📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਰਸਵਾਹਿਨੀ

ਪਣਾਮਾਦਿਕਥਾ

੧.

ਸਤ੍ਥੁਪ੍ਪਸਤ੍ਥਚਰਣਂ ¶ ਸਰਣਂ ਜਨਾਨਂ,

ਬ੍ਰਹ੍ਮਾਦਿਮੋਲ਼ਿ ਮਣਿਰਂਸਿ ਸਮਾਵਹਨ੍ਤਂ,

ਪਙ੍ਕੇਰੁਹਾਭਮੁਦੁਕੋਮਲਚਾਰੁਵਣ੍ਣਂ;

ਵਨ੍ਦਾਮਿ ਚਕ੍ਕਵਰਲਕ੍ਖਣਮਾਦਧਾਨਂ.

੨.

ਸਿਦ੍ਧਂ ਜਿਨੇਨ ਚਿਰਕਾਲਮਤਨ੍ਦਿਤੇਨ,

ਯਂ ਭਾਵਕੋ ਸਮਧਿਗਚ੍ਛਤਿ ਖੇਮਮਗ੍ਗਂ;

ਯਂ ਕਪ੍ਪਰੁਕ੍ਖ ਰੁਚਿਦਾਨ ਮਣਿਵ ਭਾਤਿ,

ਤਂ ਧਮ੍ਮਮਗ੍ਗ ਮਸਮਂ ਪਣਮਾਮਿ ਨਿਚ੍ਚਂ.

੩.

ਸਨ੍ਤਿਨ੍ਦ੍ਰਿਯਂ ਸੁਗਤਸੂਨੁਵਰਂ ਵਿਸੁਦ੍ਧਂ,

ਯਂ ਦਕ੍ਖਿਣੇਯ੍ਯਮਤਦਂ ਸੁਚਿਪੁਞ੍ਞਖੇਤ੍ਤਂ;

ਤਾਣੇਸਿਨਂ ਸਰਣਮੁਜ੍ਝਿਤਸਬ੍ਬਦੁਕ੍ਖਂ,

ਵਨ੍ਦਾਮਿ ਸਙ੍ਘ ਮਨਘਂ ਸਿਰਸਾ ਮਹਗ੍ਘਂ.

੪.

ਯਮ੍ਪਤ੍ਤਮੇਤ੍ਥ ਰਤਨਤ੍ਤਯਥੋਮਨੇਨ,

ਪੁਞ੍ਞੇਨ ਤੇਨ ਦੁਰਿਤਂ ਸਕਲਂ ਪਣੁਜ੍ਜ,

ਵਕ੍ਖਾਮਹਂ ਸੁਮਧੁਰਂ ਰਸਵਾਹਿਨਿਨ੍ਤਂ,

ਭੋ ਭੋ ਸੁਣਨ੍ਤੁ ਸੁਜਨਾ ਭਿਮੁਦਾਵਹਾ ਸਾ.

੫.

ਤਤ੍ਥਤਤ੍ਥੂਪਪਨ੍ਨਾਨਿ, ¶ ਵਤ੍ਥੂਨਿ ਅਰਹਾ ਪੁਰੇ;

ਅਭਾਸੁਂ ਦੀਪਭਾਸਾਯ, ਠਪੇਸੁਂ ਤਂ ਪੁਰਾਤਨਾ.

੬.

ਮਹਾਵਿਹਾਰੇ ਤਙ੍ਗੁਤ੍ਤ, ਵਙ੍ਕਪਰਿਵੇਣਵਾਸਿਕੋ;

ਰਟ੍ਠਪਾਲੋਤਿ ਨਾਮੇਨ, ਸੀਲਾਚਾਰ ਗੁਣਾਕਰੋ.

੭.

ਹਿਤਾਯ ਪਰਿਵਤ੍ਤੇਸਿ, ਪਜਾਨਂ ਪਾਲ਼ਿਭਾਸਤੋ;

ਪੁਨਰੁਤ੍ਤਾਦਿਦੋਸੇਹਿ, ਤਮਾਸਿ ਸਬ੍ਬਮਾਕੁਲਂ;

ਅਨਾਕੁਲਂ ਕਰਿਸ੍ਸਾਮਿ, ਤਂ ਸੁਣਾਥ ਸਮਾਹਿਤਾ.

੮.

ਵਿਤਰਾਗਾ ਪੁਰੇ ਵੋਚੁਂ, ਯਸ੍ਮਾ ਤਸ੍ਮਾ ਹਿ ਭਾਸਿਤਂ;

ਏਤਮਾਦਰਣੀਯਞ੍ਹਿ, ਸਾਧੁ ਸਾਧੂਹਿ ਸਬ੍ਬਦਾਤਿ.

ਜਮ੍ਬੁਦੀਪੁਪ੍ਪਤ੍ਤਿ ਵਤ੍ਥੂਨਿ.

ਧਮ੍ਮਸੋਣ੍ਡਕਵਗ੍ਗੋ

੧. ਧਮ੍ਮਸੋਣ੍ਡਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਤਤ੍ਥ ਤੇਸਂ ਵਤ੍ਥੂਨ ਮੁਪ੍ਪਤ੍ਤਿਯੋ ਦ੍ਵਿਧਾ ਭਵਨ੍ਤਿ ਜਮ੍ਬੁਦੀਪੇ ਸੀਹਲ਼ਦੀਪੇਚਾਤਿ, ਤਤ੍ਥ ਜਮ੍ਬੁਦੀਪੇ ਤਾਲ਼ੀਸ, ਸੀਹਲ਼ਦੀਪੇ ਤੇਸਟ੍ਠਿ, ਤੇਸੁ ਤਾਵ ਜਮ੍ਬੁਦੀਪੁਪ੍ਪਤ੍ਤਿਵਤ੍ਥੂਨਿ ਆਵਿ ਭਵਿਸ੍ਸਨ੍ਤਿ, ਤਤੋਪਿ ਧਮ੍ਮਸੋਣ੍ਡਕਸ੍ਸ ਵਤ੍ਥੁ ਆਦਿ, ਕਥਂ, ਅਮ੍ਹਾਕਂ ਕਿਰ ਭਗਵਤੋ ਪੁਬ੍ਬੇ ਇਮਸ੍ਮਿਂਯੇਵ ਭਦ੍ਦਕਪ੍ਪੇ ਕਸ੍ਸਪੋਨਾਮ ਸਤ੍ਥਾ ਲੋਕੇ ਉਦਪਾਦਿ, ਤਸ੍ਸ ਖੋ ਪਨ ਭਗਵਤੋ ਸਾਸਨਨ੍ਤਰਧਾਨਤੋ ਨ ਚਿਰੇਨੇਵ ਕਾਲੇਨ ਅਮ੍ਹਾਕਂ ਬੋਧਿਸਤ੍ਤੋ ਬਾਰਾਣਸੀਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ, ਤਸ੍ਸੁ ਪ੍ਪਤ੍ਤਿ ਕਾਲਸਮਨਨ੍ਤਰਮੇਵ ਸਬ੍ਬਸਤ੍ਤਾਨਂ ਮਨਸਿ ਧਮ੍ਮਸਞ੍ਞਾ ਉਦਪਾਦਿ, ਤਸ੍ਮਾਸ੍ਸ ਧਮ੍ਮਸੋਣ੍ਡੋਤਿਨਾਮ ਮਕਂਸੁ, ਸੋ ਪਨੇਸੋ ਕੁਮਾਰੋ ਮਹਨ੍ਤੇਨ ਪਰਿਵਾਰੇਨ ਵਡ੍ਢੇਨ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਪਿਤਰਾ ਉਪਰਜ੍ਜੇਨ ਪੂਜਿਤੋ ਹੁਤ੍ਵਾ ਦਾਨਾਦਯੋ ਦਸਕੁਸਲਕਮ੍ਮਪਥੇ ਪੂਰੇਨ੍ਤੋ ਪਿਤੁਅਚ੍ਚਯੇਨਾਮਚ੍ਚੇਹਿ ¶ ਰਜ੍ਜੇਨਾਭਿਸਿਞ੍ਚਿਤੋ ਅਹੋਸਿ, ਸੋ ਪਨੇਸ ਧਮ੍ਮਸੋਣ੍ਡਕਮਹਾਰਾਜਾ ਦੇਵਨਗਰਸਦਿਸੇ ਬਾਰਾਣਸੀਨਗਰੇ ਚਕ੍ਕਵਤ੍ਤਿਸਦਿਸਂ ਬਾਰਾਣਸੀਰਜ੍ਜਂ ਕਾਰੇਨ੍ਤੋ ਮਾਸਦ੍ਧਮਾਸਚ੍ਚਯੇਨ ਸਿਰਿਸਯਨਗਤੋ ਏਵਂ ਚਿਨ੍ਤੇਸਿ, ਮਮੇਵਂ ਰਜ੍ਜਸਿਰਿਮਨੁਭਵਨਂ ਨ ਸੋਭਤਿ ਧਮ੍ਮਵਿਯੋਗੇਨ, ਦਿਵਾਕਰ ਵਿਰਹਿਤੋ ਨਭੋ ਵਿਯਾਤਿਆਦਿਨਾ ਨਾਨਾਕਾਰਣਂ ਚਿਨ੍ਤੇਸਿ, ਤੇਨੇਤ੍ਥ.

੧.

ਪੁਞ੍ਞੇਨ ਸੀਲਾਦਿਮਯੇਨ ਪੁਬ੍ਬੇ,

ਕਤੇਨ ਪਤ੍ਤੋਸ੍ਮਿ ਅਤਨ੍ਦਿਤੇਨ,

ਮਸਕ੍ਕਸਾਰੇ ਵਿਯ ਦੇਵਰਾਜਾ;

ਰਾਜਤ੍ਤਮਿਦ੍ਧੇ ਪੁਰਮੁਤ੍ਤਮਮ੍ਹਿ.

੨.

ਰੂਪੇਨ ਹਾਰੀਨਯਨੁਸ੍ਸਵੇਨ,

ਸਦ੍ਦੇਨ ਸਮ੍ਮਾ ਸਵਣਾਮਤੇਨ,

ਗਨ੍ਧੇਨ ਘਾਨੁਸ੍ਸਵਸੋਭਨੇਨ,

ਰਸਞ੍ਞਪੁਞ੍ਞੇਨ ਰਸੇਨਚਾਪਿ.

੩.

ਫਸ੍ਸੇਨ ਗਤ੍ਤਸ੍ਸ ਸੁਫਸ੍ਸਦੇਨ,

ਸਮਿਦ੍ਧਿਪਤ੍ਤੋਸ੍ਮਿ ਮਹਿਦ੍ਧਿਕੋਹਂ,

ਨੇਵੇਤ੍ਤਕੇਨੇਵ ਪਮਾਦਭਾਵ,

ਮਾ ਪਜ੍ਜਿਤੁਂ ਯੁਤ੍ਤਰੂਪਨ੍ਤਿ ਞਤ੍ਵਾ.

੪.

ਦਸ੍ਸਾਮਿ ਅਙ੍ਗਅਪਿ ਜੀਵਿਤਞ੍ਚ,

ਧਞ੍ਞਂ ਧਨਂ ਚਾਪਿ ਪਸਨ੍ਨਚਿਤ੍ਤੋ,

ਸੋਸ੍ਸਾਮਿ ਧਮ੍ਮਂ ਸਿਵਮਾਦਧਾਨਂ,

ਜਿਨੇਰਿਤਂ ਜਾਤਿਜਰਾਪਹਾਣਂ.

੫.

ਨ ਸੋਭਤਿ ਯਥਾਕਾਸਂ, ਜਲਂ ਧਾਮਪਤਿਂਵਿਨਾ,

ਰਜ੍ਜਕਰਣਂ ਤਥਾ ਮਯ੍ਹਂ, ਵਿਨਾ ਧਮ੍ਮਾ ਨ ਸੋਭਤਿ.

੬.

ਨ ਸੋਭਤਿ ਹਥਾ ਰਤ੍ਤਿ, ਨਿਸਾਨਾਥਂ ਵਿਨਾ ਸਦਾ,

ਰਜ੍ਜਕਰਣਂ ਤਥਾ ਮਯ੍ਹਂ, ਵਿਨਾ ਧਮ੍ਮਾ ਨ ਸੋਭਤਿ.

੭.

ਅਲਙ੍ਕਤੋਪਿ ¶ ਚੇ ਹਤ੍ਥੀ, ਵਿਨਾ ਦਾਠਾ ਨ ਸੋਭਤਿ,

ਰਜ੍ਜਕਰਣਂ ਤਥਾ ਮਯ੍ਹਂ, ਵਿਨਾ ਧਮ੍ਮਾ ਨ ਸੋਭਤਿ.

੮.

ਯਥਾ ਕਲ੍ਲੋਲਮਾਲੀਯਂ,

ਵਿਨਾ ਵੇਲਾ ਨ ਸੋਭਤਿ,

ਰਜ੍ਜਕਰਣਂ ਤਥਾ ਮਯ੍ਹਂ,

ਵਿਨਾ ਧਮ੍ਮਾ ਨ ਸੋਭਤਿ.

੯.

ਯਥਾ ਸੁਮਣ੍ਡਿਤੋ ਰਾਜਾ,

ਕੁਪਟੋ ਨੇਵ ਸੋਭਤਿ,

ਰਜ੍ਜਕਰਣਂ ਤਥਾ ਮਯ੍ਹਂ,

ਵਿਨਾ ਧਮ੍ਮਾ ਨ ਸੋਭਤਿ.

੧੦.

ਧਮ੍ਮਮੇਵ ਸੁਣਿਸ੍ਸਾਮਿ, ਧਮ੍ਮੇ ਮੇ ਰਮਤੀ ਮਨੋ,

ਨ ਹਿ ਧਮ੍ਮਾ ਪਰਂ ਅਤ੍ਥਿ, ਧਮ੍ਮਮੂਲਂ ਤਿਸਮ੍ਪਦਨ੍ਤਿ.

ਏਵਂ ਚਿਨ੍ਤੇਤ੍ਵਾ ਪਾਤੋਵ ਸਿਰਿਗਬ੍ਭਾ ਨਿਕ੍ਖਮ੍ਮ ਸੁਸਜ੍ਜਿਤੇ ਸਮੁਸ੍ਸਿਤਸੇਤਚ੍ਛਤ੍ਤੇ ਰਾਜਪਲ੍ਲੇਙ੍ਕੇ ਅਮਚ੍ਚਗਣ ਪਰਿਵੁਤੋ ਨਿਸੀਦਿ ਦੇਵਰਾਜਾਵਿਯ ਵਿਰੋਚਮਾਨੋ, ਨਿਸਿਨ੍ਨੋ ਪਨ ਰਾਜਾ ਅਮਚ੍ਚੇ ਏਵਮਾਹ, ਯੋ ਪਨੇਤ੍ਥ ਭੋਨ੍ਤੋ ਬੁਦ੍ਧਭਾਸਿਤੇਸੁ ਧਮ੍ਮੇਸੁ ਕਿਞ੍ਚਿਧਮ੍ਮਂ ਜਾਨਾਤਿ, ਸੋ ਭਾਸਤੁ, ਸੋਤੁਮਿਚ੍ਛਾਮਿਧਮ੍ਮਨ੍ਤਿ, ਤੇ ਸਬ੍ਬੇਪਿ ਮਯਂ ਦੇਵ ਨ ਜਾਨਾਮਾਤਿ ਆਹਂਸੁ, ਤਂ ਸੁਤ੍ਵਾ ਅ ਨ ਤ੍ਤ ਮ ਨੋ ਰਾਜਾ ਏਵਂ ਚਿਨ੍ਤੇਸਿ, ਯਨ੍ਨੂਨਾਹਂ ਹਤ੍ਥਿਕ੍ਖਨ੍ਧੇ ਸਹਸ੍ਸਂ ਠਪੇਤ੍ਵਾ ਨਗਰੇ ਭੇਰਿਂਚਰਾਪੇਯ੍ਯਂ, ਯਂ ਅਪ੍ਪੇਵਨਾਮ ਕੋਚਿ ਧਨਲੋਭੇਨ ਚਾਤੁਪ੍ਪਦਿਕਾਯਪਿ ਗਾਥਾਯ ਧਮ੍ਮਂ ਦੇਸੇਯ੍ਯ. ਤਂ ਮੇ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀਤਿ, ਤਤੋ ਸੋ ਤਥਾ ਕਤ੍ਵਾਪਿ ਧਮ੍ਮਦੇਸਕਂ ਅਲਭਨ੍ਤੋ ਪੁਨ ਦ੍ਵਿਸਹਸ੍ਸਂ ਤਿਚਤੁਪਞ੍ਚਸਹਸ੍ਸਨ੍ਤਿਯਾਵਕੋਟਿਪ੍ਪਕੋਟਿਂਦਮ੍ਮੀਤਿ, ਤਤੋ ਗਾਮ ਨਿਗਮ ਜਨਪਦੇ, ਤਤੋ ਸੇਟ੍ਠਿਟ੍ਠਾਨਂ ਸੇਨਾਪਤਿ ਉਪਰਾਜਟ੍ਠਾਨਾ ਦਯੋਪਿ, ਪੁਨ ਸੇਤਚ੍ਛਤ੍ਤਂ ਦਮ੍ਮਿ, ਰਾਜਵੇਸਂ ਪਹਾਯ ਅਤ੍ਤਾਨਂ ਦਾਸਂ ਸਾਵੇਤ੍ਵਾ ਧਮ੍ਮਦੇਸੇਨ੍ਤਸ੍ਸ ਦਮ੍ਮਿਤਿ ਵਤ੍ਵਾ ਭੇਰਿ ਚਰਾਪੇਤ੍ਵਾਪਿ ਧਮ੍ਮ ਦੇਸਕਮਲਭਿਤ੍ਵਾ ਸਂਵਿਗ੍ਗੋ ¶ ਕਿਮ੍ਮੇ ਧਮ੍ਮਵਿਯੋਗੇਨ ਰਜ੍ਜੇਨਾਤਿ ਅਮਚ੍ਚਾਨਂ ਰਜ੍ਜਂ ਨੀਯ੍ਯਾਤੇਤ੍ਵਾ ਸਦ੍ਧਮ੍ਮਗਵੇਸਕੋ ਧਮ੍ਮਸੋਣ੍ਡਕਮਹਾਰਾਜਾ ਮਹਾਵਨਂ ਪਾਵਿਸਿ ਗਾਮ ਨਿਗਮ ਰਾਜਧਾਨਿ ਪਰਮ੍ਪਰਾਯ, ਤੇਨੇਤ੍ਥ.

੧੧.

ਪੁਰੇ ਭੇਰਿਂ ਚਰਾਪੇਤ੍ਵਾ,

ਧਮ੍ਮਸੋਣ੍ਡੋ ਨਰਾਧਿਪੋ;

ਸਦ੍ਧਮ੍ਮਜ੍ਝੇਸਕਂ ਸਤ੍ਥੁ,

ਅਲਦ੍ਧਾ ਧਨਕੋਟਿਹਿ.

੧੨.

ਦਾਸੋ ਹੋਮਿ ਪਹਾਯਾਹਂ,

ਰਾਜਤ੍ਤਂ ਦੇਸਕਸ੍ਸ ਮੇ;

ਇਚ੍ਚਾਹ ਸੋ ਮਹੀਪਾਲੋ,

ਅਹੋ ਧਮ੍ਮੇਸੁ ਲੋਲਤਾ.

੧੩.

ਰਜ੍ਜਂ ਨੀਯ੍ਯਾਤਯਿਤ੍ਵਾਨ, ਅਮਚ੍ਚਾਨਂ ਮਨੋਰਮਂ,

ਵਨਂ ਪਾਵਿਸਿ ਸੋ ਰਾਜਾ, ਗਵੇਸਂ ਧਮ੍ਮਮੁਤ੍ਤਮਨ੍ਤਿ.

ਮਹਾਵਨਂ ਪਵਿਟ੍ਠਕ੍ਖਣੇ ਪਨ ਮਹਾਸਤ੍ਤਸ੍ਸ ਪੁਞ੍ਞਤੇਜੇਨ ਸਕ੍ਕਸ੍ਸਾਸਨਂ ਉਣ੍ਹਾਕਾਰਂ ਦਸ੍ਸੇਸਿ, ਅਥ ਦੇਵਰਾਜਾ ਚਿਨ੍ਤੇਸਿ ਅਕਾਮਂ ਮੇ ਪਣ੍ਡੁਕਮ੍ਬਲ ਸਿਲਾਸਨਂ ਉਣ੍ਹਮਹੋਸਿ, ਕਿਨ੍ਨੁਖੋ ਕਾਰਣਨ੍ਤਿ ਲੋਕਂ ਓਲੋਕੇਨ੍ਤੋ ਸਕ੍ਕੋ ਦੇਵਰਾਜਾ ਧਮ੍ਮਸੋਣ੍ਡਕ ਮਹਾਰਾਜਾਨਂ ਸਕਲਜਮ੍ਬੁਦੀਪਂ ਵਿਚਿਨਿਤ੍ਵਾ ਸਦ੍ਧਮ੍ਮਜ੍ਝੇਸਕਂ ਅਲਭਿਤ੍ਵਾ ਵਨਂ ਪਵਿਟ੍ਠਭਾਵਂ ਅਦ੍ਦਸ, ਧਮ੍ਮਸੋਣ੍ਡਕਮਹਾਰਾਜਾ ਸਦ੍ਧਮ੍ਮਤ੍ਥਾਯ ਰਜ੍ਜ ਧਨ ਬਨ੍ਧੁ ਜੀਵਿਤਮ੍ਪਿ ਪਹਾਯ ਅਰਞ੍ਞਂ ਪਵਿਟ੍ਠੋ, ਨ ਸੋ ਵਤਾਯਂ ਯੋਵਾ ਸੋਵਾ ਸਤ੍ਤੋ, ਇਮਸ੍ਮਿਂਯੇਵ ਕਪ੍ਪੇ ਬੁਦ੍ਧੋ ਭਵਿਸ੍ਸਤਿ, ਬੁਦ੍ਧਬੋਧਿਸਤ੍ਤੋ ਚਾਯਂ ਅਜ੍ਜੇਵ ਮਹਾਰਞ੍ਞਂ ਪਵਿਟ੍ਠੋ ਸਦ੍ਧਮ੍ਮਂ ਅਲਦ੍ਧਾ ਮਹਾਦੁਕ੍ਖਂ ਪਾਪੁਣੇਯ੍ਯ, ਨ ਚੇਤਂ ਯੁਤ੍ਤਂ, ਅਜ੍ਜ ਮਯਾ ਤਤ੍ਥ ਗਨ੍ਥਬ੍ਬਂ ਧਮ੍ਮਾਮਤਰਸੇਨ ਤਮਭਿਸਿਞ੍ਚਿਤ੍ਵਾ ਰਜ੍ਜੇ ਪਹਿਟ੍ਠਾਪੇਤੁਨ੍ਤਿ ਚਿਨ੍ਤੇਤ੍ਵਾ ਅਤ੍ਤਭਾਵਂ ਵਿਜਹਿਤ੍ਵਾ ਭਯਾਨਕਂ ਮਹਨ੍ਤਂ ਰਕ੍ਖਸਵੇਸਂ ਨਿਮ੍ਮਿਣਿਤ੍ਵਾ ਮਹਾਸਤ੍ਤਾਭਿਮੁਖੋ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ, ਤੇਨੇਤ੍ਥ.

੧੪.

ਬ੍ਯਗ੍ਘਚ੍ਛਸੀਹਮਹਿਸੋ ¶ ਰਗਹਤ੍ਥਿਦੀਪਿ,

ਮਿਗਾਕੁਲਂ ਕਣ੍ਟਕਸੇਲਰੁਕ੍ਖਂ;

ਨਰਾਨਮਿਨ੍ਦੋ ਪਵਿਸਿਤ੍ਵਕਾਨਨਂ,

ਇਤੋਚਿਤੋ ਵਿਬ੍ਭਮਿ ਧਮ੍ਮਕਾਮੋ.

੧੫.

ਤਸ੍ਸਾਨੁਭਾਵੇਨ ਪੁਰਿਨ੍ਦਦਸ੍ਸ,

ਸਿਲਾਸਨਂ ਉਣ੍ਹਮਹੋਸਿ ਕਾਮਂ;

ਤੇਨੇਵ ਸੋ ਲੋਕਮੁਦਿਕ੍ਖਮਾਨੋ,

ਅਦ੍ਦਕ੍ਖਿ ਧੀਰਂ ਵਿਪਿਨੇ ਚਰਨ੍ਤਂ.

੧੬.

ਮਯਜ੍ਜ ਤਂ ਧਮ੍ਮਰਸੇਨ ਸਮ੍ਮਾ,

ਸਨ੍ਤਪ੍ਪਯਿਤ੍ਵਾ ਗਮਨਂ ਵਰਨ੍ਤਿ;

ਮਨ੍ਤ੍ਵਾ ਸੁਭੀਮਞ੍ਜਨਕੂਟਵਣ੍ਣਂ,

ਮਹਾਮੁਖਂ ਨਿਗ੍ਗਤ ਭੀਮਦਾਠਂ.

੧੭.

ਦਿਤ੍ਤਗ੍ਗਿਸਙ੍ਕਾਸ ਵਿਸਾਲਨੇਤ੍ਤਂ,

ਮਜ੍ਝੇਨ ਭਗ੍ਗਂ ਚਿਪਿਟਗ੍ਗਨਾਸਂ;

ਖਰਤਮ੍ਬਦਾਠਿਂ ਘਨਮਸ੍ਸੁਵਨ੍ਤਂ,

ਨੀਲੋਦਰਂ ਗਜ੍ਜਿਤਭੀਮਘੋਸਂ.

੧੮.

ਕਰੋਰੁਹਂ ਤਿਕ੍ਖਸਲੋਹਿਤਾਯਤਂ,

ਵਿਸਾਲਧੋਤਾਯਤਖਗ੍ਗਹਤ੍ਥਂ;

ਗਦਾਯੁਧੇਨਙ੍ਕਿਤਮਞ੍ਞਬਾਹੁਂ,

ਦਟ੍ਠੋਟ੍ਠਭੀਮਂ ਸਵਲੀਲਲਾਟਂ.

੧੯.

ਮਨੁਸ੍ਸਮਂਸਾਦਨਰਤ੍ਤਪਾਨਂ,

ਭਯਾਨਕਂ ਕਕ੍ਖਲਯਕ੍ਖਵਣ੍ਣਂ;

ਸੁਮਾਪਯਿਤ੍ਵਾਨ ਵਨਨ੍ਤਰਸ੍ਮਿਂ,

ਦਸ੍ਸੇਸਿ ਅਤ੍ਤਂ ਸ ਨਰਾਧਿਪਸ੍ਸਾਤਿ.

ਅਥ ਮਹਾਸਤ੍ਤੋ ਅਤ੍ਤਨੋ ਅਵਿਦੂਰੇ ਠਿਤਂ ਰਕ੍ਖਸਂ ਅਦ੍ਦਕ੍ਖਿ, ਤਂ ਦਿਸ੍ਵਾਨਾਸ੍ਸ ਭਯਂਵਾ ਛਮ੍ਭਿਤਤ੍ਤਂਵਾ ਚਿਤ੍ਥੁਤ੍ਰਾਸਮਤ੍ਤਂਵਾ ਨਾਹੋਸਿ, ਕਿਮਤ੍ਰ ਚਿਨ੍ਤੇਸਿ, ਅਪਿਨਾਮ ਏਵਰੂਪੋ ਪਿਰਕ੍ਖਸੋ ਧਮ੍ਮਂ ¶ ਜਾਨੇਯ੍ਯ, ਯਨ੍ਨੂਨਾਹਂ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਣਿਸ੍ਸਾਮਿ, ਤਮ੍ਮੇ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀਤਿ ਚਿਨ੍ਤੇਸਿ. ਚਿਨ੍ਤੇਤ੍ਵਾ ਚਪਨ ਅਜ੍ਜ ਮਯਾ ਤਮੁਪਸਙ੍ਕਮ੍ਮ ਪੁਚ੍ਛਿਤਂ ਵਟ੍ਟਤੀਤਿ ਗਨ੍ਤ੍ਵਾ ਰਕ੍ਖਸੇਨ ਸਦ੍ਧਿਂ ਸਲ੍ਲਪਨ੍ਤੋ ਆਹ.

੨੦.

ਅਸ੍ਮਿਂ ਵਨਸ੍ਮਿਂ ਤਰੁਸਣ੍ਡ ਮਣ੍ਡਿਤੇ;

ਸੁਫੁਲ੍ਲਿਤਾਨੇਕਲਤਾਕੁਲਾਕੁਲੇ;

ਅਧਿਗ੍ਗਹੀਤੋ ਸਿ ਮਹਾਨੁਭਾਵ,

ਪੁਚ੍ਛਾਮਿ ਤਂ ਦੇਵ ਵਦੇਹਿ ਕਙ੍ਖਂ.

੨੧.

ਧਮ੍ਮਂ ਗਵੇਸਂ ਵਨਮਾਗਤੋਮ੍ਹਿ,

ਪਹਾਯ ਰਜ੍ਜਂ ਅਪਿ ਞਾਤਿਸਙ੍ਘਂ;

ਜਾਨਾਸਿ ਚੇ ਸਮ੍ਮ ਵਦੇਹਿ ਮਯ੍ਹਂ,

ਏਕਮ੍ਪਿ ਗਾਥਂ ਸੁਗਤੇਨ ਦੇਸਿਤਂ.

ਤਤੋ ਯਕ੍ਖੋ ਆਹ.

੨੨.

ਧਮ੍ਮਂ ਪਜਾਨਾਮਹਮੇਕਦੇਸਂ,

ਜਿਨੇਰਿਤਂ ਸਾਧੁਤਰਂ ਰਸਾਨਂ,

ਦੇਸੇਮਿ ਚੇਹਂ ਤਵ ਧਮ੍ਮ ਮਗ੍ਗਂ,

ਤੁਵਞ੍ਹਿ ਕਿਂ ਕਾਹਸਿ ਦੇਸਕਸ੍ਸਾਤਿ.

ਅਥ ਮਹਾਸਤ੍ਤੋ ਆਹ.

੨੩.

ਰਜ੍ਜੇ ਠਿਤੋ ਅਸ੍ਸਮਹਂ ਸਚੇ ਭੋ,

ਅਨਪ੍ਪਰੂਪਂ ਪਕਰੋਮਿ ਪੂਜਂ;

ਇਦਾਨਿ ਏਕੋ ਵਨਮਜ੍ਝਪਤ੍ਤੋ,

ਕਰੋਮਿ ਕਿਂ ਦੇਹਮਿਮਂ ਠਪੇਤ੍ਵਾ.

੨੪.

ਯਦਿਚ੍ਛਸਿ ਤ੍ਵਂ ਮਮ ਮਂਸਲੋਹਿਤਂ,

ਕਰੋਮਹਂ ਸਙ੍ਗਹਮਜ੍ਜ ਤੇਨ,

ਨ ਚਤ੍ਥਿ ਅਞ੍ਞਂ ਤਵ ਅਚ੍ਚਨੀਯਂ,

ਦੇਸੇਹਿ ਧਮ੍ਮਂ ਸੁਗਤ ਪ੍ਪਸਤ੍ਥਨ੍ਤਿ.

ਤਤੋ ¶ ਯਕ੍ਖੋ ਆਹ.

੨੫.

ਭੁਤ੍ਵਾਨ ਮਂਸਂ ਸੁਹਿਤੋਵ ਸਨ੍ਤੋ,

ਹਨ੍ਤ੍ਵਾ ਪਿਪਾਸਂ ਰੁਧਿਰਂ ਪਿਵਿਤ੍ਵਾ;

ਧਮ੍ਮਂ ਕਥੇਤੁਂ ਪਭਵਾਮਿ ਤੁਯ੍ਹਂ,

ਵਤ੍ਤੁਂ ਨ ਸਕ੍ਕੋਮਿ ਖੁਦਾਪਰੇਤੋਤਿ.

ਅਥ ਮਹਾਸਤ੍ਤੋ ਆਹ.

੨੬.

ਭੁਤ੍ਵਾ ਤੁਵਂ ਮਂ ਪਥਮਞ੍ਹਿ ਯਕ੍ਖ,

ਪਚ੍ਛਾ ਤੁ ਦੇਸੇਸ੍ਸਸਿ ਕਸ੍ਸ ਧਮ੍ਮਂ;

ਧਮ੍ਮਸ੍ਸ ਮਯ੍ਹਂ ਤਵ ਮਂਸਲਾਭਂ,

ਤ੍ਵਮੇਵ ਜਾਨਾਹਿ ਯਥਾ ਭਵੇਯ੍ਯਾਤਿ.

ਏਵਂ ਵੁਤ੍ਤੇ ਸਕ੍ਕੋ ਦੇਵਾਨਮਿਨ੍ਦੋ ਸਾਧੁ ਮਹਾਰਾਜ ਅਹਮੇਵ ਯੁਤ੍ਤਂ ਜਾਨਾਮੀਤਿ ਵਤ੍ਵਾ ਤਸ੍ਸਾਵਿਦੂਰੇ ਤਿਗਾਵੁਤੁਬ੍ਬੇਧਂ ਅਞ੍ਜਨਵਣ੍ਣਂ ਮਹਨ੍ਤਂ ਪਬ੍ਬਤਂ ਮਾਪੇਤ੍ਵਾ ਮਹਾਰਾਜ ਇਮਮਾਰੁਯ੍ਹ ਪਬ੍ਬਤਮੁਦ੍ਧਨਿਟ੍ਠਿਤੋ ਮਮ ਮੁਖੇ ਪਤਤੁ, ਅਹਂ ਪਤਨ੍ਥਸ੍ਸ ਤੇ ਧਮ੍ਮਂ ਦੇਸੇਸ੍ਸਾਮਿ, ਏਵਂ ਸਨ੍ਤੇ ਤੁਯ੍ਹਂ ਧਮ੍ਮਪਟਿਲਾਭੋ, ਮਯ੍ਹਂਚ ਮਂਸਪਟਿਲਾਭੋ ਭਵਿਸ੍ਸਤੀਤਿ. ਤਂ ਸੁਤ੍ਵਾ ਮਹਾਸਤ੍ਤੋ ਅਨਮਤਗ੍ਗੇ ਸਂਸਾਰੇ ਸਂਸਰਤੋ ਮੇ ਸੀਹਬ੍ਯਗ੍ਘਚ੍ਛਮਚ੍ਛਕਚ੍ਛਪਵਿਹਙ੍ਗਾਦੀਨਂ ਭਕ੍ਖਭੂਤਸ੍ਸ ਜਾਤੀਸੁ ਪਮਾਣਂ ਨਤ੍ਤਿ, ਅਜ੍ਜ ਮਯਾ ਸਮ੍ਬੁਦ੍ਧਸ੍ਸ ਧਮ੍ਮਤ੍ਥਾਯ ਜੀਵਿਤਂ ਪਰਿਚ੍ਚਜਿਤੁਂ ਵਟ੍ਟਤੀਤਿ ਚਿਨ੍ਤੇਤ੍ਵਾ ਏਵਮਾਹ.

੨੭.

ਸਂਸਾਰਵਟ੍ਟੇਸੁ ਵਿਵਟ੍ਟਮਾਨਾ,

ਪਪ੍ਪੋਨ੍ਤਿ ਦੁਕ੍ਖਂ ਜਨਤਾ ਅਨੇਕਾ;

ਏਤਞ੍ਹਿ ਭੋ ਅਤ੍ਤਨੋ ਵਾ ਪਰਸ੍ਸ,

ਅਤ੍ਥਾਯ ਨਾਹੋਸਿ ਅਹੋਸਿ ਤੁਚ੍ਛਂ.

੨੮.

ਤ੍ਵਮਦਿਨ੍ਨਹਾਰੀ ਤਿਚ ਪਾਰਦਾਰਿਕੋ,

ਪਾਣਾਤਿਪਾਤੀਸਿ ਮੁਸਾ ਅਭਾਸਿ;

ਤ੍ਵ ਮਜ੍ਜਪਾਯੀਤਿ ਅਕਾਸਿ ਦੋਸਂ,

ਪਗ੍ਗਯ੍ਹ ਦੁਕ੍ਖਂ ਬਹੁਸੋ ਦਦਨ੍ਤਿ.

੨੯.

ਏਤਞ੍ਹਿ ¶ ਭੋ ਅਤ੍ਤਨੋ ਵਾ ਪਰਸ੍ਸ,

ਅਤ੍ਥਾਯ ਨਾਹੋਸਿ ਅਹੋਸਿ ਤੁਚ੍ਛਂ;

ਰੁਕ੍ਖਾ ਪਪਾਤਾ ਪਪਤਿਤ੍ਵਕੇਚਿ,

ਦੁਬ੍ਬਨ੍ਧਿਯਾ ਦੁਗ੍ਗਵਿਸਾਦਨੇਨ.

੩੦.

ਬ੍ਯਾਧੀਹਿ ਨਾਨਾਖਰਵੇਦਨਾਹਿ,

ਮਰਨ੍ਤਿ ਸਤ੍ਤਾ ਉਤੁਵੇਦਨਾਹਿ;

ਏਤਞ੍ਹਿ ਭੋ ਅਤ੍ਤਨੋ ਵਾ ਪਰਸ੍ਸ,

ਅਤ੍ਥਾਯ ਨਾਹੋਸਿ ਅਹੋਸਿ ਤੁਚ੍ਛਂ.

੩੧.

ਬ੍ਯਗ੍ਘਚ੍ਛਮਚ੍ਛੋ ਰਗਕੁਚ੍ਛਿਯਞ੍ਹਿ,

ਮਤਸ੍ਸ ਮੇ ਨਤ੍ਥਿ ਪਮਾਣਸਙ੍ਖਾ;

ਏਤਞ੍ਹਿ ਭੋ ਅਤ੍ਤਨੋ ਵਾ ਪਰਸ੍ਸ,

ਅਤ੍ਥਾਯ ਨਾਹੋਸਿ ਅਹੋਸਿ ਤੁਚ੍ਛਂ.

੩੨.

ਏਤਜ੍ਜ ਮੇ ਦੁਚ੍ਚ ਜ ਮਤ੍ਤਦਾਨਂ,

ਨ ਹੋਤਿ ਦੇਵਿਸ੍ਸਰਿਯਾਦਿਕਾਯ;

ਸਬ੍ਬਞ੍ਞੁਭਾਵਂ ਪਨ ਪਾਪੁਣਿਤ੍ਵਾ,

ਸਂਸਾਰਤੋ ਨਿਤ੍ਤਰਣਾਯ ਸਤ੍ਤੇ.

੩੩.

ਤ੍ਵਂ ਸਮ੍ਮ ਮਯ੍ਹਂ ਬਹੁਸੋ ਪਕਾਰੀ,

ਤਸ੍ਮਾ ਤਵੇਤਂ ਵਚਨਂ ਕਰੋਮਿ;

ਅਸਂਕਿਤੋ ਦੇਸਯ ਮਯ੍ਹਧਮ੍ਮਂ,

ਸਮਿਜ੍ਝਤੇ ਦਾਨਿ ਮਨੋਰਥੋ ਤੇਤਿ.

ਏਵਞ੍ਚ ਪਨ ਵਤ੍ਵਾ ਮਹਾਸਤ੍ਤੋ ਪਬ੍ਬਤਮਾਰੁਯ੍ਹ ਠਿਤੋ ਆਹ, ਅਹਮਜ੍ਜ ਰਜ੍ਜੇਨ ਸਦ੍ਧਿਂ ਜੀਵਿਤਞ੍ਚ ਸਰੀਰਮਂਸਞ੍ਚ ਸਦ੍ਧਮ੍ਮਤ੍ਥਾਯ ਦਮ੍ਮੀਤਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਸਮ੍ਮ ਧਮ੍ਮਂ ਦੇਸੇਹੀਤਿ ਵਤ੍ਵਾ ਤਸ੍ਮਿਂ ਮਹਾਦਾਠਂ ਮਹਾਮੁਖਂ ਵਿਵਰਿਤ੍ਵਾ ਠਿਤੇ ਤਸ੍ਸਾਭਿਮੁਖੋ ਉਪਪਤਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਸੋਮਨਸ੍ਸੋ ਅਚ੍ਛਰਿਯਪ੍ਪਤ੍ਤੋ ਅਤ੍ਤਭਾਵਂ ਵਿਜਹਿਤ੍ਵਾ ਅਲਙ੍ਕਤਦਿਬ੍ਬਤ੍ਤਭਾਵਂ ਮਾਪੇਤ੍ਵਾ ਆਕਾਸੇ ¶ ਤਰੁਣਸੁਰਿਯੋ ਵਿਯ ਓਭਾਸਮਾਨੋ ਆਕਾਸਤੋ ਪਤਨ੍ਤਂ ਮਹਾਸਤ੍ਤਂ ਉਭੋਹਿ ਹਤ੍ਥੇਹਿ ਦਲ਼੍ਹਂ ਪਤਿਗਣ੍ਹਿਤ੍ਵਾ ਦੇਵਲੋਕਂ ਨੇਤ੍ਵਾ ਪਣ੍ਡੁਕਮ੍ਬਲ ਸਿਲਾਸਨੇ ਨਿਸੀਦਾਪੇਤ੍ਵਾ ਦਿਬ੍ਬਮਯੇਹਿ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਸਯਂ ਧਮ੍ਮਂ ਸੁਤ੍ਵਾ ਪਸਨ੍ਨੋ ਪਸਨ੍ਨਾਕਾਰਂ ਕਤ੍ਵਾ ਕਸ੍ਸਪਦਸਬਲੇਨ ਦੇਸਿਤਾਯ ਅਨਿਚ੍ਚਾਦਿਪਰਿਦੀਪਿਕਾਯ.

੩੪.

ਅਨਿਚ੍ਚਾਵ ਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋਤਿ.

ਗਾਥਾਯ ਧਮ੍ਮਦੇਸਨੇਨ ਤਸ੍ਸ ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ਦੇਵਲੋਕੇ ਮਹਨ੍ਤਂ ਸਿਰਿਵਿਭਵਂ ਦਸ੍ਸੇਤ੍ਵਾ ਆਨੇਤ੍ਵਾ ਸਕਰਜ੍ਜੇਯੇਵ ਪਤਿਟ੍ਠਾਪੇਤ੍ਵਾ ਅਪ੍ਪਮਤ੍ਤੋ ਹੋਤਿ ਮਹਾਰਾਜਾਤਿ ਓਵਦਿਤ੍ਵਾ ਦੇਵਲੋਕਮੇਵ ਅਗਮਾਸੀਤਿ.

੩੫.

ਇਤਿ ਅਮਿਤਸਿਰਿਂ ਵਾ ਜੀਵਿਤਂ ਵਾਪਿ ਸਨ੍ਤੋ,

ਨ ਸੁਮਰਿਯ ਪਸਤ੍ਥਂ ਧਮ੍ਮਮੇਵਾ ਚਰਨ੍ਤਿ;

ਤਨੁਤਰ ਵਿਭਵਾਨਂ ਅਪ੍ਪਮਾਯੂਨਮਮ੍ਭੋ,

ਇਹ ਕੁਸਲਪਮਾਦੋ ਕੋ ਨੁ ਤੁਮ੍ਹਾਦਿਸਾਨਨ੍ਤਿ.

ਧਮ੍ਮਸੋਣ੍ਡਕਵਤ੍ਥੁਂ ਪਠਮਂ.

੨. ਮਿਗਲੁਦ੍ਦਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬਿਕਥਾ

ਇਤੋ ਕਿਰ ਏਕ ਤਿਂਸਤਿਮੇ ਕਪ੍ਪੇ ਸਿਖੀਨਾਮ ਸਮ੍ਮਾਸਮ੍ਬੁਦ੍ਧੋ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਪਰਮਾਤਿਸਮ੍ਬੋਧਿਂ ਪਤ੍ਵਾ ਸਦੇਵਕਂ ਲੋਕਂ ਸਂਸਾਰਕਨ੍ਤਾਰਾ ਉਤ੍ਤਾਰੇਨ੍ਤੋ ਧਮ੍ਮਰਤਨਵਸ੍ਸਂ ਵਸ੍ਸਾਪੇਨ੍ਤੋ ਧਮ੍ਮਭੇਰਿਂਪਹਰਨ੍ਤੋ ਧਮ੍ਮਕੇਤੁਂ ਉਸ੍ਸਾਪੇਨ੍ਤੋ ਏਕਸ੍ਮਿਂ ਸਮਯੇ ਵਿਵੇਕ ਮਨੁਬ੍ਰੂਹਨ੍ਤੋ ਅਰਞ੍ਞਾਯਤਨਂ ਪਾਵਿਸਿ, ¶ ਪਵਿਸਿਤ੍ਵਾ ਚਪਨ ਸੁਪੁਪ੍ਫਿਤਨਾਗਪੁਨ੍ਨਾਗਾਦਿਨਾਨਾਤਰੁਸਣ੍ਡਮਣ੍ਡਿਤੇ ਸੁਫੁਲ੍ਲਸੁਮਨਮਾਲਤਿਪ੍ਪਭੁਤਿਨਾਨਾਲਤਾਕੁਲੇ ਅਨੇਕਵਿਧਦਿਪਦਚਤੁਪ੍ਪਦਸਙ੍ਘਨਿਸੇਵਿਤੇ ਰਮਣੀਯੇ ਸੀਤਲਸਿਲਾਤਲੇ ਚਤੁਗ੍ਗੁਣਂ ਸਙ੍ਘਾਟਿਂਪਞ੍ਞਪੇਤ੍ਵਾ ਨਿਸੀਦਿ ਛਬ੍ਬਣ੍ਣਰਂਸੀਹਿ ਦਿਸਂ ਪੂਰਯਨ੍ਤੋ, ਤਦਾ ਤਤ੍ਥ ਦੇਵਬ੍ਰਹ੍ਮਨਾਗਸੁਪਣ੍ਣਾਦਯੋ ਸਨ੍ਨਿਪਤਿਤ੍ਵਾ ਦਿਬ੍ਬਮਯੇਹਿ ਗਨ੍ਧਮਾਲਾਦੀਹਿ ਭਗਵਨ੍ਤਂ ਪੂਜਯਮਾਨਾ ਥੋਮਯਮਾਨਾ ਨਮਸ੍ਸਮਾਨਾ ਅਟ੍ਠਂਸੁ, ਤਸ੍ਮਿਂ ਪਨਸਮਾਗਮੇ ਭਗਵਾ ਮਧੁਰਸ੍ਸਰਂ ਨਿਚ੍ਛਾਰੇਨ੍ਤੋ ਬ੍ਰਹ੍ਮਘੋਸੇਨ ਚਤੁਸਚ੍ਚਪਟਿਸਂਯੁਤ੍ਤਂ ਧਮ੍ਮਂ ਦੇਸੇਤਿ ਅਮਤਵਸ੍ਸਂ ਵਸ੍ਸਾਪੇਨ੍ਤੋਵਿਯ. ਤਦਾ ਏਕੋ ਮਿਗਲੁਦ੍ਦਕੋ ਵਨਂ ਪਵਿਟ੍ਠੋ ਮਿਗਸੂਕਰੇ ਹਨ੍ਤ੍ਵਾ ਮਂਸਂ ਖਾਦਨ੍ਤੋ ਤਂ ਠਾਨਂ ਪਤ੍ਵਾ ਅਦ੍ਦਸ ਭਗਵਨ੍ਤਂ ਧਮ੍ਮਂ ਦੇਸੇਨ੍ਤਂ. ਦਿਸ੍ਵਾ ਏਕਮਨ੍ਤਂ ਠਿਤੋ ਧਮ੍ਮਂ ਸੁਤ੍ਵਾ ਚਿਤ੍ਤਂ ਪਸਾਦੇਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਛਸੁ ਕਾਮਸਗ੍ਗੇਸੁ ਮਨੁਸ੍ਸੇਸੁਚ ਅਪਰਾਪਰਂ ਇਸ੍ਸਰਿਯਂ ਅਨੁਭਵਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਏਕਦਿਵਸਂ ਧਮ੍ਮਂ ਦੇਸੇਨ੍ਤਸ੍ਸ ਭਗਵਤੋ ਚਤੁਸਚ੍ਚਪਤਿ ਸਂਯੁਤ੍ਤਂ ਧਮ੍ਮਕਥਂ ਸੁਤ੍ਵਾ ਚਤੁਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਏਕਦਿਵਸਂ ਭਿਕ੍ਖੁਸਙ੍ਘਮਜ੍ਝਗਤੋ ਅਤ੍ਤਨੋ ਕਤਕਮ੍ਮਪ੍ਪਕਾਸਨੇਨ ਪੀਤਿਵਾਚਮੁਦਾਹਰਿ.

੧.

ਏ ਕ ਤਿਂ ਸੇ ਇਤੋ ਕਪ੍ਪੇ,

ਲੋਕੇ ਉਪ੍ਪਜ੍ਜਿ ਨਾਯਕੋ;

ਪਤ੍ਤਿਂਸ ਲਕ੍ਖਣਾਤਿਣ੍ਣੋ,

ਸਮ੍ਬੁਦ੍ਧੋ ਸ ਸਿਖੀਵ੍ਹਯੋ.

੨.

ਜਲਨ੍ਤੋ ਦੀਪਰੁਕ੍ਖੋਵ, ਸੂਰਿਯੋਵ ਨਭ ਮੁਗ੍ਗਤੋ;

ਮੇਰੁਰਾਜਾਵ ਸਮ੍ਬੁਦ੍ਧੋ, ਜਨੇਸਗ੍ਗੋ ਪਤਾਪਵਾ.

੩.

ਪੂਰੇਤ੍ਵਾ ਧਮ੍ਮਨਾਵਾਯਂ, ਸ ਨਾਥੋ ਸਕਲਂ ਪਜਂ;

ਪਤਿਟ੍ਠਪੇਨ੍ਤੋ ਸਂਸਾਰ, ਕਨ੍ਤਾਰਾ ਸਨ੍ਤਿਭੂਮਿਯਂ.

੪.

ਧਮ੍ਮਕੇਤੁਂ ¶ ਸਮੁਸ੍ਸੇਨ੍ਤੋ, ਹਨਨ੍ਤੋ ਧਮ੍ਮਦੁਨ੍ਦੁਭਿਂ;

ਸਤ੍ਤੇ ਦੁਕ੍ਖਾ ਪਮੋਚੇਨ੍ਤੋ, ਵਸੀ ਤਤ੍ਥ ਜਿਨੋ ਵਸੀ.

੫.

ਏਕਸ੍ਮਿਂ ਸਮਯੇ ਨਾਥੋ,

ਲੋਕਪਜ੍ਜੋਤਕੋ ਜਿਨੋ;

ਵਿਵੇਕਕਾਮੋ ਸਮ੍ਬੁਦ੍ਧੋ,

ਸੁਰਮ੍ਮਂ ਕਾਨਨਂ ਗਤੋ.

੬.

ਪੁਨ੍ਨਾਗਨਾਗਪੂਗਾਦਿ, ਨਾਨਾਪਾਦਪਸਂਕੁਲਂ;

ਲਤਾ ਲਿਙ੍ਗਿਤਸਾਖਾਹਿ, ਸਾ ਮੋਦਕੁਸੁਮਾਯੁਤਂ.

੭.

ਕੁਸੁਮਾ ਮੋਦਸਮ੍ਮਤ੍ਤ, ਛਪ੍ਪਦਾਲਿ ਨਿਸੇਵਿਤਂ;

ਨਾਨਾਮਿਗ ਗਣਾਕਿਣ੍ਣਂ, ਮਯੂਰਗਣ ਨਚ੍ਚਿਤਂ.

੮.

ਸੀਤਲਚ੍ਛੋਦਿਕਾਸਾਧੁ, ਸੁਪਤਿਤ੍ਥਜਲਾਸਯਂ;

ਆਸਾਰ ਸਾਰਧਾਰਾਹਿ, ਨਿਜ੍ਝਰਾਸਤ ਸਂਕੁਲਂ.

੯.

ਗਨ੍ਤ੍ਵਾਨ ਸੋ ਮਹਾਰਞ੍ਞਂ,

ਸੀਤਲਂ ਸਿਕਤਾਤਲਂ;

ਸਿਲਾਤਲੇ ਨਿਸਿਨ੍ਨੋਸਿ,

ਵਿਸ੍ਸਜ੍ਜੇਨ੍ਤੋ ਛਰਂਸਿਯੋ.

੧੦.

ਦੇਵਾ ਤਤ੍ਥ ਸਮਾਗਨ੍ਤ੍ਵਾ, ਪੂਜੇਸੁਂ ਦ੍ਵਿਪਦੁਤ੍ਤਮਂ;

ਦਿਬ੍ਬੇਹਿ ਗਨ੍ਧਮਾਲਾਹਿ, ਨਚ੍ਚੇਹਿ ਤੁਰਿਯੇਹਿਚ.

੧੧.

ਦੇਵਦੇਵੋ ਤਦਾ ਦੇਵ, ਸਙ੍ਘਮਜ੍ਝੇ ਨਿਸੀਦਿਯ;

ਚਤੁਸਚ੍ਚ ਮਦੇਸੇਸਿ, ਨਿਚ੍ਛਰਂ ਮਧੁਰਂ ਗਿਰਂ.

੧੨.

ਤਦਾਹਂ ਲੁਦ੍ਦਕੋ ਆਸਿਂ, ਮਿਗਸੂਕਰਮਾਰਕੋ;

ਮਿਗਮਂਸੇਨ ਜਿਵਾਮਿ, ਤੇਨ ਪੋਸੇਮਿ ਦਾਰਕੇ [ਪੋਸੇਨ੍ਤੋਪੁਤ੍ਤਦਾਰਕੇ ਇਤਿਕਤ੍ਥਚਿ].

੧੩.

ਤਦਾਹਂ ¶ ਮਿਗਵਂ ਯਾਤੋ,

ਸਬਾਣੋ ਸਸਰਾਸਨੋ;

ਅਦ੍ਦਸਂ ਵਿਰਜਂ ਬੁਦ੍ਧਂ,

ਦੇਵਸਙ੍ਘਪੁਰਕ੍ਖਤਂ.

੧੪.

ਚਨ੍ਦਂਵ ਤਾਰਕਾਕਿਣ੍ਣਂ, ਮੇਰੁਂਵਣ੍ਣਵਮਜ੍ਝਗਂ;

ਵਿਰੋਚਮਾਨ ਮਾਸੀਨਂ, ਚਤੁਸਚ੍ਚਪ੍ਪਕਾਸਕਂ.

੧੫.

ਏਕਪਸ੍ਸੇ ਠਿਤੋ ਤਤ੍ਥ, ਅਸ੍ਸੋਸਿਂ ਧਮ੍ਮਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸੋਮਨਸ੍ਸਂ ਪਵੇਦਯਿਂ.

੧੬.

ਏਕਤਿਂਸੇ ਇਤੋ ਕਪ੍ਪੇ,

ਯਂ ਪੁਞ੍ਞਂ ਪਸੁਤਂ ਮਯਾ;

ਤੇਨਾਹਂ ਪੁਞ੍ਞਕਮ੍ਮੇਨ,

ਜਾਤੋਸਿਂ ਦੇਵਯੋਨਿਯਂ.

੧੭.

ਸਮ੍ਪਤ੍ਤਿਮਨੁਭੁਤ੍ਵਾਨ, ਛਕਾਮਗ੍ਗੇ ਪਰਾਪਰਂ;

ਦੇਵਸਙ੍ਘਪਰਿਬ੍ਬੂਲ਼੍ਹੋ, ਵਿਮਾਨੇ ਰਤਨਾਮਯੇ.

੧੮.

ਮਨੁਸ੍ਸੇਸੁਚ ਯਂ ਅਗ੍ਗਂ, ਤਸ੍ਸ ਭਾਗੀ ਭਵਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਸਦ੍ਧਮ੍ਮਸਵਣੇ ਫਲਂ.

੧੯.

ਇਮਸ੍ਮਿਂ ਭਦ੍ਦਕੇ ਕਪ੍ਪੇ,

ਸਾਵਤ੍ਤਿਪੁਰਮੁਤ੍ਤਮੇ;

ਅਡ੍ਢੇ ਮਹਦ੍ਧਨੇ ਸਾਲੇ,

ਜਾਤੋਹਂ ਉਦਿਤੇ ਕੁਲੇ.

੨੦.

ਮਹਤਾ ਪਰਿਵਾਰੇਨ, ਪਤ੍ਤੋ ਵੁਦ੍ਧਿਂਚ ਵਿਞ੍ਞੁਤਂ;

ਚਾਰਿਕਂ ਚਰਮਾਨੋਹਂ, ਪਤ੍ਤੋ ਜੇਤਵਨਂ ਵਰਂ.

੨੧.

ਅਦ੍ਦਸਂ ਸਹ ਸਿਸ੍ਸੇਹਿ, ਨਿਸਿਨ੍ਨਂ ਸੁਗਤਂ ਤਦਾ;

ਅਸ੍ਸੋਸਿਂ ਮਧੁਰਂ ਧਮ੍ਮਂ, ਚਤੁਸਚ੍ਚਪ੍ਪਕਾਸਕਂ.

੨੨.

ਸੁਤ੍ਵਾਨ ਮਧੁਰਂ ਧਮ੍ਮਂ, ਪਬ੍ਬਜਿਤ੍ਵਾਨ ਸਾਸਨੇ;

ਅ ਜਰਾ ਮਰਂ ਸੀਤਿਭੂਤਂ, ਪਤ੍ਤੋ ਨਿਬ੍ਬਾਣਮੁਤ੍ਤਮਂ.

੨੩.

ਸੁਤਂ ¶ ਏਕਮੁਹੁਤ੍ਤਂ ਮੇ, ਤਦਾ ਧਮ੍ਮਂ ਸੁਦੇਸਿਤਂ;

ਤੇਨਮ੍ਹਿ ਚਤੁਰਾਪਾਯੇ, ਨ ਜਾਤੋ ਨ ਕੁਤੋਭਯਂ.

੨੪.

ਕਰਮੁਕ੍ਖਿਪ੍ਪ ਵਕ੍ਖਾਮਿ, ਕਰੋਥੇ ਕਗਿਰਂ ਮਮ;

ਮਮੋ ਪਮਂ ਕਰਿਤ੍ਵਾਨ, ਧਮ੍ਮਂ ਸੁਣਾਥ ਸਾਧੁਕਨ੍ਤਿ.

ਏਵਞ੍ਚ ਪਨ ਵਤ੍ਵਾ ਸਤ੍ਤੇ ਧਮ੍ਮਸਵਣੇ ਨਿਯੋਜੇਸੀਤਿ.

੨੫.

ਇਤਿ ਤਨੁਤਰਕਾਲਂ ਸਾਧੁ ਧਮ੍ਮਂ ਸੁਣਿਤ੍ਵਾ,

ਅਧਿਗਤਵਿਭਵਾਨਂ ਆਨੁਭਾਵਂ ਸੁਣਿਤ੍ਵਾ;

ਭਵਵਿਭਵਸੁਖਂ ਭੋ ਪਤ੍ਥਯਨ੍ਤਾ ਕੁਸੀਤਂ,

ਜਹਥ ਸੁਣਥ ਧਮ੍ਮਂ ਦੁਲ੍ਲਭਂ ਦੁਲ੍ਲਭਸ੍ਸਾਤਿ.

ਮਿਗਲੁਦ੍ਦਕਸ੍ਸ ਵਤ੍ਥੁਂ ਦੁਤਿਯਂ.

੩. ਤਿਣ੍ਣਂਜਨਾਨਂ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪਸ੍ਮਿਂ ਕਿਰ ਪੁਬ੍ਬੇ ਮਹਾਨਿਦਾਘੋ ਅਹੋਸਿ, ਤਦਾ ਨਿਦਾਘਸੁਰਿਯੇਨ ਸਕਿਰਣਕਰਾ ਵਾਪਿ ਪੋਕ੍ਖਰਣਿ ਨਦੀ ਗਿਰਿਕਨ੍ਦਰਨਿਜ੍ਝਰਾਦੀਸੁ ਉਦਕਂ ਨਿਸ੍ਸੇਸਂ ਕਤ੍ਵਾ ਪੀਤਮਿਵ ਉਦਕੇ ਪਰਿਕ੍ਖੀਣੇ ਮਚ੍ਛਕਚ੍ਛਪਾਦਯੋ ਯੇਭੁਯ੍ਯੇਨ ਵਿਨਾਸਂ ਪਤ੍ਤਾ. ਅਥ ਮਹਾਰਞ੍ਞਭੂਮਿਯਂ ਰੁਕ੍ਖਤਿਣਲਭਾਦਯੋ ਅਤੀਵ ਮਿਲਾਤਾ ਅਹੇਸੁਂ. ਮਿਗਪਕ੍ਖਿਨੋਪਿਘਮ੍ਮਾਭਿਤਤ੍ਤਾ ਪਿਪਾਸਿਤੋ ਮਰੀਚਿਂ ਤੋਯਨ੍ਤਿਮਞ੍ਞਮਾਨਾ ਇਤੋਚਿਤੋਚ ਧਾਵਨ੍ਤਾ ਮਹਾਦੁਕ੍ਖਪ੍ਪਤ੍ਤਾ ਅਹੇਸੁਂ. ਤਦਾ ਏਕੋ ਸੁਵਪੋਤਕੋ ਪਿਪਾਸਿਤੋ ਤਤ੍ਥ ਤਤ੍ਥ ਪਾਨੀਯਂ ਪਰਿਯੇਸਨ੍ਤੋ ਮਹਾਰਞ੍ਞੇ ਏਕਸ੍ਮਿਂ ਪੂਤਿਪਾਦਪੇ ਸਟ੍ਠਿਰਤਨੇ ਨਰਕਾਵਾਟੇ ਪਾਨੀਯਗਨ੍ਧਂ ਘਾਯਿਤ੍ਵਾ ਲੋਭੇਨ ਪਾਤੁਂ ਓਤਿਣ੍ਣੋ ਅਤਿਪਾਨੇਨ ਭਾਰੋ ਤਤ੍ਥੇਵ ਪਤਿਤ੍ਵਾ ਉਗ੍ਗਨ੍ਤੁਂ ਨਾਸਕ੍ਖਿ. ਅਥਾਪਰੋਪਿ ਸਪ੍ਪੋਚ ਮਨੁਸ੍ਸੋਚਾਤਿ ਦ੍ਵੇ ਜਨਾ ਤਤ੍ਥੇਵ ਪਤਿਂਸੁ, ਸਪ੍ਪਾਨਾਮ ਵਿਵੇਕਂ ਲਦ੍ਧਾਵ ਅਤ੍ਤਂ ਵਿਜਹਨ੍ਤਿ. ਤਸ੍ਮਾਯਂ ਅਲਦ੍ਧਾ ¶ ਵਿਵੇਕਤ੍ਤਂ ਉਗ੍ਗਨ੍ਤੁਂ ਨਾਸਕ੍ਖਿ. ਅਨਾਲਮ੍ਬਤ੍ਤਾ ਮਨੁਸ੍ਸੋਪਿ. ਤੇ ਉਗ੍ਗਨ੍ਤੁਂ ਅਸਕ੍ਕੋਨ੍ਤਾ ਮਰਣਭਯਭੀਤਾ ਅਞ੍ਞਮਞ੍ਞ ਮਵਿਹੇਠੇਨ੍ਤਾ ਤਤ੍ਥੇਵ ਵਸਿਂਸੁ. ਅਥੇਕੋ ਬਰਾਣਸੀਵਾਸਿਕੋ ਮਨੁਸ੍ਸੋ ਵਨਂ ਪਵਿਟ੍ਠੋ ਤਥੇਵ ਪਾਨੀਯਂ ਪਰਿਯੇਸਮਾਨੋ ਤਂ ਠਾਨਂ ਪਤ੍ਵਾ ਤੇ ਤਯੋਪਿ ਦਿਸ੍ਵਾ ਕਮ੍ਪਮਾਨਹਦਯੋ ਵਲ੍ਲਿਯਾ ਪਿਟਕਂ ਬਨ੍ਧਿਤ੍ਵਾ ਸਿਕ੍ਕਾਯ ਪਕ੍ਖਿਪਿਤ੍ਵਾ ਓਤਾਰੇਤ੍ਵਾ ਤੇ ਤਯੋਪਿ ਉਦ੍ਧਰਿ, ਅਥਾਨੇਨ ਤੇ ਅਮ੍ਹਾਕਂ ਜੀਵਿਤਂ ਦਿਨ੍ਨਨ੍ਤਿ ਸੋਮਨਸ੍ਸਾ ਤਸ੍ਸੇਵਮਾਹਂਸੁ, ਸਾਮਿ ਮਯਂ ਤੁਮ੍ਹੇ ਨਿਸ੍ਸਾਯ ਜੀਵਿਤਂ ਲਭਿਮ੍ਹ, ਤੁਮ੍ਹੇ ਇਤੋ ਪਟ੍ਠਾਯ ਅਮ੍ਹਾਕਂ ਸਹਾਯੋ, ਮਯਮ੍ਪਿ ਤੇ ਸਹਾਯਾ, ਅਮ੍ਹਾਕਂ ਵਸਨਟ੍ਠਾਨਾਨਿ ਆਗਨ੍ਤੁਕਾਮਾਤਿ ਵਤ੍ਵਾ ਤੇਸੁ ਤਾਵ ਸੁਵਪੋਤਕੋ ਆਹ, ਸਾਮਿ ਬਾਰਾਣਸਿਯਂ ਦਕ੍ਖਿਣਦ੍ਵਾਰੇ ਮਹਾਨਿਗ੍ਰੋਧੋ ਅਤ੍ਥਿ, ਤਤ੍ਥਾਹਂ ਵਸਾਮਿ, ਤਵ ਤਥਾਰੂਪੇ ਕਿਚ੍ਚੇ ਸਤਿ ਮਮ ਸਨ੍ਤਿਕਮਾਗਮ੍ਮ ਸੁਵਾਤਿ ਸਦ੍ਦਂਕਰੋਹੀਤਿ ਵਤ੍ਵਾ ਮੇਤ੍ਤਿਥਿਰਂ ਕਤ੍ਵਾ ਪਕ੍ਕਾਮਿ, ਸਪ੍ਪੋਪਿ ਸਮ੍ਮਾਹਂ ਤਸ੍ਸੇਵ ਨਿਗ੍ਰੋਧਸ੍ਸਾ ਵਿਦੂਰੇ ਮਹਨ੍ਤਂ ਵਮ੍ਮਿਕਂ ਅਤ੍ਥਿ, ਤਤ੍ਥ ਵਸਾਮਿ, ਤਵਤ੍ਥੇ ਸਤਿ ਤਤ੍ਥਾਗਨ੍ਤ੍ਵਾ ਦੀਘਾਤਿਸਦ੍ਦਂ ਕਰੋਹੀਤਿ ਵਤ੍ਵਾ ਤਥੇਵਪਕ੍ਕਾਮਿ, ਮਨੁਸ੍ਸੋਪਿ ਬਾਰਾਣਸਿਯਂ ਅਸੁਕਾਯਨਾਮ ਵੀਥਿਯਾ ਅਸੁਕਗੇਹੇ ਵਸਾਮਿ, ਤਵਤ੍ਥੇ ਸਤਿ ਮਮ ਸਨ੍ਤਿਕਂ ਆਗਚ੍ਛਾਤਿ ਵਤ੍ਵਾ ਪਕ੍ਕਾਮਿ, ਅਥਾ ਪਰਭਾਗੇ ਸੋ ਉਪਕਾਰਕੋ ਪੁਰਿਸੋ ਅਤ੍ਤਨੋ ਕਿਚ੍ਚੇ ਸਞ੍ਜਾਤੇ ਮਮ ਸਹਾਯਾਨਂ ਸਨ੍ਤਿਕਂ ਗਮਿਸ੍ਸਾਮੀਤਿ ਸਙ੍ਕੇਤਾਨੁਸਾਰੇਨ ਗਨ੍ਤ੍ਵਾ ਨਿਗ੍ਰੋਧਮੂਲੇ ਠਿਤੋ ਸੁਵਸ੍ਸ ਸਦ੍ਦਮਕਾਸਿ, ਤਂ ਸੁਤ੍ਵਾ ਸੁਵਪੋਤਕੋ ਵੇਗੇਨਾਗਨ੍ਤ੍ਵਾ ਤੇਨ ਸਦ੍ਧਿਂ ਪਟਿਸਮ੍ਮੋਦਿਤ੍ਵਾਸਮ੍ਮ ਚਿਰੇਨਾ ਗਤੋਸਿ, ਆਗਤਕਾਰਣਂ ਮੇ ਆਚਿਕ੍ਖਾਤਿ ਆਹ. ਸੋਪਾਹ ਸਮ੍ਮਾਹਂ ਜੀਵਿਤੁ ਮਸਕ੍ਕੋਨ੍ਤੋ ਪੁਤ੍ਤਦਾਰਕੇ ਞਾਤੀਨਂ ਪਟਿਪਾਦੇਤ੍ਵਾ ਤਵ ਸਨ੍ਤਿਕਮਾਗਤੋਮ੍ਹਿਤਿ, ਸੁਵਪੋਤਕੋਪਿ ਸਾਧੁ ਸਮ੍ਮ ਤਯਾ ਕਤਂ ਮਮ ਸਨ੍ਤਿਕਮਾਗਚ੍ਛਨ੍ਤੇਨ, ਤਯਾ ਮਮ ਜੀਵਿਤਂ ਦਿਨ੍ਨਂ, ਮਯਾਪਿ ਤਵ ਜੀਵਨੁਪਾਯਂ ਕਾਤੁਂ ਵਟ੍ਟਤਿ, ਯਾਵਾਹਂ ਆਗਚ੍ਛਾਮਿ, ਤਾਵੇਤ੍ਥ ਥੋਕਂ ਵਿਸ੍ਸਮਾਤਿ ਵਤ੍ਵਾ ਪਕ੍ਕਾਮਿ ਜੀਵਨੁਪਾਯਂ ਪਰਿਯੇਸਮਾਨੋ, ¶ ਤਸ੍ਮਿਂ ਕਿਰ ਸਮਯੇ ਬਾਰਾਣਸੀਰਾਜਾ ਨਗਰਤੋ ਨਿਕ੍ਖਮ੍ਮ ਸੁਸਜ੍ਜਿਤੁਯ੍ਯਾਨਂ ਪਵਿਸਿਤ੍ਵਾ ਸਪਰਿਸੋ ਕੀਲ਼ਿਤ੍ਵਾ ਮਜ੍ਝਨ੍ਤਿਕਸਮਯੇ ਸੁਫੁਲ੍ਲਿਤਂ ਪਞ੍ਚਪਦੁਮਸਞ੍ਛਨ੍ਵਂ ਮਙ੍ਗਲਪੋਕ੍ਖਰਣਿਂ ਦਿਸ੍ਵਾ ਨਹਾਯਿਤੁਕਾਮੋ ਸਬ੍ਬਾਭਰਣਾਨਿ ਓਮੁਞ੍ਚਿਤ੍ਵਾ ਰਾਜਪੁਰਿਸੇ ਪਟਿਪਾਦੇਤ੍ਵਾ ਨਹਾਯਿਤੁਂ ਓਤਰਿ, ਤਦਾ ਸੁਵਪੋਤਕੋ ਤਂ ਠਾਨਂ ਪਤ੍ਤੋ ਸਾਖਨ੍ਤਰੇ ਨਿਲੀਨੋ ਰਾਜਪੁਰਿਸਾਨਂ ਪਮਾਦਂ ਦਿਸ੍ਵਾ ਰਞ੍ਞੋ ਮੁਤ੍ਤਾਹਾਰਂ ਡਸਿਤ੍ਵਾ ਆਕਾਸਂ ਪਕ੍ਖਨ੍ਦਿਤ੍ਵਾ ਵੇਗੇਨਾਗਨ੍ਤ੍ਵਾ ਅਤ੍ਤਨੋ ਸਹਾਯਸ੍ਸ ਦਤ੍ਵਾ ਅਪ੍ਪਮਤ੍ਤੋ ਇਮਂ ਵਲਞ੍ਜੇਹਿ ਸਮ੍ਮਾਤਿ ਵਤ੍ਵਾ ਅਦਾਸਿ, ਤਤੋ ਸੋ ਨਂ ਗਹੇਤ੍ਵਾ ਇਮਂ ਕੁਹਿਂ ਪਟਿਸਾਮੇਸ੍ਸਾਮੀਤਿ ਚਿਨ੍ਤੋਨ੍ਤੋ ਮਮੇਕੋ ਸਹਾਯਕੋ ਅਨ੍ਤੋਨਗਰੇ ਵਸਤਿ, ਤਸ੍ਮਿਂ ਠਪੇਸ੍ਸਾਮੀਤਿ ਚਿਨ੍ਤੇਤ੍ਵਾ ਯਥਾਸਙ੍ਕੇਤਮੁਪਗਮ੍ਮ ਤਂ ਦਿਸ੍ਵਾ ਪਟਿਸਨ੍ਥਾਰਂ ਕਤ੍ਵਾ ਸੁਵਪੋਤਕੇਨ ਕਤੋ ਪਕਾਰਂ ਪਕਾਸੇਤ੍ਵਾ ਇਮਂ ਮੁਤ੍ਤਾਹਾਰਂ ਸਾਧੁਕਂ ਠਪੇਹੀਤਿ ਵਤ੍ਵਾ ਅਦਾਸਿ, ਤਂਖਣੇ ਰਾਜਾ ਨਹਾਤ੍ਵਾਨੁਲਿਤ੍ਤੋ ਆਭਰਣਾਨਿ ਪਿਲਨ੍ਧੇਨ੍ਤੋ ਮੁਤ੍ਤਾਹਾਰਂ ਨਾਦ੍ਦਸ. ਤਤੋ ਰਾਜਪੁਰਿਸਾ ਅਨ੍ਤੋਚ ਬਹਿਚ ਪਰਿਜਨੇ ਉਪਪਰਿਕ੍ਖਿਤ੍ਵਾ ਮੁਤ੍ਤਾਹਾਰਂ ਅਪਸ੍ਸਨ੍ਤਾ ਨਗਰੇ ਭੇਰਿਂ ਚਰਾਪੇਸੁਂ, ਯੋ ਮੁਤ੍ਤਾਹਾਰਂ ਪਸ੍ਸਤਿ, ਤਸ੍ਸ ਰਾਜਾ ਮਹਨ੍ਤਂ ਯਸਂ ਦਸ੍ਸਤੀਤਿ. ਤਂ ਸੁਤ੍ਵਾ ਸੋ ਮਿਤ੍ਤਦੂਭੀ ਏਵਂ ਚਿਨ੍ਤੇਸਿ, ਅਹਂਚਮ੍ਹਿ ਦੁਕ੍ਖਿਤੋ, ਯਨ੍ਨੂਨਾਹਂ ਮੁਤ੍ਤਾਹਾਰਂ ਰਞ੍ਞੋ ਦਸ੍ਸੇਤ੍ਵਾ ਸੁਖੇਨ ਵਸੇਯ੍ਯਂ, ਕਿਮ੍ਮੇ ਏਤੇਨਾਤਿ ਤੇਨ ਕਤਂ ਤਥਾਰੂਪਂ ਉਪਕਾਰਂ ਅਸਲ੍ਲਕ੍ਖੇਨ੍ਤੋ ਮਹਾਮਿਤ੍ਤਦੂਭੀ ਪੁਰਿਸੋ ਰਾਜਪੁਰਿਸੇ ਉਪਸਙ੍ਕਮ੍ਮ ਮੁਤ੍ਤਹਾਰਂ ਅਤ੍ਤਨੋ ਸਨ੍ਤਿਕੇ ਠਪਿਤਭਾਵਂ ਕਥੇਸਿ, ਭੋ ਮਮ ਸਨ੍ਤਿਕੇ ਏਕੋ ਪੁਰਿਸੋ ਮੁਤ੍ਤਹਾਰਂ ਠਪੇਸੀਤਿ. ਏਵਂ ਅਸਪ੍ਪੁਰਿਸਸਂਸਗ੍ਗੋਤਿ, ਤਥਾਹਿ.

੧.

ਯਥਾ ਸਂਵਡ੍ਢਿਤੋ ਨਿਮ੍ਬੋ, ਮਧੁਖੀਰੋ ਦਸਿਞ੍ਚਨਾ;

ਨ ਯਾਤਿ ਮਧੁਰਂ ਤਂ ਵੋ, ਪਕਾਰ ਮਸਤਂ ਕਤਂ.

੨.

ਸੀਸੇਨੁ ਦਕ ਮਾਦਾਯ, ਵਡ੍ਢਿਤੋਪਿ ਨੁਹੀਤਰੁ;

ਨ ਯਾਤਿ ਮਧੁਰਂ ਤਂਵੋ, ਪਕਾਰਮਸਤਂ ਕਤਂ.

੩.

ਨਿਚ੍ਚਂ ¶ ਖੀਰੋਦਪਾਨੇਨ, ਵਡ੍ਢਿਤੋ ਸਿਵਿਸੋ ਯਥਾ;

ਵਿਸਂਵ ਪਰਿਵਤ੍ਤੇਤਿ, ਤਥਾ ਨੀਚੋਪਕਾਰਕਂ.

੪.

ਯਥਾਤ੍ਤਨਾ ਕਤੋ ਅਗ੍ਗਿ, ਸੀਤਲਂ ਨ ਦਦੇ ਖਲੁ;

ਤਥਾ ਨੀਚੇ ਕਤਂ ਕਾਰਂ, ਅਗ੍ਗੀਵ ਦਹਤੇ ਤਨੁਂ.

੫.

ਤਸ੍ਮਾ ਉਪਪਰਿਕ੍ਖਿਤ੍ਵਾ, ਹਾਵਭਾਵੇਨ ਬੁਦ੍ਧਿਯਾ;

ਕਾਤਬ੍ਬਾ ਮੇਤ੍ਤਿ ਜਨ੍ਤੂਹਿ, ਨਾਮਿਤ੍ਤੋ ਲਭਤੇਸੁਖਨ੍ਤਿ.

ਅਥਸ੍ਸ ਮਿਤ੍ਤਦੁਭਿਨੋ ਵਚਨੇਨ ਰਾਜਪੁਰਿਸਾ ਮੁਤ੍ਤਾਹਾਰਂਚਤਂਚ ਗਹੇਤ੍ਵਾ ਸਭਣ੍ਡਕਂ ਪੁਰਿਸਂ ਦਸ੍ਸੇਸੁਂ. ਅਥ ਰਾਜਾ ਸਭਣ੍ਡਕਂ ਚੋਰਂ ਦਿਸ੍ਵਾ ਕੁਦ੍ਧੋ ਇਮਂ ਨੇਤ੍ਵਾ ਦਕ੍ਖਿਣਦ੍ਵਾਰੇ ਜੀਵਸੂਲੇ ਉਤ੍ਤਾਸੇਥਾਤਿ ਆਣਾਪੇਸਿ, ਰਾਜਪੁਰਿਸਾ ਤਸ੍ਸ ਰਾਜਾਣਂ ਕਰੋਨ੍ਤੋ ਅਗਮਂਸੁ, ਤੇਹਿ ਨੀਯਮਾਨੋ ਪੁਰਿਸੋ ਦਕ੍ਖਿਣਦ੍ਵਾਰਾ ਨਿਕ੍ਖਮ੍ਮ ਸਪ੍ਪਸਹਾਯਂ ਸਰਿਤ੍ਵਾ ਅਪ੍ਪੇਵਨਾਮੇ ਤਸ੍ਸ ਸਨ੍ਤਿਕਾ ਕਿਞ੍ਚਿ ਸੋਤ੍ਥਿ ਭਵੇਯ੍ਯਾਤਿ ਪੁਬ੍ਬੇ ਵੁਤ੍ਤਸਙ੍ਕੇਤਾ ਨੁਸਾਰੇਨ ਵਮ੍ਮਿਕਂ ਦਿਸ੍ਵਾ ਸਮ੍ਮ ਦੀਘਾਤਿ ਸਦ੍ਦਮਕਾਸਿ, ਸੋ ਵਮ੍ਮਿਕਾ ਨਿਕ੍ਖਮ੍ਮਤਂ ਤਥਾ ਨਿਯਮਾਨਂ ਦਿਸ੍ਵਾ ਸਂਵਿਗ੍ਗੋ ਦੁਕ੍ਖਪ੍ਪਤ੍ਤੋ ਸਹਾਯਸ੍ਸਮੇ ਅਜ੍ਜ ਅਵਸ੍ਸਯੇਨ ਉਪਤ੍ਥਮ੍ਭਂ ਭਵਿਤੁਂ ਵਟ੍ਟਤੀਤਿ ਤਂ ਸਮਸ੍ਸਾਸੇਤ੍ਵਾ ਅਤ੍ਤਭਾਵਂ ਵਿਜਹਿਤ੍ਵਾ ਅਞ੍ਞਤਰਵੇਸੇਨ ਰਾਜਪੁਰਿਸੇ ਉਪਸਙ੍ਕਮ੍ਮ ਇਮਂ ਪੁਰਿਸਂ ਮੁਹੁਤ੍ਤਂਮਾ ਮਾਰੇਥਾਤਿ ਦਲ਼੍ਹਂ ਵਤ੍ਵਾ ਮੁਹੁਤ੍ਤੇਨ ਰਞ੍ਞੋ ਅਗ੍ਗਮਹੇਸਿਯਾ ਵਸਨਟ੍ਠਾਨਂ ਗਨ੍ਤ੍ਵਾ ਸਪ੍ਪਵਣ੍ਣੇਨ ਦੇਵਿਂ ਡਸਿਤ੍ਵਾ ਤਾਯ ਵਿਸੇਨ ਮੁਚ੍ਛਿਤਕਾਲੇ ਮਨੁਸ੍ਸਵਣ੍ਣੇਨ ਵਜ੍ਝਪ੍ਪਤ੍ਤੋ ਵਿਸੋਸਧਂ ਜਾਨਾਤਿਤੀ ਵਤ੍ਵਾ ਤਂਖਣੇਵ ਸਹਾਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਰਞ੍ਞਾ ਤਵ ਪਕ੍ਕੋ ਸਿਤਕਾਲੇ ਗਨ੍ਤ੍ਵਾ ਉਦਕਪ੍ਪਸਤੇਨ ਦੇਵਿਯਾ ਸਰੀਰੇ ਪਹਰਿਤ੍ਵਾ ਨਿਬ੍ਬਿਸਂ ਕਰਾਹੀਤਿ ਵਤ੍ਵਾ ਪਕ੍ਕਾਮਿ, ਅਥ ਰਾਜਾ ਵਿਸਵੇਜ੍ਜ ਪਰਿਯੇਸਨ੍ਤੋ ਤਂ ਪਵਤ੍ਤਿਂ ਸੁਤ੍ਵਾ ਵਜ੍ਝਪ੍ਪਤ੍ਤਂ ਆਨੇਥਾਤਿ ਆਣਾਪੇਤ੍ਵਾ ਦੇਵਿਯਾ ਨਿਬ੍ਬਿਸਂ ਕਰੋਥਾਤਿ ਆਹ, ਸੋ ਨਾਗਰਾਜੇਨ ਵੁਤ੍ਤਨਯੇਨ ਨਿਬ੍ਬਿਸਮਕਾਸਿ, ਸਾ ਸੁਖਿਤਾ ਅਰੋਗਾ ਅਹੋਸਿ, ਰਾਜਾ ਤਂ ਦਿਸ੍ਵਾ ਤੁਟ੍ਠੋ ਤਸ੍ਸ ਖੇਤ੍ਤਵਤ੍ਥੁਯਾਨਵਾਹਨਾਦਿਦਾਨੇਨ ¶ ਮਹਾਸਕ੍ਕਾਰਮਕਾਸਿ, ਅਥ ਸੋ ਰਾਜਾਨਂ ਉਪਸਙ੍ਕਮ੍ਮ ਅਤ੍ਤਨਾ ਕਤਂ ਸਬ੍ਬਂ ਪਕਾਸੇਸਿ. ਤੇਨ ਵੁਤ੍ਤਂ.

੬.

ਏਕਦਾਹਂ ਮਹਾਰਾਜ, ਵਨਂ ਕਮ੍ਮੇਨ ਕੇਨਚਿ;

ਗਤੋਦ੍ਦਸਂ ਮਹਾਵਾਟੇ, ਪਤਿਤਂ ਸੁਵਪੋਤਕਂ.

੭.

ਅਥੋ ਰਗਂ ਮਨੁਸ੍ਸਂਚ;

ਦੁਕ੍ਖਪ੍ਪਤ੍ਤੇ ਖੁਦਾਪਰੇ;

ਉਕ੍ਖਿਪਿਂ ਕਰੁਣਾਯਾਹਂ;

ਤੇ ਮੇ ਵੋਚੁਂ ਤਦਾ ਤਯੋ.

੮.

ਅਦਾਸਿ ਜੀਵਮਮ੍ਹਾਕਂ, ਉਪਕਾਰੋਸਿ ਨੋ ਤੁਵਂ;

ਤਵ ਕਿਚ੍ਚੇ ਸਮੁਪ੍ਪਨ੍ਨੇ, ਅਮ੍ਹਾਕਂ ਏਹਿ ਸਨ੍ਤਿਕਂ.

੯.

ਏਵਂ ਤੇਹਿ ਪਵੁਤ੍ਤੋਹਂ, ਅਗਞ੍ਛਿਂ ਸੁਵਸਨ੍ਤਿਕਂ;

ਤੇਨ ਕਤੂਪਕਾਰੋਹਂ, ਮਨੁਸ੍ਸਸ੍ਸਾਪਿ ਸਨ੍ਤਿਕਂ.

੧੦.

ਤੇਨਾਹਂ ਮਰਣਪ੍ਪਤ੍ਤੋ, ਅਦ੍ਦਸਂ ਉਰਗਾਧਿਪਂ;

ਸੋਦਾਸਿ ਜੀਵਿਤਂ ਮਯ੍ਹਂ, ਅਲਤ੍ਥਂ [ਅਲਦ੍ਧ ਇਤਿਸਬ੍ਬਤ੍ਥ] ਵਿਪੁਲਂ ਧਨਂ.

੧੧.

ਸੁਜਨੋ ਨਾਵਮਨ੍ਤਬ੍ਬੋ, ਖੁਦ੍ਦਕੋਤਿ ਨਰਾਧਿਪ;

ਸੁਵੋਚ ਉਰਗੋਚੇਤੇ, ਮਿਤ੍ਤਧਮ੍ਮੇ ਪਤਿਟ੍ਠਿਤਾ.

੧੨.

ਕਾਰਣਞ੍ਞੂ ਮਨੁਸ੍ਸੇਸੋ,

ਅਮ੍ਹੇਹਿ ਸਮਜਾਤਿਕੋ;

ਕਤੂਪਕਾਰੋ ਏਵਮ੍ਪਿ,

ਦਿਸੋ ਜਾਤੋ ਨਰਾਧਮੋ.

੧੩.

ਅਕਸ੍ਮਾ ਦੇਵ ਕੁਪ੍ਪਨ੍ਤਿ, ਪਸੀਦਨ੍ਤਿਨਿਮਿਤ੍ਤਤੋ;

ਸੀਲਂ ਹੇਤਮਸਾਧੂਨਂ, ਬਾਲਾਨਮਵਿਜਾਨਤਂ.

੧੪.

ਮਨੁਸ੍ਸਾਪਿ ਮਹਾਰਾਜ, ਕੇਚਿ ਵਿਸ੍ਸਾਸਿਯਾ ਨ ਵੇ;

ਤਿਰਚ੍ਛਾਨਾਪਿ ਹੋਨ੍ਤੇਵ, ਅਜਿਮ੍ਹਮਨਸਾਸਠਾਤਿ.

ਏਵਂ ¶ ਸੋ ਅਤ੍ਤਨੋ ਪਵਤ੍ਤਿਂ ਕਥੇਸਿ, ਰਾਜਾ ਤਂ ਸੁਤ੍ਵਾ ਪਸਨ੍ਨੋ ਇਮਸ੍ਸ ਪੁਰਿਸਸ੍ਸ ਮਹਨ੍ਤਂ ਗੇਹਂ ਕਤ੍ਵਾ ਮਹਾਪਰਿਹਾਰਂ ਕਰੋਥਾਤਿ ਆਣਾਪੇਸਿ, ਸੋ ਪਨ ਮਮ ਗੇਹਂ ਨਿਗ੍ਰੋਧਸ੍ਸ ਚ ਵਮ੍ਮਿਕਸ੍ਸ ਚ ਅਨ੍ਤਰੇ ਕਰੋਥਾਤਿ ਵਤ੍ਵਾ ਤਥਾ ਕਾਰੇਤ੍ਵਾ ਤਤ੍ਥ ਵਸਨ੍ਤੋ ਰਾਜੂਪਟ੍ਠਾਨਂ ਕਰੋਨ੍ਤੋ ਤੇਹਿ ਸਹਾਯੇਹਿ ਸਦ੍ਧਿਂ ਸਮ੍ਮੋਦਮਾਨੋ ਯਾਵਜੀਵਂ ਵਸਿਤ੍ਵਾ ਆਯੁ ਪਰਿਯੋਸਾਨੇ ਤੇਹਿ ਸਦ੍ਧਿਂ ਯਥਾਕਮ੍ਮਂ ਗਤੋਤਿ.

੧੫.

ਇਤਿ ਪਤਿਤਸੁਖਮ੍ਹਾ ਅਙ੍ਗਤੋ ਵਾ ਧਨਮ੍ਹਾ,

ਪਰਮਤਰਪਤਿਟ੍ਠਾ ਹੋਨ੍ਤਿ ਮਿਤ੍ਤਾ ਸਖਾਨਂ;

ਵਿਰਹਿਤਸਖਿਨਂ ਭੋ ਨਤ੍ਥਿ ਯਸ੍ਮਾਭਿਵੁਦ੍ਧਿ,

ਚਿਣੁਥ ਕੁਸਲਧਮ੍ਮਂ ਮਿਤ੍ਤਵਨ੍ਤਾ ਮਹਨ੍ਤਂ.

ਤਿਣ੍ਣਂ ਜਨਾਨਂ ਵਤ੍ਥੁਂ ਤਤਿਯਂ.

੪. ਬੁਦ੍ਧੇਨਿਯਾ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਕਿਰ ਪੁਬ੍ਬੇ ਪਾਟਲਿਪੁਤ੍ਤਨਗਰੇ ਸਤ੍ਤਾਸੀਤੀਕੋਟਿਨਿਹਿਤਧਨਂ ਏਕਂ ਸੇਟ੍ਠਿਕੁਲਂ ਅਹੋਸਿ, ਤਸ੍ਸ ਪਨ ਸੇਟ੍ਠਿਨੋ ਏਕਾਯੇਵ ਧੀਤਾ ਅਹੋਸਿ ਨਾਮੇਨ ਬੁਦ੍ਧੇਨਿਨਾਮ, ਤਸ੍ਸਾ ਸਤ੍ਤਵਸ੍ਸਿਕਕਾਲੇ ਮਾਤਾਪਿਤਰੋ ਕਾਲਮਕਂਸੁ, ਤਸ੍ਮਿਂ ਕੁਲੇ ਸਬ੍ਬਂ ਸਾਪਤੇਯ੍ਯਂ ਤਸ੍ਸਾਯੇਵ ਅਹੋਸਿ, ਸਾ ਕਿਰ ਅਭਿਰੂਪਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਦੇਵਚ੍ਛਰਪਟਿਭਾਗਾ ਪਿਯਾਚ ਅਹੋਸਿ ਮਨਾਪਾ, ਸਦ੍ਧਾ ਪਸਨ੍ਨਾ ਰਤਨਤ੍ਤਯਮਾਮਿਕਾ ਪਟਿਵਸਤਿ, ਤਸ੍ਮਿਂ ਪਨ ਨਗਰੇ ਸੇਟ੍ਠਿਸੇਨਾਪਤਿਉਪਰਾਜਾਦਯੋ ਤਂ ਅਤ੍ਤਨੋ ਪਾਦਪਰਿਚਾਰਿਕਂ ਕਾਮਯਮਾਨਾ ਮਨੁਸ੍ਸੇ ਪੇਸੇਸੁਂ ਪਣ੍ਣਾਕਾਰੇਹਿ ਸਦ੍ਧਿਂ, ਸਾ ਤਂ ਸੁਤ੍ਵਾ ਚਿਨ੍ਤੇਸਿ, ਮਯ੍ਹਂ ਮਾਤਾਪਿਤਰੋ ਸਬ੍ਬਂ ਵਿਭਵਂ ਪਹਾਯ ਮਤਾ, ਮਯਾ ਪਨ ਤਥਾ ਅਗਨ੍ਤਬ੍ਬਂ, ਕਿਂ ਮੇ ਪਤਿਕੁਲੇਨ, ਕੇਵਲਂ ¶ ਵਿਤ੍ਤਵਿਨਾਸਾਯ ਭਵਤਿ, ਮਯਾ ਪਨਿ ਮਂ ਧਨਂ ਬੁਦ੍ਧਸਾਸਨੇਯੇਵ ਨਿਦਹਿਤੁਂ ਵਟ੍ਟਤੀਤਿ ਚਿਨ੍ਤੇਸਿ, ਚਿਨ੍ਤੇਤ੍ਵਾ ਚ ਪਨ ਤੇਸਂ ਨ ਮਯ੍ਹਂ ਪਤਿਕੁਲੇਨਤ੍ਥੋਤਿ ਪਟਿਕ੍ਖਿਪਿ, ਸਾ ਤਤੋ ਪਟ੍ਠਾਯ ਮਹਾਦਾਨਂ ਪਵਤ੍ਤੇਨ੍ਤੀ ਸਮਣਬ੍ਰਹ੍ਮਣੇ ਸਨ੍ਤਪ੍ਪੇਸਿ, ਤੇਨੇਤ੍ਥ.

੧.

ਚਤੁਦ੍ਦਿਸਾਯਾਤਜਿਨਤ੍ਰਜਾਨਂ,

ਆਪਾਨਭੂਤਂ ਘਰਮਾਸਿ ਤਸ੍ਸਾ;

ਯਦਿਚ੍ਛਿਤ ਪ੍ਪਚ੍ਚਯਲਾਭ ਹੇਤੁ,

ਦੇਵਦ੍ਦੁਮੋਵਾਸਿ ਮਹਾਨੁਭਾਵੋ.

੨.

ਪੁਪ੍ਫੂਪਹਾਰਾਦਿ ਵਿਤਾਨਲਙ੍ਕਤਾ,

ਪਦੀਪ ਪਞ੍ਞਤ੍ਤ ਸੁਭਾਸਨਾਵਲੀ;

ਸੁਖਾਸਨਾਸੀਨ ਵਸੀਹਿਲਙ੍ਕਤਾ,

ਤਸ੍ਸਾਸਿ ਤਸ੍ਮਿਂ ਵਰਦਾਨਸਾਲਾ.

੩.

ਸੁਧੋਤਹਤ੍ਥਾ ਸੁਚਿਪੁਞ੍ਞਚਿਤ੍ਤਾ,

ਸਦਾਦਰਾ ਰਕ੍ਖਿਤਪਞ੍ਚਸੀਲਾ;

ਬੁਦ੍ਧੇਨਿਨਾਮਾ ਕਰੁਣਾ ਗੁਣਗ੍ਗਾ,

ਅਦਾ ਮਹਾਦਾਨਵਰਂ ਪਸਤ੍ਥਨ੍ਤਿ.

ਅਥਾਪਰਭਾਗੇ ਏਕੋ ਅਸ੍ਸਵਾਣਿਜਕੋ ਅਸ੍ਸ-ਵਾਣਿਜ੍ਜਾਯ ਪੁਬ੍ਬਨ੍ਤਾਪਰਨ੍ਤਂ ਗਚ੍ਛਨ੍ਤੋ ਆਗਮ੍ਮ ਇਮਿਸ੍ਸਾ ਗੇਹੇ ਨਿਵਾਸਂ ਗਣ੍ਹਿ, ਅਥ ਸੋ ਵਾਣਿਜੋ ਤਂ ਦਿਸ੍ਵਾ ਧੀਤੁਸਿਨੇਹਂ ਪਤਿ ਟ੍ਠਾ ਪੇ ਤ੍ਵਾ ਗਨ੍ਧਮਾਲਵਤ੍ਥਾਲਙ੍ਕਾਰਾਦੀਹਿ ਤਸ੍ਸਾ ਉਪਕਾਰਕੋ ਹੁਤ੍ਵਾ ਗਮਨਕਾਲੇ ਅਮ੍ਮ ਏਤੇਸੁ ਅਸ੍ਸੇਸੁ ਤਵ ਰੁਚ੍ਚਨਕਂ ਅਸ੍ਸਂ ਗਣ੍ਹਾਹੀਤਿ ਆਹ, ਸਾਪਿ ਅਸ੍ਸੇ ਓਲੋਕੇਤ੍ਵਾ ਏਕਂ ਸਿਨ੍ਧਵਪੋਤਕਂ ਦਿਸ੍ਵਾ ਏਤਂ ਮੇ ਦੇਹੀਤਿ ਆਹ, ਵਾਣਿਜੋ ਅਮ੍ਮ ਏਸੋ ਸਿਨ੍ਧਵਪੋਤਕੋ, ਅਪ੍ਪਮਤ੍ਤਾ ਹੁਤ੍ਵਾ ਪਟਿਜਗ੍ਗਾਹੀਤਿ ਵਤ੍ਵਾ ਤਂ ਪਟਿਪਾਦੇਤ੍ਵਾ ਅਗਮਾਸਿ. ਸਾਪਿ ਤਂ ਪਟਿਜਗ੍ਗਮਾਨਾ ਆਕਾਸਗਾਮਿਭਾਵਂ ਞਤ੍ਵਾ ਸਮ੍ਮਾ ਪਟਿਜਗ੍ਗਨ੍ਤੀ ਏਵਂ ਚਿਨ੍ਤੇਸਿ, ਪੁਞ੍ਞਕਰਣਸ੍ਸ ¶ ਮੇ ਸਹਾਯੋ ਲਦ੍ਧੋਤਿ, ਅਗਤਪੁਬ੍ਬਾਚ ਮੇ ਭਗਵਤੋ ਸਮਾਰਂ ਮਾਰਬਲਂ ਵਿਧਮੇਤ੍ਵਾ ਬੁਦ੍ਧਭੂਤਸ੍ਸ ਜਯਮਹਾਬੋਧਿਭੂਮਿ, ਯਨ੍ਨੂਨਾਹਂ ਤਤ੍ਥ ਗਨ੍ਤ੍ਵਾ ਭਗਵਤੋ ਜਯਮਹਾਬੋਧਿਂ ਵਨ੍ਦੇਯ੍ਯਨ੍ਤਿ ਚਿਨ੍ਤੇਤ੍ਵਾ ਬ ਹੂ ਰਜਤਸੁਵਣ੍ਣਮਾਲਾਦਯੋ ਕਾਰਾਪੇਤ੍ਵਾ ਏਕਦਿਵਸਂ ਅਸ੍ਸ ਮਭਿਰੁਯ੍ਹ ਆਕਾਸੇਨ ਗਨ੍ਤ੍ਵਾ ਬੋਧਿਮਾਲਕੇ ਠਤ੍ਵਾ ਆਗਚ੍ਛਨ੍ਤੁਅਯ੍ਯਾ ਸੁਵਣ੍ਣਮਾਲਾ ਪੂਜੇਤੁਂਤਿ ਉਗ੍ਘੋਸੇਸਿ. ਤੇਨੇਤ੍ਥ.

੪.

ਯਤੋ ਪਟ੍ਠਾਯਹਂ ਬੁਦ੍ਧ, ਸਾਸਨੇ ਸੁਦ੍ਧਮਾਨਸਾ;

ਪਸਨ੍ਨਾ ਤੇਨ ਸਚ੍ਚੇਨ, ਮਮਾਨੁਗ੍ਗਹਬੁਦ੍ਧਿਯਾ.

੫.

ਆਗਚ੍ਛਨ੍ਤੁ ਨਮਸ੍ਸਨ੍ਤੁ, ਬੋਧਿਂ ਪੂਜੇਨ੍ਤੁ ਸਾਧੁਕਂ;

ਸੋਣ੍ਣਮਾਲਾਹਿ ਸਮ੍ਬੁਦ੍ਧ, ਪੁਤ੍ਤਾ ਅਰਿਯਸਾਵਕਾ.

੬.

ਸੁਤ੍ਵਾ ਤਂ ਵਚਨਂ ਅਯ੍ਯਾ, ਬਹੂ ਸੀਹਲ਼ਵਾਸਿਨੋ;

ਆਗਮ੍ਮ ਨਭਸਾ ਤਤ੍ਥ, ਵਨ੍ਦਿਂ ਸੁਚ ਮਹਿਂਸੁਚਾਤਿ.

ਤਤੋ ਪ੍ਪਤੁਤਿ ਸਾ ਕੁਮਾਰਿਕਾ ਬੁਦ੍ਧਸਾਸਨੇ ਅਤੀਵ ਪਸਨ੍ਨਾ ਨਿਚ੍ਚਮੇਵ ਅਸ੍ਸ ਮਭਿਰੁਯ੍ਹ ਆਗਨ੍ਤ੍ਵਾ ਅਰਿਯੇਹਿ ਸਦ੍ਧਿਂ ਮਹਾਬੋਧਿਂ ਸੁਵਣ੍ਣਮਾਲਾਹਿ ਪੂਜੇਤ੍ਵਾ ਗਚ੍ਛਤਿ, ਅਥ ਪਾਟਲਿਪੁਤ੍ਤਨਗਰੋਪਵਨੇ ਵਨਚਰਾ ਤਸ੍ਸਾ ਅਭਿਣ੍ਹਂ ਗਚ੍ਛਨ੍ਤਿਯਾ ਚ ਆਗਚ੍ਛਨ੍ਤਿਯਾ ਚ ਰੂਪਸਮ੍ਪਤ੍ਤਿਂ ਦਿਸ੍ਵਾ ਰਞ੍ਞੋ ਕਥੇਸੁਂ. ਮਹਾਰਾਜ ਏਵਰੂਪਾ ਕੁਮਾਰਿਕਾ ਅਸ੍ਸ ਮਭਿਰੁਯ੍ਹ ਆਗਨ੍ਤ੍ਵਾ ਨਿਬਦ੍ਧਂ ਵਨ੍ਦਿਤ੍ਵਾ ਗਚ੍ਛਤਿ. ਦੇਵਸ੍ਸਾਨੁਰੂਪਾ ਅਗ੍ਗਮਹੇਸੀ ਭਵਿਤੁਨ੍ਤਿ, ਰਾ ਜਾ ਤਂ ਸੁਤ੍ਵਾ ਤੇਨਹਿ ਭਣੇ ਗਣ੍ਹਥ ਨਂ ਕੁਮਾਰਿਂ, ਮਮ ਅਗ੍ਗਮਹੇਸਿਂ ਕਰੋਮੀਤਿ ਪੁਰਿਸੇ ਪਯੋਜੇਸਿ, ਤੇਨ ਪਯੁਤ੍ਤਪੁਰਿਸਾ ਬੋਧਿਪੂਜਂ ਕਤ੍ਵਾ ਆਗਚ੍ਛਨ੍ਤਿਂ ਗਣ੍ਹਾਮਾਤਿ ਤਤ੍ਥ ਨਿਲੀਨਾ ਗਹਣਸਜ੍ਜਾ ਅਟ੍ਠਂਸੁ, ਤਦਾ ਸਾ ਕੁਮਾਰਿਕਾ ਅਸ੍ਸ ਮਭਿਰੁਯ੍ਹ ਮਹਾਬੋਧਿਮਣ੍ਡਂ ਗਨ੍ਤ੍ਵਾ ਵੀਤਰੋਗੇਹਿ ਸਦ੍ਧਿਂ ਪੁਪ੍ਫਪੂਜਂ ਕਤ੍ਵਾ ਵਨ੍ਦਿਤ੍ਵਾ ਨਿਵਤ੍ਤਿ, ਅਥ ਤੇਸੁ ਏਕੋ ਧਮ੍ਮਰਕ੍ਖਿਤ ਤ੍ਥੇਰੋਨਾਮ ਤਸ੍ਸਾ ਏਵ ਮਾਹ, ਭਗਿਨਿ ਤਂ ਅਨ੍ਤਰਾਮਗ੍ਗੇ ਚੋਰਾ ਗਣ੍ਹਿਤੁਕਾਮਾ ਠਿਤਾ, ਅਸੁਕਟ੍ਠਾਨਂ ਪਤ੍ਵਾ ਅਪ੍ਪਮਤ੍ਤਾ ¶ ਸੀਘਂ ਗਚ੍ਛਾਤਿ, ਸਾਪਿ ਗਚ੍ਛਨ੍ਤੀ ਤਂ ਠਾਨਂ ਪਤ੍ਵਾ ਚੋਰੇਹਿ ਅਨੁਬਨ੍ਧਿਤਾ ਅਸ੍ਸਸ੍ਸ ਪਣ੍ਹਿਯਾ ਸਞ੍ਞਂ ਦਤ੍ਵਾ ਪਕ੍ਕਾਮਿ, ਚੋਰਾ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਿਂਸੁ. ਅਸ੍ਸੋ ਵੇਗਂ ਜ ਨੇ ਤ੍ਵਾ ਆਕਾਸ ਮੁਲ੍ਲਙ੍ਘਿ, ਕੁਮਾਰਿਕਾ ਵੇਗਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਅਸ੍ਸਸ੍ਸ ਪਿਟ੍ਠਿਤੋ ਪਰਿਗਲਿਤ੍ਵਾ ਪਤਨ੍ਤੀ ਮਯਾ ਕਤੂਪਕਾਰਂ ਸਰ ਪੁਤ੍ਤਾਤਿ ਆਹ, ਸੋ ਪਤਨ੍ਤਿਂ ਦਿਸ੍ਵਾ ਵੇਗੇਨਾ ਗਨ੍ਤ੍ਵਾ ਪਿਟ੍ਠਿਯਂ ਨਿਸੀਦਾਪੇਤ੍ਵਾ ਆਕਾਸਤੋ ਨੇਤ੍ਵਾ ਸ ਕ ਟ੍ਠਾ ਨੇ ਯੇਵ ਪਤਿਟ੍ਠਾਪੇਸਿ. ਤਸ੍ਮਾ.

੭.

ਤਿਰਚ੍ਛਾਨਗਤਾਪੇਵਂ, ਸਰਨ੍ਤਾ ਉਪਕਾਰਕਂ;

ਨ ਜਹਨ੍ਤੀਤਿ ਮਨ੍ਤ੍ਵਾਨ, ਕਤਞ੍ਞੂ ਹੋਨ੍ਤੁ ਪਾਣਿਨੋਤਿ.

ਤਤੋ ਸਾ ਕੁਮਾਰਿਕਾ ਸਤ੍ਤਾ ਸੀਤਿਕੋਟਿਧਨਂ ਬੁਦ੍ਧਸਾਸਨੇਯੇਵ ਚਜਿਤ੍ਵਾ ਯਾਵਜੀਵਂ ਸੀਲਂ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕ ਤ੍ਵਾ ਤ ਤੋ ਚੁਤਾ ਸੁਤ੍ਤ ਪ੍ਪਬੁਦ੍ਧੋ ਵਿਯ ਦੇਵਲੋਕੇ ਨਿਬ੍ਬਤ੍ਤੀਤਿ.

੮.

ਅਤਿਤਰੁਣਵਯਾ ਭੋ ਮਾਤੁਗਾਮਾਪਿ ਏਵਂ,

ਵਿਵਿਧਕੁਸਲਕਮ੍ਮਂ ਕਤ੍ਵ ਸਗ੍ਗਂ ਵਜਨ੍ਤਿ;

ਕੁਸਲਫਲਮਹਨ੍ਤਂ ਮਞ੍ਞਮਾਨਾ ਭਵਨ੍ਤਾ,

ਭਵਥ ਕਥ ਮੁਪੇਕ੍ਖਾ ਦਾਨਮਾਨਾਦਿਕਮ੍ਮੇ.

ਬੁਦ੍ਧੇਨਿਯਾ ਵਤ੍ਥੁਂ ਚਤੁਤ੍ਥਂ.

੫. ਅਹਿਤੁਣ੍ਡਿਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਮਸ੍ਮਿਂ ਕਿਰ ਭਦ੍ਦਕਪ੍ਪਮ੍ਹਿ ਅਮ੍ਹਾਕਂ ਕਿਰ ਭਗਵਤੋ ਪੁਬ੍ਬੇ ਕਸ੍ਸਪੋਨਾਮ ਸਤ੍ਥਾ ਲੋਕੇ ਉਪ੍ਪਜ੍ਜਿਤ੍ਵਾ ਸਦੇਵਕਂ ਲੋਕਂ ਸਂਸਾਰਸਾਗਰਾ ਤਾਰੇਤ੍ਵਾ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਪੇਤ੍ਵਾ ਅਤ੍ਥਂ ਗਤੋ ਦਿਵਸਕਰੋਵਿਯ ਸੇਤਬ੍ਯਮ੍ਹਿ ਅਨੁਪਾਦਿਸੇਸਾਯ ਨਿਬ੍ਬਾਣਧਾਤੁਯਾ ਪਰਿਨਿਬ੍ਬਾਯਿ, ਤਦਾ ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਨ੍ਨਿਪਤਿਤ੍ਵਾ ¶ ਏਕੇਕਂ ਸੁਵਣ੍ਣਿਟ੍ਠਕਂ ਕੋਟਿਅਗ੍ਘਨਕਂ ਰਤਨਵਿਚਿਤ੍ਤਂ ਬਹਿਚਿਨਨਤ੍ਥਾਯ ਏਕੇਕਂ ਅਡ੍ਢਕੋਟਿਅਗ੍ਘਨਕਂ ਅਬ੍ਭਨ੍ਤਰੂਪਪੂਰਣਤ੍ਥਂ ਮਨੋਸਿਲਾਯ ਮਤ੍ਤਿਕਾਕਿਚ੍ਚਂ ਕਰੋਨ੍ਤਾ ਯੋਜਨਬ੍ਬੇਧਂ ਥੂਪਂ ਕਤ੍ਵਾ ਮਹਨ੍ਤਂ ਸਕ੍ਕਾਰਂ ਕਰੋਨ੍ਤਿ. ਤਦਾ ਏਕੋ ਅਹਿਤੁਣ੍ਡਿਕੋ ਗਾਮਨਿਗਮਰਾਜਧਾਨੀਸੁ ਸਪ੍ਪੇ ਕੀਲ਼ਾਪੇਤ੍ਵਾ ਜੀਵਿਕਂ ਕਪ੍ਪੇਨ੍ਤੋ ਏਕਂ ਗਾਮਕਂ ਪਤ੍ਵਾ ਤਤ੍ਥ ਸਪ੍ਪੇ ਕੀਲ਼ਾਪੇਤ੍ਵਾ ਸਨ੍ਤੁਟ੍ਠੇਹਿ ਗਾਮਵਾਸੀਹਿ ਦਿਨ੍ਨਵਿਵਿਧੋਪਾਯਨੋ ਖਾਦਨੀਯਭੋਜਨੀਯਂ ਖਾ ਦਿ ਤ੍ਵਾ ਭੁਞ੍ਜਿਤ੍ਵਾ ਤਤ੍ਥੇਵ ਨਿਵਾਸਂ ਗਹੇਤ੍ਵਾ ਨਿਸੀਦਿ. ਤਸ੍ਮਿਂ ਕਿਰ ਗਾਮਕੇ ਮਨੁਸ੍ਸਾ ਯੇਭੁਯ੍ਯੇਨ ਰਤਨਤ੍ਤਯਮਾਮਕਾ. ਤਸ੍ਮਾ ਤੇ ਰਤ੍ਤਿਭਾਗੇ ਸਯਨ੍ਤਾ ‘‘ਨਮੋ ਬੁਦ੍ਧਾਯਾਤਿ’’ ਏਵਮਾਦਿਂ ਵਦਨ੍ਤਿ. ਸੋ ਪਨ ਅਹਿਤੁਣ੍ਡਿਕੋ ਮਿਚ੍ਛਾਦਿਟ੍ਠਿਕੋ ਤਿਣ੍ਣਂ ਰਤਨਾਨਂ ਗੁਣਂ ਨ ਜਾਨਾਤਿ. ਤਸ੍ਮਾ ਤੇਸਂ ਤਂ ਵਚਨਂ ਸੁਤ੍ਵਾ ਸਯਮ੍ਪਿ ਕੇ ਲ਼ਿਂ ਕੁਰੁਮਾਨੋ ਪਰਿਹਾਸਵਸੇਨ ‘‘ਨਮੋ ਬੁਦ੍ਧਾਯਾਤਿ’’ ਵਦਤਿ, ਅਥੇਕਦਿਵਸਂ ਸੋ ਅਤ੍ਤਨੋ ਕੀਲ਼ਾਪਨਸਮਤ੍ਥਂ ਏਕਂ ਸਪ੍ਪਂ ਭਤ੍ਥ ਤਤ੍ਥ ਪਰਿਯੇਸਮਾਨੋ ਆਹਿਣ੍ਡਤਿ. ਤਦਾ ਏਕੋ ਨਾਗਰਾਜਾ ਕਸ੍ਸਪਦਸਬਲਸ੍ਸ ਥੂ ਪਂ ਗ ਨ੍ਤ੍ਵਾ ਵਨ੍ਦਿਤ੍ਵਾ ਏਕਂ ਵਮ੍ਮਿਕਂ ਪਵਿਸਤਿ. ਤਂ ਦਿ ਸ੍ਵਾ ਅਹਿਤੁਣ੍ਡਿਕੋ ਵੇਗੇਨਾ ਗਨ੍ਤ੍ਵਾ ਨਾਗਰਾਜਂ ਗਣ੍ਹਿਤੁਂ ਮਨ੍ਤਂ ਪਰਿਜਪਿ, ਸੋ ਮਨ੍ਤਂ ਸੁਤ੍ਵਾ ਕੁਜ੍ਝਿਤ੍ਵਾ ਤਂ ਮਾਰੇਤੁਕਾਮੋ ਅਨੁਬਨ੍ਧਿ, ਤਂ ਦਿ ਸ੍ਵਾ ਅਹਿਤੁਣ੍ਡਿਕੋ ਵੇ ਗੇ ਨ ਪਲਾਯਨ੍ਤੋ ਏਕਸ੍ਮਿਂ ਪਾਸਾਣੇ ਪਕ੍ਖਲਿਤ੍ਵਾ ਪਤਮਾਨੋ ਪੁਬ੍ਬੇਵੁਤ੍ਤਪਰਿਹਾਸ ਵਚਨਪਰਿਚਯੇਨ ‘‘ਨਮੋ ਬੁਦ੍ਧਾਯਾਤਿ’’ ਵਦਨ੍ਤੋ ਪਤਿ. ਤਸ੍ਸ ਤਂ ਵਚਨਂ ਅਨੁਬਨ੍ਧਨ੍ਤਸ੍ਸ ਨਾਗਰਞ੍ਞੋ ਸੋਤਪਥੇ ਅਮਤਂਵਿਯ ਪਤਿ. ਅਥ ਸੋ ਰਤਨਤ੍ਤਯਗਾਰਵੇਨ ਤਸ੍ਮਿਂ ਕੋਧਂ ਨਿਬ੍ਬਾਪੇਤ੍ਵਾ ਸਮ੍ਮ ਮਾ ਭਾਯਿ. ਅਹਂ ਰਤਨਤ੍ਤਯਮਨ੍ਤਾਨੁਭਾਵਪਾਸੇਨ ਬਦ੍ਧੋ. ਤਸ੍ਮਾ ਤੁ ਵਂ ਡਸਿਤੁਂ ਮਯ੍ਹਂ ਅਨਨੁਰੂਪਂ. ਅਜ੍ਜ ਤ ਯਿ ਪਸਨ੍ਨੋਮ੍ਹਿ, ਪਣ੍ਣਾਕਾਰਂ ਤੇਦਮ੍ਮਿ, ਗਣ੍ਹਾਤਿ ਤੀਣਿ ਸੁਵਣ੍ਣਪੁਪ੍ਫਾਨਿ ਅਦਾਸਿ. ਏਵਂ ਰਤਨਤ੍ਤਯਂ ਨਾਮ ਘੋਰਾਸਿਵਿਸਾਨਮ੍ਪਿ ਸਪ੍ਪਾਨਂ ਮਨਂ ਪੀਣੇਤਿ. ਹੋਨ੍ਤਿ ਚੇਤ੍ਥ.

੧.

ਬੁਦ੍ਧੋਤਿ ¶ ਵਚਨਂ ਸੇਟ੍ਠਂ, ਬੁਦ੍ਧੋਤਿ ਪਦ ਮੁਤ੍ਤਮਂ;

ਨਤ੍ਥਿ ਤੇਨ ਸਮਂ ਲੋਕੇ, ਅਞ੍ਞਂ ਸੋਤਰਸਾਯਨਂ.

੨.

ਧਮ੍ਮੋਤਿਵਚਨਂ ਸੇਟ੍ਠਂ, ਧਮ੍ਮੋਤਿ ਪਦਮੁਤ੍ਤਮਂ;

ਨਤ੍ਥਿ ਤੇਨ ਸਮਂ ਲੋਕੇ, ਅਞ੍ਞਂ ਸੋਤਰਸਾਯਨਂ.

੩.

ਸਙ੍ਘੋਤਿ ਵਚਨਂ ਸੇਟ੍ਠਂ, ਸਙ੍ਘੋਤਿ ਪਦਮੁਤ੍ਤਮਂ;

ਨਤ੍ਥਿ ਤੇਨ ਸਮਂ ਲੋਕੇ, ਅਞ੍ਞਂ ਸੋਤਰਸਾਯਨਂ.

੪.

ਤਸ੍ਸ ਮੁਖਂ ਮੁਖਂ ਨਾਮ, ਯਂ ਵਤ੍ਤਤਿ ਮੁਖੇ ਸਦਾ;

ਦੁਲ੍ਲਭਂ ਬੁਦ੍ਧਵਚਨਂ, ਸਬ੍ਬਸਮ੍ਪਤ੍ਤਿਦਾਯਕਂ.

੫.

ਤਸ੍ਸ ਮਨੋ ਮਨੋ ਨਾਮ, ਯਂ ਚੇ ਮਨਸਿ ਵਤ੍ਤਤਿ;

ਦੁਲ੍ਲਭਂ ਬੁਦ੍ਧਵਚਨਂ, ਸਬ੍ਬਸਮ੍ਪਤ੍ਤਿਦਾਯਕਂ.

੬.

ਤਮੇਵ ਕਵਚਂ ਦੇਹੇ, ਤਮੇਵ ਮਣਿ ਕਾਮਦੋ;

ਤਮੇਵ ਸੁਰਭੀ ਧੇਨੁ, ਤਮੇਵ ਸੁਰਪਾਦਪੋ.

੭.

ਤਸ੍ਸੇਵ ਸੋਤਂ ਸੋਤਂਵ, ਯਂ ਸੁਣਾਤਿ ਜਨੋ ਅਯਂ

ਦੁਲ੍ਲਭਂ ਬੁਦ੍ਧਵਚਨਂ, ਸਬ੍ਬਸਮ੍ਪਤ੍ਤਿਦਾਯਕਂ.

੮.

ਏਵਂ ਵਿਧੋ ਰਗੋ ਘੋਰੋ, ਹਲ਼ਾਹਲ਼ਵਿਸੋ ਸਦਾ;

ਬੁਦ੍ਧੋਤਿ ਵਚਨਂ ਸੁਤ੍ਵਾ, ਸਨ੍ਤੁਟ੍ਠੋ ਦਾਸਿ ਜੀਵਿਤਂ.

੯.

ਸੋਣ੍ਣਪੁਪ੍ਫਤ੍ਤਯਂਚਾਪਿ, ਮਹਗ੍ਘਂ ਬਹਲਂ ਅਦਾ;

ਪਸ੍ਸ ਬੁਦ੍ਧੋਤਿ ਵਾਚਾਯ, ਆਨੁਭਾਵਮਹਨ੍ਤਤਨ੍ਤਿ.

ਅਥ ਨਾਗਰਾਜਾ ਤਸ੍ਸ ਤਾਨਿ ਸੁਵਣ੍ਣਪੁਪ੍ਫਾਨਿ ਦਤ੍ਵਾ ਏਵਮਾਹ. ਸਮ੍ਮ ਏਤੇਸੁ ਏਕਂ ਤਵ ਪੁਞ੍ਞਤ੍ਤਾਯ ਏਕਂ ਮਮ ਪੁਞ੍ਞਤ੍ਥਾਯ ਪੂਜੇਹਿ. ਇਤਰੇਨ ਯਾਵਜੀਵਂ ਸੁਖੇਨ ਜੀਵਨ੍ਤੋ ਪੁਤ੍ਤਦਾਰੇ ਪੋਸੇਨ੍ਤੋ ਦਾਨਾਦੀਸੁ ਅਪ੍ਪਮਜ੍ਜਨ੍ਤੋ ਜੀਵਿਕਂ ਕਪ੍ਪੇਹਿ. ਮਾ ਹੀਨਕਮ੍ਮੇ ਬ੍ਯਵਟੋ ਹੋਹਿ, ਮਿਚ੍ਛਾਦਿਟ੍ਠਿਞ੍ਚ ਪਜਹਾਤਿ ਓਵਦਿਤ੍ਵਾ ਪਕ੍ਕਾਮਿ. ਅਹਿਤੁਣ੍ਡਿਕੋਪਿ ਸੋਮਨਸ੍ਸਪ੍ਪਤ੍ਤੋ ਤੇਨ ਵੁਤ੍ਤਨਯੇਨੇਵ ਦ੍ਵਿਹਿ ਪੁਪ੍ਫੇਹਿ ਚੇਤਿਯਂ ਪੂਜੇਤ੍ਵਾ ਏਕੇਨ ਸ ਹ ਸ੍ਸਂ ਲਭਿਤ੍ਵਾ ਤੇ ਨ ਪੁਤ੍ਤਦਾਰੇ ¶ ਪੋਸੇਨ੍ਤੋ ਕਪਣਦ੍ਧਿਕਵਣਿਬ੍ਬਕਾਦੀਨਂ ਦਾਨਂ ਦੇਨ੍ਤੋ ਅਹਿਤੁਣ੍ਡਿਕਕਮ੍ਮਂ ਪਹਾਹ ਕੁਸਲਮੇਵ ਉਪਚਿਨਨ੍ਤੋ ਆਯੁਪਰਿਯੋਸਾਨੇ ਸਗ੍ਗਪਰਾਯਨੋ ਅਹੋਸਿ.

੧੦.

ਇਤਿ ਅਵਿਦਿਤਸਤ੍ਤੋ ਕਿਞ੍ਚਿ ਬੁਦ੍ਧਾਨੁਭਾਵਂ,

ਲਭਤਿ ਧਨਵਿਸੇਸਂ ਯਸ੍ਸ ਨਾਮਪ੍ਪਕਾਸਾ;

ਵਿਦਿਤਜਨਨਿਕਾਯੋ ਕਿਨ੍ਨੁ ਤਸ੍ਸਾਨੁਭਾਵਂ,

ਨ ਲਪਤਿ ਜਿਨਨਾਮਂ ਕਿਚ੍ਚ ਮਞ੍ਞਪ੍ਪਹਾਯਾਤਿ.

ਅਹਿਤੁਣ੍ਡਿਕਸ੍ਸ ਵਤ੍ਥੁਂ ਪਞ੍ਚਮਂ.

੬. ਸਰਣਤ੍ਥੇਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਸਾਵਤ੍ਥਿਯਂ ਕਿਰ ਸੁਮਨੋ ਨਾਮੇ ਕੋ ਗਹਪਤਿ ਅਹੋਸਿ. ਤਸ੍ਸ ਭਰਿਯਾ ਸੁਜਮ੍ਪਤਿਕਾ ਨਾਮ. ਤੇ ਅਗਾਰਂ ਅਜ੍ਝਾਵਸਨ੍ਤਾ ਅਪਰਭਾਗੇ ਪੁਤ੍ਤਂਚ ਧੀਤਰਂਚ ਲਭਿਂਸੁ. ਅਥ ਤੇਸਂ ਦਹਰਕਾਲੇਯੇਵ ਮਾਤਾਪਿਤਰੋ ਕਾਲਂ ਕਰੋਨ੍ਤਾ ਜੇਟ੍ਠਕਂਪਕ੍ਕੋਸਿਤ੍ਵਾ ਮਯਂ ਪੁਤ੍ਤ ਤੁਵਂ ਪਤਿਰੂਪੇ ਠਾਨੇ ਨਿਵੇਸਿਤੁਂ ਨਾਸਕ੍ਖਿਮ੍ਹ, ਯਂ ਨੋ ਘਰੇ ਵਿਭਵਂ, ਸਬ੍ਬਂ ਤਂ ਗਣ੍ਹ. ਇਮਾਯਚ ਤੇ ਕਣਿਟ੍ਠਿਕਾਯ ਵੁਦ੍ਧਿਂਤ੍ਵਮੇਵ ਜਾਨਾਹੀਤਿ ਵਤ੍ਵਾ ਜੇਟ੍ਠਕਸ੍ਸ ਹਤ੍ਥੇ ਕਣਿਟ੍ਠਿਕਾਯ ਹਤ੍ਥਂ ਠਪੇਤ੍ਵਾ ਕਾਲਮਕਂਸੁ. ਅਥ ਸੋ ਮਾਤਾਪਿਤੁਨ੍ਨਂ ਅਚ੍ਚਯੇਨ ਆਲ਼ਾਹਨਕਿਚ੍ਚਂ ਕਤ੍ਵਾ ਵਸਨ੍ਤੋ ਕਾਲਨ੍ਤਰੇਨ ਕਣਿਟ੍ਠਿਕਂ ਪਤਿਰੂਪੇਨ ਕੁਲੇਨ ਸਮ੍ਬਨ੍ਧਿਤ੍ਵਾ ਸਯਮ੍ਪਿ ਦਾਰਪਰਿਗ੍ਗਹਮਕਾਸਿ. ਅਥਾਪਰਭਾਗੇ ਤਸ੍ਸ ਕਣਿਟ੍ਠਿਕਾ ਗਬ੍ਭਿਨੀ ਹੁਤ੍ਵਾ ਏਕਦਿਵਸਂ ਸਾਮਿਕਂ ਆਹ, ਸਾਮਿ ਮਮ ਭਾਤਰਂ ਦਟ੍ਠੁਕਾਮਾਮ੍ਹੀਤਿ. ਸੋਪਿ ਸਾਧੁ ਭਦ੍ਦੇਤਿ ਅਨੁਰੂਪੇਨ ਪਣ੍ਣਾਕਾਰੇਨ ਤਾਯ ਸਦ੍ਧਿਂ ਨਿਕ੍ਖਮਿ. ਤਦਾ ਪਨ ਭਗਵਾ ਸੁਨਿਵਤ੍ਥੋ ਸੁਪਾਰੁਤੋ ਭਿਕ੍ਖੁਸਙ੍ਘਪਰਿਵੁਸੋ ਪਿਣ੍ਡਾਯ ਨਗਰਂ ਪਾਵਿਸਿ ਛਬ੍ਬਣ੍ਣਘਨਬੁਦ੍ਧਰਂਸਿਯੋ ਵਿਸ੍ਸਜ੍ਜੇਨ੍ਤੋ, ਤ ਤੋ ਤੇ ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਪਞ੍ਚਪਤਿਟ੍ਠਿਤੇਨ ¶ ਵਨ੍ਦਿਤ੍ਵਾ ਅਟ੍ਠਂਸੁ, ਅਥ ਸਤ੍ਤਾ ਤੇਸਂ ਜਯਮ੍ਪਤਿਕਾਨਂ ਉਪਨਿਸ੍ਸਯਸਮ੍ਪਤ੍ਤਿਂਦਿਸ੍ਵਾ ਤੇ ਸਰਣੇਸੁਚ ਸੀਲੇਸੁਚ ਪਤਿਟ੍ਠਾਪੇਤ੍ਵਾ ਏਵਮਾਹ, ਕਦਾਚਿ ਵੋ ਦੁਕ੍ਖੇ ਉਪ੍ਪਨ੍ਨੇ ਤਥਾਗਤੋ ਅਨੁਸ੍ਸਰਿਤਬ੍ਬੋਤਿ. ਤਥਾਹਿ.

੧.

ਯਂਕਿਞ੍ਚਿ ਭਯਮੁਪ੍ਪਨ੍ਨਂ, ਰਾਜਚੋਰਾਦਿਸਮ੍ਭਵਂ;

ਤਦਾ ਸਰੇਯ੍ਯ ਸਮ੍ਬੁਦ੍ਧਂ, ਨਿਚ੍ਛਨ੍ਤੋਤ ਦੁਪਦ੍ਦਵਂ.

੨.

ਯਂ ਵੇ ਉਪਦ੍ਦਵਂ ਹੋਤਿ, ਯਕ੍ਖਪੇਤਾ ਦਿਸਮ੍ਭਵਂ;

ਤਦਾ ਸਰੇਯ੍ਯ ਸਮ੍ਬੁਦ੍ਧਂ, ਨਿਚ੍ਛਨ੍ਤੋ ਤਦੁਪਦ੍ਦਵਂ.

੩.

ਸੀਹਬ੍ਯਗ੍ਘਤਰਚ੍ਛਾਦਿ, ਪੁਣ੍ਡਰੀਕਾਦਿਸਮ੍ਭਵਂ;

ਤਦਾ ਸਰੇਯ੍ਯ ਸਮ੍ਬੁਦ੍ਧਂ, ਨਿਚ੍ਛਨ੍ਤੋ ਤਦੁਪਦ੍ਦਵਂ.

੪.

ਯਮਾਤਪਗ੍ਗਿ ਵਾਤਾਦਿ, ਉਦਕਾਸਨਿਸਮ੍ਭਵਂ;

ਤਦਾ ਸਰੇਯ੍ਯ ਸਮ੍ਬੁਦ੍ਧਂ, ਨਿਚ੍ਛਨ੍ਤੋ ਤਦੁਪਦ੍ਦਵਂ.

੫.

ਪਜ੍ਜਰਾਦੀਹਿ ਰੋਗੇਹਿ, ਵਿਸਮੋ ਤੁਹਿਸਮ੍ਭਵਂ;

ਤਦਾ ਸਰੇਯ੍ਯ ਸਮ੍ਬੁਦ੍ਧਂ, ਨਿਚ੍ਛਨ੍ਤੋ ਤਦੁਪਦ੍ਦਵਂ.

੬.

ਮਚ੍ਚੁਨਾ ਚੇ ਯਦਾ ਯੁਦ੍ਧਂ, ਕਰੇ ਤੇਨਾਪਿ ਜਨ੍ਤੁਨਾ;

ਸਰਿਤਬ੍ਬੋ ਤਦਾ ਬੁਦ੍ਧੋ, ਪਤ੍ਥੇਨ੍ਤੇਨਤ੍ਤਨੋ ਜਯਨ੍ਤਿ.

ਤਤੋ ਤੇ ਭਗਵਤੋ ਵਚਨਂ ਪਟਿਨਨ੍ਦਿਤ੍ਵਾ ਵਨ੍ਦਿਤ੍ਵਾ ਅਗਮਂਸੁ. ਅਥ ਜੇਟ੍ਠਕੋ ਆਗਤੇ ਤੇ ਦਿਸ੍ਵਾ ਯਥਾਨੁਰੂਪਂ ਸਕ੍ਕਾਰ ਮਕਾਸਿ. ਤਸ੍ਸਾ ਸਾਮਿਕੋ ਕਤਿਪਾਹਂ ਤਤ੍ਥ ਵਸਿਤ੍ਵਾ ਭਰਿਯਂ ਜੇਟ੍ਠਕਸ੍ਸ ਪਟਿਪਾਦੇਤ੍ਵਾ ਮਮ ਗਾਮੇ ਕਿਚ੍ਚਂ ਅਤ੍ਥੀਤਿ ਵਤ੍ਵਾ ਪਕ੍ਕਾਮਿ. ਅਥਸ੍ਸਾ ਭਾਤਾ ਭਰਿਯਂ ਪਕ੍ਕੋਸਿਤ੍ਵਾ ਆਹ ਭਦ੍ਦੇ ਇਮਿਸ੍ਸਾ ਸਬ੍ਬਂ ਕਤ੍ਤਬ੍ਬਂ ਕਰੋਹੀਤਿ. ਸਾ ਤਤੋ ਪਟ੍ਠਾਯ ਤਸ੍ਸਾ ਉਦਕਨ੍ਨ ਪਾਨਾ ਦਿਨਾ ਵੇਯ੍ਯਾਵਚ੍ਚਂ ਕੁਰੁਮਾਨਾ ਏਤਿਸ੍ਸਾ ਹਤ੍ਥਪਾਦਗੀਵੂਪਗੇਸੁ ਆਭਰਣੇਸੁ ਲੋਭਂ ਉਪ੍ਪਾਦੇਤ੍ਵਾ ਤਂ ਵੂਪਸਮੇਤੁਂ ਅਸਕ੍ਕੋਨ੍ਤੀ ਆਹਾਰੂ ਪਚ੍ਛੇਦਂ ਕਤ੍ਵਾ ਗਿਲਾਨਾਵਿਯ ਮਞ੍ਚਕਂ ਉਪਗੂਹਿਤ੍ਵਾ ਨਿਪਤਿ. ਅਥ ਸੋ ਗੇਹਂ ਗਨ੍ਤ੍ਵਾ ਤਂ ਤਥਾ ਸਯਿਤਂ ¶ ਦਿਸ੍ਵਾ ਮਞ੍ਚਕੇ ਨਿਸਿਨ੍ਨੋ ਕਿਂ ਭਦ੍ਦੇ ਅਫਾਸੁਕਨ੍ਤਿ ਪੁਚ੍ਛਿ, ਸਾ ਤੁਣ੍ਹੀ ਹੁਤ੍ਵਾ ਕਤਿਪਯਵਾਰੇ ਪੁਚ੍ਛਿਤਾ ਨ ਸਕ੍ਕਾ ਕਥੇਤੁਨ੍ਤਿ ਆਹ. ਪੁਨ ਸਾਮਿਕੇਨ ਗਾਲ਼੍ਹਂ ਨਿਬਨ੍ਧਿਤੇ ਸਾ ਚਿਨ੍ਤੇਸਿ, ਉਜੁਕਂ ਮਯਾ ਤਸ੍ਸਾ ਪਿਲ਼ਨ੍ਧਨਂ ਪਤ੍ਥੇਮੀਤਿ ਵੁਤ੍ਤੇ ਨ ਪ੍ਪਤਿਰੁਪਂ, ਤਸ੍ਸਾ ਪਞ੍ਚਮਧੁਰ ਮਂਸਂ ਪਤ੍ਥੇਮੀਤਿ ਵੁਤ੍ਤੇ ਤਂ ਮਾਰੇਸ੍ਸਤਿ, ਤਦਾ ਪਿਲ਼ਨ੍ਧਨਾਨਿ ਮਯ੍ਹਮੇਵਾਤਿ, ਤਤੋ ਸਾਮਿ ਤਵ ਕਣਿਟ੍ਠਿਕਾਯ ਪਞ੍ਚਮਧੁਰਮਂਸਂ ਪਤ੍ਥੇਮਿ, ਅਲਭਮਾਨਾਯ ਮੇ ਜੀਵਿਤਂ ਨਤ੍ਥੀਤਿ ਆਹ, ਤਂ ਸੁਤ੍ਵਾ ਸੋ ਅਨੇਕਪਰਿਯਾਯੇਨ ਮਨੁਸ੍ਸਮਾਰਣਂ ਨਾਮ ਭਾਰਿਯਨ੍ਤਿ ਵਤ੍ਵਾ ਨਿਵਾਰੇਨ੍ਤੋਪਿ ਨਿਵਾਰੇਤੁਂ ਨਾਸਕ੍ਖਿ, ਅਥ ਤਾਯ ਪਟਿਬਦ੍ਧਚਿਤ੍ਤੋ ਕਾਮਮੁਚ੍ਛਿਤੋ ਮੋਹਮੂਲ਼੍ਹੋ ਹੁਤ੍ਵਾ ਸਾਧੁ ਲਭਿਸ੍ਸਸੀਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿ. ਤਥਾਹਿ.

੭.

ਹਾਯਨ੍ਤਿ ਇਧਲੋਕਤ੍ਥਾ, ਹਾਯਨ੍ਤਿ ਪਾਰਲੋਕਿਕਾ;

ਹਾਯਨ੍ਤਿ ਮਹਤਾ ਅਤ੍ਥਾ, ਯੇ ਇਤ੍ਥੀਨਂ ਵਸਙ੍ਗਤਾ.

੮.

ਏਸਾ ਮਾਤਾ ਪਿਤਾ ਏਸੋ, ਭਗਿਨੀ ਭਾਤਰੋ ਇਮੇ;

ਗਰੁਤਬ੍ਬੇ ਨ ਜਾਨਨ੍ਤਿ, ਯੇ ਇਤ੍ਥੀਨਂ ਵਸਙ੍ਗਤਾ.

੯.

ਕਾਰਣਾਕਾਰਣਨ੍ਤੇਤਂ, ਕਤ੍ਤਬ੍ਬਂਵਾ ਨ ਵਾ ਇਦਂ;

ਕਾਮਨ੍ਧਤ੍ਤਾ ਨ ਜਾਨਨ੍ਤਿ, ਯੇ ਇਤ੍ਥੀਨਂ ਵਸਙ੍ਗਤਾ.

੧੦.

ਪਾਣਂ ਵਾ ਅਤਿਪਾਤੇਨ੍ਤਿ, ਹੋਨ੍ਤਿ ਵਾ ਪਾਰਦਾਰਿਕਾ;

ਭਾਸਨ੍ਤਿ ਅਲਿਕਂ ਵਾਚਂ, ਯੇ ਇਤ੍ਥੀਨਂ ਵਸਙ੍ਗਤਾ.

੧੧.

ਸਨ੍ਧਿਚ੍ਛੇਦਾਦਿਕਂ ਥੇਯ੍ਯਂ, ਮਜ੍ਜਪਾਨਂਚ ਪੇਸੁਨਂ;

ਕਰੋਨ੍ਤਿ ਸਾਹਸਂ ਸਬ੍ਬਂ, ਯੇ ਇਤ੍ਥੀਨਂ ਵਸਙ੍ਗਤਾ.

੧੨.

ਅਹੋ ਅਚ੍ਛਰਿਯਂ ਲੋਕੇ, ਸਰਨ੍ਤਾਨਂ ਭਯਾ ਵਹਂ;

ਭਰਿਯਾਯ ਵਸਂ ਗਨ੍ਤ੍ਵਾ, ਸੋਦਰਿਂਹਨ੍ਤੁਮਿਚ੍ਛਤੀਤਿ.

ਅਥ ਸੋ ਸਾਹਸਿਕੋ ਪੁਰਿਸੋ ਭਗਿਨਿ ਏਵ ਮਾਹ, ਏਹਿ ਅਮ੍ਮ ਅਮ੍ਹਾਕਂ ਮਾਤਾਪਿਤੁਨ੍ਨਂ ਇਣਂ ਸਾਧੇਸ੍ਸਾਮ, ਅਪ੍ਪੇਵਨਾਮ ਨੋ ਦਿਸ੍ਵਾ ਇਣਾਯਿਕਾ ਇਣਂ ਦਸ੍ਸਨ੍ਤੀਤਿ, ਤਂ ਸੁਤ੍ਵਾ ਤਾਯ ਸਮ੍ਪਟਿਚ੍ਛਿਤੇ ¶ ਸੁਖਯਾਨਕੇ ਨਿਸੀਦਾਪੇਤ੍ਵਾ ਇਣਾਯਿਕਾਨਂ ਗਾਮਂ ਗਚ੍ਛਨ੍ਤੋ ਵਿਯ ਮਹਾਅਟਵਿਂਪਤ੍ਵਾ ਯਾਨਂ ਮਗ੍ਗਾ ਓਕ੍ਕਮ੍ਮ ਠਪੇਤ੍ਵਾ ਵਿਰਵਨ੍ਤਿਮੇਵ ਨਂ ਹਤ੍ਥੇ ਗਹੇਤ੍ਵਾ ਛਿਨ੍ਦਿਸ੍ਸਾਮੀਤਿ ਚਿਨ੍ਤੇਤ੍ਵਾ ਕੇਸੇ ਗਹੇਤ੍ਵਾ ਭੂਮਿਯਂ ਪਾਤੇਸਿ, ਤਸ੍ਮਿਂ ਖਣੇ ਤਸ੍ਸਾ ਕਮ੍ਮਜਵਾਤਾ ਚਲਿਂਸੁ. ਸਾ ਭਾਤੁਲਜ੍ਜਾਯ ਸਾਮਿ ਕਮ੍ਮਜਵਾਤਾ ਮੇ ਚਲਿਂਸੁ, ਯਾ ਵਾ ਹਂ ਵਿਜਾਯਾਮਿ, ਤਾਵ ਉਪਧਾਰੇਹੀਤਿ ਵਦਨ੍ਤੀਪਿ ਅਪਨੇਤੁਂ ਅਸਕ੍ਕੋਨ੍ਤੀ ਪੁਤ੍ਤਂ ਵਿਜਾਯਿ, ਅਥ ਸੋ ਤਂ ਸਮੀਪੇ ਵਟਰੁਕ੍ਖਮੂਲੇ ਮਾਰੇਸ੍ਸਾਮੀਤਿ ਚਿਕੁਰੇ ਗਹੇਤ੍ਵਾ ਆਕਡ੍ਢਿ, ਤਸ੍ਮਿਂ ਕਾਲੇ ਸਾ ਸਾਮਿ ਤਵ ਭਾਗਿਨੇਯ੍ਯਸ੍ਸ ਮੁਖਂ ਓਲੋਕੇਤ੍ਵਾ ਤਸ੍ਸ ਸਿਨੇਹੇਨਾਪਿ ਮਂ ਨ ਮਾਰੇਹੀਤਿ ਵਦਨ੍ਤੀ ਯਾਚਿ, ਅਥ ਸੋ ਕਕ੍ਖਲ਼ੋ ਤਸ੍ਸਾ ਤਂ ਕਾਰੁਣਿਕਵਚਨਂ ਅਸੁਣਨ੍ਤੋ ਵਿਯ ਮਾਰੇਤੁਂ ਉਸ੍ਸਹਤੇਵ, ਤਤੋ ਸਾ ਕੁਮਾਰਿਕਾ ਅਤ੍ਤਨੋ ਅਸਰਣਾ ਚਿਨ੍ਤੇਸਿ, ਮਮ ਸਦ੍ਦੇਨਾ ਗਨ੍ਤ੍ਵਾ ਯੋ ਕੋਚਿ ਮਮ ਭਾਤੁ ਅਨਯਂ ਕਰੇਯ੍ਯ, ਤਂ ਨ ਪ੍ਪਤਿਰੂਪਨ੍ਤਿ ਭਾਤੁਸਿਨੇਹੇਨ ਨਿਸ੍ਸਦ੍ਦਾ ਅਤ੍ਤਨਾ ਗਤਿਤਸਰਣਂ ਆਵਜ੍ਜਮਾਨਾ ਨਿਪਜ੍ਜਿ, ਅਥਸ੍ਸਾ ਭਾ ਤ ਰਿ ਮੇਤ੍ਤਾਨੁਭਾਵੇਨਚ ਅਨੁਸ੍ਸਰਿਤਸਰਣਾਨੁਭਾਵੇਨਚ ਤਸ੍ਮਿਂ ਨਿਗ੍ਰੋਧੇ ਅਧਿਵਤ੍ਥਾ ਦੇਵਤਾ ਏਵਰੂਪੋ ਮਾਤੁਗਾਮੋ ਏਤ੍ਥ ਮਾਰਿਤਾ ਅਭਵਿਸ੍ਸਾ, ਅਦ੍ਧਾਹਂ ਦੇਵਸਮਾਗਮਂ ਪਵਿਸਿਤੁਂ ਨ ਲਭਿਸ੍ਸਾਮੀਤਿ ਚਿਨ੍ਤੇਤ੍ਵਾ ਏਤਿਸ੍ਸਾ ਸਾ ਮਿ ਕੋ ਵਿਯ ਤਂ ਤ ਜ੍ਜੇ ਤ੍ਵਾ ਪਲਾਪੇਤ੍ਵਾ ਤ੍ਵਂ ਮਾ ਭਾਯੀਤਿ ਸਮਸ੍ਸਾਸੇਤ੍ਵਾ ਯਾ ਨ ਕੇ ਸ ਪੁ ਤ੍ਤਂ ਕੁਮਾਰਿਂ ਨਿਸੀਦਾਪੇਤ੍ਵਾ ਤਂ ਦਿਵਸਮੇਵ ਸਾਵਤ੍ਥਿਮਾਗਮ੍ਮ ਅਨ੍ਤੋਨਗਰੇ ਸਾ ਲਾ ਯ ਨਂ ਨਿਪਜ੍ਜਾਪੇਤ੍ਵਾ ਅਨ੍ਤਰਧਾਯਿ. ਤਥਾਹਿ.

੧੩.

ਸਬ੍ਬਸਮ੍ਪਤ੍ਤਿਦਾਤਾਰਂ, ਸਬ੍ਬਲੋਕੇਕਨਾਯਕਂ;

ਮਨਸਾਪਿ ਯੋ ਵਿਭਾਵੇਤਿ, ਤਂ ਵੇ ਪਾਲੇਨ੍ਤਿ ਦੇਵਤਾ.

੧੪.

ਮੁਹੁਤ੍ਤਮ੍ਪਿਚ ਯੋ ਮੇਤ੍ਤਂ, ਭਾਵੇਤਿ ਯਦਿ ਸਾਧੁਕਂ;

ਤਂ ਵੇ ਪਾਲੇਨ੍ਤਿ ਦੇਵਾਪਿ, ਤੋਸਯਨ੍ਤਿ ਉਪਾਯਨਾਤਿ.

ਤਤੋ ¶ ਤਸ੍ਸਾ ਪਨ ਸਾਮਿਕੋ ਨਗਰਾ ਨਿਕ੍ਖਮ੍ਮ ਗਚ੍ਛਨ੍ਤੋ ਅਤ੍ਤਨੋ ਭਰਿਯਂ ਦਿਸ੍ਵਾ ਤ੍ਵਂ ਕਦਾ ਆਗਤਾ, ਕੇਨਾਨੀਤਾਸੀਤਿ ਪੁਚ੍ਛਿ. ਸਾ ਦੇਵਤਾਯ ਆਨੀਤਭਾਵਂ ਅਜਾਨਨ੍ਤੀ ਕਿਂ ਤ੍ਵਂ ਭਣਸਿ, ਨਨੁ ਤਯਾ ਆਨੀਤਾਮ੍ਹੀਤਿ, ਸੋਪਿ ਕਿਂਭੋਤਿ ਭਣਸਿ, ਤਵ ਭਾਤੁਗਾਮੇ ਦਿਟ੍ਠਕਾਲਤੋ ਪ੍ਪਤੁਤਿ ਅਜ੍ਜ ਚਤ੍ਤਾਰੋ ਮਾਸਾ ਜਾਤਾ, ਏਤ੍ਤਕਂ ਕਾਲਂ ਤ੍ਵਂ ਨ ਦਿਟ੍ਠਪੁਬ੍ਬਾ, ਕਥਂ ਤ੍ਵਂ ਮਯਾ ਸਦ੍ਧਿਂਆਗਤਾਤਿ ਪੁਚ੍ਛਿ. ਸਾ ਤਂ ਸੁਤ੍ਵਾ ਤੇਨਹਿ ਮਾਞ੍ਞਸ੍ਸ ਇਮਂ ਰਹਸ੍ਸਂ ਕਥੇਹਿ ਸਾਮੀਤਿ ਵਤ੍ਵਾ ਭਾ ਤ ਰਾ ਅਤ੍ਤਨੋ ਕਤਂ ਸਬ੍ਬਂ ਵਿਤ੍ਥਾਰੇਨ ਕਥੇਸਿ. ਤਂ ਸੁਤ੍ਵਾ ਤਸ੍ਸ ਸਾਮਿਕੋ ਸਂਵਿਗ੍ਗੋ ਭਯਪ੍ਪਤ੍ਤੋ ਹੁਤ੍ਵਾ ਤਂ ਅਤ੍ਤਨੋ ਗੇਹਂ ਪਾਪੇਸਿ, ਤਤੋ ਕਤਿਪਾਹਂ ਤਾਯ ਵਿਸ੍ਸਮਿਤੇ ਤੇ ਉਭੋਪਿ ਸਤ੍ਥਾਰਂ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤੇ ਨਿਸੀਦਿਂਸੁ, ਅਥ ਸਾ ਭਗਵਤੋ ਸਰਣਸੀਲਾਨੁਭਾਵੇਨ ਅਤ੍ਤਨੋ ਜੀਵਿਤਪਟਿਲਾਭਂ ਪਕਾਸੇਤ੍ਵਾ ਅਤ੍ਤਨੋ ਪੁਤ੍ਤਂ ਭਗਵਨ੍ਤਂ ਵਨ੍ਦਾਪੇਤ੍ਵਾ ਸਰਣੋਤਿਨਾਮਮਕਂਸੁ, ਸਤ੍ਥਾ ਤੇ ਸਂ ਅਜ੍ਝਾਸਯਂ ਞਤ੍ਵਾ ਤਦਨੁਰੂਪਂ ਧਮ੍ਮਂ ਦੇਸੇਸਿ, ਦੇਸਨਾਵਸਾਨੇ ਉਭੋਪਿ ਸੋਤਾਪਨ੍ਨਾ ਅਹੇਸੁਂ, ਅਥਸ੍ਸਾ ਪੁਤ੍ਤੋ ਸਰਣਕੁਮਾਰੋ ਵੀਸਤਿਮੇ ਵਸ੍ਸੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਤੋ ਸਰਣਤ੍ਥੇਰੋਨਾਮ ਪਞ੍ਞਾਯੀਤਿ.

੧੫.

ਖਣਮਪਿ ਮਨਸੇਵਂ ਦੇਵਦੇਵਂ ਸਰਨ੍ਤਾ,

ਪਰਮਤਰਪਤਿਟ੍ਠਂ ਪਾਪੁਣਨ੍ਤੀਤਿ ਮਨ੍ਤ੍ਵਾ;

ਭਵਗਤਿ ਗੁਣਰਾਸਿਂ ਜਾਨਮਾਨਾ ਜਨਾ ਭੋ;

ਭਜਥ ਸਰਣਸੀਲਂ ਸਬ੍ਬਥਾ ਸਬ੍ਬਕਾਲਨ੍ਤਿ.

ਸਰਣਤ੍ਥੇਰਸ੍ਸ ਵਤ੍ਥੁਂ ਛਟ੍ਠਮਂ.

੭. ਵੇਸ੍ਸਾਮਿਤ੍ਤਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ¶ ਕਿਰ ਕੋਸਮ੍ਬਿਨਗਰੇ ਕੋਸਮ੍ਬਿਰਞ੍ਞੋ ਵੇਸ੍ਸਾਮਿਤ੍ਤਾਨਾਮ ਅਗ੍ਗਮਹੇਸੀ ਅਹੋਸਿ. ਤਦਾ ਭਗਵਾ ਕੋਸਮ੍ਬਿਯਂ ਪਟਿਵਸਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਚਾਰਿਕਂ ਚਰਮਾਨੋ. ਤਸ੍ਮਿਂ ਸਮਯੇ ਸਾ ਰਞ੍ਞਾ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਅਨੋਪਮਾਯ ਬੁਦ੍ਧਲੀਲ਼ਾਯ ਮਧੁਰੇਨ ਸਰੇਨ ਦੇਸੇਨ੍ਤਸ੍ਸ ਭਗਵਤੋ ਧਮ੍ਮਂ ਸੁਤ੍ਵਾ ਪਸਨ੍ਨਾ ਸਰਣੇਸੁ ਪਤਿਟ੍ਠਾਯ ਬੁਦ੍ਧਮਾਮਿਕਾ ਹੁਤ੍ਵਾ ਵਿਹਰਤਿ. ਅਥਾ ਪਰਭਾਗੇ ਤਸ੍ਸ ਰਞ੍ਞੋ ਰਜ੍ਜਤ੍ਥਾਯ ਪਚ੍ਚਨ੍ਤਰਾਜਾ ਯੁਦ੍ਧਸਜ੍ਜੋ ਰਜ੍ਜਂ ਵਾ ਦੇਤੁ, ਯੁਦ੍ਧਂਵਾਤਿ ਪਣ੍ਣਂ ਪਹਿਣਿ. ਤਂ ਸੁਤ੍ਵਾ ਰਾਜਾ ਮਹਤਿਯਾ ਸੇਨਾਯ ਪਰਿਵੁਤੋ ਯੁਦ੍ਧਭੂਮਿਂ ਗਚ੍ਛਨ੍ਤੋ ਮਹੇਸਿਯਾ ਸਦ੍ਧਿਂ ਗਨ੍ਤ੍ਵਾ ਖਨ੍ਧਾਵਾਰਂ ਨਿਵਾਸੇਤ੍ਵਾ ਤਸ੍ਸਾ ਏਵਮਾਹ. ਭਦ੍ਦੇ ਸਙ੍ਗਾਮਸੀਸੇ ਜਯਪਰਾਜਯੋ ਨਾਮ ਨ ਸਕ੍ਕਾ ਵਿਞ੍ਞਾਤੁਂ. ਸਚੇ ਮੇ ਪਰਾਜਯੋ ਅਭਵਿਸ੍ਸ, ਪੁਰੇਤਰਮੇਵ ਰਤ੍ਤਪਤਾਕਂ ਉਸ੍ਸਾਪੇਸ੍ਸਾਮਿ, ਤੇਨ ਅਭਿਞ੍ਞਾਣੇਨ ਤ੍ਵਂ ਕੋਸਮ੍ਬਿਮੇਵ ਗਚ੍ਛਾਹੀਤਿ ਅਨੁਸਾਸਿਤ੍ਵਾ ਸਙ੍ਗਾਮ ਮਣ੍ਡਲਂ ਗਨ੍ਤ੍ਵਾ ਮਹਾਰਣਂ ਕਰੋਨ੍ਤੋ ਅਤ੍ਤਨੋ ਪਰਾਜਯਭਾਵਂ ਞਤ੍ਵਾ ਮਾਤੁਗਾਮਂ ਸਰਿਤ੍ਵਾ ਰਤ੍ਤਦ੍ਧਜਂ ਉਸ੍ਸਾਪੇਤ੍ਵਾ ਯੁਜ੍ਝਨ੍ਤੋ ਰਣੇ ਪਤਿ. ਅਥ ਸਾ ਰਤ੍ਤਪਤਾਕਂ ਦਿਸ੍ਵਾ ਪਰਾਜਿਤੋ ਨੂਨ ਮੇ ਸਾਮਿਕੋਤਿ ਭਯੇਨ ਪਲਾਯਿਤੁਮਾਰਭਿ. ਅਥ ਤਂ ਚੋਰਰਞ੍ਞੋ ਮਨੁਸ੍ਸਾ ਦਿਸ੍ਵਾ ਨੂਨਾਯਂ ਰਞ੍ਞੋ ਅਗ੍ਗਮਹੇਸੀਤਿ ਞਤ੍ਵਾ ਅਤ੍ਤਨੋ ਰਾਜਾਨਂ ਦਸ੍ਸੇਸੁਂ, ਰਾਜਾ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਮਮੇਤਂ ਅਭਿਸੇਕਂ ਕਰੋਥਾਤਿ ਅਮਚ੍ਚੇ ਆਣਾਪੇਸਿ. ਅਮਚ੍ਚਾ ਤਂ ਅਭਿਸੇਕਤ੍ਥਾਯ ਯਾਚਿਂਸੁ, ਸਾ ਨ ਮੇ ਭਣੇ ਅਭਿਸੇਕੇਨਤ੍ਥੋਤਿ ਨ ਇਚ੍ਛਿ. ਅਮਚ੍ਚਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਨਂ ਪਕ੍ਕੋਸਾਪੇਤ੍ਵਾ ਕਸ੍ਮਾ ਨ ਇਚ੍ਛਸੀਤਿ ਪੁਚ੍ਛਿ. ਸਾ ਏਵਮਾਹ.

੧.

ਸੁਣੋਹਿ ਸਾਧੁਕਂ ਦੇਵ, ਭਾਸਮਾਨਾਯ ਮੇ ਵਚੋ;

ਭਤ੍ਤਾ ਮਯ੍ਹਂ ਮਤੋ ਅਜ੍ਜ, ਸਬ੍ਬਸਮ੍ਪਤ੍ਤਿਦਾਯਕੋ.

੨.

ਕਤ੍ਵਾਨ ¶ ਸੋਭਿਸੇਕਂ ਮਂ, ਅਤ੍ਤਨੋ ਹਦਯਂ ਵਿਯ;

ਪਾਲੇਤਿ ਤਂ ਸਰਨ੍ਤਸ੍ਸਾ, ਸੋਕਗ੍ਗਿ ਦਹਤੇ ਮਨਂ.

੩.

ਮਹਾਰਾਜ ਸਚਞ੍ਞਸ੍ਸ, ਅਸ੍ਸ ਮਗ੍ਗਮਹੇਸਿਕਾ;

ਤਮ੍ਹਾ ਦੁਕ੍ਖਾ ਨ ਮੁਚ੍ਚਾਮਿ, ਤੇਨਾਹਂ ਤਂ ਨ ਪਤ੍ਥਯੇ.

੪.

ਸੋਕਗ੍ਗਿਨਾ ਪਦਿਤ੍ਤਾਹਂ, ਸੋਕੇ ਸੋਕਂ ਕਥਂ ਖਿਪੇ;

ਜਲਨ੍ਤਗ੍ਗਿਮ੍ਹੀ ਕੋ ਨਾਮ, ਪਲਾਲਂ ਪਕ੍ਖਿਪੇ ਬੁਧੋ.

੫.

ਪਿਯਵਿਪ੍ਪਯੋਗਦੁਕ੍ਖਂ, ਤਂ ਚਿਨ੍ਤਯਨ੍ਤੀ ਪੁਨਪ੍ਪੁਨਂ;

ਤਮ੍ਹਾ ਦੁਕ੍ਖਾ ਨ ਮੁਚ੍ਚਾਮਿ, ਤਸ੍ਮਾਹਂ ਤਂ ਨ ਪਤ੍ਥਯੇਤਿ.

ਤਂ ਸੁਤ੍ਵਾ ਰਾਜਾ ਕੋਧੇਨਾਭਿਭੂਤੋ ਸਚੇ ਨਾਭਿਸਿਞ੍ਚਿਸ੍ਸਸਿ, ਅਗ੍ਗਿਮ੍ਹਿ ਤਂ ਪਕ੍ਖਿਪਿਸ੍ਸਾਮੀਤਿ ਵਤ੍ਵਾ ਮਹਨ੍ਤਂ ਦਾਰੁਚਿਤਕਂ ਕਾਰਾਪੇਤ੍ਵਾ ਅਗ੍ਗਿਂ ਦਤ੍ਵਾ ਏਕਪਜ੍ਜੋਤੇ ਜਾਤੇ ਏਤ੍ਤ ਪਵਿਸਾਤਿ ਆਹ. ਅਥ ਸਾ ਯਾਚਨ੍ਤੀ ਰਾਜਾਨਂ ਆਹ.

੬.

ਪਾਪੋ ਨਿਪ੍ਪਾਪਿਨਂ ਰਾਜ, ਪਾਤਨਂ ਖਲੁ ਪਾਵਕੇ;

ਹੋਤਿ ਪਾਪਫਲਂ ਤਸ੍ਸ, ਪਚ੍ਚਤ੍ਤੇਚ ਪਰਤ੍ਥਚ.

੭.

ਪੁਰਾਤਨੇਹਿ ਭੂਪਾਲ, ਸਮਣਬ੍ਰਹ੍ਮਣੇਸੁਚ;

ਮਾਤਾਪਿਤੁਸੁ ਬਾਲੇਸੁ, ਰੋਗੇਨਾ ਤੁਰਇਤ੍ਥਿਸੁ;

ਨਪ੍ਪਸਤ੍ਥੋ ਵਧੋ ਦੇਵ, ਤਸ੍ਮਾਹਂ ਨ ਵਧਾਰਹਾਤਿ.

ਤਂ ਸੁਤ੍ਵਾਪਿ ਰਾਜਾ ਅਸਦ੍ਦਹਨ੍ਤੋ ਮਨੁਸ੍ਸੇ ਆਣਾਪੇਸਿ. ਏਤਾਯ ਹਤ੍ਥਪਾਦੇ ਗਹੇਤ੍ਵਾ ਅਗ੍ਗਿਮ੍ਹਿ ਪਕ੍ਖਿਪਥਾਤਿ ਤੇ ਤਥਾ ਕਰਿਂਸੁ, ਅਥ ਸਾ ਅਗ੍ਗਿਮ੍ਹਿ ਪਕ੍ਖਿਪਮਾਨਾ ਨਤ੍ਥੇਤ੍ਥ ਮੇ ਕੋਚਿ ਪਟਿਸਰਣੋਤਿ ਸਰਣਮੇਵ ਸਰਣਂ ਕਰੋਮੀਤਿ ਚਿਨ੍ਤੇਤ੍ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮੀਤਿ’’ ਵਦਨ੍ਤੀ ਮਨਸਾਚ ਅਨੁਸ੍ਸਰਨ੍ਤੀ ਅਗ੍ਗਿਮ੍ਹਿ ਪਤਿ, ਤਥਾਵਿਧੋਪਿ ਅਗ੍ਗਿ ਤਸ੍ਸਾ ਸਰੀਰੇ ਲੋਮਕੂਪਮਤ੍ਤਮ੍ਪਿ ਉਣ੍ਹਾਕਾਰਂ ਕਾਤੁਂ ਨਾਸਕ੍ਖਿ. ਪਦੁਮਗਬ੍ਭਂ ਪਵਿਟ੍ਠਾ ਵਿਯ ਸੀਤਿਭੂਤਸਰੀਰਾ ਅਹੋਸਿ. ਰਾਜਾ ਤਂ ਅਚ੍ਛਰਿਯਂ ¶ ਦਿਸ੍ਵਾ ਸਂਵਿਗ੍ਗੋ ਲੋਮਹਟ੍ਠਜਾਤੋ ਵੇਗੇਨ ਤਂ ਉਪਸਙ੍ਕਮਿਤ੍ਵਾ ਉਭੋਹਿ ਹਤ੍ਥੇਹਿ ਪਗ੍ਗਯ੍ਹ ਉਰੇ ਨਿਪਜ੍ਜਾਪੇਤ੍ਵਾ ਰਾਜਾਸਨੇ ਨਿਸੀਦਾਪੇਤ੍ਵਾ ਅਞ੍ਜਲਿਂ ਗਗ੍ਗਯ੍ਹ ਠਿਤੋ ਕਸ੍ਮਾ ਤੇ ਤਂ ਅਗ੍ਗਿ ਸਰੀਰਂ ਮਾ ਪਰਿਦਹੀਤਿ ਪੁਚ੍ਛਿ. ਸਾ ਤਂ ਕਾਰਣਂ ਕਥੇਨ੍ਤੀ ਏਵ ਮਾਹ.

੮.

ਮਾਤਾ ਪਿਤਾਚ ਞਾਤੀਚ, ਪਰਿਵਾਰਾਚ ਸੋਹਦਾ;

ਮਨ੍ਤੋ ਸਧਾਦਯੋਚਾਪਿ, ਮਹੇਸਕ੍ਖਾਚ ਦੇਵਤਾ.

੯.

ਏਤੇਚ ਞ੍ਞੇਚ ਭੂਪਾਲ, ਸਤ੍ਤਾਨਂ ਭਯ ਮਾਗਤੇ;

ਰਕ੍ਖਿਤੁਂ ਨੇਵ ਸਕ੍ਕੋਨ੍ਤਿ, ਹਿਤ੍ਵਾਨ ਸਰਣਤ੍ਤਯਂ.

੧੦.

ਅਗਾਹਂ ਬੁਦ੍ਧਂ ਸਰਣਂ, ਬੁਦ੍ਧੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੧.

ਅਗਾਹਂ ਧਮ੍ਮਂ ਸਰਣਂ, ਧਮ੍ਮੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੨.

ਅਗਾਹਂ ਸਙ੍ਘਂ ਸਰਣਂ, ਸਙ੍ਘੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੩.

ਏਵਂ ਮਹਾਨੁਭਾਵਨ੍ਤਂ, ਪਚ੍ਚਕ੍ਖਂ ਏਹਿਪਸ੍ਸਿਕਂ;

ਨਾਨੋ ਪਦ੍ਦਵ ਵਿਦ੍ਧਂਸਿਂ, ਨਾਨਾਸਮ੍ਪਤ੍ਤਿਦਾਯਕਂ.

੧੪.

ਸਰਣਤ੍ਤਯਞ੍ਹਿ ਯੋ ਸਤ੍ਤੋ, ਨ ਸਮਾਦਾਯ ਗਣ੍ਹਤਿ;

ਇਧਵਾ ਪਰਤ੍ਥਵਾ ਲੋਕੇ, ਸੋ ਸੁਖਂ ਨਾਨੁਭੋਸ੍ਸਤਿ.

੧੫.

ਸਰਣਤ੍ਤਯਞ੍ਹਿ ਯੋ ਸਤ੍ਤੋ, ਸੁਸਮਾਦਾਯ ਗਣ੍ਹਤਿ;

ਇਧਵਾਪਰਤ੍ਥਵਾ ਲੋਕੇ, ਸੋ ਸੁਖਾ ਨ ਵਿਹਾਯਤਿ.

੧੬.

ਤਸ੍ਮਾ ਤੁਵਮ੍ਪਿ ਭੂਪਾਲ, ਗਣ੍ਹਾਹਿ ਸਰਣਤ੍ਤਯਂ;

ਤਂ ਤੇ ਭਵਤਿ ਸਬ੍ਬਤ੍ਥ, ਤਾਣਂ ਲੇਣਂ ਪਰਾਯਣਨ੍ਤਿ.

ਤਂ ਸੁਤ੍ਵਾ ਰਾਜਾ ਅਤਿਵਿਯ ਪਸਨ੍ਨਮਾਨਸੋ ਤਂ ਖਮਾਪੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਅਜ੍ਜਪ੍ਪਟ੍ਠਾਯ ਤ੍ਵਂ ਮਮ ਮਾਤਾਤਿ ਤਂ ਮਾਤੁਟ੍ਠਾਨੇ ਠਪੇਤ੍ਵਾ ਸਰਣ ਮਗਮਾਸਿ. ਤਸ੍ਮਿਂ ਸਨ੍ਨਿਪਤਿਤ੍ਵਾ ਠਿਤਮਹਾਜਨਾ ਤਂ ਪਾਟਿਹਾਰਿਯਂ ਦਿਸ੍ਵਾ ਸਰਣੇਸੁਚ ਸੀਲੇਸੁਚ ਪਤਿਟ੍ਠਾਯ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਯਥਾਕਮ੍ਮਂ ਗਤਾਤਿ.

੧੭.

ਇਤਿ ¶ ਸਰਣਵਰਂ ਸਾ ਕੇਵਲਂ ਉਗ੍ਗਹੇਤ੍ਵਾ,

ਜਲਿਤਦਹਨਮਜ੍ਝੇ ਸੀਤਿਭਾਵਂ ਅਲਤ੍ਥ;

ਪਰਮਸਰਣਸੀਲਂ ਪਾਲਯਨ੍ਤਾ ਕਥਂ ਵੋ,

ਨ ਲਭਥ ਭਵਭੋਗਂ ਨਿਬ੍ਬੁਤਿਞ੍ਚਾਪਿ ਅਨ੍ਤੇਤਿ.

ਵੇਸ੍ਸਾਮਿਤ੍ਤਾਪ ਵਤ੍ਥੁਂ ਸਤ੍ਤਮਂ.

੮. ਮਹਾਮਨ੍ਧਾਤੁਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ਕਿਰ ਏਕਨਵੁਤਿਕਪ੍ਪਮਤ੍ਥਕੇ ਵਿਪਸ੍ਸੀਨਾਮ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਵਰਧਮ੍ਮਚਕ੍ਕੋ ਸਦੇਵਕੇਹਿ ਲੋਕੇਹਿ ਪੂਜਿਯਮਾਨੋ ਬਨ੍ਧੁਮਤੀਨਗਰੇ ਪਟਿਵਸਤਿ. ਤਦਾ ਸੋ ਮਨ੍ਧਾਤਾ ਤਸ੍ਮਿਂ ਨਗਰੇ ਤੁਨ੍ਨਕਾਰੋ ਹੁਤ੍ਵਾ ਨਿਬ੍ਬਤ੍ਤਿ. ਤੁਨ੍ਨਕਾਰਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤੋ ਵਿਹਰਤਿ. ਤਦਾ ਸਕਲਨਗਰਵਾਸਿਨੋ ਬੁਦ੍ਧਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਮਹਾਦਾਨ ਮਦਂਸੁ. ਅਥ ਸੋ ਏਵਂ ਚਿਨ੍ਤੇਸਿ, ਸਬ੍ਬੇਪਿਮੇ ਨਗਰਵਾਸਿਨੋ ਦਾਨਂ ਦਦਨ੍ਤਿ. ਅਹਮੇਕੋਵ ਸੇਸੋ ਦੁਗ੍ਗਤਤ੍ਤਾ, ਯਜ੍ਜਾਹਮਜ੍ਜ ਬੀਜਂ ਨ ਰੋਪੇਮਿ, ਇਮਮ੍ਹਾ ਦੁਕ੍ਖਾ ਨ ਪਰਿਮੁਚ੍ਚਿਸ੍ਸਾਮੀਤਿ. ਸੋ ਵੇਗੇਨ ਤੁਨ੍ਨਕਾਰਕਮ੍ਮਂ ਪਰਿਯੇਸਿਤ੍ਵਾ ਕਿਞ੍ਚਿਮੂਲਂ ਲਭਿਤ੍ਵਾ ਤੇਨ ਏਕਸ੍ਸਾਪਿ ਦਾਨਂ ਦਾਤੁਂ ਓਕਾਸ ਮਲਦ੍ਧਾ ਆਪਣਂ ਗਨ੍ਤ੍ਵਾ ਰਾਜਮਾਸਕੇ ਗਹੇਤ੍ਵਾ ਚਙ੍ਕੋਟਕਂ ਪੂਰੇਤ੍ਵਾ ਆਦਾਯ ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਭਤ੍ਤਗ੍ਗਂ ਗਨ੍ਤ੍ਵਾ ਠਿਤੋ ਏਵਂ ਚਿਨ੍ਤੇਸਿ, ਨਤ੍ਥਿ ਦਾਨਿ ਓਕਾਸਂ ਏਕਸ੍ਸਾਪਿ ਭਿਕ੍ਖੁਨੋ ਪਤ੍ਤੇ ਓਕਿਰਿਤੁਂ, ਅਦ੍ਧਾਹਂ ਇਮੇ ਆਕਾਸੇ ਵਿਕਿਰਿਸ੍ਸਾਮੀਤਿ ਅਪ੍ਪੇਵਨਾਮ ਪਤਮਾਨਾਨਂ ਏਕਸ੍ਸਾਪਿ ਭਿਕ੍ਖੁਨੋ ਪਤ੍ਤੇ ਏਕਮ੍ਪਿ ਪਤੇਯ੍ਯ, ਤਂ ਮੇ ਭਵਿਸ੍ਸਤਿ ਦੀਘਰਤ੍ਤਂ ਹਿਭਾਯ ਸੁਖਾਯਾਤਿ ਪਸਨ੍ਨਮਾਨਸੋ ਉਦ੍ਧਂ ਖਿਪਿ, ਤ ਤੋ ਪਤਮਾਨਾ ਤੇ ਪਰਿਵਾਰਿਕਦੇਵਤਾਨਞ੍ਚ ਭਗਵਤੋ ਆਨੁਭਾਵੇਨਚ ਬਹਿ ਅਪਤਿਤ੍ਵਾ ਭਗਵਨ੍ਤਮਾਦਿਂ ਕਤ੍ਵਾ ਸਬ੍ਬੇਸਂ ਭਿਕ੍ਖੂਨਂ ¶ ਪਤ੍ਤੇਯੇਵ ਪਤਿਂਸੁ. ਅਥ ਸੋ ਤਂ ਅਚ੍ਛਰਿਯਂ ਦਿਸ੍ਵਾ ਪਸਨ੍ਨਮਾਨਸੋ ਸਿਰਸਿ ਅਞ੍ਜਲਿਂ ਪਗ੍ਗਯ੍ਹ ਠਿਤੋ ਏਵਂ ਪਤ੍ਥਨਮਕਾਸਿ.

੧.

ਇਮਿਨਾ ਮੇ ਅਧਿਕਾਰੇਨ, ਪਸਾਦੇਨ ਯਤਿਸ੍ਸਰੇ;

ਕਾਮਭੋਗੀਨਹਂ ਅਗ੍ਗੋ, ਭਵੇਯ੍ਯਂ ਜਾਤਿਜਾਤਿਯਂ.

੨.

ਪਹਰਿਤ੍ਵਾ ਯਦਾ ਪਾਣਿਂ, ਓਲੋਕੇਮਿ ਨਭੋਤਲਂ;

ਸਤ੍ਤਰਤਨਸਮ੍ਪਨ੍ਨਂ, ਵਸ੍ਸਂ ਵਸ੍ਸਤੁ ਸਬ੍ਬਦਾਤਿ.

ਸੋ ਤਤੋ ਪਟ੍ਠਾਯ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਭਦ੍ਦਕਪ੍ਪੇ ਆਦਿਮ੍ਹਿ ਮਹਾਸਮ੍ਮਤੋ ਨਾਮ ਰਾਜਾ ਅਹੋਸਿ. ਤਸ੍ਸ ਪੁਤ੍ਤੋ ਰੋਜੋ ਨਾਮ. ਤਸ੍ਸ ਪੁਤ੍ਤੋ ਵਰਰੋਜੋ ਨਾਮ, ਤਸ੍ਸ ਪੁਤ੍ਤੋ ਕਲ੍ਯਾਣੋ ਨਾਮ, ਤਸ੍ਸ ਪੁਤ੍ਤੋ ਵਰਕਲ੍ਯਾਣੋ ਨਾਮ. ਵਰਕਲ੍ਯਾਣਸ੍ਸ ਪੁਤ੍ਤੋ ਉਪੋਸਥੋ ਨਾਮ. ਉਪੋਸਥਸ੍ਸ ਪੁਤ੍ਤੋ ਮਨ੍ਧਾਤਾ ਨਾਮ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਸਤ੍ਤਹਿ ਰਤਨੇਹਿ ਚਤੂਹਿ ਚ ਇਦ੍ਧੀਹਿ ਸਮਨ੍ਨਾਗਤੋ ਚਕ੍ਕਵਤ੍ਤਿਰਜ੍ਜਂ ਕਾਰੇਸਿ, ਤਸ੍ਸ ਵਾਮਹਤ੍ਥਂ ਸਮ੍ਮਿਞ੍ਜਿਤ੍ਵਾ ਦਕ੍ਖਿਣਹਤ੍ਥੇਨ ਅਪ੍ਪੋਟ੍ਠਿਤੇ ਆਕਾਸਤੋ ਦਿਬ੍ਬਮੇਘਾ ਵਿਯ ਜਣ੍ਣੁਪ੍ਪਮਾਣਂ ਸਤ੍ਤਰਤਨਵਸ੍ਸਂ ਵਸ੍ਸਤਿ. ਏਵਰੂਪੋ ਅਚ੍ਛਰਿਯੋ ਅਹੋਸਿ. ਸੋ ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਕੁਮਾਰਕੀਲ਼ਂ ਕੀਲ਼ਿ. ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਓਪਰਜ੍ਜਂ ਕਾਰੇਸਿ. ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਚਕ੍ਕਵਤ੍ਤਿਰਜ੍ਜਂ ਕਾਰੇਸਿ, ਆਯੁ ਪਨਸ੍ਸ ਅਸਙ੍ਖ੍ਯੇਯ੍ਯਂ ਅਹੋਸਿ. ਸੋ ਏਕਦਿਵਸਂ ਕਾਮਤਣ੍ਹਂ ਪੂਰੇਤੁਂ ਅਸਕ੍ਕੋਨ੍ਤੋ ਉਕ੍ਕਣ੍ਠਿਤਾਕਾਰਂ ਦਸ੍ਸੇਸਿ, ਅਮਚ੍ਚਾ ਦੇਵ ਕਿਨ੍ਨਖੋ ਉਕ੍ਕਣ੍ਠਾ ਸੀਤਿ ਪੁਚ੍ਛਿਂਸੁ. ਸੋ ਭਣੇ ਮਯ੍ਹਂ ਪੁਞ੍ਞਕਮ੍ਮੇ ਓਲੋਕਿਯਮਾਨੇ ਇਮਂ ਰਜ੍ਜਂ ਨਪ੍ਪਹੋਤਿ, ਕਤਰਨ੍ਨੁ ਖੋ ਠਾਨਂ ਰਮਣੀਯਨ੍ਤਿ. ਦੇਵਲੋਕੋ ਮਹਾਰਾਜਾਤਿ. ਸੋ ਚਕ੍ਕਰਤਨਂ ਅਬ੍ਭੁਕ੍ਕਿਰਿਤ੍ਵਾ ਪਰਿਸਾਯ ਸਦ੍ਧਿਂ ਚਾਤੁਮਹਾਰਾਜਿਕਦੇਵਲੋਕਂ ਅਗਮਾਸਿ, ਅਥਸ੍ਸ ਚਤ੍ਤਾਰੋ ਮਹਾਰਾਜਾਨੋ ਦਿਬ੍ਬਮਾਲਗਨ੍ਧ- ਹਤ੍ਥਾ ¶ ਦੇਵਗਣਪਰਿਵੁਤਾ ਪਚ੍ਚੁਗ੍ਗਮਨਂ ਕਤ੍ਵਾ ਤਂ ਆਦਾਯ ਚਾਤੁਮਹਾਰਾਜਿਕਦੇਵਲੋਕਂ ਗਨ੍ਤ੍ਵਾ ਰਜ੍ਜਂ ਅਦਂਸੁ, ਤਸ੍ਸ ਪਰਿਸਾਯ ਪਰਿਵੁਤਸ੍ਸ ਤਸ੍ਮਿਂ ਰਜ੍ਜਂ ਕਰੋਨ੍ਤਸ੍ਸ ਦੀਘੋ ਅਦ੍ਧਾ ਵੀਤਿਵਤ੍ਤੋ. ਸੋ ਤਤ੍ਥਪਿ ਤਣ੍ਹਂ ਪੂਰੇਤੁ ਮਸਕ੍ਕੋਨ੍ਤੋ ਉਕ੍ਕਣ੍ਠਿਤਾ ਕਾਰਂ ਦਸ੍ਸੇਸਿ. ਤਤੋ ਚਤ੍ਤਾਰੋ ਮਹਾਰਾਜਾਨੋ ਕਿਨ੍ਨੁਖੋ ਮਹਾਰਾਜ ਉਕ੍ਕਣ੍ਠਿਤੋਤਿ ਪੁਚ੍ਛਿਂਸੁ. ਇਮਮ੍ਹਾ ਦੇਵਲੋਕਾ ਕਤਰਨ੍ਨੁ ਖੋ ਠਾਨਂ ਰਮਣੀਯਨ੍ਤਿ, ਦੇਵ ਪਰੇਸਂ ਉਪਟ੍ਠਾਕਮਨੁਸ੍ਸਸਦਿਸਾ ਮਯਂ. ਤਾਵਤਿਂਸਦੇਵਲੋਕੋ ਇਤੋ ਸਤਗੁਣੇਨ ਰਮਣੀਯੋਤਿ. ਮਨ੍ਧਾਤਾ ਚਕ੍ਕਰਤਨਂ ਅਬ੍ਭੁਕ੍ਕਿਰਿਤ੍ਵਾ ਅਤ੍ਤਨੋ ਪਰਿਸਪਰਿਵੁਤੋ ਤਾਵਤਿਂਸਾਭਿਮੁਖੋ ਪਾਯਾਸਿ, ਅਥਸ੍ਸ ਸਕ੍ਕੋ ਦੇਵਰਾਜਾ ਦਿਬ੍ਬਮਾਲਗਨ੍ਧਹਤ੍ਥੋ ਦੇਵਗਣਪਰਿਵੁਤੋ ਪਚ੍ਚੁਗ੍ਗਮਨਂ ਕਤ੍ਵਾ ਤਂ ਹਤ੍ਥੇ ਗਹੇਤ੍ਵਾ ਇਤੋ ਏਹਿ ਮਹਾਰਾਜਾਤਿ ਆਹ. ਤਤੋ ਰਞ੍ਞੋ ਦੇਵਗਣਪਰਿਵੁਤਸ੍ਸ ਗਮਨਕਾਲੇ ਪਰਿਣਾਯਕਰਤਨਂ ਚਕ੍ਕਰਤਨਂ ਆਦਾਯ ਸਦ੍ਧਿਂਪਰਿਸਾਯ ਮਨੁਸ੍ਸਪਥਂ ਓਤਰਿਤ੍ਵਾ ਅਤ੍ਤਨੋ ਘਰਂ ਪਾਵਿਸਿ. ਸਕ੍ਕੋ ਮਨ੍ਧਾਤੁਂ ਸਕ੍ਕਭਵਨਂ ਨੇਤ੍ਵਾ ਦੇਵਤਾ ਦ੍ਵੇ ਕੋਟ੍ਠਾਸੇ ਕਤ੍ਵਾ ਅਤ੍ਤਨੋ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਅਦਾਸਿ. ਤਤੋ ਪਟ੍ਠਾਯ ਦ੍ਵੇਪਿ ਰਾਜਨੋ ਰਜ੍ਜਂ ਕਾਰੇਸੁਂ. ਏਵਂ ਕਾਲੇ ਗਚ੍ਛਨ੍ਤੇ ਸਕ੍ਕੋ ਸਟ੍ਠਿਸਤਸਹਸ੍ਸਾਧਿਕਾਨਿ ਤਿਸ੍ਸੋਚ ਵਸ੍ਸਕੋਟਿਯੋ ਆਯੁਂ ਖੇਪੇਤ੍ਵਾ ਚਵਿ. ਅਞ੍ਞੋ ਸਕ੍ਕੋ ਨਿਬ੍ਬਤ੍ਤਿ, ਸੋਪਿ ਤਥੇਵ ਦੇਵਰਜ੍ਜਂ ਕਾਰੇਤ੍ਵਾ ਆਯੁਕ੍ਖਯੇਨ ਚਵਿ, ਏਤੇਨੁ ਪਾਯੇਨ ਛਤ੍ਤਿਂਸ ਸਕ੍ਕਾ ਚਵਿਂਸੁ, ਮਨ੍ਧਾਤਾ ਪਨ ਮਨੁਸ੍ਸਪਰਿਹਾਰੇਨ ਦੇਵਰਜ੍ਜਂ ਕਾਰੇਸਿਯੇਵ, ਤਸ੍ਸੇਵਂ ਕਾਲੇ ਗਚ੍ਛਨ੍ਤੇ ਭੀਯ੍ਯੋਸੋ ਮਤ੍ਤਾਯ ਕਾਮਤਣ੍ਹਾ ਉਪ੍ਪਜ੍ਜਿ, ਸੋ ਕਿਮ੍ਮੇ ਉਪਡ੍ਢਰਜ੍ਜੇਨ. ਸਕ੍ਕਂ ਮਾਰੇਤ੍ਵਾ ਏਕਰਜ੍ਜਂ ਕਰਿਸ੍ਸਾਮੀਤਿ ਚਿਨ੍ਤੇਸਿ. ਸਕ੍ਕਂ ਪਨ ਮਾਰੇਤੁਂ ਨ ਸਕ੍ਕਾ, ਕਾਮਤਣ੍ਹਾ ਪਨੇਸਾ ਵਿਪਤ੍ਤਿਮੂਲਾ. ਤਥਾਹਿ.

੩.

ਵਰਮਤ੍ਰ ਸੁਖਨ੍ਤ੍ਯਤ੍ਰ, ਅਤ੍ਰਿਚ੍ਛਾਵਿਹਤੋ ਨਰੋ;

ਇਧਵਾ ਪਰਤ੍ਥਵਾ ਕਿਞ੍ਚਿ, ਨ ਸਾਤਂ ਵਿਨ੍ਦਤੇ ਸਦਾ.

੪.

ਤਣ੍ਹਾਯ ¶ ਜਾਯਤੇ ਸੋਕੋ,

ਤਣ੍ਹਾਯ ਜਾਯਤੇ ਭਯਂ;

ਤਣ੍ਹਾਯ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੫.

ਤਣ੍ਹਾਦਾਸੋ ਨਰੋ ਏਤ੍ਥ, ਰਾਜਚੋਰਾਦਿਸਮ੍ਭਵਂ;

ਹਤ੍ਤਚ੍ਛੇਦਾਦਿਕਂ ਦੁਕ੍ਖਂ, ਪਾਪੁਣਾਤਿ ਵਿਹਞ੍ਞਤਿ.

੬.

ਯੇਨ ਲੋਭੇਨ ਜਾਤੇਨ, ਸਦਾ ਜੀਯਨ੍ਤਿ ਪਾਣਿਨੋ;

ਖੇਤ੍ਤਂ ਵਤ੍ਥੁਂ ਹਿਰਞ੍ਞਂਚ, ਗਵਾਸ੍ਸਂ ਦਾਸਪੋਰਿਸਂ;

ਸਬ੍ਬਤ੍ਥਾਮੇਨ ਸੋ ਲੋਭੋ, ਪਹਾਤਬ੍ਬੋਵ ਵਿਞ੍ਞੁਨਾਤਿ.

ਤਤੋ ਅਤ੍ਰਿਚ੍ਛਾਵਿਹਤਸ੍ਸ ਤਸ੍ਸ ਆਯੁਸਙ੍ਖਾਰੋ ਪਰਿਹਾਯਿ, ਜਰਾ ਸਰੀਰਂ ਪਹਰਿ, ਮਨੁਸ੍ਸਸਰੀਰਞ੍ਹਿ ਨਾਮ ਨ ਦੇਵਲੋਕੇਭਿਜ੍ਜਤਿ, ਤਥ ਸੋ ਦੇਵਲੋਕਾ ਭਸ੍ਸਿਤ੍ਵਾ ਬਨ੍ਧੁਮਤੀਨਗਰੁਯ੍ਯਾਨਂ ਪਾਵਿਸਿ, ਉਯ੍ਯਾਨਪਾਲੋ ਤਸ੍ਸ ਆਗਤਭਾਵਂ ਰਾਜਕੁਲਂ ਨਿਵੇਦੇਸਿ. ਰਾਜਾ ਰਾਜਕੁਲਾ ਆਗਨ੍ਤ੍ਵਾ ਉਯ੍ਯਾਨੇਯੇਵ ਆਸਨਂ ਪਞ੍ਞਾਪੇਸਿ. ਤਤੋ ਮਨ੍ਧਾਤਾ ਉਯ੍ਯਾਨੇ ਪਞ੍ਞਤ੍ਤਵਰਾਸਨੇ ਨਿਪਨ੍ਨੋ ਅਨੁਟ੍ਠਾਨਸੇਯ੍ਯਂ ਕਪ੍ਪੇਸਿ. ਤਤੋ ਅਮਚ੍ਚਾ ਦੇਵ ਤੁਮ੍ਹਾਕਂ ਪਰਤੋ ਕਿਨ੍ਨੁ ਕਥੇਸਾਮਾਤਿ ਪੁਚ੍ਛਿਂਸੁ, ਮਮ ਪਰਤੋ ਤੁਮ੍ਹੇ ਇਮਂ ਸਾਸਨਂ ਮਹਾਜਨਸ੍ਸ ਕਥੇਯ੍ਯਾਥ, ਮਨ੍ਧਾਤੁਮਹਾਰਾਜਾ ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਚਕ੍ਕਵਤ੍ਤਿਰਜ੍ਜਂ ਕਾਰੇਤ੍ਵਾ ਚਾਤੁਮਹਾਰਾਜਿਕੇਸੁ ਰਜ੍ਜਂ ਕਾਰੇਤ੍ਵਾ ਛਤ੍ਤਿਂਸਸਕ੍ਕਾਨਂ ਆਯੁਪਰਿਮਾਣੇਨ ਦੇਵਲੋਕੇ ਰਜ੍ਜਂ ਕਾਰੇਤ੍ਵਾ ਕਾਲਮਕਾਸੀਤਿ. ਸੋ ਏਵਂ ਵਤ੍ਵਾ ਕਾਲਂਕਤ੍ਵਾ ਯਥਾਕਮ੍ਮਂ ਗਤੋਤਿ ਇਮਮਤ੍ਥਂ ਪਕਾਸੇਤੁਂ ਭਗਵਾ ਚਤੁਮਹਾਪਰਿਸਮਜ੍ਝੇ ਇਮਾ ਗਾਥਾਯੋ ਆਹ.

੭.

ਯਾਵਤਾ ਚਨ੍ਦਿਮਸੁਰਿਯਾ, ਪਰਿਹਰਨ੍ਤਿ ਦਿਸਾ ਭਨ੍ਤਿ ਵਿਰੋਚਨਾ;

ਸਬ੍ਬੇਵ ਦਾਸਾ ਮਨ੍ਧਾਤਾ, ਯੇ ਪਾਣਾ ਪਥਵਿਨਿਸ੍ਸਿਤਾ.

੮.

ਨ ¶ ਕਹਾਪਣਵਸ੍ਸੇਨ, ਤਿਤ੍ਤਿ ਕਾਮੇਸੁ ਵਿਜ੍ਜਤਿ;

ਅਪ੍ਪਸ੍ਸਦਾ ਦੁਖਾ ਕਾਮਾ, ਇਤਿ ਵਿਞ੍ਞਾਯ ਪਣ੍ਡਿਤੋ.

੯.

ਅਪਿ ਦਿਬ੍ਬੇਸੁ ਕਾਮੇਸੁ, ਰਤਿਂਸੋ ਨਾਧਿਗਚ੍ਛਤਿ;

ਤਣ੍ਹਾਕ੍ਖਯਰਤੋ ਹੋਤਿ, ਸਮ੍ਮਾਸਮ੍ਬੁਦ੍ਧਸਾਵਕੋਤਿ.

ਤਂ ਸੁਤ੍ਵਾ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

੧੦.

ਇਤਿ ਗਤਿਨਿਯਤਾਨਂ ਬੋਧਿਯਾ ਉਤ੍ਤਮਾਨਂ;

ਸਕਵਸਮੁਪਨੇਤ੍ਵਾ ਦੇਤਿ ਦੁਕ੍ਖਾਤਿਤਣ੍ਹਾ;

ਅਨਿਯਤਗਤਿਕਾਨਂ ਕਾ ਕਥਾ ਮਾਦਿਸਾਨਂ;

ਜਹਥ ਤਮਿਤਿ ਮਨ੍ਤ੍ਵਾ ਭੋ ਭਜਵ੍ਹੋ ਤਿਵਤ੍ਥੁਂਤਿ.

ਮਹਾਮਨ੍ਧਾਤੁਵਤ੍ਥੁਂ ਅਟ੍ਠਮਂ.

੯. ਬੁਦ੍ਧਵਮ੍ਮਵਾਣਿਜਕਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਕਿਰ ਪਾਟਲਿਪੁਤ੍ਤਨਗਰੇ ਬੁਦ੍ਧਵਮ੍ਮੋ ਨਾਮ ਵਾਣਿਜਕੋ ਅਹੋਸਿ ਵਾਣਿਜਕਕਮ੍ਮੇਨ ਜੀਵਮਾਨੋ. ਸੋ ਅਪਰਭਾਗੇ ਸਤ੍ਥਵਾਹੇਹਿ ਸਦ੍ਧਿਂ ਗਾਮਨਿਗਮਜਨਪਦ ਰਾਜਧਾਨੀਸੁ ਵਾਣਿਜ੍ਜਂ ਪਯੋਜਯਮਾਨੋ ਵਿਚਰਤਿ, ਤਸ੍ਮਿਂ ਸਮਯੇ ਭਗਵਾਨੇਕਭਿਕ੍ਖੁਸਹਸ੍ਸਪਰਿਵੁਤੋ ਜਨਪਦਚਾਰਿਕਂ ਚਰਤਿ ਬਹੂ ਦੇਵਮਨੁਸ੍ਸੇ ਸਂਸਾਰਕਨ੍ਤਾਰਾ ਉਤ੍ਤਾਰੇਨ੍ਤੋ. ਤਦਾ ਸੋ ਭਗਵਨ੍ਤਂ ਅਦ੍ਦਸ ਦ੍ਵਤ੍ਤਿਂਸਲਕ੍ਖਣਾਨੁਬ੍ਯਞ੍ਜਨਪਤਿਮਣ੍ਡਿਤਂ ਜਲਮਾਨਸੁਵਣ੍ਣਮੇਰੁਂ ਵਿਯਵਿਰੋਚਮਾਨਂ ਮਹਾਭਿਕ੍ਖੁਸਙ੍ਘਪਰਿਵੁਤਂ, ਦਿਸ੍ਵਾ ਪਰਮਪੀਤਿਯਾ ਫੁਟਸਰੀਰੋ ਅਞ੍ਜਲਿਂ ਪਗ੍ਗਯ੍ਹ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਸਾਯਣ੍ਹੇ ਭਗਵਨ੍ਤਂ ਭਤ੍ਤੇਨ ਨਿਮਨ੍ਤੇਸਿ ਬੁਦ੍ਧਸਾਸਨੇ ਅਪਰਿਚਿਤਭਾਵੇਨ. ਅਥਸ੍ਸ ਭਗਵਾ ਵਿਕਾਲਭੋਜਨਾ ਪਟਿਵਿਰਤਾ ਤਥਾਗਤਾਤਿ ਆਹ. ਅਥ ਸੋ ਭਗਵਨ੍ਤਂ ਵਨ੍ਦਿਤ੍ਵਾ ਕਿਂ ਭਨ੍ਤੇ ਭਗਵਨ੍ਤਾ ਵਿਕਾਲੇ ਭੁਞ੍ਜਿਸ੍ਸਨ੍ਤੀਤਿ, ਅਥਸ੍ਸ ਕਥਂ ਪਟਿਚ੍ਚ ਭਗਵਾ ¶ ਅਟ੍ਠਵਿਧਂ ਪਾਨਂ ਤਥਾਗਤਾਨਂ ਵਿਕਾਲੇ ਭੁਞ੍ਜਿਤੁਂ ਕਪ੍ਪਤਿ. ਸੇਯ੍ਯਥਿਦਂ, ਅਮ੍ਬਪਾਨਂ ਜਮ੍ਬੁਪਾਨਂ ਚੋਚਪਾਨਂ ਮੋਚਪਾਨਂ ਫਾਰੁਸਕਪਾਨਂ ਮਧੁਪਾਨਂ ਮੁਦ੍ਦਿਕਪਾਨਂ ਸਾਲੂਕਪਾਨਨ੍ਤਿ. ਤਂ ਸੁਤ੍ਵਾ ਵਾਣਿਜੋ ਸਹਸਕ੍ਕਾਰਾਰਸੇਹਿ ਮੁਦ੍ਦਿਕਪਾਨਂ ਕਤ੍ਵਾ ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਅਦਾਸਿ, ਸਭਿਕ੍ਖੁਸਙ੍ਘੋ ਸਤ੍ਥਾ ਪਰਿਭੁਤ੍ਤਪਾਨੀਯਰਸੋ ਤਸ੍ਸ ਧਮ੍ਮਂ ਦੇਸੇਤ੍ਵਾ ਜਨਪਦਚਾਰਿਕਂ ਪਕ੍ਕਾਮਿ. ਸੋਪਿ ਪਸਨ੍ਨਮਾਨਸੋ ਹੁਤ੍ਵਾ ਨਿਵਤ੍ਤੋ ਸਦ੍ਧਿਂ ਵਾਣਿਜਕੇਹਿ ਤੇਸੁ ਤੇਸੁ ਜਨਪਦੇਸੁ ਵਾਣਿਜ੍ਜਂ ਪਯੋਜੇਨ੍ਤੋ ਮਹਾਵਤ੍ਤਨੀਯਂਨਾਮ ਕਨ੍ਤਾਰਂ ਪਾਪੁਣਿ, ਤਤ੍ਤ ਤੇਸਂ ਸਬ੍ਬੇਸੁਯੇਵ ਸਕਟੇਸੁ ਪਾਨੀਯਂ ਪਰਿਕ੍ਖਯਮਗਮਾਸਿ. ਤਤ੍ਥ ਸਬ੍ਬਮਨੁਸ੍ਸਾਨਂਚ ਬਲੀਵਦ੍ਦਾਨਂਚ ਪਾਨੀਯਂ ਨਾਹੋਸਿ. ਅਥ ਸੋ ਵਾਣਿਜੋ ਪਿਪਾਸਾਭਿਭੂਤੋ ਤੇਸੁ ਤੇਸੁ ਸਕਟੇਸੁ ਪਾਨੀਯਂ ਪਰਿਯੇਸਨ੍ਤੋ ਵਿਚਰਤਿ. ਅਥੇਕਸ੍ਮਿਂ ਸਕਟੇ ਮਨੁਸ੍ਸਾ ਤਂ ਦਿਸ੍ਵਾ ਕਾਰੁਞ੍ਞੇਨ ਏਤ੍ਥਾਗਚ੍ਛ, ਇਮਸ੍ਮਿਂ ਕੋਲ਼ਮ੍ਬੇ ਥੋਕਂ ਪਾਨੀਯਂ ਅਤ੍ਥਿ ਪਿਵਾਤਿ ਵਦਿਂਸੁ. ਤ ਤੋ ਸੋ ਗਨ੍ਤ੍ਵਾ ਪਾਨੀਯਂ ਪਿਵਿ. ਤਸ੍ਸ ਤਂ ਰਸਂ ਮੁਦ੍ਦਿਕਪਾਨਰਸਸਦਿਸਂ ਅਹੋਸਿ, ਪਿਵਨ੍ਤੋਵ ਸੋ ਏਵਂ ਚਿਨ੍ਤੇਸਿ. ਸਮ੍ਮਾਸਮ੍ਬੁਦ੍ਧਸ੍ਸ ਤਦਾ ਮੇ ਦਿਨ੍ਨਮੁਦ੍ਦਿਕਪਾਨਸ੍ਸ ਨਿਸ੍ਸਨ੍ਦੋ ਅਜ੍ਜ ਸਮ੍ਪਤ੍ਤੋ ਭਵਿਸ੍ਸਤੀਤਿ ਅਚ੍ਛੇਰਬ੍ਭੁਤਚਿਤ੍ਤੋ ਸੋਮਨਸ੍ਸਜਾਤੋ ਗਨ੍ਤ੍ਵਾ ਸਯਮੇਵ ਚਾਟਿਯਾ ਪਿਧਾਨਂ ਵਿਵਰਿ. ਸਕਲਾਪਿ ਸਾ ਚਾਟਿ ਮੁਦ੍ਦਿਕਪਾਨੇਨ ਪਰਿਪੁਣ੍ਣਾ ਅਹੋਸਿ. ਤਤੋ ਸੋ ਰ ਸਵ ਨ੍ਤਂ ਓਜਵਨ੍ਤਂ ਅਪਰਿਕ੍ਖਯਂ ਦਿਬ੍ਬਪਾਨਸਦਿਸਂ ਪਾਨੀਯਂ ਦਿਸ੍ਵਾ ਪਰਮਾਯ ਪੀਤਿਯਾ ਫੁਟਸਰੀਰੋ ਉਗ੍ਘੋਸੇਸਿ ਸਬ੍ਬੇ ਪਾਨੀਯਂ ਪਿਵਨ੍ਤੂਤਿ. ਤਂ ਸੁਤ੍ਵਾ ਸਬ੍ਬੇ ਸਨ੍ਨਿਪਤਿਤ੍ਵਾ ਪਾਨੀਯਂ ਦਿਸ੍ਵਾ ਅਬ੍ਭੁਤਚਿਤ੍ਤਾ ਜਾਤਾ. ਵਾਣਿਜੋ ਤੇਸਂ ਮਜ੍ਝੇ ਬੁਦ੍ਧਾਨੁਭਾਵਂ ਪਕਾਸੇਨ੍ਤੋ ਆਹ.

੧.

ਪਸ੍ਸਥੇਦਂ ਭਵਨ੍ਤੋ ਭੋ, ਆਨੁਭਾਵਂ ਮਹੇਸਿਨੋ;

ਅਚਿਨ੍ਤਨੀਯਮਚ੍ਛੇਰਂ, ਸਨ੍ਦਿਟ੍ਠਿਕ ਮਕਾਲਿਕਂ.

੨.

ਪਸਨ੍ਨਮਨਸਾ ਬੁਦ੍ਧੇ, ਦਿਨ੍ਨਂ ਪਾਨੀਯਕਂ ਮਯਾ;

ਵਿਪਚ੍ਚਤਿ ਇਦਾਨੇਵ, ਤਂ ਦਾਨਂ ਮੁਨਿਵਾਹਸਾ.

੩.

ਓਜਵਨ੍ਤਂ ¶ ਸੁਖਨ੍ਨਂਵ, ਸੀਤਲਂ ਮਧੁਰੋ ਦਕਂ;

ਦਿਬ੍ਬਪਾਨਂਵ ਦੇਵਾਨਂ, ਜਾਤਮਬ੍ਭੁਤਮਕ੍ਖਯਂ.

੪.

ਸੀਲਵਨ੍ਤੇਸੁ ਕੋ ਨਾਮ, ਨ ਦਦੇਯ੍ਯ ਵਿਚਕ੍ਖਣੋ;

ਇਧ ਲੋਕੇ ਪਰਤ੍ਤੇਚ, ਸੁਖਦਂ ਦਾਨ ਮੁਤ੍ਤਮਂ.

੫.

ਯਥਿ ਚ੍ਛਿਤਂ ਗਹੇਤ੍ਵਾਨ, ਪਿਵਨ੍ਤੁ ਮਧੁਰੋ ਦਕਂ;

ਭਾਜਨਾਨਿਚ ਪੂਰੇਤ੍ਵਾ, ਯਨ੍ਤੁ ਸਬ੍ਬੇ ਯਥਿਚ੍ਛਿਤਨ੍ਤਿ.

ਏਵਞ੍ਚ ਪਨ ਵਤ੍ਵਾ ਸਬ੍ਬੇ ਮਨੁਸ੍ਸੇਚ ਬਲੀਵਦ੍ਦੇਚ ਮੁਦ੍ਦਿਕਰਸੇਨੇਵ ਸਨ੍ਤਪ੍ਪੇਸਿ. ਤਤੋ ਤਤੋ ਆਗਤਾਪਿ ਪਾਨੀਯਂ ਪਿਵਨ੍ਤੋਚ ਪਾਨੀਯਂ ਅਕ੍ਖਯਂ ਅਹੋਸਿ. ਤਤੋ ਵਾਣਿਜੋ ਸਤ੍ਥਵਾਹੇਹਿ ਸਦ੍ਧਿਂ ਵਾਣਿਜ੍ਜਂ ਪਯੋਜੇਤ੍ਵਾ ਸਕਨਗਰਂ ਆਗਚ੍ਛਨ੍ਤੋ ਭਗਵਨ੍ਤਂ ਪਸ੍ਸਿਤ੍ਵਾ ਗਮਿਸ੍ਸਾਮੀਤਿ ਵੇਲ਼ੁਵਨਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਤਾਨੁਞ੍ਞੋ ਏਕਮਨ੍ਤੇ ਨਿਸੀਦਿ. ਸਤ੍ਥਾਪਿ ਤੇਨ ਸਦ੍ਧਿਂ ਮਧੁਰਪਟਿਸਨ੍ਥਾਰਮਕਾਸਿ. ਉਪਾਸਕੋਪਿ ਭਨ੍ਤੇ ਤੁਮ੍ਹਾਕਂ ਪਾਟਿਹਾਰਿਯਂ ਦਿਸ੍ਵਾ ਪਸਨ੍ਨੋ ਵਨ੍ਦਿਤ੍ਵਾ ਗਮਿਸ੍ਸਾਮੀਤਿ ਆਗਤੋਮ੍ਹਿ, ਏਵਞ੍ਚੇ ਵਞ੍ਚ ਪਾਟਿਹਾਰਿਯਨ੍ਤਿ ਵਿਤ੍ਥਾਰੇਨ ਕਥੇਸਿ. ਅਥਸ੍ਸ ਭਗਵਾ ਧਮ੍ਮਂ ਦੇਸੇਸਿ. ਸੋ ਧਮ੍ਮਂ ਸੁਤ੍ਵਾਨ ਸਤ੍ਥਾਰਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਅਤ੍ਤਨੋ ਗੇਹਮੇਵ ਅਗਮਾਸਿ. ਸੋ ਤਤੋ ਪਟ੍ਠਾਯ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਦੇਵਚ੍ਛਰਾਪਰਿਵੁਤੋ ਦੇਵਿਸ੍ਸਰਿਯਸਮਨ੍ਨਾਗਤੋ ਨਿਬ੍ਬਤ੍ਤਿ. ਤਸ੍ਸ ਪੁਬ੍ਬਕਮ੍ਮਪਕਾਸਨਤ੍ਥਂ ਤਤ੍ਥ ਤਤ੍ਥ ਰਤਨਭਾਜਨੇਸੁ ਦਿਬ੍ਬਮਯੇਹਿ ਮੁਦ੍ਦਿਕਪਾਨੇਹਿ ਪਰਿਪੁਣ੍ਣਂ ਅਹੋਸਿ. ਪਾਨੀਯਂ ਪਿਵਿਤ੍ਵਾ ਦੇਵਾ ਨਚ੍ਚਨ੍ਤਿ ਵਾਦੇਨ੍ਤਿ ਕੀਲ਼ਨ੍ਤੀਤਿ.

੬.

ਨ ਵਿਪੁਲਜਿਨਸਾਰਂ ਜਾਨਮਾਨੋ ਜਨੇਵਂ,

ਲਭਤਿ ਵਿਪੁਲਭੋਗਂ ਤੋਯਮਤ੍ਤਸ੍ਸ ਦਾਨਾ;

ਵਿਦਿਤਗੁਣਗਣਾ ਭੋ ਤੀਸੁ ਵਤ੍ਥੂਸੁ ਤੁਮ੍ਹੇ,

ਲਭਥ ਖਲੁ ਵਿਸੇਸਂ ਸੀਲਵਨ੍ਤੇਸੁ ਦਾਨਾਤਿ.

ਬੁਦ੍ਧਵਮ੍ਮਵਾਣਿਜਕਸ੍ਸ ਵਤ੍ਥੁਂ ਨਵਮਂ.

੧੦. ਰੂਪਦੇਵਿਯਾ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਤੀਤੇ ¶ ਕਿਰ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਤਸ੍ਮਿਂ ਨਗਰੇ ਏਕਾ ਗਾਮਦਾਰਿਕਾ ਵਿਹਾਰੇ ਆਹਿਣ੍ਡਨ੍ਤੀ ਏਕਂ ਗਿਲਾਨਭਿਕ੍ਖੁਂ ਦਿਸ੍ਵਾ ਕਮ੍ਪਮਾਨਹਦਯਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਭਨ੍ਤੇ ਕੋਤੇ ਆਬਾਧੋ ਸਰੀਰਂ ਪੀਲ਼ੇਤੀਤਿ ਪੁਚ੍ਛਿ. ਤੇਨਾਪਿ ਭਗਿਨਿ ਖਰਾਬਾਧੋ ਮੇ ਪੀਲ਼ੇਤੀਤਿ ਵੁਤ੍ਤੇ ਸਾ ਤੇਨਹਿ ਭਨ੍ਤੇ ਅਹਂ ਤਂ ਰੋਗਂ ਵੂਪਸਮੇਸ੍ਸਾਮੀਤਿ ਨਿਮਨ੍ਤੇਤ੍ਵਾ ਗੇਹਂ ਗਨ੍ਤ੍ਵਾ ਤਂ ਪਵਤ੍ਤਿਂ ਮਾਤਾਪਿਤੁਨ੍ਨਂ ਕਥੇਤ੍ਵਾ ਤੇਹਿ ਅਨੁਞ੍ਞਾਤਾ ਪੁਨ ਦਿਵਸੇ ਨਾਨਗ੍ਗਰਸੇਨ ਭੇਸਜ੍ਜਾਹਾਰਂ ਸਮ੍ਪਾਦੇਸਿ, ਤਤੋ ਸੋ ਭਿਕ੍ਖੁ ਪੁਨਦਿਵਸੇ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖਾਯ ਚਰਨ੍ਤੋ ਤਸ੍ਸਾ ਗੇਹਂ ਗਨ੍ਤ੍ਵਾ ਅਟ੍ਠਾਸਿ. ਸਾ ਥੇਰਂ ਆਗਤਂ ਦਿਸ੍ਵਾ ਸੋਮਨਸ੍ਸਜਾਤਾ ਪਤ੍ਤਂ ਗਹੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨਂ ਤਂ ਆਹਾਰੇਨ ਸਾਧੁਕਂ ਪਰਿਵਿਸਿਤ੍ਵਾ ਸਕ੍ਕਾਰ ਮਕਾਸਿ. ਅਥਸ੍ਸਾ ਸਦ੍ਧਾਬਲੇਨ ਭੁਤ੍ਤਮਤ੍ਤੇਯੇਵ ਸੋ ਆਬਾਧੋ ਵੂਪਸਮਿ. ਤਤੋ ਸੋ ਵੂਪਸਨ੍ਤਰੋਗੋ ਦੁਤਿਯਦਿਵਸੇ ਤਸ੍ਸਾ ਗੇਹਂ ਨਾ ਗਮਾਸਿ. ਅਥ ਸਾ ਵਿਹਾਰਂ ਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਕਸ੍ਮਾਨਾਗਤਤ੍ਥਾਤਿ ਪੁਚ੍ਛਿਤ੍ਵਾ ਤੇਨ ਮੇ ਭਗਿਨਿ ਬ੍ਯਾਧਿ ਵੂਪਸਮਿ, ਤਸ੍ਮਾ ਨਾਗਤੋਸ੍ਮੀਤਿ ਵੁਤ੍ਤੇ ਸਾ ਸਾਧੁ ਭਨ੍ਤੇਤਿ ਸੋਮਨਸ੍ਸਜਾਤਾ ਗੇਹਮੇਵ ਅਗਮਾਸਿ. ਸਾ ਤੇਨ ਪੁਞ੍ਞਕਮ੍ਮੇਨ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਸਾ ਤਤ੍ਥ ਦ੍ਵਾਦਸਯੋਜਨਿਕਂ ਕਨਕਵਿਮਾਨਂ ਨਿਬ੍ਬਤ੍ਤਿ. ਸਾ ਤਤ੍ਥ ਦੇਵਿਸ੍ਸਰਿਯਂ ਅਨੁਭਵਨ੍ਤੀ ਛਬੁਦ੍ਧਨ੍ਤਰਂ ਖੇਪੇਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਜਮ੍ਬੁਦੀਪੇ ਦੇਵਪੁਤ੍ਤਨਗਰੇ ਉਦਿਚ੍ਚਬ੍ਰਹ੍ਮਣਕੁਲੇ ਜੇਟ੍ਠਬ੍ਰਾਹ੍ਮਣਸ੍ਸ ਭਰਿਯਾਯ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਸਾ ਪਰਿਪਾਕ ਮਨ੍ਵਾਯ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਦਿਵਸੇ ਦਿਵਸੇ ਅਟ੍ਠਟ੍ਠਨਾਲਿਮਤ੍ਤਂ ਤਣ੍ਡੁਲਂ ਨਿਬ੍ਬਤ੍ਤਤਿ. ਤਸ੍ਸਾ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪਸਨ੍ਨਾ ਮਾਤਾਪਿਤਰੋ ਰੂਪਦੇਵੀਤਿ ਨਾਮ ਮਕਂਸੁ. ਪਚ੍ਛਾ ਤਂ ਪਤਿਰੂਪੇਨ ਦਾਰਕੇਨ ਨਿਯੋਜੇਸੁਂ. ਅਥਸ੍ਸਾ ਤਣ੍ਡੁਲ- ਨਾਲਿਮਤ੍ਤਂ ¶ ਗਹੇਤ੍ਵਾ ਪਚਿਤੁਂ ਆਰਦ੍ਧੇ ਇਚ੍ਛਿਤਿਚ੍ਛਿਤਮਂਸਾਦਿਬ੍ਯਞ੍ਜਨਞ੍ਜ ਸਪ੍ਪਿਨਵਨੀਤਦਧਿਖੀਰਾਦਿਗੋਰਸਞ੍ਚ ਜੀਰਮਰਿਚਾਦਿਕਟੁਕਭਣ੍ਡਞ੍ਚ ਕਦਲਿਪਨਸਮਧੁਗੁਲ਼ਾਦਿਉਪਕਰਣਞ੍ਚ ਭਾਜਨਾਨਿ ਪੂਰੇਤ੍ਵਾ ਨਿਬ੍ਬਤ੍ਤਤਿ, ਤਾਯ ਹਤ੍ਥੇਨ ਗਹਿਤਂ ਕਿਞ੍ਚਿ ਖਾਦਨੀਯਂ ਭੋਜਨੀਯਂਵਾ ਪੂਤਿਭਾਵਂ ਨ ਗਚ੍ਛਤਿ, ਭਤ੍ਤੁਕ੍ਖਲਿਂ ਗਹੇਤ੍ਵਾ ਸਕਲਨਗਰਵਾਸਿਨੋ ਭੋਜੇਨ੍ਤਿਯਾਪਿ ਏਕਕਟਚ੍ਛੁਮਤ੍ਤਂ ਭਤ੍ਤਂ ਗਹਿਤਟ੍ਠਾਨਂ ਨ ਪਞ੍ਞਾਯਤਿ. ਏਵਂ ਅਪਰਿਕ੍ਖਯਪੁਞ੍ਞਾ ਅਹੋਸਿ, ਸਕਲਦੇਵਪੁਤ੍ਤਨਗਰੇ ਚਨ੍ਦਸੁਰਿਯਾਵ ਪਾਕਟਾ ਅਹੋਸਿ, ਅਥ ਸਾ ਪਞ੍ਚਸਤਭਿਕ੍ਖੂ ਨਿਮਨ੍ਤੇਤ੍ਵਾ ਨਿਚ੍ਚਂ ਸਕਨਿਵੇਸਨੇਯੇਵ ਭੋਜੇਤਿ, ਤਦਾ ਤੇਸਂ ਅਨ੍ਤਰੇ ਪਟਿਸਮ੍ਭਿਦਾਪਤ੍ਤੋ ਮਹਾਸਙ੍ਘਰਕ੍ਖਿਤਤ੍ਥੇਰੋਨਾਮ ਇਮਿਸ੍ਸਾ ਪੁਞ੍ਞਾਨੁਭਾਵਂ ਦਿਬ੍ਬਚਕ੍ਖੁਨਾ ਦਿਸ੍ਵਾ ਨ ਜਾਨਾਤਿ ਏਸਾ ਅਤ੍ਥਨਾ ਪੁਬ੍ਬੇ ਕਤਕਮ੍ਮਂ. ਯਨ੍ਨੂਨਾਹਂ ਅਸ੍ਸਾ ਪਕਾਸੇਯ੍ਯਨ੍ਤਿ ਏਕਦਿਵਸਂ ਤਸ੍ਸਾ ਨਿਵੇਸਨੇ ਭੁਞ੍ਜਿਤ੍ਵਾ ਅਨੁਮੋਦਨਂ ਕਰੋਨ੍ਤੋ ਜਾਨਾਸਿ ਭਗਿਨਿ ਤਯਾ ਪੁਬ੍ਬੇ ਕਤਕਮ੍ਮਨ੍ਤਿ ਪੁਚ੍ਛਿ, ਨ ਜਾਨਾਮਿ ਭਨ੍ਤੇ. ਸੋਤੁਮਿਚ੍ਛਾਮੀਤਿ, ਅਥਸ੍ਸਾ ਸੋ ਪੁਬ੍ਬਕਮ੍ਮਂ ਪਕਾਸੇਨ੍ਤੋ.

੧.

ਏਕਨਵੁਤੇ ਇਤੋ ਕਪ੍ਪੇ,

ਵਿਪਸ੍ਸੀਨਾਮ ਨਾਯਕੋ;

ਅਹੋਸਿ ਲੋਕੇ ਲੋਕੇਕ,

ਨਾਯਕੋ ਛਿਨ੍ਨਬਨ੍ਧਨੋ.

੨.

ਤਦਾ ਤਸ੍ਮਿਂ ਪੁਰੇ ਰਮ੍ਮੇ, ਆਸਿ ਤ੍ਵਂ ਗਾਮਦਾਰਿਕਾ;

ਆਹਿਣ੍ਡਨ੍ਤੀ ਵਿਹਾਰਸ੍ਮਿਂ, ਅਦ੍ਦਕ੍ਖਿ ਜਿਨਸਾਵਕਂ.

੩.

ਰੋਗਾਤੁਰਂ ਕਿਸਂ ਪਣ੍ਡੁਂ, ਅਸ੍ਸਸਨ੍ਤਂ ਮੁਹੁਂ ਮੁਹੁਂ;

ਦਿਸ੍ਵਾਨ ਕਮ੍ਪਿਤਾ ਚਿਤ੍ਤਾ, ਨਿਮਨ੍ਤੇਤ੍ਵਾਨ ਤਂ ਮੁਨਿਂ.

੪.

ਭੇਸਜ੍ਜਞ੍ਚੇਵ ਭਤ੍ਤਞ੍ਚ, ਅਦਾ ਤ੍ਵਂ ਤੇਨ ਸੋ ਯਤਿ;

ਅਬ੍ਯਾਬਾਧੋ ਅਨੀਘੋਚ, ਅਹੋਸਿ ਅਨੁਪਦ੍ਦਵੋ.

੫.

ਤਤੋ ਤ੍ਵਂ ਤੇਨ ਕਮ੍ਮੇਨ, ਸੁਕਤੇਨ ਤਤੋ ਚੁਤਾ;

ਜਾਤਾਸਿ ਦੇਵਲੋਕਸ੍ਮਿਂ, ਸਬ੍ਬਕਾਮਸਮਿਦ੍ਧਿਨੀ.

੬.

ਤਤ੍ਥ ¶ ਤੇ ਪੁਞ੍ਞਤੇਜੇਨ, ਪਾਸਾਦੋ ਰਤਨਾਮਯੋ;

ਮਣਿਥੂਪਿਸਤਾਕਿਣ੍ਣੋ, ਕੂਟਾਗਾਰੇਹਿ ਲਙ੍ਕਤੋ.

੭.

ਨੇਕਗਬ੍ਭਸਤਾਕਿਣ੍ਣੋ, ਸਯਨਾਸਨਮਣ੍ਡਿਤੋ;

ਅਚ੍ਛਰਾਸਤਸਂਕਿਣ੍ਣੋ, ਨਚ੍ਚਗੀਤਾਦਿਸਂਕੁਲੋ.

੮.

ਰਮ੍ਭਾਮ੍ਬਜਮ੍ਬੁਸਨ੍ਨੀਰ, ਪੂਗਪੁਨ੍ਨਾਗਪਾਟਲੀ;

ਨਾਗਾਦਿਤਰੁਸਣ੍ਡੇਹਿ, ਮਣ੍ਡਿਤੁਯ੍ਯਾਨਪਨ੍ਤਿਹਿ.

੯.

ਪਦੁਮੁਪ੍ਪਲਕਲ਼ਾਰ, ਕੁਨ੍ਦਕਾਨਨਮਣ੍ਡਿਤੇ;

ਮਧੁਮਤ੍ਤਾਲਿਪਾਲੀਹਿ, ਸਾਰਸੀਸਰਸਂਕੁਲੇ.

੧੦.

ਦੇਵਪੁਤ੍ਤੇਹਿ ਨੇਕੇਹਿ, ਤਥਾ ਦੇਵਚ੍ਛਰਾਹਿਚ;

ਨਿਚ੍ਚੁਸ੍ਸਵੇ ਮਹਾਭੋਗੇ, ਵਿਮਾਨੇ ਮਨਨਨ੍ਦਨੇ.

੧੧.

ਤ੍ਵਮੇਵਂ ਦੇਵਲੋਕਮ੍ਹਿ, ਵਿਨ੍ਦਮਾਨਾ ਮਹਾਯਸਂ;

ਅਦ੍ਧਾਨਂ ਵੀਤਿਨਾਮੇਤ੍ਵਾ, ਨਿਬ੍ਬੁਤੇ ਗੋਤਮੇ ਜਿਨੇ.

੧੨.

ਜਮ੍ਬੁਦੀਪੇ ਇਦਾਨਿ ਤ੍ਵਂ, ਨਿਬ੍ਬਤ੍ਤਾ ਉਦਿਤੇ ਕੁਲੇ;

ਪੁਞ੍ਞਪਞ੍ਞਾਗੁਣਾਵਾਸਾ, ਰੂਪੇਨਗ੍ਗਾ ਪਿਯਂਵਦਾ.

੧੩.

ਏਤਂ ਤੇ ਦੇਵਲੋਕਸ੍ਮਿਂ, ਦੇਵਿਸ੍ਸਰਿਯਮਬ੍ਭੁਤਂ,

ਇਮਂ ਤੇ ਇਧ ਲੋਕਸ੍ਮਿਂ, ਸਬ੍ਬਂ ਮਾਨੁਸਿਕਂ ਸੁਖਂ.

੧੪.

ਵਿਪਸ੍ਸਿਮੁਨਿਨੋ ਕਾਲੇ, ਤ੍ਵਂ ਤਸ੍ਸੇਕਸ੍ਸ ਭਿਕ੍ਖੁਨੋ;

ਅਦਾ ਦਾਨਂ ਗਿਲਾਨਸ੍ਸ, ਤਸ੍ਸ ਤਂ ਫਲਮੀਦਿਸਂ.

੧੫.

ਕਾਤਬ੍ਬਞ੍ਹਿ ਸਦਾ ਪੁਞ੍ਞਂ, ਇਚ੍ਛਨ੍ਤੇਨ ਸੁਖਪ੍ਪਦਂ;

ਤਸ੍ਮਾ ਤ੍ਵਂ ਸਬ੍ਬਦਾ ਭਦ੍ਦੇ, ਉਸ੍ਸੁਕ੍ਕਾ ਕੁਸਲੇ ਭਵਾਤਿ.

ਏਵਂ ਸੋ ਤਸ੍ਸ ਪੁਰਿਮਤ੍ਤਭਾਵੇ ਕਤਕਮ੍ਮਂ ਪਕਾਸੇਤ੍ਵਾ ਇਦਾਨਿ ਪੁਞ੍ਞਕਮ੍ਮੇ ਅਪ੍ਪਮਾਦਾ ਭਵਾਤਿ ਅਨੁਸਾਸਿ. ਸਾ ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਰਮਸੋਮਨਸ੍ਸਾ ਤਤੋ ਪਟ੍ਠਾਯ ਦਾਨਾਦੀਸੁ ਨਿਰਤਾ ਪੁਞ੍ਞਾਨਿ ਕਰੋਨ੍ਤੀ ਤੇਨੇਵ ਸੋਮਨਸ੍ਸੇਨ ਸੋਤਾਪਨ੍ਨਾ ਅਰਿਯਸਾਵਿਕਾ ਅਹੋਸੀਤਿ.

੧੬.

ਇਤਿ ¶ ਤਰੁਣਕੁਮਾਰੀ ਪੁਞ੍ਞਕਮ੍ਮੇਸੁ ਸਾਰਂ,

ਅਵਿਦਿਤਗੁਣਮਤ੍ਤਾ ਦਤ੍ਵ ਭਿਕ੍ਖੁਸ੍ਸ ਦਾਨਂ;

ਦਿਵਿਮਨੁਜਸੁਖਂ ਸਾਲਤ੍ਥ ਤੁਮ੍ਹੇ ਭਵਨ੍ਤਾ,

ਵਿਦਿਤਕੁਸਲਪਾਕਾ ਕਿਂ ਨ ਲਬ੍ਭੇਥ ਸਨ੍ਤਿਂ.

ਰੂਪਦੇਵਿਯਾ ਵਤ੍ਥੁਂ ਦਸਮਂ.

ਧਮ੍ਮਸੋਣ੍ਡਕਵਗ੍ਗੋ ਪਥਮੋ.

ਨਨ੍ਦਿਯਰਾਜਵਗ੍ਗੋ

੧੧. ਨਨ੍ਦਿਯਰਾਜਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ¶ ਕਿਰ ਕਪ੍ਪਸਤਸਹਸ੍ਸਮਤ੍ਥਕੇ ਪਦੁਮੁਤ੍ਤਰੋ ਨਾਮ ਸਤ੍ਥਾ ਲੋਕੇ ਉਦਪਾਦਿ ਸਦੇਵਕਂ ਲੋਕਂ ਸਂਸਾਰਕਨ੍ਤਾਰਾ ਉਤ੍ਤਾਰੇਨ੍ਤੋ. ਤਸ੍ਮਿਂ ਕਿਰ ਸਮਯੇ ਏਕੋ ਕੁਟੁਮ੍ਬਿਕੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਬੁਦ੍ਧਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਮਹਾਦਾਨਂ ਸਜ੍ਜੇਤ੍ਵਾ ਅਤ੍ਤਨੋ ਭਵਨਂ ਦੇਵਭਵਨਮਿਵ ਅਲਙ੍ਕਰਿਤ੍ਵਾ ਬੁਦ੍ਧਾਰਹਂ ਮਹਾਸਨਂ ਪਞ੍ਞਾਪੇਤ੍ਵਾ ਗਨ੍ਤ੍ਵਾ ਭਗਵਨ੍ਤਂ ਯਾਚਿ ਕਾਲੋਯਂ ਭਨ੍ਤੇ ਭਗਵਤੋ ਭਤ੍ਤਗ੍ਗਸ੍ਸ ਉਪਸਙ੍ਕਮਨਾਯਾਤਿ. ਅਥ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਮਹਤਾ ਬੁਦ੍ਧਾਨੁਭਾਵੇਨ ਗਨ੍ਤ੍ਵਾ ਨਿਸੀਦਿ ਪਞ੍ਞਤ੍ਤਵਰਬੁਦ੍ਧਾਸਨੇ, ਤਤੋ ਕੁਟੁਮ੍ਬਿਕੋ ਹਟ੍ਠੋ ਉਦਗ੍ਗੋ ਸਪਰਿਸੋ ਭਗਵਨ੍ਤਂ ਪਰਿਵਿਸਤਿ ਅਨੇਕੇਹਿ ਮਧੁਰਨ੍ਨਪਾਨਾਦੀਹਿ. ਤਦਾ ਤਸ੍ਸ ਭਗਵਤੋ ਸਾਸਨੇ ਧੁਤਙ੍ਗਧਰਾਨਂ ਅਗ੍ਗੋ ਵਸਭਤ੍ਥੇਰੋਨਾਮ ਮਹਾਸਾਵਕੋ ਸਪਦਾਨਵਤ੍ਤੇਨ ਪਿਣ੍ਡਾਯ ਚਰਮਾਨੋ ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਦ੍ਵਾਰੇ ਅਟ੍ਠਾਸਿ, ਅਥ ਸੋ ਥੇਰਂ ਦਿਸ੍ਵਾ ਭਨ੍ਤੇ ਸਤ੍ਥਾ ਅਨ੍ਤੋਗੇਹੇ ਨਿਸਿਨ੍ਨੋ, ਤੁਮ੍ਹੇਪਿ ਪਵਿਸਥਾਤਿ ਯਾਚਿ, ਥੇਰੋ ਅਪਵਿਸਿਤ੍ਵਾਵ ਅਗਮਾਸਿ, ਕੁਟੁਮ੍ਬਿਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਮਤ੍ਤਂ ਵਤ੍ਵਾ ਕਿਂ ਭਨ੍ਤੇ ਸਦੇਵਕੇ ਲੋਕੇ ਭਗਵਤਾਪਿ ਉਤ੍ਤਰਿਤਰੋ ਗੁਣੇਨ ਸਂਵਿਜ੍ਜਤੀਤਿ ਆਹ. ਅਥਸ੍ਸ ਸਤ੍ਥਾ ਪੁਤ੍ਤੋਪਮਂ ਦਸ੍ਸੇਤ੍ਵਾ ਥੇਰਸ੍ਸ ਗੁਣੇ ਵਣ੍ਣੇਨ੍ਤੋ ਏਵਮਾਹ.

੧.

ਪਾਲੇਨ੍ਤਿ ਨਿਮ੍ਮਲਂ ਕਤ੍ਵਾ, ਪਾਤਿਮੋਕ੍ਖਾਦਿਸਂਵਰਂ;

ਸਮਾਦਿਨ੍ਨਧੁਤਙ੍ਗਾਚ, ਅਪ੍ਪਿਚ੍ਛਾ ਮੁਨਿਸੂਨਵੋ.

੨.

ਨਿਚ੍ਚ ਮਨ੍ਤਕਯੁਦ੍ਧਮ੍ਹਿ, ਨਦ੍ਧਾ ਯੋਧਾਵ ਦਪ੍ਪਿਤਾ;

ਪੁਞ੍ਞਾਨਂ ਵਤ੍ਥੁਭੂਤਾ ਤੇ, ਦੇਵਮਾਨੁਸਕਾ ਦਿਨਂ.

੩.

ਧਾਰੇਮਹਂ ਵਣ੍ਣਵਨ੍ਤਂ, ਸੀਵੇਯ੍ਯਮ੍ਪਿਚ ਚੀਵਰਂ;

ਬੁਦ੍ਧਪੁਤ੍ਤਾ ਮਹਾਨਾਗਾ ਨ ਧਾਰੇਨ੍ਤਿ ਤਥਾਵਿਧਂ.

੪.

ਧਾਰੇਨ੍ਤਿ ¶ ਤੇ ਪਂਸੁਕੂਲਂ, ਸਙ੍ਘਾਟੇਤ੍ਵਾ ਪਿਲੋਤਿਕੇ;

ਵਣਚ੍ਛਾਦਨਚੋਲਂਵ, ਇਚ੍ਛਾਲੋਭ ਵਿਵਜ੍ਜਿਤਾ.

੫.

ਸਾਦਿਯਾਮਿ ਸਦਾ ਹਮ੍ਭੋ, ਉਪਾਸਕਨਿਮਨ੍ਤਨਂ;

ਨੇਵ ਸਾਦੇਨ੍ਤਿ ਸਮ੍ਬੁਦ੍ਧ, ਪੁਤ੍ਤੋ ਪਾਸਕਯਾਚਨਂ.

੬.

ਸਪਦਾਨੇਨ ਯਂ ਲਦ੍ਧਂ, ਲੂਖਂਵਾਪਿ ਪਣੀਤਕਂ;

ਤੇਨ ਤੁਸ੍ਸਨ੍ਤਿ ਮੇ ਪੁਤ੍ਤਾ, ਰਸਗੇਧਵਿਵਜ੍ਜਿਤਾ.

੭.

ਨਿਪਜ੍ਜਾਮਿ ਅਹਂ ਸਾਧੁ, ਸਨ੍ਥਤੇ ਸਯਨੇ ਸੁਭੇ;

ਨ ਤੇ ਸੇਯ੍ਯਂ ਪਕਪ੍ਪੇਨ੍ਤਿ, ਸਂਸਾਰਭਯਭੀਰੁਕਾ.

੮.

ਠਾਨਾ ਸਨਗਮਨੇਨ, ਕਪ੍ਪੇਨ੍ਤਿ ਇਰਿਯਾਪਥਂ;

ਨੇਕਭੂਮਿਸਮਾਕਿਣ੍ਣ, ਪਾਸਾਦੇਸੁ ਵਸਾਮਹਂ.

੯.

ਬੁਦ੍ਧਪੁਤ੍ਤਾ ਤਥਾਚ੍ਛਨ੍ਨਂ, ਨ ਕਦਾ ਪਵਿਸਨ੍ਤਿ ਤੇ;

ਰੁਕ੍ਖਮੂਲੇ ਸੁਸਾਨਸ੍ਮਿਂ, ਅਬ੍ਭੋਕਾਸੇ ਰਮਨ੍ਤਿ ਤੇ.

੧੦.

ਭਾਵੇਤ੍ਵਾ ਭਵਨਾਸਾਯ, ਹੇਤੁਂ ਭਾਵਨਮੁਤ੍ਤਮਂ;

ਅਹਂ ਗਾਮੇ ਵਸਿਸ੍ਸਾਮਿ, ਪਾਪੇਨ੍ਤੋ ਜਨਤਂ ਸਿਵਂ.

੧੧.

ਰਮਨ੍ਤਿ ਮਮ ਪੁਤ੍ਤਾ ਤੇ, ਪਨ੍ਤਸੇਨਾਸਨੇ ਕਕਾ;

ਤੇਸਂ ਮਹਤ੍ਤਰੋ ਸਨ੍ਤੋ, ਥੇਰੋਯਂ ਵਸਭੋ ਮਹਾ;

ਧੁਤਪਾਪੋ ਧੁਤਙ੍ਗਗ੍ਗੋ, ਞਾਤੋਯਂ ਮਮ ਸਾਸਨੇਤਿ.

ਏਵਂ ਭਗਵਾ ਹਤ੍ਥਂ ਉਕ੍ਖਿਪਿਤ੍ਵਾ ਚਨ੍ਦਮਣ੍ਡਲੇ ਪਹਰਨ੍ਤੋ ਵਿਯ ਥੇਰਸ੍ਸ ਗੁਣੇ ਪਕਾਸੇਸਿ, ਤਤੋ ਸੋ ਤਸ੍ਸ ਗੁਣਕਥਂ ਸੁਤ੍ਵਾ ਸਯਮ੍ਪਿਤਂ ਠਾਨਨ੍ਤਰਂ ਕਾਮਯਮਾਨੋ ਯਨ੍ਨੂਨਾਹਂ ਅਨਾਗਤੇ ਅਞ੍ਞਤਰਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਧੁਤਙ੍ਗਧਰਾਨਂ ਅਗ੍ਗੋ ਭਵਿਸ੍ਸਾਮੀਤਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਭਗਵਤੋ ਪਾਦਮੂਲੇ ਨਿਪਜ੍ਜਿ, ਸਤ੍ਥਾ ਤਂ ਕਾਰਣਂ ਉਪਪਰਿਕ੍ਖਿਤ੍ਵਾ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਸਤ੍ਥਾ ਉਪ੍ਪਜ੍ਜਿਸ੍ਸਤਿ. ਤ੍ਵਂ ਤਦਾ ਧੁਤਙ੍ਗਧਰਾਨਂ ਅਗ੍ਗੋ ਹੁਤ੍ਵਾ ਕਸ੍ਸ ਪੋਤਿ ਪਞ੍ਞਾਯਿਸ੍ਸਤੀਤਿ ਬ੍ਯਾਕਰਣ ¶ ਮਦਾਸਿ. ਤਤੋ ਪਟ੍ਠਾਯ ਸੋ ਸੋਮਨਸ੍ਸੋ ਪੁਞ੍ਞਕਮ੍ਮਂ ਕਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਦੇਵਿਸ੍ਸਰਿਯਂ ਅਨੁਭਵਨ੍ਤੋ ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਕਾਲੇ ਏਕਸਾਟਕੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਮਹਾਦਾਨਂ ਅਦਾਸਿ. ਤਤੋ ਚੁਤੋ ਕਸ੍ਸਪਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਬਾਰਾਣਸੀਨਗਰੇ ਬਾਰਾਣਸੀਸੇਟ੍ਠਿ ਹੁਤ੍ਵਾ ਨਿਬ੍ਬਤ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਸਂਸਾਰੇ ਸਂਸਰਨ੍ਤੋ ਦਸਵਸ੍ਸਸਹਸ੍ਸਾ ਯੁਕੇਸੁ ਮਨੁਸ੍ਸੇਸੁ ਬਾਰਾਣਸਿਯਂ ਏਕੋ ਕੁਟੁਮ੍ਬਿਕੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਪਨਾਯਂ ਕੁਟੁਮ੍ਬਿਕੋ ਅਰਞ੍ਞੇ ਜਙ੍ਘਾਵਿਹਾਰਂ ਅਨੁਵਿਚਰਨ੍ਤੋ ਪਚ੍ਚਨ੍ਤਿਮੇ ਜਨਪਦੇ ਅਰਞ੍ਞਾਯਤਨੇ ਅਞ੍ਞਤਰਂ ਪਚ੍ਚੇਕਬੁਦ੍ਧਂ ਅਦ੍ਦਸ. ਸੋ ਚ ਪਚ੍ਚੇਕਬੁਦ੍ਧੋ ਤਤ੍ਥ ਚੀਵਰਕਮ੍ਮਂ ਕਰੋਨ੍ਤੋ ਅਨੁਵਾਤੇ ਅਪ੍ਪਹੋਨ੍ਤੇ ਸਂਹਰਿਤ੍ਵਾ ਠਪੇਤੁਂ ਆਰਦ੍ਧੋ. ਕੁਟੁਮ੍ਬਿਕੋ ਤਂ ਦਿਸ੍ਵਾ ਭਨ੍ਤੇ ਕਿਂ ਕਰੋਥਾਤਿ ਪੁਚ੍ਛਿ. ਸੋ ਪਚ੍ਚੇਕਬੁਦ੍ਧੋ ਅਪ੍ਪਿਚ੍ਛਤਾਯ ਤੇਨ ਪੁਟ੍ਠੋ ਨ ਕਿਞ੍ਚਿ ਵੁਤ੍ਤੋ ਹੋਤਿ. ਸੋ ਚੀਵਰਦੁਸ੍ਸਂ ਨਪ੍ਪਹੋਤੀਤਿ ਞਤ੍ਵਾ ਅਤ੍ਤਨੋ ਉਤ੍ਤਰਸਾਟਕਂ ਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਠਪੇਤ੍ਵਾ ਅਗਮਾਸਿ. ਪਚ੍ਚੇਕਬੁਦ੍ਧੋ ਤਂ ਗਹੇਤ੍ਵਾ ਅਨੁਵਾਤਕਂ ਆਰੋਪੇਨ੍ਤੋ ਚੀਵਰਂ ਕਤ੍ਵਾ ਪਾਰੁਪਿ. ਕੁਟੁਮ੍ਬਿਕੋ ਜੀਵਿਤਪਰਿਯੋਸਾਨੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਬਾਰਾਣਸਿਤੋ ਤਿਯੋਜਨਮਤ੍ਤਕੇ ਠਾਨੇ ਅਞ੍ਞਤਰਸ੍ਮਿਂ ਨਗਰੇ ਨਿਬ੍ਬਤ੍ਤਿ, ਤਸ੍ਸ ਮਾਤਾਪਿਤਰੋ ਨਨ੍ਦਿਯੋਤਿ [ਨਨ੍ਦੀਤਿਨਾਮਂ ਇਤਿਸਬ੍ਬਤ੍ਥ] ਨਾਮਂ ਅਕਂਸੁ, ਤਸ੍ਸ ਸਤ੍ਤ ਭਾਤਰੋ ਅਹੇਸੁਂ, ਸੇਸਾ ਛ ਭਾਤਰੋ ਨਾਨਾਕਮ੍ਮਨ੍ਤੇਸੁ ਬ੍ਯਾਵਟਾ ਮਾਤਾਪਿਤੁਨ੍ਨਂ ਪੋਸੇਨ੍ਤਿ. ਨਨ੍ਦਿਯੋ ਪਨ ਅਕਮ੍ਮਸੀਲੋ ਗੇਹੇਯੇਵ ਵਸਤਿ. ਤਸ੍ਮਾ ਤਸ੍ਸ ਸੇਸਾ ਕੁਜ੍ਝਨ੍ਤਿ. ਮਾਤਾਪਿਤਰੋਪਿ ਨਨ੍ਦਿਯਂ ਆਮਨ੍ਤੇਤ੍ਵਾ ਓਵਦਨ੍ਤਿ. ਸੋ ਤੁਣ੍ਹੀ ਹੋਤੇਵ. ਅਥਾਪਰਸ੍ਮਿਂ ਸਮਯੇ ਗਾਮੇ ਨਕ੍ਖਤ੍ਤਂ ਸਙ੍ਘੁਟ੍ਠਂ, ਤਦਾ ਸੋ ਮਾਤਰਂ ਆਹ. ਅਮ੍ਮ ਸਾਟਕਂ ਦੇਹਿ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀਤਿ, ਸਾ ਧੋਤ- ਵਤ੍ਥਂ ¶ ਨੀਹਰਿਤ੍ਵਾ ਅਦਾਸਿ, ਅਮ੍ਮ ਥੂਲਂ ਇਦਨ੍ਤਿ, ਸਾ ਅਞ੍ਞਂ ਨੀਹਰਿਤ੍ਵਾ ਅਦਾਸਿ, ਤਮ੍ਪਿ ਪਟਿਕ੍ਖਿਪਿ. ਅਥ ਨਂ ਮਾਤਾ ਆਹ. ਤਾਤ ਯਾਦਿਸੇ ਮਯਂ ਗੇਹੇ ਜਾਤਾ, ਨਤ੍ਥਿ ਇਤੋ ਸੁਖੁਮਤਰਸ੍ਸ ਪਟਿਲਾਭਾਯ ਪੁਞ੍ਞਨ੍ਤਿ, ਲਭਨਟ੍ਠਾਨਂ ਗਮਿਸ੍ਸਾਮਿ ਅਮ੍ਮਾਤਿ. ਪੁਤ੍ਤ ਅਹਂ ਅਜ੍ਜੇਵ ਤਵ ਬਾਰਾਣਸੀਨਗਰੇ ਰਜ੍ਜਪਟਿਲਾਭਂ ਇਚ੍ਛਾਮੀਤਿ ਆਹ. ਸੋ ਸਾਧੁ ਅਮ੍ਮਾਤਿ ਮਾਤਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਮਾਤੁਯਾ ਪਨਸ੍ਸ ਏਵਂ ਅਹੋਸਿ. ਕਹਂ ਸੋ ਗਮਿਸ੍ਸਤਿ, ਪੁਬ੍ਬੇਵਿਯ ਇਧਵਾ ਏਤ੍ਥਵਾ ਗੇਹੇ ਨਿਸੀਦਿਤ੍ਵਾ ਆਗਚ੍ਛਤੀਤਿ, ਸੋ ਪਨ ਪੁਞ੍ਞਨਿਯਾਮੇਨ ਚੋਦਿਯਮਾਨੋ ਗਾਮਤੋ ਨਿਕ੍ਖਮਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਸੇਨਗੁਤ੍ਤਸ੍ਸ ਗੇਹੇ ਪਟਿਵਸਤਿ, ਅਥੇਕਦਿਵਸਂ ਸੋ ਤਸ੍ਸ ਕਮ੍ਮਕਾਰੇਹਿ ਸਦ੍ਧਿਂ ਸਲ੍ਲਪਨ੍ਤੋ ਨਿਸੀਦਿਤ੍ਵਾ ਪਚਲਾਯਨ੍ਤੋ ਸੁਪਿਨਂ ਅਦ੍ਦਸ. ਮੁਖੇਨ ਅਨ੍ਤਂ ਨਿਕ੍ਖਮਿਤ੍ਵਾ ਸਕਲਜਮ੍ਬੁਦੀਪੇ ਪਤ੍ਥਰਿਤ੍ਵਾ ਅਨ੍ਤੋਕੁਚ੍ਛਿਮੇਵ ਪਾਵਿਸਿ. ਪਬੁਦ੍ਧੋ ਸੋ ਭੀਤੋ ਮਹਾਸਦ੍ਦਮਕਾਸਿ. ਅਥ ਨਂ ਮਹਾਸੇਨਗੁਤ੍ਤੋ ਪੁਚ੍ਛਿ. ਨਨ੍ਦਿਯੋ ਸੁਪਿਨਂ ਅਦ੍ਦਸਨ੍ਤਿ ਆਹ. ਅਥ ਤੇਨ ਕੀਦਿਸਨ੍ਤਿ ਪੁਟ੍ਠੋ ਕਥੇਸਿ, ਤਤੋ ਸੇਨਗੁਤ੍ਤੋ ਤਂ ਅਤ੍ਤਨੋ ਕੁਲੂਪਗਂ ਪਰਿਬ੍ਬਾਜਿਕਂ ਪੁਚ੍ਛਿ ਕੋ ਤਸ੍ਸ ਵਿਪਾਕੋਤਿ. ਪਰਿਬ੍ਬਾਜਿਕਾ ਯਦਿ ਭੋ ਇਤ੍ਥੀ ਪਸ੍ਸਤਿ. ਸਤ੍ਤਦਿਵਸਬ੍ਭਨ੍ਤਰੇਯੇਵ ਅਭਿਸੇਕਂ ਲਭਤਿ, ਯਦਿ ਪੁਰਿਸੋ ਪਸ੍ਸਤਿ, ਤਥੇਵ ਰਾਜਾ ਹੋਤੀਤਿ ਕਥੇਸਿ. ਸੇਨਗੁਤ੍ਤੋ ਤਸ੍ਸਾ ਤਂ ਕਥਂ ਸੁਤ੍ਵਾ ਇਮਂ ਮਮ ਞਾਤਿਂ ਕਰੋਮੀਤਿ ਅਤ੍ਤਨੋ ਸਤ੍ਤ ਧੀਤਰੇ ਪਕ੍ਕੋਸਿਤ੍ਵਾ ਪਟਿਪਾਟਿਯਾ ਪੁਚ੍ਛਿ. ਨਨ੍ਦਿਯਸ੍ਸ ਸਨ੍ਤਿਕੇ ਵਸਥਾਤਿ, ਸੇਸਾ ਸਬ੍ਬਾ ਨ ਇਚ੍ਛਿਂਸੁ, ਨ ਮਯਂ ਜਾਨਾਮ ਏਤਂ ਅਧੁਨਾਗਤਂ ਕੁਲਵਨ੍ਤਂ ਵਾ ਦੁਕ੍ਕੁਲਵਨ੍ਤਂਵਾਤਿ. ਅਥ ਕਣਿਟ੍ਠਿਕਂ ਪੁਚ੍ਛਿ. ਸਾ ਯਸ੍ਸ ਮਂ ਮਾਤਾਪਿਤਰੋ ਦਸ੍ਸਨ੍ਤਿ. ਤੇਸਂ ਵਚਨਂ ਨ ਭਿਨ੍ਦਿਸ੍ਸਾਮੀਤਿ ਸਮ੍ਪਟਿਚ੍ਛਿ, ਅਥ ਸੇਨਗੁਤ੍ਤੋ ਨਨ੍ਦਿਯਂ ਪਕ੍ਕੋਸਿਤ੍ਵਾ ਅਤ੍ਤਨੋ ਧੀਤਰਂ ਦਤ੍ਵਾ ਤਸ੍ਸ ਮਹਾਸਮ੍ਪਤ੍ਤਿ ਮਦਾਸਿ. ਤਤੋ ਸਤ੍ਤਮੇ ਦਿਵਸੇ ਨਨ੍ਦਿਯੋ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਰਞ੍ਞੋ ਮਙ੍ਗਲੁਯ੍ਯਾਨਂ ਪਸ੍ਸਿਸ੍ਸਾਮੀਤਿ ਗਨ੍ਤ੍ਵਾ ਧਙ੍ਗਲਸਿਲਾਪਟ੍ਟੇਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ, ਸੋ ਚ ਬਾਰਾਣਸੀਰਞ੍ਞੋ ਕਾਲਙ੍ਕਤਸ੍ਸ ਸਤ੍ਤਮੋ ¶ ਦਿਵਸੋ ਹੋਤਿ. ਅਮਚ੍ਚਾਚ ਪੁਰੋਹਿਤੋਚ ਰਞ੍ਞੋ ਸਰੀਰਕਿਚ੍ਚਂ ਕਾਰੇਤ੍ਵਾ ਰਾਜਙ੍ਗਣੇ ਨਿਸੀਦਿਤ੍ਵਾ ਮਨ੍ਤਯਿਂਸੁ. ਰਞ੍ਞੋ ਏਕਾਵ ਧੀਤਾ ਅਤ੍ਥਿ, ਪੁਤ੍ਤੋ ਪਨਸ੍ਸ ਨਤ੍ਥਿ. ਅਰਾਜਿਕਂ ਰਜ੍ਜਂ ਨ ਤਿਟ੍ਠਤਿ. ਫੁਸ੍ਸਰਥਂ ਵਿਸ੍ਸਜ੍ਜੇਸ੍ਸਾਮਾਤਿ. ਤੇ ਕੁਮੁਦਪਤ੍ਤਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਸੇਤਚ੍ਛਤ੍ਤਪਮੁਖਂਪਞ੍ਚਵਿਧਰਾਜਕਕੁਧਭਣ੍ਡਂ ਰਥਸ੍ਮਿਂਯੇਵ ਠਪੇਤ੍ਵਾ ਰਥਂ ਵਿਸ੍ਸਜ੍ਜੇਤ੍ਵਾ ਪਚ੍ਛਤੋ ਤੁਰਿਯਾਨਿ ਪਗ੍ਗਣ੍ਹਾਪੇਸੁਂ. ਰਥੋ ਪਾਚੀਦ੍ਵਾਰੇਨ ਨਿਕ੍ਖਮਿਤ੍ਵਾ ਉਯ੍ਯਾਨਾਭਿਮੁਖੋ ਅਹੋਸਿ. ਪਰਿਚਯੇਨ ਉਯ੍ਯਾਨਾਭਿਮੁਖੋ ਗਚ੍ਛਤਿ. ਨਿਵਤ੍ਤੇਮਾਤਿ ਕੇਚਿ ਆਹਂਸੁ. ਪੁਰੋਹਿਤੋ ਮਾ ਨਿਵਾਰਯਿਤ੍ਥਾਤਿ ਆਹ. ਰਥੋ ਕੁਮਾਰਕਂ ਪਦਕ੍ਖਿਣਂ ਕਤ੍ਵਾ ਆਰੋਹਣਸਜ੍ਜੋ ਹੁਤ੍ਵਾ ਅਟ੍ਠਾਸਿ. ਪੁਰੋਹਿਤੋ ਪਾਰੁਪਣਕਣ੍ਣਂ ਅਪਨੇਤ੍ਵਾ ਪਾਦਤਲਾਨਿ ਓਲੋਕੇਨ੍ਤੋ ਤਿਟ੍ਠਤੁ ਅਯਂ ਦੀਪੋ. ਦ੍ਵਿਸਹਸ੍ਸਦੀਪ ਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਏਕਰਜ੍ਜਂ ਕਾਤੁਂ ਸਮਤ੍ਥੋਤਿਵਤ੍ਵਾ ਤਸ੍ਸ ਧਿਤਿਂ ਉਪਧਾਰੇਤੁਂ ਤਿਕ੍ਖਤ੍ਤੁਂ ਤੁਰਿਯਾਨਿ ਪਗ੍ਗਣ੍ਹਾਪੇਸਿ. ਅਥ ਕੁਮਾਰੋ ਮੁਖਂ ਵਿਵਰਿਤ੍ਵਾ ਓਲੋਕੇਤ੍ਵਾ ਕੇਨ ਕਾਰਣੇਨ ਆਗਤਤ੍ਥਾਤਿ ਆਹ, ਦੇਵ ਤੁਮ੍ਹਾਕਂ ਰਜ੍ਜਂ ਪਾਪੁਣਾਤੀਤਿ, ਰਾਜਾ ਕਹਨ੍ਤਿ, ਦੇਵਤ੍ਤਂ ਗਤੋ ਸਾਮੀਤਿ, ਕਤਿ ਦਿਵਸਾ ਅਤਿਕ੍ਕਨ੍ਤਾਤਿ, ਅਜ੍ਜ ਸਤ੍ਤਮੋ ਦਿਵਸੋਤਿ. ਪੁਤ੍ਤੋ ਵਾ ਧੀਤਾ ਵਾ ਨਤ੍ਥੀਤਿ, ਧੀਤਾ ਅਤ੍ਥਿ ਦੇਵ. ਪੁਤ੍ਤੋ ਨ ਵਿਜ੍ਜਤੀਤਿ, ਤੇਨਹਿ ਕਰਿਸ੍ਸਾਮਿ ਰਜ੍ਜਨ੍ਤਿ, ਤੇ ਤਾਵਦੇਵ ਅਭਿਸੇਕਮਣ੍ਡਪਂ ਕਾਰੇਤ੍ਵਾ ਰਾਜਧੀਤਰਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਾਰਿਤ੍ਵਾ ਉਯ੍ਯਾਨਂ ਨੇਤ੍ਵਾ ਕੁਮਾਰਸ੍ਸ ਅਭਿਸੇਕਂ ਅਕਂਸੁ, ਅਥਸ੍ਸ ਕਤਾਭਿਸੇਕਸ੍ਸ ਸਤਸਹਸ੍ਸਗ੍ਘਨਕਂ ਵਤ੍ਥਂ ਆਨੇਸੁਂ, ਸੋ ਕਿਮਿਦਂ ਤਾਤਾਤਿ ਆਹ, ਨਿਵਾਸਨਵਤ੍ਥਂ ਦੇਵਾਤਿ, ਨਨੁ ਤਾਤਾ ਥੂਲਂਤਿ, ਮਨੁਸ੍ਸਾਨਂ ਪਰਿਭੋਗਵਤ੍ਥੇਸੁ ਇਤੋ ਸੁਖੁਮਤਰਂ ਨਤ੍ਥਿ ਦੇਵਾਤਿ, ਤੁਮ੍ਹਾਕਂ ਰਾਜਾ ਏਵਰੂਪਂ ਨਿਵਾਸੇਸੀਤਿ, ਆਮ ਦੇਵਾਤਿ. ਨ ਮਞ੍ਞੇ ਪੁਞ੍ਞਵਾ ਤੁਮ੍ਹਾਕਂ ਰਾਜਾਤਿ ਵਤ੍ਵਾ ਹਨ੍ਦ ਸੁਵਣ੍ਣਭਿਙ੍ਕਾਰਂ ਆਹਰਥ, ਲਭਿਸ੍ਸਾਮ ਵਤ੍ਥਨ੍ਤਿ, ਤੇ ਸੁਵਣ੍ਣਭਿਙ੍ਕਾਰਂ ਆਹਰਿਂਸੁ, ਸੋ ਉਟ੍ਠਾਯ ਹਤ੍ਥੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਨ ਉਦਕਂ ਆਦਾਯ ਪੁਰਤ੍ਥਿਮਦਿਸਾਯ ਅਬ੍ਭੁਕ੍ਕਿਰਿ, ¶ ਤਾਵਦੇਵ ਘਨਪਥਵਿਂ ਭਿਨ੍ਦਿਤ੍ਵਾ ਸੋਲ਼ਸਕਪ੍ਪਰੁਕ੍ਖਾ ਉਟ੍ਠਹਿਂਸੁ, ਪੁਨ ਉਦਕਂ ਹਤ੍ਥੇਨ ਗਹੇਤ੍ਵਾ ਦਕ੍ਖਿਣਂ ਪਚ੍ਛਿਮਂ ਉਤ੍ਤਰਨ੍ਤਿ ਏਵਂ ਚਤਸ੍ਸੋਪਿ ਦਿਸਾ ਅਬ੍ਭੁਕ੍ਕਿਰਿ, ਸਬ੍ਬਦਿਸਾਸੁ ਸੋਲ਼ਸ ਸੋਲ਼ਸ ਹੁਤ੍ਵਾ ਚਤੁਸਟ੍ਠਿਕਪ੍ਪਰੁਕ੍ਖਾ ਉਟ੍ਠਹਿਂਸੁ, ਸੋ ਏਕਂ ਦਿਬ੍ਬਦੁਸ੍ਸਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਨਨ੍ਦਿਯਰਞ੍ਞੋ ਵਿਜਿਤੇ ਸੁਤ੍ਤਕਨ੍ਤਿਕਾ ਇਤ੍ਥਿਯੋ ਮਾ ਸੁਤ੍ਤਂ ਕਨ੍ਤਨ੍ਤੂਤਿ ਭੇਰਿਂ ਚਰਾਪੇਥਾਤਿ ਵਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਵਿਸਿਤ੍ਵਾ ਪਾਸਾਦਮਭਿਰੁਯ੍ਹ ਮਹਾਸਮ੍ਪਤ੍ਤਿਂ ਅਨੁਭਵਿ. ਅਹੋ ਤਦਾ ਪਚ੍ਚੇਕਬੁਦ੍ਧਸ੍ਸ ਦਿਨ੍ਨਾਨੁਵਾਤਕਸ੍ਸ ਵਿਪਾਕੋ. ਤੇਨਾਹੁ ਪੋਰਾਣਾ.

੧੨.

ਯਥਾ ਸਾਸਪਮਤ੍ਤਮ੍ਹਾ, ਬੀਜਾ ਨਿਗ੍ਰੋਧਪਾਦਪੋ;

ਜਾਯਤੇ ਸਤਸਾਖਡ੍ਢੋ, ਮਹਾਨੀਲਮ੍ਬੁਦੋਪਮੋ.

੧੩.

ਤਥੇਵ ਪੁਞ੍ਞਕਮ੍ਮਮ੍ਹਾ, ਅਣੁਮ੍ਹਾ ਵਿਪੁਲਂ ਫਲਂ;

ਹੋਤੀਤਿ ਅਪ੍ਪਪੁਞ੍ਞਨ੍ਤਿ, ਨਾਵਮਞ੍ਞੇਯ੍ਯ ਪਣ੍ਡਿਤੋਤਿ.

ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਦੇਵੀ ਰਞ੍ਞੋ ਸਮ੍ਪਤ੍ਤਿਂ ਦਿਸ੍ਵਾ ਅਹੋ ਤਪਸ੍ਸੀਤਿ ਕਾਰੁਞ੍ਞਾਕਾਰਂ ਦਸ੍ਸੇਸਿ. ਕਿਮਿਦਂ ਦੇਵੀਤਿ ਚ ਪੁਟ੍ਠਾ ਅਤਿਮਹਤੀ ਤੇ ਦੇਵ ਸਮ੍ਪਤ੍ਤਿ. ਅਤੀਤਮਦ੍ਧਾਨਂ ਕਲ੍ਯਾਣਂ ਕਤਤ੍ਤਾ. ਇਦਾਨਿ ਅਨਾਗਤਸ੍ਸਤ੍ਥਾਯ ਕੁਸਲਂ ਕਰੋਥਾਤਿ ਆਹ. ਕਸ੍ਸ ਦਸ੍ਸਾਮ. ਸੀਲਵਨ੍ਤਾ ਨਤ੍ਥੀਤਿ. ਅਸੁਞ੍ਞੋ ਦੇਵ ਜਮ੍ਬੁਦੀਪੋ ਅਰਹਨ੍ਤੇਹਿ, ਤੁਮ੍ਹੇ ਦਾਨਂ ਸਜ੍ਜੇਥ, ਅਹਂ ਅਰਹਨ੍ਤੇ ਲਚ੍ਛਾਮੀਤਿ ਆਹ. ਪੁਨਦਿਵਸੇ ਰਾਜਾ ਮਹਾਰਹਂ ਦਾਨਂ ਸਜ੍ਜਾਪੇਸਿ. ਦੇਵੀ ਸਚੇ ਇਮਿਸ੍ਸਾ ਦਿਸਾਯ ਅਰਹਨ੍ਤੋ ਅਤ੍ਥਿ, ਇਧਾ ਗਨ੍ਤ੍ਵਾ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂਤਿ ਉਤ੍ਤਰਹਿਮਵਨ੍ਤਾਭਿਮੁਖੀ ਪੁਪ੍ਫਾਨਿ ਉਦ੍ਧਂ ਖਿਪਿਤ੍ਵਾ ਉਰੇਨ ਨਿਪਜ੍ਜਿ. ਅਥ ਤਾਨਿ ਪੁਪ੍ਫਾਨਿ ਆਕਾਸਤੋ ਗਨ੍ਤ੍ਵਾ ਹਿਮਵਨ੍ਤਪਦੇਸੇ ਵਸਨ੍ਤਾਨਂ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂਪਚ੍ਚੇਕਬੁਦ੍ਧਾਨਂ ਜੇਟ੍ਠਕਮਹਾਪਦੁਮਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਪਤਿਂਸੁ. ਤਥਾਹਿ.

੧੪.

ਅਹੋ ¶ ਪਸ੍ਸਥ ਭੋ ਦਾਨਿ, ਵਿਮ੍ਹਯਂ ਪੁਞ੍ਞਕਮ੍ਮੁਨੋ;

ਅਚੇਤਨਾਪਿ ਪੁਪ੍ਫਾਨਿ, ਦੂਤਕਿਚ੍ਚੇਸੁ ਬ੍ਯਾਵਟਾ.

੧੫.

ਕਤ੍ਤੁਕਾਮੇਨ ਲੋਕਸ੍ਮਿਂ, ਸਕਲਂ ਅਤ੍ਤਨੋ ਵਸਂ;

ਸਬ੍ਬਤ੍ਥਾਮੇਨ ਕਤ੍ਤਬ੍ਬਂ, ਪੁਞ੍ਞਂ ਪਞ੍ਞਵਤਾ ਸਦਾਤਿ.

ਤਤੋ ਮਹਾਪਦੁਮਪਚ੍ਚੇਕਬੁਦ੍ਧੋ ਤਂ ਞਤ੍ਵਾ ਸੇਸਭਾਤਰੇ ਆਮਨ੍ਤੇਸਿ. ਮਾਰਿਸਾ ਨਨ੍ਦਿਯਰਾਜਾ ਤੁਮ੍ਹੇ ਨਿਮਨ੍ਤੇਸਿ. ਅਧਿਵਾਸੇਥ ਤਸ੍ਸ ਨਿਮਨ੍ਤਨਨ੍ਤਿ. ਤੇ ਅਧਿਵਾਸੇਤ੍ਵਾ ਤਾਵਦੇਵ ਆਕਾਸੇਨਾ ਗਨ੍ਤ੍ਵਾ ਉਤ੍ਤਰਦ੍ਵਾਰੇ ਓਤਰਿਂਸੁ. ਮਨੁਸ੍ਸਾ ਪਞ੍ਚਸਤਾ ਦੇਵ ਪਚ੍ਚੇਕਬੁਦ੍ਧਾ ਆਗਤਾਤਿ ਰਞ੍ਞੋ ਆਰੋਚੇਸੁਂ, ਰਾਜਾ ਸਦ੍ਧਿਂ ਦੇਵਿਯਾ ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤੇ ਗਹੇਤ੍ਵਾ ਪਚ੍ਚੇਕਬੁਦ੍ਧੇ ਪਾਸਾਦਂ ਆਰੋਪੇਤ੍ਵਾ ਤਤ੍ਥ ਤੇਸਂ ਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਰਾਜਾ ਸਙ੍ਘਤ੍ਥੇਰਸ੍ਸ ਦੇਵੀ ਸਙ੍ਘਨਵਕਸ੍ਸ ਚ ਪਾਦਮੂਲੇ ਨਿਪਜ੍ਜਿਤ੍ਵਾ ਅਯ੍ਯਾ ਪਚ੍ਚਯੇਹਿ ਨ ਕਿਲਮਿਸ੍ਸਨ੍ਤੁ, ਮਯਂ ਪੁਞ੍ਞੇਨ ਨ ਹਾਯਿਸ੍ਸਾਮ, ਅਮ੍ਹਾਕਂ ਇਧ ਵਾਸਾਯ ਪਟਿਞ੍ਞਂ ਦੇਥਾਤਿ ਪਟਿਞ੍ਞਂ ਕਾਰੇਤ੍ਵਾ ਉਯ੍ਯਾਨੇ ਨਿਵਾਸਟ੍ਠਾਨਾਦਯੋ ਕਾਰੇਤ੍ਵਾ ਯਾਵਜੀਵਂ ਪਚ੍ਚਕਬੁਦ੍ਧੇ ਉਪਟ੍ਠਹਿਤ੍ਵਾ ਤੇਸੁ ਪਰਿਨਿਬ੍ਬੁਤੇਸੁ ਸਾਧੁਕੀਲ਼ਨਂ ਕਾਰੇਤ੍ਵਾ ਚਨ੍ਦਨਾ ਗਰੁਆਦੀਹਿ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਚੇਤਿਯਂ ਪਤਿਟ੍ਠਾਪੇਤ੍ਵਾ ਏਵਰੂਪਾਨਮ੍ਪਿ ਮਹਾਨੁਭਾਵਾਨਂ ਮਹੇਸੀਨਂ ਮਰਣਂ ਭਵਿਸ੍ਸਤਿ, ਕਿਮਙ੍ਗਂ ਪਨ ਮਾਦਿਸਾਨਨ੍ਤਿ ਸਂਵੇਗਜਾਤੋ ਜੇਟ੍ਠਪੁਤ੍ਤਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਸਯਂ ਪਬ੍ਬਜਂ ਪਬ੍ਬਜਿ, ਦੇਵੀਪਿ ਰਞ੍ਞੇ ਪਬ੍ਬਜਿਤੇ ਅਹਂ ਕਿਂਕਰਿਸ੍ਸਾਮੀਤਿ ਪਬ੍ਬਜਿਤ੍ਵਾ ਦ੍ਵੇਪਿ ਉਯ੍ਯਾਨੇ ਵਸਨ੍ਤਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਨ੍ਤਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਤੇ ਅਮ੍ਹਾਕਂ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਬੁਦ੍ਧਸਾਸਨੇ ਪਬ੍ਬਜਿਂਸੁ, ਤਦਾ ਨਨ੍ਦਿਯਰਾਜਾ ਧੁਤਙ੍ਗਧਰਾਨਂ ਅਗ੍ਗੋ ਮਹਾਕਸ੍ਸਪਤ੍ਥੇਰੋਨਾਮ ਹੁਤ੍ਵਾ ਚਨ੍ਦੋ ਵਿਯ ਸੁਰਿਯੋ ਵਿਯਚ ਲੋਕੇ ਪਾਕਟੋ ਹੁਤ੍ਵਾ ਭਗਵਤਿ ਪਰਿ- ਨਿਬ੍ਬੁਤੇ ¶ ਬੁਦ੍ਧਸਾਸਨਂ ਅਤਿਵਿਯ ਸੋਭੇਤਿ. ਭਰਿਯਾਪਿਸ੍ਸ ਭਦ੍ਦਕਾਪਿਲ਼ਾਨੀ ਨਾਮ ਅਹੋਸੀਤਿ.

੧੬.

ਦਤ੍ਵਾ ਪੁਰੇਕੋ ਵਿਪਿਨੇ ਚਰਨ੍ਤੋ,

ਪਚ੍ਚੇਕਬੁਦ੍ਧਸ੍ਸਨੁਵਾਤਮਤ੍ਤਂ;

ਕਤ੍ਵਾ ਸਰਟ੍ਠਂ ਕੁਰੁਦੀਪਸੋਭਂ,

ਮਹਾਨੁਭਾਵੋ ਵਸੁਧਾ ਧਿਪੋਸਿ.

੧੭.

ਤੁਮ੍ਹੇਚ ਭੋਨ੍ਤੋ ਖਲੁ ਸੀਲਵਨ੍ਤੇ,

ਦਦਾਥ ਦਾਨਾਨਿ ਅਨਪ੍ਪਕਾਨਿ;

ਤਂ ਵੋ ਪਤਿਟ੍ਠਾਚ ਭਵਨ੍ਤਰਸ੍ਮਿਂ,

ਚਿਨ੍ਤਾਮਣਿਂ ਕਪ੍ਪਤਰੁਂਵ ਸਾਰਨ੍ਤਿ.

ਨਨ੍ਦਿਯਰਾਜਸ੍ਸ ਵਤ੍ਥੁਂ ਪਥਮਂ.

੧੨. ਅਞ੍ਞਤਰਮਨੁਸ੍ਸਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਪਾਟਲਿਪੁਤ੍ਤਸਮੀਪੇ ਅਞ੍ਞਤਰਸ੍ਮਿਂ ਗਾਮੇ ਅਞ੍ਞਤਰੋ ਦੁਗ੍ਗਤਮਨੁਸ੍ਸੋ ਵਸਤਿ, ਸੋ ਪਨੇਕਦਿਵਸਂ ਅਞ੍ਞਤਰਂ ਗਾਮਂ ਗਚ੍ਛਨ੍ਤੋ ਦ੍ਵੇ ਸਾਟਕੇ ਨਿਵਾਸੇਤ੍ਵਾ ਮਹਨ੍ਤਂ ਅਟਵਿਂਪਾਪੁਣਿ, ਤਦੇਵਂ ਗਚ੍ਛਨ੍ਤਂ ਦਿਸ੍ਵਾ ਏਤਸ੍ਸ ਵਤ੍ਥਂ ਗਣ੍ਹਿਸ੍ਸਾਮੀਤਿ ਏਕੋ ਚੋਰੋ ਅਨੁਬਨ੍ਧਿ, ਸੋ ਦੂਰਤੋਵ ਆਗਚ੍ਛਨ੍ਤਂ ਚੋਰਂ ਦਿਸ੍ਵਾ ਚਿਨ੍ਤੇਸਿ, ਅਹਮੇਤਸ੍ਮਾ ਪਲਾਯਿਤੁਂ ਵਾ ਤੇਨ ਸਦ੍ਧਿਂਯੁਜ੍ਝਿਤੁਂ ਵਾ ਨ ਸਕ੍ਕੋਮਿ, ਅਯਮਾਗਨ੍ਤ੍ਵਾ ਅਵਸ੍ਸਂ ਅਨਿਚ੍ਛਨ੍ਤਸ੍ਸਾਪਿ ਮੇ ਵਤ੍ਥਂ ਗਣ੍ਹਿਸ੍ਸਤਿ. ਮਯਾਪਿਸ੍ਸ ਨਿਰਤ੍ਥਕੇਨ ਹਰਿਤੁਂ ਨ ਸਕ੍ਕਾ, ਦਾਨਵਸੇਨਸ੍ਸ ਦਸ੍ਸਾਮੀਤਿ ਸਨ੍ਨਿਟ੍ਠਾਨ ਮਕਾਸਿ, ਅਥ ਚੋਰੋ ਆਗਨ੍ਤ੍ਵਾ ਵਤ੍ਥਕਂ ਪਰਾਮਸਿ, ਅਥ ਸੋ ਪੁਰਿਸੋ ਚਿਤ੍ਤਂ ਪਸਾਦੇਤ੍ਵਾ ਇਮਂ ਮਮ ਵਤ੍ਥਦਾਨਂ ਭਵਭੋਗਸੁਖਤ੍ਥਾਯ ਪਚ੍ਚਯੋ ਹੋਤੂਤਿ ਵਤ੍ਥਂ ਦਤ੍ਵਾ ਦੁਚ੍ਛਾਦਿਤਤ੍ਤਾ ਮਹਾਮਗ੍ਗਂ ਪਹਾਯ ਅਞ੍ਞੇਨ ਜਙ੍ਘਾਮਗ੍ਗੇਨ ਗਚ੍ਛਨ੍ਤੋ ਆਸਿਵਿਸੇਨ ਦਟ੍ਠੋ ਕਾਲਂ ਕਤ੍ਵਾ ਹਿਮਵਨ੍ਤਪ੍ਪਦੇਸੇ ¶ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨੇਕਚ੍ਛਰਾਸਹਸ੍ਸਪਰਿਵੁਤੋ ਨਿਬ੍ਬਤ੍ਤਿ. ਵਿਮਾਨਂ ਪਨਸ੍ਸ ਪਰਿਵਾਰੇਤ੍ਵਾ ਤਿਯੋਜਨਿਕੇ ਠਾਨੇ ਕਪ੍ਪਰੁਕ੍ਖਾ ਨਿਬ੍ਬਤ੍ਤਿਂਸੁ, ਸੋ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਦਿਸ੍ਵਾ ਸੋਮਨਸ੍ਸਂ ਪਵੇਦੇਨ੍ਤੋ ਆਹ.

੧.

ਪਰਿਣਾਮਿਤਮਤ੍ਤੇਨ, ਦਾਨਸ੍ਸ ਸਕਸਨ੍ਤਕਂ;

ਦਦਾਤਿ ਵਿਪੁਲਂ ਭੋਗਂ, ਦਿਬ੍ਬਮਿਸ੍ਸਰਿਯਂ ਵਰਂ.

੨.

ਦ੍ਵਾਦਸਯੋਜਨੁਬ੍ਬੇਧਂ, ਦੁਦ੍ਦਿਕ੍ਖਂ ਚਕ੍ਖੁਮੂਸਨਂ;

ਕੂਟਾ ਗਾਰਵਰੁਪੇਤਂ, ਸਬ੍ਬਸੋਵਣ੍ਣਯਂ ਸੁਭਂ.

੩.

ਮਮ ਪੁਞ੍ਞੇਨ ਨਿਬ੍ਬਤ੍ਤਂ, ਨੇਕਰਾਗਦ੍ਧਜਾਕੁਲਂ,

ਤਥੇਵ ਪਰਿਸੁਦ੍ਧੇਹਿ, ਵਿਤਾਨੇਹਿ ਚ ਲਙ੍ਕਤਂ.

੪.

ਪਾਸਾਦਪਰਿਯਨ੍ਤਮ੍ਹਿ, ਦਿਬ੍ਬਵਤ੍ਥਾਨਿ ਲਮ੍ਬਰੇ;

ਵਾਤੇਰਿਤਾ ਤੇ ਸੋਭਨ੍ਤਿ, ਅਵ੍ਹੇਨ੍ਤਾਵ ਸੁਧਾਸਿਨੋ.

੫.

ਪਾਸਾਦਸ੍ਸ ਸਮਨ੍ਤਾ ਮੇ, ਭੂਮਿਭਾਗੇ ਤਿਯੋਜਨੇ;

ਇਚ੍ਛਿਤਿਚ੍ਛਿਤਦਾਤਾਰੋ, ਜਾਤਾਸੁਂ ਸੁਰਪਾਦਪਾ.

੬.

ਤਤ੍ਥ ਨਚ੍ਚੇਹਿ ਗੀਤੇਹਿ, ਵਾਦੇਹਿ ਤੁਰਿਯੇਹਿ ਚ;

ਨੇ ਕਚ੍ਛਰਾਸਹਸ੍ਸੇਹਿ, ਮੋਦਾਮਿ ਭਵਨੇ ਮਮ.

੭.

ਨ ਸਮ੍ਮਾ ਦਿਨ੍ਨਵਤ੍ਥਸ੍ਸ, ਅਕ੍ਖੇਤ੍ਤੇ ਫਲਮੀ ਦਿਸਂ;

ਖੇਤ੍ਤੇ ਸਮ੍ਮਾ ਦਦਨ੍ਤਸ੍ਸ, ਕੋ ਫਲਂ ਵਣ੍ਣਯਿਸ੍ਸਤੀਤਿ.

੮.

ਏਵਂ ਵਿਧਮ੍ਪਿ ਕੁਸਲਂ ਮਨੁਜੋ ਕਰਿਤ੍ਵਾ,

ਪਪ੍ਪੋਤਿ ਦਿਬ੍ਬਵਿਭਵਂ ਮੁਨਿਵਣ੍ਣਨੀਯਂ;

ਮਨ੍ਤ੍ਵਾਨ ਭੋ ਦਦਥ ਦਾਨਵਰਂ ਸੁਸੀਲੇ,

ਸਦ੍ਧਾਯ ਸੁਦ੍ਧਮਨਸਾਸ੍ਸ ਵਿਸੇਸਭਾਗੀਤਿ.

ਅਞ੍ਞਤਰਮਨੁਸ੍ਸਸ੍ਸ ਵਤ੍ਥੁਂ ਦੁਤਿਯਂ.

੧੩. ਵਿਸਮਲੋਮਕੁਮਾਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਤੀਤੇ ¶ ਕਿਰ ਇਮਸ੍ਮਿਂ ਜਮ੍ਬੁਦੀਪੇ ਕਸ੍ਸਪੋ ਨਾਮ ਸਮ੍ਮਾਸਮ੍ਬੁਦ੍ਧੋ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ ਲੋਕਸ੍ਸ ਦੁਕ੍ਖਾਪਨੁਦੋ ਸੁਖਾਵਹੋ ਪਟਿਵਸਤਿ ਲੋਕਂ ਨਿਬ੍ਬਾਣਮਹਾਨਗਰਵਰੇ ਪਰਿਪੂਰੇਨ੍ਤੋ. ਤਸ੍ਮਿਂ ਸਮਯੇ ਅਞ੍ਞਤਰੋ ਪੁਰਿਸੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨੋ ਭਿਕ੍ਖੁਸਙ੍ਘਸ੍ਸ ਦਾਨਂ ਦੇਨ੍ਤੋ ਸੀਲਂ ਰਕ੍ਖਨ੍ਤੋ ਉਪੋਸਥਕਮ੍ਮਂ ਕਰੋਨ੍ਤੋ ਨਾਨਾਵਿਧਾਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸੁਤ੍ਤਪ੍ਪਬੁਦ੍ਧੋਵਿਯ ਗਨ੍ਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ ਸਬ੍ਬਰਤਨਮਯੇ ਦਿਬ੍ਬਵਿਧਾਨੇ ਦੇਵਚ੍ਛਰਾਸਹਸ੍ਸਪਰਿਵੁਤੋ. ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਜਮ੍ਬੁਦੀਪੇ ਪਾਟਲਿਪੁਤ੍ਤਨਗਰੇ ਆਣਾਚਕ੍ਕਵਤ੍ਤਿਧਮ੍ਮਾਸੋਕਮਹਾਨਰਿਨ੍ਦਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤਸ੍ਸ ਨਾਮਂ ਕਰੋਨ੍ਤੋ ਸੀਸੇ ਲੋਮਂ ਵਿਸਮਂ ਹੁਤ੍ਵਾ ਜਾਤਤ੍ਥਾ ਵਿਸਮਲੋਮਕੁਮਾਰੋਤਿ ਸਞ੍ਜਾਨਿਂਸੁ. ਸੋ ਕਮੇਨ ਵਿਞ੍ਞੁਤਂ ਪਤ੍ਤੋ ਬਲਸਮ੍ਪਨ੍ਨੋ ਅਹੋਸਿ. ਮਹਾਥਾਮੋ ਅਭਿਰੂਪੋਚ ਅਹੋਸਿ. ਦਸ੍ਸਨੀਯੋ ਪਾਸਾਦਿਕੋ ਯਸਪਰਿਵਾਰਸਮ੍ਪਨ੍ਨੋ ਪਟਿਵਸਤਿ. ਤਤੋ ਅਪਰੇਨ ਸਮਯੇਨ ਧਮ੍ਮਾਸੋਕਮਹਾਨਰਿਨ੍ਦੋ ਚਤੁਰਾਸੀਤਿਸਹਸ੍ਸਰਾਜਪਰਿਵੁਤੋ ਅਨਨ੍ਤਬਲਵਾਹਨੋ ਕੀ ਲ਼ਾ ਪ ਰੋ ਹਿਮਵਨ੍ਤਂ ਗਨ੍ਤ੍ਵਾ ਯਥਾਭਿਰਨ੍ਤਂ ਕੀਲ਼ਿਤ੍ਵਾ ਆਗਚ੍ਛਨ੍ਤੋ ਚਨ੍ਦਭਾਗਂ ਨਾਮ ਗਙ੍ਗਂ ਸਮ੍ਪਾਪੁਣਿ. ਸਾ ਪਨ ਯੋਜਨਵਿਤ੍ਥਤਾ ਤਿਗਾਵੁਤਗਮ੍ਭੀਰਾ ਅਹੋਸਿ. ਤਦਾ ਸਾ ਅਧੁਨਾਗਤੇਹਿ ਓਘੇਹਿ ਮਹਾਫੇਣਸਮਾਕੁਲਾ ਬਹੂਮਿਯੋ ਉਭੋਕੂਲੇ ਉਤ੍ਤਰਨ੍ਤੀ ਮਹਾਵੇਗਾ [ਮਹਾਵੇਗਾਗਚ੍ਛਨ੍ਤੀ ਇਤਿਸਬ੍ਬਤ੍ਥ] ਗਚ੍ਛਨ੍ਤਿ. ਤਦਾ ਰਾਜਾ ਗਙ੍ਗਂ ਦਿਸ੍ਵਾ ਕੋ ਨਾਮੇਤ੍ਥ ਪੁਰਿਸੋ ਏਵਂਵਿਧਂ ਮਹਾਗਙ੍ਗਂ ਤਰਿਤੁਂ ਸਮਤ੍ਥੋ ਭਵਿਸ੍ਸਤੀਤਿ ਆਹ. ਤਂ ਸੁਤ੍ਵਾ ਵਿਸਮਲੋਮ ਕੁਮਾਰੋ ਆਗਨ੍ਤ੍ਵਾ ਵਨ੍ਦਿਤ੍ਵਾ ਅਹਂ ਦੇਵ ਗਙ੍ਗਂ ਤਰਿਤ੍ਵਾ ਗਨ੍ਤੁਞ੍ਚ ਆਗਨ੍ਤੁਞ੍ਚ ਸਕ੍ਕੋਮੀਤਿ ਆਹ. ਰਾਜਾ ਸਾਧੂਤਿ ਸਮ੍ਪਟਿਚ੍ਛਿ. ਅਥ ਕੁਮਾਰੋ ਗਾਲ਼੍ਹਂ ਨਿਵਾਸੇਤ੍ਵਾ ਮਕਰਦਨ੍ਤਿਯਾ ¶ ਕੇਸੇ ਬਨ੍ਧਿਤ੍ਵਾ ਗਙ੍ਗਾਕੂਲੇ ਠਿਤੋ ਅਟ੍ਠਾਰਸਹਤ੍ਥਂ ਅਬ੍ਭੁਗ੍ਗਨ੍ਤ੍ਵਾ ਉਸਭਮਤ੍ਤਟ੍ਠਾਨੇ ਪਤਿਤ੍ਵਾ ਤਰਿਤੁ ਮਾਰਭਿ. ਤਤੋ ਚਣ੍ਡਸੋਤਂ ਛਿਨ੍ਦਿਤ੍ਵਾ ਤਰਨ੍ਤੋ ਗਮਨਾ ਗਮਨਕਾਲੇ ਗਣ੍ਹਨਤ੍ਥਾਯ ਆਗਤੇ ਚਣ੍ਡਸੁਂਸੁਮਾਰੇ ਪਾਣਿਨਾ ਪਹਰਿਤ੍ਵਾ ਚੁਣ੍ਣਵਿਚੁਣ੍ਣਂ ਕਰੋਨ੍ਤੋ ਵੀਸਸਤਂ ਮਾਰੇਤ੍ਵਾ ਉਤ੍ਤਾਰੇਤ੍ਵਾ ਤਲਮੁਗ੍ਗਮ੍ਮ ਰਾਜਾਨਂ ਵਨ੍ਦਿਤ੍ਵਾ ਅਟ੍ਠਾਸਿ. ਰਾਜਾ ਤਂ ਕਾਰਣਂ ਦਿਸ੍ਵਾ ਭਯਪ੍ਪਤ੍ਤੋ ਏਸੋ ਖੋ ਮਂ ਮਾਰੇਤ੍ਵਾ ਰਜ੍ਜਮ੍ਪਿ ਗਹਿਤੁਂ ਸਮਤ੍ਥੋ. ਏਤਂ ਮਾਰੇਤੁਂ ਵਟ੍ਟਤੀਤਿ ਚਿਨ੍ਤੇਤ੍ਵਾ ਨਗਰਂ ਸਮ੍ਪਤ੍ਤੋ ਕੁਮਾਰਂ ਪਕ੍ਕੋਸਾਪੇਤ੍ਵਾ ਅਮਚ੍ਚੇ ਆਹ. ਇਮਂ ਭਣੇ ਬਨ੍ਧਨਾਗਾਰੇ ਕਰੋਥਾਤਿ. ਤੇ ਤਥਾ ਕਰਿਂਸੁ, ਅਥਸ੍ਸ ਬਨ੍ਧਨਾਗਾਰੇ ਵਸਨ੍ਤਸ੍ਸ ਚਤ੍ਤਾਰੋ ਮਾਸਾ ਅਤਿਕ੍ਕਨ੍ਤਾ. ਤਤੋ ਰਾਜਾ ਚਤੁਮਾਸਚ੍ਚਯੇਨ ਦੀਘਤੋ ਸਟ੍ਠਿਹਤ੍ਥਪ੍ਪਮਾਣੇ ਸਟ੍ਠਿਵੇਲ਼ੁਕਲਾਪੇ ਆਹਰਾਪੇਤ੍ਵਾ ਗਣ੍ਠਿਯੋ ਸੋਧਾਪੇਤ੍ਵਾ ਅਨ੍ਤੋ ਅਯੋਸਾਰਂ ਪੂਰੇਤ੍ਵਾ ਰਾਜਙ੍ਗਣੇ ਠਪਾਪੇਤ੍ਵਾ ਵਿਸਮਲੋਮਕੁਮਾਰਂ ਬਨ੍ਧਨਾਗਾਰਤੋ ਆਹਾਰਾਪੇਤ੍ਵਾ [ਆਣਾਪੇਤ੍ਵਾ ਇਤਿਸਬ੍ਬਤ੍ਥ] ਅਮਚ੍ਚੇ ਏਵਮਾਹ. ਭਣੇ ਸ੍ਵਾਯਂ ਕੁਮਾਰੋ ਇਮਿਨਾ ਖਗ੍ਗੇਨ ਇਮੇ ਵੇਲ਼ੁਕਲਾਪੇ ਚਤੁਰਙ੍ਗੁਲਂ ਕਤ੍ਵਾ ਛਿਨ੍ਦਤੁ. ਨੋ ਚੇ ਛਿਨ੍ਦਿਤੁਂ ਸਕ੍ਕੋਤਿ. ਤਂ ਮਾਰੇਥਾਤਿ ਆਹ, ਤਂ ਸੁਤ੍ਵਾ ਕੁਮਾਰੋ ਅਹਂ ਬਨ੍ਧਨਾਗਾਰੇ ਚਿ ਰ ਵੁ ਤ੍ਥੋ ਜਿਘਚ੍ਛਾਪੀਲ਼ਿਤੋ ਆਹਾਰੇਨ ਕਿਲਮਿਂ, ਯਨ੍ਨੂਨਾਹਂ ਆਹਾਰਂ ਭੁਞ੍ਚਿਤ੍ਵਾ ਛਿਨ੍ਦੇਯ੍ਯਨ੍ਤਿ. ਤੇ ਨਤ੍ਥਿ ਦਾਨਿ ਤੁਯ੍ਹਂ ਆਹਾਰਨ੍ਤਿ ਆਹਂਸੁ. ਤੇਨਹਿ ਪੋਕ੍ਖਰਣਿਯਾ ਪਾਨੀਯਂ ਪਿਵਿਸ੍ਸਾਮੀਤਿ ਆਹ. ਤੇ ਸਾਧੂਤਿ ਪੋਕ੍ਖਰਣਿਂ ਨੇਸੁਂ. ਕੁਮਾਰੋ ਪੋਕ੍ਖਰਣਿਂ ਓਤਰਿਤ੍ਵਾ ਨਹਾਯਿਤ੍ਵਾ ਨਿਮੁਗ੍ਗੋ ਯਾਵਦਤ੍ਥਂ ਕਲਲਂ ਭੁਞ੍ਚਿਤ੍ਵਾ ਪਾਨੀਯਂ ਪਿਵਿਤ੍ਵਾ ਉਟ੍ਠਾਯ ਅਸਿਪਤ੍ਤਂ ਗਹੇਤ੍ਵਾ ਮਹਾਜਨਾਨਂ [ਮਹਾਜਨਾਨਂਪਸ੍ਸਨ੍ਤਮੇਵ ਇਤਿਸਬ੍ਬਤ੍ਥ] ਪਸ੍ਸਨ੍ਤਾਨਮੇਵ ਅਟ੍ਠਾਸੀਤਿਹਤ੍ਥਟ੍ਠਾਨਂ ਆਕਾਸਂ ਉਲ੍ਲਙ੍ਘਿਤ੍ਵਾ ਸਬ੍ਬਵੇਲ਼ੁਕਲਾਪੇ ਚਤੁਰਙ੍ਗੁਲਮਤ੍ਤੇਨ ਖਣ੍ਡਾਖਣ੍ਡਂ ਕੁਰੁਮਾਨੋ ਓਤਰਿਤ੍ਵਾ ਮੂਲੇ ਥੂਲਅਯਸਲਾਕਂ ਪਤ੍ਵਾ ਕਿਣੀਤਿ ਸਦ੍ਦਂ ਸੁਤ੍ਵਾ ਅਸਿਪਤ੍ਤਂ ਵਿਸ੍ਸਜ੍ਜੇਤ੍ਵਾ ਰੋਦਮਾਨੋ ਅਟ੍ਠਾਸਿ. ਤਤੋ ਰਾਜਪੁਰਿਸੇਹਿ ਕਿਮਤ੍ਤਂ ਰੋਦਸੀਤਿ ਵੁਤ੍ਤੇ ¶ ਏਤ੍ਤਕਾਨਂ ਪੁਰਿਸਾਨਮਨ੍ਤਰੇ ਮਯ੍ਹਂ ਏਕੋਪਿ ਸੁਹਦੋ ਨਤ੍ਤਿ. ਸਚੇ ਭਵੇਯ੍ਯ, ਇਮੇਸਂ ਵੇਲ਼ੁਕਲਾਪਾਨਮਨ੍ਤਰੇ ਅਯੋ ਸਾਰਂ ਅਤ੍ਥਿਭਾਵਂ ਕਥੇਯ੍ਯ, ਅਹਂ ਪਨ ਜਾਨਮਾਨੋ ਇਮੇ ਵੇਲ਼ੁ ਕਲਾਪੇ ਅਙ੍ਗੁਲਙ੍ਗੁਲੇਸੁ ਛਿਨ੍ਦੇਯ੍ਯਨ੍ਤਿ ਆਹ. ਤਤੋ ਰਾਜਾ ਕੁਮਾਰੇਨ ਕਤਕਮ੍ਮਂ ਓਲੋਕੇਤ੍ਵਾ ਪਸਨ੍ਨੋ ਉਪਰਾਜਟ੍ਠਾਨਂ ਬਹੁਞ੍ਚ ਵਿਭਵਂ ਦਾਪੇਸਿ, ਏਵਮਸ੍ਸ ਬਲਸਮ੍ਪਤ੍ਤਿਲਾਭੋ ਨਾਮ ਨ ਜਾਤਿਗੋਤ੍ਤਕੁਲਪਦੇਸਾਦੀਨਂ ਬਲਂ. ਨ ਪਾਣਾਤਿਪਾਤਾਦਿਦੁਚ੍ਚਰਿਤਾਨਂ ਬਲਂ. ਕਸ੍ਸੇਤਂ ਬਲਨ੍ਤਿ. ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਭਿਕ੍ਖੁਸਙ੍ਘਸ੍ਸ ਦਿਨ੍ਨਦਾਨਾਦਿਸੁਚਰਿਤਕਮ੍ਮਵਿਪਾਕਂ. ਤੇਨ ਵੁਤ੍ਤਂ.

੧.

ਕਸ੍ਸਪਸ੍ਸ ਮੁਨਿਨ੍ਦਸ੍ਸ, ਕਾਲੇ ਅਞ੍ਞਤਰੋ ਨਰੋ;

ਸਮ੍ਬੁਦ੍ਧਮੁਪਸਂਕਮ੍ਮ, ਸੁਤ੍ਵਾ ਧਮ੍ਮਂ ਸੁਦੇਸਿਤਂ.

੨.

ਪਟਿਲਦ੍ਧਸਦ੍ਧੋ ਹੁਤ੍ਵਾ, ਸੀਲਵਨ੍ਤਾਨ ਭਿਕ੍ਖੁਨਂ;

ਮਧੁਰਨ੍ਨਪਾਨੇ ਪਚੁਰੇ, ਅਦਾਸਿ ਸੁਮਨੋ ਤਦਾ.

੩.

ਅਦਾਸਿ ਚੀਵਰੇ ਪਤ੍ਤੇ, ਤਥੇਵ ਕਾਯਬਨ੍ਧਨੇ;

ਅਦਾ ਖੀਰਸਲਾਕਞ੍ਚ, ਬਹੂ ਕਤ੍ਤਰਯਟ੍ਠਿਯੋ.

੪.

ਅਦਾ ਸੁਪਸ੍ਸਯਂ ਦਾਨਂ, ਮਞ੍ਚਪੀਠਾਦਿਕਂ ਤਥਾ;

ਪਾਵਾਰ ਕਮ੍ਬਲਾਦੀਨਿ, ਅਦਾ ਸੀਤਨਿਵਾਰਣੇ.

੫.

ਅਦਾ ਭੇਸਜ੍ਜਦਾਨਾਨਿ, ਆਰੋਗ੍ਯਤ੍ਥਾਯ ਭਿਕ੍ਖੁਨਂ;

ਏਵਂ ਨਾਨਾਵਿਧਂ ਪੁਞ੍ਞਂ, ਕਤ੍ਵਾਨ ਤਿਦਿਵਂ ਗਤੋ.

੬.

ਤਤ੍ਥ ਦਿਬ੍ਬਵਿਮਾਨਮ੍ਹਿ, ਉਪ੍ਪਨ੍ਨੋ ਸੋ ਮਹਿਦ੍ਧਿਕੋ;

ਦੇਵਚ੍ਛਰਾਪਰਿਵੁਤੋ, ਦੇਵਸੇਨਾਪੁਰਕ੍ਖਤੋ.

੭.

ਦਿਬ੍ਬੇਹਿ ਨਚ੍ਚਗੀਤੇਹਿ, ਦਿਬ੍ਬਵਾਦਿਤਤਨ੍ਤਿਹਿ;

ਮੋਦਮਾਨੋ ਅਨੇਕੇਹਿ, ਦਿਬ੍ਬਸਮ੍ਪਤ੍ਤਿਯਾ ਸਹ.

੮.

ਯਾਵਤਾਯੁਂ ਤਹਿਂ ਠਤ੍ਵਾ, ਜਮ੍ਬੁਦੀਪੇ ਮਨੋਰਮੇ;

ਪੁਰੇ ਪਾਟਲਿਪੁਤ੍ਤਮ੍ਹਿ, ਧਮ੍ਮਾਸੋਕਸ੍ਸ ਰਾਜਿਨੋ.

੯.

ਪੁਤ੍ਤੋ ¶ ਹੁਤ੍ਵਾਨ ਨਿਬ੍ਬਤ੍ਤਿ, ਮਹਾਥਾਮੋ ਮਹਾਬਲੋ;

ਮਹਾਯਸੋ ਮਹਾਭੋਗੋ, ਆਸਿ ਬੁਦ੍ਧਾਦਿਮਾਮਕੋ.

੧੦.

ਕਾਤਬ੍ਬਂ ਕੁਸਲਂ ਤਸ੍ਮਾ, ਭਵਸਮ੍ਪਤ੍ਤਿ ਮਿਚ੍ਛਤਾ;

ਪਾਲੇਤਬ੍ਬ ਮਥੋ ਸੀਲਂ, ਭਾਵੇਤਬ੍ਬਞ੍ਚ ਭਾਵਨਨ੍ਤਿ.

ਤਤੋ ਕੁਮਾਰੋ ਉਪਰਾਜਟ੍ਠਾਨਂ ਲਭਿਤ੍ਵਾ ਸਮ੍ਪਤ੍ਤਿਂਅਨੁਭਵਮਾਨੋ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਮਾਦਿਂ ਕਤ੍ਵਾ ਮਹਾਭਿਕ੍ਖੁਸਙ੍ਘਸ੍ਸ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਦਾਨਾ ਦਿਵਸੇਨ ਸਕ੍ਕਾਰਂ ਕਤ੍ਵਾ ਸੀਲਂ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਆਯੁਪਰਿਯੋਸਾਨੇ ਯਥਾਕਮ੍ਮਂ ਗਤੋਤਿ.

੧੧.

ਏਵਂਵਿਧਂ ਸੁਚਰਿਤਂ ਸੁਮਨੋ ਕਰਿਤ੍ਵਾ,

ਭਾਗਿਸ੍ਸ ਨੇਕਵਿਭਵਸ੍ਸ ਭਵਾਭਵੇਸੁ;

ਤੁਮ੍ਹੇਪਿ ਭੋ ਸੁਚਰਿਤਂ ਵਿਭਵਾਨੁਰੂਪਂ,

ਕਤ੍ਵਾਨ ਨਿਬ੍ਬੁਤਿਪਦਂ ਕਰਗਂ ਕਰੋਥਾਤਿ.

ਵਿਸਮਲੋਮਕੁਮਾਰਸ੍ਸ ਵਤ੍ਥੁਂ ਤਤਿਯਂ.

੧੪. ਕਞ੍ਚਨਦੇਵਿਯਾ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਕਿਰ ਦੇਵਪੁਤ੍ਤਨਗਰਂ ਨਾਮ ਦਸ੍ਸਨੀਯਂ ਏਕਂ ਨਗਰਂ ਅਹੋਸਿ. ਤਸ੍ਮਿਂ ਸਮਯੇ ਮਨੁਸ੍ਸਾ ਯੇਭੁਯ੍ਯੇਨ ਪਤ੍ਤਮਹਂ ਨਾਮ ਪੂਜਂ ਕਰੋਨ੍ਤਿ, ਭਗਵਤਾ ਪਰਿਭੁਤ੍ਤਪਤ੍ਤਂ ਗਹੇਤ੍ਵਾ ਕਤਾਨੇਕਪੂਜਾਵਿਧਾਨਾ ਉਸ੍ਸਵਂ ਕਰੋਨ੍ਤਿ. ਤਂ ਪਤ੍ਤਮਹਨ੍ਤਿ ਵੁਚ੍ਚਤਿ. ਤਸ੍ਮਿਂ ਸਮਯੇ ਦੇਵਪੁਤ੍ਤਨਗਰੇ ਰਾਜਾ ਸਬ੍ਬਰਤਨਮਯਂ ਰਥਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਾਰਾਪੇਤ੍ਵਾ ਕੁਮੁਦਪਤ੍ਤਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਸੁਸਿਕ੍ਖਿਤਸਿਪ੍ਪਾਚਰਿਯੇਹਿ ਸਤ੍ਤਰਤਨਪਰਿਨਿਟ੍ਠਿਤੇ ਅਸੀਤਿਹਤ੍ਥਵੇਲ਼ਗ੍ਗੇ ਸਤ੍ਥੁਨਾ ਪਰਿਭੁਤ੍ਤਂ ਸੇਲਮਯਪਤ੍ਤਂ ਮੁਤ੍ਤਾਜਾਲਾਦੀਹਿ ਅਲਙ੍ਕਰਿਤ੍ਵਾ ਵੇਲ਼ਗ੍ਗਂ ਆਰੋਪੇਤ੍ਵਾ ਵੇਲ਼ੁਂ ¶ ਰਥੇ ਠਪਾਪੇਤ੍ਵਾ ਨਗਰਂ ਦੇਵਨਗਰਂ ਵਿਯ ਅਲਙ੍ਕਰਿਤ੍ਵਾ ਧਜਪਤਾਕਾਦਯੋ ਉਸ੍ਸਾਪੇਤ੍ਵਾ ਤੋਰਣਗ੍ਘ ਕਪਨ੍ਤਿਯੋਚ ਪੁਣ੍ਣਘਟਦੀਪਮਾਲਾਦਯੋਚ ਪਤਿਟ੍ਠਾਪੇਤ੍ਵਾ ਅਨੇਕੇਹਿ ਪੂਜਾਵਿਧਾਨੇਹਿ ਨਗਰਂ ਪਦਕ੍ਖਿਣਂ ਕਾਰੇਤ੍ਵਾ ਨਗਰਮਜ੍ਝੇ ਸੁਸਜ੍ਜਿਤਰਤਨਮਣ੍ਡਪੇ ਪਤ੍ਤਧਾਤੁਂ ਠਪੇਤ੍ਵਾ ਸਤ੍ਤਮੇ ਦਿਵਸੇ ਮਹਾਧਮ੍ਮਸਵਣਂ ਕਾਰਾਪੇਸਿ. ਤਦਾ ਤਸ੍ਮਿਂ ਜਨਪਦੇ ਬਹੂ ਮਨੁਸ੍ਸਾਚ ਦੇਵਤਾਚ ਯਕ੍ਖਰਕ੍ਖਸਨਾਗਸੁਪਣ੍ਣਾਦਯੋਚ ਮਨੁਸ੍ਸਵੇਸੇਨ ਯੇਭੁਯ੍ਯੇਨ ਤਂ ਸਮਾਗਮਂ ਓਤਰਨ੍ਤਿ, ਏਵਮਚ੍ਛਰਿਯਂ ਤਂ ਪੂਜਾਵਿਧਾਨਂ ਅਹੋਸਿ.

ਤਦਾ ਏਕੋ ਨਾਗਰਾਜਾ ਉਤ੍ਤਮਰੂਪਧਰਂ ਅਗਤਪੁਬ੍ਬਪੁਰਿਸਂ ਏਕਂ ਕੁਮਾਰਿਕਂ ਧਮ੍ਮਪਰਿਸਨ੍ਤਰੇ ਨਿਸਿਨ੍ਨਂ ਦਿਸ੍ਵਾ ਤਸ੍ਸਾ ਪਟਿਬਦ੍ਧਚਿਤ੍ਤੋ ਅਨੇਕਾਕਾਰੇਹਿ ਤਂ ਯਾ ਚਿ ਤ੍ਵਾ ਤਸ੍ਸਾ ਅਲਦ੍ਧਮਾਨੋ ਕੁਜ੍ਝਿਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਸਿ ਇਮਂ ਮਾਰੇਸ੍ਸਾਮੀਤਿ. ਤਂ ਤਸ੍ਸਾ ਸਦ੍ਧਾਬਲੇਨ ਕਿਞ੍ਚਿ ਉਪਦ੍ਦਵਂ ਕਾਤੁਂ ਸਮਤ੍ਥੋ ਨਾਹੋਸਿ. ਅਥਸ੍ਸਾ ਨਾਗੋ ਪਾਦਤੋ ਪਟ੍ਠਾਯ ਯਾਵਸਕਲਸਰੀਰਂ ਭੋਗੇਨ ਵੇਠੇਤ੍ਵਾ ਸੀਸੇ ਫਣਂ ਕਤ੍ਵਾ ਭਾਯਾਪੇਨ੍ਤੋ ਅਟ੍ਠਾਸਿ. ਅਨਞ੍ਞਵਿਹਿਤਾਯ ਤਾਯ ਧਮ੍ਮਸਵਣਬਲੇਨ ਅਣੁਮਤ੍ਤਮ੍ਪਿ ਦੁਕ੍ਖਂ ਨਾਹੋਸਿ. ਪਭਾਤਾਯ ਰਤ੍ਤਿਯਾ ਤਂ ਦਿਸ੍ਵਾ ਮਨੁਸ੍ਸਾ ਕਿਮੇਤਨ੍ਤਿ ਕਾਰਣਂ ਪੁਚ੍ਛਿਂਸੁ, ਸਾਪਿ ਤੇਸਂ ਕਥੇਤ੍ਵਾ ਏਵਂ ਸਚ੍ਚਕਿਰਿਯਮਕਾਸਿ. ਤਥਾਹਿ.

੧.

ਬ੍ਰਹ੍ਮਚਾਰੀ ਅਹੋਸਾਹਂ, ਸਞ੍ਜਾਤਾ ਇਧ ਮਾਨੁਸੇ;

ਤੇਨ ਸਚ੍ਚੇਨ ਮਂ ਨਾਗੋ, ਖਿਪ੍ਪਮੇਵ ਪਮੁਞ੍ਚਤੁ.

੨.

ਕਾਮਾਤੁਰਸ੍ਸ ਨਾਗਸ੍ਸ, ਨੋਕਾਸਮਕਰਿਂਯਤੋ;

ਤੇਨ ਸਚ੍ਚੇਨ ਮਂ ਨਾਗੋ, ਖਿਪ੍ਪਮੇਵ ਮੁਞ੍ਚਤੁ.

੩.

ਵਿਸਵਾਤੇਨ ਖਿਤ੍ਤਸ੍ਸ, ਕੁਪਿਤਸ੍ਸੋਰਗਸ੍ਸਹਂ;

ਅਕੁਦ੍ਧਾ ਤੇਨ ਸਚ੍ਚੇਨ, ਸੋ ਮਂ ਖਿਪ੍ਪਂ ਪਮੁਞ੍ਚਤੁ.

੪.

ਸਦ੍ਧਮ੍ਮਂ ਸੁਣਮਾਨਾਹਂ, ਗਰੁਗਾਰਵਭਤ੍ਤਿਯਾ;

ਅਸ੍ਸੋਸਿਂ ਤੇਨ ਸਚ੍ਚੇਨ, ਖਿਪ੍ਪਂ ਨਾਗੋ ਪਮੁਞ੍ਚਤੁ.

੫.

ਅਕ੍ਖਰਂਵਾ ¶ ਪਦਂਵਾਪਿ, ਅਵਿਨਾਸੇਤ੍ਵਾਵ ਆਦਿਤੋ;

ਅਸ੍ਸੋਸਿਂ ਤੇਨ ਸਚ੍ਚੇਨ, ਖਿਪ੍ਪਂ ਨਾਗੋ ਪਮੁਞ੍ਚਤੂਤਿ.

ਸਚ੍ਚਕਿਰਿਯਾਵਸਾਨੇ ਨਾਗਰਾਜਾ ਤਸ੍ਸਾ ਅਤੀਵ ਪਸਨ੍ਨੋ ਭੋਗਂ ਵਿਨਿਵੇਠੇਤ੍ਵਾ ਫਣਸਤਂ ਮਾਪੇਤ੍ਵਾ ਤਂ ਫਣਗਬ੍ਭੇ ਨਿਸੀਦਾਪੇਤ੍ਵਾ ਬਹੂਹਿ ਨਾਗਮਾਨਵਕੇਹਿ ਸਦ੍ਧਿਂ ਉਦਕਪੂਜਂ ਨਾਮ ਪੂਜ ਮਕਾਸਿ, ਤਂ ਦਿਸ੍ਵਾ ਬਹੂ ਨਗਰਵਾਸਿਨੋ ਅਚ੍ਛਰਿਯਬ੍ਭੁਤਜਾਤਾ ਅਟ੍ਠਾਰਸਕੋਟਿਧਨੇਨ ਪੂਜ ਮਕਂਸੁ. ਤਥਾਹਿ.

੬.

ਨਤ੍ਥਿ ਸਦ੍ਧਾਸਮੋ ਲੋਕੇ, ਸੁਹਦੋ ਸਬ੍ਬਕਾਮਦੋ;

ਪਸ੍ਸਥਸ੍ਸਾ ਬਲਂ ਸਦ੍ਧਾ, ਪੂਜੇਨ੍ਤੇਵਂ ਨਰੋ ਰਗਾ.

੭.

ਇਧ ਲੋਕੇਵ ਸਾਲਤ੍ਥ, ਭਵਭੋਗ ਮਨਪ੍ਪਕਂ;

ਤਸ੍ਮਾ ਸਦ੍ਧੇਨ ਕਾਤਬ੍ਬਂ, ਰਤਨਤ੍ਤਯਗਾਰਵਨ੍ਤਿ.

ਅਥੇਵਂ ਸਾ ਪਟਿਲਦ੍ਧਮਹਾਵਿਭਵਾ ਯਾਵਜੀਵਂ ਕੋਮਾਰਿਯ ਬ੍ਰਹ੍ਮਚਾਰਿਣੀ ਹੁਤ੍ਵਾ ਆਯੁਪਰਿਯੋਸਾਨੇ ਕਾਲਂ ਕਤ੍ਵਾ ਤਸ੍ਮਿਂਯੇਵ ਨਗਰੇ ਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤ੍ਵਾ ਦਸਮਾਸਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਨਿਕ੍ਖਨ੍ਤਦਿਵਸੇ ਪਨਸ੍ਸਾ ਸਕਲਦੇਵਪੁਤ੍ਤਨਗਰੇ ਰਤਨਵਸ੍ਸਂ ਵਸ੍ਸਿ. ਤੇਨਸ੍ਸਾ ਕਞ੍ਜਨਦੇਵੀਤਿ ਨਾਮਂ ਕਰਿਂਸੁ. ਸਮਨ੍ਤਪਾਸਾਦਿਕਾ ਅਹੋਸਿ. ਅਭਿਰੂਪਾ ਦੇਵਚ੍ਛਰਪਟਿਭਾਗਾ. ਮੁਖਤੋ ਉਪ੍ਪਲਗਨ੍ਧੋ ਵਾਯਤਿ. ਸਰੀਰਤੋ ਚਨ੍ਦਨਗਨ੍ਧੋ ਵਾਯਤਿ. ਸਕਲਸਰੀਰਤੋ ਬਾਲਸੁਰਿਯੋ ਵਿਯ ਰਂਸਿਯੋ ਨਿਚ੍ਛਾਰੇਨ੍ਤੀ ਚਤੁਰਤਨਗਬ੍ਭੇ ਪਦੀਪਕਿਚ੍ਚਂ ਨਾਮ ਨਤ੍ਥਿ. ਸਬ੍ਬੋ ਗਬ੍ਭੋ ਸਰੀਰਾ ਲੋਕੇਨ ਏਕੋ ਭਾਸੋ ਹੋਤਿ, ਤਸ੍ਸਾ ਰੂਪਸਮ੍ਪਤ੍ਤਿ ਸਕਲਜਮ੍ਬੁਦੀਪੇ ਪਾਕਟਾ ਅਹੋਸਿ. ਤਤੋ ਸਕਲਜਮ੍ਬੁਦੀਪਵਾਸੀ ਰਾਜਾਨੋ ਤਸ੍ਸਾ ਅਤ੍ਥਾਯ ਪਿਤੁਰਞ੍ਞੋ ਪਣ੍ਣਾਕਾਰਾਨਿ ਪਹਿਣਿਂਸੁ. ਸਾ ਪਨ ਪਞ੍ਚਕਾਮੇ ਅਨਨੁਲਿਤ੍ਤਾ ਪਿਤਰਂ ਅਨੁਜਾਨਾਪੇਤ੍ਵਾ ਭਿਕ੍ਖੁਨੂ ਪਸ੍ਸਯਂ ਗਨ੍ਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ.

੮.

ਸੁਤ੍ਵਾਨ ¶ ਸਾਦਰਵਸੇਨ ਕੁਮਾਰਿਕੇਵਂ;

ਧਮ੍ਮਞ੍ਹਿ ਸੀਲਮਮਲਂ ਪਰਿਪਾਲਯਨ੍ਤੀ;

ਲਦ੍ਧਾਨ ਨੇਕਵਿਭਵਂ ਵਿਭਵਂ ਪਯਾਤਾ,

ਮਾ ਭੋ ਪਮਜ੍ਜਥ ਸਦਾ ਕੁਸਲਪ੍ਪਯੋਗੇਤਿ.

ਕਞ੍ਚਨਦੇਵਿਯਾ ਵਤ੍ਥੁਂ ਚਤੁਤ੍ਥਂ.

੧੫. ਬ੍ਯਗ੍ਘਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਚੂਲਰਟ੍ਠਾ ਸਨ੍ਨੇ ਬਾਰਾਣਸੀਨਗਰੇ ਏਕਂ ਪਂਸੁਪਬ੍ਬਤਂ ਵਿਨਿਵਿਜ੍ਝਿਤ੍ਵਾ ਮਹਾਮਗ੍ਗੋ ਹੋਤਿ, ਤਤ੍ਥ ਵੇਮਜ੍ਝੇ ਏਕੋ ਬ੍ਯਗ੍ਘੋ ਅਤ੍ਤਨੋ ਅਨ੍ਧਪਿਤਰਂ ਪਬ੍ਬਤਗੁਹਾਯਂ ਕਤ੍ਵਾ ਪੋਸੇਨ੍ਤੋ ਵਸਤਿ. ਤਸ੍ਸੇਵ ਪਬ੍ਬਤਸ੍ਸ ਵਨਦ੍ਵਾਰੇ ਤੁਣ੍ਡਿਲੋ ਨਾਮ ਏਕੋ ਸੁਵਪੋਤਕੋ ਰੁਕ੍ਖਸ੍ਮਿਂ ਵਸਤਿ. ਤੇ ਉਭੋਪਿ ਅਞ੍ਞਮਞ੍ਞਂ ਪਿਯਸਹਾਯਾ ਅਹੇਸੁਂ, ਤਸ੍ਮਿਂ ਸਮਯੇ ਪਚ੍ਚਨ੍ਤਗਾਮਵਾਸੀ ਏਕੋ ਮਨੁਸ੍ਸੋ ਅਤ੍ਤਨੋ ਮਾਤੁਗਾਮੇਨ ਸਦ੍ਧਿਂ ਕਲਹਂ ਕਤ੍ਵਾ ਬਾਰਾਣਸਿਂ ਗਚ੍ਛਨ੍ਤੋ ਤਂ ਵਨਦ੍ਵਾਰਂ ਸਮ੍ਪਾਪੁਣਿ. ਅਥ ਸੁਵਪੋਤਕੋ ਪਰਿਹੀਨਤ੍ਤਭਾਵਂ ਦੁਕ੍ਖਿਤਂ ਤਂ ਦਿਸ੍ਵਾ ਕਮ੍ਪਮਾਨਹਦਯੋ ਤਂ ਪਕ੍ਕੋਸਿਤ੍ਵਾ ਭੋ ਕੁਹਿਂ ਗਚ੍ਛਸੀਤਿ ਆਹ, ਤੇਨ ਪਰਖਣ੍ਡਂ ਗਚ੍ਛਾਮੀਤਿ ਵੁਤ੍ਤੇ ਤੁਣ੍ਡਿਲੋ ਭੋ ਇਮਸ੍ਮਿਂ ਵਨਖਣ੍ਡਮਜ੍ਝੇ ਏਕੋ ਬ੍ਯਗ੍ਘੋ ਵਸਤਿ. ਕਕ੍ਖਲੋ ਫਰੁਸੋ ਸਮ੍ਪਤ੍ਤਸਮ੍ਪਤ੍ਤੇ ਮਾਰੇਤ੍ਵਾ ਖਾਦਤਿ. ਮਾ ਤ੍ਵਂ ਤੇਨ ਗਚ੍ਛਾਤਿ ਆਹ. ਸ੍ਵਾਯਂ ਦੁਬ੍ਭਗੋ ਮਨੁਸ੍ਸੋ ਹਿਤਕਾਮਸ੍ਸ ਤਸ੍ਸ ਵਚਨਂ ਅਨਾਦਿਯਿਤ੍ਵਾ ਗਚ੍ਛਾਮੇਵਾਤਿ ਆਹ. ਤੁਣ੍ਡਿਲੋ ਤੇਨਹਿ ਸਮ੍ਮ ਯਦਿ ਅਨਿਵਤ੍ਤਮਾਨੋ ਗਚ੍ਛਸਿ. ਏਸੋ ਬ੍ਯਗ੍ਘੋ ਮਮ ਸਹਾਯੋ. ਮੇ ਵਚਨਂ ਤਵ ਸਨ੍ਤਿਕਾ ਸੁਤ੍ਵਾ ਨ ਗਣ੍ਹਾਤੀਤਿ. ਤਸ੍ਸ ਤਂ ਅਨਾਦਿਯਨ੍ਤੋ ਸੋ ਸੁਵਰਾਜੇ ਪਦੁਟ੍ਠਚਿਤ੍ਤੋ ਮੁਗ੍ਗਰੇਨ ਪਹਰਿਤ੍ਵਾ ਮਾਰੇਤ੍ਵਾ ਅਰਣਿਂ ਅਗ੍ਗਿਂ ਕਤ੍ਵਾ ਮਂਸਂ ਖਾਦਿ. ਅਸਪ੍ਪੁਰਿਸਸਂਸਗ੍ਗੋ ਨਾਮੇ ਸ ਇਧ ਲੋਕਪਰਲੋਕੇਸੁ ਦੁਕ੍ਖਾਵਹੋਯੇਵ. ਤਥਾਹਿ.

੧.

ਮਯਾ ¶ ਕਤਂ ਮਯ੍ਹਮਿਦਂ, ਇਤਿ ਵੇਸ੍ਸਾਨਰਂ ਨਰੋ;

ਸਮਾਲਿਙ੍ਗਤਿ ਸਪ੍ਪੇਮੋ, ਦਹਤੇਵਸ੍ਸ ਵਿਗ੍ਗਹਂ.

੨.

ਮਧੁਖੀਰਾਦਿਦਾਨੇਨ, ਪੇਮਸਾ ਪਰਿਪਾਲਿਤੋ;

ਸੋਰਗੋ ਕੁਪਿਤੋਵਸ੍ਸ, ਡਸਤੇਵਸ੍ਸ ਵਿਗ੍ਗਹਂ.

੩.

ਏਵਂ ਨਿਹੀਨਜਚ੍ਚੇਨ, ਪਾਪੇਨ ਅਕਤਞ੍ਞੁਨਾ;

ਨਰਾ ਧਮੇਨ ਦੀਨੇਨ, ਕਤੋਪਿ ਖਣਸਙ੍ਗਮੋ.

੪.

ਅਸਾਧੁਕੋ ਅਯਂਤੇਵਂ, ਜਾਨਮਾਨੇਨ ਜਨ੍ਤੁਨਾ;

ਮੁਹੁਤ੍ਤਮ੍ਪਿ ਨ ਕਾਤਬ੍ਬੋ, ਸਙ੍ਗਮੋ ਸੋ ਅਨਤ੍ਥਦੋਤਿ.

ਤਤੋ ਸੋ ਅਸਪ੍ਪੁਰਿਸੋ ਮਂਸਂ ਖਾਦਿਤ੍ਵਾ ਗਚ੍ਛਨ੍ਤੋ ਵਨਖਣ੍ਡਮਜ੍ਝਂ ਸਮ੍ਪਾਪੁਣਿ. ਅਥ ਬ੍ਯਗ੍ਘੋ ਤਂ ਦਿਸ੍ਵਾ ਮਹਾਨਾਦਂ ਕਰੋਨ੍ਤੋ ਗਹਣਤ੍ਥਾਯ ਉਟ੍ਠਾਸਿ. ਸੋ ਬ੍ਯਗ੍ਘਂ ਦਿਸ੍ਵਾ ਭਯਪ੍ਪਤ੍ਤੋ ਤੁਣ੍ਡਿਲਸ੍ਸ ਵਚਨਂ ਸਰਿਤ੍ਵਾ ਅਹਂ ਭੋ ਤਵ ਸਹਾਯਤੁਣ੍ਡਿਲਸ੍ਸ ਸਨ੍ਤਿਕਾ ਆਗਤੋਮ੍ਹੀਤਿ ਆਹ, ਤਂ ਸੁਤ੍ਵਾ ਬ੍ਯਗ੍ਘੋ ਅਤ੍ਤਮਨੋ ਏਹਿ ਸਮ੍ਮਾਤਿ ਤਂ ਪਕ੍ਕੋਸਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਖਾਦਿਤਬ੍ਬਾਹਾਰੇਨ ਤਂ ਸਨ੍ਤਪ੍ਪੇਤ੍ਵਾ ਪਿਤੁਸਨ੍ਤਿਕੇ ਨਿਸੀਦਾਪੇਤ੍ਵਾ ਪੁਨ ਵਨਖਣ੍ਡ ਮਗਮਾਸਿ. ਅਥਸ੍ਸ ਪਿਤਾ ਪੁਤ੍ਤਸ੍ਸ ਗਤਕਾਲੇ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਸ੍ਸ ਵਚਨਾਨੁਸਾਰੇਨ ਤੁਣ੍ਡਿਲਂ ਮਾਰੇਤ੍ਵਾ ਖਾਦਿਤਭਾਵਂ ਅਞ੍ਞਾਸਿ. ਤਤੋ ਸੋ ਪੁਤ੍ਤਸ੍ਸ ਆਗਤਕਾਲੇ ਤਵ ਸਹਾਯੋ ਤੇਨ ਮਾਰਿਤੋਤਿ ਆਹ. ਤਂ ਸੁਤ੍ਵਾ ਬ੍ਯਗ੍ਘੋ ਅਨਤ੍ਤਮਨੋ ਵੇਗੇਨ ਤਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਸਮ੍ਮ ਤੁਣ੍ਡਿਲਾਤਿ ਸਦ੍ਦਂ ਕਤ੍ਵਾ ਅਪਸ੍ਸਨ੍ਤੋ ਲੁਞ੍ਚਿਤਪਤ੍ਤਂਚਸ੍ਸ ਦਿਸ੍ਵਾ ਨਿਸ੍ਸਂਸਯਂ ਤੇਨ ਮਾਰਿਤੋ ਮੇ ਸਹਾਯੋਤਿ ਸੋਚਨ੍ਤੋ ਪਰਿਦੇਵਨ੍ਤੋ ਆਗਞ੍ਛਿ. ਅਥ ਸੋ ਅਸਪ੍ਪੁਰਿਸੋ ਤਸ੍ਮਿਂ ਤਤ੍ਥ ਗਤੇ ਤਸ੍ਸ ਪਿਤਰਂ ਪਾਸਾਣੇਨ ਪਹਰਿਤ੍ਵਾ ਮਾਰੇਤ੍ਵਾ ਬ੍ਯਗ੍ਘਂਚ ਦਾਨਿ ਮਾਰੇਸ੍ਸਾਮੀਤਿ ਬ੍ਯਗ੍ਘਾਗਮਨਮਗ੍ਗਂ ਓਲੋਕੇਨ੍ਤੋ ਨਿਲੀਨੋ ਅਟ੍ਠਾਸਿ. ਤਸ੍ਮਿਂ ਖਣੇ ਬ੍ਯਗ੍ਘੋਪਿ ਆਗਞ੍ਛਿ. ਸੋ ਤਸ੍ਸਾ ਗਤਕਾਲੇ ਤਸ੍ਸ ਤੇਜੇਨ ਭੀਤੋ ਗਨ੍ਤ੍ਵਾ ¶ ਜੀਵਿਤਂ ਮੇ ਸਾਮਿ ਦੇਹੀਤਿ ਪਾਦਮੂਲੇ ਉਰੇਨ ਨਿਪਜ੍ਜਿ, ਬ੍ਯਗ੍ਘੋ ਪਨ ਤੇਨ ਕਤਕਮ੍ਮਂ ਦਿਸ੍ਵਾ ਤਸ੍ਮਿਂ ਚਿਤ੍ਤਂ ਨਿਬ੍ਬਾਪੇਤ੍ਵਾ ਮਮ ਸਹਾਯਸ੍ਸ ਸਾਸਨਮਾਦਾਯਾਗਤਸ੍ਸ ਦੁਬ੍ਭਿਤੁਂ ਨ ਯੁਤ੍ਤਨ੍ਤਿ ਚਿਨ੍ਤੇਨ੍ਤੋ ਤਂ ਸਮਸ੍ਸਾਸੇਤ੍ਵਾ ਗਚ੍ਛ ਸਮ੍ਮਾਤਿ ਸੁਖਂ ਪੇਸੇਸਿ. ਏਵਞ੍ਹਿ ਸਪ੍ਪੁਰਿਸਸਮਾਗਮੋ ਨਾਮ ਇਧ ਲੋਕਪਰਲੋਕੇਸੁ ਸੁਖਾਵਹੋਯੇਵ, ਵੁਤ੍ਤਂਹਿ.

੫.

ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਬ੍ਬਤ੍ਥ ਸਨ੍ਥਵੋ ਤੇਨ, ਸੇਯ੍ਯੋ ਹੋਤਿ ਨ ਪਾਪਿਯੋ.

੬.

ਸੁਖਾਵਹੋ ਦੁਕ੍ਖਨੁਦੋ, ਸਦਾ ਸਬ੍ਭਿ ਸਮਾਗਮੋ;

ਤਸ੍ਮਾ ਸਪ੍ਪੁਰਿਸੇਹੇਵ, ਸਙ੍ਗਮੋ ਹੋਤੁ ਜਨ੍ਤੁਨਂ.

ਤਤੋ ਸੋ ਬ੍ਯਗ੍ਘੋ ਤੇਨ ਮੇਤ੍ਤਚਿਤ੍ਤਾਨੁਭਾਵੇਨ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤੋਤਿ.

੭.

ਏਵਂਵਿਧੋਪਿ ਫਰੁਸੋ ਪਰਮਂਸਭੋਜੀ;

ਬ੍ਯਗ੍ਘੋ ਦਯਾਯੁਪਗਤੋ ਸੁਗਤਿਂ ਸੁਮੇਧੋ;

ਤਸ੍ਮਾ ਕਰੋਥ ਕਰੁਣਂ ਸਤਤਂ ਜਨਾਨਂ,

ਤਂ ਵੋ ਦਦਾਤਿ ਵਿਭਵਞ੍ਚ ਭਵੇਸੁ ਭੋਗਨ੍ਤਿ.

ਬ੍ਯਗ੍ਘਸ੍ਸ ਵਤ੍ਥੁਂ ਪਞ੍ਚਮਂ.

੧੬. ਫਲਕਖਣ੍ਡਦਿਨ੍ਨਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਸਾਵਤ੍ਥਿਯਂ ਕਿਰੇਕੋ ਮਨੁਸ੍ਸੋ ਉਤ੍ਤਰਾਪਥਂ ਗਚ੍ਛਾਮੀਤਿ ਅਦ੍ਧਾਨਮਗ੍ਗਪਟਿਪਨ੍ਨੋ ਗਿਮ੍ਹਾਨਮਾਸੇ ਮਜ੍ਝਣ੍ਹੇ ਬਹਲਾਤਪੇਨ ਕਿਲਨ੍ਤੋ ਹੁਤ੍ਵਾ ਰੁਕ੍ਖਚ੍ਛਾਯਂ ਪਵਿਸਿਤ੍ਵਾ ਤਮ੍ਬੁਲਂ ਖਾਦਨ੍ਤੋ ਫਲਕੇ ਨਿਸੀਦਿ. ਅਥ ਉਤ੍ਤਰਾਪਥੇਨਾਗਚ੍ਛਾਨ੍ਤੋ ਏਕੋ ਤਥੇਵ ਆਤਪੇਨ ਕਿਲਨ੍ਤੋ ਆਗਨ੍ਤ੍ਵਾ ਪੁਰਿਮਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ਭੋ ਪਾਨੀਯਂ ਅਤ੍ਥੀਤਿ ਪੁਚ੍ਛਿ. ਇਤਰੋ ਪਾਨੀਯਂ ਨਤ੍ਥੀਤਿ ਆਹ. ਅਥਸ੍ਸ ¶ ਸੋ ਮਯ੍ਹਮ੍ਪਿ ਭੋ ਤਮ੍ਬੁਲਂ ਦੇਹਿ ਪਿਪਾਸਿਤੋਮ੍ਹਿਤਿ ਵਤ੍ਵਾਪਿ ਨ ਲਭਿ. ਚਤੁਕਹਾਪਣੇਨ ਏਕਂ ਤਮ੍ਬੁਲਪਣ੍ਣਂ ਕਿਣਿਤ੍ਵਾ ਲਦ੍ਧੋ ਤਤ੍ਥੇਵ ਨਿਸੀਦਿਤ੍ਵਾ ਖਾਦਿਤ੍ਵਾ ਪਿਪਾਸਂ ਵਿਨੋਦੇਤ੍ਵਾ ਤੇਨ ਉਪਕਾਰੇਨ ਤਸ੍ਸ ਸਿਨੇਹਂ ਕਤ੍ਵਾ ਅਤ੍ਤਨੋ ਗਮਨਟ੍ਠਾਨ ਮਗਮਾਸਿ, ਅਥਾ ਪਰਭਾਗੇ ਸੋ ਪਟ੍ਟਨਂ ਗਨ੍ਤ੍ਵਾ ਨਾਵਾਯ ਵਣਿਜ੍ਜਤ੍ਥਾਯ ਗਚ੍ਛਨ੍ਤੋ ਸਮੁਦ੍ਦਮਜ੍ਝਂ ਪਾਪੁਣਿ. ਤਤੋ ਸਤ੍ਤਮੇ ਦਿਵਸੇ ਨਾਵਾ ਭਿਜ੍ਜਿ. ਮਨੁਸ੍ਸਾ ਮਚ੍ਛਕਚ੍ਛਪਾਨਂ ਭਕ੍ਖਾ ਜਾਤਾ. ਸੋ ਏਵ ਪੁਰਿਸੋ ਅਰੋਗੋ ਹੁਤ੍ਵਾ ਏਕਂ ਫਲਕਖਣ੍ਡਂ ਉਰੇ ਕਤ੍ਵਾ ਸਮੁਦ੍ਦਂ ਤਰਤਿ. ਅਥੇ ਤਰੋਪਿ ਤਥੇਵ ਨਾਵਾਯ ਭਿਨ੍ਨਾਯ ਸੇਸੋ ਹੁਤ੍ਵਾ ਸਮੁਦ੍ਦਂ ਤਰਨ੍ਤੋ ਪੁਰਿਮੇਨ ਸਮਾਗਮਿ. ਅਥ ਤੇ ਸਤ੍ਤਦਿਵਸਂ ਸਮੁਦ੍ਦੇ ਤਰਨ੍ਤਾ ਅਞ੍ਞਮਞ੍ਞਂ ਸਞ੍ਜਾਨਿਂਸੁ. ਤੇਸੁ ਕਹਾਪਣੇ ਦਤ੍ਵਾ ਤਮ੍ਬੁਲਂ ਗਹਿਤੋ ਏਕਂ ਫਲਕਖਣ੍ਡਂ ਉਰੇ ਕਤ੍ਵਾ ਤਰਤਿ. ਇਤਰਸ੍ਸੇਤਂ ਨਤ੍ਥਿ. ਅਥ ਸੋ ਕਹਾਪਣੇ ਗਹੇਤ੍ਵਾ ਦਿਨ੍ਨਤਮ੍ਬੁਲਮਤ੍ਤਸ੍ਸੋ ਪਕਾਰਂ ਸਰਿਤ੍ਵਾ ਅਤ੍ਤਨੋ ਫਲਕਖਣ੍ਡਂ ਤਸ੍ਸ ਅਦਾਸਿ. ਸੋ ਤਸ੍ਮਿਂ ਸਯਿਤ੍ਵਾ ਤਰਨ੍ਤੋ ਤਂ ਪਹਾਯ ਅਗਮਾਸਿ, ਅਪਰੋ ਅਨਾਧਾਰਕੇਨ ਤਰਨ੍ਤੋ ਓਸ੍ਸਟ੍ਠਵਿਰਿਯੋ ਉਦਕੇ ਓਸੀਦਿਤੁਮਾਰਤਿ. ਤਸ੍ਮਿਂ ਖਣੇ ਸਮੁਦ੍ਦੇ ਅਧਿਵਤ੍ਥਾ ਮਣਿਮੇਖਲਾ ਨਾਮ ਦੇਵਧੀਤਾ ਓਸੀਦਨ੍ਤਂ ਤਂ ਦਿਸ੍ਵਾ ਸਪ੍ਪੁਰਿਸੋਤਿ ਤਸ੍ਸ ਗੁਣਾਨੁਸ੍ਸਰਨ੍ਤੀ ਵੇਗੇਨਾ ਗਨ੍ਤ੍ਵਾ ਤਂ ਅਤ੍ਤਨੋ ਆਨੁਭਾਵੇਨ ਸਮੁਦ੍ਦਤੀਰਂ ਪਾਪੇਸਿ. ਇਤਰਂਪਿ ਸਾ ਏਤਸ੍ਸੇਵ ਗੁਣਾਨੁਭਾਵੇਨ ਤੀਰਂ ਪਾਪੇਸਿ. ਅਥ ਫਲਕੇਨੋਤਿਣ੍ਣਪੁਰਿਸੋ ਤਂ ਦਿਸ੍ਵਾ ਵਿਮ੍ਹਿਤੋ ਕਥਂ ਪੁਰਤੋ ਅਹੋਸਿ ਸਮ੍ਮਾਤਿ ਪੁਚ੍ਛਿ. ਸੋ ਨ ਜਾਨਾਮਿ. ਅਪਿਚ ਖੋ ਸੁਖੇਨੇਵ ਤੀਰਂ ਪਤ੍ਤੋਸ੍ਮੀਤਿ ਆਹ. ਅਥ ਦੇਵਧੀਤਾ ਦਿਸ੍ਸਮਾਨਕਸਰੀਰੇਨੇਵ ਅਤ੍ਤਨਾ ਆਨੀਤਭਾਵਂ ਆਰੋਚੇਨ੍ਤੀ ਆਹ.

੧.

ਯੋ ਮਾਤਰਂ ਪਿਤਰਂਵਾ, ਧਮ੍ਮੇਨ ਇਧ ਪੋਸਤਿ;

ਰਕ੍ਖਨ੍ਤਿ ਤਂ ਸਦਾ ਦੇਵਾ, ਸਮੁਦ੍ਦੇ ਵਾ ਥਲੇਪਿ ਵਾ.

੨.

ਯੋ ਚੇ ਬੁਦ੍ਧਞ੍ਚ ਧਮ੍ਮਞ੍ਚ, ਸਂਘਞ੍ਚ ਸਰਣਂ ਗਤੋ;

ਰਕ੍ਖਨ੍ਤਿ ਤਂ ਸਦਾ ਦੇਵਾ, ਸਮੁਦ੍ਦੇ ਵਾ ਥਲੇਪਿ ਵਾ.

੩.

ਪਞ੍ਚਵਿਧਂ ¶ ਅਟ੍ਠਵਿਧਂ, ਪਾਤਿਮੋਕ੍ਖਞ੍ਚ ਸਂਵਰਂ;

ਪਾਲੇਤਿ ਯੋ ਤਂ ਪਾਲੇਨ੍ਤਿ, ਦੇਵਾ ਸਬ੍ਬਤ੍ਥ ਸਬ੍ਬਦਾ.

੪.

ਕਾਯੇਨ ਵਾਚਾ ਮਨਸਾ, ਸੁਚਰਿਤ੍ਤਂ ਚਰਤੀ ਧ ਯੋ;

ਪਾਲੇਨ੍ਤਿ ਤਂ ਸਦਾ ਦੇਵਾ, ਸਮੁਦ੍ਦੇ ਵਾ ਥਲੇਪਿ ਵਾ.

੫.

ਯੋ ਸਪ੍ਪੁਰਿਸਧਮ੍ਮੇਸੁ, ਠਿਤੋ ਧ ਕਤਵੇਦਿਕੋ;

ਪਾਲੇਨ੍ਤਿ ਤਂ ਸਦਾ ਦੇਵਾ, ਸਮੁਦ੍ਦੇ ਵਾ ਥਲੇਪਿ ਵਾ.

ਤਤੋ ਸੋ ਆਹ.

੬.

ਨੇਵ ਦਾਨਂ ਅਦਾਸਾਹਂ, ਨ ਸੀਲਂ ਪਰਿਪਾਲਯਿਂ;

ਕੇਨ ਮੇ ਪੁਞ੍ਞਕਮ੍ਮੇਨ, ਮਮਂ ਰਕ੍ਖਨ੍ਤਿ ਦੇਵਤਾ;

ਪੁਚ੍ਛਾਮਿ ਸਂਸਯਂ ਤੁਯ੍ਹਂ, ਤਂ ਮੇ ਅਕ੍ਖਾਹਿ ਦੇਵਤੇਤਿ.

ਦੇਵਤਾ ਆਹ.

੭.

ਅਗਾਧਾ ਪਾਰਗੇ ਭੀਮੇ, ਸਾਗਰੇ ਦੁਰਿਤਾ ਕਰੇ;

ਭਿਨ੍ਨਨਾਵੋ ਤਰਨ੍ਤੋ ਤ੍ਵਂ, ਹਦਯੇ ਕਤ੍ਵਾ ਕਲਿਙ੍ਗਰਂ.

੮.

ਠਤ੍ਵਾ ਸਪ੍ਪੁਰਿਸੇ ਧਮ੍ਮੇ, ਅਤ੍ਤਾਨ ਮਨਵੇਕ੍ਖਿਯ;

ਖਣਸਨ੍ਥਵਸ੍ਸ ਪੁਰਿਸਸ੍ਸ, ਅਦਾਸਿ ਫਲਕਂ ਸਕਂ.

੯.

ਤਂ ਤੁਯ੍ਹਂ ਮਿਤ੍ਤਧਮ੍ਮਞ੍ਚ, ਦਾਨਞ੍ਚ ਫਲਕਸ੍ਸ ਤੇ;

ਪਤਿਟ੍ਠਾਸਿ ਸਮੁਦ੍ਦਸ੍ਮਿਂ, ਏਵਂ ਜਾਨਾਹਿ ਮਾਰਿਸਾਤਿ.

ਏਵਞ੍ਚ ਵਤ੍ਵਾ ਸਾ ਤੇ ਦਿਬ੍ਬਾਹਾਰੇਨ ਸਨ੍ਤਪ੍ਪੇਤ੍ਵਾ ਦਿਬ੍ਬਵਤ੍ਥਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਅਤ੍ਤਨੋ ਆਨੁਭਾਵੇਨ ਸਾਵਤ੍ਥਿਨਗਰੇਯੇਵ ਤੇ ਪਤਿਟ੍ਠਾਪੇਸਿ. ਤਤੋ ਪਟ੍ਠਾਯ ਤਮੇਵ ਆਰਮ੍ਮਣਂ ਕਤ੍ਵਾ ਤੇ ਦਾਨਂ ਦਦਨ੍ਤਾ ਸੀਲਂ ਰਕ੍ਖਨ੍ਤਾ ਉਪੋਸਥਕਮ੍ਮਂ ਕਰੋਨ੍ਤਾ ਆਯੁਪਰਿਯੋਸਾਨੇ ਸਗ੍ਗਪਰਾਯਣਾ ਅਹੇਸੁਂ.

੧੦.

ਏਵਂ ਪਰਿਤ੍ਤਕੁਸਲੇਨਪਿ ਸਾਗਰਸ੍ਮਿਂ,

ਸਤ੍ਤਾ ਲਭਨ੍ਤਿ ਸਰਣਂ ਖਲੁ ਦੇਵਤਾਹਿ;

ਤੁਮ੍ਹੇਪਿ ਸਪ੍ਪੁਰਿਸਤਂ ਨ ਵਿਨਾਸਯਨ੍ਤਾ,

ਮਾ ਭੋ ਪਮਜ੍ਜਥ ਸਦਾ ਕੁਸਲਪ੍ਪਯੋਗੇਤਿ.

ਫਲਕਖਣ੍ਡਦਿਨ੍ਨਸ੍ਸ ਵਤ੍ਥੁਂ ਛਟ੍ਠਮਂ.

੧੭. ਚੋਰਸਹਾਯਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ¶ ਭਗਵਤਿ ਪਰਿਨਿਬ੍ਬੁਤੇ ਜਮ੍ਬੁਦੀਪੇ ਦੇਵਦਹਨਗਰੇ ਏਕੋ ਮਨੁਸ੍ਸੋ ਦੁਕ੍ਖਿਤੋ ਤਤ੍ਥ ਤਤ੍ਥ ਵਿਚਰਨ੍ਤੋ ਪਚ੍ਚਨ੍ਤੇ ਅਞ੍ਞਤਰਂ ਗਾਮਂ ਗਨ੍ਤ੍ਵਾ ਤਤ੍ਥ ਏਕਸ੍ਮਿਂ ਕੁਲਗੇਹੇ ਨਿਵਾਸਂ ਕਪ੍ਪੇਸਿ. ਤਤ੍ਥ ਮਨੁਸ੍ਸਾ ਤਸ੍ਸ ਯਾਗੁਭਤ੍ਤਂ ਦਤ੍ਵਾ ਪੋਸੇਸੁਂ, ਤਤੋ ਸੋ ਤਤ੍ਥ ਮਨੁਸ੍ਸੇਹਿ ਮਿਤ੍ਤਸਨ੍ਥਵਂ ਕਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ਅਞ੍ਞਟ੍ਠਾਨਂ ਗਨ੍ਤ੍ਵਾ ਅਪਰਭਾਗੇ ਚੋਰਕਮ੍ਮਂ ਕਰੋਨ੍ਤੋ ਜੀਵਿਕਂ ਕਪ੍ਪੇਤਿ. ਅਥੇਕਦਿਵਸਂ ਚੋਰੇਨ੍ਤਂ ਤਂ ਰਾਜਪੁਰਿਸਾ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਤਂ ਬਨ੍ਧਨਾਗਾਰੇ ਕਰੋਥਾਤਿ ਆਣਾਪੇਸਿ, ਤੇ ਤਂ ਬਨ੍ਧਨਾਗਾਰਂ ਨੇਤ੍ਵਾ ਸਙ੍ਖਲਿਕਾਹਿ ਬਨ੍ਧਿਤ੍ਵਾ ਆਰਕ੍ਖਕਾਨਂ ਪਟਿਪਾਦੇਤ੍ਵਾ ਅਗਮਂਸੁ, ਬਨ੍ਧਨਾਗਾਰੇ ਵਸਨ੍ਤਸ੍ਸ ਤਸ੍ਸ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ. ਤਤੋ ਅਪਰਭਾਗੇ ਤਸ੍ਸ ਪੁਬ੍ਬਸਹਾਯੋ ਪਚ੍ਚਨ੍ਤਗਾਮਵਾਸੀ ਮਨੁਸ੍ਸੋ ਕੇਨਚਿ ਕਮ੍ਮੇਨ ਦੇਵਦਹ ਮਾਗਤੋ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਬਨ੍ਧਨਾਗਾਰੇ ਬਦ੍ਧਂ ਤਂ ਅਦ੍ਦਸ. ਦਿਸ੍ਵਾ ਤਸ੍ਸ ਹਦਯਂ ਕਮ੍ਪਿ, ਸੋ ਰੋਦਿਤ੍ਵਾ ਪਰਿਦੇਵਿਤ੍ਵਾ ਕਿਂ ਤੇ ਮਯਾ ਕਤ੍ਤਬ੍ਬਂ ਸਮ੍ਮਾਤਿ ਪੁਚ੍ਛਿ. ਤਤੋ ਤੇਨ ਸਮ੍ਮ ਬਨ੍ਧਨਾਗਾਰੇ ਵਸਨ੍ਤਸ੍ਸ ਮੇ ਇਦਾਨਿ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ, ਏਤ੍ਤਕਂ ਕਾਲਂ ਦੁਬ੍ਭੋਜਨਾਦਿਨਾ ਮਹਾਦੁਕ੍ਖਂ ਅਨੁਭੋਮਿ. ਯਾਵਾਹਂ ਆਹਾਰਂ ਪਰਿਯੇਸਿਤ੍ਵਾ ਭੁਞ੍ਜਿਤ੍ਵਾ ਆਗਮਿਸ੍ਸਾਮਿ. ਤਾਵ ਮਂ ਇਤੋ ਮੁਞ੍ਚਨੁਪਾਯਂ ਜਾਨਾਹੀਤਿ ਵੁਤ੍ਤੇ ਸੋ ਸਪ੍ਪੁਰਿਸੋ.

੧.

ਰੂਪੇਨ ਕਿਨ੍ਤੁ ਗੁਣਸੀਲਵਿਵਜ੍ਜਿਤੇਨ,

ਮਿਚ੍ਛਾਲਯਸ੍ਸ ਕਿਤਵਸ੍ਸ ਧਿਯਾ ਕਿਮਤ੍ਥਂ;

ਦਾਨਾ ਦਿਚਾਗਵਿਗਤੇਨ ਧਨੇਨ ਕਿਂ ਵਾ;

ਮਿਤ੍ਤੇਨ ਕਿਂ ਬ੍ਯਸਨਕਾਲਪਰਮ੍ਮੁਖੇਨਾਤਿ.

ਏਵਞ੍ਚ ਪਨ ਵਤ੍ਵਾ ਸਾਧੁ ਸਮ੍ਮ ਕਰੋਮਿ ਤੇ ਵਚਨਨ੍ਤਿ ਆਰਕ੍ਖਕਾਨਂ ਸਨ੍ਤਿਕਂ ਗਨ੍ਤ੍ਵਾ ਭੋਨ੍ਤੋ ਯਾਵੇਸੋ ਭਤ੍ਤਂ ਭੁਞ੍ਜਿਤ੍ਵਾ ਆਗਚ੍ਛਤਿ. ਤਾਵਾਹਂ ਤਸ੍ਸ ਪਾਟਿਭੋਗੋ ਭਵਿਸ੍ਸਾਮਿ. ਵਿਸ੍ਸਜ੍ਜੇਥ ¶ ਨਨ੍ਤਿ ਆਹ, ਤੇਹਿ ਨ ਸਕ੍ਕਾ ਭੋ ਏਤਂ ਵਿਸ੍ਸਜ੍ਜੇਤੁਂ, ਅਪਿ ਚ ਖੋ ਯਾਵਾਯਂ ਆਗਚ੍ਛਤਿ. ਤਾਵ ਤ੍ਵਂ ਅਯਸਙ੍ਖਲਿਕਾਯ ਬਦ੍ਧੋ ਨਿਸੀਦਿਸ੍ਸਸਿ, ਏਵਂ ਤਂ ਵਿਸ੍ਸਜ੍ਜੇਸ੍ਸਾਮ, ਨੋ ਚੇ ਨ ਸਕ੍ਕਾਤਿ ਆਹਂਸੁ, ਸੋ ਏਵਮ੍ਪਿ ਹੋਤੁ ਸਮ੍ਮਾਤਿ ਵਤ੍ਵਾ ਤਸ੍ਸ ਪਾਦਤੋ ਸਙ੍ਖਲਿਕਂ ਮੁਞ੍ਚਿਤ੍ਵਾ ਅਤ੍ਤਨੋ ਪਾਦੇ ਕਤ੍ਵਾ ਬਨ੍ਧਨਾਗਾਰਂ ਪਵਿਸਿਤ੍ਵਾ ਇਤਰਂ ਮੁਞ੍ਚਾਪੇਸਿ. ਸੋਪਿ ਅਸਪ੍ਪੁਰਿਸੋ ਬਨ੍ਧਨਾ ਮੁਤ੍ਤੋ ਨ ਪੁਨ ਤਂ ਠਾਨ ਮਗਮਾਸਿ, ਅਹੋ ਅਕਤਞ੍ਞੁਨੋ ਪਕਤਿਂ ਞਾਤੁਂ ਭਾਰਿਯਂ. ਯਥਾਹ.

੨.

ਵਾਰਿਪੂਰੇ ਯਥਾ ਸੋਬ੍ਭੇ, ਨੇਵਨ੍ਤੋ ਵਿਸਮਂ ਸਮਂ;

ਪਞ੍ਞਾਯਤੇਵਂਸਾਧੁਸ੍ਸ, ਭਾਵਂ ਮਨਸਿ ਸਮ੍ਭਵਂ.

੩.

ਭਾਸਨ੍ਤਿ ਮੁਖਤੋ ਏਕਂ, ਚਿਨ੍ਤੇਨ੍ਤਿ ਮਨਸਾ ਪਰਂ;

ਕਾਯੇਨੇਕਂ ਕਰੋਨ੍ਤੇਵਂ, ਪਕਤਾਯਮਸਾਧੁਨਂ.

੪.

ਤੇਸਂ ਯੋ ਭਾਵਮਞ੍ਞਾਸਿ, ਸੋਵ ਪਣ੍ਡਿਤਜਾਤਿਕੋ;

ਬਹੁਸ੍ਸੁਤੋਪਿ ਸੋਯੇਵ, ਪਰਚਿਤ੍ਤਵਿਦੂਪਿ ਸੋ.

ਅਥਸ੍ਸ ਬਨ੍ਧਨਾਗਾਰੇ ਵਸਨ੍ਤਸ੍ਸ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ. ਏਤ੍ਤਕਂ ਕਾਲਂ ਜਿਘਚ੍ਛਾਪੀਲ਼ਿਤੇਨ ਤੇਨ ਆਹਾਰਤ੍ਤਾਯ ਪਰੋ ਨ ਯਾਚਿਤਪੁਬ੍ਬੋ, ਅਨੁਚ੍ਛਿਟ੍ਠਾਹਾਰਂ ਲਭਨਦਿਵਸਤੋ ਅਲਭਨਦਿਵਸਾਯੇਵ ਬਹੁਤਰਾ ਹੋਨ੍ਤਿ, ਅਥ ਦ੍ਵਾਦਸਸਂਵਚ੍ਛਰਾਤਿਕ੍ਕਮੇ ਰਞ੍ਞੋ ਪੁਤ੍ਤੋ ਨਿਬ੍ਬਤ੍ਤਿ. ਤਦਾ ਰਾਜਾ ਅਤ੍ਤਨੋ ਵਿਜਿਤੇ ਸਬ੍ਬਬਨ੍ਧਨਾਗਾਰਾਨਿ ਵਿਵਰਾਪੇਸਿ. ਅਨ੍ਤਮਸੋ ਮਿਗਪਕ੍ਖਿਨੋਪਿ ਬਨ੍ਧਨਾ ਮੁਞ੍ਚਾਪੇਸਿ. ਦ੍ਵਾਰੇ ਵਿਵਟਮਤ੍ਤੇਯੇਵ ਬਨ੍ਧਨਾਗਾਰੇ ਮਨੁਸ੍ਸਾ ਇਚ੍ਛਿਤਿਚ੍ਛਿਤਟ੍ਠਾਨਂ ਅਗਮਂਸੁ. ਸੋ ਪਨੇਕੋਵ ਤੇਹਿ ਸਦ੍ਧਿਂ ਅਗਨ੍ਤ੍ਵਾ ਓਹੀਯਿ. ਆਰਕ੍ਖਕੇਹਿ ਤ੍ਵਂ ਭੋ ਕਸ੍ਮਾ ਨ ਗਚ੍ਛਸੀਤਿ ਵੁਤ੍ਤੇ ਅਹਂ ਭੋ ਪਞ੍ਞਾਤਭਾਵੇਨ ਇਦਾਨਿ ਨ ਗਮਿਸ੍ਸਾਮਿ. ਅਤੀਵ ਪਰਿਹੀਨਗਤ੍ਤੋਸ੍ਮਿ. ਅਨ੍ਧਕਾਰੇ ਗਮਿਸ੍ਸਾਮੀਤਿ ਵਤ੍ਵਾ ਅਨ੍ਧਕਾਰੇ ਆਗਤੇ ਨਿਕ੍ਖਮ੍ਮ ਅਨ੍ਤੋਨਗਰੇ ਵਿਸ੍ਸਾਸਿਕਾਨਂ ਅਭਾਵੇਨ ਕੁਤੋ ਆਹਾਰਂ ਲਭਿਸ੍ਸਾਮੀਤਿ ਚਿਨ੍ਤੇਨ੍ਤੋ ਨਿਕ੍ਖਮ੍ਮ ਰਤ੍ਤਨ੍ਧਕਾਰੇ ਆਮਕਸੁਸਾਨ ¶ ਮਗਮਾਸਿ. ਏਤ੍ਥਾਹਾਰਂ ਲਭਿਸ੍ਸਾਮੀਤਿ. ਤਤ੍ਥ ਸੋ ਅਧੁਨਾ ਨਿਕ੍ਖਿਤ੍ਤਮਤਮਨੁਸ੍ਸਂ ਦਿਸ੍ਵਾ ਮਨੁਸ੍ਸਟ੍ਠਿਨਾ ਮਂਸਂ ਛਿਨ੍ਦਿਤ੍ਵਾ ਸੀਸਕਪਾਲੇ ਪਕ੍ਖਿਪਿਤ੍ਵਾ ਤੀਹਿ ਮਨੁਸ੍ਸਸੀਸੇਹਿ ਕਤਉਦ੍ਧਨੇ ਠਪੇਤ੍ਵਾ ਚਿਤਕਤੋ ਓਮੁਕ੍ਕਅਲਾਤੇਹਿ ਅਗ੍ਗਿਂ ਕਤ੍ਵਾ ਸੁਸਾਨਂ ਨਿਬ੍ਬਾਪਨਤ੍ਥਾਯਾ ਭਤਉਦਕੇਨ ਮਨੁਸ੍ਸਟ੍ਠਿਨਾ ਆਲੋਲੇਨ੍ਤੋ ਮਂਸਂ ਪਚਿਤ੍ਵਾ ਓਤਾਰੇਤ੍ਵਾ ਸਾਖਾਭਙ੍ਗੇਨ ਹਿਰਿਕੋਪੀਣਂ ਪਟਿਚ੍ਛਾਦੇਤ੍ਵਾ ਨਿਵਤ੍ਥਪਿਲੋਕਿਕਂ ਵਾਤਾਵਰਣਂ ਕਤ੍ਵਾਨਿਸੀਦਿ. ਤਸ੍ਮਿਂ ਖਣੇ ਤਤ੍ਥ ਪਿਪ੍ਪਲੀਰੁਕ੍ਖੇ ਅਧਿਵਤ੍ਥਾ ਦੇਵਤਾ ਤਸ੍ਸ ਤਂ ਕਿਰਿਯਂ ਦਿਸ੍ਵਾ ਪੁਚ੍ਛਿਸ੍ਸਾਮਿ ਤਾਵ ਨਨ੍ਤਿ ਤਂ ਉਪਸਙ੍ਕਮਿਤ੍ਵਾ ਏਵਮਾਹ. ਭੋ ਤ੍ਵਂ ਘਨਤਰਤਿਮਿਰਾਕੁਲੇ ਮਹਾਰਤ੍ਤਿਯਂ ਤਤ੍ਥ ਤਤ੍ਥ ਵਿਕਿਣ੍ਣਨਰਟ੍ਠਿਸਮਾਕਿਣ੍ਣੇ ਸੋਣਸਿਗਾਲਾਦਿਕੁਣਪਾਦਕਾਕੁਲੇ ਮਨੁਸ੍ਸਮਂਸਭਕ੍ਖਯਕ੍ਖਰਕ੍ਖਸਾਕੁਲੇ ਤਤ੍ਥ ਤਤ੍ਥ ਪਜ੍ਜਲਨ੍ਤਾਨੇਕਚਿਤਕਭਯਾਨਕੇ ਸੁਸਾਨੇ ਮਨੁਸ੍ਸਮਂਸਂ ਪਚਿਤ੍ਵਾ ਕਿਂਕਰੋਸੀਤਿ ਪੁਚ੍ਛਨ੍ਤੀ ਆਹ.

੫.

ਰਤ੍ਤਨ੍ਧਕਾਰੇ ਕੁਣਪਾਦਕੇਹਿ,

ਸਮਾਕੁਲੇ ਸੀਵਥਿਕਾਯ ਮਜ੍ਝੇ;

ਮਨੁਸ੍ਸਮਂਸਂ ਪਚਸੀ ਧ ਸੀਸੇ,

ਵਦੇਹਿ ਕਿਂ ਤੇਨ ਪਯੋਜਨਂ ਤੇਤਿ.

ਅਥ ਸੋ ਆਹ.

੬.

ਨ ਯਾਗਹੇਤੁ ਨ ਚ ਦਾਨਹੇਤੁ,

ਸੁਸਾਨਮਜ੍ਝਮ੍ਹਿ ਪਚਾਮਿ ਮਂਸਂ;

ਖੁਦਾਸਮਂ ਨਤ੍ਥਿ ਨਰਸ੍ਸ ਅਞ੍ਞਂ,

ਖੁਦਾਵਿਨਾਸਾਯ ਪਚਾਮਿਮਮ੍ਭੋਤਿ.

ਤਤੋ ਦੇਵਤਾ ਤਂ ਤਥਾ ਹੋਤੁ, ਇਮਿਨਾ ਪਿਲੋਤਿਕੇਨ ਵਾਤਾਵਰਣਂ ਕਰੋਸਿ. ਕਿਮਤ੍ਥਮੇਤਨ੍ਤਿ ਪੁਚ੍ਛਨ੍ਤੀ.

੭.

ਨਿਵਤ੍ਥਸਾਖੋ ¶ ਹਿਰਿਸਂਵਰਾਯ,

ਪਿਲੋਤਿਕਂ ਤਤ੍ਥ ਪਸਾਰਯਨ੍ਤੋ;

ਕਰੋਸਿ ਵਾਤਾਵਰਣਞ੍ਚ ਸਮ੍ਮ,

ਕਿਮਤ੍ਥਮੇਤਂ ਵਦ ਪੁਚ੍ਛਿਤੋ ਮੇਤਿ.

ਸੋ ਤਸ੍ਸਾ ਚਿਕ੍ਖਨ੍ਤੋ ਆਹ.

੮.

ਸੁਭਾ ਸੁਭਾਮਿਸ੍ਸਿਤਸੀਤਵਾਤੋ,

ਸਯਂ ਅਚਿਤ੍ਤੋਵ ਅਚਿਤ੍ਤਭਾਵਾ;

ਦੇਹਂ ਫੁਸਿਤ੍ਵਾਨ ਅਸਾਧੁਕਸ੍ਸ,

ਅਕਤਞ੍ਞੁਨੋ ਮਿਤ੍ਤਪਧਂਸਕਸ੍ਸ.

੯.

ਸਮਾਵਹਨ੍ਤੋ ਯਦਿ ਮੇ ਸਰੀਰੇ,

ਫੁਸਾਤਿ [ਫੁਸਾਤਿਸਾਸਙ੍ਗਤਿਮਜ੍ਜਦਾਨਿ ਇਤਿਕਤ੍ਤਚਿ] ਤਂ ਵਾਯੁ ਮਮਾ ਵਿਸਿਤ੍ਵਾ;

ਦੁਕ੍ਖਂ ਦਦਾਤੀਤਿ ਵਿਸਂਵ ਤਂ ਭੋ,

ਪਰਿਵਜ੍ਜਿਤੁਂ ਬਦ੍ਧਮਿਮਂ ਕੁਚੇਲਨ੍ਤਿ.

ਦੇਵਤਾ ਆਹ.

੧੦.

ਕਿ ਮਕਾਸਿ ਭੋ ਸੋ ਕਤਨਾਸਕੋ ਤੇ,

ਧਨਞ੍ਚ ਧਞ੍ਞਂ ਤਵ ਨਾਸਯੀ ਚ;

ਮਾਤਾ ਪਿਤਾ ਬਨ੍ਧਵੋ ਖੇਤ੍ਤ ਵਤ੍ਥੂ,

ਵਿਨਾਸਿਤਾ ਤੇਨ ਵਦੇਹਿ ਕਿਂ ਤੇਤਿ.

ਤਤੋ ਸੋ ਆਹ.

੧੧.

ਯਂ ਰਾਜਤੋ ਹੋਤਿ ਭਯਂ ਮਹਨ੍ਤਂ,

ਸਬ੍ਬਸ੍ਸ ਹਰਣਾਦਿਵਧਾਦਿਕਞ੍ਚ;

ਅਕਤਞ੍ਞੁਨਾ ਸਪ੍ਪੁਰਿਸੇਨ ਹੋਤਿ,

ਆਰਾਵ ਸੋ ਭੋ ਪਰਿਵਜ੍ਜਨੀਯੋ.

੧੨.

ਯਮਤ੍ਥਿ ¶ ਚੋਰਾਰਿਭਯਞ੍ਹਿ ਲੋਕੇ,

ਅਥੋ ਦਕੇਨਾਪਿ ਚ ਪਾਵਕੇਨ;

ਅਕਤਞ੍ਞੁਨਾ ਤਂ ਸਕਲਮ੍ਪਿ ਹੋਤਿ,

ਆਰਾਵ ਸੋ ਭੋ ਪਰਿਵਜ੍ਜਨੀਯੋ.

੧੩.

ਪਾਣਾਤਿਪਾਤਮ੍ਪਿ ਅਦਿਨ੍ਨਦਾਨਂ,

ਪਰਸ੍ਸ ਦਾਰੂਪਗਮਂ ਮੁਸਾ ਚ;

ਮਜ੍ਜਸ੍ਸ ਪਾਨਂ ਕਲਹਞ੍ਚ ਪੇਸੁਨਂ,

ਸਮ੍ਫਂ ਗਿਰਂ ਧੁਤ੍ਤਜਨੇਹਿ [ਅਕ੍ਖਧੁਤ੍ਤਾਦਿਯੋਗਂ ਇਤਿਕਤ੍ਥਚਿ] ਯੋਗਂ.

੧੪.

ਸਬ੍ਬਂ ਅਨਤ੍ਥਂ ਅਸਿਵਂ ਅਨਿਟ੍ਠਂ,

ਅਪਾਯਿਕਂ [ਅਪਾਯਿਕਂ ਇਤਿਕਤ੍ਥਚਿ] ਦੁਕ੍ਖਮਨਨ੍ਤ ਮਞ੍ਞਂ;

ਅਕਤਞ੍ਞੁਨਾ ਸਪ੍ਪੁਰਿਸੇਨ ਹੋਤਿ;

ਆਰਾਵ ਸੋ ਭੋ ਪਰਿਵਜ੍ਜਨੀਯੋਤਿ.

ਵਤ੍ਵਾ ਅਤ੍ਤਨਾ ਅਸਪ੍ਪੁਰਿਸਸਂਸਗ੍ਗੇਨਾਨੁਭੂਤਂ ਸਬ੍ਬਂ ਦੁਕ੍ਖਂ ਕਥੇਸਿ, ਤਤੋ ਦੇਵਤਾ ਅਹਮ੍ਪਿ ਭੋ ਸਤ੍ਥੁਨੋ ਮਙ੍ਗਲਸੁਤ੍ਤਦੇਸਨਾਦਿਵਸੇ ਇਮਸ੍ਮਿਂਯੇਵ ਰੁਕ੍ਖੇ ਨਿਸਿਨ੍ਨੋ.

ਅਸੇਵਨਾ ਚ ਬਾਲਾਨਂ, ਪਣ੍ਡਿਤਾਨਞ੍ਚ ਸੇਵਨਾ;

ਪੂਜਾ ਚ ਪੂਜਨੀਯ੍ਯਾਨਂ, ਏਤਂ ਮਙ੍ਗਲ ਮੁਤ੍ਤਮਨ੍ਤਿ.

ਗਾਥਾਯ ਬਾਲਸ੍ਸ ਦੋਸੇ ਅਸ੍ਸੋਸਿਂਤਿ ਵਤ੍ਵਾ ਤਸ੍ਸ ਪਸਨ੍ਨੋ ਤਂ ਅਤ੍ਤਨੋ ਵਿਮਾਨਂ ਨੇਤ੍ਵਾ ਨਹਾਪੇਤ੍ਵਾ ਦਿਬ੍ਬਵਤ੍ਥਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਦਿਬ੍ਬਨ੍ਨਪਾਨਂ ਦਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਅਤ੍ਤਨੋ ਆਨੁਭਾਵੇਨ ਤਸ੍ਮਿਂ ਨਗਰੇ ਰਜ੍ਜੇ ਅਭਿਸਿਞ੍ਚਾਪੇਸਿ. ਸੋ ਤਤ੍ਥ ਰਜ੍ਜਂ ਕਰੋਨ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਯਥਾਕਮ੍ਮਂ ਗਤੋਤਿ.

੧੫.

ਏਵਂ ¶ ਅਸਾਧੁਜਨਸਙ੍ਗਮਸਨ੍ਨਿਵਾਸਂ,

ਸਞ੍ਚਜ੍ਜ ਸਾਧੁਸੁਚਿਸਜ੍ਜਨਸਙ੍ਗਮੇਨ;

ਦਾਨਾਦਿ ਨੇਕਕੁਸਲਂ ਪਰਿਪੂਰਯਨ੍ਤਾ,

ਸਗ੍ਗਾ ਪਵਗ੍ਗਵਿਭਵਂ ਅਭਿਸਮ੍ਭੁਨਾਥਾਤਿ.

ਚੋਰਸਹਾਯਸ੍ਸ ਵਤ੍ਥੁਂ ਸਤ੍ਤਮਂ.

੧੮. ਮਰੁਤ੍ਤਬ੍ਰਾਹ੍ਮਣਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਚਨ੍ਦਭਾਗਾ ਨਾਮ ਗਙ੍ਗਾਤੀਰੇ ਹੋਮਗਾਮਂ ਨਾਮ ਅਤ੍ਥਿ. ਤਸ੍ਮਿਂ ਏਕੋ ਮਰੁਤ੍ਤੋ ਨਾਮ ਬ੍ਰਾਹ੍ਮਣੋ ਪਟਿਵਸਤਿ. ਤਦਾ ਸੋ ਵੋਹਾਰਤ੍ਥਾਯ ਤਕ੍ਕਸੀਲਂ ਗਨ੍ਤ੍ਵਾ ਗੇਹਂ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਏਕਾਯ ਸਾਲਾਯ ਕੁਟ੍ਠਰੋਗਾ ਤੁਰਂ ਸੁਨਖਂ ਦਿਸ੍ਵਾ ਤਸ੍ਮਿਂ ਕਾਰੁਞ੍ਞੇਨ ਨੀਲਵਲ੍ਲਿਤਕ੍ਕਮ੍ਬਿਲੇਨ ਮਦ੍ਦਿਤ੍ਵਾ ਪਾਯੇਸਿ. ਸੁਨਖੋ ਵੂਪਸਨ੍ਤਰੋਗੋ ਪਾਕਤਿਕੋ ਹੁਤ੍ਵਾ ਬ੍ਰਾਹ੍ਮਣੇਨ ਅਤ੍ਤਨੋ ਕਤੂਪਕਾਰਂ ਸਲ੍ਲਕ੍ਖੇਨ੍ਤੋ ਤੇਨੇਵ ਸਦ੍ਧਿਂ ਅਗਮਾਸਿ. ਅਪਰਭਾਗੇ ਬ੍ਰਾਹ੍ਮਣਸ੍ਸ ਭਰਿਯਾ ਗਬ੍ਭਂ ਪਟਿਲਭਿ, ਪਰਿਪੁਣ੍ਣਗਬ੍ਭਾਯ ਤਾਯ ਵਿਜਾਯਨਕਾਲੇ ਦਾਰਕੋ ਤਿਰਿਯਮ੍ਪਤਿਤ੍ਵਾ ਅਨ੍ਤੋਗਬ੍ਭੇਯੇਵ ਮਤੋ. ਤਦਾ ਤਂ ਸਤ੍ਥੇਨ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਨੀਹਰਿਂਸੁ, ਅਥ ਬ੍ਰਾਹ੍ਮਣੋ ਤਂ ਦਿਸ੍ਵਾ ਨਿਬ੍ਬਿਨ੍ਦਹਦਯੋ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਰਞ੍ਞੇ ਵਿਹਰਤਿ. ਅਥਸ੍ਸ ਭਰਿਯਾ ਅਞ੍ਞੇਨ ਸਦ੍ਧਿਂ ਸਂਵਸਨ੍ਤੀ ਅਯਂ ਮਂ ਪਹਾਯ ਪਬ੍ਬਜਿਤੋਤਿ ਬ੍ਰਾਹ੍ਮਣੇ ਪਦੁਟ੍ਠਚਿਤ੍ਤਾ ਭੋ ਬ੍ਰਾਹ੍ਮਣਂ ਮਾਰੇਹੀਤਿ ਸਾਮਿਕੇਨ ਸਦ੍ਧਿਂ ਮਨ੍ਤੇਸਿ. ਤੇਸਂ ਮਨ੍ਤਨਂ ਸੁਨਖੋ ਸੁਤ੍ਵਾ ਬ੍ਰਾਹ੍ਮਣੇਨੇਵ ਸਦ੍ਧਿਂ ਚਰਤਿ. ਅਥੇਕਦਿਵਸਂ ਤਸ੍ਸਾ ਸਾਮਿਕੋ ਤਾ ਪ ਸਂ ਮਾਰੇਸ੍ਸਾਮੀਤਿ ਧਨੁ ਕਲਾਪਂ ਗਹੇਤ੍ਵਾ ਨਿਕ੍ਖਮਿ, ਤਦਾ ਤਾਪਸੋ ਫਲਾਫਲਤ੍ਥਾਯ ਅਰਞ੍ਞਂ ਗਤੋ. ਸੁ ਨ ਖੋ ਅਸ੍ਸਮੇਯੇਵ ਓ ਹੀ ਯਿ. ਪੁਰਿਸੋ ਤਾਪਸਸ੍ਸਾਗਮਨਮਗ੍ਗਂ ਓਲੋਕੇਨ੍ਤੋ ਗਚ੍ਛਨ੍ਤਰੇ ¶ ਨਿਲੀਨੋ ਅਚ੍ਛਿ. ਸੁਨਖੋ ਤਸ੍ਸ ਪਮਾਦਂ ਓਲੋਕੇਤ੍ਵਾ ਧਨੁਨੋ ਗੁਣਂ ਖਾਦਿਤ੍ਵਾ ਛਿਨ੍ਦਿ. ਸੋ ਪੁਨ ਗੁਣਂ ਪਾਕਤਿਕਂ ਕਤ੍ਵਾ ਆਰੋਪੇਸਿ. ਏਵਂ ਸੋ ਆਰੋਪਿਤਂ ਆਰੋਪਿਤਂ ਖਾਦਤੇਵ, ਅਥ ਸੋ ਪਾਪਪੁਰਿਸੋ ਤਾਪਸਸ੍ਸਾਗਮਨਂ ਞਤ੍ਵਾ ਤਂ ਮਾਰੇਸ੍ਸਾਮੀਤਿ ਧਨੁਨਾ ਸਦ੍ਧਿਂ ਅਗਮਾਸਿ. ਅਥਸ੍ਸ ਸੁਨਖੋ ਪਾਦੇ ਡਸਿਤ੍ਵਾ ਪਾਤੇਤ੍ਵਾ ਤਸ੍ਸ ਮੁਖਂ ਖਾਦਿਤ੍ਵਾ ਦੁਬ੍ਬਲਂ ਕਤ੍ਵਾ ਭੁਙ੍ਕਾਰਮਕਾਸਿ, ਏਵਞ੍ਹਿ ਸਪ੍ਪੁਰਿਸਾ ਅਤ੍ਤਨੋ ਉਪਕਾਰਕਾਨਂ ਪਚ੍ਚੁਪਕਾਰਂ ਕਰੋਨ੍ਤਿ. ਵੁਤ੍ਤਞ੍ਹਿ.

੧.

ਉਪਕਾਰਂ ਕਰੋਨ੍ਤੋ ਸੋ, ਸੁਨਖੋ ਕਤਵੇਦਿਕੋ;

ਸਤ੍ਤੂਪਘਾਤਕਂ ਕਤ੍ਵਾ, ਇਸਿਨੋ ਦਾਸਿ ਜੀਵਿਤਂ.

੨.

ਤਿਰਚ੍ਛਾਨਾਪਿ ਜਾਨਨ੍ਤਿ, ਗੁਣਮਤ੍ਤਨਿ ਕਤਂ ਸਦਾ;

ਇਤਿ ਉਤ੍ਵਾਨ ਮੇਧਾਵੀ, ਕਤਞ੍ਞੂ ਹੋਨ੍ਤੁ ਪਾਣਿਨੋਤਿ.

ਤਤੋ ਤਾਪਸੋ ਸੁਨਖਸ੍ਸ ਸਦ੍ਦੇਨਾ ਗਨ੍ਤ੍ਵਾ ਤਸ੍ਸ ਤਂ ਵਿਪ੍ਪਕਾਰਂ ਦਿਸ੍ਵਾ ਕਾਰੁਞ੍ਞੇਨ ਪਟਿਜਿਗ੍ਗਿਤ੍ਵਾ ਵੂਪਸਨ੍ਤਵਣਂ ਬਲਪ੍ਪਤ੍ਤਂ ਪੋਸੇਤ੍ਵਾ ਤਤ੍ਥੇਵ ਵਸਨ੍ਤੋ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਆਯੁਪਰਿਯੋਸਾਨੇ ਬ੍ਰਾਹ੍ਮਲੋਕਪਰਾਯਣੋ ਅਹੋਸੀਤਿ.

੩.

ਸੁਤ੍ਵਾਨ ਸਾਧੁ ਸੁਨਖੇਨ ਕਤੂਪਕਾਰਂ,

ਮੇਤ੍ਤਿਂਦਿਸਸ੍ਸ ਪਕਤਂ ਇਸਿਨਾ ਚ ਸੁਤ੍ਵਾ;

ਸਮ੍ਮਾ ਕਰੋਥ ਕਰੁਣਞ੍ਚ ਪਰੂਪਕਾਰਂ,

ਤਂ ਸਬ੍ਬਦਾ ਭਵਤਿ ਵੋ ਭਵਭੋਗਹੇਤੂਤਿ.

ਮਰੁਤ੍ਤਬ੍ਰਾਹ੍ਮਣਸ੍ਸ ਵਤ੍ਥੁਂ ਅਟ੍ਠਮਂ.

੧੯. ਪਾਨੀਯਦਿਨ੍ਨਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ¶ ਅਞ੍ਞਤਰਸ੍ਮਿਂ ਜਨਪਦੇ ਕਿਰੇ ਕੋ ਮਨੁਸ੍ਸੋ ਰਟ੍ਠਤੋ ਰਟ੍ਠਂ ਜਨਪਦਤੋ ਜਨਪਦਂ ਵਿਚਰਨ੍ਤੋ ਅਨੁਕ੍ਕਮੇਨ ਚਨ੍ਦਭਾਗਾਨਦੀਤੀਰਂ ਪਤ੍ਵਾ ਨਾਵਂ ਅਭਿਰੁਹਿਤ੍ਵਾ ਪਰਤੀਰਂ ਗਚ੍ਛਤਿ. ਅਥਾਪਰਾ ਗਬ੍ਭਿਨਿਤ੍ਥੀ ਤਾਯ ਏਵ ਨਾਵਾਯ ਗਚ੍ਛਤਿ, ਅਥ ਨਾਵਾ ਗਙ੍ਗਾਮਜ੍ਝਪ੍ਪਤ੍ਤਕਾਲੇ ਤਸ੍ਸਾ ਕਮ੍ਮਜਵਾਤਾ ਚਲਿਂਸੁ. ਤਤੋ ਸਾ ਵਿਜਾਯਿਤੁਮਸਕ੍ਕੋਨ੍ਤੀ ਕਿਲਨ੍ਤਾ ਪਾਨੀਯਂ ਮੇ ਦੇਥ, ਪਿਪਾਸਿਤਾਮ੍ਹਿਤਿ ਮਨੁਸ੍ਸੇ ਯਾਚਿ. ਤੇ ਤਸ੍ਸਾ ਵਚਨਂ ਅਸੁਣਨ੍ਤਾ ਵਿਯ ਪਾਨੀਯਂ ਨਾਦਂਸੁ, ਅਥ ਸੋ ਜਾਨਪਦਿਕੋ ਤਸ੍ਸਾ ਕਰੁਣਾਯਨ੍ਤੋ [ਕਰੁਣਾਯਪਾਨੀਯਂ, ਕਰੁਣਾਯਨ੍ਤੋਪਾਨੀਯਂ, ਕਰੁਣਾਯਤੋਯਂ ਇਤਿਚਕਤ੍ਥਚਿ] ਤੋਯਂ ਗਹੇਤ੍ਵਾ ਮੁਖੇ ਆਸਿਞ੍ਚਿ, ਤਸ੍ਮਿਂ ਖਣੇ ਸਾ ਲਦ੍ਧਸ੍ਸਾਸਾ ਸੁਖੇਨ ਦਾਰਕਂ ਵਿਜਾਯਿ, ਅਥ ਤੇ ਤੀਰਂ ਪਤ੍ਵਾ ਕਤਿਪਯਦਿਵਸੇਨ ਅਤ੍ਤਨੋ ਅਤ੍ਤਨੋ ਠਾਨਂ ਪਾਪੁਣਿਂਸੁ. ਅਥਾਪਰਭਾਗੇ ਸੋ ਜਾਨਪਦਿਕੋ ਅਞ੍ਞਤਰਕਿਚ੍ਚਂ ਪਟਿਚ੍ਚ ਤਸ੍ਸਾ ਇਤ੍ਥਿਯਾ ਵਸਨਨਗਰਂ ਪਤ੍ਵਾ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਨਿਵਾਸਨਟ੍ਠਾਨਂ ਅਲਭਿਤ੍ਵਾ ਨਗਰਦ੍ਵਾਰੇ ਸਾਲਂ ਗਨ੍ਤ੍ਵਾ ਤਤ੍ਥ ਨਿਪਜ੍ਜਿ. ਤਸ੍ਮਿਂਯੇਵ ਦਿਵਸੇ ਚੋਰਾ ਨਗਰਂ ਪਵਿਸਿਤ੍ਵਾ ਰਾਜਗੇਹੇ ਸਨ੍ਧਿਂ ਛਿਨ੍ਦਿਤ੍ਵਾ ਧਨਸਾਰਂ ਗਹੇਤ੍ਵਾ ਗਚ੍ਛਨ੍ਤਾ ਰਾਜਪੁਰਿਸੇਹਿ ਅਨੁਬਨ੍ਧਾ ਗਨ੍ਤ੍ਵਾ ਤਾਯੇਵ ਸਾਲਾਯ ਛਡ੍ਡੇਤ੍ਵਾ ਪਲਾਯਿਂਸੁ. ਅਥ ਰਾਜਪੁਰਿਸਾ ਆਗਨ੍ਤ੍ਵਾ ਚੋਰੇ ਅਪਸ੍ਸਨ੍ਤਾ ਤਂ ਜਾਨਪਦਿਕਂ ਦਿਸ੍ਵਾ ਅਯਂ ਚੋਰੋਤਿ ਗਹੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਂ ਬਨ੍ਧਿਤ੍ਵਾ ਪੁਨ ਦਿਵਸੇ ਰਞ੍ਞੋ ਦਸ੍ਸੇਸੁਂ. ਰਞ੍ਞਾ ਕਸ੍ਮਾ ਭਣੇ ਚੋਰਕਮ੍ਮ ਮਕਾਸੀਤਿ ਪੁਚ੍ਛਿਤੋ ਨਾਹਂ ਦੇਵ ਚੋਰੋ, ਆਗਨ੍ਤੁਕੋਮ੍ਹੀਤਿ ਵੁਤ੍ਤੇ ਰਾਜਾ ਚੋਰੇ ਪਰਿਯੇਸਿਤ੍ਵਾ ਅਲਭਨ੍ਤੋ ਅਯਮੇਵ ਚੋਰੋ, ਇਮਂ ਮਾਰੇਥਾਤਿ ਆਣਾਪੇਸਿ. ਰਾਜਪੁਰਿਸੇਹਿ ਤਂ ਗਾਲ਼੍ਹਂ ਬਨ੍ਧਿਤ੍ਵਾ ਆਘਾਤਨਂ ਨੀਤੇ ਸਾ ਇਤ੍ਥੀ ਤਂ ਤਥਾ ਨੀਯਮਾਨਂ ਦਿਸ੍ਵਾ ਸਞ੍ਜਾਨਿਤ੍ਵਾ ਕਮ੍ਪਮਾਨਹਦਯਾ ਮੁਹੁਤ੍ਤੇਨ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਦੇਵ ਏਸੋ ¶ ਨ ਚੋਰੋ ਆਗਨ੍ਤੁਕੋ ਮੁਞ੍ਚਥੇਤਂ ਦੇਵਾਤਿ ਆਹ. ਰਾਜਾ ਤਸ੍ਸਾ ਕਥਂ ਅਸਦ੍ਦਹਨ੍ਤੋ ਯਜ੍ਜੇਤਂ ਮੋਚੇਤੁ ਮਿਚ੍ਛਸਿ. ਤਸ੍ਸਗ੍ਘਨਕਂ ਧਨਂ ਦਤ੍ਵਾ ਮੁਞ੍ਚਾਪੇਹੀਤਿ, ਸਾ ਸਾਮਿ ਮਮ ਗੇਹੇ ਧਨਂ ਨਤ੍ਥਿ. ਅਪਿਚ ਮਮ ਸਤ੍ਤਪੁਤ੍ਤੇਹਿ ਸਦ੍ਧਿਂ ਮਂ ਦਾਸਿਂ ਕਰੋਹਿ, ਏਤਂ ਮੁਞ੍ਚ ਦੇਵਾਤਿ ਆਹ, ਅਥ ਰਾਜਾ ਤ੍ਵਂ ਏਤਂ ਅਧੁਨਾਗਤੋਤਿ ਵਦਸਿ. ਏਤਂ ਨਿਸ੍ਸਾਯ ਪੁਤ੍ਤੇਹਿ ਸਦ੍ਧਿਂ ਅਤ੍ਤਾਨਂ ਦਾਸਤ੍ਤਂ ਸਾਵੇਸਿ. ਕਿਮੇਸੋ ਤੇ ਞਾਤਿ ਵਾ, ਉਦਾਹੁ ਉਪਕਾਰਕੋਤਿ ਪੁਚ੍ਛਨ੍ਤੋ ਆਹ.

੧.

ਕਿਂਤੇ ਭੋਤਿ ਅਯਂ ਪੋਸੋ, ਤੁਵਂ ਪੁਚ੍ਛਾਮਿ ਸਂਸਯਂ;

ਭਾਤਾ ਵਾ ਤੇ ਪਿਤਾ ਹੋਤਿ, ਪਤਿ ਵਾ ਦੇਵਰੋ ਤਵ.

੨.

ਞਾਤਿ ਸਾਲੋਹਿਤੋ ਕਿਨ੍ਨੁ, ਉਦਾਹੁ ਇਣਦਾਯਕੋ;

ਅਥੋਪਕਾਰਕੋ ਕਿਨ੍ਨੁ, ਕਸ੍ਮਾਸ੍ਸ ਦੇਸਿ ਜੀਵਿਤਂਤਿ.

ਤਤੋ ਸਾ ਆਹ.

੩.

ਏਸੋ ਮੇ ਪੁਰਿਸੋ ਦੇਵ, ਕਤਪੁਬ੍ਬੋਪਕਾਰਕੋ;

ਅਤਾਣਮੇਕਿਕਂ [ਅਤ੍ਤਾਨਮੇਕਿਕਂ ਇਤਿਕਤ੍ਥਚਿ] ਚੇਸੋ, ਦੁਕ੍ਖਿਤਂ ਮਰਣੇ ਠਿਤਂ.

੪.

ਵਿਜਾਯਿਤੁ ਮਸਕ੍ਕੋਨ੍ਤਿਂ, ਗਬ੍ਭਿਨਿਂ ਦੁਕ੍ਖਵੇਦਿਨਿਂ;

ਤੋਯੇਨ ਮਂ ਉਪਟ੍ਠਾਸਿ, ਤੇਨਾਹਂ ਸੁਖਿਤਾ ਤਦਾ.

੫.

ਭਙ੍ਗਕਲ੍ਲੋਲਮਾਲਾਯ, ਉਤ੍ਤਰਨ੍ਤਂ ਮਹਣ੍ਣਵਂ;

ਪਹਾਯ ਪਾਤੁਂ ਕੂਪਸ੍ਸ, ਯਾਤਿ ਲੋਕੋ ਪਿਪਾਸਿਤੋ.

੬.

ਤਥੇਵ ਵਿਜ੍ਜਮਾਨੇਸੁ, ਜਨੇਸੁ ਮਨੁਜਾਧਿਪ,

ਏਕਸ੍ਸੇਵ ਮਨਸ੍ਮਿਂਹਿ, ਗੁਣਂ ਤਿਟ੍ਠਤਿ ਸਾਧੁਕਂ.

੭.

ਪਹਤ੍ਵਾਨ ਮਤਂ ਹਤ੍ਥਿਂ, ਮਂਸਤ੍ਥੀ ਕੇਚਿ ਜਨ੍ਤੁਨੋ;

ਅਨੁਬਨ੍ਧਨ੍ਤਿ ਮਂਸਤ੍ਥਂ, ਸਸਂ ਧਾਵਨ੍ਤ ਮੇਕਕਂ.

੮.

ਤਥੇਵ ¶ ਵਿਜ੍ਜਮਾਨੇਸੁ, ਜਨੇਸੁ ਮਨੁਜਾਧਿਪ;

ਗੁਣਵਨ੍ਤ ਮਨੁਬਨ੍ਧਨ੍ਤਿ, ਸਪ੍ਪੁਰਿਸਂ ਕਤਵੇਦਿਕਂ.

੯.

ਤਸ੍ਮਾ ਸਪ੍ਪੁਰਿਸੇ ਧਮ੍ਮੇ, ਪਤਿਟ੍ਠਾਸ੍ਮਿ ਨਰਾਧਿਪ;

ਅਨੁਸ੍ਸਰਨ੍ਤਿ ਏਤੇਨ, ਕਤਪੁਬ੍ਬੂ ਪਕਾਰਕਂ.

੧੦.

ਅਹਞ੍ਚ ਮਮ ਪੁਤ੍ਤਾ ਚ, ਏਤੇਨਮ੍ਹ ਸੁਖਾਪਿਤਾ;

ਜੀਵਿਤਮ੍ਪਿ ਪਰਿਚ੍ਚਜ੍ਜ, ਮੁਚ੍ਚਨੀਯੋ ਅਯਂ ਮਯਾਤਿ.

ਤਤੋ ਰਾਜਾ ਦੋਵਾਰਿਕਂ ਪਕ੍ਕੋਸਿਤ੍ਵਾ ਤਮ੍ਪਿ ਪੁਚ੍ਛਿਤ੍ਵਾ ਅਧੁਨਾਗਤਭਾਵਂ ਞਤ੍ਵਾ ਤਸ੍ਸਾ ਸਪ੍ਪੁਰਿਸਧਮ੍ਮੇ ਸਨ੍ਤੁਟ੍ਠੋ ਤੇਸਂ ਉਭਿਨ੍ਨਮ੍ਪਿ ਮਹਨ੍ਤਂ ਯਸਂ ਅਨੁਪ੍ਪਦਾਸਿ. ਤੇ ਲਦ੍ਧਯਸਾ ਤ ਤੋ ਪਟ੍ਠਾਯ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣਾ ਅਹੇਸੁਨ੍ਤਿ.

੧੧.

ਧਮ੍ਮੇ ਪਤਿਟ੍ਠਿਤਮਨਾ ਅਪਿ ਮਾਤੁਗਾਮਾ,

ਏਵਂ ਲਭਨ੍ਤਿ ਵਿਭਵਞ੍ਚ ਪਸਂਸਨਞ੍ਚ;

ਧਮ੍ਮਞ੍ਚ ਸਾਧੁਚਰਿਤਂ ਮਨਸੀਕਰੋਨ੍ਤੋ,

ਧਮ੍ਮੇਸੁ ਵਤ੍ਤਥ ਸਦਾ ਸੁਚਿਸਜ੍ਜਨਾਤਿ.

ਪਾਨੀਯਦਿਨ੍ਨਸ੍ਸ ਵਤ੍ਥੁਂ ਨਵਮਂ.

੨੦. ਸਹਾਯਸ੍ਸ ਪਰਿਚ੍ਚਤ੍ਤਜੀਵਿਤਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ਪਰਿਨਿਬ੍ਬੁਤੇ ਸਾਵਤ੍ਥਿਯਂ ਸੋਮਬ੍ਰਾਹ੍ਮਣੋ ਸੋਮਦਤ੍ਤਬ੍ਰਾਹ੍ਮਣੋਤਿ ਦ੍ਵੇ ਬ੍ਰਾਹ੍ਮਣਾ ਵਸਨ੍ਤਿ. ਤਤ੍ਥ ਸੋਮਦਤ੍ਤਬ੍ਰਾਹ੍ਮਣੇਨ ਸਦ੍ਧਿਂ ਸੋਮਬ੍ਰਾਹ੍ਮਣੋ ਯੇਭੁਯ੍ਯੇਨ ਦੂਤਂ ਕੀਲ਼ਤਿ. ਅਥੇਕਦਿਵਸਂ ਸੋਮਦਤ੍ਤੋ ਸੋਮਬ੍ਰਾਹ੍ਮਣਂ ਤੇਨ ਪਰਾਜੇਤ੍ਵਾ ਤਸ੍ਸ ਉਤ੍ਤਰਾਸਙ੍ਗਞ੍ਚ ਲਞ੍ਛਨਮੁਦ੍ਦਿਕਞ੍ਚ ਗਹੇਤ੍ਵਾ ਅਤ੍ਤਨੋ ਗੇਹਂ ਗਚ੍ਛਨ੍ਤੋ ਸੋਮਬ੍ਰਾਹ੍ਮਣਸ੍ਸ ਏਹਿ ਗੇਹਂ ਗਚ੍ਛਾ- ਮਾਤਿ ¶ ਆਹ. ਤਤੋ ਸੋਮੋ ਨਾਹਂ ਸਮ੍ਮ ਏਕਸਾਟਕੋ ਹੁਤ੍ਵਾ ਅਨ੍ਤਰਵੀਥਿਂ ਓਤਰਿਤੁਂ ਸਕ੍ਕੋਮਿ. ਗਮਨਤੋ ਏਤ੍ਥੇਵ ਮੇ ਠਾਨਂ ਵਰਤਰਨ੍ਤਿ ਆਹ, ਸੋਮਦਤ੍ਤੇਨ ਏਵਂ ਸਤਿ ਸਮ੍ਮ ਇਮਂ ਉਤ੍ਤਰਾਸਙ੍ਗਂ ਗਣ੍ਹਾਤਿ ਤਸ੍ਸ ਤਂ ਦਤ੍ਵਾ ਇਦਾਨਿ ਸਮ੍ਮ ਏਹੀਤਿ ਵੁਤ੍ਤੋਪਿ ਨਾਗਚ੍ਛਤਿ. ਪੁਨ ਤੇਨ ਭੋ ਕਸ੍ਮਾ ਨਾਗਚ੍ਛਸੀਤਿ ਪੁਟ੍ਠੋ ਸਮ੍ਮ ਮਮ ਹਤ੍ਥੇ ਮੁਦ੍ਦਿਕਂ ਅਪਸ੍ਸਨ੍ਤਾ ਮੇ ਪੁਤ੍ਤਦਾਰਾਦਯੋ ਮਯਾ ਸਦ੍ਧਿਂ ਕਲਹਂ ਕਰੋਨ੍ਤੀਤਿ ਆਹ, ਅਥ ਸੋ ਏਵਂ ਸਨ੍ਤੇ ਯਦਾ ਤੇ ਪਹੋਤਿ. ਤਦਾ ਮਯ੍ਹਂ ਦੇਹੀਤਿ ਮੁਦ੍ਦਿਕਮ੍ਪਿ ਦਤ੍ਵਾ ਤਂ ਗਹੇਤ੍ਵਾ ਗੇਹਂ ਅਗਮਾਸਿ. ਅਥ ਤੇ ਏਤ੍ਤਕੇਨ ਸਹਾਯਾ ਅਹੇਸੁਂ. ਅਪਰਭਾਗੇ ਸੋਮਦਤ੍ਤਬ੍ਰਾਹ੍ਮਣਂ ਅਯਂ ਪਰਦਾਰਕਮ੍ਮਂ ਅਕਾਸੀਤਿ ਮਨੁਸ੍ਸਾ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਤਸ੍ਸ ਰੂਪਸਮ੍ਪਤ੍ਤਿਂ ਦਿਸ੍ਵਾ ਰਾਜਾਣਂ ਅਕਤ੍ਵਾ ਮਾ ਭੋ ਪੁਨ ਏਵਮਕਾਸੀਤਿ ਓਵਦਿਤ੍ਵਾ ਵਿਸ੍ਸਜ੍ਜੇਸਿ. ਰਾਜਾ ਨਂ ਯਾਵਤਤਿਯਵਾਰਂ ਓਵਦਨ੍ਤੋ ਵਿਸ੍ਸਜ੍ਜੇਤ੍ਵਾ ਚਤੁਤ੍ਥੇਵਾਰੇ ਗਚ੍ਛਥੇਤਂ ਆਘਾਤਨਂ ਨੇਤ੍ਵਾ ਮਾਰੇਥਾਤਿ ਆਣਾਪੇਸਿ. ਏਵਂ ਪਾਪਕਮ੍ਮੇ ਨਿਰਤਾ ਅਨੇਕਾਕਾਰੇਨ ਓਵਦਨ੍ਤਾਪਿ ਨ ਸਕ੍ਕਾ ਨਿਵਾਰੇਤੁਂ. ਤਥਾਹਿ.

੧.

ਸੋਣਾ ਚੇਵ ਸਿਗਾਲਾ ਚ, ਵਾਯਸਾ ਨੀਲਮਕ੍ਖਿਕਾ;

ਇਚ੍ਚੇਤੇ ਕੁਣਪੇ ਸਤ੍ਤਾ, ਨ ਸਕ੍ਕਾ ਤੇ ਨਿਸੇਧਿਤੁਂ.

੨.

ਤਥਾ ਪਾਣਾਤਿਪਾਤੇਸੁ, ਪਰਦਾਰੇ ਸੁਰਾਯ ਚ;

ਮੁਸਾਵਾਦੇਸੁ ਥੇਯ੍ਯੇਸੁ, ਸਤ੍ਤਸਤ੍ਤਾ ਨ ਵਾਰਿਯਾਤਿ.

ਤਤੋ ਰਾਜਪੁਰਿਸਾ ਤਂ ਬਨ੍ਧਿਤ੍ਵਾ ਪਕ੍ਕਮਿਂਸੁ. ਤਦਾ ਸੋਮਬ੍ਰਾਹ੍ਮਣੋ ਸੋਮਦਤ੍ਤਂ ਤਥਾ ਨੀਯਮਾਨਂ ਦਿਸ੍ਵਾ ਕਮ੍ਪਮਾਨਹਦਯੋ ਰਾਜਪੁਰਿਸਾਨਂ ਸਨ੍ਤਿਕਂ ਗਨ੍ਤ੍ਵਾ ਇਮਂ ਭੋ ਮੁਹੁਤ੍ਤਂ ਮਾ ਮਾਰੇਥ. ਯਾਵ ਰਾਜਾਨਂ ਜਾਨਾਪੇਸ੍ਸਾਮੀਤਿ ਵਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤੋ ਦੇਵ ਮਮ ਜੀਵਿਤਂ ਸੋਮਦਤ੍ਤਸ੍ਸ ਬ੍ਰਾਹ੍ਮਣਸ੍ਸ ਦਸ੍ਸਾਮਿ. ਏਤਂ ਮੁਞ੍ਚਥ. ਯਦਿ ਮਾਰੇਤੁਕਾਮਾ, ਮਂ ਮਾਰੇਥਾਤਿ ਆਹ. ਰਾਜਾ ਤੁਣ੍ਹੀ [ਤੁਟ੍ਠੋ ਇਤਿਕਤ੍ਥਚਿ] ਅਹੋਸਿ, ਰਾਜਪੁਰਿਸਾ ਸੋਮਦਤ੍ਤਂ ਮੁਞ੍ਚਿਤ੍ਵਾ ¶ ਸੋਮਬ੍ਰਾਹ੍ਮਣਂ ਆਘਾਤਨਂ ਨੇਤ੍ਵਾ ਮਾਰੇਸੁਂ, ਅਹੋ ਕਤਞ੍ਞੁਨੋ ਕਤਵੇਦਿਤਾ.

ਹੋਤਿ ਚੇਤ੍ਥ.

੩.

ਕਕੂਪਕਾਰ ਮਤ੍ਤਾਨਂ, ਸਰਨ੍ਤਾ ਕੇਚਿ ਮਾਨੁਸਾ;

ਜੀਵਿਤਂ ਦੇਨ੍ਤਿ ਸੋਮੋਵ, ਸੋਮਦਤ੍ਤਸ੍ਸ ਅਤ੍ਤਨੋਤਿ.

ਸੋ ਤੇਨ ਜੀਵਿਤਦਾਨੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਮਹਨ੍ਤੇ ਕਨਕਵਿਮਾਨੇ ਦੇਵਚ੍ਛਰਾਸਹਸ੍ਸਪਰਿਵੁਤੋ ਦਿਬ੍ਬਸਮ੍ਪਤ੍ਤਿਮਨੁਭੋਨ੍ਤੋ ਪਟਿਵਸਤਿ. ਤਦਾ ਸੋਮਦਤ੍ਤਬ੍ਰਾਹ੍ਮਣੋ ਏਸੋ ਮਂ ਮਰਣਪ੍ਪਤ੍ਤਂ ਮੋਚੇਸੀਤਿ ਵਤ੍ਵਾ ਤਸ੍ਸਤ੍ਥਾਯ ਦਾਨਂ ਦਤ੍ਵਾ ਪਤ੍ਤਿਂ ਅਦਾਸਿ. ਤਾਵਦੇਵਸ੍ਸ ਤਤੋ ਬਹੁਤਰਂ ਦੇਵਿਸ੍ਸਰਿਯਂ ਅਹੋਸਿ ਦੇਵਾਨੁਭਾਵਞ੍ਚ. ਤਤੋ ਸੋ ਸੋਮਦੇਵੋ ਅਤ੍ਤਨੋ ਦੇਵਿਸ੍ਸਰਿਯਂ ਓਲੋਕੇਨ੍ਤੋ ਸਹਾਯਸ੍ਸ ਅਤ੍ਤਨੋ ਜੀਵਿਤਦਾਨਂ ਅਦ੍ਦਸ. ਦਿਸ੍ਵਾ ਅਤ੍ਤਭਾਵਂ ਵਿਜਹਿਤ੍ਵਾ ਮਾਣਵਕਵਣ੍ਣੇਨ ਸੋਮਦਤ੍ਤਬ੍ਰਾਹ੍ਮਣਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਤ੍ਤਾਨਂ ਦੇਵਲੋਕੇ ਨਿਬ੍ਬਤ੍ਤਭਾਵਂ ਪਕਾਸੇਤ੍ਵਾ ਤਂ ਗਹੇਤ੍ਵਾ ਅਤ੍ਤਨੋ ਆਨੁਭਾਵੇਨ ਦੇਵਲੋਕਂ ਨੇਤ੍ਵਾ ਯਥਾਕਾਮਂ ਸਮ੍ਪਤ੍ਤਿ ਮਨੁਭਵਾਤਿ ਵਤ੍ਵਾ ਸਤ੍ਤਾਹਂ ਦੇਵਸ੍ਸਰਿਯਂ ਦਤ੍ਵਾ ਸਤ੍ਤਮੇ ਦਿਵਸੇ ਨੇਤ੍ਵਾ ਤਸ੍ਸ ਗੇਹੇਯੇਵ ਪਤਿਟ੍ਠਾਪੇਸਿ. ਤਤ੍ਥ ਹਿ ਦਿਬ੍ਬਸਮ੍ਪਤ੍ਤਿ ਮਨੁਭੂਤਸ੍ਸ ਮਨੁਸ੍ਸਸਮ੍ਪਤ੍ਤਿ ਪਟਿਕ੍ਕੁਲਾ ਹੋਤਿ. ਤਤੋ ਸੋ ਦਿਬ੍ਬਸਮ੍ਪਤ੍ਤਿਮਨੁਸ੍ਸਰਨ੍ਤੋ ਕਿਸੋ ਦੁਬ੍ਬਲੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਅਹੋਸਿ. ਅਥੇਕਦਿਵਸਂ ਦੇਵਪੁਤ੍ਤੋ ਤਂ ਓਲੋਕੇਨ੍ਤੋ ਤਥਾ ਦੁਕ੍ਖਪ੍ਪਤ੍ਤਂ ਦਿਸ੍ਵਾ ਨ ਸਕ੍ਕਾ ਮਨੁਸ੍ਸੇਨ ਦਿਬ੍ਬਸਮ੍ਪਤ੍ਤਿਮਨੁਭਵਿਤੁਨ੍ਤਿ ਇਚ੍ਛਿਤਿਚ੍ਛਿਤਸਮ੍ਪਤ੍ਤਿਦਾਯਕਂ ਏਕਂ ਚਿਨ੍ਤਾਮਣਿਂ ਦਤ੍ਵਾ ਤਸ੍ਸ ਭਰਿਯਮ੍ਪਿ ਅਤ੍ਤਨੋ ਆਨੁਭਾਵੇਨ ਰੂਪਵਨ੍ਥਂ ਯਸਵਨ੍ਤਂ ਵਣ੍ਣਵਨ੍ਤਂ ਅਤਿਕ੍ਕਨ੍ਤਮਨੁਸ੍ਸਿਤ੍ਥਿਵਣ੍ਣਂ ਅਕਾਸਿ, ਅਪਰਭਾਗੇ ਤੇ ਜਯਮ੍ਪਤਿਕਾ ਪਚ੍ਚਕ੍ਖਤੋ ਦਿਟ੍ਠਦਿਬ੍ਬਸਮ੍ਪਤ੍ਤਿਵਿਭਵਾ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਸਹਾਯਦੇਵਪੁਤ੍ਤਸ੍ਸ ਸਨ੍ਤਿਕੇਯੇਵ ਨਿਬ੍ਬਤ੍ਤਿਂਸੂਤਿ.

੪.

ਮਨ੍ਦੇਨ ¶ ਨਨ੍ਦਿਤਮਨਾ ਉਪਕਾਰਕੇਨ,

ਪਾਣਮ੍ਪਿ ਦੇਨ੍ਤਿ ਸੁਜਨਾ ਇਤਿ ਚਿਨ੍ਤਯਿਤ੍ਵਾ;

ਮਿਤ੍ਤਦ੍ਦੁ ਮਾ ਭਵਥ ਭੋ ਉਪਕਾਰਕਸ੍ਸ;

ਪਾਸਂਸਿਯਾ ਭਵਥ ਸਾਧੁਜਨੇਹਿ ਨਿਚ੍ਚਂਤਿ.

ਸਹਾਯਸ੍ਸ ਪਰਿਚ੍ਚਤ੍ਤਜੀਵਿਤਕਸ੍ਸ ਵਤ੍ਥੁਂ ਦਸਮਂ.

ਨਨ੍ਦਿਯਰਾਜਵਗ੍ਗੋ ਦੁਤਿਯੋ.

ਯਕ੍ਖਵਞ੍ਚਿਤਵਗ੍ਗੋ

੨੧. ਯਕ੍ਖਵਞ੍ਚਿਤ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ¶ ਪਰਿਨਿਬ੍ਬੁਤਮ੍ਹਿ ਕੋਸਲਰਞ੍ਞੋ ਕਿਰ ਜਨਪਦੇ ਤੁਣ੍ਡਗਾਮੋਨਾਮ ਅਹੋਸਿ. ਤਤ੍ਥੇਕੋ ਬੁਦ੍ਧਦਾਸੋ ਨਾਮ ਮਨੁਸ੍ਸੋ ‘‘ਯਾਵਜੀਵਂ ਬੁਦ੍ਧਂ ਸਰਣਂ ਗਚ੍ਛਾਮਿ. ਬੁਦ੍ਧੋ ਮੇ ਸਰਣਂ ਤਾਣਂ ਲੇਣਂ ਪਰਾਯਣਨ੍ਤਿ’’ ਏਵਂ ਜੀਵਿਤਪਰਿਯਨ੍ਤਂ ਬੁਦ੍ਧਂ ਸਰਣਂ ਗਤੋ ਪਟਿਵਸਤਿ, ਤਸ੍ਮਿਂ ਸਮਯੇ ਏਕੋ ਜਨਪਦਵਾਸਿਕੋ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਤਂ ਤੁਣ੍ਡਗਾਮਂ ਪਤ੍ਵਾ ਤਸ੍ਸੇਵ ਘਰੇ ਨਿਵਾਸਂ ਕਪ੍ਪੇਸਿ, ਤਸ੍ਸ ਪਨ ਜਾਨਪਦਿਕਸ੍ਸ ਸਰੀਰੇ ਏਕੋ ਯਕ੍ਖੋ ਆਵਿਸਿਤ੍ਵਾ ਪੀਲ਼ੇਤਿ, ਤਦਾ ਤਸ੍ਸ ਗਾਮਸ੍ਸ ਪਵਿਸਨਕਾਲੇ ਯਕ੍ਖੋ ਬੁਦ੍ਧਦਾਸੋ ਪਾਸਕਸ੍ਸ ਗੁਣਤੇਜੇਨ ਤਸ੍ਸ ਗੇਹਂ ਪਵਿਸਿਤੁਂ ਅਸਕ੍ਕੋਨ੍ਤੋ ਤਂ ਮੁਞ੍ਚਿਤ੍ਵਾ ਬਹਿਗਾਮੇ ਸਤ੍ਤਾਹਂ ਅਟ੍ਠਾਸਿ ਤਸ੍ਸਾਗਮਨਂ ਓਲੋਕੇਨ੍ਤੋ. ਤਤੋ ਸੋ ਜਾਨਪਦਿਕੋ ਸਤ੍ਤਦਿਵਸਂ ਤਤ੍ਥ ਵਸਿਤ੍ਵਾ ਸਤ੍ਤਮੇ ਦਿਵਸੇ ਸਕਰਟ੍ਠਂ ਗਨ੍ਤੁਕਾਮੋ ਗਾਮਾ ਨਿਕ੍ਖਮਿ. ਅਥ ਤਂ ਤਥਾ ਨਿਕ੍ਖਨ੍ਤਂ ਦਿਸ੍ਵਾ ਯਕ੍ਖੋ ਅਗ੍ਗਹੇਸਿ, ਅਥ ਸੋ ਤਂ ਏਤ੍ਤਕਂ ਕਾਲਂ ਕੁਹਿਂਗਤੋਸੀਤਿ ਪੁਚ੍ਛਿ. ਯਕ੍ਖੋ ਭੋ ਤਵਤ੍ਥਾਯ ਏਤ੍ਥ ਵਸਨ੍ਤਸ੍ਸ ਮੇ ਸਤ੍ਤਾਹਂ ਅਤਿਕ੍ਕਨ੍ਤਨ੍ਤਿ. ਤਤੋ ਸੋ ਕੋ ਤੇ ਮਯਾ ਅਤ੍ਥੋ, ਕਿਂ ਤੇ ਦਮ੍ਮੀਤਿ, ਅਥ ਯਕ੍ਖੇਨ ਭੋ ਅਹਂ ਖੁਦਾਯ ਪੀਲ਼ਿਤੋ ਭਤ੍ਤੇਨ ਮੇ ਅਤ੍ਥੋਤਿ ਵੁਤ੍ਤੋ ਸੋ ਏਵਂ ਸਤਿ ਕਸ੍ਮਾ ਮਂ ਅਨ੍ਤੋਗੇਹੇ ਵਸਨ੍ਤਂ ਨ ਗਣ੍ਹੀਤਿ ਆਹ. ਯਕ੍ਖੇਨ ਭੋ ਤਸ੍ਮਿਂ ਘਰੇ ਬੁਦ੍ਧਂ ਸਰਣਂ ਗਤੋ ਏਕੋ ਉਪਸਕੋ ਅਤ੍ਥਿ, ਤਸ੍ਸ ਸੀਲਤੇਜੇਨ ਗੇਹਂ ਪਵਿਸਿਤੁਮਸਕ੍ਕੋਨ੍ਤੋ ਅਟ੍ਠਾਸਿਨ੍ਤਿ ਵੁਤ੍ਤੋ ਜਾਨਪਦਿਕੋ ਸਰਣਂ ਨਾਮ ਕਿਨ੍ਤਿ ਅਜਾਨਨ੍ਤੋ ਕਿਨ੍ਤਿ ਵਤ੍ਵਾ ਸੋ ਸਰਣਂ ਅਗ੍ਗਹੇਸੀਤਿ ਯਕ੍ਖਂ ਪੁਚ੍ਛਿ. ਯਕ੍ਖੋ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਵਤ੍ਵਾ ਸਰਣਂ ਅਗ੍ਗਹੇਸੀਤਿ ਆਹ. ਤਂ ਸੁਤ੍ਵਾ ਜਾਨਪਦਿਕੋ ਇਦਾਨਿ ਇਮਂ ਵਞ੍ਚੇਸ੍ਸਾਮੀਤਿ ਚਿਨ੍ਤੇਤ੍ਵਾ ਤੇਨਹਿ ਯਕ੍ਖ ਅਹਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮੀਤਿ ਆਹ. ਏਵਂ ਵੁਤ੍ਤਮਤ੍ਤੇਯੇਵ ਯਕ੍ਖੋ ਮਹਾਸਦ੍ਦਂ ਕਰੋਨ੍ਤੋ ਭ ਯੇ ਨ ਭਮਨ੍ਤੋ ¶ ਪਲਾਯਿ, ਏਵਂ ਸਮ੍ਮਾਸਮ੍ਬੁਦ੍ਧਸ੍ਸ ਸਰਣਂ ਇਧਲੋਕੇ ਭਯੋ ਪਦ੍ਦਵ ਨਿਵਾਰਣਤ੍ਥਂ ਹੋਤਿ, ਪਰਲੋਕੇ ਸਗ੍ਗਮੋਕ੍ਖਾਵਹਂ. ਤਥਾਹਿ.

੧.

ਬੁਦ੍ਧੋਤਿ ਵਚਨਂ ਏਤਂ, ਅਮਨੁਸ੍ਸਾਨਂ ਭਯਾਵਹਂ;

ਬੁਦ੍ਧਭਤ੍ਤਿਕਜਨ੍ਤੂਨਂ, ਸਬ੍ਬਦਾ ਮੁਦਮਾਵਹਂ.

੨.

ਸਬ੍ਬੋਪਦ੍ਦਵਨਾਸਾਯ, ਪਚ੍ਚਕ੍ਖਦਿਬ੍ਬਮੋਸਧਂ;

ਦਿਬ੍ਬਮਨ੍ਤਂ ਮਹਾਤੇਜਂ, ਮਹਾਯਨ੍ਤਂ ਮਹਬ੍ਭੁਤਂ.

੩.

ਤਸ੍ਮਾ ਸੋ ਦਾਰੁਣੋ ਯਕ੍ਖੋ,

ਦਿਸ੍ਵਾ ਤਂ ਸਰਣੇ ਠਿਥਂ;

ਉਬ੍ਬਿਗ੍ਗੋ ਚ ਭਯਪ੍ਪਤ੍ਤੋ,

ਲੋਮਹਟ੍ਠੋ ਚ ਛਮ੍ਭੀਤੋ.

੪.

ਭਮਨ੍ਤੋ ਧਾਵਿਤਂ ਦਿਸ੍ਵਾ, ਤਿਮਿਰੋਵ ਸੁਰਿਯੁਗ੍ਗਤੇ,

ਸਿਮ੍ਬਲਿਤੂਲਭਟ੍ਠਂਵ, ਚਣ੍ਡਵਾਤੇਨ ਖਣ੍ਡਿਤਂ.

੫.

ਯਂ ਦੁਕ੍ਖਂ ਰਾਜਚੋਰਾਰਿ, ਯਕ੍ਖਪੇਤਾ ਦਿਸਮ੍ਭਵਂ;

ਨਿਚ੍ਛਨ੍ਤੇਨ ਮਨੁਸ੍ਸੇਨ, ਗਨ੍ਤਬ੍ਬਂ ਸਰਣਤ੍ਤਯਂਤਿ.

ਤਤੋ ਜਾਨਪਦਿਕੋ ਸਰਣਾਗਮਨੇ ਮਹਾਗੁਣਂ ਮਹਾਨਿਸਂਸਂ ਓਲੋਕੇਤ੍ਵਾ ਬੁਦ੍ਧੇ ਸਗਾਰਵੋ ਸਪ੍ਪੇਮੋ ‘‘ਜੀਵਿਤਪਰਿਯਨ੍ਤਂ ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਸਰਣਂ ਗਨ੍ਤ੍ਵਾ ਤੇਨੇਵ ਸਰਣਾਗਮਨਾਨੁਭਾਵੇਨ ਜੀਵਿਤਪਰਿਯੋਸਾਨੇ ਸੁਤ੍ਤਪ੍ਪਬੁਦ੍ਧੋਵਿਯ ਦੇਵਲੋਕੇ ਨਿਬ੍ਬਤ੍ਤੀਤਿ.

੬.

ਦਿਸ੍ਵਾਨ ਏਵਂ ਸਰਣਂ ਗਤਂ ਤਂ,

ਅਪੇਨ੍ਤਿ ਯਕ੍ਖਾਪਿ ਮਹਬ੍ਭਯੇਨ;

ਪਾਲੇਥ ਸੀਲਂ ਸਰਣਞ੍ਚ ਤਸ੍ਮਾ,

ਜਹਾਥ ਦੁਰਿਤਂ ਸੁਗਤਿਂ ਭਜਵ੍ਹੋਤਿ.

ਯਕ੍ਖਵਞ੍ਚਿਤਵਤ੍ਥੁਂ ਪਥਮਂ.

੨੨. ਮਿਚ੍ਛਦਿਟ੍ਠਿਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ¶ ਧਰਮਾਨੇ ਰਾਜਗਹਨਗਰੇ ਕਿਰ ਏਕੋ ਬ੍ਰਹ੍ਮਭਤ੍ਤਿਕੋ ਮਿਚ੍ਛਾਦਿਟ੍ਠਿਕੋ ਪਟਿਵਸਤਿ, ਤਤ੍ਥੇਵ ਸਮ੍ਮਾਦਿਟ੍ਠਿਕੋਪਿ. ਤੇਸਂ ਉਭਿਨ੍ਨਮ੍ਪਿ ਦ੍ਵੇ ਪੁਤ੍ਤਾ ਅਹੇਸੁਂ. ਤੇ ਏਕਤੋ ਕੀਲ਼ਨ੍ਤਾ ਵਡ੍ਢਨ੍ਤਿ. ਅਥਾਪਰਭਾਗੇ ਗੁਲ਼ਕੀਲ਼ਂਕੀਲ਼ਨ੍ਤਾਨਂ ਸਮ੍ਮਾਦਿਟ੍ਠਿਕਸ੍ਸ ਪੁਤ੍ਤੋ ‘‘ਨਮੋ ਬੁਦ੍ਧਯਾ’’ਤਿ ਵਤ੍ਵਾ ਗੁਲ਼੍ਹਂ ਖਿਪਨ੍ਤੋ ਦਿਵਸੇ ਦਿਵਸੇ ਜਿਨਾਤਿ. ਮਿਚ੍ਛਾਦਿਟ੍ਠਿਕਸ੍ਸ ਪੁਤ੍ਤੋ ‘‘ਨਮੋ ਬ੍ਰਹ੍ਮੁਨੋ’’ਤਿ ਵਤ੍ਵਾ ਖਿਪਨ੍ਤੋ ਪਰਾਜੇਤਿ, ਤਤੋ ਮਿਚ੍ਛਾਦਿਟ੍ਠਿਕਸ੍ਸ ਪੁਤ੍ਤੋ ਨਿਚ੍ਚਂ ਜਿਨਨ੍ਤਂ ਸਮ੍ਮਾਦਿਟ੍ਠਿਕਂ ਕੁਮਾਰਂ ਦਿਸ੍ਵਾ ਸਮ੍ਮ ਤ੍ਵਂ ਨਿਚ੍ਚਮੇਵ ਜਿਨਾਸਿ, ਕਿਂ ਵਤ੍ਵਾ ਗੁਲ਼ਂ ਖਿਪਸੀਤਿ ਪੁਚ੍ਛਿ. ਸੋਹਂ ਸਮ੍ਮ ‘‘ਨਮੋ ਬੁਦ੍ਧਾਯਾ’’ਤਿ ਵਤ੍ਵਾ ਖਿਪਾਮੀਤਿ ਆਹ. ਸੋਪਿ ਤਤੋ ਪਟ੍ਠਾਯ ‘‘ਨਮੋ ਬੁਦ੍ਧਾਯਾ’’ਤਿ ਵਤ੍ਵਾ ਖਿਪਤਿ, ਅਥ ਤੇ ਯੇਭੁਯ੍ਯੇਨ ਦੂਤੇ ਸਮਸਮਾਵ ਹੋਨ੍ਤਿ. ਅਪਰਭਾਗੇ ਮਿਚ੍ਛਾਦਿਟ੍ਠਿਕਸ੍ਸ ਪੁਤ੍ਤੋ ਪਿਤਰਾ ਸਦ੍ਧਿਂ ਦਾਰੂਨਮਤ੍ਥਾਯ ਵਨਂ ਗਨ੍ਤ੍ਵਾ ਸਕਟੇਨ ਦਾਰੁਂ ਗਹੇਤ੍ਵਾ ਆਗਚ੍ਛਨ੍ਤੋ ਨਗਰਦ੍ਵਾਰਸਮੀਪੇ ਸਕਟਂ ਵਿਸ੍ਸਜ੍ਜੇਤ੍ਵਾ ਤਿਣੇ ਖਾਦਨਤ੍ਥਾਯ ਗੋਣੇ ਵਿਸ੍ਸਜ੍ਜੇਸਿ, ਗੋਣਾ ਤਿਣਂ ਖਾਦਨ੍ਤੋ ਅਞ੍ਞੇਹਿ ਗੋਰੂਪੇਹਿ ਸਦ੍ਧਿਂ ਅਨ੍ਤੋਨਗਰਂ ਪਵਿਸਿਂਸੁ. ਅਥਸ੍ਸ ਪਿਤਾ ਗੋਣੇ ਪਰਿਯੇਸਨ੍ਤੋ ਸਕਟਂ ਓਲੋਕੇਹੀਤਿ ਪੁਤ੍ਤਂ ਨਿਵਤ੍ਤੇਤ੍ਵਾ ਨਗਰਂ ਪਵਿਟ੍ਠੋ ਅਹੋਸਿ, ਅਥ ਸਾਯਣ੍ਹੇ ਜਾਤੇ ਮਨੁਸ੍ਸਾ ਨਗਰਦ੍ਵਾਰਂ ਪਿਦਹਿਂਸੁ, ਤਤੋ ਕੁਮਾਰੋ ਬਹਿਨਗਰੇ ਦਾਰੁਸਕਟਸ੍ਸ ਹੇਟ੍ਠਾ ਸਯਨ੍ਤੋ ਨਿਦ੍ਦੂਪਗਤੋ ਅਹੋਸਿ. ਅਥ ਤਸ੍ਸਾ ਰਤ੍ਤਿਯਾ ਸਮ੍ਮਾਦਿਟ੍ਠਿਕੋ ਚ ਮਿਚ੍ਛਾਦਿਟ੍ਠਿਕੋ ਚਾਤਿ ਦ੍ਵੇ ਯਕ੍ਖਾ ਗੋਚਰਂ ਪਰਿਯੇਸਮਾਨਾ ਸਕਟਸ੍ਸ ਹੇਟ੍ਠਾ ਨਿਪਨ੍ਨਂ ਕੁਮਾਰਂ ਅਦ੍ਦਸਂਸੁ, ਤੇਸੁ ਮਿਚ੍ਛਾਦਿਟ੍ਠਿਕੋ ਇਮਂ ਖਾਦਾਮੀਤਿ ਆਹ. ਅਥਾਪਰੋ ਮਾ ਏਵ ਮਕਾਸਿ, ‘‘ਨਮੋ ਬੁਦ੍ਧਾਯਾ’’ਤਿ ਵਾਚਕੋ ਏਸੋਤਿ, ਖਾਦਾਮੇਵੇਤਨ੍ਤਿ ਵਤ੍ਵਾ ਇਤਰੇਨ ਯਾਵਤਤਿਯਂ ਵਾਰਿਯਮਾਨੋਪਿ ਗਨ੍ਤ੍ਵਾ ਤਸ੍ਸ ਪਾਦੇ ਗਹੇਤ੍ਵਾ ਆਕਡ੍ਢਿ. ਤਸ੍ਮਿਂ ਖਣੇ ਦਾਰਕੋ ਪੁਬ੍ਬਪਰਿਚਯੇਨ ‘‘ਨਮੋ ਬੁਦ੍ਧਾਯਾ’’ਤਿ ਆਹ ਤਂ ਸੁਤ੍ਵਾ ਯਕ੍ਖੋ ਭਯਪ੍ਪਤ੍ਤੋ ਲੋਮਹਟ੍ਠੋ ¶ ਹਤ੍ਥਂ ਵਿਸ੍ਸਜ੍ਜੇਤ੍ਵਾ ਪਟਿਕ੍ਕਮ੍ਮ ਅਟ੍ਠਾਸਿ. ਅਹੋ ਅਚ੍ਛਰਿਯਂ ਬੁਦ੍ਧਾਨੁਭਾਵਂ ਅਬ੍ਭੁਤਂ, ਏਵਂ ਅਤ੍ਤਂ ਅਨੀਯ੍ਯਾਤੇਤ੍ਵਾ ਪਰਿਚਯੇਨ ‘‘ਨਮੋ ਬੁਦ੍ਧਾਯਾ’’ਤਿ ਵੁਤ੍ਤਸ੍ਸਪਿ ਭਯਂ ਛਮ੍ਭਿਤਤ੍ਤਂ ਉਪਦ੍ਦਵਂ ਵਾ ਨ ਹੋਤਿ. ਪਗੇਵ ਅਤ੍ਤਂ ਨੀਯ੍ਯਾਤੇਤ੍ਵਾ ਯਾਵਜੀਵਂ ਬੁਦ੍ਧਂ ਸਰਣਂ ਗਤਸ੍ਸਾਤਿ. ਵੁਤ੍ਤਞ੍ਹਿ.

੧.

ਯਥਾਪਿ ਸਿਖਿਨੋ ਨਾਦਂ, ਭੁਜਙ੍ਗਾਨਂ ਭਯਾਵਹਂ;

ਏਵਂ ਬੁਦ੍ਧੋਤਿ ਵਚਨਂ, ਅਮਨੁਸ੍ਸਾਨਂ ਭਯਾਵਹਂ.

੨.

ਯਥਾ ਮਨ੍ਤਸ੍ਸ ਜਪ੍ਪੇਨ, ਵਿਲਯਂ ਯਾਤਿ ਕਿਬ੍ਬਿਸਂ;

ਏਵਂ ਬੁਦ੍ਧੋਤਿ ਵਚਨੇਨ, ਅਪਯਨ੍ਤਿ [ਪਹਾਯਨ੍ਤਿ ਇਤਿਸਬ੍ਬਤ੍ਥ] ਪਿਸਾਚਕਾ.

੩.

ਅਗ੍ਗਿਂ ਦਿਸ੍ਵਾ ਯਥਾ ਸਿਤ੍ਥਂ, ਦੂਰਤੋਵ ਵਿਲੀਯਤਿ;

ਦਿਸ੍ਵਾਨੇਵਂ ਸਰਣਗਤਂ, ਪੇਤਾ ਪੇਨ੍ਤਿਵ [ਪੇਤਾਪੇਨ੍ਤਾਵ ਇਤਿਕਤ੍ਥਚਿ] ਦੂਰਤੋ.

੪.

ਪਵਰਂ ਬੁਦ੍ਧਇਚ੍ਚੇਤ, ਮਕ੍ਖਰਦ੍ਵਯਮਬ੍ਭੁਤਂ;

ਸਬ੍ਬੋ ਪਦ੍ਦਵਨਾਸਾਯ, ਥਿਰਪਾਕਾਰ ਮੁਗ੍ਗਤਂ.

੫.

ਸਤ੍ਤਰਤਨਪਾਸਾਦਂ, ਤਮੇਵ ਵਜਿਰਂ ਗੁਹਂ;

ਤਮੇਵ ਨਾਵਂ ਦੀਪਂ ਤਂ, ਤਮੇਵ ਕਵਚਂ ਸੁਭਂ.

੬.

ਤਮੇਵ ਸਿਰਸਿ ਭਾਸਨ੍ਤਂ, ਕਿਰੀਟਂ ਰਤਨਾਮਯਂ;

ਲਲਾਟੇ ਤਿਲਕਂ ਰਮ੍ਮਂ, ਕਪ੍ਪੂਰਂ ਨਯਨਦ੍ਵਯੇ.

੭.

ਤਾਡਙ੍ਕਂ ਕਣ੍ਣਯੁਗਲੇ, ਸੋਣ੍ਣਮਾਲਾ ਗਲੇ ਸੁਭਾ;

ਏਕਾਵਲ਼ਿ ਤਾਰਹਾਰ, ਭਾਰਾ ਜਤ੍ਤੁਸੁ ਲਙ੍ਕਤਾ.

੮.

ਅਙ੍ਗਦਂ ਬਾਹੁਮੂਲਸ੍ਸ, ਕਰਗ੍ਗੇ ਵਲਯਂ ਤਥਾ;

ਅਙ੍ਗੁਲਿਸ੍ਵਙ੍ਗੁਲਿਯਞ੍ਚ, ਖਗ੍ਗਂ ਮਙ੍ਗਲਸਮ੍ਮਤਂ.

੯.

ਸੋਣ੍ਣਾ ਤਪਤ੍ਤ ਮੁਣ੍ਹੀਸਂ, ਸਬਾਣਂਵ ਸਰਾਸਨਂ;

ਤਮੇਵ ਸਬ੍ਬਾਲਙ੍ਕਾਰਂ, ਤਮੇਵ ਦੁਰਿਤਾਪਹਂ.

੧੦.

ਤਸ੍ਮਾ ¶ ਹਿ ਪਣ੍ਡਿਤੋ ਪੋਸੋ,

ਲੋਕਲੋਚਨਸਤ੍ਥੁਨੋ;

ਸਰਣਂ ਤਸ੍ਸ ਗਨ੍ਤੇਵ,

ਗੁਣਨਾਮਂ ਏਹਿਪਸ੍ਸਿਕਂ.

੧੧.

ਨਮੋਤਿ ਵਚਨਂ ਪੁਬ੍ਬਂ, ਬੁਦ੍ਧਾਯੇਤਿ ਗਿਰਂ ਤਦਾ;

ਸੁਪਨ੍ਤੇਨ ਕੁਮਾਰੇਨ, ਮਿਚ੍ਛਾਦਿਟ੍ਠਿਕਸੂਨੁਨਾ.

੧੨.

ਸੁਤ੍ਵਾ ਵੁਤ੍ਤਂ ਪਿਸਾ ਚਾਪਿ, ਮਨੁਸ੍ਸਕੁਣਪੇ ਰਤਾ;

ਨ ਹਿਂਸਨ੍ਤਿ ਅਹੋ ਬੁਦ੍ਧ, ਗੁਣਸਾਰਮਹਨ੍ਤਤਾਤਿ.

ਅਥ ਸਮ੍ਮਾਦਿਟ੍ਠਿਕਯਕ੍ਖੋ ਮਿਚ੍ਛਾਦਿਟ੍ਠਿਕਸ੍ਸ ਯਕ੍ਖਸ੍ਸ ਏਵਮਾਹ, ਅਯੁਤ੍ਤਂ ਭੋ ਤਯਾ ਕਤਂ. ਬੁਦ੍ਧਗੁਣੇ ਪਹਾਰੋ ਦਿਨ੍ਨੋ, ਦਣ੍ਡਕਮ੍ਮਂ ਤਯਾ ਕਾਤਬ੍ਬਂਤਿ, ਤੇਨ ਕਿਂਮਯਾ ਸਮ੍ਮ ਕਾਤਬ੍ਬਨ੍ਤਿ ਵੁਤ੍ਤੇ ਬੁਭੁਕ੍ਖਿਤਸ੍ਸ ਆਹਾਰਂ ਦੇਹੀਤਿ ਆਹ. ਤਤੋ ਸੋ ਸਾਧੂਤਿ ਵਤ੍ਵਾ ਯਾਵਾਹਂ ਆਗਚ੍ਛਾਮਿ, ਤ੍ਵਂ ਤਾਵੇਤ੍ਥ ਵਚ੍ਛਾਹੀਤਿ ਵਤ੍ਵਾ ਬਿਮ੍ਬਿਸਾਰਰਞ੍ਞੋ ਕਞ੍ਚਨਤਟ੍ਟਕੇ ਵਡ੍ਢਿਤਂ ਰਸਭੋਜਨਂ ਆਹਰਿਤ੍ਵਾ ਕੁਮਾਰਸ੍ਸ ਪਿਤੁਵਣ੍ਣੇਨ ਦਾਰਕਂ ਭੋਜੇਤ੍ਵਾ ਪੁਨ ਕੁਮਾਰੇਨ ਵੁਤ੍ਤਬੁਦ੍ਧਵਚਨਞ੍ਚ ਅਤ੍ਤਨਾ ਕਤਵਾਯਾਮਂ ਚਾਤਿ ਸਬ੍ਬਂ ਤਟ੍ਟਕੇ ਲਿਖਿਤ੍ਵਾ ਇਦਂ ਰਞ੍ਞੋਯੇਵ ਪਞ੍ਞਾਯਤੂਤਿ ਅਧਿਟ੍ਠਾਯ ਅਗਮਂਸੁ, ਅਥ ਪਭਾਤਾਯ ਰਤ੍ਤਿਯਾ ਰਞ੍ਞੋ ਭੋਜਨਕਾਲੇ ਰਾਜਪੁਰਿਸਾ ਤਤ੍ਥ ਤਟ੍ਟਕਂ ਅਦਿਸ੍ਵਾ ਨਗਰਂ ਉਪਪਰਿਕ੍ਖਨ੍ਤਾ ਸਕਟੇ ਦਾਰਕਞ੍ਚ ਤਟ੍ਟਕਞ੍ਚ ਦਿਸ੍ਵਾ ਤਟ੍ਟਕੇਨ ਸਦ੍ਧਿਂ ਤਂ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਤਟ੍ਟਕੇ ਅਕ੍ਖਰਾਦੀਨਿ ਦਿਸ੍ਵਾ ਵਾਚੇਤ੍ਵਾ ਤਸ੍ਸ ਗੁਣੇ ਪਸਨ੍ਨੋ ਮਹਨ੍ਤੇਨ ਯਸੇਨ ਸਦ੍ਧਿਂ ਸੇਟ੍ਠਿਟ੍ਠਾਨਮਦਾਸਿ.

੧੩.

ਜਿਨਸ੍ਸ ਨਾਮਂ ਸੁਪਿਨੇਨ ਪੇਵਂ,

ਨ ਹੋਤਿ ਭੀਤਿਂ ਲਪਨੇਨ ਯਸ੍ਮਾ;

ਤਸ੍ਮਾ ਮੁਨਿਨ੍ਦਂ ਸਤਤਂ ਸਰਾਥ,

ਗੁਣੇ ਸਰਨ੍ਤਾ ਸਰਣਞ੍ਚ ਯਾਥਾਤਿ.

ਮਿਚ੍ਛਾਦਿਟ੍ਠਿਕਸ੍ਸ ਵਤ੍ਥੁਂ ਦੁਤਿਯਂ.

੨੩. ਪਾਦਪੀਠਿਕਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ¶ ਮਹਾਬੋਧਿਤੋ ਕਿਰ ਦਕ੍ਖਿਣਪਸ੍ਸੇ ਏਤਂ ਪਚ੍ਚਨ੍ਤਨਗਰਂ ਅਹੋਸਿ. ਤਤ੍ਥ ਸਦ੍ਧਾਸਮ੍ਪਨ੍ਨੋ ਰਤਨਤ੍ਤਯਮਾਮਕੋ ਏਕੋ ਉਪਾਸਕੋ ਪਟਿਵਸਤਿ. ਤਦਾ ਏਕੋ ਖੀਣਾਸਵੋ ਭਗਵਤਾ ਪਰਿਭੁਤ੍ਤਂ ਪਾਦਪੀਠਂ ਥਵਿਕਾਯ ਪਕ੍ਖਿਪਿਤ੍ਵਾ ਗਤਗਤਟ੍ਠਾਨੇ ਪੂਜੇਨ੍ਤੋ ਅਨੁਕ੍ਕਮੇਨ ਤਂ ਨਗਰਂ ਸਮ੍ਪਾਪੁਣਿਤ੍ਵਾ ਸੁਨਿਵਤ੍ਥੋ ਸੁਪਾਰੁਤੋ ਪਤ੍ਤਂ ਗਹੇਤ੍ਵਾ ਅਨ੍ਤਰਵੀਥਿਂ ਪਟਿਪਜ੍ਜਿ ਯੁਗਮਤ੍ਤਦਸੋ ਪਬ੍ਬਜ੍ਜਾਲੀਲਾਯ ਜਨਂ ਪਰਿਤੋਸੇਨ੍ਤੋ. ਅਥ ਸੋ ਉਪਾਸਕੋ ਤਥਾ ਗਚ੍ਛਨ੍ਤਂ ਥੇਰਂ ਦਿਸ੍ਵਾ ਪਸਨ੍ਨਮਾਨਸੋ ਉਪਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਭੋਜੇਤ੍ਵਾ ਨਿਬਦ੍ਧਂ ਮਮ ਗੇਹਂ ਆਗਮਨਮਿਚ੍ਛਾਮਿ, ਮਮਾਨੁਕਮ੍ਪਾਯ ਏਤ੍ਥੇਵ ਵਸਥ ਸਾਮੀਤਿ ਯਾਚਿਤ੍ਵਾ ਨਗਰਾਸਨ੍ਨੇ ਰਮਣੀਯੇ ਵਨਸਣ੍ਡੇ ਨਦੀਕੂਲੇ ਪਣ੍ਣਸਾਲਂ ਕਤ੍ਵਾ ਥੇਰਸ੍ਸ ਤਂ ਨੀਯ੍ਯਾਤੇਤ੍ਵਾ ਚਤੁਪਚ੍ਚਯੇਹਿ ਪਟਿਜਗ੍ਗਨ੍ਤੋ ਮਾਨੇਨ੍ਤੋ ਪੂਜੇਨ੍ਤੋ ਵਸਤਿ. ਥੇਰੋਪਿ ਤਤ੍ਥ ਫਾਸੁਕਟ੍ਠਾਨੇ ਭਗਵਤਾ ਪਰਿਭੁਤ੍ਤਪਾਦਪੀਠਧਾਤੁਂ ਨਿਧਾਯ ਵਾਲੁਕਾਹਿ ਥੂਪਂ ਕਤ੍ਵਾ ਨਿਚ੍ਚਂ ਗਨ੍ਧਧੂਪਦੀਪਪੁਪ੍ਫਪੂਜਾਦੀਹਿ ਪੂਜਯਮਾਨੋ ਵਾਸਂ ਕਪ੍ਪੇਤਿ. ਤਸ੍ਮਿਂ ਸਮਯੇ ਤਸ੍ਸੋ ਪਾਸਕਸ੍ਸ ਅਨਨ੍ਤਰਗੇਹਵਾਸਿਕੋ ਏਕੋ ਇਸ੍ਸਰਭਤ੍ਤਿਕੋ ਅਤ੍ਤਨੋ ਦੇਵਤਂ ਨਿਬਦ੍ਧਂ ਨਮਸ੍ਸਤਿ. ਤਂ ਦਿਸ੍ਵਾਸ੍ਸ ਉਪਾਸਕੋ ਬੁਦ੍ਧਗੁਣੇ ਵਤ੍ਵਾ ਅਖੇਤ੍ਤੇ ਸਮ੍ਮ ਮਾ ਵਿਰਿਯਂ ਕਰੋਹਿ. ਪਜਹੇਤਂ ਦਿਟ੍ਠਿਂਤਿ ਆਹ. ਤਤੋ ਸੋ ਕੇਰਾਟਿਕੋ ਇਸ੍ਸਰਭਤ੍ਤਿਕੋ ਕੋ ਤੇ ਸਤ੍ਥੁ ਗੁਣਾਨੁਭਾਵੋ, ਅਮ੍ਹਾਕਂ ਇਸ੍ਸਰਸ੍ਸ ਗੁਣੋਵ ਮਹਨ੍ਤੋਤਿ ਵਤ੍ਵਾ ਤਸ੍ਸ ਅਗੁਣਂ ਗੁਣਨ੍ਤਿ ਕਥੇਨ੍ਤੋ ਆਹ.

੧.

ਤਿਪੁਰਂ ਸੋ ਵਿਨਾਸੇਸਿ, ਲਲਾਟਨਯਨਗ੍ਗਿਨਾ;

ਅਸੁਰੇਚ ਵਿਨਾਸੇਸਿ, ਤਿਸੂਲੇਨ ਮਹਿਸ੍ਸਰੋ.

੨.

ਜਟਾਕਲਾਪਮਾਵਤ੍ਤਂ, ਨਚ੍ਚਤੀ ਦਿਨਸਨ੍ਧਿਯਂ;

ਵਾਦੇਤਿ ਭੇਰਿਵੀਣਾਦਿਂ, ਗੀਤਂਚਾਪਿ ਸ ਗਾਯਤਿ.

੩.

ਭਰਿਯਾਯੋ ¶ ਤਸ੍ਸ ਤਿਸ੍ਸੋ, ਜਟਾਯੇਕਂ ਸਮੁਬ੍ਬਹੇ;

ਏਕਮੇਕੇਨ ਪਸ੍ਸੇਨ, ਪਸ੍ਸਮਾਨੋ ਚਰੇਕਕਂ.

੪.

ਹਤ੍ਥਿਚਮ੍ਮਮ੍ਬਰਧਰੋ, ਤੇਨੇਵ ਵਾਰਿਤਾ ਤਪੋ;

ਅਸਾਦਿਸੇਹਿ ਪੁਤ੍ਤੇਹਿ, ਰੂਪੇਨ ਚ ਸੁਪਾਕਟੋ.

੫.

ਰਤਿਯਾ ਚ ਮਧੁਪਾਨੇ ਚ, ਬ੍ਯਾਵਟੋ ਸਬ੍ਬਦਾ ਚ ਸੋ;

ਮਨੁਸ੍ਸਟ੍ਠਿਧਰੋ ਸੀਸ, ਕਪਾਲੇਨੇਸ ਭੁਞ੍ਜਕਿ.

੬.

ਨ ਜਾਤੋ ਨ ਭਯਂ ਤਸ੍ਸ, ਮਰਣਂ ਨਤ੍ਥਿ ਸਸ੍ਸਤੋ;

ਈਦਿਸੋ ਮੇ ਮਹਾਦੇਵੋ, ਨਤ੍ਥਞ੍ਞਸ੍ਸੀਦਿਸੋ ਗੁਣੋਤਿ.

ਤਂ ਸੁਤ੍ਵਾ ਉਪਾਸਕੋ ਸਮ੍ਮ ਤੁਯ੍ਹਂ ਇਸ੍ਸਰਸ੍ਸ ਏਤੇ ਗੁਣਾ ਨਾਮ ਤਾਵ ਹੋਨ੍ਤੁ. ਅਗੁਣਾ ਨਾਮ ਕਿਤ੍ਤਕਾ ਹੋਨ੍ਤੀਤਿ ਵਤ੍ਵਾ ਭਗਵਤੋ ਸਕਲਗੁਣੇ ਸਂਹਰਿਤ੍ਵਾ ਕਥੇਨ੍ਤੋ ਆਹ.

੭.

ਲੋਕੇ ਸਬ੍ਬਸਵਨ੍ਤੀਨਂ, ਆਧਾਰੋ ਸਾਗਰੋ ਯਥਾ;

ਸਬ੍ਬੇਸਂ ਗੁਣਰਾਸੀਨਂ, ਆਧਾਰੋਵ ਤਥਾਗਤੋ.

੮.

ਚਰਾਚਰਾਨਂ ਸਬ੍ਬੇਸਂ, ਆਧਾਰਾਵ ਧਰਾ ਅਯਂ;

ਤਥਾ ਗੁਣਾਨਂ ਸਬ੍ਬੇਸਂ, ਆਧਾਰੋਵ ਤਥਾਗਤੋ.

੯.

ਏਵਂ ਸਨ੍ਤੋ ਵਿਯਤ੍ਤੋਚ [ਵਿਯਨ੍ਤੋ ਇਤਿਕਤ੍ਥਚਿ], ਏਵਂ ਸੋ ਕਰੁਣਾਪਰੋ;

ਏਵ ਮਿਦ੍ਧਿਵਿਧਾ ਤਸ੍ਸ, ਏਵਮੇਵਂ ਗੁਣਾ ਇਤਿ.

੧੦.

ਬੁਦ੍ਧੋਪਿ ਸਕ੍ਕੋਤਿ ਨ ਯਸ੍ਸ ਵਣ੍ਣੇ,

ਕਪ੍ਪਮ੍ਪਿ ਵਤ੍ਵਾ ਖਯਤਂ ਗਮੇਤੁਂ;

ਪਗੇਵ ਚ ਬ੍ਰਹ੍ਮਸੁਰਾ ਸੁਰੇਹਿ,

ਵਤ੍ਤੁਂ ਨ ਹਾਨਨ੍ਤਗੁਣਸ੍ਸ ਵਣ੍ਣਨ੍ਤਿ.

ਏਵਂ ਵਦਨ੍ਤਾ ਪਨ ਤੇ ਉਭੋਪਿ ਅਮ੍ਹਾਕਂ ਦੇਵੋ ਉਤ੍ਤਮੋ ਅਮ੍ਹਾਕਂ ਦੇਵੋ ਉਤ੍ਤਮੋਤਿ ਕਲਹਂ ਵਡ੍ਢੇਤ੍ਵਾ ਰਞ੍ਞੋ ਸਨ੍ਤਿਕਮਗਮਂਸੁ, ਰਾਜਾ ¶ ਤੇਸਂ ਕਥਂ ਸੁਤ੍ਵਾ ਤੇਨਹਿ ਤੁਮ੍ਹਾਕਂ ਦੇਵਤਾਨਂ ਮਹਨ੍ਤਭਾਵਂ ਇਦ੍ਧਿਪਾਟਿਹਾਰਿਯੇਨ ਜਾਨਿਸ੍ਸਾਮ. ਦਸ੍ਸੇਥ ਤੇਹਿ ਨੋ ਇਦ੍ਧਿਂਤਿ ਨਗਰੇ ਭੇਰਿਂ ਚਰਾਪੇਸਿ. ਇਤੋ ਕਿਰ ਸਤ੍ਤਾਹਚ੍ਚਯੇਨ ਇਮੇਸਂ ਦ੍ਵਿਨ੍ਨਂ ਸਤ੍ਥਾਰਾਨਂ ਪਾਟਿਹਾਰਿਯਾਨਿ ਭਵਿਸ੍ਸਨ੍ਤਿ. ਸਬ੍ਬੇ ਸਨ੍ਨਿਪਤਨ੍ਤੂਤਿ ਤਂ ਸੁਤ੍ਵਾ ਨਾਨਾਦਿਸਾਸੁ ਬਹੂ ਮਨੁਸ੍ਸਾ ਸਮਾਗਮਿਂਸੁ, ਅਥ ਮਿਚ੍ਛਾਦਿਟ੍ਠਿਕਾ ਅਜ੍ਜ ਅਮ੍ਹਾਕਂ ਦੇਵਸ੍ਸ ਆਨੁਭਾਵਂ ਪਸ੍ਸਾਮਾਤਿ ਮਹਨ੍ਤਂ ਪੂਜਂ ਕਰੋਨ੍ਤੋ ਤਤ੍ਥ ਸਾਰਂ ਨਾਦ੍ਦਸਂਸੁ, ਸਮ੍ਮਾਦਿਟ੍ਠਿਕਾਪਿ ਅਜ੍ਜ ਅਮ੍ਹਾਕਂ ਭਗਵਤੋ ਆਨੁਭਾਵਂ ਪਸ੍ਸਿਸ੍ਸਾਮਾਤਿ ਵਾਲ਼ੁਕਾਥੂਪਂ ਗਨ੍ਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਪਦਕ੍ਖਿਣਂ ਕਤ੍ਵਾ ਅਞ੍ਜਲਿਮ੍ਪਗ੍ਗਯ੍ਹ ਅਟ੍ਠਂਸੁ. ਅਥ ਰਾਜਾਪਿ ਬਲਵਾਹਨਪਰਿਵੁਤੋ ਏਕਮਨ੍ਤੇ ਅਟ੍ਠਾਸਿ. ਨਾਨਾਸਮਯਵਾਦਿਨੋਪਿ ਅਜ੍ਜ ਤੇਸਂ ਪਾਟਿਹਾਰਿਯਂ ਪਸ੍ਸਿਸ੍ਸਾਮਾਤਿ ਮਞ੍ਚਾਤਿਮਞ੍ਚਂ ਕਤ੍ਵਾ ਅਟ੍ਠਂਸੁ. ਤੇਸਂ ਸਮਾਗਮੇ ਸਮ੍ਮਾਦਿਟ੍ਠਿਕਾ ਵਾਲ਼ੁਕਾਥੂਪ ਮਭਿਮੁਖਂ ਕਤ੍ਵਾ ਅਞ੍ਜਲਿਮ੍ਪਗ੍ਗਯ੍ਹ ਸਾਮਿ ਅਮ੍ਹਾਕਂ ਭਗਵਾ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਣਧਾਤੁਯਾ ਪਰਿਨਿਬ੍ਬਾਯਿ. ਸਾਰਿਪੁਤ੍ਤਮਹਾਮੋਗ੍ਗਲ੍ਲਾਨਾਦਯੋ ਅਸੀਤਿਮਹਾਸਾਵਕਾਪਿ ਪਰਿਨਿਬ੍ਬਾਯਿਂਸੁ, ਨਤ੍ਥੇਤ੍ਥ ਅਮ੍ਹਾਕਂ ਅਞ੍ਞਂ ਪਟਿਸਰਣਨ੍ਤਿ ਵਤ੍ਵਾ ਸਚ੍ਚਕਿਰਿਯਂ ਕਰੋਨ੍ਤਾ ਆਹਂਸੁ.

੧੧.

ਆਪਾਣਕੋਟਿਂ ਬੁਦ੍ਧਸ੍ਸ, ਸਰਣਂ ਨੋ ਗਤਾ ਯਦਿ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੨.

ਆਪਾਣਕੋਟਿਂ ਧਮ੍ਮਸ੍ਸ, ਸਰਣਂ ਨੋ ਗਤਾ ਯਦਿ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੩.

ਆਪਾਣਕੋਟਿਂ ਸਙ੍ਘਸ੍ਸ, ਸਰਣਂ ਨੋ ਗਤਾ ਯਦਿ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੪.

ਰਾਮਕਾਲੇ ਮੁਨਿਨ੍ਦਸ੍ਸ, ਪਾਦੁਕਾ ਚਾਸਿ ਅਬ੍ਭੁਤਾ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੫.

ਛਦ੍ਦਨ੍ਤਕਾਲੇ ¶ ਮੁਨਿਨੋ, ਦਾਠਾ ਛਰਂਸਿਰਞ੍ਜਿਤਾ;

ਤੇਨ ਸਚ੍ਚੇਨਯਂ ਧਾਤੁ, ਨਿਚ੍ਛਾਰੇਤੁ ਛ ਰਂਸਿਯੋ.

੧੬.

ਜਾਤਮਤ੍ਤੋ ਤਦਾ ਬੁਦ੍ਧੋ, ਠਿਤੋ ਪਙ੍ਕਜਮੁਦ੍ਧਨਿ;

ਨਿਚ੍ਛਾਰੇਸਾਸਭਿਂਵਾਚਂ, ਅਗ੍ਗੋ ਸੇਟ੍ਠੋਤਿਆਦਿਨਾ;

ਤੇਨ ਸਚ੍ਚੇਨਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੭.

ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਨਿਕ੍ਖਨ੍ਤੋ ਅਭਿਨਿਕ੍ਖਮਂ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੧੮.

ਮਾਰਸੇਨਂ ਪਲਾਪੇਤ੍ਵਾ, ਨਿਸਿਨ੍ਨੋ ਬੁਜ੍ਝਿ ਬੋਧਿਯਂ;

ਤੇਨ ਸਚ੍ਚੇਨ ਯਂ ਧਾਤੁ ਦਸ੍ਸੇਤੁ ਪਾਟਿਹਾਰਿਯਂ.

੧੯.

ਧਮ੍ਮਚਕ੍ਕਂ ਪਵਤ੍ਤੇਸਿ, ਜਿਨੋ ਸਿਪਤਨੇ ਤਦਾ;

ਤੇਨ ਸਚ੍ਚੇਨ ਯਂ ਧਾਤੁ, ਦਸ੍ਸੇਤੁ ਪਾਟਿਹਾਰਿਯਂ.

੨੦.

ਨਨ੍ਦੋਪਨਨ੍ਦਭੋਗਿਨ੍ਦਂ, ਨਾਗਂ ਨਾਲਾਗਿਰਿਵ੍ਹਯਂ;

ਆਲ਼ਵਕਾ ਦਯੋ ਯਕ੍ਖੇ, ਬ੍ਰਹ੍ਮਾਨੋ ਚ ਬਕਾ ਦਯੋ.

੨੧.

ਸਚ੍ਚਕਾਦਿਨਿਗਣ੍ਠੇਚ, ਕੂਟਦਨ੍ਤਾ ਦਯੋ ਦ੍ਵਿਜੇ;

ਦਮੇਸਿ ਤੇਨ ਸਚ੍ਚੇਨ, ਦਸ੍ਸੇਤੁ ਪਾਟਿਹਾਰਿਯਂਤਿ.

ਏਵਞ੍ਚ ਪਨ ਵਤ੍ਵਾ ਉਪਾਸਕਾ ਅਮ੍ਹਾਕਂ ਅਨੁਕਮ੍ਮਂ ਪਟਿਚ੍ਚ ਮਹਾਜਨਸ੍ਸ ਮਿਚ੍ਛਾਦਿਟ੍ਠਿਭੇਦਨਤ੍ਤਂ ਪਾਟਿਹਾਰਿਯਂ ਦਸ੍ਸੇਥ ਸਾਮੀਤਿ ਆਰਾਧੇਸੁਂ. ਅਥ ਬੁਦ੍ਧਾਨੁਭਾਵਞ੍ਚ ਥੇਰਾਨੁਭਾਵਞ੍ਚ ਉਪਾਸਕਾਨਂ ਸਚ੍ਚਕਿਰਿਯਾਨੁਭਾਵਞ੍ਚ ਪਟਿਚ੍ਚ ਵਾਲ਼ੁਕਾਥੂਪਂ ਦ੍ਵਿਧਾ ਭਿਨ੍ਦਿਤ੍ਵਾ ਪਾਦਪੀਠਧਾਤੁ ਆਕਾਸ ਮਬ੍ਭੁਗ੍ਗਨ੍ਤ੍ਵਾ ਛਬ੍ਬਣ੍ਣਰਂਸਿਯੋ ਵਿਸ੍ਸਜ੍ਜੇਨ੍ਤੀ ਵਿਲਾਸਮਾਨਾ ਅਟ੍ਠਾਸਿ. ਅਥ ਮਹਾਜਨਾ ਚੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤੇਨ੍ਤਾ ਸਾਧੁਕੀਲ਼੍ਹਂ ਕੀਲ਼ਨ੍ਤਾ ਮਹਾਨਾਦਂ ਪਵਤ੍ਤੇਨ੍ਤਾ ਮਹਨ੍ਤਂ ਪੂਜਮਕਂਸੁ. ਮਿਚ੍ਛਾਦਿਟ੍ਠਿਕਾਪਿ ਇਮਂ ਅਚ੍ਛਰਿਯਂ ਦਿਸ੍ਵਾ ਵਿਮ੍ਹਿਤਮਾਨਸਾ ਮਿਚ੍ਛਾਦਿਟ੍ਠਿਂ ਭਿਨ੍ਦਿਤ੍ਵਾ ਰਤਨਤ੍ਤਯਪਰਾਯਣਾ ਸਰਣ ਮਗਮਂਸੂਤਿ.

੨੨.

ਫੁਟ੍ਠੋਪਿ ¶ ਪਾਦੇਨ ਜਿਨਸ੍ਸ ਏਵਂ,

ਕਲਿਙ੍ਗਰੋ ਪਾ ਸਿ ਮਹਾਨੁਭਾਵੋ;

ਲੋਕੇਕਨਾਥਸ੍ਸ ਅਨਾਸਵਸ੍ਸ,

ਮਹਾਨੁਭਾਵੋ ਹਿ ਅਚਿਨ੍ਤਨੀਯੋਤਿ.

ਪਾਦਪੀਠਿਕਾਯ ਵਤ੍ਥੁਂ ਤਤਿਯਂ.

੨੪. ਉਤ੍ਤਰਸਾਮਣੇਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਸੋ ਕਿਰ ਪੁਰਿਮਬੁਦ੍ਧੇਸੁ [ਪੁਰਿਮਬੁਦ੍ਧੇ ਇਤਿਸਬ੍ਬਤ੍ਥ] ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਵਿਜ੍ਜਾਧਰੋ ਹੁਤ੍ਵਾ ਹਿਮਵਤਿ ਪਟਿਵਸਤਿ. ਤਦਾ ਸੁਮੇਧੋ ਨਾਮ ਸਮ੍ਮਾਸਮ੍ਬੁਦ੍ਧੋ ਵਿਵੇਕ ਮਨੁਬ੍ਰੂਹਨ੍ਤੋ ਹਿਮਵਨ੍ਤਂ ਗਨ੍ਤ੍ਵਾ ਰਮਣੀਯੇ ਪਦੇਸੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ. ਤਦਾ ਵਿਜ੍ਜਾਧਰੋ ਆਕਾਸੇਨ ਗਚ੍ਛਨ੍ਤੋ ਛਬ੍ਬਣ੍ਣਰਂਸੀਹਿ ਵਿਰਾਜਮਾਨਂ ਭਗਵਨ੍ਤਂ ਦਿਸ੍ਵਾ ਤੀਹਿ ਕਣਿਕਾਰਪੁਪ੍ਫੇਹਿ ਪੂਜੇਸਿ, ਪੁਪ੍ਫਾਨਿ ਬੁਦ੍ਧਾਨੁਭਾਵੇਨ ਸਤ੍ਥੁ ਉਪਰਿ ਛਤ੍ਤਾਕਾਰੇਨ ਅਟ੍ਠਂਸੁ, ਸੋ ਤੇਨ ਭੀਯ੍ਯੋਸੋ ਮਤ੍ਤਾਯ ਪਸਨ੍ਨਚਿਤ੍ਤੋ ਹੁਤ੍ਵਾ ਅਪਰਭਾਗੇ ਕਾਲਂਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਉਲ਼ਾਰਂ ਦਿਬ੍ਬਸਮ੍ਪਤ੍ਤਿਮਨੁਭਵਨ੍ਤੋ ਯਾਵਤਾਯੁਕਂ ਤਤ੍ਥ ਠਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਉਤ੍ਤਰੋਤਿਸ੍ਸ ਨਾਮਂ ਅਹੋਸਿ. ਸੋ ਉਤ੍ਤਮਰੂਪਧਰੋ ਵਿਞ੍ਞੁਤਂ ਪਤ੍ਤੋ ਬ੍ਰਾਹ੍ਮਣਵਿਜ੍ਜਾਸੁ ਨਿਪ੍ਫਤ੍ਤਿਂ ਪਤ੍ਵਾ ਜਾਤਿਯਾ ਰੂਪੇਨ ਵਿਜ੍ਜਾਯ ਸੀਲਾਚਾਰੇਨ ਚ ਲੋਕਸ੍ਸ ਮਹਨੀਯੋ ਜਾਤੋ, ਤਸ੍ਸ ਤਂ ਪਞ੍ਞਾਸਮ੍ਪਤ੍ਤਿਂਦਿਸ੍ਵਾ ਵਸ੍ਸਕਾਰੋ ਮਗਧਮਹਾਮਤ੍ਤੋ ਅਤ੍ਤਨੋ ਧੀਤਰਂ ਦਾਤੁਕਾਮੋ ਹੁਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਸਿ. ਸੋ ਨਿਸ੍ਸਰਣਜ੍ਝਾਸਯਤਾਯ ਤਂ ਪਟਿਕ੍ਖਿਪਿਤ੍ਵਾ ਕਾਲੇਨਕਾਲਂ ਧਮ੍ਮਸੇਨਾਪਤਿਂ ਪਯਿਰੁਪਾਸਨ੍ਤੋ ਤਸ੍ਸ ¶ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਹੁਤ੍ਵਾ ਥੇਰਂ ਉਪਟ੍ਠਹਤਿ. ਤੇਨ ਚ ਸਮਯੇਨ ਥੇਰਸ੍ਸ ਅਞ੍ਞਤਰੋ ਆਬਾਧੋ ਉਪ੍ਪਨ੍ਨੋ ਹੋਤਿ, ਤਸ੍ਸ ਭੇਸਜ੍ਜਤ੍ਥਾਯ ਉਤ੍ਤਰਸਾਮਣੇਰੋ ਪਾਤੋਵ ਪਤ੍ਤਚੀਵਰ ਮਾਦਾਯ ਵਿਹਾਰਤੋ ਨਿਕ੍ਖਮ੍ਮ ਅਨ੍ਤਰਾਮਗ੍ਗੇ ਤਲ਼ਾਕਸ੍ਸ ਤੀਰੇ ਪਤ੍ਤਂ ਠਪੇਤ੍ਵਾ ਉਦਕਸਮੀਪਂ ਗਨ੍ਤ੍ਵਾ ਮੁਖਂ ਧੋਵਤਿ, ਤਦਾ ਅਞ੍ਞਤਰੋ ਉਮ੍ਮਗ੍ਗਚੋਰੋ ਕਤਕਮ੍ਮੋ ਆਰਕ੍ਖਪੁਰਿਸੇਹਿ ਅਨੁਬਦ੍ਧੋ ਅਗ੍ਗਦ੍ਵਾਰੇਨੇਵ ਨਗਰਤੋ ਨਿਕ੍ਖਮਿਤ੍ਵਾ ਪਲਾਯਨ੍ਤੋ ਅਤ੍ਤਨਾ ਗਹਿਤਂ ਰਤਨਭਣ੍ਡਿਕਂ ਸਾਮਣੇਰਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਪਲਾਯਿ. ਸੋ ਸਾਮਣੇਰੋਪਿ ਪਤ੍ਤਸਮੀਪਂ [ਸਤ੍ਤੁਸਮੀਪਂ ਇਤਿਪਿ ਕਤ੍ਥਚਿ] ਉਪਗਤੋ ਹੋਤਿ, ਚੋਰਂ ਅਨੁਬਨ੍ਧਨ੍ਤਾ ਰਾਜਪੁਰਿਸਾ ਸਾਮਣੇਰਸ੍ਸ ਪਤ੍ਤੇ ਭਣ੍ਡਿਕਂ ਦਿਸ੍ਵਾ ਅਯਂ ਚੋਰੋ, ਇਮਿਨਾ ਚੋਰਿਯਂ ਕਤਨ੍ਤਿ ਸਾਮਣੇਰਂ ਪਚ੍ਛਾਬਾਹਂ ਬਨ੍ਧਿਤ੍ਵਾ ਵਸ੍ਸਕਾਰਸ੍ਸ ਬ੍ਰਾਹ੍ਮਣਸ੍ਸ ਦਸ੍ਸੇਸੁਂ. ਵਸ੍ਸਕਾਰੋ ਚ ਤਦਾ ਰਞ੍ਞੋ ਵਿਨਿਚ੍ਛਯੇ ਨਿਯੁਤ੍ਤੋ ਹੁਤ੍ਵਾ ਛੇਜ੍ਜਭੇਜ੍ਜਂ ਅਨੁਸਾਸਤਿ. ਸੋ ਏਸੋ ਪੁਬ੍ਬੇ ਮਮ ਵਚਨਂ ਨਾਦਿਯਿ. ਸੁਦ੍ਧਪਾਸਣ੍ਡਿਯੇਸੁ ਪਬ੍ਬਜੀਤਿ ਚ ਬਦ੍ਧਾਘਾਤਤ੍ਤਾ ਤਂ ਕਮ੍ਮਂ ਅਸੋਧੇਤ੍ਵਾਵ ਜੀਵਨ੍ਤਮੇਵੇਤਂ ਸੂਲੇ ਉਤ੍ਤਾਸੇਥਾਤਿ ਆਣਾ ਪੇਸਿ, ਰਾਜਪੁਰਿਸਾ ਤਂ ਨਿਮ੍ਬਸੂਲੇ ਉਤ੍ਤਾਸੇਸੁਂ. ਸਾਮਣੇਰੋ ਸੂਲਗ੍ਗੇ ਨਿਸਿਨ੍ਨੋ ਉਪਜ੍ਝਾਯਸ੍ਸ ਮੇ ਕੋ ਭੇਸਜ੍ਜਂ ਆਹਰਿਸ੍ਸਤੀਤਿ ਸਾਰਿਪੁਤ੍ਤਤ੍ਥੇਰਂ ਸਰਿ. ਤਤੋ ਥੇਰੋ ਤਂ ਪਵਤ੍ਤਿਂ ਞਤ੍ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਕਥੇਸਿ, ਭਗਵਾਪਿ ਮਹਾਸਾਵਕਪਰਿਵੁਤੋ ਤਸ੍ਸ ਞਾਣਪਰਿਪਾਕਂ ਓਲੋਕੇਤ੍ਵਾ ਤਂ ਠਾਨਮਗਮਾਸਿ. ਤਤੋ ਭਗਵਤੋ ਨਿਕ੍ਖਨ੍ਤਭਾਵਾ ਸਕਲਨਗਰੇ ਕੋਲਾਹਲਂ ਅਹੋਸਿ, ਮਹਾਜਨਕਾਯੋ ਸਨ੍ਨਿਪਤਿ. ਅਥ ਭਗਵਾ ਵਿਪ੍ਫੁਰਨ੍ਤਹਤ੍ਥਤਲੇ ਨਖਮਣਿਮਯੂਖਸਮ੍ਭਿਨ੍ਨਪੀਤਾਭਾਸਤਾਯ ਪਗ੍ਘਰਨ੍ਤਜਾਤਿਹਿਙ੍ਗੁਲਕਸੁਵਣ੍ਣਰਸਧਾਰਾਵਿਯ ਜਾਲਾਵਗੁਣ੍ਠਿਤਮੁਦੁਤਲੁਨਙ੍ਗੁਲਂ ਹਤ੍ਥਂ ਉਤ੍ਤਰਸ੍ਸ ਸੀਸੇ ਠਪੇਤ੍ਵਾ ਉਤ੍ਤਰ ਇਦਂ ਤੇ ਪੁਬ੍ਬੇ ਕਤਪਾਪਕਮ੍ਮਸ੍ਸ ਫਲਂ ਉਪ੍ਪਨ੍ਨਂ, ਤਤ੍ਥ ਤਯਾ ਪਚ੍ਚਵੇਕ੍ਖਣਬਲੇਨ ਅਧਿਵਾਸਨਾ ਕਾਤਬ੍ਬਾਤਿ ਆਹ. ਤੇਨੇਵ ਆਹ.

੧.

ਅਤੀਤੇ ¶ ਕਿਰ ਏਕਸ੍ਮਿਂ, ਗਾਮੇ ਤ੍ਵ ਮਸਿ ਦਾਰਕੋ;

ਦਾਰੇਕੇਹਿ ਸਮਾਗਮ੍ਮ, ਕੀਲ਼ਨ੍ਤੋ ਕੇਲ਼ਿਮਣ੍ਡਲੇ.

੨.

ਗਹੇਤ੍ਵਾ ਸੁਖੁਮਂ ਸੂਕਂ, ਤਦਾ ਤ੍ਵਂ ਨਿਮ੍ਬਜਲ੍ਲਿਯਾ;

ਉਤ੍ਤਾਸੇਸਿ ਤਤ੍ਥ ਸੂਲੇ, ਜੀਵਮਾਨਕਮਕ੍ਖਿਕਂ.

੩.

ਅਪਰਮ੍ਪਿ ਤੇ ਪਾਪਕਮ੍ਮਂ, ਪਵਕ੍ਖਾਮਿ ਸੁਣੋਹਿ ਮੇ;

ਓਵਦਨ੍ਤਿਂ ਹਿਤੇਨ ਤ੍ਵਂ, ਅਤੀਤੇ ਸਕਮਾਤਰਂ.

੪.

ਜੀਵਸੂਲੇ ਨਿਸੀਦਾਤਿ, ਕੋਪੇਨਾਭਿਸਪੀ ਤੁਵਂ;

ਇਮੇਹਿ ਦ੍ਵੀਹਿ ਪਾਪੇਹਿ, ਸਰਂ ਸਂਸਾਰਸਾਗਰੇ.

੫.

ਪਞ੍ਚਜਾਤਿਸਤੇ ਅਚ੍ਛਿ, ਜੀਵਸੂਲਮ੍ਹਿ ਨਿਮ੍ਬਜੇ;

ਅਯਂ ਤੇ ਚਰਿਮਾ ਜਾਤਿ, ਏਤ੍ਥਾਪਿਚ ਵਿਪਚ੍ਚਿ ਸੋਤਿ.

ਏਵਮਾਦਿਨਾ ਨਯੇਨ ਤਸ੍ਸ ਅਜ੍ਝਾਸਯਾਨੁਰੂਪੇਨ ਧਮ੍ਮਂ ਦੇਸੇਸਿ, ਉਤ੍ਤਰੋ ਅਮਤਾਭਿਸੇਕਸਦਿਸੇਨ ਸਤ੍ਥੁਨੋ ਹਤ੍ਥਸਮ੍ਫਸ੍ਸਸਞ੍ਜਾਤਪਸਾਦਸੋਮਨਸ੍ਸਤਾਯ ਉਲ਼ਾਰਂ ਪੀਤਿਪਾਮੋਜ੍ਜਂ ਪਟਿਲਭਿਤ੍ਵਾ ਯਥਾਪਰਿਚਿਤਂ ਵਿਪਸ੍ਸਨਾਮਗ੍ਗਂ ਸਮਾਰੂਲ਼੍ਹੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਤ੍ਥੁ ਦੇਸਨਾਵਿਲਾਸੇਨ ਮਗ੍ਗਪਟਿਪਾਟਿਯਾ ਸਬ੍ਬਕਿਲੇਸੇ ਖੇਪੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਧਮ੍ਮਂ ਸੁਤ੍ਵਾ ਤਤ੍ਥ ਸਮਾਗਤਾਨਂ ਦੇਵਮਨੁਸ੍ਸਾਨਂ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ ਵਦਨ੍ਤਿ. ਉਤ੍ਤਰੋ ਪਨ ਛਲ਼ਭਿਞ੍ਞੋ ਹੁਤ੍ਵਾ ਸੂਲਤੋ ਉਟ੍ਠਹਿਤ੍ਵਾ ਆਕਾਸੇ ਠਤ੍ਵਾ ਪਾਟਿਹਾਰਿਯਂ ਦਸ੍ਸੇਸਿ. ਮਹਾਜਨਾ ਅਚ੍ਛਰਿਯਬ੍ਭੁਤਚਿਤ੍ਤਾ ਜਾਤਾ ਅਹੇਸੁਂ. ਤਾਵਦੇਵਸ੍ਸ ਵਣੋਰੁਨ੍ਧਿ, ਸੋ ਭਿਕ੍ਖੂਹਿ ਆਵੁਸੋ ਤਾਦਿਸਂ ਦੁਕ੍ਖਂ ਅਨੁਭਵਨ੍ਤੋ ਕਥਂ ਤ੍ਵਂ ਵਿਪਸ੍ਸਨਂ ਅਨੁਯੁਞ੍ਜਿਤੁਂ ਸਕ੍ਖੀਤਿ ਪੁਟ੍ਠੋ ਪਗੇਵ ਮੇ ਆਵੁਸੋ ਸਂਸਾਰੇ ਆਦੀਨਵੋ ਸਙ੍ਖਾਰਾਨਞ੍ਚ ਸਭਾਵੋ ਸੁਦਿਟ੍ਠੋ. ਤਸ੍ਮਾਹਂ ਤਾਦਿਸਂ ਦੁਕ੍ਖਂ ਅਨੁਭਵਨ੍ਤੋਪਿ ਅਸਕ੍ਖਿਂ ਵਿਪਸ੍ਸਨਂ ਵਡ੍ਢੇਤ੍ਵਾ ਵਿਸੇਸਂ ਅਧਿਗਨ੍ਤੁਂਤਿ ਆਹ. ਅਥਾਪਰਭਾਗੇ ਸੋ ਭਿਕ੍ਖੁਸਙ੍ਘਮਜ੍ਝੇ ਅਤ੍ਤਨੋ ਪੁਬ੍ਬਚਰਿਤਾ ਪਦਾਨਂ ਪਕਾਸੇਨ੍ਤੋ ਇਮਾ ਗਾਥਾ ਅਭਾਸਿ.

੬.

ਸੁਮੇਧੋ ¶ ਨਾਮ ਸਮ੍ਬੁਦ੍ਧੋ, ਦ੍ਵਤ੍ਤਿਂਸਵਰਲਕ੍ਖਣੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਹਿਮਵਨ੍ਤ ਮੁਪਾਗਮਿ.

੭.

ਅਜ੍ਝੋਗਹੇਤ੍ਵਾ ਹਿਮਵਨ੍ਤਂ, ਅਗ੍ਗੋ ਕਾਰੁਣਿਕੋ ਮੁਨਿ;

ਪਲ੍ਲਙ੍ਕਂ ਆਭੁਜਿਤ੍ਵਾਨ, ਨਿਸੀਦਿ ਪੁਰਿਸੁਤ੍ਤਮੋ.

੮.

ਵਿਜ੍ਜਾਧਰੋ ਤਦਾ ਆਸਿਂ, ਅਨ੍ਤਲਿਕ੍ਖਚਰੋ ਅਹਂ;

ਤਿਸੂਲਂ ਸੁਕਤਂ ਗਯ੍ਹ, ਗਚ੍ਛਾਮਿ ਅਮ੍ਬਰੇ ਤਦਾ.

੯.

ਪਬ੍ਬਤਗ੍ਗੇ ਯਥਾ ਅਗ੍ਗਿ, ਪੁਣ੍ਣਮਾਸੇਵ ਚਨ੍ਦਿਮਾ;

ਵਨਂ ਓਭਾਸਤੇ ਬੁਦ੍ਧੋ, ਸਾਲਰਾਜਾਵ ਫੁਲ੍ਲਿਤੋ.

੧੦.

ਵਨਗ੍ਗਾ ਨਿਕ੍ਖਮਿਤ੍ਵਾਨ, ਬੁਦ੍ਧਰਂਸੀ ਵਿਧਾਵਰੇ;

ਨਲਗ੍ਗਿਵਣ੍ਣਸਙ੍ਕਾਸਾ, ਦਿਸ੍ਵਾ ਚਿਤ੍ਤਂ ਪਸਾਦਯਿਂ.

੧੧.

ਵਿਚਿਨਂ ਅਦ੍ਦਸਂ ਪੁਪ੍ਫਂ, ਕਣਿਕਾਰਂ ਦੇਵਗਨ੍ਧਿਕਂ;

ਤੀਣਿ ਪੁਪ੍ਫਾਨਿ ਆਦਾਯ, ਬੁਦ੍ਧਸੇਟ੍ਠਂ ਅਪੂਜਯਿਂ.

੧੨.

ਬੁਦ੍ਧਸ੍ਸ ਆਨੁਭਾਵੇਨ, ਤੀਣਿ ਪੁਪ੍ਫਾਨਿ ਮੇ ਤਦਾ;

ਉਦ੍ਧਵਣ੍ਟਾ ਅਧੋਪਤ੍ਤਾ, ਛਾਯਂ ਕੁਬ੍ਬਨ੍ਤਿ ਸਤ੍ਥੁਨੋ.

੧੩.

ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਞ੍ਛਹਂ.

੧੪.

ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਕਣਿਕਾਰੀਤਿ ਞਾਯਤਿ;

ਸਟ੍ਠਿਯੋਜਨ ਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

੧੫.

ਸਹਸ੍ਸਖਣ੍ਡਂ ਸਤਭੇਣ੍ਡੁ, ਧਜਾਲੁ ਹਰਿਤਾਮਯਂ;

ਸਤਸਹਸ੍ਸਾਨਿ ਬ੍ਯੂਹਾਨਿ, ਬ੍ਯਮ੍ਹੇ ਪਾਤੁਰਹਂਸੁ ਮੇ.

੧੬.

ਸੋਣ੍ਣਮਯਾ ਮਣਿਮਯਾ, ਲੋਹਿਤਙ੍ਕਮਯਾ ਪਿਚ;

ਫਲਿਕਾ ਪਿਚ ਪਲ੍ਲਙ੍ਕਾ, ਯਦਿਚ੍ਛਕ ਯਦਿਚ੍ਛਕਾ.

੧੭.

ਮਹਾਰਹਞ੍ਚ ਸਯਨਂ, ਤੂਲਿਕਂ ਵਿਕਤੀਯਕਂ;

ਉਦ੍ਦਲੋਮਿਕਏਕਨ੍ਤਂ, ਬਿਮ੍ਬੋਹਨਸਮਾਯੁਤਂ.

੧੮.

ਭਵਨਾ ¶ ਨਿਕ੍ਖਮਿਤ੍ਵਾਨ, ਚਰਨ੍ਤੋ ਦੇਵਚਾਰਿਕਂ;

ਯਦਾ ਇਚ੍ਛਾਮਿ ਗਮਨਂ, ਦੇਵਸਂਘਪੁਰਕ੍ਖਤੋ.

੧੯.

ਪੁਪ੍ਫਸ੍ਸ ਹੇਟ੍ਠਾ ਤਿਟ੍ਠਾਮਿ, ਉਪਰਿਚ੍ਛਦਨਂ ਮਮ;

ਸਮਨ੍ਤਾ ਯੋਜਨਸਤਂ, ਕਣਿਕਾਰੇਹਿ ਛਾਦਿਤਂ.

੨੦.

ਸਟ੍ਠਿਤੁਰਿਯਸਹਸ੍ਸਾਨਿ, ਸਾਯਂ ਪਾਤਂ ਉਪਟ੍ਠਹੁਂ;

ਪਰਿਵਾਰੇਨ੍ਤਿ ਮਂ ਨਿਚ੍ਚਂ, ਰਤ੍ਤਿਨ੍ਦਿਵਮਤਨ੍ਦਿਤਾ.

੨੧.

ਤਤ੍ਥ ਨਚ੍ਚੇਹਿ ਗੀਤੇਹਿ, ਤਾਲੇਹਿ ਵਾਦਿਤੇਹਿ ਚ;

ਰਮਾਮਿ ਖਿਡ੍ਡਾਰਤਿਯਾ, ਮੋਦਾਮਿ ਕਾਮਕਾਮਹਂ.

੨੨.

ਤਤ੍ਥ ਭੁਤ੍ਵਾ ਚ ਪਿਤ੍ਵਾ ਚ, ਮੋਦਾਮਿ ਤਿਦਸੇ ਤਦਾ;

ਨਾਰੀਗਣੇਹਿ ਸਹਿਤੋ, ਮੋਦਾਮਿ ਬ੍ਯਮ੍ਹਮੁਤ੍ਤਮੇ.

੨੩.

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਦੇਵਰਜ੍ਜ ਮਕਾਰਯਿਂ;

ਸਤਾਨਂ ਤੀਣਿਕ੍ਖਤ੍ਤੁਂਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਂਖਿਯਂ.

੨੪.

ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਬੁਦ੍ਧਪੂਜਾਯਿ ਦਂ ਫਲਂ.

੨੫.

ਦ੍ਵੇ ਮੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੬.

ਦ੍ਵੇ ਮੇ ਕੁਲੇ ਪਜਾਨਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੭.

ਹਤ੍ਥਿਯਾਨਂ ਅਸ੍ਸਯਾਨਂ, ਸਿਵਿਕਂ ਸਨ੍ਦਮਾਨਿਕਂ;

ਲਭਾਮਿ ਸਬ੍ਬਮੇਵੇ ਤਂ, ਬੁਦ੍ਧਪੂਜਾਯਿਦਂ ਫਲਂ.

੨੮.

ਦਾਸੀਗਣਂ ਦਾਸਗਣਂ, ਨਾਰਿਯੋ ਚ ਅਲਙ੍ਕਤਾ;

ਲਭਾਮਿ ਸਬ੍ਬ ਮੇਵੇ ਤਂ, ਬੁਦ੍ਧਪੂਜਾਯਿਦਂ ਫਲਂ.

੨੯.

ਕੋਸੇਯ੍ਯਕਮ੍ਬਲਿਯਾਨਿ, ਖੋਮਕਪ੍ਪਾਸਿਕਾਨਿਚ;

ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.

੩੦.

ਨਵਵਤ੍ਥਂ ¶ ਨਵਫਲਂ, ਨਵਗ੍ਗਰਸਭੋਜਨਂ;

ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.

੩੧.

ਇਮਂ ਖਾਦ ਇਮਂ ਭੁਞ੍ਜ, ਇਮਮ੍ਹਿ ਸਯਨੇ ਸਯ;

ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.

੩੨.

ਸਬ੍ਬਤ੍ਥ ਪੂਜਿਤੋ ਹੋਮਿ, ਯਸੋ ਅਚ੍ਚੁਗ੍ਗਤੋ ਮਮ;

ਮਹੇਸਕ੍ਖੋ ਘਦਾ ਹੋਮਿ, ਅਭੇਜ੍ਜਪਰਿਸੋ ਸਦਾ;

ਞਾਤੀਨਂ ਉਤ੍ਤਮੋ ਹੋਮਿ, ਬੁਦ੍ਧਪੂਜਾਯਿਦਂ ਫਲਂ.

੩੩.

ਸੀਤਂ ਉਣ੍ਹਂ ਨ ਜਾਨਾਮਿ, ਪਰਿਲ਼ਾਹੋ ਨ ਵਿਜ੍ਜਤਿ;

ਅਥੋ ਚੇਤਸਿਕਂ ਦੁਕ੍ਖਂ, ਹਦਯੇ ਮੇ ਨ ਵਿਜ੍ਜਤਿ.

੩੪.

ਸੁਵਣ੍ਣਵਣ੍ਣੋ ਹੁਤ੍ਵਾਨ, ਸਂਸਰਾਮਿ ਭਵਾਭਵੇ;

ਵੇਵਣ੍ਣਿਯਂ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੫.

ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਸਾਵਤ੍ਥਿਯਂ ਪੁਰੇ ਜਾਤੋ, ਮਹਾਸਾਲੇ ਸੁਅਡ੍ਢਕੇ.

੩੬.

ਪਞ੍ਚਕਾਮਗੁਣੇ ਹਿਤ੍ਵਾ, ਪਬ੍ਬਜਿਂਅਨਗਾਰਿਯਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਮਪਾਪੁਣਿਂ.

੩੭.

ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ;

ਤਰੁਣੋਵ ਪੂਜਨੀਯੋ ਹਂ, ਬੁਦ੍ਧਪੂਜਾਯਿਦਂ ਫਲਂ.

੩੮.

ਦਿਬ੍ਬਚਕ੍ਖੁਂ ਵਿਸੁਦ੍ਧਂ ਮੇ, ਸਮਾਧਿਕੁਸਲੋ ਅਹਂ;

ਅਭਿਞ੍ਞਾਪਾਰਮਿਪ੍ਪਤ੍ਤੋ, ਬੁਦ੍ਧਪੂਜਾਯਿਦਂ ਫਲਂ.

੩੯.

ਪਟਿਸਮ੍ਭਿਦਾ ਅਨੁਪ੍ਪਤ੍ਤੋ, ਇਦ੍ਧਿਪਾਦੇਸੁ ਕੋਵਿਦੋ;

ਸਦ੍ਧਮ੍ਮੇ ਪਾਰਮਿਪ੍ਪਤ੍ਤੋ, ਬੁਦ੍ਧਪੂਜਾਯਿਦਂ ਫਲਂ.

੪੦.

ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪੧.

ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੪੨.

ਸ੍ਵਾਗਤਂ ¶ ਵਤ ਮੇ ਆਸਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨਂ.

੪੩.

ਪਟਿਸਮ੍ਭਿਦਾ ਚਤਸ੍ਸੋ ਚ, ਵਿਮੇਕ੍ਖਾ ਪਿਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂਤਿ;

ਤਂ ਸੁਤ੍ਵਾ ਬਹੂ ਕੁਸਲਕਮ੍ਮਪਰਾਯਣਾ ਅਹੇਸੁਂ.

੪੪.

ਸਹੇਤੁਕਾ ਪਚ੍ਛਿਮਿਕਾਪਿ ਸਤ੍ਤਾ,

ਪਾਪਂ ਨ ਸਕ੍ਕੋਨ੍ਤਿ ਜਹਾਤੁਮੇਵਂ;

ਅਨਿਚ੍ਛਮਾਨੇਹਿ ਜਨੇਹਿ ਦੁਕ੍ਖਂ,

ਆਰਾਵ ਪਾਪਂ ਪਰਿਵਜ੍ਜਨੀਯਂਤਿ.

ਉਤ੍ਤਰਸਾਮਣੇਰਸ੍ਸ ਵਤ੍ਥੁਂ ਚਤੁਤ੍ਥਂ.

੨੫. ਕਵੀਰਪਟ੍ਟਨ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਕਿਰ ਚੋਲ਼ਰਟ੍ਠੇ ਕਾਵੀਰਪਟ੍ਟਨਂ ਨਾਮ ਅਹੋਸਿ. ਤਤ੍ਥ ਮਾਹਿਸ੍ਸਰਿਕਾ ਬਹੂ ਮਿਚ੍ਛਾਦਿਟ੍ਠਿਕਾ ਵਸਨ੍ਤਿ. ਤਤ੍ਥੇਕਸ੍ਮਿਂ ਦੇਵਾਲਯੇ ਚਿਤ੍ਤਕਮ੍ਮਂ ਕਰੋਨ੍ਤਾ ਏਕਸ੍ਮਿਂ ਫਲਕੇ ਇਸ੍ਸਰਸ੍ਸ ਓਨਮਿਤ੍ਵਾ ਵਨ੍ਦਨਾਕਾਰਂ ਭਗਵਤੋ ਰੂਪਂ ਅਕਂਸੁ. ਤਸ੍ਮਿਂ ਸਮਯੇ ਤਤ੍ਥ ਬਹੂ ਉਪਾਸਕਾ ਤਂ ਦੇਵਕੁਲਂ ਗਨ੍ਤ੍ਵਾ ਤਤ੍ਥ ਤਤ੍ਥ ਚਿਤ੍ਤਕਮ੍ਮਾਨਿ ਓਲੋਕੇਨ੍ਤਾ ਤਸ੍ਮਿਂ ਫਲਕੇ ਤਂ ਚਿਤ੍ਤਕਮ੍ਮਂ ਅਦ੍ਦਸਂਸੁ. ਦਿਸ੍ਵਾਨ ਤੇ ਅਹੋ ਅਮ੍ਹੇਹਿ ਅਪਸ੍ਸਿਤਬ੍ਬਂ ਪਸ੍ਸਿਤਂ. ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾਸਦੇਵਮਨੁਸ੍ਸਾਯ ਪਜਾਯ ਚ ਅਪਰਿਮਾਣੇਸੁ ਚਕ੍ਕਵਾਲ਼ੇਸੁ ਭਗਵਤੋ ਉਤ੍ਤਰਿਤਰਂ ਠਪੇਤ੍ਵਾ ਸਮਸਮੋਪਿ ਨਤ੍ਥਿ. ਸਕਲੇਹਿ ਸਤ੍ਤਨਿਕਾਯੇਹਿ ਵਨ੍ਦਨੀਯੋ ਪੂਜਨੀਯੋ ਭਗਵਾ. ਅਨਨੁਰੂਪਂ ਤਸ੍ਸ ਏਤੇਹਿ ਕਤਂਤਿ ਰੋਦਨ੍ਤਾ ਪਰਿਦੇਵਨ੍ਤਾ ਰਾਜਦ੍ਵਾਰਂ ਗਨ੍ਤ੍ਵਾ ਉਗ੍ਘੋਸੇਸੁਂ, ਤਂ ਸੁਤ੍ਵਾ ਰਾਜਾ ਤੇ ਪਕ੍ਕੋਸਾਪੇਤ੍ਵਾ ਕਸ੍ਮਾ ਤੁਮ੍ਹੇ ¶ ਉਗ੍ਘੋਸੇਥਾਤਿ ਪੁਚ੍ਛਿ, ਤੇ ਏਵ ਮਾਹਂਸੁ. ਦੇਵ ਅਮ੍ਹਾਕਂ ਭਗਵਾ ਦੇਵਾਤਿਦੇਵੋ ਸਕ੍ਕਾਤਿਸਕ੍ਕੋ ਬ੍ਰਹ੍ਮਾਤਿਬ੍ਰਹ੍ਮਾ ਮੇਰੁਵ ਅਚਲੋ ਸਾਗਰੋ ਗਮ੍ਭੀਰੋ ਆਕਾਸੋਵ ਅਨਨ੍ਤੋ ਪਥਵੀਵ ਪਤ੍ਥਟੋਤਿਆਦੀਹਿ ਭਗਵਤੋ ਗੁਣਂ ਵਣ੍ਣੇਸੁਂ. ਤੇਨ ਵੁਤ੍ਤਂ ਅਪਦਾਨੇ.

੧.

ਬਤ੍ਤਿਂਸਲਕ੍ਖਣਧਰੋ, ਸੁਨਕ੍ਖਤ੍ਤੋਵ ਚਨ੍ਦਿਮਾ;

ਅਨੁਬ੍ਯਞ੍ਜਨਸਮ੍ਪਨ੍ਨੋ, ਸਾਲਰਾਜਾਵ ਫੁਲ੍ਲਿਤੋ.

੨.

ਰਂਸਿਜਾਲਪਰਿਕ੍ਖਿਤ੍ਤੋ, ਦਿਤ੍ਤੋਵ ਕਨਕਾਚਲੋ;

ਬ੍ਯਾਮਪ੍ਪਭਾਪਰਿਵੁਤੋ, ਸਤਰਂਸਿ ਦਿਵਾਕਰੋ.

੩.

ਸੋਣ੍ਣਾ ਨਨੋ ਜਿਨਵਰੋ, ਸਮਣੀਵ ਸਿਲੁਚ੍ਚਯੋ;

ਕਰੁਣਾਪੁਣ੍ਣਹਦਯੋ, ਵਿਵਟ੍ਟੋ ਵਿਯ ਸਾਗਰੋ.

੪.

ਲੋਕਵਿਸ੍ਸੁਤਕਿਤ੍ਤੀਵ, ਸਿਨੇਰੁਵ ਨਗੁਤ੍ਤਮੋ;

ਯਸਸਾ ਵਿਤਤੋ ਧੀਰੋ, ਆਕਾਸਸਦਿਸੋ ਮੁਨਿ.

੫.

ਅਸਙ੍ਗਚਿਤ੍ਤੋ ਸਬ੍ਬਤ੍ਥ, ਅਨਿਲੋ ਵਿਯ ਨਾਯਕੋ;

ਪਤਿਟ੍ਠਾ ਸਬ੍ਬਭੂਤਾਨਂ, ਮਹੀਵ ਮੁਨਿਸੁਤ੍ਤਮੋ.

੬.

ਅਨੂਪਲਿਤ੍ਤੋ ਲੋਕੇਨ, ਤੋਯੇਨ ਪਦੁਮਂ ਯਥਾ;

ਕੁਵਾਦਗਚ੍ਛਦਹਨੋ, ਅਗ੍ਗਿਕ੍ਖਨ੍ਧੋਵ ਸੋਭਤਿ.

੭.

ਅਗਦੋ ਵਿਯ ਸਬ੍ਬਤ੍ਥ, ਕਿਲੇਸਵਿਸਨਾਸਕੋ;

ਗਨ੍ਧਮਾਦਨਸੇਲੋਵ, ਗੁਣਗਨ੍ਧਵਿਭੂਸਿਤੋ.

੮.

ਗੁਣਾਨਂ ਆਕਰੋ ਧੀਰੋ, ਰਤਨਾਨਂਵ ਸਾਗਰੋ;

ਸਿਨ੍ਧੂਵ ਵਨਰਾਜੀਨਂ, ਕਿਲੇਸਮਲਹਾਰਕੋ.

੯.

ਵਿਜਯੀਵ ਮਹਾਯੋਧੋ, ਮਾਰਸੇਨਪ੍ਪਮਦ੍ਦਨੋ;

ਚਕ੍ਕਵਤ੍ਤੀਵ ਸੋ ਰਾਜਾ, ਬੋਜ੍ਝਙ੍ਗਰਤਨਿਸ੍ਸਰੋ.

੧੦.

ਮਹਾਭਿਸਕ੍ਕਸਙ੍ਕਾਸੋ, ਦੋਸਬ੍ਯਾਧਿਤਿਕਿਚ੍ਛਕੋ;

ਸਲ੍ਲਕਤ੍ਤੋ ਯਥਾ ਵੇਜ੍ਜਾ, ਦਿਟ੍ਠਿਗਣ੍ਡਵਿਫਾਲਕੋ.

੧੧.

ਸਤ੍ਥਾ ¶ ਨੋ ਭਗਵਾ ਦੇਵ, ਮਹਾਬ੍ਰਹ੍ਮੇਹਿ ਵਨ੍ਦਿਤੋ;

ਦੇਵਿਨ੍ਦਸੁਰਸਿਦ੍ਧੇਹਿ, ਵਨ੍ਦਨੀਯੋ ਸਦਾ ਦਰਾ.

੧੨.

ਸਬ੍ਬੇਸੁ ਚਕ੍ਕਵਾਲ਼ੇਸੁ, ਯੇ ਅਗ੍ਗਾ ਯੇ ਚ ਪੂਜਿਤਾ;

ਤੇਸਮਗ੍ਗੋ ਮਹਾਰਾਜ, ਭਗਵਾ ਨੋ ਪਤਾਪਵਾਤਿ.

ਅਯੁਤ੍ਤਂ ਦੇਵ ਦੇਵਕੁਲੇਹਿ ਕਤਂਤਿ ਆਹਂਸੁ. ਤਂ ਸੁਤ੍ਵਾ ਰਾਜਾ ਭੋ ਸਬ੍ਬੇਪਿ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਦੇਵਤਾਨਂ ਮਹਨ੍ਤਭਾਵਂ ਕਥੇਨ੍ਤਿ. ਤੁਮ੍ਹਾਕਂ ਪਨ ਸਤ੍ਥੁਨੋ ਮਹਨ੍ਤਭਾਵਂ ਕਥਂ ਅਮ੍ਹਾਕਂ ਜਾਨਾਪੇਥਾਤਿ, ਉਪਾਸਕਾ ਨ ਗਰੁ ਤ੍ਵਂ ਮਹਾਰਾਜ ਫਲਕਂ ਆਹਰਾਪੇਤ੍ਵਾ ਸੁਦ੍ਧਵਤ੍ਥੇਨ ਵੇਠੇਤ੍ਵਾ ਤਂ ਅਤ੍ਤਨੋ ਮੁਦ੍ਦਿਕਾਯ ਲਞ੍ਛਿਤ੍ਵਾ ਸੁਰਕ੍ਖਿਤਸੁਗੋਪਿਤੇ ਏਕਸ੍ਮਿਂ ਦੇਵਕੁਲੇ ਠਪੇਤ੍ਵਾ ਸਤ੍ਤਾਹਚ੍ਚਯੇਨ ਆਹਰਾਪੇਤ੍ਵਾ ਤਂ ਓਲੋਕੇਥ, ਤਦਾ ਨੋ ਸਤ੍ਥੁਨੋ ਮਹਨ੍ਤਾਨੁਭਾਵਂ ਜਾਨਾਥਾਤਿ ਆਹਂਸੁ, ਅਥ ਰਾਜਾ ਤੇਸਂ ਵੁਤ੍ਤਨਿਯਾਮੇਨੇਵ ਕਾਰਾਪੇਤ੍ਵਾ ਅਨ੍ਤੋਦੇਵਕੁਲੇ ਠਪੇਤ੍ਵਾ ਸਬ੍ਬਦ੍ਵਾਰਾਨਿ ਪਿਦਹਿਤ੍ਵਾ ਲਞ੍ਛੇਤ੍ਵਾ ਰਕ੍ਖੇਯ੍ਯਾਥਾਤਿ ਨਿਯੋਜੇਸਿ. ਤਤੋ ਤੇ ਉਪਾਸਕਾ ਸਬ੍ਬੇ ਸਨ੍ਨਿਪਤਿਤ੍ਵਾ ਸਤ੍ਤਾਹਂ ਦਾਨਂ ਦੇਨ੍ਤਾ ਸੀਲਂ ਰਕ੍ਖਨ੍ਤਾ ਉਪੋਸਥਕਮ੍ਮਂ ਕਰੋਨ੍ਤਾ ਸਬ੍ਬਸਤ੍ਤੇਸੁ ਮੇਤ੍ਤਿਂ ਭਾਵੇਨ੍ਤਾ ਸਬ੍ਬਸਤ੍ਤਾਨਂ ਅਤ੍ਤਨਾ ਕਤਪੁਞ੍ਞੇਸੁ ਪਤ੍ਤਿਂ ਦੇਨ੍ਤਾ ਤਿਣ੍ਣਂ ਰਤਨਾਨਂ ਪੂਜਂ ਕਰੋਨ੍ਤਾ ਏਵਂ ਉਗ੍ਘੋਸੇਸੁਂ. ਅਮ੍ਹਾਕਂ ਕਤਕੁਸਲਨਿਸ੍ਸਨ੍ਦੇਨ ਲੋਕੇ ਮਹਿਦ੍ਧਿਕਾ ਮਹਾਨੁਭਾਵਾ ਸਬ੍ਬੇ ਦੇਵਾ ਚ ਲੋਕਂ ਪਾਲੇਨ੍ਤਾ ਚਤ੍ਤਾਰੋ ਮਹਾਰਾਜਾਨੋ ਚ ਅਮ੍ਹਾਕਂ ਸਤ੍ਥੁਨੋ ਉਪਟ੍ਠਾਨਾਯ [ਉਪਟ੍ਠਾਯ ਇਤਿਸਬ੍ਬਤ੍ਥ] ਠਿਤਭਾਵਂ ਦਸ੍ਸੇਨ੍ਤੂਤਿ ਸਚ੍ਚਕਿਰਿਯਂ ਅਕਂਸੁ. ਅਥ ਤੇਸਂ ਪੁਞ੍ਞਾਨੁਭਾਵੇਨ ਤਸ੍ਮਿਂ ਖਣੇ ਸਕ੍ਕਸ੍ਸ ਦੇਵਰਞ੍ਞੋ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਤਤੋ ਸੋ ਮਨੁਸ੍ਸਲੋਕਂ ਓਲੋਕੇਨ੍ਤੋ ਮਿਚ੍ਛਾਦਿਟ੍ਠੀਹਿ ਕਤਂ ਤਂ ਵਿਪ੍ਪਕਾਰਂ ਦਿਸ੍ਵਾ ਸਂਵਿਗ੍ਗੋ ਆਗਨ੍ਤ੍ਵਾ ਇਸ੍ਸਰਂ ਭਗਵਤੋ ਪਾਦੇ ਵਨ੍ਦਿਤ੍ਵਾ ਸਯਿਤਾਕਾਰਂ ¶ ਕਤ੍ਵਾ ਤਂ ਪਵਤ੍ਤਿਂ ਉਪਾਸਕਾਨਂ ਕਥੇਤ੍ਵਾ ਸਕਟ੍ਠਾਨਮੇਵ ਅਗਮਾਸਿ. ਤਤੋ ਸਤ੍ਤਮੇ ਦਿਵਸੇਪਾਤੋਵ ਤੇ ਸਬ੍ਬੇਪਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਵਮਾਹਂਸੁ. ਦੇਵ ਇਸ੍ਸਰੋ ਅਮ੍ਹਾਕਂ ਭਗਵਤੋ ਪਾਦੇ ਸਿਰਸਾ ਵਨ੍ਦਿਤ੍ਵਾ ਨਿਪਨ੍ਨੋਤਿ. ਅਥ ਰਾਜਾ ਤੇਸਂ ਕਥਂ ਸੁਤ੍ਵਾ ਨਗਰੇ ਭੇਰਿਂ ਚਰਾਪੇਤ੍ਵਾ ਮਹਾਜਨੇ ਸਨ੍ਨਿਪਾਤੇਤ੍ਵਾ ਤੇਹਿ ਪਰਿਵੁਤੋ ਦੇਵਕੁਲਂ ਗਨ੍ਤ੍ਵਾ ਲਞ੍ਛਂ ਭਿਨ੍ਦਾਪੇਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਫਲਕਂ ਆਹਰਾਪੇਤ੍ਵਾ ਵੇਠਿਤਸਾਟਕੇ ਮੋਚਾਪੇਸਿ. ਅਥ ਰਾਜਾ ਚ ਮਹਾਜਨੋ ਚ ਤਂ ਮਹਨ੍ਤਂ ਪਾਟਿਹਾਰਿਯਂ ਦਿਸ੍ਵਾ ਮਿਚ੍ਛਾਦਿਟ੍ਠਿਂ ਪਹਾਯ ਸਬ੍ਬੇ ਸਤ੍ਥੁਨੋ ਸਰਣ ਮਗਮਂਸੁ. ਅਥ ਰਾਜਾ ਤਂ ਦੇਵਕੁਲਂ ਭਿਨ੍ਦਾਪੇਤ੍ਵਾ ਮਹਨ੍ਤਂ ਰਮਣੀਯਂ ਵਿਹਾਰਂ ਕਾਰਾਪੇਤ੍ਵਾ ਯਾਵਜੀਵਂ ਪੁਞ੍ਞਕਮ੍ਮਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ.

੧੩.

ਅਨਬ੍ਭੁਤਂ ਸਤ੍ਥੁ ਧਰੀਯਮਾਨੇ,

ਕਰੋਨ੍ਤਿ ਦਿਸ੍ਵਾ ਕੁਸਲਾਨਿ ਇਦ੍ਧਿਂ;

ਯੇ ਤਂ ਮੁਨਿਨ੍ਦੇ ਪਰਿਨਿਬ੍ਬੁਤਮ੍ਹਿ,

ਕਰੋਨ੍ਤਿ ਪੁਞ੍ਞਾਨਿ ਮਹਬ੍ਭੂਤਂ ਯੇਤਿ.

ਕਾਵੀਰਪਟ੍ਟਨਵਤ੍ਥੁਂ ਪਞ੍ਚਮਂ.

੨੬. ਚੋਰਘਾਤਕਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਏਕਸ੍ਮਿਂ ਕਿਰ ਸਮਯੇ ਅਮ੍ਹਾਕਂ ਭਗਵਾ ਸਾਵਤ੍ਥਿਯਂ ਉਪਨਿਸ੍ਸਾਯ ਜੇਤਵਨੇ ਵਿਹਰਤਿ ਧਮ੍ਮਦੇਸਨਾਯ ਮਹਾਜਨਸ੍ਸ ਸਗ੍ਗਮੋਕ੍ਖਸਮ੍ਪਦਂ ਦਦਮਾਨੋ. ਤਸ੍ਮਿਂਸਮਯੇ ਪਞ੍ਚਸਤਾ ਚੋਰਾ ਅਟਵਿਤੋ ਨਗਰਂ ਆਗਨ੍ਤ੍ਵਾ ਰਤ੍ਤਿਭਾਗੇ ਚੋਰਕਮ੍ਮਂ ਕਤ੍ਵਾ ਤੇਨ ਪੁਤ੍ਤਦਾਰੇ ਪੋਸੇਨ੍ਤਿ. ਅਥੇਕਦਿਵਸਂ ਚੋਰਾ ਚੋਰਕਮ੍ਮਤ੍ਥਾਯ ਨਗਰਂ ਪਵਿਸਨ੍ਤਾ ਨਗਰਦ੍ਵਾਰੇ ਏਕਂ ਦੁਕ੍ਖਿਤਂ ਜਨਪਦਮਨੁਸ੍ਸਂ ਪਸ੍ਸਿਤ੍ਵਾ ਹਮ੍ਭੋ ¶ ਕਤ੍ਥ ਵਸਤੀਤਿ ਪੁਚ੍ਛਿਂਸੁ, ਸੋ ਅਤ੍ਤਜਨਾ ਜਨਪਦਵਾਸਿਭਾਵਂ ਪਕਾਸੇਸਿ. ਅਥਸ੍ਸ ਤੇ ਕਸ੍ਮਾ ਭੋ ਇਮਿਨਾ ਦੁਕ੍ਖਵਾਸੇਨ ਵਸਿਸ੍ਸਸਿ, ਏਹਿ ਅਮ੍ਹੇਹਿ ਸਦ੍ਧਿਂ ਚੋਰਕਮ੍ਮਂ ਕਰੋਨ੍ਤੋ ਵਤ੍ਥਾਲਙ੍ਕਾਰਸਮ੍ਪਨ੍ਨੋ ਪੁਤ੍ਤਦਾਰਂ ਪੋਸੇਹਿ. ਇਮਿਨਾ ਕਪਣਵਾਸੇਨ ਨ ਵਸਾਤਿ ਆਹਂਸੁ. ਸੋ ਪਨਿਮੇ ਯੁਤ੍ਤਂ ਕਥੇਨ੍ਤੀਤਿ ਤੇਸਂ ਵਚਨਂ ਸਮ੍ਪਟਿਚ੍ਛਿ. ਅਥ ਤੇ ਏਵਂ ਸਤਿ ਅਮ੍ਹੇਹਿ ਸਦ੍ਧਿਂ ਆਗਚ੍ਛਾਹੀਤਿ ਵਤ੍ਵਾ ਨਂ ਗਹੇਤ੍ਵਾ ਅਨ੍ਤੋਨਗਰਂ ਪਵਿਟ੍ਠਾ ਤਤ੍ਥ ਤਤ੍ਥ ਵਿਲੁਮ੍ਪਨ੍ਤਾ ਚੋਰਕਮ੍ਮਂ ਅਕਂਸੁ. ਤਦਾ ਜਾਨਪਦਿਕੋ ਲਦ੍ਧਵਿਭਵੋ ਇਮਮੇਵ ਵਰਤਰਨ੍ਤਿ ਤੇਹਿ ਸਦ੍ਧਿਂ ਚੋਰਕਮ੍ਮਂ ਕਰੋਨ੍ਤੋ ਜੀਵਿਕਂ ਕਪ੍ਪੇਸਿ, ਅਥੇਕਦਿਵਸਂ ਰਾਜਪੁਰਿਸਾ ਕਤਕਮ੍ਮੇ ਤੇ ਸਬ੍ਬੇਵ ਗਹੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਂ ਬਨ੍ਧਿਤ੍ਵਾ ਕੋਸਲਰਞ੍ਞੋ ਦਸ੍ਸੇਸੁਂ, ਰਾਜਾ ਤੇ ਦਿਸ੍ਵਾ ਏਵਮਾਹ, ਭਣੇ ਤੁਮ੍ਹਾਕਂ ਅਨ੍ਤਰੇ ਯੋ ਏਤੇਸਂ ਮਾਰੇਤ੍ਵਾ ਜੀਵਿਤਕ੍ਖਯਂ ਪਾਪੇਸ੍ਸਤਿ, ਤਸ੍ਸ ਜੀਵਿਤਦਾਨਂ ਦਮ੍ਮੀਤਿ, ਤਂ ਸੁਤ੍ਵਾ ਤੇ ਚੋਰਾ ਸਬ੍ਬੇ ਅਞ੍ਞਮਞ੍ਞਞਾਤਿਸੁਹਦਸਮ੍ਬਨ੍ਧਭਾਵੇਨ ਤਂ ਨ ਇਚ੍ਛਿਂਸੁ. ਸੋ ਪਨ ਜਨਪਦਵਾਸੀ ਮਨੁਸ੍ਸੋ ਅਹਮੇਤੇ ਸਬ੍ਬੇ ਮਾਰੇਸ੍ਸਾਮੀਤਿ ਰਞ੍ਞੋ ਵਤ੍ਵਾ ਤੇਨਾਨੁਞ੍ਞਾਤੋ ਤੇ ਸਬ੍ਬੇ ਮਾਰੇਸਿ. ਤਂ ਦਿਸ੍ਵਾ ਤੁਟ੍ਠੋ ਰਾਜਾ ਤਸ੍ਸ ਚੋਰਘਾਤਕਮ੍ਮਂ ਅਦਾਸਿ. ਸੋ ਚੋਰੇ ਚ ਵਜ੍ਝਪ੍ਪਤ੍ਤੇ ਚ ਮਾਰੇਨ੍ਤੋ ਪਞ੍ਚਵੀਸਤਿਵਸ੍ਸਾਨਿ ਵਸਨ੍ਤੋ ਅਪਰਭਾਗੇ ਮਹਲ੍ਲਕੋ ਅਹੋਸਿ. ਅਥ ਸੋ ਮਨ੍ਦਬਲਤ੍ਤਾ ਕਤਿਪਯਪਹਾਰੇਨਾਪਿ ਚੋਰਂ ਮਾਰੇਤੁਂ ਨ ਸਕ੍ਕੋਤਿ, ਰਾਜਾ ਤਂ ਞਤ੍ਵਾ ਅਞ੍ਞਸ੍ਸ ਚੋਰਘਾਤਕਮ੍ਮਂ ਅਦਾਸਿ. ਅਥ ਸੋ ਚੋਰਘਾਤਕਮ੍ਮਾ [ਚੋਰਘਾਤਕਮ੍ਮ ਇਤਿਪਿਕਤ੍ਥਚਿ] ਪਰਿਹੀਨੋ ਅਤ੍ਤਨੋ ਗੇਹੇ ਵਸਤਿ. ਤਦਾ ਅਞ੍ਞਤਰੋ ਮਨੁਸ੍ਸੋ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤੇਨ ਮਨੁਸ੍ਸਮਾਰਣਕਮਨ੍ਤਂ ਜਾਨਾਤਿ. ਤਥਾਹਿ ਹਤ੍ਥਪਾਦਕਣ੍ਣਨਾਸਸੀਸਾਦੀਸੁ ਯਂਕਿਞ੍ਚਿ ਛੇਜ੍ਜਭੇਜ੍ਜਂ ਕਤ੍ਤੁਕਾਮੋ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਤਿ. ਤਂ ਤਂ ਠਾਨਂ ਛਿਜ੍ਜਤਿ ਭਿਜ੍ਜਤਿ, ਏਵਂ ਮਹਾਨੁਭਾਵੋ ਸੋ ਮਨ੍ਤੋ, ਅਥ ਸੋ ਤਂ ਪੁਰਿਸਂ ਉਪਟ੍ਠਹਿਤ੍ਵਾ ਮਨ੍ਤਂ ਲਭਿਤ੍ਵਾ ਰਞ੍ਞੋ ਸਾਸਨਂ ਪੇਸੇਸਿ ¶ . ਅਹਂ ਇਤੋ ਪੁਬ੍ਬੇ ਮਹਲ੍ਲਕਤ੍ਤਾ ਚੋਰਾਨਂ ਹਤ੍ਥਪਾਦਾਦਯੋ ਦੁਕ੍ਖੇਨ ਛੇਜ੍ਜ ਭੇਜ੍ਜਂ ਕਰੋਮਿ, ਮਾਰੇਤਬ੍ਬੇਪਿ ਦੁਕ੍ਖੇਨ ਮਾਰੇਮਿ. ਇਦਾਨਿ ਪਨਾਹਂ ਤਥਾ ਨ ਕਰੋਮਿ, ਮਮ ਮਨ੍ਤਾਨੁਭਾਵੇਨ ਛੇਜ੍ਜਭੇਜ੍ਜਕਮ੍ਮਂ ਕਰਿਸ੍ਸਾਮੀਤਿ. ਰਾਜਾ ਤਂ ਸਾਸਨਂ ਸੁਤ੍ਵਾ ਸਾਧੂਤਿ ਤਂ ਪਕ੍ਕੋਸਾਪੇਤ੍ਵਾ ਠਾਨਨ੍ਤਰਂ ਤਸ੍ਸੇਵ ਪਾਕਤਿਕ ਮਕਾਸਿ. ਸੋ ਤਤੋ ਪਟ੍ਠਾਯ ਤਂ ਕਮ੍ਮਂ ਕਰੋਨ੍ਤੋ ਪੁਨ ਪਞ੍ਚਵਸ੍ਸਾਨਿ ਅਤਿਕ੍ਕਾਮੇਸਿ. ਸੋ ਮਹਲ੍ਲਕੋ ਖੀਣਾਯੁਕੋ ਦੁਬ੍ਬਲੋ ਮਰਣਮਞ੍ਚਪਰਾਯਣੋ ਹੁਤ੍ਵਾ ਮਰਣਵੇਦਨਾਦੁਕ੍ਖੇਨ ਮਹਨ੍ਤੇਨ ਭਯਾਨਕੇਨ ਸਦ੍ਦੇਨ ਵਿਸ੍ਸਰਂ ਵਿਰਵਨ੍ਤੋ ਨਿਮੀਲਿਤੇਨ ਚਕ੍ਖੁਨਾ ਭਯਾਨਕਂ ਨਰਕਗ੍ਗਿਜਾਲਾਪਜ੍ਜਲਨ੍ਤਅਯਕੂਟਮੁਗ੍ਗਰਧਰੇ ਨਿਰਯਪਾਲੇ ਚ ਪਸ੍ਸਨ੍ਤੋ ਨਿਪਨ੍ਨੋ ਹੋਤਿ, ਤਤੋ ਤਸ੍ਸ ਪਟਿਵਿਸ੍ਸਕਗੇਹੇ ਮਨੁਸ੍ਸਾ ਤਸ੍ਸ ਭਯਾਨਕਸਦ੍ਦਸਵਣੇਨ ਗੇਹਂ ਛਟ੍ਟੇਤ੍ਵਾ ਪਲਾਯਿਂਸੁ. ਤਸ੍ਮਿਂ ਕਿਰ ਦਿਵਸੇ ਮਹਾਸਾਰਿਪੁਤ੍ਤਤ੍ਥੇਰੋ ਦਿਬ੍ਬਚਕ੍ਖੁਨਾ ਲੋਕਂ ਓਲੋਕੇਨ੍ਤਾ ਤਂ ਚੋਰਘਾਤਕਂ ਤਦਹੇਵ ਕਾਲਂਕਤ੍ਵਾ ਨਿਰਯੇ ਨਿਬ੍ਬਤ੍ਤਮਾਨਂ ਦਿਸ੍ਵਾ ਮਯਿ ਤਤ੍ਥ ਗਤੇ ਪਨੇਸ ਮਯਿ ਪਸਾਦੇਨ ਸਗ੍ਗੇ ਨਿਬ੍ਬਤ੍ਤਤੀਤਿ ਞਤ੍ਵਾ ਅਜ੍ਜ ਮਯਾ ਤਸ੍ਸਾਨੁਗ੍ਗਹਂ ਕਾਤੁਂ ਵਟ੍ਟਤੀਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਤਸ੍ਸ ਘਰਦ੍ਵਾਰ ਮਗਮਾਸਿ. ਅਥ ਸੋ ਥੇਰਂ ਦਿਸ੍ਵਾ ਕੁਦ੍ਧੋ ਕੋਪੇਨ ਤਟਤਟਾਯਮਾਨਦੇਹੋ ਅਜ੍ਜ ਤਂ ਵਿਜ੍ਝਿਤ੍ਵਾ ਫਾਲੇਤ੍ਵਾ ਮਾਰੇਸ੍ਸਾਮੀਤਿ ਨਿਪਨ੍ਨੋਵ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਸਿ, ਥੇਰੋ ਤਸ੍ਮਿਂ ਖਣੇ ਨਿਰੋਧਸਮਾਪਨ੍ਨੋ ਨਿਰੋਧਾ ਵੁਟ੍ਠਾਯ ਸੁਰਿਯੋ ਵਿਯ ਵਿਰੋਚਮਾਨੋ ਅਟ੍ਠਾਸਿ, ਅਥ ਸੋ ਥੇਰਸ੍ਸ ਤਯੋ ਵਾਰੇ ਤਥੇਵ ਕਤ੍ਵਾ ਕਿਞ੍ਚਿ ਕਾਤੁਂ ਅਸਕ੍ਕੋਨ੍ਤੋ ਅਤਿਵਿਯ ਵਿਮ੍ਹਿਤਚਿਤ੍ਤੋ ਥੇਰੇ ਚਿਤ੍ਤਂ ਪਸਾਦੇਤ੍ਵਾ ਅਤ੍ਤਨੋ ਪਟਿਯਤ੍ਤਂ ਪਾਯਸਂ ਥੇਰਸ੍ਸ ਦਾਪੇਸਿ, ਥੇਰੋ ਮਙ੍ਗਲਂ ਵਡ੍ਢੇਤ੍ਵਾ ਵਿਹਾਰਮੇਵ ਅਗਮਾਸਿ, ਚੋਰਘਾਤਕੋ ਥੇਰਸ੍ਸ ਦਿਨ੍ਨਦਾਨਂ ਅਨੁਸ੍ਸਰਨ੍ਤੋ ਤਸ੍ਮਿਂ ਖਣੇ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ. ਅਹੋ ਵੀਤਰਾਗਾਨਂ ਬੁਦ੍ਧਪੁਤ੍ਤਾਨਂ ਆਨੁਭਾਵੋ. ਏਵਂ ਨਰਕੇ ਨਿਬ੍ਬਤ੍ਤਮਾਨੋਪਿਸ੍ਸ ਬਲੇਨ ਸਗ੍ਗੇ ਨਿਬ੍ਬਤ੍ਤੋਤਿ. ਤਥਾਹਿ.

੧.

ਦਾਨਂ ¶ ਤਾਣਂ ਮਨੁਸ੍ਸਾਨਂ, ਦਾਨਂ ਦੁਗ੍ਗਤਿਵਾਰਣਂ;

ਦਾਨਂ ਸਗ੍ਗਸ੍ਸ ਸੋਪਾਨਂ, ਦਾਨਂ ਸਨ੍ਤਿਕਰਂ ਪਰਂ.

੨.

ਇਚ੍ਛਿਤਿਚ੍ਛਿਤਦਾਨੇਨ, ਦਾਨਂ ਚਿਨ੍ਤਾਮਣੀ ਵਿਯ;

ਕਪ੍ਪਰੁਕ੍ਖੋਵ ਸਤ੍ਤਾਨਂ, ਦਾਨਂ ਭਦ੍ਦਘਟੋਵਿਯ.

੩.

ਸੀਲਵਨ੍ਤਸ੍ਸ ਦਾਨੇਨ, ਚਕ੍ਕਵਤ੍ਤਿਸਿਰਿਮ੍ਪਿ ਚ;

ਲਭਨ੍ਤਿ ਸਕ੍ਕਸਮ੍ਪਤ੍ਤਿਂ, ਤਥਾ ਲੋਕੁਤ੍ਤਰਂ ਸੁਖਂ.

੪.

ਪਾਪਕਮ੍ਮੇਸੁ ਨਿਰਤੋ, ਠਿਤੋਯਂ ਨਰਕਾਯਨੇ [ਨਰਕਾਵਨੇ ਇਤਿਪਿਕਤ੍ਥਚਿ];

ਸਾਰਿਪੁਤ੍ਤਸ੍ਸ ਥੇਰਸ੍ਸ, ਪਿਣ੍ਡਪਾਤਸ੍ਸ ਵਾਹਸਾ.

੫.

ਅਪਾਯਂ ਪਰਿਵਜ੍ਜੇਤ੍ਵਾ, ਨੇਕਦੁਕ੍ਖਸਮਾਕੁਲਂ;

ਦੇਵਸਙ੍ਘਪਰਿਬ੍ਬੂਲ਼੍ਹੋ, ਗਤੋ ਦੇਵਪੁਰਂ ਵਰਂ.

੬.

ਤਸ੍ਮਾ ਸੁਖੇਤ੍ਤੇ ਸਦ੍ਧਾਯ, ਦੇਥ ਦਾਨਾਨਿ ਕਾਮਦਂ;

ਦਾਨਂ ਦੇਨ੍ਤੇਹਿ ਸੀਲਮ੍ਪਿ, ਪਾਲਨੀਯਂਤਿਸੁਨ੍ਦਰਨ੍ਤਿ [ਪਾਲਨਂਚਾਤਿਸੁਨ੍ਦਰਂ ਇਤਿਪਿਕਤ੍ਥਚਿ].

ਅਥ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ਨਿਸਿਨ੍ਨਾ ਭਗਵਨ੍ਤਂ ਪੁਚ੍ਛਿਂਸੁ, ਕਿਂਭਨ੍ਤੇ ਸੋ ਪਾਪੋ ਚਤੂਸੁ ਅਪਾਯੇਸੁ ਕਤਰਸ੍ਮਿਂ ਨਿਬ੍ਬਤ੍ਤੋਤਿ. ਅਥ ਸਤ੍ਥਾ ਅਜ੍ਜੇਸ ਭਿਕ੍ਖਵੇ ਸਾਰਿਪੁਤ੍ਤਸ੍ਸ ਦਿਨ੍ਨਦਾਨਾਨੁਭਾਵੇਨ ਦੇਵਲੋਕੇ ਨਿਬ੍ਬਤ੍ਤੋ, ਤਸ੍ਸੇਵ ਨਿਸ੍ਸਨ੍ਦੇਨ ਅਨਾਗਤੇ ਪਚ੍ਚੇਕਬੁਦ੍ਧੋ ਭਵਿਸ੍ਸਤੀਤਿ ਬ੍ਯਾਕਾਸੀਤਿ.

੭.

ਭੋ ਸਾਰਿਪੁਤ੍ਤੇ ਨਿਹਿਤਪ੍ਪਦਾਨਂ,

ਖਣੇਨ ਪਾਪੇਤਿ ਹਿ ਸਗ੍ਗਮਗ੍ਗਂ;

ਤਸ੍ਮਾ ਸੁਖੇਤ੍ਤੇਸੁ ਦਦਾਥ ਦਾਨਂ,

ਕਾਮਤ੍ਥ ਚੇ ਸਗ੍ਗਮੋਕ੍ਖਂ ਪਰਤ੍ਥ.

ਚੋਰਘਾਤਕਵਤ੍ਥੁਂ ਛਟ੍ਠਮਂ.

੨੭. ਸਦ੍ਧੋਪਾਸਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਤੀਤੇ ¶ ਕਿਰ ਕਸ੍ਸਪਦਸਬਲਸ੍ਸ ਕਾਲੇ ਏਕੋ ਪੁਰਿਸੋ ਸਦ੍ਧੋ ਰਤਨਤ੍ਤਯੇਸੁ ਪਸਨ੍ਨੋ ਉਚ੍ਛੁਯਨ੍ਤਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤੋ ਪਟਿਵਸਤਿ. ਅਥ ਸੋ ਏਕਂ ਗਿਲਾਨਭਿਕ੍ਖੁਂ ਦਿਸ੍ਵਾ ਤਸ੍ਸ ਉਲ਼ੁਙ੍ਕਮਤ੍ਤਂ ਸਪ੍ਪਿਂ ਅਦਾਸਿ, ਤਥੇਵੇਕਸ੍ਸ ਭਿਕ੍ਖੁਸ੍ਸ ਏਕਂ ਗੁਲ਼ਪਿਣ੍ਡਂ ਅਦਾਸਿ, ਅਥਾਪਰਸ੍ਮਿਂਦਿਵਸੇ ਏਕਂ ਛਾਤਜ੍ਝਤ੍ਤਂ ਸੁਨਖਂ ਦਿਸ੍ਵਾ ਤਸ੍ਸ ਭਤ੍ਤਪਿਣ੍ਡੇਨ ਸਙ੍ਗਹ ਮਕਾਸਿ, ਅਥੇਕਸ੍ਸ ਇਣਟ੍ਠਕਸ੍ਸ ਏਕਂ ਕਹਾਪਣਂ ਅਦਾਸਿ, ਅਥੇਕਦਿਵਸਂ ਧਮ੍ਮਂ ਸੁਣਮਾਨੋ ਧਮ੍ਮਦੇਸਕਸ੍ਸ ਭਿਕ੍ਖੁਸ੍ਸ ਸਾਟਕਂ ਪੂਜੇਸਿ, ਸੋ ਏਤ੍ਤਕਂ ਪੁਞ੍ਞਕਮ੍ਮਂ ਕਤ੍ਵਾ ਭਵੇਸੁ ਚਰਮਾਨੋਹਂ ਸਮੁਦ੍ਦਪਬ੍ਬਤਾਦੀਸੁਪਿ ਯਂ ਯਂ ਇਚ੍ਛਾਮਿ. ਤਂ ਤਂ ਸਮਿਜ੍ਝਤੂਤਿ ਪਤ੍ਥਨਂ ਅਕਾਸਿ, ਸੋ ਅਪਰਭਾਗੇ ਕਾਲਂ ਕਤ੍ਵਾ ਤੇਹੇਵ ਕੁਸਲਮੂਲੇਹਿ ਸੁਤ੍ਤਪ੍ਪਬੁਦ੍ਧੋ ਵਿਯ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤੋ ਅਮ੍ਹਾਕਂ ਭਗਵਤੋ ਕਾਲੇ ਸਾਵਤ੍ਥਿਯਂ ਮਹਦ੍ਧਨੇ ਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਤਤੋ ਸੋ ਵਿਞ੍ਞੁਤਂ ਪਤ੍ਤੋ ਕਾਲੇਨ ਕਾਲਂ ਧਮ੍ਮਂ ਸੁਣਨ੍ਤੋ ਘਰਾਵਾਸੇ ਆਦੀਨਵਂ ਪਬ੍ਬਜ੍ਜਾਯ ਚ ਆਨਿਸਂਸਂ ਸੁਤ੍ਵਾ ਪਬ੍ਬਜਿਤੋ ਨ ਚਿਰੇਨੇਵ ਅਰਹਤ੍ਤਂ ਪਾਪੁਣਿ. ਸੋ ਅਪਰਭਾਗੇ ਸਤ੍ਥਾਰਂ ਵਨ੍ਦਿਤ੍ਵਾ ਪਞ੍ਚਸਤਭਿਕ੍ਖੁਪਰਿਵਾਰੋ ਉਗ੍ਗਨਗਰਂ ਅਗਮਾਸਿ, ਤਤ੍ਥ ਸੇਟ੍ਠਿਨੋ ਭਰਿਯਾ ਸਦ੍ਧਾ ਅਹੋਸਿ ਪਸਨ੍ਨਾ. ਸਾ ਥੇਰਂ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਭਿਕ੍ਖਾਯ ਚਰਨ੍ਤਂ ਦਿਸ੍ਵਾ ਤੁਰਿਤਤੁਰਿਤਾ ਗਨ੍ਤ੍ਵਾ ਥੇਰਸ੍ਸ ਪਤ੍ਤਂ ਗਹੇਤ੍ਵਾ ਸਦ੍ਧਿਂ ਪਞ੍ਚਸਤੇਹਿ ਭਿਕ੍ਖੂਹਿ ਭੋਜੇਤ੍ਵਾ ਥੇਰਂ ਤਤ੍ਥ ਨਿਬਦ੍ਧਵਾਸਤ੍ਥਂ ਯਾਚਿਤ੍ਵਾ ਪਞ੍ਚਸਤਕੂਟਾਗਾਰਾਨਿ ਕਾਰਾਪੇਤ੍ਵਾ ਅਲਙ੍ਕਰਿਤ੍ਵਾ ਪਞ੍ਚਸਤਭਿਕ੍ਖੂ ਤਤ੍ਥ ਵਾਸੇਨ੍ਤੀ ਨਿਬਦ੍ਧਂ ਚਤੁਪਚ੍ਚਯੇਹਿ ਉਪਟ੍ਠਾਨਮਕਾਸਿ. ਤਤੋ ਥੇਰੋ ਤਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਤਤ੍ਥ ਯਥਾਭਿਰਨ੍ਤਂ ਵਿਹਰਿਤ੍ਵਾ ਅਞ੍ਞਤ੍ਤ ਗਨ੍ਤੁਕਾਮੋ ਅਨੁਪੁਬ੍ਬੇਨ ਪਟ੍ਟਨਗਾਮਂ ਅਗਮਾਸਿ, ਤਤ੍ਥ ਵਸਿਤ੍ਵਾ ਤਤੋ ਨਾਵਂ ਅਭਿਰੁਯ੍ਹ ਪਞ੍ਚਸਤਭਿਕ੍ਖੂਹਿ ਪਰਿਵੁਤੋ ਸਮੁਦ੍ਦਪਿਟ੍ਠੇਨ ਗਚ੍ਛਤਿ, ਸਮੁਦ੍ਦਂ ਤਰਨ੍ਤਸ੍ਸ ¶ ਤਸ੍ਸ ਸਾਗਰਮਜ੍ਝੇ ਉਦਰਵਾਤੋ ਸਮੁਟ੍ਠਹਿਤ੍ਵਾ ਪੀਲ਼ੇਤਿ, ਤਂ ਦਿਸ੍ਵਾ ਭਿਕ੍ਖੂ ਭਨ੍ਤੇ ਇਦਂ ਪੁਬ੍ਬੇ ਕੇਨ ਵੂਪਸਮੇਸ੍ਸਤੀਤਿ ਪੁਚ੍ਛਿਂਸੁ, ਥੇਰੋ ਪੁਬ੍ਬੇ ਮੇ ਆਵੁਸੋ ਉਲੁਙ੍ਕਮਤ੍ਤੇ ਸਪ੍ਪਿਪੀਤੇ ਰੋਗੋ ਵੂਪਸਮ੍ਮਤੀਤਿ ਆਹ, ਭਿਕ੍ਖੂ ਭਨ੍ਤੇ ਸਮੁਦ੍ਦਪਿਟ੍ਠੇ ਕਥਂ ਸਪ੍ਪਿਂ ਲਭਿਸ੍ਸਾਮ, ਅਧਿਵਾਸੇਥਾਤਿ ਆਹਂਸੁ, ਤਂ ਸੁਤ੍ਵਾ ਥੇਰੇਨ [ਥੇਰੋਨਨੋਆਯਸ੍ਮਨ੍ਤਾ ਇਤਿਸਬ੍ਬਤ੍ਥ] ਨ ਨੋ ਆਯਸ੍ਮਨ੍ਤਾ ਸਪ੍ਪਿ ਦੁਲ੍ਲਭਾ, ਮਮ ਪਤ੍ਤਂ ਗਹੇਤ੍ਵਾ ਸਮੁਦ੍ਦੋਦਕਂ ਉਦ੍ਧਰਿਤ੍ਵਾ ਆਨੇਥਾਤਿ ਵੁਤ੍ਤੇ ਭਿਕ੍ਖੂ ਤਥਾ ਅਕਂਸੁ. ਉਦ੍ਧਟਮਤ੍ਤਮੇਵ ਤਂਉਦਕਂ ਪਰਿਵਤ੍ਤੇਤ੍ਵਾ ਸਪ੍ਪਿ ਅਹੋਸਿ, ਅਥ ਭਿਕ੍ਖੂ ਤਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਾ ਜਾਤਾ ਥੇਰਸ੍ਸ ਸਪ੍ਪਿਂ ਉਪਨਾਮੇਸੁਂ, ਥੇਰੇਨ ਸਪ੍ਪਿਨੋ [ਸਪ੍ਪਿਨਾ ਇਤਿਸਬ੍ਬਤ੍ਥ] ਪੀਤਮਤ੍ਤੇ ਸੋ ਆਬਾਧੋ ਵੂਪਸਮਿ, ਅਥਸ੍ਸ ਭਿਕ੍ਖੂਹਿ ਕਿ ਮੇਤਂ ਭਨ੍ਤੇ ਅਚ੍ਛਰਿਯਂ, ਨ ਨੋ ਇਤੋ ਪੁਬ੍ਬੇ ਏਵਰੂਪਂ ਦਿਟ੍ਠਪੁਬ੍ਬਂਤਿ ਵੁਤ੍ਤੇ ਥੇਰੋ ਤੇਨਹਿ ਕਤਪੁਞ੍ਞਾਨਂ ਪੁਞ੍ਞਵਿਪਾਕਂ ਪਸ੍ਸਿਸ੍ਸਥਾਤਿ ਵਤ੍ਵਾ ਸਮੁਦ੍ਦਂ ਓਲੋਕੇਸਿ ਇਦਂ ਸਪ੍ਪਿ ਹੋਤੂਤਿ. ਅਥਸ੍ਸ ਚਕ੍ਖੁਪਥੇ ਸਮੁਦ੍ਦੇ ਸਬ੍ਬੋਦਕਂ ਪਰਿਵਤ੍ਤੇਤ੍ਵਾ ਸਪ੍ਪਿ ਅਹੋਸਿ. ਅਥਸ੍ਸ ਭਿਕ੍ਖੂ ਅਬ੍ਭੁਤਚਿਤ੍ਤਾ ਅਞ੍ਞਮ੍ਪਿ ਈਦਿਸਂ ਪੁਞ੍ਞਂ ਅਤ੍ਥਿ ਭਨ੍ਤੇਤਿ ਪੁਚ੍ਛਿਂਸੁ, ਤਤੋ ਥੇਰੋ ਤੇਨਹਿ ਪਸ੍ਸਥਾਯਸ੍ਮਨ੍ਤਾ ਮਮ ਪੁਞ੍ਞਨ੍ਤਿ ਵਤ੍ਵਾ ਸਮਨ੍ਤਾ ਤਤ੍ਥ ਤਤ੍ਥ ਘਨਸੇਲਪਬ੍ਬਤੇ ਓਲੋਕੇਸਿ, ਸਬ੍ਬਾਨਿ ਤਾਨਿ ਗੁਲ਼ਪਿਣ੍ਡਾਨਿ ਅਹੇਸੁਂ, ਤਤੋ ਚਕ੍ਖੁਪਥੇ ਸਮਨ੍ਤਾ ਭਤ੍ਤਭਾਜਨਾਨਿ ਦਸ੍ਸੇਸਿ ਸਬ੍ਯਞ੍ਜਨਂ ਸੋਪਕਰਣਂ. ਤਤੋ ਹਿਮਵਨ੍ਤਂ ਓਲੋਕੇਸਿ, ਸਬ੍ਬਂ ਤਂ ਸੁਵਣ੍ਣਮਯਂ ਅਹੋਸਿ. ਅਥਾਭਿਮੁਖਟ੍ਠਾਨੇ ਮਹਨ੍ਤਂ ਵਨਸਣ੍ਡਂ ਓਲੋਕੇਸਿ, ਸਕਲਵਨਸਣ੍ਡਂਨਾਨਾਵਿਰਾਗਵਤ੍ਥੇਹਿ ਸਞ੍ਛਨ੍ਨਂ ਅਹੋਸਿ, ਭਿਕ੍ਖੂ ਤਂ ਤਂ ਪਾਟਿਹਾਰਿਯਂ ਦਿਸ੍ਵਾ ਅਤੀਵ ਵਿਮ੍ਹਿਤਾ ਭਨ੍ਤੇ ਕੇਨ ਤੇ ਪੁਞ੍ਞਕਮ੍ਮੇਨ ਏਤਾਦਿਸਾਨਿ ਪਾਟਿਹਾਰਿਯਾਨਿ ਭਵਿਸ੍ਸਨ੍ਤੀਤਿ ਪੁਚ੍ਛਿਂਸੁ, ਥੇਰੋ ਕਸ੍ਸਪਦਸਬਲਸ੍ਸ ਕਾਲੇ ਅਤ੍ਤਨਾ ਕਤਂ ਸਬ੍ਬਂ ਤਂ ਕੁਸਲਂ ਪਕਾਸੇਸਿ. ਤੇਨੇਤ੍ਥ.

੧.

ਇਮਸ੍ਮਿਂ ¶ ਭਦ੍ਦਕੇ ਕਪ੍ਪੇ, ਕਸ੍ਸਪੋ ਨਾਮ ਨਾਯਕੋ;

ਸਬ੍ਬਲੋਕਹਿਤਤ੍ਥਾਯ, ਲੋਕੇ ਉਪ੍ਪਜ੍ਜਿ ਚਕ੍ਖੁਮਾ.

੨.

ਤਦਾਹਂ ਉਚ੍ਛੁਯਨ੍ਤਮ੍ਹਿ, ਨਿਯੁਤ੍ਤੋ ਗੁਲ਼ਕਾਰਕੋ;

ਤੇਨ ਕਮ੍ਮੇਨ ਜੀਵਾਮਿ, ਪੋਸੇਨ੍ਤੋ ਪੁਤ੍ਤਦਾਰਕੇ.

੩.

ਕਿਲਨ੍ਤਿਨ੍ਦ੍ਰਿਯਮਦ੍ਦਕ੍ਖਿਂ, ਭਿਕ੍ਖੁਂ ਰੋਗਾਤੁਰਂ ਤਦਾ;

ਭਿਕ੍ਖਾਚਾਰਕਵਤ੍ਤੇਨ, ਘਤਤ੍ਥਂ [ਘਤਮਤ੍ਤਮੁਪਾਗਤਂ ਇਤਿਸਬ੍ਬਤ੍ਥ] ਸਮੁਪਾਗਤਂ.

੪.

ਉਲੁਙ੍ਕਮਤ੍ਤਂ ਸਪ੍ਪਿਸ੍ਸ, ਅਦਦਂ ਤਸ੍ਸ ਭਿਕ੍ਖੁਨੋ;

ਸਦ੍ਦਹਨ੍ਤੋ ਦਾਨਫਲਂ, ਦਯਾਯੁ ਦਗ੍ਗਮਾਨਸੋ.

. ੫

ਤੇਨ ਕਮ੍ਮੇਨ ਸਂਸਾਰੇ, ਸਂਸਰਨ੍ਤੋ ਭਵਾਭਵੇ;

ਯਤ੍ਥਿਚ੍ਛਾਮਿ ਘਤਂ ਤਤ੍ਥ, ਉਪ੍ਪਜ੍ਜਤਿ ਅਨਪ੍ਪਕਂ.

੬.

ਇਚ੍ਛਾਮਹਂ ਸਮੁਦ੍ਦਸ੍ਮਿਂ, ਫਲਮ੍ਪਿ ਘਤਮਤ੍ਤਨੋ;

ਤਂ ਤਂ ਸਬ੍ਬਂ ਘਤਂ ਹੋਤਿ, ਘਤਦਾਨਸ੍ਸਿਦਂ ਫਲਂ.

੭.

ਸੁਣਾਥ ਮਯ੍ਹਂ ਅਞ੍ਞਮ੍ਪਿ, ਪੁਞ੍ਞਕਮ੍ਮਂ ਮਨੋਰਮਂ;

ਤਦਾ ਦਿਸ੍ਵਾਨਹਂ ਭਿਕ੍ਖੁਂ, ਰੋਗੇਨ ਪਰਿਪੀਲ਼ਿਤਂ.

੮.

ਗੁਲ਼ਪਿਣ੍ਡਂ ਗਹੇਤ੍ਵਾਨ, ਪਤ੍ਤੇ ਤਸ੍ਸ ਸਮਾਕਿਰਿਂ;

ਤੇਨ ਸੋ ਸੁਖਿਤੋ ਆਸਿ, ਰੋਗਂ ਬ੍ਯਪਗਤਂ ਤਦਾ.

੯.

ਤੇਨ ਮੇ ਗੁਲ਼ਦਾਨੇਨ, ਸਂਸਰਂ ਦੇਵਮਾਨੁਸੇ;

ਯਤ੍ਥਤ੍ਥੋਸ੍ਮਿ ਗੁਲ਼ੇਨਾਹਂ, ਤਤ੍ਥ ਤਂ ਸੁਲਭਂ ਮਮ.

੧੦.

ਸੇਲਾਚ ਵਿਪੁਲਾ ਮਯ੍ਹਂ, ਹੋਨ੍ਤਿ ਚਿਤ੍ਤਾਨੁਵਤ੍ਤਕਾ;

ਮਹਨ੍ਤਗੁਲ਼ਪਿਣ੍ਡਾਵ, ਗੁਲ਼ਦਾਨੇ ਇਦਂ ਫਲਂ.

੧੧.

ਅਥਾਪਿ ਮੇ ਕਤਂ ਪੁਞ੍ਞਂ, ਸੁਣਾਥ ਸਾਧੁ ਭਿਕ੍ਖਵੋ;

ਛਾਤਜ੍ਝਤ੍ਤਂ ਫਨ੍ਦਮਾਨਂ, ਦਿਸ੍ਵਾਨ ਸੁਨਖਂ ਤਦਾ.

੧੨.

ਭਤ੍ਤਪੀਣ੍ਡੇਨ ¶ ਸਙ੍ਗਣ੍ਹਿਂ, ਤਮ੍ਪਿ ਦਾਨਂ ਫਲਾਵਹਂ;

ਤਤੋ ਪਟ੍ਠਾਯ ਨਾਹੋਸਿ, ਅਨ੍ਨਪਾਨੇਨ ਊਨਤਾ.

੧੩.

ਸੁਲਭਨ੍ਨਪਾਨੋ ਸੁਖਿਤੋ, ਅਹੋਸਿਂਜਾਤਿਜਾਤਿਯਂ;

ਅਜ੍ਜਾਪਿ ਯਦਿ ਇਚ੍ਛਾਮਿ, ਭੋਜਨੇਨ ਪਯੋਜਨਂ.

੧੪.

ਚਕ੍ਖੁਪਥੇ ਸਮਨ੍ਤਾ ਮੇ, ਜਾਯਨ੍ਤੁਕ੍ਖਲਿਯੋ ਬਹੂ;

ਅਥਾਪਰਮ੍ਪਿ ਕੁਸਲਂ, ਅਕਾਸਿਂਤਂ ਸਣਾਥ ਮੇ.

੧੫.

ਇਣਟ੍ਠਕਸ੍ਸ ਪੋਸਸ੍ਸ, ਅਦਾਸੇਕਂ ਕਹਾਪਣਂ;

ਤੇਨ ਮੇ ਪੁਞ੍ਞਕਮ੍ਮੇਨ, ਅਨੋਮਭਵਸਮ੍ਪਦਂ.

੧੬.

ਪਚੁਰਂ ਜਾਤਰੂਪਞ੍ਚ, ਲਭਾਮਿ ਜਾਤਿਜਾਤਿਯਂ;

ਸਚਜ੍ਜ ਧਨਕਾਮੋਹਂ, ਘਨਸੇਲੋਪਿ ਪਬ੍ਬਤੋ;

ਹੋਤਿ ਹੇਮਮਯਂ ਸਬ੍ਬਂ, ਇਣਤੋ ਮੋਚਨੇ ਫਲਂ.

੧੭.

ਅਞ੍ਞਮ੍ਪਿ ਮਮ ਪੁਞ੍ਞਂ ਭੋ, ਸੁਣਾਥ ਸੁਤਿਸੋਭਨਂ;

ਕਸ੍ਸਪਸ੍ਸ ਭਗਵਤੋ, ਸਾਸਨੇਕਂ ਬਹੁਸ੍ਸੁਤਂ.

੧੮.

ਦੇਸੇਨ੍ਤਂ ਮੁਨਿਨੋ ਧਮ੍ਮਂ, ਸੁਤ੍ਵਾ ਪੀਣਿਤਮਾਨਸੋ;

ਪੂਜੇਸਿਂਸਾਟਕਂ ਮਯ੍ਹਂ, ਧਮ੍ਮਸ੍ਸ ਧਮ੍ਮਸਾਮਿਨੋ.

੧੯.

ਤੇਨਾਹਂ ਪੁਞ੍ਞਕਮ੍ਮੇਨ, ਸਂਸਰਂ ਦੇਵਮਾਨੁਸੇ;

ਲਭਾਮਿ ਪਚੁਰਂ ਵਤ੍ਥਂ, ਯਂ ਲੋਕਸ੍ਮਿਂ ਵਰਂ ਪਰਂ.

੨੦.

ਇਚ੍ਛਮਾਨੋ ਸਚੇ ਅਜ੍ਜ [ਜਾਨਮਾਨੋਪਹਂਅਜ੍ਜ; ਜਾਨਧਾਨੋਚਹਂਅਜ੍ਜ ਇਤਿਕਤ੍ਥਚਿ], ਹਿਮਵਨ੍ਤਮ੍ਪਿ ਪਬ੍ਬਤਂ;

ਨਾਨਾਵਿਰਾਗਵਤ੍ਥੇਹਿ, ਛਾਦਯਿਸ੍ਸਂ ਸਮਨ੍ਤਤੋ.

੨੧.

ਸਚੇ ਇਚ੍ਛਾਮਿ ਅਜ੍ਜੇਵ, ਵਤ੍ਥੇਨਚ੍ਛਾਦਯਾ ਮਿਤੇ;

ਜਨ੍ਤਵੋ ਚਤੁਦੀਪਸ੍ਮਿਂ, ਵਤ੍ਥਦਾਨਸ੍ਸਿਦਂ ਫਲਂ.

੨੨.

ਏਤੇਸਂ ਪੁਞ੍ਞਕਮ੍ਮਾਨਂ, ਵਾਹਸਾ ਕਾਮਭੂਮਿਯਂ;

ਸਮ੍ਪਤ੍ਤਿ ਮਨੁਭੁਤ੍ਵਾਨ, ਸਾਵਤ੍ਥਿਪੁਰ ਮੁਤ੍ਤਮੇ.

੨੩.

ਜਾਤੋ ਕੁਲੇ ਮਹਾਭੋਗੇ,

ਵੁਦ੍ਧਿਪ੍ਪਤ੍ਤੋ ਸੁਖੇਧਿਤੋ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ,

ਪਬ੍ਬਜਿਤ੍ਵਾਨ ਸਾਸਨੇ.

੨੪.

ਲੋਕੁਤ੍ਤਰਂ ਅਗ੍ਗਰਸਂ, ਭੁਞ੍ਚਨ੍ਤੋ ਮੁਨਿਵਾਹਸਾ;

ਕਿਲੇਸੇ ਪਜਹਿਤ੍ਵਾਨ, ਅਰਹਤ੍ਤਮਪਾਪੁਣਿਂ.

੨੫.

ਕੁਸਲਂ ਨਾ ਵਮਨ੍ਤਬ੍ਬਂ, ਖੁਦ੍ਦਕਨ੍ਤਿ ਕਦਾਚਿਪਿ;

ਅਨਨ੍ਤਫਲਦਂ ਹੋਤਿ, ਨਿਬ੍ਬਾਣਮ੍ਪਿ ਦਦਾਤਿ ਤਂ.

ਅਥਸ੍ਸ ਧਮ੍ਮਦੇਸਨਂ ਸੁਤ੍ਵਾ ਭਿਕ੍ਖੂ ਚ ਮਹਾਜਨੋ ਚ ਦਾਨਾਦਿਕੁਸਲਕਮ੍ਮਂ ਕਤ੍ਵਾ ਯੇਭੁਯ੍ਯੇਨ ਸਗ੍ਗਪਰਾਯਣਾ ਅਹੇਸੁਂਤਿ.

੨੬.

ਮਨੋਪਸਾਦੇਨਪਿ ਅਪ੍ਪਪੁਞ੍ਞਂ,

ਏਵਂ ਮਹਨ੍ਤਂ ਭਵਤੀਤਿ ਞਤ੍ਵਾ;

ਮਾ ਅਪ੍ਪਪੁਞ੍ਞਨ੍ਤਿ ਪਮਜ੍ਜਥਮ੍ਭੋ;

ਸਰਾਥ ਦੇਵਿਂ ਇਧ ਲਾਜਦਾਯਿਂ.

ਸਦ੍ਧੋਪਾਸਕਸ੍ਸ ਵਤ੍ਥੁਂ ਸਤ੍ਤਮਂ.

੨੮. ਕਪਣਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਬਾਰਾਣਸੀਨਗਰਵਾਸੀ ਏਕੋ ਦੁਗ੍ਗਤਪੁਰਿਸੋ ਪਰਗੇਹੇ ਭਤਿਂਕਤ੍ਵਾ ਜੀਵਿਕਂ ਕਪ੍ਪੇਤਿ, ਤਸ੍ਮਿਂ ਸਮਯੇ ਨਗਰਵਾਸਿਨੋ ਯੇਭੁਯ੍ਯੇਨ ਤਸ੍ਮਿਂ ਤਸ੍ਮਿਂ ਠਾਨੇ ਮਣ੍ਡਪਾਦਯੋ ਕਾਰਾਪੇਤ੍ਵਾ ਮਹਾਦਾਨਂ ਦੇਨ੍ਤਿ, ਤਂ ਦਿਸ੍ਵਾ ਦੁਗ੍ਗਤੋ ਏਵਂ ਚਿਨ੍ਤੇਸਿ, ਅਹਂ ਪੁਬ੍ਬੇ ਅਕਤਪੁਞ੍ਞਤ੍ਤਾ ਪਰਗੇਹੇ ਭਤਿਂ ਕਤ੍ਵਾ ਕਿਚ੍ਛੇਨ ਕਸਿਰੇਨ ਜੀਵਾਮਿ. ਨਿਵਾਸਨਪਾਰੁਪਨਮ੍ਪਿ ਵਾਸਟ੍ਠਾਨਮਤ੍ਤਮ੍ਮਿ ਦੁਕ੍ਖਤੋ ਲਭਾਮਿ. ਇਦਾਨਿ ਬੁਦ੍ਧੁਪ੍ਪਾਦੋ ਵਤ੍ਤਤਿ ਭਿਕ੍ਖੁਸਙ੍ਘੋਪਿ.

ਸਬ੍ਬੇ ¶ ਇਮੇ ਦਾਨਂ ਦਤ੍ਵਾ ਸਗ੍ਗਮਗ੍ਗਂ ਸੋਧੇਨ੍ਤਿ. ਮਯਾਪਿ ਦਾਨਂ ਦਾਤੁਂ ਵਟ੍ਟਤਿ. ਤਮ੍ਮੇ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤਿ. ਅਪਿ ਚ ਮਯ੍ਹਂ ਤਣ੍ਡੁਲਨਾਲਿਮਤ੍ਤਮ੍ਪਿ ਨਤ੍ਥਿ, ਅਕਤਵੀਰਿਯੇਨ ਤਂ ਮਤ੍ਥਕਂ ਪਾਪੇਤੁਂ ਨ ਸਕ੍ਕਾ, ਏਤਦਤ੍ਥਾਯਾਹਂ ਉਯ੍ਯੋਗਂ ਕਤ੍ਵਾ ਦਾਨਂ ਦਸ੍ਸਾਮੀਤਿ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਭਤਿਂ ਪਰਿਯੇਸਮਾਨੋ ਗਨ੍ਤ੍ਵਾ ਤਤ੍ਥ ਤਤ੍ਥ ਭਤਿਂ ਕਤ੍ਵਾ ਲਦ੍ਧਨਿਵਾਪੇ ਚ ਭਿਕ੍ਖਾਚਰਿਯਾਯ ਲਦ੍ਧਤਿਲਤਣ੍ਡੁਲਾਦਯੋ ਚ ਏਕਤ੍ਥ ਸਂਹਰਿਤ੍ਵਾ ਮਨੁਸ੍ਸੇ ਸਮਾਦਾਪੇਤ੍ਵਾ ਤਸ੍ਮਿਂ ਮਣ੍ਡਪਂ ਕਾਰਾਪੇਤ੍ਵਾ ਵਨਕੁਸਮਾਦੀਹਿ ਤਂ ਅਲਙ੍ਕਰਿਤ੍ਵਾ ਭਿਕ੍ਖੂ ਨਿਮਨ੍ਤੇਤ੍ਵਾ ਮਣ੍ਡਪੇ ਨਿਸੀਦਾਪੇਤ੍ਵਾ ਸਬ੍ਬੇਸਂ ਪਾਯਸਂ [ਪਾਯਾਸਂ ਇਤਿਸਬ੍ਬਤ੍ਥ] ਪਟਿਯਾਦੇਤ੍ਵਾ ਭੋਜੇਸਿ. ਅਥ ਸੋ ਮਰਣਕਾਲੇ ਅਤ੍ਤਨਾ ਕਤਂ ਤਂ ਦਾਨਵਰਂ ਅਨੁਸ੍ਸਰਿ. ਸੋ ਤੇਨ ਕੁਸਲਕਮ੍ਮੇਨ ਸੁਤ੍ਤਪ੍ਪਬੁਦ੍ਧੋ ਵਿਯ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਮਿਂ ਤੇਨ ਕਤਪੁਞ੍ਞਾਨੁਰੂਪਂ ਮਹਨ੍ਤਂ ਕਨਕਵਿਮਾਨਂ ਨਿਬ੍ਬਤ੍ਤਿ. ਸਮਨ੍ਤਾ ਤਿਗਾਵੁਤਟ੍ਠਾਨੇ ਦੇਵਤਾ ਨਾਨਾ ਵਿਧਾਨਿ ਤੁਰਿਯਾਨਿ ਗਹੇਤ੍ਵਾ ਉਪਹਾਰਂ ਕਰੋਨ੍ਤਿ. ਨਿਚ੍ਚਂ ਦੇਵਚ੍ਛਰਾਸਹਸ੍ਸਾਨਿ [ਦੇਵਚ੍ਛਰਾਸਹਸ੍ਸਂ ਇਤਿਸਬ੍ਬਤ੍ਥ] ਤਂ ਪਰਿਵਾਰੇਤ੍ਵਾ ਤਿਟ੍ਠਨ੍ਤਿ. ਏਵਂ ਸੋ ਮਹਨ੍ਤਂ ਸਮ੍ਪਤ੍ਤਿਂ ਅਨੁਭਵਤਿ. ਅਥੇਕਦਿਵਸਂ ਸੁਵਣ੍ਣਸੇਲਵਿਹਾਰਵਾਸੀ ਮਹਾਸਙ੍ਘਰਕ੍ਖਿਤਤ੍ਥੇਰੋ ਪਤ੍ਤਪਟਿਸਮ੍ਭਿਦੋ ਦੇਵਚਾਰਿਕਂ ਚਰਮਾਨੋ ਤਂ ਦੇਵਪੁਤ੍ਤਂ ਅਨੁਪਮਾਯ ਦੇਵਸਮ੍ਪਤ੍ਤਿਯਾ ਵਿਰੋਚਮਾਨਂ ਦਿਸ੍ਵਾ ਉਪਸਙ੍ਕਮ੍ਮ ਠਿਤੋ ਤੇਨ ਕਤਕਮ੍ਮਂ ਪੁਚ੍ਛਿ. ਸੋਪਿਸ੍ਸ ਯਥਾਭੂਤਂ ਬ੍ਯਾਕਾਸਿ, ਤੇਨਤ੍ਥ.

੧.

ਸਬ੍ਬਸੋਵਣ੍ਣਯੋ ਆਸਿ, ਪਾਸਾਦੋ ਰਤਨਾਮਯੋ;

ਸੋਣ੍ਣਸਿਙ੍ਗਸਤਾਕਿਣ੍ਣੋ, ਦੁਦ੍ਦਿਕ੍ਖੋ ਚ ਪਭਸ੍ਸਰੋ.

੨.

ਕੂਟਾਗਾਰ ਸਤਾਕਿਣ੍ਣੋ, ਸੋਣ੍ਣਮਾਲਾਸਮਾਕੁਲੋ;

ਮੁਤ੍ਤਾਕਲਾਪਾਲਮ੍ਬਨ੍ਤਿ, ਤਤ੍ਥ ਤਤ੍ਥ ਮਨੋਰਮਾ.

੩.

ਨੇਕਗਬ੍ਭਸਤਾਕਿਣ੍ਣੋ, ਸਯਨਾਸਨਮਣ੍ਡਿਤੋ;

ਵਿਭਤ੍ਤੋ ਭਬ੍ਬਭਾਗੇਹਿ, ਪੁਞ੍ਞਵਡ੍ਢਕਿਨਾ ਕਤੋ.

੪.

ਨਚ੍ਚਨ੍ਤਿ ¶ ਪਮਦਾ ਤਤ੍ਥ, ਭੇਰਿਮਣ੍ਡਲਮਜ੍ਝਗਾ;

ਗਾਯਨ੍ਤਿ ਕਾਚਿ ਕੀਲ਼ਨ੍ਤਿ, ਵਾਦੇਨ੍ਤਿ ਕਾਚਿ ਤਨ੍ਤਿਯੋ.

੫.

ਤਤੋ ਤਿਗਾਵੁਤੇ ਠਾਨੇ, ਪਾਸਾਦਸ੍ਸ ਸਮਨ੍ਤਤੋ;

ਸਹਚ੍ਛਰਾ ਦੇਵਪੁਤ੍ਤਾ, ਗਹੇਤ੍ਵਾ ਆਤਤਾਦਯੋ.

੬.

ਮੋਦਨ੍ਤਿ ਪਰਿਵਾਰੇਤ੍ਵਾ, ਨਚ੍ਚਗੀਤਾਦਿਨਾ ਸਦਾ;

ਉਲ੍ਲਙ੍ਘਨ੍ਤਿਚ ਸੇਲੇਨ੍ਤਿ, ਸਿਲਾਘਨ੍ਤਿ ਸਮਨ੍ਤਤੋ.

੭.

ਏਵਂ ਮਹਿਦ੍ਧਿਕੋ ਦਾਨਿ, ਤੁਵਂ ਵਨ੍ਦੋਵ ਭਾਸਤਿ;

ਪੁਚ੍ਛਾਮਿ ਤਂ ਦੇਵਪੁਤ੍ਤ, ਕਿਂ ਕਮ੍ਮਮਕਰੀ ਪੁਰਾ.

ਦੇਵਪੁਤ੍ਤੋ ਆਹ.

੮.

ਅਹੋਸਿਂ ਦੁਗ੍ਗਤੋ ਪੁਬ੍ਬੇ, ਬਾਰਾਣਸੀਪੁਰੁਤ੍ਤਮੇ;

ਦਾਨਂ ਦੇਨ੍ਤਿ ਨਰਾ ਤਤ੍ਥ, ਨਿਮਨ੍ਤੇਤ੍ਵਾਨ ਭਿਕ੍ਖਵੋ.

੯.

ਜੀਵਨ੍ਤੋ ਭਤਿਯਾ ਸੋਹਂ, ਦਾਨਂ ਦੇਨ੍ਤੇ ਮਹਾਜਨੇ;

ਤੁਟ੍ਠਹਟ੍ਠੇ ਪਮੁਦਿਤੇ, ਏਵਂ ਚਿਨ੍ਤੇਸਹਂ ਤਦਾ.

੧੦.

ਸਮ੍ਪਨ੍ਨਵਤ੍ਥਾਲਙ੍ਕਾਰਾ, ਦਾਨਂ ਦੇਨ੍ਤਿ ਇਮੇ ਜਨਾ;

ਪਰਤ੍ਥਪਿ ਪਹਟ੍ਠਾਵ, ਸਮ੍ਪਤ੍ਤਿਮਨੁਭੋਨ੍ਤਿ ਤੇ.

੧੧.

ਬੁਦ੍ਧੁਪ੍ਪਾਦੋ ਅਯਂ ਦਾਨਿ, ਧਮ੍ਮੋ ਲੋਕੇ ਪਵਤ੍ਤਤਿ;

ਸੁਸੀਲਾ ਦਾਨਿ ਵਤ੍ਤਨ੍ਤਿ, ਦਕ੍ਖਿਣੇਯ੍ਯਾ ਜਿਨੋਰਸਾ.

੧੨.

ਅਨਾਵਟ੍ਠਿਤੋ [ਅਵਟ੍ਠਿਤੋਚ; ਅਨ੍ਧਟ੍ਠਿਤੋਚ ਇਤਿਪਿਕਤ੍ਤਚਿ] ਸਂਸਾਰੋ, ਅਪਾਯਾ ਖਲੁ ਪੂਰਿਤਾ;

ਕਲ੍ਯਾਣਵਿਮੁਖਾ ਸਤ੍ਤਾ, ਕਾਮਂ ਗਚ੍ਛਨ੍ਤਿ ਦੁਗ੍ਗਤਿਂ.

੧੩.

ਇਦਾਨਿ ਦੁਕ੍ਖਿਤੋ ਹੁਤ੍ਵਾ, ਜੀਵਾਮਿ ਕਸਿਰੇਨਹਂ;

ਦਲਿਦ੍ਦੋ ਕਪਣੋ ਦੀਨੋ, ਅਪ੍ਪਭੋਗੋ ਅਨਾਲਯੋ.

੧੪.

ਇਦਾਨਿ ਬੀਜਂ ਰੋਪੇਮਿ, ਸੁਖੇਤ੍ਤੇ ਸਾਧੁਸਮ੍ਮਤੇ;

ਅਪ੍ਪੇਵਨਾਮ ਤੇਨਾਹਂ, ਪਰਤ੍ਥ ਸੁਖਿਤੋ ਸਿਯਾ.

੧੫.

ਇਤਿ ਚਿਨ੍ਤਿਯ ਭਿਕ੍ਖਿਤ੍ਵਾ, ਭਤਿਂ ਕਤ੍ਵਾਨ ਨੇਕਧਾ;

ਮਣ੍ਡਪਂ ਤਤ੍ਥ ਕਾਰੇਤ੍ਵਾ, ਨਿਮਨ੍ਤੇਤ੍ਵਾਨ ਭਿਕ੍ਖਵੋ.

੧੬.

ਆਯਾਸੇਨ ¶ ਅਦਾਸਾਹਂ, ਪਾਯਸਂ ਅਮਤਾਯ ਸੋ;

ਤੇਨ ਕਮ੍ਮਵਿਪਾਕੇਨ, ਦੇਵਲੋਕੇ ਮਨੋਰਮੇ.

੧੭.

ਜਾਤੋਮ੍ਹਿ ਦਿਬ੍ਬਕਾਮੇਹਿ, ਮੋਦਮਾਨੋ ਅਨੇਕਧਾ;

ਦੀਘਾਯੁਕੋ ਵਣ੍ਣਵਨ੍ਤੋ, ਤੇਜਸ੍ਸੀਚ ਅਹੋਸਹਨ੍ਤਿ.

ਏਵਂ ਦੇਵਪੁਤ੍ਤੋ ਅਤ੍ਤਨਾ ਕਤਪੁਞ੍ਞਕਮ੍ਮਂ ਵਿਤ੍ਤਾਰੇਨ ਕਥੇਸਿ, ਥੇਰੋਪਿ ਮਨੁਸ੍ਸਲੋਕਂ ਆਗਨ੍ਤ੍ਵਾ ਮਨੁਸ੍ਸਾਨਂ ਅਤ੍ਤਨਾ ਪਚ੍ਚਕ੍ਖਤੋ ਦਿਟ੍ਠਦਿਬ੍ਬਸਮ੍ਪਤ੍ਤਿਂ ਪਕਾਸੇਸਿ. ਤਂ ਸੁਤ੍ਵਾ ਮਹਾਜਨੋ ਕੁਸਲਕਮ੍ਮਂ ਕਤ੍ਵਾ ਯੇਭੁਯ੍ਯੇਨ ਸਗ੍ਗੇ ਨਿਬ੍ਬਤ੍ਤੋਤਿ.

੧੮.

ਅਨਾਲਯੋ ਦੁਗ੍ਗਤਦੀਨਕੋਪਿ,

ਦਾਨਂ ਦਦਨ੍ਤੋ ਧਿਗਤੋ ਵਿਸੇਸਂ;

ਸਗ੍ਗਾ ਪਵਗ੍ਗਂ ਯਦਿ ਪਤ੍ਥਯਵ੍ਹੋ,

ਹਨ੍ਤ੍ਵਾਨ ਮਚ੍ਛੇਰਮਲਂ ਦਦਾਥਾਤਿ.

ਕਪਣਸ੍ਸ ਵਤ੍ਥੁਂ ਅਟ੍ਠਮਂ.

੨੯. ਦੇਵਪੁਤ੍ਤਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ਪੁਬ੍ਬੇ ਨਾਰਦਸ੍ਸ ਕਿਰ ਸਮ੍ਮਾਸਮ੍ਬੁਦ੍ਧਸ੍ਸ ਕਾਲੇ ਅਯਂ ਦੀਪੋ ਅਞ੍ਞਤਰੇਨ ਨਾਮੇਨ ਪਾਕਟੋ ਅਹੋਸਿ, ਸੋ ਪਨੇਕਸ੍ਮਿਂ ਕਾਲੇ ਦੁਬ੍ਭਿਕ੍ਖੋ ਅਹੋਸਿ ਦੁਸ੍ਸਸ੍ਸੋ, ਮਹਾਛਾਤਕਭਯਂ ਸਤ੍ਤੇ ਪੀਲ਼ੇਤਿ. ਤਸ੍ਮਿਂ ਸਮਯੇ ਨਾਰਦਸ੍ਸ ਭਗਵਤੋ ਏਕੋ ਸਾਸਨਿਕੋ ਸਾਵਕੋ ਅਞ੍ਞਤਰਸ੍ਮਿਂ ਗਾਮੇ ਪਿਣ੍ਡਾਯ ਚਰਿਤ੍ਵਾ ਯਥਾ ਧੋਤਪਤ੍ਤੋਵ ਨਿਕ੍ਖਮਿ. ਅਥਞ੍ਞਤਰਸ੍ਮਿਂ ਗੇਹੇ ਮਨੁਸ੍ਸਾ ਏਕਂ ਤਣ੍ਡੁਲਨਾਲ਼ਿਂਪੋਟਲਿਕਾਯ ਬਨ੍ਧਿਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਪਚਿਤ੍ਵਾ ਉਦਕਂ ਗਹੇਤ੍ਵਾ ਪਿਵਨ੍ਤੋ ਜੀਵਨ੍ਤਿ, ਤਦਾ ਥੇਰਂ ਦਿਸ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਤੇਨ ਤਣ੍ਡੁਲੇਨ ਭਤ੍ਤਂ ਪਚਿਤ੍ਵਾ ਪਤ੍ਤੇ ਪਕ੍ਖਿਪਿਤ੍ਵਾ ਥੇਰਸ੍ਸ ਅਦਂਸੁ. ਅਥ ¶ ਤੇਸਂ ਸਦ੍ਧਾਬਲੇਨ ਸਾ ਉਕ੍ਖਲਿ ਭਤ੍ਤੇਨ ਪਰਿਪੁਣ੍ਣਾ ਅਹੋਸਿ, ਤੇ ਤਂ ਅਬ੍ਭੁਤਂ ਦਿਸ੍ਵਾ ਅਯ੍ਯਸ੍ਸ ਦਿਨ੍ਨਦਾਨੇ ਵਿਪਾਕੋ ਅਜ੍ਜੇਵ ਨੋ ਦਿਟ੍ਠੋਤਿ ਸੋਮਨਸ੍ਸਜਾਤਾ ਮਹਾਜਨਂ ਸਨ੍ਨਿਪਾਤੇਤ੍ਵਾ ਤੇ ਭਤ੍ਤਂ ਭੋਜੇਤ੍ਵਾ ਪਚ੍ਛਾ ਸਯਂ ਭੁਞ੍ਜਿਂਸੁ. ਭਤ੍ਤਸ੍ਸ ਗਹਿਤਗਹਿਤਟ੍ਠਾਨਂ ਪੂਰਤੇਵ. ਤਤੋ ਪਟ੍ਠਾਯ ਤੇ ਸਮ੍ਪਤ੍ਤਮਹਾਜਨਸ੍ਸ ਦਾਨਂ ਦਦਨ੍ਤਾ ਆਯੁਪਰਿਯੋਸਾਨੇ ਦੇਵਲੋਕੇ ਨਿਬ੍ਬਤ੍ਤਿਂਸੁ, ਅਥ ਸੋ ਥੇਰੋ ਭਤ੍ਤਂ ਆਦਾਯ ਗਨ੍ਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿਤ੍ਵਾ ਭੁਞ੍ਜਿਤੁਮਾਰਤਿ. ਤਸ੍ਮਿਂ ਕਿਰ ਰੁਕ੍ਖੇ ਨਿਬ੍ਬਤ੍ਤੋ ਏਕੋ ਦੇਵਪੁਤ੍ਤੋ ਆਹਾਰੇਨ ਕਿਲਨ੍ਤੋ ਭੁਞ੍ਜਮਾਨਂ ਥੇਰਂ ਦਿਸ੍ਵਾ ਅਤ੍ਤਭਾਵਂ ਵਿਜਹਿਤ੍ਵਾ ਮਹਲ੍ਲਕਵੇਸੇਨ ਤਸ੍ਸ ਸਮੀਪੇ ਅਟ੍ਠਾਸਿ. ਥੇਰੋ ਅਨਾਵਜ੍ਜਿਤ੍ਵਾਵ ਭੁਞ੍ਜਤਿ. ਦੇਵਪੁਤ੍ਤੋ ਚਰਿਮਾਲੋਪਂ ਠਪੇਤ੍ਵਾ ਭੁਤ੍ਤਕਾਲੇ ਉਕ੍ਕਾਸਿਤ੍ਵਾ ਅਤ੍ਤਾਨਂ ਠਿਤਭਾਵਂ ਜਾਨਾਪੇਸਿ. ਥੇਰੋ ਤਂ ਦਿਸ੍ਵਾ ਵਿਪ੍ਪਟਿਸਾਰਿ ਹੁਤ੍ਵਾ ਚਰਿਮਂ ਭਤ੍ਥਪਿਣ੍ਡਂ ਤਸ੍ਸ ਹਤ੍ਥੇ ਠਪੇਸਿ, ਤਤੋ ਸੋ ਭਤ੍ਤਪਿਣ੍ਡਂ ਗਹੇਤ੍ਵਾ ਠਿਤੋ ਚਿਨ੍ਤੇਸਿ. ਇਤੋ ਕਿਰ ਮਯਾ ਪੁਬ੍ਬੇ ਸਮਣਬ੍ਰਾਹ੍ਮਣਾਨਂ ਵਾ ਕਪਣਦ੍ਧਿਕਾਨਂ ਵਾ ਅਨ੍ਤਮਸੋ ਕਾਕਸੁਨਖਾ ਦੀਨਮ੍ਪਿ ਆਹਾਰਂ ਅਦਿਨ੍ਨਪੁਬ੍ਬਂ ਭਵਿਸ੍ਸਤਿ, ਤੇਨਵਾਹਂ ਦੇਵੋ ਹੁਤ੍ਵਾਪਿ ਭਤ੍ਤਂ ਨ ਲਭਾਮਿ. ਹਨ੍ਦਾਹਂ ਇਮਂ ਭਤ੍ਤਪਿਣ੍ਡਂ ਥੇਰਸ੍ਸੇਵ ਦਸ੍ਸਾਮਿ, ਤਂ ਮੇ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯ ਚਾਤਿ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਭਤ੍ਤਪਿਣ੍ਡੇ ਆਸਂ ਪਹਾਯ ਥੇਰਂ ਉਪਸਙ੍ਕਮ੍ਮ ਸਾਮਿ ਦਾਸਸ੍ਸ ਵੋ ਅਲਂ ਇਧ ਲੋਕੇਨ ਸਙ੍ਗਹਂ. ਪਰਲੋਕੇਨ ਮੇ ਸਙ੍ਗਹਂ ਕਰੋਥਾਤਿ ਵਤ੍ਵਾ ਤਸ੍ਸ ਪਤ੍ਤੇ ਓਕਿਰਿ. ਅਥਸ੍ਸ ਭਤ੍ਥਪਿਣ੍ਡਂ [ਭਤ੍ਥਪਿਣ੍ਡਂ ਇਤਿਸਬ੍ਬਤ੍ਥ] ਪਤ੍ਤੇ ਪਤਿਤਮਤ੍ਤੇਯੇਵ ਤਿਗਾਵੁਤਟ੍ਠਾਨੇ ਦਿਬ੍ਬਮਯਾਨਿ ਭਤ੍ਤਭਾਜਨਾਨਿਪਞ੍ਞਾਯਿਂਸੁ. ਦੇਵਪੁਤ੍ਤੋ ਥੇਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤਤੋ ਦਿਬ੍ਬਭੋਜਨਂ ਗਹੇਤ੍ਵਾ ਪਥਮਂ ਦਾਨਂ ਦਤ੍ਵਾ ਪਚ੍ਛਾ ਸਯਂ ਭੁਞ੍ਚਿ. ਤਤੋ ਦੇਪੁਤ੍ਤੋ ਦੁਤਿਯਦਿਵਸਤੋ ਪਟ੍ਠਾਯ ਥੇਰਸ੍ਸ ਚ ਸਮ੍ਪਤ੍ਤਮਹਾਜਨਸ੍ਸ ਚ ਮਹਾਦਾਨਂ ਦੇਨ੍ਤੋ ਆਯੁਪਰਿਯੋਸਾਨੇ ¶ ੦ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਛਸੁ ਕਾਮਸਗ੍ਗੇਸੁ ਅਪਰਾਪਰਂ ਦਿਬ੍ਬਸਮ੍ਪਤ੍ਤਿ ਮਨੁਭਵਮਾਨੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਤਤੋ ਚੁਤੋ ਬਾਰਾਣਸਿਯਂ ਅਨੇਕਵਿਭਵਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਕੁਟੁਮ੍ਬਿਕਸ੍ਸ ਗੇਹੇ ਨਿਬ੍ਬਤ੍ਤਿ. ਦੇਵੋਤਿਸ੍ਸ ਨਾਮਂ ਅਕਂਸੁ. ਅਪਰਭਾਗੇ ਵਿਞ੍ਞੁਤਂ ਪਤ੍ਤਸ੍ਸ ਤਸ੍ਸ ਮਾਤਾਪਿਤਰੋ ਕਾਲਮਕਂਸੁ. ਸੋਵਣ੍ਣਮਣਿਮੁਤ੍ਤਾਦਿਪੂਰਿਤਕੋਟ੍ਠਾਗਾਰਾਦਯੋ ਓਲੋਕੇਤ੍ਵਾ ਮਮ ਮਾਤਾਪਿਤਰੋ ਮਿਚ੍ਛਾਦਿਟ੍ਠਿਕਤ੍ਤਾ ਇਤੋ ਦਾਨਾਦਿਕਿਞ੍ਚਿਕਮ੍ਮਂ ਅਕਰਿਤ੍ਵਾ ਪਰਲੋਕਂ ਗਚ੍ਛਨ੍ਤਾ ਕਾਕਣਿਕਮਤ੍ਤਮ੍ਪਿ ਅਗਹੇਤ੍ਵਾ ਗਤਾ, ਅਹਂ ਪਨ ਤਂ ਗਹੇਤ੍ਵਾਵ ਗਮਿਸ੍ਸਾਮੀਤਿ ਸਨ੍ਨਿਟ੍ਠਾਨਂ ਕਤ੍ਵਾ ਭੇਰਿਂ ਚਰਾਪੇਤ੍ਵਾ ਕਪਣਦ੍ਧਿਕਵਨਿਬ੍ਬਕੇ ਸਨ੍ਨਿਪਾਤੇਤ੍ਵਾ ਸਤ੍ਤਾਹਬ੍ਭਨ੍ਤਰੇ ਸਬ੍ਬਂ ਸਾਪਤੇਯ੍ਯਂ ਦਾਨਮੁਖੇਨ ਦਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਇਸਿਪ੍ਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਪਞ੍ਚ ਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਆਕਾਸਚਾਰੀ ਅਹੋਸਿ. ਅਥ ਤਸ੍ਮਿਂਸਮਯੇ ਪਦੁਮੁਤ੍ਤਰੋ ਨਾਮ ਭਗਵਾ ਹਂਸਵਤੀਨਗਰੇ ਪਟਿਵਸਨ੍ਤੋ ਦੇਵਬ੍ਰਹ੍ਮਾਦਿਪਰਿਵੁਤੋ ਚਤੁਸਚ੍ਚਪਟਿਸਂਯੁਤ੍ਤਂ ਧਮ੍ਮਂ ਦੇਸੇਨ੍ਤੋ ਨਿਸਿਨ੍ਨੋ ਹੋਤਿ, ਤਦਾ ਸੋ ਤਾਪਸੋ ਆਕਾਸੇਨ ਗਚ੍ਛਨ੍ਤੋ ਮਹਾਜਨਸਮਾਗਮਞ੍ਚ ਭਗਵਤੋ ਸਰੀਰਤੋ ਨਿਕ੍ਖਨ੍ਤਛਬ੍ਬਣ੍ਣਰਂਸਿਯੋ ਚ ਦਿਸ੍ਵਾ ਕਿਮੇਤਂਤਿ ਵਿਮ੍ਹਿਤੋ ਆਕਾਸਾ ਓਤਰਿਤ੍ਵਾ ਮਹਤਿਯਾ ਬੁਦ੍ਧਲੀਲ਼ਾਯ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਰਿਸਨ੍ਤਰੇ ਨਿਸਿਨ੍ਨੋ ਧਮ੍ਮਂ ਸੁਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਅਤ੍ਤਨੋ ਅਸ੍ਸਮਮੇਵ ਅਗਮਾਸਿ. ਅਥ ਸੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਆਯੁਪਰਿਯੋਸਾਨੇ ਤਾਵਤਿਂਸਭਵਨੇ ਨਿਬ੍ਬਤ੍ਤੋ ਤਿਂਸਕਪ੍ਪੇ ਦਿਬ੍ਬਸਮ੍ਪਤ੍ਤਿਮਨੁਭਵਨ੍ਤੋ ਛਸੁ ਕਾਮਸਗ੍ਗੇਸੁ ਅਪਰਾਪਰਿਯਵਸੇਨ ਸਂਸਰਿ. ਏਕਪਞ੍ਞਾਸਅਤ੍ਤਭਾਵੇ ਸਕ੍ਕੋ ਦੇਵਰਾਜਾ ਅਹੋਸਿ, ਏਕਕਵੀਸਤਿਅਤ੍ਤਭਾਵੇ ਚਕ੍ਕਵਤ੍ਤਿ ਹੁਤ੍ਵਾ ਮਨੁਸ੍ਸਸਮ੍ਪਤ੍ਤਿ ਮਨੁਭਵਿਤ੍ਵਾ ਇਮਸ੍ਮਿਂਬੁਦ੍ਧੁਪ੍ਪਾਦੇ ਭਗਵਤਿ ਪਰਿਨਿਬ੍ਬੁਤੇ ਸਾਵਤ੍ਥਿਯਂ ਅਞ੍ਞਤਰਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਤ੍ਤਵਸ੍ਸਿਕੋ ਏਕਂ ਭਿਕ੍ਖੁਂ ਧਮ੍ਮਂ ਦੇਸੇਨ੍ਤਂ ਅਦ੍ਦਸ. ਦਿਸ੍ਵਾ ਤਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਅਨਿਚ੍ਚਸਞ੍ਞਂ ¶ ਪਟਿਲਭਿਤ੍ਵਾ ਤਤ੍ਥ ਨਿਸਿਨ੍ਨੋਵ ਅਰਹਤ੍ਤਂ ਪਾਪੁਣਿ, ਤਤੋ ਸੋ ਪਤ੍ਤਪਟਿਸਮ੍ਭਿਦੋ ਅਤ੍ਤਨਾ ਕਤਪੁਞ੍ਞਕਮ੍ਮਂ ਓਲੋਕੇਨ੍ਤੋ ਤਂ ਪੁਬ੍ਬਚਰਿਯਂ ਭਿਕ੍ਖੂਨਂ ਮਜ੍ਝੇ ਪਕਾਸੇਨ੍ਤੋ ਆਹ. ਤਸ੍ਮਾ.

੧.

ਨਾਰਦੋ ਕਿਰ ਸਮ੍ਬੁਦ੍ਧੋ, ਪੁਬ੍ਬੇ ਆਸਿ ਨਰੁਤ੍ਤਮੋ;

ਲੋਕਂ ਦੁਕ੍ਖਾ ਪਮੋਚੇਨ੍ਤੋ, ਦਦਨ੍ਤੋ ਅਮਤਂ ਪਦਂ.

੨.

ਤਸ੍ਮਿਂ ਤੁ ਸਮਯੇ ਤਸ੍ਸ, ਸਾਵਕੋ ਛਿਨ੍ਨਬਨ੍ਧਨੋ;

ਭਿਕ੍ਖਿਤ੍ਵਾ ਦੀਪਕੇ ਲਦ੍ਧ, ਮਾਹਾਰਂ ਪਰਿਭੁਞ੍ਜਿਤੁਂ.

੩.

ਰੁਕ੍ਖਮੂਲ ਮੁਪਾ ਗਞ੍ਛਿ, ਤਤ੍ਥਾਸਿਂ ਰੁਕ੍ਖਦੇਵਤਾ;

ਬੁਭੁਕ੍ਖਿਤਾ ਉਦਿਕ੍ਖਨ੍ਤੀ, ਅਟ੍ਠਾਸਿਂ ਤਸ੍ਸ ਸਨ੍ਤਿਕੇ.

੪.

ਅਦਾਸਿ ਮੇ ਭਤ੍ਤਪਿਣ੍ਡਂ, ਕਰੁਣਾਪੂਰਿਤਨ੍ਤਰੋ;

ਗਹੇਤ੍ਵਾਨ ਠਿਤੋ ਪਿਣ੍ਡਂ, ਸਹਮਾਨੋ ਖੁਦਂ ਤਦਾ.

੫.

ਅਦਿਨ੍ਨਤ੍ਤਾ ਮਯਾ ਪੁਬ੍ਬੇ, ਕਿਞ੍ਚਿ ਦਾਨਂ ਸੁਪੇਸਲੇ;

ਜਿਘਚ੍ਛਾਪੀਲ਼ਿਤੋ ਹੋਮਿ, ਜਾਤੋਪਿ ਦੇਵਯੋਨਿਯਂ.

੬.

ਅਜ੍ਜ ਖੇਤ੍ਤਂ ਸੁਲਦ੍ਧਂਮੇ, ਦੇਯ੍ਯਧਮ੍ਮੋਪਿ ਵਿਜ੍ਜਤਿ;

ਬੀਜਮੇਤ੍ਥ ਚ ਰੋਪੇਮਿ, ਭਵਤੋ ਪਰਿਮੁਤ੍ਤਿਯਾ.

੭.

ਇਤਿ ਚਿਨ੍ਤਿਯ ਵਨ੍ਦਿਤ੍ਵਾ, ਦਾਸਸ੍ਸ ਸਾਮਿ ਵੋ ਅਲਂ;

ਸਙ੍ਗਹਂ ਇਧ ਲੋਕਸ੍ਮਿਂ, ਕਰੋਥ ਪਾਰਲੋਕਿਕਂ.

੮.

ਇਤਿ ਵਤ੍ਵਾ ਅਦਾਸਾਹਂ, ਭੁਞ੍ਚਿ ਸੋਪਿ ਦਯਾਪਰੋ;

ਤੇਨਾਹਂ ਪੁਞ੍ਞਕਮ੍ਮੇਨ, ਸੁਧਨ੍ਨਮਲਭਿਂ ਖਣੇ.

੯.

ਤਤੋ ਚੁਤੋ ਛਦੇਵੇਸੁ, ਵਿਨ੍ਦਨ੍ਤੋ ਮਹਤਿਂਸਿਰਿਂ;

ਚਿਰਕਾਲਂ ਵਸਿਂ ਤਤ੍ਥ, ਦੇਵਿਦ੍ਧੀਹਿ ਸਮਙ੍ਗਿਤਾ.

੧੦.

ਸਤਸਹਸ੍ਸੇ ਇਤੋ ਕਪ੍ਪੇ, ਪਦੁਮੁਤ੍ਤਰਨਾਮਕੋ;

ਉਪ੍ਪਜ੍ਜਿ ਲੋਕਨਾਯਕੋ, ਧਮ੍ਮਰਾਜਾ ਤਥਾਗਤੋ.

੧੧.

ਮਹਿਦ੍ਧਿਕੋ ¶ ਤਦਾ ਆਸਿਂ, ਤਾਪਸੋ ਕਾਨਨੇ ਵਨੇ;

ਸਮ੍ਪਤ੍ਤਪਞ੍ਚਾ ਭਿਞ੍ਞਾਣੋ, ਆਕਾਸੇਨ ਚਰਾਮਹਂ.

੧੨.

ਤਦਾ ਕਾਸੇਨ ਗਚ੍ਛਨ੍ਤੋ, ਰਮ੍ਮੇ ਹਂਸਵਤੀਪੁਰੇ;

ਬੁਦ੍ਧਰਂਸਿਪਰਿਕ੍ਖਿਤ੍ਤਂ, ਕੇਤੁਮਾਲਾਵਿਲਾਸਿਤਂ.

੧੩.

ਦੇਵਸਙ੍ਘਪਰਿਬ੍ਬੂਲ਼੍ਹਂ, ਦੇਸੇਨ੍ਤਂ ਅਦ੍ਦਸਂ ਜਿਨਂ;

ਸੋ ਤਂ ਦਿਸ੍ਵਾਨ ਨਭਸਾ, ਠਿਤੋਹਂ ਪਰਿਸਨ੍ਤਰੇ.

੧੪.

ਧਮ੍ਮਂ ਸੁਤ੍ਵਾ ਉਦਗ੍ਗੋਹਂ, ਕਾਲਂ ਕਤ੍ਵਾਨ ਸਤ੍ਥੁਨੋ;

ਤਤੋ ਚੁਤੋ ਪਪਨ੍ਨੋਸ੍ਮਿ, ਤਾਵਤਿਂਸੇ ਮਨੋਰਮੇ.

੧੫.

ਤਿਂਸਕਪ੍ਪਸਹਸ੍ਸਾਨਿ, ਚਰਨ੍ਤੋ ਦੇਵਮਾਨੁਸੇ;

ਦੁਗ੍ਗਤਿਂ ਨਾਭਿਜਾਨਾਮਿ, ਲਭਾਮਿ ਵਿਪੁਲਂ ਸੁਖਂ.

੧੬.

ਏਕਪਞ੍ਞਾਸਤਿਕ੍ਖਤ੍ਤੁਂ, ਦੇਵਰਜ੍ਜਮਕਾਰਯਿਂ;

ਅਥੇਕਵੀਸਤਿਕ੍ਖਤ੍ਤੁਂ, ਚਕ੍ਕਵਤ੍ਤੀ ਅਹੋਸਹਂ.

੧੭.

ਪਦੇਸਰਜ੍ਜਂ ਕਾਸਾਹਂ, ਬਹੁਕ੍ਖਤ੍ਤੁਂ ਤਹਿਂ ਤਹਿਂ;

ਇਮਸ੍ਮਿਂ ਭਦ੍ਦਕੇ ਕਪ੍ਪੇ, ਨਿਬ੍ਬੁਤੇਤੁ [ਨਿਬ੍ਬੁਤੇਸੁ ਇਤਿਸਬ੍ਬਤ੍ਥ] ਤਥਾਗਤੇ.

੧੮.

ਚੋਦਿਤੋ ਪੁਞ੍ਞਕਮ੍ਮੇਨ, ਸਾਵਤ੍ਥਿਪੁਰਮੁਤ੍ਤਮੇ;

ਉਪ੍ਪਜ੍ਜਿਤ੍ਵਾ ਕੁਲੇ ਸੇਟ੍ਠੇ, ਜਾਤਿਯਾ ਸਤ੍ਤਵਸ੍ਸਿਕੋ.

੧੯.

ਸੁਤ੍ਵਾ ਧਮ੍ਮਂ ਕਥੇਨ੍ਤਸ੍ਸ, ਭਿਕ੍ਖੁਸ੍ਸਞ੍ਞਤਰਸ੍ਸਹਂ;

ਭਵਸ੍ਸਨ੍ਤਂ ਕਰਿਤ੍ਵਾਨ, ਅਰਹਤ੍ਤਮਪਾਪੁਣਿਂ.

੨੦.

ਸੁਦਿਨ੍ਨਂ ਮੇ ਤਦਾ ਦਾਨਂ, ਸੁਸ੍ਸੁਤਂ ਧਮ੍ਮਮੁਤ੍ਤਮਂ;

ਦੁਕ੍ਖਸ੍ਸਨ੍ਤਂ ਅਕਾਸਾਹਂ, ਤਸ੍ਸ ਕਮ੍ਮਸ੍ਸ ਵਾਹਸਾਤਿ.

ਏਵਞ੍ਚ ਪਨ ਵਤ੍ਵਾ ਬਹੂ ਜਨੇ ਕੁਸਲਕਮ੍ਮੇ ਨਿਯੋਜੇਸੀਤਿ.

੨੧.

ਦਾਨੇਨਪੇਵਂ ¶ ਚਰਿਮਾਯ ਪਿਣ੍ਡਿਯਾ,

ਸਵਣਾਯ ਧਮ੍ਮਸ੍ਸ ਮੁਹੁਤ੍ਤਕੇਨ;

ਲਭਨ੍ਤਿ ਸਤ੍ਤਾ ਤਿਵਿਧਮ੍ਪਿ ਸਮ੍ਪਦਂ,

ਫਲਂ ਵਦੇ ਕੋ ਬਹੁਦਾਯਕਸ੍ਸ ਭੋ.

ਦੇਵਪੁਤ੍ਤਸ੍ਸ ਵਤ੍ਥੁਂ ਨਵਮਂ.

੩੦. ਸੀਵਲਿਤ੍ਥੇਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ਕਿਰ ਕਪ੍ਪਸਤਸਹਸ੍ਸਮਤ੍ਥਕੇ ਪਦੁਮੁਤ੍ਤਰੋ ਨਾਮ ਸਤ੍ਥਾ ਲੋਕੇ ਉਦਪਾਦਿ ਧਮ੍ਮਦੇਸਨਾਯ ਸਤ੍ਤੇ ਅਮਤਮਹਾਨਿਬ੍ਬਾਣਂ ਪਾਪੇਨ੍ਤੋ, ਤਸ੍ਮਿਂ ਸਮਯੇ ਭਗਵਾ ਹਂਸਾਵਤਿਯਂ ਸਰਾਜਿਕਾਯ ਪਰਿਸਾਯ ਮਜ੍ਝੇ ਏਕਂ ਭਿਕ੍ਖੁਂ ਲਾਭੀਨਂ ਅਗ੍ਗਟ੍ਠਾਨੇ ਠਪੇਸਿ. ਤਦਾ ਰਾਜਾ ਤਂ ਦਿਸ੍ਵਾ ਤਂ ਠਾਨਂ ਕਾਮਯਮਾਨੋ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਭਗਵਤੋ ਪਾਦਮੂਲੇ ਸਿਰਸਾ ਨਿਪਜ੍ਜਿ, ਤਦਾਸ੍ਸ ਭਗਵਾ ਅਨਾਗਤੇ ਗੋਤਮਸ੍ਸ ਭਗਵਤੋ ਸਾਸਨੇ ਤਂ ਠਾਨਂ ਲਭਿਸ੍ਸਸੀਤਿ ਵਤ੍ਵਾ ਬ੍ਯਾਕਾਸਿ. ਤਂ ਸੁਤ੍ਵਾ ਮੁਦਿਤੋ ਰਾਜਾ ਪੁਞ੍ਞਾਨਿ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਤੋ ਅਪਰਭਾਗੇ ਬਾਰਾਣਸਿਯਂ ਸੇਟ੍ਠਿਪੁਤ੍ਤੋ ਹੁਤ੍ਵਾ ਪਚ੍ਚੇਕਬੁਦ੍ਧਸਹਸ੍ਸਂ ਚਤੁਪਚ੍ਚਯਦਾਨੇਨ ਯਾਵਜੀਵਂ ਪਟਿਜਗ੍ਗਿਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ ਮਹਨ੍ਤਂ ਸਮ੍ਪਤ੍ਤਿ ਮਨੁਭਵਿਤ੍ਵਾ ਤਤੋ ਚੁਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬਨ੍ਧੁਮਤੀਨਗਰੇ ਅਞ੍ਞਤਰਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤਿ. ਸੋ ਤਸ੍ਮਿਂ ਸਮਯੇ ਸੇਨਗੁਤ੍ਤਟ੍ਠਾਨੇ ਠਤ੍ਵਾ ਰਞ੍ਞੋ ਕਮ੍ਮਂ ਕਰੋਤਿ, ਤਦਾ ਨਗਰਵਾਸਿਨੋ ਉਪਾਸਕਗਣਾ ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਂ ਉਪਸਙ੍ਕਮ੍ਮ ਵਨ੍ਦਿਤ੍ਵਾ ਭਗਵਾ ਭਨ੍ਤੇ ਸਸਾਵਕੋ ਅਮ੍ਹਾਕਂ ਅਨੁਗ੍ਗਹਂ ਕਰੋਤੂਤਿ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਮਹਾਦਾਨਂ ਦਤ੍ਵਾ ਸਬ੍ਬੇ ਏਕਚ੍ਛਨ੍ਦਾ ਭਗਵਨ੍ਤ ਮੁਦ੍ਦਿਸ੍ਸ ਮਹਾਰਹਂ ਮਹਾਪਰਿਵੇਣਂ ਕਾਰਾਪੇਤ੍ਵਾ ਪਰਿਵੇਣਮਹੇ ਮਹਾਦਾਨਂ ਦਦਨ੍ਤਾ ਦਾਨਗ੍ਗੇ ਅਸੁਕਂ ਨਾਮ ¶ ਨਤ੍ਥੀਤਿ ਨ ਵਤ੍ਤਬ੍ਬਨ੍ਤਿ ਵਤ੍ਵਾ ਦਾਨਂ ਪਟਿਯਾਦੇਤ੍ਵਾ ਦਾਨਗ੍ਗਂ ਓਲੋਕੇਨ੍ਤਾ ਨਵਦਧਿਞ੍ਚ ਪਟਲਮਧੁਞ੍ਚ ਅਪਸ੍ਸਨ੍ਤਾ ਪੁਰਿਸੇ ਪਕ੍ਕੋਸਿਤ੍ਵਾ ਸਹਸ੍ਸਂ ਦਤ੍ਵਾ ਦਧਿਮਧੁਂ ਖਿਪ੍ਪਂ ਪਰਿਯੇਸਿਤ੍ਵਾ ਆਨੇਥਾਤਿ ਪੇਸੇਸੁਂ, ਤੇ ਸਹਸ੍ਸਂ ਗਹੇਤ੍ਵਾ ਦਧਿਮਧੁਂ ਉਪਧਾਰੇਤੁਂ ਤਤ੍ਥ ਤਤ੍ਥ ਵਿਚਰਨ੍ਤਾ ਦ੍ਵਾਰਨ੍ਤਰੇ ਅਟ੍ਠਂਸੁ, ਤਦਾ ਅਯਂ ਸੇਨਗੁਤ੍ਤੋ ਰਞ੍ਞੋ ਸਭਤ੍ਤਂ ਦਧਿਮਧੁਂ ਆਦਾਯ ਗਚ੍ਛਨ੍ਤੋ ਮਹਾਦ੍ਵਾਰਂ ਸਮ੍ਪਾਪੁਣਿ, ਅਥ ਤੇ ਦਧਿਮਧੁਂ ਦਿਸ੍ਵਾ ਭੋ ਕਹਾਪਣਂ ਗਹੇਤ੍ਵਾ ਇਮਂ ਦੇਹੀਤਿ ਯਾਚਿਂਸੁ. ਤੇਨ [ਤੇਨਦਸ੍ਸਾਮਿ ਇਤਿਪਿਕਤ੍ਤਚਿ] ਨ ਦਸ੍ਸਾਮੀਤਿ ਵੁਤ੍ਤੇ ਯਾਵਸਹਸ੍ਸਂ ਵਡ੍ਢੇਤ੍ਵਾ ਯਾਚਿਂਸੁ. ਤਤੋ ਸੇਨਗੁਤ੍ਤੋ ਇਮਂ ਅਪ੍ਪਗ੍ਘਂ ਸਹਸ੍ਸੇਨ ਯਾਚਥ, ਕਿ ਮਨੇਨ ਕਰੋਥਾਤਿ ਪੁਚ੍ਛਿ, ਤੇਹਿ ਸਮ੍ਬੁਦ੍ਧਤ੍ਥਾਯਾਤਿ ਵੁਤ੍ਤੇ ਤੇਨਹਿ ਅਹਮੇਵ ਦਸ੍ਸਾਮੀਤਿ ਜੀਰਮਰਿਚਾਦੀਹਿ ਸਕ੍ਖਰਮਧੁਫਾਣਿਤਾਦਯੋ ਯੋਜੇਤ੍ਵਾ ਦਾਨਗ੍ਗਂ ਉਪਨਾਮੇਸਿ. ਤਂ ਸਤ੍ਥੁ ਆਨੁਭਾਵੇਨ ਬੁਦ੍ਧਪਮੁਖਸ੍ਸ ਅਟ੍ਠਸਟ੍ਠਿਭਿਕ੍ਖੁਸਤਸਹਸ੍ਸਸ੍ਸ ਪਹੋਣਕਂ ਅਹੋਸਿ. ਤਤੋ ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸਲੋਕੇਸੁ ਸਮ੍ਪਤ੍ਤਿ ਮਨੁਭਵਿਤ੍ਵਾ ਅਪਰਭਾਗੇ ਅਮ੍ਹਾਕਂ ਭਗਵਤੋ ਕਾਲੇ ਕੋਲਿਯਨਗਰੇ ਮਹਾਲਿਲਿਚ੍ਛਵਿਰਞ੍ਞੋ ਉਪਨਿਸ੍ਸਾਯ ਸੁਪ੍ਪਿਯਾਯ ਨਾਮ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਸੋ ਸਤ੍ਤਮਾਸਸਤ੍ਤਸਂਵਚ੍ਛਰਾਨਿ ਮਾਤੁਕੁਚ੍ਛਿਯਂ ਵਸਿਤ੍ਵਾ ਸਤ੍ਤਦਿਵਸਾਨਿ ਮੂਲ਼੍ਹਗਬ੍ਭੋ ਦੁਕ੍ਖਮਨੁਭਵਿ. ਮਾਤੁਕੁਚ੍ਛਿਤੋ ਨਿਕ੍ਖਮਨ੍ਤਸ੍ਸ ਤਸ੍ਸ ਮਾਤਾਪਿਤਰੋ ਸੀਵਲੀਤਿ ਨਾਮ ਮਕਂਸੁ. ਏਵਂ ਮਹਾਪੁਞ੍ਞਸ੍ਸ ਏਤ੍ਤਕਂ ਕਾਲਂ ਮਾਤੁਕੁਚ੍ਛਿਮ੍ਹਿ ਦੁਕ੍ਖਾਨੁਭਵਨਂ ਅਤ੍ਤਨਾਵ ਕਤੇਨ ਪਾਪਬਲੇਨ ਅਹੋਸਿ, ਸੋ ਕਿਰ ਅਤੀਤੇ ਰਾਜਾ ਹੁਤ੍ਵਾ ਅਤ੍ਤਨੋ ਸਪਤ੍ਤਰਞ੍ਞਾ ਸਦ੍ਧਿਂ ਸਙ੍ਗਾਮੇਨ੍ਤੋ ਮਾਤਰਾ ਸਦ੍ਧਿਂ ਮਨ੍ਤੇਸਿ. ਸਾ ਨਗਰਂ ਰੁਨ੍ਧਿਤ੍ਵਾ ਅਮਿਤ੍ਤੇ ਗਣ੍ਹਿਤੁਂ ਸਕ੍ਕਾਤਿ ਉਪਾਯ ਮਦਾਸਿ, ਸੋਪਿ ਤਸ੍ਸਾ ਵਚਨੇਨ ਨਗਰਂ ਰੁਨ੍ਧਿਤ੍ਵਾ ਸਤ੍ਤਮੇ ਦਿਵਸੇ ਅਗ੍ਗਹੇਸਿ, ਤੇਨ ਪਾਪਕਮ੍ਮਬਲੇਨ ਮਾਤਾਪੁਤ੍ਤਾਨਂ ਏਵਂ ਮਹਨ੍ਤਂ ਦੁਕ੍ਖਂ ਅਹੋਸੀਤਿ. ਤਤੋ ¶ ਸਾ ਪੁਤ੍ਤਂ ਵਿਜਾਯਨਕਾਲੇ ਸਤ੍ਤਮੇ ਦਿਵਸੇ ਭਗਵਨ੍ਤਂ ਅਨੁਸ੍ਸਰਿਤ੍ਵਾ ਸੁਖੇਨ ਭਾਰਂ ਮੁਞ੍ਚਿ. ਤੁਟ੍ਠਾ ਸਾ ਸਤ੍ਤਮੇ ਦਿਵਸੇ ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਾਸਿ, ਅਥਸ੍ਸਾ ਪੁਤ੍ਤੋ ਸਤ੍ਤਵਸ੍ਸਿਕਕਾਲੇ ਗੇਹਾ ਨਿਕ੍ਖਮ੍ਮ ਸਤ੍ਥਾਰਂ ਦਿਸ੍ਵਾ ਪਬ੍ਬਜ੍ਜਂ ਯਾਚਿ. ਸਤ੍ਥਾ ਸਾਰਿਪੁਤ੍ਤਤ੍ਥੇਰਸ੍ਸ ਨਿਯੋਜੇਸਿ, ਤਤੋ ਸਾਰਿਪੁਤ੍ਤਤ੍ਥੇਰੇਨ ਉਪਜ੍ਝਾਯੇਨ ਮੋਗ੍ਗਲ੍ਲਾਨਮਾਚਰਿਯਂ ਕਤ੍ਵਾ ਪਬ੍ਬਜਿ, ਅਥ ਸੋ ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਬੁਦ੍ਧਸਾਸਨਂ ਸੋਭੇਸਿ, ਸੋ ਪੁਬ੍ਬੇ ਕਤਪੁਞ੍ਞਾਨੁਭਾਵੇਨ ਮਹਾਪੁਞ੍ਞੋ ਅਹੋਸਿ ਲਾਭੀਨਞ੍ਚ ਅਗ੍ਗੋ. ਅਥੇਕਸ੍ਮਿਂ ਸਮਯੇ ਭਗਵਾ ਰੇਵਤਤ੍ਥੇਰਂ ਦਸ੍ਸਨਾਯ ਖਦਿਰਵਨਵਿਹਾਰਂ ਗਚ੍ਛਨ੍ਤੋ ਤਿਂਸਭਿਕ੍ਖੁਸਹਸ੍ਸੇਹਿ ਸਦ੍ਧਿਂ ਤਿਂਸਯੋਜਨਿਕਂ ਛਟ੍ਟਿਤਕਨ੍ਤਾਰਂ ਸਮ੍ਪਾਪੁਣਿ ਨਿਰੂਦਕਂ ਅਪ੍ਪਭਕ੍ਖਂ. ਯੇਭੁਯ੍ਯੇਨ ਦੇਵਤਾ ਸੀਵਲਿਤ੍ਥੇਰੇ ਪਸਨ੍ਨਾ. ਤਸ੍ਮਾ ਭਗਵਾ ਸੀਵਲਿਤ੍ਥੇਰਂ ਪੁਰਤੋ ਚਾਰਿਕਂ ਕਤ੍ਵਾ ਦੇਵਤਾਹਿ ਕਾਰਾਪਿਤੇ ਵਿਹਾਰੇ ਵਸਨ੍ਤੋ ਦੇਵਤਾਹਿ ਸਜ੍ਜਿਤਦਾਨਂ ਪਰਿਭੁਞ੍ਜਨ੍ਤੋ ਰੇਵਤਤ੍ਥੇਰਂ ਸਂਪਾਪੁਣਿਤ੍ਵਾ ਗਤਕਮ੍ਮਂ ਨਿਟ੍ਠਾਪੇਤ੍ਵਾ ਜੇਤਵਨਮਾਗਮ੍ਮ ਲਾਭੀਨਂ ਅਗ੍ਗਟ੍ਠਾਨੇ ਤਂ ਠਪੇਸੀਤਿ. ਤੇਨ ਵੁਤ੍ਤਂ ਅਪਦਾਨੇ.

੧.

ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੨.

ਸੀਲਂ ਤਸ੍ਸ ਅਸਙ੍ਖ੍ਯੇਯ੍ਯਂ, ਸਮਾਧਿ ਵਜਿਰੂਪਮੋ [ਵਜਿਰੂਪਮਾ ਇਤਿਕਤ੍ਥਚਿ];

ਅਸਂਖਿਯਂ ਞਾਣਵਰਂ, ਵਿਮੁਤ੍ਤਿ ਚ ਅਨੋਪਮਾ.

੩.

ਮਨੁਜਾਮਰਨਾਗਾਨਂ, ਬ੍ਰਹ੍ਮਾਨਞ੍ਚ ਸਮਾਗਮੇ;

ਸਮਣਬ੍ਰਾਹ੍ਮਣਾਕਿਣ੍ਣੇ, ਧਮ੍ਮਂ ਦੇਸੇਤਿ ਨਾਯਕੋ.

੪.

ਸਸਾਵਕਂ ਮਹਾਲਾਭਿਂ, ਪੁਞ੍ਞਵਨ੍ਤਂ ਜੁਤਿਨ੍ਧਰਂ,

ਠਪੇਸਿ ਏਤਦਗ੍ਗਮ੍ਹਿ, ਪਰਿਸਾਸੁ ਵਿਸਾਰਦੋ.

੫.

ਤਦਾਹਂ ¶ ਖਤ੍ਤਿਯੋ ਆਸਿਂ, ਪੁਰੇ ਹਂਸਵਤੀਵ੍ਹਯੇ [ਹਂਸਾਵਤਵ੍ਹਯੇ ਇਤਿਸਬ੍ਬਤ੍ਥ];

ਸੁਤ੍ਵਾ ਜਿਨਸ੍ਸ ਤਂ ਵਾਕ੍ਯਂ, ਸਾਵਕਸ੍ਸ ਗੁਣਂ ਬਹੁਂ.

੬.

ਨਿਮਨ੍ਤਯਿਤ੍ਵਾ ਸਤ੍ਤਾਹਂ, ਭੋਜਯਿਤ੍ਵਾ ਸਸਾਵਕਂ;

ਮਹਾਦਾਨਂ ਦਦਿਤ੍ਵਾਨ, ਤਂ ਠਾਨਮਭਿਪਤ੍ਥਯਿਂ.

੭.

ਤਦਾ ਮਂ ਵਿਨਤਂ ਪਾਦੇ, ਦਿਸ੍ਵਾਨ ਪੁਰਿਸਾਸਭੋ;

ਸੋ ਸਰੇਨ ਮਹਾਵੀਰੋ, ਇਮਂ ਵਚਨਮਬ੍ਰਵੀ.

੮.

ਤਤੋ ਜਿਨਸ੍ਸ ਵਚਨਂ, ਸੋਤੁਕਾਮਾ ਮਹਾਜਨਾ;

ਦੇਵਦਾਨਵਗਨ੍ਧਬ੍ਬਾ, ਬ੍ਰਹ੍ਮਾਨੋਚ ਮਹਿਦ੍ਧਿਕਾ.

੯.

ਸਮਣਬ੍ਰਾਹ੍ਮਣਾ ਚਾਪਿ, ਨਮਸ੍ਸਿਸੁਂ ਕਤਞ੍ਜਲੀ;

ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ.

੧੦.

ਖਤ੍ਤਿਯੇਨ ਮਹਾਦਾਨਂ, ਦਿਨ੍ਨਂ ਸਤ੍ਤਾਹਕਮ੍ਪਿ [ਸਤ੍ਤਾਹਕਂਪਿਤੋ ਇਤਿਪਿਕਤ੍ਥਚਿ] ਨੋ;

ਸੋਤੁਕਾਮਾ ਫਲਂ ਤਸ੍ਸ, ਬ੍ਯਾਕਰੋਹਿ ਮਹਾਮੁਨੇ.

੧੧.

ਤਤੋ ਅਵੋਚ ਭਗਵਾ, ਸੁਣੋਥ ਮਮ ਭਾਸਿਤਂ;

ਅਪ੍ਪਮੇਯ੍ਯਮ੍ਹਿ ਬੁਦ੍ਧਸ੍ਮਿਂ, ਗੁਣਮ੍ਹਿ ਸੁਪ੍ਪਤਿਟ੍ਠਿਤਾ.

੧੨.

ਦਕ੍ਖਿਣਾ ਦਾਯਕਂ ਪਤ੍ਵਾ, ਅਪ੍ਪਮੇਯ੍ਯਫਲਾਵਹਾ;

ਅਪਿ ਚੇ ਸ ਮਹਾਭੋਗੋ, ਠਾਨਂ ਪਤ੍ਥੇਤਿ ਮੁਤ੍ਤਮਂ.

੧੩.

ਲਾਭੀ ਵਿਪੁਲਲਾਭੀਨਂ, ਯਥਾ ਭਿਕ੍ਖੁ ਸੁਦਸ੍ਸਨੋ;

ਤਥਾਹਂਪਿ ਭਵੇਯ੍ਯਨ੍ਤਿ, ਲਚ੍ਛਤੇ ਤਂ ਅਨਾਗਤੇ.

੧੪.

ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋਨਾਮ ਨਾਮੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੫.

ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਸੀਵਲਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁਸਾਵਕੋ.

੧੬.

ਤੇਨ ¶ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗੋ ਅਹਂ.

੧੭.

ਤਤੋਪਰਸ੍ਮਿਂਸਮਯੇ, ਬਾਰਾਣਸਿਪੁਰੁਤ੍ਤਮੇ;

ਸੇਟ੍ਠਿਪੁਤ੍ਤੋ ਅਹਂ ਆਸਿਂ, ਅਡ੍ਢਪ੍ਪਤ੍ਤੋ ਮਹਾਧਨੋ.

੧੮.

ਸਹਸ੍ਸਮਤ੍ਤੇ ਪਚ੍ਚੇਕ, ਨਾਯਕੇ ਚ ਨਿਮਨ੍ਤਿਯ;

ਮਧੁਰੇਨਨ੍ਨਪਾਨੇਨ, ਸਨ੍ਤਪ੍ਪੇਸਿਂਤਦਾਦਰੋ.

੧੯.

ਤਤੋ ਚੁਤੋ ਛਕਾਮਗ੍ਗੇ, ਅਨੁਭੋਸਿਂਮਹਾਯਸਂ;

ਦੇਵਚ੍ਛਰਾਪਰਿਵੁਤੋ, ਪਾਸਾਦੇ ਰਤਨਾਮਯੇ.

੨੦.

ਏਵਂ ਅਚਿਨ੍ਤਿਯਾ ਬੁਦ੍ਧਾ, ਬੁਦ੍ਧਧਮ੍ਮਾ ਅਚਿਨ੍ਤਿਯਾ;

ਅਚਿਨ੍ਤਿਯੇ ਪਸਨ੍ਨਾਨਂ, ਵਿਪਾਕੋਪਿ ਅਚਿਨ੍ਤਿਯੋ.

੨੧.

ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਨਯਨੋ, ਸਬ੍ਬਧਮ੍ਮਵਿਪਸ੍ਸਕੋ.

੨੨.

ਤਦਾਹਂ ਬਨ੍ਧੁਮਤਿਯਾ, ਕੁਲਸ੍ਸਞ੍ਞਤਰਸ੍ਸ ਚ;

ਦਯਿਤੋ ਪਤ੍ਥਿਤੋ ਪੁਤ੍ਤੋ, ਆਸਿਂ ਕਮ੍ਮਨ੍ਤਬ੍ਯਾਵਟੋ.

੨੩.

ਤਦਾ ਅਞ੍ਞਤਰੋ ਪੂਗੋ, ਵਿਪਸ੍ਸਿਸ੍ਸ ਮਹੇਸਿਨੋ;

ਪਰਿਵੇਣਂ ਅਕਾਰੇਸਿ, ਮਹਨ੍ਤ ਮਿਤਿ ਵਿਸ੍ਸੁਤਂ.

੨੪.

ਨਿਟ੍ਠਿਤੇ ਚ ਮਹਾਦਾਨਂ, ਦਦਂ ਖਜ੍ਜਕਸਂਯੁਤਂ;

ਨਵਂ ਦਧਿ ਮਧੁਞ੍ਚੇਵ, ਵਿਚਿਨਂ ਨ ਚ ਮਦ੍ਦਸ.

੨੫.

ਤਦਾਹਂ ਤਂ ਗਹੇਤ੍ਵਾਨ, ਨਵਂ ਦਧਿ ਮਧੁਮ੍ਪਿਚ,

ਕਮ੍ਮਸਾਮਿਘਰਂ ਗਚ੍ਛਂ, ਤਮੇਨਂ [ਤਮੇਸਂ ਇਤਿਸਬ੍ਬਤ੍ਥ] ਦਾਨ ਮਦ੍ਦਸਂ.

੨੬.

ਸਹਸ੍ਸਮ੍ਪਿ ਚ ਦਤ੍ਵਾਨ, ਨ ਲਤਿਂਸੁ ਚ ਤਂ ਦ੍ਵਯਂ;

ਤਤੋ ਏਵਂ ਵਿਚਿਨ੍ਤੇਸਿਂ, ਨੇਤਂ ਹੇਸ੍ਸਤਿ ਓਰਕਂ.

੨੭.

ਯਥਾ ¶ ਇਮੇ ਜਨਾ ਸਬ੍ਬੇ, ਸਕ੍ਕਰੋਨ੍ਤਿ ਤਥਾਗਤਂ;

ਅਹਮ੍ਪਿ ਕਾਰਂ ਕਸ੍ਸਾਮਿ, ਸਸਙ੍ਘੇ ਲੋਕਨਾਯਕੇ.

੨੮.

ਤਦਾਹਮੇਵਂ ਚਿਨ੍ਤੇਤ੍ਵਾ, ਦਧਿਂਮਧੁਞ੍ਚ ਏਕਤੋ;

ਯੋਜੇਤ੍ਵਾ ਲੋਕਨਾਥਸ੍ਸ, ਸਸਙ੍ਘਸ੍ਸ ਅਦਾਸਹਂ.

੨੯.

ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸ ਮਗਞ੍ਛਹਂ.

੩੦.

ਪੁਨਾਹਂ ਬਾਰਾਣਸਿਯਂ, ਰਾਜਾ ਹੁਤ੍ਵਾ ਮਹਾਯਸੋ;

ਸਤ੍ਤੁਕਸ੍ਸ ਤਦਾ ਰੁਦ੍ਧੋ, ਦ੍ਵਾਰਰੋਧਂ ਅਕਾਰਯਿਂ.

੩੧.

ਤਤੋ ਸਪਤ੍ਤਿਨੋ [ਸਮ੍ਪਤ੍ਤਿਨੋ; ਸਪਤ੍ਤਾਨੋ ਇਤਿਚਕਤ੍ਥਚਿ] ਰੁਦ੍ਧਾ, ਏਕਾਹਂ ਰਕ੍ਖਿਤਾ ਅਹੁਂ;

ਤਤੋ ਤਸ੍ਸ ਵਿਪਾਕੇਨ, ਪਾਪੁਣਿਂ ਨਿਰਯਂ ਭੁਸਂ.

੩੨.

ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋਹਂ ਕੋਲਿਯੇ ਪੁਰੇ;

ਸੁਪ੍ਪਵਾਸਾ ਚ ਮੇ ਮਾਤਾ, ਮਹਾਲਿ ਲਿਚ੍ਛਵੀ ਪਿਤਾ.

੩੩.

ਖਤ੍ਤਿਯੇ ਪੁਞ੍ਞਕਮ੍ਮੇਨ, ਦ੍ਵਾਰਰੋਧਸ੍ਸ ਵਾਹਸਾ;

ਸਤ੍ਤਮਾਸੇ ਸਤ੍ਤਵਸ੍ਸੇ, ਵਸਿਂਕੁਚ੍ਛਿਮ੍ਹਿ ਦੁਕ੍ਖਿਤੋ.

੩੪.

ਸਤ੍ਤਾਹਂ ਦ੍ਵਾਰਮੂਲ਼੍ਹੋਹਂ, ਮਹਾਦੁਕ੍ਖਸਮਪ੍ਪਿਤੋ;

ਮਾਤਾ ਮੇ ਛਨ੍ਦਦਾਨੇਨ, ਏਵ ਮਾਸਿ ਸੁਦੁਕ੍ਖਿਤਾ.

੩੫.

ਸੁਵਤ੍ਥਿਤੋਹਂ ਨਿਕ੍ਖਨ੍ਤੋ, ਬੁਦ੍ਧੇਨ ਅਨੁਕਮ੍ਪਿਤੋ;

ਨਿਕ੍ਖਨ੍ਤਦਿਵਸੇਯੇਵ, ਪਬ੍ਬਜਿਂ ਅਨਗਾਰਿਯਂ.

੩੬.

ਉਪਜ੍ਝਾ ਸਾਰਿਪੁਤ੍ਤੋ ਮੇ, ਮੋਗ੍ਗਲ੍ਲਾਨੋ ਮਹਿਦ੍ਧਿਕੋ;

ਕੇਸੇ ਓਰੋਪਯਨ੍ਤੋ ਮੇ, ਅਨੁਸਾਸਿ ਮਹਾਮਤਿ.

੩੭.

ਕੇਸੇਸੁ ਛਿਜ੍ਜਮਾਨੇਸੁ [ਛਨ੍ਨਮਨੇਸੁ ਇਤਿਪਿਕਤ੍ਥਚਿ], ਅਰਹਤ੍ਤਮਪਾਪੁਣੀਂ;

ਦੇਵੋ ਨਾਗਾ ਮਨੁਸ੍ਸਾ ਚ, ਪਚ੍ਚਯਾਨੁ ਪਨੇਨ੍ਤਿ ਮੇ.

੩੮.

ਪਦੁਮੁਤ੍ਤਰਨਾਮਞ੍ਚ, ਵਿਪਸ੍ਸਿਂਚ ਵਿਨਾਯਕਂ;

ਸਂਪੂਜਯਿਂ ਪਮੁਦਿਤੋ, ਪਚ੍ਚਯੇਹਿ ਵਿਸੇਸਤੋ.

੩੯.

ਤਤੋ ¶ ਤੇਸਂ ਵਿਪਾਕੇਨ, ਕਮ੍ਮਾਨਂ ਵਿਪੁਲੁਤ੍ਤਮਂ;

ਲਾਭਂ ਲਭਾਮਿ ਸਬ੍ਬਤ੍ਥ, ਵਨੇ ਗਾਮੇ ਜਲੇ ਥਲੇ.

੪੦.

ਰੇਵਤਂ ਦਸ੍ਸਨਤ੍ਥਾਯ, ਯਦਾ ਯਾਤਿ ਵਿਨਾਯਕੋ;

ਤਿਂਸਭਿਕ੍ਖੁਸਹਸ੍ਸੇਹਿ, ਸਹ ਲੋਕਗ੍ਗਨਾਯਕੋ.

੪੧.

ਤਦਾ ਦੇਵੋ ਪਨੀਤੇਹਿ [ਪਣੀਤੇਹਿ ਇਤਿਸਬ੍ਬਤ੍ਥ], ਮਮਤ੍ਥਾਯ ਮਹਾਮਤਿ;

ਪਚ੍ਚਯੇਹਿ ਮਹਾਵੀਰੋ, ਸਸਙ੍ਘੋ ਲੋਕਨਾਯਕੋ.

੪੨.

ਉਪਟ੍ਠਿਤੋ ਮਯਾ ਬੁਦ੍ਧੋ, ਗਨ੍ਤ੍ਵਾ ਰੇਵਤਮਦ੍ਦਸ;

ਤਤੋ ਜੇਤਵਨਂ ਗਨ੍ਤ੍ਵਾ, ਏਤਦਗ੍ਗੇ ਠਪੇਸਿਮਂ.

੪੩.

ਲਾਭੀਨਂ ਸੀਵਲਿ ਅਗ੍ਗੋ, ਮਮ ਸਿਸ੍ਸੇਸੁ ਭਿਕ੍ਖਵੋ;

ਸਬ੍ਬੇਲੋਕਹਿਤੋ ਸਤ੍ਥਾ, ਕਿਤ੍ਤਯੀ ਪਰਿਸਾਸੁਮਂ.

੪੪.

ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

੪੫.

ਸ੍ਵਾਗਤਂ ਵਤ ਮੇ ਆਸਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨਂ.

੪੬.

ਪਟਿਸਮ੍ਭਿਦਾ ਚਤਸ੍ਸੋਪਿ, ਵਿਮੋਕ੍ਖਾ ਪਿਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਨ੍ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਸੀਵਲਿਤ੍ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

੪੭.

ਸੁਤ੍ਵਾਨ ਏਤਂ ਚਰਿਤਂ ਮਹਬ੍ਭੁਤਂ,

ਪੁਞ੍ਞਾਨੁਭਾਵਞ੍ਚ ਸਿਰਿਂ ਸਿਰੀਮਤਂ;

ਹਿਤ੍ਵਾ ਕੁਸੀਤਂ ਕੁਸਲਂ ਕਰੋਥ,

ਕਾਮਾਤ੍ਥ ਕਾਮਂ ਭਵਭੋਗਨਿਬ੍ਬੁਤਿਂ.

ਸੀਵਲਿਤ੍ਥੇਰਸ੍ਸ ਵਤ੍ਥੁਂ ਦਸਮਂ.

ਯਕ੍ਖਵਞ੍ਚਿਤਵਗ੍ਗੋ ਤਤਿਯੋ.

ਮਹਾਸੇਨਵਗ੍ਗੋ

੩੧. ਮਹਾਸੇਨਰਞ੍ਞੋ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ¶ ਪਰਿਨਿਬ੍ਬੁਤੇ ਪਾਟਲਿਪੁਤ੍ਤਨਗਰੇ ਮਹਾਸੇਨੋ ਨਾਮ ਰਾਜਾ ਰਜ੍ਜਂ ਕਾਰੇਸਿ ਧਮ੍ਮਿਕੋ ਧਮ੍ਮਰਾਜਾ. ਸੋ ਪਨ ਪਿਤੁਪਿਤਾਮਹਾਦੀਨਂ ਧਨਰਾਸਿਂ ਓਲੋਕੇਤ੍ਵਾ ਇਮੇ ਇਮਂ ਸਾਪਤੇਯ੍ਯਂ ਪਹਾਯ ਮਚ੍ਚੁਨੋ ਮੁਖਮੁਪਗਤਾ. ਅਹੋ ਸਂਸਾਰਿਕਾਨਂ ਅਞ੍ਞਾਣਤਾ. ਧਨਂ ਠਪੇਤ੍ਵਾ ਅਤ੍ਤਨੋ ਵਿਨਾਸਞ੍ਚ ਅਤ੍ਤਾਨਂ ਠਪੇਤ੍ਵਾ ਧਨਵਿਨਾਸਞ੍ਚ ਨ ਜਾਨਨ੍ਤੀਤਿ ਸਮ੍ਪਤ੍ਤਿਯਾ ਅਧਿਗਮਞ੍ਚ ਵਿਨਾਸਂ ਚਾਤਿ ਸਬ੍ਬਂ ਚਿਨ੍ਤੇਤ੍ਵਾ ਧਮ੍ਮਞ੍ਚ ਸੁਤ੍ਵਾ ਪਟਿਲਦ੍ਧਸਦ੍ਧੋ ਦਿਵਸੇ ਦਿਵਸੇ ਦਸਸਹਸ੍ਸਾਨਂ ਭਿਕ੍ਖੂਨਂ ਮਧੁਰੇਨ ਅਨ੍ਨਪਾਨੇਨ ਸਨ੍ਤਪ੍ਪੇਨ੍ਤੋ ਅਨੇਕਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਏਕਦਿਵਸਂ ਰਹੋ ਪਟਿਸਲ੍ਲਿਨੋ ਏਵਂ ਚਿਨ੍ਤੇਸਿ. ਏਵਂ ਰਾਜਨਿਯੋਗੇਨ ਜਨਸ੍ਸ ਪੀਲ਼ਨਂ ਕਤ੍ਵਾ ਦਿਨ੍ਨਦਾਨਤੋ ਸਹਤ੍ਥੇਨ ਕਮ੍ਮਂ ਕਤ੍ਵਾ ਲਦ੍ਧੇਨ ਦਿਨ੍ਨਦਾਨਂ ਮਹਪ੍ਫਲਂ ਮਹਾਨਿਸਂਸਂ ਭਵਿਸ੍ਸਤਿ, ਏਵਂ ਮਯਾ ਕਾਤਬ੍ਬਨ੍ਤਿ ਸੋ ਸੁਹਦਾ ਮਚ੍ਚਸ੍ਸ ਰਜ੍ਜਂ ਨੀਯ੍ਯਾਤੇਤ੍ਵਾ ਅਤ੍ਤਨੋ ਕਣਿਟ੍ਠਿਕਂ ਆਦਾਯ ਕਿਞ੍ਚਿ ਅਜਾਨਾਪੇਤ੍ਵਾ ਅਞ੍ਞਤਰਵੇਸੇਨ ਨਗਰਾ ਨਿਕ੍ਖਮ੍ਮ ਉਤ੍ਤਰਮਧੁਰਂ ਨਾਮ ਨਗਰਂ ਅਗਮਾਸਿ, ਤਤ੍ਥ ਮਹਾਵਿਭਵੋ ਏਕੋ ਸੇਟ੍ਠਿ ਪਟਿਵਸਤਿ, ਤੇ ਸੇਟ੍ਠਿਨੋ ਸਮੀਪ ਮੁਪਗਮ੍ਮ ਠਿਤਾ. ਤੇਨ ਕਿਮਤ੍ਥਾਯਾਗਤਾਤਿ ਵੁਤ੍ਤੇ ਰਾਜਾ ਤਵ ਗੇਹੇ ਭਤਿਯਾ ਕਮ੍ਮਂ ਕਰਿਸ੍ਸਾਮੀਤਿ ਵਤ੍ਵਾ ਤੇਨਾਨੁਞ੍ਞਾਤੋ ਤੀਣਿ ਵਸ੍ਸਾਨਿ ਕਮ੍ਮ ਮਕਾਸਿ, ਤਤੋ ਏਕਦਿਵਸਂ ਸੇਟ੍ਠਿ ਤੇ ਦਿਸ੍ਵਾ ਪਕ੍ਕੋਸਿਤ੍ਵਾ ਅਤੀਵ ਤੁਮ੍ਹੇ ਸੁਖੁਮਾਲਤਰਾ. ਤਥਾਪਿ ਇਮਸ੍ਮਿਂ ਗੇਹੇ ਕਮ੍ਮਕਰਣੇਨ ਚਿਰਂ ਵਸਿਤ੍ਥ, ਏਤ੍ਤਕਂ ਕਾਲਂ ਕਿਸ੍ਮਿਞ੍ਚਿ ਕਮ੍ਮੇਪਿ ਕੁਸੀਤਤ੍ਤਂ ਨ ਪਞ੍ਞਾਯਤਿ. ਪਗੇਵ ਅਨਾਚਾਰਮ੍ਪਿ, ਯਾਗੁਭਤ੍ਤਂ ਠਪੇਤ੍ਵਾ ਅਞ੍ਞਂ ਉਪਕਾਰਮ੍ਪਿ ਮਮ ਸਨ੍ਤਿਕਾ ਨਤ੍ਥਿ, ਕੇਨਤ੍ਥੇਨ ਕਮ੍ਮਂ ਕਰੋਥਾਤਿ ਪੁਚ੍ਛਿ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਇਮਸ੍ਮਿਂ ਜਨਪਦੇ ਸਾਲਿਨੋ ਮਨਾਪਭਾਵੋ ਬਹੁਸੋ ਸੂਯਤਿ. ਤਸ੍ਮਾ ਸਾਲੀਨਮਤ੍ਥਾਯ ਇਧਾ ਗਤਮ੍ਹਾਤਿ ਆਹ, ਤਂ ਸੁਤ੍ਵਾ ਤੇਸਂ ਤੁਟ੍ਠੋ ਸੇਟ੍ਠਿ ਸਾਲੀਨਂ ਸਕਟਸਹਸ੍ਸਂ ਅਦਾਸਿ, ਰਾਜਾ ਸਾਲਿਂਲਭਿਤ੍ਵਾ ਸੇਟ੍ਠਿਨੋ ¶ ਏਵਮਾਹ, ਭੋ ਇਮਂ ਅਮ੍ਹਾਕਂ ਨਗਰਂ ਪਾਪੇਥਾਤਿ, ਤਂ ਸੁਤ੍ਵਾ ਸੇਟ੍ਠਿ ਸਾਧੂਤਿ ਵਤ੍ਵਾ ਸਾਲਿਪਰਿਪੁਣ੍ਣਸਕਟਸਹਸ੍ਸਂ ਰਞ੍ਞੋ ਨਗਰਂ ਪਾਪੇਸਿ, ਰਾਜਾ ਨਗਰਂ ਗਨ੍ਤ੍ਵਾ ਸੇਟ੍ਠਿਸ੍ਸ ਨਾਨਾਵਣ੍ਣਵਤ੍ਥਹਿਰਞ੍ਞਸੁਵਣ੍ਣਾਦੀਹਿ ਸਕਟੇ ਪੂਰੇਤ੍ਵਾ ਪਟਿਪੇਸੇਤ੍ਵਾ ਮੇਤ੍ਤਿਂ ਥਿਰਂ ਕਤ੍ਵਾ ਆਭਤਵੀਹਯੋ ਰਾਜਗੇਹੇ ਸਨ੍ਨਿਚਯਮਕਾਸਿ, ਅਥ ਰਾਜਾ ਕਤਿਪਾਹਚ੍ਚਯੇਨ ਮੁਸਲਂ ਪਗ੍ਗਯ੍ਹ ਸਹਤ੍ਥੇਨੇਵ ਵੀਹਿਂ ਕੋਟ੍ਟੇਤਿ, ਕੋਟ੍ਟਿਤਕੋਟ੍ਟਿਤਂ ਕਣਿਟ੍ਠਿਕਾ ਪਪ੍ਫੋਟੇਤਿ. ਏਵਂ ਉਭੋਪਿ ਤਣ੍ਡੁਲਾਨਂ ਮਹਨ੍ਤਂ ਰਾਸਿਂ ਕਤ੍ਵਾ ਦਾਰੂਦਕਾਦਯੋ ਆਹਰਿਤ੍ਵਾ ਅਮ੍ਬਿਲਭਤ੍ਤਂ ਪਚਿਤ੍ਵਾ ਰਾਜਗੇਹੇ ਪਞ੍ਚਸਤਆਸਨਾਨਿ ਪਞ੍ਞਾਪੇਤ੍ਵਾ ਕਾਲਂ ਉਗ੍ਘੋਸੇਸੁਂ, ਆਗਚ੍ਛਨ੍ਤੁ ਅਯ੍ਯਾ ਅਨੁਕਮ੍ਪਂ ਉਪਾਦਾਯ ਮਮ ਗੇਹੇ ਭੁਞ੍ਜਨ੍ਤੂਤਿ. ਤਂ ਸੁਤ੍ਵਾ ਪਞ੍ਚਸਤਾ ਭਿਕ੍ਖੂ ਆਕਾਸੇਨ ਆਗਮਿਂਸੁ, ਰਾਜਾ ਤੇ ਯਾਵਦਤ੍ਥਂ ਪਰਿਵਿਸਿ, ਤਤੋ ਤੇਸਂ ਅਨ੍ਤਰੇ ਪਿਯਂਗੁਦੀਪਵਾਸੀ ਏਕੋ ਮਹਾਸਿਵਤ੍ਥੇਰੋ ਨਾਮ ਭਤ੍ਤਂ ਗਹੇਤ੍ਵਾ ਏਤੇ ਮਂ ਪਸ੍ਸਨ੍ਤੂਤਿ ਅਧਿਟ੍ਠਹਿਤ੍ਵਾ ਆਕਾਸੇਨ ਪਿਯਂਗੁਦੀਪਂ ਗਨ੍ਤ੍ਵਾ ਭਤ੍ਤਂ ਪਞ੍ਚਸਤਾਨਂ ਭਿਕ੍ਖੂਨਂ ਦਤ੍ਵਾ ਪਰਿਭੁਞ੍ਚਿ. ਤਂ ਤਸ੍ਸਾਨੁਭਾਵੇਨ ਸਬ੍ਬੇਸਂ ਯਾਵਦਤ੍ਥਂ ਅਹੋਸਿ. ਏਵਂ ਅਪ੍ਪਕੇਨਾਪਿ ਦੇਯ੍ਯਧਮ੍ਮੇਨ ਸਪ੍ਪੁਰਿਸਾ ਦਾਯਕਾਨਂ ਮਨਂ ਪਸਾਦੇਤ੍ਵਾ ਪਤਿਟ੍ਠਂ ਕਰੋਨ੍ਤੀਤਿ. ਵੁਤ੍ਤਞ੍ਹਿ.

੧.

ਅਪ੍ਪਕੇਨਪਿ ਮੇਧਾਵੀ, ਦਾਯਕਾਨਂ ਮਨਂ ਪਤਿ;

ਸਦ੍ਧਂ ਵਡ੍ਢੇਨ੍ਤਿ ਚਨ੍ਦੋਵ, ਰਂਸਿਨਾ ਖੀਰਸਾਗਰਂ.

੨.

ਅਟ੍ਠਾਨੇ ਨ ਨਿਯੋਜੇਨ੍ਤਾ, ਕਰੋਨ੍ਤਾ ਨੇਵ ਸਨ੍ਨਿਧਿਂ;

ਪਰਿਭੋਗ ਮਕਤ੍ਵਾਨ, ਨੇਵ ਨਾਸੇਨ੍ਤਿ ਪਚ੍ਚਯਂ.

੩.

ਨ ਪਾਪੇਨ੍ਤਾਚ ਥੇਯ੍ਯਸ੍ਸ, ਨ ਕਰੋਨ੍ਤਾ ਤਥੇਵਿਣਂ;

ਵਿਭਜਨ੍ਤਿ ਸੁਸੀਲੇਸੁ, ਸਯਂ ਭੁਤ੍ਵਾਨ ਸੀਲਵਾਤਿ.

ਅਥ ਰਾਜਾ ਕਣਿਟ੍ਠਿਕਾਯ ਸਦ੍ਧਿਂ ਥਤ੍ਥੇਵ ਠਿਤੋ ਪਿਯਂਗੁਦੀਪੇ ਪਰਿਭੁਞ੍ਜਨ੍ਤੇ ਪਞ੍ਚਸਤਭਿਕ੍ਖੂ ਦਿਸ੍ਵਾ ਹਟ੍ਠੋ ਉਦਗ੍ਗੋ ਅਹੋਸਿ. ਅਥ ¶ ਤੇ ਅਪਰਭਾਗੇ ਅਤ੍ਤਨਾ ਕਤਂ ਦਾਨਵਰਂ ਅਨੁਸ੍ਸਰਨ੍ਤਾ ਨ ਚਿਰੇਨੇਵ ਉਭੋਪਿ ਸੋਤਾਪਨ੍ਨਾ ਅਹੇਸੁਂਤਿ.

੪.

ਨ ਗਣੇਨ੍ਤਾਤ੍ਤਨੋ ਦੁਕ੍ਖਂ, ਵਿਹਾਯ ਮਹਤਿਂ ਸਿਰਿਂ;

ਆਯਤਿਂਭਵਮਿਚ੍ਛਨ੍ਤਾ, ਸੁਜਨੇਵਂ ਸੁਭੇ ਰਤਾ.

੫.

ਆਯਾਸੇਨ ਕਤਂ ਪੁਞ੍ਞਂ, ਮਹਨ੍ਤਫਲਦਾਯਕਂ;

ਇਤਿ ਮਨ੍ਤ੍ਵਾਨ ਮੇਧਾਵੀ, ਸਹਤ੍ਥੇਨੇਵ ਤਂ ਕਰੇਤਿ.

ਮਹਾਸੇਨਰਞ੍ਞੋ ਵਤ੍ਥੁਂ ਪਥਮਂ.

੩੨. ਸੁਵਣ੍ਣਤਿਲਕਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਲਙ੍ਕਾਦੀਪੇ ਕਿਰ ਅਨੁਰਾਧਪੁਰਨਗਰੇ ਏਕੋ ਮਾਤੁਗਾਮੋ [ਏਕਾਮਾਤੁਗਾਮਾਤਿਵਾ ਏਕਾਮਾਤੁਗਾਮੋਤਿਵਾ ਕਤ੍ਥਚਿ] ਸਦ੍ਧਾਸਮ੍ਪਨ੍ਨਾ ਨਿਚ੍ਚਂ ਅਭਯੁਤ੍ਤਰਚੇਤਿਯੇ ਪੁਪ੍ਫਪੂਜਂ ਕਰੋਤਿ, ਅਥੇਕਦਿਵਸਂ ਸਾ ਅਤ੍ਤਨੋ ਧੀਤੁਯਾ ਸਦ੍ਧਿਂ ਤਸ੍ਮਿਂ ਚੇਤਿਯੇ ਪੁਪ੍ਫਪੂਜਨਤ੍ਥਾਯ [ਪੁਪ੍ਫਪੂਜਤ੍ਥਾਯ ਇਤਿਕਤ੍ਥਚਿ] ਗਨ੍ਤ੍ਵਾ ਪੁਪ੍ਫਾਸਨਸਾਲਾਯ ਉਦਕਂ ਅਪਸ੍ਸਨ੍ਤੀ ਧੀਤੁ ਹਤ੍ਥੇ ਪੁਪ੍ਫਚਙ੍ਗੋਟਕਂ ਠਪੇਤ੍ਵਾ ਘਟ ਮਾਦਾਯ ਪੋਕ੍ਖਰਣਿਂ ਅਗਮਾਸਿ, ਤਤੋ ਸਾ ਦਾਰਿਕਾ ਮਾਤਰਿ ਅਨਾਗਤਾਯਯੇਵ [ਅਨਾਗਤੇਯੇਵ ਇਤਿਸਬ੍ਬਤ੍ਥ] ਅਧੋਤਾਸਨੇ ਪੁਪ੍ਫਮੁਟ੍ਠਿਂਗਹੇਤ੍ਵਾ ਮਣ੍ਡਲਂ ਕਤ੍ਵਾ ਪੂਜੇਤ੍ਵਾ ਏਵਂ ਪਤ੍ਥਨਮਕਾਸਿ. ਤਥਾ ਹਿ.

੧.

ਮਹਾਵੀਰਸ੍ਸ ਧੀਰਸ੍ਸ, ਸਯਮ੍ਭੁਸ੍ਸ ਮਹੇਸਿਨੋ;

ਤਿਲੋਕਗ੍ਗਸ੍ਸ ਨਾਥਸ੍ਸ, ਭਗਵਨ੍ਤਸ੍ਸ ਸਤ੍ਥੁਨੋ.

੨.

ਯ ਮਹਂ ਪੂਜਯਿਂ ਪੁਪ੍ਫਂ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਰੂਪੀਨਂ ਪਵਰਾ ਹੇਸ੍ਸਂ, ਆਰੋਹਪਰਿਣਾਹਵਾ.

੩.

ਮਂ ¶ ਦਿਸ੍ਵਾ ਪੁਰਿਸਾ ਸਬ੍ਬੇ, ਮੁਚ੍ਛਨ੍ਤੁ ਕਾਮਮੁਚ੍ਛਿਤਾ;

ਨਿਚ੍ਛਰਨ੍ਤੁ ਸਰੀਰਾ ਮੇ, ਰਂਸਿਮਾਲੀਵ ਰਂਸਿਯੋ.

੪.

ਹਦਯਙ੍ਗਮਾ ਕਣ੍ਣਸੁਖਾ, ਮਞ੍ਜੁਭਾਣੀ ਸੁਭਾ ਮਮ;

ਕਿਨ੍ਨਰਾਨਂ ਯਥਾ ਵਾਣੀ, ਏਵਮੇਵ ਪਵਤ੍ਤਤੂਤਿ.

ਅਥਸ੍ਸਾ ਮਾਤਾ ਆਗਮ੍ਮ ਅਧੋਤਾਸਨੇ ਪੂਜਿਤਾਨਿ ਪੁਪ੍ਫਾਨਿ ਦਿਸ੍ਵਾ ਕਸ੍ਮਾ ਚਣ੍ਡਾਲੀ ਅਧੋਤਾਸਨੇ ਭਗਵਤੋ ਪੁਪ੍ਫਾਨਿ ਪੂਜੇਸਿ, ਅਯੁਤ੍ਤਂ ਤਯਾ ਕਤਨ੍ਤਿ ਆਹ, ਤਂ ਸੁਤ੍ਵਾ ਸਾ ਮਾਤੁਯਾ ਕੁਜ੍ਝਿਤ੍ਵਾ ਤ੍ਵਂ ਚਣ੍ਡਾਲੀਤਿ ਅਕ੍ਕੋਸਿ, ਸਾ ਏਤ੍ਤਕਂ ਪੁਞ੍ਞਾਪੁਞ੍ਞਂ ਕਤ੍ਵਾ ਅਪਰਭਾਗੇ ਤਤੋ ਚੁਤਾ ਜਮ੍ਬੁਦੀਪੇ ਉਤ੍ਤਰਮਧੁਰਾਯਂ ਏਕਸ੍ਸ ਚਣ੍ਡਾਲਗਨ੍ਧਬ੍ਬਬ੍ਰਾਹ੍ਮਣਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਉਤ੍ਤਮਰੂਪਧਰਾ ਅਹੋਸਿ, ਤਸ੍ਸਾ ਸਰੀਰਤੋ ਮੇਘਮੁਖਤੋ ਵਿਜ੍ਜੁਲ੍ਲਤਾਵਿਯ ਰਂਸਿਯੋ ਨਿਚ੍ਛਰਨ੍ਤਿ. ਸਮਨ੍ਤਾ ਚਤੁਹਤ੍ਥਟ੍ਠਾਨੇ ਸਰੀਰਪ੍ਪਭਾਯ ਅਨ੍ਧਕਾਰੇ ਵਿਧਮਤਿ. ਮੁਖਤੋ ਉਪ੍ਪਲਗਨ੍ਧੋ ਵਾਯਤਿ, ਕਾਯਤੋ ਚਨ੍ਦਨਗਨ੍ਧੋ, ਤਸ੍ਸਾ ਦ੍ਵਿਨ੍ਨਂ ਥਨਾਨ ਮਨ੍ਤਰੇ ਸੁਵਣ੍ਣਵਣ੍ਣਂ ਏਕਂ ਤਿਲਕਂ ਅਹੋਸਿ, ਤੇਨ ਬਾਲਸੁਰਿਯਸ੍ਸ ਵਿਯ ਪਭਾ ਨਿਚ੍ਛਰਤਿ. ਦਿਟ੍ਠਦਿਟ੍ਠਾ ਯੇਭੁਯ੍ਯੇਨ ਉਮ੍ਮਤ੍ਤਾ ਵਿਯ ਕਾਮਮਦੇਨ ਵਿਸਞ੍ਞਿਨੋ ਹੋਨ੍ਤਿ, ਅਹੋ ਕੁਸਲਾਕੁਸਲਾਨਂ ਆਨੁਭਾਵੋ. ਤਥਾ ਹਿ.

੫.

ਯੇਨ ਸਾ ਕੋਧਸਾਮਾਤੁ, ਚਣ੍ਡਾਲੀ ਇਤਿ ਭਾਸਿਤਾ;

ਤੇਨ ਸਾ ਆਸਿ ਚਣ੍ਡਾਲੀ, ਜੇਗੁਚ੍ਛਾ ਹੀਨਜਾਤਿਕਾ.

੬.

ਸਲ੍ਲਕ੍ਖੇਤ੍ਵਾਨ ਸਮ੍ਬੁਦ੍ਧ, ਗੁਣਂ ਪੂਜੇਸਿ ਯਂ ਤਦਾ;

ਤੇਨ ਪੁਞ੍ਞਾਨੁਭਾਵੇਨ, ਸਾ ਭਿਰੂਪੀ ਮਨੋਰਮਾ.

੭.

ਯੇਨ ਯੇਨ ਪਕਾਰੇਨ, ਪੁਞ੍ਞਪਾਪਾਨਿ ਯੋ ਕਰੇ;

ਤਸ੍ਸ ਤਸ੍ਸਾਨੁਰੂਪੇਨ, ਮੋਰੋਵ ਲਭਤੇ ਫਲਂ.

੮.

ਪਾਪੇਨ ਚ ਤਿਰਚ੍ਛਾਨੇ, ਜਾਯਨ੍ਤਿ ਕੁਸਲੇਨ ਤੇ;

ਵਣ੍ਣਪੋਕ੍ਖਰਤਾ ਹੋਤਿ, ਮੋਰਾਨਂ ਕਮ੍ਮ ਮੀਦਿਸਨ੍ਤਿ.

ਤਤੋ ¶ ਤਸ੍ਸਾ ਮਾਤਾਪਿਤਰੋ ਸੁਵਣ੍ਣਤਿਲਕਾਤਿ ਨਾਮ ਮਕਂਸੁ. ਤਸ੍ਮਿਂਕਿਰ ਨਗਰੇ ਮਨੁਸ੍ਸਾ ਤਸ੍ਸਾ ਰੁਪਦਸ੍ਸਨੇਨਚ ਸਵਣੇਨਚ ਸਮ੍ਪਤ੍ਤਾਪਿ ਚਣ੍ਡਾਲਧੀਤਾ ਅਯਨ੍ਤਿ ਪਰਿਭਵਭਯੇਨ ਆਵਾਹਂ ਨ ਕਰੋਨ੍ਤਿ. ਅਥ ਤਸ੍ਮਿਂ ਨਗਰੇ ਜੇਟ੍ਠਚਣ੍ਡਾਲਬ੍ਰਾਹ੍ਮਣਸ੍ਸ ਪੁਤ੍ਤੋ ਏਤਮਤ੍ਥਾਯ ਤਸ੍ਸਾ ਮਾਤਾਪਿਤੁਨ੍ਨਂ ਸਨ੍ਤਿਕਂ ਵਤ੍ਥਾਭਰਣਗਨ੍ਧਮਾਲਾਦਯੋ ਪੇਸੇਸਿ ਸੁਵਣ੍ਣਤਿਲਕਂ ਅਮ੍ਹਾਕਂ ਦਦਨ੍ਤੂਤਿ, ਤੇ ਤਂ ਪਵਤ੍ਤਿਂ ਤਸ੍ਸਾ ਆਰੋਚੇਸੁਂ. ਸਾਸ੍ਸ ਜਿਗੁਚ੍ਛਨ੍ਤੀ ਪਰਿਹਾਸ ਮਕਾਸਿ. ਤਤੋ ਬ੍ਰਾਹ੍ਮਣਸ੍ਸ ਪੁਤ੍ਤੋ ਲਜ੍ਜਿਤੋ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵੀਣਂ ਮੁਞ੍ਚੇਤ੍ਵਾ ਗਾਯਮਾਨੋ ਏਵਮਾਹ.

੯.

ਲਲਨਾ ਨਨਾਨੀ ਚਲਲੋਚਨਾਨੀ,

ਤਰੁਣਾ ਰੁਣਾਨੀ ਚਲਿਤਾਧਰਾਣੀ;

ਮਨੁਜੋ ਹਿ ਯੋ ਨੇਤ੍ਤਪਿਯਂ ਕਰੋਤਿ,

ਸ ਤੁ ਨੀਚਜਾਤਿਂ ਅਪਿ ਨੋ ਜਹਾਤਿ.

ਕਿਮਿਦਨ੍ਤਿ ਰਞ੍ਞਾ ਪੁਟ੍ਠੋ ਆਹ.

੧੦.

ਸਮੇਤਿ ਕਿਂ ਦੇਵ ਛਮਾਯ ਮਤ੍ਤਿਕਾ,

ਕਦਾਚਿ ਚਾਮੀਕਰਜਾਤਿਕਾਯ;

ਸਿਗਾਲਧੇਨੁ ਅਪਿ ਨੀਚਜਾਤਿਕਾ,

ਸਮੇਤਿ ਕਿਂਸੀਹਵਰੇਨ ਦੇਵਾਤਿ.

ਏਵਞ੍ਚ ਪਨ ਵਤ੍ਵਾ ਦੇਵ ਇਮਸ੍ਮਿਂਨਗਰੇ ਸੁਵਣ੍ਣਤਿਲਕਾ ਨਾਮੇਕਾ ਚਣ੍ਡਾਲਧੀਤਾ ਅਤ੍ਥਿ, ਸਾ ਸਮਾਨਜਾਤਿਕੇਹਿ ਪੇਸਿਤਪਣ੍ਣਾਕਾਰਂ ਨ ਗਣ੍ਹਾਤਿ, ਕੁਲਵਨ੍ਤੇਯੇਵ ਪਤ੍ਥੇਤਿ, ਕਦਾ ਨਾਮ ਕਾਕੀ ਸੁਵਣ੍ਣਹਂਸੇਨ ਸਮਾਗਚ੍ਛਤਿ ਦੇਵਾਤਿ. ਰਾਜਾ ਤਂ ਸੁਤ੍ਵਾ ਤਸ੍ਸਾ ਪਿਤਰਂ ਪਕ੍ਕੋਸਾਪੇਤ੍ਵਾ ਤਮਤ੍ਥਂ ਵਤ੍ਵਾ ਸਚ੍ਚਂ ਭਣੇਤਿ ਪੁਚ੍ਛਿ, ਸੋਪਿ ਸਚ੍ਚਂ ਦੇਵ, ਸਾ ਜਾਤਿਸਮ੍ਪਨ੍ਨਮੇਵ ਕਾਮੇਤੀਤਿ ਆਹ. ਰਾਜਾ ਏਵਂ ਸਤਿ ਭਣੇ ਪਞ੍ਚਮਧੁਰਨਗਰੇ ਉਦ੍ਦਾਲ਼ਬ੍ਰਾਹ੍ਮਣੋ ਨਾਮ ਅਤ੍ਥਿ, ਸੋ ਜਾਤਿਸਮ੍ਪਨ੍ਨੋ ਮਾਤਿਤੋਚ ਪਿਤਿਤੋਚ ਅਨੁਪਕ੍ਕੁਟ੍ਠੋ ¶ , ਜੇਗੁਚ੍ਛਾ ਪਟਿਕ੍ਕੂਲਾ ਏਤਾਤਿ ਮਾਤੁਗਾਮੇਨ ਸਦ੍ਧਿਂ ਨ ਸਂਵਸਤਿ. ਅਤ੍ਤਨੋ ਗੇਹਤੋ ਰਾਜਗੇਹਂ ਗਚ੍ਛਨ੍ਤੋਚ ਆਗਚ੍ਛਨ੍ਤੋ ਚ ਸੋਲ਼ਸਖੀਰੋਦਕਘਟੇਹਿ ਮਗ੍ਗੇ ਸਿਞ੍ਚਾਪੇਸਿ. ਮਾਤੁਗਾਮੇ ਦਿਸ੍ਵਾ ਕਾਲਕਣ੍ਣੀ ਮਯਾ ਦਿਟ੍ਠਾਤਿ ਖੀਰੋਦਕੇਨ ਮੁਖਂ ਧੋਵਤਿ. ਤਵ ਧੀਤਾ ਸਕ੍ਕੋਨ੍ਤੀ ਤੇਨ ਸਦ੍ਧਿਂ ਸਂਵਸਤੁ, ਏਤਮਤ੍ਥਂ ਤਵ ਧੀਤਰਂ ਕਥੇਹੀਤਿ ਆਹ, ਸੋਪਿ ਤਂ ਸੁਤ੍ਵਾ ਗੇਹਂ ਗਨ੍ਤ੍ਵਾ ਧੀਤਰਂ ਪਕ੍ਕੋਸਿਤ੍ਵਾ ਰਞ੍ਞਾ ਵੁਤ੍ਤਨਿਯਾਮੇਨੇਵ ਤਸ੍ਸਾ ਕਥੇਸਿ. ਤਾਯ ਤਂ ਸੁਤ੍ਵਾ ਸਕ੍ਕੋਨ੍ਤੀ ਅਹਂ ਉਦ੍ਦਾਲ਼ਬ੍ਰਾਹ੍ਮਣੇਨ ਸਦ੍ਧਿਂ ਵਸਿਸ੍ਸਾਮਿ, ਮਾ ਤੁਮ੍ਹੇ ਚਿਨ੍ਤੇਥ, ਪਪਞ੍ਚਮ੍ਪਿ ਮਾ ਕਰੋਥ, ਪਾਤੋਵ ਗਮਿਸ੍ਸਾਮੀਤਿ ਵੁਤ੍ਤੇ ਪਿਤਾ ਪਨਸ੍ਸਾ ਸਾਧੂਤਿ ਸਹਸ੍ਸਗ੍ਘਨਕਚਿਤ੍ਤਕਮ੍ਬਲਕਞ੍ਚੁਕੇਨ ਧੀਤੁ ਸਰੀਰਂ ਪਾਰੁਪਾਪੇਤ੍ਵਾ ਵੀਣਾਦਿਤੁਰਿਯਭਣ੍ਡਾਨਿ ਗਾਹਾਪੇਤ੍ਵਾ ਧੀਤੁਯਾ ਸਦ੍ਧਿਂ ਅਦ੍ਧਾਨਮਗ੍ਗਂ ਪਟਿਪਜ੍ਜਿ. ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਅਞ੍ਞਤਰਸ੍ਮਿਂ ਨਗਰੇ ਰਞ੍ਞੋ ਗਨ੍ਧਬ੍ਬਂ ਕਰੋਨ੍ਤੋ ਧੀਤਰਂ ਪਿਟ੍ਠਿਪਸ੍ਸੇ ਨਿਸੀਦਾਪੇਤ੍ਵਾ ਗਨ੍ਧਬ੍ਬਮਕਾਸਿ. ਅਥਸ੍ਸ ਪਿਟ੍ਠਿਪਸ੍ਸਨਿਸਿਨ੍ਨਾ ਸੁਵਣ੍ਣਤਿਲਕਾ ਨਯਨਕੋਟਿਯਾ ਦਿਟ੍ਠਿਂ ਪਾਪੇਨ੍ਤੀ ਸਰਸੇਨ ਤਂ ਓਲੋਕੇਤ੍ਵਾ ਪਾਰੁਤਕਞ੍ਚੁਕਂ ਕਿਞ੍ਚਿ ਅਪਨੇਤ੍ਵਾ ਸਰੀਰਪ੍ਪਭਂ ਪਞ੍ਞਾਪੇਸਿ, ਰਾਜਾ ਪਨਸ੍ਸਾ ਸਰੀਰਪ੍ਪਭਂਚ ਰੂਪਸਮ੍ਪਦਂਚ ਦਿਸ੍ਵਾ ਕਾਮਾਤੁਰੋ ਵਿਗਤਸਞ੍ਞੋ ਸਮ੍ਮੂਲ਼੍ਹੋ ਹੁਤ੍ਵਾ ਮੁਹੁਤ੍ਤੇਨ ਪਟਿਲਦ੍ਧਸ੍ਸਾਸੋ ਤਸ੍ਸਾ ਸਸ੍ਸਾਮਿਕਾਸ੍ਸਾਮਿਕਭਾਵਂ ਪੁਚ੍ਛਿਤ੍ਵਾ ਚਣ੍ਡਾਲਧੀਤਾਤਿ ਸੁਤ੍ਵਾ ਪਰਿਭਵਭਯੇਨ ਤਂ ਆਨੇਤੁ ਮਸਕ੍ਕੋਨ੍ਤੋ ਏਵਰੂਪਂ ਵਣ੍ਣਪੋਕ੍ਖਰਸਮ੍ਪਨ੍ਨਂ ਇਤ੍ਥਿਰਤਨਂ ਅਲਭਨ੍ਤਸ੍ਸ ਮੇ ਕੋ ਅਤ੍ਥੋ ਜੀਵਿਤੇਨਾਤਿ ਸੋਚਨ੍ਤੋ ਪਰਿਦੇਵਨ੍ਤੋ ਕਾਮਮੁਚ੍ਛਿਤੋ ਕਤ੍ਤਬ੍ਬਾ ਕਤ੍ਤਬ੍ਬਂ ਅਜਾਨਨ੍ਤੋ ਅਸਿਂ ਗਹੇਤ੍ਵਾ ਅਤ੍ਤਨੋ ਸੀਸਂ ਸਯਮੇਵ ਛਿਨ੍ਦਿਤ੍ਵਾ ਕਾਲ ਮਕਾਸਿ. ਏਵਮੇਵ ਅਨ੍ਤਰਾਮਗ੍ਗੇ ਪਞ੍ਚਰਾਜਾਨੋ ਤਸ੍ਸਾ ਰੂਪਸਮ੍ਪਤ੍ਤਿਮਦਮਤ੍ਤਾ ਅਸਿਨਾ ਛਿਨ੍ਨਸੀਸਾ ਜੀਵਿਤਕ੍ਖਯਂ ਪਾਪੁਣਿਂਸੁ. ਤਥਾ ਹਿ ਸਤ੍ਤਾ ਹਿਰਞ੍ਞਸੁਵਣ੍ਣਦਾਸਿਦਾਸ ਪੁਤ੍ਤਦਾਰਾਦੀਸੁ [ਪੁਤ੍ਤਦਾਰਾਦੀਹਿ ਇਤਿਸਬ੍ਬਤ੍ਥ] ਪਿਯਂ ਨਿਸ੍ਸਾਯ ਕਾਮੇਨ ਮੁਚ੍ਛਿਤਾ ਅਨਯਬ੍ਯਸਨਂ ਪਾਪੁਣਨ੍ਤੀਤਿ. ਵੁਤ੍ਤਞ੍ਹੇਤਂ ਭਗਵਤਾ.

੧੧.

ਪਿਯਤੋ ¶ ਜਾਯਤੇ ਸੋਕੋ,

ਪਿਯਤੋ ਜਾਯਤੇ ਭਯਂ;

ਪਿਯਤੋ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੧੨.

ਪੇਮਤੋ ਜਾਯਤੇ ਸੋਕੋ,

ਪੇਮਤੋ ਜਾਯਤੇ ਭਯਂ;

ਪੇਮਤੋ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੧੩.

ਰਤਿਯਾ ਜਾਯਤੇ ਸੋਕੋ,

ਰਤਿਯਾ ਜਾਯਤੇ ਭਯਂ;

ਰਤਿਯਾ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੧੪.

ਕਾਮਤੋ ਜਾਯਤੇ ਸੋਕੋ,

ਕਾਮਤੋ ਜਾਯਤੇ ਭਯਂ;

ਕਾਮਤੋ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੧੫.

ਤਣ੍ਹਾਯ ਜਾਯਤੇ ਸੋਕੋ,

ਤਣ੍ਹਾਯ ਜਾਯਤੇ ਭਯਂ;

ਤਣ੍ਹਾਯ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

ਤਤੋ ਸੋ ਅਨੁਕ੍ਕਮੇਨ ਪਞ੍ਚਮਧੁਰਨਗਰਂ ਗਨ੍ਤ੍ਵਾ ਅਤ੍ਤਨੋ ਆਗਤਭਾਵਂ ਰਞ੍ਞਾ ਕਥਾਪੇਤ੍ਵਾ ਤੇਨ ਅਨੁਞ੍ਞਾਤੋ ਗਨ੍ਤ੍ਵਾ ਰਾਜਾਨਂ ਅਦ੍ਦਸ. ਤਦਾ ਉਦ੍ਦਾਲ਼ਬ੍ਰਾਹ੍ਮਣੋ ਰਞ੍ਞੋ ਅਵਿਦੂਰੇ ਕਮ੍ਬਲਭਦ੍ਦਪੀਠੇ ਨਿਸਿਨ੍ਨੋ ਹੋਤਿ, ਗਨ੍ਧਬ੍ਬਬ੍ਰਾਹ੍ਮਣੋਪਿ ਧੀਤੁਯਾ ਸਦ੍ਧਿਂ ਗਨ੍ਧਬ੍ਬਂ ਕੁਰੁਮਾਨੋ ਨਿਸੀਦਿ. ਤਸ੍ਮਿਂਖਣੇ ਪਿਤੁ ਪਿਟ੍ਠਿਪਸ੍ਸੇ ਨਿਸਿਨ੍ਨਾ ਸੁਵਣ੍ਣਤਿਲਕਾ ਉਦ੍ਦਾਲ਼ਬ੍ਰਾਹ੍ਮਣੋ ਕਤਮੋਤਿ ਪੁਚ੍ਛਿਤ੍ਵਾ ਏਤਸ੍ਮਿਂ ਭਦ੍ਦਪੀਠੇ ਨਿਸਿਨ੍ਨੋਂ ਏਸੋਤਿ ਸੁਤ੍ਵਾ ਨਿਲਾਮਲਲੋਚਨੇਹਿ ਤਂ ਓਲੋਕਨ੍ਤਿ ਦਸਨਰਂਸਿਨਾ ਸਮ੍ਭਿਨ੍ਨਸੁਰਤ੍ਤਾਧਰੇਨ ਮਨ੍ਦਹਸਿਤਂ ¶ ਕਰੋਨ੍ਤੀ ਤਂ ਓਲੋਕੇਤ੍ਵਾ ਪਾਰੁਤਕਞ੍ਚੁਕਂ ਅਪਨੇਤ੍ਵਾ ਸਰੀਰਪ੍ਪਭਂ ਵਿਸ੍ਸਜ੍ਜੇਸਿ. ਤਂ ਦਿਸ੍ਵਾ ਬ੍ਰਾਹ੍ਮਣੋ ਉਮ੍ਮਤ੍ਤੋ ਸੋਕੇਨ ਪਰਿਦਡ੍ਢਗਤ੍ਤੋ ਉਣ੍ਹਵਾਤੇਨ ਪੂਰਿਤਮੁਖਨਾਸੋ ਅਸ੍ਸੁਨਾ ਕਿਲਿਨ੍ਨਨੇਤ੍ਤੋ ਵਿਸਞ੍ਞੀ ਅਹੋਸਿ. ਤਤੋ ਸੋ ਮੁਹੁਤ੍ਤੇਨ ਲਦ੍ਧਸ੍ਸਾਸੋ ਰੋਗੀਵਿਯ ਰਞ੍ਞੋ ਸਕਾਸਾ ਅਪਸਰਨ੍ਤੋ ਅਤ੍ਤਨੋ ਗੇਹਂ ਗਨ੍ਤ੍ਵਾ ਸੁਹਦੇ ਪਕ੍ਕੋਸਿਤ੍ਵਾ ਤੇਸਂ ਏਵਮਾਹ. ਭਵਨ੍ਤੇਤ੍ਥ.

੧੬.

ਯੋ ਆਪਦੇ ਸਮੁਪ੍ਪਨ੍ਨੇ,

ਉਪਤਿਟ੍ਠਤਿ ਸਨ੍ਤਿਕੇ;

ਸੁਖਦੁਕ੍ਖੇ ਸਮੋ ਹੋਤਿ,

ਸੋ ਮਿਤ੍ਤੋ ਸੋਚ ਞਾਤਕੋ.

੧੭.

ਯੋ ਗੁਣਂ ਭਾਸਤੇ ਯਸ੍ਸ, ਅਗੁਣਞ੍ਚ ਨਿਗੂਹਤਿ;

ਪਟਿਸੇਧੇਤ੍ਯ [ਪਟਿਸੇਧੇਤਿਕਤ੍ਤਬ੍ਬਾ ਇਤਿਸਬ੍ਬਤ੍ਥ] ਕਤ੍ਤਬ੍ਬਾ, ਸੋ ਮਿਤ੍ਤੋ ਸੋਚ ਞਾਤਕੋ.

੧੮.

ਸੁਵਣ੍ਣਤਿਲਕਾਨਾਮ, ਲਲਨਾ ਕਾਮਲਾਲਯਾ;

ਨੀਲਕ੍ਖਿਚਣ੍ਡਕਣ੍ਡੇਹਿ, ਵਿਖਣ੍ਡੇਸਿ ਮਨੋ ਮਮ.

੧੯.

ਤਸ੍ਸਾ ਮੁਖਮ੍ਬੁਜੇ ਸਤ੍ਤਾ, ਮਮ ਨੇਤ੍ਤਮਧੁਬ੍ਬਤਾ,

ਅਪ੍ਪਮ੍ਪਿਨ ਸਰਨ੍ਤਾਮਂ, ਤਤ੍ਥੇਵਾ ਭਿਰਮਨ੍ਤਿ ਤੇ.

੨੦.

ਸਹੇਵ ਤੇਹਿ ਮੇ ਚਿਤ੍ਤਂ, ਗਤਂ ਉਲ੍ਲਂਘਿਯੁਦ੍ਧਤੋ;

ਲਜ੍ਜਾਗਮ੍ਭੀਰਪਰਿਖਂ, ਧਿਤਿਪਾਕਾਰਮੁਗ੍ਗਤਂ.

੨੧.

ਸਮ੍ਮੁਯ੍ਹਾਮਿ ਪਮੁਯ੍ਹਾਮਿ, ਸਬ੍ਬਾ ਮੁਯ੍ਹਨ੍ਤਿ ਮੇ ਦਿਸਾ;

ਤਸ੍ਸ ਮੇ ਸਰਣਂ ਹੋਥ, ਕਰੋਥ ਮਮ ਸਙ੍ਗਹਨ੍ਤਿ.

ਤਂ ਸੁਤ੍ਵਾ ਤੇ ਏਵਮਾਹਂਸੁ.

੨੨.

ਯਂ ਤ੍ਵਮਾਚਰਿਯ ਪਤ੍ਥੇਸਿ, ਚਣ੍ਡਾਲੀ ਸਾ ਅਸਙ੍ਗਮਾ;

ਕਿਨ੍ਨੁ ਮੀਲ਼੍ਹੇਨ ਸਂਯੋਗੋ, ਚਨ੍ਦਨਸ੍ਸ ਕਦਾ ਸਿਯਾ.

੨੩.

ਅਗਮ੍ਮਗਮਨਾ ¶ ਯਾਤਿ, ਨਰਾਨਂ ਦੂਰਤੋ ਸਿਰੀ;

ਕਿਤ੍ਤਿਚਾਯੁ ਬਲਂ ਬੁਦ੍ਧਿ, ਅਯਸਂਚ ਸ ਗਚ੍ਛਤੀਤਿ.

ਅਥ ਤੇਸਂ ਬ੍ਰਹ੍ਮਣੋ ਆਹ.

੨੪.

ਨ ਪਰਿਚ੍ਚਜਤਿ ਲੋਕੋਯਂ, ਅਮੇਜ੍ਝੇ ਮਣਿਮੁਤ੍ਤਮਂ;

ਥੀਰਤਨਂ ਯੁਵਾਣੀ ਚ, ਦੁਕ੍ਕੁਲਾ ਅਪਿ ਗਾਹਿਯਾਤਿ.

ਏਵਞ੍ਚ ਪਨ ਵਤ੍ਵਾ ਤਸ੍ਸਾ ਸਸ੍ਸਾਮਿਕਾਸ੍ਸਾਮਿਕਭਾਵਂ ਞਤ੍ਵਾ ਆਨੇਥਾਤਿ ਆਹ, ਤੇ ਤਥਾ ਅਕਂਸੁ. ਤਤੋ ਬ੍ਰਾਹ੍ਮਣੋ ਤਾਯ ਗੇਹਂ ਆਗਤਕਾਲਤੋ ਪਟ੍ਠਾਯ ਚਤ੍ਤਾਰੋ ਮਾਸੇ ਰਞ੍ਞੋ ਉਪਟ੍ਠਾਨਂ ਨੇਵ ਅਗਮਾਸਿ. ਤਸ੍ਸ ਪਨ ਬ੍ਰਹ੍ਮਣਸ੍ਸ ਸਨ੍ਤਿਕੇ ਪਞ੍ਚਸਤਰਾਜਕੁਮਾਰਾ ਨਾਨਾਵਿਧਾਨਿ ਸਿਪ੍ਪਾਨਿ ਉਗ੍ਗਣ੍ਹਨ੍ਤਿ. ਤੇ ਤਂ ਕਾਰਣਂ ਞਤ੍ਵਾ ਸੁਵਣ੍ਣਤਿਲਕਾਯ ਵਿਜ੍ਜਮਾਨਾਯ ਅਮ੍ਹਾਕਂ ਸਿਪ੍ਪੁਗ੍ਗਹਣਸ੍ਸ ਅਨ੍ਤਰਾਯੋ ਭਵਿਸ੍ਸਤਿ, ਯੇਨ ਕੇਨਚਿ ਉਪਾਯੇਨ ਏਤਂ ਮਾਰੇਤੁਂ ਵਟ੍ਟਤੀਤਿ, ਚਿਨ੍ਤੇਤ੍ਵਾ ਤੇ ਹਤ੍ਥਾ ਚਰਿਯਂ ਪਕ੍ਕੋਸਿਤ੍ਵਾ ਲਞ੍ਜਂ ਦਤ੍ਵਾ ਏਵਮਾਹਂਸੁ, ਹਤ੍ਥਿਂ ਸੁਰਾਯ ਮਤ੍ਤਂ ਕਤ੍ਵਾ ਸੁਵਣ੍ਣਤਿਲਕਂ ਮਾਰੇਹੀਤਿ. ਤਤੋ ਤੇ ਸਬ੍ਬੇ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ ਦੂਤਂ ਪਾਹੇਸੁਂ, ਆਚਰਿਯਂ ਦਟ੍ਠੁਕਾਮਮ੍ਹਾਤਿ. ਤਤੋ ਬ੍ਰਾਹ੍ਮਣੇਨ ਆਗਨ੍ਤ੍ਵਾ ਨਿਸਿਨ੍ਨੇਨ ਪਟਿਸਨ੍ਥਾਰਂ ਕਤ੍ਵਾ ਆਚਰਿਯ ਆਚਰਿਯਾਨਿਂ ਪਸ੍ਸਿਤੁਕਾਮਮ੍ਹਾਤਿ ਆਹਂਸੁ. ਅਥ ਸੋ ਸੁਵਣ੍ਣਤਿਲਕਂ ਗਹੇਤ੍ਵਾ ਆਗਚ੍ਛਥਾਤਿ ਮਨੁਸ੍ਸੇ ਪੇਸੇਸਿ. ਤੇ ਤਥਾ ਕਰਿਂਸੁ, ਅਥ ਤਸ੍ਸਾ ਵੀਥਿਮਜ੍ਝਂ ਸਮ੍ਪਤ੍ਤਕਾਲੇ ਹਤ੍ਥਿਂ ਵਿਸ੍ਸਜ੍ਜਾਪੇਸੁਂ. ਸੋ ਸੋਣ੍ਡਾਯ ਭੂਮਿਯਂ ਪਹਰਨ੍ਤੋ [ਪਹਰਨ੍ਤੋਉਪਧਾਵਿਤ੍ਵਾ ਇਤਿਕਤ੍ਥਚਿ] ਗਚ੍ਛਨ੍ਤੋ ਉਪਧਾਵਿਤ੍ਵਾ ਸੋਣ੍ਡੇਨ ਤਂ ਉਕ੍ਖਿਪਿਤ੍ਵਾ ਕੁਮ੍ਭੇ ਨਿਸੀਦਾਪੇਸਿ. ਤਤੋ ਰਾਜਾਨੋ ਤਥਾ ਤਂ ਮਾਰਾਪੇਤੁ ਮਸਕ੍ਕੋਨ੍ਤਾ ਪੁਨ ਦਿਵਸੇ ਮਨੁਸ੍ਸੇ ਪਯੋਜੇਤ੍ਵਾ ਰਤ੍ਤਿਯਂ ਮਾਰਾਪੇਸੁਂ. ਬ੍ਰਾਹ੍ਮਣੋਪਿ ਏਵਰੂਪਂ ਇਤ੍ਥਿਂ ਅਲਸਿਤ੍ਵਾ ਜੀਵਨਤੋ ਮਤਮੇਵ [ਮਤਂਮੇਸੇਯ੍ਯੋ ਇਤਿਕਤ੍ਥਚਿ] ਸੇਯ੍ਯੋਤਿ ਸੋਚਨ੍ਤੋ ਪਰਿਦੇਵਨ੍ਤੋ ਰਾਜਙ੍ਗਣੇ ਦਾਰੁਚਿਤਕਂ ਕਾਰਾਪੇਤ੍ਵਾ ਅਗ੍ਗਿਂਪਵਿਸਿਤ੍ਵਾ ¶ ਮਤੋਤਿ. ਏਵਂ ਮਾਤੁਗਾਮਵਸਙ੍ਗਤਾ ਮਹਨ੍ਤਂ ਅਨਯਬ੍ਯਸਨਞ੍ਚ ਮਰਣਞ੍ਚ ਪਾਪੁਣਨ੍ਤੀਤਿ. ਵੁਤ੍ਤਞ੍ਹੇਤਂ ਭਗਵਤਾ.

੨੫.

ਮਾਯਾਵੇਸਾ [ਮਾਯਾਚੇਸਾ ਇਤਿਕਤ੍ਥਚਿ] ਮਰੀਚੀਵ,

ਸੋਕੋ ਰੋਗੋ ਚੁਪਦ੍ਦਵੋ;

ਖਰਾਵ ਬਨ੍ਧਨਾ ਚੇਸਾ,

ਮਚ੍ਚੁਪਾਸੋ ਗੁਹਾਸਯੋ;

ਤਾਸੁ ਯੋ ਵਿਸ੍ਸਸੇ ਪੋਸੋ,

ਸੋ ਨਰੇਸੁ ਨਰਾਧਮੋਤਿ.

੨੬.

ਅਯੋਨਿਸੋ ਸਾ ਪੁਰਿਮਾਯ ਜਾਤਿਯਾ,

ਪੁਞ੍ਞਂ ਕਰਿਤ੍ਵਾ ਅਲਭੀਦਿਸਂ ਗਤਿਂ;

ਧੀਸਮ੍ਪਯੁਤ੍ਤਂ [ਧਿਤਿਸਮ੍ਪਯੁਤ੍ਤਂ ਇਤਿਕਤ੍ਥਚਿ] ਕੁਸਲਂ ਕਰੋਨ੍ਤਾ,

ਨਿਬ੍ਬਾਣਮੇਵਾਭਿਮੁਖਂ ਕਰੋਥਾਤਿ.

ਸੁਵਣ੍ਣਤਿਲਕਾਯ ਵਤ੍ਥੁਂ ਦੁਤਿਯਂ.

੩੩. ਕਪਣਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ਪਰਿਨਿਬ੍ਬੁਤੇ ਜਮ੍ਬੁਦੀਪੇ ਤਤ੍ਥ ਤਤ੍ਥ ਭਿਕ੍ਖੁਭਿਕ੍ਖੁਣਿਯੋ ਚ ਉਪਾਸਕਉਪਾਸਿਕਾਯੋ ਚ ਜਯਮਹਾਬੋਧਿਂ ਵਨ੍ਦਿਸ੍ਸਾਮੀਤਿ ਯੇਭੁਯ੍ਯੇਨ ਗਨ੍ਤ੍ਵਾ ਵਨ੍ਦਨ੍ਤਿ. ਅਥਾ ਪਰਭਾਗੇ ਬਹੂ ਭਿਕ੍ਖੂ ਸਙ੍ਗਮ੍ਮ ਮਹਾਬੋਧਿਂ ਵਨ੍ਦਨਤ੍ਥਾਯ ਗਚ੍ਛਨ੍ਤਾ ਅਞ੍ਞਤਰਸ੍ਮਿਂ ਗਾਮਕੇ ਭਿਕ੍ਖਾਯ ਚਰਿਤ੍ਵਾ ਆਸਨਸਾਲਂ ਗਨ੍ਤ੍ਵਾ ਕਤਭਤ੍ਤਕਿਚ੍ਚਾ ਥੋਕਂ ਵਿਸ੍ਸਮਿਂਸੁ, ਤਦਾ ਤਤ੍ਥ ਏਕਾ ਕਪਣਾ ਦੁਗ੍ਗਤਿਤ੍ਥੀ ਤਥਾ ਨਿਸਿਨ੍ਨਭਿਕ੍ਖੂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤੇ ਠਿਤਾ ਅਯ੍ਯਾ ਕੁਹਿਂ ਗਚ੍ਛਨ੍ਤੀਤਿ ਪੁਚ੍ਛਿ. ਭਿਕ੍ਖੂ ਤਂ ਸੁਤ੍ਵਾ ਜਯਮਹਾਬੋਧਿਸ੍ਸ ਆਨੁਭਾਵਞ੍ਚ ਤਂ ਵਨ੍ਦਨਤ੍ਥਾਯ ਅਤ੍ਤਾਨਂ ਗਮਨਞ੍ਚ ਕਥੇਨ੍ਤਾ ਏਵਮਾਹਂਸੁ.

੧.

ਯਤ੍ਥਾਸੀਨੋ ¶ ਜਿਨੋ ਜੇਸਿ, ਸਸੇਨਂ ਮਕਰਦ੍ਧਜਂ;

ਹਨ੍ਤ੍ਵਾ ਕਿਲੇਸਸੇਨਞ੍ਚ, ਬੁਦ੍ਧੋ ਆਸਿ ਨਿਰੁਤ੍ਤਰੋ.

੨.

ਯਂ ਪੂਜੇਸਿ ਮਹਾਵੀਰੋ, ਠਿਤੋ ਪਦ ਮਕੋਪਯਂ;

ਸਤ੍ਤਰਤ੍ਤਿਨ੍ਦਿਵਂ ਨੇਤ੍ਤ, ਨੀਲਨੀਰਜਰਂਸਿਨਾ.

੩.

ਸੁਰਾਸੁਰਨਰਾਦੀਨਂ, ਨੇਤ੍ਤਾਲਿ ਪਾਲ਼ਿਪਾਤਨਾ;

ਮੇਚਕਾਕਾਰਪਤ੍ਤੇਹਿ, ਸਿਖਣ੍ਡੀਵਿਯ ਭਾਤਿ ਯੋ.

੪.

ਸੁਰਪਾਦਪੋਵ ਸਤ੍ਤਾਨਂ, ਯਂ ਤਿਟ੍ਠਤਿ ਮਹੀਤਲੇ;

ਇਹ ਲੋਕੇ ਪਰਤ੍ਤੇ ਚ, ਦਦਨ੍ਤੋ ਇਚ੍ਛਿਤਿਚ੍ਛਿਤਂ.

੫.

ਯਸ੍ਸ ਪੁਰਾਣਪਣ੍ਣਮ੍ਪਿ, ਪਤਿਤਂ ਯੋ ਨਰੋ ਇਧ;

ਪੂਜੇਤਿ ਤਸ੍ਸ ਸੋ ਦੇਤਿ, ਭਵਭੋਗਂ ਮਹੀਰੁਹੋ.

੬.

ਗਨ੍ਧਮਾਲੇਹਿ ਸਲਿਲੇਹਿ, ਯਮੁਪਾਸਤਿ ਸਦਾ ਨਰੋ;

ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਦੁਰਿਤਂ ਸੋ ਨਿਹਞ੍ਞਤਿ.

੭.

ਯੋ ਦੇਤਿ ਇਹਲੋਕਤ੍ਥਂ,

ਯੋ ਦੇਤਿ ਪਾਰਲੋਕਿਕਂ,

ਸਮ੍ਪਦਂ ਜਯਬੋਧਿਂਤਂ,

ਭੋਤਿ ਗਚ੍ਛਾਮ ਵਨ੍ਦਿਤੁਂ.

ਤਂ ਸੁਤ੍ਵਾ ਉਦਗ੍ਗਾ ਸੋਮਨਸ੍ਸਜਾਤਾ ਭਿਕ੍ਖੂਨਂ ਏਵਮਾਹ. ਅਹਂ ਭਨ੍ਤੇ ਪਰਕੁਲੇ ਭਤਿਯਾ ਕਮ੍ਮਂ ਕਰੋਨ੍ਤੀ ਦੁਕ੍ਖੇਨ ਕਸਿਰੇਨ ਜੀਵਿਕਂ ਕਪ੍ਪੇਮਿ. ਸ੍ਵਾਤਨਾਯ ਮੇ ਤਣ੍ਡੁਲਨਾਲਿਪਿ [ਭਣ੍ਡੁਲਨਾਮ੍ਪ ਇਤਿਸਬ੍ਬਤ੍ਥ] ਨਤ੍ਥਿ, ਪਗੇਵ ਅਞ੍ਞਂ ਧਨਂ, ਇਮਂ ਵਿਨਾ ਅਞ੍ਞਂ ਸਾਟਕਮ੍ਪਿ ਨਤ੍ਥਿ, ਕਸ੍ਮਾ ਪੁਬ੍ਬੇ ਅਕਤਪੁਞ੍ਞਤ੍ਤਾ, ਤਸ੍ਮਾ ਇਮਂ ਭਨ੍ਤੇ ਸਾਟਕਂ ਮਮਾਨੁਗ੍ਗਹਾਯ ਬੋਧਿਮ੍ਹਿ ਧਜਂ ਬਨ੍ਧਥਾਤਿ ਯਾਚਿਤ੍ਵਾ ਸਾਟਕਂ ਧੋਵਿਤ੍ਵਾ ਤੇਸਂ ਅਦਾਸਿ. ਭਿਕ੍ਖੂਪਿ ਤਸ੍ਸਾਨੁਗ੍ਗਹਾਯ ਤਂ ਗਹੇਤ੍ਵਾ ਅਗਮਂਸੁ. ਸਾ ਸਾਟਕਂ ਦਤ੍ਵਾ ਪੀਤਿਪਾਮੋਜ੍ਜਮਾਨਸਾ ਗੇਹਂ ਗਨ੍ਤ੍ਵਾ ਤਦਹੇਵ ਰਤ੍ਤਿਯਾ ਮਜ੍ਝਿਮਯਾਮੇ ਸਤ੍ਥਕਵਾਤੇਨ ਉਪਹਤਾ ਕਾਲਂ ਕਤ੍ਵਾ ਤੇਸਂ ¶ ਭਿਕ੍ਖੂਨਂ ਗਮਨਮਗ੍ਗੇ ਏਕਸ੍ਮਿਂ ਰਮਣੀਯੇ ਵਨਸਣ੍ਡੇ ਭੁਮ੍ਮਦੇਵਤਾ ਹੁਤ੍ਵਾ ਨਿਬ੍ਬਤ੍ਤੀ, ਅਥਸ੍ਸਾ ਪੁਞ੍ਞਾਨੁਭਾਵੇਨ ਤਿਯੋਜਨਿਕੇ ਠਾਨੇ ਦਿਬ੍ਬਕਪ੍ਪਰੁਕ੍ਖਾ ਪਾਤੁਰਹਂਸੁ, ਤਤ੍ਤ ਤਤ੍ਤ ਨਾਨਾਵਿਰਾਗਧਜਪਤਾਕਾ ਓਲਮ੍ਬਨ੍ਤਿ. ਦੇਵਪੁਤ੍ਤਾ ਚ ਦੇਵਧੀਤਰੋ ਚ ਸਬ੍ਬਾਭਰਣਵਿਭੂਸਿਤਾ ਤਥੇਵ ਧਜਪਤਾਕਾਦਯੋ ਗਹੇਤ੍ਵਾ ਕੀਲ਼ਨ੍ਤਿ. ਨਚ੍ਚਗੀਤਾਦਿਨੇਕਾਨਿ ਅਚ੍ਛਰਿਯਾਨਿ ਪਯੋਜੇਨ੍ਤਿ. ਅਥ ਦੁਤਿਯਦਿਵਸੇ ਤੇਪਿ ਭਿਕ੍ਖੂ ਬੋਧਿਮਣ੍ਡਲਂ ਗਚ੍ਛਨ੍ਤਾ ਸਾਯਣ੍ਹੇ ਤਂ ਠਾਨਂ ਪਤ੍ਵਾ ਅਜ੍ਜ ਇਮਸ੍ਮਿਂ ਵਨਸਣ੍ਡੇ ਵਸਿਤ੍ਵਾ ਗਮਿਸ੍ਸਾਮਾਤਿ ਤਤ੍ਥ ਵਾਸਂ ਉਪਗਮਿਂਸੁ, ਤਤੋ ਤੇ ਰਤ੍ਤਿਭਾਗੇ ਨਾਨਾਵਣ੍ਣਧਜੇ ਚ ਦੇਵਤਾਹਿ ਪਯੋਜਿਯਮਾਨਾ ਗੀਤਵਾਦਿਤਾਦਯੋ ਚ ਤਿਯੋਜਨਟ੍ਠਾਨੇ ਕਪ੍ਪਰੁਕ੍ਖਾਨਿ ਚ ਇਦਂ ਸਬ੍ਬਂ ਦੇਵਿਸ੍ਸਰਿਯਂ ਤਸ੍ਸਾਨੁਭਾਵੇਨ ਨਿਬ੍ਬਤ੍ਤਭਾਵਂ ਦਿਸ੍ਵਾ ਵਿਮ੍ਹਿਤਮਾਨਸਾ ਦੇਵਧੀਤਰਂ ਆਮਨ੍ਤੇਤ੍ਵਾ ਤ੍ਵਂ ਕੇਨ ਕਮ੍ਮੇਨ ਇਧ ਨਿਬ੍ਬਤ੍ਤਾਤਿ ਪੁਚ੍ਛਿਂਸੁ. ਸਾ ਭਿਕ੍ਖੂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਠਿਤਾ ਭਨ੍ਤੇ ਮਂ ਨ ਸਞ੍ਜਾਨਿਤ੍ਥਾਤਿ ਆਹ. ਭਿਕ੍ਖੂਹਿ ਨ ਮਯਂ ਸਞ੍ਜਾਨਾਮ ਭਗਿਨੀਤਿ ਵੁਤ੍ਤੇ ਸਾ ਅਤ੍ਤਨੋ ਸਭਾਵਂ ਕਥੇਨ੍ਤੀ ਏਵਮਾਹ.

੮.

ਹੀਯ੍ਯੋ ਆਸਨਸਾਲਾਯ, ਨਿਸੀਦਿਤ੍ਥ ਸਮਾਗਤਾ;

ਤੁਮ੍ਹਕਂ ਸਨ੍ਤਿਕਂ ਗਮ੍ਮ, ਯਾ ਵਰਾਕੀਭਿਵਾਦਯਿ.

੯.

ਯਾ ਬੋਧਿਂ ਪੂਜਨਤ੍ਥਾਯ, ਵਤ੍ਥਕਂ ਪਟਿਪਾਦਯਿ;

ਸਾਹਂ ਹੀਯ੍ਯੋ ਚੁਤਾ ਆਸਿਂ, ਰਤ੍ਤਿਯਂ ਬ੍ਯਾਧਿਪੀਲ਼ਿਤਾ.

੧੦.

ਨਾਨਾਸਮ੍ਪਤ੍ਤਿਸਂਯੁਤ੍ਤਾ, ਨਾਨਾਭੂਸਨਭੂਸਿਤਾ;

ਵਿਮਾਨੇ ਰਤਨਾ ਕਿਣ੍ਣੇ, ਜਾਤਾਹਂ ਏਤ੍ਥ ਕਾਨਨੇ.

੧੧.

ਹੀਯ੍ਯੋ ਪਸ੍ਸਿਤ੍ਥ ਮੇ ਗਤ੍ਤਂ, ਰਜੋਜਲ੍ਲੇਹਿ ਸਂਕੁਲਂ;

ਅਜ੍ਜ ਪਸ੍ਸਥ ਮੇ ਗਤ੍ਤਂ, ਵਣ੍ਣਵਨ੍ਤਂ ਪਭਸ੍ਸਰਂ.

੧੨.

ਹੀਯ੍ਯੋ ਪਸ੍ਸਿਤ੍ਥ ਮੇ ਭਨ੍ਤੇ, ਨਿਵਤ੍ਥਂ ਮਲਿਨਮ੍ਬਰਂ;

ਅਜ੍ਜ ਪਸ੍ਸਥ ਮੇ ਭਨ੍ਤੇ, ਦਿਬ੍ਬਮਮ੍ਬਰਮੁਤ੍ਤਮਂ.

੧੩.

ਵਿਕਿਣ੍ਣਫਲਿਤਗ੍ਗੇਹਿ ¶ , ਕੇਸੇਹਿ ਵਿਰਲਾ ਕੁਲਂ;

ਊਕਾਗੂਥਪਟਿਕ੍ਕੂਲਂ, ਹੀਯ੍ਯੋ ਆਸਿਸਿਰਂ ਮਮ.

੧੪.

ਅਜ੍ਜ ਤਂ ਪਰਿਵਤ੍ਤਿਤ੍ਵਾ, ਮਮ ਪੁਞ੍ਞਾਨੁਭਾਵਤੋ;

ਸੁਨੀਲਮੁਦੁਧਮ੍ਮਿਲ੍ਲਂ, ਕੁਸੁਮਾ ਭਰਣਭੂਸਿਤਂ.

੧੫.

ਪੁਰਾ ਮੇ ਸਕਸੀਸੇਨ, ਵਹਿਤਂ ਦਾਰੂ ਦਕਾਦਿਕਂ;

ਪੁਞ੍ਞੇਨਾਹਂ ਅਜ੍ਜ ਮਾਲਾ, ਭਾਰਂ ਸੀਸੇ ਸਮੁਬ੍ਬਹੇ.

੧੬.

ਧਜਤ੍ਥਾਯ ਮਯਾ ਹੀਯ੍ਯੋ, ਪਦਿਨ੍ਨਂ ਥੂਲਸਾਟਕਂ;

ਅਜ੍ਜ ਨਿਬ੍ਬਤ੍ਤਿ ਮੇ ਭੋਨ੍ਤੋ, ਮਹਨ੍ਤਂ ਦਿਬ੍ਬਸਮ੍ਪਦਂ.

੧੭.

ਜਾਨਮਾਨੇਨ ਕਤ੍ਤਬ੍ਬਂ, ਦਾਨਾਦੀਸੁ ਮਹਪ੍ਫਲਂ;

ਦੇਵਲੋਕੇ ਮਨੁਸ੍ਸੇਸੁ, ਸੁਖਦਂ ਦਾਨ ਮੁਤ੍ਤਮਨ੍ਤਿ.

ਤਂ ਸੁਤ੍ਵਾ ਸਬ੍ਬੇ ਭਿਕ੍ਖੂ ਅਚ੍ਛਰਿਯਬ੍ਭੁਤਚਿਤ੍ਤਾ ਅਹੇਸੁਂ. ਸਾ ਦੇਵਤਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਭਿਕ੍ਖੂ ਨਿਮਨ੍ਤੇਤ੍ਵਾ ਦਿਬ੍ਬੇਹਿ ਖਜ੍ਜਭੋਜ੍ਜੇਹਿ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਤੇਹਿ ਸਦ੍ਧਿਂ ਆਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਦਾਨਂ ਦਦਮਾਨਾ ਮਹਾਬੋਧਿਂ ਗਨ੍ਤ੍ਵਾ ਸਬ੍ਬੇਹਿ ਧਜਪਤਾਕਾ ਦੀਹਿ ਚ ਨਾਨਾਵਿਧਵਣ੍ਣਗਨ੍ਧਸਮ੍ਪਨ੍ਨਪੁਪ੍ਫੇਹਿ ਚ ਦੀਪਧੂਪੇਹਿ ਚ ਬੋਧਿਂ ਪੂਜੇਤ੍ਵਾ ਭਿਕ੍ਖੂਨਂ ਚੀਵਰਤ੍ਥਾਯ ਦਿਬ੍ਬਵਤ੍ਥਾਨਿ ਦਤ੍ਵਾ ਆਗਮ੍ਮ ਤਸ੍ਮਿਂਯੇਵ ਵਨਸਣ੍ਡੇ ਵਸਨ੍ਤੀ ਨਾਨਾਵਿਧਾਨਿ ਪੁਞ੍ਞਾਨਿ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਭਿਕ੍ਖੂਪਿ ਤਂ ਅਚ੍ਛਰਿਯਂ ਤਤ੍ਥ ਤਤ੍ਥ ਪਕਾਸੇਨ੍ਤਾ ਬਹੂਜਨੇ ਪੁਞ੍ਞਕਮ੍ਮੇ ਨਿਯੋਜੇਸੁਂਤਿ.

੧੮.

ਏਵਂ ਵਿਧਾਪਿ ਕਪਣਾ ਜਿਨਸਾਸਨਮ੍ਹਿ,

ਕਤ੍ਵਾ ਪਸਾਦ ਮਥ ਥੂਲਕੁਚੇਲਕੇਨ;

ਪੂਜੇਤ੍ਵ ਦਿਬ੍ਬਵਿਭਵਂ ਅਲਭੀਤਿ ਞਤ੍ਵਾ,

ਪੂਜਾਪਰਾ ਭਵਥ ਵਤ੍ਥੁਸੁ ਤੀਸੁ ਸਮ੍ਮਾਤਿ.

ਕਪਣਾਯ ਵਤ੍ਥੁਂ ਤਤਿਯਂ.

੩੪. ਇਨ੍ਦਗੁਤ੍ਤਤ੍ਥੇਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤੋ ਪਰਿਨਿਬ੍ਬਾਣਤੋ ਓਰਭਾਗੇ ਜਮ੍ਬੁਦੀਪੇ ਕਿਰ ਪਾਟਲਿਪੁਤ੍ਤਂ ਨਾਮ ਨਗਰਂ ਅਹੋਸਿ. ਤਤ੍ਥ ਧਮ੍ਮਾਸੋਕੋ ਨਾਮ ਮਹਿਦ੍ਧਿਕੋ ਮਹਾਨੁਭਾਵੋ ਆਣਾਚਕ੍ਕਵਤ੍ਤਿ ਰਾਜਾ ਰਜ੍ਜਂ ਕਾਰੇਤਿ. ਉਦ੍ਧਂ ਆਕਾਸਤੋ ਹੇਟ੍ਠਾ ਪਥਵਿਯਾ ਯੋਜਨਪ੍ਪਮਾਣੇ ਸਕਲਜਮ੍ਬੂਦੀਪੇ ਤਸ੍ਸ ਆਣਾ ਪਵਤ੍ਤਤਿ, ਤਦਾ ਸਕਲਜਮ੍ਬੁਦੀਪਵਾਸਿਨੋ ਚ ਚਤੁਰਾਸੀਤਿ ਨਗਰਸਹਸ੍ਸੇ ਰਾਜਾਨੋ ਚ ਅਤ੍ਤਨੋ ਅਤ੍ਤਨੋ ਬਲਵਾਹਨੇ ਗਹੇਤ੍ਵਾ ਆਗਮ੍ਮ ਧਮ੍ਮਾਸੋਕਮਹਾਰਞ੍ਞੋ ਉਪਟ੍ਠਾਨਂ ਕਰੋਨ੍ਤਿ. ਤਸ੍ਮਿਂ ਸਮਯੇ ਦੇਵਪੁਤ੍ਤਨਗਰੇ ਦੇਵਪੁਤ੍ਤੋ ਨਾਮ ਮਹਾਰਾਜਾ ਅਤ੍ਤਨੋ ਬਲਵਾਹਨਂ ਗਹੇਤ੍ਵਾ ਰਞ੍ਞੋ ਉਪਟ੍ਠਾਨਂ ਅਗਮਾਸਿ. ਧਮ੍ਮਾਸੋਕੋ ਦੇਵਪੁਤ੍ਤਮਹਾਰਾਜਾਨਂ ਦਿਸ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ਤੁਮ੍ਹਾਕਂ ਰਟ੍ਠੇ ਬਹੁਸ੍ਸੁਤਾ ਆਗਤਾਗਮਾ ਮਹਾਗੁਣਵਨ੍ਤਾ ਅਯ੍ਯਾ ਅਤ੍ਥੀਤਿ ਪੁਚ੍ਛਿ. ਤਂ ਸੁਤ੍ਵਾ ਦੇਵਪੁਤ੍ਤਰਾਜਾ ਅਤ੍ਥਿ ਦੇਵ ਤਸ੍ਮਿਂ ਨਗਰੇ ਸੀਹਕੁਮ੍ਭਕਂ ਨਾਮ ਮਹਾਵਿਹਾਰਂ. ਤਤ੍ਥ ਅਨੇਕਸਹਸ੍ਸਭਿਕ੍ਖੂ ਵਿਹਰਨ੍ਤਿ ਸੀਲਵਨ੍ਤਾ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਵਿਵੇਕਕਾਮਿਨੋ. ਤੇਸੁ ਸਾਟ੍ਠਕਥਾਤਿਪਿਟਕਧਰੋ ਇਨ੍ਦਗੁਤ੍ਤਤ੍ਥੇਰੋ ਨਾਮ ਤੇਸਂ ਪਾਮੋਕ੍ਖੋ ਅਹੋਸਿ. ਸੋ ਅਨੇਕਪਰਿਯਾਯੇਨ ਸਨਰਾਮਰਾਨਂ ਭਿਕ੍ਖੂਨਂ ਧਮ੍ਮਂਵਣ੍ਣੇਤਿ. ਗੁਣਵਾ ਅਤ੍ਤਨੋ ਗੁਣਂ ਨਿਸ੍ਸਾਯ ਲੋਕੇ ਪਾਕਟੋਤਿ. ਤਂ ਸੁਤ੍ਵਾ ਰਾਜਾ ਤੁਟ੍ਠਮਾਨਸੋ ਥੇਰਂ ਪਸ੍ਸਿਤੁਕਾਮੋ ਹੁਤ੍ਵਾ ਸਮ੍ਮ ਤ੍ਵਮੇਵ ਗਨ੍ਤ੍ਵਾ ਥੇਰਂ ਯਾਚਿਤ੍ਵਾ ਇਧਾ ਨੇਹੀਤਿ ਆਹ. ਤਂ ਸੁਤ੍ਵਾ ਦੇਵਪੁਤ੍ਤਰਾਜਾ ਅਤ੍ਤਨੋ ਹਤ੍ਥਸ੍ਸਬਲਵਾਹਨਾ ਦਿਮਹਾ ਸੇਨਙ੍ਗਪਰਿਵੁਤੋ ਇਨ੍ਦਗੁਤ੍ਤਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਅਯ੍ਯ ਅਯ੍ਯਂ ਧਮ੍ਮਾਸੋਕਮਹਾਰਾਜਾ ਦਟ੍ਠੁਕਾਮੋਤਿ ਆਹ. ਥੇਰੇਨ ਸਾਧੂਤਿ ਸਮ੍ਪਟਿਚ੍ਛਿਤੇ ਰਾਜਾ ਥੇਰੇਨ ਸਮ੍ਪਟਿਚ੍ਛਿਤਭਾਵਂ ਧਮ੍ਮਾਸੋਕਮਹਾਰਾਜਿਨੋ ਪੇਸੇਸਿ. ਤਤੋ ਧਮ੍ਮਾਸੋਕਮਹਾਰਾਜਾ ਸੋਮਨਸ੍ਸਪ੍ਪਤ੍ਤੋ ਅਤ੍ਤਨੋ ਆਣਾਪਵਤ੍ਤਿਤਟ੍ਠਾਨੇ ਰਾਜੂਨਂ ਸਾਸਨਂ ਪੇਸੇਸਿ. ਸਬ੍ਬੇਵ ਥੇਰਾਗਮਨਮਗ੍ਗਂ ¶ ਅਲਙ੍ਕਰੋਨ੍ਤੂਤਿ. ਅਥ ਤੇ ਰਾਜਾਨੋ ਤੁਟ੍ਠਪਹਟ੍ਠਾ ਅਤ੍ਤਨੋ ਅਤ੍ਤਨੋ ਨਗਰੇ ਭੇਰਿਂ ਚਰਾਪੇਤ੍ਵਾ ਦੇਵਪੁਤ੍ਤਨਗਰਤੋ ਯਾਵ ਪਾਟਲਿਪੁਤ੍ਤਨਗਰਂ ਏਤ੍ਥਨ੍ਤਰੇ ਪਞ੍ਚਪਣ੍ਣਾਸਯੋਜਨਿਕਂ ਮਗ੍ਗਂ ਵਿਸਮਂ ਸਮਂ ਕਰੋਨ੍ਤੋ ਦੇਵਤਾਨਂ ਦਿਬ੍ਬਵੀਥਿਮਿਵ ਅਲਙ੍ਕਰਿਤ੍ਵਾ ਧਮ੍ਮਾਸੋਕਮਹਾਨਰਿਨ੍ਦਸ੍ਸ ਏਵਂ ਸਾਸਨਂ ਪੇਸੇਸੁਂ. ਭਵਨ੍ਤੇਤ੍ਥ.

੧.

ਇਨ੍ਦਗੁਤ੍ਤਮਹਾਥੇਰ, ਸਾਮਿਨੋ ਗਮਨਾਯ ਨੋ;

ਮਗ੍ਗਂ ਅਲਙ੍ਕਰੋਨ੍ਤੂਤਿ, ਮਹਾਰਾਜੇਨ ਪੇਸਿਤਂ.

੨.

ਤਤੋ ਤੇ ਅਪਨੇਤ੍ਵਾਨ, ਪਾਸਾਣਕਣ੍ਟਕਾਦਿਕਂ;

ਵਿਸਮਂ ਸਮਂ ਕਰਿਤ੍ਵਾਨ, ਸਮ੍ਮਜ੍ਜਿਤ੍ਵਾਨ ਸਾਧੁਕਂ.

੩.

ਧੋਤਮੁਤ੍ਤਾ ਸਮਾਭਾਸਾ, ਓਕਿਰਿਤ੍ਵਾਨ ਵਾਲੁਕਾ;

ਉਸ੍ਸਾਪਿਤਾ ਤਤ੍ਥ ਤਤ੍ਥ, ਦੁਸ੍ਸਤੋਰਣਪਨ੍ਤਿਯੋ.

੪.

ਕਲਧੋਤਹੇਮਰਮ੍ਭਾਦਿ, ਨਾਨਾਤੋਰਣਪਨ੍ਤਿਯੋ;

ਤਥਾ ਪੁਪ੍ਫਮਯਾ ਨੇਕ, ਤੋਰਣੂਪਰਿਤੋਰਣਾ.

੫.

ਤੇਸੁ ਤੇਸੁਚ ਠਾਨੇਸੁ, ਸਙ੍ਖਤਾ ਕੁਸੁਮਗ੍ਘਿਕਾ;

ਤਥੇਵ ਗਨ੍ਧਤੇਲੇਹਿ, ਦੀਪਿਤਾ ਦੀਪਪਨ੍ਤਿਯੋ.

੬.

ਪਦੁਮੁਪ੍ਪਲਸਨ੍ਨੀਰ, ਪੁਪ੍ਫਪਲ੍ਲਵ ਲਙ੍ਕਤਾ;

ਠਪਿਤਾ ਘਟਮਾਲਾਯੋ, ਪੁਣ੍ਣਾ ਸੋਗਨ੍ਧਵਾਰਿਹਿ.

੭.

ਨਿਲਪੀਤਾ ਦਿਸਮ੍ਭਿਨ੍ਨ, ਪਤਾਕਾਹਿ ਧਜੇਹਿ ਚ;

ਮਗ੍ਗਸ੍ਸ ਉਭਤੋ ਪਸ੍ਸੇ, ਵਨਮਾਸਿ ਸਮਾਕੁਲਂ.

੮.

ਕੇਤਵੋ ਉਗ੍ਗਤਾ ਤਤ੍ਥ, ਮਨ੍ਦਮਨ੍ਦਸਮੀਰਣਾ;

ਅਵ੍ਹਯਨ੍ਤਾਵ ਸੋਭਨ੍ਤਿ, ਬ੍ਰਹ੍ਮੋਰਗਸੁਰਾਦਯੋ.

੯.

ਨਾਗਚਮ੍ਪਪੁਨ੍ਨਾਗ, ਕੇਤਕੀਵਕੁਲਾਦਿਹਿ;

ਪਦੁਮੁਪ੍ਪਲਾ ਦਿਜਲਜੇਹਿ, ਮਾਲਤੀ ਕੁਸੁਮਾ ਦਿਹਿ.

੧੦.

ਮਾਲਾਦਾਮੇਹਿ ¶ ਨੇਕੇਹਿ, ਮਗ੍ਗਮਾਸਿ ਵਿਚਿਤ੍ਤਕਂ;

ਪਤ੍ਥਰਿਤ੍ਵਾ ਪਾਦਪਟੇ, ਸਿਤ੍ਤਸਮ੍ਮਤ੍ਤਭੂਮਿਯਂ.

੧੧.

ਲਾਜਾਦਿਪਞ੍ਚਪੁਪ੍ਫਾਨਿ, ਵਿਕਿਰਿਂਸੁ ਮਨੋਰਮਂ;

ਅਲਙ੍ਕਰਿਤ੍ਵਾ ਹਤ੍ਤਸ੍ਸਾ, ਕੁਸੁਮਾ ਭਰਣਾਦਿਹਿ.

੧੨.

ਮਗ੍ਗਾਲਙ੍ਕਰਣਤ੍ਥਾਯ, ਠਪਿਤਾਸੁਂ ਤਤੋ ਤਤੋ;

ਤੇਸੁ ਤੇਸੁ ਚ ਠਾਨੇਸੁ, ਭੇਰਿਮਣ੍ਡਲਮਜ੍ਝਗਾ.

੧੩.

ਨਚ੍ਚਨ੍ਤਿ ਚਾਤੁਰਾ ਨਾਰੀ, ਰਸਭਾਵਨਿਰਨ੍ਤਰਾ;

ਕਂਸਵਂਸਾਦਿਪਗ੍ਗਯ੍ਹ, ਵਜ੍ਜੇਨ੍ਤਾਨੇਕਤਨ੍ਤਿਯੋ.

੧੪.

ਗਾਯਨ੍ਤਿ ਮਧੁਰਂ ਗੀਤਂ, ਗਾਯਨ੍ਤੇਤ੍ਥ ਲਯਾਨ੍ਵਿਤਂ;

ਮਗ੍ਗੋਸੋ ਸਾਧੁਵਾਦੇਹਿ, ਭੇਰਿਤਨ੍ਤਿਨਦੇਹਿਚ.

੧੫.

ਕਰੀਨਂ ਕੋਞ੍ਚਨਾਦੇਹਿ, ਹਯਾਨਂ ਹੇਸਿਤੇਹਿ ਚ;

ਨੇਕਵਿਟਙ੍ਕਸਙ੍ਘੇਹਿ, ਸੋ ਕਰੀਹਿ ਸਮਾਕੁਲੋ.

੧੬.

ਮਗ੍ਗਸ੍ਸ ਉਭਤੋ ਪਸ੍ਸੇ, ਦੇਵਕਞ੍ਞੂਪਮਾ ਸੁਭਾ;

ਮਾਲਾਕਲਾਪੇ ਪਗ੍ਗਯ੍ਹ, ਤਿਟ੍ਠਨ੍ਤਿ ਤੁਟ੍ਠਮਾਨਸਾ.

੧੭.

ਤਥਾ ਪੁਣ੍ਣਘਟੇ ਗਯ੍ਹ, ਪਦੁਮੁਪ੍ਪਲਸਂਕੁਲੇ,

ਅਟ੍ਠਮਙ੍ਗਲਮੁਗ੍ਗਯ੍ਹ, ਤਿਟ੍ਠਨ੍ਤਿ ਪਮਦਾ ਤਹਿਂ.

੧੮.

ਸੀਤਲੂਦਕਸਮ੍ਪਨ੍ਨ, ਪਪਾਹਿ ਸਮਲਙ੍ਕਤਾ;

ਸਿਨਾਨਤ੍ਥਂ ਖਤਾ ਆਸੁਂ, ਪੋਕ੍ਖਰਞ੍ਞੋ ਤਹਿਂਤਹਿਂ.

੧੯.

ਤਹਿਂਤਹਿਂਕਤਾ ਆਸੁਂ, ਦਾਨਸਾਲਾ ਮਨੋਰਮਾ;

ਨਿਚਿਤਾਸੁਮਨੇਕਾਨਿ, ਦਾਨੋਪਕਰਣਾ ਤਹਿਂ.

੨੦.

ਏਵਂ ਨੇਕਵਿਧਾ ਪੂਜਾ, ਅਮ੍ਹੇਹਿ ਪਟਿਪਾਦਿਤਾ;

ਠਪੇਤ੍ਵਾਨ ਮਹਾਗਙ੍ਗਂ, ਤਂ ਜਾਨਾਤੁ ਮਹੀਪਤੀਤਿ.

ਤਂ ਸੁਤ੍ਵਾ ਅਸੋਕਮਹਾਰਾਜਾ ਗਙ੍ਗਂ ਅਲਙ੍ਕਰੋਥਾਤਿ ਸੋਲ਼ਸਯਕ੍ਖੇ ਪੇਸੇਸਿ, ਤੇ ਸਪਰਿਵਾਰਾ ਤਤ੍ਥ ਗਨ੍ਤ੍ਵਾ ਅਤ੍ਤਨੋ ¶ ਆਨੁਭਾਵੇਨ ਗਙ੍ਗਾਯ ਅਨ੍ਤੋ ਤਿਗਾਵੁਤਟ੍ਠਾਨੇ ਉਦੁਕ੍ਖਲਪਾਸਾਣੇ ਠਪੇਸੁਂ. ਠਪੇਤ੍ਵਾ ਥਮ੍ਭੇ ਉਸ੍ਸਾਪੇਤ੍ਵਾ ਤੁਲਾਸਂਘਾਟੇ ਦਤ੍ਵਾ ਹਿਮਵਨ੍ਤਤੋ ਰਤ੍ਤਚਨ੍ਦਨਸਾਰੇ ਆਹਰਿਤ੍ਵਾ ਪਦਰੇ ਸਨ੍ਥਰਿਤ੍ਵਾ ਅਨੇਕੇਹਿ ਪੂਜਾਵਿਧਾਨੇਹਿ ਅਲਙ੍ਕਰਿਤ੍ਵਾ ਰਞ੍ਞੋ ਏਵਂ ਸਾਸਨਂ ਪੇਸੇਸੁਂ. ਭਵਨ੍ਤੇਤ੍ਥ.

੨੧.

ਯਮਤ੍ਥਾਯ ਮਯਂ ਸਬ੍ਬੇ, ਮਹਾਰਾਜੇਨ ਪੇਸਿਤਾ;

ਅਮ੍ਹੇਹਿ ਦਾਨਿ ਤਂ ਸਬ੍ਬਂ, ਕਤਮੇਵ ਸੁਣੋਥ ਤਂ.

੨੨.

ਗਾਵੁਤਤ੍ਤਯਗਮ੍ਭੀਰਂ, ਗਙ੍ਗਂ ਯੋਜਨਵਿਤ੍ਥਤਂ;

ਥਮ੍ਭੇ ਪਤਿਟ੍ਠਪੇਤ੍ਵਾਨ, ਅਨਗ੍ਘਂ ਰਤ੍ਤਚਨ੍ਦਨਂ.

੨੩.

ਹਿਮਵਨ੍ਤਤੋ ਹਰਿਤ੍ਵਾਨ, ਸੇਤੁਂ ਤਤ੍ਥ ਸੁਮਾਪਿਤਂ;

ਤੋਰਣਾ ਚ ਉਭੋ ਪਸ੍ਸੇ, ਰਤਨੇਹਿ ਸੁਨਿਮ੍ਮਿਤਾ.

੨੪.

ਪੁਣ੍ਣਕੁਮ੍ਭਦ੍ਧਜਾ ਚੇਵ, ਪਦੀਪਾਵਲਿਯੋ ਤਥਾ;

ਉਭੋ ਪਸ੍ਸੇਸੁ ਰਤਨਾਨਿ, ਮਾਪੇਤ੍ਵਾਲਮ੍ਬਨਾਨਿਚ.

੨੫.

ਸੁਵਣ੍ਣਮਣਿਮੁਤ੍ਤਾਦਿ, ਦਾਮੇਹਿ ਸਮਲਙ੍ਕਤਾ;

ਵਾਲੁਕਤ੍ਥਾਯ ਓਕਿਣ੍ਣਾ, ਧੋਤਮੁਤ੍ਤਾ ਪਭਸ੍ਸਰਾ.

੨੬.

ਤੇਸੁ ਤੇਸੁ ਚ ਠਾਨੇਸੁ, ਠਪਿਤਾਸੁਂ ਮਹਾਮਣੀ;

ਨਾਨਾਰਾਗਵਿਤਾਨੇਹਿ, ਸੋਭਿਤਾ ਸੇਤੁਨੋ ਪਰਿ.

੨੭.

ਓਲਮ੍ਬਿਤਾਸੁਂ ਤਤ੍ਥੇਵ, ਦਿਬ੍ਬਾਦਿਕੁਸੁਮਾਦਯੋ;

ਨਿਟ੍ਠਿਤਂ ਇਧ ਕਾਤਬ੍ਬ, ਯੁਤ੍ਤਂ ਪੂਜਾਵਿਧਿਂਤੁ ਨੋ;

ਦੇਵੋਤਂ ਪਟਿਜਾਨਾਤੁ, ਇਤਿ ਵਤ੍ਵਾਨ ਪੇਸਯੁਂਤਿ.

ਤਮ੍ਪਿ ਸੁਤ੍ਵਾ ਅਸੋਕੋ ਮਹਾਰਾਜਾ ਤੁਮ੍ਹੇਵ ਥੇਰਂ ਇਧਾਨੇਥਾਤਿ ਤੇਸਂਯੇਵ ਸਾਸਨਂ ਪਟਿਪੇਸੇਸਿ, ਤੇ ਸਾਧੂਤਿ ਇਨ੍ਦਗੁਤ੍ਤਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਭਨ੍ਤੇ ਪਾਟਲਿਪੁਤ੍ਤਨਗਰਸ੍ਸ ਗਮਨਾਯ ਕਾਲੋਤਿ ਆਹਂਸੁ, ਤਤੋ ਥੇਰੋ ਸਟ੍ਠਿਸਹਸ੍ਸਮਤ੍ਤੇਹਿ ¶ ਭਿਕ੍ਖੁਸਙ੍ਘੇਹਿ ਪਰਿਵੁਤੋ ਪਞ੍ਚਪਣ੍ਣਾਸਯੋਜਨਮਗ੍ਗਂ ਪਟਿਪਜ੍ਜਿ. ਅਥਾਪਰਂ ਦੇਵਪੁਤ੍ਤਨਗਰਵਾਸਿਨੋ ਅਨੇਕਵਿਧਮਾਲਾਗਨ੍ਧਵਾਸਚੁਣ੍ਣਦ੍ਧਜਪਤਾਕਾਦੀਹਿ ਅਨੇਕੇਹਿ ਤਾਲਾਵਚਰੇਹਿ ਨਚ੍ਚਗੀਤਵਾਦਿਤੇਹਿ ਪੂਜੇਤ੍ਵਾ ਅਗਮਂਸੁ. ਅਥ ਥੇਰੋ ਮਹਨ੍ਤੇਨ ਪੂਜਾਵਿਧਾਨੇਨ ਜਮ੍ਬੁਦੀਪਵਾਸੀਹਿ ਪੂਜਿਯਮਾਨੋ ਅਨੁਕ੍ਕਮੇਨ ਚਨ੍ਦਭਾਗਾਯ ਗਙ੍ਗਾਯ ਸੇਤੁਂ ਪਤ੍ਵਾ ਤਤ੍ਥ ਮਹਨ੍ਤਂ ਪੂਜਾਵਿਧਾਨਂ ਓਲੋਕੇਨ੍ਤੋ ਏਵਂ ਚਿਨ੍ਤੇਸਿ, ਏਵਂ ਉਲ਼ਾਰਂ ਪੂਜਾਵਿਧਾਨਂ ਇਦਾਨਿ ਜਮ੍ਬੁਦੀਪੇ ਨਾਞ੍ਞਸ੍ਸ ਹੋਤਿ, ਮਯ੍ਹਮੇਵੇਤਂ ਕਤਂ. ਅਹਮੇਵੇਤ੍ਤ ਉਤ੍ਤਮੋ ਅਪ੍ਪਟਿਮੋਤਿ ਏਵਂ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨਂ ਉਪ੍ਪਾਦੇਤ੍ਵਾ ਅਟ੍ਠਾਸਿ. ਤਸ੍ਮਿਂ ਖਣੇ ਏਕੋ ਖੀਣਾਸਵਤ੍ਥੇਰੋ ਤਂ ਮਾਨੇਨੁਪਤ੍ਥਦ੍ਧਚੇਤਸਾ ਠਿਤਂ ਦਿਬ੍ਬਚਕ੍ਖੁਨਾ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਥੇਰਸ੍ਸ ਓਵਦਨ੍ਤੋ ਏਵਮਾਹ. ਤਸ੍ਮਾ.

੨੮.

ਮਾ ਮਾਨਸ੍ਸ ਵਸੀ ਹੋਥ, ਮਾਨੋ ਭਨ੍ਤੇ ਵਸਂਗਤਂ [ਮਾਨਂਭਨ੍ਤੇਵਸੀਕਤਂ ਇਤਿਸਬ੍ਬਤ੍ਥ];

ਅਨਤ੍ਥਦੋ ਸਦਾ ਹੋਤਿ, ਪਾਤੇਤ੍ਵਾਨ ਭਵਾ ਵਟੇ.

੨੯.

ਮਾਨੋ ਪਲਾਲਿਤੋ ਸਤ੍ਤੋ, ਤਣ੍ਹਾਪਟਿਘਸਙ੍ਗਤੋ;

ਮਕ੍ਕਟੋਰਗਸੋਣਾਦਿ, ਹੁਤ੍ਵਾ ਜਾਯਤਿ ਜਾਤਿਸੁ.

੩੦.

ਮਾ ਮਾਨਂ ਸਾਮਿ ਪੂਰੇਹਿ, ਅਤ੍ਤਾਨਂ ਪਰਿਸੋਧਯ;

ਅਪਰਿਸੁਦ੍ਧਾ ਸਯੋ ਭਿਕ੍ਖੁ, ਦਾਯਕਂ ਨ ਪਰਿਤੋਸਤਿ.

੩੧.

ਦਦਨ੍ਤਾਨਂ ਸਰਨ੍ਤਾਨਂ, ਪੂਜੇਨ੍ਤਾਨਂ ਸਚੇ ਤੁਵਂ;

ਮਹਪ੍ਫਲਂ ਮਹਾਭੂਤਿਂ, ਕਾਮਤ੍ਥ ਹੋਥ ਨਿਬ੍ਬਣਾਤਿ [ਨਿਮ੍ਮਨਾ ਇਤਿਕਤ੍ਤਚਿ].

ਤਂ ਸੁਤ੍ਵਾ ਥੇਰੋ ਸਂਸਾਰੇ ਨਿਬ੍ਬਿਨ੍ਦੋ ਤਤ੍ਥੇਵ ਠਿਤੋ ਤਿਲਕ੍ਖਣਂ ਪਟ੍ਠਪੇਤ੍ਵਾ ਕਰਜਕਾਯਂ ਸਮ੍ਮਸਨ੍ਤੋ ਸਹਪਟਿ ਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾਵ ਨਿਕ੍ਖਮਿ. ਤਤੋ ਧਮ੍ਮਾਸੋਕਮਹਾਰਾਜਾ ਬਲਵਾਹਨਪਰਿਵੁਤੋ ਮਹਨ੍ਤੇਨ ਪੂਜਾਵਿਧਾਨੇਨ ਪਟਿਮਗ੍ਗਂ ਆਗਮ੍ਮ ਵਨ੍ਦਿਤ੍ਵਾ ¶ ਤਤੋ ਦਿਗੁਣਂ ਪੂਜਾਸਕ੍ਕਾਰਂ ਕੁਰੁਮਾਨੋ ਮਹਾਭਿਕ੍ਖੁਸਙ੍ਘੇਨ ਸਦ੍ਧਿਂ ਥੇਰਂ ਅਤ੍ਤਨੋ ਨਗਰਂ ਨੇਤ੍ਵਾ ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਸਨ੍ਨਮਾਨਸੋ ਪਞ੍ਚਸੀਲੇ ਪਤਿਟ੍ਠਾਯ ਮਹਨ੍ਤਂ ਵਿਹਾਰਂ ਕਾਰੇਤ੍ਵਾ ਥੇਰੇਨ ਸਹਾਗਤਾਨਂ ਸਟ੍ਠਿਸਹਸ੍ਸਾਨਂ ਭਿਕ੍ਖੂਨਂ ਚਤੁਪਚ੍ਚਯੇਹਿ ਉਪਟ੍ਠਾਨ ਮਕਾਸਿ, ਅਥ ਥੇਰੋ ਸਾਟ੍ਠਕਥਂ ਪਿਟਕਤ੍ਤਯਂ ਪਕਾਸੇਨ੍ਤੋ ਤਸ੍ਮਿਂ ਚਿਰਂ ਵਸਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਿ. ਤਤੋ ਰਾਜਾ ਸਪਰਿਸੋ ਤਸ੍ਸ ਸਰੀਰਨਿਕ੍ਖੇਪਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਮਹਨ੍ਤਂ ਚੇਤਿਯਂ ਕਾਰਾਪੇਸੀਤਿ.

੩੨.

ਪੁਰਾਤਨਾਨਂ ਭੁਵਿ ਪੁਞ੍ਞਕਮ੍ਮਿਨਂ,

ਗੁਣਾਨੁਭਾਵੇਨ ਮਹੇਨ੍ਤਿ ਏਵਂ;

ਸਦੇਵਕਾ ਨਂ ਮਨਸੀਕਰੋਨ੍ਤਾ,

ਪੁਞ੍ਞਂ ਕਰੋਥਾ ਯਤਨੇ ਸਦਾ ਦਰਾਤਿ.

ਇਨ੍ਦਗੁਤ੍ਤਤ੍ਥੇਰਸ੍ਸ ਵਤ੍ਥੁਂ ਚਤੁਤ੍ਥਂ.

੩੫. ਸਾਖਮਾਲਪੂਜਿਕਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਾ ਦਸਪਾਰਮਿਯੋ ਪੂਰੇਤ੍ਵਾ ਅਨੁਕ੍ਕਮੇਨ ਤੁਸਿਤਭਵਨੇ ਨਿਬ੍ਬਤ੍ਤੋ ਦੇਵੇਹਿ ਆਰਾਧਿਤੋ ਸਕ੍ਕਰਾਜਕੁਲੇ ਪਟਿਸਨ੍ਧਿਂ ਗਹੇਤ੍ਵਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤੋ ਅਨੁਕ੍ਕਮੇਨ ਪਰਮਾਭਿਸਮ੍ਬੋਧਿਂ ਪਤ੍ਵਾ ਤਤੋ ਪਟ੍ਠਾਯ ਪਞ੍ਚਚਤ੍ਤਾਲੀਸਸਂਵਚ੍ਛਰਾਨਿ ਠਤ੍ਵਾ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨਿ ਦੇਸੇਤ੍ਵਾ ਗਣਨਪਥਮਤੀਤੇ ਸਤ੍ਤੇ ਭਵਕਨ੍ਤਾਰਤੋ ਸਨ੍ਤਾਰੇਤ੍ਵਾ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨ ਮਨ੍ਤਰੇ ਉਤ੍ਤਰਸੀਸਕਂ ਪਞ੍ਞਤ੍ਤੇ ਮਞ੍ਚਕੇ ਵੇਸਾਖਪੁਣ੍ਣਦਿਵਸੇ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਅਨੁਟ੍ਠਾਨਸੇਯ੍ਯਾਯ ਨਿਪਨ੍ਨੋ ਪਚ੍ਛਿਮਯਾਮੇ ਭਿਕ੍ਖੂ ਓਵਦਿਤ੍ਵਾ ਬਲਵਪਚ੍ਚੂ-ਸ ¶ ਸਮਯੇ ਮਹਾਪਥਵਿਂਕਮ੍ਪੇਨ੍ਤੋ ਅਨੁਪਾਦਿਸੇਸਾਯ ਨਿਬ੍ਬਾਣਧਾਤੁਯਾ ਪਰਿਨਿਬ੍ਬਾਯਿ, ਨਿਬ੍ਬੁਤੇ ਪਨ ਭਗਵਤਿ ਲੋਕਨਾਥੇ ਆਨਨ੍ਦਤ੍ਥੇਰੋ ਮਲ੍ਲਰਾਜੂਨਂ ਏਤਂ ਪਵਤ੍ਤਿਂ ਆਰੋਚੇਸਿ. ਤਤੋ ਕੋਸਿਨਾਰਕਾ ਚ ਦੇਵਬ੍ਰਹ੍ਮਾਦਯੋ ਚ ਸਨ੍ਨਿਪਤਿਤ੍ਵਾ ਨਚ੍ਚਗੀਤਵਾਦਿਤੇਹਿ ਮਾਲਾਗਨ੍ਧਾਦੀਹਿ ਚ ਸਕ੍ਕਰੋਨ੍ਤਾ ਗਰੁਕਰੋਨ੍ਤਾ ਮਾਨੇਨ੍ਤਾ ਪੂਜੇਨ੍ਤਾ ਚੇਲਵਿਤਾਨਾਦਯੋ ਕਰੋਨ੍ਤਾ ਭਗਵਤੋ ਸਰੀਰਂ ਨਗਰਮਜ੍ਝੇ ਯਤ੍ਥ ਮਕੁਟਬਨ੍ਧਨਂ ਨਾਮ ਮਲ੍ਲਾਨਂ ਚੇਤਿਯਂ, ਤਤ੍ਥ ਨੇਤ੍ਵਾ ਚਕ੍ਕਵਤ੍ਤਿਸ੍ਸ ਸਰੀਰਂ ਵਿਯ ਅਹਤੇਨ ਵਤ੍ਥੇਨ ਵੇਠੇਤ੍ਵਾ ਤਤੋ ਵਿਹਤੇਨ ਕਪ੍ਪਾਸੇਨ ਵੇਠੇਤ੍ਵਾਤਿ ਏਵਂ ਪਞ੍ਚਦੁਸ੍ਸਯੁਗਸਤੇਹਿ ਵੇਠੇਤ੍ਵਾ ਆਯਸਾਯ ਤੇਲਦੋਣਿਯਾ ਪਕ੍ਖਿਪਿਤ੍ਵਾ ਅਞ੍ਞਿਸ੍ਸਾਯ ਆਯਸਾਯ ਦੋਣਿਯਾ ਪਟਿਕੁਜ੍ਜਿਤ੍ਵਾ ਸਬ੍ਬਗਨ੍ਧਾਨਂ ਚਿਤਕਂ ਕਰਿਤ੍ਵਾ ਭਗਵਤੋ ਸਰੀਰਂ ਚਿਤਕਂ ਆਰੋਪੇਸੁਂ. ਅਥ ਮਹਾਕਸ੍ਸਪਤ੍ਥੇਰੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦਿਤੇ ਦੇਵਤਾਨੁਭਾਵੇਨ ਚਿਤਕੋ ਸਮਨ੍ਤਾ ਏਕਪ੍ਪਹਾਰੇਨੇਵ ਪਜ੍ਜਲਿ. ਭਗਵਤੋ ਪਨ ਸਰੀਰੇ ਦਡ੍ਢੇ ਸੁਮਨਮਕੁਲ਼ਸਦਿਸਾ ਧਾਤੁਯੋ ਅਵਸਿਸ੍ਸਿਂਸੁ. ਤਸ੍ਮਿਂ ਕਿਰ ਸਮਯੇ ਕੋਸਲਰਞ੍ਞੋ ਜਨਪਦੇ ਅਞ੍ਞਤਰਾ ਗਾਮਵਾਸਿਕਾ ਇਤ੍ਥੀ ਭਗਵਤਿ ਪਰਿਨਿਬ੍ਬੁਤੇ ਸਾਧੁਕੀਲ਼੍ਹਂ ਆਗਚ੍ਛਮਾਨਾ ਅਨ੍ਤਰਾਮਗ੍ਗੇ ਅਤ੍ਤਨੋ ਸਰੀਰੇ ਉਪ੍ਪਨ੍ਨਵਾਤਰੋਗੇਨ ਉਪਦ੍ਦੁਤਾ ਸਾਧੁਕੀਲ਼੍ਹਂ ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤੀ ਸਤ੍ਥੁ ਆਲ਼ਾਹਨਂ ਗਨ੍ਤ੍ਵਾ ਭਗਵਤੋ ਧਾਤੁਸਰੀਰੇ ਤੀਣਿ ਸਾਖਪੁਪ੍ਫਾਨਿ ਪੂਜੇਤ੍ਵਾ ਪਸਨ੍ਨਮਾਨਸਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਗਤਾ ਤਾਯ ਏਵ ਰਤ੍ਤਿਯਾ ਮਜ੍ਝਿਮਯਾਮੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਤਿਂਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਸ੍ਸਾ ਪੁਬ੍ਬਕਮ੍ਮਪਕਾਸਨਤ੍ਥਂ ਚਕ੍ਕਮਤ੍ਤਾਨਿ ਸਾਖਪੁਪ੍ਫਾਨਿ ਤਤ੍ਤ ਤਤ੍ਥ ਓਲਮ੍ਬਨ੍ਤਿ. ਤੇਹੇਵ ਸਬ੍ਬਂ ਵਿਮਾਨਂ ਏਕੋਭਾਸੀ [ਏਕੋਭਾਸਿ ਤਤੋ ਇਤਿਸਬ੍ਬਤ੍ਥ] ਅਹੋਸਿ. ਤਤੋ ਸੁਗਨ੍ਧਕਰਣ੍ਡਕਂ ਵਿਯ ਚ ਅਹੋਸਿ, ਸਾ ਪਨ ਅਤ੍ਤਨੋ ਸੋਭਗ੍ਗਪ੍ਪਤ੍ਤਂ ਅਤ੍ਤਭਾਵਞ੍ਚ ਵਿਮਾਨਸਮ੍ਪਦਞ੍ਚ ਪਰਿਵਾਰਸਮ੍ਪਤ੍ਤਿਯੋ ਚ ਦਿਸ੍ਵਾ ਵਿਮ੍ਹਿਤਮਾਨਸਾ ਪੁਬ੍ਬੇ ਕਤੇਨ [ਪੁਬ੍ਬੇਕਿਸ੍ਸਮੇ. ਪੁਬ੍ਬੇਕਤੇਨਮੇ ਇਤਿਚਕਤ੍ਥਚਿ] ¶ ਕੇਨ ਮੇ ਪੁਞ੍ਞਕਮ੍ਮੇਨਾ ਯਂ ਲਦ੍ਧਾਤਿ ਓਲੋਕਨ੍ਤੀ ਭਗਵਤੋ ਧਾਤੁਸਰੀਰਸ੍ਮਿਂ ਪੂਜਿਤਾਨਿ ਤੀਣਿ ਸਾਖਪੁਪ੍ਫਾਨਿ ਦਿਸ੍ਵਾ ਪਸਨ੍ਨਮਾਨਸਾ ਮਹਾਚਕ੍ਕਪ੍ਪਮਾਣਂ ਸਾਖਮਾਲਂ ਹਤ੍ਥੇਨ ਧਾਰੇਨ੍ਤੀ ਧਾਤੁਪੂਜਨਤ੍ਥਾਯ ਅਗਮਾਸਿ. ਤਦਾ ਤਤ੍ਥ ਸਨ੍ਨਿਪਤਿਤਾ ਮਨੁਸ੍ਸਾ ਤਸ੍ਸਾ ਰੂਪਸਮ੍ਪਦਞ੍ਚ ਹਤ੍ਤੇ ਮਹਨ੍ਤਂ ਸਾਖਮਾਲਞ੍ਚ ਦਿਸ੍ਵਾ ਵਿਮ੍ਹਿਤਮਾਨਸਾ ਅਮ੍ਮ ਤ੍ਵਂ ਕਤ੍ਥ ਵਾਸਿਕਾ. ਕਤ੍ਥ ਪਨਿਮਂ ਪੁਪ੍ਫਂ ਪਟਿਲਦ੍ਧਨ੍ਤਿ ਪੁਚ੍ਛਿਂਸੁ, ਤਂ ਸੁਤ੍ਵਾ ਦੇਵਧੀਤਾ ਅਤ੍ਤਨਾ ਭਗਵਤੋ ਧਾਤੁਸਰੀਰਸ੍ਸ ਪੂਜਿਤਸਾਖਮਾਲਤ੍ਤਯਾਨੁਭਾਵੇਨ ਪਟਿਲਦ੍ਧਸਮ੍ਪਤ੍ਤਿਯੋ ਚ ਦਿਬ੍ਬਵਿਮਾਨਞ੍ਚ ਪੁਬ੍ਬੇ ਮਤਕਲੇਵਰਂ ਚਾਤਿ ਸਬ੍ਬਂ ਤੇਸਂ ਦਸ੍ਸੇਤ੍ਵਾ ਧਮ੍ਮਦੇਸਨਾਵਸਾਨੇ ਆਹ.

੧.

ਸਮਾਗਤਾ ਭਵਨ੍ਤਾ ਭੋ, ਪਸ੍ਸਨ੍ਤੁ ਮਮ ਸਮ੍ਪਦਂ;

ਕਤਮਪ੍ਪੇਨ ਕਾਰੇਨ, ਸਮ੍ਮਾਸਮ੍ਬੁਦ੍ਧਧਾਤੁਯਾ.

੨.

ਸਾਖਮਾਲਾਨਿ ਤੀਣੇਵ, ਹੀਯ੍ਯੋਹਂ ਮੁਨਿਧਾਤੁਯਾ;

ਪੂਜਯਿਤ੍ਵਾਨ ਸਨ੍ਤੁਟ੍ਠਾ, ਨਿਵਤ੍ਤਾ ਤਾਯ ਰਤ੍ਤਿਯਾ.

੩.

ਮਰਨ੍ਤੀ ਖਰਵਾਤੇਨ, ਤਮਹਂ ਸੁਚਰਿਤਂ ਸਰਿਂ;

ਤੇਨਾਹਂ ਪੁਞ੍ਞਕਮ੍ਮੇਨ, ਤਾਵਤਿਂਸੂਪਗਾਅਹੁਂ.

੪.

ਤਤ੍ਥ ਮੇ ਆਸਿ ਪਾਸਾਦੋ, ਤਿਂਸਯੋਜਨਮੁਗ੍ਗਤੋ;

ਕੂਟਾਗਾਰਵਰਾਕਿਣ੍ਣੋ, ਸਾਖਮਾਲਾਤਿ [ਸਾਧਮਾਲੋ ਇਤਿਪਿਕਤ੍ਥਚਿ], ਵਿਸ੍ਸੁਤੋ.

੫.

ਯਥਾ ਸਬ੍ਬਸੁਗਨ੍ਧੇਹਿ, ਕਰਣ੍ਡਂ ਪਰਿਭਾਵਿਤਂ;

ਤਥਾ ਦਿਬ੍ਬਸੁਗਨ੍ਧੇਹਿ, ਗਨ੍ਧਿਤਂ ਭਵਨਂ ਮਮ.

੬.

ਚਕ੍ਕਮਤ੍ਤਾ ਸਾਖਪੁਪ੍ਫਾ, ਤਤ੍ਥ ਤਤ੍ਥੂਪਲਮ੍ਬਰੇ [ਤਤਵਤ੍ਥੁਪਲਬ੍ਬਰੇ ਇਤਿਪਿਕਤ੍ਥਚਿ];

ਦਿਬ੍ਬਗਨ੍ਧਾ ਪਵਾਯਨ੍ਤਿ, ਮਧੁਬ੍ਬਭਨਿਸੇਵਿਤਾ.

੭.

ਭਸ੍ਸਨ੍ਤਿ ਏਕਪੁਪ੍ਫਸ੍ਮਾ, ਤੁਮ੍ਬਮਤ੍ਤਾ ਹਿ ਰੇਣਵੋ;

ਤੇਹਿ ਪਿਞ੍ਜਰਿਤਾ ਦੇਵਾ, ਕੀਲ਼ਨ੍ਤਿ ਚ ਲਲਨ੍ਤਿਚ.

੮.

ਪੀਲ਼ਨ੍ਧਿਤ੍ਵਾਨ ¶ ਮਾਲਾਧਯਾ, ਸੁਦਿਬ੍ਬਾ ਭਰਣਾਨਿਚ;

ਸਹਚ੍ਛਰਾ ਦੇਵਪੁਤ੍ਤਾ, ਨਚ੍ਚਗੀਤਾਦਿਬ੍ਯਾਵਟਾ.

੯.

ਪਸ੍ਸਥੇਮਂ ਭੁਜਙ੍ਗਾ ਭੋ, ਸਤ੍ਤਾ ਮੋਹੇਨ ਪਾਰੁਤਾ;

ਹੀਯ੍ਯੋ ਮਤਂ ਪਵਿਦ੍ਧਂ ਮੇ, ਪੂਤਿਭੂਤਂ ਕਲੇਵਰਂ.

੧੦.

ਪੁਲ਼ਵੇਹਿ ਸਮਾਕਿਣ੍ਣਂ, ਮਕ੍ਖਿਕਾਗਣਕੀਲ਼ਿਤਂ;

ਕਾਕਸੋਣਾਦਿਸਤ੍ਤਾਨ, ਮਾਹਾਰਂ ਕੁਣਪਾਲਯਂ.

੧੧.

ਪਤ੍ਥੇਨ੍ਤਿ ਪੁਰਿਸਾ ਪੁਬ੍ਬੇ, ਅਨੇਕੋਪਾਯਨੇਨ ਤਂ;

ਦਟ੍ਠੁਮ੍ਪਿਦਾਨਿ ਨਿਚ੍ਛਨ੍ਤਿ, ਤਣ੍ਹਾਯਞ੍ਞਾਣਤਾ ਅਹੋ.

੧੨.

ਲੋਕਪਜ੍ਜੋਤਕਸ੍ਸਾਹਂ, ਵਿਮਲਸ੍ਸ ਯਸਸ੍ਸਿਨੋ;

ਧਾਤੁਂ ਹੀਯ੍ਯੋ ਮਹਿਂ ਸਮ੍ਮਾ, ਅਜ੍ਜ ਸਗ੍ਗੇ ਪਤਿਟ੍ਠਿਤਾ.

੧੩.

ਹਿਤ੍ਵਾਨੇ ਤਾਦਿਸਂ ਕਾਯਂ, ਲਦ੍ਧਂਦਾਨਿ ਮਮੇਦਿਸਂ;

ਦਿਬ੍ਬਤ੍ਤਭਾਵਂ ਸੋਭਾਹਿ, ਭਾਸਮਾਨ ਮੁਦਿਕ੍ਖਥ.

੧੪.

ਭਾਸਮਾਨਾਯ ਮੇ ਵਾਚਂ, ਸੁਣੋਥੇਤ੍ਥ ਸਮਾਗਤਾ;

ਨਤ੍ਥੇਵਾਕਤਪੁਞ੍ਞਸ੍ਸ, ਅਣੁਮਤ੍ਤਂ ਭਵੇ ਸੁਖਂ.

੧੫.

ਬਿਨ੍ਦੁਮਤ੍ਤਮ੍ਪਿ ਯੋ ਪੁਞ੍ਞ, ਬੀਜਂ ਰੋਪੇਤਿ ਸਾਸਨੇ;

ਨ ਹਾ ਨਤ੍ਥਫਲਂ [ਨਹਪਨਨ੍ਤਫਲਂ ਇਤਿਪਿਕਤ੍ਥਚਿ] ਹੋਤਿ, ਯਾਵ ਨਿਬ੍ਬਾਣਪਤ੍ਤਿਯਾਤਿ.

ਏਵਂ ਸਾ ਦੇਵਤਾ ਅਤ੍ਤਨਾ ਪਟਿਲਦ੍ਧਦਿਬ੍ਬਵਿਭਵਂ ਦਸ੍ਸੇਤ੍ਵਾ ਜਨਕਾਯਂ ਓਵਦਿਤ੍ਵਾ ਦਿਬ੍ਬਸਾਖਪੁਪ੍ਫੇਹਿ ਜਿਨਧਾਤੁਂ ਪੂਜੇਤ੍ਵਾ ਮਨੁਸ੍ਸਾਨਂ ਪਸ੍ਸਨ੍ਤਾਨਂਯੇਵ ਸਦ੍ਧਿਂ ਵਿਮਾਨੇਨ ਦੇਵਲੋਕਮੇਵ ਅਗਮਾਸਿ. ਤਂ ਦਿਸ੍ਵਾ ਮਹਾਜਨੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਦੇਵਲੋਕਂ ਪੂਰੇਸੀਤਿ.

੧੬.

ਏਵਞ੍ਹਿ ¶ ਸਾ ਪੁਪ੍ਫਮਤ੍ਤੇਨ ਧਾਤੁਂ,

ਪੂਜੇਤ੍ਵ ਦੇਵੇਸੁ ਅਲਤ੍ਥ ਭੂਤਿਂ;

ਤੁਮ੍ਹੇਪਿ ਭੋਨ੍ਤੋ ਤਿਦਿਵੇਸੁ ਸਾਤਂ,

ਕਾਮਤ੍ਥ ਚੇ ਕਤ੍ਥ ਪੁਞ੍ਞਾਨਿ ਸਾਧੁਂਤਿ.

ਸਾਖਮਾਲਪੂਜਿਕਾਯ ਵਤ੍ਥੁਂ ਪਞ੍ਚਮਂ.

੩੬. ਮੋਰਿਯਬ੍ਰਹ੍ਮਣਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਮਗਧਰਟ੍ਠੇ ਮਚਲਂ ਨਾਮ ਮਹਾਗਾਮਂ ਅਹੋਸਿ. ਤਤ੍ਥ ਮੋਰਿਯੋਨਾਮ ਬ੍ਰਾਹ੍ਮਣੋ ਪਟਿਵਸਤਿ ਸਦ੍ਧੋ ਪਸਨ੍ਨੋ, ਤਸ੍ਸ ਸੇਨਾਨਾਮੇ ਕਾ ਭਰਿਯਾ ਅਤ੍ਥਿ. ਸਾਪਿ ਸਦ੍ਧਾ ਪਸਨ੍ਨਾ ਰਤਨਤ੍ਤਯੇਸੁ. ਤੇ ਉਭੋਪਿ ਸਮਗ੍ਗਾ ਸਮ੍ਮੋਦਮਾਨਾ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਨਿਚ੍ਚਂ ਦਾਨਂ ਪਵਤ੍ਤੇਨ੍ਤਾ ਚੀਵਰਾਦਿਚਤੁਪਚ੍ਚਯੇਹਿ ਉਪਟ੍ਠਹਨ੍ਤਾ ਸੀਲਂ ਰਕ੍ਖਨ੍ਤਾ ਉਪੋਸਥਕਮ੍ਮਂ ਕਰੋਨ੍ਤਾ ਦਿਵਸਂ ਵੀਤਿਨਾਮੇਨ੍ਤਿ. ਅਥਸ੍ਸ ਗੇਹੇ ਵਿਭਵਂ ਯੇਭੁਯ੍ਯੇਨ ਦਾਨਾਦੀਸੁ ਪਰਿਕ੍ਖਯਮਗਮਾਸਿ. ਤਤੋ ਬ੍ਰਾਹ੍ਮਣੀ ਸਾਮਿ ਨੋ ਗੇਹੇ ਧਨਂ ਪਰਿਕ੍ਖੀਣਂ. ਕਥਂ ਦਾਨਂ ਪਵਤ੍ਤੇਯ੍ਯਾਮਾਤਿ ਬ੍ਰਾਹ੍ਮਣਸ੍ਸ ਆਰੋਚੇਸਿ, ਤਤੋ ਬ੍ਰਾਹ੍ਮਣੋ ਮਾ ਭਦ੍ਦੇ ਚਿਨ੍ਤੇਸਿ. ਯੇਨਕੇਨਚਿ ਉਪਾਯੇਨ ਦਾਨਂ ਪਤਿਟ੍ਠਪੇਸ੍ਸਾਮਾਤਿ ਵਤ੍ਵਾ ਤਸ੍ਮਿਂਯੇਵ ਅਤ੍ਤਨੋ ਸਉਸ੍ਸਾਹਤਂ ਪਕਾਸੋਨ੍ਤੋ ਆਹ.

੧.

ਜਾਨਮਾਨੋ ਹਿ ਲੋਕਸ੍ਮਿਂ, ਦਾਨਸ੍ਸੇਦਂ ਫਲਂ ਇਤਿ;

ਨ ਦਜ੍ਜਾ ਕੋ ਸੁਸੀਲੇਸੁ, ਅਪ੍ਪਮ੍ਪਿ ਦਿਵਸਮ੍ਪਤਿ.

੨.

ਸਗ੍ਗਲੋਕਨਿਦਾਨਾਨਿ, ਦਾਨਾਨਿ ਮਤਿਮਾ ਇਧ;

ਕੋਹਿਨਾਮ ਨਰੋ ਲੋਕੇ, ਨ ਦਦੇਯ੍ਯ ਹਿਤੇ ਰਤੋਤਿ.

ਏਵਞ੍ਚ ਪਨ ਵਤ੍ਵਾ ਭਦ੍ਦੇ ਵਨਂ ਪਵਿਸਿਤ੍ਵਾ ਅਨੇਕਵਿਧਾਨਿ ਪਣ੍ਣਾਨਿ ਚ ਫਲਾਨਿ ਚ ਪਚ੍ਛਿਪੂਰਂ ਆਹਰਿਤ੍ਵਾ ਵਿਕ੍ਕਿਣਿਤ੍ਵਾਪਿ ਦਾਨਂ ਨ ਉਪਚ੍ਛਿਨ੍ਦਿਸ੍ਸਾਮਾਤਿ ¶ ਵਤ੍ਵਾ ਤਤੋ ਪਟ੍ਠਾਯ ਵਨਂ ਗਨ੍ਤ੍ਵਾ ਪਣ੍ਣਾਨਿ ਚ ਫਲਾਨਿ ਚ ਆਹਰਿਤ੍ਵਾ ਵਿਕ੍ਕਿਣਿਤ੍ਵਾ ਦਾਨਂ ਦੇਨ੍ਤੋ ਪਟਿਵਸਤਿ. ਅਥੇਕਦਿਵਸਂ ਬ੍ਰਾਹ੍ਮਣੋ ਵਨਂ ਪਵਿਟ੍ਠੋ ਪਣ੍ਣੇਹਿ ਚ ਫਲੇਹਿ ਚ ਪਚ੍ਛਿਂ ਪੂਰੇਤ੍ਵਾ ਸੀਸੇਨਾ ਦਾਯ ਗੇਹਂ ਆਗਚ੍ਛਨ੍ਤੋ ਪੁਪ੍ਫਫਲਪਲ੍ਲਵੇਹਿ ਵਿਨਤਂ ਨੇਕਤਰੁਗਣਨਿਚਿਤਂ ਸਮ੍ਮਤ੍ਤਾਨੇਕਚਾਤਕਚਤੁਪ੍ਪਦਨਿਸੇਵਿਤਂ ਵਿਪ੍ਪਕਿਣ੍ਣਾਨਨ੍ਤਪੁਪ੍ਫਪਤ੍ਤਕਿਞ੍ਜਕ੍ਖਚ੍ਛਨ੍ਨਵਾਲ਼ੁਕਾਤਲਂ ਸਨ੍ਦਮਾਨਸੀਤਲਾ ਮਲਜਲਪ੍ਪਵਾਹਂ ਅਕਦ੍ਦਮਾਨਿਨ੍ਨਸੁਪਤਿਤ੍ਤੇਹਿ ਸੁਨ੍ਦਰਂ ਕਨ੍ਦਰਂ ਦਿਸ੍ਵਾ ਪਚ੍ਛਿਂ ਤੀਰੇ ਠਪੇਤ੍ਵਾ ਓਤਿਣ੍ਣੋ ਨਹਾਯਤਿ, ਤਸ੍ਮਿਂ ਖਣੇ ਤਤ੍ਥ ਏਕਸ੍ਮਿਂ ਰੁਕ੍ਖੇ ਅਧਿਵਤ੍ਥੋ ਦੇਵਪੁਤ੍ਤੋ ਤਂ ਤਤ੍ਥ ਨਹਾਯਨ੍ਤਂ ਦਿਸ੍ਵਾ ਕਿਨ੍ਨੁ ਖੋ ਏਸ ਕਲ੍ਯਾਣਜ੍ਝਾਸਯੋ ਵਾ ਉਦਾਹੁ ਪਾਪਜ੍ਝਾਸਯੋ ਸਤ੍ਤੋਤਿ ਦਿਬ੍ਬਚਕ੍ਖੁਨਾ ਉਪਧਾਰਨ੍ਤੋ ਅਚ੍ਛਰਿਯਪੁਰਿਸੋ ਏਸੋ ਦੁਗ੍ਗਤੋਪਿ ਹੁਤ੍ਵਾ ਅਤ੍ਤਨੋ ਦਾਨਪ੍ਪਵੇਣਿਯਾ ਉਪਚ੍ਛਿਜ੍ਜਨਭਯੇਨ ਵਨਂ ਗਨ੍ਤ੍ਵਾ ਪਣ੍ਣਾਨਿ ਚ ਫਲਾਨਿ ਚ ਆਹਰਿਤ੍ਵਾ ਦੁਕ੍ਖੇਨ ਕਸਿਰੇਨ ਜੀਵਿਕਂ ਕਪ੍ਪੇਨ੍ਤੋ ਦਾਨਧਮ੍ਮਂ ਨ ਉਪਚ੍ਛਿਨ੍ਦਤੀਤਿ ਚਿਨ੍ਤੇਤ੍ਵਾ ਤਸ੍ਸ ਗੁਣਾਦਯੋ ਪਟਿਚ੍ਚ ਪਚ੍ਛਿਯਂ ਠਪਿਤਪਣ੍ਣਾਨਿ ਚ ਫਲਾਨਿ ਚ ਸਬ੍ਬਾਨਿ ਸੁਵਣ੍ਣਾਨਿ ਹੋਨ੍ਤੂਤਿ ਅਧਿਟ੍ਠਾਸਿ. ਅਥਸ੍ਸਾਨੁਭਾਵੇਨ ਸਬ੍ਬਂ ਸੁਵਣ੍ਣਂ ਅਹੋਭਿ, ਅਥ ਸੋ ਸੁਵਣ੍ਣਪੁਣ੍ਣਪਚ੍ਛਿਯਂ ਉਪਰਿ ਸੁਵਣ੍ਣਰਾਸਿਮਤ੍ਥਕੇ ਸਬ੍ਬਕਾਮਦਦਂ ਮਹਨ੍ਤਂ ਮਣਿਰਤਨਂ ਠਪੇਤ੍ਵਾ ਅਨ੍ਤਰਹਿਤੋ ਪਟਿਕ੍ਕਮ੍ਮ ਅਟ੍ਠਾਸਿ, ਤਤੋ ਬ੍ਰਾਹ੍ਮਣੋ ਨਹਾਤ੍ਵਾ ਉਤ੍ਤਿਣ੍ਣੋ ਪਚ੍ਛਿਯਂ ਸਮ੍ਪੁਣ੍ਣਸੁਵਣ੍ਣਵਣ੍ਣਰਂਸਿਨਾ ਸਮ੍ਭਿਨ੍ਨਵਿਜ੍ਜੋਤਮਾਨਮਣਿਰਤਨਂ ਦਿਸ੍ਵਾ ਕਿਮੇਤਂਤਿ ਆਸਙ੍ਕਿਤਪਰਿਸਙ੍ਕਿਤੋ ਪਚ੍ਛਿਸਮੀਪਂ ਗਨ੍ਤ੍ਵਾ ਹਤ੍ਥਂ ਪਸਾਰੇਤੁਂ ਅਵਿਸਹਨ੍ਤੋ ਅਟ੍ਠਾਸਿ. ਤਂ ਦਿਸ੍ਵਾ ਦੇਵਪੁਤ੍ਤੋ ਦਿਸ੍ਸਮਾਨਸਰੀਰੇਨ ਠਤ੍ਵਾ ਮਾ ਤ੍ਵਂ ਭਾਯਿ ਬ੍ਰਾਹ੍ਮਣ. ਮਯਾ ਏਤਾਨਿ ਨਿਮ੍ਮਿਤਾਨਿ, ਗਹੇਤ੍ਵਾ ਗਚ੍ਛਾਹੀਤਿ ਆਹ, ਅਥ ਬ੍ਰਾਹ੍ਮਣੋ ਦੇਵਪੁਤ੍ਤਸ੍ਸ ਕਥਂ ਸੁਤ੍ਵਾ ਅਯਂ ਦੇਵਪੁਤ੍ਤੋ ਇਮਂ ਮਯਾ ਨਿਮ੍ਮਿਤਂ, ਗਹੇਤ੍ਵਾ ਗਚ੍ਛਾਤਿ ਵਦਤਿ. ਕਿਨ੍ਨੁ ਖੋ ਸੋ ਅਤ੍ਤਨੋ ਆਨੁਭਾਵੇਨ ਦੇਤਿ, ਉਦਾਹੁ ਮਯਾ ਕਤਪੁਞ੍ਞੇਨਾਤਿ ਪੁਚ੍ਛਿਸ੍ਸਾਮਿ ਤਂਤਿ ਪਞ੍ਜਲਿਕੋਵ ਦੇਵਪੁਤ੍ਤਂ ਪੁਚ੍ਛਨ੍ਤੋ ਆਹ.

੩.

ਪੁਚ੍ਛਾਮਿ ¶ ਪਞ੍ਜਲੀ ਦਾਨਿ, ਦੇਵਪੁਤ੍ਤ ਮਹਿਦ੍ਧਿਕ;

ਦਦਾਸਿ ਮੇ ਸੁਵਣ੍ਣਞ੍ਚ, ਕਾਮਦਂ ਮਣਿਮੁਤ੍ਤਮਂ.

੪.

ਨਾਪਿ ਕੋ ਨੋ ਤੁਵਂ ਞਾਤਿ,

ਨ ਮਿਤ੍ਤੋ ਨੋਪਕਾਰਕੋ;

ਕਿਂ ਤ੍ਵਂ ਅਤ੍ਥਵਸਂ ਦਿਸ੍ਵਾ,

ਮਮ ਦਜ੍ਜਾਸਿਮਂ ਧਨਂ.

੫.

ਕੇਨ ਤਪੇਨ ਸੀਲੇਨ, ਕੇਨਾਚਾਰਗੁਣੇਨ ਚ;

ਯੇਨ ਦਜ੍ਜਾਸਿ ਮੇ ਦੇਵ, ਕਿਂ ਮੇ ਸੁਚਰਿਤਂ ਚਿਤਂ.

੬.

ਕਿਨ੍ਨੁ ਪੁਰਾਤਨਂ ਕਮ੍ਮਂ, ਕੇਨ ਕਮ੍ਮੇਨ ਦਸ੍ਸਸਿ;

ਅਥਵਾ ਤਵਿਦ੍ਧਿਯਾ ਦੇਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋਤਿ.

ਤਤੋ ਦੇਵਪੁਤ੍ਤੋ ਨ ਖੋ ਪਨਾਹਂ ਬ੍ਰਾਹ੍ਮਣ ਦੇਵੋਤਿ ਪਰੇਸਂ ਕਿਞ੍ਚਿ ਦਾਤੁਂ ਸਕ੍ਕੋਮਿ, ਤਯਾ ਪੁਬ੍ਬੇ ਕਤਸੁਚਰਿਤਾਨੁਭਾਵੇਨ ਨਿਬ੍ਬਤ੍ਤਤੀਤਿ ਵਤ੍ਵਾ ਦਿਬ੍ਬਚਕ੍ਖੁਨਾ ਤਸ੍ਸ ਪੁਬ੍ਬਕਮ੍ਮਂ ਦਿਸ੍ਵਾ ਤਸ੍ਸ ਪਕਾਸੇਨ੍ਤੋ ਆਹ.

੭.

ਕਸ੍ਸਪੇ ਲੋਕਪਜ੍ਜੋਤੇ, ਸਮ੍ਬੁਦ੍ਧੇ ਪਰਿਨਿਬ੍ਬੁਤੇ;

ਸਬ੍ਬਤ੍ਥ ਪਤ੍ਥਟਂ ਆਸਿ, ਤਸ੍ਸ ਬੁਦ੍ਧਸ੍ਸ ਸਾਸਨਂ.

੮.

ਤਦਾ ਪਚ੍ਚਨ੍ਤਿਮੇ ਗਾਮੇ, ਤ੍ਵਮਾਸਿ ਕੁਲਦਾਰਕੋ;

ਸਦ੍ਧੋ ਆਸਿ ਪਸਨ੍ਨੋ ਚ, ਦਾਯਕੋ ਕੁਸਲੇ ਰਤੋ.

੯.

ਤਦਾ ਪਬ੍ਬਜਿਤੋ ਏਕੋ, ਗਚ੍ਛਨ੍ਤੋ ਅਨ੍ਤਰਾਪਥੇ;

ਚੋਰੇਹਿ ਅਨੁਬਦ੍ਧੋਸਿ, ਅਚ੍ਛਿਨ੍ਨਪਤ੍ਤਚੀਵਰੋ.

੧੦.

ਸਾਖਾਭਙ੍ਗਂ ਨਿਵਾਸੇਤ੍ਵਾ, ਪਾਰੁਪਿਤ੍ਵਾ ਤਥੇਵ ਤਂ;

ਅਨ੍ਤੋਗਾਮਂ ਪਵਿਟ੍ਠੋਸਿ, ਏਸਮਾਨੋ ਪਿਲੋਤਿਕੇ.

੧੧.

ਤਤੋ ਤ੍ਵਂ ਚਰਮਾਨਂ ਤਂ, ਦਿਸ੍ਵਾ ਕਮ੍ਪਿਤਮਾਨਸੋ;

ਵਤ੍ਥਯੁਗਂ ਅਦਾਸਿ ਤ੍ਵਂ, ਸਦ੍ਦਹਂ ਦਾਨਤੋ ਫਲਂ.

੧੨.

ਪਤ੍ਥੋਦਨੇਨ ¶ ਤਂ ਭਿਕ੍ਖੁਂ, ਪਰਿਵਿਸਿਤ੍ਵਾ ਯਥਾਬਲਂ;

ਪੇਸੇਸਿ ਅਭਿਵਾਦੇਤ੍ਵਾ, ਸਦ੍ਧਾਯ ਸੁਦ੍ਧਮਾਨਸੋ.

੧੩.

ਇਮਂ ਤ੍ਵਂ ਅਕਰੀ ਪੁਞ੍ਞਂ, ਤੁਯ੍ਹੇਤਂ ਚਰਿਤਂ ਇਮਂ;

ਤਸ੍ਸ ਤੇ ਪੁਞ੍ਞਕਮ੍ਮਸ੍ਸ, ਅਮੁਖ੍ਯਫਲ ਮੀਦਿਸਂਤਿ.

ਏਵਞ੍ਚ ਪਨ ਵਤ੍ਵਾ ਇਦਂ ਤੇ ਬ੍ਰਾਹ੍ਮਣ ਧਨਂ ਰਾਜਾਦੀਹਿ ਮਯਾ ਅਨਾਹਰਣੀਯਂ ਕਤਂ, ਤ੍ਵਂ ਅਪਰਿਸਙ੍ਕਨ੍ਤੋ ਗਹੇਤ੍ਵਾ ਯਥਾਧਿਪ੍ਪਾਯਂ ਕਰੋਹਿ, ਇਮਂ ਖੋ ਪਨ ਮਣਿਰਤਨਂ ਇਚ੍ਛਿਤਿਚ੍ਛਿਤਂ ਪਸਵਤਿ, ਤੇਨਾਪਿ ਆਨੁਭਾਵੇਨ ਤਵ ਦਾਨਂ ਅਨੁਪਚ੍ਛਿਨ੍ਦਨ੍ਤੋ ਪੁਤ੍ਤਦਾਰਾਦਯੋ ਪੋਸੇਹੀਤਿ ਅਨੁਸਾਸਿ, ਤਂ ਸੁਤ੍ਵਾ ਬ੍ਰਾਹ੍ਮਣੋ ਤੇਨ ਵੁਤ੍ਤਨਿਯਾਮੇਨੇਵ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਦਨ੍ਤੋ ਸੀਲਂ ਰਕ੍ਖਨ੍ਤੋ ਚਿਰਂ ਵਸਿਤ੍ਵਾ ਅਪਰਭਾਗੇ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੀਤਿ.

੧੪.

ਏਵਂ ਨਿਹੀਨਾਪੀ ਧਨੇਨ ਸਨ੍ਤੋ,

ਦਾਨਨ੍ਵਯਂ ਨੇਵ ਪਰਿਚ੍ਚਜਨ੍ਤਿ;

ਤਸ੍ਮਾ ਹਿ ਭੋਨ੍ਤੋ ਸਤਿ ਦੇਯ੍ਯਧਮ੍ਮੇ,

ਮਾ ਕਤ੍ਥ ਦਾਨੇਸੁ ਪਮਾਦਭਾਵਂਤਿ.

ਮੋਰਿਯਬ੍ਰਾਹ੍ਮਣਸ੍ਸ ਵਤ੍ਥੁਂ ਛਟ੍ਠਮਂ.

੩੭. ਪੁਤ੍ਤਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਏਕਸ੍ਮਿਂ ਕਿਰ ਸਮਯੇ ਲਙ੍ਕਾਦੀਪਵਾਸਿਨੋ ਸਟ੍ਠਿਮਤ੍ਤਾ ਭਿਕ੍ਖੂ ਜਯਮਹਾਬੋਧਿਂ ਵਨ੍ਦਿਤੁਕਾਮਾ ਏਕਤੋ ਮਨ੍ਤੇਤ੍ਵਾ ਮਹਾਤਿਤ੍ਥੇਨ ਨਾਵਂ ਆਰੁਯ੍ਹ ਜਮ੍ਬੁਦੀਪਂ ਪਤ੍ਵਾ ਤਾਮਲਿਤ੍ਤਿਪਟ੍ਠੇਨੇ [ਤਮਲਿਤ੍ਤਪਟ੍ਟਨੇ ਇਤਿਕਤ੍ਥਚਿ] ਓਤਰਿਤ੍ਵਾ ਅਨੁਕ੍ਕਮੇਨ ਪਾਟਲਿਪੁਤ੍ਤਨਗਰਂ ਪਾਪੁਣਿਂਸੁ. ਅਥ ਤਸ੍ਮਿਂ ¶ ਨਗਰੇ ਪਿਣ੍ਡਾਯ ਚਰਨ੍ਤੇ ਤੇ ਭਿਕ੍ਖੂ ਏਕੋ ਦੁਗ੍ਗਤਮਨੁਸ੍ਸੋ ਦਿਸ੍ਵਾ ਚਿਰੇਨ [ਚਿਰੇਨਾਹਂਦਿਟ੍ਠਾ ਇਤਿਸਬ੍ਬਤ੍ਥ] ਮਯਾ ਦਿਟ੍ਠਾ ਬੁਦ੍ਧਪੁਤ੍ਤਾਤਿ ਸੋਮਨਸ੍ਸੋ ਭਰਿਯਂ ਪਕ੍ਕੋਸਿਤ੍ਵਾ ਭਦ੍ਦੇ ਇਮੇਸਂ ਅਯ੍ਯਾਨਂ ਦਾਨਂ ਦਾਤੁਕਾਮੋਮ੍ਹਿ, ਪੁਬ੍ਬੇ ਨੋ ਅਕਤਪੁਞ੍ਞਤ੍ਤਾ ਇਦਾਨਿ ਦੁਗ੍ਗਤਾ ਜਾਤਾ, ਇਮੇਸੁ ਪੁਞ੍ਞਕ੍ਖੇਤ੍ਤੇਸੁ ਬੀਜਂ ਨੋ ਚੇ ਰੋਪੇਸ੍ਸਾਮ, ਪੁਨਪਿ ਏਵਮੇਵ ਭਵਿਸ੍ਸਾਮਾਤਿ ਵਤ੍ਵਾ ਕਿਂ ਮੇ ਗੇਹੇ ਦੇਯ੍ਯਧਮ੍ਮਂ ਅਤ੍ਥੀਤਿ ਪੁਚ੍ਛਿ. ਸਾ ਤਂ ਸੁਤ੍ਵਾ ਘਰੇ ਨੋ ਸਾਮਿ ਅਯ੍ਯਾਨਂ ਕਿਞ੍ਚਿ ਦਾਤਬ੍ਬਂ ਨ ਪਸ੍ਸਾਮਿ. ਅਪਿ ਚ ਮਮ ਪੁਤ੍ਤਂ ਮਾਰੇਤ੍ਵਾ ਦਾਨਂ ਦਾਤੁਂ ਸਕ੍ਕਾਤਿ. ਸੋ ਤਸ੍ਸਾ ਕਥਂ ਸੁਤ੍ਵਾ ਭਦ੍ਦੇ ਪੁਤ੍ਤਂ ਮਾਰੇਤ੍ਵਾ ਕਿਂ ਦਾਨਂ ਦੇਮਾਤਿ ਆਹ. ਤਾਯ ਤਂ ਸੁਤ੍ਵਾ ਸਾਮਿ ਕਿਂ ਨ ਜਾਨਾਸਿ, ਪੁਤ੍ਤੇ ਨੋ ਮਤੇ ਸਨ੍ਦਿਟ੍ਠਸਮ੍ਭਤ੍ਤਾ ਞਾਤਿਮਿਤ੍ਤਸੁਹਜ੍ਜਾ ਚ ਅਮ੍ਹਾਕਂ ਸਨ੍ਤਿਕਂ ਆਗਚ੍ਛਾਨ੍ਤਾ ਕਿਞ੍ਚਿ ਪਣ੍ਣਾਕਾਰਂ ਗਹੇਤ੍ਵਾ ਆਗਚ੍ਛਨ੍ਤਿ. ਮਯਂ ਤੇਨ ਪਣ੍ਣਾਕਾਰੇਨ ਦਾਨਂ ਦਸ੍ਸਾਮਾਤਿ ਵੁਤ੍ਤੇ ਉਪਾਸਕੋ ਸਾਧੁ ਤਥਾ ਕਰੋਹੀਤਿ ਮਾਤੁਯਾ ਏਵ ਭਾਰਮਕਾਸਿ, ਸਾ ਪੁਤ੍ਤਂ ਮਾਰੇਤੁਂ ਅਵਿਸਹਨ੍ਤੀ ਆਹ. ਤਥਾ ਹਿ.

੧.

ਕਿਚ੍ਛਾ ਲਦ੍ਧਂ ਪਿਯਂ ਪੁਤ੍ਤਂ, ਅਮ੍ਮਮ੍ਮਾਤਿ ਪਿਯਂ ਵਦਂ;

ਸੁਨੀਲਨੇਤ੍ਤਂ ਸੁਭਮੁਂ, ਕੋ ਪਕ੍ਕਮਿਤੁਮਿਚ੍ਛਤਿ.

੨.

ਮਾਤਰਾ ਮਾਰਿਯਨ੍ਤੋਪਿ, ਮਾਤਰਮੇਵ ਰੋਦਤਿ;

ਮਾਰੇਤੁਂ ਤਂ ਨ ਸਕ੍ਕੋਮਿ, ਹਦਯਂ ਮੇ ਪਵੇਧਤੀਤਿ.

ਏਵਞ੍ਚ ਪਨ ਵਤ੍ਵਾ ਅਹਂ ਸਾਮਿ ਨ ਸਕ੍ਕੋਮਿ ਪੁਤ੍ਤਂ ਮਾਰੇਤੁਂ. ਤ੍ਵਂ ਮਾਰੇਹੀਤਿ ਪੁਤ੍ਤਂ ਪਿਤੁਸਨ੍ਤਿਕਂ ਪੇਸੇਸਿ. ਅਥ ਸੋਪਿ ਤਂ ਮਾਰੇਤੁ ਮਸਕ੍ਕੋਨ੍ਤੋ ਏਵਮਾਹ. ਵੁਤ੍ਤਞ੍ਹਿ.

੩.

ਤਾਯਨ੍ਤਿ ਪਿਤੁਨੋ ਦੁਕ੍ਖਂ, ਪੁਤ੍ਤਾ ਪੁਤ੍ਤਾਤਿ ਕਿਤ੍ਤਿਤਾ;

ਪਿਤੁ ਦੁਕ੍ਖਂ ਸੁਖਂ ਪੁਤ੍ਤਾ, ਦਾਯਾਦਾ ਹੋਨ੍ਤਿ ਸਬ੍ਬਦਾ.

੪.

ਤਸ੍ਮਾ ¶ ਮੇ ਸਦਿਸਂ ਪੁਤ੍ਤਂ, ਪਿਲ੍ਲਕਂ ਮਞ੍ਜੁਭਾਸਨਂ;

ਨ ਸਕ੍ਕੋਮਿ ਅਹਂ ਭਦ੍ਦੇ, ਜੀਵਿਤਾ ਤਂ ਵਿਯੋਜਿਤੁਂ.

੫.

ਅਯਸਞ੍ਚ ਅਕਿਤ੍ਤਿਞ੍ਚ, ਪਪ੍ਪੋਤਿ ਪੁਤ੍ਤਘਾਤਕੋ;

ਪਾਣਾਤਿਪਾਤਕਮ੍ਮਮ੍ਪਿ, ਕਾਮਂ ਸੋ ਫੁਸਤੇ ਨਰੋਤਿ.

ਏਵਞ੍ਚ ਪਨ ਵਤ੍ਵਾ ਸੋ ਤ੍ਵਮੇਵ ਤਵ ਪੁਤ੍ਤਂ ਮਾਰੇਹੀਤਿ ਪੇਸੇਸਿ, ਏਵਂ ਤੇਨ ਵੁਤ੍ਤੇ ਪੁਤ੍ਥਸ੍ਸ ਮਾਰਪਾਣੂਪਾਯਂ ਪਰਿਯੇਸਨ੍ਤਾ ਏਵਮਾਹਂਸੁ, ਅਮ੍ਹੇ ਪਨਿਮਂ ਮਾਰੇਤੁਂ ਨ ਸਕ੍ਕੋਮਿ, ਅਮ੍ਹਾਕਂ ਪਚ੍ਛਾਗੇਹੇ ਮਹਨ੍ਤੋ ਵਮ੍ਮਿਕੋ ਅਤ੍ਥਿ, ਤਸ੍ਮਿਂ ਏਕੋ ਨਾਗਰਾਜਾ ਪਟਿਵਸਤਿ. ਕੁਮਾਰਂ ਤਤ੍ਥ ਪੇਸੇਸ੍ਸਾਮ, ਸੋ ਤਂ ਡਸਿਤ੍ਵਾ ਮਾਰੇਸ੍ਸਤੀਤਿ. ਇਚ੍ਚੇਤੇ ਏਸੋ ਖੋ ਉਪਾਯੋ ਏਵਾਤਿ ਚਿਨ੍ਤੇਤ੍ਵਾ ਕੁਮਾਰਂ ਪਕ੍ਕੋਸਿਤ੍ਵਾ ਅਞ੍ਚਨਾ ਵਲਿਵਲਯਾਦੀਹਿ ਮਣ੍ਡੇਤ੍ਵਾ ਤਸ੍ਸ ਹਤ੍ਥੇ ਗੇਣ੍ਡੁਂ [ਤੇਣ੍ਡੁਂ ਇਤਿਸਬ੍ਬਤ੍ਥ] ਠਪੇਤ੍ਵਾ ਤਾਤ ਪਚ੍ਛਾਗੇਹੇ ਵਮ੍ਮਿਕਸਮੀਪਂ ਗਨ੍ਤ੍ਵਾ ਕੀਲ਼ਾਤਿ ਪੇਸੇਸੁਂ. ਤਤੋ ਦਾਰਕੋ ਗਨ੍ਤ੍ਵਾ ਗੇਣ੍ਡੁਕੇਨ ਕੀਲ਼ਨ੍ਤੋ ਵਮ੍ਮਿਕਬਿਲੇ ਗੇਣ੍ਡੁਕਂ ਪਾਤੇਸਿ. ਅਥ ਸੋ ਗੇਣ੍ਡੁਕਂ ਗਣ੍ਹਿਸ੍ਸਾਮੀਤਿ ਵਮ੍ਮਿਕਸੁਸਿਰੇ ਹਤ੍ਥਂ ਪਵੇਸੇਸਿ. ਤਤੋ ਸਪ੍ਪੋ ਕੁਜ੍ਝਿਤ੍ਵਾ ਸੁਸੂਤਿਸਦ੍ਦਂ ਕਰੋਨ੍ਤੋ ਮਹਨ੍ਤਂ ਫਣਂ ਕਤ੍ਵਾ ਬਿਲਤੋ ਸੀਸਂ ਉਕ੍ਖਿਪਿਤ੍ਵਾ ਓਲੋਕੇਨ੍ਤੋ ਅਟ੍ਠਾਸਿ ਕੁਮਾਰਸ੍ਸ ਹਤ੍ਥਤੋ ਪਰਿਗਲਿਤਪਾਸਂਵਿਯ. ਅਥਸ੍ਸ ਕੁਮਾਰੋ ਕਿਞ੍ਚਿ ਅਜਾਨਨ੍ਤੋ ਸਪ੍ਪਸ੍ਸ ਗੀਵਂ ਦਲ਼੍ਹਂ ਗਣ੍ਹਿ. ਅਥਸ੍ਸ ਮਾਤਾਪਿਤੁਨ੍ਨਂ ਸਦ੍ਧਾਬਲੇਨ ਨਾਗਰਾਜਾ ਕੁਮਾਰਸ੍ਸ ਕਰਤਲੇ ਅਟ੍ਠਂਸਂ ਇਚ੍ਛਾਦਾਯਕਂ ਕਣ੍ਠਮਣਿਰਤਨਂ ਪਾਤੇਸਿ. ਕੁਮਾਰਸ੍ਸ ਮਾਤਾਪਿਤਰੋ ਦ੍ਵਾਰਂ ਨਿਸ੍ਸਾਯ ਠਿਤਾ ਤਸ੍ਸ ਕਿਰਿਯਂ ਓਲੋਕੇਨ੍ਤੋ ਤਂ ਮਣਿਰਤਨਂ ਦਿਸ੍ਵਾ ਸੀਘਂ ਗਨ੍ਤ੍ਵਾ ਪੁਤ੍ਤਂ ਉਕ੍ਖਿਪਿਤ੍ਵਾ ਹਤ੍ਥਤੋ ਮਣਿਰਤਨਂ ਗਣ੍ਹਿਂਸੁ. ਤਤੋ ਤੇ ਤਂ ਮਣਿਰਤਨਂ ਪਰਿਸੁਦ੍ਧਾਸਨੇ ਠਪੇਤ੍ਵਾ ਉਪਚਾਰਂ ਕਤ੍ਵਾ ਅਮ੍ਹਾਕਂ ਇਦਞ੍ਚਿਦਞ੍ਚ ਦੇਥਾਤਿ ਅਬ੍ਭੁਕ੍ਕਿਰਿਂਸੁ. ਅਥ ਤੇ ਮਣਿਰਤਨਾਨੁਭਾਵੇਨ ਗੇਹਦ੍ਵਾਰੇ ਮਹਨ੍ਤਂ ਮਣ੍ਡਪਂ ਕਾਰੇਤ੍ਵਾ ਵਿਤਾਨਾਦਿਨਾ ਮਣ੍ਡਪਂ ¶ ਅਲਙ੍ਕਰਿਤ੍ਵਾ ਭਿਕ੍ਖੂਨਂ ਆਸਨਾਨਿ ਪਞ੍ਞਾਪੇਤ੍ਵਾ ਤੇ ਸਟ੍ਠਿਮਤ੍ਤੇ ਭਿਕ੍ਖੂ ਨਿਸੀਦਾਪੇਤ੍ਵਾ ਮਹਾਦਾਨਂ ਅਦਂਸੁ. ਤਤੋ ਨਗਰਵਾਸਿਨੋ ਮਣਿਰਤਨਾਨੁਭਾਵਂ ਸੁਤ੍ਵਾ ਸਨ੍ਨਿਪਤਿਂਸੁ. ਅਥ ਤੇ ਤੇਸਂ ਮਜ੍ਝੇ ਅਤ੍ਤਨੋ ਸਦ੍ਧਾਬਲੇਨ ਮਣਿਰਤਨਸ੍ਸ ਲਾਭਂ ਪਕਾਸੇਤ੍ਵਾ ਇਮਞ੍ਹਿ ਦਾਨਤ੍ਥਾਯੇਵ ਪਰਿਚ੍ਚਜ੍ਜਾਮਾਤਿ ਏਕਸ੍ਮਿਂ ਠਾਨੇ ਪਤਿਟ੍ਠਾਪੇਤ੍ਵਾ ਤੇਨਾਨੁਭਾਵੇਨ ਯਾਵਜੀਵਂ ਦਾਨਂ ਦਦਨ੍ਤਾ ਸੀਲਂ ਰਕ੍ਖਨ੍ਤਾ ਆਯੁਪਰਿਯੋਸਾਨੇ ਦੇਵਲੋਕੇ ਨਿਬ੍ਬਤ੍ਤਿਂਸੂਤਿ.

੬.

ਛੇਤ੍ਵਾਨ ਪੇਮਂ ਅਪਿ ਅਤ੍ਰਜੇਸੁ,

ਦਦਨ੍ਤਿ ਦਾਨਂ ਇਧ ਮਾਨੁਸੇਵਂ;

ਨ ਦਦਾਤਿ ਕੋ ਨਾਮ ਨਰੋ ਸਮਿਦ੍ਧੋ,

ਦਾਨਞ੍ਹਿ ਦਾਨਸ੍ਸ ਫਲਂ ਸਰਨ੍ਤੋਤਿ.

ਪੁਤ੍ਤਵਤ੍ਥੁਂ ਸਤ੍ਤਮਂ.

੩੮. ਤੇਭਾਤਿਕਮਧੁਵਾਣਿਜਕਾਨਂ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਤੀਤੇ ਕਿਰ ਬਾਰਾਣਸਿਯਂ ਤੇ ਭਾਤਿਕਾ ਏਕਤੋ ਹੁਤ੍ਵਾ ਮਧੁਂ ਵਿਕ੍ਕਿਣਨ੍ਤਾ ਪੁਤ੍ਤਦਾਰੇ ਪੋਸੇਨ੍ਤਿ. ਤਤੋ ਤੇਸੁ ਏਕੋ ਪਚ੍ਚਨ੍ਤਂ ਗਨ੍ਤ੍ਵਾ ਮਲਯਵਾਸੀਨਂ [ਮਲਵਾਸੀਨਂ ਇਤਿਪਿਕਤ੍ਥਚਿ] ਹਤ੍ਥਤੋ ਮਧੁਂ ਕਿਣਿਤ੍ਵਾ [ਵਕ੍ਕਿਣਿਤ੍ਵਾ ਇਤਿਸਬ੍ਬਤ੍ਥ] ਗਣ੍ਹਾਤਿ, ਏਕੋ ਗਹਿਤਗਹਿਤਮਧੁਂ ਨਗਰਂ ਆਹਰਤਿ. ਏਕੋ ਤੇਨ ਆਹਟਾਹਟਮਧੂਨਿ ਬਾਰਾਣਸਿਯਂ ਨਿਸੀਦਿਤ੍ਵਾ ਵਿਕ੍ਕਿਣਾਤਿ. ਤਸ੍ਮਿਂ ਸਮਯੇ ਗਨ੍ਧਮਾਦਨਪਬ੍ਬਤੇ ਏਕੋ ਪਚ੍ਚੇਕਬੁਦ੍ਧੋ ਵਣਰੋਗੇਨਾ ਤੁਰੋ ਅਹੋਸਿ. ਅਥਞ੍ਞਤਰੋ ਪਚ੍ਚੇਕਬੁਦ੍ਧੋ ਤਸ੍ਸ ਮਧੁਨਾ ਫਾਸੁ ਭਵਿਸ੍ਸਤੀਤਿ ਞਤ੍ਵਾ ਗਨ੍ਧਮਾਦਨਪਬ੍ਬਤੇਯੇਵ ਠਿਤੋ ¶ ਚੀਵਰਂ ਪਾਰੁਪਿਤ੍ਵਾ ਆਕਾਸੇਨਾ ਗਨ੍ਤ੍ਵਾ ਨਗਰਦ੍ਵਾਰੇ ਓਤਰਿਤ੍ਵਾ ਕਤ੍ਥ ਮਧੁਂ ਲਭਾਮੀਤਿ [ਲਬ੍ਭਤਿ ਇਤਿਸਬ੍ਬਤ੍ਥ] ਓਲੋਕੇਨ੍ਤੋ ਅਟ੍ਠਾਸੀ, ਤਦਾ ਤਸ੍ਮਿਂਪਰਕੁਲੇ ਭਤਿਂ ਕਤ੍ਵਾ ਜੀਵਮਾਨਾ ਏਕਾ ਚੇਟਿਕਾ ਘਟਮਾਦਾਯ ਉਦਕਤ੍ਥਂ ਤਿਤ੍ਥਂ ਗਚ੍ਛਨ੍ਤੀ ਮਗ੍ਗਾ ਓਕ੍ਕਮ੍ਮ ਘਟਂ ਠਪੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ, ਤਦਾ ਪਚ੍ਚੇਕਬੁਦ੍ਧੋ ਭਗਿਨੀ ਏਤ੍ਥ ਭਿਕ੍ਖਾਯ ਚਰਨ੍ਤਾਨਂ ਕਤਰਸ੍ਮਿਂ ਠਾਨੇ ਮਧੁ ਲਬ੍ਭਤੀਤਿ ਪੁਚ੍ਛਿ. ਸਾ ਤਸ੍ਸ ਕਥਂ ਸੁਤ੍ਵਾ ਮਧੁਆਪਣਸ੍ਸ ਪਞ੍ਞਾਯਨਟ੍ਠਾਨੇ ਠਤ੍ਵਾ ਹਤ੍ਥਂ ਪਸਾਰੇਤ੍ਵਾ ਏਸ ਭਨ੍ਤੇ ਮਧੁਆਪਣੋਤਿ ਦਸ੍ਸੇਤ੍ਵਾ ਯਜ੍ਜਾਯਂ ਪਚ੍ਚੇਕਬੁਦ੍ਧੋ ਆਪਣਤੋ ਮਧੁਂ ਨ ਲਭਤਿ. ਮਮ ਨਿਵਤ੍ਥਵਤ੍ਥਕਂ ਦਤ੍ਵਾਪਿ ਮਧੁਂ ਦਸ੍ਸਾਮੀਤਿ ਚਿਨ੍ਤੇਤ੍ਵਾ ਓਲੋਕੇਨ੍ਤੀ ਤਤ੍ਥੇਵ ਅਟ੍ਠਾਸਿ, ਅਥ ਪਚ੍ਚੇਕਬੁਦ੍ਧੋ ਅਨੁਪੁਬ੍ਬੇਨ ਵਿਚਰਨ੍ਤੋ [ਚਰਨ੍ਤੋ ਇਤਿਪਿਕਤ੍ਥਚਿ] ਮਧੁਆਪਣਂ ਸਮ੍ਪਾਪੁਣਿ, ਤਤੋ ਕੁਟਿਮ੍ਬਿਕੋ [ਕੁਟਿਮ੍ਬ ਕੋ ਇਤਿਪਿਕਤ੍ਥਚਿ] ਤਂ ਦਿਸ੍ਵਾ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਆਧਾਰਕੇ ਠਪੇਤ੍ਵਾ ਮਧੁਘਟਂ ਆਦਾਯ ਪਤ੍ਤਸ੍ਸ ਉਪਨਾਮੇਨ੍ਤੋ ਸਹਸਾ ਨਿਕ੍ਕੁਜ੍ਜਿ. ਤਤੋ ਮਧੁ ਪਤ੍ਤਂ ਪੂਰੇਤ੍ਵਾ ਉਤ੍ਤਰਨ੍ਤੋ ਪੁਨ ਭੂਮਿਯਂ ਪਗ੍ਘਰਿ. ਤਂ ਦਿਸ੍ਵਾ ਸੋਮਨਸ੍ਸੋ ਵਾਣਿਜੋ ਏਵਂ ਪਤ੍ਥਨਮਕਾਸਿ.

ਵੁਤ੍ਤਞ੍ਹਿ ਮਹਾਵਂਸੇ.

੧.

ਤਤ੍ਥ ਪਤ੍ਤਸ੍ਸ ਬੁਦ੍ਧਸ੍ਸ, ਵਾਣਿਜੋ ਸੋ ਪਸਾਦਵਾ;

ਵਿਸ੍ਸਨ੍ਦਯਨ੍ਤੋ ਮੁਖਤੋ, ਪਤ੍ਤਪੂਰਂ ਮਧੁਂ ਅਦਾ.

੨.

ਪੁਣ੍ਣਞ੍ਚ ਉਪ੍ਪਤੀਤਞ੍ਚ, ਪਤਿਤਞ੍ਚ ਮਹੀਤਲੇ;

ਦਿਸ੍ਵਾ ਮਧੁਂ ਪਸਨ੍ਨੋ ਸੋ, ਏਵਂ ਪਣਿਦਹੀ ਤਦਾ.

੩.

ਜਮ੍ਬੁਦੀਪੇ ਏਕਰਜ੍ਜਂ, ਦਾਨੇਨਾਨੇਨ ਹੋਤੁ ਮੇ;

ਆਕਾਸੇ ਯੋਜਨੇ ਆਣਾ, ਭੂਮਿਯਂ ਯੋਜਨੇਪਿਤਿ.

ਏਵਞ੍ਚ ਪਨ ਵਤ੍ਵਾ ਪਤ੍ਤਂ ਅਦਾਸਿ, ਪਚ੍ਚੇਕਬੁਦ੍ਧੋ ਪਤ੍ਤਂ ਪਟਿਗ੍ਗਹੇਤ੍ਵਾ ਤਤ੍ਥੇਵ ਠਿਤੋ.

੪.

ਇਚ੍ਛਿਤਂ ¶ ਪਤ੍ਥਿਤਂ ਤੁਯ੍ਹਂ, ਖਿਪ੍ਪਮੇਵ ਸਮਿਜ੍ਝਤੁ;

ਪੂਰੇਨ੍ਤੁ ਚਿਤ੍ਥਸਂਕਪ੍ਪਾ, ਚਨ੍ਦੋ ਪਣ੍ਣਰਸੋ ਯਥਾ.

੫.

ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਸਬ੍ਬਮੇਵ ਸਮਿਜ੍ਝਤੁ;

ਪੂਰੇਨ੍ਤੁ ਚਿਤ੍ਤਸਂਕਪ੍ਪਾ, ਮਣਿਜੋਤਿਰਸੋ ਯਥਾਤਿ.

ਵਤ੍ਵਾ ਮਙ੍ਗਲਂ ਵਡ੍ਢੇਤ੍ਵਾ ਅਗਮਾਸਿ. ਅਥਨ੍ਤਰਾਮਗ੍ਗੇ ਠਿਤਾ ਘਟਚੇਟਿਕਾ ਪਚ੍ਚੇਕਬੁਦ੍ਧਾਭਿਮੁਖਂ ਗਨ੍ਤ੍ਵਾ ਮਧੁਂ ਲਭਿਤ੍ਥ ਭਨ੍ਤੇਤਿ ਪੁਚ੍ਛਿ. ਤੇਨ ਲਦ੍ਧਂ ਭਗਿਨੀਤਿ ਵੁਤ੍ਤੇ ਕਿਂ ਵਤ੍ਵਾ ਸੋ ਅਦਾਸੀਤਿ ਪੁਚ੍ਛਿ. ਪਚ੍ਚੇਕਬੁਦ੍ਧੋ ਸਬ੍ਬਂ ਕਥੇਸਿ. ਸਾ ਤਂ ਸੁਤ੍ਵਾ ਥੋਕਂ ਭਨ੍ਤੇ ਇਧੇਵ ਹੋਥ ਦਾਸਿਯਾ ਅਨੁਗ੍ਗਹਤ੍ਥਾਯਾਤਿ ਸੀਘਂ ਗੇਹਂ ਗਨ੍ਤ੍ਵਾ ਨਿਵਤ੍ਥਪਿਲ਼ੋਤਿਕਾ ਅਤ੍ਤਨੋ ਸਾਟਕਂ ਧੋਵਿਤ੍ਵਾ ਆਹਰਿਤ੍ਵਾ ਚੁਮ੍ਬਟਕਂ ਕਤ੍ਵਾ ਪਚ੍ਚੇਕਬੁਦ੍ਧਸ੍ਸ ਅਦਾਸਿ, ਯਦਾ ਸੋ ਭਨ੍ਤੇ ਮਧੁਦਾਯਕੋ ਸਕਲਜਮ੍ਬੁਦੀਪੇ ਏਕਰਜ੍ਜਂ ਕਾਰੇਤਿ. ਤਦਾਹਂ ਤਸ੍ਸ ਅਗ੍ਗਮਹੇਸੀ ਭਵੇਯ੍ਯਂਤਿ ਵਤ੍ਵਾ ਪਤ੍ਥਨਂ ਕਰੋਨ੍ਤੀਏਵਮਾਹ.

੬.

ਯਦਾ ਤੇ ਮਧੁਦੋ ਭਨ੍ਤੇ, ਭੂਭੁਜੋ ਹੋਤਿ ਭੂਤਲੇ;

ਤਸ੍ਸ ਹੇਸ੍ਸਂ ਤਦਾ ਭਨ੍ਤੇ, ਪਿਯਾ ਅਗ੍ਗਮਹੇਸਿਕਾ.

੭.

ਸੁਰੂਪਾਚ ਸੁਵਾਣੀਚ, ਸੁਯਸਾ ਸੁਬ੍ਬਤਾ ਸੁਭਾ;

ਅਸ੍ਸਂ ਤਸ੍ਸ ਪਿਯਾਚਾਥ, ਮਨਾਪਾ ਇਚ੍ਛਦਾ [ਇਚ੍ਛਿਦਾ ਇਤਿਪਿਕਤ੍ਥਚਿ] ਸਦਾਤਿ.

ਤਸ੍ਸਾਪਿ ਤਦਾ ਪਚ੍ਚੇਕਬੁਦ੍ਧੋ ਤਥੇਵ ਹੋਤੂਤਿ ਮਙ੍ਗਲਂ ਵਤ੍ਵਾ ਆਕਾਸੇਨ ਗਨ੍ਧਮਾਦਨਮੇਵ ਅਗਮਾਸਿ, ਅਥਾਪਰਭਾਗੇ ਤੇ ਤਯੋਪਿ ਏਕਤੋ ਹੁਤ੍ਵਾ ਮਧੁਲੋਕਨਂ ਕਰੋਨ੍ਤਾ ਤਂ ਮਧੁਘਟਂ ਕੁਹਿਂਤਿ ਪੁਚ੍ਛਿਂਸੁ, ਸੋ ਤੇਨਤ੍ਤਨਾ ਕਤਕਮ੍ਮਂ ਵਤ੍ਵਾ ਸਚੇ ਤੁਮ੍ਹੇ ਤਸ੍ਮਿਂ ਪਤ੍ਤਿਂ ਅਨੁਮੋਦੇਯ੍ਯਾਥ, ਤਂ ਸਾਧੁ. ਨੋ ਚੇ. ਮਧੁਅਗ੍ਘਨਕਂ ਮਮ ਹਤ੍ਥਤੋ ਗਣ੍ਹਥਾਤਿ ਵਤ੍ਵਾ ਤੇਹਿ ਤਤੋ ਨ ਨੋ ਅਤ੍ਥੋ [ਨਨੋਹਤ੍ਥੋ ਇਤਿਸਬ੍ਬਤ੍ਥ] ਮਧੁਨਾ, ਕੀਦਿਸਸ੍ਸੇਤਂ ਅਦਾਸੀਤਿ ਵੁਤ੍ਤੇ ਤਂ ਸੁਤ੍ਵਾ ਇਤਰੋ ਪਚ੍ਚੇਕਬੁਦ੍ਧਾ ਨਾਮੇ ਤੇ ਗਨ੍ਧਮਾਦਨੇ ਵਸਨ੍ਤਿ ਕਾਸਾਵਂ ¶ ਪਾਰੁਪਿਤ੍ਵਾ ਕੁਲੇ ਕੁਲੇ ਭਿਕ੍ਖਂ ਚਰਨ੍ਤਿ, ਸਨ੍ਤੋ ਏਤੇ ਸੀਲਵਨ੍ਤਾਤਿ ਕਥੇਸਿ, ਅਥ ਤੇਸੁ ਜੇਟ੍ਠੋ ਬ੍ਰਾਹ੍ਮਣਚਣ੍ਡਾਲਕਾਪਿ ਕਾਸਾਵਂ ਪਰਿਦਹਿਤ੍ਵਾ ਚਰਨ੍ਤਿ. ਨੂਨਾਯਂ ਚਣ੍ਡਾਲਕੋਤਿ ਮਞ੍ਞਾਮੀਤਿ ਆਹ, ਮਜ੍ਝਿਮੋ ਕੁਜ੍ਝਿਤ੍ਵਾ ਤਵ ਪਚ੍ਚੇਕਬੁਦ੍ਧਂ ਪਰਸਮੁਦ੍ਦੇ ਖਿਪਾਹੀਤਿ ਅਵੋਚ, ਅਥ ਤੇਸਂ ਕਥਂ ਸੁਤ੍ਵਾ ਮਧੁਦਾਯਕੋ ਮਾ ਭੋ ਤੁਮ੍ਹੇ ਅਰਿਯਾਨਂ ਮਹੇਸਕ੍ਖਾਨਂ ਮਹਾਨੁਭਾਵਾਨਂ ਪਚ੍ਚੇਕਬੁਦ੍ਧਾਨਂ ਫਰੁਸਂ ਕਥੇਥ. ਨਿਰਯਦੁਕ੍ਖਾ ਨ ਭਾਯਥਾਤਿਆਦਿਨਾ ਅਨੇਕਾ ਕਾਰੇਨ ਨਿਵਾਰੇਤ੍ਵਾ ਤੇਸਂ ਗੁਣਂ ਪਕਾਸੇਸਿ, ਤਂ ਸੁਤ੍ਵਾ ਤੇ ਉਭੋਪਿ ਸਾਧੂਤਿ ਪਸਨ੍ਨਾਚਿਤ੍ਤਾ ਅਨੁਮੋਦਿਂਸੁ, ਅਪਰਭਾਗੇ ਤੇ ਕਾਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤਾ ਤਤ੍ਥ ਤਤ੍ਥ ਮਹਾਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਅਮ੍ਹਾਕਂ ਸਤ੍ਥੁ ਪਰਿਨਿਬ੍ਬਾਣਤੋ ਦ੍ਵਿਨ੍ਨਂ ਵਸ੍ਸਸਤਾਨਂ ਅਚ੍ਚਯੇਨ ਅਤ੍ਤਨੋ ਅਤ੍ਤਨੋ ਸਮ੍ਪਤ੍ਤਟ੍ਠਾਨੇ ਨਿਬ੍ਬਤ੍ਤਿਂਸੁ. ਤੇਨ ਵੁਤ੍ਤਂ.

੮.

ਅਸੋਕੋ ਮਧੁਦੋ ਸਨ੍ਧਿ, ਮਿਤ੍ਤਾਦੇਵੀ ਤੁ ਚੇਟਿਕਾ;

ਚਣ੍ਡਾਲਵਾਦੀ ਨਿਗ੍ਰੋਧੋ, ਤਿਸ੍ਸੋ ਸੋ ਪਾਰਵਾਦਿਕੋਤਿ.

ਤੇਸੁ ਚਣ੍ਡਾਲਵਾਦੀ ਜੇਟ੍ਠਵਾਣਿਜੋ ਬਿਨ੍ਦੁਸਾਰਰਞ੍ਞੋ ਜੇਟ੍ਠਪੁਤ੍ਤਸ੍ਸ ਸੁਮਨਰਾਜਕੁਮਾਰਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾਯਮਾਨੁਪੁਬ੍ਬੀਕਥਾ. ਬਿਨ੍ਦੁਸਾਰਰਞ੍ਞੋ ਕਿਰ ਦੁਬ੍ਬਲਕਾਲੇਯੇਵ ਅਸੋਕਕੁਮਾਰੋ ਅਤ੍ਤਨਾ ਲਦ੍ਧਂ ਉਜ੍ਜੇਨਿਯਾ ਰਜ੍ਜਂ ਪਹਾਯ ਆਗਨ੍ਤ੍ਵਾ ਸਬ੍ਬਨਗਰਂ ਅਤ੍ਤਨੋ ਹਤ੍ਥਗਤਂ ਕਤ੍ਵਾ ਸੁਮਨਰਾਜਕੁਮਾਰਂ ਅਗ੍ਗਹੇਸਿ. ਤਂ ਦਿਵਸਮੇਵ ਸੁਮਨਸ੍ਸ ਰਾਜਕੁਮਾਰਸ੍ਸ ਸੁਮਨਾ ਨਾਮ ਦੇਵੀ ਪਰਿਪੁਣ੍ਣਗਬ੍ਭਾ ਅਹੋਸਿ. ਸਾ ਅਞ੍ਞਾਤਕਵੇਸੇਨ ਨਿਕ੍ਖਮਿਤ੍ਵਾ ਅਵਿਦੂਰੇ ਅਞ੍ਞਤਰਂ ਚਣ੍ਡਾਲਗਾਮਂ ਸਨ੍ਧਾਯ ਗਚ੍ਛਨ੍ਤੀ ਜੇਟ੍ਠਕਚਣ੍ਡਾਲਸ੍ਸ ਗੇਹਤੋ ਅਵਿਦੂਰੇ ਨਿਗ੍ਰੋਧੋ ਅਤ੍ਥਿ, ਤਸ੍ਮਿਂ ਰੁਕ੍ਖੇ ਅਧਿਵਤ੍ਥਾਯ ਦੇਵਤਾਯ ਇਤੋ ਏਹਿ ਸੁਮਨੇਤਿ ਵਦਨ੍ਤਿਯਾ ਸਦ੍ਦਂ ਸੁਤ੍ਵਾ ਤਸ੍ਸਾ ਸਮੀਪਂ ਗਤਾ, ਦੇਵਤਾ ਅਤ੍ਤਨੋ ਆਨੁਭਾਵੇਨ ਏਕਂ ਸਾਲਂ ਨਿਮ੍ਮਿਣਿਤ੍ਵਾ ਏਤ੍ਥ ਵਸਾਹੀਤਿ ਪਾਦਾਸਿ. ਸਾ ¶ ਤਂ ਸਾਲਂ ਪਾਵਿਸਿ, ਗਤਦਿਵਸੇਯੇਵ ਸਾ ਪੁਤ੍ਤਂ ਵਿਜਾਯਿ. ਸਾ ਤਸ੍ਸ ਨਿਗ੍ਰੋਧਦੇਵਤਾਯ ਪਰਿਗ੍ਗਹਿਤਤ੍ਤਾ ਨਿਗ੍ਰੋਧੋਤ੍ਵੇਵ ਨਾਮਂ ਅਕਾਸਿ. ਜੇਟ੍ਠਕਚਣ੍ਡਾਲੋ ਦਿਟ੍ਠਦਿਵਸਤੋਪ੍ਪਭੁਤਿ ਤਂ ਅਤ੍ਤਨੋ ਸਾਮਿਧੀਤਰਂ ਵਿਯ ਮਞ੍ਞਮਾਨੋ ਨਿਬਦ੍ਧਵਤ੍ਤਂ ਪਟ੍ਠਪੇਸਿ. ਰਾਜਧੀਤਾ ਤਤ੍ਥ ਸਤ੍ਤਵਸ੍ਸਾਨਿ ਵਸਿ, ਨਿਗ੍ਰੋਧਕੁਮਾਰੋਪਿ ਸਤ੍ਤਵਸ੍ਸਿਕੋ ਜਾਤੋ, ਤਦਾ ਮਹਾਵਰੁਣਤ੍ਥੇਰੋ ਨਾਮ ਏਕੋ ਅਰਹਾ ਦਾਰਕਸ੍ਸ ਹੇਤੁਸਮ੍ਪਦਂ ਦਿਸ੍ਵਾ ਵਿਹਰਮਾਨੋ ਸਤ੍ਤਵਸ੍ਸਿਕੋ ਦਾਨਿ ਦਾਰਕੋ. ਕਾਲੋ ਨਂ ਪਬ੍ਬਾਜੇਤੁਂਤਿ ਚਿਨ੍ਤੇਤ੍ਵਾ ਰਾਜਧੀਤਾਯ ਆਰੋਚਾਪੇਤ੍ਵਾ ਨਿਗ੍ਰੋਧਕੁਮਾਰਂ ਪਬ੍ਬਾਜੇਸਿ, ਕੁਮਾਰੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਮਹਾਵਂਸੇ.

੯.

ਤਂ ਮਹਾਵਰੁਣੋ ਥੇਰੋ, ਤਦਾ ਦਿਸ੍ਵਾ ਕੁਮਾਰਕਂ;

ਉਪਨਿਸ੍ਸਯਸਮ੍ਪਨ੍ਨਂ, ਅਰਹਾ ਪੁਚ੍ਛਿ ਮਾਤਰਂ;

ਪਬ੍ਬਾਜੇਸਿ ਖੁਰਗ੍ਗੇ ਸੋ, ਅਰਹਤ੍ਤਮਪਾਪੁਣੀਤਿ.

ਸੋ ਕਿਰ ਏਕਦਿਵਸਂ ਪਾਤੋਵ ਸਰੀਰਂ ਪਟਿਜਗ੍ਗਿਤ੍ਵਾ ਆਚਰਿਯੁਪਜ੍ਝਾਯਵਤ੍ਤਂ ਕਤ੍ਵਾ ਪਤ੍ਤਚੀਵਰ ਮਾਦਾਯ ਮਾਤੁਉਪਾਸਿਕਾਯ ਗੇਹਦ੍ਵਾਰਂ ਗਚ੍ਛਾਮੀਤਿ ਨਿਕ੍ਖਮਿ. ਮਾਤੁਨਿਵਾਸਟ੍ਠਾਨਞ੍ਚਸ੍ਸ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਨਗਰਮਜ੍ਝੇਨ ਗਨ੍ਤ੍ਵਾ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਗਨ੍ਤਬ੍ਬਂ ਹੋਤਿ. ਤੇਨ ਚ ਸਮਯੇਨ ਅਸੋਕੋ ਧਮ੍ਮਰਾਜਾ ਪਾਚੀਨਦਿਸਾਭਿਮੁਖੋ ਸੀਹਪਞ੍ਜਰੇ ਚਙ੍ਕਮਤਿ. ਤਂ ਖਣਂਯੇਵ ਨਿਗ੍ਰੋਧੋ ਰਾਜਙ੍ਗਣਂ ਸਮ੍ਪਾਪੁਣਿ ਸਨ੍ਤਿਨ੍ਦ੍ਰਿਯੋ ਸਨ੍ਤਮਾਨਸੋ ਯੁਗਮਤ੍ਤਂ ਪੇਕ੍ਖਮਾਨੋ, ਤੇਨ ਵੁਤ੍ਤਂ ਏਕਦਿਵਸਂ ਸੀਹਪਞ੍ਜਰੇ ਠਿਤੋ ਅਦ੍ਦਸ ਨਿਗ੍ਰੋਧਂ ਸਾਮਣੇਰਂ ਰਾਜਙ੍ਗਣੇਨ ਗਚ੍ਛਨ੍ਤਂ ਦਨ੍ਤਂ ਗੁਤ੍ਤਂ ਸਨ੍ਤਿਨ੍ਦ੍ਰਿਯਂ ਇਰਿਯਾਪਥਸਮ੍ਪਨ੍ਨਨ੍ਤਿ. ਦਿਸ੍ਵਾ ਪਨਸ੍ਸ ਏਤਦਹੋਸਿ. ਅਯਂ ਜਨੋ ਸਬ੍ਬੋਪਿ ਵਿਕ੍ਖਿਤ੍ਤਚਿਤ੍ਤੋ ਭਨ੍ਤਮਿਗਪਟਿਭਾਗੋ. ਅਯਂ ਪਨ ਦਹਰਕੋ ਅਵਿਕ੍ਖਿਤ੍ਤੋ ਅਤਿਵਿਯਸ੍ਸ ਆਲੋਕਿਤਵਿਲੋਕਿਤਂ ਸਮ੍ਮਿਞ੍ਜਨਪਸਾਰਣਞ੍ਚ ਸੋਭਤਿ. ਅਦ੍ਧਾ ਏਤਸ੍ਸਬ੍ਭਨ੍ਤਰੇ ਲੋਕੁਤ੍ਤਰਧਮ੍ਮੋ ਭਵਿਸ੍ਸਤੀਤਿ ਰਞ੍ਞੋ ਸਹ ¶ ਦਸ੍ਸਨੇਨੇਵ ਸਾਮਣੇਰੇ ਚਿਤ੍ਤਂ ਪਸੀਦਿ, ਪੇਮਂ ਸਣ੍ਠਹਿ, ਕਸ੍ਮਾ. ਪੁਬ੍ਬੇ ਕਿਰ ਪੁਞ੍ਞਕਰਣਕਾਲੇ ਰਞ੍ਞੋ ਜੇਟ੍ਠਕਭਾਤਾ ਵਾਣਿਜਕੋਯਂ.

੧੦.

ਪੁਬ੍ਬੇਵ [ਪੁਬ੍ਬੇਨ ਇਤਿਕਤ੍ਥਚਿ] ਸਨ੍ਨਿਵਾਸੇਨ, ਪਚ੍ਚੁਪ੍ਪਨ੍ਨਹਿਤੇਨ ਵਾ;

ਏਵਂ ਤਂ ਜਾਯਤੇ ਪੇਮਂ, ਉਪ੍ਪਲਂਵ ਯਥੋਦਕੇਤਿ.

ਅਥ ਰਾਜਾ ਸਞ੍ਜਾਤਪੇਮੋ ਸਬਹੁਮਾਨੋ ਸਾਮਣੇਰਂ ਪਕ੍ਕੋਸਥਾਤਿ ਅਮਚ੍ਚੇ ਪੇਸੇਸਿ, ਤੇ ਅਤਿਚਿਰਾਯਨ੍ਤੀਤਿ ਪੁਨ ਦ੍ਵੇ ਤਯੋ ਪੇਸੇਸਿ ਤੁਰਿਤਂ ਆਗਚ੍ਛਤੂਤਿ. ਸਾਮਣੇਰੋ ਅਤ੍ਤਨੋ ਪਕਤਿਯਾ ਏਵ ਅਗਮਾਸਿ. ਰਾਜਾ ਪਤਿਰੂਪਾਸਨਂ ਞਤ੍ਵਾ ਨਿਸੀਦਥਾਤਿ ਆਹ. ਸੋ ਇਤੋਚਿਤੋ ਚ ਵਿਲੋਕੇਤ੍ਵਾ ਨਤ੍ਥਿ ਦਾਨਿ ਅਞ੍ਞੋ ਭਿਕ੍ਖੂਤਿ ਸਮੁਸ੍ਸਿਤਸੇਤਚ੍ਛਤ੍ਤਂ ਰਾਜਪਲ੍ਲਙ੍ਕਂ ਉਪਸਙ੍ਕਮਿਤ੍ਵਾ ਪਤ੍ਤਂ ਗਣ੍ਹਨਤ੍ਥਾਯ ਰਞ੍ਞੋ ਆਕਾਰਂ ਦਸ੍ਸੇਸਿ. ਰਾਜਾ ਤਂ ਪਲ੍ਲਙ੍ਕਸਮੀਪਂ ਗਚ੍ਛਨ੍ਤਂ ਏਵ ਦਿਸ੍ਵਾ ਚਿਨ੍ਤੇਸਿ ਅਜ੍ਜੇਵ ਦਾਨਿ ਅਯਂ ਸਾਮਣੇਰੋ ਇਮਸ੍ਸ ਗੇਹਸ੍ਸ ਸਾਮਿਕੋ ਭਵਿਸ੍ਸਤੀਤਿ, ਸਾਮਣੇਰੋ ਰਞ੍ਞੋ ਹਤ੍ਥੇ ਪਤ੍ਤਂ ਦਤ੍ਵਾ ਪਲ੍ਲਙ੍ਕਂ ਅਭਿਰੁਹਿਤ੍ਵਾ ਨਿਸੀਦਿ. ਰਾਜਾ ਅਤ੍ਤਨੋ ਅਤ੍ਥਾਯ ਸਮ੍ਪਾਦਿਤਂ ਸਬ੍ਬਂ ਯਾਗੁਖਜ੍ਜਕਭਤ੍ਤਵਿਕਤਿਂ ਉਪਨਾਮੇਸਿ. ਸਾਮਣੇਰੋ ਅਤ੍ਤਨੋ ਯਾਪਨਮਤ੍ਤਮੇਵ ਸਮ੍ਪਟਿਚ੍ਛਿ. ਭਤ੍ਤਕਿਚ੍ਚਾਵਸਾਨੇ ਰਾਜਾ ਆਹ ਸਤ੍ਥਾਰਾ ਤੁਮ੍ਹਾਕਂ ਦਿਨ੍ਨਓਵਾਦਂ ਜਾਨਾਥਾਤਿ. ਜਾਨਾਮਿ ਮਹਾਰਾਜ ਏਕਦੇਸੇਨਾਤਿ. ਤਾਤ ਮਯ੍ਹਮ੍ਪੀ ਨਂ ਕਥੇਹੀਤਿ. ਸਾਧੁ ਮਹਾਰਾਜਾਤਿ ਰਞ੍ਞੋ ਅਨੁਰੂਪਂ ਧਮ੍ਮਪਏਦ ਅਪ੍ਪਮਾਦਵਗ੍ਗਂ ਅਨੁਮੋਦਨਤ੍ਥਾਯ ਅਭਾਸਿ. ਰਾਜਾ ਪਨ ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦਂਤਿ ਸੁਤ੍ਵਾਵ ਅਞ੍ਞਾਤਂ ਤਾਤ, ਪਰਿਯੋਸਾਪੇਹੀਤਿ ਆਹ. ਸਾਮਣੇਰੋ ਅਨੁਮੋਦਨਾ ਵਸਾਨੇ ਦ੍ਵਤ੍ਤਿਂਸਧੁਵਭਤ੍ਤਾਨਿ [ਦ੍ਵਿਤ੍ਤਿਂਸਧੁਰਭਤ੍ਤਾਨਿ ਇਤਿਸਬ੍ਬਤ੍ਥ] ਲਭਿਤ੍ਵਾ ਪੁਨ ਦਿਵਸੇ ਦ੍ਵਤ੍ਤਿਂਸਭਿਕ੍ਖੂ ਗਹੇਤ੍ਵਾ ਰਾਜਨ੍ਤੋਪੁਰਂ ਪਵਿਸਿਤ੍ਵਾ ਭਤ੍ਤਕਿਚ੍ਚ ਮਕਾਸਿ. ਰਾਜਾ ਅਞ੍ਞੇਪਿ ਦ੍ਵਤ੍ਤਿਂਸਭਿਕ੍ਖੂ ਤੁਮ੍ਹੇਹਿ ਸਦ੍ਧਿਂਸ੍ਵੇ ਭਿਕ੍ਖਂ ਗਣ੍ਹਨ੍ਤੂਤਿ ਏਤੇਨੇਵ ਉਪਾਯੇਨ ਦਿਵਸੇ ¶ ਦਿਵਸੇ ਵਡ੍ਢਾਪੇਨ੍ਤੋ ਸਟ੍ਠਿਸਹਸ੍ਸਾਨਂ ਬ੍ਰਾਹ੍ਮਣਪਰਿਬ੍ਬਾਜਕਾਨਂ ਭਤ੍ਤਂ ਉਪਚ੍ਛਿਨ੍ਦਿਤ੍ਵਾ ਅਨ੍ਤੋਨਿਵੇਸਨੇ ਸਟ੍ਠਿਸਹਸ੍ਸਾਨਂ ਭਿਕ੍ਖੂਨਂ ਨਿਚ੍ਚਭਤ੍ਤਂ ਪਟ੍ਠਪੇਸਿ ਨਿਗ੍ਰੋਧਤ੍ਥੇਰਗਤੇਨੇਵ ਪਸਾਦੇਨ. ਨਿਗ੍ਰੋਧਤ੍ਥੇਰੋਪਿ ਰਾਜਾਨਂ ਸਪਰਿਸਂ ਤੀਸੁ ਸਰਣੇਸੁ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਬੁਦ੍ਧਸਾਸਨੇ ਪੋਥੁਜ੍ਜਨਿਕੇਨ ਪਸਾਦੇਨ ਅਚਲਪ੍ਪਸਾਦਂ ਕਤ੍ਵਾ ਪਤਿਟ੍ਠਾਪੇਸਿ. ਰਾਜਾਪਿ ਅਸੋਕਾਰਾਮਂ ਨਾਮ ਮਹਾਵਿਹਾਰਂ ਕਾਰਾਪੇਤ੍ਵਾ ਸਟ੍ਠਿਸਹਸ੍ਸਾਨਂ ਭਿਕ੍ਖੂਨਂ ਨਿਚ੍ਚਭਤ੍ਤਂ ਪਟ੍ਠਪੇਸਿ. ਸਕਲਜਮ੍ਬੁਦੀਪੇ ਚਤੁਰਾਸੀਤਿਯਾ ਨਗਰਸਹਸ੍ਸੇਸੁ ਚਤੁਰਾਸੀਤਿਵਿਹਾਰਸਹਸ੍ਸਾਨਿ ਕਾਰਾਪੇਸਿ. ਤੇਨ ਵੁਤ੍ਤਂ.

੧੧.

ਚਣ੍ਡਾਲਵਾਦਿਦੋਸੇਨ,

ਜਾਤੋ ਚਣ੍ਡਾਲਗਾਮਕੇ;

ਪਤ੍ਤਾਨੁਮੋਦਨਾ ਪਾਕਾ,

ਆਸੇ ਸੋ [ਅਸੇਸੋ ਇਤਿਪਿਕਤ੍ਥਚਿ] ਹਿ ਅਨਾਸਵੋਤਿ.

ਅਯਂ ਨਿਗ੍ਰੋਧਤ੍ਥੇਰਸ੍ਸ ਕਥਾਨਯੋ.

ਮਧੁਦਾਯਕੋ ਪਨ ਵਾਣਿਜੋ ਦੇਵਲੋਕਤੋ ਚਵਿਤ੍ਵਾ ਪੁਪ੍ਫਪੁਰੇ ਰਾਜਕੁਲੇ ਉਪ੍ਪਜ੍ਜਿਤ੍ਵਾ ਪਿਯਦਾਸੋ ਨਾਮ ਕੁਮਾਰੋ ਹੁਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਸਕਲਜਮ੍ਬੁਦੀਪੇ ਏਕਰਜ੍ਜਂ ਅਕਾਸਿ. ਕਥਂ.

ਬਿਨ੍ਦੁਸਾਰਰਾਜਸ੍ਸ ਏਕਸਤਪੁਤ੍ਤਾ ਅਹੇਸੁਂ. ਤੇ ਸਬ੍ਬੇ ਅਸੋਕੋ ਅਤ੍ਤਨਾ ਸਦ੍ਧਿਂ ਏਕਮਾਤਿਕਂ ਤਿਸ੍ਸਕੁਮਾਰਂ ਠਪੇਤ੍ਵਾ ਘਾਤੇਸਿ. ਘਾਤੇਨ੍ਤੋ ਚਤ੍ਤਾਰਿ ਵਸ੍ਸਾਨਿ ਅਨਭਿਸਿਤ੍ਤੋਵ ਰਜ੍ਜਂ ਕਾਰੇਤ੍ਵਾ ਚਤੁਨ੍ਨਂ ਵਸ੍ਸਾਨਂ ਅਚ੍ਚਯੇਨ ਤਥਾਗਤਸ੍ਸ ਪਰਿਨਿਬ੍ਬਾਣਤੋ ਦ੍ਵਿਨ੍ਨਂ ਵਸ੍ਸਸਤਨਂ ਉਪਰਿ ਅਟ੍ਠਾਰਸਮੇ ਵਸ੍ਸੇ ਸਕਲਜਮ੍ਬੁਦੀਪੇ ਏਕਰਜ੍ਜਾਭਿਸੇਕਂ ਪਾਪੁਣਿ. ਅਥ ਤਂ ਸਕਲਜਮ੍ਬੁਦੀਪੇ ਚਤੁਰਾਸੀਤਿਨਗਰਸਹਸ੍ਸੇ ਰਾਜਾਨੋ ਆਗਨ੍ਤ੍ਵਾ ਉਪਟ੍ਠਹਿਸ੍ਸਨ੍ਤਿ. ਤਿਣ੍ਣਂ ਉਤੂਨਂ ਅਨੁਚ੍ਛਵਿਕਾ ਤਯੋ ਪਾਸਾਦਾ ਅਹੇਸੁਂ. ਏਕੋ ਮਹਾਸਪ੍ਪਿਕੋ ¶ , ਏਕੋ ਮੋਰਗੀਵੋ, ਏਕੋ ਮਙ੍ਗਲੋ ਨਾਮ, ਤੇਸੁ ਨੇਕਨਾਟਕਸਹਸ੍ਸਪਰਿਵੁਤੋ ਪਟਿਵਸਤਿ. ਯਾਸ੍ਸ ਮਧੁਆਪਣਂ ਦਸ੍ਸੇਸਿ, ਸਾ ਅਸਨ੍ਧਿਮਿਤ੍ਤਾ ਨਾਮ ਦੇਵਚ੍ਛਰਪਰਿਭਾਗਾ ਰਾਜਧੀਤਾ ਹੁਤ੍ਵਾ ਸਟ੍ਠਿਸਹਸ੍ਸਾਨਂ ਇਤ੍ਥੀਨਂ ਜੇਟ੍ਠਿਕਾ ਧਮ੍ਮਾਸੋਕਰਞ੍ਞੋ ਅਗ੍ਗਮਹੇਸੀ ਅਹੋਸਿ. ਅਭਿਸੇਕਾਨਨ੍ਤਰਂ ਤਸ੍ਸ ਇਮਾ ਰਾਜਿਦ੍ਧਿਯੋ ਆਗਤਾ, ਪਥਵਿਯਾ ਚ ਹੇਟ੍ਠਾ ਯੋਜਨਪ੍ਪਮਾਣੇ ਆਣਾ ਪਵਤ੍ਤਤਿ. ਤਥਾ ਉਪਰਿ ਆਕਾਸੇ. ਅਨੋਤਤ੍ਤਦਹਤੋ ਅਟ੍ਠਹਿ ਕਾਜੇਹਿ ਸੋਲ਼ਸਪਾਨੀਯਘਟੇ ਦਿਵਸੇ ਦਿਵਸੇ ਦੇਵਤਾ ਆਹਰਨ੍ਤਿ. ਯਤੋ ਸਾਸਨੇ ਉਪ੍ਪਨ੍ਨਸਦ੍ਧੋ ਹੁਤ੍ਵਾ ਅਟ੍ਠਘਟੇ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਦ੍ਵੇ ਘਟੇ ਸਟ੍ਠਿਮਤ੍ਤਾਨਂ ਤੇਪਿਟਕਭਿਕ੍ਖੂਨਂ ਦ੍ਵੇ ਘਟੇ ਅਗ੍ਗਮਹੇਸਿਯਾ ਅਸਨ੍ਧਿਮਿਤ੍ਤਾਯ. ਚਤ੍ਤਾਰੋ ਘਟੇ ਅਤ੍ਤਨਾ ਪਰਿਭੁਞ੍ਚਿ ਦੇਵਤਾ [ਦੇਵਤਾਏਵਂ ਇਤਿਸਬ੍ਬਤ੍ਥ], ਏਵ ਹਿਮਵਨ੍ਤਤੋ ਨਾਗਲਤਾਦਨ੍ਤਕਟ੍ਠਂ ਸਿਨਿਦ੍ਧਂ ਮੁਦੁਕਂ ਰਸਵਨ੍ਤਂ ਦਿਵਸੇ ਦਿਵਸੇ ਆਹਰਨ੍ਤਿ, ਤੇਨ ਰਞ੍ਞੋ ਚ ਮਹੇਸਿਯਾ ਚ ਸੋਲ਼ਸਨ੍ਨਂ ਨਾਟਕਸਹਸ੍ਸਾਨਞ੍ਚ ਸਟ੍ਠਿਮਤ੍ਤਾਨਞ੍ਚ ਭਿਕ੍ਖੁਸਹਸ੍ਸਾਨਂ ਦੇਵਸਿਕਂ ਦਨ੍ਤਪੋਣਕਿਚ੍ਚਂ ਨਿਪ੍ਫਜ੍ਜਤਿ. ਦੇਵਸਿਕਮੇਵਸ੍ਸ ਦੇਵਤਾ ਅਗਦਾਮਲਕਂ ਅਗਦਹਰੀਟਕਂ ਸੁਵਣ੍ਣਵਣ੍ਣਞ੍ਚ ਗਨ੍ਧਰਸਸਮ੍ਪਨ੍ਨਂ ਅਮ੍ਬਪਕ੍ਕਂ ਆਹਰਨ੍ਤਿ. ਛਦ੍ਦਨ੍ਤਦਹਤੋ ਪਞ੍ਚਵਣ੍ਣਂ ਨਿਵਾਸਨਪਾਰੁਪਨਂ ਪੀਤਕਵਣ੍ਣਂ ਹਤ੍ਥਪੁਞ੍ਛਨਕਪਟਂ [ਹਤ੍ਥਪੁਚ੍ਛਨਕਪਟ੍ਟਂ ਇਤਿਸਬ੍ਬਤ੍ਥ] ਦਿਬ੍ਬਞ੍ਚ ਪਾਨਂ ਆਹਰਨ੍ਤਿ. ਦੇਵਸਿਕਮੇਵਸ੍ਸ ਅਨੁਲੇਪਨਗਨ੍ਧਂ ਪਾਰੁਪਨਤ੍ਥਾਯ ਅਸੁਤ੍ਤਮਯਿਕਂ ਸੁਮਨਪੁਪ੍ਫਪਟਂ ਮਹਾਰਹਞ੍ਜ ਅਞ੍ਜਨਂ ਨਾਗਭਵਨਤੋ ਨਾਗਰਾਜਾਨੋ ਆਹਰਨ੍ਤਿ. ਛਦ੍ਦਨ੍ਤਦਹਤੋਯੇਵ ਉਟ੍ਠਿਤਸ੍ਸ ਸਾਲਿਨੋ ਨਵਵਾਹਸਹਸ੍ਸਨਿ ਦਿਵਸੇ ਦਿਵਸੇ ਸੁਵਾ ਆਹਰਨ੍ਤਿ. ਤੇ ਮੂਸਿਕਾ ਨਿਤ੍ਥੁਸਕਾਨਿ ਕਰੋਨ੍ਤਿ. ਏਕੋਪਿ ਖਣ੍ਡਤਣ੍ਡੁਲੋ ਨਾਹੋਸਿ. ਰਞ੍ਞੋ ਸਬ੍ਬਟ੍ਠਾਨੇਸੁ ਅਯਮੇਵ ਤਣ੍ਡੁਲੋ ਪਰਿਭੋਗਂ ਗਚ੍ਛਤਿ. ਮਧੁਮਕ੍ਖਿਕਾ ਮਧੁਂ ਕਰੋਨ੍ਤਿ. ਕਮ੍ਮਾਰਸਾਲਾਸੁ ਅਚ੍ਛਾ ਕੂਟਂ ਪਹਰਨ੍ਤਿ. ਕਰਵੀਕਸਕੁਣਾ ਆਗਨ੍ਤ੍ਵਾ ਮਧੁਰਸ੍ਸਰਂ ਵਿਕੂਜੇਨ੍ਤਾ ਰਞ੍ਞੋ ਬਲਿਕਮ੍ਮਂ ਕਰੋਨ੍ਤਿ. ਇਮਾਹਿ ਇਦ੍ਧੀਹਿ ਸਮਨ੍ਨਾਗਤੋ ਰਾਜਾ ਏਕਦਿਵਸਂ ਸੁਵਣ੍ਣਸਙ੍ਖਲਿਕਬਨ੍ਧਨਂ ¶ ਪੇਸੇਤ੍ਵਾ ਚਤੁਨ੍ਨਂ ਬੁਦ੍ਧਾਨਂ ਅਧਿਗਤਰੂਪਦਸ੍ਸਨਂ ਕਪ੍ਪਾ ਯੁਕਂ ਮਹਾਕਾਲਨਾਗਰਾਜਾਨਂ ਆਨਯਿਤ੍ਵਾ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਅਨੇਕਸਤ ਵਣ੍ਣੇਹਿ ਜਲਜਥਲਜਪੁਪ੍ਫੇਹਿ ਸੁਵਣ੍ਣਪੁਪ੍ਫੇਹਿ ਚ ਪੂਜਂ ਕਤ੍ਵਾ ਸਬ੍ਬਾ ਲਙ੍ਕਾਰਪਤਿਮਣ੍ਡਿਤੇਹਿ ਸੋਲ਼ਸਹਿ ਨਾਟਕਸਹਸ੍ਸੇਹਿ ਸਮਨ੍ਤਤੋ ਪਰਿਕ੍ਖਿਪਿਤ੍ਵਾ ਅਨਨ੍ਤਞਾਣਸ੍ਸ ਤਾਵ ਮੇ ਸਦ੍ਧਮ੍ਮਵਰਚਕ੍ਕਵਤ੍ਤਿਨੋ ਸਮ੍ਮਾਸਮ੍ਬੁਦ੍ਧਸ੍ਸ [ਸਮ੍ਮਾਸਮ੍ਬੁਦ੍ਧਰੂਪਂ ਇਤਿਸਬ੍ਬਤ੍ਥ] ਰੂਪਂ ਇਮੇਸਂ ਅਕ੍ਖੀਨਂ ਆਪਾਥਂ ਕਰੋਹੀਤਿ ਵਤ੍ਵਾ ਤੇਨ ਨਿਮ੍ਮਿਤਂ ਸਕਲਸਰੀਰੇ ਵਿਪ੍ਪਕਿਣ੍ਣਪੁਞ੍ਞਪ੍ਪਭਾਵਨਿਬ੍ਬਤ੍ਤਾਸੀਤਿ ਅਨੁਬ੍ਯਞ੍ਜਨਪਤਿਮਣ੍ਡਿਤ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣ ਸਸ੍ਸਿਰੀਕਤਾਯ ਵਿਕਚਕਮਲੁਪ੍ਪਲਪੁਣ੍ਡਰੀਕਪਤਿਮਣ੍ਡਿਤਮਿਵ ਸਲਿਲਤਲਂ ਤਾਰਾਗਣਰਂਸਿਜਾਲਵਿਸਰਵਿਪ੍ਫੁਰਿਤਸੋਭਾਸਮੁਜ੍ਜਲਮਿਵ ਗਗਨਤਲਂ ਨੀਲਪੀਤਲੋਹਿਤਾ ਦਿਭੇਦਂ ਵਿਚਿਤ੍ਤਵਣ੍ਣਰਂਸਿਵਿਨਦ੍ਧਬ੍ਯਾਮਪ੍ਪਭਾਪਰਿਕ੍ਖੇਪਵਿਲਾਸਿਤਾਯ ਸਞ੍ਚ੍ਯਾਪ੍ਪਭਾਨੁਰਾਗਇਨ੍ਦਧਨੁਵਿਜ੍ਜੁਲ੍ਲਤਾਪਰਿਕ੍ਖਿਤ੍ਤਮਿਵ ਕਣਕਗਿਰਿਸਿਖਰਂ ਨਾਨਾਵਿਰਾਗਵਿਮਲਕੇਤੁਮਾਲਾਸਮੁਜ੍ਜਲਿਤਚਾਰੁਮਤ੍ਥਕਸੋਭਨਂ ਨਯਨਰਸਾਯਨਮਿਵ ਚ ਬ੍ਰਹ੍ਮਦੇਵਮਨੁਜਨਾਗਯਕ੍ਖਗਣਾਨਂ ਬੁਦ੍ਧਰੂਪਂ ਪਸ੍ਸਨ੍ਤੋ ਸਤ੍ਤਦਿਵਸਾਨਿ ਅਕ੍ਖਿਪੂਜਂ ਨਾਮ ਅਕਾਸਿ. ਰਾਜਾ ਕਿਰ ਅਭਿਸੇਕਂ ਪਾਪੁਣਿਤ੍ਵਾ ਤੀਣਿਯੇਵ ਸਂਵਚ੍ਛਰਾਨਿ ਬਾਹਿਰਕਪਾਸਣ੍ਡਂ ਪਰਿਗਣ੍ਹਿ, ਚਤੁਤ੍ਥੇ ਸਂਵਚ੍ਛਰੇ ਬੁਦ੍ਧਸਾਸਨੇ ਪਸੀਦਿ, ਤਸ੍ਸ ਪਨ ਪਿਤਾ ਬਿਨ੍ਦੁਸਾਰੋ ਬ੍ਰਾਹ੍ਮਣਭਤ੍ਤੋ ਅਹੋਸਿ. ਸੋ ਬ੍ਰਾਹ੍ਮਣਾਨਞ੍ਚ ਬ੍ਰਾਹ੍ਮਣਜਾਤਿਪਾਸਣ੍ਡਾਨਂ ਪਣ੍ਡਰਙ੍ਗਪਰਿਬ੍ਬਾਜਕਾਨਞ੍ਚ ਸਟ੍ਠਿਸਹਸ੍ਸਮਤ੍ਤਾਨਂ ਨਿਚ੍ਚਭਤ੍ਤਂ ਪਟ੍ਠਪੇਸਿ. ਅਸੋਕੋਪਿ ਪਿਤਰਾ ਪਵਤ੍ਤਿਤਂ ਦਾਨਂ ਅਤ੍ਤਨੋ ਅਨ੍ਤੋਪੁਰੇ [ਅਨ੍ਤੇਪੁਰੇ ਇਤਿਸਬ੍ਬਤ੍ਥ] ਤਥੇਵ ਦਦਮਾਨੋ ਏਕਦਿਵਸਂ ਸੀਹਪਞ੍ਜਰੇ ਠਿਤੋ ਤੇ ਉਪਸਮਪਰਿਬਾਹਿਰੇਨ ਆਚਾਰੇਨ ਭੁਞ੍ਜਮਾਨੇ ਅਸਂਯਤਿਨ੍ਦ੍ਰਿਯੇ ਅਵਿਨੀਤਇਰਿਯਾਪਥੇ ਦਿਸ੍ਵਾ ਚਿਨ੍ਤੇਸਿ, ਈਦਿਸਂ ਦਾਨਂ ਉਪਪਰਿਕ੍ਖਿਤ੍ਵਾ ਯੁਤ੍ਤਟ੍ਠਾਨੇ ਦਾਤੁਂ ਵਟ੍ਟਤੀਤਿ. ਏਵਂ ਚਿਨ੍ਤੇਤ੍ਵਾ ਅਮਚ੍ਚੇ ਆਹ, ਗਚ੍ਛਥ ਭਣੇ ਅਤ੍ਤਨੋ ਅਤ੍ਤਨੋ ਸਾਧੁਸਮ੍ਮਤੇ ਸਮਣਬ੍ਰਾਹ੍ਮਣੇ ਅਨ੍ਤੋਪੁਰਂ ਅਭਿਹਰਥ ਦਾਨਂ ਦਸ੍ਸਾਮੀਤਿ, ਅਮਚ੍ਚਾ ਸਾਧੁ ਦੇਵਾਤਿ ਰਞ੍ਞੋ ¶ ਪਟਿਸ੍ਸੁਤ੍ਵਾ ਤੇ ਤੇ ਪਣ੍ਡਰਙ੍ਗਪਰਿਬ੍ਬਾਜਕਾ ਜੀਵਕ ਨਿਗਣ੍ਠਾਦਯੋ ਆਨੇਤ੍ਵਾ ਇਮੇ ਮਹਾਰਾਜ ਅਮ੍ਹਾਕਂ ਅਰਹਨ੍ਤੋਤਿ ਆਹਂਸੁ, ਅਥ ਰਾਜਾ ਅਨ੍ਤੋਪੁਰੇ ਉਚ੍ਚਾਵਚਾਨਿ ਆਸਨਾਨਿ ਪਞ੍ਞਾਪੇਤ੍ਵਾ ਆਗਚ੍ਛਨ੍ਤੂਤਿ ਵਤ੍ਵਾ ਆਗਤਾਗਤੇ ਆਹ ਅਤ੍ਤਨੋ ਅਨੁਰੂਪੇ ਆਸਨੇ ਨਿਸੀਦਥਾਤਿ, ਏਕਚ੍ਚੇ ਭਦ੍ਦਪੀਠਕੇਸੁ ਏਕਚ੍ਚੇ ਫਲਕਪੀਠਕੇਸੁ ਨਿਸੀਦਿਂਸੁ, ਤਂ ਦਿਸ੍ਵਾ ਰਾਜਾ ਨਤ੍ਥਿ ਏਤੇਸਂ ਅਨ੍ਤੋ ਸਾਰੋਤਿ ਞਤ੍ਵਾ ਤੇਸਂ ਅਨੁਰੂਪਂ ਖਾਦਨੀਯਭੋਜਨੀਯਂ ਦਤ੍ਵਾ ਉਯ੍ਯੋਜੇਸਿ. ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਸੀਹਪਞ੍ਜਰੇ ਠਿਤੋ ਨਿਗ੍ਰੋਧਸਾਮਣੇਰਂ ਦਿਸ੍ਵਾ ਤਸ੍ਮਿਂ ਗਤੇਨ ਪਸਾਦੇਨ ਬੁਦ੍ਧਸਾਸਨੇ ਪਸਨ੍ਨੋ ਸਟ੍ਠਿਸਹਸ੍ਸਮਤ੍ਤੇ ਪਾਸਣ੍ਡਿਯੇ ਅਪਨੇਤ੍ਵਾ ਸਟ੍ਠਿਸਹਸ੍ਸਮਤ੍ਤੇ ਭਿਕ੍ਖੂ ਭੋਜੇਨ੍ਤੋ ਬੁਦ੍ਧਸਾਸਨੇ ਪਸੀਦਿਤ੍ਵਾ ਅਸੋਕਾਰਾਮਂ ਕਾਰੇਤ੍ਵਾ ਤਤ੍ਥ ਤੇ ਵਸਾਪੇਨ੍ਤੋ ਏਕਦਿਵਸਂ ਅਸੋਕਾਰਾਮੇ ਸਟ੍ਠਿਸਹਸ੍ਸਭਿਕ੍ਖੂਨਂ ਦਾਨਂ ਦਤ੍ਵਾ ਤੇਸਂ ਮਜ੍ਝੇ ਨਿਸਜ੍ਜ ਸਙ੍ਘਂ ਚਤੂਹਿ ਪਚ੍ਚਯੇਹਿ ਪਵਾਰੇਤ੍ਵਾ ਇਮਂ ਪਞ੍ਹਂ ਪੁਚ੍ਛਿ, ਭਨ੍ਤੇ ਭਗਵਤਾ ਦੇਸਿਤਧਮ੍ਮੋ ਨਾਮ ਕਿਤ੍ਤਕੋ ਹੋਤੀਤਿ, ਮਹਾਰਾਜ ਨਵ ਅਙ੍ਗਾਨਿ, ਖਨ੍ਧਤੋ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀਤਿ. ਰਾਜਾ ਧਮ੍ਮੇ ਪਸੀਦਿਤ੍ਵਾ ਏਕੇਕਂ ਧਮ੍ਮਕ੍ਖਨ੍ਧਂ ਏਕੇਕਵਿਹਾਰੇਨ ਪੂਜੇਸ੍ਸਾਮੀਤਿ ਏਕਦਿਵਸਮੇਵ ਛਨ੍ਨਵੁਤਿਕੋਟਿਖਨਂ ਵਿਸ੍ਸਜ੍ਜੇਤ੍ਵਾ ਅਮਚ੍ਚੇ ਆਣਾਪੇਸਿ, ਏਕਮੇਕਸ੍ਮਿਂ ਨਗਰੇ ਏਕਮੇਕਂ ਵਿਹਾਰਂ ਕਾਰੇਨ੍ਤਾ ਚਤੁਰਾਸੀਤਿਯਾ ਨਗਰਸਹਸ੍ਸੇਸੁ ਚਤੁਰਾਸੀਤਿਵਿਹਾਰਸਹਸ੍ਸਾਨਿ ਕਾਰਾਪੇਥਾਤਿ, ਸਯਞ੍ਚ ਅਸੋਕਾਰਾਮੇ ਅਸੋਕਮਹਾਵਿਹਾਰਤ੍ਥਾਯ [ਸਯਂਚਅਸੋਕਹੋਵਿਹਾਰਤ੍ਥਾਯ ਇਤਿਪਿਕਤ੍ਥਚਿ] ਕਮ੍ਮਂ ਪਟ੍ਠਪੇਸਿ, ਸਙ੍ਘੋ ਇਨ੍ਦਗੁਤ੍ਤਤ੍ਥੇਰਂ ਨਾਮ ਮਹਿਦ੍ਧਿਕਂ ਮਹਾਨੁਭਾਵਂ ਖੀਣਾਸਵਂ ਨਵਕਮ੍ਮਾਧਿਟ੍ਠਾਯਕਂ ਅਦਾਸਿ, ਥੇਰੋ ਯਂ ਯਂ ਨ ਨਿਟ੍ਠਾਤਿ, ਤਂ ਤਂ ਅਤ੍ਤਨੋ ਆਨੁਭਾਵੇਨ ਨਿਟ੍ਠਾਪੇਸਿ, ਏਵਂਪਿਤੀਹਿ ਸਂਵਚ੍ਛਰੇਹਿ ਵਿਹਾਰਕਮ੍ਮਂ ਨਿਟ੍ਠਾਪੇਸਿ, ਏਕਦਿਵਸਮੇਵ ਸਬ੍ਬਨਗਰੇਹਿ ਪਣ੍ਣਾਨਿ ਆਗਮਿਂਸੁ, ਅਮਚ੍ਚਾ ਰਞ੍ਞੋ ਆਰੋਚੇਸੁਂ ਨਿਟ੍ਠਿਤਾਨਿ ਦੇਵ ਚਤੁਰਾਸੀਤਿਮਹਾਵਿਹਾਰਸਹਸ੍ਸਾਨੀਤਿ. ਅਥ ਰਾਜਾ ¶ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਭਨ੍ਤੇ ਮਯਾ ਚਤੁਰਾਸੀਤਿਵਿਹਾਰਸਹਸ੍ਸਾਨਿ ਕਾਰਿਤਾਨਿ, ਧਾਤੁਯੋ ਕੁਤੋ ਲਚ੍ਛਾਮੀਤਿ ਪੁਚ੍ਛਿ, ਮਹਾਰਾਜ ਧਾਤੁਨਿਧਾਨਂ ਨਾਮ ਅਤ੍ਥੀਤਿ ਸੁਣੋਮ, ਨ ਪਨ ਪਞ੍ਞਾਯਤਿ ਅਸੁਕਟ੍ਠਾਨੇਤਿ. ਰਾਜਾ ਰਾਜਗਹੇ ਚੇਤਿਯਂ ਭਿਨ੍ਦਾਪੇਤ੍ਵਾ ਧਾਤੁਂ ਅਪਸ੍ਸਨ੍ਤੋ ਪਟਿਪਾਕਤਿਕਂ ਕਾਰਾਪੇਤ੍ਵਾ ਭਿਕ੍ਖੁਭਿਕ੍ਖੁਣਿਯੋ ਉਪਾਸਕਉਪਾਸਿਕਾਯੋਤਿ ਚਤਸ੍ਸੋ ਪਰਿਸਾ ਗਹੇਤ੍ਵਾ ਵੇਸਾਲਿਯਂ ਗਤੋ. ਤਤ੍ਰਾਪਿ ਅਲਭਿਤ੍ਵਾ ਕਪਿਲਵਤ੍ਥੁਂ ਗਤੋ, ਤਤ੍ਰਾਪਿ ਅਲਭਿਤ੍ਵਾ ਰਾਮਗਾਮਂ ਗਤੋ, ਰਾਮਗਾਮੇ ਨਾਗਾ ਚੇਤਿਯਂ ਭਿਨ੍ਦਿਤੁਂ ਨਾਦਂਸੁ. ਚੇਤਿਯੇ ਨਿਪਤਿਤਕੁਦ੍ਦਾਲੋ ਖਣ੍ਡਾਵਣ੍ਡਂ ਹੋਤਿ, ਏਵਂ ਤਤ੍ਰਾਪਿ ਅਲਭਿਤ੍ਵਾ ਅਲ੍ਲਕਪ੍ਪਂ ਪਾਵਂ ਕੁਸਿਨਾਰਂਤਿ ਸਬ੍ਬਚੇਤਿਯਾਨਿ ਭਿਨ੍ਦਿਤ੍ਵਾ ਧਾਤੁਂ ਅਲਭਿਤ੍ਵਾ ਪਟਿਪਾਕਤਿਕਾਨਿ ਕਤ੍ਵਾ ਰਾਜਗਹਂ ਗਨ੍ਤ੍ਵਾ ਚਤਸ੍ਸੋ ਪਰਿਸਾ ਸਨ੍ਨਿਪਾਤਾਪੇਤ੍ਵਾ ਅਤ੍ਥਿ ਕੇਨਚਿ ਸੁਤਪੁਬ੍ਬਂ ਅਸੁਕਟ੍ਠਾਨੇ ਧਾਤੁਨਿਧਾਨਂਤਿ ਪੁਚ੍ਛਿ. ਤਤ੍ਥੇਕੋ ਵੀਸਂਵਸ੍ਸ ਸਤਿਕੋ ਥੇਰੋ ਅਸੁਕਟ੍ਠਾਨੇ ਧਾਤੁਨਿਧਾਨਂਤਿ ਨ ਜਾਨਾਮਿ, ਮਯ੍ਹਂ ਪਨ ਪਿਤਾਮਹਤ੍ਥੇਰੋ ਮਯਿ ਸਤ੍ਤਵਸ੍ਸਿਕਾਲੇ ਮਾਲਾਚਙ੍ਗੋਟਕਂ ਗਾਹਾਪੇਤ੍ਵਾ ਏਹਿ ਸਾਮਣੇਰ ਅਸੁਕਗਚ੍ਛਨ੍ਤਰੇ ਪਾਸਾਣਥੂਪੋ ਅਤ੍ਥਿ. ਤਤ੍ਥ ਗਚ੍ਛਾਮਾਤਿ ਗਨ੍ਤ੍ਵਾ ਪੂਜੇਤ੍ਵਾ ਇਮਂ ਠਾਨਂ ਉਪਧਾਰੇਤੁਂ ਵਟ੍ਟਤਿ ਸਾਮਣੇਰਾਤਿ ਆਹ. ਅਹਂ ਏਤਮੇਵ ਜਾਨਾਮਿ ਮਹਾਰਾਜਾਤਿ ਆਹ. ਰਾਜਾ ਏਤਦੇਵ ਠਾਨਂਤਿ ਵਤ੍ਵਾ ਗਚ੍ਛੇ ਹਰਾਪੇਤ੍ਵਾ ਪਾਸਾਣਥੂਪਂ ਪਂਸੁਂਚ ਅਪਨੇਤ੍ਵਾ ਹੇਟ੍ਠਾ ਸੁਧਾਭੂਮਿਂ ਅਦ੍ਦਸ, ਤਤੋ ਸੁਧਾ ਚ ਇਟ੍ਠਕਾਯੋ ਚ ਹਰਾਪੇਤ੍ਵਾ ਅਨੁਪੁਬ੍ਬੇਨ ਪਰਿਵੇਣਂ ਓਰੁਯ੍ਹ ਸਤ੍ਤਰਤਨਵਾਲਿਕਂ ਅਸਿਹਤ੍ਥਾਨਿ ਚ ਕਟ੍ਠਰੂਪਕਾਨਿ ਸਮ੍ਪਰਿਵਤ੍ਤਨ੍ਤਾਨਿ ਅਦ੍ਦਸ, ਸੋ ਯਕ੍ਖਦਾਸਕੇ ਪਕ੍ਕੋਸਾਪੇਤ੍ਵਾ ਬਲਿਕਮ੍ਮਂ ਕਾਰਾਪੇਤ੍ਵਾਪਿ ਨੇਵ ਅਨ੍ਤਂ ਪਸ੍ਸਨ੍ਤੋ ਦੇਵਤਾ ਨਮਸ੍ਸਮਾਨੋ ਅਹਂ ਇਮਾ ਧਾਤੁਯੋ ਗਹੇਤ੍ਵਾ ਚਤੁਰਾਸੀਤਿਵਿਹਾਰਸਹਸ੍ਸੇ ਨਿਦਹਿਤ੍ਵਾ ਸਕ੍ਕਾਰਂ ਕਰੋਮਿ. ਮਾ ਮੇ ਦੇਵਤਾ ਅਨ੍ਤਰਾਯਂ ਕਰੋਨ੍ਤੂਤਿ ਆਹ, ਸਕ੍ਕੋ ਦੇਵਰਾਜਾ ਚਾਰਿਕਂ ਚਰਨ੍ਤੋ ਤਂ ਦਿਸ੍ਵਾ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ ਤਾਤ ਅਸੋਕਧਮ੍ਮਰਾਜਾ ਧਾਤੁਯੋ ¶ ਨੀਹਰਿਸ੍ਸਾਮੀਤਿ ਪਰਿਵੇਣਂ ਓਤਿਣ੍ਣੋ. ਗਨ੍ਤ੍ਵਾ ਕਟ੍ਠਰੂਪਾਨਿ ਨੀਹਰਾਪੇਹੀਤਿ. ਸੋ ਪਞ੍ਚਚੂਲਕਗਾਮਦਾਰਕਵੇਸੇਨ ਗਨ੍ਤ੍ਵਾ ਰਞ੍ਞੋ ਪੁਰਤੋ ਧਨੁਕਹਤ੍ਥੋ ਠਤ੍ਵਾ ਹਾਰੇਮਿ ਮਹਾਰਾਜਾਤਿ ਆਹ, ਹਰ ਤਾਤਾਤਿ ਸਰਂ ਗਹੇਤ੍ਵਾ ਸਨ੍ਧਿਮ੍ਹਿਯੇਵ ਵਿਜ੍ਝਿ, ਸਬ੍ਬਂ ਵਿਪ੍ਪਕਿਰੀਯਿਤ੍ਥ, ਅਥ ਰਾਜਾ ਆਵਿਞ੍ਜਨੇ [ਅਵਿਞ੍ਚਿਨੇ ਇਤਿਪਿਕਤ੍ਥਚਿ] ਬਨ੍ਧਕੁਞ੍ਚਿਕਮੁਦ੍ਦਿਕਂ ਗਣ੍ਹਿ, ਮਣਿਕ੍ਖਨ੍ਧਂ ਪਸ੍ਸਿਤ੍ਵਾ ਅਨਾਗਤੇ ਦਲ਼ਿਦ੍ਦਰਾਜਾਨੋ ਇਮਂ ਮਣਿਂ ਗਹੇਤ੍ਵਾ ਧਾਤੂਨਂ ਸਕ੍ਕਾਰਂ ਕਰੋਨ੍ਤੂਤਿ ਪਣ੍ਣੇ ਅਕ੍ਖਰਾਨਿ ਦਿਸ੍ਵਾ ਕੁਜ੍ਝਿਤ੍ਵਾ ਮਾਦਿਸਾਨਂ ਪਨ ਰਾਜੂਨਂ [ਰਾਜਾਨਂ ਇਤਿਸਬ੍ਬਤ੍ਥ] ਦਲ਼ਿਦ੍ਦਰਾਜਾਤਿ ਵਤ੍ਤੁਂ ਅਯੁਤ੍ਤਂਤਿ ਪੁਨਪ੍ਪੁਨਂ ਘਟੇਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਅਨ੍ਤੋਗੇਹਂ ਪਵਿਟ੍ਠੋ ਅਟ੍ਠਾਰਸਵਸ੍ਸਾਧਿਕਾਨਂ ਦ੍ਵਿਨ੍ਨਂ ਵਸ੍ਸਸਤਾਨਂ ਉਪਰਿ ਆਰੋਪਿਤਦੀਪਾ ਤਥੇਵ ਪਜ੍ਜਲਨ੍ਤਿ, ਨੀਲੁਪ੍ਪਲਪੁਪ੍ਫਾਨਿ ਤਂਖਣਂਯੇਵ ਆਹਰਿਤ੍ਵਾ ਆਰੋਪਿਤਾਨਿ ਵਿਯ ਪੁਪ੍ਫਸਨ੍ਥਾਰੋ ਤਂ ਖਣਂ ਸਨ੍ਥਤੋ ਵਿਯ ਗਨ੍ਧਾ ਤਂ ਮੁਹੁਤ੍ਤਂ ਪਿਂਸਿਤ੍ਵਾ ਠਪਿਤਾ ਵਿਯ ਅਹੇਸੁਂ. ਰਾਜਾ ਸੁਵਣ੍ਣਪਟ੍ਟਂ ਗਹੇਤ੍ਵਾ ਅਨਾਗਤੇ ਪਿਯਦਾਸੋ ਨਾਮ ਕੁਮਾਰੋ ਛਤ੍ਤਂ ਉਸ੍ਸਾਪੇਤ੍ਵਾ ਅਸੋਕੋ ਨਾਮ ਧਮ੍ਮਰਾਜਾ ਭਵਿਸ੍ਸਤਿ, ਸੋ ਇਮਾ ਧਾਤੁਯੋ ਵਿਤ੍ਥਾਰਿਤਾ ਕਰਿਸ੍ਸਤੀਤਿ ਵਾਚੇਤ੍ਵਾ ਦਿਟ੍ਠੋਹਂ ਅਯ੍ਯੇਨ ਮਹਾਕਸ੍ਸਪਤ੍ਥੇਰੇਨਾਤਿ ਵਤ੍ਵਾ ਵਾਮਹਤ੍ਥਂ ਆਭੁਜਿਤ੍ਵਾ ਦਕ੍ਖਿਣਹਤ੍ਥੇਨ ਅਪ੍ਫੋਟੇਸਿ. ਸੋ ਤਸ੍ਮਿਂ ਠਾਨੇ ਪਰਿਚਰਣਕਧਾਤੁਮਤ੍ਤਮੇਵ ਠਪੇਤ੍ਵਾ ਸੇਸਧਾਤੁਯੋ ਸਬ੍ਬਾ ਗਹੇਤ੍ਵਾ ਧਾਤੁਘਰਂ ਪੁਬ੍ਬੇ ਪਿਹਿਤਨਯੇਨੇਵ ਪਿਦਹਿਤ੍ਵਾ ਸਬ੍ਬਾ ਯਥਾ ਪਕਤਿਯਾਯੇਵ ਕਾਰੇਤ੍ਵਾ ਉਪਰਿਪਾਸਾਣਚੇਤਿਯਂ ਪਤਿਟ੍ਠਾਪੇਤ੍ਵਾ ਚਤੁਰਾਸੀਤਿਯਾ ਵਿਹਾਰਸਹਸ੍ਸੇਸੁ ਧਾਤੁਯੋ ਪਤਿਟ੍ਠਾਪੇਸਿ. ਅਥੇਕਦਿਵਸਂ ਰਾਜਾ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਂਘਂ ਵਨ੍ਦਿਤ੍ਵਾ ਏਕਮਨ੍ਤੇ ਨਿਸਿਨ੍ਨੋ ਯਦਿ ਭਨ੍ਤੇ ਛਨ੍ਨਵੁਤਿਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਚਤੁਰਾਸੀਤਿਵਿਹਾਰਸਹਸ੍ਸਾਨਿਸਚੇਤਿਯਾਨਿ ਕਾਰਾਪੇਤ੍ਵਾਪਿ ਅਹਂ ਨ ਦਾਯਾਦੋ. ਅਞ੍ਞੋ ਕੋ ਦਾਯਾਦੋਤਿ, ਪਚ੍ਚਯਦਾਯਕੋ ਨਾਮ ਤ੍ਵਂ ਮਹਾਰਾਜ, ਯੋ ਪਨ ਅਤ੍ਤਨੋ ਪੁਤ੍ਤਞ੍ਚ ਧੀਤਰਞ੍ਚ ਪਬ੍ਬਾਜੇਤਿ, ਅਯਂ ਸਾਸਨੇ ਦਾਯਾਦੋ ਨਾਮਾਤਿ ਏਵਂ ਵੁਤ੍ਤੇ ¶ ਅਸੋਕੋ ਰਾਜਾ ਸਾਸਨੇ ਦਾਯਾਦਭਾਵਂ ਪਤ੍ਥਯਮਾਨੋ ਅਵਿਦੂਰੇ ਠਿਤਂ ਮਹਿਨ੍ਦਕੁਮਾਰਂ ਦਿਸ੍ਵਾ ਸਕ੍ਖਿਸ੍ਸਸਿ ਤਾਤ ਤ੍ਵਂ ਪਬ੍ਬਜਿਤੁਂਤਿ ਆਹ. ਕੁਮਾਰੋ ਪਕਤਿਯਾ ਪਬ੍ਬਜਿਤੁਕਾਮੋ ਰਞ੍ਞੋ ਵਚਨਂ ਸੁਤ੍ਵਾ ਅਤਿਵਿਯ ਪਾਮੋਜ੍ਜਜਾਤੋ ਪੁਬ੍ਬਜਾਮਿ [ਪਬ੍ਬਜ੍ਜਾਮਿ ਇਤਿਸਬ੍ਬਤ੍ਥ] ਦੇਵ. ਮਂ ਪਬ੍ਬਾਜੇਤ੍ਵਾ ਸਾਸਨੇ ਦਾਯਾਦੋ ਹੋਥਾਤਿ ਆਹ. ਤੇਨ ਚ ਸਮਯੇਨ ਰਾਜਧੀਤਾ ਸਂਘਮਿਤ੍ਤਾਪਿ ਤਸ੍ਮਿਂ ਠਾਨੇ ਠਿਤਾ ਹੋਤਿ. ਤਂ ਦਿਸ੍ਵਾ ਆਹ ਤ੍ਵਮ੍ਪਿ ਅਮ੍ਮ ਪਬ੍ਬਜਿਤੁਂ ਸਕ੍ਖਿਸ੍ਸਸੀਤਿ, ਸਾਧੁ ਤਾਤਾਤਿ ਸਮ੍ਪਟਿਚ੍ਛਿ. ਰਾਜਾ ਪੁਤ੍ਤਾਨਂ ਮਨਂ ਲਭਿਤ੍ਵਾ ਪਹਟ੍ਠਚਿਤ੍ਤੋ ਭਿਕ੍ਖੁਸਂਘਂ ਉਪਸਙ੍ਕਮਿਤ੍ਵਾ ਭਨ੍ਤੇ ਇਮੇ ਦਾਰਕੇ ਪਬ੍ਬਾਜੇਤ੍ਵਾ ਮਂ ਸਾਸਨੇ ਦਾਯਾਦਂ ਕਰੋਥਾਤਿ. ਸਙ੍ਘੋ ਰਞ੍ਞੋ ਵਚਨਂ ਸਮ੍ਪਟਿਚ੍ਛਿਤ੍ਵਾ ਕੁਮਾਰਂ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਉਪਜ੍ਝਾਯੇਨ ਮਹਾਦੇਵਤ੍ਥੇਰੇਨ ਆਚਰਿਯੇਨ ਪਬ੍ਬਜਾਪੇਸਿ [ਪਬ੍ਬਜ੍ਜਾਪੇਸਿ ਇਤਿਸਬ੍ਬਤ੍ਥ]. ਮਜ੍ਝਨ੍ਤਿਕਤ੍ਥੇਰੇਨ ਆਚਰਿਯੇਨ ਉਪਸਮ੍ਪਾਦੇਸਿ, ਸੋ ਉਪਸਮ੍ਪਦਾਮਾਲਕੇਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਸਙ੍ਘਮਿਤ੍ਤਾਯਪਿ ਰਾਜਧੀਤਾਯ ਆਚਰਿਯਾਣੀ ਆਯੁਪਾਲਤ੍ਥੇਰੀ ਨਾਮ [ਅਚਾਰਿਯਾ ਆਯੁਪਾਲਤ੍ਥੇਰੀਨਾਮ ਇਤਿਸਬ੍ਬਤ੍ਥ]. ਉਪਜ੍ਝਾਯਾ ਧਮ੍ਮਪਾਲਤ੍ਥੇਰੀ ਨਾਮ ਅਹੋਸਿ. ਰਾਜਾ ਪਨ ਅਨੇਕਾਕਾਰੇਨ ਬੁਦ੍ਧਸਾਸਨਂ ਸੋਭੇਤ੍ਵਾ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਸਹਾਯੇਨ [ਸਹਯ੍ਯੇਨ. ਸਾਹਾਯ੍ਯੇਨ. ਸਾਹਯ੍ਯੇਨ ਇਤਿਪਿਕਤ੍ਥਚਿ] ਸਟ੍ਠਿਸਹਸ੍ਸਮਤ੍ਤੇ ਦੁਸ੍ਸੀਲੇ ਤਿਤ੍ਥਿਯੇ ਬੁਦ੍ਧਸਾਸਨਾ ਉਪ੍ਪਬ੍ਬਾਜੇਤ੍ਵਾ ਤਤਿਯਧਮ੍ਮਸਂਗੀਤਿਂ ਨਿਟ੍ਠਾਪੇਸਿ. ਤਸ੍ਮਿਂ ਕਿਰ ਸਮਾਗਮੇ ਭਿਕ੍ਖੁਭਿਕ੍ਖੁਣਿਯੋ ਕਿਤ੍ਤਕਾਤਿ [ਕਿਤ੍ਤਕਾਨੀਤਿ ਇਤਿਸਬ੍ਬਤ੍ਥ], ਵੁਤ੍ਤਞ੍ਹਿ.

੧੨.

ਤਸ੍ਮਿਂ ਸਮਾਗਮੇ ਆਸੁਂ, ਅਸੀਤਿਭਿਕ੍ਖੁਕੋਟਿਯੋ;

ਅਹੇਸੁਂ ਸਤਸਹਸ੍ਸਾਨਿ, ਤੇਸੁ ਖੀਣਾਸਵਾ ਯਤੀ.

੧੩.

ਨਵੁਤਿਸਤਸਹਸ੍ਸਾਨਿ, ਅਹੂ ਭਿਕ੍ਖੁਣਿਯੋ ਤਹਿਂ;

ਖੀਣਾਸਵਾ ਸਿਕ੍ਖੁਣਿਯੋ, ਸਹਸ੍ਸਂ ਆਸੁ ਤਾਸੁ ਚਾਤਿ.

ਏਵਂ ¶ ਸੋ ਅਸੋਕੋ ਧਮ੍ਮਰਾਜਾ ਸਕਲਜਮ੍ਬੁਦੀਪੇ ਅਗ੍ਗਰਾਜਾ ਹੁਤ੍ਵਾ ਬੁਦ੍ਧਸਾਸਨਂ ਸੋਭੇਨ੍ਤੋ ਵਿਹਾਸਿ. ਅਯਂ ਪਨੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਮਹਾਵਂਸੇ ਵੁਤ੍ਤੋਤਿ. ਵੁਤ੍ਤਞ੍ਹਿ.

੧੪.

ਸਮ੍ਪੁਣ੍ਣਤ੍ਤਾ ਅਯਂ ਤਿਸ੍ਸੋ, ਚੇਤਨਾਯੋ ਮਧੁਪ੍ਪਦੋ;

ਸਬ੍ਬਤ੍ਥ ਸਬ੍ਬਦਾ ਸਬ੍ਬ, ਸਮ੍ਪਤ੍ਤਿਮਭਿਸਮ੍ਭੁਣੀਤਿ.

ਮਜ੍ਝਿਮੋ ਪਨ ਵਾਣਿਜੋ ਅਤ੍ਤਨੋ ਪਾਰਵਾਦਿਦੋਸੇਨ ਪਰਸਮੁਦ੍ਦੇ ਲਙ੍ਕਾਯਂ ਨਿਬ੍ਬਤ੍ਤਿ. ਤਸ੍ਸੇਵਂ ਕਥਾਪਟਿਪਾਟਿ ਵੇਦਿਤਬ੍ਬਾ. ਤਮ੍ਬਪਣ੍ਣਿਦੀਪੇ ਕਿਰ ਮੁਟਸੀਵੋ ਨਾਮ ਰਾਜਾ ਸਟ੍ਠਿਵਸ੍ਸਾਨਿ ਰਜ੍ਜਂ ਕਾਰੇਸਿ, ਤਸ੍ਸ ਪੁਞ੍ਞਪਞ੍ਞਾਗੁਣੋਪੇਤਾ ਅਞ੍ਞਮਞ੍ਞਂ ਹਿਤੇਸਿਨੋ ਦਸ ਪੁਤ੍ਤਾ ਅਹੇਸੁਂ. ਦ੍ਵੇ ਚ ਧੀਤਰੋ. ਸਬ੍ਬੇ ਤੇ ਸਮਗ੍ਗਾ ਸਮ੍ਮੋਦਮਾਨਾ ਵਸਨ੍ਤਿ. ਅਥਾਪਰਸ੍ਮਿਂ ਸਮਯੇ ਅਮਚ੍ਚਾ ਮੁਟਸੀਵਰਞ੍ਞੇ ਕਾਲਕਤੇ ਦੇਵਾਨਂਪਿਯਤਿਸ੍ਸਕੁਮਾਰਂ ਅਭਿਸਿਞ੍ਚਿਂਸੁ, ਅਭਿਸੇਕਸਮਕਾਲਮੇਵਸ੍ਸ ਅਨੇਕਾਨਿ ਅਚ੍ਛਰਿਯਾਨਿ ਅਹੇਸੁਂ. ਤਾਨਿ ਪਕਾਸੇਨ੍ਤਾ ਮਹਾਵਂਸਕਥਾਚਰਿਯਾ ਆਹਂਸੁ.

੧੫.

ਦੇਵਾਨਂਪਿਯਤਿਸ੍ਸੋਤਿ, ਵਿਸ੍ਸੁਤੋ ਦੁਤਿਯੋ ਸੁਤੋ;

ਤੇਸੁ [ਅਹੋਸਿਮੁਟਸੀਵਸ੍ਸ, ਦਸਪੁਤ੍ਤੇਸੁਪੁਞ੍ਞਵਾ ਇਤਿਕਤ੍ਥਚਿ] ਭਾਤੁਸੁ ਸਬ੍ਬੇਸੁ, ਪੁਞ੍ਞਪਞ੍ਞਾਧਿਕੋ ਅਹੁ.

੧੬.

ਦੇਵਾਨਂਪਿਯਤਿਸ੍ਸੋ ਸੋ, ਰਾਜਾਸਿ ਪਿਤੁਅਚ੍ਚਯੇ;

ਤਸ੍ਸਾਭਿਸੇਕੇਨ ਸਮਂ, ਬਹੂਨਚ੍ਛਰਿਯਾਨਹੂ.

੧੭.

ਲਙ੍ਕਾਦੀਪਮ੍ਹਿ ਸਕਲੇ, ਨਿਧਯੋ ਰਤਨਾਨਿਚ;

ਅਨ੍ਤੋਠਿਤਾਨਿ ਉਗ੍ਗਨ੍ਤ੍ਵਾ, ਪਥਵੀਤਲਮਾਰੁਹੁਂ.

੧੮.

ਲਙ੍ਕਾਦੀਪਸਮੀਪਮ੍ਹਿ, ਭਿਨ੍ਨਨਾਵਾ ਗਤਾਨਿ ਚ;

ਤਤ੍ਰ ਜਾਤਾਨਿ ਚ ਥਲਂ, ਰਤਨਾਨਿ ਸਮਾਰੁਹੁਂ.

੧੯.

ਛਾਤਪਬ੍ਬਤਪਾਦਮ੍ਹਿ, ਤਿਸ੍ਸੋ ਚ ਵੇਲ਼ੁਯਟ੍ਠਿਯੋ;

ਜਾਤਾ ਰਥਪਤੋਦੇਨ, ਸਮਾਨਾ ਪਰਿਮਾਣਤੋ.

੨੦.

ਤਾਸੁ ¶ ਏਕਾ ਲਤਾਯਟ੍ਠਿ, ਰਜਤਾਭਾ ਤਹਿਂ ਲਤਾ;

ਸੁਵਣ੍ਣਵਣ੍ਣਾ ਰੁਚਿਰਾ; ਦਿਸ੍ਸਨ੍ਤੇਤਾ ਮਨੋਰਮਾ.

੨੧.

ਏਕਾ ਕੁਸੁਮਯਟ੍ਠੀਤੁ; ਕੁਸੁਮਾਨਿ ਤਹਿਂਪਨ;

ਨਾਨਾਨਿ ਨਾਨਾਵਣ੍ਣਾਨਿ; ਦਿਸ੍ਸਨ੍ਤੇਤਿਫੁਟਾਨਿ ਚ.

੨੨.

ਏਕਾ ਸਕੁਣਯਟ੍ਠੀ ਤੁ, ਤਹਿਂਪਕ੍ਖਿਮਿਗਾ ਬਹੂ;

ਨਾਨਾ ਚ ਨਾਨਾਵਣ੍ਣਾ ਚ, ਸਜੀਵਾਵਿਯ ਦਿਸ੍ਸਰੇ.

੨੩.

ਹਯਗਜਰਥਾ ਮਲਕ੍ਯਾ, ਵਲਯਙ੍ਗੁਲਿਵੇਠਕਾ ਚੇਵ;

ਕਕੁਧਫਲਾ ਪਾਕਤਿਕਾ, ਇਚ੍ਚੇ ਤਾ ਅਟ੍ਠ ਜਾਤਿਯਾ.

੨੪.

ਮੁਤ੍ਤਾ ਸਮੁਦ੍ਦਾ ਉਗ੍ਗਨ੍ਤ੍ਵਾ; ਤੀਰੇ ਵਟ੍ਟਿਵਿਯਟ੍ਠਿਤਾ;

ਦੇਵਾਨਂਪਿਯਤਿਸ੍ਸਸ੍ਸ; ਸਬ੍ਬਂ ਪੁਞ੍ਞਵਿਜਮ੍ਭਿਤਂ.

੨੫.

ਇਨ੍ਦਨੀਲਂ ਵੇਲ਼ੁਰਿਯਂ, ਲੋਹਿਤਙ੍ਕਮਣੀ ਚਿ ਮੇ;

ਰਤਨਾਨਿ ਪਨੇ ਤਾਨਿ, ਮੁਤ੍ਤਾ ਤਾ ਤਾਚ ਯਟ੍ਠਿਯੋ;

ਸਤ੍ਤਾਹਬ੍ਭਨ੍ਤਰੇਯੇਵ, ਰਞ੍ਞੋ ਸਨ੍ਤਿਕਮਾਹਰੁਂਤਿ.

ਤੇਨ ਚ ਸਮਯੇਨ ਦੇਵਾਨਂਪਿਯਤਿਸ੍ਸਮਹਾਰਾਜਾ ਚ ਅਸੋਕੋ ਧਮ੍ਮਰਾਜਾ ਚ ਅਦ੍ਦਿਟ੍ਠਸਹਾਯਾ ਹੋਨ੍ਤਿ. ਤਸ੍ਮਾ ਸੋ ਏਤਾਨਿ ਰਤਨਾਨਿ ਚ ਅਞ੍ਞਾਨਿ ਬਹੂਨਿ ਉਪਾਯਨਾਨਿ ਮਮ ਸਹਾਯਸ੍ਸ ਦੇਥਾਤਿ ਧਮ੍ਮਾਸੋਕਮਹਾਨਰਿਨ੍ਦਸ੍ਸ ਪਣ੍ਣਾਕਾਰਤ੍ਥਾਯ ਪੇਸੇਸਿ. ਸੋਪਿ ਤਂ ਦਿਸ੍ਵਾ ਪਸੀਦਿਤ੍ਵਾ ਪਞ੍ਚਰਾਜਕਕੁਧਭਣ੍ਡਾਨਿ ਚ ਅਞ੍ਞਞ੍ਚ ਬਹੁਪਣ੍ਣਾਕਾਰਞ੍ਚ ਅਭਿਸੇਕਤ੍ਥਾਯ ਪੇਸੇਸਿ. ਮਯ੍ਹਂ ਸਹਾਯਂ ਅਭਿਸੇਕਂ ਕਰੋਨ੍ਤੂਤਿ. ਨ ਕੇਵਲਞ੍ਚੇਤਂ ਆਮਿਸਪਣ੍ਣਾਕਾਰਂ. ਇਮਂ ਕਿਰ ਧਮ੍ਮਪਣ੍ਣਾਕਾਰਮ੍ਪਿ ਪੇਸੇਸਿ.

੨੬.

ਅਹਂ ਬੁਦ੍ਧਂਚ ਧਮ੍ਮਂਚ; ਸਂਘਂਚ ਸਰਣਂ ਗਤੋ;

ਉਪਸਕਤ੍ਤਂ ਵੇਦੇਸਿਂ; ਸਕ੍ਯਪੁਤ੍ਤਸ੍ਸ ਸਾਸਨੇ.

੨੭.

ਇਮੇਸੁ ਤੀਸੁ ਵਤ੍ਥੂਸੁ; ਉਤ੍ਤਮੇਸੁ ਨਰੁਤ੍ਤਮ;

ਚਿਤ੍ਤਂ ਪਸਾਦਯਿਤ੍ਵਾਨ, ਸਦ੍ਧਾਯ ਸਰਣਂ ਵਜਾਤਿ.

ਅਮਚ੍ਚਾ ¶ ਪੁਨ ਲਙ੍ਕਮਾਗਮ੍ਮ ਰਾਜਾਨਂ ਅਭਿਸਿਞ੍ਚਿਂਸੁ, ਤੇਨ ਖੋ ਪਨ ਸਮਯੇਨ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਕਤ੍ਥ ਨੁਖੋ ਅਨਾਗਤੇ ਸਾਸਨਂ ਸੁਪ੍ਪਤਿਟ੍ਠਿਤਂ ਭਵੇਯ੍ਯਾਤਿ ਉਪਪਰਿਕ੍ਖਨ੍ਤੋ ਪਚ੍ਚਨ੍ਤਿਮੇ ਸੁਪ੍ਪਤਿਟ੍ਠਿਤਂ ਭਵਿਸ੍ਸਤੀਤਿ ਞਤ੍ਵਾ ਤੇ ਤੇ ਥੇਰੇ ਤਤ੍ਥ ਤਤ੍ਥ ਪੇਸੇਤ੍ਵਾ ਮਹਾਮਹਿਨ੍ਦਤ੍ਥੇਰਂ ਗਨ੍ਤ੍ਵਾ ਤਮ੍ਬਪਣ੍ਣਿਦੀਪਂ ਪਸਾਦੇਹੀਤਿ ਨਿਯੋਜੇਸਿ, ਸਕ੍ਕੋ ਚ ਦੇਵਾਨਮਿਨ੍ਦੋ ਮਹਾਮਹਿਨ੍ਦਤ੍ਥੇਰਂ ਉਪਸਂਕਮਿਤ੍ਵਾ ਕਾਲਕਤੋ ਭਨ੍ਤੇ ਮੁਟਸੀਵੋ ਰਾਜਾ. ਇਦਾਨਿ ਦੇਵਾਨਂਪਿਯਤਿਸ੍ਸਮਹਾਰਾਜਾ ਰਜ੍ਜਂ ਕਾਰੇਤਿ. ਸਮ੍ਮਾਸਮ੍ਬੁਦ੍ਧੇਨ ਚ ਤੁਮ੍ਹੇ ਬ੍ਯਾਕਤਾ ਅਨਾਗਤੇ ਮਹਿਨ੍ਦੋ ਨਾਮ ਭਿਕ੍ਖੁ ਤਮ੍ਬਪਣ੍ਣਿਦੀਪਂ ਪਸਾਦੇਸ੍ਸਤੀਤਿ. ਤਸ੍ਮਾ ਤਿਹ ਖੋ ਭਨ੍ਤੇ ਕਾਲੋ ਦੀਪਵਰਂ ਗਮਨਾਯ, ਅਹਮ੍ਪਿ ਸਹਾਯੋ ਭਵਿਸ੍ਸਾਮੀਤਿ, ਥੇਰੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਸਤ੍ਤਮੋ ਚੇਤਿਯਪਬ੍ਬਤਵਿਹਾਰਤੋ ਵੇਹਾਸਂ ਉਪ੍ਪਤਿਤ੍ਵਾ ਅਨੁਰਾਧਪੁਰਸ੍ਸ ਪੁਰਤ੍ਥਿਮਦਿਸਾਯ ਮਿਸ੍ਸਕਪਬ੍ਬਤੇ ਪਤਿਟ੍ਠਹਿ, ਇਮਂ ਏਤਰਹਿ ਚੇਤਿਯਪਬ੍ਬਤੋਤਿਪਿ ਸਞ੍ਜਾਨਨ੍ਤਿ. ਤਦਾ ਤਮ੍ਬਪਣ੍ਣਿਯਂ ਉਸ੍ਸਵਦਿਵਸੋ ਹੋਤਿ, ਰਾਜਾ ਛਣਂ ਕਰੋਥਾਤਿ ਅਮਚ੍ਚੇ ਆਣਾਪੇਤ੍ਵਾ ਚਤ੍ਤਾਲ਼ੀਸਸਹਸ੍ਸਪੁਰਿਸੇਹਿ ਪਰਿਵਾਰਿਤੋ ਨਗਰਮ੍ਹਾ ਨਿਕ੍ਖਮਿਤ੍ਵਾ ਮਿਸ੍ਸਕਪਬ੍ਬਤਂ ਪਾਯਾਸਿ ਮਿਗਵਂ ਕੀਲ਼ਿਤੁਕਾਮੋ. ਅਥ ਤਸ੍ਮਿਂ ਪਬ੍ਬਤੇ ਅਧਿਵਤ੍ਥਾ ਏਕਾ ਦੇਵਤਾ ਰਞ੍ਞੋ ਥੇਰੇ ਦਸ੍ਸੇਸ੍ਸਾਮੀਤਿ ਰੋਹਿਤਮੀਗਵਣ੍ਣੇਨ ਅਵਿਦੂਰੇ ਤਿਣਪਣ੍ਣਾਨਿ ਖਾਦਮਾਨਾ ਵਿਯ ਚਰਤਿ, ਰਾਜਾ ਅਯੁਤ੍ਤਂ ਦਾਨਿ ਪਮਤ੍ਤਂ ਵਿਜ੍ਝਿਤੁਂਤਿ ਜਿਯਂ ਪੋਠੇਸਿ, ਮਿਗੋ ਅਮ੍ਬਤ੍ਥਲਮਗ੍ਗਂ ਗਹੇਤ੍ਵਾ ਪਲਾਯਿਤੁਂ ਆਰਭਿ, ਰਾਜਾ ਤਂ ਅਨੁਬਨ੍ਧਨ੍ਤੋ ਅਮ੍ਬਤ੍ਥਲਮੇਵ ਅਭਿਰੁਹਿ, ਮਿਗੋਪਿ ਥੇਰਾਨਂ ਅਵਿਦੂਰੇ ਅਨ੍ਤਰਧਾਯਿ, ਮਹਿਨ੍ਦਤ੍ਥੇਰੋ ਰਾਜਾਨਂ ਅਵਿਦੂਰੇ ਆਗਚ੍ਛਨ੍ਤ ਮਂਯੇਵ ਰਾਜਾ ਪਸ੍ਸਤੁ, ਮਾ ਇਤਰੇਤਿ ਅਧਿਟ੍ਠਹਿਤ੍ਵਾ ਤਿਸ੍ਸ ਤਿਸ੍ਸ ਇਤੋ ਏਹੀਤਿ ਆਹ, ਰਾਜਾ ਤਂ ਸੁਤ੍ਵਾ ਚਿਨ੍ਤੇਸਿ. ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਜਾਤੋ ਮਂ ਤਿਸ੍ਸੋਤਿ ਨਾਮਂ ਗਹੇਤ੍ਵਾ ਆਲਪਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਅਯਂ ਪਨ ਛਿਨ੍ਨਭਿਨ੍ਨਪਟਧਰੋ ਭਣ੍ਡੁਕਾਸਾਵ ਵਸਨੋ ਮਂ ਨਾਮੇਨਾ ਲਪਤਿ, ਕੋ ਨੁਖੋ ਯਂ ਭਵਿਸ੍ਸਤਿ ਮਨੁਸ੍ਸੋ ਅਮਨੁਸ੍ਸੋ ਵਾਤਿ. ਥੇਰੋ ਆਹ.

੨੮.

ਸਮਣਾ ¶ ਮਯਂ ਮਹਾਰਾਜ, ਧਮ੍ਮਰਾਜਸ੍ਸ ਸਾਵਕਾ;

ਤਵੇਵ ਅਨੁਕਮ੍ਪਾਯ, ਜਮ੍ਬੁਦੀਪਾ ਇਧਾਗਤਾਤਿ.

ਰਾਜਾ ਧਮ੍ਮਾਸੋਕਨਰਿਨ੍ਦੇਨ ਪੇਸਿਤਸਾਸਨਾਨੁਸਾਰੇਨ ਅਨੁਸ੍ਸਰਮਾਨੋ ਅਯ੍ਯਾ ਨੁਖੋ ਆਗਤਾਤਿ ਤਾਵਦੇਵ ਆਯੁਧਂ ਨਿਕ੍ਖਿਪਿਤ੍ਵਾ ਏਕਮਨ੍ਤਂ ਨਿਸੀਦਿ ਸਮ੍ਮੋਦਨੀਯਂ ਕਥਂ ਕਥਯਮਾਨੋ ਸਾਰਣੀਯਂ [ਸਮ੍ਮੋਦਨੀਯਂ-ਇਤਿਸਬ੍ਬਤ੍ਥ] ਕਥਂ ਕੁਰੁਮਾਨੋ. ਤਸ੍ਮਿਂ ਤਾਨਿਪਿ ਚਤ੍ਤਾਲ਼ੀਸਪੁਰਿਸਸਹਸ੍ਸਾਨਿ ਆਗਨ੍ਤ੍ਵਾ ਤਂ ਪਰਿਵਾਰੇਸੁਂ, ਤਦਾ ਥੇਰੋ ਇਤਰੇਪਿ ਜਨੇ ਦਸ੍ਸੇਸਿ, ਰਾਜਾ ਦਿਸ੍ਵਾ ਇਮੇ ਕਦਾ ਆਗਤਾਤਿ ਪੁਚ੍ਛਿ, ਮਯਾ ਸਦ੍ਧਿਂਯੇਵ ਮਹਾਰਾਜਾਤਿ. ਇਦਾਨਿ ਪਨ ਜਮ੍ਬੁਦੀਪੇ ਅਞ੍ਞੇਪਿ ਏਵਰੂਪਾ ਸਮਣਾ ਸਨ੍ਤੀਤਿ. ਮਹਾਰਾਜ ਏਤਰਹਿ ਜਮ੍ਬੁਦੀਪੋ ਕਾਸਾਵਪਜ੍ਜੋਤੋ ਇਸਿਵਾਤਪਟਿਵਾਤੋ, ਤਸ੍ਮਿਂ.

੨੯.

ਤੇਵਿਜ੍ਜਾ ਇਦ੍ਧਿਪ੍ਪਤ੍ਤਾ ਚ, ਚੇਤੋਪਰਿਞ੍ਞਕੋਵਿਦਾ;

ਖੀਣਾਸਵਾ ਅਰਹਨ੍ਤੋ, ਬਹੂ ਬੁਦ੍ਧਸ੍ਸ ਸਾਵਕਾਤਿ.

ਰਾਜਾ ਤਂ ਸੁਤ੍ਵਾ ਪਸਨ੍ਨੋ ਅਹੋਸਿ, ਅਥ ਥੇਰੋ ਰੁਕ੍ਖੋਪਮਾਦਿਨਾ ਤਸ੍ਸ ਪਞ੍ਞਾਵੇਯ੍ਯਤ੍ਤਿਯਂ ਞਤ੍ਵਾ ਧਮ੍ਮਂ ਦੇਸੇਸਿ ਸਨਰਾਮਰੇਹਿ ਸਾਧੁਕਾਰਂ ਕਾਰਯਮਾਨੋ. ਤੇਨ ਵੁਤ੍ਥਂ.

੩੦.

ਪਣ੍ਡਿਤੋਤਿ ਵਿਦਿਤ੍ਵਾਨ, ਚੁਲ੍ਲਹਤ੍ਥਿਪਦੋਪਮਂ;

ਸੁਤ੍ਤਨ੍ਤਂ ਦੇਸਯੀ ਥੇਰੋ, ਮਹੀਪਸ੍ਸ ਮਹਾਮਤਿ [ਮਹੀਮਤੀ ਇਤਿਪਿਕਤ੍ਥਚਿ].

ਦੇਸਨਾਪਰਿਯੋਸਾਨੇ ਸੋ ਸਦ੍ਧਿਂ ਤੇਹਿ ਨਰੇਹਿ ਚਤ੍ਤਾਲ਼ੀਸਸਹਸ੍ਸੇਹਿ ਸਰਣੇਸੁ ਪਤਿਟ੍ਠਹੀਤਿ. ਅਥਸ੍ਸ ਰਾਜਾ ਸ੍ਵੇ ਭਨ੍ਤੇ ਮਮ ਗੇਹੇ ਭਿਕ੍ਖਂ ਗਣ੍ਹਾਥਾਤਿ ਯਾਚਿਤ੍ਵਾ ਗਨ੍ਤ੍ਵਾ ਨਗਰਞ੍ਚ ਰਾਜਗੇਹਞ੍ਚ ਅਲਙ੍ਕਰਿਤ੍ਵਾ ਥੇਰੇ ਨਿਸੀਦਾਪੇਤ੍ਵਾ ਪਣੀਤੇਨਾਹਾਰੇਨ ਪਰਿਵਿਸਿਤ੍ਵਾ ਅਨੁਲ਼ਾਦੇਵਿਪ੍ਪਮੁਖਾਹਿ ਪਞ੍ਚਸਤਇਤ੍ਥੀਹਿ ਸਦ੍ਧਿਂ ਏਕਮਨ੍ਤਂ ਨਿਸੀਦਿ. ਅਥ ਥੇਰੋ ਧਮ੍ਮਰਤਨ ਵਸ੍ਸਂ ਵਸ੍ਸਾਪੇਸਿ. ਤਤੋ ¶ ਤਾ ਪਞ੍ਚਸਤਇਤ੍ਥਿਯੋ ਸੋਤਾਪਤ੍ਤਿਫਲਂ ਪਾਪੁਣਿਂਸੁ. ਤਤੋ ਹਤ੍ਥਿਸਾਲਾਯਂ ਸਹਸ੍ਸਂ, ਨਨ੍ਦਨਵਨੇ ਸਹਸ੍ਸਂਤਿ ਏਵਂ ਦੁਤਿਯਦਿਵਸੇ ਅਡ੍ਢਤੇਯ੍ਯਾਨਿ ਪਾਣਸਹਸ੍ਸਾਨਿ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ. ਤਤਿਯਦਿਵਸੇ ਅਡ੍ਢਨਵਪ੍ਪਮਾਣਂ ਪਾਣਸਹਸ੍ਸਂਤਿ ਏਵਂ ਅਨੇਕਸਤਾਨਂ ਅਨੇਕਸਹਸ੍ਸਾਨਂ ਅਨੇਕਸਤ ਸਹਸ੍ਸਾਨਂ ਧਮ੍ਮਾ ਮਤਂ ਪਾਯੇਸਿ. ਵੁਤ੍ਤਞ੍ਹਿ.

੩੧.

ਮਹਾਮਹਿਨ੍ਦਸੁਰਿਯੋ, ਲਙ੍ਕਾਵੇਹਾਸਮਜ੍ਝਗੋ;

ਬੋਧਨੇਯ੍ਯਮ੍ਬੁਜੇ ਕਾਸਿ, ਵਿਕਾਸਂ ਧਮ੍ਮਰਂਸਿਨਾ.

੩੨.

ਮਹਾਮਹਿਨ੍ਦਚਨ੍ਦੋ ਸੋ, ਲਙ੍ਕਾਵੇਹਾਸਮਜ੍ਝਗੋ;

ਬੋਧੇਸਿ ਧਮ੍ਮਰਂਸੀਹਿ, ਵੇਨੇਯ੍ਯਕੁਮੁਦਾਕਰੇ.

੩੩.

ਮਹਾਮਹਿਨ੍ਦਮੇਘੋ ਸੋ, ਵਸ੍ਸਂ ਧਮ੍ਮਮ੍ਬੁਵੁਟ੍ਠਿਯਾ;

ਸਾਧੂਨਂ ਚਿਤ੍ਤਬੀਜੇਸੁ, ਜਨੇਸਿ ਕੁਸਲਙ੍ਕੁਰੇਤਿ.

ਅਥ ਰਾਜਾ ਸੁਮਨਸਾਮਣੇਰੇਨ ਧਮ੍ਮਾਸੋਕਸ੍ਸ ਹਤ੍ਥਤੋ ਸਮ੍ਮਾਸਮ੍ਬੁਦ੍ਧਪਰਿਭੁਤ੍ਤਪਤ੍ਤਪੂਰਧਾਤੁਯੋ ਚ ਸਕ੍ਕਸ੍ਸ ਸਨ੍ਤਿਕਾ ਦਕ੍ਖਿਣਕ੍ਖਕਧਾਤੁਂਚ ਆਹਰਾਪੇਤ੍ਵਾ [ਆਹਾਰਿਤ੍ਵਾ-ਇਤਿਸਬ੍ਬਤ੍ਥ] ਚੇਤਿਯਪਬ੍ਬਤੇ ਥੂਪਂ ਆਦਿਂਕਤ੍ਵਾ ਸਕਲਲਙ੍ਕਾਦੀਪੇ ਯੋਜਨੇ ਯੋਜਨੇ ਥੂਪਾਨਿ ਕਾਰੇਤ੍ਵਾ ਦਕ੍ਖਿਣਕਧਾਤੁਂ ਨਿਦਹਿਤ੍ਵਾ ਥੂਪਾਰਾਮਥੂਪਞ੍ਚ ਪਤਿਟ੍ਠਾਪੇਸਿ. ਅਥ ਸਙ੍ਘਮਿਤ੍ਤਾਯ ਥੇਰਿਯਾ ਆਨੀਤਂ ਜਯਮਹਾਬੋਧਿਨੋ ਦਕ੍ਖਿਣਮਹਾਸਾਖਂ ਪਤਿਟ੍ਠਾਪੇਤ੍ਵਾ ਪੂਜਂ ਕਾਰੇਸਿ. ਸਬ੍ਬੋ ਪਨੇਤ੍ਥ ਕਥਾਵਿਤ੍ਥਰੋ ਮਹਾਵਂਸਤੋ ਵੇਦਿਤਬ੍ਬੋ.

੩੪.

ਪਾਰਵਾਦਿਕਦੋਸੇਨ, ਜਾਤੇਵਂ ਪਰਸਾਗਰੇ;

ਪਤ੍ਤਾਨੁਮੋਦਨਾ ਏਵਂ, ਲਙ੍ਕਾਯਂ ਆਸਿ ਇਸ੍ਸਰੋ.

੩੫.

ਪਾਪਮ੍ਪਿ ਏਵਂ ਫਲਤੀਤਿ ਮਨ੍ਤ੍ਵਾ,

ਞਤ੍ਵਾਨ ਪੁਞ੍ਞਸ੍ਸ ਫਲਂ ਇਦਨ੍ਤਿ;

ਭੋ ਯੋਨਿਸੋ ਕੁਬ੍ਬਥ ਪੁਞ੍ਞਕਮ੍ਮੇ,

ਗਨ੍ਤ੍ਵਾਨ ਯੇ ਯਤ੍ਥ ਨ ਸੋਚਯਨ੍ਤੀਤਿ.

ਤੇਭਾਤਿਕਮਧੁਵਾਣਿਜਕਾਨਂ ਵਤ੍ਥੁਂ ਅਟ੍ਠਮਂ.

੩੯. ਬੋਧਿਰਾਜਧੀਤੁਯਾ [ਬੋਧਿਰਾਜਧੀਤਾਯ ਇਤਿਸਬ੍ਬਤ੍ਥ] ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ਪਰਿਨਿਬ੍ਬੁਤੇ ਲਙ੍ਕਾਯਂ ਸਾਸਨੇ ਸੁਪ੍ਪਤਿਟ੍ਠਿਤੇ ਤਤ੍ਥ ਹਕੁਰੇਲ਼ੀਤਿ ਏਕੋ ਗਾਮੋ ਅਹੋਸਿ, ਤਤ੍ਥੇਕਾ ਦਾਰਿਕਾ ਗਾਮਾਦਾਰਿਕਾਹਿ ਸਦ੍ਧਿਂ ਤਤ੍ਥ ਤਤ੍ਥ ਕੀਲ਼ਨ੍ਤੀ ਵਿਹਰਤਿ, ਤਦਾ ਗਾਮਸਮੀਪੇ ਮਹਾਸੋਬ੍ਭਂ ਹੋਤਿ. ਤਤ੍ਥੇਕੋ ਮਰੁਤ੍ਥਰੁਕ੍ਖੋ ਸਬ੍ਬਦਾ ਪਾਲ਼ਿਫੁਲ੍ਲੋਵ ਤਿਟ੍ਠਤਿ. ਮਨੁਸ੍ਸਾ ਬੁਦ੍ਧਪੂਜਨਤ੍ਥਂ ਪੁਪ੍ਫਾਨਿ ਵਿਚਿਣਨ੍ਤਾ ਉਦਕਂ ਓਗਹੇਤ੍ਵਾ ਰੁਕ੍ਖਮਭਿਰੁਯ੍ਹ ਪੁਪ੍ਫਾਨਿ ਓਚਿਣਨ੍ਤਿ, ਕੁਮਾਰਿਕਾ ਤੇ ਦਿਸ੍ਵਾ ਮਨੁਸ੍ਸਾ ਸੁਖੇਨ ਗਨ੍ਤ੍ਵਾ ਪੁਪ੍ਫਾਨਿ ਓਚਿਣਨ੍ਤੂਤਿ ਏਕਂ ਸੁਕ੍ਖਪਾਲਿਭਦ੍ਦਦਣ੍ਡਕਂ ਆਹਰਿਤ੍ਵਾ ਸੇਤੁਂ ਕਤ੍ਵਾ ਠਪੇਸਿ, ਤਤੋ ਪਟ੍ਠਾਯ ਮਨੁਸ੍ਸਾ ਤੇਨਗਨ੍ਤ੍ਵਾ ਪੁਪ੍ਫਾਨਿ ਓਚਿਣਨ੍ਤਿ. ਅਥ ਸਾ ਤਤੋ ਚੁਤਾ ਤੇਨੇਵ ਕੁਸਲਕਮ੍ਮੇਨ ਜਮ੍ਬੁਦੀਪੇ ਪਾਟਲਿਪੁਤ੍ਤਨਗਰੇ ਸੋਮਦਤ੍ਤਰਞ੍ਞੋ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਉਤ੍ਤਮਰੂਪਧਰਾ ਦੇਵਚ੍ਛਰਪਟਿਭਾਗਾ ਅਹੋਸਿ. ਮਾਤਾਪਿਤਰੋ ਪਨਸ੍ਸਾ ਬੋਧਿਰਾਜਕੁਮਾਰਿਕਾਤਿ ਵੋਹਰਿਂਸੁ. ਪੁਬ੍ਬੇ ਕਤਸੇਤੁਆਨੁਭਾਵੇਨ ਤਸ੍ਸਾ ਸੁਵੀਰਕੋ ਨਾਮੇਕੋ ਆਕਾਸਗਾਮੀ ਸਿਨ੍ਧਵਪੋਤਕੋ ਨਿਬ੍ਬਤ੍ਤਿ. ਰਾਜਧੀਤੁਯਾ ਪਨ ਪਿਤਾ ਬੁਦ੍ਧਮਾਮਕੋ ਧਮ੍ਮਮਾਮਕੋ ਸਙ੍ਘਮਾਮਕੋ ਹੁਤ੍ਵਾ ਮਹਨ੍ਤਂ ਪੁਞ੍ਞਂ ਪਸਵਨ੍ਤੋ ਸਿਨ੍ਧਵਪੋਤਕਂ ਦਿਸ੍ਵਾ ਪੁਞ੍ਞਕਰਣਸ੍ਸ ਮੇ ਸਹਾਯੋ ਲਦ੍ਧੋਤਿ ਤੁਟ੍ਠਮਾਨਸੋ ਅਸ੍ਸਂ ਅਭਿਰੁਹਿਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਗਨ੍ਤ੍ਵਾ ਮਹਾਬੋਧਿਂ ¶ ਵਨ੍ਦਤਿ. ਰਾਜਧੀਤਾ ਨਂ ਦਿਸ੍ਵਾ ਪਿਤੁਸਨ੍ਤਿਕਂ ਗਨ੍ਤ੍ਵਾ ਅਭਿਣ੍ਹਂ ਤਾਤ ਕੁਹਿਂ ਗਚ੍ਛਸੀਤਿ ਪੁਚ੍ਛਿ. ਰਾਜਾ ਨ ਕਿਞ੍ਚਿ ਕਥੇਸਿ, ਅਥ ਸਾ ਪੁਨਪ੍ਪੁਨਂ ਪਿਤਰਂ ਨਿਬਨ੍ਧਨ੍ਤੀ ਪੁਚ੍ਛਿ. ਤਤੋ ਰਾਜਾ ਤਸ੍ਸਾਵਿ ਕਰੋਨ੍ਤੋ ਏਵਮਾਹ.

੧.

ਅਮ੍ਹਾਕਂ ਭਗਵਾ ਪੁਬ੍ਬੇ, ਪੂਰੇਨ੍ਤੋ ਦਸਪਾਰਮੀ;

ਅਦਾਸਿ ਸੀਸਰਤ੍ਤਕ੍ਖਿ, ਮਂਸਂ ਜੀਵਿਤਮੇਵ ਚ.

੨.

ਪੁਤ੍ਤਦਾਰੇ ਚ ਰਜ੍ਜੇ ਚ, ਪਤ੍ਵਾ [ਦਤ੍ਵਾ ਇਤਿਪਿਕਤ੍ਥਚਿ] ਪਾਰਮਿਮਤ੍ਥਕਂ;

ਅਨਪ੍ਪਕਪ੍ਪਕੋਟੀਨਂ, ਖੇਪੇਤ੍ਵਾ ਕਪਿਲਵੁਯੇ.

੩.

ਸਕ੍ਕਰਾਜਕੁਲੇ ਜਾਤੋ, ਲੋਕੇ ਅਪ੍ਪਟਿਪੁਗ੍ਗਲੋ;

ਸਮ੍ਪਤ੍ਤਚਕ੍ਕਵਤ੍ਤਿਤ੍ਤਂ, ਪਹਨ੍ਤ੍ਵਾਨ ਨਰਾਧਿਪੋ.

੪.

ਦਿਸ੍ਵਾ ਨਿਮਿਤ੍ਤੇ ਚਤੁਰੋ, ਨਿਕ੍ਖਮ੍ਮ ਅਭਿਨਿਕ੍ਖਮਂ;

ਬੋਧਿਮੂਲਮੁਪਾਗਮ੍ਮ, ਨਿਸਿਨ੍ਨੋ ਵਜਿਰਾਸਨੇ.

੫.

ਸਹਸ੍ਸਬਾਹੁਂ ਮਾਪੇਤ੍ਵਾ, ਨਾਨਾਯੁਧਸਮਾਕੁਲਂ [ਨਾਨਾਵੁਧਸਮਾਕੁਲਂ-ਇਤਿਸਬ੍ਬਤ੍ਥ];

ਮਹਾਭੀਤਿਕਰਂ ਵੇਸਂ, ਕਾਲ਼ਪਬ੍ਬਤਸਾਦਿਸਂ.

੬.

ਮਾਪੇਤ੍ਵਾਨ ਸਮਾਰੁਯ੍ਹ, ਗਿਰਿਮੇਖਲਵਾਰਣਂ;

ਮਾਰਸੇਨਂ ਸਮਾਨੇਤ੍ਵਾ, ਆਗਤਂ ਮਕਰਦ੍ਧਜਂ.

੭.

ਪਾਰਮਿਤਾਬਲੇਨ ਤਂ, ਮਾਰਸੇਨਂ ਪਲਾਪਿਯ;

ਯਤ੍ਥਾਸੀਨੋ ਕਿਲੇਸਾਰਿ, ਸਹਸ੍ਸਂ ਘਾਤਯੀ ਜਿਨੋ.

੮.

ਨਯਨਂ ਸੁਜਲਸੇਕੇਹਿ, ਸਤ੍ਤਾਹਂ ਜਿਨਸੇਵਿਤਂ;

ਪੂਜਿਤਂ ਦੇਵਬ੍ਰਹ੍ਮੇਹਿ, ਸਿਦ੍ਧੋਰਗਨਰਾਦਿਹਿ;

ਵਨ੍ਦਿਤੁਂ ਜਯਬੋਧਿਂਤਂ, ਗਚ੍ਛਾਮਿ ਸਤਤਂ ਅਹਂ.

੯.

ਉਪਾਸਤਿ ਸਦਾ ਗਨ੍ਤ੍ਵਾ, ਯੋ ਨਰੋ ਬੋਧਿਪਾਦਪਂ;

ਗਨ੍ਧੋਦਦੀਪਧੂਪਾਦਿ, ਨਾਨਾਪੂਜਾਹਿ ਸਾਧੁਕਂ.

੧੦.

ਸ ਨਰੋ ਨਿਰਾਮਯੋ ਹੋਤਿ, ਪਚ੍ਚਤ੍ਤੇ ਚ ਪਰਤ੍ਥ ਚ;

ਪੂਜਿਤੋ ਮਾਨਿਤੋ ਹੋਤਿ, ਦੀਘਾਯੁ ਬਲਵਾ ਸੁਖੀ.

੧੧.

ਤਦਤ੍ਥਂ ਪਤ੍ਥਯਨ੍ਤੇਨ, ਅਤ੍ਥਕਾਮੇਨ ਜਨ੍ਤੁਨਾ;

ਉਪਾਸਨੀਯਂ ਸਦ੍ਧਾਯ, ਨਿਚ੍ਚਂ ਤਂ ਬੋਧਿਪਾਦਪਂਤਿ.

ਤਂ ਸੁਤ੍ਵਾ ਕੁਮਾਰਿਕਾ ਪੀਤਿਯਾ ਫੁਟਸਰੀਰਾ ਪਿਤਰਂ ਵਨ੍ਦਿਤ੍ਵਾ ਅਹਮ੍ਪਿ ਤਾਤ ਗਚ੍ਛਾਮੀਤਿ ਆਹ. ਰਾਜਾ ਪਨਸ੍ਸਾ ਉਪਦ੍ਦਵਭਯੇਨ ਗਮਨਂ ਨ ਇਚ੍ਛਿ. ਤਤੋ ਸਾ ਯਾਵਤਤਿਯਂ ਪਿਤਰਂ ਯਾਚਿਤ੍ਵਾ ਰਞ੍ਞਾ ਅਨੁਞ੍ਞਾਤਾ. ਤਤੋ ਪਟ੍ਠਾਯ ਪਿਤਰਾ ਸਦ੍ਧਿਂ ਸਿਨ੍ਧਵਮਾਰੁਯ੍ਹ ਬੋਧਿਂ ਵਨ੍ਦਿਤੁਂ ਸਤਤਂ ਗਚ੍ਛਤਿ. ਅਥਾਪਰਭਾਗੇ ਰਾਜਾ ਮਰਣਮਞ੍ਚੇ ਨਿਪਨ੍ਨੋ ਚਿਨ੍ਤੇਸਿ. ਧੀਤਾ ਮੇ ਨਿਰਨ੍ਤਰਂ ਬੋਧਿਉਪਟ੍ਠਾਨਂਗਚ੍ਛਤਿ, ਏਤਿਸ੍ਸਾ ਅਨਾਗਤੇ ਯਂਕਿਞ੍ਚਿ ਭਯਂ ਉਪ੍ਪਜ੍ਜਮਾਨਂ ਤਤੋ ਉਪ੍ਪਜ੍ਜਤਿ. ਤਤ੍ਥ ਮੇ ਕਿਂ ਕਾਤਬ੍ਬਨ੍ਤਿ. ਤਤੋ ਸਿਨ੍ਧਵਂ ਪਕ੍ਕੋਸਾਪੇਤ੍ਵਾ ਤਸ੍ਸ ਕਣ੍ਣਮੂਲੇ ਮਨ੍ਤੇਨ੍ਤੋ ਏਵਮਾਹ, ਤਾਤ ਮਮ ਧੀਤਾ ਅਭਿਣ੍ਹਂ ਤਵ ਸਹਾਯਂ ਕਤ੍ਵਾ ਬੋਧਿਂ ਵਨ੍ਦਿਤੁਂ ਗਚ੍ਛਤਿ. ਤਤ੍ਥਸ੍ਸਾ ਯਂਕਿਞ੍ਚਿ ਭਯਂ ਭਵੇਯ੍ਯ. ਤਂ ਨਪ੍ਪਤਿਰੂਪਂ. ਤਤ੍ਥ ਗਮਨਾਗਮਨੇ ਮਮ ਧੀਤਰਂ ਰਕ੍ਖੇਯ੍ਯਾਸੀਤਿ ਤਸ੍ਸ ਧੀਤਰਂ ਪਟਿਪਾਦੇਤ੍ਵਾ ਕਾਲਮਕਾਸਿ. ਤਤੋ ਰਾਜਧੀਤਾ ਪਿਤੁਸਰੀਰਕਿਚ੍ਚਂ ਕਾਰੇਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਅਸ੍ਸਮਭਿਰੁਯ੍ਹ ਬੋਧਿਉਪਟ੍ਠਾਨਂ ਗਚ੍ਛਤਿ. ਮਨੁਸ੍ਸਾ ਪਨਸ੍ਸਾ ਰੂਪਸਮ੍ਪਤ੍ਤਿਂ ਦਿਸ੍ਵਾ ਵਿਮ੍ਹਿਤਮਾਨਸਾ ਰਾਜਾਰਹਂ ਵਤ ਨੋ ਇਦਂ ਪਣ੍ਣਾਕਾਰਂ ਦਿਟ੍ਠਂ. ਗਨ੍ਤ੍ਵਾ ਰਞ੍ਞੋ ਆਚਿਕ੍ਖਿਸ੍ਸਾਮ. ਅਪ੍ਪੇਵ ਨਾਮ ਰਾਜਾ ਸੋ ਕਿਞ੍ਚਿ ਨੋ ਦਦੇਯ੍ਯਾਤਿ ਚਿਨ੍ਤੇਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤਾ ਏਵਮਾਹਂਸੁ.

੧੨.

ਬੋਧਿਮਣ੍ਡਂ ਸਮਾਗਮ੍ਮ, ਅਭਿਣ੍ਹਂ ਤੁਟ੍ਠਮਾਨਸਾ;

ਵਨ੍ਦਨ੍ਤੀ ਯਾਤਿ ਕਞ੍ਞੇਕਾ, ਵਿਜ੍ਜੂਵ ਸਿਰਿਯਾ ਜਲਂ.

੧੩.

ਨੀਲਧਮ੍ਪਿਲ੍ਲਭਾਰਾ ਸਾ, ਵਿਸਾਲਾਯਤਲੋਚਨਾ;

ਸੋਣ੍ਣਦੋਲਾਭਸਵਣਾ, ਸਾਮਾ ਸੁਭਪਯੋਧਰਾ.

੧੪.

ਸਤਰਂਸੀਹਿ ਸਮ੍ਮਿਸ੍ਸ, ਸਞ੍ਚ੍ਯਾਮ੍ਬੁਦਸਮਾਧਰਾ;

ਤੁਙ੍ਗਨਾਸਾ ਨੀਲਭਮੁ, ਹਾਸਭਾਸਾ ਮਨੋਰਮਾ.

੧੫.

ਈਦਿਸਂ ¶ ਨੋ ਮਹਾਰਾਜਾ [ਮਹਾਰਾਜਦਿਟ੍ਠਪੁਬ੍ਬ ਇਤਿਪਿਕਤ੍ਥਚਿ], ਦਿਟ੍ਠਪੁਬ੍ਬਂ ਕੁਦਾਚਨਂ;

ਏਹਿ ਤਸ੍ਸਾ ਸਿਰਿਂਦੇਵ, ਬੋਧਿਮਣ੍ਡਮ੍ਹਿ ਦਕ੍ਖਸੀਤਿ.

ਤਂ ਸੁਤ੍ਵਾ ਰਾਜਾ ਸਵਣਸਂਸਗ੍ਗੇਨੇਵ ਤਾਯ ਪਟਿਬਦ੍ਧਚਿਤ੍ਤੋ ਚਤੁਰਙ੍ਗਿਨਿਂਸੇਨਂ ਗਹੇਤ੍ਵਾ ਰਾਜਧੀਤਰਂ ਬੋਧਿਵਨ੍ਦਨਤ੍ਥਾਯ ਆਗਤਕਾਲੇ ਬਹਿਪਾਕਾਰੇ ਸੇਨਂ ਪਰਿਕ੍ਖਿਪਾਪੇਤ੍ਵਾ ਗਣ੍ਹਥੇਤਨ੍ਤਿ ਮਨੁਸ੍ਸੇ ਨਿਯੋਜੇਸਿ. ਤਤੋ ਸੇਨਾਪਿ ਤਂ ਗਹਣਸਜ੍ਜਾ ਅਟ੍ਠਾਸਿ. ਰਾਜਧੀਤਾ ਤੇ ਦਿਸ੍ਵਾ ਸੀਘਂ ਸਿਨ੍ਧਵਂ ਉਪਸਙ੍ਕਮਿਤ੍ਵਾ ਤਸ੍ਸ ਪਿਟ੍ਠਿਯਂ ਨਿਸਿਨ੍ਨਾ ਪਣ੍ਹਿਯਾ ਸਞ੍ਞਂ ਅਦਾਸਿ. ਸੋ ਤਂ ਗਹੇਤ੍ਵਾ ਵੇਗੇਨ ਆਕਾਸਂ ਪਕ੍ਖਨ੍ਦਿ. ਸਾ ਪਨ ਦੁਨ੍ਨਿਸਿਨ੍ਨਭਾਵੇਨ ਅਸ੍ਸਸ੍ਸ ਵੇਗਂ ਸਨ੍ਧਾਰੇਤੁਮਸਕ੍ਕੋਨ੍ਤੀ ਅਸ੍ਸਪਿਟ੍ਠਿਤੋ ਪਰਿਗਲਿ. ਸਿਨ੍ਧਵੋ ਰਾਜਧੀਤਰਂ ਪਤਮਾਨਂ ਦਿਸ੍ਵਾ ਰਾਜੋਵਾਦਂ ਸਰਮਾਨੋ ਵੇਗੇਨਾਗਨ੍ਤ੍ਵਾ ਤਸ੍ਸਾ ਕੇਸੇ ਡਂਸਿਤ੍ਵਾ ਉਕ੍ਖਿਪਿਤ੍ਵਾ ਪਤਮਾਨਾਯ ਤਸ੍ਸਾ ਪਿਟ੍ਠਿਂਦਤ੍ਵਾ ਨਿਸੀਦਾਪੇਤ੍ਵਾ ਆਕਾਸੇਨ ਤਂ ਨੇਤ੍ਵਾ ਪਾਟਲਿਪੁਤ੍ਤਨਗਰੇਯੇਵ ਪਤਿਟ੍ਠਾਪੇਸਿ [ਪਾਤਲਿਪੁਤ੍ਤਨਗਰੇਯੇਵਤਂ ਪਵਿਠਾਪੇਸਿਇਤਿਪਿਕਤ੍ਥਚਿ].

੧੬.

ਤਿਰਚ੍ਛਾਨਗਤਾਪੇਵਂ, ਸਰਨ੍ਤਾ ਉਪਕਾਰਕਂ;

ਨ ਜਹਨ੍ਤੀਤਿ ਮਨ੍ਤ੍ਵਾਨ, ਕਤਞ੍ਞੂ ਹੋਨ੍ਤੁ [ਹੋਨ੍ਤਿਪਾਣਿਨੋ-ਇਤਿਪਿਕਤ੍ਥਚਿ] ਪਾਣਿਨੋਤਿ.

ਤਤੋ ਪਟ੍ਠਾਯ ਸਾ ਪੁਞ੍ਞਕਮ੍ਮਂ ਕਤ੍ਵਾ ਸਗ੍ਗਪਰਾਯਨਾ ਅਹੋਸੀਤਿ.

੧੭.

ਯੋ ਯਂ ਦੁਮਿਨ੍ਦਂਯਤਿਨਨ੍ਦਨੇਨ;

ਸਮ੍ਪੂਜਿਤਂ ਪੂਜਯਤੇ ਸ ਪਞ੍ਞੋ;

ਸ ਭੋਗਵਾ ਹੋਤਿ ਅਨੀਤਿਕੋ ਚ,

ਸਬ੍ਬਤ੍ਥ ਸੋ ਹੋਤਿ ਪਸਤ੍ਥਰੂਪੋ.

ਬੋਧਿਰਾਜਧੀਤੁਯਾ ਵਤ੍ਥੁਂ ਨਵਮਂ.

੪੦. ਕੁਣ੍ਡਲਿਯਾ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਲਙ੍ਕਾਦੀਪੇ ¶ ਰੋਹਣਜਪਦੇ ਮਹਾਗਾਮੋ ਨਾਮ ਅਹੋਸਿ, ਤਤ੍ਥ ਤਿਸ੍ਸਵਿਹਾਰਂ ਨਾਮ ਅਨੇਕਸਤਭਿਕ੍ਖੂਹਿ ਸਮਾਕਿਣ੍ਣਂ ਅਨੇਕਪਰਿਵੇਣਪਤਿਮਣ੍ਡਿਤਂ ਵਿਹਾਰਂ ਅਹੋਸਿ. ਤਤ੍ਥੇਕੋ ਤਿਸ੍ਸੋ ਨਾਮ ਸਾਮਣੇਰੋ ਪਟਿਵਸਤਿ. ਸੋ ਏਕਸ੍ਮਿਂਸਮਯੇ ਜਨਪਦਚਾਰਿਕਂ ਚਰਨ੍ਤੋ ਪਾਸਾਣਵਾਪਿਗਾਮੇ ਭਿਕ੍ਖਂ ਚਰਿਤ੍ਵਾ ਯਾਪਨਮਤ੍ਤਂ ਭਤ੍ਤਂ ਸਪ੍ਪਿਨਾ ਸਦ੍ਧਿਂ ਲਭਿਤ੍ਵਾ ਨਿਕ੍ਖਮ੍ਮ ਗਾਮਦ੍ਵਾਰਂ ਪਤ੍ਵਾ ਮਹਾਗਾਮਾਭਿਮੁਖੋ ਗਚ੍ਛਨ੍ਤੋ ਮਨੁਸ੍ਸੇ ਉਦਕਫਾਸੁਕਟ੍ਠਾਨਂ ਪੁਚ੍ਛਿ. ਤੇਹਿ ਭਨ੍ਤੇ ਤੁਮ੍ਹਾਕਂ ਅਭਿਮੁਖੇ ਅਵਿਦੂਰਟ੍ਠਾਨੇ ਕਕੁਬਨ੍ਦਕਨ੍ਦਰਂ ਨਾਮ ਸਨ੍ਦਮਾਨਸੀਤਲੋਦਕਂ ਧਵਲਵਾਲੁਕਾਤਲਂ ਤਤ੍ਥ ਤੁਮ੍ਹੇ ਗਨ੍ਤ੍ਵਾ ਨਹਾਤ੍ਵਾ ਸੀਤਲਚ੍ਛਾਯਾਯ ਵਾਲੁਕਾਤਲੇ ਨਿਸਿਨ੍ਨੋ ਭਤ੍ਤਕਿਚ੍ਚਂ ਕਤ੍ਵਾ ਗਚ੍ਛਥਾਤਿ ਵੁਤ੍ਤੇ ਸਾਮਣੇਰੋ ¶ ਸਾਧੂਤਿ ਵਤ੍ਵਾ ਤਤ੍ਥ ਗਨ੍ਤ੍ਵਾ ਫਾਸੁਕਟ੍ਠਾਨੇ ਨਿਸਿਨ੍ਨੋ ਭਤ੍ਤਂ ਭੁਞ੍ਜਿਤੁਮਾਰਭਿ. ਤਦਾ ਏਕੇਨ ਵਨਕਮ੍ਮਿਕੇਨ ਸਦ੍ਧਿਂਅਰਞ੍ਞਂ ਗਤਾ ਏਕਾ ਸੁਨਖੀ ਤਸ੍ਮਿਂ ਕਨ੍ਦਰੇ ਏਕਸ੍ਮਿਂ ਪਬ੍ਭਾਰਟ੍ਠਾਨੇ ਦਾਰਕੇ ਵਿਜਾਯਿਤ੍ਵਾ ਛਾਤਜ੍ਝਤ੍ਤਾ ਪਵੇਧਮਾਨਗਤ੍ਤਾ ਦਾਰਕਾਨਂ ਸਮੀਪੇਨਿਪਨ੍ਨਾ ਸਾਮਣੇਰਸ੍ਸ ਪਤ੍ਤੇ ਆਹਾਰਗਨ੍ਧਂ ਘਾਯਿਤ੍ਵਾ ਨਿਪਨ੍ਨਟ੍ਠਾਨਤੋ ਵੁਟ੍ਠਾਯ ਪਵੇਧਮਾਨਾ ਤਸ੍ਸ ਸਮੀਪਂ ਆਗਮ੍ਮ ਨਙ੍ਗੁਟ੍ਠਂ ਚਾਲੇਨ੍ਤੀ ਅਟ੍ਠਾਸਿ, ਸਾਮਣੇਰੋ ਤਂ ਦਿਸ੍ਵਾ ਕਮ੍ਪਿਤਮਾਨਸੋ ਅਤ੍ਤਨੋ ਭੋਜਨਤ੍ਥਾਯ ਵਟ੍ਟਿਤਂ ਪਥਮਾਲੋਪਂ ਤਸ੍ਸਾ ਪੁਰਤੋ ਠਪੇਸਿ, ਤਤੋ ਸਾ ਸੋਮਨਸ੍ਸਾ ਤਂ ਭੁਞ੍ਜਿ. ਤਂ ਦਿਸ੍ਵਾ ਤੁਟ੍ਠੋ ਪੁਨਪ੍ਪੁਨਂ ਆਲੋਪਂ ਕਰੋਨ੍ਤੋ ਤਸ੍ਸਾ ਭਤ੍ਤਂ ਦਤ੍ਵਾ ਪਤ੍ਤਂ ਧੋਵਿਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਅਗਮਾਸਿ. ਤਤੋ ਸਾ ਸੁਨਖੀ ਸਾਮਣੇਰਗਤੇਨ ਪਸਾਦੇਨ ਤਤੋ ਚੁਤਾ ਜਮ੍ਬੁਦੀਪੇ ਦੇਵਪੁਤ੍ਤਨਗਰੇ ਰਾਜਾਨਂ ਪਟਿਚ੍ਚ ਤਸ੍ਸ ਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤ੍ਵਾ ਦਸਮਾਸਚ੍ਚਯੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿ, ਅਥਸ੍ਸਾ ਸਿਖਾਮਙ੍ਗਲਦਿਵਸੇ ਸਮ੍ਪਤ੍ਤੇ ਮਾਤਾਪਿਤਰੋ ਪਨਸ੍ਸਾ ਕੁਣ੍ਡਲਾਵਟ੍ਟਕੇਸਤ੍ਤਾ ਕੁਣ੍ਡਲਾਤਿ ਨਾਮ ਮਕਂਸੁ. ਸਾ ਅਨੁਕ੍ਕਮੇਨ ਸੋਲ਼ਸਵਸ੍ਸੁਦ੍ਦੇਸਿਕਾ ਅਹੋਸਿ, ਤਸ੍ਮਿਂ ਕਿਰ ਸਮਯੇ ਤਿਸ੍ਸੋ ਸਾਮਣੇਰੋ ਮਹਾਬੋਧਿਂ ਵਨ੍ਦਿਸ੍ਸਾਮੀਤਿ ਨਾਵਂ ਅਭਿਰੁਯ੍ਹ ਜਮ੍ਬੁਦੀਪਂ ਗਨ੍ਤ੍ਵਾ ਅਨੁਪੁਬ੍ਬੇਨ ਦੇਵਪੁਤ੍ਤਨਗਰਂ ਪਤ੍ਵਾ ਸੁਨਿਵਤ੍ਥੋ ਸੁਪਾਰੁਤੋ ਯੁਗਮਤ੍ਤਦਸੋ ਭਿਕ੍ਖਾਯ ਚਰਨ੍ਤੋ ਮਹਾਵੀਥਿਂ ਸਮ੍ਪਾਪੁਣਿ. ਰਾਜਧੀਤਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਅਨ੍ਤਰਵੀਥਿਂ ਓਲੋਕੇਨ੍ਤੀ ਭਿਕ੍ਖਨ੍ਤਂ ਸਾਮਣੇਰਂ ਦਿਸ੍ਵਾ ਪੁਬ੍ਬਸਿਨੇਹਂ ਪਟਿਲਭਿ, ਤਸ੍ਮਿਂਖਣੇ ਤਸ੍ਸਾ ਜਾਤਿਸ੍ਸਰਞਾਣਂ ਅਹੋਸਿ. ਸਾ ਕਿਰ ਪੁਬ੍ਬੇ ਭਿਕ੍ਖੁਣੀ ਹੁਤ੍ਵਾ ਪਣ੍ਣਸੂਚਿਯਾ ਸਦ੍ਧਿਂ ਪੋਤ੍ਥਕਞ੍ਚ ਪਦੀਪਿਯਤੇਲਞ੍ਚ ਦਤ੍ਵਾ ਜਾਤਿਸ੍ਸਰਾ ਭਵੇਯ੍ਯਂਤਿ ਪਤ੍ਥਨਂ ਠਪੇਸਿ, ਤਤੋ ਸਾਜਾਤਿਂ ਅਨੁਸ੍ਸਰਨ੍ਤੀ ਸਾਮਣੇਰੇਨ ਅਤ੍ਤਨੋ ਕਤੂਪਕਾਰਂ ਦਿਤ੍ਵਾ ਸੋਮਨਸ੍ਸਾ ਨਂ ਪਕ੍ਕੋਸਾਪੇਤ੍ਵਾ ਰਾਜਗੇਹੇ ਆਸਨਂ ਪਞ੍ਞਾਪੇਤ੍ਵਾ ਤਤ੍ਥ ਨਿਸਿਨ੍ਨਂ ਨਾਨਗ੍ਗਰਸ ਭੋਜਨੇਨ ਪਰਿਵਿਸਿਤ੍ਵਾ ਓਨੀਤਪਤ੍ਤਪਾਣਿਂ ਸਾਮਣੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਤੇਨ ਸਦ੍ਧਿਂ ਸਲ੍ਲਪਨ੍ਤੀ ਏਵਮਾਹ.

੧.

ਨ ਸਞ੍ਜਾਨਾਸਿ ਮਂ ਧੀਰ, ਪੁਬ੍ਬੇਹਂ ਤਵ ਦਾਸਿਕਾ;

ਤੇਨਾਹਂ ਸੁਖਿਤਾ ਆਸਿਂ, ਤਸ੍ਮਾ ਤ੍ਵਮਸਿ ਇਸ੍ਸਰੋਤਿ.

ਤਂ ਸੁਤ੍ਵਾ ਸਾਮਣੇਰੋ ਆਹ.

੨.

ਨਤ੍ਥਿ ਮੇ ਤਾਦਿਸੀ ਦਾਸੀ, ਨ ਸਞ੍ਜਾਨਾਮਿ ਤਂ ਅਹਂ;

ਕਾਸਿ ਤ੍ਵਂ ਕਸ੍ਸ ਵਾ ਧੀਤਾ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾਤਿ.

ਤਤੋ ਸਾ ਤਂ ਸਾਰਾਪੇਨ੍ਤੀ ਆਹ.

੩.

ਸਾਰਾਪੇਮਿ ਤੁਵਂ ਅਜ੍ਜ, ਯਥਾ ਜਾਨਾਸਿਮਂ ਇਸੇ;

ਬੁਜ੍ਝਸ੍ਸੁ ਬੋਧਿਤੋ ਦਾਨਿ, ਮਯਾ ਜਾਤਿਂਸਰਨ੍ਤਿਯਾ.

੪.

ਪਾਸਾਣਵਾਪਿਗਾਮਮ੍ਹਿ, ਤਮ੍ਬਪਣ੍ਣਿਮ੍ਹਿ ਰੋਹਣੇ;

ਭਿਕ੍ਖਿਤ੍ਵਾਨ ਤੁਵਂ ਭਨ੍ਤੇ, ਯਦਾ ਕਕੁਬਨ੍ਦਕਨ੍ਦਰੇ.

੫.

ਨਿਸੀਦਿਤ੍ਵਾਨ ਤ੍ਵਂ ਭਤ੍ਤਂ, ਭੁਤ੍ਤਕਾਲਂ ਸਰਿਸ੍ਸਸਿ;

ਤਦਾਹਂ ਸੁਨਖੀ ਆਸਿਂ, ਵਿਜਾਤਾ ਲਦ੍ਧਗੋਚਰਾ.

੬.

ਦਾਰਕੇ ¶ ਖਾਦਿਤੁਂ ਮਯ੍ਹ, ਮਾਸਨ੍ਨਾ ਖੁਦਪੀਲ਼ਿਤਾ;

ਪਵੇਧਮਾਨਸਬ੍ਬਙ੍ਗਾ, ਅਟ੍ਠਾਸਿਂ ਤਵ ਸਨ੍ਤਿਕੇ.

੭.

ਦਿਸ੍ਵਾ ਤਂ ਮਂ ਤਦਾ ਭਨ੍ਤੇ, ਵੇਧਮਾਨਂ ਬੁਭੁਕ੍ਖਿਤਂ;

ਛਿਨ੍ਨਭਤ੍ਤੋ ਤੁਵਂ ਹੁਤ੍ਵਾ, ਮਮਂ ਭਤ੍ਤੇਨ ਤੋਸਯੀ.

੮.

ਤਦਾਹਂ ਮੁਦੁਚਿਤ੍ਤੇਨ, ਚਿਤ੍ਤਂ ਤਯਿ ਪਸਾਦਯਿਂ;

ਤੇਨਾਹਂ ਪੁਞ੍ਞਕਮ੍ਮੇਨ, ਦੁਤਿਯੇ ਅਤ੍ਤਸਮ੍ਭਵੇ.

੯.

ਇਧ ਰਾਜਕੁਲੇ ਜਾਤਾ, ਸਬ੍ਬਕਾਮਸਮਿਦ੍ਧਿਨੀ;

ਚਿਤ੍ਤਪ੍ਪਸਾਦਮਤ੍ਤੇਨ, ਲੋਕਨਾਥਸ੍ਸ ਸਾਸਨੇ.

੧੦.

ਤਦਹੁਪਬ੍ਬਜਿਤਸ੍ਸਾਪਿ, ਈਦਿਸਾ ਹੋਨ੍ਤਿ ਸਮ੍ਪਦਾ;

ਕੀਦਿਸਂ ਹੋਤਿ ਸਮ੍ਬੁਦ੍ਧੇ, ਪਸਾਦੇਨ ਫਲਂ ਅਹੋ.

੧੧.

ਅਞ੍ਞਾਨਿ ਪਨ ਕਿਚ੍ਚਾਨਿ, ਪਹਾਯਾਤ੍ਤਹਿਤੇ ਰਤੋ;

ਅਤਨ੍ਦਿਤੋ ਦਿਵਾਰਤ੍ਤਿਂ, ਸਰਾਤੁ ਰਤਨਤ੍ਤਯਂਤਿ.

ਏਵਂ ਸਾਮਣੇਰੇਨ ਕਤੂਪਕਾਰਂ ਸਾਰਾਪੇਤ੍ਵਾ ਭਨ੍ਤੇ ਤਵ ਦਾਸਿਯਾ ਅਨੁਗ੍ਗਹਂ ਪਟਿਚ੍ਚ ਇਧੇਵ ਵਸਥਾਤਿ ਨਿਮਨ੍ਤਿਤ੍ਵਾ ਤੇਨ ਸਮ੍ਪਟਿਚ੍ਛਿਤੇ ਮਹਨ੍ਤਂ ਵਿਹਾਰਂ ਕਾਰਾਪੇਤ੍ਵਾ ਸਾਮਣੇਰਂ ਆਦਿਂ ਕਤ੍ਵਾ ਅਨੇਕਭਿਕ੍ਖੁਸਤੇ ਨਿਮਨ੍ਤੇਤ੍ਵਾ ਵਿਹਾਰੇ ਵਸਾਪੇਤ੍ਵਾ ਸੁਲਭਂ ਕਤ੍ਵਾ ਚਤੁਪਚ੍ਚਯੇਹਿ ਉਪਟ੍ਠਾਸਿ. ਸਾਮਣੇਰੋਪਿ ਸੁਨਖਿਯਾ ਦਿਨ੍ਨਦਾਨਂ ਅਨੁਸ੍ਸਰਿਤ੍ਵਾ ਤੁਟ੍ਠੋ ਬੁਦ੍ਧਾਨੁਸ੍ਸਤਿਂ ਮਨਸਿਕਰੋਨ੍ਤੋ ਨ ਚਿਰੇਨਵ ਅਰਹਤ੍ਤਂ ਪਤ੍ਵਾ ਤਸ੍ਮਿਂਯੇਵ ਵਿਹਾਰੇ ਵਸਨ੍ਤੋ ਆਯੁਪਰਿਯੋਸਾਨੇ ਤਤ੍ਥੇਵ ਪਰਿਨਿਬ੍ਬਾਯੀਤਿ.

੧੨.

ਤਿਯਦ੍ਧੇਸੁ ਤਿਲੋਕਸ੍ਮਿਂ, ਨਤ੍ਥਿ ਵਤ੍ਥੁਤ੍ਤਯਂ ਵਿਨਾ;

ਸਤ੍ਤਾਨ ਮਞ੍ਞ ਮਿਚ੍ਛਤ੍ਥ, ਦਾਯਕਂ ਸੁਰਪਾਦਪਂ.

ਕੁਣ੍ਡਲਿਯਾ ਵਤ੍ਥੁਂ ਦਸਮਂ.

ਮਹਾਸੇਨਵਗ੍ਗੋ ਚਤੁਤ੍ਥੋ.

ਏਤ੍ਤਾਵਤਾ ਜਮ੍ਬੁਦੀਪੁਪ੍ਪਤ੍ਤਿਕਥਾ ਸਮਤ੍ਤਾ.