ਅਞ੍ਞ > ਸਙ੍ਗਾਯਨ-ਪੁਚ੍ਛ ਵਿਸ੍ਸਜ੍ਜਨਾ

ਪੁਚ੍ਛਾ – ਸਾਧੁ ¶ ਸਾਧੁ ਆਵੁਸੋ ਮਯਮ੍ਪਿ ਦਾਨਿ ਤਤੋਯੇਵ ਪਟ੍ਠਾਯ ਸਂਗਾਯਿਤੁਂ ਪੁਬ੍ਬਕਿਚ੍ਚਾਨਿ ਸਮਾਰਭਾਮ…, ਤੇਨਾਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਬ੍ਰਹ੍ਮਜਾਲਸੁਤ੍ਤਂ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਅਨ੍ਤਰਾ ਚ ਭਨ੍ਤੇ ਰਾਜਗਹਂ ਅਨ੍ਤਰਾ ਚ ਨਾਲ਼ਨ੍ਦਂ ਅਮ੍ਬਲਟ੍ਠਿਕਾਯਂ ਰਾਜਾਗਾਰਕੇ ਭਾਸਿਤਂ.

ਪੁਚ੍ਛਾ – ਕਂ ¶ ਆਵੁਸੋ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸੁਪ੍ਪਿਯਞ੍ਚ ਭਨ੍ਤੇ ਪਰਿਬ੍ਬਾਜਕਂ ਬ੍ਰਹ੍ਮਦਤ੍ਤਞ੍ਚ ਮਾਣਵਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਕਿਸ੍ਮਿਂ ਆਵੁਸੋ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਵਣ੍ਣਾਵਣ੍ਣੇ ਭਨ੍ਤੇ, ਸੁਪ੍ਪਿਯੋ ਹਿ ਭਨ੍ਤੇ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ ਧਮ੍ਮਸ੍ਸ ਅਵਣ੍ਣਂ ਭਾਸਤਿ ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਸੁਪ੍ਪਿਯਸ੍ਸ ਪਨ ਪਰਿਬ੍ਬਾਜਕਸ੍ਸ ਅਨ੍ਤੇਵਾਸੀ ਬ੍ਰਹ੍ਮਦਤ੍ਤੋ ਮਾਣਵੋ ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਤਿ ਧਮ੍ਮਸ੍ਸ ਵਣ੍ਣਂ ਭਾਸਤਿ ਸਙ੍ਘਸ੍ਸ ਵਣ੍ਣਂ ਭਾਸਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਕਤਿ ¶ ਆਵੁਸੋ ਤਤ੍ਥ ਅਨੁਸਨ੍ਧਯੋ.

ਵਿਸ੍ਸਜ੍ਜਨਾ – ਤਯੋ ਭਨ੍ਤੇ ਤਤ੍ਥ ਅਨੁਸਨ੍ਧਯੋ, ਏਕੋ ਅਵਣ੍ਣਾਨੁਸਨ੍ਧਿ, ਦ੍ਵੇ ਵਣ੍ਣਾਨੁਸਨ੍ਧਿਯੋ.

ਪੁਚ੍ਛਾ – ਤਤ੍ਥਾਵੁਸੋ ਪਠਮੇ ਅਨੁਸਨ੍ਧਿਮ੍ਹਿ ਕਥਂ ਭਗਵਤਾ ਭਾਸਿਤਂ, ਤਂ ਸਂਖੇਪਤੋ ਕਥੇਹਿ.

ਵਿਸ੍ਸਜ੍ਜਨਾ – ਪਠਮੇ ਭਨ੍ਤੇ ਅਨੁਸਨ੍ਧਿਮ੍ਹਿ ਅਵਣ੍ਣੇ ਮਨੋਪਦੋਸਂ ਨਿਵਾਰੇਤ੍ਵਾ, ਤਤ੍ਥ ਚ ਆਦੀਨਵਂ ਦਸ੍ਸੇਤ੍ਵਾ, ਤਤ੍ਥ ਪਟਿਪਜ੍ਜਿਤਬ੍ਬਾਕਾਰੋ ਭਗਵਤਾ ਭਾਸਿਤੋ.

ਮਮਂ ¶ ਵਾ ਭਿਕ੍ਖਵੇ ਪਰੇ ਅਵਣ੍ਣਂ ਭਾਸੇਯ੍ਯੁਂ, ਧਮ੍ਮਸ੍ਸ ਵਾ ਅਵਣ੍ਣਂ ਭਾਸੇਯ੍ਯੁਂ ਸਙ੍ਘਸ੍ਸ ਵਾ ਅਵਣ੍ਣਂ ਭਾਸੇਯ੍ਯੁਂ, ਤਤ੍ਰ ਤੁਮ੍ਹੇਹਿ ਨ ਆਘਾਤੋ ਅਪ੍ਪਚ੍ਚਯੋ ਨ ਚੇਤਸੋ ਅਨਭਿਰਦ੍ਧਿ ਕਰਣੀਯਾ…

ਪੁਚ੍ਛਾ – ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਭਗਵਾ ਅਤ੍ਤਨਾ ਪਰਮੁਕ੍ਕਂ ਸਾਗਤਖਨ੍ਤੀਗੁਣਸਮਨ੍ਨਾਗਤੋ ਅਤ੍ਤਨੋ ਸਾਵਕਭੂਤੇ ਅਮ੍ਹੇਪਿ ਤਤ੍ਥ ਸਮਾਦਾਪੇਸਿ, ਅਤ੍ਤਨਾ ਚ ਲੋਕਧਮ੍ਮੇਸੁ ਅਨਿਞ੍ਜਨਸਭਾਵੋ ਅਮ੍ਹਾਕਮ੍ਪਿ ਤਥਤ੍ਤਾਯ ਓਵਾਦਮਦਾਸਿ, ਦੁਤਿਯੇਪਨਾਵੁਸੋ ਅਨੁਸਨ੍ਧਿਮ੍ਹਿ ਕਥਂ ਭਗਵਤਾ ਭਾਸਿਤਂ, ਤਮ੍ਪਿ ਸਂਖੇਪਤੋ ਪਕਾਸੇਹਿ.

ਵਿਸ੍ਸਜ੍ਜਨਾ – ਦੁਤਿਯੇ ਪਨ ਭਨ੍ਤੇ ਅਨੁਸਨ੍ਧਿਮ੍ਹਿ ਵਣ੍ਣੇ ਚੇਤਸੋ ਉਪ੍ਪਿਲਾਵਿਤਤ੍ਤਂ ਨਿਸੇਧੇਤ੍ਵਾ, ਤਤ੍ਥ ਚ ਆਦੀਨਵਂ ਦਸ੍ਸੇਤ੍ਵਾ, ਤਤ੍ਥ ਚ ਪਟਿਪਜ੍ਜਨਾਕਾਰਂ ਦਸ੍ਸੇਤ੍ਵਾ, ਪੁਥੁਜ੍ਜਨਸ੍ਸ ਵਣ੍ਣਭੂਮਿਭੂਤਾਨਿ ਤੀਣਿ ਸੀਲਾਨਿ ਵਿਤ੍ਥਾਰਤੋ ਭਗਵਤਾ ਭਾਸਿਤਾਨਿ.

ਮਮਂ ¶ ਵਾ ਭਿਕ੍ਖਵੇ ਪਰੇ ਵਣ੍ਣਂ ਭਾਸੇਯ੍ਯੁਂ, ਧਮ੍ਮਸ੍ਸ ਵਾ ਵਣ੍ਣਂ ਭਾਸੇਯ੍ਯੁਂ, ਸਙ੍ਘਸ੍ਸ ਵਾ ਵਣ੍ਣਂ ਭਾਸੇਯ੍ਯੁਂ, ਤਤ੍ਰ ਤੁਮ੍ਹੇਹਿ ਨ ਆਨਨ੍ਦੋ ਨ ਸੋਮਨਸ੍ਸਂ ਨ ਚੇਤਸੋ ਅਭਿਰਦ੍ਧਿ ਕਰਣੀਯਾ –

ਪੁਚ੍ਛਾ – ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਭਗਵਾ ਅਤ੍ਤਨਾ ਪਰਮੁਕ੍ਕਂਸਗਤਸੁਪਰਿਸੁਦ੍ਧਸੀਲਸਮਨ੍ਨਾਗਤੋ, ਤਂ ਅਤ੍ਤਨੋ ਸੁਪਰਿਸੁਦ੍ਧਸੀਲਂ ਦਸ੍ਸੇਤ੍ਵਾ ਪਰੇਪਿ ਤਤ੍ਥ ਨਿਯੋਜੇਸਿ, ਤਤਿਯੇ ਪਨਾਵੁਸੋ ਅਨੁਸਨ੍ਧਿਮ੍ਹਿ ਕਥਂ ਭਗਵਤਾ ਭਾਸਿਤਂ, ਤਂ ਸਂਖੇਪਤੋ ਪਕਾਸੇਹਿ.

ਵਿਸ੍ਸਜ੍ਜਨਾ – ਤਤਿਯੇ ਪਨ ਭਨ੍ਤੇ ਅਨੁਸਨ੍ਧਿਮ੍ਹਿ ਦ੍ਵਾਸਟ੍ਠਿ ਦਿਟ੍ਠਿਯੋ ਸਬ੍ਬਞ੍ਞੁਤ ਞਾਣੇਨ ਵਿਤ੍ਥਾਰਤੋ ਵਿਭਜਿਤ੍ਵਾ, ਤਾਸਞ੍ਚ ਛ ਫਸ੍ਸਾਯਤਨਪਦਟ੍ਠਾਨਭਾਵਂ ਵਿਭਾਵੇਤ੍ਵਾ, ਮਿਚ੍ਛਾਦਿਟ੍ਠਿਗਤਿਕਾਧਿਟ੍ਠਾ ਨਞ੍ਚ ਵਟ੍ਟਂ ਕਥੇਤ੍ਵਾ, ਯੁਤ੍ਤਯੋਗਭਿਕ੍ਖੁਅਧਿਟ੍ਠਾਨਞ੍ਚ ਵਿਵਟ੍ਟਂ ਕਥੇਤ੍ਵਾ, ਮਿਚ੍ਛਾਦਿਟ੍ਠਿਗਤਿਕਸ੍ਸ ਦੇਸਨਾਜਾਲਤੋ ਅਵਿਮੁਤ੍ਤਭਾਵਂ ¶ ਦੇਸਨਾਜਾਲਤੋ ਵਿਮੁਤ੍ਤਸ੍ਸ ਨਤ੍ਥਿਕਭਾਵਞ੍ਚ ਵਿਭਾਵੇਤ੍ਵਾ, ਅਤ੍ਤਨੋ ਚ ਕਤ੍ਥਚਿ ਅਪਰਿਯਾਪਨ੍ਨਭਾਵਂ ਦਸ੍ਸੇਤ੍ਵਾ, ਉਪਾਦਿਸੇਸਨਿਬ੍ਬਾਨਧਾਤੁਂ ਪਾਪੇਤ੍ਵਾ ਦੇਸਨਾ ਭਗਵਤਾ ਨਿਟ੍ਠਾਪਿਤਾ.

ਉਚ੍ਛਿਨ੍ਨਭਾਵਨੇਤ੍ਤਿਕੋ ¶ ਭਿਕ੍ਖਵੇ ਤਥਾਗਤਸ੍ਸ ਕਾਯੋ ਤਿਟ੍ਠਤਿ, ਯਾਵਸ੍ਸ ਕਾਯੋ ਠਸ੍ਸਤਿ ਤਾਵ ਨਂ ਦਕ੍ਖਨ੍ਤਿ ਦੇਵਮਨੁਸ੍ਸਾ, ਕਾਯਸ੍ਸ ਭੇਦਾ ਉਦ੍ਧਂ ਜੀਵਿਤਪਰਿਯਾਦਾਨਾ ਨ ਨਂ ਦਕ੍ਖਨ੍ਤਿ ਦੇਵਮਨੁਸ੍ਸਾ.

ਪੁਚ੍ਛਾ – ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਭਗਵਾ ਅਤ੍ਤਨਾ ਦ੍ਵਾਸਟ੍ਠਿ ਦਿਟ੍ਠਿਯੋ ਚ ਛ ਫਸ੍ਸਾਯਤਨਾਨਿ ਚ ਦ੍ਵਾਦਸ ਪਟਿਚ੍ਚਸਮੁਪ੍ਪਾਦਙ੍ਗਾਨਿ ਚ ਸਬ੍ਬਸੋ ਪਰਿਜਾਨਿਤ੍ਵਾ ਤੇਸਂ ਪਰਿਜਾਨਨਤ੍ਥਾਯ ਪਰੇਸਮ੍ਪਿ ਤਥਤ੍ਤਾਯ ਧਮ੍ਮਂ ਪਕਾਸੇਤਿ, ਸੁਤ੍ਤਞ੍ਚ ਨਾਮ ਆਵੁਸੋ ਚਤੁਨ੍ਨਂ ਸੁਤ੍ਤਨਿਕ੍ਖੇਪਾਨਂ ਅਞ੍ਞਤਰਵਸੇਨੇਵ ਨਿਕ੍ਖਿਤ੍ਤਂ, ਤਸ੍ਮਾ ਤੇਸੁ ਇਦਂ ਸੁਤ੍ਤਂ ਕਤਰੇਨ ਸੁਤ੍ਤਨਿਕ੍ਖੇਪੇਨ ਭਗਵਤਾ ਨਿਕ੍ਖਿਤ੍ਤਂ.

ਵਿਸ੍ਸਜ੍ਜਨਾ – ਚਤੂਸੁ ਭਨ੍ਤੇ ਸੁਤ੍ਤਨਿਕ੍ਖੇਪੇਸੁ ਅਟ੍ਠੁਪ੍ਪਤ੍ਤਿਨਿਕ੍ਖੇਪਨ ਇਦਂ ਸੁਤ੍ਤਂ ਨਿਕ੍ਖਿਤ੍ਤਂ.

ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.

ਪੁਚ੍ਛਾ – ਅਤ੍ਥਿ ਨੁ ਖੋ ਆਵੁਸੋ ਏਤ੍ਥ ਕੋਚਿ ਵਿਰਦ੍ਧਦੋਸਾ, ਯੇਨ ਪਚ੍ਛਿਮਾ ਜਨਾ ਮਿਚ੍ਛਾਅਤ੍ਥਂ ਗਣ੍ਹੇਯ੍ਯੁਂ.

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸਾਮਞ੍ਞਫਲਸੁਤ੍ਤਂ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨੇ ਭਾਸਿਤਂ.

ਪੁਚ੍ਛਾ – ਕੇਨਾਵੁਸੋ ਸਦ੍ਧਿਂ ਭਗਵਤਾ ਭਾਸਿਤਂ.

ਵਿਸ੍ਸਜ੍ਜਨਾ – ਰਞ੍ਞਾ ਭਨ੍ਤੇ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਦ੍ਧਿਂ ਭਾਸਿਤਂ.

ਪੁਚ੍ਛਾ – ਤਂ ¶ ਪਨਾਵੁਸੋ ਸੁਤ੍ਤਂ ਚਤੁਨ੍ਨਂ ਸੁਤ੍ਤਨਿਕ੍ਖੇਪਾਨਂ ਕਤਰੇਨ ਸੁਤ੍ਤਨਿਕ੍ਖੇਪੇਨ ਭਗਵਤਾ ਨਿਕ੍ਖਿਤ੍ਤਂ.

ਵਿਸ੍ਸਜ੍ਜਨਾ – ਚਤੁਨ੍ਨਂ ਭਨ੍ਤੇ ਸੁਤ੍ਤਨਿਕ੍ਖੇਪਾਨਂ ਪੁਚ੍ਛਾਵਸਿਕੇਨ ਸੁਤ੍ਤਨਿਕ੍ਖੇਪੇਨ ਨਿਕ੍ਖਿਤਂ ਭਗਵਤਾ.

ਪੁਚ੍ਛਾ – ਸਾ ਪਨਾਵੁਸੋ ਪੁਚ੍ਛਾ ਕੇਨਾਕਾਰੇਨ ਸਮੁਪ੍ਪਨ੍ਨਾ.

ਵਿਸ੍ਸਜ੍ਜਨਾ – ਰਾਜਾ ਭਨ੍ਤੇ ਮਾਗਧੋ ਅਜਾਸਤ੍ਤੁ ਵੇਦੇਹਿਪੁਤ੍ਤੋ ਤਦਹੁਪੋਸਥੇ ਪਨ੍ਨਰਸੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪੁਣ੍ਣਾਯ ਪੁਣ੍ਣਮਾਯ ਰਤ੍ਤਿਯਾ ਯੇਨ ਭਗਵਾ ਤੇਨੁਪਸਂਕਮਿ, ਉਪਸਂਕਮਿਤ੍ਵਾ ਭਗਵਨ੍ਤਂ ਦਿਟ੍ਠੇਵ ਧਮ੍ਮੇ ਸਂਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਏਵਂ ਖੋ ਸਾ ਭਨ੍ਤੇ ਪੁਚ੍ਛਾ ਉਪ੍ਪਨ੍ਨਾ.

ਰਮ੍ਮਣੀਯਾ ¶ ਵਤ ਭੋ ਦੋਸਿਨਾ ਰਤ੍ਤਿ, ਅਭਿਰੂਪਾ ਵਤ ਭੋ ਦੋਸਿਨਾ ਰਤ੍ਤਿ, ਦਸ੍ਸਨੀਯਾ ਵਤ ਭੋ ਦੋਸਿਨਾ ਰਤ੍ਤਿ, ਪਾਸਾਦਿਕਾ ਵਤ ਭੋ ਦੋਸਿਨਾ ਰਤ੍ਤਿ, ਲਕ੍ਖਞ੍ਞਾ ਵਤ ਭੋ ਦੋਸਿਨਾ ਰਤ੍ਤਿ….

ਕਂ ਨੁਖ੍ਵਜ੍ਜ ਸਮਣਂ ਵਾ ਬ੍ਰਾਹ੍ਮਣਂ ਵਾ ਪਯਿਰੁਪਾਸੇਯ੍ਯਾਮ….

ਯਂ ¶ ਨੋ ਪਯਿਰੁਪਸਤੋ ਚਿਤ੍ਤਂ ਪਸੀਦੇਯ੍ਯ….

ਤ੍ਵਂ ਪਨ ਸਮ੍ਮ ਜੀਵਕ ਕਿਂ ਤੁਣ੍ਹੀਸਿ –

ਅਯਂ ¶ ਦੇਵ ਅਮ੍ਹਾਕਂ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਅਮ੍ਹਾਕਂ ਅਮ੍ਬਵਨੇ ਵਿਹਰਤਿ.

ਤਂ ਖੋ ਪਨ ਭਗਵਨ੍ਤਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ ‘‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋਪੁਰਿਸਦਮ੍ਮਸਾਰਥਿ ਸਤ੍ਥਾਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’’ਤਿ.

ਤਂ ਦੇਵੋ ਭਗਵਨ੍ਤਂ ਪਯਿਰੁਪਾਸਤੁ, ਅਪ੍ਪੇਵਨਾਮ ਦੇਵਸ੍ਸ ਭਗਵਨ੍ਤਂ ਪਯਿਰੁਪਾਸਤੋ ਚਿਤ੍ਤਂ ਪਸੀਦੇਯ੍ਯ.

ਤੇਨ ਹਿ ਸਮ੍ਮ ਜੀਵਕ ਹਤ੍ਥਿਯਾਨਾਨਿ ਕਪ੍ਪਾਪੇਹਿ.

ਕਪ੍ਪਿਤਾਨਿ ¶ ਖੋ ਤੇ ਦੇਵ ਹਤ੍ਥਿਯਾਨਾਨਿ, ਯਸ੍ਸ ਦਾਨਿ ਕਾਲਂ ਮਞ੍ਞਸਿ.

ਕਿਚ੍ਚਿ ਮਂ ਸਮ੍ਮ ਜੀਵਕ ਨ ਵਞ੍ਚੇਸਿ, ਕਚ੍ਚਿ ਮਂ ਸਮ੍ਮ ਜੀਵਕ ਨ ਪਲਮ੍ਭੇਸਿ….

ਮਾ ਭਾਯਿ ਮਹਾਰਾਜ, ਮਾ ਭਾਯਿ ਮਹਾਰਾਜ….

ਨ ਤਂ ਦੇਵ ਵਞ੍ਚੇਮਿ, ਨ ਤਂ ਦੇਵ ਪਲਮ੍ਭਾਮਿ….

ਏਸੋ ¶ ਮਹਾਰਾਜ ਭਗਵਾ, ਏਸੋ ਮਹਾਰਾਜ ਭਗਵਾ ਮਜ੍ਝਿਮਂ ਥਮ੍ਭਂ ਨਿਸ੍ਸਾਯ ਪੁਰਤ੍ਥਾਭਿਮੁਖੋ ਨਿਸਿਨ੍ਨੋ ਪੁਰਕ੍ਖਤੋ ਭਿਕ੍ਖੁਸਙ੍ਘਸ੍ਸ….

ਇਮਿਨਾ ਮੇ ਉਪਸਮੇਨ ਉਦਯਭਦ੍ਦੋ ਕੁਮਾਰੋ ਸਮਨ੍ਨਾਗਤੋ ਹੋਤੁ…

ਪੁਚ੍ਛੇਯ੍ਯਾਮਹਂ ਭਨ੍ਤੇ ਭਗਵਨ੍ਤਂ ਕਿਞ੍ਚਿਦੇਵ ਦੇਸਂ ਸਚੇ ਮੇ ਭਗਵਾ ਓਕਾਸਂ ਕਰੋਤਿ ਪਞ੍ਹਸ੍ਸ ਵੇਯ੍ਯਾਕਰਣਾਯ.

ਯਥਾ ¶ ਨੁ ਖੋ ਇਮਾਨਿ ਭਨ੍ਤੇ ਪੁਥੁਸਿਪ੍ਪਾਯਤਨਾਨਿ, ਸੇਯ੍ਯਥਿਦਂ, ਹਤ੍ਥਾਰੋਹਾ ਅਸ੍ਸਾਰੋਹਾ ਰਥਿਕਾ ਧਨੁਗ੍ਗਹਾ ਚੇਲਕਾ ਚਲਕਾ ਪਿਣ੍ਡਦਾਯਕਾ (ਪੇਯ੍ਯਾਲ) ਗਣਕਾ ਮੁਦ੍ਦਿਕਾ, ਅਞ੍ਞਾਨਿਪਿ ਏਵਂ ਗਤਿਕਾਨਿ ਪੁਥੁਸਿਪ੍ਪਾਯਤਨਾਨਿ, ਤੇ ਤੇਨ ਸਿਪ੍ਪੇਨ ਸਨ੍ਦਿਟ੍ਠਿਕਂ ਸਿਪ੍ਪਫਲਂ ਜੀਵਨ੍ਤਿ, ਤੇ ਤੇਨ ਅਤ੍ਤਾਨਂ ਸੁਖੇਨ੍ਤਿ ਪੀਣੇਨ੍ਤਿ, ਮਾਤਾਪਿਤਰੋ ਸੁਖੇਨ੍ਤਿ, ਪੀਣੇਨ੍ਤਿ, ਪੁਤ੍ਤਦਾਰਂ ਸੁਖੇਨ੍ਤਿ ਪੀਣੇਨ੍ਤਿ, ਮਿਤ੍ਤਾਮਚ੍ਚੇ ਸੁਖੇਨ੍ਤਿ ਪੀਣੇਨ੍ਤਿ ਸਮਣਬ੍ਰਾਹ੍ਮਣੇਸੁ ਉਦ੍ਧਗ੍ਗਿਕਂ ਦਕ੍ਖਿਣਂ ਪਤਿਟ੍ਠਪੇਨ੍ਤਿ ਸੋਵਗ੍ਗਿਕਂ ਸੁਖਵਿਪਾਕਂ ਸਗ੍ਗਸਂਵਤ੍ਤਨਿਕਂ, ਸਕ੍ਕਾ ਨੁ ਖੋ ਭਨ੍ਤੇ ਏਵਮੇਵ ਦਿਟ੍ਠੇਵ ਧਮ੍ਮੇ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪਞ੍ਞਪੇਤੁਂ.

ਪੁਚ੍ਛਾ – ਤਦਾ ¶ ਆਵੁਸੋ ਕਥਂ ਭਗਵਤਾ ਰਾਜਾ ਅਜਾਤਸਤ੍ਤੁ ਵੇਦੇਹਿ ਪੁਤ੍ਤੋ ਪਟਿਪੁਚ੍ਛਿਤੋ ਕਥਞ੍ਚ ਤੇਨ ਭਗਵਤੋ ਆਰੋਚਿਤਂ.

ਵਿਸ੍ਸਜ੍ਜਨਾ – ‘‘ਅਭਿਜਾਨਾਸਿ ਨੋ ਤ੍ਵਂ ਮਹਾਰਾਜ ਇਮਂ ਪਞ੍ਹਂ ਅਞ੍ਞੇ ਸਮਣਬ੍ਰਾਹ੍ਮਣੇ ਪੁਚ੍ਛਿਤਾਤਿ, ਅਭਿਜਾਨਾਮਹਂ ਭਨ੍ਤੇ ਅਞ੍ਞੇ ਸਮਣਬ੍ਰਾਹ੍ਮਣੇ ਪੁਚ੍ਛਿਤਾਤਿ, ਯਥਾਕਥਂ ਪਨ ਤੇ ਮਹਾਰਾਜ ਬ੍ਯਾਕਰਿਂਸੁ, ਸਚੇ ਤੇ ਅਗਰੁ, ਭਾਸਸ੍ਸੂਤਿ ਨ ਖੋ ਮੇ ਭਨ੍ਤੇ ਗਰੁ, ਯਤ੍ਥਸ੍ਸ ਭਗਵਾ ਨਿਸਿਨ੍ਨੋ ਭਵਨ੍ਤਰੂਪੋ ਵਾਤਿ, ਤੇਨੇਹਿ ਮਹਾਰਾਜ ਭਾਸਸ੍ਸੂ’’ਤਿ, ਏਵਂ ਖੋ ਭਨ੍ਤੇ ਤਦਾ ਭਗਵਤਾ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿ ਪੁਤ੍ਤੋ ਪਟਿਪੁਚ੍ਛਿਤੋ, ਏਵਂ ਖੋ ਭਨ੍ਤੇ ਤੇਨ ਤਦਾ ਭਗਵਤੋ ਆਰੋਚਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਪੂਰਣਕਸ੍ਸਪਸ੍ਸ ਸਨ੍ਤਿਕੇ ਪੁਚ੍ਛਾਵਿਸ੍ਸਜ੍ਜਨਾ ਅਹੋਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਪੂਰਣੋ ਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪੂਰਣਂ ਕਸ੍ਸਪਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਅਥ ਖੋ ਭਨ੍ਤੇ ਪੂਰਣੋ ਕਸ੍ਸਪੋ ਕਰੋਤੋ ਖੋ ਮਹਾਰਾਜ ਕਾਰਯਤੋ, ਛਿਨ੍ਦਤੋ ਛੇਦਾਪਯਤੋ, ਪਚਤੋ ਪਾਚਾਪਯਤੋ, ਸੋਚਯਤੋ ਸੋਚਾਪਯਤੋ (ਪੇਯ੍ਯਾਲ) ਕਰੋਤੋ ਨ ਕਰੀਯਤਿ ਪਾਪਂ ਤ੍ਯਾਦਿਨਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਸਂਦਿਟ੍ਠਿ ਕਂ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਅਕਿਰਿਯਂ ਬ੍ਯਾਕਾਸਿ, ਏਵਂ ਖੋ ਭਨ੍ਤੇ ਪੂਰਣਸ੍ਸ ਕਸ੍ਸਪਸ੍ਸ ਸਨ੍ਤਿਕੇ ਪੁਚ੍ਛਾਵਿਸ੍ਸਜ੍ਜਨਾ ਅਹੋਸਿ.

ਨਿਸ੍ਸਿਰਿਕੋ ¶ ਵਤ ਆਵੁਸੋ ਪੂਰਣਸ੍ਸ ਕਸ੍ਸਪਸ੍ਸ ਵਾਦੋ ਅਨਤ੍ਥਸਂਹਿਤੋ ਜਿਗੁਚ੍ਛਨੀਯੋ ਅਤਿਵਿਯ ਭਯਾਨਕੋ, ਯੇ ਤਸ੍ਸ ਵਚਨਂ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞੇਯ੍ਯੁਂ, ਤੇਸਂ ਤਂ ਅਸ੍ਸ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ, ਏਤ੍ਤਕੇਨੇਵ ਅਜ੍ਜ ਮਯਂ ਪੁਚ੍ਛਾਵਿਸ੍ਸਜ੍ਜਨਂ ਥਪੇਸ੍ਸਾਮ.

ਪੁਚ੍ਛਾ – ਪੁਰਿਮਦਿਵਸੇ ਆਵੁਸੋ ਮਯਾ ਸਾਮਞ੍ਞਫਲਸੁਤ੍ਤਸ੍ਸ ਨਿਦਾਨਪਰਿਯਾਪਨ੍ਨਾਨਿ ਪੁਚ੍ਛਿਤਬ੍ਬਟ੍ਠਾਨਾਨਿ ਕਾਨਿਚਿ ਕਾਨਿਚਿ ਪੁਚ੍ਛਿਤਾਨਿ, ਤਯਾ ਚ ਸੁਟ੍ਠੁ ਵਿਸ੍ਸਜ੍ਜਿਤਾਨਿ, ਅਜ੍ਜ ਪਨ ਯਥਾਨੁਪ੍ਪਤ੍ਤਮਕ੍ਖਲਿਗੋਸਾਯ ਵਾਦਤੋ ਪਟ੍ਠਾਯ ਪੁਚ੍ਛਿਸ੍ਸਾਮਿ, ਮਕ੍ਖਲਿ ਪਨ ਆਵੁਸੋ

ਗੋਸਾਲੋ ¶ ਰਞ੍ਞਾ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਮਕ੍ਖਲਿਗੋਸਾਲੋ ਤੇਨੁਪਸਂਕਮਿ, ਉਪਸਂਕਮਿਤ੍ਵਾ ਮਕ੍ਖਲਿਂ ਗੋਸਾਲਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਅਥ ਖੋ ਭਨ੍ਤੇ ਮਕ੍ਖਲਿਗੋਸਾਲੋ ਰਾਜਾਨਂ ਮਾਗਧਂ ਅਜਾਤਸਤ੍ਤੁਂ ਵੇਦੇਹਿਪੁਤ੍ਤਂ ਏਤਦਵੋਚ ‘‘ਨਤ੍ਥਿ ਮਹਾਰਾਜ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯ, ਅਹੇਤੂ ਅਪਚ੍ਚਯਾ ਸਤ੍ਤਾ ਸਂਕਿਲਿਸ੍ਸਨ੍ਤਿ. ਨਤ੍ਥਿ ਮਹਾਰਾਜ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਵਿਸੁਦ੍ਧਿਯਾ, ਅਹੇਤੂ ਅਪਚ੍ਚਯਾ ਸਤ੍ਤਾ ਵਿਸੁਜ੍ਝਨ੍ਤਿ, (ਪੇਯ੍ਯਾਲ) ਚੁਲ੍ਲਾਸੀਤਿ ਮਹਾਕਪ੍ਪਿਨੋ ਸਤਸਹਸ੍ਸਾਨਿ, ਯਾਨਿ ਬਾਲੇ ਚ ਪਣ੍ਡਿਤੇ ਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਨ੍ਤਿ, ਤਤ੍ਥ ਨਤ੍ਥਿ ‘ਇਮਿਨਾਹਂ ਸੀਲੇਨ ਵਾ ਵਤੇਨ ਵਾ ਤਪੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਪਰਿਪਕ੍ਕਂ ਵਾ ਕਮ੍ਮਂ ਪਰਿਪਾਚੇਸ੍ਸਾਮਿ, ਪਰਿਪਕ੍ਕਂ ਵਾ ਕਮ੍ਮਂ ਫੁਸ੍ਸ ਫੁਸ੍ਸ ਬ੍ਯਨ੍ਤਿਂ ਕਰਿਸ੍ਸਾਮੀ’ਤਿ ਹੇਵਂ ਨਤ੍ਥਿ. ਦੋਣਮਿਤੇ ਸੁਖਦੁਕ੍ਖੇ, ਪਰਿਯਨ੍ਤਕਤੇ ਸਂਸਾਰੇ ਨਤ੍ਥਿ ਹਾਯਨਵਡ੍ਢਨੇ, ਨਤ੍ਥਿ ਉਕ੍ਕਂਸਾਵਕਂਸੇ. ਸੇਯ੍ਯਥਾਪਿ ਨਾਮ ਸੁਤ੍ਤਪੁਟ੍ਠੇ ਖਿਤ੍ਤੇ ਨਿਬ੍ਬੇਠਿਯਮਾਨਮੇਵ ਪਲੇਤਿ, ਏਵਮੇਵ ਬਾਲੇ ਚ ਪਣ੍ਡਿਤੇ ਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਨ੍ਤੀ’’ਤਿ, ਇਤ੍ਥਂ ਖੋ ਭਨ੍ਤੇ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਮਕ੍ਖਲਿਗੋਸਾਲੋ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਸਂਸਾਰਸੁਦ੍ਧਿਂ ਬ੍ਯਾਕਾਸਿ.

ਅਯਮ੍ਪਿ ¶ ਆਵੁਸੋ ਵਾਦੋ ਨਿਸ੍ਸਿਰਿਕੋਯੇਵ ਅਨਤ੍ਥਸਂਹਿਤੋ ਜਿਗੁਚ੍ਛਨੀਯੋ ਅਤਿ ਵਿਯ ਭਯਾਨਕੋ, ਯੇ ਤਸ੍ਸ ਵਚਨਂ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞੇਯ੍ਯੁਂ, ਤੇਸਂ ਤਂ ਅਸ੍ਸ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ.

ਪੁਚ੍ਛਾ – ਅਥਾਪਰਮ੍ਪਿ ¶ ਪੁਚ੍ਛਾਮਿ, ਅਜਿਤੋ ਪਨ ਆਵੁਸੋ ਕੇਸਕਮ੍ਬਲੋ ਰਞ੍ਞਾ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਅਜਿਤੋ ਕੇਸਕਮ੍ਬਲੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਅਜਿਤਂ ਕੇਸਕਮ੍ਬਲਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਅਥ ਖੋ ਭਨ੍ਤੇ ਅਜਿਤੋ ਕੇਸਕਮ੍ਬਲੋ ਰਾਜਾਨਂ ਮਾਗਧਂ ਅਜਾਤਸਤ੍ਤੁਂ ਵੇਦੇਹਿਪੁਤ੍ਤਂ ਏਤਦਵੋਚ ‘‘ਨਤ੍ਥਿ ਮਹਾਰਾਜ ਦਿਨ੍ਨਂ, ਨਤ੍ਥਿ ਯਿਟ੍ਠਂ, ਨਤ੍ਥਿ ਹੁਤਂ, ਨਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ, ਨਤ੍ਥਿ ਅਯਂ ਲੋਕੋ, ਨਤ੍ਥਿ ਪਰੋ ਲੋਕੋ, ਨਤ੍ਥਿ ਮਾਤਾ, ਨਤ੍ਥਿ ਪਿਤਾ, ਨਤ੍ਥਿ ਸਤ੍ਤਾ ਓਪਪਾਤਿਕਾ, ਨਤ੍ਥਿ ਲੋਕੇ ਸਮਣਬ੍ਰਾਹ੍ਮਣਾ ਸਮ੍ਮਗ੍ਗਤਾ ਸਮ੍ਮਾਪਟਿਪਨ੍ਨਾ, ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਨ੍ਤਿ. (ਪੇਯ੍ਯਾਲ) ਬਾਲੇ ਚ ਪਣ੍ਡਿਤੇ ਚ ਕਾਯਸ੍ਸ ਭੇਦਾ ਉਚ੍ਛਿਜ੍ਜਨ੍ਤਿ ਵਿਨਸ੍ਸਨ੍ਤੀ’’ਤਿ. ਇਤ੍ਥਂ ਖੋ ਭਨ੍ਤੇ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਜਿਤੋ ਕੇਸਕਮ੍ਬਲੋ ¶ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਉਚ੍ਛੇਦਂ ਬ੍ਯਾਕਾਸਿ.

ਅਯਮ੍ਪਿ ¶ ਖੋ ਆਵੁਸੋ ਨਿਸ੍ਸਿਰਿਕੋਯੇਵ, ਅਨਤ੍ਥਸਂਹਿਤੋ ਜਿਗੁਚ੍ਛਨੀਯੋ ਅਤਿ ਵਿਯ ਭਯਾਨਕੋ, ਯੇ ਤਸ੍ਸ ਵਚਨਂ ਸੋਤਬ੍ਬਂ ਸਦ੍ਧਾਤਬ੍ਬਂ ਮਞ੍ਞੇਯ੍ਯੁਂ, ਤੇਸਂ ਤਂ ਅਸ੍ਸ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ.

ਪੁਚ੍ਛਾ – ਅਥਾਪਰਮ੍ਪਿ ¶ ਪੁਚ੍ਛਾਮਿ, ਪਕੁਧੋ ਪਨ ਆਵੁਸੋ ਕਚ੍ਚਾਯਨੋ ਰਞ੍ਞਾ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਪਕੁਧੋ ਕਚ੍ਚਾਯਨੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਕੁਧਂ ਕਚ੍ਚਾਯਨਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਅਥ ਖੋ ਭਨ੍ਤੇ ਪਕੁਧੋ ਕਚ੍ਚਾਯਨੋ ਰਾਜਾਨਂ ਮਾਗਧਂ ਅਜਾਸਤ੍ਤੁਂ ਵੇਦੇਹਿਪੁਤ੍ਤਂ ਏਤਦਵੋਚ ‘‘ਸਤ੍ਤਿਮੇ ਮਹਾਰਾਜ ਕਾਯਾ ਅਕਟਾ ਅਕਟਵਿਧਾ ਅਨਿਮ੍ਮਿਤਾ ਅਨਿਮ੍ਮਾਤਾ ਵਞ੍ਚਾ ਕੂਟਟ੍ਠਾ ਏਸਿਕਟ੍ਠਾਯਿਤਾ, ਤੇ ਨ ਇਞ੍ਜਨ੍ਤਿ, ਨ ਵਿਪਰਿਣਾਮੇਨ੍ਤਿ, ਨ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤਿ, ਨਾਲਂ ਅਞ੍ਞਮਞ੍ਞਸ੍ਸ ਸੁਖਾਯ ਵਾ ਦੁਕ੍ਖਾਯ ਵਾ ਸੁਖਦੁਕ੍ਖਾਯ ਵਾ. ਕਤਮੇ ਸਤ੍ਤ, ਪਥਵੀਕਾਯੋ, ਆਪੋਕਾਯੋ, ਤੇਜੋਕਾਯੋ ¶ ਵਾਯੋਕਾਯੋ, ਸੁਖੇ, ਦੁਕ੍ਖੇ, ਜੀਵੇ ਸਤ੍ਤਮੇ. ਇਮੇ ਸਤ੍ਤਕਾਯਾ ਅਕਟਾ ਅਕਟਵਿਧਾ ਅਨਿਮ੍ਮਿਤਾ ਅਨਿਮ੍ਮਾਤਾ ਵਞ੍ਚ੍ਯਾ ਕੂਟਟ੍ਠਾ ਏਸਿਕਟ੍ਠਾਯਿਤਾ, ਤੇ ਨ ਇਞ੍ਜਨ੍ਤਿ, ਨ ਵਿਪਰਿਣਾਮੇਨ੍ਤਿ, ਨ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤਿ, ਨਾਲਂ ਅਞ੍ਞਮਞ੍ਞਸ੍ਸ ਸੁਖਾਯ ਵਾ ਦੁਕ੍ਖਾਯ ਵਾ ਸੁਖਦੁਕ੍ਖਾਯ ਵਾ. ਤਤ੍ਥ ਨਤ੍ਥਿ ਹਨ੍ਤਾ ਵਾ ਘਾਤੇਤਾ ਵਾ, ਸੋਤਾ ਵਾ ਸਾਵੇਤਾ ਵਾ, ਵਿਞ੍ਞਾਤਾ ਵਾ ਵਿਞ੍ਞਾਪੇਤਾ ਵਾ, ਯੋਪਿ ਤਿਣ੍ਹੇਨ ਸਤ੍ਥੇਨ ਸੀਸਂ ਛਿਨ੍ਦਤਿ, ਨ ਕੋਚਿ ਕਿਞ੍ਚਿ ਜਿਵਿਤਾ ਵੋਰੋਪੇਤਿ, ਸਤ੍ਤਨ੍ਨਂਤ੍ਵੇਵ ਕਾਯਾਨਮਨ੍ਤਰੇਨ ਸਤ੍ਥਂ ਵਿਵਰਮਨੁਪਤਤੀ’’ਤਿ. ਇਤ੍ਥਂ ਖੋ ਭਨ੍ਤੇ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਪਕੁਧੋ ਕਚ੍ਚਾਯਨੋ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਅਞ੍ਞੇਨ ਅਞ੍ਞਂ ਬ੍ਯਾਕਾਸਿ.

ਅਯਮ੍ਪਿ ¶ ਖੋ ਆਵੁਸੋ ਵਾਦੋ ਪੁਰਿਮਵਾਦੋਵਿਯ ਨਿਸ੍ਸਿਰਿਕੋਯੇਵ ਅਨਤ੍ਥਸਂਹਿਤੋ ਜਿਗੁਚ੍ਛਨੀਯੋ ਅਤਿਵਿਯ ਭਯਾਨਕੋ.

ਪੁਚ੍ਛਾ – ਅਥਾਪਰਮ੍ਪਿ ਪੁਚ੍ਛਾਮਿ, ਨਿਗਣ੍ਠੋ ਪਨਾਵੁਸੋ ਨਾਟਪੁਤ੍ਤੋ ਰਞ੍ਞਾ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਂਕਮਿ, ਉਪਸਂਕਮਿਤ੍ਵਾ ਨਿਗਣ੍ਠਂ ਨਾਟਪੁਤ੍ਤਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਚ੍ਛਿ, ਅਥ ਖੋ ਨਿਗਣ੍ਠੋ ਨਾਟਪੁਤ੍ਤੋ ਰਾਜਾਨਂ ਮਾਗਧਂ ਅਜਾਤਸਤ੍ਤੁਂ ਵੇਦੇਹਿਪੁਤ੍ਤਂ ਏਤਦਵੋਚ, ‘‘ਇਧ ਮਹਾਰਾਜ ਨਿਗਣ੍ਠੋ ਚਾਤੁਯਾਮਸਂਵਰਸਂਵੁਤੋ ਹੋਤਿ, ਕਥਞ੍ਚ ਮਹਾਰਾਜ

ਨਿਗਣ੍ਠੋ ¶ ਚਾਤੁਯਾਮਸਂਵਰਸਂਵੁਤੋ ਹੋਤਿ, ਇਧ ਮਹਾਰਾਜ ਨਿਗਣ੍ਠੋ ਸਬ੍ਬਵਾਰਿਵਾਰਿਤੋ ਚ ਹੋਤਿ, ਸਬ੍ਬਵਾਰਿਯੁਤ੍ਤੋ ਚ, ਸਬ੍ਬਵਾਰਿਧੁਤੋ ਚ, ਸਬ੍ਬਵਾਰਿਫੁਟੋ ਚ. ਏਵਂ ਖੋ ਮਹਾਰਾਜ ਨਿਗਣ੍ਠੋ ਚਾਤੁਯਾਮਸਂਵਰਸਂਵੁਤੋ ਹੋਤਿ, ਯਤੋ ਖੋ ਮਹਾਰਾਜ ਨਿਗਣ੍ਠੋ ਏਵਂ ਚਾਤੁਯਾਮਸਂਵਰਸਂਵੁਤੋ ਹੋਤਿ. ਅਯਂ ਵੁਚ੍ਚਤਿ ਮਹਾਰਾਜ ਨਿਗਣ੍ਠੋ ਗਤਤ੍ਤੋ ਚ ਯਤਤ੍ਤੋ ਚ ਠਿਤਤ੍ਤੋ ਚਾ’’ਤਿ. ਇਤ੍ਥਂ ਖੋ ਭਨ੍ਤੇ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਨਿਗਣ੍ਠੋ ਨਾਟਪੁਤ੍ਤੋ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਚਾਤੁਯਾਮਸਂਵਰਂ ਬ੍ਯਾਕਾਸਿ.

ਏਤਸ੍ਸ ¶ ਪਨਾਵੁਸੋ ਵਾਦੇ ਕੋਚਿ ਸਾਸਨਾਨੁਲੋਮਵਾਦੋ ਅਤ੍ਥਿ, ਅਸੁਦ੍ਧਲਦ੍ਧਿਤਾਯ ਪਨ ਏਸੋਪਿ ਵਾਦੋ ਜਿਗੁਚ੍ਛਨੀਯੋਯੇਵ, ਸੇਯ੍ਯਥਾਪਿ ਭੋਜਨਂ ਗੂਥਮਿਸ੍ਸਂ ਗਾਰਯ੍ਹੋਯੇਵ ਆਰਕਾ ਪਰਿਵਜ੍ਜਿਤਬ੍ਬੋਯੇਵ, ਸੇਯ੍ਯਥਾਪਿ ਵਿਸਸਂਸਟ੍ਠੋ ਆਪਾਨੀਯਕਂਸੋ.

ਪੁਚ੍ਛਾ – ਅਥਾਪਰਮ੍ਪਿ ¶ ਪੁਚ੍ਛਾਮਿ, ਸਞ੍ਚਯੋ ਪਨਾਵੁਸੋ ਬੇਲਟ੍ਠਪੁਤ੍ਤੋ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਏਕਮਿਦਂ ਭਨ੍ਤੇ ਸਮਯਂ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਯੇਨ ਸਞ੍ਚਯੋ ਬੇਲਟ੍ਠਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸਞ੍ਚਯਂ ਬੇਲਟ੍ਠਪੁਤ੍ਤਂ ਏਤਦਵੋਚ, ‘‘ਯਥਾ ਨੁ ਖੋ ਇਮਾਨਿ ਭੋ ਸਞ੍ਚਯ ਪੁਥੁਸਿਪ੍ਪਾਯਤਨਾਨਿ, ਸੇਯ੍ਯਥਿਦਂ, ਹਤ੍ਥਾਰੋਹਾ ਅਸ੍ਸਰੋਹਾ…ਪੇ… ਸਕ੍ਕਾ ਨੁ ਖੋ ਭੋ ਸਞ੍ਚਯ ਏਵਮੇਵ ਦਿਟ੍ਠੇਵ ਧਮ੍ਮੇ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪਞ੍ਞਪੇਤੁ’’ਨ੍ਤਿ, ਏਵਂ ਵੁਤ੍ਤੇ ਭਨ੍ਤੇ ਸਞ੍ਚਯੋ ਬੇਲਟ੍ਠਪੁਤ੍ਤੋ ਰਾਜਾਨਂ ਮਾਗਧਂ ਅਜਾਤਸਤ੍ਤੁਂ ਵੇਦੇਹਿਪੁਤ੍ਤਂ ਏਤਦਵੋਚ.

‘‘ਅਤ੍ਥਿ ਪਰੋਲੋਕੋਤਿ ਇਤਿ ਚੇ ਮਂ ਪੁਚ੍ਛਸਿ, ਅਤ੍ਥਿ ਪਰੋ ਲੋਕੋਤਿ ਇਤਿ ਚੇ ਮੇ ਅਸ੍ਸ, ਅਤ੍ਥਿ ਪਰੋ

ਲੋਕੋਤਿ ¶ ਇਤਿ ਤੇ ਨਂ ਬ੍ਯਾਕਰੇਯ੍ਯਂ, ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋ, ਅਞ੍ਞਥਾਤਿਪਿ ਮੇ ਨੋ, ਨੋਤਿਪਿ ਮੇ ਨੋ, ਨੋ ਨੋਤਿਪਿ ਮੇ ਨੋ…ਪੇ… ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਇਤਿ ਚੇ ਮਂ ਪੁਚ੍ਛਸਿ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਇਤਿ ਚੇ ਮੇ ਅਸ੍ਸ, ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਇਤਿ ਤੇ ਨਂ ਬ੍ਯਾਕਰੇਯ੍ਯਂ, ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋ, ਅਞ੍ਞਥਾਤਿਪਿ ਮੇ ਨੋ, ਨੋਤਿਪਿ ਮੇ ਨੋ, ਨੋ ਨੋਤਿਪਿ ਮੇ ਨੋ’’ਤਿ. ਇਤ੍ਥਂ ਖੋ ਭਨ੍ਤੇ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਸਞ੍ਚਯੋ ਬੇਲਟ੍ਠਪੁਤ੍ਤੋ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਸਮਾਨੋ ਵਿਕ੍ਖੇਪਂ ਬ੍ਯਾਕਾਸਿ.

ਸਬ੍ਬੇਪਿ ¶ ਆਵੁਸੋ ਏਤੇ ਛਨ੍ਨਂ ਸਤ੍ਥਾਰਾਨਂ ਵਾਦਾ ਨਿਸ੍ਸਿਰਿਕਾਯੇਵ ਜਿਗੁਚ੍ਛਨੀਯਾਯੇਵ ਅਨਤ੍ਥਸਂਹਿਤਾਯੇਵ, ਬਾਲਾਨਂ ਭਿਯ੍ਯੋਸੋ ਮਤ੍ਤਾਯ ਸਮ੍ਮੋਹਾਯ ਸਂਵਤ੍ਤਨ੍ਤਿ ਅਨਤ੍ਥਾਯ.

ਅਜ੍ਜ ¶ ਪਨ ਆਵੁਸੋ ਕਾਲੋ ਅਤਿਕ੍ਕਨ੍ਤੋ, ਸ੍ਵੇਯੇਵ ਭਗਵਤਾ ਵੁਤ੍ਤਂ ਪਣੀਤਂ ਪਸਟ੍ਠਂ ਸਨ੍ਦਿਟ੍ਠਿਕਫਲਂ ਪੁਚ੍ਛਾਮ.

ਪੁਚ੍ਛਾ – ਪੁਰਿਮਦਿਵਸੇਸੁ ਆਵੁਸੋ ਸਾਮਞ੍ਞਫਲਸੁਤ੍ਤਸ੍ਸ ਪੁਬ੍ਬਭਾਗੇ ਯਾਵ ਛਸਤ੍ਥਾਰਮਿਚ੍ਛਾਵਾਦਪਰਿਯੋਸਾਨਂ ਪੁਚ੍ਛਨਵਿਸ੍ਸਜ੍ਜਨਂ ਅਮ੍ਹੇਹਿ ਕਤਂ, ਅਜ੍ਜ ਪਨ ਯਥਾਨੁਪ੍ਪਤ੍ਤਂ ਭਗਵਤਾ ਦੇਸਿਤਸਾਮਞ੍ਞਫਲਸੁਤ੍ਤਾਧਿਕਾਰੇ ਪੁਚ੍ਛਾਵਿਸ੍ਸਜ੍ਜਨਂ ਕਰਿਸ੍ਸਾਮ. ਭਗਵਾ ਪਨ ਆਵੁਸੋ ਰਞ੍ਞਾ ਮਾਗਧੇਨ ਅਜਾਤਸਤ੍ਤੁਨਾ ਵੇਦੇਹਿਪੁਤ੍ਤੇਨ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਕਥਂ ਬ੍ਯਾਕਾਸਿ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਤਿਧਾ ਵਿਭਜਿਤ੍ਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਟ੍ਠੋ ਬ੍ਯਾਕਾਸਿ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਨੋ ਵੇਦੇਹਿਪੁਤ੍ਤਸ੍ਸ ਪਠਮਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ.

ਵਿਸ੍ਸਜ੍ਜਨਾ – ਦਾਸਂ ਭਨ੍ਤੇ ਪਬ੍ਬਜਿਤਂ ਉਪਮਾਭਾਵੇਨ ਨਿਦ੍ਦਿਸਿਤ੍ਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਭਗਵਾ ਪਠਮਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ.

ਸੋਹਂ ¶ ਭਨ੍ਤੇ ਭਗਵਨ੍ਤਮ੍ਪਿ ਪੁਚ੍ਛਾਮਿ, ਯਥਾ ਨੁ ਖੋ ਇਮਾਨਿ ਭਨ੍ਤੇ ਪੁਥੁਸਿਪ੍ਪਾਯਤਨਾਨਿ ਸੇਯ੍ਯਥਿਦਂ…ਪੇ… ਸਕ੍ਕਾ ਨੁ ਖੋ ਭਨ੍ਤੇ ਏਵ ਮੇਵ ਦਿਟ੍ਠੇਵ ਧਮ੍ਮੇ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪਞ੍ਞਪੇਤੁਂ –

ਅਚ੍ਛਰਿਯਂ ¶ ਆਵੁਸੋ ਅਬ੍ਭੁਤਂ ਆਵੁਸੋ, ਯਾਵ ਸ੍ਵਾਖਾਤਸ੍ਸ ਬੁਦ੍ਧਸਾਸਨਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰਹਿ ਨਾਮ ਦਾਸੋਪਿ ਨਿਹੀਨਜਚ੍ਚੋ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਅਤ੍ਤਨੋ ਇਸ੍ਸਰਭੂਤੇਨ ਰਞ੍ਞਾਪਿ ਵਨ੍ਦਨੀਯਤ੍ਤਂ ਗਰੁਕਰਣੀਯਤ੍ਤਂ ਪਾਪੁਣਿਸ੍ਸਤਿ, ਸੁਪਞ੍ਞਤ੍ਤਮੇਤਂ ਭਗਵਤਾ ਪਠਮਂ ਸਨ੍ਦਿਟ੍ਠਿਕਫਲਂ.

ਪੁਚ੍ਛਾ – ਕਥਂ ¶ ਪਨਾਵੁਸੋ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਨੋ ਵੇਦੇਹਿਪੁਤ੍ਤਸ੍ਸ ਦੁਤਿਯਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ.

ਵਿਸ੍ਸਜ੍ਜਨਾ – ਕਸ੍ਸਕਂ ਭਨ੍ਤੇ ਪਬ੍ਬਜਿਤਂ ਉਪਮਾਭਾਵੇਨ ਦਸ੍ਸੇਤ੍ਵਾ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰਹਿ ਨਾਮ ਕਸ੍ਸ ਕੋਪਿ ਗੁਣਰਹਿਤੋ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਰਟ੍ਠਧਿਪਤਿਨਾ ਮਨੁਸ੍ਸਲੋਕੇ ਦੇਵਭੂਤੇਨ ਰਞ੍ਞਾਪਿ ਗਰੁਕਰਣੀਯਤਂ ਵਨ੍ਦਨੀਯਤਂ ਪਾਪੁਣਿਸ੍ਸਤਿ, ਸੁਪਞ੍ਞਤ੍ਤਮੇਤਂ ਆਵੁਸੋ ਭਗਵਤਾ ਦੁਤਿਯਂ ਸਨ੍ਦਿਟ੍ਠਿਕਫਲਂ.

ਪੁਚ੍ਛਾ – ਕਥਞ੍ਚਾ ¶ ਪਨਾਵੁਸੋ ਭਗਵਾ ਪੁਰਿਮੇਹਿ ਸਨ੍ਦਿਟ੍ਠਿਕਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਰਞ੍ਞੋ ਦੇਸੇਸਿ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਬੁਦ੍ਧੁਪ੍ਪਾਦਤੋ ਪਟ੍ਠਾਯ ਕੁਲਪੁਤ੍ਤਸ੍ਸ ਪਬ੍ਬਜਿਤ ਭਾਵਂ, ਤਸ੍ਸ ਚ ਸੀਲਸਮ੍ਪਦਂ, ਤਸ੍ਸ ਚ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਂ, ਅਰਿਯਞ੍ਚਸਤਿਸਮ੍ਪਜਞ੍ਞਂ, ਅਰਿਯਞ੍ਚ ਸਨ੍ਤੁਟ੍ਠਿਂ, ਪਞ੍ਚਨ੍ਨਞ੍ਚ ਨੀਵਰਣਾਨਂ ਪਹਾਨਂ, ਚਤ੍ਤਾਰਿ ਚ ਝਾਨਾਨਿ, ਅਟ੍ਠ ਚ ਵਿਜ੍ਜਾਯੋ, ਤਾਹਿ ਤਾਹਿ ਉਪਮਾਹਿ ਵਿਤ੍ਥਾਰਤੋ ਵਿਭਜਿਤ੍ਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸਕ੍ਕਾ ¶ ਪਨ ਭਨ੍ਤੇ ਦਿਟ੍ਠੇਵ ਧਮ੍ਮੇ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਪਞ੍ਞਪੇਤੁਂ.

ਸਕ੍ਕਾ ਮਹਾਰਾਜਾ, ਤੇਨ ਹਿ ਮਹਾਰਾਜ ਸੁਣੋਹਿ ਸਾਧੁਕਂ ਮਨਸਿਕਰੋਹਿ ਭਾਸਿਸ੍ਸਾਮਿ.

ਪੁਚ੍ਛਾ – ਕਥਞ੍ਚ ¶ ਪਨਾਵੁਸੋ ਭਿਕ੍ਖੁ ਸੀਲਸਮ੍ਪਨ੍ਨੋ ਹੋਤਿ, ਕਥਞ੍ਚ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਨੋ ਵੇਦੇਹਿਪੁਤ੍ਤਸ੍ਸ ਚੂਲ਼ਸੀਲਂ ਵਿਭਜਿਤ੍ਵਾ ਦੇਸੇਸਿ.

ਵਿਸ੍ਸਜ੍ਜਨਾ – ‘‘ਕਥਞ੍ਚ ¶ ਮਹਾਰਾਜ ਭਿਕ੍ਖੁ ਸੀਲਸਮ੍ਪਨ੍ਨੋ ਹੋਤਿ. ਇਧ ਮਹਾਰਾਜ ਭਿਕ੍ਖੁ ਪਾਣਾਤਿਪਾਤਂ ਪਹਾਯ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ ਨਿਹਿਤਦਣ੍ਡੋ ਨਿਹਿਤਸਤ੍ਥੋ ਲਜ੍ਜੀ ਦਯਾਪਨ੍ਨੋ, ਸਬ੍ਬਪਾਣਭੂਤਹਿਤਾਨੁਕਮ੍ਪੀ ਵਿਹਰਤਿ. ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿਂ’’ ਏਵਮਾਦਿਨਾ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਛਬ੍ਬੀਸਤਿਯਾ ਆਕਾਰੇਹਿ ਚੂਲ਼ਸੀਲਂ ਵਿਭਜਿਤ੍ਵਾ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਸਾਧੁ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਸਦ੍ਧਾਪਬ੍ਬਾਜਿਤੋ ਇਮਿਨਾ ਚ ਚੂਲ਼ਸੀਲੇਨ ਸਮਨ੍ਨਾਗਤੋ ਵਿਹਰੇਯ੍ਯ.

ਸੁਵੇ ਯਥਾਨੁਪ੍ਪਤ੍ਤਟ੍ਠਾਨਤੋ ਪਟ੍ਠਾਯ ਪੁਚ੍ਛਾਵਿਸ੍ਸਜ੍ਜਨਂ ਕਰਿਸ੍ਸਾਮ.

ਪੁਚ੍ਛਾ – ਕਥਂ ਪਨਾਵੁਸੋ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਨੋ ਵੇਦੇਹਿਪੁਤ੍ਤਸ੍ਸ ਮਜ੍ਝਿਮਸੀਲਞ੍ਚ ਮਹਾਸੀਲਞ੍ਚ ਵਿਭਜਿਤ੍ਵਾ ਦੇਸੇਸਿ.

ਵਿਸ੍ਸਜ੍ਜਨਾ – ‘‘ਯਥਾ ਵਾ ਪਨੇਕੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਦ੍ਧਾਦੇਯ੍ਯਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਤੇ ਏਵਰੂਪਂ ਬੀਜਗਾਮਭੂਤਗਾਮਸਮਾਰਮ੍ਭਂ ਅਨੁਯੁਤ੍ਤਾ ਵਿਹਰਨ੍ਤਿ. ਸੇਯ੍ਯਥਿਦਂ. ਮੂਲਬੀਜਂ ਖਨ੍ਧਬੀਜਂ ਫਲ਼ੁਬੀਜਂ ਅਗ੍ਗਬੀਜਂ ਬੀਜਬੀਜਮੇਵ ਪਞ੍ਚਮਂ, ਇਤਿ ਏਵਰੂਪਾ ਬੀਜਗਾਮਭੂਤਗਾਮਸਮਾਰਮ੍ਭਾ ਪਟਿਵਿਰਤੋ ਹੋਤਿ. ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿਂ’’ ਏਵਮਾਦਿਨਾ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਮਜ੍ਝਿਮਸੀਲਞ੍ਚ ਮਹਾਸੀਲਞ੍ਚ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਸਦ੍ਧਾਪਬ੍ਬਜਿਤੋ ਏਵਂ ਅਰਿਯੇਨ ਸੀਲੇਨ ਸਮਨ੍ਨਾਗਤੋ ਵਿਹਰੇਯ੍ਯ.

ਪੁਚ੍ਛਾ – ਕਥਂ ਪਨਾਵੁਸੋ ਅਰਿਯਂ ਇਨ੍ਦ੍ਰਿਯਸਂਵਰਞ੍ਚ ਅਰਿਯਂ ਸਤਿਸਮ੍ਪਜਞ੍ਞਞ੍ਚ ਅਰਿਯਂ ਸਨ੍ਤੋਸਞ੍ਚ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵਿਭਜਿਤ੍ਵਾ ਦੇਸੇਸਿ.

ਵਿਸ੍ਸਜ੍ਜਨਾ – ਇਧ ਮਹਾਰਾਜ ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਨ ਨਿਮਿਤ੍ਤਗ੍ਗਾਹੀ ਹੋਤਿ ਨਨੁਬ੍ਯਞ੍ਜਨਗ੍ਗਾਹੀ, ਯਤ੍ਵਾਧਿਕਰਣਮੇਨਂ ਚਕ੍ਖੁਨ੍ਦ੍ਰਿਯਂ ਅਸਂਵੁਤਂ ਵਿਹਰਨ੍ਤਂ ਅਭਿਜ੍ਝਾਦੋਮਨਸ੍ਸਾ ਪਾਪਕਾ ਅਕੁਸਲਾ ਧਮ੍ਮਾ ਅਨ੍ਵਾਸ੍ਸਵੇਯ੍ਯੁਂ, ਤਸ੍ਸ ਸਂਵਰਾਯ ਪਟਿਪਜ੍ਜਤਿ, ਰਕ੍ਖਤਿ ਚਕ੍ਖੁਨ੍ਦ੍ਰਿਯਂ, ਚਕ੍ਖੁਨ੍ਦ੍ਰਿਯੇ ਸਂਵਰਂ ਆਪਜ੍ਜਤਿ, ਏਵਮਾਦਿਨਾ ਚ.

ਇਧ ਮਹਾਰਾਜ ਭਿਕ੍ਖੁ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ ਹੋਤਿ, ਅਭਿਕ੍ਕਨ੍ਤੇ ਪਟਿਕ੍ਕਨ੍ਤੇ ਸਮ੍ਪਜਨਕਾਰੀ ਹੋਤਿ,

ਆਲੋਕਿਤੇ ¶ ਵਿਲੋਕਿਤੇ ਸਮ੍ਪਜਾਨਕਾਰੀ ਹੋਤਿ, ਸਮਿਞ੍ਜਿਤੇ ਪਸਾਰਿਤੇ ਸਮ੍ਪਜਾਨਕਾਰੀ ਹੋਤਿ, ਸਙ੍ਘਾਟਿਪਤ੍ਤਚੀਵਰਧਾਰਣੇ ਸਮ੍ਪਜਾਨਕਾਰੀ ਹੋਤਿ, ਅਸਿਤੇ ਪੀਤੇ ਖਾਯਿਤੇ ਸਾਯਿਤੇ ਸਮ੍ਪਜਾਨਕਾਰੀ ਹੋਤਿ, ਉਚ੍ਚਾਰਪਸ੍ਸਾਵਕਮ੍ਮੇ ਸਮ੍ਪਜਾਨਕਾਰੀ ਹੋਤਿ, ਗਤੇ ਠਿਤੇ ਨਿਸਿਨ੍ਨੇ ਸੁਤ੍ਤੇ ਜਾਗਰਿਤੇ ਭਾਸਿਤੇ ਤੁਣ੍ਹੀਭਾਵੇ ਸਮ੍ਪਜਾਨਕਾਰੀ ਹੋਤਿ, ਏਵਂ ਖੋ ਮਹਾਰਾਜ ਭਿਕ੍ਖੁ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ ਹੋਤਿ.

ਕਥਞ੍ਚ ਮਹਾਰਾਜ ਭਿਕ੍ਖੁ ਸਨ੍ਤੁਟ੍ਠੋ ਹੋਤਿ, ਇਧ ਮਹਾਰਾਜ ਭਿਕ੍ਖੁ ਸਨ੍ਤੁਟ੍ਠੋ ਹੋਤਿ ਕਾਯਪਰਿਹਾਰਿਕੇਨ ਚੀਵਰੇਨ ਕੁਚ੍ਛਿਪਰਿਹਾਰਿਕੇਨ ਪਿਣ੍ਡਪਾਤੇਨ.

ਏਵਮਾਦਿਨਾ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਰਿਯਞ੍ਚ ਇਨ੍ਦ੍ਰਿਯੇਸੁਗੁਤ੍ਤਦ੍ਵਾਰਤਂ ਅਰਿਯਞ੍ਚ ਸਤਿਸਮ੍ਪਜਞ੍ਞਂ ਅਰਿਯਞ੍ਚ ਸਨ੍ਤੋਸਂ ਵਿਭਜਿਤ੍ਵਾ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਸਦ੍ਧਾਪਬ੍ਬਜਿਤੋ ਇਮਿਨਾ ਚ ਅਰਿਯੇਨ ਇਨ੍ਦ੍ਰਿਯਸਂਵਰੇਨ ਸਮਨ੍ਨਾਗਤੋ, ਇਮਿਨਾ ਚ ਅਰਿਯੇਨ ਸਤਿਸਮ੍ਪਜਞ੍ਞੇਨ

ਸਮਨ੍ਨਾਗਤੋ ¶ , ਇਮਾਯ ਚ ਅਰਿਯਾਯ ਸਨ੍ਤੁਟ੍ਠਿਯਾ ਸਮਨ੍ਨਾਗਤੋ ਵਿਹਰੇਯ੍ਯ.

ਪੁਚ੍ਛਾ – ਕਥਂ ਪਨਾਵੁਸੋ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਨੀਵਰਣਪਹਾਨਂ ਵਿਭਜਿਤ੍ਵਾ ਦੇਸੇਸਿ.

ਵਿਸ੍ਸਜ੍ਜਨਾ – ਸੋ ਏਵਂ ਅਰਿਯੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ, ਅਰਿਯੇਨ ਇਨ੍ਦ੍ਰਿਯਸਂਵਰੇਨ ਸਮਨ੍ਨਾਗਤੋ, ਅਰਿਯੇਨ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ, ਅਰਿਯਾਯ ਸਨ੍ਤੁਟ੍ਠਿਯਾ ਸਮਨ੍ਨਾਗਤੋ, ਵਿਵਿਤ੍ਤਂ ਸੇਨਾਸਨਂ ਭਜਤਿ ਅਰਞ੍ਞਂ ਰੁਕ੍ਖਮੂਲਂ ਪਬ੍ਬਤਂ ਕਨ੍ਦਰਂ ਗਿਰਿਗੁਹਂ ਸੁਸਾਨਂ ਵਨਪਤ੍ਤਂ ਅਬ੍ਭੋਕਾਸਂ ਪਲਾਲਪੁਞ੍ਜਂ. ਸੋ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਨਿਸੀਦਤਿ ਪਲ੍ਲਙ੍ਕਂ ਆਭੁਞ੍ਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਸੋ ਅਭਿਜ੍ਝਂ ਲੋਕੇ ਪਹਾਯ ਵਿਗਤਾਭਿਜ੍ਝੇਨ ਚੇਤਸਾ ਵਿਹਰਤਿ…ਪੇ… ਤਸ੍ਸਿਮੇ ਪਞ੍ਚ ਨੀਵਰਣੇ ਪਹੀਨੇ ਅਤ੍ਤਨਿ ਸਮਨੁਪਸ੍ਸਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ¶ ਸੁਖਂ ਵੇਦੇਹਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਨੀਵਰਣਪ੍ਪਹਾਨਂ ਵਿਭਜਿਤ੍ਵਾ ਵਿਤ੍ਥਾਰਤੋ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਸਦ੍ਧਾਪਬ੍ਬਜਿਤੋ ਏਵਂ ਪਞ੍ਚਨੀਵਰਣੇ ਪਜਹਿਤ੍ਵਾ ਤੇਹਿ ਚਿਤ੍ਤਂ ਵਿਸੋਧੇਤ੍ਵਾ ਵਿਹਰੇਯ੍ਯ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਪਠਮਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ

ਪਣੀਤਤਰਞ੍ਚ ¶ . ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਪਠਮਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨਸਙ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤ੍ਵਾ ਏਵਂ ਪਠਮਂ ਝਾਨਂ

ਉਪਸਮ੍ਪਜ੍ਜ ¶ ਵਿਵੇਕਜੇਨ ਪੀਤਿਸੁਖੇਨ ਅਤ੍ਤਨੋ ਕਾਯਂ ਅਭਿਸਨ੍ਦੇਯ੍ਯ ਪਰਿਸਨ੍ਦੇਯ੍ਯ ਪਰਿਪੂਰੇਯ੍ਯ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਭਗਵਾ ਦੁਤਿਯਞ੍ਚ ਤਤਿਯਞ੍ਚ ਚਤੁਤ੍ਥਞ੍ਚ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਪੁਨ ਚ ਪਰਂ ਮਹਾਰਾਜ ਭਿਕ੍ਖੁ ਵਿਤਕ੍ਕਵਿਚਾਰਾਨਂ ਵੂਪਸਮਾ ਅਜ੍ਝਤ੍ਤਂ ਸਮ੍ਪਸਾਦਨਂ ਚੇਤਸੋ ਏਕੋਦਿਭਾਵਂ ਅਵਿਤਕ੍ਕਂ ਅਵਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂਝਾਨਂ ਉਪਸਮ੍ਪਜ੍ਜ ਵਿਹਰਤਿ ਏਵਮਾਦਿਨਾ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਦੁਤਿਯਞ੍ਚ ਤਤਿਯਞ੍ਚ ਚਤੁਤ੍ਥਞ੍ਚ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨਸਙ੍ਖਾਤੇ ਧਮ੍ਮਵਿਨਯੇ ਸਦ੍ਧਾਪਬ੍ਬਜਿਤੋ ਏਵਂ ਦੁਤਿਯਝਾਨਞ੍ਚ ਤਤਿਯਝਾਨਞ੍ਚ ਚਤੁਤ੍ਥਝਾਨਞ੍ਚ ਉਪਸਮ੍ਪਜ੍ਜ ਤੇਹਿ ਝਾਨਸੁਖੇਹਿ ਅਤ੍ਤਨੋ ਕਾਯਂ ਅਭਿਸਨ੍ਦੇਤ੍ਵਾ ਪਰਿਸਨ੍ਦੇਤ੍ਵਾ ਪਰਿਪੂਰੇਤ੍ਵਾ ਵਿਹਰੇਯ੍ਯ.

ਪੁਚ੍ਛਾ – ਕਥਞ੍ਚ ¶ ਪਨਾਵੁਸੋ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਞਾਣਦਸ੍ਸਨਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਏਵਂ ਪਜਾਨਾਤਿ ‘‘ਅਯਂ ਖੋ ਮੇ ਕਾਯੋ ਰੂਪੀ ਚਾਤੁਮਹਾਭੂਤਿਕੋ ਮਾਤਾਪੇਤ੍ਤਿਕਸਮ੍ਭਵੋ ਓਦਨਕੁਮ੍ਮਾਸੂਪਚਯੋ ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮੋ, ਇਦਞ੍ਚ ਪਨ ਮੇ ਵਿਞ੍ਞਾਣਂ ਏਤ੍ਥ ਸਿਤਂ ਏਤ੍ਥ ਪਟਿਬਨ੍ਧਨ੍ਤਿ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸੁਞ੍ਞਾਰਂਗਾ ¶ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ. ਅਮਾਨੁਸੀ ਰਤੀ ਹੋਤਿ, ਸਮ੍ਮਾਧਮ੍ਮਂ ਵਿਪਸ੍ਸਤੋ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨਸਙ੍ਖਾਤੇ ਧਮ੍ਮਵਿਨਯੇ ਸਦ੍ਧਾਪਬ੍ਬਜਿਤੋ ਏਵਂ ਞਾਣਦਸ੍ਸਨਂ ਉਪ੍ਪਾਦੇਤ੍ਵਾ ਏਵਂ ਞਾਣਦਸ੍ਸਨੇਨ ਸਮਨ੍ਨਾਗਤੋ ਹੁਤ੍ਵਾ ਵਿਹਰੇਯ੍ਯ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਭਗਵਾ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਮਨੋਮਯਂ ਕਾਯਂ ਅਭਿਨਿਮ੍ਮਾਨਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਇਮਮ੍ਹਾ ਕਾਯਾ ਅਞ੍ਞਂ ਕਾਯਂ ਅਭਿਨਿਮ੍ਮਿਨਾਤਿ ਰੂਪਿਂ ਮਨੋਮਯਂ ਸਬ੍ਬਙ੍ਗਪਚ੍ਚਙ੍ਗਿਂ ਅਹੀਨਿਨ੍ਦ੍ਰਿਯਂ ਏਵਮਾਦਿਨਾ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਭਿਕ੍ਖੁ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨਸਙ੍ਖਾਤੇ ਧਮ੍ਮਵਿਨਯੇ ਸਦ੍ਧਾਪਬ੍ਬਜਿਤੋ ਏਵਂ ਵਿਸੇਸੇਨ ਮਨੋਮਯਞਾਣੇਨ ਸਮਨ੍ਨਾਗਤੋ ਵਿਹਰੇਯ੍ਯ.

ਪੁਚ੍ਛਾ – ਭਗਵਾ ¶ ਆਵੁਸੋ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਝਾਨਚਤੁਕ੍ਕਸਙ੍ਖਾਤਞ੍ਚ ਪਠਮ ਦੁਤਿਯ ਵਿਜ੍ਜਾਸਙ੍ਖਾਤਞ੍ਚ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦਸ੍ਸੇਤ੍ਵਾ, ਅਪਰਂ ਕੀਦਿਸਂ ਸਂਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਇਦ੍ਧਿਵਿਧਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਅਨੇਕਵਿਹਿਤਂ ਇਦ੍ਧਿਵਿਧਂ ਪਚ੍ਚਨੁਭੋਤਿ, ਏਕੋਪਿ ਹੁਤ੍ਵਾ ਬਹੁਧਾ ਹੋਤਿ, ਬਹੁਧਾਪਿ ਹੁਤ੍ਵਾ ਏਕੋ ਹੋਤਿ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚਾਤਿ. ਇਤ੍ਥਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ, ਯਤ੍ਰਹਿ ਨਾਮ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਸਾਵਕੋਪਿ ਸਮ੍ਮਾਪਟਿਪਨ੍ਨੋ ਏਵਂ ਮਹਿਦ੍ਧਿਕਂ ਏਵਂ ਮਹਾਨੁਭਾਵਂ ਇਦ੍ਧਿਵਿਧਞਾਣਮ੍ਪਿ ਪਚ੍ਚਨੁਭੋਸ੍ਸਤਿ.

ਪੁਚ੍ਛਾ – ਕਥਂ ¶ ਪਨਾਵੁਸੋ ਭਗਵਾ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਦਿਬ੍ਬਾਯ ਸੋਤਧਾਤੁਯਾ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਦਿਬ੍ਬਾਯ ਸੋਤਧਾਤੁਯਾ ਵਿਸੁਦ੍ਧਾਯ ਅਤਿਕ੍ਕਨ੍ਤ ਮਾਨੁਸਿਕਾਯ ਉਭੋ ਸਦ੍ਦੇ ਸੁਣਾਤਿ ਦਿਬ੍ਬੇ ਚ ਮਾਨੁਸੇ ਚ ਯੇ ਦੂਰੇ ਸਨ੍ਤਿਕੇ ਚ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ, ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ, ਯਤ੍ਰਹਿ ਨਾਮ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਸਦ੍ਧਾਪਬ੍ਬਜਿਤੋ ਸਮ੍ਮਾਪਟਿਪਨ੍ਨੋ ਸਾਵਕੋਪਿ ਏਵਂ ਵਿਸੇਸਂ ਦਿਬ੍ਬਸੋਤਞਾਣਂ ਪਟਿਲਭਿਸ੍ਸਤਿ.

ਪੁਚ੍ਛਾ – ਕਥਂ ਪਨਾਵੁਸੋ ਭਗਵਾ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ. ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ

ਆਨਞ੍ਜਪ੍ਪਤ੍ਤੇ ¶ ਚੇਤੋਪਰਿਯਞਾਣਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਚੇਤਸਾ ਚੇਤੋ ਪਰਿਚ੍ਚ ਪਜਾਨਾਤਿ, ਸਰਾਗਂ ਵਾ ਚਿਤ੍ਤਂ ਸਰਾਗਂ ਚਿਤ੍ਤਨ੍ਤਿ ਪਜਾਨਾਤਿ, ਵੀਤਰਾਗਂ ਵਾ ਚਿਤ੍ਤਂ ਵੀਤਰਾਗਂ ਚਿਤ੍ਤਨ੍ਤਿ ਪਜਾਨਾਤਿ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ, ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ, ਯਤ੍ਰਹਿ ਨਾਮ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤੋ ਸਮ੍ਮਾਪਟਿਪਨ੍ਨੋ ਸਾਵਕੋਪਿ ਏਵਂ ਵਿਸੇਸਂ ਚੇਤੋਪਰਿਯਞਾਣਂ ਪਟਿਲਭਿਸ੍ਸਤਿ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਸੋ ਅਨੇਕਵਿਹਿਤਂ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ, ਸੇਯ੍ਯਥਿਦਂ, ਏਕਮ੍ਪਿਜਾਤਿਂ ਦ੍ਵੇਪਿ ਜਾਤਿਯੋ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਏਵਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ, ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ, ਯਤ੍ਰਹਿ ਨਾਮ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਸਾਵਕੋਪਿ ਸਮ੍ਮਾਪਟਿਪਨ੍ਨੋ ਏਵਂ ਵਿਸੇਸਂ ਪੁਬ੍ਬੇਨਿਵਾਸਞਾਣਂ ਪਟਿਲਭਿਸ੍ਸਤਿ.

ਪੁਚ੍ਛਾ – ਕਥਞ੍ਚ ਪਨਾਵੁਸੋ ਭਗਵਾ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਦੇਸੇਸਿ, ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨੇਞ੍ਜਪ੍ਪਤ੍ਤੇ ਸਤ੍ਤਾਨਂ ਚੁਤੂਪਪਾਤਞਾਣਾਯ ਚਿਤ੍ਤਂ ਅਭਿਨੀਹਰਤਿ ¶ ਅਭਿਨਿਨ੍ਨਾਮੇਤਿ, ਸੋ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਤ੍ਤੇ ਪਸ੍ਸਤਿ ਚਵਮਾਨੇ ਉਪਪਜ੍ਜਮਾਨੇ ਹੀਨੇ ਪਣੀਤੇ ਸੁਵਣ੍ਣੇ ਦੁਬ੍ਬਣ੍ਣੇ ਸੁਗਤੇ ਦੁਗ੍ਗਤੇ ਯਥਾਕਮ੍ਮੁਪਗੇ ਸਤ੍ਤੇ ਪਜਾਨਾਤਿ…ਪੇ… ਇਦਮ੍ਪਿ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਇਤ੍ਥਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਅਪਰਮ੍ਪਿ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਅਚ੍ਛਰਿਯਂ ¶ ਆਵੁਸੋ, ਅਬ੍ਭੁਤਂ ਆਵੁਸੋ, ਯਾਵ ਬੁਦ੍ਧਸਾਸਨਸ੍ਸ ਸ੍ਵਾਖਾਤਤਾ, ਯਤ੍ਰਹਿ ਨਾਮ ਏਵਂ ਸ੍ਵਾਖਾਤੇ ਬੁਦ੍ਧਸਾਸਨੇ ਪਬ੍ਬਜਿਤੋ ਸਾਵਕੋਪਿ ਸਮ੍ਮਾਪਟਿਪਨ੍ਨੋ ਏਵਂ ਵਿਸੇਸਂ ਦਿਬ੍ਬਚਕ੍ਖੁਞਾਣਂ ਪਟਿਲਭਿਸ੍ਸਤਿ.

ਪੁਚ੍ਛਾ – ਕਥਂ ¶ ਪਨਾਵੁਸੋ ਭਗਵਾ ਪਰਿਯੋਸਾਨੇ ਉਤ੍ਤਰਿਤਰਂ ਸਾਮਞ੍ਞਫਲਂ ਦੇਸੇਸਿ.

ਵਿਸ੍ਸਜ੍ਜਨਾ – ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨੇਞ੍ਜਪ੍ਪਤ੍ਤੇ ਆਸਵਾਨਂ ਖਯਞਾਣਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ…ਪੇ… ਇਦਂ ਖੋ ਮਹਾਰਾਜ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ. ਇਮਸ੍ਮਾ ਚ ਪਨ ਮਹਾਰਾਜ ਸਨ੍ਦਿਟ੍ਠਿਕਾ ਸਾਮਞ੍ਞਫਲਾ ਅਞ੍ਞਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਉਤ੍ਤਰਿਤਰਂ ਵਾ ਪਣੀਤਤਰਂ ਵਾ ਨਤ੍ਥੀਤਿ. ਇਤ੍ਥਂ ਖੋ ਭਨ੍ਤੇ ਭਗਵਾ ਰਞ੍ਞੋ ਮਾਗਧਸ੍ਸ ਅਜਾਤਸਤ੍ਤੁਸ੍ਸ ਵੇਦੇਹਿਪੁਤ੍ਤਸ੍ਸ ਪਰਿਯੋਸਾਨਂ ਸਨ੍ਦਿਟ੍ਠਿਕਂ ਸਾਮਞ੍ਞਫਲਂ ਪੁਰਿਮੇਹਿ ਸਨ੍ਦਿਟ੍ਠਿਕੇਹਿ ਸਾਮਞ੍ਞਫਲੇਹਿ ਅਭਿਕ੍ਕਨ੍ਤਤਰਞ੍ਚ ਪਣੀਤਤਰਞ੍ਚ ਦੇਸੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ, ਯਂ ਭਿਕ੍ਖੁ ਬੁਦ੍ਧਸਾਸਨੇ ਸਦ੍ਧਾਪਬ੍ਬਜਿਤੋ ਏਵਂ ਸ੍ਵਾਖਾਤੇ ਧਮ੍ਮਵਿਨਯੇ ਸਮ੍ਮਾਪਟਿਪਨ੍ਨੋ ਆਸਵਕ੍ਖਯਞਾਣਂ ਪਾਪੁਣਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ.

ਪੁਚ੍ਛਾ – ਕਥਂ ¶ ਪਨਾਵੁਸੋ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਇਮਿਸ੍ਸਾ ਦੇਸਨਾਯ ਪਰਿਯੋਸਾਨੇ ਭਗਵਤਿ ਚ ਦੇਸਨਾਯਞ੍ਚ ਪਸਨ੍ਨੋ ਪਸਨ੍ਨਾਕਾਰਂ ਅਕਾਸਿ, ਕੀਦਿਸਞ੍ਚ ਆਨਿਸਂਸਂ ਪਟਿਲਭਿ.

ਵਿਸ੍ਸਜ੍ਜਨਾ – ਏਵਂ ਵੁਤ੍ਤੇ ਭਨ੍ਤੇ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਭਗਵਨ੍ਤਂ ਏਤਦਵੋਚ, ਅਭਿਕ੍ਕਨ੍ਤਂ ਭਨ੍ਤੇ, ਅਭਿਕ੍ਕਨ੍ਤਂ ਭਨ੍ਤੇ, ਸੇਯ੍ਯਥਾਪਿ ਭਨ੍ਤੇ ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ…ਪੇ… ਅਜ੍ਜਤਗ੍ਗੇ ਪਾਣ੍ਣੁਪੇਤਂ ਸਰਣਂ ਗਤਨ੍ਤਿ, ਅਯਞ੍ਹਿ ਭਨ੍ਤੇ ਰਾਜਾ ਪਿਤੁਮਾਰਿਤਕਾਲਤੋ ਪਟ੍ਠਾਯ ਨੇਵ ਰਤ੍ਤਿਂ ਨ ਦਿਵਾ ਨਿਦ੍ਦਂ ਪਟਿਲਭਤਿ, ਸਤ੍ਥਾਰਂ ਪਨ ਉਪਸਙ੍ਕਮਿਤ੍ਵਾ ਇਮਾਯ ਮਧੁਰਾਯ ਓਜਵਨ੍ਤਿਯਾ ਧਮ੍ਮਦੇਸਨਾਯ ਸੁਤਕਾਲਤੋ ਪਟ੍ਠਾਯ ਨਿਦ੍ਦਂ ਪਟਿਲਭਤਿ, ਤਿਣ੍ਣਂ ਰਤਨਾਨਂ ਮਹਾਸਕ੍ਕਾਰਮਕਾਸਿ, ਪੁਥੁਜ੍ਜਨਿਕਾਯ ਸਦ੍ਧਾਯ ਸਮਨ੍ਨਾਗਤੋ ਨਾਮ ਇਮਿਨਾ ਰਞ੍ਞਾ ਸਦਿਸੋ ਨਾਹੋਸਿ, ਅਨਾਗਤੇ ਪਨ ਵਿਜਿਤਾਵੀ ਨਾਮ ਪਚ੍ਚੇਕਬੁਦ੍ਧੋ ਹੁਤ੍ਵਾ ਪਰਿਨਿਬ੍ਬਾਯਿਸ੍ਸਤਿ. ਏਵਂ ਖੋ ਭਨ੍ਤੇ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ¶ ਦੇਸਨਾਪਰਿਯੋਸਾਨੇ ਪਸਨ੍ਨੋ ਪਸਨ੍ਨਾਕਾਰਮਕਾਸਿ, ਇਦਿਸਞ੍ਚ ਭਨ੍ਤੇ ਮਹਾਨਿਸਂਸਂ ਪਟਿਲਭਿ.

ਪੁਚ੍ਛਾ – ਤੇਨਾਵੁਸੋ ¶ ਭਗਵਾ ਜਾਨਤਾ ਅਰਹਤਾ ਪਸ੍ਸਤਾ ਸਮ੍ਮਾਸਮ੍ਬੁਦ੍ਧੇਨ ਅਮ੍ਬਟ੍ਠਂ ਟਾਮ ਸੁਤ੍ਤਂ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਜਨਪਦੇ ਇਚ੍ਛਾਨਙ੍ਗਲੇ ਨਾਮ ਕੋਸਲਾਨਂ ਬ੍ਰਾਹ੍ਮਣਗਾਮੇ ਅਮ੍ਬਟ੍ਠਂ ਨਾਮ ਮਾਣਵਂ ਬ੍ਰਾਹ੍ਮਣਸ੍ਸ ਪੋਕ੍ਖਰਸਾਤਿਸ੍ਸ ਅਨ੍ਤੇਵਾਸਿਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਸੋਣਦਣ੍ਡਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਅਙ੍ਗੇਸੁ ਭਨ੍ਤੇ ਜਨਪਦੇ ਚਮ੍ਪਾਯਂ ਸੋਣਦਣ੍ਡਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਕੂਟਦਨ੍ਤਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁ ਭਨ੍ਤੇ ਖਾਣੁਮਤੇ ਨਾਮ ਬ੍ਰਾਹ੍ਮਣਗਾਮੇ ਕੂਟਦਨ੍ਤ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਮਹਾਲਿਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਓਟ੍ਠਦ੍ਧਂ ਨਾਮ ਲਿਚ੍ਛਵਿਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਜਾਲਿਯਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਦ੍ਵੇ ਪਬ੍ਬਜਿਤੇ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਮਹਾਸੀਹਨਾਦਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਉਰੁਞ੍ਞਾਯਂ ਭਨ੍ਤੇ ਕਣ੍ਣਕਥਲੇ ਅਚੇਲਂ ਕਸ੍ਸਪਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਪੋਟ੍ਠਪਾਦਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪੋਟ੍ਠਪਾਦਞ੍ਚ ਪਰਿਬ੍ਬਾਜਕਂ ਚਿਤ੍ਤਞ੍ਚ ਹਤ੍ਥਿਸਾਰਿਪੁਤ੍ਤਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਸੁਭਸੁਤ੍ਤਂ ¶ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਤਾ ਆਨਨ੍ਦੇਨ ਧਮ੍ਮਭਣ੍ਡਾਗਾਰਿਕੇਨ ਸੁਭਂ ਮਾਣਵਂ ਤੋਦੇਯ੍ਯਪੁਤ੍ਤਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਕੇਵਟ੍ਟਂ ¶ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਨਾਲ਼ਨ੍ਦਾ ਯਂ ਭਨ੍ਤੇ ਕੇਵਟ੍ਟਂ ਗਹਪਤਿਪੁਤ੍ਤਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਲੋਹਿਚ੍ਚਸੁਤ੍ਤ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਜਨਪਦੇ ਸਾਲਵਤਿਕਾਯਂ ਲੋਹਿਚ੍ਚਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਤੇਵਿਜ੍ਜਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਮਨਸਾਕਟੇ ਨਾਮ ਕੋਸਲਾਨਂ ਬ੍ਰਾਹ੍ਮਣਗਾਮੇ ਵਾਸੇਟ੍ਠਂ ਭਾਰਦ੍ਵਾਜਂ ਮਾਣਵਂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਤੇਨ ¶ ਆਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਮਹਾਪਦਾਨਸੁਤ੍ਤਂ ਦੀਘਨਿਕਾਯੇ ਮਹਾਵਗ੍ਗੇ ਪੋਰਾਣਕੇਹਿ ਸਙ੍ਗਿਤਿਕਾਰੇਹਿ ਪਠਮਂ ਸਙ੍ਗਿਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ, ਸਮ੍ਬਹੁਲਾਨਂ ਭਨ੍ਤੇ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਪੁਬ੍ਬੇਨਿਵਾਸਪਟਿਸਂਯੁਤ੍ਤਾ ਧਮ੍ਮੀਕਥਾ ਉਦਪਾਦਿ, ਇਤਿਪਿ ਪੁਬ੍ਬੇਨਿਵਾਸੋ ਇਤਿਪਿ ਪੁਬ੍ਬੇਨਿਵਾਸੋਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਮਹਾਨਿਦਾਨਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਕੁਰੂਸੁ ਭਨ੍ਤੇ ਕਮ੍ਮਾਸਧਮ੍ਮੇ ਨਾਮ ਕੁਰੂਨਂ ਨਿਗਮੇ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਅਚ੍ਛਰਿਯਂ ਭਨ੍ਤੇ, ਅਬ੍ਭੁਤਂ ਭਨ੍ਤੇ, ਯਾਵ ਗਮ੍ਭੀਰੋਚਾਯਂ ਭਨ੍ਤੇ ਪਟਿਚ੍ਚਸਮੁਪ੍ਪਾਦੋ

ਗਮ੍ਭੀਰਾਵਭਾਸੋ ¶ ਚ, ਅਥ ਚ ਪਨ ਮੇ ਉਤ੍ਤਾਨਕੁਤ੍ਤਾਨਕੋ ਵਿਯ ਖਾਯਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਮਹਾਪਰਿਨਿਬ੍ਬਾਨਸੁਤ੍ਤਂ ¶ ਪਨਾਵੁਸੋ ਬਹੁਅਨੁਸਨ੍ਧਿਕਂ, ਬਹੁਦੇਸਨਾ ਸਙ੍ਗਹਂ, ਬੁਦ੍ਧਸ੍ਸ ਭਗਵਤੋ ਪਰਿਨਿਬ੍ਬਾਨਾਸਨ੍ਨਵਸ੍ਸੇ ਪਵਤ੍ਤਅਟ੍ਠੁਪ੍ਪਤ੍ਤਿਦੀਪਕਵਚਨਪਬਨ੍ਧਭੂਤਂ, ਤਸ੍ਮਾ ਤਂ ਅਨ੍ਤਰਾਭੇਦਵਸੇਨ ਵਿਭਜ੍ਜ ਪਰਿਚ੍ਛਿਜ੍ਜ ਪਰਿਚ੍ਛਿਜ੍ਜ ਪੁਚ੍ਛਿਸ੍ਸਾਮਿ, ਤਤ੍ਥਾਵੁਸੋ ਭਗਵਤਾ ਪਠਮਂ

ਰਾਜੂਨਂ ¶ ਅਪਰਿਹਾਨਿਯਧਮ੍ਮਦੇਸਨਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਾ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਵਸ੍ਸਕਾਰਂ ਬ੍ਰਾਹ੍ਮਣਂ ਮਗਧਮਹਾਮਤ੍ਤਂ ਆਰਬ੍ਭ ਭਾਸਿਤਾ, ਵਸ੍ਸਕਾਰੋ ਭਨ੍ਤੇ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਰਾਜਾ ਭੋ ਗੋਤਮ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਵਜ੍ਜੀ ਅਭਿਯਾਤੁਕਾਮੋ ਸੋ ਏਵਮਾਹ ਅਹਂ ਹਿਮੇ ਵਜ੍ਜੀ ਏਵਂ ਮਹਿਦ੍ਧਿਕੇ ਏਵਂ ਮਹਾਨੁਭਾਵੇ ਉਚ੍ਛੇਚ੍ਛਾਮਿ ਵਜ੍ਜੀ ਵਿਨਾਸੇਸ੍ਸਾਮਿ ਵਜ੍ਜੀ ਅਨਯਬ੍ਯਸਨਂ ਆਪਾਦੇਸ੍ਸਾਮੀ ਵਜ੍ਜੀ’’ਤਿ ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਾ.

ਪੁਚ੍ਛਾ – ਭਿਕ੍ਖੂਨਂ ¶ ਪਨਾਵੁਸੋ ਅਪਰਿਹਾਨਿਯਧਮ੍ਮਦੇਸਨਾ ਭਗਵਤਾ ਕਤ੍ਥ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਾ.

ਵਿਸ੍ਸਜ੍ਜਨਾ – ਤਸ੍ਮਿਂਯੇਵ ਭਨ੍ਤੇ ਰਾਜਗਹੇ ਤਸ੍ਮਿਂਯੇਵ ਵਤ੍ਥੁਸ੍ਮਿਂ ਭਾਸਿਤਾ.

ਪੁਚ੍ਛਾ – ਧਮ੍ਮਾਦਾਸੋ ¶ ਆਵੁਸੋ ਧਮ੍ਮਪਰਿਯਾਯੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤੋ.

ਵਿਸ੍ਸਜ੍ਜਨਾ – ਨਾਤਿਕੇ ਭਨ੍ਤੇ ਗਿਞ੍ਜਕਾਵਸਥੇ ਆਯਸ੍ਮਨ੍ਤਂ ਆਨਨ੍ਦ ਆਰਬ੍ਭ ਭਾਸਿਤੋ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਨਾਤਿਕਿਯਾਨਂ ਦ੍ਵਾਦਸਨ੍ਨਂ ਪੁਗ੍ਗਲਾਨਂ ਗਤਿਅਭਿਸਮ੍ਪਰਾਯਂ ਪੁਚ੍ਛਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤੋ.

ਪੁਚ੍ਛਾ – ਅਤ੍ਤਦੀਪਧਮ੍ਮਦੇਸਨਾ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਾ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਵੇਲ਼ੁਵਗਾਮਕੇ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਭਾਸਿਤਾ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਭਗਵਤੋ ਗਿਲਾਨਵੁਟ੍ਠਿਤਸ੍ਸ ਅਚਿਰਵੁਟ੍ਠਿਤਸ੍ਸ ਗੇਲਞ੍ਞਾ ਭਗਵਤੋ ਗੇਲਞ੍ਞੇਨ ਅਤ੍ਤਨੋ ਖੇਦਪਤ੍ਤਕਾਰਣਂ ਆਰੋਚੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਾ.

‘‘ਤਸ੍ਮਾਤਿਹਾਨਨ੍ਦ ¶ ਅਤ੍ਤਦੀਪਾ ਵਿਹਰਥ ਅਤ੍ਤਸਰਣਾ ਅਨਞ੍ਞਸਰਣਾ’’.

ਪੁਚ੍ਛਾ – ਭਗਵਤਾ ਆਵੁਸੋ ਪੁਰਿਮ ਦੁਤਿਯਦਿਵਸੇ ਪੁਚ੍ਛਿਤਵਿਸ੍ਸਜ੍ਜਿਤਕ੍ਕਮੇਨ ਅਤ੍ਤਦੀਪਧਮ੍ਮਦੇਸਨਞ੍ਚ ਅਞ੍ਞਾਨਿ ਚ ਧਮ੍ਮਦੇਸਨਾਨਿ ਕਥੇਤ੍ਵਾ ਪਰਿਨਿਟ੍ਠਿਤ ਸਬ੍ਬਬੁਦ੍ਧਕਿਚ੍ਚੇਨ ਆਯੁਸਙ੍ਖਾਰੋ ਕਤ੍ਥ ਓਸ੍ਸਟ੍ਠੋ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਚਾਪਾਲੇ ਚੇਤਿਯੇ ਮਾਰੇਨ ਪਾਪਿਮਤਾ ਯਾਚਿਤੋ ਭਗਵਾ ਸਤੇਨ ਸਮ੍ਪਜਾਨੇਨ ਆਯੁਸਙ੍ਖਾਰੋ ਓਸ੍ਸਟ੍ਠੋ.

‘‘ਪਰਿਨਿਬ੍ਬਾਤੁ ¶ ਦਾਨਿ ਭਨ੍ਤੇ ਭਗਵਾ, ਪਰਿਨਿਬ੍ਬਾਤੁ ਸੁਗਤੋ, ਪਰਿਨਿਬ੍ਬਾਨ ਕਾਲੋ ਦਾਨਿ ਭਨ੍ਤੇ ਭਗਵਤੋ.

ਅਪ੍ਪੋਸੁਕ੍ਕੋ ਤ੍ਵਂ ਪਾਪਿਮ ਹੋਤਿ, ਨ ਚਿਰਂ ਤਥਾਗਤਸ੍ਸ ਪਰਿਨਿਬ੍ਬਾਨਂ ਭਵਿਸ੍ਸਤਿ, ਇਤੋ ਤਿਣ੍ਣਂ ਮਾਸਾਨਂ ਅਚ੍ਚਯੇਨ ਤਥਾਗਤੋ ਪਰਿਨਿਬ੍ਬਾਯਿਸ੍ਸਤਿ.

ਪੁਚ੍ਛਾ – ਚਤੁਮਹਾਪਦੇਸਧਮ੍ਮਦੇਸਨਾ ¶ ਪਨਾਵੁਸੋ ਭਗਵਤਾ ਕਤ੍ਥ ਭਾਸਿਤਾ.

ਵਿਸ੍ਸਜ੍ਜਨਾ – ਭੋਗਨਗਰੇ ਭਨ੍ਤੇ ਆਨਨ੍ਦੇ ਚੇਤਿਯੇ ਭਾਸਿਤਾ.

ਪਰਿਪਕ੍ਕੋ ¶ ਵਯੋ ਮਯ੍ਹਂ, ਪਰਿਤ੍ਤਂ ਮਮ ਜੀਵਿਤਂ. ਪਹਾਯ ਵੋ ਗਮਿਸ੍ਸਾਮਿ, ਕਤਂ ਮੇ ਸਰਣਮਤ੍ਤਨੋ.

ਪੁਚ੍ਛਾ – ਚਤੁਸਂਵੇਜਨੀਯਕਥਾ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਾ.

ਵਿਸ੍ਸਜ੍ਜਨਾ – ਕੁਸਿਨਾਰਾਯਂ ਭਨ੍ਤੇ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਭਾਸਿਤਾ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਭਗਵਨ੍ਤਂ ਏਤਦਵੋਚ ‘‘ਪੁਬ੍ਬੇ ਭਨ੍ਤੇ ਦਿਸਾਸੁ ਵਸ੍ਸਂਵੁਟ੍ਠਾ ਭਿਕ੍ਖੂ ਆਗਚ੍ਛਨ੍ਤਿ ਤਥਾਗਤਂ ਦਸ੍ਸਨਾਯ, ਤੇ ਮਯਂ ਲਭਾਮ ਮਨੋਭਾਵਨੀਯੇ ਭਿਕ੍ਖੂ ਦਸ੍ਸਨਾਯ, ਲਭਾਮ ਪਯਿਰੁਪਾਸਨਾਯ. ਭਗਵਤੋ ਪਨ ਮਯਂ ਭਨ੍ਤੇ ਅਚ੍ਚਯੇਨ ਨ ਲਭਿਸ੍ਸਾਮ ਮਨੋਭਾਵਨੀਯੇ ਭਿਕ੍ਖੂ ਦਸ੍ਸਨਾਯ, ਨ ਲਭਿਸ੍ਸਾਮ ਪਯਿਰੁਪਾਸਨਾਯਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਾ.

ਯੇਹਿ ¶ ਕੇਚਿ ਆਨਨ੍ਦ ਚੇਤਿਯਚਾਰਿਕਂ ਆਹਿਣ੍ਡਨ੍ਤਾ ਪਸਨ੍ਨਚਿਤ੍ਤਾ ਕਾਲਂ ਕਰਿਸ੍ਸਨ੍ਤਿ, ਸਬ੍ਬੇਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਨ੍ਤਿ ਹੁ –

ਪੁਚ੍ਛਾ – ਕਥਞ੍ਚਾਵੁਸੋ ¶ ਭਗਵਾ ਭਿਕ੍ਖੂਨਂ ਮਾਤੁਗਾਮੇਸੁ ਪਟਿਪਜ੍ਜਿਤਬ੍ਬਵਤ੍ਤਂ ਕਥੇਸਿ.

ਵਿਸ੍ਸਜ੍ਜਨਾ – ਅਦਸ੍ਸਨਂ ਆਨਨ੍ਦਾਤਿ ਚ ਅਨਾਲਾਪੋ ਆਨਨ੍ਦਾਤਿ ਚ ਸਤਿ ਆਨਨ੍ਦ ਉਪਟ੍ਠਬ੍ਬੇਤਬ੍ਬਾਤਿ ਚ ਏਵਂ ਖੋ ਭਨ੍ਤੇ ਭਗਵਾ ਮਾਤੁਗਾਮੇਸੁ ਪਟਿਪਜ੍ਜਿਤਬ੍ਬਾਕਾਰਂ ਕਥੇਸਿ.

ਪੁਚ੍ਛਾ – ਮਹਾਸੁਦਸ੍ਸਨਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਤਿਸ੍ਸਂਯੇਵ ਭਨ੍ਤੇ ਕੁਸਿਨਾਰਾਯਂ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਭਗਵਨ੍ਤਂ ਏਤਦਵੋਚ ‘‘ਮਾ ਭਨ੍ਤੇ ਭਗਵਾ ਇਮਸ੍ਮਿਂ ਖੁਦ੍ਦਕਨਗਰਕੇ

ਉਜ੍ਜਙ੍ਗਲਨਗਰਕੇ ¶ ਸਾਖਾਨਗਰਕੇ ਪਰਿਨਿਬ੍ਬਾਯਿ. ਸਨ੍ਤਿ ਭਨ੍ਤੇ ਅਞ੍ਞਾਨਿ ਮਹਾਨਗਰਾਨਿ. ਸੇਯ੍ਯਥਿਦਂ, ਚਮ੍ਪਾ, ਰਾਜਗਹਂ, ਸਾਵਤ੍ਥੀ, ਸਾਕੇਤਂ, ਕੋਸਮ੍ਬੀ, ਬਾਰਾਣਸੀ, ਏਤ੍ਥ ਭਗਵਾ ਪਰਿਨਿਬ੍ਬਾਯਤੁ, ਏਤ੍ਥ ਬਹੂ ਖਤ੍ਤਿਯਮਹਾਸਾਲਾ ਬ੍ਰਾਹ੍ਮਣ ਮਹਾਸਾਲਾ ਗਹਪਤਿ ਮਹਾਸਾਲਾ ਤਥਾਗਤੇ ਅਭਿਪ੍ਪਸਨ੍ਨਾ. ਤੇ ਤਥਾਗਤਸ੍ਸ ਸਰੀਰਪੂਜਂ ਕਰਿਸ੍ਸਨ੍ਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਭਗਵਾ ¶ ਆਵੁਸੋ ਪੁਰਿਮਦਿਵਸੇ ਪੁਚ੍ਛਿਤ ਵਿਸ੍ਸਜ੍ਜਿਤਕ੍ਕਮੇਨ ਮਹਾਸੁਦਸ੍ਸਨ ਸੁਤ੍ਤਨ੍ਤਂ ਦੇਸੇਤ੍ਵਾ ਸੁਭਦ੍ਦਂਨਾਮ ਪਰਿਬ੍ਬਾਜਕਂ ਬੁਦ੍ਧਵੇਨੇਯ੍ਯੇਸੁ ਪਚ੍ਛਿਮਸਾਵਕਭੂਤਂ ਕਥਂ ਵਿਨੇਸਿ.

ਵਿਸ੍ਸਜ੍ਜਨਾ – ਯਸ੍ਮਿਂ ਖੋ ਸੁਭਦ੍ਦ ਧਮ੍ਮਵਿਨਯੇ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਨ ਉਪਲਬ੍ਭਤਿ, ਸਮਣੋਪਿ ਤਤ੍ਥ ਨ ਉਪਲਬ੍ਭਤਿ, ਦੁਤਿਯੋਪਿ ਤਤ੍ਥ ਸਮਣੋ ਨ ਉਪਲਬ੍ਭਤਿ, ਤਤਿਯੋਪਿ ਤਤ੍ਥ ਸਮਣੋ ਨ ਉਪਲਬ੍ਭਤਿ, ਚਤੁਤ੍ਥੋਪਿ ਤਤ੍ਥ ਸਮਣੋ ਨ ਉਪਲਬ੍ਭਤਿ (ਪੇਯ੍ਯਾਲ). ਇਮੇ ਚ ਸੁਭਦ੍ਦ ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸ, ਏਵਂ ਖੋ ਭਨ੍ਤੇ ਭਗਵਾ ਸੁਭਦ੍ਦਂ ਪਰਿਬ੍ਬਾਜਕਂ ਬੁਦ੍ਧਵੇਨੇਯ੍ਯੇਸੁ ਪਚ੍ਛਿਮਂ ਸਕ੍ਖਿਸਾਵਕਂ ਵਿਨੇਸਿ.

ਪੁਚ੍ਛਾ – ਪਚ੍ਛਿਮੇ ¶ ਪਨਾਵੁਸੋ ਕਾਲੇ ਭਗਵਾ ਆਯਸ੍ਮਤੋ ਆਨਨ੍ਦਸ੍ਸ ਕੀਦਿਸਂ ਵਚਨਂ ਕਥੇਤ੍ਵਾ, ਕਥਞ੍ਚ ਭਿਕ੍ਖੂ ਪਵਾਰੇਤ੍ਵਾ, ਕੀਦਿਸਞ੍ਚ ਭਿਕ੍ਖੂਨਂ ਵਚਨਂ ਆਮਨ੍ਤੇਤ੍ਵਾ, ਕਥਞ੍ਚ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਪਚ੍ਛਿਮੇ ਕਾਲੇ ਆਯਸ੍ਮਤੋ ਆਨਨ੍ਦਸ੍ਸ ਸਿਯਾ ਖੋ ਪਨਾਨਨ੍ਦ ਤੁਮ੍ਹਾਕਂ ਏਵਮਸ੍ਸ ਅਤੀਤਸਤ੍ਥੁਕਂ ਪਾਵਚਨਂ ਨਤ੍ਥਿ ਨੋ ਸਤ੍ਥਾਤਿ ਏਵਮਾਦਿਕਂ ਵਚਨਂ ਕਥੇਤ੍ਵਾ, ਸਿਯਾ ਖੋ ਪਨ ਭਿਕ੍ਖਵੇ ਏਕਭਿਕ੍ਖੁਸ੍ਸਾਪਿ ਕਙ੍ਖਾ ਵਾ ਵਿਮਤਿ ਵਾ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ ਮਗ੍ਗੇ ਵਾ ਪਟਿਪਦਾਯ ਵਾਤਿ ਏਵਮਾਦਿਨਾ ਭਿਕ੍ਖੂ ਪਵਾਰੇਤ੍ਵਾ, ਹਨ੍ਦਦਾਨਿ ਭਿਕ੍ਖਵੇ ਆਮਨ੍ਤਯਾਮਿ ਵੋ, ਵਯਧਮ੍ਮਾ ਸਙ੍ਖਾਰਾ ਅਪ੍ਪਮਾਦੇਨ ਸਮ੍ਪਾਦੇਥਾਤਿ ਪਚ੍ਛਿਮਞ੍ਚ ਓਵਾਦਵਚਨਂ ਭਿਕ੍ਖੂਨਂ ਆਮਨ੍ਤੇਤ੍ਵਾ, ਨਵ ਅਨੁਪੁਬ੍ਬਸਮਾਪਤ੍ਤਿਯੋ ਅਨੁਲੋਮਂ ਪਟਿਲੋਮਂ ਸਮਾਪਜ੍ਜਿਤ੍ਵਾ, ਚਤੁਤ੍ਥਜ੍ਝਾਨਾ ਵੁਟ੍ਠਹਿਤ੍ਵਾ ਸਮਨਨ੍ਤਰਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਨਾਵੁਸੋ ¶ ਆਨਨ੍ਦ ਭਗਵਾ ਪਰਿਨਿਬ੍ਬੁਤੋ, ਸਞ੍ਞਾਵੇਦਯਿਤ ਨਿਰੋਧਂ ਸਮਾਪਨ੍ਨੋ.

ਪੁਚ੍ਛਾ – ਮਹਾਸੁਦਸ੍ਸਨਸੁਤ੍ਤਂ ¶ ਪਨਾਵੁਸੋ ਪੁਰਿਮਦਿਵਸੇ ਪੁਚ੍ਛਿਤਞ੍ਚ ਵਿਸ੍ਸਜ੍ਜਿਤਞ੍ਚ, ਜਨਵਸਭਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਨਾਤਿਕੇ ਭਨ੍ਤੇ ਗਿਞ੍ਜਕਾਵਸਥੇ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਮਾਗਧਕੇ ਪਰਿਚਾਰਕੇ ਆਰਬ੍ਭ ਭਗਵਤੋ ਸਮ੍ਮੁਖਾ ਪਰਿਕਥਂ ਕਥੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਮਹਾਗੋਵਿਨ੍ਦਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਭਾਸਿਤਂ.

ਪੁਚ੍ਛਾ – ਮਹਾਸਮਯਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਸਕ੍ਕਪਞ੍ਹਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁ ਭਨ੍ਤੇ ਪਾਚੀਨਤੋ ਰਾਜਗਹਸ੍ਸ ਅਮ੍ਬਸਣ੍ਡਾ ਨਾਮ ਬ੍ਰਾਹ੍ਮਣਗਾਮੋ, ਤਸ੍ਸੁਤ੍ਤਰਤੋ ਵੇਦਿਯਕੇ ਪਬ੍ਬਤੇ ਇਨ੍ਦਸਾਲਗੁਹਾਯਂ ਸਕ੍ਕਂ ਦੇਵਾਨਮਿਨ੍ਦਂ ਆਰਬ੍ਭ ਭਾਸਿਤਂ, ਸਕ੍ਕੋ ਭਨ੍ਤੇ ਦੇਵਾਨਮਿਨ੍ਦੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਮਹਾਸਤਿਪਟ੍ਠਾਨਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਕੁਰੂਸੁ ਭਨ੍ਤੇ ਕਮ੍ਮਾਸਧਮ੍ਮੇ ਨਾਮ ਕੁਰੂਨਂ ਨਿਗਮੇ ਭਾਸਿਤਂ.

ਪੁਚ੍ਛਾ – ਪਾਯਾਸਿ ¶ ਸੁਤ੍ਤਂ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਸੇਤਬ੍ਯਾਨਾਮ ਕੋਸਲਾਨਂ ਨਗਰਂ ਉਤ੍ਤਰੇਨ ਸੇਤਬ੍ਯਂ ਸਿਂਸਪਾਵਨੇ ਆਯਸ੍ਮਤਾ ਕੁਮਾਰਕਸ੍ਸਪੇਨ ਪਾਯਾਸਿਂ ਰਾਜਞ੍ਞਂ ਆਰਬ੍ਭ ਭਾਸਿਤਂ, ਪਾਯਾਸਿਸ੍ਸ ਭਨ੍ਤੇ ਰਾਜਞ੍ਞਸ੍ਸ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਇਤਿਪਿ ਨਤ੍ਥਿ ਪਰੋਲੋਕੋ ਨਤ੍ਥਿ ਸਤ੍ਤਾ ਓਪਪਾਤਿਕਾ ਨਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਤਤ੍ਥਾਵੁਸੋ ¶ ਪਾਯਾਸਿਸ੍ਸ ਰਾਜਞ੍ਞਸ੍ਸ ਦਿਟ੍ਠਿਪਕਾਸਨਾਚ ਆਯਸ੍ਮਤੋ ਕੁਮਾਰਕਸ੍ਸਪਤ੍ਥੇਰਸ੍ਸ ਦਿਟ੍ਠਿਵਿਨਿਵੇਟ੍ਠਨਕਥਾ ਚ ਅਨੇਕਵਾਰਂ ਆਗਤਾ, ਤਤ੍ਥਾਵੁਸੋ ਪਠਮਂ ਪਾਯਾਸਿ ਰਾਜਞ੍ਞੋ ਅਤ੍ਤਨੋ ਦਿਟ੍ਠਿਂ ਕਥਂ ਪਕਾਸੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਤਂ ਮਿਚ੍ਛਾਦਿਟ੍ਠਿਂ ਵਿਨਿਵੇਠੇਸਿ.

ਵਿਸ੍ਸਜ੍ਜਨਾ – ਪਾਯਾਸਿ ਭਨ੍ਤੇ ਰਾਜਞ੍ਞੋ ਆਯਸ੍ਮਨ੍ਤਂ ਕੁਮਾਰਕਸ੍ਸਪਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਅਹਞ੍ਹਿ ਭੋ ਕਸ੍ਸਪ ਏਵਂ ਵਾਦੀ ਏਵਂ ਦਿਟ੍ਠੀ ਇਤਿਪਿ ਨਤ੍ਥਿ ਪਰੋਲੋਕੋ, ਨਤ੍ਥਿ ਸਤ੍ਤਾ ਓਪਪਾਤਿਕਾ, ਨਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ’’ਕਿ, ਏਵਂ ਖੋ ਭਨ੍ਤੇ ਪਾਯਾਸਿਰਾਜਞ੍ਞੋ ਅਤ੍ਤਨੋ ਮਿਚ੍ਛਾਦਿਟ੍ਠਿਂ ਆਯਸ੍ਮਤੋ ਕੁਮਾਰਕਸ੍ਸਪਸ੍ਸ ਸਨ੍ਤਿਕੇ ਪਕਾਸੇਸਿ. ਆਯਸ੍ਮਾ ਚ ਕੁਮਾਰਕਸ੍ਸਪੋ ਸਕ੍ਖਿਕਾਰਣਂ ਚਨ੍ਦਿਮਸੂਰਿਯਉਪਮਂ ਦਸ੍ਸੇਤ੍ਵਾ ਪਾਯਾਸਿਸ੍ਸ ਰਾਜਞ੍ਞਸ੍ਸ ਤਂ ਪਾਪਕਂ ਦਿਟ੍ਠਿਗਤਂ ਵਿਨਿਵੇਠੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਆਯਸ੍ਮਾ ਕੁਮਾਰਕਸ੍ਸਪੋ ਪਾਯਾਸਿਸ੍ਸ ਰਾਜਞ੍ਞਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਸਦ੍ਧਮ੍ਮਵਿਮੁਖਿਭੂਤਸ੍ਸ ਪਚ੍ਚਕ੍ਖਤੋ ਪਰਲੋਕਂ ਦਸ੍ਸੇਤ੍ਵਾ ਤਂ ਮਿਚ੍ਛਾਦਿਟ੍ਠਿਂ ਵਿਨਿਵੇਠੇਸਿ.

ਪੁਚ੍ਛਾ – ਅਥ ਪਨਾਵੁਸੋ ਪਾਯਾਸਿਰਾਜਞ੍ਞੋ ਦੁਤਿਯਮ੍ਪਿ ਕੀਦਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਵਿਸ੍ਸਜ੍ਜਨਾ – ਦੁਤਿਯੇ ਪਨ ਭਨ੍ਤੇ ਪਾਯਾਸਿਰਾਜਞ੍ਞੋ ਅਤ੍ਤਨੋ ਮਿਤ੍ਤਾਮਚ੍ਚੇ ਞਾਤਿਸਾਲੋਹਿਤੇ ਦੁਚ੍ਚਰਿਤਸਮਙ੍ਗਿਨੋ ਕਾਲਂਕਤੇ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਮਿਚ੍ਛਾਵਾਦਂ ਪਤਿਟ੍ਠਾਪੇਸਿ ¶ , ਆਯਸ੍ਮਾ ਚ ਕੁਮਾਰਕਸ੍ਸਪੋ ਚੋਰਉਪਮਾਯ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਉਪ੍ਪਨ੍ਨਂ ਪਰਪ੍ਪਵਾਦਂ ਸਹਧਮ੍ਮੇਨ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪੁਚ੍ਛਾ – ਅਥ ਪਨਾਵੁਸੋ ਪਾਯਾਸਿਰਾਜਞ੍ਞੋ ਤਤਿਯਮ੍ਪਿ ਕੀਦਿਸਂ ਸਾਧਕ ਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਵਿਸ੍ਸਜ੍ਜਨਾ – ਤਤਿਯਮ੍ਪਨ ¶ ਭਨ੍ਤੇ ਪਾਯਾਸਿਰਾਜਞ੍ਞੋ ਅਤ੍ਤਨੋ ਮਿਤ੍ਤਾਮਚ੍ਚੇ ਞਾਤਿਸਾਲੋਹਿਤੇ ਸੁਚਰਿਤਸਮਙ੍ਗਿਨੋ ਕਾਲਂਕਤੇ ਦਸ੍ਸੇਤ੍ਵਾ ਅਤ੍ਤਨੋ ਮਿਚ੍ਛਾਵਾਦਂ ਪਤਿਟ੍ਠਾਪੇਸਿ, ਆਯਸ੍ਮਾ ਚ ਕੁਮਾਰਕਸ੍ਸਪੋ ਗੂਥਕੂਪੇ ਪਤਪੁਰਿਸੋਪਮਾਯ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪੁਚ੍ਛਾ – ਆਯਸ੍ਮਤਾ ਆਵੁਸੋ ਕੁਮਾਰਕਸ੍ਸਪੇਨ ਪੁਰਿਮਦਿਵਸੇ ਪੁਚ੍ਛਿਤਵਿਸ੍ਸਜ੍ਜਿਤਕ੍ਕਮੇਨ ਗੂਥਕੂਪਪੁਰਿਸਉਪਮਾਯ ਮਿਚ੍ਛਾਵਾਦਂ ਪਟਿਕ੍ਖਿਪਿਤ੍ਵਾ ਧਮ੍ਮਵਾਦੇ ਪਤਿਟ੍ਠਾਪਿਯਮਾਨੇ ਪਿਯਾਸਿਰਾਜਞ੍ਞੋ

ਚਤੁਤ੍ਥਂ ¶ ਵਾ ਪਞ੍ਚਮਂ ਵਾ ਕੀਦਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਸਹਧਮ੍ਮੇਨ ਤਂ ਮਿਚ੍ਛਾਵਾਦਂ ਪਟਿਕ੍ਖਿਪਿਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਵਿਸ੍ਸਜ੍ਜਨਾ – ਪਾਯਾਸਿ ਭਨ੍ਤੇ ਰਾਜਞ੍ਞੋ ਆਯਸ੍ਮਤਾ ਕੁਮਾਰਕਸ੍ਸਪੇਨ ਗੂਥਕੂਪੇ ਨਿਮੁਗ੍ਗਪੁਰਿਸੋ ਪਮਾਯ ਮਿਚ੍ਛਾਵਾਦਂ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ ਧਮ੍ਮਵਾਦੇ ਪਤਿਟ੍ਠਾਪਿਤੇ ਚਤੁਤ੍ਥਂ ਵਾ ਪਞ੍ਚਮਂ ਵਾ ਅਤ੍ਤਨੋ ਮਿਤ੍ਤਾਮਚ੍ਚੇ ਞਾਤਿਸਾਲੋਹਿਤੇ ਸਮਾਦਿਨ੍ਨ ਪਞ੍ਚਸੀਲੇ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਮਿਚ੍ਛਾਵਾਦਂ ਪਤਿਟ੍ਠਾਪੇਸਿ. ਆਯਸ੍ਮਾ ਚ ਕੁਮਾਰਕਸ੍ਸਪੋ ਤਾਵਤਿਂਸਦੇਵੋਪਮਾਯ ਚ ਜਚ੍ਚਨ੍ਧੋਪਮਾਯ ਚਾਤਿ ਦ੍ਵੀਹਿ ਉਪਮਾਹਿ ਤਂ ਪਾਪਕਂ ਦਿਟ੍ਠਿਗਤਂ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ, ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਕੁਮਾਰਕਸ੍ਸਪੋ ਪਾਯਾਸਿਸ੍ਸ ਰਾਜਞ੍ਞਸ੍ਸ ਦ੍ਵੇ ਉਪਮਾਯੋ ਦਸ੍ਸੇਤ੍ਵਾ ਉਪ੍ਪਨ੍ਨਂ ਪਾਪਕਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪੁਚ੍ਛਾ – ਅਥ ਪਨਾਵੁਸੋ ਪਾਯਾਸਿਰਾਜਞ੍ਞੋ ਛਟ੍ਠਂਪਿ ਕੀਦਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਸਹਧਮ੍ਮੇਨ ਤਂ ਮਿਚ੍ਛਾਵਾਦਂ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਵਿਸ੍ਸਜ੍ਜਨਾ – ਛਟ੍ਠਂ ਪਨ ਭਨ੍ਤੇ ਪਾਯਾਸਿਰਾਜਞ੍ਞੋ ਸੀਲਵਨ੍ਤੇ ਸਮਣਬ੍ਰਾਹ੍ਮਣੇ ਕਲ੍ਯਾਣਧਮ੍ਮੇ ਜੀਵਿਤੁਕਾਮੇ ਅਮਰਿਤੁਕਾਮੇ

ਸੁਖਕਾਮੇ ¶ ਦੁਕ੍ਖਪਟਿਕੂਲੇ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਆਯਸ੍ਮਾਚ ਕੁਮਾਰਕਸ੍ਸਪੋ ਗਬ੍ਭਿਨੀ ਉਪਮਾਯ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਗਬ੍ਭਿਨੀਉਪਮਂ ਦਸ੍ਸੇਤ੍ਵਾ ਤਂ ਮਿਚ੍ਛਾਵਾਦਂ ਪਟਿਕ੍ਖਿਪਿਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪੁਚ੍ਛਾ – ਅਥ ਪਨਾਵੁਸੋ ਪਾਯਾਸਿਰਾਜਞ੍ਞੋ ਸਤ੍ਤਮਂਪਿ ਕੀਦਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਵਿਸ੍ਸਜ੍ਜਨਾ – ਸਤ੍ਤਮਂ ਪਨ ਭਨ੍ਤੇ ਪਾਯਾਸਿਰਾਜਞ੍ਞੋ ਕੁਬ੍ਭਿਯਂ ਪਕ੍ਖਿਪਿਤ੍ਵਾ ਮਾਰਿਤਪੁਰਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਆਯਸ੍ਮਾਚ ਕੁਮਾਰਕਸ੍ਸਪੋ ਸੁਪਿਨਕੂਪਮਾਯ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਸੁਪਿਨਕੂਪਮਂ ਦਸ੍ਸੇਤ੍ਵਾ ਉਪ੍ਪਨ੍ਨਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪੁਚ੍ਛਾ – ਅਥ ¶ ਪਨਾਵੁਸੋ ਪਾਯਾਸਿਰਾਜਞ੍ਞੋ ਅਟ੍ਠਮਮ੍ਪਿ ਨਵਮਮ੍ਪਿ ਕਥੇਤਬ੍ਬਂ ਕਥੇਤ੍ਵਾ ਦਸਮਂ ਕੀਦਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਸਹਧਮ੍ਮੇਨ ਤਂ ਮਿਚ੍ਛਾਵਾਦਂ ਪਟਿਨਿਸ੍ਸਜ੍ਜਾਪੇਸਿ.

ਵਿਸ੍ਸਜ੍ਜਨਾ – ਅਟ੍ਠਮਮ੍ਪਿ ਭਨ੍ਤੇ ਨਵਮਮ੍ਪਿ ਪਾਯਾਸਿਰਾਜਞ੍ਞੋ ਯਂ ਵਾ ਤਂ ਵਾ ਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਦਸਮਂ ਪਨ ਭਨ੍ਤੇ ਪਾਯਾਸਿਰਾਜਞ੍ਞੋ ਛਵਿਆਦੀਨਿ ਛਿਨ੍ਦਿਤ੍ਵਾ ਮਾਰਿਤਪੁਰਿਸਂ ਸਾਧਕਪਰਿਯਾਯਂ ਦਸ੍ਸੇਤ੍ਵਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਸਿ, ਆਯਸ੍ਮਾ ਚ ਕੁਮਾਰਕਸ੍ਸਪੋ ਅਗ੍ਗਿਕਜਟਿਲੋਪਮਾਯ ਤਂ ਮਿਚ੍ਛਾਵਾਦਂ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਹੇਤ੍ਵਾ ਧਮ੍ਮਵਾਦਂ ਪਤਿਟ੍ਠਾਪੇਸਿ.

ਪਟਿਨਿਸ੍ਸਜ੍ਜੇਤਂ ¶ ਰਾਜਞ੍ਞ ਪਾਪਕਂ ਦਿਟ੍ਠਿਗਤਂ. ਪਟਿਨਿਸ੍ਸਜ੍ਜੇਤਂ ਰਾਜਞ੍ਞ ਪਾਪਕਂ ਦਿਟ੍ਠਿਗਤਂ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਓਪਾਯਿਕਂ ਉਪਮਂ ਦਸ੍ਸੇਤ੍ਵਾ ਤਂ ਪਾਪਿਕਂ ਮਿਚ੍ਛਾਦਿਟ੍ਠਿਂ ਪਟਿਨਿਸ੍ਸਜ੍ਜਾਪੇਸਿ, ਯਂ ਤਸ੍ਸ ਭਵੇਯ੍ਯ ਦੀਘਰਤ੍ਤਂ ਹਿਤਾਯ ਸੁਖਾਯ.

ਪੁਚ੍ਛਾ – ਆਯਸ੍ਮਤਾ ਆਵੁਸੋ ਕੁਮਾਰਕਸ੍ਸਪੇਨ ਪੁਰਿਮਦਿਵਸੇ ਪੁਚ੍ਛਿਤਵਿਸ੍ਸਜ੍ਜਿਤਾਕਾਰੇਨ ਪਾਯਾਸਿਸ੍ਸ ਰਾਜਞ੍ਞਸ੍ਸ ਅਗ੍ਗਿਕਜਟਿਲੋਪਮਂ ਦਸ੍ਸੇਤ੍ਵਾ ਤਸ੍ਮਿਂ ਪਾਪਕੇ ਦਿਟ੍ਠਿਗਤੇ ਪਟਿਨਿਸ੍ਸਜ੍ਜਾਪਿਤੇ ਸੋ ਤਾਵ ਥੇਰਸ੍ਸ ਵਚਨਂ ਅਨਾਦਿਯਿਤ੍ਵਾ ਕੀਦਿਸਞ੍ਚ ਪਚ੍ਚਨੀਕਕਥਂ ਕਥੇਸਿ, ਕਥਞ੍ਚ ਥੇਰੋ ਕਰੁਣਾਸੀਤਲਹਦਯੋ ਹੁਤ੍ਵਾ ਅਪਰਮ੍ਪਿ ਉਪਮਂ ਦਸ੍ਸੇਤ੍ਵਾ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪੇਸਿ.

ਵਿਸ੍ਸਜ੍ਜਨਾ – ਪਾਯਾਸਿ ਭਨ੍ਤੇ ਰਾਜਞ੍ਞੋ ਆਯਸ੍ਮਤਾ ਕੁਮਾਰਕਸ੍ਸਪੇਨ ਅਗ੍ਗਿਕਜਟਿਲੋਪਮਂ ਦਸ੍ਸੇਤ੍ਵਾ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪਿਤੇ ਕਿਞ੍ਚਾਪਿ ਭਵਂ ਕਸ੍ਸਪੋ ਏਵਮਾਹ, ਅਥ ਖੋ ਨੇਵਾਹਂ ਸਕ੍ਕੋਮਿ ਇਦਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਿਤੁਨ੍ਤਿ ਏਵਮਾਦਿਕਂ ਪਚ੍ਚਨੀਕਕਥਂ ਕਥੇਸਿ, ਥੇਰੋ ਚ ਭਨ੍ਤੇ ਕੁਮਾਰਕਸ੍ਸਪੋ ਦ੍ਵੇ ਸਤ੍ਥਵਾਹੋਪਮਂ ਦਸ੍ਸੇਤ੍ਵਾ ਤਂ ਪਾਪਕਂ ਮਿਚ੍ਛਾਵਾਦਂ ਪਟਿਨਿਸ੍ਸਜ੍ਜਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਪਾਯਾਸਿਸ੍ਸ ਰਾਜਞ੍ਞਸ੍ਸ ਦ੍ਵੇ ਸਤ੍ਥਵਾਹੋਪਮਮ੍ਪਿ ਦਸ੍ਸੇਤ੍ਵਾ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪੇਸਿ, ਤਞ੍ਹਿ ਤਸ੍ਸ ਚ ਤਦਨੁਯਾਯੀਨਞ੍ਚ ਭਵੇਯ੍ਯ ਦੀਘਰਤ੍ਤਂ ਹਿਤਾਯ ਸੁਖਾਯ.

ਪੁਚ੍ਛਾ – ਏਵਂ ¶ ਪਨਾਵੁਸੋ ਆਯਸ੍ਮਤਾ ਕੁਮਾਰਕਸ੍ਸਪੇਨ ਯਥਾ ਵੁਤ੍ਤਾਹਿ ਬਹੂਹਿ ਉਪਮਾਹਿ ਚ ਅਪਰਾਹਿ ਗੂਥਭਾਰਿਕਅਕ੍ਖਧੁਤ੍ਤਕੋਪਮਾਹਿ ਚ ਤਸ੍ਮਿਂ ਪਾਪਕੇ ਦਿਟ੍ਠਿਗਤੇ ਵਿਸ੍ਸਜ੍ਜਾਪਿਤੇ ਸੋ ਤਾਵ ਥੇਰਸ੍ਸ ਵਚਨਂ ਅਨਾਦਿਯਿਤ੍ਵਾਵ ਪਚ੍ਛਿਮਪਟਿਕ੍ਖੇਪਵਸੇਨ ਕੀਦਿਸਂ ਪਚ੍ਚਨੀਕਕਥਂ ਕਥੇਸਿ, ਕਥਞ੍ਚ ਥੇਰੋ ਕਰੁਣਾਸੀਤਲਹਦਯੋ ਹੁਤ੍ਵਾ ਪਚ੍ਛਿਮਮ੍ਪਿ ਉਪਮਂ ਦਸ੍ਸੇਤ੍ਵਾ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪੇਸਿ.

ਵਿਸ੍ਸਜ੍ਜਨਾ – ਪਾਯਾਸਿ ਭਨ੍ਤੇ ਰਾਜਞ੍ਞੋ ਏਵਂ ਥੇਰੇਨ ਨਾਨਾਉਪਮਾਹਿ ਤਸ੍ਮਿਂ ਪਾਪਕੇ ਦਿਟ੍ਠਿਗਤੇ ਪਟਿਨਿਸ੍ਸਜ੍ਜਾਪਿਤੇਪਿ ਪੁਰਿਮਨਯੇਨੇਵ ਥੇਰਸ੍ਸ ਪਚ੍ਚਨੀਕਕਥਂ ਕਥੇਸਿ, ਥੇਰੋਪਿ ਚ ਭਨ੍ਤੇ ਪਚ੍ਛਿਮਂ ਸਾਣਭਾਰਿਕੂਪਮਂ ਦਸ੍ਸੇਤ੍ਵਾ ਕਰੁਣਾਸੀਤਲਹਦਯੋ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪੇਸਿ.

ਸਾਧੁ ¶ ਸਾਧੁ ਆਵੁਸੋ, ਸਾਧੁ ਖੋ ਆਵੁਸੋ ਯਂ ਆਯਸ੍ਮਾ ਕੁਮਾਰਕਸ੍ਸਪੋ ਪਾਯਾਸਿਸ੍ਸ ਰਾਜਞ੍ਞਸ੍ਸ ਸਾਣਭਾਰਿਕੋਪਮਮ੍ਪਿ ਦਸ੍ਸੇਤ੍ਵਾ ਤਂ ਪਾਪਕਂ ਦਿਟ੍ਠਿਗਤਂ ਪਟਿਨਿਸ੍ਸਜ੍ਜਾਪੇਸਿ, ਤਞ੍ਹਿ ਤਸ੍ਸ ਚ ਤਦਨੁਯਾਯੀਨਞ੍ਚ ਭਵੇਯ੍ਯ ਦੀਘਰਤ੍ਤਂ ਹਿਤਾਯ ਸੁਖਾਯ.

ਪੁਚ੍ਛਾ – ਇਮਾਯ ¶ ਪਨਾਵੁਸੋ ਪਚ੍ਛਿਮਿਕਾਯ ਸਾਣਭਾਰਿਕੋਪਮਾਯ ਦਸ੍ਸਿਤਾਯ ਪਾਯਾਸਿਰਾਜਞ੍ਞੋ ਥੇਰਸ੍ਸ ਧਮ੍ਮਦੇਸਨਾਨੁਭਾਵੇਨ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਹੁਤ੍ਵਾ ਕੀਦਿਸਂ ਪਸਨ੍ਨਾਕਾਰਮਕਾਸਿ, ਕਥਞ੍ਚ ਆਯਸ੍ਮਨ੍ਤਂ ਕੁਮਾਰਕਸ੍ਸਪਂ ਅਨੁਸਾਸਨਿਂ ਯਾਚਿ, ਕਥਞ੍ਚਾਯਸ੍ਮਾ ਕੁਮਾਰਕਸ੍ਸਪੋ ਅਨੁਸਾਸਿ.

ਵਿਸ੍ਸਜ੍ਜਨਾ – ਇਮਾਯ ਚ ਪਨ ਭਨ੍ਤੇ ਉਪਮਾਯ ਦਸ੍ਸਿਤਾਯ ਪਾਯਾਸਿ ਰਾਜਞ੍ਞੋ ‘‘ਪੁਰਿਮੇਨੇਵ ਅਹਂ ਓਪਮ੍ਮੇਨ ਭੋਤੋ ਕਸ੍ਸਪਸ੍ਸ ਅਤ੍ਤਮਨੋ ਅਭਿਰਦ੍ਧੋ ਏਵਮਾਦਿਨਾ ਭਨ੍ਤੇ ਪਾਯਾਸਿਰਾਜਞ੍ਞੋ ਇਮਸ੍ਮਿਂ ਧਮ੍ਮਵਿਨਯੇ ਆਯਸ੍ਮਤੋ ਕੁਮਾਰਕਸ੍ਸਪਸ੍ਸ ਧਮ੍ਮਦੇਸਨਾਯ ਪਸਨ੍ਨੋ ਪਸਨ੍ਨਾਕਾਰਮਕਾਸਿ. ਇਚ੍ਛਾਮਿ ਚਾਹਂ ਭੋ ਕਸ੍ਸਪ ਮਹਾਯਞ੍ਞਂ ਯਜਿਤੁਂ, ਅਨੁਸਾਸਤੁ ਮਂ ਭਵਂ ਕਸ੍ਸਪੋ ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾਤਿ ਪਾਯਾਸਿ ਰਾਜਞ੍ਞੋ ਆਯਸ੍ਮਨ੍ਤਂ ਕੁਮਾਰਕਸ੍ਸਪਂ ਅਨੁਸਾਸਨਿਂ ਯਾਚਿ, ਆਯਸ੍ਮਾ ਚ ਭਨ੍ਤੇ ਕੁਮਾਰਕਸ੍ਸਪੋ ਦੁਕ੍ਖੇਤ੍ਤੇ ਦੁਬ੍ਭੂਮੇ ਪਵੁਤ੍ਤਬੀਜੋਪਮਾਯ ਦੁਸ੍ਸੀਲੇਸੁ ਦਿਨ੍ਨਦਾਨਸ੍ਸ ਨ ਮਹਪ੍ਫਲਭਾਵਂ ਦਸ੍ਸੇਤ੍ਵਾ ਸੁਖੇਤ੍ਤੇ ਸੁਭੂਮੇ ਪਵੁਤ੍ਤਬੀਜੋਪਮਾਯ ਸੀਲਵਨ੍ਤੇਸੁ ਦਿਨ੍ਨਦਾਨਸ੍ਸ ਮਹਪ੍ਫਲਭਾਵਂ ਦਸ੍ਸੇਤ੍ਵਾ ਪਾਯਾਸਿਂ ਰਾਜਞ੍ਞਮਨੁਸਾਸਿ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਪਾਯਾਸਿਰਾਜਞ੍ਞੋ ਦਾਨਂ ਅਦਾਸਿ, ਕਥਞ੍ਚਸ੍ਸ ਸਮ੍ਪਰਾਯੋ ਅਹੋਸਿ.

ਵਿਸ੍ਸਜ੍ਜਨਾ – ਪਾਯਾਸਿ ਭਨ੍ਤੇ ਰਾਜਞ੍ਞੋ ਅਸਕ੍ਕਚ੍ਚਂ ਦਾਨਮਦਾਸਿ, ਅਸਹਤ੍ਥਾ ਦਾਨਮਦਾਸਿ, ਅਚਿਤ੍ਤੀਕਤਂ ਦਾਨਮਦਾਸਿ, ਅਪਵਿਦ੍ਧਂ ਦਾਨਮਦਾਸਿ, ਸੋ ਅਸਕ੍ਕਚ੍ਚਂ ਦਾਨਂ ਦਤ੍ਵਾ ਅਸਹਤ੍ਥਾ ਦਾਨਂ ਦਤ੍ਵਾ ਅਚਿਤ੍ਤੀਕਤਂ ਦਾਨਂ ਦਤ੍ਵਾ ਅਪਵਿਦ੍ਧਂ ਦਾਨਂ ਦਤ੍ਵਾ ਕਾਯਸ੍ਸਭੇਦਾ ਪਰਂ ਮਰਣਾ ਚਾਤੁਮਹਾਰਾਜਿਕਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਿ ਸੁਞ੍ਞਂ ਸੇਰੀਸਕਂ ਵਿਮਾਨਂ.

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਪਾਥਿਯਵਗ੍ਗੇ ਪਠਮਂ ਪਾਥਿਯਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਮਲ੍ਲੇਸੁ ਭਨ੍ਤੇ ਅਨੁਪਿਯੇ ਨਾਮ ਮਲ੍ਲਾਨਂ ਨਿਗਮੇ ਭਗ੍ਗਵਗੋਤ੍ਤਂ ਪਰਿਬ੍ਬਾਜਕਂ ਆਰਬ੍ਭ ਭਾਸਿਤਂ, ਭਗ੍ਗਵਗੋਤ੍ਤੋ ਭਨ੍ਤੇ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ ‘‘ਪੁਰਿਮਾਨਿ ਭਨ੍ਤੇ ਦਿਵਸਾਨਿ ਪੁਰਿਮਤਰਾਨਿ ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋ ਯੇਨਾਹਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਮਂ ਏਤਦਵੋਚ ‘‘ਪਚ੍ਚਕ੍ਖਾਤੋ ਦਾਨਿ ਮਯਾ ਭਗ੍ਗਵ ਭਗਵਾ, ਨ ਦਾਨਾਹਂ ਭਗਵਨ੍ਤਂ ਉਦ੍ਦਿਸ੍ਸ ਵਿਹਰਾਮੀ’ਤਿ, ਕਚ੍ਚੇ ਤਂ ਭਨ੍ਤੇ ਤਥੇਵ, ਯਥਾ ਸੁਨਕ੍ਖਤ੍ਤੋ, ਲਿਚ੍ਛਵਿਪੁਤ੍ਤੋ ਅਵਚਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਉਦੁਮ੍ਬਰਿਕਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਨਿਗ੍ਰੋਧਂ ਪਰਿਬ੍ਬਾਜਕਂ ਆਰਬ੍ਭ ਭਾਸਿਤਂ, ਨਿਗ੍ਰੋਧੋ ਭਨ੍ਤੇ ਪਰਿਬ੍ਬਾਜਕੋ ਭਗਵਤੋ ਪਰਮ੍ਮੁਖਾ ਭਗਵਨ੍ਤਂਯੇਵ ਆਰਬ੍ਭ ਅਨੇਕਵਿਹਿਤਂ ਅਭੂਤਕਥਂ ਕਥੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਚਕ੍ਕਵਤ੍ਤਿਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁ ਭਨ੍ਤੇ ਮਾਤੁਲਾਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਤ੍ਤਜ੍ਝਾਸਯੇਨ ਸੁਤ੍ਤਨਿਕ੍ਖੇਪੇਨ ਭਗਵਤਾ ਭਾਸਿਤਂ.

ਪੁਚ੍ਛਾ – ਅਗ੍ਗਞ੍ਞਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ ਵਾਸੇਟ੍ਠਂ ਪਬ੍ਬਜਿਤਂ ਆਰਬ੍ਭ ਭਾਸਿਤਂ, ਬ੍ਰਾਹ੍ਮਣਾ ਭਨ੍ਤੇ ਵਾਸੇਟ੍ਠ ਭਾਰਦ੍ਵਾਜੇ ਪਬ੍ਬਜਿਤੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ ਅਤ੍ਤਰੂਪਾਯ

ਪਰਿਭਾਸਾਯ ¶ ਪਰਿਪੁਣ੍ਣਾਯ ਨੋ ਅਪਰਿਪੁਣ੍ਣਾਯ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਸਮ੍ਪਸਾਦਨੀਯ ਸੁਤ੍ਤਂ ਪਨਾਵੁਸੋ ਕਤ੍ਥ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਨਾਲ਼ਨ੍ਦਾਯਂ ਭਨ੍ਤੇ ਪਾਵਾਰਿਕਮ੍ਬਵਨੇ ਆਯਸ੍ਮਤਾ ਸਾਰਿਪੁਤ੍ਤੇਨ ਭਾਸਿਤਂ.

ਪੁਚ੍ਛਾ – ਪਾਸਾਦਿਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਵੇਧਞ੍ਞਾਨਾਮ ਸਕ੍ਯਾਨਂ ਅਮ੍ਬਵਨੇ ਪਾਸਾਦੇ ਚੁਨ੍ਦਂ ਸਮਣੁਦ੍ਦੇਸਂ ਆਰਬ੍ਭ ਭਾਸਿਤਂ, ਚੁਨ੍ਦੋ ਭਨ੍ਤੇ ਸਮਣੁਦ੍ਦੇਸੋ ਪਾਵਾਯਂ ਨਿਗਣ੍ਠਸ੍ਸ ਨਾਟਪੁਤ੍ਤਸ੍ਸ ਕਾਲਂ ਕਿਰਿਯਾਯ ਭਿਨ੍ਨਾਨਂ ਨਿਗਣ੍ਠਾਨਂ ਦ੍ਵੇਧਿਕਜਾਤਾਨਂ ਭਣ੍ਡਨਜਾਤਾਨਂ ਕਲਹਜਾਤਾਨਂ ਵਿਵਾਦਾਪਨ੍ਨਾਨਂ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਜ੍ਜਨਕਾਰਣਂ ਆਯਸ੍ਮਤੋ ਆਨਨ੍ਦਸ੍ਸ ਆਰੋਚੇਸਿ, ਆਯਸ੍ਮਾ ਚ ਭਨ੍ਤੇ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਲਕ੍ਖਣਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਜੇਤਵਨਮਹਾਵਿਹਾਰੇ ਭਾਸਿਤਂ.

ਪੁਚ੍ਛਾ – ਸਿਙ੍ਗਾਲਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਿਙ੍ਗਾਲਂ ਗਹਪਤਿਪੁਤ੍ਤਂ ਆਰਬ੍ਭ ਭਾਸਿਤਂ, ਸਿਙ੍ਗਾਲੋ ਭਨ੍ਤੇ ਗਹਪਤਿਪੁਤ੍ਤੋ ਕਾਲਸ੍ਸੇਵ ਉਟ੍ਠਾਯ ਰਾਜਗਹਾ ਨਿਕ੍ਖਮਿਤ੍ਵਾ ਅਲ੍ਲਵਤ੍ਥੋ ਅਲ੍ਲਕੇਸੋ ਪਞ੍ਜਲਿਕੋ ਪੁਥੁਦਿਸਾ ਨਮਸ੍ਸਤਿ ਪੁਰਤ੍ਥਿਮਂ ਦਿਸਂ ਦਕ੍ਖਿਣਂ ਦਿਸਂ ਪਚ੍ਛਿਮਂ ਦਿਸਂ ਉਤ੍ਤਰਂ ਦਿਸਂ ਹੇਟ੍ਠਿਮਂ ਦਿਸਂ ਉਪਰਿਮਂ ਦਿਸਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਆਟਾਨਾਟਿਯਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ¶ ਭਨ੍ਤੇ ਗਿਜ੍ਝਕੂਟੇ ਪਬ੍ਬਤੇ ਭਾਸਿਤਂ, ਭਗਵਤਿ ਭਨ੍ਤੇ ਰਾਜਗਹੇ ਵਿਹਰਤਿ ਚਤ੍ਤਾਰੋ ਮਹਾਰਾਜਾਨੋ ਚਤੁਦ੍ਦਿਸਂ ਰਕ੍ਖਂ ਠਪੇਤ੍ਵਾ ਚਤੁਦ੍ਦਿਸਂ ਗੁਮ੍ਬਂ ਠਪੇਤ੍ਵਾ ਚਤੁਦ੍ਦਿਸਂ ਓਵਰਣਂ ਠਪੇਤ੍ਵਾ ਕੇਵਲਕਪ੍ਪਂ ਗਿਜ੍ਝਕੂਟਪਬ੍ਬਤਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਏਕਮਨ੍ਤਂ ਨਿਸਿਨ੍ਨੋ ਖੋ ਭਨ੍ਤੇ ਵੇਸ੍ਸਵਣੋ ਮਹਾਰਾਜਾ ਆਟਾਨਾਟਿਯਂ ਰਕ੍ਖਂ ਭਗਵਤੋ ਆਰੋਚੇਸਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ ਫਾਸੁਵਿਹਾਰਾਯ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਸਙ੍ਗੀਤਿ ¶ ਸੁਤ੍ਤਂ ਪਨਾਵੁਸੋ ਕਤ੍ਥ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਪਾਵਾਯਂ ਭਨ੍ਤੇ ਆਯਸ੍ਮਤਾ ਸਾਰਿਪੁਤ੍ਤੇਨ ਭਾਸਿਤਂ.

ਪੁਚ੍ਛਾ – ਦਸੁਤ੍ਤਰਸੁਤ੍ਤਂ ਪਨਾਵੁਸੋ ਕਤ੍ਥ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਦਸੁਤ੍ਤਰਸੁਤ੍ਤਂ ਭਨ੍ਤੇ ਚਮ੍ਪਾਯਂ ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ ਆਯਸ੍ਮਤਾ ਸਾਰਿਪੁਤ੍ਤੇਨ ਭਾਸਿਤਂ.

ਪੁਚ੍ਛਾ – ਕੇ ¶ ਆਵੁਸੋ ਸਿਕ੍ਖਨ੍ਤਿ.

ਵਿਸ੍ਸਜ੍ਜਨਾ – ਸੇਕ੍ਖਾ ਚ ਭਨ੍ਤੇ ਪੁਥੁਜ੍ਜਨਕਲ੍ਯਾਣਕਾ ਚ ਸਿਕ੍ਖਨ੍ਤਿ.

ਪੁਚ੍ਛਾ – ਕੇ ਆਵੁਸੋ ਸਿਕ੍ਖਿਤਸਿਕ੍ਖਾ.

ਵਿਸ੍ਸਜ੍ਜਨਾ – ਅਰਹਨ੍ਤੋ ਭਨ੍ਤੇ ਸਿਕ੍ਖਿਤਸਿਕ੍ਖਾ.

ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.