📜
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਚਤੁਰਾਰਕ੍ਖਦੀਪਨੀ
ਕਾਯਪਚ੍ਚਵੇਕ੍ਖਣਾ
ਪਣਾਮਪਟਿਞਾ
ਚਕ੍ਕਵਾਲ਼ ¶ ਨਹੁਤਾ ਗ, ਦੇਵਾਲਿ ਗਣ ਚੁਮ੍ਬਿਤੋ;
ਬੁਦ੍ਧ ਪਾਦਮ੍ਬੁਜੋ ਠਾਤੁ, ਸੀਸੇ ਦਯਾ ਤਿਗਨ੍ਧਜੋ.
ਨਨ੍ਤ ¶ ਚਕ੍ਕਵਾਲ਼ ਬ੍ਭੁਗ੍ਗ, ਗੁਣ ਸਨ੍ਨਿਚ੍ਚਿਤਂ ਜਿਨਂ;
ਵਨ੍ਦੇ ਤਪ੍ਪੂਜਿਤਂ ਧਮ੍ਮਂ, ਤਜ੍ਜਂ ਸਙ੍ਘਞ੍ਚ ਨਿਮ੍ਮਲਂ.
ਵਕ੍ਖਾਮਿ ¶ ਚਤੁਰਾਰਕ੍ਖਂ, ਸਮ੍ਬੁਦ੍ਧ ਵਚਨ ਨ੍ਵਯਂ;
ਅਪ੍ਪਮਾਦਾਵਹਂ ਏਤਂ, ਸੋਤ੍ਤਬ੍ਬਂ ਭਵਭੀਰੁਹਿ.
ਬੁਦ੍ਧਾਨੁਸ੍ਸਤਿ ¶ ਮਰਣਾ, ਭੁਭਾ ਮੇਤ੍ਤਾਚ ਭਾਵਨਾ;
ਅਪ੍ਪਮਾਦਾਯ ਆਰਕ੍ਖਾ, ਚਤਸ੍ਸੋ ਮਾਨਿਤਾ ਸਤਂ.
ਬੁਦ੍ਧੋਵਾਦਂ ¶ ਸਰਿਤ੍ਵਾਵ, ਮਚ੍ਚੁਬ੍ਬਿਗ੍ਗਾ ਸੁਖੇਸਿਨੋ;
ਸੀਤਾ ਸੀਤਤਰਂ ਯਨ੍ਤਿ, ਸੁਭਮੇਤ੍ਤਮ੍ਬੁਸਿ-ਟ੍ਠਿਤਾ.
ਮਰਣਗ੍ਗਿ ਵਾਰਣਮ੍ਬੁ, ਸਮ੍ਬੁਦ੍ਧਵਚਨਂ ਯਿਦਂ;
ਬਹੂ ਤਦਗ੍ਗਿ ਸਨ੍ਤਤ੍ਤਾ, ਸੀਤਾਵਾਸੁਂ ਤਦਮ੍ਬੁਨਾ.
ਸਦ੍ਧਂ ¶ ਬੁਦ੍ਧੇਨ ਤੇਜੇਤ੍ਵਾ, ਮਾਨਂ ਮਰਣਚਿਨ੍ਤਯਾ;
ਅਸੁਭਾਯ ਹਨੇ ਰਾਗਂ, ਦੋਸਂ ਮੇਤ੍ਤਾਯ ਪਞ੍ਞਵਾ.
੧. ਬੁਦ੍ਧਾਨੁਸ੍ਸਤਿ ਨਿਦ੍ਦੇਸ
ਅਰਹਂ ¶ ਸਮ੍ਮਾਸਮ੍ਬੁਦ੍ਧੋ, ਵਿਜ੍ਜਕ੍ਖਿ ਚਰਣਪ੍ਪਦੋ;
ਸੁਗਤੋ ਸੁਗਦੋ ਸਤ੍ਥਾ, ਸਬ੍ਬਞ੍ਞੂ ਭਗਵਾਦਮੋ.
ਆਰਕਤ੍ਤਾਰਿਹਨ੍ਤਤ੍ਤਾ ¶ , ਪਾਪਾਕਾਰਕਤੋਰਹੋ;
ਹਤ ਚਕ੍ਕਾਰਤੋ ਪੂਜਾ, ਰਹਤ੍ਤਾ ਚਾਰਹਂ ਨਮੇ.
ਸਮੁਤ੍ਤੇ ¶ ਜਿਯ ਗਿਹੀਨਂ, ਅਨੁਪੁਬ੍ਬਿਕਥੋ ਜਿਨੋ;
ਅਦਾਸਿ ਪਰਮਂ ਤੁਟ੍ਠਿਂ, ਸਚ੍ਚਾਨਿ ਦਸ੍ਸਯਂ ਦਿਵਾ.
ਭਿਕ੍ਖੂਨਂ ¶ ਪਠਮੇ ਯਾਮੇ, ਪਾਯੇਸਿ ਅਮਤਾਗਦਂ;
ਜਾਤਿਖੇਤ੍ਤਾਗ ਦੇਵਾਨਂ, ਕਙ੍ਖਚ੍ਛੇਦੋ ਸ ਮਜ੍ਝਿਮੇ;
ਆਦੋ ਫਲਸੁਖਂ ਵੇਦਿ, ਮਜ੍ਝੇ ਸੇਯ੍ਯ ਮਕਾ ਜਿਨੋ;
ਵੇਨੇਯ੍ਯੋ ਲੋਕਨਂ ਅਨ੍ਤੇ, ਪਚ੍ਛਿਮੇਪਿ ਤਿਧਾ ਕਤੇ.
ਖੇਦਂ ¶ ਅਗਣਯਂ ਨਾਥੋ, ਪਞ੍ਚ ਬੁਦ੍ਧਕਤਂ ਵਹਂ;
ਸਤ੍ਥਸਿਦ੍ਧੋ ਪਰਤ੍ਥਂਵ, ਬ੍ਯਾਵਟੋ ਸੁਮਹਾਦਯੋ.
ਚਙ੍ਕਮਿਤ੍ਵਾ ਨਿਸੀਦਿਤ੍ਵਾ, ਰਤ੍ਤਿਂਦਿਵਞ੍ਚ ਝਾਯਿਤੁਂ;
ਸੁਪਿਤੁਂ ਮਜ੍ਝਯਾਮੇਵ, ਬੁਦ੍ਧੋ ਭਿਕ੍ਖੂਨ ਮੋਵਦਿ.
ਨਾਲ ¶ ਮਾਲਸਿਤੁਂ ਤਸ੍ਸ, ਮਹਾਵੀਰਸ੍ਸ ਸਾਸਨੇ;
ਪਮਾਦਾਯ ਮੁਨਿਨ੍ਦਸ੍ਸ, ਕਤਞ੍ਞੂ ਸਾਧੁ ਸਮ੍ਮਤੋ.
ਅਨਞ੍ਞਾਤਸ੍ਸ ਞਾਤਾਯ, ਅਪਤ੍ਤਸ੍ਸਚ ਪਤ੍ਤਿਯਾ;
ਆਰਭੇਤੁਂਵ ਨੋ ਯੁਤ੍ਤੋ, ਅਪ੍ਪਮਤ੍ਤੋ ਰਹੋਗਤੋ.
ਆਰਬ੍ਭਥ ¶ ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ;
ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ.
ਯੋ ¶ ਇਮਸ੍ਮਿਂ ਧਮ੍ਮਵਿਨਯੇ, ਅਪ੍ਪਮਤ੍ਤੋ ਵਿਹਿਸ੍ਸਤਿ;
ਪਹਾਯ ਜਾਤਿ ਸਂਸਾਰਂ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤਿ;
ਇਤਿ ¶ ਉਯ੍ਯੋਜਨਂ ਮ੍ਹਾਕਂ, ਮੁਤ੍ਤਸ੍ਸ ਮੁਤ੍ਤਿਯਾ ਸਰਂ;
ਨਯੁਤ੍ਤੋਵ ਪਮਾਦਾਯ, ਮਹਾਦਯਸ੍ਸ ਸਤ੍ਥੁਨੋ.
ਸੁਤ੍ਤੇਨ ਦੁਬ੍ਬਿਤਕ੍ਕੇਨ, ਅਕਿਚ੍ਚ ਕਰਣੇਨਵਾ;
ਮੋਘ ਕਾਲਕ੍ਖਯੋ ਮਨ੍ਦੋ, ਦੁਕ੍ਖਸ੍ਸਨ੍ਤਂ ਕਥਂਕਰੇ.
ਆਕਾਸਂ ¶ ਚਕ੍ਕਵਾਲ਼ਞ੍ਚ, ਸਤ੍ਤਾ ਬੁਦ੍ਧਗੁਣਾ ਪਿਚ;
ਅਨਨ੍ਤਾਨਾਮ ਚਤ੍ਤਾਰੋ, ਪਰਿਚ੍ਛੇਦੋ ਨਵਿਜ੍ਜਤਿ.
ਯਥਾਪਿ ਨਭ ਮਾਕਾਸਂ, ਅਙ੍ਗੁਲਰਜ੍ਜੁਯਟ੍ਠਿਭਿ;
ਮਿਨੇਤੁਂ ਨੇਵ ਸਕ੍ਕੋਤਿ, ਏਵਂ ਕੇਨਚਿ ਤਗ੍ਗੁਣਂ.
੨. ਮਰਣਸ੍ਸਤਿਨਿਦ੍ਦੇਸ
ਮਰਣਸ੍ਸਤਿ ¶ ਮਿਚ੍ਛਨ੍ਤੋ, ਤਾਵ ਬੁਦ੍ਧਵਚੋ ਸੁਣ;
ਅਵਿਕ੍ਖਿਤ੍ਤੇਨ ਚਿਤ੍ਤੇਨ, ਸਮ੍ਬੁਦ੍ਧ ਵਚਨਂ ਹਿਦਂ.
ਅਨਿਮਿਤ੍ਤ ¶ ਮਨਞ੍ਞਾਤਂ, ਮਚ੍ਚਾਨਂ ਇਧ ਜੀਵਿਤਂ;
ਕਸਿਰਞ੍ਚ ਪਰਿਤ੍ਤਞ੍ਚ, ਤਞ੍ਚ ਦੁਕ੍ਖੇਨ ਸਂਯੁਤਂ.
ਨ ਹਿ ਸੋ ਪਕ੍ਕਮੋ ਅਤ੍ਥਿ, ਯੇਨ ਜਾਤਾ ਨਮਿਯ੍ਯਰੇ;
ਜਰਮ੍ਪਿ ਪਤ੍ਵਾ ਮਰਣਂ, ਏਵਂਧਮ੍ਮਾ ਹਿ ਪਾਣਿਨੋ.
ਫਲਾਨ ¶ ਮਿਵ ਪਕ੍ਕਾਨਂ, ਪਾਤੋ ਪਤਨਤੋ ਭਯਂ;
ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚਂ ਮਰਣ ਤੋ ਭਯਂ.
ਯਥਾਪਿ ਕੁਮ੍ਭਕਾਰਸ੍ਸ, ਕਤਾ ਮਤ੍ਤਿਕਭਾਜਨਾ;
ਸਬ੍ਬੇ ਭੇਦਪਰਿਯਨ੍ਤਾ, ਏਵਂ ਮਚ੍ਚਾਨ ਜੀਵਿਤਂ.
ਦਹਰਾਚ ¶ ਮਹਨ੍ਤਾਚ, ਯੇਬਾਲਾ ਯੇਚ ਪਣ੍ਡਿਤਾ;
ਸਬ੍ਬੇ ਮਚ੍ਚੁਵਸਂ ਯਨ੍ਤਿ, ਸਬ੍ਬੇ ਮਚ੍ਚੁਪਰਾਯਨਾ.
ਤੇਸਂ ਮਚ੍ਚੁਪਰੇਤਾਨਂ, ਗਚ੍ਛਤਂ ਪਰਲੋਕਤੋ;
ਨਪਿਤਾ ਤਾਯਤੇ ਪੁਤ੍ਤਂ, ਞਾਤਿਵਾਪਨ ਞਾਤਕੇ;
ਪੇਕ੍ਖਤਞ੍ਞੇਵ ¶ ਞਾਤੀਨਂ, ਪਸ੍ਸ ਲਾਲਪ੍ਪਤਂ ਪੁਥੁ;
ਏਕਮੇਕੋਵ ਮਚ੍ਚਾਨਂ, ਗੋ ਵਜ੍ਝੋਵਿਯ ਨਿਯ੍ਯਤਿ.
ਏਵ ਮਬ੍ਭਾਹਤੋ ਲੋਕੋ, ਮਚ੍ਚੁਨਾਚ ਜਰਾਯਚ;
ਤਸ੍ਮਾ ਧੀਰਾ ਨਸੋਚਨ੍ਤਿ, ਵਿਦਿਤ੍ਵਾ ਲੋਕ ਪਰਿਯਾਯਂ.
ਅਞ੍ਞੇਪਿ ¶ ਪਸ੍ਸ ਗਮਨੇ, ਯਥਾ ਕਮ੍ਮੁਪਗੇ ਨਰੇ;
ਮਚ੍ਚੁਨੋ ਵਸਮਾਗਮ੍ਮ, ਫਨ੍ਦਨ੍ਤੇਵਿਧ ਪਾਣਿਨੋ.
ਯੇਨ ਯੇਨਹਿ ਮਞ੍ਞਨ੍ਤਿ,
ਤਤੋਤਸ੍ਸ ਹਿ ਅਞ੍ਞਥਾ;
ਏਤਾਦਿਸੋ ਵਿਨਾਭਾਵੋ,
ਪਸ੍ਸ ਲੋਕਸ੍ਸ ਪਰਿਯਾਯਨ੍ਤਿ.
[ਸੁਲ੍ਲ ਸੁਤ੍ਤੇ ਵੁਤ੍ਤਂ.]
ਯਥਾਪਿ ¶ ਸੇਲਾ ਵਿਪੁਲਾ,
ਨਭਂ ਆਹਚ੍ਚ ਪਚ੍ਚਤਾ;
ਸਮਨ੍ਤਾ ਅਨੁਪਰਿ ਯੇਯ੍ਯੁਂ,
ਨਿਪ੍ਪੋਥੇਨ੍ਤਾ ਚਤੁਦ੍ਦਿਸਾ.
ਏਵਂ ਜਰਾਚ ਮਚ੍ਚੁਚ,
ਅਧਿਵਤ੍ਤਨ੍ਤਿ ਪਾਣਿਨੇ;
ਖਤ੍ਤਿਯੇਬ੍ਰਾਹ੍ਮਣੇ ਵੇਸ੍ਸੇ,
ਸੁਦ੍ਦੇ ਚਣ੍ਡਾਲ ਪਕ੍ਕੁਸੇ;
ਨਕਿਞ੍ਚਿ ਪਰਿਵਜ੍ਜੇਤਿ,
ਸਬ੍ਬਮੇਵਾ ਭਿਮਦ੍ਦਤਿ.
ਨ ¶ ਤਤ੍ਥ ਹਤ੍ਥਿ ਨਂ ਭੁਮ੍ਮਿ, ਨ ਰਥਾਨਂ ਨਪਤ੍ਤਿਯਾ;
ਨ ਚਾਪਿ ਮਨ੍ਤਯੁਦ੍ਧੇਨ, ਸਕ੍ਕਾ ਜੇਤੁਂ ਧਨੇਨਵਾ.
ਤਸ੍ਮਾਹਿ ¶ ਪਣ੍ਡਿਤੋ ਪੋਸੋ,
ਸਮ੍ਪਸ੍ਸਂ ਅਤ੍ਥ ਮਤ੍ਤਨੋ;
ਬੁਦ੍ਧੇ ਧਮ੍ਮੇ ਚ ਸਙ੍ਘੇਚ,
ਧੀਰੋ ਸਦ੍ਦਂ ਨਿਵੇਸਯੇ.
ਯੋ ਧਮ੍ਮਚਾਰੀ ਕਾਯੇਨ, ਵਾਚਾਯ ਉਦ ਚੇਤਸਾ;
ਇਧੇਵਨਂ ਪਸਂਸਨ੍ਤਿ, ਪਚ੍ਚਸਗ੍ਗੇ ਪਮੋਦਤੀਤਿ.
[ਪਬ੍ਬਤੂ ਮਮ ਸੁਤ੍ਤੇ ਵੁਤ੍ਤਂ.]
ਯਥਾ ¶ ਵਾਰਿਵਹੋ ਪੂਰੋ, ਵਹੇ ਰੁਕ੍ਖੇ ਪਕੂਲਜੇ;
ਏਵਂ ਜਰਾਮਰਣੇਨ, ਵੁਯ੍ਹਨ੍ਤੇ ਸਬ੍ਬ ਪਾਣਿਨੋ.
ਦਹਰਾਪਿ ਹਿ ਮਿਯ੍ਯਨ੍ਤਿ,
ਨਰਾਚ ਅਥਨਾਰਿਯੋ;
ਤਤ੍ਥ ਕੋ ਵਿਸਾਸੇਪੋਸੋ,
ਦਹਰੋ ਮ੍ਹੀਤਿਜੀਵਿਤੇ.
ਸਾਯ ¶ ਮੇਕੇ ਨਿਦਿਸ੍ਸਨ੍ਤਿ, ਪਾਤੋ ਦਿਟ੍ਠਾ ਬਹੁਜ੍ਜਨਾ;
ਪਾਤੋ ਏਕੇ ਨਦਿਸ੍ਸਨ੍ਤਿ, ਸਾਯਂ ਦਿਟ੍ਠਾ ਬਹੁਜ੍ਜਨਾ.
ਅਜ੍ਜੇਵ ਕਿਚ੍ਚਂ ਆਤਪ੍ਪਂ, ਕੋ ਜਞ੍ਞਾ ਮਰਣਂ ਸੁਵੇ;
ਨਹਿ ਨੋ ਸਙ੍ਕਰਂ ਤੇਨ, ਮਹਾਸੇਨਨ ਮਚ੍ਚੁਨਾਤਿ.
[ਜਾਤਕੇਸੁਵੁਤ੍ਤਂ.]
ਨਤ੍ਥੇਤ੍ਥਞ੍ਞੋ ¶ ਨੁਸਾਸਨ੍ਤੋ, ਸਯਂਵਤ੍ਤਾਨ ਮੋਵਦ;
ਜਿਨੇਰਿਤਾ ਨੁਸਾਰੇਨ, ਭਿਕ੍ਖੁ ਸਂਸਾਰ ਭੀਰੁਕੋ.
ਅਹਿਵਾਪਿ ¶ ਮਂ ਡਂਸੇਯ੍ਯ, ਅਞ੍ਞੇਪਿ ਵਿਸਧਾਰਿਨੋ;
ਅਪਿਯਾਪਿਚ ਘਾਤੇਯ੍ਯੁਂ, ਉਪ੍ਪਜ੍ਜੇਯ੍ਯੁਂ ਰੁਜਾਪਿਮੇ.
ਮਚ੍ਚੁਸੇਨਾ ਵੁਧਾਸਙ੍ਖ੍ਯਾ, ਬਾਹਿਰਜ੍ਝਤ੍ਤੁ ਪਦ੍ਦਵਾ;
ਤੇਹਾਯੁ ਪੀਲ਼ਿਤਂਛੇਜ੍ਜਂ, ਮਰਿਸ੍ਸ ਮਜ੍ਜਵਾ ਸੁਵੇ.
ਅਲ਼ਕ੍ਕਾ ¶ ਹਿ ਗਵਾਦੀਹਿ, ਚੋਰਾਦੀਹਿ ਅਰੀਹਿਪਿ;
ਅਭਿਣ੍ਹ ਸਨ੍ਨਿਪਾਤੇਹਿ, ਰੁਜਾ ਛਨਵੁਤੀਹਿਪਿ.
ਬਹੂਨ ਮੁਪਕਾਰੇਹਿ, ਅਨ੍ਨੋਦਕਾਦਿਕੇਹਿਪਿ;
ਮਰਿਸ੍ਸਂ ਪੀਲ਼ਿਤੋ ਨਿਚ੍ਚਂ, ਨਿਰੁਜ੍ਝੇਯ੍ਯਾਯੁ ਅਜ੍ਜਵਾ.
ਬਹ੍ਵਾਵੁਧੇ ¶ ਵਿਸਜ੍ਜੇਤਿ, ਨਿਲ੍ਲੇਣਂ ਮਚ੍ਚੁਨਿਦ੍ਦਯੋ;
ਵਸਨ੍ਤਂ ਭਵਸਙ੍ਗਾਮੇ, ਨਮੁਤ੍ਤੋ ਕੋਚਿ ਆਵੁਧਾ;
ਮਹਬ੍ਬਲਾ ਮਹਾਪਞ੍ਞਾ, ਮਹਿਦ੍ਧਿਕਾ ਮਹਦ੍ਧਨਾ;
ਨਮੁਤ੍ਤਾ ਸਮ੍ਮਾਸਮ੍ਬੁਦ੍ਧੋ, ਸਬ੍ਬਲੋਕਾਧਿਪੋ ਅਪਿ;
ਮਯਾ ¶ ਸਮਾ ਨਵਾ ਵੁਦ੍ਧਾ, ਤਦਾਵੁਧੇਹਿ ਤੇ ਮਤਾ;
ਤਥਾ ਹਮ੍ਪਿ ਮਰਿਸ੍ਸਾਮਿ, ਲੇਣਂ ਪੁਞ੍ਞਂਵ ਮੇ ਕਤਂ.
ਪਥਬ੍ਯਾਪਾਦਯੋ ਧਾਤ੍ਥੂ,
ਆਹਾਰਾ ਭੋਜਨਾਦਯੋ;
ਸੀਤੁਣ੍ਹ ਮੁਤੁਨਾਮੇਤਂ,
ਦੋਸਾ ਪਿਤ੍ਤਸੇਮ੍ਹਾਨਿਲਾ.
ਧਾਤ੍ਵਾਹਾਰੁ ¶ ਤੁਦੋਸਾਨਂ, ਸਮਤ੍ਤੇ ਵਾਯੁ ਤਿਟ੍ਠਤਿ;
ਵਿਸਮੇ ਤਙ੍ਖਣਞ੍ਞੇਵ, ਛੇਜ੍ਜ ਮਪ੍ਪਂ ਪਰਾਧਿਨਂ.
ਧਾਤ੍ਵਾ ਹਾਰੁਤੁ ਦੋਸਾਨਂ, ਵਿਸਮਾ ਸ੍ਵੇਪ੍ਯਕਲ੍ਲਕੋ;
ਉਸ੍ਸਾਹੇ ਕਲ੍ਲਕਾਲੇਵ, ਕਿਂਕਰੇਯ੍ਯਅਕਲ੍ਲਕੋ;
ਉਪ੍ਪਜ੍ਜੇਯ੍ਯੁਂ ¶ ਰੁਜਾ ਸ੍ਵੇਪਿ, ਅਸਾਤੋ ਦੁਕ੍ਖਮਾ ਖਰਾ;
ਪੁਰੇਤਰਂਵ ਆਰਬ੍ਭੇ, ਮਾਪਚ੍ਛਾ ਅਨੁਤਾਪਨਂ.
ਸਤ੍ਤਾਨਂ ¶ ਨੀਚਕਮ੍ਮਾਨਂ, ਸਰਣੋਪਿ ਭਯਙ੍ਕਰੋ;
ਨੀਚਾਨੀਚਂ ਨਜਾਨਾਮਿ, ਮਰਣਾਸਨ੍ਨਤਮ੍ਪਿਚ.
ਕਮ੍ਮ ਪੀਲ਼ਿਤ ਸਤ੍ਤਾਨਂ, ਤਙ੍ਖਣਮ੍ਪਿ ਭਯੁਬ੍ਭਵੋ;
ਮਰੇਯ੍ਯ ਮਜ੍ਜਵਾ ਸ੍ਵੇਵਾ, ਨਯੁਤ੍ਤੋਵ ਪਮਜ੍ਜਿਤੁਂ.
ਪੁਞ੍ਞਕ੍ਖੀਣਾ ਪਜਾ ਖਿਪ੍ਪਂ, ਅਹੇਤੁਨਾਪਿ ਨਸ੍ਸਯੇ;
ਸੁਦ੍ਧਚਿਤ੍ਤੋ ਮਰਿਸ੍ਸਾਮਿ, ਨ ਕਿਲਿਟ੍ਠੇਨ ਚੇਤਸਾ.
ਉਪਚ੍ਛੇਦਾਪਿ ¶ ਮੇ ਸਨ੍ਤਿ, ਭਵਾਭਵਚਿਤਾ ਬਹੂ;
ਛੇਜ੍ਜਂ ਤੇਹਾਯੁ ਅਜ੍ਜਾਪਿ, ਸਾਧ੍ਵਾਸੁਮਾਰਭੇ ਮਤਂ;
ਕਮ੍ਮਾ ਪਰਾਧ ਸਤ੍ਤਾਨਂ, ਵਿਨਾਸੇ ਪਚ੍ਚੁਪਟ੍ਠਿਤੇ;
ਅਨਯੋ ਨਯਰੂਪੇਨ, ਬੁਦ੍ਧਿਮਾਕਮ੍ਯ ਤਿਟ੍ਠਤਿ.
ਮਰਣਾਸਨ੍ਨ ¶ ਤਞ੍ਞੇਵ, ਚਿਨ੍ਤੇਯ੍ਯ ਪਞ੍ਞਵਾ ਸਤੋ;
ਏਵਂ ਚਿਨ੍ਤਯਨ੍ਤੋ ਸਨ੍ਤੋ, ਨਪਾਪਂ ਕਤ੍ਤੁ ਮੁਸ੍ਸਹੇ.
ਮਰਣਾਸਨ੍ਨ ਤਞ੍ਞੇਵ, ਚਿਨ੍ਤੇਯ੍ਯ ਬੁਦ੍ਧਸਾਵਕੋ;
ਏਵਂ ਚਿਨ੍ਤਯਨ੍ਤੋ ਸਨ੍ਤੋ, ਕਦਾਚਿਪਿ ਅਨੁਣ੍ਣਤੋ.
ਅਦ੍ਧਾਗ ¶ ਮਰਣਂ ਪਞ੍ਞੋ, ਪੁਰੇਤਰਂਵ ਚਿਨ੍ਤਯੇ;
ਕਰੇ ਕਾਤਬ੍ਬ ਕਮ੍ਮਞ੍ਚ, ਏਵਂ ਸੋ ਨਾਨੁਸੋਚਤਿ.
ਮਰਣਾਸਨ੍ਨ ਸਞ੍ਞੀ ਸੋ, ਅਪ੍ਪਮਤ੍ਤੋ ਵਿਚਕ੍ਖਣੋ;
ਪਤ੍ਤੇਪਿ ਮਰਣੇ ਕਾਲੇ, ਨ ਸਮ੍ਮੁਲ਼੍ਹੋ ਨਸੋਕਵਾ.
ਮਰਣਾ ¶ ਸਨ੍ਨਸਞ੍ਞੀ ਸੋ, ਸੋਧੇਤਿ ਅਤ੍ਤਨੋ ਮਲਂ;
ਨਿਮ੍ਮਲੇਨ ਚੁਤੋ ਭਿਕ੍ਖੁ, ਨਤ੍ਵੇਵਾ ਪਾਯ ਗਾਮਿਕੋ.
ਸਤਿ ਆਸਨ੍ਨ ਮਰਣੇ,
ਦੂਰਸਞ੍ਞੀ ਪਮਾਦ ਵਾ;
ਯੋ ਕਰੋਤਿ ਅਕਾਤਬ੍ਬਂ,
ਤਦਾ ਸੋ ਅਤਿਸੋਚਤਿ.
ਸਤਿ ¶ ਆਸਨ੍ਨਮਰਣੇ, ਦੂਰਸਞ੍ਞੀ ਪਮਾਦਵਾ;
ਆਕਿਣ੍ਣੋ ਪਾਪਧਮ੍ਮੇਹਿ, ਪਜ੍ਝਾਯਿ ਦੁਮ੍ਮਨੋ ਤਦਾ.
ਸਤਿ ਆਸਨ੍ਨ ਮਰਣੇ, ਦੁਟ੍ਠੋ ਦੋਸੋਤਿ ਥਦ੍ਧਵਾ;
ਅਭਿਨਨ੍ਦਤਿ ਸਾਦੇਤਿ, ਤਦਾਸੋ ਅਤਿਦੁਕ੍ਖਿਤੋ.
ਸਤਿ ¶ ਆਸਨ੍ਨਮਰਣੇ, ਤੁਵਟਂ ਨ ਚਿਕਿਚ੍ਛਤਿ;
ਸਞ੍ਚਿਚ੍ਚਾਪਤ੍ਤਿ ਮਾਪਨ੍ਨੋ, ਤਦਾ ਸੋ ਪਰਿਦੇਵਤਿ.
ਸਤਿ ਆਸਨ੍ਨ ਮਰਣੇ, ਗਿਹੀਹਿ ਨਵਕੇਹਿਚ;
ਸਂਸਟ੍ਠੋ ਨ ਨੁਲੋਮੇਹਿ, ਸ੍ਵਤਿਵਸ੍ਸੁ ਮੁਖੋ ਤਦਾ.
ਸਤਿ ¶ ਆਸਨ੍ਨ ਮਰਣੇ, ਕੁਹਕੋ ਕੁਲਦੂਸਕੋ;
ਮਿਚ੍ਛਾਜੀਵ ਸਮਾਪਨ੍ਨੋ, ਦੁਨ੍ਨਿਮਿਤ੍ਤੋਵ ਸੋ ਚੁਤੋ.
ਸਸੋਕੀ ¶ ਸਹਨਨ੍ਦੀਚ, ਦੁਕ੍ਖੇ ਦੁਕ੍ਖੋ ਸੁਖੇ ਸੁਖੋ;
ਗਿਹਿਕਮ੍ਮੇਸੁ ਉਸ੍ਸੁਕ੍ਕੋ, ਪਸ੍ਸਂ ਗਿਜ੍ਝਕੂਟਂ ਚੁਤੋ.
ਮਰਿਸ੍ਸਨ੍ਤਿ ਅਨਾਵਜ੍ਜ, ਕਿਲੇਸਾਤੁਰ ਪੀਲ਼ਿਤੋ;
ਕਿਮਿਖਜ੍ਜਵਣੋ ਸਾਵ, ਭਨ੍ਤੋ ਕਿਂ ਸੁਗਤਿਂ ਵਜੇ.
ਮਰਿਸ੍ਸਨ੍ਤਿ ¶ ਅਨਾਵਜ੍ਜ, ਧੁਰਦ੍ਵਯਂ ਨ ਪੂਰਤਿ;
ਗਨ੍ਥਂ ਵਿਪਸ੍ਸਨਂ ਤਨ੍ਦੀ, ਕਾਰੁਞ੍ਞੋਯੇਵ ਸੋ ਚੁਤੋ.
ਮਰਿਸ੍ਸਨ੍ਤਿ ਅਨਾਵਜ੍ਜ, ਕਿਲੇਸਾਨਂ ਵਸਾਨੁਗੋ;
ਸਮ੍ਬੁਦ੍ਧਾ-ਣਂ ਵੀਤਿਕ੍ਕਨ੍ਤੋ, ਕਾਰੁਞ੍ਞੋ ਨਤ੍ਥਿ ਤਸ੍ਸਮੋ.
ਮਰਿਸ੍ਸਨ੍ਤਿ ¶ ਅਨਾਵਜ੍ਜਂ, ਧਨਮੇਸੀ ਅਧਮ੍ਮਤੋ;
ਪੁਞ੍ਞੇ ਚਿਨ੍ਤਾਪਿ ਨੁਪ੍ਪਜ੍ਜਿ, ਨਿਰਯਂ ਸੋ ਮਨਂ ਗਤੋ.
ਮਰੇਯ੍ਯਨ੍ਤਿ ਅਨਾਵਜ੍ਜਂ, ਧਨਂ ਚਿਨਿ ਅਧਮ੍ਮਤੋ;
ਚਿਤਂ ਚਿਤਂ ਇਹੇਵੇਤਂ, ਤਸ੍ਮਿਂਗਿਦ੍ਧੋ ਸ ਪੇਤ੍ਤਿਕੋ.
ਅਤ੍ਥਾ ¶ ਗੇਹੇ ਨਿਵਤ੍ਤਨ੍ਤੇ, ਸੁਸਾਨੇ ਮਿਤ੍ਤਬਨ੍ਧਵਾ;
ਸੁਕਤਂ ਦੁਕ੍ਕਤਂ ਕਮ੍ਮਂ, ਗਚ੍ਛਨ੍ਤ ਮਨੁਗਚ੍ਛਤਿ.
ਮਰੇਯ੍ਯਨ੍ਤਿ ਅਨਾਵਜ੍ਜਂ, ਇਹਤ੍ਥਂ ਵਾ ਨੁਯੁਞ੍ਜਤਿ;
ਸਮ੍ਪਰਾਯ ਮਨਪੇਕ੍ਖੋ, ਸੁਜੁਂ ਵਾ ਪਾਯਗਾਮਿਕੋ.
ਮਰੇਯ੍ਯਨ੍ਤਿ ¶ ਸਮਾਵਜ੍ਜ, ਧਮ੍ਮਤੋ ਧਨ ਮੇਸਤਿ;
ਪੁਞ੍ਞਕਾਰੀ ਸੁਲਦ੍ਧੇਨ, ਮਰਣੇਪਿ ਸ ਮੋਦਤਿ.
ਪਞ੍ਚਸੀਲ ਸਦਾਰਕ੍ਖੋ, ਯਥਾਬਲਞ੍ਚ ਦਾਯਕੋ;
ਕਾਲੇ ਉਪੋਸਥਾਵਾਸੋ, ਸੋ ਨਿਚ੍ਚਂ ਸੁਗਤਿਂ ਵਜ੍ਜੇ.
ਧੋਵਾਪਤ੍ਤਿਮਲਂ ¶ ਖਿਪ੍ਪਂ, ਮਚ੍ਚੁ ਅਦ੍ਧਾ ਗਮਿਸ੍ਸਤਿ;
ਮਿਚ੍ਛਾਵਿਤਕ੍ਕ ਮੁਚ੍ਛਿਜ੍ਜ, ਕਰ ਕਾਤਬ੍ਬਭਾਵਨਂ.
ਅਤਿਕ੍ਕਨ੍ਤਾ ਬਹੂ ਰਤ੍ਯੋ, ਖੇਪੇਤ੍ਵਾ ਮਮ ਜੀਵਿਤਂ;
ਮਨ੍ਦਾਯੁਨਾ ਪਮਾਦੇਨ, ਯੁਤ੍ਤੋ ਵਿਹਰਿਤੁਂ ਕਥਂ.
ਹਾਸਨ੍ਤਂ ¶ ਨਨ੍ਦਿ ਮਤ੍ਤਾਨਂ, ਮਚ੍ਚੁਸਨ੍ਧੀਹਿ ਤਚ੍ਛਯੇ;
ਕੁਚ੍ਛਿ ਮੇਯ੍ਯਚੁਤੋ ਅਜ੍ਜ, ਕੋ ਹਾਸਨਨ੍ਦਿਤਬ੍ਬਕੋ.
ਮਚ੍ਚੁਸੇਨਾਵੁਧਾ ਸਙ੍ਖ੍ਯਾ, ਮਰਣਾਭਿਮੁਖੋ ਅਹਂ;
ਅਚ੍ਚਾਯਿਤਬ੍ਬ ਕਾਲੋ ਯਂ, ਇਕ੍ਖਿਤਬ੍ਬ ਮੁਦਿਕ੍ਖਤੁ.
ਪੁਰੇਮਰਾਮਿ ¶ ਦਟ੍ਠਬ੍ਬਂ,
ਦਕ੍ਖੇਯ੍ਯਂ ਮਚ੍ਚੁ ਏਸ੍ਸਤਿ;
ਅਚ੍ਚਾਯਿਤਬ੍ਬ ਕਾਲੋ ਯਂ,
ਨੋਕਾਸੋ ਹਾਸਤੁਟ੍ਠਿਯਾ.
ਆਕਿਣ੍ਣਮਚ੍ਚੁਸੇਨਾਨਂ ¶ , ਅਜ੍ਜ ਸ੍ਵੇਵਾ ਵਿਨਾਸਿਨਂ;
ਅਦ੍ਧਾ ਪਹਾਯ ਗਾਮੀਨਂ, ਕਿਂ ਪਮਾਦ ਵਿਹਾਰਿਨਾ.
ਖਣਮਤ੍ਤੋਵ ਪਚ੍ਚਕ੍ਖੋ, ਅਜ੍ਜ ਸ੍ਵੇਵਾ ਅਤਿਸ੍ਸਤਿ;
ਸਮ੍ਪਰਾਯੋ ਅਤਿਦੀਘੋ, ਪਰਮ੍ਪਰੋ ਅਨਨ੍ਤਿਕੋ.
ਖਣਮਤ੍ਤੋਵ ¶ ਪਚ੍ਚਕ੍ਖੋ, ਮਚ੍ਚੁਨਾ ਤਂ ਜਹਿਸ੍ਸਤਿ;
ਪਹਾਯ ਗਮਨੀਯੇ-ਸ੍ਮਿਂ, ਮਹੁਸ੍ਸਾਹੋ ਨਿਰਤ੍ਥਕੋ.
ਸਮ੍ਪਰਾਯੋ ਅਤਿਦੀਘੋ, ਅਪਾਥੇਯ੍ਯੇ ਸੁਦੁਤ੍ਤਰੋ;
ਮਹੁਸ੍ਸਾਹੇਨ ਕਾਤਬ੍ਬੋ, ਤਦਤ੍ਥੋ ਦੀਘਦਸ੍ਸਿਨਾ.
ਸਦ੍ਧਾ ¶ ਬਨ੍ਧਤੁ ਪਾਥੇਯ੍ਯਂ, ਤਦੇਸਨਂ ਇਹੇਵ ਹਿ;
ਭਵਨ੍ਤਰੇ ਨਲਬ੍ਭੇਯ੍ਯ, ਅਪਾਥੇਯ੍ਯ ਤਿਦੁਕ੍ਖਿਤੋ.
ਸਂਸਾਰ ਤਰਣਤ੍ਥਾਯ, ਮਹੋਲੁਮ੍ਪਾਨਿ ਬਨ੍ਧਥ;
ਭਾਵਨਾ ਦਾਨ ਸੀਲੇਹਿ, ਤਿਵਿਤ੍ਤਿਣ੍ਣੋ ਭਵਣ੍ਣਵੋ.
ਭੁਞ੍ਜਂ ¶ ਭੁਞ੍ਜਂ ਜਨਂ ਕਾਮੇ,
ਕਾਲਾਕਾਲਾ-ਬੁਧੋਨ੍ਤਕੋ;
ਕਨ੍ਤੇਕਨ੍ਤੇਤਿ ਮਂਸਾਸੋ,
ਪਿਵਂਪਿਵਂਵ ਕਂ ਮਿਗਂ.
ਕਾਮੇ ਕਾਮੇਸਨਾਯੇਯ੍ਯ,
ਕਾਲੋਕਾਲੋ ਮਤੇਟ੍ਠਿਯਾ;
ਪੂਰੇ ਪੂਰੇਤਬ੍ਬਂ ਧਮ੍ਮਂ,
ਅਦ੍ਧਾ ਅਦ੍ਧਾਨ ਸਂਸਰਂ.
ਮਰੇਯ੍ਯਨ੍ਤਿ ¶ ਅਨੁਬ੍ਬਿਗ੍ਗੋ, ਪਾਪਕਂ ਕਤ੍ਤੁਮੁਸ੍ਸਹੇ;
ਕਰੇਯ੍ਯ ਹਾਸਨਨ੍ਦਿਞ੍ਚ, ਚਾਪਲ੍ਲਞ੍ਚ ਪਮਾਦ ਵਾ.
ਮਰੇਯ੍ਯਮਿਤਿ ¶ ਸਂਵਿਗ੍ਗੋ, ਲੇਣਮੇਵ ਗਵੇਸਤਿ;
ਨ ਹਾਸਿ ਨੇਵਨਨ੍ਦੀਚ, ਨ ਚਾਪਲ੍ਲੋ ਕਦਾਚਿਪਿ.
ਅਚ੍ਚੁਟ੍ਠਿਤ ਰੁਜਗ੍ਗੀਹਿ, ਅਚ੍ਚਾਯਾਸੇ ਭਯਾਨਕੇ;
ਨੋਸਧੇ ਮਰਣਾਸਨ੍ਨੇ, ਕਤਪੁਞ੍ਞਂਵ ਸਾਤ-ਦਂ.
ਞਾਤਿਸਙ੍ਘਾ ¶ ਵਿਯੋਜੇਨ੍ਤਾ, ਮਰਣਨ੍ਤ ਭੁਸਾਤੁਰਾ;
ਸਬ੍ਬਂ ਪਹਾਯ ਗਨ੍ਤਾਪਿ, ਨਨ੍ਦਿਤਬ੍ਬਾਨਿ ਪੁਞ੍ਞਿਨੋ.
ਪਸ੍ਸਨ੍ਤਾ ਸੁਨਿਮਿਤ੍ਤਾਨਿ, ਪਾਕਟਾਨਿ ਸਕਮ੍ਮੁਨਾ;
ਸੁਖਨ੍ਤਿ ਮਰਣੇ ਕਾਲੇ, ਨੁਮੋਦਨ੍ਤਾ ਕਤਾਨਿਚ.
ਸਾਤ-ਦਾਤਾਨਿ ¶ ਪੁਞ੍ਞਾਨਿ, ਏਵਂ ਮਹਬ੍ਭਯੇ ਅਪਿ;
ਸੁਗਤਿਂ ਲਹੁਨੇਤਾਨਿ, ਕਾਤਬ੍ਬਾਨਿ ਪੁਰੇਤਰਂ.
ਦੇਵਦੂਤੇ ¶ ਪਕਾਸੇਤ੍ਵਾ, ਯਮਪੁਟ੍ਠੋ ਸਯਂਕਤਂ;
ਪੁਞ੍ਞਂ ਸਰਤਿ ਚੇ ਸਤ੍ਤੋ, ਤਦੇਵ ਸੁਗਤਿਂ ਵਜੇ.
ਪਾਪ ¶ ਕਡ੍ਢਮ੍ਪਿ ਨਿਰਯੇ, ਮਨਂ ਦੁਕ੍ਖਗਤਂ ਪਜਂ;
ਦੁਕ੍ਖਾ ਮੋਚੇਤਿ ਯਂਪੁਞ੍ਞਂ, ਸਦਾ ਕਾਤਬ੍ਬਮੇਵ ਤਂ.
ਪਹਾਯਕਂਵ ਪੁਞ੍ਞਞ੍ਹਿ, ਪਹਾਤਬ੍ਬਂਵ ਪਾਪਕਂ;
ਤਂ ਪਦੀਪਨ੍ਧਕਾਰਂਵ, ਦ੍ਵਯਂ ਓਤ੍ਵਾ ਖੁਕਂ ਵਿਯ.
ਞਾਤਿਸਙ੍ਘਾ ¶ ਵਿਯੋਜੇਨ੍ਤਾ, ਮਰਣਨ੍ਤ ਭੁਸਾਤੁਰਾ;
ਸਬ੍ਬਂ ਪਹਾਯ ਗਨ੍ਤਾਰੋ, ਭਯਾਨਕਾਨਿ ਪਾਪਿਨੋ.
ਪਸ੍ਸਨ੍ਤਾ ਦੁਨ੍ਨਿਮਿਤ੍ਤਾਨਿ, ਪਾਕਟਾਨਿ ਸਕਮ੍ਮੁਨਾ;
ਮਰਣੇ ਅਤਿਦੁਕ੍ਖਨ੍ਤਿ, ਨੁਤਾਪੇਨ੍ਤਾ ਕਤਾਨਿਚ.
ਪਟਿਪੀਲ਼ਾਨਿ ¶ ਪਾਪਾਨਿ, ਏਵਂ ਮਹਬ੍ਭਯੇ ਸਤਿ;
ਦੁਗ੍ਗਤਿਂ ਲਹੁਨੇਤਾਨਿ, ਯੁਤ੍ਤੋਵ ਪਰਿਵਜ੍ਜਿਤੁਂ.
ਦੇਵਦੂਤੇ ¶ ਪਕਾਸੇਤ੍ਵਾ, ਯਮਰਾਜੇਨ ਪੁਚ੍ਛਿਤੋ;
ਪਮਾਦਸ੍ਸਨ੍ਤਿ ਚਿਕ੍ਖਨ੍ਤੋ, ਮਹਗ੍ਗਿਮ੍ਹਿ ਤੁਰਂ ਪਤਿ.
ਪੁਞ੍ਞਂ ਅਕਰਿਵਾ ਮਾਵਾ, ਯਮਰਾਜਿਨ੍ਦ ਪੁਚ੍ਛਿਤੋ;
ਪਮਾਦਸ੍ਸਨ੍ਤਿ ਚਿਕ੍ਖਨ੍ਤੋ, ਮਹਾਦੁਕ੍ਖਂ ਤੁਰਂ ਗਮਿ.
ਪਾਪਂ ¶ ਅਕਰਿਵਾ ਮਾਵਾ, ਪੁਚ੍ਛਿਤੋ ਯਮਸਾਮਿਨਾ;
ਪਮਾਦਸ੍ਸਨ੍ਤਿ ਚਿਕ੍ਖਨ੍ਤੋ, ਤਤ੍ਤਂ ਗੁਲ਼ਂ ਤੁਰਂ ਗਿਲਿ.
ਜਾਤਮਤ੍ਤਾ ਤਿਜਿਣ੍ਣਾਚ, ਆਤੁਰਾਚ ਮਤਾ ਵੁਧਾ;
ਦੇਵਦੂਤੇ ਇਮੇ ਪਞ੍ਚ, ਦਿਸ੍ਵਾ ਸਂਵਿਗ੍ਗਤਂ ਵਜੇ.
ਚੋਦਿਤਾ ¶ ਦੇਵਦੂਤੇਹਿ, ਯੇ ਪਮਜ੍ਜਨ੍ਤਿ ਮਾਨਵਾ;
ਤੇ ਦੀਘਰਤ੍ਤਂ ਸੋਚਨ੍ਤਿ, ਹਿਨ ਕਾਯੂ ਪਗਾਨਰਾ.
ਧੁਰਦ੍ਵਯ ¶ ਮਨਾਰਬ੍ਭ, ਗਿਹਿਕਮ੍ਮਾਦਿਕੇ ਰਤੋ;
ਕਥਂ ਗਿਜ੍ਝਕੂਟਂ ਸੇਸਂ, ਪੇਤਾਵਾਸਂ ਅਤਿਸ੍ਸਤਿ.
ਪਰਿਯਤ੍ਤਿ ਮਸਿਕ੍ਖਨ੍ਤੋ,
ਨਾਰਦ੍ਧੋ ਪਟਿਪਤ੍ਤਿਯਂ;
ਅਲਸੋ ਦੁਬ੍ਬਿਤਕ੍ਕੋ ਸੋ,
ਕਿਂ ਤਂਸੇਲਂ ਅਤਿਸ੍ਸਤਿ.
ਮੋਚਨਤ੍ਥਾਯ ¶ ਪਬ੍ਬਜ੍ਜ, ਸਂਕਿਲਿਟ੍ਠਾ ਪਮਾਦਿਨੋ;
ਸੁਗਤ੍ਯਾਪਿਚ ਤੇ ਭਟ੍ਠਾ, ਅਤਿਦੂਰਾਵ ਮੁਤ੍ਤਿਤੋ.
ਸੀਦਨ੍ਤੇਵ ¶ ਜਲੇ ਖਿਤ੍ਤਾ, ਸਿਲਾ ਮਹਾਵ ਖੁਦ੍ਦਕਾ;
ਪਤਨ੍ਤਿ ਖੁਦ੍ਦਕੇਨਾਪਿ, ਅਪਾਯਂ ਪਾਪ ਕਮ੍ਮੁਨਾ.
ਪਤਨ੍ਤਾ ਖੁਦ੍ਦਕੇਨੇਵ, ਬਹੂਹਿ ਪੁਨ ਪੀਲ਼ਿਤਾ;
ਮੋਕ੍ਖੋਕਾਸਂ ਨਵਿਨ੍ਦਨ੍ਤਿ, ਪਾਪਂ ਖੁਦ੍ਦਮ੍ਪਿ ਨਾਚਰੇ.
ਜੇਗੁਚ੍ਛਿਤ੍ਥੂਦਰਾਗਮ੍ਮ ¶ , ਪੁਨਾਪਿ ਤਤ੍ਥ ਨਿਚ੍ਚਗੂ;
ਦੁਕ੍ਖਾਤਿ ਦੁਕ੍ਖ ਸਂਕਿਣ੍ਣੋ, ਹਟ੍ਠੁਂ ਤੁਟ੍ਠੁਂ ਨਸਕ੍ਕੁਣੇ.
ਅਤਿਬ੍ਯਾਪਿਗੁਣੋ ¶ ਪੁਞ੍ਞੋ,
ਮਹਾਯਸੋ ਸਿਰਿਨ੍ਧਰੋ;
ਕੁਚ੍ਛਿਯਂ ਰੇਤਸਿ ਵਾਸੋ,
ਅਤੀਵ ਲਜ੍ਜਿਤਬ੍ਬਕੋ.
ਮਚ੍ਚੁਦੁਕ੍ਖਂ ਖਣਂਯੇਵ, ਅਤਿਦੁਕ੍ਖਂ ਤਦੁਤ੍ਤਰਿ;
ਮਾਤੁਗਾਮੁਦਰੇ ਸਨ੍ਧਿ, ਪਤਿਟ੍ਠਾਨਂ ਭਯਾਨਕਂ.
ਮਚ੍ਚੁਦੁਕ੍ਖਂ ¶ ਖਣਂਯੇਵ, ਅਤਿਦੁਕ੍ਖਂ ਚਿਰਤ੍ਤਨਂ;
ਆਮ ਪਕ੍ਕਨ੍ਤਰੇ ਸਨ੍ਧਿ, ਪਤਿਟ੍ਠਾਨਂ ਭਯਾਨਕਂ.
ਦੁਗ੍ਗਤ੍ਯਂਠਾਤੁ ਤਂਦੁਕ੍ਖਂ, ਸੁਣ ਉਚ੍ਚਕੁਲੇਅਪਿ;
ਕੁਚ੍ਛਿਯਂ ਅਤਿਸਮ੍ਬਾਧੇ, ਜਲਾਬੁਮ੍ਹਿ ਜਿਗੁਚ੍ਛਿਤੇ.
ਮਿਲ਼੍ਹ ਸੇਮ੍ਹਾਦਿ ਸਂਕਿਣ੍ਣੇ, ਅਤਿ ਦੁਗ੍ਗਨ੍ਧ ਵਾਸਿਤੇ;
ਗੂਥਕੂਪੇ ਕਿਮੀਵਿਯ, ਤਮੇਜਾ ਮੂਲਕਮ੍ਮਤੋ.
ਪਰਮਾਣੁਕਾਯੋ ਠਾਤਿ, ਦੁਕ੍ਖੀ ਨੇਰਯਿਕੋ ਵਿਯ;
ਧੁਵਾਤੁਰੋ ਸੁਖਾਮਿਸ੍ਸੋ, ਆਮ ਪਕ੍ਕਾਸਯਨ੍ਤਰੇ;
ਵੇਦਨਟ੍ਟੋਵ ਸਂਵਡ੍ਢੋ, ਅਚਿਤ੍ਤੋਵਿਯ ਨਿਚ੍ਚਲੋ;
ਦਸਮਾਸਨ੍ਤਰੇ ਕਚ੍ਚੇ, ਬਹੂ ਮਰਨ੍ਤਿ ਪਾਣਿਨੋ.
ਪਰਿਪਕ੍ਕੋ ¶ ਪਮੁਞ੍ਛੋ ਸੋ,
ਅਤਿਸਮ੍ਬਾਧ ਯੋਨਿਤੋ;
ਮਲਾਕਿਣ੍ਣੇਨ ਗਤ੍ਤੇਨ,
ਅਚ੍ਚਾਯਾਸੋ ਵਿਜਾਯਤਿ.
ਏਵਂ ¶ ਮਚ੍ਚੁਞ੍ਚ ਸਨ੍ਧਿਞ੍ਚ, ਵਿਜਾਯਨਞ੍ਚ ਭੇਰਵਂ;
ਪਸ੍ਸਂ ਨਿਬ੍ਬਿਨ੍ਦਨ੍ਤੋ ਸਨ੍ਤੋ, ਵਿਰਜ੍ਜੇਯ੍ਯ ਭਵਨ੍ਦੁਕੇ.
ਏਵਂ ਮਚ੍ਚੁਞ੍ਚ ਸਨ੍ਦਿਞ੍ਚ, ਅਨੁਸ੍ਸਰ ਮਭਿਣ੍ਹਸੋ;
ਰਾਜਸੇਟ੍ਠਿ ਭਵਾਦਿਮ੍ਪਿ, ਨਇਚ੍ਛੇਯ੍ਯ ਤਦਨ੍ਵਿਤਂ.
ਭਵੇ ¶ ਦੁਕ੍ਖ ਮਚਿਨ੍ਤੇਤ੍ਵਾ, ਭਵਾਸਾਯ ਪਵਤ੍ਤਿਤਂ;
ਪੁਞ੍ਞਂ ਪੁਨਪ੍ਪੁਨਂ ਦੇਤਿ, ਸਨ੍ਧਿਂ ਨ ਨਿਬ੍ਬੁਤਿਂ ਵਰਂ.
ਭਵੇ ਦੁਕ੍ਖਂ ਵਿਭਾਯਿਤ੍ਵਾ, ਨਿਬ੍ਬਿਨ੍ਦੇਨ ਪਵਤ੍ਤਿਤਂ;
ਪੁਞ੍ਞਂ ਭਵ ਮਤਿਕ੍ਕਮ੍ਮ, ਨਿਬ੍ਬਾਨਂ ਦੇਤਿ ਨਿਬ੍ਬੁਤਿਂ.
ਭਵੇ ¶ ਦੁਕ੍ਖਂ ਸਰਿਤ੍ਵਾਨ, ਮਚ੍ਚੁਸਨ੍ਧਿ ਸਯਾਦਿਕਂ;
ਤਿਭਵੇਸੁ ਵਿਰਜ੍ਜੇਯ੍ਯਾ, ਦਿਤ੍ਤ ਗੇਹੇਵ ਸਾਮਿਕੋ.
ਸਨ੍ਤੋ ਪੁਞ੍ਞਾਨਿ ਕਰੋਨ੍ਤੋ, ਸਨ੍ਧਿਦੁਕ੍ਖ ਮਨੁਸ੍ਸਰਂ;
ਨਿਬ੍ਬਿਨ੍ਦ ਯੁਤ੍ਤ ਚਿਤ੍ਤੇਨ, ਵਜ੍ਜੇਯ੍ਯ ਭਵਸਾਤ ਤੋ.
ਪੁਞ੍ਞ ¶ ਨਿਬ੍ਬਤ੍ਤ ਠਾਨੇਪਿ, ਜੇਗੁਚ੍ਛੇ ਸਨ੍ਧਿਸਮ੍ਭਵੋ;
ਭਵ ਸਾਤ ਵਸਾ ਤਸ੍ਮਾ, ਧੀਰੋ ਤਂ ਲਗ੍ਗਨਂ ਚਜੇ.
੩. ਅਸੁਭਭਾਵਨਾ ਨਿਦ੍ਦੇਸ
ਸਿਰਿਮਂ ¶ ਗਣਿਕਂ ਦਿਸ੍ਵਾ, ਦਮੇਤੁਂ ਰਤ੍ਤਚੇਤਸਂ;
ਦਸ੍ਸੇਤ੍ਵਾ ਮਤਸਾਰੀਰਂ, ਤਸ੍ਸਾ ਜਿਨੋ ਇਦਂ ਬ੍ਰਵਿ.
ਚਰਂਵਾ ¶ ਯਦਿਵਾ ਤਿਟ੍ਠਂ, ਨਿਸਿਨ੍ਨੋ ਉਦਵਾ ਸਯਂ;
ਸਮਞ੍ਛੇਤਿ ਪਸਾਰੇਤਿ, ਏਸਾ ਕਾਯਸ੍ਸ ਇਞ੍ਜਨਾ.
ਅਟ੍ਠਿ ਨ੍ਹਾਰੂਹਿ ਸਂਯੁਤ੍ਤੋ, ਤਚ ਮਂਸਾਵ ਲੇਪਨੋ;
ਛਵਿਯਾ ਕਾਯੋ ਪਟਿਚ੍ਛਨ੍ਨੋ, ਯਥਾਭੂਤਂ ਨਦਿਸ੍ਸਤਿ.
ਅਨ੍ਤਪੂਰੋ ¶ ਦਰਪੂਰੋ, ਯਕਨ ਪੇਲ਼ਸ੍ਸ ਵਤ੍ਥਿਨੋ;
ਹਦਯਸ੍ਸ ਪਪ੍ਫਾਸਸ੍ਸ, ਵਕ੍ਕਸ੍ਸ ਪਿਹਕਸ੍ਸਚ.
ਸਿਙ੍ਘਾਨਿਕਾਯ ਖੇਲ਼ਸ੍ਸ, ਸੇਦਸ੍ਸਚ ਮੇਦਸ੍ਸਚ;
ਲੋਹਿਤਸ੍ਸ ਲਸਿਕਾਯ, ਪਿਤ੍ਤਸ੍ਸਚ ਵਸਾਯਚ.
ਅਥਸ੍ਸ ¶ ਨਵਹਿ ਸੋਤੇਹਿ, ਅਸੁਚਿ ਸਵਤਿ ਸਬ੍ਬਦਾ;
ਅਕ੍ਖਿਮ੍ਹਾ ਅਕ੍ਖਿਗੂਥਕੋ, ਕਣ੍ਣਮ੍ਹਾ ਕਣ੍ਣਗੂਥਕੋ.
ਸਿਙ੍ਘਾਨਿਕਾਚ ਨਾਸਤੋ, ਮੁਖਤੋ ਵਮਤਿ ਏਕਦਾ;
ਪਿਤ੍ਤਂ ਸੇਮ੍ਹਞ੍ਚ ਵਮਤਿ, ਕਾਯਮ੍ਹਾ ਸੇਦਜਲ੍ਲਿਕਾ.
ਅਥਸ੍ਸ ¶ ਸੁਸਿਰਂ ਸੀਸਂ,
ਮਤ੍ਥਲੁਙ੍ਗਸ੍ਸ ਪੂਰਿਤਂ;
ਸੁਭਤੋ ਨਂ ਮਞ੍ਞਤਿ ਬਾਲੋ,
ਅਵਿਜ੍ਜਾਯ ਪੁਰਕ੍ਖਤੋ.
ਯਦਾਚ ਸੋ ਮਤੋ ਸੇਤਿ,
ਉਦ੍ਧੁਮਾਤੋ ਵਿਨੀਲਕੋ;
ਅਪਵਿਦ੍ਧੋ ਸੁਸਾਨਸ੍ਮਿਂ,
ਅਨਪੇਕ੍ਖਾ ਹੋਨ੍ਤਿ ਞਾਤਯੋ.
ਖਾਦਨ੍ਤਿ ¶ ਨਂ ਸੁਵਾਨਾਚ, ਸਿਙ੍ਗਾਲਕਾਚ ਕਿਮਿਯੋ;
ਕਾਕਾ ਗਿਜ੍ਝਾਚ ਖਾਦਨ੍ਤਿ, ਯੇਚਞ੍ਞੇ ਸਨ੍ਤਿ ਪਾਣਕਾ.
ਸੁਤ੍ਵਾਨ ¶ ਬੁਦ੍ਧਵਚਨਂ, ਭਿਕ੍ਖੁ ਪਞ੍ਞਾਣਵਾ ਇਧ;
ਸੋਖੋ ਨਂ ਪਰਿਜਾਨਾਤਿ, ਯਥਾਭੂਤਞ੍ਹਿ ਪਸ੍ਸਤਿ.
ਯਥਾਇਦਂ ਤਥਾਏਤਂ, ਯਥਾਏਤਂ ਤਥਾਇਦਂ;
ਅਜ੍ਝਤ੍ਤਞ੍ਚ ਬਹਿਦ੍ਧਾਚ, ਕਾਯੇ ਛਨ੍ਦਂ ਵਿਰਾਜਯੇ.
ਛਨ੍ਦ ¶ ਰਾਗ ਵਿਰਤ੍ਤੋ ਸੋ, ਭਿਕ੍ਖੁ ਪਞ੍ਞਾਣਵਾ ਇਧ;
ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦ ਮਚ੍ਚੁਤਂ.
ਦ੍ਵਿਪਾਦਕੋ ਯਂ ਅਸੁਚਿ, ਦੁਗ੍ਗਨ੍ਧੋ ਪਰਿਹਾਰਤਿ;
ਨਾਨਾਕੁਣਪ ਪਰਿਪੂਰੋ, ਵਿਸ੍ਸਵਨ੍ਤੋ ਤਤੋਤਤੋ.
ਏਤਾਦਿਸੇਨ ¶ ਕਾਯੇਨ, ਯੋ ਮਞ੍ਞੇ ਉਨ੍ਨਮੇਤਵੇ;
ਪਰਂਵਾ ਅਵਜਾਨੇਯ੍ਯ, ਕਿਮਞ੍ਞਤ੍ਰ ਅਦਸ੍ਸਨਾਤਿ;
ਕਾਯ ਵਿਚ੍ਛਨ੍ਦਨੀਯਸੁਤ੍ਤਂ, ਵਿਜਯਸੁਤ੍ਤਨ੍ਤਿਪਿ ਵਤ੍ਤਬ੍ਬਂ.
ਰ-ਅਕ੍ਖਰੋ ¶ ਸਿਯਾਗ੍ਗਿਮ੍ਹਿ, ਰੋਵ ਅਗ੍ਗਿਵ ਆਗਤੋ;
ਤਸ੍ਮਾ ਰਾਗੋਤਿ ਵਤ੍ਤਬ੍ਬੋ, ਤਣ੍ਹਾਵ ਨਿਚ੍ਚਤਾਪਿਕਾ.
ਅਭਿਣ੍ਹਮੇਵ ਰਾਗਗ੍ਗਿ, ਦਯ੍ਹਤੇ ਸੁਭਸਞ੍ਞਿਨਂ;
ਕਿਮਿਖਜ੍ਜਵਣੋ ਸਾਵ, ਦੁਕ੍ਖੀ ਰਾਗੀ ਸ ਸਬ੍ਬਦਾ.
ਦੁਕ੍ਖੀ ¶ ਪਿਯ ਮਲਦ੍ਧਾਨ, ਲਦ੍ਧਾਪ੍ਯ ਪਰਿਪੁਣ੍ਣਤੋ;
ਨਤ੍ਥਿ ਰਾਗਗ੍ਗਿਖਨ੍ਧਸ੍ਸ, ਪਿਯਿਨ੍ਧੇਨ ਹਿ ਪੁਣ੍ਣਤਾ.
ਨਤ੍ਥਿ ¶ ਰਾਗਸਮੋ ਅਗ੍ਗਿ,
ਇਤਿ ਵੁਤ੍ਤਂ ਮਹੇਸਿਨਾ;
ਤੇਨ ਰਾਗਗ੍ਗਿਨਾ ਦਡ੍ਢੋ,
ਸਬ੍ਬੋ ਲੋਕੋ ਤਿਦੁਕ੍ਖਿਤੋ.
ਏਕਸ੍ਸ ਪਿਵਿਤਂ ਖੀਰਂ, ਚਤੂ ਦਧਿ ਜਲਾ ਬਹੁ;
ਰਾਗਹੇਤੁ ਭਵੇ ਸਨ੍ਧਿ, ਟ੍ਠਾਨਂ ਅਨਮਤਗ੍ਗਿਕਂ.
ਚਤੂਦਮਿ ¶ ਜਲਾ ਭਿਯ੍ਯੋ, ਸੀਸਚ੍ਛੇਦਨ ਲੋਹਿਤਂ;
ਰਾਗਹੇਤੁ ਭਵੇ ਮਚ੍ਚ, ਭਯਂ ਅਨਮਤਗ੍ਗਿਕਂ.
ਏਕਸ੍ਸ ਰੁਦਤੋ ਅਸ੍ਸੁ, ਚਤੂ ਦਧਿ ਜਲਾ ਬਹੁ;
ਦੁਕ੍ਖਂ ਅਨਮਤਗ੍ਗਂਵ, ਤਂਹੇਤੁ ਪਰਿਦੇਵਨਂ.
ਤਤ੍ਤਾਯੋ ¶ ਗੁਲ਼ ਗਿਲਿਤ, ਵਧਗ੍ਗਿ ਦਯ੍ਹਨਾ ਦਿਕਂ;
ਅਸਙ੍ਖ੍ਯੇਯ੍ਯਂ ਮਹਾਦੁਕ੍ਖਂ, ਤਂਹੇਤੁ ਨਿਰਯੇ ਲਭਿ.
ਏਕ ਦ੍ਵਿਤ੍ਤਿ ਚਤੁ ਪਞ੍ਚ, ਬੁਦ੍ਧੁਪ੍ਪਾਦੇਪ੍ਯ ਮੋਚਿਤਂ;
ਖੁਪ੍ਪਿਪਾਸਿਤ ਨਿਜ੍ਝਾਮਂ, ਲਭਿ ਤਂਹੇਤੁ ਪੇਤ੍ਤਿਕਂ.
ਤਿਰਚ੍ਛਾਨੇ ¶ ਅਸੂਰੇਚ, ਦੁਕ੍ਖਂ ਨਾਨਾਵਿਧਂ ਲਭਿ;
ਨਮਤਗ੍ਗਿਕ ਸਂਸਾਰੇ, ਸਬ੍ਬਨ੍ਤਂ ਰਾਗਹੇਤੁਕਂ.
ਏਕਸ੍ਸੇਕੇਨ ਕਪ੍ਪੇਨ, ਪੁਗ੍ਗਲਸ੍ਸਟ੍ਠਿ ਸਞ੍ਚਯੋ;
ਸਚੇ ਸਂਹਾਰਿਤੋ ਅਸ੍ਸ, ਵੇਪੁਲ੍ਲ ਪਬ੍ਬਤਾਧਿਕੋ.
ਏਕ ਕਪ੍ਪੇ ਇਦਂ ਦੁਕ੍ਖਂ, ਨਾਦਿਕਪ੍ਪੇਸੁ ਕਾਕਥਾ;
ਰਾਗੋ ਨਨੁ ਮਹਾਵੇਰੀ, ਬਾਲੋ ਜਨੋ ਤ ਮਿਚ੍ਛਤਿ.
ਰਾਗਸੁਦ੍ਧਿ ¶ ਅਸੋਕੋਚ, ਨਿਦ੍ਦੁਕ੍ਖੋ ਞਾਯਪਤ੍ਤਿਚ;
ਨਿਬ੍ਬਾਨਂ ਪਞ੍ਚ ਪਚ੍ਚਕ੍ਖਾ, ਅਸੁਭਾਯ ਫਲਾ ਮਤਾ.
ਅਸੁਭਗ੍ਗਹਣਂ ¶ ਝਾਯੀ, ਮਿਤਾ ਸਿਨ੍ਦ੍ਰਿਯ ਸਂਵਰੋ;
ਸੋਮਿਤ੍ਯ ਮੁਕ੍ਕਟ੍ਠਾਵਾਚਾ, ਛਲ਼ਿਮੇ ਰਾਗ ਸੁਦ੍ਧਿਯਾ.
ਨਿਚ੍ਚੁਗ੍ਗਰਾਗ ਰੋਗੀਨਂ, ਅਸੁਭਾ ਵਾਤੁਲੋਸਧਾ;
ਰਾਗਯਕ੍ਖਾਭਿ ਗਯ੍ਹਾਨਂ, ਅਸੁਭਾ ਮਨ੍ਤ ਮੁਤ੍ਤਰਂ.
ਸਜੀਵਕਾਚ ¶ ਨਿਜ੍ਜੀਵਾ, ਅਸੁਭਾ ਦੁਵਿਧਾ ਮਤਾ;
ਸਜੀਵਾ ਕੇਸਲੋਮਾਦਿ, ਦਸੇਵਿਮੇ ਅਜੀਵਕਾ.
ਉਦ੍ਧੁਮਾਤਕ ¶ ਵੀਨੀਲਂ, ਵਿਪੁਬ੍ਬਕਂ ਵਿਛਿਦ੍ਦਕਂ;
ਵਿਕ੍ਖਾਯਿਤਕ ਵਿਕ੍ਖਿਤ੍ਤਂ, ਹਤਿਵਿਕ੍ਖਿਤ੍ਤ ਲੋਹਿਤਂ.
ਪੁਲ਼ੁਵ ਟ੍ਠਿਕ ਮਿਚ੍ਚੇਸੁ, ਲਦ੍ਧਾ ਅਞ੍ਞਤਰਂ ਸਤੋ;
ਰਤਨ ਵਾਨਪਸ੍ਸੇਯ੍ਯ, ਯਥਾ ਚੇਤਸਿ ਪਾਕਟਂ.
ਮਤਂ ¶ ਖਜ੍ਜਂ ਸ ਮਂਸਞ੍ਚ, ਨਿਲੋਹਿਤਂ ਨਿਮਂਸਕਂ;
ਵਿਕ੍ਖਿਤ੍ਤਂ ਸੇਤ ਪੁਞ੍ਜਟ੍ਠਿਂ, ਨਵਧਾ ਪੁਤਿਮਿਕ੍ਖਯੇ.
ਮਚ੍ਚੁਤੋ ¶ ਪਰਿਮੁਚ੍ਚਾਮਿ, ਪਟਿਵਤ੍ਤਿ ਯਿਮਾ ਯਿਤਿ;
ਪਯੋਜਨ ਸਮਾਵਜ੍ਜ, ਮੋਦਿਤਬ੍ਬਂ ਜਿਗੁਚ੍ਛਕੇ.
ਸਜੀਵਕੇ ਜਿਗੁਚ੍ਛਤ੍ਥਂ, ਨਿਜ੍ਜੀਵਾ ਸੁਭ ਮੀਰਿਤਂ;
ਤਥੂਪਮੋ ਅਯਂਕਾਯੋ, ਏਵਮੇਵ ਭਵਿਸ੍ਸਤਿ.
ਏਵਂਧਮ੍ਮੋ ¶ ਅਯਂਕਾਯੋ, ਏਵਂਭਾਵੀ ਨਤਿਕ੍ਕਮੋ;
ਇਚ੍ਚੁਪ ਸਂਹਰੇ ਦਿਸ੍ਵਾ, ਏਕਦ੍ਵਿਹ ਮਤਾਦਿਕਂ.
ਯਥਾ ¶ ਇਦਂ ਤਥਾਏਤਂ, ਯਥਾਏਤਂ ਤਥਾ ਇਦਂ;
ਜੇਗੁਚ੍ਛਂ ਪਟਿਕੂਲ੍ਯਞ੍ਚ, ਕਾਯੇ ਇਚ੍ਚੁਪ ਸਂਹਰੇ.
ਉਦ੍ਧੁਮਾਤ ਵਿਨੀਲਾਦਿ,
ਪਟਿਕੂਲ੍ਯੋ ਜਿਗੁਚ੍ਛਿਤੋ;
ਤਥੇਵਾਯਮ੍ਪਿ ਮੇ ਕਾਯੋ,
ਵਿਸੇਸੋ ਨਾਯੁ-ਸਾਯੁਵ.
ਉਦ੍ਧੁਮਾਤ ¶ ਵਿਨੀਲਾਦੋ, ਸੋਭਣਂ ਨਤ੍ਥਿ ਕਿਞ੍ਚਿਪਿ;
ਇਮਸ੍ਮਿਂਪਿ ਮੇ ਕਾਯੇ, ਗਵੇਸਨ੍ਤੋਪਿ ਸਬ੍ਬਸੋ.
ਪਟਿਕੂਲਵਸਾ ਧਾਤੁ, ਵਸਾਚ ਦ੍ਵਿਪ੍ਪਕਾਰਤੋ;
ਪਚ੍ਚਵੇਕ੍ਖੇਯ੍ਯਿਮਂ ਕਾਯਂ, ਇਚ੍ਛਂ ਵਿਰਾਗ ਮਤ੍ਤਨਿ.
ਵਣ੍ਣ ¶ ਸਣ੍ਠਾਨ ਗਨ੍ਧੇਹਿ, ਆਸਯੋ ਕਾਸਤੋਪਿਚ;
ਜੇਗੁਚ੍ਛ ਪਟਿਕੂਲ੍ਯਾਚ, ਕੇਸਾ ਨ ਤੁਟ੍ਠਮਾਨਿਤਾ.
ਇਤਿ ਕੇਸੇਸੁ ਇਕ੍ਖੇਯ੍ਯ,
ਲੋਮਾ ਦੀਸੁਪ੍ਯਯਂ ਨਯੋ;
ਦ੍ਵਤ੍ਤਿਂਸੇਵਞ੍ਹਿ ਕੋਟ੍ਠਾਸੇ,
ਪਚ੍ਚਵੇਕ੍ਖੇ ਵਿਸੁਂਵਿਸੁਂ.
ਕਾਯਤੋ ¶ ਬਹਿਨਿਕ੍ਖਨ੍ਤਂ, ਪਟਿਕੂਲ੍ਯਂ ਜਿਗੁਚ੍ਛਿਤਂ;
ਅਨਿਕ੍ਖਨ੍ਤਮ੍ਪਿ ਜੇਗੁਚ੍ਛਂ, ਪਟਿਕੂਲ੍ਯਂਵ ਤਸ੍ਸਮਂ.
ਸਙ੍ਖਤਮ੍ਪਿ ਯਥਾ ਵਚ੍ਚਂ, ਮਨੁਞ੍ਞਤਂ ਨ ਪਾਪੁਣੇ;
ਉਪਕ੍ਕਮ ਸਹਸ੍ਸੇਹਿ, ਏਵਂ ਕੇਸਾਦਿਕਮ੍ਪਿਚ.
ਸਭਾਵ ¶ ਪਟਿਕੂਲ੍ਯਂਵ, ਏਕਮ੍ਪਿ ਵਚ੍ਚ ਪੁਞ੍ਜਕਂ;
ਨਨੁ ਜੇਗੁਚ੍ਛਿਤਾ ਭਿਯ੍ਯੋ, ਦ੍ਵਤ੍ਤਿਂਸ ਵਚ੍ਚਪੁਞ੍ਜਕਾ.
ਪਚ੍ਚੇਕਮ੍ਪਿ ¶ ਪਟਿਕੂਲ੍ਯਂ, ਕੇਸਾਦਿਕਂ ਸਭਾਵਤੋ;
ਕੇਸਾਦਿਦ੍ਵਤ੍ਤਿਂਸ ਪੁਞ੍ਜੋ, ਭਿਯ੍ਯੋ ਜੇਗੁਚ੍ਛਿਤੋ ਨਨੁ.
ਪੁਞ੍ਜਿਤੇਸ੍ਵੇਵ ਕਨ੍ਤੇਸੁ, ਕਨ੍ਤੋਹੋਤਿ ਸ ਪੁਞ੍ਜਕੋ;
ਪੁਞ੍ਜਿਤੇਸੁ ਅਕਨ੍ਤੇਸ, ਅਕਨ੍ਤੋਵ ਸ ਪੁਞ੍ਜਕੋ.
ਪਚ੍ਚੇਕਂ ¶ ਵਿਨਿਭੁਤ੍ਤੇਸ, ਕੇਸ ਲੋਮ ਨਖਾਦਿਸੁ;
ਨਤ੍ਥਿ ਤਞ੍ਞਾ ਕੁਮਾਰੀਵਾ, ਮੁਖਹਤ੍ਥਾਦਿਕਾਨਿਵਾ.
ਸਮ੍ਪਿਣ੍ਡਿ ਤੇਸੁ ਤੇਸ੍ਵੇਵ,
ਕੁਤੋ ਤਾ ਤਾਨਿ ਆਗਤਾ;
ਪਞ੍ਞਤ੍ਤਿ ਮਤ੍ਤ ਮੇਵੇਸਾ,
ਜਿਗੁਚ੍ਛਞ੍ਞਾ ਨ ਕਾਚਿਪਿ.
ਸਨ੍ਤਂ ¶ ਚਿਨ੍ਤੇਯ੍ਯ ਨਾਸਨ੍ਤਂ, ਸਨ੍ਤ ਚਿਨ੍ਤਯਤੋ ਸੁਖਂ;
ਅਸਨ੍ਤਂ ਪਰਿਕਪ੍ਪੇਨ੍ਤੋ, ਨਾਨਾਦੁਕ੍ਖੇਹਿ ਤਪ੍ਪਤਿ.
ਨਾਵਜ੍ਜ ਸਨ੍ਤਜੇਗੁਚ੍ਛਂ, ਸਞ੍ਞਂ ਅਸਤਿ ਕਾਤੁਨ;
ਸੁਭਾ ਇਤ੍ਥੀਤਿ ਗਾਰਗ੍ਗਿ, ਉਪ੍ਪਜ੍ਜਿ ਸੁਭਸਞ੍ਞਿਨੋ.
ਅਸਨ੍ਤਂਵ ¶ ਅਭੂਤਂਵ, ਪਸ੍ਸੇ ਰਾਗਗ੍ਗਿਜੋਤਿਯਾ;
ਤਾਯ ਸਨ੍ਤਞ੍ਚ ਭੂਤਞ੍ਚ, ਨ ਪਸ੍ਸਤਿ ਕਦਾਚਿਪਿ.
ਏਕਸ੍ਸ ¶ ਪਿਵਿਤਂ ਖੀਰਂ, ਸੀਸਚ੍ਛੇਦਨ ਲੋਹਿਤਂ;
ਰੁਦਤੋ ਅਸ੍ਸੁ ਤਂਹੇਤੁ, ਚਤੂਦਧਿ ਜਲਾ ਬਹੁ.
ਆਯਤਿਮ੍ਪਿ ਅਤੀਤੇਵ, ਸਂਸਰਨ੍ਤਸ੍ਸ ਹੇਸ੍ਸਤਿ;
ਰਾਗਂ ਹਨ੍ਤੁ ਮਨੀਹੋਚੇ, ਖੀਰਂ ਅਸ੍ਸੁਚ ਲੋਹਿਤਂ.
ਸੁਭਸਞ੍ਞਾਯ ¶ ਸੋ ਵਡ੍ਢੋ,
ਤਦਭਾਵੇ ਸ ਨਸ੍ਸਤਿ;
ਥਿਰਂ ਹਨ੍ਤੁਂ ਨ ਤਂਸਞ੍ਞਂ,
ਸਕ੍ਕਾ ਸਿਥਿਲ ਵੀਰਿਯੋ.
ਉਸ੍ਸੋਲ਼੍ਹਿ ¶ ਵੀਰਿਯੋ ਹੁਤ੍ਵਾ, ਬ੍ਰੂਹੇਯ੍ਯਾਸੁਭ ਭਾਵਨਂ;
ਸੁਭਸਞ੍ਞਾਪ੍ਪ ਹਾਨਾਯ, ਪਰਿਚ੍ਚਜ੍ਜਾਪਿ ਜੀਵਿਤਂ.
ਅਞ੍ਞਕਿਚ੍ਚ ਮੁਪੇਕ੍ਖਾਯ, ਬ੍ਰੂਹੇਯ੍ਯਾਸੁਭ ਭਾਵਨਂ;
ਮਨ੍ਦਿ ਹੁਤ੍ਵੇਹ ਰਾਗਗ੍ਗਿ, ਨਿਬ੍ਬਾਯਿਸ੍ਸਤਿ ਆਯਤਿਂ.
ਕਿਚ੍ਚਂ ਮੇ ਇਦਮੇਵੇਤਿ, ਬ੍ਰੂਹੇਯ੍ਯਾਸੁਭ ਭਾਵਨਂ;
ਦਾਨਿ ਮਨ੍ਦਗ੍ਗਿ ਹੁਤ੍ਵਾਨ, ਪਾਮੋਜ੍ਜਂ ਵੇ ਲਭਿਸ੍ਸਤਿ.
ਕਾਯੇ ¶ ਦਟ੍ਠਬ੍ਬ ਜੇਗੁਚ੍ਛਂ, ਅਪਸ੍ਸਨ੍ਤੋ ਪਮਾਦਵਾ;
ਅਲਦ੍ਧਾ ਕਿਞ੍ਚਿ ਪਾਮੋਜ੍ਜਂ, ਪਬ੍ਬਜ੍ਜਮ੍ਪਿ ਨ ਮੋਦਤਿ.
ਪੁਰੇ ਮਰਾਮਿ ਕਾਯੇ ਸ੍ਮਿਂ, ਪਸ੍ਸਾ ਮਿ ਪਸ੍ਸਿਤਬ੍ਬਕਂ;
ਇਚ੍ਚਾ ਰਦ੍ਧੋ ਵੀਤਿਂਲਦ੍ਧਾ, ਪਬ੍ਬਜ੍ਜਂ ਅਤਿਮੋਦਤਿ.
ਕਾਯੇ ¶ ਦਟ੍ਠਬ੍ਬ ਜੇਗੁਚ੍ਛਂ, ਅਪਸ੍ਸਨ੍ਤੋ ਪਮਾਦ ਵਾ;
ਮੋਘਂਵ ਦੁਲ੍ਲਭਾਤੀਤੋ, ਮਹਾਜਾਨੀਯਤਂ ਗਤੋ.
ਸਨ੍ਤਂ ਭੂਤਞ੍ਚ ਜੇਗੁਚ੍ਛਂ, ਰਾਗਗ੍ਗਿਨਾ ਅਪਸ੍ਸਿਯਂ;
ਪਞ੍ਞਾਪਦੀਪਜੋਤੇਨ, ਸਮਿਕ੍ਖੇਯ੍ਯ ਅਭਿਣ੍ਹਸੋ.
ਸਨ੍ਤਂ ¶ ਭੂਤਞ੍ਚ ਕਾਯੇ ਸ੍ਮਿਂ, ਦਟ੍ਠੁਕਾਮੋ ਸਦਾਸਤੋ;
ਪਞ੍ਞਾਪਦੀਪਕੇਨੇਵ, ਦਕ੍ਖੇ ਨ ਰਾਗੀਸੀਖਿਨਾ.
ਜੇਗੁਚ੍ਛਿਤੇਨ ਕਾਯੇਨ, ਨਿਕ੍ਖਨ੍ਤੇਨ ਜਿਗੁਚ੍ਛਤੋ;
ਅਜ੍ਜ ਸ੍ਵੇਵਾ ਵਿਨਟ੍ਠੇਨ, ਨਾਲ ਮੁਨ੍ਨਮਿਤੁਂ ਸਤੋ.
ਕੀਦਿਸਂ ¶ ਮਂ ਤੁਵਂ ਮਞ੍ਞਿ, ਅਹਂ ਸਬ੍ਬ ਜੇਗੁਚ੍ਛਕੋ;
ਜੇਗੁਚ੍ਛਤੋਚ ਨਿਕ੍ਖਨ੍ਤੋ, ਇਚ੍ਚੇਵ ਵਤ੍ਤੁ ਮਰਹਤਿ.
ਕਾਯੇ ਜੇਗੁਚ੍ਛਸਞ੍ਞਂਵ, ਕਰੇ ਸਬ੍ਬਿਰਿਯਾ ਪਥੇ;
ਤਸ੍ਮਿਂ ਤੁਟ੍ਠਬ੍ਬਕਂ ਨਤ੍ਥਿ, ਪਿਯਾਯਿਤਂ ਮਮਾਯਿਤਂ.
ਸੁਭਾਯ ¶ ਨਵ ਮਤ੍ਤਾਨਂ, ਅਸੁਭਾ ਪਰਿਪਾਚਯੇ;
ਸਨ੍ਤੋ ਪਕ੍ਕਸ੍ਸ ਸਂਸਾਰੋ, ਨਨ੍ਤੋ ਨਵਸ੍ਸ ਰਾਗਿਨੋ.
ਕਾਯੇ ਅਸੁਭ ਸਞ੍ਞਾਯ, ਪਰਿਪਕ੍ਕ ਸਭਾਵਿਨੋ;
ਆਲਮ੍ਬੇਸੁ ਅਚਾਪਲ੍ਲਾ, ਥਿਰਾ ਸਮ੍ਬੁਦ੍ਧ ਸਾਸਨੇ.
ਅਨ੍ਤੋ ¶ ਗੋਚਰਿਕਾ ਪਕ੍ਕਾ, ਬਹਿ ਗੋਚਰਿਕਾ ਨਵਾ;
ਪਕ੍ਕਾ ਨਾਸਾਯ ਉਚ੍ਚਾ ਤੇ, ਨੀਚਾਯੇਵ ਨਵਾ ਸਿਨੋ.
ਨਵਾਨਵਾ ¶ ਸੁਭਾਭੋਗੀ, ਨੀਚਾਨੀਚਾ ਭਿਗਾਮਿਨੋ;
ਪਕ੍ਕਾ ਪਕ੍ਕਾਵ ਧੀਝਾਯੀ, ਸਨ੍ਤਾਸਨ੍ਤਾ ਵਿਰਾਗਿਨੋ.
ਸਕ੍ਕਾ ਸਕ੍ਕਾ ਨ ਦਸ੍ਸੇਤੁਂ, ਸੁਭਂਸੁਭਂ ਸਤਂਸਤਂ;
ਧੀਰਾਧੀਰਾਗ ਮੁਜ੍ਝਨ੍ਤਿ, ਕਾਯੇ ਕਾਯੇ ਕ੍ਰਿਯੇਕ੍ਰਿਯੇ.
ਸਕ੍ਕਾ ¶ ਸਕ੍ਕਾਪਿ ਤਂ ਕਾਤੁਂ, ਸੁਭਂਸੁਭਂ ਨ ਧੀਮਯਂ;
ਸਨ੍ਤੋਸਨ੍ਤੋਜਿਗੁਚ੍ਛਞ੍ਞੂ, ਨ ਵਾਨਵਾ ਸੁਭੇਸਕੋ.
ਦੁਕਾਯਂ ¶ ਸੁਤਿ ਚਿਨ੍ਤੇਤ੍ਵਾ, ਮਮਾਯਨ੍ਤਾ ਮਹਾਤਪਾ;
ਤਪਂ ਨਿਬ੍ਬਾਯਿਤੁਂ ਇਚ੍ਛਂ, ਦੁਕਾਯਂ ਦੁਤਿ ਚਿਨ੍ਤਯੇ.
ਯ੍ਵਾਸੁਭਂ ਸੁਭਤੋ ਮਞ੍ਞਿ, ਕੋਨੁਬਾਲੋਤਦੁਤ੍ਤਰਿ;
ਅਨ੍ਧੋ ਉਮ੍ਮਤ੍ਤਕੋਵਾ ਸੋ, ਨਤ੍ਤਾਨਂ ਮਞ੍ਞਤੇ ਤਥਾ.
ਸਰਿਤਬ੍ਬਕ ¶ ਮੇਵੇਤਂ, ਕਾਯੇ ਜੇਗੁਚ੍ਛ ਪੁਞ੍ਜਤਂ;
ਮਨ੍ਦਰਾਗੋ ਮਨੋਸੀਤਂ, ਲਭੇਯ੍ਯ ਤਮਨੁਸ੍ਸਨਂ.
ਗਿਹਿਭਾਵੇ ਅਪਾਯੇਚ, ਰਾਗਯਕ੍ਖਨ੍ਧ ਨਿਨ੍ਨਿਤਾ;
ਮਂਪਿ ਨੇਸ੍ਸਤਿ ਸੋਯਕ੍ਖੋ, ਸਾਦੇਮਿਚੇ ਤਦਾਗਤਂ.
ਅਭਿਣ੍ਹ ¶ ਗਾਹਿਨਂ ਰਾਗ, ਯਕ੍ਖਂ ਅਨਨ੍ਤ ਦੁਕ੍ਖ ਦਂ;
ਅਸੁਭਾ ਤੁਲ ਮਨ੍ਤੇਨ, ਵਾਰੇਹਿ ਤਂ ਸ ਭਾਯਤਿ.
ਰਾਗਯਕ੍ਖੋ ਬਹੁਮਾਯੋ, ਸਦ੍ਧਾਮੇਤ੍ਤਾ ਦਿਵੇਸਵਾ;
ਰਾਗਮ੍ਪਿ ਕੁਸਲਂ ਮਞ੍ਞਿ, ਜਨੋ ਤੇਨੇਵ ਵਞ੍ਚਿਤੋ.
ਆਤੁਰਂ ¶ ਅਸੁਚਿਂ ਪੁਤਿਂ, ਪਸ੍ਸ ਨਨ੍ਦੇ ਸਮੁਸ੍ਸਯਂ;
ਉਗ੍ਘਰਨ੍ਤਂ ਪਗ੍ਘਰਨ੍ਤਂ, ਬਾਲਾਨਂ ਅਭਿਪਤ੍ਥਿਤਂ.
ਸੁਭਤੋ ਨਂ ਮਞ੍ਞਤਿ ਬਾਲੋ, ਅਵਿਜ੍ਜਾਯ ਪੁਰਕ੍ਖਤੋ;
ਇਚ੍ਚਾਹ ਭਗਵਾ ਨਿਨ੍ਦਿ, ਬਾਲੋਤਿ ਸੁਭਸਞ੍ਞਿਨਂ.
ਨ੍ਹਾਰੁਟ੍ਠਿ ¶ ਤਚ ਮਂਸਾਨਿ, ਸਰਂ ਸਤਂ ਨ ਨਿਨ੍ਦਿਤੋ;
ਬੁਦ੍ਧਨਿਨ੍ਦਾਯ ਮੋਚੇਤੁਂ, ਤਾਨਾਰਬ੍ਭ ਅਨੁਸ੍ਸਰੇ.
ਮਞ੍ਞਿਤ੍ਵਾ ਅਤ੍ਤਨੋ ਬਾਲ੍ਯਂ, ਅਸੁਭੇ ਸੁਭਦਸ੍ਸਿਨੋ;
ਵਾਯਾਮੇਯ੍ਯ ਅਬਾਲਾਯ, ਕਾਯਂ ਅਸੁਭਤੋ ਸਰਂ.
ਅਤ੍ਤਾਨਂ ¶ ਗਰਹਿਤ੍ਵਾਨ, ਬਾਲਂ ਵਿਪਰਿਦਸ੍ਸਿਨਂ;
ਸੁਭਸਞ੍ਞਂ ਪਹਿਨ੍ਨੇਯ੍ਯ, ਕਰੇਯ੍ਯਾਸੁਭ ਸਞ੍ਞਿਤਂ.
ਵਿਸ ਭੇਸਜ੍ਜਰੁਕ੍ਖਟ੍ਠੋ, ਅਹਿ ਡਂਸੇਯ੍ਯਸੋਸਤੋ;
ਯਥਾ ਤਸ੍ਸੇਵ ਪਣ੍ਣਾਦਿਂ, ਖਾਦੇਤ੍ਵਾ ਵਿਸ ਮੁਜ੍ਜਹੇ.
ਏਵਂ ਰਾਗੋ ਸਮੁਪ੍ਪਜ੍ਜੇ, ਕਾਯੇ ਗਨ੍ਧਾਦਿ ਵਾਸਿਤੇ;
ਅਨ੍ਤੋ ਤਸ੍ਸੇਵ ਜੇਗੁਚ੍ਛਂ, ਚਿਨ੍ਤੇਤ੍ਵਾ ਰਾਗ ਮੁਜ੍ਜਹੇ.
ਜਿਗੁਚ੍ਛਿਤੇਨ ¶ ਕਾਯੇਨ, ਅਪਸ੍ਸਨ੍ਤੋ ਜਿਗੁਚ੍ਛਤਂ;
ਉਨ੍ਨਮੇਤਿ ਅਵਞ੍ਞਾਤਿ, ਅਵਿਜ੍ਜਾਯ ਪੁਰਕ੍ਖਤੋ.
ਆਯਤਿਂ ¶ ਮਗ੍ਗਲਾਭਾਯ, ਬੀਜਂ ਕਰੇਯ੍ਯ ਭਾਵਨਂ;
ਬੀਜਾ ਭਾਵੇ ਕੁਤੋ ਮਗ੍ਗੋ, ਮਗ੍ਗਬੀਜਾ ਹਿ ਭਾਵਨਾ.
ਮਗ੍ਗਬੀਜੋ ਅਪਾਯੇਪਿ, ਨਿਮ੍ਮੁਗ੍ਗੋ ਸਮਯੇ ਗਤੇ;
ਉਮ੍ਮੁਜ੍ਜਿਤ੍ਵਾਵ ਬੁਦ੍ਧਾਨਂ, ਮਗ੍ਗਂ ਲਭੇਯ੍ਯ ਸਨ੍ਤਿਕੇ.
ਅਜੀਜਸ੍ਸ ¶ ਤੁ ਸਂਸਾਰੋ, ਦੀਘੋਯੇਵ ਅਨਨ੍ਤਿਕੋ;
ਤਸ੍ਮਾਹਿ ਭਾਵਨਾਬੀਜਂ, ਕਰੇਯ੍ਯ ਮੋਚਨਤ੍ਥਿਕੋ.
ਅਭਿਣ੍ਹ ਪੀਲ਼ਿਤਂ ਰਾਗਂ, ਅਸੁਭਾਯ ਨਿਵਾਰਯੇ;
ਮਨ੍ਦੀਹੁਤ੍ਵਾ ਪਹੀਯੇਯ੍ਯ, ਰਾਗੋ ਅਸੁਭ ਭੀਰੁਕੋ.
ਮਾਜੇਗੁਚ੍ਛਂ ¶ ਮਮਾਯੇਥ, ਸਾਵ ਜੇਗੁਚ੍ਛਮਾਮਕੋ;
ਅਨਨ੍ਤ ਦੁਕ੍ਖ ਮਾਪਾਦਿ, ਜੇਗੁਚ੍ਛਿਤ ਮਮਾਯਨਾ.
ਮਂਸਲਗ੍ਗੋ ਤਚਚ੍ਛਨ੍ਨੋ,
ਨ੍ਹਾਰੁਬਨ੍ਧੋ ਟ੍ਠਿਪੁਞ੍ਜਕੋ;
ਮੋਹੇਤਿ ਛਵਿਯਾ ਲੋਕਂ,
ਮਹਾਦੁਕ੍ਖੋ ਸ ਮੋਹਿਤੋ.
ਨ੍ਹਾਰੁਟ੍ਠਿ ¶ ਤਚ ਮਂਸੇਹਿ, ਰਾਗਵਡ੍ਢਕਿ ਸਙ੍ਖਤੇ;
ਗੇਹੇ ਰੋਗਾ ਪੁਤੀ ਪਾਪਾ, ਵਸਨ੍ਤਿ ਕੁਚ੍ਛਿਤਾ ਸਦਾ.
ਲੁਙ੍ਗਨ੍ਤਾ ਵੀਸ ਭੂਧਾਤੂ, ਪਿਤ੍ਤਾਦੀ ਦ੍ਵਾਦਸਮ੍ਬੁਵ;
ਤਾਪਂ ਜਿਰਂ ਦਹਂ ਪਕ੍ਕਂ, ਚਤੁਰਗ੍ਗਿ ਛਵਾਯੁਕਾ.
ਅਧੋਦ੍ਧਂ ਕੁਚ੍ਛਿ ਕੋਟ੍ਠਾਸਾ,
ਅਙ੍ਗਚਾਰੀਚ ਪਾਣਕਾ;
ਧਾਤੁਯੋਯੇਵ ਕਾਯੇਸ੍ਮਿਂ,
ਦ੍ਵਿਤਾਲੀਸ ਅਨਞ੍ਞਕਾ.
ਯਥਾ ¶ ਬਹਿ ਤਥਾ ਅਜ੍ਝਤ੍ਤਂ, ਧਾਤੂ ਭ੍ਵਾਪਾ ਨਲਾਨਿਲਾ;
ਨਮੇ ਨਾਹਂ ਨਅਤ੍ਤਾਤਿ, ਸਂਮਸੇਯ੍ਯ ਪੁਨਪ੍ਪੁਨਨ੍ਤਿ.
੪. ਮੇਤ੍ਤਾਭਾਵਨਾਨਿਦ੍ਦੇਸ
ਮੇਤ੍ਤਾ ¶ ਭਾਵਨ ਮਿਚ੍ਛਮ੍ਪਿ, ਸੁਣ ਬੁਦ੍ਧਵਚੋ ਯਿਦਂ;
ਦੋਸ ਨਿਗ੍ਗਹਣਤ੍ਥਾਯ, ਦੋਸੋ ਮੇਤ੍ਤਾਯਵੇਰਿਹਿ.
ਅਕ੍ਕੋਚ੍ਛਿਮਂ ਅਵਧਿਮਂ, ਅਜਿਨਿਮਂ ਅਹਾਸਿਮੇ;
ਯੇਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨਸਮ੍ਮਤਿ.
ਅਕ੍ਕੋਚ੍ਛਿਮਂ ¶ ਅਵਧਿਮਂ, ਅਜਿਨਿਮਂ ਅਹਾਸਿਮੇ;
ਯੇਚਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸਂ ਉਪਸਮ੍ਮਤਿ.
ਨਹਿਵੇਰੇਨ ਵੇਰਾਨਿ, ਸਮ੍ਮਨ੍ਤਿਧ ਕੁਦਾਚਨ;
ਅਵੇਰੇਨਚ ਸਮ੍ਮਨ੍ਤਿ, ਏਸਧਮ੍ਮੋ ਸਨਨ੍ਤਨੋ.
ਪਰੇਚ ¶ ਨਵਿਜਾਨਨ੍ਤਿ, ਮਯ ਮੇਤ੍ਥ ਯਮਾਮਸੇ;
ਯੇਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.
ਕੁਦ੍ਧੋ ਅਤ੍ਥਂ ਨਜਾਨਾਤਿ, ਕੁਦ੍ਧੋ ਧਮ੍ਮਂ ਨਪਸ੍ਸਤਿ;
ਸਦਾ ਅਨ੍ਧਤਮਂ ਹੋਤਿ, ਯਂਕੋਧੋ ਸਹਤੇਨਰਂ.
ਉਭਿਨ੍ਨ ¶ ਮਤ੍ਥਂ ਚਰਤਿ, ਅਤ੍ਤਨੋਚ ਪਰਸ੍ਸਚ;
ਪਰਂ ਸਂਕੁਪ੍ਪਿਤਂ ਞਤ੍ਵਾ, ਯੋ ਸਤੋ ਉਪਸਮ੍ਮਤਿ.
ਤਸ੍ਸੇਵ ਤੇਨ ਪਾਪਿਯ੍ਯੋ, ਯੋ ਕੁਦ੍ਧਂ ਪਟਿਕੁਜ੍ਝਤਿ;
ਕੁਦ੍ਧਂ ਅਪਟਿਕੁਜ੍ਝਨ੍ਤੋ, ਸਙ੍ਗਾਮਂ ਜੇਤਿ ਦੁਜ੍ਜਯਂ.
ਖਨ੍ਤੀ ¶ ਪਰਮਂ ਤਪੋ ਤਿਤਿਕ੍ਖਾ,
ਨਿਬ੍ਬਾਨਂ ਪਰਮਂ ਵਦਨ੍ਤਿ ਬੁਦ੍ਧਾ;
ਨਹਿ ਪਬ੍ਬਜਿਤੋ ਪਰੂਪਘਾਤੀ,
ਨਸਮਣੋ ਹੋਤਿ ਪਰਂ ਵਿਹੇਠਯਨ੍ਤੋ.
ਅਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;
ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾ ਲਿਕਵਾਦਿਨਂ.
ਯੋ ¶ ਵੇ ਉਪ੍ਪਤਿਤਂ ਕੋਧਂ, ਰਥਂ ਭਨ੍ਤਂਵ ਵਾਰਯੇ;
ਤ ਮਹਂ ਸਾਰਥੀ ਬ੍ਰੂਮਿ, ਰਸ੍ਮਿਗ੍ਗਾਹੋ ਇਤਰੋਜਨੋ.
ਪੁਰਿਸਸ੍ਸ ¶ ਹਿ ਜਾਤਸ੍ਸ, ਕੁਧਾਰੀ ਜਾਯਤੇ ਮੁਖੇ;
ਯਾਯ ਛਿਨ੍ਦਤਿ ਅਤ੍ਤਾਨਂ, ਬਾਲੋ ਦੁਬ੍ਭਾਸਿਤਂਭਣਂ.
ਸੇਲੋ ਯਥਾ ਏਕਗ੍ਘਨੋ, ਵਾਤੇਨ ਨਸਮੀਰਤਿ;
ਏਵਂ ਨਿਨ੍ਦਾ ਪਸਂਸਾਸੁ, ਨਸਮਿਞ੍ਜਨ੍ਤਿ ਪਣ੍ਡਿਤਾ.
ਸਮਾਨਭਾਗਂ ¶ ਕ੍ਰੁਬ੍ਬੇਥ, ਗਾਮੇ ਅਕ੍ਕੁਟ੍ਠ ਵਨ੍ਦਿਤਂ;
ਮਨੋਪਦੋਸਂ ਰਕ੍ਖੇਯ੍ਯ, ਸਨ੍ਤੋ ਅਨੁਣ੍ਣਤੋ ਸਿਯਾ.
ਨਪਰੋ ਪਰਂ ਨਿਕੁਪ੍ਪੇਥ, ਨਾਤਿਮਞ੍ਞੇਥ ਕਤ੍ਥਚਿ ਨਕਿਞ੍ਚਿ;
ਬ੍ਯਾਰੋਸਨਾ ਪਟਿਘਸਞ੍ਞਾ, ਨਞ੍ਞਮਞ੍ਞਸ੍ਸ ਦੁਕ੍ਖ ਮਿਚ੍ਛੇਯ੍ਯ.
ਮਾਤਾ ¶ ਯਥਾ ਨਿਯਂ ਪੁਤ੍ਤ,
ਮਾਯੁਸਾ ਏਕਪੁਤ੍ਤ ਮਨੁਰਕ੍ਖੇ;
ਏਵਮ੍ਪਿ ਸਬ੍ਬ ਭੂਤੇਸੁ,
ਮਾਨਸਂ ਭਾਵਯੇ ਅਪਰਿਮਾਣਂ.
ਸੁਤ੍ਵਾਨ ਦੁਸਿਤੋ ਬਹੁਂ ਵਾਚਂ,
ਸਮਣਾਨਂਵਾ ਪੁਥੁਜਨਾਨਂ;
ਫਰੁਸੇਨ ਹਿ ਨ ਪਟਿਵਜ੍ਜਾ,
ਨ ਹਿ ਸਨ੍ਤੋ ਪਟਿਸੇਨਿਂ ਕਰੋਨ੍ਤਿ.
ਸਚ੍ਚਂ ¶ ਭਣੇ ਨਕੁਜ੍ਝੇਯ੍ਯ, ਦਜ੍ਜਾ ਅਪ੍ਪਮ੍ਪਿ ਯਾਚਿਤੋ;
ਏਤੇਹਿ ਤੀਹਿ ਠਾਨੇਹਿ, ਗਚ੍ਛੇ ਦੇਵਾਨ ਸਨ੍ਤਿਕੇ.
ਨ ਪਰੇਸਂ ਵਿਲੋਮਾਨਿ, ਨ ਪਰੇਸਂ ਕਤਾਕਤਂ;
ਅਤ੍ਤਨੋਵ ਅਵੇਕ੍ਖੇਯ੍ਯ, ਕਤਾਨਿ ਅਕਤਾਨਿਚ.
ਸੁ ¶ ਦਸਂ ਵਜ੍ਜਮਞ੍ਞੇਸਂ, ਅਤ੍ਤਨੋ ਪਨ ਦੁਦ੍ਦਸਂ;
ਪਰੇਸਞ੍ਹਿ ਸੋ ਵਜ੍ਜਾਨਿ, ਓਫੁਨਾਤਿ ਯਥਾ ਭੁਸਂ;
ਅਤ੍ਤਨੋ ਪਨ ਛਾਦੇਤਿ, ਕਲਿਂਵ ਕਿਤਵਾ ਸਟ੍ਠੋ.
ਨਿਧੀਨਂਵ ¶ ਪਵਤ੍ਤਾਨਂ, ਯਂ ਪਸ੍ਸੇ ਵਜ੍ਜਦਸ੍ਸਿਨਂ;
ਨਿਗ੍ਗਯ੍ਹਵਾਦਿਂ ਮੇਧਾਵਿਂ, ਤਾਦਿਸਂ ਪਣ੍ਡਿਤਂ ਭਜੇ.
ਤਾਦਿਸਂ ਭਜਮਾਨਸ੍ਸ,
ਸੇਯ੍ਯੋਹੋਤਿ ਨਪਾਪਿਯੋ;
ਇਤਿ ਵੁਤ੍ਤਂ ਮੁਨਿਨ੍ਦੇਨ,
ਤਿਲੋਕਗ੍ਗੇਨ ਸਤ੍ਥੁਨਾ.
ਮੇਤ੍ਤਾ ¶ ਗਨ੍ਧੇਨ ਵਾਸੇਨ੍ਤੋ,
ਦੋਸਂ ਦੂਰੇਕਰੇ ਬੁਧੋ;
ਦੂਰਾਸਨ੍ਨੇਸੁ ਸਬ੍ਬੇਸੁ,
ਅਤ੍ਤਨੋ ਵੇਰਿਕੇਸੁਪਿ.
ਹਨੇ ਦੋਸੂ ਪਨਾਹਾਨਿ, ਅਨਤ੍ਥ ਕਾਰਕਾਨਿ ਹਿ;
ਤੇਸ੍ਵ ਸਨ੍ਤੇਸੁ ਸਬ੍ਬੇਸੁ, ਮੇਤ੍ਤਾਹੋਤਿ ਸੁਨਿਮ੍ਮਲਾ.
ਸਤਂ ¶ ਦੁਜ੍ਜਨ ਵਾਕ੍ਯੇਹਿ, ਨਮਨੋ ਯਾਤਿ ਵਿਕ੍ਰਿਯਂ;
ਨਹਿਤਾਪਯਿਤੁਂ ਸਕ੍ਕਾ, ਗਙ੍ਗਾਨਦਿਂ ਤਿਣੁਕ੍ਕਯਾ.
ਨਹਿ ਨਿਨ੍ਦਾ ਪਸਂਸਾਹਿ, ਸਤਂ ਮਨੋਵਿਕਾਰਤਾ;
ਨ ਕਦਾਚਿਪਿ ਕਮ੍ਪੇਯ੍ਯ, ਵਾਤੇਹਿ ਸੇਲਪਬ੍ਬਤੋ.
ਨਦਿਯਂ ¶ ਖੁਦ੍ਦਕਾ ਨਾਵਾ, ਵਿਚੀਹਿ ਉਨ੍ਨਤੋਨਤਾ;
ਮਹਾਨਾਵਾ ਨਕਮ੍ਪਨ੍ਤਿ, ਮਹਨ੍ਤੀਹਿ ਵਿਚੀਹਿਪਿ.
ਲੋਕੇ ਪਸਂਸ ਨਿਨ੍ਦਾਹਿ, ਦੁਜ੍ਜਨੋਵੁਨ੍ਨਤੋਨਤੋ;
ਸਨ੍ਤੋਪਞ੍ਞੋ ਨਚਲਤਿ, ਮਹਾਨਿਨ੍ਦਾ ਥੁਤੀਹਿਪਿ.
ਸੇਲੋਸੇਲੋ ¶ ਨਿਲੇਹੇਵ,
ਵਣ੍ਣਾਵਣ੍ਣਾ ਅਸਸ੍ਸਤਾ;
ਲਾਭਾਲਾਭਾ ਸੁਖਾਦੁਕ੍ਖਾ,
ਯਸਾਯਸਾ ਨਕਮ੍ਪਤਿ.
ਖਮਾਧਗ੍ਗ ਕਰੇਤਸ੍ਸ, ਦੁਜ੍ਜਨੋ ਕਿਂ ਕਰਿਸ੍ਸਤਿ;
ਅਤਿਣੇ ਪਤਿਤੋ ਅਗ੍ਗਿ, ਸਯਮੇਵ ਪਸਮ੍ਭਤਿ.
ਸਯਮੇਵ ¶ ਸਕਤ੍ਤਾਨਂ, ਮਚ੍ਚੁਬ੍ਭਯੇਨ ਤਚ੍ਛਤੁ;
ਮਾਞ੍ਞੇ ਤਚ੍ਛਤੁ ਦੋਸੇਨ, ਕਿਮਤ੍ਥਂ ਅਞ੍ਞਤਚ੍ਛਨਂ.
ਮਾਞ੍ਞੇ ਤਚ੍ਛ ਤੁਦੋਸੇਨ, ਨਸੇਯ੍ਯੋ ਅਞ੍ਞਤਚ੍ਛਨਂ;
ਮਾਞ੍ਞੋ ਤਂ ਅਹਿਬ੍ਯਗ੍ਘੇਵ, ਦੋਮਨਸ੍ਸੇਨ ਭਾਯਤੁ.
ਨਿਸ੍ਸਾਯ ¶ ਗਰੁਕਾਤਬ੍ਬਂ, ਬਹੂਨਂ ਪਾਪਮੋਚਨਂ;
ਅਚਾਪਲ੍ਲੇਨ ਸਨ੍ਤੇਨ, ਗਰੁਕਾਤਬ੍ਬਤਂ ਵਜੇ.
ਨਿਸ੍ਸਾਯ ਗਰੁਕਾਤਬ੍ਬਂ, ਬਹੂਨਂ ਪੁਞ੍ਞਵਡ੍ਢਨਂ;
ਗਰੁਕਾਤਬ੍ਬਤਂ ਗਚ੍ਛੇ, ਧੀਤਿਯਾ ਸੀਲ ਗੁਤ੍ਤਿਯਾ.
ਸਨ੍ਤਂ ¶ ਹਿ ਸੀਲਵਂ ਧੀਤਿਂ, ਹਿਰੋਤ੍ਤਪ੍ਪੇਨ ਭਾਯਤਿ;
ਦੁਜ੍ਜਨਂ ਦੋਮਨਸ੍ਸੇਨ, ਅਹਿਬ੍ਯਗ੍ਘੇਵ ਭਾਯਤਿ.
ਨਫਰੁਸਾਯ ਵਾਚਾਯ, ਅਞ੍ਞੇ ਦਮੇਯ੍ਯ ਪਣ੍ਡਿਤੋ;
ਅਤ੍ਤਾਨਂਵ ਦਮੇਤ੍ਵਾਨ, ਅਞ੍ਞੇ ਸਣ੍ਹੇਨ ਓਵਦੇ.
ਚਿਤ੍ਤੇ ¶ ਸਣ੍ਹੇ ਅਸਣ੍ਹਾਪਿ, ਨਵਾਚਾਫਰੁਸਾ ਭਵੇ;
ਤਸ੍ਮਾ ਓਵਾ ਦਨਾਦੀਸੁ, ਰਕ੍ਖੇਯ੍ਯ ਥਦ੍ਧਚਿਤ੍ਤਤੋ.
ਅਤ੍ਤਾਨ ਮੋਵਦਤ੍ਥਾਯ, ਸਿਕ੍ਖੇਯ੍ਯ ਬੁਦ੍ਧਭਾਸਿਤਂ;
ਪਰਮ੍ਪਿ ਅਨੁਕਮ੍ਪਾਯ, ਇਚ੍ਛਨ੍ਤੋ ਅਨੁਸਾਸਯੇ.
ਅਞ੍ਞਂ ਨਨਿਗ੍ਗਹੇ ਕਿਞ੍ਚਿ, ਸੁਤੇਨ ਪਟਿਪਤ੍ਤਿਯਾ;
ਅਤ੍ਤਨਿਗ੍ਗਹਣਂ ਸੇਯ੍ਯੋ, ਨੁਨ੍ਨਮੇਯ੍ਯ ਜਿਨੋਰਸੋ.
ਨਾਵੀਕਰੇਯ੍ਯ ¶ ਦੋਸਂਵਾ, ਲੋਭਂ ਮਾਨਂ ਸਕਂਮਲਂ;
ਮਾਞ੍ਞੇ ਮਞ੍ਞਨ੍ਤੁ ਤਂ ਦਿਸ੍ਵਾ, ਚਿਰਪ੍ਪਬ੍ਬ ਜਿਤੋ ਨੁਤਿ.
ਕਕਚੇਨ ਤ੍ਤਛੇਦੇਨ੍ਤੇ, ਵੇਰਿਕੇਪਿਨਦੋਸਯੇ;
ਇਚ੍ਚੋਵਾਦਂ ਮੁਨਿਨ੍ਦਸ੍ਸ, ਸਮ੍ਪਟਿਚ੍ਛ ਜਿਨੋਰਸੋ.
ਵੇਰੀ ¶ ਅਚ੍ਚੁਪਨਾਹੀਪਿ, ਰੂਪੇਵ ਦੁਕ੍ਖਕਾਰਕੋ;
ਨ ਤ੍ਵ ਤਬ੍ਬਿਸਯੇ ਨਾਮੇ, ਦੁਕ੍ਖਂ ਮਾਕਰਿ ਚੇਤਸਿ.
ਵੇਰੀ ਤਿਬਨ੍ਧ ਵੇਰੋਪਿ, ਇਹੇਵ ਦੁਕ੍ਖਕਾਰਕੋ;
ਭਵਨ੍ਤਰਂ ਨਅਨ੍ਵੇਤਿ, ਸਕਮ੍ਮੁਨਾ ਗਤੋ ਹਿਸੋ.
ਦੋਸੋਤੁ ¶ ਇਹ ਪੀਲ਼ੇਤ੍ਵਾ,
ਦੁਕ੍ਖਾਵਹੋ ਭਵੇਭਵੇ;
ਮਹਾਨਤ੍ਥ ਕਰਂ ਦੋਸਂ,
ਕਸ੍ਮਾ ਵਡ੍ਢੇਤਿ ਚੇਤਸਿ.
ਮੇਤ੍ਤਾਸੀਤਮ੍ਬੁਸੇਕੇਨ, ਜਿਨੋਵਾਦ ਮਨੁਸ੍ਸਰਂ;
ਮਹਾ ਨਤ੍ਥ ਕਰਂ ਦੋਸਂ, ਨਿਬ੍ਬਾਯਤੁ ਸ ਚੇਤਸਿ.
ਛਦ੍ਦਨ੍ਤੋ ¶ ਲੁਦ੍ਦਕਂ ਪਾਪਂ, ਭੂਰਿਦਤ੍ਤੋਹਿ ਤੁਣ੍ਡਿਕਂ;
ਧਮ੍ਮਪਾਲੋ ਖਮਿ ਤਾਤਂ, ਕਪਿਨ੍ਦੋ ਕਨ੍ਦਰੋ ਪਤਂ.
ਅਸਙ੍ਖ੍ਯੇਯ੍ਯ ਤ੍ਤਭਾਵੇਸੁ, ਪਰਵਜ੍ਜਂ ਤਿਤਿਕ੍ਖਤੋ;
ਨਾਥਸ੍ਸ ਪਾਰਮਿਂ ਖਨ੍ਤਿਂ, ਸਰਂ ਧੀਰੋ ਤਿਤਿਕ੍ਖਤੁ.
ਸਾਸਨੇ ¶ ਚਿਰਵਾਸੇਨ, ਏਵਂ ਨਿਦ੍ਦੋਸਕਾ ਇਤਿ;
ਤੁਵਂ ਪਟਿਚ੍ਚ ਮਞ੍ਞਨ੍ਤੁ, ਸਾਸਨੇ ਸਪ੍ਪਯੋਜਨਂ.
ਸਾਸਨੇ ਚਿਰ ਵਾਸਾਪਿ, ਮਾਦਿਸਾਵ ਇਮੇ ਇਤਿ;
ਤਮਾਗਮ੍ਮ ਨਮਞ੍ਞਨ੍ਤੁ, ਸਾਸਨੇ ਨਿਪ੍ਪਯੋਜਨਂ.
ਦ੍ਵੇ ਉਸੇਤੀਤਿ ਦੋਸੋ ਸੋ, ਸਪਰਂ ਦਯ੍ਹਤੇ ਦ੍ਵਯਂ;
ਪਹਾਤਬ੍ਬੋ ਸ ਸਬ੍ਬੇਸੁ, ਪਰਤ੍ਥ ਸਤ੍ਥ ਮਿਚ੍ਛਤਾ.
ਪਰਦਿਨ੍ਨੇਹਿ ¶ ਨੋਆਯੁ, ਤਿਟ੍ਠਤੇ ਨਾਤ੍ਤਨੋ ਵਸਾ;
ਪਰਵਜ੍ਜਂ ਖਮੇਤਬ੍ਬਂ, ਨਸਾਧੁ ਅਞ੍ਞਵਿਰੋਧਿਤੋ.
ਜੇਗੁਚ੍ਛ ¶ ਕ੍ਕੋਸ ਨਿਨ੍ਦਾਨਿ, ਬਾਲੋ ਗਣ੍ਹਾਤਿ ਅਕ੍ਖਮੋ;
ਖਮਨ੍ਤੋਤੁ ਨਗਣ੍ਹਾਤਿ, ਜਾਨਂ ਜੇਗੁਚ੍ਛਿਤਾਨਿਤਿ.
ਪਰਦਿਨ੍ਨਾਨਿ ਵਚ੍ਚਾਨਿ, ਪਾਭਤਨ੍ਤਿ ਨਕੋਚਿਪਿ;
ਗਣ੍ਹੇਯ੍ਯੇਵਂ ਦੁਰੁਤ੍ਤਾਨਿ, ਅਗਣ੍ਹਨ੍ਤੋ ਖਮੇ ਸਤੋ.
ਨਦਿ ¶ ਕਲ੍ਲੋਲ ਵਿਚਿਯੋ, ਤੀਰਂ ਪਤ੍ਵਾ ਸਮਨ੍ਤਿਧ;
ਸਬ੍ਬੇ ਉਪ੍ਪਤਿਤਾ ਦੋਸਾ, ਖਨ੍ਤਿਪਤ੍ਵਾ ਸਮਨ੍ਤਿ ਤੇ.
ਦੋਸੁਮ੍ਮਤ੍ਤਕ ਵਾਚਾਯ, ਨੁਮ੍ਮਤ੍ਤੋ ਕਿਂਕਰਿਸ੍ਸਤਿ;
ਭਵੇ ਯ੍ਯੁਮ੍ਮਤ੍ਤਕੋ ਸੋਵ, ਤਾਦਿਸਂ ਵਚਨਂ ਭਣਂ.
ਕੋਧਨੋ ਅਕ੍ਖਮੋ ਅਞ੍ਞ, ਦੁਟ੍ਠਸਞ੍ਞੀ ਭਯਾਲੁਕੋ;
ਗਾਮਮਜ੍ਝੇ ਅਲ਼ਕ੍ਕੋਵ, ਤਥਾ ਮਾਹੋਹਿ ਤਂ ਜਹ.
ਮੇਤ੍ਤਾਲੁਕੋ ¶ ਖਮਾਸੀਲੋ,
ਸਬ੍ਬਟ੍ਠਾਨੇਸੁਨਿਬ੍ਭਯੋ;
ਪਰਤ੍ਥ ਸਤ੍ਥ ਮਿਚ੍ਛਨ੍ਤੋ,
ਖਨ੍ਤਿ ਮੇਤ੍ਤਞ੍ਚ ਭਾਵਯੇ.
ਪਰਕ੍ਕੋਸਾਨਿ ਨਿਨ੍ਦਾਨਿ, ਤਂਵ ਪਚ੍ਚੇਨ੍ਤਿ ਨਾਞ੍ਞਗੂ;
ਖਿਤ੍ਤਂਪਂਸੁਵ ਵਾਤੁਦ੍ਧਂ, ਗਰੁਕਂ ਕਿਂ ਖਮਾਯਤੇ.
ਅਕ੍ਕੋਸਨ੍ਤੋਚ ¶ ਨਿਨ੍ਦੀਚ, ਪੀਲ਼ਿਤੋ ਸਕ ਕਮ੍ਮੁਨਾ;
ਇਧ ਪੇਚ੍ਚਚ ਨੀਚੇਯ੍ਯੋ, ਨਂਨਯਂ ਗਣ੍ਹਿ ਅਕ੍ਖਮੋ.
ਅਕ੍ਕੋਸੋ ¶ ਮਂ ਨਆਗਚ੍ਛਿ,
ਤਸ੍ਸੇਵਾ ਨਤ੍ਥਕਾਰਕੋ;
ਇਤਿ ਞਤ੍ਵਾਵ ਸਪ੍ਪਞ੍ਞੋ,
ਅਕ੍ਕੋਸਂ ਨ ਗਰੁਂ ਕਰੇ.
ਵਿਕਾਰਾਪਤ੍ਤਿ ਮਿਚ੍ਛਨ੍ਤੋ, ਵੇਰੀ ਬਹੁ ਮੁਪਕ੍ਕਮਿ;
ਮਾਮਿਤ੍ਤਵਸ ਮਨ੍ਵੇਹਿ, ਨਿਬ੍ਬਿਕਾਰੋ ਤੁਵਂਭਵ.
ਮੇਤ੍ਤਮ੍ਬੁਨਾ ਸਦ੍ਦੋਸੋਚ, ਪਰਦੋਸੋਚ ਸਮ੍ਮਤਿ;
ਮੇਤ੍ਤਾਸੇਕੇਨ ਸਬ੍ਬੇਸੁ, ਸਬ੍ਬਤੋਗ੍ਗਿਂ ਨਿਪਾਰਯੇ.
ਸਦੋਸ ¶ ਪਰਦੋਸਗ੍ਗਿਂ, ਸਬ੍ਬਤੋ ਦਿਸਤੋ ਟ੍ਠਿਤਂ;
ਮੇਤ੍ਤਾ ਤੋਯੇਨ ਵਾਰੇਯ੍ਯ, ਸਿਯਾ ਨਿਬ੍ਬੁਤਿ ਸਬ੍ਬਧਿ.
ਨਗਮੇ ਅਤ੍ਤਨੋ ਅਗ੍ਗਿਂ, ਪਰਗ੍ਗਿਂਵਾਪਿ ਨਾਗਮੇ;
ਮੇਤ੍ਤਮ੍ਬੁਨਾਵ ਨਿਬ੍ਬਾਤੁ, ਸਪਰਗ੍ਗਿ ਦ੍ਵਯਂ ਭੁਸਂ.
ਗੁਣੀ ¶ ਗੁਣੀ ਨਨ੍ਦਿਨ੍ਦਾਯ, ਪਸਂਸਾਯ ਗੁਣੀ ਗੁਣੀ;
ਨਿਨ੍ਦਂਨਿਨ੍ਦਂ ਨਕੁਪ੍ਪੇਯ੍ਯ, ਨਸਾਦਿਯੇ ਥੁਤਿਂ ਥੁਤਿਂ.
ਗੁਣਂ ਨਿਨ੍ਦਾਯ ਨਾਸੇਤੁਂ, ਨਸਕ੍ਕਾ ਕੋਚਿ ਕੁਸ੍ਸਕੋ;
ਵਡ੍ਢੇਤੁਂਵਾ ਪਸਂਸਾਯ, ਗਰੁਂਕਰੇ ਨ ਤਂਦ੍ਵਯਂ.
ਦੋਸਬ੍ਭਾ ¶ ਮਲ ਸਞ੍ਛਨ੍ਨੋ, ਮੇਤ੍ਤਾਚਨ੍ਦੋ ਨ ਰੋਚਤਿ;
ਤਂਮੁਤ੍ਤਸ੍ਸ ਤੁ ਏਤਸ੍ਸ, ਅਤਿਸ੍ਸਯ ਪਭਾਵਤੋ.
ਸੁ ਸੁਤ੍ਤ ਬੁਦ੍ਧ ਸੁਪਿਨਾ, ਦ੍ਵੇਪਿਯਾ ਗੁਤ੍ਤਿ ਨਾਕ੍ਕਮੋ;
ਸਮਾਧਿ ਸੁਮੁਖਾ ਮੁਲ਼੍ਹਾ, ਬ੍ਰਹ੍ਮਾ ਤ੍ਯੇਕਾ ਦਸ ਗ੍ਗੁਣਾ.
ਸੀਤਂ ¶ ਕਰੋਤੁ ਮੇਤ੍ਤਾਯ, ਚਕ੍ਖੁਂ ਲਾਭੇਤੁ ਪਞ੍ਞਾਯ;
ਮਾਕਾਸਿਨਿਪ੍ਪਭੇ ਚਞ੍ਞੇ, ਚਨ੍ਦੋ ਹੋਹਿ ਗਤੇਗਤੇ.
ਦੂਰਾਸਨ੍ਨੇਸੁ ¶ ਸਬ੍ਬੇਸੁ, ਮੇਤ੍ਤਂ ਪੇਸੇਤੁ ਪਾਭਤਂ;
ਧਮ੍ਮਂ ਦੇਸੇਤੁ ਪਤ੍ਤਾਨਂ, ਚਨ੍ਦੋ ਹੋਹਿ ਗਤੇਗਤੇ.
ਸਮ੍ਪਤ੍ਤਾਨਂ ਮਲਂ ਧੋਵ, ਸੀਤਂਕਰੇ ਸਦਾਦਯੋ;
ਉਚ੍ਚਨੀਚੇ ਨਵਿਸੇਸੇ, ਜਲਸ੍ਸਮੋ ਗਤੇਗਤੇ.
ਅਸਅਸ੍ਸਤੇਸੁ ¶ ਫੁਟ੍ਠੇਸੁ, ਲੋਕਧਮ੍ਮੇਸੁ ਅਟ੍ਠਸੁ;
ਪਤਿਟ੍ਠੋ ਨਿਬ੍ਬਿਕਾਰੋ ਤ੍ਵਂ, ਪਥਵੀਸਦਿਸੋ ਭਵ.
ਨਾਕਾਸਿ ਕਲਹਂ ਸਿਲਾ, ਸਦਾ ਕੇਨਚਿ ਨਿਚ੍ਚਲਾ;
ਮੇਤ੍ਤਾਯਨ੍ਤੋ ਖਮਾਯਨ੍ਤੋ, ਮਹਾਸਿਲਂ ਗੁਰੁਂਕਰੇ.
ਸਿਲਾਵ ¶ ਸੀਲਵਾ ਹੋਤੁ, ਦੁਰੁਤ੍ਤਾਨਿ ਤਿਤਿਕ੍ਖਤੁ;
ਪਚ੍ਚੁਤ੍ਤੇ ਦੋਸਸਂਵਡ੍ਢੋ, ਅਨੁਤ੍ਤੋਵ ਪਸਮ੍ਭਤਿ.
ਸਬ੍ਬੇ ਅਹਂਵ ਇਚ੍ਛਨ੍ਤਿ, ਸਤ੍ਤਾ ਸੁਖਨ੍ਤਿ ਞਾਤੁਨ;
ਭਾਵੇਯ੍ਯ ਕਮਤੋ ਮੇਤ੍ਤਂ, ਪਿਯ ਮਜ੍ਝਤ੍ਤ ਵੇਰਿਕੇ.
ਸਬ੍ਬੇ ¶ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇ ਭਾਯਨ੍ਤਿ ਮਚ੍ਚੁਨੋ;
ਅਤ੍ਤਾਨਂ ਉਪਮਂ ਕਤ੍ਵਾ, ਨਹਨੇਯ੍ਯ ਨਘਾਤਯੇ.
ਸੁਖ ਕਾਮਾਨਿ ਭੂਤਾਨਿ,
ਯੋਦਣ੍ਡੇਨ ਵਿਹਿਂਸਤਿ;
ਅਤ੍ਤਨੋ ਸੁਖ ਮੇਸਾਨੋ,
ਪੇਚ੍ਚ ਸੋ ਨਲਭੇਸੁਖਂ.
ਅਵੇਰਾ ¶ ਬ੍ਯਾਪਜ੍ਜਾ ਨੀਘੋ, ਸੁਖੀ ਚਸ੍ਸਂ ਅਹਂਵ ਮੇ;
ਹਿਤਕਾਮਾ ਤਥਾ ਅਸ੍ਸੁ, ਮਜ੍ਝਤ੍ਤਾ ਵੇਰਿਨੋਪਿਚ.
ਮਾਤਰੋ ¶ ਭਾਤਰੋ ਞਾਤੀ, ਦਾਯਕੋ ਪਾਸਕਾਪਿਚ;
ਸੁਖੀਹੋਨ੍ਤੂਤਿ ਭਾਵੇਯ੍ਯ, ਚਜੇ ਤੇਸੁਚ ਲਗ੍ਗਨਂ.
ਦੋਸੋ ਮੇਤ੍ਤਾਯ ਦੂਰਾਰਿ, ਤਣ੍ਹਾ ਆਸਨ੍ਨ ਵੇਰਿਕਾ;
ਤਣ੍ਹਂ ਪਿਯੇਸੁ ਵਾਰੇਯ੍ਯ, ਦੋਸਂ ਵੇਰੀਸੁ ਮੇਤ੍ਤਿਕੋ.
ਏਕੁਦ੍ਦੇਸੇ ¶ ਕਕਮ੍ਮਾਚ, ਸਿਸ੍ਸਾ ਆਚਰਿਯਾ ਸੁਖੀ;
ਹੋਨ੍ਤੁ ਸਬ੍ਰਹ੍ਮਚਾਰੀਚ, ਤੇਚ ਞ੍ਞੋਞ੍ਞ ਹਿਤਾਵਹਾ.
ਰਾਜਾਨੋਚ ਅਮਚ੍ਚਾਚ, ਗਾਮੇ ਇਸ੍ਸਰਿਯਾ ਸੁਖੀ;
ਭਵਨ੍ਤੁ ਦੇਵਤਾਯੋਚ, ਤੇਹਿ ਸੁਰਕ੍ਖਿਤੋ ਸੁਖੋ.
ਮਯਂ ¶ ਯੇਨ ਸੁਗੁਤ੍ਤਾਵ,
ਸੁਖਿਤਾ ਰਟ੍ਠਵਾਸਿਨੋ;
ਸੁਖੀ ਕਲ੍ਲ ਤ੍ਥੁ ਸੋਰਾਜਾ,
ਤੇਜਵਨ੍ਤੋ ਚਿਰਾਯੁਕੋ.
ਰਟ੍ਠ ¶ ਪਿਣ੍ਡੇਨ ਜੀਵਾਮ, ਰਟ੍ਠਵਾਸੀ ਸੁਖਨ੍ਤੁਤਿ;
ਭਾਵੇਯ੍ਯੇਵਂ ਅਮੋਘਂਵ, ਰਟ੍ਠਪਿਣ੍ਡਂ ਸੁਭੁਞ੍ਜਤਿ.
ਆਪਾਯਿਕਾ ਬਹੂ ਸਨ੍ਤਿ, ਮਾਤਾਪਿਤਾਦਿ ਪੁਬ੍ਬਕਾ;
ਤੇਚਞ੍ਞੇਚ ਸੁਖੀਨੀਘਾ, ਸ੍ਸ੍ਵ ਬ੍ਯਾਪਜ੍ਜਾ ਅਵੇਰਿਨੋ.
ਸਤ੍ਤਾ ¶ ਭੂਤਾਚ ਪਾਣਾਚ, ਪੁਗ੍ਗਲਾ ਅਤ੍ਤਭਾਵਿਕਾ;
ਥੀ ਪੂ ਰਿਯਾ ਨਰਿਯਾਚ, ਦੇਵਾਨਰਾ ਨਿਪਾਤਿਕਾ.
ਅਵੇਰਾ ਹੋਨ੍ਤੁ ਬ੍ਯਾਪਜ੍ਜਾ, ਅਨੀਘਾਚ ਸੁਖੀ ਇਮੇ;
ਅਤ੍ਤਾਨਂ ਪਰਿਹਾਰਨ੍ਤੁ, ਚਤੁਧਾ ਇਤਿ ਭਾਵਯੇ.
ਪੁਰਤ੍ਥਿਮਾਯ ¶ ਦਿਸਾਯ, ਸਬ੍ਬੇਸਤ੍ਤਾ ਅਵੇਰਿਨੋ;
ਅਬ੍ਯਾਪਜ੍ਜਾ ਸੁਖੀਨੀਘਾ, ਹੋਨ੍ਤੂਤਿ ਤਾਵ ਭਾਵਯੇ.
ਪੁਰਤ੍ਥਿਮਾਯ ਦਿਸਾਯ, ਸਬ੍ਬੇਪਾਣਾਤਿਆਦਿਨਾ;
ਦ੍ਵਾਦਸਕ੍ਖਤ੍ਤੁਂ ਭਾਵੇਯ੍ਯ, ਸੇਸਾਸੁਪਿ ਅਯਂਨਯੋ.
ਚਤੁਦ੍ਦਿਸਾ ¶ ਨੁਦਿਸਾ ਧੋ, ਉਦ੍ਧਂ ਸਤ੍ਤਾਚ ਪਾਣਿਨੋ;
ਭੂਤਾਚ ਪੁਗ੍ਗਲਾ ਅਤ੍ਤ, ਭਾਵੀ ਸਬ੍ਬੇ ਥਿ ਪੂਰਿਸਾ.
ਅਰਿਯਾ ਅਰਿਯਾ ਦੇਵਾ, ਨਰਾਚ ਵਿਨਿਪਾਤਿਕਾ;
ਅਵੇਰਾ ਬ੍ਯਾਪਜ੍ਜਾ ਨੀਘਾ, ਸੁਖਤ੍ਤਾਚ ਭਵਨ੍ਤੁ ਤੇ.
ਚਤੁਦ੍ਦਿਸਾ ¶ ਨੁਦਿਸਾ ਧੋ, ਉਦ੍ਧਨ੍ਤਿ ਦਸਕੇਦਿਸਿ;
ਦ੍ਵਾਦਸੇ ਤੇ ਪਰਿਚ੍ਛਿਜ੍ਜ, ਭਾਵੇਯ੍ਯ ਪੁਗ੍ਗਲੇ ਬੁਧੋ.
ਮੇਤ੍ਤਾ ¶ ਵਸ੍ਸੇਨ ਤੇਮੇਤੁ, ਪਜ੍ਜੁਨ੍ਤੋਵਿਯ ਸਬ੍ਬਧਿ;
ਮਾਕਿਞ੍ਚਿ ਪਰਿਵਜ੍ਜੇਹਿ, ਏਵਂ ਮੇਤ੍ਤਾ ਸੁਭਾਵਿਤਾ.
ਪਞ੍ਚਾ ਨੋਧਿ ਸਤ੍ਤੋਧਿਸਾ, ਸਿਯੁਂ ਦ੍ਵਾਦਸਪੁਗ੍ਗਲਾ;
ਨ੍ਤੁ ਚਤੂਹੇਸੁ ਭਾਵੇਤ੍ਵਾ, ਅਟ੍ਠਤਾਲੀਸਕਾ ਸਿਯੁਂ.
ਦਸਕੇਦਿਸਿ ¶ ਤਾਮੇਤ੍ਤਾ, ਚਤੁਸ੍ਸਤ ਅਸੀਤਿਯੋ;
ਅਟ੍ਠਤਾਲੀਸਾਹਿ ਪਞ੍ਚ, ਸਤਾ ਟ੍ਠਵੀਸ ਸਾਧਿਕਾ.
ਦੁਕ੍ਖਿਤੇ ¶ ਕਰੁਣਂ ਬ੍ਰੂਹੇ, ਮੁਦਿਤਂ ਸੁਖਿਤੇ ਜਨੇ;
ਮੇਤ੍ਤਾਚੇਵ ਉਪੇਕ੍ਖਾਚ, ਉਭੋ ਉਭੋਸੁ ਭਾਵਿਤਾ.
ਬ੍ਰਹ੍ਮਵਾਸੀਤਿ ਵਤ੍ਤਬ੍ਬੋ, ਤੇਸ੍ਵਞ੍ਞਤਰ ਵਾਸਿਤੋ;
ਗਨ੍ਧਭੂਤੇਸੁ ਸੋ ਲੋਕੇ, ਬ੍ਰਹ੍ਮਾਵਿਯ ਵਿਰੋਚਤਿ.
ਅਪ੍ਪਮਾਦਾਵਹ ਪਕਿਣ੍ਣਕਨਿਦ੍ਦੇਸ
ਸਂਵਿਜ੍ਜਨ੍ਤਿ ¶ ਧ ਲੋਕਸ੍ਮਿਂ,
ਬਹੂ ਜੀਵਿਤਕਪ੍ਪਨਾ;
ਗਹੇਤ੍ਵਾ ਪਤ੍ਤ ਮੁਞ੍ਛੋ ਯੋ,
ਜੀਵਿਕਾਨਂ ਸ ਲਾਮਕੋ.
ਸੁਕੁਲਾਚ ਤਦੁਪਗਾ, ਕਾਮਭੋਗਾ ਨਪੇਕ੍ਖਿਨੋ;
ਨ ਭਯਟ੍ਟਾ ਨ ਇਣਟ੍ਟਾ, ਨੇਵ ਆਜੀਵ ਕਾਰਣਾ.
ਨਾਲਂਵ ¶ ਗਿਹਿਨਾ ਬ੍ਰਹ੍ਮ, ਚਰਿਯਾਯ ਅਖਣ੍ਡਿਤਂ;
ਘਰਾਵਾਸੋ ਤਿਸਮ੍ਬਾਧੋ, ਪਬ੍ਬਜ੍ਜਾਵ ਨਿਰਾਲਯਾ.
ਭਵਪਙ੍ਕਾ ¶ ਪਮੁਚ੍ਚਾਮ, ਤਿਵਿਤ੍ਤਿਣ੍ਣਾ ਭਯਾਨਕਾ;
ਪਟਿਪਤ੍ਤਿ ਯਿਮਾਯਾਤਿ, ਕਤ੍ਵਾ ਤਦੁਪਗਾ ਇਮੇ.
ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯ, ਧਮ੍ਮਂ ਚਰਿਤਂ ਸੁਚਰੇ;
ਧਮ੍ਮਚਾਰੀ ਸੁਖਂਸੇਤਿ, ਅਸ੍ਮਿਂਲੋਕੇ ਪਰਮ੍ਹਿਚ.
ਸ੍ਵਾਗਤਾ ¶ ਵਤ ਤੇਭਿਕ੍ਖੂ, ਪਤ੍ਤਾ ਸਮ੍ਬੁਦ੍ਧਪੁਤ੍ਤ ਤਂ;
ਗਿਹਿ ਬਨ੍ਧਨ ਪੁਚ੍ਛਿਜ੍ਜ, ਸੁਖਿਤਾ ਸਾਸਨੇ ਰਤਾ.
ਕਤਪੁਞ੍ਞ ਵਿਸੇਸਾਵ, ਏਤੇ ਸੁਲਦ੍ਧ ਦੁਲ੍ਲਭਾ;
ਛਟ੍ਟੇਤ੍ਵਾਪਿ ਮਹਾਰਜ੍ਜਂ, ਨੇਦਿਸਂ ਲਦ੍ਧ ਮਞ੍ਞਦਾ.
ਸ੍ਵਾਗਤਾ ¶ ਸੁਗਤੀ ਹੋਨ੍ਤੁ, ਮਾਦੁਗ੍ਗਤੀ ਪਮਾਦਿਨੋ;
ਦੁਸ੍ਸੀਲਾ ਚੇ ਗਮਿਸ੍ਸਨ੍ਤਿ, ਅਪਾਯਂ ਤਿਭਯਾਨਕਂ.
ਗਿਹਿਭੋਗਾ ¶ ਪਰੀਹਿਨ੍ਨੋ, ਸਾਮਞ੍ਞਤ੍ਤਞ੍ਚ ਦੂਭਤੋ;
ਪਰਿਧਂਸਮਾਨੋ ਪਕਿਰੇਤਿ, ਛਵਾਲਾਤਂਵ ਨਸ੍ਸਤਿ.
ਕੁਸੋ ਯਥਾ ਦੁਗ੍ਗਹਿਤੋ, ਹਤ੍ਥਮੇਵਾ ਨੁਕਨ੍ਤਤਿ;
ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾ ਯੁਪ ਕਡ੍ਢਤਿ.
ਯਂਕਿਞ੍ਚਿ ¶ ਸਿਥਿਲਂ ਕਮ੍ਮਂ, ਸਂਕਿਲਿਟ੍ਠਞ੍ਚ ਯਂਕਤਂ;
ਸਙ੍ਕਸ੍ਸਰਂ ਬ੍ਰਹ੍ਮਚਰਿਯਂ, ਨਤਂਹੋਤਿ ਮਹਪ੍ਫਲਂ.
ਕਰਿਯਾਚੇ ਕਰਿਯਾ ਵੇਨਂ, ਦਲ਼੍ਹਮੇਨਂ ਪਰਕ੍ਕਮੇ;
ਸਿਥਿਲੋਹਿ ਪਰਿਬ੍ਬਜੋ, ਭਿਯ੍ਯੋ ਆਕਿਰਤੇ ਰਜਂ.
ਇਤਿ ¶ ਵੁਤ੍ਤਂ ਮੁਨਿਨ੍ਦੇਨ, ਨੁਸ੍ਸਰਂ ਅਨਿ ਵਤ੍ਤਿਤੋ;
ਸਦਾ ਅਲਿਨ ਚਿਤ੍ਤੇਨ, ਚਰੇਯ੍ਯ ਬੁਦ੍ਧਸਾਵਕੋ.
ਰਾਗਂ ਅਸੁਭਚਿਨ੍ਤਾਯ, ਦੋਸਂ ਮੇਤ੍ਤਾਯ ਵਾਰਯੇ;
ਮਰਣੇਨ ਧਜਂਮਾਨਂ, ਸਮ੍ਬੁਦ੍ਧੇ ਤਿਕ੍ਖ ਸਦ੍ਧਿਕੋ.
ਅਸੁਭਾ ਕਾਮਵਿਤਕ੍ਕਂ, ਮੇਤ੍ਤਾ ਬ੍ਯਾਪਾਦ ਤਕ੍ਕਿਤਂ;
ਵਿਹਿਂਸਂ ਕਰੁਣਾਯੇਵ, ਨਿਵਾਰੇਯ੍ਯ ਸਦਾਸਤੋ.
ਬੁਦ੍ਧਾਣਤ੍ਤਿ ¶ ਸਦਾਤੀਤੋ, ਮਿਚ੍ਛਾਵਿਤਕ੍ਕ ਪੀਲ਼ਿਤੋ;
ਪਾਪਧਮ੍ਮੇਹਿ ਸਂਕਿਣ੍ਣੋ, ਸੋਨਿਚ੍ਚਾਪਾਯ ਗਾਮਿਕੋ.
ਧੋਵਿਤ੍ਵਾ ਪਤ੍ਤਿਮਲਾਨਿ, ਪੁਨਾਤਿਕ੍ਕਮ ਸਂਵੁਤੋ;
ਮਿਚ੍ਛਾਵਿਤਕ੍ਕ ਸਞ੍ਛੇਦੀ, ਦੂਰੋ ਅਪਾਯ ਗਾਮਿਤੋ.
ਖੀਣਾਸਵਤ੍ਤ ¶ ਬੁਦ੍ਧਤ੍ਤਂ, ਨਿਯ੍ਯਾਨਿਕ ਨ੍ਤਰਾ ਯਿਕਂ;
ਸੀਹਨਾਦਂ ਚਤੁਟ੍ਠਾਨੇ, ਵੇਸਾਰਜ੍ਜੋ ਜਿਨੋ ਨਦਿ.
ਸੀਲਂ ¶ ਨਿਯ੍ਯਾਨਿਕਂ ਨਾਮ, ਆਪਤ੍ਤਿ ਅਨ੍ਤਰਾਯਿਕਂ;
ਅਨ੍ਤਰਾਯ ਮਨਾਪਜ੍ਜ, ਨਿਯ੍ਯਾਨੇਵ ਪਤਿਟ੍ਠਤੁ.
ਨਿਯ੍ਯਾਨਿਕਾਚ ¶ ਅਸੁਭਾ, ਸੁਭਸਞ੍ਞਾ ਨ੍ਤਰਾਯਿਕਾ;
ਅਨ੍ਤਰਾਯ ਮਨਾਪਜ੍ਜ, ਨਿਯ੍ਯਾਨੇਵ ਪਤਿਟ੍ਠਤੁ.
ਨਾਨਾਪਤ੍ਤਿ ¶ ਪਕਿਣ੍ਣੋਪਿ, ਪਾਰਾਜਿਕਾ ਵਸੇਸਕੋ;
ਸੋ ਮਿਤ੍ਯਤ੍ਤ ਪਣੀਧੀਹਿ, ਲਜ੍ਜੀਯੇਵ ਵਿਸੋਧਕੋ.
ਅਲਜ੍ਜੀਕਮ੍ਮ ਕਿਣ੍ਣੋਪਿ,
ਸਂਵੇਜੇਤ੍ਵਾ ਸੁਮਿਤ੍ਤਿਕੋ;
ਲਜ੍ਜੀਯੇਵ ਵਿਸੋਧੇਨ੍ਤੋ,
ਮਤਕੋਵ ਅਸੋਧਕੋ.
ਯੋ ¶ ਪੁਬ੍ਬੇਵ ਪਮਜ੍ਜਿਤ੍ਵਾ, ਪਚ੍ਛਾਸੋ ਨਪ੍ਪਮਜ੍ਜਤਿ;
ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾਮੁਤ੍ਤੋਵਚਨ੍ਦਿਮਾ.
ਧੁਰਂਕਤ੍ਵਾ ¶ ਧਿਪਤਯੋ, ਯੋ ਪੁਞ੍ਞੇਸੁ ਪਰਕ੍ਕਮੇ;
ਤਸ੍ਸ ਨਿਯ੍ਯਾਨਿਕਂ ਕਮ੍ਮਂ, ਕਿਂਨਾਮਕਂ ਨਸਿਜ੍ਝਤੇ.
ਪਚ੍ਚਤੇ ¶ ਮੁਨਿਨੋ ਭਤ੍ਤਂ, ਥੋਕਂਥੋਕਂ ਘਰੇਘਰੇ;
ਪਿਣ੍ਡਿਕਾਯੇਵ ਜੀਵਨ੍ਤੁ, ਮਾਪਜ੍ਜਨ੍ਤੁ ਅਨੇਸਨਂ.
ਧੋਵੇਯ੍ਯਾ ਪਤ੍ਤਿਮਗਾਨਿ, ਵੁਟ੍ਠਾਨ ਦੇਸਨਮ੍ਬੁਹਿ;
ਸਂਵਰਿਸ੍ਸਨ੍ਤਿ ਚਿਤ੍ਤੇਨ, ਸੀਲਂ ਧੋਤਸ੍ਸ ਨਿਮ੍ਮਲਂ.
ਬੁਦ੍ਧਾਣਾਤਿਕ੍ਕਮਾਪਤ੍ਤਿ ¶ , ਨਿਗ੍ਗਹੇ ਰਾਗਦੋਸਕੇ;
ਨਤ੍ਥਿ ਸਞ੍ਚਿਚ੍ਚ ਆਪਤ੍ਤਿ, ਲਜੀਵ ਸੋ ਪਵੁਚ੍ਚਤਿ.
ਵਾਣਿਜ੍ਜ ਕਸਿਕਾਦੀਹਿ, ਨਾਹਾਰੇਟ੍ਠਿ ਧਸਾਸਨੇ;
ਧੁਰ ਦ੍ਵਯਂਵ ਕਿਚ੍ਚਂ ਤਂ, ਨਾਞ੍ਞਕਿਚ੍ਚੇਹਿ ਹਾਪਯੇ.
ਨਿਗ੍ਗਣ੍ਹੇਯ੍ਯ ¶ ਸਕਂਚਿਤ੍ਤਂ, ਕਿਟ੍ਠਾਦਿਂ ਵਿਯ ਦੁਪ੍ਪਸੁਂ;
ਸਤਿਮਾ ਸਮ੍ਪਜਾਨੋਚ, ਚਰੇ ਸਬ੍ਬਿਰਿਯਾਪਥੇ.
ਯਥਾ ¶ ਥਮ੍ਭੇ ਨਿਬਨ੍ਧੇਯ੍ਯ, ਵਚ੍ਛਂ ਦਮਂ ਨਰੋ ਇਧ;
ਬਨ੍ਧੇਯ੍ਯੇਵਂ ਸਕਂਚਿਤ੍ਤਂ, ਸਤਿਯਾ ਰਮ੍ਮਣੇ ਦਲ਼੍ਹਂ.
ਅਧਿਸੀਲਾਧਿਚਿਤ੍ਤਾਨਂ, ਅਧਿਪਞ੍ਞਾਯ ਸਿਕ੍ਖਨਂ;
ਭਿਕ੍ਖੁ ਕਿਚ੍ਚਤ੍ਤਯਂ ਏਤਂ, ਕਰੋਨ੍ਤੋਵ ਸੁਭਿਕ੍ਖੁਕੋ.
ਪਞ੍ਚਾਟ੍ਠ ¶ ਦਸ ਸੀਲਾਨਿ, ਨਾਧਿਸੀਲਂ ਤਦੁਤ੍ਤਰਿ;
ਪਾਤਿਮੋਕ੍ਖਂ ਅਧਿਸੀਲਂ, ਪਬ੍ਬਤਾ ਧਿਕ ਮੇਰੁਵ.
ਪਾਤਿਮੋਕ੍ਖਂ ¶ ਵਿਸੋਧੇਨ੍ਤੋ, ਅਪ੍ਪੇਵ ਜੀਵਿਤਂ ਜਹੇ;
ਪਞ੍ਞਤ੍ਤਂ ਲੋਕਨਾਥੇਨ, ਨਭਿਨ੍ਦੇ ਸੀਲਸਂਵਰਂ.
ਸੀਲੇਨਾ ਤਿਕ੍ਕਮਂ ਥੁਲ੍ਲਂ, ਪਰਿਯੁਟ੍ਠਂ ਸਮਾਧਿਨਾ;
ਪਞ੍ਞਾਯਾ ਨੁਸਯਂ ਸਣ੍ਹਂ, ਕਿਲੇਸਂ ਭਿਕ੍ਖੁ ਭਿਨ੍ਦਤਿ.
ਸਾਸਨਸ੍ਸਾਦਿ ¶ ਸੀਲਂਵ, ਮਜ੍ਝੇ ਤਸ੍ਸ ਸਮਾਧਿਵ;
ਪਞ੍ਞਾਵ ਪਰਿਯੋਸਾਨਂ, ਕਲ੍ਯਾਣਾਵ ਇਮੇਤਯੋ.
ਮਹਾਪੁਞ੍ਞੇ ¶ ਠਿਤਂ ਸੀਲਂ, ਸਮਾਧਿ ਅਪ੍ਪਨਾ ਗਤਂ;
ਚਤੁਮਗ੍ਗ ਯੁਤਾ ਪਞ੍ਞਾ, ਏਤਂ ਸਿਕ੍ਖਤ੍ਤਯਂ ਮਤਂ.
ਸੀਲਨਲਕ੍ਖਣਂ ਸੀਲਂ, ਦੁਸ੍ਸੀਲ੍ਯ ਧਂਸਨਂ ਰਸਂ;
ਹਿਰੋਤ੍ਤਪ੍ਪ ਪਦਟ੍ਠਾਨਂ, ਸੁਚਿ ਪਚ੍ਚੁਪਟ੍ਠਾਨਕਂ.
ਸਸੀਲਗੁਤ੍ਤਿ ¶ ਨਾਥੋਚ, ਦੁਨ੍ਨਿਗਹੋ ਵਿਸਾਰਦੋ;
ਧਮ੍ਮਟ੍ਠੀਤੀਤਿ ਪਞ੍ਚੇਤੇ, ਗੁਣਾ ਵੇਨਯਿਕੇ ਮਤਾ.
ਆਦਿ ¶ ਕਲ੍ਰਾਣ ਸਂਵੇਦੀ, ਸੀਲਮਤ੍ਤਟ੍ਠ ਭਿਕ੍ਖਵੋ;
ਉਦ੍ਧਂ ਕਲ੍ਯਾਣ ਲਾਭਾਯ, ਅਲਿਨੋ ਅਨਿਵਤ੍ਤਿਕੋ.
ਧੋਵਿਤ੍ਵਾ ਪਤ੍ਤਿਮਲਾਨਿ, ਵੁਟ੍ਠਾਨ ਦੇਸਨ ਮ੍ਬੁਹਿ;
ਸੁਦ੍ਧਸੀਲੇ ਠਿਤੋਯੇਵ, ਏਵਂ ਚਿਨ੍ਤੇਯ੍ਯ ਪਞ੍ਞਵਾ.
ਸਮ੍ਪੁਦ੍ਧੋਰਸ ¶ ਪੁਤ੍ਤਾਵ, ਬੁਦ੍ਧੁਰੋਜਾ ਨੁਸ੍ਸਾਵਨਾ;
ਸਮ੍ਭੂਤਾ ਪਿਤੁ ਦਾਯਾਦਾ, ਪੁਤ੍ਤਾਨਾਮ ਸਭਾਵਤੋ.
ਖੀਰਂ ਪਿਤ੍ਵਾਵ ਜੀਵਨ੍ਤਿ, ਜਾਤਾਪਿ ਇਧ ਪੁਤ੍ਤਕਾ;
ਪਰਿਯਤ੍ਤਿ ਜਿਨਕ੍ਖੀਰਂ, ਪਿਤ੍ਵਾਵ ਜਿਨਪੁਤ੍ਤਕਾ.
ਦਾਯੋਚ ¶ ਨਾਮ ਬੁਦ੍ਧਸ੍ਸ, ਧਮ੍ਮਾਮਿਸ ਵਸਾਦ੍ਵਿਧਾ;
ਮਗ੍ਗਞਾਣਾ ਦਯੋ ਧਮ੍ਮੋ, ਚਤ੍ਤਾਰੋ ਪਚ੍ਚਯਾਮਿਸਾ.
ਚਿਰ ਮਾਮਿਸ ਦਾਯਾਦਾ, ਰਾਜਪੂਜਾਦਿ ਗਾਹਿਨੋ;
ਦਾਯਾ ਮਿਸ੍ਸਗ੍ਗਹਂ ਨਿਚ੍ਛਿ, ਸਦ੍ਧਮ੍ਮ ਗਰੁਕੋ ਜਿਨੋ.
ਲਕ੍ਖ ¶ ਕਪ੍ਪ ਚਤੁਸ੍ਸਙ੍ਖ੍ਯ, ਕਾਲਂ ਵਿਚਿਤ ਨਿਚ੍ਚਿਤਂ;
ਧਮ੍ਮਦਾਯਂ ਨਵਿਨ੍ਦਮ੍ਹਾ, ਬੁਦ੍ਧਪੁਤ੍ਤਾਪਿ ਯੇਮਯਂ.
ਬੁਦ੍ਧਵਾਰਿਤ ਦਾਯਾਦਾ, ਸਦ੍ਧਮ੍ਮਦਾਯ ਬਾਹਿਰਾ;
ਪੁਤ੍ਤਾਪਿ ਸਤ੍ਥੁਦਾਸਾਭਾ, ਭੁਤ੍ਤਮਤ੍ਤਾ ਹਿ ਦਾਸਕਾ.
ਭਦ੍ਦਨ੍ਤ ¶ ਰਾਹੁਲਸ੍ਸੇਵ, ਦਾਯਂ ਨੋਪਿ ਅਦਾ ਜਿਨੋ;
ਨਾਦਿਯਿਮ੍ਹਾ ਪਮਾਦਾਯ, ਤਂ ਦਾਯਂ ਕੁਸਲਨ੍ਤਕਂ.
ਧਮ੍ਮਦਾਯਾਦਾ ਮੇਭਿਕ੍ਖਵੇ ਤੁਮ੍ਹੇਭਵਥ,
ਮਾਆਮਿਸ ਦਾਯਾਦਾ;
ਇਤਿ ਵੁਤ੍ਤਂ ਮੁਨਿਨ੍ਦੇਨ,
ਸਾਵਕੇਸੁ ਦਯਾਵਤਾ.
ਇਮਾਯ ¶ ਬੁਦ੍ਧਵਾਚਾਯ, ਬੁਦ੍ਧਸਨ੍ਤਕ ਤਂ ਸਰੇ;
ਦ੍ਵਿਨ੍ਨਂ ਆਮਿਸਅ ਦਾਯਾਦ, ਭਾਵਸ੍ਸਚ ਨਿਵਾਰਣਂ.
ਰਜ੍ਜੇ ਚਣ੍ਡਾਲਪੁਤ੍ਤਾਵ, ਸਦ੍ਧਮ੍ਮਚਕ੍ਕ ਵਤ੍ਤਿਨੋ;
ਪੁਤ੍ਤਾ ਹੋਨ੍ਤਾਪਿ ਦਾਯੇਸ੍ਮਿਂ, ਨਿਰਾਸਾ ਤਿਵ ਨਿਨ੍ਦਿਤਾ.
ਮਿਚ੍ਛਾਜੀਵ ¶ ਸਮਾਪਨ੍ਨਾ, ਅਚ੍ਚਾਸਾ ਪਚ੍ਚਯਾਮਿਸੇ;
ਮਹਾਜਾਨੀਯ ਸਮ੍ਪਤ੍ਤਾ, ਮੋਘਕਤ੍ਵਾ ਤਿਦੁਲ੍ਲਭਂ.
ਗਿਹਿਕਾਮੇ ¶ ਪਹਾਯਾਗੋ, ਪਰਵਨ੍ਤੋਸੁ ਲਗ੍ਗਿਤੋ;
ਗਙ੍ਗਾਤਿਣ੍ਣੋ ਤਲ਼ਾਕਮ੍ਹਿ, ਨਿਮੁਗ੍ਗੋਵਾ ਤਿਨਿਨ੍ਦਿਤੋ.
ਚੀਵਰੇ ¶ ਪਿਣ੍ਡਪਾਤੇਚ, ਪਚ੍ਚਯੇ ਸਯਨਾਸਨੇ;
ਏਤੇਸੁ ਤਣ੍ਹ ਮਾਕਾਸਿ, ਮਾਲੋਕਂ ਪੁਨਰਾਗਮਿ.
ਇਤਿਵੁਤ੍ਤਾ ਨੁਸਾਰੇਨ, ਪਚ੍ਚਵੇਕ੍ਖਣ ਸੁਦ੍ਧਿਯਾ;
ਆਮਿਸੇਸੁ ਹਨੇ ਆਸਂ, ਪੁਤ੍ਤਮਂਸੁ ਪਮਂ ਸਰਂ.
ਸੇਯ੍ਯੋ ¶ ਅਯੋਗੁਲ਼ੋ ਭੁਤ੍ਤੋ,
ਤਤ੍ਤੋ ਅਗ੍ਗਿਸਿਖੂਪਮੋ;
ਯਞ੍ਚੇ ਭੁਞ੍ਜੇਯ੍ਯ ਦੁਸ੍ਸੀਲੋ,
ਰਟ੍ਠਪਿਣ੍ਡਂ ਅਸਞ੍ਞਤੋ.
ਇਤਿਵੁਤ੍ਤਂ ¶ ਨੁਚਿਨ੍ਤੇਨ੍ਤੋ, ਵਜ੍ਜੇ ਦੁਸ੍ਸੀਲ ਭਾਵਤੋ;
ਸੀਲੇ ਠਿਤੋਵ ਭੁਞ੍ਜੇਯ੍ਯ, ਮਾਦਿਤ੍ਤ ਗੁਲ਼ਕਂ ਗਿਲਿ.
ਅਨ੍ਨਾਨ ਮਥੋ ਪਾਨਾਨਂ,
ਖਾਦਨੀਯਾਨ ਮਥੋਪਿ ਵਤ੍ਥਾਨਂ;
ਲਦ੍ਧਾਨ ਸਨ੍ਨਿਧਿਂ ਕਰਿਯਾ,
ਨਚ ਪਰਿਤ੍ਤਸੇ ਤਾਨਿ ਅਲਭਮਾਨੋ.
ਅਞ੍ਞਾਹਿ ¶ ਲਾਭੁਪਨਿਸਾ, ਅਞ੍ਞਾ ਨਿਬ੍ਬਾਨ ਗਾਮਿਨੀ;
ਸਕ੍ਕਾਰਂ ਨਾਭਿਨਨ੍ਦੇਯ੍ਯ, ਵਿਵੇਕ ਮਨੁਬ੍ਰੂਹਯੇ.
ਅਕਤ੍ਵਾ ¶ ਆਮਿਸੇ ਆਸਂ,
ਸਦ੍ਧਮ੍ਮੇਯੇਵ ਆਸਿਕੋ;
ਅਪ੍ਪਮਤ੍ਤੋ ਸਮਾਰਦ੍ਧੋ,
ਧਮ੍ਮਦਾਯਂ ਲਭਿਸ੍ਸਤਿ.
ਪਰਿਯਤ੍ਤਿਂ ਵਿਨਾ ਸੇਯ੍ਯਂ, ਨਲਭਨ੍ਤਿ ਬੁਧਾਅਪਿ;
ਸੇਯ੍ਯਤ੍ਥਿਕੋਵ ਸਿਕ੍ਖੇਯ੍ਯ, ਨੇਵ ਪੂਜਾਦਿ ਕਾਰਣਾ.
ਭਵਨਿਸ੍ਸਰਣਤ੍ਥਂਵ ¶ , ਸਿਕ੍ਖੇ ਨਾ ਲਗ੍ਗਦੂਪਮੋ;
ਤਥੂਪਮਾਯ ਸਿਕ੍ਖਨ੍ਤੋ, ਅਪਾਯੇਸੁ ਪਤਿਸ੍ਸਤਿ.
ਸਿਕ੍ਖਿਤੇਨ ਅਮਾਨਤ੍ਥਂ, ਨਸਾਧੁ ਮਾਨਥਦ੍ਧਿਕੋ;
ਮੁਦੁਭਾਵਾਯ ਸਿਕ੍ਖਿਤ੍ਵਾ, ਦਮੇਨ੍ਤੋ ਮੁਦੁਕੋ ਭਵੇ.
ਰਾਗਂ ¶ ਦੋਸਂ ਧਜਂਮਾਨਂ, ਸਿਕ੍ਖਨ੍ਤੋਪਿ ਵਿਵਜ੍ਜਯੇ;
ਦਹਰਾਪਿ ਹਿ ਮਿਯ੍ਯਨ੍ਤਿ, ਨਤ੍ਥਿ ਵਸ੍ਸਗ੍ਗਤੋ ਮਤਂ.
ਸਦ੍ਧਂਤਿਕ੍ਖੇਯ੍ਯ ਬੁਦ੍ਧੇਨ, ਰਾਗਂ ਅਸੁਭ ਚਿਨ੍ਤਯਾ;
ਮਰਣੇਨ ਧਜਂਮਾਨਂ, ਦੋਸਂ ਮੇਤ੍ਤਾਯ ਵਾਰਯੇ.
ਏਤੇਹਿ ¶ ਚਤੁਰਕ੍ਖੇਹਿ, ਗਨ੍ਥਂ ਸਿਕ੍ਖੇਯ੍ਯ ਸਂ ਵੁਤੋ;
ਸਿਕ੍ਖਨ੍ਤਸ੍ਸੇਹਿ ਰਕ੍ਖੇਹਿ, ਨਕੋਚਿ ਸਂਕਿਲੇਸਿਕੋ.
ਬੁਦ੍ਧਵਾਚਮ੍ਪਿ ¶ ਸਜ੍ਝਾਯ, ਏਤੇਪਿ ਮਨਸੀਕਰ;
ਵੁਤ੍ਤੋ ਧਮ੍ਮਵਿਹਾਰੀਤਿ, ਏਦਿਸੋ ਸਾਸਨੇ ਵਰੋ.
ਗਰੂਨ ਮੁਪਦੇਸੇਨ,
ਚਤੁਰਕ੍ਖੋ ਸੁਸੀਲਵਾ;
ਅਪ੍ਪਸ੍ਸੁਤੋਪਿ ਪਾਸਂਸੋ,
ਭਿਯ੍ਯੋਯੇਵ ਬਹੁਸ੍ਸੁਤੋ.
ਸਾਤਂ ¶ ਸੇਵਕ੍ਖਣੇਵਪ੍ਪਂ, ਤਂਹੇਤ੍ਵਾ ਨਨ੍ਤਾਦੁਕ੍ਖਨ੍ਤਿ;
ਧੀਰੋ ਆਸਂ ਹਨੇ ਕਾਮੇ, ਖੁਰਧਾਰਮਧੂਪਮੇ.
ਯੋਧ ਕਾਮੇ ਸੁਖਂਮਞ੍ਞਿ,
ਨ ਸੋ ਦੁਕ੍ਖਾ ਵਿਮੁਚ੍ਚਤਿ;
ਮਾਤਾਹਿ ਬ੍ਯਗ੍ਘ ਮਨ੍ਵੇਨ੍ਤੋ,
ਵਛੋ ਮੁਤ੍ਤੋ ਕਥਂਭਯਾ.
ਤਿਰਚ੍ਛਾ ¶ ਪੇਤ ਲਦ੍ਧਬ੍ਬੇ, ਨਾਸਂ ਕਾਮਸੁਖੇ ਕਰੇ;
ਭਾਯਿਤਬ੍ਬ ਸੁਖਂ ਤਞ੍ਹਿ, ਤਸ੍ਮਿਂ ਲਗ੍ਗਾ ਮਹਾਤਪਾ.
ਲਦ੍ਧਾ ਕਾਮਸੁਖਂ ਬਾਲਾ, ਪਮੋਦਨ੍ਤਿ ਨਪਣ੍ਡਿਤਾ;
ਪਸੁਪਕ੍ਖੀਭਿ ਲਦ੍ਧਬ੍ਬਂ, ਅਨਨ੍ਤਦੁਕ੍ਖ ਕਾਰਣਂ.
ਲਦ੍ਧਾ ¶ ਧਮ੍ਮਰਤਿਂਵਿਞ੍ਞੂ, ਮੋਦਨ੍ਤਿ ਨ ਅਪਣ੍ਡਿਤਾ;
ਅਨੋਮ ਸਤ੍ਤ ਪਰਿਭੋਗਂ, ਭਗਨਿਸ੍ਸਰਣਾਵਹਂ.
ਹੀਨਕਮ੍ਮਂ ¶ ਪਟਿਚ੍ਛਨ੍ਨਂ, ਕਾਮਸ੍ਸਾਦਂ ਨਪਤ੍ਥਯੇ;
ਧਮ੍ਮੇ ਪੀਤਿਞ੍ਚ ਪਾਮੋਜ੍ਜਂ, ਪਤ੍ਥੇਯ੍ਯ ਸਾਧੁਸਮ੍ਪਤੋ.
ਪਰਿਗ੍ਗਣ੍ਹਨ੍ਤਿ ਯੇਕਾਮੇ, ਹਿਂ ਸਨ੍ਤਿਤੇ ਤਦਤ੍ਥਿਕਾ;
ਪਰਿਚ੍ਚਤ੍ਤਂ ਨ ਹਿਂ ਸਨ੍ਤਿ, ਮੁਤ੍ਤਂ ਵਣ੍ਣੇਨ੍ਤਿ ਸਾਧਵੋ.
ਨਿਚ੍ਚੁਪਕ੍ਕਮ੍ਮ ¶ ਪੁਟ੍ਠੋਪਿ, ਕਾਯੋ ਵੇਰੀਵਸਾ ਨੁਗੋ;
ਅਚਿਰਂਯੇਵ ਭੂਸਾਯੀ, ਯੁਤ੍ਤੋਵ ਤ ਮੁਪੇਕ੍ਖਿਤੁਂ.
ਰਕ੍ਖਿਤੋਪਿ ਅਗੁਤ੍ਤੋਵ, ਕਾਯੋ ਭਯਮੁਖੇ ਠਿਤੋ;
ਤਸ੍ਮਾ ਕਾਯ ਮੁਪੇਕ੍ਖਿਤ੍ਵਾ, ਚਰੇਧਮ੍ਮ ਮਛਮ੍ਭਿਤੋ.
ਪੁਟ੍ਠੋ ¶ ਪੁਟ੍ਠੋਪਿ ਯਂਕਾਯੋ, ਭੁਵਿ ਰੋਗਾਸਯੀਸਯੀ;
ਕਤਂਕਤਂ ਮੁਧਾਤੋ ਨ, ਤਦਤ੍ਥਂ ਦੁਚ੍ਚਰੇ ਚਰੇ.
ਪਾਪਂ ¶ ਕਰੋਤਿ ਯੋਬਾਲੋ,
ਪੁਟ੍ਠੁਂ ਕਾਯਂ ਤਿਦੁਬ੍ਭਰਂ;
ਭੂਮ੍ਯਂ ਕਾਯਂ ਠਪੇਤ੍ਵਾਨ,
ਅਨਾਥੋ ਸੋ ਅਪਾਯਿਕੋ.
ਵੇਰੀਵਸਾ ਨੁਗਂ ਕਾਯਂ,
ਬਾਲੋ ਪੋਸੇਤਿ ਦੁਚ੍ਚਰੋ;
ਪੋਸੇਨ੍ਤੋ ਨਿਰਯੇ ਪਕ੍ਕੋ,
ਕਾਯੋ ਭੂਮ੍ਯਂ ਵਿਕਾਰਗੂ.
ਪਾਪਂ ¶ ਮਾਕਰ ਕਾਯਤ੍ਥਂ, ਕਾਯੋ ਵੇਰੀ ਵਸਾਨੁਗੋ;
ਭੂਮ੍ਯਂ ਸੇਸ੍ਸਤਿ ਵੇਕਾਰੀ, ਪਾਪਿਕੋ ਨਿਰਯਂ ਗਤੋ.
ਅਮਯ੍ਹਂ ਮਯ੍ਹਸਞ੍ਞਾਯ,
ਕਾਯਂ ਰੋਗਵਸਾਨੁਗਂ;
ਪੋਸਂ ਪਤ੍ਤੋ ਮਹਾਜਾਨਿਂ,
ਨੋਕਾਸੋ ਧਮ੍ਮ ਮਿਕ੍ਖਿਤੁਂ.
ਕਾਯਾਪੇਕ੍ਖਾਯ ¶ ਨੋਕਾਸੋ,
ਧਮ੍ਮਂ ਦਟ੍ਠੁਂ ਰਹੋਗਤੋ;
ਉਪੇਕ੍ਖਾਯੇਵ ਓਕਾਸੋ,
ਦੁਕ੍ਖਿਤਾ ਮ੍ਹ ਅਪੇਕ੍ਖਯਾ.
ਚਿਤ੍ਤ ¶ ਸਂਸੋਧਕਾ ਪਕ੍ਕਾ, ਕਾਯਸਂਸੋਧਕਾ ਨਵਾ;
ਸੋਧੇ ਚਿਤ੍ਤਂਵ ਪਕ੍ਕਤ੍ਥਂ, ਨਕਾਯਂ ਭਵਭੀਰੁਕੋ.
ਚਿਤ੍ਤਸਙ੍ਖਰਣਂ ¶ ਸਾਧੁ, ਤਂ ਸਙ੍ਖਤਂ ਪਭਸ੍ਸਰਂ;
ਨਸਾਧੁ ਕਾਯਸਙ੍ਖਾਰੋ, ਸਙ੍ਖਤੋਪ੍ਯਸੁਭੋਵ ਸੋ.
ਸਭਾਵ ਮਲਿਨਂ ਕਾਯਂ, ਨਿਮ੍ਮਲਾਯ ਕਥਂ ਕਰੇ;
ਆਗਨ੍ਤੁਮਲਿਨਂ ਚਿਤ੍ਤਂ, ਸਕ੍ਕਾ ਕਾਤੁਂ ਸੁਨਿਮ੍ਮਲਂ.
ਆਧਿਬ੍ਯਾਧਿ ¶ ਪਰੋਤਾਯ, ਅਜ੍ਜਸ੍ਵੇਵਾ ਵਿਨਾਸਿਨਾ;
ਕੋਹਿਨਾਮ ਸਰੀਰਾਯ, ਧਮ੍ਮਾਪੇਤਂ ਸਮਾਚਰੇ.
ਸਭਾਵਜੇਗੁਚ੍ਛਂ ਕਾਯਂ, ਸੋਭੇਤੁਂਨੇਵਸਕ੍ਕੁਣੇ;
ਚਿਤ੍ਤਂ ਵਾ ਲਙ੍ਕਤਂ ਸੋਭਂ, ਸੀਲਾਦਿ ਗਨ੍ਧਵਾਸਿਤਂ.
ਸਚੇ ¶ ਭਾਯਥ ਦੁਕ੍ਖਸ੍ਸ, ਸਚੇ ਵੋ ਦੁਕ੍ਖ ਮਪ੍ਪਿਯਂ;
ਮਾਕਤ੍ਥ ਪਾਪਕਂ ਕਮ੍ਮਂ, ਆਵਿਵਾ ਯਦਿਵਾ ਰਹੋ.
ਕਿਲੇਸਾ ਗਨ੍ਤੁਮਲਂਚਿਤ੍ਤਂ, ਪਭਸ੍ਸਰ ਸਭਾਵਿਕਂ;
ਤਦਾਗਨ੍ਤੁਮਲਂ ਧੋਵ, ਚਿਤ੍ਤਂ ਧੋਤੇ ਪਭਸ੍ਸਰਂ.
ਕਿਲੇਸਾ ¶ ਗਨ੍ਤੁਮਲਂਚਿਤ੍ਤਂ, ਉਪਕ੍ਕਮੇਨ ਸੋਧਯੇ;
ਸੁਵਿਸੁਦ੍ਧ ਮਨਾਯੇਵ, ਉਤ੍ਤਰਿਂਸੁ ਭਵਣ੍ਣਵਾ.
ਕਾਯੇ ਮਲਮੁਪੇਕ੍ਖਾਯ, ਚਿਤ੍ਤੇ ਮਲਂਵ ਧੋਵਤੁ;
ਚਿਤ੍ਤੇ ਹਿ ਨਿਮ੍ਮਲੇਸਨ੍ਤੋ, ਪੂਤਿਕਾਯੋਪਿ ਪੂਜਿਤੋ.
ਕਾਯਰੋਗਂ ¶ ਤਿਤਿਕ੍ਖਾਯ, ਚਿਤ੍ਤਰੋਗਂ ਚਿਕਿਚ੍ਛਤੁ;
ਸੁਖਿਤੋ ਕਾਯਰੋਗੀਪਿ, ਚਿਤ੍ਤੇ ਨਿਰਾਮਯੇ ਸਤਿ.
ਕਾਯਰੋਗੇ ਬਹੂ ਵੇਜ੍ਜਾ, ਬੁਦ੍ਧੁਤ੍ਤਿਵ ਮਨੋਗਦੇ;
ਇਧਾਪਿ ਕਾਯਿਕੋ ਸਨ੍ਤੋ, ਅਨਨ੍ਤਾਵ ਮਨੋਰੁਜਾ.
ਸੀਸਦਡ੍ਢ ¶ ਮੁਪੇਕ੍ਖਾਯ, ਨਿਬ੍ਬਾਤੁ ਰਾਗਪਾਵਕਂ;
ਖਿਪ੍ਪਂ ਅਸੁਭ ਸਞ੍ਞਾਯ, ਨਿਚ੍ਚਦਡ੍ਢਂ ਭਵੇਭਵੇ.
ਸੁਭਾਯ ਉਟ੍ਠਿਤਂ ਰਾਗਂ, ਅਸੁਭਾਯ ਨਿਵਾਰਯੇ;
ਸੋਰਾਗੋ ਸਾਦਿਤਂ ਜਨ੍ਤੁਂ, ਚਤ੍ਵਾਪਾਯਂ ਨਯਿਸ੍ਸਤਿ.
ਪਣ੍ਡਿਤਾਨਂ ¶ ਮਲਂ ਮਾਨੋ, ਸੋਤ੍ਤੁਕ੍ਕਂਸੇਨ ਪਾਕਟੋ;
ਮਾਖੋ ਅਤ੍ਤਾਨ ਮੁਕ੍ਕਂਸੇ, ਮਾਵਿਭਾਵੇ ਸਕਂਮਲਂ.
ਗੁਣਂ ਪਟਿਚ੍ਚ ਗੁਣੀਨਂ, ਅਹਂਮਾਨੋ ਸਮੁਟ੍ਠਹੇ;
ਮਰਣਂ ਅਨੁਚਿਨ੍ਤਾਯ, ਧਜਂਮਾਨਂ ਨਿਪਾਤਯ.
ਏਕੋ ¶ ਕਾਯਵਿਵੇਕੇਸੀ, ਕਤ੍ਵਾ ਕਿਲੇਸਨਿਗ੍ਗਹਂ;
ਵਸੇ ਚਿਤ੍ਤਵਿਵੇਕੇਸੀ, ਉਭੋ ਪਧਿ ਵਿਵੇਕਾਦਾ.
ਅਦਿਟ੍ਠੇ ਅਸੁਤੇ ਠਾਨੇ, ਵਸੇਯ੍ਯ ਮੋਚਨਤ੍ਥਿਕੋ;
ਅਸ੍ਸਾਦਂਹਿ ਨਿਵਾਰੇਤੁਂ, ਦਿਟ੍ਠੇ ਸੁਤੇ ਤਿਦੁਕ੍ਕਰਂ.
ਅਦਿਟ੍ਠੇ ¶ ਅਸੁਤੇ ਰਞ੍ਞੇ, ਵਸੇਯ੍ਯਿ ਨ੍ਦ੍ਰਿਯਗੋਪਕੋ;
ਵਾਰੇਤੁਂ ਵਿਸਯਾਕਿਣ੍ਣੇ, ਚਕ੍ਖੁਸੋਤਂ ਤਿਦੁਕ੍ਕਰਂ.
ਰਾਗਂ ਅਸਤਿ ਉਪ੍ਪਨ੍ਨਂ, ਸਨ੍ਤਾਭੁਜੇਨ ਵਾਰਯੇ;
ਬਾਹਿਰੇ ਰਾਗ ਮੁਪ੍ਪਨ੍ਨਂ, ਅਨ੍ਤੋ ਅਸੁਭਚਿਨ੍ਤਯਾ.
ਰਾਗਂ ¶ ਛਿਨ੍ਦਾਤਿ ਬੁਦ੍ਧਾਣਂ, ਸਰਂ ਭਿਕ੍ਖੁ ਰਹੋਗਤੋ;
ਪਸ੍ਸਂ ਕਾਯੇਧ ਜੇਗੁਚ੍ਛਂ, ਲਭੇਯ੍ਯਾ ਸਿਟ੍ਠਮੋਚਨਂ.
ਕਾਯਂ ਅਸੁਭਤੋਪਸ੍ਸ, ਕਲ੍ਲਕਾਲੇਵ ਦਸ੍ਸਨਂ;
ਮੋਘਂ ਕਾਲਂ ਨਖੀਯੇਯ੍ਯ, ਭਵੇਯ੍ਯੁਂਸ੍ਵੇਪਿਆਤੁਰਾ.
ਕਾਯਂ ¶ ਜੇਗੁਚ੍ਛਤੋਪਸ੍ਸ, ਬਾਲ੍ਯਨ੍ਤੋ ਪਚ੍ਚਵੇਕ੍ਖਿਯ;
ਆਦੋ ਕਿਞ੍ਚਿ ਜਿਗੁਚ੍ਛਾਯ, ਜਿਗੁਚ੍ਛੇਯ੍ਯਾਯਤਿਂ ਭੁਸਂ.
ਕਾਯਾਦਿਨਵ ਮਿਕ੍ਖੇਯ੍ਯ, ਦਾਨਿ ਕਿਞ੍ਚਿਪਿ ਦਸ੍ਸਨਂ;
ਆਯਤਿਂ ਮਗ੍ਗਲਾਭਾਯ, ਭਵੇਯ੍ਯ ਉਪਨਿਸ੍ਸ ਯੋ.
ਇਤ੍ਥੀਨ ¶ ਮਙ੍ਗਮਙ੍ਗਾਨਿ, ਨਪਸ੍ਸੇਯ੍ਯ ਨਚਿਨ੍ਤਯੇ;
ਤਦਾਸਾ ਉਭਤੋ ਭਟ੍ਠਾ, ਸੁਗਤ੍ਯਾ ਸਾਸਨਾਪਿਚ.
ਇਤ੍ਥਿਰੂਪ ਸਰਾਕਡ੍ਢਾ, ਭਟ੍ਠਾ ਬਹੂਵ ਸਾਸਨਾ;
ਇਹਾਪਿ ਦੁਕ੍ਖਿਤਾ ਹੁਤ੍ਵਾ, ਤੇ ਪੇਚ੍ਚ ਅਤਿਦੁਕ੍ਖਿਨੋ.
ਪੁਂਮਨੋ ¶ ਪਰਿਯਾਦਾਯ, ਇਤ੍ਥਿਰੂਪਸਰਾ ਠਿਤਾ;
ਤਸ੍ਸਮ ਮਞ੍ਞ ਮੇਕਮ੍ਪਿ, ਨਵਿਜ੍ਜਤੇਵ ਸਬ੍ਬਧਿ.
ਸਲ੍ਲਪੇ ¶ ਅਸਿਹਤ੍ਥੇਨ, ਪਿਸਾਚੇਨਾਪਿ ਸਲ੍ਲਪੇ;
ਆਸਦੇ ਆਸਿਵਿਸੇਪਿ, ਅਗ੍ਗਿਕ੍ਖਨ੍ਧੇਪਿ ਆਸਦੇ;
ਨਤ੍ਵੇਵ ਮਾਤੁਗਾਮੇਨ, ਏਕੇਕਾਯ ਸੁਪੇਸਲੋ.
ਕਾਮਂ ਅਸੁਭਚਿਨ੍ਤਾਯ, ਬ੍ਯਾਪਾਦਂ ਸ੍ਨੇਹਚੇਤਸਾ;
ਵਿਹਿਂਸਂ ਕਰੁਣਾਯੇਹਿ, ਵਿਤਕ੍ਕਗ੍ਗੀ ਤਯੋਸਮੇ.
ਅਸਮੇਤ ¶ ਵਿਤਕ੍ਕਗ੍ਗੀ, ਥੁਸਰਾਸਿਮ੍ਹਿ ਖਾਣੁਵ;
ਅਥਿਰਾ ਸਾਸਨੇ ਤਾਪੀ, ਤੇਪਚ੍ਛਾਅਤਿਤਾਪਿਨੋ.
ਅਸੁਭਾ ¶ ਪਗਮੇ ਲੋਕਾ, ਤਂ ਮੇਤ੍ਤਾਯੁਪਸਙ੍ਕਮੇ;
ਸੁਭਾਵਿਤਾਹਿ ਏਤਾਹਿ, ਜਹੇਲੋਕੇ ਪਿਯਾਪਿਯਂ.
ਗਤਟ੍ਠਿਤਾਦੋ ਉਪ੍ਪਨ੍ਨੇ, ਵਿਤਕ੍ਕਗ੍ਗੀ ਤਯੋ ਸਮੇ;
ਆਤਾਪੀ ਪਹਿਤਤ੍ਤੋਤਿ, ਏਵਂਭੂਤੋ ਪਵੁਚ੍ਚਤਿ.
ਵਿਵਾਦਪ੍ਪਤ੍ਤੋ ¶ ਦੁਤੀਯੋ, ਕੇਨੇਕੋ ਵਿਵਦਿਸ੍ਸਤਿ;
ਤਸ੍ਸਤੇ ਸਗ੍ਗਕਾਮਸ੍ਸ, ਏਕਤ੍ਤ ਮੁਪਰੋਚਿਤਂ.
ਸਿਨਿਹਪ੍ਪਤ੍ਤੋ ਦੁਤੀਯੋ, ਕਮੇਕਾ ਸਿਨਿਹਿਸ੍ਸਤਿ;
ਤਸ੍ਸਤੇ ਮੋਕ੍ਖਕਾਮਸ੍ਸ, ਏਕਤ੍ਤ ਮੁਪਰੋਚਿਤਂ.
ਪੁਰਤੋ ¶ ਪਚ੍ਛਤੋਵਾਪਿ, ਅਪਰੋ ਚੇ ਨਵਿਜ੍ਜਤਿ;
ਤਸ੍ਸੇਵ ਫਾਸੁ ਭਵਤਿ, ਏਕਸ੍ਸ ਵਸਤੋ ਵਨੇ.
ਸੁਖਞ੍ਚ ਕਾਮ ਮਯਿਕਂ, ਦੁਕ੍ਖਞ੍ਚ ਪਵਿਵੇਕਿਕਂ;
ਪਵਿਵੇਕਂ ਦੁਕ੍ਖਂ ਸੇਯ੍ਯੋ, ਯਞ੍ਚੇ ਕਾਮਮਯਂ ਸੁਖਂ.
ਯੋਚ ¶ ਵਸ੍ਸਸਤਂ ਜੀਵੇ, ਅਪਸ੍ਸਂ ਉਦਯਬ੍ਬਯਂ;
ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਉਦਯਬ੍ਬਯਂ.
ਸੁਞ੍ਞਾਗਾਰਂ ¶ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;
ਅਮਾਨੁਸ੍ਸੀ ਰਤਿ ਹੋਤਿ, ਸਮ੍ਮਾਧਮ੍ਮਂ ਵਿਪਸ੍ਸਤੋ.
ਯਤੋਯਤੋ ¶ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;
ਲਭਤਿ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤਂ.
ਇਚ੍ਚੁਤ੍ਤਂ ਧਮ੍ਮਪਾਮੋਜ੍ਜਂ, ਵਿਵੇਕਜਂ ਰਸਾਧਿਕਂ;
ਇਚ੍ਛਨ੍ਤੋ ਸੀਲਵਾ ਭਿਕ੍ਖੁ, ਅਨਿਵਤ੍ਤਿਤ ਵੀਰਿਯੋ.
ਵਨਾ ਵਾਸੇ ਵਸਿਤ੍ਵਾਨ, ਅਪ੍ਪਿਚ੍ਛਾਦਿਗੁਣਾਵਹੋ;
ਪਲਿ ਬੋਧੇ ਸਮੁਚ੍ਛਿਜ੍ਜ, ਭਾਵੇਯ੍ਯੇਵਂਰਹੋਗਤੋ.
ਕਾਯੇ ¶ ਜੇਗੁਚ੍ਛਪੁਞ੍ਜਾਨਿ, ਰੂਪਂ ਰੁਪ੍ਪਨਭਾਵਤੋ;
ਤਸ੍ਸਿਤਾ ਵੇਦਨਾ ਸਞ੍ਞਾ, ਸਙ੍ਖਾਰਾਚ ਤਤੋਪਰੇ.
ਵਿਞ੍ਞਾਣਞ੍ਚ ਇਮੇਪਞ੍ਚ, ਖਨ੍ਧਾ ਰਾਸਤ੍ਥਤੋ ਮਤਾ;
ਤੇਚਾਨਿਚ੍ਚ ਦੁਕ੍ਖਾ ਨਤ੍ਤਾ, ਉਪਾਦਾ ਵਯਧਮ੍ਮਿਨੋ.
ਫੇਣਪਿਣ੍ਡੂ ¶ ਪਮਂ ਰੂਪਂ, ਵੇਦਨਾ ਪੁਪ੍ਫੁਲ਼ੂਪਮਾ;
ਮਰੀਚਿਕੂਪਮਾ ਸਞ੍ਞਾ, ਸਙ੍ਖਾਰਾ ਕਦਲੂਪਮਾ.
ਮਾਯੂਪਮਨ੍ਤਿ ਵਿਞ੍ਞਾਣਂ, ਦਸ੍ਸਿਤੇ ਸਬ੍ਬ ਦਸ੍ਸਿਨਾ;
ਉਪਮਾਹਿ ਸਮਸ੍ਸੇ ਯ੍ਯ, ਪਞ੍ਚਕ੍ਖਨ੍ਧੇ ਅਸਾਰਕੇ.
ਯਾਵ ¶ ਬ੍ਯਾਤਿ ਨਿਮ੍ਮਿਸ੍ਸਤਿ,
ਕੋਟਿਲਕ੍ਖਾਤਹਿਂਖਣੇ;
ਖਨ੍ਧਾ ਭਿਜ੍ਜਨ੍ਤਿ ਹੁਤ੍ਵਾਨ,
ਅਨਿਚ੍ਚਾਨਾਮ ਤੇ ਤਤੋ.
ਭਯ ਪੀਲ਼ਿਤਤੋ ਦੁਕ੍ਖਾ, ਅਨਤ੍ਤਾ ਅਵਿਧੇਯ੍ਯਤੋ;
ਖਨ੍ਧਾਵ ਹੋਨ੍ਤਿ ਭਿਜ੍ਜਨ੍ਤਿ, ਅਞ੍ਞੋ ਕੋਚਿ ਨਲਬ੍ਭਤਿ.
ਖਨ੍ਧਾ ¶ ਨਿਚ੍ਚਾ ਖਯਟ੍ਠੇਨ, ਭਯਟ੍ਠੇਨ ਦੁਖਾਚਤੇ;
ਅਨਤ੍ਤਾ ਸਾਰਕਟ੍ਠੇਨ, ਇਤਿ ਪਸ੍ਸੇ ਪੁਨਪ੍ਪੁਨਂ.
ਭਾਣੂਦਯੇ ਕਯਂ ਏਨ੍ਤਿ, ਹੇਮਨ੍ਤੇ ਪਤਿਤੁਸ੍ਸਵਾ;
ਰਾਗਾ ਮਾਨਾਚ ਸਬ੍ਬੇਵਂ, ਸਤ੍ਯਾ ਨਿਚ੍ਚਾਨੁਪਸ੍ਸਨੇ.
ਸੀਹਨਾਦਂ ¶ ਵਨੇਸੁਤ੍ਵਾ, ਸਂਵੇਜੇਨ੍ਤਿ ਸਸੋਤਕਾ;
ਵੇਹਪ੍ਫਲਾਪਿ ਲੋਕੇਵਂ, ਜਿਨੇਰਿਤ ਤਿਲਕ੍ਖਣਂ.
ਵੇਦਨਾਦੀਨਿ ¶ ਨਾਮਾਨਿ, ਨਾਮਰੂਪਦ੍ਵਯਂਵ ਤੇ;
ਤਣ੍ਹਾਵਿਜ੍ਜਾਚ ਕਮ੍ਮਾਦਿ, ਨਾਮਰੂਪਸ੍ਸ ਪਚ੍ਚਯਾ.
ਨਾਮਰੂਪਂ ਪਰਿਗ੍ਗਯ੍ਹ, ਤਤੋ ਤਸ੍ਸਚ ਪਚ੍ਚਯਂ;
ਹੁਤ੍ਵਾ ਅਭਾਵਤੋ ਨਿਚ੍ਚਾ, ਉਦਯਬ੍ਬਯ ਪੀਲ਼ਨਾ.
ਦੁਕ੍ਖਾ ਅਵਸਵਤ੍ਤਿਤ੍ਤਾ, ਅਨਤ੍ਤਾਤਿਤਿਲਕ੍ਖਣਂ;
ਆਰੋਪੇਤ੍ਵਾਵ ਸਙ੍ਖਾਰੇ, ਸਮ੍ਮਸਨ੍ਤੋ ਪੁਨਪ੍ਪੁਨਂ.
ਪਾਪੁਣੇਯ੍ਯਾ ¶ ਨੁਪੁਬ੍ਬੇਨ,
ਸਬ੍ਬਸਂਯੋਜਨ ਕ੍ਖਯਂ;
ਤਮ੍ਪਤ੍ਤੋ ਅਰਹਾ ਭਿਕ੍ਖੁ,
ਭਵਤਿਣ੍ਣੋ ਸੁਨਿਬ੍ਬੁਤੋ.
ਨਤੁਮ੍ਹਂ ¶ ਭਿਕ੍ਖਵੇ ਰੂਪਂ, ਤਂ ਜਹੇਥਾਤਿ ਵੁਤ੍ਤਤੋ;
ਮੇਮੇਤਨ੍ਤਿ ਉਪਾਦਾਨਂ, ਪਞ੍ਚਕ੍ਖਨ੍ਧੇ ਵਿਨਾਸਯੇ.
ਪੁਤ੍ਤਾ ਮਤ੍ਥਿ ਧਨਾ ਮਤ੍ਥਿ, ਇਤਿ ਬਾਲੋ ਵਿਹਞ੍ਞਤਿ;
ਅਤ੍ਤਾਪਿ ਅਤ੍ਤਨੋ ਨਤ੍ਥਿ, ਕੁਤੋਪੁਤ੍ਤੋਕੁਤੋਧਨਂ.
ਇਚ੍ਚੁਤ੍ਤ ਮਨੁਚਿਨ੍ਤਾਯ, ਅਤ੍ਤਾਤਿ ਅਤ੍ਥਿਮੇਤਿਵਾ;
ਸਞ੍ਞਂ ਨਾਸੇਯ੍ਯ ਖਨ੍ਧਾਵ, ਅਤ੍ਥੀਤਿ ਆਭੁਜੇ ਬੁਧੋ.
ਖਨ੍ਧਨਾਸ ¶ ਮਨਾਭੁਜ੍ਜ, ਮਤੋ ਮੇ ਪੁਤ੍ਤਕੋ ਇਤਿ;
ਸੋਚਨ੍ਤਿ ਪਰਿਦੇਵਨ੍ਤਿ ਪੁਤ੍ਤੋਨਤ੍ਥਿ ਨਸੋਮਤੋ.
ਭਿਜ੍ਜਮਾਨੇਸੁ ¶ ਖਨ੍ਧੇਸੁ, ਅਤ੍ਤਸਞ੍ਞੀ ਅਨਤ੍ਤੇਸੁ;
ਨਾਦਿਕਾਲ ਵਿਪਰਿਤਾ, ਮਹਾਜਾਨੀਯਤਂ ਗਤਾ.
ਭਿਜ੍ਜਮਾਨੇਸੁ ਖਨ੍ਧੇਸੁ, ਲਗ੍ਗਾ ਰਤ੍ਤਾ ਮਮਾਯਿਤਾ;
ਨਾਰੀਪੁਮਾਦਿ ਸਞ੍ਞਾਯ, ਵਿਪਰੇਤਾ ਅਨਾਦਿਕੇ.
ਨਾਦਿਕਾਲ ¶ ਵਿਪਰਿਤੋ, ਅਤ੍ਤਸਞ੍ਞੀ ਅਨਤ੍ਤਨਿ;
ਭਿਜ੍ਜਮਾਨੇਸੁ ਖਨ੍ਧੇਸੁ, ਜਹ ਤ੍ਤਾਤਿ ਮਮਾਯਨਂ.
ਅਭਿਣ੍ਹੁਪ੍ਪਤ੍ਤਿਯਾਯੇਵ, ਭਿਜ੍ਜਮਾਨੋ ਨਞ੍ਞਯਤਿ;
ਅਨਿਚ੍ਚਲਕ੍ਖਣਂ ਛਨ੍ਨਂ, ਤਂ ਚਿਨ੍ਤੇਯ੍ਯ ਸੁਪਞ੍ਞਵਾ.
ਅਸਨ੍ਤੇਯੇਵ ¶ ਲਗ੍ਗਨ੍ਤਾ, ਨਮੁਚ੍ਚਨ੍ਤਿ ਭਵਤ੍ਤਯਾ;
ਨਤ੍ਥਿ ਸਨ੍ਤੇਸੁ ਲਗ੍ਗਨ੍ਤਾ, ਰੂਪਕ੍ਖਨ੍ਧਾ ਦਿਕੇ ਸ੍ਵਿਧ.
ਤਣ੍ਹਾ ਗਿਜ੍ਝਤਿ ਮੇਤਨ੍ਤਿ, ਮਾਨੋ ਅਹਨ੍ਤਿ ਮਞ੍ਞਤਿ;
ਦਿਟ੍ਠਿ ਗਣ੍ਹਾਤਿ ਅਤ੍ਤਾਤਿ, ਏਤੇ ਪਪਞ੍ਚਕਾ ਤਯੋ.
ਮਮੇ ¶ ਤ ਮਹ ਮਤ੍ਤਾਤਿ, ਪਪਞ੍ਚਾਨਂ ਵਸਾਨੁਗੋ;
ਗਣ੍ਹਨ੍ਤੋ ਭਵ ਪਙ੍ਕਮ੍ਹਿ, ਨਿਮ੍ਮੁਗ੍ਗੋਵ ਭਯਾਨਕੇ.
ਨਮੇ ਨਾਹਂ ਨਅਤ੍ਤਾਤਿ, ਏਤੇਹਿ ਵਿਵਦਂ ਕਰੇ;
ਵਿਵਦਨ੍ਤਾਵ ਮੁਚ੍ਚਨ੍ਤਿ, ਭਵਪਙ੍ਕਾ ਭਯਾਨਕਾ.
ਨਮੇ ¶ ਨਾਹਂ ਨਅਤ੍ਤਾਤਿ, ਦਟ੍ਠਬ੍ਬਨ੍ਤਿ ਜਿਨੇਰਿਤਂ;
ਤਥੇਵ ਸਬ੍ਬਦਾ ਮਞ੍ਞੇ, ਮਾ ਪਪਞ੍ਚ ਵਸਾਨੁਗੋ.
ਲੋਕੋ ਵਿਵਦਿ ਬੁਦ੍ਧੇਨ, ਨਲੋਕੇਨ ਕਦਾਚਿਸੋ;
ਅਨਤ੍ਤਾਤਿ ਜਿਨੁਦ੍ਦਿਟ੍ਠਂ, ਲੋਕੋ ਅਤ੍ਤਾਤਿ ਮਞ੍ਞਤਿ.
ਮੋ ¶ ਲੋਕੇਨ ਸਮੋ ਹੋਤੁ,
ਤਸ੍ਸਮੋ ਕਿਂਤਦੁਤ੍ਤਰੇ;
ਅਨ੍ਧਿਭੂਤੋ ਅਯਂਲੋਕੋ,
ਸਮ੍ਬੁਦ੍ਧਸ੍ਸ ਵਿਰੋਧਿਕੋ.
ਸਮ੍ਬੁਦ੍ਧਸ੍ਸ ਵਸਂ ਨ੍ਵੇਤੁ, ਸਨ੍ਝਾਦਿ ਭਯਤਜ੍ਜਿਤੋ;
ਤਬ੍ਬਸਂਯੇਵ ਅਨ੍ਵੇਨ੍ਤੋ, ਭਵਤਿਣ੍ਣੋ ਭਵਿਸ੍ਸਤਿ.
ਅਨਤ੍ਤਾਤਿ ¶ ਗਿਰਾ ਸਚ੍ਚਾ, ਅਤ੍ਤਾਤਿ ਵਚਨਂ ਮੁਸਾ;
ਮੁਸਾਯ ਵਿਵਦੇ ਲੋਕੋ, ਬੁਦ੍ਧੇਨ ਸਚ੍ਚ ਵਾਦਿਨਾ.
ਤੁਰਙ੍ਗਵਜਗਾਮਮ੍ਹਾ, ਪੁਰਿਮੇ ਚਮਕ੍ਯ ਕਾਨਨੇ;
ਵਸਤਾ ਅਗ੍ਗਧਮ੍ਮੇਨ, ਥੇਰੇਨ ਰਚਿਤੋ ਅਯਂ.
ਅਰਿਮਤ੍ਤੇਯ੍ਯ ਬੁਦ੍ਧਸ੍ਸ,
ਧਮ੍ਮ ਸ੍ਸੁਤਕ੍ਖਣੇ ਭਵੇ;
ਖੀਣਾਸਵੋ ਮਹਾਪਞ੍ਞੋ,
ਪੁਞ੍ਞੇਨ ਤੇਨ ਸਾਵਕੋਤਿ.
ਕਾਯਪਚ੍ਚਵੇਕ੍ਖਣਾ
ਨਾਦਿਕਾਲ ¶ ਵਿਪਰਿਤ, ਜਨ ਭੂਤਤ੍ਥ ਦਸ੍ਸਿਨੋ;
ਦਾਤੁਮੇ ਕਨ੍ਤਿਕਸ੍ਸਾਦਂ, ਸਤ੍ਥੁ ਪਾਦੋ ਤਿਮਾਨਿਤੋ.
ਸੀਸੇ ¶ ਪਿਲਨ੍ਦਿਯਾ ਮੋਦੀ, ਸਮ੍ਬੁਦ੍ਧ ਚਰਣ ਮ੍ਬੁਜਂ;
ਸਾਧੁ ਤੁਟ੍ਠਿਕਰਂ ਬ੍ਰੂਮਿ, ਸੁਕਾਯ ਪਚ੍ਚਵੇਕ੍ਖਣਂ.
ਯੋਨਿਸੋ ਮਨਸੀਕਤ੍ਵਾ, ਨਾਦਾ ਵਿਰੁਦ੍ਧ ਮਞ੍ਞਿਤਂ;
ਸਾਧਵੋ ਤ ਮੁਦਿਕ੍ਖਨ੍ਤੁ, ਮਯਾਪਿ ਮਨ੍ਦਬੁਦ੍ਧਿਨੋ.
ਇਚ੍ਛਿਤਬ੍ਬਾਨ ¶ ਮਾਯਤ੍ਤਾ, ਤੇਸਞ੍ਚ ਚਯਭਾਵਤੋ;
ਤਦਾਕਾਰੇਨ ਵਤ੍ਤਿਤਾ, ਕਾਯੋ ਜੇਗੁਚ੍ਛ ਪੁਞ੍ਜਕੋ.
ਪੁਨਪ੍ਪੁਨਂਵ ਓਕ੍ਕਮ, ਞਾਣ ਮਨ੍ਤੋ ਪਵੇਸਿਯ;
ਬਾਹਿਰਂਵ ਅਨਾਲਮ੍ਬ, ਇਕ੍ਖਣਾ ਪਚ੍ਚਵੇਕ੍ਖਣਾ.
ਮਂਸਚ੍ਛਨ੍ਨ ¶ ਟ੍ਠਿਰੂਪੇਵ, ਮਨੋਜ ਵਾਯੁ ਚਾਲਿਤੇ;
ਨਾਰੀ ਗਤਾਤਿ ਯਾਚਿਨ੍ਤਾ, ਨੇਵ ਸਾਪਚ੍ਚਵੇਕ੍ਖਣਾ.
ਸਞ੍ਞਾਦਿਟ੍ਠਿਚ ਚਿਤ੍ਤਞ੍ਚ, ਵਿਪਲ੍ਲਾਸਾ ਇਮੇਤਯੋ;
ਤ ਦਾਕਾਰੇਨ ਵਤ੍ਤਨ੍ਤਿ, ਅਵਿਜ੍ਜੋ ਤ੍ਥਰਿਤਾ ਭੁਸਂ.
ਆਸਾ ¶ ਵਿਪਰਿਤੇ ਯੇਸਂ,
ਵਿਪਲ੍ਲਾਸਾਤਿ ਤੇਮਤਾ;
ਆਸਾ ਆਸਿਸਨਾ ਵੁਤ੍ਤਾ,
ਤਣ੍ਹਾਯੇਵ ਸਭਾਵਤੋ.
ਅਸੁਭੇਵ ਸੁਭਮਿਤਿ, ਅਨਿਚ੍ਚੇਏਵ ਨਿਚ੍ਚਤੋ;
ਦੁਕ੍ਖੇਯੇਵ ਸੁਖਂਵਾਤਿ, ਅਨਤ੍ਤਨਿਵ ਅਤ੍ਤਤੋ.
ਸਞ੍ਞਾਣਂ ਦਸ੍ਸਨਂ ਚਿਨ੍ਤਾ,
ਦ੍ਵਾਦਸਾ ਕਾਰਤੋ ਤਯੋ;
ਦਿਟ੍ਠਿਸਾ ਚਾਦਿ ਮਗ੍ਗੇਨ,
ਸੇਸਾ ਸੇਸੇਹਿ ਵਜ੍ਝਿਤਾ.
ਤਣ੍ਹਾ ¶ ਤਸ੍ਸਿ ਮਮੇਤਨ੍ਤਿ, ਮਾਨੋ ਮਞ੍ਞਿ ਅਹਨ੍ਤਿਚ;
ਯਸ੍ਸਿ ਦਿਟ੍ਠਿਚ ਅਤ੍ਤਾਤਿ, ਪਪਞ੍ਚਾ ਨਾਮਿਮੇ ਤਯੋ.
ਪਪਞ੍ਚਨ੍ਤਿ ਸਂਸਾਰਂ, ਤਸ੍ਮਾ ਪਪਞ੍ਚਨਾਮਕਾ;
ਭਵਯਨ੍ਤੇ ਪਯੋਜੇਨ੍ਤਾ, ਮੋਕ੍ਖਂ ਨਾਦਂਸੁ ਤੇ ਚਿਰਂ.
ਭਵਪਙ੍ਕੇ ਨਿ ਮੁਜ੍ਜਨ੍ਤਾ, ਪਪਞ੍ਚਾਨਂ ਵਸਾਨੁਗਾ;
ਚਿਰਸ੍ਸਂ ਦੁਕ੍ਖਿਤਾ ਹੋਨ੍ਤਿ, ਆਰਾ ਨਿਬ੍ਬਾਨਤੋ ਤਿਵ.
ਨਮੇ ¶ ਨਾਹਂ ਨਅਤ੍ਤਾਤਿ, ਏਤੇਹਿ ਵਿਵਦਂ ਕਰੇ;
ਭਣ੍ਡਨ੍ਤਾ ਵਿਵਦਨ੍ਤਾ ਤੇ, ਨਿਬ੍ਬਾਨਤੋ ਅਦੂਰਿਨੋ.
ਵਿਪਲ੍ਲਾਸੇ ਪਪਞ੍ਚੇਚ, ਦ੍ਵੇਪਿਏਤੇ ਪਹਾਤਵੇ;
ਸੋਪਚ੍ਚਵੇਕ੍ਖਿਤਬ੍ਬੇ ਵਂ, ਕਾਯੋ ਜੇਗੁਚ੍ਛਪੁਞ੍ਜਕੋ.
ਕੇਸਾ ¶ ਲੋਮਾ ਨਖਾਦਨ੍ਤਾ,
ਤਣ੍ਹਾਯਾਪਿਚ ਗੋਚਰਾ;
ਤਸ੍ਮਾ ਤੇ ਦਟ੍ਠੁਕਾਮੇਨ,
ਤਣ੍ਹਾ ਨਿਵਾਰਿਤਾ ਸਦਾ.
ਲਗ੍ਗਿਕਾ ਛਵਿਯਂਯੇਵ, ਤਣ੍ਹਾ ਬਾਹਿਰਗੋਚਰਾ;
ਤਸ੍ਮਾ ਏਤ੍ਥ ਤਚੋਵਾਹ, ਸਮ੍ਬੁਦ੍ਧੋ ਨ ਬਹਿਚ੍ਛਵਿਂ.
ਏਸਾ ¶ ਤਚਪਰਿਯਨ੍ਤ, ਪਦੇਨਾਪਿ ਨਿਵਾਰਿਤਾ;
ਅਤੋ ਛਵਿ ਮਨਾਲਮ੍ਬ, ਤਚਸੀਵ ਮਨੇਕਰੇ.
ਜਿਗੁਚ੍ਛਿਤਾਨਿ ਛਾਦੇਤਿ, ਅਟ੍ਠਿ ਮਂਸ ਤਚਾਦਿਨਿ;
ਞਾਣੇਨ ਛਿਨ੍ਦਿ ਤਬ੍ਬਾਚ, ਤਸ੍ਮਾ ਛਵੀਤਿ ਵੁਚ੍ਚਤਿ.
ਛਵਿਂ ¶ ਛੇਤ੍ਵਾ ਤਚਂ ਪਸ੍ਸੇ,
ਤਂ ਛੇਤ੍ਵਾ ਮਂਸਕਾਦਯੋ;
ਗਬ੍ਭੇਵਤ੍ਥੂਨਿ ਦੀਪੇਨ,
ਯਥਾ ਪਞ੍ਞਾਪਦੀਪਿਕੋ.
ਜੇਗੁਚ੍ਛੋ ਛਵਿਯਾ ਕਾਯੋ,
ਅਸੁਭੋਵ ਸੁਭਾਯਤੇ;
ਨਿਚ੍ਛਵਾ ਤਚਮਤ੍ਤੇਨ,
ਕਥਂ ਸੁਭਾਯਤੇ ਅਯਂ.
ਨ੍ਹਾਰੁਬਨ੍ਧੋ ¶ ਟ੍ਠਿਸਙ੍ਘਾਤੋ, ਮਂਸਲੋਹਿ ਤ ਲਿਮ੍ਪਿਤੋ;
ਛਵਿਯਾਵ ਵਿਮੋਹੇਤਿ, ਤਚਚ੍ਛਨ੍ਨੋ ਇਮਂ ਪਜਂ.
ਵਣ੍ਣ ਸਣ੍ਠਾਨ ਤੋਚੇਵ,
ਗਨ੍ਧੋ ਕਾਸਾ ਸਯੇਹਿਚ;
ਜੇਗੁਚ੍ਛਾ ਪਟਿਕੁਲ੍ਯਾਚ,
ਕੇਸਾਨਾਮ ਨ ਮੇਪਿਯਾ.
ਏਕੇਕਂ ¶ ਮਨਸੀਕਤ੍ਵਾ, ਨਯੇ ਨਿਚ੍ਚੇਵ ਮਾਦਿਨਾ;
ਭਾਵੇਤਬ੍ਬਾ ਸਮਾਰਮ੍ਭ, ਯਥਾਪਞ੍ਞਾਯਤੇ ਤਥਾ.
ਪੂਰਿਤਂ ਮਤ੍ਥਲੁਙ੍ਗਸ੍ਸ, ਸੀਸਟ੍ਠਿਪਿ ਜਿਗੁਚ੍ਛਿਤਂ;
ਮੁਖ ਨਾਸਕ੍ਖਿ ਕਣ੍ਣਾਦਿ, ਛਿਦ੍ਦਾ ਵਛਿਦ੍ਦ ਦੁਦ੍ਦਸਂ.
ਪੂਤਿ ¶ ਵਾਯੁ ਵਿਚਰਿਤ, ਕੁਚ੍ਛਿਟ੍ਠਨ੍ਤਾਨਿ ਲੋਹਿਤਂ;
ਪਿਤ੍ਤਂ ਸੇਮ੍ਹਞ੍ਚ ਪਪ੍ਫਾਸਂ, ਹਦਯਂ ਯਕਨਮ੍ਪਿ ਧੀ.
ਅਨ੍ਨ ਪਾਨਂ ਮਨੁਞ੍ਞਮ੍ਪਿ, ਖੇਲ਼ ਤਿਨ੍ਤ ਮਧੋਪਰਿ;
ਦਨ੍ਤੇਹਿ ਪਿਸਿਤਂ ਸ੍ਵਾਨ, ਵਮਥੂਵ ਜਿਗੁਚ੍ਛਿਤਂ.
ਯਾਵਤਾਯੁ ¶ ਅਧੋਤੇਵਾ, ਮਾਸਯੇ ਗਿਲਿਤਂ ਠਿਤਂ;
ਕਿਮਿਕੂਲ ਸਮਾਕਿਣ੍ਣੇ, ਤਹਿਮੇਵਾ ਸਿਤਾਸਿਤਂ.
ਏਤਂ ਉਦਰਿਯਂ ਨਾਮ, ਤਮ੍ਹਾ ਪਕ੍ਕਾਸਯਂ ਗਤਂ;
ਦਿਨਚ੍ਚਯੇ ਕਰੀਸਨ੍ਤਂ, ਸਾ ਸਯਂ ਤਂਦ੍ਵਯਮ੍ਪਿ ਧੀ.
ਪਕਾਸੇਤ੍ਵਾ ¶ ਪਵੇਸੇਤਿ, ਅਨ੍ਨਪਾਨਂ ਮਹਾਰਹਂ;
ਪਟਿਚ੍ਛਨ੍ਨੋ ਨਿਹਰਤਿ, ਤਮੇਵ ਨ੍ਤੋ ਠਿਤਂ ਜਨੋ.
ਪਵੇਸੇ ਤਂ ਪਰਿਵਤੋ,
ਨਿਹਰੇਕੋ ਰਹੋ ਲਿਨੋ;
ਮਨੁਞ੍ਞਂਵ ਪਵੀਸਨ੍ਤੇ,
ਨਿਕ੍ਖਮਨ੍ਤੇ ਜਿਗੁਚ੍ਛਿਤਂ.
ਜੇਗੁਚ੍ਛ ¶ ਪਟਿਕੁਲ੍ਯਾਨਿ, ਮਂਸਨ੍ਹਾਰੁ ਤਚਟ੍ਠਿਨਿ;
ਨਪਿਯਾਨਿ ਨ ਤੁਟ੍ਠਾਨਿ, ਨੇਵਇਤ੍ਥੀ ਨਪੂਪਿਸੋ.
ਹਤ੍ਥ ਪਾਦ ਮੁਖਾਦੀਨਿ,
ਨਤ੍ਥਞ੍ਞਾਨਿ ਜਿਗੁਚ੍ਛਿਤਾ;
ਤਤ੍ਥਾ ਕੁਮਾਰਿਕਾ ਕਞ੍ਞਾ,
ਮੋਹੇਨ ਅਤ੍ਥਿਸਞ੍ਞਿਤਾ.
ਪਚ੍ਚੇਕਂ ¶ ਵਿਨਿਭੁਤ੍ਤੇਸ, ਕੇਸ ਲੋਮ ਨਖਾਦਿਸੁ;
ਨਤ੍ਥਿਕਞ੍ਞਾ ਕੁਮਾਰੀਵਾ, ਸਮ੍ਪਿਣ੍ਡਿਤੇਸੁ ਸਾ ਕੁਤੋ.
ਆਕਾਸੋਯੇਵ ¶ ਕਾਯਾਙ੍ਖ੍ਯੋ,
ਤਚਾਦਿ ਪਰਿਵਾਰਿਤੋ;
ਤਥਾਸੀਸਂ ਮੁਖਂਹਤ੍ਥੋ,
ਪਾਦੋਰੁ ਕਟਿਆਦਯੋ.
ਥਮ੍ਭਾਦੀਸ੍ਵਿਵ ਗੇਹੋਤਿ,
ਪਿਣ੍ਡਿਤੇ ਸ੍ਵੇਸੁ ਸਮ੍ਮੁਤਿ;
ਕਾਯੋਤਿ ਇਤ੍ਥਿਪੋਸੋਤਿ,
ਸਂਮੁਲ਼੍ਹੋ ਤਾਯਰਜ੍ਜਤਿ.
ਸਨ੍ਤਂ ¶ ਚਿਨ੍ਤੇਯ੍ਯ ਨਾਸਨ੍ਤਂ, ਸਨ੍ਤਂ ਚਿਨ੍ਤਯਤੋ ਸੁਖਂ;
ਅਸਨ੍ਤਂ ਅਨੁਚਿਨ੍ਤੇਨ੍ਤੋ, ਨਾਨਾਦੁਕ੍ਖੇਹਿ ਤਪ੍ਪਤਿ.
ਜਵਤ੍ਯਾ ਵਿਜ੍ਜਮਾਨੇਵ, ਨਾਵਿਜ੍ਜਾ ਵਿਜ੍ਜਮਾਨਕੇ;
ਤਸ੍ਮਾਤਂਨਾਮਕੋ ਮੋਹੋ, ਤਣ੍ਹਾਪਿਚ ਤਦਨ੍ਵਿਤਾ.
ਪੁਂਕਾਯੋਵਾਥੀਕਾਯੋਵਾ ¶ , ਮਲਾਸੁਚਿਜਿਗੁਚ੍ਛਿਤੋ;
ਤਸ੍ਸਮਂ ਨਤ੍ਥਿਗਾਰਯ੍ਹਂ, ਯ੍ਵਾਮਲਮ੍ਪਿ ਮਲਂਕਰੇ.
ਨਤ੍ਥਿ ¶ ਕਾਯਸਮੋਵੇਰੀ,
ਮਹਾਨਤ੍ਥਕਰੋ ਚੀਰਂ;
ਨਤ੍ਥਿ ਕਾਯਸਮੋ ਵਞ੍ਚੋ,
ਅਸੁਭੋਵ ਸੁਭਾਯਤੇ.
ਥੀਪੁਂ ਸਪਰਕਾਯੋਤਿ, ਪਸ੍ਸਤਿਪਿ ਨਪਸ੍ਸਤਿ;
ਜੇਗੁਚ੍ਛ ਪਟਿਕੁਲ੍ਯੋਤਿ, ਸਮ੍ਮਾ ਪਸ੍ਸਤਿ ਪਸ੍ਸਤਿ.
ਸੁਭੋਸੁਭੋਤਿ ¶ ਮਞ੍ਞਨ੍ਤਾ,
ਧੀਤਿ ਧੀਤਿ ਜਿਨੇਰਿਤੇ;
ਲੋਕਾਲੋਕਾ ਨਧੀਯੇਸਂ,
ਭਵਾ ਭਵਾ ਵਚਾਰਿਨੋ.
ਭਿਯ੍ਯੋਭਿਯ੍ਯੋਵ ਰਾਗਗ੍ਗਿ,
ਸੁਭੋਸੁਭੋਤਿਪਸ੍ਸਤੋ;
ਮਨ੍ਦੋਮਨ੍ਦੋਵ ਸੋਅਗ੍ਗਿ,
ਧੀਵਧੀਵਵਿਪਸ੍ਸਤੋ.
ਬਹੁਸ੍ਸੁਤੋਪਿ ¶ ਬਾਲੋਵ, ਅਸੁਭੇ ਸੁਭਮਞ੍ਞਕੋ;
ਅਸੁਭੋਤਿ ਵਿਪਸ੍ਸਨ੍ਤੋ, ਅਪ੍ਪਸ੍ਸੁਤੋਪਿਪਣ੍ਡਿਤੋ.
ਯੋਚ ਸਿਪ੍ਪਾਨਿ ਜਾਨੇਯ੍ਯ, ਸਤਾਨਿ ਸਹਸ੍ਸਾਨਿਪਿ;
ਕਾਯੇਕਜਾਨਨਂ ਸੇਯ੍ਯੋ, ਯਞ੍ਚੇ ਅਞ੍ਞ ਵਿਜਾਨਂਨਂ.
ਕਾਯਮੇਕਮ੍ਪਿ ¶ ਨਞ੍ਞਾਮਿ, ਬੁਦ੍ਧਾਲਦ੍ਧਨਯੋ ਅਪਿ;
ਸੁਤਾਚ ਪਣ੍ਡਿਤਾਤ੍ਯਮ੍ਹਾ, ਯੁਤ੍ਤੋਯੇਵਾ ਤਿਲਜ੍ਜਿਤੁਂ.
ਸੁਭਤੋਯੇਵ ਮਞ੍ਞਾਮਿ, ਏਵਂ ਜਿਗੁਚ੍ਛਿਤਮ੍ਪਿਨਂ;
ਮਞ੍ਚ ਞੇ ਪਣ੍ਡਿਤੋ ਤ੍ਯਾਹੁ, ਅਲਮੇਵਾਤਿਲਜ੍ਜਿਤੁਂ.
ਕਾਯੇ ¶ ਅਸੁਭਸਞ੍ਞਂਯੋ, ਨਲਭਾਮਿ ਕਦਾਚਿਪਿ;
ਸੁਲਦ੍ਧ ਸੁਗਤੋ ਵਾਦੋ, ਸ੍ਵਾਰਹੋਵਾਤਿਲਜ੍ਜਿਤੁਂ.
ਕਾਯੇਨ ਸਂਸਰਨ੍ਤੋਪਿ, ਤਦਾਕਾਰਂ ਯਥਾਤਥਂ;
ਭਵੇਭਵੇ ਅਜਾਨਨ੍ਤੋ, ਮਮਾਯਿਤ੍ਵਾਵ ਤਂ ਚਜਿਂ.
ਕਾਯੇਨ ¶ ਸਂਸਰਨ੍ਤੋਪਿ, ਨਞ੍ਞਾ ਕਾਯ ਜਿਗੁਚ੍ਚਤਂ;
ਨਿਚ੍ਚੁਪਾਦਾ ਮਮਾਯਨ੍ਤੋ, ਪਿਯਾਯਿਤ੍ਵਾਵ ਤਂ ਚਜਿਂ.
ਕੁਭਾਰਂ ਸਾਰਸਞ੍ਞਾਯ, ਪਿਯਾਯਿਤ੍ਵਾਵ ਹਿਂਸਕਂ;
ਅਨਨ੍ਤਦੁਕ੍ਖ ਮਾਪਾਦਿਂ, ਵਿਪਲ੍ਲਾਸੋ ਭਵੇਭਵੇ.
ਮਹਾਜਾਨੀਯ ¶ ਪਤ੍ਤੋਤਿ, ਸਂਵੇਜੇਤ੍ਵਾ ਸਕਂਮਨਂ;
ਦਿਰੋਕਤ ਜਿਨੋਵਾਦੋ, ਅਨਿਵਤ੍ਤਿਤ ਵੀਰਿਯੋ.
ਅਦਿਟ੍ਠਪੁਬ੍ਬ ਮੇਤਸ੍ਸ, ਤਥਾਕਾਰਂਵ ਪਸ੍ਸਤੁ;
ਕਿਚ੍ਚ ਮਞ੍ਞ ਮੁਪੇਕ੍ਖਾਯ, ਸਂਸਾਰ ਭਯ ਭੀਰੁਕੋ.
ਯਞ੍ਹਿਕਿਚ੍ਚਂ ¶ ਅਪਵਿਟ੍ਠਂ, ਅਕਿਚ੍ਚਂ ਪਨ ਕਯਿਰਾ;
ਉਨ੍ਨਲ਼ਾਨਂ ਪਮਤ੍ਤਾਨਂ, ਤੇਸਂ ਵਡ੍ਢਨ੍ਤਿ ਆਸਵਾ.
ਯੇਸਞ੍ਚ ਸੁਸਮਾਰਦ੍ਧਾ, ਨਿਚ੍ਚਂ ਕਾਯਗਤਾ ਸਤਿ;
ਅਕਿਚ੍ਚਂ ਤੇ ਨਸੇਵਨ੍ਤਿ, ਕਿਚ੍ਚੇ ਸਾਤਤ ਕਾਰਿਨੋ;
ਸਤਾਨਂ ਸਮ੍ਪਜਾਨਾਨਂ, ਅਤ੍ਥਂ ਗਚ੍ਛਨ੍ਤਿ ਆਸਵਾਤਿ.
ਥੋਮੇਨ੍ਤਾ ¶ ਸੋਣ੍ਣਂ ਕਾਯੋਰ,
ਮੁਖਕ੍ਖਿ ਤ੍ਯਾਦਿਨਾ ਇਮਂ;
ਰਤ੍ਤੇ ਮੁਟ੍ਠੇ ਕਰੋਨ੍ਤੇਤੇ,
ਅਞ੍ਞੇਜਨੇ ਸਯਂਵਿਯ.
ਕਾਯਸੋਭ੍ਯ ਪਕਾਸੇਤਾ,
ਵਾਚਾ ਵੇ ਮਾਰਦੇਸਨਾ;
ਤਦਸੋਭ੍ਯ ਪਕਾਸੇਤਾ,
ਵਾਚਾ ਸਮ੍ਮੁਦ੍ਧ ਦੇਸਨਾ.
ਅਸੁਭੋਤਿ ¶ ਜਿਨੁਦ੍ਦਿਟ੍ਠਂ, ਕਾਯਂ ਸੁਭੋਤਿ ਗਾਹਿਨੋ;
ਸਂਮੁਲ਼੍ਹਾਤੇ ਨ ਮੁਚ੍ਚਨ੍ਤਿ, ਭਵਾ ਬੁਦ੍ਧ ਵਿਰੋਧਿਨੋ.
ਅਸੁਭੋਤਿ ਜਿਨੁਦ੍ਦਿਟ੍ਠਂ, ਕਾਯਂ ਤਥੇਵ ਗਾਹਿਨੋ;
ਪਣ੍ਡਿਤਾ ਤੇਵ ਮੁਚ੍ਚਨ੍ਤਿ, ਭਵਾ ਬੁਦ੍ਧਮਤਾਨੁਗਾ.
ਸੋਧੇਨ੍ਤੇਲਙ੍ਕਰੋਨ੍ਤੇਵ ¶ , ਮਲਾਸਵਨ੍ਤਿਕਾਯਤੋ;
ਅਲਂ ਕਾਯਵਿਸੋਧੇਨ, ਬਾਲੋਵ ਤਂ ਗਰੁਂ ਕਰੋ.
ਗੋਪੇਨ੍ਤੇਵ ਅਰੋਗਾਯ,
ਕਾਯੋ ਰੋਗੇਨਸਂਵਸੇ;
ਗਾਯਗੁਤ੍ਤਂ ਮੁਧਾਯੇਵ,
ਚਿਤ੍ਤਗੁਤ੍ਤਂਵ ਸਾਤ੍ਥਕਂ.
ਚਨ੍ਦਨਾਦਿ ¶ ਵਿਲਿਤ੍ਤੋਪਿ,
ਮੁਤ੍ਤੋਮਣਿ ਵਿਭੂਸਿਤੋ;
ਤਂਸਭਾਵੋਵ ਸੋਕਾਯੋ,
ਵਿਸ੍ਸਵਨ੍ਤੋ ਤਤੋਤਤੋ.
ਪਤਿਤੇਚ ¶ ਅਪਤਿਤੇ,
ਵਿਸੇਸੋ ਨਤ੍ਥਿ ਕਿਞ੍ਚਿਪਿ;
ਕਾਯੋ ਚੇਮਨੁਞ੍ਞੋ ਤਮ੍ਹਾ,
ਪਤਿਤੋਪਿ ਤਥਾਸਿਯਾ.
ਕਾਯੋ ਮਨੁਸ੍ਸਜਾਤੀਨਂ, ਤਿਰਚ੍ਛਾਨ ਤ੍ਤਭਾਵਤੋ;
ਜੇਗੁਚ੍ਛਿਤ ਤਰੋਹੋਤਿ, ਦੁਬ੍ਬਿਸੋਧੋਚ ਦੁਬ੍ਭਰੋ.
ਯਥਾਜਾਤੇਨ ¶ ਕਾਯੇਨ, ਸਕ੍ਕਾ ਵਿਹਰਿਤੁਂ ਨਚ;
ਪਚ੍ਚਹਂ ਸੋਧਨੀਯੋਚ, ਧੋਵਨ ਮਜ੍ਜਨਾਦਿਭਿ.
ਰਤ੍ਤਂ ਪਾਤੁਂ ਛਵਿਂ ਛੇਤ੍ਵਾ, ਸਕ੍ਕਾ ਡਂਸਾਦਯੋਪਿਨਂ;
ਛੇਤ੍ਵਾ ਮਂਸ ਟ੍ਠਿਕਾਦੀਨਿ, ਧੀਰੋ ਨਾਲਮ੍ਬਿਤੁਂ ਕਥਂ.
ਲਗ੍ਗਨ੍ਤਿ ¶ ਛਵਿਮਤ੍ਤੇ ਯੇ, ਮਕ੍ਖਿਕਾ ਸੇਦਪਾ ਯਥਾ;
ਥੀਪੁਂ ਮੁਖਾਦਿ ਸਞ੍ਞਾਯ, ਤੇ ਪਮੁਲ਼੍ਹਾ ਮਹਾਤਪਾ.
ਚਾਰੀ ਅਗੋਚਰੇ ਕਾਮੇ, ਲਗ੍ਗਾਲੇਪੇ ਕਪੀਰਿਵ;
ਬਹੂਹਿ ਪੀਲ਼ਿਤਾ ਰੀਹਿ, ਮਰਨ੍ਤਿ ਅਤਿਦੁਕ੍ਖਿਨੋ.
ਰਾਗਾਰਿਂ ¶ ਦੁਜ੍ਜਯਂ ਜੇਯ੍ਯੁਂ, ਜਯਭੁਮ੍ਮਾਸੁਭੇ ਚਰਾ;
ਸੀਤਾਨਿਸ੍ਸਿਤ ਲਟੁਕੀ, ਸੇਨਕਂਵ ਮਹਬ੍ਬਲਂ.
ਕਾਯਧਿ ¶ ਗ੍ਗੋਚਰੋ ਵੇਸੋ,
ਜਯਭੂਬੁਦ੍ਧ ਦੁਤ੍ਤਿਯਾ;
ਏਤ੍ਥੇਵ ਗੋਚਰਾ ਹੋਨ੍ਤੁ,
ਮਾਭੋ ਕਾਮੇ ਜਯਤ੍ਥਿਕਾ.
ਕਾਯਾ ¶ ਸੁਭਂ ਵਿਪਸ੍ਸਨ੍ਤੁ, ਦਿਬ੍ਬ ਕ੍ਖਿਨਾਪ੍ਯ ਪਸ੍ਸਿਯਂ;
ਆਯਤਿਂ ਮਗ੍ਗਲਾਭਾਯ, ਤਂ ਦਸ੍ਸਨਂ ਭਵਿਸ੍ਸਤਿ.
ਧੀਚਕ੍ਖੁਨਾਵ ਧਿਕ੍ਕਾਯਂ, ਪਸ੍ਸੇ ਨ ਮਂਸਚਕ੍ਖੁਨਾ;
ਉਮ੍ਮਿਲਿਤ੍ਵਾਵ ਧੀਚਕ੍ਖੁਂ, ਵਿਵੇਕਟ੍ਠੋ ਉਦਿਕ੍ਖਤੁ.
ਪਞ੍ਚਙ੍ਗਾਨਿ ¶ ਯਥਾ ਕੁਮ੍ਮੋ, ਚਕ੍ਖਾਦੀਨਿ ਨਿਗੂਹਯੇ;
ਵੇਰੀ ਲਭਤੁ ਮੋਕਾਸਂ, ਪਞ੍ਚਦ੍ਵਾਰਾ ਅਰਕ੍ਖਿਤਾ.
ਚਕ੍ਖੁਰੂਪੇਨ ¶ ਸਂਵਾਸਾ, ਰਾਗਪੁਤ੍ਤਂ ਵਿਜਾਯਤਿ;
ਮਹਾਨਤ੍ਥਕਰੋ ਸੋਚ, ਸਂਵਾਸਂ ਤੇਨ ਵਾਰਯੇ.
ਰੂਪਾਦੀਸੁਸਞ੍ਜਨ੍ਤੀਤਿ, ਸਤ੍ਤਾ ਇਤ੍ਥ੍ਯਾਦਿ ਸਞ੍ਞਾਯ;
ਨਤ੍ਵੇਵ ਖਨ੍ਧਸਞ੍ਞਾਯ, ਤਂਸਞ੍ਞਿਹਿ ਵਿਰਾਗਿਨੋ.
ਸਕਾਯੇਪਰਕਾਯੇਚ ¶ ,
ਆਸਂ ਛਿਨ੍ਦੇਯ੍ਯ ਪਣ੍ਡਿਤੋ;
ਆਸਂ ਛੇਤ੍ਵਾ ਸੁਖਂਸੇਤਿ,
ਆਸਾਯ ਦੁਕ੍ਖਿਤਾ ਪਜਾ.
ਦਸ੍ਸਨੇ ਸਵਨੇ ਕਾਯ,
ਸਂਸਗ੍ਗੇ ਮੇਥੁਨੇਪਿਚ;
ਨਿਰਾਸੋ ਸੁਖਿਤੋ ਹੋਤਿ,
ਅਨਿਰਾਸੋਤਿਦੁਕ੍ਖਿਤੋ.
ਬਹੀਵ ¶ ਸੋਧਿਤਂ ਯਸ੍ਸ, ਨ ਵਨ੍ਤੋ ਜੇਗੁਚ੍ਛ ਪੁਞ੍ਜਕਂ;
ਤਂਕਾਯਂ ਅਸੁਤਂਜਾਨ, ਤਨੁਰਾਗੋ ਸਿਯਾਤ੍ਤਨਿ.
ਕਾਯੇਵਿਰਾਗ ਮਿਚ੍ਛਨ੍ਤੋ, ਨੁਪਸ੍ਸੇਯ੍ਯ ਤਦਨ੍ਤਰਂ;
ਅਨ੍ਤੋਦਸ੍ਸੀ ਅਤਪ੍ਪਨ੍ਤੋ, ਲਭੇ ਸਂਸਾਰਮੋਚਨਂ.
ਸਤ੍ਤਾ ¶ ਸਤ੍ਤਾ ਬਹਿਟ੍ਠੇਵਾ, ਸਾਰਂਸਾਰਂ ਮਮਾਯਿਨੋ;
ਸਨ੍ਤੋਸਨ੍ਤੋ ਵਿਪਸ੍ਸਨ੍ਤੋ, ਨਵਾਨਵਾਯਤਿਂਭਵੇ.
ਅਲਂ ¶ ਅਲਂ ਕਤ੍ਵਾ ਕਾਯਂ, ਮਲਾਮਲਾਸਵਨ੍ਤਿਤੋ;
ਸੋਭਂ ਸੋਭਂ ਨਯੇ ਠਾਨਂ, ਮਨਂ ਮਨਂ ਪ੍ਯਲਂ ਕਤਂ.
ਸਂਸਗ੍ਗਜਾਤਸ੍ਸ ਭਵਨ੍ਤਿ ਸ੍ਨੇਹਾ,
ਸ੍ਨੇਹਾਨ੍ਵਯਂ ਦੁਕ੍ਖ ਮਿਦਂ ਪਹੋਤਿ;
ਆਦਿਨਵਂ ਸ੍ਨੇਹਜਂਪੇਕ੍ਖ ਮਾਨੋ,
ਏਕੋ ਚਰੇਖਗ੍ਗ ਵਿਸਾਣ ਕਪ੍ਪੋ.
ਖਿਟ੍ਟਾ ¶ ਰਤਿ ਹੋਤਿ ਸਹਾਯ ਮਜ੍ਝੇ,
ਪੁਤ੍ਤੇਸੁਚ ਵਿਪੁਲਂ ਹੋਤਿ ਪੇਮਂ;
ਪਿਯਵਿਪ੍ਪਯੋਗਂ ਵਿਜਿਗੁਚ੍ਛਮਾਨੋ,
ਏਕੋ ਚਰੇ ਖਗ੍ਗਵਿਸਾਣ ਕਪ੍ਪੋ.
ਵਂਸੋ ¶ ਵਿਸਾਲੋਯਥਾ ਵਿਸਤ੍ਤੋ,
ਪੁਤ੍ਤੇਸੁ ਦਾਰੇਸੁਚ ਯਾਅਪੇਕ੍ਖਾ;
ਵਂਸਕਲ਼ਿਰੋਵ ਅਸਜ੍ਜਮਾਨੋ,
ਏਕੋ ਚਰੇ ਖਗ੍ਗਵਿਸਾਣ ਕਪ੍ਪੋ.
ਕਾਮਂ ¶ ਕਾਮਯ ਮਾਨਸ੍ਸ, ਤਸ੍ਸਚੇਤਂ ਸਮਿਜ੍ਝਤਿ;
ਅਦ੍ਧਾ ਪੀਤਿਮਨੋ ਹੋਤਿ, ਮਚ੍ਚੋ ਲਦ੍ਧਾ ਯਦਿਚ੍ਛਤਿ.
ਤਸ੍ਸਚੇ ਕਾਮਯਾਨਸ੍ਸ, ਛਨ੍ਦਜਾਤਸ੍ਸ ਜਨ੍ਤੁਨੋ;
ਤੇਕਾਮਾ ਪਰਿਹਾਯਨ੍ਤਿ, ਸਲ੍ਲਵਿਦ੍ਧੋਵ ਰੁਪ੍ਪਤਿ.
ਯੋਕਾਮੇ ¶ ਪਰਿਵਜ੍ਜੇਤਿ, ਸਪ੍ਪਸ੍ਸੇਵ ਪਦਾ ਸਿਰੋ;
ਸੋਮਂ ਵਿਸਤ੍ਤਿਕਂ ਲੋਕੇ, ਸਤੋ ਸਮਤਿਵਤ੍ਤਤਿ.
ਖੇਤ੍ਤਂ ਵਤ੍ਥੁਂ ਤਲ਼ਾਕਂਵਾ, ਗਵਸ੍ਸਂ ਦਾਸਪੋਰਿਸਂ;
ਥਿਯੋ ਬਨ੍ਧੂ ਪੁਥੁਕਾਮੇ, ਯੋਨਰੋ ਅਨੁਗਿਜ੍ਝਤਿ.
ਅਬਲਾ ਨਂ ਬਲੀਯਨ੍ਤਿ, ਮਦ੍ਦਨ੍ਤੇਨਂ ਪਰਿਸ੍ਸਯਾ;
ਤਤੋਨਂ ਦੁਕ੍ਖਮਨ੍ਵੇਤਿ, ਨਾਵਂ ਭਿਨ੍ਨ ਮਿਵੋਦਕਂ.
ਤਸ੍ਮਾਜਨ੍ਤੁ ¶ ਸਦਾਸਤੋ, ਕਾਮਾਨਿ ਪਰਿਵਜ੍ਜਯੇ;
ਤੇ ਪਹਾਯ ਤਰੇ ਓਘਂ, ਨਾਵਂ ਸਿਤ੍ਵਾਵ ਪਾਰਗੂ.
ਕਾਮਤੋ ¶ ਜਾਯਤੇ ਸੋਕੋ,
ਕਾਮਤੋ ਜਾਯਤੇ ਭਯਂ;
ਕਾਮਤੋ ਵਿਪ੍ਪਮੁਤ੍ਤਸ੍ਸ,
ਨਤ੍ਥਿ ਸੋਕੋ ਕੁਤੋ ਭਯਂ.
ਸੁਭਾਨੁਪਸ੍ਸਿਂ ¶ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਅਸਂਵੁਤਂ;
ਭੋਜਨਮ੍ਹਿ ਅਮਤ੍ਤਞ੍ਞੁਂ, ਕੁਸਿਤਂ ਹੀਨ ਵੀਰਿਯਂ;
ਤਂਵੇ ਪਸਹਤਿ ਮਾਰੋ, ਵਾਤੋ ਰੁਕ੍ਖਂਵ ਦੁਬ੍ਬਲਂ.
ਅਸੁਭਾਨੁਪਸ੍ਸਿਂ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਸੁਸਂਵੁਤਂ;
ਭੋਜਨਮ੍ਹਿਚ ਮਤ੍ਤਞ੍ਞੁਂ, ਸਦ੍ਧਂ ਆਰਦ੍ਧ ਵੀਰਿਯਂ;
ਤਂਵੇ ਨਪ੍ਪਸਹਤਿ ਮਾਰੋ, ਵਾਤੋ ਸੇਲਂਵ ਪਬ੍ਬਤਂ.
ਯਥਾ ¶ ਅਗਾਰਂ ਦੁਚ੍ਛਨ੍ਨਂ, ਵੁਟ੍ਠਿ ਸਮਤਿ ਵਿਜ੍ਝਤਿ;
ਏਵਂ ਅਭਾਵਿਤਂ ਚਿਤ੍ਤਂ, ਰਾਗੋ ਸਮਤਿਵਿਜ੍ਝਤਿ.
ਤਦੇਵਂ ¶ ਪਚ੍ਚਵੇਕ੍ਖਨ੍ਤਿ, ਯੇ ਤੇ ਰਾਗਗ੍ਗਿਦੁਬ੍ਬਲਾ;
ਪਤਿਟ੍ਠਂ ਸਾਸਨੇ ਲਦ੍ਧਾ, ਨੁਕ੍ਕਣ੍ਠਾ ਨਲਸਾ ਰਤਾ.
ਬੁਦ੍ਧਾਵਾਦਂ ¶ ਲਭਿਤ੍ਵਾਪਿ, ਨਾਹਂਸਕ੍ਕਾ ਨਵੋਮ੍ਹਿਤਿ;
ਦੋਸਂ ਤਣ੍ਹਂ ਅਨਾਸੇਨ੍ਤੋ, ਪਰਿਪਕ੍ਕੋ ਕਦਾਭਵੇ;
ਪੁਞ੍ਞਕਮ੍ਮਂ ਅਕਰੋਨ੍ਤੋ, ਪਰਵਜ੍ਜਂ ਅਖਮਨ੍ਤੋ.
ਕਾਯ ਸਙ੍ਖਾਰਿਕਾ ਤਣ੍ਹਾ, ਨੀਚਾਨੀਚਕਰਾਚ ਸਾ;
ਚਿਤ੍ਤਸਙ੍ਖਾਰਿਕਾ ਸਦ੍ਧਾ, ਉਚ੍ਚਾ ਉਚ੍ਚਕਰਾਚ ਸਾ.
ਦਸ੍ਸਨੀਯੇ ¶ ਰਤਾ ਤਣ੍ਹਾ, ਸਦ੍ਧਾਸ੍ਵਾਚਾਰਭਤ੍ਤਿਕਾ;
ਵਿਕਿਣ੍ਣਚਾਰਿਕਾ ਤਣ੍ਹਾ, ਸਦ੍ਧਾ ਵਿਸਦਚਾਰਿਨੀ.
ਮਨੋਕਿਲੇਸਿਕਾ ਤਣ੍ਹਾ, ਸਾਨੁਗਾਨਨ੍ਤ ਦੁਕ੍ਖਦਾ;
ਚਿਤ੍ਤਪ੍ਪਸਾਦਿਕਾ ਸਦ੍ਧਾ, ਅਤ੍ਤਾਨੁਗ ਸੁਖਾਵਹਾ.
ਤਣ੍ਹਾ ¶ ਸਦ੍ਧਾਨ ਮਿਚ੍ਚੇਵਂ, ਵਿਸੇਸਂ ਜਾਨ ਤਤ੍ਵਤੋ;
ਞਤ੍ਵਾ ਤਣ੍ਹਂ ਵਿਨਾਸੇਯ੍ਯ, ਸਦ੍ਧਂਭਾਵੇਯ੍ਯ ਚੇਤਸਿ.
ਉਚ੍ਛੁਕਂ ਯਨ੍ਤਪਤ੍ਤਮ੍ਪਿ, ਸਞ੍ਚੁਣ੍ਣਿਤਮ੍ਪਿ ਚਨ੍ਦਨਂ;
ਮਧੁਰਂਵ ਸੁਗਨ੍ਧਂਵ, ਮੇਤ੍ਤਿਵ ਹਿਂਸਿਤੋਪਿ ਸਂ.
ਅਤ੍ਤਚ੍ਛੇਦਮ੍ਪਿ ¶ ਵਾਸੇਤਿ, ਸੁਗਨ੍ਧੇਨਿਵ ਚਨ੍ਦਨਂ;
ਸਨ੍ਤੋ ਮੇਤ੍ਤਾਸੁਗਨ੍ਧੇਨ, ਅਤ੍ਤਹਿਂਸਮ੍ਪਿ ਵਾਸਯੇ.
ਕਦਾਚਿਪਿ ਨ ਦੁਗ੍ਗਨ੍ਧਿ, ਸੁਕ੍ਖਂ ਚੁਣ੍ਣਮ੍ਪਿ ਚਨ੍ਦਨਂ;
ਤਥੇਵ ਦੁਕ੍ਖਪਤ੍ਤੋਪਿ, ਨ ਸਨ੍ਤੋ ਪਾਪਕਾਰਕੋ.
ਖਮੇ ¶ ਵਜ੍ਜਂ ਕਰੇਯ੍ਯਤ੍ਥਂ, ਬੁਦ੍ਧਖਨ੍ਤਿ ਮਨੁਸ੍ਸਰਂ;
ਮੇਤ੍ਤਾਤਿਨ੍ਤੇਨ ਵੇਰੀਪਿ, ਨੁਪਨਾਹੋ ਸਿਯਤ੍ਤਨਿ.
ਨਗਚ੍ਛਤਿ ਤ ਮਕ੍ਕੋਸੋ, ਮਮੇਵਾ ਨਤ੍ਥਕਾਰਕੋ;
ਇਤਿ ਞਤ੍ਵਾਵ ਸਪ੍ਪਞ੍ਞੋ, ਨੇਵ ਕ੍ਕੋਸੇਯ੍ਯ ਕਿਞ੍ਚਨਂ.
ਅਕ੍ਕੋਸੋ ¶ ਮਂ ਨਆਗਚ੍ਛੇ,
ਤਸ੍ਸੇਵਾ ਨਤ੍ਥਕਾਰਕੋ;
ਇਤਿ ਞਤ੍ਵਾ ਤਿਤਿਕ੍ਖੇਯ੍ਯ,
ਨ ਪਚ੍ਚਕ੍ਕੋਸਨਂ ਕਰੇ.
ਅਕ੍ਕੋਸਕ ਨਯਂ ਗਣ੍ਹਿ,
ਪਚ੍ਚਕ੍ਕੋਸੋ ਨ ਸੋ ਵਰੋ;
ਬੁਧੋ ਤਂ ਨਾਨੁਗਾਹੇਯ੍ਯ,
ਮਾ ਸੋਵ ਪਾਪਿਯੋ ਭਵੇ.
ਤਣ੍ਹਾਵਿਜ੍ਜਾਚ ¶ ਮੂਲਾਦ੍ਵੇ, ਸਂਸਾਰਵਿਸਪਾਦਪੇ;
ਸਬ੍ਭਤ੍ਤਿ ਸਦ੍ਧਮ੍ਮਸ੍ਸੁਤਂ, ਦ੍ਵੇਯੇਵ ਮਧੁਰਾ ਫਲਾ.
ਸੋਧੇ ਚਿਤ੍ਤ ਮੁਪਕ੍ਕਮ੍ਮ, ਸੁਦ੍ਧਂ ਉਪਕ੍ਕਮੇਨ ਤਂ;
ਵਹੇ ਸੁਖਂ ਅਸਙ੍ਖੇਯ੍ਯਂ, ਦੁਕ੍ਖਂ ਅਸੋਧਿਤਂ ਮਲਿ.
ਸੋਧਿਤਂ ¶ ਸੁਗਤਿਂਨੇਤਿ, ਦੁਗ੍ਗਤਿਂਵ ਅਸੋਧਿਤਂ;
ਚਿਤ੍ਤਂ ਸੋਧੇਤੁ ਮਾਲਿਮ੍ਪੇ, ਰਾਗਦੋਸ ਮਲੇਹਿ ਤਂ.
ਦੋਸੇਜਾ ਨਾਸਿਤਾ ਯੇਨ,
ਸਾਸਨੇਵਤ੍ਥਿ ਸੋਨਯੋ;
ਨਤ੍ਥਞ੍ਞਤ੍ਥ ਤਮਾਦਾਯ,
ਬੁਧੋ ਨਾਸੇਤੁ ਤਂਦ੍ਵਯਂ.
ਰਨਕੁਨਵਾਸਿ ¶ ਕਤਾਵਾਸੇ, ਦਗੁਂਚੇਤੀ ਪੁਰਤ੍ਥਿਮੇ;
ਵਸਤਾ ਅਗ੍ਗਧਮ੍ਮੇਨ, ਥੇਰੇਨ ਰਚਿਤੋ ਅਯਨ੍ਤਿ.