ਅਞ੍ਞ > ਸਙ੍ਗਾਯਨ-ਪੁਚ੍ਛ ਵਿਸ੍ਸਜ੍ਜਨਾ

ਯਂ ¶ ਭਿਕ੍ਖਵੇ ਸਦੇਵਕਸ੍ਸ ਲੋਕਸ੍ਸ ਸਮਾਰਕਸ੍ਸ ਸਬ੍ਰਹ੍ਮਕਸ੍ਸ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮਹਂ ਜਾਨਾਮਿ ਤਮਹਂ ਅਭਿਞ੍ਞਾਸਿਂ, ਤਂ ਤਥਾਗਤਸ੍ਸ ਵਿਦਿਤਂ, ਤਂ ਤਥਾਗਤੋ ਨ ਉਪਟ੍ਠਾਤਿ.

ਇਤਿ ¶ ਖੋ ਭਿਕ੍ਖਵੇ ਤਥਾਗਤੋ ਦਿਟ੍ਠਸੁਤਮੁਤਵਿਞ੍ਞਾਤਬ੍ਬੇਸੁ ਧਮ੍ਮੇਸੁ ਤਾਦੀਯੇਵ ਤਾਦੀ, ਤੁਮ੍ਹਾ ਚ ਪਨ ਤਾਦਿਮ੍ਹਾ ਅਞ੍ਞੋ ਤਾਦੀ ਉਤ੍ਤਰਿਤਰੋ ਵਾ ਪਣੀਤਤਰੋ ਵਾ ਨਤ੍ਥੀਤਿ ਵਦਾਮਿ.

ਸੁਵਣ੍ਣਭੂਮਿਂ ¶ ਗਨ੍ਤ੍ਵਾਨ, ਸੋਣੁਤ੍ਤਰਾ ਮਹਿਦ੍ਧਿਕਾ;

ਪਿਸਾਚੇ ਨਿਦ੍ਧਮੇਤ੍ਵਾਨ, ਬ੍ਰਹ੍ਮਜਾਲਮਦੇਸਿਸੁਂ.

ਸਮਣਾ ¶ ਮਯਂ ਮਹਾਰਾਜ, ਧਮ੍ਮਰਾਜਸ੍ਸ ਸਾਵਕਾ;

ਤਵੇਵ ਅਨੁਕਮ੍ਪਾਯ, ਜਮ੍ਬੁਦੀਪਾ ਇਧਾਗਤਾ.

ਅਹਂ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ,

ਉਪਾਸਕਤ੍ਤਂ ਦੇਸੇਸਿਂ, ਸਕ੍ਯਪੁਤ੍ਤਸ੍ਸ ਸਾਸਨੇ.

ਤੇਨ ¶ ਸਮਯੇਨ ਬੁਦ੍ਧੋ ਭਗਵਾ ਵੇਰਞ੍ਜਾਯਂ ਵਿਹਰਤਿ ਨਲ਼ੇਰੁਪੁਚਿ ਮਨ੍ਦਮੂਲੇ.

ਸਗ੍ਗਾਰੋਹਣਸੋਪਾਣਂ ¶ , ਅਞ੍ਞਂ ਸੀਲਸਮਂ ਕੁਤੋ;

ਦ੍ਵਾਰਂ ਵਾ ਪਨ ਨਿਬ੍ਬਾਨ, ਨਗਰਸ੍ਸ ਪਵੇਸਨੇ.

ਅਲਮੇਵ ¶ ਕਾਤੁਂ ਕਲ੍ਯਾਣਂ, ਦਾਨਂ ਦਾਤੁਂ ਯਥਾਰਹਂ;

ਪਾਣਿਂ ਕਾਮਦਦਂ ਦਿਸ੍ਵਾ, ਕੋ ਪੁਞ੍ਞਂ ਨਕਰਿਸ੍ਸਤਿ.

ਦਸ੍ਸਾਮਨ੍ਨਞ੍ਚ ¶ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਦੁਗ੍ਗੇ ਸਙ੍ਕਮਨਾਨਿ ਚ.

ਮਹਾਅਟ੍ਠਕਥਞ੍ਚੇਵ ¶ , ਮਹਾਪਚ੍ਚਰਿਮੇਵਚ;

ਕੁਰੁਨ੍ਦਿਞ੍ਚਾਤਿ ਤਿਸ੍ਸੋਪਿ, ਸੀਹਲ਼ਟ੍ਠਕਥਾ ਇਮਾ;

ਬੁਦ੍ਧਮਿਤ੍ਤੋਤਿ ਨਾਮੇਨ, ਵਿਸੁਤਸ੍ਸ ਯਸਸ੍ਸਿਨੋ;

ਵਿਨਯਞ੍ਞੁਸ੍ਸ ਧੀਰਸ੍ਸ, ਸੁਤ੍ਵਾ ਥੇਰਸ੍ਸ ਸਨ੍ਤਿਕੇ.

ਉਪਦ੍ਦਵਾਕੁਲੇ ¶ ਲੋਕੇ, ਨਿਰੁਪਦ੍ਦਵਤੋ ਅਯਂ;

ਏਕਸਂਵਚ੍ਛਰੇਨੇਵ, ਯਥਾ ਨਿਟ੍ਠਂ ਉਪਾਗਤਾ;

ਏਵਂ ਸਬ੍ਬਸ੍ਸ ਲੋਕਸ੍ਸ, ਨਿਟ੍ਠਂ ਧਮ੍ਮੂਪਸਂਹਿਤਾ;

ਸੀਘਂ ਗਚ੍ਛਨ੍ਤੁ ਆਰਮ੍ਭਾ, ਸਬ੍ਬੇਪਿ ਨਿਰੁਪਦ੍ਦਵਾ.

ਚਿਰਟ੍ਠਿਤਤ੍ਥਂ ¶ ਧਮ੍ਮਸ੍ਸ, ਕਰੋਨ੍ਤੇਨ ਮਯਾ ਇਮਂ;

ਸਦ੍ਧਮ੍ਮਬਹੁਮਾਨੇਨ, ਯਞ੍ਚ ਪੁਞ੍ਞਂ ਸਮਾਚਿਤਂ;

ਸਬ੍ਬਸ੍ਸ ਆਨੁਭਾਵੇਨ, ਤਸ੍ਸ ਸਬ੍ਬੇਪਿ ਪਾਣਿਨੋ;

ਭਵਨ੍ਤੁ ਧਮ੍ਮਰਾਜਸ੍ਸ, ਸਦ੍ਧਮ੍ਮਰਸਸੇਵਿਨੋ.

ਚਿਰਂ ¶ ਤਿਟ੍ਠਤੁ ਸਦ੍ਧਮ੍ਮੋ, ਕਾਲੇ ਵਸ੍ਸਂ ਚਿਰਂ ਪਜਂ;

ਤਪ੍ਪੇਤੁ ਦੇਵੋ ਧਮ੍ਮੇਨ, ਰਾਜਾ ਰਕ੍ਖਤੁ ਮੇਦਿਨਿਂ.

ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;

ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਸੀਲਵਿਸੁਦ੍ਧਿਯਾ;

ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;

ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋ.

ਕਰੁਣਾਸੀਤਲਹਦਯਂ ¶ , ਪਞ੍ਞਾਪਜ੍ਜੋਤਵਿਹਤਮੋਹਤਮਂ;

ਸਨਰਾਮਰਲੋਕਗਰੁਂ, ਵਨ੍ਦੇ ਸੁਗਤਂ ਗਤਿਵਿਮੁਤ੍ਤਂ.

ਬੁਦ੍ਧੋਪਿ ¶ ਬੁਦ੍ਧਭਾਵਂ, ਭਾਵੇਤ੍ਵਾ ਚੇਵ ਸਚ੍ਛਿਕਤ੍ਵਾਚ;

ਯਂ ਉਪਗਤੋ ਗਤਮਲਂ, ਵਨ੍ਦੇ ਤਮਨੁਤ੍ਤਰਂ ਧਮ੍ਮਂ.

ਸੁਗਤਸ੍ਸ ਓਰਸਾਨਂ, ਪੁਤ੍ਤਾਨਂ ਮਾਰਸੇਨਮਥਨਾਨਂ;

ਅਟ੍ਠਨ੍ਨਮ੍ਪਿ ਸਮੂਹਂ, ਸਿਰਸਾ ਵਨ੍ਦੇ ਅਰਿਯਸਙ੍ਘਂ.

ਦੀਘਸ੍ਸ ¶ ਦੀਘਸੁਤ੍ਤਙ੍ਕਿਤਸ੍ਸ, ਨਿਪੁਣਸ੍ਸ ਆਗਮਵਰਸ੍ਸ;

ਬੁਦ੍ਧਾਨੁਬੁਦ੍ਧਸਂਵਣ੍ਣਿਤਸ੍ਸ, ਸਦ੍ਧਾਵਹਗੁਣਸ੍ਸ.

ਸਮ੍ਮਾਸਮ੍ਬੁਦ੍ਧੇਨੇਵ ¶ ਹਿ ਤਿਣ੍ਣਮ੍ਪਿ ਪਿਟਕਾਨਂ ਅਤ੍ਥਵਣ੍ਣਨਾਕ੍ਕਮੋ ਭਾਸਿਤੋ, ਯਾਪਕਿਣ੍ਣਕਦੇਸਨਾਤਿ ਵੁਚ੍ਚਤਿ, ਤਤੋ ਸਂਗਾਯਨਾਦਿਵਸੇਨ ਸਾਵਕੇਹੀਤਿ ਆਚਰਿਯਾ ਵਦਨ੍ਤਿ.

ਅਤ੍ਥਪ੍ਪਕਾਸਨਤ੍ਥਂ, ਅਟ੍ਠਕਥਾ ਆਦਿਤੋ ਵਸਿਸਤੇਹਿ;

ਪਞ੍ਚਹਿ ਯਾਸਙ੍ਗੀਤਾ, ਅਨੁਸਙ੍ਗੀਤਾ ਚ ਪਚ੍ਛਾਪਿ.

ਮਜ੍ਝੇ ¶ ਵਿਸੁਦ੍ਧਿਮਗ੍ਗਾ, ਏਸ ਚਤੁਨ੍ਨਮ੍ਪਿ ਆਗਮਾਨਞ੍ਹਿ;

ਠਤ੍ਵਾ ਪਕਾਸਯਿਸ੍ਸਤਿ, ਤਤ੍ਥ ਯਥਾ ਭਾਸਿਤਮਤ੍ਥਂ;

ਇਚ੍ਚੇਵ ਕਤੋ ਤਸ੍ਮਾ, ਤਮ੍ਪਿ ਗਹੇਤ੍ਵਾਨ ਸਦ੍ਧਿਮੇਤਾਯ;

ਅਟ੍ਠਕਥਾਯ ਵਿਜਾਨਾਥ, ਦੀਘਾਗਮਨਿਸ੍ਸਿਤਂ ਅਤ੍ਥਂ.

ਅਤ੍ਥਾਨਂ ¶ ਸੂਚਨਤੋ, ਸੁਵੁਤ੍ਤਤੋ ਸਵਨਤੋਥਸੂਦਨਤੋ,

ਸੁਤ੍ਤਾਣਾ ਸੁਤ੍ਤਸਭਾਗਤੋਚ, ਸੁਤ੍ਤਨ੍ਤਿ ਅਕ੍ਖਾਤਂ.

ਸੁਦੁਦ੍ਦਸਂ ¶ ਸੁਨਿਪੁਣਂ, ਯਤ੍ਥਕਾਮਨਿਪਾਤਿਨਂ;

ਚਿਤ੍ਤਂ ਰਕ੍ਖੇਥ ਮੇਧਾਵੀ, ਚਿਤ੍ਤਂ ਗੁਤ੍ਤਂ ਸੁਖਾਵਹਂ.

ਸੋ ¶ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨਞ੍ਜਪ੍ਪਤ੍ਤੇ ਞਾਣਦਸ੍ਸਨਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ –

ਯਂਹਿਤਂ ¶ ਭਿਕ੍ਖਵੇ ਸਮ੍ਮਾਵਦਮਾਨੇ ਵਦੇਯ੍ਯ ਸਮਨ੍ਤਪਾਸੋ ਮਾਰਸ੍ਸਾਤਿ, ਮਾਤੁਗਾਮਂਯੇਵ ਸਮ੍ਮਾ ਵਦਮਾਨੋ ਵਦੇਯ੍ਯ ਸਮਨ੍ਤਪਾਸੋ ਮਾਰਸ੍ਸਾਤਿ.

ਯੋ ¶ ਭਿਕ੍ਖੁ ਦਿਵਸਂ ਚਙ੍ਕਮੇਨ ਨਿਸਜ੍ਜਾਯ ਚ ਆਵਰਣੀਯੇਹਿ ਧਮ੍ਮੇਹਿ ਚਿਤ੍ਤਂ ਪਰਿਸੋਧੇਤ੍ਵਾ.

ਇਤਿ ¶ ਚਿਤ੍ਤਕਿਰਿਯਵਾਯੋਧਾਤੁਵਿਪ੍ਫਾਰਵਸੇਨ ਅਯਂ ਕਾਯਸਮ੍ਮਤੋ ਅਟ੍ਠਿਸਙ੍ਘਾਤੋ ਅਭਿਕ੍ਕਮਤਿ.

ਕਰੁਣਾ ¶ ਵਿਯ ਸਤ੍ਤੇਸੁ, ਪਞ੍ਞਾ ਯਸ੍ਸ ਮਹੇਸਿਨੋ;

ਞੇਯ੍ਯਧਮ੍ਮੇਸੁ ਸਬ੍ਬੇਸੁ, ਪਵਤ੍ਤਿਤ੍ਥ ਯਥਾਰੁਚਿ.

ਦਸਾਯ ¶ ਤਾਯ ਸਤ੍ਤੇਸੁ, ਸਮੁਸ੍ਸਾਹਿਤਮਾਨਸੋ;

ਪਾਟਿਹੀਰਾਵਸਾਨਮ੍ਹਿ, ਵਸਨ੍ਤੋ ਤਿਦਸਾਲਯੇ;

ਪਾਰਿਚ੍ਛਤ੍ਤਕਮੂਲਮ੍ਹਿ, ਪਣ੍ਡੁਕਮ੍ਬਲਨਾਮਕੇ;

ਸਿਲਾਸਨੇ ਸਨ੍ਨਿਸਿਨ੍ਨੋ, ਆਦਿਚ੍ਚੋਵ ਯੁਗਨ੍ਧਰੇ.

ਚਕ੍ਕਵਾਲ਼ਸਹਸ੍ਸੇਹਿ, ਦਸਾਹਾਗਮ੍ਮ ਸਬ੍ਬਸੋ;

ਸਨ੍ਨਿਸਿਨ੍ਨੇਨ ਦੇਵਾਨਂ, ਗਣੇਨ ਪਰਿਵਾਰਿਤੋ;

ਮਾਤਰਂ ਪਮੁਖਂ ਕਤ੍ਵਾ, ਤਸ੍ਸਾ ਪਞ੍ਞਾਯ ਤੇਜਸਾ;

ਅਭਿਧਮ੍ਮਕਥਾਮਗ੍ਗਂ, ਦੇਵਾਨਂ ਸਮ੍ਪਵਤ੍ਤਯਿ.

ਤਸ੍ਸ ¶ ਪਾਦੇ ਨਮਸ੍ਸਿਤ੍ਵਾ, ਸਮ੍ਬੁਦ੍ਧਸ੍ਸ ਸਿਰੀਮਤੋ;

ਸਦ੍ਧਮ੍ਮਞ੍ਚਸ੍ਸ ਪੂਜੇਤ੍ਵਾ, ਕਤ੍ਵਾ ਸਙ੍ਘਸ੍ਸ ਚਞ੍ਜਲਿਂ.

ਯਂ ¶ ਦੇਵਦੇਵੋ ਦੇਵਾਨਂ, ਦੇਸੇਤ੍ਵਾ ਨਯਤੋ ਪੁਨ;

ਥੇਰਸ੍ਸ ਸਾਰਿਪੁਤ੍ਤਸ੍ਸ, ਸਮਾਚਿਕ੍ਖਿ ਵਿਨਾਯਕੋ.

ਅਨੋਤਤ੍ਤਦਹੇ ਕਤ੍ਵਾ, ਉਪਟ੍ਠਾਨਂ ਮਹੇਸਿਨੋ;

ਯਞ੍ਚ ਸੁਤ੍ਵਾਨ ਸੋ ਥੇਰੋ, ਆਹਰਿਤ੍ਵਾ ਮਹੀਤਲਂ.

ਭਿਕ੍ਖੂਨਂ ਪਰਿਰੁਦਾਹਾਸਿ, ਇਤਿ ਭਿਕ੍ਖੂਹਿ ਧਾਰਿਤੋ;

ਸਙ੍ਗੀਤਿਕਾਲੇ ਸਂਙ੍ਗੀਤੋ, ਵੇਦੇਹਮੁਨਿਨਾ ਪੁਨ.

ਯਂ ¶ ਕਰੋਮਸਿ ਬ੍ਰਹ੍ਮੁਨੋ, ਸਮਂ ਦੇਵੇਹਿ ਮਾਰਿਸ;

ਤਦਜ੍ਜ ਤੁਯ੍ਹਂ ਕਸ੍ਸਾਮ, ਹਨ੍ਦ ਸਾਮਂ ਕਰੋਮ ਤੇ.

ਅਤ੍ਥਂ ¶ ਪਕਾਸਯਿਸ੍ਸਾਮਿ, ਆਗਮਟ੍ਠਕਥਾਸੁਪਿ;

ਗਹੇਤਬ੍ਬਂ ਗਹੇਤ੍ਵਾਨ, ਤੋਸਯਨ੍ਤੋ ਵਿਚਕ੍ਖਣੇ.

ਇਤਿਮੇ ¶ ਭਾਸਮਾਨਸ੍ਸ, ਅਭਿਧਮ੍ਮਕਥਂ ਇਮਂ;

ਅਵਿਕ੍ਖਿਤ੍ਤਾ ਨਿਸਾਮੇਥ, ਦੁਲ੍ਲਭਾਹਿਅਯਂਕਥਾ.

ਏਤ੍ਥੇਤੇ ¶ ਪਾਪਕਾ ਅਕੁਸਲਾ ਧਮ੍ਮਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

ਚਕ੍ਖੁਂ ¶ ਚਾਵੁਸੋ ਪਟਿਚ੍ਚ ਰੂਪੇਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ, ਤਿਣ੍ਣਂ ਸਙ੍ਗਤਿ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਯਂ ਵੇਦੇਤਿ, ਤਂ ਸਞ੍ਜਾਨਾਤਿ. ਯਂ ਸਞ੍ਜਾਨਾਤਿ, ਤਂ ਵਿਤਕ੍ਕੇਤਿ, ਯਂ ਵਿਤਕ੍ਕੇਤਿ, ਤਂ ਪਪਞ੍ਚੇਤਿ, ਯਂ ਪਪਞ੍ਚੇਤਿ, ਤਤੋ ਨਿਦਾਨਂ ਪੁਰਿਸਂ ਪਪਞ੍ਚਸਞ੍ਞਾਸਙ੍ਖਾ ਸਮੁਦਾਚਰਨ੍ਤਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇਸੁ ਚਕ੍ਖੁਵਿਞ੍ਞੇਯ੍ਯਸੁ ਰੂਪੇਸੁ –

ਪੁਰਿਮਾ ¶ ਭਿਕ੍ਖਵੇ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯ.

ਅਤ੍ਥੇਵ ¶ ਗਮ੍ਭੀਰਗਤਂ ਸੁਦੁਬ੍ਬੁਧਂ,

ਅਭਿਕ੍ਕਮਿਸ੍ਸਾਮਿ ¶ ਪਟਿਕ੍ਕਮਿਸ੍ਸਾਮੀਤਿ ਹਿ ਚਿਤ੍ਤਂ ਉਪ੍ਪਜ੍ਜਮਾਨਂ ਰੂਪਂ ਸਮੁਟ੍ਠਾਪੇਤਿ.

ਯਤ੍ਥਟ੍ਠਿਤੋ ਮੁਚ੍ਚੇਯ੍ਯ ਪਾਪਕਮ੍ਮਾ.

ਯਂ ¶ ਪਤ੍ਤਂ ਕੁਸਲਂ ਤਸ੍ਸ, ਆਨੁਭਾਵੇਨ ਪਾਣਿਨੋ;

ਸਬ੍ਬੇ ਸਦ੍ਧਮ੍ਮਰਾਜਸ੍ਸ, ਞਤ੍ਵਾ ਧਮ੍ਮਂ ਸੁਖਾਵਹਂ;

ਪਾਪੁਣਨ੍ਤੁ ਵਿਸੁਦ੍ਧਾਯ, ਸੁਖਾਯ ਪਟਿਪਤ੍ਤਿਯਾ;

ਅਸੋਕਮਨੁਪਾਯਾਸਂ, ਨਿਬ੍ਬਾਨਸੁਖਮੁਤ੍ਤਮਂ.

ਚਿਰਂ ਤਿਟ੍ਠਤੁ ਸਦ੍ਧਮ੍ਮੋ, ਧਮ੍ਮੇ ਹੋਨ੍ਤੁ ਸਗਾਰਵਾ;

ਸਬ੍ਬੇਪਿ ਸਤ੍ਤਾ ਕਾਲੇਨ, ਸਮ੍ਮਾ ਦੇਵੋ ਪਵਸ੍ਸਤੁ;

ਯਥਾ ਰਕ੍ਖਿਂਸੁ ਪੋਰਾਣਾ, ਸੁਰਾਜਾਨੋ ਤਥੇਵਿਮਂ;

ਰਾਜਾ ਰਕ੍ਖਤੁ ਧਮ੍ਮੇਨ, ਅਤ੍ਤਨੋਵ ਪਜਂਪਜਂ.

ਤਾਵ ¶ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;

ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਪਞ੍ਞਾਵਿਸੁਦ੍ਧਿਯਾ;

ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;

ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋ.

ਪੁਚ੍ਛਾ – ਅਟ੍ਠਕਥਾ ¶ ਸਂਗੀਤਿਯਾ ਆਵੁਸੋ ਪਠਮੇ ਸਨ੍ਨਿਪਾਤੇ ਸਕਲਾ ਚ ਵਿਨਯਸਂਵਣ੍ਣਨਾ ਦੀਘਨਿਕਾਯੇ ਚ ਸੀਲਕ੍ਖਨ੍ਧਵਗ੍ਗਵਣ੍ਣਨਾ ਅਭਿਧਮ੍ਮੇ ਚ ਧਮ੍ਮਸਙ੍ਗਹਸਂਵਣ੍ਣਨਾ ਸਂਗੀਤਾ ਥੇਰੇਹਿ ਛਟ੍ਠਸਂਗੀਤਿਕਾਰੇਹਿ. ਇਦਾਨਿ ਪਨ ਦੁਤਿਯੇ ਸਨ੍ਨਿਪਾਤੇ ਦੀਘਨਿਕਾਯੇ ਮਹਾਵਗ੍ਗਵਣ੍ਣਨਾਤੋ ਪਟ੍ਠਾਯ ਤਦਵਸੇਸਾਨਂ ਯਥਾਵਵਤ੍ਥਿਤਸਂਵਣ੍ਣਨਾਨਂ ਸਂਗਾਯਨੋਕਾਸੋ ਅਨੁਪ੍ਪਤ੍ਤੋ. ਤਸ੍ਮਾ ਇਮਿਸ੍ਸਾ ਦੁਤਿਯਸਨ੍ਨਿਪਾਤਸਂਗੀਤਿਯਾ ਪੁਬ੍ਬਕਿਚ੍ਚਵਸੇਨ ਯਥਾਨੁਪ੍ਪਤ੍ਤਾਯ ਮਹਾਵਗ੍ਗੇ ਮਹਾਪਦਾਨਸੁਤ੍ਤਸਂਵਣ੍ਣਨਾਯ ਪੁਚ੍ਛਾਵਿਸ੍ਸਜ੍ਜਨਂ ਕਾਤੁਂ ਸਮਾਰਭਾਮ. ਮਹਾਪਦਾਨਸੁਤ੍ਤਸ੍ਸ ਆਵੁਸੋ ਨਿਦਾਨੇ ਪਰਿਯਾਪਨ੍ਨਸ੍ਸ ‘‘ਕਰੇਰਿਕੁਟਿਕਾਯ’’ਨ੍ਤਿਪਦਸ੍ਸ ਅਤ੍ਥੋ ਕਥਂ ਅਟ੍ਠਕਥਾਚਰਿਯੇਨ ਕਥਿਤੋ.

ਵਿਸ੍ਸਜ੍ਜਨਾ – ਮਹਾਪਦਾਨਸੁਤ੍ਤਸ੍ਸ ਭਨ੍ਤੇ ਨਿਦਾਨੇ ਪਰਿਯਾਪਨ੍ਨਸ੍ਸ ਕਰੇਰਿਕੁਟਿਕਾਯਨ੍ਤਿਪਦਸ੍ਸ ਅਤ੍ਥੋ ‘‘ਕਰੇਰਿਕੁਟਿਕਾਯ’’ਨ੍ਤਿ ਕਰੇਰੀਤਿ ਵਰੁਣਰੁਕ੍ਖਸ੍ਸ ਨਾਮਂ. ਕਰੇਰਿਮਣ੍ਡਪੋ ਤਸ੍ਸਾ ਕੁਟਿਕਾਯ ¶ ਦ੍ਵਾਰੇ ਠਿਤੋ, ਤਸ੍ਮਾ ਕਰੇਰਿਕੁਟਿਕਾਤਿ ਵੁਚ੍ਚਤਿ. ਯਥਾ ਕੋਸਮ੍ਬਰੁਕ੍ਖਸ੍ਸ ਦ੍ਵਾਰੇਠਿਤਤ੍ਤਾ ਕੋਸਮ੍ਬਕੁਟਿਕਾਤਿ ਏਵਮਾਦਿਨਾ ਭਨ੍ਤੇ ਅਟ੍ਠਕਥਾਚਰਿਯੇਨ ਕਥਿਤੋ.

ਕਰੇਰਿਕੁਟਿਕਾਯਨ੍ਤਿ ¶ ਕਰੇਰੀਤਿ ਵਰੁਣਰੁਕ੍ਖਸ੍ਸ ਨਾਮਂ.

ਕਰੇਰਿਮਣ੍ਡਪੋ ¶ ਤਸ੍ਸਾ ਕੁਟਿਕਾਯ ਦ੍ਵਾਰੇ ਠਿਤੋ, ਤਸ੍ਮਾ ਕਰੇਰਿਕੁਟਿਕਾਤਿ ਵੁਚ੍ਚਤਿ. ਯਥਾ ਕੋਸਮ੍ਬਰੁਕ੍ਖਸ੍ਸ ਦ੍ਵਾਰੇ ਠਿਤਤ੍ਤਾ ਏਕਾਸਮ੍ਬਕੁਟਿਕਾਤਿ.

ਅਨ੍ਤੋਜੇਤਵਨੇ ਕਿਰ ਕਰੇਰਿਕੁਟਿ ਕੋਸਮ੍ਬਕੁਟਿ ਗਨ੍ਧਕੁਟਿ ਸਲਲ਼ਾਗਾਰਨ੍ਤਿ ਚਤ੍ਤਾਰਿ ਮਹਾਗੇਹਾਨਿ –

ਏਕੇਕਂ ਸਤਸਹਸ੍ਸਪਰਿਚ੍ਚਾਗੇਨ ਨਿਪ੍ਫਨ੍ਨਂ.

ਤੇਸੁ ਸਲਲ਼ਾਗਾਰਂ ਰਞ੍ਞਾ ਪਸੇਨਦਿਨਾ ਕਾਰਿਤਂ.

ਪੁਚ੍ਛਾ – ਤਤ੍ਥੇਵ ¶ ਆਵੁਸੋ ਨਿਦਾਨੇ ਪੁਬ੍ਬੇਨਿਵਾਸਪਟਿਸਂਯੁਤ੍ਤਾ ਧਮ੍ਮੀਕਥਾ ਉਦਪਾਦੀਤਿਵਚਨਸ੍ਸ ਅਤ੍ਥੋ ਕਥਂ ਅਟ੍ਠਕਥਾਚਰਿਯੇਨ ਕਥਿਤੋ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਨਿਦਾਨੇ ਪੁਬ੍ਬੇਨਿਵਾਸਪਟਿਸਂਯੁਤ੍ਤਾ ਧਮ੍ਮੀਕਥਾ ਉਦਪਾਦੀਤਿ ਵਚਨਸ੍ਸ ਅਤ੍ਥੋ ਪੁਬ੍ਬੇਨਿਵਾਸਪਟਿਸਂਯੁਤ੍ਤਾਤਿ ਏਕਮ੍ਪਿਜਾਤਿਂ ਦ੍ਵੇਪਿ ਜਾਤਿਯੋਤਿ ਏਵਂ ਨਿਬਦ੍ਧੇਨ ਪੁਬ੍ਬੇਨਿਵੁਟ੍ਠਖਨ੍ਧਸਨ੍ਤਾਨਸਙ੍ਖਾਤੇਨ ਪੁਬ੍ਬੇਨਿਵਾਸੇਨ ਸਦ੍ਧਿਂ ਯੋਜੇਤ੍ਵਾ ਪਵਤ੍ਤਿਤਾ. ਧਮ੍ਮੀਤਿ ਧਮ੍ਮਸਂਯੁਤ੍ਤਾ. ਉਦਪਾਦੀਤਿ ਅਹੋ ਅਚ੍ਛਰਿਯਂ ਦਸਬਲਸ੍ਸ ਪੁਬ੍ਬੇਨਿਵਾਸਞਾਣਂ. ਪੁਬ੍ਬੇਨਿਵਾਸਂ ਨਾਮ ਕੇ ਅਨੁਸ੍ਸਰਨ੍ਤਿ ਕੇ ਨਾਨੁਸ੍ਸਰਨ੍ਤੀਤਿ ਦਿਟ੍ਠਿਯਾ ਅਨੁਸ੍ਸਰਨ੍ਤਿ, ਸਾਵਕਾ ਸ ਪਚ੍ਚੇਕਬੁਦ੍ਧਾ ਚ ਬੁਦ੍ਧਾ ਚ ਅਨੁਸ੍ਸਰਨ੍ਤਿ. ਕਤਰਦਿਟ੍ਠਿਯੋ ਅਨੁਸ੍ਸਰਨ੍ਤਿ. ਯੇ ਅਗ੍ਗਪਤ੍ਤਾ ਕਮ੍ਮਵਾਦਿਨੋ ਤੇਪਿ ਚਤ੍ਤਾਲੀਸਂਯੇਵ ਕਪ੍ਪੇ ਅਨੁਸ੍ਸਰਨ੍ਤਿ, ਨ ਤਤੋ ਪਰਨ੍ਤਿ ਏਵਮਾਦਿਨਾ ਭਨ੍ਤੇ ਅਟ੍ਠਕਥਾਚਰਿਯੇਨ ਕਥਿਤੋ.

ਪੁਬ੍ਬੇਨਿਵਾਸਪਟਿਸਂਯੁਤ੍ਤਾਤਿ ¶ ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋਤਿ ਏਵਂ ਨਿਬਦ੍ਧੇਨ ਪੁਬ੍ਬੇਨਿਵੁਟ੍ਠਖਨ੍ਧਸਨ੍ਤਾਨਸਙ੍ਖਾਤੇਨ ਪੁਬ੍ਬੇਨਿਵਾਸੇਨ ਸਦ੍ਧਿਂ ਯੋਜੇਤ੍ਵਾ ਪਵਤ੍ਤਿਤਾ.

ਪੁਚ੍ਛਾ – ਤਸ੍ਮਿਂ ¶ ਆਵੁਸੋ ਮਹਾਪਦਾਨਸੁਤ੍ਤੇ ਉਦ੍ਦੇਸਵਾਰੇ ਨਵਸੁ ਪਰਿਚ੍ਛੇਦਵਾਰੇਸੁ ਪਠਮੇ ਕਪ੍ਪਪਰਿਚ੍ਛੇਦਵਾਰੇ ਭਦ੍ਦਕਪ੍ਪੇਤਿ ਪਦਸ੍ਸ ਅਤ੍ਥੋ ਅਟ੍ਠਕਥਾਚਰਿਯੇਨ ਕਥਂ ਕਥਿਤੋ.

ਵਿਸ੍ਸਜ੍ਜਨਾ – ਤਸ੍ਮਿਂ ¶ ਭਨ੍ਤੇ ਮਹਾਪਦਾਨਸੁਤ੍ਤੇ ਉਦ੍ਦੇਸਵਾਰੇ ਨਵਸੁ ਪਰਿਚ੍ਛੇਦਵਾਰੇਸੁ ਪਠਮੇ ਕਪ੍ਪਪਰਿਚ੍ਛੇਦਵਾਰੇ ਭਦ੍ਦਕਪ੍ਪੇਤਿ ਪਦਸ੍ਸ ਅਤ੍ਥੋ ਭਦ੍ਦਕਪ੍ਪੇਤਿ ਪਞ੍ਚਬੁਦ੍ਧੁਪ੍ਪਾਦਪਟਿਮਣ੍ਡਿਤਤ੍ਤਾ ਸੁਨ੍ਦਰਕਪ੍ਪੇ ਸਾਰਕਪ੍ਪੇਤਿ ਭਗਵਾ ਇਮਂ ਕਪ੍ਪਂ ਥੋਮੇਨ੍ਤੋ ਏਵਮਾਹ. ਯਤੋ ਪਟ੍ਠਾਯ ਕਿਰ ਅਮ੍ਹਾਕਂ ਭਗਵਾ ਅਭਿਨੀਹਾਰੋ ਕਤੋ, ਏਕਸ੍ਮਿਂ ਅਨ੍ਤਰੇ ਏਕਸ੍ਮਿਮ੍ਪਿ ਕਪ੍ਪੇ ਪਞ੍ਚਬੁਦ੍ਧਾ ਨਿਬ੍ਬਤ੍ਤਾ ਨਾਮ ਨਤ੍ਥੀਤਿ ਏਵਮਾਦਿਨਾ ਭਨ੍ਤੇ ਅਟ੍ਠਕਥਾਚਰਿਯੇਨ ਕਥਿਤੋ.

ਵਿਪਸ੍ਸਿਸ੍ਸ ¶ ਭਿਕ੍ਖਵੇ ਭਗਵਤੋ ਇਤੋ ਸੋ ਭਿਕ੍ਖਵੇ ਛਨਵੁਤਿਕਪ੍ਪੇ ਯਂ ਵਿਪਸ੍ਸੀ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਦਪਾਦਿ –

ਸਦ੍ਦਕਪ੍ਪੇਤਿ ਪਞ੍ਚਬੁਦ੍ਧੁਪ੍ਪਾਦਪਟਿਮਣ੍ਡਿਤਤ੍ਤਾ ਸੁਨ੍ਦਰਕਪ੍ਪੇ ਸਾਰਕਪ੍ਪੇਤਿ ਭਗਵਾ ਇਮਂ ਕਪ੍ਪਂ ਥੋਮੇਨ੍ਤੋ ਏਵਮਾਹ –

‘‘ਯਤੋ ਪਟ੍ਠਾਯ ਕਿਰ ਅਮ੍ਹਾਕਂ ਭਗਵਤਾਭਿਨੀਹਾਰੋ ਕਤੋ, ਏਤਸ੍ਮਿਂ ਅਨ੍ਤਰੇ ਏਕਸ੍ਮਿਮ੍ਪਿ ਕਪ੍ਪੇ ਪਞ੍ਚਬੁਦ੍ਧਾ ਨਿਬ੍ਬਤ੍ਤਾ ਨਾਮ ਨਤ੍ਥਿ’’ –

ਪੁਚ੍ਛਾ – ਚਤੁਤ੍ਥੇ ¶ ਪਨਾਵੁਸੋ ਆਯੁਪਰਿਚ੍ਛੇਦਵਾਰੇ ਅਪ੍ਪਂ ਵਾ ਭਿਯ੍ਯੋਤਿ ਏਤੇਸਂ ਪਦਾਨਂ ਅਤ੍ਥੋ ਕਥਂ ਅਟ੍ਠਕਥਾਚਰਿਯੇਨ ਕਥਿਤੋ.

ਵਿਸ੍ਸਜ੍ਜਨਾ – ਚਤੁਤ੍ਥੇ ਪਨ ਭਨ੍ਤੇ ਆਯੁਪਰਿਚ੍ਛੇਦਵਾਰੇ ਅਪ੍ਪਂ ਵਾ ਭਿਯ੍ਯੋਤਿ ਏਤੇਸਂ ਪਦਾਨਂ ਅਤ੍ਥੋ ‘‘ਅਪ੍ਪਂ ਵਾ ਭਿਯ੍ਯੋਤਿ ਵਸ੍ਸਸਤਤੋ ਵਾ ਉਪਰਿ ਅਪ੍ਪਂ, ਅਞ੍ਞਂ ਵਸ੍ਸਸਤਂ ਅਪਤ੍ਵਾ ਵੀਸਂ ਵਾ ਤਿਂਸਂ ਵਾ ਚਤ੍ਤਾਲੀਸਂ ਵਾ ਪਣ੍ਣਾਸਂ ਵਾ ਸਟ੍ਠਿ ਵਾ ਵਸ੍ਸਾਨਿ ਜੀਵਤਿ. ਏਵਂ ਦੀਘਾਯੁਕੋ ਪਨ ਅਤਿਦੁਲ੍ਲਭੋ, ਅਸੁਕੋ ਕਿਰ ਏਵਂ ਚਿਰਂ ਜੀਵਤੀਤਿ ਤਤ੍ਥ ਤਤ੍ਥ ਗਨ੍ਤ੍ਵਾ ਦਟ੍ਠਬ੍ਬੋ ਹੋਤੀ’’ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਅਟ੍ਠਕਥਾਚਰਿਯੇਨ ਕਥਿਤੋ.

ਮਯ੍ਹਂ ¶ ਭਿਕ੍ਖਵੇ ਏਤਰਹਿ ਅਪ੍ਪਕਂ ਆਯੁਪ੍ਪਮਾਣਂ ਪਰਿਤ੍ਤਂ ਲਹੁਕਂ ਯੋ ਚਿਰਂ ਜੀਵਤਿ ਸੋ ਵਸ੍ਸਸਤਂ ਅਪ੍ਪਂ ਵਾ ਭਿਯ੍ਯੋ.

ਅਪ੍ਪਂ ਵਾ ਭਿਯ੍ਯੋਤਿ ਵਸ੍ਸਸਤਤੋ ਵਾ ਉਪਰਿ ਅਪ੍ਪਂ, ਅਯ੍ਯਂ ਵਸ੍ਸਸਤਂ ਅਪਤ੍ਵਾ ਵੀਸਂ ਵਾ ਤਿਂਸਂ ਵਾ ਚਤ੍ਤਾਲੀਸਂਵਾ ਵਾ ਪਣ੍ਣਾਸਂ ਵਾ ਸਟ੍ਠਿ ਵਾ ਵਸ੍ਸਾਨਿ ਜੀਵਤਿ–

ਪੁਚ੍ਛਾ – ਅਟ੍ਠਮੇ ¶ ਪਨਾਵੁਸੋ ਉਪਟ੍ਠਾਕਪਰਿਚ੍ਛੇਦਵਾਰੇ ਆਨਨ੍ਦੋਤਿਪਦੇ ਕਥਂ ਅਟ੍ਠਕਥਾਚਰਿਯੇਨ ਵਣ੍ਣਿਤੋ.

ਵਿਸ੍ਸਜ੍ਜਨਾ – ਅਟ੍ਠਮੇ ਪਨ ਭਨ੍ਤੇ ਉਪਟ੍ਠਾਕਪਰਿਚ੍ਛੇਦੇ ਪਨ ਆਨਨ੍ਦੋਤਿ ਨਿਬਦ੍ਧੁਪਟ੍ਠਾਕਭਾਵਂ ਸਨ੍ਧਾਯ ਵੁਤ੍ਤਨ੍ਤਿ ਏਵਮਾਦਿਨਾ ਭਨ੍ਤੇ ਅਟ੍ਠਕਥਾਚਰਿਯੇਨ ਵਣ੍ਣਿਤੋ.

ਮਯ੍ਹਂ ¶ ਭਿਕ੍ਖਵੇ ਏਤਰਹਿ ਆਨਨ੍ਦੋ ਨਾਮ ਭਿਕ੍ਖੁ ਉਪਟ੍ਠਾਕੋ ਅਹੋਸਿ ਅਗ੍ਗੁਪਟ੍ਠਾਕੋ–

ਭਗਵਤੋਹਿ ¶ ਪਠਮਬੋਧਿਯਂ ਅਨਿਬਦ੍ਧਾ ਉਪਟ੍ਠਾਕਾ ਅਹੇਸੁਂ.

ਏਕਦਾ ਨਾਗਸਮਾਲੋ ਪਤ੍ਤਚੀਵਰਂ ਗਹੇਤ੍ਵਾ ਵਿਚਰਿ.

ਇਦਮੇਵ ¶ ਤੇ ਕਾਰਣਂ ਸਲ੍ਲਕ੍ਖੇਤ੍ਵਾ ਨਿਵਾਰਯਿਮ੍ਹ.

ਏਕਚ੍ਚੇ ¶ ਭਿਕ੍ਖੂ ਇਮਿਨਾ ਮਗ੍ਗੇਨ ਗਚ੍ਛਾਮਾਤਿ ਵੁਤ੍ਤੇ ਅਞ੍ਞੇਨ ਗਚ੍ਛਨ੍ਤਿ.

ਉਟ੍ਠੇਹਿ ¶ ਆਵੁਸੋ ਆਨਨ੍ਦ, ਉਟ੍ਠੇਹਿ ਆਵੁਸੋ ਆਨਨ੍ਦ.

ਕਂ ਪਨੇਤ੍ਥ ਆਨਨ੍ਦ ਆਦੀਨਵਂ ਪਸ੍ਸਸਿ.

ਕਂ ¶ ਪਨੇਤ੍ਥ ਆਨਨ੍ਦ ਆਨਿਸਂਸਂ ਪਸ੍ਸਸਿ.

ਸਮਵਤ੍ਤਕ੍ਖਨ੍ਧੋ ¶ ਅਤੁਲੋ, ਸੁਪ੍ਪਬੁਦ੍ਧੋ ਚ ਉਤ੍ਤਰੋ;

ਸਤ੍ਤਵਾਹੋ ਵਿਜਿਤਸੇਨੋ, ਰਾਹੁਲੋ ਭਵਤਿ ਸਤ੍ਤਮੋ –

ਸੁਤਨਾ ¶ ਸਬ੍ਬਕਾਮਾਚ, ਸੁਚਿਤ੍ਤਾ ਅਥ ਰੋਚਿਨੀ;

ਰੁਚਗ੍ਗਤੀ ਸੁਨਨ੍ਦਾਚ, ਬਿਮ੍ਬਾ ਭਵਤਿ ਸਤ੍ਤਮਾ.

ਅਨੇਕਜਾਤਿਸਂਸਾਰਂ ¶ , ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਗਹਕਾਰਂ ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ;

ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ.

ਸਬ੍ਬਾ ਤੇ ਫਾਸੁਕਾ ਭਗ੍ਗਾ, ਗਹਕੂਟਂ ਵਿਸਙ੍ਖਤਂ;

ਵਿਸਙ੍ਖਾਰਗਤਂ ਚਿਤ੍ਤਂ, ਤਣ੍ਹਾਨਂ ਖਯਮਜ੍ਝਗਾ.

ਅਯੋਘਨਹਤਸ੍ਸੇਵ ¶ , ਜਲਤੋ ਜਾਤਵੇਦਸੋ;

ਅਨੁਪੁਬ੍ਬੂਪਸਨ੍ਤਸ੍ਸ, ਯਥਾ ਨ ਞਾਞਤੇ ਗਤਿ;

ਏਵਂ ਸਮ੍ਮਾਵਿਮੁਤ੍ਤਾਨਂ, ਕਾਮਬਨ੍ਧੋਘਤਾਰਿਨਂ;

ਪਞ੍ਞਾਪੇਤੁਂ ਗਤਿ ਨਤ੍ਥਿ, ਪਤ੍ਤਾਨਂ ਅਚਲਂ ਸੁਖਂ.

ਨ ¶ ਪਨ ਭਗਵਾ ਮਿਲਕ੍ਖੁਸਦਿਸੋ ਹੋਤਿ ਨਾਪਿ ਆਮੁਤ੍ਤਮਣਿਕੁਣ੍ਡਲੋ.

ਤੇ ਪਨ ਅਤ੍ਤਨੋ ਸਮਾਨਸਣ੍ਠਾਨਮੇਵ ਪਸ੍ਸਨ੍ਤਿ.

ਨ ¶ ਖੋ ਆਨਨ੍ਦ ਏਤ੍ਤਾਵਤਾ ਤਥਾਗਤੋ ਸਕ੍ਕਤੋ ਵਾ ਹੋਤਿ ਗਰੁਕਤੋ ਵਾ ਮਾਨਿਤੋ ਵਾ ਪੂਜਿਤੋ ਵਾ ਅਪਚਿਤੋ ਵਾ.

ਕਸ੍ਮਾ ¶ ਪਨ ਭਗਵਾ ਅਞ੍ਞਤ੍ਥ ਏਕਂ ਉਮਾਪੁਪ੍ਫਮਤ੍ਤਮ੍ਪਿ ਗਹੇਤ੍ਵਾ ਬੁਦ੍ਧ ਗੁਣੇ ਆਵਜ੍ਜੇਤ੍ਵਾ ਕਤਾਯ ਪੂਜਾਯ ਬੁਦ੍ਧਞਾਣੇਨਾਪਿ ਅਪਰਿਚ੍ਛਿਨ੍ਨਂ ਵਿਪਾਕਂ ਵਣ੍ਣੇਤ੍ਵਾ–

ਯੋ ¶ ਖੋ ਆਨਨ੍ਦ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਉਪਾਸਕੋ ਵਾ ਉਪਾਸਿਕਾ ਵਾ ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਵਿਹਰਤਿ ਸਾਮੀਚਿਪ੍ਪਟਿਪਨ੍ਨੋ ਅਨੁਧਮ੍ਮਚਾਰੀ ਸੋ ਤਥਾ ਗਤਂ ਸਕ੍ਕਰੋਤਿ ਗਰੁਕਰੋਤਿ ਮਾਨੇਤਿ ਪੂਜੇਤਿ ਅਪਚਿਯਤਿ ਪਰਮਾਯ –

ਸਿਯਾ ¶ ਖੋ ਪਨਾਨਨ੍ਦ ਤੁਮ੍ਹਾਕਂ ਏਵਮਸ੍ਸ ‘ਅਤੀਤਸਤ੍ਥੁਕਂ ਪਾਵਚਨਂ, ਨਤ੍ਥਿ ਨੋ ਸਤ੍ਥਾ’ਤਿ.

ਨ ¶ ਖੋ ਪਨੇਤਂ ਆਨਨ੍ਦ ਏਵਂ ਦਟ੍ਠਬ੍ਬਂ.

ਧਮ੍ਮੋਪਿ ਦੇਸਿਤੋ ਚੇਵ ਪਞ੍ਞਤ੍ਤੋਚ, ਵਿਨਯੋਪਿ ਦੇਸਿਤੋ ਚੇਵ ਪਞ੍ਞਤ੍ਤੋ ਚ–

ਅਸ੍ਸੋਸਿ ¶ ਖੋ ਰਾਜਾ ਮਾਗਧੋ ਅਜਾਤਸਤ੍ਤੁ ਵੇਦੇਹਿਪੁਤ੍ਤੋ ਭਗਵਾ ਕਿਰ ਕੁਸਿਨਾਰਾਯਂ ਪਰਿਨਿਬ੍ਬੁਤੋਤਿ.

ਸਤ੍ਥਾ ਨਾਮ ਪਰਿਨਿਬ੍ਬੁਤੋ, ਨ ਸੋ ਸਕ੍ਕਾ ਪੁਨ ਆਹਰਿਤੁਂ, ਪੋਥੁਜ੍ਜਨਿਕਸਦ੍ਧਾਯ ਪਨ ਅਮ੍ਹਾਕਂ ਰਞ੍ਞਾ ਸਦਿਸੋ ਨਤ੍ਥਿ, ਸਚੇ ਏਸ ਇਮਿਨਾਵ ਨਿਯਾਮੇਨ ਸੁਣਿਸ੍ਸਤਿ, ਹਦਯਮਸ੍ਸ ਫਲਿਸ੍ਸਤਿ. ਰਾਜਾ ਖੋ ਪਨ ਅਮ੍ਹੇਹਿ ਅਨੁਰਕ੍ਖਿਤਬ੍ਬੋਤਿ.

ਦੇਵ ¶ ਅਮ੍ਹੇਹਿ ਸੁਪਿਨਕੋ ਦਿਟ੍ਠੋ, ਤਸ੍ਸ ਪਟਿਘਾਤਤ੍ਥਂ ਤੁਮ੍ਹੇਹਿ ਦੁਕੂਲਦੁਪਟ੍ਟਂ ਨਿਵਾਸੇਤ੍ਵਾ ਯਥਾ ਨਾਸਾਪੁਟਮਤ੍ਤਂ ਪਞ੍ਞਾਯਤਿ, ਏਵਂ ਚਤੁਮਧੁਰਦੋਣਿਯਾ ਨਿਪਜ੍ਜਿਤੁਂ ਵਟ੍ਟਤੀਤਿ.

ਦੇਵ ¶ ਮਰਣਤੋ ਮੁਚ੍ਚਨਕਸਤ੍ਤੋ ਨਾਮ ਨਤ੍ਥਿ, ਅਮ੍ਹਾਕਂ ਆਯੁਵਡ੍ਢਨੋ ਚੇਤਿਯਟ੍ਠਾਨਂ ਪੁਞ੍ਞਕ੍ਖੇਤ੍ਤਂ ਅਭਿਸੇਕਸਿਞ੍ਚਕੋ ਸੋ ਭਗਵਾ ਸਤ੍ਥਾ ਕੁਸਿਨਾਰਾਯ ਪਰਿਨਿਬ੍ਬੁਤੋਤਿ.

ਭਗਵਾ ¶ ਸਬ੍ਬਞ੍ਞੁ ਨਨੁ ਇਮਸ੍ਮਿਂ ਠਾਨੇ ਨਿਸੀਦਿਤ੍ਵਾ ਧਮ੍ਮਂ ਦੇਸਯਿਤ੍ਥ, ਸੋਕਸਲ੍ਲਂ ਮੇ ਵਿਨੋਦਯਿਤ੍ਥ, ਤੁਮ੍ਹੇ ਮਯ੍ਹਂ ਸੋਕਸਲ੍ਲਂ ਨੀਹਰਿਤ੍ਥ, ਅਹਂ ਤੁਮ੍ਹਾਕਂ ਸਰਣਂ ਗਤੋ, ਇਦਾਨਿ ਪਨ ਮੇ ਪਟਿਵਚਨਮ੍ਪਿ ਨ ਦੇਥ ਭਗਵਾਤਿ.

ਨਨੁ ¶ ਭਗਵਾ ਅਹਂ ਅਞ੍ਞਦਾ ਏਵਰੂਪੇ ਕਾਲੇ ਤੁਮ੍ਹੇ ਮਹਾਭਿਕ੍ਖੁ ਸਙ੍ਘਪਰਿਵਾਰਾ ਜਮ੍ਬੁਦੀਪਤਲੇ ਚਾਰਿਕਂ ਚਰਥਾਤਿ ਸੁਣੋਮਿ.

ਮਮ ਪਰਿਦੇਵਿਤੇਨੇਵ ਨ ਸਿਜ੍ਝਤਿ, ਦਸਬਲਸ੍ਸ ਧਾਤੁਯੋ ਆਹਰਾਪੇਸ੍ਸਾਮੀਤਿ ਏਵਂ ਅਸ੍ਸੋਸਿ.

ਸਚੇ ¶ ਦਸ੍ਸਨ੍ਤਿ, ਸੁਨ੍ਦਰਂ. ਨੋ ਚੇ ਦਸ੍ਸਨ੍ਤਿ, ਆਹਰਣੁਪਾਯੇਨ ਆਹਰਿਸ੍ਸਾਮੀਤਿ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਸਯਮ੍ਪਿ ਨਿਕ੍ਖਨ੍ਤੋਯੇਵ.

ਯਥਾ ਚ ਅਜਾਤਸਤ੍ਤੁ, ਏਵਂ ਲਿਚ੍ਛਵੀ ਆਦਯੋਪਿ.

ਅਮ੍ਹਾਕਂ ¶ ਧਾਤੁਯੋ ਵਾ ਦੇਨ੍ਤੁ, ਯੁਦ੍ਧਂ ਵਾਤਿ ਕੁਸਿਨਾਰਾਨਗਰਂ ਪਰਿਵਾਰੇਤ੍ਵਾ ਠਿਤੇ ਏਤਂ ਭਗਵਾ ਅਮ੍ਹਾਕਂ ਗਾਮਕ੍ਖੇਤ੍ਤੇਹਿ ਪਟਿਵਚਨਂ ਅਵੋਚੁਂ.

ਨ ਮਯਂ ਸਤ੍ਥੁ ਸਾਸਨਂ ਪਹਿਣਿਮ੍ਹ, ਨਾਪਿ ਗਨ੍ਤ੍ਵਾ ਆਨਯਿਮ੍ਹ. ਸਤ੍ਥਾ ਪਨ ਸਯਮੇਵ ਆਗਨ੍ਤ੍ਵਾ ਸਾਸਨਂ ਪੇਸੇਤ੍ਵਾ ਅਮ੍ਹੇ ਪਕ੍ਕੋਸਾਪੇਸਿ. ਤੁਮ੍ਹੇਪਿ ਖੋ ਪਨ ਯਂ ਤੁਮ੍ਹਾਕਂ ਗਾਮਕ੍ਖੇਤ੍ਤੇ ਰਤਨਂ ਉਪ੍ਪਜ੍ਜਤਿ. ਨ ਤਂ ਅਮ੍ਹਾਕਂ ਦੇਥ. ਸਦੇਵਕੇ ਚ ਲੋਕੇ ਬੁਦ੍ਧਰਤਨਸਮਂ ਰਤਨਂ ਨਾਮ ਨਤ੍ਥਿ ¶ , ਏਵਰੂਪਂ ਉਤ੍ਤਮਰਤਨਂ ਲਭਿਤ੍ਵਾ ਮਯਂ ਨਦਸ੍ਸਾਮ, ਨ ਖੋ ਪਨ ਤੁਮ੍ਹੇਹਿਯੇਵ ਮਾਤੁਥਨਤੋ ਖੀਰਂ ਪੀਤਂ. ਅਮ੍ਹੇਹਿਪਿ ਮਾਤੁਥਨਤੋ ਖੀਰਂ ਪੀਤਂ, ਨ ਤੁਮ੍ਹੇਯੇਵ ਪੁਰਿਸਾ, ਅਮ੍ਹੇਪਿ ਪੁਰਿਸਾ. ਹੋਤੂਤਿ ਅਞ੍ਞਮਞ੍ਞਂ ਅਹਂਕਾਰਂ ਕਤ੍ਵਾ ਸਾਸਨਪਟਿਸਾਸਨਂ ਪੇਸੇਨ੍ਤਿ. ਅਞ੍ਞਮਞ੍ਞਂ ਮਾਨਗਜ੍ਜਿਤਂ ਗਜ੍ਜਨ੍ਤਿ.

ਏਤੇ ¶ ਰਾਜਾਨੋ ਭਗਵਤੋ ਪਰਿਨਿਬ੍ਬੁਤਟ੍ਠਾਨੇ ਵਿਵਾਦਂ ਕਰੋਨ੍ਤਿ, ਨ ਖੋ ਪਨੇਤਂ ਪਤਿਰੂਪਂ, ਅਲਂ ਇਮਿਨਾ ਕਲਹੇਨ, ਵੂਪਸਮੇਸ੍ਸਾਮਿ ਨਨ੍ਤਿ.

ਆਚਰਿਯਸ੍ਸ ¶ ਵਿਯ ਭੋ ਸਦ੍ਦੋ, ਆਚਰਿਯਸ੍ਸ ਵਿਯ ਭੋ ਸਦ੍ਦੋਤਿ ਸਬ੍ਬੇ ਨਿਰਵਾ ਅਹੇਸੁਂ.

ਵਿਤ੍ਥਾਰਿਕਾ ਹੋਨ੍ਤੁ, ਦਿਸਾਸੁ ਥੂਪਾ;

ਨ ¶ ਹਿ ਸਾਧੁਕਂ ਉਤ੍ਤਮਪੁਗ੍ਗਲਸ੍ਸ, ਸਰੀਰਭਾਗੇ ਸਿਯਾ ਸਮ੍ਪਹਾਰੋਤਿ ਨ ਹਿ ਸਾਧੁਯਨ੍ਤਿ ਨ ਹਿ ਸਾਧੁ ਅਯਂ –

ਭਗਵਾ ¶ ਸਬ੍ਬਸੁ ਪੁਬ੍ਬੇ ਮਯਂ ਤੁਮ੍ਹਾਕਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਂ ਛਬ੍ਬਣ੍ਣਬੁਦ੍ਧਰਸ੍ਮਿਖਚਿਤਂ ਅਸੀਤਿਅਨੁਬ੍ਯਞ੍ਜਨਸਮੁਜ੍ਜਲਿਤਸੋਭਂ ਸੁਵਣ੍ਣਵਣ੍ਣਂ ਸਰੀਰਂ ਅਦ੍ਦਸਾਮ, ਇਦਾਨਿ ਪਨ ਸੁਵਣ੍ਣਵਣ੍ਣਾਵ ਧਾਤੁਯੋ ਅਵਸਿਟ੍ਠਾ ਜਾਤਾ, ਨਯੁਤ੍ਤਮਿਦਂ ਭਗਵਾ ਤੁਮ੍ਹਾਕਨ੍ਤਿ ਪਰਿਦੇਵਿਂਸੁ.

ਕੇਨ ¶ ਨੁ ਖੋ ਸਦੇਵਕਸ੍ਸ ਲੋਕਸ੍ਸ ਕਙ੍ਖਚ੍ਛੇਦਨਤ੍ਥਾਯ ਚਤੁਸਚ੍ਚਕਥਾਯ ਪਚ੍ਚਯਭੂਤਾ ਭਗਵਤੋ ਦਕ੍ਖਿਣਦਾਠਾ ਗਹਿਤਾਤਿ ਓਲੋਕੇਨ੍ਤੋ ਬ੍ਰਾਹ੍ਮਣੇਨ ਗਹਿਤਾਤਿ ਦਿਸ੍ਵਾ ਬ੍ਰਾਹ੍ਮਣੋਪਿ ਦਠਾਯ ਅਨੁਚ੍ਛਵਿਕਂ ਸਕ੍ਕਾਰਂ ਨਸਕ੍ਖਿਸ੍ਸਤਿ ਗਣ੍ਹਾਮਿ ਨਤ੍ਥਿ ਵੇਟ੍ਠਨ੍ਤਰਤੋ ਗਹੇਤ੍ਵਾ ਸੁਵਣ੍ਣਚਙ੍ਕੋਟਕੇ ਠਪੇਤ੍ਵਾ ਦੇਵਲੋਕਂ ਨੇਤ੍ਵਾ ਚੂਲ਼ਾਮਣਿਚੇਤਿਯੇ ਪਤਿਟ੍ਠਪੇਸਿ –

ਰਾਜਗਹੇ ¶ ਭਗਵਤੋ ਸਰੀਰਾਨਂ ਥੂਪਞ੍ਚ ਮਹਞ੍ਚ ਅਕਾਸਿ.

ਸਮਣਸ੍ਸ ¶ ਗੋਤਮਸ੍ਸ ਪਰਿਨਿਬ੍ਬੁਤਕਾਲਤੋ ਪਟ੍ਠਾਯ ਬਲਕ੍ਕਾਰੇਨ ਸਾਧੁਕੀਲ਼ਿਤਾਯ ਉਪਦ੍ਦੁਤੁਮ੍ਹ, ਸਬ੍ਬੇ ਨੋ ਕਮ੍ਮਨ੍ਤਾ ਨਟ੍ਠਾਤਿ.

ਮਹਾਜਨੋ ਮਨਂ ਪਦੋਸੇਤ੍ਵਾ ਅਪਾਯੇ ਨਿਬ੍ਬਤ੍ਤੀਤਿ ਦਿਸ੍ਵਾ ਸਕ੍ਕਂ ਦੇਵਰਾਜਾਨਂ ਧਾਤੁਆਹਰਣੂਪਾਯਂ ਕਾਰੇਸ੍ਸਾਮਾਤਿ ਤਸ੍ਸ ਸਨ੍ਤਿਕਂ ¶ ਗਨ੍ਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਧਾਤੁਆਹਰਣੂਪਾਯਂ ਕਰੋਮਿ ਮਹਾਰਾਜਾਤਿ ਆਹਂਸੁ.

ਭਨ੍ਤੇ ਪੁਥੁਜ੍ਜਨੋ ਨਾਮ ਅਜਾਤਸਤ੍ਤੁਨਾ ਸਮੋ ਸਦ੍ਧੋ ਨਾਮ ਨਤ੍ਥਿ, ਨ ਸੋ ਮਮ ਵਚਨਂ ਕਰਿਸ੍ਸਤਿ, ਅਪਿਚ ਖੋ ਮਾਰਵਿਭਿਂ ਸਕਸਦਿਸਂ ਵਿਭਿਂਸਕਂ ਦਸ੍ਸੇਸ੍ਸਾਮਿ ਮਹਾਸਦ੍ਦਂ ਸਾਵੇਸ੍ਸਾਮਿ ਯਕ੍ਖਗਾਹਕਖਿਪਿਤਕਅਰੋਚਕੇ ਕਰਿਸ੍ਸਾਮਿ, ਤੁਮ੍ਹੇ ਅਮਨੁਸ੍ਸਾ ਮਹਾਰਾਜ ਕੁਪਿਤਾ ਧਾਤੁਯੋ ਆਹਰਾਪੇਥਾਤਿ ਵਦੇਯ੍ਯਾਥ, ਏਵਂ ਸੋ ਆਹਰਾਪੇਸ੍ਸਤੀਤਿ–

ਮਹਾਰਾਜ ¶ ਅਮਨੁਸ੍ਸਾ ਕੁਪਿਤਾ, ਧਾਤੁਯੋ ਆਹਰਾਪੇਹੀਤਿ ਭਣਿਂਸੁ.

ਨ ਤਾਵ ਭਨ੍ਤੇ ਮਯ੍ਹਂ ਚਿਤ੍ਤਂ ਤੁਸ੍ਸਤਿ, ਏਵਂ ਸਨ੍ਤੇਪਿ ਆਹਰਨ੍ਤੂਤਿ ਆਹ.

ਮਹਾਰਾਜ ¶ ਏਕਂ ਧਾਤੁਨਿਧਾਨਂ ਕਾਤੁਂ ਵਟ੍ਟਤੀਤਿ ਆਹ.

ਅਨਾਗਤੇ ¶ ਲਙ੍ਕਾਦੀਪੇ ਮਹਾਵਿਹਾਰੇ ਮਹਾਚੇਤਿਯਮ੍ਹਿ ਨਿਦਹਿਸ੍ਸਨ੍ਤਿ.

ਇਮਸ੍ਮਿਂ ¶ ਠਾਨੇ ਯੋ ਪਾਸਾਣੋ ਅਤ੍ਥਿ, ਸੋ ਅਨ੍ਤਰਧਾਯਤੁ, ਪਂਸੁ ਸੁਵਿਸੁਦ੍ਧਾ ਹੋਤੁ, ਉਦਕਂ ਮਾ ਉਟ੍ਠਹਤੂਤਿ ਅਧਿਟ੍ਠਾਸਿ.

ਇਧ ਰਾਜਾ ਕਿਂ ਕਾਰੇਤੀਤਿ ਪੁਚ੍ਛਨ੍ਤਾਨਮ੍ਪਿ ਮਹਾਸਾਵਕਾਨਂ ਚੇਤਿਯਾਨੀਤਿ ਵਦਨ੍ਤਿ.

ਮਾਲਾ ¶ ਮਾ ਮਿਲਾਯਨ੍ਤੁ, ਗਨ੍ਧਾ ਮਾ ਵਿਨਸ੍ਸਨ੍ਤੁ, ਦੀਪਾ ਮਾ ਵਿਜ੍ਝਾਯਨ੍ਤੂਤਿ ਅਧਿਟ੍ਠਹਿਤ੍ਵਾ ਸੁਵਣ੍ਣਪਟ੍ਟੇ ਅਕ੍ਖਰਾਨਿ ਛਿਨ੍ਦਾਪੇਸਿ –

ਅਨਾਗਤੇ ਪਿਯਦੋਸੋ ਨਾਮ ਕੁਮਾਰੋ ਛਤ੍ਤਂ ਉਸ੍ਸਾਪੇਤ੍ਵਾ ਅਸੋਕੋ ਧਮ੍ਮਰਾਜਾ ਭਵਿਸ੍ਸਤਿ, ਸੋ ਇਮਾ ਧਾਤੁਯੋ ਵਿਤ੍ਥਾਰਿਕਾ ਕਰਿਸ੍ਸਤੀਤਿ.

ਅਨਾਗਤੇ ¶ ਦਲਿਦ੍ਦਰਾਜਾ ਇਮਂ ਮਣਿਂ ਗਹੇਤ੍ਵਾ ਧਾਤੂਨਂ ਸਕ੍ਕਾਰਂ ਕਰੋਤੂਤਿ ਅਕ੍ਖਰਂ ਛਿਨ੍ਦਾਪੇਸਿ.

ਤਾਤ ਅਜਾਤਸਤ੍ਤੁਨਾ ਧਾਤੁਨਿਧਾਨਂ ਕਤਂ, ਏਤ੍ਥ ਆਰਕ੍ਖਂ ਪਟ੍ਠਪੇਹੀਤਿ ਪਹਿਣਿ.

ਪਰਿਕ੍ਖੀਣੋਦਾਨਿ ¶ ਮੇ ਆਯੂਤਿ ਅਞ੍ਞਾਸਿ.

ਯੇਸਞ੍ਚ ਦੇਵਪੁਤ੍ਤਾਨਂ ਮਰਣਨਿਮਿਤ੍ਤਾਨਿ ਆਵਿ ਭਵਨ੍ਤਿ.

ਨਸ੍ਸਤਿ ¶ ਵਤ ਭੋ ਮੇ ਅਯਂ ਸਮ੍ਪਤ੍ਤੀਤਿ ਭਯਾਭਿਭੂਤੋ ਅਹੋਸਿ.

ਅਤ੍ਥਿ ਨੁ ਖੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਲੋਕਪਿਤਾ ਮਹੋ ਮਹਾਬ੍ਰਹ੍ਮਾਵਾ, ਯੋ ਮੇ ਹਦਯਨਿਸ੍ਸਿਤਂ ਸੋਕਸਲ੍ਲਂ ਸਮੁਦ੍ਧਰਿਤ੍ਵਾ ਇਮਂ ਸਮ੍ਪਤ੍ਤਿਂ ਥਾਵਰਂ ਕਰੇਯ੍ਯਾਤਿ ਓਲੋਕੇਨ੍ਤੋ ਕਞ੍ਚਿ ਅਦਿਸ੍ਵਾ ਪੁਨ ਅਦ੍ਦਸ ਮਾਦਿਸਾਨਂ ਸਤਸਹਸ੍ਸਾਨਮ੍ਪਿ ਉਪ੍ਪਨ੍ਨਂ ਸੋਕਸਲ੍ਲਂ ਸਮ੍ਮਾਸਮ੍ਬੁਦ੍ਧੋ ਉਦ੍ਧਰਿਤੁਂ ਪਟਿਬਲੋਤਿ.

ਅਪਰਿਪਕ੍ਕਂ ¶ ਤਾਵਸ੍ਸ ਞਾਣਂ, ਕਤਿਪਾਹਂ ਪਨ ਅਤਿਕ੍ਕਮਿਤ੍ਵਾ ਮਯਿ ਇਨ੍ਦਸਾਲਗੁਹਾਯਂ ਵਿਹਰਨ੍ਤੇ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਮਰਣਭਯਭੀਤੋ ਦ੍ਵੀਸੁ ਦੇਵਲੋਕੇਸੁ ਦੇਵਤਾਹਿ ਸਦ੍ਧਿਂ ਉਪਸਙ੍ਕਮਿਤ੍ਵਾ ਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾ ਉਪੇਕ੍ਖਾਪਞ੍ਹਵਿਸ੍ਸਜ੍ਜਨਾਵਸਾਨੇ ਅਸੀਤਿਯਾ ਦੇਵਤਾਸਹਸ੍ਸੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਹਿਸ੍ਸਤੀਤਿ ਚਿਨ੍ਤੇਤ੍ਵਾ ਓਕਾਸਂ ਨਾਕਾਸਿ.

ਮਮ ¶ ਪੁਬ੍ਬੇਪਿ ਏਕਕਸ੍ਸ ਗਤਤ੍ਤਾ ਸਤ੍ਥਾਰਾ ਓਕਾਸੋ ਨਕਤੋ, ਅਦ੍ਧਾ ਮੇ ਨਤ੍ਥਿ ਮਗ੍ਗਫਲਸ੍ਸ ਉਪਨਿਸ੍ਸਯੋ, ਏਕਸ੍ਸ ਪਨ ਉਪਨਿਸ੍ਸਯੇ ਸਤਿ ਚਕ੍ਕਵਾਲ਼ਪਰਿਯਨ੍ਤਾਯਪਿ ਪਰਿਸਾਯ ਭਗਵਾ ਧਮ੍ਮਂ ਦੇਸੇਤਿਯੇਵ. ਅਵਸ੍ਸਂ ਖੋ ਪਨ ਦ੍ਵੀਸੁ ਦੇਵਲੋਕੇਸੁ ਕਸ੍ਸਚਿ ਦੇਵਸ੍ਸ ਉਪਨਿਸ੍ਸਯੋ ਭਵਿਸ੍ਸਤਿ, ਤਂ ਸਨ੍ਧਾਯ ਸਤ੍ਥਾ ਦਮ੍ਮਂ ਦੇਸੇਸ੍ਸਤਿ. ਤਂ ਸੁਤ੍ਵਾ ਅਹਮ੍ਪਿ ਅਤ੍ਤਨੋ ਦੋਮਨਸ੍ਸਂ ਵੂਪਸਮੇਸ੍ਸਾਮੀਤਿ.

ਦ੍ਵੀਸੁ ¶ ਦੇਵਲੋਕੇਸੁ ਦੇਵਤਾ ਗਹੇਤ੍ਵਾ ਧੁਰੇਨ ਪਹਰਨ੍ਤਸ੍ਸ ਵਿਯ ਸਤ੍ਥਾਰਂ ਉਪਸਙ੍ਕਮਿਤੁਂ ਨਯੁਤ੍ਤਂ, ਅਯਂਪਨ ਪਞ੍ਚਸਿਖੋ ਦਸਬਲਸ੍ਸ ਉਪਟ੍ਠਾਕੋ ¶ ਵਲ੍ਲਭੋ ਇਚ੍ਛਿਤਿਚ੍ਛਿਤਕ੍ਖਣੇ ਗਨ੍ਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਧਮ੍ਮਂ ਸੁਣਾਤਿ, ਇਮਂ ਪੁਰਤੋ ਪੇਸੇਤ੍ਵਾ ਓਕਾਸਂ ਕਾਰੇਤ੍ਵਾ ਇਮਿਨਾ ਕਤੋਕਾਸੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਸ੍ਸਾਮੀਤਿ ਓਕਾਸਕਰਣਤ੍ਥਂ ਆਮਨ੍ਤੇਸਿ.

ਏਵਂ ਮਹਾਰਾਜ ਹੋਤੁ, ਭਦ੍ਦਂ ਤਵ ਯੋ ਤ੍ਵਂ ਮਂ ਏਹਿ ਮਾਰਿਸ ਉਯ੍ਯਾਨ ਕੀਲ਼ਾਦੀਨਿ ਵਾ ਨਟਸਮਜ੍ਜਾਦੀਨਿ ਵਾ ਦਸ੍ਸਨਾਯ ਗਚ੍ਛਾਮਾਤਿ ਅਵਤ੍ਵਾ ਬੁਦ੍ਧਂ ਪਸ੍ਸਿਸ੍ਸਾਮ ਧਮ੍ਮਂ ਸੋਸ੍ਸਾਮਾਤਿ ਵਦਸੀਤਿ ਦਲ਼੍ਹਤਰਂ ਉਪਤ੍ਥਮ੍ਭੇਨ੍ਤੋ ਦੇਵਾਨਮਿਨ੍ਦਸ੍ਸ ਵਚਨਂ ਪਟਿਸ੍ਸੁਤ੍ਵਾ ਅਨੁਚਰਿਯਂ ਸਹਚਰਣਂ ਏਕਤੋ ਗਮਨਂ ਉਪਾਗਮਿ.

ਵਨ੍ਦੇ ¶ ਤੇ ਪਿਤਰਂ ਭਦ੍ਦੇ, ਤਿਮ੍ਬਰੁਂ ਸੂਰਿਯਵਚ੍ਛਸੇ;

ਯੇਨ ਜਾਤਾਸਿ ਕਲ੍ਯਾਣੀ, ਆਨਨ੍ਦਜਨਨੀ ਮਮ.

ਏਵਂ ਵੁਤ੍ਤੇ ਭਗਵਾ ਪਞ੍ਚਸਿਖਂ ਗਨ੍ਧਬ੍ਬਦੇਵਪੁਤ੍ਤਂ ਏਤਦਵੋਚ. ਸਂਸਨ੍ਦਤਿ ਖੋ ਤੇ ਪਞ੍ਚਸਿਖ ਤਨ੍ਤਿਸ੍ਸਰੋ ਗੀਤਸ੍ਸਰੇਨ ਗੀਤਸ੍ਸਰੋ ਚ ਤਨ੍ਤਿਸ੍ਸਰੇਨ, ਨਚ ਪਨ ਤੇ ਪਞ੍ਚਸਿਖ ਤਨ੍ਤਿਸ੍ਸਰੋ ਗੀਤਸ੍ਸਰਂ ਅਤਿਵਤ੍ਤਤਿ ਗੀਤਸ੍ਸਰੋ ਚ ਤਨ੍ਤਿਸ੍ਸਰਂ. ਕਦਾ ਸਂਯੂਲ਼੍ਹਾ ਪਨ ਤੇ ਪਞ੍ਚਸਿਖ ਵ੍ਮਿ ਗਾਥਾ ਬੁਦ੍ਧੂਪਸਞ੍ਹਿਤਾ ਧਮ੍ਮੂਪਸਞ੍ਹਿਤਾ ਸਂਯੂਪਸਞ੍ਹਿਤਾ ਅਰਹਨ੍ਤੂਪਸਞ੍ਹਿਤਾ ਕਾਮੂਪਸਞ੍ਹਿਤਾਤਿ –

ਭਗਵਤਾ ¶ ਪਞ੍ਚਸਿਖਸ੍ਸ ਓਕਾਸੋ ਨਕਤੋਤਿ ਦੇਵਤਾ ਗਹੇਤ੍ਵਾ ਤਤੋਵ ਪਟਿਨਿਵਤ੍ਤੇਯ੍ਯ. ਤਤੋ ਮਹਾਜਾਨਿਯੋ ਭਵੇਯ੍ਯ, ਵਣ੍ਣੇ ਪਨ ਕਥਿਤੇ ਕਤੋ ਭਗਵਤਾ ਪਞ੍ਚਸਿਖਸ੍ਸ ਓਕਾਸੋਤਿ ਦੇਵਤਾਹਿ ਸਦ੍ਧਿਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਾਵਸਾਨੇ ਅਸੀਤਿਯਾ ਦੇਵਤਾਸਹਸ੍ਸੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਹਿਸ੍ਸਤੀਤਿ ਞਤ੍ਵਾ ਵਣ੍ਣਂ ਕਥੇਸਿ.

ਅਥ ¶ ਖੋ ਭਗਵਾ ਸਕ੍ਕਂ ਦੇਵਾਨਮਿਨ੍ਦਂ ਏਤਦਵੋਚ ‘‘ਅਚ੍ਛਰਿਯਮਿਦਂ ਆਯਸ੍ਮਤੋ ਕੋਸਿਯਸ੍ਸ, ਅਬ੍ਭੁਤਮਿਦਂ ਆਯਸ੍ਮਤੋ ਕੋਸਿਯਸ੍ਸ ਤਾਵ ਬਹੁਕਿਚ੍ਚਸ੍ਸ ਬਹੁਕਰਣੀਯਸ੍ਸ ਯਦਿਦਂ ਇਧਾਗਮਨ’’ਨ੍ਤਿ.

ਚਿਰਪਟਿਕਾਹਂ ਭਨ੍ਤੇ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਕਾਮੋ, ਅਪਿ ਚ ਦੇਵਾਨਂ ਤਾਵਤਿਂਸਾਨਂ ਕੇਹਿਚਿ ਕੇਹਿਚਿ ਕਿਚ੍ਚਕਰਣੀਯੇਹਿ ਬ੍ਯਾਵਟੋ, ਏਵਾਹਂ ਨਾਸਕ੍ਖਿਂ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮਿਤੁਂ.

ਤੇ ¶ ‘‘ਤਵ ਸਨ੍ਤਕਾ, ਮਮ ਸਨ੍ਤਕਾ’’ਤਿ ਨਿਚ੍ਛੇਤੁਂ ਅਸਕ੍ਕੋਨ੍ਤਾ ਅਡ੍ਡਂ ਕਰੋਨ੍ਤਿ, ਸਕ੍ਕਂ ਦੇਵਰਾਜਾਨਂ ਪੁਚ੍ਛਨ੍ਤਿ, ਸੋ ‘‘ਯਸ੍ਸ ਵਿਮਾਨਂ ਆਸਨ੍ਨਤਰਂ, ਤਸ੍ਸ ਸਨ੍ਤਕਾ’’ਤਿ ਵਦਤਿ.

ਯਸ੍ਸ ¶ ਵਿਮਾਨਂ ਓਲੋਕੇਨ੍ਤੀ ਠਿਤਾ, ਤਸ੍ਸ ਸਨ੍ਤਕਾਤਿ ਵਦਤਿ.

ਇਧੇਵ ¶ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਗੋਪਿਕਾ ਨਾਮ ਸਕ੍ਯਧੀਤਾ ਅਹੋਸਿ ਬੁਦ੍ਧੇ ਪਸਨ੍ਨਾ ਧਮ੍ਮੇ ਪਸਨ੍ਨਾ ਸਙ੍ਘੇ ਪਸਨ੍ਨਾ ਸੀਲੇਸੁ ਪਰਿਪੂਰਕਾਰਿਨੀ, ਸਾ ਇਤ੍ਥਿਤ੍ਤਂ ਵਿਰਾਜੇਤ੍ਵਾ ਪੁਰਿਸਤ੍ਤਂ ਭਾਵੇਤ੍ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਨ੍ਨਾ.

ਤਸ੍ਸ ¶ ਧਮ੍ਮਸ੍ਸ ਪਤ੍ਤਿਯਾ, ਆਗਤਮ੍ਹਾਸਿ ਮਾਰਿਸ;

ਕਤਾਵਕਾਸਾ ਭਗਵਤਾ, ਪਞ੍ਹਂ ਪੁਚ੍ਛੇਮੁ ਮਾਰਿਸ.

ਪੁਚ੍ਛ ਵਾਸਵ ਮਂ ਪਞ੍ਹਂ, ਯਂ ਕਿਞ੍ਚਿ ਮਨਸਿਚ੍ਛਸਿ;

ਤਸ੍ਸ ਤਸ੍ਸੇਵ ਪਞ੍ਹਸ੍ਸ, ਅਹਂ ਅਨ੍ਤਂ ਕਰੋਮਿ ਤੇ.

ਕਿਂ ¶ ਸਂਯੋਜਨਾ ਨੁ ਖੋ ਮਾਰਿਸ ਦੇਵਾ ਮਨੁਸ੍ਸਾ ਅਸੁਰਾ ਨਾਗਾ ਗਨ੍ਧਬ੍ਬਾ ਯੇ ਚਞ੍ਞੇ ਸਨ੍ਤਿ ਪੁਥੁਕਾਯਾ, ਤੇ ਅਵੇਰਾ ਅਦਣ੍ਡਾ ਅਸਪਤ੍ਤਾ ਅਬ੍ਯਾਪਜ੍ਜਾ ਵਿਹਰੇਮੁ ਅਵੇਰਿਨੋਤਿ ਇਤਿ ਚ ਨੇਸਂ ਹੋਤਿ. ਅਥ ਚ ਪਨ ਸਵੇਰਾ ਸਦਣ੍ਡਾ ਸਸਪਤ੍ਤਾ ਸਬ੍ਯਾਪਜ੍ਜਾ ਵਿਹਰਨ੍ਤਿ ਸਵੇਰਿਨੋਤਿ.

ਇਸ੍ਸਾਮਚ੍ਛਰਿਯਸਂਯੋਜਨਾ ¶ ਖੋ ਦੇਵਾਨਮਿਨ੍ਦ ਦੇਵਾ ਮਨੁਸ੍ਸਾ ਅਸੁਰਾ ਨਾਗਾ ਗਨ੍ਧਬ੍ਬਾ ਯੇਚਞ੍ਞੇ ਸਨ੍ਤਿ ਪੁਥੁਕਾਯਾ, ਤੇ ਅਵੇਰਾ ਅਦਣ੍ਡਾ ਅਸਪਤ੍ਤਾ ਅਬ੍ਯਾਪਜ੍ਜਾ ਵਿਹਰੇਮੁ ਅਵੇਰਿਨੋਤਿ ਇਤਿ ਚ ਨੇਸਂਹੋਤਿ, ਅਥ ਚ ਪਨ ਸਵੇਰਾ ਸਦਣ੍ਡਾ ਸਸਪਤ੍ਤਾ ਸਬ੍ਯਾਪਜ੍ਜਾ ਵਿਹਰਨ੍ਤਿ ਸਵੇਰਿਨੋਤਿ.

ਇਸ੍ਸਤੀਤਿ ¶ ਇਸ੍ਸਾ, ਸਾ ਪਰਸਮ੍ਪਤ੍ਤੀਨਂ ਉਸੂਯਨਲਕ੍ਖਣਾ, ਤਤ੍ਥੇਵ ਅਨਭਿਰਤਿਰਸਾ, ਤਤੋ ਵਿਮੁਖਭਾਵਪਚ੍ਚੁਪਟ੍ਠਾਨਾ, ਪਰਸਮ੍ਪਤ੍ਤਿ ਪਦਟ੍ਠਾਨਾ, ਸਂਯੋਜਨਨ੍ਤਿ ਦਟ੍ਠਬ੍ਬਾ.

ਮਚ੍ਛੇਰਭਾਵੋ ¶ ਮਚ੍ਛਰਿਯਂ, ਤਂਲਦ੍ਧਾਨਂ ਵਾ ਲਭਿਤਬ੍ਬਾਨਂ ਵਾ ਅਤ੍ਤਨੋ ਸਮ੍ਪਤ੍ਤੀਨਂ ਨਿਗੂਹਨਲਕ੍ਖਣਂ, ਤਾਸਂਯੇਵ ਪਰੇਹਿ ਸਾਧਾਰਣਭਾਵ ਅਕ੍ਖਮਨਰਸਂ, ਸਙ੍ਕੋਚਨਪਚ੍ਚੁਪਟ੍ਠਾਨਂ, ਕਟੁਕਞ੍ਚੁਕਤਾ ਪਚ੍ਚੁਪਟ੍ਠਾਨਂ ਵਾ, ਅਤ੍ਤਸਮ੍ਪਤ੍ਤਿਪਦਟ੍ਠਾਨਂ, ਚੇਤਸੋ ਵਿਰੂਪਭਾਵੋਤਿ ਦਟ੍ਠਬ੍ਬਂ.

ਕਿਂ ¶ ਵਣ੍ਣੋ ਏਸੋਤਿ ਤਂ ਤਂ ਦੋਸਂ ਵਦਨ੍ਤੋ ਪਰਿਯਤ੍ਤਿਞ੍ਚ ਕਸ੍ਸਚਿ ਕਿਞ੍ਚਿ ਅਦੇਨ੍ਤੋ ਦੁਬ੍ਬਣ੍ਣੋ ਚੇਵ ਏਲ਼ਮੂਗੋਚ ਹੋਤਿ.

ਯਾਵ ¶ ਤਂ ਨਪ੍ਪਹੀਯਤਿ, ਤਾਵ ਦੇਵਮਨੁਸ੍ਸਾ ਅਵੇਰਤਾਦੀਨਿ ਪਤ੍ਥਯਨ੍ਤਾਪਿ ਵੇਰਾਦੀਨਿ ਨਪਰਿਮੁਚ੍ਚਨ੍ਤਿਯੇਵ.

ਅਥ ¶ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਨ੍ਤਂ ਉਤ੍ਤਰਿ ਪਞ੍ਹਂ ਅਪੁਚ੍ਛਿ–

ਇਸ੍ਸਾਮਚ੍ਛਰਿਯਂ ਪਨ ਮਾਰਿਸ ਕਿਂ ਨਿਦਾਨਂ ਕਿਂ ਸਮੁਦਯਂ ਕਿਂ ਜਾਤਿਕਂ ਕਿਂ ਪਭਵਂ, ਕਿਸ੍ਮਿਂ ਸਤਿ ਇਸ੍ਸਾਮਚ੍ਛਰਿਯਂ ਹੋਤਿ, ਕਿਸ੍ਮਿਂ ਅਸਤਿ ਇਸ੍ਸਾਮਚ੍ਛਰਿਯਂ ਨ ਹੋਤੀਤਿ.

ਇਸ੍ਸਾਮਚ੍ਛਰਿਯਂ ¶ ਖੋ ਦੇਵਾਨਮਿਨ੍ਦ ਪਿਯਾਪ੍ਪਿਯਨਿਦਾਨਂ ਪਿਯਾਪ੍ਪਿਯਸਮੁਦਯਂ ਪਿਯਾਪ੍ਪਿਯਜਾਤਿਕਂ ਪਿਯਾਪ੍ਪਿਯਪਭਵਂ, ਪਿਯਾਪ੍ਪਿਯੇ ਸਤਿ ਇਸ੍ਸਾਮਚ੍ਛਰਿਯਂ ਹੋਤਿ, ਪਿਯਾਪ੍ਪਿਯੇ ਅਸਤਿ ਇਸ੍ਸਾਮਚ੍ਛਰਿਯਂ ਨਹੋਤੀਤਿ.

ਨ ¶ ਸਕ੍ਕਾ ਦਾਤੁਂ, ਕਿਲਮਿਸ੍ਸਤਿ ਵਾ ਉਕ੍ਕਣ੍ਠਿਸ੍ਸਤਿ ਵਾਤਿਆਦੀਨਿ ਵਤ੍ਵਾ ਮਚ੍ਛਰਿਯਂ ਕਰੋਤਿ.

ਅਹੋ ¶ ਵਤਸ੍ਸ ਏਵਰੂਪਂ ਨ ਭਵੇਯ੍ਯਾਤਿ ਇਸ੍ਸਂ ਕਰੋਤਿ.

ਮਯਮ੍ਪੇਤਂ ਮਮਾਯਨ੍ਤਾ ਨ ਪਰਿਭੁਞ੍ਜਾਮ, ਨ ਸਕ੍ਕਾ ਦਾਤੁਨ੍ਤਿ ਮਚ੍ਛਰਿਯ ਕਰੋਤਿ.

ਠਪੇਤ੍ਵਾ ¶ ਮਂ ਕੋ ਅਞ੍ਞੋ ਏਵਰੂਪਸ੍ਸ ਲਾਭੀਤਿ ਇਸ੍ਸਂ ਵਾ ਕਰੋਤਿ, ਯਾਚਿਤੋ ਤਾਵਕਾਲਿਕਮ੍ਪਿ ਅਦਦਮਾਨੋ ਮਚ੍ਛਰਿਯਂ ਵਾ ਕਰੋਤਿ.

ਪਿਯਾਪ੍ਪਿਯਂ ਖੋ ਪਨ ਮਾਰਿਸ ਕਿਂਨਿਦਾਨਂ ਕਿਂਸਮੁਦਯਂ ਕਿਂਜਾਤਿਕਂ ਕਿਂਪਭਵਂ, ਕਿਸ੍ਮਿਂ ਸਤਿ ਪਿਯਾਪ੍ਪਿਯਂ ਹੋਤਿ, ਕਿਸ੍ਮਿਂ ਅਸਤਿ ਪਿਯਾਪ੍ਪਿਯਂ ਨ ਹੋਤੀਤਿ.

ਪਿਯਾਪ੍ਪਿਯਂ ¶ ਖੋ ਦੇਵਾਨਮਿਨ੍ਦ ਛਨ੍ਦਨਿਦਾਨਂ ਛਨ੍ਦਸਮੁਦਯਂ ਛਨ੍ਦਜਾਤਿਕਂ ਛਨ੍ਦਪਭਵਂ, ਛਨ੍ਦੇ ਸਤਿ ਪਿਯਾਪ੍ਪਿਯਂ ਹੋਤਿ, ਛਨ੍ਦੇ ਅਸਤਿ ਪਿਯਾਪ੍ਪਿਯਂ ਨ ਹੋਤੀਤਿ.

ਛਨ੍ਦਨਿਦਾਨਨ੍ਤਿਏਤ੍ਥ ¶ ਪਰਿਯੇਸਨਛਨ੍ਦੋ, ਪਟਿਲਾਭਛਨ੍ਦੋ, ਪਰਿਭੋਗ ਛਨ੍ਦੋ, ਸਨ੍ਨਿਧਿਛਨ੍ਦੋ, ਵਿਸ੍ਸਜ੍ਜਨਛਨ੍ਦੋਤਿ ਪਞ੍ਚਵਿਧੋ ਛਨ੍ਦੋ.

ਇਮੇ ¶ ਮਂ ਰਕ੍ਖਿਸ੍ਸਨ੍ਤਿ ਗੋਪਿਸ੍ਸਨ੍ਤਿ ਮਮਾਯਿਸ੍ਸਨ੍ਤਿ ਸਮ੍ਪਰਿਵਾਰਯਿਸ੍ਸਨ੍ਤੀਤਿ.

ਛਨ੍ਦੋ ਖੋ ਪਨ ਮਾਰਿਸ ਕਿਂਨਿਦਾਨੋ ਕਿਂਸਮੁਦਯੋ ਕਿਂਜਾਤਿਕੋ ਕਿਂਪਭਵੋ, ਕਿਸ੍ਮਿਂ ਸਤਿ ਛਨ੍ਦੋ ਹੋਤਿ, ਕਿਸ੍ਮਿਂ ਅਸਤਿ ਛਨ੍ਦੋ ਨਹੋਤੀਤਿ. ਛਨ੍ਦੋ ਖੋ ਦੇਵਾਨਮਿਨ੍ਦ ਵਿਤਕ੍ਕਨਿਦਾਨੋ ਵਿਤਕ੍ਕਸਮੁਦਯੋ ਵਿਤਕ੍ਕਜਾਤਿਕੋ ਵਿਤਕ੍ਕਪਭਵੋ, ਵਿਤਕ੍ਕੇ ਸਤਿ ਛਨ੍ਦੋ ਹੋਤਿ, ਵਿਤਕ੍ਕੇ ਅਸਤਿ ਛਨ੍ਦੋ ਨ ਹੋਤੀਤਿ.

ਏਤ੍ਤਕਂ ¶ ਰੂਪਸ੍ਸ ਭਵਿਸ੍ਸਤਿ, ਏਤ੍ਤਕਂ ਸਦ੍ਦਸ੍ਸ, ਏਤ੍ਤਕਂ ਗਨ੍ਧਸ੍ਸ, ਏਤ੍ਤਕਂ ਰਸਸ੍ਸ, ਏਤ੍ਤਕਂ ਫੋਟ੍ਠਬ੍ਬਸ੍ਸ ਭਵਿਸ੍ਸਤਿ, ਏਤ੍ਤਕਂ ਮਯ੍ਹਂ ਭਵਿਸ੍ਸਤਿ, ਏਤ੍ਤਕਂ ਪਰਸ੍ਸ ਭਵਿਸ੍ਸਤਿ, ਏਤ੍ਤਕਂ ਨਿਦਹਿਸ੍ਸਾਮਿ, ਏਤ੍ਤਕਂ ਪਰਸ੍ਸ ਦਸ੍ਸਾਮੀਤਿ ਵਵਤ੍ਥਾਨਂ ਵਿਤਕ੍ਕਵਿਨਿਚ੍ਛਯੇਨ ਹੋਤਿ. ਤੇਨਾਹ ਛਨ੍ਦੋ ਖੋ ਦੇਵਾਨਮਿਨ੍ਦ ਵਿਤਕ੍ਕਨਿਦਾਨੋਤਿ.

ਕਥਂ ¶ ਪਟਿਪਨ੍ਨੋ ਪਨ ਮਾਰਿਸ ਭਿਕ੍ਖੁ ਪਪਞ੍ਚਸਞ੍ਞਾਸਙ੍ਖਾਨਿਰੋਧਸਾਰੁਪ੍ਪਗਾਮਿਨਿਂ ਪਟਿਪਦਂ ਪਟਿਪਨ੍ਨੋ ਹੋਤੀਤਿ.

ਸੋਮਨਸ੍ਸਂਪਾਹਂ ¶ ਦੇਵਾਨਮਿਨ੍ਦ ਦੁਵਿਧੇਨ ਵਦਾਮਿ ਸੇਵਿਤਬ੍ਬਂਪਿ ਅਸੇਵਿਤਬ੍ਬਂਪਿ. ਦੋਮਨਸ੍ਸਂਪਾਹਂ ਦੇਵਾਨਮਿਨ੍ਦ ਦੁਵਿਧੇਨ ਵਦਾਮਿ ਸੇਵਿਤਬ੍ਬਂਪਿ ਅਸੇਵਿਤਬ੍ਬਂਪਿ. ਉਪੇਕ੍ਖਂਪਾਹਂ ਦੇਵਾਨਮਿਨ੍ਦ ਦੁਵਿਧੇਨ ਵਦਾਮਿ ਸੇਵਿਤਬ੍ਬਂਪਿ ਅਸੇਵਿਤਬ੍ਬਂਪਿ.

ਕਿਂ ¶ ਪਨ ਭਗਵਤਾ ਪੁਚ੍ਛਿਤਂ ਕਥਿਤਂ ਅਪੁਚ੍ਛਿਤਂ, ਸਾਨੁਸਨ੍ਧਿਕਂ ਅਨਨੁਸਨ੍ਧਿਕਨ੍ਤਿ.

ਪੁਚ੍ਛਿਤਮੇਵ ਕਥਿਤਂ ਨੋ ਅਪੁਚ੍ਛਿਤਂ. ਸਾਨੁਸਨ੍ਧਿਕਮੇਵ ਨੋ ਅਨਨੁਸਨ੍ਧਿਕਂ.

ਇਮੇ ¶ ਪਞ੍ਚਕ੍ਖਨ੍ਧਾ ਕਿਂ ਹੇਤੁਕਾਤਿ ਉਪਪਰਿਕ੍ਖਨ੍ਧੋ ਅਵਿਜ੍ਜਾਦਿਹੇਤੁਕਾਤਿ ਪਸ੍ਸਤਿ.

ਅਹੋਸੁਖਂ ¶ ਅਹੋਸੁਖਨ੍ਤਿ ਵਾਚਂ ਨਿਚ੍ਛਾਰਯਮਾਨਵਸੇਨ ਉਪ੍ਪਜ੍ਜਤਿ.

ਅਹੋਦੁਕ੍ਖਂ ¶ ਅਹੋਦੁਕ੍ਖਨ੍ਤਿ ਵਿਪ੍ਪਲਾਪਯਮਾਨਮੇਵ ਉਪ੍ਪਜ੍ਜਤਿ.

‘‘ਸੋਮਨਸ੍ਸਂਪਾਹਂ ¶ ਦੇਵਾਨਮਿਨ੍ਦ ਦੁਵਿਧੇਨ ਵਦਾਮਿ ਸੇਵਿਤਬ੍ਬਂਪਿ ਅਸੇਵਿਤਬ੍ਬਂਪੀ’’ਤਿ ਇਤਿਖੋ ਪਨੇਤਂ ਵੁਤ੍ਤਂ, ਕਿਞ੍ਚੇਤਂ ਪਟਿਚ੍ਚ ਵੁਤ੍ਤਂ. ਤਤ੍ਥ ਯਂ ਜਞ੍ਞਾ ਸੋਮਨਸ੍ਸਂ ‘‘ਇਮਂ ਖੋ ਮੇ ਸੋਮਨਸ੍ਸਂ ਸੇਵਤੋ ਅਕੁਸਲਾ ਧਮ੍ਮਾ ਅਭਿਵਡ੍ਢਨ੍ਤਿ, ਕੁਸਲਾ ਧਮ੍ਮਾ ਪਰਿਹਾਯਨ੍ਤੀ’’ਤਿ, ਏਵਰੂਪਂ ਸੋਮਨਸ੍ਸਂ ਨ ¶ ਸੇਵਿਤਬ੍ਬਂ. ਤਤ੍ਥ ਯਂ ਜਞ੍ਞਾ ਸੋਮਨਸ੍ਸਂ ‘‘ਇਮਂ ਖੋ ਮੇ ਸੋਮਨਸ੍ਸਂ ਸੇਵਤੋ ਅਕੁਸਲਾ ਧਮ੍ਮਾ ਪਰਿਹਾਯਨ੍ਤਿ, ਕੁਸਲਾ ਧਮ੍ਮਾ ਅਭਿਵਡ੍ਢਨ੍ਤੀ’’ਤਿ, ਏਵਰੂਪਂ ਸੋਮਨਸ੍ਸਂ ਸੇਵਿਤਬ੍ਬਂ. ਤਤ੍ਥ ਯਂ ਚੇ ਸਵਿਤਕ੍ਕਂ ਸਵਿਚਾਰਂ, ਯਂਚੇ ਅਵਿਤਕ੍ਕਂ ਅਵਿਚਾਰਂ, ਯੇ ਅਵਿਤਕ੍ਕੇ ਅਵਿਚਾਰੇ, ਤੇ ਪਣੀਤਤਰੇ. ‘‘ਸੋਮਨਸ੍ਸਂਪਾਹਂ ਦੇਵਾਨਮਿਨ੍ਦ ਦੁਵਿਧੇਨ ਵਦਾਮਿ ਸੇਵਿਤਬ੍ਬਂਪਿ ਅਸੇਵਿਤਬ੍ਬਂਪੀ’’ਤਿ ਇਤਿ ਯਂ ਤਂ ਵੁਤ੍ਤਂ, ਇਦਮੇਤਂ ਪਟਿਚ੍ਚ ਵੁਤ੍ਤਂ.

ਨ ¶ ਲਦ੍ਧਂ ਵਤ ਮੇ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਤੁਨ੍ਤਿ ਆਵਜ੍ਜਤੋ ਦੋਮਨਸ੍ਸਂ ਉਪ੍ਪਜ੍ਜਤਿ, ਅਸ੍ਸੁਧਾਰਾ ਪਵਤ੍ਤਨ੍ਤਿ ਗਾਮਨ੍ਤ ਪਬ੍ਭਾਰਵਾਸੀ ਮਹਾਸੀਵਤ੍ਥੇਰਸ੍ਸ ਵਿਯ.

ਅਮ੍ਹਾਕਂ ¶ ਆਚਰਿਯੋ ਅਞ੍ਞੇਸਂ ਅਵਸ੍ਸਯੋ ਹੋਤਿ, ਅਤ੍ਤਨੋ ਭਵਿਤੁਂ ਨ ਸਕ੍ਕੋਤਿ, ਓਵਾਦਮਸ੍ਸ ਦਸ੍ਸਾਮੀਤਿ ਆਕਾਸੇਨ ਗਨ੍ਤ੍ਵਾ ਵਿਹਾਰਸਮੀਪੇ ਓਤਰਿਤ੍ਵਾ ਦਿਵਾਟ੍ਠਾਨੇ ਨਿਸਿਨ੍ਨਂ ਆਚਰਿਯਂ ਉਪਸਙ੍ਕਮਿਤ੍ਵਾ ਵਤ੍ਤਂ ਦਸ੍ਸੇਤ੍ਵਾ ਏਕਮਨ੍ਤਂ ਨਿਸੀਦਿ.

ਕਿਂ ਕਾਰਣਾ ਆਗਤੋਸਿ ਪਿਣ੍ਡਪਾਤਿਕਾਤਿ ਆਹ.

ਨ ¶ ਤੇ ਤੁਮ੍ਹਾਕਂ ਅਨੁਮੋਦਨਾਯ ਅਤ੍ਥੋਤਿ ਆਕਾਸੇ ਉਪ੍ਪਤਿਤ੍ਵਾ ਅਗਮਾਸਿ.

ਇਮਸ੍ਸ ¶ ਭਿਕ੍ਖੁਨੋ ਪਰਿਯਤ੍ਤਿਯਾ ਕਮ੍ਮਂ ਨਤ੍ਥਿ, ਮਯ੍ਹਂ ਪਨ ਅਙ੍ਕੁਸਕੋ ਭਵਿਸ੍ਸਾਮੀਤਿ ਆਗਤੋਤਿ ਞਤ੍ਵਾ ਇਦਾਨਿ ਓਕਾਸੋ ਨ ਭਵਿਸ੍ਸਤਿ, ਪਚ੍ਚੂਸਕਾਲੇ ਗਮਿਸ੍ਸਾਮੀਤਿ ਪਤ੍ਤਚੀਵਰਂ ਸਮੀਪੇ ਕਤ੍ਵਾ ਸਬ੍ਬਂ ਦਿਵਸਭਾਗਂ ਪਠਮਯਾਮ ਮਜ੍ਝਿਮਯਾਮਞ੍ਚ ਧਮ੍ਮਂ ਵਾਚੇਤ੍ਵਾ ਪਚ੍ਛਿਮਯਾਮੇ ਏਕਸ੍ਮਿਂ ਥੇਰੇ ਉਦ੍ਦੇਸਂ ਗਹੇਤ੍ਵਾ ਨਿਕ੍ਖਨ੍ਤੇ ਪਤ੍ਤਚੀਵਰਂ ਗਹੇਤ੍ਵਾ ਤੇਨੇਵ ਸਦ੍ਧਿਂ ਨਿਕ੍ਖਨ੍ਤੋ.

ਤਤੋ ¶ ‘‘ਨ ਮਞ੍ਚੇ ਮਯ੍ਹਂ ਚਤੂਹਿ ਇਰਿਯਾਪਥੇਹਿ ਮਗ੍ਗਫਲਂ ਉਪ੍ਪਜ੍ਜਿਸ੍ਸਤਿ ਅਰਹਤ੍ਤਂ ਅਪਤ੍ਵਾ ਨੇਵ ਮਞ੍ਚੇ ਪਿਟ੍ਠਿਂ ਪਸਾਰੇਸ੍ਸਾਮਿ, ਨ ਪਾਦੇ ਧੋਵਿਸ੍ਸਾਮੀਤਿ ਮਞ੍ਚਂ ਉਸ੍ਸਾਪੇਤ੍ਵਾ ਠਪੇਸਿ.

ਇਦਾਨਿ ¶ ਮੇ ਤਿਂਸਵਸ੍ਸਾਨਿ ਸਮਣਧਮ੍ਮਂ ਕਰੋਨ੍ਤਸ੍ਸ, ਨਾਸਕ੍ਖਿਂ ਅਰਹਤ੍ਤਂ ਪਾਪੁਣਿਤੁਂ, ਅਦ੍ਧਾ ਮੇ ਇਮਸ੍ਮਿਂ ਅਤ੍ਤਭਾਵੇ ਮਗ੍ਗੋਵਾ ਫਲਂਵਾ ਨਤ੍ਥਿ, ਨ ਮੇ ਲਦ੍ਧਂ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਤੁਨ੍ਤਿ ਚਿਨ੍ਤੇਸਿ.

ਭੋ ¶ ਮਹਾਸੀਵਤ੍ਥੇਰ ਦੇਵਤਾਪਿ ਤਯਾ ਸਦ੍ਧਿਂ ਕੇਲ਼ਿਂ ਕਰੋਨ੍ਤਿ, ਅਨੁਚ੍ਛਵਿਕਂ ਨੁ ਖੋ ਤੇ ਏਤਨ੍ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਗ੍ਗਹੇਸਿ. ਸੋ ਇਦਾਨਿ ਨਿਪਜ੍ਜਿਸ੍ਸਾਮੀਤਿ ਸੇਨਾਸਨਂ ਪਟਿਜਗ੍ਗਿਤ੍ਵਾ ਮਞ੍ਚਕਂ ਪਞ੍ਞਪੇਤ੍ਵਾ ਉਦਕਟ੍ਠਾਨੇ ਉਦਕਂ ਪਚ੍ਚੁਪਟ੍ਠਪੇਤ੍ਵਾ ਪਾਦੇ ਧੋਵਿਸ੍ਸਾਮੀਤਿ ਸੋਪਾਨਫਲਕੇ ਨਿਸੀਦਿ.

ਅਪੇਥ ¶ ਭਨ੍ਤੇ ਮਾਤੁਗਾਮੋਤਿ ਓਕਾਸਂ ਕਾਰੇਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪੁਰਤੋ ਉਕ੍ਕੁਟਿਕੋ ਨਿਸੀਦਿਤ੍ਵਾ ਪਾਦੇ ਧੋਵਿਸ੍ਸਾਮੀਤਿ ਆਹ.

ਧਮ੍ਮਦਾਯਾਦਾ ¶ ਮੇ ਭਿਕ੍ਖਵੇ ਭਵਥ, ਮਾ ਆਮਿਸਦਾਯਾਦਾ, ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ, ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾਤਿ. ਤੁਮ੍ਹੇ ਚ ਭਿਕ੍ਖਵੇ ਆਮਿਸਦਾਯਾਦਾ ਭਵੇਯ੍ਯਾਥ, ਨੋ ਧਮ੍ਮਦਾਯਾਦਾ. ਤੁਮ੍ਹੇਪਿ ਤੇਨ ਆਦਿਯਾ ਭਵੇਯ੍ਯਾਥ, ਆਮਿਸ ਦਾਯਾਦਾ ਸਤ੍ਥੁਸਾਵਕਾ ਵਿਹਰਨ੍ਤਿ, ਨੋ ਧਮ੍ਮਦਾਯਾਦਾਤਿ. ਅਹਮ੍ਪਿਤੇਨ ਆਦਿਯੋ ਭਵੇਯ੍ਯਂ ਆਮਿਸਦਾਯਾਦਾ ਸਤ੍ਥੁ ਸਾਵਕਾ ਵਿਹਰਨ੍ਤਿ, ਨੋ ਧਮ੍ਮਦਾਯਾਦਾਤਿ. ਤੁਮ੍ਹੇ ਚ ਮੇ ਭਿਕ੍ਖਵੇ ਧਮ੍ਮਦਾਯਾਦਾ ਭਵੇਯ੍ਯਾਥ ਨੋ ਆਮਿਸਦਾਯਾਦਾ. ਤੁਮ੍ਹੇਪਿ ਤੇਨ ਆਦਿਯਾ ਭਵੇਯ੍ਯਾਥ ਧਮ੍ਮਦਾਯਾਦਾ ਸਤ੍ਥੁ ਸਾਵਕਾ ਵਿਹਰਨ੍ਤਿ, ਨੋ ਆਮਿਸਦਾਯਾਦਾਤਿ. ਅਹਮ੍ਪਿ ਤੇਨ ਨ ਆਦਿਯੋ ਭਵੇਯ੍ਯਂ. ਧਮ੍ਮਦਾਯਾਦਾ ਸਤ੍ਥੁ ਸਾਵਕਾ ਵਿਹਰਨ੍ਤਿ, ਨੋ ਆਮਿਸਦਾਯਾਦਾਤਿ. ਤਸ੍ਮਾਤਿਹ ਮੇ ਭਿਕ੍ਖਵੇ ਧਮ੍ਮਦਾਯਾਦਾ ਭਵਥ, ਮਾ ਆਮਿਸਦਾਯਾਦਾ, ਅਤ੍ਥਿਮੇ ਤੁਮ੍ਹੇਸੁ ਅਨੁਕਮ੍ਪਾ, ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾਤਿ.

ਕਹਂ ¶ ਬੁਦ੍ਧੋ ਕਹਂ ਭਗਵਾ ਕਹਂ ਦੇਵਦੇਵੋ ਨਰਾਸਭੋ ਪੁਰਿਸਸੀਹੋਤਿ ਭਗਵਨ੍ਤਂ ਪਰਿਯੇਸਨ੍ਤਿ.

ਵੁਤ੍ਤਮ੍ਪਿਚੇਤਂ ¶ ‘‘ਤੇਨ ਖੋ ਪਨ ਸਮਯੇਨ ਭਗਵਾ ਸਕ੍ਕਤੋ ਹੋਤਿ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਲਾਭੀ ਚੀਵਰ ਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨਂ, ਭਿਕ੍ਖੁਸਙ੍ਘੋਪਿ ਖੋ ਸਕ੍ਕਤੋ ਹੋਤਿ…ਪੇ… ਪਰਿਕ੍ਖਾਰਾਨ’’ਨ੍ਤਿ.

ਯਾਵਤਾ ਖੋ ਚੁਨ੍ਦ ਏਤਰਹਿ ਸਙ੍ਘੋ ਵਾ ਗਣੋ ਵਾ ਲੋਕੇ ਉਪ੍ਪਨ੍ਨੋ, ਨਾਹਂ ਚੁਨ੍ਦ ਅਞ੍ਞਂ ਏਕਸਙ੍ਘਮ੍ਪਿ ਸਮਨੁਪਸ੍ਸਾਮਿ, ਏਵਂ ਲਾਭਗ੍ਗ ਯਸਗ੍ਗਪਤ੍ਤਂ, ਯਥਰਿਵ ਚੁਨ੍ਦ ਭਿਕ੍ਖੁਸਙ੍ਘੋਤਿ.

ਅਮ੍ਹਾਕਂ ¶ ਆਚਰਿਯਸ੍ਸ ਦੇਥ, ਉਪਜ੍ਝਾਯਸ੍ਸ ਦੇਥਾਤਿ ਉਚ੍ਚਾਸਦ੍ਦ ਮਹਾਸਦ੍ਦਂ ਕਰੋਨ੍ਤਿ. ਸਾ ਚ ਨੇਸਂ ਪਵਤ੍ਤਿ ਭਗਵਤੋਪਿ ਪਾਕਟਾ ਅਹੋਸਿ. ਤਤੋ ਭਗਵਾ ਅਨਨੁਚ੍ਛਵਿਕਨ੍ਤਿ ਧਮ੍ਮਸਂਵੇਗਂ ਉਪ੍ਪਾਦੇਤ੍ਵਾ ਚਿਨ੍ਤੇਸਿ.

ਪਚ੍ਚਯਾ ਅਕਪ੍ਪਿਯਾਤਿ ਨ ਸਕ੍ਕਾ ਸਿਕ੍ਖਾਪਦਂ ਪਞ੍ਞਪੇਤੁਂ. ਪਚ੍ਚਯਪਟਿਬਦ੍ਧਾ ਹਿ ਕੁਲਪੁਤ੍ਤਾਨਂ ਸਮਣਧਮ੍ਮਵੁਤ੍ਤਿ. ਹਨ੍ਦਾਹਂ ਧਮ੍ਮਦਾਯਾਦਪਟਿਪਦਂ ਦੇਸੇਮਿ.

ਸਾ ¶ ਸਿਕ੍ਖਾਕਾਮਾਨਂ ਕੁਲਪੁਤ੍ਤਾਨਂ ਸਿਕ੍ਖਾਪਦਪਞ੍ਞਤ੍ਤਿ ਵਿਯ ਭਵਿਸ੍ਸਤਿ ਨਗਰਦ੍ਵਾਰੇ ਠਪਿਤਸਬ੍ਬਕਾਯਿਕਆਦਾਸੋ ਵਿਯ ਚ, ਯਥਾ ਹਿ ਨਗਰ ਦ੍ਵਾਰੇ ਠਪਿਤੇ ਸਬ੍ਬਕਾਯਿਕੇ ਆਦਾਸੇ ਚਤ੍ਤਾਰੋ ਵਣ੍ਣਾ ਅਤ੍ਤਨੋ ਛਾਯਂ ਦਿਸ੍ਵਾ ਵਜ੍ਜਂ ਪਹਾਯ ਨਿਦ੍ਦੋਸਾ ਹੋਨ੍ਤਿ.

ਸੋ ¶ ਹਿ ਬ੍ਰਾਹ੍ਮਣ ਭਗਵਾ ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ ਉਪ੍ਪਾਦੇਤਾ, ਅਸਞ੍ਜਾਤਸ੍ਸ ਮਗ੍ਗਸ੍ਸ ਸਞ੍ਜਨੇਤਾ, ਅਨਕ੍ਖਾਤਸ੍ਸ ਮਗ੍ਗਸ੍ਸ ਅਕ੍ਖਾਤਾ, ਮਗ੍ਗਞ੍ਞੂ ਮਗ੍ਗਵਿਦੂ ਮਗ੍ਗਕੋਵਿਦੋਤਿਚ. ਸੋ ਹਾਵੁਸੋ ਭਗਵਾ ਜਾਨਂ ਜਾਨਾਤਿ, ਪਸ੍ਸਂ ਪਸ੍ਸਤਿ ਚਕ੍ਖੁਭੂਤੋ ਞਾਣਭੂਤੋ ਧਮ੍ਮਭੂਤੋ ਬ੍ਰਹ੍ਮਭੂਤੋ ਵਤ੍ਤਾ ਪਵਤ੍ਤਾ ਅਤ੍ਥਸ੍ਸ ਨਿਨ੍ਨੇਤਾ ਅਮਤਸ੍ਸ ਦਾਤਾ ਧਮ੍ਮਸ੍ਸਾਮੀ ਤਥਾਗਤੋਤਿਚ, ….

ਪਣੀਤੇਨ ¶ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ.

ਅਰੇ ¶ ਤ੍ਵਂ ਸੁਗਤਾਤਿਰਿਤ੍ਤਮ੍ਪਿ ਪਿਣ੍ਡਪਾਤਂ ਪਟਿਕ੍ਖਿਪਿਤ੍ਵਾ ਈਦਿਸਂ ਇਚ੍ਛਂ ਉਪ੍ਪਾਦੇਸਿ.

ਦੁਬ੍ਭਰੋ ¶ ਭਿਕ੍ਖੁ ਨ ਸਕ੍ਕਾ ਪੋਸਿਤੁਂ.

ਅਮ੍ਹਾਕਂ ¶ ਭਦਨ੍ਤੋ ਸੁਭਰੋ ਥੋਕੇਨਪਿ ਤੁਸ੍ਸਤਿ, ਮਯਮੇਵ ਨਂ ਪੋਸਿਸ੍ਸਾਮਾਤਿ ਪਟਿਞ੍ਞਂ ਕਤ੍ਵਾ ਪੋਸੇਨ੍ਤਿ.

‘‘ਅਰੇ ¶ ਤ੍ਵਂ ਨਾਮ ਤਦਾ ਸੁਗਤਾਤਿਰਿਤ੍ਤਮ੍ਪਿ ਪਿਣ੍ਡਪਾਤਂ ਪਟਿਕ੍ਖਿਪਿਤ੍ਵਾ ਤਥਾ ਜਿਘਚ੍ਛਾਦੁਬ੍ਬਲ੍ਯਪਰੇਤੋਪਿ ਸਮਣਧਮ੍ਮਂ ਕਤ੍ਵਾ ਅਜ੍ਜ ਕੋਸਜ੍ਜਮਨੁਯੁਞ੍ਜਸਿ’’ –

ਯਾ ¶ ਚ ਖੋ ਆਨਨ੍ਦਕਥਾ ਅਭਿਸਲ੍ਲੇਖਿਤਾ ਚੇਤੋਵਿਨੀਵਰਣਸਪ੍ਪਾਯਾ ਏਕਨ੍ਤਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਸੇਯ੍ਯਥਿਦਂ ਅਪ੍ਪਿਚ੍ਛਕਥਾਤਿ …,.

ਇਦਮਵੋਚ ¶ ਭਗਵਾ, ਇਦਂ ਵਤ੍ਵਾਨ ਸੁਗਤੋ ਉਟ੍ਠਾਯਾਸਨਾ ਵਿਹਾਰਂ ਪਾਵਿਸਿ.

ਇਮਂ ¶ ਮਯਾ ਸਂਖਿਤ੍ਤੇਨ ਉਦ੍ਦੇਸਂ ਉਦ੍ਦਿਟ੍ਠਂ ਵਿਤ੍ਥਾਰੇਨ ਅਵਿਭਤ੍ਤਂ, ਧਮ੍ਮਪਟਿਗ੍ਗਾਹਕਾ ਭਿਕ੍ਖੂ ਉਗ੍ਗਹੇਤ੍ਵਾ ਆਨਨ੍ਦਂ ਵਾ ਕਚ੍ਚਾਨਂ ਵਾ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਨ੍ਤਿ, ਤੇ ਮਯ੍ਹਂ ਞਾਣੇਨ ਸਂਸਨ੍ਦੇਤ੍ਵਾ ਕਥੇਸ੍ਸਨ੍ਤਿ, ਤਤੋ ਧਮ੍ਮਪਟਿਗ੍ਗਾਹਕਾ ਪੁਨ ਮਂ ਪੁਚ੍ਛਿਸ੍ਸਨ੍ਤਿ, ਤੇਸਂ ਅਹਂ ਸੁਕਥਿਤਂ ਭਿਕ੍ਖਵੇ ਆਨਨ੍ਦੇਨ, ਸੁਕਥਿਤਂ ਕਚ੍ਚਾਨੇਨ, ਮਂ ਚੇਪਿ ਤੁਮ੍ਹੇ ਏਕਮਤ੍ਥਂ ਪੁਚ੍ਛੇਯ੍ਯਾਥ, ਅਹਮ੍ਪਿ ਨਂ ਏਵਮੇਵ ਬ੍ਯਾਕਰੇਯ੍ਯਨ੍ਤਿ.

ਏਵਂ ¶ ਮੇ ਸੁਤਂ ਏਕਂ ਸਮਯਂ ਭਗਵਾ ਨਾਤਿਕੇ ਵਿਹਰਤਿ ਗਿਞ੍ਜਕਾਵਸਥੇ, ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ ਗੋਸਿਙ੍ਗਸਾਲਵਨਦਾਯੇ ਵਿਹਰਨ੍ਤਿ. ਅਥਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਗੋਸਿਙ੍ਗਸਾਲਵਨਦਾਯੋ, ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਦਾਯਪਾਲੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ ‘‘ਮਾ ਮਹਾਸਮਣ ਏਤਂ ਦਾਯਂ ਪਾਵਿਸਿ, ਸਨ੍ਤੇਤ੍ਥ ਤਯੋ ਕੁਲਪੁਤ੍ਤਾ ਅਤ੍ਤਕਾਮਰੂਪਾ ਵਿਹਰਨ੍ਤਿ, ਮਾ ਤੇਸਂ ਅਫਾਸੁਕਮਕਾਸੀ’’ਤਿ.

ਅਹਂ ¶ ਇਮੇ ਕੁਲਪੁਤ੍ਤੇ ਪਗ੍ਗਣ੍ਹਿਤ੍ਵਾ ਉਕ੍ਕਂਸਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਧਮ੍ਮਂ ਨੇਸਂ ਦੇਸੇਸ੍ਸਾਮੀਤਿ.

ਅਸ੍ਸੋਸਿ ¶ ਖੋ ਆਯਸ੍ਮਾ ਅਨੁਰੁਦ੍ਧੋ ਦਾਯਪਾਲਸ੍ਸ ਭਗਵਤਾ ਸਦ੍ਧਿਂ ਮਨ੍ਤਯਮਾਨਸ੍ਸ. ਸੁਤ੍ਵਾਨ ਦਾਯਪਾਲਂ ਏਤਦਵੋਚ, ਮਾ ਆਵੁਸੋ ਦਾਯਪਾਲ ਭਗਵਨ੍ਤਂ ਵਾਰੇਸਿ, ਸਤ੍ਥਾ ਨੋ ਭਗਵਾ ਅਨੁਪ੍ਪਤ੍ਤੋਤਿ.

ਮਯਂ ¶ ਤਯੋ ਜਨਾ ਇਧ ਵਿਹਰਾਮ, ਅਞ੍ਞੇ ਪਬ੍ਬਜਿਤਾ ਨਾਮ ਨਤ੍ਥਿ, ਅਯਞ੍ਚ ਦਾਯਪਾਲੋ ਪਬ੍ਬਜਿਤੇਨ ਵਿਯ ਸਦ੍ਧਿਂ ਕਥੇਤਿ, ਕੋ ਨੁ ਖੋ ਭਵਿਸ੍ਸਤੀਤਿ.

ਅਯਂ ¶ ਦਾਯਪਾਲੋ ਫਣਕਤਂ ਆਸਿਵਿਸਂ ਗੀਵਾਯ ਗਹੇਤੁਂ ਹਤ੍ਥਂ ਪਸਾਰੇਨ੍ਤੋਵਿਯ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਕਥੇਨ੍ਤੋਵ ਨ ਜਾਨਾਤਿ, ਅਞ੍ਞਤਰਭਿਕ੍ਖੁਨਾ ਵਿਯ ਸਦ੍ਧਿਂ ਕਥੇਤੀਤਿ.

ਮਯਂ ¶ ਤਯੋ ਜਨਾ ਸਮਗ੍ਗਵਾਯਂ ਵਸਾਮ. ਸਚਾਹਂ ਏਕਕੋਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ. ਸਮਗ੍ਗਵਾਸੋ ਨਾਮ ਨ ਭਵਿਸ੍ਸਤੀਤਿ ਪਿਯਮਿਤ੍ਤੇ ਗਹੇਤ੍ਵਾਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ. ਯਥਾ ਚ ਭਗਵਾ ਮਯ੍ਹਂ ਪਿਯੋ, ਏਵਂ ਸਹਾਯਾਨਮ੍ਪਿ ਮੇ ਪਿਯੋਤਿ, ਤੇਹਿ ਸਦ੍ਧਿਂ ਪਚ੍ਚੁਗ੍ਗਮਨਂ ਕਾਤੁਕਾਮੋ ਸਯਂ ਅਕਤ੍ਵਾਵ ਉਪਸਙ੍ਕਮਿ.

ਤਸ੍ਸ ¶ ਮਯ੍ਹਂ ਭਨ੍ਤੇ ਏਵਂ ਹੋਤਿ, ਯਂ ਨੂਨਾਹਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤੇਯ੍ਯਨ੍ਤਿ. ਸੋ ਖੋ ਅਹਂ ਭਨ੍ਤੇ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤਾਮਿ, ਨਾਨਾਹਿ ਖੋ ਨੋ ਭਨ੍ਤੇ ਕਾਯਾ ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ.

ਸਾਧੁ ¶ ਸਾਧੁ ਅਨੁਰੁਦ੍ਧਾ, ਕਚ੍ਚਿ ਪਨ ਵੋ ਅਨੁਰੁਦ੍ਧਾ ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾਤਿ.

ਤਗ੍ਘ ਮਯਂ ਭਨ੍ਤੇ ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਾਮਾਤਿ.

ਯਥਾ ¶ ਕਥਂ ਪਨ ਤੁਮ੍ਹੇ ਅਨੁਰੁਦ੍ਧਾ ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾਤਿ.

ਅਤ੍ਥਿ ¶ ਪਨ ਵੋ ਅਨੁਰੁਦ੍ਧਾ ਏਵਂ ਅਪ੍ਪਮਤ੍ਤਾਨਂ ਆਤਾਪੀਨਂ ਪਹਿਤਤ੍ਤਾਨਂ ਵਿਹਰਨ੍ਤਾਨਂ ਉਤ੍ਤਰਿਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸੋ ਅਧਿਗਤੋ ਫਾਸੁਵਿਹਾਰੋਤਿ.

ਕਿਂ ¶ ਹਿ ਨੋ ਸਿਯਾ ਭਨ੍ਤੇ. ਇਧ ਮਯਂ ਭਨ੍ਤੇ ਯਾਵਦੇਵ ਆਕਙ੍ਖਾਮ, ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਚਾਰਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਾਮ, ਅਯਂ ਖੋ ਨੋ ਭਨ੍ਤੇ ਅਮ੍ਹਾਕਂ ਅਪ੍ਪਮਤ੍ਤਾਨਂ ਆਤਾਪੀਨਂ ਪਹਿਤਤ੍ਤਾਨਂ ਵਿਹਰਨ੍ਤਾਨਂ ਉਤ੍ਤਰਿਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸੋ ਅਧਿਗਤੋ ਫਾਸੁਵਿਹਾਰੋਤਿ.

ਏਵਂ ¶ ਮੇ ਸੁਤਂ ਏਕਂ ਸਮਯਂ ਭਗਵਾ ਆਲ਼ਵਿਯਂ ਵਿਹਰਤਿ ਆਲ਼ਵਕਸ੍ਸ ਯਕ੍ਖਸ੍ਸ ਭਵਨੇ.

ਨਾਸਕ੍ਖਿ ¶ ਮਿਗਂ ਗਹੇਤੁਨ੍ਤਿ ਅਪਵਾਦਮੋਚਨਤ੍ਥਂ ਕਾਜੇਨਾਦਾਯ ਆਗਚ੍ਛਨ੍ਤੋ ਨਗਰਸ੍ਸਾਵਿਦੂਰੇ ਬਹਲਪਤ੍ਤਪਲਾਸਂ ਮਹਾਨਿਗ੍ਰੋਧਂ ਦਿਸ੍ਵਾ ਪਰਿਸ੍ਸਮਵਿਨੋਦਨਤ੍ਥਂ ਤਸ੍ਸ ਮੂਲਮੁਪਗਤੋ.

ਯੇ ¶ ਯੇ ਵਜ੍ਜਾ ਹੋਨ੍ਤਿ, ਤੇ ਤੇ ਸਨ੍ਧਾਯ ‘‘ਯੋ ਜੀਵਿਤਤ੍ਥਿਕੋ, ਸੋ ਨਿਕ੍ਖਮਤੂ’’ਤਿ ਭਣਤਿ.

ਰਾਜਾ ¶ ਚੋਰੇ ਗਹੇਤ੍ਵਾ ਯਕ੍ਖਸ੍ਸ ਦੇਤੀਤਿ ਮਨੁਸ੍ਸਾ ਚੋਰਕਮ੍ਮ ਤੋ ਪਟਿਵਿਰਤਾ. ਤਤੋ ਅਪਰੇਨ ਸਮਯੇਨ ਨਵਚੋਰਾਨਂ ਅਭਾਵੇਨ ਪੁਰਾਣਚੋਰਾਨਞ੍ਚ ਪਰਿਕ੍ਖਯੇਨ ਬਨ੍ਧਨਾਗਾਰਾਨਿ ਸੁਞ੍ਞਾਨਿ ਅਹੇਸੁਂ.

ਰਾਜਾ ¶ ਅਮ੍ਹਾਕਂ ਪਿਤਰਂ ਅਮ੍ਹਾਕਂ ਪਿਤਾਮਹਂ ਪੇਸੇਤੀਤਿ ਮਨੁਸ੍ਸਾ ਖੋਭਂ ਕਰਿਸ੍ਸਨ੍ਤਿ, ਮਾ ਵੋ ਏਤਂ ਰੁਚ੍ਚੀਤਿ ਵਾਰੇਸਿ.

ਨਤ੍ਥਿ ¶ ਦੇਵ ਨਗਰੇ ਦਾਰਕੋ ਠਪੇਤ੍ਵਾ ਅਨ੍ਤੇਪੁਰੇ ਤਵ ਪੁਤ੍ਤਂ ਆਲ਼ਵਕਕੁਮਾਰਨ੍ਤਿ.

ਅਥ ¶ ਖੋ ਆਲ਼ਵਕੋ ਯਕ੍ਖੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ ਨਿਕ੍ਖਮ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਨਿਕ੍ਖਮਿ. ਪਵਿਸ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਪਾਵਿਸਿ. ਦੁਤਿਯਮ੍ਪਿ ਖੋ ਓਲ਼ਵਕੋ ਯਕ੍ਖੋ ਭਗਵਨ੍ਤਂ ਏਤਦਵੋਚ ਨਿਕ੍ਖਮ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਨਿਕ੍ਖਮਿ. ਪਵਿਸ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਪਾਵਿਸਿ. ਤਤਿਯਮ੍ਪਿ ਖੋ ਆਲ਼ਵਕੋ ਯਕ੍ਖੋ ਭਗਵਨ੍ਤਂ ਏਤਦਵੋਚ ਨਿਕ੍ਖਮ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਨਿਕ੍ਖਮਿ. ਪਵਿਸ ਸਮਣਾਤਿ. ਸਾਧਾਵੁਸੋਤਿ ਭਗਵਾ ਪਾਵਿਸਿ. ਚਤੁਤ੍ਥਮ੍ਪਿ ਖੋ ਆਲ਼ਵਕੋ ਯਕ੍ਖੋ ਭਗਵਨ੍ਤਂ ਏਤਦਵੋਚ ਨਿਕ੍ਖਮ ਸਮਣਾਤਿ. ਨ ਖ੍ਵਾਹਂ ਤਂ ਆਵੁਸੋ ਨਿਕ੍ਖਮਿਸ੍ਸਾਮਿ. ਯਂ ਤੇ ਕਰਣੀਯਂ, ਤਂ ਕਰੋਹੀਤਿ. ਪਞ੍ਹਂ ਤਂ ਸਮਣ ਪੁਚ੍ਛਿਸ੍ਸਾਮਿ, ਸਚੇ ਮੇ ਨ ਬ੍ਯਾਕਰਿਸ੍ਸਸਿ, ਚਿਤ੍ਤਂ ਵਾ ਤੇ ਖਿਪਿਸ੍ਸਾਮਿ, ਹਦਯਂ ਵਾ ਤੇ ਫਾਲੇਸ੍ਸਾਮਿ, ਪਾਦੇਸੁ ਵਾ ਗਹੇਤ੍ਵਾ ਪਾਰਗਙ੍ਗਾਯ ਖਿਪਿਸ੍ਸਾਮੀਤਿ. ਨ ਖ੍ਵਾਹਂ ਤਂ ਆਵੁਸੋ ਪਸ੍ਸਾਮਿ ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ, ਯੋ ਮੇ ਚਿਤ੍ਤਂ ਵਾ ਖਿਪੇਯ੍ਯ ਹਦਯਂ ਵਾ ਫਾਲੇਯ੍ਯ ਪਾਦੇਸੁ ਵਾ ਗਹੇਤ੍ਵਾ ਪਾਰਗਙ੍ਗਾਯ ਖਿਪੇਯ੍ਯ. ਅਪਿਚ ਤ੍ਵਂ ਆਵੁਸੋ ਪੁਚ੍ਛ ਯਦਾ ਕਙ੍ਖਸੀਤਿ.

ਕੋ ¶ ਸੋ ਭਗਵਾਨਾਮ, ਯੋ ਮਮ ਭਵਨਂ ਪਵਿਟ੍ਠੋਤਿ ਆਹ.

ਨ ਤ੍ਵਂ ਆਵੁਸੋ ਜਾਨਾਸਿ ਭਗਵਨ੍ਤਂ ਅਮ੍ਹਾਕਂ ਸਤ੍ਥਾਰਂ, ਯੋ ਤੁਸਿਤਭਵਨੇ ਠਿਤੋ ਪਞ੍ਚਮਹਾਵਿਲੋਕਿਤਂ ਵਿਲੋਕੇਤ੍ਵਾਤਿਆਦਿਨਾ ਨਯੇਨ ਯਾਵ ਦਮ੍ਮਚਕ੍ਕਪਵਤ੍ਤਨਾ ਕਥੇਨ੍ਤਾ ਪਟਿਸਨ੍ਧਿਆਦੀਸੁ ਦ੍ਵਤ੍ਤਿਂਸਪੁਬ੍ਬਨਿਮਿਤ੍ਤਾਨਿ ਵਤ੍ਵਾ ਇਮਾਨਿਪਿ ਤ੍ਵਂ ਆਵੁਸੋ ਅਚ੍ਛਰਿਯਾਨਿ ਨਾਦ੍ਦਸਾਤਿ ਚੋਦੇਸੁਂ.

ਪਸ੍ਸਥ ¶ ਦਾਨਿ ਤੁਮ੍ਹਾਕਂ ਵਾ ਸਤ੍ਥਾ ਮਹਾਨੁਭਾਵੋ, ਅਹਂ ਵਾਤਿ ਦਕ੍ਖਿਣਪਾਦੇਨ ਸਟ੍ਠਿਯੋਜਨਮਤ੍ਤਂ ਕੇਲਾਸਪਬ੍ਬਤਕੂਟਂ ਅਕ੍ਕਮਿ.

ਯਂ ¶ ਨੂਨਾਹਂ ਕੇਨਚਿ ਅਜੇਯ੍ਯਂ ਦੁਸ੍ਸਾਵੁਧਂ ਮੁਞ੍ਚੇਯ੍ਯਨ੍ਤਿ.

ਇਦਂ ¶ ਕਾਰਣਂ ਮੇਤ੍ਤਾਵਿਹਾਰਯੁਤ੍ਤੋ ਸਮਣੋ, ਹਨ੍ਦ ਨਂ ਰੋਸੇਤ੍ਵਾ ਮੇਤ੍ਤਾਯ ਵਿਯੋਜੇਮੀਤਿ ਇਮਿਨਾ ਸਮ੍ਬਨ੍ਧੇਨੇਤਂ ਵੁਤ੍ਤਂ, ਅਥ ਖੋ ਆਲ਼ਵਕੋ ਯਕ੍ਖੋ ਯੇਨ ਭਗਵਾ…ਪੇ… ਨਿਕ੍ਖਮ ਸਮਣਾਤਿ.

‘‘ਸੁਬ੍ਬਚੋ ¶ ਵਤਾਯਂ ਸਮਣੋ ਏਕਵਚਨੇਨੇਵ ਨਿਕ੍ਖਨ੍ਤੋ, ਏਵਂ ਨਾਮ ਨਿਕ੍ਖਮੇਤੁਂ ਸੁਖਂ ਸਮਣਂ ਅਕਾਰਣੇਨੇਵਾਹਂ ਸਕਲਰਤ੍ਤਿਂ ਯੁਦ੍ਧੇਨ ਅਬ੍ਭੁਯ੍ਯਾਸਿਨ੍ਤਿ ਮੁਦੁਚਿਤ੍ਤੋ ਹੁਤ੍ਵਾ ਪੁਨ ਚਿਨ੍ਤੇਸਿ –

ਸੁਬ੍ਬਚੋ ¶ ਅਯਂ ਸਮਣੋ ਨਿਕ੍ਖਮਾਤਿ ਵੁਤ੍ਤੋ ਨਿਕ੍ਖਮਤਿ. ਪਵਿਸਾਤਿ ਵੁਤ੍ਤੋ ਪਵਿਸਤਿ. ਯਂਨੂਨਾਹਂ ਇਮਂ ਸਮਣਂ ਏਵਮੇਵ ਸਕਲਰਤ੍ਤਿਂ ਕਿਲਮੇਤ੍ਵਾ ਪਾਦੇ ਗਹੇਤ੍ਵਾ ਪਾਰਗਙ੍ਗਾਯ ਖਿਪੇਯ੍ਯਨ੍ਤਿ ਪਾਪਕਂ ਚਿਤ੍ਤਂ ਉਪ੍ਪਾਦੇਤ੍ਵਾ ਚਤੁਤ੍ਥਵਾਰਂ ਆਹ ਨਿਕ੍ਖਮ ਸਮਣਾਤਿ.

ਕਿਂ ¶ ਸੂਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਕਥਂ ਜੀਵਿਂ ਜੀਵਿਤਮਾਹੁ ਸੇਟ੍ਠਨ੍ਤਿ;

ਸਦ੍ਧੀਧ ¶ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ,

ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠਨ੍ਤਿ.

ਵਿਸਮ੍ਪਿ ਸਚ੍ਚੇਨ ਹਨਨ੍ਤਿ ਪਣ੍ਡਿਤਾ;

ਸਚ੍ਚੇ ਠਿਤਾ ਨਿਬ੍ਬੁਤਿਂ ਪਤ੍ਥਯਨ੍ਤਿ.

ਕਥਂਸੁ ¶ ਤਰਤਿ ਓਘਂ, ਕਥਂਸੁ ਤਰਤਿ ਅਣ੍ਣਵਂ;

ਕਥਂਸੁ ਦੁਕ੍ਖਮਚ੍ਚੇਤਿ, ਕਥਂਸੁ ਪਰਿਸੁਜ੍ਝਤਿ.

ਸਦ੍ਧਾਯ ¶ ਤਰਤਿ ਓਘਂ, ਅਪ੍ਪਮਾਦੇਨ ਅਣ੍ਣਵਂ;

ਵੀਰਿਯੇਨ ਦੁਕ੍ਖਮਚ੍ਚੇਤਿ, ਪਞ੍ਞਾਯ ਪਰਿਸੁਜ੍ਝਤਿ.

ਕਥਂਸੁ ¶ ਲਭਤੇ ਪਞ੍ਞਂ, ਕਥਂਸੁ ਵਿਨ੍ਦਤੇ ਧਨਂ;

ਕਥਂਸੁ ਕਿਤ੍ਤਿਂ ਪਪ੍ਪੋਤਿ, ਕਥਂ ਮਿਤ੍ਤਾਨਿ ਗਨ੍ਥਤਿ;

ਅਸ੍ਮਾ ਲੋਕਾ ਪਰਂ ਲੋਕਂ, ਕਥਂ ਪੇਚ੍ਚ ਨ ਸੋਚਤੀਤਿ–

ਸਦ੍ਦਹਾਨੋ ¶ ਅਰਹਤਂ, ਧਮ੍ਮਂ ਨਿਬ੍ਬਾਨਪਤ੍ਤਿਯਾ;

ਸੁਸ੍ਸੂਸਂ ਲਭਤੇ ਪਞ੍ਞਂ, ਅਪ੍ਪਮਤ੍ਤੋ ਵਿਚਕ੍ਖਣੋ.

ਪਤਿਰੂਪਕਾਰੀ ¶ ਧੁਰਵਾ, ਉਟ੍ਠਾਤਾ ਵਿਨ੍ਦਤੇ ਧਨਂ;

ਸਚ੍ਚੇਨ ਕਿਤ੍ਤਿਂ ਪਪ੍ਪੋਤਿ, ਦਦਂ ਮਿਤ੍ਤਾਨਿ ਗਨ੍ਥਤਿ.

ਅਸ੍ਮਾ ਲੋਕੋ ਪਰਂ ਲੋਕਂ, ਏਵਂ ਪੇਚ੍ਚ ਨ ਸੋਚਤਿ.

ਕਥਂ ¶ ਨੁ ਦਾਨਿ ਪੁਚ੍ਛੇਯ੍ਯਂ, ਪੁਥੂ ਸਮਣਬ੍ਰਾਹ੍ਮਣੇ;

ਯੋਹਂ ਅਜ੍ਜ ਪਜਾਨਾਮਿ, ਯੋ ਅਤ੍ਥੋ ਸਮ੍ਪਰਾਯਿਕੋ.

ਅਤ੍ਥਾਯ ¶ ਵਤ ਮੇ ਬੁਦ੍ਧੋ, ਵਾਸਾਯਾਲ਼ਵਿਮਾਗਮਾ;

ਯੋਹਂ ਅਜ੍ਜ ਪਜਾਨਾਮਿ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

ਸੋ ¶ ਅਹਂ ਵਿਚਰਿਸ੍ਸਾਮਿ, ਗਾਮਾ ਗਾਮਂ ਪੁਰਾ ਪੁਰਂ;

ਨਮਸ੍ਸਮਾਨੋ ਸਮ੍ਬੁਦ੍ਧਂ, ਧਮ੍ਮਸ੍ਸ ਚ ਸੁਧਮ੍ਮਤਂ.

ਸਬ੍ਬਙ੍ਗੁਪੇਤਂ ਪਰਿਪੁਣ੍ਣਬ੍ਯਞ੍ਜਨਂ;

ਅਯਂ ਕੁਮਾਰੋ ਸਰਣਮੁਪੇਤਿ ਬੁਦ੍ਧਂ…ਪੇ… ਧਮ੍ਮਂ…ਪੇ… ਸਙ੍ਘਂ.

ਏਕਂ ¶ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਾਰਿਪੁਤ੍ਤੋ ਮਗਧੇਸੁ ਵਿਹਰਤਿ ਨਾਲਕਗਾਮਕੇ ਆਬਾਧਿਕੋ ਦੁਕ੍ਖਿਤੋ ਬਾਲ਼੍ਹਗਿਲਾਨੋ. ਚੁਨ੍ਦੋ ਚ ਸਮਣੁਦ੍ਦੇਸੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਉਪਟ੍ਠਾਕੋ ਹੋਤਿ.

ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਤੇਨੇਵ ਆਬਾਧੇਨ ਪਰਿਨਿਬ੍ਬਾਯਿ. ਅਥ ਖੋ ਚੁਨ੍ਦੋ ਸਮਣੁਦ੍ਦੇਸੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ, ਯੇਨਾ ਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਚੁਨ੍ਦੋ ਸਮਣੁਦ੍ਦੇਸੋ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ ‘‘ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤੋ ਪਰਿਨਿਬ੍ਬੁਤੋ, ਇਦਮਸ੍ਸ ਪਤ੍ਤਚੀਵਰ’’ਨ੍ਤਿ. ਅਤ੍ਥਿ ਖੋ ਇਦਂ ਆਵੁਸੋ ਚੁਨ੍ਦ ਕਥਾ ਪਾਭਤਂ ਭਗਵਨ੍ਤਂ ਦਸ੍ਸਨਾਯ, ਆਯਾਮਾਵੁਸੋ ਚੁਨ੍ਦ, ਯੇਨ ਭਗਵਾ ਤੇਨੁਪਸਙ੍ਕਮਿਸ੍ਸਾਮ, ਉਪਸਙ੍ਕਮਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸ੍ਸਾਮਾਤਿ. ‘‘ਏਵਂ ਭਨ੍ਤੇ’’ਤਿ ਖੋ ਚੁਨ੍ਦੋ ਸਮਣੁਦ੍ਦੇਸੋ ਆਯਸ੍ਮਤੋ ਆਨਨ੍ਦਸ੍ਸ ਪਚ੍ਚਸ੍ਸੋਸਿ.

ਬੁਦ੍ਧਾ ¶ ਨੁ ਖੋ ਪਠਮਂ ਪਰਿਨਿਬ੍ਬਾਯਨ੍ਤਿ, ਉਦਾਹੁ ਅਗ੍ਗਸਾਵਕਾਤਿ.

ਅਨੁਜਾਨਾਤੁ ¶ ਮੇ ਭਨ੍ਤੇ ਭਗਵਾ, ਅਨੁਜਾਨਾਤੁ ਸੁਗਤੋ. ਪਰਿਨਿਬ੍ਬਾਨ ਕਾਲੋ ਮੇ, ਓਸ੍ਸਟ੍ਠੋ ਮੇ ਆਯੁਸਙ੍ਖਾਰੋਤਿ.

ਕਤ੍ਥ ¶ ਪਰਿਨਿਬ੍ਬਾਯਿਸ੍ਸਸਿ ਸਾਰਿਪੁਤ੍ਤਾਤਿ.

ਅਤ੍ਥਿ ਭਨ੍ਤੇ ਮਗਧੇਸੁ ਨਾਲਕਗਾਮੇ ਜਾਤੋਵਰਕੋ, ਤਤ੍ਥਾਹਂ ਪਰਿਨਿਬ੍ਬਾਯਿਸ੍ਸਾਮੀਤਿ.

ਯਸ੍ਸ ਦਾਨਿ ਤ੍ਵਂ ਸਾਰਿਪੁਤ੍ਤ ਕਾਲਂ ਮਞ੍ਞਸਿ, ਇਦਾਨਿ ਪਨ ਤੇ ਜੇਟ੍ਠਕਨਿਟ੍ਠ ਭਾਤਿਕਾਨਂ ਤਾਦਿਸਸ੍ਸ ਭਿਕ੍ਖੁਨੋ ਦਸ੍ਸਨਂ ਦੁਲ੍ਲਭਂ ਭਵਿਸ੍ਸਤਿ, ਦੇਸੇਹਿ ਨੇਸਂ ਧਮ੍ਮਨ੍ਤਿ ਆਹ.

ਅਥਖੋ ¶ ਆਯਸ੍ਮਾ ਚ ਆਨਨ੍ਦੋ ਚੁਨ੍ਦੋ ਚ ਸਮਣੁਦ੍ਦੇਸੋ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ ‘‘ਅਯਂ ਭਨ੍ਤੇ ਚੁਨ੍ਦੋ ਸਮਣੁਦ੍ਦੇਸੋ ‘ਏਵਮਾਹ ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤੋ ¶ ਪਰਿਨਿਬ੍ਬੁਤੋ, ਇਦਮਸ੍ਸ ਪਤ੍ਤਚੀਵਰ’ਨ੍ਤਿ. ਅਪਿਚ ਮੇ ਭਨ੍ਤੇ ‘ਮਧੁਰਕ ਜਾਤੋ ਵਿਯ ਕਾਯੋ, ਦਿਸਾਪਿ ਮੇ ਨ ਪਕ੍ਖਾਯਨ੍ਤਿ, ਧਮ੍ਮਾਪਿ ਮਂ ਨਪ੍ਪਟਿਭਨ੍ਤਿ ਆਯਸ੍ਮਾ ਸਾਰਿਪੁਤ੍ਤੋ ਪਰਿਨਿਬ੍ਬੁਤੋ’ਤਿ’’ ਸੁਤ੍ਵਾ–

ਅਪ੍ਪਕੇਨਪਿ ¶ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮਨ੍ਤਿ.

ਤਂਵੀਤਰਾਗਂ ਸੁਸਮਾਹਿਤਿਨ੍ਦ੍ਰਿਯਂ;

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

ਅਨੁਕਮ੍ਪਕੋ ਕਾਰੁਣਿਕੋ ਚ ਨਿਬ੍ਬੁਤੋ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

ਚਣ੍ਡਾਲਪੁਤ੍ਤੋ ¶ ਯਥਾ ਨਗਰਂ ਪਵਿਟ੍ਠੋ,

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਂ.

ਅਹੇਟ੍ਠਯਨ੍ਤੋ ਚਰਤਿ ਪੁਰਨ੍ਤਰੇ ਵਨੇ;

ਪਰਿਨਿਬ੍ਬੁਤਂ ਵਨ੍ਦਥ ਸਾਰਿਪੁਤ੍ਤਨ੍ਤਿ.

ਅਪਿਚ ¶ ਮੇ ਭਨ੍ਤੇ ਮਧੁਰਕਜਾਤੋ ਵਿਯ ਕਾਯੋ.

ਕਿਂ ¶ ਨੁਖੋ ਤੇ ਆਨਨ੍ਦ ਸਾਰਿਪੁਤ੍ਤੋ ਸੀਲਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ, ਸਮਾਧਿਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ, ਪਞ੍ਞਾਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ, ਵਿਮੁਤ੍ਤਿਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋ, ਵਿਮੁਤ੍ਤਿ ਞਾਣਦਸ੍ਸਨਕ੍ਖਨ੍ਧਂ ਵਾ ਆਦਾਯ ਪਰਿਨਿਬ੍ਬੁਤੋਤਿ.

ਨਨੁ ¶ ਤਂ ਆਨਨ੍ਦ ਮਯਾ ਪਟਿਕਚ੍ਚੇਵ ਅਕ੍ਖਾਤਂ ਸਬ੍ਬੇਹਿ ਪਿਯੇਹਿ ਮਨਾ ਪੇਹਿ ਨਾਨਾਭਾਵੋ ਵਿਨਾਭਾਵੋ ਅਞ੍ਞਥਾਭਾਵੋ, ਤਂ ਕੁਤੇਤ੍ਥ ਆਨਨ੍ਦ ਲਬ੍ਭਾ ‘‘ਯਂ ਤਂ ਜਾਤਂ ਭੂਤਂ ਸਙ੍ਖਤਂ ਪਲੋਕਧਮ੍ਮਂ, ਤਂ ਵਤ ਮਾਪਲੁਜ੍ਜੀ’’ਤਿ ਨੇਤਂ ਠਾਨਂ ਵਿਜ੍ਜਤਿ.

ਤਤ੍ਥ ¶ ਕਤਮਂ ਤਥਾਗਤਸ੍ਸ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਞਾਣਂ. ਇਧ ਤਥਾਗਤੋ ‘‘ਅਟ੍ਠਾਨਮੇਤਂ ਅਨਵਕਾਸੋ ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯ ਨੇਤਂ ਠਾਨਂ ਵਿਜ੍ਜਤੀ’’ਤਿ ਪਜਾਨਾਤਿ, ‘‘ਠਾਨਞ੍ਚ ਖੋ ਏਤਂ ਵਿਜ੍ਜਤਿ ਯਂ ਪੁਥੁਜ੍ਜਨੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯ ਠਾਨਮੇਤਂ ਵਿਜ੍ਜਤੀ’’ਤਿ –

ਮਯਾ ¶ ਭਨ੍ਤੇ ਉਪ੍ਪਨ੍ਨੋ ਚੋਰੋ ਨ ਸਕ੍ਕਾ ਪਟਿਬਾਹਿਤੁਂ, ਸਙ੍ਘੋ ਪਰਸਮੁਦ੍ਦਂ ਗਚ੍ਛਤੁ, ਅਹਂ ਸਮੁਦ੍ਦਾਰਕ੍ਖਂ ਕਰਿਸ੍ਸਾਮੀਤਿ.

ਆਵੁਸੋ ਮਹਾਸੋਣ ਅਭਿਰੁਹ ਮਹਾਉਲੁਮ੍ਪਨ੍ਤਿ.

ਨਾਹਂ ¶ ਭਨ੍ਤੇ ਤੁਮ੍ਹੇਸੁ ਅਗਚ੍ਛਨ੍ਤੇਸੁ ਗਮਿਸ੍ਸਾਮੀਤਿ ਯਾਵਤਤਿਯਂ ਕਥੇਤ੍ਵਾਪਿ ਥੇਰਂ ਆਰੋਪੇਤੁਂ ਅਸਕ੍ਕੋਨ੍ਤਾ ਨਿਵਤ੍ਤਿਂਸੁ.

ਏਵਰੂਪਸ੍ਸ ¶ ਨਾਮ ਲਾਭਗ੍ਗਯਸਗ੍ਗਪ੍ਪਤ੍ਤਸ੍ਸ ਸਰੀਰਧਾਤੁਨਿਚਯਟ੍ਠਾਨਂ ਅਨਾਥਂ ਜਾਤਨ੍ਤਿ ਚਿਨ੍ਤਯਮਾਨੋ ਨਿਸੀਦਿ.

ਭਨ੍ਤੇ ¶ ਏਤਂ ਪਣ੍ਣਖਾਦਕਮਨੁਸ੍ਸਾਨਂ ਵਸਨਟ੍ਠਾਨਂ, ਧੂਮੋ ਪਞ੍ਞਾਯਤਿ, ਅਹਂ ਪੁਰਤੋ ਗਮਿਸ੍ਸਾਮੀਤਿ ਥੇਰਂ ਵਨ੍ਦਿਤ੍ਵਾ ਅਤ੍ਤਨੋ ਭਵਨਂ ਅਗਮਾਸਿ. ਥੇਰੋ ਸਬ੍ਬਮ੍ਪਿ ਭਯਕਾਲਂ ਪਣ੍ਣਖਾਦਕਮਨੁਸ੍ਸੇ ਨਿਸ੍ਸਾਯ ਵਸਿ.

ਆਵੁਸੋ ਮਹਾਸੋਣ ਭਿਕ੍ਖਾਹਾਰੋ ਪਞ੍ਞਾਯਤੀਤਿ ਵਤ੍ਵਾ ਪਤ੍ਤਚੀਵਰਂ ਆਰੋਪੇਤ੍ਵਾ ਚੀਵਰਂ ਪਾਰੁਪਿਤ੍ਵਾ ਪਤ੍ਤਂ ਨੀਹਰਿਤ੍ਵਾ ਅਟ੍ਠਾਸਿ.

ਮਹਾਸੋਣਤ੍ਥੇਰੋ ¶ ਪਞ੍ਚਭਿਕ੍ਖੁਸਤਪਰਿਵਾਰੋ ਮਣ੍ਡਲਾਰਾਮਵਿਹਾਰਂ ਪਤ੍ਤੋ, ਏਕੇਕੋ ਨਵਹਤ੍ਥਸਾਟਕੇਨ ਸਦ੍ਧਿਂ ਏਕੇਕਕਹਾਪਣਗ੍ਘਨਕਂ ਪਿਣ੍ਡਪਾਤਂ ਦੇਤੂਤਿ ਮਨੁਸ੍ਸੇ ਅਵੋਚੁਂ.

ਅਨਾਯਤਨੇ ¶ ਨਟ੍ਠਾਨਂ ਅਤ੍ਤਭਾਵਾਨਂ ਪਮਾਣਂ ਨਤ੍ਥਿ, ਬੁਦ੍ਧਾਨਂ ਉਪਟ੍ਠਾਨਂ ਕਰਿਸ੍ਸਾਮੀਤਿ ਚੇਤਿਯਙ੍ਗਣਂ ਗਨ੍ਤ੍ਵਾ ਅਪ੍ਪਹਰਿਤਂ ਕਰੋਤਿ.

ਮਯਂ ¶ ਤਾਵ ਮਹਲ੍ਲਕਾ, ਇਦਂ ਨਾਮ ਭਵਿਸ੍ਸਤੀਤਿ ਨ ਸਕ੍ਕਾ ਜਾਨਿਤੁਂ, ਤੁਵਂ ਅਤ੍ਤਾਨਂ ਰਕ੍ਖੇਯ੍ਯਾਸੀਤਿ.

ਕਹਂ ¶ ਵਤ੍ਤਬ੍ਬਕਨਿਗ੍ਰੋਧਤ੍ਥੇਰੋ, ਕਹਂ ਵਤ੍ਤਬ੍ਬਕਨਿਗ੍ਰੋਧਤ੍ਥੇਰੋਤਿ ਪੁਚ੍ਛਿਤ੍ਵਾ ਤਸ੍ਸ ਸਨ੍ਤਿਕਂ ਅਗਮਂਸੁ.

ਧਮ੍ਮਸਕਟਸ੍ਸ ¶ ਅਕ੍ਖੋ ਭਿਜ੍ਜਤਿ ਅਕ੍ਖੋ ਭਿਜ੍ਜਤੀਤਿ ਪਰਿਦੇਵਮਾਨੋ ਵਿਚਰਿ.

ਚਤ੍ਤਾਰੋਮੇ ¶ ਆਵੁਸੋ ਸਮ੍ਮਪ੍ਪਧਾਨਾ. ਕਤਮੇ ਚਤ੍ਤਾਰੋ. ਇਧਾਵੁਸੋ ਭਿਕ੍ਖੁ ਅਨੁਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ, ਉਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਅਪ੍ਪਹੀਯਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ, ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਅਨੁਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ, ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਅਨੁਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ, ਉਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤੀਤਿ.

ਉਪਜ੍ਝਾਯੋ ¶ ਮੇ ਅਤਿਵਿਯ ਪਸਨ੍ਨਚਿਤ੍ਤੋ ਵਨ੍ਦਤਿ, ਕਿਂ ਨੁ ਖੋ ਪੁਪ੍ਫਾਨਿ ਲਭਿਤ੍ਵਾ ਪੂਜਂ ਕਰੇਯ੍ਯਾਸੀਤਿ ਚਿਨ੍ਤੇਸਿ.

ਤ੍ਵਂ ¶ ਅਮ੍ਹੇ ਉਚ੍ਚਾਕੁਲਾਤਿ ਸਲ੍ਲਕ੍ਖੇਸਿ.

ਅਟ੍ਠਾਨਮੇਤਂ ¶ ਅਨਵਕਾਸੋ ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤੀਤਿ ਪਜਾਨਾਤਿ.

ਅਜ੍ਜ ¶ ਸਤ੍ਥਾ ਪਰਿਨਿਬ੍ਬਾਯਤਿ, ਅਜ੍ਜ ਸਾਸਨਂ ਓਸਕ੍ਕਤਿ, ਪਚ੍ਛਿਮਦਸ੍ਸਨਂ ਦਾਨਿ ਇਦਂ ਅਮ੍ਹਾਕਨ੍ਤਿ ਦਸਬਲਸ੍ਸ ਪਰਿਨਿਬ੍ਬੁਤਦਿਵਸਤੋ ਮਹਨ੍ਤਤਰਂ ਕਾਰੁਞ੍ਞਂ ਕਰਿਸ੍ਸਨ੍ਤਿ.

ਏਕਪੁਗ੍ਗਲੋ ¶ ਭਿਕ੍ਖਵੇ ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਅਚ੍ਛਰਿਯਮਨੁਸ੍ਸੋ, ਕਤਮੋ ਏਕਪੁਗ੍ਗਲੋ ਤਥਾਗਤੋ ਭਿਕ੍ਖਵੇ ਅਰਹਂ ਸਮ੍ਮਾਸਮ੍ਬੁਦ੍ਧੋਤਿ.

ਅਭਿਕ੍ਕਨ੍ਤੇ ¶ ਪਟਿਕ੍ਕਨ੍ਤੇ ਸਮ੍ਪਜਾਨਕਾਰੀ ਹੋਤਿ.

ਸਤੋ ਸਮ੍ਪਜਾਨੋ ਪਟਿਕ੍ਕਮਤੀਤਿ ਵੁਤ੍ਤਂ.

ਕਿਨ੍ਨੂ ਮੇ ਏਤ੍ਥ ਗਤੇਨ ਅਤ੍ਥੋ ਅਤ੍ਥਿ ਨਤ੍ਥੀਤਿ ਅਤ੍ਥਾਨਤ੍ਥਂ ਪਰਿਗ੍ਗਹੇਤ੍ਵਾ ਅਤ੍ਥਪਰਿਗ੍ਗਣ੍ਹਨਂ ਸਾਤ੍ਥਕਸਮ੍ਪਜਞ੍ਞਂ.

ਆਮਿਸਤੋਪਿ ¶ ਵਡ੍ਢਿ ਅਤ੍ਥੋਯੇਵ, ਤਂ ਨਿਸ੍ਸਾਯ ਬ੍ਰਹ੍ਮਚਰਿਯਾ ਨੁਗ੍ਗਹਾਯ ਪਟਿਪਨ੍ਨਤ੍ਤਾਤਿ ਵਦਨ੍ਤਿ.

ਮਯਾ ¶ ਪਬ੍ਬਜਿਤਦਿਵਸਤੋ ਪਟ੍ਠਾਯ ਭਿਕ੍ਖੁਨਾ ਸਦ੍ਧਿਂ ਦ੍ਵੇਕਥਾ ਨਾਮ ਨਕਥਿਤਪੁਬ੍ਬਾ, ਅਞ੍ਞਸ੍ਮਿਂ ਦਿਵਸੇ ਉਪਰਿਵਿਸੇਸਂ ਨਿਬ੍ਬਤ੍ਤੇਸ੍ਸਾਮੀਤਿ ਚਿਨ੍ਤੇਤ੍ਵਾ ‘‘ਕਿਂ ਭਨ੍ਤੇ’’ਤਿ ਪਟਿਵਚਨਂ ਅਦਾਸਿ.

ਭਨ੍ਤੇ ¶ ਏਤੇ ਮਨੁਸ੍ਸਾ ਤੁਮ੍ਹਾਕਂ ਕਿਂਹੋਨ੍ਤਿ, ਮਾਤਿਪਕ੍ਖਤੋ ਸਮ੍ਬਨ੍ਧਾ ਪਿਤਿਪਕ੍ਖਤੋਤਿ.

ਆਵੁਸੋਯਂ ¶ ਮਾਤਾਪਿਤੂਹਿਪਿ ਦੁਕ੍ਕਰਂ, ਤਂ ਏਤੇ ਮਨੁਸ੍ਸਾ ਅਮ੍ਹਾਕਂ ਕਰੋਨ੍ਤਿ, ਪਤ੍ਤਚੀਵਰਮ੍ਪਿ ਨੋ ਏਤੇਸਂ ਸਨ੍ਤਕਮੇਵ, ਏਤੇਸਂ ਆਨੁਭਾਵੇਨ ਨੇਵ ਭਯੇ ਭਯਂ ਨ ਛਾਤਕੇ ਛਾਤਕਂ ਜਾਨਾਮ, ਏਦਿਸਾਨਾਮ ਅਮ੍ਹਾਕਂ ਉਪਕਾਰਿਨੋ ਨਤ੍ਥੀਤਿ ਤੇਸਂ ਗੁਣੇ ਕਥੇਨ੍ਤੋ ਗਚ੍ਛਤਿ.

ਕਮ੍ਮਟ੍ਠਾਨਂ ¶ ਨਾਮ ਅਤ੍ਥੀਤਿਪਿ ਸਞ੍ਞਂ ਅਕਤ੍ਵਾ ਗਾਮਂ ਪਿਣ੍ਡਾਯ ਪਵਿਸਿਤ੍ਵਾ ਅਨਨੁਲੋਮਿਕੇਨ ਗਿਹਿਸਂਸਗ੍ਗੇਨ ਸਂਸਟ੍ਠੋ ਚਰਿਤ੍ਵਾ ਚ ਭੁਞ੍ਜਿਤ੍ਵਾ ਚ ਤੁਚ੍ਛੋ ਨਿਕ੍ਖਮਤਿ.

ਆਵੁਸੋ ¶ ਤੁਮ੍ਹੇ ਨ ਇਣਟ੍ਟਾ ਨ ਭਯਟ੍ਟਾ ਨ ਆਜੀਵਿਕਾ ਪਕਤਾ ਪਬ੍ਬਜਿਤਾ, ਦੁਕ੍ਖਾ ਮੁਚ੍ਚਿਤੁਕਾਮਾ ਪਨੇਤ੍ਥ ਪਬ੍ਬਜਿਤਾ. ਤਸ੍ਮਾ ਗਮਨੇ ਉਪ੍ਪਨ੍ਨਕਿਲੇਸਂ ਗਮਨੇਯੇਵ ਨਿਗਣ੍ਹਥ. ਠਾਨੇ, ਨਿਸਜ੍ਜਾਯ, ਸਯਨੇ ਉਪ੍ਪਨ੍ਨਕਿਲੇਸਂ ਸਯਨੇਯੇਵ ਨਿਗ੍ਗਣ੍ਹਥਾਤਿ.

ਅਯਂ ¶ ਭਿਕ੍ਖੁ ਤੁਯ੍ਹਂ ਉਪ੍ਪਨ੍ਨਂ ਵਿਤਕ੍ਕਂ ਜਾਨਾਤਿ, ਅਨਨੁਚ੍ਛਵਿਕਂ ਤੇ ਏਤਨ੍ਤਿ ਅਤ੍ਤਾਨਂ ਪਟਿਚੋਦੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਿਯਭੂਮਿਂ ਓਕ੍ਕਮਤਿ.

ਅਯਂ ¶ ਥੇਰੋ ਪੁਨਪ੍ਪੁਨਂ ਨਿਵਤ੍ਤਿਤ੍ਵਾ ਗਚ੍ਛਤਿ, ਕਿਂ ਨੁਖੋ ਮਗ੍ਗਮੂਲ਼੍ਹੋ ਉਦਾਹੁ ਕਿਞ੍ਚਿ ਪਮੁਟ੍ਠੋਤਿ ਸਮੁਲ੍ਲਪਨ੍ਤਿ.

ਕਿਨ੍ਨੂ ¶ ਖੋ ਏਤੇ ਅਮ੍ਹੇਹੇਵ ਸਦ੍ਧਿਂ ਨ ਸਲ੍ਲਪਨ੍ਤਿ ਉਦਾਹੁ ਅਞ੍ਞ ਮਞ੍ਞਮ੍ਪਿ, ਯਦਿ ਅਞ੍ਞਮਞ੍ਞਮ੍ਪਿ ਨ ਸਲ੍ਲਪਨ੍ਤਿ, ਅਦ੍ਧਾ ਵਿਵਾਦਜਾਤਾ ਭਵਿਸ੍ਸਨ੍ਤਿ.

ਅਞ੍ਞਂ ¶ ਉਪ੍ਪਜ੍ਜਤੇ ਚਿਤ੍ਤਂ, ਅਞ੍ਞਂ ਚਿਤ੍ਤਂ ਨਿਰੁਜ੍ਝਤਿ;

ਅਵੀਚਿ ਮਨੁਸਮ੍ਬਨ੍ਧੋ, ਨਦੀ ਸੋਤੋਵ ਵਤ੍ਤਤਿ.

ਆਲੋਕਿਤੇ ਵਿਲੋਕਿਤੇ ਸਮ੍ਪਜਾਨਕਾਰੀ ਹੋਤਿ.

ਸਚੇ ¶ ਭਿਕ੍ਖਵੇ ਨਨ੍ਦਸ੍ਸ ਪੁਰਤ੍ਥਿਮਾ ਦਿਸਾ ਆਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸਾ ਸਮਨ੍ਨਾਹਰਿਤ੍ਵਾ ਨਨ੍ਦੋ ਪੁਰਤ੍ਥਿਮਂ ਦਿਸਂ ਆਲੋਕੇਤਿ ‘ਏਵਂ ਮੇ ਪੁਰਤ੍ਥਿਮਂ ਦਿਸਂ ਆਲੋਕਯਤੋ ਨਾਭਿਜ੍ਝਾ ਦੋਮਨਸ੍ਸਾ ਪਾਪਕਾ ਅਕੁਸਲਾ ਧਮ੍ਮਾ ਅਨ੍ਵਾਸ੍ਸਵਿਸ੍ਸਨ੍ਤੀ’ਤਿ. ਇਤਿਹ ਸਾਤ੍ਥਕ ਸਮ੍ਪਜਾਨੋ ਹੋਤਿ. ਸਚੇ ਭਿਕ੍ਖਵੇ ਨਨ੍ਦਸ੍ਸ ਪਚ੍ਛਿਮਾ ਦਿਸਾ, ਉਤ੍ਤਰਾ ਦਿਸਾ, ਦਕ੍ਖਿਣਾ ਦਿਸਾ, ਉਦ੍ਧਂ, ਅਧੋ, ਅਨੁਦਿਸਾ ਅਨੁਵਿਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸਾ ਸਮਨ੍ਨਾਹਰਿਤ੍ਵਾ ਨਨ੍ਦੋ ਅਨੁਦਿਸਂ ਅਨੁਵਿਲੋਕੇਤਿ ‘ਏਵਂ ਮੇ ਅਨੁਦਿਸਂ ਅਨੁਵਿਲੋਕਯਤੋ…ਪੇ… ਸਮ੍ਪਜਾਨੋ ਹੋਤੀਤਿ….

ਭਵਙ੍ਗਾ ¶ ਵਜ੍ਜਨਞ੍ਚੇਵ, ਦਸ੍ਸਨਂ ਸਮ੍ਪਟਿਚ੍ਛਨਂ;

ਸਨ੍ਤੀਰਣਂ ਵੋਟ੍ਠਬ੍ਬਨਂ, ਜਵਨਂ ਭਵਤਿ ਸਤ੍ਤਮਂ.

ਸਮਿਞ੍ਜਿਤੇ ¶ ਪਸਾਰਿਤੇ ਸਮ੍ਪਜਾਨਕਾਰੀ ਹੋਤਿ.

ਸਮਿਞ੍ਜਿਤੇ ਪਹਾਰਿਤੇਤਿ ਪਬ੍ਬਾਨਂ ਸਮਿਞ੍ਜਨ ਪਸਾਰਣੇ.

ਕਸ੍ਮਾ ¶ ਭਨ੍ਤੇ ਸਹਸਾ ਹਤ੍ਥਂ ਸਮਿਞ੍ਜਿਤ੍ਵਾ ਪੁਨ ਯਥਾਠਾਨੇ ਠਪੇਤ੍ਵਾ ਸਣਿਕਂ ਸਮਿਞ੍ਜਿਤ੍ਥਾਤਿ.

ਯਤੋ ਪਟ੍ਠਾਯ ਮਯਾ ਆਵੁਸੋ ਕਮ੍ਮਟ੍ਠਾਨਂ ਮਨਸਿਕਾਤੁਂ ਆਰਦ੍ਧੋ, ਨ ਮੇ ਕਮ੍ਮਟ੍ਠਾਨਂ ਮੁਞ੍ਜਿਤ੍ਵਾ ਹਤ੍ਥੋ ਸਮਿਞ੍ਜਿਤਪੁਬ੍ਬੋ, ਇਦਾਨਿ ਪਨ ਮੇ ਤੁਮ੍ਹੇਹਿ ਸਦ੍ਧਿਂ ਕਥਯਮਾਨੇਨ ਕਮ੍ਮਟ੍ਠਾਨਂ ਮੁਞ੍ਚਿਤ੍ਵਾ ਸਮਿਞ੍ਜਿਤੋ, ਤਸ੍ਮਾ ਪੁਨ ਯਥਾ ਠਾਨੇ ਠਪੇਤ੍ਵਾ ਸਮਿਞ੍ਜੇਸਿਨ੍ਤਿ.

ਸਾਧੁ ¶ ਭਨ੍ਤੇ ਭਿਕ੍ਖੁਨਾ ਨਾਮ ਏਵਰੂਪੇਨ ਭਵਿਤਬ੍ਬਨ੍ਤਿ.

ਸਙ੍ਘਾਟਿਪਤ੍ਤਚੀਵਰਧਾਰਣੇ ਸਮ੍ਪਜਾਨਕਾਰੀ ਹੋਤਿ.

ਕਤਮੋ ¶ ਚ ਪੁਗ੍ਗਲੋ ਸਮਯਵਿਮੁਤ੍ਤੋ, ਇਧੇਕਚ੍ਚੋ ਪੁਗ੍ਗਲੋ ਕਾਲੇਨ ਕਾਲਂ ਸਮਯੇਨ ਸਮਯਂ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਯਵਿਮੁਤ੍ਤੋ.

ਕਤਮੋ ¶ ਚ ਪੁਗ੍ਗਲੋ ਅਸਮਯਵਿਮੁਤ੍ਤੋ, ਇਧੇਕਚ੍ਚੋ ਪੁਗ੍ਗਲੋ ਨਹੇਵ ਖੋ ਕਾਲੇਨ ਕਾਲਂ ਸਮਯੇਨ ਸਮਯਂ ਅਟ੍ਠਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਅਸਮਯਵਿਮੁਤ੍ਤੋ. ਸਬ੍ਬੇਪਿ ਅਰਿਯ ਪੁਗ੍ਗਲਾ ਅਰਿਯੇ ਵਿਮੋਕ੍ਖੇ ਅਸਮਯਵਿਮੁਤ੍ਤਾ.

ਕਤਮੋ ¶ ਚ ਪੁਗ੍ਗਲੋ ਕੁਪ੍ਪਧਮ੍ਮੋ, ਇਧੇਕਚ੍ਚੋ ਪੁਗ੍ਗਲੋ ਲਾਭੀ ਹੋਤਿ ਰੂਪਸਹਗਤਾਨਂ ਵਾ ਅਰੂਪਸਹਗਤਾਨਂ ਵਾ ਸਮਾਪਤ੍ਤੀਨਂ, ਸੋ ਚ ਖੋ ਨ ਨਿਕਾਮਲਾਭੀ ਹੋਤਿ ਨ ਅਕਿਚ੍ਛਲਾਭੀ ਨ ਅਕਸਿਰ ਲਾਭੀ, ਨ ਯਤ੍ਥਿਚ੍ਛਕਂ ਯਦਿਚ੍ਛਕਂ ਯਾਵਤਿਚ੍ਛਕਂ ਸਮਾਪਜ੍ਜਤਿਪਿ ਵੁਟ੍ਠਾਤਿਪਿ, ਠਾਨਂ ਖੋ ਪਨੇਤਂ ਵਿਜ੍ਝਤਿ, ਯਂ ਤਸ੍ਸ ਪੁਗ੍ਗਲਸ੍ਸ ਪਮਾਦਮਾਗਮ੍ਮ ਤਾ ਸਮਾਪਤ੍ਤਿਯੋ ਕੁਪ੍ਪੇਯ੍ਯੁਂ. ਅਯਂ ਵੁਚ੍ਚਤਿ ਪੁਗ੍ਗਲੋ ਕੁਪ੍ਪਧਮ੍ਮੋ.

ਕਤਮੋ ¶ ਚ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ, ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤ ਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਸਤ੍ਤਕ੍ਖਤ੍ਤੁਂ ਦੇਵੇ ਚ ਮਾਨੁਸੇ ਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ.

ਸੋਤੋ ¶ ਸੋਤੋਤਿ ਹਿਦਂ ਸਾਰਿਪੁਤ੍ਤ ਵੁਚ੍ਚਤਿ, ਕਤਮੋ ਨੁਖੋ ਸਾਰਿਪੁਤ੍ਤ ਸੋਤੋਤਿ. ਅਯਮੇਵ ਹਿ ਭਨ੍ਤੇ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਸੋਤੋ. ਸੇਯ੍ਯਥਿਦਂ, ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧੀਤਿ. ਸੋਤਾਪਨ੍ਨੋ ਸੋਤਾਪਨ੍ਨੋਤਿ ਹਿਦਂ ਸਾਰਿਪੁਤ੍ਤ ਵੁਚ੍ਚਤਿ, ਕਤਮੋ ਨੁਖੋ ਸਾਰਿਪੁਤ੍ਤ ਸੋਤਾਪਨ੍ਨੋਤਿ. ਯੋ ਹਿ ਭਨ੍ਤੇ ਇਮਿਨਾ ਅਰਿਯੇਨ ਅਟ੍ਠਙ੍ਗਿਕੇਨ ਮਗ੍ਗੇਨ ਸਮਨ੍ਨਾਗਤੋ, ਅਯਂ ਵੁਚ੍ਚਤਿ ਸੋਤਾਪਨ੍ਨੋ, ਸ੍ਵਾਯਂ ਆਯਸ੍ਮਾ ਏਵਂਨਾਮੋ ਏਵਂਗੋਤ੍ਤੋ ਇਤਿ ਵਾਤਿ, ਇਤਿਵਾ….

ਕਤਮੋ ¶ ਚ ਪੁਗ੍ਗਲੋ ਕੋਲਂ ਕੋਲੋ. ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਦ੍ਵੇ ਵਾ ਤੀਣਿ ਵਾ ਕੁਲਾਨਿ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਵੁਚ੍ਚਤਿ ਕੋਲਂ ਕੋਲੋ.

ਕਤਮੋ ¶ ਚ ਪੁਗ੍ਗਲੋ ਏਕਬੀਜੀ, ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ ਅਵਿਨਿਪਾਤਧਮ੍ਮੋ ਨਿਯਤੋ ਸਮ੍ਬੋਧਿਪਰਾਯਣੋ, ਸੋ ਏਕਂਯੇਵ ਮਾਨੁਸਕਂ ਭਵਂ ਨਿਬ੍ਬਤ੍ਤੇਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਏਕਬੀਜੀ.

ਕਤਮੋ ¶ ਚ ਪੁਗ੍ਗਲੋ ਸਕਦਾਗਾਮੀ, ਇਧੇ ਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਰਾਗਦੋਸਮੋਹਾਨਂ ਤਨੁਤ੍ਤਾ ਸਕਦਾਗਾਮੀ ਹੋਤਿ ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਕਦਾਗਾਮੀ.