਾਵਾਯ ਪਖਾਨਭੂਤਸ੍ਸ ਮੋਗ੍ਗਲਾਨਤ੍ਥੇਰਸ੍ਸ ਧਮ੍ਮਕਿਤ੍ਤਿਲੋਕਗਰੁਸਾਮੀਤਿ ਨਾਮਂ ਅਦਾਸਿ. ਅਵਸੇਸਾਨਂ ਪਨ ਸਿਰਿਵਨਰਤਨਸਾਮਿ ਮਙ੍ਗਲਤ੍ਥੇਰਸ੍ਸਾਮਿ ਕਲ੍ਯਾਣਤਿਸ੍ਸਸ੍ਸਾਮਿ ਚਨ੍ਦਗਿਰਿਸਾਮਿ ਸਿਰਿਦਨ੍ਤਧਾਤੁਸਾਮਿ ਵਨਵਾਸਿਤਿਸ੍ਸਸਾਮਿ ਰਤਨਲਙ੍ਕਾਰਸਾਮਿ ਮਹਾਦੇਵਸਾਮਿ ਉਦੁਮ੍ਬਰਗਿਰਿਸਾਮਿ ਚੂਲ਼ਾਭਯਤਿਸ੍ਸਸਾਮੀਤਿ ਨਾਮਾਨਿ ਅਦਾਸਿ. ਬਾਵੀਸਤਿਯਾ ਪਨ ਪਚ੍ਛਾ ਸਮਣਾਨਂ ਨਾਮਂ ਨ ਅਦਾਸਿ. ਅਭਿਨਵਸਿਕ੍ਖਂ ਪਨ ਸਬ੍ਬੇਸਂਯੇਵ ਅਦਾਸਿ.

ਤਤੋ ਪਚ੍ਛਾ ਚੇਤਿਯਪੂਜਨਾਦੀਨਿ ਕਤ੍ਵਾ ਤਂਤਂਕਿਚ੍ਚਂ ਨਿਪ੍ਫਾਦੇਤ੍ਵਾ ਪੁਨ ਆਗਮਂਸੁ. ਭੂਵਨੇਕਬਾਹੁਰਾਜਾ ਚਿਤ੍ਰਦੂਤਂ ਏਵਮਾਹ, ਰਾਮਾਧਿਪਤਿਰਞ੍ਞੋ ਪਣ੍ਣਾਕਾਰਂ ਪਟਿਦਾਤੁਂ ਇਚ੍ਛਾਮਿ, ਪਟਿਦੂਤਞ੍ਚ ਪੇਸੇਤੁਂ ਤਾਵ ਤ੍ਵਂ ਆਗਮੇਹੀਤਿ. ਏਵਂ ਪਨ ਵਤ੍ਵਾ ਪਚ੍ਛਾ ਆਗਮਨਕਾਲੇ ਚਣ੍ਡਵਾਤਭਯੇਨ ਮਹਾਸਮੁਦ੍ਦਮਜ੍ਝੇ ਨਾਵਾ ਅਵਗਚ੍ਛਤਿ. ਤੇਨ ਸੀਹਲ਼ਰਞ੍ਞਾ ਪੇਸਿਤਨਾਵਾਯ ਸਬ੍ਬੇ ਸਨ੍ਨਿਪਤਿਤ੍ਵਾ ਆਰੁਹਿਤ੍ਵਾ ਆਗਚ੍ਛਨ੍ਤਾ ਤੀਣਿ ਦਿਵਸਾਨਿ ਅਤਿਕ੍ਕਮਿਤ੍ਵਾ ਪੁਨ ਚਣ੍ਡਵਾਤਭਯੇਨ ਅਗਮ੍ਭੀਰਟ੍ਠਾਨੇ ਸਿਲਾਯ ਘਟ੍ਟੇਤ੍ਵਾ ਲਗ੍ਗਿਤ੍ਵਾ ਗਨ੍ਤੁਂ ਅਸਕ੍ਕੁਣਿਤ੍ਵਾ ਏਕਂ ਉਲ਼ੁਮ੍ਪਂ ਬਨ੍ਧਿਤ੍ਵਾ ਜਙ੍ਘੇਨੇਵ ਅਗਮਂਸੁ. ਸੀਹਲ਼ਰਞ੍ਞੋ ਚ ਦੂਤੋ ਪਣ੍ਣਾਕਾਰਂ ਦਤ੍ਵਾ ਪਚ੍ਚਾਗਮਾਸਿ. ਭਿਕ੍ਖੂਸੁ ਚ ਭਿਕ੍ਖੂ ਅਨ੍ਤਰਾਮਗ੍ਗੇਯੇਵ ਮਚ੍ਚੁ ਆਦਾਯ ਗਚ੍ਛਤਿ. ਅਹੋ ਅਨਿਚ੍ਚਾ ਵਤ ਸਙ੍ਖਾਰਾਤਿ. ਹੋਨ੍ਤਿ ਚੇਤ੍ਥ,–

ਇਮੇਸਂ ਪਨ ਆਰਦ੍ਧਂ, ਨ ਕਿਚ੍ਚਂ ਯਾਵ ਨਿਟ੍ਠਿਤਂ;

ਨ ਤਾਵ ਆਦਿਯਿਸ੍ਸਨ੍ਤਿ, ਮਚ੍ਚੁ ਨਤ੍ਥਿ ਆਪੇਕ੍ਖਨਾ.

ਨਿਕ੍ਕਾਰੁਣਿਕੋ ਹਿ ਏਸ, ਬਲਕ੍ਕਾਰੇਨ ਆਦਿਯ;

ਰੋਦਮਾਨਂਵ ਞਾਤੀਨਂ ਅਨਿਚ੍ਛਨ੍ਤਂਵ ਗਚ੍ਛਤੀਤਿ.

ਰਾਮਾਧਿਪਤਿਰਾਜਾਚ ਤੇਸਂ ਭਿਕ੍ਖੂਨਂ ਪਤ੍ਤਕਾਲੇ ਹਂਸਾਵਤੀਨਗਰਸ੍ਸ ਪਚ੍ਛਿਮਸ੍ਮਿਂ ਦਿਸਾਭਾਗੇ ਨਰਸੂਰੇਨ ਨਾਮ ਅਮਚ੍ਚੇਨ ਪਰਿਭੁਤ੍ਤੇ ਗਾਮਖੇਤ੍ਤੇ ਪਾਲ਼ਿਅਟ੍ਠਕਥਾਲ਼ੀਕਾਦਯੋ ਪੁਨਪ੍ਪੁਨਂ ਪਸ੍ਸਿਤ੍ਵਾ ਉਪਪਰਿਕ੍ਖਿਤ੍ਵਾ ਸੀਮਸਮੂਹਨਸੀਮਸਮ੍ਮੁਤਿਕਮ੍ਮਾਨਿ ਕਾਰਪੇਸਿ. ਸੀਹਲ਼ਦੀਪੇ ਭਗਵਤਾ ਨ੍ਹਾਯਿਤਪੁਬ੍ਬਾਯ ਕਲ੍ਯਾਣਿਯਾ ਨਾਮ ਨਦਿਯਂ ਉਦਕੁਕ੍ਖੇਪਸੀਮਂ ਕਤ੍ਵਾ ਤਤ੍ਥ ਮਹਾਵਿਹਾਰਵਾਸੀਨਂ ਭਿਕ੍ਖੂਨਂ ਸਨ੍ਤਿਕੇ ਉਪਲਦ੍ਧਉਪਸਮ੍ਪਦਭਾਵੇਹਿ ਭਿਕ੍ਖੂਹਿ ਕਤਤ੍ਤਾ ਕਲ੍ਯਾਣੀਸੀਮਾਤਿ ਸਮਞ੍ਞਂ ਅਕਾਸਿ. ਇਚ੍ਚੇਵਂ ਰਾਮਾਧਿਪਤਿਰਾਜਾ ਪਤ੍ਤਲਙ੍ਕੇ ਭਿਕ੍ਖੂ ਨਿਸ੍ਸਾਯ ਸਾਸਨਂ ਸੁਟ੍ਠੁ ਪਤਿਟ੍ਠਿਤਂ ਅਕਾਸਿ. ਕਲਿਯੁਗਸ੍ਸ ਅਟ੍ਠਤਿਂਸਾਧਿਕਅਟ੍ਠਵਸ੍ਸਸਤਕਾਲਤੋ ਯਾਵ ਏਕਚਤ੍ਤਾਲੀਸਾਧਿਕਅਟ੍ਠਵਸ੍ਸਸਤਾ ਤੇਸਂ ਭਿਕ੍ਖੂਨਂ ਵਂਸੇ ਅਸੀਤਿਮਤ੍ਤਾ ਗਣਪਾਮੋਕ੍ਖਤ੍ਥੇਰਾ ਅਹੇਸੁਂ. ਤੇਸਂ ਸਿਸ੍ਸਜਾਤਾਨਿ ਪਨ ਛਬ੍ਬਿਸਾਧਿਕਾਨਿ ਦ੍ਵਿਸਤਾਨਿ ਚਤੁਸਹਸ੍ਸਾਨਿ ਦਸਸਹਸ੍ਸਾਨਿ ਅਹੇਸੁਂ. ਏਵਂ ਭਗਵਤੋ ਸਾਸਨਂ ਰਾਮਞ੍ਞਰਟ੍ਠੇ ਵੁਡ੍ਢਿਂ ਰਾਮਞ੍ਞਰਟ੍ਠੇ ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਮਾਪਜ੍ਜਿਤਿ.

ਇਦਂ ਰਾਮਞ੍ਞਰਟ੍ਠੇ ਸਤ੍ਤਮਂ ਸਾਸਨਸ੍ਸ ਪਤਿਟ੍ਠਾਨਂ.

ਯਦਾ ਪਨ ਅਰਿਮਦ੍ਦਨਨਗਰੇ ਅਨੁਰੁਦ੍ਧੋ ਨਾਮ ਰਾਜਾ ਸੁਧਮ੍ਮਪੁਰਂ ਸਰਾਜਿਕਂ ਅਭਿਭਵਿਤ੍ਵਾ ਵਿਦ੍ਧਂਸਿ, ਤਦਾ ਰਾਮਞ੍ਞਰਟ੍ਠਂ ਰਾਜਸੁਞ੍ਞਂ ਹੁਤ੍ਵਾ ਪਤਿਟ੍ਠਹਿ. ਰਾਮਞ੍ਞਰਟ੍ਠੇ ਮੁਤ੍ਤਿਮਨਗਰੇ ਸੋਣੁਤ੍ਤਰਵਂਸੋ ਏਕੋ ਗਣੋ, ਸਿਵਲਿਵਂਸੋ ਏਕੋ, ਤਾਮਲਿਨ੍ਦਵਂਸੋ ਏਕੋ, ਆਨਨ੍ਦਵਂਸੋ ਏਕੋ, ਬੁਦ੍ਧਵਂਸੋ ਏਕੋ, ਮਹਾਨਾਗਵਂਸੋ ਏਕੋਤਿ ਛਗ੍ਗਣਾ ਵਿਸੁਂ ਵਿਸੁਂ ਹੁਤ੍ਵਾ ਅਟ੍ਠਂਸੁ ਨਾਨਾਸਂਵਾਸਕਾ ਨਾਨਾਨਿਕਾਯਾ.

ਧਮ੍ਮਚੇਤਿਯਰਞ੍ਞਾ ਪਨ ਕਾਰਾਪਿਤਸਾਸਨਮ੍ਪਿ ਅਭਿਜ੍ਜਮਾਨਂ ਹੁਤ੍ਵਾ ਅਟ੍ਠਾਸਿ. ਸਮਾਨਸਂਵਾਸੋ ਏਕਨਿਕਾਯੋਯੇਵ ਅਹੋਸਿ. ਹਂਸਾਵਤੀਮੁਤ੍ਤਿਮਸੁਵਸੇਨ ਤੀਣਿਪਿ ਰਾਮਞ੍ਞਰਟ੍ਠਾਨਿ ਸੁਨਾਪਰਨ੍ਤ ਸਙ੍ਖਾਤੇਨ ਏਕਾਬਦ੍ਧਾਨਿ ਹੁਤ੍ਵਾ ਤਿਟ੍ਠਨ੍ਤਿ. ਪੁਬ੍ਬੇਚ ਮਰਮ੍ਮਰਟ੍ਠਿਨ੍ਦਰਾਜੂਨਂ ਆਣਾਪਵਤ੍ਤਨਟ੍ਠਾਨਾਨਿ ਅਹੇਸੁਂ ¶ . ਤਸ੍ਮਾ ਮਰਮ੍ਮਰਟ੍ਠਤੋ ਏਕਚ੍ਚੇ ਭਿਕ੍ਖੂ ਰਾਮਞ੍ਞਰਟ੍ਠਂ ਗਨ੍ਤ੍ਵਾ ਕਲ੍ਯਾਣੀਸੀਮਾਯਂ ਪੁਨ ਸਿਕ੍ਖਂ ਗਣ੍ਹਿਂਸੁ. ਧਮ੍ਮਚੇਤਿਯਰਞ੍ਞਾਕਾਰਾਵਿਤਸਾਸਨਂ ਸਕਲਂ ਮਰਮ੍ਮਰਟ੍ਠਮ੍ਪਿ ਬ੍ਯਾਪੇਤ੍ਵਾ ਓਗਾਹੇਤ੍ਵਾ ਤਿਟ੍ਠਤਿ.

ਰਾਮਞ੍ਞਰਟ੍ਠੇ ਸੋਣੁਤ੍ਤਰਤ੍ਥੇਰਾਨਂ ਸਾਸਨਂ ਪਤਿਟ੍ਠਾਪਿਤਕਾਲਤੋ ਪਟ੍ਠਾਯ ਯਾਵ ਸੁਧਮ੍ਮਪੁਰੇ ਮਨੋਹਰਿਰਞ੍ਞਾ ਅਰਹਨ੍ਤਾਨਂ ਸਂਵਿਜ੍ਜਮਾਨਤਾ ਵੇਦਿਤਬ੍ਬਾ. ਤਤੋ ਪਚ੍ਛਾ ਪਨ ਉਤ੍ਤਰਾ ਜੀਵਾਰਿਯਾਵਂਸਮਹਾਕਾਲ਼ਪ੍ਰਾਨਦਸ੍ਸਿਤ੍ਥੇਰਾਨਂ ਕਾਲੇ ਲੋਕਿਯਜ੍ਝਾਨਾਭਿਞ੍ਞਾਲਾਭਿਯੋਯੇਵ ਸਂਵਿਜ੍ਜਂਸੂਤਿ. ਅਧੁਨਾ ਪਨ ਤੀਸੁਪਿ ਰਾਮਞ੍ਞਰਟ੍ਠੇਸੁ ਧਮ੍ਮਚੇਤਿਯਰਞ੍ਞਾ ਕਾਰਾਵਿਤਸਾਸਨਂਯੇਵ ਤਿਟ੍ਠਤਿ. ਏਤ੍ਥਚ ਹੇਤੁਫਲਸਮ੍ਬਨ੍ਧਵਸੇਨ ਆਦਿਅਨ੍ਤਵਸੇਨੇ ਚ ਸਾਸਨਵਂਸਂ ਪਞ੍ਞਾਯ ਤੁਲਯਿਤ੍ਵਾ ਆਦਿਤੋਵ ਦਸ੍ਸਿਤੇਹਿ ਤੀਹਿ ਨਯੇਹਿ ਯਥਾਪਵੇਣੀ ਘਟ੍ਟਿਯਤਿ, ਤਥਾ ਗਣ੍ਹੇਯ੍ਯਾਤਿ. ਅਯਞ੍ਚ ਸਾਸਨਵਂਸੋ ਲਜ੍ਜਿਪੇਸਲਸਿਕ੍ਖਾਕਾਮਾਨਂਯੇਵ ਵਸੇਨ ਵੁਤ੍ਤੋ, ਨਾਲਜ੍ਜੀਨਂ ਵਸੇਨਾਤਿ ਦਟ੍ਠਬ੍ਬੋ.

ਤਾਯ ਚ ਥੇਰਪਰਮ੍ਪਰਾਯ ਮੁਤ੍ਤਿਮਨਗਰਵਾਸਿਮੇਧਙ੍ਕਰਤ੍ਥੇਰੋ ਲੋਕਦੀਪਕਸਾਰਂ ਨਾਮ ਗਨ੍ਥਂ ਅਕਾਸਿ. ਹਂਸਾਵਤੀਨਗਰਵਾਸੀ ਪਨ ਆਨਨ੍ਦਤ੍ਥੇਰੋ ਮਧੁਸਾਰਤ੍ਥਦੀਪਨਿਂ ਨਾਮ ਅਭਿਧਮ੍ਮਟੀਕਾਯ ਸਂਵਣ੍ਣਨਂ, ਹਂਸਾਵਤੀਨਗਰਵਾਸੀਯੇਵ ਧਮ੍ਮਬੁਦ੍ਧਤ੍ਥੇਰੋ ਕਵਿਸ੍ਸਾਰਂ ਨਾਮ ਛਨ੍ਦੋਵਣ੍ਣਨਂ, ਹਂਸਾਵਤੀਨਗਰਵਾਸੀਯੇਵ ਸਦ੍ਧਮ੍ਮਾਲਙ੍ਕਾਰਤ੍ਥੇਰੋ ਪਟ੍ਠਾਨਸਾਰਦੀਪਨਿਂ ਨਾਮ ਪਕਰਣਂ, ਤਥੇਵ ਅਞ੍ਞਤਰੋ ਥੇਰੋ ਅਫੇਗ੍ਗੁਸਾਰਂ ਨਾਮ ਗਨ੍ਥਂ ਅਕਾਸਿ. ਏਵਂ ਅਨੇਕਪ੍ਪਕਾਰਾਨਂ ਗਨ੍ਥਕਾਰਾਨਂ ਮਹਾਥੇਰਾਨਂ ਵਸਨਟ੍ਠਾਨਂ ਹੁਤ੍ਵਾ ਸਾਸਨਂ ਓਗਾਹੇਤ੍ਵਾ ਵਿਰੂਲ਼ਟ੍ਠਾਨਂਅਹੋਸੀਤਿ.

ਇਤਿ ਸਾਸਨਵਂਸੇ ਸੁਵਣ੍ਣਭੂਮਿਸਾਸਨਵਂਸਕਥਾਮਗ੍ਗਾ ਨਾਮ

ਤਤਿਯੋ ਪਰਿਚ੍ਛੇਦੋ.

੪. ਯੋਨਕਰਟ੍ਠਸਾਸਨਵਂਸਕਥਾਮਗ੍ਗੋ

੪. ਇਦਾਨਿ ਪਨ ਯੋਨਕਰਟ੍ਠੇ ਸਾਸਨਸ੍ਸੁਪ੍ਪਤ੍ਤਿਂ ਕਥੇਸ੍ਸਾਮਿ ¶ . ਭਗਵਾ ਹਿ ਵੇਨੇਯ੍ਯਹਿਤਾਵਹੋ ਯੋਨਕਰਟ੍ਠੇ ਮਮਸਾਸਨਂ ਚਿਰਕਾਲਂ ਪਭਿਟ੍ਠਹਿਸ੍ਸਤੀਤਿ ਆਪੇਕ੍ਖਿਤ੍ਵਾ ਸਦ੍ਧਿਂ ਭਿਕ੍ਖੁ ਸਙ੍ਘੇਨ ਦੇਸਚਾਰਿਕਂ ਆਹਿਣ੍ਡਨ੍ਤੋ ਲਭੁਞ੍ਜਂ ਨਾਮ ਨਗਰਂ ਅਗਮਾਸਿ. ਤਦਾ ਏਕੋ ਨੇਸਾਦੋ ਹਰਿਫਲਂ ਦਤ੍ਵਾ ਤਂ ਪਰਿਭੁਞ੍ਜਿਤ੍ਵਾ ਹਰਿਬੀਜੇ ਖਿਪਿਤੇ ਪਥਵਿਯਂ ਅਪਤਿਤ੍ਵਾ ਆਕਾਸੇਯੇਵ ਪਤਿਟ੍ਠਾਸਿ. ਤਂ ਦਿਸ੍ਵਾ ਸਿਤਂ ਪਤ੍ਵਾਕਾਸਿ. ਤਮਤ੍ਥਂ ਦਿਸ੍ਵਾ ਆਨਨ੍ਦਤ੍ਥੇਰੋ ਪੁਚ੍ਛਿ. ਅਨਾਗਤੇ ਖੋ ਆਨਨ੍ਦ ਇਮਸ੍ਮਿਂ ਠਾਨੇ ਮਮ ਧਾਤੁਚੇਤਿਯਂ ਪਤਿਟ੍ਠਹਿਸ੍ਸਤਿ, ਸਾਸਨਂ ਵਿਰੂਲ਼ਮਾਪਜ੍ਜਿਸ੍ਸਤੀਤਿ ਬ੍ਯਾਕਾਸਿ. ਭਗਵਤਾ ਪਨ ਹਰਿਫਲਸ੍ਸ ਭੁਞ੍ਜਿਤਟ੍ਠਾਨਤ੍ਤਾਹਰਿਭੁਞ੍ਜੋਤਿ ਤਸ੍ਸ ਰਟ੍ਠਸ੍ਸ ਨਾਮਂ ਅਹੋਸਿ. ਦ੍ਵਿਨ੍ਨਂ ਤਾਪਸਾਨਂ ਠਪਿਤਂ ਜਲਸੁਤ੍ਤਿਕਂ ਪਟਿਚ੍ਚ ਯੋਨਕਾਨਂ ਭਾਸਾਯ ਲਭੁਞ੍ਜੋਤਿ ਨਾਮਂ ਅਹੋਸਿ.

ਤਦਾ ਤਤ੍ਥ ਮਪਿਨ੍ਨਾਯ ਨਾਮ ਏਕਿਸ੍ਸਾ ਮਾਤਿਕਾਯ ਸਮੀਪੇ ਨਿਸਿਨ੍ਨੋ ਏਕੋ ਲਵਕੁਲਿਕਜੇਟ੍ਠਕੋ ਅਤ੍ਤਨੋ ਪੁਤ੍ਤਂ ਸਤ੍ਤਵਸ੍ਸਿਕਂ ਭਗਵਤੋ ਨਿਯ੍ਯਾਦੇਤ੍ਵਾ ਪਬ੍ਬਾਜੇਸਿ. ਕਮ੍ਮਟ੍ਠਾਨਾਨੁਯੋਗਵਸੇਨ ਅਚਿਰੇਨੇਵ ਅਰਹਤ੍ਤਂ ਪਾਪੁਣਿ. ਸਤ੍ਤਵਸ੍ਸਿ ਕਸ੍ਸਚ ਸਾਮਣੇਰਸ੍ਸ ਅਰਹਤ੍ਤਂ ਸਚ੍ਛਿਕਤਟ੍ਠਾਨਤਂ ਪਟਿਚ੍ਚ ਯੋਨਕਭਾਸਾਯ ਏਤਂ ਠਾਨਂ ਚਙ੍ਗਮਙ੍ਘ ਇਤਿ ਵੁਚ੍ਚਤਿ. ਚਿਰਕਾਲ ਵਸੇਨ ਜਙ੍ਗਮਙ੍ਘ ਇਤਿ ਵੁਚ੍ਚਤਿ. ਤਤੋ ਪਟ੍ਠਾਯਯੇਵ ਯੋਨਕਰਟ੍ਠੇ ਸਾਸਨਂ ਪਤਿਟ੍ਠਾਤੀਤਿ.

ਇਦਂ ਯੋਨਕਰਟ੍ਠੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਸਾਸਨੇ ਪਨ ਪਞ੍ਚਤਿਂਸਾਧਿਕੇ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਮਹਾਰਕ੍ਖਿਤਤ੍ਥੇਰੋ ਯੋਨਕਰਟ੍ਠਂ ਗਨ੍ਤ੍ਵਾ ਕਮ੍ਬੋਜਖੇਮਾਵਰ ਹਰਿਭੁਞ੍ਜਾਯੁਦ੍ਧਯਾਦੀਸੁ ਅਨੇਕੇਸੁ ਰਟ੍ਠੇਸੁ ਸਾਸਨਂ ਪਤਿਟ੍ਠਾਪੇਤਿ. ਤਾਨਿ ਹਿ ਸਬ੍ਬਾਨਿ ਰਟ੍ਠਾਨਿ ਸਙ੍ਗਹੇਤ੍ਵਾ ਦਸ੍ਸੇਨ੍ਤੇਹਿ ਅਟ੍ਠਕਥਾਚਰਿਯੇਹਿ ਯੋਨਕਲੋਕਨ੍ਤਿ ਓਕਾਸਕਾਲੋਕਵਾਚਕੇਨ ਸਾਮਞ੍ਞਸਦ੍ਦੇਨ ਵੁਤ੍ਤਂ. ਪਕਤਿ ਹੇਸਾ ਗਨ੍ਥਕਾਰਾਨਂ ਯੇਨ ¶ ਕੇਨਚਾਕਾਰੇਨ ਅਤ੍ਥਨ੍ਤਰਸ੍ਸ ਵਿਞ੍ਞਾਪਨਾਤਿ.

ਮਹਾਰਕ੍ਖਿਤਤ੍ਥੇਰੋ ਚ ਸਦ੍ਧਿਂ ਪਞ੍ਚਹਿ ਭਿਕ੍ਖੂਹਿ ਪਾਟਲਿਪੁਤ੍ਤਤੋ ਅਨਿਲਪਥਮਗ੍ਗੇਨ ਯੋਨਕਲੋਕਂ ਆਗਨ੍ਤ੍ਵਾ ਕਾਲ਼ਕਾਰਾਮਸੁਤ੍ਤੇਨ ਯੋਨਕੇ ਪਸਾਦੇਸਿ. ਸਤ੍ਤਤਿਸਹਸ੍ਸਾਧਿਕਪਾਣਸਤਸਹਸ੍ਸਂ ਮਗ੍ਗਫਲਾਲਙ੍ਕਾਰਂ ਅਦਾਸਿ. ਸਨ੍ਤਿਕੇ ਚਸ੍ਸ ਦਸਸਹਸ੍ਸਾਨਿ ਪਬ੍ਬਜਿਂਸੁ. ਏਵਂ ਸੋ ਤਤ੍ਥਸਾਸਨਂ ਪਤਿਟ੍ਠਾਪੇਸਿ. ਤਥਾ ਚ ਵੁਤ੍ਤਂ ਅਟ੍ਠਕਥਾਯਂ,–

ਯੋਨਕਰਟ੍ਠਂ ਤਦਾ ਗਨ੍ਤ੍ਵਾ, ਸੋ ਮਹਾਰਕ੍ਖਿਤੋ ਇਸਿ;

ਕਾਲ਼ਕਾਰਾਮਸੁਤ੍ਤੇਨ, ਤੇ ਪਸਾਦੇਸਿ ਯੋਨਕੇਤਿ.

ਤਤੋ ਪਟ੍ਠਾਯ ਤੇਸਂ ਸਿਸ੍ਸਪਰਮ੍ਪਰਾ ਬਹੂ ਹੋਨ੍ਤਿ, ਗਣਨਪਥਂ ਵੀਤਿਵਤ੍ਤਾ.

ਇਦਂ ਯੋਨਕਰਟ੍ਠੇ ਮਹਾਰਕ੍ਖਿਤਤ੍ਥੇਰਾਦਯੋ ਪਟਿਚ੍ਚ

ਦੁਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਯੋਨਕਰਟ੍ਠੇ ਲਕੁਨ੍ਨਨਗਰੇ ਜਿਨਚਕ੍ਕੇ ਪਞ੍ਚਵਸ੍ਸਸਤੇ ਮਣਿਮਯਂ ਬੁਦ੍ਧਪ੍ਪਟਿਮਂ ਮਾਪੇਤ੍ਵਾ ਵਿਸੁਕਮ੍ਮਦੇਵਪੁਤ੍ਤੋ ਨਾਗਸੇਨਤ੍ਥੇਰਸ੍ਸ ਅਦਾਸਿ. ਨਾਗੇਸੇਨਤ੍ਥੇਰੋ ਚ ਤਸ੍ਮਿਂ ਪਟਿਮਮ੍ਹਿ ਧਾਤੁ ਆਗਨ੍ਤ੍ਵਾ ਪਤਿਟ੍ਠਾਤੂਤਿ ਅਧਿਟ੍ਠਾਸਿ. ਅਧਿਟ੍ਠਾਨਵਸੇਨੇਵ ਸਤ੍ਤਧਾਤੁਯੋ ਆਗਨ੍ਤ੍ਵਾ ਤਤ੍ਥ ਪਤਿਟ੍ਠਹਿਤ੍ਵਾ ਪਾਟਿਹਾਰਿਯਂ ਦਸ੍ਸੇਸੁਨ੍ਤਿ ਰਾਜਵਂਸੇ ਵੁਤ੍ਤਂ.

ਤਞ੍ਚ ਵਚਨਂ ਮਮ ਪਰਿਨਿਬ੍ਬਾਨਤੋ ਪਞ੍ਚਵਸ੍ਸਸਤੇ ਅਤਿਕ੍ਕਨ੍ਤੇ ਏਤੇ ਉਪ੍ਪਜ੍ਜਿਸ੍ਸਨ੍ਤੀਤਿ ਮਿਲਿਨ੍ਦਪਞ੍ਹਾਯਂ ਵੁਤ੍ਤਵਚਨੇਨ ਕਾਲਪਰਿਮਾਣਵਸੇਨ ਚ ਸਮੇਤਿ. ਯੋਨਕਰਟ੍ਠੇ ਮਿਲਿਨ੍ਦਰਞ੍ਞੋ ਕਾਲੇ ਜਿਨਚਕ੍ਕੇ ਪਞ੍ਚਵਸ੍ਸਸਤੇਯੇਵ ਨਾਗਸੇਨਤ੍ਥੇਰਂ ਪਟਿਸ੍ਸ ਜਿਨਚਕ੍ਕਂ ਵਿਰੂਲ਼ਂ ਹੁਤ੍ਵਾ ਪਤਿਟ੍ਠਾਸਿ.

ਇਦਂ ਯੋਨਕਰਟ੍ਠੇ ਨਾਗਸੇਨਤ੍ਥੇਰਂ ਪਟਿਚ੍ਚ ਤਤਿਯਂ

ਸਾਸਨਸ੍ਸ ਪਤਿਟ੍ਠਾਨਂ.

ਕਲਿਯੁਗੇ ¶ ਪਞ੍ਚਸਟ੍ਠਿਵਸ੍ਸੇਲਭੁਞ੍ਜਨਗਰਤੋ ਸਙ੍ਕਮਿਤ੍ਵਾ ਕ੍ਯੁਙ੍ਗਰਨਗਰੇ ਮਾਪਿਕਸ੍ਸ ਬਞ੍ਞਾਚੋਮਙ੍ਗਰ ਨਾਮਕਸ੍ਸ ਰਞ੍ਞੋ ਕਾਲੇ ਮਜ੍ਝਿਮਦੇਸਤੋ ਕਸ੍ਸਪਤ੍ਥੇਰੋ ਪਞ੍ਚਹਿ ਥੇਰੇਹਿ ਸਦ੍ਧਿਂ ਆਗਚ੍ਛਿ.

ਤਦਾ ਸੋ ਰਾਜਾ ਵਿਹਾਰਂ ਕਤ੍ਵਾ ਤੇਸਂ ਅਦਾਸਿ. ਸੀਹਲ਼ਦੀਪਤੋ ਚ ਧਾਤੁਯੋ ਆਨੇਤ੍ਵਾ ਏਕੋ ਥੇਰੋ ਆਗਚ੍ਛਿ. ਧਾਤੁਤੋ ਪਾਟਿਹਾਰਿਯਂ ਦਿਸ੍ਵਾ ਪਸੀਦਿਤ੍ਵਾ ਲਭੁਞ੍ਜਚੇਤਿਯ ਨਿਧਾਨਂ ਅਕਾਸਿ. ਤੇ ਚ ਥੇਰੇ ਪਟਿਚ੍ਚ ਯੋਨਕਰਟ੍ਠੇ ਸਾਸਨ ਵਂਸੋ ਆਗਤੋ.

ਇਦਂ ਯੋਨਕਰਟ੍ਠੇ ਚਤੁਤ੍ਥਂ ਸਾਸਨਸ੍ਸ ਪਤਿਟ੍ਠਾਨਂ.

ਕਲਿਯੁਗੇ ਦ੍ਵਾਸਟ੍ਠਾਧਿਕੇ ਸਤ੍ਤਸਤੇ ਸਮ੍ਪਤ੍ਥੇ ਚਿਨਰਟ੍ਠਿਨ੍ਦੋ ਰਾਜਾ ਅਭਿਭਵਿਤ੍ਵਾ ਸਕਲਮ੍ਪਿ ਯੋਨਕਰਟ੍ਠਂ ਸਙ੍ਖੁਬ੍ਭਿਤਂ ਹੋਤਿ. ਤਦਾ ਮਹਾਧਮ੍ਮਗਮ੍ਭੀਰਤ੍ਥੇਰੋ ਮਹਾਮੇਧਙ੍ਕਰਤ੍ਥੇ ਰੋਚਾਤਿ ਦ੍ਵੇ ਥੇਰੋ ਯੋਨਕਰਟ੍ਠਤੋ ਸਦ੍ਧਿਂ ਬਹੂਹਿ ਭਿਕ੍ਖੂਹਿ ਸੀਹਲ਼ਦੀਪਂ ਅਗਮਂਸੁ. ਤਦਾ ਚ ਸੀਹਲ਼ਦੀਪੇ ਦੁਬ੍ਭਿਕ੍ਖਭਯੇਨ ਅਭਿਭੂਤੋ ਹੁਤ੍ਵਾ ਤਤੋ ਸ੍ਯਾਮਰਟ੍ਠੇ ਸੋਕ੍ਕਤਯਨਗਰਂ ਪੁਨ ਅਗਮਂਸੁ.

ਤਤੋ ਪਚ੍ਛਾ ਲਕੁਨ੍ਨਨਗਰਂ ਗਨ੍ਤ੍ਵਾ ਸਾਸਨਂ ਪਗ੍ਗਣ੍ਹਨ੍ਤਾਨਂ ਲਜ੍ਜਿਪੇਸਲਾਨਂ ਭਿਕ੍ਖੂਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਣ੍ਹਿਂਸੁ. ਤੇ ਚ ਥੇਰੋ ਸ੍ਯਾਮਰਟ੍ਠੇ ਯੋਨਕਰਟ੍ਠੇ ਚ ਸਬ੍ਬਤ੍ਥ ਸਾਸਨਂ ਪਤਿਟ੍ਠਾਪੇਸੁਨ੍ਤਿ.

ਇਦਂ ਯੋਨਕਰਟ੍ਠੇ ਪਤ੍ਤਲਙ੍ਕੇ ਦ੍ਵੇ ਥੇਰੇ ਪਟਿਚ੍ਚ ਪਞ੍ਚਮਂ

ਸਾਸਨਸ੍ਸ ਪਤਿਟ੍ਠਾਨਂ.

ਕਲਿਯੁਗੇ ਪਞ੍ਚਵੀਸਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਸਿਰਿਸਦ੍ਧਮ੍ਮਲੋਕਪਤਿਚਕ੍ਕਵਤ੍ਤਿਰਾਜਾ ਲਭੁਞ੍ਜਚੇਤਿਯਂ ਪੁਨ ਮਹਨ੍ਤਂ ਕਤ੍ਵਾ ¶ ਤਸ੍ਸ ਚੇਤਿਯਸ੍ਸ ਸਮੀਪੇ ਚਤ੍ਤਾਰੋ ਵਿਹਾਰੇ ਕਾਰਾਪੇਤ੍ਵਾ ਮਹਾਮੇਧਙ੍ਕਰਤ੍ਥੇਰਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਚ ਅਦਾਸਿ. ਤਦਾਪਿ ਤੇ ਦ੍ਵੇ ਥੇਰਾ ਸਾਸਨਂ ਪਰਿਸੁਦ੍ਧਂ ਕਤ੍ਵਾ ਪਤਿਟ੍ਠਾਪੇਸੁਨ੍ਤਿ.

ਇਦਂ ਯੋਨਕਰਟ੍ਠੇ ਮਹਾਮੇਧਙ੍ਕਰਸਾਰਿਪੁਤ੍ਤਤ੍ਥੇਰੇ

ਪਟਿਚ੍ਚ ਛਟ੍ਠਂ ਸਾਸਨਸ੍ਸ ਪਤਿਟ੍ਠਾਨਂ.

ਕਲਿਯੁਗੇ ਤੇਚਤ੍ਤਾਲੀਸਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਹਂਸਾਵਤੀਨਗਰੇ ਅਨੇਕਸੇਤਿਭਿਨ੍ਦੋ ਨਾਮ ਰਾਜਾ ਯੋਨਕਰਟ੍ਠਂ ਅਭਿਭਵਿਤ੍ਵਾ ਅਤ੍ਤਨੋ ਹਤ੍ਥਗਤਂ ਕਤ੍ਵਾ ਬਲਿ ਭੁਞ੍ਜਨਤ੍ਥਾਯ ਜੇਟ੍ਠਪੁਤ੍ਤਸ੍ਸ ਅਨੁਰੁਦ੍ਧਸ੍ਸ ਨਾਮ ਰਾਜਕੁਮਾਰਸ੍ਸ ਦਤ੍ਵਾ ਬਹੂਹਿ ਅਮਚ੍ਚੇਹਿ ਸਦ੍ਧਿਂ ਤਤ੍ਥ ਗਨ੍ਤ੍ਵਾ ਅਨੁਰਾਜਤਾਵੇਨ ਰਜ੍ਜਂ ਕਾਰਾਪੇਸਿ. ਸਾਸਨਞ੍ਚ ਵਿਸੋਧਾਪੇਤੁਂ ਸਦ੍ਧਮ੍ਮਚਕ੍ਕਸਾਮਿਤ੍ਥੇਰਂ ਤੇਨ ਸਦ੍ਧਿਂ ਪਹਿਣਿ.

ਅਨੇਕਸੇਤਿਭਿਨ੍ਨੋ ਕਿਰ ਰਾਜਾ ਯੋਨਕਰਟ੍ਠਂ ਵਿਜਯਕਾਲੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਭੂਤਮਿਦਨ੍ਤਿ ਕਤ੍ਵਾ ਤਂਰਟ੍ਠਵਾਸਿਨੋ ਕਰਮਰਾਨੀਤਭਾਵੇਨ ਨ ਅਗ੍ਗਹੇਸੀਤਿ.

ਯਥਾਵੁਤ੍ਤਤ੍ਥੇਰਵਂਸੇਸੁ ਚ ਏਕੋ ਲਕੁਨ੍ਨਨਗਰੇ ਅਰਞ੍ਞਵਾਸੀ ਥੇਰੋ ਤਤ੍ਥ ਨਗਰੇ ਅਜ੍ਜ ਅਸੁਕਸ੍ਮਿਂ ਠਾਨੇ ਏਕੋ ਮਤੋਤਿ ਗਿਹੀਨਂ ਕਥੇਤ੍ਵਾ ਯਥਾਕਥਿਤਂ ਭੂਤਂ ਹੁਤ੍ਵਾ ਅਯਂ ਅਭਿਞ੍ਞਾਲਾਭੀਤਿ ਪਾਕਟੋ ਅਹੋਸਿ.

ਤਸ੍ਮਿਂਯੇਵ ਚ ਨਗਰੇ ਮਹਾਮਙ੍ਗਲੋ ਨਾਮ ਥੇਰੋ ਅਨੇਕਸੇਤਿਭਿਨ੍ਦਸ੍ਸ ਰਞ੍ਞੋ ਯੁਜ੍ਝਿਤੁਂ ਆਗਤਕਾਲੇ ਅਨੇਕਸੇਤਿਭਿਨ੍ਦੋ ਰਾਜਾ ਮਂ ਪਕ੍ਕੋਸਿਸ੍ਸਤਿ, ਸਮਾਨਜਾਤਿਕਂ ਦੂਤਂ ਪੇਸ੍ਸੇਸ੍ਸਤੀਤਿ ਪਕ੍ਕੋਸਿਤਕਾਲਤੋ ਪਠਮਮੇਵਵਦਿ. ਯਥਾਵੁਤ੍ਤਨਿਯਾਮੇਨੇਵ ਪਕ੍ਕੋਸਨਤੋ ਅਯਂ ਅਭਿਞ੍ਞਾ ਲਾਭੀਤਿ ਕਿਤ੍ਤਿ ਘੋਸੋ ਅਹੋਸਿ.

ਤਤ੍ਥ ਨਗਰੇ ਞਾਣਵਿਲਾਸਤ੍ਥੇਰੋ ਸਙ੍ਖ੍ਯਾਪਕਾਸਕਂ ਨਾਮ ¶ ਪਕਰਣਂ ਅਕਾਸਿ. ਤਂਲ਼ੀਕਂ ਪਨ ਪਤ੍ਤਲਙ੍ਕਤ੍ਥੇਰਸ੍ਸ ਵਿਹਾਰੇ ਵਸਨ੍ਤੋ ਸਿਰਿਮਙ੍ਗਲੋਨਾਮ ਥੇਰੋ ਅਕਾਸਿ.

ਵਿਸੁਦ੍ਧਿਮਗ੍ਗਦੀਪਨਿਂ ਪਨ ਸਂਞ੍ਞ੍ਵਤ੍ਤਅਰਞ੍ਞਵਾਸੀ ਉਤ੍ਤਰਾਰਾਮੋ ਨਾਮ ਏਕੋ ਥੇਰੋ. ਮਙ੍ਗਲਦੀਪਨਿਂ ਸਿਰਿਮਙ੍ਗਲਤ੍ਥੇਰੋ. ਉਪ੍ਪਾਤਸਨ੍ਤਿਂ ਅਞ੍ਞਤਰੋ ਥੇਰੋ. ਤਂ ਕਿਰ ਉਪ੍ਪਾਤਸਨ੍ਤਿਂ ਸਜ੍ਝਾਯਿਤ੍ਵਾ ਚੀਨਰਞ੍ਞੋ ਸੇਨਂ ਅਜਿਨੀਤਿ. ਇਚ੍ਚੇਵਂ ਯੋਨਕਰਟ੍ਠੇ ਅਭਿਞ੍ਞਾਲਾਭੀਨਂ ਗਨ੍ਥਕਾਰਾਨਞ੍ਚ ਥੇਰਾਨਂ ਆਨੁਭਾਵੇਨ ਜਿਨਸਾਸਨਂ ਪਰਿਸੁਦ੍ਧਂ ਹੁਤ੍ਵਾ ਪਤਿਟ੍ਠਾਤਿ. ਏਵਂ ਹੇਤੁਫਲਸਮ੍ਬਨ੍ਧਵਸੇਨ ਆਦਿ ਅਨ੍ਤ ਸਮ੍ਬਨ੍ਧਵਸੇਨ ਚ ਯਥਾਵੁਤ੍ਤੇਹਿ ਤੀਹਿ ਨਯੇਹਿ ਥੇਰਪਰਮ੍ਪਰਾ ਘਟ੍ਟੇਤ੍ਵਾ ਗਹੇਤਬ੍ਬਾ.

ਇਤਿ ਸਾਸਨਵਂਸੇ ਯੋਨਕਰਟ੍ਠਸਾਸਨਵਂਸਕਥਾ

ਮਗ੍ਗੋ ਨਾਮ ਚਤੁਤ੍ਥੋ ਪਰਿਚ੍ਛੇਦੋ.

੫. ਨਵਵਾਸੀਰਟ੍ਠਸਾਸਨਵਂਸਕਥਾਮਗ੍ਗੋ

੫. ਇਦਾਨਿ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰਸਾਸਨਵਂਸਂ ਵਕ੍ਖਾਮਿ. ਜਿਨਚਕ੍ਕੇ ਹਿ ਏਕਾਧਿਕੇ ਵਸ੍ਸਸਤੇ ਸਮ੍ਪਤ੍ਤੇ ਜਟਿਲੋ ਸਕ੍ਕੋ ਨਾਗੋ ਗਰੁਲ਼ੋ ਕੁਮ੍ਭਣ੍ਡੋ ਚਨ੍ਦੀ ਪਰਮੀਸ੍ਵਰੋਚਾਤਿ ਇਮੇ ਸਤ੍ਤ ਸਿਰਿਖੇਤ੍ਤਂ ਨਾਮ ਨਗਰਂ ਮਾਪੇਸੁਂ. ਤਤ੍ਥ ਦ੍ਵਤ੍ਤਪੋਙ੍ਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਕਿਰ ਤੀਣਿ ਅਕ੍ਖੀਨਿ ਸਨ੍ਤੀਤਿ. ਤਦਾ ਭਗਵਤੋ ਸਾਵਕਾ ਅਰਹਨ੍ਤਾ ਤਿਸਹਸ੍ਸਮਤ੍ਤਾ ਤਤ੍ਥ ਵਸਿਂਸੁ. ਸੋ ਰਾਜਾ ਤੇਸਂ ਅਰਹਨ੍ਤਾਨਂ ਦੇਵਸਿਕਂ ਚਤੂਹਿ ਪਚ੍ਚਯੇਹਿ ਉਪਤ੍ਥਮ੍ਭਿ. ਛ ਸਰੀਰਧਾਤੁਯੋ ਚ ਏਕੇਕਂ ਏਕੇਕਸ੍ਮਿਂ ਨਿਦਹਿਤ੍ਵਾ ਛ ਚੇਤਿਇਯਾਨਿ ਕਾਰਾਪੇਸਿ. ਦਕ੍ਖਿਣਬਾਹੁਂ ਪਨ ਨਿਦਹਿਤ੍ਵਾ ਏਕਮ੍ਪਿ ਚੇਤਿਯਂ ਕਾਰਾਪੇਸਿ.

ਉਣ੍ਹੀਸਧਾਤੁਂ ਪਨ ਕਙ੍ਗਰਨ੍ਨਗਰਤੋ ਆਨੇਤ੍ਵਾ ਏਕਮ੍ਪਿ ਚੇਤਿਯਂ ਕਾਰਾਪੇਸਿ. ਤਂ ਪਨ ਤਾਵ ਨ ਨਿਟ੍ਠਿਤਂ. ਪਚ੍ਛਾ ਅਨੁਰੁਦ੍ਧਰਾਜਾ ਗਹੇਤ੍ਵਾ ਅਰਿਮਦ੍ਦਨਨਗਰਂ ਆਨੇਤ੍ਵਾ ਚਞ੍ਞਿਙ੍ਖੁ ਨਾਮ ਚੇਤਿਯੇ ਨਿਧਾਨਂ ¶ ਅਕਾਸਿ. ਤਸ੍ਮਾ ਰਕ੍ਖਿਤਤ੍ਥੇਰਸ੍ਸ ਆਗਮਨਤੋ ਪੁਬ੍ਬੇਪਿ ਸਾਸਨਂ ਪਤਿਟ੍ਠਾਸੀਤਿ ਦਟ੍ਠਬ੍ਬਂ. ਤਤੋ ਪਚ੍ਛਾ ਸਾਸਨਂ ਦੁਬ੍ਬਲਂ ਹੁਤ੍ਵਾ ਅਟ੍ਠਾਸਿ.

ਇਦਂ ਵਨਵਾਸੀਰਟ੍ਠੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਪਨ ਪੇਸਿਤੋ ਰਕ੍ਖਿਤਤ੍ਥੇਰੋ ਵਨਵਾਸੀਰਟ੍ਠਂ ਗਨ੍ਤ੍ਵਾ ਆਕਾਸੇ ਠਤ੍ਵਾ ਅਨਮਤਗ੍ਗਪਰਿਯਾਯਕਥਾਯ ਵਨਵਾਸਿਕੇ ਪਸਾਦੇਸਿ. ਕਥਾਪਰਿਯੋਸਾਨੇ ਪਨਸ੍ਸ ਸਟ੍ਠਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸਤ੍ਤਤਿਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਪਞ੍ਚਵਿਹਾਰਸਤਾਨਿ ਪਤਿਟ੍ਠਾਪੇਸੁਂ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸਿ. ਤੇਨੇਵ ਅਟ੍ਠ ਕਥਾਯਂ –

ਗਨ੍ਤ੍ਵਾਨ ਰਕ੍ਖਿਤਤ੍ਥੇਰੋ,

ਵਨਵਾਸਿਂ ਮਹਿਦ੍ਧਿਕੋ;

ਅਨ੍ਤਲਿਕ੍ਖੇ ਠਿਤੋ ਤਤ੍ਥ,

ਦੇਸੇਸਿ ਅਨਮਤਗ੍ਗਿਯਨ੍ਤਿ ਵੁਤ੍ਤਂ.

ਏਵਂ ਵਨਵਾਸੀਰਟ੍ਠੇ ਪੁਬ੍ਬੇਯੇਵ ਸਾਸਨਂ ਓਗਾਹੇਤ੍ਵਾ ਪਤਿਟ੍ਠਹਿ. ਨ ਪਨ ਤਾਵ ਸਕਲਂ ਬ੍ਯਾਪੇਤ੍ਵਾ ਪਤਿਟ੍ਠਹਿ.

ਇਦਂ ਤਾਵ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰੇ ਦੁਤਿਯਂ

ਸਾਸਨਸ੍ਸ ਪਤਿਟ੍ਠਾਨਂ.

ਜਿਨਚਕ੍ਕੇ ਪਨ ਤੇਤ੍ਤਿਂਸਾਧਿਕੇ ਚਤੁਵਸ੍ਸਸਤੇ ਕੁਕ੍ਕੁਟ ਸੀਸੋ ਨਾਮ ਏਕੋ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਰਞ੍ਞੋ ਕਾਲੇ ਭਗਵਤੋ ਸਾਵਕਾ ਅਰਹਨ੍ਤਾ ਪਞ੍ਚਸਤਮਤ੍ਤਾ ਅਹੇਸੁਂ. ਤੇਸਮ੍ਪਿ ਸੋ ਰਾਜਾ ਦੇਵਸਿਕਂ ਚਤੂਹਿ ਪਚ੍ਚਯੇਹਿ ਉਪਤ੍ਥਮ੍ਭੇਸਿ. ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਪਨ ਗਣਨਪਥਂ ¶ ਵੀਤਿਵਤ੍ਤਾ ਅਹੇਸੁਂ.

ਇਦਂ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰੇ ਪਰਮ੍ਪਰਾਭਤਵਸੇਨ

ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਇਚ੍ਚੇਵਂ ਵਨਵਾਸੀਰਟ੍ਠੇ ਅਨੇਕਸਤੇਹਿ ਅਰਹਨ੍ਤਤ੍ਥੇਰੇਹਿ ਸਾਸਨਂ ਪੁਣ੍ਣਿਨ੍ਦੁਸਙ੍ਕਾਸਂ ਹੁਤ੍ਵਾ ਅਤਿਵਿਯ ਵਿਜ੍ਜੋਤੇਸਿ. ਸਾਸਨਿਕ ਗਨ੍ਥਕਾਰਾ ਪਨ ਮਹਾਥੇਰਾ ਤਤ੍ਥ ਨ ਸਨ੍ਦਿਸ੍ਸਨ੍ਤਿ. ਅਰਹਨ੍ਤਤ੍ਥੇਰਾ ਪਨ ਰਾਜੂਨਂ ਆਯਾਚਨਂ ਆਰਬ੍ਭ ਧਮ੍ਮਸਤ੍ਥਂ ਏਕਂ ਵਿਰਚਯਿਂਸੂਤਿ ਪੋਰਾਣਾ ਵਦਨ੍ਤੀਤਿ. ਇਚ੍ਚੇਵਂ–

ਤੇਚ ਥੇਰਾ ਮਹਾਪਞ੍ਞਾ,

ਪਗ੍ਗਹੇਤ੍ਵਾਨ ਸਾਸਨਂ;

ਸੂਰਿਯੋ ਵਿਯ ਅਤ੍ਥਙ੍ਗੋ,

ਉਪਗਾ ਮਚ੍ਚੁਸਨ੍ਤਿਕਂ.

ਤਸ੍ਮਾ ਹਿ ਪਣ੍ਡਿਤੋ ਪੋਸੋ,

ਯਾਵ ਮਚ੍ਚੁ ਨਚਾਗਤੋ;

ਤਾਵ ਪੁਞ੍ਞਂ ਕਰੇ ਨਿਚ੍ਚਂ,

ਮਾ ਪਮਜ੍ਜੇਯ੍ਯ ਸਬ੍ਬਦਾਤਿ.

ਇਤਿ ਸਾਸਨਵਂਸੇ ਵਨਵਾਸੀਰਟ੍ਠਸਾਸਨਵਂਸਕਥਾਮਗ੍ਗੋ

ਨਾਮ ਪਞ੍ਚਮੋ ਪਰਿਚ੍ਛੇਦੋ.

੬. ਅਪਰਨ੍ਤਰਟ੍ਠਸਾਸਨਵਂਸਕਥਾਮਗ੍ਗੋ

੬. ਇਦਾਨਿ ਪਨ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਸਾਸਨਵਂਸਂ ਵਕ੍ਖਾਮਿ. ਅਮ੍ਹਾਕਞ੍ਹਿ ਮਰਮ੍ਮਰਟ੍ਠੇ ਸੁਪ੍ਪਾਦਕਤਿਤ੍ਥੇ ਵਾਣਿਜਗਾਮੇ ਵਸਨ੍ਤੇ ਚੂਲ਼ਪੁਣ੍ਣ ਮਹਾਪੁਣ੍ਣੇਦ੍ਵੇ ਭਾਤਿਕੇ ਪਟਿਚ੍ਚ ਭਗਵਤੋ ਧਰਮਾਨਸ੍ਸੇਵ ਅਤਿਰੇਕਵੀਸਤਿਵਸ੍ਸਕਾਲਤੋ ਪਭੁਤਿ ਸਾਸਨਂ ਪਤਿਟ੍ਠਾਸਿ. ਨ ਪਨ ਤਾਵ ਬ੍ਯਾਪੇਤ੍ਵਾ ਪਤਿਟ੍ਠਾਸਿ. ਤੇਨੇਵ ਪੁਨ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ¶ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਪੇਸੇਸੀਤਿ.

ਭਗਵਾ ਪਨ ਲੋਹਿਤਚਨ੍ਦਨਵਿਹਾਰਂ ਪਟਿਗ੍ਗਹੇਤ੍ਵਾ ਸਤ੍ਤਸਤ੍ਤਾਹਾਨਿ ਨਿਸੀਦਿਤ੍ਵਾ ਸਮਾਗਤਾਨਂ ਦੇਵਮਨੁਸ੍ਸਾਨਂ ਧਮ੍ਮਰਸਂ ਅਦਾਸਿ. ਸਤ੍ਤਾਹੇਸੁ ਚ ਏਕਸ੍ਮਿਂ ਅਹੁ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਪਞ੍ਚਸਤਮਤ੍ਤੇਹਿ ਚ ਪਾਸਾਦੇਹਿ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਸਚ੍ਚਬਨ੍ਧਪਬ੍ਬਤੇ ਨਿਸਿਨ੍ਨਸ੍ਸ ਸਚ੍ਚਬਨ੍ਧਸ੍ਸ ਨਾਮ ਇਸਿਨੋ ਧਮ੍ਮਂ ਦੇਸੇਤ੍ਵਾ ਛਹਿ ਅਭਿਞ੍ਞਾਹਿ ਸਦ੍ਧਿਂ ਅਰਹਤ੍ਤਂ ਪਾਪੇਸਿ. ਵਾਣਿਜਗਾਮੇ ਚ ਇਸਿਦਿਨ੍ਨਸੇਟ੍ਠਿ ਆਦੀਨਮ੍ਪਿ ਧਮ੍ਮਰਸਂ ਪਾਯੇਸਿ. ਇਚ੍ਚੇਵਂ ਸਚ੍ਚਬਨ੍ਧਇਸਿਦਿਨ੍ਨਮਹਾਪੁਣ੍ਣਾਦਯੋ ਪਟਿਚ੍ਚ ਅਮ੍ਹਾਕਂ ਮਰਮ੍ਮਮਣ੍ਡਲੇ ਸਾਸਨਂ ਪਤਿਟ੍ਠਾਸਿ.

ਇਦਂ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਪਠਮਂ ਸਾਸਨਸ੍ਸ

ਪਤਿਟ੍ਠਾਨਂ.

ਭਗਵਤੋ ਪਰਿਨਿਬ੍ਬੁਤਤੋ ਪਞ੍ਚਤਿਂਸਾਧਿਕੇ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਤਤਿਯਸਙ੍ਗੀਤਿਂ ਸਙ੍ਗਾਯਿਤ੍ਵਾ ਅਵਸਾਨੇ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਸਦ੍ਧਿਂ ਚਤੂਹਿ ਭਿਕ੍ਖੂਹਿ ਅਪਰਨ੍ਤਰਟ੍ਠਂ ਪੇਸੇਸਿ. ਅਪਰਨ੍ਤਰਟ੍ਠਞ੍ਚ ਨਾਮ ਅਮ੍ਹਾਕਂ ਮਰਮ੍ਮਮਣ੍ਡਲੇ ਸੁਨਾਪਰਨ੍ਤਰਟ੍ਠਮੇਵ. ਤਮਤ੍ਥਂ ਪਨ ਹੇਟ੍ਠਾ ਅਵੋਚੁਮ੍ਹਾ.

ਯੋਨਕਧਮ੍ਮਰਕ੍ਖਿਤਤ੍ਥੇਰੋਪਿ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਅਗ੍ਗਿਕ੍ਖਨ੍ਧੋਪਮਸੁਤ੍ਤੇਨ ਰਟ੍ਠਵਾਸੀਨਂ ਪਸਾਦੇਸਿ. ਸਤ੍ਤਤਿਮਤ੍ਤਾਨਂ ਪਾਣਸਹਸ੍ਸਾਨਂ ਧਮ੍ਮਰਸਂ ਪਾਯੇਸਿ. ਰਟ੍ਠਵਾਸਿਨੋ ਚ ਬਹਵੋ ਸਾਸਨੇ ਪਬ੍ਬਜਿਂਸੁ. ਰਾਜਕੁਲਤੋਪਿ ਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਇਤ੍ਥੀਨਂ ਪਨ ਅਤਿਰੇਕਸਟ੍ਠਿਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਤਞ੍ਚ ਨ ਅਗ੍ਗਿਕ੍ਖਨ੍ਧੋਪਮਸੁਤ੍ਤਨ੍ਤਂ ਸੁਤ੍ਵਾ ਪਬ੍ਬਜਨ੍ਤੀਨਂ ਇਤ੍ਥੀਨਂ ਵਸੇਨ ਵੁਤ੍ਤਂ, ਅਥ ਖੋ ਆਦਿਤੋ ਪਟ੍ਠਾਯ ਯਾਵਚਿਰਕਾਲਾ ਸਾਸਨਂ ਪਸੀਦਿਤ੍ਵਾ ਪਬ੍ਬਜਨ੍ਤੀਨਂ ਇਤ੍ਥੀਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਸ੍ਮਾਤਿ ਚੇ, ਇਤ੍ਥੀਨਂ ਭਿਕ੍ਖੁਨੀਨਂ ਸਨ੍ਤਿਕੇਯੇਵ ਪਬ੍ਬਜਿਤੁਂ ਯੁਤ੍ਤਤ੍ਤਾ ਯੋਨਕਧਮ੍ਮਰਕ੍ਖਿਤਤ੍ਥੇਰੇਨ ¶ ਚ ਸਦ੍ਧਿਂ ਭਿਕ੍ਖੁਨੀਨਂ ਅਨਾਗਤਤ੍ਤਾ. ਏਵਂ ਚਿਰਕਾਲਂ ਅਤਿਕ੍ਕਮਿਤ੍ਵਾ ਪਚ੍ਛਾ ਭਿਕ੍ਖੁਨਿਯੋ ਆਗਨ੍ਤ੍ਵਾ ਤਾਸਂ ਸਨ੍ਤਿਕੇ ਪਬ੍ਬਜਿਤਾਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸੀਹਲ਼ਦੀਪੇ ਅਨੁਲ਼ਾਦੇਵਿਯੋ ਪਬ੍ਬਜਿਤਕਾਲੇ ਮਹਾਮਹਿਨ੍ਦਤ੍ਥੇਰਸ੍ਸ ਸਙ੍ਘਮਿਤ੍ਤਾਥੇਰਿਯਾ ਪਕ੍ਕੋਸਨਤਾ ਇਧ ਞਾਪਕਾਤਿ. ਏਵਂ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਪਟਿਚ੍ਚ ਅਪਰਨ੍ਤਰਟ੍ਠੇ ਸਤ੍ਤਾਨਂ ਬਹੁਪਕਾਰੋ ਅਹੋਸਿ. ਤੇਨੇਵਟ੍ਠਕਥਾਯਂ–

ਅਪਰਨ੍ਤਂ ਵਿਗਾਹਿਤ੍ਵਾ, ਯੋਨਕੋ ਧਮ੍ਮਰਕ੍ਖਿਤੋ;

ਅਗ੍ਗਿਕ੍ਖਨ੍ਧੂਪਮੇਨੇਤ੍ਥ, ਪਸਾਦੇਸਿ ਜਨੇ ਬਹੂਤਿ.

ਤਤ੍ਥਾਯਂ ਅਧਿਪ੍ਪਾਯ ਵਿਸੇਸੋ ਗਹੇਤਬ੍ਬੋ. ਕਥਂ. ਅਗ੍ਗਿਕ੍ਖਨ੍ਧੋਪਮਸੁਤ੍ਤਨ੍ਤਂ ਨਾਮ ਭਿਕ੍ਖੂਨਂ ਪਟਿਪਤ੍ਤਿਵਸੇਨ ਵੁਤ੍ਤਂ, ਤਂ ਭਿਕ੍ਖੂਨਂਯੇਵ ਦੇਸੇਤੁਂ ਵਟ੍ਟਤਿ, ਥੇਰੋਪਿ ਤਤ੍ਥ ਤਂ ਦੇਸੇਸਿ, ਤਸ੍ਮਾ ਪੁਣ੍ਣਸਚ੍ਚਬਨ੍ਧਾਦਯੋ ਪਟਿਚ੍ਚ ਭਗਵਤੋ ਧਰਮਾਨਸ੍ਸ ਵੀਸਤਿਵਸ੍ਸਕਾਲੇਯੇਵ ਸਾਸਨਂ ਅਪਰਨ੍ਤਰਟ੍ਠੇ ਪਤਿਟ੍ਠਹਿਤ੍ਵਾ ਕਸ੍ਮਿਞ੍ਚਿ ਕਸ੍ਮਿਞ੍ਚਿ ਠਾਨੇ ਭਿਕ੍ਖੂਨਂ ਸਂਵਿਜ੍ਜਮਾਨਤ੍ਤਾ ਤੇਸਂ ਭਿਕ੍ਖੂਨਂ ਸਙ੍ਗਹੇਤ੍ਵਾ ਦੇਸੇਤੁਂ ਪਚ੍ਛਾ ਆਗਤਾਨਞ੍ਚ ਭਿਕ੍ਖੂਨਂ ਪਰਿਸੁਦ੍ਧਾਚਾਰਤਂ ਵਿਞ੍ਞਾਪੇਤੁਂ ਅਗ੍ਗਿਕ੍ਖਨ੍ਧੋਪਮਸੁਤ੍ਤਂ ਥੇਰੋ ਦੇਸੇਸੀਤਿ. ਏਵਞ੍ਚ ਸਤਿ ਅਰਿਮਦ੍ਦਨਨਗਰੇ ਸਮਣਕੁਤ੍ਤਕਾਨਂ ਸਂਵਿਜ੍ਜਮਾਨਭਾਵਂ ਵਕ੍ਖਮਾਨੇਨ ਵਚਨੇਨ ਸਮੇਤਿ.

ਇਦਂ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਦੁਤਿਯਂ

ਸਾਸਨਸ੍ਸ ਪਤਿਟ੍ਠਾਨਂ.

ਯਸ੍ਮਾ ਪਨ ਬੁਦ੍ਧੇ, ਭਗਵਾ ਪੁਣ੍ਣਤ੍ਥੇਰਸ੍ਸ ਯਾਚਨਮਾਰਬ੍ਭ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਵਾਣਿਜੇ ਹਿ ਕਾਰਿਤੇ ਚਨ੍ਦਨਵਿਹਾਰੇ ਵਸਿਤ੍ਵਾ ਏਕਸ੍ਮਿਂ ਸਮਯੇ ਆਨਨ੍ਦੇਨ ਪਚ੍ਛਾਸਮਣੇਨ ਤਮ੍ਬਦੀਪਰਟ੍ਠਮ੍ਪਿ ਦੇਸਚਾਰਿਕਂ ਆਹਿਣ੍ਡਿ. ਆਹਿਣ੍ਡਿਤ੍ਵਾ ਅਰਿਮਦ੍ਦਨਨਗਰਟ੍ਠਾਨਸਮੀਪਂ ਪਤ੍ਵਾ ਪਬ੍ਬਤਮੁਦ੍ਧਨਿ ਠਤ੍ਵਾ ਅਨਾਗਤੇ ਖੋ ਆਨਨ੍ਦ ਇਮਸ੍ਮਿਂ ਪਦੇਸੇ ਸਮ੍ਮੁਤਿ ਨਾਮ ਰਾਜਾ ਅਰਿਮਦ੍ਦਨਂ ਨਾਮ ਨਗਰਂ ਮਾਪੇਸ੍ਸਤਿ ¶ , ਤਸ੍ਮਿਞ੍ਚ ਨਗਰੇ ਮਮ ਸਾਸਨਂ ਵਿਰੂਲ਼ਂ ਹੁਤ੍ਵਾ ਪਤਿਟ੍ਠਹਿਸ੍ਸਤੀਤਿ ਬ੍ਯਾਕਾਸਿ. ਅਯਮਤ੍ਥੋ ਪੋਰਾਣਵੇਦਪਾਤ੍ਥਕੇਸੁ ਵੁਤ੍ਤੋ.

ਯੋਨਕਧਮ੍ਮਰਕ੍ਖਿਤਤ੍ਥੇਰੋ ਚ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਤਮ੍ਬਦੀਪਰਟ੍ਠਮ੍ਪਿ ਆਹਿਣ੍ਡਿਤ੍ਵਾ ਤਮ੍ਬਦੀਪਰਟ੍ਠਵਾਸੀਨਮ੍ਪਿ ਧਮ੍ਮਰਸਂ ਪਾਯੇਸਿਯੇਵ. ਅਯਮਤ੍ਥੋ ਖਤ੍ਤਿਯਕੁਲਤੋ ਏਵ ਪੁਰਿਸਸਹਸ੍ਸਾਨਿ ਪਬ੍ਬਜਿਂਸੂਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਵਿਞ੍ਞਾਯਤਿ. ਤਦਾ ਹਿ ਅਪਰਨ੍ਤਰਟ੍ਠੇ ਖਤ੍ਤਿਯੋ ਨਤ੍ਥਿ, ਤਮ੍ਬਦੀਪਰਟ੍ਠਿਨ੍ਦੋਯੇਵ ਤਂ ਅਨੁਸਾਸੇਤ੍ਵਾ ਅਤਿ ਵਸਤਿ, ਖਤ੍ਤਿਯੇ ਚ ਆਸਨ੍ਤੇ ਕੁਤੋ ਖਤ੍ਤਿਯਕੁਲਾਨਿ ਭਵਿਸ੍ਸਨ੍ਤਿ, ਤੇਨੇਵ ਤਮ੍ਬਦੀਪਰਟ੍ਠਤੋ ਪੁਰਿਸਸਹਸ੍ਸਾਨਿ ਪਬ੍ਬਜਿਂਸੂਤਿ ਵਿਞ੍ਞਾਤਬ੍ਬਂ. ਤਸ੍ਮਾ ਤਮ੍ਬਦੀਪਿਕਸਾਸਨਵਂਸਮ੍ਪਿ ਇਧ ਵਤ੍ਤੁਂ ਯੁਜ੍ਜਤਿ.

ਤੇਨਿਦਾਨਿ ਤਮ੍ਬਦੀਪਿਕਾਸਾਸਨਵਂਸਂ ਪਵਕ੍ਖਾਮਿ. ਅਮ੍ਹਾਕਞ੍ਹਿ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਸਮ੍ਮੁਤਿਰਾਜਾ ਨਾਮ ਭੂਪਾਲੋ ਰਜ੍ਜਂ ਕਰੇਸਿ. ਤਤੋ ਪਟ੍ਠਾਯ ਯਾਵ ਅਨੁਰੁਦ੍ਧਰਞ੍ਞਾ ਸਮਥਿ ਨਾਮਕੇ ਦੇਸੇ ਨਿਸਿਨ੍ਨਾਨਂ ਤਿਂਸਮਤ੍ਤਾਨਂ ਸਮਣਕੁਤ੍ਤਕਾਨਂ ਸਟ੍ਠਿਸਹਸ੍ਸਮਤ੍ਤਾਨਂ ਸਿਸ੍ਸਾਨਂ ਓਵਾਦਂ ਦਤ੍ਵਾ ਚਰਿਂਸੁ.

ਤੇਸਂ ਪਨ ਸਮਣਕੁਤ੍ਤਕਾਨਂ ਅਯਂ ਵਾਦੋ,- ਸਚੇ ਯੋ ਪਾਣਾਤਿਪਾਤਂ ਕਰੇਯ੍ਯ, ਸੋ ਈਦਿਸਂ ਪਰਿਤ੍ਤਂ ਭਣਨ੍ਤੋ ਤਮ੍ਹਾ ਪਾਪਕਮ੍ਮਾ ਪਰਿਮੁਚ੍ਚੇਯ੍ਯ, ਸਚੇ ਪਨ ਯੋ ਮਾਤਾਪਿਤਰਂ ਹਨ੍ਤ੍ਵਾ ਅਨਨ੍ਤਰਿਯਕਮ੍ਮਤੋ ਪਰਿਮੁਚ੍ਚਿਤੁਕਾਮੋ ਭਵੇਯ੍ਯ, ਈਦਿਸਂ ਪਰਿਤ੍ਤਂ ਭਣੇਯ੍ਯ, ਸਚੇਪਿ ਪੁਤ੍ਤਧਿਤਾਨਂ ਆਵਾਹਵਿਵਾਹਕਮ੍ਮਂ ਕਤ੍ਤੁਕਾਮੋ ਭਵੇਯ੍ਯ, ਆਚਰਿਯਾਨਂ ਪਠਮਂ ਨਿਯ੍ਯਾਦੇਤ੍ਵਾ ਆਵਾਹਵਿਵਾਹਕਮ੍ਮਂ ਕਾਤਬ੍ਬਂ, ਯੋ ਇਦਂ ਚਾਰਿਤ੍ਤਂ ਅਤਿਕ੍ਕਮੇਯ੍ਯ, ਬਹੁ ਅਪੁਞ੍ਞਂ ਪਸਵੇਯ੍ਯਾਤਿ ਏਵਮਾਦੀਹਿ ਮਿਚ੍ਛਾਵਾਦੇਹਿ ਅਤ੍ਤਨੋ ਅਤ੍ਤਨੋ ਉਪਗਤਾਨਂ ਓਵਾਦਂ ਅਦਂਸੁ. ਤਮਤ੍ਥਂ ਸੁਤ੍ਵਾ ਅਨੁਰੁਦ੍ਧਰਾਜਾ ਪਰਿਚਿਤਪੁਞ੍ਞੋ ਤੇਸਂ ਵਾਦਂ ਨ ਰੁਚਿ. ਅਯਂ ਤੇਸਂ ਮਿਚ੍ਛਾਵਾਦੋਤਿ.

ਤਦਾ ¶ ਚ ਅਰਿਮਦ੍ਦਨਨਗਰੇ ਅਰਹਨ੍ਤੋ ਨਾਮ ਥੇਰੋ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸਿ. ਅਯਂ ਅਰਹਨ੍ਤਤ੍ਥੇਰਸ੍ਸ ਅਟ੍ਠੁਪ੍ਪਤ੍ਤਿ,– ਰਾਜਵਂਸਾਗਤਪਰਿਤ੍ਤਨਿਦਾਨਾਗਤਸਾਸਨਪ੍ਪਵੇਣਿਯਾਗਤਵਸੇਨ ਤਿਵਿਧਾ ਹੋਤਿ.

ਤਤ੍ਥਾਯਂ ਰਾਜਵਂਸਾਗਤਟ੍ਠੁਪ੍ਪਤ੍ਤਿ,– ਤਦਾ ਹਿ ਸੁਨਾਪਰਨ੍ਤਤਮ੍ਬਦੀਪਰਟ੍ਠੇਸੁ ਸਬ੍ਬੇਨ ਸਬ੍ਬਂ ਸਬ੍ਬਦਾ ਥਿਰਂ ਸਾਸਨਂ ਨ ਤਾਵ ਪਤਿਟ੍ਠਾਸਿ. ਤੇਨੇਵ ਭਗਵਤੋ ਬ੍ਯਾਕਤਨਿਯਾਮੇਨ ਸਾਸਨਂ ਪਤਿਟ੍ਠਾਪੇਸ੍ਸਾਮਾਤਿ ਚਿਨ੍ਤੇਤ੍ਵਾ ਮਹਾਥੇਰਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਾਸਨਂ ਅਨੁਗ੍ਗਹਿਤੁਂ ਸਮਤ੍ਥਂ ਪੁਗ੍ਗਲਂ ਦੇਹੀਤਿ ਯਾਚਿਂਸੁ. ਸਕ੍ਕੋਚ ਦੇਵਾਨਮਿਨ੍ਦੋ ਤਾਵਤਿਂਸਭਵਨੇ ਏਕਂ ਦੇਵਪੁਤ੍ਤਂ ਯਾਚਿਤ੍ਵਾ ਏਕਿਸ੍ਸਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਾਪੇਸਿ. ਦਸਮਾਸਚ੍ਚਯੇਨ ਵਿਜਾਯਨਕਾਲੇ ਸੀਲਬੁਦ੍ਧਿ ਨਾਮ ਥੇਰੋ ਅਨੁਰਕ੍ਖਿਤ੍ਵਾ ਵਯੇ ਸਮ੍ਪਤ੍ਤੇ ਪਬ੍ਬਾਜੇਸਿ. ਤੀਸੁ ਪਿਟਕੇਸੁ ਅਤਿਵਿਯ ਛੇਕੋ ਹੁਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਨ੍ਤੋਤਿ ਨਾਮੇਨ ਪਾਕਟੋ ਅਹੋਸਿ.

ਸੋਚ ਥੇਰੋ ਮਰਮ੍ਮਮਣ੍ਡਲੇ ਜਿਨਸਾਸਨਂ ਵਿਜ੍ਜੋਤਾਪੇਤੁਂ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਨਗਰਤੋ ਅਵਿਦੂਰੇ ਏਕਸ੍ਮਿਂ ਅਰਞ੍ਞੇ ਨਿਸੀਦਿ. ਤਦਾ ਸਕ੍ਕੋ ਦੇਵਾਨਮਿਨ੍ਦੋ ਏਕਂ ਨੇਸਾਦਂ ਪਲੋਭੇਤ੍ਵਾ ਤਸ੍ਸ ਥੇਰਂ ਦਸ੍ਸੇਸਿ. ਅਥ ਨੇਸਾਦਸ੍ਸ ਏਤਦਹੋਸਿ,– ਅਯਂ ਪਨ ਅਮਨੁਸ੍ਸੋ ਯਕ੍ਖੋ ਭਵੇਯ੍ਯ, ਸਚੇ ਪਨ ਮਨੁਸ੍ਸੋ ਭਵੇਯ੍ਯ, ਏਵਂ ਸਤਿ ਮਿਲਕ੍ਖੁਜਾਤਿਕੋ ਭਵੇਯ੍ਯਾਤਿ. ਏਵਂ ਪਨ ਚਿਨ੍ਤੇਤ੍ਵਾ ਰਞ੍ਞੋ ਦਸ੍ਸਨਤ੍ਥਾਯ ਨਗਰਂ ਆਨੇਸਿ. ਥੇਰੋ ਚ ਅਟ੍ਠਪਰਿਕ੍ਖਾਰੇ ਗਹੇਤ੍ਵਾ ਅਨੁਗਚ੍ਛਿ. ਨੇਸਾਦਾ ਚ ਥੇਰਂ ਆਨੇਤ੍ਵਾ ਰਞ੍ਞੋ ਦਸ੍ਸੇਸਿ.

ਰਾਜਾ ਦਿਸ੍ਵਾ ਸਨ੍ਤਿਨ੍ਦ੍ਰਿਯੋ ਅਯਂ, ਨ ਮਿਲਕ੍ਖੁਜਾਤਿਕੋ, ਇਮਸ੍ਸ ਅਬ੍ਭਨ੍ਤਰੇ ਸਾਰਧਮ੍ਮੋ ਅਤ੍ਥਿ ਮਞ੍ਞੇਤਿ ਲਦ੍ਧਸੂਰਿਯੋਭਾਸਂਵਿਯ ਪਦੁਮਂ ਫੁਲ੍ਲਚਿਤ੍ਤਂ ਹੁਤ੍ਵਾ ਵੀਮਂਸੇਤੁਕਾਮੋ ਥੇਰਂ ਆਹ,– ਅਤ੍ਤਨੋ ਸਾਰੁਪ੍ਪਂ ਆਸਨਂ ਞਤ੍ਵਾ ਨਿਸੀਦਾਹੀਤਿ.

ਥੇਰੋ ਚ ਰਾਜਪਲ੍ਲਙ੍ਕਂ ਆਰੁਹਿਤ੍ਵਾ ਨਸੀਦਿ. ਰਾਜਾ ਚ ਅਯਂ ਅਗ੍ਗਾਸਨੇ ¶ ਨਿਸੀਦਿ, ਅਵਸ੍ਸਂ ਅਗ੍ਗਪੁਗ੍ਗਲੋ ਭਵੇਯ੍ਯਾਤਿ ਚਿਨ੍ਤੇਤ੍ਵਾ ਤ੍ਵਂ ਕਸ੍ਸ ਞਾਤਿ, ਕਸ੍ਸ ਭਿਸ੍ਸੋ, ਕੁਤੋ ਆਗਤੋਸੀਤਿ ਪੁਚ੍ਛਿ. ਥੇਰੋ ਚ ਏਵਮਾਹ,– ਲੋਕਸ੍ਮਿਂ ਯੋ ਨਵਗੁਣਸਮ੍ਪਨ੍ਨੋ ਭਗਵਾ ਸਮ੍ਮਾਸਮ੍ਬੁਦ੍ਧੋ, ਤਸ੍ਸਾਹਂ ਞਾਤਿ, ਸੋਭਗਵਾਯੇਵ ਮਮਾਚਰਿਯੋ, ਭਿਕ੍ਖੁਸਙ੍ਘਸ੍ਸ ਨਿਸਿਨ੍ਨਟ੍ਠਾਨਤੋ ਆਗਤੋਮ੍ਹੀਤਿ.

ਰਾਜਾ ਚ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਆਹ, ਤਵ ਆਚਰਿਯੇਨ ਦੇਸਿਤਂ ਧਮ੍ਮਂ ਏਕਦੇਸਤੋ ਦੇਸੇਹੀਤਿ. ਅਥ ਯਥਾ ਸਿਰਿਧਮ੍ਮਾਸੋਕਰਞ੍ਞੋ ਨਿਗ੍ਰੋਧਸਾਮਣੇਰੇਨ ਅਪ੍ਪਮਾਦਧਮ੍ਮੋ ਦੇਸਿਤੋ, ਏਵਂ ਅਪ੍ਪਮਾਦਧਮ੍ਮਂਯੇਵ ਥੇਰੋ ਦੇਸੇਸਿ.

ਰਾਜਾ ਚ ਪੁਨ ਆਹ,– ਕੁਹਿਂ ਦਾਨਿ ਸਮ੍ਮਾਸਮ੍ਬੁਦ੍ਧੋ ਨਿਸੀਦਤਿ, ਤੇਨ ਪਨ ਦੇਸਿਤੋ ਧਮ੍ਮੋ ਕਤਿਪ੍ਪਮਾਣੋ, ਤਸ੍ਸ ਸਾਵਕਾ ਪਨ ਕਤਿਪ੍ਪਮਾਣਾ, ਤੁਮ੍ਹਾਦਿਸਾ ਅਞ੍ਞੇ ਅਤ੍ਥਿ ਵਾ ਮਾ ਵਾਤਿ. ਇਦਾਨਿ ਅਮ੍ਹਾਕਂ ਆਚਰਿਯੋ ਸਮ੍ਮਾਸਮ੍ਬੁਦ੍ਧੋ ਪਰਿਨਿਬ੍ਬੁਤੋ, ਧਾਤੁਯੋਯੇਵ ਇਦਾਨਿ ਅਤ੍ਥਿ, ਤੇਨ ਪਨ ਦੇਸਿਤੋ ਧਮ੍ਮੋ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਪ੍ਪਮਾਣੋ, ਸੁਧਮ੍ਮਪੁਰੇ ਪਿਟਕਤ੍ਤਯਂ ਯੁਗਲ਼ਵਸੇਨ ਤਿਂਸਵਿਧਾ ਅਤ੍ਥਿ, ਮਯਾ ਅਞ੍ਞੋ ਪਰਮਤ੍ਥ ਸਮ੍ਮੁਤਿਵਸੇਨ ਦੁਵਿਧੋਪਿ ਸਙ੍ਘੋ ਅਤ੍ਥੀਤਿ.

ਤਂ ਸੁਤ੍ਵਾ ਰਾਜਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਹੁਤ੍ਵਾ ਪੁਨ ਆਰੋਚੇਸਿ,– ਮਮ ਭਨ੍ਤੇ ਇਮਸ੍ਮਿਂ ਪਚ੍ਚਕ੍ਖੇ ਨਤ੍ਥਿ ਤਯਾ ਅਞ੍ਞੋ ਨਾਥੋ, ਅਜ੍ਜਭਗ੍ਗੇ ਪਾਣੁਪੇਤਂ ਮਂ ਉਪਾਸਕੋਤਿ ਧਾਰੇਹਿ, ਤਵ ਓਵਾਦਂ ਅਹਂ ਸਿਰਸਾ ਪਟਿਗ੍ਗਣ੍ਹਿਸ੍ਸਾਮੀਤਿ.

ਤਤੋ ਪਚ੍ਛਾ ਅਰਞ੍ਞਕਙ੍ਗਾਰਹੇ ਠਾਨੇ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਸਮਣਕੁਤ੍ਤਕਾਨਮ੍ਪਿ ਵਾਦਂ ਭਿਨ੍ਦਿ, ਯਥਾ ਪਨ ਸੁਵਣ੍ਣਪਾਤਿਂ ਲਭਿਤ੍ਵਾ ਸੁਵਣ੍ਣਭਾਜਨਂ ਲਭਿਤ੍ਵਾ ਮਤ੍ਤਿਕਾਭਾਜਨਨ੍ਤਿ. ਸਕਲੇਪਿ ਚ ਰਟ੍ਠੇ ਸਮਣਕੁਤ੍ਤਕਾਨਂ ਵਾਦਂ ਜਹਾਪੇਸਿ. ਤਸ੍ਮਿਞ੍ਚ ਕਾਲੇ ਸਮਣਕੁਤ੍ਤਕਾ ਹੀਨਲਾਭਾ ਹੁਤ੍ਵਾ ਥੇਰਸ੍ਸ ਉਪਨਾਹਂ ਬਨ੍ਧਿਂਸੁ. ਤੇ ਪਨ ਸਮਣਕੁਤ੍ਤਕਾ ਅਰਞ੍ਞੇ ਨਿਸ੍ਸਾਮਿਕਾਵਿਯ ¶ ਕੋਲੇਯਕਾ ਸੁਨਖਾ ਅਨਾਥਾ ਹੁਤ੍ਵਾ ਕਾਯਿਕਚੇਤਸਿਕਦੁਕ੍ਖਂ ਲਭਿਂਸੁ.

ਰਾਜਾ ਚ ਤਮਤ੍ਥਂ ਞਤ੍ਵਾ ਯਥਾ ਸਮਣਕੁਤ੍ਤਕਾ ਨਾਭਿਭਵਨ੍ਤਿ, ਤਥਾ ਆਰਕ੍ਖਂ ਠਪੇਸਿ. ਤੇ ਚ ਸਮਣਕੁਤ੍ਤਕੇ ਸੇਤਵਤ੍ਥਂ ਨਿਵਾਸਾਪੇਤ੍ਵਾ ਆਵੁਧਗਾਹਯੋਧਭਾਵੇਨ ਰਾਜਕਮ੍ਮੇ ਨਿਯੋਜਾਪੇਸਿ. ਥੇਰੋ ਚ ਸਾਸਨੇ ਪਸਨ੍ਨੇ ਜਨੇ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਤ੍ਵਾ ਸਾਸਨਂ ਵਿਸੋਧਾਪੇਸਿ. ਰਾਜਾ ਚ ਇਮਸ੍ਮਿਂ ਰਟ੍ਠੇ ਪੋਰਾਣਿਕਾ ਰਾਜਾਨੋ ਸਮਣਕੁਤ੍ਤਕਾਨਂ ਵਾਦਂ ਗਹੇਤ੍ਵਾ ਰਜ੍ਜਂ ਕਾਰੇਸੁਂ, ਸਚੇ ਹਿ ਪਨ ਤੇਸਂ ਅਨਤ੍ਥਕਰਜ੍ਜਂ ਪੁਨ ਗਣ੍ਹਾਪੇਤੁਂ ਸਕ੍ਕੁਣੇਯ੍ਯਂ, ਏਵਂ ਸਤਿ ਅਹਂ ਤੇਸਂ ਅਨਤ੍ਥਕਰਜ੍ਜਂ ਅਪਨੇਤ੍ਵਾ ਸਾਤ੍ਥਕਰਜ੍ਜਂ ਗਣ੍ਹਾਪੇਤੁਮਿਚ੍ਛਾਮੀਤਿ ਅਨੁਸੋਚੀਤਿ.

ਅਯਂ ਪਨ ਪਰਿਤ੍ਤਨਿਦਾਨਾਗਤਟ੍ਠੁਪ੍ਪਤ੍ਤਿ, –

ਸੀਹਲ਼ਦੀਪੇ ਕਿਰ ਵਿਪ੍ਪਵਾਸੀਨਗਰੇ ਨਿਸਿਨ੍ਨੋ ਏਕੋ ਭਿਕ੍ਖੁਉਪਦ੍ਵਾਰਾਵਤੀਨਗਰਂ ਗਨ੍ਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿ. ਤਤੋ ਪਚ੍ਛਾ ਸੁਧਮ੍ਮ ਪੁਰਂ ਗਨ੍ਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿ. ਤਸ੍ਮਿਞ੍ਚ ਕਾਲੇ ਸਿਰਿਖੇਤ੍ਤਨਗਰੇ ਪਾਟਲਿਰੁਕ੍ਖੇ ਏਕੋ ਗਨ੍ਥੋ ਅਤ੍ਥੀਤਿ ਸੁਤ੍ਵਾ ਸੁਧਮ੍ਮਪੁਰਤੋ ਸਿਰਿਖੇਤ੍ਤਨਗਰਂ ਅਗਮਾਸਿ. ਅਨ੍ਤਰਾਮਗ੍ਗੇ ਲੁਦ੍ਧਕੋ ਥੇਰਂ ਪਸ੍ਸਿਤ੍ਵਾ ਅਯਂ ਯਕ੍ਖੋਤਿ ਮਞ੍ਞਿਤ੍ਵਾ ਗਹੇਤ੍ਵਾ ਅਨੁਰੁਦ੍ਧਰਞ੍ਞੋ ਦਸ੍ਸੇਸਿ.

ਤਦਾ ਰਾਜਾ ਥੇਰਂ ਪੁਚ੍ਛਿ,– ਕੋ ਪਨ ਤ੍ਵਨ੍ਤਿ. ਅਹਂ ਮਹਾਰਾਜ ਗੋਭਮਸ੍ਸ ਸਾਵਕੋਤਿ. ਪੁਨ ਰਾਜਾ ਪੁਚ੍ਛਿ,–ਤਿਣ੍ਣਂ ਪਨ ਰਤਨਾਨਂ ਕੀਦਿਸੋਤਿ. ਥੇਰੋ ਆਹ,– ਮਹੋਸਧਪਣ੍ਡਿਤੋਵਿਯ ਮਹਾਰਾਜ ਬੁਦ੍ਧੋ ਦਟ੍ਠਬ੍ਬੋ, ਉਮਙ੍ਗੋਵਿਯ ਧਮ੍ਮੋ, ਵਿਦੇਹਸੇਨਾ ਵਿਯ ਸਙ੍ਘੋਤਿ. ਏਵਂ ਉਪਮਾਹਿ ਪਕਾਸਿਤੋ ਰਾਜਾ ਪੁਨ ਪੁਚ੍ਛਿ,–ਕਿਂ ਨੁਖੋ ਇਮੇ ਗੋਤਮਸ੍ਸ ਸਾਵਕਾਤਿ. ਨ ਖੋ ਮਹਾਰਾਜ ਇਮੇ ਗੋਤਮਸ੍ਸ ਸਾਵਕਾ, ਇਮੇ ਪਨ ਅਮ੍ਹੇਹਿ ਵਿਸਭਾਗਾ ਸਮਣਕੁਤ੍ਤਕਾਯੇ ਵਾਤਿ. ਏਵਂ ਵੁਤ੍ਤੇ ਤਤੋ ਪਟ੍ਠਾਯ ਤੇ ਸਮਣਕੁਤ੍ਤਕੇ ਵਿਜਹਿ, ਤਿਣਂ ਵਿਯ ਨਾਤਿਮਞ੍ਞਿ. ਪਾਟਲਿਰੁਕ੍ਖਸੁ ਸਿਰਤੋਪਿ ¶ ਲਦ੍ਧਂ ਤੇਸਂ ਗਨ੍ਥਂ ਲਦ੍ਧਟ੍ਠਾਨੇਯੇਵ ਅਗ੍ਗਿਨਾ ਝਾਪੇਸਿ. ਤਮ੍ਪਿ ਠਾਨਂ ਯਾਵਜ੍ਜਤਨਾ ਅਗ੍ਗਿਝਾਪਨਥਲਨ੍ਤਿ ਪਾਕਟਨ੍ਤਿ.

ਥੇਰੋ ਚ ਵਿਮਾਨ ਵਤ੍ਥੁਂ ਰਞ੍ਞੋ ਦੇਸੇਸਿ. ਰਾਜਾ ਚ ਪਸੀਦਿਤ੍ਵਾ ਸਿਰਿਖੇਤ੍ਤਨਗਰਤੋ ਅਰਿਮਦ੍ਦਨਨਗਰਂ ਪਚ੍ਚਾਗਮਨਕਾਲੇ ਆਨੇਸਿ.

ਇਦਂ ਪਨ ਪਾਟਲਿਸੁਸਿਰੇ ਲਦ੍ਧਗਨ੍ਥਸ੍ਸ ਕਾਰਣਂ,- ਤੇਸਞ੍ਹਿ ਸਮਣਕੁਤ੍ਤਕਾਨਂ ਅਬ੍ਭਨ੍ਤਰੇ ਏਕੋ ਉਪਾਯਚ੍ਛੇਕੋ ਸਮਣਕੁਤ੍ਤਕੋ ਅਤ੍ਤਨੋ ਵਾਦਾਨੁਰੂਪਂ ਗਨ੍ਥਂ ਕਤ੍ਵਾ ਸਿਰਿਖੇਤ੍ਤਨਗਰੇ ਦ੍ਵਤ੍ਤਿਂਸਰਤਨਕ੍ਖਨ੍ਧਸ੍ਸ ਪਾਟਲਿਰੁਕ੍ਖਸ੍ਸ ਸੁਸਿਰੇ ਪਵੇਸੇਤ੍ਵਾ ਪੁਨਪ੍ਪੁਨਂ ਉਦਕੇਨ ਤੇਮੇਤ੍ਵਾ ਮਤ੍ਤਿਕਾਯ ਲਿਮ੍ਪੇਤ੍ਵਾ ਪੁਨ ਤਚਂ ਉਪ੍ਪਾਦੇਤ੍ਵਾ ਉਟ੍ਠਾਪੇਸਿ. ਤਦਾ ਮਯਂ ਸੁਪਿਨੇ ਪਾਟਲਿਰੁਕ੍ਖੇ ਸਾਰਗਨ੍ਥੋ ਅਤ੍ਥਬ੍ਯਞ੍ਜਨਸਮ੍ਪਨ੍ਨੋ ਏਕੋ ਅਤ੍ਥੀਤਿਇ ਪਸ੍ਸਾਮਾਤਿ ਕੋਲਾਹਲਂ ਉਪ੍ਪਾਦੇਸੁਂ. ਤਂ ਸੁਤ੍ਵਾ ਰਾਜਾ ਸਿਰਿਖੇਤ੍ਤਨਗਰਂ ਗਨ੍ਤ੍ਵਾ ਤਂ ਪਾਟਲਿਰੁਕ੍ਖਂ ਭਿਨ੍ਦਿਤ੍ਵਾ ਗਵੇਸੇਨ੍ਤੋ ਤਂ ਗਨ੍ਥਂ ਲਭਿ. ਗਨ੍ਥੇ ਪਨ ਸਕਵਾਦਵਸੇਨ ਸਮਣਕੁਤ੍ਤਕਸਾਮਞ੍ਞਤਾ ਈਦਿਸਾਯੇਵ, ਏਤੇ ਗੋਤਮਾਸਾਵਕਾ ਹੋਨ੍ਤਿਇ, ਏਤੇਸਂਯੇਵ ਆਚਾਰੋ ਸਗ੍ਗਮਗ੍ਗਪਥਭੂਤੋਤਿ ਏਵਮਾਦੀਹਿ ਕਾਰਣੇਹਿ ਵੁਤ੍ਤਂ. ਰਾਜਾ ਚ ਪਸੀਦਿਤ੍ਵਾ ਸਮਣਕੁਤ੍ਤਕਾਨਂ ਬਹੂਨਿ ਦਾਤਬ੍ਬਾਨਿ ਅਦਾਸਿ. ਤਤੋ ਪਚ੍ਛਾ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਤਂ ਅਗ੍ਗਿਨਾ ਝਾਪੇਸੀਤਿ ਏਵਂ ਸਮਣਕੁਤ੍ਤਕਾਨਂ ਵਚਨਂ ਸੁਤ੍ਵਾ ਸਿਰਿਖੇਤ੍ਤਨਗਰਂ ਗਨ੍ਤ੍ਵਾ ਅਰਿਮਦ੍ਦਨਨਗਰਂ ਪਚ੍ਚਾਗਚ੍ਛਨ੍ਤੋ ਥੇਰਂ ਆਨੇਸੀਤਿ ਦਟ੍ਠਬ੍ਬਂ. ਅਰਿਮਦ੍ਦਨਨਗਰਂ ਸਮ੍ਪਤ੍ਤਕਾਲੇ ਜੇਤਵਨਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਥੇਰੋ ਚ ਤਤ੍ਥ ਸਾਸਾਨਂ ਵਿਸੋਧੇਤ੍ਵਾ ਨਿਸੀਦਿ. ਰਾਜਾ ਦੇਵਸਿਕਂ ਉਦਕਂ ਆਨੇਤ੍ਵਾ ਅਗ੍ਗਮਹੇਸੀ ਪਨ ਦੇਵਸਿਕਂਯੇਵ ਪਿਣ੍ਡਪਾਤਂ ਆਨੇਤ੍ਵਾ ਭੋਜੇਸਿ. ਉਪ੍ਪਨ੍ਨਕਙ੍ਖਾ ਕਾਲੇਪਿ ਤਂਤਂਕਙ੍ਖਾਟ੍ਠਾਨਂ ਪੁਚ੍ਛੀਤਿ.

ਅਯਂ ਪਨ ਸਾਸਨਪ੍ਪਵੇਣਿਯਾਗਤਟ੍ਠੁਪ੍ਪਤ੍ਤਿ,–

ਸੁਧਮ੍ਮਪੁਰੇ ਹਿ ਸਮਾਪਤ੍ਤਿਲਾਭੀ ਅਨੋਮਦਸ੍ਸੀ ਨਾਮ ਥੇਰੋ ¶ ਸੋਣੁਤ੍ਤਰਤ੍ਥੇਰਾਨਂ ਵਂਸਾਨੁਰੁਕ੍ਖਣਵਸੇਨ ਸਦ੍ਧਿਂ ਪਞ੍ਚਹਿ ਭਿਕ੍ਖੁ ਸਤੇਹਿ ਨਿਸੀਦਿ. ਤਸ੍ਸ ਪਨ ਪਧਾਨਸਿਸ੍ਸੋ ਅਧਿਸੀਲੋਨਾਮ, ਤਸ੍ਸ ਪਧਾਨਸਿਸ੍ਸੋ ਪ੍ਰਾਨਦਸ੍ਸੀ ਨਾਮ, ਤਸ੍ਸ ਪਧਾਨਸਿਸ੍ਸੋ ਕਾਲ਼ੋ ਨਾਮ, ਤਸ੍ਸ ਪਧਾਨਸਿਸ੍ਸੋ ਅਰਹਨ੍ਤੋ ਨਾਮ, ਤਸ੍ਸ ਪਧਾਨਸਿਸ੍ਸੋ ਅਰਿਯਵਂਸੋ ਨਾਮਾਤਿ.

ਇਦਞ੍ਚ ਵਚਨਂ-ਕੋ ਪਨੇਸ ਉਤ੍ਤਰਾਜੀਵਮਹਾਥੇਰੋਤਿ. ਅਯਞ੍ਹਿ ਥੇਰੋ ਰਾਮਞ੍ਞਦੇਸਿਯਪੁਤ੍ਤੋ ਅਰਿਯਵਂਸਤ੍ਥੇਰਸ੍ਸ ਸਿਸ੍ਸੋ. ਅਰਿਯਵਂਸਤ੍ਥੇਰੋ ਪਨ ਕਪ੍ਪੁਙ੍ਗਨਗਰਵਾਸੀ ਮਹਾਕਾਲ਼ਤ੍ਥੇਰਸ੍ਸ ਸਿਸ੍ਸੋ. ਸੋ ਪਨ ਸੁਧਮ੍ਮਨਗਰਵਾਸਿਨੋ ਪ੍ਰਾਨਦਸ੍ਸੀ ਮਹਾਥੇਰਸ੍ਸ ਸਿਸ੍ਸੋਤਿ ਕਲ੍ਯਾਣੀ ਸਿਲਾਲੇਖਨੇ ਵੁਤ੍ਤਵਚਨੇਨ ਨ ਸਮੇਤਿ. ਏਵਮ੍ਪਿ ਸਤਿ ਯਥਿਚ੍ਛਿਤ ਅਧਿਪ੍ਪਾਯੋ ਨ ਨਸ੍ਸਤੀਤਿ ਦਟ੍ਠਬ੍ਬਂ.

ਏਵਂ ਨਾਨਾਚਰਿਯਾਨਂ ਵਾਦੋ ਨਾਨਾਕਾਰੇਨ ਦਿਸ੍ਸਮਾਨੋਪਿ ਅਰਹਨ੍ਤਤ੍ਥੇਰਸ੍ਸ ਅਰਿਮਦ੍ਦਨਨਗਰੇ ਸਾਸਨਂ ਅਨੁਗ੍ਗਹੇਤ੍ਵਾ ਪਤਿਟ੍ਠਾਨਤਾਯੇਵੇਤ੍ਥ ਪਮਾਣਨ੍ਤਿ ਕਤ੍ਵਾ ਨਾਵਮਞ੍ਞਿਤਬ੍ਬੋ. ਸਬ੍ਬੇਸਞ੍ਹਿ ਆਚਰਿਯਾਨਂ ਵਾਦੇਪਿ ਅਰਹਨ੍ਤਤ੍ਥੇਰੋ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸੀਤਿ ਅਤ੍ਥੋ ਇਚ੍ਛਿਤਬ੍ਬੋਯੇਵਾਤਿ.

ਅਰਹਨ੍ਤਤ੍ਥੇਰੋ ਪਨ ਮੂਲਨਾਮੇਨ ਧਮ੍ਮਦਸ੍ਸੀਤਿ ਪਾਕਟੋ ਸੁਧਮ੍ਮਪੁਰਵਾਸੀ ਸੀਲਬੁਦ੍ਧਿਤ੍ਥੇਰਸ੍ਸ ਸਿਸ੍ਸੋਤਿ ਦਟ੍ਠਬ੍ਬੋ. ਸੋ ਚ ਥੇਰੋ ਪੁਬ੍ਬੇਵ ਪਬ੍ਬਜ੍ਜਕਾਲਤੋ ਚਤੂਸੁ ਵੇਦੇਸੁ ਸਿਕ੍ਖਿਤਸਿਪ੍ਪੋ. ਪਬ੍ਬਜਿਤ੍ਵਾ ਪਨ ਸਾਲ਼ਕਥਂ ਪਿਟਕਤ੍ਤਯਂ ਉਗ੍ਗਣ੍ਹਿਤ੍ਵਾ ਪਾਰਂ ਗਨ੍ਤ੍ਵਾ ਸਬ੍ਬਤ੍ਥ ਪਾਕਟੋ. ਸੋਕ੍ਕਤਯਨਗਰਂ ਅਨੇਤ੍ਵਾ ਮਨੁਸ੍ਸਾ ਪੂਜੇਨ੍ਤਿ. ਤਤ੍ਥ ਦਸਵਸ੍ਸਾਨਿ ਵਸਿਤ੍ਵਾ ਪੁਨ ਸੁਧਮ੍ਮਪੁਰਂ ਆਗਨ੍ਤ੍ਵਾ ਅਰਞ੍ਞਵਾਸਂ ਸਮਾਦਿਯਿ.

ਤਤੋ ਪਚ੍ਛਾ ਜਿਨਚਕ੍ਕੇ ਏਕਸਟ੍ਠਾਧਿਕੇ ਪਞ੍ਚਸਤੇ ਸਹਸ੍ਸੇਚ ਸਮ੍ਪਤ੍ਤੇ ਕਲਿਯੁਗੇ ਏਕੂਨਾਸੀਤਾਧਿਕੇ ਤਿਸਤੇ ਸਮ੍ਪਤ੍ਤੇ ਅਨੁਰੁਦ੍ਧਰਾਜਾ ਰਜ੍ਜਂ ਪਾਪੁਣਿ. ਤਦਾ ਅਰਿਮਦ੍ਦਨਨਗਰੇ ਸਮਣਕੁਤ੍ਤਕਾ ¶ ਮਯਂ ਗੋਤਮਸਾਵਕਾਤਿ ਵਤ੍ਵਾ ਤਿਂਸਤਿਂਸਵਗ੍ਗਾ ਹੁਤ੍ਵਾ ਨਿਸੀਦਿਂਸੁ. ਵਗ੍ਗਵਸੇਨ ਕਿਰ ਸਹਸ੍ਸਮਤ੍ਤਾਤਿ. ਅਨੁਰੁਦ੍ਧਰਾਜਾ ਚ ਤੇਸਂ ਸਮਣਕੁਤ੍ਤਕਾਨਂ ਆਗਾਰਿਯਾਬ੍ਰਹ੍ਮਚਰਿਯਾਦੀਨਿ ਸੁਤ੍ਵਾ ਨ ਪਸੀਦਿ. ਏਵਮ੍ਪਿ ਪਵੇਣਿਯਾ ਆਗਭਤ੍ਤਾ ਨ ਪਜਹਿ. ਅਰਹਨ੍ਤਂ ਪਨ ਥੇਰਂ ਪਸ੍ਸਿਤ੍ਵਾ ਤਤੋ ਪਟ੍ਠਾਯ ਤੇਸਂ ਸਮਣਕੁਤ੍ਤਕਾਨਂ ਨਿਬਦ੍ਧਵਤ੍ਤਾਨਿ ਭਿਨ੍ਦਿਤ੍ਵਾ ਸਾਸਨੇ ਪਸੀਦਿ.

ਇਦਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਅਰਹਨ੍ਤਂ.

ਨਾਮ ਥੇਰਂ ਪਟਿਚ੍ਚ ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਤਸ੍ਮਿਞ੍ਚ ਕਾਲੇ ਅਰਹਨ੍ਤਤ੍ਥੇਰੋ ਅਨੁਰੁਦ੍ਧਰਾਜਾਨਂ ਆਹ,-ਤੀਸੁ ਸਾਸਨੇਸੁ ਪਰਿਯਤ੍ਤਿਸਾਸਨੇ ਤਿਟ੍ਠਨ੍ਤੇਯੇਵ ਪਟਿਪਤ੍ਤਿ ਸਾਸਨਂ ਤਿਟ੍ਠਤਿ, ਪਟਿਪਤ੍ਤਿਸਾਸਨੇ ਤਿਟ੍ਠਨ੍ਤੇਯੇਵ ਪਟਿਵੇਧਸਾਸਨਂ ਤਿਟ੍ਠਤਿ, ਯਥਾ ਹਿ ਗੁਨ੍ਨਂ ਸਤੇਪਿ ਸਹਸ੍ਸੇਪਿ ਵਿਜ੍ਜਮਾਨੇ ਪਵੇਣਿਪ,ਲਿਕਾਯ ਧੇਨੁਯਾ ਅਸਤਿ ਸੋ ਵਂਸੋ ਸਾਪਵੇਣੀ ਨ ਘਲ਼ੀਯਤਿਇ, ਏਵਮੇਵਂ ਧੁਤਙ੍ਗਧਰਾਨਂ ਭਿਕ੍ਖੂਨਂ ਸਤੇਪਿ ਸਹਸ੍ਸੇਪਿ ਵਿਜ੍ਜਮਾਨੇ ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਪਟਿਵੇਧੋ ਨਾਮ ਨ ਹੋਤਿ, ਯਥਾ ਪਨ ਨਿਮਿਕੁਮ੍ਭਿਯੋ ਜਾਨਨਤ੍ਥਾਯ ਪਾਸਾਣ ਪਿਟ੍ਠੇ ਅਕ੍ਖਰੇਸੁ ਠਪਿਤੇਸੁ ਯਾਵ ਅਕ੍ਖਰਾਨਿ ਧਰਨ੍ਤਿ, ਤਾਵ ਨਿਧਿਕੁਮ੍ਭਿਯੋ ਨਟ੍ਠਾ ਨਾਮ ਨ ਹੋਨ੍ਤਿ, ਏਵਮੇਵਂ ਪਰਿਯਤ੍ਤਿਯਾ ਧਰਮਾਨਾਯ ਸਾਸਨਂ ਅਨਨ੍ਤਰਹਿਤਂ ਨਾਮ ਹੋਤਿ, ਯਥਾ ਚ ਮਹਤੋ ਤਲ਼ਾਕਸ੍ਸ ਪਾਲ਼ਿਯਾ ਥਿਰਾਯ ਉਦਕਂ ਨ ਠਸ੍ਸਤੀਤਿ ਨ ਵਤ੍ਤਬ੍ਬਂ, ਉਦਕੇ ਸਤਿ ਪਦੁਮਾਦੀਨਿ ਪੁਪ੍ਫਾਨਿ ਨ ਪੁਪ੍ਫਿਸ੍ਸਨ੍ਤੀਤਿ ਨ ਵਤ੍ਤਬ੍ਬਂ, ਏਵਮੇਵਂ ਮਹਾਤਲ਼ਾਕਸ੍ਸ ਥਿਰਪਾਲ਼ਿਸਦਿਸੇ ਤੇਪਿਟਕੇ ਬੁਦ੍ਧਵਚਨੇ ਸਤਿ ਉਦਕਸਦਿਸਾ ਪਟਿਪਤ੍ਤਿਪੂਰਕਾ ਕੁਲਪੁਤ੍ਤਾ ਨਤ੍ਥੀਤਿ ਨ ਵਤ੍ਤਬ੍ਬਂ, ਤੇਸੁ ਸਤਿ ਪਦੁਮਾਦਿਪੁਪ੍ਫਸਦਿਸੋ ਪਟਿਵੇਧੋ ਨਤ੍ਥੀਤਿ ਨ ਵਤ੍ਤਬ੍ਬਂ, ਏਵਂ ਏਕਨ੍ਤਤੋ ਪਰਿਯਤ੍ਤਿਮੇਵ ਪਮਾਣਂ, ਤਸ੍ਮਾ ਅਨ੍ਤਮਸੋ ਦ੍ਵੀਸੁ ਪਾਤਿਮੋਕ੍ਖਸੁ ਵਤ੍ਤਮਾਨੇਸੁਪਿ ਸਾਸਨਂ ਅਨਨ੍ਤਰਹਿਤਮੇਵ, ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਸੁਪ੍ਪਟਿਪਨ੍ਨਸ੍ਸਾਪਿ ਧਮ੍ਮਾਭਿਸਮਯੋ ਨਤ੍ਥਿ, ਅਨਨ੍ਤਰਹਿਤਾਯ ਏਵ ਧਮ੍ਮਾਭਿਸਮਯੋ ਅਤ੍ਥਿ ¶ , ਇਦਾਨਿਪਿ ਅਮ੍ਹਾਕਂ ਪਰਿਯਤ੍ਤਿਸਾਸਨਂ ਪਰਿਪੁਣ੍ਣਂ ਨਤ੍ਥਿ, ਸਰੀਰਧਾਤੁਯੋ ਚ ਨਤ੍ਥਿ, ਤਸ੍ਮਾ ਯਤ੍ਥ ਪਰਿਯਤ੍ਤਿਸਾਸਨਂ ਸਰੀਰਧਾਤੁਯੋ ਚ ਅਤ੍ਥਿ, ਤਤ੍ਥ ਪਣ੍ਣਾਕਾਰੇਨ ਸਦ੍ਧਿਂ ਦੂਤਂ ਪੇਸੇਤ੍ਵਾ ਆਨੇਤਬ੍ਬਾ, ਏਵਂ ਸਤਿ ਅਮ੍ਹਾਕਂ ਰਟ੍ਠੇ ਜਿਨਸਾਸਨਂ ਚਿਰਕਾਲਂ ਪਤਿਟ੍ਠਹਿਸ੍ਸਤੀਤਿ.

ਏਵਂ ਪਨ ਭਨ੍ਤੇ ਸਤਿ ਕਤ੍ਥ ਯਾਚਿਸ੍ਸਾਮਾਤਿ. ਸੁਵਣ੍ਣਭੂਮਿਰਟ੍ਠੇ ਮਹਾਰਾਜ ਸੁਧਮ੍ਮਪੁਰੇ ਤੀਹਿ ਵਾਰੇਹਿ ਪਿਟਕਤ੍ਤਯਂ ਲਿਖਿਤ੍ਵਾ ਠਪੇਸਿ, ਸਰੀਰਧਾਤੁਯੋ ਚ ਬਹੂ ਤਤ੍ਥ ਅਤ੍ਥੀਤਿ. ਰਾਜਾ ਏਵਂ ਭਨ੍ਤੇਤਿ ਪਟਿਗ੍ਗਣ੍ਹਿਤ੍ਵਾ ਬਹੂ ਪਣ੍ਣਾਕਾਰੇ ਪਟਿਯਾਦੇਤ੍ਵਾ ਰਾਜਲੇਖਨਂ ਲਿਖਿਤ੍ਵਾ ਅਟ੍ਠਙ੍ਗਸਮਨ੍ਨਾਗਤਂ ਏਕਂ ਅਮਚ੍ਚਂ ਦੂਤਂ ਕਤ੍ਵਾ ਪੇਸੇਸਿ.

ਸੁਧਮ੍ਮਪੁਰਿਨ੍ਦੋ ਮਨੋਹਰਿ ਨਾਮ ਰਾਜਾਪਿ ਮਚ੍ਛੇਰਚਿਤ੍ਤੋ ਹੁਤ੍ਵਾ ਤੁਮ੍ਹਾਦਿਸਾਨਂ ਮਿਚ੍ਛਾਦਿਟ੍ਠੀਨਂ ਠਾਨੇ ਪਿਟਕਤ੍ਤਯਂ ਸਰੀਰਧਾਤੁਯੋ ਚ ਪਹਿਣਿਤੁਂ ਨ ਯੁਤ੍ਤਾ, ਤਿਲੋਕਗ੍ਗਸ੍ਸ ਹਿ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਸਮ੍ਮਾਦਿਟ੍ਠੀਨਂ ਠਾਨੇਯੇਵ ਪਤਿਟ੍ਠਹਿਸ੍ਸਤਿ, ਯਥਾ ਨਾਮ ਕੇਸਰਸੀਹਰਾਜਸ੍ਸ ਵਸਾ ਸੁਵਣ੍ਣਪਾਤਿਯਂਯੇਵ, ਨ ਮਤ੍ਤਿਕਾਭਾਜਨੇਤਿ.

ਦੂਤਾ ਪਚ੍ਚਾਗਨ੍ਤ੍ਵਾ ਅਨੁਰੁਦ੍ਧਰਞ੍ਞੋ ਤਮਤ੍ਥਂ ਆਰੋਚੇਸੁਂ. ਤਂ ਸੁਤ੍ਵਾ ਅਨੁਰੁਦ੍ਧਰਾਜਾ ਕੁਜ੍ਝਿ, ਤਤ੍ਤਕਕਪਾਲੇ ਪਕ੍ਖਿਤ੍ਤਤਿਲਂਵਿਯ ਤਟ ਤਟਾਯਿ.

ਅਥ ਰਾਜਾ ਨਦੀਮਗ੍ਗੇਨ ਨਾਵਾਨਂ ਅਸੀਤਿਸਤਸਹਸ੍ਸੇਹਿ ਨਾਵਿਕਾਨਂ ਯੋਧਾਨਂ ਅਟ੍ਠਕੋਟੀਹਿ ਸੇਨਂ ਬ੍ਯੂਹਿਤ੍ਵਾ ਥਲਮਗ੍ਗੇਨ ਸਦ੍ਧਿਂ ਚਤੂਹਿ ਮਹਾਯੋਧਨਾਯਕੇਹਿ ਹਤ੍ਥੀਨਂ ਅਸੀਤਿ ਸਹਸ੍ਸੇਹਿ ਅਸ੍ਸਾਨਂ ਨਵੁਤਿਇਸਤਸਹਸ੍ਸੇਹਿ ਯੋਧਾਨਂ ਅਸੀਤਿਕੋਟਿਯਾ ਸੇਨਂ ਬ੍ਯੂਹਿਤ੍ਵਾ ਸਯਮੇਵ ਯੁਜ੍ਝਿਤੁਂ ਸੁਧਮ੍ਮਪਰਂ ਗਚ੍ਛਿ.

ਤਂ ਸੁਤ੍ਵਾ ਮਨੋਹਰਿਰਾਜਾ ਸੀਤਤਸਿਤੋ ਹੁਤ੍ਵਾ ਅਤ੍ਤਨੋ ¶ ਬਹੂ ਯੋਧੇ ਸਂਵਿਦਹਿਤ੍ਵਾ ਸੁਧਮ੍ਮਪੁਰਯੇਵ ਪਟਿਸੇਨਂ ਕਤ੍ਵਾ ਨਿਸੀਦਿ.

ਅਥ ਅਥਬ੍ਬਣਵੇਦੇ ਆਗਤਪ੍ਪਯੋਗਵਸੇਨ ਪੁਨਪ੍ਪੁਨਂ ਵਾਯਮਨ੍ਤਾਪਿ ਨਗਰਮੂਲਂ ਉਪਸਙ੍ਕਮਿਤੁਂ ਨ ਸਕ੍ਕਾ. ਤਦਾ ਰਾਜਾ ਵੇਦਞ੍ਞੁਨੋ ਪੁਚ੍ਛਿ,–ਕਸ੍ਮਾ ਪਨੇਤ੍ਥ ਨਗਰਮੂਲਂ ਉਪਸਙ੍ਕਮਿਤੁਂ ਨ ਸਕ੍ਕੋਮਾਤਿ. ਵੇਦਞ੍ਞੁਨੋ ਆਹਂਸੁ,-ਅਥਬ੍ਬਣਵੇਦਵਿਧਾਨਂ ਮਹਾਰਾਜ ਅਤ੍ਥਿ ਮਞ੍ਞੇਤਿ. ਅਥ ਰਾਜਾ ਪਥਵਿਯਂ ਨਿਦਹਿਤ੍ਵਾ ਮਤਕਲ਼ੇਵਰਂ ਉਦ੍ਧਰਿਤ੍ਵਾ ਮਹਾਸਮੁਦ੍ਦੇ ਖਿਪੇਸਿ.

ਏਕਂ ਕਿਰ ਮਨੁਸ੍ਸਂ ਹਿਨ੍ਦੁਕੁਲਂ ਜੇਙ੍ਗੁਨਾਮਕਂ ਕੀਟਂ ਖਾਦਾਪੇਤ੍ਵਾ ਤਂ ਮਾਰੇਤ੍ਵਾ ਹਤ੍ਥਪਾਦਾਦੀਨਿ ਅਙ੍ਗਪਚ੍ਚਙ੍ਗਾਨਿ ਗਹੇਤ੍ਵਾ ਛਿਨ੍ਨਛਿਨ੍ਨਾਨਿ ਕਤ੍ਵਾ ਨਗਰਸ੍ਸ ਸਾਮਨ੍ਤਾ ਪਥਵਿਯਂ ਨਦਹਿਤ੍ਵਾ ਠਪੇਸਿ. ਤਦਾ ਪਨ ਨਗਰਂ ਉਪਸਙ੍ਕਮਿਤੁਂ ਸਕ੍ਕਾ. ਨਗਰਞ੍ਚ ਪਵਿਸਿਤ੍ਵਾ ਅਨੁਰੁਦ੍ਧਰਾਜਾ ਮਨੋਹਰਿਰਾਜਾਨਂ ਜੀਵਗ੍ਗਾਹਂ ਗਣ੍ਹਿ. ਸੁਧਮ੍ਮਪੁਰੇ ਪੋਰਾਣਿਕਾਨਂ ਰਾਜੂਨਂ ਪਵੇਣੀਆਗਤਵਸੇਨ ਰਤਨਮਯਮਞ੍ਜੂਸਾਯਂ ਠਪੇਤ੍ਵਾ ਪੂਜਿਤਂ ਸਹਧਾਤੂਹਿ ਪਿਟਕਤ੍ਤਯਂ ਗਹੇਤ੍ਵਾ ਮਨੋਹਰਿਰਞ੍ਞੋ ਸਨ੍ਤਕਾਨਂ ਦ੍ਵਤ੍ਤਿਂਸਹਤ੍ਥੀਨਂ ਪਿਟ੍ਠਿਯਂ ਆਰੋਪੇਤ੍ਵਾ ਆਨੇਸਿ.

ਅਰਿਮਦ੍ਦਨਨਗਰਂ ਪਨ ਪਤ੍ਵਾ ਧਾਤੁਯੋ ਰਤਨਮਯਮਞ੍ਜੂਸਾਯਂ ਠਪੇਤ੍ਵਾ ਸਿਰਿਸਯਨਗਬ੍ਭੇ ਰਤਨਮਞ੍ਚੇ ਸੀਸੋਪਦੇਸਸ੍ਸ ਸਮੀਪੇ ਠਪੇਸਿ. ਪਿਟਕਤ੍ਤਯਮ੍ਪਿ ਰਤਨਮਯੇ ਪਾਸਾਦੇ ਠਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਉਗ੍ਗਹਧਾਰਣਾਦਿਅਤ੍ਥਾਯ ਨਿਯ੍ਯਾਦੇਸਿ. ਤਤੋ ਕਿਰ ਆਨੀਤਂ ਪਿਟਕਤ੍ਤਯਂ ਉਗ੍ਗਣ੍ਹਨ੍ਤਾਨਂ ਅਰਿਯਾਨਂ ਸਹਸ੍ਸਮਤ੍ਤਂ ਅਹੋਸੀਤਿ.

ਸੁਧਮ੍ਮਨਗਰਂ ਵਿਜਯਿਤ੍ਵਾ ਪਿਟਕੇਨ ਸਦ੍ਧਿਂ ਭਿਕ੍ਖੁਸਙ੍ਘਂ ਆਨੇਤ੍ਵਾ ਸਾਸਨਸ੍ਸ ਪਤਿਟ੍ਠਾਪਨਂ ਜਿਨਚਕ੍ਕੇ ਏਕਾਧਿਕੇ ਛਸਤੇ ਵਸ੍ਸਸਹਸ੍ਸੇ ਕਲਿਯੁਗੇ ਚ ਸੋਲ਼ਸਾਧਿਕੇ ਚਤੁਸਤੇ ਸਮ੍ਪਤ੍ਤੇਤਿ ਸਿਲਾਲੇਖਨੇਸੁ ਵੁਤ੍ਤਂ.

ਅਨੁਰੁਦ੍ਧਰਞ੍ਞੋ ਕਾਲੇ ਪੁਞ੍ਞਾਨੁਭਾਵੇਨ ਤਿਇਣ੍ਣਂ ਰਤਨਾਨਂ ਪਰਿਪੁਣ੍ਣਤ੍ਤਾ ¶ ਪੁਣ੍ਣਗਾਮੋਤਿ ਸਮਞ੍ਞਾ ਅਹੋਸਿ. ਚਿਰਕਾਲਂ ਅਤਿਕ੍ਕਨ੍ਤੇ ਣ੍ਣਕਾਰਂ ਲੋਪਵਸੇਨ ਮਕਾਰਸ੍ਸ ਚ ਨਿਗ੍ਗਹਿਤ ਵਸੇਨ ਪੁਗਮੀਤਿ ਮਰਮ੍ਮਭਾਸਾਯ ਵੋਹਾਰੀਯਤੀਤਿ ਅਨਾਗਤਵਂਸਰਾਜਵਂਸੇਸੁ ਵੁਤ੍ਤਂ.

ਅਨੁਰੁਦ੍ਧਰਾਜਾਯੇਵ ਚਤ੍ਤਾਰੋ ਮਹਾਯੋਧੇ ਸੀਹਲ਼ਦੀਪਂ ਪੇਸੇਤ੍ਵਾ ਤਤੋਪਿ ਪਿਟਕਤ੍ਤਯਂ ਆਨੇਸਿ. ਸੀਹਲ਼ਦੀਪਤੋ ਆਨੀਤਪਿਟਕਤ੍ਤਯੇਨ ਸੁਧਮ੍ਮਪੁਰਤੋ ਆਨੀਤਪਿਟਕਤ੍ਤਯਂ ਅਞ੍ਞਮਞ੍ਞਂ ਯੋਜੇਤ੍ਵਾ ਸਂਸਨ੍ਦੇਤ੍ਵਾ ਅਰਹਨ੍ਤਤ੍ਥੇਰੋ ਵੀਮਂਸੇਸਿ. ਤਦਾ ਗਙ੍ਗਾਦਕੇਨਵਿਯ ਯਮੁਨੋਦਕਂ ਅਞ੍ਞਮਞ੍ਞਂ ਅਨੂਨਂ ਅਨਧਿਕਂ ਅਹੋਸਿ. ਤੇਹਿ ਪਿਟਕੇਹਿ ਅਞ੍ਞਾਨਿਪਿ ਵਡ੍ਢੇਤ੍ਵਾ ਤਿਪਿਟਕਗਬ੍ਭੇ ਠਪੇਤ੍ਵਾ ਪੂਜੇਸਿ. ਤੇਸੁ ਤੇਸੁ ਠਾਨੇਸੁਪਿ ਪਤਿਟ੍ਠਾਪੇਸਿ.

ਮਨੋਹਰਿਰਾਜਾਨਮ੍ਪਿ ਮ੍ਰਙ੍ਕਪਾ ਨਾਮ ਦੇਸੇ ਉਪਟ੍ਠਾਕੇਹਿ ਸਹ ਠਪੇਸਿ. ਤਸ੍ਸ ਚ ਕਿਰ ਰਞ੍ਞੋ ਮੁਖਂ ਵਿਰਵਿਤ੍ਵਾ ਕਥਂ ਸਲ੍ਲਾਪੇਨ੍ਤਸ੍ਸ ਮੁਖਤੋ ਓਭਾਸੋ ਪਜ੍ਜਲਿਤ੍ਵਾ ਨਿਕ੍ਖਮਿ. ਸੋ ਕਦਾਚਿ ਕਦਾਚਿ ਅਨੁਰੁਦ੍ਧਰਞ੍ਞੋ ਸਨ੍ਤਿਕਂ ਆਗਨ੍ਤ੍ਵਾ ਗਾਰਵਵਸੇਨ ਵਨ੍ਦਨਾਦੀਨਿ ਅਕਾਸਿ. ਤਦਾ ਅਨੁਰੁਦ੍ਧਰਞ੍ਞੋ ਲੋਮਹਂਸੋ ਉਪ੍ਪਜ੍ਜਿ ਉਬ੍ਬਿਗ੍ਗੋ ਚ. ਤਸ੍ਮਾ ਤਸ੍ਸ ਰਞ੍ਞੋ ਨਿਤ੍ਥੇਜਤ੍ਥਾਯ ਬੁਦ੍ਧਰੂਪਸ੍ਸ ਚੇਤਿਯਸ੍ਸ ਭਤ੍ਤਂ ਪੂਜੇਤ੍ਵਾ ਤਂ ਗਹੇਤ੍ਵਾ ਮਨੋਹਰਿਰਞ੍ਞੋ ਭਾਜੇਸਿ. ਤਦਾ ਤਸ੍ਸ ਤਦਾਨੁਭਾਵੋ ਅਨ੍ਤਰਧਾਯਿ. ਮਨੋਹਰਿਰਾਜਾ ਸਂਵੇਗਂ ਆਪਜ੍ਜਿਤ੍ਵਾ ਸਂਸਾਰੇ ਸਂਸਰਨ੍ਤੋ ਯਾਵ ਨਿਬ੍ਬਾਨਂ ਨ ਪਾਪੁਣਾਮਿ, ਤਾਵ ਪਰਵਸੇ ਨਾਨੁਵਤ੍ਤੇਯ੍ਯਨ੍ਤਿ ਪਤ੍ਥਨਂ ਅਕਾਸਿ. ਸੁਧਮ੍ਮਪੁਰਤੋ ਆਭਤਂ ਅਤ੍ਤਨੋ ਸਨ੍ਤਕਂ ਮਨੋਮਯ ਮਣਿਂ ਏਕਸ੍ਸ ਸੇਟ੍ਠਿਨੋ ਸਨ੍ਤਿਕੇ ਵਿਕ੍ਕਿਣਿਤ੍ਵਾ ਲਦ੍ਧਮੂਲੇਨ ਪਞ੍ਚਵਾਹਰਜਤੇਨ ਅਭੁਜਿਤਪਲ੍ਲਙ੍ਕਵਸੇਨ ਏਕਂ ਮਹਨ੍ਤਂ ਬੁਦ੍ਧ ਬਿਮ੍ਬਂ ਪਰਿਨਿਬ੍ਬਾਨਾਕਾਰੇਨ ਏਕਨ੍ਤਿ ਦ੍ਵੇ ਬੁਦ੍ਧਪ੍ਪਟਿਬਿਮ੍ਬਾਨਿ ਕਾਰਾਪੇਸਿ. ਯਾਵਜ੍ਜਤਨਾ ਤਾਨਿ ਸਨ੍ਤੀਤਿ. ਇਚ੍ਚੇਵਂ ਅਨੁਰੁਦ੍ਧਰਾਜਾ ਸੁਧਮ੍ਮਪੁਰਤੋ ¶ ਸੀਹਲ਼ਦੀਪਤੋ ਚ ਸਾਸਨਂ ਆਨੇਤ੍ਵਾ ਅਰਿਮਦ੍ਦਨਨਗਰੇ ਪਤਿਟ੍ਠਾਪੇਸੀਤਿ.

ਇਦਂ ਅਮ੍ਹਾਕਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ

ਅਨੁਰੁਦ੍ਧਰਾਜਾਨਂ ਪਟਿਚ੍ਚ ਚਤੁਤ੍ਥਂ ਸਾਸਨਸ੍ਸ ਪਤਿਟ੍ਠਾਨਂ.

ਉਤ੍ਤਰਾਜੀਵਤ੍ਥੇਰੋਪਿ ਸੋਣੁਤ੍ਤਰਾਨਂ ਵਂਸਤੋ ਸਾਸਨਂ ਗਹੇਤ੍ਵਾ ਸੁਧਮ੍ਮਪੁਰਤੋ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸਿ.

ਇਦਂ ਅਮ੍ਹਾਕਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਉਤ੍ਤਰਾਜੀਵਤ੍ਥੇਰਂ ਪਟਿਚ੍ਚ ਪਞ੍ਚਮਂ ਸਾਸਨਸ੍ਸ ਪਤਿਟ੍ਠਾਨਂ.

ਉਤ੍ਤਰਾਜੀਵਤ੍ਥੇਰਸ੍ਸ ਸੀਹਲ਼ਦੀਪਂ ਗਤਕਾਲੇ ਤੇਨ ਸਦ੍ਧਿਂ ਗਤਂ ਛਪ੍ਪਦਂ ਨਾਮ ਸਾਮਣੇਰਂ ਸੀਹਲ਼ਦੀਪੇਯੇਵ ਸੀਹਲ਼ਦੀਪਿਕਾ ਪਬ੍ਬਜਿਂਸੁ. ਪਬ੍ਬਜਿਤ੍ਵਾ ਚ ਛਪ੍ਪਦਸਾਮਣੇਰੋ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਦਸਵਸ੍ਸਂ ਤਤ੍ਥ ਵਸਿਤ੍ਵਾ ਅਰਿਮਦ੍ਦਨਨਗਰਂ ਪਚ੍ਚਾਗਚ੍ਛਿ. ਸਿਵਲਿਤ੍ਥੇਰਞ੍ਚ ਤਾਮਲਿਨ੍ਦਤ੍ਥੇਰਞ੍ਚ ਆਨਨ੍ਦਤ੍ਥੇਰਞ੍ਚ ਰਾਹੁਲਤ੍ਥੇ ਰਞ੍ਚ ਅਨੇਸਿ. ਤੇ ਪਨ ਥੇਰਾ ਤਿਪਿਟਕਧਰਾ ਹੋਨ੍ਤਿ ਬ੍ਯਤ੍ਤਾ ਦਕ੍ਖਾ ਚ. ਅਯਞ੍ਚਤ੍ਥੋ ਵਿਤ੍ਥਾਰੇਨ ਹੇਟ੍ਠਾ ਵੁਤ੍ਤੋ.

ਅਰਿਮਦ੍ਦਨਨਗਰਂ ਪਤ੍ਵਾ ਅਰਿਮਦ੍ਦਨ ਵਾਸੀਹਿ ਭਿਕ੍ਖੂਹਿ ਸਦ੍ਧਿਂ ਵਿਨਯਕਮ੍ਮਾਨਿ ਅਕਤ੍ਵਾ ਪੁਥੁ ਹੁਤ੍ਵਾ ਨਿਸੀਦਿਂਸੁ. ਨਰਪਤਿਰਾਜਾ ਚ ਤੇਸੁ ਥੇਰੇਸੁ ਅਤਿਵਿਯ ਪਸੀਦਿ. ਏਰਾਵਤੀਨਦਿਯਂ ਉਲ਼ੁਮ੍ਪਂ ਬਨ੍ਧਿਤ੍ਵਾ ਤਤ੍ਥੇਵ ਉਪਸਮ੍ਪਦਕਮ੍ਮਂ ਕਾਰਾਪੇਸਿ. ਚਿਰਕਾਲਂ ਅਤਿਕ੍ਕਮਿਤ੍ਵਾ ਸੋ ਗਣੋ ਵੁਡ੍ਢਿ ਹੁਤ੍ਵਾ ਉਪ੍ਪਜ੍ਜਿ.

ਨਰਪਤਿਰਾਜਾ ਚ ਤੇ ਥੇਰੇ ਸਦ੍ਧਿਂ ਸਙ੍ਘੇਨ ਨਿਮਨ੍ਤੇਤ੍ਵਾ ਮਹਾਦਾਨਂ ਅਦਾਸਿ. ਤਦਾ ਛਣੇ ਆਕਪ੍ਪਸਮ੍ਪਨ੍ਨਂ ਰੂਪਸੋਭਗ੍ਗਪ੍ਪਕ੍ਕਂ ਏਕਂ ਨਾਟਕਿਤ੍ਤਿਂ ਦਿਸ੍ਵਾ ਰਾਹੁਲਤ੍ਥੇਰੋ ਪਟਿਬਦ੍ਧਚਿਤ੍ਤੋ ਲੇਪੇ ਲਗ੍ਗਿਤਵਾਨਰੋਵਿਯ ਕਦ੍ਦਮੇ ਲਗ੍ਗਿਤਮਾਤਙ੍ਗੋਵਿਯ ਚ ਕਾਮ ਗੁਣਲੇਪਕਦ੍ਦਮੇਸੁ ਲਗ੍ਗਿਤੋ ਸਾਸਨੇ ਵਿਰਮਿਤ੍ਵਾ ਹੀ ਨਾਯਾਵਤ੍ਤੀਤੁਂ ਆਰਭਿ. ਮਰਣਨ੍ਤਿ ਕਰੋਗੇਨ ਅਭਿਭੂਤੋ ਵਿਯ ¶ ਅਤੇਕਿਚ੍ਛੋ ਹੁਤ੍ਵਾ ਸੇਸਤ੍ਥੇਰੇਸੁ ਓਵਾਦਂ ਦਿਨ੍ਨੇਸੁ ਪਿਨਾਦਿਯਿ. ਤਦਾ ਸੇਸਤ੍ਥੇਰਾ ਤਂ ਏਵਮਾਹਂਸੁ,-ਮਾ ਤ੍ਵਂ ਏਕਂ ਤਂ ਪਟਿਚ੍ਚ ਸਬ੍ਬੇਪਿ ਅਮ੍ਹੇ ਲਜ੍ਜਾਪੇਤੁਂ ਨ ਅਰਹਸਿ, ਮਾ ਇਧ ਹੀਨਾਯਾ ਵਤ੍ਤੇਹਿ, ਮਲ੍ਲਾਰੁਦੀਪਂ ਗਨ੍ਤ੍ਵਾ ਯਥਾਰੁਚਿਂ ਕਰੋਹੀਤਿ ਪੇਸੇਸੁਂ. ਰਾਹੁਲਤ੍ਥੇਰੋ ਚ ਕੁਸਿਮਤਿਤ੍ਥਤੋ ਨਾਵਂ ਆਰੁਯ੍ਹ ਮਲ੍ਲਾਰੁਦੀਪਂ ਅਗਮਾਸਿ. ਮਲ੍ਲਾਰੁਦੀਪਂ ਪਤ੍ਤਕਾਲੇ ਮਲ੍ਲਾਰੁਰਾਜਾ ਵਿਨਯਂ ਜਾਨਿਤੁਕਾਮੋ ਸਹ ਟੀਕਾਯ ਖੁਦ੍ਦਸਿਕ੍ਖਾਪਕਰਣਂ ਤਸ੍ਸ ਸਨ੍ਤਿਕੇ ਉਗ੍ਗਣ੍ਹਿਤ੍ਵਾ ਏਕਪਤ੍ਤਮਤ੍ਤਂ ਮਣਿਂ ਅਦਾਸਿ. ਸੋਚ ਤਂ ਲਭਿਤ੍ਵਾ ਹੀਨਾਯਾਵਤ੍ਤੀਤਿ. ਹੋਨ੍ਤਿ ਚੇਤ੍ਥ,-

ਅਤਿਦੂਰੇਵ ਹੋਤਬ੍ਬਂ, ਭਿਕ੍ਖੁਨਾ ਨਾਮ ਇਤ੍ਥਿਭਿ;

ਇਤ੍ਥਿਯੋ ਨਾਮ ਭਿਕ੍ਖੂਨਂ, ਭਵਨ੍ਤਿ ਇਧ ਵੇਰਿਨੋ.

ਤਾਵ ਤਿਟ੍ਠਨ੍ਤੁ ਦੁਪ੍ਪਞ੍ਞਾ, ਮਯਂ ਪੋਰਾਣਿਕਾਪਿ ਚ;

ਮਹਾਪਞ੍ਞਾ ਵਿਨਾਸਂ, ਪਤ੍ਤਾ ਹਰਿਤਚਾਦਯੋ.

ਤਸ੍ਮਾ ਹਿ ਪਣ੍ਡਿਤੋ ਭਿਕ੍ਖੁ, ਅਨ੍ਤਮਸੋਵ ਇਤ੍ਥਿਭਿ;

ਵਿਸ੍ਸਾਸਂ ਨ ਕਰੇ ਲੋਕੇ, ਰਾਗੋ ਚ ਦੁਪ੍ਪਵਾਰਿਤੋਤਿ.

ਸੇਸੇਸੁ ਚ ਥੇਰੇਸੁ ਛਪ੍ਪਦੋ ਨਾਮ ਥੇਰੋ ਪਠਮਂ ਕਾਲਙ੍ਕਤੋ. ਸਿਵਲਿਤਾਮਲਿਨ੍ਦਾਨਨ੍ਦਤ੍ਥੇਰਾਯੇਵ ਤਯੋ ਪਰਿਯਤ੍ਤਿਉਗ੍ਗਹਣਧਾਰਣਾਦਿਵਸੇਨ ਸਾਸਨਂ ਉਪਤ੍ਥਮ੍ਭੇਤ੍ਵਾ ਅਰਿਮਦ੍ਦਨਨਗਰੇ ਨਿਸੀਦਿਂਸੁ. ਏਕਸ੍ਮਿਞ੍ਚ ਕਾਲੇ ਰਾਜਾ ਤੇਸਂ ਤਿਣ੍ਣਂ ਥੇਰਾਨਂ ਏਕੇਕਂ ਹਤ੍ਥਿਂ ਅਦਾਸਿ. ਸਿਵਲਿਤਾਮਲਿਨ੍ਦਤ੍ਥੇਰਾ ਪਟਿਗ੍ਗਹੇਤ੍ਵਾ ਵਨੇ ਵਿਸ੍ਸਜ੍ਜਾਪੇਸੁਂ. ਆਨਨ੍ਦਤ੍ਥੇਰੋ ਪਨ ਕਿਞ੍ਚਿਪੁਰਨਗਰਂ ਪਹਿਣਿਤ੍ਵਾ ਞਾਤਕਾਨਂ ਦੇਹੀਤਿ ਕੁਸਿਮਤਿਤ੍ਥਂ ਗਨ੍ਤ੍ਵਾ ਨਾਵਂ ਆਰੋਪੇਸਿ. ਤਂ ਕਾਰਣਂ ਞਤ੍ਵਾ ਸਿਵਲਿਤਾਮਲਿਨ੍ਦਤ੍ਥੇਰਾਤਂ ਏਵਮਾਹਂਸੁ,– ਮਯਂ ਪਨ ਆਵੁਸੋ ਹਤ੍ਥੀਨਂ ਸੁਖਤ੍ਥਾਯ ਵਨੇ ਵਿਸ੍ਸਜ੍ਜੇਮ,ਤ੍ਵਂ ਪਨ ਅਧਮ੍ਮਿਕਂ ਕਰੋਸੀਤਿ. ਕਿਨ੍ਨਾਮ ਭਨ੍ਤੇ ਞਾਭਕਾਨਂ ਸਙ੍ਗਹੋ ਨ ਵਟ੍ਟਤਿ, ਨਨੁ ਞਾਤਕਾਨਞ੍ਚ ਸਙ੍ਗਹੋਤਿ ਭਗਵਤਾ ਵੁਤ੍ਤਨ੍ਤਿ.

ਥੇਰਾ ¶ ਆਹਂਸੁ,-ਸਚੇ ਤ੍ਵਂ ਅਮ੍ਹਾਕਂ ਵਚਨਂ ਨਕਰੇਯ੍ਯਾਸਿ,ਭਵ ਇਚ੍ਛਾਨੁਰੂਪਂ ਕਰੋਹਿ, ਮਯਂ ਪਨ ਤਯਾ ਸਦ੍ਧਿਂ ਸਂਵਾਸਂ ਨ ਕਰਿਸ੍ਸਾਮਾਤਿ ਵਿਸੁਂ ਨਿਸੀਦਿਂਸੁ.

ਤਤੋ ਪਟ੍ਠਾਯ ਦ੍ਵੇ ਗਣਾ ਭਿਜ੍ਜਿਂਸੁ. ਤਤੋ ਪਚ੍ਛਾਕਾਲੇ ਅਤਿਕ੍ਕਨ੍ਤੇ ਤਾਮਲਿਨ੍ਦਤ੍ਥੇਰੋ ਬਹੁਸ੍ਸੁਤਾਨਂ ਬ੍ਯਤ੍ਤਿਬਲਾਨਂ ਸਿਸ੍ਸਾਨਂ ਅਨੁਗ੍ਗਹਤ੍ਥਾਯ ਗਹਟ੍ਠਾਨਂ ਸਨ੍ਤਿਕੇ ਅਯਂ ਬਹੁਸ੍ਸੁਤੋ ਅਯਂ ਮਹਾਪਞ੍ਞੋਤਿ ਏਵਮਾਦਿਨਾ ਵਚੀਵਿਞ੍ਞਤ੍ਤਿਂ ਸਮੁਟ੍ਠਾਪੇਤਿ, ਏਵਂ ਕਤੇ ਕੁਲਪੁਤ੍ਤਾ ਸੁਲਭਪਚ੍ਚਯਵਸੇਨ ਸਾਸਨਸ੍ਸ ਹਿਤਂ ਆਵਹਿਭੁਂਸਕ੍ਖਿਸ੍ਸਨ੍ਤੀਤਿ ਕਤ੍ਵਾ. ਤਂ ਕਾਰਣਂ ਸੁਤ੍ਵਾ ਸਿਵਲਿਤ੍ਥੇਰੋ ਏਵਮਾਹ,- ਕਸ੍ਮਾ ਤ੍ਵਂ ਵਚੀਵਿਞ੍ਞਤ੍ਤਿਂ ਸਮੁਟ੍ਠਾਪੇਤ੍ਵਾ ਬੁਦ੍ਧਪ੍ਪਟਿਕੁਚ੍ਛਿਤਂ ਕਮ੍ਮਂ ਕਰੋਸੀਤਿ. ਭਗਵਤਾ ਅਤ੍ਤਨੋ ਅਤ੍ਥਾਯਯੇਵ ਵਚੀਵਿਞ੍ਞਤ੍ਤਿਂ ਪਟਿਕ੍ਖਿਤ੍ਤਾ, ਅਹਂ ਪਨ ਪਰੇਸਂਯੇਵ ਅਤ੍ਥਾਯ ਵਚੀਵਿਞ੍ਞਤ੍ਤਿਂਸਮੁਟ੍ਠਾਪੇਮਿ, ਨਾਤ੍ਤਨੋ ਅਤ੍ਥਾਯ, ਸਾਸਨਸ੍ਸ ਹਿ ਵੇਪੁਲ੍ਲਤ੍ਥਾਯ ਏਵਂ ਵਚੀਵਿਞ੍ਞਤ੍ਤਿਂਸਮੁਟ੍ਠਾਪੇਮਿ. ਸਿਵਲਿਤ੍ਥੇਰੋਪਿ ਨ ਤ੍ਵਂ ਮਮ ਵਚਨਂ ਕਰੋਸਿ, ਯਂ ਯਂ ਤ੍ਵਂ ਇਚ੍ਛਸਿ, ਤਂ ਤਂ ਕਰੋਹਿ, ਅਹਂ ਪਨ ਤਯਾ ਸਦ੍ਧਿਂ ਸਂਵਾਸਂ ਨਕਰਿਸ੍ਸਾਮੀਤਿ ਵਿਸੁਂ ਹੁਤ੍ਵਾ ਸਦ੍ਧਿਂ ਸਕਪਕ੍ਖੇਨ ਨਿਸੀਦਿ. ਤਤੋ ਪਟ੍ਠਾਯ ਤਯੋ ਗਣਾ ਭਿਜ੍ਜਿਂਸੁ.

ਏਵਂ ਅਰਿਮਦ੍ਦਨਨਗਰੇ ਅਰਹਨ੍ਤਤ੍ਥੇਰਸ੍ਸ ਏਕੋ ਵਂਸੋ, ਸਿਵਲਿਤ੍ਥੇਰਸ੍ਸ ਏਕੋ, ਤਾਮਲਿਨ੍ਦਤ੍ਥੇਰਸ੍ਸ ਏਕੋ, ਆਨਨ੍ਦਤ੍ਥੇਰਸ੍ਸ ਏਕੋਤਿ ਚਤ੍ਤਾਰੋ ਗਣਾ ਅਹੇਸੁਂ.

ਤੇਸੁ ਅਰਹਨ੍ਤਤ੍ਥੇਰਗਣੋ ਸੁਧਮ੍ਮਪੁਰਤੋ ਪਠਮਂ ਆਗਤਤ੍ਤਾ ਪੁਰਿਮਗਣੋਤਿ ਵੋਹਾਰਿਯਤਿ, ਅਞ੍ਞੇ ਪਨ ਪਚ੍ਛਾ ਆਗਤਤ੍ਤਾ ਪਚ੍ਛਾਗਣਾਤਿ.

ਸਿਵਲਿਤ੍ਥੇਰੋ ਅਰਿਮਦ੍ਦਨਨਗਰੇ ਯਾਵੀਜੀਵਂ ਸਾਸਨਂ ਪਗ੍ਗਣ੍ਹਿਤ੍ਵਾ ਕਲਿਯੁਗੇ ਨਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸਿ.

ਆਨਨ੍ਦਤ੍ਥੇਰੋ ਪਨ ਅਰਿਮਦ੍ਦਨਨਗਰੇਯੇਵ ਚਤੁਚਤ੍ਤਾਲੀਸ ਵਸ੍ਸਾਨਿ ¶ ਸਾਸਨਂ ਪਗ੍ਗਣ੍ਹਿਤ੍ਵਾ ਛਨਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸਿ.

ਤਾਮਲਿਨ੍ਦਤ੍ਥੇਰੋਪਿ ਯਾਵਜੀਵਂ ਸਾਸਨਂ ਪਗ੍ਗਣ੍ਹਿਤ੍ਵਾ ਅਟ੍ਠਨ ਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸੀਤਿ. ਅਹੋ ਸਙ੍ਖਾਰਸਭਾਵੋਤਿ.

ਸੇਯ੍ਯਥਾਜਗਰਸ੍ਸੇਵ, ਨਾਭਿਯਾ ਚਕ੍ਕਮਣ੍ਡਲੇ;

ਲਗ੍ਗੋ ਸਸੋ ਸਮਿਤ੍ਵਾਪਿ, ਦਿਸਂ ਗਚ੍ਛਤਿ ਤਂ ਮੁਖਂ.

ਤਥੇਵ ਸਬ੍ਬਸਤ੍ਤਾਪਿ, ਮਚ੍ਚੁਚਕ੍ਕੇਸੁ ਲਗ੍ਗਿਤਾ;

ਯਾਵਜੀਵਮ੍ਪਿ ਧਾਵਿਤ੍ਵਾ, ਮਚ੍ਚੁਮੁਖਂ ਉਪਾਗਮੁਨ੍ਤਿ.

ਇਚ੍ਚੇਵਂ ਅਰਿਮਦ੍ਦਨਪੁਰੇ ਅਰਹਨ੍ਤੇਹਿ ਚ ਗਨ੍ਥਕਾਰੇਹਿ ਚ ਪੁਥੁਜ੍ਜਨੇਹਿ ਜਿਨਸਾਸਨਂ ਨਭੇ ਚਨ੍ਦੋਵਿਯ ਵਿਜ੍ਜੋਤਤਿ.

ਤਤ੍ਥ ਹਿ ਯਦਾ ਅਨੁਰੁਦ੍ਧਰਾਜਾ ਸੁਧਮ੍ਮਪੁਰਤੋ ਸਾਸਨਂ ਆਨੇਸਿ, ਤਦਾ ਅਰਹਨ੍ਤਾ ਛਸਤਸਹਸ੍ਸਮਤ੍ਤਾ ਆਗਤਾ, ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਪਨ ਗਣਨਪਥਂ ਵੀਤਿ ਵਤ੍ਤਾਤਿ.

ਛਤ੍ਤਗੁਹਿਨ੍ਦਸ੍ਸ ਨਾਮ ਰਞ੍ਞੋ ਕਾਲੇਪਿ ਹਿਮਵਨ੍ਤੇ ਗਨ੍ਧਮਾਦਨਪਬ੍ਬਤਤੋ ਅਟ੍ਠ ਅਰਹਨ੍ਤਾ ਪਿਣ੍ਡਾਯ ਰਾਜਗੇਹਂ ਆਗਮਂਸੁ. ਰਾਜਾ ਚ ਪਤ੍ਤਂ ਗਹੇਤ੍ਵਾ ਪਿਣ੍ਡਪਾਤੇਨ ਭੋਜੇਤ੍ਵਾ ਇਦਾਨਿ ਕੁਤੋ ਆਗਤਤ੍ਥਾਭਿ ਪੁਚ੍ਛਿ. ਹਿਮਵਨ੍ਤੇ ਮਹਾਰਾਜ ਗਨ੍ਧ ਮਾਦਨਪਬ੍ਬਤਤੋਤਿ. ਅਥ ਰਾਜਾ ਅਤਿਪ੍ਪਸਨ੍ਨੋ ਹੁਤ੍ਵਾ ਇਧ ਤੇਮਾਸਂ ਵਸ੍ਸਂ ਉਪਗਚ੍ਛਥਾਤਿ ਯਾਚਿਤ੍ਵਾ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਤੇਮਾਸਮ੍ਪਿ ਅਨ੍ਤੋਗੇਹੇ ਨਿਮਨ੍ਤੇਤ੍ਵਾ ਪਿਣ੍ਡਪਾਤੇਨ ਭੋਜੇਸਿ.

ਏਕਂ ਸਮਯਂ ਅਰਹਨ੍ਤਾਨਂ ਗਨ੍ਧਮਾਦਨਪਬ੍ਬਤੇ ਨਨ੍ਦਮੂਲਗੁਹਂ ਵਿਯ ਏਕਂ ਗੁਹਂ ਮਾਪੇਤ੍ਵਾ ਦਸ੍ਸੇਹੀਤਿ ਯਾਚਿ. ਤੇ ਚ ਅਰਹਨ੍ਤਾ ਨਨ੍ਦਮੂਲਗੁਹਂਵਿਯ ਏਕਂ ਗੁਹਂ ਇਦ੍ਧਿਯਾ ਮਾਪੇਤ੍ਵਾ ਦਸ੍ਸੇਸੁਂ ¶ . ਰਾਜਾ ਚ ਤਾਯ ਗੁਹਾਯ ਸਦਿਸਂ ਏਕਂ ਗੁਹਂ ਕਾਰਾਪੇਸਿ. ਨਨ੍ਦਮੂਲਗੁਹਾਕਾਰੇਨ ਪਨ ਕਤਤ੍ਤਾ ਨਨ੍ਦਾਤਿ ਨਾਮਮ੍ਪਿ ਅਕਾਸਿ. ਇਚ੍ਚੇਵਂ ਛਤ੍ਤਗੁਹਿਨ੍ਦਸ੍ਸ ਰਞ੍ਞੋ ਕਾਲੇ ਗਨ੍ਧਮਾਦਨਪਬ੍ਬਤੇ ਨਨ੍ਦਮੂਲਗੁਹਤੋ ਆਗਨ੍ਤ੍ਵਾ ਅਰਹਨ੍ਤਾ ਸਾਸਨਂ ਪਤਿਟ੍ਠਾਪੇਸੁਂ.

ਅਰਹਨ੍ਤਭਾਵੋ ਚ ਨਾਮੇਸ ਯਥਾਭੂਤਂ ਜਾਨਿਤੁਂ ਦੁਕ੍ਕਰੋ, ਅਨੁਪਸਮ੍ਪਨ੍ਨਾਨਂ ਉਤ੍ਤਰਿਮਨੁਸ੍ਸਧਮ੍ਮਦਸ੍ਸਨਸ੍ਸ ਪਟਿਕ੍ਖਿਤ੍ਤਤ੍ਤਾ, ਅਰਹਤ੍ਤਂ ਵਾ ਪਤ੍ਵਾਪਿ ਵਾਸਨਾਯ ਅਪ੍ਪਜਹਿਤਤ੍ਤਾ. ਅਰਹਾਪਿ ਹਿ ਸਮਾਨੋ ਅਹਂ ਅਰਹਾਤਿ ਅਨੁਪਸਮ੍ਪਨ੍ਨਾਨਂ ਕਥੇਤੁਂ ਨ ਵਟ੍ਟਤਿ, ਅਰਹਤ੍ਤਂ ਪਤ੍ਵਾਪਿ ਏਕਚ੍ਚੋ ਵਾਸਨਂ ਪਜਹਿਤੁਂ ਨ ਸਕ੍ਕਾ, ਪਿਲਿਨ੍ਦਵਚ੍ਛਤ੍ਥੇਰਵਤ੍ਥੁਚੇਤ੍ਥ ਞਾਪਕਂ. ਏਵਂ ਲੋਕੇ ਅਰਹਨ੍ਤ ਭਾਵੋ ਜਾਨਿਤੁਂ ਦੁਕ੍ਕਰੋ. ਤੇਨੇਵ ਮਹਾਕਸ੍ਸਪਤ੍ਥੇਰਸ੍ਸ ਉਪਟ੍ਠਾਕੋ ਏਕੋ ਭਿਕ੍ਖੁ ਅਤ੍ਤਨੋ ਉਪਜ੍ਝਾਯਸ੍ਸ ਮਹਾਕਸ੍ਸਪਤ੍ਥੇਰਸ੍ਸ ਸਨ੍ਤਿਕੇ ਵਸਿਤ੍ਵਾਪਿ ਤਸ੍ਸ ਅਰਹਨ੍ਤ ਭਾਵਂ ਨ ਜਾਨਿ.

ਮਹਾਕਸ੍ਸਪਤ੍ਥੇਰਞ੍ਹਿ ਏਕੇਨ ਸਦ੍ਧਿਵਿਹਾਰਿਕੇਨ ਸਦ੍ਧਿਂ ਅਰਞ੍ਞਵਿਹਾਰਤੋ ਗਾਮਂ ਪਿਣ੍ਡਾਯ ਚਰਨ੍ਤਂ ਅਨ੍ਤਰਾਮਗ੍ਗੇ ਪਤ੍ਤਾ ਦਿਪਰਿਕ੍ਖਾਰੇ ਗਹੇਤ੍ਵਾ ਪਚ੍ਛਾ ਗਚ੍ਛਨ੍ਤੋਯੇਵ ਏਕੋਸਦ੍ਧਿ ਵਿਹਾਰਿਕੋ ਏਵਮਾਹ,–ਲੋਕਸ੍ਮਿਂ ਭਨ੍ਤੇ ਅਰਹਾ ਅਰਹਾਤਿ ਪਾਕਟੋ, ਸੁਤਮਤ੍ਤੋਵਾਹਂ ਭਵਾਮਿ, ਨ ਕਦਾਚਿ ਦਿਟ੍ਠਪੁਬ੍ਬੋਤਿ. ਤਂ ਸੁਤ੍ਵਾ ਥੇਰੋ ਪਚ੍ਛਾ ਪਰਿਵਤ੍ਤਤ੍ਵਾ ਓਲੋਕੇਨ੍ਤੋ ਪਰਿਕ੍ਖਾਰੇ ਆਵੁਸੋ ਗਹੇਤ੍ਵਾ ਅਰਹਨ੍ਤਸ੍ਸ ਪਚ੍ਛਾਗਚ੍ਛਨ੍ਤੋਯੇਵ ਅਰਹਨ੍ਤਭਾਵਂ ਨ ਜਾਨਾਤੀਤਿ ਆਹਾਤਿ.

ਅਰਿਮਦ੍ਦਨਨਗਰੇਪਿ ਸੀਲਬੁਦ੍ਧਿਪੋਲ੍ਲੋਙ੍ਕਸੁਮੇਧਤ੍ਥੇਰਾਦਯੋਪਿ ਅਰਹਨ੍ਤਾਯੇਵ ਅਹੇਸੁਂ. ਨਰਪਤਿਰਾਜਾ ਹਿ ਖਣਿਤ੍ਤਿ ਪਾਦਪਬ੍ਬਤਂ ਗਨ੍ਤ੍ਵਾ ਪਚ੍ਚਾਗਮਨਕਾਲੇ ਅਨ੍ਤਰਾਮਗ੍ਗੇ ਏਕਿਸ੍ਸਾ ਮਾਤਿਕਾਯ ਮਣੋਭਾਸਂ ਦਿਸ੍ਵਾ ਇਧ ਪੁਞ੍ਞਂ ਕਾਰੇਤੁਕਾਮੋ ਸਕ੍ਕੋ ਦਸ੍ਸੇਤਿ ਮਞ੍ਞੇਤਿ ਮਨਸਿਕਰਿਤ੍ਵਾ ਚੇਤਿਯਂ ਕਾਰਾਪੇਸ੍ਸਾਮੀਤਿ ¶ ਤਤ੍ਥ ਰਟ੍ਠਵਾਸੀਤਿ ਸਮਂ ਭੂਮਿਭਾਗਂ ਕਾਰਾਪੇਸਿ.

ਅਥ ਏਕੋ ਸੀਲਬੁਦ੍ਧਿ ਨਾਮ ਥੇਰੋ ਏਵਮਾਹ,– ਪੁਞ੍ਞਂ ਮਹਾਰਾਜ ਕਰਿਸ੍ਸਮੀਤਿ ਇਦਂ ਭੂਮਿਪਰਿਕਮ੍ਮਂ ਕਾਰਾਪੇਸਿ, ਏਵਂ ਕਾਰਾਪੇਨ੍ਤਸ੍ਸ ਤੇ ਅਪੁਞ੍ਞਂਯੇਵ ਭਵਤਿ, ਨੋਪੁਞ੍ਞਨ੍ਤਿ ਵਤ੍ਵਾ ਬਹੂ ਸਤ੍ਤਾ ਮਾ ਕਿਲਮਨ੍ਤੂਤਿ ਮਨਸਿਕਤ੍ਵਾ ਰਞ੍ਞੋ ਦਣ੍ਡਕਮ੍ਮੇਨ ਤਜ੍ਜਨਤ੍ਥਾਯ ਰਞ੍ਞਾ ਦਿਨ੍ਨਂ ਪਿਣ੍ਡਪਾਤਂ ਨਭੁਞ੍ਜਿ. ਰਾਜਾ ਚ ਸਚੇ ਤ੍ਵਂ ਮਯਾ ਦਿਨ੍ਨਂ ਪਿਣ੍ਡਪਾਤਂ ਅਭੁਞ੍ਜਿਤੁਕਾਮੋ ਭਵੇਯ੍ਯਾਸਿ, ਮਮ ਵਿਜਿਤੇ ਵਸਨ੍ਤੋਯੇਵ ਤ੍ਵਂ ਮਮ ਪਿਣ੍ਡਪਾਤਾ ਨ ਮੁਚ੍ਚੇਯ੍ਯਾਸਿ, ਰਟ੍ਠਵਾਸੀਹਿਪਿ ਦਿਨ੍ਨਪਿਣ੍ਡਪਾਤੋ ਮਯ੍ਹਮੇਵ ਸਨ੍ਤਕੋ, ਨਨੁ ਨਾਮ ਮਮ ਪਿਣ੍ਡਪਾਤਂਯੇਵ ਤ੍ਵਂ ਭੁਞ੍ਜਸੀਤਿ ਆਹ.

ਸੀਲਬੁਦ੍ਧਿਤ੍ਥੇਰੋਪਿ ਸਚੇ ਅਹਂ ਏਵਂ ਭਵੇਯ੍ਯਾਮਿ, ਸੀਹਲ਼ਦੀਪਂ ਗਨ੍ਤ੍ਵਾ ਵਸਿਸ੍ਸਾਮੀਤਿ ਚਿਨ੍ਤੇਤ੍ਵਾ ਅਰਞ੍ਞੇ ਵਸਿ.

ਅਥ ਤਮਤ੍ਥਂ ਜਾਨਿਤ੍ਵਾ ਨਗਰਦ੍ਵਾਰੇ ਆਰਕ੍ਖੋ ਏਕੋ ਯਕ੍ਖੋ ਰਞ੍ਞੋ ਆਗਤਕਾਲੇ ਅਭਿਮੁਖਂ ਠਿਤੋਵ ਭਯਾਨਕਰੂਪਂ ਨਿਸੀਦਿ. ਅਥ ਨਾਨਾਵਿਜ੍ਜਾਕਮ੍ਮੇਹਿ ਅਪਨੇਨ੍ਤੋਪਿ ਨ ਸਕ੍ਕਾ ਅਪਨੇਤੁਂ.

ਅਥ ਰਾਜਾ ਨਿਮਿਤ੍ਤਪਾਠਕੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ,-ਕੇਨ ਕਾਰਣੇਨ ਅਯਂ ਯਕ੍ਖੋ ਇਧ ਨਿਸਿਨ੍ਨੋਤਿ. ਤ੍ਵਂ ਮਹਾਰਾਜ ਸੀਲਬੁਦ੍ਧਿਤ੍ਥੇਰਂ ਅਗਾਰਵਵਸੇਨ ਪੁਬ੍ਬੇ ਕਥੇਸਿ, ਯਕ੍ਖਾਪਿ ਥੇਰੇ ਅਤਿਵਿਯ ਪਸਨ੍ਨਾਤਿ ਅਮ੍ਹੇਹਿ ਸੁਤਪੁਬ੍ਬਾ, ਤਂ ਪਟਿਚ੍ਚ ਯਕ੍ਖੋ ਭਯਾਨਕਰੂਪਂ ਦਸ੍ਸੇਤ੍ਵਾ ਨਿਸਿਨ੍ਨੋ ਭਵਿਸ੍ਸਤੀਤਿ ਆਹ.

ਰਾਜਾਪਿ ਅਮਚ੍ਚੇ ਆਣਾਪੇਸਿ ਥੇਰਂ ਪਕ੍ਕਾਸਥਾਤਿ. ਥੇਰੋ ਨਾਗਚ੍ਛਿ. ਸੀਹਲ਼ਦੀਪਂਯੇਵ ਗਮਿਸ੍ਸਾਮੀਤਿ ਆਰਭਿ. ਤਮਤ੍ਥਂ ਸੁਤ੍ਵਾ ਰਾਜਾ ਏਕਂ ਚਤੁਰਙ੍ਗਪਚ੍ਚਯਂ ਨਾਮ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ਤ੍ਵਂ ਗਨ੍ਤ੍ਵਾ ਥੇਰਂ ਪਕ੍ਕੋਸਾਹੀਤਿ ਪੇਸੇਸਿ. ਚਤੁਰਙ੍ਗਪਚ੍ਚਯੋ ਚ ਛੇਕਤਾਯ ਏਕਂ ਸੁਵਣ੍ਣਮਯਂ ਬੁਦ੍ਧਪ੍ਪਟਿਬਿਮ੍ਬਂ ਨਾਵਾਯ ਠਪੇਤ੍ਵਾ ਮਹਾਸਮੁਦ੍ਦਤਿਤ੍ਥਂ ਅਗਮਾਸਿ. ਅਥ ਥੇਰਂ ਸਮ੍ਪਾਪੁਣਿਤ੍ਵਾ ¶ ਇਦਾਨਿ ਇਧ ਭਗਵਾ ਸਮ੍ਮਾਸਮ੍ਬੁਦ੍ਧੋ ਅਗਮਾਸਿ, ਸੀਲਬੁਦ੍ਧਿਤ੍ਥੇਰੋ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਦਸ੍ਸਨਤ੍ਥਾਯ ਆਗਚ੍ਛਤੂਤਿ ਦੂਤਂ ਪੇਸੇਸਿ. ਥੇਰੋਪਿ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਦਸ੍ਸਨਤ੍ਥਾਯ ਆਗਚ੍ਛਤੂਤਿ ਵਚਨਂ ਪਟਿਕ੍ਖਿਪਿਤੁਂ ਬੁਦ੍ਧਗਾਰਵਵਸੇਨ ਅਵਿਸਹਤਾਯ ਆਗਚ੍ਛੀਤਿ.

ਪੋਰਾਣਿਕਾਨਂਵ ਥੇਰਾਨਂ, ਬੁਦ੍ਧੇ ਸਗਾਰਵਂ ਇਧ;

ਪਣ੍ਡਿਤੋ ਗਾਰਵਂ ਬੁਦ੍ਧੇ, ਕਰੇ ਪਸਨ੍ਨਚੇਤਸਾਤਿ.

ਨਾਵਂ ਅਭਿਰੂਹਿਤ੍ਵਾ ਥੇਰੋ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਵਨ੍ਦਨਾਮਾਨਪੂਜਾਸਕ੍ਕਾਰਦੀਨਿ ਅਕਾਸਿ. ਥੇਰਸ੍ਸ ਏਵਂ ਵਨ੍ਦਨਾਮਾਨਪੂਜਾਸਕ੍ਕਾਰਾਦੀਨਿ ਕਰੋਨ੍ਤਸ੍ਸੇਵ ਵੇਗੇਨ ਨਾਵਂ ਆਨੇਤ੍ਵਾ ਗਚ੍ਛਿ. ਅਥ ਚਤੁਰਙ੍ਗਪਚ੍ਚਯੋ ਏਵਮਾਹ,– ਇਦਾਨਿ ਭਨ੍ਤੇ ਤੁਮ੍ਹਾਕਂ ਆਚਰਿਯਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਪਗ੍ਗਣ੍ਹਿਤੁਂ ਯੁਤ੍ਤੋਤਿ. ਰਾਜਾ ਚ ਅਮਚ੍ਚੇਹਿ ਪਰਿਵਾਰਿਤੋ ਪਚ੍ਚੁਗ੍ਗਚ੍ਛਿ. ਨਾਵਾਯ ਥੇਰਸ੍ਸ ਹਤ੍ਥੇ ਗਹੇਤ੍ਵਾ ਰਾਜਗੇਹਂ ਆਨੇਸਿ. ਦ੍ਵਾਰਂ ਪਤ੍ਤਕਾਲੇ ਯਕ੍ਖੋ ਪਥਵਿਯਂ ਨਿਸੀਦਿਤ੍ਵਾ ਥੇਰਂ ਵਨ੍ਦਿ.

ਰਾਜਾ ਰਾਜਗੇਹਂ ਪਤ੍ਵਾ ਥੇਰਂ ਨਾਨਾਭੋਜਨੇਹਿ ਭੋਜੇਸਿ. ਏਵਞ੍ਚ ਅਵੋਚ,–ਅਜ੍ਜਤਗ੍ਗੇ ਭਨ੍ਤੇ ਤ੍ਵਮਸਿ ਮਮਾਚਰਿਯੋ, ਭਗਵਤੋਵ ਓਵਾਦਂ ਸਿਰਸਾ ਪਟਿਗ੍ਗਹੇਤ੍ਵਾ ਅਨੁਵਤ੍ਤਿਸ੍ਸਾਮਾਤਿ ਅਤ੍ਤਨੋ ਪਞ੍ਚਪੁਤ੍ਤੇਪਿ ਥੇਰਸ੍ਸ ਅਦਾਸਿ. ਤੇ ਚ ਪਞ੍ਚਕੁਮਾਰਾ ਥੇਰੇਨ ਸਦ੍ਧਿਂ ਅਨੁਵਤ੍ਤਿਂਸੁ. ਥੇਰੋ ਤੇ ਪਕ੍ਕੋਸੇਤ੍ਵਾ ਵਿਹਾਰਂ ਅਗਮਾਸਿ. ਅਨ੍ਤਰਾਮਗ੍ਗੇ ਕਪ੍ਪਿਯਪਥਵਿਯਂ ਪਞ੍ਚ ਪਰਿਮਣ੍ਡਲਾਕਾਰਾਨਿ ਲਿਖਿਤ੍ਵਾ ਤੇਸਂ ਰਾਜਕੁਮਾਰਾਨਂ ਦਸ੍ਸੇਤ੍ਵਾ ਨਿਵਤ੍ਤਾਪੇਸਿ. ਰਾਜਕੁਮਾਰਾ ਪਟਿਨਿਵਤ੍ਤਿਤ੍ਵਾ ਤਂ ਕਾਰਣਂ ਰਞ੍ਞੋ ਆਰੋਚੇਸੁਂ. ਰਾਜਾ ਚ ਤੁਮ੍ਹਾਕਂ ਪੁਞ੍ਞਂ ਕਾਰਾਪਨਤ੍ਥਾਯ ਦਸ੍ਸੇਤੀਤਿ ਵਤ੍ਵਾ ਤੁਲਾਵਸੇਨ ਤੇਹਿ ਰਾਜਕੁਮਾਰੇਹਿ ਸੁਵਣ੍ਣਂ ਸਮਂ ਕਤ੍ਵਾ ਤੇਨ ਸੁਵਣ੍ਣੇਨ ਮੂਲਂ ਕਤ੍ਵਾ ਭਗਵਤੋ ਧਰਮਾਨਕਾਲੇ ¶ ਪਸ੍ਸੇਨਦਿਕੋਸਲਰਞ੍ਞਾ ਕਾਰਾਪਿਤਂ ਚਨ੍ਦਨਪ੍ਪਟਿਬਿਮ੍ਬਂਵਿਯ ਵਿਸੁਂ ਵਿਸੁਂ ਪਟਿਬਿਮ੍ਬਂ ਕਾਰਾਪੇਸਿ.

ਤੇਸਂ ਨਿਧਾਨਟ੍ਠਾਨਭੂਤਾਨਿ ਪਞ੍ਚ ਚੇਤਿਯਾਨਿਪਿ ਸਕ੍ਕੋ ਕਮ੍ਮ ਵਿਧਾਯਕੋ ਹੁਤ੍ਵਾ ਪਤਿਟ੍ਠਾਪੇਸਿ. ਏਤ੍ਥ ਚ ਪੁਬ੍ਬੇ ਰਞ੍ਞਾ ਪਸੀਦਿਤ੍ਵਾ ਥੇਰਸ੍ਸ ਰਾਜਕੁਮਾਰਾ ਦਿਨ੍ਨਾ, ਮੂਲਂ ਰਤਨਤ੍ਤਯਸ੍ਸ ਦਤ੍ਵਾ ਪੁਨ ਰਾਜਕੁਮਾਰੇ ਭੂਜਿਸ੍ਸੇ ਕਾਰੇਤੁਕਾਮਤਾਯ ਥੇਰੋ ਏਵਂ ਸਞ੍ਞਂ ਅਦਾਸੀਤਿ ਦਟ੍ਠਬ੍ਬਂ.

ਸੋ ਚ ਸੀਲਬੁਦ੍ਧਿਤ੍ਥੇਰੋ ਅਰਹਨ੍ਤਗਣਵਂਸੋਤਿ ਦਟ੍ਠਬ੍ਬੋ.

ਅਰਿਮਦ੍ਦਨਨਗਰੇਯੇਵ ਨਰਪਤਿ ਰਞ੍ਞੋ ਕਾਲੇ ਕਸ੍ਸਪੋ ਨਾਮ ਥੇਰੋ ਦੇਸਚਾਰਿਕਂ ਚਰਮਾਨੋ ਪੋਲ੍ਲੋਙ੍ਕਨਾਮਕਂ ਦੇਸਂ, ਤਦਵਸਰਿ. ਅਥ ਦ੍ਵੇ ਮਹਲ੍ਲਕਪੋਲ੍ਲੋਙ੍ਕਾ ਮਨੁਸ੍ਸਾ ਥੇਰੇ ਅਤਿਪ੍ਪਸਨ੍ਨਤਾਯ ਦ੍ਵੇ ਪੁਤ੍ਤੇ ਉਪਟ੍ਠਾਕਤ੍ਥਾਯ ਨਿਯ੍ਯਾਦੇਸੁਂ.

ਪੋਲ੍ਲੋਙ੍ਕਮਨੁਸ੍ਸਾਨਂ ਅਤਿਪ੍ਪਸਨ੍ਨਤਂ ਪਟਿਚ੍ਚ ਥੇਰੋਪਿ ਪੋਲ੍ਲੋਙ੍ਕਤ੍ਥੇਰੋਤਿ ਵੋਹਾਰਿਯਤਿ. ਯਦਾ ਚ ਪਨ ਸੋ ਥੇਰੋ ਸੀਹਲ਼ਦੀਪਂ ਗਨ੍ਤੁਕਾਮੋ ਅਹੋਸਿ, ਤਦਾ ਸਕ੍ਕੋ ਦੇਵਾਨਮਿਨ੍ਦੋ ਬ੍ਯਗ੍ਘਰੂਪਂ ਮਾਪੇਤ੍ਵਾ ਪਿਟ੍ਠਿਯਾ ਯਾਵ ਮਹਾਸਮੁਦ੍ਦਤੀਰਂ ਆਨੇਸਿ. ਮਹਾਸਮੁਦ੍ਦਤੀਰਂ ਪਨ ਪਤ੍ਵਾ ਨਾਵਂ ਅਭਿਰੂਹਿਤ੍ਵਾ ਵਾਣਿਜੇਹਿ ਸਦ੍ਧਿਂ ਤਰਿ.

ਮਹਾਸਮੁਦ੍ਦਮਜ੍ਝੇ ਪਨ ਪਤ੍ਵਾ ਸਾ ਨਾਵਾ ਨ ਗਚ੍ਛਿ, ਨਿਚ੍ਚਲਾਵ ਅਟ੍ਠਾਸਿ. ਅਥ ਵਾਣਿਜਾ ਮਨ੍ਤੇਸੁਂ,-ਅਮ੍ਹਾਕਂ ਨਾਵਾਯ ਅਲਕ੍ਖੀ ਪਾਪਜਨੋ ਅਤ੍ਥਿ ਮਞ੍ਞੇਤਿ. ਏਵਂ ਪਨ ਮਨ੍ਤੇਤ੍ਵਾ ਸਲਾਕਾਦਾਨਂ ਅਕਂਸੁ. ਯਾਵ ਤਤਿਯਮ੍ਪਿ ਥੇਰਸ੍ਸੇਵ ਹਤ੍ਥੇ ਸਲਾਕਾ ਪੁਬ੍ਬੇ ਕਤਕਮ੍ਮਵਿਪਾਕਵਸੇਨ ਨਿਪਤਿ. ਇਦਂ ਪਨ ਥੇਰਸ੍ਸ ਪੁਬ੍ਬੇ ਕਤਕਮ੍ਮਂ,-ਥੇਰੋ ਹਿ ਤਤੋ ਅਤ੍ਤਭਾਵਤੋ ਸਤ੍ਤਮੇ ਭਵੇ ਏਕਸ੍ਮਿਂ ਗਾਮੇ ਕੁਲਦਾਰਕੋ ਹੁਤ੍ਵਾ ਕੀਲ਼ਨਤ੍ਥਾਯ ਏਕਂ ਸੁਨਖਂ ਨਦਿਯਂ ਓਤਾਰੇਤ੍ਵਾ ਉਦਕੇ ਕੀਲ਼ਮਾਪੇਸਿ. ਏਵਂ ਕੀਲ਼ਮਨ੍ਤਂ ਸੁਨਖਂ ਸਯਮੇਵ ਉਰੇਨ ਉਗ੍ਗਹੇਤ੍ਵਾ ਤੀਰਂ ਆਨੇਸੀਤਿ ਏਵਂ ¶ ਪੁਬ੍ਬੇ ਕਤਕਮ੍ਮਵਿਪਾਕਵਸੇਨ ਥੇਰਸ੍ਸੇਵ ਹਤ੍ਥੇ ਸਲਾਕਾ ਨਿਪਤਿ.

ਤਦਾ ਵਾਣਿਜਾ ਉਦਕਪਿਟ੍ਠੇ ਖਿਪਿਂਸੁ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਕੁਮ੍ਭੀਲਰੂਪਂ ਮਾਪੇਤ੍ਵਾ ਪਿਟ੍ਠਿਯਂ ਆਰੋਪੇਤ੍ਵਾ ਆਨੇਸਿ. ਥੇਰੋ ਯਕ੍ਖਦੀਪਂ ਪਤ੍ਵਾ ਅਨ੍ਧਚਕ੍ਖੁਕਾਨਂ ਯਕ੍ਖਾਨਂ ਮੇਤ੍ਤਾਨੁਭਾਵੇਨ ਚਕ੍ਖੁਂ ਲਭਾਪੇਸਿ. ਯਕ੍ਖਾ ਚ ਥੇਰਸ੍ਸ ਗੁਣਂ ਞਤ੍ਵਾ ਦ੍ਵੇ ਯਕ੍ਖਭਾਤਿਕੇ ਅਦਂਸੁ. ਥੇਰੋ ਚ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਚੇਤਿਯਰੂਪਂ ਲੋਹਪਾਸਾਦਰੂਪਂ ਸਰੀਰਧਾਤੁਂ ਮਹਾਬੋਧਿਬਿਜਾਨਿ ਚ ਆਨੇਤ੍ਵਾ ਪਚ੍ਚਾਗਮਾਸੀਤਿ.

ਸੁਮੇਧਤ੍ਥੇਰੋ ਚ ਹਲਙ੍ਕਸ੍ਸ ਨਾਮ ਨਗਰਸ੍ਸ ਦਕ੍ਖਿਣਦਿਸਾਭਾਗੇ ਮ੍ਹਤ੍ਤਿਪਾਮੇ ਪੁਰਤ੍ਥਿਮਾਯ ਅਨੁਦਿਸਾਯ ਦਿਨ੍ਨਨਾਮਿਕੇ ਵਿਹਾਰੇ ਵਸਿ. ਠਾਨਸ੍ਸ ਪਨ ਨਾਮਵਸੇਨ ਥੇਰਸ੍ਸੋਪਿ ਦਿਨ੍ਨਵਿਹਾਰੋ ਤ੍ਵੇਵ ਨਾਮਂ ਅਹੋਸਿ. ਸੋਪਿ ਥੇਰੋ ਪਂਸੁਕੂਲਿਕੋ ਲਜ੍ਜੀਪੇਸਲੋ ਸਿਕ੍ਖਾਕਾਮੋ ਝਾਨਲਾਭੀ ਅਰਹਾਯੇਵ. ਸੋ ਹਿ ਦੇਵਸਿਕਂ ਦੇਵਸਿਕਂ ਅਟ੍ਠਨਵਯੋਜਨਪ੍ਪਮਾਣੇ ਪਾਦਚੇਤਿਯਂ ਗਨ੍ਤ੍ਵਾ ਵਨ੍ਦਿ. ਚੇਤਿਯਙ੍ਗਣਵਤ੍ਤਞ੍ਚ ਅਕਾਸਿ. ਤਤੋ ਆਗਨ੍ਤ੍ਵਾ ਮ੍ਹਤ੍ਤਿਗਾਮੇ ਪਿਣ੍ਡਾਯ ਚਰਿ. ਇਦਂ ਥੇਰਸ੍ਸ ਨਿਬਦ੍ਧਵਤ੍ਤਂ.

ਅਪਰਾਨਿਪਿ ਵਤ੍ਥੂਨਿ ਬਹੂਨਿ ਸਨ੍ਤਿ, ਸਬ੍ਬਾਨਿ ਪਨ ਤਾਨਿ ਵਿਤ੍ਥਾਰੇਤ੍ਵਾ ਵਤ੍ਤਬ੍ਬਾਨਿਪਿ ਗਨ੍ਥਪਾਰਵਭਯੇਨ ਨ ਵਕ੍ਖਾਮ. ਸਬ੍ਬਾਨਿਪਿ ਹਿ ਵੁਚ੍ਚਮਾਨਾਨਿ ਅਯਂ ਸਾਸਨਵਂਸਪ੍ਪਦੀਪਿਕਾ ਅਤਿਪ੍ਪਪਞ੍ਚਾ ਭਵਿਸ੍ਸਤਿ.

ਸਮ੍ਮਾਸਮ੍ਬੁਦ੍ਧਸ੍ਸ ਹਿ ਪਰਿਨਿਬ੍ਬਾਨਤੋ ਯਾਵਜ੍ਜਤਨਾ ਥੇਰਾਨਂ ਪਰਮ੍ਪਰਵਸੇਨ ਸਙ੍ਘਟ੍ਟੇਤ੍ਵਾ ਆਨਯਨਮੇਵੇਤ੍ਥ ਅਧਿਪ੍ਪੇਤਂ. ਯਥਾਵੁਤ੍ਤਾਨਿ ਪਨ ਵਤ੍ਥੂਨਿ ਅਧੁਨਾ ਅਭਿਞ੍ਞਾਲਾਭੀਨਂ ਪੁਗ੍ਗਲਾਨਂ ਅਖੇਤ੍ਤਭਾਵੇਨ ਪਸਙ੍ਗਞਾਣਪ੍ਪਟਿਬਾਹਣਤ੍ਥਂ ਅਰਿਮਦ੍ਦਨਨਗਰੇ ਚ ਬਹੂਨਂ ਅਭਿਞ੍ਞਾਲਾਭੀਨਂ ਪੁਗ੍ਗਲਾਨਂ ਨਿਵਾਸਟ੍ਠਾਨਤਾ ਦਸ੍ਸਨਤ੍ਥਂ ਵੁਤ੍ਤਾਨਿ. ਵੁਤ੍ਤਞ੍ਚੇਤਂ ਭਿਕ੍ਖੁਨੀਖਨ੍ਧਕਟ੍ਠਕਥਾਯਂ,–

ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ ¶ ਅਨਾਗਾਮੀਹਿ ਵਸ੍ਸਸਹਸ੍ਸਂ ਸਕਦਾਗਾਮੀਹਿ ਵਸ੍ਸਸਹਸ੍ਸਂ ਸੋਤਾਪਨ੍ਨੇਹਿ ਵਸ੍ਸਸਹਸ੍ਸਨ੍ਤਿ ਏਵਂ ਪਞ੍ਚਵਸ੍ਸਸਹਸ੍ਸਾਨਿ ਪਟਿਵੇਧਧਮ੍ਮੋ ਠਸ੍ਸਤੀਤਿ.

ਦੀਘਨਿਕਾਯਟ੍ਠਕਥਾਯਂ ਪਨ ਸਂਯੁਤ੍ਤਨਿਕਾਯਟ੍ਠਕਥਾਯਞ੍ਚ ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਛਲ਼ਾਭਿਞ੍ਞੇਹਿ ਵਸ੍ਸਸਹਸ੍ਸਂ ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ ਪਾਤਿਮੋਕ੍ਖੇਨ ਵਸ੍ਸਸਹਸ੍ਸਨ੍ਤਿ ਵੁਤ੍ਤਂ.

ਅਙ੍ਗੁਤ੍ਤਰਨਿਕਾਯਟ੍ਠਕਥਾਯਂ ਪਨ ਵਿਭਙ੍ਗਕਥਾਯਞ੍ਚ ਬੁਦ੍ਧਾਨਂ ਪਰਿਨਿਬ੍ਬਾਨਤੋ ਵਸ੍ਸਸਹਸ੍ਸਮੇਵ ਪਟਿਸਮ੍ਭਿਦਾ ਨਿਬ੍ਬਤ੍ਤੇਤੁਂ ਸਕ੍ਕੋਨ੍ਤਿ, ਤਤੋ ਪਰਂ ਛ ਅਭਿਞ੍ਞਾ, ਤਤੋਪਿ ਅਸਕ੍ਕੋਨ੍ਤਾ ਤਿਸ੍ਸੋ ਵਿਜ੍ਜਾ ਨਿਬ੍ਬਤ੍ਤਿਂਸੁ. ਗਚ੍ਛਨ੍ਤੇ ਕਾਲੇ ਤਾਪਿ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਸੁਕ੍ਖਵਿਪਸ੍ਸਕਾ ਹੋਨ੍ਤਿ. ਏਤੇਨੇਵ ਨਯੇਨ ਅਨਾਗਾਮਿਨੋ ਸਕਦਾਗਾਮਿਨੋ ਸੋਤਾਪਨ੍ਨਾਤਿ ਵੁਤ੍ਤਂ.

ਏਵਂ ਨਾਨਾਨਯੇਹਿ ਅਟ੍ਠਕਥਾਯਪਿ ਆਗਤਤ੍ਤਾ ਅਧੁਨਾ ਲੋਕੇ ਅਰਿਯਪੁਗ੍ਗਲਾ ਭਵਿਤੁਂ ਨ ਸਕ੍ਕਾਤਿ ਨ ਵਤ੍ਤਬ੍ਬਂ. ਅਰਿਯਾਨਮੇਵ ਖੇਤ੍ਤਸ੍ਸ ਅਧੁਨਾਪਿ ਸਮ੍ਭਵਤੋ, ਸਚੇ ਆਰਦ੍ਧਵਿਪਸ੍ਸਕੋ ਭਵੇਯ੍ਯ ਸੋ ਅਰਹਾ ਭਵਿਤੁਂ ਸਕ੍ਕਾਯੇਵਾਤਿ ਨਿਟ੍ਠਮੇਤ੍ਥਾਵਗਨ੍ਤਬ੍ਬਂ. ਅਟ੍ਠਕਥਾਸੁ ਪਨ ਨਾਨਾਭਾਣਕਤ੍ਥੇਰਾਨਂ ਨਾਨਾਵਾਦਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਤਕੇਨੇਵ ਪਨ ਨਾਨਾਕਾਰੇਨ ਵਾਦੋ ਭਿਨ੍ਨੋਪਿ ਸਾਸਨਂ ਭਿਜ੍ਜਤਿਯੇਵ. ਸਾਸਨਸ੍ਸ ਅਭਿਨ੍ਨਂਯੇਵ ਹਿ ਏਤ੍ਥ ਪਮਾਣਨ੍ਤਿ.

ਏਵਂ ਮਰਮ੍ਮਮਣ੍ਡਲੇ ਅਰਿਮਦ੍ਦਨਨਗਰੇ ਅਨੇਕੇਹਿ ਅਰਹਨ੍ਤਸਤੇਹਿ ਸਾਸਨਂ ਵਿਜ੍ਜੋਤਤਿ. ਭਗਵਤੋ ਪਨ ਪਰਿਨਿਬ੍ਬਾਨਤੋ ਤਿਂਸਾਧਿਕਾਨਂ ਨਵਵਸ੍ਸਸਤਾਨਂ ਉਪਰਿ ਪਰਮ੍ਮਰਟ੍ਠੇ ਸੇਞਿਲਞ੍ਞਿਕ੍ਰੋਧਿਨਾਮੇਨ ਰਞ੍ਞਾ ਸਮਕਾਲਵਸੇਨ ਸੀਹਲ਼ਦੀਪੇ ਰਜ੍ਜਂ ਪਤ੍ਤਸ੍ਸ ਮਹਾਨਾਮਰਞ੍ਞੋ ਕਾਲੇ ਬੁਦ੍ਧਘੋਸਬੁਦ੍ਧਦਤ੍ਤਤ੍ਥੇਰੇਹਿ ਪਭੁਤਿ ਤੇਤੇਮਹਾਥੇਰਾ ਤੇਤੇਗਨ੍ਥੇ ਅਕਂਸੁ.

ਤਤੋ ਪਚ੍ਛਾ ਸਤਿਸਮਾਧਿਪਞ੍ਞਾਮਨ੍ਦਵਸੇਨ ਸੁਖਾਵਬੋਧਨਤ੍ਥਂ ¶ ਟੀਕਾਯੋ ਅਕਂਸੁ. ਅਰਿਮਦ੍ਦਨਨਗਰੇ ਜਿਨਚਕ੍ਕੇਸਤ੍ਤਨਵੁਤਾਧਿਕੇ ਛਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਿਣ੍ਣਂ ਪਿਟਕਾਨਂ ਮੂਲਭੂਤੇਸੁ ਸਦ੍ਦਨਯੇਸੁ ਸੋਤਾਰਾਨਂ ਛੇਕਤ੍ਥਾਯ ਮਹਾਸਮੁਦ੍ਦੇਵਿਯ ਆਨਨ੍ਦੋ ਨਾਮ ਮਹਾਮਚ੍ਛੋ ਤੀਸੁ ਪਿਟਕੇਸੁ ਸਾਟ੍ਠਕਥੇਸੁ ਵਿਲੋਲੇਤ੍ਵਾ ਅਗ੍ਗਵਂਸੋ ਨਾਮ ਥੇਰੋ ਸਦ੍ਦਨੀਤਿਪ੍ਪਕਰਣਂ ਅਕਾਸਿ. ਅਰਿਮਦ੍ਦਨਨਗਰੇ ਹਿ ਉਤ੍ਤਰਾਜੀਵਤ੍ਥੇਰਾਦੀਨਂ ਸੀਹਲ਼ਦੀਪਂ ਗਮਨਤੋ ਪੁਬ੍ਬੇਯੇਵ ਤਯੋ ਮਹਾਥੇਰਾ ਪਰਿਯਤ੍ਤਿਵਿਸਾਰਦਾ, ਮਹਾਅਗ੍ਗਪਣ੍ਡਿਤੋ, ਤਸ੍ਸ ਸਦ੍ਧਿਵਿਹਾਰਿਕੋ ਦੁਤਿਯਅਗ੍ਗਪਣ੍ਡਿਤੋ, ਤਸ੍ਸ ਭਾਗਿਨੇਯ੍ਯੋ ਤਤਿਯਅਗ੍ਗਪਣ੍ਡਿਤੋਤਿ. ਤਤਿਯਅਗ੍ਗਪਣ੍ਡਿਤੋ ਪਨ ਅਗ੍ਗਵਂਸੋਤਿਪਿ ਵੋਹਾਰਿਯਤਿ.

ਤਸ੍ਮਿਞ੍ਚ ਕਾਲੇ ਅਰਿਮਦ੍ਦਨਨਗਰਵਾਸਿਨੋ ਸਦ੍ਦਕੋਵਿਦਾ ਬਹਵੋ ਸਨ੍ਤੀਤਿ ਯਾਵ ਲਙ੍ਕਾਦੀਪਾ ਕਿਤ੍ਤਿਘੋਸੋ ਪਤ੍ਥਰਿ. ਤਸ੍ਮਾ ਸੀਹਲ਼ਦੀਪਿਕਾ ਸਦ੍ਦਕੋਵਿਦਾ ਵੀਮਂਸੇਤੁਕਾਮਾ ਹੁਤ੍ਵਾ ਅਰਿਮਦ੍ਦਨਨਗਰਂ ਆਗਮਂਸੁ. ਤਦਾ ਅਰਿਮਦ੍ਦਨਨਗਰਵਾਸਿਨੋ ਭਿਕ੍ਖੂ ਸਦ੍ਦਨੀਤਿਪ੍ਪਕਰਣਂ ਦਸ੍ਸੇਸੁ.

ਸੀਹਲ਼ਦੀਪਿਕਾ ਚ ਤਂ ਦਿਸ੍ਵਾ ਉਪਧਾਰੇਨ੍ਤਾ ਸਦ੍ਦਵਿਸਯੇ ਅਯਂ ਗਨ੍ਥੋਵਿਯ ਸੀਹਲ਼ਦੀਪੇ ਗਨ੍ਥੋ ਇਤ੍ਥਿ, ਇਮਸ੍ਮਿਂ ਪਕਰਣੇ ਆਗਤਵਿਨਿਚ੍ਛਯਮ੍ਪਿ ਸਕਲਂ ਨ ਜਾਨਿਮ੍ਹਾਤਿ ਨਾਨਾਪ੍ਪਕਾਰੇਹਿ ਥੋਮੇਸੁਨ੍ਤਿ ਯਾਵਜ੍ਜਭਨਾ ਕਥਾਮਗ੍ਗੋ ਨ ਉਪਚ੍ਛਿਨ੍ਨੋਤਿ.

ਅਰਿਮਦ੍ਦਨਨਗਰੇ ਸੀਹਲ਼ਦੀਪਂ ਗਨ੍ਤ੍ਵਾ ਪਚ੍ਚਾਗਤੋ ਛਪ੍ਪਦੋ ਨਾਮ ਸਦ੍ਧਮ੍ਮਜੋਤਿਪਾਲਤ੍ਥੇਰੋ ਸਦ੍ਦਨਯੇ ਛੇਕਤਾਯ ਸੁਤ੍ਤਨਿਦ੍ਦੇਸਂ ਅਕਾਸਿ. ਪਰਮਤ੍ਥਧਮ੍ਮੇ ਚ ਛੇਕਤਾਯ ਸਙ੍ਖੇਪਵਣ੍ਣਨਂ ਨਾਮਚਾਰਦੀਪਕਞ੍ਚ. ਵਿਨਯੇ ਛੇਕਤਾਯ ਵਿਨਯਗੂਲ਼ਤ੍ਥਦੀਪਨਿਂ ਸੀਮਾਲਙ੍ਕਾਰਞ੍ਚ ਅਕਾਸਿ. ਅਤ੍ਤਨਾ ਕਥਾਨਂ ਗਨ੍ਥਾਨਂ ਨਿਗਮੇ ਸਦ੍ਧਮ੍ਮ ਜੋਤਿਪਾਲੋਤਿ ਮੂਲਨਾਮੇਨ ਵੁਤ੍ਤਂ. ਕੁਸਿਮਨਗਰੇ ਪਨ ਛਪ੍ਪਦ ਗਾਮੇ ਜਾਤਤ੍ਤਾ ਠਾਨਸ੍ਸ ਨਾਮੇਨ ਛਪ੍ਪਦੋਤਿ ਪਾਕਟੋ.

ਕੁਖਨਨਗਰੇ ਪਨ ਛਪ੍ਪਦੋਤਿ ਵੋਹਾਰਿਤੋਪਿ ਏਕੋ ਥੇਰੋ ਅਤ੍ਥਿ. ਸੋ ਅਲਜ੍ਜੀ ਦੁਸ੍ਸੀਲੋ. ਏਕਚ੍ਚੇ ਪਨ ਨਾਮਸਾਮਞ੍ਞਲੇਸਮਤ੍ਤੇਨ ਪਤ੍ਤਲਙ੍ਕਂ ਸੀਲਵਨ੍ਤਂ ਪੇਸਲਂ ਸਿਕ੍ਖਾਕਾਮਂ ਛਪ੍ਪਦਤ੍ਥੇਰਂ ਅਲਜ੍ਜਿਦੁਸ੍ਸੀਲਭਾਵੇਨ ਉਪਵਦਨ੍ਤਿ, ਯਥਾ ਨਾਮ ਸਾਮਞ੍ਞਲੇਸਮਤ੍ਤੇਨ ਮਲ੍ਲਪੁਤ੍ਤਂ ਆਯਸ੍ਮਨ੍ਤਂ ਦਬ੍ਬਂ ਅਸਮਾਚਾਰੇਨਾਤਿ.

ਅਰਿਮਦ੍ਦਨਨਗਰਯੇਵ ਅਲੋਙ੍ਗਚਞ੍ਞਿਸੂਨਾਮਕਸ੍ਸ ਰਞ੍ਞੋ ਕਾਲੇ ਮਹਾਵਿਮਲਬੁਦ੍ਧਿਤ੍ਥੇਰੋ ਚੂਲ਼ਵਿਮਲਬੁਦ੍ਧਿਤ੍ਥੇਰੋਤਿ ਦ੍ਵੇ ਥੇਰਾ ਪਰਿਯਤ੍ਤਿਵਿਸਾਰਦਾ ਅਹੇਸੁਂ. ਤੇਸੁ ਮਹਾਵਿਮਲਬੁਦ੍ਧਿਤ੍ਥੇਰੋ ਕਚ੍ਚਾਯਨਸ੍ਸ ਸਂਵਣ੍ਣਨਂ ਨ੍ਯਾਸਗਨ੍ਥਮਕਾਸਿ.

ਕੇਚਿ ਪਨ ਸੀਹਲ਼ਦੀਪਵਾਸੀ ਵਿਮਲਬੁਦ੍ਧਿਤ੍ਥੇਰੋ ਤਮਕਾਸੀਤਿ ਵਦਨ੍ਤਿ. ਚੂਲ਼ਵਿਮਲਬੁਦ੍ਧਿਤ੍ਥੇਰੋ ਪਨ ਵੁਤ੍ਤੋਦਯਸ੍ਸ ਪੋਰਾਣਟੀਕਮਕਾਸਿ. ਛਨ੍ਦੋਸਾਰਤ੍ਥਵਿਕਾਸਿਨਿਂ ਸਦ੍ਧਮ੍ਮਞਾਣਤ੍ਥੇਰੋ ਅਕਾਸਿ. ਵਚਨਤ੍ਥਜੋਤਿਂ ਪਨ ਵੇਪੁਲ੍ਲਤ੍ਥੇਰੋ ਅਕਾਸਿ. ਨ੍ਯਾਸਗਨ੍ਥਸ੍ਸਪੋਰਾਣਟੀਕਂ ਨਰਪਤਿਰਞ੍ਞੋ ਕਾਲੇ ਏਕੋ ਅਮਚ੍ਚੋ ਅਕਾਸਿ.

ਸੋ ਹਿ ਰਞ੍ਞੋ ਏਕਂ ਓਰੋਧਂ ਪਟਿਚ੍ਚ ਜਾਤਂ ਏਕਂ ਧੀਤਰਂ ਦਿਸ੍ਵਾ ਵਾਨਰੋਵਿਯ ਲੇਪੇ ਲਗ੍ਗਿਤੋ ਤਿਸ੍ਸਂ ਪਟਿਬਨ੍ਧਚਿਤ੍ਤੋ ਹੁਤ੍ਵਾ ਲਗ੍ਗਿ. ਤਮਤ੍ਥਂ ਜਾਨਿਤ੍ਵਾ ਰਾਜਾ ਏਵਮਾਹ,– ਸਚੇ ਏਤਂ ਇਚ੍ਛੇਯ੍ਯਾਸਿ, ਏਕਂ ਗਨ੍ਥਂ ਪਰਿਪੁਣ੍ਣਵਿਨਿਚ੍ਛਯਂ ਗੂਲ਼ਤ੍ਥਂ ਕਰੋਹਿ, ਸਚੇ ਤ੍ਵਂ ਤਾਦਿਸਂ ਗਨ੍ਥਂ ਕਾਤੁਂ ਸਕ੍ਕੁਣੇਯ੍ਯਾਸਿ, ਏਤਂ ਲਭਿਸ੍ਸਸੀਤਿ. ਅਥ ਸੋ ਨ੍ਯਾਸਸ੍ਸ ਸਂਵਣ੍ਣਨਂ ਪੋਰਾਣਟੀਕਂ ਅਕਾਸਿ.

ਤਤੋ ਪਚ੍ਛਾ ਹੀਨਾਯਾਵਤ੍ਤਿਤ੍ਵਾ ਧੀਤਰਂ ਦਤ੍ਵਾ ਰਜ੍ਜੁਗ੍ਗਾਹਾਮਚ੍ਚਟ੍ਠਾਨੇ ਠਪੇਸਿ, ਯਂ ਮਰਮ੍ਮਵੋਹਾਰੇਨ ਸਂਪ੍ਯਙ੍ਗਇਤਿ ਵੁਚ੍ਚਤਿ. ਤੇਨ ਪਨ ਕਤਤ੍ਤਾ ਸੋਪਿ ਗਨ੍ਥੋ ਤਂ ਨਾਮੇਨ ਵੁਚ੍ਚਤਿ. ਕਾਰਿਕਂ ਤਸ੍ਸਾ ਚ ਸਂਵਣ੍ਣਨਂ ਛਤ੍ਤਗੁਹਿਨ੍ਦਸ੍ਸ ਨਾਮ ਰਞ੍ਞੋ ਕਾਲੇਧਮ੍ਮਸੇਨਾਪਤਿਤ੍ਥੇਰੋ ਅਕਾਸਿ. ਤੇਨ ਕਿਰ ਕਾਰਪਿਤੇ ਨਨ੍ਦਗੁਹਾਯ ਸਮੀਪੇ ਨਨ੍ਦਵਿਹਾਰੇ ਨਿਸੀਦਿਤ੍ਵਾ ਅਕਾਸਿ.

ਤਸ੍ਮਿਞ੍ਚਕਾਲੇ ¶ ਗਨ੍ਥਮਾਦਨਪਬ੍ਬਤੇ ਨਨ੍ਦਮੂਲਗੁਹਤੋ ਅਰਹਨ੍ਤਾ ਆਗਨ੍ਤ੍ਵਾ ਤਸ੍ਮਿਂ ਵਿਹਾਰੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਮ੍ਮੁਖੇ ਕਤਤ੍ਤਾ ਤੇ ਚ ਗਨ੍ਥਾ ਪਣ੍ਡਿਤੇਹਿ ਸਾਰਤੋ ਪਚ੍ਚੇਤਬ੍ਬਾਤਿ ਆਚਰਿਯਾ ਵਦਨ੍ਤਿ.

ਵਾਚ੍ਚਵਾਚਕਂ ਪਨ ਧਮ੍ਮਦਸ੍ਸੀ ਨਾਮ ਸਾਮਣੇਰੋ ਅਕਾਸਿ.

ਸਦ੍ਦਤ੍ਥਭੇਦਚਿਨ੍ਤਂ ਪਨ ਅਰਿਮਦ੍ਦਨਨਗਰਸਮੀਪੇ ਠਿਤਸ੍ਸ ਖਣਿਤ੍ਤਿਪਾਦਪਬ੍ਬਤਸ੍ਸ ਸਮੀਪੇ ਏਕਸ੍ਮਿਂ ਗਾਮੇ ਵਸਨ੍ਤੋ ਸਦ੍ਧਮ੍ਮਸਿਰਿ ਨਾਮ ਥੇਰੋ ਅਕਾਸਿ. ਸੋਯੇਵ ਥੇਰੋ ਬ੍ਰਹਜਂ ਨਾਮ ਵੇਦਸਤ੍ਥਮ੍ਪਿ ਮਰਮ੍ਮਭਾਸਾਯ ਪਰਿਵਤ੍ਤੇਸਿ.

ਏਕਕ੍ਖਰਕੋਸਂ ਪਨ ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਅਕਾਸਿ. ਸੋ ਹਿ ਕਲਿਯੁਗੇ ਸਤ੍ਤਾਸੀਤਾਧਿਕੇ ਅਟ੍ਠਸਤੇ ਸਮ੍ਪਤ੍ਤੇ ਮਿਚ੍ਛਾ ਦਿਟ੍ਠਿਕਾਨਂ ਜਲੁਮਸਞ੍ਞਿਤਾਨਂ ਕੁਲਾਨਂ ਭਯੇਨ ਸਕਲੇਪਿ ਤਮ੍ਬਦੀਪਰਟ੍ਠੇ ਸਾਸਨੋਭਾਸੋ ਮਿਲਾਯਤਿ. ਬਹੂਨਿਪਿ ਪੋਤ੍ਥਕਾਨਿ ਅਗ੍ਗਿਭਯੇਨ ਨਸ੍ਸੇਸੁਂ.

ਤਦਾ ਤਂ ਪਵਤ੍ਤਿਂ ਪਸ੍ਸਿਤ੍ਵਾ ਸਚੇ ਪਰਿਯਤ੍ਤਿਧਮ੍ਮੋਵਿਨਸ੍ਸੇਯ੍ਯ, ਪਟਿਪਤ੍ਤਿਧਮ੍ਮੋਪਿ ਨਸ੍ਸਿਸ੍ਸਤਿ, ਪਟਿਪਤ੍ਤਿਧਮ੍ਮੇ ਨਸ੍ਸਨ੍ਤੇ ਕੁਤੋ ਪਟਿਵੇਧਧਮ੍ਮੋ ਭਵਿਸ੍ਸਤੀਤਿ ਸਂਵੇਗਂ ਅਪਜ੍ਜਿਤ੍ਵਾ ਇਮਂ ਗਨ੍ਥਂ ਅਕਾਸੀਤਿ ਤਟ੍ਟਿਕਾਯਂ ਵੁਤ੍ਤਂ.

ਮੁਖਮਤ੍ਤਸਾਰਂ ਸਾਗਰਤ੍ਥੇਰੋ ਅਕਾਸਿ.

ਕਲਿਯੁਗੇ ਏਕਾਸੀਤਾਧਿਕੇ ਪਞ੍ਚਸਤੇ ਸਮ੍ਪਤ੍ਤੇ ਏਕਂ ਦਹਰਪੁਤ੍ਤਂ ਕਾਲਙ੍ਕਤਂ ਪਟਿਚ੍ਚ ਸਂਵੇਗਂ ਆਪਜ੍ਜਿਤ੍ਵਾ ਪਚ੍ਚੇਕਬੁਦ੍ਧਤ੍ਤਂ ਪਤ੍ਥਯਨ੍ਤਸ੍ਸ ਜੇਯ੍ਯਸਿਙ੍ਖਨਾਮਕਸ੍ਸ ਰਞ੍ਞੋ ਪੁਤ੍ਤੋ ਕ੍ਯਚ੍ਵਾਨਾਮਕੋ ਰਾਜਾ ਰਜ੍ਜਂ ਕਾਰੇਸਿ. ਧਮ੍ਮਰਾਜਾਤਿਪਿ ਨਾਮਲਞ੍ਛਂ ਪਟਿਗ੍ਗਣ੍ਹਿ. ਤੀਸੁ ਪਨ ਪਿਟਕੇਸੁ ਯਥਾਭੂਤਂ ਵਿਜਾਨਕਤਾਯ ਮਰਮ੍ਮਵੋਹਾਰੇਨ ਕ੍ਯਚ੍ਵਾਤਿ ਵੋਹਾਰਿਯਤਿ.

ਸੋ ਚ ਕਿਰ ਰਾਜਾ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਤਿਛੇਕਤਾਯ ਪਿਟਕਤ੍ਤਯੇ ਸਾਕਚ੍ਛਮਤ੍ਤਮ੍ਪਿ ਕਾਤੁਂ ਸਮਤ੍ਥੋ ¶ ਨਾਮ ਨਤ੍ਥੀਤਿ ਉਗ੍ਗਹਿਤਤਿਪਿਟਕੋ ਹੁਤ੍ਵਾ ਭਿਕ੍ਖੁਸਙ੍ਘਮ੍ਪਿ ਦਿਵਸੇ ਸਤ੍ਤਹਿ ਵਾਰੇਹਿ ਗਨ੍ਥਂ ਵਾਚੇਤਿ.

ਖਣਿਤ੍ਤਿਪਾਦਪਬ੍ਬਤਸ੍ਸ ਸਮੀਪੇਪਿ ਏਕਂ ਤਲ਼ਾਕਂ ਕਾਰਾਪੇਤ੍ਵਾ ਤਤ੍ਥ ਰਾਜਾਗਾਰਂ ਕਾਰਾਪੇਤ੍ਵਾ ਤਤ੍ਥ ਨਿਸੀਦਿਤ੍ਵਾ ਗਨ੍ਥਂ ਵਾਚੇਤਿ. ਸਬ੍ਬਾਨਿ ਪਨ ਰਾਜੂਨਂ ਕਿਚ੍ਚਾਨਿ ਪੁਤ੍ਤਸ੍ਸੇਵ ਉਪਰਾਜਸ੍ਸ ਨਿਯ੍ਯਾਦੇਸਿ. ਗਨ੍ਥਂ ਉਗ੍ਗਣ੍ਹਨ੍ਤਾਨਂ ਓਰੋਧਾਨਮਤ੍ਥਾਯ ਸਙ੍ਖੇਪਤੋ ਸਦ੍ਦਬਿਨ੍ਦੁਂ ਨਾਮ ਪਕਰਣਂ ਪਰਮਤ੍ਥਬਿਨ੍ਦੁਞ੍ਚ ਨਾਮ ਪਕਰਣਂ ਅਕਾਸਿ. ਤਸ੍ਸ ਹਿ ਚਿਤ੍ਤਂ ਪਰਿਯਤ੍ਤਿਯਂਯੇਵ ਰਮਤਿ. ਅਞ੍ਞਂ ਪਨ ਰਾਜਕਿਚ੍ਚਂ ਸੁਣਿਤੁਮ੍ਪਿ ਨ ਇਚ੍ਛਿ. ਅਨੁਰੁਦ੍ਧਰਾਜਾ ਅਨਾਗਤੇ ਅਹਂ ਰਾਜਾ ਭਵੇਯ੍ਯਾਮਿ, ਤਦਾਯੇਵ ਇਮਾਨਿ ਤਾਲ਼ਿਬੀਜਾਨਿ ਉਟ੍ਠਹਨ੍ਤੂਤਿ ਅਧਿਟ੍ਠਹਿਤ੍ਵਾ ਰੋਪੇਸਿ. ਤਾਨਿ ਤਸ੍ਸ ਰਞ੍ਞੋ ਕਾਲੇ ਉਟ੍ਠਹਿਂਸੁ. ਤੇਨੇਵ ਅਨੁਰੁਦ੍ਧਰਾਜਾਯੇਵਾਯਨ੍ਤਿ ਰਟ੍ਠਵਾਸਿਨੋ ਸਞ੍ਜਾਨਿਂਸੁ. ਸਮ੍ਮੁਤਿਰਾਜਾ ਹਿ ਅਨੁਰੁਦ੍ਧਰਾਜਾ ਕ੍ਯਚ੍ਵਾਰਾਜਾਤਿ ਇਮੇ ਤਯੋ ਏਕਸਨ੍ਤਾਨਾਤਿ ਵਦਨ੍ਤਿ.

ਸੋ ਰਾਜਾ ਏਕਮ੍ਪਿ ਚੇਤਿਯਂ ਅਕਾਸਿ, ਨ ਤਂ ਨਿਟ੍ਠਂ ਅਗਮਾਸਿ, ਪਰਿਯਤ੍ਤਿਯਂਯੇਵ ਪਰਿਚਾਰਕਤ੍ਤਾਤਿ ਰਾਜਵਂਸੇ ਆਗਤਂ. ਲੋਕਸਮ੍ਮੁਤਿਵਸੇਨ ਕਕ੍ਖਲ਼ਦਿਨੇ ਇਟ੍ਠਕਾਨਿ ਕਾਰਾਪੇਤ੍ਵਾ ਤਸ੍ਮਿਂਯੇਵ ਦਿਨੇ ਭੂਮਿਸਮਂ ਕਤ੍ਵਾ ਤਸ੍ਮਿਂਯੇਵ ਦਿਨੇ ਅਞ੍ਞਮ੍ਪਿ ਸਬ੍ਬਂ ਕਾਰਾਪੇਸਿ. ਤੇਨ ਮਰਮ੍ਮਵੋਹਾਰੇਨ ਪ੍ਰਸ੍ਸਦਾ ਚੇਤਿਯਨ੍ਤਿ ਯਾਵਜ੍ਜਭਨਾ ਪਾਕਟਂ.

ਤਸ੍ਸ ਰਞ੍ਞੋ ਏਕਾ ਧਿਭਾ ਵਿਭਤ੍ਯਤ੍ਥਂ ਨਾਮ ਗਨ੍ਥਂ ਅਕਾਸੀਤਿ.

ਪੁਬ੍ਬੇ ਕਿਰ ਅਰਿਮਦ੍ਦਨਨਗਰੇ ਉਗ੍ਗਹਧਾਰਣਾਦਿਵਸੇਨ ਸਾਸਨਂ ਅਤਿਵਿਯ ਵਿਰੂਲ਼ਮਾਪਜ੍ਜਿ. ਅਰਿਮਦ੍ਦਨਨਗਰੇਯੇਵ ਹਿ ਏਕੋ ਵੁਡ੍ਢਪਬ੍ਬਜਿਤੋ ਭਿਕ੍ਖੁ ਗਨ੍ਥਂ ਲਿਖਿਤੁਂ ਸਿਲਾਲੇਖਨਦਣ੍ਡੇਨ ਇਚ੍ਛਨ੍ਤੋ ਰਾਜਗੇਹਂ ਪਾਵਿਸਿ. ਰਾਜਾ ਕੇਨ ਆਗਤੋਸੀਤਿ ਪੁਚ੍ਛਿ. ਗਨ੍ਥਂ ਲਿਖਿਤੁਂ ਸਿਲਾਲੇਖਨਦਣ੍ਡੇਨ ਇਚ੍ਛਨ੍ਤੋ ਆਗਤੋ ਮ੍ਹੀਤਿ. ਏਵਂ ਮਹਲ੍ਲਕੋ ਤ੍ਵਂ ਗਨ੍ਥਂ ਮਹੁਸ੍ਸਾਹੇਨ ਪਰਿਯਾਪੁਣਨ੍ਤੋਪਿ ¶ ਗਨ੍ਥੇਸੁ ਛੇਕਸ੍ਸ ਓਕਾਸਂ ਨ ਪਸ੍ਸਾਮਿ, ਸਚੇ ਹਿਮੁਸਲੋ ਅਙ੍ਕੁਰਂ ਉਟ੍ਠਾਪੇਤ੍ਵਾ ਰੂਹੇਯ੍ਯ, ਏਵਂ ਸਤਿ ਤ੍ਵਂ ਗਨ੍ਥੇਸੁ ਛੇਕਤਂ ਆਪਜ੍ਜੇਯ੍ਯਾਸੀਤਿ ਆਹ.

ਤਤੋ ਪਚ੍ਛਾ ਵਿਹਾਰਂ ਗਨ੍ਤ੍ਵਾ ਦੇਵਸਿਕਂ ਦੇਵਸਿਕਂ ਏਕਦਨ੍ਤਕਟ੍ਠਪ੍ਪਮਾਣਤ੍ਤਂ ਲੇਖਨਂ ਉਗ੍ਗਹੇਤ੍ਵਾ ਕਚ੍ਚਾਯਨਅਭਿਧਮ੍ਮੇਤ੍ਥਸਙ੍ਗਹਪ੍ਪਕਰਣਂ ਆਦਿਂ ਕਤ੍ਵਾ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਣ੍ਹਿ. ਸੋ ਅਚਿਰੇਨੇਵ ਗਨ੍ਥੇਸੁ ਛੇਕਤਂ ਪਤ੍ਵਾ ਮੁਸਲੇ ਜਮ੍ਬੁਰੁਕ੍ਖਙ੍ਕੁਰਂ ਬਨ੍ਧਿਤ੍ਵਾ ਉਸ੍ਸਾਪੇਤ੍ਵਾ ਰਾਜਗੇਹਂ ਪਾਵਿਸਿ.

ਅਥ ਤਂ ਰਾਜਾ ਪੁਚ੍ਛਿ,-ਕੇਨਆਗਤੋਸੀਤਿ. ਅਯਂ ਮਹਾਰਜ ਮੁਸਲੋ ਅਙ੍ਕੁਰਂ ਉਟ੍ਠਾਪੇਤ੍ਵਾ ਰੂਹਤੀਤਿ ਆਚਿਕ੍ਖਿਤੁਂ ਆਗਤੋਮ੍ਹੀਤਿ ਵੁਤ੍ਤੇ ਰਾਜਾ ਏਤਸ੍ਸ ਗਨ੍ਥੇਸੁ ਛੇਕਤਂ ਪਤ੍ਤੋਮ੍ਹੀਤਿ ਵੁਤ੍ਤਂ ਹੋਤੀਤਿ ਜਾਨਾਸਿ. ਤਂ ਸਚ੍ਚਂ ਵਾ ਅਲਿਕਂ ਵਾਤਿ ਵੀਮਂਸਨਤ੍ਥਾਯ ਮਹਾਥੇਰਾਨਂ ਸਨ੍ਤਿਕਂ ਪਹਿਣਿ. ਮਹਾਥੇਰਾਪਿ ਗੂਲ਼ਟ੍ਠਾਨਂ ਪੁਚ੍ਛਿਂਸੁ. ਸੋਪਿ ਪੁਚ੍ਛਿਤਂ ਪੁਚ੍ਛਿਤਂ ਬ੍ਯਾਕਾਸਿ.

ਅਥ ਸੋ ਭਿਕ੍ਖੁ ਮਹਾਥੇਰੇ ਏਵਮਾਹ,-ਤੁਮ੍ਹੇ ਭਨ੍ਤੇ ਮਂ ਬਹੂ ਪੁਚ੍ਛਥ, ਅਹਮ੍ਪਿ ਤੁਮ੍ਹੇ ਪੁਚ੍ਛਿਤੁਂ ਇਚ੍ਛਾਮਿ, ਓਕਾਸਂ ਦੇਥਾਤਿ ਯਾਚਿਤ੍ਵਾ ਅਞ੍ਞਸਮਾਨਚੇਤਸਿਕਨ੍ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਵਧ੍ਯਾਪੇਕ੍ਖਤ੍ਤਾ ਅਵਧਿਪਦਂ ਉਦ੍ਧਰਿਤ੍ਵਾ ਦਸ੍ਸੇਥਾਤਿ ਪੁਚ੍ਛਿ. ਮਹਾਥੇਰਾਪਿ ਪੁਬ੍ਬੇ ਅਮਨਸਿਕਤਤ੍ਤਾ ਸੀਘਂ ਵਿਸ੍ਸਜ੍ਜਿਤੁਂ ਨ ਸਕ੍ਖਿਂਸੁ. ਰਾਜਾ ਤਮਤ੍ਥਂ ਸੁਤ੍ਵਾ ਤੁਟ੍ਠਚਿਤ੍ਤੋ ਹੁਤ੍ਵਾ ਦਿਸਾ ਪਾਮੋਕ੍ਖਨਮੇਨ ਆਚਰਿਯਟ੍ਠਾਨੇ ਠਪੇਸਿ. ਸੋ ਪਨ ਭਿਕ੍ਖੁ ਅਗਨ੍ਥਕਾਰਕੋਪਿ ਗਨ੍ਥਕਾਰਕੋਵਿਯ ਪਚ੍ਛਿਮਾਨਂ ਜਨਤਾਨਂ ਦਿਨ੍ਨੋਪਦੇਸਵਸੇਨ ਉਪਕਾਰਂ ਕਤ੍ਵਾ ਸਾਸਨੇ ਉਪ੍ਪਜ੍ਜੀਤਿ. ਹੋਨ੍ਤਿ ਚੇਤ੍ਥ,–

ਅਹਂ ਮਹਲ੍ਲਕੋ ਹੋਮਿ, ਦੁਪ੍ਪਞ੍ਞੋ ਪਰਿਯਤ੍ਤਿਕਂ;

ਉਗ੍ਗਹਂ ਮਹੁਸ੍ਸਾਹੇਨ, ਨ ਸਕ੍ਖਿਸ੍ਸਾਮਿ ਜਾਨਿਤੁਂ.

ਏਵਞ੍ਚ ¶ ਨਾਤਿਮਞ੍ਞੇਯ੍ਯ,

ਨਾਪ੍ਪੋਸ੍ਸੁਕ੍ਕਤਮਾਪਜ੍ਜੇ;

ਸਦ੍ਧਮ੍ਮੇ ਛੇਕਕਾਮੋਵ,

ਉਸ੍ਸਾਹਂਵ ਕਰੇ ਪੋਸੋ.

ਵੁਡ੍ਢਪਬ੍ਬਜਿਤੋ ਭਿਕ੍ਖੁ,

ਮਹਲ੍ਲਕੋਪਿ ਦੁਪ੍ਪਞ੍ਞੋ;

ਆਪਜ੍ਜਿ ਛੇਕਤਂ ਧਮ੍ਮੇ,

ਤਮਪੇਕ੍ਖਨ੍ਤੁ ਸੋਤਾਰੋਤਿ.

ਪੁਬ੍ਬੇ ਕਿਰ ਅਰਿਮਦ੍ਦਨਨਗਰੇ ਮਾਤੁਗਾਮਾਪਿ ਗਨ੍ਥਂ ਉਗ੍ਗਣ੍ਹਿਂਸੁ. ਯੇਭੁਯ੍ਯੇਨ ਉਗ੍ਗਹਧਾਰਣਾਦਿਵਸੇਨ ਪਰਿਯਤ੍ਤਿਸਾਸਨਂ ਪਗ੍ਗਹੇਸੁਂ. ਮਾਤੁਗਾਮਾ ਹਿ ਅਞ੍ਞਮਞ੍ਞਂ ਪਸ੍ਸਨ੍ਤਾ ਤੁਮ੍ਹੇ ਕਿਤ੍ਤਕਂ ਗਨ੍ਥਂ ਉਗ੍ਗਣ੍ਹਥ, ਕਿਤ੍ਤਕਂ ਗਨ੍ਥਂ ਵਾਚੁਗ੍ਗਤਂ ਕਰੋਥਾਤਿ ਪੁਚ੍ਛਿ ਸੁਨ੍ਤਿ.

ਏਕੋ ਕਿਰ ਮਾਤੁਗਾਮੋ ਏਕਂ ਮਾਤੁਗਾ,ਮਂ ਪੁਚ੍ਛਿ,-ਤ੍ਵਂ ਇਦਾਨਿ ਕਿਤ੍ਤਕਂ ਗਨ੍ਥਂ ਵਾਚੁਗ੍ਗਤਂ ਕਰੋਸੀਤਿ. ਅਹਂ ਪਨ ਇਦਾਨਿ ਦਹਰਪੁਤ੍ਤੇਹਿ ਬਲਿਬੋਧਤ੍ਤਾ ਬ੍ਯਾਕੁਲਂ ਪਤ੍ਵਾ ਬਹੁਂ ਗਨ੍ਥਂ ਵਾਚੁਗ੍ਗਤਂ ਕਾਤੁਂ ਨਸਕ੍ਕਾ,ਸਮਨ੍ਤਮਹਾਪਟ੍ਠਾਨੇ ਪਨ ਕੁਸਲਤ੍ਤਿਕਮਤ੍ਤਂਵ ਵਾਚੁਗ੍ਗਤਂ ਕਰੋਮੀਤਿ ਆਹਾਤਿ.

ਇਦਮ੍ਪਿ ਅਰਿਮਦ੍ਦਨਨਗਰਵਾਸੀਨਂ ਮਾਤੁਗਾਮਾਨਮ੍ਪਿ ਪਰਿਯਤ੍ਤੁਗ੍ਗਹਣੇ ਏਕਂ ਵਤ੍ਥੁ,–

ਏਕਂ ਕਿਰ ਭਿਕ੍ਖੁਂ ਪਿਣ੍ਡਾਯ ਚਰਨ੍ਤਂ ਏਕਾ ਦ੍ਵਾਦਸਵਸ੍ਸਿਕਾ ਦਹਰਿਤ੍ਥੀ ਪੁਚ੍ਛਿ,-ਕਿਨ੍ਨਾਮੋਸਿ ਤ੍ਵਂ ਭਨ੍ਤੇਤਿ. ਖੇਮਾਨਾਮਾਹਨ੍ਤਿ. ਕਥਞ੍ਹਿ ਭਨ੍ਤੇ ਪੁਮਾਵ ਸਮਾਨੋ ਇਤ੍ਥਿਲਿਙ੍ਗੇਨ ਨਾਮਂ ਅਕਾਸੀਤਿ ਆਹ. ਅਥ ਅਨ੍ਤੋਗੇਹੇ ਨਿਸਿਨ੍ਨਾ ਮਾਤਾ ਸੁਤ੍ਵਾ ਧੀਤਰਂ ਆਹ,-ਤ੍ਵਂ ਰਾਜਾਦਿਗਣਸ੍ਸ ਲਕ੍ਖਣਂ ਨ ਜਾਨਾਸੀਤਿ. ਆਮ ਜਾਨਾਮਿ, ਅਯਂ ਪਨ ਖੇਮਸਦ੍ਦੋ ਨ ਰਾਜਾਦਿਗਣਪਕ੍ਖਂ ਭਜਤੀਤਿ. ਅਥ ¶ ਮਾਤਾ ਏਵਮਾਹ,-ਅਯਂ ਪਨ ਖੇਮਸਦ੍ਦੋ ਏਕਦੇਸੇਨੇਵ ਰਾਜਾਦਿਗਣਪਕ੍ਖਂ ਭਜਤੀਤਿ.

ਅਯਂ ਪਨੇਤ੍ਥ ਧੀਤੁ ਅਧਿਪ੍ਪਾਯੋ,-ਨ ਰਾਜਾਦਿਸਦ੍ਦੋ ਕਦਾਚਿ ਰਾਜੋਤਿ ਪਚ੍ਚਤ੍ਤਵਚਨਵਸੇਨ ਓਕਾਰਨ੍ਤੋ ਦਿਸ੍ਸਤਿ ਵਿਨਾ ਦੇਵਰਾਜੋਤਿਆਦਿਸਮਾਸਵਿਸਯਂ, ਖੇਮਸਦ੍ਦੋ ਪਨ ਕਤ੍ਥਚਿ ਖੇਮੋਤਿ ਚ ਖੇਮਨ੍ਤਿ ਚ ਲਿਙ੍ਗਨ੍ਤਰਵਸੇਨ ਰੂਪਨ੍ਤਰਂ ਦਿਸ੍ਸਤਿ, ਤੇਨੇਵ ਖੇਮਸਦ੍ਦੋ ਨ ਰਾਜਾਦਿਗਣੋਤਿ ਵੇਦਿਤਬ੍ਬੋਤਿ.

ਅਯਂ ਪਨ ਮਾਤੁ ਅਧਿਪ੍ਪਾਯੋ,-ਖੇਮਸਦ੍ਦੋ ਅਭਿਧੇਯ੍ਯਲਿਙ੍ਗਤ੍ਤਾ ਤਿਲਿਙ੍ਗਕੋ,ਯਦਾ ਪਨ ਸਞ੍ਞਾਸਦ੍ਦਾਧਿਕਾਰੇ ਪਚ੍ਚਤ੍ਤਵਚਨਵਸੇਨ ਖੇਮਾਤਿ ਆਕਾਰਨ੍ਤੋ ਦਿਸ੍ਸਤਿ, ਤਦਾ ਏਕਦੇਸੇਨ ਖੇਮਸਦ੍ਦੋ ਰਾਜਾਦਿਗਣਪਕ੍ਖਂ ਭਜਤੀਤਿ.

ਇਦਮ੍ਪਿ ਏਕਂ ਵਤ੍ਥੁ,–

ਅਰਿਮਦ੍ਦਨਨਗਰੇ ਕਿਰ ਏਕਸ੍ਸ ਕੁਟੁਮ੍ਬਿਕਸ੍ਸ ਏਕੋ ਪੁਤ੍ਤੋ ਦ੍ਵੇ ਧੀਤਰੋ ਅਹੇਸੁਂ. ਏਕਸ੍ਮਿਞ੍ਚ ਕਾਲੇ ਘਮ੍ਮਾਭਿਭੂਤਤ੍ਤਾ ਗੇਹਸ੍ਸ ਉਪਰਿਤਲੇ ਨਹਾਯਿਤ੍ਵਾ ਨਿਸੀਦਿ. ਅਥ ਏਕਾ ਦਾਸੀ ਗੇਹਸ੍ਸ ਹੇਟ੍ਠਾ ਠਤ੍ਵਾ ਕਿਞ੍ਚਿ ਕਮ੍ਮਂ ਕਰੋਨ੍ਤੀ ਤਸ੍ਸ ਕੁਟੁਮ੍ਬਿਕਸ੍ਸ ਗੁਯ੍ਹਟ੍ਠਾਨਂ ਓਲੋਕੇਸਿ. ਤਮਤ੍ਥਂ ਜਾਨਿਤ੍ਵਾ ਕੁਟੁਮ੍ਬਿਕੋ ਸਾਖਂ ਓਲੋਕੇਸੀਤਿ ਏਕਂ ਵਾਕ੍ਯਂ ਬਨ੍ਧਿਤ੍ਵਾ ਪੁਤ੍ਤਸ੍ਸ ਦਸ੍ਸੇਸਿ,ਇਮਸ੍ਸ ਅਤ੍ਥਯੋਜਨਂ ਕਰੋਹੀਤਿ. ਅਥ ਪੁਤ੍ਤੋ ਅਤ੍ਥਯੋਜਨਂ ਅਕਾਸਿ,-ਸਾਖਂ ਰੁਕ੍ਖਸਾਖਂ ਓਲੇਕੇਸਿ ਉਦਿਕ੍ਖਤੀਤਿ. ਅਥ ਪਚ੍ਛਾ ਏਕਾਯ ਧੀਤੁਯਾ ਦਸ੍ਸੇਸਿ, ਇਮਸ੍ਸ ਅਤ੍ਥਯੋਜਨਂ ਕਰੋਹੀਤਿ. ਸਾਪਿ ਅਤ੍ਥਯੋਜਨਂ ਅਕਾਸਿ,- ਸਾ ਸੁਨਖੋ ਖਂ ਆਕਾਸਂ ਓਲੋਕੇਸਿ ਉਦਿਕ੍ਖਤੀਤਿ. ਅਥ ਪਚ੍ਛਾ ਏਕਾਯ ਧੀਤੁਯਾ ਦਸ੍ਸੇਸਿ, ਇਮਸ੍ਸ ਅਤ੍ਥ ਯੋਜਨਂ ਕਰੋਹੀਤਿ. ਸਾਪਿ ਅਤ੍ਥਯੋਜਨਂ ਅਕਾਸਿ,-ਸਾ ਇਤ੍ਥੀ ਖਂ ਅਙ੍ਗਜਾਤਂ ਓਲੋਕੇਸਿ ਮੁਖਂ ਉਦ੍ਧਂ ਕਤ੍ਵਾ ਓਲੋਕੇਸੀਤਿ.

ਇਦਮ੍ਪਿ ਏਕਂ ਵਤ੍ਥੁ,–

ਏਕੋ ਕਿਰ ਸਾਮਣੇਰੋ ਰਤਨਪੂਰਵਾਸੀ ਅਰਿਮਦ੍ਦਨਨਗਰੇ ਮਾਤੁਗਾਮਾਪਿ ¶ ਸਦ੍ਦਨਯੇਸੁ ਅਤਿਕੋਵਿਦਾਤਿ ਸੁਤ੍ਵਾ ਅਹਂ ਤਤ੍ਥ ਗਨ੍ਤ੍ਵਾ ਜਾਨਿਸ੍ਸਾਮੀਤਿ ਅਰਿਮਦ੍ਦਨਨਗਰਂ ਗਤੋ. ਅਥ ਅਨ੍ਤਰਾਮਗ੍ਗੇ ਅਰਿਮਦ੍ਦਨਨਗਰਸ੍ਸ ਸਮੀਪੇ ਏਕਂ ਦਹਰਿਤ੍ਥਿਂ ਕਪ੍ਪਾਸਵਤ੍ਥੁਂ ਰਕ੍ਖਿਤ੍ਵਾ ਨਿਸਿਨ੍ਨਂ ਪਸ੍ਸਿ. ਅਥ ਸਾਮਣੇਰੋ ਤਸ੍ਸਾ ਸਨ੍ਤਿਕਂ ਮਗ੍ਗਪੁਚ੍ਛਨਤ੍ਥਾਯ ਗਚ੍ਛਿ. ਅਥ ਦਹਰਿਤ੍ਥੀ ਸਾਮਣੇਰਂ ਪੁਚ੍ਛਿ,-ਕੁਤੋ ਆਗਤੋਸੀਤਿ.

ਸਾਮਣੇਰੋ ਆਹ,-ਰਤਨਪੂਰਤੋ ਅਹਂ ਆਗਚ੍ਛਤੀਤਿ. ਕੁਹਿਂ ਗਤੋਸੀਤਿ ਵੁਤ੍ਤੇ ਅਰਿਮਦ੍ਦਨਨਗਰਂ ਗਚ੍ਛਤੀਤਿ ਆਹ. ਅਥ ਦਹਰਿਤ੍ਥੀ ਏਵਮਾਹ,-ਤ੍ਵਂ ਭਨ੍ਤੇ ਸਦ੍ਦਯੋਗਵਿਨਿਚ੍ਛਯਂ ਅਨੁਪਧਾਰੇਤ੍ਵਾ ਕਥੇਸਿ, ਅਮ੍ਹਯੋਗਟ੍ਠਾਨੇ ਹਿ ਤ੍ਵਂ ਨਾਮ ਯੋਗਸਦ੍ਦੇਨ ਯੋਜੇਤ੍ਵਾ ਕਥੇਸਿ, ਨਨੁ ਪਣ੍ਡਿਤਾਨਂ ਵਚਨੇਨ ਨਾਮ ਪਰਿਪੁਣ੍ਣਤ੍ਥੇਨ ਅਵਿਰੁਦ੍ਧਸਦ੍ਦਨਯੇਨ ਪੁਣ੍ਣਿਨ੍ਦੁਸਙ੍ਕਾਸੇਨ ਭਵਿਤਬ੍ਬਨ੍ਤਿ. ਅਥ ਸਾਮਣੇਰੋ ਖੇਤ੍ਤਵਤ੍ਥੂਨਿ ਰਕ੍ਖਨ੍ਤੀ ਦੁਗ੍ਗਤਾ ਦਹਰਿਤ੍ਥੀਪਿ ਤਾਵ ਸਦ੍ਦਨਯਕੋਵਿਦਾ ਹੋਤਿ, ਕਿਮਙ੍ਗਂ ਪਨ ਭੋਗਸਮ੍ਪਨ੍ਨਾ ਮਹਲ੍ਲਕਿਤ੍ਥਿਯੋਤਿ ਲਜ੍ਜਿਤ੍ਵਾ ਤਤੋਯੇਵ ਪਟਿਨਿਵਤ੍ਤਿਤ੍ਵਾ ਪਚ੍ਚਾਗਮਾਸੀਤਿ.

ਇਦਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਥੇਰਪਰਮ੍ਪਰਵਸੇਨ ਸਾਸਨਸ੍ਸ ਪਤਿਟ੍ਠਾਨਂ.

ਇਦਾਨਿ ਮਰਮ੍ਮਮਣ੍ਡਲੇਯੇਵ ਜੇਯ੍ਯਵਡ੍ਢਨਰਟ੍ਠੇ ਕੇਤੁਮਤੀਨਗਰੇ ਸਾਸਨਵਂਸਂ ਵਕ੍ਖਾਮਿ.

ਕਲਿਯੁਗੇ ਹਿ ਦ੍ਵਿਸਤ੍ਤਤਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਜੇਯ੍ਯਵਡ੍ਢਨਰਟ੍ਠੇ ਕੇਤੁਮਤੀਨਗਰੇ ਮਹਾਸਿਰਿਜੇਯ੍ਯਸੂਰੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਏਕਂ ਅਤਿਛੇਕਂ ਦੇਵਨਾਗ ਨਾਮਕਂ ਏਕਂ ਹਤ੍ਥਿਂ ਨਿਸ੍ਸਾਯ ਵਿਜਿਤਂ ਵਿਤ੍ਥਾਰਮਕਾਸਿ. ਤਸ੍ਸ ਪਨ ਰਞ੍ਞੋ ਕਾਲੇ ਕਲਿਯੁਗੇ ਦ੍ਵਿਨਵੁਤਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਮਹਾਪਰਕ੍ਕਮੋ ਨਾਮ ਥੇਰੋ ਸੀਹਲ਼ਦੀਪਤੋ ਨਾਵਾਯ ਆਗਨ੍ਤ੍ਵਾ ਕੇਤੁਮਤੀਨਗਰਂ ਸਮ੍ਪਤ੍ਤੋ. ਰਾਜਾ ਚ ਦ੍ਵਾਰਾ ਵਤੀਨਗਰਸ੍ਸ ¶ ਦਕ੍ਖਿਣਦਿਸਾਭਾਗੇ ਮਹਾਵਿਹਾਰਂ ਕਾਰਾਪੇਤ੍ਵਾ ਤਸ੍ਸ ਅਦਾਸਿ ਨਿਚ੍ਚਭਤ੍ਤਮ੍ਪਿ. ਤਸ੍ਮਿਞ੍ਚ ਵਿਹਾਰੇ ਸੀਮਂ ਸਮ੍ਮਨ੍ਨਿਤ੍ਵਾ ਤਿਸ੍ਸਂ ਸੀਮਾਯਂ ਤੁਲਾਵਸੇਨ ਅਤ੍ਤਨਾ ਸਮਂ ਕਤ੍ਵਾ ਲੋਹਮਯਬੁਦ੍ਧਪ੍ਪਟਿਬਿਮ੍ਬਂ ਕਾਰਾਪੇਸਿ. ਤਞ੍ਚ ਬੁਦ੍ਧਪ੍ਪਟਿਬਿਮ੍ਬਿਂ ਸਮ੍ਪਤ੍ਤਲਙ੍ਕਾਦੀਪਨ੍ਤਿ ਨਾਮੇਨ ਪਾਕਟਂ ਅਹੋਸਿ.

ਤਸ੍ਸ ਰਞ੍ਞੋ ਕਾਲੇ ਸੁਰਾਮੇਰਯਸਿਕ੍ਖਾਪਦਂ ਪਟਿਚ੍ਚ ਵਿਪਾਦੋ ਅਹੋਸਿ. ਕਥਂ. ਬੀਜਤੋ ਪਟ੍ਠਾਯਾਤਿ ਸਮ੍ਭਾਰੇ ਪਟਿਯਾ ਦੇਤ੍ਵਾ ਚਾਟਿਯਂ ਪਕ੍ਖਿਤ੍ਤਕਾਲਤੋ ਪਟ੍ਠਾਯ ਤਾਲਨਾਲਿਕੇਰਾਦੀਨਂ ਪੁਪ੍ਫਰਸੋ ਪੁਪ੍ਫਤੋ ਗਲਿਤਾਭਿਨਵਕਾਲਤੋ ਪਟ੍ਠਾਯ ਚ ਨ ਪਾਤਬ੍ਬੋਤਿ ਕਙ੍ਖਾਵਿਤਰਣੀਟੀਕਾਦੀਸੁ ਵੁਤ੍ਤਵਚਨੇ ਅਧਿਪ੍ਪਾਯਂ ਵਿਪਲ੍ਲਾਸਤੋ ਗਹੇਤ੍ਵਾ ਤਾਲਨਾਲਿਕੇਰਾਦੀਨਂ ਰਸੋ ਗਲਿਤਾਭਿਨਵਤੋ ਪਟ੍ਠਾਯ ਪਿਵਿਤੁਂ ਨ ਵਟ੍ਟਤੀਤਿ ਏਕਚ੍ਚੇ ਵਦਨ੍ਤਿ. ਏਕਚ੍ਚੇ ਪਨ ਏਵਂ ਵਦਨ੍ਤਿ,–ਤਾਲਨਾਲਿਕੇਰਾਦੀਨਂ ਰਸੋ ਗਲਿਤਾਭਿਨਵਕਾਲੇ ਪਿਵਿਤੁਂ ਵਟ੍ਟਤੀਤਿ.

ਤਤ੍ਥ ਪੁਬ੍ਬਪਕ੍ਖੇ ਆਚਰਿਯਾਨਂ ਅਯਮਧਿਪ੍ਪਾਯੋ,–

ਬੀਜਤੋ ਪਟ੍ਠਾਯਾਤਿ ਏਤ੍ਥ ਸਮ੍ਭਾਰੇ ਪਟਿਯਾਦੇਤ੍ਵਾ ਚਾਟਿਯਂ ਪਕ੍ਖਿਤ੍ਤਕਾਲਤੋ ਪਟ੍ਠਾਯ ਨ ਪਾਤਬ੍ਬੋ. ਤਾਲਨਾਲਿਕੇਰਾਦੀਨਂ ਪੁਪ੍ਫਰਸੋ ਚ ਗਲਿਤਾਭਿਨਵਕਾਲਤੋਯੇਵ ਨ ਪਾਤਬ੍ਬੋਤਿ.

ਅਯਂ ਪਨ ਅਪਰਪਕ੍ਖੇ ਆਚਰਿਯਾਨਮਧਿਪ੍ਪਾਯੋ,–

ਬੀਜਤੋ ਪਟ੍ਠਾਯਾਤਿ ਏਤ੍ਥ ਸਮ੍ਭਾਰੇ ਪਟਿਯਾਦੇਤ੍ਵਾ ਚਾਟਿਯਂ ਪਕ੍ਖਿਤ੍ਤਕਾਲਤੋ ਪਟ੍ਠਾਯ ਨ ਪਾਤਬ੍ਬੋ. ਤਾਲਨਾਲਿਕੇਰਾਦੀਨਂ ਸਮ੍ਭਾਰੇਹਿ ਪਟਿਯਾਦਿਤੋ ਪੁਪ੍ਫਰਸੋ ਪੁਪ੍ਫਤੋ ਗਲਿਤਾਭਿਨਵਕਾਲਤੋ ਨ ਪਾਤਬ੍ਬੋਤਿ.

ਏਵਂ ਤਾਲਨਾਲਿਕੇਰਾਦੀਨਂ ਰਸੋ ਗਲਿਤਾਭਿਨਵਕਾਲਤੋ ਪਟ੍ਠਾਯ ਪਾਤੁਂ ਵਟ੍ਟਤਿ ਨ ਵਟ੍ਟਤੀਤਿ ਵਿਵਾਦਂ ਕਰੋਨ੍ਤਾਨਂ ਮਜ੍ਝੇ ਨਿਸੀਦਿਤ੍ਵਾ ਸਮ੍ਪਤ੍ਤਲਙ੍ਕੋ ਮਹਾਪਰਕ੍ਕਮਤ੍ਥੇਰੋ ਤਾਦਿਸੋ ਪਿਵਿਤੁਂ ਵਟ੍ਟਤੀਤਿ ਵਿਨਿਚ੍ਛਿਨ੍ਦਿ, ਸੁਰਾਵਿਨਿਚ੍ਛਯਞ੍ਚ ਨਾਮ ਗਨ੍ਥਂ ਅਕਾਸਿ ¶ . ਏਵਂ ਕੇਤੁਮਤੀਨਗਰਂ ਮਾਪੇਨ੍ਤਂ ਮਹਾਸਿਰਿਜੇਯ੍ਯਸੂਰਂ ਨਾਮ ਰਾਜਾਨਂ ਨਿਸ੍ਸਾਯ ਕੇਤੁਮਤਿਯਂ ਸਾਸਨਂ ਪਤਿਟ੍ਠਹਿ.

ਇਦਂ ਮਰਮ੍ਮਮਣ੍ਡਲੇਯੇਵ ਕੇਤੁਮਤੀਨਗਰੇ

ਸਾਸਨਸ੍ਸ ਪਤਿਟ੍ਠਾਨਂ.

ਇਦਾਨਿ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇਯੇਵ ਖਨ੍ਧਪੁਰਸਾਸਨਵਂਸਂ ਵਕ੍ਖਾਮਿ.

ਕਲਿਯੁਗੇ ਹਿ ਚਤੁਸਟ੍ਠਾਧਿਕੇ ਛਵਸ੍ਸਸਤੇ ਤਯੋ ਭਾਤਿਕਾ ਕਿਤ੍ਤਿਤਰਨਾਮਕਂ ਰਾਜਾਨਂ ਰਜ੍ਜਤੋ ਚਾਵੇਤ੍ਵਾ ਖਨ੍ਧਪੁਰਨਗਰੇ ਰਜ੍ਜਂ ਕਾਰੇਸੁਂ. ਤਦਾ ਕਿਤ੍ਤਿਤਰਨਾਮਕਸ੍ਸ ਰਞ੍ਞੋ ਏਕੋ ਪੁਤ੍ਤੋ ਚੀਨਰਟ੍ਠਿਨ੍ਦਰਾਜਾਨਂ ਯਾਚਿਤ੍ਵਾ ਬਹੂਹਿ ਸੇਨਙ੍ਗੇਹਿ ਖਨ੍ਧਪੁਰਨਗਰਂ ਸਮ੍ਪਰਿਵਾਰੇਤ੍ਵਾ ਅਟ੍ਠਾਸਿ. ਅਥ ਤੀਸੁ ਪਿਟਕੇਸੁ ਛੇਕਂ ਏਕਂ ਮਹਾਥੇਰਂ ਪਕ੍ਕੋਸੇਤ੍ਵਾ ਮਨ੍ਤੇਸੁਂ. ਥੇਰੋ ਏਵਮਾਹ,– ਜਨਪਦਾਯਤ੍ਤਮਿਦਂ ਕਮ੍ਮਂ ਸਮਣਾਨਂ ਨ ਕਪ੍ਪਤਿ ਵਿਚਾਰੇਤੁਂ, ਅਹਮ੍ਪਿ ਸਮਣੋ, ਨਾਟਕੇਹਿ ਪਨ ਸਦ੍ਧਿਂ ਮਨ੍ਤੇਥਾਤਿ. ਅਥ ਨਾਟਕੇ ਪਕ੍ਕੋਸੇਤ੍ਵਾ ਮਨ੍ਤੇਸੁਂ. ਨਾਟਕਾਪਿ ਸਚੇ ਕਾਰਣਂ ਨਤ੍ਥਿ, ਏਵਂ ਸਤਿ ਫਲਂ ਨ ਭਵੇਯ੍ਯ, ਸਚੇ ਪੂਤਿ ਨਤ੍ਥਿ, ਮਕ੍ਖਿਕਾ ਨ ਸਨ੍ਨਿਪਤੇਯ੍ਯੁਨ੍ਤਿ ਗੀਤਂ ਗਾਯਿਤ੍ਵਾ ਉਦਕੇ ਕੀਲ਼ਨ੍ਤਿ.

ਅਥ ਤੇਚ ਤਯੋ ਭਾਤਿਕਾ ਤਂ ਸੁਤ੍ਵਾ ਕਿਤ੍ਤਿਤਰਨਾਮਕਂ ਰਾਜਾਨਂ ਬਨ੍ਧਨਾਗਾਰਤੋ ਗਹੇਤ੍ਵਾ ਮਾਰੇਤ੍ਵਾ ਇਦਾਨਿ ਯਂ ਰਜ੍ਜੇ ਠਪਯਿਸ੍ਸਾਮਾਤਿ ਚਿਨ੍ਤੇਤ੍ਵਾ ਤੁਮ੍ਹੇ ਗਚ੍ਛਥ, ਅਯਂ ਤਸ੍ਸ ਸੀਸੋ, ਇਦਾਨਿ ਏਸ ਪਰਲੋਕਂ ਗਤੋਤਿ ਸੀਸਂ ਦਸ੍ਸੇਸੁਂ. ਅਥ ਚੀਨਰਟ੍ਠਸੇਨਾਯੋਪਿ ਇਦਾਨਿ ਰਾਜਵਂਸਿਕੋ ਨਤ੍ਥਿ, ਤੇ ਨਹਿ ਯੁਜ੍ਝਿਤੁਂ ਨ ਇਚ੍ਛਾਮ, ਯਂ ਰਜ੍ਜੇ ਠਪਯਿਸ੍ਸਾਮਾਤਿ ਕਤ੍ਵਾ ਮਯਂ ਆਗਤਾ, ਇਦਾਨਿ ਸੋ ਨਤ੍ਥੀਤਿ ਵਤ੍ਵਾ ਨਿਵਤ੍ਤੇਤ੍ਵਾ ਅਗਮਂਸੁ.

ਸੋ ਚ ਥੇਰੋ ਨਾਟਕੇਹਿ ਸਦ੍ਧਿਂ ਮਨ੍ਤੇਥਾਤਿ ਏਤ੍ਤਕਮੇਵ ਵੁਤ੍ਤਤ੍ਤਾ ਭਿਕ੍ਖੁਭਾਵਤੋ ਨ ਮੋਚੇਤੀਤਿ ਦਟ੍ਠਬ੍ਬਂ. ਵੁਤ੍ਤਞ੍ਚੇਤਂ,–

ਪਰਿਯਾਯੋਚ ਆਣਤ੍ਤਿ, ਤਤਿਯੇ ਦੁਤਿਯੇ ਪਨ;

ਆਣਤ੍ਤਿਯੇਵ ਸੇਸੇਸੁ, ਦ੍ਵਯਮੇਤਂ ਨ ਲਬ੍ਭਤੀਤਿ.

ਤਸ੍ਮਿਂ ਪਨ ਖਨ੍ਧਪੁਰੇ ਅਰਿਮਦ੍ਦਨਨਗਰੇ ਅਰਹਨ੍ਤਗਣਵਂਸਿਕਾ ਛਪ੍ਪਦਗਣਵਂਸਿਕਾ ਆਨਨ੍ਦ ਗਣਵਂਸਿਕਾ ਚ ਥੇਰਾ ਬਹਵੋ ਵਸਨ੍ਤਿ. ਤੇਹਿ ਪਨ ਕਤਗਨ੍ਥੋ ਨਾਮ ਕੋਚਿ ਨਤ੍ਥੀਤਿ.

ਇਦਂ ਖਨ੍ਧਪੁਰੇ ਸਾਸਨਸ੍ਸ ਪਤਿਟ੍ਠਾਨਂ.

ਇਦਾਨਿ ਮਰਮ੍ਮਮਣ੍ਡਲੇ ਤਮ੍ਬਦੀਪਰੇਟ੍ਠੇਯੇਵ ਵਿਜਯਪੁਰੇ ਸਾਸਨਵਂਸਂ ਵਕ੍ਖਾਮਿ.

ਕਲਿਯੁਗੇ ਹਿ ਚਤੁਸਤ੍ਤਤਾਧਿਕੇ ਛਵਸ੍ਸਸਤੇ ਸੀਹਸੂਰੋ ਨਾਮ ਰਾਜਾ ਵਿਜਯਪੁਰਂ ਮਾਪੇਸਿ. ਤਤੋ ਪਚ੍ਛਾ ਦ੍ਵੀਸੁ ਸਂਵਚ੍ਛਰੇਸੁ ਅਤਿਕ੍ਕਨ੍ਤੇਸੁ ਚਮੁਂਨਦਿਯਂ ਮਤਸੇਤਿਭਂ ਏਕਂ ਲਭਿਤ੍ਵਾ ਏਕਸੇਤਿਭਿਨ੍ਨੋਤਿ ਤਸ੍ਸ ਨਾਮਂ ਪਾਕਟਂ ਅਹੋਸਿ. ਤਸ੍ਸ ਰਞ੍ਞੋ ਕਾਲੇ ਵਿਜਯਪੁਰੇ ਸੀਲਵਨ੍ਤਾ ਲਜ੍ਜੀਪੇਸਲਾ ਭਿਕ੍ਖੂ ਬਹਵੋ ਨਤ੍ਥਿ. ਅਰਿਮਦ੍ਦਨਨਗਰਤੋ ਅਨੁਰੁਦ੍ਧਰਾਜਕਾਲੇ ਰਾਜਭਯੇਨ ਨਿਲੀਯਿਤ੍ਵਾ ਅਵਸੇਸਾ ਸਮਣਕੁਤ੍ਤਕਾਯੇਵ ਬਹਵੋ ਅਤ੍ਥਿ. ਪਚ੍ਛਾ ਚੂਲ਼ਅਰਹਨ੍ਤਤ੍ਥੇਰਦਿਬ੍ਬਚਕ੍ਖੁਤ੍ਥੇਰਾਨਂ ਆਗਤਕਾਲੇਯੇਵ ਲਜ੍ਜੀਪੇਸਲਾ ਭਿਕ੍ਖੂ ਬਲਵਨ੍ਤਾ ਹੁਤ੍ਵਾ ਗਣਂ ਵਡ੍ਢਾਪੇਸੁਂ. ਰਾਜਾ ਚ ਦਿਬ੍ਬਚਕ੍ਖੁਤ੍ਥੇਰਂ ਅਨ੍ਤੇਪੁਰਂ ਪਵੇਸੇਤ੍ਵਾ ਦੇਵਸਿਕਂ ਪਿਣ੍ਡਪਾਤੇਨ ਭੋਜੇਸਿ. ਅਨੁਰੁਦ੍ਧਰਞ੍ਞਾ ਤਮ੍ਬੁਲਮਞ੍ਜੂਸਾਯਂ ਠਪੇਤ੍ਵਾ ਪੂਜਿਤਾ ਸਤ੍ਤ ਧਾਤੁਯੋ ਲਭਿਤ੍ਵਾ ਤਾਸਂ ਪਞ੍ਚਧਾਤੁਯੋ ਚਞ੍ਞਿਙ੍ਖੁਚੇਤਿਯੇ ਨਿਧਾਨਂ ਅਕਾਸਿ. ਅਵਸੇਸਾ ਪਨ ਦ੍ਵੇ ਧਾਤੁਯੋ ਪੁਞ੍ਞਸ੍ਸ ਨਾਮ ਅਮਚ੍ਚਸ੍ਸ ਪੂਜਨਤ੍ਥਾਯ ਨਿਯ੍ਯਾਦੇਸਿ. ਸੋਚ ਅਮਚ੍ਚੋ ਜੇਯ੍ਯਪੁਰੇ ਪੁਞ੍ਞਚੇਤਿਯੇ ਨਿਧਾਨਂ ਅਕਾਸਿ.

ਤਦਾ ਚ ਕਿਰ ਸਮਣਕੁਤ੍ਤਕਾ ਗਹਟ੍ਠਾਵਿਯ ਰਾਜਰਾਜਮਹਾਮਤ੍ਤਾਨਂ ¶ ਸਨ੍ਤਿਕੇ ਉਪਟ੍ਠਾਨਂ ਅਕਂਸੁ. ਕਲਿਯੁਗੇ ਚਤੁਅਸੀਤਾਧਿਕੇ ਛਵਸ੍ਸਸਤੇ ਸਮ੍ਪਤ੍ਤੇ ਸੀਸਸੂਰਰਞ੍ਞੋ ਜੇਟ੍ਠ ਪੁਤ੍ਤੋ ਉਜਨੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਸੋ ਪਨ ਅਵਪਙ੍ਕ੍ਯਾ ਨਾਮਕੇ ਦੇਸੇ ਚਮ੍ਪਕਕਟ੍ਠਮਯੇ ਸਤ੍ਤਵਿਹਾਰੇ ਕਾਰਾਪੇਸਿ. ਦ੍ਵਿ ਵਸ੍ਸਾਧਿਕੇ ਸਤ੍ਤਵਸ੍ਸਸਤੇ ਕਾਲੇ ਤੇ ਵਿਹਾਰਾ ਨਿਟ੍ਠਂ ਅਗਮਂਸੁ.

ਤੇਸੁ ਵਿਹਾਰੇਸੁ ਚਮ੍ਪਕਂ ਨਾਮ ਪਧਾਨਵਿਹਾਰਂ ਅਮਚ੍ਚਪੁਤ੍ਤਸ੍ਸ ਸੁਧਮ੍ਮਮਹਾਸਾਮਿਤ੍ਥੇਰਸ੍ਸ ਅਦਾਸਿ. ਸੋ ਪਨ ਥੇਰੋ ਅਰਿਮਦ੍ਦਨਨਗਰੇ ਅਰਹਨ੍ਤਤ੍ਥੇਰਸ੍ਸ ਵਂਸਿਕੋਤਿ ਦਟ੍ਠਬ੍ਬੋ.

ਵੇਲ਼ੂਵਨਂ ਨਾਮ ਪਰਿਵਾਰਵਿਹਾਰਂ ਪਨ ਆਭਿਧਮ੍ਮਿਕਸ੍ਸ ਞਾਣਧਜਸ੍ਸ ਨਾਮ ਥੇਰਸ੍ਸ ਅਦਾਸਿ. ਸੋਪਿ ਅਰਹਨ੍ਤਤ੍ਥੇਰਸ੍ਸ ਵਂਸਿਕੋ.

ਜੇਤਵਨਂ ਨਾਮ ਪਰਿਵਾਰਵਿਹਾਰਂ ਪਨ ਸਕਲਵਿਨਯਪਿਟਕਂ ਵਾਚੁਗ੍ਗਤਂ ਕਰੋਨ੍ਤਸ੍ਸ ਗੁਣਾਰਾਮਤ੍ਥੇਰਸ੍ਸ ਅਦਾਸਿ. ਸੋ ਪਨ ਥੇਰੋ ਅਰਿਮਦ੍ਦਨਨਗਰੇਯੇਵ ਆਨਨ੍ਦਤ੍ਥੇਰਸ੍ਸ ਵਂਸਿਕੋ.

ਕੁਲਵਿਹਾਰਂ ਨਾਮ ਪਰਿਵਾਰਵਿਹਾਰਂ ਆਦਿਚ੍ਚਰਂਸਿਨੋ ਨਾਮ ਥੇਰਸ੍ਸ ਅਦਾਸਿ. ਸੋਪਿ ਆਨਨ੍ਦਤ੍ਥੇਰਸ੍ਸ ਵਂਸਿਕੋਯੇਵ.

ਸੁਵਣ੍ਣਵਿਹਾਰਂ ਨਾਮ ਪਰਿਵਾਰਵਿਹਾਰਂ ਸੁਧਮ੍ਮਾਲਙ੍ਕਾਰਸ੍ਸ ਨਾਮ ਥੇਰਸ੍ਸ ਅਦਾਸਿ. ਸੋਪਿ ਆਨਨ੍ਦਤ੍ਥੇਰਵਂਸਿਕੋਯੇਵ.

ਨੀਚਗੇਹਂ ਨਾਮ ਪਰਿਵਾਰਵਿਹਾਰਂ ਵਰਪਤ੍ਤਸ੍ਸ ਨਾਮ ਥੇਰਸ੍ਸ ਅਦਾਸਿ. ਸੋ ਪਨ ਸੁਧਮ੍ਮਮਹਾਸਾਮਿਤ੍ਥੇਰਸ੍ਸ ਅਨ੍ਤੇਵਾਸਿਕੋ.

ਦਕ੍ਖਿਣਕੋਟਿਂ ਨਾਮ ਪਰਿਵਾਰਵਿਹਾਰਂ ਸਿਰਿਪੁਞ੍ਞਵਾਸਿਨੋ ਨਾਮ ਥੇਰਸ੍ਸ ਅਦਾਸਿ. ਸੋਪਿ ਸੁਧਮ੍ਮਮਹਾਸਾਮਿਤ੍ਥੇਰਸ੍ਸ ਅਨ੍ਤੇਵਾਸਿਕੋਤਿ.

ਤੇਸਂ ਵਿਹਾਰਾਨਂ ਏਸਨ੍ਨਟ੍ਠਾਨੇ ਰਾਜਾ ਸਯਮੇਵ ਹਤ੍ਥੇਨ ਗਹੇਤ੍ਵਾ ਮਹਾਬੋਧਿਰੁਕ੍ਖਂ ਰੋਪੇਸਿ. ਤੇਸਂ ਵਿਹਾਰਾਨਂ ਪਟਿ ਜਗ੍ਗਨਤ੍ਥਾਯ ਬਹੂਨਿਪਿ ਖੇਤ੍ਤਵਤ੍ਥੂਨਿ ਅਦਾਸਿ ਆਰਾਮਗੋਪਕ ਕੁਲਾਨਿ ਚ.

ਤੇਸਂ ¶ ਪਨ ਥੇਰਾਨਂ ਸੁਧਮ੍ਮਪੁਰਾਰਿਮਦ੍ਦਨਪੁਰਭਿਕ੍ਖੁਵਂਸਿਕਤ੍ਤਾਲਜ੍ਜਿਪੇਸਲਤਾ ਵਿਞ੍ਞਾਤਬ੍ਬਾ. ਤੇਨੇਵ ਵਿਜਯਪੁਰੇ ਸਾਸਨਂ ਅਤਿਵਿਯ ਪਰਿਸੁਦ੍ਧਂ ਅਹੋਸੀਤਿ ਦਟ੍ਠਬ੍ਬਂ.

ਤੇਸਮ੍ਪਿ ਸਿਸ੍ਸਪਰਮ੍ਪਰਾ ਅਨੇਕਸਹਸ੍ਸਪ੍ਪਮਾਣਾ ਅਹੇਸੁਂ. ਏਵਂ ਲਜ੍ਜੀਪੇਸਲਾਨਂਯੋ ਭਿਕ੍ਖੂਨਂ ਸਨ੍ਤਿਕਾ ਕੇਚਿ ਸਦ੍ਧਿਵਿਹਾਰਿਕਾ ਕੀਟਾਗਿਰਿਮ੍ਹਿ ਅਸ੍ਸਜਿਪੁਨਬ੍ਬਸੁਕਾਵਿਯ ਅਲਜ੍ਜੀ ਦੁਸ੍ਸੀਲਾ ਉਪ੍ਪਜ੍ਜਿਂਸੁ, ਸੇਯ੍ਯਥਾਪਿ ਨਾਮ ਮਧੁਰਮ੍ਬਰੁਕ੍ਖਤੋ ਅਮ੍ਬਿਲਫਲਨ੍ਤਿ. ਤੇ ਪਨ ਬਹੁਅਨਾਚਾਰਂ ਚਰਿਂਸੁਯੇਵ. ਇਦਂ ਪਨ ਤੇਸਂ ਮੂਲਉਪ੍ਪਤ੍ਤਿ ਦਸ੍ਸਨਂ.

ਰਾਜਾ ਹਿ ਤਦਾ ਤੇਸਂ ਵਿਹਾਰਾਨਂ ਪਟਿਜਗ੍ਗਨਤ੍ਥਾਯ ਬਹੂਨਿ ਖੇਤ੍ਤਵਤ੍ਥੂਨਿ ਅਦਾਸਿ. ਤੇਸੁ ਖੇਤ੍ਤਵਤ੍ਥੂਸੁ ਬਲਿਵਿਚਾਰਣਤ੍ਥਾਯ ਸੁਧਮ੍ਮਮਹਾਸਾਮਿਤ੍ਥੇਰੋ ਏਕਚ੍ਚੇ ਭਿਕ੍ਖੂ ਆਰਕ੍ਖਣਟ੍ਠਾਨੇ ਠਪੇਸਿ. ਆਰਕ੍ਖਣਭਿਕ੍ਖੂ ਪਨ ਧਮ੍ਮਾਨੁਲੋਮਵਸੇਨ ਕਸ੍ਸਕਾਨਂ ਓਵਾਦਾਪੇਸਿ, ਖੇਤ੍ਤਵਤ੍ਥੁਸਾਮਿਭਾਗਮ੍ਪਿ ਪਟਿਗ੍ਗਣ੍ਹਾਪੇਸਿ. ਤਸ੍ਮਿਞ੍ਚ ਕਾਲੇ ਖੇਤ੍ਤਵਤ੍ਥੂਨਿ ਪਟਿਚ੍ਚ ਭਿਕ੍ਖੂ ਵਿਵਾਦਂ ਅਕਂਸੁ. ਅਥ ਤਂ ਵਿਵਾਦਂ ਸੁਤ੍ਵਾ ਸਾਸਨਧਰਤ੍ਥੇਰੋ ਚ ਦ੍ਵੇ ਪਰਕ੍ਕਮਤ੍ਥੇਰਾ ਚ ਤਤੋ ਨਿਕ੍ਖਮਿਂਸੁ. ਨਿਕ੍ਖਮਿਤ੍ਵਾ ਸਾਸਨਧਰਤ੍ਥੇਰੋ ਖਣਿਤ੍ਤਿ ਪਾਦਪਬ੍ਬਤੇ ਨਿਸੀਦਿ. ਦ੍ਵੇ ਪਰਕ੍ਕਮਤ੍ਥੇਰਾ ਚ ਚਙ੍ਗਕਿਙ੍ਗਪਬ੍ਬਤਕਨ੍ਦਰੇ ਨਿਸੀਦਿਂਸੁ. ਤੇਸਞ੍ਹਿ ਨਿਵਾਸਟ੍ਠਾਨਤ੍ਤਾ ਯਾਵਜ੍ਜਤਨਾ ਤਂ ਠਾਨਂ ਪਰਕ੍ਕਮਟ੍ਠਾਨਨ੍ਤਿ ਪਾਕਟਂ ਅਹੋਸਿ. ਤੇ ਪਨ ਥੇਰਾ ਏਕਚਾਰਾਤਿ ਵੋਹਾਰਿਂਸੁ. ਅਵਸੇਸਾ ਪਨ ਭਿਕ੍ਖੂ ਗਾਮਵਾਸੀਬਹੁਚਾਰਾਤਿ ਵੋਹਾਰਿਂਸੁ. ਤਤੋ ਪਟ੍ਠਾਯ ਅਰਞ੍ਞਵਾਸੀਗਾਮਵਾਸੀਵਸੇਨ ਵਿਸੁਂ ਗਣਾ ਹੋਨ੍ਤਿ. ਵਿਹਾਰਸ੍ਸ ਨਿਨ੍ਨਾਨਂ ਖੇਤ੍ਤਵਤ੍ਥੂਨਂ ਬਲਿਪ੍ਪਟਿਗ੍ਗਾਹਕਭਿਕ੍ਖੂਨਮ੍ਪਿ ਸਙ੍ਘਜਾਤਿਸਮਞ੍ਞਾ ਅਹੋਸਿ.

ਕਲਿਯੁਗੇ ਚਤੁਵਸ੍ਸਾਧਿਕੇ ਸਤ੍ਤਸਤੇ ਉਜਨਸ੍ਸ ਰਞ੍ਞੋ ਧਰਮਾਨਸ੍ਸੇਵ ਕਨਿਟ੍ਠਭਾਤਿਕੋ ਕ੍ਯੇਚ੍ਵਾ ਨਾਮ ਰਾਜਾ ਕੁਮਾਰੋ ਰਜ੍ਜਂ ਗਣ੍ਹਿ.

ਅਯਂ ਪਨ ਤਸ੍ਸ ਅਟ੍ਠੁਪ੍ਪਤ੍ਤਿ,– ਉਜਨੋ ਨਾਮ ਰਾਜਾ ਤ੍ਵਂ ਸਮੁਦ੍ਦਮਜ੍ਝਂ ¶ ਨਾਮ ਗਾਮਂ ਗਨ੍ਤ੍ਵਾ ਤਤ੍ਥ ਨਿਸੀਦਿਤ੍ਵਾ ਤਤ੍ਰੁਪ੍ਪਾਦਬਲਿਂ ਭੁਞ੍ਜਾਹੀਤਿ ਨਿਯ੍ਯਾਦੇਸਿ. ਸੋ ਪਨ ਰਾਜਕੁਮਾਰੋ ਲੁਦ੍ਦਕਮ੍ਮੇਸੁਯੇਵ ਅਭਿਰਮ੍ਮਣਸੀਲੋ. ਏਕਸ੍ਮਿਂ ਸਮਯੇ ਪਿਗਵਂ ਗਨ੍ਤ੍ਵਾ ਪਚ੍ਚਾਗਤਕਾਲੇ ਰਤ੍ਤਿਯਂ ਸੁਪਿਨਂ ਪਸ੍ਸਿ,– ਸਕ੍ਕੋ ਦੇਵਾਨਮਿਨ੍ਦੋ ਆਗਨ੍ਤ੍ਵਾ ਉਪੋਸਥਸੀਲਂ ਸਮਾਦਿਯਾਹਿ, ਏਵਂ ਸਤਿ ਅਚਿਰੇਨੇਵ ਸੇਤਿਭੇ ਲਭਿਸ੍ਸਸਤੀਤਿ ਵਤ੍ਵਾ ਤਾਵਤਿਂਸਭਵਨਂ ਪੁਨ ਗਤੋਤਿ.

ਸੋਚ ਰਾਜਕੁਮਾਰੋ ਤਤੋ ਪਟ੍ਠਾਯ ਉਪੋਸਥਸੀਲਂ ਸਮਾਦਿਯਿ. ਪਚ੍ਛਾ ਕਾਲੇਪਿ ਅਤ੍ਤਨੋ ਹਤ੍ਥੇ ਗੁਥੇਨ ਕਿਲਿਨ੍ਨਂ ਭਵਤੀਤਿ ਪੁਨ ਸੁਪਿਨਂ ਪਸ੍ਸਿ. ਸੋ ਅਚਿਰੇਨੇਵ ਪਞ੍ਚ ਸੇਤਿਭੇ ਲਭਿ. ਅਥ ਏਕੋ ਅਮਚ੍ਚੋ ਗਨ੍ਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਸਿ. ਰਾਜਾ ਤੁਟ੍ਠਚਿਤ੍ਤੋ ਹੁਤ੍ਵਾ ਮਮ ਕਿਰ ਭੋਨ੍ਤੋ ਕਨਿਟ੍ਠਭਾਤਿਕੋ ਪਞ੍ਚ ਸੇਤਿਭੇ ਲਭੀਤਿ ਰਾਜਪੁਰਿਸਾਨਂ ਮਜ੍ਝੇ ਸਂਵਣ੍ਣੇਸਿ. ਅਮਚ੍ਚੋ ਪੁਨ ਰਾਜਕੁਮਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ. ਰਾਜਕੁਮਾਰੋਪਿ ਮਮ ਭਾਤਿਕੋ ਰਾਜਾ ਅਕਥਿਤਪੁਬ੍ਬਂ ਵਾਚਾਪੇਯ੍ਯਂ ਵਦਤੀਤਿ ਆਰਾਧਯਿਤ੍ਵਾ ਪੁਨ ਗਨ੍ਤ੍ਵਾ ਤਮਤ੍ਥਂ ਰਞ੍ਞੋ ਆਰੋਚਾਪੇਸਿ. ਰਾਜਾਪਿ ਤਥੇਵ ਵਦਤੀਤਿ. ਤਂ ਸੁਤ੍ਵਾ ਰਾਜਕੁਮਾਰੋ ਭਿਯ੍ਯੋਸੋ ਪਸੀਦਿ.

ਕਸ੍ਮਾ ਪਨ ਉਜਨੋ ਰਾਜਾ ਕਿਤ੍ਤਿਤਰਂ ਨਾਮ ਰਾਜਕੁਮਾਰਂ ਕਨਿਟ੍ਠਵੋਹਾਰੇਨ ਨ ਵਦਤੀਤਿ. ਏਕਸੇਤਿਭਿਨ੍ਦੋ ਹਿ ਰਾਜਾ ਅਪਰਸ੍ਸ ਰਞ੍ਞੋ ਦੇਵਿਂ ਗਬ੍ਭਿਨਿਂ ਆਨੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ, ਠਪੇਤ੍ਵਾ ਅਚਿਰੇਨੇਵ ਉਜਨਂ ਵਿਜਾਯਿ, ਤੇਨੇਵ ਨ ਉਜਨੋ ਏਕਸੇਤਿਭਿਨ੍ਦਸ੍ਸ ਪੁਤ੍ਤੋ, ਕਿਤ੍ਤਿਤਰੋ ਨਾਮ ਰਾਜਕੁਮਾਰੋਯੇਵ ਏਕਸੇਤਿਭਿਨ੍ਦਸ੍ਸ ਪੁਤ੍ਤੋ, ਤਸ੍ਮਾ ਤਂ ਕਾਰਣਂ ਪਟਿਚ੍ਚ ਸੋ ਤਂ ਕਨਿਟ੍ਠਵੋਹਾਰੇਨ ਨ ਵਦਤੀਤਿ.

ਕਨਿਟ੍ਠੋ ਪਞ੍ਚਸੇਤਿਭੇ ਲਭਤੀਤਿ ਸੁਤ੍ਵਾ ਰਾਜਾ ਭਾਯਿਤ੍ਵਾ ਕਨਿਟ੍ਠਸ੍ਸ ਰਜ੍ਜਂ ਉਪਨਿਯ੍ਯਾਦੇਸਿ. ਰਾਜਾ ਰਾਜਗੇਹਸ੍ਸ ਪਚ੍ਛਿਮਦ੍ਵਾਰੇਨ ਨਿਕ੍ਖਮਿ. ਕਨਿਟ੍ਠੋ ਪੁਰਿਮਦ੍ਵਾਰੇਨ ਪਾਵਿਸਿ. ਪਞ੍ਚਨ੍ਨਂ ਪਨ ਸੇਤਿਭਾਨਂ ਲਦ੍ਧਤ੍ਤਾ ਪਞ੍ਚਸੇਤਿਭਿਨ੍ਦੋਤਿ ਪਾਕਟੋ. ਮੂਲਨਾਮਂ ਪਨਸ੍ਸ ¶ ਸੀਹਸੂਰੋਤਿ ਦਟ੍ਠਬ੍ਬਂ. ਤਸ੍ਸ ਰਞ੍ਞੋ ਕਾਲੇ ਬਹੂ ਅਲਜ੍ਜਿਨੋ ਗਾਮਸਾਮਨ੍ਤ ਵਿਹਾਰੇ ਵਸਿਤ੍ਵਾ ਅਨੇਕਵਿਧਂ ਆਨਾਚਾਰਂ ਚਰਿਂਸੁ. ਸੁਧਮ੍ਮਪੁਰਅਰਿਮਦ੍ਦਨਪੁਰਤੋ ਪਰਮ੍ਪਰਵਸੇਨ ਆਗਤਾ ਭਿਕ੍ਖੂਪਿ ਬਹੂ ਲਜ੍ਜਿਨੋ ਸਿਕ੍ਖਾਕਾਮਾ ਸਨ੍ਤਿ.

ਅਥ ਤਸ੍ਸ ਰਞ੍ਞੋ ਭਤ੍ਤਂ ਪਰਿਭੁਞ੍ਜਨਕਾਲੇ ਏਕੋ ਸਮਣਕੁਤ੍ਤਕੋ ਅਟ੍ਠ ਪਰਿਕ੍ਖਾਰੇ ਗਹੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਸਮ੍ਮੁਖੇ ਅਟ੍ਠਾਸਿ. ਕਿਮਤ੍ਥਾਯ ਆਗਤੋਸੀਤਿ ਪੁਚ੍ਛਿਤੇ ਪਿਣ੍ਡਪਾਤਤ੍ਥਾਯ ਆਗਤੋਮ੍ਹੀਤਿ ਆਹ. ਅਥ ਰਾਜਾ ਸਯਂ ਭੁਞ੍ਜਿਸ੍ਸਾਮੀਤਿ ਆਰਭਿਤ੍ਵਾਪਿ ਅਤਿਪ੍ਪਸਨ੍ਨਤਾਯ ਪਨ ਸੁਵਣ੍ਣਪਾਤਿਯਾ ਪਟਿਯਾਦਿਤਂ ਸਕਲਮ੍ਪਿ ਭਤ੍ਤਂ ਅਦਾਸਿ. ਅਥ ਰਾਜਾ ਏਵਂ ਚਿਨ੍ਤੇਸਿ,– ਅਯਂ ਭਿਕ੍ਖੁ ਪਿਣ੍ਡਪਾਤਤ੍ਥਾਯ ਉਪਮਜ੍ਝਨ੍ਤਿ ਕਯੇਵ ਆਗਨ੍ਤ੍ਵਾ ਅਟ੍ਠਾਸਿ, ਨ ਸੋ ਪੁਥੁਜ੍ਜਨਭਿਕ੍ਖੁ, ਅਥ ਖੋ ਅਭਿਞ੍ਞਾਲਾਭੀ ਅਰਹਾ ਭਵੇਯ੍ਯ, ਮਮ ਪੁਞ੍ਞਤ੍ਥਾਯ ਆਗਤੋ ਭਵੇਯ੍ਯ ਮਂ ਅਨੁਕਮ੍ਪਂ ਉਪਾਦਾਯਾਤਿ.

ਏਵਂ ਪਨ ਚਿਨ੍ਤੇਤ੍ਵਾ ਏਕਂ ਰਾਜਪੁਰਿਸਂ ਆਣਾਪੇਸਿ ਤਸ੍ਸ ਪਚ੍ਛਾ ਅਨੁਗਨ੍ਤ੍ਵਾ ਓਲੋਕੇਤੁਂ. ਸੋ ਪਨ ਸਮਣਕੁਤ੍ਤਕੋ ਸਯਂ ਅਲਜ੍ਜਿਭੂਤਤ੍ਤਾਵ ਅਤ੍ਤਨੋ ਭਰਿਯਾ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਂ ਗਣ੍ਹਿ. ਤਂ ਦਿਸ੍ਵਾ ਰਾਜਪੁਰਿਸੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਪਠਮਮੇਵ ਏਵਂ ਚਿਨ੍ਤੇਸਿ,– ਸਚੇ ਯਥਾਭੂਤਂ ਆਰੋਚੇਯ੍ਯਂ, ਰਞ੍ਞੋ ਪਸਾਦੋ ਵਿਨਸ੍ਸੇਯ੍ਯ, ਏਵਂ ਪਨ ਅਨਾਰੋਚੇਤ੍ਵਾ ਯਥਾ ਰਞ੍ਞੋ ਪਸ੍ਸਾਦੋ ਭਿਯ੍ਯੋਸੋਮਤ੍ਤਾਯ ਭਵੇਯ੍ਯ, ਮਯ੍ਹਮ੍ਪਿ ਲਾਭੋ ਉਪ੍ਪਜ੍ਜੇਯ੍ਯ, ਸਮਣਕੁਤ੍ਤਕੋਪਿ ਰਾਜਪਰਾਧਤੋ ਵਿਮੁਚ੍ਚੇਯ੍ਯ, ਏਵਂ ਆਰੋਚੇਸ੍ਸਾਮੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਅਹਂ ਮਹਾਰਾਜ ਤਂ ਅਨੁਗਨ੍ਤ੍ਵਾ ਓਲੋਕੇਸਿ, ਅਥ ਮਮ ਏਵਂ ਓਲੋਕੇਨ੍ਤਸ੍ਸਵ ਅਨ੍ਤਰਧਾਯੀਤਿ ਆਰੋਚੇਸਿ. ਰਾਜਾ ਭਿਯ੍ਯੋਸੋਮਤ੍ਤਾਯ ਪਸੀਦਿਤ੍ਵਾ ਹਤ੍ਥਂ ਪਸਾਰੇਤ੍ਵਾ ਯਥਾਹਂ ਮਞ੍ਞਮਿ, ਤਥਾ ਅਵਿਰਜ੍ਝਨਮੇਵਤਨ੍ਤਿ ਤਿਕ੍ਖਤ੍ਤੁਂ ਵਾਚਂ ਨਿਚ੍ਛਾਰੇਸਿ, ਰਾਜਪੁਰਿਸਸ੍ਸ ਚ ਦਾਤਬ੍ਬਂ ਅਦਾਸਿ.

ਤਸ੍ਮਿਂਯੇਵ ਦਿਵਸੇ ਏਕੋ ਅਮਚ੍ਚੋ ਰਞ੍ਞੋ ਪਣ੍ਣਾਕਾਰਤ੍ਥਾਯ ¶ ਵੇਲਾਹਕਂ ਨਾਮ ਏਕਂ ਤੁਰਙ੍ਗਮਂ ਅਦਾਸਿ. ਅਥ ਰਾਜਾ ਮਮ ਪੁਞ੍ਞਾਨੁਭਾਵੇਨ ਏਸ ਲਦ੍ਧੋਤਿ ਸਮ੍ਪਹਂਸਿ. ਤਂ ਪਨ ਤੁਰਙ੍ਗਮਂ ਆਰੋਹਿਤ੍ਵਾ ਏਕਂ ਹਤ੍ਥਾਰੋਹਂ ਪਾਜਾਪੇਸਿ. ਅਥ ਮਹਾਜਨਸ੍ਸ ਓਲੋਕੇਨ੍ਤਸ੍ਸ ਹਤ੍ਥਾਰੋਹਸ੍ਸ ਸੀਸੇਵੇਟ੍ਠਨਦੁਸ੍ਸਂਯੇਵ ਪਸ੍ਸਿਤ੍ਵਾ ਆਕਾਸੇ ਪਕ੍ਖਨ੍ਧੋ ਬਕੋਵਿਯ ਪਞ੍ਞਾਯਤਿ. ਸੋ ਪਨ ਤੁਰਙ੍ਗਮੋ ਪਾਤੋਵ ਵਿਜਯਪੁਰਤੋ ਗਚ੍ਛਨ੍ਤੋ ਪਬ੍ਬਤਬ੍ਭਨ੍ਤਰਨਗਰਂ ਸਾਯਨ੍ਹਸਮਯੇ ਪਾਪੁਣਿ. ਅਬ੍ਭ ਵਿਜਬ੍ਭਨਅਸ੍ਸੋਤਿਪਿ ਨਾਮਂ ਅਕਾਸਿ.

ਇਚ੍ਚੇਵਂ ਸਮਣਕੁਤ੍ਤਕਾ ਦਾਰਮ੍ਪਿ ਪੋਸੇਸੁਂ, ਪਗੇਵ ਇਤਰਂ ਅਨਾਚਾਰਂ. ਤੇਨੇਵ ਤੇ ਸਮਣਕੁਤ੍ਤਕਾ ਰਞ੍ਞੋ ਮਲ੍ਲਰਙ੍ਗਮ੍ਪਿ ਪਵਿਸਿਤ੍ਵਾ ਮਲ੍ਲਂ ਯੁਜ੍ਝੇਸੁਂ. ਤੇਸੁ ਪਨ ਸਮਣਕੁਤ੍ਤਕੇਸੁ ਓਵਿਚਙ੍ਗਾਖੁਂਸਙ੍ਘਜੋ ਨਾਮ ਸਮਣਕੁਤ੍ਤਕੋ ਮਲ੍ਲਕਮ੍ਮੇ ਅਤਿਵਿਯ ਛੇਕੋ ਅਧਿਕੋ. ਸੋ ਕਿਰ ਸਂਵਚ੍ਛਰੇ ਸਂਵਚ੍ਛਰੇ ਰਞ੍ਞੋ ਮਲ੍ਲਰਙ੍ਗੇ ਜਯਿਤ੍ਵਾ ਪਨ੍ਨਰਸ ਵਾ ਵੀਸਤਿ ਵਾ ਅਸ੍ਸੇ ਪਟਿਲਭੀਤਿ.

ਰਤਨਪੂਰਨਗਰੇ ਮਲ੍ਲਕਮ੍ਮੇ ਅਤਿਛੇਕੋ ਅਧਿਕੋ ਏਕੋ ਕਮ੍ਬੋਜਕੁਲੋ ਅਤ੍ਥਿ. ਸੋ ਰਤਨਪੂਰਨਗਰੇ ਜੇਯ੍ਯਪੁਰਨਗਰ ਚ ਅਤ੍ਤਨਾ ਸਮਥਾਮਂ ਮਲ੍ਲਪੁਰਿਸਂ ਅਸਭਿਤ੍ਵਾ ਵਿਜਯ ਪੁਰਂ ਆਗਨ੍ਤ੍ਵਾ ਚਮ੍ਪਕਵਿਹਾਰਸ੍ਸ ਦ੍ਵਾਰਸਮੀਪੇ ਮਲ੍ਲਸਭਾਮਣ੍ਡਪੇ ਪਵਿਸਿਤ੍ਵਾ ਮਲ੍ਲਕਮ੍ਮਂ ਕਾਤੁਂ ਇਚ੍ਛਾਮੀਤਿ ਰਞ੍ਞੋ ਆਰੋਚੇਸਿ. ਅਥ ਰਾਜਾ ਤਂ ਸਙ੍ਘਜਂ ਆਮਨ੍ਤੇਤ੍ਵਾ ਏਵਮਾਹ,- ਇਦਾਨਿ ਭੋ ਤ੍ਵਂ ਇਮਿਨਾ ਸਦ੍ਧਿਂ ਮਲ੍ਲਯੁਦ੍ਧਂ ਕਾਤੁਂ ਸਕ੍ਖਿਸ੍ਸਸੀਤਿ. ਆਮਮਹਾਰਾਜ ਪੁਬ੍ਬੇ ਅਹਂ ਦਹਰੇ ਹੁਤ੍ਵਾ ਕੀਲ਼ਨਤ੍ਥਾਯਯੇਵ ਮਲ੍ਲਕਮ੍ਮਂ ਅਕਾਸਿਂ, ਇਦਾਨਿ ਪਨ ਏਕੂਨਸਤ੍ਤਤਿਵਸ੍ਸੋ ਅਹਂ ਇਤੋ ਪਚ੍ਛਾ ਮਲ੍ਲਯੁਦ੍ਧਂ ਕਾਤੁਂ ਸਕ੍ਖਿਸ੍ਸਾਮਿ ਵਾ ਮਾ ਵਾਤਿ ਨ ਜਾਨਾਮਿ, ਇਦਾਨਿ ਪਰਪਕ੍ਖਂ ਮਲ੍ਲਪੁਰਿਸਂ ਮਲ੍ਲਕਮ੍ਮੇਨ ਮਾਰੇਸ੍ਸਾਮੀਤਿ ਵਦਤਿ.

ਅਥ ਰਾਜੂਨਂ ਮਲ੍ਲਕਮ੍ਮਂ ਨਾਮ ਕੀਲ਼ਨਤ੍ਥਾਯਯੇਵ ਭਵਤਿ, ਮਾ ਮਾਰੇਤੁਂ ਉਸ੍ਸਾਹਂ ਕਰੋਹੀਤਿ ਵਤ੍ਵਾ ਅਞ੍ਞਮਞ੍ਞਂ ਮਲ੍ਲਯੁਦ੍ਧਂ ਕਾਰਾਪੇਸਿ ¶ . ਸਪਰਿਸਸ੍ਸ ਰਞ੍ਞੋ ਓਲੋਕੇਨ੍ਤਸ੍ਸੇਵ ਤੇ ਮਲ੍ਲਾਕਾਰੇਨ ਨਚ੍ਚਿਤ੍ਵਾ ਅਞ੍ਞਮਞ੍ਞਂ ਸਮੀਪਂ ਉਪਗਚ੍ਛਿਂਸੁ. ਅਥ ਸਙ੍ਘਜੋ ਮਲ੍ਲੋ ਕਮ੍ਬੋਜਮਲ੍ਲਸ੍ਸ ਪਾਦੇਨ ਪਹਰਣਾਕਾਰਂ ਦਸ੍ਸੇਤ੍ਵਾ ਦਕ੍ਖਿਣਹਤ੍ਥਮੁਟ੍ਠਿਨਾ ਕਪਾਲੇ ਪਹਾਰਂ ਅਦਾਸਿ. ਅਥ ਕਮ੍ਬੋਜਮਲ੍ਲਸ੍ਸ ਮੁਖਂ ਪਚ੍ਛਤੋ ਅਹੋਸਿ. ਤਦਾ ਸਪਰਿਸੋ ਰਾਜਾ ਈਦਿਸਾ ਪਨ ਵਿਮੁਖਤੋ ਮਰਣਮੇਵ ਸੇਯ੍ਯੋ ਇਦਾਨਿ ਪਨ ਇਮਂ ਪਸ੍ਸਿਤੁਂ ਨ ਵਿਸਹਾਮੀਤਿ ਵਦਤਿ. ਪੁਨ ਸਙ੍ਘਜੋ ਵਾਮਹਤ੍ਥ ਮੁਟ੍ਠਿਨਾ ਪਹਾਰਂ ਅਦਾਸਿ. ਅਥ ਕਮ੍ਬੋਜਮਲ੍ਲਸ੍ਸ ਮੁਖਂ ਪਰਿਵਟ੍ਟੇਤ੍ਵਾ ਯਥਾ ਪੁਬ੍ਬੇ, ਤਥਾ ਪਤਿਟ੍ਠਾਸਿ.

ਤਸ੍ਮਿਞ੍ਚ ਕਾਲੇ ਸਪਰਿਸੋ ਖਤ੍ਤਿਯੋ ਤਂ ਅਚ੍ਛਰਿਯਂ ਦਿਸ੍ਵਾ ਦ੍ਵੇ ਅਸ੍ਸੇ ਤਿਂਸਮਤ੍ਤਾਨਿ ਵਤ੍ਤਾਨਿ ਸਤਕਹਾਪਣਞ੍ਚ ਅਦਾਸੀਤਿ. ਇਦਞ੍ਚ ਵਚਨਂ ਪੋਰਾਣਪੋਤ੍ਥਕੇਸੁ ਆਗਤਤ੍ਤਾ ਸਾਧੁਜਨਾਨਞ੍ਚ ਸਂਵੇਜਨਿਯਟ੍ਠਾਨਤ੍ਤਾ ਵੁਤ੍ਤਂ. ਠਪੇਤ੍ਵਾ ਹਿ ਸਂਵੇਗਲਾਭਂ ਨਤ੍ਥਿ ਅਞ੍ਞਂ ਕਿਞ੍ਚਿ ਪਯੋਜਨਨ੍ਤਿ.

ਕਲਿਯੁਗੇ ਤੇਰਸਾਧਿਕੇ ਸਤ੍ਤਵਸ੍ਸਸਤੇ ਵਿਜਯਪੁਰੇਯੇਵ ਤਸ੍ਸ ਪੁਤ੍ਤੋ ਕਿਤ੍ਤਿਤਰਨਾਮਕੋ ਰਾਜਾ ਰਜ੍ਜਂ ਕਾਰੇਸਿ. ਵਿਤਰਾ ਸਦਿਸਨਾਮਵਸੇਨੇਵ ਸੀਹਸੂਰੋਤਿ ਨਾਮਂ ਪਟਿਗ੍ਗਣ੍ਹਿ. ਪਿਤੁ ਰਞ੍ਞੋ ਕਾਲੇ ਲਦ੍ਧੇਸੁ ਪਞ੍ਚਸੁ ਸੇਤਿਹੇਸੁ ਚਤੁਨ੍ਨਂਯੇਵ ਅਵਸੇਸਤ੍ਤਾ ਚਤੁਸੇਤਿਭਿਨ੍ਦੋਤਿ ਨਾਮਂ ਪਾਕਟਂ. ਤੇਨੇ ਵਾਹ ਅਭਿਧਾਨਪ੍ਪਦੀਪਿਕਾਟੀਕਾਯਂ ਚਤੁਸੇਤਿਭਿਨ੍ਦੋਤਿ. ਤਸ੍ਸ ਰਞ੍ਞੋ ਕਾਲੇ ਚਤੁਰਙ੍ਗਬਲੋ ਨਾਮ ਮਹਾਅਮਚ੍ਚੋ ਗਨ੍ਥਕੋਵਿਦੋ ਅਭਿਧਾਨਪ੍ਪਦੀਪਿਕਾਸਂ ਵਣ੍ਣਨਂ ਅਕਾਸਿ. ਸੋ ਪਨ ਸਕਲਬ੍ਯਾਕਰਣਵਨਾਸਙ੍ਗਞਾਣਾਚਾਰੀ ਅਹੋਸਿ.

ਏਕਸ੍ਮਿਞ੍ਚ ਸਮਯੇ ਰਾਜਾ ਏਕਂ ਮਹਨ੍ਤਂ ਵਿਹਾਰਂ ਕਾਰਾਪੇਤ੍ਵਾ ਅਸੁਕਰਞ੍ਞਾ ਅਯਂ ਵਿਹਾਰੋ ਕਾਰਾਪਿਤੋ, ਇਮਸ੍ਮਿਂ ਵਿਹਾਰੇ ਸੀਲਵਨ੍ਤਾਯੇਵ ਨਿਸੀਦਨ੍ਤੂਤਿ ਕੋਲਾਹਲਂ ਉਪ੍ਪਾਦੇਸਿ. ਅਥ ਸਾਚਞ੍ਞਿਨਾਮਗਾਮਵਾਸੀ ਏਕੋ ਥੇਰੋ ਆਗਨ੍ਤ੍ਵਾ ਨਿਸੀਦਿ.

ਅਯਂ ¶ ਪਨ ਤਸ੍ਸ ਥੇਰਸ੍ਸ ਅਟ੍ਠੁਪ੍ਪਤ੍ਤਿ,–

ਸਾਚਞ੍ਞਿਗਾਮੇ ਕਿਰ ਏਕੋ ਗਹਪਤਿ ਅਤ੍ਤਨੋ ਪੁਤ੍ਤਂ ਸਿਪ੍ਪੁਗ੍ਗਹਣਤ੍ਥਾਯ ਵਿਹਾਰੇ ਏਕਸ੍ਸ ਭਿਕ੍ਖੁਸ੍ਸ ਸਨ੍ਤਿਕੇ ਨਿਯ੍ਯਾਦੇਸਿ. ਪੁਤ੍ਤਸ੍ਸ ਪਨ ਵਿਹਾਰਂ ਅਗਨ੍ਤੁਕਾਮਸ੍ਸ ਤਜ੍ਜਨਤ੍ਥਾਯ ਸਕਣ੍ਟਕਗਚ੍ਛਸ੍ਸ ਉਪਰਿ ਖਿਪਤਿ. ਸੋ ਚ ਦਹਰੋ ਨਿਕ੍ਖਮਿਤ੍ਵਾ ਗੇਹਂ ਅਨਾਗਤ੍ਵਾ ਵਿਹਾਰੇਯੇਵ ਨਿਸੀਦਿ. ਮਾਤਾਪਿਤੂਨਂ ਸਨ੍ਤਿਕਂ ਅਨਾਗਨ੍ਤ੍ਵਾ ਥੋਕਂ ਥੋਕਂ ਦੂਰਂ ਗਨ੍ਤ੍ਵਾ ਸਾਮਣੇਰ ਭੂਮਿਤੋ ਉਪਸਮ੍ਪਦਭੂਮਿਂ ਪਤ੍ਵਾ ਅਰਿਮਦ੍ਦਨਨਗਰਂ ਗਚ੍ਛਿ. ਅਤਿਪਞ੍ਞਵਨ੍ਤਤਾਯ ਪਨ ਪਤ੍ਤਪ੍ਪਤ੍ਤਟ੍ਠਾਨੇ ਮਹਾਥੇਰੋ ਸਙ੍ਗਣ੍ਹਿਂਸੁ. ਤੇਨੇਵੇਸ ਸਕਲਮਰਮ੍ਮਰਟ੍ਠੇ ਪਾਕਟੋ ਅਹੋਸਿ. ਅਥ ਮਾਤਾਪਿਤਰੋ ਪੁਤ੍ਤਸ੍ਸ ਆਗਮਨਂ ਅਪੇਕ੍ਖਿਤ੍ਵਾਯੇਵ ਨਿਸੀਦਿਂਸੁ. ਤਮਤ੍ਥਂ ਪਨ ਸੁਤ੍ਵਾ ਏਸ ਅਮ੍ਹਾਕਂ ਪੁਤ੍ਤੋ ਭਵਿਸ੍ਸਤਿ ਵਾ ਨੋ ਵਾਤਿ ਵੀਮਂਸਿਤੁਕਾਮੋ ਪਿਤਾ ਅਨੁਗਚ੍ਛਿ. ਅਰਿਮਦ੍ਦਨਨਗਰੇ ਤਂ ਸਮ੍ਪਾਪੁਣਿਤ੍ਵਾ ਉਪਟ੍ਠਪੇਤ੍ਵਾ ਨਿਸੀਦਿ. ਸੋਪਿ ਭਿਕ੍ਖੁ ਯਥਾਉਪਟ੍ਠਾਨੇਨੇਵ ਸਨ੍ਤਪ੍ਪੇਤ੍ਵਾ ਗਨ੍ਥਂ ਉਗ੍ਗਣ੍ਹਿ. ਅਪਰਸ੍ਮਿਂ ਪਨ ਕਾਲੇਸੋ ਭਿਕ੍ਖੁ ਅਜ੍ਜ ਸੂਪੋ ਅਪ੍ਪਲੋਣੋਤਿਆਦਿਨਾ ਪੁਨਪ੍ਪੁਨਂ ਭਣਤਿ.

ਅਥ ਪਿਤਾ ਏਵਮਾਹ,- ਨ ਪੁਬ੍ਬੇ ਪਿਯਪੁਤ੍ਤਕ ਤਯਾ ਈਦਿਸਂ ਵਚਨਂ ਕਥਿਤਂ, ਇਦਾਨਿ ਪਨ ਤ੍ਵਂ ਅਭਿਣ੍ਹਂ ਈਦਿਸਂ ਵਚਨਂ ਛਣਸਿ, ਕਾਰਣਮੇਤ੍ਥ ਕਿਨ੍ਤਿ ਪੁਚ੍ਛਿ. ਪੁਬ੍ਬੇ ਗਨ੍ਥੇਸੁ ਛੇਕਤ੍ਤਂ ਅਪ੍ਪਤ੍ਵਾ ਗਨ੍ਥੇਸੁ ਛੇਕਤ੍ਥਂ ਬ੍ਯਾਪਨ੍ਨਚਿਤ੍ਤਤਾਯ ਨ ਵੁਤ੍ਤਂ, ਇਦਾਨਿ ਪਨ ਮਯਾ ਇਚ੍ਛਿਤੋ ਅਤ੍ਥੋ ਮਤ੍ਥਕਂ ਪਤ੍ਤੋ, ਤਸ੍ਮਾ ਕਾਯਬਲਪਰਿਗ੍ਗਹਣਤ੍ਥਾਯ ਮਯਾ ਈਦਿਸਂ ਵਚਨਂ ਵੁਤ੍ਤਨ੍ਤਿ ਵਦਤਿ. ਤਂ ਵਚਨਂ ਸੁਤ੍ਵਾ ਪਿਤਾ ਮਾਤੁਯਾ ਸਨ੍ਤਿਕਂ ਗਮਨਤ੍ਥਾਯ ਓਕਾਸਂ ਯਾਚਿਤ੍ਵਾ ਪਿਤਰਾ ਸਦ੍ਧਿਂ ਸਕਟ੍ਠਾਨਂ ਆਗਚ੍ਛਨ੍ਤੋ ਵਿਜਯਪੁਰਂ ਚੇਤਿਯਵਨ੍ਦਨਤ੍ਥਾਯ ਪਾਵਿਸਿ.

ਤਦਾ ਰਞ੍ਞਾ ਵੁਤ੍ਤਵਚਨਂ ਸੁਤ੍ਵਾ ਤਸ੍ਮਿਂ ਵਿਹਾਰੇ ਅਰੁਹਿਤ੍ਵਾ ਨਿਸੀਦਿ ¶ . ਆਰਕ੍ਖਪੁਰਿਸਾ ਚ ਤਂ ਭਿਕ੍ਖੁਂ ਵਿਹਾਰੇ ਨਿਸਿਨ੍ਨਂ ਦਿਸ੍ਵਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਚ ਚਤੁਰਙ੍ਗਬਲਂ ਅਮਚ੍ਚਂ ਆਣੇਪੇਸਿ,-ਗਨ੍ਤ੍ਵਾ ਤਸ੍ਸ ਭਿਕ੍ਖੁਸ੍ਸ ਞਾਣਥਾਮਂ ਉਪਧਾਰੇਹੀਤਿ. ਚਤੁਰਙ੍ਗਬਲੋ ਚ ਗਨ੍ਤ੍ਵਾ ਤਂ ਭਿਕ੍ਖੁਂ ਗੂਲ਼ਗੂਲ਼ਟ੍ਠਾਨਂ ਪੁਚ੍ਛਿ. ਸੋਪਿ ਪੁਚ੍ਛਿਤਂ ਪੁਚ੍ਛਿਤਂ ਵਿਸ੍ਸਜ੍ਜੇਸਿ. ਚਤੁਰਙ੍ਗਬਲੋ ਚ ਤਮਤ੍ਥਂ ਰਞ੍ਞੋ ਆਰੋਚੇਸਿ. ਰਾਜਾ ਤੁਟ੍ਠਚਿਤ੍ਤੋ ਹੁਤ੍ਵਾ ਤਂ ਵਿਹਾਰਂ ਤਸ੍ਸ ਭਿਕ੍ਖੁਸ੍ਸ ਅਦਾਸਿ. ਤਸ੍ਸ ਪਨ ਭਿਕ੍ਖੁਸ੍ਸ ਦਹਰਕਾਲੇ ਸਕਣ੍ਟਕਗਚ੍ਛੇ ਪਿਤੁਨੋ ਖਿਪਨਂ ਪਟਿਚ੍ਚ ਕਣ੍ਡਕਖਿਪਤ੍ਥੇਰੋਤਿ ਸਮਞ੍ਞਾ ਅਹੋਸਿ, ਮੂਲਨਾਮਂ ਪਨਸ੍ਸ ਨਾਗਿਤੋਤਿ. ਸੋਤਸ੍ਮਿਂ ਵਿਹਾਰੇ ਨਿਸੀਦਿਤ੍ਵਾ ਸਦ੍ਦਸਾਰਤ੍ਥਜਲਿਨਿਂ ਨਾਮ ਗਨ੍ਥਂ ਅਕਾਸਿ. ਤਸ੍ਸ ਕਿਰ ਥੇਰਸ੍ਸ ਕਾਲੇ ਤਸ੍ਮਿਂ ਨਗਰੇ ਆਰਦ੍ਧ ਵਿਪਸ੍ਸਨਾਧੁਰਾ ਮਹਲ੍ਲਕਾ ਭਿਕ੍ਖੂ ਸਹਸ੍ਸਮਤ੍ਤਾ ਅਹੇਸੁਂ. ਆਰਦ੍ਧਗਨ੍ਥਧੁਰਾ ਪਨ ਦਹਰਭਿਕ੍ਖੂ ਗਣਨਪਥਂ ਵੀਤਿਵਤ੍ਤਾ.

ਤਸ੍ਸ ਪਨ ਪਿਤਰਮ੍ਪਿ ਸੇਟ੍ਠਿਟ੍ਠਾਨੇ ਠਪੇਸਿ. ਤੇਨੇਵ ਤਂ ਗਾਮਂ ਸੇਟ੍ਠਿਗਾਮੋਤਿ ਨਾਮੇਨ ਵੋਹਰਿਂਸੁ.

ਕਚ੍ਚਾਯਨਵਣ੍ਣਨਂ ਪਨ ਵਿਜਯਪੁਰੇਯੇਵ ਅਭਯਗਿਰਿਪਬ੍ਬਤੇ ਨਿਸਿਨ੍ਨੋ ਮਹਾਵਿਜਿਤਾਪੀ ਨਾਮ ਥੇਰੋ ਅਕਾਸਿ. ਵਾਚਕੋ ਪਦੇਸਮ੍ਪਿ ਸੋਯੇਵ ਅਕਾਸਿ. ਸਦ੍ਦਵੁਤ੍ਤਿਂ ਪਨ ਸਦ੍ਧਮ੍ਮਗੁਰੁਤ੍ਥੇਰੋ ਅਕਾਸਿ.

ਇਚ੍ਚੇਵਂ ਵਿਜਯਪੁਰੇ ਅਨੇਕੇਹਿ ਗਨ੍ਥਕਾਰੇਹਿ ਸਾਸਨਂ ਵਿਪੁਲਂ ਅਹੋਸਿ.

ਕਲਿਯੁਗੇ ਪਨ ਪਞ੍ਚਾਸੀਤਾਧਿਕੇ ਛਵਸ੍ਸਸਤੇ ਸਮ੍ਪਤ੍ਤੇ ਅਸਙ੍ਖਯਾਚੋਯੋਨ੍ਨਾਮਕੋ ਰਾਜਾ ਜੇਯ੍ਯਪੁਰਨਗਰਂ ਮਾਪੇਤ੍ਵਾ ਤਤ੍ਥ ਰਜ੍ਜਂ ਕਾਰੇਸਿ. ਤਤ੍ਥ ਪਨ ਰਾਜੂਨਂ ਕਾਲੇ ਥੇਰੇਹਿ ਕਤਗਨ੍ਥੋ ਨਾਮ ਨਤ੍ਥਿ.

ਕਲਿਯੁਗੇ ਛਬ੍ਬਿਸਾਧਿਕੇ ਸਤ੍ਤਵਸ੍ਸਸਤੇ ਵੇਸਾਖਮਾਸੇ ਜੇਯ੍ਯਪੁਰਨਗਰਂ ਵਿਨਸ੍ਸਿ. ਤਸ੍ਮਿਂਯੇਵ ਸਂਵਚ੍ਛਰੇ ਜੇਟ੍ਠਮਾਸੇ ਵਿਜਯਪੁਰਂ ਵਿਨਸ੍ਸਿ. ਤਸ੍ਮਿਂਯੇਵ ਸਂਵਚ੍ਛਰੇ ਫਗ੍ਗੁਨਮਾਸੇ ਸਤ੍ਵਿਵਰਾਜਾ ¶ ਰਤਨਪੂਰਂ ਨਾਮ ਨਗਰਂ ਮਾਪੇਤ੍ਵਾ ਰਜ੍ਜਂ ਕਾਰੇਸੀਤਿ.

ਇਦਂ ਵਿਜਯਪੁਰਜੇਯ੍ਯਪੁਰੇਸੁ ਸਾਸਨਸ੍ਸ ਪਤਿਟ੍ਠਾਨਂ.

ਇਦਾਨਿ ਮਰਮ੍ਮਮਣ੍ਡਲੇ ਤਮ੍ਬਨੀਪਰਟ੍ਠੇਯੇਵ ਰਤਨਪੂਰਨਗਰੇ ਸਾਸਨਵਂਸਂ ਵਕ੍ਖਾਮਿ.

ਕਲਿਯੁਗੇ ਹਿ ਅਟ੍ਠਾਸੀਤਾਧਿਕੇ ਸਤ੍ਤਵਸ੍ਸਸਤੇ ਨਰਪਤਿਰਞ੍ਞੋ ਧਿਤਾਯ ਸਦ੍ਧਿਂ ਅਲੋਙ੍ਗਚਞ੍ਞਿਸੂਰਞ੍ਞੋ ਪੁਤ੍ਤੋ ਆਨਨ੍ਦਸੂਰਿਯੋ ਨਾਮ ਸਨ੍ਥਵਂ ਕਤ੍ਵਾ ਏਕਂ (ਸਿਦ੍ਧਿਕਂ ਨਾਮ ਪੁਤ੍ਤਂ ਵਿਜਾਯਿ. ਸੋ ਵਯੇ ਸਮ੍ਪਤ੍ਤੇ ਰਜ੍ਜਸਮ੍ਪਤ੍ਤਿਂ ਲਭਿ. ਤਤੋ ਪਭੁਤਿ ਯਾਵ ਮ੍ਰੇਨਚੋਦਿਘਾ ਰਞ੍ਞਾ ਅਰਿਮਦ੍ਦਨਨਗਰੇ ਰਜ੍ਜਂ ਅਕਂਸੁ). ਤਤੋ ਪਚ੍ਛਾ ਸਿਰਿਸੁਧਮ੍ਮਰਾਜਾਧਿਪਤੀਤਿ ਲਦ੍ਧਨਾਮੋ ਸਤ੍ਵਿਵਰਾਜਾ ਰਤਨਪੂਰਨਗਰੇ ਰਜ੍ਜਂ ਕਾਰੇਸਿ. ਤਸ੍ਸ ਰਞ੍ਞੋ ਕਾਲੇ ਕਲਿਯੁਗੇ ਏਕਨਵੁਤਾਧਿਕੇ ਸਤ੍ਤਵਸ੍ਸਸਤੇ ਸਮ੍ਪਤ੍ਤੇ ਲਙ੍ਕਾਦੀਪਤੋ ਸਿਰਿਸਦ੍ਧਮ੍ਮਾਲਙ੍ਕਾਰਤ੍ਥੇਰੋ ਸੀਹਲ਼ਮਹਾਸਾਮਿਤ੍ਥੇਰੋਚਾਤਿ ਇਮੇ ਦ੍ਵੇ ਥੇਰਾ ਪਞ੍ਚ ਸਰੀਰਧਾਤੁਯੋ ਆਨੇਤ੍ਵਾ ਨਾਵਾਯ ਕੁਸਿਮਤਿਤ੍ਥਂ ਪਾਪੁਣਿਤ੍ਵਾ ਰਾਮਞ੍ਞਰਟ੍ਠੇ ਬਞ੍ਞਾਰਨਿ ਨਾਮੇਨ ਰਞ੍ਞਾ ਨਿਵਾਰਿਤਾ ਅਨਿਸੀਦਿਸ੍ਵਾ ਤਤੋ ਸੋਯੇਵ ਰਾਜਾ ਥੇਰੇ ਯਾਵ ਸਿਰਿਖੇਤ੍ਤਨਗਰਾ ਪਹਿਣਿ. ਤਮਤ੍ਥਂ ਞਤ੍ਵਾ ਰਤਨਪੂਰਿਨ੍ਦੋ ਰਾਜਾ ਚਤ੍ਤਾਲੀਸਾਯ ਨਾਵਾਹਿ ਯਾਵ ਸਿਰਿਖੇਤ੍ਤਨਗਰਂ ਪਚ੍ਚੁਗ੍ਗਨ੍ਤ੍ਵਾ ਆਨੇਸਿ. ਆਨੇਤ੍ਵਾ ਚ ਮਹਾਨਵਗਾਮਂ ਪਤ੍ਤਕਾਲੇ ਸਹ ਓਰੋਧੇਹਿ ਅਮਚ੍ਚੇਹਿ ਚ ਸਯਮੇਵ ਰਾਜਾ ਪਚ੍ਚੁਗ੍ਗਚ੍ਛਿ. ਰਤਨਪੂਰਂ ਪ੍ਪਨ ਪਤ੍ਤਕਾਲੇ ਮਹਾਪਥਵੀ ਚਲਿ, ਪਟਿਨਾਦਞ੍ਚ ਨਦਿ. ਤਦਾ ਰਾਜਾ ਸਮ੍ਮਾਸਮ੍ਬੁਦ੍ਧਸ੍ਸ ਤਿਲੋਕਗ੍ਗਸ੍ਸ ਸਾਸਨਂ ਪਗ੍ਗਣ੍ਹਿਸ੍ਸਾਮੀਤਿ ਚਿਨ੍ਤੇਤ੍ਵਾ ਸਰੀਰਧਾਤੁਂ ਆਨੇਤ੍ਵਾ ਇਧ ਪਤ੍ਤਕਾਲੇ ਅਯਂ ਮਹਾਪਥਵੀ ਚਲਤਿ, ਪਟਿਨਾਦਞ੍ਚ ਨਦਤਿ, ਇਦਂ ¶ ਅਮ੍ਹਾਕਂ ਰਟ੍ਠੇ ਜਿਨਸਾਸਨਸ੍ਸ ਚਿਰਕਾਲਂ ਪਤਿਟ੍ਠਾਨਭਾਵੇ ਪੁਬ੍ਬਨਿਮਿਤ੍ਤਨ੍ਤਿ ਸਯਮੇਵ ਨਿਮਿਤ੍ਤਪਾਠਂ ਅਕਾਸਿ.

ਤਾਵ ਤਿਟ੍ਠਤੁ ਜੀਵਮਾਨਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਆਨੁਭਾਵੋ, ਅਹੋਵਤ ਸਰੀਰਧਾਤੁਯਾਯੇਵ ਅਨੁਭਾਵੋਤਿ ਬਹੁਰਟ੍ਠ ਵਾਸਿਨੋ ਪਸਿਦਿਂਸੁ. ਹੋਨ੍ਤਿ ਚੇਤ੍ਥ, –

ਸਰੀਰਧਾਤੁਯਾ ਤਾਵ, ਮਹਨ੍ਤੋਚ੍ਛਰਿਯੋ ਹੋਤਿ;

ਕਾ ਕਥਾ ਪਨ ਬੁਦ੍ਧਸ੍ਸ, ਜੀਵਮਾਨਸ੍ਸ ਸੇਟ੍ਠਸ੍ਸ.

ਏਵਂ ਅਨੁਸ੍ਸਰਿਤ੍ਵਾਨ, ਉਪ੍ਪਾਦੇਯ੍ਯ ਪਸਾਦਕਂ;

ਬੁਦ੍ਧਗੁਣੇਸੁ ਬਾਹੁਲ੍ਲਂ, ਗਾਰਵਞ੍ਚਂ ਕਰੇ ਜਨੋਤਿ.

ਕਲਿਯੁਗੇ ਦ੍ਵੇਨਵੁਤਾਧਿਕੇ ਸਤ੍ਤਵਸ੍ਸਸਤੇ ਤਾ ਪਞ੍ਚ ਧਾਤੁਯੋ ਨਿਦਹਿਤ੍ਵਾ ਜੇਯ੍ਯਪੁਰਨਗਰਤੋ ਪਚ੍ਛਿਮਦਿਸਾਭਾਗੇ ਸਮਭੂਮਿਭਾਗੇ ਚੇਤਿਯਂ ਪਤਿਟ੍ਠਾਪੇਸਿ. ਤਞ੍ਚ ਚੇਤਿਯਂ ਰਤਨਚੇਤਿਯਨ੍ਤਿ ਪਞ੍ਞਾਪੇਸਿ, ਹਤ੍ਥਿਰੂਪਬਾਹੁਲ੍ਲਤਾਯ ਪਨ ਅਨੇਕਿਭਿਨ੍ਦੋਤਿ ਪਾਕਟਂ ਹੋਤਿ. ਤੀਹਿ ਸਿਰਿਗਬ੍ਭੇਹਿ ਸਤ੍ਤਹਿ ਦ੍ਵਾਰੇਹੀ ਚ ਅਲਙ੍ਕਤਂ ਨਾਮ ਮਹਾਵਿਹਾਰਂ ਕਾਰਾਪੇਤ੍ਵਾ ਦ੍ਵਿਨ੍ਨਂ ਸੀਹਲ਼ਦੀਪਿਕਤ੍ਥੇਰਾਨਂ ਅਦਾਸਿ. ਤਤੋ ਪਚ੍ਛਾ ਤੇਸੁ ਮਹਨ੍ਤਤ੍ਥੇਰੋ ਸਕਵਿਹਾਰਸਮੀਪੇ ਪਬ੍ਬਤਮੁਦ੍ਧਨਿ ਅਤ੍ਤਨੋ ਸਿਸ੍ਸੇਪਿ ਅਪ੍ਪਵੇਸੇਤ੍ਵਾ ਲਜ੍ਜੀਪੇਸਲਬਹੁਸ੍ਸੁਤਸਿਕ੍ਖਾਕਾਮੇਹਿ ਸਬ੍ਬੇਹਿ ਤੀਹਿ ਥੇਰੇਹਿ ਸਦ੍ਧਿਂ ਸੀਮਂ ਸਮ੍ਮਨ੍ਨਤਿ. ਇਚ੍ਚੇਵਂ ਸੀਮਸਮ੍ਮੁਤਿਪਰਿਯਤ੍ਤਿਵਾਚਨਾਦਿਕਮ੍ਮੇਹਿ ਮਰਮ੍ਮਰਟ੍ਠੇ ਸਾਸਨਂ ਵਿਰੂਲ਼ਂ ਕਤ੍ਵਾ ਪਤਿਟ੍ਠਾਪੇਸਿ.

ਇਦਂ ਮਰਮ੍ਮਮਣ੍ਡਲੇ ਰਤਨਪੂਰਨਗਰੇ ਸੀਹਲ਼ਦੀਪਿਕੇ

ਦ੍ਵੇ ਥੇਰੇ ਪਟਿਚ੍ਚ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਕਲਿਯੁਗੇ ਛਬ੍ਬੀਸਾਧਿਕੇ ਸਤ੍ਤਵਸ੍ਸਸਤੇ ਸਮ੍ਪਤ੍ਤੇ ਫਗ੍ਗੁਨਮਾਸੇ ਸਤ੍ਵਵਰਾਜਾ ਰਤਨਪੂਰਨਗਰਂ ਮਾਪੇਸਿ. ਤਸ੍ਸ ਰਞ੍ਞੋ ¶ ਕਾਲੇ ਜੇਯ੍ਯਪੁਰਨਗਰੇ ਏਕਾ ਪੂਪਿਕਾ ਇਤ੍ਥੀ ਅਲਜ੍ਜਿਨੋ ਏਕਸ੍ਸ ਭਿਕ੍ਖੁਸ੍ਸ ਸਨ੍ਤਿਕੇ ਧਨਂ ਉਪਨਿਦਹਿ. ਅਪਰਭਾਗੇਸਾ ਤਂ ਧਨਂ ਯਾਚਿ. ਅਥ ਸੋ ਭਿਕ੍ਖੁ ਤਵ ਧਨਂ ਅਹਂ ਨ ਪਟਿਗ੍ਗਣ੍ਹਾਮੀਤਿ ਮੁਸਾ ਭਣਤਿ. ਏਵਂ ਵਿਵਾਦਂ ਕਤ੍ਵਾ ਤਂ ਕਾਰਣਂ ਰਞ੍ਞੋ ਆਰੋਚੇਸਿ. ਰਾਜਾ ਪਕ੍ਕੋਸਾਪੇਤ੍ਵਾ ਸਯਮੇਵ ਤਂ ਭਿਕ੍ਖੁਂ ਪੁਚ੍ਛਿ,-ਤ੍ਵਂ ਭਨ੍ਤੇ ਤਸ੍ਸਾ ਇਤ੍ਥਿਯਾ ਧਨਂ ਪਟਿਗ੍ਗਣ੍ਹਾਸਿ ਵਾ ਮਾ ਵਾਤਿ. ਅਹਂ ਮਹਾਰਾਜ ਸਮਣੋ ਅਲਿਕਂ ਭਣਿਤੁਂ ਨ ਵਟ੍ਟਤਿ, ਨ ਪਟਿਗ੍ਗਣ੍ਹਾਮੀਤਿ ਵਦਤਿ. ਤਂ ਕਾਰਣਂ ਰਾਜਾ ਚ ਪੁਨਪ੍ਪੁਨਂ ਪੁਚ੍ਛਿਤ੍ਵਾ ਵੀਮਂਸਨ੍ਤੋ ਭਿਕ੍ਖੁਸ੍ਸ ਕੇਰਾਟਿਕਭਾਵਂ ਜਾਨਿਤ੍ਵਾ ਤਂ ਸਮਣੋ ਸਮਾਨੋ ਭਗਵਤੋ ਪਞ੍ਞਤ੍ਤਂ ਸਿਕ੍ਖਾਪਦਂ ਅਕ੍ਕਮਿਤ੍ਵਾ ਮੁਸਾ ਭਣਤੀਤਿ ਕੁਜ੍ਝਿਤ੍ਵਾ ਸਯਮੇਵ ਅਪਰਾਧਾਨੁਰੂਪਂ ਸੀਯਂ ਛਿਨ੍ਦਿਤ੍ਵਾ ਰਾਜਗੇਹਤੋ ਹੇਟ੍ਠਾ ਖਿਪਿ.

ਤਞ੍ਚ ਕਾਰਣਂ ਸਕਲਮਰਮ੍ਮਰਟ੍ਠੇ ਪਾਕਟਂ. ਅਲਜ੍ਜੀਭਿਕ੍ਖੂਪਿ ਅਞ੍ਞੇ ਪਾਪਕਮ੍ਮਂ ਕਾਤੁਂ ਨ ਵਿਸਹਿਂਸੁ. ਰਞ੍ਞਾ ਭਾਯਿਤ੍ਵਾਯੇਵ ਸਿਕ੍ਖਾਪਦਂ ਨ ਅਕ੍ਕਮੇਸੁਂ.

ਕਲਿਯੁਗੇ ਤਿਂਸਾਧਿਕੇ ਸਤ੍ਤਵਸ੍ਸਸਤੇ ਸਮ੍ਪਤ੍ਤੇ ਮਙ੍ਗਕ੍ਰਿਚ੍ਵਾਚੋਙ੍ਕ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਸੋ ਪਨ ਰਾਜਾ ਰਟ੍ਠਵਾਸੀਨਂ ਸੁਖਤ੍ਥਾਯ ਨਿਮਿਤ੍ਤਂ ਗਹੇਤ੍ਵਾ ਤਾਲਵਣ੍ਟਂ ਗਹੇਤ੍ਵਾ ਰਾਜਗੇਹਂ ਪਟਿਗ੍ਗਣ੍ਹਿ. ਸੋ ਚ ਰਾਜਾ ਸਕ੍ਕਰਾਜੇ ਪਞ੍ਚਚਤ੍ਤਾਲੀਸਾਧਿਕੇ ਸਤ੍ਤਵਸ੍ਸਸਤੇ ਸਮ੍ਪਤ੍ਤੇ ਚਞ੍ਞਿਙ੍ਖੁਂ ਨਾਮ ਚੇਤਿਯਂ ਪਤਿਟ੍ਠਾਪੇਸਿ. ਯਙ੍ਗਰਨਾਮਕਸ੍ਸ ਸਿਲਾਪਬ੍ਬਤਸ੍ਸ ਸਮੀਪੇ ਪੋਰਾਣਿਕਂ ਏਕਂ ਚੇਤਿਯਂ ਨਦੀਉਦਕਂ ਭਿਨ੍ਦਿ. ਤਦਾ ਸਕਰਣ੍ਡਕਾ ਪਞ੍ਚ ਧਾਤੁਯੋ ਉਦਕੇ ਨਿਮ੍ਮੁਜ੍ਜਨ੍ਤਿਯੋ ਏਰਾਪਥੋ ਨਾਮ ਨਾਗੋ ਗਹੇਤ੍ਵਾ ਪਚ੍ਛਾ ਚਞ੍ਞਿਙ੍ਖੁਂ ਨਾਮ ਚੇਤਿਯਂ ਪਤਿਟ੍ਠਾਪੇਸ੍ਸਾਮੀਤਿ ਰਞ੍ਞਾ ਆਰਦ੍ਧਕਾਲੇਯੇਵ ਦਾਠਾਨਾਗਸ੍ਸ ਨਾਮ ਥੇਰਸ੍ਸ ਸਹ ਕਰਣ੍ਡਕੇਨ ਪਞ੍ਚ ਧਾਤੁਯੋ ਨਿਯ੍ਯਾਦੇਸਿ. ਸੋ ਚ ਥੇਰੋ ਰਞ੍ਞੋ ਅਦਾਸਿ. ਰਾਜਾ ਦ੍ਵੇ ਧਾਤੁਯੋ ਮੁਟ੍ਠੋਚੇਤਿਯੇ ਨਿਧਾਨਂ ਅਕਾਸਿ. ਤਿਸ੍ਸੋ ਪਨ ਚਞ੍ਞਿਙ੍ਖੁਂ ਚੇਤਿਯੇਤਿ ਪੋਰਾਣਪੋਤ੍ਥਕੇਸੁ ਵੁਤ੍ਤਂ.

ਸੋ ¶ ਰਾਜਾ ਕੁਮਾਰਕਾਲੇ ਸਿਕ੍ਖਾਪਕਸ੍ਸ ਆਚਰਿਯਸ੍ਸ ਸੇਤਚ੍ਛਤ੍ਤਂ ਦਤ੍ਵਾ ਸਙ੍ਘਨਾਯਕਟ੍ਠਾਨਂ ਨਿਯ੍ਯਾਦੇਸਿ. ਖੇਮਾਚਾਰੋ ਨਾਮ ਏਕੋ ਥੇਰੋ ਰਤ੍ਤਿਭਾਗੇ ਮਜ੍ਝਨ੍ਤਿਕਕਾਲੇ ਚੇਤਿਯਙ੍ਗਣੇ ਓਲਮ੍ਬੇਤ੍ਵਾ ਠਪਿਤਂ ਭੇਰਿਂ ਅਨੇਕਵਾਰਂ ਪਹਰਿ. ਅਥ ਰਾਜਾ ਰਾਜਗੇਹਤੋਯੇਵ ਸੁਤ੍ਵਾ ਯਥਾਠਪਿਤਨ੍ਤਿਯਾਮਵਸੇਨ ਵਿਹਾਰੇ ਕੋਚਿ ਭਿਕ੍ਖੁ ਕਾਲਂ ਕਤੋ ਭਵੇਯ੍ਯਾਤਿ ਮਞ੍ਞਿਤ੍ਵਾ ਵਿਹਾਰਂ ਗਨ੍ਤ੍ਵਾ ਪੁਚ੍ਛਾਹੀਤਿ ਦੂਤਂ ਪੇਸੇਸਿ. ਦੂਤੋ ਵਿਹਾਰਂ ਗਨ੍ਤ੍ਵਾ ਕਾਰਣਂ ਪੁਚ੍ਛਿ. ਭਿਕ੍ਖੂ ਚ ਏਵਮਾਹਂਸੁ,- ਨ ਅਮ੍ਹੇਸੁ ਕਾਲਙ੍ਕਤਭਿਕ੍ਖੁ ਨਾਮ ਅਤ੍ਥਿ, ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਇਦਾਨਿ ਕਾਲਙ੍ਕਤੋਤਿ ਬਹੂਨਂ ਮਨੁਸ੍ਸਾਨਂ ਞਾਪਨਤ੍ਥਾਯ ਭੇਰਿਂ ਪਹਰਿਮ੍ਹਾਤਿ. ਪੁਨ ਰਾਜਾ ਭਿਕ੍ਖੂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ,-ਕਸ੍ਮਾ ਪਨ ਭਨ੍ਤੇ ਤੁਮ੍ਹੇ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਕਾਲਙ੍ਕਤਭਾਵਂ ਜਾਨਾਥਾਤਿ. ਅਥ ਭਿਕ੍ਖੂ ਏਵਮਾਹਂਸੁ,-ਭਗਲਤੋ ਪਰਿਨਿਬ੍ਬਾਨਕਾਲੇ ਸਾਸਨਂ ਰਕ੍ਖਿਸ੍ਸਾਮੀਤਿ ਸਕ੍ਕੋ ਦੇਵਾਨਮਿਨ੍ਦੋ ਪਟਿਞ੍ਞਂ ਕਤ੍ਵਾਪਿ ਇਦਾਨਿ ਸਾਸਨੇ ਵਸਨ੍ਤਾਨਂ ਅਮ੍ਹਾਕਂ ਅਨੁਪਾਲਨਕਮ੍ਮਂ ਨਾਮ ਕਿਞ੍ਚਿ ਨ ਅਕਾਸਿ, ਸਚੇ ਪਨ ਸਕ੍ਕੋ ਦੇਵਾਨਮਿਨ੍ਦੋ ਜੀਵਮਾਨੋ ਭਵੇਯ੍ਯ, ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਪਟਿਞ੍ਞਂ ਦਲ਼ਂ ਕਤ੍ਵਾ ਇਦਾਨਿ ਅਪ੍ਪੋਸ੍ਸੁਕ੍ਕੋ ਨ ਭਵੇਯ੍ਯ. ਇਦਾਨਿ ਪਨ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਆਰਕ੍ਖਣਕਮ੍ਮਂ ਨਾਮ ਕਿਞ੍ਚਿ ਨ ਦਿਸ੍ਸਤਿ, ਤਸ੍ਮਾ ਇਦਾਨਿ ਸਕ੍ਕੋ ਦੇਵਾਨਮਿਨ੍ਦੋ ਕਾਲਙ੍ਕਤੋਤਿ ਜਾਨਿਮ੍ਹਾਤਿ.

ਰਾਜਾ ਤਂ ਸੁਤ੍ਵਾ ਖੇਮਾਚਾਰਤ੍ਥੇਰਸ੍ਸ ਪਸੀਦਿਤ੍ਵਾ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਸੋ ਚ ਥੇਰੋ ਸੁਧਮ੍ਮਪੁਰਵਾਸੀਨਂ ਸੀਹਲ਼ਵਂਸਿਕਾਨਂ ਮਹਾਥੇਰਾਨਂ ਵਂਸੇ ਭਵਤਿ ਲਜ੍ਜੀ ਪੇਸਲੋ ਹੋਤੀਤਿ.

ਰਤਨਪੂਰਨਗਰੇਯੇਵ ਅਧਿਕਰਞ੍ਞੋ ਕਾਲੇ ਰਤਨਪੂਰਨਗਰਸ੍ਸ ਦਕ੍ਖਿਣਦਿਸਾਭਾਗੇ ਮਹਾਸੇਤੁਂ ਕਾਰਾਪੇਸਿ. ਤਸ੍ਸ ¶ ਪਨ ਆਚਰਿਯੋ ਸਙ੍ਘਰਾਜਾ ਲਜ੍ਜੀਪਕ੍ਖਂ ਨ ਭਜਤਿ. ਤੇਨੇਵ ਥੇਰਪਰਮ੍ਪਰਾਯ ਏਸ ਨ ਸਙ੍ਗਹਿਤਬ੍ਬੋ.

ਤਸ੍ਸ ਰਞ੍ਞੋ ਕਾਲੇ ਛਸਟ੍ਠਾਧਿਕੇ ਸਤ੍ਤਵਸ੍ਸਸਤੇ ਕਲਿਯੁਗੇ ਰਾਜਾਧਿਰਾਜਾ ਨਾਮ ਰਾਮਞ੍ਞਰਟ੍ਠਿਨ੍ਦੋ ਭੂਪਾਲੋਤਿ ਸਹਸ੍ਸਪ੍ਪਮਾਣਾਸੁ ਨਾਵਾਸੁ ਸਟ੍ਠਿਸਤਸਹਸ੍ਸੇਹਿ ਯੋਧੇਹਿ ਸਦ੍ਧਿਂ ਨਦੀਮਗ੍ਗੇਨ ਯੁਜ੍ਝਨਤ੍ਥਾਯ ਰਤਨਪੂਰਾਭਿਮੁਖਂ ਆਗਤੋ.

ਅਥ ਅਧਿਕਰਾਜਾ ਬਹਵੋ ਅਮਚ੍ਚੇਚ ਭਿਕ੍ਖੂ ਚ ਸਨ੍ਨਿਪਾਤਾਪੇਤ੍ਵਾ ਮਨ੍ਤੇਸਿ,-ਇਦਾਨਿ ਰਾਮਞ੍ਞਰਟ੍ਠਿਨੋ ਰਾਜਾ ਯੁਜ੍ਝਨਤ੍ਥਾਯ ਇਧ ਆਗਚ੍ਛਤਿ, ਯੁਦ੍ਧਂ ਅਕਤ੍ਵਾ ਕੇਨੁਪਾਯੇਨ ਤਂ ਪਟਿਨਿਵਤ੍ਤਾਪੇਤੁਂ ਸਕ੍ਖਿਸ੍ਸਾਮਾਤਿ. ਅਥ ਸਬ੍ਬੇ ਕਿਞ੍ਚਿ ਅਕਥੇਤ੍ਵਾ ਤੁਣ੍ਹੀਭਾਵੇਨੇਵ ਨਿਸੀਦਿਂਸੁ.

ਅਥ ਜਾਤਵਸ੍ਸੇਨ ਏਕਤ੍ਤਿਂਸਵਸ੍ਸਿਕੋ ਉਪਸਮ੍ਪਦਾਵਸੇਨ ਪਨ ਏਕਾਦਸਵਸ੍ਸਿਕੋ ਏਕੋ ਭਿਕ੍ਖੁ ਏਵਮਾਹ,-ਏਕੋ ਪਨ ਰਾਮਞ੍ਞਰਟ੍ਠਿਨ੍ਦੋ ਰਾਜਾਧਿਰਾਜਾ ਤਾਵ ਤਿਟ੍ਠਤੁ, ਸਚੇ ਸਕਲੇਪਿ ਜਮ੍ਬੁਦੀਪੇ ਸਬ੍ਬੇ ਰਾਜਾਨੋ ਆਗਚ੍ਛੇਯ੍ਯੁਂ, ਏਵਮ੍ਪਿ ਕਥਾਸਲ੍ਲਾਪੇਨੇਵ ਯੁਦ੍ਧਂ ਅਕਤ੍ਵਾ ਪਟਿਨਿਵਤ੍ਤਾਪੇਸੁਂ ਸਕ੍ਕੋਮੀਤਿ.

ਅਥ ਅਧਿਕਰਾਜਾ ਤੁਟ੍ਠਚਿਤ੍ਤੋ ਹੁਤ੍ਵਾ ਆਹ,- ਯਥਾ ਭਨ੍ਤੇ ਤ੍ਵਂ ਸਕ੍ਕੋਸਿ ਰਾਜਾਧਿਰਾਜਂ ਯਥਾਸਲ੍ਲਾਪੇਨ ਪਟਿਨਿ ਵਤ੍ਥਾਪੇਤੁਂ, ਤਥਾ ਕਰੋਹੀਤਿ.

ਅਥ ਸੋ ਭਿਕ੍ਖੁ ਮੇਤ੍ਤਾਸਨ੍ਦੇਸਪਣ੍ਣਂ ਪੇਸੇਤ੍ਵਾ ਓਕਾਸਂ ਯਾਚਿ ਤਸ੍ਸ ਰਾਜਾਧਿਰਾਜਸ੍ਸ ਸਨ੍ਤਿਕਂ ਪਵਿਸਿਤੁਕਾਮੋ. ਰਾਜਾਧਿਰਾਜਾ ਚ ਤਸ੍ਸ ਭਿਕ੍ਖੁਸ੍ਸ ਮੇਤ੍ਤਾਸਨ੍ਦੇਸਪਣ੍ਣਂ ਪਸ੍ਸਿਤ੍ਵਾ ਤਂ ਭਿਕ੍ਖੁਂ ਸੀਙ੍ਘਂ ਆਨੇਥਾਤਿ ਦੂਤਂ ਪੇਸੇਸਿ. ਦੂਤੋ ਆਨੇਤ੍ਵਾ ਰਞ੍ਞੋ ਦਸ੍ਸੇਸਿ. ਅਥ ਸੋ ਭਿਕ੍ਖੁ ਰਾਜਾਧਿਰਾਜਂ ਧਮ੍ਮਦੇਸਨਾਯ ਓਵਾਦਂ ਦਤ੍ਵਾ ਸਕਟ੍ਠਾਨਂ ਪਟਿਨਿਵਤ੍ਤਾਪੇਸਿ. ਅਯਞ੍ਚ ¶ ਭਿਕ੍ਖੁ ਅਰਿਮਦ੍ਦਨਨਗਰੇ ਚਤੂਸੁ ਗਣੇਸੁ ਅਰਹਨ੍ਤਗਣਵਂਸੋ ਸਿਕ੍ਖਾਕਾਮੋ ਲਜ੍ਜੀ ਪੇਸਲੋ. ਅਰਿਮਦ੍ਦਨਨਗਰੇ ਚਾਗਹੇ ਨਾਮ ਦੇਸੇ ਪਨ ਜਾਤਤ੍ਤਾ ਚਾਗ੍ਰੁਹਿ ਭਿਕ੍ਖੂਤਿ ਵੋਹਾਰਿਯਤਿ.

ਕਲਿਯੁਗੇ ਅਟ੍ਠਾਸੀਤਾਧਿਕੇ ਸਤ੍ਤਵਸ੍ਸਸਤੇ ਸਮ੍ਪਤ੍ਤੇ ਮਿਞ੍ਞ੍ਹਙ੍ਗ ਧਮ੍ਮਰਾਜਾ ਰਤਨਪੂਰੇਯੇਵ ਰਜ੍ਜਂ ਸਮ੍ਪਤ੍ਤੋ. ਤਸ੍ਸ ਰਞ੍ਞੋ ਕਾਲੇ ਸੀਹਲ਼ਦੀਪਤੋ ਦ੍ਵੇ ਮਹਾਥੇਰਾ ਰਤਨਪੂਰਂ ਆਗਨ੍ਤ੍ਵਾ ਸਾਸਨਂ ਅਨੁਗ੍ਗਹੇਤ੍ਵਾ ਨਿਸੀਦਿਂਸੁ.

ਤਦਾ ਕਲਿਯੁਗੇ ਅਟ੍ਠਸਤੇ ਸਮ੍ਪੁਣ੍ਣੇ ਪੋਰਾਣਕਂ ਕਲਿਯੁਗਂ ਅਪਨੇਤ੍ਵਾ ਅਭਿਨਵਂ ਠਪੇਤੁਂ ਓਕਾਸੋ ਅਨੁਪ੍ਪਤ੍ਤੋ. ਅਥ ਚਾਗ੍ਰਿਹਿ ਥੇਰੋ ਚ ਰਾਜਵਿਹਾਰਵਾਸਿਤ੍ਥੇਰੋ ਚ ਏਵਮਾਹਂਸੁ,- ਅਪਨੀਤਬ੍ਬਕਾਲੇ ਮਹਾਰਾਜ ਸਮ੍ਪਤ੍ਤੇ ਅਨਪਨੇਤੁਂ ਨ ਵਟ੍ਟਤੀਤਿ.

ਅਥ ਰਾਜਾ ਪੁਨ ਏਵਮਾਹ,-ਅਪਨੀਤਬ੍ਬੇ ਸਮ੍ਪਤ੍ਤੇ ਅਨਪਨੇਤ੍ਵਾ ਅਜ੍ਝੁਪੇਕ੍ਖਿਤ੍ਵਾ ਵਸਨ੍ਤਸ੍ਸ ਕੋ ਦੋਸੋਤਿ. ਸਚੇ ਅਪਨੀਤਬ੍ਬੇ ਸਮ੍ਪਤ੍ਤੇ ਅਨਪਨੇਤ੍ਵਾ ਅਜ੍ਝੁਪੇਕ੍ਖਿਤ੍ਵਾ ਨਿਸੀਦੇਯ੍ਯ, ਰਟ੍ਠਵਾਸੀਨਂ ਦੁਕ੍ਖਂ ਭਵਿਸ੍ਸਤੀਤਿ ਵੇਦਸਤ੍ਥੇਸੁ ਆਗਤਂ, ਸਕ੍ਕਰਾਜਂ ਅਪਨੇਨ੍ਤੋਪਿ ਰਾਜਾ ਤਸ੍ਮਿਂਯੇਵ ਵਸ੍ਸੇ ਦਿਵਙ੍ਗਤੋ ਭਵੇਯ੍ਯਾਤਿ ਆਹਂਸੁ.

ਅਥ ਰਾਜਾ ਸਤ੍ਤਾਨਂ ਸੁਖਂ ਲਭੀਯਮਾਨਤਂ ਜਾਨਨ੍ਤੋਯੇਵ ਮਾਦਿਸੋ ਅਤ੍ਤਨੋ ਭਯਂ ਅਪੇਕ੍ਖਿਤ੍ਵਾ ਅਪਨੀਤਬ੍ਬਂ ਅਨਪਨੇਤ੍ਵਾ ਨਿਸੀਦਿਤੁਂ ਨ ਵਟ੍ਟਤਿ, ਕਮ੍ਮਂ ਖੀਯਿਤ੍ਵਾਪਿ ਮਮ ਅਗੁਣਂ ਲੋਕੇ ਪਤ੍ਥਰਿਤ੍ਵਾ ਪਤਿਟ੍ਠਹਿਸ੍ਸਤੀਤਿ ਮਨਸਿਕਰਿਤ੍ਵਾ ਸਕ੍ਕਰਾਜੇ ਅਟ੍ਠਵਸ੍ਸਸਤੇ ਸਮ੍ਪੁਣ੍ਣੇ ਬਸ੍ਯੁਛਿਦ੍ਰਮੁਨਿਸਖ੍ਯਂ ਅਪਨੇਤ੍ਵਾ ਚਮ੍ਮਾਵਸੇਸਂ ਠਪੇਸਿ. ਅਥ ਮਹਾਮਣ੍ਡਪਂ ਕਾਰਾਪੇਤ੍ਵਾ ਮਹਾਛਣਂ ਕਤ੍ਵਾ ਮਹਾਦਾਨਮ੍ਪਿ ਅਦਾਸਿ.

ਚਾਗ੍ਰਿਹਿਥੇਰੋ ਰਾਜਵਿਹਾਰ ਵਾਸਿਤ੍ਥੇਰੋਚਾਤਿ ਅਰਿਮਦ੍ਦਨ ਨਗਰੇ ¶ ਅਰਹਨ੍ਤਗਣਾਂਸਿਕੋ ਲਜ੍ਜੀ ਪੇਸਲੋ ਸਿਕ੍ਖਾਕਾਮੋ.

ਈਦਿਸਂ ਪਨ ਵਚਨਂ ਸਾਸਨਪ੍ਪਟਿਯਤ੍ਤਤ੍ਤਾ ਚ ਰਟ੍ਠਵਾਸਿਕਾਯਤ੍ਤਤ੍ਤਾ ਚ ਧਮ੍ਮਾਨੁਲੋਮਵਸੇਨ ਵੁਤ੍ਤਂ.

ਕਲਿਯੁਗੇ ਚਤੁਵਸ੍ਸਾਧਿਕੇ ਅਟ੍ਠਸਤੇ ਮਹਾਨਰਪਤਿ ਰਾਜਾ ਰਤਨਪੂਰਨਗਰੇ ਰਜ੍ਜਂ ਕਾਰੇਸਿ. ਸੋ ਚ ਰਾਜਾ ਥੂਪਾਰਾਮਚੇਤਿਯਂ ਕਾਰਾਪੇਸਿ. ਤਸ੍ਸ ਪਨ ਆਚਰਿਯੋ ਮਹਾਸਾਮਿਤ੍ਥੇਰੋ ਨਾਮ. ਸੋ ਪਨ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਸੀਹਲ਼ਿਨ੍ਦਸ੍ਸ ਰਞ੍ਞੋ ਆਚਰਿਯਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਸਿਕ੍ਖਂ ਗਹੇਤ੍ਵਾ ਪਚ੍ਚਾਗਤਤ੍ਥੇਰਵਂਸਿਕੋਤਿ ਦਟ੍ਠਬ੍ਬੋ. ਤਸ੍ਸ ਰਞ੍ਞੋ ਕਾਲੇ ਰਤਨਪੂਰਨਗਰੇ ਮਹਾਅਰਿਯਵਂਸੋ ਨਾਮ ਏਕੋ ਥੇਰੋ ਅਤ੍ਥਿ. ਸੋ ਪਨ ਪਰਿਯਤ੍ਤਿਵਿਸਾਰਦੋ ਅਰਿਮਦ੍ਦਨਨਗਰੇ ਛਪ੍ਪਦਗਣਤੋ ਆਗਤਵਂਸਿਕੋ.

ਏਕਸ੍ਮਿਂ ਸਮਯੇ ਜੇਯ੍ਯਪੁਰਨਗਰਂ ਗਨ੍ਤ੍ਵਾ ਰੇਙ੍ਗ ਇਤਿ ਪਾਕਟਸ੍ਸ ਮਹਾਥੇਰਸ੍ਸ ਸਨ੍ਤਿਕੇ ਸਦ੍ਦਨਯਂ ਉਗ੍ਗਣ੍ਹਿਤ੍ਵਾ ਨਿਸੀਦਿ. ਸੋ ਪਨ ਕਿਰ ਮਹਾਥੇਰੋ ਅਞ੍ਞੇਹਿ ਸਦ੍ਧਿਂ ਯਂਵਾ ਤਂਵਾ ਕਥਂ ਅਸਲ੍ਲਪਿਤੁਕਾਮਤਾਯ ਮੁਖੇ ਉਦਕਂ ਠਪੇਤ੍ਵਾ ਯੇਭੁਯ੍ਯੇਨ ਨਿਸੀਦਤਿ. ਤੇਨੇਵੇਸ ਮਰਮ੍ਮਵੋਹਾਰੇਨ ਰੇਙ੍ਗੁ ਇਤਿ ਪਾਕਟੋ ਅਹੋਸਿ.

ਸੋ ਕਿਰ ਅਰਿਯਵਂਸਤ੍ਥੇਰੋ ਰੇਙ੍ਗੁਂ ਥੇਰਸ੍ਸ ਸਨ੍ਤਿਕਂ ਗਨ੍ਥਂ ਵਾਚਾਪੇਤੁ ਓਕਾਸਂ ਯਾਚਿਸ੍ਸਾਮੀਤਿ ਉਪਗਚ੍ਛਨ੍ਤੋਪਿ ਕਥਾਸਲ੍ਲਾਪਂ ਅਕਤ੍ਵਾ ਦ੍ਵੇ ਅਹਾਨਿ ਵਤ੍ਤਂ ਪਰਿਪੂਰੇਤ੍ਵਾਯੇਵ ਪਚ੍ਚਾਗਚ੍ਛਿ. ਤਤਿਯਦਿਵਸੇ ਪਨ ਚਮ੍ਮਖਣ੍ਡਂ ਆਕੋਟੁਨਤ੍ਤਾ ਸਦ੍ਦਂ ਸੁਤ੍ਵਾ ਮੁਖਤੋ ਉਦਕਂ ਉਗ੍ਗਿਰਿਤ੍ਵਾ ਕਾਰਣਂ ਪੁਚ੍ਛਿ. ਗਨ੍ਥਂ ਉਗ੍ਗਹਣਤ੍ਥਾਯ ਆਗਤਭਾਵਂ ਆਰੋਚੇਸਿ.

ਅਥ ਥੇਰੋ ਏਵਮਾਹ,-ਅਹਂ ਆਵੁਸੋ ਦਿਵਸੇ ਦਿਵਵਸੇ ਤਿਕ੍ਖਤ੍ਤੁਂ ਗਨ੍ਥਂ ਵਾਚੇਮਿ, ਮਜ੍ਝਨ੍ਤਿ ਕਾਤਿਕ੍ਕਮਕਾਲੇਪਿ ਪਞ੍ਞਚੇਤਿਯਂ ਗਨ੍ਤ੍ਵਾ ਚੇਤਿਯਙ੍ਗਣੇ ਸਮ੍ਮਜ੍ਜਨਕਿਚ੍ਚਂ ਕਰੋਮਿ, ਓਕਾਸਂ ¶ ਨ ਲਭਾਮਿ, ਏਵਮ੍ਪਿ ਤ੍ਵਂ ਬਹੂਗਨ੍ਥੇ ਉਗ੍ਗਹੇਤ੍ਵਾਪਿ ਆਚਰਿਯੇਹਿ ਦਿਨ੍ਨੋਪਦੇਸਂ ਅਲਭਿਤ੍ਵਾ ਪੁਨ ਮਮ ਸਨ੍ਤਿਕਂ ਆਗਚ੍ਛਸਿ, ਤਸ੍ਮਾਯਙ੍ਗਣੇ ਸਮ੍ਮਜ੍ਜਨਵਤ੍ਤਂ ਤਾਵਕਾਲਿਕਂ ਵਿਕੋਪੇਤ੍ਵਾ ਗਨ੍ਥੁਗ੍ਗਹਣਤ੍ਥਾਯ ਓਕਾਸਂ ਦਸ੍ਸਾਮੀਤਿ ਵਤ੍ਵਾ ਅਭਿਧਮ੍ਮਤ੍ਥਵਿਸਾਵਿਨਿਂ ਨਾਮ ਲਕ੍ਖਣਟੀਕਂ ਉਗ੍ਗਣ੍ਹਾਪੇਸਿ. ਨਾਨਾਨਯੇਹਿ ਉਪਦੇਸਂ ਦਤ੍ਵਾ ਵਾਚੇਸਿ. ਵਾਚੇਤ੍ਵਾ ਚ ਤਤਿਯਦਿਵਸੇ ਆਚਰਿਯਸ੍ਸ ਸਨ੍ਤਿਕਂ ਨਾਗਚ੍ਛਿ. ਮਹਾਥੇਰੋਪਿ ਕਾਰਣਂ ਅਕਲ੍ਲਤਾਯ ਅਨਾਗਤੋ ਭਵੇਯ੍ਯਾਤਿ ਮਞ੍ਞਿਤ੍ਵਾ ਪੁਚ੍ਛਨਤ੍ਥਾਯ ਭਿਕ੍ਖੂ ਪੇਸੇਸਿ.

ਅਰਿਯਵਂਸਤ੍ਥੇਰੋਚ ਆਚਰਿਯਸ੍ਸ ਸਨ੍ਤਿਕਂ ਗਮਿਸ੍ਸਾਮੀਤਿ ਆਗਤੋ, ਅਨ੍ਤਰਾਮਗ੍ਗੇਯੇਵ ਦੂਤਭਿਕ੍ਖੂ ਪਸ੍ਸਿਤ੍ਵਾ ਤੇਹਿ ਸਦ੍ਧਿਂ ਮਹਾਥੇਰਸ੍ਸ ਸਨ੍ਤਿਕਂ ਆਗਮਂਸੁ. ਆਚਰਿਯਸ੍ਸ ਸਨ੍ਤਿਕਂ ਪਤ੍ਵਾ ਆਚਰਿਯਾ ਅਰਿਯਵਂਸਤ੍ਥੇਰਂ ਪੁਚ੍ਛਿ,-ਕਸ੍ਮਾ ਪਨ ਤ੍ਵਂ ਨ ਉਗ੍ਗਹਣਤ੍ਥਾਯ ਆਗਤੋਸੀਤਿ. ਅਹਂ ਭਨ੍ਤੇ ਤੁਮ੍ਹੇਹਿ ਦਿਨ੍ਨੋਪਦੇਸਂ ਨਿਸ੍ਸਾਯ ਇਦਾਨਿ ਸਬ੍ਬਂ ਨਯਂ ਜਾਨਾਮੀਤਿ. ਅਥ ਆਚਰਿਯੋ ਆਹ, ਯਂ ਪਨ ਗਨ੍ਥਂ ਨਿਸ੍ਸਾਯ ਤ੍ਵਂ ਛੇਕਤਂ ਪਤ੍ਤੋਸਿ, ਤਸ੍ਸ ਸਂਵਣ੍ਣਨਂ ਕਤ੍ਵਾ ਉਪਕਾਰਂ ਕਰੋਹੀਤਿ. ਅਥ ਅਰਿਯਵਂਸਤ੍ਥੇਰੋ ਆਚਰਿਯਸ੍ਸ ਵਚਨਂ ਸਿਰਸਾ ਪਟਿਗ੍ਗਹੇਤ੍ਵਾ ਅਭਿਧਮ੍ਮਤ੍ਥਵਿਭਾਵਿਨਿਯਾ ਮਣਿਸਾਰਮਞ੍ਜੂਸਂ ਨਾਮ ਅਨੁਸਂਵਣ੍ਣਨਂ ਅਕਾਸਿ. ਨਿਟ੍ਠਿਤਨਿਟ੍ਠਿਤਪਾਲ਼ਂ ਉਪੋਸਥਦਿਵਸੇ ਉਪੋਸਥਦਿਵਸੇ ਪੁਞ੍ਞਚੇਤਿਯਸ੍ਸ ਚੇਤਿਯਙ੍ਗਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਮਜ੍ਝੇ ਵਾਚਾਪੇਤ੍ਵਾ ਸੁਣਾਪੇਸਿ,- ਸਚੇ ਕੋਚਿ ਦੋਸੋ ਅਤ੍ਥਿ, ਤਂ ਵਦਥਾਤਿ.

ਅਥ ਅਰਿਮਦ੍ਦਨਨਗਰਤੋ ਚੇਤਿਯਵਨ੍ਦਨਤ੍ਥਾਯ ਏਕੋ ਭਿਕ੍ਖੁ ਆਗਨ੍ਤ੍ਵਾ ਪਰਿਸਕੋਟਿਯਂ ਸੁਣਿਤ੍ਵਾ ਨਿਸੀਦਿ. ਅਥ ਸੋ ਭਿਕ੍ਖੁ ਦ੍ਵੇ ਵਾਰਂ ਏਏਇਤਿ ਸਦ੍ਦਂ ਅਕਾਸਿ. ਤਂ ਠਾਨਂ ਸਲ੍ਲਕ੍ਖੇਤ੍ਵਾ ਠਪੇਸਿ. ਨਿਵਾਸਨਟ੍ਠਾਨਞ੍ਚ ਪੁਚ੍ਛਿ. ਅਰਿਯਵਂਸਤ੍ਥੇਰੋਪਿ ਸਕਵਿਹਾਰਂ ਪਤ੍ਵਾ ਤਸ੍ਮਿਂ ਠਾਨੇ ਉਪਧਾਰੋਨ੍ਤੋ ਏਕਸ੍ਮਿਂ ਠਾਨੇ ਏਕਸ੍ਸ ਅਤ੍ਥਸ੍ਸ ਦ੍ਵਿਕ੍ਖਤ੍ਤੁਂ ਵੁਤ੍ਤਤ੍ਤਾ ਪੁਨਰੁਤ੍ਤਿਦੋਸੋ ਦਿਸ੍ਸਤਿ, ਏਕਸ੍ਮਿਂ ¶ ਠਾਨੇ ਇਮਂ ਗਨ੍ਥਨ੍ਤਿ ਪੁਲ੍ਲਿਙ੍ਗਰੂਪੇਨ ਵਤ੍ਤਬ੍ਬਟ੍ਠਾਨੇ ਇਦਂ ਗਨ੍ਥਨ੍ਤਿ ਨਪੁਂਸਕਲਿਙ੍ਗੇਨ ਵੁਤ੍ਤਤ੍ਤਾ ਲਿਙ੍ਗਵਿਰੋਧਿਦੋਸੋ ਦਿਸ੍ਸਤਿ.

ਅਥ ਤਂ ਪੁਗ੍ਗਲਂ ਪਕ੍ਕੋਸਾਪੇਤ੍ਵਾ ਏਵਮਾਹ,-ਅਹਂ ਆਵੁਸੋ ਇਮਂ ਗਨ੍ਥਂ ਮਹੁਸ੍ਸਾਹੇਨ ਕਰੋਮਿ, ਤਞ੍ਚ ਵਿਵੇਕਕਾਲੇ ਰਤ੍ਤਿਭਾਗੇਯੇਵ ਪੋਤ੍ਥਕਂ ਪਤ੍ਥਰਿਤ੍ਵਾ ਲਿਖਾਮਿ, ਏਵਂ ਮਹੁਸ੍ਸਾਹੇਨ ਕਰੋਨ੍ਤਮ੍ਪਿ ਤ੍ਵਂ ਅਰੁਚ੍ਚਨਾਕਾਰੇਨ ਸਦ੍ਦਂ ਕਰੋਸਿ, ਕੀਦਿਸਂ ਪਨ ਦੋਸਂ ਸੁਤ੍ਵਾ ਏਵਂ ਕਰੋਸੀਤਿ ਪੁਚ੍ਛਿ. ਅਥ ਸੋ ਭਿਕ੍ਖੁ ਏਵਮਾਹ,- ਤਯੋ ਭਨ੍ਤੇ ਮਹੁਸ੍ਸਾਹੇਨ ਕਤੇ ਗਨ੍ਥੇ ਦੋਸਵਸੇਨ ਬਹੁਵਤ੍ਤਬ੍ਬਟ੍ਠਾਨਂ ਨਤ੍ਥਿ, ਸਦ੍ਦਤੋਚੇਵ ਅਤ੍ਥਤੋ ਚ ਪਰਿਪੁਣ੍ਣੋਯੇਵੇਸ ਗਨ੍ਥੋ, ਅਥ ਖੋ ਪਨ ਏਕਸ੍ਮਿਂ ਠਾਨੇ ਏਕਸ੍ਸ ਅਤ੍ਥਸ੍ਸ ਦ੍ਵਿਕ੍ਖਤ੍ਤੁਂ ਵੁਤ੍ਤਤ੍ਤਾ ਪੁਰਨੁਤ੍ਤਿਦੋਸੋ ਦਿਸ੍ਸਤਿ, ਏਕਸ੍ਮਿਂ ਪਨ ਇਮਂ ਗਨ੍ਥਨ੍ਤਿ ਪੁਲ੍ਲਿਙ੍ਗੇਨ ਵਤ੍ਤਬ੍ਬਟ੍ਠਾਨੇ ਇਦਂ ਗਨ੍ਥਨ੍ਤਿ ਨਪੁਂਸਕਲਿਙ੍ਗੇਨ ਵੁਤ੍ਤਤ੍ਤਾ ਲਿਙ੍ਗਵਿਰੋਧਿਦੋਸੋ ਦਿਸ੍ਸਤਿ, ਏਵਂ ਏਤ੍ਤਕਂਯੇਵ ਦੋਸਂ ਦਿਸ੍ਵਾ ਈਦਿਸਂ ਅਰੁਚ੍ਚਨਾਕਾਰਂ ਦਸ੍ਸੇਮੀਤਿ.

ਅਥ ਅਰਿਯਵਂਸਤ੍ਥੇਰੋ ਤੁਟ੍ਠਚਿਤ੍ਤੋ ਹੁਤ੍ਵਾ ਅਤ੍ਤਨੋ ਸਰੀਰਪਾਰੁਪਿਤਂ ਦੁਪਟ੍ਟਚੀਵਰਂ ਇਮਿਨਾਹਂ ਤਵ ਞਾਣਂ ਪੂਜੇਮੀਤਿ ਵਤ੍ਵਾ ਅਦਾਸਿ. ਪਚ੍ਛਾਕਾਲੇ ਅਧਿਕਰਾਜਾ ਤਮਤ੍ਥਂ ਸੁਤ੍ਵਾ ਨਾਮ ਲਞ੍ਛਂ ਅਦਾਸਿ.

ਸੋ ਚ ਅਰਿਯਵਂਸਤ੍ਥੇਰੋ ਮਣਿਦੀਪਂ ਨਾਮ ਗਨ੍ਥਂ ਗਨ੍ਥਾ ਭਰਣਞ੍ਚੇਵ ਜਾਤਕਵਿਸੋਧਨਞ੍ਚ ਪਾਲ਼ਿਭਾਸਾਯ ਅਕਾਸਿ. ਅਨੁਟੀਕਾਯ ਪਨ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ.

ਏਕਂ ਸਮਯਂ ਅਧਿਕਰਾਜਾ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਿ. ਥੇਰੋ ਧਮ੍ਮਂ ਦੇਸੇਤ੍ਵਾ ਨਿਟ੍ਠਿਤਕਾਲੇ ਯਾਨਬਲਿਂ ਸੁਖਤ੍ਥਾਯ ਯਾਚਿ. ਰਾਜਾ ਅਦਤ੍ਵਾ ਨਾਵਂ ਅਭਿਰੂਹਿਤ੍ਵਾ ਪਚ੍ਚਾਗਚ੍ਛਿ. ਅਨ੍ਤਰਾਮਗ੍ਗੇ ਨਾਵਾਯ ਫਿਯਂ ਏਕੋ ਸਂਸੁਮਾਰੋ ਮੁਖੇਨ ਗਣ੍ਹਿਤ੍ਵਾ ਨਿਚ੍ਚਲਂ ਕਤ੍ਵਾ ਠਪੇਸਿ. ਥੇਰੇਨ ਯਾਚਿਤਂ ਯਾਨਬਲਿਂ ਦਦਾਮੀਤਿ ਮਹਾਸਦ੍ਦਂ ਕਤ੍ਵਾ ਰਾਜਪੁਰਿਸੇ ਤਿਕ੍ਖਤ੍ਤੁਂ ਨਿਚ੍ਛਾਰੇਸਿ. ਅਥ ਸਂਸੁਮਾਰੋ ਨਾਵਂ ਮੁਞ੍ਚਿਤ੍ਵਾ ਗਚ੍ਛਿ. ਏਕਸ੍ਮਿਞ੍ਚ ਕਾਲੇ ਰਾਜਾ ਵਿਹਾਰਂ ਨਿਕ੍ਖਮਿ. ਅਥ ¶ ਏਕੋ ਹਤ੍ਥਿਨੀ ਵਿਹਾਰਸਮੀਪੇ ਬਨ੍ਧਿਤ੍ਵਾ ਠਪੇਸਿ. ਸਾ ਬੋਧਿਰੁਕ੍ਖਸਾਖਂ ਛਿਨ੍ਦਿਤ੍ਵਾ ਖਾਦਿ. ਸਾ ਤਤ੍ਥੇਵ ਭੂਮਿਯਂ ਪਤਿ. ਅਥ ਥੇਰੋ ਸਚ੍ਚਕਿਰਿਯਂ ਕਤ੍ਵਾ ਮੇਤ੍ਤਾਭਾਵਨਂ ਭਾਵੇਤ੍ਵਾ ਮੇਤ੍ਤੋਦਕੇਨ ਭਿਞ੍ਚਿ. ਤਂ ਖਣਞ੍ਞੇਵ ਸਾ ਉਟ੍ਠਹਿ. ਰਾਜਾ ਚ ਤਂ ਅਚ੍ਛਰਿਯਂ ਦਿਸ੍ਵਾ ਤਸ੍ਸਾ ਅਗ੍ਘਨਕਮੂਲਂ ਦਤ੍ਵਾ ਵਿਹਾਰਤੋ ਨਦੀ ਤਿਤ੍ਥਂ ਗਮਨਮਗ੍ਗੇ ਸਿਲਾਪਟ੍ਟਂ ਚਿਨਿਤ੍ਵਾ ਸੇਤੁਂ ਅਕਾਸੀਤਿ.

ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਪਨ ਅਰਿਯਵਂਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ ਜੇਤਵਨਵਿਹਾਰਵਾਸੀ. ਤੇ ਪਨ ਥੇਰਾ ਛਪ੍ਪਦਗਣਵਂਸਿਕਾਤਿ ਦਟ੍ਠਬ੍ਬਾ.

ਕਲਿਯੁਗੇ ਦ੍ਵੇਚਤ੍ਤਾਲੀਸਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਰਤਨਪੂਰਨਗਰੇਯੇਵ ਸਿਰਿਸੁਧਮ੍ਮਰਾਜਾਧਿਪਤਿ ਨਾਮ ਦੁਤਿਯਾਧਿਕਰਾਜਾ ਰਜ੍ਜਂ ਕਾਰੇਸਿ. ਤਸ੍ਮਿਞ੍ਚ ਕਾਲੇ ਪਬ੍ਬਤਬ੍ਭਨ੍ਤਰਨਗਰਤੋ ਮਹਾਸੀਲਵਂਸੋ ਨਾਮ ਥੇਰੋ ਪਞ੍ਚਚਤ੍ਤਾਲੀਸਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਸੁਮੇਧਕਥਂ ਕਬ੍ਯਾਲਙ੍ਕਾਰਵਸੇਨ ਬਨ੍ਧਿਤ੍ਵਾ ਬੁਦ੍ਧਾਲਙ੍ਕਾਰਞ੍ਚ ਨਾਮ ਕਬ੍ਯਾਲਙ੍ਕਾਰਂ ਪਬ੍ਬਤਬ੍ਭਨ੍ਤਰਪ੍ਪਟਿਸਂਯੁਤ੍ਤਞ੍ਚੇਵ ਕਬ੍ਯਾਲਙ੍ਕਾਰਂ ਬਨ੍ਧਿਤ੍ਵਾ ਤੇ ਗਹੇਤ੍ਵਾ ਰਤਨਪੂਰਨਗਰਂ ਆਗਚ੍ਛਿ.

ਅਥ ਰਾਜਾ ਥੂਪਾਰਾਮਚੇਤਿਯਸ੍ਸ ਏਸਨ੍ਨਟ੍ਠਾਨੇ ਰਤਨਵਿਮਾਨਵਿਹਾਰੇ ਨਿਸੀਦਾਪੇਸਿ. ਸੋ ਚ ਥੇਰੋ ਤਤ੍ਥ ਸੋਤਾਰਾਨਂ ਪਰਿਯਤ੍ਤਿਂ ਵਾਚੇਤ੍ਵਾ ਨਿਸੀਦਿ. ਸੋ ਚ ਥੇਰੋ ਤਤ੍ਥ ਨਿਸਿਨ੍ਨਾਨਂ ਥੇਰਾਨਂ ਅਟ੍ਠਮਕੋ ਹੋਤਿ. ਸੋ ਚ ਮਹਾਸੀਲਵਂਸਤ੍ਥੇਰੋ ਕਲਿਯੁਗਸ੍ਸ ਪਨ੍ਨਰਸਾਧਿਕੇ ਅਟ੍ਠਵਸ੍ਸਸਤੇ ਜਾਤੋ. ਤਿਂਸਵਸ੍ਸਕਾਲੇ ਰਤਨਪੂਰਨਗਰਂ ਆਗਤੋਤਿ ਪੋਰਾਣਪੋਤ੍ਥਕੇਸੁ ਵੁਤ੍ਤਂ. ਸੋ ਪਨ ਥੇਰੋ ਨੇਤ੍ਤਿਪਾਲ਼ਿਯਾ ਅਤ੍ਥ ਯੋਜਨਂ ਮਰਮ੍ਮਭਾਸਾਯ ਅਕਾਸਿ ਪਾਰਾਯਨਵਤ੍ਥੁਞ੍ਚ.

ਰਤਨਪੂਰਨਗਰੇਯੇਵ ਰਟ੍ਠਸਾਰੋ ਨਾਮ ਏਕੋ ਥੇਰੋ ਅਤ੍ਥਿ, ਮਹਾਸੀਲਵਂਸਤ੍ਥੇਰੇਨ ਸਮਞ੍ਞਾਣਥਾਮੋ. ਸੋ ਪਨ ਰਤਨਪੂਰਨਗਰੇਯੇਵ ¶ ਕਲਿਯੁਗਸ੍ਸ ਤਿਂਸਾਧਿਕੇ ਅਟ੍ਠਵਸ੍ਸਸਤੇ ਕਾਲੇ ਜਾਤੋ. ਭੂਰਿਦਤ੍ਤਜਾਤਕਂ ਹਤ੍ਥਿਪਾਲਜਾਤਕਂ ਸਂਵਰਜਾਤਕਞ੍ਚ ਕਬ੍ਯਾਲਙ੍ਕਾਰਵਸੇਨ ਬਨ੍ਧਿ ਅਞ੍ਞਞ੍ਚ ਅਨੇਕਵਿਧਂ ਕਬ੍ਯਾਲਙ੍ਕਾਰਂ. ਤੇ ਪਨ ਦ੍ਵੇ ਥੇਰਾ ਕਬ੍ਯਾਲਙ੍ਕਾਰਕਾ ਰਕਾਤਿ ਥੇਰਪਰਮ੍ਪਰਾਯ ਪਵੇਸੇਤ੍ਵਾ ਨ ਗਣੇਨ੍ਤਿ ਪੋਰਾਣਾ.

ਏਤ੍ਥ ਚ ਕਿਞ੍ਚਾਪਿ ਸਮਣਾਨਂ ਉਪੋਸਥਿਕਾਨਞ੍ਚ ਕਬ੍ਯਾਲਙ੍ਕਾਰਂ ਬਨ੍ਧਿਤੁਂ ਵਾਚੇਤੁਂ ਵਾ ਕਪ੍ਪਾਕਪ੍ਪਵਿਚਾਰਣਂ ਵਤ੍ਤੁਂ ਓਕਾਸੋ ਲਦ੍ਧੋ, ਸਾਸਨਵਂਸਂ ਪਨ ਵਤ੍ਤੁਂ ਓਕਾਸਸ੍ਸ ਅਤਿਵਿਤ੍ਥਾਰੋਵਸੇਸਤ੍ਤਾ ਤਂ ਅਵਤ੍ਵਾ ਅਜ੍ਝੁਪੇਕ੍ਖਿਸ੍ਸਾਮ. ਉਪੋਸਥਵਿਨਿਚ੍ਛਯੇ ਪਨ ਨਚ੍ਚਗੀਤਾਦਿਸਿਕ੍ਖਾਪਦਸ੍ਸ ਵਿਸਯੇ ਵਿਤ੍ਥਾਰੇਨ ਮਯਂ ਅਵੋਚੁਮ੍ਹਾ.

ਕਲਿਯੁਗਸ੍ਸ ਗਤੇ ਤੇਸਟ੍ਠਾਧਿਕੇ ਅਟ੍ਠਵਸ੍ਸਸਤੇ ਰਤਨਪੂਰਨਗਰੇਯੇਵ ਸਿਰਿਤ੍ਰਿਭਵਨਾਦਿਤ੍ਯਨਰਪਤਿਪਵਰਮਹਾਧਮ੍ਮ ਰਾਜਾਧਿਪਤਿਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਰਞ੍ਞੋ ਕਾਲੇਤਿਸਾਸਨਧਜੋ ਨਾਮ ਭਿਕ੍ਖੁ ਸਦ੍ਧਮ੍ਮਕਿਤ੍ਤਿਤ੍ਥੇਰਸ੍ਸ ਸਨ੍ਤਿਕੇ ਗਨ੍ਥਂ ਉਗ੍ਗਣ੍ਹਿ. ਅਥ ਅਰਿਮਦ੍ਦਨਨਗਰਤੋ ਏਕੋ ਮਹਾਥੇਰੋਸੋਤੁਨਂ ਵਾਚਿਤ੍ਵਾ ਰਤਨਪੂਰਨਗਰੇ ਨਿਸੀਦਿਸ੍ਸਾਮੀਤਿ ਆਗਤੋ. ਅਥ ਸਦ੍ਧਮ੍ਮਕਿਤ੍ਤਿਤ੍ਥੇਰਸ੍ਸ ਗਨ੍ਥਂ ਵਾਚੇਨ੍ਤਸ੍ਸੇਵ ਵਿਹਾਰਸ੍ਸ ਹੇਟ੍ਠਾ ਨਿਸੀਦਿਤ੍ਵਾ ਸੋ ਮਹਾਥੇਰੋ ਸਦ੍ਦਂ ਸੁਣਿਤ੍ਵਾ ਏਵਂ ਚਿਨ੍ਤੇਸਿ,-ਏਤਸ੍ਸ ਸਨ੍ਤਿਕੇ ਅਹਂ ਨਵਕਟ੍ਠਾਨੇ ਠਤ੍ਵਾ ਥੋਕਂ ਗਨ੍ਥਂ ਉਗ੍ਗਣ੍ਹਿਸ੍ਸਾਮੀਤਿ. ਅਥ ਸੋ ਮਹਾਥੇਰੋ ਸਦ੍ਧਮ੍ਮਕਿਤ੍ਤਿਤ੍ਥੇਰਸ੍ਸ ਸਨ੍ਤਿਕਂ ਪਵਿਸਿਤ੍ਵਾ ਗਨ੍ਥਂ ਵਾਚਾਪੇਤੁਂ ਓਕਾਸਂ ਯਾਚਿ. ਅਥ ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਵਸ੍ਸਪਮਾਣਂ ਪੁਚ੍ਛਿਤ੍ਵਾ ਤ੍ਵਂ ਭਨ੍ਤੇ ਮਯਾ ਵੁਡ੍ਢਤਰੋਸੀਤਿ ਆਹ. ਅਹਂ ਤਯਾ ਵੁਡ੍ਢਤਰੋਪਿ ਸਮਾਨੋ ਨਵਕਟ੍ਠਾਨੇ ਠਤ੍ਵਾ ਗਨ੍ਥਂ ਉਗ੍ਗਣ੍ਹਿਸ੍ਸਾਮੀਤਿ ਆਹ. ਅਥ ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਤਸ੍ਸ ਗਨ੍ਥਂ ਵਾਚੇਸਿ. ਅਤਿਪਸੀਦਿਤ੍ਵਾ ਪਨ ਤਂ ਮਹਾਥੇਰਂ ਮਹਾਸਾਧੁਜ੍ਜਨੋਤਿ ਨਾਮੇਨ ਵੋਹਾਰਤਿ.

ਅਥ ¶ ਪਚ੍ਛਾ ਮਰਮ੍ਮਰਟ੍ਠਂ ਕਲਿਯੁਗਸ੍ਸ ਪਞ੍ਚਾਸੀਤਾਧਿਕਅਟ੍ਠਸਤਕਾਲਤੋ ਪਟ੍ਠਾਯ ਯਾਵ ਅਟ੍ਠਾਸੀਤਾਧਿਕਅਟ੍ਠਸਤਵਸ੍ਸਕਾਲਂ ਨਾਨਾਭਯੇਹਿ ਸਙ੍ਖੁਬ੍ਭਿਤਂ ਅਹੋਸਿ. ਤਦਾ ਕਮ੍ਬੋਜਰਟ੍ਠਤੋ ਸਿਹਨਿਸ੍ਵਾ ਨਾਮ ਭਿਨ੍ਨਕੁਤੋ ਆਗਨ੍ਤ੍ਵਾ ਰਤਨ ਪੂਰਨਗਰੇ ਰਜ੍ਜਂ ਗਣ੍ਹਿ. ਅਥ ਸੋ ਏਵਂ ਚਿਨ੍ਤੇਸਿ,- ਭਿਕ੍ਖੂ ਅਦਾਰਾ ਅਪੁਤ੍ਤਿਕਾ ਹੁਤ੍ਵਾ ਪੁਨ ਸਿਸ੍ਸੇ ਪੋਸੇਤ੍ਵਾ ਪਰਿਵਾਰਂ ਗਵੇਸਨ੍ਤਿ, ਸਚੇ ਭਿਕ੍ਖੂ ਪਰਿਵਾਰਂ ਵਿਚਿਨਿਤ੍ਵਾ ਰਾਜਭਾਵਂ ਗਣ੍ਹੇਯ੍ਯੁਂ, ਏਵਂ ਸਤਿ ਰਜ੍ਜਂ ਗਹੇਤੁਂ ਸਕ੍ਖਿਸ੍ਸਨ੍ਤਿ, ਇਦਾਨੇਵ ਭਿਕ੍ਖੂ ਗਹੇਤ੍ਵਾ ਮਾਰੇਤੁਂ ਵਟ੍ਟਤੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਤੋਵਿਸੀਲੂ ਨਾਮਕੇ ਖੇਤ੍ਤਵਨੇ ਬਹੂ ਮਣ੍ਡਪੇ ਕਾਰਾਪੇਤ੍ਵਾ ਗੋਮਹਿਸਕੁਕ੍ਕੁਟਸੂਕਰਾਦਯੋ ਮਾਰਾਪੇਤ੍ਵਾ ਭਿਕ੍ਖੂ ਭੋਜੇਸ੍ਸਾਮੀਤਿ ਵਤ੍ਵਾ ਜੇਯ੍ਯਪੁਰਵਿਜਯਪੁਰਰਤਨਪੂਰਨਗਰੇਸੁ ਸਬ੍ਬੇ ਮਹਾਥੇਰੇ ਬਹੂਹਿ ਅਨ੍ਤੇਵਾਸਿਕੇਹਿ ਸਦ੍ਧਿਂ ਪਕ੍ਕੋਸਾਪੇਤ੍ਵਾ ਤੇਸੁ ਮਣ੍ਡਪੇਸੁ ਨਿਸੀਦਾਪੇਤ੍ਵਾ ਹਤ੍ਥਿਅਸ੍ਸਾਦਿਸੇਨਙ੍ਗੇਹਿ ਪਰਿਵਾਰੇਤ੍ਵਾ ਮਾਰੇਸਿ. ਤਦਾ ਕਿਰ ਤਿਸਹਸ੍ਸਪ੍ਪਮਾਣਾ ਭਿਕ੍ਖੂ ਮਰਿਂਸੂਤਿ. ਭਿਕ੍ਖੂ ਚ ਮਾਰੇਤ੍ਵਾ ਬਹੂਪਿ ਪੋਤ੍ਥਕੇ ਅਗ੍ਗਿਨਾ ਝਾਪੇਸਿ, ਚੇਤਿਯਾਨਿਪਿ ਭੇਦਾਪੇਸਿ. ਅਹੋਵਤ ਪਾਪਜਨਸ੍ਸ ਪਾਪਕਮ੍ਮਨ੍ਤਿ. ਹੋਨ੍ਤਿ ਚੇਤ੍ਥ,-

ਸਾਸਨਂ ਨਾਮ ਰਾਜਾਨਂ, ਨਿਸ੍ਸਾਯ ਤਿਟ੍ਠਤੇ ਇਧ;

ਮਿਚ੍ਛਾਦਿਟ੍ਠਿਕਰਾਜਾਨੋ, ਸਾਸਨਂ ਦੂਸੇਨ੍ਤਿ ਸਤ੍ਥੁਨੋ.

ਸਮ੍ਮਾਦਿਟ੍ਠੀ ਚ ਰਾਜਾਨੋ, ਪਗ੍ਗਣ੍ਹਨ੍ਤੇਵ ਸਾਸਨਂ;

ਏਵਞ੍ਚ ਸਤਿ ਆਕਾਸੇ, ਉਲੂਰਾਜਾਵ ਦਿਬ੍ਬਤੀਤਿ.

ਅਥ ਕਲਿਯੁਗੇ ਏਕਵਸ੍ਸਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਆਕਾਸੇ ਬਹੂਹਿ ਤਾਰਕਾਹਿ ਧੂਮਾ ਨਿਕ੍ਖਮਿਂਸੁ. ਚਞ੍ਞਿਙ੍ਖੁਚੇਤਿਯੇਪਿ ਬੁਦ੍ਧਪ੍ਪਟਿਬਿਮ੍ਬਸ੍ਸ ਅਕ੍ਖਿਕੂਪਤੋ ਉਦਕਧਾਰਾਨੇਤ੍ਤਜਲਾਨਿਵਿਯ ਨਿਕ੍ਖਮਿਂਸੂਤਿ ਰਾਜਵਂਸੇ ਵੁਤ੍ਤਂ.

ਅਥ ¶ ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਸਦ੍ਧਿਂ ਮਹਾਸਾਧੁਜ੍ਜਨਤਿਸਾਯ ਨਧਜਤ੍ਥੇਰੇਹਿ ਕੇਤੁਮਤੀਨਗਰਂ ਅਗਮਾਸਿ. ਰਟ੍ਠਸਾਰਤ੍ਥੇਰੋਪਿ ਸਿਰਿਖੇਤ੍ਤਨਗਰਂ ਸਯਮੇਵ ਅਗਮਾਸੀਤਿ ਪੋਰਾਣਪੋਤ੍ਥਕੇਸੁ ਵੁਤ੍ਤਂ. ਤਂ ਪਨ ਰਾਜਵਂਸੇ ਸਿਰਿਖੇਤ੍ਤਨਗਰਿਨ੍ਦੋ ਸਤ੍ਵ ਵਰਾਜਾ ਤਂ ਆਨੇਸੀਤਿ ਵੁਤ੍ਤਵਚਨੇਨ ਨ ਸਮੇਤਿ.

ਸਦ੍ਧਮ੍ਮਕਿਤ੍ਤਿਤ੍ਥੇਰੋਪਿ ਕੇਤੁਮਤੀਨਗਰੇ ਕਾਲਙ੍ਕਤੋ. ਤਤੋ ਪਚ੍ਛਾ ਥੋਕਂ ਕਾਲਂ ਅਤਿਕ੍ਕਮਿਤ੍ਵਾ ਮਹਾਸਾਧੁਜ੍ਜਨਤ੍ਥੇਰੋ ਤਤ੍ਥੇਵ ਕਾਲਮਕਾਸਿ.

ਤਿਸਾਸਨਧਜਤ੍ਥੇਰੋ ਪਨ ਕਲਿਯੁਗੇ ਦ੍ਵਾਦਸਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਹਂਸਾਵਤੀਨਗਰੇ ਅਨੇਕਸੇਤਿਭਿਨ੍ਦਸ੍ਸ ਰਞ੍ਞੋ ਕਾਲੇ ਕੇਤੁਮਤੀਨਗਰਤੋ ਹਂਸਾਵਤੀਨਗਰਂ ਅਗਮਾਸਿ.

ਤਤੋ ਪਚ੍ਛਾ ਤਿਚਤ੍ਤਾਲੀਸਵਸ੍ਸਿਕੋ ਹੁਤ੍ਵਾ ਕਲਿਯੁਗੇ ਤੇਰਸਾਧਿਕੇ ਨਵਵਸ੍ਸਸਤੇ ਮਿਙ੍ਘ ਬ੍ਰਹ੍ਮਨਰਪਤਿਰਞ੍ਞੋਕਾਲੇ ਪੁਨ ਜੇਯ੍ਯਪੁਰਨਗਰਂ ਸਮ੍ਪਤ੍ਤੋ ਹੁਤ੍ਵਾ ਜੇਤਵਨਵਿਹਾਰਸਮੀਪੇ ਏਕਿਸ੍ਸਂ ਗੁਹਾਯਂ ਦਿਸੀਦਿ. ਮਹਾਅਰਿਯਵਂਸਗਣਿਕਸ੍ਸ ਜੇਤਵਨਤ੍ਥੇਰਸ੍ਸ ਸਨ੍ਤਿਕੇ ਉਪਸਙ੍ਕਮਿ.

ਤਸ੍ਮਿਞ੍ਚ ਕਾਲੇ ਜੇਤਵਨਤ੍ਥੇਰੋ ਗਿਲਾਨੋ ਹੁਤ੍ਵਾ ਮਯਿ ਕਾਲਙ੍ਕਤੇ ਮਮ ਠਾਨਂ ਅਧੁਨਾ ਹਂਸਾਵਤੀਨਗਰਤੋ ਆਗਤੋ ਤਿਸਾਸਨਧਜੋ ਨਾਮ ਥੇਰੋ ਪਰਿਗ੍ਗਣ੍ਹਿਤੁਂ ਸਮਤ੍ਥੋ ਭਵਿਸ੍ਸਤਿ, ਤਸ੍ਸ ਨਿਯ੍ਯਾਦੇਸ੍ਸਾਮੀਤਿ ਚਿਨ੍ਤੇਸਿ. ਤਸ੍ਮਿਂ ਖਣੇ ਤਿਸਾਸਨਧਜਤ੍ਥੇਰੋ ਪੁਰਿਮਯਾਮੇ ਸੁਪਿਨਂ ਮਸ੍ਸਿ,– ਮਤਕਲ਼ੇਵਰਂ ਸਮੀਪਂ ਆਗਚ੍ਛਤੀਤਿ, ਮਜ੍ਝਿਮਯਾਮੇ ਪਨ ਤਂ ਮਤਕਲ਼ੇਵਰਂ ਗੁਹਾਯਂ ਪਵਿਸਤੀਤਿ, ਪਚ੍ਛਿਮਯਾਮੇ ਮਤਕਲ਼ੇਵਰਸ੍ਸ ਮਂਸਂ ਸਤ੍ਥੇਨ ਛਿਨ੍ਦਤੀਤਿ. ਅਥ ਸੁਪਿਨਂ ਪਸ੍ਸਿਤਭਾਵਂ ਅਤ੍ਤਨੋ ਸਮੀਪੇ ਸਯਨ੍ਤਸ੍ਸ ਏਕਸ੍ਸ ਸਾਮਣੇਰਸ੍ਸ ਆਰੋਚੇਸਿ. ਆਰੋਚੇਤ੍ਵਾ ਚ ਪਰਿਤ੍ਤਂ ਭਣੇਤ੍ਵਾ ਨਿਸੀਦਨ੍ਤਸ੍ਸੇਵ ਜੇਤਵਨਤ੍ਥੇਰੋ ਤਂ ਪਕ੍ਕੋਸਿਤ੍ਵਾ ਜੇਤਵਨਵਿਹਾਰਂ ਤਸ੍ਸ ਨਿਯ੍ਯਾਦੇਸਿ. ਤਿਸਾਸਨਧਜਤ੍ਥੇਰੋ ਚ ਜੇਤਵਨਵਿਹਾਰੇ ਨਿਸੀਦਿਤ੍ਵਾ ¶ ਗਨ੍ਥਂ ਵਾਚੇਤ੍ਵਾ ਨਿਸੀਦਿ. ਮਿਙ੍ਘ ਬ੍ਰਹ੍ਮਨਰਪਤਿਰਾਜਾ ਚ ਤਸ੍ਸ ਅਨੁਗ੍ਗਹਿਤਂ ਅਕਾਸਿ.

ਪਚ੍ਛਾ ਕਲਿਯੁਗੇ ਸੋਲ਼ਸਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਹਂਸਾਵਤੀਨਗਰਿਨ੍ਦੋ ਅਨੇਕਸੇਤਿਭਿਨ੍ਦੋ ਨਾਮ ਰਾਜਾ ਰਤਨਪੂਰਨਗਰਂ ਵਿਜਯਿਤ੍ਵਾ ਏਕਂ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸ ਅਦਾਸਿ.

ਸੋ ਚ ਤਿਸਾਸਨਧਜਤ੍ਥੇਰੋ ਅਰਿਮਦ੍ਦਨਨਗਰੇ ਅਰਹਨ੍ਤ ਗਣਵਂਸਿਕੋਤਿ ਦਟ੍ਠਬ੍ਬੋ.

ਤਸ੍ਸ ਪਨ ਸਿਸ੍ਸਾ ਅਨੇਕਸਤਪ੍ਪਮਾਣਾ ਲਜ੍ਜਿਨੋ ਅਹੇਸੁਂ. ਤੇਸੁ ਪਨ ਸਿਸ੍ਸੇਸੁ ਵਰਬਾਹੁਤ੍ਥੇਰੋ ਭੂਮਿਨਿਖਾਨੇਨ ਗਰਵਾਸਿਤ੍ਥੇਰੋ ਮਹਾਰਟ੍ਠਗਾਮਵਾਸਿਨੋ ਤਯੋ ਮਹਾਥੇਰਾਤਿ ਇਮੇ ਪਞ੍ਚ ਥੇਰਾ ਵਿਸੇਸਤੋ ਪਰਿਯਤ੍ਤਿਕੋਵਿਦਾਤਿ.

ਤਿਸਾਸਨਧਜਤ੍ਥੇਰੋ ਚ ਮਹਲ੍ਲਕਕਾਲੇ ਅਨਾਪਾਨ ਸਤਿਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਵਿਵੇਕਟ੍ਠਾਨਂ ਗਣ੍ਹਿ. ਤਦਾ ਜੇਤਵਨਗਣਾਦਯੋ ਅਰਹਨ੍ਤ ਗਣਵਂਸਾਯੇਵ. ਅਪਰਭਾਗੇਯੇਵ ਤੇਸਂ ਸਿਸ੍ਸਾਨੁਸਿਸ੍ਸਪਰਮ੍ਪਰਾਸੁ ਕੇਚਿ ਭਿਕ੍ਖੂ ਸਿਰਚ੍ਛਾਦਨਂ ਨਾਨਾਵਣ੍ਣਪ੍ਪਟਿਮਣ੍ਡਿਤਞ੍ਚ ਤਾਲਵਣ੍ਟਂ ਗਹੇਤ੍ਵਾ ਆਚਾਰਵਿਕਾਰਂ ਆਪਜ੍ਜਿਂਸੁ.

ਕਲਿਯੁਗੇ ਏਕਵਸ੍ਸਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਉਕ੍ਕਂਸਿਕੋ ਨਾਮ ਰਾਜਾ ਵਿਹਾਰਂ ਕਾਰਾਪੇਤ੍ਵਾ ਤਿਸਾਸਨਧਜਤ੍ਥੇਰਸ੍ਸ ਸਿਸ੍ਸਭੂਤਸ੍ਸ ਵਰਬਾਹੁਤ੍ਥੇਰਸ੍ਸ ਸਿਸ੍ਸਭੂਤਸ੍ਸ ਮਹਾਰਤਨਾਕਰਸ੍ਸ ਨਾਮ ਥੇਰਸ੍ਸ ਅਦਾਸਿ.

ਸੋ ਚ ਮਹਾਰਤਨਾਕਰਤ੍ਥੇਰੋ ਉਕ੍ਕਂਸਿਕਰਞ੍ਞੋ ਸਿਰਿਸੁਧਮ੍ਮਰਾਜਾਮਹਾਧਿਪਤੀਤਿ ਨਾਮਲਞ੍ਛਂ ਛਨ੍ਦਾਲਙ੍ਕਾਰਸਦ੍ਦਨੇਤ੍ਤਿ ਨਯੇਹਿ ਅਲਙ੍ਕਰਿਤ੍ਵਾ ਦਸ੍ਸਿਤਂ ਰਜਿਨ੍ਦਰਾਜਨਾਮਾਭਿਧੇਯ੍ਯਾਦੀਪਨਿਂ ਨਾਮ ਗਨ੍ਥਂ ਅਕਾਸਿ.

ਤਞ੍ਚ ਗਨ੍ਥਂ ਪਰਿਵਿਸੋਧਨਤ੍ਥਾਯ ਤਿਰੋਪਬ੍ਬਤਾਭਿਧੇਯ੍ਯਸ੍ਸ ਮਹਾਥੇਰਸ੍ਸ ਨਿਯ੍ਯਾਦੇਸਿ. ਤਿਸਾਸਨਧਜਤ੍ਥੇਰਸ੍ਸ ਸਿਸ੍ਸਭੂਤੇਸੁ ¶ ਮਹਾਰਟ੍ਠਗਾਮਵਾਸੀਸੁ ਤੀਸੁ ਭਾਤਿਕਤ੍ਥੇਰੇਸੁ ਜੇਟ੍ਠੋ ਤਿਂਸਗੁਹਾਸੁਵਸਨ੍ਤੋ ਪਰਿਯਤ੍ਤਿਂ ਵਾਚੇਤ੍ਵਾ ਨਿਸੀਦਿ. ਸਤ੍ਵਵਰਾਜਾ ਚ ਤਸ੍ਮਿਂ ਥੇਰੇ ਅਤਿਵਿਯ ਪਸਨ੍ਨੋ ਅਹੋਸਿ. ਞ੍ਞੋਙ੍ਕਰਮਿ ਨਾਮਕਸ੍ਸ ਰਞ੍ਞੋ ਕਾਲੇਪਿ ਚੂਲ਼ਪਿਤਾ ਏਕਂ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸੇਵ ਅਦਾਸਿ. ਉਕ੍ਕਂਸਿਕਰਞ੍ਞੋ ਕਾਲੇਪਿ ਮਙ੍ਗਵਂਨਾਮਕੇ ਪਬ੍ਬਤੇ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸੇਵ ਅਦਾਸਿ.

ਤੇਸੁ ਮਹਾਰਟ੍ਠਗਾਮਵਾਸਿਤ੍ਥੇਰੇਸੁ ਮਜ੍ਝਿਮਤ੍ਥੇਰੋਪਿ ਤਿਸਾਸਨਧਜਤ੍ਥੇਰਸ੍ਸ ਜੇਟ੍ਠਭਾਤਿਕਤ੍ਥੇਰਸ੍ਸ ਚ ਨਿਵਾਸਟ੍ਠਾਨਭੂਤੇ ਜੇਤਵਨਵਿਹਾਰੇਯੇਵ ਗਨ੍ਥਂ ਵਾਚੇਤ੍ਵਾ ਨਿਸੀਦਿ. ਕਨਿਟ੍ਠਤ੍ਥੇਰੋਪਿ ਤੇਸਂ ਨਿਵਾਸਟ੍ਠਾਨਭੂਤੇਸੁਯੇਵ ਵਿਹਾਰੇਸੁ ਗਨ੍ਥਂ ਵਾਚੇਤ੍ਵਾ ਨਿਸੀਦਿ. ਏਤ੍ਥ ਚ ਤਿਸਾਸਨਧਜਤ੍ਥੇਰੋ ਨਾਮ ਲਜ੍ਜਿਅਲਜ੍ਜਿਵਸੇਨ ਦੁਬ੍ਬਿਧੋ. ਯਥਾਵੁਤ੍ਤਤ੍ਥੇਰੋ ਪਨ ਲਜ੍ਜੀਯੇ ਵਾਤਿ ਦਟ੍ਠਬ੍ਬੋ. ਅਲਜ੍ਜੀ ਪਨ ਇਮਸ੍ਮਿਂ ਥੇਰਪਰਮ੍ਪਰਾਦਸ੍ਸਨੇ ਨ ਇਚ੍ਛਿ ਤਬ੍ਬੋ. ਅਲਜ੍ਜੀਭੂਤਸ੍ਸ ਪਨ ਤਿਸਾਸਨਧਜਤ੍ਥੇਰਸ੍ਸ ਵਤ੍ਥੁਂ ਇਧ ਅਵਤ੍ਵਾ ਅਜ੍ਝੁਪੇਕ੍ਖਿਸ੍ਸਾਮ, ਪਯੋਜਨਾਭਾਵਾ ਗਨ੍ਥਸ੍ਸ ਚ ਪਪਞ੍ਚੂਪਗਮਨਤ੍ਤਾਤਿ.

ਯੋਗਿਰਙ੍ਗ ਨਾਮਕਸ੍ਸ ਰਞ੍ਞੋ ਕਾਲੇ ਜੇਯ੍ਯਪੁਰੇ ਸੁਵਣ੍ਣਗੁਹਵਾਸੀ ਮਹਾਥੇਰੋ ਦਕ੍ਖਿਣਾਰਾਮਵਿਹਾਰਵਾਸੀ ਮਹਾਥੇਰੋ ਚਤੁਭੂਮਿਕਵਿਹਾਰਵਾਸੀ ਮਹਾਥੇਰੋ ਤੋਙ੍ਗਭੀਲੂ ਵਿਹਾਰਵਾਸੀ ਮਹਾਥੇਰੋ ਚ ਤਿਸਾਸਨਧਜਮਹਾਥੇਰਸ੍ਸ ਸਦ੍ਧਿਵਿਹਾਰਿਕਾਯੇਵ. ਤੇਸਂ ਪਨ ਵਤ੍ਥੁਮ੍ਪਿ ਗਨ੍ਥਵਿਤ੍ਥਾਰਭਯੇਨ ਨ ਵਦਾਮ. ਲਜ੍ਜਿਗਣਵਂਸਿਕਾ ਏਤੇਤਿ ਵਿਜਾਨਨਮੇਵ ਹੇਤ੍ਥ ਪਮਾਣਨ੍ਤਿ.

ਕਲਿਯੁਗੇ ਏਕਸਟ੍ਠਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਫਗ੍ਗੁਨਮਾਸਸ੍ਸ ਜੁਣ੍ਹਪਕ੍ਖਦੁਤਿਯਦਿਵਸੇ ਸੁਕ੍ਕਵਾਰੇ ਰਤਨਪੂਰਨਗਰਂ ਦੁਤਿਯਂ ਮਾਪੇਤ੍ਵਾ ਞ੍ਞੋਗੀਰਙ੍ਗ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਸੀਹਸੂਰਧਮ੍ਮਰਾਜਾਤਿਪਿ ਨਾਮਲਞ੍ਛਂ ਪਟਿਗ੍ਗਣ੍ਹਿ. ਤੋਚਭੀਲੂ ਵਿਹਾਰਵਾਸੀਮਹਾਥੇਰਂ ¶ ਉਦ੍ਦਿਸ੍ਸ ਚਤੁਭੂਮਿਕਵਿਹਾਰਂ ਕਾਰਾਪੇਸਿ. ਚਤ੍ਤਾਰਿ ਮਹਾਮੁਨਿਚੇਤਿਯਾਨਿਪਿ ਕਾਰਾਪੇਸਿ. ਵਿਹਾਰ ਚੇਤਿਯੇਸੁ ਅਨਿਟ੍ਠਿਤੇਸੁਯੇਵ ਸਿਨ੍ਨੀਨਗਰਂ ਨਿਕ੍ਖਮਿਤ੍ਵਾ ਤਤ੍ਥ ਵੇਰਂ ਵੂਪਸਮਾਪੇਤ੍ਵਾ ਪਚ੍ਚਾਗਤਕਾਲੇ ਸਙ੍ਖਾਰਸਭਾਵਂ ਅਨਤਿਕ੍ਕਮਨਤੋ ਦਿਵਙ੍ਗਤੋ ਅਹੋਸਿ. ਅਹੋਵਤ ਸਙ੍ਖਾਰਧਮ੍ਮਾਤਿ. ਹੋਨ੍ਤਿ ਚੇਤ੍ਥ,–

ਸੇਯ੍ਯਥਾ ਵਾਣਿਜਾਨਂਵ, ਘਰਗੋਲ਼ਿਕਰੂਪਕਂ;

ਤਂਤਂਦਿਸਂ ਭਮਿਤ੍ਵਾਵ, ਸੀਸਂ ਠਪੇਤਿ ਉਤ੍ਤਰਂ;

ਏਵਂ ਲੋਕਮ੍ਹਿ ਸਤ੍ਤਾ ਚ, ਸਨ੍ਧਿਚੁਤੀਨਮਨ੍ਤਰੇ;

ਯਥਾ ਤਥਾ ਭਮਿਤ੍ਵਾਵ, ਅਨ੍ਤੇ ਠਪੇਨ੍ਤਿ ਸਨ੍ਤਨੁਨ੍ਤਿ;

ਕਲਿਯੁਗੇ ਸਤ੍ਤਸਟ੍ਠਾਧਿਕੇ ਨਵਵਸ੍ਸਸਤੇ ਫਗ੍ਗੁਨਮਾਸਸ੍ਸ ਕਾਲ਼ਪਕ੍ਖਤੇਰਸਮਿਯਂ ਤਸ੍ਸ ਜੇਟ੍ਠਪੁਤ੍ਤੋ ਪਿਤੁ ਸਨ੍ਤਕਂ ਰਜ੍ਜਂ ਗਣ੍ਹਿ. ਮਹਾਧਮ੍ਮਰਾਜਾਤਿ ਨਾਮਲਞ੍ਛਮ੍ਪਿ ਪਟਿਗ੍ਗਣ੍ਹਿ. ਪਿਤੁ ਕਾਲੇ ਅਨਿਟ੍ਠਿਤਾਨਿ ਚੇਤਿਯਾਨਿ ਪੁਨ ਕਾਰਾਪੇਸਿ. ਚਤੁਭੂਮਿਕਵਿਹਾਰਞ੍ਚ ਨਿਟ੍ਠਂ ਗਮਾਪੇਤ੍ਵਾ ਤੋਵਿਭੀਲੂ ਮਹਾਥੇਰਸ੍ਸ ਪਰਲੋਕਂ ਗਨ੍ਤ੍ਵਾ ਅਵਿਜ੍ਜਮਾਨਤਾਯ ਚਤੁਭੂਮਿਕਵਿਹਾਰਵਾਸੀ ਮਹਾਥੇਰਸ੍ਸ ਦਸ੍ਸਾਮੀਤਿ ਅਨ੍ਤੇਪੁਰਂ ਪਕ੍ਕੋਸਾਪੇਸਿ. ਥੇਰੋ ਦ੍ਵੇ ਵਾਰਾਨਿ ਪਕ੍ਕੋਸਿਯਮਾਨੋਪਿ ਨਾਗਚ੍ਛਿ. ਤਤਿਯ ਵਾਰੇ ਪਨ ਬਹੂ ਸਦ੍ਧਿਵਿਹਾਰਿਕਾ ਅਨ੍ਤੇਪੁਰਂ ਗਨ੍ਤ੍ਵਾ ਪਵਿਸਥ, ਨ ਹਿ ਸਕ੍ਕਾ ਰਞ੍ਞਾ ਪਕ੍ਕੋਸਿਤੇ ਪਟਿਕ੍ਖਿਪਿਤੁਨ੍ਤਿ ਆਹਂਸੁ.

ਅਥ ਥੇਰੋ ਏਵਮਾਹ,- ਅਹਂ ਆਵੁਸੋ ਰਟ੍ਠਪੀਲ਼ਨਪਿਣ੍ਡਪਾਤਂ ਭੁਞ੍ਜਿਤੁਂ ਨ ਇਚ੍ਛਾਮਿ, ਏਵਮ੍ਪਿ ਸਚੇ ਤੁਮ੍ਹੇ ਇਚ੍ਛਥ ਰਞ੍ਞੋ ਸਨ੍ਤਿਕਂ ਗਨ੍ਤੁਂ, ਏਵਂ ਸਤਿ ਇਦਾਨਿ ਰਞ੍ਞੋ ਸਨ੍ਤਿਕਂ ਅਹਂ ਗਮਿਸ੍ਸਾਮੀਤਿ ਅਨ੍ਤੇਪੁਰਂ ਪਾਵਿਸਿ. ਪਵਿਸਿਤ੍ਵਾ ਰਞ੍ਞਾ ਸਦ੍ਧਿਂ ਸਲ੍ਲਾਪਂ ਕਤ੍ਵਾ ਅਯਂ ਵਿਹਾਰੋ ਅਰਞ੍ਞਵਾਸੀਨਂ ਭਿਕ੍ਖੂਨਂ ਅਸਪ੍ਪਾਯੋਤਿ ਪਟਿਕ੍ਖਿਪਿ. ਏਵਂ ਪਨ ਭਨ੍ਤੇ ਸਤਿ ਤਸ੍ਮਿਂ ਵਿਹਾਰੇ ਨਿਸੀਦਿਯਮਾਨਂ ਥੇਰਂ ਉਪਦਿਸ੍ਸਥਾਤਿ ¶ . ਖਣਿਤ੍ਤਿਪਾਦਵਿਹਾਰਵਾਸੀ ਮਹਾਰਾਜ ਥੇਰੋ ਪਰਿਯਤ੍ਤਿਵਿਸ੍ਸਾਰਦੋ ਸਿਕ੍ਖਾਕਾਮੋ, ਤਸ੍ਸ ਦਾਤੁਂ ਵਟ੍ਟਤੀਤਿ. ਅਥ ਰਾਜਾ ਤਸ੍ਸ ਵਿਹਾਰਂ ਅਦਾਸਿ. ਮਹਾਸਙ੍ਘਨਾਥੋਤਿ ਨਾਮਲਞ੍ਛਮ੍ਪਿ ਅਦਾਸਿ. ਸੋ ਤਤ੍ਥ ਪਰਿਯਤ੍ਤਿਂ ਵਾਚੇਤ੍ਵਾ ਨਿਸੀਦਿ.

ਤਸ੍ਸ ਪਨ ਵਿਹਾਰਸ੍ਸ ਪਰਿਵਾਰਭੂਤੇਸੁ ਚਤ੍ਤਾਲੀਸਾਯ ਵਿਹਾਰੇਸੁ ਉਤ੍ਤਰਾਯ ਅਨੁਦਿਸਾਯ ਏਕਸ੍ਮਿਂ ਵਿਹਾਰੇ ਵਸਨ੍ਤੋ ਵਰਾਭਿਸਙ੍ਘਨਾਥੋ ਨਾਮ ਥੇਰੋ ਮਣਿਕੁਣ੍ਡਲਵਤ੍ਥੁਂ ਮਰਮ੍ਮਭਾਸਾਯ ਅਕਾਸਿ. ਪਚ੍ਛਿਮਾਯ ਅਨੁਦਿਸਾਯ ਏਕਸ੍ਮਿਂ ਵਿਹਾਰੇ ਵਸਨ੍ਤੋ ਏਕੋ ਥੇਰੋ ਸਤ੍ਤਰਾਜਧਮ੍ਮਵਤ੍ਥੁਂ ਅਕਾਸਿ.

ਤਸ੍ਮਿਞ੍ਚ ਕਾਲੇ ਭਾਮਅਙ੍ਕ੍ਯੋ ਆਚਾਰਅਙ੍ਕ੍ਯੋਤਿ ਦ੍ਵਿਨ੍ਨਂ ਭਿਕ੍ਖੂਨਞ੍ਚ ਲੋਕਧਮ੍ਮੇਸੁ ਛੇਕਤਾਯ ਦ੍ਵੇ ਵਿਹਾਰੇ ਕਤ੍ਵਾ ਅਦਾਸਿ. ਤੇ ਪਨ ਦ੍ਵੇ ਥੇਰਾ ਵੇਦਸਤ੍ਥਕੋਵਿਦਾ, ਪਰਿਯਤ੍ਤਿਪਟਿਪਤ੍ਤੀਸੁ ਪਨ ਮਨ੍ਦਾ, ਰਾਮਞ੍ਞਰਟ੍ਠਤੋ ਆਗਤਾ. ਤੇ ਪਨ ਥੇਰਪਰਮ੍ਪਰਾਯ ਨ ਗਣਨ੍ਤਿ ਪੋਰਾਣਾ.

ਕਲਿਯੁਗੇ ਤਿਸਤ੍ਤਤਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਮਹਾਮੁਨਿਚੇਤਿਯਸ੍ਸ ਪੁਰਤ੍ਥਿਮਦਿਸਾਭਾਗੇ ਚਤ੍ਤਾਰੋ ਵਿਹਾਰੇ ਕਾਰਾਪੇਤ੍ਵਾ ਚਤੁਨ੍ਨਂ ਥੇਰਾਨਂ ਅਦਾਸਿ. ਤੇ ਚ ਥੇਰਾ ਤਤ੍ਥ ਨਿਸੀਦਿਤ੍ਵਾ ਸਾਸਨਂ ਪਗ੍ਗਣ੍ਹਿਂਸੁ.

ਤਸ੍ਮਿਂਯੇਵ ਕਾਲੇ ਬਦਰਵਨਵਾਸੀ ਨਾਮ ਏਕੋਪਿ ਥੇਰੋ ਅਤ੍ਥਿ. ਸੋਪਿ ਪਰਿਯਤ੍ਤਿਵਿਸਾਰਦੋ ਛਪ੍ਪਦਵਂਸਿਕੋ. ਸੋ ਚ ਥੇਰੋ ਯਾਵਜੀਵਂ ਯਥਾਬਲਂ ਸਾਸਨਂ ਪਗ੍ਗਣ੍ਹਿਤ੍ਵਾ ਦੁਤਿਯਭਵੇ ਚਲਙ੍ਗਨਗਰੇ ਏਕਿਸ੍ਸਾ ਇਤ੍ਥਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਦਸਮਾਸਚ੍ਚਯੇਨ ਕਲਿਯੁਗੇ ਚਤ੍ਤਾਲੀਸਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਬੁਧਵਾਰੇ ਵਿਜਾਯਿਤ੍ਵਾ ਤੇਰਸਵਸ੍ਸਿਕਕਾਲੇ ਸਾਸਨੇ ਪਬ੍ਬਜਿਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿ. ਸਿਰਿਖੇਤ੍ਤਨਗਰਿਨ੍ਦੋ ਰਾਜਾ ਸਿਰਿਖੇਤ੍ਤਨਗਰਂ ਆਨੇਤ੍ਵਾ ਸਿਰਿਖੇਤ੍ਤਨਗਰੇ ਸਾਮਣੇਰੋਤਿ ਨਾਮੇਨ ਪਾਕਟੋ ਹੁਤ੍ਵਾ ਕਲਿਯੁਗੇ ਚਤੁਪਣ੍ਣਾਸਾਧਿਕੇ ¶ ਨਵਵਸ੍ਸਸਤੇ ਸਮ੍ਪਤ੍ਤੇ ਪਨ੍ਨਰਸਵਸ੍ਸਿਕਕਾਲੇ ਵੇਸ੍ਸਨ੍ਤਰਜਾਭਕਂ ਕਬ੍ਯਾਲਙ੍ਕਾਰਵਸੇਨ ਬਨ੍ਧਿ. ਪਰਿਪੁਣ੍ਣਵੀਸਤਿਵਸ੍ਸਕਾਲੇ ਸਿਰਿਖੇਤ੍ਤਨਗਰੇਯੇਵ ਸਿਰਿਖੇਤ੍ਤਨਗਰਿਨ੍ਦੋ ਵੇਰਵਿਜਯੋ ਨਾਮ ਰਾਜਾ ਅਨੁਗ੍ਗਹੇਤ੍ਵਾ ਉਪਸਮ੍ਪਦਭੂਮਿਯਂ ਪਤਿਟ੍ਠਾਤਿ. ਪਚ੍ਛਿਮਪਕ੍ਖਾਧਿਕੋ ਨਾਮ ਰਾਜਾ ਸਿਰਿਖੇਤ੍ਤਨਗਰਂ ਅਤ੍ਤਨੋ ਹਤ੍ਥਗਤਂ ਅਕਾਸਿ. ਤਸ੍ਮਿਞ੍ਚ ਕਾਲੇ ਤਂ ਥੇਰਂ ਆਨੇਤ੍ਵਾ ਰਤਨਪੂਰਨਗਰੇ ਵਸਾਪੇਸਿ. ਸੂਰਕਿਤ੍ਤਿ ਨਾਮ ਰਞ੍ਞੋ ਕਨਿਟ੍ਠਭਾਤਿਕੋ ਏਰਾਵਤੀਨਦੀਤੀਰੇ ਚਤੁਭੂਮਿਕਵਿਹਾਰਂ ਕਾਰਾਪੇਤ੍ਵਾ ਤਸ੍ਸ ਥੇਰਸ੍ਸ ਅਦਾਸਿ. ਰਾਜਾ ਚ ਤਿਪਿਟਕਾਲਙ੍ਕਾਰੋਤਿ ਨਾਮਲਞ੍ਛਂ ਅਦਾਸਿ.

ਕਲਿਯੁਗੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਫਗ੍ਗੁਨਮਾਸਸ੍ਸ ਪੁਣ੍ਣਮਿਯਂ ਸਟ੍ਠਿਵਸ੍ਸਿਕੋ ਹੁਤ੍ਵਾ ਤਿਰਿਯਪਬ੍ਬਤਂ ਗਨ੍ਤ੍ਵਾ ਅਰਞ੍ਞਵਾਸਂ ਵਸਿ. ਦ੍ਵੇ ਵਸ੍ਸਾਧਿਕੇ ਵਸ੍ਸਸਹਸ੍ਸੇ ਰਾਜਾ ਤਸ੍ਮਿਂ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸੇਵ ਥੇਰਸ੍ਸ ਅਦਾਸਿ. ਸੋ ਪਨ ਤਿਪਿਟਕਾਲਙ੍ਕਾਰਤ੍ਥੇਰੋ ਸਿਰਿਖੇਤ੍ਤਨਗਰੇ ਨਵਙ੍ਗਕਨ੍ਦਰੇ ਪਤ੍ਤਲਙ੍ਕਸ੍ਸ ਅਤੁਲਵਂਸਤ੍ਥੇਰਸ੍ਸ ਵਂਸਿਕੋ. ਸਿਰਿਖੇਤ੍ਤਨਗਰੇ ਨਵਙ੍ਗਕਨ੍ਦਰੇ ਸੁਵਣ੍ਣਵਿਹਾਰੇ ਵਸਨ੍ਤਸ੍ਸ ਥੇਰਸ੍ਸ ਕਿਤ੍ਤਿਘੋਸੋ ਸਬ੍ਬਤ੍ਥ ਪਤ੍ਥਰਿ. ਜੇਯ੍ਯਪੁਰੇ ਏਰਾਵਤੀਨਦੀਤੀਰੇ ਚਤੁਭੂਮਿਕਵਿਹਾਰੇ ਵਸਨਕਾਲੇ ਅਟ੍ਠਸਾਲਿਨਿਯਾ ਆਦਿਤੋ ਵੀਸਤਿ ਗਾਥਾਨਂ ਸਂਵਣ੍ਣਨਂ ਅਕਾਸਿ. ਸੂਰਕਿਤ੍ਤਿਨਾਮਕਸ੍ਸ ਕਨਿਟ੍ਠਭਾਤਿਕਸ੍ਸ ਯਾਚਨਮਾਰਬ੍ਭ ਯਸਵਡ੍ਢਨਵਤ੍ਥੁਞ੍ਚ ਅਕਾਸਿ. ਤਿਰਿਯਪਬ੍ਬਤੇ ਵਸਨਕਾਲੇ ਵਿਨਯਾਲਙ੍ਕਾਰਟੀਕਂ ਅਕਾਸਿ. ਪਚ੍ਛਿਮਪਕ੍ਖਾਧਿਕਰਞ੍ਞੋ ਕਾਲੇ ਮਹਾਸਙ੍ਘਨਾਥਤ੍ਥੇਰਂ ਸਙ੍ਘਰਾਜਭਾਵੇ ਠਪੇਸਿ. ਸੋ ਚ ਸਙ੍ਘਰਾਜਾ ਅਤਿਵਿਯ ਪਰਿਯਤ੍ਤਿ ਵਿਸਾਰਦੋ. ਤਸ੍ਮਿਞ੍ਚ ਕਾਲੇ ਰਤਨਪੂਰਨਗਰੇਪਿ ਅਰਿਯਾਲਙ੍ਕਾਰਤ੍ਥਰੋ ਨਾਮ ਏਕੋ ਅਤ੍ਥਿ. ਸੋ ਪਨ ਤਿਪਿਟਕਾਲਙ੍ਕਾਰਤ੍ਥੇਰੇਨ ਸਮਞ੍ਞਾਣਥਾਮੋ. ਵਯਸਾਪਿ ਸਮਾਨਵਸ੍ਸਿਕਾ.

ਤੇਸੁ ਤਿਪਿਟਕਾਲਙ੍ਕਾਰਤ੍ਥੇਰੋ ਗਨ੍ਥਨ੍ਤਰਬਹੁਸ੍ਸੁਤਟ੍ਠਾਨੇ ¶ ਅਧਿਕੋ, ਅਰਿਯਾਲਙ੍ਕਾਰਤ੍ਥੇਰੋ ਪਨ ਧਾਤੁਪਚ੍ਚਯਵਿਭਾਗਟ੍ਠਾਨੇ ਅਧਿਕੋਤਿ ਦਟ੍ਠਬ੍ਬੋ. ਪਚ੍ਛਾ ਪਨ ਉਕ੍ਕਂਸਿਕਰਞ੍ਞੋਕਾਲੇ ਤੇਪਿ ਦ੍ਵੇ ਥੇਰਾ ਰਞ੍ਞੋ ਆਚਰਿਯਾ ਹੁਤ੍ਵਾ ਸਾਸਨਂ ਪਗ੍ਗਣ੍ਹਿਂਸੁ. ਤੇਸੁ ਅਰਿਯਾਲਙ੍ਕਾਰਤ੍ਥੇਰੋ ਅਪਰਭਾਗੇ ਕਾਲਙ੍ਕਰਿਤ੍ਵਾ ਤਸ੍ਸ ਥੇਰਸ੍ਸ ਸਦ੍ਧਿਵਿਹਾਰਿਕਸ੍ਸ ਦੁਤਿਯਾਰਿਯਾਲਙ੍ਕਾਰਤ੍ਥੇਰਸ੍ਸ ਰਾਜਮਣਿਚੂਲ਼ਚੇਤਿਯਸ੍ਸ ਸਮੀਪੇ ਦਕ੍ਖਿਣਵਨਾਰਾਮਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ.

ਉਕ੍ਕਂਸਿਕੋ ਨਾਮ ਰਾਜਾ ਪਨ ਸਾਸਨੇ ਬਹੁਪ੍ਪਕਾਰੋ. ਸੋ ਚ ਕਲਿਯੁਗੇ ਛਨਵੁਤਾਧਿਕੇ ਨਵਵਸ੍ਸਸਤੇ ਰਜ੍ਜਂ ਪਤ੍ਤੋ. ਰਜ੍ਜਂ ਪਨ ਪਤ੍ਵਾ ਸਿਰਿਧਮ੍ਮਾਸੋਕਰਾਜਾਵਿਯ ਚਤ੍ਤਾਰਿ ਵਸ੍ਸਾਨਿ ਅਤਿਕ੍ਕਮਿਤ੍ਵਾ ਮੁਦ੍ਧਾਭਿਸੇਕਂ ਪਟਿਗ੍ਗਹੇਤ੍ਵਾ ਸਿਰਿਸੁਧਮ੍ਮ ਰਾਜਾਮਹਾਧਿਪਤੀਤਿ ਨਾਮਲਞ੍ਛਮ੍ਪਿ ਪਟਿਗ੍ਗਣ੍ਹਿ. ਏਕਸ੍ਮਿਂ ਪਨ ਸਮਯੇ ਹਂਸਾਵਤੀਨਗਰਂ ਗਨ੍ਤ੍ਵਾ ਤਤ੍ਥ ਨਿਸੀਦਿ. ਅਥ ਰਾਮਞ੍ਞਰਟ੍ਠਵਾਸਿਨੋ ਏਵਮਾਹਂਸੁ,- ਮਰਮ੍ਮਿਕਭਿਕ੍ਖੂ ਨਾਮ ਪਰਿਯਤ੍ਤਿਕੋਵਿਦਾ ਵੇਦਸਤ੍ਥਞ੍ਞੁਨੋ ਨਤ੍ਥੀਤਿ. ਤਂ ਸੁਤ੍ਵਾ ਰਾਜਾ ਚਤੁਭੂਮਿਕਵਿਹਾਰਵਾਸਿਤ੍ਥੇਰਸ੍ਸ ਸਨ੍ਤਿਕਂ ਸਾਸਨਂ ਪੇਸੇਸਿ,-ਤਿਂਸਵਸ੍ਸਿਕਾ ਚਤ੍ਤਾਲੀਸਵਸ੍ਸਿਕਾ ਵਾ ਪਰਿਯਤ੍ਤਿਕੋਵਿਦਾ ਵੇਦਸਤ੍ਥਞ੍ਞੁਨੋ ਭਿਕ੍ਖੂ ਰਾਮਞ੍ਞਰਟ੍ਠਂ ਮਮ ਸਨ੍ਤਿਕਂ ਪੇਸੇਥਾਤਿ. ਅਥ ਚਤੁਭੂਮਿ ਕਵਿਹਾਰਵਾਸਿਤ੍ਥੇਰੋ ਤਿਪਿਟਕਾਲਙ੍ਕਾਰਂ ਤਿਲੋਕਾਲਙ੍ਕਾਰਂ ਤਿਸਾਸਨਾਲਙ੍ਕਾਰਞ੍ਚ ਸਦ੍ਧਿਂ ਤਿਂਸਮਤ੍ਥੇਹਿ ਭਿਕ੍ਖੂਹਿ ਪੇਸੇਸਿ. ਹਂਸਾਵਤੀਨਗਰਂ ਪਨ ਪਤ੍ਵਾ ਮੋਧੋਚੇਤਿਯਸ੍ਸ ਪੁਰਤ੍ਥਿਮਭਾਗੇ ਵਿਹਾਰੇ ਕਾਰਾਪੇਤ੍ਵਾ ਤੇਸਂ ਅਦਾਸਿ.

ਉਪੋਸਥਦਿਵਸੇਸੁ ਸੁਧਮ੍ਮਸਾਲਾਯਂ ਰਾਮਞ੍ਞਰਟ੍ਠਵਾਸਿਨੋ ਪਰਿਯਤ੍ਤਿਕੋਵਿਦੇ ਵੇਦਸਤ੍ਥਞ੍ਞੁਨੋ ਸਨ੍ਨਿਪਾਤਾਪੇਤ੍ਵਾ ਤੇਹਿ ਤੀਹਿ ਥੇਰੇਹਿ ਸਦ੍ਧਿਂ ਕਥਾਸਲ੍ਲਾਪਂ ਕਾਰਾਪੇਸਿ. ਅਥ ਰਾਮਞ੍ਞਰਟ੍ਠਵਾਸਿਨੋ ਭਿਕ੍ਖੂ ਏਵਮਾਹਂਸੁ,– ਪੁਬ੍ਬੇ ਪਨ ਮਯਂ ਮਰਮ੍ਮਰਟ੍ਠੇ ਪਰਿਯਤ੍ਤਿਕੋਵਿਦਾ ਵੇਦਸਤ੍ਤਞ੍ਞੁਨੋ ਨਤ੍ਥੀਤਿ ਮਞ੍ਞਾਮ, ਇਦਾਨਿ ਮਰਮ੍ਮਰਟ੍ਠਵਾਸਿਨੋ ਅਤਿਵਿਯ ਪਰਿਯਤ੍ਤਿ ਕੋਵਿਦਾ ¶ ਵੇਦਸਤ੍ਥਞ੍ਞੁਨੋਤਿ. ਅਪਰਭਾਗੇ ਕਲਿਯੁਗੇ ਛਨਵੁਤਾਧਿਕੇ ਨਵਵਸ੍ਸਸਤੇ ਸਮ੍ਪਤ੍ਤੇ ਰਾਜਾ ਰਤਨਪੂਰਨਗਰਂ ਪਚ੍ਚਾਗਚ੍ਛਿ.

ਤੇਪਿ ਥੇਰਾ ਪਚ੍ਚਾਗਨ੍ਤੁਕਾਮਾ ਰਾਮਞ੍ਞਰਟ੍ਠੇ ਪਧਾਨਭੂਤਸ੍ਸ ਤਿਲੋਕਗਰੂਤਿ ਨਾਮਧੇਯ੍ਯਸ੍ਸ ਮਹਾਥੇਰਸ੍ਸ ਸਨ੍ਤਿਕਂ ਵਨ੍ਦਨਤ੍ਥਾਯ ਅਗਮਂਸੁ.

ਤਦਾ ਤਿਲੋਕਗਰੁਤ੍ਥੇਰੋਪਿ ਤੇਹਿ ਸਦ੍ਧਿਂ ਸਲ੍ਲਾਪਂ ਕਤ੍ਵਾ ਏਵਮਾਹ,-ਤੁਮ੍ਹੇਸੁ ਪਨ ਤਿਪਿਟਕਾਲਙ੍ਕਾਰਤ੍ਥੇਰੋ ਪਠਮਂ ਆਵਾਸਵਿਹਾਰਂ ਲਭਿਸ੍ਸਤੀਤਿ. ਕਸ੍ਮਾ ਪਨ ਭਨ੍ਤੇ ਏਵਮ ਵੋਚਾਤਿ ਵੁਤ੍ਤੇ ਅਯਂ ਪਨ ਪਿਣ੍ਡਾਯ ਚਰਨ੍ਤੋਪਿ ਅਨ੍ਤਰਾਮਗ੍ਗੇ ਵੇਲ਼ੁਵੇਤ੍ਤਾਦੀਨਿ ਲਭਿਤ੍ਵਾ ਗਹੇਤ੍ਵਾ ਵਿਹਾਰੇ ਪਟਿਸਙ੍ਖਰਣਂ ਅਕਾਸਿ, ਤਸ੍ਮਾਹਂ ਏਵਂ ਵਦਾਮਿ, ਲੋਕੇ ਵਿਹਾਰੇ ਪਟਿਸਙ੍ਖਰਣਸੀਲਾ ਭਿਕ੍ਖੂ ਸੀਘਮੇਵ ਆਵਾਸਵਿਹਾਰਂ ਲਭਨ੍ਤੀਤਿ ਹਿ ਪੋਰਾਣਤ੍ਥੇਰਾ ਆਹਂਸੂਤਿ ਆਹ.

ਤੇਪਿ ਰਤਨਪੂਰਨਗਰਂ ਪਚ੍ਚਾਗਚ੍ਛਿਂਸੁ. ਤਿਲੋਕਗਰੁਤ੍ਥੇਰਸ੍ਸ ਵਚਨਾਨੁਰੂਪਮੇਵ ਤਿਪਿਟਕਾਲਙ੍ਕਾਰਤ੍ਥੇਰੋ ਸਬ੍ਬਪਠਮਂ ਆਵਾਸਵਿਹਾਰਂ ਲਭੀਤਿ.

ਕਲਿਯੁਗੇ ਪਨ ਨਵਵਸ੍ਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਰਞ੍ਞੋ ਕਨਿਟ੍ਠੋ ਕਾਲਮਕਾਸਿ. ਅਥਂ ਰਞ੍ਞੋ ਪੁਤ੍ਤੋ ਉਚ੍ਚਨਗਰਭੋਜਕੋ ਬਾਲਜਨੇਹਿ ਸਨ੍ਥਵਂ ਕਤ੍ਵਾ ਤੇਸਂ ਵਚਨਂ ਆਦਿਯਿਤ੍ਵਾ ਪਚ੍ਚੂਸਕਾਲੇ ਪਿਤਰਂ ਘਾਤੇਤੁਕਾਮੋ ਅਨ੍ਤੇਪੁਰਂ ਸਹਸਾ ਪਾਵਿਸਿ.

ਰਾਜਾਵ ਅਨਗ੍ਘਂ ਮੁਦ੍ਦਿਕਂ ਗਹੇਤ੍ਵਾ ਨਨ੍ਦਜੇਯ੍ਯੇਨ ਨਾਮ ਅਮਚ੍ਚੇਨ ਰਾਜਯੋਧੇਨ ਨਾਮ ਅਮਚ੍ਚੇਨਚ ਸਦ੍ਧਿਂ ਅਞ੍ਞਤਰਵੇਸੇਨ ਨਗਰਤੋ ਨਿਕ੍ਖਮਿਤ੍ਵਾ ਰਜਤਵਾਲੁਕਨਦਿਂ ਸਮ੍ਪਤ੍ਤੋ.

ਤਸ੍ਮਿਞ੍ਚ ਕਾਲੇ ਏਕੋ ਸਾਮਣੇਰੋ ਮਾਤਾਪਿਤੂਨਂ ਗੇਹੇ ਪਿਣ੍ਡਪਾਤਂ ਆਨੇਸ੍ਸਾਮੀਤਿ ਖੁਦ੍ਦਕਨਾਵਾਯ ਨਦਿਯਂ ਆਗਚ੍ਛਿ. ਅਥ ¶ ਤਂ ਸਾਮਣੇਰਂ ਦਿਸ੍ਵਾ ਰਾਜਾ ਏਵਮਾਹ,- ਅਮ੍ਹੇ ਭਨ੍ਤੇ ਪਰਤੀਰਂ ਨਾਵਾਯ ਆਨੇਹੀਤਿ. ਸਾਮਣੇਰੋ ਚ ਆਹ,-ਸਚੇ ਉਪਾਸਕ ਤੁਮ੍ਹੇ ਪਰਤੀਰਂ ਆਨੇਯ੍ਯਂ, ਭਤ੍ਤਕਾਲਂ ਅਤਿਕ੍ਕਮੇਯ੍ਯਨ੍ਤਿ. ਅਥ ਰਾਜਾ ਅਮ੍ਹੇਯੇਵ ਸੀਘਂ ਆਨੇਹਿ, ਇਮਂ ਮੁਦ੍ਦਿਕਂ ਦਸ੍ਸਾਮੀਤਿ ਅਸ੍ਸਾਸੇਤ੍ਵਾ ਆਨੇਤੁਂ ਓਕਾਸਂ ਯਾਚਿ. ਅਥ ਸਾਮਣੇਰੋ ਕਾਰੁਞ੍ਞਪ੍ਪਤ੍ਤਂ ਵਚਨਂ ਸੁਤ੍ਵਾ ਪਰਤੀਰਂ ਆਨੇਸਿ.

ਅਥ ਚਤੁਭੂਮਿਕਵਿਹਾਰਂ ਪਤ੍ਵਾ ਤਸ੍ਮਿਂ ਵਿਹਾਰੇ ਥੇਰਸ੍ਸ ਸਬ੍ਬਮ੍ਪਿ ਕਾਰਣਂ ਆਰੋਚੇਤ੍ਵਾ ਏਵਮਾਹ,-ਸਚੇ ਭਨ੍ਤੇ ਅਮ੍ਹੇ ਗਣ੍ਹਿਤੁਂ ਆਗਚ੍ਛਯ੍ਯ, ਤੇ ਨਿਵਾਰੇਥਾਤਿ. ਥੇਰੋਚ ਮਯਂ ਮਹਾਰਾਜ ਸਮਣਾ ਨ ਸਕ੍ਕਾ ਏਵਂ ਨਿਵਾਰੇਤੁਂ, ਏਵਮ੍ਪਿ ਏਕੋ ਉਪਾਯੋ ਅਤ੍ਥਿ,-ਨਿਸਿਨ੍ਨਵਿਹਾਰਵਾਸਿਤ੍ਥੇਰੋ ਪਨ ਗਿਹਿਕਮ੍ਮੇਸੁ ਅਤਿਵਿਯ ਛੇਕੋ, ਤਂ ਪਕ੍ਕੋਸੇਤ੍ਵਾ ਕਾਰਣਂ ਚਿਨ੍ਤੇਤੁਂ ਯੁਤ੍ਤਨ੍ਤਿ. ਅਥ ਤਂ ਪਕ੍ਕੋਸੇਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਰਾਜਾ ਇਦਮਵੋ ਚ,- ਸਚੇ ਭਨ੍ਤੇ ਅਮ੍ਹੇ ਗਣ੍ਹਿਤੁਂ ਆਗਚ੍ਛੇਯ੍ਯੁਂ, ਅਥ ਕੇਨਚਿਦੇਵ ਉਪਾਯੇਨ ਤੇ ਨਿਵਾਰੇਥਾਤਿ. ਅਥ ਸੋ ਥੇਰੋ ਏਵਮਾਹ,-ਤੇਨ ਹਿ ਮਹਾਰਾਜ ਮਾ ਕਿਞ੍ਚਿ ਸੋਚਿ ਮਾਭਾਯਿ ਵਿਹਾਰਮਜ੍ਝੇ ਸਿਰਿਗਬ੍ਭਂ ਪਵਿਸਿਤ੍ਵਾ ਨਿਸੀਦਥਾਤਿ ਵਤ੍ਵਾ ਪਿਣ੍ਡਾਯ ਅਚਰਨ੍ਤੇ ਭਿਕ੍ਖੁਸਾਮਣੇਰੇ ਸਨ੍ਨਿਪਾਤਾਪੇਤ੍ਵਾ ਵਿਸੁਂ ਵਿਸੁਂ ਦਣ੍ਡਹਤ੍ਥਾ ਹੁਤ੍ਵਾ ਏਕਸ੍ਸਪਿ ਪੁਰਿਸਸ੍ਸ ਵਿਹਾਰਂ ਪਵਿਸਿਤੁਂ ਓਕਾਸਂ ਮਾ ਦੇਥਾਤਿ ਵਤ੍ਵਾ ਸੇਨਂਵਿਯ ਬ੍ਯੂਹੇਸਿ. ਸਾਮਨ੍ਤਵਿਹਾਰੇਸੁਪਿ ਵਸਨ੍ਤੇ ਭਿਕ੍ਖੁਸਾਮਣੇਰੇ ਪਕ੍ਕੋਸਿ. ਤਦਾ ਕਿਰ ਆਗਨ੍ਤ੍ਵਾ ਸਨ੍ਨਿਪਾਤਾਨਂ ਭਿਕ੍ਖੁਸਾਮਣੇਰਾਨਂ ਅਤਿਰੇਕਸਹਸ੍ਸਮਤ੍ਤਂ ਅਹੋਸਿ. ਥੇਰੋ ਤੇ ਵਿਹਾਰੇ ਦ੍ਵਾਰਕੋਟ੍ਠਕੇਸੁ ਆਗਤਮਗ੍ਗੇ ਚ ਵਿਸੁਂ ਵਿਸੁਂ ਦਣ੍ਡਹਤ੍ਥਾ ਹੁਤ੍ਵਾ ਆਰਕ੍ਖਣਤ੍ਥਾਯ ਠਪੇਸਿ, ਯਥਾ ਵਡ੍ਢਕੀ ਸੂਕਰੋ ਬ੍ਯਗ੍ਘਸ੍ਸ ਨਿਵਾਰਣਤ੍ਥਾਯ ਵਿਸੁਂ ਵਿਸੁਂ ਸੂਕਰੇ ਸਂਵਿਧਾਯ ਠਪੇਸੀਤਿ. ਅਥ ਪੁਤ੍ਤਸ੍ਸ ਯੋਧਾਪਿ ਰਾਜਾਨਂ ਗਹੇਤੁਂ ਨ ਸਕ੍ਕਾ, ਭਿਕ੍ਖੁ ਸਾਮਣੇਰਾਨਂ ¶ ਗਾਰਵਵਸੇਨ ਬਲਕ੍ਕਾਰੇਨ ਮਾਰੇਤ੍ਵਾ ਪਵਿਸਿਤੁਂ ਨ ਵਿਸਹਨ੍ਤਿ, ਭਿਕ੍ਖੁ ਸਾਮਣੇਰਾਨਂ ਬਾਹੁਲ੍ਲਤਾਯ ਚ.

ਤਸ੍ਮਿਂਯੇਵ ਸਂਵਚ੍ਛਰੇ ਅਸ੍ਸਯੁਜਮਾਸਸ੍ਸ ਕਾਲ਼ਪਕ੍ਖਪਞ੍ਚਮਿਤੋ ਯਾਵ ਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਪਞ੍ਚਮੀ ਵਿਹਾਰੇਯੇਵ ਰਾਜਾ ਨਿਲੀਯਿਤ੍ਵਾ ਨਿਸੀਦਿ. ਅਥ ਅਨ੍ਤੇਪੁਰਵਾਸਿਕਾ ਅਮਚ੍ਚਾ ਪੁਤ੍ਤਂ ਅਪਨੇਤ੍ਵਾ ਰਾਜਾਨਂ ਆਨੇਤ੍ਵਾ ਰਜ੍ਜੇ ਠਪੇਸੁਂ. ਰਾਜਾ ਚ ਪੁਨ ਰਜ੍ਜਂ ਪਤ੍ਵਾ ਵਿਹਾਰੇ ਨਿਸਿਨ੍ਨਕਾਲੇ ਮਾ ਭਾਯਿ ਮਹਾਰਾਜ ਤ੍ਵਂ ਜਿਨੇਸ੍ਸਤੀਤਿ ਰਞ੍ਞੋ ਆਰੋਚੇਨ੍ਤਸ੍ਸ ਵੇਦਸਤ੍ਥਞ੍ਞੁਨੋ ਏਕਸ੍ਸ ਭਿਕ੍ਖੁਸ੍ਸ ਚਞ੍ਞਿਙ੍ਖੁਚੇਤਿਯਸ੍ਸ ਏਸਨ੍ਨਟ੍ਠਾਨੇ ਏਕਂ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਧਮ੍ਮਨਨ੍ਦਰਾਜਗੁਰੂਤਿ ਨਾਮਲਞ੍ਛਮ੍ਪਿ ਅਦਾਸਿ. ਤਸ੍ਸ ਪਨ ਵਿਜਾਤਟ੍ਠਾਨਭੂਤਂ ਗਾਮਂ ਨਿਸ੍ਸਾਯ ਮਰਮ੍ਮਵੋਹਾਰੇਨ ‘ਯੇ ਨੇ ਨਾ ਸੇ ਯਾਂ ਵ’ ਇਤਿ ਸਮਞ੍ਞਾ ਅਹੋਸਿ.

ਰਾਜਾ ਚ ਪੁਨ ਰਜ੍ਜਂ ਪਤ੍ਵਾ ਤਸ੍ਮਿਂਯੇਵ ਸਂਵਚ੍ਛਰੇ ਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਚੁਦ੍ਦਸਮਿਯਂ ਸਬ੍ਬੇਪਿ ਮਹਾਥੇਰੇ ਨਿਮਨ੍ਤੇਤ੍ਵਾ ਰਾਜਗੇਹਂ ਪਵੇਸੇਤ੍ਵਾ ਪਿਣ੍ਡਪਾਤੇਨ ਭੋਜੇਸਿ. ਅਥ ਰਾਜਾ ਏਵਮਾਹ,-ਚਤੁਭੂਮਿਕਵਿਹਾਰਵਾਸਿਤ੍ਥੇਰੋ ਸਮ੍ਪਰਾਯਿਕਤ੍ਥਾਵਹੋ ਆਚਰਿਯੋ, ਨਿਸਿਨ੍ਨਵਿਹਾਰਵਾਸਿਤ੍ਥੇਰੋ ਪਨ ਦਿਟ੍ਠਧਮ੍ਮਿਕਤ੍ਥਾਵਹੋਤਿ ਏਵਂ ਰਾਜਾਵਂਸੇ ਵੁਤ੍ਤਂ. ਪੋਰਾਣਪੋਤ੍ਥਕੇਸੁ ਪਨ ਚਤੁਭੂਮਿਕਵਿਹਾਰ ਵਾਸਿਤ੍ਥੇਰੋ ਏਕਨ੍ਤਸਮਣੋ ਆਚਰਿਯੋ, ਨਿਸਿਨ੍ਨਵਿਹਾਰਵਾਸਿਤ੍ਥੇਰੋ ਪਨ ਯੋਧਾਰਹੋ ਯੋਧਕਮ੍ਮੇ ਛੇਕੋਤਿ ਰਾਜਾ ਅਹਾਤਿ ਵੁਤ੍ਤਂ. ਰਾਜਾ ਕਿਰ ਸਮ੍ਪਰਾਯਿਕਤ੍ਥਂ ਅਨੁਪੇਕ੍ਖਿਤ੍ਵਾ ਦਿਨ੍ਨਕਾਲੇ ਨਿਸਿਨ੍ਨਵਿਹਾਰਤ੍ਥੇਰਸ੍ਸ ਨ ਅਦਾਸਿ, ਕਦਾਚਿ ਕਦਾਚਿ ਪਨ ਦਿਟ੍ਠਧਮ੍ਮਿਕਤ੍ਥਂ ਅਨੁਪ੍ਪੇਕ੍ਖਿਤ੍ਵਾ ਤਸ੍ਸ ਵਿਸੁਂ ਅਦਾਸੀਤਿ. ਏਤ੍ਥ ਚ ਯਸ੍ਮਾ ਨਿਸਿਨ੍ਨਵਿਹਾਰ ਵਾਸਿਤ੍ਥੇਰੋ ਰਞ੍ਞੋ ਭੀਯੇਹਿ ਨਿਵਾਰਣਤ੍ਥਾਯ ਆਰਕ੍ਖਂ ਅਕਾਸਿ, ਨ ਪਰੇਸਂ ਵਿਹੇਠਨਤ੍ਥਾਯ, ਆਣਤ੍ਤਿਕਪ੍ਪਯੋਗਾ ਚ ਨ ਦਿਸ੍ਸਤਿ, ਤਸ੍ਮਾ ਨਤ੍ਥਿ ਆਪਤ੍ਤਿਦੋਸੋ. ਸਦ੍ਧਾਤਿਸ੍ਸਰਞ੍ਞੋ ਭਯੇਹਿ ¶ ਨਿਵਾਰਣਤ੍ਥਂ ਅਰਹਨ੍ਤੇਹਿ ਥੇਰੇਹਿ ਕਤਪ੍ਪਯੋਗੋਵਿਯ ਦਟ੍ਠਬ੍ਬੋ.

ਚਤੁਭੂਮਿਕਵਿਹਾਰ ਵਾਸਿਤ੍ਥੇਰੋ ਪਨ ਖਣਿਤ੍ਤਿਪਾਦਗਾਮੇ ਜਾਤੋ, ਅਰਿਮਦ੍ਦਨਪੁਰੇ ਅਰਹਨ੍ਤਤ੍ਥੇਰਗਣਪ੍ਪਭਵੋ, ਯਤ੍ਥ ਕਤ੍ਥਚਿ ਗਨ੍ਤ੍ਵਾ ਅਞ੍ਞੇਸਂ ਭਿਕ੍ਖੂਨਂ ਆਚਾਰਂ ਯਥਾਭੂਤਂ ਜਾਨਿਤ੍ਵਾ ਤੇਹਿ ਚਤੁਪਚ੍ਚਯਸਮ੍ਭੋਗੋ ਨ ਕਭਪੁਬ੍ਬੋ, ਅਨ੍ਤਮਸੋ ਉਦਕਮ੍ਪਿ ਨ ਪਿਵਿਤਪੁਬ੍ਬੋ, ਤਂਤਂਟ੍ਠਾਨਮ੍ਪਿ ਚਮ੍ਮਖਣ੍ਡਂ ਗਹੇਤ੍ਵਾਯੇਵ ਗਮਨਸੀਲੋ. ਉਕ੍ਕਂਸਿਕਰਾਜਾ ਪਨ ਸਿਰਿਖੇਤ੍ਤਨਗਰੇ ਦ੍ਵਤ੍ਤਪੋਙ੍ਕਰਞ੍ਞਾ ਕਾਰਾਵਿਤਚੇਤਿਯਸਣ੍ਠਾਨਂ ਗਹੇਤ੍ਵਾ ਰਾਜਮਣਿਚੂਲ਼ਂ ਨਾਮ ਚੇਤਿਯਂ ਅਕਾਸਿ. ਤਂ ਪਨ ਚੇਤਿਯਂ ਪਰਿਮਣ੍ਡਲਤੋ ਤਿਹਤ੍ਥਸਤਪ੍ਪਮਾਣਂ, ਉਬ੍ਬੇਧਤੋਪਿ ਏਤ੍ਤਕਮੇਵ. ਤਸ੍ਸ ਪਨ ਚੇਤਿਯਸ੍ਸ ਚਤੂਸੁ ਪਸ੍ਸੇਸੁ ਚਤ੍ਤਾਰੋ ਵਿਹਾਰੇਪਿ ਕਾਰਾਪੇਸਿ, ਪੁਰਤ੍ਥਿਮਪਸ੍ਸੇ ਪੁਬ੍ਬਵਨਾਰਾਮੋ ਨਾਮ ਵਿਹਾਰੋ, ਦਕ੍ਖਿਣਪਸ੍ਸੇ ਪਨ ਦਕ੍ਖਿਣਵਨਾਰਾਮੋ ਨਾਮ, ਪਚ੍ਛਿਮਪਸ੍ਸੇ ਪਚ੍ਛਿਮਵਨਾਰਾਮੋ ਨਾਮ, ਉਤ੍ਤਰਪਸ੍ਸੇ ਉਤ੍ਤਰਵਨਾਰਾਮੋ ਨਾਮ. ਤੇਸੁ ਚਤੂਸੁ ਵਿਹਾਰੇਸੁ ਉਤ੍ਤਰਵਨਾਰਾਮੋ ਨਾਮ ਵਿਹਾਰੋ ਅਸਨਿਪਾਭਗ੍ਗਿਨਾ ਡਯ੍ਹਿਤ੍ਵਾ ਵਿਨਸ੍ਸਿ. ਅਵਸੇਸੇ ਪਨ ਤਯੋ ਵਿਹਾਰੇ ਪਰਿਯਤ੍ਤਿਕੋਵਿਦਾਨਂ ਤਿਣ੍ਣਂ ਮਹਾਥੇਰਾਨਂ ਅਦਾਸਿ. ਨਾਮ ਲਞ੍ਛਮ੍ਪਿ ਤੇਸਂ ਅਦਾਸਿ. ਪਚ੍ਛਿਮਸ੍ਸ ਰਞ੍ਞੋ ਕਾਲੇਯੇਵ ਉਤ੍ਤਰਪਸ੍ਸੇ ਵਿਹਾਰਂ ਕਾਰਾਪੇਸਿ.

ਤਸ੍ਮਿਂ ਪਨ ਚੇਤਿਯੇ ਛਤ੍ਤਂ ਅਨਾਰੋਪੇਤ੍ਵਾਯੇਵ ਸੋ ਰਾਜਾ ਦਿਵਙ੍ਗਤੋ. ਤੇਸੁ ਪਨ ਚਤੂਸੁ ਵਿਹਾਰੇਸੁ ਨਿਸਿਨ੍ਨਾਨਂ ਥੇਰਾਨਂ ਦਕ੍ਖਿਣਵਨਾਰਾਮਵਿਹਾਰਵਾਸੀਮਹਾਥੇਰੋ ਕਚ੍ਚਾਯਨਗਨ੍ਥਸ੍ਸ ਅਤ੍ਥਂ ਛਬ੍ਬਿਧੇਹਿ ਸਂਵਣ੍ਣਨਾਨਯੇਹਿ ਅਲਙ੍ਕਰਿਤ੍ਵਾ ਮਰਮ੍ਮਭਾਸਾਯ ਸਂਵਣ੍ਣੇਸਿ. ਪਚ੍ਛਿਮਵਨਾਰਾਮਵਿਹਾਰ ਵਾਸਿਤ੍ਥੇਰੋ ਪਨ ਨ੍ਯਾਸਸ੍ਸ ਸਂਵਣ੍ਣਨਂ ਛਹਿ ਨਯੇਹਿ ਅਲਙ੍ਕਰਿਤ੍ਵਾ ਅਕਾਸਿ.

ਕਲਿਯੁਗੇ ਪਨ ਦਸਵਸ੍ਸਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਤਸ੍ਸ ¶ ਰਞ੍ਞੋ ਪੁਤ੍ਤੋ ਸਿਰਿਨਨ੍ਦਸੁਧਮ੍ਮਰਾਜਾਪਵਰਾਧੀਪਤਿ ਰਜ੍ਜਂ ਕਾਰੇਸਿ. ਪਿਤੁਨੋ ਰਾਜਗੇਹਂ ਭਿਨ੍ਦਿਤ੍ਵਾ ਵਿਹਾਰਂ ਕਾਰਾਪੇਤ੍ਵਾ ਤਿਲੋਕਾਲਙ੍ਕਾਰਸ੍ਸ ਨਾਮ ਮਹਾਥੇਰਸ੍ਸ ਅਦਾਸਿ. ਤਿਲੋਕਾਲਙ੍ਕਾਰਤ੍ਥੇਰੋ ਚ ਨਾਮ ਤਿਪਿਟਕਾਲਙ੍ਕਾਰਤ੍ਥੇਰੇਨ ਸਮਞ੍ਞਾਣਥਾਮਸ੍ਸ ਅਰਿਯਾਲਙ੍ਕਾਰਤ੍ਥੇਰਸ੍ਸ ਸਿਸ੍ਸੋਤਿ ਦਟ੍ਠਬ੍ਬੋ. ਅਯਞ੍ਚਤ੍ਥੋ ਹੇਟ੍ਠਾ ਦਸ੍ਸਿਤੋ. ਜੇਯ੍ਯਪੁਰੇ ਚਤੁਭੂਮਿਕਅਤੁਲਵਿਹਾਰਂ ਕਾਰਾਪੇਤ੍ਵਾ ਦਾਟ੍ਠਾਨਾਗਰਾਜਗੁਰੁਤ੍ਥੇਰਸ੍ਸ ਅਦਾਸਿ. ਸੋ ਚ ਥੇਰੋ ਨਿਰੁਤ੍ਤਿਸਾਰਮਞ੍ਜੂਸਂ ਨਾਮ ਨ੍ਯਾਸਸਂਵਣ੍ਣਨਂ ਅਕਾਸੀ.

ਕਲਿਯੁਗੇ ਦ੍ਵਾਦਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਫਗ੍ਗੁਨਮਾਸੇ ਸੋਤਾਪਨ੍ਨਾ ਨਾਮ ਆਰਕ੍ਖਦੇਵਤਾ ਅਞ੍ਞਤ੍ਥ ਗਮਿਸ੍ਸਾਮਾਤਿ ਆਹਂਸੂਤਿ ਨਗਰਾ ਸੁਪਿਨਂ ਪਸ੍ਸਨ੍ਤਾ ਹੁਤ੍ਵਾ ਬਹੂਸਨ੍ਨਿਪਤਿਤ੍ਵਾ ਦੇਵਪੂਜਂ ਅਕਂਸੁ. ਦੇਵਤਾਨਂ ਪਨ ਸਙ੍ਕਮਨਂ ਨਾਮ ਨਤ੍ਥਿ, ਪੁਬ੍ਬਨਿਮਿਤ੍ਤਮੇਵਤਨ੍ਤਿ ਦਟ੍ਠਬ੍ਬਂ.

ਤਸ੍ਮਿਞ੍ਚ ਕਾਲੇ ਚਿਨਰਞ੍ਞੋ ਯੋਧਾ ਆਗਨ੍ਤ੍ਵਾ ਮਰਮ੍ਮਰਟ੍ਠਂ ਦੂਸੇਸੁਂ. ਸਾਸਨਂ ਅਬ੍ਭਪ੍ਪਟਿਚ੍ਛਨ੍ਨੋ ਵਿਯ ਚਨ੍ਦੋ ਦੁਬ੍ਬਲਂ ਅਹੋਸਿ.

ਕਲਿਯੁਗੇ ਤੇਵੀਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਕਨਿਟ੍ਠੋ ਮਹਾਪਵਰਧਮ੍ਮਰਾਜਾਲੋਕਾਧਿਪਤਿ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਮਿਞ੍ਚ ਕਾਲੇ ਲੋਕਸਙ੍ਕੇਤਵਸੇਨ ਪੁਞ੍ਞਂ ਮਨ੍ਦਂ ਭਵਿਸ੍ਸਤੀਤਿ ਵੇਦਸਤ੍ਥਞ੍ਞੂਹਿ ਆਰੋਚਿਤਤ੍ਤਾ ਲੋਕਸਙ੍ਕੇਤਵਸੇਨੇਵ ਅਭਿਨਵਪੁਞ੍ਞੁਪ੍ਪਾਦਨਤ੍ਥਂ ਖਨ੍ਧਵਾਰਗੇਹਂ ਕਾਰਾਪੇਤ੍ਵਾ ਤਾਵਕਾਲਿਕਵਸੇਨ ਸਙ੍ਕਮਿਤ੍ਵਾ ਨਿਸੀਦਿ. ਤਤੋ ਅਪਰਭਾਗੇ ਉਤ੍ਤਰਗੇਹਂ ਭਿਨ੍ਦਿਤ੍ਵਾ ਤਸ੍ਮਿਂਯੇਵ ਠਾਨੇ ਵਿਹਾਰਂ ਕਾਰਾਪੇਤ੍ਵਾ ਏਕਸ੍ਸ ਮਹਾਥੇਰਸ੍ਸ ਅਦਾਸਿ.

ਦਕ੍ਖਿਣਗੇਹਂ ਪਨ ਨਗਰਸ੍ਸ ਪੁਰਤ੍ਥਿਮਦਿਸਾਭਾਗੇ ਵਿਹਾਰਂ ਕਾਰਾਪੇਤ੍ਵਾ ਅਗ੍ਗਣਮ੍ਮਾਲਙ੍ਕਾਰਤ੍ਥੇਰਸ੍ਸ ਅਦਾਸਿ. ਸੋ ਚ ਥੇਰੋ ਕਚ੍ਚਾਯਨਗਨ੍ਥਸ੍ਸਚੇਵ ਅਭਿਧਮ੍ਮਤ੍ਥਸਙ੍ਗਹਸ੍ਸ ਚ ਮਾਤਿਕਾਧਾਤੁਕਥਾਯਮਕਪਟ੍ਠਾਨਾਨਞ੍ਚ ¶ ਅਤ੍ਥਂ ਮਰਮ੍ਮਭਾਸਾਯ ਯੋਜੇਸਿ.

ਉਪਰਾਜਾ ਚ ਮਹਾਸੇਤੁਨੋ ਪਮੁਖੇ ਠਾਨੇ ਸੋਵਣ੍ਣਮਯਵਿਹਾਰਂ ਕਾਰਾਪੇਤ੍ਵਾ ਉਤ੍ਤਰਗੇਹਵਿਹਾਰ ਵਾਸਿਤ੍ਥੇਰਸ੍ਸ ਅਨ੍ਤੇਵਾਸਿਕਸ੍ਸ ਜਿਨਾਰਾਮਤ੍ਥੇਰਸ੍ਸ ਅਦਾਸਿ. ਤਸ੍ਮਿਂਯੇਵ ਠਾਨੇ ਨਾਨਾਰਤਨਵਿਚਿਤ੍ਰਂ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸੇਵ ਥੇਰਸ੍ਸ ਅਨ੍ਤੇਵਾਸਿਕਸ੍ਸ ਗੁਣਗਨ੍ਧਤ੍ਥੇਰਸ੍ਸ ਅਦਾਸਿ.

ਸੋ ਪਨ ਥੇਰੋ ‘ਛਿਨ ਵ੍ਡਿਨ’ ਗਾਮੇ ਵਿਜਾਤੋ. ਵਯੇ ਪਨ ਸਮ੍ਪਤ੍ਤੇ ਰਤਨਪੂਰਨਗਰਂ ਗਨ੍ਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਤਤੋ ਪੁਨ ਨਿਵਤ੍ਤਿਤ੍ਵਾ ਬਦੁਨਨਗਰੇ ਬਦਰਗਾਮੇ ਨਿਸੀਦਿਤ੍ਵਾ ਪਚ੍ਛਾ ‘ਛਿਨ ਵ੍ਡਿਨ’ ਗਾਮੇ ਚਤੂਹਿ ਪਚ੍ਚਯੇਹਿ ਕਿਲਮਥੋ ਹੁਤ੍ਵਾ ਵਸਤਿ. ਤਸ੍ਮਿਞ੍ਚ ਕਾਲੇ ਗਾਮੇ ਮੋਕ੍ਖਸ੍ਸ ਨਾਮ ਪੁਰਿਸਸ੍ਸ ਸਨ੍ਤਿਕੇ ਏਕਂ ਅਨਗ੍ਘਂ ਮਣਿਂ ਰਾਜਾ ਲਭਿਤ੍ਵਾ ਅਤਿਵ ਮਮਾਯਿ. ‘ਛਿਨ ਵ੍ਡਿਨ’ ਮੋਕ੍ਖਮਣੀਤਿ ਪਾਕਟੋ ਅਹੋਸਿ.

ਅਥ ਉਤ੍ਤਰਗੇਹਵਿਹਾਰਵਾਸਿਤ੍ਥੇਰੋ ਆਹ,- ‘ਛਿਨ ਵ੍ਡਿਨ’ ਗਾਮਕੇ ਨ ਮਣਿਯੇਵ ਅਨਗ੍ਘਂ, ਅਥ ਖੋ ਏਕੋਪਿ ਥੇਰੋ ਗੁਣਗਨ੍ਧੋ ਨਾਮ ਪਰਿਯਤ੍ਤਿਕੋਵਿਦੋ ਅਨਗ੍ਘੋਯੇਵਾਤਿ.

ਅਥ ਤਂ ਸੁਤ੍ਵਾ ਰਾਜਾ ਤਂ ਪਕ੍ਕੋਸੇਤ੍ਵਾ ਚਤੂਹਿ ਪਚ੍ਚਯੇਹਿ ਉਪਤ੍ਥਮ੍ਭੇਤ੍ਵਾ ਪੂਜਂ ਅਕਾਸਿ.

ਸਹਸ੍ਸੋਰੋਧਗਾਮੇ ਗੁਣਸਾਰੋ ਨਾਮ ਥੇਰੋ ਪਲਿਣਗਾਮੇ ਸੁਜਾਤੋ ਨਾਮ ਥੇਰੋ ਚ ਗੁਣਗਨ੍ਧਤ੍ਥੇਰਸ੍ਸ ਸਿਸ੍ਸਾਯੇਵ ਅਹੇਸੁਂ.

ਏਕਸ੍ਮਿਞ੍ਚ ਕਾਲੇ ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰੋ ਭਿਕ੍ਖੁਸਙ੍ਘਮਜ੍ਝੇ ਅਗ੍ਗਧਮ੍ਮਾਲਙ੍ਕਾਰਤ੍ਥੇਰਂ ਕੀਲ਼ਨਵਸੇਨ ਏਵਮਾਹ,- ਅਮ੍ਹੇਸੁ ਆਵੁਸੋ ਅਨ੍ਤਰਧਾਰਯਮਾਨੇਸੁ ਤ੍ਵਂ ਲੋਕੇ ਏਕੋ ਗਨ੍ਥਕੋਵਿਦਤ੍ਥੇਰੋ ਭਵਿਸ੍ਸਸਿ ਮਞ੍ਞੇਤਿ. ਅਥ ਅਗ੍ਗਧਮ੍ਮਾਲਙ੍ਕਾਰੋ ਚ ਏਵਮਾਹ,-ਤੁਮ੍ਹੇਸੁ ਭਨ੍ਤੇ ਅਨ੍ਤਰਧਾਰਯਮਾਨੇਸੁ ਮਯਂ ਗਨ੍ਥਕੋਵਿਦਾਨ ਭਵੇਯ੍ਯਾਮਕੋ ਨਾਮ ¶ ਪੁਗ੍ਗਲੋ ਲੋਕੇ ਗਨ੍ਥਕੋਵਿਦੋ ਭਵਿਸ੍ਸਤੀਤਿ. ਪੋਰਾਣਪੋਤ੍ਥਕੇਸੁ ਪਨ ਅਰਿਯਾਲਙ੍ਕਾਰਤ੍ਥੇਰੋ ਨਨੁ ਪਨਿਦਾਨਿ ਮਯਂ ਗਨ੍ਥਕੋਵਿਦਾ ਨ ਤਾਵ ਭਵਾਮਾਤਿ ਏਵਮਾਹਾਤਿ ਵੁਤ੍ਤਂ. ਸੋ ਅਗ੍ਗਧਮ੍ਮਾਲਙ੍ਕਾਰਤ੍ਥੇਰੋਯੇਵ ਰਞ੍ਞਾ ਯਾਚਿਤੋ ਰਾਜਵਂਸ. ਸਙ੍ਖੇਪਮ੍ਪਿ ਅਕਾਸਿ. ਸੋ ਪ੍ਪਨ ਥੇਰੋ ਅਮਚ੍ਚਪੁਤ੍ਤੋ.

ਏਕਸ੍ਮਿਞ੍ਚ ਕਾਲੇ ਹੀਨਾਯਾਵਤ੍ਤਕੋ ਏਕੋ ਮਹਾਅਮਚ੍ਚੋ ਰਞ੍ਞੋ ਸਨ੍ਤਿਕਾ ਅਤ੍ਤਨਾ ਉਪਲਦ੍ਧਪਰਿਭੋਗਂ ਸਬ੍ਬਂ ਗਹੇਤ੍ਵਾ ਵਿਹਾਰਂ ਆਗਨ੍ਤ੍ਵਾ ਅਗ੍ਗਧਮ੍ਮਾਲਙ੍ਕਾਰਤ੍ਥੇਰੇਨ ਸਦ੍ਧਿਂ ਸਲ੍ਲਾਪਂ ਅਕਾਸਿ. ਸਲ੍ਲਾਪਂ ਪਨ ਕਤ੍ਵਾ ਸਬ੍ਬਂ ਪਰਿਭੋਗਂ ਥੇਰਸ੍ਸ ਦਸ੍ਸੇਤ੍ਵਾ ਸਚੇ ਭਨ੍ਤੇ ਤ੍ਵਂ ਗਿਹਿ ਭਵੇਯ੍ਯਾਸਿ, ਏਤ੍ਤਕਂ ਪਰਿਭੋਗਂ ਲਭਿਸ੍ਸਤੀਤਿ ਆਹ. ਥੇਰੋਪਿ ਏਵਮਾਹ,-ਤੁਮ੍ਹਾਕਂ ਪਨ ਏਤ੍ਤਕੋ ਪਰਿਭੋਗੋ ਅਮ੍ਹਾਕਂ ਸਮਣਾਨਂ ਵਚ੍ਚਕੁਟਿਂ ਅਸੁਭਭਾਵਨਂ ਭਾਵੇਤ੍ਵਾ ਪਵਿਸਨ੍ਤਾਨਂ ਪੁਞ੍ਞਂ ਕਲਂ ਨਾਗ੍ਘਤਿ ਸੋਲ਼ਸਿਨ੍ਤਿ. ਕਿਞ੍ਚਾਪਿ ਇਦਞ੍ਚ ਪਨ ਵਚਨਂ ਸਾਸਨਵਂਸੇ ਅਪ੍ਪਧਾਨਂ ਹੋਤਿ, ਪੁਬ੍ਬਾਚਰਿਯਸੀਹੇਹਿ ਪਨ ਵੁਤ੍ਤ ਵਚਨਂ ਯਾਵ ਅਪਾਣਕੋਟਿਕਾ ਸਰਿਤਬ੍ਬਮੇਵਾਤਿ ਮਨਸਿਕਰੋਨ੍ਤੇਨ ਵੁਤ੍ਤਨ੍ਤਿ.

ਕਲਿਯੁਗੇ ਪਨ ਚਤੁਤ੍ਤਿਂਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਤਸ੍ਸ ਪੁਤ੍ਤੋ ਨਰਾਵਰੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਮਹਾਸੀਹਸੂਰਧਮ੍ਮਰਾਜਾਤਿ ਨਾਮਲਞ੍ਛਂ ਪਟਿਗ੍ਗਣ੍ਹਿ. ਤਸ੍ਸ ਰਞ੍ਞੋ ਕਾਲੇ ‘ਸੀ ਖੋਂ’ ਚੇਤਿਯਸ੍ਸ ਸਮੀਪੇ ਜੇਤਵਨਵਿਹਾਰੇ ਗਨ੍ਥਂ ਉਗ੍ਗਣ੍ਹਨ੍ਤੋ ਏਕੋ ਦਹਰਭਿਕ੍ਖੁ ਗਨ੍ਥਛੇਕੋਪਿ ਸਮਾਨੋ ਬਾਲਕਾਲੇ ਬਾਲਚਿਤ੍ਤੇਨ ਆਕੁਲਿਤੋ ਹੁਤ੍ਵਾ ਵਚ੍ਚਕੂਪੇ ਵਾਤਾਤਪੇਹਿ ਬਹਿਸੁਕ੍ਖਭਾਵੇਨ ਪਟਿਚ੍ਛਾਦਿਤੇ ਦਣ੍ਡੇਨ ਆਲੁਲਿਤ੍ਵਾ ਦੁਗ੍ਗਨ੍ਧੋਵਿਯ ਚਿਤ੍ਤਸਨ੍ਤਾਨੇ ਪਰਿਯਤ੍ਤਿਵਾਤਾਤਪੇਹਿ ਬਹਿਸੁਕ੍ਖਭਾਵੇਨ ਪਟਿਚ੍ਛਾਦਿਤੇ ਕੇਨਚਿਦੇਵ ਰੂਪਾਰਮ੍ਮਣਾਦਿਨਾ ਆਲੁਲਿਤ੍ਵਾ ਕਿਲੇਸਸਤ੍ਤਿਸਙ੍ਖਾਤੋ ਦੁਗ੍ਗਨ੍ਧੋ ਵਾਯਿਤ੍ਵਾ ਹੀਨਾਯਾਵਤ੍ਤਿਸ੍ਸਾਮੀਤਿ ਚਿਨ੍ਤੇਤ੍ਵਾ ਗਿਹਿਵਤ੍ਥਾਨਿ ਗਹੇਤ੍ਵਾ ਸਦ੍ਧਿਂ ਸਹਾਯਭਿਕ੍ਖੁਹਿ ਨਦੀਤਿਤ੍ਥਂ ਅਗਮਾਸਿ. ਅਨ੍ਤਰਾਮਗ੍ਗੇ ¶ ਤਾਵ ਭਿਕ੍ਖੁਭਾਵੇਨੇਵ ਚੇਤਿਯਂ ਵਨ੍ਦਿਸ੍ਸਾਮੀਤਿ ਗਿਹਿਵਤ੍ਥਾਨਿ ਸਹਾਯਕਾਨਂ ਹਤ੍ਥੇ ਠਪੇਤ੍ਵਾ ਚੇਤਿਯਪ੍ਪਮੁਖੇ ਲੇਣਂ ਪਵਿਸਿਤ੍ਵਾ ਵਨ੍ਦਿਤ੍ਵਾ ਨਿਸੀਦਿ. ਅਥ ਏਕਾ ਦਹਰਿਤ੍ਥੀ ਚੇਤਿਯਙ੍ਗਣਂ ਆਗਨ੍ਤ੍ਵਾ ਬਹਿ ਲੇਣਂ ਨਿਸੀਦਿਸ੍ਵਾ ਉਦਕਂ ਸਿਞ੍ਚਿਤ੍ਵਾ ਪਤ੍ਥਨਂ ਅਕਾਸਿ,-ਇਮਿਨਾ ਪੁਞ੍ਞਕਮ੍ਮੇਨ ਸਬ੍ਬੇਹਿ ਅਪਾਯਾਦਿਨੁਕ੍ਖੇਹਿ ਮੋਚੇਯ੍ਯਾਮਿ, ਭਵੇ ਭਵੇ ਚ ਹੀਨਾਯਾਵਤ੍ਤਕਸ੍ਸ ਪੁਰਿਸਸ੍ਸ ਪਾਦਚਾਰਿਕਾ ਨ ਭਵੇਯ੍ਯਾਮੀਤਿ.

ਅਥ ਤਂ ਸੁਤ੍ਵਾ ਦਹਰਭਿਕ੍ਖੁ ਏਵਂ ਚਿਨ੍ਤੇਸਿ,-ਇਦਾਨਿ ਅਹਂਹੀਨਾਯਾਵਤ੍ਤਿਸ੍ਸਾਮੀਤਿ ਚਿਨ੍ਤੇਤ੍ਵਾ ਆਗਤੋ, ਅਯਮ੍ਪਿ ਦਹਰਿਤ੍ਥੀ ਹੀਨਾਯਾਵਤ੍ਤਕਸ੍ਸ ਪੁਰਿਸਸ੍ਸ ਪਾਦਚਾਰਿਕਾ ਨ ਭਵੇਯ੍ਯਾ ਮੀਤਿ ਪਤ੍ਥਨਂ ਅਕਾਸਿ, ਇਦਾਨਿ ਤਂ ਦਹਰਿਤ੍ਥਿਂ ਕਾਰਣਂ ਪੁਚ੍ਛਿਸ੍ਸਾਮੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਬਹਿ ਲੇਣਂ ਨਿਕ੍ਖਮਿਤ੍ਵਾ ਤਂ ਦਹਰਿਤ੍ਥਿਂਕਾਰਣਂ ਪੁਚ੍ਛਿ,-ਕਸ੍ਮਾ ਪਨ ਤ੍ਵਂ ਹੀਨਾਯਾਵਤ੍ਤਕਸ੍ਸ ਪੁਰਿਸਸ੍ਸ ਪਾਦਚਾਰਿਕਾ ਨ ਭਵੇਯ੍ਯਾਮੀਤਿ ਪਤ੍ਥਨਂ ਕਰੋਸੀਤਿ. ਹੀਨਾਯਾਵਤ੍ਤਕਸ੍ਸ ਭਨ੍ਤੇ ਪੁਰਿਸਸ੍ਸ ਪਾਦਚਾਰਿਕਾ ਨ ਭਵੇਯ੍ਯਾਮੀਤਿ ਵੁਤ੍ਤਵਚਨਂ ਬਾਲਪੁਰਿਸਸ੍ਸ ਪਾਦਚਾਰਿਕਾ ਨ ਭਵੇਯ੍ਯਾਮੀਤਿ ਵੁਤ੍ਤਵਚਨੇਨ ਨਾਨਾ ਨ ਹੋਤਿ, ਸਦਿਸਤ੍ਥਕਮੇਵਾਤਿ ਨਨੁ ਹੀਨਾਯਾ ਵਤ੍ਤਕੋ ਬਾਲੋਯੇਵ ਨਾਮ, ਸਚੇ ਪਨ ਭਨ੍ਤੇ ਹੀਨਾਯਾਵਤ੍ਤਕੋ ਬਾਲੋ ਨਾਮ ਨ ਭਵੇਯ੍ਯ, ਕੋ ਨਾਮ ਲੋਕੇ ਬਾਲੋ ਭਵੇਯ੍ਯ, ਭਿਕ੍ਖੁ ਨਾਮ ਹਿ ਪਰੇਹਿ ਦਿਨ੍ਨਂ ਚੀਵਰਪਿਣ੍ਡਪਾਤਸੇਨਾਸਨਂ ਪਰਿਭੁਞ੍ਜਿਤ੍ਵਾ ਸੁਖਂ ਵਸਤਿ, ਸਚੇ ਗਨ੍ਥਂ ਉਗ੍ਗਣ੍ਹਿਤੁ ਕਾਮੋ ਭਵੇਯ੍ਯ, ਯਥਾਕਾਮਂਯੇਵ ਗਨ੍ਥਂ ਉਗ੍ਗਣ੍ਹਿਤੁਂ ਓਕਾਸਂ ਲਭਤਿ, ਏਵਂ ਪਨ ਅਹੁਤ੍ਵਾ ਅਲਸਿਕੋਯੇਵ ਭੁਞ੍ਜਿਤ੍ਵਾ ਸਯਿਤ੍ਵਾ ਨਿਸੀਦਿਤੁਂ ਇਚ੍ਛੇਯ੍ਯ, ਏਵਮ੍ਪਿ ਯਥਾਕਾਮਂ ਭੁਞ੍ਜਿਤੁਂ ਸਯਿਤੁਂ ਓਕਾਸਂ ਲਭਤਿ, ਏਵਮ੍ਪਿ ਸਮਾਨੋ ਪਰਸ੍ਸ ਦਾਸੋ ਭਵਿਸ੍ਸਾਮਿ, ਦਾਰਸ੍ਸ ਕਿਂਕਰੋ ਭਵਿਸ੍ਸਾਮੀਤਿ ਅਕਥੇਨ੍ਤੋਪਿ ਕਥੇਨ੍ਤੋਵਿਯ ਹੁਤ੍ਵਾ ਹੀਨਾਯਾਵਤ੍ਤੇਯ੍ਯ, ਸੋ ਲੋਕੇ ਅਞ੍ਞੇਹਿ ਬਾਲੇਹਿ ਅਧਿਕੋ ਬਾਲੋਤਿ ਅਹਂ ਮਞ੍ਞਾਮਿ, ਸਚੇ ਪਨ ਬਾਲਤਰਸ੍ਸ ਭਰਿਯਾ ਭਵੇਯ੍ਯ, ਅਹਂ ਬਾਲਤਰੀ ਭਵੇਯ੍ਯਨ੍ਤਿ ¶ ਵੁਤ੍ਤੇ ਸੋ ਦਹਰਭਿਕ੍ਖੁ ਸਂਵੇਗਂ ਆਪਜ੍ਜਿਤ੍ਵਾ ਬਹਿਨਗਰਦ੍ਵਾਰਂ ਨਿਕ੍ਖਮਿਤ੍ਵਾ ਵਾਨਰਗਣੇਨ ਵਿਨਾ ਝਾਯਨ੍ਤੋਵਿਯ ਵਾਨਰੋ ਝਾਯਿਤ੍ਵਾ ਨਿਸੀਦਿ.

ਅਥ ਸਹਾਯਕਾ ਆਗਨ੍ਤ੍ਵਾ ਗਿਹਿਵਤ੍ਥਾਨਿ ਗਣ੍ਹਾਹੀਤਿ ਪਕ੍ਕੋਸਿਂਸੁ. ਤਸ੍ਮਿਂ ਕਾਲੇ ਸੋ ਦਹਰਭਿਕ੍ਖੁ ਆਗਚ੍ਛਥ ਭਵਨ੍ਤੋਤਿ ਵਤ੍ਵਾ ਸਬ੍ਬਂ ਕਾਰਣਂ ਤੇਸਂ ਆਚਿਕ੍ਖਿਤ੍ਵਾ ਇਦਾਨਿ ਪਨ ਭਵਨ੍ਤੋ ਹੀਨਾਯਾਵਤ੍ਤੇਹੀਤਿ ਸਚੇ ਯੋ ਕੋਚਿ ਆਗਨ੍ਤ੍ਵਾ ਮਮ ਸੀਸਂ ਮੁਗ੍ਗਰੇਨ ਪਹਾਰੇਯ੍ਯ, ਏਵਂ ਸਨ੍ਤੇਪਿ ਹੀਨਾਯਾਵਤ੍ਤਿਤੁਂ ਨ ਇਚ੍ਛਾਮਿ, ਇਤੋ ਪਟ੍ਠਾਯ ਯਾਵ ਜੀਵਿਤਪਰਿਯਨ੍ਤਾ ਹੀਨਾਯਾਵਤ੍ਤਿਤੁਂ ਮਨਸਾਪਿ ਨ ਚਿਨ੍ਤਯਿਸ੍ਸਾਮੀਤਿ ਵਤ੍ਵਾ ਏਰਾਵਤੀਨਂਦਿਂ ਤਰਿਤ੍ਵਾ ਜੇਯ੍ਯਪੁਰਂ ਅਗਮਾਸਿ. ਤਦਾ ਕਿਰ ਦਹਰਿਤ੍ਥੀ ਦੇਵਲਾਭਵਯ੍ਯ, ਨ ਮਨੁਸ੍ਸਿਤ੍ਥੀਤਿ ਵਦਨ੍ਤਿ ਪਣ੍ਡਿਤਾਤਿ.

ਜੇਯ੍ਯਪੁਰਂ ਪਨ ਪਤ੍ਵਾ ਪਰਿਯਤ੍ਤਿਕੋਵਿਦਾਨਂ ਮਹਾਥੇਰਾਨਂ ਸਨ੍ਤਿਕੇ ਨਯਂ ਗਹੇਤ੍ਵਾ ਪੁਞ੍ਞਚੇਤਿਯਸ੍ਸ ਦਕ੍ਖਿਣਦਿਸਾਭਾਗੇ ਏਕਸ੍ਮਿਂ ਵਿਹਾਰੇ ਨਿਸੀਦਿ. ਪਰਿਯਤ੍ਤਿਂ ਵਾਚੇਤ੍ਵਾ ਅਥ ਕਮੇਨ ਤਂਤਂਦਿਸਾਹਿ ਭਿਕ੍ਖੁਸਾਮਣੇਰਾ ਆਗਨ੍ਤ੍ਵਾ ਤਸ੍ਸ ਸਨ੍ਤਿਕੇ ਪਰਿਯਤ੍ਤਿਂ ਉਗ੍ਗਣ੍ਹਿਂਸੁ. ਆਵਾਸਂ ਪਨ ਅਲਭਿਤ੍ਵਾ ਕੇਚਿ ਭਿਕ੍ਖੁਸਾਮਣੇਰਾ ਛਤ੍ਤਾਨਿਪਿ ਛਾਦਿਤ੍ਵਾ ਨਿਸੀਦਿਂਸੁ.

ਏਕਸ੍ਮਿਂ ਕਾਲੇ ਰਾਜਾ ਨਿਕ੍ਖਮਿਤ੍ਵਾ ਪੁਞ੍ਞਚੇਤਿਯਂ ਵਨ੍ਦਿਸ੍ਸਾਮੀਤਿ ਚੇਤਿਯਙ੍ਗਣਂ ਪਾਵਿਸਿ. ਅਥ ਛਤ੍ਤਾਨਿ ਛਾਦੇਤ੍ਵਾ ਨਿਸਿਨ੍ਨੇ ਭਿਕ੍ਖੂ ਦਿਸ੍ਵਾ ਗੁਹਾਯ ਸਦ੍ਧਿਂ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸ ਭਿਕ੍ਖੁਸ੍ਸ ਅਦਾਸਿ. ਤਿਲੋਕਗਰੂਤਿਪਿ ਨਾਮਲਞ੍ਛਂ ਅਦਾਸਿ. ਸੁਖਵੋਹਾਰਤ੍ਥਂ ਪਨ ਕਕਾਰਲੋਪਂ ਕਤ੍ਵਾ ਤਿਲੋਗਰੂਤਿ ਵੋਹਰਿਂਸੁ.

ਤਸ੍ਸ ਪਨ ਸਦ੍ਧਿਵਿਹਾਰਿਕੋ ਸਤ੍ਤਵਸ੍ਸਿਕੋ ਤੇਜੋਦੀਪੋ ਨਾਮ ਭਿਕ੍ਖੁ ਪਰਿਤ੍ਤਟੀਕਂ ਅਕਾਸਿ. ਅਪਰਭਾਗੇ ਪਨ ਤਿਲੋਕਾਲਙ੍ਕਾਰੋਤਿ ਨਾਮਲਞ੍ਛਂ ਅਦਾਸਿ. ਏਵਂ ਤੇਜੇਦੀਪੋ ਨਾਮ ਭਿਕ੍ਖੁ ਨਰਾਵਰਰਞ੍ਞੋ ਕਾਲੇ ਪਰਿਤ੍ਤਟੀਕਂ ਅਕਾਸੀਤਿ ਦਟ੍ਠਬ੍ਬਂ. ਕੇਚਿ ਪਨ ਪਚ੍ਛਿਮਪਕ੍ਖਾਧਿਕਰਞ੍ਞੋ ਕਾਲੇਤਿ ਵਦਨ੍ਤਿ.

ਏਕਸ੍ਮਿਂ ¶ ਪਨ ਕਾਲੇ ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰੋ ਪਾਦਚੇਤਿਯਂ ਵਨ੍ਦਨਤ੍ਥਾਯ ਗਨ੍ਤ੍ਵਾ ਪਚ੍ਚਾਗਤਕਾਲੇ ਕੁਖਨਨਗਰੇ ਸੁਵਣ੍ਣਗੁਹਾਯਂ ਜਮ੍ਬੁਧਜਤ੍ਥੇਰਸ੍ਸ ਸਨ੍ਤਿਕਂ ਪਵਿਸਿਤ੍ਵਾ ਤੇਨ ਸਦ੍ਧਿਂ ਸਲ੍ਲਾਪਂ ਅਕਾਸਿ. ਤੇ ਚ ਮਹਾਥੇਰਾ ਅਞ੍ਞਮਞ੍ਞਂ ਪਸ੍ਸਿਤ੍ਵਾ ਸਲ੍ਲਪਿਤ੍ਵਾ ਅਤਿਵਿਯ ਪਮੋਦਿਂਸੁ. ਲੋਕਸ੍ਮਿਞ੍ਹਿ ਬਾਲੋ ਬਾਲੇਨ ਪਣ੍ਡਿਤੋ ਪਣ੍ਡਿਤੇਨ ਸਦ੍ਧਿਂ ਅਤਿਵਿਯ ਪਮੋਦਤੀਤਿ. ਤੇ ਚ ਦ੍ਵੇ ਥੇਰਾ ਸਮਾਨਵਸ੍ਸਿਕਾ. ਤਿਰਿਯਪਬ੍ਬਤਵਿਹਾਰ ਵਾਸੀਮਹਾਥੇਰੋ ਤੇਨ ਸਦ੍ਧਿਂ ਸਲ੍ਲਾਪਂ ਕਤ੍ਵਾ ਪਚ੍ਚਾਗਚ੍ਛਿ. ਜਮ੍ਬੁਧਜਤ੍ਥੇਰੋ ਚ ਮਗ੍ਗਂ ਅਚਿਕ੍ਖਿਤੁਂ ਅਨੁਗਚ੍ਛਿ. ਅਥ ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰੋ ਜਮ੍ਬੁਧਜਤ੍ਥੇਰਂ ਆਹ,- ਅਹਂ ਭਨ੍ਤੇ ਰਾਜਵਲ੍ਲਭੋ ਹੋਮਿ ਰਾਜਗੁਰੁ,ਤ੍ਵਂਯੇਵ ਮਮ ਪੁਰਤੋ ਗਚ੍ਛਾਹੀਤਿ. ਅਥ ਜਮ੍ਬੁਧਜਤ੍ਥੇਰੋਪਿ ਤਿਰਿਯਪਬ੍ਬਤਵਿਹਾਰਵਾਸਿਤ੍ਥੇਰਂ ਆਹ,-ਤ੍ਵਂ ਭਨ੍ਤੇ ਰਾਜਵਲ੍ਲਭੋ ਭਵਸਿਰਾਜਗੁਰੁ, ਲੋਕੇ ਰਾਜਗੁਰੁ ਨਾਮ ਪਧਾਨਭਾਵੇ ਠਿਤੋ, ਤਸ੍ਮਾ ਤ੍ਵਂਯੇਵ ਮਮ ਪੁਰਤੋ ਗਚ੍ਛਾਹੀਤਿ. ਏਤ੍ਥ ਚ ਦ੍ਵੇਪਿ ਮਹਾਥੇਰਾ ਅਞ੍ਞਮਞ੍ਞਂ ਗਾਰਵਵਸੇਨ ਲੋਕਵਤ੍ਤਂ ਅਪੇਕ੍ਖਿਤ੍ਵਾ ਏਵਮਾਹਂਸੂਤਿ ਦਟ੍ਠਬ੍ਬਂ. ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰੋਪਿ ਰਤਨਪੂਰਨਗਰਂ ਪਤ੍ਵਾ ਰਾਜਵਂਸਪਬ੍ਬਤਂ ਗਨ੍ਤ੍ਵਾ ਅਰਞ੍ਞਵਾਸਂ ਵਸਿ.

ਅਥ ਉਕ੍ਕਂਸਿਕਰਾਜਾ ਕਨਿਟ੍ਠੇਨ ਸੂਰਕਿਤ੍ਤਿਨਾਮੇਨ ਸਦ੍ਧਿਂ ਮਨ੍ਤੇਸਿ,-ਸਚੇ ਤ੍ਵਂ ਵਨੇ ਥੇਰਂ ਪਠਮਂ ਪਸ੍ਸਸਿ, ਤ੍ਵਂਯੇਵ ਵਿਹਾਰਂ ਕਾਰਾਪੇਤ੍ਵਾ ਥੇਰਸ੍ਸ ਦਦਾਹਿ, ਸਚੇ ਪਨਾਹਂ ਪਠਮਂ ਪਸ੍ਸੇਯ੍ਯ, ਅਹਂ ਵਿਹਾਰਂ ਕਾਰਾਪੇਤ੍ਵਾ ਦਦਾਮੀਤਿ.

ਅਥ ਕਨਿਟ੍ਠਾ ਪਠਮਂ ਪਸ੍ਸਿਤ੍ਵਾ ਤਿਰਿਯਪਬ੍ਬਤਕਨ੍ਦਰੇ ਜੇਤਵਨਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਇਦਞ੍ਚ ਵਚਨਂ ਸਾਧੁਜ੍ਜਨਾਨਂ ਗੁਣਂ ਏਵਕਾਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ, ਤੇਨ ਪੁਞ੍ਞਕਮ੍ਮੇਨ ਤੇਨ ਪੀਤਿਸੋਮਨਸ੍ਸੇਨ ਸਤ੍ਤਕ੍ਖਤ੍ਤੁਂ ਦੇਵਰਜ੍ਜਸਮ੍ਪਤ੍ਤਿਂ ਸਤ੍ਤਕ੍ਖਤ੍ਤੁਂ ਮਨੁਸ੍ਸਰਜ੍ਜਸਮ੍ਪਤ੍ਤਿਂ ਪਟਿਲਭੀਤਿ ਵੁਤ੍ਤਤ੍ਤਾ ਸਾਧੁਜ੍ਜਨਾਨਂ ਗੁਣਂ ਅਨੁਸ੍ਸਰਿਤ੍ਵਾ ਪੁਞ੍ਞਵਿਸੇਸਲਾਭਤ੍ਥਾਯ ਵੁਤ੍ਤਂ.

ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰੋ ਚ ਜਮ੍ਬੁਧਜਤ੍ਥੇਰਸ੍ਸ ¶ ਗੁਣਂ ਉਕ੍ਕਂਸਿਕਰਞ੍ਞੋ ਆਰੋਚੇਸਿ. ਰਾਜਾ ਚ ਅਤਿਵਿਯ ਪਸੀਦਿਤ੍ਵਾ ਜਮ੍ਬੁਧਜੋਤਿ ਮੂਲਨਾਮੇ ਦੀਪਸਦ੍ਦੇਨ ਯੋਜੇਤ੍ਵਾ ਜਮ੍ਬੁਦੀਪਧਜੋਤਿ ਨਾਮਲਞ੍ਛਂ ਅਦਾਸਿ.

ਜਮ੍ਬੁਧਜਤ੍ਥੇਰੋ ਚ ਨਾਮ ਧਮ੍ਮਨਨ੍ਦਤ੍ਥੇਰਸ੍ਸ ਸਦ੍ਧਿਵਿਹਾਰਿਕਾ. ਧਮ੍ਮਨਨ੍ਦਤ੍ਥੇਰੋ ਚ ਜੋਤਿਪੁਞ੍ਞਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਤੇ ਚ ਥੇਰਾ ਅਰਹਨ੍ਤਗਣਵਂਸਿਕਾ.

ਜਮ੍ਬੁਧਜਤ੍ਥੇਰੋ ਪਨ ਵਿਨਯਪਾਲ਼ਿਯਾ ਅਟ੍ਠਕਥਾਯ ਚ ਅਤ੍ਥ ਯੋਜਨਂ ਮਰਮ੍ਮਭਾਸਾਯ ਅਕਾਸਿ. ਮਣਿਰਤਨੋ ਨਾਮ ਪਨ ਥੇਰੋ ਅਟ੍ਠਸਾਲਿਨੀਸਮ੍ਮੋਹਵਿਨੋਦਨੀਕਙ੍ਖਾਵਿਤਰਣੀਅਟ੍ਠਕਥਾਨਂ ਅਭਿਧਮ੍ਮਤ੍ਥਵਿਭਾਵਨੀਸਙ੍ਖਪਵਣ੍ਣਨਾਲ਼ੀਕਾਨਞ੍ਚ ਅਤ੍ਥਂ ਮਰਮ੍ਮ ਭਾਸਾਯ ਯੋਜੇਸਿ.

ਮੂਲਾਵਾਸਗਾਮੇ ਚ ਪੁਬ੍ਬਾਰਾਮਵਿਹਾਰਵਾਸਿਤ੍ਥੇਰੋ ਗੂਲ਼ਤ੍ਥ ਦੀਪਨਿਂ ਨਾਮ ਗਨ੍ਥਂ ਵਿਸੁਦ੍ਧਿਮਗ੍ਗਗਣ੍ਠਿਪਦਤ੍ਥਞ੍ਚ ਮੂਲਭਾਸਾਯ ਅਕਾਸਿ, ਨੇਤ੍ਤਿਪਾਲ਼ਿਯਾ ਚ ਅਤ੍ਥਂ ਮਰਮ੍ਮਭਾਸਾਯ ਯੋਜੇਸਿ. ਸੋ ਪਨ ਥੇਰੋ ਪੁਬ੍ਬੇ ਗਾਮਵਾਸੀ ਹੁਤ੍ਵਾ ਸੀਸਵੇਠਨਤਾਲਪਤ੍ਤਾਨਿ ਗਹੇਤ੍ਵਾ ਆਚਰਿਯਪ੍ਪਵੇਣੀਵਸੇਨ ਵਿਨਯਵਿਲੋਮਾਚਾਰਂ ਚਰਿ. ਪਚ੍ਛਾ ਪਨ ਤਂ ਆਚਾਰਂ ਵਿਸ੍ਸਜ੍ਜਿਤ੍ਵਾ ਅਰਞ੍ਞਵਾਸਂ ਵਸਿ. ਸੋਪਿ ਥੇਰੋ ਗਮ੍ਭੀਰਞਾਣਿਕੋ ਸਦ੍ਦਤ੍ਥਨਯੇਸੁ ਅਤਿਵਿਯ ਛੇਕੋ.

ਕਲਿਯੁਗੇ ਪਨ ਪਞ੍ਚਤਿਂਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਕਨਿਟ੍ਠੋ ਸਿਰਿਪਵਰਮਹਾਧਮ੍ਮਰਾਜਾ ਨਾਮ ਭੂਪਾਲੋ ਰਜ੍ਜਂ ਕਾਰੇਸਿ. ਦਬ੍ਬਿਮੁਖਜਾਤਸ੍ਸਰੇ ਪਨ ਗੇਹਂ ਕਾਰਾਪੇਤ੍ਵਾ ਨਿਸੀਦਨਤੋ ਦਬ੍ਬਿਮੁਖਜਾਤਸ੍ਸਰੋਤਿ ਨਾਮਂ ਪਾਕਟਂ ਅਹੋਸਿ. ਤਸ੍ਮਿਂ ਪਨ ਜਾਤਸ੍ਸਰੇ ਜੇਯ੍ਯਭੂਮਿਕਿਤ੍ਤਿਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਸਿਰਿਸਦ੍ਧਮ੍ਮਪਾਲਤ੍ਥੇਰਸ੍ਸ ਅਦਾਸਿ. ਬਹੂਨਮ੍ਪਿ ਗਾਮਵਾਸੀ ਅਰਞ੍ਞਵਾਸੀ ਭਿਕ੍ਖੂਨਂ ਅਨੁਗ੍ਗਹਂ ਅਕਾਸਿ. ਰਤਨਪੂਰਨਗਰਸ੍ਮਿਞ੍ਹਿ ਦਸਸੁ ‘ਞ੍ਯ੍ौਂ ਯਾਂ’ ਰਾਜਾਂਸੇਸੁ ਪ੍ਪਚ੍ਛਿਮਾ ਪਞ੍ਚ ਰਾਜਾਨੋ ਅਵਿਚਿਨਿਤ੍ਵਾਯੇਵ ਅਲਜ੍ਜੀਲਜ੍ਜੀਮਿਸ੍ਸਕਵਸੇਨ ਸਾਸਨਂ ਪਗ੍ਗਣ੍ਹਿਂਸੁ. ਤਦਾ ¶ ਜਿਨਸਾਸਨਂ ਅਬ੍ਭਨ੍ਤਰੇ ਚਨ੍ਦੋਵਿਯ ਅਤਿਪਰਿਸੁਦ੍ਧਂ ਨ ਅਹੋਸਿ. ਏਵਮ੍ਪਿ ਲਜ੍ਜਿਨੋ ਅਤ੍ਤਨੋ ਅਤ੍ਤਨੋ ਵਂਸਾਨੁਰਕ੍ਖਣਵਸੇਨ ਧਮ੍ਮਂ ਪੂਰੇਤੁਂ ਅਨਿਵਾਰਿਤਤ੍ਤਾ ਲਜ੍ਜੀਗਣਵਂਸੋ ਨ ਛਿਜ੍ਜਤਿ. ਤਥਾ ਅਲਜ੍ਜਿਨੋਪਿ ਅਤ੍ਤਨੋ ਅਤ੍ਤਨੋ ਆਚਰਿਯਪ੍ਪਵੇਣੀਵਸੇਨ ਵਿਚਰਿਂਸੁ, ਤੇਨ ਅਲਜ੍ਜੀਗਣਵਂਸੋਪਿ ਨ ਛਿਜ੍ਜਤੀਤਿ ਦਟ੍ਠਬ੍ਬਂ. ਤਸ੍ਸ ਰਞ੍ਞੋ ਕਾਲੇ ਦੇਵਚਕ੍ਕੋਭਾਸੋ ਨਾਮ ਏਕੋ ਥੇਰੋ ਅਤ੍ਥਿ, ਵੇਦਸਤ੍ਥਞ੍ਞੂ ਪਿਟਕੇਸੁ ਪਨ ਮਨ੍ਦੋਤਿ.

ਕਲਿਯੁਗੇ ਪਨ ਅਟ੍ਠਤਿਂਸਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਵੇਸਾਖਮਾਸਸ੍ਸ ਕਾਲ਼ਪਕ੍ਖਅਟ੍ਠਮਿਤੋ ਪਟ੍ਠਾਯ ਲੋਕਸਙ੍ਕੇਤਵਸੇਨ ਉਪ੍ਪਜ੍ਜਮਾਨਂ ਭਯਂ ਨਿਵਾਰੇਤੁਂ ਨਵਗੁਹਾਯਂ ਤੇਨ ਦੇਵਚਕ੍ਕੋਭਾਸਤ੍ਥੇਰੇਨ ਕਥਿਤਨਿਯਾਮੇਨ ਪਠਮਂ ਮਰਮ੍ਮਿਕਭਿਕ੍ਖੂ ਪਟ੍ਠਾਨਪ੍ਪਕਰਣਂ ਵਾਚਾਪੇਸਿ. ਤਤੋ ਪਚ੍ਛਾ ਜੇਟ੍ਠਮਾਸਸ੍ਸ ਜੁਣ੍ਹਪਕ੍ਖਪਾਟਿਪਦਦਿਵਸਤੋ ਰਾਮਞ੍ਞਰਟ੍ਠਵਾਸਿਕੇ ਭਿਕ੍ਖੂ ਪਟ੍ਠਾਨਪ੍ਪਕਰਣਂ ਵਾਚਾਪੇਸਿ. ਮਹਾਛਣਞ੍ਚ ਕਾਰਾਪੇਸਿ. ਰਟ੍ਠਵਾਸਿਨੋਪਿ ਬਹੁਪੂਜਾਸਕ੍ਕਾਰਂ ਕਾਰਾਪੇਸਿ. ਤਸ੍ਸ ਕਿਰ ਰਞ੍ਞੋ ਕਾਲੇ ਪੋਤ੍ਥਕਂ ਅਟ੍ਠਿਭਲ੍ਲਿਕਰੁਕ੍ਖਨਿਯ੍ਯਾਸੇਹਿ ਪਰਿਮਟ੍ਠਂ ਕਤ੍ਵਾ ਮਨੋਸਿਲਾਯ ਲਿਖਿਤ੍ਵਾ ਸੁਵਣ੍ਣੇਨ ਲਿਮ੍ਪੇਤ੍ਵਾ ਪਿਟਕਂ ਪਤਿਟ੍ਠਾਪੇਸਿ. ਤਤੋ ਪਟ੍ਠਾਯ ਯਾਵਜ੍ਜਤਨਾ ਇਦਂ ਪੋਤ੍ਥਕਕਮ੍ਮਂ ਮਰਮ੍ਮਰਟ੍ਠੇ ਅਕਂਸੂਤਿ.

ਕਲਿਯੁਗੇ ਸਟ੍ਠਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ (ਅਸ੍ਸਯੁਜਮਾਸਸ੍ਸ ਕਾਲ਼ਪਕ੍ਖਛਟ੍ਠਮਿਯਂ ਅਙ੍ਗਾਰਵਾਰੇ) ਤਸ੍ਸ ਪੁਤ੍ਤੋ ਰਜ੍ਜਂ ਕਾਰੇਸਿ. ਸਿਰਿਹਾਸੀਹਸੂਰਸੁਧਮ੍ਮਰਾਜਾਤਿ ਨਾਮਲਞ੍ਛਮ੍ਪਿ ਪਟਿਗ੍ਗਣ੍ਹਿ. ਪਿਤੁ ਰਞ੍ਞੋ ਗੇਹਟ੍ਠਾਨੇ ਚੇਤਿਯਂ ਕਾਰਾਪੇਸਿ. ਤਸ੍ਸ ਪਨ ਮਾਰਜੇਯ੍ਯਰਤਨਨ੍ਤਿ ਸਮਞ੍ਞਾ ਅਹੋਸਿ. ਤਸ੍ਸ ਪਨ ਰਞ੍ਞੋ ਕਾਲੇ ਸਲ੍ਲਾਵਤਿਯਾ ਨਾਮ ਨਦਿਯਾ ਪਚ੍ਛਿਮਭਾਗੇ ਤੁਨ੍ਨਨਾਮਕੇ ਗਾਮੇ ਗੁਣਾਭਿਲਙ੍ਕਾਰੋ ਨਾਮ ਥੇਰੋ ਸਾਮਣੇਰਾਨਂ ਗਾਮਗ੍ਗਵੇਸਨਕਾਲੇ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ¶ ਸੀਸਵੇਠਨਤਾਲਪਤ੍ਤਾਨਿ ਪਨ ਨ ਗਣ੍ਹਾਪੇਤ੍ਵਾ ਤਾਲਵਣ੍ਟਮੇਵ ਗਣ੍ਹਾਪੇਸਿ. ਏਕੋ ਗਣੋ ਹੁਤ੍ਵਾ ਸਪਰਿਵਾਰੇਨ ਸਦ੍ਧਿਂ ਤੁਨ੍ਨਗਾਮੇ ਨਿਸੀਦਿ. ਤੁਨ੍ਨਗਣੋਤਿ ਤਸ੍ਸ ਸਮਞ੍ਞਾ ਅਹੋਸਿ. ਸੋ ਪਨ ਥੇਰੋ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਧਿਪ੍ਪਾਯਂ ਯਥਾਭੂਤਂ ਨ ਜਾਨਾਤਿ, ਅਭਿਧਮ੍ਮਪਿਟਕਂਯੇਵ ਸਿਸ੍ਸਾਨਂ ਵਾਚੇਤ੍ਵਾ ਨਿਸੀਦਿ.

ਤਸ੍ਮਿਞ੍ਚ ਕਾਲੇ ਕੇਤੁਮਤੀਨਗਰੇ ਨਿਸਿਨ੍ਨਾ ਬਦ੍ਧਨ੍ਨਾ ਬੁਦ੍ਧਙ੍ਕੁਰਤ੍ਥੇਰ ਚਿਤ੍ਤਤ੍ਥੇਰਾ, ਦੀਪਯਙ੍ਗਨਗਰੇ ਉਲ਼ੁਗਾਮੇ ਨਿਸਿਨ੍ਨੋ ਸੁਨਨ੍ਦਤ੍ਥੇਰੋ, ਤਲੁਪ੍ਪਨਗਰੇ ਜੇਯ੍ਯਬਹੁਅਨ੍ਧਗਾਮੇ ਕਲ੍ਯਾਣਤ੍ਥੇਰੋਤਿ ਇਮੇ ਚਤ੍ਤਾਰੋ ਥੇਰਾ ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਏਕਂਸਂ ਉਤ੍ਤਰਾਸਙ੍ਗਂ ਅਕਾਰਾਪੇਤ੍ਵਾ ਸੀਸਵੇਠਨਤਾਲਪਤ੍ਤਾਨਿ ਅਗ੍ਗਣ੍ਹਾਪੇਤ੍ਵਾ ਚੀਵਰਂ ਪਾਰੁਪਾਪੇਤ੍ਵਾ ਤਾਲਵਣ੍ਟਂ ਗਣ੍ਹਾਪੇਤ੍ਵਾ ਸਕਲਕਗਣਂ ਓਵਾਦਂ ਕਤ੍ਵਾ ਨਿਸੀਦਿਂਸੁ. ਤੇ ਪਨ ਥੇਰਾ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਧਿਪ੍ਪਾਯਂ ਯਥਾਭੂਭਂ ਜਾਨਿਂਸੁ, ਤੀਸੁਪਿ ਪਿਟਕੇਸੁ ਕੋਵਿਦਾ ਅਹੇਸੁਂ. ਇਚ੍ਚੇਵਂ ਸਿਰਿਮਹਾਸੀਹਸੂਰਸੁਧਮ੍ਮਰਞ੍ਞੋ ਕਾਲੇ ਪਾਰੁਪਨਭਿਕ੍ਖੂਹਿ ਨਾਨਾ ਹੁਤ੍ਵਾ ਵਿਰੂਪਂ ਆਪਜ੍ਜਿਤ੍ਵਾ ਏਕਂਸਿਕਗਣੋ ਨਾਮ ਵਿਸੁਂ ਭਿਜ੍ਜਿ, ਯਥਾ ਪਨ ਅਯਮਲਂ ਅਯਤੋ ਉਟ੍ਠਹਿਤ੍ਵਾ ਵਿਸਦਿਸਂ ਹੁਤ੍ਵਾ ਵਿਰੁਦ੍ਧਂ ਹੋਤੀਤਿ. ਏਵਂ ਭਿਜ੍ਜਮਾਨਾਪਿ ਗਣਾ ਰਾਜਾ ਪਮਾਦੋ ਅਨੁਸ੍ਸੁਕ੍ਕੋ ਹੁਤ੍ਵਾ ਅਤ੍ਤਨੋ ਅਤ੍ਤਨੋ ਰੁਚਿਵਸੇਨੇਵ ਚਰਿਤ੍ਵਾ ਨਿਸੀਦਿਂਸੁ.

ਤੇਸੁ ਚ ਦ੍ਵੀਸੁ ਗਣੇਸੁ ਪਾਰੁਪਨਗਣੇ ਥੇਰਾ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਨੀਤਤ੍ਥਵਸੇਨ ਵੁਤ੍ਤਂ ਵਚਨਂ ਨਿਸ੍ਸਾਯ ਨਿਕ੍ਕਙ੍ਖਾ ਨਿਦ੍ਦੋਸਾਵ ਹੁਤ੍ਵਾ ਨਿਸੀਦਿਂਸੁ. ਏਕਂਸਿਕਗਣੇ ਪਨ ਥੇਰਾ ਅਤ੍ਤਨੋ ਅਤ੍ਤਨੋ ਵਾਦੋ ਨ ਪਾਲ਼ਿਯਂ ਨ ਚ ਅਟ੍ਠਕਥਾਸੁ ਨੇਵ ਟੀਕਾਸੁ ਨਾਪਿ ਗਨ੍ਥਨ੍ਤੇਰੇਸੁ ਦਿਸ੍ਸਤਿ, ਇਮਮਤ੍ਥਂ ਅਜਾਨਨ੍ਤਾ ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਵਤ੍ਵਾ ਕੇਚਿ ਪਨ ਸਕਸਕਸਿਸ੍ਸਾਨਂ ਓਵਾਦਂ ਅਦਂਸੁ. ਏਵਰੂਪਾਪਿ ਸਿਸ੍ਸਾ ਓਵਾਦਂ ਪਟਿਗ੍ਗਣ੍ਹਿਂਸੁ.

ਕੇਚਿ ਪਨ ਪਾਲ਼ਿਯਾਦੀਸੁ ਸਕਵਾਦਸ੍ਸ ਅਨਾਗਤਭਾਵਂ ਞਤ੍ਵਾਯੇਵ ¶ ਅਪਰਿਸੁਦ੍ਧਚਿਤ੍ਤਾ ਹੁਤ੍ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਮੁਖਂ ਅਨੋਲੋਕੇਤ੍ਵਾ ਸਮ੍ਮਾਸਮ੍ਬੁਦ੍ਧਸ੍ਸੇਵ ਭਗਵਤੋ ਗੁਣਂ ਅਨੁਸ੍ਸਰਿਤ੍ਵਾ ਸਕਵਾਦੇ ਆਕਾਸੇ ਪਸਾਰਿਤ ਹਤ੍ਥੋਵਿਯ ਅਪ੍ਪਤਿਟ੍ਠਾਨੋਤਿ ਜਾਨਿਤ੍ਵਾਯੇਵ ਅਮ੍ਹਾਕਂ ਵਾਦੋ ਸਮ੍ਪਤ੍ਤਲਙ੍ਕਸ੍ਸ ਸਦ੍ਧਮ੍ਮਚਾਰਿਤ੍ਥੇਰਸ੍ਸ ਵਂਸਪ੍ਪਭਵੋਤਿ ਅਨਿਸ੍ਸਾਯਭੂਭਮ੍ਪਿ ਨਿਸ੍ਸਯਂ ਅਕਂਸੁ. ਅਭੂਤੇਨ ਮਹਾਥੇਰਂ ਸੀਲਵਨ੍ਤਂ ਅਬ੍ਭਾਚਿਕ੍ਖਿਂਸੁ. ਫ੍ਯਸੀਨਾਮਕੇ ਗਾਮੇ ਦਿਟ੍ਠਧਮ੍ਮਿਕਸਮ੍ਪਰਾਯਿ ਕਤ੍ਥਂ ਅਨਪੇਕ੍ਖਨ੍ਤਸ੍ਸ ਹੀਨਾਯਾਵਤ੍ਤਕਸ੍ਸ ਦੁਸ੍ਸੀਲਸ੍ਸ ਉਪਾਸਕਸ੍ਸ ਲਞ੍ਜਂ ਦਤ੍ਵਾ ਅਮ੍ਹਾਕਂ ਵਾਦਾਨੁਰੂਪਂ ਏਕਂ ਗਨ੍ਥਂ ਕਰੋਹੀਤਿ ਉਯ੍ਯੋਜੇਤ੍ਵਾ ਅਨਾਗਤੇ ਅਨੁਭਵਿਯਮਾਨਦੁਕ੍ਖਤੋ ਅਭਾਯਿਤ੍ਵਾ ਨਿਸ੍ਸਯਂ ਗਵੇਸਿਂਸੂਤਿ.

ਤਸ੍ਮਿਂਞ੍ਚ ਕਾਲੇ ਨਿਗ੍ਰੋਧਪਾਲ਼ਿਸੁਵਣ੍ਣਵਿਹਾਰਵਾਸਿਤ੍ਥੇਰੋ ਗਾਮਵਾਸੀਭਿਕ੍ਖੁ ਗਣਂ ਸਮਿਤਿਂ ਕਤ੍ਵਾ ਤਸ੍ਸ ਨਾਯਕੋ ਹੁਤ੍ਵਾ ਸੀਸਵੇਠਨਂ ਅਧਾਰੇਨ੍ਤਾ ਅਮਙ੍ਗਲਭਿਕ੍ਖੂ ਸਾਸਨੇ ਮਾਤਿਟ੍ਠਨ੍ਤੂਤਿ ਅਰਞ੍ਞਵਾਸੀਨਂ ਭਿਕ੍ਖੂਨਂ ਗਨ੍ਥਂ ਵਿਕੋਪੇਤ੍ਵਾ ਤਤੋ ਤਤੋ ਪਬ੍ਬਜੇਸੁਂ. ਅਥ ਹਤ੍ਥਿਸਾਲਗਾਮਸ੍ਸ ਪੁਰਤ੍ਥਿਮਾਯ ਅਨੁਦਿਸਾਯ ਸੇਟ੍ਠਿਤਲ਼ਾਕਸ੍ਸ ਦਕ੍ਖਿਣਾਯ ਅਨੁਦਿਸਾਯ ਵਿਹਾਰੇ ਨਿਸਿਨ੍ਨੇ ਅਤਿਰੇਕਪਣ੍ਣਾਸਭਿਕ੍ਖੂਪਿ ਪਬ੍ਬਾਜੇਸ੍ਸਾਮਾਸਿ ਚਿਨ੍ਤੇਤ੍ਵਾ ਗਾਮਵਾਸੀਭਿਕ੍ਖੂ ਸਨ੍ਨਹਿਤ੍ਵਾ ਅਗਮਾਸਿ. ਅਥ ਰਾਜਾ ਤਮਤ੍ਥਂ ਸੁਤ੍ਵਾ ਗਾਮਵਾਸੀਗਣੋਪਿ ਏਕੋ, ਅਰਞ੍ਞਵਾਸੀਗਣੋਪਿ ਏਕੋ, ਗਾਮਵਾਸੀਭਿਕ੍ਖੂ ਅਰਞ੍ਞਵਾਸੀਭਿਕ੍ਖੂ ਵਿਹੇਠੇਸੁਂ ਨ ਸਕ੍ਕਾ, ਸਕਸਕਵਾਦਵਸੇਨ ਸਕਸਕਟ੍ਠਾਨੇ ਨਿਸੀਦਿ ਤਬ੍ਬਨ੍ਤਿ ਰਾਜਲੇਖਨਂ ਪੇਸੇਸਿ. ਅਥ ਅਰਞ੍ਞਵਾਸੀਭਿਕ੍ਖੂ ਸੁਖਂ ਵਸਿਤੁਂ ਓਕਾਸਂ ਲਭਿਂਸੁ.

ਕਲਿਯੁਗੇ ਛਸਤ੍ਤਤਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਪੁਤ੍ਤੋ ਮਹਾਸੀਹਸੂਰਧਮ੍ਮਰਾਜਾਧਿਰਾਜਾ ਨਾਮ ਰਜ੍ਜਂ ਕਾਰੇਸਿ. ਸੋਯੇਵ ਸੂਰਜ੍ਜਰਾਜਾਤਿ ਚ ਸੇਤਿਭਿਨ੍ਦੋਤਿ ਚ ਵੋਹਾਰਿਯਤਿ.

ਤਸ੍ਸ ¶ ਰਞ੍ਞੋ ਕਾਲੇ ਸੁਵਣ੍ਣਯਾਨੋਲੋਕਨਗਾਮਵਾਸੀਉਕ੍ਕਂਸਮਾਲਂ ਨਾਮ ਥੇਰਂ ਅਨ੍ਤੋਯੁਧਨਾਯਕੋ ਏਕੋ ਅਮਚ੍ਚੋ ਆਨੇਤ੍ਵਾ ਰਤਨਪੂਰਨਗਰਂ ਪਤ੍ਵਾ ਸੁਵਣ੍ਣਕੁਕ੍ਕੁਟਾਚਲੇ ਵਿਹਾਰਂ ਕਾਰਾਪੇਤ੍ਵਾ ਠਪੇਸਿ.

ਸੋ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਤਿਵਿਯ ਛੇਕੋ. ਵਣ੍ਣਬੋਧਨਂ ਨਾਮ ਲਿਖਨਨਯਞ੍ਚ ਅਕਾਸਿ. ਤਸ੍ਸ ਗਾਮਸ੍ਸ ਰਾਜੂਹਿ ਦਿਨ੍ਨਵਸੇਨ ਚੇਤਿਯਜਗ੍ਗਨਕਮ੍ਮੇ ਯੁਤ੍ਤਕੁਲਤ੍ਤਾ ਪਨ ਰਞ੍ਞੋ ਆਚਰਿਯਟ੍ਠਾਨੇ ਅਟ੍ਠਪੇਤ੍ਵਾ ਅਨ੍ਤੋਯੁਧਨਾਯ ਕਸ੍ਸੇਵ ਪੂਜਨਤ੍ਥਾਯ ਨਿਯ੍ਯਾਦੇਸਿ. ਤਸ੍ਸਾਪਿ ਰਞ੍ਞੋ ਕਾਲੇ ਸਾਮਣੇਰੇਹਿ ਗਾਮਪ੍ਪਵਸਨਕਾਲੇ ਪਾਰੁਪੇਤ੍ਵਾ ਪਵਿਸਿਤਬ੍ਬਨ੍ਤਿ ਏਕਚ੍ਚੇ ਵਦਿਂਸੁ. ਏਕਚ੍ਚੇ ਪਨ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਪਵਿਸਿਤਬ੍ਬਨ੍ਤਿ ਵਦਿਂਸੁ. ਏਵਂ ਅਞ੍ਞਮਞ੍ਞਂ ਕਲਹਂ ਅਕਂਸੁ.

ਤਤ੍ਥ ਉਕ੍ਕਂਸਮਾਲਾਨਾਮਕੋ ਥੇਰੋ ਪਾਰੁਪਨਗਣੇ ਪਧਾਨੋ ਹੁਤ੍ਵਾ ਨਾਨਾਗਨ੍ਥੇਸੁ ਪਾਰੁਪਨਵਤ੍ਤਮੇਵ ਆਗਤਨ੍ਤਿ ਪਕਾਸਿਂਸੁ. ਏਕਂਸਿਕਗਣੇ ਪਨ ਤਿਰਿਯਪਬ੍ਬਤਵਿਹਾਰਵਾਸੀਮਹਾਥੇਰਾ ਆਚਰਿਯਪ੍ਪਵੇਣੀਦਸ੍ਸਨਵਸੇਨ ਪਾਰੁਪਨਵਾਦਂ ਪਟਿਕ੍ਖਿਪਿਂਸੁ.

ਅਥ ਰਾਜਾ ਚ ਫਲਿਕਖਚਿਤਵਿਹਾਰਵਾਸਿਤ੍ਥੇਰਂ ਮੇਘੁਚ੍ਚਨਵਿਹਾਰਵਾਸਿਤ੍ਥੇਰਂ ਸੁਹਤ੍ਥਤ੍ਥੇਰਂ ਬੁਦ੍ਧਙ੍ਕੁਰਤ੍ਥੇਰਞ੍ਚਾਤਿ ਇਮੇ ਚਤ੍ਤਾਰੋ ਥੇਰੇ ਵਿਨਯਵਿਨਿਚ੍ਛਕਟ੍ਠਾਨੇ ਠਪੇਤ੍ਵਾ ਦ੍ਵੇ ਪਕ੍ਖਾ ਅਤ੍ਤਨੋ ਅਤ੍ਤਨੋ ਵਾਦਂ ਦਸ੍ਸੇਨ੍ਤੂਤਿ ਆਹ.

ਤੇ ਚ ਚਤ੍ਤਾਰੋ ਥੇਰਾ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਕੋਵਿਦਾ. ਤੇਸਞ੍ਹਿ ਠਪੇਤ੍ਵਾ ਰਾਜਵਲ੍ਲਭਮਤ੍ਤਂ ਅਞ੍ਞੋ ਕੋਚਿ ਗੁਣਵਿਸੇਸੋ ਨਤ੍ਥਿ ਰਾਜਗੁਰੁਭਾਵਤ੍ਥਾਯ, ਯਥਾ ਬ੍ਯਗ੍ਘਾ ਰੁਕ੍ਖਗਚ੍ਛਲਤਾਦਿਪ੍ਪਟਿਚ੍ਛਨ੍ਨੇ ਦੁਗ੍ਗਟ੍ਠਾਨੇ ਨਿਸਿਨ੍ਨੇ ਮਿਗੇ ਖੁਦ੍ਦਕਤ੍ਤਾ ਦੁਬ੍ਬਲੇਪਿ ਗਣ੍ਹੇਤੁਂ ਨ ਸਕ੍ਕੋਨ੍ਤਿ, ਏਵਮੇਵ ਤੇ ਏਕਂਸਿਕਤ੍ਥੇਰੇ ¶ ਰਾਜਾਨਂ ਨਿਸ੍ਸਾਯ ਠਿਤੇ ਗਨ੍ਥੇਸੁ ਅਨਾਗਤਤ੍ਤਾ ਦੁਬ੍ਬਲੇਪਿ ਵਾਦਵਸੇਨ ਅਭਿਭਵਿਤੁਂ ਨ ਸਕ੍ਖਿਂਸੁ. ਤੇਨੇਵ ਪਰਸੇਨਾਯ ਬਲਵਤਂ ਜਾਨਿਤ੍ਵਾ ਨਿਪਚ੍ਚਕਾਰਂ ਦਸ੍ਸੇਤ੍ਵਾ ਵੇਰਂ ਸਮੇਤ੍ਵਾ ਨਿਸਿਨ੍ਨੋ ਪਣ੍ਡਿਤਯੋਧੋਵਿਯ ਵਾਦਂ ਨਿਟ੍ਠਂ ਅਪ੍ਪਾਪੇਤ੍ਵਾਯੇਵ ਪਾਰੁਪਨਗਣਾ ਨਿਸੀਦਿਂਸੂਤਿ.

ਕਲਿਯੁਗੇ ਪਨ ਪਞ੍ਚਨਵੁਤਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਤਸ੍ਸ ਪੁਤ੍ਤੋ ਮਹਾਰਾਜਾਧਿਪਤਿ ਨਾਮ ਰਜ੍ਜਂ ਕਾਰੇਸਿ. ਪਚ੍ਛਾ ਪਨ ਕਾਲੇ ਤੇਰਸਾਧਿਕੇ ਸਤੇ ਵਸ੍ਸਸਹਸ੍ਸੇ ਚ ਸਮ੍ਪਤ੍ਤੇ ਰਾਮਞ੍ਞਰਟ੍ਠਿਨੋ ਰਾਜਾ ਤਂ ਅਭਿਭਵਿਤ੍ਵਾਵ ਅਨੀਤਤ੍ਤਾ ਪਤ੍ਤਹਂਸਾਵਤੀਤਿ ਪਾਕਟਂ ਅਹੋਸਿ.

ਤਸ੍ਸ ਰਞ੍ਞੋ ਕਾਲੇ ਕੁਖਨਨਗਰੇ ਜਾਲਯੁਤ੍ਤ ਗਾਮਤੋ ਞਾਣਵਰਂ ਨਾਮ ਥੇਰਂ ਆਨੇਤ੍ਵਾ ਆਚਰਿਯਟ੍ਠਾਨੇ ਠਪੇਸਿ. ਸੋ ਪਨ ਥੇਰੋ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਤਿਵਿਯ ਛੇਕੋ. ਸੁਧਮ੍ਮਸਭਾਯਂ ਪਰਿਯਤ੍ਤਿਵਾਚਕਾਨਂ ਸੋਤਾਰਾਨਂ ਅਤ੍ਥਾਯ ਅਭਿਧਮ੍ਮਤ੍ਥਸਙ੍ਗਹਪ੍ਪਕਰਣਸ੍ਸ ਗਣ੍ਠਿਪਦਤ੍ਥਂ ਪਠਮਂ ਅਕਾਸਿ. ਤਤੋ ਪਚ੍ਛਾ ਅਟ੍ਠਸਾਲਿਨਿਯਂ ਗਣ੍ਠਿਪਦਤ੍ਥਂ ਸੁਰਾਵਿਨਿਚ੍ਛਯਞ੍ਚ ਅਕਾਸਿ. ਤਤੋ ਪਚ੍ਛਾ ਤੇਨ ਰਞ੍ਞਾ ਯਾਚਿਤੋ ਅਭਿਧਾਨਪ੍ਪਟੀਪਿਕਾਯ ਅਤ੍ਥਂ ਮਰਮ੍ਮਭਾਸਾਯ ਯੋਜੇਸਿ. ਰਞ੍ਞੋ ਨਾਮਲਞ੍ਛਂ ਛਨ੍ਦੋਲਙ੍ਕਾਰਸਦ੍ਦਨੇਤ੍ਤਿਵਿਦਗ੍ਗਦਣ੍ਡੀਬ੍ਯਞ੍ਜੀਨਨਯੇਹਿ ਅਲਙ੍ਕਰਿਤ੍ਵਾ ਰਾਜਾਧਿਰਾਜਨਾਮਤ੍ਥਪ੍ਪਕਾਸਿਨਿਂ ਨਾਮ ਗਨ੍ਥਮ੍ਪਿ ਅਕਾਸਿ.

ਰਾਜਾ ਹਤ੍ਥਿਸਾਲਨਾਮਕੇ ਦੇਸੇ ਕਾਰਾਪਿਤਗੇਹਂ ਭਿਨ੍ਦਿਤ੍ਵਾ ਸਤਪ੍ਪਮਾਣੇ ਵਿਹਾਰੇ ਕਾਰਾਪੇਤ੍ਵਾ ਸਬ੍ਬੇਸਮ੍ਪਿ ਵਿਹਾਰਾਨਂ ਕਿਤ੍ਤਿਜੇਯ੍ਯਵਾਸਟ੍ਠਾਪਨਨ੍ਤਿ ਨਾਮਾਨਿ ਪਞ੍ਞਾਪੇਤ੍ਵਾ ਤਸ੍ਸੇਵ ਥੇਰਸ੍ਸ ਅਦਾਸਿ. ਵਿਹਾਰਨਾਮੇਨੇਵ ਚ ਥੇਰਸ੍ਸਾਪਿ ਤਂਸਮਞ੍ਞਾ ਅਹੋਸਿ.

ਤਸ੍ਮਿਞ੍ਚ ਕਾਲੇ ਅਕ੍ਯਕਰਞ੍ਞੋ ਪਿਤੁਰਞ੍ਞੋ ਚ ਕਾਲੇ ਤੇਸਂ ¶ ਦ੍ਵਿਨ੍ਨਂ ਗਣਾਨਂ ਵਿਵਾਦਵਸੇਨ ਅਵਿਪ੍ਪਕਤਵਚਨਂ ਪੁਨ ਵਿਵਾਦਸ੍ਸ ਵੂਪਸਮਨਤ੍ਥਾਯ ਅਤ੍ਤਨੋ ਅਤ੍ਤਨੋ ਵਾਦਂ ਕਥਾਪੇਸਿ. ਪਾਰੁਪਨਗਣੇ ਸੋ ਥੇਰੋ ਪਧਾਨੋ ਹੁਤ੍ਵਾ ਏਕਂਸਿਕਗਣੇ ਪਨ ਪਾਸਂਸਤ੍ਥੇਰੋ ਪਧਾਨੋ ਹੁਤ੍ਵਾ ਯਥਾਯੁਦ੍ਧਂ ਅਕਾਸਿ. ਅਥ ਰਾਜਾ ਅਤਿਵਿਯ ਰਾਜਵਲ੍ਲਭਂ ਜੇਯ੍ਯਭੂਮਿਸੁਵਣ੍ਣਵਿਹਾਰਵਾਸਿਤ੍ਥੇਰਂ ਤੇਸਂ ਵਾਦਸ੍ਸ ਵਿਨਿਚ੍ਛਿਨ੍ਦਨਤ੍ਥਾਯ ਵਿਨਯਚਰੇਟ੍ਠਾਨੇ ਠਪੇਸਿ.

ਕਿਞ੍ਚਾਪਿ ਸੋ ਪਨ ਥੇਰੋ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਥੋਕਂਯੇਵ ਜਾਨਕਤ੍ਤਾ ਪਰਿਯਤ੍ਤਿਕੋਵਿਦੇਸੁ ਅਬ੍ਬੋਹਾਰਿਕੋਯੇਵ ਅਹੋਸਿ, ਰਾਜਵਲ੍ਲਭਤ੍ਤਾ ਪਨ ਰਾਜਾ ਯਥਾਭੂਤਂ ਅਜਾਨਿਤ੍ਵਾ ਵਿਨਯਧਰਟ੍ਠਾਨੇ ਠਪੇਸਿ. ਯਥਾ ਪਨ ਅਯਂ ਪੁਰਤ੍ਥਿਮਦਿਸਾ, ਅਯਂ ਪਨ ਪਚ੍ਛਿਮਦਿਸਾਭਿ ਏਵਮਾਦਿਨਾ ਦਿਸਾਵਵਤ੍ਥਾਨਮਤ੍ਤਂਯੇਵ ਕਾਤੁਂ ਸਮਤ੍ਥਂ ਨਙ੍ਗਲਕੋਟਿਯਾ ਸਂਵਡ੍ਢਨ੍ਤਂ ਪਰਿਸੁਂ ਰਾਜਾਗਾਰੇ ਧਮ੍ਮਵਿਨਿਚ੍ਛਕਾਮਪਚ੍ਚਟ੍ਠਾਨੇ ਠਪੇਤਿ, ਏਵਮੇਵ ਰਾਜਾ ਅਯਂ ਈਦਿਸੋ ਅਯਂ ਈਦਿਸੋਤਿ ਅਜਾਨਿਤ੍ਵਾ ਵਿਨਯਧਰਟ੍ਠਾਨੇ ਠਪਿਤਤ੍ਤਾ ਸੋ ਜੇਯ੍ਯਭੂਮਿਸੁਵਣ੍ਣਵਿਹਾਰਵਾਸਿਤ੍ਥੇਰੋ ਤੇਸਂ ਦ੍ਵਿਨ੍ਨਂ ਪਕ੍ਖਾਨਂ ਦ੍ਵੀਸੁ ਵਾਦੇਸੁ ਅਯਂ ਭੂਤੋ ਅਯਂ ਅਭੂਤੋਤਿ ਵਤ੍ਤੁਂ ਨ ਸਕ੍ਕਾ, ਅਦ੍ਵਾਰਘਰੇ ਪਵਿਟ੍ਠਕਾਲੇਵਿਯ ਤਦਾ ਅਹੋਸਿ. ਸੇਯ੍ਯਥਾਪਿ ਨਾਮ ਮਹਿਸੋ ਅਤ੍ਤਨੋ ਸਮੀਪੇ ਠਤ੍ਵਾ ਦੇਵਗੀਤਂ ਗਾਯਿਤ੍ਵਾ ਦੇਵਵੀਣਂ ਵਾਦੇਨ੍ਤਸ੍ਸ ਦੇਵਗਨ੍ਧਬ੍ਬਸ੍ਸ ਵੇਲ਼ੁਸਲਾਕਂ ਪਹਰਨ੍ਤਸ੍ਸ ਚ ਗਾਮਦਾਰਕਸ੍ਸ ਸਦ੍ਦੇਸੁ ਕਿਞ੍ਚਿ ਵਿਸੇਸਂ ਨ ਜਾਨਾਤਿ, ਏਵਮਿਦਂ ਸਮ੍ਪਦਂ ਦਟ੍ਠਬ੍ਬਂ. ਅਥ ਰਾਜਾ ਮਮ ਵਿਜਿਤੇ ਯੇਯੇਭਿਕ੍ਖੂ ਯਂਯਂਇਚ੍ਛਨ੍ਤਿ, ਤੇਤੇਭਿਕ੍ਖੂ ਤਂਤਂਚਰਿਤ੍ਵਾ ਯਥਾਕਮ੍ਮਂ ਨਿਸੀਦਨ੍ਤੂਤਿ ਰਾਜਲੇਖਨਂ ਠਪੇਸਿ. ਤੇਸਂ ਵਿਵਾਦੋ ਤਦਾ ਨ ਵੂਪਸਮਿ.

ਅਪਰਭਾਗੇ ਤੇਰਸਾਧਿਕੇ ਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਰਤਨਪੂਰਨਗਰਂ ਵਿਨਸ੍ਸਿ.

ਤਤੋ ਪਚ੍ਛਾ ਦੁਤਿਯੇ ਸਂਵਚ੍ਛਰੇ ਰਤਨਸਿਖਨਗਰਮਾਪਕੋ ਰਾਜਾ ਰਾਮਞ੍ਞਰਟ੍ਠਿਨ੍ਦਸ੍ਸ ਰਞ੍ਞੋ ਸੇਨਂ ਯਵਖੇਤ੍ਤਤੋ ਚਾਤਕਸਕੁਣਂਵਿਯ ¶ ਅਤ੍ਤਨੋ ਪੁਞ੍ਞਨੁਭਾਵੇਨ ਮਰਮ੍ਮਰਟ੍ਠਤੋ ਨੀਹਰਿਤ੍ਵਾ ਸਕਲਮ੍ਪਿ ਰਾਮਞ੍ਞਰਟ੍ਠਂ ਅਤ੍ਤਨੋ ਹਤ੍ਥਗਤਂ ਕਤ੍ਵਾ ਰਜ੍ਜਂ ਕਾਰੇਸਿ.

ਤਸ੍ਮਿਞ੍ਚ ਕਾਲੇ ਸਕਲਮਰਮ੍ਮਰਟ੍ਠਵਾਸੀਨਂ ਚਿਤ੍ਤਂ ਪਸਾਦੇਸਿ, ਯਥਾ ਨਾਮ ਸੂਰਿਯਾਤਪੇਨ ਮਿਲਾਯਨ੍ਤਾਨਂ ਕੁਮੁਦਾਨਂ ਅਨੋਤਤ੍ਤੋਦਕੇਨ ਸਿਞ੍ਚਿਤ੍ਵਾ ਹਰਿਤਤ੍ਤਂ ਪਾਪੇਤਿ, ਏਵਮੇਵ ਰਾਮਞ੍ਞਰਟ੍ਠਿਨ੍ਦਸ੍ਸ ਸੇਨਾਬਲਾਤਪੇਹਿ ਦੁਕ੍ਖਪ੍ਪਤ੍ਤਾਨਂ ਮਰਮ੍ਮਰਟ੍ਠਵਾਸੀਨਂ ਗਹਟ੍ਠਾਨਞ੍ਚੇਵ ਭਿਕ੍ਖੂਨਞ੍ਚ ਅਤ੍ਤਨੋ ਪੁਞ੍ਞਾਨੋਤਤ੍ਤੋਦਕੇਨ ਛਿਞ੍ਚਿਤ੍ਵਾ ਕਾਯਿਕਚੇਤਸਿਕਵਸੇਨ ਦੁਵਿਧਮ੍ਪਿ ਸੁਖਂ ਉਪ੍ਪਾਦੇਸਿ.

ਸਕਲਮਰਮ੍ਮਰਟ੍ਠਵਾਸਿਨੋ ਚ ਅਯਂ ਅਮ੍ਹਾਕਂ ਰਾਜਾ ਬੋਧਿਸਤ੍ਤੋਤਿ ਵੋਹਾਰਿਂਸੁ. ਅਥ ਏਕਸ੍ਮਿਂ ਮਾਸੇ ਚਤੂਸੁ ਉਪੋਸਥਦਿਵਸੇਸੁ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਅਨ੍ਤੇਪੁਰੇ ਪਵੇਸੇਤ੍ਵਾ ਪਿਣ੍ਡਪਾਤੇਨ ਭੋਜੇਸਿ. ਰਾਜੋਰੋਧਾਮਚ੍ਚੇਹਿ ਸਦ੍ਧਿਂ ਉਪੋਸਥਂ ਉਪਵਸਿ. ਸਬ੍ਬੇਸਮ੍ਪਿ ਰਾਜੋਰੋਧਾਮਚ੍ਚਾਨਂ ਗੁਣਤ੍ਤਯਪਾਠਂ ਸਹ ਅਤ੍ਥਯੋਜਨਾਨਯੇਨ ਵਾਚਗ੍ਗਤਂ ਕਾਰਾਪੇਸਿ.

ਅਥ ਬੇਲੁਵਗਾਮਵਾਸੀਯਸਤ੍ਥੇਰਂ ਅਨੇਤ੍ਵਾ ਅਤ੍ਤਨੋ ਆਚਰਿਯਟ੍ਠਾਨੇ ਠਪੇਸਿ. ਮਹਾਅਤੁਲਯਸਧਮ੍ਮਰਾਜਗੁਰੂਤਿ ਨਾਮਲਞ੍ਛਮ੍ਪਿ ਅਦਾਸਿ. ਤਤੋ ਪਟ੍ਠਾਯ ਪਨ ਅਤੁਲਤ੍ਥੇਰੋਤਿ ਨਾਮੇਨ ਪਾਕਟੋ ਅਹੋਸਿ. ਤਸ੍ਮਿਞ੍ਚ ਕਾਲੇ ਪਾਰੁਪਨਗਣਪਕ੍ਖਾਪਲਿਣਗਾਮਵਾਸੀਸੁਜਾਤਤ੍ਥੇਰਾਦਯੋ ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਚੀਵਰਂ ਪਾਰੁਪਿਤ੍ਵਾ ਪਵਿਸਿਤਬ੍ਬਨ੍ਤਿ ਅਕ੍ਖਰਂ ਲਿਖਿਤ੍ਵਾ ਰਞ੍ਞੋ ਸਨ੍ਤਿਕਂ ਸਨ੍ਦੇਸਪਣ੍ਣਂ ਪਵੇਸੇਤਿ.

ਅਥ ਏਕਂਸਿਕਗਣਪਕ੍ਖਾਪਿ ਅਤੁਲਤ੍ਥੇਰਾਦਯੋ ਪੁਬ੍ਬੇਸਂ ਰਾਜੂਨਂ ਕਾਲੇ ਅਧਿਕਰਣਂ ਵੂਪਸਮਿ, ਇਦਾਨਿ ਵੂਪਸਮਿਤਕਮ੍ਮਂ ਪੁਨ ਨ ਉਪ੍ਪਾਦੇਤਬ੍ਬਨ੍ਤਿ ਲੇਖਨਂ ਲਿਖਿਤ੍ਵਾ ਰਞ੍ਞੋ ਸਨ੍ਤਿਕਂ ਪੇਸੇਸਿ.

ਅਥ ਰਾਜਾ ਦ੍ਵਿਨ੍ਨਂ ਪਕ੍ਖਾਨਂ ਸਕਸਕਵਾਦਂ ਕਥੇਤੁਕਾਮੋਪਿ ¶ ਇਦਾਨਿ ਰਾਜਪ੍ਪਟਿਸਂਯੁਤ੍ਤਂ ਕਮ੍ਮਂ ਬਹੁ ਅਤ੍ਥਿ, ਤਿਟ੍ਠਸੁ ਤਾਵ ਸਾਸਨਪ੍ਪਟਿਸਂਯੁਤ੍ਤਂ ਕਮ੍ਮਂ, ਰਾਜਪ੍ਪਟਿਸਂਯੁਤ੍ਤਮੇਵ ਕਮ੍ਮਂ ਪਠਮਂ ਆਰਭਿਸ੍ਸਾਮਿ, ਪਚ੍ਛਾ ਸਾਸਨਪ੍ਪਟਿਸਂਯੁਤ੍ਤਂ ਕਮ੍ਮਂ ਕਰਿਸ੍ਸਾਮੀਤਿ ਰਾਜਲੇਖਨਂ ਠਪੇਸਿ. ਅਪਰਭਾਗੇ ਪਨ ਰਾਜਾ ਏਵਂ ਆਣਂ ਠਪੇਸਿ,-ਇਦਾਨਿ ਮਮ ਵਿਜਿਤੇ ਸਬ੍ਬੇਪਿ ਭਿਕ੍ਖੂ ਮਮ ਆਚਰਿਯਸ੍ਸ ਮਤਿਂ ਅਨੁਵਤ੍ਤਿਤ੍ਵਾ ਚਰਨ੍ਤੂਤਿ.

ਅਥ ਪਾਰੁਪਨਗਣਭਿਕ੍ਖੂਪਿ ਏਕਂਸਿਕਗਣਂ ਅਨੁਵਤ੍ਤੇਸੁਂ ਰਞ੍ਞੋ ਆਣਾਵਸੇਨ. ਸਹਸ੍ਸੋਰੋਧਗਾਮੇ ਪਨ ਦ੍ਵੇ ਮਹਾਥੇਰਾ ਅਤ੍ਤਨੋ ਪਰਿਸਂ ਪਾਰੁਪਨਵਸੇਨੇਵ ਗਾਮਪ੍ਪਵੇਸਨਵਤ੍ਤਂ ਪਰਿਪੂਰਿਤਬ੍ਬਨ੍ਤਿ ਓਵਦਿਤ੍ਵਾ ਨਿਸੀਦਿਂਸੁ.

ਤਦਾ ਰਞ੍ਞੋ ਆਚਰਿਯੋ ਯਸਤ੍ਥੇਰੋ ਤਮਤ੍ਥਂ ਸੁਤ੍ਵਾਤੇ ਪਕ੍ਕੋਸਾਪੇਸਿ. ਤੇ ਚ ਆਗਨ੍ਤ੍ਵਾ ਨਗਰਂ ਸਮ੍ਪਤ੍ਤਕਾਲੇ ਏਕੋ ਉਪਾਸਕੋ ਪਸਨ੍ਨੋ ਹੁਤ੍ਵਾ ਤੇਸਂ ਥੇਰਾਨਂ ਪਿਣ੍ਡਪਾਤੇਨ ਉਪਟ੍ਠਹਿ. ਅਥ ਅਤੁਲਤ੍ਥੇਰੋ ਤੇ ਮਹਾਥੇਰੇ ਦੂਰਟ੍ਠਾਨਤੋ ਵਾਲੁਕਂ ਆਨੇਤ੍ਵਾ ਤਸ੍ਸ ਉਪਾਸਕਸ੍ਸ ਗੇਹਸਮੀਪੇ ਓਕਿਰਾਪੇਸਿ. ਇਦਂ ਵਿਨਯਧਮ੍ਮਸ੍ਸ ਅਨਨੁਲੋਮਵਸੇਨ ਚਰਨ੍ਤਾਨਂ ਦਣ੍ਡਕਮ੍ਮਨ੍ਤਿ ਕੋਲਾਹਲਮ੍ਪਿ ਉਪ੍ਪਾਦੇਸਿ. ਅਥ ਤੇਸਂ ਵਾਲੁਕਂ ਆਹਰਨ੍ਤਾਨਂਯੇਵ ਅਞ੍ਞਮਞ੍ਞਂ ਸਲ੍ਲਪੇਸੁਂ,-ਇਦਾਨਿ ਭਨ੍ਤੇ ਵਿਨਯਧਮ੍ਮਾਨੁਲੋਮਵਸੇਨ ਆਚਰਨ੍ਤਾਨਂ ਅਮ੍ਹਾਕਂ ਈਦਿਸਂ ਕਮ੍ਮਂ ਅਸਾਰੁਪ੍ਪਂ, ਅਹੋ ਅਚ੍ਛਰਿਯਧਮ੍ਮੋ ਲੋਕੋਤਿ ਏਕੋ ਥੇਰੋ ਆਹ. ਅਥ ਪਨ ਏਕੋ ਥੇਰੋ ਏਵਮਾਹ,-ਇਦਾਨਿ ਆਵੁਸੋ ਲੋਕਪਾਲਾ ਦੇਵਾ ਈਦਿਸਂ ਅਧਮ੍ਮਕਮ੍ਮਂ ਦਿਸ੍ਵਾਯੇਵ ਅਜ੍ਝੁਪੇਕ੍ਖਿਤ੍ਵਾ ਅਪ੍ਪੋਸ੍ਸੁਕਾ ਨਿਸੀਦਿਤੁਂ ਨ ਸਕ੍ਕਾ, ਇਦਾਨਿ ਲੋਕਪਾਲਾ ਦੇਵਾ ਪਮਜ੍ਜਿਤ੍ਵਾ ਨਿਸੀਦਨ੍ਤਿ ਮਞ੍ਞੇਤਿ.

ਤਸ੍ਮਿਂਯੇਵ ਖਣੇ ਵੇਗੇਨ ਮੇਘੋ ਉਟ੍ਠਹਿਤ੍ਵਾ ਅਤੁਲਤ੍ਥੇਰਸ੍ਸ ਵਿਹਾਰੇ ਰਾਜਗੇਹੇ ਚ ਏਕਕ੍ਖਣੇ ਅਸਨਿਯੋ ਨਿਪਤਿਂਸੁ. ਏਵਂ ਸਮਾਨੋਪਿ ਸੋ ਥੇਰੋ ਅਤਿਮਾਨਥਦ੍ਧਤਾਯ ਸਤਿਂ ਨ ਲਭਿ.

ਪੁਨ ¶ ਰਾਜਾ ਇਦਾਨਿ ਮਮ ਵਿਜਿਤੇ ਸਬ੍ਬੇਪਿ ਭਿਕ੍ਖੂ ਮਮ ਆਚਰਿਯਸ੍ਸ ਮਤਿਂ ਅਨੁਵਤ੍ਤਨ੍ਤਿ ਵਾ ਮਾ ਵਾਤਿ ਅਮਚ੍ਚੇ ਪੁਚ੍ਛਿ. ਅਮਚ੍ਚਾਪਿ ਏਵਂ ਰਞ੍ਞੋ ਆਰੋਚੇਸੁਂ,-ਇਦਾਨਿ ਮਹਾਰਾਜ ਕੁਖਨਨਗਰੇ ਨੀਪਗਾਮੇ ਨਿਸਿਨ੍ਨੋ ਏਕੋ ਮਹਾਥੇਰੋ ਮੁਨਿਨ੍ਦਘੋਸੋ ਨਾਮ ਅਤ੍ਥਿ, ਸੋ ਪਾਰੁਪਨਵਸੇਨ ਅਤ੍ਤਨੋ ਪਰਿਸਂ ਓਵਾਦੇਤ੍ਵਾ ਬਹੁਗੁਣਂ ਉਪ੍ਪਾਦੇਤ੍ਵਾ ਨਿਸੀਦਤੀਤਿ.

ਅਥ ਰਾਜਾ ਏਵਮਾਹ,-ਤਂ ਪਕ੍ਕੋਸੇਤ੍ਵਾ ਸੁਧਮ੍ਮਸਸਾਯਂ ਮਹਾਥੇਰੇ ਸਨ੍ਨਿਪਾਭਾਪੇਤ੍ਵਾ ਤਸ੍ਸ ਥੇਰਸ੍ਸ ਵਿਨਯ ਪਣ੍ਣਤ੍ਤਿਂ ਯਥਾਭੂਤਂ ਅਜਾਨਨ੍ਤਸ੍ਸ ਯਥਾਭੂਤਂ ਸਭਾਵਂ ਦਸ੍ਸੇਤ੍ਵਾ ਓਵਾਦੇਨ੍ਤੂਤਿ.

ਅਥ ਅਮਚ੍ਚਾ ਤਥਾ ਅਕਂਸੁ. ਮਹਾਥੇਰਾ ਚ ਸੁਧਮ੍ਮਸਸ੍ਸਯਂ ਸਨ੍ਨਿਪਤਿਤ੍ਵਾ ਤਂ ਪਕ੍ਕੋਸੇਤ੍ਵਾ ਓਵਦਿਂਸੁ. ਤੇਸੁ ਪਨ ਮਹਾਥੇਰੇਸੁ ਏਕੋ ਥੇਰੋ ਭੂਪਾਲਸ੍ਸ ਸਙ੍ਘਰਞ੍ਞੋ ਚ ਮੁਖਂ ਓਲੋਕੇਤ੍ਵਾ ਭਗਵਤੋ ਪਨ ਸਮ੍ਮਾਸਮ੍ਬੁਦ੍ਧਸ੍ਸ ਮੁਖਂ ਅਨੋਲੋਕੇਤ੍ਵਾ ਮੁਨਿਨ੍ਦਘੋਸਤ੍ਥੇਰਂ ਏਵਮਾਹ,- ਇਦਾਨਿ ਆਵੁਸੋ ਇਮਸ੍ਮਿਂ ਮਰਮ੍ਮਰਟ੍ਠੇ ਸਬ੍ਬੇਪਿ ਭਿਕ੍ਖੂ ਭੂਪਾਲਸ੍ਸ ਸਙ੍ਘਸ੍ਸ ਰਞ੍ਞੋ ਚ ਆਣਂ ਅਨੁਵਤ੍ਤਿਤ੍ਵਾ ਏਕਂਸਿਕਾਯੇਵ ਅਹੇਸੁਂ, ਤ੍ਵਂਯੇਵ ਏਕੋ ਸਦ੍ਧਿਂ ਪਰਿਸਾਯ ਪਾਰੁਪਨਵਤ੍ਥਂ ਚਰਿਤ੍ਵਾ ਨਿਸੀਦਸਿ, ਕਸ੍ਮਾ ਪਨ ਤ੍ਵਂ ਮਾਨਥਦ੍ਧੋ ਹੁਤ੍ਵਾ ਈਦਿਸਂ ਅਨਾਚਾਰਂ ਅਵਿਜਹਿਤ੍ਵਾ ਤਿਟ੍ਠਸੀਤਿ.

ਅਥ ਮੁਨਿਨ੍ਦਘੋਸਤ੍ਥੇਰੋ ਤਸ੍ਸ ਥੇਰਸ੍ਸ ਮੁਖਂ ਉਜੁਕਂ ਓਲੋਕੇਤ੍ਵਾ ਏਵਮਾਹ,- ਤ੍ਵਂ ਲਜ੍ਜੀਪੇਸਲੋ ਸਿਕ੍ਖਾਕਾਮੋਤਿ ਪੁਬ੍ਬੇ ਮਯਾ ਸੁਤਪੁਬ੍ਬੋ, ਈਦਿਸੋ ਪਨ ਪੁਗ੍ਗਲੋ ਈਦਿਸਂ ਵਚਨਂ ਵਤ੍ਤੁਨਂ ਯੁਤ੍ਤੋ,ਈਦਿਸਸ੍ਸ ਹਿ ਪੁਗ੍ਗਲਸ੍ਸ ਈਦਿਸਂ ਵਚਨਂ ਅਸ੍ਸਾਰੁਪ੍ਪਂ, ਸਚੇ ਤ੍ਵਂ ਅਯਂ ਅਪ੍ਪਪੁਞ੍ਞੋ ਨਿਤ੍ਤੇਜੋ ਅਨਾਥੋਤਿ ਮਂ ਮਞ੍ਞਿਤ੍ਵਾ ਅਗਾਰਵਵਸੇਨ ਵਤ੍ਤੁਂ ਇਚ੍ਛੇਯ੍ਯਾਸਿ, ਏਵਂ ਸਨ੍ਤੇਪਿ ਮਮਾਚਰਿਯਸ੍ਸ ਮੁਖਂ ਓਲੋਕੇਤ੍ਵਾ ਮਮਾਚਰਿਯਸ੍ਸ ਗੁਣਂ ਜਾਨਿਤ੍ਵਾ ਤਸ੍ਸ ਸਿਸ੍ਸੋਯਨ੍ਤਿ ਅਨੁਸ੍ਸਰਿਤ੍ਵਾ ਈਦਿਸਂ ਵਚਨਂ ਅਧਮ੍ਮਿਕਂ ਵਤ੍ਤੁਂ ਨ ਸਕ੍ਕਾਤਿ.

ਅਥ ¶ ਸੋ ਥੇਰੋ ਤਂ ਪੁਚ੍ਛਿ,-ਕੋ ਪਨ ਤਵਾਚਰਿਯੋਤਿ. ਅਥ ਸੁਖਮ੍ਮਸਭਾਯਂ ਠਪਿਤਂ ਬੁਦ੍ਧਰੂਪਂ ਵਦ੍ਦਿਤ੍ਵਾ ਅਯਂ ਮਮਾਚਰਿਯੋਤਿ ਆਹ. ਮਮਾਸਰਿਯੋਤਿ ਵਤ੍ਵਾ ਪਨ ਭਿਕ੍ਖੁਸਙ੍ਘਮਜ੍ਝੇ ਉਟ੍ਠਹਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਅਹਂ ਭਨ੍ਤੇ ਯਾਵ ਜੀਵਿਤਪਰਿਯੋਸਾਨਾ ਮਮ ਜੀਵਿਤਂਯੇਵ ਪਰਿਚ੍ਚਜਿਸ੍ਸਾਮਿ, ਭਗਵਤੋ ਪਨਤਿ ਲੋਕਗ੍ਗਸ੍ਸ ਸਿਕ੍ਖਾਪਦਂ ਨ ਵਿਜਹਿਸ੍ਸਾਮੀਤਿ ਆਰੋਚੇਸਿ.

ਅਥ ਰਾਜਾ ਤਮਤ੍ਥਂ ਸੁਤ੍ਵਾ ਮਾਨਥਦ੍ਧੋ ਏਸੋ ਮਮ ਵਿਜਿਤੇ ਨਿਸੀਦਾਪੇਤੁਂ ਵਟ੍ਟਤਿ, ਰਟ੍ਠਨ੍ਤਰਂ ਪਬ੍ਬਾਜੇਤਬ੍ਬੋਤਿ ਰਾਜਾਣਾਯ ਰਟ੍ਠਨ੍ਤਰਂ ਪੇਸੇਸਿ.

ਰਾਜਪੁਰਿਸਾ ਚ ਤਂ ਪਕ੍ਕੋਸੇਤ੍ਵਾ ਰਟ੍ਠਨ੍ਤਰਂ ਆਨੇਸਿ. ਬਹਙ੍ਗਂ ਨਾਮ ਦੇਸਂ ਪਤ੍ਵਾ ਬਹਙ੍ਗਨਾਯਕੋ ਪੁਰਿਸੋ ਰਾਜਪੁਰਿਸਾਨਂ ਲਞ੍ਜਂ ਦਤ੍ਵਾ ਏਵਮਾਹ,- ਅਯਂ ਪਨ ਭੋਨ੍ਤੋ ਮਰਮ੍ਮਰਟ੍ਠਸ੍ਸ ਪਰਿਯਨ੍ਤਪ੍ਪਦੇਸੋ, ਇਧੇਵ ਠਪੇਤ੍ਵਾ ਤੁਮ੍ਹੇ ਨਿਵਤ੍ਤਥਾਤਿ.

ਰਾਜ ਪੁਰਿਸਾਪਿ ਲਞ੍ਜਂ ਗਹੇਤ੍ਵਾ ਤਤ੍ਥੇਵ ਠਪੇਤ੍ਵਾ ਨਿਵਤ੍ਤਿਂਸੁ. ਥੇਰੋਪਿ ਚਤੂਹਿ ਦਿਸਾਹਿ ਆਗਤਾਨਂ ਭਿਕ੍ਖੁਸਾਮਣੇਰਾਨਂ ਪਾਰੁਪਨਵਸੇਨ ਓਵਾਦਂ ਦਤ੍ਵਾ ਪਰਿਯਤ੍ਤਿਂ ਵਾਚੇਤ੍ਵਾ ਤਤ੍ਥ ਨਿਸੀਦਿ. ਅਭਿਧਮ੍ਮਤ੍ਥਸਙ੍ਗਹਗਨ੍ਥਸ੍ਸ ਅਤ੍ਥਯੋਜਨਮ੍ਪਿ ਮਰਮ੍ਮਭਾਸਾਯ ਅਕਾਸਿ.

ਅਪਰਭਾਗੇ ਰਾਜਾ ਤਮਤ੍ਥਂ ਸੁਤ੍ਵਾ ਇਦਾਨਿ ਸੋ ਥੇਰੋ ਮਮ ਵਿਜਿਤਪਰਿਯਨ੍ਤੇਯੇਵ ਨਿਸੀਦਿਤ੍ਵਾ ਅਮ੍ਹੇਹਿ ਅਨਿਚ੍ਛਿਤਂ ਨਿਵਾਰਿਤਂ ਕਮ੍ਮਂ ਕਤ੍ਵਾ ਨਿਸੀਦਿ, ਤਂ ਪਕ੍ਕੋਸਥਾਤਿ ਆਹ.

ਰਾਜਦੂਤਾ ਚ ਤਤ੍ਥ ਗਨ੍ਤ੍ਵਾ ਪਕ੍ਕੋਸਿਂਸੁ. ਥੇਰੋ ਚ ਇਦਾਨਿ ਮਂ ਰਾਜਾ ਮਾਰੇਤੁਕਾਮੋਤਿ ਮਞ੍ਞਿਤ੍ਵਾ ਸਿਕ੍ਖਂ ਪਚ੍ਚਕ੍ਖਿਤ੍ਵਾ ਗਿਹਿਵਤ੍ਥਂ ਨਿਵਾਸੇਤ੍ਵਾ ਤੇਹਿ ਸਦ੍ਧਿਂ ਆਗਚ੍ਛਿ. ਨਗਰਂ ਪਨ ਆਗਨ੍ਤ੍ਵਾ ਪਤ੍ਤਕਾਲੇ ਰਞ੍ਞੋ ਸਨ੍ਤਿਕਂ ਆਨੇਸਿ.

ਅਥ ਰਾਜਾ ਏਵਮਾਹ,-ਤ੍ਵਂ ਭਿਕ੍ਖੁ ਹੁਤ੍ਵਾ ਗਣਂ ਵਡ੍ਢਾਪੇਤ੍ਵਾ ਨਿਸੀਦਸੀਤਿ ਮਯਾ ਸੁਤਂ, ਕਸ੍ਮਾ ਪਨਿਦਾਨਿ ਗਿਹਿ ਭਵਸੀਤਿ. ਸਚੇ ¶ ਤ੍ਵਂ ਮਹਾਰਾਜ ਮਂ ਮਾਰੇਤੁਕਾਮੋ ਪਕ੍ਕੋਸੇਯ੍ਯਾਸਿ, ਏਵਂ ਸਤਿ ਯਦਿ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਠਿਤਂ ਮਂ ਮਾਰੇਯ੍ਯਾਸਿ, ਤਵ ਭਾਰਿਯਂ ਕਮ੍ਮਂ ਭਵਿਸ੍ਸਤੀਤਿ ਮਨਸਿਕਰਿਤ੍ਵਾ ਤਵ ਕਮ੍ਮਸ੍ਸ ਅਭਾਰਿਯਤ੍ਥਾਯ ਸਿਕ੍ਖਂ ਪਚ੍ਚਕ੍ਖਿਤ੍ਵਾ ਆਗਤੋਮ੍ਹਿ, ਸਚੇ ਮਂ ਮਾਰੇਤੁਕਾਮੋਸਿ, ਮਾਰੇਹੀਹਿ. ਰਾਜਾ ਚ ਤਂ ਬਨ੍ਧਨਾਗਾਰੇ ਠਪੇਤ੍ਵਾ ਸ੍ਯਾਮਰਟ੍ਠਂ ਯੁਜ੍ਝਨਤ੍ਥਾਯਗਚ੍ਛਿ. ਯਜ੍ਝਨਤ੍ਥਾਯ ਪਨ ਗਨ੍ਤ੍ਵਾ ਪਚ੍ਚਾਗਤਕਾਲੇ ਅਨ੍ਤਰਾਮਗ੍ਗੇਵ ਦਿਵਙ੍ਗਤੋ ਅਹੋਸੀਤਿ.

ਕਲਿਯੁਗੇ ਪਨ ਦ੍ਵਾਵੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਸ੍ਸ ਜੇਟ੍ਠਪੁਤ੍ਤੋ ਸਿਰਿਪਵਰਮਹਾਧਮ੍ਮਰਾਜਾ ਨਾਮ ਰਜ੍ਜਂ ਕਾਰੇਸਿ. ਰਤਨਸਿਖਨਗਰਤੋ ਸਙ੍ਕਮੇਤ੍ਵਾ ਜੇਯ੍ਯਪੁਰਂ ਦੁਤਿਯਂ ਮਾਪਿਤਤ੍ਤਾ ਜੇਯ੍ਯਪੁਰਮਾਪੇਕੋ ਰਾਜਾਤਿਪਿ ਤਸ੍ਸ ਸਮਞ੍ਞਾ ਅਹੋਸਿ. ਤਸ੍ਮਿਞ੍ਚ ਕਾਲੇ ਮਹਾਪਬ੍ਬਤਬ੍ਭਨ੍ਤਰਨਗਰਵਾਸਿਂ ਞਾਣਤ੍ਥੇਰਂ ਆਨੇਤ੍ਵਾ ਆਚਰਿਯਟ੍ਠਾਨੇ ਠਪੇਸਿ. ਸੋਕਿਰ ਥੇਰੋ ਗਮ੍ਭੀਰਪਞ੍ਞੋ ਏਕਸ੍ਮਿਂ ਦਿਵਸੇ ਨਵ ਵਾ ਦਸ ਵਾ ਭਾਣਵਾਰੇ ਵਾਚੁਗ੍ਗਤਂ ਕਾਤੁਂ ਸਮਤ੍ਥੋ ਅਹੋਸਿ. ਅਭਿਨਵੋਪਸਮ੍ਪਨ੍ਨਕਾਲੇਯੇਵ ਪਦਵਿਭਾਗਗਨ੍ਥਂ ਨ੍ਯਾਸਸਂ ਵਣ੍ਣਨਂ ਯਮਕਸਂਵਣ੍ਣਨਂ ਮਹਾਪਟ੍ਠਾਨਸਂਵਣ੍ਣਨਞ੍ਚ ਮਰਮ੍ਮਭਾਸਾਯ ਅਕਾਸਿ. ਰਾਜਾ ਮਹਾਭੂਮਿਰਮ੍ਮਣਿਯਵਿਹਾਰਂ ਨਾਮ ਕਾਰਾਪੇਤ੍ਵਾ ਤਸ੍ਸੇਵ ਅਦਾਸਿ. ਞਾਣਾਲਙ੍ਕਾਰਮਹਾਧਮ੍ਮਰਾਜਗੁਰੂ ਤਿਪਿ ਨਾਮਲਞ੍ਛਂ ਅਦਾਸਿ.

ਤਸ੍ਮਿਞ੍ਚ ਕਾਲੇ ਪਾਰੁਪਨਗਣੇ ਥੇਰਾ ਏਵਂ ਚਿਨ੍ਤੇਸੁਂ,- ਇਦਾਨਿ ਪਨ ਅਮ੍ਹਾਕਂ ਪਕ੍ਖਿਕੋ ਥੇਰੋ ਰਞ੍ਞੋ ਆਚਰਿਯੋ ਅਹੋਸਿ, ਇਦਾਨਿ ਮਯਂ ਪਤਿਟ੍ਠਾਨਂ ਲਭਾਮਾਤਿ. ਏਵਂ ਪਨ ਚਿਨ੍ਤੇਤ੍ਵਾ ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਚੀਵਰਂ ਪਾਰੁਪੇਤ੍ਵਾ ਪਵਿਸਿਤਬ੍ਬਨ੍ਤਿ ਸਨ੍ਦੇਸਪਣ੍ਣਂ ਰਞ੍ਞੋ ਸਨ੍ਤਿਕਂ ਪਵੇਸੇਸਿ. ਅਥ ਅਤੁਲਤ੍ਥੇਰੋ ਪੁਬ੍ਬੇ ਵੁਤ੍ਤਨਯੇਨ ਵੂਪਸਮਿਤਂ ਕਮ੍ਮਮਿਦਨ੍ਤਿ ਸਨ੍ਦੇਸਪਣ੍ਣਂ ਰਞ੍ਞੋ ਸਨ੍ਤਿਕਂ ਪਵੇਸੇਸਿ. ਤੇਨੇਵ ਅਞ੍ਞਮਞ੍ਞਂ ਪਟਿਵਚਨਵਸੇਨ ਦਸ੍ਸੇਤੁਂ ਓਕਾਸਂ ਨ ਲਭਿਂਸੂਤਿ.

ਤਤੋ ਪਚ੍ਛਾ ਕਲਿਯੁਗੇ ਪਞ੍ਚਵੀਸਵਸ੍ਸਾਧਿਕੇ ਸਤੇ ਸਹਸ੍ਸੇ ¶ ਚ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਸਿਰਿਪਵਰਸੁਧਮ੍ਮਮਹਾਰਾਜਿਨ੍ਦਾਧਿਪਤਿ ਨਾਮ ਰਜ੍ਜਂ ਕਾਰੇਸਿ. ਰਤਨਪੂਰਂ ਪਨ ਤਤਿਯਂ ਮਾਪਕਤ੍ਤਾ ਰਤਨਪੂਰਮਾਪਕੋਤਿ ਏਕਸ੍ਸ ਪਨ ਛਦ੍ਦਨ੍ਤਨਾਗਰਾਜਸ੍ਸ ਸਾਮਿਭੂਤਤ੍ਤਾ ਸੇਤਿਭਿਨ੍ਦੋਤਿ ਚ ਸਮਞ੍ਞਾ ਅਹੋਸਿ. ਚਰਚ੍ਚ ਗਾਮਵਾਸੀਚਨ੍ਦਾਵਰਂ ਨਾਮ ਥੇਰਂ ਆਨੇਤ੍ਵਾ ਅਤ੍ਤਨੋ ਆਚਰਿਯਟ੍ਠਾਨੇ ਠਪੇਸਿ. ਸੂਮਿਕਿਤ੍ਤਿਅਤੁਲਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸ ਅਦਾਸਿ. ਜਮ੍ਬੁਦੀਪਅਨਨ੍ਤਧਜਮਹਾਧਮ੍ਮਰਾਜਗੁਰੂਤਿਪਿ ਨਾਮਲਞ੍ਛਂ ਅਦਾਸਿ. ਤਸ੍ਸ ਰਞ੍ਞੋ ਕਾਲੇ ਏਕਚ੍ਚੇ ਮਨੁਸ੍ਸਾ ਦਿਟ੍ਠਿਵਿਪਲ੍ਲਾਸਾ ਅਹੇਸੁਂ, ਤੇਪਿ ਪਕ੍ਕੋਸਾਪੇਤ੍ਵਾ ਸਮ੍ਮਾਦਿਟ੍ਠਿਂ ਗਣ੍ਹਾਪੇਸਿ. ਤਸ੍ਸ ਪਨ ਰਞ੍ਞੋ ਕਾਲੇ ਏਕਂਸਿਕਗਣਂ ਅਭਿਭਵਿਤੁਂ ਓਕਾਸਂ ਨ ਲਭਿਂਸੂਤਿ.

ਤਤੋ ਪਚ੍ਛਾ ਕਲਿਯੁਗੇ ਅਟ੍ਠਤਿਂਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਪੁਤ੍ਤੋ ਮਹਾਧਮ੍ਮੇ ਰਾਜਾਧਿਰਾਜਾ ਨਾਮ ਰਜ੍ਜਂ ਕਾਰੇਸਿ. ਨਗਰਸ੍ਸ ਦਕ੍ਖਿਣਦਿਸਾਭਾਗੇ ਪਞ੍ਚਭੂਮਿਕਵਿਹਾਰਂ ਕਾਰਾਪੇਤ੍ਵਾ ਜੇਯ੍ਯਭੂਮਿਵਾਸਾਤੁਲਨਾਮੇਨ ਪਞ੍ਞਾਪੇਤ੍ਵਾ ਮਾਰਾਵਟ੍ਟਨਸ੍ਸ ਨਾਮ ਥੇਰਸ੍ਸ ਅਦਾਸਿ. ਗੁਣਮੁਨਿਨ੍ਦਾਭਿਸਾਸਨਧਜਮਹਾਧਮ੍ਮਰਾਜਾਧਿਰਾਜਗੁਰੂਤਿਪਿ ਨਾਮਲਞ੍ਛਂ ਅਦਾਸਿ.

ਤਸ੍ਮਿਞ੍ਚ ਕਾਲੇ ਨਨ੍ਦਮਾਲੋ ਨਾਮ ਥੇਰੋ ਚਲਙ੍ਗਨਗਰਸ੍ਸ ਪੁਰਤ੍ਥਿਮਦਿਸਾਭਾਗੇ ਵਿਹਾਰੇ ਨਿਸੀਦਿਤ੍ਵਾ ਬਹੂਨਂ ਭਿਕ੍ਖੁਸਾਮਣੇਰਾਨਂ ਗਨ੍ਥਂ ਵਾਚੇਸਿ. ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਪਾਰੁਪਨਵਤ੍ਤਮੇਵ ਪਰਿਪੂਰੇਤ੍ਵਾ ਪਵਿਸਿਤਬ੍ਬਂ, ਏਕਂਸਿਕਵਤ੍ਤਂ ਪਨ ਨੇਵ ਪਾਲ਼ਿਯਂ ਨ ਅਟ੍ਠਕਥਾਯਂ ਨ ਚ ਟੀਕਾਸੁ ਨਾਪਿ ਗਨ੍ਥਨ੍ਤਰੇਸੁ ਦਿਸ੍ਸਤਿ, ਨ ਧਮ੍ਮਾਨੁਲੋਮਨ੍ਤਿ ਓਵਾਦਂ ਅਭਿਣ੍ਹਂ ਅਦਾਸਿ. ਪਾਲ਼ਿਅਟ੍ਠਕਥਾਦੀਸੁ ਆਗਤਵਿਨਿਚ੍ਛਯਂ ਦਸ੍ਸੇਤ੍ਵਾ ਏਕਮ੍ਪਿਗਨ੍ਥਂ ਅਕਾਸਿ.

ਅਥ ਏਕਂਸਿਕਗਣਿਕਾ ਭਿਕ੍ਖੂ ਤਂ ਗਨ੍ਥਂ ਰਞ੍ਞੋ ਸਨ੍ਤਿਕਂ ਪਵੇਸਿਂਸੁ ਦੋਸਾਵਿਕਰਣਤ੍ਥਾਯ. ਤਸ੍ਮਿਞ੍ਚ ਕਾਲੇ ਰਾਜਾ ਏਵਰੂਪਂ ਸੁਪਿਨਂ ਪਸ੍ਸਿ, -ਸਕ੍ਕੋ ਹਿ ਦੇਵਰਾਜਾ ਸੇਤਵਤ੍ਥਂ ਨਿਵਾਸੇਤ੍ਵਾ ¶ ਸੇਤਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਸੇਤਕੁਸੁਮਾਨਿ ਪਿਲਨ੍ਦਿਤ੍ਵਾ ਰਞ੍ਞੋ ਸਨ੍ਤਿਕਂ ਆਗਨ੍ਤ੍ਵਾ ਏਵਮਾਹ,- ਅਪਰਨ੍ਤਰਟ੍ਠੇਹਿ ਮਹਾਰਾਜ ਨਮ੍ਪਦਾਨਦੀਤੀਰੇ ਪਾਦਚੇਤਿਯੇ ਬਹੂਨਿ ਤਿਣਾਨਿ ਉਟ੍ਠਹਿਤ੍ਵਾ ਅਞ੍ਞਮਞ੍ਞਂ ਮੂਲੇਨ ਮੂਲਂ ਖਨ੍ਧੇਨ ਖਨ੍ਧਂ ਪਤ੍ਤੇਨ ਪਤ੍ਤਂ ਸਮ੍ਪਨ੍ਧਿਤ੍ਵਾ ਪਟਿਚ੍ਛਾਦੇਤ੍ਵਾ ਠਿਤਾਨਿ, ਤਾਨਿ ਪਨ ਪੁਬ੍ਬਰਾਜੂਹਿ ਯਥਾਭੂਤਂ ਅਜਾਨਨ੍ਤੇਹਿ ਅਵਿਸੋਧਿਤਾਨਿ, ਇਦਾਨਿ ਪਨ ਤਯਾ ਯਥਾਭੂਤਂ ਜਾਨਨ੍ਤੇਨ ਪਰਿਸੁਦ੍ਧਂ ਕਤ੍ਤੁਕਾਮੇਨ ਵਿਸੋਧਿਤਬ੍ਬਾਨਿ, ਤਤ੍ਥਚ ਏਕੋ ਭਿਕ੍ਖੁ ਆਗਨ੍ਤ੍ਵਾ ਉਪਦੇਸਨਯਂ ਦਸ੍ਸਤੀਤਿ.

ਏਵਂ ਪਨ ਸੁਪਿਨਂ ਪਸ੍ਸਿਤ੍ਵਾ ਨਨ੍ਦਮਾਲਂ ਨਾਮ ਥੇਰਂ ਪਕ੍ਕੋਸਾਪੇਤ੍ਵਾ ਰਤਨਪੂਰਨਗਰਸ੍ਸ ਏਸਨ੍ਨਟ੍ਠਾਨੇ ਉਦਕਕੀਲ਼ਨਤ੍ਥਾਯ ਕਾਰਾਪਿਤੇ ਰਾਜਗੇਹੇ ਵਸਾਪੇਸਿ.

ਅਥ ਥੇਰੋ ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਪਾਰੁਪਨਵਸੇਨ ਪਵਿਸਿਤਬ੍ਬਨ੍ਤਿ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਹਿ ਰਾਜਾਨਂ ਜਾਨਾਪੇਸਿ, ਯਥਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਸਿਰਿਧਮ੍ਮਾਸੋਕਰਾਜਾਨਂ ਸਮ੍ਮਾਵਾਦਨ੍ਤਿ. ਅਥ ਰਾਜਾ ਪਰਿਚਿਤ ਪਾਰਮੀਪੁਞ੍ਞਸਮ੍ਭਾਰੋ ਮਹਾਞਾਣੋ ਜਾਨਾਸਿ,-ਪਾਰੁਪਨਵਾਦੋਯੇਵ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਆਗਤੋ, ਏਕਂਸਿਕਵਾਦੋ ਪਨ ਤੇਸੁ ਕਤ੍ਥਚਿਪਿ ਨ ਆਗਤੋਤਿ. ਏਵਂ ਪਨ ਜਾਨਿਤ੍ਵਾ ਰਞ੍ਞੋ ਗੇਹੇ ਦ੍ਵੇ ਪਕ੍ਖੇ ਥੇਰੇ ਸਨ੍ਨਿਪਾਤਾਪੇਤ੍ਵਾ ਅਤ੍ਤਨੋ ਅਤ੍ਤਨੋ ਵਾਦਂ ਕਥਾਪੇਸਿ.

ਅਥ ਏਕਂਸਿਕਤ੍ਥੇਰੋ ਏਵਮਾਹਂਸੁ,-ਤੁਮ੍ਹਾਕਂ ਪਾਰੁਪਨਵਾਦੋ ਕਤ੍ਥ ਆਗਤੋਤਿ. ਤਦਾ ਪਾਰੁਪਨਤ੍ਥੇਰਾ ਪਰਿਮਣ੍ਡਲਂ ਪਾਰੁਪਿਸ੍ਸਾਮੀਤਿਆਦਿਨਾ ਨਯੇਨ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਪਾਰੁਪਨਵਾਦੋ ਆਗਤੋਤਿ ਆਹਂਸੁ. ਤਤੋ ਪਚ੍ਛਾ ਪਾਰੁਪਨਤ੍ਥੇਰਾ ਏਵਮਾਹਂਸੁ,-ਤੁਮ੍ਹਾਕਂ ਪਨ ਏਕਂਸਿਕਵਾਦੋ ਕਤ੍ਥ ਆਗਤੋਤਿ. ਤਦਾ ਤੇ ਏਕਂਸਿਕਤ੍ਥੇਰਾ ਅਦ੍ਵਾਰਘਰਂ ਪਵਿਟ੍ਠਕਾਲੋਵਿਯ ਰਤ੍ਤਿਭਾਗੇ ਮਹਾਵਨਮਗ੍ਗੇ ਗਮਨਕਾਲੋਵਿਯ ਚ ਹੁਤ੍ਵਾ ਕਿਞ੍ਚਿ ਵਤ੍ਤੁਂ ਨ ਸਕ੍ਕਾ. ਮੁਖਂ ਨਾਮ ਕਥਨਤ੍ਥਾਯ ਭੁਞ੍ਜਨਤ੍ਥਾਯ ਹੋਤੀਤਿ ¶ ਵੁਤ੍ਤਤ੍ਤਾ ਯਂ ਵਾ ਤਂ ਵਾ ਵਦਨ੍ਤਾਪਿ ਰਾਜਾਨਂ ਆਰਾਧੇਤੁਂ ਨ ਸਕ੍ਖਿਂਸੁ.

ਰਾਜਾ ਚ ਥੇਰਂ ਨਿਸ੍ਸਾਯ ਵਿਨਯੇ ਕੋਸਲ੍ਲਤਾਯ ਪਾਲ਼ਿਯਂ ਈਦਿਸੋਯੇਵ ਆਗਤੋ, ਅਟ੍ਠਕਥਾਦੀਸੁ ਈਦਿਸੋਯੇਵਾਤਿ ਵਤ੍ਵਾ ਤੁਮ੍ਹਾਕਂ ਏਕਂਸਿਕਵਾਦੋ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਨ ਦਿਸ੍ਸਤਿ, ਏਵਮ੍ਪਿ ਸਮਾਨਾ ਕਸ੍ਮਾ ਈਦਿਸਂ ਵਤ੍ਤਂ ਅਕਂਸੂਤਿ ਪੁਚ੍ਛਿ. ਅਥ ਤੇ ਏਕਂਸਿਕਤ੍ਥੇਰਾ ਚਤੁਹਤ੍ਥਗਬ੍ਭੇ ਸਹੋਡ੍ਡੇਨ ਗਹਿਤਚੋਰਾਵਿਯ ਮਨੁਸ੍ਸੇਹਿ ਗਤਿਤਕਾਕਾਵਿਯ ਚ ਕਿਞ੍ਚਿ ਵਤ੍ਤੁਂ ਅਸਕ੍ਕੁਣੇਯ੍ਯਤਾਯ ਸਬ੍ਬਦਿਸਾਸੁ ਓਲੋਕੇਤ੍ਵਾਯੇਵ ਅਮ੍ਹਾਕਂ ਚਾਰਿਤ੍ਤਂ ਪਾਲ਼ਿਆਦੀਸੁ ਨ ਦਿਟ੍ਠਪੁਬ੍ਬਂ, ਅਥ ਖੋ ਪਨ ਆਚਰਿਯਪ੍ਪਵੇਣੀਵਸੇਨੇਵ ਚਰਿਮ੍ਹਾਤਿ ਵਤ੍ਵਾ ਪਰਾਜਯਂ ਪਤ੍ਵਾ ਪਾਰੁਪਨਪਕ੍ਖੇਯੇਵ ਪਵਿਸਿਂਸੂਤਿ. ਰਾਜਾ ਚ ਇਤੋ ਪਟ੍ਠਾਯ ਭਿਕ੍ਖੂ ਪਾਰੁਪਨਵਤ੍ਤਮੇਵ ਕਾਰਾਪੇਤੁਂ ਸਾਮਣੇਰਾਨਂ ਓਵਦਨ੍ਤੂਤਿ ਰਾਜਾਣਂ ਠਪੇਸਿ. ਤਤੋ ਪਟ੍ਠਾਯ ਏਕਂਸਿਕਪਕ੍ਖਾਥੇਰਾ ਅਰੁਣੁਗ੍ਗਮਨਕਾਲੇ ਕੋਸਿਯਾਵਿਯ ਸੀਸਂ ਉਟ੍ਠਹਿਤੁਮ੍ਪਿ ਨ ਸਕ੍ਕਾਤਿ.

ਸੋਕਸਰਭੂਮਹਾਚੇਤਿਯਸ੍ਸ ਪੁਰਤ੍ਥਿਮਦਿਸਾਭਾਗੇ ਦ੍ਵੀਹਿ ਪਾਸਾਦੇਹਿ ਅਲਙ੍ਕਤਂ ਚਤੁਭੂਮਿਕਂ ਭੂਮਿਕਿਤ੍ਤਿਵਿਰਾਮਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਨਨ੍ਦਮਾਲਤ੍ਥੇਰਸ੍ਸ ਅਦਾਸਿ, ਨਰਿਨ੍ਦਾਭਿਧਜਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾਮਲਞ੍ਛਮ੍ਪਿ ਅਦਾਸਿ. ਸੋ ਪਨ ਥੇਰੋ ਛਪ੍ਪਦਵਂਸਿਕੋਤਿ ਦਟ੍ਠਬ੍ਬੋ. ਅਭਿਨਵੋਪਸਮ੍ਪਨ੍ਨਕਾਲੇਯੇਵ ਵਿਨਯਵਿਨਿਚ੍ਛਯਸ੍ਸ ਸੁਤ੍ਤਸਙ੍ਗਹਸ੍ਸ ਮਹਾਵਗ੍ਗਟ੍ਠਕਥਾਯ ਚ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ, ਸਾਸਨਸੁਦ੍ਧਿਦੀਪਿਕਂ ਨਾਮ ਗਨ੍ਥਮ੍ਪਿ ਅਕਾਸੀਤਿ.

ਤਤੋ ਪਚ੍ਛਾ ਕਲਿਯੁਗੇ ਤੇਚਤ੍ਤਾਲੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਫਗ੍ਗੁਨਮਾਸਸ੍ਸ ਕਾਲ਼ਪਕ੍ਖਪਨ੍ਨ ਰਸਮਿਯਂ ਰਤਨਸਿਖਮਾਪਕਸ੍ਸ ਰਞ੍ਞੋ ਮਜ੍ਝਿਮਪੁਤ੍ਤੋ ਰਜ੍ਜਂ ਕਾਰੇਸਿ ¶ .

ਤਦਾ ਰਾਜਾ ਏਵਂ ਚਿਨ੍ਤੇਸਿ,-ਏਕਂਸਿਕਪਾਰੁਪਨਵਸੇਨ ਉਪ੍ਪਨ੍ਨੋ ਵਿਵਾਦੋ ਪੁਬ੍ਬੇਸਂ ਰਾਜੂਨਂ ਕਾਲੇ ਵੂਪਸਮਿਤੁਂ ਨ ਸਕ੍ਕਾ, ਸਿਰਿਪਵਰਸੁਧਮ੍ਮਮਹਾਰਾਜਿਨ੍ਦਾਧਿਪਤਿਨੋ ਕਾਲੇਪਿ ਰਾਜਗੇਹੇ ਸਨ੍ਨਿਪਾਤਾਪੇਤ੍ਵਾ ਰਞ੍ਞੋ ਸਮ੍ਮੁਖੇ ਕਥਾਪਿਤਤ੍ਤਾ ਵਿਸ੍ਸਟ੍ਠੇਨ ਕਥੇਤੁਂ ਓਕਾਸਸ੍ਸ ਅਲਦ੍ਧਤ੍ਤਾ ਯਥਾਕਾਮਂ ਵਤ੍ਤੁਂ ਅਵਿਸਹਤ੍ਤਾ ਪਰਾਜਯੋ ਅਹੋਸੀਤਿ ਲੇਸਂ ਓਡ੍ਡਤੁਂ ਓਕਾਸੋ ਭਵੇਯ੍ਯਮਯ੍ਹਂ ਪਨ ਕਾਲੇ ਈਦਿਸਂ ਅਕਤ੍ਵਾ ਤੇਸਂ ਤੇਸਂ ਥੇਰਾਨਂ ਵਿਹਾਰੇ ਦੂਤਂ ਪੇਸੇਤ੍ਵਾ ਸਕਸਕਵਾਦਂ ਕਥਾ ਪੇਸ੍ਸਾਮਿ, ਏਵਞ੍ਹਿ ਸਤਿ ਤੇਤੇਥੇਰਾ ਵਿਸ੍ਸਟ੍ਠਾ ਹੁਤ੍ਵਾ ਕਥੇਸ੍ਸਨ੍ਤੀਤਿ.

ਏਵਂ ਪਨ ਚਿਨ੍ਤੇਤ੍ਵਾ ਅਨ੍ਤੋਯੁਧਨਾਯਕਂ ਅਮਚ੍ਚਂ ਪਧਾਨਂ ਕਤ੍ਵਾ ਤੇਸਂ ਤੇਸਂ ਥੇਰਾਨਂ ਸਨ੍ਤਿਕਂ ਗਨ੍ਤ੍ਵਾ ਆਰੋਚਾਪੇਸਿ,-ਸਕਸਕਵਾਦਂ ਵਿਸ੍ਸਟ੍ਠਾ ਹੁਤ੍ਵਾ ਵਦਥਾਤਿ. ਅਥ ਏਕਂਸਿਕਗਣਿਕਾ ਥੇਰਾ ਅਮ੍ਹੇਹਿ ਵੁਤ੍ਤਵਚਨਂ ਪਾਲ਼ਿਆਦੀਸੁ ਨ ਦਿਸ੍ਸਤਿ, ਅਥ ਖੋ ਪਨ ਆਚਰਿਯਪ੍ਪਵੇਣੀਵਸੇਨੇਵ ਮਯਂ ਚਰਿਮ੍ਹਾਤਿ ਅਨੁਜਾਨਿਂਸੁ.

ਮਹਾਰਾਜਾ ਚ ਏਵਂ ਥੇਰਾਨਂ ਅਨੁਜਾਨਨੇ ਸਤਿ ਕਿਞ੍ਚਿ ਕਤ੍ਤਬ੍ਬਂ ਨਤ੍ਥਿ, ਇਦਾਨਿ ਪਰਿਮਣ੍ਡਲਸੁਪ੍ਪਟਿਚ੍ਛਨ੍ਨਸਿਕ੍ਖਾਪਦਾਨਿ ਅਵਿਕੋਪੇਤ੍ਵਾ ਸਾਮਣੇਰਾ ਗਾਮਂ ਪਵਿਸਨ੍ਤੂਤਿ ਰਾਜਲੇਖਨਂ ਤਤ੍ਥ ਤਤ੍ਥ ਪੇਸੇਸਿ.

ਅਪਰਭਾਗੇ ਪਨ ਸਹਸ੍ਸੋਰੋਧਗਾਮਤੋ ਉਪਸਮ੍ਪਦਾ ਵਸ੍ਸੇਨ ਸਤ੍ਤਵਸ੍ਸਿਕਂ ਞਾਣਂ ਨਾਮ ਭਿਕ੍ਖੁਂ ਆਨੇਤ੍ਵਾ ਅਨ੍ਤੋਯੁਧਵਿਹਾਰਂ ਨਾਮ ਕਾਰਾਪੇਤ੍ਵਾ ਤਸ੍ਸ ਅਦਾਸਿ, ਞਾਣਾਭਿਸਾਸਨਧਜਮਹਾਧਮ੍ਮਰਾਜਗੁਰੂਤਿ ਨਾਮਲਞ੍ਛਮ੍ਪਿ ਅਦਾਸਿ. ਅਥ ਰਞ੍ਞਾ ਯਾਚਿਤੋ ਰਾਜਾਭਿਸੇਕਗਨ੍ਥਂ ਪਰਿਸੋਧੇਤ੍ਵਾ ਮਰਮ੍ਮਭਾਸਾਯ ਅਤ੍ਥਂ ਯੋਜੇਸਿ.

ਅਪਰਭਾਗੇ ਭਗਵਾ ਧਰਮਾਨੋਯੇਵ ਆਗਨ੍ਤ੍ਵਾ ਚਤੁਨ੍ਨਂ ਯਕ੍ਖਾਨਂ ਦਮੇਤ੍ਵਾ ਤੇਹਿ ਦਿਨ੍ਨਂ ਮਂਸੋਦਨਂ ਪਟਿਗ੍ਗਹੇਤ੍ਵਾ ਪਬ੍ਬਤਸਾਮਨ੍ਤਦੇਸਂ ¶ ਗਨ੍ਤ੍ਵਾ ਪਰਿਭੁਞ੍ਜਿਤ੍ਵਾ ਤਂ ਠਾਨਂ ਓਲੋਕੇਤ੍ਵਾ ਸਿਤਂ ਪਾਤ੍ਵਾਕਾਸਿ. ਅਥ ਆਨਨ੍ਦਤ੍ਥੇਰੋ ਕਾਰਣਂ ਪੁਚ੍ਛਿ. ਅਨਾਗਤੇ ਖੋ ਆਨਨ੍ਦ ਇਮਸ੍ਮਿਂ ਦੇਸੇ ਮਹਾਨਗਰਂ ਭਵਿਸ੍ਸਤਿ, ਚਤ੍ਤਾਰੋ ਚ ਇਮੇ ਯਕ੍ਖਾ ਤਸ੍ਮਿਂ ਨਗਰੇ ਰਾਜਾਨੋ ਭਵਿਸ੍ਸਨ੍ਤੀਤਿ ਬ੍ਯਾਕਾਸਿ.

ਯਥਾਬ੍ਯਾਕਤਨਿਯਾਮੇਨੇਵ ਕਲਿਯੁਗੇ ਚਤੁਚਤ੍ਤਾਲੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਮਾਘਮਾਸਸ੍ਸ ਕਾਲ਼ਪਕ੍ਖਦ੍ਵਾਦਸਮਿਯਂ ਅਙ੍ਗਾਰਵਾਰੇ ਉਤ੍ਤਰਫਗ੍ਗੁਨੀਨਕ੍ਖਤ੍ਤੇਨ ਯੋਗੇ ਅਮਰਪੁਰਂ ਨਾਮ ਮਹਾਰਾਜਟ੍ਠਾਨੀਨਗਰਂ ਮਾਪੇਸਿ.

ਸਿਰਿਪਰਵਿਜਯਾਨਨ੍ਤਯਸਤ੍ਰਿਭਵਨਾਦਿਤ੍ਯਾਧਿਪਤਿਪਣ੍ਡਿਤਮਹਾਧਮ੍ਮਰਾਜਾਧਿਰਾਜਾਤਿ ਨਾਮਲਞ੍ਛਮ੍ਪਿ ਪਟਿਗ੍ਗਣ੍ਹਿ.

ਅਗ੍ਗਮਹੇਸਿਯਾ ਕਾਰਾਪਿਤਂ ਜੇਯ੍ਯਭੂਮਿਵਿਹਾਰਕਿਤ੍ਤਿਨਾਮਕਂ ਵਿਹਾਰਂ ਗੁਣਾਭਿਲਙ੍ਕਾਰਸਦ੍ਧਮ੍ਮਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਮੇ ਓ ਸਯਾਡੋ’ ਇਤਿ ਵੁਚ੍ਚਤਿ.

ਕਨ੍ਨੀਨਗਰਭੋਜਕਾਯ ਰਾਜਕਞ੍ਞਾਯ ਕਾਰਾਪਿਤਂ ਵਿਹਾਰਰਮਣੀਯਵਿਰਾਮਂ ਨਾਮ ਵਿਹਾਰਂ ਗੁਣਮੁਨਿਨ੍ਦਾਧਿਪਤਿ ਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਮਾਂ ਲੇ ਸਯਾਡੋ’ ਇਤਿ ਵੁਚ੍ਚਤਿ.

ਉਪਰਞ੍ਞੋ ਦੇਵਿਯਾ ਕਾਰਾਪਿਤਂ ਮਙ੍ਗਲਾਵਿਰਾਮਂ ਨਾਮ ਵਿਹਾਰਂ ਤਿਪਿਟਕਸਦ੍ਧਮ੍ਮਸਾਮਿਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਸੋਂ ਠਾ ਸਯਾਡੋ’ ਇਤਿ ਵੁਚ੍ਚਤਿ.

ਮਜ੍ਝਿਮਗੇਹਵਾਸਿਦੇਵਿਯਾ ਕਾਰਾਪਿਤਂ ਮਙ੍ਗਲਾਵਾਸਾਤੁਲਂ ਨਾਮ ਵਿਹਾਰਂ ਞਾਣਜਮ੍ਬੁਦੀਪਅਨਨ੍ਤਧਜਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਮੇਂ ਜ੍ਵਾ ਸਯਾਡੋ’ ਇਤਿ ਵੁਚ੍ਚਤਿ.

ਇਮੇ ਪ੍ਪਨ ਚਤ੍ਤਾਰੋ ਮਹਾਥੇਰੇ ਸਙ੍ਘਰਾਜਟ੍ਠਾਨੇ ਠਪੇਸਿ.

ਉਤ੍ਤਰਗੇਹਵਾਸਿਦੇਵਿਯਾ ਕਾਰਾਪਿਤਂ ਮਙ੍ਗਲਭੂਮਿਕਿਤ੍ਤਿਂ ਨਾਮ ¶ ਵਿਹਾਰਂ ਕਵਿਨ੍ਦਾਭਿਸਦ੍ਧਮ੍ਮਧਰਧਜਮਹਾਧਮ੍ਮਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਞ੍ਯੋਂ ਕਾਂ ਸਯਾਡੋ’ ਇਤਿ ਵੁਚ੍ਚਤਿ.

ਸਿਰਿਖੇਤ੍ਤਨਗਰਭੋਜਕੇਨ ਰਾਜਕੁਮਾਰੇਨ ਕਾਰਾਪਿਤਂ ਅਤੁਲਭੂਮਿਵਾਸਂ ਨਾਮ ਵਿਹਾਰਂ ਕਵਿਨ੍ਦਾਭਿਸਦ੍ਧਮ੍ਮਪਵਰਮਹਾਧਮ੍ਮ ਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਸ੍ਵੇ ਟੋਂ ਸਯਾਡੋ’ ਇਤਿ ਵੁਚ੍ਚਤਿ.

ਅਨ੍ਤੋਅਮਚ੍ਚੇਨ ਏਕੇਨ ਕਾਰਾਪਿਤਂ ਵਿਹਾਰਂ ਞਾਣਾਲਙ੍ਕਾਰਸਦ੍ਧਮ੍ਮਧਜਮਹਾਧਮ੍ਮਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਸੇਂ ਟੇ ਸਯਾਡੋ’ ਇਤਿ ਵੁਚ੍ਚਤਿ.

ਵਾਮਬਲਨਾਯਕੇਨਾਮਚ੍ਚੇਨ ਕਾਰਾਪਿਤਂ ਵਿਹਾਰਂ ਪਰਮਸਿਰਿਵਂਸਧਜਮਹਾਧਮ੍ਮਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਮੇ ਠੀ ਸਯਾਡੋ’ ਇਤਿ ਵੁਚ੍ਚਤਿ.

ਧਮ੍ਮਵਿਨਿਚ੍ਛਕੇਨ ਏਕੇਨਾਮਚ੍ਚੇਨ ਕਾਰਾਪਿਤਂ ਵਿਹਾਰਂ ਕਵਿਨ੍ਦ ਸਾਰਧਜਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਅਦਾਸਿ, ਯੋ ‘ਲੋਕਾ ਮ੍ਹਾਂ ਕੇਂ ਸਯਾਡੋ’ ਇਤਿ ਵੁਚ੍ਚਤਿ.

ਇਚ੍ਚੇਵਂ ਪਰਿਯਤ੍ਤਿਕੋਵਿਦਾਨਂ ਅਨੇਕਾਨਂ ਮਹਾਥੇਰਾਨਂ ਸਦ੍ਧਿਂ ਨਾਮਲਞ੍ਛੇਨ ਵਿਹਾਰਂ ਦਤ੍ਵਾ ਅਨੁਗ੍ਗਹਂ ਅਕਾਸਿ. ਯਸ੍ਮਾ ਪਨ ਸਬ੍ਬੇਸਂ ਥੇਰਾਨਂ ਨਾਮਂ ਉਦ੍ਧਰਿਤ੍ਵਾ ਵਿਸੁਂ ਵਿਸੁਂ ਕਥਿਤੇ ਅਯਂ ਸਾਸਨਵਂਸਪ੍ਪਦੀਪਿਕਕਥਾ ਅਤਿਪ੍ਪਪਞ੍ਚਾ ਭਵਿਸ੍ਸਤਿ, ਤਸ੍ਮਾ ਇਧ ਅਜ੍ਝੁਪੇਕ੍ਖਿਤ੍ਵਾ ਵਤ੍ਤਬ੍ਬਮੇਵ ਵਕ੍ਖਾਮਾਤਿ.

ਪਚ੍ਛਾਭਾਗੇ ਚਤ੍ਤਾਰੋ ਮਹਾਥੇਰਾ ਰਾਜਾਦੁਬ੍ਬਲਤਾਯ ਯਥਾਕਾਮਂ ਸਾਸਨਂ ਵਿਸੋਧੇਤੁਂ ਸਕ੍ਖਿਸ੍ਸਨ੍ਤੀਤਿ ਮਞ੍ਞਿਤ੍ਵਾ ਪੁਨ ਅਟ੍ਠ ਥੇਰੇ ਏਤੇਹਿ ਚਤੂਹਿ ਮਹਾਥੇਰੇਹਿ ਸਦ੍ਧਿਂ ਸਾਸਨਂ ਵਿਸੋਧਾਪੇਤੁਂ ਸਙ੍ਘਨਾਯਕਟ੍ਠਾਨੇ ਠਪੇਸਿ. ਸੇਯ੍ਯਥਿਦਂ, ਕਵਿਨ੍ਦਾਭਿਸਦ੍ਧਮ੍ਮਪਵਰਮਹਾਧਮ੍ਮਰਾਜਗੁਰੁਤ੍ਥੇਰੋ, ਤਿਪਿਟਕਾਲਙ੍ਕਾਰਧਜਮਹਾਧਮ੍ਮਰਾਜਗੁਰੁਤ੍ਥੇਰੋ, ਚਕ੍ਕਿਨ੍ਦਾਭਿਧਜਮਹਾਧਮ੍ਮਰਾਜਗੁਰੁਤ੍ਥੇਰਾ, ਪਰਮਸਿਰਿਵਂਸਧਜਮਹਾਧਮ੍ਮਰਾਜਗੁਰੁਤ੍ਥੇਰੋ, ਜਨਿਨ੍ਦਾਭਿਪਵਰਮਹਾਧਮ੍ਮਰਾਜਗੁਰੁਤ੍ਥੇਰੋ, ਮਹਾਞਾਣਾਭਿਧਜਮਹਾਧਮ੍ਮਰਾਜਗੁਰੁਤ੍ਥੇਰੋ ¶ , ਞਾਣਾਲਙ੍ਕਾਰਸਦ੍ਧਮ੍ਮਧਜਮਹਾਧਮ੍ਮਰਾਜਗੁਰੁਥੇਰੋ, ਞਾਣਾਭਿਸਾਸਨਧਜਮਹਾਧਮ੍ਮਰਾਜਗੁਰੁਤ੍ਥੇਰੋਤਿ.

ਅਥ ਅਰਹਾਪਿ ਸਮਾਨੋ ਨਿਸ੍ਸਯਮੁਚ੍ਚਕਙ੍ਗਵਿਕਲੋ ਵਿਨਾਨਿਸ੍ਸਯਾਚਰਿਯੇਨ ਵਸਿਤੁਂ ਨ ਵਟ੍ਟਤੀਤਿ ਜਾਨਿਤ੍ਵਾ ਨਿਸ੍ਸਯਾ ਚਰਿਯਪ੍ਪਹੋਨਕਾਨਂ ਥੇਰਾਨਂ ਨਿਸ੍ਸਯਙ੍ਗਾਨਿ ਨਿਸ੍ਸਯਮੁਚ੍ਚਕਾਰਹਾਨਂ ਨਿਸ੍ਸਯਮੁਚ੍ਚਕਙ੍ਗਾਨਿ ਪਰਿਪੂਰਾਪੇਤ੍ਵਾ ਨਿਸ੍ਸਿਤਕਾਨਂ ਨਿਸ੍ਸਯਂ ਗਣ੍ਹਿਤ੍ਵਾਵ ਨਿਸੀਦਾਪੇਸਿ.

ਤਤੋ ਪਚ੍ਛਾ ਕਲਿਯੁਗੇ ਪਞ੍ਞਾਸਾਧਿਕੇ ਵਸ੍ਸਸਤੇ ਸਹਸ੍ਸੇਵ ਸਮ੍ਪਤ੍ਤੇ ਞਾਣਾਭਿਸਾਸਨਧਜਮਹਾਧਮ੍ਮਰਾਜਗੁਰੁਤ੍ਥੇਰਂਯੇਵ ਏਕਂ ਸਙ੍ਘਰਾਜਟ੍ਠਾਨੇ ਠਪੇਸਿ. ਤਤੋ ਪਟ੍ਠਾਯ ਸੋਯੇਵ ਏਕੋ ਸਙ੍ਘਨਾਯਕੋ ਹੁਤ੍ਵਾ ਸਾਸਨਂ ਵਿਸੋਧਯਿ.

ਤਤੋ ਪਚ੍ਛਾ ਏਕਪਣ੍ਣਾਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਫਗ੍ਗੁਨਮਾਸੇ ਮਹਾਮੁਨਿਚੇਤਿਯਸ੍ਸ ਦਕ੍ਖਿਣਦਿਸਾਭਾਗੇ ਦ੍ਵੀਹਿ ਇਟ੍ਠਕਮਯੇਹਿ ਪਾਕਾਰੇਹਿ ਪਰਿਕ੍ਖਿਤ੍ਤਂ ਪਞ੍ਚਭੂਮਿਕਂ ਅਸੋਕਾਰਾਮੇ ਰਤਨਭੂਮਿਕਿਤ੍ਤਿਂ ਨਾਮ ਵਿਹਾਰਂ ਅਤਿਮਹਨ੍ਤਂ ਕਾਰਾਪੇਤ੍ਵਾ ਞਾਣਾਭਿਸਾਸਨਧਜਮਹਾਧਮ੍ਮਰਾਜਗੁਰੁਤ੍ਥੇਰਸ੍ਸ ਅਦਾਸਿ. ਞਾਣਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾਮਲਞ੍ਛਮ੍ਪਿ ਪੁਨ ਅਦਾਸਿ. ਤਤੋ ਅਞ੍ਞਾਨਿ ਜੇਯ੍ਯਭੂਮਿਵਿਹਾਰਕਿਤ੍ਤਿਮਙ੍ਗਲਵਿਰਾਮਾਦਯੋ ਅਨੇਕੇਪਿ ਵਿਹਾਰੇ ਤਸ੍ਸੇਵ ਅਦਾਸਿ.

ਸੋ ਪਨ ਤੇਸੁ ਵਿਹਾਰੇਸੁ ਵਾਰੇਨ ਨਿਸੀਦਿਤ੍ਵਾ ਪਰਿਯਤ੍ਤਿਂ ਵਾਚੇਸਿ. ਉਭਤੋਵਿਭਙ੍ਗਾਨਿਪਿ ਵਾਚੁਗ੍ਗਤਂ ਅਕਾਸਿ. ਨਿਚ੍ਚਂਯੇਵ ਏਕਾਸਨਿਕਧੁਜਙ੍ਗਂ ਸਮਾਦਿਯਿ.

ਸੋ ਪਨ ਥੇਰੋ ਉਪਸਮ੍ਪਦਾਵਸ੍ਸੇਨ ਪਞ੍ਚਵਸ੍ਸਿਕੋ ਹੁਤ੍ਵਾ ਪੁਬ੍ਬੇਵ ਸਙ੍ਘਰਾਜਭਾਵਤੋ ਪੇਟਕਾਲਙ੍ਕਾਰ ਨਾਮ ਨੇਤ੍ਤਿਸਂਵਣ੍ਣਨਂ ਅਭਿਨਵਟੀਕਂ ਅਕਾਸਿ. ਅਟ੍ਠਵਸ੍ਸਿਇਕਕਾਲੇ ਸਙ੍ਘਰਾਜਾ ਅਹੋਸਿ. ਸਙ੍ਘਰਾਜਾ ਹੁਤ੍ਵਾ ਸਾਧੁਜ੍ਜਨਵਿਲਾਸਿਨਿਂ ਨਾਮ ¶ ਦੀਘਨਿਕਾਯਟੀਕਂ ਅਕਾਸਿ. ਅਰਿਯਵਂਸਾਲਙ੍ਕਾਰਂ ਨਾਮ ਗਨ੍ਥਞ੍ਚ ਅਕਾਸਿ. ਮਹਾਧਮ੍ਮਰਞ੍ਞਾ ਯਾਚਿਤੋ ਜਾਤਕਟ੍ਠਕਥਾਯ ਅਤ੍ਥਯੋਜਨਂ ਚਤੁਸਾਮਣੇਰਵਤ੍ਥੁਂ ਰਾਜੋਵਾਦਵਤ੍ਥੁਂ ਤਿਗੁਮ੍ਭਥੋਮਨਂ ਛਦ੍ਦਨ੍ਤਨਾਗਰਾਜੁਪ੍ਪਤ੍ਤਿਕਥਂ ਰਾਜਾਧਿਰਾਜ ਵਿਲਾਸਿਨਿਂ ਨਾਮ ਗਨ੍ਥਞ੍ਚਾਤਿ ਏਵਮਾਦਯੋਪਿ ਅਕਾਸਿ.

ਕਲਿਯੁਗੇ ਪਨ ਦ੍ਵਾਸਟ੍ਠਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਸੀਹਲ਼ਦੀਪਤੋ ਅਮ੍ਪਗਹਪਤਿਸ੍ਸੋ, ਮਹਾਦਮ੍ਪੋ, ਕੋਚ੍ਛ ਗੋਧੋ, ਬ੍ਰਾਹ੍ਮਣਵਤ੍ਤੋ, ਭੋਗਹਵਤ੍ਤੋ, ਵਾਤੁਰਗਮ੍ਮੋਤਿ ਇਮੇ ਛ ਸਾਮਣੇਰਾ ਦਸ ਧਾਤੁਯੋ ਧਮ੍ਮਪਣ੍ਣਾ ਕਾਰਤ੍ਥਾਯ ਆਨੇਤ੍ਵਾ ਅਮਰਪੁਰਂ ਨਾਮ ਮਹਾਰਾਜਟ੍ਠਾਨੀਨਗਰਂ ਆਗਤਾ ਸਦ੍ਧਿਂ ਏਕੇਨ ਉਪਾਸਕੇਨ.

ਅਥ ਞਾਣਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੁਨਾ ਸਙ੍ਘਰਞ੍ਞਾ ਉਪਜ੍ਝਾਯੇਨ ਕਵਿਨ੍ਦਾਭਿਸਦ੍ਧਮ੍ਮਧਰਧਜਮਹਾਧਮ੍ਮਰਾਜਗੁਰੁਤ੍ਥੇਰੇਨ ਜਨਿਨ੍ਦਾਭਿਧਜਮਹਾਧਮ੍ਮਰਾਜਗੁਰੁਤ੍ਥੇਰੇਨ ਮੁਨਿਨ੍ਦਘੋਸਮਹਾਧਮ੍ਮਰਾਜਗੁਰੁਤ੍ਥੇਰੇਨਾਤਿ ਏਵਮਾਦੀਹਿ ਰਾਜਗੁਰੁਤ੍ਥੇ ਰੇਹਿ ਕਮ੍ਮਵਾਚਰਿਯੇਹਿ ਹਤ੍ਥਿਰਜ੍ਜੁਸੁਵਣ੍ਣਗੁਹਸੀਮਾਯਂ ਉਪਸਮ੍ਪਦਕਮ੍ਮਂ ਕਾਰਾਪੇਸਿ, ਉਪਾਸਕਞ੍ਚ ਸਾਮਣੇਰਭੂਮਿਯਂ ਪਤਿਟ੍ਠਾਪੇਸਿ, ਤਤੋ ਪਚ੍ਛਾ ਚ ਅਨੇਕਵਾਰਂ ਆਗਤਾਨਂ ਭਿਕ੍ਖੂਨਂ ਪੁਨ ਸਿਕ੍ਖਂ ਗਣ੍ਹਾਪੇਸਿ, ਸਾਮਣੇਰਾਨਞ੍ਚ ਉਪਸਮ੍ਪਦਕਮ੍ਮਂ ਕਾਰਾਪੇਸਿ, ਉਪਾਸਕਾਨਞ੍ਚ ਪਬ੍ਬਜ੍ਜਕਮ੍ਮਨ੍ਤਿ.

ਅਪਰਭਾਗੇ ਪਨ ਕਲਿਯੁਗੇ ਛਚਤ੍ਤਾਲੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਪਿਤੁਰਞ੍ਞੋ ਆਚਰਿਯਪੁਬ੍ਬੋ ਅਤੁਲੋ ਨਾਮ ਥੇਰੋ ਚੀਵਰਪਟਲਂ ਉਪਰਿਸਙ੍ਘਾਟਿਂ ਕਤ੍ਵਾ ਉਰਬਨ੍ਧਨਵਤ੍ਥਂ ਬਨ੍ਧਿਤਬ੍ਬਨ੍ਤਿ ਚੂਲ਼ਗਣ੍ਠਿਪਦੇ ਵੁਤ੍ਤਤ੍ਤਾ ਸਾਮਣੇਰਾਨਂ ਗਾਮਪ੍ਪਵਸੇਨਕਾਲੇ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਰਬਨ੍ਧਨਵਤ੍ਥਂ ਬਨ੍ਧਿਤ੍ਵਾਯੇਵ ਪਵਿਸਿਤਬ੍ਬਨ੍ਤਿ ਦਲ਼ਂ ਕਤ੍ਵਾ ਰਞ੍ਞੋ ਸਨ੍ਤਿਕਂ ਲੇਖਨਂ ਪਵੇਸੇਸਿ.

ਅਥ ਰਾਜਾ ਤਂ ਸੁਤ੍ਵਾ ਮਹਾਥੇਰੇ ਸੁਧਮ੍ਮਸਭਾਯਂ ਸਨ੍ਨਿਪਾਤਾਪੇਤ੍ਵਾ ¶ ਅਤੁਲਤ੍ਥੇਰੇਨ ਸਦ੍ਧਿਂ ਸਾਕਚ੍ਛਂ ਕਾਰਾਪੇਸਿ. ਅਥ ਅਤੁਲਤ੍ਥੇਰੋ ਚੀਵਰਪਟਲਂ ਉਪਰਿਸਙ੍ਘਾਟਿਂ ਕਤ੍ਵਾ ਉਰਬਨ੍ਧਨਵਤ੍ਥਂ ਬਨ੍ਧਿਤਬ੍ਬਨ੍ਤਿ ਚੂਲ਼ਗਣ੍ਠਿਪਦੇ ਆਗਤਪਾਠਂ ਦਸ੍ਸੇਤ੍ਵਾ ਸਾਮਣੇਰਾਨਂ ਗਾਮਪ੍ਪਵੇਸਨਕਾਲੇ ਏਕਂਸਂ ਉਤ੍ਤਰਾਸਙ੍ਗਂ ਕਤ੍ਵਾ ਉਰਬਨ੍ਧਨਵਤ੍ਥਂ ਬਨ੍ਧਿਤ੍ਵਾ ਪਵਿਸਿਤਬ੍ਬਨ੍ਤਿ ਆਹ.

ਅਥ ਮਹਾਥੇਰਾ ਤਂ ਪੁਚ੍ਛਿਂਸੁ,-ਈਦਿਸੋ ਅਧਿਪ੍ਪਾਯੋ ਅਞ੍ਞਤ੍ਥ ਦਿਸ੍ਸਤਿ ਵਾ ਮਾ ਵਾਤਿ. ਅਥ ਅਤੁਲਤ੍ਥੇਰੋ ਏਵਮਾਹ,-ਅਞ੍ਞਤ੍ਥ ਪਨ ਈਦਿਸੋ ਅਧਿਪ੍ਪਾਯੋ ਨ ਦਿਸ੍ਸਤੀਤਿ. ਏਵਂ ਹੋਤੁ, ਅਯਂ ਗਨ੍ਥੋ ਕੇਨ ਕਤੋਤਿ. ਸੀਹਲ਼ਦੀਪੇ ਅਨੁਰਾਧਪੁਰਸ੍ਸ ਦਕ੍ਖਿਣਦਿਸਾਭਾਗੇ ਪੋਕ੍ਕਨ੍ਤਿ ਗਾਮੇ ਅਰਹਨ੍ਤੇਨ ਮੋਗ੍ਗਲਾਨਤ੍ਥੇਰੇਨਾਤਿ. ਅਯਮਤ੍ਥੋ ਕਥਂ ਜਾਨਿਤਬ੍ਬੋਤਿ. ਪਿਟਕਤ੍ਤਯਲਕ੍ਖਣਗਨ੍ਥੇ ਆਗਤਤ੍ਤਾਤਿ. ਅਯਞ੍ਚ ਪਿਟਕਤ੍ਤਯ ਲਕ੍ਖਣਗਨ੍ਥੋ ਕੁਤੋ ਲਦ੍ਧੋਤਿ. ਬੁਦ੍ਧਘੋਸਤ੍ਥੇਰੇਨ ਕਿਰ ਸੀਹਲ਼ਦੀਪਤੋ ਆਨੀਤਤ੍ਤਾ ਤਤੋ, ਅਯਞ੍ਹਿ ਗਨ੍ਥੋ ਸੀਹਲ਼ਦੀਪਤੋ ਅਤ੍ਤਨਾ ਆਨੀਤੇਸੁ ਗਨ੍ਥੇਸੁ ਅਸੁਕੋ ਗਨ੍ਥੋ ਅਸੁਕੇਨ ਥੇਰੇਨ ਕਤੋਤਿ ਵਿਞ੍ਞਾਪਨਤ੍ਥਾਯ ਬੁਦ੍ਧਘੋਸਤ੍ਥੇਰੇਨ ਕਤੋ, ਇਦਾਨਾਯਂ ਗਨ੍ਥੋ ਅਮ੍ਹਾਕਂ ਹਤ੍ਥੇ ਸਂਵਿਜ੍ਜਤੀਤਿ. ਸਚੇ ਇਦਾਨਾਯਂ ਗਨ੍ਥੋ ਤੁਮ੍ਹਾਕਂ ਹਤ੍ਥੇ ਸਂਵਿਜ੍ਜਤਿ, ਅਮ੍ਹਾਕਂ ਦਸ੍ਸੇਹੀਤਿ. ਪਸ੍ਸਥਾਵੁਸੋ ਅਯਮਮ੍ਹਾਕਂ ਹਤ੍ਥੇ ਗਨ੍ਥੋਤਿ ਦਸ੍ਸੇਸਿ. ਅਥ ਮਹਾਥੇਰੇਹਿ ਸਙ੍ਘਰਾਜਪ੍ਪਮੁਖੇਹਿ ਤਸ੍ਮਿਂ ਗਨ੍ਥੇ ਪਸ੍ਸਿਤੇ ਵਿਨਯਗਣ੍ਠਿਪਦਂ ਸੀਹਲ਼ਦੀਪੇ ਪਰਕ੍ਕਮਬਾਹੁਰਞ੍ਞੋ ਕਾਲੇ ਮੋਗ੍ਗਲਾਨਤ੍ਥੇਰੋ ਅਕਾਸੀਤਿ ਆਗਤਂ, ਨ ਚੂਲ਼ਗਣ੍ਠਿਪਦਂ ਸੀਹਲ਼ਦੀਪੇ ਅਨੁਰਾਧਪੁਰਸ੍ਸਦਕ੍ਖਿਣਦਿਸਾਭਾਗੇ ਪੋਕ੍ਕਨ੍ਤਿਗਾਮੇ ਅਰਹਾ ਮੋਗ੍ਗਲਾਨਤ੍ਥੇਰੋ ਅਕਾਸੀਤਿ.

ਅਥ ਥੇਰਾ ਏਵਮਾਹਂਸੁ,-ਕਸ੍ਮਾ ਪਨ ਪਿਟਕਤ੍ਤਯਲਕ੍ਖਣਗਨ੍ਥੇ ਅਨਾਗਤਮ੍ਪਿ ਆਗਤਂਵਿਯ ਕਤ੍ਵਾ ਮੁਸਾ ਵਦਥ, ਨ ਨੁ ਤੁਮ੍ਹਾਕਮ੍ਪਿ ਏਕਂਸਿਕਭਿਕ੍ਖੂਨਂ ਮੁਸਾਵਾਦਸਿਕ੍ਖਾਪਦਂ ਅਤ੍ਥੀਤਿ. ਅਥ ਅਤੁਲਤ੍ਥੇਰੋ ਉਤ੍ਤਰਿਂ ਵਤ੍ਤੁਂ ਅਸਕ੍ਕੁਣੇਯ੍ਯਤ੍ਤਾ ਲੁਦ੍ਦਕਸ੍ਸ ¶ ਵਾਕੁਰੇ ਬਨ੍ਧਮਿਗੋਵਿਯ ਫਨ੍ਦਮਾਨੋ ਹੁਤ੍ਵਾ ਅਟ੍ਠਾਸਿ, ਸਹੋਡ੍ਡੇਨ ਗਹਿਤੋਵਿਯ ਚੋਰੋ ਸਹਮੁਸਾਵਾਦਕਮ੍ਮੇਨ ਸੋ ਥੇਰੋ ਗਹਿਤੋ ਅਹੋਸੀਤਿ.

ਇਦਂ ਇਮਸ੍ਸ ਅਤ੍ਥਸ੍ਸ ਆਵਿਭਾਵਤ੍ਥਾਯ ਵਤ੍ਥੁ, –

ਇਮਸ੍ਮਿਂ ਕਿਰ ਰਟ੍ਠੇ ਏਕੋ ਜਨਪਦਵਾਸੀਪੁਰਿਸੋ ਕੇਨਚਿਦੇਵ ਕਰਣੀਯੇਨ ਅਮਰਪੁਰਂ ਨਾਮ ਮਹਾਰਾਜਟ੍ਠਾਨੀਨਗਰਂ ਆਗਚ੍ਛਿ. ਆਗਨ੍ਤ੍ਵਾ ਚ ਪਚ੍ਚਾਗਤਕਾਲੇ ਅਨ੍ਤਰਾਮਗ੍ਗੇ ਪਾਥੇਯ੍ਯਂ ਖਯਂ ਅਹੋਸਿ. ਅਥਸ੍ਸ ਏਤਦਹੋਸਿ,- ਇਦਾਨਿ ਮਮ ਪਾਥੇਯ੍ਯਂ ਖਯਂ ਅਹੋਸਿ, ਇਮਸ੍ਮਿਂ ਕਿਰ ਰਟ੍ਠੇ ਸਹਸ੍ਸੋਰੋਧਗਾਮੇ ਲਦ੍ਧਵਰੋ ਨਾਮ ਮਹਾਸੇਟ੍ਠਿ ਸਬ੍ਬਤ੍ਥ ਭੂਤਲੇ ਅਤਿਵਿਯ ਪਾਕਟੋ. ਤਸ੍ਸਾਹਂ ਞਾਤੀਤਿ ਵਞ੍ਚੇਤ੍ਵਾ ਕਥੇਸ੍ਸਾਮਿ, ਏਵਂ ਸਤਿ ਤੇਨ ਮਹਾਸੇਟ੍ਠਿਨਾ ਮਿਤ੍ਤਸਨ੍ਥਵਂ ਕਾਤੁਂ ਤੇਤੇਗਾਮਿਕਾ ਮਨੁਸ੍ਸਾ ਮਮ ਬਹੁ ਲਾਭਂ ਦਸ੍ਸਨ੍ਤਿ, ਤਦਾ ਪਾਥੇਯ੍ਯੇਨ ਅਕਿਚ੍ਛੋ ਭਵਿਸ੍ਸਾਮੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਅਨ੍ਤਰਾਮਗ੍ਗੇ ਸਮ੍ਪਤ੍ਤਸਮ੍ਪਤ੍ਤਗਾਮੇਸੁ ਮਹਾਭੋਗਾਨਂ ਗੇਹਂ ਵਿਚਿਨੇਤ੍ਵਾ ਮਹਾਭੋਗਾਨਂ ਸਨ੍ਤਿਕਂ ਪਵਿਸਿਤ੍ਵਾ ਕਥਾਸਲ੍ਲਾਪਂ ਅਕਾਸਿ.

ਅਥ ਤੇਤੇਗਾਮਿਕਾ ਤ੍ਵਂ ਕੁਤੋ ਆਗਤੋ, ਕੁਹਿਂ ਗਮਿਸ੍ਸਸਿ, ਕਸ੍ਸ ਞਾਤਿ,ਕੋ ਵਾ ਤ੍ਵਨ੍ਤਿ ਪੁਚ੍ਛਿਂਸੁ. ਅਮਰਪੂਰਮਹਾਰਾਜਟ੍ਠਾਨੀਨਗਰਤੋ ਆਗਤੋ, ਸਹਸ੍ਸੋਰੋਧਗਾਮਂ ਗਮਿਸ੍ਸਾਮਿ, ਸਹਸ੍ਸੋਰੋਧਗਾਮੇ ਲਦ੍ਧਵਰਸ੍ਸ ਨਾਮ ਮਹਾਸੇਟ੍ਠਿਨੋ ਜਾਮਾਤਾ ਧਨਵਡ੍ਢਕੋ ਨਾਮਾਹਨ੍ਤਿ ਆਹ.

ਅਥ ਤੇਤੇਗਾਮਿਕਾ ਲਦ੍ਧਵਰੇਨ ਮਹਾਸੇਟ੍ਠਿਨਾ ਮਿਤ੍ਤਸਨ੍ਥਵਂ ਕਾਤੁਂ ਨਾਨਾਭੋਜਨੇਹਿ ਭੋਜੇਸੁਂ. ਅਞ੍ਞੇਹਿਪਿ ਬਹੂਹਿ ਪਣ੍ਣਾਕਾਰੇਹਿ ਸਙ੍ਗਹਂ ਅਕਂਸੁ. ਇਮਿਨਾਵ ਨਯੇਨ ਸਮ੍ਪਤ੍ਤ ਸਮ੍ਪਤ੍ਤਗਾਮੇਸੁ ਵਞ੍ਚੇਤ੍ਵਾ ਅਤ੍ਤਨੋ ਗੁਣਂ ਕਥੇਤ੍ਵਾ ਅਦ੍ਧਾਨ ਮਗ੍ਗਂ ਤਰਿ. ਪਚ੍ਛਾ ਪਨ ਸਹਸ੍ਸੋਰੋਧਗਾਮਂ ਸਮ੍ਪਤ੍ਤੋ. ਸੋ ਸਹਸ੍ਸੋਰੋਧਗਾਮਂ ਨ ਸਮ੍ਪਤ੍ਤਪੁਬ੍ਬੋ. ਲਦ੍ਧਵਰੋ ਮਹਾਸੇਟ੍ਠਿ ਤੇਨ ਨ ਦਿਟ੍ਠਪੁਬ੍ਬੋ. ਸਹਸ੍ਸੋਰੋਧਗਾਮਂ ਸਮ੍ਪਤ੍ਤੇਯੇਵ ਅਯਂ ਕਿਂ ਨਾਮ ਗਾਮੋਤਿ ਅਪੁਚ੍ਛਿਤ੍ਵਾਯੇਵ ਤਸ੍ਮਿਂ ਗਾਮੇ ਮਹਾਭੋਗਤਰਸ੍ਸ ¶ ਮਹਾਗੇਹਂ ਵਿਚਿਨਨ੍ਤੋ ਤਸ੍ਸੇਵ ਲਦ੍ਧਵਰਸ੍ਸ ਸੇਟ੍ਠਿਨੋ ਮਹਨ੍ਤਂ ਗੇਹਂ ਪਸ੍ਸਿਤ੍ਵਾ ਲਦ੍ਧਵਰਸ੍ਸ ਸੇਟ੍ਠਿਨੋ ਸਨ੍ਤਿਕਂ ਪਵਿਸਿਤ੍ਵਾ ਤੇਨ ਸਦ੍ਧਿਂ ਕਥਾਸਲ੍ਲਾਪਂ ਅਕਾਸਿ.

ਅਥ ਮਹਾਸੇਟ੍ਠਿ ਤਂ ਪੁਚ੍ਛਿ,-ਤ੍ਵਂ ਕੁਤੋ ਆਗਤੋ, ਕੁਹਿਂ ਗਮਿਸ੍ਸਸਿ, ਕਸ੍ਸ ਞਾਤਿ,ਕੋ ਤ੍ਵਨ੍ਤਿ. ਅਮਰਪੁਰਮਹਾਰਾਜਟ੍ਠਾਨੀਨਗਰਤੋ ਸਾਮਿ ਆਗਤੋ, ਸਹਸ੍ਸੋਰੋਧਗਾਮਂ ਗਮਿਸ੍ਸਾਮਿ, ਸਹਸ੍ਸੋਰੋਧਗਾਮੇ ਲਦ੍ਧਵਰਸ੍ਸ ਨਾਮ ਮਹਾਸੇਟ੍ਠਿਨੋ ਜਾਮਾਤਾ, ਧਨਵਡ੍ਢਕੋ ਨਾਮਾਹਨ੍ਤਿ ਆਹ.

ਅਥ ਮਹਾਸੇਟ੍ਠਿ ਤਸ੍ਸ ਮੁਖਂ ਉਜੁਂ ਓਲੋਕੇਤ੍ਵਾ ਅਯਂ ਮਾਣਵ ਸਹਸ੍ਸੋਰੋਧਗਾਮੋਯੇਵ, ਅਹਮ੍ਪਿ ਲਦ੍ਧਵਰੋ ਨਾਮ ਮਹਾਸੇਟ੍ਠਿ, ਮਮ ਧੀਤਰੋ ਸਨ੍ਤਿ, ਤਾਪਿ ਸਸ੍ਸਾਮਿਕਾਯੇਵ ਹੋਨ੍ਤਿ, ਇਦਾਨਿ ਤਾ ਸਕਸਕਸ੍ਸਾਮਿਕਾਨਂਯੇਵ ਸਨ੍ਤਿਕੇ ਵਸਨ੍ਤਿ, ਨ ਤ੍ਵਂ ਕਦਾਚਿ ਮਯਾ ਦਿਟ੍ਠਪੁਬ੍ਬੋ, ਕੇਨ ਕਾਰਣੇਨ ਕੁਤੋ ਆਗਨ੍ਤ੍ਵਾ ਮਮ ਜਾਮਾਤਾ ਭਵਸੀਤਿ ਪੁਚ੍ਛਿ.

ਅਥ ਸੋ ਮ੍ਮਨੁਸ੍ਸੇਹਿ ਅਨੁਬਨ੍ਧਿਯਮਾਨੋਵਿਯ ਮਿਗੋ ਸਕਲਮ੍ਪਿ ਕਾਯਂ ਫਨ੍ਦਾਪੇਤ੍ਵਾ ਕਿਞ੍ਚਿ ਵਤ੍ਤਬ੍ਬਂ ਵਚਨਂ ਅਜਾਨਿਤ੍ਵਾ ਅਲਦ੍ਧਪ੍ਪਤਿਟ੍ਠਾਨਤਾਯ ਏਵਂ ਸਤਿ ਕੁਤੋ ਆਗਤੋ, ਕੁਹਿਂ ਗਮਿਸ੍ਸਾਮਿ, ਕਸ੍ਸ ਞਾਤਿ, ਕੋ ਵਾ ਅਹਨ੍ਤਿ ਇਦਾਨਿ ਨ ਜਾਨਾਮਿ, ਸਬ੍ਬਦਿਸਾ ਸਮ੍ਮੁਯ੍ਹਾਮਿ, ਖਮਾਹਿ ਮਮ ਅਪਰਾਧਂ, ਇਤੋ ਪਟ੍ਠਾਯ ਯਾਵ ਜੀਵਿਤਪਰਿਯੋਸਾਨਾ ਨ ਵਞ੍ਚੇਸ੍ਸਾਮਿ, ਵਞ੍ਚੇਤੁਂ ਨ ਵਿਸਹਾਮਿ, ਇਦਾਨਿ ਅਤਿਵਿਯ ਭਾਯਾਮਿ, ਮਾ ਕਿਞ੍ਚਿ ਦਣ੍ਡਕਮ੍ਮਂ ਕਰੋਹੀਤਿ ਵਤ੍ਵਾ ਵੇਗੇਨ ਉਟ੍ਠਹਿਤ੍ਵਾ ਪਲਾਯੀਤਿ.

ਇਚ੍ਚੇਵਂ ਅਤੁਲਤ੍ਥੇਰੋ ਦੁਮ੍ਮੁਖੋ ਹੁਤ੍ਵਾ ਯਂਵਾਤਂਵਾ ਮੁਖਾਰੂਲ਼ਂ ਵਿਲਪਿਤ੍ਵਾ ਸਙ੍ਘਮਜ੍ਝੇ ਨਿਸੀਦਿ.

ਅਯਂ ਅਤੁਲਤ੍ਥੇਰਸ੍ਸ ਪਠਮੋ ਪਰਾਜਯੋ.

ਤਤੋ ਪਚ੍ਛਾ ਖਲਿਤ੍ਵਾ ਕਦ੍ਦਮੇ ਪਤਿਤਂ ਪੁਰਿਸਂ ਪੁਨ ਉਪਰਿ ਅਕ੍ਕਮਨ੍ਤਾਵਿਯ ਪੁਨ ਮਹਾਥੇਰਾ ਏਵਂ ਪੁਚ੍ਛਿਂਸੁ,-ਇਦਂ ਭਨ੍ਤੇ ਤਵ ਚੂਲ਼ਗਣ੍ਠਿਪਦਂ ਨਾਮ ਤੀਸੁ ਵਿਨਯਮਹਾਟੀਕਾਸੁ ਸਾਧਕਵਸੇਨ ਦਸ੍ਸਿਤਂ ¶ ਚੂਲ਼ਗਣ੍ਠਿਪਦਂ ਉਦਾਹੁ ਅਪਰਨ੍ਤਿ. ਤੀਸੁ ਵਿਨਯਮਹਾਟੀਕਾਸੁ ਸਾਧਕਵਸੇਨ ਦਸ੍ਸਿਤਂ ਚੂਲ਼ਗਣ੍ਠਿਪਦਂਯੇਵ ਇਦਨ੍ਤਿ. ਏਵਂਸਤਿ ਕਸ੍ਮਾ ਤਵ ਚੂਲ਼ਗਣ੍ਠਿਪਦੇਯੇਵ ਵੁਤ੍ਤਞ੍ਹਿ ਵਜਿਰਬੁਦ੍ਧਿਟੀਕਾਯਂ, ਵੁਤ੍ਤਞ੍ਹਿ ਸਾਰਤ੍ਥਦੀਪਨੀਟੀਕਾਯਂ, ਤਥਾ ਹਿ ਵੁਤ੍ਤਂ ਵਿਮਤਿ ਵਿਨੋਦਨੀਟੀਕਾਯਨ੍ਤਿ ਤਾਸਂ ਵਿਨਯਮਹਾਟੀਕਾਨਂ ਪਚ੍ਛਾ ਹੁਤ੍ਵਾ ਤਿਸ੍ਸੋ ਵਿਨਯਮਹਾਟੀਕਾਯੋ ਸਾਧਕਵਸੇਨ ਦਸ੍ਸਿਤਾਤਿ. ਏਵਂ ਪਨ ਪੁਚ੍ਛਨ੍ਤੋ ਸੋ ਮਯਾ ਪੁਬ੍ਬੇ ਵੁਤ੍ਤਂ ਤੀਸੁ ਵਿਨਯਮਹਾਟੀਕਾਸੁ ਸਾਧਕਵਸੇਨ ਦਸ੍ਸਿਤਂ ਚੂਲ਼ਗਣ੍ਠਿਪਦਂਯੇਵ ਇਦਨ੍ਤਿ ਵਚਨਂ ਸਚ੍ਚਮੇਵਾਤਿ ਮੁਖਾਸੁਞ੍ਞਤ੍ਥਾਯ ਪੁਨਪ੍ਪੁਨਂ ਵਦਿ.

ਇਦਞ੍ਚ ਇਮਸ੍ਸ ਅਤ੍ਥਸ੍ਸ ਆਵਿਭਾਵਤ੍ਥਾਯ ਵਤ੍ਥੁ, –

ਏਕੋ ਕਿਰ ਪੁਰਿਸੋ ਏਕੇਨ ਸਹਾਯੇਨ ਸਦ੍ਧਿਂ ਪੁਤ੍ਤਦਾਰਪੋਸਨਤ੍ਥਾਯ ਰਞ੍ਞੋ ਭਤਿਂ ਗਹੇਤ੍ਵਾ ਯੁਦ੍ਧਕਮ੍ਮਂ ਕਾਤੁਂ ਸਙ੍ਗਾਮਂ ਗਚ੍ਛਤਿ. ਅਥ ਪਰਸੇਨਾਯ ਯੁਜ੍ਝਿਤ੍ਵਾ ਪਰਸੇਨਾ ਅਭਿਭਵਿਤ੍ਵਾ ਸਬ੍ਬੇ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਅਭਿਮੁਖਟ੍ਠਾਨਂ ਪਲਾਯਿਂਸੁ. ਅਥ ਸੋਪਿ ਪੁਰਿਸੋ ਤੇਨ ਸਹਾਯੇਨ ਸਦ੍ਧਿਂ ਅਤ੍ਤਨੋ ਅਭਿਮੁਖਟ੍ਠਾਨਂ ਪਲਾਯਿ. ਤੋਕਂ ਪਲਾਯਿਤ੍ਵਾ ਅਨ੍ਤਰਾਮਗ੍ਗੇ ਪਰਸੇਨਾਹਿ ਪਹਰਿਤਦਣ੍ਡੇਨ ਮੁਚ੍ਛਿਤੋ ਹੁਤ੍ਵਾ ਸੋ ਪੁਰਿਸੋ ਤੇਨ ਸਦ੍ਧਿਂ ਗਨ੍ਤੁਂ ਨ ਸਕ੍ਕਾ, ਅਨ੍ਤਮਸੋ ਨਿਸੀਦਿਤੁਮ੍ਪਿ ਨ ਸਕ੍ਕਾ.

ਅਥ ਸਹਾਯਸ੍ਸ ਏਤਦਹੋਸਿ,-ਇਦਾਨਿ ਅਯਂ ਅਤਿਵਿਯ ਬਾਲ਼ਗਿਲਾਨੋ ਹੋਤਿ ਮਰਣਾਸਨ੍ਨੋ, ਸਚਾਹਂ ਤਸ੍ਸ ਉਪਟ੍ਠਹਿਤ੍ਵਾ ਇਧੇਵ ਨਿਸੀਦੇਯ੍ਯਂ, ਵੇਰਿਨੋ ਆਗਨ੍ਤ੍ਵਾ ਮਂ ਗਣ੍ਹਿਸ੍ਸਨ੍ਤੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਗਿਲਾਨਸ੍ਸ ਸਨ੍ਤਕਾਨਿ ਕਹਾਪਣਵਤ੍ਥਾਦੀਨਿ ਗਹੇਤ੍ਵਾ ਤਂ ਤਤ੍ਥੇਵ ਠਪੇਤ੍ਵਾ ਗਚ੍ਛਤਿ. ਸਕਟ੍ਠਾਨਸਮੀਪਂ ਪਨ ਪਤ੍ਤਸ੍ਸ ਤਸ੍ਸ ਏਤਦਹੋਸਿ,- ਸਚੇ ਤਂ ਅਨ੍ਤਰਾਮਗ੍ਗੇ ਠਪੇਤ੍ਵਾ ਆਗਚ੍ਛਾਮੀਤਿ ਵਦੇਯ੍ਯਂ, ਤਸ੍ਸ ਞਾਤਕਾ ਮਮ ਉਪਰਿ ਦੋਸਂ ਰੋਪੇਸ੍ਸਨ੍ਤਿ, ਇਦਾਨਿ ਸੋ ਮਰਿਤ੍ਵਾ ਅਹਂ ਏਕਕੋਵ ਆਗਚ੍ਛਾਮੀਤਿ ਵਦਿਸ੍ਸਾਮੀਤਿ. ਸਕਟ੍ਠਾਨਂ ਪਨ ਪਤ੍ਵਾ ਤਸ੍ਸ ਭਰਿਯਾ ਤਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਮਯ੍ਹਂ ਪਨ ਸਾਮਿਕੋ ¶ ਕੁਹਿਂ ਗਤੋ, ਕਤ੍ਥ ਠਪੇਤ੍ਵਾ ਤ੍ਵਂ ਏਕਕੋਵ ਆਗਚ੍ਛਸੀਤਿ ਪੁਚ੍ਛਿ. ਤਵ ਅਯ੍ਯੇ ਸਾਮਿਕੋ ਪਰੇਸਂ ਆਵੁਧੇਨ ਪਹਰਿਤ੍ਵਾ ਕਾਲਙ੍ਕਤੋ, ਇਮਾਨਿ ਤਵ ਸਾਮਿਕਸ੍ਸ ਸਨ੍ਤਕਾਨੀਤਿ ਵਤ੍ਵਾ ਕਹਾਪਣਵਤ੍ਥਾਦੀਨਿ ਦਤ੍ਵਾ ਮਾ ਸੋਚਿ ਮਾ ਪਰਿਦੇਵਿ, ਇਦਾਨਿ ਮਤਕਭਤ੍ਤਂ ਦਤ੍ਵਾ ਪੁਞ੍ਞਭਾਗਂਯੇਵ ਭਾਜੇਹੀਤਿ ਸਮਸ੍ਸਾਸੇਸਿ. ਅਥ ਸਾ ਤਾਨਿ ਗਹੇਤ੍ਵਾ ਰੋਦਿਤ੍ਵਾ ਮਤਕਭਤ੍ਤਂ ਦਤ੍ਵਾ ਪੁਞ੍ਞਭਾਗਂ ਭਾਜੇਸਿ.

ਅਪਰਭਾਗੇ ਪਨ ਥੋਕਂ ਕਾਲਂ ਅਤਿਕ੍ਕਨ੍ਤੇ ਗਿਲਾਨਾ ਵੁਟ੍ਠਿਤੋ ਸਕਗੇਹਂ ਆਗਚ੍ਛਤਿ. ਭਰਿਯਾਪਿ ਤਂ ਨ ਸਦ੍ਦਹਿ. ਅਹਂ ਨ ਕਾਲਙ੍ਕਤੋ, ਗਿਲਾਨਂਯੇਵ ਮਂ ਠਪੇਤ੍ਵਾ ਸੋ ਮਮ ਸਨ੍ਤਕਾਨਿ ਗਹੇਤ੍ਵਾ ਗਤੋ, ਸਚੇ ਮਂ ਤ੍ਵਂ ਨ ਸਦ੍ਦਹਸਿ, ਅਹਂ ਅਨ੍ਤੋਗਬ੍ਭੇ ਨਿਲੀਯਿਤ੍ਵਾ ਨਿਸੀਦਿਸ੍ਸਾਮਿ, ਤਂ ਪਕ੍ਕੋਸੇਤ੍ਵਾ ਪੁਚ੍ਛਾਹੀਤਿ ਆਹ.

ਅਥ ਸਾ ਤਂ ਪਕ੍ਕੋਸੇਤ੍ਵਾ ਬਹਿ ਗਬ੍ਭੇ ਨਿਸੀਦਿਤ੍ਵਾ ਪੁਚ੍ਛਿ,-ਮਮ ਸਾਮਿ ਸਾਮਿਕੋ ਕਾਲਙ੍ਕਤੋਤਿ ਤਂ ਸਚ੍ਚਂ ਵਾ ਅਲਿਕਂ ਵਾਤਿ. ਸਚ੍ਚਮੇਵੇਤਂ, ਯਂ ਤਵ ਸਾਮਿਕੋ ਕਾਲਙ੍ਕਤੋਤਿ.

ਅਥ ਸੋ ਪੁਰਿਸੋ ਬਹਿ ਗਬ੍ਭਂ ਨਿਕ੍ਖਮਿਤ੍ਵਾ ਅਙ੍ਗੁਲਿਂ ਪਸਾਰੇਤ੍ਵਾ ਨ ਇਦਾਨਿ ਭੋਸਮ੍ਮ ਅਹਂ ਕਿਞ੍ਚਿ ਮਤ੍ਤੋਪਿ ਮਰਾਮਿ, ਕਸ੍ਮਾ ਪਨ ਅਮਰਨ੍ਤਂਯੇਵ ਮਂ ਮਤੋ ਏਸੋਤਿ ਵਦੇਸੀਤਿ. ਅਥ ਕਿਞ੍ਚਿ ਵਤ੍ਤਬ੍ਬਸ੍ਸ ਕਾਰਣਸ੍ਸ ਅਦਿਸ੍ਸਨਤੋ ਮੁਖਾਸੁਞ੍ਞਤ੍ਥਾਯ ਅਙ੍ਗੁਲਿਂ ਪਸਾਰੇਤ੍ਵਾ ਉਜੁਂ ਓਲੋਕੇਤ੍ਵਾ ਇਦਾਨਿ ਤ੍ਵਂ ਇਧ ਆਗਨ੍ਤੁਂ ਸਮਤ੍ਥੋਪਿ ਮਤੋਯੇਵ, ਮਤੋਤਿ ਮਯਾ ਵੁਤ੍ਤ ਵਚਨਂ ਸਚ੍ਚਂਯੇਵ, ਨਾਹਂ ਕਿਞ੍ਚਿ ਅਲਿਕਂ ਵਦਾਮੀਤਿ ਆਹ. ਏਵਂ ਸੋ ਪੁਨਪ੍ਪੁਨਂ ਵਦਨ੍ਤੋਪਿ ਜੀਵਮਾਨਕਸ੍ਸ ਸਂਵਿਜ੍ਜਮਾਨਤ੍ਤਾ ਪਚ੍ਚਕ੍ਖੇਯੇਵ ਚ ਤਸ੍ਸ ਠਿਤਤ੍ਤਾ ਕੋਚਿਪਿ ਤਸ੍ਸ ਵਚਨਂ ਨ ਸਦ੍ਦਹਿ, ਪਰਾਜਯਂਯੇਵ ਸੋ ਪਤ੍ਤੋਤਿ.

ਇਚ੍ਚੇਵਂ ¶ ਅਤੁਲਤ੍ਥੇਰੋ ਮੁਖਾਸੁਞ੍ਞਤ੍ਥਾਯ ਵਦਨ੍ਤੋਪਿ ਕੋਚਿ ਨ ਸਦ੍ਦਹਿ, ਪਰਾਜਯਂਯੇਵ ਸੋ ਪਤ੍ਤੋਤਿ.

ਅਯਂ ਅਤੁਲਤ੍ਥੇਰਸ੍ਸ ਦੁਤਿਯੋ ਪਰਾਜਯੋ.

ਪੁਨਪਿ ਸੇਯ੍ਯਥਾਪਿ ਲੁਦ੍ਦਕੋ ਕੁਞ੍ਜਰਂ ਦਿਸ੍ਵਾ ਏਕੇਨ ਵਾਰੇਨ ਉਸੁਨਾ ਵਿਜ੍ਝਿਤ੍ਵਾ ਪਤਨ੍ਤਮ੍ਪਿ ਕੁਞ੍ਜਰਂ ਪੁਨ ਅਨੁਟ੍ਠਾਹਨਤ੍ਥਾਯ ਕਤਿਪਯਵਾਰੇਹਿ ਉਸੂਹਿ ਵਿਜ੍ਝਤਿ, ਏਵਮੇਵ ਏਕਵਾਰੇਨੇਵ ਪਰਾਜਯਂ ਪਤ੍ਤਂ ਪਨ ਵਾਦਸ੍ਸ ਅਨੁਕ੍ਖਿਪਨਤ੍ਥਾਯ ਕਤਿਪਯਵਾਰੇਹਿ ਪਰਾਜਯਂ ਪਾਪੇਤੁਂ ਪਾਰੁਪਨਵਾਦਿਨੋ ਮਹਾਥੇਰਾ ਏਵਮਾਹਂਸੁ,- ਤਵ ਚੂਲ਼ਗਣ੍ਠਿਪਦੇਯੇਵ ਸਾਮਣੇਰਾਨਂ ਪਰਿਮਣ੍ਡਲਸੁਪ੍ਪਟਿਚ੍ਛਨ੍ਨਾਦੀਨਿ ਵਤ੍ਤਾਨਿ ਅਭਿਨ੍ਦਿਤ੍ਵਾਯੇਵ ਪਵਿਸਿਤਬ੍ਬੋਤਿ ਪੁਬ੍ਬੇ ਵਤ੍ਵਾ ਚੀਵਰਪਟਲਉਪਰਿਸਙ੍ਘਾਟਿਂ ਕਤ੍ਵਾ ਉਰਬਨ੍ਧਨਵਤ੍ਥਂ ਬਨ੍ਧਿਤਬ੍ਬਨ੍ਤਿ ਪਨ ਵੁਤ੍ਤਂ, ਕਸ੍ਮਾ ਪਨ ਪੁਬ੍ਬੇਨ ਅਪਰਂ ਅਸਂਸਨ੍ਦਿਤ੍ਵਾ ਵੁਤ੍ਤਂ, ਤੁਮ੍ਹਾਕਂ ਵਾਦੇ ਪਟਿਸਰਣਭੂਤਾਨਂ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰਾਨਂ ਨਤ੍ਥਿਤਾਯ ਅਮ੍ਹਾਕਂ ਪਟਿਸਰਣਭੂਤਂ ਚੂਲ਼ਗਣ੍ਠਿਪਦਨ੍ਤਿ ਵਦਥ, ਤੁਮ੍ਹਾਕਂ ਪਟਿਸਰਣਭੂਤਾ ਚੂਲ਼ਗਣ੍ਠਿਪਦਤੋਯੇਵ ਭਯਂ ਉਪ੍ਪਜ੍ਜਤੀਤਿ ਵਤ੍ਵਾ ਸਹ ਨਿਲੀਯਨਟ੍ਠਾਨੇਨ ਗਹਿਤਂ ਚੋਰਂ ਵਿਯ ਸਹ ਨਿਸ੍ਸਯੇਨ ਅਧਮ੍ਮਵਾਦਿਨੋ ਗਣ੍ਹਿਂਸੁ.

ਇਦਂ ਇਮਸ੍ਸ ਅਤ੍ਥਸ੍ਸ ਅਵਿਭਾਵਤ੍ਥਾਯ ਵਤ੍ਥੁ, –

ਅਤੀਤੇ ਕਿਰ ਬਾਰਾਣਸਿਤੋ ਅਵਿਦੂਰੇ ਨਦੀਤੀਰੇ ਗਾਮਕੇ ਪਾਟਲਿ ਨਾਮ ਨਟਮਚ੍ਚੋ ਵਸਤਿ. ਸੋ ਏਕਸ੍ਮਿਂ ਉਸ੍ਸਵ ਦਿਵਸੇ ਭਰਿਯਮਾਦਾਯ ਬਾਰਾਣਸਿਂ ਪਵਿਸਿਤ੍ਵਾ ਨਚ੍ਚਿਤ੍ਵਾ ਵੀਣਂ ਵਾਦਿਤ੍ਵਾ ਗਾਯਿਤ੍ਵਾ ਧਨਂ ਲਭਿਤ੍ਵਾ ਉਸ੍ਸਵਪਰਿਯੋਸਾਨੇ ਬਹੁ ਸੁਰਾਭਤ੍ਤਂ ਗਾਹਾਪੇਤ੍ਵਾ ਅਤ੍ਤਨੋ ਗਾਮਂ ਗਚ੍ਛਨ੍ਤੋ ਨਦੀਤੀਰਂ ਪਤ੍ਵਾ ਨਵੋਦਕਂ ਆਗਚ੍ਛਨ੍ਤਂ ਦਿਸ੍ਵਾ ਭਤ੍ਤਂ ਭੁਞ੍ਜਨ੍ਤੋ ਸੁਰਂ ਵਿਵਨ੍ਤੋ ਨਿਸੀਦਿਤ੍ਵਾ ਮਤ੍ਤੋ ਹੁਤ੍ਵਾ ਅਤ੍ਤਨੋ ਬਲਂ ਅਜਾਨਨ੍ਤੋ ਮਹਾਵੀਣਂ ਗੀਵਾਯ ਬਨ੍ਧਿਤ੍ਵਾ ਨਦਿਂ ਓਤਰਿਤ੍ਵਾ ਗਮਿਸ੍ਸਾਮੀਤਿ ਭਰਿਯਂ ਹਤ੍ਥੇ ਗਹੇਤ੍ਵਾ ਨਦਿਂ ਓਤਰਿ. ਵੀਣਾਛਿਦ੍ਦੇਹਿ ਉਦਕਂ ¶ ਪਾਵਿਸਿ. ਅਥ ਨਂ ਸਾ ਪੀਣਾ ਉਦਕੇ ਓਸੀਦਾਪੇਸਿ. ਭਰਿਯਾ ਪਨਸ੍ਸ ਓਸੀਦਨਭਾਵਂ ਞਤ੍ਵਾ ਤਂ ਵਿਸ੍ਸਜ੍ਜਿਤ੍ਵਾ ਉਤ੍ਤਰਿਤ੍ਵਾ ਨਦੀਤੀਰੇ ਅਟ੍ਠਾਸਿ. ਨਟਪਾਟਲਿ ਸਕਿਂ ਉਮ੍ਮੁਜ੍ਜਤਿ, ਸਕਿਂ ਨਿਮ੍ਮੁਜ੍ਜਤਿ, ਉਦਕਂ ਪਵਿਸਿਤ੍ਵਾ ਉਦ੍ਧੁਮਾਤਉਦਰੋ ਅਹੋਸਿ. ਅਥਸ੍ਸ ਭਰਿਯਾ ਚਿਨ੍ਤੇਸਿ,-ਮਯ੍ਹਂ ਸਾਮਿਕੋ ਇਦਾਨਿ ਮਰਿਸ੍ਸਤਿ, ਏਕਂ ਗੀਤਂ ਯਾਚਿਤ੍ਵਾ ਪਰਿਸਮਜ੍ਝੇ ਤਂ ਗਾਯਨ੍ਤੀ ਜੀਵਿਤਂ ਕਪ੍ਪੇਸ੍ਸਾਮੀਤਿ ਚਿਨ੍ਤੇਤ੍ਵਾ ਸਾਮਿ ਤ੍ਵਂ ਉਦਕੇ ਨਿਮ੍ਮੁਜ੍ਜਸਿ, ਏਕਂ ਮੇ ਗੀਤਂ ਦੇਹਿ, ਤੇਨ ਜੀਵਿਤਂ ਕਪ੍ਪੇਸ੍ਸਾਮੀਤਿ ਵਤ੍ਵਾ–

ਬਹੁਸ੍ਸੁਤਂ ਚਿਤ੍ਤਕਥਂ, ਗਙ੍ਗਾ ਵਹਤਿ ਪਾਟਲਿਂ;

ਵੁਯ੍ਹਮਾਨਕਂ ਭਦ੍ਦਨ੍ਤੇ, ਏਕਂ ਮੇ ਦੇਹਿ ਗਾਥਕਨ੍ਤਿ.

ਅਥ ਨਂ ਨਟਪਾਟਲਿ ਭਦ੍ਦੇ ਕਥਂ ਤਵ ਗੀਤਂ ਦਸ੍ਸਾਮਿ, ਇਦਾਨਿ ਮਹਾਜਨਸ੍ਸ ਪਤਿਸਰਣਭੂਤਂ ਉਦਕਂ ਮਂ ਮਾਰੇਤੀਤਿ ਵਤ੍ਵਾ–

ਯੇਨ ਸਿਞ੍ਚਨ੍ਤਿ ਦੁਕ੍ਖਿਤਂ, ਯੇਨ ਸਿਞ੍ਚਨ੍ਤਿ ਆਤੁਰਂ;

ਤਸ੍ਸ ਮਜ੍ਝੇ ਮਰਿਸ੍ਸਾਮਿ, ਜਾਤਂ ਸਰਣਤੋ ਭਯਨ੍ਤਿ.

ਅਥ ਅਤੁਲਤ੍ਥੇਰੋ ਅਤ੍ਤਨੋ ਪਤਿਸਰਣਭੂਤਾ ਚੂਲ਼ਗਣ੍ਠਿਪਦਤੋ ਭਯਂ ਉਪ੍ਪਜ੍ਜਿਤ੍ਵਾ ਕਿਞ੍ਚਿ ਵਤ੍ਤਬ੍ਬਂ ਅਜਾਨਿਤ੍ਵਾ ਅਧੋਮੁਖੋ ਹੁਤ੍ਵਾ ਪਰਾਜਾਯਂ ਪਤ੍ਤੋਤਿ.

ਅਯਂ ਅਤੁਲਤ੍ਥੇਰਸ੍ਸ ਤਤਿਯੋ ਪਰਾਜਯੋ.

ਅਥ ਰਾਜਾ ਤੇਸਂ ਦ੍ਵਿਨ੍ਨਂ ਪਕ੍ਖਾਨਂ ਵਚਨਂ ਸੁਤ੍ਵਾ ਚੂਲ਼ਗਣ੍ਠਿਪਦਸ੍ਸ ਪੁਬ੍ਬਾਪਰਵਿਰੋਧਿਦੋਸਹਿ ਆਕੁਲਤ੍ਤਾ ਸੁਤ੍ਤਸੁਤ੍ਤਾਨੁਲੋਮਾਦੀਸੁ ਅਪ੍ਪਵਿਟ੍ਠਤ੍ਤਾ ਆਗਮਸੁਦ੍ਧਿਯਾ ਚ ਅਭਾਵਤੋ ਪਰੋਵਸ੍ਸਸਤਂ ਚਿਰਂ ਠਿਤਸ੍ਸ ਗੇਹਸ੍ਸਵਿਯ ਅਤਿਦੁਬ੍ਬਲਵਸੇਨ ਅਥਿਰਤਂ ਜਾਨਿਤ੍ਵਾ ਇਦਾਨਿ ਸਾਸਨਂ ਪਰਿਸੁਦ੍ਧਂ ਭਵਿਸ੍ਸਤੀਤਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਮਮ ਵਿਜਿਤੇ ਸਬ੍ਬੇਪਿ ਭਿਕ੍ਖੂ ਪਾਰੁਪਨਵਸੇਨ ਸਮਾਨਵਾਦਿਕਾ ਹੋਨ੍ਤੂਤਿ ਆਣਂ ਠਪੇਸਿ. ਤਤੋ ¶ ਪਟ੍ਠਾਯ ਯਾਵਜ੍ਜਤਨਾ ਸਕਲੇਪਿ ਮਰਮ੍ਮਰਟ੍ਠੇ ਪਾਰੁਪਨਵਸੇਨ ਸਮਾਨਵਾਦਿਕਾ ਭਵਨ੍ਤੀਤਿ.

ਅਯਮੇਤ੍ਥ ਸਙ੍ਖੇਪੋ,-ਤੇਸਞ੍ਹਿ ਦ੍ਵਿਨ੍ਨਂ ਪਕ੍ਖਾਨਂ ਸਨ੍ਨਿਪਤਿਤ੍ਵਾ ਵਚਨਪ੍ਪਟਿਵਚਨ ਵਸੇਨ ਵਿਵਾਦਕਥਾ ਵਿਤ੍ਥਾਰੇਨ ਵੁਚ੍ਚਮਾਨਾ ਛਪਞ੍ਚਸਾਣਵਾਰਮਤ੍ਤਮ੍ਪਿ ਪਤ੍ਵਾ ਨਿਟ੍ਠਂ ਨ ਪਾਪੁਣੇਯ੍ਯ. ਯਸ੍ਮਾ ਪਨ ਸਬ੍ਬਂ ਅਨਵਸੇਸੇਤ੍ਵਾ ਵੁਚ੍ਚਮਾਨਂ ਅਯਂ ਸਾਸਨਵਂਸਪ੍ਪਟੀਪਿਕਾ ਅਤਿਪ੍ਪਪਞ੍ਚਾ ਭਵਿਸ੍ਸਤਿ, ਤਸ੍ਮਾ ਏਤ੍ਥ ਇਚ੍ਛਿਤਮਤ੍ਤਮੇਵ ਦਸ੍ਸਯਿਤ੍ਵਾ ਅਜ੍ਝੁਪੇਕ੍ਖਾਮਾਤਿ.

ਞਾਣਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜ ਗੁਰੁ ਪਨ ਸਙ੍ਘਰਾਜਾ ਮਹਾਥੇਰੋ ਸੀਹਲ਼ਦੀਪੇ ਅਮਰਪੁਰਨਿਕਾਯਿਕਾਨਂ ਭਿਕ੍ਖੂਨਂ ਆਦਿਭੂਤੋ ਆਚਰਿਯੋ ਬਹੂਪਕਾਰੋ. ਅਮਰਪੁਰਨਿਕਾਯੋਤਿ ਤਤ੍ਥੇਰਪ੍ਪਭਵੋਤਿ.

ਕਲਿਯੁਗੇ ਪਨ ਏਕਾਸੀਤਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਨਤ੍ਤਾ ਸਿਰਿਤ੍ਰਿਭਵਨਾਦਿਤ੍ਯਪਵਰਪਣ੍ਡਿਤਮਹਾਧਮ੍ਮਰਾਜਾਧਿਰਾਜਾ ਨਾਮ ਰਜ੍ਜਂ ਕਾਰੇਸਿ. ਸੋ ਪਨ ਅਮਰਪੁਰਤੋ ਸਙ੍ਕਮਿਤ੍ਵਾ ਰਤਨਪੂਰਂ ਚਤੁਤ੍ਥਂ ਮਾਪੇਸਿ. ਤਸ੍ਸ ਰਞ੍ਞੋ ਕਾਲੇ ਗੁਣਮੁਨਿਨ੍ਦਾਧਿਪਤਿਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਸੀਸ੍ਸਂ ਸਜੀਵਗਾਮਵਾਸਿਂ ਸੀਲਾਚਾਰਂ ਨਾਮ ਥੇਰਂ ਅਰਞ੍ਞਵਾਸੀਨਂ ਭਿਕ੍ਖੂਨਂ ਪਾਮੋਕ੍ਖਟ੍ਠਾਨੇ ਠਪੇਸਿ. ਰਾਜਾਗਾਰਨਾਮਕੇ ਦੇਸੇ ਵਿਹਾਰਂ ਕਾਰਾਪੇਤ੍ਵਾ ਤਸ੍ਸੇਵ ਅਦਾਸਿ.

ਕਲਿਯੁਗੇ ਏਕਾਸੀਤਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਚਲਙ੍ਗਪੁਰਤੋ ਪਞ੍ਞਾਸੀਹਂ ਨਾਮ ਥੇਰਂ ਆਨੇਤ੍ਵਾ ਅਸੋਕਾਰਾਮੇ ਰਤਨਭੂਮਿਕਿਤ੍ਤਿਵਿਹਾਰੇ ਪਤਿਟ੍ਠਾਪੇਸਿ, ਮੁਨਿਨ੍ਦਾਭਿਸਿਰਿਸਦ੍ਧਮ੍ਮਧਜਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾਮਲਞ੍ਛਮ੍ਪਿ ਅਦਾਸਿ.

ਕਲਿਯੁਗੇ ਚਤੂਸੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਮੁਨਿਨ੍ਦਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾਮਲਞ੍ਛਂ ਦਤ੍ਵਾ ਮਹਾਜੇਯ੍ਯਭੂਮਿਵਿਹਾਰਰਮ੍ਮਣੀਯਂ ਨਾਮ ਵਿਹਾਰਂ ¶ ਦਤ੍ਵਾ ਤਂਯੇਵ ਮਹਾਥੇਰਂ ਸਙ੍ਘਰਾਜਟ੍ਠਾਨੇ ਠਪੇਸਿ.

ਏਕਸ੍ਮਿਞ੍ਚ ਸਮਯੇ ਮਹਾਥੇਰੇ ਰਾਜਾ ਪੁਚ੍ਛਿ,-ਚਤਸ੍ਸੋ ਦਾਠਾ ਨਾਮ ਚਤ੍ਤਾਲੀਸਾਯ ਦਨ੍ਤੇਸੁ ਅਨ੍ਤੋਗਧਾ ਵਾ, ਉਦਾਹੁ ਚਤ੍ਤਾਲੀਸਾਯ ਦਨ੍ਤੇਹਿ ਵਿਸੁਂ ਭੂਤਾਤਿ ਪੁਚ੍ਛਿ.

ਅਥ ਏਕਚ੍ਚੇ ਥੇਰਾ ਏਵਮਾਹਂਸੁ,-ਚਤਸ੍ਸੋ ਦਾਠਾ ਨਾਮ ਚਤ੍ਤਾਲੀਸਾਯ ਦਨ੍ਤੇਸੁ ਅਨ੍ਤੋਗਧਾਤਿ. ਏਕਚ੍ਚੇ ਪਨ ਚਤਸ੍ਸੋ ਦਾਠਾ ਨਾਮ ਚਤ੍ਤਾਲੀਸਾਯ ਦਨ੍ਤੇਹਿ ਵਿਸੁਂ ਭੂਤਾਤਿ ਆਹਂਸੁ. ਅਥ ਰਾਜਾ ਗਨ੍ਥਂ ਆਹਰਥਾਤਿ ਆਹ. ਅਥ ਅਨ੍ਤੋਗਧਵਾਦਿਕਾ ਥੇਰਾ ਗਨ੍ਥਂ ਆਹਰਿਂਸੁ,- ਅਞ੍ਞੇਸਂ ਪਰਿਪੁਣ੍ਣਦਨ੍ਤਾਨਮ੍ਪਿ ਦ੍ਵਤ੍ਤਿਂਸਦਨ੍ਤਾ ਹੋਨ੍ਤਿ, ਇਮਸ੍ਸ ਪਨ ਚਤ੍ਤਾਲੀਸਂ ਭਵਿਸ੍ਸਨ੍ਤੀਤਿ ਚ.

ਦਨ੍ਤਾਤਿ ਪਰਿਪੁਣ੍ਣਦਨ੍ਤਸ੍ਸ ਦ੍ਵਤ੍ਤਿਂਸਦਨ੍ਤਟ੍ਠਿਕਾਨਿ. ਤੇਪਿ ਵਣ੍ਣਤੋ ਸੇਤਾ, ਸਣ੍ਠਾਨਤੋ ਅਨੇਕਸਣ੍ਠਾਨਾ. ਤੇਸਞ੍ਹਿ ਹੇਟ੍ਠਿਮਾਯ ਤਾਵ ਦਨ੍ਤਪਾਲ਼ਿਯਾ ਮਜ੍ਝੇ ਚਤ੍ਤਾਰੋ ਦਨ੍ਤਾ ਮਤ੍ਤਿਕਾਪਿਣ੍ਡੇ ਪਟਿਪਾਟਿਯਾ ਠਪਿਤਆਲਾਬੁਬੀਜਸਣ੍ਠਾਨਾ, ਤੇਸਂ ਉਭੋਸੁ ਪਸ੍ਸੇਸੁ ਏਕੇਕੋ ਏਕਮੂਲਕੋ ਏਕਕੋਟਿਕੋ ਮਲ੍ਲਿਕਮਕੁਲ਼ਸਣ੍ਠਾਨੋ, ਤਤੋ ਏਕੇਕੋ ਦ੍ਵਿਮੂਲਕੋ ਦ੍ਵਿਕੋਟਿਕੋ ਯਾਨਕਉਪਤ੍ਥਮ੍ਫਿਨਿਸਣ੍ਠਾਨੋ, ਤਤੋ ਦ੍ਵੇ ਦ੍ਵੇ ਤਿਮੂਲਕਾ ਤਿਕੋਟਿਕਾ, ਤਤੋ ਦ੍ਵੇ ਦ੍ਵੇ ਚਤੁਮੂਲਕਾ ਚਤੁਕੋਟਿਕਾਤਿ. ਉਪਰਿਮਾਯ ਦਨ੍ਤਪਾਲ਼ਿਯਾਪਿ ਏਸੇਵ ਨਯੋਤਿ ਚ.

ਤਸ੍ਸ ਕਿਰ ਉਤ੍ਤਰੋਟ੍ਠਅਪ੍ਪਕਤਾਯ ਤਿਰਿਯਂ ਫਾਲੇਤ੍ਵਾ ਅਪਨੀਤਦ੍ਧਂਵਿਯ ਖਾਯਤਿ, ਚਤ੍ਤਾਰੋ ਦਨ੍ਤੇ ਦ੍ਵੇ ਚ ਦਾਠਾ ਨ ਛਾਦੇਤਿ, ਤੇਨ ਨਂ ਓਟ੍ਠਦ੍ਧੋਤਿ ਵੋਹਰਨ੍ਤੀਤਿ ਚ.

ਤਤ੍ਥ ਤਸ੍ਸਾਤਿ ਲਿਚ੍ਛਵਿਨੋ ਨਾਮ ਰਾਜਕੁਮਾਰਸ੍ਸ, ਉਤ੍ਤਰੋਟ੍ਠਅਪ੍ਪਕਤਾਯਾਤਿ ਉਪਰਿ ਓਟ੍ਠਸ੍ਸ ਅਪ੍ਪਕਤਾਯ. ਅਪਨੀਤਦ੍ਧਂ ਵਿਯਾਤਿ ਉਪਰਿ ਓਟ੍ਠਸ੍ਸ ਉਪਡ੍ਢਭਾਗਂ ਅਪਨੀਤਂ ਵਿਯ ਖਾਯਤੀਤਿ ਅਤ੍ਥੋ. ਨ ਛਾਦੇਤੀਤਿ ਉਪਰਿ ਓਟ੍ਠਸ੍ਸ ਉਪਡ੍ਢਭਾਗੇ ਪਨ ਨ ਪਟਿਚ੍ਛਾਦੇਤਿ. ਤੇਨਾਹਿ ਯੇਨ ਚਤ੍ਤਾਰੋ ਦਨ੍ਤੇ ਦ੍ਵੇ ਚ ਦਾਠਾ ਨ ਛਾਦੇਤਿ, ਤੇਨ ਨਂ ਲਿਚ੍ਛਵੀਰਾਜਕੁਮਾਰਂ ਓਟ੍ਠਦ੍ਧੋਤਿ ਵੋਹਰਨ੍ਤੀਤਿ ¶ . ਏਵਂ ਅਨ੍ਤੋਗਧਵਾਦੇਹਿ ਥੇਰੇਹਿ ਗਨ੍ਥਂ ਆਹਰਿਤ੍ਵਾ ਦਸ੍ਸਿਤੇ ਸਬ੍ਬੇਪਿ ਤਸ੍ਮਿਂ ਵਾਦੇ ਪਤਿਟ੍ਠਹਿਂਸੂਤਿ.

ਏਕਸ੍ਮਿਞ੍ਚ ਕਾਲੇ ਰਾਜਾ ਮਨ੍ਤਿਨਿਂ ਅਮਚ੍ਚਂ ਪੁਚ੍ਛਿ,-ਪੁਬ੍ਬਰਾਜੂਹਿ ਵਿਹਾਰਸ੍ਸ ਚੇਤਿਯਸ੍ਸ ਵਾ ਦਿਨ੍ਨਾਨਿ ਖੇਤ੍ਤਵਤ੍ਥੁਆਦੀਨਿ ਪਚ੍ਛਿਮਰਾਜੂਨਂ ਕਾਲੇ ਯਥਾਦਿਨ੍ਨਂ ਤਾਨਿ ਪਤਿਟ੍ਠਹਨ੍ਤਿ ਵਾ ਮਾ ਵਾਤਿ.

ਅਥ ਮਨ੍ਤਿਨਿਆਮਚ੍ਚੋ ਏਵਂ ਕਥੇਸਿ,- ਸਙ੍ਘਿਕਾਯ ਭੂਮਿਯਾ ਪੁਗ੍ਗਲਿਕਾਨਿ ਬੀਜਾਨਿ ਰੋਪਯਨ੍ਤਿ, ਭਾਗਂ ਦਤ੍ਵਾ ਪਰਿਭੁਞ੍ਜਿਤਬ੍ਬਾਨੀਤਿ ਦਸਕੋਟ੍ਠਾਸੇ ਕਤ੍ਵਾ ਏਕੋ ਕੋਟ੍ਠਾਸੋ ਭੂਮਿਸ੍ਸਾਮਿਕਾਨਂ ਦਾਤਬ੍ਬੋਤਿ ਚ ਵਿਨਯਪਾਲ਼ਿਅਟ੍ਠਕਥਾਸੁ ਵੁਤ੍ਤਤ੍ਤਾ ਪੁਬ੍ਬੇ ਏਕੇਨ ਰਞ੍ਞਾ ਦਿਨ੍ਨਾਨਿ ਖੇਤ੍ਤਵਤ੍ਥੁਆਦੀਨਿ ਪਚ੍ਛਾ ਏਕਸ੍ਸ ਰਞ੍ਞੋ ਕਾਲੇ ਯਥਾਦਿਨ੍ਨਂ ਠਿਤਾਨਿ. ਏਤ੍ਥ ਹਿ ਸਙ੍ਘਿਕਾਯ ਭੂਮਿਯਾਤਿ ਵੁਤ੍ਤਤ੍ਤਾ ਲਾਭਸੀਮਾਯਂਵਿਯ ਬਲਿਂਯੇਵ ਅਦਤ੍ਵਾ ਸਹ ਭੂਮਿਯਾ ਦਿਨ੍ਨਤ੍ਤਾ ਪਵੇਣੀਵਸੇਨ ਸਙ੍ਘਿਕਾ ਭੂਮਿ ਅਤ੍ਥੀਤਿ ਵਿਞ੍ਞਾਯਤਿ. ਏਤ੍ਥਚ ਪਟਿਗ੍ਗਾਹਕੇਸੁ ਮਤੇਸੁ ਤਦਞ੍ਞੋ ਚਤੁਦ੍ਦਿਸਸਙ੍ਘੋ ਅਨਾਗਤਸਙ੍ਘੋ ਚ ਇਸ੍ਸਰੋ, ਤਸ੍ਸ ਸਨ੍ਤਕੋ, ਤੇਨ ਵਿਚਾਰੇਤਬ੍ਬੋਤਿ.

ਚੇਤਿਯ ਪਦੀਪਤ੍ਥਾਯ ਪਟਿਸਙ੍ਖਾਰਣਤ੍ਥਾਯ ਵਾ ਦਿਇਨ੍ਨਆਰਾਮੋਪਿ ਜਗ੍ਗਿਤਬ੍ਬੋ, ਵੇਤ੍ਤਨਂ ਅਤ੍ਵਾਪਿ ਜਗ੍ਗਾਪੇਤਬ੍ਬੋਤਿ ਚੇਤਿਯੇ ਛਤ੍ਤਂ ਵਾ ਵੇਦਿਕਂ ਵਾ ਜਿਣ੍ਣਂ ਵਾ ਪਟਿਸਙ੍ਖਰੋਨ੍ਤੇਨ ਸੁਧਾਕਮ੍ਮਾਦੀਨਿ ਵਾ ਕਰੋਨ੍ਤੇਨ ਚੇਤਿਯਸ੍ਸ ਉਪਨਿਕ੍ਖੇਪਤੋ ਕਾਰੇਤਬ੍ਬਨ੍ਤਿ ਚ ਅਟ੍ਠਕਥਾਯਂ ਵੁਤ੍ਤਤ੍ਤਾ ਪੁਬ੍ਬਰਾਜੂਹਿ ਚੇਤਿਯਸ੍ਸ ਦਿਨ੍ਨਾਨਿ ਖੇਤ੍ਤਵਤ੍ਥੁਆਦੀਨਿ ਪਚ੍ਛਿਮਰਾਜੂਨਂ ਕਾਲੇਪਿ ਚੇਤਿਯਸਨ੍ਤਕਸਾਵੇਨੇਵ ਠਿਤਾਨੀਤਿ ਵੇਦਿਤਬ੍ਬਾਨਿ.

ਅਥਾਪਰਮ੍ਪਿ ਪੁਚ੍ਛਿ,- ਕਦਾ ਕਸ੍ਸ ਰਞ੍ਞੋ ਕਾਲੇ ਆਦਿਂ ਕਤ੍ਵਾ ਖੇਤ੍ਤਵਤ੍ਥੁਆਦੀਨਿ ਵਿਹਾਰਸ੍ਸ ਚੇਤ੍ਯਸ੍ਸ ਵਾ ਦਿਨ੍ਨਾਨੀਤਿ.

ਅਥ ਮਨ੍ਤਿਨਮਚ੍ਚੋ ਏਵਮਾਹ,-ਪੁਰਿਮਕਪ੍ਪੇਸੁ ਪੁਰਿਮਾਨਂ ਰਾਜੂਨਂ ਕਾਲੇਪਿ ਵਿਹਾਰਸ੍ਸ ਚੇਤਿਯਸ੍ਸ ਵਾ ਦਿਨ੍ਨਾਨੀਤਿ ਵੇਦਿਤਬ੍ਬਾਨਿ, ਤੇਨੇਵ ਸੁਜਾਤਸ੍ਸ ਨਾਮ ਭਗਵਤੋ ਅਮ੍ਹਾਕਂ ਬੋਧਿਸਤ੍ਤੋ ¶ ਚਕ੍ਕਵਤ੍ਤਿਰਾਜਾ ਸਦ੍ਧਿਂ ਸਤ੍ਤਹਿ ਰਤਨੇਹਿ ਦ੍ਵਿਸਹਸ੍ਸੇ ਖੁਦ੍ਦਕਦੀਪੇ ਚਤ੍ਤਾਰੋ ਮਹਾਦੀਪੇ ਚ ਅਦਾਸਿ, ਰਟ੍ਠਵਾਸਿਨੋ ਚ ਆਰਾਮਗੋਪਕਕਿਚ੍ਚਂ ਕਾਰਾਪੇਸੀਤਿ ਗਨ੍ਥੇਸੁ ਆਗਤਂ, ਤਸ੍ਮਾ ਚਿਰਕਾਲਤੋਯੇਵ ਪਟ੍ਠਾਯ ਪੁਬ੍ਬਰਾਜੂਹਿ ਖੇਤ੍ਤਵਤ੍ਥੁਆਦਿਨਿ ਦਿਨ੍ਨਾਨੀਤਿ ਵੇਦਿਤਬ੍ਬਾਨਿ.

ਰਾਜਵਂਸੇਸੁਪਿ ਭਗਵਤੋ ਪਰਿਨਿਬ੍ਬਾਨਤੋ ਵਸ੍ਸਸਤਾਨਂ ਉਪਰਿ ਸਿਰਿਖੇਤ੍ਤਨਗਰੇ ਏਕਾਯ ਆਪੂਪਿਕਾਯ ਪਞ੍ਚਕਰੀਸ ਮਤ੍ਤਂ ਖੇਤ੍ਤਂ ਏਕਸ੍ਸ ਥੇਰਸ੍ਸ ਦਿਨ੍ਨਂ, ਤਂ ਦ੍ਵਤ੍ਤਪੋਙ੍ਕੋ ਨਾਮ ਰਾਜਾ ਵਿਲੁਮ੍ਪਿਤ੍ਵਾ ਗਣ੍ਹਿ. ਅਥ ਪਹਾਰਘਣ੍ਟਭੇਰਿਯੋ ਪਹਰਿਤਾਪਿ ਸਦ੍ਦਂ ਨ ਅਕਂਸੁ. ਰਞ੍ਞੋ ਕੁਨ੍ਤਚਕ੍ਕਮ੍ਪਿ ਯਥਾ ਪੁਬ੍ਬੇ, ਤਥਾ ਪੇਸਿਤਟ੍ਠਾਨਂ ਨ ਗਚ੍ਛਿ. ਅਥ ਤਂ ਕਾਰਣਂ ਞਤ੍ਵਾ ਆਪੂਪਿਕਾਯ ਯਥਾਦਿਨ੍ਨਮੇਵ ਥੇਰਸ੍ਸ ਨਿਯ੍ਯਾਦੇਸੀਤਿ.

ਕਲਿਯੁਗੇ ਪਨ ਨਵਨਵੁਤਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਸ੍ਸ ਕਨਿਟ੍ਠੋ ਸਿਰਿਪਵਰਾਦਿਤ੍ਯਲੋਕਾਪੇਤਿ ਵਿਜਯਮਹਾਧਮ੍ਮਰਾਜਾਧਿਰਾਨਾ ਰਜ੍ਜਂ ਕਾਰੇਸਿ, ਸੋ ਪਨ ਰਾਜਾ ਰਤਨਪੂਰਤੋ ਸਙ੍ਕਮਿਤ੍ਵਾ ਅਮਰਪੁਰਂ ਦੁਤਿਯਂ ਮਾਪੇਸਿ. ਤਸ੍ਸ ਰਞ੍ਞੋ ਰਜ੍ਜਂ ਪਤ੍ਤਸਂਵਚ੍ਛਰੇਯੇਵ ਜੇਟ੍ਠਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਯਂ ਰਤਨਪੂਰਨਗਰੇ ਮਾਰਵਿਜਯਰਤਨਸੁਧਮ੍ਮਾਯ ਨਾਮ ਪਿਟਕਸਾਲਾਯ ਸੂਰਿਯਵਂਸਸ੍ਸ ਨਾਮ ਥੇਰਸ੍ਸ ਪਰਿਸਮਜ੍ਝੇ ਰਾਜਲੇਖਨਂ ਵਾਚਾਪੇਤ੍ਵਾ ਸਙ੍ਘਰਜ੍ਜਂ ਨਿਯ੍ਯਾਦੇਸਿ. ਸੂਰਿਯਵਂਸਾਭਿਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾ ਮਲਞ੍ਛਮ੍ਪਿ ਅਦਾਸਿ.

ਸੋ ਪਨ ਥੇਰੋ ਕਲਿਯੁਗੇ ਪਞ੍ਚਵੀਸਾਧਿਕੇ ਵਸ੍ਸਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਮਿਗਸਿਰਮਾਸਸ੍ਸ ਜੁਣ੍ਹਪਕ੍ਖਸਤ੍ਤਮਿਯਂ ਸੁਤ੍ਤਵਾਰੇ ਵਾਲੁਕਵਾਪਿਗਾਮੇ ਪਟਿਸਨ੍ਧਿਯਾ ਵਿਜਾਤੋਤਿਸਤ੍ਤਤਿਵਯਂ ਸਮ੍ਪਤ੍ਤੇ ਸਙ੍ਘਰਜ੍ਜਂ ਪਤ੍ਤੋ ਸਨ੍ਤਿਨ੍ਦ੍ਰਿਯੋ ਖਨ੍ਤੀ ਧਮ੍ਮੋ ਸਿਕ੍ਖਾਕਾਮੋ ਪਰਿਯਤ੍ਤਿਵਿਹਾਰਦੋ ਤਿਪਿਟਕਾਲਙ੍ਕਾਰਮਹਾਧਮ੍ਮਰਾਜਗੁਰੁਤ੍ਥੇਰਸ੍ਸ ਸਿਸ੍ਸੋ. ਸੋ ਪਨ ਕਲਿਯੁਗੇ ਪਨ੍ਨਰਸਾਧਿਕੇ ¶ ਦ੍ਵਿਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਤਸ੍ਸ ਰਞ੍ਞੋ ਕਾਲੇਯੇਵ ਮਚ੍ਚੁਵਸਂ ਪਤ੍ਤੋ.

ਅਥ ਰਾਜਾ ਅਨੇਕਸਹਸ੍ਸੇਹਿ ਪਾਸਾਦੇਹਿ ਅਭੂਤਪੁਬ੍ਬੇਹਿ ਅਚ੍ਛਰਿਯਕਮ੍ਮੇਹਿ ਸਰੀਰਝਾਪਨਕਿਚ੍ਚਂ ਅਕਾਸਿ. ਅਥ ਕਲਿਯੁਗੇ ਸੇਲ਼ਸਾਧਿਕੇ ਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਤਸ੍ਸ ਮਹਾਥੇਰਸ੍ਸ ਸਿਸ੍ਸਂ ਞੇਯ੍ਯਧਮ੍ਮਂ ਨਾਮ ਥੇਰਂ ਪੁਨ ਸਙ੍ਘਰਾਜਟ੍ਠਾਨੇ ਠਪੇਸਿ. ਪਠਮਂ ਞੇਯ੍ਯਧਮ੍ਮਾਲਙ੍ਕਾਰਧਮ੍ਮ ਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੂਤਿ ਨਾਮਲਞ੍ਛਂ ਅਦਾਸਿ. ਤਤੋ ਪਚ੍ਛਾ ਦੁਤਿਯਂ ਞੇਯ੍ਯਧਮ੍ਮਾਭਿਵਂਸਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜ- ਗੁਰੂਤਿ ਨਾਮਲਞ੍ਛਂ ਅਦਾਸਿ.

ਸੋ ਪਨ ਥੇਰੋ ਕਲਿਯੁਗੇ ਏਕਸਟ੍ਠਾਧਿਕੇ ਵਸ੍ਸਸਤੇ ਸਹਸ੍ਸੇਚ ਦੇਵਸੂਰਗਾਮੇ ਪਟਿਸਨ੍ਧਿਯਾ ਵਿਜਾਤੋ ਹੁਤ੍ਵਾ ਅਸੀਤਾਧਿਕੇ ਵਸ੍ਸਸਤੇ ਸਹਸ੍ਸੇਚ ਪਠਮਆਸਾਲ਼ਿਮਾਸਸ੍ਸ ਜੁਣ੍ਹਪਕ੍ਖਚੁਦ੍ਦਸਮਿਯਂ ਉਪਸਮ੍ਪਦਭੂਮਿਂ ਪਤ੍ਤੋ.

ਤਸ੍ਸ ਰਞ੍ਞੋ ਕਾਲੇ ਕਲਿਯੁਗੇ ਨਵਨਵੁਤਾਧਿਕੇ ਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਸੀਹਲ਼ਦੀਪਤੋ ਪਞ੍ਞਾਤਿਸ੍ਸੋ ਨਾਮ ਥੇਰੋ ਸਦ੍ਧਿਂ ਸੁਨਨ੍ਦੇਨ ਨਾਮ ਭਿਕ੍ਖੁਨਾ ਇਨ੍ਦਸਾਰੇਨ ਨਾਮ ਸਾਮਣੇਰੇਨ ਏਕੇਨ ਉਪਾਸਕੇਨ ਏਕੇਨ ਦਾਰਕੇਨਚ ਅਮਰਪੁਰਂ ਨਾਮ ਨਗਰਂ ਸਮ੍ਪਤ੍ਤੋ. ਅਥ ਸਙ੍ਘਰਾਜਾ ਤੇਸਂ ਪਚ੍ਚਯਾਨੁਗ੍ਗਹੇਨ ਧਮ੍ਮਾਨੁਗ੍ਗਹੇਚ ਅਨੁਗ੍ਗਹੇਸਿ. ਤੇਸੁ ਅਪਰਭਾਗੇ ਕਲਿਯੁਗੇ ਦ੍ਵਿਵਸ੍ਸਾਧਿਕੇ ਦ੍ਵਿਸਤੇ ਵਸ੍ਸਸਹਸ੍ਸੇਚ ਸਮ੍ਪਤ੍ਤੇ ਪਞ੍ਞਾਤਿਸ੍ਸਤ੍ਥੇਰੋ ਜਰਰੋਗੇਨ ਅਭਿਭੂਤਤ੍ਤਾ ਸਙ੍ਖਾਰਧਮ੍ਮਾਨਂ ਸਭਾਵਂ ਅਨਤਿਵਤ੍ਤਤ੍ਤਾ ਕਾਲਮਕਾਸਿ. ਤਸ੍ਸ ਪੁਨ ਸਿਕ੍ਖਂ ਗਣ੍ਹਿਸ੍ਸਾਮੀਤਿ ਪਰਿਵਿਤਕ੍ਕੋ ਮਤ੍ਥਕਂ ਅਪ੍ਪਤ੍ਤੋ ਹੁਤ੍ਵਾ ਵਿਨਸ੍ਸਯਿ. ਤੇਨਾਹਭਗਵਾ, –

ਅਚਿਨ੍ਤਿਤਮ੍ਪਿ ¶ ਭਵਤਿ, ਚਿਨ੍ਤਿ ਤਮ੍ਪਿ ਵਿਨਸ੍ਸਤਿ;

ਨ ਹਿ ਚਿਨ੍ਤਾਮਯਾ ਭੋਗਾ, ਇਤ੍ਥਿਯਾ ਪੁਰਿਸਸ੍ਸ ਵਾਤਿ.

ਇਮਸ੍ਮਿਂ ਪਨ ਲੋਕੇ ਪਣ੍ਡਿਤੋ ਪੁਞ੍ਞਂ ਕਤ੍ਤੁਕਾਮੋ ਅਭਿਤ੍ਥਰੇਵ ਕਰੇਯ੍ਯ. ਕੋ ਨਾਮ ਜਞ੍ਞਾ ਅਜ੍ਜੇ ਵਾ ਸੁਵੇ ਵਾ ਪਰਸੁਵੇ ਵਾ ਮਰਣਂ ਭਵਿਸ੍ਸਭੀਤਿ. ਤੇਨਾਹ ਭਗਵਾ, –

ਅਭਿਤ੍ਥਰੇਥ ਕਲ੍ਯਾਣੇ, ਪਾਪਾ ਚਿਤ੍ਤਂ ਨਿਵਾਰਯੇ;

ਦਨ੍ਦਞ੍ਹਿ ਕਰਤੋ ਪੁਞ੍ਞਂ, ਪਾਪਸ੍ਮਿਂ ਰਮਤੀ ਮਨੋਤਿ.

ਅਥ ਮਹਾਰਾਜਾ ਤਸ੍ਸ ਸਰੀਰਝਾਪਨਕਿਚ੍ਚਂ ਬਹੂਹਿ ਸਾਧੁਕੀਲ਼ਨਸਭਾਯੇਹਿ ਅਕਾਸਿ. ਤਤੋ ਪਚ੍ਛਾ ਸੁਨਨ੍ਦਸ੍ਸ ਨਾਮ ਭਿਕ੍ਖੁਸ੍ਸ ਪੁਨ ਸਿਕ੍ਖਂ ਅਦਾਸਿ. ਸਾਮਣੇਰਂ ਪਨ ਉਪਸਮ੍ਪਦਭੂਮਿਯਂ ਪਤਿਟ੍ਠਾਪੇਸਿ. ਦਾਰਕਞ੍ਚ ਸਾਮਣੇਰਭੂਮਿਯਨ੍ਤਿ.

ਤੇ ਪਨ ਮਹਾਰਾਜਾ ਕਲਿਯੁਗੇ ਤਿਵਸ੍ਸਾਧਿਕੇ ਦ੍ਵਿਸਤੇ ਸਹਸ੍ਸੇਚ ਸਮ੍ਪਤ੍ਤੇ ਮਾਘਮਾਸੇ ਬਹੂਹਿ ਪਚ੍ਚਯੇਹਿ ਉਪਤ੍ਥਮ੍ਭੇਤ੍ਵਾ ਤਾਨਿਤਾਨਿ ਸਬ੍ਬਾਨਿ ਕਮ੍ਮਾਨਿ ਤੀਰੇਤ੍ਵਾ ਕੁਸਿਮਨਗਰਜੇਟ੍ਠਸ੍ਸ ਏਕਸ੍ਸ ਅਮਚ੍ਚਸ੍ਸ ਭਾਰਂ ਕਤ੍ਵਾ ਤਸ੍ਸੇਵ ਸਬ੍ਬਾਨਿ ਕਿਚ੍ਚਾਨਿ ਨਿਯ੍ਯਾਦੇਤ੍ਵਾ ਸੀਹਲ਼ਦੀਪਂ ਪਹਿਣੀਤਿ.

ਸਙ੍ਘਰਾਜਾਮਹਾਥੇਰੋ ਪਨ ਸਾਸਨਸ੍ਸ ਚਿਰਟ੍ਠਿਤਤ੍ਥਾਯ ਸੋਤਾਰਾਨਂ ਸੁਖਪ੍ਪਟਿਬੋਧਨਤ੍ਥਾਯ ਨਾਨਾਗਨ੍ਥੇਹਿ ਪਾਠਂ ਵਿਸੋਧੇਤ੍ਵਾ ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਨਾਮ ਮਹਾਨਿਦ੍ਦੇਸਟ੍ਠਕਥਾਯ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ. ਬਹੂਨਂ ਸਿਸ੍ਸਾਨਂ ਪਰਿਯਤ੍ਤਿਵਾਚਨਵਸੇਨ ਜਿਨਸਾਸਨਸ੍ਸ ਅਨੁਗ੍ਗਹਂ ਅਕਾਸੀਤਿ.

ਅਪਰਭਾਗੇ ਕਲਿਯੁਗੇ ਅਟ੍ਠਵਸ੍ਸਾਧਿਕੇ ਦ੍ਵਿਸਕੇ ਸਹਸ੍ਸੇਚ ਸਮ੍ਪਤ੍ਤੇ ਮਿਗਸਿਰਮਾਸਸ੍ਸ ਜੁਣ੍ਹਪਕ੍ਖਅਟ੍ਠਮਿਯਂ ਤਸ੍ਸ ਪੁਤ੍ਤੋ ਸੀਰਿਪਵਰਾਦਿਤ੍ਯਵਿਜਯਾਨਨ੍ਤਯਸਮਹਾਧਮ੍ਮਰਾਜਾਧਿਰਾਜਾ ਨਾਮ ਰਜ੍ਜਂ ਕਾਰੇਸਿ. ਤਦਾ ਸੂਰਿਯਵਂਸਾਭਿਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੁ- ਮਹਾਥੇਰਸ੍ਸ ਸਿਸ੍ਸਂ ਪਞ੍ਞਾਜੋਤਾਭਿਧਜਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਂ ¶ ਸਙ੍ਘਰਾਜਟ੍ਠਾਨੇ ਠਪੇਸਿ.

ਸੋਪਿ ਸੀਲਵਾ ਪਰਿਯਤ੍ਤਿਕੋਵਿਦੋ ਸਿਕ੍ਖਾਕਾਮੋ ਲਜ੍ਜੀਪੇਸਲੋ. ਅਙ੍ਗੁਤ੍ਤਰਨਿਕਾਯਪਾਲ਼ਿਯਾ ਤਦਟ੍ਠਕਥਾਯਚ ਅਤ੍ਥ ਯੋਜਨਂ ਮਰਮ੍ਮਭਾਸਾਯ ਅਕਾਸਿ.

ਤਸ੍ਸ ਰਞ੍ਞੋ ਕਾਲੇ ਞੇਯ੍ਯਧਮ੍ਮਾਭਿਵਂਸਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜ- ਗੁਰੁਤ੍ਥੇਰੋ ਸਦ੍ਧਮ੍ਮਵਿਲਾਸਿਨਿਯਾ ਨਾਮ ਪਟਿਸਮ੍ਭਿਦਾਮਗ੍ਗਟ੍ਠਕਥਾਯ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ.

ਮਣਿਜੋਤਸਦ੍ਧਮ੍ਮਾਲਙ੍ਕਾਰਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰੋਸਂਯੁਤ੍ਤ- ਨਿਕਾਯਪਾਲ਼ਿਯਾ ਤਦਟ੍ਠਕਥਾਯਚ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ.

ਮੇਧਾਭਿਵਂਸਸਦ੍ਧਮ੍ਮਧਜਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰੋ ਦੀਘਨਿਕਾਯਪਾਲ਼ਿਯਾ ਤਦਟ੍ਠਕਥਾਯਚ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿ.

ਞੇਯ੍ਯਧਮ੍ਮਾਭਿਵਂਸਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿਮਹਾ ਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਸਿਸ੍ਸੋ ਉਪਸਮ੍ਪਦਾਵਸੇਨ ਪਞ੍ਚਵਸ੍ਸਿਕੋ ਪਞ੍ਞਾਸਾਮਿ ਨਾਮਾਹਂ ਸਦ੍ਦਤ੍ਥਭੇਦਚਿਨ੍ਤਾਨਾਮਕਸ੍ਸਗਨ੍ਥਸ੍ਸ ਗਣ੍ਠਿਪਦਤ੍ਥਵਣ੍ਣਨਂ ਮਰਮ੍ਮਭਾਸਾਯ ਅਕਾਸਿਂ. ਦਸਵਸ੍ਸਿਕਕਾਲੇ ਪਨ ਅਭਿਧਾਨਪ੍ਪਦੀਪਿਕਾਸਂਵਣ੍ਣਨਾਯ ਅਤ੍ਥਯੋਜਨਂ ਮਰਮ੍ਮਭਾਸਾਯ ਅਕਾਸਿਂ. ਤਸ੍ਸਾਚ ਪਾਠਂ ਬਹੂਹਿ ਗਨ੍ਥੇਹਿ ਸਂਸਦ੍ਦਿਤ੍ਵਾ ਵਿਸੋਧੇਸਿਨ੍ਤਿ.

ਅਪਰਭਾਗੇ ਸਕ੍ਕਰਾਜੇ ਚੁਦ੍ਦਸਾਧਿਕੇ ਦ੍ਵਿਸਤੇ ਸਹਸ੍ਸੇਚ ਸਮ੍ਪਤ੍ਤੇ ਅਯਂ ਅਮ੍ਹਾਕਂ ਧਮ੍ਮਿਕੋ ਰਾਜਾ ਅਨੇਕਸਤਜਾਤੀਸੁ ਉਪਚਿਤਪੁਞ੍ਞਾਨੁਭਾਵੇਨ ਜਿਨਸਾਸਨਸ੍ਸ ਪਗ੍ਗਣ੍ਹਨਤ੍ਥਾਯ ਸਮ੍ਮਾਦੇਵਲੋਕਪਾਲੇਹਿ ਉਯ੍ਯੋਜਿਯਨੋਵਿਯਰਜ੍ਜਸਮ੍ਪਤ੍ਤਿਂ ਪਟਿਲਭਿ. ਦਸਬਲਸ੍ਸਸਾਸਨਂ ਪਗ੍ਗਣ੍ਹਿਤੁਕਾਮਸ੍ਸ ਧਮ੍ਮਰਾਜਸ੍ਸ ਮਨੋਰਥੋ ਮਤ੍ਥਕਂ ਪਤ੍ਤੋ ਅਹੋਸਿ. ਮਰਿਯਾਦਂ ਭਿਨ੍ਦਿਤ੍ਵਾ ਦਿਨ੍ਨਕਤਮਗ੍ਗਂਵਿਯ ਉਦਕਂ ਲਦ੍ਧੋਕਾਸਤਾਯ ਸਦ੍ਧਾ ਮਹੋਘੋ ¶ ਅਵਤ੍ਥਰਿਤ੍ਵਾ ਤਿਟ੍ਠਤਿ. ਚਤ੍ਤਾਰਿਚ ਵਸ੍ਸਾਨਿ ਅਤਿਕ੍ਕਮਿਤ੍ਵਾ ਬੇਸਾਖਮਾਸੇ ਪਞ੍ਚਕਕੁਧਭਣ੍ਡਾਦੀਹਿ ਅਨੇਕੇਹਿ ਰਾਜਭੋਗ੍ਗਭਣ੍ਡੇਹਿ ਪਰਿਵਾਰੇਤ੍ਵਾ ਉਦੁਮ੍ਬਰਭਦ੍ਦਪਿਟ੍ਠੇ ਸਦ੍ਧਿਂ ਮਹੇਸਿਯਾ ਅਭਿਸੇਕਂ ਪਤ੍ਤੋ. ਤੇਨਾਵੋਚੁਮ੍ਹਾ ਨਾਗਰਾਜੁਪ੍ਪਤ੍ਤਿਕਥਾਯਂ,-

ਮਹਾਪੁਞ੍ਞੋਵ ਰਾਜਾਯਂ, ਕਟ੍ਠਟਘੇਵ ਆਗਤੇ;

ਸਕ੍ਕਰਾਜੇ ਹਿ ਸਮ੍ਪਤ੍ਤਿਂ, ਪਤ੍ਵਾ ਦਾਨੇ ਰਤੋ ਵਤੇ.

ਤਦਾ ਚਤ੍ਤਾਰਿ ਵਸ੍ਸਾਨਿ, ਅਤਿਕ੍ਕਮਿਤ੍ਵਾ ਵਿਸਾਧਿਕੇ;

ਸਦ੍ਧਿਂ ਮਹੇਸਿਯਾ ਸੇਕਂ, ਪਤ੍ਤੋ ਹੁਤ੍ਵਾ ਮਹਾਤਲੇ.

ਜਿਨਚਕ੍ਕਞ੍ਚ ਜੋਤੇਸਿ, ਮਹਾਸੋਕਾਦਯੋ ਯਥਾ;

ਅਲਜ੍ਜਿਨੋਚ ਨਿਗ੍ਗਯ੍ਹ, ਪਗ੍ਗਹੇਤ੍ਵਾਨ ਲਜ੍ਜਿਨੋ.

ਰਟ੍ਠੇਚ ਦਾਨਸੀਲੇਸੁ, ਭਾਵਨਾਯਾਭਿਯੁਞ੍ਚਯੇ;

ਨਿਮਿਰਾਜਾਦਯੋ ਯਥਾਤਿ.

ਤਦਾ ਯਸ੍ਮਾ ਅਲਜ੍ਜਿਨੋ ਨਿਗ੍ਗਹਿਤਬ੍ਬਪੁਗ੍ਗਲੇ ਅਵੀਚਿਨਰਕੇ ਨਿਕ੍ਖਿਪਨ੍ਤੋਵਿਯ ਨਿਗ੍ਗਹਕਮ੍ਮਂ ਅਕਾਸਿ, ਤਸ੍ਮਾ ਤੇ ਅਲਦ੍ਧੋਕਾਸਾ ਨਿਲੀਯਨ੍ਤਿ, ਯਥਾ ਅਰੁਣੁਗ੍ਗਮਨਕਾਲੇ ਕੋਸਿਯਾਤਿ. ਤੇਨਾਵੋਚੁਮ੍ਹਾ ਨਾਗਰਾਜੁਪ੍ਪਤ੍ਤਿਕਥਾਯਂ,-

ਤਦਾ ਪਨ ਜਿਨਚਕ੍ਕਂ, ਨਭੇ ਚਨ੍ਦੋਵ ਪਾਕਟਂ;

ਅਲਜ੍ਜਿਨੋ ਨਿਲੀਯਨ੍ਤਿ, ਅਰੁਣੁਗ੍ਗੇਵ ਕੋਸਿਯਾਤਿ.

ਯਸ੍ਮਾਚ ਲਜ੍ਜਿਨੋ ਪਗ੍ਗਹਿਤਬ੍ਬਪੁਗ੍ਗਲੇ ਭਵਗ੍ਗੇਉਕ੍ਖਿਪਨ੍ਤੋਵਿਯ ਪਗ੍ਗਹਕਮ੍ਮਂ ਕਰੋਤਿ, ਤਸ੍ਮਾ ਤੇ ਲਦ੍ਧੋਕਾਸਾ ਉਟ੍ਠਿਤਸੀਸਾ ਨਿਰਾਸਙ੍ਕਾ ਹੁਤ੍ਵਾ ਤਿਟ੍ਠਨ੍ਤਿ, ਯਥਾ ਚਨ੍ਦਿਮਸੂਰਿਯਾਲੋਕਾਨਂ ਪਟਿਲਦ੍ਧਕਾਲੇ ਆਦਿਕਪ੍ਪਿਕਾਤਿ. ਤੇਨਾਵੋਚੁਮ੍ਹਾ, –

ਤਦਾਪਿਚ ¶ ਜਿਨਚਕ੍ਕਂ, ਖੇ ਭਾਣੁਮਾਵ ਪਾਕਟਂ;

ਲਜ੍ਜਿਨੋਪਿ ਉਟ੍ਠਹਨ੍ਤਿ, ਓਭਾਲਦ੍ਧੇਵ ਕਪ੍ਪਿਕਾਤਿ.

ਤੇਪਿਟਕਮ੍ਪਿ ਨਵਙ੍ਗਂ ਬੁਦ੍ਧਵਚਨਂ ਚਿਰਟ੍ਠਿਤਿਕਂ ਕਤ੍ਤੁਕਾਮੋ ਪਰਿਯਤ੍ਤਿਵਿਸ੍ਸਰਦੇਹਿ ਮਹਾਥੇਰੇਹਿ ਵਿਸੋਧਾਪੇਤ੍ਵਾ ਲੇਖਕਾਨਂ ਭਤਿਂ ਦਤ੍ਵਾ ਕਣ੍ਠਜਮੁਦ੍ਧਜਾਦਿਵਿਧਾਨਂ ਸਿਥਿਲਧਨਿਤਾਦਿਵਿਧਾਨਞ੍ਚ ਪੁਨਪ੍ਪੁਨਂ ਵਿਚਾਰੇਤ੍ਵਾ ਅਨ੍ਤਮਸੋ ਪਰਿਚ੍ਛੇਦਲੇਖਮਤ੍ਤਮ੍ਪਿ ਅਵਿਰਾਧੇਤ੍ਵਾ ਅਨ੍ਤੇਪੁਰਂ ਪਵਿਸੇਤ੍ਵਾ ਸੁਵਣ੍ਣਮਯੇਸੁ ਲੋਹਮਯੇਸੁਚ ਪੋਤ੍ਥਕੇਸੁ ਲਿਖਾਪੇਸਿ. ਞਾਣਥਾਮਸਮ੍ਪਨ੍ਨੇਚ ਭਿਕ੍ਖੂ ਵਿਚਿਨੇਤ੍ਵਾ ਯਥਾਬਲਂ ਵਿਨਯਪਿਟਕਂ ਵਿਸੁਂ ਵਿਸੁਂ ਧਾਰੇਤਿ ਵਾਚੁਗ੍ਗਤਂ ਕਾਰਾਪੇਤਿ. ਅਗ੍ਗਮਹੇਸਿਂ ਆਦਿਂ ਕਤ੍ਵਾ ਸਕਲ ਓਰੋਧਾਦਯੋ ਬਹੂ ਰਾਜਸੇਵਕਾ ਅਮਚ੍ਚਾਦਯੋ ਨਾਗਰਿਕੇਚ ਯਥਾਬਲਂ ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਞ੍ਚ ਵਿਸੁਂ ਵਿਸੁਂ ਏਕੇਕਸੁਤ੍ਤਮਾਤਿਕਾਪਦਭਾਜਨੀਚਿਤ੍ਤਵਾਰਾਦਿਵਸੇਨ ਵਿਭਾਜੇਤ੍ਵਾ ਧਾਰੇਤਿ ਵਾਚੁਗ੍ਗਤਂ ਕਾਰਾਪੇਤਿ. ਸਯਞ੍ਚ ਅਨਤ੍ਤਲਕ੍ਖਣਾਦਿਕਂ ਅਨੇਕਵਿਧਂ ਸੁਤ੍ਤਂ ਦੇਵਸਿਕਂ ਸਜ੍ਝਾਯਂ ਕਰੋਤਿ. ਜਿਨਸਾਸਨਸ੍ਸ ਚਿਰਟ੍ਠਿਤਤ੍ਥਾਯਸਕਲਵਿਜਿਤੇਚ ਅਰਞ੍ਞਵਾਸੀਨਂ ਭਿਕ੍ਖੂਨਂ ਅਸ੍ਸਮਸ੍ਸ ਸਮਨ੍ਤਤੋ ਪਞ੍ਚਧਨੁਸਤਪ੍ਪਮਾਣੇ ਠਾਨੇਥਲਦਕਚਰਾਨਂ ਸਬ੍ਬੇਸਂ ਸਤ੍ਤਾਨਂ ਅਭਯਂ ਅਦਾਸਿ. ਪਰਿਯਤ੍ਤਿ ਵਿਸਾਰਦਾਨਞ੍ਚ ਥੇਰਾਨੁਥੇਰਾਨਂ ਮਾਤਾਪਿਤਾਦਯੋ ਞਾਤਕੇ ਸਬ੍ਬਰਾਜਕਿਚ੍ਚਤੋ ਬਲਿਕਮ੍ਮਤੋਚ ਮੋਚਾਪੇਤ੍ਵਾ ਯਥਾਸੁਖਂ ਵਸਾਪੇਤਿ. ਏਕਾਹੇਨੇਵਾਪਿ ਸਹਸ੍ਸਮਤ੍ਤੇ ਕੁਲਪੁਤ੍ਤੇ ਪਬ੍ਬਜੂਪਸਮ੍ਪਦਭੂਮੀਸੁ ਪਤਿਟ੍ਠਾਪੇਤ੍ਵਾ ਸਾਸਨਂ ਪਗ੍ਗਣ੍ਹਿ. ਅਞ੍ਞਾਨਿਪਿ ਬਹੂਨਿ ਪੁਞ੍ਞਕਮ੍ਮਾਨਿ ਕਰੋਤਿ. ਕਤ੍ਵਾਚ ਵਿਵਟ੍ਟਮੇਵ ਪਤ੍ਥੇਤਿ, ਨੋ ਵਟ੍ਟਂ. ਅਞ੍ਞੇਚ ਓਰੋਧਾਦਯੋ ਤੁਮ੍ਹੇ ਯਾਨਿ ਕਾਨਿਚਿ ਪੁਞ੍ਞਕਮ੍ਮਾਨਿ ਕਤ੍ਵਾ ਵਿਵਟ੍ਟਮੇਵ ਪਤ੍ਥੇਤ, ਮਾ ਵਟ੍ਟਨ੍ਤਿ ਅਭਿਣ੍ਹਂ ਓਵਦਤਿ. ਅਨਿਚ੍ਚਲਕ੍ਖਣਾਦਿਸਂਯੁਤ੍ਤਾਯ ਧਮ੍ਮਕਥਾਯ ਨਿਚ੍ਚਂ ਓਵਦਤਿ. ਸਯਮ੍ਪਿ ਸਮਥਵਿਪਸ੍ਸਨਾਸੁ ਨਿਚ੍ਚਾਰਦ੍ਧਂ ਅਕਾਸਿ. ਰਾਜੂਨਂ ਪਨ ਰਟ੍ਠਸਾਮਿਕਾਨਂ ਧਮ੍ਮਤਾਯ ਕਿਚ੍ਚਬਾਹੁਲ੍ਲਤਾਯ ਕਦਾਚਿ ਕਦਾਚਿ ਓਕਾਸਂ ਨ ਲਭਤਿ ਕਮ੍ਮਟ੍ਠਾਨਮਨੁਯੁਞ੍ਜਿਤੁਂ, ਏਵਮ੍ਪਿ ਸਮਾਨੋ ਸਰੀਰਮਲਪਰਿਜਗ੍ਗਨਕਾਲੇਪਿ ਕਮ੍ਮਟ੍ਠਾਨਮਨੁਯੁਞ੍ਜਤਿਯੇਵ, ਨ ਮੋਘਵਸੇਨ ਕਾਲਂ ਖੇਪੇਤਿ. ਲੋਕੇ ਹਿ ਅਮਙ੍ਗਲਸਮ੍ਮਤਾਨਿਪਿ ਮਨੁਸ੍ਸਸੀਸਕਪਾਲਟ੍ਠਿਆਦੀਨਿ ਸੁਸਾਸਨਤੋ ਆਨੇਤ੍ਵਾ ਦਨ੍ਤਕਟ੍ਠਾਦੀਨਿ ਵਾ ਤਂਸਦਿਸਾਨਿ ਕਾਰਾਪੇਤ੍ਵਾ ਅਤ੍ਤਨੋ ਸਮੀਪੇ ਠਪੇਤ੍ਵਾ ਅਟ੍ਠਿਕਾਦਿਭਾਵਨਾਮਯਪੁਞ੍ਞਂ ਵਿਚਿਨਾਤਿ.

ਤਦਾ ਪਨ ਅਮ੍ਹਾਕਂ ਆਚਰਿਯਵਰਂ ਪਰਿਯਤ੍ਤਿਵਿਸਾਰਦਂ ਤਿਕ੍ਖ ਜਵਨਗਚ੍ਛਿਰਾਦਿਞਾਣੋਪੇਤਂ ਵਿਚਿਤ੍ਰਧਮ੍ਮਦੇਸਨਾਕਥਂ ਸਕਲ ਮਰਮ੍ਮਿਕਭਿਕ੍ਖੂਨਂ ਓਨਮਿਤਟ੍ਠਾਨਭੂਤਂ ਵੁਦ੍ਧਾਪਚਾਯਿਂ ਰੂਪਸੋਭਗ੍ਗਪਤ੍ਤਂ ਯੁਤ੍ਤਵਾਦਿਕਂ ਞੇਯ੍ਯਧਮ੍ਮਾਭਿਮੁਨਿਵਰਞਾਣਕਿਤ੍ਤਿਸਿਰਿਧਜਧਮ੍ਮਸੇਨਾਪਤਿ- ਮਹਾਧਮ੍ਮਰਾਜਾਧਿਰਾਜਗੁਰੂਤਿ ਤਤਿਯਂ ਲਦ੍ਧਲਞ੍ਛਂ ਤਂ ਭਿਕ੍ਖੁਸਙ੍ਘਾਨਂ ਸਕਲਰਟ੍ਠਵਾਸੀਨਂ ਪਾਮੋਕ੍ਖਭਾਵੇ ਪਤਿਟ੍ਠਾਪੇਸਿ ਅਸੋਕਮਹਾਰਾਜਾਵਿਯ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਂ. ਤੇਨਾਵੋਚੁਮ੍ਹਾ ਨਾਗਰਾਜੁਪ੍ਪਤ੍ਤਿਕਥਾਯਂ,–

ਤਦਾਚ ਭਿਕ੍ਖੁਸਙ੍ਘਾਨਂ, ਥੇਰਂ ਪਾਮੋਕ੍ਖਭਾਵਕੇ;

ਞੇਯ੍ਯਾਦਿਲਦ੍ਧਲਞ੍ਛਂ ਤਂ, ਪਤਿਟ੍ਠਾਪੇਸਿ ਸਾਧੁਕਨ੍ਤਿ.

ਤਦਾਚ ਅਮ੍ਹਾਕਂ ਧਮ੍ਮਿਕਮਹਾਰਾਜਾ ਸਕ੍ਕਰਾਜੇ ਏਕੂਨਵੀਸਤਾਧਿਕੇ ਸਹਸ੍ਸੇ ਦ੍ਵਿਸਤੇਚ ਸਮ੍ਪਤ੍ਤੇ ਮਨ੍ਤਲਾਖ੍ਯਾਤਾਚਲਸ੍ਸ ਸਮੀਪੇ ਸੁਭੂਮਿਲਕ੍ਖਣੋਪੇਤਂ ਏਕਨਿਪਾਤਤਿਤ੍ਥਮਿਵ ਬਹੁਜਨਨਯਨਵਿਹਙ੍ਗਾਨਂ ਸਬ੍ਬਨਗਰਾਲਙ੍ਕਾਰੇਹਿ ਪਰਿਕ੍ਖਿਤ੍ਤਂ ਮਨੁਸ੍ਸਾਨਂ ਚਕ੍ਖੁਲੋਲਤਾਜਨਕਂ ਨਾਨਾਰਤਨੇਹਿ ਸਮ੍ਪੁਣ੍ਣਂ ਨਾਨਾ ਵੇਰਜ੍ਜਵਾਣਿਜਾਨਂ ਪੁਟਭੇਦਨਟ੍ਠਾਨਭੂਤਂ ਰਤਨਪੁਣ੍ਣਨਾਮਕਂ ਮਹਾਰਾਜਟ੍ਠਾਨਿਕਂ ਮਾਪੇਸਿ, ਮਨ੍ਧਾਤੁਵਿਯ ਰਾਜਗਹਂ, ਸੁਦਸ੍ਸਨੋ ਵਿਯਚ ਕੁਸਾਵਤੀਨਗਰਨ੍ਤਿ. ਤੇਨਾਵੋਚੁਮ੍ਹਾ ਨਾਗਰਾਜੁਪ੍ਪਤ੍ਤਿਕਥਾਯਂ,–

ਤਦਾ ਕਟ੍ਠਟਝੇ ਸਮ੍ਪਤ੍ਤੇ, ਮਨ੍ਤਲਾਖ੍ਯਾਚਲਸ੍ਸਚ;

ਏਰਾਵਤੀਤਿ ਨਾਮਾਯ, ਮਾਪੇਸਿ ਸਮੀਪੇ ਨਗਰਂ.

ਸੁਭੂਮਿਲਕ੍ਖਣੋਪੇਤਂ ¶ , ਰਤਨਪੁਣ੍ਣਨਾਮਕਂ;

ਰਾਜਗਹਂਵ ਮਨ੍ਧਾਤੁ, ਅਕਿਰਮ੍ਮਣਿਯਂ ਸੁਭਨ੍ਤਿ.

ਸੇਯ੍ਯਥਾਪਿ ਨਾਮ ਲੋਕੇ ਆਲੋਕਤ੍ਥਿਕਾਨਂ ਸਤ੍ਤਾਨਂ ਪੀਤਿਸੋਮਨਸ੍ਸਂ ਉਪ੍ਪਾਦੇਨ੍ਤੋ ਉਪਕਰੋਨ੍ਤੋ ਉਦਯਪਬ੍ਬਤਤੋ ਸਹਸ੍ਸਰਂਸੀ ਦਿਵਾਕਰੋ ਉਟ੍ਠਹਤਿ, ਏਵਮੇਵਂ ਮਰਮ੍ਮਰਟ੍ਠਿਕਾਨਂ ਲਜ੍ਜੀਪੇਸਲਾਨਂ ਸਿਕ੍ਖਾਕਾਮਾਨਂ ਭਿਕ੍ਖੂਨਂ ਗਿਹੀਨਞ੍ਚ ਪੀਤਿਸੋਮਨਸ੍ਸਂ ਉਪ੍ਪਾਦੇਨ੍ਤੋ ਉਪਕਾਰੋਨ੍ਤੋ ਅਯਂ ਧਮ੍ਮਿਕੋਰਾਜਾ ਇਮਸ੍ਮਿਂ ਮਰਮ੍ਮਰਟ੍ਠੇ ਉਪ੍ਪਜ੍ਜਤਿ.

ਇਮਞ੍ਚ ਧਮ੍ਮਿਕਰਾਜਾਨਂ ਨਿਸ੍ਸਾਯ ਮਰਮ੍ਮਰਟ੍ਠੇ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਅਤਿਵਿਯ ਜੋਤੇਤਿ. ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਂ ਆਪਜ੍ਜਤਿ.

ਸਾਸਨਞ੍ਚ ਨਾਮੇਤਂ ਰਾਜਾਨਂ ਨਿਸ੍ਸਾਯ ਤਿਟ੍ਠਤੀਤਿ. ਅਯਂ ਧਮ੍ਮਿਕਰਾਜਾਯੇਵ ਨ ਸਾਸਨਸ੍ਸੂਪਕਾਰੋ ਧਮ੍ਮਚਾਰੀ ਧਮ੍ਮਮਾਨੀ, ਅਪਿਚ ਖੋ ਧਮ੍ਮਿਕਰਾਜਾਨਂ ਨਿਸ੍ਸਿਤਾਪਿ ਸਬ੍ਬਰਟ੍ਠਵਾਸਿਕਾ ਸਾਸਨਸ੍ਸੂਪਕਾਰਾਯੇਵ ਧਮ੍ਮਚਾਰਿਨੋ ਧਮ੍ਮਮਾਨਿਨੋ ਰਾਜਾਨੁਗਤਾ ਹੁਤ੍ਵਾ. ਤੇਨੇਵਾਹ ਮਹਾਬੋਧਿਜਾਤਕਾਦੀਸੁ, –

ਗਵਞ੍ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਗਾਵੀ ਉਜੁਂ ਯਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇਪਿ ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋਤਿ.

ਵਿਸੇਸਤੋ ਪਨ ਦੁਤਿਯਂ ਅਮਰਪੁਰਂ ਮਾਪੇਨ੍ਤਸ੍ਸ ਮਹਾਧਮ੍ਮਰਞ੍ਞੋ ਅਗ੍ਗਮਹੇਸਿਯਾ ਅਜ੍ਜਵਮਦ੍ਦਵਸੋਹਜ੍ਜਾਦਿਗੁਣਯੁਤ੍ਤਾਯ ਧਿਤਾ ਅਮ੍ਹਾਕਂ ਰਞ੍ਞੋ ਅਗ੍ਗਮਹੇਸੀ ਸਮ੍ਮਾਚਾਰਿਨੀ ਪਤਿਬ੍ਬਤਾ. ਸਬ੍ਬਨਾਰੀਨਂ ਅਗ੍ਗਭਾਵਂ ਪਤ੍ਤਾਪਿ ਸਮਾਨਾ ਕਾਮਗੁਣਸਙ੍ਖਾਤੇਨ ਸੁਰਾਮਦੇਨ ਅਪ੍ਪਮਜ੍ਜਿਤ੍ਵਾ ਪੁਞ੍ਞਕਮ੍ਮੇਸੁ ਅਪ੍ਪਮਾਦਵਸੇਨ ਨਿਚ੍ਚਾਰਦ੍ਧਵੀਰਿਯਾ ਹੋਤਿ. ਨਿਚ੍ਚਂ ਪਰਿਯਤ੍ਤਿਯਾ ਉਗ੍ਗਹਣਂ ਅਕਾਸਿ. ਵੇਦਪਾਰਗੂਚ ¶ ਅਹੋਸਿ. ਸਮ੍ਮਾਸਮ੍ਬੁਦ੍ਧਸਾਸਨੇ ਅਤਿਵਿਯ ਪਸਨ੍ਨਾ ਅਞ੍ਞਾਪਿ ਓਰੋਧਾਦਯੋ ਮਹਾਧਮ੍ਮਰਞ੍ਞੋ ਓਵਾਦੇ ਠਤ੍ਵਾ ਧਮ੍ਮਂ ਚਰਿਂਸੁ. ਸਾਸਨਂ ਪਸੀਦਿਂਸੁਯੇਵ. ਉਪਰਾਜਾਪਿ ਮਹਾਧਮ੍ਮਰਾਜਸ੍ਸ ਏਕਮਾਤਾਪੀਤਿਕੋ ਮਹਾਧਮ੍ਮਰਾਜਿਚ੍ਛਾਯ ਅਵਿਰੋਧੇਤ੍ਵਾਯੇਵ ਸਕਲਰਟ੍ਠਵਾਸੀਨਂ ਗਿਹੀਨਂ ਭਿਕ੍ਖੂਨਞ੍ਚ ਅਤ੍ਥਹਿਤਮਾਵਹਤਿ, ਸੇਯ੍ਯਥਾਪਿ ਚਕ੍ਕਵਤ੍ਤਿਰਞ੍ਞੋ ਸਨ੍ਤਿਕੇ ਜੇਟ੍ਠਪੁਤ੍ਤੋ ਥਾਮਜਵਸਮ੍ਪਨ੍ਨੋ ਅਤਿਸੂਰੋ ਉਟ੍ਠਾਨਵੀਰਿਯੋ. ਅਞ੍ਞੇਪਿ ਅਮਚ੍ਚਾ ਅਨੇਕਸਹਸ੍ਸਪ੍ਪਮਾਣਾ ਮਹਾਧਮ੍ਮਰਞ੍ਞਾ ਲਦ੍ਧੇਸੁ ਲਦ੍ਧੇਸੁ ਠਾਨਨ੍ਤਰੇਸੁ ਠਿਤਾ ਮਹਾਧਮ੍ਮਰਞ੍ਞੋ ਤਂ ਤਂ ਕਿਚ੍ਚਮਾਵਹਨ੍ਤਿ ਪੁਞ੍ਞਕਮ੍ਮੇਸੁ ਅਭਿਰਮਨ੍ਤਿ. ਸਕਲਰਟ੍ਠਵਾਸਿਨੋਚ ਮਨੁਸ੍ਸਾ ਦਾਨਸੀਲਭਾਵਨਾਸੁਯੇਵ ਚਿਤ੍ਤਂ ਠਪੇਨ੍ਤਿ. ਭਿਕ੍ਖੂਚ ਸਙ੍ਘਰਾਜਪ੍ਪਮੁਖਾਦਯੋ ਥੇਰਨਵਮਜ੍ਝਿਮਾ ਗਨ੍ਥਧੁਰਵਿਪਸ੍ਸਨਾਧੁਰੇਸੁ ਅਭਿਯੁਞ੍ਜਨ੍ਤਿ.

ਏਵਮੇਕਸ੍ਸ ਸਾਧੁਜ੍ਜਨਸ੍ਸ ਗੁਣਂ ਮਹਨ੍ਤੇਨ ਉਸ੍ਸਾਹੇਨ ਕਥੇਨ੍ਤੋਪਿ ਦੁਕ੍ਕਰਂਤਾਵ ਨਿਟ੍ਠਂ ਪਾਪੇਤੁਂ, ਭਗਵਤੋ ਪਨ ਤਿਲੋਕਗ੍ਗਸ੍ਸ ਅਨੇਕਸਹਸ੍ਸਪਾਰਮਿਤਾਨੁਭਾਵੇਨ ਪਵਤ੍ਤਂ ਗੁਣਂ ਕੋ ਨਾਮ ਪੁਗ੍ਗਲੋ ਸਕ੍ਖਿਸ੍ਸਤਿ ਨਿਟ੍ਠਂ ਪਾਪੇਤ੍ਵਾ ਕਥੇਤੁਨ੍ਤਿ. ਏਵਂ ਮਹਾਧਮ੍ਮਰਾਜਸ੍ਸਚ ਅਗ੍ਗਮਹੇਸਿਯਾਚੇਵ ਉਪਰਾਜਾਦੀਨਞ੍ਚ ਗੁਣੇ ਵਿਸ੍ਸਟ੍ਠੇਨ ਵਿਤ੍ਥਾਰਤੋ ਕਥਿਯਮਾਨੇ ਇਮਿਸ੍ਸਾ ਸਾਸਨਵਂਸਪ੍ਪਦੀਪਿਕਾਯ ਅਨੇਕਸਤਭਾਣਵਾਰਮਤ੍ਤਮ੍ਪਿ ਪਤ੍ਵਾ ਪਰਿਯਨ੍ਤੋ ਨ ਪਞ੍ਞਾਯੇਯ੍ਯ, ਯਸ੍ਮਾਚ ਅਤਿਪ੍ਪਪਞ੍ਚਾ ਭਵੇਯ੍ਯ, ਤਸ੍ਮਾ ਸਙ੍ਖੇਪੇਨੇਵਾਯਂ ਕਥਿਤਾ ਸਾਧੁਜ੍ਜਨਾਨਂ ਮਹਾਪੁਞ੍ਞਮਯਾਯ ਪੀਤਿਯਾ ਅਨੁਮੋਦਨਤ੍ਥਾਯ. ਇਦਞ੍ਹਿ ਸੁਣਨ੍ਤੇਹਿ ਸਾਧੁਜ੍ਜਨੇਹਿ ਅਨੁਮੋਦਿਤਬ੍ਬਂ,- ਅਸੁਕਸ੍ਮਿਂ ਕਿਰ ਕਾਲੇ ਅਸੁਕਸ੍ਮਿਂ ਰਟ੍ਠੇ ਅਸੁਕੋ ਨਾਮ ਰਾਜਾ ਸਾਸਨਂ ਪਗ੍ਗਣ੍ਹਿਤ੍ਵਾ ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਮਾਪਜ੍ਜਿ, ਸੇਯ੍ਯਥਾਪਿ ਨਾਮ ਰੁਕ੍ਖੋ ਭੂਮੋਦਕਾਨਂ ਨਿਸ੍ਸਾਯ ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਮਾਪਜ੍ਜੀਤਿ.

ਇਮਸ੍ਸ ਰਞ੍ਞੋ ਕਾਲੇ ਞੇਯ੍ਯਧਮ੍ਮਾਭਿਮੁਨਿਵਰਞ੍ਞਾਣਕਿਤ੍ਤਿ ਸਿਰਿਧਜਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੁ ਨਾਮ ਸਙ੍ਘਰਾਜਾ ¶ ਮਹਾਥੇਰੋ ਰਞ੍ਞਾ ਅਭਿਯਾਚਿਤੋ ਸੁਰਾਜਮਗ੍ਗਦੀਪਨਿਂ ਨਾਮ ਗਨ੍ਥਂ ਅਕਾਸਿ. ਮਜ੍ਝਿਮਨਿਕਾਯਟ੍ਠਕਥਾਯ ਅਤ੍ਥਂ ਸਿਸ੍ਸਾਨਂ ਵਾਚੇਤ੍ਵਾ ਯਥਾਵਾਚਿਤਨਿਯਾਮੇਨ ਅਤ੍ਥਯੋਜਨਾਨਯਂ ਪੋਤ੍ਥਕੇ ਆਰੋਪਾਪੇਸਿ.

ਮੇਧਾਭਿਵਂਸਸਦ੍ਧਮ੍ਮਧਜਮਹਾਧਮ੍ਮਰਾਜਾਧਿਰਾਜਗੁਰੁ ਨਾਮ ਮਹਾਥੇਰੋ ਜਾਤਕਪਾਲ਼ਿਯਾ ਅਤ੍ਥਯੋਜਨਾਨਯਂ ਮਰਮ੍ਮਭਾਸਾਯ ਅਕਾਸਿ.

ਸਙ੍ਘਰਾਜਸ੍ਸ ਸਿਸ੍ਸੋ ਪਞ੍ਞਾਸਾਮਿਸਿਰਿਕਵਿਧਜਮਹਾਧਮ੍ਮਰਾਜਾਧਿਰਾਜਗੁਰੂਤਿ ਰਞ੍ਞਾ ਲਦ੍ਧਨਾਮਲਞ੍ਛੋ ਸੋਯੇਵਾਹਂ ਧਮ੍ਮ ਰਞ੍ਞਾ ਅਗ੍ਗਮਹੇਸਿਯਾਚ ਅਭਿਯਾਚਿਤੋ ਸੀਲਕਥਂ ਨਾਮ ਗਨ੍ਥਂ ਉਪਾਯਕਥਂ ਨਾਮ ਗਨ੍ਥਞ੍ਚ ਅਕਾਸਿਂ. ਰਞ੍ਞੋ ਆਚਰਿਯਭੂਤੇਨ ਦਿਸਾਪਾਮੋਕ੍ਖੇਨ ਨਾਮ ਉਪਾਸਕੇਨ ਅਭਿਯਾਚਿਤੋ ਸੋਯੇਵਾਤਂ ਅਕ੍ਖਰਵਿਸੋਧਨਿਂ ਨਾਮ ਗਨ੍ਥਂ ਆਪਤ੍ਤਿਵਿਨਿਚ੍ਛਯਂ ਨਾਮ ਗਨ੍ਥਞ੍ਚ. ਤਥਾ ਸਙ੍ਘਰਞ੍ਞਾ ਚੋਦਿਤੋ ਸੋਯੇ ਵਾਹਂ ਨਾਗਰਾਜੁਪ੍ਪਤਿਕਥਂ ਵੋਹਾਰਤ੍ਥਭੇਦਞ੍ਚ ਵਿਵਾਦਵਿਨਿਚ੍ਛਯਞ੍ਚ ਅਕਾਸਿਂ. ਤਥਾ ਪਞ੍ਚਜਮ੍ਬੁਗਾਮਭੋਜਕੇਨ ਲੇਖਕਾਮਚ੍ਚੇਨ ਦ੍ਵੀਹਿਚ ਆਰੋਚਨਲੇਖਕਾਮਚ੍ਚੇਹਿ ਅਭਿਯਾਚਿਤੋ ਸੋ ਯੇਵਾਹਂ ਰਾਜਸੇਵਕਦੀਪਨਿਂ ਨਾਮ ਗਨ੍ਥਂ ਅਕਾਸਿਂ. ਤਥਾ ਦੀਘਨਾਵਾਨਗਰਭੋਜਕੇਨ ਮਹਾਅਮਚ੍ਚੇਨ ਅਭਿਯਾਚਿਤੋ ਸੋਯੇਵਾਹਂ ਨਿਰਯਕਥਾਦੀਪਕਂ ਨਾਮ ਗਨ੍ਥਂ ਅਕਾਸਿਂ. ਤਥਾ ਸਿਲਾਲੇਡ੍ਡੁਕਨਾਮਕੇਨ ਉਪਾਸਕੇਨ ਅਭਿਯਾਚਿਤੋ ਸੋਯੇਵਾਹਂ ਉਪੋਸਥਵਿਨਿਚ੍ਛਯਂ ਨਾਮ ਗਨ੍ਥਂ ਅਕਾਸਿਂ. ਤਥਾ ਬਹੂਹਿ ਸੋਤੁਜਨੇਹਿ ਅਭਿਯਾਚਿਤੋ ਸੋਯੇਵਾਹਂ ਸਦ੍ਦਨੀਤਿਯਾ ਸਂਵਣ੍ਣਨਂ ਪਾਲ਼ਿਭਾਸਾਯ ਅਕਾਸਿਨ੍ਤਿ.

ਏਕਸ੍ਮਿਞ੍ਚ ਸਮਯੇ ਕਲਿਯੁਗੇ ਵੀਸਾਧਿਕੇ ਦ੍ਵਿਸਤੇ ਸਹਸ੍ਸੇਚ ਸਮ੍ਪਤ੍ਤੇ ਰਞ੍ਞੋ ਏਤਦਹੋਸਿ,- ਇਦਾਨਿ ਬੁਦ੍ਧਸ੍ਸ ਭਗਵਤੋ ਸਾਸਨੇ ਕੇਸਞ੍ਚਿ ਭਿਕ੍ਖੂਨਂ ਸਾਮਣੇਰਾਨਞ੍ਚ ਕੁਲਦੂਸਨਾਦਿਅਸਾਰੁਪ੍ਪਕਮ੍ਮੇਹਿ ਉਪ੍ਪਾਦਿਤਾ ਚਤ੍ਤਾਰੋ ਪਚ੍ਚਯਾ ਬਹੂ ਦਿਸ੍ਸਨ੍ਤਿ ¶ , ਕੇਚਿਪਿ ਅਲਜ੍ਜੀ ਪੁਗ੍ਗਲਾ ਜਾਤਰੂਪਾਦਿਨਿਸ੍ਸਗ੍ਗਿਯਵਤ੍ਥੁਮ੍ਪਿਸਾਦਿਯਨ੍ਤਿ, ਕੇਚਿਪਿ ਵਿਨਾ ਪਚ੍ਚਯਂ ਵਿਕਾਲੇ ਤਮ੍ਬੁਲਂ ਖਾਦਨ੍ਤਿ, ਸਨ੍ਨਿਧਿਞ੍ਚ ਕਤ੍ਵਾ ਧੂਮਾਨਿਚ ਪਿਵਨ੍ਤਿ, ਅਗਿਲਾਨਾ ਹੁਤ੍ਵਾ ਸਉਪਾਹਨਾ ਗਾਮਂ ਪਵਿਸਨ੍ਤਿ, ਛਤ੍ਤਂ ਧਾਰੇਨ੍ਤਿ, ਅਞ੍ਞੇਪਿ ਅਵਿਨਯਾਨੁਲੋਮਾਚਾਰੇ ਚਰਨ੍ਤਿ, ਇਦਾਨਿ ਭਿਕ੍ਖੂਨਂ ਸਾਮਣੇਰਾਨਞ੍ਚ ਬੁਦ੍ਧਸ੍ਸ ਸਮ੍ਮੁਖੇ ਬੁਦ੍ਧਂ ਸਕ੍ਖਿਂ ਕਤ੍ਵਾ ਇਮੇ ਅਨਾਚਾਰੇ ਨ ਚਰਿਸ੍ਸਾਮਾਤਿ ਪਟਿਞ੍ਞਂ ਕਾਰਾਪੇਤ੍ਵਾ ਭਗਵਤੋ ਸਿਕ੍ਖਾਪਦਾਨਿ ਰਕ੍ਖਾਪੇਤੁਂ ਵਟ੍ਟਤਿ, ਏਵਞ੍ਚ ਸਤਿ ਭਿਕ੍ਖੂ ਸਾਮਣੇਰਾਚ ਮਯਂ ਬੁਦ੍ਧਸ੍ਸ ਸਮ੍ਮੁਖੇ ਏਵਂ ਪਟਿਞ੍ਞਂ ਕਰੋਮ, ਪਟਿਞ੍ਞਞ੍ਚ ਕਤ੍ਵਾ ਵਿਕਾਰਂ ਆਪਜ੍ਜਨ੍ਤਾਨਂ ਅਮ੍ਹਾਕਂ ਇਮਸ੍ਮਿਂਯੇਵ ਅਤ੍ਤਭਾਵੇ ਇਮਸ੍ਮਿਂਯੇਵ ਪਚ੍ਚਕ੍ਖੇ ਕਿਞ੍ਚਿ ਭਯਂ ਉਪ੍ਪਜ੍ਜੇਯ੍ਯਾਤਿ ਪਚ੍ਚਕ੍ਖਭਯਂ ਅਪੇਕ੍ਖਿਤ੍ਵਾ ਤੇ ਸਿਕ੍ਖਾਪਦਂ ਰਕ੍ਖਿਸ੍ਸਨ੍ਤੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਭਿਕ੍ਖੂਨਂ ਸਾਮਣੇਰਾਨਞ੍ਚ ਏਵਂ ਪਟਿਞ੍ਞਂ ਕਾਰਾਪੇਤੁਂ ਯੁਜ੍ਜਤਿ ਵਾ ਮਾ ਵਾਤਿ ਮਯਂ ਨ ਜਾਨਾਮ, ਇਦਾਨਿ ਸਙ੍ਘਰਾਜਾਦਯੋ ਮਹਾਥੇਰੇ ਸਨ੍ਨਿਪਾਤਾਪੇਤ੍ਵਾ ਪੁਚ੍ਛਿਸ੍ਸਾਮੀਤਿ ਪੁਨ ਚਿਨ੍ਤੇਸਿ.

ਅਥ ਸਬ੍ਬੇਪਿ ਮਹਾਥੇਰੇ ਸਙ੍ਘਰਾਜਸ੍ਸ ਵਿਹਾਰੇ ਸਨ੍ਨਿਪਾਤਾਪੇਤ੍ਵਾ ਇਮਂ ਕਾਰਣਂ ਪੁਚ੍ਛਥਾਤਿ ਅਮਚ੍ਚੇ ਆਣਾਪੇਸਿ. ਅਥ ਅਮਚ੍ਚਾ ਮਹਾਥੇਰੇ ਸਨ੍ਨਿਪਾਤਾਪੇਤ੍ਵਾ ਪੁਚ੍ਛਿਂਸੁ,-ਇਦਾਨਿ ਭਨ੍ਤੇ ਸਾਸਨੇ ਭਿਕ੍ਖੂਨਂ ਸਾਮਣੇਰਾਨਞ੍ਚ ਅਵਿਨਯਾਨੁਲੋਮਾਚਾਰਾਨਿ ਦਿਸ੍ਵਾ ਬੁਦ੍ਧਸ੍ਸ ਸਮ੍ਮੁਖੇ ਬੁਦ੍ਧਂ ਸਕ੍ਖਿਂ ਕਤ੍ਵਾ ਰਾਜਾ ਯਥਾ ਇਮੇ ਅਨਾਚਾਰੇ ਨ ਚਰਿਸ੍ਸਾਮਾਤਿ ਪਟਿਞ੍ਞਂ ਕਾਰਾਪੇਤ੍ਵਾ ਭਗਵਤੋ ਸਿਕ੍ਖਾਪਦਾਨਿ ਰਕ੍ਖਾਪੇਤੁਂ ਇਚ੍ਛਤਿ, ਤਥਾ ਕਾਰਾਪੇਤੁਂ ਯੁਜ੍ਜਤਿ ਵਾ ਮਾ ਵਾਤਿ.

ਅਥ ਸਙ੍ਘਰਾਜਪ੍ਪਮੁਖਾਦਯੋ ਮਹਾਥੇਰਾ ਏਵਮਾਹਂਸੁ,- ਯਸ੍ਮਾ ਸਾਸਨਸ੍ਸ ਪਰਿਸੁਦ੍ਧਭਾਵਂ ਇਚ੍ਛਨ੍ਤੋ ਏਵਂ ਕਰੋਤਿ, ਤਸ੍ਮਾ ਤਥਾ ਕਾਰਾਪੇਤੁਂ ਯੁਜ੍ਜਤੀਤਿ.

ਪਣ੍ਡਿਤਾਭਿਧਜਮੁਨਿਨ੍ਦਘੋਸਮਹਾਧਮ੍ਮਰਾਜਗੁਰੁਤ੍ਥੇਰਾਦਯੋ ਪਨ ਕਤਿਪਯਤ੍ਥੇਰਾ ਏਵਮਾਹਂਸੁ, – ਇਦਾਨਿ ਭਿਕ੍ਖੂ ਨਾਮ ਸਦ੍ਧਾਬਲਾਦੀਨਂ ¶ ਥੋਕਤਾਯ ਭਗਵਤੋ ਆਣਾਸਙ੍ਖਾਤਂ ਸਚਿਤ੍ਤਕਾਚਿਤ੍ਤਕਾਪਤ੍ਤਿਇਂ ਆਪਜ੍ਜਿਤ੍ਵਾ ਭਗਵਤਾਯੇਵ ਅਨੁਞ੍ਞਾਤੇਹਿ ਦੇਸਨਾਵੁਟ੍ਠਾਨਕਮ੍ਮੇਹਿ ਪਟਿਕਰਿਤ੍ਵਾ ਸੀਲਂ ਪਰਿਸੁਦ੍ਧਂ ਕਤ੍ਵਾ ਲਜ੍ਜੀਪੇਸਲਭਾਵਂ ਕਰੋਨ੍ਤਿ, ਨ ਕਦਾਚਿ ਆਪਤ੍ਤਿਂ ਅਨਾਪਜ੍ਜਿਤ੍ਵਾ, ਤਸ੍ਮਾ ਭਗਵਤਾ ਪਟਿਕ੍ਖਿਤ੍ਤਂ ਕਮ੍ਮਂ ਸਞ੍ਚਿਚ੍ਚਨ ਵੀਤਿਕ੍ਕਮਿਸ੍ਸਾਮਾਤਿ ਬੁਦ੍ਧਸ੍ਸ ਸਮ੍ਮੁਖੇ ਪਟਿਞ੍ਞਾਕਰਣਂ ਅਤਿਭਾਰਿਯਂ ਹੋਤਿ, ਸਚੇਪਿ ਪੁਬ੍ਬੇ ਪਟਿਞ੍ਞਂ ਕਤ੍ਵਾ ਪਚ੍ਛਾ ਵਿਸਂਵਾਦੇਯ੍ਯ, ਏਵਂ ਸਤਿ ਪਟਿਸ੍ਸਵਵਿਸਂਵਾਦੇ ਸੁਦ੍ਧਚਿਤ੍ਤਸ੍ਸ ਦੁਕ੍ਕਟਂ ਪਟਿਸ੍ਸਵਕ੍ਖਣੇਏਵ ਪਾਚਿਤ੍ਤਿ ਇਤਰਸ੍ਸਚਾਤਿ ਵਚਨਤੋ ਤਂ ਤਂ ਆਪਤ੍ਤਿਂ ਪਟਿਸ੍ਸਵਵਿਸਂਵਾਦਨਦੁਕ੍ਕਪੇਤ੍ਤਿਯਾ ਸਹੇਵ ਆਪਜ੍ਜੇਯ੍ਯ, ਅਥ ਪਟਿਞ੍ਞਾਕਰਣਤੋਯੇਵ ਆਪਤ੍ਤਿਬਹੁਲਤਾ ਭਵੇਯ੍ਯ, ਯਥਾ ਪਨ ਰੋਗਂ ਵੂਪਸਮਿਤੁਂ ਅਸਪ੍ਪਾਯਭੇਸਜ੍ਜਂ ਪਟਿਸੇਵਤਿ, ਅਥਸ੍ਸ ਰੋਗੋ ਅਵੂਪਸਮਿਤ੍ਵਾ ਅਤਿਕ੍ਕਮੇਯ੍ਯ, ਏਵਂ ਆਪਤ੍ਤਿਂ ਅਨਾਪਜ੍ਜਿਤੁਕਾਮੋ ਬੁਦ੍ਧਸ੍ਸ ਸਮ੍ਮੁਖੇ ਪਟਿਞ੍ਞਂ ਕਰੋਤਿ, ਅਥਸ੍ਸ ਆਪਤ੍ਤਿਬਹੁਲਾਯੇਵ ਭਵੇਯ੍ਯਾਤਿ, ਕਿਞ੍ਚ ਭਿਯ੍ਯੋ ਅਭਯਦਸ੍ਸਾਵਿਨੋ ਭਿਕ੍ਖੂ ਅਨੇਕਸਤਬੁਦ੍ਧਸ੍ਸ ਸਮ੍ਮੁਖੇ ਅਨੇਕਸਤਵਾਰਾਨਿਪਿ ਪਟਿਞ੍ਞਂ ਕਤ੍ਵਾ ਸਿਕ੍ਖਾਪਦਂ ਵੀਤਿਕ੍ਕਮਿਤੁਂ ਵਿਸਹਿਸ੍ਸਨ੍ਤਿਯੇਵਾਤਿ.

ਅਥ ਸਙ੍ਘਰਾਜਾ ਮਹਾਥੇਰੋ ਅਤ੍ਤਨੋ ਸਿਸ੍ਸਂ ਪਞ੍ਞਾਸਾਮਿਸਿਰਿਕਵਿਧਜਮਹਾਧਮ੍ਮਰਾਜਾਧਿਰਾਜਗੁਰੁਂ ਨਾਮ ਮਂ ਉਯ੍ਯੋਜੇਸਿ, ਤਸ੍ਸ ਥੇਰਸ੍ਸ ਵਚਨੇ ਪਟਿਵਚਨਂ ਦਾਤੁਂ.

ਅਥਾਹਂ ਏਵਂ ਵਦਾਮਿ,- ਦ੍ਵੇ ਪੁਗ੍ਗਲਾ ਅਭਬ੍ਬਾ ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਿਤੁਂ ਭਿਕ੍ਖੂਚ ਭਿਕ੍ਖੁਨਿਯੋਚ ਅਰਿਯਾ ਪੁਗ੍ਗਲਾ, ਦ੍ਵੇ ਪੁਗ੍ਗਲਾ ਸਬ੍ਬਾ ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਿਤੁਂ ਭਿਕ੍ਖੂਚ ਭਿਕ੍ਖੁਨਿਯੋਚ ਪੁਥੁਜ੍ਜਨਾਤਿ ਪਰਿਵਾਰਪਾਲ਼ਿਯਂ ਵੁਤ੍ਤਤ੍ਤਾ ਅਰਿਯਪੁਗ੍ਗਲਾਨਂਵਿਯ ਪੁਥੁਜ੍ਜਨਾਨਂ ਵਿਸ੍ਸਟ੍ਠੇਨ ਪਟਿਞ੍ਞਂ ਕਾਤੁਂ ਨ ਵਟ੍ਟਤੀਤਿ ਮਨਸਿਕਰਿਤ੍ਵਾ ਪੁਥੁਜ੍ਜਨਭਿਕ੍ਖੂਨਂ ਪਟਿਞ੍ਞਾਕਰਣਂ ਅਤਿਭਾਰਿਯਨ੍ਤਿ ਵੇਦੇਯ੍ਯਚੇ, ਸਬ੍ਬੇਹਿਪਿ ਅਰਿਯਪੁਥੁਜ੍ਜਨੇਹਿ ਭਿਕ੍ਖੂਹਿ ਉਪਸਮ੍ਪਦਾਮਾਲ਼ਕੇ ਆਦਿਤੋਵ ¶ ਚਤ੍ਤਾਰਿ ਅਕਰਣੀਯਾਨਿ ਆਚਿਕ੍ਖਿਤਬ੍ਬਾਨੀਤਿ ਵੁਤ੍ਤੇਸੁ ਚਤੂਸੁ ਅਕਰਣੀਯੇਸੁ ਅਨ੍ਤਮਸੋ ਤਿਣਸਲਾਕਂ ਉਪਾਦਾਯ ਯੋ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋਤਿ, ਅਨ੍ਤਮਸੋ ਕੁਨ੍ਤਕਿਪਿਲ੍ਲਿਕਂ ਉਪਾਦਾਯ ਯੋ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਂ ਵੋਰੋਪੇਸਿ, ਅਨ੍ਤਮਸੋ ਗਬ੍ਭਪਾਤਨਂ ਉਪਾਦਾਯ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋਤਿ, ਅਨ੍ਤਮਸੋ ਸੁਞ੍ਞਾਗਾਰੇ ਅਭਿਰਮਾਮੀਤਿ ਯੋ ਭਿਕ੍ਖੁਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋਤਿਚ ਉਪਜ੍ਝਾਚਰਿਯੇਨ ਓਵਦਿਯਮਾਨੇਹਿ ਅਭਿਨਵੋਪਸਮ੍ਪਨ੍ਨੇਹਿ ਆਮ ਭਨ੍ਤੇਤਿ ਪਟਿਞ੍ਞਾਕਥਾਯੇਵ. ਸਾਮਣੇਰੇਹਿਪਿ ਪਬ੍ਬਜ੍ਜਕ੍ਖਣੇਯੇਵ ਉਪਜ੍ਝਾਯਸ੍ਸ ਸਨ੍ਤਿਕੇ ਪਾਣਾਤਿਪਾਤਾਵੇਰਮਣਿਸਿਕ੍ਖਾਪਦਂ ਸਮਾਦਿਯਾਮੀਤਿਆਦਿਨਾ ਪਠਮਂ ਪਟਿਞ੍ਞਾ ਕਤਾਯੇਵ. ਤਥਾ ਭਿਕ੍ਖੂਹਿ ਤਂਤਂਆਪਤ੍ਤਿਂ ਆਪਜ੍ਜਿਤ੍ਵਾ ਦੇਸਨਾਯ ਪਟਿਕਰਣਕਾਲੇ ਸਾਧੁ ਸੁਟ੍ਠੁ ਭਨ੍ਤੇ ਸਂਵਰਿਸ੍ਸਾਮੀਤਿ ਅਭਿਣ੍ਹਂ ਪਟਿਞ੍ਞਾ ਕਤਾਯੇਵ. ਸਾਮਣੇਰੇਹਿਪਿ ਉਪਜ੍ਝਾਚਰਿਯਸ੍ਸ ਸਨ੍ਤਿਕੇ ਸਿਕ੍ਖਾਗ੍ਗਹਣਕਾਲੇਪਿ ਪਾਣਾਤਿਪਾਤਾਵੇਰ ਮਣਿਸਿਕ੍ਖਾਪਦਂ ਸਮਾਦਿਯਾਮੀਤਿਆਦਿਨਾ ਅਭਿਣ੍ਹਂ ਪਟਿਞ੍ਞਾ ਕਤਾਯੇਵ. ਤਾਹਿ ਪਨ ਪਟਿਞ੍ਞਾਹਿ ਅਭਾਯਿਤ੍ਵਾ ਇਤੋਯੇਵ ਭਾਯਾਮੀਤਿ ਵੁਤ੍ਤਵਚਨਂ ਅਚ੍ਛਰਿਯਂਵਿਯ ਹੁਤ੍ਵਾ ਖਾਯਤਿ. ਇਮਾਯ ਹਿ ਪਟਿਞ੍ਞਾਯ ਤਾਸਂ ਪਟਿਞ੍ਞਾਨਂ ਵਿਸੇਸਤਾ ਨ ਦਿਸ੍ਸਤੀਤਿ.

ਅਯਂ ਪਨੇਤ੍ਥ ਸਨ੍ਨਿਟ੍ਠਾਨਤ੍ਥੋ,- ਪਟਿਸ੍ਸਵਦੁਕ੍ਕਟਾਪਤ੍ਤਿ ਨਾਮ ਸਾਵਤ੍ਥਿਯਂ ਪਸ੍ਸੇਨਦਿਕੋਸਲਰਞ੍ਞਾ ਇਮਸ੍ਮਿਂ ਵਿਹਾਰੇ ਵਸ੍ਸਂ ਉਪਗਚ੍ਛਾਹੀਤਿ ਆਯਾਚਿਤੇ ਸਾਧੂਤਿ ਪਟਿਜਾਨਿਤ੍ਵਾ ਲਾਭਬਹੁਲਤਂ ਪਟਿਚ੍ਚ ਅਨ੍ਤਰਾਮਗ੍ਗੇ ਅਞ੍ਞਸ੍ਮਿਂ ਵਿਹਾਰੇ ਵਸ੍ਸਂ ਉਪਗਨ੍ਤ੍ਵਾ ਪਟਿਸ੍ਸਵਵਿਸਂਵਾਦਨਪਚ੍ਚਯਾ ਉਪਨਨ੍ਦਂ ਨਾਮ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਾ. ਸਮਨ੍ਤਪਾਸਾਦਿਕਞ੍ਚ ਨਾਮ ਵਿਨਯਟ੍ਠਕਥਾਯ ਵਸ੍ਸੂਪਨਾਯਿਕਕ੍ਖਨ੍ਧਕਵਣ੍ਣਨਾਯਂ ¶ ਪਟਿਸ੍ਸਵੇਚ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਨ ਕੇਵਲਂ ਇਮਂ ਤੇਮਾਸਂ ਇਧ ਵਸ੍ਸਂ ਵਸਥਾਤਿ ਏਤਸ੍ਸੇਵ ਪਟਿਸ੍ਸਵੇ ਆਪਤ੍ਤਿ, ਇਮਂ ਤੇਮਾਸਂ ਭਿਕ੍ਖਂ ਗਣ੍ਹਥ, ਉਭੋਪਿ ਮਯਂ ਵਸ੍ਸਂ ਵਸਿਸ੍ਸਾਮ, ਏਕਤੋ ਉਦ੍ਦਿਸ੍ਸਾਪੇਸ੍ਸਾਮਾਤਿ ਏਵਮਾਦਿਨਾਪਿ ਤਸ੍ਸ ਤਸ੍ਸ ਪਟਿਸ੍ਸਵੇ ਦੁਕ੍ਕਟਂ, ਤਞ੍ਚ ਖੋ ਪਠਮਂ ਸੁਦ੍ਧਚਿਤ੍ਤਸ੍ਸ ਪਚ੍ਛਾ ਵਿਸਂਵਾਦਨਪਚ੍ਚਯਾ, ਪਠਮਮ੍ਪਿ ਅਸੁਦ੍ਧ ਚਿਤ੍ਤਸ੍ਸ ਪਨ ਪਟਿਸ੍ਸਵੇ ਪਾਚਿਤ੍ਤਿਯਨ੍ਤਿ ਵੁਤ੍ਤਂ.

ਇਚ੍ਚੇਵਂ ਭਿਕ੍ਖੂਨਂ ਅਞ੍ਞਮਞ੍ਞਂ ਦਾਯਕੇਹਿਚ ਸਦ੍ਧਿਂ ਪਟਿਜਾਨਿਤ੍ਵਾ ਵਿਸਂਵਾਦਨਪਚ੍ਚਯਾ ਅਞ੍ਞੇਸਂ ਅਤ੍ਥਹਿਤਭੇਦੇਯੇਵ ਦੁਕ੍ਕਟਾਪਤ੍ਤਿ ਵੁਤ੍ਤਾ, ਨ ਅਤ੍ਤਨੋ ਇਚ੍ਛਾਵਸੇਨ ਸਯਮੇਵ ਅਹਂ ਭੁਞ੍ਜਿਸ੍ਸਾਮਿ ਸਯਿਸ੍ਸਾਮੀਤਿ ਏਵਮਾਦਿਨਾ ਵਤ੍ਵਾ ਯਥਾਵੁਤ੍ਤਾਨੁਰੂਪਂ ਅਕਤ੍ਵਾ ਵਿਸਂਵਾਦਨੇਤਿ. ਸਚੇ ਪਨ ਭਿਕ੍ਖੁਸਾਮਣੇਰਾਨਂ ਪਠਮਮੇਵ ਆਮ ਭਨ੍ਤੇਤਿਆਦਿਨਾ ਪਟਿਞ੍ਞਂ ਕਤ੍ਵਾ ਪਚ੍ਛਾ ਕੇਨਚਿਦੇਵ ਕਰਣੀਯੇਨ ਤਂਤਂਆਪਤ੍ਤਿਂ ਆਪਜ੍ਜਨ੍ਤੋ ਸਹ ਪਟਿਸ੍ਸਵਵਿਸਂਵਾਦੇਨ ਦੁਕ੍ਕਟਾਪਤ੍ਤਿਯਾ ਆਪਜ੍ਜੇਯ੍ਯ, ਏਵਂ ਸਤਿ ਤਤ੍ਥ ਤਤ੍ਥ ਸਿਕ੍ਖਾਪਦੇਸੁ ਦ੍ਵੇ ਦ੍ਵੇ ਆਪਤ੍ਤਿਯੋ ਪਞ੍ਞਾਪੇਯ੍ਯ, ਨ ਚ ਏਵਮ੍ਪਿ ਪਞ੍ਞਤ੍ਤਾ, ਤੇਨੇਵ ਪਟਿਸ੍ਸਵਦੁਕ੍ਕਟਾਪਤ੍ਤਿ ਨਾਮ ਪਰੇਸਂ ਸਨ੍ਤਿਕੇ ਪਰੇਸਂ ਮਤਿਂ ਗਹੇਤ੍ਵਾ ਪਟਿਜਾਨਿਤ੍ਵਾ ਵਿਸਂਵਾਦਨਟ੍ਠਾਨੇਯੇਵ ਪਞ੍ਞਤ੍ਤਾਤਿ ਦਟ੍ਠਬ੍ਬਾ.

ਇਦਾਨਿ ਰਾਜਾ ਸਾਸਨਸ੍ਸ ਸੁਦ੍ਧਿਂ ਇਚ੍ਛਨ੍ਤੋ ਇਮਿਨਾ ਉਪਾਯੇਨ ਭਿਕ੍ਖੁਸਾਮਣੇਰਾਨਂ ਸੀਲਂ ਸਂਵਰਾਪੇਨ੍ਤੋ ਪਚ੍ਚਕ੍ਖਸਮ੍ਪਰਾਯਿਕਭਯਂ ਅਨੁਪੇਕ੍ਖਿਤ੍ਵਾ ਸਂਵਰਂ ਆਪਜ੍ਜੇਯ੍ਯੁਨ੍ਤਿ ਚਿਨ੍ਤੇਤ੍ਵਾ ਬੁਦ੍ਧਸ੍ਸ ਸਮ੍ਮੁਖੇ ਪਟਿਞ੍ਞਂ ਕਾਰਾਪਿਤਤ੍ਤਾ ਨ ਕੋਚਿ ਦੋਸੋ ਦਿਸ੍ਸਤਿ. ਭਿਕ੍ਖੁਸਾਮਣੇਰਾਨਮ੍ਪਿ ਭਿਯ੍ਯੋਸੋਮਤ੍ਤਾਯਸੀਲਂ ਸਂਵਰਿਤ੍ਵਾ ਸੀਲਪਰਿਸੁਦ੍ਧਿ ਭਵੇਯ੍ਯਾਤਿ. ਅਥ ਰਾਜਾ ਸਬ੍ਬੇਸਂ ਭਿਕ੍ਖੁਸਾਮਣੇਰਾਨਂ ਬੁਦ੍ਧਸ੍ਸ ਸਮ੍ਮੁਖੇ ਪਟਿਞ੍ਞਂ ਕਾਰਾਪੇਤ੍ਵਾ ਸੀਲਂ ਰਕ੍ਖਾਪੇਸੀਤਿ.

ਇਚ੍ਚੇਵਂ ਇਮਸ੍ਸ ਰਞ੍ਞੋ ਕਾਲੇ ਪੁਬ੍ਬੇ ਅਲਜ੍ਜਿਨੋਪਿ ਸਮਾਨਾ ਭਯਂ ਅਨੁਪੇਕ੍ਖਿਤ੍ਵਾ ਯੇਭੁਯ੍ਯੇਨ ਲਜ੍ਜਿਨੋਵ ਭਵਨ੍ਤੀਤਿ.

ਬੁਦ੍ਧਸ੍ਸ ¶ ਭਗਵਤੋ ਪਰਿਨਿਬ੍ਬਾਨਤੋ ਤਿਸਤਾਧਿਕਾਨਂ ਦ੍ਵਿਵਸ੍ਸਸਹਸ੍ਸਾਨਂ ਉਪਰਿ ਨਵੁਤਿਮੇ ਸਂਵਚ੍ਛਰੇ ਬਹਿਨਦੀਤੀਰੇ ਗਾਮਸੀਮਤੋ ਪਟ੍ਠਾਯ ਯਾਵ ਅਨ੍ਤੋਉਦਕੁਕ੍ਖੇਪਾ, ਤਾਵ ਕਮ੍ਮਂ ਕਰੋਨ੍ਤਾਨਂ ਭਿਕ੍ਖੂਨਂ ਸੁਖੇਨ ਗਮਨਤ੍ਥਾਯ ਗਹਟ੍ਠਾ ਗਾਮਸੀਮਾਯ ਉਦਕੁਕ੍ਖੇਪਸੀਮਂ ਸਮ੍ਬਨ੍ਧਿਤ੍ਵਾ ਸੇਤੁਂ ਅਕਂਸੁ.

ਅਥ ਤਤ੍ਥ ਞਾਣਾਲਙ੍ਕਾਰਸੁਮਨਮਹਾਧਮ੍ਮਰਾਜਗੁਰੁਗਣਾ ਚਰਿਯਨਾਮਕੋ ਥੇਰੋ ਉਪਸਮ੍ਪਦਾਦਿਵਿਨਯਕਮ੍ਮਾਨਿ ਕਤਿਪਯ ਵਸ੍ਸੇਸੁ ਅਕਾਸਿ.

ਧੀਰਾਨਨ੍ਦਤ੍ਥੇਰੋ ਪਨ ਤਤ੍ਥ ਸਙ੍ਕਰਦੋਸੋ ਹੋਤੀਤਿ ਕਮ੍ਮਂ ਕਾਤੁਂ ਨ ਇਚ੍ਛਤਿ. ਤਥਾ ਪਟ੍ਠਾਯ ਯੇ ਯੇ ਞਾਣਾਲਙ੍ਕਾਰਸੁਮਨਮਹਾਧਮ੍ਮਰਾਜਗੁਰੁਗਣਾਚਰਿਯਸ੍ਸ ਮਤਿਂ ਰੁਚ੍ਚਨ੍ਤਿ, ਤੇ ਤੇ ਤਸ੍ਸ ਪਕ੍ਖਿਕਾ ਭਵਨ੍ਤਿ. ਯੇ ਯੇ ਪਨ ਧੀਰਾਨਨ੍ਦਤ੍ਥੇਰਸ੍ਸਮਤਿਂ ਰੁਚ੍ਚਨ੍ਤਿ, ਤੇਤੇ ਤਸ੍ਸ ਪਕ੍ਖਿਕਾ ਭਵਨ੍ਤਿ. ਏਵਂਲਙ੍ਕਾਦੀਪੇ ਅਮਰਪੁਰਨਿਕਾਯਿਕਾ ਭਿਕ੍ਖੂ. ਦ੍ਵੇਧਾ ਭਿਨ੍ਦਿਤ੍ਵਾ ਤਿਟ੍ਠਨ੍ਤਿ.

ਅਥ ਧੀਰਾਨਨ੍ਦਪਕ੍ਖੇ ਭਿਕ੍ਖੁ ਤਪ੍ਪਕ੍ਖਿਕਸ੍ਸ ਸੀਲਕ੍ਖਨ੍ਧਤ੍ਥੇਰਸ੍ਸ ਸਿਸ੍ਸੇ ਧਮ੍ਮਕ੍ਖਨ੍ਧਵਨਰਤਨਭਿਕ੍ਖੂ ਅਮ੍ਹਾਕਂ ਜਮ੍ਬੁਦੀਪੇ ਰਤਨਪੁਣ੍ਣਨਗਰਂ ਪੇਸੇਸੁਂ ਸਙ੍ਘਰਾਜਮਹਾਥੇਰਸ੍ਸ ਸਨ੍ਤਿਕੇ ਓਵਾਦਸ੍ਸ ਪਟਿਗ੍ਗਾਹਣਤ੍ਥਾਯ. ਤੇ ਚ ਕਲਿਯੁਗੇ ਅਟ੍ਠਾਰਸਾਧਿਕੇ ਦ੍ਵਿਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਕਤ੍ਤਿਕਮਾਸਸ੍ਸ ਜੁਣ੍ਹਪਕ੍ਖਅਟ੍ਠਮਿਯਂ ਸੀਹਲ਼ਦੀਪਤੋ ਨਿਕ੍ਖਮਿਤ੍ਵਾ ਆਗਚ੍ਛਨ੍ਤਾ ਏਕੂਨਵੀਸਾਧਿਕੇ ਦ੍ਵਿਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਫਗ੍ਗੁਨਮਾਸਸ੍ਸ ਜੁਣ੍ਹਪਕ੍ਖਸਤ੍ਤਮਿਯਂ ਰਤਨਪੁਣ੍ਣਨਗਰਂ ਸਮ੍ਪਤ੍ਤਾ.

ਅਥ ਧਮ੍ਮਰਾਜਾ ਸਙ੍ਘਰਾਜਸ੍ਸ ਆਰਾਮੇ ਚਤੁਭੂਮਿਕਂ ਵਿਹਾਰਂ ਕਾਰਾਪੇਤ੍ਵਾ ਤਤ੍ਥ ਤੇ ਵਸਾਪੇਸਿ. ਚਤੂਹਿ ਪਚ੍ਚਯੇਹਿਚ ਸਙ੍ਗਹਂ ਅਕਾਸਿ. ਸਙ੍ਘਰਾਜਾਚ ਤੇਸਂ ਦ੍ਵਿਨ੍ਨਂ ਪਕ੍ਖਿਕਾਨਂ ਵਚਨਂ ਸੁਤ੍ਵਾ ਬਹੂਹਿ ਗਨ੍ਥੇਹਿ ਸਂਸਨ੍ਦਿਤ੍ਵਾ ਵਿਵਾਦਂ ਵਿਨਿਚ੍ਛਿਨ੍ਦਿ. ਤਾਦਿਸੇ ਠਾਨੇ ਸਙ੍ਕਰਦੋਸਸ੍ਸ ਅਤ੍ਥਿਭਾਵਂ ਪਕਾਸੇਤ੍ਵਾ ਸਨ੍ਦੇਸਪਣ੍ਣਮ੍ਪਿ ਤੇਸਂ ਅਦਾਸਿ.

ਮਹਾਧਮ੍ਮਰਾਜਾਚ ¶ ਤੇਸਂ ਪੁਨ ਸਿਕ੍ਖਂ ਸਙ੍ਘਰਾਜਸ੍ਸ ਸਨ੍ਤਿਕੇ ਗਣ੍ਹਾਪੇਤ੍ਵਾ ਪਿਟਕਤ੍ਤਯਪੋਤ੍ਥਕਾਦੀਨਿ ਦਾਤਬ੍ਬਵਤ੍ਥੂਨਿ ਦਤ੍ਵਾ ਤਸ੍ਮਿਂਯੇਵ ਸਂਵਚ੍ਛਰੇ ਪਠਮਆਸਾਲ਼ਿਮਾਸਸ੍ਸ ਕਾਲ਼ਪਕ੍ਖਦਸਮਿਯਂ ਨਾਵਾਯ ਤੇ ਪੇਸੇਸਿ.

ਤਤੋ ਪਚ੍ਛਾਚ ਞਾਣਾਲਙ੍ਕਾਰਸੁਮਨਮਹਾਧਮ੍ਮਰਾਜਗੁਰੁਗਣਾਚਰਿਯਪਕ੍ਖੇ ਭਿਕ੍ਖੂਪਿ ਤਪ੍ਪਕ੍ਖਿਕਸ੍ਸ ਪਞ੍ਞਾਮੋਲਿਤ੍ਥੇਰਸ੍ਸ ਸਿਸ੍ਸੇ ਵਿਮਲਜੋਤਿਧਮ੍ਮਨਨ੍ਦਭਿਕ੍ਖੂ ਪੇਸੇਸੁਂ ਸਦ੍ਧਿਂ ਅਰਿਯਾਲਙ੍ਕਾਰੇਨ ਨਾਮ ਸਾਮਣੇਰੇਨ ਚਤੂਹਿਚ ਉਪਾਸਕੇਹਿ. ਤੇਚ ਕਲਿਯੁਗੇ ਵੀਸਾਧਿਕੇ ਦ੍ਵਿਸਤੇ ਸਹਸ੍ਸੇਚ ਸਮ੍ਪਤ੍ਤੇ ਕਤ੍ਤਿਕਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਯਂ ਸਮ੍ਪਤ੍ਤਾ.

ਤਦਾਪਿ ਸਙ੍ਘਰਾਜਸ੍ਸ ਆਰਾਮੇਯੇਵ ਏਕਂ ਵਿਹਾਰਂ ਕਾਰਾਪੇਤ੍ਵਾ ਤੇ ਵਸਾਪੇਸਿ. ਚਤੂਹਿ ਪਚ੍ਚਯੇਹਿਚ ਸਙ੍ਗਹਂ ਅਕਾਸਿ. ਸਙ੍ਘਰਾਜਾਪਿ ਪੁਨ ਵਿਨਿਚ੍ਛਯਂ ਅਦਾਸਿ ਯਥਾਵੁਤ੍ਤਨਯੇਨ. ਧਮ੍ਮਰਾਜਾ ਤੇਸਮ੍ਪਿ ਭਿਕ੍ਖੂਨਂ ਸਙ੍ਘਰਾਜਸ੍ਸ ਸਨ੍ਤਿਕੇ ਪੁਨ ਸਿਕ੍ਖਂ ਗਣ੍ਹਾਪੇਤ੍ਵਾ ਸਾਮਣੇਰਞ੍ਚ ਉਪਸਮ੍ਪਾਦੇਤ੍ਵਾ ਚਤੂਹਿ ਪਚ੍ਚਯੇਹਿ ਸਙ੍ਗਹਂ ਕਤ੍ਵਾ ਪਹਿਣਿ.

ਤਤੋ ਪਚ੍ਛਾਚ ਕਲਿਯੁਗੇ ਬਾਵੀਸਾਧਿਕੇ ਦ੍ਵਿਵਸ੍ਸਸਤੇ ਸਹਸ੍ਸੇਚ ਸਮ੍ਪਤ੍ਤੇ ਮਾਘਮਾਸਸ੍ਸ ਕਾਲ਼ਪਕ੍ਖਏਕਾਦਸਮਿਯਂ ਸੀਹਲ਼ਦੀਪਤੋਯੇਵ ਦ੍ਵੇ ਭਿਕ੍ਖੂ ਤਯੋ ਸਾਮਣੇਰਾ ਚਤ੍ਤਾਰੋ ਉਪਾਸਕਾ ਸਰਜਤਸੁਵਣ੍ਣਕਰਣ੍ਡਕਂ ਸਰਜਤਸੁਵਣ੍ਣਚੇਤਿਯਦਾਤੁਂ ਹਤ੍ਥਿਦਨ੍ਤਮਯਂ ਬੁਦ੍ਧਰੂਪਂ ਮਹਾਬੋਧਿਪਤ੍ਤਾਨਿ ਮਹਾਬੋਧਿਤਚਂ ਮਹਾਬੋਧਿਪਤਿਟ੍ਠਾਨਸੂਮਿਂ ਸੀਹਲ਼ਦਕ੍ਖਿਣਸਾਖਾਬੋਧਿਪਤ੍ਤਾਨਿ ਦੁਤਿਯਸਤ੍ਤਾਹਅਨਿਮਿਸਟ੍ਠਾਨਭੂਮਿਞ੍ਚ ਧਮ੍ਮਪਣ੍ਣਾਕਾਰਤ੍ਥਾਯ ਗਹੇਤ੍ਵਾ ਰਤਨਪੁਣ੍ਣਂ ਨਾਮ ਮਹਾਰਾਜਟ੍ਠਾਨੀਨਗਰਂ ਸਮ੍ਪਤ੍ਤਾ. ਤੇਸਮ੍ਪਿ ਧਮ੍ਮਰਾਜਾ ਚਤੂਹਿ ਪਚ੍ਚਯੇਹਿ ਸਙ੍ਗਹਂ ਕਤ੍ਵਾ ਸਙ੍ਘਰਞ੍ਞੋ ਆਰਾਮੇ ਵਸਾਪੇਸਿ. ਭਿਕ੍ਖੁਨਞ੍ਚ ਪੁਨ ਸਿਕ੍ਖਂ ਗਣ੍ਹਾਪੇਸਿ. ਸਾਮਣੇਰਾਨਞ੍ਚ ਉਪਸਮ੍ਪਦਕਮ੍ਮਂ ਗਹਟ੍ਠਾਨਞ੍ਚ ਪਬ੍ਬਜ੍ਜਕਮ੍ਮਂ ਗਣ੍ਹਾਪੇਸਿ.

ਇਚ੍ਚੇਵਂ ਮਰਮ੍ਮਰਟ੍ਠੇ ਭਗਵਤੋ ਪਰਿਨਿਬ੍ਬਾਨਤੋ ਪਟ੍ਠਾਯ ਯਾਵਜ੍ਜਤਨਾ ¶ ਸਾਸਨਸ੍ਸ ਥੇਰਪਰਮ੍ਪਰਵਸੇਨ ਪਤਿਟ੍ਠਾਨਤਾ ਵੇਦਿਤਬ੍ਬਾ.

ਇਚ੍ਚੇਵਂ ਮਰਮ੍ਮਮਣ੍ਡਲੇ ਅਰਿਮਦ੍ਦਨਪੁਰੇ ਅਰਹਨ੍ਤਤ੍ਥੇਰਗਣੋ ਉਤ੍ਤਰਾਜੀਵਤ੍ਥੇਰਛਪ੍ਪਦਤ੍ਥੇਰਗਣੋ ਸਿਵਲਿਤ੍ਥੇਰਗਣੋ ਆਨਨ੍ਦਤ੍ਥੇਰਗਣੋ ਤਾਮਲਿਨ੍ਦਤ੍ਥੇਰਗਣੋਤਿ ਪਞ੍ਚ ਗਣਾ ਅਹੇਸੁਂ.

ਇਦਾਨਿ ਅਰਿਮਦ੍ਦਨਨਗਰੇ ਪਞ੍ਚਗਣਤੋ ਪਟ੍ਠਾਯ ਵਿਜਯਪੁਰਜੇਯ੍ਯਪੁਰਰਤਨਪੂਰੇਸੁ ਥੇਰਪਰਮ੍ਪਰਵਸੇਨ ਸਾਸਨਸ੍ਸ ਅਨੁਕ੍ਕਮੇਨ ਆਗਤਭਾਵਂ ਦਸ੍ਸਯਿਸ੍ਸਾਮਿ. ਸਿਰਿਖੇਤ੍ਤਨਗਰੇ ਹਿ ‘ਸੋ ਯਾਂ ਨੋਂ’ ਨਾਮ ਰਾਜਾ ਪਰਕ੍ਕਮਵਂਸਿਕਸ੍ਸ ਸਾਰਦਸ੍ਸਿਤ੍ਥੇਰਸ੍ਸ ਅਨ੍ਤੇਵਾਸਿਕਂ ਸਦ੍ਧਮ੍ਮਟ੍ਠਿਤਿਤ੍ਥੇਰਂ ਅਤ੍ਤਨੋ ਆਚਰਿਯਂ ਕਤ੍ਵਾ ਪੂਜੇਸਿ.

ਕਲਿਯੁਗਸ੍ਸ ਚਤੁਵਸ੍ਸਾਧਿਕਅਟ੍ਠਸਤਕਾਲੇ ਸਿਰਿਖੇਤ੍ਤਨਗਰਤੋ ਆਗਨ੍ਤ੍ਵਾ ਸੋ ਰਤਨਪੂਰੇ ਰਜ੍ਜਂ ਕਾਰੇਸਿ. ਅਥ ਅਤ੍ਤਨੋ ਪੁਤ੍ਤਂ ਅਨੇਕਿਭਂ ਨਾਮ ਰਾਜਕੁਮਾਰਂ ਮਹਾਰਾਜ ਨਾਮੇਨ ਸਿਰਿਖੇਤ੍ਤਨਗਰਂ ਭੁਞ੍ਜਾਪੇਸਿ. ਦਕ੍ਖਿਣਦਿਸਾਭਾਗੇ ‘ਕੂ ਵ੍ਠੇ ਟ-ਯੋ ਮੋ’ ਨਗਰਂ, ਪਚ੍ਛਿਮਦਿਸਾਭਾਗੇ ‘ਫੋ ਖੋਂ’ ਨਾਮ ਠਾਨਂ, ਉਤ੍ਤਰਦਿਸਾਭਾਗੇ ‘ਮ ਲੋਂ’ ਨਗਰਂ, ਪੁਰਤ੍ਥਿਮਦਿਸਾਭਾਗੇ ‘ਕੋਂ ਖੋਂ’ ਨਾਮ ਠਾਨਂ, ਏਤ੍ਥਨ੍ਤਰੇ ਨਿਸਿਨ੍ਨਾਨਂ ਗਿਹੀਨਂ ਮਮ ਪੁਤ੍ਤਸ੍ਸ ਆਣਾ ਪਵਤ੍ਤਤੁ, ਭਿਕ੍ਖੂਨਂ ਮਮਾਚਰਿਯਸ੍ਸ ਸਦ੍ਧਮ੍ਮਟ੍ਠਿਤਿਤ੍ਥੇਰਸ੍ਸ ਆਣਾ ਪਵਤ੍ਤਤੂਤਿ ਨਿਯ੍ਯਾਦੇਸਿ.

ਤਸ੍ਸਚ ਸਦ੍ਧਮ੍ਮਟ੍ਠਿਤਿਤ੍ਥੇਰਸ੍ਸ ਅਰਿਯਵਂਸਤ੍ਥੇਰੋ ਮਹਾਸਾਮਿਤ੍ਥੇਰੋਤਿ ਦ੍ਵੇ ਸਿਸ੍ਸਾ ਅਹੇਸੁਂ. ਤੇਸੁ ਮਹਾਸਾਮਿਤ੍ਥੇਰੋ ਪੁਬ੍ਬੇ ਵੁਤ੍ਤਨਯੇਨ ਸਾਸਨਵਂਸਂ ਆਨੇਸ੍ਸਾਮੀਤਿ ਸੀਹਲ਼ਦੀਪਂ ਗਨ੍ਤ੍ਵਾ ਸੀਹਲ਼ਦੀਪਤੋ ਸਦ੍ਧਿਂ ਪਞ੍ਚਹਿ ਭਿਕ੍ਖੂਹਿ ਸਦ੍ਧਮ੍ਮਚਾਰਿਂ ਨਾਮ ਥੇਰਂ ਆਨੇਤ੍ਵਾ ਅਭਿਨਵਸਿਕ੍ਖਂ ਗਣ੍ਹਿਤ੍ਵਾ ਸਿਰਿਖੇਤ੍ਤਨਗਰੇ ਸੀਹਲ਼ਦੀਪਵਂਸਿਕਂ ਸਾਸਨਂ ਵਡ੍ਢਾਪੇਤ੍ਵਾ ਨਿਸੀਦਿ. ਤਸ੍ਸ ਮਹਾਸਾਰਿਤ੍ਥੇਰਸ੍ਸ ਸਿਸ੍ਸੋ ਅਤੁਲਵਂਸੋ ਨਾਮ ਥੇਰੋ ਚਤੂਸੁ ਦਿਸਾਸੁ ਅਹਿਣ੍ਡਿਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਸਿਰਿਖੇਤ੍ਤਨਗਰੇਯੇਵ ¶ ਤਮ੍ਬੁਲਭੁਞ੍ਜਮਾਤਿਕਾਸਮੀਪੇ ਸਾਸਨਂ ਪਗ੍ਗਣ੍ਹਿਤ੍ਵਾ ਨਿਸੀਦਿ. ਤਸ੍ਸ ਅਤੁਲਵਂਸਤ੍ਥੇਰਸ੍ਸ ਸਿਸ੍ਸੋ ਰਤਨਰਂਸੀ ਨਾਮ ਥੇਰੋਚ ਪਰਿਯਤ੍ਤਿਵੇਸਾਰਜ੍ਜਂ ਪਤ੍ਵਾ ਸਿਰਿਖੇਤ੍ਤਨਗਰੇਯੇਵ ਸਾਸਨਂ ਪਗ੍ਗਣ੍ਹਿਤ੍ਵਾ ਨਿਸੀਦਿ. ਤਸ੍ਸਚ ਰਤਨਰਂ ਸਿਤ੍ਥੇਰਸ੍ਸ ਸਿਸ੍ਸੋ ਸਤ੍ਵਵਧਮ੍ਮਰਾਜਸ੍ਸ ਆਚਰਿਯੋ ਅਭਿਸਙ੍ਕੇਤੋ ਨਾਮ ਥੇਰੋ ਪਰਿਯਤ੍ਤਿਵੇਸਾਰਜ੍ਜਂ ਪਤ੍ਵਾ ਸਿਰਿਖੇਤ੍ਤਨਗਰਯੇਵ ਸਾਸਨਂ ਪਗ੍ਗਣ੍ਹਿਤ੍ਵਾ ਨਿਸੀਦਿ. ਤਸ੍ਸ ਪਨ ਸਿਸ੍ਸੋ ਮੁਨਿਨ੍ਦਘੋਸੋ ਨਾਮ ਥੇਰੋ ਅਤ੍ਥਿ. ਕਲਿਯੁਗੇ ਸਤ੍ਤਤਾਧਿਕੇ ਨਵਸਤੇ ਸਮ੍ਪਤ੍ਤੇ ਪਚ੍ਛਿਮਪਕ੍ਖਾਧਿਕਰਾਜਾ ਸਿਰਿਖੇਤ੍ਤਨਗਰਂ ਅਭਿਭਵਿਤ੍ਵਾ ਨਨ੍ਦਯੋਧੇਨ ਨਾਮ ਅਮਚ੍ਚੇਨ ਸਦ੍ਧਿਂ ਤਂ ਮੁਨਿਨ੍ਦਘੋਸਤ੍ਥੇਰਂ ਆਨੇਤ੍ਵਾ ਰਤਨਪੂਰੇ ਪਤਿਟ੍ਠਾਪੇਸਿ.

ਸੋ ਕਿਰ ਪਚ੍ਛਿਮਪਕ੍ਖਾਧਿਕਰਾਜਾ ਏਵਂ ਕਥੇਸਿ,- ਅਹਂ ਸਿਰਿਖੇਤ੍ਤਨਗਰਂ ਲਭਿਤ੍ਵਾ ਏਕਂਯੇਵ ਭਿਕ੍ਖੁਂ ਏਕਂਯੇਵ ਗਿਹਿਂ ਲਭਾਮੀਤਿ.

ਸੋ ਪਨ ਥੇਰੋ ਸਾਮਣੇਰਨਾਮੇਨ ਮੁਨਿਨ੍ਦਘੋਸੋ ਨਾਮ. ਉਪਸਮ੍ਪਨ੍ਨਕਾਲੇ ਪਨ ਮਾਤੁਲਭੂਤਸ੍ਸ ਥੇਰਸ੍ਸ ਨਾਮੇਨ ਉਪਾਲਿ ਨਾਮ. ਦਿਨ੍ਨਨਾਮੇਨ ਪਨ ਤਿਪਿਟਕਾਲਙ੍ਕਾਰੋ ਨਾਮ. ਤਿਰਿਯਪਬ੍ਬਤਵਿਹਾਰੇ ਪਨ ਵਾਸਤ੍ਤਾ ਠਾਨਨਾਮੇਨ ਤਿਰਿਯਪਬ੍ਬਤਤ੍ਥੇਰੋ ਨਾਮ.

ਸੋ ਕਿਰ ਏਰਾਵਤੀਨਦੀਤੀਰੇ ਚਤੁਭੂਮਿਕਵਿਹਾਰੇ ਪਠਮਂ ਨਿਸੀਦਿਤ੍ਵਾ ਪਚ੍ਛਾ ਕਲਿਯੁਗਸ੍ਸ ਵਸ੍ਸਸਹਸ੍ਸੇ ਕਾਲੇਸਟ੍ਠਿਵਸ੍ਸਾਯੁਕੋ ਹੁਤ੍ਵਾ ਤਿਰਿਯਪਬ੍ਬਤਵਿਹਾਰੇ ਨਿਸੀਦਿ. ਸਾਮਣੇਰਕਾਲੇ ਸੋ ਜਲੁਮਸ੍ਯਾਮਭਯੇਨ ਰਤਨਪੂਰਤੋ ਨਿਕ੍ਖਮਿਤ੍ਵਾ ਕੇਤੁਮਤੀਨਗਰਂ ਪਤ੍ਵਾ ਤਤ੍ਥ ਤਿਸਾਸਨਧਜਤ੍ਥੇਰਸ੍ਸ ਸਿਸ੍ਸਭੂਤਸ੍ਸ ਧਮ੍ਮਰਾਜਗੁਰੁਤ੍ਥੇਰਸ੍ਸ ਸਨ੍ਤਿਕੇ ਗਨ੍ਥਂ ਉਗ੍ਗਣ੍ਹਿਂ. ਪਾਲ਼ਿਅਟ੍ਠਕਥਾਟੀਕਾਸੁ ਅਤਿਛੇਕਤਾਯ ਦਹਰਕਾਲੇਯੇਵਚ ਵੇਸ੍ਸਨ੍ਤਰਜਾਤਕਂ ਕਬ੍ਯਾਲਙ੍ਕਾਰੇਨ ਬਨ੍ਧਿਤ੍ਵਾ ਕਥਨਤੋ ਅਤਿਵਿਯ ਪਾਕਟੋ ਅਹੋਸਿ. ਤਸ੍ਸ ਪਨ ¶ ਥੇਰਸ੍ਸ ਸਿਸ੍ਸੋ ਉਚ੍ਚਨਗਰਵਾਸੀ ਮਹਾਤਿਸ੍ਸਤ੍ਥੇਰੋਤਿ ਸਙ੍ਗਿਰਜਨਪਦੇ ਅਰਞ੍ਞਵਾਸਂ ਵਸਿਤ੍ਵਾ ਪਰਿਯਤ੍ਤਿਂ ਵਾਚੇਤ੍ਵਾ ਸਾਸਨਂ ਪਗ੍ਗਣ੍ਹਿ. ਤਸ੍ਸ ਪਨ ਸਿਸ੍ਸੋ ਰੇਮਿਨਗਾਮੇ ਗਾਮਵਾਸੀ ਚਨ੍ਦਤ੍ਥੇਰੋ ਨਾਮ. ਤਸ੍ਸ ਸਿਸ੍ਸੋ ਤਂਗਾਮਵਾਸੀ ਗੁਣਸਿਰਿਤ੍ਥੇਰੋ ਨਾਮ. ਤਸ੍ਸ ਸਿਸ੍ਸੋ ਤਂਗਾਮਵਾਸੀ ਕਲ੍ਯਾਣਧਜਤ੍ਥਰੋ ਨਾਮ. ਸੋ ਪਨ ਥੇਰੋ ਪਦੁਮਨਗਰੇ ਸਹਸ੍ਸੋਰੋਧਬੋਧੋਦਧਿਗਾਮੇਸੁ ਪਰਿਯਤ੍ਤਿਂ ਵਾਚੇਤ੍ਵਾ ਨਿਸੀਦਿ. ਤਸ੍ਸ ਸਿਸ੍ਸੋ ਬੋਧੋਦਧਿਗਾਮਵਾਸਿਨੋ ਇਨ੍ਦੋਭਾਸਕਲ੍ਯਾਣਚਕ੍ਕਵਿਮਲਾਚਾਰਤ੍ਥੇਰਾ ਸਹਸ੍ਸੋਰੋਧਗਾਮਵਾਸਿਨੋ ਗੁਣਸਾਰਚਨ੍ਦਸਾਰਤ੍ਥੇਰਾ ਵਂਤੁਮਗਾਮਵਾਸੀ ਵਰਏਸਿਤ੍ਥੇਰੋ ਕਨ੍ਨਿਨਗਰੇ ਜਰਰਾਜਗਾਮ ਵਾਸੀ ਗੁਣਸਿਰਿਤ੍ਥੇਰੋਚਾਤਿ ਇਮੇ ਥੇਰਾ ਕਲ੍ਯਾਣਧਜਤ੍ਥੇਰਸ੍ਸ ਸਨ੍ਤਿਕੇ ਪੁਨ ਸਿਕ੍ਖਂ ਗਹੇਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਕੋਵਿਦਾ ਅਹੇਸੁਂ.

ਤਸ੍ਸੇਵ ਕਲ੍ਯਾਣਧਜਤ੍ਥੇਰਸ੍ਸ ਸਿਸ੍ਸੋ ਸਙ੍ਗਿਰਜਨਪਦੇ ਸਮਿਵਨਗਾਮੇ ਨਿਸਿਨ੍ਨੋ ਧਮ੍ਮਧਰੋ ਨਾਮ ਥੇਰੋ ਮਹਲ੍ਲਕਕਾਲੇ ਪਦੁਮਨਗਰੇ ਕੁਸੁਮਮੂਲਗਾਮੇ ਨਿਸੀਦਿਤ੍ਵਾ ਗਨ੍ਥਂ ਵਾਚੇਤ੍ਵਾ ਸਾਸਨਂ ਪਗ੍ਗਣ੍ਹਿ.

ਤੇਸੁ ਗੁਣਸਿਰਿਤ੍ਥੇਰੋ ਅਮਰਪੁਰਮਾਪਕਸ੍ਸ ਰਞ੍ਞੋ ਕਾਲੇ ਗੁਣਾਭਿਲਙ੍ਕਾਰਸਦ੍ਧਮ੍ਮਮਹਾਰਾਜਾਧਿਰਾਜਗੁਰੂਤਿ ਨਾਮਲਞ੍ਛਂ ਗਣ੍ਹਿਤ੍ਵਾ ਜੇਯ੍ਯਭੂਮਿਵਾਸਕਿਤ੍ਤਿਵਿਹਾਰੇ ਪਟਿਵਸਿ.

ਤਸ੍ਸ ਪਨ ਥੇਰਸ੍ਸ ਸਿਸ੍ਸੋ ਞਾਣਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਗੁਰੁ ਨਾਮ ਮਹਾਥੇਰੋ. ਤਸ੍ਸੇਵ ਰਞ੍ਞੋ ਕਾਲੇ ਸਙ੍ਘਰਾਜਾ ਅਹੋਸਿ. ਸੋ ਪਨ ਥੇਰੋ ਸੀਹਲ਼ਦੀਪੇ ਅਮਰਪੁਰਨਿਕਾਯਿਕਾਨਂ ਪਭਵੋ. ਗੁਣਾਭਿਲਙ੍ਕਾਰਸਦ੍ਧਮ੍ਮਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸੇਵ ਸਿਸ੍ਸੋ ਤਿਪਿਟਕਾਲਙ੍ਕਾਰਮਹਾਧਮ੍ਮਰਾਜਗੁਰੁ ਨਾਮ ਥੇਰੋ. ਤਸ੍ਸ ਸਿਸ੍ਸੋ ਸੂਰਿਯਵਂਸਾਭਿਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿ ਮਹਾਧਮ੍ਮਰਾਜਾਧਿਰਾਜਗੁਰੁ ਨਾਮ ਥੇਰੋ ਅਮਰਪੁਰਦੁਤਿਯਮਾਪਕਸ੍ਸ ਰਞ੍ਞੋ ਕਾਲੇ ¶ ਸਙ੍ਘਰਾਜਾ ਅਹੋਸਿ. ਤਸ੍ਸ ਪਨ ਸਿਸ੍ਸੋ ਞੇਯ੍ਯ ਧਮ੍ਮਾਭਿਵਂਸਮੁਨਿਵਰਞਾਣਕਿਤ੍ਤਿਸਿਰਿਪਵਰਾਲਙ੍ਕਾਰਧਮ੍ਮਸੇਨਾਪਤਿ- ਮਹਾਧਮ੍ਮਰਾਜਾਧਿਰਾਜਗੁਰੁ ਮਹਾਥੇਰੋ ਦੁਤਿਯਂ ਅਮਰਪੁਰਮਾਪਕਸ੍ਸ ਰਤਨਪੁਣ੍ਣਮਾਪਕਸ੍ਸਚ ਰਞ੍ਞੋ ਕਾਲੇਸੁ ਸਙ੍ਘ ਰਾਜਾ ਅਹੋਸਿ. ਸੋ ਪਨ ਞਾਣਾਭਿਵਂਸਧਮ੍ਮਸੇਨਾਪਤਿਮਹਾਧਮ੍ਮਰਾਜਾਧਿਰਾਜਗੁਰੁਤ੍ਥੇਰਸ੍ਸ ਸਙ੍ਘਰਞ੍ਞੋ ਸਿਸ੍ਸੋਪਿ ਵਰਏਸਿਤ੍ਥੇਰਸ੍ਸ ਸਿਸ੍ਸੋਚ ਅਹੋਸਿ.

ਅਯਂ ਸੀਹਲ਼ਦੀਪਤੋ ਸਬ੍ਬਪਚ੍ਛਿਮਾਗਤੇਹਿ ਸਦ੍ਧਮ੍ਮਚਾਰੀਮਹਾਸਾਮਿਤ੍ਥੇਰੇਹਿ ਯਾਵ ਅਮ੍ਹਾਕਂ ਆਚਰਿਯਾ ਥੇਰਪਰਮ੍ਪਰਾ ਦਸ੍ਸਨਕਥਾ.

ਅਯਮ੍ਪਿ ਅਪਰਾ ਥੇਰਪਰਮ੍ਪਰਾ ਵੇਦਿਤਬ੍ਬਾ. ਛਪ੍ਪਦਤ੍ਥੇਰਵਂਸਿਕੋ ਸਦ੍ਧਮ੍ਮਕਿਤ੍ਤਿ ਨਾਮ ਥੇਰੋ ਜੇਯ੍ਯਪੁਰਂ ਆਗਨ੍ਤ੍ਵਾ ਚਤੁਦੀਪਭੂਮਿਟ੍ਠਾਨੇ ਨਿਸੀਦਿਤ੍ਵਾ ਮਹਾਅਰਿਯਵਂਸਤ੍ਥੇਰਸ੍ਸ ਸਨ੍ਤਿਕੇ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਤਤੋ ਪਚ੍ਛਾ ਜੇਤਵਨਵਿਹਾਰਂ ਸਙ੍ਕਮਿਤ੍ਵਾ ਤਤ੍ਥ ਨਿਸੀਦਿਤ੍ਵਾ ਪਰਿਯਤ੍ਤਿਂ ਵਾਚੇਤ੍ਵਾ ਸਾਸਨਂ ਪਗ੍ਗਣ੍ਹਿ.

ਤਸ੍ਸ ਸਦ੍ਧਮ੍ਮਕਿਤ੍ਤਿਤ੍ਥੇਰਸ੍ਸ ਸਿਸ੍ਸੋ ਤਿਸਾਸਨਧਜੋ ਨਾਮ. ਤਸ੍ਸ ਸਿਸ੍ਸੋ ਧਮ੍ਮਰਾਜਗੁਰੁ ਨਾਮ. ਤਸ੍ਸ ਸਿਸ੍ਸੋ ਮੁਨਿਨ੍ਦਘੋਸੋ ਨਾਮ. ਤਸ੍ਸ ਸਿਸ੍ਸੋ ਮਹਾਤਿਸ੍ਸੋ ਨਾਮ. ਤਸ੍ਸ ਸਿਸ੍ਸੋ ਚਨ੍ਦਪਞ੍ਞੋ ਨਾਮ. ਤਸ੍ਸ ਸਿਸ੍ਸੋ ਗੁਣਸਿਰਿ ਨਾਮ. ਤਸ੍ਸ ਸਿਸ੍ਸੋ ਞਾਣਧਜੋ ਨਾਮ. ਤਸ੍ਸ ਸਿਸ੍ਸੋ ਧਮ੍ਮਧਰੋ ਨਾਮ. ਤਸ੍ਸ ਸਿਸ੍ਸੋ ਇਨ੍ਦੋਭਾਸੋ ਨਾਮ. ਤਤੋ ਪਟ੍ਠਾਯ ਕਲ੍ਯਾਣਚਕ੍ਕ ਵਿਮਲਾਚਾਰ ਗੁਣਸਾਰ ਚਨ੍ਦਸਾਰ ਵਰਏਸੀ ਗੁਣਸਿਰਿ ਞਾਣਾਭਿਵਂਸ ਞੇਯ੍ਯਧਮ੍ਮਾਭਿਵਂਸਤ੍ਥੇਰਾਨਂ ਵਸੇਨ ਸਾਸਨਵਂਸੋ ਵੇਦਿਤਬ੍ਬੋਤਿ.

ਅਯਂ ਪਤ੍ਤਲਙ੍ਕਸ੍ਸ ਛਪ੍ਪਦਤ੍ਥੇਰਸ੍ਸ ਸਿਸ੍ਸਭੂਤਾ ਸਦ੍ਧਮ੍ਮਕਿਤ੍ਤਿਤ੍ਥੇਰਤੋ ਪਟ੍ਠਾਯ ਥੇਰਪਰਮ੍ਪਰਦਸ੍ਸਨਕਥਾ.

ਇਦਂ ਰਤਨਪੁਣ੍ਣਨਗਰੇ ਸਾਸਨਸ੍ਸ ਪਤਿਟ੍ਠਾਨਂ.

ਏਵਂ ਅਪਰਨ੍ਤਰਟ੍ਠਸਙ੍ਖਾਤੇਨ ਏਕਦੇਸੇਨ ਸਕਲਮ੍ਪਿ ਮਰਮ੍ਮਰਟ੍ਠਂ ¶ ਗਹੇਤ੍ਵਾ ਸਾਸਨਵਂਸੋ ਦਸ੍ਸੇਤਬ੍ਬੋ. ਭਗਵਾਪਿ ਹਿ ਅਪਰਨ੍ਤਰਟ੍ਠੇ ਚਨ੍ਦਨਵਿਹਾਰੇ ਵਸਿਤ੍ਵਾ ਤਮ੍ਬਦੀਪਰਟ੍ਠੇ ਤਂਤਂਦੇਸਮ੍ਪਿ ਇਦ੍ਧਿਯਾ ਚਰਿਤ੍ਵਾ ਸਤ੍ਤਾਨਂ ਧਮ੍ਮਂ ਦੇਸੇਸਿਯੇਵਾਤਿ.

ਇਤਿ ਸਾਸਨਵਂਸੇ ਅਪਰਨ੍ਤਰਟ੍ਠਸਾਸਨਵਂਸਕਥਾਮਗ੍ਗੋ

ਨਾਮ ਛਟ੍ਠੋ ਪਰਿਚ੍ਛੇਦੋ.

੭. ਕਸ੍ਮਿਰਗਨ੍ਧਾਰਰਟ੍ਠਸਾਸਨਵਂਸਕਥਾਮਗ੍ਗੋ

੭. ਇਦਾਨਿ ਯਥਾਵੁਤ੍ਤਮਾਤਿਕਾਵਸੇਨ ਕਸ੍ਮੀਰਵਨ੍ਧਾਰਰਟ੍ਠਸਾਸਨਵਂਸਕਥਾਮਗ੍ਗਂ ਵਤ੍ਤੁਂ ਓਕਾਸੋ ਅਨੁਪ੍ਪਤ੍ਤੋ, ਤਸ੍ਮਾ ਤਂ ਵਕ੍ਖਾਮਿ.

ਤਤਿਯਸਙ੍ਗੀਤਾਵਸਾਨੇ ਹਿ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਮਜ੍ਝਨ੍ਤਿ ਕਤ੍ਥੇਰਂ ਕਸ੍ਮੀਰਗਨ੍ਧਾਰਰਟ੍ਠਂ ਪੇਸੇਸਿ,-ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਭਿਟ੍ਠਾਪੇਹੀਤਿ. ਏਤ੍ਥ ਚ ਕਸ੍ਮੀਰਗਨ੍ਧਾਰਰਟ੍ਠਂ ਨਾਮ ਚੀਨਰਟ੍ਠਸਮੀਪੇ ਤਿਟ੍ਠਤਿ. ਤੇਨੇਵ ਹਿ ਅਧੁਨਾ ਕਸ੍ਮੀਰਗਨ੍ਧਾਰਰਟ੍ਠਵਾਸਿਨੋ ਚਿਨਰਟ੍ਠਵਾਸਿਨੋਚ ਮਨੁਸ੍ਸਾ ਅਰਵਾਲ਼ਸ੍ਸ ਨਾਮ ਨਾਗਰਾਜਸ੍ਸ ਉਪ੍ਪਜ੍ਜਨਕਾਲਤੋ ਪਟ੍ਠਾਯ ਯਾਵਜ੍ਜਤਨਾ ਨਾਗਰੂਪਂ ਕਤ੍ਵਾ ਮਾਨੇਨ੍ਤਿ ਪੂਜੇਨ੍ਤਿ ਸਕ੍ਕਰੋਨ੍ਤਿ, ਵਤ੍ਥਭਾਜਨਾਦੀਸੁਪਿ ਨਾਗਰੂਪਮੇਵ ਤੇ ਯੇਭੁਯ੍ਯੇਨ ਕਰੋਨ੍ਤੀਤਿ.

ਸੋਚ ਮਜ੍ਝਨ੍ਤਿਕਤ੍ਥੇਰੋਪਿ ਚਤੂਹਿ ਭਿਕ੍ਖੂਹਿ ਸਦ੍ਧਿਂ ਅਤ੍ਥ ਪਞ੍ਚਮੋ ਹੁਤ੍ਵਾ ਪਾਟਲਿਪੁਤ੍ਤਤੋ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਹਿਮਵਤਿ ਅਰਵਾਲ਼ਦਹਸ੍ਸ ਉਪਰਿ ਓਤਰਿ. ਤੇਨ ਖੋ ਪਨ ਸਮਯੇਨ ਕਸ੍ਮੀਰਗਨ੍ਧਾਰਰਟ੍ਠੇ ਸਸ੍ਸਪਾਕਸਮਯੇ ਅਰਵਾਲ਼ੋ ਨਾਮ ਨਾਗਰਾਜਾ ਅਰਵਾਲ਼ਦਹੇ ਨਿਸੀਦਿਤ੍ਵਾ ਕਰਕਵਸ੍ਸਂ ਨਾਮ ਵਸ੍ਸਾਪੇਤ੍ਵਾ ਸਸ੍ਸਂ ਹਰਾਪੇਤ੍ਵਾ ਮਹਾਸਮੁਦ੍ਦਂ ਪਾਪੇਸਿ. ਤੇਰੋਚ ਅਰਵਾਲ਼ਦਹਸ੍ਸ ਉਪਰਿ ਓਤਰਿਤ੍ਵਾ ਅਰਵਾਲ਼ਦਹਪਿਟ੍ਠਿਕਂ ਚਙ੍ਕਮਤਿਪਿ ਤਿਟ੍ਠਤਿਪਿ ਨਿਸੀਦਤਿਪਿ ਸੇਯ੍ਯਮ੍ਪਿ ਕਪ੍ਪੇਤਿ. ਨਾਗਮਾਣਵਕਾ ਤਂ ਦਿਸ੍ਵਾ ਅਰਵਾਲ਼ਸ੍ਸ ਨਾਗਰਾਜਸ੍ਸ ਆਰੋਚੇਸੁਂ, - ਮਹਾਰਾਜ ਏਕੋ ਛਿਨ੍ਨਭਿਨ੍ਨਪਟਧਰੋ ਭਣ੍ਡੁਕਾਸਾਵਵਸਨੋ ਅਮ੍ਹਾਕਂ ਉਦਕਂ ਦੂਸੇਤੀਤਿ. ਤਦਾ ਪਨ ਥੇਰੋ ਅਤ੍ਤਾਨਂਯੇਵ ¶ ਨਾਗਾਨਂ ਦਸ੍ਸੇਤਿ. ਨਗਰਾਜਾ ਤਾਵਦੇਵ ਕੋਧਾਭਿਭੂਤੋ ਨਿਕ੍ਖਮਿਤ੍ਵਾ ਥੇਰਂ ਦਿਸ੍ਵਾ ਮਕ੍ਖਂ ਅਸ੍ਸਹਮਾਨੋ ਅਨ੍ਤਲਿਕ੍ਖੇ ਅਨੇਕਾਨਿ ਭਿਂਸਨਕਾਨਿ ਨਿਮ੍ਮਿਨਿ. ਤਤੋ ਤਤੋ ਭੁਸਾਵਾਤਾ ਵਾਯਨ੍ਤਿ, ਰੁਕ੍ਖਾ ਛਿਜ੍ਜਨ੍ਤਿ, ਪਬ੍ਬਤਕੂਟਾ ਪਤਨ੍ਤਿ ਮੇਘਾਗਜ੍ਜਨ੍ਤਿ, ਵਿਜ੍ਜੁਂਲਤਾ ਨਿਚ੍ਛਰਨ੍ਤਿ, ਅਸਨਿਯੋ ਫਲਨ੍ਤਿ, ਭਿਨ੍ਨਂ ਵਿਯ ਗਗਨਂ ਉਦਕਂ ਪਗ੍ਘਰਤਿ, ਭਯਾਨਕਰੂਪਾ ਨਾਗਕੁਮਾਰਾ ਸਨ੍ਨਿਪਤਨ੍ਤਿ, ਸਯਮ੍ਪਿ ਧੂਮਾਯਤਿ ਪਜ੍ਜਲਤਿ, ਪਹਰਣਵੁਟ੍ਠਿਯੋ ਵਿਸ੍ਸਜ੍ਜੇਤਿ, ਕੋ ਅਯਂਮੁਣ੍ਡਕੋ ਛਿਨ੍ਨਭਿਨ੍ਨਪਟਧਰੋਤਿਆਦੀਹਿ ਫਰੁਸਵਚਨੇਹਿ ਥੇਰਂ ਸਨ੍ਤਜ੍ਜੇਤਿ, ਏਥ ਗਣ੍ਹਥ ਹਨਥ ਨਿਦ੍ਧਮਥ ਇਮਂ ਸਮਣਨ੍ਤਿ ਨਾਗਬਲਂ ਆਣਾਪੇਸਿ.

ਥੇਰੋ ਸਬ੍ਬਂ ਤਂ ਭਿਂਸਨਕਂ ਅਤ੍ਤਨੋ ਇਦ੍ਧਿਬਲੇਨ ਪਟਿਬਾਹਿਤ੍ਵਾ ਨਾਗਰਾਜਾਨਂ ਆਹ,–

ਸਦੇਵਕੋਪਿ ਚੇ ਲੋਕੋ, ਆਗਨ੍ਤ੍ਵਾ ਤਾਸਯੇਯ੍ਯ ਮਂ;

ਨ ਮੇ ਪਟਿਬਲੋ ਅਸ੍ਸ, ਜਨੇਤੁਂ ਭਯਭੇਰਵਂ.

ਸਚੇਪਿ ਤ੍ਵਂ ਮਹਿਂ ਸਬ੍ਬ, ਸਸਮੁਦ੍ਦਂ ਸਪਬ੍ਬਤਂ;

ਉਕ੍ਖਿਪਿਤ੍ਵਾ ਮਹਾਨਾਗ, ਖਿਪੇਯ੍ਯਾਸਿ ਮਮੂਪਰਿ.

ਨੇਵ ਮੇ ਸਕ੍ਕੁਣੇਯ੍ਯਾਸਿ, ਜਨੇਤੁਂ ਭਯਭੇਰਵਂ;

ਅਞ੍ਞਦਤ੍ਥੁ ਤਵੇਵਸ੍ਸ, ਵਿਘਾਤੋ ਉਰਗਾਧਿਪਾਤਿ.

ਏਵਂ ਵੁਤ੍ਤੇ ਨਾਗਰਾਜਾ ਵਿਹਤਾਨੁਭਾਵੋ ਨਿਪ੍ਫਲਵਾਯਾਮੋ ਦੁਕ੍ਖੀ ਦੁਮ੍ਮਨੋ ਅਹੋਸਿ.

ਤਂ ਥੇਰੋ ਤਙ੍ਖਣਾਨੁਰੂਪਾਯ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਤੀਸੁ ਸਰਣੇਸੁ ਪਞ੍ਚਸੁਚ ਸੀਲੇਸੁ ਪਤਿਟ੍ਠਾਪੇਸਿ ਸਦ੍ਧਿਂ ਚਤੁਰਾਸੀਤਿਯਾ ਨਾਗਸਹਸ੍ਸੇਹਿ. ਅਞ੍ਞੇਪਿ ਬਹੂ ਹਿਮਵਨ੍ਤਵਾਸਿਨੋ ਯਕ੍ਖਾਚ ਗਨ੍ਧਬ੍ਬਾਚ ਕੁਮ੍ਭਣ੍ਡਾਚ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਸਰਣੇਸੁਚ ਸੀਲੇਸੁਚ ਪਤਿਟ੍ਠਹਿਂਸੁ. ਪਞ੍ਚਕੋਪਿ ਯਕ੍ਖੋ ਸਦ੍ਧਿਂ ਭਰਿਯਾਯ ਯਕ੍ਖਿਨਿਯਾ ਪਞ੍ਚਹਿਚ ਪੁਤ੍ਤਸਤੇਹਿ ਪਠਮੇ ¶ ਫਲੇ ਪਤਿਟ੍ਠਿਤੋ. ਅਥਾਯਸ੍ਮਾ ਮਜ੍ਝਨ੍ਤਿ ਕਤ੍ਥੇਰੋ ਸਬ੍ਬੇਨਾਗਯਕ੍ਖਰਕ੍ਖਸੇ ਆਮਨ੍ਤੇਤ੍ਵਾ ਏਵਮਾਹ,-

ਮਾਦਾਨਿ ਕੋਧਂ ਜਨਯਿਤ੍ਥ, ਇਤੋ ਉਦ੍ਧਂ ਯਥਾ ਪੁਰੇ;

ਸਸ੍ਸਘਾਤਞ੍ਚ ਮਾ ਕਤ੍ਥ, ਸੁਖਕਾਮਾ ਹਿ ਪਾਣਿਨੋ;

ਕਰੋਥ ਮੇਤ੍ਤਂ ਸਤ੍ਤੇਸੁ, ਵਸਨ੍ਤੁ ਮਨੁਜਾ ਸੁਖਨ੍ਤਿ.

ਤੇ ਸਬ੍ਬੇਪਿ ਸਾਧੁ ਭਨ੍ਤੇਤਿ ਥੇਰਸ੍ਸ ਵਚਨਂ ਪਟਿਸ੍ਸੁਣਿਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਿਂਸੁ. ਤਂ ਦਿਵਸਮੇਵ ਨਾਗਰਾਜਸ੍ਸ ਪੂਜਾਸਮਯੋ ਹੋਤਿ. ਅਥ ਨਾਗਰਾਜਾ ਅਤ੍ਤਨੋ ਰਤਨਮਯਂ ਪਲ੍ਲਙ੍ਕਂ ਆਹਰਾਪੇਤ੍ਵਾ ਥੇਰਸ੍ਸ ਪਞ੍ਞਪੇਸਿ. ਨਿਸੀਦਿ ਥੇਰੋ ਪਲ੍ਲਙ੍ਕੇ. ਨਾਗਰਾਜਾਪਿ ਥੇਰਂ ਬੀਜਯਮਾਨੋ ਸਮੀਪੇ ਅਟ੍ਠਾਸਿ. ਤਸ੍ਮਿਂ ਖਣੇ ਕਸ੍ਮੀਰਗਨ੍ਧਾਰਰਟ੍ਠਵਾਸਿਨੋ ਆਗਨ੍ਤ੍ਵਾ ਥੇਰਂ ਦਿਸ੍ਵਾ ਅਮ੍ਹਾਕਂ ਨਾਗਰਾਜਤੋਪਿ ਥੇਰੋ ਮਹਿਦ੍ਧਿਕਤਰੋਤਿ ਥੇਰਮੇਵ ਵਨ੍ਦਿਤ੍ਵਾ ਨਿਸਿਨ੍ਨਾ. ਥੇਰੋ ਤੇਸਂ ਆਸਿਵਿਸੋਪਮਸੁਤ੍ਤਂ ਕਥੇਸਿ. ਸੁਤ੍ਤਪਰਿਯੋਸਾਨੇ ਅਸੀਤਿਯਾਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਕੁਲਸਤਸਹਸ੍ਸਞ੍ਚ ਪਬ੍ਬਜਿ. ਤਤੋ ਪਭੁਤਿ ਚ ਕਸ੍ਮੀਰਗਨ੍ਧਾਰੋ ਯਾਵਜ੍ਜੇਤਨਾ ਕਾਸਾਵਪਜ੍ਜੋਤਾ ਇਸਿਵਾਤਪਟਿਵਾਤਾਏਵ.

ਗਨ੍ਤ੍ਵਾ ਕਸ੍ਮੀਰਗਨ੍ਧਾਰਂ, ਇਸਿ ਮਜ੍ਝਨ੍ਤਿਕੋ ਤਦਾ;

ਦੁਟ੍ਠਂ ਨਾਗਂ ਪਸਾਦੇਤ੍ਵਾ, ਮੋਚੇਸਿ ਬਨ੍ਧਨਾ ਬਹੂਤਿ.

ਅਧੁਨਾ ਪਨ ਕਸ੍ਮੀਰਗਨ੍ਧਾਰਰਟ੍ਠੇ ਸਾਸਨਸ੍ਸ ਅਤ੍ਥਙ੍ਗਤਸ੍ਸਵਿਯ ਸੂਰਿਯਸ੍ਸ ਓਭਾਸੋ ਨ ਪਞ੍ਞਾਯਤਿ, ਤਸ੍ਮਾ ਤਤ੍ਥ ਸਾਸਨਸ੍ਸ ਪਤਿਟ੍ਠਾਨੇ ਵਿਤ੍ਥਾਰੇਨ ਵਤ੍ਤਬ੍ਬਕਿਚ੍ਚਂ ਨਤ੍ਥੀਤਿ.

ਇਤਿ ਸਾਸਨਵਂਸੇ ਕਸ੍ਮੀਰਗਨ੍ਧਾਰਰਟ੍ਠਸਾਸਨਵਂਸਕਥਾਮਗ੍ਗੋ

ਨਾਮ ਸਤ੍ਤਮੋ ਪਰਿਚ੍ਛੇਦੋ.

੮. ਮਹਿਂਸਕਰਟ੍ਠਸ੍ਸਾਸਨਵਂਸਕਥਾਮਗ੍ਗੋ

੮. ਇਦਾਨਿ ¶ ਯਥਾਵੁਤ੍ਤਮਾਤਿਕਾਵਸੇਨ ਮਹਿਂਸਕਰਟ੍ਠਸਾਸਨਵਂਸਕਥਾਮਗ੍ਗਂ ਵਤ੍ਤੁਂ ਓਕਾਸੋ ਅਨੁਪ੍ਪਤ੍ਤੋ, ਤਸ੍ਮਾ ਤਂ ਵਕ੍ਖਾਮਿ.

ਤਤਿਯਸਙ੍ਗੀਤਾਵਸਾਨੇ ਹਿ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਮਹਾਰੇਵਤ੍ਥੇਰਂ ਮਹਿਂਸਕਮਣ੍ਡਲਂ ਪੇਸੇਸਿ,- ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਹੀਤਿ.

ਸੋਚ ਅਤ੍ਤਪਞ੍ਚਮੋ ਹੁਤ੍ਵਾ ਮਹਿਂਸਕਮਣ੍ਡਲਂ ਅਗਮਾਸਿ ਪਚ੍ਚਨ੍ਤਿਮੇਸੁ ਜਨਪਦੇਸੁ ਪਞ੍ਚਵਗ੍ਗੋ ਗਣੋ ਅਲਂ ਉਪਸਮ੍ਪਦਕਮ੍ਮਾਯਾਤਿ ਮਞ੍ਞਮਾਨੋ. ਥੇਰੋ ਮਹਿਂਸਕਮਣ੍ਡਲਂ ਗਨ੍ਤ੍ਵਾ ਦੇਵਦੂਤਸੁਤ੍ਤਂ ਕਥੇਸਿ. ਸੁਤ੍ਤਪਰਿਯੋਸਾਨੇ ਚਤ੍ਤਾਲੀਸਪਾਣਸਹਸ੍ਸਾਨਿ ਧਮ੍ਮਚਕ੍ਖੁਂ ਪ੍ਪਟਿਲਭਿਂਸੁ. ਚਤ੍ਤਾਲੀਸਂਯੇਵ ਪਾਣਸਹਸ੍ਸਾਨਿ ਪਬ੍ਬਜਿਂਸੁ.

ਗਨ੍ਤ੍ਵਾਨ ਰਟ੍ਠਂ ਮਹਿਂਸਂ, ਮਹਾਰੇਵੋ ਮਹਿਦ੍ਧਿਕੋ;

ਚੋਦੇਤ੍ਵਾ ਦੇਵਦੂਤੇਹਿ, ਮੋਚੇਸਿ ਬਨ੍ਧਨਾ ਬਹੂਤਿ.

ਅਧੁਨਾ ਪਨ ਤਤ੍ਥ ਸਾਸਨਸ੍ਸ ਅਬ੍ਭੇਹਿਵਿਯ ਪਟਿਚ੍ਛਨ੍ਨਸ੍ਸ ਸੂਰਿਯਸ੍ਸ ਓਕਾਸੋ ਦੁਬ੍ਬਲੋ ਹੁਤ੍ਵਾ ਪਞ੍ਞਾਯਤਿ.

ਇਤਿ ਸਾਸਨਵਂਸੇ ਮਹਿਂਸਕਰਟ੍ਠਸਾਸਨਵਂਸਕਥਾਮਗ੍ਗੋ

ਨਾਮ ਅਟ੍ਠਮੋ ਪਰਿਚ੍ਛੇਦੋ.

੯. ਮਹਾਰਟ੍ਠਸਾਸਨਵਂਸਕਥਾਮਗ੍ਗੋ

੯. ਇਤੋ ਪਰਂ ਮਹਾਰਟ੍ਠਸਾਸਨਵਂਸਕਥਾਮਗ੍ਗਂ ਕਥਯਿਸ੍ਸਾਮਿ ਯਥਾਵੁਤ੍ਤਮਾਤਿਕਾਵਸੇਨ.

ਤਤਿਯਸਙ੍ਗੀਤਾਵਸਾਨੇ ਹਿ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਮਹਾਧਮ੍ਮਰਕ੍ਖਿਤ੍ਥੇਰਂ ਮਹਾਰਟ੍ਠਂ ਪੇਸੇਸਿ,-ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਸੀਤਿ.

ਮਹਾਧਮ੍ਮਰਕ੍ਖਿਤਤ੍ਥੇਰੋਚ ਅਤ੍ਤਪਞ੍ਚਮੋ ਹੁਤ੍ਵਾ ਮਹਾਰਟ੍ਠਂ ਗਨ੍ਤ੍ਵਾ ਮਹਾਨਾਰਦਕਸ੍ਸਪਜਾਤਕਕਥਾਯ ਮਹਾਰਟ੍ਠਕੇ ਪਸਾਦੇਤ੍ਵਾ ¶ ਚਤੁਰਾਸੀਤਿਪਾਣਸਹਸ੍ਸਾਨਿ ਮਗ੍ਗਫਲੇਸੁ ਪਤਿਟ੍ਠਾਪੇਸਿ. ਤੇਰਸਸਹਸ੍ਸਾਨਿ ਪਬ੍ਬਜਿਂਸੁ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸਿ.

ਮਹਾਰਟ੍ਠਂ ਇਸਿ ਗਨ੍ਤ੍ਵਾ, ਸੋ ਮਹਾ ਧਮ੍ਮਰਕ੍ਖਿਤੋ;

ਜਾਤਕਂ ਕਥਯਿਤ੍ਵਾਨ, ਪਸਾਦੇਸਿ ਮਹਾਜਨਨ੍ਤਿ.

ਤਤ੍ਥ ਕਿਰ ਮਨੁਸ੍ਸਾ ਪੁਬ੍ਬੇ ਅਗ੍ਗਿਹੁਤਾਦਿਮਿਚ੍ਛਾਕਮ੍ਮਂ ਯੇਭੁਯ੍ਯੇਨ ਅਕਂਸੁ. ਤੇਨੇਵ ਥੇਰੋ ਮਹਾਨਾਰਦਕਸ੍ਸਪਜਾਤਕਕਥਂ ਦੇਸੇਸਿ. ਤਤੋ ਪਟ੍ਠਾਯ ਤਤ੍ਥ ਮਨੁਸ੍ਸਾ ਜਾਤਕ ਕਥਂ ਯੇਭੁਯ੍ਯੇਨ ਸੋਤੁਂ ਅਤਿਵਿਯ ਇਚ੍ਛਨ੍ਤਿ. ਭਿਕ੍ਖੂਚ ਯੇਭੁਯ੍ਯੇਨ ਗਹਟ੍ਠਾਨਂ ਜਾਤਕਕਥਂਯੇਵ ਦੇਸੇਨ੍ਤਿ. ਵਿਸੇਸਤੋ ਪਨ ਵਸ੍ਸਨ੍ਤਰਜਾਤਕਕਥਂ ਤੇ ਮਨੁਸ੍ਸਾ ਬਹੂਹਿ ਦਾਤਬ੍ਬਵਤ੍ਥੂਹਿ ਪੂਜੇਤ੍ਵਾ ਸੁਣਨ੍ਤਿ.

ਤਞ੍ਚ ਮਹਾਰਟ੍ਠਂ ਨਾਮ ਸ੍ਯਾਮਰਟ੍ਠਸਮੀਪੇ ਠਿਤਂ, ਤੇਨੇਵ ਸ੍ਯਾਮਰਟ੍ਠਵਾਸਿਨੋਪਿ ਭਿਕ੍ਖੂ ਗਹਟ੍ਠਾਚ ਯੇਭੁਯ੍ਯੇਨ ਸੋਤੁਂ ਇਚ੍ਛਨ੍ਤੀਤਿ. ਮਹਾਧਮ੍ਮਰਕ੍ਖਿਤਤ੍ਥੇਰੋਪਿ ਮਹਾਰਟ੍ਠਵਾਸੀਹਿ ਸਦ੍ਧਿਂ ਸਕਲਸ੍ਯਾਮਰਟ੍ਠਵਾਸੀਨਂ ਧਮ੍ਮਂ ਦੇਸੇਸਿ, ਅਮਤਰਸਂ ਪਾਯੇਸਿ, ਯਥਾ ਯੋਨਕਧਮ੍ਮਰਕ੍ਖਿਤਤ੍ਥੇਰੋ ਅਪਰਨ੍ਤਰਟ੍ਠਂ ਗਨ੍ਤ੍ਵਾ ਸਕਲਮਰਮ੍ਮਰਟ੍ਠਵਾਸੀਨਨ੍ਤਿ.

ਯਂ ਪਨ ਯੋਨਕਰਟ੍ਠਸਾਸਨਵਂਸਕਥਾਯਂ ਵੁਤ੍ਤਂ, ਤਮ੍ਪਿ ਸਬ੍ਬਂ ਏਤ੍ਥਾਪਿ ਦਟ੍ਠਬ੍ਬਂਯੇਵ, ਤੇਹਿ ਤਸ੍ਸ ਏਕਸਦਿਸਤ੍ਤੇਨ ਠਿਤਤ੍ਤਾਤਿ. ਤਥਾ ਹਿ ਨਾਗਸੇਨਤ੍ਥੇਰੋਪਿ ਯੋਨਕਰਟ੍ਠੇ ਵਸਿਤ੍ਵਾ ਸ੍ਯਾਮਰਟ੍ਠਾਦੀਸੁਪਿ ਸਾਸਨਂ ਪਤਿਟ੍ਠਾਪੇਸਿ. ਯੋਨਕਰਟ੍ਠਵਾਸਿਨੋ ਮਹਾਧਮ੍ਮਗਮ੍ਭੀਰਤ੍ਥੇਰਮਹਾਮੇਧਙ੍ਕਰਤ੍ਥੇਰਾਚ ਸਦ੍ਧਿਂ ਬਹੂਹਿ ਭਿਕ੍ਖੂਹਿ ਸੀਹਲ਼ਦੀਪਂ ਗਨ੍ਤ੍ਵਾ ਤਤੋ ਪੁਨਾਗਨ੍ਤ੍ਵਾ ਸ੍ਯਾਮਰਟ੍ਠੇ ਸੋਕ੍ਕਤਯਨਗਰਂ ਪਤ੍ਵਾ ਤਤ੍ਥ ਨਿਸੀਦਿਤ੍ਵਾ ਸਾਸਨਂ ਪਗ੍ਗਣ੍ਹਿਤ੍ਵਾ ਪਚ੍ਛਾ ਲਕੁਨ੍ਨਨਗਰੇ ਨਿਸੀਦਿਤ੍ਵਾ ਸਾਸਨਂ ਪਗ੍ਗਣ੍ਹਿ. ਏਵਂ ਯੋਨਕਰਟ੍ਠੇ ਸਾਸਨਂ ਠਿਤਂ ਸ੍ਯਾਮਾਦੀਸੁਪਿ ਠਿਤਂਯੇਵਾਤਿ ਦਟ੍ਠਬ੍ਬਂ.

ਬੁਦ੍ਧਸ੍ਸ ਭਗਵਤੋ ਪਰਿਨਿਬ੍ਬਾਨਤੋ ਦ੍ਵਿਸਤਾਧਿਕਾਨਂ ਦ੍ਵਿਨ੍ਨਂ ਵਸ੍ਸਸਹਸ੍ਸਾਨਂ ¶ ਉਪਰਿ ਨਵੁਤਿਮੇ ਵਸ੍ਸ ਸੀਹਲ਼ਦੀਪੇ ਰਜ੍ਜਂ ਪਤ੍ਤਸ੍ਸ ਕਿਤ੍ਤਿਸ੍ਸਿਰਿਰਾਜਸੀਹਮਹਾਰਾਜਸ੍ਸ ਅਭਿਸੇਕਤੋ ਤਤਿਯੇ ਵਸ੍ਸੇ ਤੇਨੇਵ ਕਿਤ੍ਤਿਸ੍ਸਿਰਿਰਾਜਸੀਹਮਹਾਰਞ੍ਞਾ ਪਹਿਤਪਣ੍ਣਾਕਾਰਸਾਸਨਂ ਆਗਮ੍ਮ ਸਰਾਮਾਧਿਪਤਿਧਮ੍ਮਿਕਮਹਾਰਾਜਾਧਿਰਾਜੇਨਾਣਤ੍ਤੇਹਿ ਲਙ੍ਕਾਦੀਪਂ ਆਗਤੇਹਿ ਉਪਾਲਿਤ੍ਥੇ ਰਾਦੀਹਿ ਪਤਿਟ੍ਠਾਪਿਤੋ ਵਂਸੋ ਉਪਾਲਿਵਂਸੋਤਿ ਪਾਕਟੋ. ਸੋਚ ਦੁਵਿਧੋ ਪੁਬ੍ਬਾਰਾਮਵਿਹਾਰਵਾਸੀਅਭਯਗਿਰਿਵਿਹਾਰਵਾਸੀਵਸੇਨਾਤਿ. ਏਵਂ ਮਹਾਨਗਰਯੋਨਕਲ੍ਯਾਮਰਟ੍ਠੇਸੁ ਸਾਸਨਂ ਥਿਰਂ ਹੁਤ੍ਵਾ ਤਿਟ੍ਠਤੀਤਿ ਵੇਦਿਤਬ੍ਬਨ੍ਤਿ.

ਇਤਿ ਸਾਸਨਵਂਸੇ ਮਹਾਰਟ੍ਠਸਾਸਨਵਂਸਕਥਾਮਗ੍ਗੋ ਨਾਮ

ਨਵਮੋ ਪਰਿਚ੍ਛੇਦੋ.

੧੦. ਚਿਨਰਟ੍ਠਸਾਸਨਵਂਸਕਥਾਮਗ੍ਗੋ

੧੦. ਤਤੋ ਪਰਂ ਪਵਕ੍ਖਾਮਿ ਚੀਨਰਟ੍ਠਸਾਸਨਵਂਸਕਥਾਮਗ੍ਗਂ ਯਥਾਟ੍ਠਵਿਤਮਾਤਿਕਾਵਸੇਨ.

ਤਤਿਯਸਙ੍ਗੀਤਾਵਸਾਨੇ ਹਿ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਮਜ੍ਝਿਮਤ੍ਥੇਰਂ ਚਿਨਰਟ੍ਠਂ ਪੇਸੇਸਿ,-ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਹੀਤਿ.

ਮਜ੍ਝਿਮਤ੍ਥੇਰੋਚ ਕਸ੍ਸਪਗੋਤ੍ਤਰੇਨ ਅਲ਼ਕਰੇਵਤ੍ਥੇਰੇਨ ਦੁਨ੍ਦਭਿਯਤ੍ਥੇਰੇਨ ਮਹਾਰੇਵਤ੍ਥੇਰੇਨਚ ਸਦ੍ਧਿਂ ਹਿਮਵਨ੍ਤਪ੍ਪਦੇਸੇ ਪਞ੍ਚਚੀਨਰਟ੍ਠਂ ਗਨ੍ਤ੍ਵਾ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਨ੍ਤਕਥਾਯਤਂ ਦੇਸਂ ਪਸਾਦੇਤ੍ਵਾ ਅਸੀਤਿਪਾਣਕੋਟਿਯੋ ਮਗ੍ਗਫਲਰਤਨਾਨਿ ਪਟਿਲਾਭੇਸਿ. ਪਞ੍ਚਪਿਚ ਤੇ ਥੇਰਾ ਪਞ੍ਚਰਟ੍ਠਾਨਿ ਪਸਾਦੇਸੁਂ. ਏਕਮੇਕਸ੍ਸ ਸਨ੍ਤਿਕੇ ਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਏਵਂ ਤੇ ਤਤ੍ਥ ਸਾਸਨਂ ਪਤਿਟ੍ਠਾਪੇਸੁਂ.

ਗਨ੍ਤ੍ਵਾ ਮਜ੍ਝਿਮਤ੍ਥੇਰੋ, ਹਿਮਵਨ੍ਤਂ ਪਸਾਦਯਿ;

ਯਕ੍ਖਸੇਨਂ ਪਕਾਸੇਨ੍ਤੋ, ਧਮ੍ਮਚਕ੍ਕਪ੍ਪਵਤ੍ਤਨਨ੍ਤਿ.

ਤਤ੍ਥ ਕਿਰ ਮਨੁਸ੍ਸਾ ਯੇਭੁਯ੍ਯੇਨ ਚਨ੍ਦੀਪਰਮੀਸ੍ਵਾਰਾਨਂ ਯਕ੍ਖਾਨਂ ਪੂਜਂ ¶ ਕਰੋਨ੍ਤਿ. ਤੇਨੇਵ ਤੇ ਪਞ੍ਚ ਥੇਰਾ ਤੇਸਂ ਯਕ੍ਖਸੇਨਂ ਪਕਾਸਯਿਤ੍ਵਾ ਧਮ੍ਮਂ ਦੇਸੇਸੁਂ. ਕਸ੍ਮੀਰਗਨ੍ਧਾਰਰਟ੍ਠਂ ਪਨ ਕਦਾਚਿ ਕਦਾਚਿ ਚੀਨਰਟ੍ਠਿਨ੍ਦਸ੍ਸ ਵਿਜਿਤਂ ਹੋਤਿ, ਕਦਾਚਿ ਕਦਾਚਿ ਪਨ ਵਿਸੁਂ ਹੋਤਿ. ਤਦਾ ਪਨ ਵਿਸੁਂਯੇਵ ਅਹੋਸੀਤਿ ਦਟ੍ਠਬ੍ਬਂ.

ਚੀਰਨਟ੍ਠੇ ਪਨ ਭਗਵਤੋ ਸਾਸਨਂ ਦੁਬ੍ਬਲਂਯੇਵ ਹੁਤ੍ਵਾ ਅਟ੍ਠਾਸਿ, ਨ ਥਿਰਂ ਹੁਤ੍ਵਾ. ਤੇਨੇਵ ਇਦਾਨਿ ਤਤ੍ਥ ਕਤ੍ਥਚਿਯੇਵ ਸਾਸਨਂ ਛਾਯਾਮਤ੍ਤਂਵ ਪਞ੍ਞਾਯਤਿ, ਵਾਤਵੇਗੇਨ ਵਿਕਿਣ੍ਣਅਬ੍ਭਂਵਿਯ ਤਿਟ੍ਠਤੀਤਿ.

ਇਤਿ ਸਾਸਨਵਂਸੇ ਚੀਨਰਟ੍ਠਸਾਸਨਵਂਸਕਥਾਮਗ੍ਗੋ ਨਾਮ

ਦਸਮੋ ਪਰਿਚ੍ਛੇਦੋ.

ਏਵਂ ਸਬ੍ਬੇਨ ਸਬ੍ਬਂ ਸਾਸਨਵਂਸਕਥਾਮਗ੍ਗੋ ਨਿਟ੍ਠਿਤੋ.

ਏਤ੍ਤਾਵਤਾਚ –

ਲਙ੍ਕਾਗਤੇਨ ਸਨ੍ਤੇਨ, ਚਿਤ੍ਰਞਾਣੇਨ ਭਿਕ੍ਖੁਨਾ;

ਸਰਣਙ੍ਕਰਨਾਮੇਨ, ਸਦ੍ਧਮ੍ਮਟ੍ਠਿਤਿਕਾਮਿਨਾ.

ਦੂਰਤੋਯੇਵ ਦੀਪਮ੍ਹਾ, ਸੁਮਙ੍ਗਲੇਨ ਜੋਤਿਨਾ;

ਵਿਸੁਦ੍ਧਸੀਲਿਨਾਚੇਵ, ਦੀਪਨ੍ਤਰਟ੍ਠਭਿਕ੍ਖੁਨਾ.

ਅਞ੍ਞੇਹਿਚਾਭਿਯਾਚਿਤੋ, ਪਞ੍ਞਾਸਾਮੀਤਿ ਨਾਮਕੋ;

ਅਕਾਸਿਂ ਸੁਟ੍ਠੁਕਂ ਗਨ੍ਥਂ, ਸਾਸਨਵਂਸਪ੍ਪਦੀਪਿਕਂ.

ਦ੍ਵਿਸਤੇਚ ਸਹਸ੍ਸੇਚ, ਤੇਵੀਸਾਧਿਕੇ ਗਤੇ;

ਪੁਣ੍ਣਾਯਂ ਮਿਗਸੀਰਸ੍ਸ, ਨਿਟ੍ਠਂ ਗਤਾਵ ਸਬ੍ਬਸੋ.

ਕੋਚਿ ਏਤ੍ਥੇਵ ਦੋਸੋ ਚੇ, ਪਞ੍ਞਾਯਤਿ ਸੁਚਿਤ੍ਤਕਾ;

ਤਂ ਖਮਨ੍ਤੁ ਚ ਸੁਦ੍ਧਿਯਾ, ਗਣ੍ਹਨ੍ਤੁ ਯੁਤ੍ਤਿਕਂ ਹਵੇਤਿ.