📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸੁਤ੍ਤਨ੍ਤਨੀਤਿ

੧.

ਪਰਾ ਭਵਨ੍ਤਂ ਪੁਰਿਸਂ,

ਮਯਂ ਪੁਚ੍ਛਾਮ ਗੋਤਮਂ;

ਭਵਨ੍ਤਂ ਪੁਟ੍ਠੁ ਮਾਗਮ੍ਮ,

ਕਿਂ ਪਰਾਭਵਤੋ ਮੁਖਂ.

੨.

ਸੁਵਿਜਾਨੋ ਭਵਂਹੋਤਿ,

ਦੁਵਿਜਾਨੋ ਪਰਾਭਵੋ;

ਧਮ੍ਮਕਾਮੋ ਭਵਂ ਹੋਤਿ,

ਧਮ੍ਮਦੇਸ੍ਸੀ ਪਰਾਭਵੋ.

੩.

ਇਤਿਹੇ ਤਂ ਵਿਜਾਨਾਮ,

ਪਥਮੋ ਸੋ ਪਰਾਭਵੋ;

ਦੁਤੀਯਂ ਭਗਵਾ ਬ੍ਰੂਹਿ,

ਕਿਂ ਪਰਾਭਵਤੋ ਮੁਖਂ.

੪.

ਅਸਨ੍ਤਸ੍ਸ ਪਿਯੋ ਹੋਤਿ,

ਸਨ੍ਤੇ ਨ ਕੁਰੁਤੇ ਪਿਯਂ;

ਅਸਤਂ ਧਮ੍ਮਂ ਰੋਚੇਤਿ,

ਤਂ ਪਰਾਭਵਤੋ ਮੁਖਂ.

ਕਮ੍ਮਾਪਰਾਧਸਤ੍ਤਾਨਂ,

ਵਿਨਾਸੇ ਪਚ੍ਚੁਪਟ੍ਠਿਤੇ;

ਅਨਯੋ ਨਯਰੂਪੇਨ,

ਬੁਦ੍ਧਿਮਾਕਮ੍ਯ ਤਿਟ੍ਠਤਿ.

੫.

ਨਿਦ੍ਦਾਸੀਲੀ ਸਭਾਸੀਲੀ,

ਅਨੁਟ੍ਠਾਤਾ ਚ ਯੋ ਨਰੋ;

ਅਲਸੋ ਕੋਧਪਞ੍ਞਾਣੋ,

ਤਂ ਪਰਾਭਵਤੋ ਮੁਖਂ.

੬.

ਯੋ ਮਾਤਰਂ ਪਿਤਰਂ ਵਾ,

ਜਿਣ੍ਣਕਂ ਗਤਯੋਬ੍ਬਨਂ;

ਪਹੁਸਨ੍ਤੋ ਨ ਭਰਤਿ,

ਤਂ ਪਰਾਭਵਤੋ ਮੁਖਂ.

੭.

ਯੋ ਬ੍ਰਾਹ੍ਮਣਂ ਸਮਣਂ ਵਾ,

ਅਞ੍ਞਂ ਵਾਪਿ ਵਣਿਬ੍ਬਕਂ;

ਮੁਸਾਵਾਦੇਨ ਵਞ੍ਚੇਤਿ,

ਤਂ ਪਰਾਭਵਤੋ ਮੁਖਂ.

੮.

ਪਹੁਤਵਿਤ੍ਤੋ ਪੁਰਿਸੋ,

ਸਹਿਰਞ੍ਞੋ ਸਭੋਜਨੋ;

ਏਕੋ ਭੁਞ੍ਜਤਿ ਸਾਦੂਨਿ,

ਤਂ ਪਰਾਭਵਤੋ ਮੁਖਂ.

੯.

ਜਾਤਿਥਦ੍ਧੋ ਧਨਥਦ੍ਧੋ,

ਗੋਤ੍ਤਥਦ੍ਧੋ ਚ ਯੋ ਨਰੋ;

ਸਞਾਤਿਂ ਅਤਿਮਞ੍ਞੇਤਿ,

ਤਂ ਪਰਾਭਵਤੋ ਮੁਖਂ.

੧੦.

ਇਤ੍ਥਿਧੁਤ੍ਤੋ ਸੁਰਾਧੁਤ੍ਤੋ,

ਅਕ੍ਖਧੁਤ੍ਤੋ ਚ ਯੋ ਨਰੋ;

ਲਦ੍ਧਂਲਦ੍ਧਂ ਵਿਨਾਸੇਤਿ,

ਤਂ ਪਰਾਭਵਤੋ ਮੁਖਂ.

ਨ ਬਾਲ਼੍ਹਂ ਇਤ੍ਥਿਂ ਗਚ੍ਛੇਯ੍ਯ,

ਸਮ੍ਪਸ੍ਸਂ ਤੇਜਸਙ੍ਖਯਂ;

ਕਾਸਂ ਸਾਸਂ ਦਰਂ ਬਾਲ੍ਯਂ,

ਖੀਣਮੇਦੋ ਨਿਗਚ੍ਛਤਿ.

(ਕ)

ਮਾਯਾਚੇਤਾ ਮਰੀਚੀ ਚ,

ਸੋਕੋ ਰੋਗੋ ਉਪਦ੍ਦਵੋ;

ਖਰਾ ਚ ਬਨ੍ਧਨਾਚੇਤਾ,

ਮਚ੍ਚੁਪਾਸੋ ਗੁਹਾਸਯੋ.

(ਖ)

ਬਲਵਨ੍ਤੋ ਦੁਬ੍ਬਲਾ ਹੋਨ੍ਤਿ,

ਥਾਮਵਨ੍ਤੋਪਿ ਹਾਯਰੇ;

ਚਕ੍ਖੁਮਾ ਅਨ੍ਧਕਾ ਹੋਨ੍ਤਿ,

ਮਾਤੁਗਾਮਵਸਂਗਤਾ.

(ਗ)

ਗੁਣਵਨ੍ਤੋ ਨਿਗ੍ਗੁਣਾ ਹੋਨ੍ਤਿ,

ਪਞ੍ਞਵਨ੍ਤੋਪਿ ਹਾਯਰੇ;

ਪਮੁਤ੍ਤਾ ਬਨ੍ਧਨਾ ਸੇਨ੍ਤਿ,

ਮਾਤੁਗਾਮਵਸਂਗਤਾ.

(ਘ)

ਯਸਂ ਕਿਤ੍ਤਿਂ ਧਿਤਿਂ ਸੂਰਂ;

ਬਾਹੁਸ੍ਸਚ੍ਚਂ ਪਜਾਨਨਂ;

ਹਾਪਯਨ੍ਤਿ ਪਮਤ੍ਤਸ੍ਸ;

ਕਟ੍ਠਪੁਞ੍ਚਂਵ ਪਾਵਕੋ.

੧੧.

ਸੇਹਿ ਦਾਰੇਹਿ ਸਨ੍ਤੁਟ੍ਠੋ,

ਵੇਸਿਯਾਸੁ ਪਦੁਸ੍ਸਤਿ;

ਦੁਸ੍ਸਤਿ ਪਰਦਾਰੇਸੁ,

ਤਂ ਪਰਾਭਵਤੋ ਮੁਖਂ.

(ਕ)

ਮਯਞ੍ਚ ਭਰਿਯਂ ਨਾਤਿਕ੍ਕਮਾਮ,

ਅਮ੍ਹੇਚ ਭਰਿਯਾ ਨਾਤਿਕ੍ਕਮਨ੍ਤਿ;

ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ,

ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

(ਖ)

ਏਤਾਸੁ ਜਾਯਰੇ ਸੁਤ੍ਤਮਾਸੁ,

ਮੇਧਾਵਿਨੋ ਹੋਨ੍ਤਿ ਪਹੁਤਪਞ੍ਞਾ;

ਬਹੁਸ੍ਸੁਤਾ ਥੇਰਗੁਣਾ ਚ ਹੋਨ੍ਤਿ,

ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ.

੧੨.

ਅਤੀਤਯੋਬ੍ਬਨੋ ਪੋਸੋ,

ਆਨੇਤਿ ਤਿਮ੍ਬਰੁਤ੍ਥਨਿਂ;

ਤਸ੍ਸ ਇਸ੍ਸਾ ਨ ਸੁਪਤਿ,

ਤਂ ਪਰਾਭਵਤੋ ਮੁਖਂ.

(ਕ)

ਨ ਦੁਕ੍ਖਂ ਅਹਿਨਾ ਦਟ੍ਠਂ,

ਨ ਦੁਕ੍ਖਂ ਸਤ੍ਤਿਯਾ ਹਤਂ;

ਤਞ੍ਚ ਦੁਕ੍ਖਞ੍ਚ ਤਿਬ੍ਬਞ੍ਚ,

ਯਂ ਪਸ੍ਸੇ ਜਿਣ੍ਣਕਂ ਪਤਿਂ.

(ਖ)

ਨਤ੍ਥਿ ਖਿਟ੍ਟਾ ਨਤ੍ਥਿ ਰਤਿ,

ਜਿਣ੍ਣੇਨ ਪਤਿਨਾ ਸਹ;

ਨਤ੍ਥਿ ਅਲ੍ਲਾਪਸਲ੍ਲਾਪੋ,

ਜਗ੍ਘਿਤੁਂਪਿ ਨ ਸੋਭਤਿ.

(ਗ)

ਯਦਾ ਚ ਦਹਰੋ ਦਹਰੀ,

ਮਨ੍ਤਯਿਂਸੁ ਰਹੋਗਤਾ;

ਸਬ੍ਬੇ ਸੋਕਾ ਵਿਨਸ੍ਸਨ੍ਤਿ,

ਯੇਕੇਚਿ ਹਦਯਸ੍ਸਿਤਾ.

੧੩.

ਇਤ੍ਥਿਂ ਸੋਣ੍ਡਿਂ ਵਿਕਿਰਣਿਂ,

ਪੁਰਿਸਂ ਵਾਪਿ ਤਾਦਿਸਂ;

ਇਸ੍ਸਰਿਯਸ੍ਮਿਂ ਥਪੇਤਿ,

ਤਂ ਪਰਾਭਵਤੋ ਮੁਖਂ.

੧੪.

ਅਪ੍ਪਭੋਗੋ ਮਹਾਤਣ੍ਹੋ,

ਖਤ੍ਤਿਯੇ ਜਾਯਤੇ ਕੁਲੇ;

ਸੋ ਚ ਰਜ੍ਜਂ ਪਤ੍ਥਯਤਿ,

ਤਂ ਪਰਾਭਵਤੋ ਮੁਖਂ.

‘‘ਸੁਵਿਜਾਨੋ ਭਵਂਹੋਤਿ,

ਦੁਵਿਜਾਨੋ ਪਰਾਭਵੋ’’;

ਅਪ੍ਪਭੋਗੋ ਮਹਾਤਣ੍ਹੋ.

੧੫.

ਏਤੇ ਪਰਾਭਵੇ ਲੋਕੇ,

ਪਣ੍ਡਿਤੋ ਸਮਵੇਕ੍ਖਿਯ;

ਅਰਿਯੋ ਦਸ੍ਸਨਸਮ੍ਪਨ੍ਨੋ,

ਸ ਲੋਕਂ ਭਜਤੇ ਸਿਵਂ.

ਵਸਲਸੁਤ੍ਤ

੧.

ਕੋਧਨੋ ਉਪਨਾਹੀਚ,

ਪਾਪਮਕ੍ਖੀ ਚ ਯੋ ਨਰੋ;

ਵਿਪਨ੍ਨਦਿਟ੍ਠੀ ਮਾਯਾਵੀ,

ਤਂ ਜਞ੍ਞਾ ਵਸਲੋ ਇਤਿ.

੨.

ਏਕਜਂ ਵਾ ਦ੍ਵਿਜਂ ਵਾਪਿ,

ਯੋਧ ਪਾਣਂ ਵਿਹਿਂਸਤਿ;

ਯਸ੍ਸ ਪਾਣੇ ਦਯਾ ਨਤ੍ਥਿ,

ਤਂ ਜਞ੍ਞਾ ਵਸਲੋ ਇਤਿ.

੩.

ਯੋ ਹਨ੍ਤਿ ਉਪਰੁਨ੍ਧਤਿ,

ਗਾਮਾਨਿ ਨਿਗਮਾਨਿ ਚ;

ਨਿਗ੍ਗਾਹਕੋ ਸਮਞ੍ਞਾਤੋ,

ਤਂ ਜਞ੍ਞਾ ਵਸਲੋ ਇਤਿ.

੪.

ਗਾਮੇ ਵਾ ਯਦਿ ਵਾ ਰਞ੍ਞੇ,

ਯਂ ਪਰੇਸਂ ਮਮਾਯਿਤਂ;

ਥੇਯ੍ਯਾ ਅਦਿਨ੍ਨਂ ਆਦੇਤਿ,

ਤਂ ਜਞ੍ਞਾ ਵਸਲੋ ਇਤਿ.

੫.

ਯੋ ਹਵੇ ਇਣਮਾਦਾਯ,

ਵੁਚ੍ਚਮਾਨੋ ਪਲਾਯਤਿ;

ਨ ਹਿ ਤੇ ਇਣਮਤ੍ਥੀਤਿ,

ਤਂ ਜਞ੍ਞਾ ਵਸਲੋ ਇਤਿ.

੬.

ਯੋਧ ਕਿਞ੍ਚਿਕ੍ਖਕਮ੍ਯਤਾ,

ਪਥਸ੍ਮਿਂ ਵਜਤਂ ਜਨਂ;

ਹਨ੍ਤ੍ਵਾ ਕਿਞ੍ਚਿਕ੍ਖ ਮਾਦੇਤਿ;

ਤਂ ਜਞ੍ਞਾ ਵਸਲੋ ਇਤਿ.

੭.

ਯੋ ਅਤ੍ਤਹੇਤੁ ਪਰਹੇਤੁ,

ਧਨਹੇਤੁ ਚ ਯੋ ਨਰੋ;

ਸਕ੍ਖਿਪੁਟ੍ਠੋ ਮੁਸਾਬ੍ਰੂਤਿ,

ਤਂ ਜਞ੍ਞਾ ਵਸਲੋ ਇਤਿ.

੮.

ਯੋ ਞਾਤੀਨਂ ਸਖੀਨਂ ਵਾ,

ਦਾਰੇਸੁ ਪਟਿਦਿਸ੍ਸਤਿ;

ਸਹਸਾ ਸਮ੍ਪਿਯੇਨ ਵਾ,

ਤਂ ਜਞ੍ਞਾ ਵਸਲੋ ਇਤਿ.

੯.

ਯੋ ੪ ਮਾਤਰਂ ਪਿਤਰਂ ਵਾ,

ਜਿਣ੍ਣਕਂ ਗਤਯੋਬ੍ਬਨਂ;

ਪਹੁਸਨ੍ਤੋ ਨ ਭਰਤਿ,

ਤਂ ਜਞ੍ਞਾ ਵਸਲੋ ਇਤਿ.

੧੦.

ਯੋ ਮਾਤਰਂ ਪਿਤਰਂ ਵਾ,

ਭਾਤਰਂ ਭਗਿਨਿਂ ਸਸ੍ਸੁਂ;

ਹਨ੍ਤਿ ਰੋਸੇਤਿ ਵਾਚਾਯ,

ਤਂ ਜਞ੍ਞਾ ਵਸਲੋ ਇਤਿ.

੧੧.

ਯੋ ਅਤ੍ਥਂ ਪੁਚ੍ਛਿਤੋ ਸਨ੍ਤੋ,

ਅਨਤ੍ਥ ਮਨੁਸਾਸਤਿ;

ਪਟਿਚ੍ਛਨ੍ਨੇਨ ਮਨ੍ਤੇਤਿ,

ਤਂ ਜਞ੍ਞਾ ਵਸਲੋ ਇਤਿ.

੧੨.

ਯੋ ਕਤ੍ਵਾ ਪਾਪਕਂ ਕਮ੍ਮਂ,

ਮਾਮਂ ਜਞ੍ਞਾਤਿ ਇਚ੍ਛਤਿ;

ਯੋ ਪਟਿਚ੍ਛਨ੍ਨਕਮ੍ਮਨ੍ਤੋ,

ਤਂ ਜਞ੍ਞਾ ਵਸਲੋ ਇਤਿ.

੧੩.

ਯੋ ਵੇ ਪਰਕੁਲਂ ਗਨ੍ਤ੍ਵਾ,

ਭੁਤ੍ਵਾਨ ਸੁਚਿਭੋਜਨਂ;

ਆਗਤਂ ਨਪ੍ਪਟਿਪੂਜੇਤਿ,

ਤਂ ਜਞ੍ਞਾ ਵਸਲੋ ਇਤਿ.

੧੪.

ਯੋ ਸਮਣਂ ਵਾ ਬ੍ਰਾਹ੍ਮਣਂ,

ਅਞ੍ਞਂ ਵਾਪਿ ਵਣਿਬ੍ਬਕਂ;

ਮੁਸਾਵਾਦੇਨ ਵਞ੍ਚੇਤਿ,

ਤਂ ਜਞ੍ਞਾ ਵਸਲੋ ਇਤਿ.

੧੫.

ਯੋ ਸਮਣਂ ਵਾ ਬ੍ਰਾਹ੍ਮਣਂ,

ਭਤ੍ਤਕਾਲੇ ਉਪਟ੍ਠਿਤਂ;

ਰੋਸੇਤਿ ਵਾ ਨ ਚ ਦੇਤਿ,

ਤਂ ਜਞ੍ਞਾ ਵਸਲੋ ਇਤਿ.

੧੬.

ਅਸਨ੍ਤਂ ਯੋਧ ਪਬ੍ਰੂਤਿ,

ਮੋਹੇਨ ਪਲਿਗੁਣ੍ਠਿਤੋ;

ਕਿਞ੍ਚਨਂ ਨਿਜਿਗੀਸਾਨੋ,

ਤਂ ਜਞ੍ਞਾ ਵਸਲੋ ਇਤਿ.

੧੭.

ਯੋਚਤ੍ਤਾਨਂ ਸਮੁਕ੍ਕਂਸੇ,

ਪਰੇਚ ਮਵਜਾਨਾਤਿ;

ਨਿਹੀਨੋ ਸੇਨ ਮਾਨੇਨ,

ਤਂ ਜਞ੍ਞਾ ਵਸਲੋ ਇਤਿ.

੧੮.

ਰੋਸਕੋ ਕਦਰੀਯੋ ਚ,

ਪਾਪਿਚ੍ਛੋ ਮਚ੍ਛਰੀ ਸਠੋ;

ਅਹਿਰੀਕੋ ਅਨੋਤ੍ਤਪ੍ਪੀ,

ਤਂ ਜਞ੍ਞਾ ਵਸਲੋ ਇਤਿ.

੧੯.

ਯੋ ਬੁਦ੍ਧਂ ਪਰਿਭਾਸਤਿ,

ਅਥਵਾ ਤਸ੍ਸ ਸਾਵਕਂ;

ਪਰਿਬ੍ਬਜਂ ਗਹਟ੍ਠਂ ਵਾ,

ਤਂ ਜਞ੍ਞਾ ਵਸਲੋ ਇਤਿ.

ਅਟ੍ਠਹਿ ਭਿਕ੍ਖਵੇ ਅਙ੍ਗੇਹਿ ਸਮ੍ਪਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤੋ ਨਿਕੁਜ੍ਜਿਤਬ੍ਬੋ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਾਵਾਸਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਕ੍ਕੋਸਤਿ ਪਰਿਭਾਸਤਿ, ਭਿਕ੍ਖੂਭਿਕ੍ਖੂਹਿ ਭੇਦੇਤਿ, ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਅਨੁਜਾਨਾਮਿ ਭਿਕ੍ਖਵੇ ਇਮੇਹਿ ਅਟ੍ਠਹਿ ਅਙ੍ਗੇਹਿ ਸਮ੍ਪਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤਂ ਨਿਕੁਜ੍ਜਿਤੁਂ.

੨੦.

ਯੋ ਅਨਰਹਂ ਸਨ੍ਤੋ,

ਅਰਹਾਤਿ ਪਟਿਜਾਨਾਤਿ;

ਚੋਰੋ ਸਬ੍ਰਹ੍ਮਕੇ ਲੋਕੇ,

ਤਂ ਜਞ੍ਞਾ ਵਸਲੋ ਇਤਿ.

੨੧.

ਏਤੇ ਖੋ ਵਸਲਾ ਵੁਤ੍ਤਾ,

ਮਯਾ ਯੇ ਤੇ ਪਕਾਸਿਤਾ;

ਨ ਜਚ੍ਚਾ ਵਸਲੋ ਹੋਤਿ,

ਨ ਜਚ੍ਚਾ ਹੋਤਿ ਬ੍ਰਾਹ੍ਮਣੋ.

੨੨.

ਕਮ੍ਮੁਨਾ ਵਸਲੋ ਹੋਤਿ,

ਕਮ੍ਮੁਨਾ ਹੋਤਿ ਬ੍ਰਾਹ੍ਮਣੋ.

੨੩.

ਤਦਮਿਨਾਪਿ ਜਾਨਾਥ,

ਯਥਾਹੇਤਂ ਨਿਦਸ੍ਸਨਂ;

ਚਣ੍ਡਾਲਪੁਤ੍ਤੋ ਸੋਪਾਕੋ,

ਮਾਤਙ੍ਗੋ ਇਤਿ ਵਿਸ੍ਸੁਤੋ.

੨੪.

ਸੋ ਯਸਂ ਪਰਮਂ ਪਤ੍ਤੋ,

ਮਾਤਙ੍ਗੋ ਯਂ ਸੁਦੁਲ੍ਲਭਂ;

ਆਗਚ੍ਛੁਂ ਤਸ੍ਸੁਪਟ੍ਠਾਨਂ,

ਖਤ੍ਤਿਯਾ ਬ੍ਰਾਹ੍ਮਣਾ ਬਹੂ.

੨੫.

ਸੋ ਦੇਵਯਾਨਂ ਅਭਿਰੁਯ੍ਹ,

ਵਿਰਜਂ ਸੋ ਮਹਾਪਥਂ;

ਕਾਮਰਾਗਂ ਵਿਰਾਜੇਤ੍ਵਾ,

ਬ੍ਰਹ੍ਮਲੋਕੂਪਗੋ ਅਹੁ.

ਗਿਰਿਂ ਨਖੇਨ ਖਣਸਿ,

ਅਯੋ ਦਨ੍ਤੇਭਿ ਖਾਦਸਿ;

ਜਾਤਵੇਦਂ ਪਦਹਸਿ,

ਯੋ ਇਸਿਂ ਪਰਿਭਾਸਤਿ.

ਆਵੇਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ,

ਬਾਹੁਂ ਪਸਾਰੇਤਿ ਅਕਮ੍ਪਣੇਯ੍ਯਂ;

ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ,

ਕੋ ਮੇ ਇਮਂ ਪੁਤ੍ਤਮਕਾਸਿ ਏਵਂ.