ਅਞ੍ਞ > ਬ੍ਯਾਕਰਣ ਗਨ੍ਥ-ਸਙ੍ਗਹੋ > ਸੁਬੋਧਾਲਙ੍ਕਾਰਪਾਠ

MMR Vol 0

Misc. Paragraph

ਸੁਬੋਧਾਲਙ੍ਕਾਰੋ

੧. ਦੋਸਾਵਬੋਧ-ਪਠਮਪਰਿਚ੍ਛੇਦ

੨. ਦੋਸਪਰਿਹਾਰਾਵਬੋਧ-ਦੁਤਿਯਪਰਿਚ੍ਛੇਦ

੩. ਗੁਣਾਵਬੋਧ-ਤਤਿਯਪਰਿਚ੍ਛੇਦ

੪. ਅਤ੍ਥਾਲਙ੍ਕਾਰਾਵਬੋਧ-ਚਤੁਤ੍ਥਪਰਿਚ੍ਛੇਦ

ਵਙ੍ਕਵੁਤ੍ਤਿ ਅਤ੍ਥਾਲਙ੍ਕਾਰ

੫. ਭਾਵਾਵਬੋਧ-ਪਞ੍ਚਮਪਰਿਚ੍ਛੇਦ

ਠਾਯੀਭਾਵ ਨਿਦ੍ਦੇਸ ਰਤਿਟ੍ਠਾਯੀਭਾਵ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਮੁਨਿਨ੍ਦਵਦਨਮ੍ਭੋਜ, ਗਬ੍ਭਸਮ੍ਭਵਸੁਨ੍ਦਰੀ;

ਸਰਣਂ ਪਾਣਿਨਂ ਵਾਣੀ, ਮਯ੍ਹਂ ਪੀਣਯਤਂ ਮਨਂ.

ਰਾਮ, ਸਮ੍ਮਾ’ਦ੍ਯ’ਲਙ੍ਕਾਰਾ, ਸਨ੍ਤਿ ਸਨ੍ਤੋ ਪੁਰਾਤਨਾ;

ਤਥਾਪਿ ਤੁ ਵਲ਼ਞ੍ਜੇਨ੍ਤਿ, ਸੁਦ੍ਧਮਾਗਧਿਕਾ ਨ ਤੇ.

ਤੇਨਾ’ਪਿ ਨਾਮ ਤੋਸੇਯ੍ਯ, ਮੇਤੇ ਲਙ੍ਕਾਰਵਜ੍ਜਿਤੇ;

ਅਨੁਰੂਪੇਨਾ’ਲਙ੍ਕਾਰੇ, ਨੇ’ਸ ਮੇਸੋ ਪਰਿਸ੍ਸਮੋ.

ਯੇਸਂ ਨ ਸਞ੍ਚਿਤਾ ਪਞ੍ਞਾ, ਨੇਕਸਤ੍ਥਨ੍ਤਰੋ’ਚਿਤਾ;

ਸਮ੍ਮੋਹ’ਬ੍ਭਾਹਤਾ ਵੇ’ਤੇ, ਨਾਵਬੁਜ੍ਝਨ੍ਤਿ ਕਿਞ੍ਚਿਪਿ.

ਕਿਂ ਤੇਹਿ ਪਾਦਸੁਸ੍ਸੂਸਾ, ਯੇਸਂ ਨਤ੍ਥਿ ਗਰੂਨਿ’ਹ;

ਯੇ ਤਪ੍ਪਾਦਰਜੋਕਿਣ੍ਣਾ, ਤੇ’ਵ ਸਾਧੂ ਵਿਵੇਕਿਨੋ.

ਕਬ੍ਬ, ਨਾਟਕਨਿਕ੍ਖਿਤ੍ਤ, ਨੇਤ੍ਤਚਿਤ੍ਤਾ ਕਵਿਜ੍ਜਨਾ;

ਯਂਕਿਞ੍ਚਿ ਰਚਯਨ੍ਤੇ’ਤਂ, ਨ ਵਿਮ੍ਹਯਕਰਂ ਪਰਂ.

ਤੇਯੇ’ਵ ਪਟਿਭਾਵੇਨ੍ਤੋ, ਸੋ’ਵ ਬਨ੍ਧੋ ਸਵਿਮ੍ਹਯੋ;

ਯੇਨ ਤੋਸੇਨ੍ਤਿ ਵਿਞ੍ਞੂ ਯੇ, ਤਤ੍ਥ ਪ੍ਯ’ਵਿਹਿਤਾ’ਦਰਾ.

ਬਨ੍ਧੋ ¶ ਚ ਨਾਮ ਸਦ੍ਦ,ਤ੍ਥਾ, ਸਹਿਤਾ ਦੋਸਵਜ੍ਜਿਤਾ;

ਪਜ੍ਜ ਗਜ੍ਜ ਵਿਮਿਸ੍ਸਾਨਂ, ਭੇਦੇਨਾ’ਯਂ ਤਿਧਾ ਭਵੇ.

ਨਿਬਨ੍ਧੋ ਚਾ’ਨਿਬਨ੍ਧੋ ਚ, ਪੁਨ ਦ੍ਵਿਧਾ ਨਿਰੁਪ੍ਪਤੇ;

ਤਂ ਤੁ ਪਾਪੇਨ੍ਤ੍ਯ’ਲਙ੍ਕਾਰਾ, ਵਿਨ੍ਦਨੀਯਤਰਤ੍ਤਨਂ.

ਅਨਵਜ੍ਜਂ ਮੁਖਮ੍ਭੋਜ [‘‘ਅਮ੍ਭੋਜ’’ਨ੍ਤਿ ਪਦਂ ਪਾਲ਼ਿਯਂ ਨਤ੍ਥਿ, ਵਾਰਿਜਵਾਚਕਂ, ਸਕ੍ਕਟਗਨ੍ਥਤੋ ਅਨੀਤਂ], ਮਨਵਜ੍ਜਾ ਚ ਭਾਰਤੀ;

ਅਲਙ੍ਕਤਾ’ਵ ਸੋਭਨ੍ਤੇ, ਕਿਂ ਨੁ ਤੇ ਨਿਰ’ਲਙ੍ਕਤਾ?

ਵਿਨਾ ਗਰੂਪਦੇਸਂ ਤਂ, ਬਾਲੋ’ਲਙ੍ਕਤ੍ਤੁ ਮਿਚ੍ਛਤਿ;

ਸਮ੍ਪਾਪੁਣੇ ਨ ਵਿਞ੍ਞੂਹਿ, ਹਸ੍ਸਭਾਵਂ ਕਥਂ ਨੁ ਸੋ?

ਗਨ੍ਥੋਪਿ ਕਵਿਵਾਚਾਨ, ਮਲਙ੍ਕਾਰ’ਪ੍ਪਕਾਸਕੋ;

ਯਾਤਿ ਤਬ੍ਬਚਨੀਯਤ੍ਤਂ, ਤ’ਬ੍ਬੋਹਾਰੂ’ਪਚਾਰਤੋ.

ਦ੍ਵਿਪ੍ਪਕਾਰਾ ਅਲਙ੍ਕਾਰਾ, ਤਤ੍ਥ ਸਦ੍ਦ, ਤ੍ਥਭੇਦਤੋ;

ਸਦ੍ਦਤ੍ਥਾ ਬਨ੍ਧਨਾਮਾ’ਵ, ਤਂਸਜ੍ਜਿਤ ਤਦਾਵਲਿ.

ਗੁਣਾਲਙ੍ਕਾਰਸਂਯੁਤ੍ਤਾ, ਅਪਿ ਦੋਸਲਵ’ਙ੍ਕਿਤਾ;

ਪਸਂਸਿਯਾ ਨ ਵਿਞ੍ਞੂਹਿ, ਸਾ ਕਞ੍ਞਾ ਵਿਯ ਤਾਦਿਸੀ.

ਤੇਨ ਦੋਸਨਿਰਾਸੋ’ਵ, ਮਹੁਸ੍ਸਾਹੇਨ ਸਾਧਿਯੋ;

ਨਿਦ੍ਦੋਸਾ ਸਬ੍ਬਥਾ ਸਾ’ਯਂ, ਸਗੁਣਾ ਨ ਭਵੇਯ੍ਯ ਕਿਂ?

ਸਾ’ਲਙ੍ਕਾਰਵਿਯੁਤ੍ਤਾ’ਪਿ, ਗੁਣਯੁਤ੍ਤਾ ਮਨੋਹਰਾ;

ਨਿਦ੍ਦੋਸਾ ਦੋਸਰਹਿਤਾ, ਗੁਣਯੁਤ੍ਤਾ ਵਧੂ ਵਿਯ.

ਪਦੇ ਵਾਕ੍ਯੇ ਤਦਤ੍ਥੇ ਚ, ਦੋਸਾ ਯੇ ਵਿਵਿਧਾ ਮਤਾ;

ਸੋ’ਦਾਹਰਣ ਮੇਤੇਸਂ, ਲਕ੍ਖਣਂ ਕਥਯਾਮ੍ਯ’ਹਂ.

ਵਿਰੁਦ੍ਧਤ੍ਥਨ੍ਤਰਾ, ਝਤ੍ਥ, ਕਿਲਿਟ੍ਠਾਨਿ, ਵਿਰੋਧਿ ਚ;

ਨੇਯ੍ਯਂ, ਵਿਸੇਸਨਾਪੇਕ੍ਖਂ, ਹੀਨਤ੍ਥਕ ਮਨਤ੍ਥਕਂ.

ਦੋਸਾ ਪਦਾਨ ਵਾਕ੍ਯਾਨ, ਮੇਕਤ੍ਥਂ ਭਗ੍ਗਰੀਤਿਕਂ;

ਤਥਾ ਬ੍ਯਾਕਿਣ੍ਣ ਗਾਮ੍ਮਾਨਿ, ਯਤਿਹੀਨਂ ਕਮਚ੍ਚੁਤਂ;

ਅਤਿਵੁਤ੍ਤ ਮਪੇਤਤ੍ਥਂ, ਸਬਨ੍ਧਫਰੁਸਂ ਤਥਾ.

ਅਪਕ੍ਕਮੋ’ ¶ , ਚਿਤ੍ਯਹੀਨਂ, ਭਗ੍ਗਰੀਤਿ, ਸਸਂਸਯਂ;

ਗਾਮ੍ਮਂ ਦੁਟ੍ਠਾਲਙ੍ਕਤੀਤਿ, ਦੋਸਾ ਵਾਕ੍ਯਤ੍ਥਨਿਸ੍ਸਿਤਾ.

ਵਿਰੁਦ੍ਧਤ੍ਥਨ੍ਤਰਂ ਤਞ੍ਹਿ, ਯਸ੍ਸ’ਞ੍ਞਤ੍ਥੋ ਵਿਰੁਜ੍ਝਤਿ;

ਅਧਿਪ੍ਪੇਤੇ ਯਥਾ ਮੇਘੋ, ਵਿਸਦੋ ਸੁਖਯੇ ਜਨਂ.

ਵਿਸੇਸ੍ਯ ਮਧਿਕਂ ਯੇਨਾ, ਝਤ੍ਥ ਮੇਤਂ ਭਵੇ ਯਥਾ;

ਓਭਾਸਿਤਾ’ਸੇਸਦਿਸੋ, ਖਜ੍ਜੋਤੋ’ਯਂ ਵਿਰਾਜਤੇ.

ਯਸ੍ਸ’ਤ੍ਥਾ’ਵਗਮੋ ਦੁਕ੍ਖੋ, ਪਕਤ੍ਯਾ’ਦਿਵਿਭਾਗਤੋ;

ਕਿਲਿਟ੍ਠਂ ਤਂ ਯਥਾ ਤਾਯ, ਸੋ’ਯ ਮਾਲਿਙ੍ਗ੍ਯਤੇ ਪਿਯਾ.

ਯਂ ਕਿਲਿਟ੍ਠਪਦਂ ਮਨ੍ਦਾ, ਭਿਧੇਯ੍ਯਂ ਯਮਕਾਦਿਕਂ;

ਕਿਲਿਟ੍ਠਪਦਦੋਸੇ’ਵ, ਤਮ੍ਪਿ ਅਨ੍ਤੋ ਕਰੀਯਤਿ.

ਪਤੀਤਸਦ੍ਦਰਚਿਤਂ, ਸਿਲਿਟ੍ਠਪਦਸਨ੍ਧਿਕਂ;

ਪਸਾਦਗੁਣਸਂਯੁਤ੍ਤਂ, ਯਮਕਂ ਮਤ ਮੇਦਿਸਂ.

ਅਬ੍ਯਪੇਤਂ ਬ੍ਯਪੇਤ’ਞ੍ਞ, ਮਾਵੁਤ੍ਤਾ’ਨੇਕਵਣ੍ਣਜਂ;

ਯਮਕਂ ਤਞ੍ਚ ਪਾਦਾਨ, ਮਾਦਿ, ਮਜ੍ਝ, ਨ੍ਤ, ਗੋਚਰਂ.

ਸੁਜਨਾ’ਸੁਜਨਾ ਸਬ੍ਬੇ, ਗੁਣੇਨਾਪਿ ਵਿਵੇਕਿਨੋ;

ਵਿਵੇਕਂ ਨ ਸਮਾਯਨ੍ਤਿ, ਅਵਿਵੇਕਿਜਨਨ੍ਤਿਕੇ.

ਕੁਸਲਾ’ਕੁਸਲਾ ਸਬ੍ਬੇ, ਪਬਲਾ’ਪਬਲਾ ਥਵਾ;

ਨੋ ਯਾਤਾ ਯਾਵ’ਹੋਸਿਤ੍ਤਂ, ਸੁਖਦੁਕ੍ਖਪ੍ਪਦਾ ਸਿਯੁਂ;

ਅਬ੍ਯਪੇਤ ਪਠਮ ਦੁਤਿਯ ਤਤਿਯਪਾਦਾਦਿ ਯਮਕਂ.

ਸਾਦਰਂ ਸਾ ਦਰਂ ਹਨ੍ਤੁ, ਵਿਹਿਤਾ ਵਿਹਿਤਾ ਮਯਾ;

ਵਨ੍ਦਨਾ ਵਨ੍ਦਨਾਮਾਨ, ਭਾਜਨੇ ਰਤਨਤ੍ਤਯੇ.

ਕਮਲਂ ਕ’ਮਲਂ ਕਤ੍ਤੁਂ, ਵਨਦੋ ਵਨਦੋ’ਮ੍ਬਰਂ;

ਸੁਗਤੋ ਸੁਗਤੋ ਲੋਕਂ, ਸਹਿਤਂ ਸ ਹਿਤਂ ਕਰਂ.

ਅਬ੍ਯਪੇਤਾਦਿਯਮਕ ¶ , ਸ੍ਸੇਸੋ ਲੇਸੋ ਨਿਦਸ੍ਸਿਤੋ;

ਞੇਯ੍ਯਾਨਿ’ਮਾਯੇਵ ਦਿਸਾ, ਯ’ਞ੍ਞਾਨਿ ਯਮਕਾਨਿਪਿ.

ਅਚ੍ਚਨ੍ਤਬਹਵੋ ਤੇਸਂ, ਭੇਦਾ ਸਮ੍ਭੇਦਯੋਨਿਯੋ;

ਤਥਾਪਿ ਕੇਚਿ ਸੁਕਰਾ, ਕੇਚਿ ਅਚ੍ਚਨ੍ਤਦੁਕ੍ਕਰਾ.

ਯਮਕਂ ਤਂ ਪਹੇਲੀ [ਪਹੇਲ਼ਿ (ਕ.)] ਚ, ਨੇਕਨ੍ਤਮਧੁਰਾਨਿ’ਤਿ;

ਉਪੇਕ੍ਖਿਯਨ੍ਤਿ ਸਬ੍ਬਾਨਿ, ਸਿਸ੍ਸਖੇਦਭਯਾ ਮਯਾ.

ਦੇਸਕਾਲਕਲਾਲੋਕ, ਞਾਯਾਗਮਵਿਰੋਧਿ ਯਂ;

ਤਂ ਵਿਰੋਧਿਪਦਂ ਚੇ’ਤ, ਮੁਦਾਹਰਣਤੋ ਫੁਟਂ.

ਯ ਦਪ੍ਪਤੀਤ ਮਾਨੀਯ, ਵਤ੍ਤਬ੍ਬਂ ਨੇਯ੍ਯ ਮਾਹੁ ਤਂ;

ਯਥਾ ਸਬ੍ਬਾਪਿ ਧਵਲਾ, ਦਿਸਾ ਰੋਚਨ੍ਤਿ ਰਤ੍ਤਿਯਂ.

ਨੇਦਿਸਂ ਬਹੁ ਮਞ੍ਞਨ੍ਤਿ, ਸਬ੍ਬੇ ਸਬ੍ਬਤ੍ਥ ਵਿਞ੍ਞੁਨੋ;

ਦੁਲ੍ਲਭਾ’ਵਗਤੀ ਸਦ੍ਦ, ਸਾਮਤ੍ਥਿਯਵਿਲਙ੍ਘਿਨੀ.

ਸਿਯਾ ਵਿਸੇਸਨਾਪੇਕ੍ਖਂ, ਯਂ ਤਂ ਪਤ੍ਵਾ ਵਿਸੇਸਨਂ;

ਸਾਤ੍ਥਕਂ ਤਂ ਯਥਾ ਤਂ ਸੋ, ਭਿਯ੍ਯੋ ਪਸ੍ਸਤਿ ਚਕ੍ਖੁਨਾ.

ਹੀਨਂ ਕਰੇ ਵਿਸੇਸ੍ਯਂ ਯਂ, ਤਂ ਹੀਨਤ੍ਥਂ ਭਵੇ ਯਥਾ;

ਨਿਪ੍ਪਭੀ ਕਤ ਖਜ੍ਜੋਤੋ, ਸਮੁਦੇਤਿ ਦਿਵਾਕਰੋ.

ਪਾਦਪੂਰਣਮਤ੍ਤਂ ਯਂ, ਅਨਤ੍ਥਮਿਤਿ ਤਂ ਮਤਂ;

ਯਥਾ ਹਿ ਵਨ੍ਦੇ ਬੁਦ੍ਧਸ੍ਸ, ਪਾਦਪਙ੍ਕੇਰੁਹਂ ਪਿ ਚ.

ਸਦ੍ਦਤੋ ਅਤ੍ਥਤੋ ਵੁਤ੍ਤਂ, ਯਤ੍ਥ ਭਿਯ੍ਯੋਪਿ ਵੁਚ੍ਚਤਿ;

ਤ ਮੇਕਤ੍ਥਂ ਯਥਾ’ਭਾਤਿ, ਵਾਰਿਦੋ ਵਾਰਿਦੋ ਅਯਂ.

ਤਿਤ੍ਥਿਯਙ੍ਕੁਰਬੀਜਾਨਿ, ਜਹਂ ਦਿਟ੍ਠਿਗਤਾਨਿ’ਹ;

ਪਸਾਦੇਤਿ ਪਸਨ੍ਨੇ’ਸੋ, ਮਹਾਮੁਨਿ ਮਹਾਜਨੇ.

ਆਰਦ੍ਧਕ੍ਕਮਵਿਚ੍ਛੇਦਾ, ਭਗ੍ਗਰੀਤਿ ਭਵੇ ਯਥਾ;

ਕਾਪਿ ਪਞ੍ਞਾ, ਕੋਪਿ ਪਗੁਣੋ, ਪਕਤੀਪਿ ਅਹੋ ਤਵ.

ਪਦਾਨਂ ¶ ਦੁਬ੍ਬਿਨਿਕ੍ਖੇਪਾ, ਬ੍ਯਾਮੋਹੋ ਯਤ੍ਥ ਜਾਯਤਿ;

ਤਂ ਬ੍ਯਾਕਿਣ੍ਣਨ੍ਤਿ ਵਿਞ੍ਞੇਯ੍ਯਂ, ਤਦੁਦਾਹਰਣਂ ਯਥਾ.

ਬਹੁਗੁਣੇ ਪਣਮਤਿ, ਦੁਜ੍ਜਨਾਨਂ ਪ੍ਯਯਂ ਜਨੋ;

ਹਿਤਂ ਪਮੁਦਿਤੋ ਨਿਚ੍ਚਂ, ਸੁਗਤਂ ਸਮਨੁਸ੍ਸਰਂ.

ਵਿਸਿਟ੍ਠਵਚਨਾ’ਪੇਤਂ, ਗਾਮ੍ਮਂ’ਤ੍ਯ’ਭਿਮਤਂ ਯਥਾ;

ਕਞ੍ਞੇ ਕਾਮਯਮਾਨਂ ਮਂ, ਨ ਕਾਮਯਸਿ ਕਿਂਨ੍ਵਿ’ਦਂ?

ਪਦਸਨ੍ਧਾਨਤੋ ਕਿਞ੍ਚਿ, ਦੁਪ੍ਪਤੀਤਿਕਰਂ ਭਵੇ;

ਤਮ੍ਪਿ ਗਾਮ੍ਮਂ ਤ੍ਯ’ਭਿਮਤਂ, ਯਥਾ ਯਾਭਵਤੋ ਪਿਯਾ.

ਵੁਤ੍ਤੇਸੁ ਸੂਚਿਤੇ ਟ੍ਠਾਨੇ, ਪਦਚ੍ਛੇਦੋ ਭਵੇ ਯਤਿ;

ਯਂ ਤਾਯ ਹੀਨਂ ਤਂ ਵੁਤ੍ਤਂ, ਯਤਿਹੀਨਨ੍ਤਿ ਸਾ ਪਨ.

ਯਤਿ ਸਬ੍ਬਤ੍ਥਪਾਦਨ੍ਤੇ, ਵੁਤ੍ਤਡ੍ਢੇ ਚ ਵਿਸੇਸਤੋ;

ਪੁਬ੍ਬਾਪਰਾਨੇਕਵਣ੍ਣ, ਪਦਮਜ੍ਝੇਪਿ ਕਤ੍ਥਚਿ.

ਤਂ ਨਮੇ ਸਿਰਸਾ ਚਾਮਿ, ਕਰਵਣ੍ਣਂ ਤਥਾਗਤਂ;

ਸਕਲਾਪਿ ਦਿਸਾ ਸਿਞ੍ਚ, ਤਿਵ ਸੋਣ੍ਣਰਸੇਹਿ ਯੋ.

ਸਰੋ ਸਨ੍ਧਿਮ੍ਹਿ ਪੁਬ੍ਬਨ੍ਤੋ, ਵਿਯ ਲੋਪੇ ਵਿਭਤ੍ਤਿਯਾ;

ਅਞ੍ਞਥਾ ਤ੍ਵ’ਞ੍ਞਥਾ ਤਤ੍ਥ, ਯਾ’ਦੇਸਾਦਿ ਪਰਾ’ਦਿ’ਵ.

ਚਾਦੀ ਪੁਬ੍ਬਪਦਨ੍ਤਾ’ਵ, ਨਿਚ੍ਚਂ ਪੁਬ੍ਬਪਦਸ੍ਸਿਤਾ;

ਪਾਦਯੋ ਨਿਚ੍ਚਸਮ੍ਬਨ੍ਧਾ, ਪਰਾਦੀਵ ਪਰੇਨ ਤੁ.

ਨਮੇ ਤਂ ਸਿਰਸਾ ਸਬ੍ਬੋ, ਪਮਾ’ਤੀਤਂ ਤਥਾਗਤਂ;

ਯਸ੍ਸ ਲੋਕਗ੍ਗਤਂ ਪਤ੍ਤ, ਸ੍ਸੋ’ਪਮਾ ਨ ਹਿ ਯੁਜ੍ਜਤਿ.

ਮੁਨਿਨ੍ਦਂ ਤਂ ਸਦਾ ਵਨ੍ਦਾ, ਮ੍ਯ’ਨਨ੍ਤਮਤਿ ਮੁਤ੍ਤਮਂ;

ਯਸ੍ਸ ਪਞ੍ਞਾ ਚ ਮੇਤ੍ਤਾ ਚ, ਨਿਸ੍ਸੀਮਾਤਿ ਵਿਜਮ੍ਭਤਿ.

ਚਾਦਿਪਾਦੀਸੁ ਪਚ੍ਚੁਦਾਹਰਣਾਨਿ ਯਥਾ

ਮਹਾਮੇਤ੍ਤਾ ਮਹਾਪਞ੍ਞਾ, ਚ ਯਤ੍ਥ ਪਰਮੋਦਯਾ;

ਪਣਮਾਮਿ ਜਿਨਂ ਤਂ ਪ, ਵਰਂ ਵਰਗੁਣਾ’ਲਯਂ.

ਪਦਤ੍ਥਕ੍ਕਮਤੋ ਮੁਤ੍ਤਂ, ਕਮਚ੍ਚੁਤ ਮਿਦਂ ਯਥਾ;

ਖੇਤ੍ਤਂ ਵਾ ਦੇਹਿ ਗਾਮਂ ਵਾ, ਦੇਸਂ ਵਾ ਮਮ ਸੋਭਨਂ.

ਲੋਕਿਯਤ੍ਥ ¶ ਮਤਿਕ੍ਕਨ੍ਤਂ, ਅਤਿਵੁਤ੍ਤਂ ਮਤਂ ਯਥਾ;

ਅਤਿਸਮ੍ਬਾਧ ਮਾਕਾਸ, ਮੇਤਿਸ੍ਸਾ ਥਨਜਮ੍ਭਨੇ.

ਸਮੁਦਾਯਤ੍ਥਤੋ’ਪੇਤਂ, ਤਂ ਅਪੇਤਤ੍ਥਕਂ ਯਥਾ;

ਗਾਵਿਪੁਤ੍ਤੋ ਬਲਿਬਦ੍ਧੋ, ਤਿਣਂ ਖਾਦੀ ਪਿਵੀ ਜਲਂ.

ਬਨ੍ਧੇ ਫਰੁਸਤਾ ਯਤ੍ਥ, ਤਂ ਬਨ੍ਧਫਰੁਸਂ ਯਥਾ;

ਖਰਾ ਖਿਲਾ ਪਰਿਕ੍ਖੀਣਾ, ਖੇਤ੍ਤੇ ਖਿਤ੍ਤਂ ਫਲਤ੍ਯ’ਲਂ.

ਞੇਯ੍ਯਂ ਲਕ੍ਖਣ ਮਨ੍ਵਤ੍ਥ, ਵਸੇਨਾ’ਪਕ੍ਕਮਾਦਿਨਂ;

ਉਦਾਹਰਣ ਮੇਤੇਸਂ, ਦਾਨਿ ਸਨ੍ਦਸ੍ਸਯਾਮ੍ਯ’ਹਂ.

ਭਾਵਨਾ, ਦਾਨ, ਸੀਲਾਨਿ, ਸਮ੍ਮਾ ਸਮ੍ਪਾਦਿਤਾਨਿ’ਹ;

ਭੋਗ, ਸਗ੍ਗਾਦਿ, ਨਿਬ੍ਬਾਨ, ਸਾਧਨਾਨਿ ਨ ਸਂਸਯੋ.

ਪੂਜਨੀਯਤਰੋ ਲੋਕੇ, ਅਹ ਮੇਕੋ ਨਿਰਨ੍ਤਰਂ;

ਮਯੇਕਸ੍ਮਿਂ ਗੁਣਾ ਸਬ੍ਬੇ, ਯਤੋ ਸਮੁਦਿਤਾ ਅਹੁਂ.

ਯਾਚਿਤੋ’ਹਂ ਕਥਂ ਨਾਮ, ਨ ਦਜ੍ਜਾਮ੍ਯ’ਪਿ ਜੀਵਿਤਂ;

ਤਥਾਪਿ ਪੁਤ੍ਤਦਾਨੇਨ, ਵੇਧਤੇ ਹਦਯਂ ਮਮ.

ਇਤ੍ਥੀਨਂ ਦੁਜ੍ਜਨਾਨਞ੍ਚ, ਵਿਸ੍ਸਾਸੋ ਨੋਪਪਜ੍ਜਤੇ;

ਵਿਸੇ ਸਿਙ੍ਗਿਮ੍ਹਿ ਨਦਿਯਂ, ਰੋਗੇ ਰਾਜਕੁਲਮ੍ਹਿ ਚ.

ਮੁਨਿਨ੍ਦਚਨ੍ਦਿਮਾ ਲੋਕ, ਸਰਲੋਲਵਿਲੋਚਨੋ;

ਜਨੋ’ ਵਕ੍ਕਨ੍ਤਪਨ੍ਥੋ’ਵ, ਗੋਪਦਸ੍ਸਨਪੀਣਿਤੋ.

ਵਾਕ੍ਯਤ੍ਥਤੋ ਦੁਪ੍ਪਤੀਤਿ, ਕਰਂ ਗਾਮ੍ਮਂ ਮਤਂ ਯਥਾ;

ਪੋਸੋ ਵੀਰਿਯਵਾ ਸੋ’ਯਂ, ਪਰਂ ਹਨ੍ਤ੍ਵਾ ਨ ਵਿਸ੍ਸਮੀ.

ਦੁਟ੍ਠਾਲਙ੍ਕਰਣਂ ਤੇਤਂ [ਤ੍ਵੇਥਂ (?)], ਯਤ੍ਥਾ’ਲਙ੍ਕਾਰਦੂਸਨਂ;

ਤਸ੍ਸਾ’ਲਙ੍ਕਾਰਨਿਦ੍ਦੇਸੇ, ਰੂਪ ਮਾਵਿ ਭਵਿਸ੍ਸਤਿ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

੨. ਦੋਸਪਰਿਹਾਰਾਵਬੋਧ-ਦੁਤਿਯਪਰਿਚ੍ਛੇਦ

ਕਦਾਚਿ ਕਵਿਕੋਸਲ੍ਲਾ, ਵਿਰੋਧੋ ਸਕਲੋ ਪ੍ਯ’ਯਂ;

ਦੋਸਸਙ੍ਖ੍ਯ ਮਤਿਕ੍ਕਮ੍ਮ, ਗੁਣਵੀਥਿਂ ਵਿਗਾਹਤੇ.

ਤੇਨ ਵੁਤ੍ਤਵਿਰੋਧਾਨ, ਮਵਿਰੋਧੋ ਯਥਾ ਸਿਯਾ;

ਤਥਾ ਦੋਸਪਰਿਹਾਰਾ, ਵਬੋਧੋ ਦਾਨਿ ਨੀਯਤੇ.

ਤਤ੍ਥ ਵਿਰੁਦ੍ਧਤ੍ਥਨ੍ਤਰਸ੍ਸ ਪਰਿਹਾਰੋ ਯਥਾ

ਵਿਨ੍ਦਨ੍ਤਂ ਪਾਕਸਾਲੀਨਂ, ਸਾਲੀਨਂ ਦਸ੍ਸਨਾ ਸੁਖਂ;

ਤਂ ਕਥਂ ਨਾਮ ਮੇਘੋ’ਯਂ, ਵਿਸਦੋ ਸੁਖਯੇ ਜਨਂ?

ਵਿਨਾਯਕੋਪਿ ਨਾਗੋ ਸਿ, ਗੋਤਮੋਪਿ ਮਹਾਮਤਿ;

ਪਣੀਤੋਪਿ ਰਸਾ’ਪੇਤੋ, ਚਿਤ੍ਤਾ ਮੇ ਸਾਮਿ ਤੇ ਗਤਿ.

ਕਥਂ ਤਾਦਿਗੁਣਾਭਾਵੇ, ਲੋਕਂ ਤੋਸੇਤਿ ਦੁਜ੍ਜਨੋ?

ਓਭਾਸਿਤਾਸੇਸਦਿਸੋ, ਖਜ੍ਜੋਤੋ ਨਾਮ ਕਿਂ ਭਵੇ?

ਪਹੇਲਿਕਾਯ [ਪਹੇਲ਼ਿਕਾਯ (ਕ.)] ਮਾਰੁਲ਼੍ਹਾ, ਨ ਹਿ ਦੁਟ੍ਠਾ ਕਿਲਿਟ੍ਠਤਾ;

ਪਿਯਾ ਸੁਖਾ’ਲਿਙ੍ਗਿਤਂ ਕ, ਮਾਲਿਙ੍ਗਤਿ ਨੁ ਨੋ ਇਤਿ.

ਯਮਕੇ ਨੋ ਪਯੋਜੇਯ੍ਯ, ਕਿਲਿਟ੍ਠਪਦ ਮਿਚ੍ਛਿਤੇ;

ਤਤੋ ਯਮਕ ਮਞ੍ਞਂ ਤੁ, ਸਬ੍ਬ ਮੇਤਂਮਯਂ ਵਿਯ.

ਬੋਧਿਸਤ੍ਤਪ੍ਪਭਾਵੇਨ ¶ , ਥਲੇਪਿ ਜਲਜਾਨ੍ਯ’ਹੁਂ;

ਨੁਦਨ੍ਤਾਨਿ’ਵ ਸੁਚਿਰਾ, ਵਾਸਕ੍ਲੇਸਂ ਤਹਿਂ ਜਲੇ.

ਮਹਾਨੁਭਾਵ ਪਿਸੁਨੋ, ਮੁਨਿਨੋ ਮਨ੍ਦ ਮਾਰੁਤੋ;

ਸਬ੍ਬੋਤੁਕਮਯਂ ਵਾਯਿ, ਧੁਨਨ੍ਤੋ ਕੁਸੁਮਂ ਸਮਂ.

ਨਿਮੁਗ੍ਗਮਾਨਸੋ ਬੁਦ੍ਧ, ਗੁਣੇ ਪਞ੍ਚਸਿਖਸ੍ਸਪਿ;

ਤਨ੍ਤਿਸ੍ਸਰ ਵਿਰੋਧੋ ਸੋ, ਨ ਸਮ੍ਪੀਣੇਤਿ ਕਂ ਜਨਂ?

ਗਣਯੇ ਚਕ੍ਕਵਾਲ਼ਂ ਸੋ, ਚਨ੍ਦਨਾਯਪਿ ਸੀਤਲਂ;

ਸਮ੍ਬੋਧਿ ਸਤ੍ਤ ਹਦਯੋ, ਪਦਿਤ੍ਤ’ਙ੍ਗਾਰਪੂਰਿਤਂ.

ਪਰਿਚ੍ਚਤ੍ਤਭਵੋਪਿ ਤ੍ਵ, ਮੁਪਨੀਤਭਵੋ ਅਸਿ;

ਅਚਿਨ੍ਤ੍ਯਗੁਣਸਾਰਾਯ, ਨਮੋ ਤੇ ਮੁਨਿਪੁਙ੍ਗਵ.

ਨੇਵਾ’ਲਪਤਿ ਕੇਨਾ’ਪਿ, ਵਚੀਵਿਞ੍ਞਤ੍ਤਿਤੋ ਯਤਿ;

ਸਮ੍ਪਜਾਨਮੁਸਾਵਾਦਾ, ਫੁਸੇਯ੍ਯਾ’ਪਤ੍ਤਿਦੁਕ੍ਕਟਂ.

ਮਰੀਚਿਚਨ੍ਦਨਾ’ਲੇਪ, ਲਾਭਾ ਸੀਤਮਰੀਚਿਨੋ;

ਇਮਾ ਸਬ੍ਬਾਪਿ ਧਵਲਾ, ਦਿਸਾ ਰੋਚਨ੍ਤਿ ਨਿਬ੍ਭਰਂ.

ਮਨੋਨੁਰਞ੍ਜਨੋ ਮਾਰ, ਙ੍ਗਨਾਸਿਙ੍ਗਾਰਵਿਬ੍ਭਮੋ;

ਜਿਨੇਨਾ’ਸਮਨੁਞ੍ਞਾਤੋ, ਮਾਰਸ੍ਸ ਹਦਯਾ’ਨਲੋ.

ਅਪਯਾਤਾ’ਪਰਾਧਮ੍ਪਿ, ਅਯਂ ਵੇਰੀ ਜਨਂ ਜਨੋ;

ਕੋਧਪਾਟਲਭੂਤੇਨ, ਭਿਯ੍ਯੋ ਪਸ੍ਸਤਿ ਚਕ੍ਖੁਨਾ.

ਅਪ੍ਪਕਾਨਮ੍ਪਿ ਪਾਪਾਨਂ, ਪਭਾਵਂ ਨਾਸਯੇ ਬੁਧੋ;

ਅਪਿ ਨਿਪ੍ਪਭਾਤਾ’ਨੀਤ, ਖਜ੍ਜੋਤੋ ਹੋਤਿ ਭਾਣੁਮਾ.

ਨ ¶ ਪਾਦਪੂਰਣਤ੍ਥਾਯ, ਪਦਂ ਯੋਜੇਯ੍ਯ ਕਤ੍ਥਚਿ,

ਯਥਾ ਵਨ੍ਦੇ ਮੁਨਿਨ੍ਦਸ੍ਸ, ਪਾਦਪਙ੍ਕੇਰੁਹਂ ਵਰਂ.

ਭਯਕੋਧਪਸਂਸਾਦਿ, ਵਿਸੇਸੋ ਤਾਦਿਸੋ ਯਦਿ;

ਵਤ੍ਤੁਂ ਕਾਮੀਯਤੇ ਦੋਸੋ, ਨ ਤਤ੍ਥੇ’ਕਤ੍ਥਤਾਕਤੋ.

ਸਪ੍ਪੋ ਸਪ੍ਪੋ! ਅਯਂ ਹਨ੍ਦ, ਨਿਵਤ੍ਤਤੁ ਭਵਂ ਤਤੋ,

ਯਦਿ ਜੀਵਿਤੁਕਾਮੋ’ਸਿ, ਕਥਂ ਤ ਮੁਪਸਪ੍ਪਸਿ?

ਯੋਕੋਚਿ ਰੂਪਾ’ਤਿਸਯੋ, ਕਨ੍ਤਿ ਕਾਪਿ ਮਨੋਹਰਾ;

ਅਬ੍ਯਾਮੋਹਕਰਂ ਬਨ੍ਧਂ, ਅਬ੍ਯਾਕਿਣ੍ਣਂ ਮਨੋਹਰਂ;

ਅਦੂਰਪਦ ਵਿਨ੍ਯਾਸਂ, ਪਸਂਸਨ੍ਤਿ ਕਵਿਸ੍ਸਰਾ.

ਨੀਲੁਪ੍ਪਲਾ’ਭਂ ਨਯਨਂ, ਬਨ੍ਧੁਕਰੁਚਿਰੋ’ਧਰੋ;

ਨਾਸਾ ਹੇਮ’ਙ੍ਕੁਸੋ ਤੇਨ, ਜਿਨੋ’ਯਂ ਪਿਯਦਸ੍ਸਨੋ.

ਸਮਤਿਕ੍ਕਨ੍ਤ ਗਾਮ੍ਮਤ੍ਤਂ, ਕਨ੍ਤ ਵਾਚਾ’ਭਿਸਙ੍ਖਤਂ;

ਬਨ੍ਧਨਂ ਰਸਹੇਤੁਤ੍ਤਾ, ਗਾਮ੍ਮਤ੍ਤਂ ਅਤਿਵਤ੍ਤਤਿ.

ਦੁਨੋਤਿ ਕਾਮਚਣ੍ਡਾਲੋ, ਸੋ ਮਂ ਸਦਯ ਨਿਦ੍ਦਯੋ;

ਈਦਿਸਂ ਬ੍ਯਸਨਾ’ਪਨ੍ਨਂ, ਸੁਖੀਪਿ ਕਿ ਮੁਪੇਕ੍ਖਸੇ?

ਯਤਿਹੀਨਪਰਿਹਾਰੋ, ਨ ਪੁਨੇ’ਦਾਨਿ ਨੀਯਤੇ;

ਯਤੋ ਨ ਸਵਨੁ’ਬ੍ਬੇਗਂ, ਹੇਟ੍ਠਾ ਯੇਸਂ ਵਿਚਾਰਿਤਂ.

ਉਦਾਰਚਰਿਤੋ’ਸਿ ਤ੍ਵਂ, ਤੇਨੇ’ਵਾ’ਰਾਧਨਾ ਤ੍ਵਯਿ;

ਦੇਸਂ ਵਾ ਦੇਹਿ ਗਾਮਂ ਵਾ, ਖੇਤ੍ਤਂ ਵਾ ਮਮ ਸੋਭਨਂ.

ਮੁਨਿਨ੍ਦਚਨ੍ਦਸਮ੍ਭੂਤ, ਯਸੋਰਾਸਿਮਰੀਚਿਨਂ;

ਸਕਲੋਪ੍ਯ’ਯ ਮਾਕਾਸੋ, ਨਾ’ਵਕਾਸੋ ਵਿਜਮ੍ਭਨੇ.

ਵਾਕ੍ਯਂ ¶ ਬ੍ਯਾਪਨ੍ਨਚਿਤ੍ਤਾਨਂ, ਅਪੇਤਤ੍ਥਂ ਅਨਿਨ੍ਦਿਤਂ;

ਤੇਨੁ’ਮ੍ਮਤ੍ਤਾਦਿਕਾਨਂ ਤਂ, ਵਚਨਾ’ਞ੍ਞਤ੍ਰ ਦੁਸ੍ਸਤਿ.

ਸਮੁਦ੍ਦੋ ਪੀਯਤੇ ਸੋ’ਯ, ਮਹ’ਮਜ੍ਜ ਜਰਾਤੁਰੋ;

ਇਮੇ ਗਜ੍ਜਨ੍ਤਿ ਜੀਮੂਤਾ, ਸਕ੍ਕਸ੍ਸੇ’ਰਾਵਣੋ ਪਿਯੋ.

ਸੁਖੁਮਾਲਾ’ਵਿਰੋਧਿਤ੍ਤ, ਦਿਤ੍ਤਭਾਵਪ੍ਪਭਾਵਿਤਂ;

ਬਨ੍ਧਨਂ ਬਨ੍ਧਫਰੁਸ, ਦੋਸਂ ਸਂਦੂਸਯੇਯ੍ਯ ਤਂ.

ਪਸ੍ਸਨ੍ਤਾ ਰੂਪਵਿਭਵਂ, ਸੁਣਨ੍ਤਾ ਮਧੁਰਂ ਗਿਰਂ;

ਚਰਨ੍ਤਿ ਸਾਧੂ ਸਮ੍ਬੁਦ੍ਧ, ਕਾਲੇ ਕੇਲ਼ਿਪਰਮ੍ਮੁਖਾ.

ਭਾਵਨਾ, ਦਾਨ, ਸੀਲਾਨਿ, ਸਮ੍ਮਾ ਸਮ੍ਪਾਦਿਤਾਨਿ’ਹ;

ਨਿਬ੍ਬਾਨ, ਭੋਗ, ਸਗ੍ਗਾਦਿ, ਸਾਧਨਾਨਿ ਨ ਸਂਸਯੋ.

ਉਦ੍ਦਿਟ੍ਠਵਿਸਯੋ ਕੋਚਿ, ਵਿਸੇਸੋ ਤਾਦਿਸੋ ਯਦਿ;

ਅਨੁ’ਦ੍ਦਿਟ੍ਠੇਸੁ ਨੇਵ’ਤ੍ਥਿ, ਦੋਸੋ ਕਮਵਿਲਙ੍ਘਨੇ.

ਕੁਸਲਾ’ਕੁਸਲਂ ਅਬ੍ਯਾ, ਕਤ’ਮਿਚ੍ਚੇਸੁ ਪਚ੍ਛਿਮਂ;

ਅਬ੍ਯਾਕਤਂ ਪਾਕਦਂ ਨ, ਪਾਕਦਂ ਪਠਮਦ੍ਵਯਂ.

ਸਗੁਣਾਨਾ’ਵਿਕਰਣੇ, ਕਾਰਣੇ ਸਤਿ ਤਾਦਿਸੇ;

ਓਚਿਤ੍ਯਹੀਨਤਾ’ਪਤ੍ਤਿ, ਨਤ੍ਥਿ ਭੂਤਤ੍ਥਸਂਸਿਨੋ.

ਓਚਿਤ੍ਯਂ ਨਾਮ ਵਿਞ੍ਞੇਯ੍ਯਂ, ਲੋਕੇ ਵਿਖ੍ਯਾਤ ਮਾਦਰਾ;

ਤਤ੍ਥੋ’ਪਦੇਸਪਭਵਾ, ਸੁਜਨਾ ਕਵਿਪੁਙ੍ਗਵਾ.

ਵਿਞ੍ਞਾਤੋਚਿਤ੍ਯਵਿਭਵੋ, ਚਿਤ੍ਯਹੀਨਂ ਪਰਿਹਰੇ;

ਯੋ ਮਾਰਸੇਨ ਮਾਸਨ੍ਨ, ਮਾਸਨ੍ਨਵਿਜਯੁ’ਸ੍ਸਵੋ;

ਤਿਣਾਯਪਿ ਨ ਮਞ੍ਞਿਤ੍ਥ, ਸੋ ਵੋ ਦੇਤੁ ਜਯਂ ਜਿਨੋ.

ਆਰਦ੍ਧਕਤ੍ਤੁਕਮ੍ਮਾਦਿ, ਕਮਾ’ਤਿਕ੍ਕਮਲਙ੍ਘਨੇ;

ਭਗ੍ਗਰੀਤਿਵਿਰੋਧੋ’ਯਂ, ਗਤਿਂ ਨ ਕ੍ਵਾ’ਪਿ ਵਿਨ੍ਦਤਿ.

ਸੁਜਨ’ਞ੍ਞਾਨ ਮਿਤ੍ਥੀਨਂ, ¶ ਵਿਸ੍ਸਾਸੋ ਨੋ’ਪਪਜ੍ਜਤੇ;

ਵਿਸਸ੍ਸ ਸਿਙ੍ਗਿਨੋ ਰੋਗ, ਨਦੀਰਾਜਕੁਲਸ੍ਸ ਚ.

ਭੇਸਜ੍ਜੇ ਵਿਹਿਤੇ ਸੁਦ੍ਧ, ਬੁਦ੍ਧਾਦਿਰਤਨਤ੍ਤਯੇ;

ਪਸਾਦ ਮਾਚਰੇ ਨਿਚ੍ਚਂ, ਸਜ੍ਜਨੇ ਸਗੁਣੇਪਿ ਚ.

ਮੁਨਿਨ੍ਦਚਨ੍ਦਿਮਾ’ਲੋਕ, ਰਸ ਲੋਲ ਵਿਲੋਚਨੋ;

ਜਨੋ’ਵਕ੍ਕਨ੍ਤਪਨ੍ਥੋ’ਵ, ਰਂਸਿਦਸ੍ਸਨਪੀਣਿਤੋ.

ਸਂਸਯਾਯੇ’ਵ ਯਂਕਿਞ੍ਚਿ, ਯਦਿ ਕੀਲ਼ਾਦਿਹੇਤੁਨਾ;

ਪਯੁਜ੍ਜਤੇ ਨ ਦੋਸੋ’ਵ, ਸਸਂਸਯਸਮਪ੍ਪਿਤੋ.

ਯਾਤੇ ਦੁਤਿਯਂ ਨਿਲਯਂ, ਗਰੁਮ੍ਹਿ ਸਕਗੇਹਤੋ;

ਪਾਪੁਣੇਯ੍ਯਾਮ ਨਿਯਤਂ, ਸੁਖ’ਮਜ੍ਝਯਨਾ’ਦਿਨਾ.

ਸੁਭਗਾ ਭਗਿਨੀ ਸਾ’ਯਂ, ਏਤਸ੍ਸਿ’ਚ੍ਚੇਵਮਾਦਿਕਂ;

ਨ ‘ਗਾਮ੍ਮ’ਮਿਤਿ ਨਿਦ੍ਦਿਟ੍ਠਂ, ਕਵੀਹਿ ਸਕਲੇਹਿਪਿ.

ਦੁਟ੍ਠਾ’ਲਙ੍ਕਾਰਵਿਗਮੇ, ਸੋਭਨਾ’ਲਙ੍ਕਤਿਕ੍ਕਮੋ;

ਅਲਙ੍ਕਾਰਪਰਿਚ੍ਛੇਦੇ, ਆਵਿਭਾਵਂ ਗਮਿਸ੍ਸਤਿ.

ਵਿਞ੍ਞਾਯਿ’ਮਂ ਗਰੁਵਰਾਨ’ਧਿਕ’ਪ੍ਪਸਾਦਾ,

ਇਤਿ ਸਙ੍ਘਰਕ੍ਖਿਤਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

ਸਮ੍ਭਵਨ੍ਤਿ ¶ ਗੁਣਾ ਯਸ੍ਮਾ, ਦੋਸਾਨੇ’ਵ’ਮਤਿਕ੍ਕਮੇ;

ਦਸ੍ਸੇਸ੍ਸਂ ਤੇ ਤਤੋ ਦਾਨਿ, ਸਦ੍ਦੇ ਸਮ੍ਭੂਸਯਨ੍ਤਿ ਯੇ.

ਪਸਾਦੋ’ਜੋ, ਮਧੁਰਤਾ, ਸਮਤਾ, ਸੁਖੁਮਾਲਤਾ;

ਸਿਲੇਸੋ’ਦਰਤਾ, ਕਨ੍ਤਿ, ਅਤ੍ਥਬ੍ਯਤ੍ਤਿ, ਸਮਾਧਯੋ.

ਗੁਣੇਹੇ’ਤੇਹਿ ਸਮ੍ਪਨ੍ਨੋ, ਬਨ੍ਧੋ ਕਵਿਮਨੋਹਰੋ;

ਸਮ੍ਪਾਦਿਯਤਿ ਕਤ੍ਤੂਨਂ, ਕਿਤ੍ਤਿ ਮਚ੍ਚਨ੍ਤਨਿਮ੍ਮਲਂ.

ਅਦੂਰਾਹਿਤਸਮ੍ਬਨ੍ਧ, ਸੁਭਗਾ ਯਾ ਪਦਾ’ਵਲਿ;

ਸੁਪਸਿਦ੍ਧਾ’ਭਿਧੇਯ੍ਯਾ’ਯਂ, ਪਸਾਦਂ ਜਨਯੇ ਯਥਾ.

ਅਲਙ੍ਕਰੋਨ੍ਤਾ ਵਦਨਂ, ਮੁਨਿਨੋ’ਧਰਰਂਸਿਯੋ;

ਸੋਭਨ੍ਤੇ’ਰੁਣਰਂਸੀ’ਵ, ਸਮ੍ਪਤਨ੍ਤਾ’ਮ੍ਬੁਜੋ’ਦਰੇ.

ਓਜੋ ਸਮਾਸਬਾਹੁਲ੍ਯ, ਮੇਸੋ ਗਜ੍ਜਸ੍ਸ ਜੀਵਿਤਂ;

ਮੁਨਿਨ੍ਦ ਮਨ੍ਦ ਸਞ੍ਜਾਤ, ਹਾਸ ਚਨ੍ਦਨ ਲਿਮ੍ਪਿਤਾ;

ਪਲ੍ਲਵਾ ਧਵਲਾ ਤਸ੍ਸੇ, ਵੇਕੋ ਨਾ’ਧਰਪਲ੍ਲਵੋ.

ਪਦਾ’ਭਿਧੇਯ੍ਯਵਿਸਯਂ, ਸਮਾਸ ਬ੍ਯਾਸ ਸਮ੍ਭਵਂ;

ਯਂ ਪਾਰਿਣਤ੍ਯਂ ਹੋਤੀ’ਹ, ਸੋਪਿ ਓਜੋ’ਵ ਤਂ ਯਥਾ.

ਜੋਤਯਿਤ੍ਵਾਨ ਸਦ੍ਧਮ੍ਮਂ, ਸਨ੍ਤਾਰੇਤ੍ਵਾ ਸਦੇਵਕੇ;

ਜਲਿਤ੍ਵਾ ਅਗ੍ਗਿਖਨ੍ਧੋ’ਵ, ਨਿਬ੍ਬੁਤੋ ਸੋ ਸਸਾਵਕੋ.

ਮਤ੍ਥਕਟ੍ਠੀ ਮਤਸ੍ਸਾ’ਪਿ, ਰਜੋਭਾਵਂ ਵਜਨ੍ਤੁ ਮੇ;

ਯਤੋ ਪੁਞ੍ਞੇਨ ਤੇ ਸੇਨ੍ਤੁ, ਜਿਨ ਪਾਦ’ਮ੍ਬੁਜਦ੍ਵਯੇ.

ਇਚ੍ਚਤ੍ਰ ¶ ਨਿਚ੍ਚਪ੍ਪਣਤਿ, ਗੇਧੋ ਸਾਧੁ ਪਦਿਸ੍ਸਤਿ;

ਜਾਯਤੇ’ਯਂ ਗੁਣੋ ਤਿਕ੍ਖ, ਪਞ੍ਞਾਨਮਭਿਯੋਗਤੋ.

ਮਧੁਰਤ੍ਤਂ ਪਦਾਸਤ੍ਤਿ, ਰ’ਨੁਪ੍ਪਾਸਵਸਾ ਦ੍ਵਿਧਾ;

ਸਿਯਾ ਸਮਸੁਤਿ ਪੁਬ੍ਬਾ, ਵਣ੍ਣਾ’ਵੁਤ੍ਤਿ ਪਰੋ ਯਥਾ.

ਯਦਾ ਏਸੋ’ਭਿਸਮ੍ਬੋਧਿਂ, ਸਮ੍ਪਤ੍ਤੋ ਮੁਨਿਪੁਙ੍ਗਵੋ;

ਤਦਾ ਪਭੁਤਿ ਧਮ੍ਮਸ੍ਸ, ਲੋਕੇ ਜਾਤੋ ਮਹੁ’ਸ੍ਸਵੋ.

ਮੁਨਿਨ੍ਦਮਨ੍ਦਹਾਸਾ ਤੇ, ਕੁਨ੍ਦ ਸਨ੍ਦੋਹਵਿਬ੍ਭਮਾ;

ਦਿਸਨ੍ਤ ਮਨੁਧਾਵਨ੍ਤਿ, ਹਸਨ੍ਤਾ ਚਨ੍ਦਕਨ੍ਤਿਯੋ.

ਸਬ੍ਬਕੋਮਲਵਣ੍ਣੇਹਿ, ਨਾ’ਨੁਪ੍ਪਾਸੋ ਪਸਂਸਿਯੋ;

ਯਥਾ’ਯਂ ਮਾਲਤੀਮਾਲਾ, ਲਿਨ ਲੋਲਾ’ਲਿਮਾਲਿਨੀ.

ਮੁਦੂਹਿ ਵਾ ਕੇਵਲੇਹਿ, ਕੇਵਲੇਹਿ ਫੁਟੇਹਿ ਵਾ,

ਮਿਸ੍ਸੇਹਿ ਵਾ ਤਿਧਾ ਹੋਤਿ, ਵਣ੍ਣੇਹਿ ਸਮਤਾ ਯਥਾ.

ਕੋਕਿਲਾ’ਲਾਪਸਂਵਾਦੀ, ਮੁਨਿਨ੍ਦਾ’ਲਾਪਵਿਬ੍ਭਮੋ;

ਹਦਯਙ੍ਗਮਤਂ ਯਾਤਿ, ਸਤਂ ਦੇਤਿ ਚ ਨਿਬ੍ਬੁਤਿਂ.

ਸਮ੍ਭਾਵਨੀਯਸਮ੍ਭਾਵਂ, ਭਗਵਨ੍ਤਂ ਭਵਨ੍ਤਗੁਂ;

ਭਵਨ੍ਤਸਾਧਨਾ’ਕਙ੍ਖੀ, ਕੋ ਨ ਸਮ੍ਭਾਵਯੇ ਵਿਭੁਂ.

ਲਦ੍ਧਚਨ੍ਦਨਸਂਸਗ੍ਗ, ਸੁਗਨ੍ਧਿ ਮਲਯਾ’ਨਿਲੋ;

ਮਨ੍ਦ ਮਾਯਾਤਿ ਭੀਤੋ’ਵ, ਮੁਨਿਨ੍ਦਮੁਖਮਾਰੁਤਾ.

ਅਨਿਟ੍ਠੁਰ’ਕ੍ਖਰ’ਪ੍ਪਾਯਾ, ਸਬ੍ਬਕੋਮਲ ਨਿਸ੍ਸਟਾ;

ਕਿਚ੍ਛਮੁਚ੍ਚਾਰਣਾ’ਪੇਤ, ਬ੍ਯਞ੍ਜਨਾ ਸੁਖੁਮਾਲਤਾ.

ਪਸ੍ਸਨ੍ਤਾ ਰੂਪਵਿਭਵਂ, ਸੁਣਨ੍ਤਾ ਮਧੁਰਂ ਗਿਰਂ;

ਚਰਨ੍ਤਿ ਸਾਧੂ [ਸਾਧੁ (ਸੀ-ਛਨ੍ਧਾਨੁਰਕ੍ਖਣਤ੍ਥਂ)] ਸਮ੍ਬੁਦ੍ਧ, ਕਾਲੇ ਕੇਲ਼ਿਪਰਮ੍ਮੁਖਾ.

ਅਲਙ੍ਕਾਰਵਿਹੀਨਾ’ਪਿ, ਸਤਂ ਸਮ੍ਮੁਖਤੇ’ਦਿਸੀ;

ਆਰੋਹਤਿ ਵਿਸੇਸੇਨ, ਰਮਣੀਯਾ ਤ’ਦੁਜ੍ਜਲਾ.

ਰੋਮਞ੍ਚ ¶ ਪਿਞ੍ਛ ਰਚਨਾ, ਸਾਧੁ ਵਾਦਾਹਿਤਦ੍ਧਨੀ;

ਲਲ਼ਨ੍ਤਿ’ਮੇ ਮੁਨਿਮੇਘੁ, ਮ੍ਮਦਾ ਸਾਧੁ ਸਿਖਾਵਲਾ.

ਸੁਖੁਮਾਲਤ੍ਤ ਮਤ੍ਥੇ’ਵ, ਪਦਤ੍ਥਵਿਸਯਮ੍ਪਿ ਚ;

ਯਥਾ ਮਤਾਦਿਸਦ੍ਦੇਸੁ, ਕਿਤ੍ਤਿਸੇਸਾਦਿਕਿਤ੍ਤਨਂ.

ਸਿਲਿਟ੍ਠ ਪਦ ਸਂਸਗ੍ਗ, ਰਮਣੀਯ ਗੁਣਾ’ਲਯੋ;

ਸਬਨ੍ਧਗਾਰਵੋ ਸੋ’ਯਂ, ਸਿਲੇਸੋ ਨਾਮ ਤਂ ਯਥਾ.

ਬਾਲਿ’ਨ੍ਦੁਵਿਬ੍ਭਮ’ਚ੍ਛੇਦਿ, ਨਖਰਾ’ਵਲਿ ਕਨ੍ਤਿਭਿ;

ਸਾ ਮੁਨਿਨ੍ਦਪਦ’ਮ੍ਭੋਜ, ਕਨ੍ਤਿ ਵੋ ਵਲਿਤਾ’ਵਤਂ.

ਉਕ੍ਕਂਸਵਨ੍ਤੋ ਯੋਕੋਚਿ, ਗੁਣੋ ਯਦਿ ਪਤੀਯਤੇ;

ਉਦਾਰੋ’ਯਂ ਭਵੇ ਤੇਨ, ਸਨਾਥਾ ਬਨ੍ਧਪਦ੍ਧਤਿ.

ਪਾਦਮ੍ਭੋਜ ਰਜੋ ਲਿਤ੍ਤ, ਗਤ੍ਤਾ ਯੇ ਤਵ ਗੋਤਮ;

ਅਹੋ! ਤੇ ਜਨ੍ਤਵੋ ਯਨ੍ਤਿ, ਸਬ੍ਬਥਾ ਨਿਰਜਤ੍ਤਨਂ.

ਏਵਂ ਜਿਨਾ’ਨੁਭਾਵਸ੍ਸ, ਸਮੁਕ੍ਕਂਸੋ’ਤ੍ਰ ਦਿਸ੍ਸਤਿ;

ਪਞ੍ਞਵਾ ਵਿਧਿਨਾ’ਨੇਨ, ਚਿਨ੍ਤਯੇ ਪਰ ਮੀਦਿਸਂ.

ਉਦਾਰੋ ਸੋਪਿ ਵਿਞ੍ਞੇਯ੍ਯੋ, ਯਂ ਪਸਤ੍ਥ ਵਿਸੇਸਨਂ;

ਯਥਾ ਕੀਲ਼ਾਸਰੋ ਲੀਲਾ, ਹਾਸੋ ਹੇਮਙ੍ਗਦਾ’ਦਯੋ.

ਲੋਕਿਯ’ਤ੍ਥਾ’ਨ’ਤਿਕ੍ਕਨ੍ਤਾ, ਕਨ੍ਤਾ ਸਬ੍ਬਜਨਾਨਪਿ;

ਕਨ੍ਤਿ ਨਾਮਾ’ਤਿਵੁਤ੍ਤਸ੍ਸ, ਵੁਤ੍ਤਾ ਸਾ ਪਰਿਹਾਰਤੋ.

ਸਾ’ਯਂ ਤਦੁਭਯਾ ਨੇਯ੍ਯ, ਪਰਿਹਾਰੇ ਪਦਸ੍ਸਿਤਾ;

ਯਥਾ ਮਰੀਚਿਚ੍ਚਾਦਿ ਚ, ਮਨੋਨੁਰਞ੍ਜਨੋਚ੍ਚਾਦਿ.

ਸਭਾਵਾ’ਮਲਤਾ ਧੀਰ, ਮੁਧਾ ਪਾਦਨਖੇਸੁ ਤੇ;

ਯਤੋ ਤੇ’ਵਨਤਾ’ਨਨ੍ਤ, ਮੋਲ਼ਿਚ੍ਛਾਯਾ ਜਹਨ੍ਤਿ ਨੋ.

‘ਬਨ੍ਧਸਾਰੋ’ਤਿ ਮਞ੍ਞਨ੍ਤਿ, ਯਂ ਸਮਗ੍ਗਾਪਿ ਵਿਞ੍ਞੁਨੋ;

ਦਸ੍ਸਨਾ’ਵਸਰਂ ਪਤ੍ਤੋ, ਸਮਾਧਿ ਨਾਮ’ਯਂ ਗੁਣੋ.

ਅਞ੍ਞਧਮ੍ਮੋ ਤਤੋ’ਞ੍ਞਤ੍ਥ, ਲੋਕਸੀਮਾ’ਨੁਰੋਧਤੋ;

ਸਮ੍ਮਾ ਆਧੀਯਤੇ’ਚ੍ਚੇ’ਸੋ, ‘ਸਮਾਧੀ’ਤਿ ਨਿਰੁਚ੍ਚਤਿ.

ਅਪਾਣੇ ¶ ਪਾਣੀਨਂ ਧਮ੍ਮੋ, ਸਮ੍ਮਾ ਆਧੀਯਤੇ ਕ੍ਵਚਿ,;

ਨਿਰੂਪੇ ਰੂਪਯੁਤ੍ਤਸ੍ਸ, ਨਿਰਸੇ ਸਰਸਸ੍ਸ, ਚ.

ਅਦ੍ਰਵੇ ਦ੍ਰਵਯੁਤ੍ਤਸ੍ਸ, ਅਕਤ੍ਤਰਿਪਿ ਕਤ੍ਤੁਤਾ,;

ਕਠਿਨਸ੍ਸਾ’ਸਰੀਰੇ,ਪਿ, ਰੂਪਂ ਤੇਸਂ ਕਮਾ ਸਿਯਾ.

ਉਣ੍ਣਾ ਪੁਣ੍ਣਿ’ਨ੍ਦੁਨਾ ਨਾਥ! ਦਿਵਾਪਿ ਸਹ ਸਙ੍ਗਮਾ;

ਵਿਨਿਦ੍ਦਾ ਸਮ੍ਪਮੋਦਨ੍ਤਿ, ਮਞ੍ਞੇ ਕੁਮੁਦਿਨੀ ਤਵ.

ਦਯਾਰਸੇਸੁ ਮੁਜ੍ਜਨ੍ਤਾ, ਜਨਾ’ਮਤਰਸੇਸ੍ਵਿ’ਵ;

ਸੁਖਿਤਾ ਹਤਦੋਸਾ ਤੇ, ਨਾਥ! ਪਾਦ’ਮ੍ਬੁਜਾ’ਨਤਾ.

ਮਧੁਰੇਪਿ ਗੁਣੇ ਧੀਰ, ਨ’ਪ੍ਪਸੀਦਨ੍ਤਿ ਯੇ ਤਵ;

ਕੀਦਿਸੀ ਮਨਸੋਵੁਤ੍ਤਿ, ਤੇਸਂ ਖਾਰਗੁਣਾਨ ਭੋ’.

ਸਬ੍ਬਤ੍ਥਸਿਦ੍ਧ! ਚੂਲ਼ਕ, ਪੁਟਪੇਯ੍ਯਾ ਮਹਾਗੁਣਾ;

ਦਿਸਾ ਸਮਨ੍ਤਾ ਧਾਵਨ੍ਤਿ, ਕੁਨ੍ਦਸੋਭਾ ਸ ਲਕ੍ਖਣਾ.

ਮਾਰਾ’ਰਿਬਲਵਿਸ੍ਸਟ੍ਠਾ, ਕੁਣ੍ਠਾ ਨਾਨਾਵਿਧਾ’ਯੁਧਾ;

ਲਜ੍ਜਮਾਨਾ’ਞ੍ਞਵੇਸੇਨ, ਜਿਨ! ਪਾਦਾ’ਨਤਾ ਤਵ.

ਸਦ੍ਧਮ੍ਮਰਂਸਿਨਾ ਭਾਤਿ, ਭਿਨ੍ਦ ਮਨ੍ਦਤਮਂ ਪਰਂ.

ਵਮਨੁ’ਗ੍ਗਿਰਨਾਦ੍ਯੇ’ਤਂ, ਗੁਣਵੁਤ੍ਯ’ਪਰਿਚ੍ਚੁਤਂ;

ਅਤਿਸੁਨ੍ਦਰ ਮਞ੍ਞਂ ਤੁ, ਕਾਮਂ ਵਿਨ੍ਦਤਿ ਗਾਮ੍ਮਤਂ.

ਕਨ੍ਤੀਨਂ ਵਮਨਬ੍ਯਾਜਾ, ਮੁਨਿਪਾਦਨਖਾ’ਵਲੀ;

ਚਨ੍ਦਕਨ੍ਤੀ ਪਿਵਨ੍ਤੀ’ਵ, ਨਿਪ੍ਪਭਂ ਤਂ ਕਰੋਨ੍ਤਿਯੋ.

ਅਚਿਤ੍ਤਕਤ੍ਤੁਕਂ ¶ ਰੁਚ੍ਯ [ਰੁਚ੍ਚ (ਸੀ.)], ਮਿਚ੍ਚੇਵਂ ਗੁਣਕਮ੍ਮਤਂ;

ਸਚਿਤ੍ਤਕਤ੍ਤੁਕਂ ਪੇ’ਤਂ, ਗੁਣਕਮ੍ਮਂ ਯਦੁ’ਤ੍ਤਮਂ.

ਉਗ੍ਗਿਰਨ੍ਤੋ’ਵ ਸਸ੍ਨੇਹ, ਰਸਂ ਜਿਨਵਰੋ ਜਨੇ;

ਭਾਸਨ੍ਤੋ ਮਧੁਰਂ ਧਮ੍ਮਂ, ਕਂ ਨ ਸਪ੍ਪੀਣਯੇ ਜਨਂ.

ਯੋ ਸਦ੍ਦਸਤ੍ਥਕੁਸਲੋ ਕੁਸਲੋ ਨਿਘਣ੍ਡੁ,

ਛਨ੍ਦੋਅਲਙ੍ਕਤਿਸੁ ਨਿਚ੍ਚਕਤਾ’ਭਿਯੋਗੋ;

ਸੋ’ਯਂ ਕਵਿਤ੍ਤਵਿਕਲੋਪਿ ਕਵੀਸੁ ਸਙ੍ਖ੍ਯ,

ਮੋਗ੍ਗਯ੍ਹ ਵਿਨ੍ਦਤਿ ਹਿ ਕਿਤ੍ਤਿ’ ਮਮਨ੍ਦਰੂਪਂ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

੪. ਅਤ੍ਥਾਲਙ੍ਕਾਰਾਵਬੋਧ-ਚਤੁਤ੍ਥਪਰਿਚ੍ਛੇਦ

ਅਤ੍ਥਾਲਙ੍ਕਾਰਸਹਿਤਾ, ਸਗੁਣਾ ਬਨ੍ਧਪਦ੍ਧਤਿ;

ਅਚ੍ਚਨ੍ਤਕਨ੍ਤਾ ਕਨ੍ਤਾ [ਯਤੋ ਅਚ੍ਚਨ੍ਤਕਨ੍ਤਾ (ਕ.)] ਵ ਵੁਚ੍ਚਨ੍ਤੇ ਤੇ ਤਤੋ’ਧੁਨਾ.

ਸਭਾਵ, ਵਙ੍ਕਵੁਤ੍ਤੀਨਂ, ਭੇਦਾ ਦ੍ਵਿਧਾ ਅਲਂਕ੍ਰਿਯਾ;

ਪਠਮਾ ਤਤ੍ਥ ਵਤ੍ਥੂਨਂ, ਨਾਨਾਵਤ੍ਥਾ’ਵਿਭਾਵਿਨੀ.

ਲੀਲਾ ਵਿਕਨ੍ਤਿ ਸੁਭਗੋ, ਦਿਸਾ ਥਿਰ ਵਿਲੋਕਨੋ;

ਬੋਧਿਸਤ੍ਤਙ੍ਕੁਰੋ ਭਾਸਂ, ਵਿਰੋਚਿ ਵਾਚ ਮਾਸਭਿਂ.

ਵੁਤ੍ਤਿ ਵਤ੍ਥੁਸਭਾਵਸ੍ਸ, ਯਾ’ਞ੍ਞਥਾ ਸਾ’ਪਰਾ ਭਵੇ;

ਤਸ੍ਸਾ’ਨਨ੍ਤਵਿਕਪ੍ਪਤ੍ਤਾ, ਹੋਤਿ ਬੀਜੋ’ਪਦਸ੍ਸਨਂ.

ਤਤ੍ਥਾ’ਤਿਸਯ, ਉਪਮਾ, ਰੂਪਕਾ, ਵੁਤ੍ਤਿ, ਦੀਪਕਂ,;

ਅਕ੍ਖੇਪੋ, ਤ੍ਥਨ੍ਤਰਨ੍ਯਾਸੋ, ਬ੍ਯਤਿਰੇਕੋ, ਵਿਭਾਵਨਾ.

ਹੇਤੁ ¶ , ਕ੍ਕਮੋ, ਪਿਯਤਰਂ, ਸਮਾਸ, ਪਰਿਕਪ੍ਪਨਾ;

ਸਮਾਹਿਤਂ, ਪਰਿਯਾਯ, ਵੁਤ੍ਤਿ, ਬ੍ਯਾਜੋਪਵਣ੍ਣਨਂ.

ਵਿਸੇਸ, ਰੁਲ਼੍ਹਾਹਙ੍ਕਾਰਾ, ਸਿਲੇਸੋ, ਤੁਲ੍ਯਯੋਗਿਤਾ;

ਨਿਦਸ੍ਸਨਂ, ਮਹਨ੍ਤਤ੍ਤਂ, ਵਞ੍ਚਨਾ, ਪ੍ਪਕਤਤ੍ਥੁਤਿ,.

ਏਕਾਵਲਿ, ਅਞ੍ਞਮਞ੍ਞਂ, ਸਹਵੁਤ੍ਤਿ, ਵਿਰੋਧਿਤਾ;

ਪਰਿਵੁਤ੍ਤਿ, ਬ੍ਭਮੋ, ਭਾਵੋ, ਮਿਸ੍ਸ, ਮਾਸੀ, ਰਸੀ, ਇਤਿ.

ਏਤੇ ਭੇਦਾ ਸਮੁਦ੍ਦਿਟ੍ਠਾ, ਭਾਵੋ ਜੀਵਿਤ ਮੁਚ੍ਚਤੇ;

ਵਙ੍ਕਵੁਤ੍ਤੀਸੁ ਪੋਸੇਸਿ, ਸਿਲੇਸੋ ਤੁ ਸਿਰਿਂ ਪਰਂ.

ਪਕਾਸਕਾ ਵਿਸੇਸਸ੍ਸ, ਸਿਯਾ’ਤਿਸਯਵੁਤ੍ਤਿ ਯਾ;

ਲੋਕਾ’ਤਿਕ੍ਕਨ੍ਤਵਿਸਯਾ, ਲੋਕਿਯਾ,ਤਿ ਚ ਸਾ ਦ੍ਵਿਧਾ.

ਪਟਿਪਾਦੀਯਤੇ ਤ੍ਵ’ਜ੍ਜ, ਲੋਕਾਤਿਕ੍ਕਨ੍ਤਗੋਚਰਾ.

ਪਿਵਨ੍ਤਿ ਦੇਹਕਨ੍ਤੀ ਯੇ, ਨੇਤ੍ਤਞ੍ਜਲਿਪੁਟੇਨ ਤੇ;

ਨਾ’ਲਂ ਹਨ੍ਤੁਂ ਜਿਨੇ’ਸਂ ਤ੍ਵਂ, ਤਣ੍ਹਂ ਤਣ੍ਹਾਹਰੋਪਿ ਕਿਂ?

ਉਪਮਾਨੋ’ਪਮੇਯ੍ਯਾਨਂ, ਸਧਮ੍ਮਤ੍ਤਂ ਸਿਯੋ’ਪਮਾ;

ਸਦ੍ਦ, ਤ੍ਥਗਮ੍ਮਾ, ਵਾਕ੍ਯਤ੍ਥ, ਵਿਸਯਾ,ਤਿ ਚ ਸਾ ਭਿਧਾ.

ਸਮਾਸ, ਪਚ੍ਚਯੇ, ਵਾ’ਦੀ, ਸਦ੍ਦਾ ਤੇਸਂ ਵਸਾ ਤਿਧਾ;

ਸਦ੍ਦਗਮ੍ਮਾ ਸਮਾਸੇਨ, ਮੁਨਿਨ੍ਦੋ ਚਨ੍ਦਿਮਾ’ਨਨੋ.

ਆਯਾਦੀ ਪਚ੍ਚਯਾ ਤੇਹਿ, ਵਦਨਂ ਪਙ੍ਕਜਾਯਤੇ;

ਮੁਨਿਨ੍ਦਨਯਨ ਦ੍ਵਨ੍ਦਂ, ਨੀਲੁਪ੍ਪਲਦਲੀਯਤਿ.

ਇਵਾਦੀ ਇਵ, ਵਾ, ਤੁਲ੍ਯ, ਸਮਾਨ, ਨਿਭ, ਸਨ੍ਨਿਭਾ;

ਯਥਾ, ਸਙ੍ਕਾਸ, ਤੁਲਿਤ, ਪ੍ਪਕਾਸ, ਪਤਿਰੂਪਕਾ.

ਸਰੀ, ਸਰਿਕ੍ਖ, ਸਂਵਾਦੀ, ਵਿਰੋਧਿ, ਸਦਿਸਾ, ਵਿਯ;

ਪਟਿਪਕ੍ਖ, ਪਚ੍ਚਨੀਕਾ, ਸਪਕ੍ਖੋ, ਪਮਿਤੋ, ਪਮਾ.

ਪਟਿਬਿਮ੍ਬ, ਪਟਿਚ੍ਛਨ੍ਨ, ਸਰੂਪ, ਸਮ, ਸਮਿਤਾ;

ਸਵਣ੍ਣਾ, ਭਾ, ਪਟਿਨਿਧਿ, ਸਧਮ੍ਮਾ, ਦਿ ਸਲਕ੍ਖਣਾ.

ਜਯਤ੍ਯ ¶ , ਕ੍ਕੋਸਤਿ, ਹਸਤਿ, ਪਤਿਗਜ੍ਜਤਿ, ਦੂਭਤਿ;

ਉਸੂਯਤ੍ਯ, ਵਜਾਨਾਤਿ, ਨਿਨ੍ਦਤਿ, ਸ੍ਸਤਿ, ਰੁਨ੍ਧਤਿ.

ਤਸ੍ਸ ਚੋਰੇਤਿ ਸੋਭਗ੍ਗਂ, ਤਸ੍ਸ ਕਨ੍ਤਿਂ ਵਿਲੁਮ੍ਪਤਿ;

ਤੇਨ ਸਦ੍ਧਿਂ ਵਿਵਦਤਿ, ਤੁਲ੍ਯਂ ਤੇਨਾ’ਧਿਰੋਹਤਿ.

ਕਚ੍ਛਂ ਵਿਗਾਹਤੇ, ਤਸ੍ਸ, ਤ ਮਨ੍ਵੇਤ੍ਯ, ਨੁਬਨ੍ਧਤਿ;

ਤਂਸੀਲਂ, ਤਂਨਿਸੇਧੇਤਿ, ਤਸ੍ਸ ਚਾ’ਨੁਕਰੋਤਿ, ਮੇ.

ਉਪਮਾਨੋ’ਪਮੇਯ੍ਯਾਨਂ, ਸਧਮ੍ਮਤ੍ਤਂ ਵਿਭਾਵਿਭਿ;

ਇਮੇਹਿ ਉਪਮਾਭੇਦਾ, ਕੇਚਿ ਨਿਯ੍ਯਨ੍ਤਿ ਸਮ੍ਪਤਿ.

ਵਿਕਾਸਿਪਦੁਮਂ’ਵਾ’ਤਿ, ਸੁਨ੍ਦਰਂ ਸੁਗਤਾ’ਨਨਂ;

ਇਤਿ ਧਮ੍ਮੋਪਮਾ ਨਾਮ, ਤੁਲ੍ਯਧਮ੍ਮਨਿਦਸ੍ਸਨਾ.

ਧਮ੍ਮਹੀਨਾ ‘‘ਮੁਖ’ਮ੍ਭੋਜ, ਸਦਿਸਂ ਮੁਨਿਨੋ’’ਇਤਿ;

ਵਿਪਰੀਤੋ’ਪਮਾ ‘‘ਤੁਲ੍ਯ, ਮਾਨਨੇਨ’ਮ੍ਬੁਜਂ ਤਵ’’.

ਤਵਾ’ਨਨ’ਮਿਵ’ਮ੍ਭੋਜਂ, ਅਮ੍ਭੋਜ’ਮਿਵ ਤੇ ਮੁਖਂ;

ਅਞ੍ਞਮਞ੍ਞੋਪਮਾ ਸਾ’ਯਂ, ਅਞ੍ਞਮਞ੍ਞੋਪਮਾਨਤੋ.

‘‘ਯਦਿ ਕਿਞ੍ਚਿ ਭਵੇ’ਮ੍ਭੋਜਂ, ਲੋਚਨ’ਬ੍ਭਮੁਵਿਬ੍ਭਮਂ;

ਧਾਰੇਤੁਂ ਮੁਖਸੋਭਂ ਤਂ, ਤਵੇ’’ਤਿ ਅਬ੍ਭੁਤੋਪਮਾ.

‘‘ਸੁਗਨ੍ਧਿ ਸੋਭਾ ਸਮ੍ਬਨ੍ਧੀ, ਸਿਸਿਰਂ’ਸੁ ਵਿਰੋਧਿ ਚ;

ਮੁਖਂ ਤਵ’ਮ੍ਬੁਜਂਵੇ’ਤਿ’’, ਸਾ ਸਿਲੇਸੋਪਮਾ ਮਤਾ.

ਸਰੂਪਸਦ੍ਦਵਾਚ੍ਚਤ੍ਤਾ, ਸਾ ਸਨ੍ਤਾਨੋਪਮਾ ਯਥਾ;

ਬਾਲਾ’ਵੁ’ਯ੍ਯਾਨਮਾਲਾ’ਯਂ, ਸਾ’ਲਕਾ’ਨਨਸੋਭਿਨੀ.

ਖਯੀ ਚਨ੍ਦੋ, ਬਹੁਰਜਂ, ਪਦੁਮਂ, ਤੇਹਿ ਤੇ ਮੁਖਂ;

ਸਮਾਨਮ੍ਪਿ ਸਮੁਕ੍ਕਂਸਿ, ਤ੍ਯ’ਯਂ ਨਿਨ੍ਦੋਪਮਾ ਮਤਾ.

ਅਸਮਤ੍ਥੋ ਮੁਖੇਨਿ’ਨ੍ਦੁ, ਜਿਨ! ਤੇ ਪਟਿਗਜ੍ਜਿਤੁਂ;

ਜਲ਼ੋ ਕਲਙ੍ਕੀ’ਤਿ ਅਯਂ, ਪਟਿਸੇਧੋਪਮਾ ਸਿਯਾ.

‘‘ਕਚ੍ਛਂ ਚਨ੍ਦਾਰਵਿਨ੍ਦਾਨਂ, ਅਤਿਕ੍ਕਮ੍ਮ ਮੁਖਂ ਤਵ;

ਅਤ੍ਤਨਾ’ਵ ਸਮਂ ਜਾਤ’’, ਮਿਤ੍ਯ’ਸਾਧਾਰਣੋਪਮਾ.

‘‘ਸਬ੍ਬ’ਮ੍ਭੋਜ’ਪ੍ਪਭਾਸਾਰੋ, ਰਾਸਿਭੂਤੋ’ਵ ਕਤ੍ਥਚਿ;

ਤਵਾ’ਨਨਂ ਵਿਭਾਤੀ’’ਤਿ, ਹੋਤਾ’ਭੂਤੋਪਮਾ ਅਯਂ.

ਪਤੀਯਤੇ’ਤ੍ਥਗਮ੍ਮਾ ਤੁ, ਸਦ੍ਦਸਾਮਤ੍ਥਿਯਾ ਕ੍ਵਚਿ;

ਸਮਾਸ, ਪ੍ਪਚ੍ਚਯੇ, ਵਾਦਿ, ਸਦ੍ਦਯੋਗਂ ਵਿਨਾ ਅਪਿ.

ਭਿਙ੍ਗਾਨੇ’ਮਾਨਿ ¶ ਚਕ੍ਖੂਨਿ, ਨਾ’ਮ੍ਬੁਜਂ ਮੁਖ’ਮੇਵਿ’ਦਂ;

ਸੁਬ੍ਯਤ੍ਤਸਦਿਸਤ੍ਤੇਨ, ਸਾ ਸਰੂਪੋਪਮਾ ਮਤਾ.

‘‘ਮਯੇ’ਵ ਮੁਖਸੋਭਾ’ਸ੍ਸੇ, ਤ੍ਯਲ’ਮਿਨ੍ਦੁ! ਵਿਕਤ੍ਥਨਾ;

ਯਤੋ’ਮ੍ਬੁਜੇਪਿ ਸਾ’ਤ੍ਥੀਤਿ’’, ਪਰਿਕਪ੍ਪੋਪਮਾ ਅਯਂ.

‘‘ਕਿਂ ਵਾ’ਮ੍ਬੁਜ’ਨ੍ਤੋਭਨ੍ਤਾਲਿ, ਕਿਂ ਲੋਲਨਯਨਂ ਮੁਖਂ;

ਮਮ ਦੋਲਾਯਤੇ ਚਿਤ੍ਤ’’, ਮਿਚ੍ਚ’ਯਂ ਸਂਸਯੋਪਮਾ.

ਕਿਞ੍ਚਿ ਵਤ੍ਥੁਂ ਪਦਸ੍ਸੇਤ੍ਵਾ, ਸਧਮ੍ਮਸ੍ਸਾ’ਭਿਧਾਨਤੋ;

ਸਾਮ੍ਯਪ੍ਪਤੀਤਿਸਬ੍ਭਾਵਾ, ਪਤਿਵਤ੍ਥੁਪਮਾ ਯਥਾ.

ਜਨੇਸੁ ਜਾਯਮਾਨੇਸੁ, ਨੇ’ਕੋਪਿ ਜਿਨਸਾਦਿਸੋ;

ਦੁਤਿਯੋ ਨਨੁ ਨਤ੍ਥੇ’ਵ, ਪਾਰਿਜਾਤਸ੍ਸ ਪਾਦਪੋ.

ਵਾਕ੍ਯਤ੍ਥੇਨੇ’ਵ ਵਾਕ੍ਯਤ੍ਥੋ, ਯਦਿ ਕੋਚੂ’ਪਮੀਯਤੇ;

ਇਵਯੁਤ੍ਤਾ, ਵਿਯੁਤ੍ਤਤ੍ਤਾ, ਸਾ ਵਾਕ੍ਯਤ੍ਥੋਪਮਾ ਦ੍ਵਿਧਾ.

ਜਿਨੋ ਸਂਕ੍ਲੇਸਤਤ੍ਤਾਨਂ, ਆਵਿਭੂਤੋ ਜਨਾਨ’ਯਂ;

ਘਮ੍ਮਸਨ੍ਤਾਪਤਤ੍ਤਾਨਂ, ਘਮ੍ਮਕਾਲੇ’ਮ੍ਬੁਦੋ ਵਿਯ.

ਮੁਨਿਨ੍ਦਾਨਨ ਮਾਭਾਤਿ, ਵਿਲਾਸੇਕਮਨੋਹਰਂ;

ਉਦ੍ਧਂ ਸਮੁਗ੍ਗਤਸ੍ਸਾ’ਪਿ, ਕਿਂ ਤੇ ਚਨ੍ਦ ਵਿਜਮ੍ਭਨਾ.

ਸਮੁਬ੍ਬੇਜੇਤਿ ਧੀਮਨ੍ਤਂ, ਭਿਨ੍ਨਲਿਙ੍ਗਾਦਿਕਂ ਤੁ ਯਂ;

ਉਪਮਾਦੂਸਨਾਯਾ’ਲ, ਮੇਤਂ ਕਤ੍ਥਚਿ ਤਂ ਯਥਾ.

ਹਂਸੀ’ਵਾ’ਯਂ ਸਸੀ ਭਿਨ੍ਨ, ਲਿਙ੍ਗਾ, ਕਾਸਂ ਸਰਾਨਿ’ਵ;

ਵਿਜਾਤਿ ਵਚਨਾ, ਹੀਨਾ, ਸਾ’ਵ ਭਤ੍ਤੋ ਭਟੋ’ਧਿਪੇ.

‘‘ਖਜ੍ਜੋਤੋ ਭਾਣੁਮਾਲੀ’ਵ, ਵਿਭਾਤਿ’’ਤ੍ਯਧਿਕੋਪਮਾ;

ਅਫੁਟ੍ਠਤ੍ਥਾ ‘‘ਬਲਮ੍ਬੋਧਿ, ਸਾਗਰੋ ਵਿਯ ਸਂਖੁਭਿ.’’

‘‘ਚਨ੍ਦੇ ਕਲਙ੍ਕੋ ਭਿਙ੍ਗੋ’ਵੇ’, ਤ੍ਯੁ’ਪਮਾਪੇਕ੍ਖਿਨੀ ਅਯਂ;

ਖਣ੍ਡਿਤਾ ਕੇਰਵਾ’ਕਾਰੋ, ਸਕਲਙ੍ਕੋ ਨਿਸਾਕਰੋ.

ਇਚ੍ਚੇਵਮਾਦਿਰੂਪੇਸੁ, ਭਵਨ੍ਤਿ ਵਿਗਤਾ’ਦਰਾ;

ਕਰੋਨ੍ਤਿ ਚਾ’ਦਰਂ ਧੀਰਾ, ਪਯੋਗੇ ਕ੍ਵਚਿ ਦੇ’ਵ ਤੁ.

ਇਤ੍ਥੀਯਂ’ਵਾ’ਜਨੋ ਯਾਤਿ, ਵਦਤ੍ਯੇ’ਸਾ ਪੁਮਾ ਵਿਯ;

ਪਿਯੋ ਪਾਣਾ ਇਵਾ’ਯਂ ਮੇ, ਵਿਜ੍ਜਾ ਧਨ’ਮਿਵ’ਚ੍ਚਿਤਾ.

ਭਵਂ ¶ ਵਿਯ ਮਹੀਪਾਲ, ਦੇਵਰਾਜਾ ਵਿਰੋਚਤੇ;

ਅਲ’ਮਂਸੁਮਤੋ ਕਚ੍ਛਂ, ਤੇਜਸਾ ਰੋਹਿਤੁਂ ਅਯਂ.

ਉਪਮਾਨੋ’ਪਮੇਯ੍ਯਾਨਂ, ਅਭੇਦਸ੍ਸ ਨਿਰੂਪਨਾ;

ਉਪਮਾ’ਵ ਤਿਰੋਭੂਤ, ਭੇਦਾ ਰੂਪਕ ਮੁਚ੍ਚਤੇ.

ਅਸੇਸ ਵਤ੍ਥੁ ਵਿਸਯਂ, ਏਕਦੇਸ ਵਿਵੁਤ੍ਤਿ [ਵਿਵਤ੍ਤਿ (ਟੀਕਾ)], ਚ;

ਤਂ ਦ੍ਵਿਧਾ ਪੁਨ ਪਚ੍ਚੇਕਂ, ਸਮਾਸਾਦਿਵਸਾ ਤਿਧਾ.

ਅਙ੍ਗੁਲਿਦਲ ਸਂਸੋਭਿਂ, ਨਖਦੀਧਿਤਿ ਕੇਸਰਂ;

ਸਿਰਸਾ ਨ ਪਿਲਨ੍ਧਨ੍ਤਿ, ਕੇ ਮੁਨਿਨ੍ਦ ਪਦ’ਮ੍ਬੁਜਂ.

ਰਤਨਾਨਿ ਗੁਣਾ ਭੂਰੀ, ਕਰੁਣਾ ਸੀਤਲਂ ਜਲਂ;

ਗਮ੍ਭੀਰਤ੍ਤ ਮਗਾਧਤ੍ਤਂ, ਪਚ੍ਚਕ੍ਖੋ’ਯਂ ਜਿਨੋ’ਮ੍ਬੁਧਿ.

ਚਨ੍ਦਿਕਾ ਮਨ੍ਦਹਾਸਾ ਤੇ, ਮੁਨਿਨ੍ਦ! ਵਦਨਿ’ਨ੍ਦੁਨੋ;

ਪਬੋਧਯਤ੍ਯ’ਯਂ ਸਾਧੁ, ਮਨੋ ਕੁਮੁਦ ਕਾਨਨਂ.

ਅਸੇਸਵਤ੍ਥੁਵਿਸਯੇ, ਪਭੇਦੋ ਰੂਪਕੇ ਅਯਂ;

ਏਕਦੇਸਵਿਵੁਤ੍ਤਿਮ੍ਹਿ, ਭੇਦੋ ਦਾਨਿ ਪਵੁਚ੍ਚਤਿ.

ਵਿਲਾਸ ਹਾਸ ਕੁਸੁਮਂ, ਰੁਚਿਰਾ’ਧਰ ਪਲ੍ਲਵਂ;

ਸੁਖਂ ਕੇ ਵਾ ਨ ਵਿਨ੍ਦਨ੍ਤਿ, ਪਸ੍ਸਨ੍ਤਾ ਮੁਨਿਨੋ ਮੁਖਂ.

ਪਾਦਦ੍ਵਨ੍ਦਂ ਮੁਨਿਨ੍ਦਸ੍ਸ, ਦਦਾਤੁ ਵਿਜਯਂ ਤਵ;

ਨਖਰਂਸੀ ਪਰਂ ਕਨ੍ਤਾ, ਯਸ੍ਸ ਪਾਪਜਯਦ੍ਧਜਾ.

ਸੁਨਿਮ੍ਮਲਕਪੋਲਸ੍ਸ, ਮੁਨਿਨ੍ਦ ਵਦਨਿ’ਨ੍ਦੁਨੋ;

ਸਾਧੁ’ਪ੍ਪਬੁਦ੍ਧ ਹਦਯਂ, ਜਾਤਂ ਕੇਰਵ ਕਾਨਨਂ.

ਰੂਪਕਾਨਿ ¶ ਬਹੂਨ੍ਯੇ’ਵ [ਟੀਕਾਯਂ ਉਦ੍ਧਟਂ ਯੁਤ੍ਤਰੂਪਕਂ ਸਿਤਪੁਪ੍ਫੁਜਲਂ ਲੋਲ, ਨੇਤ੍ਤਭਿਙ੍ਗ ਤਵਾ’ਨਨਂ; ਕਸ੍ਸ ਨਾਮ ਮਨੋ ਧੀਰ, ਨਾਕਡ੍ਢਤਿ ਮਨੋਹਰਂ;], ਯੁਤ੍ਤਾ, ਯੁਤ੍ਤਾਦਿਭੇਦਤੋ;

ਵਿਸੁਂ ਨ ਤਾਨਿ ਵੁਤ੍ਤਾਨਿ, ਏਤ੍ਥੇ’ਵ’ਨ੍ਤੋਗਧਾਨਿ’ਤਿ.

‘‘ਚਨ੍ਦਿਮਾ’ਕਾਸਪਦੁਮ’’, ਮਿਚ੍ਚੇਤਂ ਖਣ੍ਡਰੂਪਕਂ;

ਦੁਟ੍ਠ, ‘‘ਮਮ੍ਬੋਰੁਹਵਨਂ, ਨੇਤ੍ਤਾਨਿ’ਚ੍ਚਾ’’ਦਿ ਸੁਨ੍ਦਰਂ.

ਪਰਿਯਨ੍ਤੋ ਵਿਕਪ੍ਪਾਨਂ, ਰੂਪਕਸ੍ਸੋ’ਪਮਾਯ ਚ;

ਨਤ੍ਥਿ ਯਂ ਤੇਨ ਵਿਞ੍ਞੇਯ੍ਯਂ, ਅਵੁਤ੍ਤ ਮਨੁਮਾਨਤੋ.

ਪੁਨਪ੍ਪੁਨ ਮੁਚ੍ਚਾਰਣਂ [ਪੁਨਪ੍ਪੁਨੁਚ੍ਚਾਰਣਂ ਯਂ (ਸੀ. ਕ.)], ਯਮਤ੍ਥਸ੍ਸ, ਪਦਸ੍ਸ ਚ;

ਉਭਯੇਸਞ੍ਚ ਵਿਞ੍ਞੇਯ੍ਯਾ, ਸਾ’ਯ’ਮਾਵੁਤ੍ਤਿ ਨਾਮਤੋ.

ਮਨੋ ਹਰਤਿ ਸਬ੍ਬੇਸਂ, ਆਦਦਾਤਿ ਦਿਸਾ ਦਸ;

ਗਣ੍ਹਾਤਿ ਨਿਮ੍ਮਲਤ੍ਤਞ੍ਚ, ਯਸੋਰਾਸਿ ਜਿਨਸ੍ਸ’ਯਂ.

ਵਿਭਾਸੇਨ੍ਤਿ ਦਿਸਾ ਸਬ੍ਬਾ, ਮੁਨਿਨੋ ਦੇਹਕਨ੍ਤਿਯੋ;

ਵਿਭਾ ਸੇਨ੍ਤਿ ਚ ਸਬ੍ਬਾਪਿ, ਚਨ੍ਦਾਦੀਨਂ ਹਤਾ ਵਿਯ.

ਜਿਤ੍ਵਾ ਵਿਹਰਤਿ ਕ੍ਲੇਸ, ਰਿਪੁਂ ਲੋਕੇ ਜਿਨੋ ਅਯਂ;

ਵਿਹਰਤ੍ਯ’ਰਿਵਗ੍ਗੋ’ਯਂ, ਰਾਸਿਭੂਤੋ’ਵ ਦੁਜ੍ਜਨੇ.

ਏਕਤ੍ਥ ਵਤ੍ਤਮਾਨਮ੍ਪਿ, ਸਬ੍ਬਵਾਕ੍ਯੋ’ਪਕਾਰਕਂ;

ਦੀਪਕਂ ਨਾਮ ਤਂ ਚਾਦਿ, ਮਜ੍ਝ, ਨ੍ਤਵਿਸਯਂ ਤਿਧਾ.

ਅਕਾਸਿ ਬੁਦ੍ਧੋ ਵੇਨੇਯ੍ਯ, ਬਨ੍ਧੂਨ ਮਮਿਤੋ’ਦਯਂ;

ਸਬ੍ਬਪਾਪੇਹਿ ਚ ਸਮਂ, ਨੇਕਤਿਤ੍ਥਿਯਮਦ੍ਦਨਂ.

ਦਸ੍ਸਨਂ ਮੁਨਿਨੋ ਸਾਧੁ, ਜਨਾਨਂ ਜਾਯਤੇ’ਮਤਂ;

ਤਦ’ਞ੍ਞੇਸਂ ਤੁ ਜਨ੍ਤੂਨਂ, ਵਿਸਂ ਨਿਚ੍ਚੋ’ਪਤਾਪਨਂ.

ਅਚ੍ਚਨ੍ਤ ¶ ਕਨ੍ਤ ਲਾਵਣ੍ਯ, ਚਨ੍ਦਾ’ਤਪ ਮਨੋਹਰੋ;

ਜਿਨਾ’ਨਨਿ’ਨ੍ਦੁ ਇਨ੍ਦੁ ਚ, ਕਸ੍ਸ ਨਾ’ਨਨ੍ਦਕੋ ਭਵੇ.

ਹੋਤਾ’ਵਿਪ੍ਪਟਿਸਾਰਾਯ, ਸੀਲਂ, ਪਾਮੋਜ੍ਜਹੇਤੁ ਸੋ;

ਤਂ ਪੀਤਿਹੇਤੁ, ਸਾ ਚਾ’ਯਂ, ਪਸ੍ਸਦ੍ਧ੍ਯਾ’ਦਿ ਪਸਿਦ੍ਧਿਯਾ.

ਇਚ੍ਚਾ’ਦਿਦੀਪਕਤ੍ਤੇਪਿ, ਪੁਬ੍ਬਂ ਪੁਬ੍ਬ ਮਪੇਕ੍ਖਿਨੀ;

ਵਾਕ੍ਯਮਾਲਾ ਪਵਤ੍ਤਾਤਿ, ਤਂ ਮਾਲਾਦੀਪਕਂ ਮਤਂ.

ਅਨੇਨੇ’ਵ’ਪ੍ਪਕਾਰੇਨ, ਸੇਸਾਨ ਮਪਿ ਦੀਪਕੇ;

ਵਿਕਪ੍ਪਾਨਂ ਵਿਧਾਤਬ੍ਬਾ, ਨੁਗਤਿ ਸੁਦ੍ਧਬੁਦ੍ਧਿਭਿ.

ਵਿਸੇਸ ਵਚਨਿ’ਚ੍ਛਾਯਂ, ਨਿਸੇਧਵਚਨਂ ਤੁ ਯਂ;

ਅਕ੍ਖੇਪੋ ਨਾਮ ਸੋਯਞ੍ਚ, ਤਿਧਾ ਕਾਲਪ੍ਪਭੇਦਤੋ.

ਏਕਾਕੀ’ ਨੇਕਸੇਨਂ ਤਂ, ਮਾਰਂ ਸ ਵਿਜਯੀ ਜਿਨੋ;

ਕਥਂ ਤ ਮਥਵਾ ਤਸ੍ਸ, ਪਾਰਮੀਬਲ ਮੀਦਿਸਂ.

ਕਿਂ ਚਿਤ੍ਤੇ’ਜਾਸਮੁਗ੍ਘਾਤਂ, ਅਪਤ੍ਤੋ’ਸ੍ਮੀਤਿ ਖਿਜ੍ਜਸੇ;

ਪਣਾਮੋ ਨਨੁ ਸੋ ਯੇ’ਵ, ਸਕਿਮ੍ਪਿ ਸੁਗਤੇ ਗਤੋ.

ਸਚ੍ਚਂ ਨ ਤੇ ਗਮਿਸ੍ਸਨ੍ਤਿ, ਸਿਵਂ ਸੁਜਨਗੋਚਰਂ;

ਮਿਚ੍ਛਾਦਿਟ੍ਠਿ ਪਰਿਕ੍ਕਨ੍ਤ [ਪਰਿਕਨ੍ਤ (ਕ.)], ਮਾਨਸਾ ਯੇ ਸੁਦੁਜ੍ਜਨਾ.

ਞੇਯ੍ਯੋ ਅਤ੍ਥਨ੍ਤਰਨ੍ਯਾਸੋ, ਯੋ, ਞ੍ਞਵਾਕ੍ਯਤ੍ਥਸਾਧਨੋ;

ਸਬ੍ਬਬ੍ਯਾਪੀ ਵਿਸੇਸਟ੍ਠੋ, ਹਿਵਿਸਿਟ੍ਠ’ਸ੍ਸ ਭੇਦਤੋ.

ਤੇਪਿ ਲੋਕਹਿਤਾ ਸਤ੍ਤਾ, ਸੂਰਿਯੋ ਚਨ੍ਦਿਮਾ ਅਪਿ;

ਅਤ੍ਥਂ ਪਸ੍ਸ ਗਮਿਸ੍ਸਨ੍ਤਿ, ਨਿਯਮੋ ਕੇਨ ਲਙ੍ਘ੍ਯਤੇ.

ਸਤ੍ਥਾ ਦੇਵਮਨੁਸ੍ਸਾਨਂ, ਵਸੀ ਸੋਪਿ ਮੁਨਿਸ੍ਸਰੋ;

ਗਤੋ’ਵ ਨਿਬ੍ਬੁਤਿਂ ਸਬ੍ਬੇ, ਸਙ੍ਖਾਰਾ ਨ ਹਿ ਸਸ੍ਸਤਾ.

ਜਿਨੋ ¶ ਸਂਸਾਰਕਨ੍ਤਾਰਾ, ਜਨਂ ਪਾਪੇਤਿ [ਪਾਪੇਸਿ (ਕ.)] ਨਿਬ੍ਬੁਤਿਂ;

ਨਨੁ ਯੁਤ੍ਤਾ ਗਤਿ ਸਾ’ਯਂ, ਵੇਸਾਰਜ੍ਜ ਸਮਙ੍ਗਿਨਂ.

ਸੁਰਤ੍ਤਂ ਤੇ’ਧਰਫੁਟਂ, ਜਿਨ! ਰਞ੍ਜੇਤਿ ਮਾਨਸਂ;

ਸਯਂ ਰਾਗਪਰੀਤਾ ਹਿ, ਪਰੇ ਰਞ੍ਜੇਨ੍ਤਿ ਸਙ੍ਗਤੇ.

ਵਾਚ੍ਚੇ ਗਮ੍ਮੇ ਥ ਵਤ੍ਥੂਨਂ, ਸਦਿਸਤ੍ਤੇ ਪਭੇਦਨਂ;

ਬ੍ਯਤਿਰੇਕੋ’ਯ’ਮਪ੍ਯੇ’ਕੋ, ਭਯਭੇਦਾ ਚਤੁਬ੍ਬਿਧੋ.

ਗਮ੍ਭੀਰਤ੍ਤ ਮਹਤ੍ਤਾਦਿ, ਗੁਣਾ ਜਲਧਿਨਾ ਜਿਨ!;

ਤੁਲ੍ਯੋ ਤ੍ਵ ਮਸਿ ਭੇਦੋ ਤੁ, ਸਰੀਰੇਨੇ’ਦਿਸੇਨ ਤੇ.

ਮਹਾਸਤ੍ਤਾ’ਤਿਗਮ੍ਭੀਰਾ, ਸਾਗਰੋ ਸੁਗਤੋਪਿ ਚ;

ਸਾਗਰੋ’ਞ੍ਜਨਸਙ੍ਕਾਸੋ, ਜਿਨੋ ਚਾਮੀਕਰਜ੍ਜੁਤਿ.

ਨ ਸਨ੍ਤਾਪਾਪਹਂ ਨੇਵਿ, ਚ੍ਛਿਤਦਂ ਮਿਗਲੋਚਨਂ;

ਮੁਨਿਨ੍ਦ! ਨਯਨਦ੍ਵਨ੍ਦਂ, ਤਵ ਤਗ੍ਗੁਣ ਭੂਸਿਤਂ.

ਮੁਨਿਨ੍ਦਾਨਨ ਮਮ੍ਭੋਜ, ਮੇਸਂ ਨਾਨਤ੍ਤ ਮੀਦਿਸਂ;

ਸੁਵੁਤ੍ਤਾ’ਮਤਸਨ੍ਦਾਯੀ, ਵਦਨਂ ਨੇ’ਦਿਸ’ਮ੍ਬੁਜਂ.

ਪਸਿਦ੍ਧਂ ਕਾਰਣਂ ਯਤ੍ਥ, ਨਿਵਤ੍ਤੇਤ੍ਵਾ’ ਞਾਕਾਰਣਂ;

ਸਾਭਾਵਿਕਤ੍ਤ ਮਥਵਾ, ਵਿਭਾਬ੍ਯਂ ਸਾ ਵਿਭਾਵਨਾ.

ਅਨਞ੍ਜਿਤਾ’ਸਿਤਂ ਨੇਤ੍ਤਂ, ਅਧਰੋ ਰਞ੍ਜਿਤਾ’ਰੁਣੋ;

ਸਮਾਨਤਾ ਭਮੁ ਚਾ’ਯਂ, ਜਿਨਾ’ਨਾਵਞ੍ਚਿਤਾ ਤਵ.

ਨ ਹੋਤਿ ਖਲੁ ਦੁਜ੍ਜਨ੍ਯ, ਮਪਿ ਦੁਜ੍ਜਨਸਙ੍ਗਮੇ;

ਸਭਾਵਨਿਮ੍ਮਲਤਰੇ, ਸਾਧੁਜਨ੍ਤੂਨ ਚੇਤਸਿ.

ਜਨਕੋ ¶ , ਞਾਪਕੋ ਚੇਤਿ, ਦੁਵਿਧਾ ਹੇਤਵੋ ਸਿਯੁਂ;

ਪਟਿਸਙ੍ਖਰਣਂ ਤੇਸਂ, ਅਲਙ੍ਕਾਰਤਾਯੋ’ਦਿਤਂ.

ਭਾਵਾ’ਭਾਵ ਕਿਚ੍ਚਵਸਾ, ਚਿਤ੍ਤਹੇਤੁਵਸਾਪਿ ਚ;

ਭੇਦਾ’ਨਨ੍ਤਾ ਇਦਂ ਤੇਸਂ, ਮੁਖਮਤ੍ਤ ਨਿਦਸ੍ਸਨਂ.

ਪਰਮਤ੍ਥਪਕਾਸੇ’ਕ, ਰਸਾ ਸਬ੍ਬਮਨੋਹਰਾ;

ਮੁਨਿਨੋ ਦੇਸਨਾ’ਯਂ ਮੇ, ਕਾਮਂ ਤੋਸੇਤਿ ਮਾਨਸਂ.

ਧੀਰੇਹਿ ਸਹ ਸਂਵਾਸਾ, ਸਦ੍ਧਮ੍ਮਸ੍ਸਾ’ਭਿਯੋਗਤੋ;

ਨਿਗ੍ਗਹੇਨਿ’ਨ੍ਦ੍ਰਿਯਾਨਞ੍ਚ, ਦੁਕ੍ਖਸ੍ਸੁ’ਪਸਮੋ ਸਿਯਾ.

ਮੁਨਿਨ੍ਦ’ਚਨ੍ਦ ਸਂਵਾਦਿ, ਕਨ੍ਤਭਾਵੋ’ਪਸੋਭਿਨਾ;

ਮੁਖੇਨੇ’ਵ ਸੁਬੋਧਂ ਤੇ, ਮਨਂ ਪਾਪਾ’ਭਿਨਿਸ੍ਸਟਂ.

ਸਾਧੁਹਤ੍ਥਾ’ਰਵਿਨ੍ਦਾਨਿ, ਸਙ੍ਕੋਚਯਤਿ ਤੇ ਕਥਂ;

ਮੁਨਿਨ੍ਦ! ਚਰਣਦ੍ਵਨ੍ਦ, ਰਾਗਬਾਲਾ’ਤਪੋ ਫੁਸਂ?

ਸਙ੍ਕੋਚਯਨ੍ਤਿ ਜਨ੍ਤੂਨਂ, ਪਾਣਿਪਙ੍ਕੇਰੁਹਾਨਿ’ਹ;

ਮੁਨਿਨ੍ਦ! ਚਰਣਦ੍ਵਨ੍ਦ, ਨਖ ਚਨ੍ਦਾਨ’ ਮਂਸਵੋ.

ਉਦ੍ਦਿਟ੍ਠਾਨਂ ਪਦਤ੍ਥਾਨਂ, ਅਨੁਦ੍ਦੇਸੋ ਯਥਾਕ੍ਕਮਂ;

‘ਸਙ੍ਖ੍ਯਾਨ’ਮਿਤਿ ਨਿਦ੍ਦਿਟ੍ਠਂ, ਯਥਾਸਙ੍ਖ੍ਯਂ ਕਮੋਪਿ ਚ.

ਆਲਾਪ ਹਾਸ ਲੀਲ਼ਾਹਿ, ਮੁਨਿਨ੍ਦ! ਵਿਜਯਾ ਤਵ;

ਕੋਕਿਲਾ ਕੁਮੁਦਾਨਿ ਚੋ, ਪਸੇਵਨ੍ਤੇ ਵਨਂ ਜਲਂ.

ਸਿਯਾ ਪਿਯਤਰਂ ਨਾਮ, ਅਤ੍ਥਰੂਪਸ੍ਸ ਕਸ੍ਸਚਿ;

ਪਿਯਸ੍ਸਾ’ਤਿਸਯੇਨੇ’ਤਂ, ਯਂ ਹੋਤਿ ਪਟਿਪਾਦਨਂ.

ਪੀਤਿਯਾ ਮੇ ਸਮੁਪ੍ਪਨ੍ਨਾ, ਸਨ੍ਤ! ਸਨ੍ਦਸ੍ਸਨਾ ਤਵ;

ਕਾਲੇਨਾ’ਯਂ ਭਵੇ ਪੀਤਿ, ਤਵੇ’ਵ ਪੁਨ ਦਸ੍ਸਨਾ.

ਵਣ੍ਣਿਤੇਨੋ’ਪਮਾਨੇਨ, ਵੁਤ੍ਯਾ’ਧਿਪ੍ਪੇਤ ਵਤ੍ਥੁਨੋ;

ਸਮਾਸਵੁਤ੍ਤਿ ਨਾਮਾ’ਯਂ, ਅਤ੍ਥ ਸਙ੍ਖੇਪ ਰੂਪਤੋ.

ਸਾ’ਯਂ ¶ ਵਿਸੇਸ੍ਯਮਤ੍ਤੇਨ, ਭਿਨ੍ਨਾ’ਭਿਨ੍ਨਵਿਸੇਸਨਾ;

ਅਤ੍ਥੇ’ਵ ਅਪਰਾ ਪ੍ਯ’ਤ੍ਥਿ, ਭਿਨ੍ਨਾ’ਭਿਨ੍ਨਵਿਸੇਸਨਾ.

ਵਿਸੁਦ੍ਧਾ’ਮਤਸਨ੍ਦਾਯੀ, ਪਸਤ੍ਥਰਤਨਾ’ਲਯੋ;

ਗਮ੍ਭੀਰੋ ਚਾ’ਯ’ ਮਮ੍ਬੋਧਿ, ਪੁਞ੍ਞੇਨਾ’ਪਾਦਿਤੋ ਮਯਾ.

ਇਚ੍ਛਿਤ’ਤ੍ਥਪਦੋ ਸਾਰੋ, ਫਲਪੁਪ੍ਫੋ’ਪਸੋਭਿਤੋ;

ਸਚ੍ਛਾਯੋ’ਯ’ਮਪੁਬ੍ਬੋਵ ਕਪ੍ਪਰੁਕ੍ਖੋ ਸਮੁਟ੍ਠਿਤੋ.

ਸਾਗਰਤ੍ਤੇਨ ਸਦ੍ਧਮ੍ਮੋ, ਰੁਕ੍ਖਤ੍ਤੇਨੋ’ਦਿਤੋ ਜਿਨੋ;

ਸਬ੍ਬੇ ਸਾਧਾਰਣਾ ਧਮ੍ਮਾ, ਪੁਬ੍ਬਤ੍ਰਾ’ਞ੍ਞਤ੍ਰ ਤੁ’ਤ੍ਤਯਂ.

ਵਤ੍ਥੁਨੋ’ਞ੍ਞਪ੍ਪਕਾਰੇਨ, ਠਿਤਾ ਵੁਤ੍ਤਿ ਤਦ’ਞ੍ਞਥਾ;

ਪਰਿਕਪ੍ਪੀਯਤੇ ਯਤ੍ਥ, ਸਾ ਹੋਤਿ ਪਰਿਕਪ੍ਪਨਾ.

ਉਪਮਾ’ਬ੍ਭਨ੍ਤਰਤ੍ਤੇਨ, ਕਿਰਿਯਾਦਿਵਸੇਨ ਚ;

ਕਮੇਨੋ’ਦਾਹਰਿਸ੍ਸਾਮਿ, ਵਿਵਿਧਾ ਪਰਿਕਪ੍ਪਨਾ.

ਇਚ੍ਛਾਭਙ੍ਗਾ’ਤੁਰਾ’ਸੀਨਾ, ਤਾ’ਤਿਨਿਚ੍ਚਲ ਮਚ੍ਛਰਾ;

ਵਸਂ ਨੇਨ੍ਤਿ’ਵ ਧੀਰਂ ਤਂ, ਤਦਾ ਯੋਗਾ’ਭਿਯੋਗਤੋ.

ਗਜਂ ਮਾਰੋ ਸਮਾਰੁਲ਼੍ਹੋ, ਯੁਦ੍ਧਾਯ’ਚ੍ਚਨ੍ਤ’ਮੁਨ੍ਨਤਂ;

ਮਗ੍ਗ ਮਨ੍ਵੇਸਤੀ ਨੂਨ, ਜਿਨਭੀਤੋ ਪਲਾਯਿਤੁਂ.

ਮੁਨਿਨ੍ਦ! ਪਾਦਦ੍ਵਨ੍ਦੇ ਤੇ, ਚਾਰੁ ਰਾਜਿਵ ਸੁਨ੍ਦਰੇ;

ਮਞ੍ਞੇ ਪਾਪਾ’ਭਿ’ਸਮ੍ਮਦ੍ਦ, ਜਾਤਸੋਣੇਨ ਸੋਣਿਮਾ.

ਮਞ੍ਞੇ, ਸਙ੍ਕੇ, ਧੁਵਂ, ਨੂਨ, ਮਿਵ, ਮਿਚ੍ਚੇਵ ਮਾਦਿਹਿ;

ਸਾ’ਯਂ ਬ੍ਯਞ੍ਜੀਯਤੇ ਕ੍ਵਾ’ਪਿ, ਕ੍ਵਾ’ਪਿ ਵਾਕ੍ਯੇਨ ਗਮ੍ਯਤੇ.

ਦਯਾ ਸਞ੍ਜਾਤ ਸਰਸਾ, ਦੇਹਾ ਨਿਕ੍ਖਨ੍ਤਕਨ੍ਤਿਯੋ;

ਪੀਣੇਨ੍ਤਾ ਜਿਨ! ਤੇ ਸਾਧੁ, ਜਨਂ ਸਰਸਤਂ ਨਯੁਂ.

ਆਰਬ੍ਭਨ੍ਤਸ੍ਸ ¶ ਯਂਕਿਞ੍ਚਿ, ਕਤ੍ਤੁਂ ਪੁਞ੍ਞਵਸਾ ਪੁਨ;

ਸਾਧਨ’ਨ੍ਤਰਲਾਭੋ ਯੋ, ਤਂ ਵਦਨ੍ਤਿ ਸਮਾਹਿਤਂ.

ਮਾਰਾ’ਰਿਭਙ੍ਗਾ’ਭਿਮੁਖ, ਮਾਨਸੋ ਤਸ੍ਸ ਸਤ੍ਥੁਨੋ;

ਮਹਾਮਹੀ ਮਹਾਰਵਂ, ਰਵੀ’ਯ’ਮੁਪਕਾਰਿਕਾ.

ਅਵਤ੍ਵਾ’ਭਿਮਤਂ ਤਸ੍ਸ, ਸਿਦ੍ਧਿਯਾ ਦਸ੍ਸਨ’ਞ੍ਞਥਾ;

ਵਦਨ੍ਤਿ ਤਂ ‘ਪਰਿਯਾਯ, ਵੁਤ੍ਤੀ’ਤਿ ਸੁਚਿਬੁਦ੍ਧਯੋ.

ਵਿਵਟ’ਙ੍ਗਣਨਿਕ੍ਖਿਤ੍ਤਂ, ਧਨ’ਮਾਰਕ੍ਖ ਵਜ੍ਜਿਤਂ;

ਧਨਕਾਮ! ਯਥਾਕਾਮਂ, ਤੁਵਂ ਗਚ੍ਛ ਯਦਿਚ੍ਛਸਿ.

ਥੁਤਿਂ ਕਰੋਤਿ ਨਿਨ੍ਦਨ੍ਤੋ, ਵਿਯ ਤਂ ਬ੍ਯਾਜਵਣ੍ਣਨਂ;

ਦੋਸਾ’ਭਾਸਾ ਗੁਣਾ ਏਵ, ਯਨ੍ਤਿ ਸਨ੍ਨਿਧਿ ਮਤ੍ਰ ਹਿ.

ਸਞ੍ਚਾਲੇਤੁ ਮਲਂ ਤ੍ਵਂ’ਸਿ, ਭੁਸਂ ਕੁਵਲਯਾ’ਖਿਲਂ;

ਵਿਸੇਸਂ ਤਾਵਤਾ ਨਾਥ!, ਗੁਣਾਨਂ ਤੇ ਵਦਾਮ ਕਿਂ?

ਵਿਸੇਸਿ’ਚ੍ਛਾਯਂ ਦਬ੍ਬਸ੍ਸ, ਕ੍ਰਿਯਾ, ਜਾਤਿ, ਗੁਣਸ੍ਸ ਚ;

ਵੇਕਲ੍ਲਦਸ੍ਸਨਂ ਯਤ੍ਰ, ਵਿਸੇਸੋ ਨਾਮ ਯਂ ਭਵੇ.

ਨ ਰਥਾ, ਨ ਚ ਮਾਤਙ੍ਗਾ, ਨ ਹਯਾ, ਨ ਪਦਾਤਯੋ;

ਜਿਤੋ ਮਾਰਾਰਿ ਮੁਨਿਨਾ, ਸਮ੍ਭਾਰਾਵਜ੍ਜਨੇਨ ਹਿ.

ਨ ਬਦ੍ਧਾ ਭੂਕੁਟਿ, ਨੇਵ, ਫੁਰਿਤੋ ਦਸਨਚ੍ਛਦੋ;

ਮਾਰਾਰਿਭਙ੍ਗਂ ਚਾ’ਕਾਸਿ, ਮੁਨਿ ਵੀਰੋ ਵਰੋ ਸਯਂ.

ਨ ਦਿਸਾਸੁ ਬ੍ਯਾਤ੍ਤਾ [ਤਤਾ (ਕ.)] ਰਂਸਿ,

ਤਥਾਪ੍ਯ’ਨ੍ਧਤਮਹਰਂ, ਪਰਂ ਸਾਧੁਸੁਭਾਸਿਤਂ.

ਨ ਖਰਂ, ਨ ਹਿ ਵਾ ਥਦ੍ਧਂ, ਮੁਨਿਨ੍ਦ! ਵਚਨਂ ਤਵ;

ਤਥਾਪਿ ਗਾਲ਼੍ਹਂ ਖਣਤਿ, ਨਿਮ੍ਮੂਲਂ ਜਨਤਾਮਦਂ.

ਦਸ੍ਸੀਯਤੇ’ਤਿਰਿਤ੍ਤਂ ¶ ਤੁ, ਸੂਰਵੀਰਤ੍ਤਨਂ ਯਹਿਂ;

ਵਦਨ੍ਤਿ ਵਿਞ੍ਞੂਵਚਨਂ, ਰੁਲ਼੍ਹਾਹਙ੍ਕਾਰ ਮੀਦਿਸਂ.

ਦਮੇ ਨਨ੍ਦੋਪਨਨ੍ਦਸ੍ਸ, ਕਿਂ ਮੇ ਬ੍ਯਾਪਾਰਦਸ੍ਸਨਾ?

ਪੁਤ੍ਤਾ ਮੇ ਪਾਦਸਮ੍ਭਤ੍ਤਾ, ਸਜ੍ਜਾ ਸਨ੍ਤੇ’ਵ ਤਾਦਿਸੇ.

ਸਿਲੇਸੋ ਵਚਨਾ’ਨੇਕਾ, ਭਿਧੇਯ੍ਯੇ’ਕਪਦਾਯੁਤਂ;

ਅਭਿਨ੍ਨਪਦਵਾਕ੍ਯਾਦਿ, ਵਸਾ ਤੇਧਾ’ਯ ਮੀਰਿਤੋ.

ਅਨ੍ਧਤਮਹਰੋ ਹਾਰੀ, ਸਮਾਰੁਲ਼੍ਹੋ ਮਹੋਦਯਂ;

ਰਾਜਤੇ ਰਂਸਿਮਾਲੀ’ਯਂ, ਭਗਵਾ ਬੋਧਯਂ ਜਨੇ.

ਸਾਰਦਾ’ਮਲਕਾ’ਭਾਸੋ, ਸਮਾਨੀਤ ਪਰਿਕ੍ਖਯੋ;

ਕੁਮੁਦਾ’ਕਰਸਮ੍ਬੋਧੋ, ਪੀਣੇਤਿ ਜਨਤਂ ਸੁਧੀ.

ਸਮਾਹਿਤ’ਤ੍ਤਵਿਨਯੋ, ਅਹੀਨ ਮਦ ਮਦ੍ਦਨੋ;

ਸੁਗਤੋ ਵਿਸਦਂ ਪਾਤੁ, ਪਾਣਿਨਂ ਸੋ ਵਿਨਾਯਕੋ.

ਵਿਰੁਦ੍ਧਾ, ਵਿਰੁਦ੍ਧਾ, ਭਿਨ੍ਨ, ਕਮ੍ਮਾ, ਨਿਯਮਵਾ, ਪਰੋ;

ਨਿਯਮ’ਕ੍ਖੇਪਵਚਨੋ, ਅਵਿਰੋਧਿ, ਵਿਰੋਧ੍ਯ’ਪਿ.

ਓਚਿਤ੍ਯ ਸਮ੍ਪੋਸਕਾਦਿ, ਸਿਲੇਸੋ, ਪਦਜਾ’ਦਿ [ਪਦਜਾਤਿ (ਕ.)] ਪਿ;

ਏਸਂ ਨਿਦਸ੍ਸਨੇਸ੍ਵੇ’ਵ, ਰੂਪ ਮਾਵਿ ਭਵਿਸ੍ਸਤਿ.

ਸਵਸੇ ਵਤ੍ਤਯਂ ਲੋਕਂ, ਅਖਿਲਂ ਕਲ੍ਲਵਿਗ੍ਗਹੋ;

ਪਰਾਭਵਤਿ ਮਾਰਾਰਿ, ਧਮ੍ਮਰਾਜਾ ਵਿਜਮ੍ਭਤੇ.

ਸਭਾਵਮਧੁਰਂ ਪੁਞ੍ਞ ਵਿਸੇਸੋ’ਦਯ ਸਮ੍ਭਵਂ;

ਸੁਣਨ੍ਤਿ ਵਾਚਂ ਮੁਨਿਨੋ, ਜਨਾ ਪਸ੍ਸਨ੍ਤਿ ਚਾ’ਮਤਂ.

ਅਨ੍ਧਕਾਰਾ’ਪਹਾਰਾਯ ¶ , ਸਭਾਵ ਮਧੁਰਾਯ ਚ;

ਮਨੋ ਪੀਣੇਤਿ ਜਨ੍ਤੂਨਂ, ਜਿਨੋ ਵਾਚਾਯ ਭਾਯ ਚ.

ਕੇਸ’ਕ੍ਖੀਨਂ’ਵ ਕਣ੍ਹਤ੍ਤਂ, ਭਮੂਨਂਯੇਵ ਵਙ੍ਕਤਾ;

ਪਾਣਿਪਾਦਾ’ਧਰਾਨਂ’ਵ, ਮੁਨਿਨ੍ਦਸ੍ਸਾ’ਭਿਰਤ੍ਤਤਾ.

ਪਾਣਿਪਾਦਾ’ਧਰੇਸ੍ਵੇ’ਵ, ਸਾਰਾਗੋ ਤਵ ਦਿਸ੍ਸਤਿ;

ਦਿਸ੍ਸਤੇ ਸੋ’ਯ ਮਥਵਾ, ਨਾਥ! ਸਾਧੁਗੁਣੇਸ੍ਵ’ਪਿ.

ਸਲਕ੍ਖਣੋ’ਤਿਸੁਭਗੋ, ਤੇਜਸ੍ਸੀ ਨਿਯਤੋ’ਦਯੋ;

ਸਦਯੋ ਪ੍ਯ’ਦਯੋ ਪਾਪੇ, ਚਿਤ੍ਤਾ’ਯਂ ਮੁਨਿਨੋ ਗਤਿ.

ਸਂਸਾਰਦੁਕ੍ਖੋ’ਪਹਤਾ, ਵਨਤਾ ਜਨਤਾ ਤ੍ਵਯਿ;

ਸੁਖ ਮਿਚ੍ਛਿਤ ਮਚ੍ਚਨ੍ਤਂ, ਅਮਤਨ੍ਦਦ! ਵਿਨ੍ਦਤਿ.

ਗੁਣਯੁਤ੍ਤੇਹਿ ਵਤ੍ਥੂਹਿ, ਸਮਂ ਕਤ੍ਵਾਨ ਕਸ੍ਸਚਿ;

ਸਂਕਿਤ੍ਤਨਂ ਭਵਤਿ ਯਂ, ਸਾ ਮਤਾ ਤੁਲ੍ਯਯੋਗਿਤਾ.

ਸਮ੍ਪਤ੍ਤਸਮ੍ਮਦੋ ਲੋਕੋ, ਸਮ੍ਪਤ੍ਤਾ’ਲੋਕਸਮ੍ਪਦੋ;

ਉਭੋਹਿ ਰਂਸਿਮਾਲੀ ਚ, ਭਗਵਾ ਚ ਤਮੋਨੁਦੋ.

ਅਤ੍ਥਨ੍ਤਰਂ ਸਾਧਯਤਾ, ਕਿਞ੍ਚਿ ਤਂ ਸਦਿਸਂ ਫਲਂ;

ਦਸ੍ਸੀਯਤੇ ਅਸਨ੍ਤਂ ਵਾ, ਸਨ੍ਤਂ ਵਾ ਤਂ ਨਿਦਸ੍ਸਨਂ.

ਉਦਯਾ ¶ ਸਮਣਿਨ੍ਦਸ੍ਸ, ਯਨ੍ਤਿ ਪਾਪਾ ਪਰਾਭਵਂ;

ਧਮ੍ਮਰਾਜਵਿਰੁਦ੍ਧਾਨਂ, ਸੂਚਯਨ੍ਤਾ ਦੁਰ’ਨ੍ਤਤਂ.

ਸਿਰੋ ਨਿਕ੍ਖਿਤ੍ਤ ਚਰਣੋ, ਚ੍ਛਰਿਯਾਨ’ਮ੍ਬੁਜਾਨ’ਯਂ;

ਪਰਮ’ਬ੍ਭੁਤਤਂ ਲੋਕੇ, ਵਿਞ੍ਞਾਪੇਤ’ਤ੍ਤਨੋ ਜਿਨੋ.

ਵਿਭੂਤਿਯਾ ਮਹਨ੍ਤਤ੍ਤਂ, ਅਧਿਪ੍ਪਾਯਸ੍ਸ ਵਾ ਸਿਯਾ;

ਪਰਮੁਕ੍ਕਂਸਤਂ ਯਾਤਂ, ਤਂ ਮਹਨ੍ਤਤ੍ਤ ਮੀਰਿਤਂ.

ਕਿਰੀਟ ਰਤਨ’ਚ੍ਛਾਯਾ, ਨੁਵਿਦ੍ਧਾ’ਤਪ ਵਾਰਣੋ;

ਪੁਰਾ ਪਰਂ ਸਿਰਿਂ ਵਿਨ੍ਦਿ, ਬੋਧਿਸਤ੍ਤੋ’ ਭਿਨਿਕ੍ਖਮਾ.

ਸਤ੍ਤੋ ਸਮ੍ਬੋਧਿਯਂ ਬੋਧਿ, ਸਤ੍ਤੋ ਸਤ੍ਤਹਿਤਾਯ ਸੋ;

ਹਿਤ੍ਵਾ ਸ੍ਨੇਹਰਸਾਬਨ੍ਧ, ਮਪਿ ਰਾਹੁਲਮਾਤਰਂ.

ਗੋਪੇਤ੍ਵਾ ਵਣ੍ਣਨੀਯਂ ਯਂ, ਕਿਞ੍ਚਿ ਦਸ੍ਸੀਯਤੇ ਪਰਂ;

ਅਸਮਂ ਵਾ ਸਮਂ ਤਸ੍ਸ, ਯਦਿ ਸਾ ਵਞ੍ਚਨਾ ਮਤਾ.

ਪੁਰਤੋ ਨ ਸਹਸ੍ਸੇਸੁ, ਨ ਪਞ੍ਚੇਸੁ ਚ ਤਾਦਿਨੋ;

ਮਾਰੋ ਪਰੇਸੁ ਤਸ੍ਸੇ’ਸਂ, ਸਹਸ੍ਸਂ ਦਸਵਡ੍ਢਿਤਂ.

ਵਿਵਾਦ ਮਨੁਯੁਞ੍ਜਨ੍ਤੋ, ਮੁਨਿਨ੍ਦਵਦਨਿ’ਨ੍ਦੁਨਾ;

ਸਮ੍ਪੁਣ੍ਣੋ ਚਨ੍ਦਿਮਾ ਨਾ’ਯਂ, ਛਤ੍ਤ ਮੇਤਂ ਮਨੋਭੁਨੋ.

ਪਰਾਨੁਵਤ੍ਤਨਾਦੀਹਿ, ਨਿਬ੍ਬਿਨ੍ਦੇਨਿ’ਹ ਯਾ ਕਤਾ;

ਥੁਤਿ ਰ’ਪ੍ਪਕਤੇ ਸਾ’ਯਂ, ਸਿਯਾ ਅਪ੍ਪਕਤਤ੍ਥੁਤਿ.

ਸੁਖਂ ਜੀਵਨ੍ਤਿ ਹਰਿਣਾ, ਵਨੇਸ੍ਵ’ਪਰਸੇਵਿਨੋ;

ਅਨਾਯਾਸੋ ਪਲਾਭੇਹਿ, ਜਲਦਬ੍ਭਙ੍ਕੁਰਾਦਿਭਿ.

ਉਤ੍ਤਰਂ ਉਤ੍ਤਰਂ ਯਤ੍ਥ, ਪੁਬ੍ਬਪੁਬ੍ਬਵਿਸੇਸਨਂ;

ਸਿਯਾ ਏਕਾਵਲਿ ਸਾ’ਯਂ, ਦ੍ਵਿਧਾ ਵਿਧਿ, ਨਿਸੇਧਤੋ.

ਪਾਦਾ ¶ ਨਖਾਲਿ ਰੁਚਿਰਾ, ਨਖਾਲਿ ਰਂਸਿ ਭਾਸੁਰਾ;

ਰਂਸੀਤਮੋਪਹਾਨੇ’ਕ, ਰਸਾ ਸੋਭਨ੍ਤਿ ਸਤ੍ਥੁਨੋ.

ਨਾ’ਲਯੋ ਯੋ ਸ ਜਨ੍ਤੂਨਂ, ਨਾ’ਨਨ੍ਤ ਬ੍ਯਸਨਾ ਵਹੋ.

ਯਹਿਂ ਭੂਸਿਯ ਭੂਸਤ੍ਤਂ, ਅਞ੍ਞਮਞ੍ਞਂ ਤੁ ਵਤ੍ਥੁਨਂ;

ਵਿਨਾ’ਵ ਸਦਿਸਤ੍ਤਂ ਤਂ, ਅਞ੍ਞਮਞ੍ਞਵਿਭੂਸਨਂ.

ਬ੍ਯਾਮਂ’ਸੁ ਮਣ੍ਡਲਂ ਤੇਨ, ਮੁਨਿਨਾ ਲੋਕਬਨ੍ਧੁਨਾ;

ਮਹਨ੍ਤਿਂ ਵਿਨ੍ਦਤੀ ਕਨ੍ਤਿਂ, ਸੋਪਿ ਤੇਨੇਵ ਤਾਦਿਸਿਂ.

ਕਥਨਂ ਸਹਭਾਵਸ੍ਸ, ਕ੍ਰਿਯਾਯ ਚ, ਗੁਣਸ੍ਸ ਚ;

‘ਸਹਵੁਤ੍ਤੀ’ਤਿ ਵਿਞ੍ਞੇਯ੍ਯਂ, ਤ’ਦੁਦਾਹਰਣਂ ਯਥਾ.

ਜਲਨ੍ਤਿ ਚਨ੍ਦਰਂਸੀਹਿ, ਸਮਂ ਸਤ੍ਥੁ ਨਖਂ ਸਵੋ;

ਵਿਜਮ੍ਭਤਿ ਚ ਚਨ੍ਦੇਨ, ਸਮਂ ਤਮ੍ਮੁਖਚਨ੍ਦਿਮਾ.

ਜਿਨੋ’ਦਯੇਨ ਮਲੀਨਂ, ਸਹ ਦੁਜ੍ਜਨ ਚੇਤਸਾ;

ਪਾਪਂ ਦਿਸਾ ਸੁਵਿਮਲਾ, ਸਹ ਸਜ੍ਜਨ ਚੇਤਸਾ.

ਵਿਰੋਧੀਨਂ ਪਦ’ਤ੍ਥਾਨਂ, ਯਤ੍ਥ ਸਂਸਗ੍ਗਦਸ੍ਸਨਂ;

ਸਮੁਕ੍ਕਂਸਾ’ਭਿਧਾਨਤ੍ਥਂ, ਮਤਾ ਸਾ’ਯਂ ਵਿਰੋਧਿਤਾ.

ਗੁਣਾ ਸਭਾਵ ਮਧੁਰਾ, ਅਪਿ ਲੋਕੇ’ਕ ਬਨ੍ਧੁਨੋ;

ਸੇਵਿਤਾ ਪਾਪ ਸੇਵੀਨਂ, ਸਮ੍ਪਦੂਸੇਨ੍ਤਿ ਮਾਨਸਂ.

ਯਸ੍ਸ ਕਸ੍ਸ ਚਿ ਦਾਨੇਨ, ਯਸ੍ਸ ਕਸ੍ਸ ਚਿ ਵਤ੍ਥੁਨੋ;

ਵਿਸਿਟ੍ਠਸ੍ਸ ਯ ਮਾਦਾਨਂ, ‘ਪਰਿਵੁਤ੍ਤੀ’ਤਿ ਸਾ ਮਤਾ.

ਪੁਰਾ ਪਰੇਸਂ ਦਤ੍ਵਾਨ, ਮਨੁਞ੍ਞਂ ਨਯਨਾਦਿਕਂ;

ਮੁਨਿਨਾ ਸਮਨੁਪ੍ਪਤ੍ਤਾ, ਦਾਨਿ ਸਬ੍ਬਞ੍ਞੁਤਾਸਿਰੀ [ਮੁਨਿਨ੍ਦ! ਸਮਨੁਪ੍ਪਤ੍ਤੋ, ਦਾਨਿ ਸਬ੍ਬਞ੍ਞੁਤਾਸਿਰਿਂ (ਕ.)].

ਕਿਞ੍ਚਿ ¶ ਦਿਸ੍ਵਾਨ ਵਿਞ੍ਞਾਤਾ, ਪਟਿਪਜ੍ਜਤਿ ਤਂਸਮਂ;

ਸਂਸਯਾ’ਪਗਤਂ ਵਤ੍ਥੁਂ, ਯਤ੍ਥ ਸੋ’ਯਂ ਭਮੋ ਮਤੋ.

ਸਮਂ ਦਿਸਾਸੁ’ਜ੍ਜਲਾਸੁ, ਜਿਨ ਪਾਦ ਨਖਂ’ਸੁਨਾ;

ਪਸ੍ਸਨ੍ਤਾ ਅਭਿਨਨ੍ਦਨ੍ਤਿ, ਚਨ੍ਦਾ’ਤਪ ਮਨਾ ਜਨਾ.

ਪਵੁਚ੍ਚਤੇ ਯਂ ਨਾਮਾਦਿ, ਕਵੀਨਂ ਭਾਵਬੋਧਨਂ;

ਯੇਨ ਕੇਨਚਿ ਵਣ੍ਣੇਨ, ਭਾਵੋ ਨਾਮਾ’ਯ ਮੀਰਿਤੋ.

ਨਨੁ ਤੇਯੇ’ਵ ਸਨ੍ਤਾਨੋ, ਸਾਗਰਾ ਨ ਕੁਲਾਚਲਾ;

ਮਨਮ੍ਪਿ ਮਰਿਯਾਦਂ ਯੇ, ਸਂਵਟ੍ਟੇਪਿ ਜਹਨ੍ਤਿ ਨੋ.

ਅਙ੍ਗਙ੍ਗਿ ਭਾਵਾ ਸਦਿਸ, ਬਲਭਾਵਾ ਚ ਬਨ੍ਧਨੇ;

ਸਂਸਗ੍ਗੋ’ਲਙ੍ਕਤੀਨਂ ਯੋ, ਤਂ ‘ਮਿਸ੍ਸ’ਨ੍ਤਿ ਪਵੁਚ੍ਚਤਿ.

ਪਸਤ੍ਥਾ ਮੁਨਿਨੋ ਪਾਦ, ਨਖ ਰਂਸਿ ਮਹਾਨਦੀ;

ਅਹੋ! ਗਾਲ਼੍ਹਂ ਨਿਮੁਗ੍ਗੇਪਿ, ਸੁਖਯਤ੍ਯੇ’ਵ ਤੇ ਜਨੇ.

ਵੇਸੋ ਸਭਾਵ ਮਧੁਰੋ, ਰੂਪਂ ਨੇਤ੍ਤ ਰਸਾਯਨਂ;

ਮਧੂ’ਵ ਮੁਨਿਨੋ ਵਾਚਾ, ਨ ਸਮ੍ਪੀਣੇਤਿ ਕਂ ਜਨਂ.

ਆਸੀ ਨਾਮ ਸਿਯਾ’ਤ੍ਥਸ੍ਸ, ਇਟ੍ਠਸ੍ਸਾ’ਸੀਸਨਂ ਯਥਾ;

ਰਸ’ਪ੍ਪਤੀਤਿ ਜਨਕਂ, ਜਾਯਤੇ ਯਂ ਵਿਭੂਸਨਂ;

‘ਰਸਵਨ੍ਤ’ਨ੍ਤਿ ਤਂ ਞੇਯ੍ਯਂ, ਰਸਵਨ੍ਤ ਵਿਧਾਨਤੋ.

ਰਾਗਾ’ਨਤ’ਬ੍ਭੁਤ ਸਰੋਜ ਮੁਖਂ ਧਰਾਯ,

ਪਾਦਾ ਤਿਲੋਕਗਰੁਨੋ’ਧਿਕ ਬਨ੍ਧਰਾਗਾ;

ਆਦਾਯ ਨਿਚ੍ਚਸਰਸੇਨ ਕਰੇਨ ਗਾਲ਼੍ਹਂ,

ਸਞ੍ਚੁਮ੍ਬਯਨ੍ਤਿ ਸਤਤਾ’ਹਿਤ ਸਮ੍ਭਮੇਨ.

ਇਚ੍ਚਾ’ਨੁਗਮ੍ਮ ¶ ਪੁਰਿਮਾਚਰਿਯਾ’ਨੁਭਾਵਂ,

ਸਙ੍ਖੇਪਤੋ ਨਿਗਦਿਤੋ’ਯ ਮਲਙ੍ਕਤੀਨਂ;

ਭੇਦੋ’ਪਰੂਪਰਿ ਕਵੀਹਿ ਵਿਕਪ੍ਪਿਯਾਨਂ,

ਕੋ ਨਾਮ ਪਸ੍ਸਿਤੁ ਮਲਂ ਖਲੁ ਤਾਸ ਮਨ੍ਤਂ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿ ਵਿਰਚਿਤੇ ਸੁਬੋਧਾਲਙ੍ਕਾਰੇ

ਪਟਿਭਾਨਵਤਾ ਲੋਕ, ਵੋਹਾਰ’ਮਨੁਸਾਰਿਨਾ;

ਤਤੋ’ਚਿਤ੍ਯ ਸਮੁਲ੍ਲਾਸ, ਵੇਦਿਨਾ ਕਵਿਨਾ ਪਰਂ.

ਠਾਯਿਸਮ੍ਬਨ੍ਧਿਨੋ ਭਾਵ, ਵਿਭਾਵਾ ਸਾ’ਨੁਭਾਵਕਾ;

ਸਮ੍ਬਜ੍ਝਨ੍ਤਿ ਨਿਬਨ੍ਧਾ ਤੇ, ਰਸ’ਸ੍ਸਾਦਾਯ ਸਾਧੁਨਂ.

ਚਿਤ੍ਤ ਵੁਤ੍ਤਿ ਵਿਸੇਸਾ ਤੁ, ਭਾਵਯਨ੍ਤਿ ਰਸੇ ਯਤੋ;

ਰਤ੍ਯਾਦਯੋ ਤਤੋ ਭਾਵ, ਸਦ੍ਦੇਨ ਪਰਿਕਿਤ੍ਤਿਤਾ.

ਵਿਰੋਧਿਨਾ’ਞ੍ਞਭਾਵੇਨ, ਯੋ ਭਾਵੋ ਨ ਤਿਰੋਹਿਤੋ;

ਸੀਲੇਨ ਤਿਟ੍ਠਤਿ’ਚ੍ਚੇਸੋ, ‘ਠਾਯੀਭਾਵੋ’ਤਿ ਸਦ੍ਦਿਤੋ.

ਜਿਗੁਚ੍ਛਾ, ਵਿਮ੍ਹਯੋ, ਚੇਵ, ਸਮੋ ਚ ਨਵ ਠਾਯਿਨੋ.

ਤਿਰੋਭਾਵਾ, ਵਿਭਾਵਾ’ਦਿ, ਵਿਸੇਸਨਾ’ਭਿਮੁਖ੍ਯਤੋ;

ਯੇ ਤੇ ਚਰਨ੍ਤਿ ਸੀਲੇਨ, ਤੇ ਹੋਨ੍ਤਿ ਬ੍ਯਭਿਚਾਰਿਨੋ.

ਸੁਤ੍ਤਂ, ਤਾਸੋ, ਗਿਲਾਨੁ, ਸ੍ਸੁਕ, ਹਰਿਸ,

ਸਤਿ, ਸ੍ਸਾ, ਵਿਸਾਦਾ, ਬਹਿਤ੍ਥਾ [ਬਹਿਦ੍ਧਾ (ਕ.)];

ਚਪਲਤਾ [ਸਚਪਲਾ (ਕ.)], ਬ੍ਯਾਧਿ, ਤੇਤ੍ਤਿਂਸ ਮੇਤੇ.

ਸਮਾਹਿਤ’ਤ੍ਤ’ਪ੍ਪਭਵਂ, ਸਤ੍ਤਂ [ਸਤ੍ਵਂ (ਕ.)] ਤੇਨੋ’ਪਪਾਦਿਤਾ;

ਸਤ੍ਤਿਕਾ [ਸਾਤ੍ਵਿਕਾ (ਕ.)] ਪ੍ਯ’ਨੁਭਾਵਤ੍ਤੇ, ਵਿਸੁਂ ਭਾਵਾ ਭਵਨ੍ਤਿ ਤੇ.

ਥਮ੍ਭੋ, ਪਲ਼ਯ, ਰੋਮਞ੍ਚਾ, ਤਥਾ ਸੇਦ, ਸ੍ਸੁ, ਵੇਪਥੁ;

ਵੇਵਣ੍ਣਿਯਂ, ਵਿਸਰਤਾ, ਭਾਵਾ’ਟ੍ਠੇ’ਤੇ ਤੁ ਸਤ੍ਤਿਕਾ.

ਯਦਾ ਰਤ੍ਯਾਦਯੋ ਭਾਵਾ, ਠਿਤਿਸੀਲਾ ਨ ਹੋਨ੍ਤਿ ਚੇ;

ਤਦਾ ਸਬ੍ਬੇਪਿ ਤੇ ਭਾਵਾ, ਭਵਨ੍ਤਿ ਬ੍ਯਭਿਚਾਰਿਨੋ.

ਵਿਭਾਵੋ ਕਾਰਣਂ ਤੇਸੁ, ਪ੍ਪਤ੍ਤਿਯੁ’ਦ੍ਦੀਪਨੇ ਤਥਾ;

ਨੇਕਹੇਤੁਂ ਮਨੋਵੁਤ੍ਤਿ, ਵਿਸੇਸਞ੍ਚ ਵਿਭਾਵਿਤੁਂ;

ਭਾਵਂ ਵਿਭਾਵਾ’ਨੁਭਾਵਾ, ਵਣ੍ਣਿਯਾ ਬਨ੍ਧਨੇ ਫੁਟਂ.

ਸਵਿਭਾਵਾ’ਨੁਭਾਵੇਹਿ, ਭਾਵਾ ਤੇ ਤੇ ਯਥਾਰਹਂ;

ਵਣ੍ਣਨੀਯਾ ਯਥੋ’ਚਿਤ੍ਯਂ, ਲੋਕਰੂਪਾ’ਨੁਗਾਮਿਨਾ.

ਚਿਤ੍ਤ ¶ ਵੁਤ੍ਤਿ ਵਿਸੇਸਤ੍ਤਾ, ਮਾਨਸਾ ਸਤ੍ਤਿਕਾ’ਙ੍ਗਤੋ;

ਬਹਿ ਨਿਸ੍ਸਟ ਸੇਦਾਦਿ, ਅਨੁਭਾਵੇਹਿ ਵਣ੍ਣਿਯਾ.

ਸਾਮਾਜਿਕਾਨ ਮਾਨਨ੍ਦੋ, ਯੋ ਬਨ੍ਧਤ੍ਥਾ’ਨੁਸਾਰਿਨਂ;

ਰਸੀਯਤੀਤਿ ਤਞ੍ਞੂਹਿ, ਰਸੋ ਨਾਮਾ’ਯ’ਮੀਰਿਤੋ.

ਸਵਿਭਾਵਾ, ਨੁਭਾਵੇਹਿ, ਸਤ੍ਤਿਕ,ਬ੍ਯਭਿਚਾਰਿਭਿ;

ਅਸ੍ਸਾਦਿਯਤ੍ਤ ਮਾਨੀਯ, ਮਾਨੋ ਠਾਯੇ’ਵ ਸੋ ਰਸੋ.

ਸਿਙ੍ਗਾਰ,ਹਸ੍ਸ,ਕਰੁਣਾ, ਰੁਦ੍ਦ,ਵੀਰ,ਭਯਾਨਕਾ;

ਬੀਭਚ੍ਛ,ਬ੍ਭੁਤ,ਸਨ੍ਤਾ, ਚ, ਰਸਾ ਠਾਯੀਨ ਨੁਕ੍ਕਮਾ.

ਦੁਕ੍ਖਰੂਪੇ’ਯ’ ਮਾਨਨ੍ਦੋ, ਕਥਂ ਨੁ ਕਰੁਣਾਦਿਕੇ?

ਠਾਯੀਭਾਵ ਨਿਦ੍ਦੇਸ ਰਤਿਟ੍ਠਾਯੀਭਾਵ

ਰਮ੍ਮ,ਦੇਸ, ਕਲਾ, ਕਾਲ, ਵੇਸਾਦਿ, ਪਟਿਸੇਵਨਾ;

ਯੁਵਾਨ’ਞ੍ਞੋਞ੍ਞਰਤ੍ਤਾਨਂ, ਪਮੋਦੋ ਰਤਿ ਰੁਚ੍ਚਤੇ.

ਯੁਤ੍ਯਾ ਭਾਵਾਨੁਭਾਵਾ ਤੇ, ਨਿਬਨ੍ਧਾ ਪੋਸਯਨ੍ਤਿ ਨਂ;

ਸੋਪ੍ਯ’ਯੋਗ, ਵਿਪ੍ਪਯੋਗ, ਸਮ੍ਭੋਗਾਨਂ ਵਸਾ ਤਿਧਾ.

ਵਿਕਾਰਾ’ਕਤਿਆਦੀਹਿ, ਅਤ੍ਤਨੋ ਥ ਪਰਸ੍ਸ ਵਾ;

ਹਸ੍ਸੋ ਨਿਦ੍ਦਾ, ਸਮਾ’ਲਸ੍ਯ, ਮੁਚ੍ਛਾਦਿ,ਬ੍ਯਭਿਚਾਰਿਭਿ;

ਪਰਿਪੋਸੇ ਸਿਯਾ ਹਸ੍ਸੋ, ਭਿਯ੍ਯੋ’ਤ੍ਥਿਪਭੁਤੀਨਂ ਸੋ.

ਕਿਞ੍ਚਾ’ਲਕ੍ਖਿਯ ਦਿਜਂ ਤੁ ਤਂ ਹਸਿਤਂ;

ਮਧੁਰਸ੍ਸਰਂ ਵਿਹਸਿਤਂ, ਅਂਸਸਿਰੋਕਮ੍ਪਮੁਪਹਸਿਤਂ.

ਅਪਹਸਿਤਂ ¶ ਸਜਲ’ਕ੍ਖਿ, ਵਿਕ੍ਖਿਤ੍ਤਙ੍ਗਂ ਭਵਤ੍ਯ’ਤਿਹਸਿਤਂ;

ਜੇਟ੍ਠੇ [ਮਜ੍ਝੇ’ਧਮੇਤਿ ਏਤ੍ਥ ਮਜ੍ਝੇ ਅਧਮੇਤਿ ਪਦਚ੍ਛੇਦੋ] ਮਜ੍ਝੇ’ਧਮੇ ਚ ਕਮਸੋ.

ਸੋਕਰੂਪੋ ਤੁ ਕਰੁਣੋ, ਨਿਟ੍ਠਪ੍ਪਤ੍ਤਿ’ਟ੍ਠ ਨਾਸਤੋ;

ਤਤ੍ਥਾ’ਨੁਭਾਵਾ ਰੁਦਿਤ, ਪਲ਼ਯ,ਤ੍ਥਮ੍ਭਕਾਦਯੋ;

ਵਿਸਾਦਾ,ਲਸ੍ਯ,ਮਰਣ, ਚਿਨ੍ਤਾ’ਦੀ ਬ੍ਯਭਿਚਾਰਿਨੋ.

ਕੋਧੋ ਮਚ੍ਛਰਿਯਾ’ਦੀਹਿ, ਪੋਸੇ ਤਾਸ, ਮਦਾਦਿਭਿ;

ਨਯਨਾ’ਰੁਣਤਾਦੀਹਿ, ਰੁਦ੍ਦੋ ਨਾਮ ਰਸੋ ਭਵੇ.

ਪਤਾਪ, ਵਿਕ੍ਕਮਾ’ਦੀਹੁ, ਸ੍ਸਾਹੋ ‘ਵੀਰੋ’ਤਿ ਸਞ੍ਞਿਤੋ;

ਰਣ,ਦਾਨ,ਦਯਾਯੋਗਾ, ਵੀਰੋ’ਯਂ ਤਿਵਿਧੋ ਭਵੇ;

ਤੇਵਾ’ਨੁਭਾਵਾ ਧਿਤਿ,ਮ, ਤ੍ਯਾ’ਦਯੋ ਬ੍ਯਭਿਚਾਰਿਨੋ.

ਵਿਕਾਰਾ,ਸਨਿ,ਸਤ੍ਤਾ’ਦਿ, ਭਯੁ’ਕ੍ਕਂਸੋ ਭਯਾਨਕੋ;

ਸੇਦਾ’ਦਯੋ ਨੁਭਾਵੇ’ਤ੍ਥ, ਤਾਸਾ’ਦੀ ਬ੍ਯਭਿਚਾਰਿਨੋ.

ਜਿਗੁਚ੍ਛਾ ਰੁਧਿਰਾ’ਦੀਹਿ, ਪੂਤ੍ਯਾ’ਦੀਹਿ ਵਿਰਾਗਤੋ;

ਬੀਭਚ੍ਛੋ ਖੋਭਨੁ’ਬ੍ਬੇਗੀ, ਕਮੇਨ ਕਰੁਣਾਯੁਤੋ;

ਨਾਸਾ ਵਿਕੂਣਨਾਦੀਹਿ, ਸਙ੍ਕਾਦੀਹਿ’ਸ੍ਸ ਪੋਸਨਂ.

ਅਤਿ ਲੋਕ ਪਦਤ੍ਥੇਹਿ, ਵਿਮ੍ਹਯੋ’ਯਂ ਰਸੋ’ਬ੍ਭੁਤੋ;

ਤਸ੍ਸਾ’ਨੁਭਾਵਾ ਸੇਦ,ਸ੍ਸੁ, ਸਾਧੁਵਾਦਾ’ਦਯੋ ਸਿਯੁਂ;

ਤਾਸਾ,ਵੇਗ,ਧਿਤਿ,ਪ੍ਪਞ੍ਞਾ, ਹੋਨ੍ਤੇ’ਤ੍ਥ ਬ੍ਯਭਿਚਾਰਿਨੋ.

ਠਾਯੀਭਾਵੋ ਸਮੋ ਮੇਤ੍ਤਾ, ਦਯਾ,ਮੋਦਾ’ਦਿ ਸਮ੍ਭਵੋ;

ਭਾਵਾਦੀਹਿ ਤ’ਦੁਕ੍ਕਂਸੋ, ਸਨ੍ਤੋ ਸਨ੍ਤ ਨਿਸੇਵਿਤੋ.

ਇਤਿ ਸਙ੍ਘਰਕ੍ਖਿਤ ਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ