📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸੁਤ੍ਤਨ੍ਤਪਿਟਕ

ਸਂਯੁਤ੍ਤਨਿਕਾਯੇ

ਸਗਾਥਾਵਗ੍ਗਪਾਲ਼ਿ

ਸਂਗਾਯਨਸ੍ਸ ਪੁਚ੍ਛਾ ਵਿਸ੍ਸਜ੍ਜਨਾ

ਪੁਚ੍ਛਾ – ਪਠਮਮਹਾਸਂਗੀਤਿਕਾਲੇ ¶ ਆਵੁਸੋ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਪੋਰਾਣਸਂਗੀਤਿਕਾਰਾ ਪਠਮਂ ਵਿਨਯਪਿਟਕਂ ਸਂਗਾਯਿਤ੍ਵਾ ਤਦਨਨ੍ਤਰਂ ਸੁਤ੍ਤਨ੍ਤਪਿਟਕਂ ਸਂਗਾਯਨ੍ਤਾ ਦੀਘਨਿਕਾਯਞ੍ਚ ਮਜ੍ਝਿਮਨਿਕਾਯਞ੍ਚ ਸਂਗਾਯਿਤ੍ਵਾ ਤਦਨਨ੍ਤਰਂ ਕਿਂਨਾਮ ਪਾਵਚਨਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਪਠਮਮਹਾਸਂਗੀਤਿਕਾਲੇ ਭਨ੍ਤੇ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਪੋਰਾਣਥੇਰਵਰਾ ਪਠਮਂ ਵਿਨਯਪਿਟਕਂ ਸਂਗਾਯਿਤ੍ਵਾ ਤਦਨਨ੍ਤਰਂ ਸੁਤ੍ਤਨ੍ਤਪਿਟਕਂ ਸਂਗਾਯਨ੍ਤਾ ਦੀਘਨਿਕਾਯਞ੍ਚ ਮਜ੍ਝਿਮਨਿਕਾਯਞ੍ਚ ਸਂਗਾਯਿਤ੍ਵਾ ਤਦਨਨ੍ਤਰਂ ਸਤ੍ਤਹਿ ਚ ਸੁਤ੍ਤਸਹਸ੍ਸੇਹਿ ਸਤ੍ਤਹਿ ਚ ਸੁਤ੍ਤਸਤੇਹਿ ਦ੍ਵਾਸਟ੍ਠਿਯਾ ਚ ਸੁਤ੍ਤੇਹਿ ਪਟਿਮਣ੍ਡਿਤਂ ਭਾਣਵਾਰਸਤਪਰਿਮਾਣਂ ਸਂਯੁਤ੍ਤਨਿਕਾਯਂ ਨਾਮ ਪਾਵਚਨਂ ਸਂਗਾਯਿਂਸੁ.

ਪੁਚ੍ਛਾ – ਸਂਯੁਤ੍ਤਨਿਕਾਯੇ ¶ ਚ ਆਵੁਸੋ ਸਗਾਥਾਵਗ੍ਗੋ ਨਿਦਾਨਵਗ੍ਗੋ ਖਨ੍ਧਵਗ੍ਗੋ ਸਲ਼ਾਯਤਨਵਗ੍ਗੋ ਮਹਾਵਗ੍ਗੋਤਿ ਪਞ੍ਚਸਂਯੁਤ੍ਤਪ੍ਪਕਰਣਾਨਿ, ਤੇਸੁ ਪਠਮਂ ਕਤਰਂ ਸਂਯੁਤ੍ਤਪ੍ਪਕਰਣਂ ਤੇ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਪਞ੍ਚਸੁ ਭਨ੍ਤੇ ਸਂਯੁਤ੍ਤਪ੍ਪਕਰਣੇਸੁ ਪਠਮਂ ਸਗਾਥਾਵਗ੍ਗਸਂਯੁਤ੍ਤਪ੍ਪਕਰਣਂ ਸਂਗਾਯਿਂਸੁ.

ਪੁਚ੍ਛਾ – ਸਗਾਥਾਵਗ੍ਗੇਪਿ ¶ ਆਵੁਸੋ ਦੇਵਤਾਸਂਯੁਤ੍ਤਾਦਿਵਸੇਨ ਏਕਾਦਸਸਂਯੁਤ੍ਤਾਨਿ, ਤੇਸੁ ਪਠਮਂ ਕਤਰਂ ਸਂਯੁਤ੍ਤਂ ਤੇ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਏਕਾਦਸਸੁ ਭਨ੍ਤੇ ਸਂਯੁਤ੍ਤੇਸੁ ਪਠਮਂ ਦੇਵਤਾਸਂਯੁਤ੍ਤਂ ਸਂਗਾਯਿਂਸੁ.

ਪੁਚ੍ਛਾ – ਦੇਵਤਾਸਂਯੁਤ੍ਤੇਪਿ ਆਵੁਸੋ ਨਲ਼ਵਗ੍ਗਾਦਯੋ ਅਟ੍ਠ ਵਗ੍ਗਾ, ਓਘਤਰਣਸੁਤ੍ਤਾਦੀਨਿ ਚ ਏਕਾਸੀਤਿ ਸੁਤ੍ਤਾਨਿ, ਤੇਸੁ ਪਠਮਂ ਕਤਰਂ ਵਗ੍ਗਂ ਕਤਰਞ੍ਚ ਸੁਤ੍ਤਂ ਸਗਾਯਿਂਸੁ.

ਵਿਸ੍ਸਜ੍ਜਨਾ – ਅਟ੍ਠਸੁ ਭਨ੍ਤੇ ਵਗ੍ਗੇਸੁ ਪਠਮਂ ਨਲ਼ਵਗ੍ਗਂ ਏਕਾਸੀਤਿਯਾ ਚ ਸੁਤ੍ਤੇਸੁ ਪਠਮਂ ਓਘਤਰਣਸੁਤ੍ਤਂ ਸਂਗਾਯਿਂਸੁ.

ਸਾਧੁ ¶ ਸਾਧੁ ਆਵੁਸੋ, ਮਯਮ੍ਪਿ ਦਾਨਿ ਤਤੋਯੇਵ ਪਟ੍ਠਾਯ ਸਂਗੀਤਿਪੁਬ੍ਬਙ੍ਗਮਾਨਿ ਪੁਚ੍ਛਨਵਿਸ੍ਸਜ੍ਜਨਕਿਚ੍ਚਾਨਿ ਆਵਹਿਤੁਂ ਸਮਾਰਭਾਰ.

ਦੇਵਤਾਸਂਯੁਤ੍ਤ

ਓਘਤਰਣਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਓਘਤਰਣਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਤਂ ਆਰਬ੍ਭ ਭਾਸਿਤਂ, ਅਞ੍ਞਤਰਾ ਭਨ੍ਤੇ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ, ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਏਤਦਵੋਚ ‘‘ਕਥਂ ਨੁ ਤ੍ਵਂ ਮਾਰਿਸ ਓਘਮਤਰੀ’’ਤਿ,

ਤਸ੍ਮਿਂ ¶ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਪਤਿਟ੍ਠਂ ਖ੍ਵਾਹਂ ਆਵੁਸੋ ਅਨਾਯੂਹਂ ਓਘਮਤਰਿਂ’’ਤਿ, ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਅਚ੍ਚੇਨ੍ਤਿਸੁਤ੍ਤ

ਪੁਚ੍ਛਾ – ਅਚ੍ਚੇਨ੍ਤਿਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਤਂ ਆਰਬ੍ਭ ਭਾਸਿਤਂ. ਅਞ੍ਞਤਰਾ ਭਨ੍ਤੇ ਦੇਵਤਾ ਭਗਵਨ੍ਤਂ ਏਤਦਵੋਚ–

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ,

ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ,

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਪੁਞ੍ਞਾਨਿ ਕਯਿਰਾਥ ਸੁਖਾਵਹਾਨੀ’’ਤਿ–

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ –

‘‘ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ,

ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ,

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਲੋਕਾਮਿਸਂ ਪਜਹੇ ਸਨ੍ਤਿਪੇਕ੍ਖੋ’’ਤਿ –

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਸਤ੍ਤਿਸੁਤ੍ਤ

ਪੁਚ੍ਛਾ – ਸਤ੍ਤਿਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਤਂ ਆਰਬ੍ਭ ਭਾਸਿਤਂ, ਅਞ੍ਞਤਰਾ ਭਨ੍ਤੇ ਦੇਵਤਾ ਭਗਵਨ੍ਤਂ ਏਤਦਵੋਚ–

‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ;

ਕਾਮਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ–

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਸਤ੍ਤਿਯਾ ¶ ਵਿਯ ਓਮਟ੍ਠੋ ਡਯ੍ਹਮਾਨੋਵ ਮਤ੍ਥਕੇ;

ਸਕ੍ਕਾਯਦਿਟ੍ਠਿਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇਤਿ;

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ;

ਕਾਮਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ –

ਸਤ੍ਤਿਯਾ ¶ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ,

ਸਕ੍ਕਾਯਦਿਟ੍ਠਿਪ੍ਪਮਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ –

ਜਟਾਸੁਤ੍ਤ

ਪੁਚ੍ਛਾ – ਜਟਾਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਤਂ ਆਰਬ੍ਭ ਭਾਸਿਤਂ, ਅਞ੍ਞਤਰਾ ਭਨ੍ਤੇ ਦੇਵਤਾ ਭਵਗਨ੍ਤਂ ਏਤਦਵੋਚ–

‘‘ਅਨ੍ਤੋ ਜਟਾ ਬਹਿਜਟਾ, ਜਟਾਯ ਜਟਿਤਾ ਪਜਾ;

ਤਂ ਤਂ ਗੋਤਮ ਪੁਚ੍ਛਾਮਿ, ਕੋ ਇਮਂ ਵਿਜਟਯੇ ਜਟ’’ਨ੍ਤਿ–

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ –

ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ, ਚਿਤ੍ਤਂ ਪਞ੍ਞਞ੍ਚ ਭਾਵਯਂ;

ਆਤਾਪੀ ਨਿਪਕੋ ਭਿਕ੍ਖੁ, ਸੋ ਇਮਂ ਵਿਜਟਯੇ ਜਟਂ.

ਯੇਸਂ ¶ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸਂ ਵਿਜਟਿਤਾ ਜਟਾਤਿ;

ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸੀਲੇ ¶ ਪਤਿਟ੍ਠਾਯ ਨਰੋ ਸਪਞ੍ਞੋ, ਚਿਤ੍ਤਂ ਪਞ੍ਞਞ੍ਚ ਭਾਵਯਂ;

ਆਤਾਪੀ ਨਿਪਕੋ ਭਿਕ੍ਖੁ, ਸੋ ਇਮਂ ਵਿਜਟਯੇ ਜਟਂ–

ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸਂ ਵਿਜਟਿਤਾ ਜਟਾ–

ਯਤ੍ਥ ¶ ਨਾਮਞ੍ਚ ਰੂਪਞ੍ਚ, ਅਸੇਸਂ ਉਪਰੁਜ੍ਝਤਿ;

ਪਟਿਘਂ ਰੂਪਸਞ੍ਞਾ ਚ, ਏਤ੍ਥੇਸਾ ਛਿਜ੍ਜਤੇ ਜਟਾ.

ਅਚ੍ਛਰਾਸੁਤ੍ਤ

ਪੁਚ੍ਛਾ – ਅਚ੍ਛਰਾਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਪੁਤ੍ਤਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਦੇਵਪੁਤ੍ਤੋ ਭਗਵਨ੍ਤਂ ਏਤਦਵੋਚ–

‘‘ਅਚ੍ਛਰਾਗਣਸਙ੍ਘਟ੍ਠਂ, ਪਿਸਾਚ ਗਣਸੇਵਿਤਂ;

ਵਨਨ੍ਤਂ ਮੋਹਨਂ ਨਾਮ, ਕਥਂ ਯਾਤ੍ਰਾ ਭਵਿਸ੍ਸਤੀ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਉਜੁਕੋ ਨਾਮ ਸੋ ਮਗ੍ਗੋ, ਅਭਯਾ ਨਾਮ ਸਾ ਦਿਸਾ,

ਰਥੋ ਅਕੂਜਨੋ ਨਾਮ, ਧਮ੍ਮਚਕ੍ਕੇਹਿ ਸਂਯੁਤੋ.

ਹਿਰੀ ¶ ਤਸ੍ਸ ਅਪਾਲਮ੍ਬੋ, ਸਤ੍ਯਸ੍ਸ ਪਰਿਵਾਰਣਂ;

ਧਮ੍ਮਾਹਂ ਸਾਰਥਿਂ ਬ੍ਰੂਮਿ, ਸਮ੍ਮਾਦਿਟ੍ਠਿ ਪੁਰੇਜਵਂ.

ਯਸ੍ਸ ਏਤਾਦਿਸਂ ਯਾਨਂ, ਇਤ੍ਥਿਯਾ ਪੁਰਿਸਸ੍ਸ ਵਾ;

ਸ ਵੇ ਏਤੇਨ ਯਾਨੇਨ, ਨਿਬ੍ਬਾਨਸ੍ਸੇਵ ਸਨ੍ਤਿਕੇ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਅਚ੍ਛਰਾਗਣਸਙ੍ਘੁਟ੍ਠਂ ¶ , ਪਿਸਾਚਗਣਸੇਵਿਤਂ;

ਵਨਨ੍ਤਂ ਮੋਹਨਂ ਨਾਮ, ਕਥਂ ਯਾਤ੍ਰਾ ਭਵਿਸ੍ਸਤਿ–

ਜਰਾਸੁਤ੍ਤ

ਪੁਚ੍ਛਾ – ਜਰਾਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਦੇਵਤਂ ਆਰਬ੍ਭ ਭਾਸਿਤਂ. ਅਞ੍ਞਤਰਾ ਭਨ੍ਤੇ ਦੇਵਤਾ ਭਗਵਨ੍ਤਂ ਏਤਦਵੋਚ–

‘‘ਕਿਂ ਸੁ ਯਾਵ ਜਰਾ ਸਾਧੁ, ਕਿਂ ਸੁ ਸਾਧੁ ਪਤਿਟ੍ਠਿਤਂ;

ਕਿਂ ਸੁ ਨਰਾਨਂ ਰਤਨਂ, ਕਿਂ ਸੁ ਚੋਰੇਹਿ ਦੂਹਰ’’ਨ੍ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਸੀਲਂ ਯਾਵ ਜਰਾ ਸਾਧੁ, ਸਦ੍ਧਾ ਸਾਧੁ ਪਤਿਟ੍ਠਿਤਾ;

ਪਞ੍ਞਾ ਨਰਾਨਂ ਰਤਨਂ, ਪੁਞ੍ਞਂ ਚੋਰੇਹਿ ਦੂਹਰ’’ਨ੍ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਕਿਂ ਸੁ ਯਾਵ ਜਰਾ ਸਾਧੁ.

ਕਿਂ ਸੁ ਸਾਧੁ ਪਤਿਟ੍ਠਿਤਂ.

ਕਿਂ ¶ ਸੁ ਨਰਾਨਂ ਰਤਨਂ.

ਕਿਂ ਸੁ ਚੋਰੇਹਿ ਦੂਹਰਂ.

ਦੇਵਪੁਤ੍ਤਸਂਯੁਤ੍ਤ

ਸੁਬ੍ਰਹ੍ਮਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਸੁਬ੍ਰਹ੍ਮਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਤਞ੍ਚ ਭਾਸਿਤਂ. ਕੀਦਿਸੋ ਚ ਤਤ੍ਥ ਧਮ੍ਮਪਟਿਗ੍ਗਾਹਕਸ੍ਸ ਧਮ੍ਮਸ੍ਸਵਨਾਨਿਸਂਸੋ ਅਧਿਗਤੋ.

ਵਿਸ੍ਸਜ੍ਜਨਾ – ਰਾਜਗਹੇ ¶ ਭਨ੍ਤੇ ਸੁਬ੍ਰਹ੍ਮਦੇਵਪੁਤ੍ਤਂ ਆਰਬ੍ਭ ਭਾਸਿਤਂ. ਸੁਬ੍ਰਹ੍ਮਾ ਭਨ੍ਤੇ ਦੇਵਪੁਤ੍ਤੋ ਮਰਣਭਯਭੀਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ–

‘‘ਨਿਚ੍ਚਂ ਉਤ੍ਰਸ੍ਤਮਿਦਂ ਚਿਤ੍ਤਂ, ਨਿਚ੍ਚਂ ਉਬ੍ਬਿਗ੍ਗਮਿਦਂ ਮਨੋ;

ਅਨੁਪ੍ਪਨ੍ਨੇਸੁ ਕਿਚ੍ਛੇਸੁ, ਅਥੋ ਉਪ੍ਪਤਿਤੇਸੁ ਚ;

ਸਚੇ ਅਤ੍ਥਿ ਅਨੁਤ੍ਰਸ੍ਤਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ–

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ.

‘‘ਨਾਞ੍ਞਤ੍ਰ ਬੋਜ੍ਜਾ ਤਪਸਾ, ਨਾਞ੍ਞਤ੍ਰਿਨ੍ਦ੍ਰਿਯਸਂਵਰਾ;

ਨਾਞ੍ਞਤ੍ਰ ਸਬ੍ਬਨਿਸ੍ਸਗ੍ਗਾ, ਸੋਤ੍ਥਿਂ ਪਸ੍ਸਾਮਿ ਪਾਣਿਨ’’ਨ੍ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ. ਦੇਸਨਾਪਰਿਯੋਸਾਨੇ ਚ ਭਨ੍ਤੇ ਸੁਬ੍ਰਹ੍ਮਸ੍ਸ ਦੇਵਪੁਤ੍ਤਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ, ‘‘ਯਂਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

ਨਿਚ੍ਚਂ ¶ ਉਤ੍ਰਸ੍ਤਮਿਦਂ ਚਿਤ੍ਤਂ, ਨਿਚ੍ਚਂ ਉਬ੍ਬਿਗ੍ਗਮਿਦਂ ਮਨੋ;

ਅਨੁਪ੍ਪਨ੍ਨੇਸੁ ਕਿਚ੍ਛੇਸੁ, ਅਥੋ ਉਪ੍ਪਤਿਤੇਸੁ ਚ;

ਸਚੇ ਅਤ੍ਥਿ ਅਨੁਤ੍ਰਸ੍ਤ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ-ਹੁ–

ਨਾਞ੍ਞਤ੍ਰ ¶ ਬੋਜ੍ਜਾ ਤਪਸਾ, ਨਾਞ੍ਞਤ੍ਰਿਨ੍ਦ੍ਰਿਯਸਂਵਰਾ;

ਨਾਞ੍ਞਤ੍ਰ ਸਬ੍ਬਨਿਸ੍ਸਗ੍ਗਾ, ਸੋਤ੍ਥਿਂ ਪਸ੍ਸਾਮਿ ਪਾਣਿਨਂ–

ਰੋਹਿਤਸ੍ਸਸੁਤ੍ਤ

ਪੁਚ੍ਛਾ – ਰੋਹਿਤਸ੍ਸਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰੋਹਿਤਸ੍ਸਂ ਦੇਵਪੁਤ੍ਤਂ ਆਰਬ੍ਭ ਭਾਸਿਤਂ. ਰੋਹਿਤਸ੍ਸੋ ਭਨ੍ਤੇ ਦੇਵਪੁਤ੍ਤੋ ਭਗਵਨ੍ਤਂ ਏਤਦਵੋਚ ‘‘ਯਤ੍ਥ ਨੁ ਖੋ ਭਨ੍ਤੇ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤਿ, ਸਕ੍ਕਾ ਨੁ ਖੋ ਸੋ ਭਨ੍ਤੇ ਗਮਨੇਨ ਲੋਕਸ੍ਸ ਅਨ੍ਤੋ ਞਾਤੁਂ ਵਾ ਦਟ੍ਠੁਂ ਵਾ ਪਾਪੁਣਿਤੁਂ ਵਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਤ੍ਥ ਖੋ ਆਵੁਸੋ ਨ ਜਾਯਤਿ ਨ ਜੀਯਤਿ ਨ ਮੀਯਤਿ ਨ ਚਵਤਿ ਨ ਉਪਪਜ੍ਜਤਿ, ਨਾਹਂ ਤਂ ਗਮਨੇਨ ਲੋਕਸ੍ਸ ਅਨ੍ਤਂ ਞਾਤੇਯ੍ਯਂ ਅਟ੍ਠੇਯ੍ਯਂ ਪਤ੍ਤੇਯ੍ਯਨ੍ਤਿ ਵਦਾਮੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਕੋਸਲਸਂਯੁਤ੍ਤ

ਦਹਰਸੁਤ੍ਤ

ਪੁਚ੍ਛਾ – ਦਹਰਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਭਨ੍ਤੇ ਰਾਜਾ ਪਸੇਨਦਿ ਕੋਸਲੋ ਭਗਵਨ੍ਤਂ ਏਤਦਵੋਚ ‘‘ਭਵਮ੍ਪਿ ਨੋ ਗੋਤਮੋ ‘ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਟਿਜਾਨਾਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਞ੍ਹਿ ਤਂ ਮਹਾਰਾਜ ਸਮ੍ਮਾ ਵਦਮਾਨੋਵਦੇਯ੍ਯ ‘ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ¶ , ਮਮੇਵ ਤਂ ਸਮ੍ਮਾ ਵਦਮਾਨੋ ਵਦੇਯ੍ਯਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਤਸ੍ਮਾ ¶ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਭੁਜਙ੍ਗਮਂ ਪਾਵਕਞ੍ਚ, ਖਤ੍ਤਿਯਞ੍ਚ ਯਸਸ੍ਸਿਨਂ;

ਭਿਕ੍ਖੁਞ੍ਚ ਸੀਲਸਮ੍ਪਨ੍ਨਂ, ਸਮ੍ਮਦੇਵ ਸਮਾਚਰੇ–

ਅਤ੍ਤਰਕ੍ਖਿਤਸੁਤ੍ਤ

ਪੁਚ੍ਛਾ – ਅਤ੍ਤਰਕ੍ਖਿਤਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂਯੇਵ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਇਧ ਮਯ੍ਹਂ ਭਨ੍ਤੇ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ¶ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀ’’ਤਿ ਏਵਮਾਦਿਕਂ ਵਚਨਂ ਅਵੋਚ. ਭਗਵਾ ਚ ਭਨ੍ਤੇ ਏਵਮੇਤਂ ਮਹਾਰਾਜ ਏਵਮੇਤਂ ਮਹਾਰਾਜਾਤਿ ਏਵਮਾਦਿਨਾ ਵਿਭਜਿਤ੍ਵਾ ਭਾਸਿਤਂ.

ਕਾਯੇਨ ¶ ਸਂਵਰੋ ਸਾਧੁ, ਸਾਧੁ ਵਾਚਾਯ ਸਂਵਰੋ;

ਮਨਸਾ ਸਂਵਰੋ ਸਾਧੁ, ਸਾਧੁ, ਸਬ੍ਬਤ੍ਥ ਸਂਵਰੋ;

ਸਬ੍ਬਤ੍ਥ ਸਂਵੁਤੋ ਲਜ੍ਜੀ, ਰਕ੍ਖਿਤੋਤਿ ਪਵੁਚ੍ਚਤਿ.

ਅਪ੍ਪਕਸੁਤ੍ਤ

ਪੁਚ੍ਛਾ – ਅਪ੍ਪਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂਯੇਵ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਇਧ ਮਯ੍ਹਂ ਭਨ੍ਤੇ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ਅਪ੍ਪਕਾ ਤੇ ਸਤ੍ਤਾ ਲੋਕਸ੍ਮਿਂ, ਯੇ ਉਲ਼ਾਰੇ ਉਲ਼ਾਰੇ ਭੋਗੇ ਲਭਿਤ੍ਵਾ ਨ ਚੇਵ ਮਜ੍ਜਨ੍ਤਿ ਨ ਚ ਪਮਜ੍ਜਨ੍ਤਿ, ਨ ਚ ਕਾਮੇਸੁ ਗੇਧਂ ਆਪਜ੍ਜਨ੍ਤੀ’’ਤਿ ਏਵਮਾਦਿਕਂ ਵਚਨਂ ਅਵੋਚ. ਭਗਵਾ ਚ ਭਨ੍ਤੇ ‘‘ਏਵਮੇਤਂ ਮਹਾਰਾਜ ਏਵਮੇਤਂ ਮਹਾਰਾਜਾ’’ਤਿ ਏਵਮਾਦਿਨਾ ਅਪ੍ਪਕਸੁਤ੍ਤਂ ਭਾਸਿਤਂ.

ਮਲ੍ਲਿਕਾਸੁਤ੍ਤ

ਪੁਚ੍ਛਾ – ਮਲ੍ਲਿਕਾਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂਯੇਵ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਮਲ੍ਲਿਕਂ ਦੇਵਿਂ ਏਤਦਵੋਚ ‘‘ਅਤ੍ਥਿ ਨੁ ਖੋ ਤੇ ਮਲ੍ਲਿਕੇ ਕੋਚਞ੍ਞੋ ਅਤ੍ਤਨਾ ਪਿਯਤਰੋ’’ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ਸਬ੍ਬਾਦਿਸਾ ਅਨੁਪਰਿਗਮ੍ਮ ਚੇਤਸਾਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸਬ੍ਬਾ ¶ ਦਿਸਾ ਅਨੁਪਰਿਗਮ੍ਮ ਚੇਤਸਾ, ਨੇਵਜ੍ਝਗਾ ਪਿਯਤਰਮਤ੍ਤਨਾ ਕ੍ਵਚਿ. ਏਵਂ ਪਿਯੋ ਪੁਥੁ ਅਤ੍ਤਾ ਪਰੇਸਂ, ਤਸ੍ਮਾ ਨ ਹਿਂਸੇ ਪਰਮਤ੍ਤਕਾਮੋ–

ਸਤ੍ਤਜਟਿਲਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸਤ੍ਤਜਟਿਲਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਅਚਿਰਪਕ੍ਕਨ੍ਤੇਸੁ ਸਤ੍ਤਸੁ ਚ ਜਟਿਲੇਸੁ ਸਤ੍ਤਸੁ ਚ ਨਿਗਣ੍ਠੇਸੁ ਸਤ੍ਤਸੁ ਚ ਅਚੇਲਕੇਸੁ ਸਤ੍ਤਸੁ ਚ ਏਕਸਾਟਕੇਸੁ ਸਤ੍ਤਸੁ ਚ ਪਰਿਬ੍ਬਾਜਕੇਸੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਭਨ੍ਤੇ ਰਾਜਾ ਪਸੇਨਦਿ ਕੋਸਲੋ ਭਗਵਨ੍ਤਂ ਏਤਦਵੋਚ ‘‘ਯੇ ਤੇ ਭਨ੍ਤੇ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਏਤੇ ਤੇਸਂ ਅਞ੍ਞਤਰਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਦੁਜ੍ਜਾਨਂ ਖੋ ਏਤਂ ਮਹਾਰਾਜ ਤਯਾ ਗਿਹਿਨਾ ਕਾਮਭੋਗਿਨਾ ਪੁਤ੍ਤਸਮ੍ਬਾਧਸਯਨਂ ਅਜ੍ਝਾਵਸਨ੍ਤੇਨ ਕਾਸਿਣਚਨ੍ਦਨਂ ਪਚ੍ਚਨੁਭੋਨ੍ਤੇਨ ਮਾਲਾਗਨ੍ਧਵਿਲੇਪਨਂ ਧਾਰਯਨ੍ਤੇਨ ਜਾਤਰੂਪਰਜਤਂ ਸਾਦਿਯਨ੍ਤੇਨ ‘‘ਇਮੇ ਵਾ ਅਰਹਨ੍ਤੋ, ਇਮੇ ਵਾ ਅਰਹਤ੍ਤਮਗ੍ਗਂ ਸਮਾਪਨ੍ਨਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਨ ¶ ਵਣ੍ਣਰੂਪੇਨ ਨਰੋ ਸੁਜਾਨੋ, ਨ ਵਿਸ੍ਸਸੇ ਇਤ੍ਤਰਦਸ੍ਸਨੇਨ;

ਸੁਸਞ੍ਞਤਾਨਞ੍ਹਿ ਵਿਯਞ੍ਜਨੇਨ, ਅਸਞ੍ਞਤਾ ਲੋਕਮਿਮਂ ਚਰਨ੍ਤਿ.

ਪਤਿਰੂਪਕੋ ਮਤ੍ਤਿਕਾਕੁਣ੍ਡਲੋਵ, ਲੋਹਡ੍ਢਮਾਸੋਵ ਸੁਵਣ੍ਣਛਨ੍ਨੋ;

ਚਰਨ੍ਤਿ ਲੋਕੇ ਪਰਿਵਾਰਛਨ੍ਨਾ, ਅਨ੍ਤੋ ਅਸੁਦ੍ਧਾ ਬਹਿਸੋਭਮਾਨਾ-ਹੂ

ਪਞ੍ਚਰਾਜਸੁਤ੍ਤ

ਪੁਚ੍ਛਾ – ਪਞ੍ਚਰਾਜਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂਯੇਵ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਭਗਵਨ੍ਤਂ ਏਤਦਵੋਚ ‘‘ਕਿਂ ਨੁ ਖੋ ਭਨ੍ਤੇ ਕਾਮਾਨਂ ਅਗ੍ਗ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਮਨਾਪਪਰਿਯਨ੍ਤਂ ਖ੍ਵਾਹਂ ਮਹਾਰਾਜ ਪਞ੍ਚਸੁ ਕਾਮਗੁਣੇਸੁ ਅਗ੍ਗਨ੍ਤਿ ਵਦਾਮੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਇਧ ¶ ਭਨ੍ਤੇ ਅਮ੍ਹਾਕਂ ਪਞ੍ਚਨ੍ਨਂ ਰਾਜੂਨਂ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾਨਂ ਸਮਙ੍ਗੀਭੂਤਾਨਂ ਪਰਿਚਾਰਯਮਾਨਾਨਂ ਅਯਮਨ੍ਤਰਾਕਥਾ ਉਦਪਾਦਿਂ ‘ਕਿਂ ਨੁ ਖੋ ਕਾਮਾਨਂ ਅਗ੍ਗ’ਨ੍ਤਿ–

ਪਦੁਮਂ ¶ ਯਥਾ ਕੋਕਨਦਂ ਸੁਗਨ੍ਧਂ, ਪਾਤੋ ਸਿਯਾ ਫੁਲ੍ਲਮਵੀਤਗਨ੍ਧਂ. ਅਙ੍ਗੀਰਸਂ ਪਸ੍ਸ ਵਿਰੋਚਮਾਨਂ, ਤਪਨ੍ਤਮਾਦਿਚ੍ਚਮਿਵਨ੍ਤਲਿਕ੍ਖੇ–

ਦੁਤਿਯਅਪੁਤ੍ਤਕਸੁਤ੍ਤ

ਪੁਚ੍ਛਾ – ਦੁਤਿਯਅਪੁਤ੍ਤਕਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਰਾਜਾਨਂਯੇਵ ਪਸੇਨਦਿਂ ਕੋਸਲਂ ਆਰਬ੍ਭ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਇਧ ਭਨ੍ਤੇ ਸਾਵਤ੍ਥਿਯਂ ਸੇਟ੍ਠਿ ਗਹਪਤਿ ਕਾਲਙ੍ਕਤੋ, ਤਮਹਂ ਅਪੁਤ੍ਤਕਂ ਸਾਪਤੇਯ੍ਯਂ ਰਾਜਨ੍ਤੇਪੁਰਂ ਅਤਿਹਰਿਤ੍ਵਾ ਆਗਚ੍ਛਾਮੀ’’ਤਿ ਏਵਮਾਦਿਕਂ ਵਚਨਂ ਅਵੋਚ. ਭਗਵਾ ਚ ਭਨ੍ਤੇ ‘‘ਏਵਮੇਤਂ ਮਹਾਰਾਜ, ਏਵਮੇਤਂ ਮਹਾਰਾਜ, ਭੂਤਪੁਬ੍ਬਂ ਸੋ ਮਹਾਰਾਜ ਸੇਟ੍ਠਿ ਗਹਪਤਿ ਤਗ੍ਗਰਸਿਖਿਂ ਨਾਮ ਪਚ੍ਚੇਕਸਮ੍ਬੁਦ੍ਧਂ ਪਿਣ੍ਡਪਾਤੇਨ ਪਟਿਪਾਦੇਸੀ’’ਤਿ ਏਵਮਾਦਿਨਾ ਤਸ੍ਸ ਸੇਟ੍ਠਿਸ੍ਸ ਗਹਪਤਿਸ੍ਸ ਅਤੀਤਂ ਵਤ੍ਥੁਂ ਆਹਰਿਤ੍ਵਾ ਪਰਿਯੋਸਾਨੇ ਚਤੂਹਿ ਗਾਥਾਹਿ ਭਾਸਿਤਂ.

ਧਞ੍ਞਂ ¶ ਧਨਂ ਰਜਤਂ ਜਾਤਰੂਪਂ, ਪਰਿਗ੍ਗਹਂ ਵਾਪਿ ਯਦਤ੍ਥਿ ਕਿਞ੍ਚਿ,

ਦਾਸਾ ਕਮ੍ਮਕਰਾ ਪੇਸ੍ਸਾ, ਯੇ ਚਸ੍ਸ ਅਨੁਜੀਵਿਨੋ.

ਸਬ੍ਬਂ ਨਾਦਾਯ ਗਨ੍ਤਬ੍ਬਂ, ਸਬ੍ਬਂ ਨਿਕ੍ਖਿਪ੍ਪਗਾਮਿਨਂ;

ਯਞ੍ਚ ਕਰੋਤਿ ਕਾਯੇਨ, ਵਾਚਾਯ ਉਦਚੇਤਸਾ.

ਤਞ੍ਹਿ ਤਸ੍ਸ ਸਕਂ ਹੋਤਿ, ਤਂਵ ਆਦਾਯ ਗਚ੍ਛਤਿ;

ਤਂਵਸ੍ਸ ਅਨੁਗਂ ਹੋਤਿ, ਛਾਯਾਵ ਅਨਪਾਯਿਨੀ.

ਤਸ੍ਮਾ ਕਰੇਯ੍ਯ ਕਲ੍ਯਾਣਂ, ਨਿਚਯਂ ਸਮ੍ਪਰਾਯਿਕਂ;

ਪੁਞ੍ਞਾਨਿ ਪਰਲੋਕਸ੍ਮਿਂ, ਪਤਿਟ੍ਠਾ ਹੋਨ੍ਤਿ ਪਾਣਿਨਂ –

ਮਾਰਸਂਯੁਤ੍ਤ

ਤਪੋਕਮ੍ਮਸੁਤ੍ਤ

ਪੁਚ੍ਛਾ – ਤਪੋਕਮ੍ਮਸੁਤ੍ਤਂ ¶ ਪਨਾਵੁਸੋ ਭਗਵਤਾ ਜਿਨੇਨ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਉਰੁਵੇਲਾਯਂ ਭਨ੍ਤੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਗਾਥਾਯ ਅਜ੍ਝਭਾਸਿ.

‘‘ਤਪੋਕਮ੍ਮਾ ਅਪਕ੍ਕਮ੍ਮ, ਯੇਨ ਸੁਜ੍ਝਨ੍ਤਿ ਮਾਣਵਾ;

ਅਸੁਦ੍ਧੋ ਮਞ੍ਞਸਿ ਸੁਦ੍ਧੋ, ਸੁਦ੍ਧਿਮਗ੍ਗਾ ਅਪਰਦ੍ਧੋ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਅਨਤ੍ਤਸਂਹਿਤਂ ਞਤ੍ਵਾ, ਯਂ ਕਿਞ੍ਚਿ ਅਮਰਂ ਤਪਂ;

ਸਬ੍ਬਂ ਨਤ੍ਥਾਵਹਂ ਹੋਤਿ, ਫਿਯਾਰਿਤ੍ਤਂਵ ਧਮ੍ਮਨਿ;

ਸੀਲਂ ਸਮਾਧਿ ਪਞ੍ਞਞ੍ਚ, ਮਗ੍ਗਂ ਬੋਧਾਯ ਭਾਵਯਂ;

ਪਤ੍ਤੋਸ੍ਮਿ ਪਰਮਂ ਸੁਦ੍ਧਿਂ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਜਿਨੇਨ ਭਾਸਿਤਂ.

ਤਪੋਕਮ੍ਮਾ ¶ ਅਪਕ੍ਕਮ੍ਮ, ਯੇ ਨ ਸੁਜ੍ਝਨ੍ਤਿ ਮਾਣਵਾ;

ਅਸੁਦ੍ਧੋ ਮਞ੍ਞਸਿ ਸੁਦ੍ਧੋ, ਸੁਦ੍ਧਿਮਗ੍ਗਾ ਅਪਰਦ੍ਧੋ–

ਅਨਤ੍ਥਸਂਹਿਤਂ ¶ ਉਤ੍ਵਾ, ਯਂਕਿਞ੍ਚਿ ਅਮਰਂ ਤਪਂ;

ਸਬ੍ਬਂ ਨਤ੍ਥਾਵਹਂ ਹੋਤਿ, ਫਿਯਾਰਿਤ੍ਤਂਵ ਧਮ੍ਮਨਿ;

ਹਤ੍ਥਿਰਾਜਵਣ੍ਣਸੁਤ੍ਤ

ਪੁਚ੍ਛਾ – ਹਤ੍ਥਿਰਾਜਵਣ੍ਣਸੁਤ੍ਤਂ ¶ ਪਨਾਵੁਸੋ ਭਵਗਤਾ ਜਿਨੇਨ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਉਰੁਵੇਲਾਯਂ ਭਨ੍ਤੇ ਮਾਰਕਂਯੇਵ ਪਾਪਿਮਨ੍ਤਂ ਆਰਬ੍ਭ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਭਗਵਤੋ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਸਂਸਰਂ ਦੀਘਮਦ੍ਧਾਨਂ, ਵਣ੍ਣਂ ਕਤ੍ਵਾ ਸੁਭਾਸੁਭਂ;

ਅਲਂ ਤੇ ਤੇਨ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਜਿਨੇਨ ਭਾਸਿਤਂ.

ਸਂਸਰਂ ¶ ਦੀਘਮਦ੍ਧਾਨਂ, ਵਣ੍ਣਂ ਕਤ੍ਵਾ ਸੁਭਾਸੁਭਂ,

ਅਲਂ ਤੇ ਤੇਨ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕ –

ਭਿਕ੍ਖੁਨੀਸਂਯੁਤ੍ਤ

ਆਲ਼ਵਿਕਾਸੁਤ੍ਤ

ਪੁਚ੍ਛਾ – ਇਦਾਨਿ ਆਵੁਸੋ ਭਿਕ੍ਖੁਨੀ ਸਂਯੁਤ੍ਤਂ ਪੁਚ੍ਛਾਮਿ, ਯਂ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਸਾਵਿਕਾਹਿ ਥੇਰੀਹਿ ਅਤ੍ਤਨੋ

ਚ ¶ ਬੁਦ੍ਧਸਾਸਨਸ੍ਸ ਚ ਯਥਾਭੂਤਂ ਗੁਣਂ ਪਕਾਸੇਤ੍ਵਾ ਭਾਸਿਤਂ. ਤਤ੍ਥਾਵੁਸੋ ਪਠਮਂ ਪੋਰਾਣਕੇਹਿ ਮਹਾਕਸ੍ਸਪਾਦੀਹਿ ਧਮ੍ਮਸਂਗਾਹਕੇਹਿ ਥੇਰਵਰੇਹਿ ਸਂਗੀਤਂ ਆਲ਼ਵਿਕਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਆਲ਼ਵਿਕਾਯ ਭਿਕ੍ਖੁਨਿਯਾ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਆਲ਼ਵਿਕਾਯ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਵਿਵੇਕਮ੍ਹਾ ਚਾਵੇਤੁਕਾਮੋ ਆਲ਼ਵਿਕਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ–

‘‘ਨਤ੍ਥਿ ਨਿਸ੍ਸਰਣਂ ਲੋਕੇ, ਕਿਂ ਵਿਵੇਕੇਨ ਕਾਹਸਿ;

ਭੁਞ੍ਜਸ੍ਸ ਕਾਮਰਤਿਯੋ, ਮਾਹੁ ਪਚ੍ਛਾਨੁਤਾਪਿਨੀ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਅਤ੍ਥਿ ਨਿਸ੍ਸਰਣਂ ਲੋਕੇ, ਪਞ੍ਞਾਯ ਮੇ ਸੁਫੁਸ੍ਸਿਤਂ;

ਪਮਤ੍ਤਬਨ੍ਧੁ ਪਾਪਿਮ, ਨ ਤ੍ਵਂ ਜਾਨਾਸਿ ਤਂ ਪਦਂ;

ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ਤ੍ਵਂ ਕਾਮਰਤਿਂ ਬ੍ਰੂਸਿ, ਅਰਹਿ ਮਯ੍ਹ ਸਾ ਅਹੂ’’ਤਿ.

ਏਵਂ ਖੋ ਭਨ੍ਤੇ ਆਲ਼ਵਿਕਾਯ ਭਿਕ੍ਖੁਨਿਯਾ ਭਾਸਿਤਂ.

ਨਤ੍ਥਿ ¶ ਨਿਸ੍ਸਰਣਂ ਲੋਕੇ, ਕਿਂ ਵਿਵੇਕੇਨ ਕਾਹਸਿ;

ਭੁਞ੍ਜਸ੍ਸੁ ਕਾਮਰਤਿਯੋ, ਮਾਹੁ ਪਚ੍ਛਾਨੁਤਾਪਿਨੀ-ਹੁ–

ਅਤ੍ਥਿ ¶ ਨਿਸ੍ਸਰਣਂ ਲੋਕੇ, ਪਞ੍ਞਾਯ ਮੇ ਸੁਫੁਸ੍ਸਿਤਂ;

ਪਮਤ੍ਤਬਨ੍ਧੁ ਪਾਪਿਮ, ਨ ਤ੍ਵਂ ਜਾਨਾਸਿ ਤਂ ਪਦਂ.

ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ਤ੍ਵਂ ਕਾਮਰਤਿਂ ਬ੍ਰੂਸਿ, ਅਰਤਿ ਮਯ੍ਹ ਸਾ ਅਹੁ–

ਸੋਮਾਸੁਤ੍ਤ

ਪੁਚ੍ਛਾ – ਸੋਮਾਸੁਤ੍ਤਂ ¶ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਅਨ੍ਧਵਨੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਸੋਮਾਯ ਭਿਕ੍ਖੁਨਿਯਾ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਸੋਮਾਯ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਸੋਮਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ.

‘‘ਯਂ ਤਂ ਇਸੀਹਿ ਪਤ੍ਤਬ੍ਬਂ, ਠਾਨਂ ਦੁਰਭਿਸਮ੍ਭਵਂ;

ਨ ਤਂ ਦ੍ਵਙ੍ਗੁਲਪਞ੍ਞਾਯ, ਸਕ੍ਕਾ ਪਪ੍ਪੋਤੁਮਿਤ੍ਥਿਯਾ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਇਤ੍ਥਿਭਾਵੋ ਕਿਂ ਕਯਿਰਾ, ਚਿਤ੍ਤਮ੍ਹਿ ਸੁਸਮਾਹਿਤੇ;

ਞਾਣਮ੍ਹਿ ਵਤ੍ਤਮਾਨਮ੍ਹਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ;

ਯਸ੍ਸ ਨੂਨ ਸਿਯਾ ਏਵਂ, ਇਤ੍ਥਾਹਂ ਪੁਰਿਸੋਤਿ ਵਾ;

ਕਿਞ੍ਚਿ ਵਾ ਪਨ ਅਞ੍ਞਸ੍ਮਿ, ਤਂ ਮਾਰੋ ਵਤ੍ਤੁਮਰਹਤੀ’’ਤਿ.

ਏਵਂ ਖੋ ਭਨ੍ਤੇ ਸੋਮਾਯ ਭਿਕ੍ਖੁਨਿਯਾ ਅਰਿਯਸਾਵਿਕਾਯ ਭਾਸਿਤਂ.

ਯਂ ¶ ਤਂ ਇਸੀਹਿ ਪਤ੍ਤਬ੍ਬਂ, ਠਾਨਂ ਦੁਰਭਿਸਮ੍ਭਵਂ;

ਨ ਤਂ ਦ੍ਵਙ੍ਗੁਲਪਞ੍ਞਾਯ, ਸਕ੍ਕਾ ਪਪ੍ਪੋਤੁਮਿਤ੍ਥਿਯਾ–

ਇਤ੍ਥਿ ¶ ਭਾਵੋ ਕਿਂ ਕਯਿਰਾ, ਚਿਤ੍ਤਮ੍ਹਿ ਸੁਸਮਾਹਿਤੇ;

ਞਾਣਮ੍ਹਿ ਵਤ੍ਤ ਮਾਨਮ੍ਹਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

ਯਸ੍ਸ ਨੂਨ ਸਿਯਾ ਏਵਂ, ਇਤ੍ਥਾਹਂ ਪੁਰਿਸੋਤਿ ਵਾ;

ਕਿਞ੍ਚਿ ਵਾ ਪਨ ਅਞ੍ਞਸ੍ਮਿ, ਤਂ ਮਾਰੋ ਵਤ੍ਤੁਮਰਹਤਿ.

ਕਿਸਾਗੋਤਮੀਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਕਿਸਾਗੋਤਮੀਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਅਨ੍ਧਵਨੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਕਿਸਾਗੋਤਮਿਯਾ ਭਿਕ੍ਖੁਨਿਯਾ ਥੇਰਿਯਾ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਕਿਸਾਗੋਤਮਿਯਾ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਕਿਸਾਗੋਤਮਿਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ–

‘‘ਕਿਂ ਨੁ ਤ੍ਵਂ ਮਤਪੁਤ੍ਤਾਵ, ਏਕਮਾਸਿ ਰੁਦਮ੍ਮੁਖੀ;

ਵਨਮਜ੍ਝਗਤਾ ਏਕਾ, ਪੁਰਿਸਂ ਨੁ ਗਵੇਸਸੀ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਅਚ੍ਚਨ੍ਤਂ ਮਤਪੁਤ੍ਤਾਮ੍ਹਿ, ਪੁਰਿਸਾ ਏਕਦਨ੍ਤਿਕਾ;

ਨ ਸੋਚਾਮਿ ਨ ਰੋਦਾਮਿ, ਨ ਤਂ ਭਾਯਾਮਿ ਆਵੁਸੋ.

ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਕ੍ਖਨ੍ਧੋ ਪਦਾਲਿਤੋ;

ਜੇਤ੍ਵਾਨ ਮਚ੍ਚੁਨੋ ਸੇਨਂ, ਵਿਹਰਾਮਿ ਅਨਾਸਵਾ’’ਤਿ.

ਏਵਂ ਖੋ ਭਨ੍ਤੇ ਕਿਸਾਗੋਤਮਿਯਾ ਭਿਕ੍ਖੁਨਿਯਾ ਭਾਸਿਤਂ.

ਕਿਂ ¶ ਨੁ ਤ੍ਵਂ ਮਤਪੁਤ੍ਤਾਵ, ਏਕਮਾਸਿ ਰੁਦਮ੍ਮੁਖੀ;

ਵਨਮਜ੍ਝਗਤਾ ਏਕਾ, ਪੁਰਿਸਂ ਨੁ ਗਸੇਸਸਿ-ਹੁ–

ਅਚ੍ਚਨ੍ਤਂ ਮਤਪੁਤ੍ਤਾਮ੍ਹਿ, ਪੁਰਿਸਾ ਏਤਦਨ੍ਤਿਕਾ;

ਨ ਸੋਚਾਮਿ ਨ ਰੋਦਾਮਿ, ਨ ਤਂ ਭਾਯਾਮਿ ਆਵੁਸੋ.

ਸਬ੍ਬਤ੍ਥ ¶ ਵਿਹਤਾ ਨਨ੍ਦੀ, ਤਮੋਕ੍ਖਨ੍ਧੋ ਪਦਾਲਿਤੋ;

ਜੇਤ੍ਵਾਨ ਮਚ੍ਚੁਨੋ ਸੇਨਂ, ਵਿਹਰਾਮਿ ਅਨਾਸਵਾ.

ਉਪ੍ਪਲਵਣ੍ਣਾਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ਪੋਰਾਣੇਹਿ ਸਂਗੀਤਿਕਾਰਮਹਾਥੇਰਵਰੇਹਿ ਸਂਗੀਤਂ ਉਪ੍ਪਲਵਣ੍ਣਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਅਨ੍ਧਵਨੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਉਪ੍ਪਲਵਣ੍ਣਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ–

‘‘ਸੁਪੁਪ੍ਫਿਤਗ੍ਗਂ ¶ ਉਪਗਮ੍ਮ ਭਿਕ੍ਖੁਨਿ, ਏਕਾ ਤੁਵਂ ਤਿਟ੍ਠਸਿ ਸਾਲਮੂਲੇ. ਨ ਚਤ੍ਥਿ ਤੇ ਦੁਤਿਯਾ ਵਣ੍ਣਧਾਤੁ, ਬਾਲੇ ਨ ਤ੍ਵਂ ਭਾਯਸਿ ਧੁਤ੍ਤਕਾਨ’’ਨ੍ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਸਤਂ ਸਹਸ੍ਸਾਨਿਪਿ ਧੁਤ੍ਤਕਾਨਂ,

ਇਧਾਗਤਾ ਤਾਦਿਸਕਾ ਭਵੇਯ੍ਯੁਂ;

ਲੋਮਂ ਨ ਇਞ੍ਜਾਮਿ ਨ ਸਨ੍ਤਸਾਮਿ,

ਨ ਮਾਰ ਭਾਯਾਮਿ ਤਮੇਕਿਕਾਪਿ.

ਏਸਾ ਅਨ੍ਤਰਧਾਯਾਮਿ, ਕੁਚ੍ਛਿਂ ਵਾ ਪਵਿਸਾਮਿ ਤੇ;

ਪਖੁਮਨ੍ਤਰਿਕਾਯਮ੍ਪਿ, ਤਿਟ੍ਠਨ੍ਤਿਂ ਮਂ ਨ ਦਕ੍ਖਸਿ.

ਚਿਤ੍ਤਸ੍ਮਿਂ ਵਸੀਭੂਤਾਮ੍ਹਿ, ਇਦ੍ਧਿਪਾਦਾ ਸੁਭਾਵਿਤਾ;

ਸਬ੍ਬਬਨ੍ਧਨਮੁਤ੍ਤਾਮ੍ਹਿ, ਨ ਤਂ ਭਾਯਾਮਿ ਆਵੁਸੋ’’ਤਿ.

ਏਵਂ ਖੋ ਭਨ੍ਤੇ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਭਾਸਿਤਂ.

ਚਾਲਾਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਚਾਲਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਨ੍ਧਵਨੇ ਮਾਰਂਯੇਵ ਪਾਪਿਮਨ੍ਤਂ ਆਰਬ੍ਭ ਚਾਲਾਯ ਭਿਕ੍ਖੁਨਿਯਾ ਅਰਿਯਸਾਵਿਕਾਯ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਚਾਲਂ ਭਿਕ੍ਖੁਨਿਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਕਿਂ ਨੁ ਤ੍ਵਂ ਭਿਕ੍ਖੁਨਿ ਨ ਰੋਚੇਸੀ’’ਤਿ. ਜਾਤਿਂ ਖ੍ਵਾਹਂ ਆਵੁਸੋ ਨ ਰੋਚੇਮੀ’’ਤਿ.

ਕਿਂ ਨੁ ਜਾਤਿਂ ਨ ਰੋਚੇਸਿ, ਜਾਤੋ ਕਾਮਾਨਿ ਭੁਞ੍ਜਤਿ;

ਕੋ ਨੁ ਤਂ ਇਦਮਾਦਪਯਿ, ਜਾਤਿਂ ਮਾ ਰੋਚ ਭਿਕ੍ਖੁਨੀਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਜਾਤਸ੍ਸ ਮਰਣਂ ਹੋਤਿ, ਜਾਤੋ ਦੁਕ੍ਖਾਨਿ ਫੁਸ੍ਸਤਿ;

ਬਨ੍ਧਂ ਵਧਂ ਪਰਿਕ੍ਲੇਸਂ, ਤਸ੍ਮਾ ਜਾਤਿਂ ਨ ਰੋਚਯੇ.

ਬੁਦ੍ਧੋ ਧਮ੍ਮਮਦੇਸੇਸਿ, ਜਾਤਿਯਾ ਸਮਤਿਕ੍ਕਮਂ;

ਸਬ੍ਬਦੁਕ੍ਖਪ੍ਪਹਾਨਾਯ, ਸੋ ਮਂ ਸਚ੍ਚੇ ਨਿਵੇਸਯਿ.

ਯੇ ਚ ਰੂਪੂਪਗਾ ਸਤ੍ਤਾ, ਯੇ ਚ ਅਰੂਪਟ੍ਠਾਯਿਨੋ;

ਨਿਰੋਧਂ ਅਪ੍ਪਜਾਨਨ੍ਤਾ, ਆਗਨ੍ਤਾਰੋ ਪੁਨਬ੍ਭਵਨ੍ਤਿ.

ਏਵਂ ਖੋ ਭਨ੍ਤੇ ਚਾਲਾਯ ਭਿਕ੍ਖੁਨਿਯਾ ਭਾਸਿਤਂ.

ਕਿਂ ¶ ਨੁ ਜਾਤਿਂ ਨ ਰੋਚੇਸਿ, ਜਾਤੋ ਕਾਮਾਨਿ ਭੁਞ੍ਜਤਿ;

ਕੋ ਨੁ ਤਂ ਇਦਮਾਦਪਯਿ, ਜਾਤਿਂ ਮਾ ਰੋਚ ਭਿਕ੍ਖੁਨੀ.

ਜਾਤਸ੍ਸ ¶ ਮਰਣਂ ਹੋਤਿ, ਜਾਤੋ ਦੁਕ੍ਖਾਨਿ ਫੁਸ੍ਸਤਿ;

ਬਨ੍ਧਂ ਵਧਂ ਪਰਿਕ੍ਲੇਸਂ, ਤਸ੍ਮਾ ਜਾਤਿਂ ਨ ਰੋਚਯੇ.

ਬੁਦ੍ਧੋ ਧਮ੍ਮਮਦੇਸੇਸਿ, ਜਾਤਿਯਾ ਸਮਤਿਕ੍ਕਮਂ,

ਸਬ੍ਬਦੁਕ੍ਖਪ੍ਪਹਾਨਾਯ, ਸੋ ਮਂ ਸਚ੍ਚੇ ਨਿਵੇਸਯਿ.

ਸੇਲਾਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਸੇਲਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਮਾਰਂਯੇਵ ਪਾਪਿਮਨ੍ਤਂ ਆਰਬ੍ਬ੍ਭ ਸੇਲਾਯ ਭਿਕ੍ਖੁਨਿਯਾ ਅਰਿਯਸਾਵਿਕਾਯ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਸੇਲਾਯ ਭਿਕ੍ਖੁਨਿਯਾ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਕਾਮੋ ਸਮਾਧਿਮ੍ਹਾ ਚਾਵੇਤੁਕਾਮੋ ਸੇਲਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ–

ਕੇਨਿਦਂ ਪਕਤਂ ਬਿਮ੍ਬਂ, ਕ੍ਵਨੁ ਬਿਮ੍ਬਸ੍ਸ ਕਾਰਕੋ;

ਕ੍ਵਨੁ ਬਿਮ੍ਬਂ ਸਮੁਪ੍ਪਨ੍ਨਂ, ਕ੍ਵਨੁ ਬਿਮ੍ਬਂ ਨਿਰੁਜ੍ਝਤੀਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਨਯਿਦਂ ਅਤ੍ਤਕਤਂ ਬਿਮ੍ਬਂ, ਨਯਿਦਂ ਪਰਕਤਂ ਅਘਂ;

ਹੇਤੁਂ ਪਟਿਚ੍ਚ ਸਮ੍ਭੂਤਂ, ਹੇਤੁਭਙ੍ਗਾ ਨਿਰੁਜ੍ਝਤੀਤਿ.

ਏਵਮਾਦਿਨਾ ਭਨ੍ਤੇ ਸੇਲਾਯ ਭਿਕ੍ਖੁਨਿਯਾ ਭਾਸਿਤਂ.

ਕੇਨਿਦਂ ¶ ਪਕਤਂ ਬਿਮ੍ਬਂ, ਕ੍ਵਨੁ ਬਿਮ੍ਬਸ੍ਸ ਕਾਰਕੋ;

ਕ੍ਵਨੁ ਬਿਮ੍ਬਂ ਸਮੁਪ੍ਪਨ੍ਨਂ, ਕ੍ਵਨੁ ਬਿਮ੍ਬਂ ਨਿਰੁਜ੍ਝਤਿ-ਹੁ–

ਨਯਿਦਂ ਅਤ੍ਤਕਤਂ ਬਿਮ੍ਬਂ, ਨਯਿਦਂ ਪਰਕਤਂ ਅਘਂ;

ਹੇਤੁਂ ਪਟਿਚ੍ਚ ਸਮ੍ਭੂਤਂ, ਹੇਤੁਭਙ੍ਗਾ ਨਿਰੁਜ੍ਝਤਿ.

ਵਜਿਰਾਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਪੋਰਾਣਕੇਹਿ ਮਹਾਕਸ੍ਸਪਾਦੀਹਿ ਧਮ੍ਮਸਂਗਾਹਕਥੇਰਵਰੇਹਿ ਸਂਗੀਤਂ ਵਜਿਰਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਮਾਰਂ ਪਾਪਿਮਨ੍ਤਂ ਆਰਬ੍ਭ ਵਜਿਰਾਯ ਥੇਰਿਯਾ ਭਿਕ੍ਖੁਨਿਯਾ ਭਾਸਿਤਂ. ਮਾਰੋ ਭਨ੍ਤੇ ਪਾਪਿਮਾ ਪੁਰਿਮਨਯੇਨੇਵ ਵਜਿਰਂ ਭਿਕ੍ਖੁਨਿਂ ਗਾਥਾਯ ਅਜ੍ਝਭਾਸਿ–

ਕੇਨਾਯਂ ¶ ਪਕਤੋ ਸਤ੍ਤੋ, ਕੁਵਂ ਸਤ੍ਤਸ੍ਸ ਕਾਰਕੋ,

ਕੁਵਂ ਸਤ੍ਤੋ ਸਮੁਪ੍ਪਨ੍ਨੋ, ਕੁਵਂ ਸਤ੍ਤੋ ਨਿਰੁਜ੍ਝਤੀਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਕਿਂ ਨੁ ਸਤ੍ਤੋਤਿ ਪਚ੍ਚੇਸਿ, ਮਾਰਦਿਟ੍ਠਿਗਤਂ ਨੁ ਤੇ;

ਸੁਦ੍ਧਸਙ੍ਖਾਰਪੁਞ੍ਜੋਯਂ, ਨਯਿਧ ਸਤ੍ਤੁਪਲਬ੍ਭਤਿ.

ਯਥਾ ਹਿ ਅਙ੍ਗਸਮ੍ਭਾਰਾ, ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ, ਹੋਤਿ ਸਤ੍ਤੋਤਿ ਸਮ੍ਮੁਤਿ.

ਦੁਕ੍ਖਮੇਵ ਹਿ ਸਮ੍ਭੋਤਿ, ਦੁਕ੍ਖਂ ਤਿਟ੍ਠਤਿ ਵੇਤਿ ਚ,

ਨਾਞ੍ਞਤ੍ਰ ਦੁਕ੍ਖਾ ਸਮ੍ਭੋਤਿ, ਨਾਞ੍ਞਂ ਦੁਕ੍ਖਾ ਨਿਰੁਜ੍ਝਤੀਤਿ.

ਏਵਂ ਖੋ ਭਨ੍ਤੇ ਵਜਿਰਾਯ ਭਿਕ੍ਖੁਨਿਯਾ ਭਾਸਿਤਂ.

ਕੇਨਾਯਂ ਪਕਤੋ ਸਤ੍ਤੋ, ਕੁਵਂ ਸਤ੍ਤਸ੍ਸਕਾਰਕੋ;

ਕੁਵਂ ਸਤ੍ਤੋ ਸਮੁਪ੍ਪਨ੍ਨੋ, ਕੁਵਂ ਸਤ੍ਤੋ ਨਿਰੁਜ੍ਝਤਿ-ਹੁ–

ਕਿਂ ¶ ਨੁ ਸਤ੍ਤੋਤਿ ਪਚ੍ਚੇਸਿ, ਮਾਰ ਦਿਟ੍ਠਿਗਤਂ ਨੁ ਤੇ;

ਸੁਦ੍ਧਸਙ੍ਖਾਰਪੁਞ੍ਜੋਯਂ, ਨਯਿਧ ਸਤ੍ਤੁਪਲਬ੍ਭਤਿ.

ਬ੍ਰਹ੍ਮਸਂਯੁਤ੍ਤ

ਗਾਰਵਸੁਤ੍ਤ

ਪੁਚ੍ਛਾ – ਬ੍ਰਹ੍ਮਸਂਯੁਤ੍ਤੇ ¶ ਆਵੁਸੋ ਪੋਰਾਣੇਹਿ ਮਹਾਕਸ੍ਸਪਥੇਰਾਦੀਹਿ ਧਮ੍ਮਸਂਗਾਹਕਥੇਰਵਰੇਹਿ ਦੁਤਿਯਂ ਸਂਗੀਤਂ ਗਾਰਵਸੁਤ੍ਤਂ ਕਤ੍ਥ ਕਥਞ੍ਚ ਸਮੁਪ੍ਪਨ੍ਨਂ.

ਵਿਸ੍ਸਜ੍ਜਨਾ – ਉਰੁਵੇਲਾਯਂ ਭਨ੍ਤੇ ਸਮੁਪ੍ਪਨ੍ਨਂ. ਭਗਵਾ ਭਨ੍ਤੇ ਉਰੁਵੇਲਾਯਂ ਵਿਹਰਤਿ ਨਜ੍ਜਾ ਨੇਰਞ੍ਜਰਾਯ ਤੀਰੇ ਅਜਪਾਲਨਿਗ੍ਰੋਧਮੂਲੇ ਪਠਮਾਭਿਸਮ੍ਬੁਦ੍ਧੋ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਦੁਕ੍ਖਂ ਖੋ ਅਗਾਰਵੋ ਵਿਹਰਤਿ ਅਪ੍ਪਤਿਸ੍ਸੋ, ਕਂ ਨੁ ਖ੍ਵਾਹਂ ਸਮਣਂ ਵਾ ਬ੍ਰਾਹ੍ਮਣਂ ਵਾ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰੇਯ੍ਯ’’ਨ੍ਤਿ.

ਅਥ ਖੋ ਭਨ੍ਤੇ ਭਗਵਤੋ ਏਤਦਹੋਸਿ ‘‘ਅਪਰਿਪੁਣ੍ਣਸ੍ਸ ਖੋ ਸੀਲਕ੍ਖਨ੍ਧਸ੍ਸ ਪਾਰਿਪੂਰਿਯਾ ਅਞ੍ਞਂ ਸਮਣਂ ਵਾ ਬ੍ਰਾਹ੍ਮਣਂ ਵਾ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰੇਯ੍ਯੁਂ, ਨ ਖੋ ਪਨਾਹਂ ਪਸ੍ਸਾਮਿ ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਤ੍ਤਨਾ ਸੀਲਸਮ੍ਪਨ੍ਨਤਰਂ ਅਞ੍ਞਂ ਸਮਣਂ ਵਾ

ਬ੍ਰਾਹ੍ਮਣਂ ¶ ਵਾ, ਯਮਹਂ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰੇਯ੍ਯੁਂ.

ਅਪਰਿਪੁਣ੍ਣਸ੍ਸ ਖੋ ਸਮਾਧਿਕ੍ਖਨ੍ਧਸ੍ਸ;

ਅਪਰਿਪੁਣ੍ਣਸ੍ਸ ਖੋ ਪਞ੍ਞਾਕ੍ਖਨ੍ਧਸ੍ਸ;

ਅਪਰਿਪੁਣ੍ਣਸ੍ਸ ਖੋ ਵਿਮੁਤ੍ਤਿਕ੍ਖਨ੍ਧਸ੍ਸ.

ਅਪਰਿਪੁਣ੍ਣਸ੍ਸ ਖੋ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਸ੍ਸ ਪਾਰਿਪੂਰਿਯਾ ਅਞ੍ਞਂ ਸਮਣਂ ਵਾ ਬ੍ਰਾਹ੍ਮਣਂ ਵਾ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਨਿਸ੍ਸਾਯ ਵਿਹਰੇਯ੍ਯਂ. ਨ ਖੋ ਪਨਾਹਂ ਪਸ੍ਸਾਮਿ ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਤ੍ਤਨਾ ਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਤਰਂ ਅਞ੍ਞਂ ਸਮਣਂ ਵਾ ਬ੍ਰਾਹ੍ਮਣਂ ਵਾ, ਯਮਹਂ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰੇਯ੍ਯਂ. ਯਂਨੂਨਾਹਂ ਯ੍ਵਾਯਂ ਧਮ੍ਮੋ ਮਯਾ ਅਭਿਸਮ੍ਬੁਦ੍ਧੋ, ਤਮੇਵ ਧਮ੍ਮਂ ਸਕ੍ਕਤ੍ਵਾ ਗਰੁਂ ਕਤ੍ਵਾ ਉਪਨਿਸ੍ਸਾਯ ਵਿਹਰੇਯ੍ਯ’’ਨ੍ਤਿ. ਏਵਂ ਖੋ ਭਨ੍ਤੇ ਭਗਵਤੋ ਚੇਤਸੋ ਪਰਿਵਿਤਕ੍ਕਵਸੇਨ ਉਪ੍ਪਨ੍ਨਂ.

ਯੇ ¶ ਚ ਅਤੀਤਾ ਸਮ੍ਬੁਦ੍ਧਾ, ਯੇ ਚ ਬੁਦ੍ਧਾ ਅਨਾਗਤਾ;

ਯੋ ਚੇਤਰਹਿ ਸਮ੍ਬੁਦ੍ਧੋ, ਬਹੂਨਂ ਸੋਕਨਾਸਨੋ;

ਸਬ੍ਬੇ ਸਦ੍ਧਮ੍ਮਗਰੁਨੋ, ਵਿਹਂਸੁ ਵਿਹਰਨ੍ਤਿ ਚ;

ਤਥਾਪਿ ਵਿਹਰਿਸ੍ਸਨ੍ਤਿ, ਏਸਾ ਬੁਦ੍ਧਾਨ ਧਮ੍ਮਤਾ.

ਤਸ੍ਮਾ ਹਿ ਅਤ੍ਤਕਾਮੇਨ, ਮਹਤ੍ਤਮਭਿਕਙ੍ਖਤਾ;

ਸਦ੍ਧਮ੍ਮੋ ਗਰੁਕਾਤਬ੍ਬੋ, ਸਰਂ ਬੁਦ੍ਧਾਨ ਸਾਸਨਂ.

ਅਞ੍ਞਰਤਬ੍ਰਹ੍ਮਸੁਤ੍ਤ

ਪੁਚ੍ਛਾ- ਤਤ੍ਥਾਵੁਸੋ ¶ ਪੋਰਾਣਕੇਹਿ ਮਹਾਕਸ੍ਸਪਾਦੀਹਿ ਧਮ੍ਮਸਂਗਾਹਕਥੇਰਵਰੇਹਿ ਪਠਮਂ ਸਂਗੀਤਂ ਅਞ੍ਞਤਰਬ੍ਰਹ੍ਮਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਬ੍ਰਹ੍ਮਲੋਕੇ ਭਨ੍ਤੇ ਅਞ੍ਞਤਰਂ ਬ੍ਰਹ੍ਮਾਨਂ ਆਰਬ੍ਭ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਭਾਸਿਤਂ. ਅਞ੍ਞਤਰਸ੍ਸ ਭਨ੍ਤੇ ਬ੍ਰਹ੍ਮੁਨੋ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ ‘‘ਨਤ੍ਥਿ ਸੋ ਸਮਣੋ ਵਾ ਬ੍ਰਾਹ੍ਮਣੋ ਵਾ, ਯੋ ਇਧ ਆਗਚ੍ਛੇਯ੍ਯਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਅਜ੍ਜਾਪਿ ਤੇ ਆਵੁਸੋ ਸਾ ਦਿਟ੍ਠਿ, ਯਾ ਤੇ ਦਿਟ੍ਠਿ ਪੁਰੇ ਅਹੁ;

ਪਸ੍ਸਸਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰਨ੍ਤਿ;

ਏਵਂ ਖੋ ਭਨ੍ਤੇ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਭਾਸਿਤਂ.

ਅਜ੍ਜਾਪਿ ¶ ਤੇ ਆਵੁਸੋ ਸਾ ਦਿਟ੍ਠਿ, ਯਾ ਤੇ ਦਿਟ੍ਠਿ ਪੁਰੇ ਅਹੁ;

ਪਸ੍ਸਸਿ ਵੀਤਿਵਤ੍ਤਨ੍ਤ, ਬ੍ਰਹ੍ਮਲੋਕੇ ਪਭਸ੍ਸਰਂ-ਹੁ–

ਨ ਮੇ ਮਾਰਿਸ ਸਾ ਦਿਟ੍ਠਿ, ਯਾ ਮੇ ਦਿਟ੍ਠਿ ਪੁਰੇ ਅਹੁ;

ਪਸ੍ਸਾਮਿ ਵੀਤਿਵਤ੍ਤਨ੍ਤਂ, ਬ੍ਰਹ੍ਮਲੋਕੇ ਪਭਸ੍ਸਰਂ;

ਸ੍ਵਾਹਂ ਅਜ੍ਜ ਕਥਂ ਵਜ੍ਜਂ, ਅਹਂ ਨਿਚ੍ਚੋਮ੍ਹਿ ਸਸ੍ਸਤੋ ਹੁ–

ਤੇਵਿਜ੍ਜਾ ¶ ਇਦ੍ਧਿਪਤ੍ਤਾ ਚ, ਚੇਤੋਪਰਿਯਾਯ ਕੋਵਿਦਾ;

ਖੀਣਾਸਵਾ ਅਰਹਨ੍ਤੋ, ਬਹੂ ਬੁਦ੍ਧਸ੍ਸ ਸਾਵਕਾ-ਹੁ–

ਅਰੁਣਵਤੀਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਅਰੁਣਵਤੀਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭੂਤਪੁਬ੍ਬਂ ਭਿਕ੍ਖਵੇ ਰਾਜਾ ਅਹੋਸਿ ਅਰੁਣਵਾ ਨਾਮ. ਰਞ੍ਞੋ ਖੋ ਪਨ ਭਿਕ੍ਖਵੇ ਅਰੁਣਵਤੋ ਅਰੁਣਵਤੀ ਨਾਮ ਰਾਜਧਾਨੀ ਅਹੋਸੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਅਰੁਣਵਤੀ ਸੁਤ੍ਤਂ ਭਾਸਿਤਂ.

ਆਰਮ੍ਭਥ ¶ ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ;

ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ;

ਯੋ ਇਮਸ੍ਮਿਂ ਧਮ੍ਮਵਿਨਯੇ, ਅਪ੍ਪਮਤ੍ਤੋ ਵਿਹਸ੍ਸਤਿ;

ਪਹਾਯ ਜਾਤਿ ਸਂਸਾਰਂ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤਿ-ਹੁ–

ਬ੍ਰਾਹ੍ਮਣਸਂਯੁਤ੍ਤ

ਧਨਞ੍ਜਾਨੀਸੁਤ੍ਤ

ਪੁਚ੍ਛਾ – ਬ੍ਰਾਹ੍ਮਣਸਂਯੁਤ੍ਤੇ ¶ ਆਵੁਸੋ ਪਠਮਂ ਸਂਗੀਤਂ ਧਨਞ੍ਜਾਨੀਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਭਾਰਦ੍ਵਾਜਗੋਤ੍ਤਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਭਾਰਦ੍ਵਾਜਗੋਤ੍ਤੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਗਾਥਾਯ ਅਜ੍ਝਭਾਸਿ.

‘‘ਕਿਂ ਸੁ ਛੇਤ੍ਵਾ ਸੁਖਂ ਸੇਤਿ,

ਕਿਂ ਸੁ ਛੇਤ੍ਵਾ ਨ ਸੋਚਤਿ;

ਕਿਸ੍ਸਸ੍ਸੁ ਏਕਧਮ੍ਮਸ੍ਸ,

ਵਧਂ ਰੋਚੇਸਿ ਗੋਤਮਾ’’ਤਿ–

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਕੋਧਂ ਛੇਤ੍ਵਾ ਸੁਖਂ ਸੇਤਿ;

ਕੋਧਂ ਛੇਤ੍ਵਾ ਨ ਸੋਚਤਿ;

ਕੋਧਸ੍ਸ ਵਿਸਮੂਲਸ੍ਸ,

ਮਧੁਰਗ੍ਗਸ੍ਸ ਬ੍ਰਾਹ੍ਮਣ;

ਵਧਂ ਅਰਿਯਾ ਪਸਂਸਨ੍ਤਿ,

ਤਞ੍ਹਿ ਛੇਤ੍ਵਾ ਨ ਸੋਚਤੀ’’ਤਿ;

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਕਿਂ ¶ ਸੁ ਛੇਤ੍ਵਾ ਸੁਖਂਸੇਤਿ, ਕਿਂ ਸੁ ਛੇਤ੍ਵਾ ਨ ਸੋਚਤਿ;

ਕਿਸ੍ਸਸ੍ਸੁ ਏਕਧਮ੍ਮਸ੍ਸ, ਵਧਂ ਰੋਚੇਸਿ ਗੋਤਮ–

ਪੁਚ੍ਛਾ – ਇਮਞ੍ਚ ¶ ਪਨਾਵੁਸੋ ਧਮ੍ਮਦੇਸਨਂ ਸੁਤ੍ਵਾ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਕੀਦਿਸਂ ਪਸਨ੍ਨਾਕਾਰਮਕਾਸਿ, ਕੀਵਤ੍ਤਕਞ੍ਚ ਅਤ੍ਥਂ ਸਮ੍ਪਾਦੇਸਿ.

ਵਿਸ੍ਸਜ੍ਜਨਾ – ਇਮਞ੍ਚ ਪਨ ਭਨ੍ਤੇ ਧਮ੍ਮਦੇਸਨਂ ਸੁਤ੍ਵਾ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ‘‘ਅਭਿਕ੍ਕਨ੍ਤਂ ਭੋ ਗੋਤਮ, ਅਭਿਕ੍ਕਨ੍ਤਂ ਭੋ ਗੋਤਮ, ਸੇਯ੍ਯਥਾਪਿ ਭੋ ਗੋਤਮ ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀ’’ਤਿ ਏਵਮਾਦਿਨਾ ਭਨ੍ਤੇ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਪਸਨ੍ਨਾਕਾਰਮਕਾਸਿ. ਇਮਞ੍ਚ ਪਨ ਭਨ੍ਤੇ ਧਮ੍ਮਦੇਸਨਂ ਸੁਤ੍ਵਾ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਉਪਸਮ੍ਪਦਂ ਯਾਚਿਤ੍ਵਾ ਅਚਿਰੂਪਸਮ੍ਪਨ੍ਨੋ ਯਾਵ ਅਰਹਤ੍ਤਂ ਸਮ੍ਪਾਦੇਸਿ.

ਅਕ੍ਕੋਸਸੁਤ੍ਤ

ਪੁਚ੍ਛਾ – ਅਕ੍ਕੋਸਕਭਾਰਦ੍ਵਾਜਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਅਕ੍ਕੋਸਕਭਾਰਦ੍ਵਾਜਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਅਕ੍ਕੋਸਕਭਾਰਦ੍ਵਾਜੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਸਬ੍ਭਾਹਿ ਫਰੁਸਾਹਿ ਵਾਚਾਹਿ ਭਗਵਨ੍ਤਂ ਅਕ੍ਕੋਸਤਿ ਪਰਿਭਾਸਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਂ ਕਿਂ ਮਞ੍ਞਸਿ ਬ੍ਰਾਹ੍ਮਣ, ਅਪਿ ਨੁਖੋ ਤੇ ਆਗਚ੍ਛਨ੍ਤਿ ਮਿਤ੍ਤਾਮਚ੍ਚਾ ¶ ਞਾਤਿਸਾਲੋਹਿਤਾ ਅਤਿਤਿਯੋ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਅਕ੍ਕੋਧਸ੍ਸ ¶ ਕੁਤੋ ਕੋਧੋ,

ਦਨ੍ਤਸ੍ਸ ਸਮਜੀਵਿਨੋ;

ਸਮ੍ਮਦਞ੍ਞਾ ਵਿਮੁਤ੍ਤਸ੍ਸ,

ਉਪਸਨ੍ਤਸ੍ਸ ਤਾਦਿਨੋ.

ਤਸ੍ਸੇਵ ¶ ਤੇਨ ਪਾਪਿਯੋ,

ਯੋ ਕੁਦ੍ਧਂ ਪਟਿਕੁਜ੍ਝਤਿ;

ਕੁਦ੍ਧਂ ਅਪ੍ਪਟਿਕੁਜ੍ਝਨ੍ਤੋ,

ਸਙ੍ਗਾਮਂ ਜੇਤਿ ਦੁਜ੍ਜਯਂ.

ਉਭਿਨ੍ਨਮਤ੍ਥਂ ਚਰਤਿ,

ਅਤ੍ਤਨੋ ਚ ਪਰਸ੍ਸ ਚ;

ਪਰਂ ਸਙ੍ਕੁਪਿਤਂ ਞਤ੍ਵਾ,

ਯੋ ਸਤੋ ਉਪਸਮ੍ਮਤਿ.

ਉਭਿਨ੍ਨਂ ਤਿਕਿਚ੍ਛਨ੍ਤਾਨਂ,

ਅਤ੍ਤਨੋ ਚ ਪਰਸ੍ਸ ਚ;

ਜਨਾ ਮਞ੍ਞਨ੍ਤਿ ਬਾਲੋਤਿ,

ਯੇ ਧਮ੍ਮਸ੍ਸ ਅਕੋਵਿਦਾ.

ਪੁਚ੍ਛਾ – ਇਮਞ੍ਚ ¶ ਪਨਾਵੁਸੋ ਧਮ੍ਮਦੇਸਨਂ ਸੁਤ੍ਵਾ ਅਕ੍ਕੋਸਕਭਾਰਦ੍ਵਾਜੋ ਬ੍ਰਾਹ੍ਮਣੋ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਕੀਦਿਸਂ ਪਸਨ੍ਨਾਕਾਰਮਕਾਸਿ. ਕੀਵਤ੍ਤਕਞ੍ਚ ਅਤ੍ਥਂ ਸਮ੍ਪਾਦੇਸਿ.

ਵਿਸ੍ਸਜ੍ਜਨਾ – ਇਮਞ੍ਚ ਪਨ ਭਨ੍ਤੇ ਧਮ੍ਮਦੇਸਨਂ ਸੁਤ੍ਵਾ ਅਕ੍ਕੋਸਕਭਾਰਦ੍ਵਾਜੋ ਬ੍ਰਾਹ੍ਮਣੋ ‘‘ਅਭਿਕ੍ਕਨ੍ਤਂ ਭੋ ਗੋਤਮ, ਅਭਿਕ੍ਕਨ੍ਤਂ ਭੋ ਗੋਤਮਾ’’ਤਿ ਏਵਮਾਦਿਨਾ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਪਸਨ੍ਨਾਕਾਰਮਕਾਸਿ. ਯਾਵ ਅਰਹਤ੍ਤਾ ਚ ਪਨ ਮਹਨ੍ਤਂ ਅਤ੍ਥਂ ਸਮ੍ਪਾਦੇਸਿ.

ਬਹੁਧੀਤਰਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ ਜਾਨਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਬ੍ਰਾਹ੍ਮਣਸਂਯੁਤ੍ਤੇ ਬਹੁਧੀਤਰਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਅਞ੍ਞਤਰਸ੍ਮਿਂ ਵਨਸਣ੍ਡੇ ਅਞ੍ਞਤਰਂ ਭਾਰਦ੍ਵਾਜਗੋਤ੍ਤਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਗੋਣੇ ਨਟ੍ਠੇ ਪਰਿਯੇਸਨ੍ਤੋ ਭਗਵਤੋ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ.

‘‘ਨ ਹਿ ਨੂਨਿਮਸ੍ਸ ਸਮਣਸ੍ਸ, ਬਲੀਬਦ੍ਦਾ ਚਤੁਦ੍ਦਸ;

ਅਜ੍ਜਸਟ੍ਠਿਂ ਨ ਦਿਸ੍ਸਨ੍ਤਿ, ਤੇਨਾਯਂ ਸਮਣੋ ਸੁਖੀ;

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਤਿਲਾਖੇਤ੍ਤਸ੍ਮਿ ਪਾਪਕਾ;

ਏਕਪਣ੍ਣਾ ਦੁਪਣ੍ਣਾ ਚ, ਤੇਨਾਯਂ ਸਮਣੋ ਸੁਖੀ.

(ਪੇਯ੍ਯਾਲ)

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਪਚ੍ਚੂਸਮ੍ਹਿ ਇਣਾਯਿਕਾ;

ਦੇਥ ਦੇਥਾਤਿ ਚੋਦੇਨ੍ਤਿ, ਤੇਨਾਯਂ ਸਮਣੋ ਸੁਖੀ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਬਲੀਬਦ੍ਦਾ ਚਤੁਦ੍ਦਸ;

ਅਜ੍ਜਸਟ੍ਠਿਂ ਨ ਦਿਸ੍ਸਨ੍ਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ;

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਤਿਲਾਖੇਤ੍ਤਸ੍ਮਿ ਪਾਪਕਾ;

ਏਕਪਣ੍ਣਾ ਦੁਪਣ੍ਣਾ ਚ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(ਪੇਯ੍ਯਾਲ)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਪਚ੍ਚੂਸਮ੍ਹਿ ਇਣਾਯਿਕਾ;

ਦੇਥ ਦੇਥਾਤਿ ਚੋਦੇਨ੍ਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

(੧)

ਨ ¶ ਹਿ ਨੂਨਿਮਸ੍ਸ ਸਮਣਸ੍ਸ, ਬਲੀਬਦ੍ਦਾ ਚਤੁਦ੍ਦਸ;

ਅਜ੍ਜਸਟ੍ਠਿਂ ਨ ਦਿਸ੍ਸਨ੍ਤਿ, ਤੇਨਾਹਂ ਸਮਣੋ ਸੁਖੀ.

(੨)

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਤਿਲਾਖੇਤ੍ਤਸ੍ਮਿ ਪਾਪਕਾ;

ਏਕਪਣ੍ਣਾ ਦੁਪਣ੍ਣਾ ਚ, ਤੇਨਾਯਂ ਸਮਣੋ ਸੁਖੀ.

(੩)

ਨ ¶ ਹਿ ਨੂਨਿਮਸ੍ਸ ਸਮਣਸ੍ਸ, ਤੁਚ੍ਛਕੋਟ੍ਠਸ੍ਮਿ ਮੂਸਿਕਾ;

ਉਸ੍ਸੋਲ਼੍ਹਿਕਾਯ ਨਚ੍ਚਨ੍ਤਿ, ਤੇਨਾਯਂ ਸਮਣੋ ਸੁਖੀ.

(੪)

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਸਨ੍ਥਾਰੋ ਸਤ੍ਤਮਾਸਿਕੋ;

ਉਪ੍ਪਾਟਕੇਹਿ ਸਞ੍ਛਨ੍ਨੋ, ਤੇਨਾਯਂ ਸਮਣੋ ਸੁਖੀ.

(੫)

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਵਿਧਵਾ ਸਤ੍ਤ ਧੀਤਰੋ;

ਏਕਪੁਤ੍ਤਾ ਦੁਪੁਤ੍ਤਾ ਚ, ਤੇਨਾਯਂ ਸਮਣੋ ਸੁਖੀ.

(੬)

ਨ ¶ ਹਿ ਨੂਨਿਮਸ੍ਸ ਸਮਣਸ੍ਸ, ਪਿਙ੍ਗਲਾ ਤਿਲਕਾਹਤਾ;

ਸੋਤ੍ਤਂ ਪਾਦੇਨ ਬੋਧੇਤਿ, ਤੇਨਾਯਂ ਸਮਣੋ ਸੁਖੀ.

(੭)

ਨ ਹਿ ਨੂਨਿਮਸ੍ਸ ਸਮਣਸ੍ਸ, ਪਚ੍ਚੂਸਮਿ ਇਣਾਯਿਕਾ;

ਦੇਥ ਦੇਥਾਤਿ ਚੋਦੇਨ੍ਤਿ, ਤੇਨਾਯਂ ਸਮਣੋ ਸੁਖੀ.

(੧)

ਨ ¶ ਹਿ ਮਯ੍ਹਂ ਬ੍ਰਾਹ੍ਮਣ, ਬਲੀਬਦ੍ਦਾ ਚਤੁਦ੍ਦਸ;

ਅਜ੍ਜਸਟ੍ਠਿਂ ਨ ਦਿਸ੍ਸਨ੍ਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੨)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਤਿਲਾਖੇਤ੍ਤਸ੍ਮਿ ਪਾਪਕਾ;

ਏਕਪਣ੍ਣਾ ਦੁਪਣ੍ਣਾ ਚ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੩)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਤੁਚ੍ਛਕੋਟ੍ਠਸ੍ਮਿ ਮੂਸਿਕਾ;

ਉਸ੍ਸੋਲ਼੍ਹੀਕਾਯ ਨਚ੍ਚਨ੍ਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੪)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਸਨ੍ਥਾਰੋ ਸਤ੍ਤਮਾਸਿਕੋ;

ਉਪ੍ਪਾਟਕੇਹਿ ਸਞ੍ਛਨ੍ਨੋ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੫)

ਨ ¶ ਹਿ ਮਯ੍ਹਂ ਬ੍ਰਾਹ੍ਮਣ, ਵਿਧਵਾ ਸਤ੍ਤ ਧੀਤਰੋ;

ਏਕਪੁਤ੍ਤਾ ਦੁਪੁਤ੍ਤਾ ਚ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੬)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਪਿਙ੍ਗਲਾ ਤਿਲਕਾਹਤਾ;

ਸੋਤ੍ਤਂ ਪਾਦੇਨ ਬੋਧੇਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

(੭)

ਨ ਹਿ ਮਯ੍ਹਂ ਬ੍ਰਾਹ੍ਮਣ, ਪਚ੍ਚੂਸਮ੍ਹਿ ਇਣਾਯਿਕਾ;

ਦੇਥ ਦੇਥਾਤਿ ਚੋਦੇਨ੍ਤਿ, ਤੇਨਾਹਂ ਬ੍ਰਾਹ੍ਮਣਾ ਸੁਖੀ.

ਪੁਚ੍ਛਾ – ਇਮਞ੍ਚ ¶ ਪਨਾਵੁਸੋ ਧਮ੍ਮਦੇਸਨਂ ਸੁਤ੍ਵਾ ਸੋ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਕੀਦਿਸਂ ਪਸਨ੍ਨਾਕਾਰਮਕਾਸਿ. ਕੀਵ ਮਹਨ੍ਤਞ੍ਚ ਇਮਸ੍ਮਿਂ ਧਮ੍ਮਵਿਨਯੇ ਅਤ੍ਥਂ ਸਮ੍ਪਾਦੇਸਿ.

ਵਿਸ੍ਸਜ੍ਜਨਾ – ਇਮਞ੍ਚ ਪਨ ਭਨ੍ਤੇ ਧਮ੍ਮਦੇਸਨਂ ਸੁਤ੍ਵਾ ਸੋ ਭਾਰਦ੍ਵਾਜਗੋਤ੍ਤੋ ਬ੍ਰਾਹ੍ਮਣੋ ‘‘ਅਭਿਕ੍ਕਨ੍ਤਂ ਭੋ ਗੋਤਮ ਅਭਿਕ੍ਕਨ੍ਤਂ ਭੋ ਗੋਤਮ, ਸੇਯ੍ਯਥਾਪਿ ਭੋਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ, ਚਕ੍ਖੁਮਨ੍ਤੋ ਰੂਪਾਨਿ ਦੁਕ੍ਖਨ੍ਤੀ’’ਤਿ ਏਵਮਾਦਿਨਾ ਇਮਸ੍ਮਿ ਧਮ੍ਮਵਿਨਯੇ ਪਸਨ੍ਨੋ ਪਸਨ੍ਨਾਕਾਰਮਕਾਸਿ. ਭਗਵਤੋ ਚ ਸਨ੍ਤਿਕੇ ‘‘ਲਭੇਯ੍ਯਾਹਂ ਭੋਤੋ ਗੋਤਮਸ੍ਸ ਸਨ੍ਤਿਕੇ ਪਬ੍ਬਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ ਏਵਮਾਦਿਨਾ ਪਬ੍ਬਜ੍ਜਂ ਉਪਸਮ੍ਪਦਂ ਯਾਚਿਤ੍ਵਾ ਅਚਿਰੂਪਸਮ੍ਪਨ੍ਨੋ ਯਾਵ ਅਰਹਤ੍ਤਾ ਮਹਨ੍ਤਂ ਵਿਸੇਸਂ ਸਮ੍ਪਾਦੇਸਿ.

ਕਸਿਭਾਰਦ੍ਵਾਜਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਏਕਾਦਸਮਂ ਮਹਾਕਸ੍ਸਪਾਦੀਹਿ ਪੋਰਾਣਧਮ੍ਮਸਂਗਾਹਕਥੇਰੇਹਿ ਸਂਗੀਤਂ ਕਸਿਭਾਰਦ੍ਵਾਜਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁ ਭਨ੍ਤੇ ਦਕ੍ਖਿਣਾਗਿਰਿਸ੍ਮਿਂ ਏਕਨਾਲ਼ਾਯਂ ਬ੍ਰਾਹ੍ਮਣਗਾਮੇ ਕਸਿਭਾਰਦ੍ਵਾਜਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਕਸਿਭਾਰਦ੍ਵਾਜੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ.

‘‘ਕਸ੍ਸਕੋ ¶ ਪਟਿਜਾਨਾਸਿ, ਨ ਚ ਪਸ੍ਸਾਮਿ ਤੇ ਕਸਿਂ. ਕਸ੍ਸਕੋ ਪੁਚ੍ਛਿਤੋ ਬ੍ਰੂਹਿ, ਕਥਂ ਜਾਨੇਮੁ ਤਂ ਕਸਿ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਸਦ੍ਧਾ ਬੀਜਂ ਤਪੋ ਵੁਟ੍ਠਿ, ਪਞ੍ਞਾ ਮੇ ਯੁਗਨਙ੍ਗਲਂ;

ਹਿਰੀ ਈਸਾ ਮਨੋ ਯੋਤ੍ਤਂ, ਸਤਿ ਮੇ ਫਾਲਪਾਚਨਂ.

ਕਾਯਗੁਤ੍ਤੋ ਵਚੀਗੁਤ੍ਤੋ, ਆਹਾਰੇ ਉਦਰੇ ਯਤੋ;

ਸਚ੍ਚਂ ਕਰੋਮਿ ਨਿਦ੍ਦਾਨਂ, ਸੋਰਚ੍ਚਂ ਮੇ ਪਮੋਚਨਂ.

ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਗਚ੍ਛਤਿ ਅਨਿਵਤ੍ਤਨ੍ਤਂ, ਯਤ੍ਥ ਗਨ੍ਤ੍ਵਾ ਨ ਸੋਚਤਿ.

ਏਵਮੇਸਾ ਕਸੀ ਕਟ੍ਠਾ, ਸਾ ਹੋਤਿ ਅਮਤਪ੍ਫਲਾ;

ਏਤਂ ਕਸਿਂ ਕਸਿਤ੍ਵਾਨ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਕਸ੍ਸਕੋ ¶ ਪਟਿਜਾਨਾਸਿ, ਨ ਚ ਪਸ੍ਸਾਮਿ ਤੇ ਕਸਿਂ;

ਕਸ੍ਸਕੋ ਪੁਚ੍ਛਿਤੋ ਬ੍ਰੂਹਿ, ਕਥਂ ਜਾਨੇਮੁ ਤਂ ਕਸਿਂ.

ਸਦ੍ਧਾ ¶ ਬੀਜਂ ਤਪੋ ਵੁਟ੍ਠਿ, ਪਞ੍ਞਾ ਮੇ ਯੁਗਨਙ੍ਗਲਂ;

ਹਿਰੀ ਈਸਾ ਮਨੋ ਯੋਤ੍ਤਂ, ਸਤਿ ਮੇ ਫਾਲਪਾਚਨਂ.

ਪੁਚ੍ਛਾ – ਇਮਞ੍ਚ ¶ ਪਨਾਵੁਸੋ ਧਮ੍ਮਦੇਸਨਂ ਸੁਤ੍ਵਾ ਸੋ ਕਸਿਭਾਰਦ੍ਵਾਜੋ ਬ੍ਰਾਹ੍ਮਣੋ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਕੀਦਿਸਂ ਪਸਨ੍ਨਾਕਾਰਮਕਾਸਿ.

ਵਿਸ੍ਸਜ੍ਜਨਾ – ਇਮਞ੍ਚ ਪਨ ਭਨ੍ਤੇ ਧਮ੍ਮਦੇਸਨਂ ਸੁਤ੍ਵਾ ਕਸਿਭਾਰਦ੍ਵਾਜੋ ਬ੍ਰਾਹ੍ਮਣੋ ‘‘ਅਭਿਕ੍ਕਨ੍ਤਂ ਭੋ ਗੋਤਮ, ਅਭਿਕ੍ਕਨ੍ਤਂ ਭੋ ਗੋਤਮਾ’’ਤਿਏਵਮਾਦਿਨਾ ਇਮਸ੍ਮਿਂ ਧਮ੍ਮਵਿਨਯੇ ਪਸਨ੍ਨੋ ਪਸਨ੍ਨਾਕਾਰਮਕਾਸਿ.

ਸੇਯ੍ਯਥਾਪਿ ਭੋ ਗੋਤਮ ਉਕ੍ਕੁਜ੍ਜਿਤਂ ਵਾ ਨਿਕ੍ਕੁਜ੍ਜੇਯ੍ਯ.

ਉਦਯਸੁਤ੍ਤ

ਪੁਚ੍ਛਾ – ਉਦਯਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਉਦਯਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਉਦਯੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ ‘‘ਪਕਟ੍ਠਕੋਯਂ ਸਮਣੋ ਗੋਤਮੋ ਪੁਨਪ੍ਪੁਨਂ ਆਗਚ੍ਛਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜਂ, ਪੁਨਪ੍ਪੁਨਂ ਵਸ੍ਸਤਿ ਦੇਵਰਾਜਾ;

ਪੁਨਪ੍ਪੁਨਂ ਖੇਤ੍ਤਂ ਕਸਨ੍ਤਿ ਕਸ੍ਸਕਾ, ਪੁਨਪ੍ਪੁਨਂ ਧਞ੍ਞਮੁਪੇਤਿ ਰਟ੍ਠਂ.

ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਪੁਨਪ੍ਪੁਨਂ ¶ ਚੇਵ ਵਪਨ੍ਤਿ ਬੀਜਂ, ਪੁਨਪ੍ਪੁਨਂ ਵਸ੍ਸਤਿ ਦੇਵ ਰਾਜਾ;

ਪੁਨਪ੍ਪੁਨਂ ਖੇਤ੍ਤਂ ਕਸਨ੍ਤਿ ਕਸ੍ਸਕਾ, ਪੁਨਪ੍ਪੁਨਂ ਧਞ੍ਞਮੁਪੇਤਿ ਰਟ੍ਠਂ.

ਪੁਨਪ੍ਪੁਨਂ ¶ ਯਾਚਕਾ ਯਾਚਯਨ੍ਤਿ, ਪੁਨਪ੍ਪੁਨਂ ਦਾਨਪਤੀ ਦਦਨ੍ਤਿ;

ਪੁਨਪ੍ਪੁਨਂ ਦਾਨਪਤੀ ਦਦਿਤ੍ਵਾ, ਪੁਨਪ੍ਪੁਨਂ ਸਗ੍ਗਮੁਪੇਤਿ ਠਾਨਂ.

ਪੁਨਪ੍ਪੁਨਂ ਖੀਰਨਿਕਾ ਦੁਹਨ੍ਤਿ, ਪੁਨਪ੍ਪੁਨਂ ਵਚ੍ਛੋ ਉਪੇਤਿ ਮਾਤਰਂ;

ਪੁਨਪ੍ਪੁਨਂ ਕਿਲਮਤਿ ਫਨ੍ਦਤਿ ਚ, ਪੁਨਪ੍ਪੁਨਂ ਗਬ੍ਭਮੁਪੇਤਿ ਮਨ੍ਦੋ.

ਪੁਨਪ੍ਪੁਨਂ ਜਾਯਤਿ ਮੀਯਤਿ ਚ, ਪੁਨਪ੍ਪੁਨਂ ਸਿਵਥਿਕਂ ਹਰਨ੍ਤਿ;

ਮਗ੍ਗਞ੍ਚ ਲਦ੍ਧਾ ਅਪੁਨਬ੍ਭਵਾਯ, ਨ ਪੁਨਪ੍ਪੁਨਂ ਜਾਯਤਿ ਭੂਰਿਪਞ੍ਞੋ-ਹੁ–

ਮਾਤੁਪੋਸਕਸੁਤ੍ਤ

ਪੁਚ੍ਛਾ – ਮਾਤੁਪੋਸਕਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਮਾਤੁਪੋਸਕਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਮਾਤੁਪੋਸਕੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ ‘‘ਅਹਞ੍ਹਿ ਭੋ ਗੋਤਮ ਧਮ੍ਮੇਨ ਭਿਕ੍ਖਂ ਪਰਿਯੇਸਾਮਿ, ਧਮ੍ਮੇਨ ਭਿਕ੍ਖਂ ਪਰਿਯੇਸਿਤ੍ਵਾ ਮਾਤਾਪਿਤਰੋ ਪੋਸੇਮਿ, ਕਚ੍ਚਾਹਂ ਭੋ ਗੋਤਮ ਏਵਂਕਾਰੀ ਕਿਚ੍ਚਕਾਰੀ ਹੋਮੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਗ੍ਘ ਤ੍ਵਂ ਬ੍ਰਾਹ੍ਮਣ ਏਵਂਕਾਰੀ ਕਿਚ੍ਚਕਾਰੀ ਹੋਸਿ, ਯੋ ਖੋ ਬ੍ਰਾਹ੍ਮਣ ਧਮ੍ਮੇਨ ਭਿਕ੍ਖਂ ਪਰਿਯੇਸਤਿ, ਧਮ੍ਮੇਨ ਭਿਕ੍ਖਂ ਪਰਿਯੇਸਿਤ੍ਵਾ ਮਾਤਾਪਿਤਰੋ ਪੋਸੇਤਿ, ਬਹੁਂ ਸੋ ਪੁਞ੍ਞਂ ਪਸਵਤੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਾ.

ਯੋ ¶ ਮਾਤਰਂ ਵਾ ਪਿਤਰਂ ਵਾ, ਮਚ੍ਚੋ ਧਮ੍ਮੇਨ ਪੋਸਤਿ;

ਤਾਯ ਨਂ ਪਾਰਿਚਰਿਯਾਯ, ਮਾਤਾਪਿਤੂਸੁ ਪਣ੍ਡਿਤਾ;

ਇਧੇਵ ਨਂ ਪਸਂਸਨ੍ਤਿ, ਪੇਚ੍ਚ ਸਗ੍ਗੇ ਪਮੋਦਤਿ–

ਖੋਮਦੁਸ੍ਸਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਬ੍ਰਾਹ੍ਮਣਸਂਯੁਤ੍ਤੇ ਖੋਮਦੁਸ੍ਸਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਖੋਮਦੁਸ੍ਸੇ ਨਾਮ ਸਕ੍ਯਾਨਂ ਨਿਗਮੇ ਖੋਮਦੁਸ੍ਸਕੇ ਬ੍ਰਾਹ੍ਮਣਗਹਪਤਿਕੇ ਆਰਬ੍ਭ ਭਾਸਿਤ, ਖੋਮਦੁਸ੍ਸਕਾ ਭਨ੍ਤੇ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਏਤਦਵੋਚੁਂ ‘‘ਕੇ ਚ ਮੁਣ੍ਡਕਾ ਸਮਣਕਾ, ਕੇ ਚ ਸਭਾਧਮ੍ਮਂ ਜਾਨਿਸ੍ਸਨ੍ਤੀ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਨੇਸਾ ਸਭਾ ਯਤ੍ਥ ਨ ਸਨ੍ਤਿ ਸਨ੍ਤੋ,

ਸਨ੍ਤੋ ਨ ਤੇ ਯੇ ਨ ਵਦਨ੍ਤਿ ਧਮ੍ਮਂ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ,

ਧਮ੍ਮਂ ਵਦਨ੍ਤਾ ਚ ਭਵਨ੍ਤਿ ਸਨ੍ਤੋ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਨੇਸਾ ¶ ਸਭਾ ਯਤ੍ਥ ਨਸਨ੍ਤਿ ਸਨ੍ਤੋ,

ਸਨ੍ਤੋ ਨ ਤੇ ਯੇ ਨ ਵਦਨ੍ਤਿ ਧਮ੍ਮਂ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ,

ਧਮ੍ਮਂ ਵਦਨ੍ਤਾ ਚ ਭਵਨ੍ਤਿ ਸਨ੍ਤੋ–

ਵਙ੍ਗੀਸਸਂਯੁਤ੍ਤ

ਆਨਨ੍ਦਸੁਤ੍ਤ

ਪੁਚ੍ਛਾ – ਵਙ੍ਗੀਸਸਂਯੁਤ੍ਤੇ ¶ ਪਨਾਵੁਸੋ ਚਤੁਤ੍ਥਂ ਸਂਙ੍ਗੀਤਂ ਆਨਨ੍ਦਸੁਤ੍ਤਂ ਕਤ੍ਥਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਵਙ੍ਗੀਸਤ੍ਥੇਰਂ ਆਰਬ੍ਭ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ. ਆਯਸ੍ਮਤਾ ਭਨ੍ਤੇ ਵਙ੍ਗੀਸੋ ਆਯਸ੍ਮਨ੍ਤਂ ਆਨਨ੍ਦਂ ਗਾਥਾਯ ਅਜ੍ਝਭਾਸਿ–

‘‘ਕਾਮਰਾਗੇਨ ਡਯ੍ਹਾਮਿ, ਚਿਤ੍ਤਂ ਮੇ ਪਰਿਡਯ੍ਹਤਿ;

ਸਾਧੁ ਨਿਬ੍ਬਾਪਨਂ ਬ੍ਰੂਹਿ, ਅਨੁਕਮ੍ਪਾਯ ਗੋਤਮਾ’’ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਸਞ੍ਞਾਯ ਵਿਪਰਿਯੇਸਾ, ਚਿਤ੍ਤਂ ਤੇ ਪਰਿਡਯ੍ਹਤਿ;

ਨਿਮਿਤ੍ਤਂ ਪਰਿਵਜ੍ਜੇਹਿ, ਸੁਭਂ ਰਾਗੂਪਸਂਹਿਤਂ;

ਸਙ੍ਖਾਰੇ ਪਰਤੋ ਪਸ੍ਸ, ਦੁਕ੍ਖਤੋ ਮਾ ਚ ਅਤ੍ਤਤੋ;

ਨਿਬ੍ਬਾਪੇਹਿ ਮਹਾਰਾਗਂ, ਮਾ ਡਯ੍ਹਿਤ੍ਥੋ ਪੁਨਪ੍ਪੁਨਂ;

ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ;

ਸਤਿ ਕਾਯਗਤਾ ਤ੍ਯਤ੍ਥੁ, ਨਿਬ੍ਬਿਦਾਬਹੁਲੋ ਭਵ;

ਅਨਿਮਿਤ੍ਤਞ੍ਚ ਭਾਵੇਹਿ, ਮਾਨਾਨੁਸਯਮੁਜ੍ਜਹ;

ਤਤੋ ਮਾਨਾਭਿਸਮਯਾ, ਉਪਸਨ੍ਤੋ ਚਰਿਸ੍ਸਸੀ’’ਤਿ.

ਏਵਂ ਖੋ ਭਨ੍ਤੇ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ.

ਕਾਮਰਾਗੇਨ ¶ ਡਯ੍ਹਾਮਿ, ਚਿਤ੍ਤਂ ਮੇ ਪਰਿਡਯ੍ਹਤਿ;

ਸਾਧੁ ਨਿਬ੍ਬਾਪਨਂ ਬ੍ਰੂਹਿ, ਅਨੁਕਮ੍ਪਾਯ ਗੋਤਮ–

ਸਞ੍ਞਾਯ ¶ ਵਿਪਰਿਯੇਸਾ, ਚਿਤ੍ਤਂ ਤੇ ਪਰਿਡਯ੍ਹਤਿ;

ਨਿਮਿਤ੍ਤਂ ਪਰਿਵਜ੍ਜੇਹਿ, ਸੁਭਂ ਰਾਗੂਪਸਂਹਿਤਂ.

ਸਙ੍ਖਾਰੇ ਪਰਤੋਪਸ੍ਸ, ਦੁਕ੍ਖਤੋ ਮਾ ਚ ਅਤ੍ਤਤੋ;

ਨਿਬ੍ਬਾਪੇਹਿ ਮਹਾਰਾਗਂ, ਮਾ ਡਯ੍ਹਿਤ੍ਥੋ ਪੁਨਪ੍ਪੁਨਂ.

ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ;

ਸਤਿ ਕਾਯਗਤਾ ਤ੍ਯਤ੍ਥੁ, ਨਿਬ੍ਬਿਦਾਬਹੁਲੋ ਭਵ.

ਅਨਿਮਿਤ੍ਤਞ੍ਚ ¶ ਭਾਵੇਹਿ, ਮਾਨਾਨੁਸਯਮੁਜ੍ਜਹ;

ਤਤੋ ਮਾਨਾਭਿਸਮਯਾ, ਉਪਸਨ੍ਤੋ ਚਰਿਸ੍ਸਸਿ.

ਵਙ੍ਗੀਸਸੁਤ੍ਤ

ਪੁਚ੍ਛਾ – ਤਤ੍ਥ ਆਵੁਸੋ ਦ੍ਵਾਦਸਮਂ ਵਙ੍ਗੀਸਸੁਤ੍ਤਂ ਕਤ੍ਥ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਤਾ ਵਙ੍ਗੀਸਤ੍ਥੇਰੇਨ ਅਚਿਰ ਅਰਹਤ੍ਤਪ੍ਪਤ੍ਤੇਨ ਵਿਮੁਤ੍ਤਿਸੁਖਪਟਿਸਂਵੇਦਿਨਾ–

‘‘ਕਾਵੇਯ੍ਯਮਤ੍ਤਾ ਵਿਚਰਿਮ੍ਹ ਪੁਬ੍ਬੇ, ਗਾਮਾਗਾਮਂ ਪੁਰਾਪੁਰਂ,

ਅਥਦ੍ਦਸਾਮ ਸਮ੍ਬੁਦ੍ਧਂ, ਸਦ੍ਧਾ ਨੋ ਉਪਪਜ੍ਜਥ;

ਸੋ ਮੇ ਧਮ੍ਮ ਮਦੇਸੇਸਿ, ਖਨ੍ਧਾਯਤਨ ਧਾਤੁਯੋ;

ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਬਹੁਨ੍ਨਂ ਵਤ ਅਤ੍ਥਾਯ, ਬੋਧਿਂ ਅਜ੍ਝਗਮਾ ਮੁਨਿ;

ਭਿਕ੍ਖੂਨਂ ਭਿਕ੍ਖੂਨੀਨਞ੍ਚ, ਯੇ ਨਿਯਾਮਗਤਦ੍ਦਸਾ;

ਸ੍ਵਾਗਤਂ ¶ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਪੁਬ੍ਬੇ ਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁਂ ਵਿਸੋਧਿਤਂ;

ਤੇਵਿਜ੍ਜੋ ਇਦ੍ਧਿਪਤ੍ਤੋਮ੍ਹਿ, ਚੇਤੋਪਰਿਯਾਯ ਕੋਵਿਦੋ.

ਏਵਂ ਖੋ ਭਨ੍ਤੇ ਉਦਾਨਵਸੇਨ ਭਾਸਿਤਂ.

ਕਾਵੇਯ੍ਯ ¶ ਮਤ੍ਤਾ ਵਿਚਰਿਮ੍ਹ ਪੁਬ੍ਬੇ; ਗਾਮਾਗਾਮਂਪੁਰਾਪੁਰਂ,

ਅਥਦ੍ਦਸਾਮ ਸਮ੍ਬੁਦ੍ਧਂ, ਸਦ੍ਧਾ ਨੋ ਉਪਪਜ੍ਜਥ.

ਸੋ ¶ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨ ਧਾਤੁਯੋ;

ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

ਬਹੁਨ੍ਨਂ ਵਤ ਅਤ੍ਥਾਯ, ਬੋਧਿਂ ਅਜ੍ਝਗਮਾ ਮੁਨਿ;

ਭਿਕ੍ਖੂਨਂ ਭਿਕ੍ਖੁਨੀ ਨਞ੍ਚ, ਯੇ ਨਿਯਾਮਗਤਦ੍ਦਸਾ.

ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

ਪੁਬ੍ਬੇਨਿਵਾਸਂ ¶ ਜਾਨਾਮਿ; ਦਿਬ੍ਬਚਕ੍ਖੁ ਵਿਸੋਧਿਤਂ;

ਤੇਵਿਜ੍ਜੋ ਇਦ੍ਧਿਪਤ੍ਤੋਮ੍ਹਿ, ਚੇਤੋਪਰਿਯਾਯਕੋਵਿਦੋ.

ਵਨਸਂਯੁਤ੍ਤ

ਆਨਨ੍ਦਸੁਤ੍ਤ

ਪੁਚ੍ਛਾ – ਵਨਸਂਯੁਤ੍ਤੇ ਪਨਾਵੁਸੋ ਪਞ੍ਚਮਂ ਸਂਗੀਤਂ ਆਨਨ੍ਦਸੁਤ੍ਤਂ ਕਦਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਅਞ੍ਞਤਰਸ੍ਮਿਂ ਵਨਸਣ੍ਡੇ ਅਚਿਰਪਰਿਨਿਬ੍ਬੁਤੇ ਭਗਵਤਿ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਤਸ੍ਮਿਂ ਵਨਸਣ੍ਡੇ ਅਧਿਵਤ੍ਥਾਯ ਦੇਵਤਾਯ ਭਾਸਿਤਂ. ਆਯਸ੍ਮਾ ਭਨ੍ਤੇ ਆਨਨ੍ਦੋ ਅਚਿਰਪਰਿਨਿਬ੍ਬੁਤੇ ਭਗਵਤਿ ਅਤਿਵੇਲਂ ਗਿਹਿਸਞ੍ਞਤ੍ਤਿਬਹੁਲੋ ਵਿਹਰਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਰੁਕ੍ਖਮੂਲਗਹਨਂ ਪਸਕ੍ਕਿਯ,

ਨਿਬ੍ਬਾਨਂ ਹਦਯਸ੍ਮਿਂ ਓਪਿਯ;

ਝਾਯ ਗੋਤਮ ਮਾ ਪਮਾਦੋ,

ਕਿਂ ਤੇ ਬਿਲ਼ਿਬਿਲ਼ਿਕਾ ਕਰਿਸ੍ਸਤੀ’’ਤਿ.

ਏਵਂ ¶ ਖੋ ਭਨ੍ਤੇ ਵਨਸਣ੍ਡੇ ਅਧਿਵਤ੍ਥਾਯ ਦੇਵਤਾਯ ਆਯਸ੍ਮਤੋ ਆਨਨ੍ਦਤ੍ਥੇਰਸ੍ਸ ਅਨੁਕਮ੍ਪਿਕਾਯ ਅਤ੍ਥਕਾਮਾਯ ਭਾਸਿਤਂ.

ਰੁਕ੍ਖਮੂਲ ¶ ਗਹਨਂ ਪਸਕ੍ਕਿਯ, ਨਿਬ੍ਬਾਨਂ ਹਦਯਸ੍ਮਿਂ ਓਪਿਯ;

ਝਾਯ ਗੋਤਮ ਮਾ ਪਮਾਦੋ, ਕਿਂ ਤੇ ਬਿਲ਼ਿਬਿਲ਼ਿਕਾ ਕਰਿਸ੍ਸਤਿ-ਹੁ–

ਯਕ੍ਖਸਂਯੁਤ੍ਤ

ਇਨ੍ਦਕਸੁਤ੍ਤ

ਪੁਚ੍ਛਾ – ਯਕ੍ਖਸਂਯੁਤ੍ਤੇ ¶ ਪਨਾਵੁਸੋ ਪਠਮਂ ਸਂਗੀਤਂ ਇਨ੍ਦਕਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਇਨ੍ਦਕੂਟੇ ਪਬ੍ਬਤੇ ਇਨ੍ਦਕਸ੍ਸ ਯਕ੍ਖਸ੍ਸ ਭਵਨੇ ਇਨ੍ਦਕਂ ਯਕ੍ਖਂ ਆਰਬ੍ਭ ਭਾਸਿਤਂ. ਇਨ੍ਦਕੋ ਭਨ੍ਤੇ ਯਕ੍ਖੋ ਅਤ੍ਤਵਾਦੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਗਾਥਾਯ ਅਜ੍ਝਭਾਸਿ–

‘‘ਰੂਪਂ ਨ ਜੀਵਨ੍ਤਿ ਵਦਨ੍ਤਿ ਬੁਦ੍ਧਾ,

ਕਥਂ ਨ੍ਵਯਂ ਵਿਨ੍ਦਤਿਮਂ ਸਰੀਰਂ;

ਕੁਤਸ੍ਸ ਅਟ੍ਠੀਯਕਪਿਣ੍ਡਮੇਭਿ,

ਕਥਂ ਨ੍ਵਯਂ ਸਜ੍ਜਤਿ ਗਬ੍ਭਰਸ੍ਮਿ’’ਨ੍ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਪਠਮਂ ਕਲਲਂ ਹੋਤਿ, ਕਲਲਾ ਹੋਤਿ ਅਬ੍ਬੁਦਂ,

ਅਬ੍ਬੁਦਾ ਜਾਯਤੇ ਪੇਸਿ, ਪੇਸਿ ਨਿਬ੍ਬਤ੍ਤਤੀ ਘਨੋ;

ਘਨਾ ਪਸਾਖਾ ਜਾਯਨ੍ਤਿ, ਕੇਸਾ ਲੋਮਾ ਨਖਾਪਿਚ;

ਯਞ੍ਚਸ੍ਸ ਭੁਞ੍ਜਤੀ ਮਾਤਾ, ਅਨ੍ਨਂ ਪਾਨਞ੍ਚ ਭੋਜਨਂ;

ਤੇਨ ਸੋ ਤਤ੍ਥ ਯਾਪੇਤਿ, ਮਾਤੁਕੁਚ੍ਛਿਗਤੋਨਰੋ’’ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਆਲ਼ਵਕਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਯਕ੍ਖਸਂਯੁਤ੍ਤੇ ਆਲ਼ਵਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਆਲ਼ਵਿਯਂ ਭਨ੍ਤੇ ਆਲ਼ਵਕਸ੍ਸ ਯਕ੍ਖਸ੍ਸ ਭਵਨੇ ਆਲ਼ਵਕਂ ਯਕ੍ਖਂ ਆਰਬ੍ਭ ਭਾਸਿਤਂ. ਆਲ਼ਵਕੋ ਭਨ੍ਤੇ ਯਕ੍ਖੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ–

ਕਿਂ ਸੂਧਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਕਿਂ ਸੁ ਸੁਚਿਣ੍ਣਂ ਸੁਖਮਾਵਹਾਤਿ;

ਕਿਂ ਸੁ ਹਵੇ ਸਾਦੁਤਰਂ ਰਸਾਨਂ,

ਕਥਂ ਜੀਵਿਂ ਜੀਵਿਤਾਮਾਹੁ ਸੇਟ੍ਠਨ੍ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

ਸਦ੍ਧੀਚ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਸਚ੍ਚਂ ਹਵੇ ਸਾਦੁਤਰਂ ਰਸਾਨਂ,

ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠਨ੍ਤਿ.

ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਨ ¶ ਖ੍ਵਾਹਂ ਤਂ ਆਵੁਸੋ ਨਿਕ੍ਖਮਿਸ੍ਸਾਮਿ, ਯਂ ਤੇ ਕਰਣੀਯਂ, ਤਂ ਕਰੋਹਿ,

ਪਞ੍ਹਂ ਤਂ ਸਮਣ ਪੁਚ੍ਛਿਸ੍ਸਾਮਿ, ਸਚੇ ਮੇ ਨ ਬ੍ਯਾਕਰਿਸ੍ਸਸਿ, ਚਿਤ੍ਤਂ ਵਾ ਤੇ ਖਿਪਿਸ੍ਸਾਮਿ, ਹਦਯਂ ਵਾ ਤੇ ਫਾਲੇਸ੍ਸਾਮਿ, ਪਾਦੇਸੁ ਵਾ ਗਹੇਤ੍ਵਾ ਪਾਰਗਙ੍ਗਾਯ ਖਿਪਿਸ੍ਸਾਮਿ–

ਕਿਂ ¶ ਸੂਖ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ, ਕਿਂ ਸੁ ਸੁਚਿਣ੍ਣਂ ਸੁਖਮਾਵਹਾਤਿ;

ਕਿਂ ਸੁ ਹਵੇ ਸਾਦੁਭਰਂ ਰਸਾਨਂ, ਕਥਂ ਜੀਵਿਂ ਜੀਵਿਤਮਾਹੁ ਸੇਟ੍ਠਂ–

ਸਦ੍ਧੀਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ, ਧਮ੍ਮੋ ਸੁਚਿਣ੍ਣੋ ਸੁਖਮਾਵਹਾਤਿ;

ਸਚ੍ਚਂ ਹਵੇ ਸਾਦੁਤਰਂ ਰਸਾਨਂ, ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠਂ;

ਕਥਂਸੁ ¶ ਤਰਤਿ ਓਘਂ, ਕਥਂਸੁ ਤਰਤਿ ਅਣ੍ਣਵਂ;

ਕਥਂਸੁ ਦੁਕ੍ਖ ਮਚ੍ਚੇਤਿ, ਕਥਂਸੁ ਪਰਿਸੁਜ੍ਝਤਿ.

ਸਦ੍ਧਾਯ ਤਰਤਿ ਓਘਂ, ਅਪ੍ਪਮਾਦੇਨ ਅਣ੍ਣਵਂ;

ਵੀਰਿਯੇਨ ਦੁਕ੍ਖ ਮਚ੍ਚੇਤਿ, ਪਞ੍ਞਾਯ ਪਰਿਸੁਜ੍ਝਤਿ–

ਕਥਂਸੁ ¶ ਲਭਤੇ ਪਞ੍ਞਂ, ਕਥਂਸੁ ਵਿਨ੍ਦਤੇ ਧਨਂ;

ਕਥਂਸੁ ਕਿਤ੍ਤਿਂ ਪਪ੍ਪੋਤਿ, ਕਥਂ ਮਿਤ੍ਤਾਨਿ ਗਨ੍ਥਤਿ;

ਅਸ੍ਮਾ ਲੋਕਾ ਪਰਂ ਲੋਕਂ, ਕਥਂ ਪੇਚ੍ਚ ਨ ਸੋਚਤਿ–

ਸਦ੍ਦਹਾਨੋ ਅਰਹਤਂ, ਧਮ੍ਮਂ ਨਿਬ੍ਬਾਨਪਤ੍ਤਿਯਾ;

ਸੁਸ੍ਸੂਸਂ ਲਭਤੇ ਪਞ੍ਞਂ, ਅਪ੍ਪਮਤ੍ਤੋ ਵਿਚਕ੍ਖਣੋ;

ਪਤਿਰੂਪਕਾਰੀ ਧੁਰਵਾ, ਉਟ੍ਠਾਤਾ ਵਿਨ੍ਦਤੇ ਧਨਂ;

ਸਚ੍ਚੇਨ ¶ ਕਿਤ੍ਤਿਂ ਪਪ੍ਪੋਤਿ, ਦਦਂ ਮਿਤ੍ਤਾਨਿ ਗਨ੍ਥਤਿ;

ਅਸ੍ਮਾ ਲੋਕਾ ਪਰਂ ਲੋਕਂ, ਏਵਂ ਪੇਚ੍ਚ ਨ ਸੋਚਤਿ;

ਯਸ੍ਸੇਤੇ ਚਤੁਰੋ ਧਮ੍ਮਾ, ਸਦ੍ਧਸ੍ਸ ਘਰਮੇਸਿਨੋ;

ਸਚ੍ਚਂ ਧਮ੍ਮੋ ਧਿਤਿ ਚਾਗੋ, ਸ ਵੇ ਪੇਚ੍ਚਨ ਸੋਚਤਿ–

ਸਕ੍ਕਸਂਯੁਤ੍ਤ

ਵਤਪਦਸੁਤ੍ਤ

ਪੁਚ੍ਛਾ – ਸਕ੍ਕਸਂਯੁਤ੍ਤੇ ¶ ਪਨਾਵੁਸੋ ਵਤਪਦਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਕ੍ਕਸ੍ਸ ਭਿਕ੍ਖਵੇ ਦੇਵਾਨਮਿਨ੍ਦਸ੍ਸ ਪੁਬ੍ਬੇ ਮਨੁਸ੍ਸਭੂਤਸ੍ਸ ਸਤ੍ਤ ਵਤਪਦਾਨਿ ਸਮਤ੍ਤਾਨਿ ਸਮਾਦਿਨ੍ਨਾਨਿ ਅਹੇਸੁਂ, ਯੇਸਂ ਸਮਾਦਿਨ੍ਨਤ੍ਤਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸਕ੍ਕਸ੍ਸ ¶ ਭਿਕ੍ਖਵੇ ਦੇਵਾਨਮਿਨ੍ਦਸ੍ਸ ਪੁਬ੍ਬੇ ਮਨੁਸ੍ਸਭੂਤਸ੍ਸ ਇਮਾਨਿ ਸਤ੍ਤ ਵਤਪਦਾਨਿ ਸਮਤ੍ਤਾਨਿ ਸਮਾਦਿਨ੍ਨਾਨਿ ਅਹੇਸੁਂ.

ਮਾਤਾਪੇਤ੍ਤਿਭਰਂ ਜਨ੍ਤੁਂ, ਕੁਲੇ ਜੇਟ੍ਠਾਪਚਾਯਿਨਂ;

ਸਣ੍ਹਂ ਸਖਿਲਸਮ੍ਭਾਸਂ, ਪੇਸੁਣੇਯ੍ਯਪ੍ਪਹਾਯਿਨਂ;

ਮਚ੍ਛੇਰਵਿਨਯੇ ਯੁਤ੍ਤਂ, ਸਚ੍ਚਂ ਕੋਧਾਭਿਭੁਂ ਨਰਂ;

ਤਂ ਵੇ ਦੇਵਾ ਤਾਵਤਿਂਸਾ, ਆਹੁ ‘‘ਸਪ੍ਪੁਰਿਸੋ’’ਇਤਿ.

ਦਲਿਦ੍ਦਸੁਤ੍ਤ

ਪੁਚ੍ਛਾ – ਦਲਿਦ੍ਦਸੁਤ੍ਤਂ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ. ਵਿਸ੍ਸਜ੍ਜਨਾ. ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭੂਤਪੁਬ੍ਬਂ ਭਿਕ੍ਖਵੇ ਅਞ੍ਞਤਰੋ ਪੁਰਿਸੋ ਇਮਸ੍ਮਿਂਯੇਵ ਰਾਜਗਹੇ ਮਨੁਸ੍ਸਦਲਿਦ੍ਦੋ ¶ ਅਹੋਸਿ ਮਨੁਸ੍ਸਕਪਣੋ ਮਨੁਸ੍ਸਵਰਾਕੋ, ਸੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਸਦ੍ਧਂ ਸਮਾਦਿਯਿ, ਸੀਲਂ, ਸੁਤਂ, ਚਾਗਂ, ਪਞ੍ਞਂ ਸਮਾਦਿਯੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਯਸ੍ਸ ¶ ਸਦ੍ਧਾ ਤਥਾਗਤੇ, ਅਚਲਾ ਸੁਪ੍ਪਤਿਟ੍ਠਿਤਾ;

ਸੀਲਞ੍ਚ ਯਸ੍ਸ ਕਲ੍ਯਾਣਂ, ਅਰਿਯਕਨ੍ਤਂ ਪਸਂਸਿਤਂ.

ਯਜਮਾਨਸੁਤ੍ਤ

ਪੁਚ੍ਛਾ – ਯਜਮਾਨਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ¶ ਭਨ੍ਤੇ ਸਕ੍ਕਂ ਦੇਵਾਨਮਿਨ੍ਦਂ ਆਰਬ੍ਭ ਭਾਸਿਤਂ. ਸਕ੍ਕੋ ਭਨ੍ਤੇ ਦੇਵਾਨਮਿਨ੍ਦੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ–

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਕਤ੍ਥ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ–

‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ;

ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ’’ਨ੍ਤਿ.

ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਯਜਮਾਨਾਨਂ ¶ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ,

ਕਰੋਤਂ ਓਪਧਿਤਂ ਪੁਞ੍ਞਂ, ਕਤ੍ਥ ਦਿਨ੍ਨਂ ਮਹਪ੍ਫਲਂ–

ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ;

ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ–

ਗਹਟ੍ਠਵਨ੍ਦਨਾਸੁਤ੍ਤ

ਪੁਚ੍ਛਾ – ਗਹਟ੍ਠਵਨ੍ਦਨਾਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭੂਤਪੁਬ੍ਬਂ ਭਿਕ੍ਖਵੇ ਸਕ੍ਕੋ ਦੇਵਾਨਮਿਨ੍ਦੋ ਮਾਤਲਿਂ ਸਙ੍ਗਾਹਕਂ ਆਮਨ੍ਤੇਸੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਤਂ ¶ ਨਮਸ੍ਸਨ੍ਤਿ ਤੇਵਿਜ੍ਜਾ, ਸਬ੍ਬੇ ਭੁਮ੍ਮਾਚ ਖਤ੍ਤਿਯਾ;

ਚਤ੍ਤਾਰੋ ਚ ਮਹਾਰਾਜਾ, ਤਿਦਸਾਚ ਯਸਸ੍ਸਿਨੋ;

ਅਥਕੋ ਨਾਮ ਸੋ ਯਕ੍ਖੋ, ਯਂ ਤ੍ਵਂ ਸਕ੍ਕ ਨਮਸ੍ਸਸਿ–

ਅਹਞ੍ਚ ¶ ਸੀਲਸਮ੍ਪਨ੍ਨੇ, ਚਿਰਰਤ੍ਤਸਮਾਹਿਤੇ;

ਸਮ੍ਮਾਪਬ੍ਬਜਿਤੇ ਵਨ੍ਦੇ, ਬ੍ਰਹ੍ਮਚਰਿਯਪਰਾਯਨੇ.

ਯੇ ਗਹਟ੍ਠਾ ਪੁਞ੍ਞਕਰਾ, ਸੀਲਵਨ੍ਤੋ ਉਪਾਸਕਾ;

ਧਮ੍ਮੇਨ ਦਾਰਂ ਪੋਸੇਨ੍ਤਿ, ਤੇ ਨਮਸ੍ਸਾਮਿ ਮਾਤਲਿ.

ਨਿਦਾਨਵਗ੍ਗਪਾਲ਼ਿ

ਨਿਦਾਨਸਂਯੁਤ੍ਤ

ਪਟਿਚ੍ਚਸਮੁਪ੍ਪਾਦਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਨਿਦਾਨਵਗ੍ਗਸਂਯੁਤ੍ਤੇ ਪਠਮਂ ਸਂਗੀਤਂ ਪਟਿਚ੍ਚਸਮੁਪ੍ਪਾਦਸੁਤ੍ਤਂ ਕਤ੍ਥ ਤਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਞ੍ਚਸਤੇ ਜਨਪਦਵਾਸਿਨੋ ਭਿਕ੍ਖੂ ਆਰਬ੍ਭ ਭਾਸਿਤਂ. ਪਞ੍ਚਸਤਾ ਭਨ੍ਤੇ ਜਨਪਦਵਾਸਿਨੋ ਭਿਕ੍ਖੂ ਸਬ੍ਬੇ ਉਗ੍ਘਾਟਿਤਞ੍ਞੁਨੋ ਧੁਤਙ੍ਗਧਰਾ ਆਰਦ੍ਧਵੀਰਿਯਾ ਯੁਤ੍ਤਯੋਗਾ ਵਿਪਸ੍ਸਕਾ ਸਣ੍ਹਂ ਸੁਖੁਮਂ ਸੁਞ੍ਞਤਂ ਪਚ੍ਚਯਾਕਾਰਧਮ੍ਮਦੇਸਨਂ ਪਤ੍ਥਯਮਾਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਪਟਿਚ੍ਚਸਮੁਪ੍ਪਾਦਂ ਵੋ ਭਿਕ੍ਖਵੇ ਦੇਸੇਸ੍ਸਾਮਿ, ਤਂ ਸੁਣਾਥ ਸਾਧੁਕਂ ਮਨਸਿ ਕਰੋਥ, ਭਾਸਿਸ੍ਸਾਮੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਕਤਮੋ ¶ ਚ ਭਿਕ੍ਖਵੇ ਪਟਿਚ੍ਚਸਮੁਪ੍ਪਾਦੋ. ਅਵਿਜ੍ਜਾਪਚ੍ਚਯਾ ਭਿਕ੍ਖਵੇ ਸਙ੍ਖਾਰਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ (ਪੇਯ੍ਯਾਲ) ਜਾਤਿਪਚ੍ਚਯਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਸਾ ਸਮ੍ਭਵਨ੍ਤਿ, ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਨ੍ਧਸ੍ਸ ਸਮੁਦਯੋ ਹੋਤਿ. ਅਯਂ ਵੁਚ੍ਚਤਿ ਭਿਕ੍ਖਵੇ ਪਟਿਚ੍ਚਸਮੁਪ੍ਪਾਦੋ.

ਅਵਿਜ੍ਜਾਯ ਤ੍ਵੇਵ ਅਸੇਸਵਿਰਾਗਨਿਰੋਧੋ ਸਙ੍ਖਾਰਨਿਰੋਧੋ (ਪੇਯ੍ਯਾਲ) ਜਾਤਿਨਿਰੋਧਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨਿਰੁਜ੍ਝਨ੍ਤਿ, ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤਿ –

ਵਿਭਙ੍ਗਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਦੁਤਿਯਂ ਸਂਗੀਤਂ ਵਿਭਙ੍ਗਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਞ੍ਚਸਤੇ ਜਨਪਦਵਾਸਿਨੋ ਵਿਪਞ੍ਚਿਤਞ੍ਞੁਨੋ ਭਿਕ੍ਖੂ ਆਰਬ੍ਭ ਭਾਸਿਤਂ. ਪਞ੍ਚਸਤਾ ਭਨ੍ਤੇ ਜਨਪਦਵਾਸਿਕਾ ਭਿਕ੍ਖੂ ਵਿਪਞ੍ਚਿਤਞ੍ਞੁਨੋ ਧੁਤਙ੍ਗਧਰਾ ਆਰਦ੍ਧਵੀਰਿਯਾ ਯੁਤ੍ਤਯੋਗਾ ਵਿਸ੍ਸਕਾ ਸਣ੍ਹਂ ਸੁਖੁਮਂ ਸੁਞ੍ਞਤਪਟਿਸਂਯੁਤ੍ਤਂ ਪਚ੍ਚਯਾਕਾਰਧਮ੍ਮਦੇਸਨਂ ਪਤ੍ਥਯਮਾਨਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਪਟਿਚ੍ਚ ਸਮੁਪ੍ਪਾਦਂ ਵੋ ਭਿਕ੍ਖਵੇ ਦੇਦੇਸ੍ਸਾਮਿ ਵਿਭਜਿਸ੍ਸਾਮਿ, ਤਂ ਸੁਣਾਥ ਸਾਧੁਕਂ ਮਨਸਿਕਰੋਥ, ਭਾਸਿਸ੍ਸਾਮੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਪਞ੍ਚਵੇਰਭਯਸੁਤ੍ਤ

ਪੁਚ੍ਛਾ – ਪਞ੍ਚਵੇਰਭਯਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਨਾਥਪਿਣ੍ਡਿਕਂ ਗਹਪਤਿਂ ਆਰਬ੍ਭ ‘‘ਯਤੋ ਖੋ ਗਹਪਤਿ ਅਰਿਯਸਾਵਕਸ੍ਸ ਪਞ੍ਚ ਭਯਾਨਿ ਵੇਰਾਨਿ ਵੂਪਸਨ੍ਤਾਨਿ ਹੋਨ੍ਤਿ, ਚਤੂਹਿ ਚ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤੋ ਹੋਤਿ, ਅਰਿਯੋ ਚਸ੍ਸ ਞਾਯੋ ਪਞ੍ਞਾਯ ਸੁਦਿਟ੍ਠੋ ਹੋਤਿ ਸੁਪ੍ਪਟਿਵਿਦ੍ਧੋ, ਸੋ ਆਕਙ੍ਖਮਾਨੋ ਅਤ੍ਤਨਾਵ ਅਤ੍ਤਾਨਂ ਬ੍ਯਾਕਰੇਯ੍ਯ ਖੀਣਨਿਰਯੋਮਿ ਖੀਣਤਿਰਚ੍ਛਾਨਯੋਨਿ ਖੀਣਪੇਤ੍ਤਿਵਿਸਯੋ ਖੀਣਾਪਾਯਦੁਗ੍ਗਤਿਵਿਨਿਪਾਤੋ, ਸੋਤਾਪਨ੍ਨੋਹਮਸ੍ਮਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਨੋ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋਤਤ੍ਥ ¶ ਭਗਵਤਾ ਅਰਿਯਸਾਵਕਸ੍ਸ ਪਞ੍ਚਨ੍ਨਂ ਭਯਾਨਂ ਵੇਰਾਨਂ ਵੂਪਸਨ੍ਤਤਾ ਪਕਾਸਿਤਾ.

ਵਿਸ੍ਸਜ੍ਜਨਾ – ‘‘ਕਤਮਾਨਿ ¶ ਪਞ੍ਚ ਭਯਾਨਿ ਵੇਰਾਨਿ ਵੂਪਸਨ੍ਤਾਨਿ ਹੋਨ੍ਤਿ. ਯਂ ਗਹਪਤਿ ਪਾਣਾਤਿਪਾਤੀ ਪਾਣਾਤਿਪਾਤਪਚ੍ਚਯਾ ਦਿਟ੍ਠਧਮ੍ਮਿਕਮ੍ਪਿ ਭਯਂ ਵੇਰਂ ਪਸਵਤਿ, ਸਮ੍ਪਰਾਯਿਕਮ੍ਪਿ ਭਯਂ ਵੇਰਂ ਪਸਵਤਿ, ਚੇਤਸਿਕਮ੍ਪਿ ਦੁਕ੍ਖਂ ਦੋਮਨਸ੍ਸਂ ਪਟਿਸਂਵੇਦਯਤਿ. ਪਾਣਾਤਿਪਾਤਾ ਟਿਵਿਰਤਸ੍ਸ ਏਵਂ ਤਂ ਭਯਂ ਵੇਰਂ ਵੂਪਸਨ੍ਤਂ ਹੋਤੀ’’ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਅਰਿਯਸਾਵਕਸ੍ਸ ਪਞ੍ਚਨ੍ਨਂ ਭਯਾਨਂ ਵੇਰਾਨਂ ਵੂਪਸਨ੍ਤਤਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਅਰਿਯਸਾਵਕਸ੍ਸ ਚਤੂਹਿ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤਤਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਕਤਮੇਹਿ ਚਤੂਹਿ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤੋ ਹੋਤਿ. ਇਧ ਗਹਪਤਿ ਅਰਿਯਸਾਵਕੋ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ ‘‘ਇਤਿਪਿਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋਪੁਰਿਸਦਮ੍ਮਸਾਰਥਿ ਸਤ੍ਥਾਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’’ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਅਰਿਯਸਾਵਕਸ੍ਸ ਚਤੂਹਿ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤਤਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਅਰਿਯਸਾਵਕੇਨ ਅਰਿਯਸ੍ਸ ਞਾਯਸ੍ਸ ਪਞ੍ਞਾਯ ਸੁਦਿਟ੍ਠਤਾ ਸੁਪ੍ਪਟਿਵਿਦ੍ਧਤਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਕਤਮੋ ਚਸ੍ਸ ਅਰਿਯੋ ਞਾਯੋ ਪਞ੍ਞਾਯ ਸੁਦਿਟ੍ਠੋ ਹੋਤਿ ਸੁਪ੍ਪਟਿਵਿਦ੍ਧੋ. ਇਧ ਗਹਪਤਿ ਅਰਿਯਸਾਵਕੋ ਪਟਿਚ੍ਚਸਮੁਪ੍ਪਾਦਞ੍ਞੇਵ ਸਾਧੁਕਂ ਯੋਨਿਸੋ ਮਨਸਿ ਕਰੋਤਿ ‘‘ਇਤਿ ਇਮਸ੍ਮਿਂ ਸਤਿ ਇਦਂ ਹੋਤਿ, ਇਮਸ੍ਮਿਂ ਅਸਤਿ ਇਦਂ ਨ ਹੋਤਿ, ਇਮਸ੍ਸੁਪ੍ਪਾਦਾ ਇਦਂ ਉਪ੍ਪਜ੍ਜਤਿ, ਇਮਸ੍ਸ ਨਿਰੋਧਾ ਇਦਂ ਨਿਰੁਜ੍ਝਤਿ, ਯਦਿਦਂ ਅਵਿਜ੍ਜਾਪਚ੍ਚਯਾ (ਪੇਯ੍ਯਾਲ) ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀ’’ਤਿ, ਏਵਂ ਖੋ ਭਨ੍ਤੇ ਭਗਵਤਾ ਤਤ੍ਥ ਅਰਿਯਸਾਵਕੇਨ ਅਰਿਯਸ੍ਸ ਞਾਯਸ੍ਸ ਪਞ੍ਞਾਯ ਸੁਦਿਟ੍ਠਤਾ ਸੁਪ੍ਪਟਿਵਿਦ੍ਧਤਾ ਪਕਾਸਿਤਾ.

ਯਤੋ ¶ ਖੋ ਗਹਪਤਿ ਅਰਿਯਸਾਵਕਸ੍ਸ ਇਮਾਨਿ ਪਞ੍ਚ ਭਯਾਨਿ ਵੇਰਾਨਿ ਵੂਪਸਨ੍ਤਾਨਿ ਹੋਨ੍ਤਿ. ਇਮੇਹਿ ਚਤੂਹਿ ਸੋਤਾਪਤ੍ਤਿਯਙ੍ਗੇਹਿ ਸਮਨ੍ਨਾਗਤੋ ਹੋਤਿ. ਅਯਞ੍ਚਸ੍ਸ ਅਰਿਯੋ ਞਾਯੋ ਪਞ੍ਞਾਯ ਸੁਦਿਟ੍ਠੋ ਹੋਤਿ ਸੁਪ੍ਪਟਿਵਿਦ੍ਧੋ–

ਦੁਕ੍ਖਸੁਤ੍ਤ

ਪੁਚ੍ਛਾ – ਦੁਕ੍ਖਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਦੁਕ੍ਖਸ੍ਸ ਭਿਕ੍ਖਵੇ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਸ੍ਸਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਦੁਕ੍ਖਸਮੁਦਯੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਕਤਮੋ ਚ ਭਿਕ੍ਖਵੇ ਦੁਕ੍ਖਸ੍ਸ ਸਮੁਦਯੋ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ. ਅਯਂ ਖੋ ਭਿਕ੍ਖਵੇ ਦੁਕ੍ਖਸ੍ਸ ਸਮੁਦਯੋ. ਸੋਤਞ੍ਚ ਪਟਿਚ੍ਚ ਸਦ੍ਦੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣਂ…ਪੇ… ਘਾਨਞ੍ਚ ਪਟਿਚ੍ਚ ਗਨ੍ਧੇ ਚ…ਪੇ… ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ…ਪੇ… ਕਾਯਞ੍ਚ ਪਟਿਚ੍ਚ ਫੋਟ੍ਠਬ੍ਬੇ ਚ…ਪੇ… ਮਨਞ੍ਚ ਪਟਿਚ੍ਚ ਧਮ੍ਮੇ ਚ ਉਪ੍ਪਜ੍ਜਤਿ ਮਨੋਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ. ਅਯਂ ਖੋ ਭਿਕ੍ਖਵੇ ਦੁਕ੍ਖਸ੍ਸ ਸਮੁਦਯੋਤਿ ਏਵਂਖੋ ਭਨ੍ਤੇ ਤਤ੍ਥ ਭਗਵਤਾ ਦੁਕ੍ਖਸ੍ਸ ਸਮੁਦਯੋ ਪਕਾਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਦੁਕ੍ਖਸ੍ਸ ਅਤ੍ਥਙ੍ਗਮੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਕਤਮੋ ਚ ਭਿਕ੍ਖਵੇ ਦੁਕ੍ਖਸ੍ਸ ਅਤ੍ਥਙ੍ਗਮੋ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ, ਤਸ੍ਸਾਯੇਵ ਤਣ੍ਹਾਯ ਅਸੇਸਵਿਰਾਗਨਿਰੋਧਾ ਉਪਾਦਾਨਨਿਰੋਧੋ ਉਪਾਦਾਨਨਿਰੋਧਾ ਭਵਨਿਰੋਧੋ, ਭਵਨਿਰੋਧਾ ਜਾਤਿਨਿਰੋਧੋ, ਜਾਤਿਨਿਰੋਧਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨਿਰੁਜ੍ਝਨ੍ਤਿ. ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਦੁਕ੍ਖਸ੍ਸ ਅਤ੍ਥਙ੍ਗਮੋ ਪਕਾਸਿਤੋ.

ਪੁਤ੍ਤਮਂਸੂਪਮਸੁਤ੍ਤ

ਪੁਚ੍ਛਾ – ਪੁਤ੍ਤਮਂਸੂਪਮਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਅਧੁਨਾ ਪਬ੍ਬਜਿਤੇ ਭਿਕ੍ਖੂ ਆਰਬ੍ਭ ਭਾਸਿਤਂ. ਭਗਵਤੋ ਚ ਭਨ੍ਤੇ ਭਿਕ੍ਖੁਸਙ੍ਘਸ੍ਸ ਚ ਮਹਾਲਾਭਸਕ੍ਕਾਰੋ ਉਦਪਾਦਿ, ਏਕਚ੍ਚੇ ਚ ਭਨ੍ਤੇ ਭਿਕ੍ਖੂ ਨਵਾ ਅਚਿਰਪਬ੍ਬਜਿਤਾ ਕੁਲਪੁਤ੍ਤਾ ਆਹਾਰਂ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਂਸੁ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਤ੍ਤਾਰੋਮੇ ਭਿਕ੍ਖਵੇ ਆਹਾਰਾ ਭੂਤਾਨਂ ਵਾ ਸਤ੍ਤਾਨਂ ਠਿਤਿਯਾ ਸਮ੍ਭਵੇਸੀਨਂ ਵਾ ਅਨੁਗ੍ਗਹਾਯ. ਕਤਮੇ ਚਤ੍ਤਾਰੋ ਕਬਲ਼ੀਕਾਰੋ ਆਹਾਰੋ ਓਲ਼ਾਰਿਕੋ ਵਾ ਸੁਖੁਮੋ ਵਾ ਫਸ੍ਸੋ ਦੁਤਿਯੋ ਮਨੋਸਞ੍ਚੇਤਨਾ ਤਤਿਯਾ ਵਿਞ੍ਞਾਣਂ ਚਤੁਤ੍ਥ’’ਨ੍ਤਿ ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਕਬਲ਼ੀਕਾਰਸ੍ਸ ਆਹਾਰਸ੍ਸ ਦਟ੍ਠਬ੍ਬਾਕਾਰੋ ਭਗਵਤਾ ਪਕਾਸਿਤੋ.

ਵਿਸ੍ਸਜ੍ਜਨਾ – ਸੇਯ੍ਯਥਾਪਿ ਭਿਕ੍ਖਵੇ ਦ੍ਵੇ ਜਾਯਮ੍ਪਤਿਕਾ ਪਰਿਤ੍ਤਂ ਸਮ੍ਬਲਂ ਆਦਾਯ ਕਨ੍ਤਾਰਮਗ੍ਗਂ ਪਟਿਪਜ੍ਜੇਯ੍ਯੁਂ. ਤੇਸਮਸ੍ਸ ਏਕਪੁਤ੍ਤਕੋ ਪਿਯੋ ਮਨਾਪੋਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ¶ ਕਬਲ਼ੀਕਾਰਸ੍ਸ ਆਹਾਰਸ੍ਸ ਦਟ੍ਠਬ੍ਬਾਕਾਰੋ ਪਕਾਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਫਸ੍ਸਾਹਾਰਸ੍ਸ ਦਟ੍ਠਬ੍ਬਾਕਾਰੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਸੇਯ੍ਯਥਾਪਿ ਭਿਕ੍ਖਵੇ ਗਾਵੀ ਨਿਚ੍ਚਮ੍ਮਾ ਕੁਟ੍ਟਂ ਚੇ ਨਿਸ੍ਸਾਯ ਤਿਟ੍ਠੇਯ੍ਯ, ਯੇ ਕੁਟ੍ਟਨਿਸ੍ਸਿਤਾ ਪਾਣਾ, ਤੇ ਨਂ ਖਾਦੇਯ੍ਯੁਂ. ਰੁਕ੍ਖਂ ਚੇ ਨਿਸ੍ਸਾਯ ਤਿਟ੍ਠੇਯ੍ਯ. ਉਦਕਂ ਚੇ ਨਿਸ੍ਸਾਯ ਤਿਟ੍ਠੇਯ੍ਯ. ਆਕਾਸਂ ਚੇ ਨਿਸ੍ਸਾਯ ਤਿਟ੍ਠੇਯ੍ਯ, ਯੇ ਆਕਾਸਨਿਸ੍ਸਿਤਾ ਪਾਣਾ, ਤੇ ਨਂ ਖਾਦੇਯ੍ਯੁਨ੍ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਫਸ੍ਸਸ੍ਸ ਆਹਾਰਸ੍ਸ ਦਟ੍ਠਬ੍ਬਾਕਾਰੋ ਵਿਤ੍ਥਾਰੇਤ੍ਵਾ ਪਕਾਸਿਤੋ.

ਏਵਮੇਵ ¶ ਖ੍ਵਾਹਂ ਭਿਕ੍ਖਵੇ ਫਸ੍ਸਾਹਾਰੋ ਦਟ੍ਠਬ੍ਬੋਤਿ ਵਦਾਮਿ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਮਨੋਸਞ੍ਚੇਤਨਾਹਾਰਸ੍ਸ ਦਟ੍ਠਬ੍ਬਾਕਾਰੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਸੇਯ੍ਯਥਾਪਿ ਭਿਕ੍ਖਵੇ ਅਙ੍ਗਾਰਕਾਸੁ ਸਾਧਿਕਪੋਰਿਸਾ ਪੁਣ੍ਣਾ ਅਙ੍ਗਾਰਾਨਂ ਵੀਤਚ੍ਚਿਕਾਨਂ ਵੀਤਧੂਮਾਨਂ. ਅਥ ਪੁਰਿਸੋ ਆਗਚ੍ਛੇਯ੍ਯ ਜੀਵਿਤੁਕਾਮੋ ਅਮਰਿਤੁਕਾਮੋ ਸੁਖ ਕਾਮੋ ਦੁਕ੍ਖਪ੍ਪਟਿਕੂਲੋਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਮਨੋਸਞ੍ਚੇਤਨਾਹਾਰਸ੍ਸ ਦਟ੍ਠਬ੍ਬਾਕਾਰੋ ਵਿਤ੍ਥਾਰੇਨ ਪਕਾਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਵਿਞ੍ਞਾਣਾਹਾਰਸ੍ਸ ਦਟ੍ਠਬ੍ਬਾਕਾਰੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਸੇਯ੍ਯਥਾਪਿ ਭਿਕ੍ਖਵੇ ਚੋਰਂ ਆਗੁਚਾਰਿਂ ਗਹੇਤ੍ਵਾ ਰਞ੍ਞੋ ਦਸ੍ਸੇਯ੍ਯੁਂ ‘‘ਅਯਂ ਤੇ ਦੇਵਚੋਰੋ ਆਗੁਚਾਰੀ, ਇਮਸ੍ਸ ਯਂ ਇਚ੍ਛਸਿ, ਤਂ ਦਣ੍ਡਂ ਪਣੇਹੀ’’ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਵਿਞ੍ਞਾਣਾਹਾਰਸ੍ਸ ਦਟ੍ਠਬ੍ਬਾਕਾਰੋ ਪਕਾਸਿਤੋ.

ਸੁਸਿਮਪਰਿਬ੍ਬਾਜਕਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸੁਸਿਮਪਰਿਬ੍ਬਾਜਕ ਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਸੁਸਿਮਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਸੁਸਿਮੋ ਯਾਵਤਕੋ ਭਿਕ੍ਖੂਹਿ ਸਦ੍ਧਿਂ ਅਹੋਸਿ ਕਥਾਸਲ੍ਲਾਪੋ, ਤਂ ਸਬ੍ਬਂ ਭਗਵਤੋ ਆਰੋਚੇਸਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਪੁਬ੍ਬੇ ਖੋ ਸੁਸਿਮ ਧਮ੍ਮਟ੍ਠਿਤਿਞਾਣਂ, ਪਚ੍ਛਾ ਨਿਬ੍ਬਾਨੇ ਞਾਣ’’ਨ੍ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਾ ਆਯਸ੍ਮਤੋ ਸੁਸਿਮਤ੍ਥੇਰਸ੍ਸ ਸਮ੍ਪਤਿਅਰਹਤ੍ਤਪਤ੍ਤਸ੍ਸ ਅਨੁਯੋਗਵਸੇਨ ਪਟਿਪੁਚ੍ਛਿਤ੍ਵਾ ਪਟਿਪੁਚ੍ਛਿਤ੍ਵਾ ਉਤ੍ਤਰਿ ਧਮ੍ਮਦੇਸਨਂ ਵਿਤ੍ਥਾਰੇਤ੍ਵਾ ਦੇਸੇਸਿ.

ਵਿਸ੍ਸਜ੍ਜਨਾ – ਜਾਤਿਪਚ੍ਚਯਾ ਜਰਾਮਰਣਨ੍ਤਿ ਸੁਸਿਮ ਪਸ੍ਸਸੀਤਿ. ਏਵਂ ਭਨ੍ਤੇ. ਭਵਪਚ੍ਚਯਾ ਜਾਤੀਤਿ ਸੁਸਿਮ ਪਸ੍ਸਸੀਤਿ. ਏਵਂ ਭਨ੍ਤੇਤਿ ਏਵਮਾਦਿਨਾ ਭਨ੍ਤੇ ਭਗਵਾ ਤਤ੍ਥ ਆਯਸ੍ਮਤੋ ਸੁਸਿਮਸ੍ਸ ਸਮ੍ਪਤਿਅਰਹਤ੍ਤਪਤ੍ਤਸ੍ਸ ਉਤ੍ਤਰਿਪਿ ਅਨੁਯੋਗਵਸੇਨ ਪਟਿਪੁਚ੍ਛਿਤ੍ਵਾ ਪਟਿਪੁਚ੍ਛਿਤ੍ਵਾ ਵਿਤ੍ਥਾਰਤੋ ਧਮ੍ਮਂ ਦੇਸੇਸਿ.

ਤਸ੍ਸ ¶ ਮੇ ਭਨ੍ਤੇ ਭਗਵਾ ਅਚ੍ਚਯਂ ਅਚ੍ਚਯਤੋ ਪਟਿਗ੍ਗਣ੍ਹਾਤੁ ਆਯਤਿਂਸਂਵਰਾਯ–

ਅਭਿਸਮਯਸਂਯੁਤ੍ਤ

ਨਖਸਿਖਾਸੁਤ੍ਤ

ਪੁਚ੍ਛਾ – ਅਭਿਸਮਯਸਂਯੁਤ੍ਤੇ ¶ ਪਨਾਵੁਸੋ ਪਠਮਂ ਸਂਗੀਤਂ ਨਖਸਿਖਾਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯੋ ਵਾਯਂ ਮਯਾ ਪਰਿਤ੍ਤੋ ਨਖਸਿਖਾਯਂ ਪਂਸੁਆਰੋਪਿਤੋ, ਅਯਂ ਵਾ ਮਹਾਪਥਵੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਧਾਤੁਸਂਯੁਤ੍ਤ

ਚਙ੍ਕਮਸੁਤ੍ਤ

ਪੁਚ੍ਛਾ – ਧਾਤੁਸਂਯੁਤ੍ਤੇ ¶ ਪਨਾਵੁਸੋ ਚਙ੍ਕਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਧਾਤੁਸੋਵ ਭਿਕ੍ਖਵੇ ਸਤ੍ਤਾ ਸਂਸਨ੍ਦਨ੍ਤਿ ਸਮੇਨ੍ਤਿ, ਹੀਨਾਧਿਮੁਤ੍ਤਿਕਾ ਹੀਨਾਧਿਮੁਤ੍ਤਿਕੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ, ਕਲ੍ਯਾਣਾਧਿਮੁਤ੍ਤਿਕਾ ਕਲ੍ਯਾਣਾਧਿਮੁਤ੍ਤਿਕੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਸ੍ਸਦ੍ਧਸਂਸਨ੍ਦਨਸੁਤ੍ਤ

ਪੁਚ੍ਛਾ – ਅਸ੍ਸਦ੍ਧਸਂਸਨ੍ਦਨਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਧਾਤੁਸੋਵ ਭਿਕ੍ਖਵੇ ਸਤ੍ਤਾ ਸਂਸਨ੍ਦਨ੍ਤਿ ਸਮੇਨ੍ਤਿ, ਅਸ੍ਸਦ੍ਧਾ ਅਸ੍ਸਦ੍ਧੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ, ਅਹਿਰਿਕਾ ਅਹਿਰਿਕੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ, ਅਨੋਤ੍ਤਪ੍ਪਿਨੋ. ਅਪ੍ਪਸ੍ਸੁਤਾ. ਕੁਸੀਤਾ. ਮੁਟ੍ਠਸ੍ਸਤਿਨੋ. ਦੁਪ੍ਪਞ੍ਞਾ ਦੁਪ੍ਪਞ੍ਞੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਨਮਤਗ੍ਗਸਂਯੁਤ੍ਤ

ਪਥਵੀਸੁਤ੍ਤ

ਪੁਚ੍ਛਾ – ਅਨਮਤਗ੍ਗਸਂਯੁਤ੍ਤੇ ¶ ਆਵੁਸੋ ਦੁਤਿਯਂ ਸਂਗੀਤਂ ਪਥਵੀਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਸੇਯ੍ਯਥਾਪਿ ਭਿਕ੍ਖਵੇ ਪੁਰਿਸੋ ਇਮਂ ਮਹਾਪਥਵਿਂ ਕੋਲਟ੍ਠਿਮਤ੍ਤਂ ਕੋਲਟ੍ਠਿਮਤ੍ਤਂ ਮਤ੍ਤਿਕਾਗੁਲ਼ਿਕਂ ਕਰਿਤ੍ਵਾ ਨਿਕ੍ਖਿਪੇਯ੍ਯ ‘ਅਯਂ ਮੇ ਪਿਯਾ, ਤਸ੍ਸ ਮੇ ਪਿਤੁ ਅਯਂ ਪਿਤਾ’ਤਿ. ਅਪਰਿਯਾਦਿਨ੍ਨਾਵ ਭਿਕ੍ਖਵੇ ਤਸ੍ਸ ਪੁਰਿਸਸ੍ਸ ਪਿਤੁਪਿਤਰੋ ਅਸ੍ਸੁ. ਅਥਾਯਂ ਮਹਾਪਥਵੀ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛੇਯ੍ਯ. ਤਂ ਕਿਸ੍ਸਹੇਤੁ, ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾ ਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ’’ ਏਵਮਾਦਿਨਾ ਭਗਵਤਾ ਭਾਸਿਤਂ.

ਏਵਂ ¶ ਦੀਘਰਤ੍ਤਂ ਵੋ ਭਿਕ੍ਖਵੇ ਦੁਕ੍ਖਂ ਪਚ੍ਚਨੁਭੂਤਂ ਤਿਬ੍ਬਂ ਪਚ੍ਚਨੁਭੂਤਂ ਬ੍ਯਸਨਂ ਪਚ੍ਚਨੁਭੂਤਂ ਕਟਸੀ ਵਡ੍ਢਿਤਾ.

ਅਲਮੇਵ ¶ ਸਬ੍ਬਸਙ੍ਖਾਰੇਸੁ ਨਿਬ੍ਬਿਨ੍ਦਿਤੁਂ,

ਅਲਂ ਵਿਰਜ੍ਜਿਤੁਂ, ਅਲਂ ਵਿਮੁਚ੍ਚਿਤੁਂ,

ਅਸ੍ਸੁਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ਤਤਿਯਂ ਸਂਗੀਤਂ ਅਸ੍ਸੁਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇਯੇਵ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯਂ ਵਾ ਵੋ ਇਮਿਨਾ ਦੀਘੇਨ ਅਦ੍ਧੁਨਾ ਸਨ੍ਧਾਵਤਂ ਸਂਸਰਤਂ ਅਮਨਾਪਸਮ੍ਪਯੋਗਾ ਮਨਾਪਵਿਪ੍ਪਯੋਗਾ ਕਨ੍ਦਨ੍ਤਾਨਂ ਰੋਦਨ੍ਤਾਨਂ ਅਸ੍ਸੁ ਪਸ੍ਸਨ੍ਨਂ ਪਗ੍ਘਰਿਤਂ, ਯਂ ਵਾ ਚਤੂਸੁ ਮਹਾਸਮੁਦ੍ਦੇਸੁ ਉਦਕ’’ਨ੍ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਾਸਪਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਛਟ੍ਠਂ ਸਂਗੀਤਂ ਸਾਸਪਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਭਗਵਨ੍ਤਂ ਏਤਦਵੋਚ ‘‘ਕੀਵਦੀਘੋ ਨੁ ਖੋ ਭਨ੍ਤੇ ਕਪ੍ਪੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਦੀਘੋ ਖੋ ਭਿਕ੍ਖੁ ਕਪ੍ਪੋ, ਸੋ ਨ ਸੁਕਰੋ ਸਙ੍ਖਾਤੁਂ ਏਤ੍ਤਕਾਨਿ ਵਸ੍ਸਾਨਿ ਇਤਿਵਾ, (ਪੇਯ੍ਯਾਲ) ਏਤ੍ਤਕਾਨਿ ਵਸ੍ਸਸਤਸਹਸ੍ਸਾਨਿ ਇਤਿਵਾਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਗਙ੍ਗਾਸੁਤ੍ਤ

ਪੁਚ੍ਛਾ – ਤੇਨਾਵੁਸੋ…ਪੇ… ¶ ਸਮ੍ਮਾਸਮ੍ਬੁਦ੍ਧੇਨ ਅਨਮਤਗ੍ਗਸਂਯੁਤ੍ਤੇ ਗਙ੍ਗਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਅਞ੍ਞਤਰਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ ‘‘ਕੀਵ-

ਬਹੁਕਾ ¶ ਨੁ ਖੋ ਭੋ ਗੋਤਮ ਕਪ੍ਪਾ ਅਬ੍ਭਤੀਤਾ ਅਤਿਕ੍ਕਨ੍ਤਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਬਹੁਕਾ ਖੋ ਬ੍ਰਾਹ੍ਮਣ ਕਪ੍ਪਾ ਅਬ੍ਭਤੀਤਾ ਅਤਿਕ੍ਕਨ੍ਤਾ, ਤੇ ਨ ਸੁਕਰਾ ਸਙ੍ਖਾਤੁਂ ‘ਏਤ੍ਤਕਾ ਕਪ੍ਪਾ’ ਇਤਿ ਵਾ ‘ਏਤ੍ਤਕਾਨਿ ਕਪ੍ਪਸਤਾਨਿ’ ਇਤਿ ਵਾ ‘ਏਤ੍ਤਕਾਨਿ ਕਪ੍ਪਸਹਸ੍ਸਾਨਿ’ ਇਤਿਵਾ ‘ਏਤ੍ਤਕਾਨਿ ਕਪ੍ਪਸਤਸਹਸ੍ਸਾਨਿ’ ਇਤਿ ਵਾ’’ਤਿ ਏਵ ਮਾਦਿਨਾ ਭਗਵਤਾ ਭਾਸਿਤਂ.

ਪੁਗ੍ਗਲਸੁਤ੍ਤ

ਪੁਚ੍ਛਾ – ਪੁਗ੍ਗਲਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾ ਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਏਕਪੁਗ੍ਗਲਸ੍ਸ ਭਿਕ੍ਖਵੇ ਕਪ੍ਪਂ ਸਨ੍ਧਾਵਤੋ ਸਂਸਰਤੋ ਸਿਯਾ ਏਵਂ ਮਹਾ ਅਟ੍ਠਿਕਙ੍ਕਲੋ ਅਟ੍ਠਿਪੁਞ੍ਜੋ ਅਟ੍ਠਿਰਾਸਿ, ਯਥਾ ਯਂ ਵੇਪੁਲ੍ਲੋ ਪਬ੍ਬਤੋ. ਸਚੇ ਸਂਹਾਰਕੋ ਅਸ੍ਸ, ਸਮ੍ਭਤਞ੍ਚ ਨ ਵਿਨਸ੍ਸੇਤ੍ਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਦੁਗ੍ਗਤਸੁਤ੍ਤ, ਸੁਖਿਤਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਦੁਗ੍ਗਤਸੁਤ੍ਤਞ੍ਚ ਸੁਖਿਤਸੁਤ੍ਤਞ੍ਚ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਯਂ ਭਿਕ੍ਖਵੇ ਪਸ੍ਸੇਯ੍ਯਾਥ ਦੁਗ੍ਗਤਂ ਦੁਰੂਪੇਤਂ, ਨਿਟ੍ਠਮੇਤ੍ਥ ਗਨ੍ਤਬ੍ਬਂ ‘ਅਮ੍ਹੇਹਿਪਿ ਏਵਰੂਪਂ ਪਚ੍ਚਨੁਭੂਤਂ ਇਮਿਨਾ ਦੀਘੇਨ ਅਦ੍ਧੁਨਾ’ਤਿ, ਯਂ ਭਿਕ੍ਖਵੇ ਪਸ੍ਸੇਯ੍ਯਾਥ ਸੁਖਿਤਂ ਸੁਸਜ੍ਜਿਤਂ,

ਨਿਟ੍ਠਮੇਤ੍ਥ ¶ ਗਨ੍ਤਬ੍ਬਂ, ‘‘ਅਮ੍ਹੇਹਿਪਿ ਪਚ੍ਚਨੁਭੂਤਂ ਇਮਿਨਾ ਦੀਘੇਨ ਅਦ੍ਧੁਨਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਤਿਂਸਮਤ੍ਤਸੁਤ੍ਤ

ਪੁਚ੍ਛਾ – ਤਿਂਸਮਤ੍ਤਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਤਿਂਸਮਤ੍ਤੇ ਪਾਵੇਯ੍ਯਕੇ ਭਿਕ੍ਖੂ ਆਰਬ੍ਭ ‘‘ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯਂ ਵਾ ਵੋ ਇਮਿਨਾ ਦੀਘੇਨ ਅਦ੍ਧੁਨਾ ਸਨ੍ਧਾਵਤਂ ਸਂਸਰਤਂ ਸੀਸਚ੍ਛਿਨ੍ਨਾਨਂ ਲੋਹਿਤਂ ਪਸ੍ਸਨ੍ਨਂ ਪਗ੍ਘਰਿਤਂ, ਯਂ ਵਾ ਚਤੂਸੁ ਮਹਾਸਮੁਦ੍ਦੇਸੁ ਉਦਕ’’ਨ੍ਤਿ ਏਵਮਾਦਿਨਾ ਭਵਗਤਾ ਭਾਸਿਤਂ.

ਮਾਤੁਸੁਤ੍ਤ

ਪੁਚ੍ਛਾ – ਮਾਤੁਸੁਤ੍ਤਾਦੀਨਿ ¶ ਪਨਾਵੁਸੋ ਛਸੁਤ੍ਤਾਨਿ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਅਨਮਤਗ੍ਗੋਯਂ ਭਿਕ੍ਖਵੇ ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤਂ. ਨ ਸੋ ਭਿਕ੍ਖਵੇ ਸਤ੍ਤੋ ਸੁਲਭਰੂਪੋ, ਯੋ ਨ ਮਾਤਾਭੂਤਪੁਬ੍ਬੋ ਇਮਿਨਾ ਦੀਘੇਨ ਅਦ੍ਧੁਨਾ. ਯੋ ਨ ਪਿਤਾਭੂਤਪੁਬ੍ਬੋ. ਯੋ ਨ ਭਾਤਾਭੂਤਪੁਬ੍ਬੋ. ਯੋ ਨ ਭਗਿਨਿਭੂਤਪੁਬ੍ਬੋ. ਯੋ ਨ ਪੁਤ੍ਤਭੂਤਪੁਬ੍ਬੋ. ਯੋ ਨ ਧੀਤਾਭੂਤਪੁਬ੍ਬੋ ¶ ਇਮਿਨਾ ਦੀਘੇਨ ਅਦ੍ਧੁਨਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਕਸ੍ਸਪਸਂਯੁਤ੍ਤ

ਚਨ੍ਦੂਪਮਸੁਤ੍ਤ

ਪੁਚ੍ਛਾ – ਕਸ੍ਸਪਸਂਯੁਤ੍ਤੇ ¶ ਪਨਾਵੁਸੋ ਚਨ੍ਦੂਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਚਨ੍ਦੂਪਮਾ ਭਿਕ੍ਖਵੇ ਕੁਲਾਨਿ ਉਪਸਙ੍ਕਮਥ ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤਂ ਨਿਚ੍ਚਨਵਕਾ ਕੁਲੇਸੁ ਅਪ੍ਪਗਬ੍ਭਾ. ਸੇਯ੍ਯਥਾਪਿ ਭਿਕ੍ਖਵੇ ਪੁਰਿਸੋ ਜਰੁਦਪਾਨਂ ਵਾ ਓਲੋਕੇਯ੍ਯ ਪਬ੍ਬਤਵਿਸਮਂ ਵਾ ਨਦੀਵਿਦੁਗ੍ਗਂ ਵਾ ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤਂ. ਏਵਮੇਵ ਖੋ ਭਿਕ੍ਖਵੇ ਚਨ੍ਦੂਪਮਾ ਕੁਲਾਨਿ ਉਪਸਙ੍ਕਮਥ ਅਪਕਸ੍ਸੇਵ ਕਾਯਂ ਅਪਕਸ੍ਸ ਚਿਤ੍ਤਂ ਨਿਚ੍ਚਨਵਕਾ ਕੁਲੇਸੁ ਅਪ੍ਪਗਬ੍ਭਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਤਂ ¶ ਕਿਂ ਮਞ੍ਞਥ ਭਿਕ੍ਖਵੇ, ਕਥਂ ਰੂਪਾ ਭਿਕ੍ਖੁ ਅਰਹਤਿ ਕੁਲਾਨਿ ਉਪਸਙ੍ਕਮਿਤੁਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਪਰਿਸੁਦ੍ਧਾਪਰਿਸੁਦ੍ਧ ਧਮ੍ਮਦੇਸਨਂ ਦਸ੍ਸੇਤ੍ਵਾ ਭਿਕ੍ਖੂਨਂ ਓਵਾਦੋ ਦਿਨ੍ਨੋ.

ਵਿਸ੍ਸਜ੍ਜਨਾ – ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਥਂ ਰੂਪਸ੍ਸ ਭਿਕ੍ਖੁਨੋ ਅਪਰਿਸੁਦ੍ਧਾ ਧਮ੍ਮਦੇਸਨਾ ਹੋਤਿ, ਕਥਂ ਰੂਪਸ੍ਸ ਭਿਕ੍ਖੁਨੋ ਪਰਿਸੁਦ੍ਧਾ ਧਮ੍ਮਦੇਸਨਾ ¶ ਹੋਤੀ’’ਤਿ ਏਵਮਾਦਿਨਾ ਪਰਿਸੁਦ੍ਧਾਪਰਿਸੁਦ੍ਧਧਮ੍ਮਦੇਸਨਾ ਵਿਤ੍ਥਾਰਤੋ ਦਸ੍ਸੇਤ੍ਵਾ ‘‘ਕਸ੍ਸਪੇਨ ਵਾ ਹਿ ਵੋ ਭਿਕ੍ਖਵੇ ਓਵਦਿਸ੍ਸਾਮਿ ਯੋ ਵਾ ਪਨਸ੍ਸ ਕਸ੍ਸਪਸਦਿਸੋ, ਓਵਦਿਤੇਹਿ ਚ ਪਨ ਵੋ ਤਥਤ੍ਤਾਯ ਪਟਿਪਜ੍ਜਿਤਬ੍ਬ’’ਨ੍ਤਿ. ਏਵਂ ਖੋ ਭਨ੍ਤੇ ਭਗਵਤੋ ਭਿਕ੍ਖੂਨਂ ਓਵਾਦੋ ਦਿਨ੍ਨੋ.

ਯੋ ¶ ਹਿ ਕੋਚਿ ਭਿਕ੍ਖਵੇ ਭਿਕ੍ਖੁ ਏਵਂਚਿਤ੍ਤੋ ਪਰੇਸਂ ਧਮ੍ਮਂ ਦੇਸੇਤਿ ‘‘ਅਹੋ ਵਤ ਮੇ ਧਮ੍ਮਂ ਸੁਣੇਯ੍ਯੁਂ, ਸੁਤ੍ਵਾ ਚ ਪਨ ਧਮ੍ਮਂ ਪਸੀਦੇਯ੍ਯੁਂ, ਪਸਨ੍ਨਾ ਚ ਮੇ ਪਸਨ੍ਨਾਕਾਰਂ ਕਰੇਯ੍ਯੁਂ–

ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ ਸਨ੍ਦਿਟ੍ਠਿਕੋ ਅਕਾਲਿਕੋ ਏਹਿ ਪਸ੍ਸਿਕੋ ਓਪਨੇਯ੍ਯਿਕੋ ਪਚ੍ਚਤ੍ਤਂ ਵੇਦਿਤਬ੍ਬੋ ਵਿਞ੍ਞੂਹਿ–

ਕਸ੍ਸਪੇਨ ¶ ਵਾ ਹਿ ਵੋ ਭਿਕ੍ਖਵੇ ਓਵਦਿਸ੍ਸਾਮਿ ਯੋ ਵਾ ਪਨਸ੍ਸ ਕਸ੍ਸਪਸਦਿਸੋ, ਓਵਦਿਤੇਹਿ ਚ ਪਨ ਵੋ ਤਥਤ੍ਤਾਯ ਪਟਿਪਜ੍ਜਿਤਬ੍ਬਂ–

ਕੁਲੂਪਕਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਕਸ੍ਸਪਸਂਯੁਤ੍ਤੇ ਚਤੁਤ੍ਥਂ ਕੁਲੂਪਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਥਂ ਰੂਪੋ ਭਿਕ੍ਖੁ ਅਰਹਤਿ ਕੁਲੂਪਕੋ ਹੋਤੁਂ, ਕਥਂ ਰੂਪੋ ਭਿਕ੍ਖੁ ਨ ਅਰਹਤਿ ਕੁਲੂਪਕੋ ਹੋਤੁ’’ਨ੍ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਕਸ੍ਸਪੇਨ ¶ ਵਾ ਹਿ ਵੋ ਭਿਕ੍ਖਵੇ ਓਵਦਿਸ੍ਸਾਮਿ ਯੋ ਵਾ ਪਨਸ੍ਸ ਕਸ੍ਸਪਸਦਿਸੋ, ਓਵਦਿਤੇਹਿ ਚ ਪਨ ਵੋ ਤਥਤ੍ਤਾਯ ਪਟਿਪਜ੍ਜਿਤਬ੍ਬਂ.

ਦੁਤਿਯ ਓਵਾਦਸੁਤ੍ਤ

ਪੁਚ੍ਛਾ – ਤਤ੍ਥੇਵਾਵੁਸੋ ¶ ਭਗਵਤਾ ਦੁਤਿਯ ਓਵਾਦਸੁਤ੍ਤਂ ਕਤ੍ਥ ਕੇਨ ਸਦ੍ਧਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਤਾ ਮਹਾਕਸ੍ਸਪੇਨ ਸਦ੍ਧਿਂ ‘‘ਓਵਦ ਕਸ੍ਸਪ ਭਿਕ੍ਖੂ, ਕਰੋਹਿ ਕਸ੍ਸਪ ਭਿਕ੍ਖੂਨਂ ਧਮ੍ਮਿਂ ਕਥਂ, ਅਹਂ ਵਾ ਕਸ੍ਸਪ ਭਿਕ੍ਖੂ ਓਵਦੇਯ੍ਯਂ ਤ੍ਵਂ ਵਾ, ਅਹਂ ਵਾ ਭਿਕ੍ਖੂਨਂ ਧਮ੍ਮਿਂ ਕਥਂ ਕਰੇਯ੍ਯਂ ਤ੍ਵਂ ਵਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਯਸ੍ਸ ¶ ਕਸ੍ਸਚਿ ਭਨ੍ਤੇ ਸਦ੍ਧਾ ਨਤ੍ਥਿ ਕੁਸਲੇਸੁ ਧਮ੍ਮੇਸੁ, ਹਿਰੀ ਨਤ੍ਥਿ. ਓਤ੍ਤਪ੍ਪਂ ਨਤ੍ਥਿ. ਵੀਰਿਯਂ ਨਤ੍ਥਿ. ਪਞ੍ਞਾ ਨਤ੍ਥਿ ਕੁਸਲੇਸੁ ਧਮ੍ਮੇਸੁ.

ਤਤਿਯ ਓਵਾਦਸੁਤ੍ਤ

ਪੁਚ੍ਛਾ – ਤਤ੍ਥੇਵਾਵੁਸੋ ¶ ਭਗਵਤਾ ਤਤਿਯਓਵਾਦਸੁਤ੍ਤਂ ਕਤ੍ਥ ਕੇਨ ਸਦ੍ਧਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਤਾਯੇਵ ਮਹਾਕਸ੍ਸਪੇਨ ਸਦ੍ਧਿਂ ‘‘ਓਵਦ ਕਸ੍ਸਪ ਭਿਕ੍ਖੂ. ਕਰੋਹਿ ਕਸ੍ਸਪ ਭਿਕ੍ਖੂਨਂ ਧਮ੍ਮਿਂ ਕਥਂ, ਅਹਂ ਵਾ ਕਸ੍ਸਪ ਭਿਕ੍ਖੂ ਓਵਦੇਯ੍ਯਂ ਤ੍ਵਂ ਵਾ. ਅਹਂ ਵਾ ਭਿਕ੍ਖੂਨਂ ਧਮ੍ਮਂ ਕਥਂ ਕਰੇਯ੍ਯਂ ਤ੍ਵਂ ਵਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਦੁਬ੍ਬਚਾ ¶ ਖੋ ਭਨ੍ਤੇ ਏਤਰਹਿ ਭਿਕ੍ਖੂ ਦੋਵਚਸ੍ਸਕਰਣੇਹਿ ਧਮ੍ਮੇਹਿ ਸਮਨ੍ਨਾਗਤਾ ਅਕ੍ਖਮਾ ਅਪ੍ਪਦਕ੍ਖਿਣਗ੍ਗਾਹਿਨੋ ਅਨੁਸਾਸਨਿਂ–

ਸਦ੍ਧਮ੍ਮਪ੍ਪਤਿਰੂਪਕਸੁਤ੍ਤ

ਪੁਚ੍ਛਾ – ਤਤ੍ਥੇਵਾਵੁਸੋ ¶ ਭਗਵਤਾ ਪਰਿਯੋਸਾਨਂ ਸਦ੍ਧਮ੍ਮਪ੍ਪਤਿਰੂਪਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂਯੇਵ ਮਹਾਕਸ੍ਸਪਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਮਹਾਕਸ੍ਸਪੋ ਭਗਵਨ੍ਤਂ ਏਤਦੇਵੋਚ ‘‘ਕੋ ਨੁ ਖੋ ਭਨ੍ਤੇ ਹੇਤੁ ਕੋ ਪਚ੍ਚਯੋ, ਯੇਨ ਪੁਬ੍ਬੇ ਅਪ੍ਪਤਰਾਨਿ ਚੇਵ ਸਿਕ੍ਖਾਪਦਾਨਿ ਅਹੇਸੁਂ, ਬਹੁਤਰਾ ਚ ਭਿਕ੍ਖੂ ਅਞ੍ਞਾਯ ਸਣ੍ਠਹਿਂਸੁ. ਕੋ ਪਨ ਭਨ੍ਤੇ ਹੇਤੁ ਕੋ ਪਚ੍ਚਯੋ, ਯੇਨੇਤਰਹਿ ਬਹੁਤਰਾਨਿ ਚੇਵ ਸਕ੍ਖਾਪਦਾਨਿ ਅਪ੍ਪਤਰਾ ਚ ਭਿਕ੍ਖੂ ਅਞ੍ਞਾਯ ਸਣ੍ਠਹਨ੍ਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਏਵਞ੍ਚੇਤਂ ਕਸ੍ਸਪ ਹੋਤਿ ਸਤ੍ਤੇਸੁ ਹਾਯਮਾਨੇਸੁ ਸਦ੍ਧਮ੍ਮੇ ਅਨ੍ਤਰਧਾਯਮਾਨੇ ਬਹੁਤਰਾਨਿਚੇਵ ਸਿਕ੍ਖਾਪਦਾਨਿ ¶ ਹੋਨ੍ਤਿ, ਅਪ੍ਪਤਰਾਚ ਭਿਕ੍ਖੂ ਅਞ੍ਞਾਯ ਸਣ੍ਠਹਨ੍ਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਲਾਭਸਕ੍ਕਾਰਸਂਯੁਤ੍ਤ

ਮੀਲ਼੍ਹਕਸੁਤ੍ਤ

ਪੁਚ੍ਛਾ – ਤੇਨਾਵੁਸੋ…ਪੇ… ¶ ਸਮ੍ਮਾਸਮ੍ਬੁਦ੍ਧੇਨ ਲਾਭਸਕ੍ਕਾਰਂਯੁਤ੍ਤੇ ਪਞ੍ਚਮਂ ਸਂਗੀਤਂ ਮੀਲ਼੍ਹਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਦਾਰੁਣੋ ਭਿਕ੍ਖਵੇ ਲਾਭਸਕ੍ਕਾਰਸਿਲੋਕੋ ਫਰੁਸੋ ਅਨ੍ਤਰਾਯਿਕੋ ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸ ਅਧਿਗਮਾਯ. ਸੇਯ੍ਯਥਾਪਿ ਭਿਕ੍ਖਵੇ ਮੀਲ਼੍ਹਕਾ ਗੂਥਾਦੀ ਗੂਥਪੂਰਾ ਪੁਣ੍ਣਾ ਗੂਥਸ੍ਸ, ਪੁਰਤੋ ਚਸ੍ਸ ਮਹਾਗੂਥਪੁਞ੍ਜੋ, ਸਾ ਤੇਨ ਅਞ੍ਞਾ ਮੀਲ਼੍ਹਕਾ ਅਤਿਮਞ੍ਞੇਯ੍ਯ ‘‘ਅਹਮ੍ਹਿ ਗੂਥਾਦੀ ਗੂਥਪੂਰਾ ਪੁਣ੍ਣਾ ਗੂਥਸ੍ਸ, ਪੁਰਤੋ ਚ ਮ੍ਯਾਯਂ ਮਹਾਗੂਥਪੁਞ੍ਜੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਤਂ ¶ ਹਿ ਤਸ੍ਸ ਭਿਕ੍ਖਵੇ ਮੋਘਪੁਰਿਸਸ੍ਸ ਹੋਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ.

ਏਵਂ ਦਾਰੁਣੋ ਖੋ ਭਿਕ੍ਖਵੇ ਲਾਭਸਕ੍ਕਾਰਸਿਲੋਕੋ.

ਤਸ੍ਮਾਤਿਹ ¶ ਭਿਕ੍ਖਵੇ ਏਵਂ ਸਿਕ੍ਖਿਤਬ੍ਬਂ, ‘‘ਉਪ੍ਪਨ੍ਨਂ ਲਾਭਸਕ੍ਕਾਰਸਿ ਲੋਕਂ ਪਜਹਿਸ੍ਸਾਮ, ਨ ਚ ਨੋ ਉਪ੍ਪਨ੍ਨੋ ਲਾਭਸਕ੍ਕਾਰਸਿਲੋਕੋ ਚਿਤ੍ਤਂ ਪਰਿਯਾਦਾਯ ਠਸ੍ਸਭੀ’’ਤਿ, ਏਵਞ੍ਹਿ ਖੋ ਭਿਕ੍ਖਵੇ ਸਿਕ੍ਖਿਤਬ੍ਬਂ.

ਏਕਪੁਤ੍ਤਕਸੁਤ੍ਤ

ਪੁਚ੍ਛਾ – ਤਤ੍ਥੋ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕੇਹਿ ਸਂਗੀਤਂ ਏਕਪੁਤ੍ਤਕਸੁਤ੍ਤਂ ਕਤ੍ਥ ਕਂ ਆਰਬ੍ਭਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਦਾਰੁਣੋ ਭਿਕ੍ਖਵੇ ਲਾਭਸਕ੍ਕਾਰਸਿਲੋਕੋ ਕਟੁਕੋ ਫਰੁਸੋ ਅਨ੍ਤਰਾਯਿਕੋ ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸ ਅਧਿਗਮਾਯ, ਸਦ੍ਧਾ ਭਿਕ੍ਖਵੇ ਉਪਾਸਿਕਾ ਏਕਪੁਤ੍ਤਕਂ ਪਿਯਂ ਮਨਾਪਂ ਏਵਂ ਸਮ੍ਮਾਆਯਾਚਮਾਨਾ ¶ ਆਯਾਚੇਯ੍ਯ ਤਾਦਿਸੋ ਤਾਤ ਭਵਾਹਿ, ਯਾਦਿਸੋ ਚਿਤ੍ਤੋ ਚ ਗਹਪਤਿ ਹਤ੍ਥਕੋ ਚ ਆਲ਼ਵਕੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਏਸਾ ¶ ਭਿਕ੍ਖਵੇ ਤੁਲਾ ਏਤਂ ਪਮਾਣਂ ਮਮ ਸਾਵਕਾਨਂ ਉਪਾਸਕਾਨਂ ਯਦਿਦਂ ਚਿਤ੍ਤੋ ਚ ਗਹਪਤਿ ਹਤ੍ਥਕੋ ਚ ਆਲ਼ਵਕੋ.

ਸਚੇ ਖੋ ਤ੍ਵਂ ਤਾਤ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਸਿ, ਤਾਦਿਸੋ ਤਾਤ ਭਵਾਹਿ, ਯਾਦਿਸਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾ.

ਮਾ ਚ ਖੋ ਤ੍ਵਂ ਤਾਤ ਸੇਖਂ ਅਪ੍ਪਤ੍ਤਮਾਨਸਂ ਲਾਭਸਕ੍ਕਾਰਸਿਲੋਕੋ ਅਨੁਪਾਪੁਣਾਤੁ–

ਏਵਂ ¶ ਦਾਰੁਣੋ ਭਿਕ੍ਖਵੇ ਲਾਭਸਕ੍ਕਾਰਸਿਲੋਕੋ ਕਟੁਕੋ ਫਰੁਸੋ ਅਨ੍ਤਰਾਯਿਕੋ ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸ ਅਧਿਗਮਾਯ.

ਏਕਵੀਤੁਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਯਕੇਹਿ ਸਂਗੀਤਂ ਏਕਧੀਤੁਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਦਾਰੁਣੋ ਭਿਕ੍ਖਵੇ ਲਾਭਸਕ੍ਕਾਰਸਿਲੋਕੋ ਕਟੁਕੋ ਫਰੁਸੋ ਅਨ੍ਤਰਾਯਿਕੋ ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸ ਅਧਿਗਮਾਯ. ਸਦ੍ਧਾ ਭਿਕ੍ਖਵੇ ਉਪਾਸਿਕਾ ਏਕਂ ਧੀਤਰਂ ਪਿਯਂ ਮਨਾਪਂ ਏਵਂ ਸਮ੍ਮਾ ਆਯਾਚਮਾਨਾ ਆਯਾਚੇਯ੍ਯ ‘ਤਾਦਿਸਾ ਅਯ੍ਯੇ ਭਵਾਹਿ, ਯਾਦਿਸਾ ਖੁਜ੍ਜੁਤ੍ਤਰਾ ਚ ਉਪਾਸਿਕਾ ਵੇਲ਼ੁਕਣ੍ਡਕਿਯਾ ਚ ਨਨ੍ਦਮਾਤਾ’ਤਿ. ਏਸਾ ਭਿਕ੍ਖਵੇ ਤੁਲਾ ਏਤਂ ਪਮਾਣਂ ਮਮ ਸਾਵਿਕਾਨਂ ਉਪਾਸਿਕਾਨਂ, ਯਦਿਦਂ ਖੁਜ੍ਜੁਤ੍ਤਰਾ ਚ ਉਪਾਸਿਕਾ ਵੇਲ਼ੁਕਣ੍ਡਕਿਯਾ ਚ ਨਨ੍ਦਮਾਤਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸਚੇ ¶ ਖੋ ਤ੍ਵਂ ਅਯ੍ਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਸਿ, ਭਾਦਿਸਾ ਅਯ੍ਯੇ ਭਵਾਹਿ, ਯਾਦਿਸਾ ਖੇਮਾ ਚ ਭਿਕ੍ਖੁਨੀ ਉਪ੍ਪਲਵਣ੍ਣਾ ਚ–

ਤਸ੍ਮਾਤਿਹ ¶ ਭਿਕ੍ਖਵੇ ਏਵਂ ਸਿਕ੍ਖਿਤਬ੍ਬਂ.

ਰਾਹੁਲਸਂਯੁਤ੍ਤ

ਪੁਚ੍ਛਾ – ਰਾਹੁਲਸਂਯੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਰਾਹੁਲਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਰਾਹੁਲੋ ਭਗਵਨ੍ਤਂ ਏਤਦਵੋਚ ‘‘ਸਾਧੁ ਮੇ ਭਨ੍ਤੇ ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੁ, ਯਮਹਂ ਭਗਵਤੋ ਧਮ੍ਮਂ ਸੁਤ੍ਵਾ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰੇਯ੍ਯ’’ਨ੍ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਂ ਕਿਂ ਮਞ੍ਞਸਿ ਰਾਹੁਲ, ਚਕ੍ਖੁਨਿਚ੍ਚਂ ਵਾ ਅਨਿਚ੍ਚਂ ਵਾਤਿ. ਅਨਿਚ੍ਚਂ ਭਨ੍ਤੇ. ਯਂ ਪਨਾਨਿਚ੍ਚਂ, ਦੁਕ੍ਖਂ ਵਾ ਤਂ ਸੁਖਂ ਵਾਤਿ. ਦੁਕ੍ਖਂ ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ ‘ਏਤਂ ਮਮ, ਏਸੋ ਹਮਸ੍ਮਿ, ਏਸੋ ਮੇ ਅਤ੍ਤਾ’ਤਿ. ਨੋ ਹੇਤਂ ਭਨ੍ਤੇ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਲਕ੍ਖਣਸਂਯੁਤ੍ਤ

ਅਟ੍ਠਿਸੁਤ੍ਤ

ਪੁਚ੍ਛਾ – ਲਕ੍ਖਣਸਂਯੁਤ੍ਤੇ ¶ ਪਨਾਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਤ੍ਥੇਰੇਹਿ ਪਠਮਂ ਸਂਗੀਤਂ ਅਟ੍ਠਿਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਞ੍ਚ ਲਕ੍ਖਣਂ ਆਯਸ੍ਮਨ੍ਤਞ੍ਚ ਮਹਾਮੋਗ੍ਗਲ੍ਲਾਨਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਲਕ੍ਖਣੋ ਭਗਵਤਾ ਸਮ੍ਮੁਖੇ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਤਦਵੋਚ ¶ ‘‘ਇਧਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਞ੍ਞਤਰਸ੍ਮਿਂ ਪਦੇਸੇ ਸਿਤਂ ਪਾਤ੍ਵਾਕਾਸਿ, ਕੋ ਨੁ ਖੋ ਆਵੁਸੋ ਮੋਗ੍ਗਲ੍ਲਾਨ ਹੇਤੁ, ਕੋ ਪਚ੍ਚਯੋ ਸਿਤਸ੍ਸ ਪਾਤੁਕਮ੍ਮਾਯਾ’’ਤਿ. ਆਯਸ੍ਮਾ ਚ ਭਨ੍ਤੇ ਮਹਾਮੋਗ੍ਗਲ੍ਲਾਨੋ ‘‘ਇਧਾਹਂ ਆਵੁਸੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸਂ ਅਟ੍ਠਿਕਸਙ੍ਖਲਿਕਂ ਵੇਹਾਸਂ ਗਚ੍ਛਨ੍ਤਿਂ’’ਤਿ ਏਵਮਾਦਿਨਾ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਕ੍ਖੁਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਞਾਣਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਯਤ੍ਰਹਿ ਨਾਮ ਸਾਵਕੋ ਏਵਰੂਪਂ ਞਸ੍ਸਤਿ ਵਾ ਦਕ੍ਖਤਿ ਵਾ ਸਕ੍ਖਿਂ ਵਾ ਕਰਿਸ੍ਸਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਚ੍ਛਰਿਯਂ ¶ ਵਤ ਭੋ, ਅਬ੍ਭੁਤਂ ਵਤ ਭੋ;

ਏਵਰੂਪੋਪਿ ਨਾਮ ਸਤ੍ਤੋ ਭਵਿਸ੍ਸਤਿ.

ਪਿਣ੍ਡਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਜਾਨਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਲਕ੍ਖਣਸਂਯੁਤ੍ਤੇ ਤਤਿਯਂ ਸਂਗੀਤਂ ਪਿਣ੍ਡਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਞ੍ਚ ਲਕ੍ਖਣਂ ਆਯਸ੍ਮਨ੍ਤਞ੍ਚ ਮਹਾਮੋਗ੍ਗਲ੍ਲਾਨਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਲਕ੍ਖਣੋ ਭਗ੍ਗਵਤੋ ਸਮ੍ਮੁਖੇ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਤਦਵੋਚ ‘‘ਇਧਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਞ੍ਞਤਰਸ੍ਮਿਂ ਪਦੇਸੇ ਸਿਤਂ ਪਾਤ੍ਵਾਕਾਸਿ ¶ , ਕੋ ਨੁਖੋ ਆਵੁਸੋ ਮੋਗ੍ਗਲ੍ਲਾਨਹੇਤੁ, ਕੋ ਪਚ੍ਚਯੋ ਸਿਤਸ੍ਸ ਪਾਤੁਕਮ੍ਮਾਯਾ’’ਤਿ. ਆਯਸ੍ਮਾ ਚ ਭਨ੍ਤੇ ਮਹਾਮੋਗ੍ਗਲ੍ਲਾਨੋ ‘‘ਇਧਾਹਂ ਆਵੁਸੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸਂ ਮਂਸਪਿਣ੍ਡਂ ਵੇਹਾਸਂ ਗਚ੍ਛਨ੍ਤਂ, ਤਮੇਨਂ ਗਿਜ੍ਝਾਪਿ ਕਾਕਾਪਿ ਕੁਲਲਾਪਿ ਅਨੁਪਤਿਤ੍ਵਾ ਅਨੁਪਤਿਤ੍ਵਾ ਵਿਤਚ੍ਛੇਨ੍ਤਿ ਵਿਰਾਜੇਨ੍ਤਿ. ਸਾ ਸੁਦਂ ਅਟ੍ਟਸ੍ਸਰਂ ਕਰੋਤੀ’’ਤਿ ਏਵਮਾਦਿਨਾ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਕ੍ਖੁਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਞਾਣਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਯਤ੍ਰਹਿ ਨਾਮ ਸਾਵਕੋ ਏਵਰੂਪਂ ਞਸ੍ਸਤਿ ਵਾ ਦਕ੍ਖਤਿ ਵਾ ਸਕ੍ਖਿਂ ਵਾ ਕਰਿਸ੍ਸਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਸਿਲੋਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕੇਹਿ ਮਹਾਥੇਰੇਹਿ ਸਂਗੀਤਂ ਅਸਿਲੋਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਞ੍ਚ ਲਕ੍ਖਣਂ ਆਯਸ੍ਮਨ੍ਤਞ੍ਚ ਮਹਾਮੋਗ੍ਗਲ੍ਲਾਨਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਲਕ੍ਖਣੋ ਭਗਵਤੋ ਸਮ੍ਮੁਖੇ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ¶ ਏਤਦਵੋਚ ‘‘ਕੋ ਨੁ ਖੋ ਆਵੁਸੋ ਮੋਗ੍ਗਲ੍ਲਾਨ ਹੇਤੁ, ਕੋ ਪਚ੍ਚਯੋ ਸਿਤਸ੍ਸ ਪਾਤੁਕਮ੍ਮਾਯਾ’’ਤਿ. ਆਯਸ੍ਮਾ ਚ ਭਨ੍ਤੇ ਮਹਾਮੋਗ੍ਗਲ੍ਲਾਨਤ੍ਥੇਰੋ ‘‘ਇਧਾਹਂ ਆਵੁਸੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸਂ ਅਸਿਲੋਮਂ ਵੇਹਾਸਂ ਗਚ੍ਛਨ੍ਤਂ’’ਤਿ ਏਵਮਾਦਿਨਾ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਚਕ੍ਖੁਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਞਾਣਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ. (ਪੇਯ੍ਯਾਲ) ਏਸੋ ਭਿਕ੍ਖਵੇ ਸਤ੍ਤੋ ਇਮਸ੍ਮਿਂਯੇਵ ਰਾਜਗਹੇ ਸੂਕਰਿਕੋ ਅਹੋਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸੂਚਿਲੋਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਂ ਸੂਚਿਲੋਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਰਾਜਗਹੇ ਆਯਸ੍ਮਨ੍ਤਞ੍ਚ ਲਕ੍ਖਣਂ ਆਯਸ੍ਮਨ੍ਤਞ੍ਚ ਮਹਾਮੋਗ੍ਗਲ੍ਲਾਨਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਲਕ੍ਖਣੋ ਭਗਵਤੋ ਸਮ੍ਮੁਖੇ ਤਥੇਵ ਅਵੋਚ.

ਆਯਸ੍ਮਾ ¶ ਚ ਭਨ੍ਤੇ ਮਹਾਮੋਗ੍ਗਲ੍ਲਾਨੋ ਤਥੇਵ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਕ੍ਖੁਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, ਞਾਣਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ, (ਪੇਯ੍ਯਾਲ) ਏਸੋ ਭਿਕ੍ਖਵੇ ਸਤ੍ਤੋ ਇਮਸ੍ਮਿਂਯੇਵ ਰਾਜਗਹੇ ਸੂਤੋ ਅਹੋਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਾ.

ਪਾਪਭਿਕ੍ਖੁਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਾਨਿ ਪਾਪਭਿਕ੍ਖੁਸੁਤ੍ਤਾਦੀਨਿ ਪਞ੍ਚਸੁਤ੍ਤਾਨਿ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਰਾਜਗਹੇ ਆਯਸ੍ਮਨ੍ਤਞ੍ਚ ਲਕ੍ਖਣਂ ਆਯਸ੍ਮਨ੍ਤਞ੍ਚ ਮਹਾਮੋਗ੍ਗਲ੍ਲਾਨਂ ਆਰਬ੍ਭ ਭਾਸਿਤਾਨਿ. ਆਯਸ੍ਮਾ ਭਨ੍ਤੇ ਲਕ੍ਖਣੋ ਭਗਵਤੋ ਸਮ੍ਮੁਖੇ ਪੁਬ੍ਬੇ ਵੁਤ੍ਤਨਯੇਨੇਵ ਆਰੋਚੇਸਿ. ਆਯਸ੍ਮਾ ਚ ਭਨ੍ਤੇ ਮਹਾਮੋਗ੍ਗਲ੍ਲਾਨੋ ‘‘ਇਧਾਹਂ ਆਵੁਸੋ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸਂ ਭਿਕ੍ਖੁਂ ਵੇਹਾਸਂ ਗਚ੍ਛਨ੍ਤਂ. ਅਦ੍ਦਸਂ ਭਿਕ੍ਖੁਨਿਂ ਵੇਹਾਸਂ ਗਚ੍ਛਨ੍ਤਿਂ. ਅਦ੍ਦਸਂ ਸਿਕ੍ਖਮਾਨਂ ਵੇਹਾਸਂ ਗਚ੍ਛਨ੍ਤਿਂ. ਅਦ੍ਦਸਂ ਸਾਮਣੇਰਂ ਵੇਹਾਸਂ ਗਚ੍ਛਨ੍ਤਂ. ਅਦ੍ਦਸਂ ਸਾਮਣੇਰਿਂ ਵੇਹਾਸਂ ਗਚ੍ਛਨ੍ਤਿਂ. ਤਸ੍ਸਾ ਸਙ੍ਘਾਟਿਪਿ ਆਦਿਤ੍ਤਾ ਸਮ੍ਪਜ੍ਜਲਿਤਾ ਸਜੋਤਿਭੂਤਾ, ਪਤ੍ਤੋਪਿ ਆਦਿਤ੍ਤੋ ਸਮ੍ਪਜ੍ਜਲਿਤੋ ਸਜੋਤਿਭੂਤੋ, ਕਾਯਬਨ੍ਧਨਮ੍ਪਿ ਆਦਿਤ੍ਤਂ ਸਮ੍ਪਜ੍ਜਲਿਤਂ ਸਜੋਤਿਭੂਤਂ ¶ , ਕਾਯੋਪਿ ਆਦਿਤ੍ਤੋ ਸਮ੍ਪਜ੍ਜਲਿਤੋ ਸਜੋਤਿਭੂਤੋ, ਸਾ ਸੁਦਂ ਅਟ੍ਟਸ੍ਸਰਂ ਕਰੋਤੀ’’ਤਿ ਏਵਮਾਦਿਨਾ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਕ੍ਖੁਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ ਞਾਣਭੂਤਾ ਵਤ ਭਿਕ੍ਖਵੇ ਸਾਵਕਾ ਵਿਹਰਨ੍ਤਿ. (ਪੇਯ੍ਯਾਲ). ਏਸੋ ਭਿਕ੍ਖਵੇ ਭਿਕ੍ਖੁ ਕਸ੍ਸਪਸ੍ਸਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨੇ ਪਾਪਭਿਕ੍ਖੁ ਅਹੋਸਿ. ਏਸਾ ਭਿਕ੍ਖਵੇ ਭਿਕ੍ਖੁਨੀ ਕਸ੍ਸਪਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨੇ ਪਾਪਭਿਕ੍ਖੁਨੀ ਅਹੋਸਿ. ਏਸਾ ਭਿਕ੍ਖਵੇ ਸਿਕ੍ਖਮਾਨਾ ਕਸ੍ਸਪਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨੇ ਪਾਪਸਿਕ੍ਖਮਾਨਾ ਅਹੋਸਿ. ਏਸੋ ਭਿਕ੍ਖਵੇ ਸਾਮਣੇਰੋ ਕਸ੍ਸਪਸ੍ਸਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨੇ ਪਾਪਸਾਮਣੇਰੋ ਅਹੋਸਿ. ਏਸਾ ਭਿਕ੍ਖਵੇ ਸਾਮਣੇਰੀ ਕਸ੍ਸਪਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨੇ ਪਾਪਸਾਮਣੇਰੀ ਅਹੋਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਾਨਿ.

ਓਪਮ੍ਮਸਂਯੁਤ੍ਤ

ਨਖਸਿਖਸੁਤ੍ਤ

ਪੁਚ੍ਛਾ – ਓਪਮ੍ਮਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਂ ਨਖਸਿਖਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯੋ ਚਾਯਂ ਮਯਾ ਪਰਿਤ੍ਤੋ ¶ ਨਖਸਿਖਾਯਂ ਪਂਸੁ ਆਰੋਪਿਤੋ, ਯਾ ਚਾਯਂ ਮਹਾਪਥਵੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ.

ਤਸ੍ਮਾਤਿਹ ¶ ਭਿਕ੍ਖਵੇ ਏਵਂ ਸਿਕ੍ਖਿਤਬ੍ਬਂ.

ਆਣਿਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਂ ਆਣਿਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭੂਤਪੁਬ੍ਬਂ ਭਿਕ੍ਖਵੇ ਦਸਾਰਹਾਨਂ ਆਨਕੋ ਨਾਮ ਮੁਦਿਙ੍ਗੋ ਅਹੋਸਿ, ਤਸ੍ਸ ਦਸਾਰਹਾ ਆਨਕੇ ਘਟਿਤੇ ਅਞ੍ਞਂ ਆਣਿਂ ਓਦਹਿਂਸੁ, ਅਹੁ ਖੋ ਸੋ ਭਿਕ੍ਖਵੇ ਸਮਯੋ ਯਂ ਆਨਕਸ੍ਸ ਮੁਦਿਙ੍ਗਸ੍ਸ ਪੋਰਾਣਂ ਪੋਕ੍ਖਰਫਲਕਂ ਅਨ੍ਤਰਧਾਯਿ ¶ , ਆਣਿਸਙ੍ਘਾਟੋਵ ਅਵਸਿਸ੍ਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਭਿਕ੍ਖੁਸਂਯੁਤ੍ਤ

ਨਵਸੁਤ੍ਤ

ਪੁਚ੍ਛਾ – ਭਿਕ੍ਖੁਸਂਯੁਤ੍ਤੇ ¶ ਆਵੁਸੋ ਭਗਵਤਾ ਨਵਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਨਵਂ ਭਿਕ੍ਖੁਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਨਵੋ ਭਿਕ੍ਖੁ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਵਿਹਾਰਂ ਪਵਿਸਿਤ੍ਵਾ ਅਪ੍ਪੋਸੁਕ੍ਕੋ ਤੁਣ੍ਹੀਭੂਤੋ ਸਙ੍ਕਸਾਯਭਿ, ਨ ਭਿਕ੍ਖੂਨਂ ਵੇਯ੍ਯਾਵਚ੍ਚਂ ਕਰੋਤਿ ਚੀਵਰਕਾਰਸਮਯੇ ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਮਾ ਖੋ ਤੁਮ੍ਹੇ ਭਿਕ੍ਖਵੇ ਏਤਸ੍ਸ ਭਿਕ੍ਖੁਨੋ ਉਜ੍ਝਾਯਿਤ੍ਥਾ ਏਸੋ ਖੋ ਭਿਕ੍ਖਵੇ ਭਿਕ੍ਖੁ ਚਤੁਨ੍ਨਂ ਝਾਨਾਨਂ ਆਭਿਚੇਤਸਿਕਾਨਂ ਦਿਟ੍ਠਧਮ੍ਮ ਸੁਖਵਿਹਾਰਾਨਂ ਨਿਕਾਮਲਾਭੀ ਅਕਿਚ੍ਛਲਾਭੀ ਅਕਸਿਰਲਾਭੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਹਮ੍ਪਿ ¶ ਖੋ ਭਨ੍ਤੇ ਸਕਂ ਕਿਚ੍ਚਂ ਕਰੋਮਿ,

ਏਸੋ ¶ ਖੋ ਭਿਕ੍ਖਵੇ ਭਿਕ੍ਖੁ ਚਤੁਨ੍ਨਂ ਝਾਨਾਨਂ ਆਭਿਚੇਤਸਿਕਾਨਂ ਦਿਟ੍ਠਧਮ੍ਮਸੁਖਵਿਹਾਰਾਨਂ ਨਿਕਾਮਲਾਭੀ ਅਕਿਚ੍ਛਲਾਭੀ ਅਕਸਿਰਲਾਭੀ –

ਨਯਿਦਂ ਸਿਥਿਲਮਾਰਬ੍ਭ, ਨਯਿਦਂ ਅਪ੍ਪੇਨ ਥਾਮਸਾ;

ਨਿਬ੍ਬਾਨਂ ਅਧਿਗਨ੍ਤਬ੍ਬਂ, ਸਬ੍ਬਦੁਕ੍ਖਪ੍ਪਮੋਚਨਂ;

ਅਯਞ੍ਚ ਦਹਰੋ ਭਿਕ੍ਖੁ, ਅਯਮੁਤ੍ਤਮਪੁਰਿਸੋ;

ਧਾਰੇਤਿ ਅਨ੍ਤਿਮਂ ਦੇਹਂ, ਜੇਤ੍ਵਾ ਮਾਰਂ ਸਵਾਹਿਨਿਂ–

ਖਨ੍ਧਵਗ੍ਗਸਂਯੁਤ੍ਤਪਾਲ਼ਿ

ਸਂਗਾਯਨਸ੍ਸ ਪੁਚ੍ਛਾ ਵਿਸ੍ਸਜ੍ਜਨਾ

ਨਕੁਲਪਿਤੁਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ ਜਾਨਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਖਨ੍ਧਵਗ੍ਗਸਂਯੁਤ੍ਤੇ ਪਠਮਂ ਨਕੁਲਪਿਤੁਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਭਗ੍ਗੇਸੁ ਭਨ੍ਤੇ ਸੁਸੁਮਾਰਗਿਰੇ ਭੇਸਕਲ਼ਾਵਨੇ ਮਿਗਦਾਯੇ ਨਕੁਲਪਿਤਰਂ ਗਹਪਤਿਂ ਆਰਬ੍ਭ ਭਾਸਿਤਂ. ਨਕੁਲਪਿਤਾ ਭਨ੍ਤੇ ਗਹਪਤਿ ਭਗਵਨ੍ਤਂ ‘‘ਅਹਮਸ੍ਮਿ ਭਨ੍ਤੇ ਜਿਣ੍ਣੋ ਵੁਡ੍ਢੋ ਮਹਲ੍ਲਕੋ ਅਦ੍ਧਗਤੋ ਵਯੋਅਨੁਪ੍ਪਤ੍ਤੋ ਆਤੁਰਕਾਯੋ ਅਭਿਕ੍ਖਣਾਤਙ੍ਕੋ, ਅਨਿਚ੍ਚਦਸ੍ਸਾਵੀ ਖੋ ਪਨਾਹਂ ਭਨ੍ਤੇ ਭਗਵਤੋ ਮਨੋਭਾਵਨੀਯਾਨਞ੍ਚ ਭਿਕ੍ਖੂਨਂ, ਓਵਦਤੁ ਮਂ ਭਨ੍ਤੇ ਭਗਵਾ, ਅਨੁਸਾਸਤੁ ਮਂ ਭਨ੍ਤੇ ਭਗਵਾ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਏਵਮੇਤਂ ਗਹਪਤਿ, ਏਵਮੇਤਂ ਗਹਪਤਿ, ਆਤੁਰੋ ਹਾਯਂ ਗਹਪਤਿ ਕਾਯੋ ਅਣ੍ਡਭੂਤੋ ਪਰਿਯੋਨਦ੍ਧੋ, ਯੋ ਹਿ ਗਹਪਤਿ ਇਮਂ ਕਾਯਂ ਪਰਿਹਰਨ੍ਤੋ ਮੁਹੁਤ੍ਤਮ੍ਪਿ ਆਰੋਗ੍ਯਂ ਪਟਿਜਾਨੇਯ੍ਯ, ਕਿਮਞ੍ਞਤ੍ਰ ਬਾਲ੍ਯਾ. ਤਸ੍ਮਾਤਿਹ ਤੇ ਗਹਪਤਿ ਏਵਂ ਸਿਕ੍ਖਿਤਬ੍ਬਂ ‘ਆਤੁਰਕਾਯਸ੍ਸ ਮੇ ਸਤੋ ਚਿਤ੍ਤਂ ਅਨਾਤੁਰਂ ਭਵਿਸ੍ਸਤੀ’ਤਿ. ਏਵਞ੍ਹਿ ਤੇ ਗਹਪਤਿ ਸਿਕ੍ਖਿਤਬ੍ਬ’’ਨ੍ਤਿ. ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਤਸ੍ਮਾਤਿਹ ¶ ਤੇ ਗਹਪਤਿ ਏਵਂ ਸਿਕ੍ਖਿਤਬ੍ਬਂ.

ਪੁਚ੍ਛਾ – ਤਞ੍ਚਾਵੁਸੋ ¶ ਭਗਵਤਾ ਸਂਖਿਤ੍ਤੇਨ ਭਾਸਿਤਂ ਵਿਤ੍ਥਾਰੇਨ ਕੇਨ ਕਥਞ੍ਚ ਵਿਭਤ੍ਤਂ.

ਵਿਸ੍ਸਜ੍ਜਨਾ – ਤਂ ਖੋ ਭਨ੍ਤੇ ਭਗਵਤਾ ਸਂਖਿਤ੍ਤੇਨ ਦੇਸਿਤਂ ‘‘ਕਥਞ੍ਚ ਗਹਪਤਿ ਆਤੁਰਕਾਯੋ ਚੇਵ ਹੋਤਿ ਆਤੁਰਚਿਤ੍ਤੋ ਚ. ਇਧ ਗਹਪਤਿ ਅਸ੍ਸੁਤਵਾ ਪੁਥੁਜ੍ਜਨੋ ਅਰਿਯਾਨਂ ਅਦਸ੍ਸਾਵੀ ਅਰਿਯਧਮ੍ਮਸ੍ਸ ਅਕੋਵਿਦੋ ਅਰਿਯਧਮ੍ਮੇ ਅਵਿਨੀਤੋ, ਸਪ੍ਪੁਰਿਸਾਨਂ ਅਦਸ੍ਸਾਵੀ ਸਪ੍ਪੁਰਿਸਧਮ੍ਮਸ੍ਸ ਅਕੋਵਿਦੋ ਸਪ੍ਪੁਰਿਸਧਮ੍ਮੇ ਅਵਿਨੀਤੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤਿ ਰੂਪਵਨ੍ਤਂ ਵਾ ਅਤ੍ਤਾਨਂ, ਅਤ੍ਤਨਿ ਵਾ ਰੂਪਂ, ਰੂਪਸ੍ਮਿਂ ਵਾ ਅਤ੍ਤਾਨਂ, ‘‘ਅਹਂ ਰੂਪਂ ਮਮ ਰੂਪ’’ਨ੍ਤਿ ਪਰਿਯੁਟ੍ਠਟ੍ਠਾਯੀ ਹੋਤਿ. ਤਸ੍ਸ ‘‘ਅਹਂ ਰੂਪਂ ਮਮ ਰੂਪ’’ਨ੍ਤਿ ਪਰਿਯੁਟ੍ਠਟ੍ਠਾਯਿਨੋ ਤਂ ਰੂਪਂ ਵਿਪਰਿਣਮਤਿ ਅਞ੍ਞਥਾ ਹੋਤਿ. ਤਸ੍ਸ ਰੂਪਵਿਪਰਿਣਾਮਞ੍ਞਥਾਭਾਵਾ ਉਪ੍ਪਜ੍ਜਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ ਵਿਤ੍ਥਾਰੇਨ ਵਿਭਤ੍ਤਂ.

ਅਨਿਚ੍ਚਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਦੁਤਿਯਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕ ਮਹਾਥੇਰੇਹਿ ਪਠਮਂ ਸਂਗੀਤਂ ਅਨਿਚ੍ਚਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਰੂਪਂ ਭਿਕ੍ਖਵੇਅਨਿਚ੍ਚਂ, ਵੇਦਨਾ ਅਨਿਚ੍ਚਾ, ਸਞ੍ਞਾ ਅਨਿਚ੍ਚਾ, ਸਙ੍ਖਾਰਾ ਅਨਿਚ੍ਚਾ, ਵਿਞ੍ਞਾਣਂ ਅਨਿਚ੍ਚਂ. ਏਵਂ ਪਸ੍ਸਂ ਭਿਕ੍ਖਵੇ ਸੁਤਵਾ ਅਰਿਯਸਾਵਕੋ ਰੂਪਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਵੇਦਨਾਯਪਿ ਨਿਬ੍ਬਿਨ੍ਦਤਿ, ਸਞ੍ਞਾਯਪਿ ਨਿਬ੍ਬਿਨ੍ਦਤਿ, ਸਙ੍ਖਾਰੇਸੁਪਿ ਨਿਬ੍ਬਿਨ੍ਦਤਿ, ਵਿਞ੍ਞਾਣਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ, ਵਿਮੁਤ੍ਤਸ੍ਮਿਂ ‘ਵਿਮੁਤ੍ਤ’ਮਿਤਿ ਞਾਣਂ ਹੋਤੀ’’ਤਿ. ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਂ.

ਦੁਕ੍ਖਅਨਤ੍ਤਸੁਤ੍ਤ

ਪੁਚ੍ਛਾ – ਦੁਕ੍ਖਅਨਤ੍ਤਸੁਤ੍ਤਾਨਿ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਰੂਪਂ ਭਿਕ੍ਖਵੇ ਦੁਕ੍ਖਂ, ਵੇਦਨਾ ਦੁਕ੍ਖਾ, ਸਞ੍ਞਾ ਦੁਕ੍ਖਾ, ਸਙ੍ਖਾਰਾ ਦੁਕ੍ਖਾ, ਵਿਞ੍ਞਾਣਂ ਦੁਕ੍ਖਂ. ਰੂਪਂ ਭਿਕ੍ਖਵੇ ਅਨਤ੍ਤਾ, ਵੇਦਨਾ ਅਨਤ੍ਤਾ, ਸਞ੍ਞਾ ਅਨਤ੍ਤਾ, ਸਙ੍ਖਾਰਾ ਅਨਤ੍ਤਾ, ਵਿਞ੍ਞਾਣਂ ਅਨਤ੍ਤਾ. ਏਵਂ ਪਸ੍ਸਂ ਭਿਕ੍ਖਵੇ ਸੁਤਵਾ ਅਰਿਯਸਾਵਕੋ ਰੂਪਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਵੇਦਨਾਯਪਿ ਨਿਬ੍ਬਿਨ੍ਦਤਿ, ਸਞ੍ਞਾਯਪਿ ਨਿਬ੍ਬਿਨ੍ਦਤਿ, ਸਙ੍ਖਾਰੇਸੁਪਿ ਨਿਬ੍ਬਿਨ੍ਦਤਿ, ਵਿਞ੍ਞਾਣਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ, ਵਿਮੁਤ੍ਤਸ੍ਮਿਂ ‘ਵਿਮੁਤ੍ਤ’ਮਿਤਿ ਞਾਣਂ ਹੋਤਿ, ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਾਨਿ.

ਭਾਰਸੁਤ੍ਤ

ਪੁਚ੍ਛਾ – ਭਾਰਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭਾਰਞ੍ਚ ਵੋ ਭਿਕ੍ਖਵੇ ਦੇਸੇਸ੍ਸਾਮਿ ਭਾਰਹਾਰਞ੍ਚ ਭਾਰਾਦਾਨਞ੍ਚ ਭਾਰਨਿਕ੍ਖੇਪਨਞ੍ਚ, ਤਂ ਸੁਣਾਥ. ਕਤਮੋ ਚ ਭਿਕ੍ਖਵੇਭਾਰੋ, ‘ਪਞ੍ਚੁਪਾਦਾਨਕ੍ਖਨ੍ਧਾ’ ਤਿਸ੍ਸ ਵਚਨੀਯਂ. ਕਤਮੇ ਪਞ੍ਚ, ਰੂਪੁਪਾਦਾਨਕ੍ਖਨ੍ਧੋ ਵੇਦਨੁਪਾਦਾਨਕ੍ਖਨ੍ਧੋ ਸਞ੍ਞੁਪਾਦਾਨਕ੍ਖਨ੍ਧੋ ਸਙ੍ਖਾਰੁਪਾਦਾਨਕ੍ਖਨ੍ਧੋ ਵਿਞ੍ਞਾਣੁਪਾਦਾਨਕ੍ਖਨ੍ਧੋ. ਅਯਂ ਵੁਚ੍ਚਤਿ ਭਿਕ੍ਖਵੇ ਭਾਰੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਭਾਰਾ ¶ ਹਵੇ ਪਞ੍ਚਕ੍ਖਨ੍ਧਾ, ਭਾਰਹਾਰੋ ਚ ਪੁਗ੍ਗਲੋ;

ਭਾਰਾਦਾਨਂ ਦੁਖਂ ਲੋਕੇ, ਭਾਰਨਿਕ੍ਖੇਪਨਂ ਸੁਖਂ;

ਨਿਕ੍ਖਿਪਿਤ੍ਵਾ ਗਰੁਂ ਭਾਰਂ, ਅਞ੍ਞਂ ਭਾਰਂ ਅਨਾਦਿਯ;

ਸਮੂਲਂ ਤਣ੍ਹਮਬ੍ਬੁਯ੍ਹ, ਨਿਚ੍ਛਾਤੋ ਪਰਿਨਿਬ੍ਬੁਤੋ.

ਨਤੁਮ੍ਹਾਕਸੁਤ੍ਤ

ਪੁਚ੍ਛਾ – ਨ ਤੁਮ੍ਹਾਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੁ ਆਰਬ੍ਭ ‘‘ਯਂ ਭਿਕ੍ਖਵੇ ਨਤੁਮ੍ਹਾਕਂ ਤਂ ਪਜਹਥ, ਤਂ ਵੋ ਪਹੀਨਂ ਹਿਤਾਯ ਸੁਖਾਯਭਵਿਸ੍ਸਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਨਤ੍ਤਲਕ੍ਖਣਸੁਤ੍ਤ

ਪੁਚ੍ਛਾ – ਅਨਤ੍ਤਲਕ੍ਖਣਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਇਸਿਪਤਨੇ ਮਿਗਦਾਯੇ ਪਞ੍ਚਵਗ੍ਗਿਯੇ ਭਿਕ੍ਖੂ ਆਰਬ੍ਭ ‘‘ਰੂਪਂ ਭਿਕ੍ਖਵੇ ਅਨਤ੍ਤਾ, ਰੂਪਞ੍ਚ ਹਿਦਂ ਭਿਕ੍ਖਵੇ ਅਤ੍ਤਾ ਅਭਵਿਸ੍ਸ, ਨਯਿਦਂ ਰੂਪਂ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਰੂਪੇ ਏਵਂ ਮੇ ਰੂਪਂ ਹੋਤੁ, ਏਵਂ ਮੇ ਰੂਪਂ ਮਾ ਅਹੋਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਯਮਕਸੁਤ੍ਤ

ਪੁਚ੍ਛਾ – ਥੇਰਵਗ੍ਗੇ ਪਨਾਵੁਸੋ ਤਤਿਯਂ ਸਂਗੀਤਂ ਯਮਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਯਮਕਤ੍ਥੇਰਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਆਯਸ੍ਮਤੋ ਭਨ੍ਤੇ ਯਮਕਤ੍ਥੇਰਸ੍ਸ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ ‘‘ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਯਥਾ ਖੀਣਾਸਵੋ ਭਿਕ੍ਖੁ ਕਾਯਸ੍ਸ ਭੇਦਾ ਉਚ੍ਛਿਜ੍ਜਤਿ ਵਿਨਸ੍ਸਤਿ, ਨ ਹੋਤਿ ਪਰਂਮਰਣਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਂ ਕਿਂ ਮਞ੍ਞਸਿ ਆਵੁਸੋ ਯਮਕ, ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਧਮ੍ਮਸੇਨਾਪਤਿ ਆਯਸ੍ਮਤੋ ਯਮਕਤ੍ਥੇਰਸ੍ਸ ਪਟਿਵਿਦ੍ਧਸਚ੍ਚਸ੍ਸ ਦਿਟ੍ਠਿਸਮ੍ਪਨ੍ਨਸ੍ਸ ਅਨੁਯੋਗਵਤ੍ਤਝਾਪਨਵਸੇਨ ਪਟਿਪੁਚ੍ਛਿਤ੍ਵਾ ਉਤ੍ਤਰਿ ਧਮ੍ਮਦੇਸਨਂ ਵਿਤ੍ਥਾਰੇਨ ਦੇਸੇਸਿ.

ਵਿਸ੍ਸਜ੍ਜਨਾ – ਤਂ ਕਿਂ ਮਞ੍ਞਸਿ ਆਵੁਸੋ ਯਮਕ, ਰੂਪਂ ‘ਤਥਾਗਤੋ’ਤਿ ਸਮਨੁਪਸ੍ਸਸੀਤਿ. ‘ਨੋ ਹੇਤਂ ਆਵੁਸੋ’. ਵੇਦਨਂ. ਸਞ੍ਞਂ. ਸਙ੍ਖਾਰੇ. ਵਿਞ੍ਞਾਣਂ ‘ਤਥਾਗਤੋ’ਤਿ ਸਮਨੁਪਸ੍ਸਸੀਤਿ. ‘ਨੋ ਹੇਤਂ ਆਵੁਸੋ’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਧਮ੍ਮਸੇਨਾਪਤਿ ਆਯਸ੍ਮਤੋ ਯਮਕਤ੍ਥੇਰਸ੍ਸ ਅਨੁਯੋਗਵਤ੍ਤਝਾਪਨਵਸੇਨ ਪਟਿਪੁਚ੍ਛਿਤ੍ਵਾ ਪਟਿਪੁਚ੍ਛਿਤ੍ਵਾ ਉਤ੍ਤਰਿ ਧਮ੍ਮਦੇਸਨਂ ਪਵਤ੍ਤੇਸਿ.

ਤਂ ¶ ਕਿਂ ਮਞ੍ਞਸਿ ਆਵੁਸੋ ਯਮਕ, ਰੂਪਂ, ਵੇਦਨਂ, ਸਞ੍ਞਂ, ਸਙ੍ਖਾਰੇ, ਵਿਞ੍ਞਾਣਂ ‘ਤਥਾਗਤੋ’ਤਿ ਸਮਨੁਪਸ੍ਸਸਿ–

ਵਕ੍ਕਲਿਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਖਨ੍ਧਵਗ੍ਗਸਂਯੁਤ੍ਤੇ ਥੇਰਵਗ੍ਗੇ ਪਞ੍ਚਮਂ ਵਕ੍ਕਲਿਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਵਕ੍ਕਲਿਂ ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਵਕ੍ਕਲਿਥੇਰੋ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ ਭਗਵਨ੍ਤਂ ਏਤਦਵੋਚ ‘‘ਚਿਰਪਟਿਕਾਹਂ ਭਨ੍ਤੇ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਕਾਮੋ, ਨਤ੍ਥਿ ਚ ਮੇ ਕਾਯਸ੍ਮਿਂ ਤਾਵਤਿਕਾ ਬਲਮਤ੍ਤਾ, ਯਾਵਤਾਹਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮੇਯ੍ਯ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਲਂ ਵਕ੍ਕਲਿ, ਕਿਂ ਤੇ ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ, ਯੋ ਖੋ ਵਕ੍ਕਲਿ ਧਮ੍ਮਂ ਪਸ੍ਸਤਿ, ਸੋ ਮਂ ਪਸ੍ਸਤਿ, ਯੋ ਮਂ ਪਸ੍ਸਤਿ, ਸੋ ਧਮ੍ਮਂ ਪਸ੍ਸਤਿ. ਧਮ੍ਮਞ੍ਹਿ ਵਕ੍ਕਲਿ ਪਸ੍ਸਨ੍ਤੋ ਮਂ ਪਸ੍ਸਤਿ, ਮਂ ਪਸ੍ਸਨ੍ਤੋ ਧਮ੍ਮਂ ਪਸ੍ਸਤਿ. ਤਂ ਕਿਂ ਮਞ੍ਞਸਿ ਵਕ੍ਕਲਿ ¶ , ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

‘‘ਅਹਂ ¶ ਵਕ੍ਕਲਿ, ਕਿਂ ਤੇ ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ’’ –

‘‘ਤਂ ਕਿਂ ਮਞ੍ਞਸਿ ਵਕ੍ਕਲਿ, ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ –

ਅਨਿਚ੍ਚਂ ਭਨ੍ਤੇ.

‘‘ਯਂ ਪਨਾਨਿਚ੍ਚਂ, ਦੁਕ੍ਖਂ ਵਾ ਤਂ ਸੁਖਂ ਵਾ’’–

ਦੁਕ੍ਖਂ ਭਨ੍ਤੇ.

ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ ‘‘ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ’’–

ਪੁਚ੍ਛਾ – ਕਥਞ੍ਚਾਵੁਸੋ ¶ ਪੁਨਪਿ ਭਗਵਾ ਭਿਕ੍ਖੂ ਪੇਸੇਤ੍ਵਾ ਆਯਸ੍ਮਤੋ ਵਕ੍ਕਲਿਤ੍ਥੇਰਸ੍ਸ ਪਗ੍ਗਹਵਚਨਂ ਆਰੋਚਾਪੇਸਿ. ਸੋਪਿ ਕਥਂ ਅਤ੍ਤਨੋ ਪਵਤ੍ਤਿਂ ਭਗਵਤੋ ਪਚ੍ਚਾਰੋਚਾਪੇਸਿ. ਕਥਞ੍ਚਸ੍ਸ ਅਭਿਸਮ੍ਪਰਾਯੋ ਅਹੋਸਿ.

ਵਿਸ੍ਸਜ੍ਜਨਾ – ਸੁਣਾਵੁਸੋ ਤ੍ਵਂ ਵਕ੍ਕਲਿ ਭਗਵਤੋ ਵਚਨਂ ਦ੍ਵਿਨ੍ਨਞ੍ਚ ਦੇਵਤਾਨਂ, ਇਮਂ ਆਵੁਸੋ ਰਤ੍ਤਿਂ ਦ੍ਵੇ ਦੇਵਤਾਯੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਗਿਜ੍ਝਕੂਟਂ ਓਭਾਸੇਤ੍ਵਾ ਯੇਨ

ਭਗਵਾ ¶ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ, ਏਕਮਨ੍ਤਂ ਠਿਤਾ ਖੋ ਆਵੁਸੋ ਏਕਾ ਦੇਵਤਾ ਭਗਵਨ੍ਤਂ ਏਤਦਵੋਚ ‘ਵਕ੍ਕਲਿ ਭਨ੍ਤੇ ਭਿਕ੍ਖੁ ਵਿਮੋਕ੍ਖਾਯ ਚੇਤੇਤੀ’ਤਿ. ਅਪਰਾ ਦੇਵਤਾ ਭਗਵਨ੍ਤਂ ਏਤਦਵੋਚ ‘ਸੋ ਹਿ ਨੂਨ ਭਨ੍ਤੇ ਸੁਵਿਮੁਤ੍ਤੋ ਵਿਮੁਚ੍ਚਿਸ੍ਸਤੀ’ਤਿ. ਭਗਵਾ ਚ ਤਂ ਆਵੁਸੋ ਵਕ੍ਕਲਿ ਏਵਮਾਹ ‘ਮਾ ਭਾਯਿ ਵਕ੍ਕਲਿ, ਮਾ ਭਾਯਿ ਵਕ੍ਕਲਿ, ਅਪਾਪਕਂ ਤੇ ਮਰਣਂ ਭਵਿਸ੍ਸਤਿ, ਅਪਾਪਿਕਾ ਕਾਲਕਿਰਿਯਾ’ਤਿ. ਏਵਂ ਖੋ ਭਨ੍ਤੇ ਭਗਵਾ ਪੁਨਪਿ ਭਿਕ੍ਖੂ ਪੇਸੇਤ੍ਵਾ ਆਯਸ੍ਮਤੋ ਵਕ੍ਕਲਿਤ੍ਥੇਰਸ੍ਸ ਪਗ੍ਗਹਵਚਨਂ ਆਰੋਚਾਪੇਸਿ. ਸੋਪਿ ਭਨ੍ਤੇ ਆਯਸ੍ਮਾ ਤੇਨਹਾਵੁਸੋ ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦਥ ‘‘ਵਕ੍ਕਲਿ ਭਨ੍ਤੇ ਭਿਕ੍ਖੁ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ, ਸੋ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’’ਤਿ, ਏਵਞ੍ਚ ਵਦੇਥ ‘‘ਰੂਪਂ ਅਨਿਚ੍ਚਂ, ਤਾਹਂ ਭਨ੍ਤੇ ਨ ਕਙ੍ਖਾਮਿ, ਯਦਨਿਚ੍ਚਂ ਤਂ ਦੁਕ੍ਖਨ੍ਤਿ ਨਵਿਚਿਕਿਚ੍ਛਾਮਿ, ਯਦਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਨਤ੍ਥਿ ਮੇ ਤਤ੍ਥ ਛਨ੍ਦੋ ਵਾ ਰਾਗੋ ਵਾ ਪੇਮਂਵਾਤਿ ਨ ਵਿਚਿਕਿਚ੍ਛਾਮੀ’’ਤਿ ਏਵਮਾਦਿਨਾ ਭਗਵਤੋ ਅਤ੍ਤਨੋ ਪਵਤ੍ਤਿਂ ਪਚ੍ਚਾਰੋਚਾਪੇਸਿ. ਸੋ ਹਿ ਭਨ੍ਤੇ ਆਯਸ੍ਮਾ ਅਚਿਰਪਕ੍ਕਨ੍ਤੇਸੁ ਤੇਸੁ ਭਿਕ੍ਖੂਸੁ ਸਤ੍ਥਂ ਆਹਰਿਤ੍ਵਾ ਵੇਦਨਂ ਵਿਕ੍ਖਮ੍ਭੇਤ੍ਵਾ ਮੂਲਕਮ੍ਮਟ੍ਠਾਨਂ ਆਦਾਯ ਸਮ੍ਪਜਾਨੋ ਅਰਹਤ੍ਤਂ ਸਚ੍ਛਿਕਤ੍ਵਾ ਕਾਲਮਕਾਸਿ. ਏਵਂ ਖੋ ਭਨ੍ਤੇ ਤਸ੍ਸ ਆਯਸ੍ਮਤੋ ਅਭਿਸਮ੍ਪਰਾਯੋ ਅਹੋਸਿ.

ਅਸ੍ਸਜਿਸੁਤ੍ਤ

ਪੁਚ੍ਛਾ – ਅਸ੍ਸਜਿਸੁਤ੍ਤਂ ¶ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਅਸ੍ਸਜਿਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਅਸ੍ਸਜਿ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ ਭਗਵਨ੍ਤਂ ਏਤਦਵੋਚ ‘‘ਪੁਬ੍ਬੇ ਖ੍ਵਾਹਂ ਭਨ੍ਤੇ ਗੇਲਞ੍ਞੇ ਪਸ੍ਸਮ੍ਭੇਤ੍ਵਾ ਪਸ੍ਸਮ੍ਭੇਤ੍ਵਾ ਕਾਯਸਙ੍ਖਾਰੇ ਵਿਹਰਾਮਿ, ਸੋਹਂ ਸਮਾਧਿਂ ਨਪ੍ਪਟਿਲਭਾਮਿ. ਤਸ੍ਸ ਮਯ੍ਹਂ ਭਨ੍ਤੇ ਤਂ ਸਮਾਧਿਂ ਅਪ੍ਪਟਿਲਭਤੋ ਏਵਂ ਹੋਤਿ ਨੋ ਚਸ੍ਸਾਹਂ ਪਰਿਹਾਯਾਮੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯੇ ਤੇ ਅਸ੍ਸਜਿ ਸਮਣਬ੍ਰਾਹ੍ਮਣਾ ਸਮਾਧਿਸਾਰਕਾ ਸਮਾਧਿਸਾਮਞ੍ਞਾ, ਤੇਸਂ ਤਂ ਸਮਾਧਿਂ ਅਪ੍ਪਟਿਲਭਤਂ ਏਵਂ ਹੋਤਿ ‘ਨੋ ਚਸ੍ਸੁ ਮਯਂ ਪਰਿਹਾਯਾਮਾ’ਤਿ. ਤਂ ਕਿਂ ਮਞ੍ਞਸਿ ਅਸ੍ਸਜਿ, ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਖੇਮਕਸੁਤ੍ਤ

ਪੁਚ੍ਛਾ – ਖੇਮਕਸੁਤ੍ਤਂ ¶ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਸਮ੍ਬਹੁਲੇ ਥੇਰੇ ਭਿਕ੍ਖੂ ਆਰਬ੍ਭ ਆਯਸ੍ਮਤਾ ਖੇਮਕਤ੍ਥੇਰੇਨ ਭਾਸਿਤਂ. ਸਮ੍ਬਹੁਲਾ ਭਨ੍ਤੇ ਥੇਰਾ ਭਿਕ੍ਖੂ ਆਯਸ੍ਮਨ੍ਤਂ ਦਾਸਕਂ ਪੇਸੇਤ੍ਵਾ ਚਤੁਕ੍ਖਤ੍ਤੁਂ ਆਯਸ੍ਮਨ੍ਤਂ ਖੇਮਕਂ ਆਬਾਧਿਕਂ ਦੁਕ੍ਖਿਤਂ ਬਾਲ਼੍ਹਗਿਲਾਨਂ ਗੇਲਞ੍ਞਕਾਰਣਞ੍ਚ ਧਮ੍ਮਞ੍ਚ ਪੁਚ੍ਛਿਂਸੁ ¶ , ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਪਞ੍ਚਿਮੇ ਆਵੁਸੋ ਉਪਾਦਾਨਕ੍ਖਨ੍ਧਾ ਵੁਤ੍ਤਾ ਭਗਵਤਾ. ਸੇਯ੍ਯਥਿਦਂ, ਰੂਪੁਪਾਦਾਨਕ੍ਖਨ੍ਧੋ ਵੇਦਨੁਪਾਦਾਨਕ੍ਖਨ੍ਧੋ ਸਞ੍ਞੁਪਾਦਾਨਕ੍ਖਨ੍ਧੋ ਸਙ੍ਖਾਰੁਪਾਦਾਨਕ੍ਖਨ੍ਧੋ ਵਿਞ੍ਞਾਣੁਪਾਦਾਨਕ੍ਖਨ੍ਧੋ, ਇਮੇਸੁ ਖ੍ਵਾਹਂ ਆਵੁਸੋ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਨ ਕਿਞ੍ਚਿ ਅਤ੍ਤਂ ਵਾ ਅਤ੍ਤਨਿਯਂ ਵਾ ਸਮਨੁਪਸ੍ਸਾਮੀ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਖੇਮਕਤ੍ਥੇਰੇਨ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਆਯਸ੍ਮਾ ਖੇਮਕੋ ਉਤ੍ਤਰਿ ਧਮ੍ਮਦੇਸਨਂ ਪਵਡ੍ਢੇਤ੍ਵਾ ਵਿਤ੍ਥਾਰੇਨ ਥੇਰਾਨਂ ਭਿਕ੍ਖੂਨਂ ਦੇਸੇਸਿ. ਕੀਦਿਸੋ ਚ ਨੇਸਂ ਧਮ੍ਮਦੇਸਕਧਮ੍ਮਪ੍ਪਟਿਗ੍ਗਾਹਕਾਨਂ ਧਮ੍ਮਦੇਸਨਾਯ ਆਨਿਸਂਸੋ ਅਧਿਗਤੋ.

ਵਿਸ੍ਸਜ੍ਜਨਾ – ਚਤੁਤ੍ਥੇ ਭਨ੍ਤੇ ਵਾਰੇ ਆਯਸ੍ਮਾ ਖੇਮਕੋ ‘‘ਅਲਂ ਆਵੁਸੋ ਦਾਸਕ ਕਿਂ ਇਮਾਯ ਸਨ੍ਧਾਵਨਿਕਾਯ, ਆਹਰਾਵੁਸੋ ਦਣ੍ਡਂ, ਅਹਮੇਵ ਥੇਰਾਨਂ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਦਣ੍ਡਮੋਲੁਬ੍ਭ ਆਯਸ੍ਮਾ ਖੇਮਕੋ ਯੇਨ ਥੇਰਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਥੇਰੇਹਿ ਭਿਕ੍ਖੂਹਿ ਪੁਚ੍ਛਿਤੋ ‘‘ਨਖ੍ਵਾਹਂ ਆਵੁਸੋ ਰੂਪਂ ਅਸ੍ਮੀਤਿ ਵਦਾਮਿ, ਨਪਿ ਅਞ੍ਞਤ੍ਰ ਰੂਪਾ ਅਸ੍ਮੀਤਿ ਵਦਾਮਿ. ਨ ਖ੍ਵਾਹਂ ਆਵੁਸੋ ਵੇਦਨਂ ਅਸ੍ਮੀਤਿ ਵਦਾਮਿ, ਨਪਿ ਅਞ੍ਞਤ੍ਰ ਵੇਦਨਾ ਅਸ੍ਮੀਤਿ ਵਦਾਮੀ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਾ ਖੇਮਕੋ ਉਤ੍ਤਰਿਪਿ ਧਮ੍ਮਦੇਸਨਂ ਪਵਡ੍ਢੇਤ੍ਵਾ ਵਿਤ੍ਥਾਰੇਨ ਦੇਸੇਸਿ. ਇਮਸ੍ਮਿਞ੍ਚ ਪਨ ਭਨ੍ਤੇ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਸਟ੍ਠਿਮਤ੍ਤਾਨਂ ਥੇਰਾਨਂ ਭਿਕ੍ਖੂਨਂ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ ਆਯਸ੍ਮਤੋਚ ਖੇਮਕਸ੍ਸ. ਏਵਂ ਖੋ ਭਨ੍ਤੇ ਤੇਸਂ ਥੇਰਾਨਂ ਧਮ੍ਮਦੇਸਕਧਮ੍ਮਪ੍ਪਟਿਗ੍ਗਾਹਕਾਨਂ ਧਮ੍ਮਾਭਿਸਮਯੋ ਅਹੋਸਿ.

ਛਨ੍ਨਸੁਤ੍ਤ

ਪੁਚ੍ਛਾ – ਛਨ੍ਨਸੁਤ੍ਤਂ ¶ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਆਯਸ੍ਮਨ੍ਤਂ ਛਨ੍ਨਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਛਨ੍ਨਤ੍ਥੇਰੋ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ ‘‘ਓਵਦਤੁ ਮਂ ਆਯਸ੍ਮਾ ਆਨਨ੍ਦੋ, ਅਨੁਸਾਸਤੁ ਮਂ ਆਯਸ੍ਮਾ ਆਨਨ੍ਦੋ, ਕਰੋਤੁ ਮੇ ਆਯਸ੍ਮਾ ਆਨਨ੍ਦੋ ਧਮ੍ਮਿਂ ਕਥਂ, ਯਥਾਹਂ ਧਮ੍ਮਂ ਪਸ੍ਸੇਯ੍ਯ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸਮ੍ਮੁਖਾ ਮੇ ਤਂ ਆਵੁਸੋ ਛਨ੍ਨ ਭਗਵਤੋ ਸੁਤਂ, ਸਮ੍ਮੁਖਾ ਪਟਿਗ੍ਗਹਿਤਂ ਕਚ੍ਚਾਨਗੋਤ੍ਤਂ ਭਿਕ੍ਖੁਂ ਓਵਦਨ੍ਤਸ੍ਸ, ਦ੍ਵਯਨਿਸ੍ਸਿਤੋ ਖ੍ਵਾਯਂ ਕਚ੍ਚਾਨ ਲੋਕੋ ਯੇਭੁਯ੍ਯੇਨ ਅਤ੍ਥਿਤਞ੍ਚੇਵ ਨਤ੍ਥਿਤਞ੍ਚ, ਲੋਕਸਮੁਦਯਂ ਖੋ ਕਚ੍ਚਾਨ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋ ਯਾ ਲੋਕੇ ਨਤ੍ਥਿਤਾ, ਸਾ ਨ ਹੋਤੀ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ.

ਓਵਦਤੁ ¶ ਮਂ ਆਯਸ੍ਮਾ ਆਨਨ੍ਦੋ, ਅਨੁਸਾਸਤੁ ਮਂ ਆਯਸ੍ਮਾ ਆਨਨ੍ਦੋ.

ਪੁਪ੍ਫਸੁਤ੍ਤ

ਪੁਚ੍ਛਾ – ਤੇਨਾਵੁਸੋ…ਪੇ… ¶ ਸਮ੍ਮਾਸਮ੍ਬੁਦ੍ਧੇਨ ਖਨ੍ਧਵਗ੍ਗਸਂਯੁਤ੍ਤੇ ਪੁਪ੍ਫਵਗ੍ਗੇ ਪੁਪ੍ਫਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਨਾਹਂ ਭਿਕ੍ਖਵੇ ਲੋਕੇਨ ਵਿਵਦਾਮਿ, ਲੋਕੋਵ ਮਯਾ ਵਿਵਦਤਿ, ਨ ਭਿਕ੍ਖਵੇ ਧਮ੍ਮਵਾਦੀ ¶ ਕੇਨਚਿ ਲੋਕਸ੍ਮਿਂ ਵਿਵਦਤਿ, ਯਂ ਭਿਕ੍ਖਵੇ ਨਤ੍ਥਿ ਸਮ੍ਮਤਂ ਲੋਕੇ ਪਣ੍ਡਿਤਾਨਂ, ਅਹਮ੍ਪਿਤਂ ‘‘ਨਤ੍ਥੀ’’ਤਿ ਵਦਾਮਿ, ਯਂ ਭਿਕ੍ਖਵੇ ਅਤ੍ਥਿਸਮ੍ਮਤਂ ਲੋਕੇ ਪਣ੍ਡਿਤਾਨਂ, ਅਹਮ੍ਪਿਤਂ ‘‘ਅਤ੍ਥੀ’’ਤਿ ਵਦਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਨਾਹਂ ਭਿਕ੍ਖਵੇ ਲੋਕੇਨ ਵਿਵਦਾਮਿ.

ਨ ਭਿਕ੍ਖਵੇ ਧਮ੍ਮਵਾਦੀ ਕੇਨਚਿ ਲੋਕਸ੍ਮਿਂ ਵਿਵਦਤਿ.

ਫੇਣਪਿਣ੍ਡੂਪਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਫੇਣਪਿਣ੍ਡੂਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਅਯੁਜ੍ਝਾਯਂ ਭਨ੍ਤੇ ਗਙ੍ਗਾਯ ਨਦਿਯਾ ਤੀਰੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਸੇਯ੍ਯਥਾਪਿ ਭਿਕ੍ਖਵੇ ਅਯਂ ਗਙ੍ਗਾ ਨਦੀ ਮਹਨ੍ਤਂ ਫੇਣਪਿਣ੍ਡਂ ਆਵਹੇਯ੍ਯ, ਤਮੇਨਂ ਚਕ੍ਖੁਮਾ ਪੁਰਿਸੋ ਪਸ੍ਸੇਯ੍ਯ ਨਿਜ੍ਝਾਯੇਯ੍ਯ ਯੋਨਿਸੋ ਉਪਪਰਿਕ੍ਖੇਯ੍ਯ, ਤਸ੍ਸ ਤਂ ਪਸ੍ਸਤੋ ਨਿਜ੍ਝਾਯਤੋ ਯੋਨਿਸੋ ਉਪਪਰਿਕ੍ਖਤੋ ਰਿਤ੍ਤਕਞ੍ਞੇਵ ਖਾਯੇਯ੍ਯ, ਤੁਚ੍ਛਕਞ੍ਞੇਵ ਖਾਯੇਯ੍ਯ, ਅਸਾਰਕਞ੍ਞੇਵ ਖਾਯੇਯ੍ਯ, ਕਿਂ ਸਿਯਾ ਭਿਕ੍ਖਵੇ ਫੇਣਪਿਣ੍ਡੇ ਸਾਰੋ. ਏਵਮੇਵ ਖੋ ਭਿਕ੍ਖਵੇ ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਤਂ ਭਿਕ੍ਖੁ ਪਸ੍ਸਤਿ ਨਿਜ੍ਝਾਯਤਿ ਯੋਨਿਸੋ ਉਪਪਰਿਕ੍ਖਤਿ, ਤਸ੍ਸ ਤਂ ਪਸ੍ਸਤੋ ਨਿਜ੍ਝਾਯਤੋ ਯੋਨਿਸੋ ਉਪਪਰਿਕ੍ਖਤੋ ਰਿਤ੍ਤਕਞ੍ਞੇਵ ਖਾਯਤਿ, ਤੁਚ੍ਛਕਞ੍ਞੇਵ ਖਾਯਤਿ, ਅਸਾਰਕਞ੍ਞੇਵ ਖਾਯਤਿ, ਕਿਞ੍ਹਿ ਸਿਯਾ ਭਿਕ੍ਖਵੇ ਰੂਪੇ ਸਾਰੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਫੇਣਪਿਣ੍ਡੂਪਮਂ ¶ ਰੂਪਂ, ਵੇਦਨਾ ਪੁਬ੍ਬੁਲ਼ੁਪਮਾ;

ਮਰੀਚਿਕੂਪਮਾ ਸਞ੍ਞਾ, ਸਙ੍ਖਾਰਾ ਕਦਲੂਪਮਾ;

ਮਾਯੂਪਮਞ੍ਚ ਵਿਞ੍ਞਾਣਂ, ਦੇਸਿਤਾਦਿਚ੍ਚਬਨ੍ਧੁਨਾ;

ਯਥਾ ਯਥਾ ਨਿਜ੍ਝਾਯਤਿ, ਯੋਨਿਸੋ ਉਪਪਰਿਕ੍ਖਤਿ;

ਰਿਤ੍ਤਕਂ ਤੁਚ੍ਛਕਂ ਹੋਤਿ, ਯੋ ਨਂ ਪਸ੍ਸਤਿ ਯੋਨਿਸੋ.

ਇਮਞ੍ਚ ¶ ਕਾਯਂ ਆਰਬ੍ਭ, ਭੂਰਿਪਞ੍ਞੇਨ ਦੇਸਿਤਂ;

ਪਹਾਨਂ ਤਿਣ੍ਣਂ ਧਮ੍ਮਾਨਂ, ਰੂਪਂ ਪਸ੍ਸਥ ਛਡ੍ਡਿਤਂ.

ਆਯੁ ਉਸ੍ਮਾਚ ਵਿਞ੍ਞਾਣਂ, ਯਦਾ ਕਾਯਂ ਜਹਨ੍ਤਿਮਂ;

ਅਪਵਿਦ੍ਧੋ ਤਦਾ ਸੇਤਿ, ਪਰਭਤ੍ਤਂ ਅਚੇਤਨਂ.

ਏਤਾਦਿਸਾਯਂ ਸਨ੍ਤਾਨੋ, ਮਾਯਾਯਂ ਬਾਲਲਾਪਿਨੀ;

ਵਧਕੋ ਏਸ ਅਕ੍ਖਾਤੋ, ਸਾਰੋ ਏਤ੍ਥ ਨ ਵਿਜ੍ਜਤਿ.

ਏਵਂ ਖਨ੍ਧੇ ਅਵੇਕ੍ਖੇਯ੍ਯ, ਭਿਕ੍ਖੁ ਆਰਦ੍ਧਵੀਰਿਯੋ;

ਦਿਵਾ ਵਾ ਯਦਿ ਵਾ ਰਤ੍ਤਿਂ, ਸਮ੍ਪਜਾਨੋ ਪਟਿਸ੍ਸਤੋ.

ਜਹੇਯ੍ਯ ਸਬ੍ਬਸਂਯੋਗਂ, ਕਰੇਯ੍ਯ ਸਰਣਤ੍ਤਨੋ;

ਚਰੇਯ੍ਯਾਦਿਤ੍ਤਸੀਸੋਵ, ਪਤ੍ਥਯਂ ਅਚ੍ਚੁਤਂ ਪਦਂ.

ਦੁਤਿਯਧਮ੍ਮਕਤਿਕਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਧਮ੍ਮਕਥਿਕਵਗ੍ਗੇ ਦੁਤਿਯਧਮ੍ਮਕਥਿਕਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਭਾਸਿਤਂ. ਅਞ੍ਞਤਮੋ ਭਨ੍ਤੇ ਭਿਕ੍ਖੁ ਭਗਵਨ੍ਤਂ ਏਤਦਵੋਚ ‘‘ਧਮ੍ਮਕਥਿਕੋ ਧਮ੍ਮਕਥਿਕੋਤਿ ਭਨ੍ਤੇ ਵੁਚ੍ਚਤਿ, ਕਿਤ੍ਤਾਵਤਾ ਨੁ ਖੋ ਭਨ੍ਤੇ ਧਮ੍ਮਕਥਿਕੋ ਹੋਤਿ, ਕਿਤ੍ਤਾਵਤਾ ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਹੋਤਿ, ਕਿਤ੍ਤਾਵਤਾ ਦਿਟ੍ਠਧਮ੍ਮਨਿਬ੍ਬਾਨਪ੍ਪਤ੍ਤੋ ਹੋਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਰੂਪਸ੍ਸ ਚੇ ਭਿਕ੍ਖੁ ਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਧਮ੍ਮਂ ਦੇਸੇਤਿ, ‘ਧਮ੍ਮਕਥਿਕੋ ਭਿਕ੍ਖੂ’ਤਿ ਅਲਂ ਵਚਨਾਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸੀਲਵਨ੍ਤਸੁਤ੍ਤ, ਸੁਤਵਨ੍ਤਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਂ ਸੀਲਵਨ੍ਤਸੁਤ੍ਤਞ੍ਚ ਸੁਤਵਨ੍ਤਸੁਤ੍ਤਞ੍ਚ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ¶ ਭਨ੍ਤੇ ਆਯਸ੍ਮਨ੍ਤਂ ਮਹਾਕੋਟ੍ਠਿਕਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਆਯਸ੍ਮਾ ਭਨ੍ਤੇ ਮਹਾਕੋਟ੍ਠਿਕੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ ‘‘ਸੀਲਵਤਾਵੁਸੋ ਸਾਰਿਪੁਤ੍ਤ ਭਿਕ੍ਖੁਨਾ ਕਤਮੇ ਧਮ੍ਮਾ ਯੋਨਿਸੋ ਮਨਸਿਕਾਤਬ੍ਬਾ. ਸੁਤਾਵਤਾਵੁਸੋ ਸਾਰਿਪੁਤ੍ਤ ਭਿਕ੍ਖੁਨਾ ਕਤਮੇ ਧਮ੍ਮਾ ਯੋਨਿਸੋ ਮਨਸਿਕਾਤਬ੍ਬਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸੀਲਵਤਾਵੁਸੋ ਕੋਟ੍ਠਿਕ ਭਿਕ੍ਖੁਨਾ, ਸੁਤਾਵਤਾਵੁਸੋ ਕੋਟ੍ਠਿਕ ਭਿਕ੍ਖੁਨਾ ਪਞ੍ਚੁਪਾਦਾਨਕ੍ਖਨ੍ਧਾ ਅਨਿਚ੍ਚਤੋ ਦੁਕ੍ਖਤੋ ਰੋਗਤੋ ਗਣ੍ਡਤੋ ਸਲ੍ਲਤੋ ਅਘਤੋ ਆਬਾਧਤੋ ਪਰਤੋ ਪਲੋਕਤੋ ਸੁਞ੍ਞਤੋ ਅਨਤ੍ਤਤੋ ਯੋਨਿਸੋ ਮਨਸਿਕਾਤਬ੍ਬਾ’’ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਰਾਧਸਂਯੁਤ੍ਤ

ਸਤ੍ਤਸੁਤ੍ਤ

ਪੁਚ੍ਛਾ – ਰਾਧਸਂਯੁਤ੍ਤੇ ¶ ਪਨਾਵੁਸੋ ਦੁਤਿਯਂ ਸਤ੍ਤਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਰਾਧਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਰਾਧਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਸਤ੍ਤੋ ਸਤ੍ਤੋਤਿ ਭਨ੍ਤੇ ਵੁਚ੍ਚਤਿ, ਕਿਤ੍ਤਾਵਤਾ ਨੁ ਖੋ ਭਨ੍ਤੇ ਸਤ੍ਤੋਤਿ ਵੁਚ੍ਚਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਰੂਪੇ ਖੋ ਰਾਧ ਯੋ ਛਨ੍ਦੋ ਯੋ ਰਾਗੋ ਯਾ ਨਨ੍ਦੀ ਯਾ ਤਣ੍ਹਾ, ਤਤ੍ਰ ਸਤ੍ਤੋ ਤਤ੍ਰ ਵਿਸਤ੍ਤੋ, ਤਸ੍ਮਾ ਸਤ੍ਤੋਤਿ ਵੁਚ੍ਚਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਦਿਟ੍ਠਿਸਂਯੁਤ੍ਤ

ਸੋਅਤ੍ਤਾਸੁਤ੍ਤ

ਪੁਚ੍ਛਾ – ਦਿਟ੍ਠਿਸਂਯੁਤ੍ਤੇ ¶ ਪਨਾਵੁਸੋ ਤਤਿਯਂ ਸਂਗੀਤਂ ਸੋਅਤ੍ਤਾ ਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਕਿਸ੍ਮਿਂ ਨੁ ਖੋ ਭਿਕ੍ਖਵੇ ਸਤਿ ਕਿਂ ਉਪਾਦਾਯ ਕਿਂ ਅਭਿਨਿਵਿਸ੍ਸ ਏਵਂ ਦਿਟ੍ਠਿ ਉਪ੍ਪਜ੍ਜਤਿ ਸੋ ਅਤ੍ਤਾ ਸੋ ਲੋਕੋ ਸੋ ਪੇਚ੍ਚ ਭਵਿਸ੍ਸਾਮਿ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਨਤ੍ਥਿਦਿਨ੍ਨਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪਞ੍ਚਮਂ ਨਤ੍ਥਿਦਿਨ੍ਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਕਿਸ੍ਮਿਂ ਨੁ ਖੋ ਭਿਕ੍ਖਵੇ ਸਤਿ ਕਿਂ ਉਪਾਦਾਯ ਕਿਂ ਅਭਿਨਿਵਿਸ੍ਸ ਏਵਂ ਦਿਟ੍ਠਿ ਉਪ੍ਪਜ੍ਜਤਿ ਨਤ੍ਥਿ ਦਿਨ੍ਨਂ, ਨਤ੍ਥਿ ਯਿਟ੍ਠਂ, ਨਤ੍ਥਿ ਹੁਤਂ, ਨਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਓਕ੍ਕਨ੍ਤਸਂਯੁਤ੍ਤ

ਚਕ੍ਖੁਸੁਤ੍ਤ

ਪੁਚ੍ਛਾ – ਓਕ੍ਕਨ੍ਤਸਂਯੁਤ੍ਤੇ ¶ ਪਨਾਵੁਸੋ ਪਠਮਂ ਚਕ੍ਖੁਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ¶ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਚਕ੍ਖੁਂ ਭਿਕ੍ਖਵੇ ਅਨਿਚ੍ਚਂ ਵਿਪਰਿਣਾਮਿ ਅਞ੍ਞਥਾਭਾਵਿ. ਸੋਤਂ. ਘਾਨਂ. ਜਿਵ੍ਹਂ. ਕਾਯੋ. ਮਨੋ ਅਨਿਚ੍ਚੋ ਵਿਪਰਿਣਾਮੀ ਅਞ੍ਞਥਾਭਾਵੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਾਰਿਪੁਤ੍ਤਸਂਯੁਤ੍ਤ

ਸੁਚਿਮੁਖੀਸੁਤ੍ਤ

ਪੁਚ੍ਛਾ – ਸਾਰਿਪੁਤ੍ਤਸਂਯੁਤ੍ਤੇ ¶ ਪਨਾਵੁਸੋ ਦਸਮਂ ਸੁਚਿਮੁਖੀਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸੁਚਿਮੁਖਿਂ ਪਰਿਬ੍ਬਾਜਿਕਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਸੁਚਿਮੁਖੀ ਭਨ੍ਤੇ ਪਰਿਬ੍ਬਾਜਿਕਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ ‘‘ਕਿਂ ਨੁ ਖੋ ਸਮਣ ਅਧੋਮੁਖੋ ਭੁਞ੍ਜਸੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਨ ਖ੍ਵਾਹਂ ਭਗਿਨਿ ਅਧੋਮੁਖੋ ਭੁਞ੍ਜਾਮੀ’’ਤਿ ਏਵਮਾਦਿਨਾ ਪਟਿਕ੍ਖਿਪਿਤ੍ਵਾ ‘‘ਯੇ ਹਿ ਕੇਚਿ ਭਗਿਨਿ ਸਮਣਬ੍ਰਾਹ੍ਮਣਾ ਵਤ੍ਥੁਵਿਜ੍ਜਾ ਤਿਰਚ੍ਛਾਨਵਿਜ੍ਜਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਨ੍ਤਿ, ਇਮੇ ਵੁਚ੍ਚਨ੍ਤਿ ਭਗਿਨਿ ਸਮਣਬ੍ਰਾਹ੍ਮਣਾ ਅਧੋਮੁਖਾ ਭੁਞ੍ਜਨ੍ਤੀ’’ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਕਿਂ ¶ ਨੁ ਖੋ ਸਮਣ ਅਧੋ ਮੁਖੋ ਭੁਞ੍ਜਸਿ.

ਨ ਖ੍ਵਾਹਂ ਭਗਿਨਿ ਅਧੋਮੁਖੋ ਭੁਞ੍ਜਾਮਿ.

ਤੇਨ ਹਿ ਸਮਣ ਉਬ੍ਭਮੁਖੋ ਭੁਞ੍ਜਸਿ.

ਨ ਖ੍ਵਾਹਂ ਭਗਿਨਿ ਉਬ੍ਭਮੁਖੋ ਭੁਞ੍ਜਾਮਿ.

ਸਲ਼ਾਯਤਨਵਗ੍ਗਸਂਯੁਤ੍ਤਪਾਲ਼ਿ

ਅਜ੍ਝਤ੍ਤਾਨਿਚ੍ਚਸੁਤ੍ਤ, ਬਾਹਿਰਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸਲ਼ਾਯਤਨਵਗ੍ਗਸਂਯੁਤ੍ਤੇ ਪਠਮਂ ਅਜ੍ਝਤ੍ਤਾਨਿਚ੍ਚਸੁਤ੍ਤਞ੍ਚ ਚਤੁਤ੍ਥਂ ਬਾਹਿਰਾਨਿਚ੍ਚਸੁਤ੍ਤਞ੍ਚ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਚਕ੍ਖੁਂ ਭਿਕ੍ਖਵੇ ਅਨਿਚ੍ਚਂ, ਯਦਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਦਨਤ੍ਤਾ, ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬ’’ਨ੍ਤਿ ਏਵਮਾਦਿਨਾਚ. ‘‘ਰੂਪਾ ਭਿਕ੍ਖਵੇ ਅਨਿਚ੍ਚਾ. ਯਦਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਦਨਤ੍ਤਾ, ਯਦਨਤ੍ਤਾ ਤਂ ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’’ਤਿ ਚ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਬ੍ਬਵਗ੍ਗ

ਆਦਿਤ੍ਤਸੁਤ੍ਤ

ਪੁਚ੍ਛਾ – ਤਤ੍ਥਾਵੁਸੋ ¶ ਸਬ੍ਬਵਗ੍ਗੇ ਛਟ੍ਠਂ ਆਦਿਤ੍ਤਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਗਯਾਯਂ ¶ ਭਨ੍ਤੇ ਗਯਾਸੀਸੇ ਪੁਰਾਣਜਟਿਲਂ ਭਿਕ੍ਖੁਸਹਸ੍ਸਂ ਆਰਬ੍ਭ ‘‘ਸਬ੍ਬਂ ਭਿਕ੍ਖਵੇ ਆਦਿਤ੍ਤਂ, ਕਿਞ੍ਚ ਭਿਕ੍ਖਵੇ ਸਬ੍ਬਂ ਆਦਿਤ੍ਤਂ. ਚਕ੍ਖੁ ਭਿਕ੍ਖਵੇ ਆਦਿਤ੍ਤਂ, ਰੂਪਾ ਆਦਿਤ੍ਤਾ, ਚਕ੍ਖੁਵਿਞ੍ਞਾਣਂ ਆਦਿਤ੍ਤਂ, ਚਕ੍ਖੁਸਮ੍ਫਸ੍ਸੋ ਆਦਿਤ੍ਤੋ, ਯਮ੍ਪਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ, ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂਵਾ, ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ. ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਮਿਗਜਾਲਵਗ੍ਗ

ਪਠਮ ਮਿਗਜਾਲਸੁਤ੍ਤ

ਪੁਚ੍ਛਾ – ਮਿਗਜਾਲਵਗ੍ਗੇ ¶ ਆਵੁਸੋ ਪਠਮਮਿਗਜਾਲਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ¶ ਭਨ੍ਤੇ ਆਯਸ੍ਮਨ੍ਤਂ ਮਿਗਜਾਲਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਮਿਗਜਾਲਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਏਕਵਿਹਾਰੀ ਏਕਵਿਹਾਰੀਤਿ ਭਨ੍ਤੇ ਵੁਚ੍ਚਤਿ, ਕਿਤ੍ਤਾਵਤਾਨੁਖੋ ਭਨ੍ਤੇ ਏਕਵਿਹਾਰੀ ਹੋਤਿ, ਕਿਤ੍ਤਾਵਤਾਚ ਪਨ ਸਦੁਤਿਯਵਿਹਾਰੀ ਹੋਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸਨ੍ਤਿ ਖੋ ਮਿਗਜਾਲ ਚਕ੍ਖੁਵਿਞ੍ਞੇਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਤਞ੍ਚੇ ਭਿਕ੍ਖੁ ਅਭਿਨਨ੍ਦਤਿ ਅਭਿਵਦਤਿ ਅਜ੍ਝੋਸਾਯ ਤਿਟ੍ਠਤਿ, ਤਸ੍ਸ ਤਂ ਅਭਿਨਨ੍ਦਤੋ ਅਭਿਵਦਤੋ ਅਜ੍ਝੋਸਾਯ ਤਿਟ੍ਠਤੋ ਉਪ੍ਪਜ੍ਜਤਿ ਨਨ੍ਦੀ, ਨਨ੍ਦਿਯਾ ਸਤਿ ਸਾਰਾਗੋ ਹੋਤਿ, ਸਾਰਾਗੇ ਸਤਿ ਸਂਯੋਗੋ ਹੋਤਿ, ਨਨ੍ਦਿਸਂਯੋਜਨਸਂਯੁਤ੍ਤੋ ਖੋ ਮਿਗਜਾਲ ਭਿਕ੍ਖੁ ਸਦੁਤਿਯਵਿਹਾਰੀਤਿ ਵੁਚ੍ਚਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪਠਮ ਛਫਸ੍ਸਾਯਤਨਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਨਵਮਂ ਸਂਗੀਤਂ ਪਠਮਛਫਸ੍ਸਾਯਤਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਯੋ ਹਿ ਕੋਚਿ ਵਿਕ੍ਖਵੇ ਭਿਕ੍ਖੁ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਨਪ੍ਪਜਾਨਾਤਿ, ਅਵੁਸਿਤਂ ਤੇਨ ਬ੍ਰਹ੍ਮਚਰਿਯਂ, ਆਰਕਾ ਸੋ ਇਮਸ੍ਮਾ ਧਮ੍ਮਵਿਨਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਹਂ ¶ ਹਿ ਭਨ੍ਤੇ ਛਨ੍ਨਂ ਫਸ੍ਸਾਯਤਨਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਨਪ੍ਪਜਾਨਾਮਿ.

ਚਕ੍ਖੁਂ ¶ ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ ਸਮਨੁਪਸ੍ਸਸਿ.

ਨੋ ਹੇਤਂ ਭਨ੍ਤੇ.

ਏਤ੍ਥ ਚ ਤੇ ਭਿਕ੍ਖੁ ਚਕ੍ਖੁ ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਂ ਭਵਿਸ੍ਸਤਿ, ਏਸੇਵਨ੍ਤੋ ਦੁਕ੍ਖਸ੍ਸ.

ਗਿਲਾਨਵਗ੍ਗ

ਪਠਮ ਗਿਲਾਨਸੁਤ੍ਤ

ਪੁਚ੍ਛਾ – ਗਿਲਾਨਵਗ੍ਗੇ ¶ ਪਨਾਵੁਸੋ ਪਠਮਂ ਗਿਲਾਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਨਵਂ ਭਿਕ੍ਖੁਂ ਗਿਲਾਨਂ ਆਬਾਧਿਤਂ ਦੁਕ੍ਖਿਤਂ ਬਾਲ਼੍ਹਗਿਲਾਨਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਗਿਲਾਨੋ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ ਭਗਵਨ੍ਤਂ ਏਤਦਵੋਚ ‘‘ਨਖ੍ਵਾਹਂ ਭਨ੍ਤੇ ਸੀਲਵਿਸੁਦ੍ਧਤ੍ਥਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਤਂ ਭਿਕ੍ਖੁਂ ਪਟਿਪੁਚ੍ਛਿਤ੍ਵਾ ਤਸ੍ਸ ਚ ਵਚਨਂ ਸਾਧੁਕਾਰਂ ਦਤ੍ਵਾ ‘‘ਰਾਗਵਿਰਾਗਤ੍ਥੋ ਹਿ ਭਿਕ੍ਖੁ ਮਯਾ ਧਮ੍ਮੋ ਦੇਸਿਤੋ, ਤਂ ਕਿਂ ਮਞ੍ਞਸਿ ਭਿਕ੍ਖੁ, ਚਕ੍ਖੁ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿ. ਅਨਿਚ੍ਚਂ ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਾ ਤਂ ਸੁਖਂ ਵਾਤਿ, ਦੁਕ੍ਖਂ ਭਨ੍ਤੇ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਨ ¶ ਮੇ ਭਨ੍ਤੇ ਖਮਨੀਯਂ.

ਸਾਧੁ ¶ ਖੋ ਤ੍ਵਂ ਭਿਕ੍ਖੁ ਰਾਗਵਿਰਾਗਤ੍ਥਂ ਮਯਾ ਧਮ੍ਮਂ ਦੇਸਿਤਂ ਆਜਾਨਾਸਿ,

ਛਨ੍ਨਵਗ੍ਗ

ਪੁਣ੍ਣਸੁਤ੍ਤ

ਪੁਚ੍ਛਾ – ਛਨ੍ਨਵਗ੍ਗੇ ¶ ਪਨਾਵੁਸੋ ਪਞ੍ਚਮਂ ਸਂਗੀਤਂ ਪੁਣ੍ਣਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਪੁਣ੍ਣਤ੍ਥੇਰਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਭਨ੍ਤੇ ਪੁਣ੍ਣਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਸਾਧੁ ਮੇ ਭਨ੍ਤੇ ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੁ, ਯਮਹਂ ਭਗਵਤੋ ਧਮ੍ਮਂ ਸੁਤ੍ਵਾ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰੇਯ੍ਯ’’ਨ੍ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਸਨ੍ਤਿ ਖੋ ਪੁਣ੍ਣ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਤਞ੍ਚੇ ਭਿਕ੍ਖੁ ਅਭਿਨਨ੍ਦਤਿ ਅਭਿਵਦਤਿ ਅਜ੍ਝੋਸਾਯ ਤਿਟ੍ਠਤਿ, ਤਸ੍ਸ ਤਂ ਅਭਿਨਨ੍ਦਤੋ ਅਭਿਵਦਤੋ ਅਜ੍ਝੋਸਾਯ ਤਿਟ੍ਠਤੋ ਉਪ੍ਪਜ੍ਜਤਿ ਨਨ੍ਦੀ, ਨਨ੍ਦੀ ਸਮੁਦਯੋ ਦੁਕ੍ਖਸਮੁਦਯੋ ਪੁਣ੍ਣਾਤਿ ਵਦਾਮੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਪੁਚ੍ਛਾ – ਏਵਞ੍ਚਾਵੁਸੋ ¶ ਭਗਵਾ ਆਯਸ੍ਮਤੋ ਪੁਣ੍ਣਤ੍ਥੇਰਸ੍ਸ ਸਂਖਿਤ੍ਤੇਨ ਓਵਾਦਂ ਦਤ੍ਵਾ ਕਥਞ੍ਚ ਨਂ ਪਟਿਪੁਚ੍ਛਿ, ਕਥਞ੍ਚ ਸੋ ਭਗਵਤੋ ਆਰੋਚੇਸਿ, ਕਥਞ੍ਚਸ੍ਸਾਯਸ੍ਮਤੋ ਪੁਣ੍ਣਤ੍ਥੇਰਸ੍ਸ ਅਭਿਸਮ੍ਪਰਾਯੋ ਅਹੋਸਿ.

ਵਿਸ੍ਸਜ੍ਜਨਾ – ਏਵਂ ਖੋ ਭਨ੍ਤੇ ਭਗਵਾ ਆਯਸ੍ਮਤੋ ਪੁਣ੍ਣਤ੍ਥੇਰਸ੍ਸ ਸਂਖਿਤ੍ਤੇਨ ਓਵਾਦਂ ਦਤ੍ਵਾ ‘‘ਇਮਿਨਾ ਤ੍ਵਂ ਪੁਣ੍ਣ ਮਯਾ ਸਂਖਿਤ੍ਤੇਨ ਓਵਾਦੇਨ ਓਵਦਿਤੋ ਕਤਮਸ੍ਮਿਂ ਜਨਪਦੇ ਵਿਹਰਿਸ੍ਸਸੀ’’ਤਿ ਤਂ ਆਯਸ੍ਮਨ੍ਤਂ ਪੁਣ੍ਣਤ੍ਥੇਰਂ ਪਟਿਪੁਚ੍ਛਿ. ਸੋ ਚ ਭਨ੍ਤੇ ਆਯਸ੍ਮਾ ‘‘ਅਤ੍ਥਿ ਭਨ੍ਤੇ ਸੁਨਾਪਰਨ੍ਤੋ ਨਾਮ ਜਨਪਦੋ, ਤਤ੍ਥਾਹਂ ਵਿਹਰਿਸ੍ਸਾਮੀ’’ਤਿ ਏਵਮਾਦਿਨਾ ਭਗਵਤੋ ਆਰੋਚੇਸਿ. ਸੋ ਹਿ ਭਨ੍ਤੇ ਆਯਸ੍ਮਾ ਸੁਨਾਪਰਨ੍ਤੇ ਜਨਪਦੇ ਵਸਿਤ੍ਵਾ ਤੇਨੇਵ ਅਨ੍ਤਰਵਸ੍ਸੇਨ ਤਿਸ੍ਸੋ ਵਿਜ੍ਜਾ ਸਚ੍ਛਾਕਾਸਿ. ਤੇਨੇਵ ਅਨ੍ਤਰਵਸ੍ਸੇਨ ਪਰਿਨਿਬ੍ਬਾਯਿ. ਏਵਂ ਖੋ ਭਨ੍ਤੇ ਤਸ੍ਸ ਆਯਸ੍ਮਤੋ ਅਭਿਸਮ੍ਪਰਾਯੋ ਅਹੋਸਿ.

ਸਨ੍ਤਿ ¶ ਖੋ ਤਸ੍ਸ ਭਗਵਤੋ ਸਾਵਕਾ ਕਾਯੇਨ ਚ ਜੀਵਿਤੇਨ ਚ ਅਟ੍ਟੀਯਮਾਨਾ ਹਰਾਯਮਾਨਾ ਜਿਗੁਚ੍ਛਮਾਨਾ ਸਤ੍ਥਹਾਰਕਂ ਪਰਿਯੇਸਨ੍ਤਿ.

ਸਕ੍ਖਿਸ੍ਸਸਿ ਖੋ ਤ੍ਵਂ ਪੁਣ੍ਣ ਇਮਿਨਾ ਦਮੂਪਸਮੇਨ ਸਮਨ੍ਨਾਗਤੋ ਸੁਨਾਪਰਸਨ੍ਤਸ੍ਮਿਂ ਜਨਪਦੇ ਵਤ੍ਥੁਂ.

ਸਲ਼ਵਗ੍ਗ

ਮਾਲੁਕ੍ਯਪੁਤ੍ਤਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸਲ਼ਵਗ੍ਗੇ ਦੁਤਿਯਂ ਮਾਲੁਕ੍ਯਪੁਤ੍ਤਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ¶ ਭਨ੍ਤੇ ਆਯਸ੍ਮਨ੍ਤਂ ਮਾਲੁਕ੍ਯਪੁਤ੍ਤਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਮਾਲੁਕ੍ਯਪੁਤ੍ਤਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਸਾਧੁ ਮੇ ਭਨ੍ਤੇ ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੁ, ਯਮਹਂ ਭਗਵਤੋ ਧਮ੍ਮਂ ਸੁਤ੍ਵਾ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰੇਯ੍ਯ’’ਨ੍ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਏਤ੍ਥ ਦਾਨਿ ਮਾਲੁਕ੍ਯਪੁਤ੍ਤ ਕਿਂ ਦਹਰੇ ਭਿਕ੍ਖੂ ਵਕ੍ਖਾਮਾਤਿ’’ਆਦਿਨਾ ਥੇਰਂ ਅਪਸਾਦੇਤ੍ਵਾ ਚੇਵ ਉਸ੍ਸਾਦੇਤ੍ਵਾ ਚ ‘‘ਤਂ ਕਿਂ ਮਞ੍ਞਸਿ ਮਾਲੁਕ੍ਯਪੁਤ੍ਤ, ਯੇ ਤੇ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਅਦਿਟ੍ਠਾ ਅਦਿਟ੍ਠਪੁਬ੍ਬਾ, ਨ ਚ ਪਸ੍ਸਸਿ, ਨ ਚ ਤੇ ਹੋਤਿ ਪਸ੍ਸੇਯ੍ਯਨ੍ਤਿ, ਅਤ੍ਥਿ ਤੇ ਤਤ੍ਥ ਛਨ੍ਦੋ ਵਾ ਰਾਗੋ ਵਾ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਪੁਚ੍ਛਾ – ਇਮਸ੍ਮਿਂ ¶ ਚ ਖੋ ਪਨਾਵੁਸੋ ਭਗਵਤਾ ਓਵਾਦੇ ਸਂਖਿਤ੍ਤੇਨ ਭਾਸਿਤੇ ਸੋ ਆਯਸ੍ਮਾ ਮਾਲੁਕ੍ਯਪੁਤ੍ਤਤ੍ਥੇਰੋ ਭਗਵਨ੍ਤਂ ਕਿਂ ਅਵੋਚ ਕਥਞ੍ਚਸ੍ਸ ਭਗਵਾ ਅਨੁਞ੍ਞਾਸਿ. ਕੀਦਿਸੋ ਚਸ੍ਸਾਯਸ੍ਮਤੋ ਮਾਲੁਕ੍ਯਪੁਤ੍ਤਤ੍ਥੇਰਸ੍ਸ ਧਮ੍ਮਾਭਿਸਮਯੋ ਅਹੋਸਿ.

ਵਿਸ੍ਸਜ੍ਜਨਾ – ਇਮਸ੍ਮਿਂ ਖੋ ਭਨ੍ਤੇ ਓਵਾਦੇ ਭਗਵਤਾ ਸਂਖਿਤ੍ਤੇਨ ਭਾਸਿਤੇ ਆਯਸ੍ਮਾ ਮਾਲੁਕ੍ਯਪੁਤ੍ਤਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਇਮਸ੍ਸ ਖ੍ਵਾਹਂ ਭਨ੍ਤੇ ਭਗਵਤਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਾਮਿ.

ਰੂਪਂ ਦਿਸ੍ਵਾ ਮੁਟ੍ਠਾ, ਪਿਯਂ ਨਿਮਿਤ੍ਤਂ ਮਨਸਿ ਕਰੋਤੋ;

ਸਾਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਅਜ੍ਝੋਸ ਤਿਟ੍ਠਤਿ.

ਤਸ੍ਸ ਵਡ੍ਢਨ੍ਤਿ ਵੇਦਨਾ, ਅਨੇਕਾ ਰੂਪਸਮ੍ਭਵਾ;

ਅਭਿਜ੍ਝਾ ਚ ਵਿਹੇਸਾ ਚ, ਚਿਤ੍ਤਮਸ੍ਸੂਪਹਞ੍ਞਤਿ;

ਏਵਂ ਆਚਿਨਤੋ ਦੁਕ੍ਖਂ, ਆਰਾ ਨਿਬ੍ਬਾਨ ਵੁਚ੍ਚਤਿ;

ਪੇਯ੍ਯਾਲ

ਨ ਸੋ ਰਜ੍ਜਤਿ ਧਮ੍ਮੇਸੁ, ਧਮ੍ਮਂ ਞਤ੍ਵਾ ਪਟਿਸ੍ਸਤੋ;

ਵਿਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਨਾਜ੍ਝੋਸ ਤਿਟ੍ਠਤਿ.

ਯਥਾਸ੍ਸ ਜਾਨਤੋ ਧਮ੍ਮਂ, ਸੇਵਤੋ ਚਾਪਿ ਵੇਦਨਂ;

ਖੀਯਤਿ ਨੋਪਚੀਯਤਿ, ਏਵਂ ਸੋ ਚਰਤੀ ਸਤੋ;

ਏਵਂ ਅਪਚਿਨਤੋ ਦੁਕ੍ਖਂ, ਸਨ੍ਤਿਕੇ ਨਿਬ੍ਬਾਨ ਵੁਚ੍ਚਤੀਤਿ.

ਇਮਸ੍ਸ ਖ੍ਵਾਹਂ ਭਨ੍ਤੇ ਭਗਵਤਾ ਸਂਖਿਤ੍ਤੇਨ ਭਾਸਿਤਸ੍ਸ ਏਵਂ ਵਿਤ੍ਥਾਰੇਨ ਅਤ੍ਥਂ ਆਜਾਨਾਮੀਤਿ. ਭਗਵਾ ਚ ਭਨ੍ਤੇ ‘‘ਸਾਧੁ ਸਾਧੁ ਮਾਲੁਕ੍ਯਪੁਤ੍ਤ, ਸਾਧੁ ਖੋ ਤ੍ਵਂ ਮਾਲੁਕ੍ਯਪੁਤ੍ਤ ਮਯਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਾਸੀ’’ਤਿ ਸਾਧੁਕਾਰਂ ਦਤ੍ਵਾ–

‘‘ਰੂਪਂ ਦਿਸ੍ਵਾ ਸਤਿ ਮੁਟ੍ਠੋ, ਪਿਯਂ ਨਿਮਿਤ੍ਤਂ ਮਨਸਿ ਕਰੋਤੋ;

ਸਾਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਅਜ੍ਝੋਸ ਤਿਟ੍ਠਤੀ’’ਤਿ–

ਆਦਿਨਾ

ਥੇਰਸ੍ਸ ਵਚਨਂ ਸਮਨੁਞ੍ਞਾਸਿ. ਸੋ ਚ ਭਨ੍ਤੇ ਆਯਸ੍ਮਾ ਮਾਲੁਕ੍ਯਪੁਤ੍ਤਤ੍ਥੇਰੋ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ¶ ਵਿਹਰਨ੍ਤੋ ਨਚਿਰਸ੍ਸੇਵ ਯਸ੍ਸਤ੍ਥਾਯ ਕੁਲਪੁਤ੍ਤਾ ਸਮ੍ਮਦੇਵ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ, ਤਦਨੁਤ੍ਤਰਂ ਬ੍ਰਹ੍ਮਚਰਿਯਪਰਿਯੋਸਾਨਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਾਸਿ, ‘‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’’ਤਿ ਅਬ੍ਭਞ੍ਞਾਸਿ. ਅਞ੍ਞਤਰੋਚ ਪਨਾਯਸ੍ਮਾ ਮਾਲੁਕ੍ਯਪੁਤ੍ਤੋ ਅਰਹਤਂ ਅਹੋਸਿ. ਏਵਂ ਖੋ ਭਨ੍ਤੇ ਤਸ੍ਸ ਆਯਸ੍ਮਤੋ ਅਭਿਸਮ੍ਪਰਾਯੋ ਅਹੋਸਿ.

ਰੂਪਂ ¶ ਦਿਸ੍ਵਾ ਸਤਿ ਮੁਟ੍ਠਾ, ਪਿਯਂ ਨਿਮਿਤ੍ਤਂ ਮਨਸਿ ਕਰੋਤੋ;

ਸਾਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਅਜ੍ਝੋਸ ਤਿਟ੍ਠਤਿ.

ਪਮਾਦਵਿਹਾਰੀਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਚਤੁਤ੍ਥਂ ਪਮਾਦਵਿਹਾਰੀਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਪਮਾਦਵਿਹਾਰਿਞ੍ਚ ਵੋ ਭਿਕ੍ਖਵੇ ਦੇਸੇਸ੍ਸਾਮਿ ਅਪ੍ਪਮਾਦਵਿਹਾਰਿਞ੍ਚ, ਤਂ ਸੁਣਾਥ. ਕਥਞ੍ਚ ਭਿਕ੍ਖਵੇ ਪਮਾਦਵਿਹਾਰੀ ਹੋਤਿ. ਚਕ੍ਖੁਨ੍ਦ੍ਰਿਯਂ ਅਸਂਵੁਤਸ੍ਸ ਭਿਕ੍ਖਵੇ ਵਿਹਰਤੋ ਚਿਤ੍ਤਂ ਬ੍ਯਾਸਿਞ੍ਚਤਿ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ, ਤਸ੍ਸ ਬ੍ਯਾਸਿਤ੍ਤਚਿਤ੍ਤਸ੍ਸ ਪਾਮੋਜ੍ਜਂ ਨ ਹੋਤਿ, ਪਾਮੋਜ੍ਜੇ ਅਸਤਿ ਪੀਤਿ ਨ ਹੋਤਿ, ਪੀਤਿਯਾ ਪਸ੍ਸਦ੍ਧਿ ਨ ਹੋਤਿ, ਪਸ੍ਸਦ੍ਧਿਯਾ ਅਸਤਿ ਦੁਕ੍ਖਂ ਹੋਤਿ, ਦੁਕ੍ਖਿਨੋ ਚਿਤ੍ਤਂ ਨ ਸਮਾਧਿਯਤਿ, ਅਸਮਾਹਿ ਤੇ ਚਿਤ੍ਤੇ ਧਮ੍ਮਾ ਨ ਪਾਤੁਭਵਨ੍ਤਿ, ਧਮ੍ਮਾਨਂ ਅਪਾਤੁਭਾਵਾ ਪਮਾਦਵਿਹਾਰੀਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਲੋਕਕਾਮਗੁਣਵਗ੍ਗ

ਰਾਹੁਲੋਵਾਦਸੁਤ੍ਤ

ਪੁਚ੍ਛਾ – ਲੋਕਕਾਮਗੁਣਵਗ੍ਗੇ ¶ ਆਵੁਸੋ ਅਟ੍ਠਮਂ ਰਾਹੁਲੋਵਾਦਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਆਯਸ੍ਮਨ੍ਤਂ ਰਾਹੁਲਂ ਆਰਬ੍ਭ ‘‘ਤਂ ਕਿਂ ਮਞ੍ਞਸਿ ਰਾਹੁਲ, ਚਕ੍ਖੁ ਨਿਚ੍ਚਂ ਵਾ ਅਨਿਚ੍ਚਂ ਵਾਤਿ. ਅਨਿਚ੍ਚਂ ਭਨ੍ਤੇ. ਯਂ ਪਨਾਨਿਚ੍ਚਂ, ਦੁਕ੍ਖਂ ਵਾ ਤਂ ਸੁਖਂਵਾਤਿ. ਦੁਕ੍ਖਂ ਭਨ੍ਤੇ. ਯਂ ਪਨਾਨਿਚ੍ਚਂ ਦੁਕ੍ਖਂ ਵਿਪਰਿਣਾਮਧਮ੍ਮਂ ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ ‘ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ’ਤਿ. ਨੋ ਹੇਤਂ ਭਨ੍ਤੇ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਯਂਨੂਨਾਹਂ ¶ ਰਾਹੁਲਂ ਉਤ੍ਤਰਿਂ ਆਸਵਾਨਂ ਖਯੇ ਵਿਨੇਯ੍ਯਂ.

ਗਣ੍ਹਾਹਿ ਰਾਹੁਲ ਨਿਸੀਦਨਂ.

ਗਹਪਤਿਵਗ੍ਗ

ਭਾਰਦ੍ਵਾਜਸੁਤ੍ਤ

ਪੁਚ੍ਛਾ – ਗਹਪਤਿਵਗ੍ਗੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਚਤੁਤ੍ਥਂ ਸਂਗੀਤਂ ਭਾਰਦ੍ਵਾਜਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਰਾਜਾਨਂ ਉਦੇਨਂ ਆਰਬ੍ਭ ਆਯਸ੍ਮਤਾ ਪਿਣ੍ਡੋਲਭਾਰਦ੍ਵਾਜਤ੍ਥੇਰੇਨ ਭਾਸਿਤਂ. ਰਾਜਾ ਭਨ੍ਤੇ ਉਦੇਨੋ ਆਯਸ੍ਮਨ੍ਤਂ ਪਿਣ੍ਡੋਲਭਾਰਦ੍ਵਾਜਂ ਏਤਦਵੋਚ ‘‘ਕੋ ਨੁ ਖੋ ਭੋ ਭਾਰਦ੍ਵਾਜ ਹੇਤੁ ਕੋ ਪਚ੍ਚਯੋ, ਯੇਨਿਮੇ ਦਹਰਾ ਭਿਕ੍ਖੂ ਸੁਸੂ ਕਾਲ਼ਕੇਸਾ ਭਦ੍ਰੇਨ ਯੋਬ੍ਬਨੇਨ ਸਮਨ੍ਨਾਗਤਾ ਪਠਮੇਨ ਵਯਸਾ ਅਨਿਕੀਲ਼ਿਤਾਵਿਨੋ ਕਾਮੇਸੁ ਯਾਵਜੀਵਂ ਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਚਰਨ੍ਤਿ, ਅਦ੍ਧਾਨਞ੍ਚ ਆਪਾਦੇਨ੍ਤੀ’’ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਵੁਤ੍ਤਂ ਖੋ

ਏਤਂ ¶ ਮਹਾਰਾਜ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਏਥ ਤੁਮ੍ਹੇ ਭਿਕ੍ਖਵੇ ਮਾਤੁਮਤ੍ਤੀਸੁ ਮਾਤੁਚਿਤ੍ਤਂ ਉਪਟ੍ਠਪੇਥ. ਭਗਨਿਮਤ੍ਤੀਸੁ ਭਗਿਨਿਚਿਤ੍ਤਂ ਉਪਟ੍ਠਪੇਥ, ਧੀਤੁਮਤ੍ਤੀਸੁ ਧੀਤੁਚਿਤ੍ਤਂ ਉਪਟ੍ਠਪੇਥਾ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਪਿਣ੍ਡੋਲ ਭਾਰਦ੍ਵਾਜਤ੍ਥੇਰੇਨ ਭਾਸਿਤਂ.

ਵੇਰਹਚ੍ਚਾਨਿਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦਸਮਂ ਸਂਗੀਤਂ ਵੇਰਹਚ੍ਚਾਨਿਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕਾਮਣ੍ਡਾਯਂ ਭਨ੍ਤੇ ਵੇਰਹਚ੍ਚਾਨਿਗੋਤ੍ਤਂ ਬ੍ਰਾਹ੍ਮਣਿਂ ਆਰਬ੍ਭ ਆਯਸ੍ਮਤਾ ਉਦਾਯਿਤ੍ਥੇਰੇਨ ਭਾਸਿਤਂ. ਵੇਰਹਚ੍ਚਾਨੀਗੋਤ੍ਤਾ ਭਨ੍ਤੇ ਬ੍ਰਾਹ੍ਮਣੀ ਆਯਸ੍ਮਨ੍ਤਂ ਉਦਾਯਿਤ੍ਥੇਰਂ ਏਤਦਵੋਚ ‘‘ਕਿਸ੍ਮਿਂ ਨੁ ਖੋ ਭਨ੍ਤੇ ਸਤਿ ਅਰਹਨ੍ਤੋ ਸੁਖਦੁਕ੍ਖਂ ਪਞ੍ਞਪੇਨ੍ਤਿ, ਕਿਸ੍ਮਿਂ ਅਸਤਿ ਅਰਹਨ੍ਤੋ ਸੁਖਦੁਕ੍ਖਂ ਨ ਪਞ੍ਞਪੇਨ੍ਤੀ’’ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਚਕ੍ਖੁਸ੍ਮਿਂ ਖੋ ਭਗਿਨਿ ਸਤਿ ¶ ਅਰਹਨ੍ਤੋ ਸੁਖਦੁਕ੍ਖਂ ਪਞ੍ਞਪੇਨ੍ਤਿ, ਚਕ੍ਖੁਸ੍ਮਿਂ ਅਸਤਿ ਅਰਹਨ੍ਤੋ ਸੁਖਦੁਕ੍ਖਂ ਨ ਪਞ੍ਞਪੇਨ੍ਤੀ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਉਦਾਯਿਤ੍ਥੇਰੇਨ ਭਾਸਿਤਂ.

ਦੇਵਦਹਵਗ੍ਗ

ਖਣਸੁਤ੍ਤ

ਪੁਚ੍ਛਾ – ਦੇਵਦਹਵਗ੍ਗੇ ¶ ਆਵੁਸੋ ਖਣਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਦੇਵਦਹੇ ਨਾਮ ਸਕ੍ਯਾਨਂ ਨਿਗਮੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਲਾਭਾ ਵੋ ਭਿਕ੍ਖਵੇ, ਸੁਲਦ੍ਧਂ ਵੋ ਭਿਕ੍ਖਵੇ, ਖਣੋ ਵੋ ਪਟਿਲਦ੍ਧੋ ਬ੍ਰਹ੍ਮਚਰਿਯਵਾਸਾਯਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸਮੁਦ੍ਦਵਗ੍ਗ

ਬਾਲ਼ਿਸਿਕੋਪਮਸੁਤ੍ਤ

ਪੁਚ੍ਛਾ – ਸਮੁਦ੍ਦਵਗ੍ਗੇ ¶ ਪਨਾਵੁਸੋ ਤਤਿਯਂ ਬਾਲ਼ਿਸਿਕੋਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ¶ ਭਨ੍ਤੇ ਜੀਵਕਮ੍ਬਵਨੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਸੇਯ੍ਯਥਾਪਿ ਭਿਕ੍ਖਵੇ ਬਾਲ਼ਿਸਿਕੋ ਆਮਿਸਗਤਬਲ਼ਿਸਂ ਗਮ੍ਭੀਰੇ ਉਦਕਰਹਦੇ ਪਕ੍ਖਿਪੇਯ੍ਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਆਦਿਤ੍ਤਪਰਿਯਾਯਸੁਤ੍ਤ

ਪੁਚ੍ਛਾ – ਸਲ਼ਾਯਤਨਵਗ੍ਗਸਂਯੁਤ੍ਤੇ ¶ ਸਮੁਦ੍ਦਵਗ੍ਗੇ ਪਨਾਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਂਗੀਤਂ ਅਟ੍ਠਮਂ ਆਦਿਤ੍ਤਪਰਿਯਾਯਸੁਤ੍ਤਂ ਭਗਵਤਾ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਮ੍ਬਹੁਲੇ ਭਨ੍ਤੇ ਭਿਕ੍ਖੂ ਆਰਬ੍ਭ ‘‘ਆਦਿਤ੍ਤਪਰਿਯਾਯਂ ਵੋ ਭਿਕ੍ਖਵੇ ਧਮ੍ਮਪਰਿਯਾਯਂ ਦੇਸੇਸ੍ਸਾਮਿ, ਤਂ ਸੁਣਾਥ. ਕਤਮੋ ਚ ਭਿਕ੍ਖਵੇ ਆਦਿਤ੍ਤਪਰਿਯਾਯੋ ਧਮ੍ਮਪਰਿਯਾਯੋ. ਵਰਂ ਭਿਕ੍ਖਵੇ ਤਤ੍ਤਾਯ ਅਯੋਸਲਾਕਾਯ ਆਦਿਤ੍ਤਾਯ ਸਮ੍ਪਜ੍ਜਲਿਤਾਯ ਸਜੋਤਿਭੂਤਾਯ ਚਕ੍ਖੁਨ੍ਦ੍ਰਿਯਂ ਸਮ੍ਪਲਿਮਟ੍ਠਂ, ਨਤ੍ਵੇਵ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਅਨੁਬ੍ਯਞ੍ਜਨਸੋ ਨਿਮਿਤ੍ਤਗ੍ਗਾਹੋ’’ਤਿਆਦਿਨਾ ਭਗਵਤਾ ਭਾਸਿਤਂ.

ਆਸੀਵਿਸਵਗ੍ਗ

ਪਠਮਦਾਰੁਕ੍ਖਨ੍ਧੋਪਮਸੁਤ੍ਤ

ਪੁਚ੍ਛਾ – ਆਸੀਵਿਸਵਗ੍ਗੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਚਤੁਤ੍ਥਂ ਸਂਗੀਤਂ ਪਠਮਦਾਰੁਕ੍ਖਨ੍ਧੋਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਗਙ੍ਗਾਯ ਨਦਿਯਾ ਤੀਰੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਪਸ੍ਸਥ ਨੋ ਤੁਮ੍ਹੇ ਭਿਕ੍ਖਵੇ ਅਮ੍ਹਂ ਮਹਨ੍ਤਂ ਦਾਰੁਕ੍ਖਨ੍ਧਂ ਗਙ੍ਗਾਯ ਨਦਿਯਾ ਸੋਤੇਨ ਵੁਯ੍ਹਮਾਨ’’ਨ੍ਤਿ ਏਵਮਾਦਿਨਾ ਭਗਵਤਾ ਭਾਸਿਤਾ.

ਉਪਚਾਰਵਚਨਂ

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਓਰਿਮਤੀਰਾਦੀਨਂ ਉਪਚਾਰਵਚਨਾਨਂ ਅਤ੍ਥੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤੋ.

ਵਿਸ੍ਸਜ੍ਜਨਾ – ਓਰਿਮਂ ਤੀਰਨ੍ਤਿ ਖੋ ਭਿਕ੍ਖੁ ਛਨ੍ਨੇਤਂ ਅਜ੍ਝਤ੍ਤਿਕਾਨਂ ਆਯਤਨਾਨਂ ਅਧਿਵਚਨਂ. ਪਾਰਿਮਂ ਤੀਰਨ੍ਤਿ ਖੋ ਭਿਕ੍ਖੁ ਛਨ੍ਨੇਤਂ ਬਾਹਿਰਾਨਂ ਆਯਤਨਾਨਂ ਅਧਿਵਚਨਂ. ਮਜ੍ਝੇ ਸਂਸੀਦੋਤਿ ਖੋ ਭਿਕ੍ਖੁ ਨਨ੍ਦਿਰਾਗਸ੍ਸੇਤਂ ਅਧਿਵਚਨਂ. ਥਲੇ ਉਸ੍ਸਾਦੋਤਿ ਖੋ ਭਿਕ੍ਖੁ ਅਸ੍ਮਿਮਾਨਸ੍ਸੇਤਂ ਅਧਿਵਚਨਨ੍ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਤਤ੍ਥ ਓਰਿਮਤੀਰਾਦੀਨਂ ਉਪਚਾਰਵਚਨਾਨਂ ਅਤ੍ਥੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤੋ.

ਪੁਚ੍ਛਾ – ਇਮਸ੍ਮਿਂ ¶ ਖੋ ਪਨ ਆਵੁਸੋ ਸੁਤ੍ਤੇ ਭਗਵਤਾ ਭਾਸਿਤੇ ਵਿਸੇਸਤੋ ਕਸ੍ਸ ਕੀਦਿਸੋ ਅਤ੍ਥੋ ਕਥਞ੍ਚ ਪਟਿਲਦ੍ਧੋ.

ਵਿਸ੍ਸਜ੍ਜਨਾ – ਇਮਸ੍ਮਿਂ ਭਨ੍ਤੇ ਸੁਤ੍ਤੇ ਭਗਵਤਾ ਭਾਸਿਤੇ ਵਿਸੇਸਤੋ ਨਨ੍ਦਸ੍ਸ ਗੋਪਾਲਕਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਯਾਵ ਅਰਹਤ੍ਤਾਚ ਵਿਸੇਸਤੋ ਅਤ੍ਥੋ ਅਧਿਗਤੋ.

ਲਭੇਯ੍ਯਾਹਂ ¶ ਭਨ੍ਤੇ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦਂ.

ਤੇਨ ਹਿ ਤ੍ਵਂ ਨਨ੍ਦ ਸਾਮਿਕਾਨਂ ਗਾਵੋ ਨਿਯ੍ਯਾਤੇਹਿ.

ਗਮਿਸ੍ਸਨ੍ਤਿ ¶ ਭਨ੍ਤੇ ਗਾਵੋ ਵਚ੍ਛਗਿਦ੍ਧਿਨਿਯੋ.

ਕਿਂਸੁਕੋਪਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਅਟ੍ਠਮਂ ਸਂਗੀਤਂ ਕਿਂਸੁਕੋਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਅਞ੍ਞਤਰਂ ਕਾਰਕਂ ਭਿਕ੍ਖੁਂ ਆਰਬ੍ਭ ਭਾਸਿਤਂ. ਅਞ੍ਞਤਰੋ ਭਨ੍ਤੇ ਕਾਰਕੋ ਭਿਕ੍ਖੁ ਚਤ੍ਤਾਰੋ ਖਾਣਾਸਵੇ ਭਿਕ੍ਖੂ ਞਾਣਦਸ੍ਸਨਵਿਸੁਦ੍ਧਂ ਪੁਚ੍ਛਿਤ੍ਵਾ ਅਸਨ੍ਤੁਟ੍ਠੋ ਤੇਸਂ ਭਿਕ੍ਖੂਨਂ ਪਞ੍ਹਾਵੇਯ੍ਯਾਕਰਣੇਨ ਯੇਨ ਭਗਵਾ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ ‘‘ਕਿਤ੍ਤਾਵਤਾ ਨੁ ਖੋ ਭਨ੍ਤੇ ਭਿਕ੍ਖੁਨੋ ਦਸ੍ਸਨਂ ਸੁਵਿਸੁਦ੍ਧਂ ਹੋਤੀ’’ਤਿ. ਤਸ੍ਮਿਂ ਵਤ੍ਥੁਸ੍ਮਿਂ ‘‘ਸੇਯ੍ਯਥਾਪਿ ਭਿਕ੍ਖੁ ਪੁਰਿਸਸ੍ਸ ਕਿਂਸੁਕੋ ਅਦਿਟ੍ਠਪੁਬ੍ਬੋ ਅਸ੍ਸ, ਸੋ ਯੇਨਞ੍ਞਤਰੋ ਪੁਰਿਸੋ ਕਿਂਸੁਕਸ੍ਸ ਦਸ੍ਸਾਵੀ ਤੇਨੁਪਸਙ੍ਕਮੇਯ੍ਯਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਛਪ੍ਪਾਣਕੋਪਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦਸਮਂ ਸਂਗੀਤਂ ਛਪ੍ਪਾਣਕੋਪਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਸੇਯ੍ਯਥਾਪਿ, ਭਿਕ੍ਖਵੇ ਪੁਰਿਸੋ ਅਰੁਗਤ੍ਤੋ ਪਕ੍ਕਗਤ੍ਤੋ ਸਰਵਨਂ ਪਵਿਸੇਯ੍ਯਾ’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਅਸਂਵਰੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਵਿਸ੍ਸਜ੍ਜਨਾ – ਕਥਞ੍ਚ ਭਿਕ੍ਖਵੇ ਅਸਂਵਰੋ ਹੋਤਿ, ਇਧ ਭਿਕ੍ਖਵੇ ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਪਿਯਰੂਪੇ ਰੂਪੇ ਅਧਿਮੁਚ੍ਚਤਿ, ਅਪ੍ਪਿਯਰੂਪੇ ਰੂਪੇ ਬ੍ਯਾਪਜ੍ਜਤਿ, ਅਨੁਪਟ੍ਠਿਤਕਾਯਸ੍ਸਤਿ ਚ ਵਿਹਰਤਿ ਪਰਿਤ੍ਤਚੇਤਸੋ. ਤਞ੍ਚ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਯਥਾਭੂਤਂ ਨਪ੍ਪਜਾਨਾਤਿ, ਯਤ੍ਥਸ੍ਸ ਤੇ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਤਤ੍ਥ ਅਸਂਵਰੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਸਂਵਰੋ ਵਿਭਜਿਤ੍ਵਾ ਵਿਤ੍ਥਾਰੇਨ ਦੇਸਿਤੋ.

ਵਿਸ੍ਸਜ੍ਜਨਾ – ਕਥਞ੍ਚ ਭਿਕ੍ਖਵੇ ਸਂਵਰੋ ਹੋਤਿ, ਇਧ ਭਿਕ੍ਖਵੇ ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਪਿਯਰੂਪੇ ਰੂਪੇ ਨਾਧਿਮੁਚ੍ਚਤਿ, ਅਪ੍ਪਿਯਰੂਪੇ ਰੂਪੇ ਨ ਬ੍ਯਾਪਜ੍ਜਤੀਤਿ, ਏਵਮਾਦਿਨਾ ¶ ਭਨ੍ਤੇ ਭਗਵਤਾ ਤਤ੍ਥ ਸਂਵਰੋ ਵਿਭਜਿਤ੍ਵਾ ਵਿਤ੍ਥਾਰੇਨ ਦੇਸਿਤੋ.

ਵੇਦਨਾਸਂਯੁਤ੍ਤ

ਦਟ੍ਠਬ੍ਬਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਵੇਦਨਾਸਂਯੁਤ੍ਤੇ ਪਞ੍ਚਮਂ ਦਟ੍ਠਬ੍ਬਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਿਸ੍ਸੋ ਇਮਾ ਭਿਕ੍ਖਵੇ ਵੇਦਨਾ. ਕਤਮਾ ਤਿਸ੍ਸੋ, ਸੁਖਾ ਵੇਦਨਾ ਦੁਕ੍ਖਾਵੇਦਨਾ ਅਦੁਕ੍ਖਮਸੁਖਾ ਵੇਦਨਾ. ਸੁਖਾ ਭਿਕ੍ਖਵੇ ਵੇਦਨਾ ਦੁਕ੍ਖਤੋ ਦਟ੍ਠਬ੍ਬਾ, ਦੁਕ੍ਖਾ ਵੇਦਨਾ ਸਲ੍ਲਤੋ ਦਟ੍ਠਬ੍ਬਾ, ਅਦੁਕ੍ਖਮਸੁਖਾ ਵੇਦਨਾ ਅਨਿਚ੍ਚਤੋ ਦਟ੍ਠਬ੍ਬਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸੁਖਾ ¶ ਭਿਕ੍ਖਵੇ ਵੇਦਨਾ ਦੁਕ੍ਖਤੋ ਦਟ੍ਠਬ੍ਬਾ.

ਯੋ ਸੁਖਂ ਦੁਕ੍ਖਤੋ ਅਦ੍ਦਸ, ਦੁਕ੍ਖਮਦ੍ਦਕ੍ਖਿ ਸਲ੍ਲਤੋ;

ਅਦੁਕ੍ਖਮਸੁਖਂ ਸਨ੍ਤਂ, ਅਦ੍ਦਕ੍ਖਿਨਂ ਅਨਿਚ੍ਚਤੋ.

ਸ ਵੇ ਸਮ੍ਮਦ੍ਦਸੋ ਭਿਕ੍ਖੁ, ਪਰਿਜਾਨਾਤਿ ਵੇਦਨਾ;

ਸੋ ਵੇਦਨਾ ਪਰਿਞ੍ਞਾਯ, ਦਿਟ੍ਠੇ ਧਮ੍ਮੇ ਅਨਾਸਵੋ;

ਕਾਯਸ੍ਸ ਭੇਦਾ ਧਮ੍ਮਟ੍ਠੋ, ਸਙ੍ਖ੍ਯਂ ਨੋਪੇਤਿ ਵੇਦਗੂ.

ਸਲ੍ਲਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਛਟ੍ਠਂ ਸਲ੍ਲਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਅਸ੍ਸੁਤਵਾ ਭਿਕ੍ਖਵੇ ਪੁਥੁਜ੍ਜਨੋ ਸੁਖਮ੍ਪਿ ਵੇਦਨਂ ਵੇਦਯਤਿ, ਦੁਕ੍ਖਮ੍ਪਿ ਵੇਦਨਂ ਵੇਦਯਤਿ, ਅਦੁਕ੍ਖਮਸੁਖਮ੍ਪਿ ਵੇਦਨਂ ਵੇਦਯਤਿ. ਸੁਤਵਾ ਭਿਕ੍ਖਵੇ ਅਰਿਯਸਾਵਕੋ ਸੁਖਮ੍ਪਿ ਵੇਦਨਂ ਵੇਦਯਤਿ, ਦੁਕ੍ਖਮ੍ਪਿ ਵੇਦਨਂ ਵੇਦਯਤਿ, ਅਦੁਕ੍ਖਮਸੁਖਮ੍ਪਿ ਵੇਦਨਂ ਵੇਦਯਤਿ. ਤਤ੍ਰ ਭਿਕ੍ਖਵੇ ਕੋ ਵਿਸੇਸੋ, ਕੋ ਅਧਿਪ੍ਪਯਾਸੋ, ਕਿਂ ਨਾਨਾਕਰਣਂ ਸੁਤਵਤੋ ਅਰਿਯਭਾਵਕਸ੍ਸ ਅਸ੍ਸੁਤਵਤਾ ਪੁਥੁਜ੍ਜਨੇਨਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਜਮ੍ਬੁਖਾਦਕਸਂਯੁਤ੍ਤ

ਨਿਬ੍ਬਾਨਪਞ੍ਹਾਸੁਤ੍ਤ

ਪੁਚ੍ਛਾ – ਜਮ੍ਬੁਖਾਦਕਸਂਯੁਤ੍ਤੇ ¶ ਆਵੁਸੋ ਪਠਮਂ ਨਿਬ੍ਬਾਨਪਞ੍ਹਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁ ਭਨ੍ਤੇ ਨਾਲਕਗਾਮਕੇ ਜਮ੍ਬੁਖਾਦਕਂ ਪਰਿਬ੍ਬਾਜਕਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਜਮ੍ਬੁਖਾਦਕੋ ਭਨ੍ਤੇ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ ‘‘ਨਿਬ੍ਬਾਨਂ ਨਿਬ੍ਬਾਨਨ੍ਤਿ ਆਵੁਸੋ ਸਾਰਿਪੁਤ੍ਤ ਵੁਚ੍ਚਤਿ, ਕਤਮਂ ਨੁਖੋ ਆਵੁਸੋ ਨਿਬ੍ਬਾਨ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯੋ ¶ ਖੋ ਆਵੁਸੋ ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋ, ਇਦਂ ਵੁਚ੍ਚਤਿ ਨਿਬ੍ਬਾਨ’’ਨ੍ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਧਮ੍ਮਵਾਦੀਪਞ੍ਹਾਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਤਤਿਯਂ ਸਂਗੀਤਂ ਧਮ੍ਮਵਾਦੀਪਞ੍ਹਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁਯੇਵ ਭਨ੍ਤੇ ਨਾਲਕਗਾਮੇ ਜਮ੍ਬੁਖਾਦਕਂ ਪਰਿਬ੍ਬਾਜਕਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਜਮ੍ਬੁਖਾਦਕੋ ਭਨ੍ਤੇ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ ‘‘ਕੇ ਨੁ ਖੋ ਆਵੁਸੋ ਸਾਰਿਪੁਤ੍ਤ ਲੋਕੇ ਧਮ੍ਮਵਾਦਿਨੋ, ਕੇ ਲੋਕੇ ਸੁਪ੍ਪਟਿਪਨ੍ਨਾ, ਕੇ ਲੋਕੇ ਸੁਗਤਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯੇ ਖੋ ਆਵੁਸੋ ਰਾਗਪ੍ਪਹਾਨਾਯ ਧਮ੍ਮਂ ਦੇਸੇਨ੍ਤਿ, ਦੋਸਪ੍ਪਹਾਨਾਯ ਧਮ੍ਮਂ ਦੇਸੇਨ੍ਤਿ, ਮੋਹਪ੍ਪਹਾਨਾਯ ਧਮ੍ਮਂ ਦੇਸੇਨ੍ਤਿ. ਤੇ ਲੋਕੇ ਧਮ੍ਮਵਾਦਿਨੋ’’ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਕੇ ¶ ਲੋਕੇ ਸੁਪ੍ਪਟਿਪਨ੍ਨਾ.

ਕੇ ਲੋਕੇ ਸੁਗਤਾ.

ਦੁਕ੍ਕਰਪਞ੍ਹਾਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਪੋਰਾਣਕੇਹਿ ਧਮ੍ਮਸਂਗਾਹਕ ਮਹਾਥੇਰੇਹਿ ਪਰਿਯੋਸਾਨਸੁਤ੍ਤਭਾਵੇਨ ਸਂਗੀਤਂ ਦੁਕ੍ਕਰਪਞ੍ਹਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਗਧੇਸੁਯੇਵ ਨਾਲਕਗਾਮੇ ਜਮ੍ਬੁਖਾਦਕਂ ਪਰਿਬ੍ਬਾਜਕਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ. ਜਮ੍ਬੁਖਾਦਕੋ ਭਨ੍ਤੇ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ ‘‘ਕਿਂ ਨੁ ਖੋ ਆਵੁਸੋ ਸਾਰਿਪੁਤ੍ਤ ਇਮਸ੍ਮਿਂ ਧਮ੍ਮਵਿਨਯੇ ਦੁਕ੍ਕਰ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਪਬ੍ਬਜ੍ਜਾ ਖੋ ਆਵੁਸੋ ਇਮਸ੍ਮਿਂ ਧਮ੍ਮਵਿਨਯੇ ਦੁਕ੍ਕਰਾ’’ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਮੋਗ੍ਗਲ੍ਲਾਨਸਂਯੁਤ੍ਤ

ਸਕ੍ਕਸੁਤ੍ਤ

ਪੁਚ੍ਛਾ – ਮੋਗ੍ਗਲ੍ਲਾਨਸਂਯੁਤ੍ਤੇ ¶ ਆਵੁਸੋ ਦਸਮਂ ਸਂਗੀਤਂ ਸਕ੍ਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਦੇਵੇਸੁ ਭਨ੍ਤੇ ਤਾਵਤਿਂਸੇਸੁ ਸਕ੍ਕਂ ਦੇਵਾਨਮਿਨ੍ਦਂ ਆਰਬ੍ਭ ‘‘ਸਾਧੁ ਖੋ ਦੇਵਾਨਮਿਨ੍ਦ ਬੁਦ੍ਧਸਰਣਗਮਨਂ ਹੋਤਿ, ਬੁਦ੍ਧਸਰਣਗਮਨਹੇਤੁ ਖੋ ਦੇਵਾਨਮਿਨ੍ਦ ¶ ਏਵਮਿਧੇਕਚ੍ਚੇ ਸਤ੍ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਨ੍ਤੀ’’ਤਿ ਏਵਮਾਦਿਨਾ ਭਨ੍ਤੇ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਭਾਸਿਤਂ.

ਚਿਤ੍ਤਸਂਯੁਤ੍ਤ

ਨਿਗਣ੍ਠਨਾਟਪੁਤ੍ਤਸੁਤ੍ਤ

ਪੁਚ੍ਛਾ – ਚਿਤ੍ਤਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਅਟ੍ਠਮਂ ਸਂਗੀਤਂ ਨਿਗਣ੍ਠਨਾਟਪੁਤ੍ਤਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਚ੍ਛਿਕਾਸਣ੍ਡੇ ਭਨ੍ਤੇ ਨਿਗਣ੍ਠਂ ਨਾਟਪੁਤ੍ਤਂ ਆਰਬ੍ਭ ਚਿਤ੍ਤੇਨ ਗਹਪਤਿਨਾ ਭਾਸਿਤਂ. ਨਿਗਣ੍ਠੋ ਭਨ੍ਤੇ ਨਾਟਪੁਤ੍ਤੋ ਚਿਤ੍ਤਂ ਗਹਪਤਿਂ ਏਤਦਵੋਚ ‘‘ਸਦ੍ਦਹਸਿ ਤ੍ਵਂ ਗਹਪਤਿ ਸਮਣਸ੍ਸ ਗੋਤਮਸ੍ਸ ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਅਤ੍ਥਿ ਵਿਤਕ੍ਕਵਿਚਾਰਾਨਂ ਨਿਰੋਧੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਨ ਖ੍ਵਾਹਂ ਏਤ੍ਥ ਭਨ੍ਤੇ ਭਗਵਤੋ ਸਦ੍ਧਾਯ ਗਚ੍ਛਾਮਿ, ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਅਤ੍ਥਿ ਵਿਤਕ੍ਕਵਿਚਾਰਾਨਂ ਨਿਰੋਧੋ’’ਤਿ ਏਵਮਾਦਿਨਾ ਚਿਤ੍ਤੇਨ ਗਹਪਤਿਨਾ ਭਾਸਿਤਂ.

ਇਦਂ ¶ ਭਵਨ੍ਤੋ ਪਸ੍ਸਨ੍ਤੁ.

ਯਾਵ ਉਜੁਕੋ ਚਾਯਂ ਚਿਤ੍ਤੋ ਗਹਪਤਿ.

‘‘ਅਹਂ ¶ ਖੋ ਭਨ੍ਤੇ ਯਾਵਦੇਵ ਆਕਙ੍ਖਾਮਿ, ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮਿ’’ –

ਇਦਂ ¶ ਭਵਨ੍ਤੋ ਪਸ੍ਸਨ੍ਤੁ.

ਅਚੇਲਕਸ੍ਸਪਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਨਵਮਂ ਸਂਗੀਤਂ ਅਚੇਲਕਸ੍ਸਪਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਮਚ੍ਛਿਕਾਸਣ੍ਡੇ ਅਚੇਲਂ ਕਸ੍ਸਪਂ ਆਰਬ੍ਭ ਚਿਤ੍ਤੇਨ ਗਹਪਤਿਨਾ ਭਾਸਿਤਂ. ਅਚੇਲੋ ਭਨ੍ਤੇ ਕਸ੍ਸਪੋ ਚਿਤ੍ਤਂ ਗਹਪਤਿਂ ਏਤਦਵੋਚ ‘‘ਇਮੇਹਿ ਪਨ ਤੇ ਗਹਪਤਿ ਤਿਂਸਮਤ੍ਤੇਹਿ ਵਸ੍ਸੇਹਿ ਅਤ੍ਥਿ ਕੋਚਿ ਉਤ੍ਤਰਿਮਨੁਸ੍ਸਧਮ੍ਮੋ ਅਲਮਰਿਯਞਾਣਦਸ੍ਸਨਵਿਸੇਸੋ ਅਧਿਗਤੋ ਫਾਸੁਵਿਹਾਰੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਗਿਹਿਨੋਪਿ ਸਿਯਾ ਭਨ੍ਤੇ ਅਹਞ੍ਹਿ ਭਨ੍ਤੇ ਯਾਵਦੇਵ ਆਕਙ੍ਖਾਮਿ, ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮੀ’’ਤਿ ਏਵਮਾਦਿਨਾ ਚਿਤ੍ਤੇਨ ਗਹਪਤਿਨਾ ਭਾਸਿਤਂ.

ਗਾਮਣਿਸਂਯੁਤ੍ਤ

ਚਣ੍ਡਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਗਾਮਣਿਸਂਯੁਤ੍ਤੇ ਪਠਮਂ ਚਣ੍ਡਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ¶ ਭਨ੍ਤੇ ਚਣ੍ਡਂ ਗਾਮਣਿਂ ਆਰਬ੍ਭ ਭਾਸਿਤਂ. ਚਣ੍ਡੋ ਭਨ੍ਤੇ ਗਾਮਣਿ ਭਗਵਨ੍ਤਂ ਏਤਦਵੋਚ ‘‘ਕੋ ਨੁ ਖੋ ਭਨ੍ਤੇ ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਚਣ੍ਡੋ ਚਣ੍ਡੋਤ੍ਵੇਵ ਸਙ੍ਖਂ ਗਚ੍ਛਤਿ. ਕੋ ਪਨ ਭਨ੍ਤੇ ਹੇਤੁ ਕੋ ਪਚ੍ਚਯੋ, ਯੇਨ ਮਿਧੇਕਚ੍ਚੋ ਸੋਰਤੋ ਸੋਰਤੋਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਇਧ ਗਾਮਣਿ ਏਕਚ੍ਚਸ੍ਸ ਰਾਗੋ ਅਪ੍ਪਹੀਨੋ ਹੋਤਿ, ਰਾਗਸ੍ਸ ਅਪ੍ਪਹੀਨਤ੍ਤਾ ਪਰੇ ਕੋਪੇਨ੍ਤਿ, ਪਰੇਹਿ ਕੋਪਿਯਮਾਨੋ ਕੋਪਂ ਪਾਤੁਕਰੋਤਿ, ਸੋ ਚਣ੍ਡੋਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਖੇਤ੍ਤੂਪਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਤ੍ਤਮਂ ਸਂਗੀਤਂ ਖੇਤ੍ਤੂਪਮਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਨਾਲ਼ਨ੍ਦਾਯਂ ਭਨ੍ਤੇ ਪਾਵਾਰਿਕਮ੍ਬਵਨੇ ਅਸਿਬਨ੍ਧਕਪੁਤ੍ਤਂ ਗਾਮਣਿਂ ਆਰਬ੍ਭ ਭਾਸਿਤਂ. ਅਸਿਬਨ੍ਧਕਪੁਤ੍ਤੋ ਭਨ੍ਤੇ ਗਾਮਣਿ ਭਗਵਨ੍ਤਂ ਏਤਦਵੋਚ ‘‘ਨਨੁ ਭਨ੍ਤੇ ਭਗਵਾ ਸਬ੍ਬਪਾਣਭੂਤਹਿਤਾਨੁਕਮ੍ਪੀ ਵਿਹਰਤੀਤਿ. ਏਵਂ ਗਾਮਣਿ ਤਥਾਗਤੋ ਸਬ੍ਬਪਾਣਭੂਤਹਿਤਾਨੁਕਮ੍ਪੀ ਵਿਹਰਤੀਤਿ. ਅਥ ਕਿਞ੍ਚਰਹਿ ਭਨ੍ਤੇ ਭਗਵਾ ਏਕਚ੍ਚਾਨਂ ਸਕ੍ਕਚ੍ਚਂ ਧਮ੍ਮਂ ਦੇਸੇਤਿ, ਏਕਚ੍ਚਾਨਂ ਨੋ ਤਥਾ ¶ ਸਕ੍ਕਚ੍ਚਂ ਧਮ੍ਮਂ ਦੇਸੇਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤੇਨ ਹਿ ਗਾਮਣਿ ਤਞ੍ਞੇਵੇਤ੍ਥ ਪਟਿਪੁਚ੍ਛਿਸ੍ਸਾਮਿ, ਯਥਾ ਤੇ ਖਮੇਯ੍ਯ, ਤਥਾ ਨਂ ਬ੍ਯਾਕਰੇਯ੍ਯਾਸੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਙ੍ਖਧਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕ ਮਹਾਥੇਰੇਹਿ ਅਟ੍ਠਮਂ ਸਂਗੀਤਂ ਸਙ੍ਖਧਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਨਾਲ਼ਨ੍ਦਾਯਂਯੇਵ ਭਨ੍ਤੇ ਪਾਵਾਰਿਕਮ੍ਬਵਨੇ ਅਸਿਬਨ੍ਧਕਪੁਤ੍ਤਂ ਗਾਮਣਿਂ ਨਿਗਣ੍ਠਸਾਵਕਂ ਆਰਬ੍ਭ ਭਾਸਿਤਂ. ਭਗਵਾ ਭਨ੍ਤੇ ਅਸਿਬਨ੍ਧਕਪੁਤ੍ਤਂ ਗਾਮਣਿਂ ਨਿਗਣ੍ਠਸਾਵਕਂ ਏਤਦਵੋਚ ‘‘ਕਥਂ ਨੁ ਖੋ ਗਾਮਣਿ ਨਿਗਣ੍ਠੋ ਨਾਟਪੁਤ੍ਤੋ ਸਾਵਕਾਨਂ ਧਮ੍ਮਂ ਦੇਸੇਤੀ’’ਤਿ. ਏਵਂ ਖੋ ਭਨ੍ਤੇ ਨਿਗਣ੍ਠੋ ਨਾਟਪੁਤ੍ਤੋ ਸਾਵਕਾਨਂ ਧਮ੍ਮਂ ਦੇਸੇਤਿ ‘‘ਯੋ ਕੋਚਿ ਪਾਣਂ ਅਤਿਪਾਤੇਤਿ, ਸਬ੍ਬੋ ਸੋ ਆਪਾਯਿਕੋ ਨੇਰਯਿਕੋ. (ਪੇਯ੍ਯਾਲ) ਯਂਬਹੁਲਂ ਯਂਬਹੁਲਂ ਵਿਹਰਤਿ, ਤੇਨ ਤੇਨ ਨੀਯਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਂਬਹੁਲਂ ਯਂਬਹੁਲਞ੍ਚ ਗਾਮਣਿ ਵਿਹਰਤਿ, ਤੇਨ ਤੇਨ ਨੀਯਤਿ, ਏਵਂ ਸਨ੍ਤੇ ਨ ਕੋਚਿ ਆਪਾਯਿਕੋ ਨੇਰਯਿਕੋ ਭਵਿਸ੍ਸਤਿ, ਯਥਾ ਨਿਗਣ੍ਠਸ੍ਸ ਨਾਟਪੁਤ੍ਤਸ੍ਸ ਵਚਨ’’ਨ੍ਤਿ ਏਵਂ ਖੋ ਭਗਵਤਾ ਸਂਖਿਤ੍ਤੇਨ ਭਾਸਿਤਂ.

ਯਂ ਬਹੁਲਵਾਦ

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਯਂਬਹੁਲਵਾਦੇ ਦੋਸੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਤਂ ਕਿਂ ਮਞ੍ਞਸਿ ਗਾਮਣਿ, ਯੋ ਸੋ ਪੁਰਿਸੋ ਪਾਣਾਤਿਪਾਤੀ ਰਤ੍ਤਿਯਾ ਵਾ ਦਿਵਸਸ੍ਸ ਵਾ ਸਮਯਾਸਮਯਂ ਉਪਾਦਾਯ ਕਤਮੋ ਬਹੁਤਰੋ ਸਮਯੋ ਯਂ ਵਾਸੋ ਪਾਣਮਤਿਪਾਤੇਤਿ. ਯਂ ਵਾ ਸੋ ਪਾਣਂ ਨਾਤਿਪਾਤੇਤੀਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਅਸਿਬਨ੍ਧਕਂ ਨਿਗਣ੍ਠਨਾਟਪੁਤ੍ਤਸ੍ਸ ਸਾਵਕਂ ਗਾਮਣਿਂ ਪੁਚ੍ਛਿਤ੍ਵਾ ਪੁਚ੍ਛਿਤ੍ਵਾ ਯਂਬਹੁਲਵਾਦੇ ਦੋਸੋ ਪਕਾਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਅਨੇਕਂਸ ਵਿਪਾਕਕਮ੍ਮਸ੍ਸ ਏਕਂ ਸਵਿਪਾਕਵਾਦੇ ਦੋਸੋ ਪਕਾਸਿਤੋ.

ਵਿਸ੍ਸਜ੍ਜਨਾ – ਇਧ ਗਾਮਣਿ ਏਕਚ੍ਚੋ ਸਤ੍ਥਾ ਏਵਂਵਾਦੀ ਹੋਤਿ ਏਵਂਦਿਟ੍ਠਿ ਯੋ ਕੋਚਿ ਪਾਣਮਤਿਪਾਤੇਤਿ, ਸਬ੍ਬੋ ਸੋ ਆਪਾਯਿਕੋ ਨੇਰਯਿਕੋਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਅਨੇਕਂਸ ਕਮ੍ਮਵਿਪਾਕਸ੍ਸ ਏਕਂਸਵਿਪਾਕਵਾਦੇ ਦੋਸੋ ਵਿਤ੍ਥਾਰੇਤ੍ਵਾ ਪਕਾਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਯਥਾਧਮ੍ਮਸਾਸਨੇ ਗੁਣੋਵਿਭਜਿਤ੍ਵਾ ਪਕਾਸਿਤੋ.

ਵਿਸ੍ਸਜ੍ਜਨਾ – ਇਧ ¶ ਪਨ ਗਾਮਣਿ ਤਥਾਗਤੋ ਲੋਕੇ ਉਪ੍ਪਜ੍ਜਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋਪੁਰਿਸ ਦਮ੍ਮਸਾਰਥਿ ਸਤ੍ਥਾਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ, ਸੋ ਅਨੇਕਪਰਿਯਾਯੇਨ ਪਾਣਾਤਿਪਾਤਂ ਗਰਹਤਿ ਵਿਗਰਹਤਿ. ‘‘ਪਾਣਾਤਿਪਾਤਾ ਵਿਰਮਥਾ’’ਤਿ ਚਾਹਾਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਤਤ੍ਥ ਯਥਾਧਮ੍ਮਸਾਸਨੇ ਗੁਣੋ ਵਿਤ੍ਥਾਰੇਤ੍ਵਾ ਪਕਾਸਿਤੋ.

ਭਦ੍ਰਕਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਏਕਾਦਸਮਂ ਸਂਗੀਤਂ ਭਦ੍ਰਕਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਲ੍ਲੇਸੁ ਭਨ੍ਤੇ ਉਰੁਵੇਲਕਪ੍ਪੇਨਾਮ ਮਲ੍ਲਾਨਂ ਨਿਗਮੇ ਭਦ੍ਰਕਂ ਗਾਮਣਿਂ ਆਰਬ੍ਭ ਭਾਸਿਤਂ. ਭਦ੍ਰਕੋ ਭਨ੍ਤੇ ਗਾਮਣਿ ਭਗਵਨ੍ਤਂ ਏਤਦਵੋਚ ‘‘ਸਾਧੁ ਮੇ ਭਨ੍ਤੇ ਭਗਵਾ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਤੂ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਹਞ੍ਚੇ ਤੇ ਗਾਮਣਿ ਅਤੀਤਮਦ੍ਧਾਨਂ ਆਰਬ੍ਭ ਦੁਕ੍ਖਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਯ੍ਯਂ ‘ਏਵਂ ਅਹੋਸਿ ਅਤੀਤਮਦ੍ਧਾਨ’ਨ੍ਤਿ. ਤਤ੍ਰ ਤੇ ਸਿਯਾ ਕਙ੍ਖਾ ਸਿਯਾ ਵਿਮਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਾਧੁ ¶ ਮੇ ਭਨ੍ਤੇ ਭਗਵਾ ਦੁਕ੍ਖਸ੍ਸ

ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਦੇਸੇਤੁ–

‘‘ਤਂ ¶ ਕਿਂ ਮਞ੍ਞਸਿ ਗਾਮਣਿ, ਅਤ੍ਥਿ ਉਰੁਵੇਲਕਪ੍ਪੇ ਮਨੁਸ੍ਸਾ’’ –

ਰਾਸਿਯਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਗਾਮਣਿਸਂਯੁਤ੍ਤੇ ਦ੍ਵਾਦਸਮਂ ਸਂਗੀਤਂ ਰਾਸਿਯਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਮਲ੍ਲੇਸੁ ਭਨ੍ਤੇ ਉਰੁਵੇਲਕਪ੍ਪੇਨਾਮ ਮਲ੍ਲਾਨਂ ਨਿਗਮੇ ਰਾਸਿਯਂ ਗਾਮਣਿਂ ਆਰਬ੍ਭ ਭਾਸਿਤਂ. ਰਾਸਿਯੋ ਭਨ੍ਤੇ ਗਾਮਣਿ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਦੋਚ ¶ ‘‘ਸੁਤਂ ਮੇ ਭਨ੍ਤੇ ‘ਸਮਣੋ ਗੋਤਮੋ ਸਬ੍ਬਂ ਤਪਂ ਗਰਹਤਿ, ਸਬ੍ਬਂ ਤਮਸ੍ਸਿਂ ਲੂਖਜੀਵਿਂ ਏਕਂਸੇਨ ਉਪਵਦਤਿ ਉਪਕ੍ਕੋਸਤੀ’’ਤਿ. ਯੇ ਤੇ ਭਨ੍ਤੇ ਏਵਮਾਹਂਸੁ ‘ਸਮਣੋ ਗੋਤਮੋ ਸਬ੍ਬਂ ਤਪਂ ਗਰਹਤਿ, ਸਬ੍ਬਂ ਤਪਸ੍ਸਿਂ ਲੂਖਜੀਵਿਂ ਏਕਂਸੇਨ ਉਪਵਦਤਿ ਉਪਕ੍ਕੋਸਤੀ’’ਤਿ. ਕਚ੍ਚਿ ਤੇ ਭਨ੍ਤੇ ਭਗਵਤੋ ਵੁਤ੍ਤਵਾਦਿਨੋ, ਨ ਚ ਭਗਵਨ੍ਤਂ ਅਭੂਤੇਨ ਅਬ੍ਭਾਚਿਕ੍ਖਨ੍ਤਿ, ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਯੇ ਤੇ ਗਾਮਣਿ ਏਵਮਾਹਂਸੁ ‘‘ਸਮਣੋ ਗੋਤਮੋ ਸਬ੍ਬਂ ਤਪਂ ਗਰਹਤਿ, ਸਬ੍ਬਂ ਤਪਸ੍ਸਿਂ ਲੂਖਜੀਵਿਂ ਏਕਂਸੇਨ ਉਪਵਦਤਿ ਉਪਕ੍ਕੋਸਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਗਰਹਿਤਬ੍ਬਾਗਰਹਿਤਬ੍ਬਾ ਕਾਮਭੋਗਿਨੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਤਯੋ ਖੋ ਮੇ ਗਾਮਣਿ ਕਾਮਭੋਗਿਨੋ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਕਤਮੇ ਤਯੋ. ਇਧ ਗਾਮਣਿ ਏਕਚ੍ਚੋ ਕਾਮਭੋਗੀ ਅਧਮ੍ਮੇਨ ¶ ਭੋਗੇ ਪਰਿਯੇਸਤਿ ਸਾਹਸੇਨ, ਅਧਮ੍ਮੇਨ ਭੋਗੇ ਪਰਿਯੇਸਿਤ੍ਵਾ ਸਾਹਸੇਨ ਨ ਅਤ੍ਤਾਨਂ ਸੁਖੇਤਿ ਨ ਪੀਣੇਤਿ, ਨ ਸਂਵਿਭਜਤਿ ਨ ਪੁਞ੍ਞਾਨਿ ਕਰੋਤੀਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਗਰਹਿਤਬ੍ਬਾਗਰਹਿਤਬ੍ਬਾ ਕਾਮਭੋਗਿਨੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ¶ ਤਤ੍ਥ ਭਗਵਤਾ ਗਰਹਿਤਬ੍ਬਾਗਰਹਿਤਬ੍ਬਾ ਤਪਸ੍ਸਿਨੋ ਲੂਖਜੀਵਿਨੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਤਯੋ ਮੇ ਗਾਮਣਿ ਤਪਸ੍ਸਿਨੋ ਲੂਖਜੀਵਿਨੋ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਕਤਮੇ ਤਯੋ. ਇਧ ਗਾਮਣੀ ਏਕਚ੍ਚੋ ਤਪਸ੍ਸੀ ਲੂਖਜੀਵੀ ਸਦ੍ਧਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ ‘‘ਅਪ੍ਪੇਵ ਨਾਮ ਕੁਸਲਂ ਧਮ੍ਮਂ ਅਧਿਗਚ੍ਛੇਯ੍ਯਂ, ਅਪ੍ਪੇਵ ਨਾਮ ਉਤ੍ਤਰਿਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸਂ ਸਚ੍ਛਿਕਰੇਯ੍ਯ’’ਨ੍ਤਿ, ਸੋ ਅਤ੍ਤਾਨਂ ਆਤਾਪੇਤਿ ਪਰਿਤਾਪੇਤਿ, ਕੁਸਲਞ੍ਚ ਧਮ੍ਮਂ ਨਾਧਿਗਚ੍ਛਤਿ, ਉਤ੍ਤਰਿ ਚ ਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸਂ ਨ ਸਚ੍ਛਿਕਰੋਤੀਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਗਰਹਿਤਬ੍ਬਾਗਰਹਿਤਬ੍ਬਾ ਤਪਸ੍ਸਿਨੋ ਲੂਖਜੀਵਿਨੋ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤਾ.

ਅਬ੍ਯਾਕਤਸਂਯੁਤ੍ਤ

ਖੇਮਾਸੁਤ੍ਤ

ਪੁਚ੍ਛਾ – ਅਬ੍ਯਾਕਤਸਂਯੁਤ੍ਤੇ ¶ ਪਨਾਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕ ਮਹਾਥੇਰੇਹਿ ਪਠਮਂ ਸਂਗੀਤਂ ਖੇਮਾਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ. ਕਥਞ੍ਚ ਤਂ ਭਗਵਤਾਪਿ ਪੁਨ ਭਾਸਿਤਂ.

ਵਿਸ੍ਸਜ੍ਜਨਾ – ਅਨ੍ਤਰਾ ਚ ਭਨ੍ਤੇ ਸਾਵਤ੍ਥਿਂ ਅਨ੍ਤਰਾ ਚ ਸਾਕੇਤਂ ਤੋਰਣਵਤ੍ਥੁਸ੍ਮਿਂ ਪਦੇਸੇ ਰਾਜਾਨਂ ਪਸੇਨਦਿਂ ਕੋਸਲਂ ਆਰਬ੍ਭ ਖੇਮਾਯ ਭਿਕ੍ਖੁਨਿਯਾ ਭਾਸਿਤਂ. ਰਾਜਾ ਭਨ੍ਤੇ ਪਸੇਨਦਿ ਕੋਸਲੋ ਯੇਨ ਖੇਮਾ ਭਿਕ੍ਖੁਨੀ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਭਨ੍ਤੇ ਰਾਜਾ ਪਸੇਨਦਿਕੋਸਲੋ ਖੇਮਂ ਭਿਕ੍ਖੁਨਿਂ ਏਤਦਵੋਚ ‘‘ਕਿਂ ਨੁਖੋ ਅਯ੍ਯੇ ਹੋਤਿ ਤਥਾਗਤੋ ਪਰਂਮਰਣਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਬ੍ਯਾਕਤਂ ਖੋ ਏਤਂ ਮਹਾਰਾਜ ਭਗਵਤਾ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਏਵਮਾਦਿਨਾ ਖੇਮਾਯ ਭਿਕ੍ਖੁਨਿਯਾ ਭਾਸਿਤਂ. ਭਗਵਤਾ ਚ ਭਨ੍ਤੇ ਅਪਰੇਨ ਸਮਯੇਨ ਰਞ੍ਞਾ ਪਸੇਨਦਿਕੋਸਲੇਨ ਪੁਟ੍ਠੇਨ ਏਵਮੇਵ ਪੁਨ ਭਾਸਿਤਂ.

ਕਿਂ ¶ ਪਨਯ੍ਯੇ ਨਹੋਤਿ ਤਥਾਗਤੋ ਪਰਂ ਮਰਣਾ.

ਕੁਤੂਹਲਸਾਲਾਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਨਵਮਂ ਸਂਗੀਤਂ ਕੁਤੂਹਲਸਾਲਾਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਵਚ੍ਛਗੋਤ੍ਤਂ ਪਰਿਬ੍ਬਾਜਕਂ ਆਰਬ੍ਭ ਭਾਸਿਤਂ. ਵਚ੍ਛਗੋਤ੍ਤੋ ਭਨ੍ਤੇ ਪਰਿਬ੍ਬਾਜਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਪੁਰਿਮਾਨਿ ਭੋ ਗੋਤਮ ਦਿਵਸਾਨਿ ਪੁਰਿਮਤਰਾਨਿ ਸਮ੍ਬਹੁਲਾਨਂ ਨਾਨਾਤਿਤ੍ਥਿਯਾਨਂ ਸਮਣਬ੍ਰਾਹ੍ਮਣਾਨਂ ਪਰਿਬ੍ਬਾਜਕਾਨਂ ਕੁਤੂਹਲਸਾਲਾਯਂ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਕਥਾ ਉਦਪਾਦੀ’’ਤਿ ਏਵਮਾਦਿਕਂ ਵਚਨਂ ਅਵੋਚ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਲਞ੍ਹਿ ਤੇ ਵਚ੍ਛ ਕਙ੍ਖਿਤੁਂ, ਅਲਂ ਵਿਚਿਕਿਚ੍ਛਿਤੁਂ. ਕਙ੍ਖਨੀਯੇ ਚ ਪਨ ਤੇ ਠਾਨੇ ਵਿਚਿਕਿਚ੍ਛਾ ਉਪ੍ਪਨ੍ਨਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਮਹਾਵਗ੍ਗਸਂਯੁਤ੍ਤਪਾਲ਼ਿ

ਅਵਿਜ੍ਜਾਵਗ੍ਗ

ਉਪਡ੍ਢਸੁਤ੍ਤ

ਪੁਚ੍ਛਾ – ਮਹਾਵਗ੍ਗਸਂਯੁਤ੍ਤੇ ¶ ਪਨਾਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦੁਤਿਯਂ ਸਂਗੀਤਂ ਉਪਡ੍ਢਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਸਕ੍ਕਰੇ ਨਾਮ ਸਕ੍ਯਾਨਂ ਨਿਗਮੇ ਆਯਸ੍ਮਨ੍ਤਂ ਆਨਨ੍ਦਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਆਨਨ੍ਦਤ੍ਥੇਰੋ ਭਗਵਨ੍ਤਂ ਏਤਦਵੋਚ ‘‘ਉਪਡ੍ਢਮਿਦਂ ਭਨ੍ਤੇ ਬ੍ਰਹ੍ਮਚਰਿਯਂ ਯਦਿਦਂ ਕਲ੍ਯਾਣਮਿਤ੍ਤਤਾ ਕਲ੍ਯਾਣਸਹਾਯਤਾ ਕਲ੍ਯਾਣਸਮ੍ਪਵਙ੍ਕਤਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਮਾ ਹੇਵਂ ਆਨਨ੍ਦ, ਮਾ ਹੇਵਂ ਆਨਨ੍ਦ, ਸਕਲਮੇਵਿਦਂ ਆਨਨ੍ਦ ਬ੍ਰਹ੍ਮਚਰਿਯਂ ਯਦਿਦਂ ਕਲ੍ਯਾਣਮਿਤ੍ਤਤਾ ਕਲ੍ਯਾਣਸਹਾਯਤਾ ਕਲ੍ਯਾਣਸਮ੍ਪਵਙ੍ਕਤਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਮਮਂ ¶ ਹਿ ਆਨਨ੍ਦ ਕਲ੍ਯਾਣਮਿਤ੍ਤਂ ਆਗਮ੍ਮ ਜਾਤਿਧਮ੍ਮਾ ਸਤ੍ਤਾ ਜਾਤਿਯਾ ਪਰਿਮੁਚ੍ਚਨ੍ਤਿ.

ਬੋਜ੍ਝਙ੍ਗਸਂਯੁਤ੍ਤ

ਕੁਣ੍ਡਲਿਯਸੁਤ੍ਤ

ਪੁਚ੍ਛਾ – ਬੋਜ੍ਝਙ੍ਗਸਂਯੁਤ੍ਤੇ ¶ ਪਨਾਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਛਟ੍ਠਂ ਸਂਗੀਤਂ ਕੁਣ੍ਡਲਿਯਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਕੇਤੇ ਭਨ੍ਤੇ ਅਞ੍ਜਨਵਨੇ ਮਿਗਦਾਯੇ ਕੁਣ੍ਡਲਿਯਂ ਪਰਿਬ੍ਬਾਜਕਂ ਆਰਬ੍ਭ ਭਾਸਿਤਂ. ਕੁਣ੍ਡਲਿਯੋ ਭਨ੍ਤੇ ਪਰਿਬ੍ਬਾਜਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਅਹਮਸ੍ਮਿ ਭੋ ਗੋਤਮ ਆਰਾਮਨਿਸ੍ਸਯੀ ਪਰਿਸਾਵਚਰੋ, ਤਸ੍ਸ ਮਯ੍ਹਂ ਭੋ ਗੋਤਮ ਪਚ੍ਛਾਭਤ੍ਤਂ ਭੁਤ੍ਤਪਾਤਰਾਸਸ੍ਸ ਅਯਮਾਚਾਰੋ ਹੋਤਿ ਆਰਾਮੇਨ ਆਰਾਮਂ ਉਯ੍ਯਾਨੇਨ ਉਯ੍ਯਾਨਂ ਅਨੁਚਙ੍ਕਮਾਮਿ ਅਨੁਵਿਚਰਾਮਿ, ਸੋ ਤਤ੍ਥ ਪਸ੍ਸਾਮਿ ਏਕੇ ਸਮਣਬ੍ਰਾਹ੍ਮਣੇ ਇਤਿਵਾਦਪ੍ਪਮੋਕ੍ਖਾਨਿਸਂਸਞ੍ਚੇਵ ਕਥਂ ਕਥਨ੍ਤੇ ਉਪਾਰਮ੍ਭਾਨਿਸਂਸਞ੍ਚ, ਭਵਂ ਪਨ ਗੋਤਮੋ ਕਿਮਾਨਿਸਂਸੋ ਵਿਹਰਤੀ’’ਤਿ ਏਤਂ ਵਚਨਂ ਅਵੋਚ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਵਿਜ੍ਜਾਵਿਮੁਤ੍ਤਿਫਲਾਨਿਸਂਸੋ ¶ ਖੋ ਕੁਣ੍ਡਲਿਯ ਤਥਾਗਤੋ ਵਿਹਰਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪਠਮ ਗਿਲਾਨਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ¶ ਭਗਵ੍ਵਤਾ ਜਾਨਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਬੋਜ੍ਝਙ੍ਗਸਂਯੁਤ੍ਤੇ ਦੁਤਿਯੇ ਗਿਲਾਨਵਗ੍ਗੇ ਪਠਮਗਿਲਾਨਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਪਿਪ੍ਪਲਿਗੁਹਾਯਂ ਆਯਸ੍ਮਨ੍ਤਂ ਮਹਾਕਸ੍ਸਪਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਮਹਾਕਸ੍ਸਪਤ੍ਥੇਰੋ ਪਿਪ੍ਪਲਿਗੁਹਾਯਂ ਵਿਹਰਤਿ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ. ਅਥ ਖੋ ਭਨ੍ਤੇ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਮਹਾਕਸ੍ਸਪੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਆਯਸ੍ਮਨ੍ਤਂ ਮਹਾਕਸ੍ਸਪਂ ¶ ਏਤਦਵੋਚ– ‘‘ਕਚ੍ਚਿ ਤੇ ਕਸ੍ਸਪ ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਦੁਕ੍ਖਾ ਵੇਦਨਾ ਪਟਿਕ੍ਕਮਨ੍ਤਿ ਨੋ ਅਭਿਕ੍ਕਮਨ੍ਤਿ, ਪਟਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਅਭਿਕ੍ਕਮੋਤਿ. ਨ ਮੇ ਭਨ੍ਤੇ ਖਮਨੀਯਂ ਨ ਯਾਪਨੀਯਂ, ਬਾਲ਼੍ਹਾ ਮੇ ਦੁਕ੍ਖਾ ਵੇਦਨਾ ਅਭਿਕ੍ਕਮਨ੍ਤਿ ਨੋ ਪਟਿਕ੍ਕਮਨ੍ਤਿ, ਅਭਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਪਟਿਕ੍ਕਮੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸਤ੍ਤਿਮੇ ਕਸ੍ਸਪ ਬੋਜ੍ਝਙ੍ਗਾ ਮਯਾ ਸਮ੍ਮਦਕ੍ਖਾਤਾ ਭਾਵਿਤਾ ਬਹੁਲੀਕਤਾ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਨ੍ਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਉਦਾਯਿਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਤਤਿਯੇ ਉਦਾਯਿਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦਸਮਂ ਸਂਗੀਤਂ ਉਦਾਯਿਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸੁਮ੍ਭੇਸੁ ਭਨ੍ਤੇ ਸੇਤਕੇਨਾਮ ਸੁਮ੍ਭਾਨਂ ਨਿਗਮੇ ਆਯਸ੍ਮਨ੍ਤਂ ਉਦਾਯਿਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਉਦਾਯਿਤ੍ਥੇਰੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਅਚ੍ਛਰਿਯਂ ਭਨ੍ਤੇ, ਅਬ੍ਭੁਤਂ ਭਨ੍ਤੇ, ਯਾਵ ਬਹੁਕਤਞ੍ਚ ਮੇ ਭਨ੍ਤੇ ਭਗਵਤਿ ਪੇਮਞ੍ਚ ਗਾਰਵੋ ਚ ਹਿਰੀ ਚ ਓਤ੍ਤਪ੍ਪਞ੍ਚਾਤਿ ਏਵਮਾਦਿਕਂ ਵਚਨਂ ਅਵੋਚ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸਾਧੁ ਸਾਧੁ ਉਦਾਯਿ ਏਸੋ ਹਿ ਤੇ ਉਦਾਯਿ ਮਗ੍ਗੋ ਪਟਿਲਦ੍ਧੋ. ਯੋ ਤੇ ਭਾਵਿਤੋ ਬਹੁਲੀਕਤੋ, ਤਥਾ ਤਥਾ ਵਿਹਰਨ੍ਤਂ ਤਥਤ੍ਤਾਯ ਉਪਨੇਸ੍ਸਤਿ, ਯਥਾ ਤ੍ਵਂ ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’ਤਿ ਪਜਾਨਿਸ੍ਸਤੀ’’ਤਿ. ਏਵਂ ਖੋ ਭਗਵਤਾ ਭਾਸਿਤਂ.

ਸਤਿਪਟ੍ਠਾਨਸਂਯੁਤ੍ਤ

ਸਤਿਸੁਤ੍ਤ

ਪੁਚ੍ਛਾ – ਸਤਿਪਟ੍ਠਾਨਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕ ਮਹਾਥੇਰੇਹਿ ਦੁਤਿਯਂ ਸਂਗੀਤਂ ਸਤਿਸੁਤ੍ਤਂ ਭਗਵਤਾ ਕਤ੍ਥ ਕਂ ਕਾਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਅਮ੍ਬਪਾਲਿਵਨੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਸਤੋ ਭਿਕ੍ਖਵੇ ਭਿਕ੍ਖੁ ਵਿਹਰੇਯ੍ਯ ਸਮ੍ਪਜਾਨੋ ਅਯਂ ਵੋ ਅਮ੍ਹਾਕਂ ਅਨੁਸਾਸਨੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਾਲਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਚਤੁਤ੍ਥਂ ਸਂਗੀਤਂ ਸਾਲਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਸਾਲਾਯਨਾਮ ਕੇਸਲਾਨਂ ਬ੍ਰਾਹ੍ਮਣਗਾਮੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਯੇ ਤੇ ਭਿਕ੍ਖਵੇ ਭਿਕ੍ਖੂ ਨਵਾ ਅਚਿਰਪਬ੍ਬਜਿਤਾ ਅਧੁਨਾਗਤਾ ਇਮਂ ਧਮ੍ਮਵਿਨਯਂ, ਤੇ ਵੋ ਭਿਕ੍ਖਵੇ ਭਿਕ੍ਖੂ ਚਤੁਨ੍ਨਂ ਸਤਿਪਟ੍ਠਾਨਾਨਂ ਭਾਵਨਾਯ ਸਮਾਦਪੇਤਬ੍ਬਾ ਨਿਵੇਸੇਤਬ੍ਬਾ ਪਤਿਟ੍ਠਾਪੇਤਬ੍ਬਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸਕੁਣਗ੍ਘਿਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਛਟ੍ਠਂ ਸਂਗੀਤਂ ਸਕੁਣਗ੍ਘਿਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਭੂਤਪੁਬ੍ਬਂ ਭਿਕ੍ਖਵੇ ਸਕੁਣਗ੍ਘਿ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ ਅਗ੍ਗਹੇਸਿ. ਅਥ ਖੋ ਭਿਕ੍ਖਵੇ ਲਾਪੋ ਸਕੁਣੋ ਸਕੁਣਗ੍ਘਿਯਾ ਹਰਿਯਮਾਨੋ ਏਵਂ ਪਰਿਦੇਵਸਿ ਮਯਮੇਵਮ੍ਹ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ, ਯੇ ਮਯਂ ਅਗੋਚਰੇ ਚਰਿਮ੍ਹ ਪਰਵਿਸਯੇ, ਸਚੇਜ੍ਜ ਮਯਂ ਗੋਚਰੇ ਚਰੇਯ੍ਯਾਮ ਸਕੇ ਪੇਤ੍ਤਿਕੇ ਵਿਸਯੇ, ਨ ਮ੍ਯਾਹਂ ਸਕੁਣਗ੍ਘਿ ਅਲਂ ਅਭਵਿਸ੍ਸ ਯਦਿਦਂ ਯੁਦ੍ਧਾਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਮਯਮੇਵਮ੍ਹ ¶ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ.

ਕੋ ਪਨ ਤੇ ਲਾਪ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ.

ਯਦਿਦਂ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਂ.

ਏਹਿ ¶ ਖੋ ਦਾਨਿ ਮੇ ਸਕੁਣਗ੍ਘਿ, ਏਹਿ ਖੋ ਦਾਨਿ ਮੇ ਸਕੁਣਗ੍ਘਿ,

(ਦਾਰੁਗੁਲ਼ੋਵਿਯ ਵਿਨਿਵਤ੍ਤਿਤ੍ਵਾ ਤਸ੍ਸੇਵ ਲੇਡ੍ਡੁਸ੍ਸ ਅਨ੍ਤਰੇ ਪਚ੍ਚੁਪਾਦਿ. ਅਟ੍ਠਕਥਾ)

ਏਵਞ੍ਹਿ ਤਂ ਭਿਕ੍ਖਵੇ ਹੋਤਿ ਯੋ ਅਗੋਚਰੇ ਚਰਤਿ ਪਰਵਿਸਯੇ.

ਤਸ੍ਮਾਤਿਹ ¶ ਭਿਕ੍ਖਵੇ ਮਾ ਅਗੋਚਰੇ ਚਰਿਤ੍ਥ ਪਰਵਿਸਯੇ.

ਗੋਚਰੇ ਭਿਕ੍ਖਵੇ ਚਰਥ ਸਕੇ ਪੇਤ੍ਤਿਕੇ ਵਿਸਯੇ.

ਗੋਚਰੇ ਭਿਕ੍ਖਵੇ ਚਰਤਂ ਸਕੇ ਪੇਤ੍ਤਿਕੇ ਵਿਸਯੇ ਨ ਲਚ੍ਛਤਿ ਮਾਰੋ ਓਤਾਰਂ, ਨ ਲਚ੍ਛਤਿ ਮਾਰੋ ਆਰਮ੍ਮਣਂ.

ਭਿਕ੍ਖੁਨੁਪਸ੍ਸਯਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦਸਮਂ ਸਂਗੀਤਂ ਭਿਕ੍ਖੁਨੁਪਸ੍ਸਯਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਆਨਨ੍ਦਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਆਨਨ੍ਦੋ ਯਾਵਤ੍ਤਕੋ ਅਹੋਸਿ ਭਿਕ੍ਖੁਨੀਹਿ ਸਦ੍ਧਿਂ ਕਥਾਸਲ੍ਲਾਪੋ ਤਂ ਸਬ੍ਬਂ ਭਗਵਤੋ ਆਰੋਚੇਸਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਏਵਮੇਤਂ ਆਨਨ੍ਦ, ਏਵਮੇਤਂ ਆਨਨ੍ਦ, ਯੋਹਿ ਕੋਚਿ ਆਨਨ੍ਦ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਚਤੂਸੁ ਸਤਿਪਟ੍ਠਾਨੇਸੁ ਸੁਪ੍ਪਤਿਟ੍ਠਿਤਚਿਤ੍ਤੋ ਵਿਹਰਤਿ, ਤਸ੍ਸੇਤਂ ਪਾਟਿਕਙ੍ਖਂ ਉਲ਼ਾਰਂ ਪੁਬ੍ਬੇਨਾਪਰਂ ਵਿਸੇਸਂ ਸਞ੍ਜਾਨਿਸ੍ਸਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਚੁਨ੍ਦਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਦੁਤਿਯੇ ਨਾਲਨ੍ਦਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਤਤਿਯਂ ਸਂਗੀਤਂ ਚੁਨ੍ਦਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂਯੇਵ ਆਨਨ੍ਦਤ੍ਥੇਰਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਆਨਨ੍ਦਤ੍ਥੇਰੋ ਚੁਨ੍ਦੇਨ ਸਮਣੁਦ੍ਦੇਸੇਨ ਸਦ੍ਧਿਂ ਯੇਨ ਭਗਵਾ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਭਨ੍ਤੇ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ ‘‘ਅਯਂ ਭਨ੍ਤੇ ਚੁਨ੍ਦੋ ਸਮਣੁਦ੍ਦੇਸੋ ਏਵਮਾਹ ‘ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤੋ ਪਰਿਨਿਬ੍ਬੁਤੋ, ਇਦਮਸ੍ਸ ਪਤ੍ਤਚੀਵਰ’ਨ੍ਤਿ. ਅਪਿ ਚ ਮੇ ਭਨ੍ਤੇ ਮਧੁਰਕਜਾਤੋ ਵਿਯ ਕਾਯੋ, ਦਿਸਾਪਿ ਮੇ ਨ ਪਕ੍ਖਾਯਨ੍ਤਿ, ਧਮ੍ਮਾਪਿ ਮਂ ਨਪ੍ਪਟਿਭਨ੍ਤਿ ‘ਆਯਸ੍ਮਾ ਸਾਰਿਪੁਤ੍ਤੋ ਪਰਿਨਿਬ੍ਬੁਤੋ’ਤਿ ਸੁਤ੍ਵਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਕਿਂ ਨੁ ਖੋ ਤੇ ਆਨਨ੍ਦ ਸਾਰਿਪੁਤ੍ਤੋ ਸੀਲਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ, ਸਮਾਧਿਕ੍ਖਨ੍ਧਂ ਵਾ, ਪਞ੍ਞਾਕ੍ਖਨ੍ਧਂਵਾ, ਵਿਮੁਤ੍ਤਿਕ੍ਖਨ੍ਧਂਵਾ, ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਯਂ ¶ ਭਨ੍ਤੇ ਚੁਨ੍ਦੋਸਮਣੁਦ੍ਦੇਸੋ ਏਵਮਾਹ.

ਤਸ੍ਮਾਤਿਹਾਨਨ੍ਦ ¶ ਅਤ੍ਤਦੀਪਾ ਵਿਹਰਥ ਅਤ੍ਤਸਰਣਾ ਅਨਞ੍ਞਸਰਣਾ ਧਮ੍ਮਦੀਪਾ ਧਮ੍ਮਸਰਣਾ ਅਨਞ੍ਞਸਰਣਾ.

ਬਾਹਿਯਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਞ੍ਚਮਂ ਸਂਗੀਤਂ ਬਾਹਿਯਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਬਾਹਿਯਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਬਾਹਿਯੋ ਭਗਵਨ੍ਤਂ ਏਤਦਵੋਚ ‘‘ਸਾਧੁ ਮੇ ਭਨ੍ਤੇ ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੁ, ਯਮਹਂ ਭਗਵਤੋ ਧਮ੍ਮਂ ਸੁਤ੍ਵਾ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰੇਯ੍ਯ’’ਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਸ੍ਮਾਤਿਹ ਤ੍ਵਂ ਬਾਹਿਯ ਆਦਿਮੇਵ ਵਿਸੋਧੇਹਿ ਕੁਸਲੇਸੁ ਧਮ੍ਮੇਸੁ. ਕੋ ਚਾਦਿਕੁਸਲਾਨਂ ਧਮ੍ਮਾਨਂ, ਸੀਲਞ੍ਚ ਸੁਵਿਸੁਦ੍ਧਂ ਦਿਟ੍ਠਿਚ ਉਜੁਕਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸੀਲਟ੍ਠਿਤਿਵਗ੍ਗ

ਚਿਰਟ੍ਠਿਤਿਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਤਤਿਯੇ ਸੀਲਟ੍ਠਿਤਿਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦੁਤਿਯਂ ਸਂਗੀਤਂ ਚਿਰਟ੍ਠਿਤਿਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਪਾਟਲਿਪੁਤ੍ਤੇ ਭਨ੍ਤੇ ਆਯਸ੍ਮਨ੍ਤਂ ਭਦ੍ਦਂ ਆਰਬ੍ਭ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ. ਆਯਸ੍ਮਾ ਭਨ੍ਤੇ ਭਦ੍ਦੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ ‘‘ਕੋ ਨੁ ਖੋ ਆਵੁਸੋ ਆਨਨ੍ਦ ਹੇਤੁ ਕੋ ਪਚ੍ਚਯੋ, ਯੇਨ ਤਥਾਗਤੇ ਪਰਿਨਿਬ੍ਬੁਤੇ ਸਦ੍ਧਮ੍ਮੋ ਨ ਚਿਰਟ੍ਠਿਤਿਕੋ ਹੋਤਿ, ਕੋ ਪਨਾਵੁਸੋ ਆਨਨ੍ਦ ਹੇਤੁ ਕੋ ਪਚ੍ਚਯੋ, ਯੇਨ ਤਥਾਗਤੇ ਪਰਿਨਿਬ੍ਬੁਤੇ ਸਦ੍ਧਮ੍ਮੋ ਚਿਰਟ੍ਠਿਤਿਕੋ ਹੋਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਸਾਧੁ ਸਾਧੁ ਆਵੁਸੋ ਭਦ੍ਦ, ਭਦ੍ਦਕੋ ਖੋ ਤੇ ਆਵੁਸੋ ਭਦ੍ਦ ਉਮ੍ਮਙ੍ਗੋ’’ਤਿ ਏਵਮਾਦਿਨਾ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ.

ਭਦ੍ਦਕੋ ¶ ਤੇ ਆਵੁਸੋ ਭਦ੍ਦ ਉਮ੍ਮਙ੍ਗੋ.

‘‘ਚਤੁਨ੍ਨਂ ¶ ਖੋ ਆਵੁਸੋ ਸਤਿਪਟ੍ਠਾਨਾਨਂ ਅਭਾਵਿਤਤ੍ਤਾ ਅਬਹੁਲੀਕਤਤ੍ਤਾ ਤਥਾਗਤੇ ਪਰਿਨਿਬ੍ਬੁਤੇ ਸਦ੍ਧਮ੍ਮੋ ਨ ਚਿਰਟ੍ਠਿਤਿਕੋ ਹੋਤੀ’’ –

ਸਿਰਿਵਡ੍ਢਸੁਤ੍ਤ

ਪੁਚ੍ਛਾ – ਤਸ੍ਸਾਵੁਸੋ ਭਗਵਤਾ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪਾਵਚਨਸਮੁਦਯਭੂਤਾਯ ਮਹਾਵਗ੍ਗਪਾਲ਼ਿਯਾ ਸਤਿਪਟ੍ਠਾਨਸਂਯੁਤ੍ਤੇ ਸੀਲਟ੍ਠਿਤਿਵਗ੍ਗੇ ਨਵਮਂ ਸਿਰਿਵਡ੍ਢਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਿਰਿਵਡ੍ਢਂ ਗਹਪਤਿਂ ਆਰਬ੍ਭ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ. ਸਿਰਿਵਡ੍ਢੋ ਭਨ੍ਤੇ ਗਹਪਤਿ ਆਬਾਧਿਕੋ ਹੋਤਿ ਦੁਕ੍ਖਿਤੋ ਬਾਲ਼੍ਹਗਿਲਾਨੋ. ਅਥਖੋ ਭਨ੍ਤੇ ਆਯਸ੍ਮਾ ਆਨਨ੍ਦੋ ਯੇਨਸਿਰਿਵਡ੍ਢਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ¶ . ਨਿਸਜ੍ਜ ਖੋ ਆਯਸ੍ਮਾ ਆਨਨ੍ਦੋ ਸਿਰਿਵਡ੍ਢਂ ਗਹਪਤਿਂ ਏਤਦਵੋਚ ‘‘ਕਚ੍ਚਿ ਤੇ ਗਹਪਤਿ ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਦੁਕ੍ਖਾ ਵੇਦਨਾ ਪਟਿਕ੍ਕਮਨ੍ਤਿ ਨੋ ਅਭਿਕ੍ਕਮਨ੍ਤਿ, ਪਟਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਅਭਿਕ੍ਕਮੋ’’ਤਿ. ਨ ਮੇ ਭਨ੍ਤੇ ਖਮਨੀਯਂ, ਨ ਯਾਪਨੀਯਂ, ਬਾਲ਼੍ਹਾ ਮੇ ਦੁਕ੍ਖਾ ਵੇਦਨਾ ਅਭਿਕ੍ਕਮਨ੍ਤਿ ਨੋ ਪਟਿਕ੍ਕਮਨ੍ਤਿ, ਅਭਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਪਟਿਕ੍ਕਮੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਸ੍ਮਾਤਿਹ ਤੇ ਗਹਪਤਿ ਏਵਂ ਸਿਕ੍ਖਿਤਬ੍ਬਂ ‘ਕਾਯੇ ਕਾਯਾਨੁਪਸ੍ਸੀ ਵਿਹਰਿਸ੍ਸਾਮਿ ਆਤਾਪੀ ਸਮ੍ਪਜਾਨੋ ਸਤਿਮਾ ਵਿਨੇਯ੍ਯ ਲੋਕੇ ਅਭਿਜ੍ਝਾ ਦੋਮਨਸ੍ਸਂ. ਵੇਦਨਾਸੁ. ਚਿਤ੍ਤੇ. ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਿਸ੍ਸਾਮਿ ਆਤਾਪੀ ਸਮ੍ਪਜਾਨੋ ਸਤਿਮਾ ਵਿਨੇਯ੍ਯ ਲੋਕੇ ਅਭਿਜ੍ਝਾ ਦੋਮਨਸ੍ਸ’ਨ੍ਤਿ. ਏਵਞ੍ਹਿ ਤੇ ਗਹਪਤਿ ਸਿਕ੍ਖਿਤਬ੍ਬ’’ਨ੍ਤਿ. ਏਵਂ ਖੋ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਧਮ੍ਮਭਣ੍ਡਾਗਾਰਿਕੇਨ ਭਾਸਿਤਂ.

ਇਦ੍ਧਿਪਾਦਸਂਯੁਤ੍ਤ

ਮੋਗ੍ਗਲ੍ਲਾਨਸੁਤ੍ਤ

ਪੁਚ੍ਛਾ – ਇਦ੍ਧਿਪਾਦਸਂਯੁਤ੍ਤੇ ¶ ਆਵੁਸੋ ਚਤੁਤ੍ਥਂ ਮੋਗ੍ਗਲ੍ਲਾਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ. ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਹੇਟ੍ਠਾਮਿਗਾਰਮਾਤੁਪਾਸਾਦੇ ਵਿਹਰਨ੍ਤਿ ਉਦ੍ਧਤਾ ਉਨ੍ਨਲ਼ਾ ਚਪਲਾ ਮੁਖਰਾ ਵਿਕਿਣ੍ਣਵਾਚਾ ਮੁਟ੍ਠਸ੍ਸਤਿਨੋ ਅਸਮ੍ਪਜਾਨਾ ਅਸਮਾਹਿਤਾ ਭਨ੍ਤਚਿਤ੍ਤਾ ਪਾਕਤਿਨ੍ਦ੍ਰਿਯਾ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਤੇ ਭਿਕ੍ਖੂ ਸਂਵੇਜੇਤ੍ਵਾ ‘‘ਕਿਂ ਨੁ ਤੁਮ੍ਹੇ ਭਿਕ੍ਖਵੇ ਸਂਵਿਗ੍ਗਾ ਲੋਮਹਟ੍ਠਜਾਤਾ ਏਕਮਨ੍ਤਂ ਠਿਤਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਅਚ੍ਛਰਿਯਂ ¶ ਵਤ ਭੋ, ਅਬ੍ਭੁਤਂ ਵਤ ਭੋ.

ਨਿਵਾਤਞ੍ਚ ਵਤ.

ਅਯਞ੍ਚ ਮਿਗਾਰਮਾਤੁਪਾਸਾਦੋ ਗਮ੍ਭੀਰਨੇਮੋ.

ਤੁਮ੍ਹੇਵ ¶ ਖੋ ਭਿਕ੍ਖਵੇ ਸਂਵੇਜੇਤੁਕਾਮੇਨ ਮੋਗ੍ਗਲ੍ਲਾਨੇਨ ਭਿਕ੍ਖੁਨਾ ਪਾਦਙ੍ਗੁਟ੍ਠਕੇਨ ਮਿਗਾਰਮਾਤੁਪਾਸਾਦੋ ਸਙ੍ਕਮ੍ਪਿਤੋ ਸਮ੍ਪਕਮ੍ਪਿਤੋ ਸਮ੍ਪਧਾਲਿਤੋ.

ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮੇਸਂ ਧਮ੍ਮਾਨਂ ਭਾਵਿਤਤ੍ਤਾ ਬਹੁਲੀਕਤਤ੍ਤਾ ਮੋਗ੍ਗਲ੍ਲਾਨੋ ਭਿਕ੍ਖੁ ਏਵਂ ਮਹਿਦ੍ਧਿਕੋ ਏਵਂ ਮਹਾਨੁਭਾਵੋ.

ਅਨੁਰੁਦ੍ਧਸਂਯੁਤ੍ਤ

ਬਾਲ਼੍ਹਗਿਲਾਨਸੁਤ੍ਤ

ਪੁਚ੍ਛਾ – ਅਨੁਰੁਦ੍ਧਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਦਸਮਂ ਸਂਗੀਤਂ ਬਾਲ਼੍ਹਗਿਨਾਨਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਆਯਸ੍ਮਤਾ ਅਨੁਰੁਦ੍ਧਤ੍ਥੇਰੇਨ ਭਾਸਿਤਂ. ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਆਯਸ੍ਮਨ੍ਤਂ ਅਨੁਰੁਦ੍ਧਂ ਆਬਾਧਿਕਂ ਦੁਕ੍ਖਿਤਂ ਬਾਲ਼੍ਹਗਿਲਾਨਂ ਏਤਦਵੋਚੁਂ ‘‘ਕਤਮੇਨਾਯਸ੍ਮਤੋ ਅਨੁਰੁਦ੍ਧਸ੍ਸ ਵਿਹਾਰੇਨ ਵਿਹਰਤੋ ਉਪ੍ਪਨ੍ਨਾ ਸਾਰੀਰਿਕਾ ਦੁਕ੍ਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਨ੍ਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਚਤੂਸੁ ਖੋ ਮੇ ਆਵੁਸੋ ਸਤਿਪਟ੍ਠਾਨੇਸੁ ਸੁਪ੍ਪਤਿਟ੍ਠਿਤਚਿਤ੍ਤਸ੍ਸ ਵਿਹਰਤੋ ਉਪ੍ਪਨ੍ਨਾ ਸਾਰੀਰਿਕਾ ਦੁਕ੍ਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਨ੍ਤੀ’’ਤਿ ਏਵਮਾਦਿਨਾ ਆਯਸ੍ਮਤਾ ਅਨੁਰੁਦ੍ਧਤ੍ਥੇਰੇਨ ਭਾਸਿਤਂ.

ਆਨਾਪਾਨਸਂਯੁਤ੍ਤ

ਮਹਾਕਪ੍ਪਿਨਸੁਤ੍ਤ

ਪੁਚ੍ਛਾ – ਆਨਾਪਾਨਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਤ੍ਤਮਂ ਸਂਗੀਤਂ ਮਹਾਕਪ੍ਪਿਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਪਸ੍ਸਥ ਨੋ ਤੁਮ੍ਹੇ ਭਿਕ੍ਖਵੇ ਏਤਸ੍ਸ ਭਿਕ੍ਖੁਨੋ ਕਾਯਸ੍ਸ ਇਞ੍ਜਿਤਤ੍ਤਂ ਵਾ ਫਨ੍ਦਿਤਬ੍ਬਂ ਵਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਇਚ੍ਛਾਨਙ੍ਗਲਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਦੁਤਿਯਵਗ੍ਗੇ ਪਠਮਂ ਇਚ੍ਛਾਨਙ੍ਗਲਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਇਚ੍ਛਾਨਙ੍ਗਲੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਸਚੇ ਖੋ ਭਿਕ੍ਖਵੇ ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਏਵਂ ਪੁਚ੍ਛੇਯ੍ਯੁਂ ‘ਕਤਮੇ ਨਾਵੁਸੋ ਵਿਹਾਰੇਨ ਸਮਣੋ ਗੋਤਮੋ ਵਸ੍ਸਾਵਾਸਂ ਬਹੁਲਂ ਵਿਹਾਸੀ’ਤਿ. ਏਵਂ ਪੁਟ੍ਠਾ ਤੁਮ੍ਹੇ ਭਿਕ੍ਖਵੇ ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ ਆਨਾਪਾਨਸ੍ਸਤਿਸਮਾਧਿਨਾ ਖੋ ਆਵੁਸੋ ਭਗਵਾ ਵਸ੍ਸਾਵਾਸਂ ਬਹੁਲਂ ਵਿਹਾਸੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਸੋਤਾਪਤ੍ਤਿਸਂਯੁਤ੍ਤ

ਚਕ੍ਕਵਤ੍ਤਿਰਾਜਸੁਤ੍ਤ

ਪੁਚ੍ਛਾ – ਸੋਤਾਪਤ੍ਤਿਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਠਮਂ ਸਂਗੀਤਂ ਚਕ੍ਕਵਤ੍ਤਿਰਾਜਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਕਿਞ੍ਚਾਪਿ ਭਿਕ੍ਖਵੇ ਰਾਜਾ ਚਕ੍ਕਵਤ੍ਤੀ ਚਤੁਨ੍ਨਂ ਦੀਪਾਨਂ ਇਸ੍ਸਰਿਯਾਧਿਪਚ੍ਚਂ ਰਜ੍ਜਂ ਕਾਰੇਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ ਦੇਵਾਨਂ ਤਾਵਤਿਂਸਾਨਂ ਸਹਬ੍ਯਤਂ, ਸੋ ਤਤ੍ਥ ਨਨ੍ਦਨੇ ਵਨੇ ਅਚ੍ਛਰਾਸਙ੍ਘਪਰਿਵੁਤੋ ਦਿਬ੍ਬੇਹਿ ਚ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗੀਭੂਤੋ ਪਰਿਚਾਰੇਤਿ ਸੋ ਚਤੂਹਿ ਧਮ੍ਮੇਹਿ ਅਸਮਨ੍ਨਾਗਤੋ, ਅਥ ਖੋ ਸੋ ਅਪਰਿਮੁਤ੍ਤੋਵ ਨਿਰਯਾ, ਅਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ, ਅਪਰਿਮੁਤ੍ਤੋ ਪੇਤ੍ਤਿਵਿਸਯਾ, ਅਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਦੀਘਾਵੁ ਉਪਾਸਕਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਤਤਿਯਂ ਸਂਗੀਤਂ ਦੀਘਾਵੁਉਪਾਸਕਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ¶ ਭਨ੍ਤੇ ਦੀਘਾਵੁਂ ਉਪਾਸਕਂ ਆਰਬ੍ਭ ਭਾਸਿਤਂ. ਭਗਵਾ ਭਨ੍ਤੇ ਦੀਘਾਵੁਂ ਉਪਾਸਕਂ ਆਬਾਧਿਕਂ ਦੁਕ੍ਖਿਤਂ ਬਾਲ਼੍ਹਗਿਲਾਨਂ ਏਤਦਵੋਚ ‘‘ਕਚ੍ਚਿ ਤੇ ਦੀਘਾਵੁ ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਦੁਕ੍ਖਾ ਵੇਦਨਾ ਪਟਿਕ੍ਕਮਨ੍ਤਿ ਨੋ ਅਭਿਕ੍ਕਮਨ੍ਤਿ, ਪਟਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਅਭਿਕ੍ਕਮੋ’’ਤਿ. ਨ ਮੇ ਭਨ੍ਤੇ ਖਮਨੀਯਂ, ਨ ਯਾਪਨੀਯਂ ਬਾਲ਼੍ਹਾ ਮੇ ਦੁਕ੍ਖਾ ਵੇਦਨਾ ਅਭਿਕ੍ਕਮਨ੍ਤਿ ਨੋ ਪਟਿਕ੍ਕਮਨ੍ਤਿ, ਅਭਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਪਟਿਕ੍ਕਮੋਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਤਸ੍ਮਾਤਿਹ ਤੇ ਦੀਘਾਵੁ ਏਵਂ ਸਿਕ੍ਖਿਤਬ੍ਬਂ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਭਵਿਸ੍ਸਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਯਾਨਿਮਾਨਿ ¶ ਭਨ੍ਤੇ ਭਗਵਤਾ ਚਤ੍ਤਾਰਿ ਸੋਤਾਪਤ੍ਤਿਯਙ੍ਗਾਨਿ ਦੇਸਿਤਾਨਿ, ਸਂਵਿਜ੍ਜਨ੍ਤੇ ਤੇ ਧਮ੍ਮਾ ਮਯਿ–

ਤਸ੍ਮਾਤਿਹ ਤ੍ਵਂ ਦੀਘਾਵੁ ਇਮੇਸੁ ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਪਤਿਟ੍ਠਾਯ ਛ ਵਿਜ੍ਜਾਭਾਗਿਯੇ ਧਮ੍ਮੇ ਉਤ੍ਤਰਿ ਭਾਵੇਯ੍ਯਾਸਿ–

ਮਾ ¶ ਤ੍ਵਂ ਤਾਤ ਦੀਘਾਵੁ ਏਵਂ ਮਨਸਾਕਾਸਿ.

ਇਙ੍ਘ ਤ੍ਵਂ ਤਾਤ ਦੀਘਾਵੁ ਯਦੇਵ ਤੇ ਭਗਵਾ ਆਹ, ਤਦੇਵ ਤ੍ਵਂ ਸਾਧੁਕਂ ਮਨਸਿਕਰੋਹਿ.

ਪਣ੍ਡਿਤੋ ¶ ਭਿਕ੍ਖਵੇ ਦੀਘਾਵੁ ਉਪਾਸਕੋ.

ਪਚ੍ਚਪਾਦਿ ਧਮ੍ਮਸ੍ਸਾਨੁਧਮ੍ਮਂ.

ਨ ¶ ਚ ਮਂ ਧਮ੍ਮਾਧਿਕਰਣਂ ਵਿਹੇਠੇਸਿ.

ਦੀਘਾਵੁ ਭਿਕ੍ਖਵੇ ਉਪਾਸਕੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਓਪਪਾਤਿਕੋ ਤਤ੍ਥ ਪਰਿਨਿਬ੍ਬਾਯੀ ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾ.

ਵੇਲ਼ੁਦ੍ਵਾਰੇਯ੍ਯਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸੋਤਾਪਤ੍ਤਿਸਂਯੁਤ੍ਤੇ ਸਤ੍ਤਮਂ ਸਂਗੀਤਂ ਵੇਲ਼ੁਦ੍ਵਾਰੇਯ੍ਯਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਲੇਸੁ ਭਨ੍ਤੇ ਵੇਲ਼ੁਦ੍ਵਾਰੇ ਨਾਮ ਕੋਸਲਾਨਂ ਬ੍ਰਾਹ੍ਮਣ ਗਾਮੇ ਵੇਲ਼ੁਦ੍ਵਾਰੇਯ੍ਯਕੇ ਬ੍ਰਾਹ੍ਮਣਗਹਪਤਿਕੇ ਆਰਬ੍ਭ ਭਾਸਿਤਂ.

ਵੇਲ਼ੁਦ੍ਵਾਰੇਯ੍ਯਕਾ ¶ ਭਨ੍ਤੇ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਏਤਦਵੋਚੁਂ ‘‘ਮਯਂ ਭੋ ਗੋਤਮ ਏਵਂਕਾਮਾ ਏਵਂਛਨ੍ਦਾ ਏਵਂਅਧਿਪ੍ਪਾਯਾ ਪੁਤ੍ਤਸਮ੍ਬਾਧਸਯਨਂ ਅਜ੍ਝਾਵਸੇਯ੍ਯਾਮ…ਪੇ… ਜਾਤਰੂਪਰਜਤਂ ਸਾਦਿਯੇਯ੍ਯਾਮ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾਮ, ਤੇਸਂ ਨੋ ਭਵਂ ਗੋਤਮੋ ਅਮ੍ਹਾਕਂ ਏਵਂਕਾਮਾਨਂ ਏਵਂਛਨ੍ਦਾਨਂ ਏਵਂਅਧਿਪ੍ਪਾਯਾਨਂ ਤਥਾ ਦਮ੍ਮਂ ਦੇਸੇਤੁ, ਯਥਾ ਮਯਂ ਪੁਤ੍ਤਸਮ੍ਬਾਧਸਯਨਂ ਅਜ੍ਝਾਵਸੇਯ੍ਯਾਮ…ਪੇ… ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾਮਾ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਅਤ੍ਤੂਪਨਾਯਿਕਂ ਵੋ ਗਹਪਤਯੋ ਧਮ੍ਮਪਰਿਯਾਯਂ ਦੇਸੇਸ੍ਸਾਮਿ, ਤਂ ਸੁਣਾਥ ਸਾਧੁਕਂ ਮਨਸਿ ਕਰੋਥ, ਭਾਸਿਸ੍ਸਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਰਣਾਨਿਵਗ੍ਗ

ਪਠਮ ਮਹਾਨਾਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਤਤਿਯੇ ਸਰਣਾਨਿਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਠਮਂ ਸਂਗੀਤਂ ਪਠਮਮਹਾਨਾਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ¶ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਮਹਾਨਾਮਂ ਸਕ੍ਕਂ ਆਰਬ੍ਭ ਭਾਸਿਤਂ. ਮਹਾਨਾਮੋ ਭਨ੍ਤੇ ਸਕ੍ਕੋ ਭਗਵਨ੍ਤਂ ਏਤਦਵੋਚ ‘‘ਇਦਂ ਭਨ੍ਤੇ ਕਪਿਲਵਤ੍ਥੁ ਇਦ੍ਧਞ੍ਚੇਵ ਫੀਤਞ੍ਚ ਬਾਹੁਜਞ੍ਞਂ ਆਕਿਣ੍ਣਮਨੁਸ੍ਸਂ ਸਮ੍ਬਾਧਬ੍ਯੂਹਂ, ਸੋ ਖ੍ਵਾਹਂ ਭਨ੍ਤੇ ਭਗਵਨ੍ਤਂ ਵਾ ਪਯਿਰੁਪਾਸਿਤ੍ਵਾ ਮਨੋਭਾਵਨੀਯੇ ਵਾ ਭਿਕ੍ਖੂ ਸਾਯਨ੍ਹਸਮਯਂ ਕਪਿਲਵਤ੍ਥੁਂ ਪਵਿਸਨ੍ਤੋ ਭਨ੍ਤੇਨਪਿ ਹਤ੍ਥਿਨਾ ਸਮਾਗਚ੍ਛਾਮਿ, ਭਨ੍ਤੇਨਪਿ ਅਸ੍ਸੇਨ ਸਮਾਗਚ੍ਛਾਮਿ, ਭਨ੍ਤੇਨਪਿ ਰਥੇਨ ਸਮਾਗਚ੍ਛਾਮਿ, ਭਨ੍ਤੇਨਪਿ ਸਕਟੇਨ ਸਮਾਗਚ੍ਛਾਮਿ, ਭਨ੍ਤੇਨਪਿ ਪੁਰਿਸੇਨ ਸਮਾਗਚ੍ਛਾਮਿ, ਤਸ੍ਸ ਮਯ੍ਹਂ ਭਨ੍ਤੇ ਤਸ੍ਮਿਂ ਸਮਯੇ ਮੁਸ੍ਸਤੇਵ ਭਗਵਨ੍ਤਂ ਆਰਬ੍ਭ ਸਤਿ, ਮੁਸ੍ਸਤਿ ਧਮ੍ਮਂ ਆਰਬ੍ਭ ਸਤਿ, ਮੁਸ੍ਸਤਿ ਸਙ੍ਘਂ ਆਰਬ੍ਭ ਸਤਿ, ਤਸ੍ਸ ਮਯ੍ਹਂ ਭਨ੍ਤੇ ਏਵਂ ਹੋਤਿ ਇਮਮ੍ਹਿ ਚਾਹਂ ਸਮਯੇ ਕਾਲਂ ਕਰੇਯ੍ਯਂ, ਕਾ ਮਯ੍ਹਂ ਗਤਿ, ਕੋ ਅਭਿਸਮ੍ਪਰਾਯੋ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਮਾ ਭਾਯਿ ਮਹਾਨਾਮ, ਮਾ ਭਾਯਿ ਮਹਾਨਾਮ, ਅਪਾਪਕਂ ਤੇ ਮਰਣਂ ਭਵਿਸ੍ਸਤਿ ਅਪਾਪਿਕਾ ਕਾਲਂ ਕਿਰਿਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਦੁਤਿਯ ਸਰਣਾਨਿਸਕ੍ਕਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਧਮ੍ਮਸਂਗਾਹਕਮਹਾਥੇਰੇਹਿ ਪਞ੍ਚਮਂ ਸਂਗੀਤਂ ਦੁਤਿਯਸਰਣਾਨਿਸਕ੍ਕਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਮਹਾਨਾਮਂਯੇਵ ਸਕ੍ਕਂ ਆਰਬ੍ਭ ਭਾਸਿਤਂ.

ਮਹਾਨਾਮੋ ਭਨ੍ਤੇ ਸਕ੍ਕੋ ਭਗਵਨ੍ਤਂ ਏਤਦਵੋਚ ‘‘ਇਧ ਭਨ੍ਤੇ ਸਰਣਾਨਿ ਸਕ੍ਕੋ ਕਾਲਙ੍ਕਤੋ, ਸੋ ਭਗਵਤਾ ਬ੍ਯਾਕਤੋ ‘ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ’ਤਿ. ਤਤ੍ਰ ਸੁਦਂ ਭਨ੍ਤੇ ਸਮ੍ਬਹੁਲਾ ਸਕ੍ਕਾ ਸਙ੍ਗਮ੍ਮ ਸਮਾਗਮ੍ਮ ਉਜ੍ਝਾਯਨ੍ਤਿ ਖੀਯਨ੍ਤਿ ਵਿਪਾਚੇਨ੍ਤਿ ‘ਅਚ੍ਛਰਿਯਂ ਵਤ ਭੋ, ਅਬ੍ਭੁਤਂ ਵਤ

ਭੋ ¶ , ਏਤ੍ਥ ਦਾਨਿ ਕੋ ਨ ਸੋਤਾਪਨ੍ਨੋ ਭਵਿਸ੍ਸਤਿ, ਯਤ੍ਰ ਹਿ ਨਾਮ ਸਰਣਾਨਿ ਸਕ੍ਕੋ ਕਾਲਙ੍ਕਤੋ, ਸੋ ਭਗਵਤਾ ਬ੍ਯਾਕਤੋ ‘ਸੋਤਾਪਨ੍ਨੋ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ’ਤਿ, ਸਰਣਾਨਿ ਸਕ੍ਕੋ ਸਿਕ੍ਖਾਯ ਅਪਰਿਪੂਰਕਾਰੀ ਅਹੋਸੀ’’ਤਿ ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯੋ ਸੋ ਮਹਾਨਾਮ ਦੀਘਰਤ੍ਤਂ ਉਪਾਸਕੋ ਬੁਦ੍ਧਂ ਸਰਣਂ ਗਤੋ, ਧਮ੍ਮਂ ਸਰਣਂ ਗਤੋ, ਸਙ੍ਘਂ ਸਰਣਂ ਗਤੋ, ਸੋ ਕਥਂ ਵਿਨਿਪਾਤਂ ਗਚ੍ਛੇਯ੍ਯਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪਠਮ ਅਨਾਥਪਿਣ੍ਡਿਕਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਛਟ੍ਠਂ ਸਂਗੀਤਂ ਪਠਮਅਨਾਥਪਿਣ੍ਡਿਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕੇਨ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਨਾਥਪਿਣ੍ਡਿਕਂ ਗਹਪਤਿਂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤਤ੍ਥੇਰੋ ਆਯਸ੍ਮਤਾ ਆਨਨ੍ਦਤ੍ਥੇਰੇਨ ਪਚ੍ਛਾਸਮਣੇਨ ਸਦ੍ਧਿਂ ਯੇਨ ਅਨਾਥਪਿਣ੍ਡਿਕਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਆਯਸ੍ਮਾ ਸਾਰਿਪੁਤ੍ਤੋ ਅਨਾਥਪਿਣ੍ਡਿਕਂ ਗਹਪਤਿਂ ਆਬਾਧਿਕਂ ਦੁਕ੍ਖਿਤਂ ਬਾਲ਼੍ਹਗਿਲਾਨਂ ਏਤਦਵੋਚ ‘‘ਕਚ੍ਚਿ ਤੇ ਗਹਪਤਿ ਖਮਨੀਯਂ ਕਚ੍ਚਿ ਯਾਪਨੀਯਂ, ਕਚ੍ਚਿ ਦੁਕ੍ਖਾ ਵੇਦਨਾ ਪਟਿਕ੍ਕਮਨ੍ਤਿ, ਨੋ ਅਭਿਕ੍ਕਮਨ੍ਤਿ, ਪਟਿਕ੍ਕਮੋਸਾਨਂ ਪਞ੍ਞਾਯਤਿ, ਨੋ ਅਭਿਕ੍ਕਮੋ’’ਤਿ, ਨ ਮੇ ਭਨ੍ਤੇ ਖਮਨੀਯਂ, ਨ ਯਾਪਨੀਯਂ, ਬਾਲ਼੍ਹਾ ਮੇ ਦੁਕ੍ਖਾ ਵੇਦਨਾ ਅਭਿਕ੍ਕਮਨ੍ਤਿ, ਨੋ ਪਟਿਕ੍ਕਮਨ੍ਤਿ, ਅਭਿਕ੍ਕਮੋਸਾਨਂ ਪਞ੍ਞਾਯਤਿ, ਨੋ ਪਟਿਕ੍ਕਮੋਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਥਾ ਰੂਪੇਨ ਖੋ ਗਹਪਤਿ ਬੁਦ੍ਧੇ ਅਪ੍ਪਸਾਦੇਨ ਸਮਨ੍ਨਾਗਤੋ ਅਸ੍ਸੁਤਵਾ ਪੁਥੁਜ੍ਜਨੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਯਰਂ ਉਪਪਜ੍ਜਤਿ ਤਥਾਰੂਪੋ ਤੇ ਬੁਦ੍ਧੇ ਅਪ੍ਪਸਾਦੋ ਨਤ੍ਥਿ, ਅਤ੍ਥਿ ਚ ਖੋ ਤੇ ਗਹਪਤਿ ਬੁਦ੍ਧੇ ਅਵੇਚ੍ਚਪ੍ਪਸਾਦੋ ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ…ਪੇ… ਭਗਵਾ’ਤਿ ਤਞ੍ਚ ਪਨ ਤੇ ਬੁਦ੍ਧੇ ਅਵੇਚ੍ਚਪ੍ਪਸਾਦਂ ਅਤ੍ਤਨਿ ਸਮਨੁਪਸ੍ਸਤੋ ਠਾਨਸੋ ਵੇਦਨਾ ਪਟਿਪ੍ਪਸ੍ਸਮ੍ਭੇਯ੍ਯਾ’’ਤਿ ਏਵਮਾਦਿਨਾ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਯਸ੍ਸ ¶ ਸਦ੍ਧਾ ਤਥਾਗਤੇ, ਅਚਲਾ ਸੁਪ੍ਪਤਿਟ੍ਠਿਤਾ;

ਸੀਲਞ੍ਚ ਯਸ੍ਸ ਕਲ੍ਯਾਣਂ, ਅਰਿਯਕਨ੍ਤਂ ਪਸਂਸਿਤਂ.

ਸਙ੍ਘੇ ਪਸਾਦੋ ਯਸ੍ਸਤ੍ਥਿ, ਉਜੁਭੂਤਞ੍ਚ ਦਸ੍ਸਨਂ;

ਅਦਲਿਦ੍ਦੋਤਿ ਤਂ ਆਹੁ, ਅਮੋਘਂ ਤਸ੍ਸ ਜੀਵਿਤਂ.

ਤਸ੍ਮਾ ਸਦ੍ਧਞ੍ਚ ਸੀਲਞ੍ਚ, ਪਸਾਦਂ ਧਮ੍ਮਦਸ੍ਸਨਂ;

ਅਨੁਯੁਞ੍ਜੇਥ ਮੇਧਾਵੀ, ਸਰਂ ਬੁਦ੍ਧਾਨਸਾਸਨਂ.

ਪੁਞ੍ਞਾਭਿਸਨ੍ਦਵਗ੍ਗ

ਮਹਾਨਾਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਪੁਞ੍ਞਾਭਿਸਨ੍ਦਵਗ੍ਗੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਸਤ੍ਤਮਂ ਸਂਗੀਤਂ ਮਹਾਨਾਮਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ¶ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਮਹਾਨਾਮਂ ਸਕ੍ਕਂ ਆਰਬ੍ਭ ਭਾਸਿਤਂ.

ਮਹਾਨਾਮੋ ਭਨ੍ਤੇ ਸਕ੍ਕੋ ਭਗਵਨ੍ਤਂ ਏਤਦਵੋਚ ‘‘ਕਿਤ੍ਤਾਵਤਾ ਨੁ ਖੋ ਭਨ੍ਤੇ ਉਪਾਸਕੋ ਹੋਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਤੋ ਖੋ ਮਹਾਨਾਮ ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ ਹੋਤਿ, ਸਙ੍ਘਂ ਸਰਣਂ ਗਤੋ ਹੋਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਕਿਤ੍ਤਾਵਤਾ ਨੁ ਖੋ ਭਨ੍ਤੇ ਉਪਾਸਕੋ ਹੋਤਿ.

ਕਾਲ਼ਿਗੋਧਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਨਵਮਂ ਸਂਗੀਤਂ ਕਾਲ਼ਿਗੋਧਸੁਤ੍ਤਂ ਭਗਵਤਾ ਕਤ੍ਥ ਕਂ ਕਾਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਾਲ਼ਿਗੋਧਂ ਨਾਮ ਸਾਕਿਯਾਨਿਂ ਆਰਬ੍ਭ ‘‘ਚਤੂਹਿ ਖੋ ਗੋਧੇ ਧਮ੍ਮੇਹਿ ਸਮਨ੍ਨਾਗਤਾ ਅਰਿਯਸਾਵਿਕਾ ਸੋਤਾਪਨ੍ਨਾ ਹੋਤਿ ਅਵਿਨਿਪਾਤਧਮ੍ਮਾ ਨਿਯਤਾ ਸਮ੍ਬੋਧਿਪਰਾਯਣਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਲਾਭਾ ¶ ਤੇ ਗੋਧੇ, ਸੁਲਦ੍ਧਂ ਤੇ ਗੋਧੇ, ਸੋਤਾਪਤ੍ਤਿਫਲਂ ਤਯਾ ਗੋਧੇ –

ਨਨ੍ਦਿਯਸਕ੍ਕਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਜਾਨਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਸੋਤਾਪਤ੍ਤਿਸਂਯੁਤ੍ਤੇ ਪੁਞ੍ਞਾਭਿਸਨ੍ਦਵਗ੍ਗੇ ਦਸਮਂ ਨਨ੍ਦਿਯਸਕ੍ਕਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ ਨਨ੍ਦਿਯਂ ਸਕ੍ਕਂ ਆਰਬ੍ਭ ਭਾਸਿਤਂ. ਨਨ੍ਦਿਯੋ ਭਨ੍ਤੇ ਸਕ੍ਕੋ ਭਗਵਨ੍ਤਂ ਏਤਦਵੋਚ ‘‘ਯਸ੍ਸੇਵ ਨੁ ਖੋ ਭਨ੍ਤੇ ਅਰਿਯਸਾਵਕਸ੍ਸ ਚਤ੍ਤਾਰਿ ਸੋਤਾਪਤ੍ਤਿਯਙ੍ਗਾਨਿ ਸਬ੍ਬੇਨ ਸਬ੍ਬਂ ਸਬ੍ਬਥਾਸਬ੍ਬਂ ਨਤ੍ਥਿ, ਸ੍ਵੇਵ ਨੁ ਖੋ ਭਨ੍ਤੇ ਅਰਿਯਸਾਵਕੋ ਪਮਾਦਵਿਹਾਰੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ‘‘ਯਸ੍ਸ ਖੋ ਨਨ੍ਦਿਯ ਚਤ੍ਤਾਰਿ ਸੋਤਾਪਤ੍ਤਿਯਙ੍ਗਾਨਿ ਸਬ੍ਬੇਨਸਬ੍ਬਂ ਸਬ੍ਬਥਾਸਬ੍ਬਂ ਨਤ੍ਥਿ, ਤਮਹਂ ਬਾਹਿਰੋ ਪੁਥੁਜ੍ਜਨਪਕ੍ਖੇ ਠਿਤੋਤਿ ਵਦਾਮੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਸਚ੍ਚਸਂਯੁਤ੍ਤ

ਤਿਰਚ੍ਛਾਨਕਥਾਸੁਤ੍ਤ

ਪੁਚ੍ਛਾ – ਸਚ੍ਚਸਂਯੁਤ੍ਤੇ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਯਕਮਹਾਥੇਰੇਹਿ ਦਸਮਂ ਸਂਗੀਤਂ ਤਿਰਚ੍ਛਾਨਕਥਾਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਮਾ ਭਿਕ੍ਖਵੇ ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਯ੍ਯਾਥ. ਸੇਯ੍ਯਥਿਦਂ, ਰਾਜਕਥਂ ਚੋਰਕਥਂ ਮਹਾਮਤ੍ਤਕਥਂ ਸੇਨਾਕਥਂ ਭਯਕਥਂ ਯੁਦ੍ਧਕਥਂ ਅਨ੍ਨਕਥਂ ਪਾਨਕਥਂ ਵਤ੍ਥਕਥਂ ਸਯਨਕਥਂ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਂ.

ਇਦਂ ¶ ਦੁਕ੍ਖਨ੍ਤਿ ਕਥੇਯ੍ਯਾਥ.

ਤਸ੍ਮਾਤਿਹ ¶ ਭਿਕ੍ਖਵੇ ਇਦਂ ਦੁਕ੍ਖਨ੍ਤਿ ਯੋਗੋ ਕਰਣੀਯੋ…ਪੇ… ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਯੋਗੋ ਕਰਣੀਯੋ.

ਧਮ੍ਮਚਕ੍ਕਪਵਤ੍ਤਨਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਧਮ੍ਮਚਕ੍ਕਪ੍ਪਵਤ੍ਤਨਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਠਮਂ ਸਂਗੀਤਂ ਧਮ੍ਮਚਕ੍ਕਪਵਤ੍ਤਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਇਸਿਪਤਨੇ ਮਿਗਦਾਯੇ ਪਞ੍ਚਵਗ੍ਗਿਯੇ ਭਿਕ੍ਖੂ ਆਰਬ੍ਭ ‘‘ਦ੍ਵੇ ਮੇ ਭਿਕ੍ਖਵੇ ਅਨ੍ਤਾ ਪਬ੍ਬਜਿਤੇਨ ਨਸੇਵਿਤਬ੍ਬਾ. ਕਤਮੇ ਦ੍ਵੇ, ਯੋ ਚਾਯਂ ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋ ਹੀਨੋ ਗਮ੍ਮੋ ਪੋਥੁਜ੍ਜਨਿਕੋ ਅਨਰਿਯੋ ਅਨਤ੍ਥਸਂਹਿਤੋ, ਯੋ ਚਾਯਂ ਅਤ੍ਤਕਿਲਮਥਾਨੁਯੋਗੋ ¶ ਦੁਕ੍ਖੋ ਅਨਰਿਯੋ ਅਨਤ੍ਥਸਂਹਿਤੋ, ਏਤੇ ਖੋ ਭਿਕ੍ਖਵੇ ਉਭੋ ਅਨ੍ਤੇ ਅਨੁਪਗਮ੍ਮ ਮਜ੍ਝਿਮਾਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਆਸਵਕ੍ਖਯਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਕੋਟਿਗਾਮਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਞ੍ਚਮਂ ਸਂਗੀਤਂ ਆਸਵਕ੍ਖਯਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਜਾਨਤੋਹਂ ਭਿਕ੍ਖਵੇ ਪਸ੍ਸਤੋ ਆਸਵਾਨਂ ਖਯਂ ਵਦਾਮਿ, ਨੋ ਅਜਾਨਤੋ ਅਪਸ੍ਸਤੋ. ਕਿਞ੍ਚ ਭਿਕ੍ਖਵੇ ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ਇਦਂ ਦੁਕ੍ਖਨ੍ਤਿ ਭਿਕ੍ਖਵੇ ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ਅਯਂ ਦੁਕ੍ਖਸਮੁਦਯੋਤਿ, ਅਯਂ ਦੁਕ੍ਖਨਿਰੋਧੋਤਿ, ਅਯਂ ਦੁਕ੍ਖਨਿਰੋਧਗਾਮਿਨੀਪਟਿਪਦਾਤਿ ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ. ਏਵਂ ਖੋ ਭਿਕ੍ਖਵੇ ਜਾਨਤੋ ਏਵਂ ਪਸ੍ਸਤੋ ਆਸਵਾਨਂ ਖਯੋ ਹੋਤਿ. ਤਸ੍ਮਾਤਿਹ ਭਿਕ੍ਖਵੇ ‘‘ਇਦਂ ਦੁਕ੍ਖ’’ਨ੍ਤਿ ਯੋਗੋ ਕਰਣੀਯੋ, ਅਯਂ ਦੁਕ੍ਖਸਮੁਦਯੋਤਿ, ਅਯਂ ਦੁਕ੍ਖਨਿਰੋਧੋਤਿ, ਅਯਂ ਦੁਕ੍ਖਨਿਰੋਧਗਾਮਿਨੀਪਟਿਪਦਾਤਿ ਯੋਗੋ ਕਰਣੀਯੋ’’ਤਿ ਏਵਂ ਖੋ ਭਗਵਤਾ ਭਾਸਿਤਂ.

ਸੀਸਪਾਵਨਸੁਤ੍ਤ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਸੀਸਪਾਵਨਵਗ੍ਗੇ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਠਮਂ ਸਂਗੀਤਂ ਸੀਸਪਾਵਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ¶ ਭਨ੍ਤੇ ਸੀਸਪਾਵਨੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁਖੋ ਬਹੁਤਰਂ ਯਾਨਿ ਵਾ ਮਯਾ ਪਰਿਤ੍ਤਾਨਿ ਸੀਸਪਾਪਣ੍ਣਾਨਿ ਪਾਣਿਨਾ ਗਹਿਤਾਨਿ ਯਦਿਦਂ ਉਪਰਿ ਸੀਸਪਾਵਨੇ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਂ.

ਪਞ੍ਚਗਤਿਪੇਯ੍ਯਾਲਵਗ੍ਗ

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਪੋਰਾਣਕੇਹਿ ਧਮ੍ਮਸਂਗਾਹਕਮਹਾਥੇਰੇਹਿ ਪਰਿਯੋਸਾਨਭਾਵੇਨ ਸਂਗੀਤੋ ਪਞ੍ਚਗਤਿਪੇਯ੍ਯਾਲਵਗ੍ਗੇ, ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤੋ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ‘‘ਤਂ ਕਿਂ ਮਞ੍ਞਥ ਭਿਕ੍ਖਵੇ, ਕਤਮਂ ਨੁ ਖੋ ਬਹੁਤਰਂ, ਯੋ ਵਾਯਂ ਮਯਾ ਪਰਿਤ੍ਤੋ ਨਖਸਿਖਾਯਂ ਪਂਸੁ ਆਰੋਪਿਤੋ, ਅਯਂ ਵਾ ਮਹਾਪਥਵੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤੋ.

ਪੁਚ੍ਛਾ – ਕੇ ¶ ਆਵੁਸੋ ਸਿਕ੍ਖਨ੍ਤਿ.

ਵਿਸ੍ਸਜ੍ਜਨਾ – ਸੇਕ੍ਖਾ ਚ ਭਨ੍ਤੇ ਪੁਥੁਜ੍ਜਨਕਲ੍ਯਾਣਕਾ ਚ ਸਿਕ੍ਖਨ੍ਤਿ.

ਪੁਚ੍ਛਾ – ਕੇ ¶ ਆਵੁਸੋ ਸਿਕ੍ਖਿਤਸਿਕ੍ਖਾ.

ਵਿਸ੍ਸਜ੍ਜਨਾ – ਅਰਹਨ੍ਤੋ ਭਨ੍ਤੇ ਸਿਕ੍ਖਿਤਸਿਕ੍ਖਾ.

ਪੁਚ੍ਛਾ – ਕਤ੍ਥ ਆਵੁਸੋ ਠਿਤਂ.

ਵਿਸ੍ਸਜ੍ਜਨਾ – ਸਿਕ੍ਖਾਕਾਮੇਸੁ ਭਨ੍ਤੇ ਠਿਤਂ.

ਪੁਚ੍ਛਾ – ਕੇ ਆਵੁਸੋ ਧਾਰੇਨ੍ਤਿ.

ਵਿਸ੍ਸਜ੍ਜਨਾ – ਯੇਸਂ ਭਨ੍ਤੇ ਵਤ੍ਤਤਿ ਤੇ ਧਾਰੇਨ੍ਤਿ.

ਪੁਚ੍ਛਾ – ਕਸ੍ਸ ¶ ਆਵੁਸੋ ਵਚਨਂ.

ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਪੁਚ੍ਛਾ – ਕੇਨ ਆਵੁਸੋ ਆਭਤਂ.

ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.