📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਨੀਤਿਮਞ੍ਜਰੀ

੧.

ਕੁਲਕ੍ਖਯੇ ਵਿਨਸ੍ਸਨ੍ਤਿ,

ਕੁਲਧਮ੍ਮਾ ਸਨਨ੍ਤਨਾ;

ਧਮ੍ਮੇ ਨਟ੍ਠੇ ਕੁਲਂ ਸਬ੍ਬਂ,

ਅਧਮ੍ਮੋ ਅਭਿਭੂ ਖਲਂ.

੨.

ਅਧਮ੍ਮਾਭਿਭਵਾ ਦਨ੍ਤਾ,

ਪਦੁਸ੍ਸਨ੍ਤਿ ਕੁਲਿਤ੍ਥਿਯੋ;

ਥੀਸੁ ਦੁਟ੍ਠਾ ਸ੍ਵ ਧਮ੍ਮੇਨ,

ਜਾਯਤੇ ਵਣ੍ਣਸਙ੍ਕਰੋ.

੩.

ਪਿਯਂ ਭਾਸੇ ਗੁਣਗ੍ਗਾਹੋ,

ਸੂਰੋ ਸਿਯਾ ਵਿਕਨ੍ਤਨੋ;

ਦਾਤਾ ਚਨ੍ਦਸਮਾ ਨਾਰੀ,

ਦਿਟ੍ਠਂ ਦਿਟ੍ਠਂ ਨਹਾਸਯੇ.

੪.

ਕੁਤੋਤ੍ਥਿ ਕੁਮਿਤ੍ਤੇ ਸਚ੍ਚਂ,

ਕੁਦਾਰੇ ਰਤਿਵਡ੍ਢਨਂ;

ਕੁਦੇਸਮ੍ਹਿ ਮਨੋ ਰਮ੍ਮਂ,

ਕੁਰਾਜੇ ਭੋਗਸਮ੍ਪਦਂ.

ਸਙ੍ਕੇਤੇਵ ਅਮਿਤ੍ਤਸ੍ਮਿਂ,

ਮਿਤ੍ਤਸ੍ਮਿਂ ਪਿ ਨਵਿਸ੍ਸਸੇ;

ਅਭਯਾ ਭਯ ਮੁਪ੍ਪਨ੍ਨਂ,

ਅਪਿ ਮੂਲਾਨਿ ਕਨ੍ਤਤਿ.

ਅਦਿਟ੍ਠੋਵ ਪਰੋ ਸੇਯ੍ਯੋ,

ਦੁਮ੍ਮਿਤ੍ਤੋ ਨੋ ਵਿਸ੍ਸਾਸਿਕੋ.

ਅਗ੍ਗਿਹੋਮਫਲਂ ਵੇਦੋ,

ਸਤ੍ਥਂਸੀਲਫਲਂ ਮਤਂ;

ਰਤਿਪੁਤ੍ਤਫਲਂ ਨਾਰੀ,

ਦਾਨਭੁਤ੍ਤਿਫਲਂ ਧਨਂ.

ਅਸਚ੍ਚਂ ਸਾਹਸਂ ਮਾਯਾ,

ਮੂਲ਼੍ਹਤ੍ਤ ਮ ਤਿਲੋਭਤਾ;

ਅਸੋਚਂ ਨਿਦ੍ਦਯਤ੍ਤਞ੍ਚ,

ਥੀਨਂ ਦੋਸਾ ਸਭਾਵਜਾ.

ਜਾਯਾਯ ਭਤ੍ਤੁਨੋ ਭਾਰੋ,

ਸਿਸ੍ਸੇਨ ਗੁਰੁਨੋ ਕਤੋ;

ਅਮਚ੍ਚਕੇਹਿ ਰਾਜਸ੍ਸ,

ਪਿਤਰਾਨਂ ਨਿਜੇਨਚ.

੫.

ਉਯ੍ਯਮੇਨ ਹਿ ਸਿਜ੍ਝਨ੍ਤਿ,

ਕਮ੍ਮਾਨਿ ਨ ਮਨੋਰਥਾ;

ਨ ਹਿ ਸੁਤ੍ਤਸ੍ਸ ਸੀਹਸ੍ਸ,

ਪਵੀਸਨ੍ਤਿ ਮੁਖੇ ਮਿਗਾ.

ਅਤਿਸੀਤਂ ਅਤਿਉਣ੍ਹਂ,

ਅਤਿਸਾਯਮਿਦਂ ਅਹੁ;

ਇਤਿ ਵਿਸਟ੍ਠਕਮ੍ਮਨ੍ਤੇ,

ਖਣਾ ਅਚ੍ਚੇਨ੍ਤਿ ਮਾਣਵੇ.

ਆਦਾਨਸ੍ਸ ਪਦਾਨਸ੍ਸ,

ਕਤ੍ਤਬ੍ਬਸ੍ਸ ਚ ਕਮ੍ਮੁਨੋ;

ਖਿਪ੍ਪਂ ਅਕਯ੍ਯਮਾਨਸ੍ਸ,

ਕਾਲੇ ਪਿਵਤਿ ਸਮ੍ਪਦਂ.

ਨਾਦਬ੍ਬੇ ਨਿਹਿਤਾ ਕਾਚਿ,

ਕ੍ਰਿਯਾ ਫਲਵਤੀ ਭਵੇ;

ਨਬ੍ਯਾਪਾਰਸਤੇਨਾਪਿ,

ਸੁਕੋਵ ਪਾਠਤੇ ਬਕੋ.

ਯੋ ਦਨ੍ਧਕਾਲੇ ਤਰਤਿ,

ਤਰਣੀਯੇ ਚ ਦਨ੍ਧਯੇ;

ਸੁਕ੍ਖਪਣ੍ਣਂ ਵ ਅਕ੍ਕਮ੍ਮ,

ਅਤ੍ਥਂ ਭਞ੍ਜਤਿ ਅਤ੍ਤਨੋ.

੬.

ਯਂ ਦਦਾਤਿ ਯਂ ਭੁਞ੍ਜਤਿ,

ਤਦੇਵ ਧਨਿਨੋ ਧਨਂ;

ਅਞ੍ਞੇ ਮਤਸ੍ਸ ਕੀਲ਼ਨ੍ਤਿ,

ਦਾਰੇਹਿਪਿ ਧਨੇਹਿਪਿ.

ਦਾਨੋਪਭੋਗਹੀਨੇਨ,

ਧਨੇਨ ਧਨਿਨੋ ਸੁਖਂ;

ਕੋ ਵਿਸੇਸੋ ਦਲਿਦ੍ਦਸ੍ਸ,

ਅਧਿਕਂ ਧਨਰਕ੍ਖਣਂ.

ਨਿਜਸੋਖ੍ਯਂ ਨਿਰੁਨ੍ਧਨ੍ਤੋ,

ਨੀਚਭੋਗੋ ਮਿਤਮ੍ਪਚੋ;

ਧਨਂ ਸਞ੍ਚਯਤੇ ਯੋ ਸੋ,

ਪਰਭਾਰਵਹੋ ਪਸੁ.

ਯਂ ਉਸ੍ਸੁਕਾ ਸਙ੍ਖਰੋਨ੍ਤਿ,

ਅਲਕ੍ਖਿਕਾ ਬਹੁਂ ਧਨਂ;

ਸਿਪ੍ਪਵਨ੍ਤੋ ਅਸਿਪ੍ਪਾਵਾ,

ਲਕ੍ਖਿ ਵਾ ਤਾਨਿ ਭੁਞ੍ਜਤਿ.

੭.

ਸਮ੍ਪਤ੍ਯਂ ਮਹਤਂ ਚਿਤ੍ਤਂ,

ਭਵੇ ਉਪ੍ਪਲੇ ਕੋਮਲਂ;

ਵਿਪਤ੍ਯਂਚ ਮਹਾਸੇਲ,

ਸਿਲਾਸਙ੍ਘਾਤਕਕ੍ਕਸਂ.

੮.

ਅਸਮ੍ਭਬ੍ਯਗੁਣਂ ਥੁਤ੍ਵਾ,

ਖੇਦੋ ਮੁਧਾਵ ਜਾਯਤੇ;

ਅਵ੍ਹਾਯਂ ਚਨ੍ਦ ਮੁ ਲ੍ਲੋਕ੍ਯ,

ਨਚਨ੍ਦੋਤ ਮੁ ਪਾਗਮੀ.

੯.

ਸਚ੍ਚਂ ਮੁਖਮ੍ਹਿ ਧਾਰੇਯ੍ਯ,

ਕਣ੍ਣੇ ਸੁਤਂ ਭੁਜੇ ਜਯਂ;

ਹਦਯਮ੍ਹਿ ਖਮਂ ਵੀਰਂ,

ਲੋਕਾਦਾਸਂਚ ਲੋਚਨੇ.

ਸਦ੍ਦਮਤ੍ਤਂ ਨਫਨ੍ਦੇਯ੍ਯ,

ਅਞ੍ਞਤ੍ਵਾ ਸਦ੍ਦਕਾਰਣਂ;

ਸਦ੍ਦਹੇਤੁਂ ਪਰਿਞ੍ਞਾਯ,

ਪਮੋਦੋ ਵਾ ਭਯੋ ਤਥਾ.

ਸਬ੍ਬਸੁਤ ਮ ਧੀਯੇਯ੍ਯ,

ਹੀਨਮੁਕ੍ਕਟ੍ਠਮਜ੍ਝਿਮਂ.

੧੦.

ਦੁਨ੍ਨਾਰਿਯਾ ਕੁਲਂ ਸੁਦ੍ਧਂ,

ਪੁਤ੍ਤੋ ਨਸ੍ਸਤਿ ਲਾਲਨਾ;

ਸਮਿਦ੍ਧਿ ਅਨਯਾ ਬਨ੍ਧੁ,

ਪਵਾਸਾ ਮਦਨਾ ਹਿਰੀ.

ਲਾਲਯੇ ਪਞ੍ਚਵਸ੍ਸਾਨਿ,

ਦਸਵਸ੍ਸਾਨਿ ਤਾਲਯੇ;

ਪਤ੍ਤੇਤੁ ਸੋਲ਼ਸੇਵਸ੍ਸੇ,

ਪੁਤ੍ਤਂ ਮਿਤ੍ਤਂਵ ਆਚਰੇ.

ਲਾਲਨੇ ਬਹਵੋ ਦੋਸਾ,

ਲਾਲਨੇ ਬਹਵੋ ਗੁਣਾ.

ਪਾਪਾ ਨਿਵਾਰਯਤਿ ਯੋਜਯਤੇ ਹਿਤਾਯ,

ਗੁਯ੍ਹਾਨਿ ਗੂਹਤਿ ਗੁਣਂ ਪਕਟੀਕਰੋਤਿ;

ਆਪਤ੍ਤਿਕਞ੍ਚ ਨਜਹਾਤਿ ਦਦਾਤਿ ਕਾਲੇ,

ਸਮ੍ਮਿਤ੍ਤ ਲਕ੍ਖਣਮਿਦਂ ਪਵਦਨ੍ਤਿ ਸਨ੍ਤੋ.

੧੧.

ਦੁਜ੍ਜਨੋ ਜੀਯਤੇ ਯੁਤ੍ਯਾ,

ਨਿਗ੍ਗਹੇਨ ਨਧੀਮਤਾ;

ਨਿਪਾਤ੍ਯਤੇ ਮਹਾਰੁਕ੍ਖੋ,

ਤਸ੍ਸਮੀਪ ਖਤਿਕ੍ਖਯਾ.

ਵਨੇ ਮਿਗਾਚ ਲੁਦ੍ਧਾਨਂ,

ਦੁਜ੍ਜਨਾਨਞ੍ਚ ਸਜ੍ਜਨਾ;

ਅਕਾਰਣਵੇਰੀ ਹੋਨ੍ਤਿ,

ਤਿਣਭਕ੍ਖਾ ਸੁਪੇਸਲਾ.

ਪਾਦਲਗ੍ਗਂ ਕਰਟ੍ਠੇਨ,

ਕਣ੍ਡਕੇਨੇਵ ਕਣ੍ਡਕਂ.

ਬਾਲਂ ਨਪਸ੍ਸੇ ਨਸੁਣੇ,

ਨਚਬਾਲੇਨ ਸਂਵਸੇ;

ਬਾਲੇਨਾਲ੍ਲਾਪਸਲ੍ਲਾਪਂ,

ਨਕਰੇ ਨਚਰੋਚਯੇ.

੧੨.

ਉਪ ਕਤ੍ਤੁਂ ਯਥਾ ਖੁਦ੍ਦੋ,

ਸਮਤ੍ਥੋ ਨਤਥਾਮਹਾ;

ਕੂਪੋ ਹਿ ਹਨ੍ਤਿ ਪਿਪਾਸਂ,

ਨਤੁ ਪਾਯੋ ਮਹਮ੍ਬੁਧਿ.

੧੩.

ਆਦਾਨਸ੍ਸ ਪਦਾਨਸ੍ਸ,

ਕਤ੍ਤਬ੍ਬਸ੍ਸਚ ਕਮ੍ਮੁਨੋ;

ਖਿਪ੍ਪਂ ਅਕਰਮਾਨਸ੍ਸ,

ਕਾਲੋ ਭਕ੍ਖਤਿ ਤਂ ਰਸਂ.

ਨਕ੍ਖਤ੍ਤਂ ਪਟਿਮਾਨੇਨ੍ਤਂ,

ਅਤ੍ਥੋ ਬਾਲਂ ਉਪਜ੍ਝਗਾ;

ਅਤ੍ਥੋ ਅਤ੍ਥਸ੍ਸ ਨਕ੍ਖਤ੍ਤਂ,

ਕਿਂ ਕਰਿਸ੍ਸਨ੍ਤਿ ਤਾਰਕਾ.

ਅਜਰਾਮਰੋਵ ਪਞ੍ਞੋ,

ਵਿਜ੍ਜਮਤ੍ਥਞ੍ਚ ਚਿਨ੍ਤਯੇ;

ਗਹਿਤੋਵਿਯ ਕੇਸੇਸੁ,

ਮਚ੍ਚੁਨਾ ਧਮ੍ਮਮਾਚਰੇ.

੧੪.

ਵਜ੍ਜਾ ਗੁਰੂਚ ਮਨ੍ਤੀਚ,

ਤਯੋ ਰਟ੍ਠਾਭਿਸਙ੍ਖਤਾ;

ਜੀਵੀਤ ਦਕ੍ਖ ਕੋਸਾਨਂ,

ਵਡ੍ਢਨਾ ਨਾਸਨਾਚ ਤੇ.

੧੫.

ਥਿਰੇਨ ਕਮ੍ਮਂ ਵਡ੍ਢਤਿ,

ਅਥਿਰੇਨ ਤੁਰੇਨ ਨੋ;

ਫਲਨ੍ਤਿ ਸਮਯੇ ਰੁਕ੍ਖਾ,

ਸਿਤ੍ਤਾਪਿ ਬਹੁਵਾਰਿਨਾ.

ਵਾਯਾਮੇਥੇਵ ਪੁਰਿਸੋ,

ਨਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ.

ਪਯਤਨੋ ਤਾਦਿਸੋ ਨੇਵ,

ਕਯ੍ਯੋ ਯੇਨ ਫਲਂ ਨਹਿ;

ਸੇਲਗ੍ਗੇ ਕੂਪਖਣਨਾ,

ਕਥਂ ਤੋਯਸਮਾਗਮੋ.

ਞਾਣਙ੍ਕੁਸੇਨ ਸਮ੍ਮਗ੍ਗਂ,

ਨਿਯ੍ਯਤ੍ਯੁਸ੍ਸਾਹਕੁਞ੍ਜਰੋ.

ਅਸਮੇਕ੍ਖਿਤਕਮ੍ਮਨ੍ਤਂ,

ਤੁਰਿਤਾਭਿ ਨਿਪਾਤਿਨਂ;

ਤਾਨਿਕਮ੍ਮਾਨਿ ਤਪ੍ਪੇਨ੍ਤਿ,

ਉਣ੍ਹਂ ਵ ਜ੍ਝੋਹਿਤਂ ਮੁਖੇ.

੧੬.

ਛਦ੍ਦੋਸਾ ਪੁਰਿਸੇਨੇਹ,

ਹਾਤਬ੍ਬਾ ਭੂਤਿਮਿਚ੍ਛਨ੍ਤਾ;

ਨਿਦ੍ਦਾ ਮਜ੍ਜਂ ਭਯਂ ਕੋਧੋ,

ਆਲਸ੍ਯਂ ਦੀਘਸੁਤ੍ਤਤਾ.

ਨ ਦਿਵਾ ਸੁਪ੍ਪਸੀਲੇਨ,

ਰਤ੍ਤਿਮੁਟ੍ਠਾਨਦੇਸ੍ਸਿਨਾ;

ਨਿਚ੍ਚਸੋਣ੍ਡੇਨ ਮਤ੍ਤੇਨ,

ਸਕ੍ਕਾ ਆਵਸਿਤੁਂ ਘਰਂ.

ਅਭੇਤਬ੍ਬਮ੍ਹਿ ਭਾਯਨ੍ਤਿ,

ਭਾਯਿਤਬ੍ਬੇ ਨਭਾਯਰੇ;

ਭਯਾਭਯ ਵਿਮੁਲ਼੍ਹਾ ਤੇ,

ਜਿਮ੍ਹਾਨੁਗਾ ਉਜੁਞ੍ਜਹਾ.

ਯਸ੍ਸ ਮਨੁਸ੍ਸਭੂਤਸ੍ਸ,

ਨਤ੍ਥਿ ਭੋਗਾਚ ਸਿਪ੍ਪਕਂ;

ਕਿਂ ਫਲਂ ਤਸ੍ਸ ਮਾਨੁਸ੍ਸਂ,

ਦ੍ਵਿਪਾਦਟ੍ਠੋ ਹਿ ਸੋ ਮਿਗੋ.

੧੭.

ਨਾਨੋਪਾਯੋਵ ਕਤ੍ਤਬ੍ਬੋ,

ਸਚੇ ਭਵੇਯ੍ਯ ਅਤ੍ਤਨੋ;

ਅਤ੍ਥਸਿਦ੍ਧਿ ਯਥਾਕਾਮਂ,

ਉਪਾਯੋ ਹਿ ਹਿਤਞ੍ਜਸੋ.

ਲਞ੍ਜਦਾਨਬਾਲਿਸੇਨ,

ਕੂਟਡ੍ਡਕਾਰਧੀਵਰਾ;

ਵਿਨਿਚ੍ਛਯਮਹਾਮਚ੍ਛਂ,

ਓਟ੍ਟੇਨ੍ਤਿ ਲੋਭਸਾਗਰੇ.

ਯਸ੍ਸੇਤੇ ਚਤੁਰੋ ਧਮ੍ਮਾ,

ਵਾਨਰਿਨ੍ਦ ਯਥਾਤਵ;

ਸਚ੍ਚਂ ਧਮ੍ਮੋ ਧੀਤਿ ਚਾਗੋ,

ਦਿਟ੍ਠਂ ਸੋ ਅਤਿਵਤ੍ਤਤਿ.

੧੮.

ਵਿਦ੍ਵਾਚ ਰਤਨਂ ਨਾਰੀ,

ਵੀਣਾ ਸਾਤ੍ਥਂ ਗਿਰਂਮਹੀ;

ਗੁਣਵਿਸੇਸ ਮਾਗਮ੍ਮ,

ਗੁਣਾਨਿ ਅਗੁਣਾਨਿਚ.

ਧਨਵਾ ਬਲਵਾ ਲੋਕੇ,

ਧਨਾ ਭਵਤਿ ਪਣ੍ਡਿਤੋ.

ਸੁਮਨੇ ਨਿਸ੍ਸਿਤੋ ਕੀਟੋ,

ਨਿਗ੍ਗੁਣੋ ਹੀਨਕੋ ਸਯਂ;

ਤਂ ਪੁਪ੍ਫੇਹਿ ਮਣ੍ਡੇਨ੍ਤਾਨਂ,

ਰਞ੍ਞਂ ਸਿਰੋਪਿ ਰੋਹਤਿ.

ਅਲਕ੍ਖਿਕੇਹਿ ਸਞ੍ਚੀਤਾ,

ਧਨਭੋਗਾਚ ਚਿਨ੍ਤਿਤਾ;

ਲਕ੍ਖਿਕਸ੍ਸ ਭਵਨ੍ਤੇਤੇ,

ਲਕ੍ਖਿਵਾ ਸੁਟ੍ਠੁਭੁਞ੍ਜਤਿ.

ਖਤ੍ਤਿਯੋ ਸੇਟ੍ਠੋ ਜਨੇ ਤਸ੍ਮਿਂ,

ਯੋ ਗੋਤ੍ਤਪਟਿਸਾਰਿਨੋ;

ਵਿਜ੍ਜਾਚਰਣਸਮ੍ਪਨ੍ਨੋ,

ਸੋ ਸੇਟ੍ਠੋ ਦੇਵਮਾਨੁਸੇ.

ਵਿਸਾਪਿ ਅਮਤਂ ਗਣ੍ਹੇ,

ਗੂਥਤੋ ਮਣਿਮੁਤ੍ਤਮਂ;

ਕਣ੍ਟਕਪਾਦਪਾ ਪੁਪ੍ਫਂ,

ਥਿਰਤਂ ਦੁਕ੍ਕੁਲਾ ਵਰਂ.

ਧਨਿਸ੍ਸਰਾਦਿਗੁਣੋਮ੍ਮਿ -

ਵੇਗੇਨ ਵਾਹਿਤਾ ਪਜਾ.

੧੯.

ਯਸ੍ਸ ਤ੍ਥਿ ਸਤਤਂ ਮੇਤ੍ਤਾ,

ਸਬ੍ਬਲੋਕਸੁਵਲ੍ਲਭਾ;

ਕੂਪਾਯਤੇ ਸਮੁਦ੍ਦੋਪਿ,

ਅਗ੍ਗਿ ਤਸ੍ਸ ਜਲਾਯਤੇ.

੨੦.

ਸਕ੍ਖਰਾਯਤਿ ਮੇਰੂਪਿ,

ਵਿਸਭਕ੍ਖੋ ਸੁਧਾਯਤੇ;

ਸਸਾਯਤੇ ਮਿਗਰਾਜ,

ਬ੍ਯਾਲੋ ਮਾਲਾਗੁਣਾਯਤੇ;

ਦੋਲਾਯਤੇ ਛਮਾਚਾਲੋ,

ਨਾਨਾਵੁਧਾ ਤਿਣਾਯਰੇ.

੨੧.

ਸਮੇਵ ਸਤਿ ਉਸ੍ਸਾਹੇ,

ਸੁਖਵਾਹੋ ਹਿਤਙ੍ਕਰੋ;

ਊਨੇ-ਧਿਕੇ ਤਥਾ ਨੋਹਿ,

ਮਜ੍ਝਗੋ ਸਾਧੁ ਸਬ੍ਬਦਾ.

ਸਾਧੁ ਖੋ ਪਣ੍ਡਿਤੋਨਾਮ,

ਨਤ੍ਵੇਵ ਅਤਿਪਣ੍ਡਿਤੋ.