📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸੂਰਸ੍ਸਤੀਨੀਤਿ

ਪਠਮੋ ਭਾਗੋ

ਪਣਾਮਗਾਥਾ

੧.

ਮੁਖਮ੍ਹਾ ਭਗਵਨ੍ਤਸ੍ਸ,

ਸੁਗਨ੍ਧਕਮਲਾ ਸੁਭਾ;

ਸਞ੍ਜਾਤਂ ਉਤ੍ਤਮਂ ਵਾਣਿਂ,

ਵਨ੍ਦਾਮਿ ਵਿਤ੍ਤਮਾਨਸਾ.

੨.

ਸਮਜ੍ਝਿਟ੍ਠੋ ਰਚਿਸ੍ਸਾਮਿ,

ਦਕ੍ਖੇਨ ਰਾਜਮਨ੍ਤਿਨਾ;

ਨਾਮੇਨ ਸਨ੍ਤੇਨ,

ਨੀਤਿਂ ਲੋਕਹਿਤਾਵਹਂ;

ਸਾਲਙ੍ਕਾਰਂ ਸੋਪਦੇਸਂ,

ਨਾਮੇਨਾਹਂ ਸ੍ਵਰਸ੍ਸਤਿਂ.

੩.

ਪੇਕ੍ਖਨ੍ਤ੍ਵਿਮਂ ਨੀਤਿਂ ਸਨ੍ਤਾ,

ਮਞ੍ਜੂਸਰੁਕ੍ਖਸਨ੍ਨਿਭਂ;

ਨਾਨੋਪਦੇਸਸਂਪੁਣ੍ਣਂ,

ਸਦਤ੍ਥਕੁਸਲਾ ਸਦਾ.

ਸੂਰਸ੍ਸਤੀਨੀਤਿ

੧.

ਕਤਞ੍ਞੁਤਾ ਚ ਸਚ੍ਚਞ੍ਚ,

ਲੋਕਸਾਰਾ ਹਿ ਤੇ ਦੁਵੇ;

ਲੋਕਾਪਿ ਤੇਹਿ ਤਿਟ੍ਠਨ੍ਤਿ,

ਰਟ੍ਠਂ ਅਕਂਸੁ ਇਸ੍ਸਰਂ.

੨.

ਕਾਕਾਚ ਦੁਜ੍ਜਨਾ ਲੋਕੇ,

ਮਲੀਭੂਤਾਵ ਸਬ੍ਬਦਾ;

ਇਟ੍ਠਂ ਗੁਣਂ ਨਾਸਯਨ੍ਤਿ,

ਤੇ ਵੇ ਲੋਕਸ੍ਸ ਵੇਰਿਨੋ.

ਮਿਗਾਨਂ ਸਿਙ੍ਗਾਲੋ ਅਨ੍ਤੋ,

ਪਕ੍ਖੀਨਂ ਪਨ ਵਾਯਸੋ.

ਅਕਾਰਣਵੇਰੀ ਹੋਨ੍ਤਿ,

ਮਚ੍ਛਾਨਂ ਧੀਵਰਾ ਯਥਾ;

ਗੁਣੀਨਂ ਸਜ੍ਜਨਾਨਞ੍ਚ,

ਦੁਜ੍ਜਨਾ ਨਿਚ੍ਚਵੇਰਿਨੋ.

੩.

ਸਿਰਿਂ ਭੋਨ੍ਤੋ ਸੁਪੋਸੇਥ,

ਸਿਰਿ ਮੂਲਾ ਹਿ ਸਮ੍ਪਦਾ;

ਸਿਰਿਯ ਇਧ ਜੋਤਨ੍ਤਿ,

ਸਿਰੀ ਸਾ ਸਬ੍ਬਸਿਦ੍ਧਿਕਾ.

੪.

ਮੁਸਾ ਤਮੋਕਰਾ ਲੋਕੇ,

ਸਚ੍ਚਂ ਮੀਦਿਤਿਕਾਰਕਂ;

ਮੁਸਾਤਮੇਨ ਦੁਕ੍ਖਨ੍ਤਿ,

ਸਚ੍ਚਾਭਾਯ ਸੁਖਨ੍ਤਿਵੇ.

ਸੁਵਿਜਾਨਂ ਸਿਙ੍ਗਾਲਾਨਂ,

ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ,

ਦੁਬ੍ਬਿਜਾਨਤਰਂ ਤਤੋ.

੫.

ਕਪ੍ਪਗ੍ਗਿਸਦਿਸਾ ਇਸ੍ਸਾ,

ਝਾਪੇਤਿ ਸਬ੍ਬਸਮ੍ਪਦਂ;

ਮੁਦਿਤਾ ਕਪ੍ਪਮੇਘੋਵ,

ਰੋਪੇਤਿ ਸਬ੍ਬਸਮ੍ਪਦਂ.

੬.

ਯਥਾ ਅਸਨ੍ਥਿਰਾ ਥਮ੍ਭਾ,

ਥੁਸਰਾਸਿਮ੍ਹਿ ਉਸ੍ਸਿਤਾ;

ਤਥੇਵ ਕਪਿਚਿਤ੍ਤਾਨਂ,

ਕਮ੍ਮਨ੍ਤਾ ਚਞ੍ਚਲਙ੍ਗਤਾ.

ਹਲਿਦ੍ਦਿਰਾਗਂ ਕਪਿਚਿਤ੍ਤਂ;

ਪੁਰਿਸਂ ਰਾਗਵਿਰਾਗਿਨਂ,

ਏਦਿਸਂ ਤਾਤ ਮਾਸੇਵਿ;

ਨਿਮ੍ਮਨੁਸ੍ਸਮ੍ਪਿ ਚੇ ਸਿਯਾ.

੭. [ਕ]

ਪੁਪ੍ਫਚੁਮ੍ਬਿ ਚਿਤ੍ਤਪਤ੍ਤੀ,

ਸਕਵਣ੍ਣੇਨ ਮਜ੍ਜਿਤੋ;

ਵਿਕ੍ਕਮੀ ਪੁਪ੍ਫਤੋ ਪੁਪ੍ਫਂ,

ਨਸ੍ਸਾਗਾਰਂ ਨ ਸਙ੍ਗਮੋ.

[ਖ]

ਕਿਪ੍ਪਿਲਿਕਾ ਦੁਬ੍ਬਣ੍ਣਾਪਿ,

ਸਮਗ੍ਗਾਚ ਪਰਕ੍ਕਮਾ;

ਮਾ ਹੋਥ ਪੁਪ੍ਫਚੁਮ੍ਬੀਵ,

ਹੋਥ ਵੋ ਪਚਿਕਾ ਯਥਾ.

੧.

ਯੇ ਮਰਨ੍ਤਿ ਕੀਲ਼ਨ੍ਤਾ ਤੇ,

ਸ੍ਵਾਨਾ ਅਞ੍ਞੋਞ੍ਞਮੋਦਿਤਾ;

ਦਿਸ੍ਵਾਨ ਛਟ੍ਟਿਤਂ ਭਤ੍ਤਂ,

ਸੀਘਵੇਰੀ ਵਿਹਿਂਸਰੇ.

੨.

ਤਥੇਕੇਪਿ ਜਨਾ ਦਾਨਿ,

ਸਮਗ੍ਗਾ ਞ੍ਞੋਞ੍ਞਮੋਦਿਤਾ;

ਧਨਹੇਤੁ ਵਿਹਿਂਸਨ੍ਤਿ,

ਧੀਰਤ੍ਥੁ ਸੀਘਵੇਰਿਕਾ.

੯.

ਵਸਨ੍ਤੇ ਹੇਮਨ੍ਤੇ ਗਿਮ੍ਹੇ;

ਨੇਵ ਤਾਲਾ ਵਿਸੇਸਿਨੋ;

ਥਿਰਚਿਤ੍ਤਾ ਜਨਾ ਸਨ੍ਤਾ;

ਸੁਖਦੁਕ੍ਖੇਸੁ ਨਿਚ੍ਚਲਾ.

੧੦.

ਯਥਾ ਪਵਟ੍ਟਮਾਨਮ੍ਹਿ,

ਸੁਟ੍ਠੁ ਤਿਟ੍ਠਤਿ ਗੇਣ੍ਠੁਕੇ;

ਅਪ੍ਪਵਟ੍ਟੇ ਭੂਮ੍ਯਂ ਸੇਤਿ,

ਤਥੇਵ ਗੇਣ੍ਠੁਕੋ ਜਨੋ.

੧੧.

ਅਗ੍ਘਾਪੇਤੁਂ ਨਸਕ੍ਕੋਨ੍ਤਿ,

ਕਾਲਞ੍ਹਿ ਕਾਲਿਕਾ ਜਨਾ;

ਵਜਿਰਾਦਿਞ੍ਚ ਸਕ੍ਕੋਨ੍ਤਿ,

ਤੇਨ ਕਾਲੋ ਅਨਗ੍ਘਿਕੋ.

੧੨. [ਕ]

ਅਸਨੋ ਹਿ ਦੀਘਦ੍ਧਾਨੋ,

ਸਾਰਸਾਰੋ ਸੁਗਨ੍ਧਿਕੋ;

ਨਿਗ੍ਗਨ੍ਧੋ ਤ੍ਵੇਵ ਨਿਸ੍ਸਾਰੋ,

ਦੀਘਦ੍ਧਾਨੋਪਿ ਸਿਮ੍ਬਲੀ.

[ਖ]

ਤਥੇਵੇਕੇ ਜਨਾ ਲੋਕੇ,

ਦੀਘਦ੍ਧਾਨਾ ਸੁਸਾਰਕਾ;

ਨਿਸ੍ਸਾਰਾ ਕੇਚਿ ਫੇਗ੍ਗੂਵ,

ਦੀਘਦ੍ਧਾਨਾਪਿ ਗੋਯਥਾ.

੧੩.

ਉਪਕਾਰੋ ਚਾਪਕਾਰੋ,

ਯਸ੍ਮਿਂ ਗਚ੍ਛਤਿ ਨਟ੍ਠਤਂ;

ਪਾਸਾਣਹਦਯਸ੍ਸਸ੍ਸ,

ਜੀਵਤੀਤ੍ਯਾ ਭਿਧਾਮੁਧਾ.

ਪਸਾਦੋ ਨਿਪ੍ਫਲੋ ਯਸ੍ਸ,

ਕੋਪੋਚਾਪਿ ਨਿਰਤ੍ਥਕੋ;

ਨ ਤਂ ਸਙ੍ਗਨ੍ਤੁ ਮਿਚ੍ਛੇਯ੍ਯ,

ਥੀਪੁਮਾਵ ਨਪੁਂਸਕਂ.

੧੪.

ਉਪਚਾਰੋ ਹਿ ਕਾਤਬ੍ਬੋ,

ਨ ਯਾਵ ਸੋਹਦਂ ਭਵੇ;

ਉਪਚਾਰੋ ਸੁਮਿਤ੍ਤਮ੍ਹਿ,

ਮਾਯਾ ਚ ਹੋਤਿ ਕੋਟਿਲਂ.

੧੫.

ਕਮੇਨ ਅਗ੍ਗਤੋ ਉਚ੍ਛੁ,

ਰਸੋ ਸਾਦੁਤਰੋ ਯਥਾ;

ਤਥੇਵ ਸੁਮਿਤ੍ਤੋ ਲੋਕੇ,

ਦੁਮ੍ਮਿਤ੍ਤੋ ਪਨ ਨੇਦਿਸੋ.

੧੬.

ਸੋਕਾਰਾਤਿ ਪਰਿਤ੍ਤਾਣਂ,

ਵਿਸ੍ਸਾਸਪੀਤਿਭਾਜਨਂ;

ਰਤਨਾਭਿਰਤਨਂ ਇਚ੍ਛੇ,

ਸੁਮਿਤ੍ਤਂ ਅਕ੍ਖਰਤ੍ਤਯਂ.

੧੭.

ਦਮ੍ਪਤੀਨਂ ਸੁਮਿਤ੍ਤਾਨਂ,

ਮੁਖਂ ਅਞ੍ਞੋਞ੍ਞਦਪ੍ਪਣਂ,

ਸੁਖੇ ਸੁਖਂ ਦੁਕ੍ਖੇ ਦੁਕ੍ਖਂ,

ਪਟਿਚ੍ਛਾਯੇਵ ਦਪ੍ਪਣੇ.

ਕਥਂ ਨੁ ਤਾਸਂ ਹਦਯਂ,

ਸੁਖਰਾਵਤ ਇਤ੍ਥਿਯੋ;

ਯਾਸਾਮਿਕੇ ਦੁਕ੍ਖਿਤਮ੍ਹਿ,

ਸੁਖਮਿਚ੍ਛਨ੍ਤਿ ਅਤ੍ਤਨੋ.

੧੮.

ਨਿਵਾਤਞ੍ਚ ਪੁਰੇ ਕਤ੍ਵਾ,

ਮਾਨਂ ਕਤ੍ਵਾਨ ਪਚ੍ਛਤੋ;

ਸਕਤ੍ਥਂ ਧਾਰਯੇ ਧੀਰੋ,

ਅਤ੍ਥਭਞ੍ਜੋ ਹਿ ਮੁਲ਼੍ਹਤਾ.

੧੯.

ਪੁਰੇਚਾਰਂ ਸਤਿਂ ਕਤ੍ਵਾ,

ਸਦ੍ਧਂ ਕਰੇਯ੍ਯ ਪਚ੍ਛਤੋ;

ਤੁਰਂ ਨ ਸਦ੍ਦਹੇ ਧੀਰੋ,

ਸੀਘਸਦ੍ਧੋ ਹਿ ਮਨ੍ਦਕੋ.

੨੦.

ਵਨੇ ੦.੦੦੯੯ ਬਹੂਨਿ ਕਟ੍ਠਾਨਿ;

ਦੁਲ੍ਲਭਂ ਰਤ੍ਤਚਨ੍ਦਨਂ;

ਤਥਾ ਜਨਾ ਬਹੂ ਲੋਕੇ;

ਪੁਮਾ ਜਞ੍ਞੋ ਸੁਦੁਲ੍ਲਭੋ.

੨੧.

ਤਿਣਕਟ੍ਠਪਲਾਸੇਹਿ;

ਸੁਕ੍ਖੇਹਿ ਦਯ੍ਹਤੇ ਵਨਂ;

ਏਤਾਦੀਹਿ ਅਸਾਰੇਹਿ;

ਲੋਕੋ ਜਨੇਹਿ ਦਯ੍ਹਤੇ.

੨੨.

ਅਨ੍ਤੋਵਸ੍ਸੇ ਤਿਮਾਸਮ੍ਹਿ,

ਪੁਞ੍ਞਕਮ੍ਮੇਨ ਮੋਦਿਤਾ;

ਸੁਖਂ ਵਸਿਂਸੁ ਪੋਰਾਣਾ,

ਬੁਦ੍ਧਸਾਸਨਮਾਮਕਾ.

੨੩.

ਮਿਗਮਦੇਨ ਏਕੇਨ,

ਤਂ ਵਨਂ ਸੁਰਭਿਗਨ੍ਧਿਕਂ;

ਤਥਾ ਜਨੇਨ ਤਂ ਰਟ੍ਠਂ,

ਗੁਣਿਨਾ ਹਿ ਸਿਰੀਮਤਾ.

ਸਰੀਰਂ ਖਣਵਿਦ੍ਧਂਸੀ,

ਕਪ੍ਪਨ੍ਤਟ੍ਠਾਯਿਨੋ ਗੁਣਾ.

੨੪.

ਖਰਾਨਂ ਸੀਹਬ੍ਯਗ੍ਘਾਨਂ,

ਸਙ੍ਗਮੋ ਨੋ ਹਿਸਬ੍ਬਦਾ;

ਤਥੇਵ ਬ੍ਯਗ੍ਘਚਿਤ੍ਤਾਨਂ,

ਸਜਾਤਿਕਾ ਖਯੋਨਤਾ.

੨੫.

ਸਕ ਸਾਧੁਪਿ ਨੋ ਸਾਧੂ,

ਯੋ ਚੇਞ੍ਞ ਦੁਟ੍ਠਕਾਰਕੋ;

ਬਹੂਨਂ ਸਾਧੂ ਪਾਯੇਨ,

ਸ ਵੇ ਸਾਧੂਤਿ ਵੁਚ੍ਚਤੇ.

੨੬.

ਬਹੂਦਕੇ ਸਮੁਦ੍ਦੇਪਿ,

ਜਲਂ ਨਤ੍ਥੇਵ ਪਾਤਵੇ;

ਖੁਦ੍ਦਕੇ ਖਤਕੂਪਮ੍ਹਿ,

ਸਾਦੁਂ ਅਤ੍ਥਿ ਬਹੁਂ ਦਕਂ.

੨੭.

ਮਾ ਸੀਘਂ ਵਿਵਰੇਯ੍ਯਾਥ,

ਨਿਨ੍ਦਿਤੁਞ੍ਚ ਪਸਂਸਿਤੁਂ;

ਮੁਖਞ੍ਹਿ ਵੋ ਕਥਾਦ੍ਵਾਰਂ,

ਨਿਰੁਨ੍ਧੇਯ੍ਯਾਥ ਸਬ੍ਬਦਾ.

੨੮.

ਮਾ ਸੀਘਂ ਵਿਵਰੇਯ੍ਯਾਥ,

ਚਕ੍ਖੁਂ ਵੋ ਦਸ੍ਸਿਤੁਂ ਪਿਯਂ;

ਸਣਿਕਞ੍ਹਿ ਪਿਯਲਾਭਂ,

ਧਨਲਾਭਂ ਤੁਰਂ ਕਰੇ.

੨੯.

ਅਨਾਰਮ੍ਭੋ ਹਿ ਕਮ੍ਮਾਨਂ,

ਪਠਮਂ ਬੁਦ੍ਧਿਲਕ੍ਖਣਂ;

ਨਿਟ੍ਠਙ੍ਗਤਂ ਆਰਦ੍ਧਸ੍ਸ,

ਦੁਤਿਯਂ ਬੁਦ੍ਧਿਲਕ੍ਖਣਂ.

ਅਸਮੇਕ੍ਖਿਤਕਮ੍ਮਨ੍ਤਂ,

ਤੁਰਿਤਾਭਿਨਿਪਾਤਿਨਂ;

ਸਾਨਿ ਕਮ੍ਮਾਨਿ ਤਪ੍ਪੇਨ੍ਤਿ,

ਉਣ੍ਹਂ ਵਜ੍ਝੋਹਟਂ ਮੁਖੇ.

੩੦.

ਅਫਲਾਨਿ ਦੁਰਨ੍ਤਾਨਿ,

ਜਨਤਾ ਨਿਨ੍ਦਿਤਾਨਿ ਚ;

ਅਸਕ੍ਯਾਨਿ ਚ ਕਮ੍ਮਾਨਿ,

ਨਾਰਭੇਥ ਵਿਚਕ੍ਖਣੋ.

੩੧.

ਅਤਿਵਿਰੋਧਭੀਤਾਨਂ,

ਸਙ੍ਕਿਤਾਨਂ ਪਦੇ ਪਦੇ;

ਪਰਪ੍ਪਵਾਦਤਾਸਾਨਂ,

ਦੂਰਤੋ ਯਨ੍ਤਿ ਸਮ੍ਪਦਾ.

ਸਦ੍ਦਮਤ੍ਤਂ ਨ ਭੇਤਬ੍ਬਂ,

ਲੋਕੋ ਸਦ੍ਦਸ੍ਸ ਗੋਚਰੋ;

ਯੋ ਚ ਸਦ੍ਦਪਰਿਤ੍ਤਾਸੋ,

ਵਨੇ ਭਨ੍ਤਮਿਗੋ ਹਿ ਸੋ.

੩੨.

ਦ੍ਵਿਨ੍ਨਂ ਤਣ੍ਡੁਲਥੂਸਾਨਂ,

ਵਿਸੇਸੋ ਸੁਟ੍ਠੁ ਖਾਯਤਿ;

ਰਨ੍ਧਿਤੋਪਿ ਸਿਨਿਦ੍ਧੋ ਨੋ,

ਥੁਸੋ ਵਿਰਸਫਾਰੁਸੋ;

ਤਣ੍ਡੁਲਂ ਸਿਨਿਦ੍ਧਂ ਰਸਂ,

ਏਵਂ ਲੋਕੇਪਿ ਞਾਯਤੇ.

੩੩.

ਏਰਣ੍ਡਂ ਨਿਸ੍ਸਿਤਾ ਵਲ੍ਲਿ,

ਰੁਹਤੇ ਕਿਂ ਯਥਾਬਲਂ;

ਮਹਾਸਾਲਂ ਸੁਨਿਸ੍ਸਾਯ,

ਰੁਹਤੇ ਬ੍ਰਹਤਂ ਗਤਾ.

੩੪.

ਮੇਤ੍ਤਾ ਹਿ ਸੀਮਸਮ੍ਭੇਦਾ,

ਪਕ੍ਖਪਾਤ ਵਿਘਾਤਿਕਾ;

ਪਕ੍ਖਪਾਤੇਨ ਦੁਕ੍ਖਨ੍ਤਿ,

ਨਿਪ੍ਪਕ੍ਖੋ ਵਸਤੇ ਸੁਖਂ.

੩੫.

ਨਰਾ ਪਞ੍ਞਾ ਚ ਲਙ੍ਕਾਰਾ,

ਯਥਾਠਾਨੇ ਨਿਯੁਜ੍ਜਰੇ;

ਨੋ ਹਿ ਚੂਲ਼ਾਮਣਿ ਪਾਦੇ,

ਪਾਦੁਕਾ ਚ ਸਿਰੋਪਰਿ.

ਉਕ੍ਕੁਟ੍ਠੇ ਸੂਰ ਮਿਚ੍ਛਨ੍ਤਿ;

ਮਨ੍ਤੀਸੁ ਅਕੁਤੂਹਲਂ;

ਵਿਯਞ੍ਚ ਅਨ੍ਨਪਾਨਮ੍ਹਿ;

ਅਤ੍ਥੇ ਜਾਤੇ ਚ ਪਣ੍ਡਿਤਂ.

੩੬.

ਪਮਾਦੋ ਹਿ ਤਮੋ ਲੋਕੇ,

ਕਾਲੋ ਚੋਰੋ ਭਯਾਨਕੋ;

ਕਾਯਗੇਹਂ ਬਹੁਛਿਦ੍ਦਂ,

ਕਾਲਚੋਰਸ੍ਸ ਚੋਰਿਤਂ.

੩੭.

ਚਞ੍ਚਲੋ ਕਾਲਦਾਸੋ ਹਿ,

ਧੀਤਿਮਾ ਕਾਲਇਸ੍ਸਰੋ;

ਕਾਲਿਸ੍ਸਰੋ ਰਟ੍ਠਿਸ੍ਸਰਂ,

ਅਤਿਵਤ੍ਤਤਿ ਸਬ੍ਬਸੋ.

੩੮.

ਵਿਲੁਪ੍ਪਨ੍ਤਿ ੮ ਧਨਂ ਏਕੇ,

ਕਾਲਮੇਕੇ ਅਨੇਕ੍ਖਕਾ;

ਤੇਸੁ ਕਾਲਵਿਲੋਪਾਵ,

ਭਯਾਨਕਾ ਤਿਕਕ੍ਖਲ਼ਾ.

੩੯.

ਰਞ੍ਞਾ ਰਟ੍ਠਹਿਤਂ ਕਤ੍ਤਾ,

ਰਞ੍ਞੋ ਹਿਤਂ ਜਨੇਹਿ ਵੇ;

ਦੇਸ੍ਸੋ ਅਤ੍ਤਹਿਤਂ ਦਸ੍ਸੀ,

ਗਾਰਯ੍ਹੋ ਕਿਨ੍ਨੁ ਕਾਰਕੋ.

ਅਤ੍ਤਦਤ੍ਥਂ ਪਰਤ੍ਥੇਨ;

ਬਹੁਨਾਪਿ ਨ ਹਾਪਯੇ.

੪੦.

ਯਸ੍ਸ ਉਪਕਾਰੋ ਦਿਨ੍ਨੋ,

ਉਪਕਾਰਂ ਦਦੇ ਪੁਨ;

ਤਤੋ ਪਕਾਰਂ ਨਿਚ੍ਛੇਯ੍ਯ,

ਕਤਞ੍ਞੂ ਦੁਲ੍ਲਭੋ ਇਧ.

ਸਚ੍ਚਂ ਕਿਰੇਵ ਮਾਹਂਸੁ,

ਨਰਾ ਏਕਚ੍ਚਿਯਾ ਇਧ;

ਕਟ੍ਠਂ ਨਿਪ੍ਲਵਿਤਂ ਸੇਯ੍ਯੋ,

ਨਤ੍ਵੇਵੇ ਕਚ੍ਚਿਯੋ ਨਰੋ.

੪੧.

ਕਾਰੁਕੋ ਸਕਪਞ੍ਞਾਯ,

ਮਹਗ੍ਘਂ ਦਾਰੁਕਂ ਕਰੇ;

ਤਥਾ ਜਨੋਪਿ ਅਤ੍ਤਾਨਂ,

ਮਹਗ੍ਘੋ ਲੋਕਮਾਨਿਤੋ.

੪੨.

ਅਪ੍ਪਗ੍ਘੋ ਹਿ ਅਯੋ ਹੇਮਂ,

ਮਹਗ੍ਘਂ ਛਿਨ੍ਦਤੇ ਯਥਾ;

ਨਿਗ੍ਗੁਣੋ ਸਗੁਣਂ ਲੋਕੇ,

ਅਲਕ੍ਖੀਚ ਸਿਰਿਂ ਤਥਾ.

ਸੂਰਸ੍ਸਤੀਨੀਤਿ

ਦੁਤਿਯੋ ਭਾਗੋ

੧.

ਧਨਸ੍ਸ ਦੁਬ੍ਬਿਧਂ ਕਿਚ੍ਚਂ,

ਪਾਪੇਤਿ ਉਣ੍ਣਤਂ ਧਨਿਂ;

ਅਧਨਿਂ ਓਣਤਂ ਲੋਕੇ,

ਸਞ੍ਚਿਨੇ ਤੇਨ ਤਂ ਧਨਂ.

੨.

ਵਟ੍ਟਤੇ ਸਤਤਂ ਸੀਘਂ,

ਕਾਲਚਕ੍ਕਂ ਅਵਾਰਿਤਂ;

ਤੇਨ ਘਟੀ ਦਿਨਂ ਮਾਸੋ,

ਵਸ੍ਸੋ ਭਵਤ੍ਯ ਚੀਰਤੋ.

੩.

ਸਤ੍ਤੁਨਾ ਨ ਹਿ ਸਨ੍ਧੇਯ੍ਯ,

ਏਕਦਾ ਸੋ ਭਯਂ ਕਰੋ;

ਸੁਤਤ੍ਤਮਪਿ ਪਾਨੀਯਂ,

ਸਮਯਤੇ ਨੁ ਪਾਵਕਂ.

੪.

ਵਿਜਹਂ ਪਕਤਿਂ ਯੋ ਹਿ,

ਵਿਕਤਿਂ ਪੁਨ ਗਚ੍ਛਤਿ;

ਸਭਾਵੇਨ ਆਕਾਰੇਨ,

ਵਿਪ੍ਪਲ੍ਲਾਸਂ ਸ ਗਚ੍ਛਤਿ;

ਸਂਸੁਮਾਰ ਗਤਾ ਗੋਧਾ,

ਯਥਾ ਥੀ ਪੁਮਵੇਸਿਕਾ.

੫.

ਪਕ੍ਖਂ ਲਦ੍ਧਾਨ ਉਡ੍ਡੇਨ੍ਤਿ,

ਉਪਚਿਕਾ ਹਿ ਵਮ੍ਮਿਕਾ;

ਨਿਕ੍ਖਨ੍ਤਾ ਮਰਣਂ ਯਨ੍ਤਿ,

ਉਪ੍ਪਤਾ ਨਿਪ੍ਪਤਂ ਗਤਾ.

੬.

ਸਬ੍ਬਂਪਿਯਸ੍ਸ ਦਜ੍ਜੇਯ੍ਯ,

ਨਿਸ੍ਸੇਸਂ ਪਿਯਮਾਨਸਂ;

ਸਦ੍ਧਾਚਿਤ੍ਤਂ ਤੁ ਨੋ ਵਿਞ੍ਞੂ,

ਸਦ੍ਧਾਯਿਕੋ ਪਕ੍ਖਲਿਤੋ.

੭.

ਸਕ੍ਕੋਤਿ ਲਙ੍ਘਿਤੁਂ ਬ੍ਯਾਮਂ,

ਮਹੁਸ੍ਸਾਹੇਨ ਯੋ ਹਿ ਸੋ;

ਤਦਡ੍ਢਂ ਅਨੁਸ੍ਸਾਹੇਨ,

ਨੋਸ੍ਸਾਹੋ ਤੇਸੁ ਥੋਮਿਤੋ;

ਮਹੁਸ੍ਸਾਹੋ ਦੁਕ੍ਖੋ ਲੋਕੇ,

ਅਨੁਸ੍ਸਾਹੋ ਸਦਾ ਸੁਖੋ.

੮.

ਦੁਕ੍ਖਮਂ ਅਕ੍ਖਮਨ੍ਤੋ ਯੋ,

ਪਿਟ੍ਠਿਕਾਰੀਚ ਦੁਕ੍ਕਰਂ,

ਕਦਾ ਲਭੇਯ੍ਯ ਸੋ ਲੋਕੇ,

ਸੁਖਮਂ ਸੁਕਰਂ ਮੁਧਾ;

ਪਚ੍ਚਕ੍ਖਞ੍ਹਿ ਸੋ ਕਰੇਯ੍ਯ,

ਦੁਕ੍ਖਮਞ੍ਚਾਪਿ ਦੁਕ੍ਕਰਂ.

੯.

ਅਨਗ੍ਘੋ ਮਨੁਸ੍ਸੋ ਲੋਕੇ,

ਤੋਸਨਾਪੋਸਨਾਦਿਨਾ;

ਤੇਨ ਸੋ ਮਹਗ੍ਘਂ ਕਮ੍ਮਂ,

ਕਰੇ ਲੋਕਹਿਤਾਯੁਤਂ.

੧੦.

ਵਾਤੇਨ ਨਪ੍ਪਭਿਜ੍ਜਨ੍ਤਿ,

ਨਿਨ੍ਨਾ ਵੇਲ਼ੂ ਕਸਾ ਨਲ਼ਾ;

ਯਥਾਵਾਤਂ ਨਗਚ੍ਛਨ੍ਤਿ,

ਤਥਾ ਚਰੇ ਜਨੇ ਕਦਾ.

੧੧.

ਪੁਰਤੋ ਚ ਪਚ੍ਛਤੋ ਚੇ,

ਨਿਸ੍ਸਯੋ ਨਤ੍ਥਿ ਪਸ੍ਸਤੋ;

ਅਧਿਕਂ ਵੀਰਿਯਂ ਹੋਤਿ,

ਅਤ੍ਤਨਾਥੋ ਤਦਾ ਭਵੇ.

੧੨.

ਖਣਂ ਆਖੁਬਿਲਂ ਸੀਹੋ,

ਪਾਸਾਣਸਕਲਾਕੁਲਂ;

ਪਪ੍ਪੋਤਿ ਨਖਭਙ੍ਗਂਵਾ,

ਫਲਂਵਾ ਮੂਸਿਕੋ ਭਵੇ.

੧੩.

ਮਗ੍ਗਮੁਲ਼੍ਹਾ ਜਨਾ ਅਨ੍ਧਾ,

ਅਮਗ੍ਗਾ ਮਗ੍ਗਸਞ੍ਞਿਨੋ;

ਤਥੇਵ ਦੁਪ੍ਪਞ੍ਞਾ ਮੁਲ਼੍ਹਾ,

ਤਥਤ੍ਥਂ ਨਾਵ ਬੁਜ੍ਝਰੇ.

੧੪.

ਪਿਯਰੂਪਂ ਵੀਰਰੂਪਂ,

ਦੁਵਿਧਾ ਰੂਪਸਮ੍ਪਦਾ,

ਨਾਰਿਂ ਇਚ੍ਛੇ ਪਿਯਰੂਪਿਂ,

ਪੁਰਿਸਂ ਵੀਰਰੂਪਕਂ.

੧੫.

ਪਜ੍ਜਲਨ੍ਤਿ ਹਿ ਖਜ੍ਜੋਤਾ,

ਪਕ੍ਖਚਾਲਨਕਮ੍ਮੁਨਾ;

ਕੁਸਿਤਾ ਸੁਪਿਤਾ ਨੇਤੇ,

ਤਥਾ ਜਨਾਪਿ ਕਮ੍ਮਿਕਾ.

੧੬.

ਕੁਮ੍ਮਸਙ੍ਕੋਚਮੋਪਮ੍ਯ,

ਨਿਗ੍ਗਹਮਪਿ ਸਂਖਮੇ;

ਪਤ੍ਤਕਾਲੇ ਤੁ ਨੀਤਿਞ੍ਞੋ,

ਕਣ੍ਹਸਪ੍ਪੋਵ ਉਟ੍ਠਹੇ.

੧੭.

ਭਕ੍ਖਸੇਸਂ ਨਖਾਦਨ੍ਤਿ,

ਸੀਹਾ ਉਨ੍ਨਤਚੇਤਸਾ;

ਪਰਂਪਿ ਨਪਣਾਮੇਨ੍ਤਿ,

ਵੁਦ੍ਧਿਕਾਮਾ ਤਥਾ ਚਰੇ.

੧੮.

ਨ ਵ ਵਸ੍ਸੋ ਸਮੁਪ੍ਪਨ੍ਨੋ,

ਖੀਣੋ ਪੁਰਾਣਹਾਯਨੋ;

ਨਵਵਸ੍ਸੇ ਨਵਾ ਮੇਤ੍ਤਾ,

ਭਾਵਿਤਬ੍ਬਾ ਹਿਤੇਸਿਨਾ.

੧੯.

ਸਨ੍ਤਾਪਯਨ੍ਤਿ ਕਮਯਾਪ੍ਯਭੁਜਂ ਨ ਰੋਗਾ,

ਦੁਮ੍ਮਨ੍ਤਿਨਂ ਕਮੁਪਯਨ੍ਤਿ ਨ ਨੀਤਿਦੋਸਾ;

ਕਂ ਸ੍ਰੀ ਨ ਮਾਨਯਤਿ ਕਂ ਨ ਚ ਹਨ੍ਤਿ ਮਚ੍ਚੁ,

ਕਂ ਥੀਕਤਾ ਨ ਵਿਸਯਾ ਪਰਿਪੀਲ਼ਯਨ੍ਤਿ.

(ਵਸਨ੍ਤਤਿਲਕਾਗਾਥਾ.)

੨੦.

(ਕ) ਬ੍ਯਾਮਮਤ੍ਤੇਨ ਦਣ੍ਡੇਨ,

ਯੋਲੁਮ੍ਬ੍ਯ ਉਦਕਂ ਮਿਨੇ;

ਅਗਮ੍ਭੀਰਂ ਗਮ੍ਭੀਰਂਵਾ,

ਅਗਾਧੇ ਮਞ੍ਞਿ ਗਮ੍ਭੀਰਂ.

(ਖ)

ਤਥਾ ਮਨ੍ਦੋ ਸਞ੍ਞਾਣੇਨ,

ਅਗਾਧੇ ਮਞ੍ਞਿ ਪਣ੍ਡਿਤਂ;

ਸਮਾਸਮਂ ਨ ਜਾਨਾਤਿ,

ਬਹ੍ਵਪ੍ਪਂ ਤਿਕ੍ਖਮਨ੍ਦਤਂ.

੨੧.

ਦੁਟ੍ਠਕਮ੍ਮੇ ਸਙ੍ਗਮਨ੍ਤਿ,

ਛੇਕਕਮ੍ਮੇ ਚ ਨੋ ਇਧ;

ਮਚ੍ਚੁਂ ਵਹਨ੍ਤਿ ਸੀਸੇਨ,

ਤੇ ਮੁਲ਼੍ਹਾ ਮੁਲ਼੍ਹਸਙ੍ਗਮਾ.

੨੨.

ਦੁਵਿਧੋ ਸਙ੍ਗਮੋ ਲੋਕੇ,

ਉਜੁਕੋ ਕੁਟਿਲੋ ਭਵੇ;

ਉਜੁਕੋਵ ਪਸਂਸੇਯ੍ਯੋ,

ਨੋਹ੍ਯਞ੍ਞੋ ਸਾਜਸਙ੍ਗਮੋ.

ਤੇ ਇਮਿਨਾ ਉਪਾਯੇਨ ਸਮਗ੍ਗਾ ਸਮ੍ਮੋਦਮਾਨਾ ਮਹਾ ਭਿਤ੍ਤਿਪਿਟ੍ਠਿਕਾਯ ਵਸਨ੍ਤਿ. (ਮਹੋਸਧਜਾਤਕ ਅਟ੍ਠਕਥਾ)

੨੩.

ਯੂਥਿਕਾ ਪੁਪ੍ਫਤੇ ਨੋਹਿ,

ਸਿਞ੍ਚਿਤਾਪਿ ਪੁਨਪ੍ਪੁਨਂ;

ਪੁਪ੍ਫਤੇ ਸਮ੍ਪਤ੍ਤੇ ਕਾਲੇ,

ਏਵਂ ਧਾਰੇਥ ਵੀਰਿਯਂ.

੨੪.

ਧਨੁਚ੍ਚਯੋ ਧਨਕ੍ਖੇਪੋ,

ਦੁਵਿਧਾ ਹਿ ਧਨਾਕਤਿ;

ਧਨੁਚ੍ਚਯੇ ਨਯੋ ਅਤ੍ਥਿ,

ਧਨਕ੍ਖੇਪਮ੍ਹਿ ਨੋ ਇਧ.

੨੫.

ਅਮਾਤਾ ਪਿਤਰਸਂ ਵਡ੍ਢਂ,

ਜੂਤਕਾਰਞ੍ਚ ਚਞ੍ਚਲਂ;

ਨਾਲਪੇਯ੍ਯ ਵਿਸੇਸਞ੍ਞੂ,

ਯਦਿਚ੍ਛੇ ਸਿਦ੍ਧਿ ਮਤ੍ਤਨੋ.

ਹਲਿਦ੍ਦਿਰਾਗਂ ਕਪਿਚਿਤ੍ਤਂ,

ਪੁਰਿਸਂ ਰਾਗਵਿਰਾਗਿਨਂ;

ਏਦਿਸਂ ਤਾਤ ਮਾਸੇਵਿ,

ਨਿਮ੍ਮਨੁਸ੍ਸਂਪਿ ਚੇ ਸਿਯਾ.

੨੬.

ਗੁਣਾ ਗੁਣਞ੍ਞੂਸੁ ਗੁਣਾ ਭਵਨ੍ਤਿ,

ਤੇ ਨਿਗ੍ਗੁਣਂ ਪਤ੍ਵਾ ਭਵਨ੍ਤਿ ਦੋਸਾ;

ਆਸਾਦ੍ਯਤੋਯਾ ਪਭਵਨ੍ਤਿ ਨਜ੍ਜੋ,

ਸਮੁਦ੍ਰਮਾਸਜ੍ਜ ਭਵਨ੍ਤ੍ਯਪੇਯ੍ਯਾ.

(ਉਪਜਾਤਿਗਾਥਾ)

੨੭.

ਸਿਲਾਰੂਪਂ ਨਿਮ੍ਮਿਨਨ੍ਤਿ,

ਕੋਟ੍ਟੇਤ੍ਵਾਨ ਪੁਨਪ੍ਪੁਨਂ;

ਕੋਟ੍ਟਕੋਵ ਤਥਾ ਬਾਲਾ,

ਸਾਧੁਂ ਓਵਜ੍ਜ ਨਿਮ੍ਮਿਤਾ.

ਚਾਣਕ੍ਯਨੀਤਿਲਾ ਗਾਥਾ

ਲਾਲਨੇ ਬਹਵੋ ਦੋਸਾ,

ਤਾਲ਼ਨੇ ਬਹਵੋ ਗੁਣਾ;

ਤਸ੍ਮਾ ਪੁਤ੍ਤਞ੍ਚ ਸਿਸ੍ਸਞ੍ਚ,

ਤਾਲ਼ਯੇ ਨ ਚ ਲਾਲਯੇ.

੨੮.

ਅਤੀਤਸ੍ਸ ਹਿ ਮਿਤ੍ਤਸ੍ਸ,

ਯੋ ਚੇ ਦੋਸਂ ਪਕਾਸਯੇ;

ਸੋ ਹਵੇ ਪਚ੍ਚੁਪ੍ਪਨ੍ਨਸ੍ਸ,

ਦੋਸਂ ਭਾਸੇਤਿ ਞਾਯਤਿ.

੨੯.

ਲਤਾਵਿਯ ਸੇਵਕਾ ਤੇ,

ਯੇ ਨਿਸ੍ਸਯਂ ਪਲਮ੍ਬਰੇ;

ਨਿਸ੍ਸਯਸ੍ਸ ਵਿਨਾਸੇਨ,

ਭੂਮ੍ਯਂ ਸੇਨ੍ਤਿ ਅਨਾਥਕਾ.

੩੦.

ਦੋਸਸਿਙ੍ਗੇਹਿ ਵਿਜ੍ਝਨ੍ਤੋ,

ਮਾਨਖੂਰੇਹਿ ਅਕ੍ਕਮਂ;

ਭਯਂ ਕਰੋਤਿ ਲੋਕਮ੍ਹਿ,

ਗੋਵ ਬਾਲੋ ਵਿਹਿਂਸਕੋ.

੩੧.

ਆਦੋ ਉਪਰਿ ਲੋਕੋਯਂ,

ਉਜੁਲੇਖਾਯ ਤਿਟ੍ਠਤਿ;

ਮੁਸਾਵਾਤੇਹਿ ਤਂਲੋਕਂ,

ਨਿਪਾਤੇਸਿ ਅਨਜ੍ਜਵਂ.

੩੨.

ਸੁਘਟਂ ਕੁਮ੍ਭਕਾਰੇਨ,

ਨਾਰਹੋ ਪਰਿਭੁਞ੍ਜਿਤੁਂ;

ਤਥੂਪਮਾਯ ਵੇਕ੍ਖੇਯ੍ਯ,

ਸਕਮ੍ਮਪਰਕਮ੍ਮਨਿ.

੩੩.

ਅਨਨ੍ਤਰਂਸੀ ਸੂਰੋਪਿ,

ਨਸਕ੍ਕੋਤਿ ਘਨਂ ਤਮਂ;

ਵਿਜ੍ਝਿਤੁਂ ਰਂਸਿਯਾ ਲੋਕੇ,

ਤਥਾ ਮਦਨਮੋਹਿਤਾ;

ਨਸਕ੍ਕੋਨ੍ਤਿ ਮਦਂ ਭੇਤ੍ਵਾ,

ਪਞ੍ਞਾਭਾਯ ਪਭਾਸਿਤੁਂ.

੩੪.

ਖੇਦਵੇਰਂ ਦਲਿਦ੍ਦਮ੍ਹਿ,

ਭੋਗਿਮ੍ਹਿ ਰੋਗੁਪਦ੍ਦਵਂ;

ਦੇਸ੍ਸਵੇਰਞ੍ਚ ਆਣਿਮ੍ਹਿ,

ਪਸ੍ਸੇ ਲੋਕਸ੍ਸ ਵੇਰਿਤਂ.

੩੫.

ਸਂਲਦ੍ਧੇਨ ਸੁਭੋਗੇਨ,

ਜੀਵਂ ਸੁਦ੍ਧਂ ਕਰੇ ਨਿਜਂ;

ਸੇਟ੍ਠੋ ਸੋ ਤੇਨ ਜੀਵੇਨ,

ਜੇਗੁਚ੍ਛੋ ਮਲਜੀਵਿਕੋ.

੩੬.

ਵਜਿਰ ਪੁਪ੍ਫਰਾਗਾਨਂ,

ਵਿਸੇਸਂ ਯੋ ਨਬੁਜ੍ਝਤਿ;

ਕਥਞ੍ਹਿ ਸੋ ਵਿਕ੍ਕੀਣੇਯ੍ਯ,

ਕੀਣੇਯ੍ਯ ਵਾ ਯਥਾਤਥਂ.

੩੭.

ਕਿਪ੍ਪੀਲਿ ਕੋਪਿ ਚਿਨ੍ਤੇਤ੍ਵਾ,

ਪਬ੍ਬਤਂ ਭੇਤ੍ਤੁ ਮੁਸ੍ਸਹਂ;

ਅਬਲਾ ਤਨੁਮਜ੍ਝਤ੍ਤਾ,

ਚਿਨ੍ਤਾ ਹਸ੍ਯਾਵ ਸਾ ਮੁਧਾ.

੩੮.

ਜਾਤਮਤ੍ਤਂ ਨ ਯੋ ਸਤ੍ਤੁਂ,

ਰੋਗਞ੍ਚੂਪਸਮਂ ਨਯੇ;

ਮਹਾਬਲੋਪਿ ਤੇਨੇਵ,

ਵੁਦ੍ਧਿਂਪਤ੍ਵਾ ਸ ਹਞ੍ਞਤੇ.

੩੯.

ਸਜੀਵਮਂਸਭਕ੍ਖੇਹਿ,

ਸਦਾਠੀਹਿ ਮੁਖੇਹਿ ਭੋ;

ਬਿਲ਼ਾਰਬ੍ਯਗ੍ਘਸੀਹਾਨਂ,

ਨਿਹੀਨਾਨਿ ਅਨੇਕਧਾ;

ਤਿਕ੍ਖਾਨਿ ਖਰਵਾਦਾਨਿ,

ਮਨੁਸ੍ਸਾਨਂ ਮੁਖਾਨਿ ਵੇ.

੪੦.

ਵਿਲੁਪ੍ਪਨ੍ਤਾ ਵਿਧਾਵਨ੍ਤਿ,

ਸਜੀਵਵੁਤ੍ਤਿਕਮ੍ਮੁਨਾ;

ਜਨਾ ਤੇਨ ਵਿਹਞ੍ਞਨ੍ਤਿ,

ਚਰਨ੍ਤਿ ਧਮ੍ਮਵੇਮੁਖਾ.

੪੧.

ਸੁਲਭਂ ਲੋਕਿਯਂ ਲੋਕੇ,

ਸਾਸਨੀਯਂਵ ਦੁਲ੍ਲਭਂ;

ਦੁਲ੍ਲਭਂ ਤਂ ਵਮਞ੍ਞਨ੍ਤੋ,

ਏਸੋ ਬਾਲਤਮੋ ਭਵੇ.

੪੨.

ਯੋ ਪਤਿਤ੍ਥ ਅਗ੍ਯਾਵਾਟਂ,

ਮੋਹਾ ਤਂ ਉਪਕਾਰਿਤੁਂ;

ਅਞ੍ਞੋਰੋਹਿ ਤਦਾ ਵਾਟਂ,

ਦੁਤੀਯੋ ਮੁਲ਼੍ਹਮੁਲ਼੍ਹਕੋ.

੪੩.

ਬ੍ਯਗ੍ਘੋ ਆਵੁਧਵਿਦ੍ਧੋ ਹਿ,

ਅਕਾ ਦੁਟ੍ਠਾਨਿ ਨਿਨ੍ਨਦਂ;

ਤਥੇਵ ਸਾਧੁਸਤ੍ਥੇਨ,

ਵਿਦ੍ਧੋ ਬਾਲੋ ਪਕੁਪ੍ਪਿਤੋ.

੪੪.

ਪਿਵਨ੍ਤਿ ਲੋਹਿਤਂ ਡਂਸਾ,

ਅਨ੍ਤੋ ਤੁਣ੍ਡੇਨ ਮਕ੍ਖਿਕਾ;

ਬਹਿਦ੍ਧਾ ਪਰਿਵਾਰੇਨ੍ਤਿ,

ਜਨੋ ਤੇਨ ਡਂਸਾਯਯੇ.

੪੫.

ਅਧਨਸ੍ਸ ਖਣੋ ਅਪ੍ਪੋ,

ਸਦ੍ਧਮ੍ਮੋ ਅਪ੍ਪਕਾਲਿਨੋ;

ਅਪ੍ਪਕੋ ਤੇਨ ਯੁਞ੍ਜੇਯ੍ਯੁਂ,

ਖਣਂ ਬਹੁਂ ਲਭੇਤਵੇ.