📜

ਥੁਪਵਂਸੋ ¶

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਯਸ੍ਮਿਂ ਸਯਿਂਸੁ ਜਿਨਧਾਤੁਵਰਾ ਸਮਨ੍ਤਾ

ਛਬ੍ਬਣ੍ਣ ਰਂਸਿ ਵਿਸਰੇਹਿ ਸਮੁਜ੍ਜਲਨ੍ਤਾ,

ਨਿਮ੍ਮਾਯ ਲੋਕਹਿਤਹੇਤੁ ਜਿਨਸ੍ਸ ਰੂਪਂ

ਤਂ ਥੁਪਮਬ੍ਭੁਤ ਤਮਂ ਸਿਰਸਾ ਨਮਿਤ੍ਵਾ;

ਚਕ੍ਖਾਮਹਂ ਸਕਲ ਲੋਕ ਹਿਤਾਵਹਸ੍ਸ

ਥੁਪਸ੍ਸ ਸਬ੍ਬ ਜਨ ਨਣ੍ਦਨ ਕਾਰਣਸ੍ਸ,

ਵਂਸਂ ਸੁਰਾਸੁਰ ਨਰਿਣ੍ਦਵਰੇਹਿ ਨਿਚ੍ਚਂ

ਸਮ੍ਪੂਜਿਤਸ੍ਸ ਰਤਨੁਜ੍ਜਲ ਥੂਪਿਕਸ੍ਸ;

ਕਿਞ੍ਚਾਪਿ ਸੋ ਯਤਿਜਨੇਨ ਪੁਰਾਤਨੇਨ

ਅਤ੍ਵਾਯ ਸੀਹਲ਼ਜਨਸ੍ਸ ਕਤੋ ਪੁਰਾਪਿ,

ਵਾਕ੍ਕੇਨ ਸਿਹਲ਼ਭਵੇਨ’ਭਿਸਙ੍ਖਮਤ੍ਤਾ

ਅਤ੍ਥਂ ਨ ਸਾਧਹਤਿ ਸਬ੍ਬਜਨਸ੍ਸ ਸਮ੍ਮਾ;

ਯਸ੍ਮਾ ਚ ਮਾਗਧ ਨਿਰੁਤ੍ਤਿਕਤੋਪਿ ਥੂਪ-

ਵਂਸੋ ਵਿਰੁਦ੍ਧਨਯ ਸਦ੍ਦ ਸਮਾਕੁਲੋ ਸੋ,

ਵਤ੍ਤਬ੍ਬਮੇਵ ਚ ਬਹੁਮ੍ਪਿ ਯਤੋ ਨ ਵੁਤ੍ਤਂ

ਤਮ੍ਹਾ ਅਹਂ ਪੁਨਪਿ ਵਂਸਮਿ’ਮਂ ਵਦਾਮਿ;

ਸੁਣਾਥ ਸਾਧਵੋ ਸਬ੍ਬੇ ਪਰਿਪੁਣ੍ਣਮਨਾਕੁਲਂ

ਵੁਚ੍ਚਮਾਨਂ ਮਯਾ ਸਾਧੁ ਵਂਸਂ ਥੂਪਸ੍ਸ ਸਤ੍ਥੁਨੋਤਿ;

ਤਤ੍ਥ ਥੂਪਸ੍ਸ ਵਂਸਂ ਵਕ੍ਖਾਮੀਤਿ ਏਤ੍ਥ ਤਥਾਗਤੋ ਅਰਹਂ ਸਮ੍ਮਾ ਸਮ੍ਬੁਦ੍ਧੋ ਥੂਪਾਰਹੋ, ਪਚ੍ਚੇਕਬੁਦ੍ਧੋ ਥੂਪਾਰਹੋ, ਤਥਾਗਤਸ੍ਸ ਸਾਵਕੋ ਥੂਪਾਰਹੋ, ਰਾਜਾ ਚਕ੍ਕਵਤ੍ਤਿ ਥੂਪਾਰਹੋਤਿ ਵਚਨਤੋ ਥੂਪਾਰਹਾਨਂ ਬੁਦ੍ਧਾਦੀਨਂ ਧਾਤੁਯੋ ਪਤਿਟ੍ਠਾਪੇਤ੍ਵਾ ਕਤ ਚੇਤਿਯਂ ਅਬ੍ਭੁਨਨ ਤਟ੍ਠੇਨ ¶ ਥੂਪੋਤਿ ਵੁਚ੍ਚਤਿ, ਇਧ ਪਨ ਕਞ੍ਚਨ ਮਾਲਿਕ ਮਹਾਥੂਪੋ ਅਧਿਪ੍ਪੇਤੋ, ਸੋ ਕਸ੍ਸ ਧਾਤੁਯੋ ਪਤਿਟ੍ਠਾਪੇਤ੍ਵਾ ਕਤੋਤਿ ਚੇ? ਯੋਦੀਪਙ੍ਕਰਾਦੀਨਂ ਚਤੁਵੀਸਤਿਯਾ ਬੁਦ੍ਧਾਨਂ ਸਨ੍ਤਿਕੇ ਲਦ੍ਧਵ੍ਯਾਕਰਣੋ ਸਮਤਿਂਸਪਾਰਮਿਯੋ ਪੂਰੇਤ੍ਵਾ ਪਰਮਾਭਿਸਮ੍ਬੋਧਿਂ ਪਤ੍ਵਾ ਧਮ੍ਮਚਕ੍ਕਪ੍ਪਵਤ੍ਤਨਤੋ ਪਟ੍ਠਾਯ ਯਾਵ ਸੁਹਦ੍ਦ ਪਰਿਬ੍ਬਾਜਕ ਵਿਨਯਾਨ ਸਬ੍ਬ ਬੁਦ੍ਧਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਅਨੁਪਾਦਿਯੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾ ਸਮ੍ਬੁਦ੍ਧਸ੍ਸ ਧਾਤੁਯੋ ਪਤਿਟ੍ਠਾਪੇਤ੍ਵਾ ਕਤੋ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵੇਦਿਤਬ੍ਬੋ?

੨. ਇਤੋ ਕਿਰ ਕਪ੍ਪਸਤਸਹਸ੍ਸਾਧਿਕਾਨਂ ਚਤੁਨ੍ਨਂ ਅਸਙ੍ਖੇਯ੍ਯਾਨਂ ਮਤ੍ਥਕੇ ਅਮਰਵਤੀ ਨਾਮ ਨਗਰਂ ਅਹੋਸਿ. ਤਤ੍ਥ ਸੁਮੇਧੋ ਨਾਮ ਬ੍ਰਾਹ੍ਮਣੋ ਪਟਿਵਸਤਿ. ਸੋ ਅਞ੍ਞਂ ਕਮ੍ਮਂ ਅਕਤ੍ਵਾ ਬ੍ਰਹ੍ਮਣਸਿਪ੍ਪਮੇਵ ਉਗ੍ਗਣ੍ਹਿ ਤਸ੍ਸ ਦਹਰਕਾਲੇਯੇਵ ਮਾਤਾਪਿਤਰੋ ਕਾਲਮਕਂਸੁ. ਅਥਸ੍ਸ ਰਾਸਿਵਡ੍ਢਨਕੋ ਅਮਚ੍ਚੋ ਆਯ ਪੋਤ੍ਥਕਂ ਆਹਰਿਤ੍ਵਾ ਸੁਵਣ੍ਣ ਰਜਤ ਮਣਿਮੁਤ੍ਤਾਦਿ ਭਰਿਤੇ ਗਬ੍ਭੇ ਵਿਵਰਿਤ੍ਵਾ ਏਤ੍ਤਕਂ ਤੇ ਕੁਮਾਰ ਮਾਤੁ ਸਨ੍ਤਕਂ, ਏਤ੍ਤਕਂ ਪਿਤੁਸਨ੍ਤਕਂ, ਏਤ੍ਤਕਂ ਅਯ੍ਯਕ ਪਯ੍ਯਕਾਨਨ੍ਤਿ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਧਕਂ ਆਚਿਕ੍ਖਿਤ੍ਵਾ ਏਤਮ੍ਪਟਿਜਗ੍ਗਾਹੀਤਿ ਆਹ. ਸੋ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਅਗਾਰਂ ਅਜ੍ਝਾਵਸਨ੍ਤੋ ਏਕਦਿਵਸਂ ਚਿਨ੍ਤੇਸਿ.

੩. ਪੁਨਬ੍ਭਵੇ ਪਟਿਸਣ੍ਧਿਗਹਣਂ ਤਾਮ ਦੁਕ੍ਖਂ, ਤਥਾ ਨਿਬ੍ਬਤ੍ਤ ਨਿਬ੍ਬਤ੍ਤਟ੍ਠਾਨੇ ਸਰੀਰਭੇਦਨਂ ਅਹਞ੍ਚ ਜਾਨਿਧਮ੍ਮੋ ਜਰਾਧਮ੍ਮੋ ਵ੍ਯਾਧਿਧਮ੍ਮੋ ਮਰਣਧਮ੍ਮੋ. ਏਵਂ ਭੂਤੇਨ ਮਯਾ ਅਜਾਤਿ ਅਜਰਂ ਅਵ੍ਯਾਧਿਂ ਅਮਰਣਂ ਸੁਖਂ ਸੀਤਲਂ ਨਿਬ੍ਬਾਨਂ ਗਵੇਸਿਤੁਂ ਵਟ੍ਟਤੀਤਿ ਨੇਕ੍ਖਮ੍ਮਕਾਰਣਂ ਚਿਨ੍ਤੇਤ੍ਵਾ ਪੁਨ ਚਿਨ੍ਤੇਸਿ ਇਮਂ ਧਨਂ ਸਬ੍ਬਂ ਮਯ੍ਹਂ ਪਿਤੁ ਪਿਤਾਮਹਾਦਯੋ ਪਰਲੋਕਂ ਗਚ੍ਛਨ੍ਤਾ ਏਕ ਕਹਾਪਣਮ੍ਪਿ ਗਹੇਤ੍ਵਾ ਨਗਤਾ ਮਯਾ ਪਨ ਗਹੇਤ੍ਵਾ ਗਮਨਕਾਰਣਂ ਕਾਤੁਂ ਵਟ੍ਟਤੀਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਮਹਾਜਨਸ੍ਸ ਦਾਨਂ ਦਤ੍ਵਾ ਹਿਮਵਨ੍ਤਸ੍ਸ ਪਵਿਸਿਤ੍ਵਾ ਤਾਪਸ ਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਤ੍ਤਾਹਬ੍ਭਨ੍ਤਰੇਯੇਵ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵ ਸਮਾਪਤ੍ਤਿਸੁਖੇਨ ਵੀਤਿਨਾਮੇਸਿ.

ਤਦਾ ਦੀਪਙ੍ਕਰੋ ਨਾਮ ਸਤ੍ਥਾ ਪਰਯਾਭਿਸਮ੍ਬੋਧਿਂ ਪਤ੍ਵਾ ਸਤ੍ਤ ਸਤ੍ਤਾਹਂ ਬੋਧਿਸਮੀਪੇਚੇਵ ਵਿਤਿਨਾਮੇਤ੍ਵਾ ਸੁਨਣ੍ਦਾਰਾਮੇ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਕੋਟਿਸਤ੍ਤਾਨਂ ਦੇਵਮਨੁਸ੍ਸਾਨਂ ਧਮ੍ਮਮਤਂ ਪਾਯੇਤ੍ਵਾ ਚਾਤੁਦ੍ਦੀਪਿਕ ਮਹਾਮੇਘੋ ਵਿਯ ਧਮ੍ਮਵਸ੍ਸਂ ਵਸ੍ਸੇਨ੍ਤੋ ਚਤੂਹਿ ਖੀਣਾਸਯ ਸਤਸਹਸ੍ਸੇਹਿ ਪਰਿਵੁਤੋ ਅਨੁਪੁਬ੍ਬੇਨ ਚਾਰਕਂ ਚਰਮਾਨੋ ਰਮ੍ਮ ਨਗਰਂ ਪਤ੍ਵਾ ਸੁਦਸ੍ਸਨ ਮਹਾਵਿਹਾਰੇ ਪਟਿਵਸਤਿ ਤਦਾ ਰਮ੍ਮਨਗਰਵਾਸਿਨੋ ਸਪ੍ਪਿ ਫਣਿਤਾਦੀਨਿ ਭੇਸਜ੍ਜਾਨਿ ਗਹੇਤ੍ਵਾ ਪੁਪ੍ਫ ਧੂਪ ਗਣ੍ਧਹਤ੍ਥਾ ਯੇਨ ਬੁਦ੍ਧੋ ਤੇਨਪਸਙ੍ਕਮਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਪੁਪ੍ਫਾਦੀਹਿ ਪੂਜੇਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਧਮ੍ਮਂ ਸੁਤ੍ਵਾ ਸ੍ਵਾਤਨਾਯ ਭਗਵਨ੍ਤਂ ਨਿਮਨ੍ਤੇਤ੍ਵਾ ਉਟ੍ਠਾਯਾਸਨਾ ਦਸਬਲਂ ਪਦਕ੍ਖੀਨਂ ਕਤ੍ਵਾ ਪਕ੍ਕਮਿਂਸੁ.

ਤੇ ¶ ਪੁਨ ਦਿਵਸੇ ਅਸਦਿਸ ਮਹਾਦਾਨਂ ਸਜ੍ਜੇਤ੍ਵਾ ਦਸਬਲਸ੍ਸ ਆਗਮਨ ਮਗ੍ਗਂ ਸੋਧੇਨ੍ਤਿ. ਤਸ੍ਮਿਂ ਕਾਲੇ ਸੁਮੇਧਤਾਪਸੋ ਅਤ੍ਤਨੋ ਅਸ੍ਸਮ ਪਦਤੋ ਉਗ੍ਗਨ੍ਤ੍ਵਾ ਰਮ੍ਮਨਗਰਵਾਸੀਨਂ ਤੇਸਂ ਮਨੁਸ੍ਸਾਨਂ ਉਪਰਿਭਾਗੇਨ ਆਕਾਸੇਨ ਗਚ੍ਛਨ੍ਤਾ ਤੇ ਹਟ੍ਠਪਹਟ੍ਠੇ ਮਗ੍ਗਂ ਸੋਧੇਨ੍ਤੇ ਦਿਸ੍ਵਾ ਕਿਨ੍ਨੁ ਖੋ ਕਾਰਣਨ੍ਤਿ ਚਿਨ੍ਤੇਨ੍ਤੋ ਸਬ੍ਬੇਸਂ ਪਸ੍ਸਨ੍ਤਾਨਂਯੇਵ ਆਕਾਸਤੋ ਓਰੁ ਏਕਮਨ੍ਤੇ ਠਤ੍ਥਾਯਹ ਤੇ ਮਨੁਸ੍ਸੇ ਪੁਚ੍ਛਿ.’ਹਮ੍ਭੋ ਕਸ੍ਸ ਪਨ ਇਮਂ ਮਗ੍ਗਂ ਸੋਧੇਥਾ’ਤਿ ਤੇ ਆਹਂਸੁ ਭਨ੍ਤੇ ਸੁਮੇਧ ਤੁਮ੍ਹੇ ਕਿਂ ਨਂ ਜਾਨਾਥ, ਦੀਪਙ੍ਕਰੋ ਨਾਮ ਸਤ੍ਥਾ ਪਰਮਾਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਵਰ ਧਮ੍ਮਚਕ੍ਕੋ ਜਨਪਦ ਚਾਰਿਕਂ ਚਰਮਾਨੋ ਅਨੁਕ੍ਕਮੇਨ ਅਮ੍ਹਾਕਂ ਨਗਰਂ ਪਤ੍ਵਾ ਸੁਦਸ੍ਸਨ ਮਹਾਵਿਹਾਰੇ ਪਟਿਵਸਤਿ. ਮਯਂ ਤਂ ਭਗਵਨ੍ਤਂ ਨਿਮਨ੍ਤਯਿਮ੍ਹ ਤਸ੍ਸ ਭਗਵਤੋ ਆਗਮਨਮਗ੍ਗਂ ਸੋਧੇਮਾਤਿ. ਤਂ ਸੁਤ੍ਵਾ ਸੁਮੇਧਪਣ੍ਡਿਤੋ ਚਿਨ੍ਤੇਸਿ. ਬੁਦ੍ਧੋਤਿ ਖੋ ਪਨੇਸ ਘੋਸੋਪਿ ਦੁਲ੍ਲਭੋ, ਪਗੇਵ ਬੁਦ੍ਧੁਪ੍ਪਾਦੋ ਤੇਨ ਹਿ ਮਯਾਪਿ ਇਮੇਹਿ ਮਨੁਸ੍ਸੇਹਿ ਸਦ੍ਧਿਂ ਦਸਬਲਸ੍ਸ ਆਗਮਨਮਗ੍ਗਂ ਸੋਧੇਤੁਂ ਵਟ੍ਟਤੀਤਿ ਸੋ ਤੇ ਮਨੁਸ੍ਸੇ ਆਹ, ਸਚੇ ਭੋ ਤੁਮ੍ਹੇ ਇਮਂ ਮਗ੍ਗ ਬੁਦ੍ਧਸ੍ਸ ਸੋਧੇਥ - ਸਯਹਮ੍ਪਿ ਏਕਂ ਓਕਾਸਂ ਸਮ੍ਪਟਿਚ੍ਛਤ੍ਵਾ ਅਯਂ ਸੁਮੇਧਪਣ੍ਡਿਤੋ ਮਹਿਦ੍ਧਿਕੋ ਮਹਾਨੁਭਾਵੋਤਿ ਜਾਨਨ੍ਤਾ ਦੁਬ੍ਬਿਸੋਧਨਂ ਉਦਕਸਮ੍ਭਿਨ੍ਨਂ ਅਤਿਵਿਸਮਂ ਏਕਂ ਓਕਾਸਂ ਸਲ੍ਲਕ੍ਖੇਤ੍ਵਾ ਇਮਂ ਹਕਾਸਂ ਤੁਮ੍ਹੇ ਸੋਧੇਥ. ਅਲਙ੍ਕਰੋਥਾਤਿ ਅਦਂਸੁ.

ਸੁਮੇਧਪਣ੍ਡਿਤੋ ਬੁਦ੍ਧਾਰਮ੍ਮਣ ਪੀਤਿਂ ਉਪ੍ਪਾਦੇਤ੍ਵਾ ਚਿਨ੍ਤੇਸਿ. ਅਹਮ੍ਪਨਿਮਂ ਓਕਾਸਂ ਇਦ੍ਧੀਯਾ ਪਰਮਦਸ੍ਸਨੀਯ ਕਾਤੁਂ ਪਹੋਮਿ ਏਵਂ ਕਤੋ ਪਨ ਮਂ ਨ ਪਰਿਤੋਸੇਤਿ ਅਜ੍ਜ ਪਨ ਮਯਾ ਕਾਯਵੇਯ੍ਯਾਵਚ੍ਚਂ ਕਾਤੁਂ ਵਟ੍ਟਤਿਤਿ ਪਂਸੁਂ ਆਹਰਿਤ੍ਵਾ ਤਂ ਪਹੇਸਂ ਪੂਰੇਨਿ, ਤਸ੍ਸ ਪਨ ਤਸ੍ਮਿਂ ਪਦੇਸੇ ਅਸੋਧਿਤੇ ਜਯਸੁਮਨ ਕੁਸੁਮ ਸਦਿਸਿ ਵਣ੍ਣਂ ਦੁਪਟ੍ਟਚੀਵਰਂ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਨਿਵਾਸੇਤ੍ਵਾ ਤਸ੍ਸੁਪਰਿ ਯੁਣ੍ਣਮਾਪਙ੍ਗੇਨ ਕੁਸੁਮਕਲਾਪਂ ਪਰਕ੍ਖਿਪਨ੍ਤੋ ਵਿਯ ਵਿਜ੍ਜੁਲ੍ਲਤਾ ਸਸ੍ਸੀਰੀਕਂ ਕਾਯਬਣ੍ਧਨਂ ਬਣ੍ਧਿਤ੍ਵਾ ਕਨਕ ਗਿਰਿਸਿਖਰ ਮਤ੍ਥਕੇ ਲਾਖਾਰਸਂ ਪਰਿਸਿਞ੍ਚਨ੍ਤੇ ਵਿਯ ਸੁਵਣ੍ਣਚੇਤਿਯਂ ਪਵਾਲ਼ਜਾਲੇਨ ਪਰਿਕ੍ਖਿਪਨ੍ਤੋ ਵਿਯ ਸੁਵਣ੍ਣਙ੍ਘਕਂ ਰਤ੍ਤਕਮ੍ਬਲੇਨ ਪਟਿਮੁਞ੍ਚਨ੍ਤੋ ਵਿਯ ਸਰਦ ਸਮਯ ਰਜਨਿਕਰਂ ਰਤ੍ਤਵਲਾਹਕੇਨ ਪਟਿਚ੍ਛਾਦੇਨ੍ਤੋ ਵਿਯ ਚ ਲਾਖਾਰਸੇਨ ਤਿਨ੍ਨ ਕਿਂ ਸੁਕਕ੍ਸੁਮਵਣ੍ਣਂ ਰਤ੍ਤਵਰ ਪਸੁਕੂਲ ਚੀਵਰਂ ਪਾਰਿਪਿਤ੍ਵਾ ਗਣ੍ਧਕੂਗਿਦ੍ਵ ਰਤੋ ਕਨਕਗੁਹਾਤੋ ਸੀਹੋ ਵਿਯ ਨਿਕ੍ਖਮਿਤ੍ਵਾ ਜਲ਼ਭਿਞ੍ਞਾਨਂਯੇਵ ਚਤੂਹਿ ਖੀਣਾਸਵ ਸਤਸਹਸ੍ਸੇਹਿ ਪਰਿਵੁਤੋ ਅਮਰਗਣ ਪਰਿਵੁਤੋ ਦਸਸਤਨਯਨੋ ਵਿਯ ਬ੍ਰਹ੍ਮਗਣਪਰਿਵੁਤੋ ਮਹਾ ਬ੍ਰਹ੍ਮਾ ਵਿਯ ਚ ਅਪਰਿਮਿਤ ਸਮਯ ਸਮੁਪਚਿਤਾਯ ਕੁਸਲਬਲਜਨਿਤਾਯ ਅਨੋਪਮਯਾ ਬੁਦ੍ਧਲੀਲਾਯ ਤਾਰਾਗਣਪਰਿਵੁਤੋ ¶ ਸਰਦ ਸਮਯ ਰਜਨਿਕਰੋ ਵਿਯ ਗਗਨਤਲਂ ਅਲਙ੍ਗਤ ਪਟਿਯਤ੍ਤਂ ਮਗ੍ਗਂ ਪਟਿਪਜ੍ਜਿ.

੫. ਸੁਮੇਧਤਾਪਸੋਪਿ ਤੇਨ ਅਲਙ੍ਕਤ ਪਟਿਯਤ੍ਤੇਨ ਮਗ੍ਗੇਨ ਆਗਚ੍ਛਨ੍ਤਸ੍ਸ ਦੀਪਙ੍ਕਰਸ੍ਸ ਭਗਵਤੋ ਦ੍ਵਤ੍ਤਿਂਸ ਵਰਲਕ੍ਖਣ ਪਤਿਮਣ੍ਡਿਤਂ ਅਸਤਿਯਾ ਅਨੁਬ੍ਯਞ੍ਜਨੇਹਿ ਅਨੁਬ੍ਯਞ੍ਜਿਤਂ ਬ੍ਯਾਮਪ੍ਪਹਾਪਰਿਕ੍ਖੇਪ ਸਸ੍ਸੀਰੀਕਂ ਇਣ੍ਦਨੀਲਮਣਿਸਂਕਾਸੋਆਕਾਸੇ ਨਾਨਪ੍ਪਕਾਰਾ ਵਿਜ੍ਜੁਲ੍ਲਤਾ ਵਿਯ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਨ੍ਤਂ ਰੂਪਗ੍ਗਪ੍ਪਤ੍ਤਂ ਅਤ੍ਤਭਾਵਂ ਓਲੋਕੇਤ੍ਵਾ ਅਜ੍ਜ ਮਯਾ ਦਸਬਲਸ੍ਸ ਜੀਵਿਤਪਰਿਚ੍ਚਾਗਂ ਕਾਤੁਂ ਵਟ੍ਟਤਿ ਮਾ ਭਗਵਾ ਕਲਲੇ ਅਕ੍ਕਮਿ ਮਣਿਮਯਂ ਲਕਸੇਤੁਂ ਅਕ੍ਕਮਨ੍ਤੋ ਵਿਯ ਸਦ੍ਧਿਂ ਚਤੂਹਿ ਖੀਣਾਸਵ ਸਤਸਹਸ੍ਸੇਹਿ ਮਮ ਪਿਟ੍ਠਿਂ ਅਕ੍ਕਮਨ੍ਤੋ ਗਚ੍ਛਤੁ ਤਂ ਮੇ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾਤਿ ਕੇਸੇ ਮੋਚੇਤ੍ਵਾ ਅਜਿਨਜਟਾ ਵਾਕਚੀਰਾਨਿ ਕਲੇਲ ਪਤ੍ਥਰਿਤ੍ਵਾ ਤਤ੍ਥੇਵ ਕਲਲਪਿਟ੍ਠੇ ਨਿਪਜ੍ਜਿ ਨਿਪਨ੍ਨੋ ਚ ਸਚੇ ਅਹਂ ਇਚ੍ਛੇਯ੍ਯਂ ਸਬ੍ਬਕਿਲੇਸੇ ਝਾਪੇਤ੍ਵਾ ਸਙ੍ਘਨਵਕੋ ਹੁਤ੍ਵਾ ਰਮ੍ਮਨਗਰਂ ਪਵਿਸੇਯ੍ਯਂ ਅਞ੍ਞਾਤਕਵੇਸੇਨ ਪਨ ਮੇ ਕਿਲੇਸੇ ਣ੍ਧਪੇਤ੍ਵਾ ਨਿਬ੍ਬਾਨਪਤ੍ਤਿਯਾ ਕਿਚ੍ਚਂ ਨਤ੍ਥਿ, ਯਂਨੂਨਾਹਂ ਦੀਪਙ੍ਕਰ ਦਸਬਲੋ ਵਿਯ ਪਰਮਾਭਿਸਮ੍ਬੋਧਿਂ ਪਤ੍ਵਾ ਧਮ੍ਮਨਾਵਂ ਆਰੋਪੇਤ੍ਵਾ ਮਹਾਜਨਂ ਸਂਸਾਰਸਾਗਰਾ ਉਤ੍ਤਾਰੇਤ੍ਵਾ ਪਚ੍ਛਾ ਪਰਿਨਿਬ੍ਬਾਯੇਯ੍ਯਂ. ਇਦਂ ਮੇ ਪਤਿਰੁਪਨ੍ਤਿ ਚਿਨ੍ਤੇਤ੍ਵਾ ਅਟ੍ਠਧਮ੍ਮੇ ਸਮੋਧਾਨੇਤ੍ਵਾ ਬੁਦ੍ਧਭਾਵਾਯ ਅਭਿਨੀਹਾਰਂ ਕਤ੍ਵਾ ਨਿਪਜ੍ਜ.

ਦੀਪਙ੍ਕਰੋਪਿ ਭਗਵਾ ਆਗਤ੍ਤ੍ਵਾ ਸੁਮੇਧਪਣ੍ਡਿਤਸ੍ਸ ਸੀਸਸਾਗੇ ਠਤ੍ਵਾ ਕਲਲਪਿਟ੍ਠੇ ਨਿਪਨ੍ਨਂ ਤਾਪਸਂ ਦਿਸ੍ਵਾ ਅਯਂ ਤਾਪਸੋ ਬੁਦ੍ਧਤ੍ਥਾਯ ਅਭਿਨੀਹਾਰਂ ਕਤ੍ਵਾ ਨਿਪਨ੍ਤੋ, ਇਜ੍ਝਿਸ੍ਸਤਿ ਨੁ ਖੋ ਏਤਸ੍ਸ ਪਤ੍ਥਨਾ ਉਦਾਹੁ ਨੋਤਿ ਉਪਧਾਰੇਨ੍ਤੋ - ਅਨਾਗਤੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀਤਿ ਞਤ੍ਵਾ ਠਿਤਕੋਵ ਪਰਿਸ ਮਜ੍ਝੇ ਵ੍ਯਾਕਾਸਿ, ਪਸ੍ਸਥ ਨੋ ਤੁਮ੍ਹੇ ਭਿਕ੍ਖਵੇ ਇਮਂ ਉਗ੍ਗਤਪਂ ਤਾਪਸਂ ਕਲਲਪਿਟ੍ਠੇ ਨਿਪਨ੍ਨਨ੍ਤਿ. ਏਵਂ ਭਨ੍ਤੇ, ਅਯਂ ਯਿਦ੍ਧਤ੍ਥਾਯ ਅਭਿਨੀਹਾਰਂ ਕਤ੍ਵਾ ਨਿਪਨ੍ਨੋ ਸਮਿਜ੍ਝਿਸ੍ਸਤਿ ਇਮਸ੍ਸ ਪਤ੍ਥਤਾ ਕਪ੍ਪਸਤ ਸਹਸ੍ਸਾਧਿਕਾਨਂ ਚਤੁਨ੍ਤਂ ਅਸਙ੍ਖੇਯ੍ਯਾਨਂ ਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀਤਿ ਸਬ੍ਬਂ ਵ੍ਯਾਕਾਸਿ.

ਵੁਤ੍ਤਞ੍ਹੇਤਂ ਬੁਦ੍ਧਵਂਸੇ.

ਦੀਪਙ੍ਕਰੋ ਲੋਕਵਿਦੂ - ਆਹੁਤੀਨਂ ਪਟਿਗ੍ਗਹੋ,

ਉਸ੍ਸੀਸਕੇ ਮਂ ਠਤ੍ਵਾਨ - ਇਦਂ ਵਚਨਮਬ੍ਰਵਿ;

ਪਸ੍ਸਥ ਇਮਂ ਤਾਪਸਂ - ਜਟਿਲ ਉਗ੍ਗਤਾਪਸਂ ਅਪਰਿਮੇਯ੍ਯੇ ਇਤੋ ਕਪ੍ਪੇ - ਅਯਂ ਬੁਦ੍ਧੋ ਭਵਿਸ੍ਸਤਿ. ਅਹੁ ਕਪਿਲਵਹਯਾ ਰਮ੍ਮਾ - ਨਿਕ੍ਖਮਿਤ੍ਵਾ ਤਥਾਗਤੋ. ਪਧਾਨਂ ਪਦਹਿਤ੍ਵਾਨ - ਕਤ੍ਵਾ ਦੁਕ੍ਕਰ ਕਾਰਿਕਂ

ਬੁਦ੍ਧੇ ਲੋਕੇ - ਕੇਚਿ.

ਅਜਪਾਲ ¶ ਰੁਕ੍ਖਮੂਲਸ੍ਮਿਂ - ਨਿਸੀਦਿਤ੍ਵਾ ਤਥਾਗਤੋ,

ਤਤ੍ਥ ਪਾਯਾਸਮਗ੍ਗਯ੍ਹ - ਨੇਰਞ੍ਜਰਮੁਪੇਹੇਤਿ;

ਨੇਰਞ੍ਜਰਾਯ ਤੀਰਮ੍ਹਿ - ਪਾਯਾਸਾਦਾਯ ਸੋ ਜਿਨੋ,

ਪਟਿਯਤ੍ਤਵਰਮਗ੍ਗੇਨ - ਬੋਧਿਮੂਲਞ੍ਹਿ ਏਹੀਤਿ;

ਤਤੋ ਪਦਕ੍ਖਿਣਂ ਕਤ੍ਵਾ - ਬੋਧਿਮਣ੍ਡਂ ਅਨੁਤ੍ਤਰੋ

ਅਸ੍ਸਤ੍ਥਰਾਕ੍ਖਮੂਲਮ੍ਹਿ - ਵੁਜ੍ਝਿਸ੍ਸਤਿ ਮਹਾਯਸੋ;

ਇਮਸ੍ਸਜਨਿਕਾ ਮਾਤਾ - ਮਾਯਾ ਨਾਮ ਭਵਿਸ੍ਸਤਿ, ਪਿਤਾ ਸੁਦ੍ਧੋਦਨੋ ਨਾਮ - ਅਯਂ ਹੇਸ੍ਸਤਿ ਗੋਤਮੋ. ਅਨਾਸਵਾ ਵੀਤਰਾਗਾ - ਸਨ੍ਤਚਿਤ੍ਤਾ ਸਮਾਹਿਤਾ,

ਕੋਲਿਤੋ ਉਪਤਿਸ੍ਸੋ ਚ - ਅਗ੍ਗਾ ਹੇਸ੍ਸਨ੍ਤਿ ਸਾਵਕਾ;

ਆਨਣ੍ਦੋ ਨਾਮੁਪਟ੍ਠਾਕੋ - ਉਪਟ੍ਠਿਸ੍ਸਤੀ’ਮਂ ਜਿਨਂ;

ਖੇਮਾ ਉਪ੍ਪਲਵਣ੍ਣਾ ਚ - ਅਗ੍ਗਾ ਹੇਸ੍ਸਨ੍ਤਿ ਸਾਵਿਕਾ;

ਅਨਾਸਵਾ ਵੀਤਰਾਗਾ - ਸਨ੍ਤਚਿਤ੍ਤਾ ਸਮਾਹਿਤਾ;

ਬੋਧਿ ਤਸ੍ਸ ਭਗਵਤੋ ਅਸ੍ਸਤ੍ਥੋਤਿ ਪਵੁਚ੍ਚਤੀ’’ਤਿ.

ਅਭਿਨੀਹਾਰ ਕਥਾ

੬. ਤਤੋ ਦੀਪਙ੍ਕਰੋ ਦਸਬਲੋ ਬੋਧਿਸਤ੍ਤਂ ਪਸਂਸਿਤ੍ਵਾ ਅਟ੍ਠਹਿ ਪੁਪ੍ਫ ਮੁਟ੍ਠੀਹਿ ਪੂਜੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਤੇਪਿ ਚਤੂਸਤ ਸਹਸ੍ਸ ਖੀਣਾਸਵਾ ਬੋਧਿਸਤ੍ਤਂ ਪੁਪ੍ਫੇਹਿ ਚ ਗਣ੍ਧੇਹਿ ਚ ਪੂਜੇਤ੍ਵਾ ਪਦਪ੍ਫਣਂ ਕਤ੍ਵਾ ਪਕ੍ਕਮਿਂਸੁ. ਦੇਵਮਨੁਸ੍ਸਾ ਚ ਤਥੇਵ ਪੂਜੇਤ੍ਵਾ ਵਨ੍ਦਿਤ੍ਵਾ ਅਥ ਖੋ ਬੋਧਿਸਤ੍ਤੋ ਦਸਬਲਸ੍ਸ ਵ੍ਯਾਕਰਣਂ ਸੁਤ੍ਵਾ ਬੁਦ੍ਧਭਾਵਂ ਕਰਤਲਗਤਮਿਵ ਮਞ੍ਞਮਾਨੋ ਪਮੁਦਿਤ ਹਦਯੋ ਸਬ੍ਬੇਸੁ ਪਟਿਕ੍ਕਨ੍ਤੇਸੁ ਸਯਨਾ ਵੁਟ੍ਠਾਯ ਪੁਪ੍ਫਰਾਸਿ ਮਤ੍ਥਕੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਬੁਦ੍ਧਕਾਰਕਧਮ੍ਮੇ ਉਪਧਾਰੇਨ੍ਤੋ ਕਹਨਨੁ ਖੋ ਬੁਦ੍ਧਕਾਰਕ ਧਮ੍ਮਾ, ਕਿਂ ਉਦ੍ਧਂ ਅਧੋ ਦਿਸਾਸੁ ਵੀਦੀਯਾਸੂਤਿ ਅਨੁਕ੍ਕਮੇਨ ਸਕਲਂ ਧਮ੍ਮਧਾਤੁਂ ਵਿਚਿਨਨ੍ਤੋ ਪੋਰਾਣਕਬੋਧਿਸਤ੍ਤੇਹਿ ਆਸੇਵਿਤ ਨਿਸੇਵਿਤ ਪਠਮਂ ਦਾਨਪਾਰਮਿਂ ਦਿਸ੍ਵਾ ਤਤ੍ਥ ਦਲ਼ਭਿਸਮਾਦਾਨ ਕਤ੍ਵਾ ਏਵਂ ਅਨੁਕ੍ਕਮੇਨ ਸੀਲ - ਨੇਕ੍ਖਮ੍ਮ - ਪਞ੍ਞਾ - ਵੀਰਿਯ - ਖਨ੍ਤਿ - ਸਚ੍ਚ - ਅਧਿਟ੍ਠਾਨ - ਮੇਤ੍ਤਾ - ਉਪੇਕ੍ਖਾ ਪਾਰਮਿਯੋਚ ਦਿਸ੍ਵਾ ਤਤ੍ਥਦਲ਼੍ਹ ਸਮਾਦਾਨਂ ਕਤ੍ਵਾ ਦੇਵਤਾਹਿ ਅਭਿਤ੍ਥੁਤੋ ਆਕਾਸਮਬਭੁਗ੍ਗਨਤ੍ਵ ਹਿਮ ਹਿਮਵਨ੍ਤਮੇਵ ਅਗਮਾਸਿ.

ਦੀਪਙ੍ਕਰੋਪਿ ਸਤ੍ਥਾ ਚਤੂਹਿ ਖੀਣਾਸਵ ਸਤਸਹਸ੍ਸੇਹਿ ਪਰਿਵੁਤੋ ਰਮ੍ਮਨਗਰਵਾਸੀਹਿ ਪੂਜੀਯਮਾਨੋ ਦੇਵਤਾਹਿ ਅਭਿਨਣ੍ਦਿਯਮਾਨੋ ਅਲਙ੍ਕਤ ਪਟਿਯਤ੍ਤੇਨ ਮਗ੍ਗੇਨ ਰਮ੍ਮਨਗਰਂ ਪਵਿਸਿਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿ. ਭਿਕ੍ਖੁਸਙ੍ਘੋਪਿ ਅਤ੍ਤਨੋ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿ. ਰਮ੍ਮਨਗਰਵਾਸਿਨੋਪਿ ਉਪਾਸਕਾ ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ¶ ਦਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤ ਪਤ੍ਤਪਾਣਿਂ ਮਾਲਾਗਣ੍ਧਾਦੀਹਿ ਪੂਜੇਤ੍ਵਾ ਦਾਨਾਨੁਮੋਦਨਂ ਸੋਤੁਕਾਮਾ ਨਿਸੀਦਿਂਸੁ. ਭਗਵਾਪਿ ਤੇਸਂ ਅਨੁਮੋਦਨਂ ਕਰੋਨ੍ਤੋ ਦਾਨਕਥਂ ਸੀਲਕਥਂ ਸਗ੍ਗਿਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਞ੍ਚ ਪਕਾਸੇਤ੍ਵਾ ਅਮਤ ਪਰਿਯੋਸਾਨਂ ਧਮ੍ਮਕਥਂ ਕਥੇਸਿ.

ਏਵਂ ਤਸ੍ਸ ਮਹਜਨਸ੍ਸ ਧਮ੍ਮਂ ਦੇਸੇਤ੍ਵਾ ਏਕਚ੍ਚੇ ਸਰਣੇਸੁ ਏਕਚ੍ਚੇ ਪਞ੍ਚਸੁ ਸੀਲੇਸੁ ਏਕਚ੍ਚੇ ਸੋਤਾਪਤ੍ਤਿਫਲੇ ਏਕਚ੍ਚੇ ਸਕਦਾਗਾਮਿ ਫਲੇ ਏਕਚ੍ਚੇ ਅਨਾਗਾਮੀ ਫਲੇ ਏਕਚ੍ਚੇ ਚਤੁਸੁਪਿ ਫਲੇਸੁ ਏਕਚ੍ਚੇ ਤੀਸੁ ਵਿਜ੍ਜਾਸੁ ਏਕਚ੍ਚੇ ਛਲ਼ਭਿਞ੍ਞਾਸੁ ਏਕਚ੍ਚੇ ਅਟ੍ਠਸੁ ਸਮਾਪਤ੍ਤਿਸੁ ਪਤਿਟ੍ਠਾਪੇਤ੍ਵਾ ਉਟ੍ਠਾਯਾਸਨਾ ਰਮ੍ਮਨਗਰਤੋ ਨਿਕ੍ਖਮਿਤ੍ਵਾ ਸੁਦਸ੍ਸਨ ਮਹਾਵਿਹਾਰਮੇਵ ਪਾਵਿਸਿ.

ਵੁਤ੍ਤਞ੍ਹੇਤਂ

‘‘ਤਦਾ ਤੇ ਭੋਜਯਿਤ੍ਵਾਨ - ਸਸਙ੍ਘਂ ਲੋਕਨਾਯਕਂ,

ਉਫਗਛੁਞ੍ਞਂ ਸਰਣਂ ਤਸ੍ਸ - ਦੀਪਙ੍ਕਰਸ੍ਸ ਸਤ੍ਥੁਨੋ,

ਸਰਣਾਗਮਨੇ ਕਞ੍ਚਿ - ਨਿਵਸੇਤਿ ਤਥਾਗਤੋ

ਕਞ੍ਚਿ ਪਞ੍ਚਸੁ ਸੀਲੇਸੁ - ਸੀਲੇ ਦਸਵਿਧੇ ਪਰਂ;

ਕਸ੍ਸਚਿ ਦੇਤਿ ਸਾਮਞ੍ਞਂ - ਚਤੁਰੋ ਫਲਮੁਤ੍ਤਮੇ,

ਕਸ੍ਸਚਿ ਅਸਥੇ ਧਮ੍ਮੇ - ਦੇਤਿ ਸੋ ਪਟਿਸਮ੍ਭਿਦਾ;

ਕਸ੍ਸਚਿ ਵਰਸਮਾਪਤ੍ਤਿਯੋ - ਅਟ੍ਠ ਦੇਤਿ ਨਰਾਸਭੋ,

ਤਿਸ੍ਸੋ ਕਸ੍ਸਚਿ ਵਿਜ੍ਜਾਯੋ - ਛਲ਼ਭਿਞ੍ਞ ਪਵੇਚ੍ਛਤਿ;

ਤੇਨ ਯੋਗੇਨ ਜਨਕਾਯਂ - ਓਵਦੇਤਿ ਮਹਾਮੁਨਿ,

ਤੇਨ ਵਿਤ੍ਥਾਰਿਕਂ ਆਸੀ - ਲੋਕਨਾਥਸ੍ਸ ਸਾਸਨਂ;

ਮਹਾਹਨੂਸਭਕ੍ਖਣ੍ਧੋ - ਦੀਪਙ੍ਕਰਸਨਾਮਕੋ,

ਬਹੂ ਜਨੇ ਤਾਰਯਤਿ - ਪਰਿਮੋਚੇਤਿ ਦੁਗ੍ਗਤਿਂ;

ਬੋਧਨੇਯ੍ਯਂ ਜਨਂ ਦਿਸ੍ਵਾ - ਸਤਸਹਸ੍ਸੇਪਿ ਯੋਜਨੇ

ਖਣੇਨ ਉਪਗਨ੍ਤ੍ਵਾਨ - ਬੋਧੇਤਿ ਤਂ ਮਹਾਮੁਨੀ’’ਤਿ;

ਇਤਿ ਸੋ ਦੀਪਙ੍ਕਰੋ ਸਤ੍ਥਾ ਵਸ੍ਸਸਤ ਸਹਸ੍ਸਾਨਿ ਠਤ੍ਵਾ ਸਤ੍ਤਾਨਂ ਬਣ੍ਧਨਮੋਕ੍ਖਂ ਕੁਰੁਮਾਨੋ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਨਣ੍ਦਾਰਾਮੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿਨਹੇਵ ਧਾਤੁਯੋ ਤਸ੍ਸ - ਸਤ੍ਥੁਨੋ ਵਿਕਿਰਿਂਸੁ ਤਾ. ਠਿਤਾ ਏਕਘਨਾ ਹੁਤ੍ਵਾ - ਸੁਵਣ੍ਣਪਟਿਮਾ ਵਿਯ ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਘਨਕੋਟਿਟਿਮਸੁਵਣ੍ਣਟ੍ਠਿਕਾਹਿ ਏਵਂ ਛਤ੍ਤਿਂਸ ਯੋਜਨਿਕਂ ਮਹਾਥੂਪਮਕਂਸੁ ਨਿਵੇਦਸਿ - ਕੇਚਿ.

ਤੇਨ ¶ ਵੁਤ੍ਤਂ

‘‘ਦੀਪਙ੍ਕਰੋ ਜਿਨੋ ਸਤ੍ਥਾ - ਨਣ੍ਦਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਜਿਨਥੂਪੋ - ਛਤ੍ਤਿਂਸੁਬ੍ਬੇਧ ਯੋਜਨੋ‘‘;

‘‘ਪਤ੍ਤ ਚੀਵਰ ਪਰਿਕ੍ਖਾਰ - ਪਰਿਭੋਗਞ੍ਜ ਸਤ੍ਥੁਨੋ,

ਬੋਧਿਮੂਲੇ ਤਦਾ ਥੂਪੋ - ਤੀਣਿ ਯੋਜਨਮੁਗ੍ਗਤੋ’’ਤਿ;

੭. ਦੀਪਙ੍ਕਰਸ੍ਸ ਪਨ ਭਗਵਤੋ ਅਪਰਭਾਗੋ ਏਕਂ ਅਸਙ੍ਖੇਯ੍ਯਂ ਅਤਿਕ੍ਕਮਿਤ੍ਵਾ ਕੋਣ੍ਡਞ੍ਞੋ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਵਿਜਿਤਾਵਿ ਨਾਮ ਚਕ੍ਕਵਤ੍ਤਿ ਹੁਤ੍ਵਾ ਕੋਟਿਸਤਸਹਸ੍ਸ ਸਙ੍ਖਸ੍ਸ ਬੁਦ੍ਧ ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਾਯਿ ਸਤ੍ਥਾ ਬੋਧਿਸਤ੍ਤਂ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਰਿਤ੍ਵਾ ਧਮ੍ਮਂ ਦੇਸੇਸਿ ਸੋ ਸਤ੍ਥੁ ਧਮ੍ਮਂਕਥਂ ਸੁਤ੍ਵਾ ਰਜ੍ਜਿ ਨਿਯ੍ਯਾਦੇਤ੍ਵਾ ਪਬ੍ਬਜਿ ਸੋ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚਅਭਿਞ੍ਞਾਯੋਚ ਉਪ੍ਪਾਦੇਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਸੋਪਿ ਬੁਦ੍ਧੋ ਵਸ੍ਸਸਤਸਹਸ੍ਸਾਨਿ ਠਤ੍ਵਾ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਾਪੇਤ੍ਵਾ ਚਣ੍ਦਾਰਾਮੇ ਪਰਿਨਿਬ੍ਬਾਯਿ ਤਸ੍ਸਾਪਿ ਭਗਵਤੋ ਧਾਤੁਯਾ ਨ ਵਿਕਿਰਿਂਸੁ ਸਕਲਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਮਾਗਨ੍ਤ੍ਵਾ ਸਤ੍ਤਯੋਜਨਿਕਾਸਤ੍ਤਰਤਨਮਯਂ ਹਰਿਤਾਲਮਨੋਸਿਲਾਯਮਤ੍ਤਿਕਾਕਿਚ੍ਚਂ ਤੇਲ ਸਪ੍ਪੀਹਿ ਉਦਕਕਿਚ੍ਚਂ ਕਤ੍ਵਾ ਚੇਤਿਯਂ ਨਿਟ੍ਠਾਪੇਸੁਂ

ਕੋਣ੍ਡਞ੍ਞੇ ਕਿਰ ਸਮ੍ਬੁਦ੍ਧੋ - ਚਣ੍ਦਾਰਾਮੇ ਮਨੋਰਮੇ,

ਨਿਬ੍ਬਾਯਿ ਚੇਤਿਯੋ ਤਸ੍ਸ - ਸਤ੍ਤਯੋਜਨਿਕੋ ਕਤੋਤਿ;

ਤਸ੍ਸ ਅਪਰਭਾਗੇ ਏਕਂ ਅਸਂਙ੍ਖਯ੍ਯਂ ਅਤਿਕ੍ਕਮਿਤ੍ਵਾ ਏਕਸ੍ਮਿਂਯੇਵ ਕਪ੍ਪੇ ਚਤ੍ਤਾਰੋ ਬੁਦ੍ਧਾ ਉਪ੍ਪਜ੍ਜਿਂਸੁ - ਮਙ੍ਗਲੋ ਸੁਮਨੋ ਰੇਵਤੋ ਯੋਹਿਤੋਤਿ. ਮਙ੍ਗਲਸ੍ਸ ਪਨ ਭਗਵਤੋ ਕਾਲੇ ਬੋਧਿਸਤ੍ਤੋ ਸੁਰੁਚਿ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਸਤ੍ਥਾਰਂ ਨਿਮਨ੍ਤੇਸ੍ਸਾਮੀਤਿ ਉਪਸਙ੍ਕਮਿਤ੍ਵਾ ਮਧੁਰ ਧਮ੍ਮਂਕਤਂ ਸੁਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਕੋਟਿਸਤਸਹਸ੍ਸ ਸਙ੍ਖਸ੍ਸ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਸਤ੍ਤਾਹਂ ਗਵਪਾਨਂ ਨਾਮ ਦਾਨਮਦਾਸਿ ਸਤ੍ਥਾ ਅਨੁਮੋਦਨਂ ਕਰੋਨ੍ਤੋ ਮਹਾਪੁਰਿਸਂ ਆਮਨ੍ਤੇਤ੍ਵਾ ਤ੍ਵਂ ਕਪ੍ਪਸਤਸਹਸ੍ਸਾਧਿਕਾਨਂ ਦ੍ਵਨ੍ਨਂ ਅਸਙ੍ਖੇਯ੍ਯਾਨਂ ਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਸੀਤਿ ਵ੍ਯਾਕਾਸਿ ਮਹਾਪੁਰਿਸੋ ਵ੍ਯਾਕਰਣਂ ਸੁਤ੍ਵਾ ਅਹਂ ਕਿਰ ਬੁਦ੍ਧੋ ਭਵਿਸ੍ਸਾਮਿ ਕੋ ਮੇ ਘਰਾਵਾਸੇਨ ਅਤ੍ਥੋ ਪਬ੍ਬਜਿਸ੍ਸਮੀਤਿ ਚਿਨ੍ਤਤ੍ਵਾ ਤਥਾਰੂਪਂ ਸਮ੍ਪਤ੍ਤਿਂ ਕੇਲ਼ਪਿਣ੍ਡਂ ਵੀਯ ਪਹਾਯ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਤਸ੍ਮਿਮ੍ਪਿ ਬੁਦ੍ਧੇ ਪਰਿਨਿਬ੍ਬੁਤੇ ਧਾਤੁਯੋ ਨ ਵਿਕਿਰਿਂਸੁ, ਜਮ੍ਬੁਦੀਪਵਾਸਿਨੋ ਪੁਬ੍ਬੇ ਵਿਯ ਤਿਂਸਯੋਜਨਕਂ ਥੂਪਮਕਂਸੁ.

ਤੇਨ ¶ ਵੁਤ੍ਤਂ ‘‘ਉਯ੍ਯਾਨੇ ਵਸਭੋ ਨਾਮ - ਬੁਦ੍ਧੋ ਨਿਬ੍ਬਾਯਿ ਮਙ੍ਗਲੋ, ਤਤ੍ਥੇਵ ਤਸ੍ਸ ਜਿਨਥੂਪੋ - ਤਿਂਸਯੋਜਨਮੁਗ੍ਗਿਤੋ’’ਤਿ.

ਤਸ੍ਸ ਅਪਰਭਾਗੇ ਸੁਮਨੋ ਨਾਮ ਸਤ੍ਥਾ ਉਦਪਾਦਿ ਤਦਾ ਮਹਾਸਤ੍ਤੋ ਅਤੁਲੋ ਨਾਮ ਨਾਗਰਾਜਾ ਹੁਤ੍ਵਾ ਨਿਬ੍ਬਤ੍ਤਿ-ਮਹਿਦ੍ਧਿਕੋ ਮਹਾਨੁਭਾਵੋ ਸੋ ਬੁਦ੍ਧੋ ਉਪ੍ਪਨ੍ਨੋਤਿ ਸੁਤ੍ਵਾ ਞਾਤਿਸਙ੍ਘਪਰਿਵੁਤੋ ਨਾਗਭਵਨਾ ਨਿਕ੍ਖਮਿਤ੍ਵਾ ਕੋਟਿਸਤਸਹਸ੍ਸ ਭਿਕ੍ਖੁਪਰਿਵਾਰਸ੍ਸ ਤਸ੍ਸ ਭਗਵਤੋ ਦਿਬ੍ਬਤੁਰਿਯੇਹਿ ਉਪਹਾਰਂ ਕਾਰੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਪਚ੍ਚੇਕਂ ਦੁਸ੍ਸਯੁਗਾਨਿ ਦਤ੍ਵਾ ਸਰਣੇਸੁ ਪਤਿਟ੍ਠਾਸਿ ਸੋਪਿ ਨਂ ਸਤ੍ਥਾ ਅਨਾਗਤੇ ਬੁਦ੍ਧੋ ਭਵਿਸ੍ਸਸੀਤਿ ਵ੍ਯਾਕਾਸਿ ਤਸ੍ਮਿਮ੍ਪਿ ਬੁਦ੍ਧੇ ਪਰਿਨਿਬ੍ਬੁਤੇ ਧਾਤੁਯੋ ਨ ਵਿਕਿਰਿਂਸੁ ਜਮ੍ਬੁਦੀਪਵਾਸਨੋ ਪੁਬ੍ਬੇ ਵਿਯ ਚਤੁਯੋਜਨਿਕਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਸੁਮਨੋ ਯਸਧਰੋ - ਬੁਦ੍ਧੋ ਅਗ੍ਗਾਰਾਮਮ੍ਹ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਜਿਨਥੂਪੋ - ਚਤੁਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਰੇਵਤੋ ਨਾਮ ਸਤ੍ਥਾ ਉਦਪਾਦਿ ਤਦਾ ਬੋਧਿਸਤ੍ਤੋ ਅਤਿਦੇਵੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਸਤ੍ਥੁ ਧਮ੍ਮਦੇਸਨ ਸੁਤ੍ਵਾ ਸਰਣੇਸੁ ਪਤਿਟ੍ਠਾਯ ਸਿਰਸਿ ਅਞ੍ਜਲਿਂ ਪਗ੍ਗਹੇਤ੍ਵਾ ਤਸ੍ਸ ਸਤ੍ਥੁਨੋ ਕਿਲੇਸਪ੍ਪਹਾਨੇ ਵਣ੍ਣਂ ਵਤ੍ਵਾ ਉਤ੍ਤਰਾਸਙ੍ਘੇਨ ਪੂਜਮਕਾਸਿ. ਸੋਪਿ ਨਂ ਸਤ੍ਥਾ ਬੁਦ੍ਧੋ ਭਵਿਸ੍ਸਤਿਤਿ ਵ੍ਯਾਕਾਸਿ ਤਸ੍ਮਿਂ ਪਨ ਬੁਦ੍ਧੇ ਪਰਿਨਿਬ੍ਬੁਤੇ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਰੇਵਤੋ ਪਵਰੋ ਬੁਦ੍ਧੋ - ਨਿਬ੍ਬੁਤੋ ਸੋ ਮਹਾਪੁਰੇ,

ਧਾਤੁ ਵਿਤ੍ਥਾਰਿਕਂ ਆਸੀ - ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਸੋਭਿਤੋ ਨਾਮ ਸਤ੍ਥਾ ਉਦਪਾਦਿ ਤਦਾ ਬੋਧਿਸਤ੍ਤੋ ਅਜਿਤੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਰਣੇਸੁ ਪਤਿਟ੍ਟਾਯ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਂ ਅਦਾਸਿ. ਸੋਪਿ ਨਂ ਸਤ੍ਥਾ ਬੁਦ੍ਧੋ ਭਵਿਸ੍ਸਸੀਤਿ ਵ੍ਯਾਕਾਸਿ ਤਸ੍ਸਾਪਿ ਭਗਵਤੋ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਸੋਭਿਤੋ ਵਰਸਮ੍ਬੁਦ੍ਧੋ - ਸੀਹਰਾਮਮ੍ਹਿ ਨਿਬ੍ਬੁਤੋ,

ਧਾਤੁਵਿਤ੍ਥਾਰਿਕਂ ਆਸੀ - ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਏਕਮਸਙ੍ਖੇਯ੍ਯਂ ਅਤਿਕ੍ਕਮਿਤ੍ਵਾ ਏਕਸ੍ਮਿਂਯੇਵ ਕਪ੍ਪੇ ਤਯੋ ਬੁਦ੍ਧਾ ਨਿਬ੍ਬਤ੍ਤਿਂਸੁ - ਅਨੋਮਦਸ੍ਸਿ ਪਦੁਮੋ ਨਾਰਦੋਤਿ. ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਬੋਧਿਸਤ੍ਤੋ ਏਕੋ

੧. ਯਸਵਰੋ ਧੀਰੋ - ਕੇਚਿ.

ਯਕ੍ਖ ¶ ਸੇਨਾਪਤਿ ਅਹੋਸਿ ਮਹਿਦ੍ਧਿਕੋ ਮਹਾਨੁਭਾਵੋ ਅਨੇਕ ਕੋਟਿਸਤਸਹਸ੍ਸਾਨਂ ਯਕ੍ਖਾਨਂ ਅਧਿਪਤਿ. ਸੋ ਬੁਦ੍ਧੋ ਉਪ੍ਪਨ੍ਨੋਤਿ ਸੁਤ੍ਵਾ ਆਗਨ੍ਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਮਦਾਸਿ ਸਤ੍ਥਾਪਿ ਤਂ ਅਨਾਗਤੇ ਬੁਦ੍ਧੋ ਭਵਿਸ੍ਸਸੀਤਿ ਵ੍ਯਾਕਾਸਿ. ਅਨੋਮਦਸ੍ਸਿਮ੍ਹਿ ਪਨ ਭਗਵਤਿ ਪਰਿਨਿਬ੍ਬੁਤੇ ਧਾਤੁਯੋ ਨ ਵਿਕਿਰਿਂਸੁ ਜਮ੍ਬੁਦੀਪਵਾਸਿਨੋ ਪਞ੍ਚਵੀਸਯੋਜਨਕਂ ਥੂਪਂ ਕਰਿਂਸੁ

ਤੇਨ ਵੁਤ੍ਤਂ

‘‘ਅਨੋਮਦਸ੍ਸਿ ਜਿਨੋ ਸਤ੍ਥਾ - ਧਮ੍ਮਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਜਿਨਥੂਪੋ - ਉਬ੍ਬੇਧਾ ਪਣ੍ਣੁਵੀਸਤੀ’ਤਿ;

ਤਸ੍ਸ ਅਪਰਭਾਗੇ ਪਦੁਮੋ ਨਾਮ ਸਤ੍ਥਾ ਉਦਪਾਦਿ ਤਥਾਗਤੇ ਅਗਾਮਕਾਰਞ੍ਞੇ ਵਿਹਰੇਨ੍ਤਾ ਬੋਧਿਸਤ੍ਤੋ ਸੀਹੋ ਹੁਤ੍ਵਾ ਸਤ੍ਥਾਰਂ ਨਿਰੋਧਸਮਾਪਤ੍ਤਿਯਾ ਸਮਾਪਨ੍ਨਂ ਦਿਸ੍ਵਾ ਪਸਨ੍ਨਚਿਤ੍ਤੋ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪੀਤਿਸੋਮਨਸ੍ਸਜਾਤੋ ਤਿਕ੍ਖਤ੍ਤੁਂ ਸੀਹਨਾਦਂ ਨਦਿਤ੍ਵਾ ਸਤ੍ਤਾਹਂ ਬੁਦ੍ਧਾਰਮ੍ਮਣਂ ਪੀਤਿਂ ਅਵਿਜਹਿਤ੍ਵਾ ਪੀਤਿਸੁਖੇਨੇਵ ਗੋਚਰਾਯ ਅਪਕ੍ਕਮਿਤ੍ਵਾ ਜਿਵਿਤਪਰਿਚ੍ਚਾਗਂ ਕਤ੍ਵਾ ਪਯਿਰੁਪਾਸਮਾਨੋ ਅਟ੍ਠਾਸਿ ਸਤ੍ਥਾ ਸਤ੍ਤਾਹਚ੍ਚਯੇਨ ਨਿਰੋਧਾ ਵੁਟ੍ਠਿਤੋ ਸੀਹਂ ਓਲੋਕੇਤ੍ਵਾ ਭਿਕ੍ਖੁਸਙ੍ਘੇਪਿ ਚਿਤ੍ਤਂ ਪਸਾਦੇਤ੍ਵਾ ਸਙ੍ਘਂ ਵਨ੍ਦਿਸ੍ਸਤੀ‘‘ਤਿ ਭਿਕ੍ਖੁਸਙ੍ਘੋ ਆਗਚ੍ਛਤੂਤਿ ਚਿਨ੍ਤੇਸਿ ਭਿਕ੍ਖੁ ਤਾਵਦੇਵ ਆਗਮਿਂਸੁ ਸੀਹੋ ਸਙ੍ਘੇ ਚਿਤ੍ਤਂ ਪਸਾਦੇਸਿ. ਸਤ੍ਥਾ ਤਸ੍ਸ ਮਨਂ ਓਲੋਕੇਤ੍ਵਾ ਅਨਾਗਤੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਤਸ੍ਸ ਪਨ ਭਗਵਤੋ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਪਦੁਮੋ ਜਿਨਵਰੋ ਸਤ੍ਥਾ - ਧਮ੍ਮਾਰਾਮਮ੍ਹਿ ਨਿਬ੍ਬੁਤੋ,

ਧਾਤੁ ਵਿਤ੍ਥਾਰਿਕਂ ਆਸਿ - ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਨਾਰਦੋ ਨਾਮ ਸਤ੍ਥਾ ਅਹੋਸਿ ਤਦਾ ਬੋਧਿਸਤ੍ਤੋ, ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਞ੍ਚਸੁ ਅਭਿਞ੍ਞਾਸੁ ਅਟ੍ਠਸੁਚ ਸਮਾਪਤ੍ਤਿਸੁਚਿਣ੍ਣਵਸੀ ਹੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਲੋਹਿਤ ਚਣ੍ਦਨੇਨ ਪੂਜਮਕਾਸਿ ਸੋਪਿ ਨਂ ਅਨਾਗਤੋ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਨਾਰਦ ਪਨ ਭਗਵਤੋ ਧਾਤੁਯੋ ਏਕਘਨਾ ਅਹੇਸੁਂ. ਸਬ੍ਬੇ ਦੇਵ ਮਨੁਸ੍ਸਾ ਸਨ੍ਨਿਪਤਿਤ੍ਵਾ ਚਤੁਯੋਜਨਿਕਂ ਥੂਪਂ ਕਰਿਂਸੁ.

ਤੇਨ ਵੁਤ੍ਤਂ

‘‘ਨਾਰਦੋ ਜਿਨਵਸਭੋ - ਨਿਬ੍ਬੁਤੋ ਸੁਦਸ੍ਸਨੇ ਪੁਰੇ,

ਤਤ੍ਥੇਵ ਤਸ੍ਸ ਥੂਪਵਰੋ - ਚਤੁਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਏਕਮਸਙ੍ਖੇਯ੍ਯਮਤਿਕ੍ਕਮਿਤ੍ਵਾ ਇਤੋ ਕਪ੍ਪਸਤਸਹਸ੍ਸ ਮਤ੍ਥਕੇ ਏਕਸ੍ਮਿਂ ਕਪ੍ਪੇ ਪਦੁਮੁਤ੍ਤਰੋ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਜਟਿਲੋ ਨਾਮ ਮਹਾਰਟ੍ਠਿਕੋ ਹੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਚਿਵਰਦਾਨਮਦਾਸਿ. ਸੋਪਿ ਤਂ ਅਨਾਗਤੋ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ. ¶ ਪਦੁਮੁਤ੍ਤਰਸ੍ਸਾਪਿ ਭਗਵਤੋ ਧਾਤੁਯੋ ਏਕਘਨਾ ਅਹੇਸੁਂ. ਸਬ੍ਬੇ ਦੇਵਮਨੁਸ੍ਸਾ ਸਨ੍ਨਿਪਤਿਤ੍ਵਾ ਦ੍ਵਾਦਸ ਯੋਜਨਿਕਂ ਮਹਾਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਪਦੁਮੁਤ੍ਤਰੋ ਜਿਨੋ ਬੁਦ੍ਧੋ - ਨਣ੍ਦਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਥੂਪਵਰੋ - ਦ੍ਵਾਦਸੁਬ੍ਬੇਧਯੋਜਨੋ’’ਤਿ;

ਤਸ੍ਸ ਅਪਰਭਾਗੇ ਤਿਂਸਕਪ੍ਪ ਸਹਸ੍ਸਾਨਿ ਅਤਿਕ੍ਕਮਿਤ੍ਵਾ ਸੁਮੇਧੋ ਸੁਜਾਤੋ ਚਾਤਿ ਏਕਸ੍ਮਿਂ ਕਪ੍ਪੇ ਦ੍ਵੇ ਬੁਦ੍ਧਾ ਨਿਬ੍ਬਤ੍ਤਿਂਸੁ ਸੁਮੇਧਸ੍ਸ ਪਨ ਭਗਵਤੋ ਕਾਲੇ ਬੋਧਿਸਤ੍ਤੋ ਉਤ੍ਤਰੋ ਨਾਮ ਮਾਨਵੋ ਹੁਤ੍ਵਾ ਨਿਦਹਿਤ੍ਵਾ ਠਪਿਤਂਯੇਵ ਅਸੀਤਿਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਧਮ੍ਮਂ ਸੁਤ੍ਵਾ ਸਰਣੇਸੁ ਪਤਿਟ੍ਠਾਯ ਨਿਕ੍ਖਮਿਤ੍ਵਾ ਪਬ੍ਬਜਿ ਸੋਪਿ ਨਂ ਅਨਾਗਤੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ. ਸੁਮ੍ਧੇਸ੍ਸ ਪਨ ਭਗਵਤੋ ਧਾਤੁਯੋ ਵਿਕਿਰਿਂਸੁ

ਤੇਨ ਵੁਤ੍ਤਂ

‘‘ਸੁਮੇਧੋ ਜਿਨਵਰੋ ਬੁਦ੍ਧੋ - ਮੇਧਾਰਾਮਮ੍ਹਿ ਨਿਬ੍ਬੁਤੋ,

ਧਾਤੁਵਿਤ੍ਥਾਰਿਕਂ ਆਸਿ - ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਸੁਜਾਤੋ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋਚਕ੍ਕਵਤ੍ਤਿਰਾਜਾ ਹੁਤ੍ਵਾ ਬੁਦ੍ਧੋ ਉਪ੍ਪਨ੍ਨੋਤਿ ਸੁਤ੍ਵਾ ਉਪਸਂਕਮਿਤ੍ਵਾ ਧਮ੍ਮਂ ਸੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਸਦ੍ਧਿਂ ਸਤ੍ਤਹਿ ਰਤਨੇਹਿ ਚਤੁਮਹਾਦੀਪਂ ਰਜ੍ਜਂ ਦਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿ ਸਕਲਰਟ੍ਠਵਾਸਿਨੋ ਰਟ੍ਠੁਪ੍ਪਾਦਂ ਗਹੇਤ੍ਵਾ ਆਰਾਮਿਕ ਕਿਚ੍ਚਂ ਸਾਧੇਨ੍ਤਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਨਿਚ੍ਚਂ ਮਹਾਦਾਨਮਦਂਸੁ. ਸੋਪਿ ਨਂ ਸਤ੍ਥਾ ਅਨਾਗਤੇ ਬੁਦ੍ਧੋਭਵਿਸ੍ਸਤੀਤਿ ਵ੍ਯਾਕਾਸਿ ਸੁਜਾਤਸ੍ਸ ਪਨ ਭਗਵਤੋ ਧਾਤੁਯੋ ਏਕਘਨਾ ਅਹੇਸੁਂ ਜਮ੍ਬੁਦੀਪਵਾਸਿਨੋ ਤਿਗਾਵੁਤਂ ਥੂਪਮਕਂਸੁ

ਤੇਨ ਵੁਤ੍ਤਂ

‘‘ਸੁਜਾਤੋ ਜਿਨਵਰੋ ਬੁਦ੍ਧੋ ਸੀਲਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਚੇਤਿਯੋ ਤਸ੍ਸ - ਤੀਣਿ ਗਾਵੁਤਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਅਟ੍ਠਾਰਸ ਕਪ੍ਪਸਤਮਤ੍ਥਕੇ ਏਕਸ੍ਮਿਂ ਕਪ੍ਪੇ ਪਿਯਦਸ੍ਸਿ ਅਤ੍ਥਦਸ੍ਸਿ ਧਮ੍ਮਦਸ੍ਸਿਤਿ ਤਯੋ ਬੁਦ੍ਧਾ ਨਿਬ੍ਬਤ੍ਤਿਂਸੁ ਪਿਯਦਸ੍ਸਿ ਬੁਦ੍ਧਕਾਲੇ ਬੋਧਿਸਤ੍ਤੋ ਕਸ੍ਸਪੋ ਨਾਮ ਮਾਣਵੋ ਤਿਣ੍ਣਂ ਵੇਦਾਨਂ ਪਾਰਗਤੋ ਹੁਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਕੋਟਿਸਤਸਹਸ੍ਸ ਧਨ ਪਰਿਚ੍ਚਾਗੇਨ ਸਙ੍ਘਾਰਾਮਂ ਕਾਰੇਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਸਿ ਅਥ ਨਂ ਸਤ੍ਥਾ ਅਟ੍ਠਾਰਸ ਕਪ੍ਪ ਸਤਚ੍ਚਯੇਨ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਪਿਯਦਸ੍ਸਿਸ੍ਸ ਭਗਵਤੋਪਿ ਧਾਤੁਯੋ ਏਕਘਨਾਵ ਅਹੇਸੁਂ ਜਮ੍ਬੁਦੀਪਵਾਸਿਨੋ ਸਨ੍ਨਿਪਤਿਤ੍ਵਾ ਤਿਯੋਜਨਿਕਂ ਮਹਾਥੂਪਮਕਂਸੁ.

ਤੇਨ ¶ ਵੁਤ੍ਤਂ

‘‘ਪਿਯਦਸ੍ਸਿ ਮੁਨਿਵਰੋ - ਸਲਲਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਜਿਨਥੂਪੋ - ਤੀਣਿ ਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਅਤ੍ਥਦਸ੍ਸਿ ਨਾਮ ਭਗਵਾ ਉਦਪਾਦਿ ਤਦਾ ਬੋਧਿਸਤ੍ਤੋ ਮਹਿਦ੍ਧਿਕੋ ਮਹਾਨੁਭਾਵੋ ਸੁਸਿਮੋ ਨਾਮ ਤਾਪਸੋ ਹੁਤ੍ਵਾ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਸੀਦਿਤ੍ਵਾ ਦਿਬ੍ਬਾਨਿ ਮਣ੍ਦਾਰਵ ਪਦੁਮਪਾਰਿਚ੍ਛਤ੍ਤਕਾਦੀਨਿ ਪੁਪ੍ਫਾਨਿ ਆਹਰਿਤ੍ਵਾ ਚਾਤੁਦ੍ਵੀਪਿਕ ਮਹਾਮੇਘੋ ਵਿਯ ਪੁਪ੍ਫਵਸ੍ਸਂ ਵਸ੍ਸੇਤ੍ਵਾ ਸਮਨ੍ਤਤੋ ਪੁਪ੍ਫਮਣ੍ਡਪ ਪੁਪ੍ਫਅਗਘਿਯ ਤੋਰਣਾਦੀਨਿ ਕਤ੍ਵਾ ਮਣ੍ਦਾਰਵ ਪੁਪ੍ਫਚ੍ਛਤ੍ਤੇਨ ਦਸਬਲਂ ਪੂਜੇਸਿ ਸੋਪਿ ਨਂ ਭਗਵਾ ਅਨਾਗਤੋ ਗੋਤਮੋ ਨਾਮ ਬੁਦ੍ਧੋ ਭਵਿਸ੍ਸਤੀਤਿ ਵਾਕਾਸਿ. ਤਸ੍ਸ ਪਨ ਭਗਵਤੋ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਅਤ੍ਥਦਸ੍ਸਿ ਜਿਨਵਰੋ - ਅਨੋਮਾਰਾਮਮ੍ਹਿ ਨਿਬ੍ਬੁਤੋ,

ਧਾਤੁਵਿਤ੍ਥਾਰਿਕਂ ਆਸਿ - ਤੇਸੁ ਤੇਸੁ ਚ ਰਟ੍ਠਤੋ’’ਤਿ;

ਤਸ੍ਸ ਅਪਰਭਾਗੇ ਧਮ੍ਮਦਸ੍ਸਿ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਸਕ੍ਕਾ ਦੇਵਰਾਜਾ ਦਿਬ੍ਬਗਣ੍ਧਪੁਪ੍ਫੇਹਿ ਚ ਦਿਬ੍ਬਤੁਰਿਯੇਹਿ ਚ ਪੂਜਂ ਅਕਾਸਿ ਸੋਪਿ ਨਂ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ. ਧਮ੍ਮਦਸ੍ਸਿਸ੍ਸ ਪਨ ਭਗਵਤੋ ਧਾਤੁਯੋ ਏਕਘਨਾ ਅਹੇਸੁਂ. ਜਮ੍ਬੁਦੀਪਵਾਸਿਨੋ ਤਿਯੋਜਨਿਕਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਧਮ੍ਮਦਸ੍ਸਿ ਮਹਾਵੀਰੋ-ਕੇਲਾਸਾਰਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਥੂਪਵਰੋ ਤਸ੍ਸ-ਤੀਣਿ ਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਚਤੁਨਵੁਤਿਕਪ੍ਪ ਮਤ੍ਥਕੇ ਏਕਸ੍ਮਿਂ ਕਪ੍ਪੇ ਏਕੋਵ ਸਿਦ੍ਧਤ੍ਥੋ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਉਗ੍ਗਤੇਜੋ ਅਭਿਞ੍ਞਾਬਲ ਸਮ੍ਪਨ੍ਨੋ ਮਙ੍ਗਲੋ ਨਾਮ ਤਾਪਸੋ ਹੁਤ੍ਵਾ ਮਹਾਜਮ੍ਬੁਫਲਂ ਆਹਰਿਤ੍ਵਾ ਤਥਾਗਸ੍ਸ ਅਦਾਸਿ ਸਤ੍ਥਾ ਤਂ ਫਲਂ ਪਰਿਭੁਞ੍ਜਿਤ੍ਵਾ ਚਤੁਨਵੁਤਿ ਕਪ੍ਪਮਤ੍ਥਕੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਤਸ੍ਸਾਪਿ ਭਗਵਤੋ ਧਾਤੁਯੋ ਨ ਵਿਕਿਰਿਂਸੁ, ਚਤੁਯੋਜਨਿਕਂ ਰਤਨਮਯਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਸਿਦ੍ਧਤ੍ਤੋ ਮੁਨਿਵਰੋ ਬੁਦ੍ਧੋ ਅਨੋਮਾਰਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਥੂਪਵਰੋ-ਚਤੁਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਇਤੋ ਦ੍ਵਾਨਵੁਤਿ ਕਪ੍ਪਮਤ੍ਥਕੇ ਤਿਸ੍ਸੋ ਫੁਸ੍ਸੋਤਿ ਏਕਸ੍ਮਿਂ ਕਪ੍ਪੇ ਦੇਵ ਬੁਦ੍ਧਾ ਨਿਬ੍ਬਤ੍ਤਿਂਸੁ ਤਿਸ੍ਸਸ੍ਸ ਭਗਵਤੋ ਕਾਲੇ ਬੋਧਿਸਤ੍ਤਾ ਮਹਾਭੋਗੋ ਮਹਾਯਸੋ ਸੁਜਾਤੋ ਨਾਮ ਖਤ੍ਤਿਯੋ ਹੁਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਮਹਿਦ੍ਧਿਕਭਾਵਂ ਪਤ੍ਵਾ ਬੁਦ੍ਧੋ ¶ ਉਪ੍ਪਨ੍ਨੋਤਿ ਸੁਤ੍ਵਾ ਦਿਬ੍ਬਮਣ੍ਦਾਰਵ ਪਦੁਮ ਪਾਰਿਚ੍ਛਤ੍ਤ ਪੁਪ੍ਫਾਨਿ ਆਦਾਯ ਚਤੁਪਰਿਸਮਜ੍ਝੇ ਗਚ੍ਛਨ੍ਤਂ ਤਥਾਗਤਂ ਪੂਜੇਸਿ. ਆਕਾਸੇ ਪੁਪ੍ਫਵਿਤਾਨਮਿਵ ਅਟ੍ਠਾਸਿ ਸੋਪਿ ਨਂ ਸਤ੍ਥਾ ਇਤੋ ਦ੍ਵਾਨਵੁਤਿ ਕਪ੍ਪਮਤ੍ਥਕੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ. ਤਸ੍ਸਾਪਿ ਭਗਵਤੋ ਧਾਤੁਯੋ ਨ ਵਿਕਿਰਿਂਸੁ ਧਾਤੁਯੋ ਗਹੇਤ੍ਵਾ ਤਿਯੋਜਨਿਕਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਤਿਸ੍ਸੋ ਜਿਨਵਰੋ ਬੁਦ੍ਧੋ-ਨਣ੍ਦਾਰਾਮਮ੍ਹਿ ਨਿਬ੍ਬੁਤੋ

ਤਤ੍ਥੇਵ ਤਸ੍ਸ ਥੂਪਵਰੋ-ਤੀਣਿ ਯੋਜਨਮੁਸ੍ਸਿਤੋ’’ਤਿ;

ਤਸ੍ਸ ਅਪਰਭਾਗੇ ਫੁਸ੍ਸੋ ਨਾਮ ਬੁਦ੍ਧੋ ਉਦਪਾਦਿ ਤਦਾ ਬੋਧਿਸਤ੍ਤੋ ਵਿਜਿਤਾਵਿ ਨਾਮ ਖਤ੍ਤਿਯੋ ਹੁਤ੍ਵਾ ਮਹਾਰਜ੍ਜਂ ਪਹਾਯ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਮਹਾਜਨਸ੍ਸ ਧਮ੍ਮਕਥਂ ਕਥੇਤ੍ਵਾ ਸੀਲਪਾਰਮਿਞ੍ਚ ਪੂਰੇਸਿ. ਸੋਪਿ ਨਂ ਬੁਦ੍ਧੋ ਤਥੇਵ ਵ੍ਯਾਕਾਸਿ ਤਸ੍ਸ ਪਨ ਭਗਵਤੋ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਫੁਸ੍ਸੋ ਜਿਨਵਰੋ ਸਤ੍ਥਾ-ਸੁਨਨ੍ਦਾਰਾਮਮ੍ਹਿ ਨਿਬ੍ਬੁਤੋ

ਧਾਤੁਵਿਤ੍ਥਾਰਿਕਂ ਆਸਿ-ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਇਤੋ ਏਕਨਵੁਤਿ ਕਪ੍ਪਮਤ੍ਥਕੇ ਵਿਪਸ੍ਸਿ ਨਾਮ ਬੁਦ੍ਧੋ ਉਦਪਾਦਿ ਤਦਾ ਬੋਧਿਸਤ੍ਤੋ ਮਹਿਦ੍ਧਿਕੋ ਮਹਾਨੁਭਾਵੋ ਅਤੁਲੋ ਨਾਮ ਨਾਗਰਾਜਾ ਹੁਤ੍ਵਾ ਸਤ੍ਤਰਤਨ ਖਚਿਤਂ ਸੋਵਣ੍ਣਮਹਾਪੀਠਂ ਭਗਵਤੋ ਅਦਾਸਿ ਸੋਪਿ ਨਂ ਇਤੋ ਏਕਨਵੁਤਿਕਪ੍ਪਮਤ੍ਥਕੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਤਸ੍ਸ ਪਨ ਭਗਵਤੋ ਧਾਤੁਯੋ ਨ ਵਿਕਿਰਿਂਸੁ ਸਬ੍ਬੇ ਦੇਵਮਨੁਸ੍ਸਾ ਸਨ੍ਤਿਪਤਿਤ੍ਵਾ ਧਾਤੁਯੋ ਗਹੇਤ੍ਵਾ ਸਤ੍ਤਯੋਜਨਿਕਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਵਿਪਸ੍ਸਿ ਜਿਨਵਰੋ ਵੀਰੋ-ਸੁਮਿਤ੍ਤਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਸੋ ਥੂਪਵਰੋ-ਸਤ੍ਤਯੋਜਨਿਕੋ ਕਤੋ’’ਤਿ;

ਤਸ੍ਸ ਅਪਰਭਾਗੇ ਇਤੋ ਏਕਤਿਂਸ ਕਪ੍ਪਮਤ੍ਥਕੇ ਸਿਖੀ ਵੇਸ੍ਸਭੂਤਿ ਦ੍ਵੇ ਬੁਦ੍ਧਾ ਨਿਬ੍ਬਤ੍ਤਿਂਸੁ ਸਿਖਿਸ੍ਸ ਭਗਵਤੋ ਕਾਲੇ ਬੋਧਿਸਤ੍ਤੋ ਅਰਿਣ੍ਦਮੋ ਨਾਮ ਰਾਜਾ ਹੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਸਚਿਵਰਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਰਤਨ ਪਤਿਮਣ੍ਡਿਤਂ ਹਤ੍ਥਿਰਤਨਂ ਦਤ੍ਵਾ ਹਤ੍ਥਿਪ੍ਪਮਾਣਂ ਕਤ੍ਵਾ ਕਪ੍ਪਿਯ ਭਣ੍ਡਮਦਾਸਿ ਸੋਪਿ ਨਂ ਇਤੋ ਏਕਤਿਂਸ ਕਪ੍ਪੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ, ਸਿਖਿਸ੍ਸ ਭਗਵਤੋ ਧਾਤੁਯੋ ਏਕਘਨਾ ਹੁਤ੍ਵਾ ਅਟ੍ਠਂਸੁ, ਸਕਲ ਜਮ੍ਬੁਦੀਪਵਾਸਿਨੋ ਪਨ ਮਨੁਸ੍ਸਾ ਧਾਤੁਯੋ ਗਹੇਤ੍ਵਾ ਤਿਯੋਜਨੁਬ੍ਬੇਧਂ ਸਤ੍ਤਰਤਨਮਯਂ ਹਿਮਗਿਰਿ ਸਦਿਸ ਸੋਭਂ ਥੂਪਮਕਂਸੁ.

ਸਿਖੀ ¶ ਮੁਨਿਵਰੋ ਬੁਦ੍ਧੋ-ਦੁਸ੍ਸਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਥੂਪਵਰੋ-ਤੀਣਿ ਯੋਜਨਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਵੇਸ੍ਸਭੂ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਸੁਦਸ੍ਸਨੋ ਨਾਮ ਰਾਜਾ ਹੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਸਚੀਵਰਮਹਾਦਾਨਂ ਦਤ੍ਵਾ ਤਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਆਚਾਰਗੁਣਸਮ੍ਪਨ੍ਨੋ ਬੁਦ੍ਧਰਤਨੇ ਚਿਤਤੀਕਾਰ ਪੀਤਿ ਬਹੁਲੋ ਅਹੋਸਿ ਸੇਪਿ ਨਂ ਸਤ੍ਥਾ ਇਤੋ ਏਕਤਿਂਸਕਪ੍ਪੇ ਬੁਦ੍ਧੋ ਭਵਿਸ੍ਸਤੀਤਿ ਵ੍ਯਾਕਾਸਿ ਵੇਸ੍ਸਭੁਸ੍ਸ ਪਨ ਭਗਵਤੋ ਧਾਤੁਯੋ ਵਿਕਿਰਿਂਸੁ.

ਤੇਨ ਵੁਤ੍ਤਂ

‘‘ਵੇਸ੍ਸਭੂ ਜਿਨਵਰੋ ਸਤ੍ਥਾ-ਖੇਮਾਰਾਮਮ੍ਹਿ ਨਿਬ੍ਬੁਤੋ;

ਧਾਤੁਵਿਤ੍ਥਾਰਿਕਂ ਆਸਿ-ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਇਮਸ੍ਮਿਂ ਕਪ੍ਪੇ ਚਤ੍ਤਾਰੋ ਬੁਦ੍ਧਾ ਨਿਬ੍ਬਤ੍ਤਿਂਸੁ ਕਕੁਸਣ੍ਧੋ ਕੋਨਾਗਮਨੋ ਕਸ੍ਸਪੋ ਅਮ੍ਹਾਕਂ ਭਗਵਾਤਿ ਕਤੁਸਣ੍ਧਸ੍ਸ ਪਨ ਭਗਵਤੋ ਕਾਲੋ ਬੋਧਿਸਤ੍ਤੋ ਖੇਮੋ ਨਾਮ ਰਾਜਾ ਹੁਤ੍ਵਾ ਬੁਦ੍ਧਪਮੁਖਸ੍ਸ ਸਙ੍ਘਸ੍ਸ ਸਪਤ੍ਤਚੀਵਰਂ ਦਾਨਞ੍ਚੇਵ ਅਞ੍ਜਨਾਦਿ ਭੇਸਜ੍ਜਾਨਿ ਚ ਦਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਬ੍ਬਜਿ ਸੋਪਿ ਨਂ ਸਤ੍ਥਾ ਵ੍ਯਾਕਾਸਿ ਤਸ੍ਸ ਪਨ ਭਗਵਤੋ ਧਾਤੁਯੋ ਨ ਵਿਕਿਰਿਂਸੁ ਸਬ੍ਬੇ ਸਨ੍ਨਿਪਤਿਤ੍ਵਾ ਧਾਤੁਯੋ ਗਹੇਤ੍ਵਾ ਗਾਵੁਤੁਬ੍ਬੇਧਂ ਥੂਪਮਕਂਸੁ.

ਤੇਨ ਵੁਤ੍ਤਂ

‘‘ਕਕੁਸਣ੍ਧੋ ਜਿਨਵਰੋ - ਖੇਮਾਰਾਮਮ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਥੂਪਵਰੋ-ਗਾਵੁਤਂ ਨਭਮੁਗ੍ਗਤੋ’’ਤਿ;

ਤਸ੍ਸ ਅਪਰਭਾਗੇ ਕੋਨਾਗਮਨੋ ਨਾਮ ਸਤ੍ਥਾ ਉਦਪਾਦਿ ਤਦਾ ਬੋਧਿਸਤ੍ਤੋ ਪਬ੍ਬਤੋ ਨਾਮ ਰਜਾ ਹੁਤ੍ਵਾ ਅਮਚ੍ਚਗਣ ਪਰਿਵੁਤੋ ਸਤ੍ਥੁ ਸਨ੍ਤਿਕੇ ਗਨ੍ਤ੍ਵਾ ਧਮ੍ਮਦੇਸਨਂ ਸੁਤ੍ਵਾ ਬੁਦ੍ਧਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਪਤ੍ਤੁਣ੍ਣਚੀਨਪਟ੍ਟ ਕੋਸੇਯ੍ਯ ਕਮ੍ਬਲ ਦੁਕੁਲਾਨਿ ਚੇਵ ਸੁਵਣ੍ਣਪਟ੍ਟਕਞ੍ਚ ਦਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿ. ਸੋਪਿ ਨਂ ਸਤ੍ਥਾ ਵ੍ਯਾਕਾਸਿ ਤਸ੍ਸ ਭਗਵਤੋ ਧਾਤੁਯੋ ਵਿਕਿਰਿਂਸੁ

ਤੇਨ ਵੁਤ੍ਤਂ

‘‘ਕੋਨਾਗਮਨੋ ਸਮ੍ਬੁਦ੍ਧੋ ਪਬ੍ਬਤਾਰਾਮਮ੍ਹਿ ਨਿਬ੍ਬੁਤੋ,

ਧਾਤੁ ਵਿਤ੍ਥਾਰਿਕਂ ਆਸਿ-ਤੇਸੁ ਤੇਸੁ ਪਦੇਸਤੋ’’ਤਿ;

ਤਸ੍ਸ ਅਪਰਭਾਗੇ ਕਸ੍ਸਪੋ ਨਾਮ ਸਤ੍ਥਾ ਉਦਪਾਦਿ. ਤਦਾ ਬੋਧਿਸਤ੍ਤੋ ਜੋਤਿਪਾਲੋ ਨਾਮ ਮਾਣਵੋ ਹੁਤ੍ਵਾ ਤਿਣ੍ਣਂ ਵੇਦਾਨਂ ਪਾਰਗੁਭੂਮਿਯਞ੍ਚੇਵ ਅਨ੍ਤਲਿਕ੍ਖੇਵ ਪਾਕਟੋ ਘਟੀਕਾਰਸ੍ਸ ਕੁਮ੍ਭਕਾਰਸ੍ਸ ਮਿਤ੍ਤੋ ਅਹੋਸਿ. ਸੋ ਤੇਨ ਸਦ੍ਧਿਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮ

ਕਥਂ ¶ ਸੁਤ੍ਵਾ ਪਬ੍ਬਜਿਤ੍ਵਾ ਆਰਦ੍ਧਵੀਰਿਯੋ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਵਤ੍ਤਾ ਵਤ੍ਤਸਮ੍ਪਤ੍ਤਿਯਾ ਬੁਦ੍ਧਸਾਸਨਂ ਸੋਭੇਸਿ. ਸੋਪਿ ਨਂ ਸਤ੍ਥਾ ਵ੍ਯਾਕਾਸਿ. ਕਸ੍ਸਪਸ੍ਸ ਪਨ ਸਤ੍ਥੁਨੋ ਧਾਤੁਯੋ ਨ ਵਿਕਿਰਿਂਸੁ ਸਕਲ ਜਮ੍ਬੁਦੀਪਵਾਸਿਨੋ ਮਨੁਸ੍ਸਾ ਸਨ੍ਨਿਪਤਿਤ੍ਵਾ ਏਕੇਕਂ ਸੁਵਣ੍ਣਟ੍ਠਿਕਂ ਕੋਟਿ ਅਗ੍ਘਨਕਂ ਰਤਨਵਿਚਿਤ੍ਤਂ ਬਹਿ ਰਚਨਤ੍ਥਂ ਏਕੇਕਂ ਅਡ੍ਢਕੋਟਿ ਅਗ੍ਘਨਕਂ ਅਬ੍ਭਨ੍ਤਰ ਪੂਰਣਤ੍ਥਂ ਮਨੋਸਿਲਾਯ ਮਤ੍ਤਿਕਾਕਿਚ੍ਚਂ ਤੇਲੇਨ ਉਦਕਕਿਚ੍ਚਂ ਕਰੋਨ੍ਤਾ ਯੋਜਨੁਬ੍ਬੇਧਂ ਥੁਪਮਕਂਸੁ.

ਤੇਨ ਵੁਤ੍ਤਂ

‘‘ਮਹਾਕਸ੍ਸਪੋ ਜਿਨੋ ਸਤ੍ਥਾ-ਸੇਤਵ੍ਯਾਯਞ੍ਹਿ ਨਿਬ੍ਬੁਤੋ,

ਤਤ੍ਥੇਵ ਤਸ੍ਸ ਜਿਨਥੁਪੋ-ਯੋਜਨੁਬ੍ਬੇਧਮੁਗ੍ਗਤੋ’’ਤਿ;

ਏਤ੍ਥ ਚ

ਦੀਪਙ੍ਕਰੋ ਚ ਕੋਣ੍ਡਞ੍ਞੋ-ਮਙ੍ਗਲੋ ਸੁਮਨੋ ਤਥਾ,

ਅਨੋਮਦਸ੍ਸੀ ਬੁਦ੍ਧੋ ਚ-ਨਾਰਦੋ ਪਦੁਮੁਤ੍ਤਰੋ;

ਸੁਜਾਤੋ ਪਿਯਦਸ੍ਸੀ ਚ-ਧਮ੍ਮਦਸ੍ਸਿ ਨਰੁਤ੍ਤਮੋ,

ਸਿਦ੍ਧਤ੍ਥਬੁਦ੍ਧੋ ਤਿਸ੍ਸੋ ਚ-ਵਿਪਸ੍ਸਿ ਚ ਸਿਖੀ ਤਥਾ;

ਕਕੁਸਣ੍ਧੋ ਕਸ੍ਸਪੋ ਚਾਤਿ-ਸੋਲ਼ਸੇਤੇ ਮਹੇਸਯੋ,

ਥੁਪਪ੍ਪਮਾਣਮੇਤੇਸਂ ਪਾਲਿਯਂਯੇਵ ਦਸ੍ਸਿਤਂ;

ਯਸ੍ਮਾ ਤਸ੍ਮਾ ਮਯਾ ਸਾਧੂ-ਤੇ ਸਬ੍ਬੇਪਿ ਪਕਾਸਿਤਾ,

ਥੂਪਾ ਸਦ੍ਧਾ ਜਨਾ ਸਾਧੂ-ਤੇ ਵਨ੍ਦੇਯ੍ਯਥ ਸਾਦਰਂ;

ਯੇਸਾਨਂ ਪਨ ਅਟ੍ਠਨ੍ਨਂ - ਸੁਗਤਾਨਂ ਹਿਤੇਸਿਨਂ

ਧਾਤੁ ਵਿਤ੍ਥਾਰਿਕਾ ਆਸੁਂ - ਤੇਸੁ ਤੇਸੁ ਪਦੇਸਤੋਤਿ;

ਸਾਧੁਜਨ ਮਨੋਪਸਾਦਨਤ੍ਥਾਯ ਕਤੇ ਥੂਪਵਂਸੇ ਵਿਜ੍ਜਮਾਨਥੂਪਾਨਂ ਬੁਦ੍ਧਾਨਂ ਥੂਪਕਥਾ ਚੇਵ ਸਬ੍ਬੇਸਂ ਸਨ੍ਤਿਕੇ ਅਭਿਨਿਹਾਰਕਤਾਚੇ. ਸਮਤ੍ਤਾ.

ਕਸ੍ਸਪਸ੍ਸ ਪਨ ਭਗਵਤੋ ਅਪਰਭਾਗੇ ਠਪੇਤ੍ਵਾ ਇਮਂ ਸਮ੍ਮਾ ਸਮ੍ਬੁਦ੍ਧਂ ਅਞ੍ਞੋ ਬੁਦ੍ਧੋ ਨਾਮ ਨਤ੍ਥਿ. ਏਵਂ ਦੀਪਙ੍ਕਰਾਦੀਨਂ ਚਤੁਵੀਸਤਿਯਾ ਬੁਦ੍ਧਾਨਂ ਸਨ੍ਤਿਕੇ ਲਦ੍ਧਵ੍ਯਾਕਰਣੋ ਬੋਧਿਸਤ੍ਤੋ ਪਾਰਮਿਯੋ ਪੂਰੇਤ੍ਵਾ ਵੇਸ੍ਸਨ੍ਤਰਤ੍ਤਭਾਵੇ ਠਿਤੋ-

‘‘ਅਚੇਤਨਾਯਂ ਪਥਵੀ-ਅਵਿਞ੍ਞਾਯ ਸੁਖਂ ਦੁਖਂ,

ਸਾਪਿ ਦਾਨਬਲੋ ਮਯ੍ਹਂ-ਸਤ੍ਤਕ੍ਕਤ੍ਤੁਂ ਪਕਮ੍ਪਥਾ’’ਤਿ;

ਏਵਂ ਮਹਾਪਥਵਿ ਕਮ੍ਪਨਾਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਤਤੋ ਚੁਤੋ ਤੁਸਿਤਭਵਨੇ ਨਿਬ੍ਬਤ੍ਤਿ ਤਤ੍ਥ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਧਿਗਣ੍ਹਿਤ੍ਵਾ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੋ ਮਨੁਸ੍ਸਗਣਨਾਯ ¶ ਸਤ੍ਤਹਿ ਦਿਵਸੇਹਿ ਆਯੁਕ੍ਖਯਂ ਪਾਪੁਣਿਸ੍ਸਤਿਤਿ ਵਤ੍ਥਾਨਿ ਕਿਲ਼ਿਸ੍ਸਨ੍ਤਿ, ਮਾਲਾ ਮਿਲਾਯਨ੍ਤਿ, ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਕਾਯੇਚੇਵ ਦੁਬ੍ਬਣ੍ਣਿਯਂ ਓਕ੍ਕਮਤਿ. ਦੇਵੋ ਦੇਵਾਸਨੇ ਨਾਭਿਰਮਤੀਤਿ ਇਮੇਸੁ ਪਞ੍ਚਸੁ ਪੁਬ੍ਬਨਿਮਿਤ੍ਤੇਸੁ ਉਪ੍ਪਨ੍ਨੇਸੁ ਤਾਨਿ ਦਿਸ੍ਵਾਸੁਞ੍ਞਾਵਤ ਨੋ ਸਗ੍ਗਾ ਭਵਿਸ੍ਸਨ੍ਤਿਤਿ ਸਂਵੇਗਜਾਤਾਹਿ ਦੇਵਤਾਹਿ ਮਹਾਸਤ੍ਤਸ੍ਸ ਪਾਰਮਿਨਂ ਪੂਰਿਤਭਾਵਂ ਞਤ੍ਵਾ ਇਮਸ੍ਮਿਂ ਇਦਾਨਿ ਅਞ੍ਞਂ ਦੇਵਲੋਕਂ ਅਨੁਪਗਨ੍ਤ੍ਵਾ ਮਨੁਸ੍ਸਲੋਕੇ ਉਪ੍ਪਜ੍ਜਿਤ੍ਵਾ ਬੁਦ੍ਧਭਾਵਂ ਪਤ੍ਤੇ ਪੁਞ੍ਞਾਨਿ ਕਤ੍ਵਾ ਚੁਤ ਚੁਤਾ ਦੇਵਲੋਕਂ ਪੂਰੇਸ੍ਸਨ੍ਤੀਤਿ ਚਿਨ੍ਤੇਤ੍ਵਾ.

‘‘ਯਤੋਹਂ ਤੁਸਿਤੇ ਕਾਯੇ-ਸਨ੍ਤੁਸਿਤੋ ਨਾਮਹਂ ਤਦਾ,

ਦਸਸਹਸ੍ਸਿ ਸਮਾਗਨ੍ਤ੍ਵਾ-ਯਾਚਨ੍ਤਿ ਪਞ੍ਜਲੀ ਮਮਂ;

ਕਾਲੋਯਂਤੇ ਮਹਾਵੀਰ-ਉਪ੍ਪਜ੍ਜ ਮਾਤੁਕੁਚ੍ਛਿਯਂ,

ਸਦੇਵਕਂ ਤਾਰਯਨ੍ਤੋ-ਬੁਜ੍ਝਸ੍ਸੁ ਅਮਤਂ ਪਦਨ੍ਤਿ’’;

ਏਵਂ ਬੁਦ੍ਧਭਾਵਤ੍ਥਾਯ ਆਯਾਚਿਤੋ ਕਾਲਂ-ਦੀਪਂ-ਦੇਸਂ ਕੁਲਂ-ਜਨੇਤ੍ਤਿਯਾ ਆਯੁਪ੍ਪਮਾਣਨ੍ਤਿ ਇਮਾਨਿ ਪਞ੍ਚ ਮਹਾਵਿਲੋਕਨਾਨਿ ਵਿਲੋਕੇਤ੍ਵਾ ਕਤਸਨ੍ਨਿਟ੍ਠਾਨੋ ਤਤੋ ਚੁਤੋ ਸਕ੍ਯਰਾਜਕੁਲੇ ਪਟਿਸਣ੍ਧਿਂਗਹੇਤ੍ਵਾ ਤਤ੍ਥ ਮਹਾਸਮ੍ਪਤ੍ਤਿਯਾ ਪਰਿਹਰਿਯਮਾਨੋ ਅਨੁਕ੍ਕਮੇਨ ਭਦ੍ਦਂ ਯੋਬ੍ਬਨਂ ਅਨੁਪਾਪੁਣਿਤ੍ਵਾ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇਸੁ ਤੀਸੁ ਪਾਸਾਦੇਸੁ ਦੇਵਲੋਕਸਿਰਿਂ ਵਿਯ ਰਜ੍ਜਸਿਰਿਂ ਅਨੁਭਵਮਾਨੋ ਉਯ੍ਯਾਨਕੀਲ਼ਾਯ ਗਮਨਸਮਯੇ ਅਨੁਕ੍ਕਮੇਨ ਜਿਣ੍ਣ - ਵ੍ਯਾਧਿ - ਮਤਸਙ੍ਖਾਤੇ ਤਯੋ ਦੇਵਦੂਤੇ ਦਿਸ੍ਵਾ ਸਂਜਾਤ ਸਂਵੇਗਾ ਨਿਵਤ੍ਤਿਤ੍ਵਾ ਚਤੁਤ੍ਥੇ ਵਾਰੇ ਪਬ੍ਬਜਿਤਂ ਦਿਸ੍ਵਾ ਸਾਧੁ ਪਬ੍ਬਜ੍ਜਾਤਿ ਪਬ੍ਬਜ੍ਜਾਯ ਰੁਚਿਂ ਉਪ੍ਪਾਦੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਤਤ੍ਥ ਦਿਵਸਂ ਖੇਪੇਤ੍ਵਾ ਮਙ੍ਗਲ ਪੋਕ੍ਖਰਣਿਤੀਰੇ ਨਿਸਿਨ੍ਨੋ ਕਪ੍ਪਕ ਵੇਸਂ ਗਹੇਤ੍ਵਾ ਆਗਤੇਨ ਵਿਸ੍ਸਕਮ੍ਮ ਦੇਵਪੁਤ੍ਤੇਨ ਅਲਙ੍ਕਤ ਪਟਿਯਤ੍ਤੋ ਰਾਹੁਲਕੁਮਾਰਸ੍ਸ ਪਾਤਸਾਸਨਂ ਸੁਤ੍ਵਾ ਪੁਤ੍ਤਸਿਨੇਹਸ੍ਸ ਬਲਵਭਾਵਂ ਞਤ੍ਵਾ ਯਾਵ ਇਮਂ ਬਣ੍ਧਨਂ ਨ ਵਡ੍ਢਤਿ ਤਾਵਦੇਵਨਂ ਛਿਣ੍ਦਿਸ੍ਸਾਮੀਤਿ ਚਿਨ੍ਤੇਤ੍ਵਾ ਸਾਯਂ ਨਗਰਂ ਪਵਿਸਨ੍ਤੋ-

‘‘ਨਿਬ੍ਬੁਤਾ ਨੂਨ ਸਾ ਮਾਤਾ - ਨਿਬ੍ਬੁਤੋ ਨੂਨ ਸੋ ਪਿਤਾ,

ਨਿਬ੍ਬੁਤਾ ਨੂਨ ਸਾ ਨਾਰੀ - ਯਸ੍ਸਾਯਂ ਈਦਿਸੋ ਪਤਿ’’ਤਿ;

ਕਿਸਾਗੋਤਮਿਯਾ ਨਾਮ ਪਿਤੁਚ੍ਛਾ ਧੀਤਾਯ ਭਾਸਿਤਂ ਇਮਂ ਗਾਥਾ ਸੁਤ੍ਵਾ ਇਹਂ ਇਮਾਯ ਨਿਬ੍ਬੁਤਪਦਂ ਸਾਵਿਤੋਤਿ ਗੀਵਤੋ ਸਤਸਹਸ੍ਸਗ੍ਘਨਕਂ ਮੁਤ੍ਤਾਹਾਰਂ ਓਮੁਞ੍ਚਿਤ੍ਵਾ ਤਸ੍ਸਾ ਪੇਸੇਤ੍ਵਾ ਅਤ੍ਤਨੋ ਭਵਨਂ ਪਵਿਸਿਤ੍ਵਾ ਸਿਰੀਸਯਨੇ ਨਿਪਨ੍ਨੋ ਨਿਦ੍ਦਾਵਸ ਗਤਾਨਂ ਨਾਟਕਾਨਂ ਵਿਪ੍ਪਕਾਰਂ ਦਿਸ੍ਵਾ ਨਿਬ੍ਬਿਨ੍ਨਹਦਯੋ ਛਨ੍ਨਂ ਉਟ੍ਠਾਪੇਤ੍ਵਾ ਕਣ੍ਥਕਂ ਆਹਾਰਾਪੇਤ੍ਵਾ ਤਂ ਆਰੁਯ੍ਹ ਛਨ੍ਨਸਹਾਯੋ ਦਸਸਹਸ੍ਸ ਚਕ੍ਕਵਾਲ਼ ਦੇਵਤਾਹਿ ਕਤ ਪਰਿਵਾਰੋ ਮਹਾਭਿਨਿਕ੍ਖਮਨਾ ਨਿਕ੍ਖਮਿਤ੍ਵਾ ਤੇਨੇਵ ਰਤ੍ਤਾਵਸੇਸੇਨ ਤੀਣਿ ਰਜ੍ਜਾਨਿ ਅਤਿਕ੍ਕਮ੍ਮ ਅਨੋਮਾਯ ਨਦਿਯਾ ਪਰਤੀਰਂ ਪਤ੍ਵਾ ਅਸ੍ਸਾਪਿਟ੍ਠਿਤੋ ਓਰੁਯ੍ਹ ¶ ਮੁਤ੍ਤਰਾਸਿ ਸਦਿਸੇ ਚਾਲਿਕਾਪੁਲਿਣੇ ਠਤ੍ਵਾ ਛਨ੍ਨਤ੍ਵਂ ਮਯ੍ਹਂ ਆਭਰਣਾਨਿ ਚੇਵ ਕਣ੍ਥਕਞ੍ਚ ਆਦਾਯ ਗਚ੍ਛਾਹਿ ਆਭਰਣਾਨਿ ਚ ਕਣ੍ਥਕਞ੍ਚ ਪਟਿਚ੍ਛਾਪੇਤ੍ਵਾ ਦਕ੍ਖਿਣ ਹਤ੍ਥੇਨ ਮਙ੍ਗਲਖਗ੍ਗਮਾਦਾਯ ਵਾਮਹਤ੍ਥੇਨ ਮੋਲਿਯਾ ਸਦ੍ਧਿਂ ਚੂਲ਼ਂ ਛਿਣ੍ਦਿਤ੍ਵਾ ਸਚੇ ਅਹਂ ਬੁਦ੍ਧੋ ਭਵਿਸ੍ਸਾਮਿ ਆਕਾਸੇ ਤਿਟ੍ਠਤੁ ਨੋ ਚੇ ਭੂਮਿਯਂ ਪਤਤੂਤਿ ਆਕਾਸੇ ਖਿਪਿ ਚੁਲ਼ਾਮਣੀ ਬਣ੍ਧਨਂ ਯੋਜਨਪ੍ਪਮਾਣਂ ਠਾਨਂਗਨ੍ਤ੍ਵਾ ਆਕਾਸੇ ਅਟ੍ਠਾਸਿ ਅਥ ਸਕ੍ਕੋ ਦੇਵਰਾਜਾ ਯੋਜਨਿਕੇਨ ਰਤਨਚਙ੍ਗੋਟਕੇਨ ਪਟਿਗ੍ਗਹੇਸਿ.

ਯਥਾਹ

ਛੇਤ੍ਵਾਨ ਮੋਲਿਂ ਵਰਗਨ੍ਧਵਾਸਿਤਂ

ਵੇਹਾਸਯਂ ਉਕ੍ਖਿਪਿ ਸਕ੍ਯਪੁਙ੍ਗਯਵੋ,

ਸਹਸ੍ਸਨੇਤ੍ਤੋ ਸਿਰਸਾ ਪਟਿਗ੍ਗਹਿ

ਸੁਵਣ੍ਣ ਵਙ੍ਗੋਟਵਰੇਨ ਵਾਸਵੋ’ਤਿ;

ਪਟਿਗ੍ਗਹੇਤ੍ਵਾ ਚ ਪਨ ਦੇਵਲੋਕਂ ਨੇਤ੍ਵਾ ਸੁਨੇਰੁ ਮੁਦ੍ਧਨਿ ਤਿਯੋਜਨਪ੍ਪਮਾਣਂ ਇਣ੍ਦਨੀਲਮਣਿਮਯਂ ਚੁਲ਼ਾਮਣਿ ਚੇਤਿਯਂ ਨਾਮ ਅਕਾਸਿ ਅਥ ਕਸ੍ਸਪ ਬੁਦ੍ਧਕਾਲੇ ਪੋਰਾਣ ਸਹਾਯਕੋ ਘਟਿਕਾਰ ਮਹਾਬ੍ਰਹ੍ਮਾ ਏਕਂ ਬੁਦ੍ਧਨ੍ਤਰਂ ਵਿਨਾਵਾਸਭਾਵਪ੍ਪਤ੍ਤੇਨ ਮਤ੍ਤਭਾਵੋ ਚਿਤ੍ਤੇਸਿ. ਅਜ੍ਜ ਮੇ ਸਹਾਯਕੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ ਸਮਣ ਪਰਿਕ੍ਖਾਰਮਸ੍ਸ ਗਹੇਤ੍ਵਾ ਗਚ੍ਛਾਮੀਤਿ-

‘‘ਤਿਚੀਵਰਞ੍ਚ ਪਤ੍ਤੋ ਚ ਵਾਸਿ ਸੂਚਿ ਚ ਬਣ੍ਧਨਂ,

ਪਰਿਸ੍ਸਾਵਨ ਅਟ੍ਠੇਤੇਨ-ਯੁਤ੍ਤਯੋਗਸ੍ਸ ਭਿਕ੍ਖੁਨੋ’’ਤਿ;

ਇਮੇ ਸਮਣਪਰਿਕ੍ਖਾਰੇ ਆਹਰਿਤ੍ਵਾ ਅਦਾਸਿ ਮਹਾਪੁਰਿਸੋ ਅਰਹਦ੍ਧਜਂ ਨਿਵਾਸੇਤ੍ਵਾ ਉਤ੍ਤਮਂ ਪਬ੍ਬਜ੍ਜਾਵੇਸਂ ਗਣ੍ਹਿਤ੍ਵਾ ਸਾਟਕਯੁਗਲਂ ਆਕਾਸੇ ਖਿਪਿ ਤਂ ਬ੍ਰਹ੍ਮਾ ਪਟਿਗ੍ਗਹੇਤ੍ਵਾ ਬ੍ਰਹ੍ਮਲੋਕੇ ਦ੍ਵਾਦਸਯੋਜਨਿਕਂ ਸਬ੍ਬਰਤਨਮਯਂ ਦੁਸ੍ਸਚੇਤਿਯਮਕਾਸਿ.

‘‘ਕਿਲੇਸ ਅਪ੍ਪਹੀਣੇਪਿ=ਮਹਾਸਤ੍ਤਸ੍ਸ ਤਂ ਖਣੇ,

ਯਸ੍ਸਾਨੁਭਾਵਤੋ ਏਵਂ ਦੁਸ੍ਸਚੂਲ਼ਾ ਹਿ ਪੂਜਿਤਾ

ਤਸ੍ਮਾ ਤਮ੍ਮ ਮਹਾਬੋਧਿ-ਸਤ੍ਤਾਨਂ ਪਟਿਪਤ੍ਤਿਯਂ,

ਨ ਕਰੇਯ੍ਯ ਮਹੁਸ੍ਸਾਹਂਵ-ਕੋ ਹਿ ਨਾਮ ਬੁਧੋ ਜਨੋ’’ਤਿ;

ਚੂਲ਼ਾਮਣਿਦੁਸ੍ਸ ਥੁਪਦ੍ਵਯਕਥਾ

੯. ਬੋਧਿਸਤ੍ਤੋ ਪਬ੍ਬਜਿਤ੍ਵਾ ਅਨੁਕ੍ਕਮੇਨ ਰਾਜਗਹਂ ਗਨ੍ਤ੍ਵਾ ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਪਣ੍ਡਵ ਪਬ੍ਬਤਪਬ੍ਭਾਰੇ ਨਿਸਿਨ੍ਨੋ ਮਗਧਰਾਜੇਨ ਰਜ੍ਜੇਨ ਨਿਮਨ੍ਤਿਯਮਾਨੋ ਤਂ ਪਟਿਕ੍ਖਿਪਿਤ੍ਵਾ ਸਬ੍ਬਞ੍ਞੁਤਂ ਪਤ੍ਵਾ ਤਿਸ੍ਸਵਿਜਿਤਂ ਆਗਮਨਤ੍ਥਾਯਤੇਨਗਹਿਤ ਪਟਿਞ੍ਞੋ ਆਲ਼ਾਰਂ-ਉਦ੍ਦਕਞ੍ਚ ਉਪਸਙ੍ਕਮਿਤ੍ਵਾ ¶ ਤੇਸਂ ਸਨ੍ਤਿਕੇ ਅਧਿਗਤਵਿਸੇਸੇਨ ਅਪਰਿਤੁਟ੍ਠੋ ਛਬ੍ਬਸ੍ਸਾਨਿ ਮਹਾਪਧਾਨਂ ਪਦਹਿਤ੍ਵਾ ਵਿਸਾਖ ਪੁਣ੍ਣਮ ਦਿਵਸੇ ਸੇਨਾਨਿਨਿਗਮੇ ਸੁਜਾਤਾਯ ਦਿਨ੍ਨਪਾਯਾਸਂ ਪਰਿਭੁਞ੍ਜਿਤ੍ਵਾ ਨੇਰਞ੍ਜਰਾਯ ਨਦਿਯਾ ਸੁਵਣ੍ਣਪਾਤਿਂ ਪਵਾਹੇਤ੍ਵਾ ਨੇਰਞ੍ਜਰਾਯ ਤੀਰੇ ਮਹਾਵਨਸਣ੍ਡੇ ਨਾਨਾਸਮਾਪਤ੍ਤੀਹਿ ਦਿਵਾਭਾਗਂ ਵਿਤਿਨਾਮੇਤ੍ਵਾ ਸਾਯਣ੍ਹ ਸਮਯੇ ਸੋਤ੍ਥਿਯੇਨ ਦਿਨ੍ਨਂ ਤਿਣਮੁਟ੍ਠਿਂ ਗਹੇਤ੍ਵਾ ਕਾਲ਼ੇਨ ਨਾਗਰਾਜੇਨ ਅਭਿਤ੍ਥੁਤਗੁਣੋ ਬੋਧਿਮਣ੍ਡਂ ਆਰੁਯ੍ਹ ਤਿਣਾਨਿ. ਸਤ੍ਥਰਿਤ੍ਵਾ ਨ ਤਾਵੀਮਂ ਪਲ੍ਲਙ੍ਕਂ ਭਿਣ੍ਦਿਸ੍ਸਾਮਿ ਯਾਵ ਮੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਿਸ੍ਸਤੀ’’ਤਿ ਪਟਿਞ੍ਞਂ ਕਤ੍ਵਾ ਪਾਚੀਨ ਦਾਸਾਭਿਮੁਖੋ ਨਿਸੀਦਿਤ੍ਵਾ-ਸੂਰਿਯੇ ਅਨਤ੍ਥਮਿਤੇਯੇਵ ਮਾਰਬਲਂ ਵਿਧਮੇਤ੍ਵਾ ਪਠਮਯਾਮੇ ਪੁਬ੍ਬੇ ਨਿਵਾਸਞਾਣਂ ਮਜ੍ਝਿਮਯਾਮੇ ਚੁਤੂਪਪਾਤਞਾਣਂ ਪਤ੍ਵਾ ਪਚ੍ਛਿਮਯਾਮਾਵਸਾਨੇ ਦਸਬਲ ਚਤੁਵੇਸਾਰਜ੍ਜਾਦਿ ਸਬ੍ਬਗੁਣਪਤਿਮਣ੍ਡਿਤਂਸਬ੍ਬਞ੍ਞੁਤਞਾਣਂ ਪਟਿਵਿਜ੍ਝਿਤ੍ਵਾ ਸਤ੍ਤ ਸਤ੍ਤਾਹਂ ਬੋਧਿਸਮੀਪੇਯੇਵ ਵੀਤਿਨਾਮੇਤ੍ਵਾ ਅਟ੍ਠਮੇ ਸਤ੍ਤਾਹੇ ਅਜਪਾਲ ਨਿਗ੍ਰੋਧਮੂਲੇ ਨਿਸਿਨ੍ਨੋ ਧਮ੍ਮਗਮ੍ਭੀਰਤਾ ਪਚ੍ਚਵੇਕ੍ਖਨੇਨ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਮਾਨੋ ਦਸਦਹਸ੍ਸੀ ਮਹਾਬ੍ਰਹ੍ਮ ਪਰਿਵਾਰੇਨ ਸਹਮ੍ਪਤਿ ਮਹਾਬ੍ਰਹ੍ਮੁਨਾ ਆਯਾਚਿਤ ਧਮ੍ਮਦੇਸਨੋ ਬੁਦ੍ਧਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਬ੍ਰਹ੍ਮੁਨੋ ਅਜ੍ਝੇਸਨਂ ਆਦਾਯ ਕਸ੍ਸ ਨੁ ਖੋ ਪਠਮਂ ਧਮ੍ਮਂ ਦੇਸੇਯ੍ਯਨ੍ਤਿ ਓਲੋਕੇਨ੍ਤੋ ਆਲ਼ਾਰੁਦ੍ਦਕਾਨਂ ਕਾਲਕਤਭਾਵਂ ਞਤ੍ਵਾ ਪਞ੍ਚਵਗ੍ਗੀਯਾਨਂ ਭਿਕ੍ਖੁਨਂ ਬਹੂਪਕਾਰਤਂ ਅਨੁਸ੍ਸਰਿਤ੍ਵਾ ਉਟ੍ਠਾਯਾਸਨਾ ਕਾਸਿਪੁਰਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਉਪਕੇਨ ਸਦ੍ਧਿਂ ਮਨ੍ਤੇਤ੍ਵਾ ਆਸਾਲ਼ਹਿਪੁਣ੍ਣਮ ਦਿਵਸੇ ਇਸਿਪਤਨੇ ਮਿਗਦਾਯੇ ਪਞ੍ਚ ਵਗ੍ਗਿਯਾਨਂ ਭਿਕ੍ਖੁਨਂ ਵਸਨਟ੍ਠਾਨਂ ਪਤ੍ਵਾ ਤੇ ਅਨਨੁਚ੍ਛਵਿਕੇਨ ਆਵੁਸੋ ਵਾਦੇਨ ਸਮੁਦਾਚਰਨ੍ਤੇ ਅਞ੍ਞਾਪੇਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਨ੍ਤੋ ਅਞ੍ਞਾਕੋਣ੍ਡਞ੍ਞਤ੍ਥੇਰਪਮੁਖੇ ਅਟ੍ਠਾਰਸ ਕੋਟਿਯੋ ਅਮਤਪਾਨਂ ਪਾਯੇਸਿ.

ਤਤੋ ਪਟ੍ਠਾਯ ਚਤ੍ਤਾਲੀਸ ਸਂਵਚ੍ਛਰਾਨਿ ਠਤ੍ਵਾ ਚਤੁਰਾਸੀਤਿ ਧਮ੍ਮਕ੍ਖਣ੍ਧ ਸਹਸ੍ਸਾਨਿ ਦੇਸੇਤ੍ਵਾ ਗਣਨਪਥਮਤੀਤੇ ਸਤ੍ਤੇ ਭਵਕਨ੍ਤਾਰਤੋ ਸਨ੍ਤਾਰੇਤ੍ਵਾ ਸਬ੍ਬਬੁਦ੍ਧਕਿਚ੍ਚਾਨਿ ਨਿਟ੍ਠਪੇਤ੍ਵਾ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨ ਮਨ੍ਤਰੇ ਉਤ੍ਤਸੀਸਕਂ ਪਞ੍ਞਤ੍ਤੇ ਮਞ੍ਚਕੇ ਵਿਸਾਖਪੁਣ੍ਣਮ ਦਿਵਸੇ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਅਨੁਟ੍ਠਾਨਸੇਯ੍ਯਾਯ ਨਿਪਜ੍ਜਿ. ਤਦਾ ਕਿਰ ਭਗਵਤੋ ਪੂਜਾਯ ਯਮਕਸਾਲਾ ਸਬ੍ਬਪਾਲਿਫੁਲ੍ਲਾ ਮੂਲਤੋ ਪਟ੍ਠਾਯ ਯਾਵ ਅਗ੍ਗਾ ਏਕਚ੍ਛਨ੍ਨਾ ਅਹੇਸੁਂ. ਨ ਕੇਵਲਞ੍ਚ ਯਮਕਸਾਲਾਯੇਵ ਸਬ੍ਬੇਪਿ ਰੁਕ੍ਖਸਾਖਾ ਸਬ੍ਬਪਾਲਿਫੁਲ੍ਲਾਵ ਅਹੇਸੁਂ.

ਨ ਕੇਵਲਞ੍ਚ ਤਸ੍ਮਿਂਯੇਵ ਉਯ੍ਯਾਨੇ ਸਕਲੇਪਿ ਦਸਸਹਸ੍ਸ ਚਕ੍ਕਵਾਲ਼ੇ ਫਲੁਪਗ ਰੁਕ੍ਖਾ ਫਲਂ ਗਣ੍ਹਿਂਸੁ. ਸਬ੍ਬਰੁਕ੍ਖਾਨਂ ਖਣ੍ਧੇਸੁ ਖਣ੍ਧ ਪਦੁਮਾਨਿ, ¶ ਵਲਲੀਸੁ ਵਲਲਿਪਦੁਮਾਨਿ. ਆਕਾਸੇ ਉਲ੍ਲੋਕਪਦੁਮਾਨਿ, ਪਥਵਿਤਲਂ ਭਿਣ੍ਦਿਤ੍ਵਾ ਦਣ੍ਡਕਪਦੁਮਾਨਿ ਪੁਪ੍ਫਿਂਸੁ. ਸਬ੍ਬੋ ਮਹਾ ਸਮੁਦ੍ਦੋ ਪਞ੍ਚਵਣ੍ਣ ਪਦੁਮਸਞ੍ਛਨ੍ਨੋ ਅਹੋਸਿ ਤਿਯੋਜਨ ਸਹਸ੍ਸਵਿਤ੍ਥਤੋ ਪਨ ਹਿਮਵਾ ਘਨਬਦ੍ਧਮੋਰਪਿਞ੍ਛਕਲਾਪੋ ਵਿਯ ਨਿਰਨ੍ਤਰਂ ਮਾਲਾਦਾਮਗਵਕ੍ਖਿਤੋ ਵਿਯ ਸੁਟ੍ਠੁ ਪੀਲ਼ੇਤ੍ਵਾ ਆਬਦ੍ਧਪੁਪ੍ਫਵਟਂਸਕੋ ਵਿਯ ਸੁਪੂਰਿਤ ਪੁਪ੍ਫਚਙ੍ਗੇਟਕਂ ਵਿਯ ਚ ਅਤਿਰਮਣੀਯੋ ਅਹੋਸਿ.

ਯਮਕਸਾਲਾ ਭੁਮ੍ਮਦੇਵਤਾਨਿ ਸਞ੍ਚਾਲਿਤਕ੍ਖਵਿਣ੍ਧਟਪਾ ਤਥਾਗਤਸਰੀਰਸ੍ਸ ਉਪਰਿਪੁਪ੍ਫਾਨਿ ਵਿਕਿਰਨ੍ਤਿ. ਦਿਬ੍ਬਾਨਿਪਿ ਮਣ੍ਦਾਰਵ ਪੁਪ੍ਫਾਨਿ ਅਨ੍ਤਲਿਕ੍ਖਾ ਪਤਨ੍ਤਿ. ਤਾਨਿ ਹੋਨ੍ਤਿ ਸੁਵਣ੍ਣ ਵਣ੍ਣਾਨਿ ਪਣ੍ਣਚ੍ਛਤ੍ਤਪ੍ਪਮਾਣਾਨਿ ਮਹਾਤੁਮ੍ਬਮਤ੍ਤਂ ਰੇਣੁ ਗਣ੍ਹਨ੍ਤਿ ਨ ਕੇਵਲਞ੍ਚ ਮਣ੍ਦਾਰਵ ਪੁਪ੍ਫਾਨੇਚ, ਅਞ੍ਞਾਨਿਪਿ ਸਬ੍ਬਾਨਿ ਪਾਰਿਚ੍ਛਤ੍ਤਕ ਪੁਪ੍ਫਾਦੀਨਿ ਸੁਵਣ੍ਣਵਙ੍ਗੋਟਕਾਨਿ ਰਜਤਚਙ੍ਗੋਟਕਾਨਿ ਚ ਪੂਰੇਤ੍ਵਾ ਪੂਰੇਤ੍ਵਾ ਤਿਦਸ ਪੁਰੇਪਿ ਬ੍ਰਹ੍ਮਲੋਕੇਪਿ ਠਿਤਾਹਿ ਦੇਵਤਾਹਿ ਵਿਵਿਧਾਨਿ ਅਨ੍ਤਰਾ ਅਵਿਪ੍ਪਕਿਣ੍ਣਾਨੇਵ ਹੁਤ੍ਵਾ ਆਗਨ੍ਤ੍ਵਾ ਪਤ੍ਤਕਿਂਜਕ੍ਖ ਰੇਣੁ ਚੁਣ੍ਣੇਹਿ ਤਥਾਗਤਸ੍ਸ ਸਰੀਰਮੇਵ ਓਕੀਰਨ੍ਤਿ ਨ ਕੇਵਲਞ੍ਚ ਦੇਵਤਾਨਂਯੇਵ ਨਾਗ ਸੁਪਣ੍ਣ ਮਨੁਸ੍ਸਾਨਮ੍ਪਿ ਉਪਕਪ੍ਪਨ ਚਣ੍ਦਨ ਚੁਣ੍ਣਾਨਿ ਨ ਕੇਵਲਞ੍ਚ ਚਣ੍ਦਨਚੁਣ੍ਣਾਨੇਵ ਕਾਲ਼ਾਨੁਸਾਰੀ ਤਗਰ ਲੋਹਿਤਚਣ੍ਦਨਾਦਿ ਸਬ੍ਬਗਨ੍ਧਜਾਤਚੁਣ੍ਣਾਨਿ, ਹਰਿਤਾਲਞ੍ਜਨ ਸੁਵਣ੍ਣ ਰਜਤ ਚੁਣ੍ਣਾਨਿ, ਸਬ੍ਬਗਨ੍ਧਵਾਸ ਵਿਕਤਿਯੋ ਸੁਵਣ੍ਣ ਰਜਤਾਦਿਸਮੁਗ੍ਗੇ ਪੂਰੇਤ੍ਵਾ ਚਕ੍ਕਵਾਲ਼ ਮੁਖਵਟ੍ਟਿਆਦਿਸੁ ਠਿਤਾਹਿ ਦੇਵਤਾਹਿ ਪਵਿਦ੍ਧਾ ਅਨ੍ਤਰਾ ਅਵਿਪ੍ਪਕਿਰਿਤ੍ਵਾ ਤਥਾਗਤਸ੍ਸੇਵ ਸਰੀਰਂ ਓਕਿਰਨ੍ਤਿ ਦਿਬ੍ਬਾਨਿਪਿ ਤੁਰਿਯਾਨਿ ਅਨ੍ਤਲਿਕ੍ਖੇ ਵਜ੍ਜਨ੍ਤਿ. ਨ ਕੇਵਲਞ੍ਚ ਤਾਨਿਯੇਵ ਸਬ੍ਬਾਨਿਪਿ ਤਨ੍ਤਿਬਦ੍ਧ ਚਮ੍ਮਪਰਿਯੋਨਦ੍ਧ ਸੁਸਿਰਾਦਿ ਭੇਦਾਨਿ ਦਸਸਹਸ੍ਸਚਕ੍ਕਵਾਲ਼ੇ ਦੇਵ-ਨਾਗਵ-ਸੁਪਣ੍ਣ-ਮਨੁਸ੍ਸਾਨਂ ਤੁਰਿਯਾਨਿ ਏਕਚਕ੍ਕਵਾਲ਼ੇ ਸਨ੍ਨਿਪਤਿਤ੍ਵਾ ਅਨ੍ਤਲਿਕ੍ਖੇ ਵਜ੍ਜਨ੍ਤਿ.

ਵਰਚਾਰਣਦੇਵਤਾ ਕਿਰ ਨਾਮੇਕਾ ਦੀਘਾਯੁਕਾ ਦੇਵਤਾ ਮਹਾਪੁਰਿਸੋ ਮਨੁਸ੍ਸਪਥੇ ਨਿਬ੍ਬਤ੍ਤਿਤ੍ਵਾ ਬੁਦ੍ਧੋ ਭਵਿਸ੍ਸਤੀਤਿ ਸੁਤ੍ਵ ਪਟਿਸਣ੍ਧਿਦਿਵਸੇ ਗਣ੍ਹਿਤ੍ਵਾ ਗਮਿਸ੍ਸਾਮਾਤਿ ਮਾਲਾ ਗਨ੍ਥਿਤੁਂ ਆਰਭਿਂਸੁ ਤਾ ਗਣ੍ਥਮਾਨਾਵ ਮਹਾਪੁਰਿਸੇ ਮਾਤੁਕੁਚ੍ਛਿਯਂ ਨਿਬ੍ਬਤ੍ਤੇ ਤੁਮ੍ਭੇ ਕਸ੍ਸ ਗਣ੍ਥਥਾਤਿ ਵੁਤ੍ਤਾ ਨ ਤਾਵ ਤਿਟ੍ਠਾਤਿ ਕੁਚ੍ਛਿਤੋ ਨਿਕ੍ਖਮਨ ਦਿਵਸੇ ਗਹੇਤ੍ਵਾ ਗਮਿਸ੍ਸਾਮਾਤਿ ਆਹਂਸੁ ਪੁਨ ਨਿਕ੍ਖੇਨ੍ਤੋਤਿ ਸੁਤ੍ਵਾ ਮਹਾਭਿਨਿਕ੍ਖਮਨਦਿਵਸੇ ਗਮਿਸ੍ਸਾਮਾਤਿ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋਤਿ ਸੁਤ੍ਵਾ ਅਭਿਸਮ੍ਬੋਧਿ ਦਿਵਸੇ ਗਮਿਸ੍ਸਾਮਾਤਿ. ਅਜ੍ਜ ਅਭਿਸਮ੍ਬੁਦ੍ਧੋਤਿ ਸੁਤ੍ਵਾ ਧਮ੍ਮਚਕ੍ਕਪ੍ਪਵਤ੍ਤਨਦਿਵਸੇ ਗਮਿਸ੍ਸਾਮਾਤਿ ਧਮ੍ਮਚਕ੍ਕਂ ਪਵਤ੍ਤਯੀਤਿ ਸੁਤ੍ਵਾ ਯਮਕਪਾਟਿਹਾਰਿਯਦਿਵਸੇ ਗਮਿਸ੍ਸਾਮਾਤਿ. ਅਜ੍ਜ ਯਮਕਪਾਟਿਹਾਰਿਯਂ ਕਰੀਤਿ ਸੁਤ੍ਵਾ ਦੇਵੋ ਰੋਹਨਦਿਵਸੇ ਗਮਿਸ੍ਸਾਮਾਤਿ. ਅਜ੍ਜ ਦੇਵੋਰੋਹਨਂ ਕਰੀਤਿ ਸੁਤ੍ਵਾ ਆਯੁਸਙ੍ਖਾਰੋਸ੍ਸਜ੍ਜਨੇ ਗਮਿਸ੍ਸਾਮਾਤਿ ਆਯੁਸਙ੍ਖਾਰਂ ਓਸ੍ਸਜੀਤਿ ਸੁਤ੍ਵਾ ਨ ਤਾਵ ਨਿਟ੍ਠਾਤਿ ਪਰਿਨਿਬ੍ਬਾਨਦਿਵਸੇ ਗਮਿਸ੍ਸਾਮਾਤਿ?

ਅਜ੍ਜ ¶ ਭਗਵਾ ਯਮਕਸਾਲਾਨਮਨ੍ਤਰੇ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਸੀਹਸੇਯ੍ਯਂ ਉਪਗਤੋ ਬਲਵ ਪਚ੍ਚੁਸਮਯੇ ਪਰਿਨਿਬ੍ਬਾਯਿਸ੍ਸਤਿ ਤੁਮ੍ਹੇ ਕਸ੍ਸ ਗਣ੍ਥਥਾਤਿ ਵੁਤ੍ਤਾ ਪਨ ਕਿਨ੍ਨਾਮੇਤਂ ਅਜ੍ਜੇਵ ਮਾਤੁਕੁਚ੍ਛਿਯਂ ਪਟਿਸਣ੍ਧਿਂ ਗਣ੍ਹਿ ਅਜ੍ਜੇਵ ਕੁਚ੍ਛਿਤੋ ਨਿਕ੍ਖਨ੍ਤੋ, ਅਜ੍ਜੇਵ ਮਹਾਭਿਨਿਕ੍ਖਮਨਂ ਨਿਕ੍ਖਮਿ. ਅਜ੍ਜੇਵਬੁਦ੍ਧੋ ਅਹੋਸਿ ਅਜ੍ਜੇਵ ਧਮ੍ਮਚਕ੍ਕਂ ਪਵਤ੍ਤਯਿ. ਅਜ੍ਜੇਵ ਯਮਕਪਾਟਿਹਾਰਿਯਂ ਅਕਾਸਿ. ਅਜ੍ਜੇਵ ਦੇਵਲੋਕਾ ਓਤਿਨਣ੍ਣਾ. ਅਜ੍ਜੇਵ ਆਯੁਸਙ੍ਖਰਂ ਓਸ੍ਸਜਿ. ਅਜ੍ਜੇਵ ਕਿਰ ਪਰਿਨਿਬ੍ਬੁਤੋ. ਨਨੁ ਨਾਮ ਦੁਤਿਯ ਦਿਵਸੇ ਯਾਗੁਪਾਨ ਕਾਲਮਤ੍ਤਮ੍ਪਿ ਠਾਤਬ੍ਬਂ ਅਸ੍ਸ, ਦਸ ਪਾਰਮਿਯੋ ਪੂਰੇਤ੍ਵਾ ਬੁਦ੍ਧਤ੍ਤਂ ਪਤ੍ਤਸ੍ਸ ਨਾਮ ਅਨਨੁਚ੍ਛਵਿਕਨ੍ਤਿ ਅਪਰਿ ਨਿਟ੍ਠਿਤਾਵ ਮਾਲਾਯੋ ਗਹੇਤ੍ਵਾ ਆਗਮ੍ਮ ਅਨ੍ਤੋ ਚਕ੍ਕਵਾਲ਼ੇ ਓਕਾਸਂ ਆਲਭਮਾਨਾ ਚਕ੍ਕਵਾਲ਼ ਮੁਖਵਟ੍ਟਿਯਂ ਲਭਿਤ੍ਵਾ ਆਧਾਵਨ੍ਤਿਯੋ ਹਤ੍ਥੇਨ ਹਤ੍ਥਂ ਗੀਵਾਯ ਗੀਵਂ ਗਹੇਤ੍ਵਾ ਤੀਣਿ ਰਤਨਾਨਿ ਆਰਬ੍ਭਦ੍ਵਤ੍ਤਿਂਸਮਹਪੁਰਿਸਲਕ੍ਖਣਾਨਿ ਛਬ੍ਬਣ੍ਣਰਂਸਿਯੋ ਦਸਪਾਰਮਿਯੋ ਅਦ੍ਧਚ੍ਛਟ੍ਠਾਨਿ ਜਾਤਕਸਤਾਨਿ ਚੁਦ੍ਦਸ੍ਸ ਬੁਦ੍ਧਞਾਣਾਨਿ ਆਰਬ੍ਭ ਗਾਯਿਤ੍ਵਾ ਤਸ੍ਸ ਤਸ੍ਸ ਅਵਸਾਨੇ ਸਹਾਯ ਹੇ ਸਹਾਯ ਹੇਤਿ ਵਦਨ੍ਤਿ. ਇਦਮੇਤਂ ਪਟਿਚ੍ਚਵੁਤ੍ਤਂ-ਦਿਬ੍ਬਾਨਿਪਿ ਸਂਗੀਤਾਨਿ ਅਨ੍ਤਲਿਕ੍ਖੇ ਵਤ੍ਤਨ੍ਤਿਤਿ.

ਭਗਵਾ ਪਨ ਏਵਂ ਮਹਤਿਯਾ ਪੂਜਾਯ ਵਤ੍ਤਮਾਨਯਾ ਪਠਮਯਾਮੇ ਮਲ੍ਲਾਨਂ ਧਮ੍ਮਂ ਦੇਸੇਸਿ ਮਜ੍ਝਿਮਯਾਮੇ ਸੁਭਦ੍ਦਸ੍ਸ ਧਮ੍ਮਂ ਦੇਸੇਤ੍ਵਾ ਤਂ ਮਗ੍ਗਫਲੇ ਪਤਿਟ੍ਠਾਪੇਸਿ ਪਚ੍ਛਿਮਯਾਮੇ ਭਿਕ੍ਖੁ ਓਵਦਿਤ੍ਵਾ ਬਲਵ ਪਚ੍ਚੂਸ ਸਮਯੇ ਮਹਾਪਥਵਿਂ ਕਮ੍ਪੇਨ੍ਤੋ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ ਪਰਿਨਿਬ੍ਬੁਤੇ ਪਨ ਭਗਵਤਿ ਲੋਕਨਾਥੇ ਆਨਣ੍ਦਤ੍ਥੇਰੋ ਮਲ੍ਲਰਾਜੁਨਂ ਤਂ ਪਵਤ੍ਤਿਂ ਆਰੋਚੇਤਿ ਤੇ ਸੁਤ੍ਵਾਵ ਗਣ੍ਧਮਾਲਂ ਸਬ੍ਬਞ੍ਚ ਤਾਲਾਵਚਰਂ ਪਞ੍ਚ ਚ ਦੁਸ੍ਸਯੁਗਸਤਾਨਿ ਆਦਾਯ ਗਨ੍ਤ੍ਵਾ ਭਗਵਤੋ ਸਰੀਰਂ ਨਚ੍ਚੇਹਿ - ਗੀਤੇਹਿ - ਵਾਦਿਤੇਹਿ - ਮਾਲੇਹਿ - ਗਣ੍ਧੇਹਿ ਸਕ੍ਕਰੋਨ੍ਤਾ ਗਰੁਕਰੋਨ੍ਤਾ ਮਾਨੇਨ੍ਤਾ - ਪੂਜੇਨ੍ਤਾ ਚੇਲਵਿਤਾਨਾਨਿ ਕਰੋਨ੍ਤਾ ਮਣ੍ਡਲ ਮਾਲਾਨਿ ਪਟਿਯਾਦੇਨ੍ਤਾ ਏਵਂ ਤਾ ਦਿਵਸਂ ਵੀਤਿਨਾਮੇਸੁਂ.

ਅਥ ਦੇਵਤਾਨਞ੍ਚ ਕੋਸਿਨਾਰਕਾਨਂ ਮਲ੍ਲਾਨਞ੍ਚ ਏਤਦਹੋਸਿ-ਅਤਿਵਿਕਾਲੋ ਖੋ ਅਜ੍ਜ ਭਗਵਤੋ ਸਰੀਰ ਝਾਪੇਤੁਂ, ਸ੍ਵੇਦਾਨਿ ਭਗਵਤੋ ਸਰੀਰਂ ਝਪੇਸ੍ਸਾਮਾਤਿ ਤਥਾ ਦੁਤਿਯਮ੍ਪਿ ਦਿਵਸਂ ਵੀਤਿਨਾਮੇਸੁਂ. ਤਥਾ ਤਤਿਯਂ ਚਤੁਤ੍ਥਂ ਪਞ੍ਚਮਂ ਛਟ੍ਠਮ੍ਪਿ ਦਿਵਸਂ ਵੀਤਿਨਾਮੇਸੁਂ ਸਤ੍ਤ ਮੇ ਦਿਵਸੇ ਦੇਵਤਾ ਚ ਦੋਸਿਨਾਰਕਾ ਮਲ੍ਲਾ ਚ ਭਗਵਤੋ ਸਰੀਰਂ ਦਿਬ੍ਬੇਹਿ ਮਾਨੁਸਕੇਹਿ ਚ ਨਚ੍ਛੇਹਿ - ਗੀਤੇਹਿ - ਵਾਦਿਤੇਹਿ - ਮਾਲੇਹਿ - ਗਣ੍ਧੇਹਿ ਸਕ੍ਕਾਰੋਨ੍ਤੋ ਗਰੁਕਰੋਨ੍ਤਾ ਮਾਨੇਨ੍ਤਾ ਪੂਜੇਨ੍ਤਾ ਨਗਰਮਜ੍ਝੇਨ ਨੀਹਰਿਤ੍ਵਾ ਯਤ੍ਥ ਮਕੁਟਬਣ੍ਧਨਂ ਨਾਮ ਮਲ੍ਲਾਨਂ ਚੇਤਿਯਂ ਤਤ੍ਥ ਨਿਕ੍ਖਿਪਿਂਸੁ

ਤੇਨ ਖੋ ਪਨ ਸਮਯੇਨ ਕੁਸਿਨਾਰਾ ਯਾਵ ਸਨ੍ਧਿਸਮਲ ਸਂਕਟੀਰਾਜਨ੍ਨੁਮਤ੍ਤੇਨ ਓਧਿਨਾ ਮਣ੍ਦਾਰਵ ਪੁਪ੍ਫੇਨ ਸਤ੍ਥਤਾ ਹੋਤਿ ਅਥ ਖੋ ਕੋਸਿਨਾਰਕਾ ¶ ਮਲ੍ਲਾ ਭਗਵਤੋ ਸਰੀਰਂ ਚਕ੍ਕਵਤ੍ਤਿਸ੍ਸ ਸਰੀਰਂ ਵਿਯ ਅਹਤੇਨ ਵਤ੍ਥੇਨ ਵੇਠੇਸੁਂ ਅਹਤੇਨ ਵਤ੍ਥੇਨ ਵੇਠੇਤ੍ਵਾ ਵਿਹਤੇਨ ਕਪ੍ਪਾਸੇਨ ਵੇਠੇਸੁਂ ਵਿਹਤੇਨ ਕਪ੍ਪਾਸੇਨ ਵੇਠੇਤ੍ਵਾ ਅਹਤੇਨ ਵਤ੍ਥੇਨ ਵੇਠੇਸੁਂ. ਏਤੇਨੇਵ ਨਯੇਨ ਪਞ੍ਚਹਿਯੁਗਸਤੇਹਿ ਵੇਠੇਤ੍ਵਾ ਆਯਸਾਯ ਤੇਲਦੋਣਿਯਾ ਪਕ੍ਖਿਪਿਤ੍ਵਾ ਅਞ੍ਞਿਸ੍ਸਾ ਆਯਸਾਯ ਦੋਣਿਯਾ ਪਟਿਕੁਜ੍ਜੇਤ੍ਵਾ ਸਬ੍ਬਗਨ੍ਧਾਨਂ ਚਿਤਕਂ ਕਰਿਤ੍ਵਾ ਭਗਵਤੋ ਸਰੀਰਂ ਚਿਤਕਂ ਆਰੋਪੇਸੁਂ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਮਹਾ ਕਸ੍ਸਪੋ ਪਾਵਾਯ ਕੁਸਿਨਾਰਂ ਅਦ੍ਧਾਨਮਗ੍ਗ ਪਟਿਪਨ੍ਨੋ ਹੋਤਿ ਮਹਤਾਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਤੇਨ ਖੋ ਪਨ ਸਮਯੇਨ ਥੇਰੇ ਚਿਤ੍ਤਂ ਪਸਾਦੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾ ਦੇਵਤਾ ਤਸ੍ਮਿਂ ਸਮਾਗਮੇ ਥੇਰਂ ਅਦਿਸ੍ਵਾ ਕੁਹਿਨ੍ਨੁ ਖੋ ਅਮ੍ਹਾਕਂ ਕੁਲੁਪਗ ਥੇਰੋਤਿ ਆਵਜ੍ਜੇਨ੍ਤੋ ਅਨ੍ਤਰਾਮਗ੍ਗਪਟਿਪਨ੍ਨਂ ਦਿਸ੍ਵਾ ਅਮ੍ਹਾਕਂ ਕੁਲੁਪਗ ਥੇਰੇ ਅਵਣ੍ਦਿਤੇ ਚਿਤਕੋ ਮਾ ਪਜ੍ਜਲਿਤ੍ਥਾਤਿ ਅਧਿਟ੍ਠਿਹਿਂਸੁ.

ਅਥ ਖੋ ਚਤ੍ਤਾਰੋ ਮਲ੍ਲਪਾਮੋਕ੍ਖਾ ਸੀਸਂ ਨਹਾਤਾ ਅਹਤਾਨਿ ਵਤ੍ਥਾਨਿ ਨਿਚਤ੍ਥਾ ਵੀ ਸਂਰਤਨਸਤਿਕਂ ਚਣ੍ਦਨਚਿਤਕਂ ਆਲਿਮ੍ਪੇਸ੍ਸਾਮਾਤਿ ਅਟ੍ਠਪਿ ਸੋਲਸਪਿ ਦ੍ਵਤ੍ਤਿਂਸਾਪਿ ਜਨਾ ਹੁਤ੍ਵਾ ਯਮਕ ਉਕ੍ਕਯੋ ਗਹੇਤ੍ਵਾ ਤਾਲਵਣੇਟਹਿ ਵਿਜਨ੍ਤਾ ਭਸ੍ਤਾਨਿ ਧਮਨ੍ਤਾ ਨ ਸਕ੍ਕੋਨ੍ਤਿਯੇਵ ਅਗ੍ਗਿਂ ਗਾਹਾਪੇਤੁਂ. ਅਥ ਖੋ ਕੋਸਿਨਾਰਕਾ ਮਲ੍ਲਾ ਚਿਤਕਸ੍ਸ ਅਪਜ੍ਜਲਨ ਕਾਰਣਂ ਆਯਸ੍ਮਨ੍ਤਂ ਅਨੁਰੁਦ੍ਧਂ ਪੁਚ੍ਛਿਤ੍ਵਂ ਦੇਵਤਾਨਂ ਅਭਿਪ੍ਪਾਯਂ ਸੁਤ੍ਵਾ ਮਹਾਕਸ੍ਸਪੋ ਕਿਰ ਭੋ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਦਸਬਲਸ੍ਸ ਪਾਦੇ ਵਨ੍ਦਿਸ੍ਸਾਮੀਤਿ ਆਗਚ੍ਛਤਿ ਤਸ੍ਮਿਂ ਕਿਰ ਅਨਾਗਤੇ ਚਿਤਕੋ ਨ ਪਜ੍ਜਲਤਿ ਕੀਦਿਸੋ ਭੋਸੋ ਭਿਕ੍ਖੁ ਕਾਲੋ ਓਦਾਤੋ ਦੀਘੋ ਰਸ੍ਸੋ ਏਵਰੂਪੇ ਨਾਮ ਭੋ ਭਿਕ੍ਖੁਮ੍ਹਿ ਠਿਤੋ ਕਿਂ ਦਸਬਲਸ੍ਸ ਪਰਿਨਿਬ੍ਬਾਨਂ ਨਾਮਾਤਿ ਦੇਚਿ ਗਣ੍ਧਮਾਲਾਦਿ ਹਤ੍ਥਾ ਪਟਿਪਥਂ ਗਚ੍ਛਿਂਸੁ ਕੇਚਿ ਵੀਥਿਯੋ ਵਿਚਿਤ੍ਤਾ ਕਤ੍ਵਾ ਆਗਮਨਮਗ੍ਗਂ ਓਲੋਕਯਮਾਨਾ ਅਟ੍ਠਂਸੁ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਯੇਨ ਕੁਸਿਨਾਰਾ ਮਕੂਟਬਣ੍ਧਨਂ ਨਾਮ ਮਲ੍ਲਾਨਂ ਚੇਤਿਯਂ, ਯੇਨ ਭਗਵਤੋ ਚਿਤਕੋ ਤੇਨੁਪਸਙ੍ਕਮਿ. ਉਪਸਙ੍ਕਮਿਤ੍ਵਾ ਏਕਂਸਂ ਚੀਵਰਂ ਕਤ੍ਵਾ ਤਿਕ੍ਖਤ੍ਤੁਂ ਚਿਤਕਂ ਪਦਕ੍ਖਿਣਂ ਕਤ੍ਵਾ ਆਵਜ੍ਜੇਨ੍ਤੋਵ ਸਲ੍ਲਕ੍ਖੇਸਿ-ਇਮਸ੍ਮਿਂ ਠਾਨੇ ਪਾਦਾਤਿ ਤਤੇ ਪਾਦਸਮੀਪੇ ਠਤ੍ਵਾ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਰਸਹਸ੍ਸ ਪਤਿਮਣ੍ਡਿਤਾ ਦਸਬਲਸ੍ਸ ਪਾਦਾ ਸਦ੍ਧਿਂ ਕਪ੍ਪਾਸ ਪਟਲੇਹਿ ਪਞ੍ਚਦੁਸ੍ਸਯੁਗਸਤਾਨਿ ਸੁਵਣ੍ਣਦੋਣਿਂ ਵਣ੍ਦਨਚਿਤਕਞ੍ਚ ਦ੍ਵੇਧਾ ਕਤ੍ਵਾ ਮਯ੍ਹਂ ਉਤ੍ਤਮਙ੍ਗੇ ਸਿਰਸਿ ਪਤਿਟ੍ਠਹਨ੍ਤੂਤਿ ਅਧਿਟ੍ਠਾਸਿ ਸਹ ਅਧਿਟ੍ਠਾਨ ਚਿਤ੍ਤੇਨ ਤਾਨਿ ਦੁਸ੍ਸਯੁਗਾਦਿਨਿ ਦ੍ਵੇਧਾ ਕਤ੍ਵਾ ਵਲਾਹਕਨ੍ਤਰਾ ਪੁਣ੍ਣਚਣ੍ਦੋ ਵਿਯ ਪਾਦਾ ਨਿਕ੍ਖਮਿਂਸੁ.

ਥੇਰੋ ਵਿਕਸਿਤ ਰਤ੍ਤਪਦੁਮ ਸਦਿਸੇ ਹਤ੍ਥੇ ਪਸਾਰੇਤ੍ਵਾ ਸੁਵਣ੍ਣਵਣ੍ਣੇ ਸਤ੍ਥੁ ਪਾਦੇ ਯਾਵ ਗੋਪ੍ਫਕਾ ਬਾਲ਼੍ਹਂ ਗਹੇਤ੍ਵ ਅਤ੍ਤਨੋ ਸਿਰਵਰੇ ਪਤਿਟ੍ਠਾਪੇਸਿ ਮਹਾਜਨੋ ਤਂ ਅਚ੍ਛਰਿਯਂ ਦਿਸ੍ਵਾ ਏਕਪ੍ਪਹਾਰੇ ਨੇਵ ਮਹਾਨਾਦਂ ਨਦਿ. ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਯਥਾਰੁਚਿਂ ਵਣ੍ਦਿ. ਏਵ ਪਨ ¶ ਥੇਰੇਨ ਚ ਮਹਾਜਨੇਨ ਚ ਤੇਹਿ ਚ ਪਞ੍ਚਹਿ ਭਿਕ੍ਖੁਸਤੇਹਿ ਵਣ੍ਦਿਤ ਮਤ੍ਤੇਥੇਰਸ੍ਸ ਹਤ੍ਥਤੋ ਮੁਞ੍ਚਿਤ੍ਵਾ ਅਲਤ੍ਤਕ ਵਣ੍ਣਾਨਿ ਭਗਵਤੋ ਪਾਦਤਾਲਾਨਿ ਦਾਰੁਆਦਿਸੁ ਕਿਞ੍ਚਿ ਅਚਾਲੇਤ੍ਵਾਵ ਯਥਾਟ੍ਠਾਨੇ ਪਤਿਟ੍ਠਹਿਂਸੁ. ਭਗਵਤੋ ਪਾਦੇਸੁ ਨਿਕ੍ਖਮਨ੍ਤੇਸੁ ਵਾ ਪਵਿਸਨ੍ਤੇਸੁ ਵਾ ਕਪ੍ਪਾਸਅਂਸੁ ਵਾ ਦਸਾਤਨ੍ਤੁ ਵਾ ਤੇਲਬਿਣ੍ਦੁ ਵਾ ਦਾਰੁਖਣ੍ਡਂ ਵਾ ਠਾਨਾ ਚਲਿਤਂ ਨਾਮ ਨਾਹੋਸਿ. ਸਬ੍ਬਂ ਯਥਾਟ੍ਠਾਨੇ ਠਿਤਮੇਵ ਅਹੋਸਿ. ਉਟ੍ਠਹਿਤ੍ਵਾ ਪਨ ਅਤ੍ਥਙ੍ਗਤੇ ਚਣ੍ਦੇ ਵਿਯ ਸੂਰਿਯੇ ਵਿਯ ਚ ਤਥਾਗਤਸ੍ਸ ਪਾਦੇਸੁ ਅਨ੍ਤਰਹਿਤੇਸੁ ਮਹਾਜਨੋ ਮਹਾਕਣ੍ਦਿਤਂ ਕਣ੍ਦਿ. ਪਰਿਨਿਬ੍ਬੁਤਕਾਲਤੋ ਅਧਿਕਤਰਂ ਕਾਰੁਞ੍ਞਂ ਅਹੋਸਿ ਅਥ ਖੋ ਦੇਵਾਤਾਨੁਭਾਵੇਨ ਪਨੇਸ ਚਿਤਕੇ ਸਮਨ੍ਤਤੋ ਏਕਪ੍ਪਹਾਰੇਨੇਵ ਪਜ੍ਜਲਿ. ਝਾਯਮਾਨਸ੍ਸ ਭਗਵਤੋ ਸਰੀਰਸ੍ਸ ਛਵਿ ਚਮ੍ਮ ਮਂਸਾਦੀਨਂ ਨੇਵ ਛਾਰਿਕਾਮਤ੍ਤਮ੍ਪਿ ਅਨ੍ਤਮਸੋ ਪਞ੍ਞਾਯਿਤ੍ਥ ਨ ਮਸਿ, ਸੁਮਨ ਮਕੁਲ ਸਦਿਸਾ ਪਨ ਧੋਤਮੁਤ੍ਤ ਸਦਿਸਾ ਸੁਵਣ੍ਣਸਦਿਸਾ ਚ ਧਾਤੁਯੋ ਅਵਸਿਸ੍ਸਿਂਸੁ.

ਦੀਘਾਯੁਕ ਬੁਦ੍ਧਾਨਞ੍ਹਿ ਸਰੀਰਂ ਸੁਵਣ੍ਣਕ੍ਖਣ੍ਧਸਦਿਸਂ ਏਕਘਨਮੇਵ ਹੋਤਿ. ਭਗਵਾ ਪਨ ਅਹਂਨ ਚਿਰਂ ਠਤ੍ਵਾ ਠਤ੍ਵਾ ਪਰਿਨਿਬ੍ਬਾਯਾਮਿ. ਮਯ੍ਹਂ ਸਾਸਨਂ ਨ ਤਾਵ ਸਬ੍ਬਤ੍ਥ ਵਿਤ੍ਥਾਰਿਤਂ, ਤਸ੍ਮਾ ਪਰਿਨਿਬ੍ਬੁਤਸ੍ਸਪਿ ਮੇ ਸਾਸਸਮਤ੍ਤਮ੍ਪਿ ਧਾਤੁਂ ਗਹੇਤ੍ਵਾ ਅਤ੍ਤਨੋ ਅਤ੍ਤਨੋ ਵਸਨਟ੍ਠਾਨੇ ਚੇਤਿਯਂ ਕਤ੍ਵਾ ਪਰਿਚਰਨ੍ਤੋ ਮਹਾਜਨੋ ਸਗ੍ਗਪਰਾਯਨੋ ਹੋਤਿਤਿ ਧਾਤੂਨਂ ਵਿਕਿਰਣਂ ਅਧਿਟ੍ਠਾਸਿ. ਕਤਿ ਪਨਸ੍ਸ ਧਾਤੁਯੋ ਵਿਪ੍ਪਕਿਣ੍ਣਾ, ਕਤਿ ਨ ਵਿਪ੍ਪਕਿਣ੍ਣਾਤਿ ਚਤਸ੍ਸੋ ਦਾਟ੍ਠਾ, ਦ੍ਵੇ ਅਕ੍ਖਕਾ, ਉਣ੍ਹੀਸਨ੍ਤਿ ਇਮਾ ਸਤ੍ਤਧਾਤੁਯੋ ਨ ਵਿਪ੍ਪਕਿਣ੍ਣਾ. ਸੇਸਾ ਵਿਪ੍ਪਕਿਰਿਂਸੁ. ਤਤ੍ਥ ਸਬ੍ਬਖੁਦ੍ਦਕਾ ਧਾਤੁ ਸਾਸਪ ਬੀਜਮਤ੍ਤਾ ਅਹੋਸਿ ਮਹਾਧਾਤੁ ਮਜ੍ਝੇ ਭਿਨ੍ਨ ਤਣ੍ਡੁਲਮਤ੍ਤਾ. ਅਤਿਮਹਤੀ ਮਜ੍ਝੇ ਭਿਨ੍ਨਮੁਗ੍ਗ ਬੀਜਮਤ੍ਤਾ ਅਹੋਸਿ.

ਦਡ੍ਢੇ ਖੋ ਪਨ ਭਗਵਤੋ ਸਰੀਰੇ ਆਕਾਸਤੋ ਅਗ੍ਗਬਾਹੁਮਤ੍ਤਾਪਿ ਜਙ੍ਘਮਤ੍ਤਾਪਿ ਤਾਲਕ੍ਖਣ੍ਧਮਤ੍ਤਾਪਿ ਉਦਕਧਾਰਾ ਪਤਿਤ੍ਵਾ ਚਿਤਕਂ ਨਿਬ੍ਬਾਪੇਸਿ ਨ ਕੇਵਲਂ ਆਕਾਸਤੋਯੇਵ ਪਰਿਵਾਰੇਤ੍ਵਾ ਠਿਤਸਾਲਰੁਕ੍ਖਾਨਮ੍ਪਿ ਸਾਖਤ੍ਤਰ ਵਿਟਪਨ੍ਤਰੇਹਿ ਉਦਕਧਾਰਾ ਨਿਕ੍ਖਮਿਤ੍ਵਾ ਨਿਬ੍ਬਾਪੇਸੁਂ, ਭਗਵਤੋ ਚਿਤਕੋ ਮਹਨ੍ਤੋ, ਸਮਨ੍ਤਾ ਪਥਵਿਂ ਭਿਣ੍ਦਿਤ੍ਵਾ ਤਂਙ੍ਗਲਸੀਸਮਤ੍ਤਾ ਉਦਕਵਟ੍ਟਿ ਏਲ਼ਿਕ ਵਟਂਸਕ ਸਦਿਸਾ ਗਨ੍ਤ੍ਵਾ ਚਿਤਕਮੇਵ ਗਣ੍ਹਿ ਮਲ੍ਲਰਾਜਾਨੋ ਚ ਸੁਵਣ੍ਣਘਟੇ ਰਜਤਘਟੇ ਚ ਪੂਰੇਤ੍ਵਾ ਆਭਤ ਨਾਨਾਗਣ੍ਧੋਦਕੇਨ ਸੁਵਣ੍ਣ ਰਜਤਮਯੇਹਿ ਅਟ੍ਠਦਨ੍ਤਕੇਹਿ ਵਿਕਿਰਿਤ੍ਵਾ ਚਣ੍ਦਨਚਿਤਕਂ ਨਿਬ੍ਬਾਪੇਸੁਂ. ਤਤ੍ਥ ਚਿਤਕੇ ਝਯਮਾਨੇ ਪਰਿਵਾਰੇਤ੍ਵਾ ਠਿਤ ਸਾਲਰੁਕ੍ਖਾਨਂ ਸਾਖਨ੍ਤਰੇਹਿ ਵਿਟਪਨ੍ਤਰੇਹਿ ਪਤ੍ਤਨ੍ਤਰੇਹਿ ਚ ਜਾਲੇ ਉਗ੍ਗਚ੍ਛਨ੍ਤੇ ਪਤ੍ਤਂ ਵਾ ਸਾਖਾ ਵਾ ਦਡ੍ਢਾ ਨਾਮ ਨਤ੍ਥਿ ਕਿਪਿਲ੍ਲਿਕਾਪਿ ਮਕ੍ਕਟਕਾਪਿ ਪਾਣਕਾਪਿ ਜਾਲਾਨਂ ਅਨ੍ਤਰੇ ਨੇਵ ਵਿਚਰਨ੍ਤਿ.

ਆਕਾਸਤੋ ਪਤਿਤ ਉਦਕਧਾਰਾਸੁਪਿ ਸਾਲਰੁਕ੍ਖੇਹਿ ਨਿਕ੍ਖਨ੍ਤ੍ौਦਕਧਾਰਾਸੁਪਿ ਪਥਵਿਂ ਭਿਣ੍ਦਿਤ੍ਵਾ ਨਿਕ੍ਖਨ੍ਤ ਉਦਕਧਾਰਾਸੁਪਿ ਧਮ੍ਮਤਾਵ ਪਮਾਣਂ ਏਵਂ ¶ ਚਿਤਕਂ ਨਿਬ੍ਬਾਪੇਤ੍ਵਾ ਪਨ ਮਲ੍ਲਰਾਜਾਨੋ ਸਨ੍ਥਾਗਾਰੇ ਚਤੁਜਾਤਿਗਣ੍ਧ ਪਰਿਭਣ੍ਡਂ ਕਾਰੇਤ੍ਵਾ ਲਾਜ ਪਞ੍ਚਮਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਉਪਰਿ ਚੇਲਵਿਤਾਨਂ ਬਣ੍ਧਾਪੇਤ੍ਵਾ ਸੁਵਣ੍ਣਤਾਰਕਾਹਿ ਖਚੇਤ੍ਵਾ ਤਤ੍ਥ ਗਣ੍ਧਦਾਮ ਮਾਲਾਦਾਮ ਰਤਨਦਾਮਾਨਿ ਓਲਮ੍ਬੇਤ੍ਵਾ ਸਤ੍ਥਾਗਾਰਤੋ ਯਾਵ ਮਕੁਟ ਬਣ੍ਧਨ ਸਙ੍ਖਾਤਾ ਸੀਸਪ੍ਪਸਾਧਨ ਮਙ੍ਗਲਸਾਲਾ ਤਾਵ ਉਭੋਹਿ ਪਸ੍ਸੇਹਿ ਸਾਣਿਕਿਲਞ੍ਜ ਪਰਿਕ੍ਖੇਪਂ ਕਾਰੇਤ੍ਵਾ ਉਪਰਿ ਚੇਲਵਿਤਾਨਂ ਬਣ੍ਧਾਪੇਤ੍ਵਾ ਸੁਵਣ੍ਣਤਾਰਕਾਹਿ ਖਚੇਤ੍ਵਾ ਤਤ੍ਥਾਪਿ ਗਣ੍ਧਦਾਮ ਮਾਲਾਦਾਮ ਰਤਨਦਾਮਾਨਿ ਓਲਮ੍ਬੇਤ੍ਵਾ ਮਣਿਦਣ੍ਡੇਹਿ ਪਞ੍ਚਵਣ੍ਣਧਜੇ ਉਸ੍ਸਪੇਤ੍ਵਾ ਸਮਨ੍ਤਾ ਧਜਪਤਾਕਾ ਪਿਰਿਕ੍ਖਿਪਿਤ੍ਵਾ ਸਿਤ੍ਤਸਮ੍ਮਟ੍ਠਾਸੁ ਵੀਥਿਸੁ ਕਦਲਿਯੋ ਪੁਣ੍ਣਘਟੇ ਚ ਠਪੇਤ੍ਵਾ ਦਣ੍ਡਦੀਪਿਕਾ ਜਾਲੇਤ੍ਵਾ ਅਲਙ੍ਕਤ ਹਤ੍ਥਿਕ੍ਖਣ੍ਧੇ ਸਹਧਾਤੂਹਿ ਸੁਵਣ੍ਣਦੋਣਿਂ ਠਪੇਤ੍ਵਾ ਮਾਲਾਗਣ੍ਧਾਦੀਹਿ ਪੂਜੇਤ੍ਵਾ ਸਾਧੁਕੀਲ਼ਂ ਕੀਲ਼ਨ੍ਤਾ ਅਨ੍ਤੋਨਗਰਂ ਪਵੇਸੇਤ੍ਵਾ ਸਨ੍ਥਾਗਾਰੇ ਸਰਭਮਯ ਪਲ੍ਲਙ੍ਕੇ ਠਪੇਤ੍ਵਾ ਉਪਰਿ ਸੇਤਚ੍ਛਤ੍ਤਂ ਧਾਰਯਿਤ੍ਵਾ ਸਤ੍ਤਿ ਹਤ੍ਥੇਹਿ ਪੁਰਿਸੇਹਿ ਪਰਿਕ੍ਖਿਪਾਪੇਤ੍ਵਾ ਹਤ੍ਥੀਹਿ ਕੁਮ੍ਭੇਨ ਕੁਮ੍ਭਂ ਪਹਰਨ੍ਤੇਹਿ ਪਰਿਕ੍ਖਿਪਾਪੇਤ੍ਵਾ ਤਤੋ ਅਸ੍ਸੇਹਿ ਗੀਵਾਯ ਗੀਵਂ ਪਹਰਨ੍ਤੇਹਿ ਤਤੋ ਰਥੇਹਿ ਆਣਿਕੋਟਿਯਾ ਆਣਿਕੋਟਿਂ ਪਹਨ੍ਤੇਹਿ ਤਤੋ ਯੋਧੇਹਿ ਬਾਹੂਹਿ ਬਾਹੁਂ ਪਹਰਨ੍ਤੇਹਿ ਤੇਸਂ ਪਰਿਯਨ੍ਤੇ ਕੋਟਿਯਾ ਕੋਟਿਂ ਪਹਰਮਾਨੇਹਿ ਧਨੂਹਿ ਪਰਿਕ੍ਖਿਪਾਪੇਸੁਂ.

ਇਤਿ ਸਮਨ੍ਤਾ ਯੋਜਨਪ੍ਪਮਾਣਂ ਠਾਨਂ ਸਨ੍ਨਾਹਗਚ੍ਛਿਤਂ ਵਿਯ ਕਤ੍ਵਾ ਆਰਕ੍ਖਂ ਸਂਵਿਦਹਿਂਸੁ. ਕਸ੍ਮਾ ਪਨੇਤੇ ਏਵਮਕਂਸੂਤਿ. ਇਤੋ ਪੁਰਿਮੇਸੁ ਦ੍ਵੀਸੁ ਸਤ੍ਤਾਹੇਸੁ ਤੇ ਭਿਕ੍ਖੁਸਙ੍ਘਸ੍ਸ ਠਾਨਨਿਸਜ੍ਜੋਕਾਸਂ ਕਰੋਨ੍ਤਾ ਖਾਦਨੀਯ ਭੋਜਨੀਯਂ ਸਂਵਿਦਹਨ੍ਤਾ ਸਾਧੁਕੀਲ਼ਾਯ ਓਕਾਸਂ ਨ ਲਭਿਂਸੁ ਤਤੋ ਤੇਸਂ ਅਹੋਸਿ - ਇਮਂ ਸਤ੍ਤਾਹਂ ਸਾਧੁਕੀਲ਼ਂ ਕੀਲ਼ਿਸ੍ਸਾਮ. ਠਾਨਂ ਖੋ ਪਨੇਤਂ ਵਿਜ੍ਜਤਿ ਯਂ ਅਮ੍ਹਾਕਂ ਪਮਤ੍ਤਭਾਵਂ ਞਤ੍ਵਾ ਕੋਚੀਦੇਵ ਆਗਨ੍ਤ੍ਵਾ ਧਾਤੁਯੋ ਗਣ੍ਹਯ੍ਯ-ਤਸ੍ਮਾ ਆਰਕ੍ਖਂ ਠਪੇਤ੍ਵਾ ਕੀਲ਼ਿਸ੍ਸਾਮਾਤਿ ਤੇਨ ਤੇ ਏਵਮਕਂਸੁ.

ਅਥ ਖੋ ਅਸ੍ਸੋਸਿ ਖੋ ਰਾਜਾ ਮਾਗਧੋ ਅਜਾਤਸਤ੍ਤੁ ਭਗਵਾ ਕਿਰ ਕੁਸਿਨਾਰਾਯਂ ਪਰਿਨਿਬ੍ਬੁਤੋਤਿ ਕਥਂ ਅਸ੍ਸੋਸਿ ਪਠਮਮੇਵਸ੍ਸ ਅਮਚ੍ਚਾ ਸੁਤ੍ਵਾ ਚਿਨ੍ਤਯਿਂਸੁ? ਸਤ੍ਥਾ ਨਾਮ ਪਰਿਨਿਬ੍ਬੁਤੋ, ਨ ਸੋ ਸਕ੍ਕਾ ਪੁਨ ਆਹਰਿਂਤੁ ਪੋਥੁਜ੍ਜਨਿਕ ਸਦ੍ਧਾਯ ਪਨ ਅਮ੍ਹਾਕਂ ਰਞ੍ਞਾ ਸਦਿਸੋ ਨਤ੍ਥਿ. ਸਚੇ ਏਸ ਇਮਿਨਾਵ ਨਿਯਾਮੇਨ ਸੁਣਿਸ੍ਸਤਿ, ਹਦਯਮਸ੍ਸ ਏਲ਼ਿਸ੍ਸਤਿ ਰਾਜਾ ਖੋ ਪਨਮ੍ਭੇਹਿ ਅਨੁਰਕ੍ਖਿਤਬ੍ਬੋਤਿ ਤੇ ਤਿਸ੍ਸੋ ਸੁਵਣ੍ਣਦੋਣਿਯੋ ਆਹਰਿਤ੍ਵਾ ਚਤੁਮਧੁਰਸ੍ਸ ਪੂਰੇਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਏਤਦਵੋਚੁਂ. ਦ੍ਵੇ ਅਮ੍ਹੇਹਿ ਸੁਪਿਨਕੋ ਦਿਟ੍ਠੋ ਤਸ੍ਸ ਪਟਿਘਾਤਤ੍ਥਂ ਤੁਮ੍ਹੇਹਿ ਦੁਕੂਲਪਟ੍ਟਂ ਨਿਵਾਸੇਤ੍ਵਾ ਯਥਾ ਨਾਸਾਪੁਟਮਤ੍ਤਂ ਪਞ੍ਞਾਯਤਿ ਏਵਂ ਚਤੁਮਧੁਰਦੋਣਿਯਂ ਨਿਪਜ੍ਜਿਤੁਂ ਵਟ੍ਟਤੀਤਿ. ਰਾਜਾ ਅਤ੍ਥਵਰਕਾਨਂ ਵਚਨਂ ਸੁਤ੍ਵਾ ਏਵਂ ਹੋਤੁ ਤਾਤਾ’ਤਿ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਾਸਿ.

ਅਥੇਕੋ ¶ ਅਮਚ੍ਚੋ ਅਲਙ੍ਕਾਰਂ ਓਮੁਞ੍ਚਿਤ੍ਵਾ ਕੇਸੇ ਪਰਿਕਿਰਿਯ ਯਾਯ ਦਿਸਾਯ ਸਤ੍ਥਾ ਪਰਿਨਿਬ੍ਬੁਤੋ ਤਦਭਿਮੁਖੋ ਹੁਤ੍ਵਾ ਅਞ੍ਜਲਿਮ੍ਪਗ੍ਗਯ੍ਹ ਰਾਜਾਨਂ ਆਹ- ਦੇਵਮਰਣਤੋ ਮੁਞ੍ਚਨਕਸਤ੍ਤੋ ਨਾਮ ਨਤ੍ਥਿ. ਅਮ੍ਹਾਕਂ ਆਯੁਵਦ੍ਧਕੇਨਾ ਚੇਤਿਯਟ੍ਠਾਨਂ ਪੁਞ੍ਞਕ੍ਖੇਤ੍ਤਂ ਅਭਿਸੇਕਪਿਟ੍ਠਿਕਾ ਭਗਵਾ ਸਤ੍ਥਾ ਕੁਸਿਨਾਰਾਯਂ ਪਰਿਨਿਬ੍ਬੁਤੋਤਿ ਰਾਜਾ ਸੁਤ੍ਵਾ ਵਿਸਞ੍ਞੀ ਜਾਤੋ ਚਤੁਮਧੁਰਦੋਣਿ ਉਸੁਮਂ ਮੁਞ੍ਚਿ ਰਾਜਾਨਂ ਉਕ੍ਖਿਪਿਤ੍ਵਾ ਦੁਤਿਯਾਯ ਦੋਣਿਯਾ ਨਿਪਜ੍ਜਾਪੇਸੁਂ ਸੋ ਸਞ੍ਞਂ ਲਭਿਤ੍ਵਾ ਤਾਤ ਕਿਂ ਵਦਥਾਤਿ ਪੁਚ੍ਛਿ. ਸਤ੍ਥਾ ਮਹਾਰਾਜ ਪਰਿਨਿਬ੍ਬੁਤੋਤਿ, ਪੁਨ ਵਿਸਞ੍ਞਿ ਜਾਤੋ ਚਤੁਮਧੁਰਦੋਣਿਂ ਉਸੁਮਂ ਮੁਞ੍ਚਿ. ਅਥ ਨਂ ਤਤੋਪਿ ਉਕ੍ਖਿਪਿਤ੍ਵਾ ਤਤਿਯਾਯ ਦੋਣਿਯਾ ਨਿਪਜ੍ਜਾਪੇਸੁਂ ਸੋ ਪੁਨ ਸਞ੍ਞਂ ਪਟਿਲਭਿਤ੍ਵਾ ਤਾਤ ਕਿਂ ਵਦਥਾਤਿ ਪੁਚ੍ਛਿ ਸਤ੍ਥਾ ਮਹਾਰਾਜ ਪਰਿਨਿਬ੍ਬੁਤੋਤਿ. ਰਾਜਾ ਪੁਨ ਵਿਸਞ੍ਞੀ ਜਾਤੋ ਚ ਮਧੁਰਦੋਣਿ ਉਸੁਮਂ ਮੁਞ੍ਚਿ.

ਅਥ ਨਂ ਤਤੋਪਿ ਉਕ੍ਖਿਪਿਤ੍ਵਾ ਨਹਾਪੇਤ੍ਵਾ ਮਤ੍ਥਕੇ ਘਟੇਹਿ ਉਦਕਂ ਆਸਿਞ੍ਚਿਂਸੁ ਰਾਜਾ ਸਞ੍ਞਂ ਪਟਿਲਭਿਤ੍ਵਾ ਆਸਨਾ ਉਟ੍ਠਾਯ ਗਣ੍ਧਪਰਿਭਾਵੀਤੇ ਮਣਿਵਣ੍ਣਕੇਸੇ ਸੁਵਣ੍ਣਫਲਕ ਵਣ੍ਣਾਯ ਪਿਟ੍ਠਿਯਂ ਪਕਿਰਿਤ੍ਵਾ ਪਵਾਲ਼ਙ੍ਗੁਰਵਣ੍ਣਾਹਿ ਸੁਵਟ੍ਟਿਤਙ੍ਗੁਲੀਹਿ ਸੁਵਣ੍ਣਬਿਮ੍ਬਕ ਵਣ੍ਣਂ ਉਰਂ ਸਂਸਿਬ੍ਬਨ੍ਤੋ ਵਿਯ ਗਹੇਤ੍ਵਾ ਪਰਿਦੇਵਮਾਨੋ ਉਮ੍ਮਤ੍ਤਕਵੇਸੇਨੇਵ ਅਨ੍ਤਰਵੀਥਿਂ ਓਤਿਣ੍ਣੋ ਸੋ ਅਲਙ੍ਕਤ ਨਾਟਕ ਪਰਿਵੁਤੋ ਨਗਰਾ ਨਿਕ੍ਖਮ੍ਮ ਜੀਵਕਮ੍ਬਵਨਂ ਗਨ੍ਤ੍ਵਾ ਯਸ੍ਮਿਂ ਠਾਨੇ ਨਿਸਿਨ੍ਨੇਨ ਭਗਵਤਾ ਧਮ੍ਮੋ ਦੇਸਿਤੋ ਤਂ ਓਲੋਕੇਤ੍ਵਾ ਭਗਵਾ ਸਬ੍ਬਞ੍ਞੁ ਨਨੁ ਮੇ ਇਮਸ੍ਮਿਂ ਠਾਨੇ ਨਿਸੀਦਿਤ੍ਵਾ ਧਮ੍ਮਂ ਦੇਸਯਿਤ੍ਥ ਤੁਮ੍ਹੇ ਸੋਕਸਲ੍ਲਂ ਵਿਨੋਦਯਿਤ੍ਥ. ਤੁਮ੍ਹੇ ਮਯ੍ਹਂ ਸੋਕਸਲ੍ਲਂ ਨੀਹਰਿਤ੍ਥ. ਅਹਂ ਤੁਮ੍ਹਾਕਂ ਸਰਣਂ ਗਤੋ. ਇਦਾਨਿ ਪਨ ਮੇ ਪਟਿਵਚਨਮ੍ਪਿ ਨ ਦੇਥ ਭਗਵਾਤਿ ਪੁਨਪ੍ਪੁਨ ਪਰਿਦੇਵਿਤ੍ਵਾ ਨਨੁ ਭਗਵਾ ਅਹਂ ਅਞ੍ਞਦਾ ਏਵਰੂਪੇ ਕਾਲੇ ਤੁਟ੍ਠੇ ਮਹਾਭਿਕ੍ਖੁਸਙ੍ਘਪਰਿਵਾਰਾ ਜਮ੍ਬੁਦੀਪਤਲੇ ਚਾਰਿਕਂ ਚਰਥਾਤਿ ਸੁਣਾਮ ਇਦਾਨਿ ਪਨ ਅਹਂ ਤੁਮ੍ਹਾਕਂ ਅਨਨੁਰੂਪਂ ਅਯੁਤ੍ਤਂ ਪਵਤ੍ਤਿਂ ਸੁਣਾਮੀਤਿ ਏਵਮਾਦੀਨਿ ਚ ਵਤ੍ਤਾ ਸਟ੍ਠਿਮਤ੍ਤਾਹਿ ਗਾਥਾਹਿ ਭਗਵਤੋ ਗੁਣਂ ਅਨੁਸ੍ਸਰਿਤ੍ਵਾ ਚਿਨ੍ਤੇਸਿ ਮਮ ਪਰਿਦੇਵਿਤੇ ਨੇਵ ਨ ਸਿਜ੍ਝਤਿ. ਦਸਬਲਸ੍ਸ ਧਾਤੁਯੋ ਆਹਰਾਪੇਸ੍ਸਾਮਿਤਿ ਮਲ੍ਲਰਾਜੁਨਂ ਦੂਤਞ੍ਚ ਪਣ੍ਣਞ੍ਚ ਪਾਹੇਸਿ.

ਭਗਵਾਪਿ ਖਤ੍ਤਿਯੋ, ਅਹਮ੍ਪਿ ਖਤ੍ਤਿਯੋ, ਅਹਮ੍ਪਿ ਅਰਹਾਮਿ ਭਗਵਤੋ ਸਰੀਰਾਨਂ ਥੂਪਞ੍ਚ ਮਹਞ੍ਚ ਕਾਰੇਤੁਨ੍ਤਿ ਪੇਸੇਤ੍ਵਾ ਪਨ ਸਚੇ ਦਸ੍ਸਨ੍ਤਿ ਸੁਣ੍ਦਰਂ, ਨੋ ਚੇ ਦਸ੍ਸਨ੍ਤਿ ਆਹਰਣੁਪਾਯੇਨ ਆਹਰਿਸ੍ਸਾਮੀਤਿ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਸਯਮ੍ਪਿ ਨਿਕ੍ਖਨ੍ਤੋਯੇਵ ਯਥਾ ਚ ਅਜਾਤਸਤ੍ਤੁ ਏਵਂ ਵੇਸਾਲਿਯਂ ਲਿਚ੍ਛਵਿਰਾਜਾਨੋ ਕਪਿਲਵਤ੍ਥੁਮ੍ਹਿ ਸਕ੍ਯਰਾਜਾਨੋ ਅਲ੍ਲਕਪ੍ਪਕੇ ਬੁਲਯੋ ਰਾਮਗਾਮਕੇ ਕੋਲ਼ਿਯਾ ਵੇਠਦੀਪਕੇ ਬ੍ਰਾਹ੍ਮਣੋ ਪਾਵਾਯਞ੍ਚ ਮਲ੍ਲਾ ਦੂਤਂ ਪੇਸੇਤ੍ਵਾ ਸਯਮ੍ਪਿ ਚਤੁਰਙ੍ਗਿਨਿਯਾ ਸੇਨਾਯ ਨਿਕ੍ਖਮਿਂਸੁਯੇਵ ਤਤ੍ਥ ਪਾਚੇਯ੍ਯਕਾ ਸਬ੍ਬੇਹਿ ਆਸਨ੍ਨਤਰਾ ਕੁਸਿਨਾਰਾਤੋ ¶ ਤਿਗਾਵੁਤਨ੍ਤਰੇ ਨਗਰੇ ਵਸਨ੍ਤਿ. ਭਗਵਾਪਿ ਪਾਵਂ ਪਵਿਸਿਤ੍ਵਾ ਕੁਸਿਨਾਰਂ ਗਤੋ. ਮਹਾਪਰਿਹਾਰਾ ਪਨੇਤੇ ਰਾਜਾਨੋ ਪਰਿਹਾਰਾ ਕਾਰੇਂਨ੍ਤਾਵ ਪਚ੍ਛਤੋ ਜਾਤਾ. ਤੇ ਸਬ੍ਬੇਪਿ ਸਤ੍ਤਨਗਰਵਾਸਿਨੋ ਆਗਤ੍ਤ੍ਵਾ ਅਮ੍ਹਾਕਂ ਧਾਤੁਯੋ ਵਾ ਦੇਨ੍ਤੁ ਯੁਦ੍ਧਂ ਵਾਤਿ ਕੁਸਿਨਾਰਾ ਨਗਰਂ ਪਰਿਵਾਰਯਿਂਸੁ.

ਤਤੋ ਮਲ੍ਲਰਾਜਾਨੋਏਤਦਵੋਚੁਂ-ਭਗਵਾਅਮ੍ਹਾਕਂਗਾਮਕ੍ਖੇਤ੍ਤੇ ਪਰਿਨਿਬ੍ਬੁਤੋ, ਨ ਮਯਂ ਸਤ੍ਥੁ ਸਾਸਨਂ ਪਹਿਣਿਮ੍ਹ ਨ ਗਤ੍ਤ੍ਵਾ ਆਨਯਿਮ੍ਹ. ਸਤ੍ਥਾ ਪਸ ਸਯਮੇਵ ਆਗਨ੍ਤ੍ਵਾ ਸਾਸਨਂ ਪੇਸੇਤ੍ਵਾ ਅਮ੍ਹੇ ਪਕ੍ਕੋਸਪੇਸਿ ਤੁਮ੍ਹੇਪਿ ਖੋ ਪਨ ਯਂ ਤੁਮ੍ਹਾਕਂ ਗਾਮਕ੍ਖੇਤ੍ਤੇ ਰਤਨਂ ਉਪ੍ਪਜ੍ਜਤਿ ਨ ਤਂ ਅਮ੍ਹਾਕਂ ਦੇਥ ਸਦੇਵਕੇ ਲੋਕੇ ਬੁਦ੍ਧਰਤਨਸਮਂ ਰਤਨਂ ਨਾਮ ਨਤ੍ਥਿ, ਏਵਰੂਪਂ. ਉਤ੍ਤਮਂ ਰਤਨਂ ਲਭਿਤ੍ਵਾ ਮਯਂ ਨ ਦਸ੍ਸਮਾਤਿ ਏਵਂ ਤੇ ਕਲਹਂ ਵਡ੍ਢੇਤ੍ਵਾ ਨ ਖੋ ਪਨ ਤੁਮ੍ਹੇਹਿਯੇਵ ਮਾਤੁ ਥਨਤੋ ਖਿਰਂ ਪੀਤਂ, ਅਮ੍ਹੇਹਿਪਿ ਪੀਤਂ ਤੁਮ੍ਹੇਯੇਵ ਪੁਰਿਸਾ ਅਮ੍ਹੇ ਨ ਪੁਰਿਸਾ ਹੋਤੁ ਹੋਤੂਤਿ ਅਞ੍ਞਮਞ੍ਞਂ ਅਹਂਕਾਰਂ ਕਤ੍ਵਾ ਸਾਸਨ ਪਟਿਸਾਸਨਂ ਪੇਸੇਨ੍ਤਾ ਅਞ੍ਞਮਞ੍ਞਂ ਮਾਨਗਜ੍ਜਿਤਂ ਗਜ੍ਜਿਂਸੁ ਯੁਦ੍ਧੇ ਪਨ ਸਤਿ ਕੋਸਿਨਾਰਕਾਨਂਯੇਵ ਜਯੋ ਅਭਵਿਸ੍ਸ, ਕਸ੍ਮਾ ਧਾਤੁਪਾਸਨਤ੍ਥਂ ਆਗਤਾ ਦੇਵਤਾ ਤੇਸਂ ਪਕ੍ਖਾਅਹੇਸੁਂ.

ਤਤੋ ਦੋਣੋ ਬ੍ਰਾਹ੍ਮਣੋ ਇਮਂ ਵਿਵਾਦਂ ਸੁਤ੍ਵਾ ਏਤੇ ਰਾਜਾਨੋ ਭਗਵਤੇ ਪਰਿਨਿਬ੍ਬੁਤਟ੍ਠਾਨੇ ਵਿਵਿਦਂ ਕਰੋਨ੍ਤਿ ਨ ਖੋ ਪਨੇਤਂ ਪਤਿਰੂਪਂ ਅਲਂ ਇਮਿਨਾ ਕਲਹੇਨ ਚੂਪਸਮੇਸ੍ਸਾਮਿ ਨ ਨ੍ਤਿ ਉਣ੍ਣਤਪ੍ਪਦੇਸੇ ਠਤ੍ਵਾ ਦ੍ਵੇਭਾਣਵਾਰਪਰਿਮਾਣਂ ਦੋਣਗਜ੍ਜਿਤਂ ਨਾਮ ਅਵੋਚ ਤਤ੍ਥ ਪਟ੍ਠਮਕਭਾਣਵਾਰੇ ਤਾਵ ਏਕਪਦਮ੍ਪਿ ਤੇ ਨ ਜਾਨਿਂਸੁ ਦੁਤਿਯਕ ਭਾਣਵਾਰ ਪਰਿਯੋਸਾਨੇ’ਆਚਰਿਯਸ੍ਸ ਵਿਯ ਭੋਸਦ੍ਦੋ, ਆਚਰਿਯਸ੍ਸ ਵਿਯ ਭੋ ਸਦ੍ਦੋ’ਤਿ ਸਬ੍ਬੇ ਨੀ ਰਵਾ ਅਹੇਸੁਂ ਸਕਲਜਮ੍ਬੁਦੀਪਤਲੇ ਕਿਰ ਕੁਲਘਰੇ ਜਾਤੋ ਯੇਭੁਯ੍ਯੇਨ ਤਸ੍ਸ ਨ ਅਨ੍ਤੇਵਾਸਿਕੋ ਨਾਮ ਨਤ੍ਥਿ ਅਥ ਸੋ ਤੇ ਅਤ੍ਤਨੋ ਵਚਨਂ ਸੁਤ੍ਵਾ ਤੁਣ੍ਹੀਭੂਤੇ ਵਿਦਿਤ੍ਵਾ ਪੁਨ ਏਤਦਵੋਚ

‘‘ਸੁਣਨ੍ਤੁ ਭੋਨ੍ਤੋ ਮਮ ਏਕਵਾਕ੍ਯਂ

ਅਮ੍ਹਾਕਂ ਬੁਦ੍ਧੋ ਅਹੁ ਖਨ੍ਤਿਵਾਦੋ,

ਨ ਹਿ ਸਾਧਯਂ ਉਤ੍ਤਮ ਪੁਗ੍ਗਲਸ੍ਸ

ਸਰੀਰਭਙ੍ਗੇ ਸਿਯਾ ਸਮ੍ਪਹਾਰੋ

ਸਬ੍ਬੇਵ ਭੋਨ੍ਤੋ ਸਹਿਤਾ ਸਮਗ੍ਗਾ

ਸਮ੍ਮੋਦਮਾਨਾ ਕਰੋਮਟ੍ਠਭਾਗੇ,

ਵਿਤ੍ਥਾਰਿਕਾ ਹੋਨ੍ਤੁ ਦਿਸਾਯੁ ਥੂਪਾ

ਬਹੁਜ੍ਜਨੋ ਚਕ੍ਖੁਮਤੋ ਪਸਨ੍ਨੋ’’ਤਿ;

ਤਤ੍ਰਾਯਮਤ੍ਥੋ ‘‘ਅਮ੍ਹਾਕਂ ਬੁਦ੍ਧੋ ਅਹੁ ਖਨ੍ਤਿਵਾਦੋ‘‘ਤਿ ਬੁਦ੍ਧਭੂਮਿਂ ਅਪ੍ਪਤ੍ਵਾਪਿ ਪਾਰਮਿਯੋ ਪੂਰੇਨ੍ਤੋ ਖਨ੍ਤਿਵਾਦ ਤਾਪਸਕਾਲੇ ਧਮ੍ਮਪਾਲਕੁਮਾਰ ਕਾਲੇ ਛਦ੍ਦਨ੍ਤਹਤ੍ਥਿਕਾਲੇ ਭੂਰਿਦਤ੍ਤ ਨਾਗਰਾਜ ਕਾਲੇ ਚਮ੍ਪੇਯ੍ਯ ¶ ਨਾਗਰਾਜ ਕਾਲੇ ਸਙ੍ਖਪਾਲ ਨਾਗਰਾਜ ਕਾਲੇ ਮਹਾਕਪਿਕਾਲੇ ਅਞ੍ਞੇਸੁਪਿ ਬਹੂਸੁ ਜਾਤਕੇਸੁ ਪਰੇਸੁ ਕੋਪਂ ਅਕਤ੍ਵਾ ਖਨ੍ਤਿਮੇਵ ਅਕਾਸਿ. ਖਨ੍ਤਿਮੇਵ ਵਣ੍ਣਯਿ, ਕਿਮਙ੍ਗ ਪਨ ਏਤਰਹਿ ਇਟ੍ਠਾਨਿਟ੍ਠੇਸੁ ਤਾਦਿਲਕ੍ਖਣਂ ਪਤ੍ਤੋ ਸਬ੍ਬਥਾਪਿ ਅਮ੍ਹਾਕਂ ਬੁਦ੍ਧੋ ਖਨ੍ਤਿਵਾਦੋ ਅਹੋਸਿ.

ਤਸ੍ਸ ਏਵਂ ਵਿਧਸ੍ਸ ਨ ਹਿ ਸਾਧਯ ਉਤ੍ਤਮਪੁਗ੍ਗਲਸ੍ਸ ਸਰੀਰਭਙ੍ਗੇ ਸਿਯਾ ਸਮ੍ਪਹਾਰੋ, ‘‘ਨ ਹਿ ਸਾਧਯਨ੍ਤਿ‘‘ਨ ਹਿ ਸਾਧੁ ਅਯਂ, ‘‘ਸਰੀਰਭਙ੍ਗੇਤਿ ਸਰੀਰ ਭਙ੍ਗਨਿਮਿਤ੍ਤਂ ਧਾਤੁਕੋਟ੍ਠਾਸਹੇਤੂਤਿ ਅਤ੍ਥੋ ‘‘ਸਿਯਾ ਸਮ੍ਪਹਾਰੋ‘‘ਤਿ ਆਯੁਧ ਸਮ੍ਪਹਾਰੋ ਨ ਹਿ ਸਾਧੁ ਸਿਯਾਤਿ ਵੁਤ੍ਤਂ ਹੋਤਿ. ‘‘ਸਬ੍ਬੇਵ ਭੋਨ੍ਤੋ ਸਹਿਤਾ‘‘ਤਿ ਸਬ੍ਬੇਵ ਭਵਨ੍ਤੋ ਸਹਿਤਾ ਭੋਥ ਮਾ ਭਿਜ੍ਜਿਤ੍ਥ. ‘‘ਸਮਗ੍ਗਾਤਿ‘‘ ਕਾਯੇਨ ਵਾਚਾਯ ਚ ਏਕਸਨ੍ਨਿਪਾਤਾ ਏਕਵਚਨਾ ਸਮਗ੍ਗਾ ਭੋਥ ‘‘ਸਮ੍ਮੋਦਮਾਨਾ‘‘ਤਿ ਚਿਤ੍ਤੇਨਾਪਿ ਅਞ੍ਞਮਞ੍ਞਂ ਮੋਦਮਾਨਾ ਭੋਥ.’ਕਰੋਮਟ੍ਠਭਾਗੇ‘‘ਤਿ ਭਗਵਤਾ ਸਰੀਰਾਨਿ ਅਟ੍ਠਭਾਗੇ ਕਰੋਮ. ‘‘ਚਕ੍ਖੁਮਤੋ‘‘ਤਿ ਪਞ੍ਚਹਿ ਚਕ੍ਖੁਹੀ ਚਕ੍ਖੁਤਾ ਬੁਦ੍ਧਸ੍ਸ, ਨ ਕੇਵਲਂ ਤੁਮ੍ਹੇਯੇਵ ਬਹੁਜ੍ਜਨੋ ਪਸਨ੍ਨੋ ਤੇਸੁ ਏਕੋਪਿ ਲਦ੍ਧੁ ਅਯੁਤ੍ਤੋ ਨਾਮ ਨਤ੍ਥਿਤਿ ਬਹੁਂ ਕਾਰਣਂ ਵਤ੍ਵਾ ਸਞ੍ਞਾਪੇਸਿ.

ਅਥ ਸਬ੍ਬੇਪਿ ਰਾਜਾਨੋ ਏਵਮਾਹਂਸੁ-ਤੇਨ ਹਿ ਬ੍ਰਾਹ੍ਮਣ ਤ੍ਵਞ੍ਞੇਵ ਭਗਵਤੋ ਸਰੀਰਾਨਿ ਅਟ੍ਠਧਾ ਸਮਂ ਸੁਵਿਭਤ੍ਤਂ ਵਿਭਜਾਹੀਤਿ. ਏਵਂ ਭੋਤਿ ਖੋ ਦੋਣੋ ਬ੍ਰਾਹ੍ਮਣੋ ਤੇਸਂ ਰਾਜੂਨਂ ਪਟਿਸ੍ਸੁਤ੍ਵਾ ਧਾਤੁਯੋ ਸਮਂ ਸੁਵਿਭਤ੍ਤਂ ਵਿਭਜਿ.

ਤਤ੍ਰਾਯਮਨੁਕ੍ਕਮੋ ਦੋਣੋ ਕਿਰ ਤੇਸਂ ਪਟਿਸ੍ਸੁਤ੍ਵਾ ਸੁਵਣ੍ਣਦੋਣਿਂ ਵਿਵਰਾਪੇਸਿ. ਰਾਜਾਨੋ ਆਗਨ੍ਤ੍ਵਾ ਦੋਣਿਯਂ ਯੇਵਤਾ ਸੁਵਣ੍ਣਵਣ੍ਣਾ ਧਾਤੁਯੋ ਦਿਸ੍ਵਾ ਭਗਵਾ ਸਬ੍ਬਞ੍ਞੁ ਪੁਬ੍ਬੇ ਮਯਂ ਤੁਮ੍ਹਾਕਂ ਦ੍ਵਤ੍ਤਿਂਸ ਲਕ੍ਖਣ ਪਤਿਮਣ੍ਡਿਤਂ ਛਬ੍ਬਣ੍ਣਬੁਦ੍ਧਰਸ੍ਮਿਖਚਿਤਂ ਸੁਵਣ੍ਣਵਣ੍ਣਂ ਸਰੀਰਂ ਅਦ੍ਦਸਾਮ ਇਦਾਨਿ ਪਨ ਸੁਵਣ੍ਣਵਣ੍ਣਾ ਧਾਤੁਯੋਵ ਅਵਸਿਟ੍ਠਾ ਜਾਤਾ, ਨ ਯੁਤ੍ਤਮਿਦਂ ਭਗਵਾ ਤੁਮ੍ਹਾਕਨ੍ਤਿ ਪਰਿਦੇਵਿਂਸੁ. ਬ੍ਰਾਹ੍ਮਣੋ ਤਸ੍ਮਿਂ ਸਮਯੇ ਤੇਸਂ ਪਮਤ੍ਤਭਾਵਂ ਞਤ੍ਵਾ ਦਕ੍ਖਿਣਦਾਠਂ ਗਹੇਤ੍ਵਾ ਵੇਠਨ੍ਤਰੇ ਠਪੇਸਿ ਅਥ ਪਚ੍ਛਾ ਸਮਂ ਸੁਵਿਭਤ੍ਤਂ ਵਿਭਜਿ. ਸਬ੍ਬਾਪਿ ਧਾਤੁਯੋ ਪਾਕਤਿਕ ਨਾਲ਼ਿਯਾ ਸੋਲ਼ਸ ਨਾਲ਼ਿਯੋ ਅਹੋਸੁਂ. ਏਕੇਕ ਨਗਰਵਾਸਿਨੋ ਦ੍ਵੇ ਦ੍ਵੇ ਨਾਲ਼ਿਯੋ ਲਭਿਂਸੁ.

ਬ੍ਰਾਹ੍ਮਣਸ੍ਸ ਪਨ ਧਾਤੁਯੋ ਵਿਭਜਨ੍ਤਸ੍ਸੇਵ ਸਕ੍ਕੋ ਦੇਵਾਨਮਿਨ੍ਦੋ ਕੇਨ ਨੁ ਖੋ ਸਦੇਵਕਸ੍ਸ ਲੋਕਸ੍ਸ ਕਙ੍ਖਾਚ੍ਛੇਦਨਾਯ ਚਤੁਸਚ੍ਚਕਥਾਯ ਪਚ੍ਚਯਭੂਤਾ ਭਗਵਤੋ ਦਕ੍ਖਿਣਦਾਠਾ ਗਹਿਤਾਤਿ ਓਲੋਕੇਨ੍ਤੋ ਬ੍ਰਾਹ੍ਮਣੇਨ ਗਹਿਤਾਤਿ ਦਿਸ੍ਵਾ ਬ੍ਰਾਹ੍ਮਣੋ ਦਾਠਾਯ ਅਨੁਚ੍ਛਵਿਕਂ ਸਕ੍ਕਾਰਂ ਕਾਤੁਂ ਨ ਸਕ੍ਖਿਸ੍ਸਤਿ ਗਣ੍ਹਾਮਿ ਨਨ੍ਤਿ ਵੇਠਨ੍ਤਰਤੋ ਗਹੇਤ੍ਵਾ ਸੁਵਣ੍ਣ ਚਙ੍ਗੋਟਕੇ ਠਪੇਤ੍ਵਾ ਦੇਵਲੋਕਂ ਨੇਤ੍ਵਾ ਚੁਲ਼ਾਮਣੀ ¶ ਚੇਤਿਯੇ ਪਤਿਟ੍ਠਾਪੇਸਿ ਬ੍ਰਾਹ੍ਮਣੋਪਿ ਧਾਤੁਯੋ ਵਿਭਜਿਤ੍ਵਾ ਦਾਠਂ ਅਪਸ੍ਸਨ੍ਤੋ ਕੇਨ ਮੇ ਠਾ ਗਹਿਤਾਤਿ ਪੁਚ੍ਛਿਤੁਮ੍ਪਿ ਨਾਸਕ੍ਖਿ. ਨਨੁ ਤਯਾ ਧਾਤੁਯੋ ਵਿਭਜਿਤਾ, ਕਿਂ ਤ੍ਵਂ ਪਠਮਂਯੇਵ ਅਤ੍ਤਨੋ ਧਾਤੂਹਿ ਅਤ੍ਥਿਭਾਵਂ ਨ ਅਞ੍ਞਾਸੀਤਿ, ਅਤ੍ਤਨਿ ਦੋਸਾਰੋਪਨਂ ਸਮ੍ਪਸ੍ਸਮਾਨੋ ਮਯ੍ਹਮ੍ਪਿ ਕੋਟ੍ਠਾਸਂ ਦੇਥਾਤਿ ਵਤ੍ਤੁਮ੍ਪਿ ਨਾਸਕ੍ਖਿ.

ਤਤੋ ਅਯਂ ਸੁਵਣ੍ਣਕੁਮ੍ਭੋਪਿ ਧਾਤੁਗਤਿਕੋਯੇਵ ਯੇਨ ਤਥਾਗਤਸ੍ਸ ਧਾਤੁਯੋ ਮਿਨਿਤਾ. ਇਮਸ੍ਸਾਹਂ ਥੂਪਂ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਇਮਂ ਮੇ ਭੋਨ੍ਤੋ ਕੁਮ੍ਭਂ ਦਦਨ੍ਤੂਤਿ ਆਹ ਤਤੋ ਰਾਜਾਨੋ ਬ੍ਰਾਹ੍ਮਣਸ੍ਸ ਕੁਮ੍ਭਮਦਂਸੁ ਪਿਪ੍ਫਲਿਵਨਿਯਾਪਿ ਖੋ ਮੋਰਿਯਾ ਭਗਵਤੋ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ਭਗਵਾਪਿ ਖਤ੍ਤਿਯੋ, ਮਯਮ੍ਪਿ ਖਤ੍ਤਿਯੋ ਮਯਮ੍ਪਿ, ਅਰਹਾਮ ਲਭਿਤੁਂ ਭਗਵਤੋ ਸਰੀਰਾਨਂ ਭਾਗਨ੍ਤਿ ਦੂਤਂ ਪੇਸੇਤ੍ਵਾ ਯੁਦ੍ਧ ਸਜ੍ਜਾ ਨਿਕ੍ਖਮਿਤ੍ਵਾ ਆਗਤਾ ਤੇਸਂ ਰਾਜਾਨੋ ਏਵਮਾਹਂਸੁ - ਨਤ੍ਥਿ ਭਗਵਤੋ ਸਰੀਰਾਨਂ ਭਾਗੋ, ਵਿਭਤ੍ਤਾਨਿ ਭਗਵਤੋ ਸਰੀਰਾਨਿ ਇਤੋ ਅਙ੍ਗਾਰਂ ਗਰਥਾਤਿ. ਤੇ ਤਤੋ ਅਙ੍ਗਾਰਂ ਹਰਿਂਸੁ.

ਅਥ ਖੋ ਰਾਜਾ ਅਜਾਤਸਤ੍ਤੁ ਕੁਸਿਨਾਰਾਯ ਚ ਰਾਜਗਹਸ੍ਸ ਚ ਅਨ੍ਤਰੇ ਪਞ੍ਚਵੀਸਤਿ ਯੋਜਨਮਗ੍ਗਂ ਅਟ੍ਠ ਉਸਭਵਿਤ੍ਥਤਂ ਸਮਤਲਂ ਕਾਰੇਤ੍ਵਾ ਸਾਦਿਸਂ ਮਲ੍ਲਰਾਜਾਨੋ ਮਕੁਟਬਣ੍ਧਨਸ੍ਸ ਚ ਸਨ੍ਥਾਗਾਰਸ੍ਸ ਚ ਅਨ੍ਤਰੇ ਪੂਜਂ ਕਾਰੇਸੁਂ ਤਾਦਿਸਂ ਪਞ੍ਚਵੀਸਤਿਯੋਜਨੇਪਿ ਮਗ੍ਗੇ ਪੂਜਾ ਕਾਰੇਤ੍ਵਾ ਲੋਕਸ੍ਸ ਅਨੁਕ੍ਕਣ੍ਠਨਤ੍ਥਂ ਸਬ੍ਬਤ੍ਥ ਅਨ੍ਤਰਾਪਣੇ ਪਸਾਰੇਤ੍ਵਾ ਸੁਵਣ੍ਣਦੋਣਿਯਂ ਪਕ੍ਖਿਤ੍ਤਧਾਤੁਯੋ ਸਤ੍ਤਿਪਞ੍ਜਰੇਨ ਪਰਿਕ੍ਖਿਪਾਪੇਤ੍ਵਾ ਅਤ੍ਤਨੋ ਵਿਜਿਤੇ ਪਞ੍ਚਯੋਜਨਸਤ ਪਰਿਮਣ੍ਡਲੇ ਮਨੁਸ੍ਸੇ ਸਨ੍ਨਿਪਾਤਾਪੇਸਿ.

ਤੇ ਧਾਤੁਯੋ ਗਹੇਤ੍ਵਾ ਕੁਸਿਨਾਰਾਤੋ ਧਾਤੁਕੀਲ਼ਂ ਕੀਲ਼ਨ੍ਤਾ ਨਿਕ੍ਖਮਿਤ੍ਵਾ ਯਤ੍ਥ ਯਤ੍ਥ ਵਣ੍ਣਵਨ੍ਤਾਨਿ ਪੁਪ੍ਫਾਨਿ ਪਸ੍ਸਨ੍ਤਿ, ਤਤ੍ਥ ਤਤ੍ਥ ਧਾਤੁਯੋ ਸਤ੍ਤਿ ਅਨ੍ਤਰੇ ਠਪੇਤ੍ਵਾ ਤੇਸਂ ਪੁਪ੍ਫਾਨਂ ਖੀਣਕਾਲੇ ਗਚ੍ਛਨ੍ਤਿ. ਰਥਸ੍ਸ ਧੁਰਟ੍ਠਾਨਂ ਪਚ੍ਛਿਮਟ੍ਠਾਨੇ ਸਮ੍ਪਤ੍ਤੇ ਸਤ੍ਤ ਦਿਵਸੇ ਸਾਧੁਕੀਲ਼ਂ ਕੀਲ਼ਨ੍ਤਿ ਏਵਂ ਧਾਤੁਯੋ ਗਹੇਤ੍ਵਾ ਆਗਚ੍ਛਨ੍ਤਾਨਂ ਸਤ੍ਤਵਸ੍ਸਾਨਿ ਸਤ੍ਤਮਾਸਾਨਿ ਸਤ੍ਤ ਚ ਦਿਵਸਾਨਿ ਵਿਤਿਵਤ੍ਤਾਨਿ ਮਿਚ੍ਛਾਦਿਟ੍ਠਿਕਾ ਸਮਣਸ੍ਸ ਗੋਤਮਸ੍ਸ ਪਰਿਨਿਬ੍ਬੁਤ ਕਾਲਤੋ ਪਟ੍ਠਾਯ ਬਲਕ੍ਕਾਰੇਨ ਸਾਧੁਕੀਲ਼ਿਕਾਯ ਉਪਦ੍ਦੁਤਮ੍ਹਾ, ਸਬ੍ਬੇ ਨੋ ਕਮ੍ਮਨ੍ਤਾ ਨਟ੍ਠਾਤਿ ਉਜ੍ਝਾਯਨ੍ਤਾ ਮਨਂ ਪਦੂਸੇਤ੍ਵਾ ਛਲ਼ਾਸੀਤਿਸਹਸ੍ਸਮਤ੍ਤਾ ਅਪਾਯੇ ਨਿਬ੍ਬਤ੍ਤਾ, ਖੀਣਾਸਵ ਆਵਜ੍ਜਿਤ੍ਵਾ ਮਹਾਜਨੋ ਮਨਂ ਪਦੂਸੇਤ੍ਵਾ ਅਪਾਯੇ ਨਿਬ੍ਬਤ੍ਤੋਤਿ ਸਕ੍ਕਂ ਦੇਵਰਾਜਾਨਂ ਦਿਸ੍ਵਾ ਧਾਤੁ ਆਹਰਣੁਪਾਯਂ ਕਰਿਸ੍ਸਾਮਾਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਧਾਤੁ ਆਹਰਣੁਪਾਯਂ ਕਾਰੋਹਿ ਮਹਾਰਾਜਾਤਿ ਆਹਂਸੁ. ਸਕ੍ਕੋ ਆਹ ‘‘ਪੁਥੁਜ੍ਜਨੋ ਨਾਮ ਅਜਾਤਸਤ੍ਤੁਨਾ ਸਮੋ ਸਦ੍ਧੋ ਨਤ੍ਥਿ, ਨ ਸੋ ਮਮ ਵਚਨਂ ਕਰਿਸ੍ਸਤਿ ਅਪਿ ਚ ਖੋ ਮਾਰਵਿਭਿਸਕਸਦਿਸਂ ਵਿਭੀਸਕਂ ਦਸ੍ਸੇਸ੍ਸਾਮਿ ਯਕ੍ਖ ਗਾਹਕ ਖਿਪਨਕ ਅਰੋਚਕੇ ਕਰਿਸ੍ਸਾਮਿ ਤੁਮ੍ਹੇ ¶ ’ਮਹਾਰਾਜ ਅਮਨੁਸ੍ਸਾ ਕੁਪਿਤਾ, ਧਾਤੁਯੋ ਆਹਰਾਪੇਥਾਤਿ’. ਵਦੇਯ੍ਯਾਥ ਏਵਂ ਸੋ ਆਹਰਾਪੇਸ੍ਸਤੀਤਿ. ਅਥ ਖੋ ਸਕ੍ਕੋ ਤਂ ਸਬ੍ਬਂ ਅਕਾਸਿ.

ਥੇਰਾਪਿ ਰਾਜਾਨਂ ਉਪਸਙ੍ਕਮਿਤ੍ਵਾ ਮਹਾਰਾਜ ਅਮਨੁਸ੍ਸਾ ਕੁਪਿਤਂ, ਧਾਤੁਯੋ ਆਹਰਾਪੇਹੀਤਿ ਭਣਿਂਸੁ ਰਾਜਾ ਨ ਤਾਵ ਭਨ੍ਤੇ ਮਯ੍ਹਂ ਚਿਤ੍ਤਂ ਤੁਸ੍ਸਤਿ. ਏਵਂ ਸਨ੍ਤੇਪਿ ਆਹਰਤੂਤਿ ਆਹ ਸਤ੍ਤਮੇ ਦਿਵਸੇ ਧਾਤੁਯੋ ਆਹਰਿਂਸੁ. ਏਵਂ ਆਹਤਧਾਤੁਯੋ ਗਹੇਤ੍ਵਾ ਰਾਜਾ ਰਾਜਗਹੇ ਥੁਪਮਕਾਸਿ ਇਤਰੇਪਿ ਰਾਜਾਨੋ ਅਤ੍ਤਨੋ ਅਤ੍ਤਨੋ ਬਲਾਨੁਰੂਪੇਨ ਨੀਹਰਿਤ੍ਵਾ ਸਕਸਕਟ੍ਠਾਨੇ ਥੂਪਮਕਂਸੁ. ਦੋਣਿਪਿ ਬ੍ਰਾਹ੍ਮਣੋ ਪਿਫ੍ਫਲੀਵਨਿਯਾਪਿ ਮੋਰਿਯਾ ਸਕਸਕਟ੍ਠਾਨੇ ਥੂਪਮਕਂਸੂਤਿ.

ਏਕੋ ਥੂਪੋ ਰਾਜਗਹੇ - ਏਕੋ ਵੇਸਾਲਿਯਾ ਪੁਰੇ,

ਏਕੋ ਕਪਿਲਵਤ੍ਥੁਸ੍ਮਿਂ - ਏਕੋ ਚ ਅਲ੍ਲਕਪ੍ਪਕੇ;

ਏਕੋ ਥੂਪੋ ਰਾਮਗਾਮੇ - ਏਕੋ ਚ ਵੇਠਦੀਪਕੇ,

ਏਕੋ ਪਾਚੇਯ੍ਯਕੇ ਮਲ੍ਲੇ - ਏਕੋ ਚ ਕੁਸਿਨਾਰਕੇ;

ਯੇ ਤੇ ਸਾਰੀਰਿਕਾ ਥੂਪਾ - ਜਮ੍ਬੁਵਦੀਪੇ ਪਤਿਟ੍ਠਿਤਾ;

ਅਙ੍ਗਾਰਕੁਮ੍ਭਥੂਪੇਹਿ - ਦਸ ਥੂਪਾ ਭਵਨ੍ਤਿ ਤੇ;

ਦਸਾਪਿ ਥੂਪਾ ਪੁਰਿਸੁਤ੍ਤਮਸ੍ਸ ਯੇ-

ਯਥਾਨੁਰੂਪਂ ਨਰਰਾਜ ਪੂਜਿਤਾ,

ਸਬ੍ਬੇਨ ਲੋਕੇਨ ਸਦੇਵਕੇਨ ਤੇ-

ਨਮਸ੍ਸਨੇਯ੍ਯਾਚ ਭਵਨ੍ਤਿ ਸਬ੍ਬਦਾਤਿ;

ਦਸਥੂਪਕਥਾ

੧੦. ਏਵਂ ਪਤਿਟ੍ਠਿਤੇਸੁ ਪਨ ਥੂਪੇਸੁ ਮਹਾਕਸ੍ਸਪਤ੍ਥੇਰੋ ਧਾਤੂਨਂ ਅਨ੍ਤਰਾਯਂ ਦਿਸ੍ਵਾ ਅਜਾਤਸਤ੍ਤੁਂ ਉਪਸਙ੍ਕਮਿਤ੍ਵਾ ਮਹਾਰਾਜ ਏਕਂ ਧਾਤੁਨਿਧਾਨਂ ਕਾਤੁਂ ਵਟ੍ਟਤਿਤਿ ਆਹ ਸਾਧੁ ਭਨ੍ਤੇ ਨਿਧਾਨਕਮ੍ਮਂ ਤਾਵ ਮਮ ਹੋਤੁ, ਧਾਤੁਯੋ ਪਨ ਕਥਂ ਆਹਰਾਪੇਮਿਤਿ. ਨ ਮਹਾਰਾਜ ਧਾਤੁ ਆਹਰਣਂ ਤੁਯ੍ਹਂ ਭਾਰੋ, ਅਮ੍ਹਾਕਂ ਭਾਰੋਤਿ. ਸਾਧੁ ਭਨ੍ਤੇ ਤੁਮ੍ਹੇ ਧਾਤੁਯੋ ਆਹਰਥ. ਅਹਂ ਧਾਤੁਨਿਧਾਨਂ ਕਰਿਸ੍ਸਾਮੀਤਿ. ਥੇਰੋ ਤੇਸਂ ਤੇਸਂ ਰਾਜਕੁਲਾਨਂ ਪਰਿਚਰਣਮਤ੍ਤਕਮੇਵ ਠਪੇਤ੍ਵਾ ਸੇਸੇਧਾਤੁਯੋ ਆਹਰਿ.

ਰਾਮਗਾਮੇ ਪਨ ਧਾਤੁਯੋ ਨਾਗਾ ਗਣ੍ਹਿਂਸੁ ਤਾਸਂ ਅਨ੍ਤਰਾਯੋ ਨਤ੍ਥਿ, ਅਨਾਗਤੇ ਲਙ੍ਕਾਦੀਪੇ ਮਹਾਵਿਹਾਰੇ ਮਹਾਚੇਤਿਯਮ੍ਹਿ ਨਿਧਿਯਿਸ੍ਸ ਨੀਤਿ. ਤਾ ਨ ਆਹਰਿਤ੍ਥ, ਸੇਸੇਹਿ ਸਤ੍ਤਹਿ ਨਗਰੇਹਿ ਆਹਰਿਤ੍ਵਾ ਰਾਜਗਹਸ੍ਸ ਪਾਚੀਨ ਦਕ੍ਖਿਨ ਦਿਸਾਭਾਗੇ ਠਪੇਤ੍ਵਾ ਇਮਸ੍ਮਿਂ ਠਾਨੇ ਯੋ ਪਾਸਾਣੋ ਅਤ੍ਥਿ, ਸੋ ਅਨ੍ਤਰਧਾਯਤੁ, ਪਂਸੁ ਸੁਵਿਸੁਦ੍ਧਾ ਹੋਤੁ, ਉਦਕਞ੍ਚ ਮਾ ਉਟ੍ਠਹਤੂਤਿ ਅਧਿਟ੍ਠਾਸਿ.

ਰਾਜਾ ¶ ਤਂ ਠਾਨਂ ਖਣਾਪੇਤ੍ਵਾ ਤਤੋ ਉਦ੍ਧਟ ਪਂਸੁਨਾ ਇਟ੍ਠਿਕਾ ਕਾਰੇਤ੍ਵਾ ਅਸੀਤਿ ਮਹਾਸਾਵਕਾਨਂ ਥੂਪੇ ਕਾਰੇਤਿ ਇਧ ਰਾਜਾ ਕਿਂ ਕਾਰੇਹੀਤਿ ਪੁਚ੍ਛਨ੍ਤਾਨਮ੍ਪਿ ਮਹਾਸਾਵਕਾਨਂਚੇਤਿਯਾ ਨੀਤਿ ਵਦਨ੍ਤਿ ਨ ਕੋਚਿ ਧਾਤੁਨਿਧਾਨਭਾਵਂ ਜਾਨਾਤਿ ਅਸੀਤਿਹਤ੍ਥਗਮ੍ਭੀਰੇ ਪਨ ਤਸ੍ਮਿਂ ਪਦੇਸੇ ਜਾਤੇ ਹੇਟ੍ਠਾ ਲੋਭਸਤ੍ਥਰਂ ਸਤ੍ਥਰਾਪੇਤ੍ਵਾ ਤਤ੍ਥ ਥੂਪਾਰਾਮੇ ਚੇਤਿਯ ਘਰਪ੍ਪਮਾਣਂ ਤਮ੍ਬਲੋਹਮਯਂ ਗੇਹਂ ਕਾਰਾਪੇਤ੍ਵਾ ਅਟ੍ਠਟ੍ਠ ਹਰਿ ਚਣ੍ਦਨਾਦਿਮਯੇ ਕਰਣ੍ਡੇ ਚ ਥੂਪੇ ਚ ਕਾਰਾਪੇਸਿ.

ਅਥ ਖੋ ਭਗਵਤੋ ਧਾਤੁਯੋ ਹਰਿਚਣ੍ਦਨ ਕਰਣ੍ਡੇ ਪਕ੍ਖਿਪਿਤ੍ਵਾ ਤਂ ਹਰਿਚਣ੍ਦਨਂ ਕਰਣ੍ਡਂ ਅਞ੍ਞਸ੍ਮਿਂ ਹਰਿਚਣ੍ਦਨ ਕਰਣ੍ਡੇ ਤਮ੍ਪਿ ਅਞ੍ਞਸ੍ਮਿਨ੍ਤਿ ਏਵਂ ਅਟ੍ਠ ਹਰਿਚਣ੍ਦਨ ਕਰਣ੍ਡੇ ਏਕਤੋ ਕਤ੍ਵਾ ਏਤੇਨੇਵ ਉਪਾਯੇਨ ਅਟ੍ਠ ਕਰਣ੍ਡੇ ਅਟ੍ਠਸੁ ਹਰਿਚਣ੍ਦਨ ਥੂਪੇਸੁ ਅਟ੍ਠ ਹਰਿਚਣ੍ਦਨਥੂਪੇ ਅਟ੍ਠਸੁ ਲੋਹਿਤਚਣ੍ਦਨ ਕਰਣ੍ਡੇਸੁ, ਅਟ੍ਠ ਲੋਹਿਤਚਣ੍ਦਨਕਰਣ੍ਡੇ ਅਟ੍ਠਸੁ ਲੋਹਿਤਚਣ੍ਦਨਥੂਪੇਸੁ, ਅਟ੍ਠਲੋਹਿਤ ਚਣ੍ਦਨਥੂਪੇ ਅਟ੍ਠਸੁ ਦਨ੍ਤਕਰਣ੍ਡੇਸੁ, ਅਟ੍ਠ ਦਨ੍ਤਕਰਣ੍ਡੇ ਅਟ੍ਠਸੁ ਦਨ੍ਤਥੂਪੇਸੁ, ਅਟ੍ਠਦਨ੍ਤਥੂਪੇ ਅਟ੍ਠਸੁਸਬ੍ਬ ਰਤਨਕਰਣ੍ਡੇਸੁ, ਅਟ੍ਠ ਸਬ੍ਬ ਰਤਨਕਰਣ੍ਡੇ ਅਟ੍ਠਸੁ ਸਬ੍ਬਰਤਨਥੂਪੇਸੁ, ਅਟ੍ਠ ਸਬ੍ਬਰਤਨ ਥੂਪੇ ਅਟ੍ਠਸੁ ਸੁਵਣ੍ਣਕਰਣ੍ਡੇਸੁ. ਅਟ੍ਠਸੁਵਣ੍ਣਕਰਣ੍ਡੇ ਅਟ੍ਠਸੁ ਸੁਵਣ੍ਣਥੂਪੇਸੁ, ਅਟ੍ਠਸੁਵਣ੍ਣਥੂਪੇ ਅਟ੍ਠਸੁਰਜਤਕਰਣ੍ਡੇਸੁ, ਅਟ੍ਠ ਰਜਤਕਰਣ੍ਡੇ ਅਟ੍ਠਸੁ ਰਜਤਥੂਪੇਸੇ ਅਟ੍ਠ ਰਜਤਥੂਪੇ ਅਟ੍ਠਸੁ ਮਣਿਕਰਣ੍ਡੇਸੁ ਅਟ੍ਠਮਣਿਕਰੇਣ੍ਡਅਟ੍ਠਸੁਵਣ੍ਣਥੂਪੇਸੁ, ਅਟ੍ਠ ਮਣਿਥੂਪੇ ਅਟ੍ਠਸੁ ਲੋਹਿਤਙ੍ਕ ਕਰਣ੍ਡੇਸੁ, ਅਟ੍ਠਲੋਹਿਤਙ੍ਕ ਕਰਣ੍ਡੇ ਅਟ੍ਠਸੁ ਲੋਹਿਤਙ੍ਕਥੂਪੇਸੁ, ਅਟ੍ਠ ਲੋਹਿਤਙ੍ਕਥੂਪੇ ਅਟ੍ਠਸੁ ਮਸਾਰਗਲ੍ਲਥੂਪੇਸੁ, ਅਟ੍ਠ ਮਸਾਰਗਲ੍ਲਥੂਪੇ ਅਟ੍ਠਸੁ ਫਲਿਕ ਕਰਣ੍ਡੇਸੁ, ਅਟ੍ਠ ਫਲ਼ਿਕ ਕਰਣ੍ਡੇ ਅਟ੍ਠਸੁ ਫਲ਼ਿਕਥੂਪੇਸੁ ਪਕ੍ਖਿਪਿ ਸਬ੍ਬ ਉਪਰਿਮਂ ਫਲ਼ਿਕਚੇਤਿਯਂ ਥੂਪਾਰਾਮ ਚੇਤਿਯਪ੍ਪਮਾਣਂ ਅਹੋਸਿ.

ਤਸ੍ਸ ਉਪਰਿਸਬ੍ਬਰਤਨਮਯਂ ਗੇਹਂ ਕਾਰੇਸਿ ਤਸ੍ਸ ਉਪਰਿ ਸੁਵਣ੍ਣਮਯਂ, ਤਸ੍ਸ ਉਪਰਿ ਰਜਤਮਯਂ, ਤਸ੍ਸ ਉਪਰਿ ਤਮ੍ਬਲੋਹਮਯਂ ਗੇਹਂ ਕਾਰੇਸਿ ਤਤ੍ਥ ਸਬ੍ਬਰਤਨਮਯਂ ਵਾਲੁਕਂ ਓਕਿਰਿਤ੍ਵਾ ਜਲਜ ਥਲਜ ਪੁਪ੍ਫਾਨਂ ਸਹਸ੍ਸਾਨਿ ਵਿਪ੍ਪਕਿਰਿਤ੍ਵਾ ਅਦ੍ਧਚ੍ਛਟ੍ਠਾਨਿ ਜਾਤਕਸਤਾਨਿ ਆਸੀਤਿ ਮਹਾਥੇਰੇ ਸੁਦ੍ਧੋਦਨ ਮਹਾਰਾਜਾਨਂ ਮਹਾਮਾਯਾਦੇਵਿਂ ਸਤ੍ਤ ਸਹਜਾਤੇ ਸਬ੍ਬਾਨੇਤਾਨਿ ਸੁਵਣ੍ਣਮਯਾਨੇਵ ਕਾਰੇਸਿ ਪਞ੍ਚਪਞ੍ਚਸਤੇ ਸੁਵਣ੍ਣਰਜਤਮਯੇ ਪੁਣ੍ਣਘਟੇ ਠਪਾਪੇਸਿ ਪਞ੍ਚਸੁਵਣ੍ਣਧਜਸਤੇ ਪਞ੍ਚਸਤੇ ਸੁਵਣ੍ਣਦੀਪਕੇ ਚ ਕਾਰਾਪੇਤ੍ਵਾ ਸੁਗਣ੍ਧਤੇਲਸ੍ਸ ਪੂਰੇਤ੍ਵਾ ਤੇਸੁ ਦੁਕੂਲਵਟ੍ਟਿਯੋ ਠਪੇਸਿ.

ਅਥਾਯਸ੍ਮਾ ਮਹਾਕਸ੍ਸਪੋ ਮਾਲਾ ਮਾ ਮਿਲਾਯਨ੍ਤੁ. ਗਣ੍ਧਾ ਮਾ ਵਿਨਸ੍ਸਨ੍ਤੁ, ਦੀਪਾ ਮਾ ਵਿਜ੍ਝਾਯਨ੍ਤੂਤਿ ਅਧਿਟ੍ਠਹਿਤ੍ਵਾ ਸੁਵਣ੍ਣਪਟ੍ਟਅਕ੍ਖਰਾਨਿ ਛਿਣ੍ਦਾਪੇਸਿ. ਅਨਾਗਤੇ ਪਿਯਦਾਸੋ ਨਾਮ ਕੁਮਾਰੋ ਛਤ੍ਤਂ ਉਸ੍ਸਾਪੇਤ੍ਵਾ ¶ ਅਸੋਕੋ ਨਾਮ ਧਮ੍ਮਰਾਜਾ ਭਵਿਸ੍ਸਤਿ ਸੋ ਇਮਂ ਧਾਤੁਯੋ ਵਿਤ੍ਥਾਰਿਕਾ ਕਰਿਸ੍ਸਤੀਤਿ ਰਾਜਾ ਸਬ੍ਬਪਸਾਧਨੇਹਿ ਪੂਜੇਤ੍ਵਾ ਆਦਿਤੋ ਪਟ੍ਠਾਯ ਦ੍ਵਾਰਂ ਪਿਦਹਨ੍ਤੋ ਨਿਕ੍ਖਮਿ ਤਮ੍ਬਲੋਹਦ੍ਵਾਰਂ ਪਿਦਹਿਤ੍ਵਾ ਆਵਿਞ੍ਜਨ ਰਜ੍ਜੁਯਂ ਕੁਞ੍ਚਿਕਮੁਦ੍ਦਿਕਂ ਬਣ੍ਧਿ ਤਤ੍ਥੇਵ ਮਹਨ੍ਤਂ ਮਣਿਕ੍ਖਣ੍ਧਂ ਠਪੇਸਿ ਅਨਾਗਤੇ ਦਲ਼ਿਦ੍ਦਰਾਜਾਨੋ ਇਮਂ ਮਣਿਂ ਗਹੇਤ੍ਵਾ ਧਾਤੂਨਂ ਸਕ੍ਕਾਰਂ ਕਰੋਨ੍ਤੂਤਿ ਅਕ੍ਖਰਾਨਿ ਛਿਣ੍ਦਾਪੇਸੀ.

ਸਕ੍ਕੋ ਦੇਵਰਾਜਾ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ’ਤਾਤ, ਅਜਾਤਸਤ੍ਤੁਨਾ ਧਾਤੁਨਿਧਾਨਂ ਕਤਂ. ਏਤ੍ਥ ਆਰਕ੍ਖਂ ਠਪੇਹਿ’ਤਿ ਪਹਿਣਿ ਸੋ ਆਗਨ੍ਤ੍ਵਾ ਵਾਲ਼ਸਙ੍ਘਾਟਯਨ੍ਤਂ ਯੋਜੇਸਿ. ਕਟ੍ਠਰੂਪਕਾਨਿ ਤਸ੍ਮਿਂ ਧਾਤੁਗਬ੍ਭੇ ਫਲ਼ਿਕਵਣ੍ਣ ਖਗ੍ਗੇ ਗਹੇਤ੍ਵਾ ਵਾਤਸਦਿਸੇਨ ਵੇਗੇਨ ਅਨੁਪਰਿਯਾਯਨ੍ਤਂ ਯੋਜੇਤ੍ਵਾ ਏਕਾਯ ਏਵ ਆਣਿਵਾ ਬਣ੍ਧਿਤ੍ਵਾ ਸਮਨ੍ਤਤੋ ਗਿਞ੍ਜਕ ਵਸਥਾਕਾਰੇਨ ਸਿਲਾਪਰਿਕ੍ਖੇਪਂ ਕਤ੍ਵਾ ਉਪਰਿ ਏਕਾਯ ਪਿਦਹਿਤ੍ਵਾ ਪਂਸੁਂ ਪਕ੍ਖਿਪਿਤ੍ਵਾ ਭੂਮਿਂ ਸਮਂ ਕਤ੍ਵਾ ਤਸ੍ਸੁਪਰਿ ਪਾਸਾਣਥੂਪਂ ਪਤਿਟ੍ਠਾਪੇਸਿ.

ਧਾਤੁਨਿਧਾਨ ਕਥਾ

੧੧. ਏਵਂ ਨਿਟ੍ਠਿਤੇ ਧਾਤੁਨਿਧਾਨੇ ਯਾਵਤਾਯੁਕਂ ਠਤ੍ਵਾ ਥੇਰੋ ਪਰਿਨਿਬ੍ਬੁਤੋ, ਰਾਜਾਪਿ ਯਥਾਕਮ੍ਮਂ ਗਤੋ, ਤੇਪਿ ਮਨੁਸ੍ਸਾ ਕਾਲਕਤਾ, ਅਪਰਭਾਗੇ ਪਿਯਦਾਸੋ ਕੁਮਾਰੋ ਛਤ੍ਤਂ ਉਸ੍ਸਾਪੇਤ੍ਵਾ ਅਸੋਕੋ ਨਾਮ ਧਮ੍ਮ ਰਾਜਾ ਹੁਤ੍ਵਾ ਤਾ ਧਾਤੁਯੋ ਗਹੇਤ੍ਵਾ ਜਮ੍ਬੁਦੀਪੇ ਚਤੁਰਾਸੀਤਿਯਾ ਚੇਤਿਯ ਸਹਸ੍ਸੇਸੁ ਪਤਿਟ੍ਠਾਪੇਸਿ. ਕਥਂ ਬਿਣ੍ਦੁਸਾਰਸ੍ਸ ਕਿਰ ਏਕਸਤਂ ਪੁਤ੍ਤਾ ਅਹੇਸੁਂ ਤੇ ਸਬ੍ਬੇ ਅਸੋਕੋ ਅਤ੍ਤਨਾ ਸਦ੍ਧਿਂ ਏਕਮਾਤਿਕਂ ਤਿਸ੍ਸ ਕੁਮਾਰਂ ਠਪੇਤ੍ਵਾ ਘਾਤੇਸਿ. ਘਾਤੇਨ੍ਤੋ ਚਤ੍ਤਾਰਿ ਵਸ੍ਸਾਨਿ ਅਨਭਿਸਿਤ੍ਤੋ ਰਜ੍ਜਂ ਕਾਰੇਤ੍ਵਾ ਚਤੁਨ੍ਨਂ ਵਸ੍ਸਾਨਂ ਅਚ੍ਚਯੇਨ ਤਥਾਗਤਸ੍ਸ ਪਰਿਨਿਬ੍ਬਾਨਤੋ ਦ੍ਵਿਨ੍ਨਂ ਵਸ੍ਸਸਤਾਨਂ ਉਪਰਿ ਅਟ੍ਠਾਰਸਮੇ ਵਸ੍ਸੇ ਸਕਲਜਮ੍ਬੁਦੀਪੇ ਏਕਰਜ੍ਜਾਭਿਸੇਕਂ ਪਾਪੁਣਿ.

ਅਭਿਸੇਕਾਨੁਭਾਵੇਨ ਇਮਾ ਰਾਜਿਦ੍ਧਿਯੋ ਆਗਤਾ ਮਹਾਪਥਵਿਯਾ ਹੇਟ੍ਠਾ ਯੋਜਨਪ੍ਪਮਾਣੇ ਆਣਾ ਪਵਤ੍ਤਿ, ਤਥਾ ਉਪਰਿ ਆਕਾਸੇ, ਅਨੋਤਤ੍ਤਦਹਤੋ ਅਟ੍ਠਹਿ ਕਾਜੇਹਿ ਸੋਲ਼ਸ ਪਾਨੀਯਘਟੇ ਦਿਵਸੇ ਦਿਵਸੇ ਦੇਵਤਾ ਆਹਰਨ੍ਤਿ. ਯਤੋ ਸਾਸਨੇ ਉਪ੍ਪਨ੍ਨਸਦ੍ਧੋ ਹੁਤ੍ਵਾ ਅਟ੍ਠ ਘਟੇ ਭਿਕ੍ਖੁਸਙ੍ਘਸ੍ਸ ਅਦਾਸਿ ਦ੍ਵੇ ਘਟੇ ਸਟ੍ਠਿਮਤ੍ਤਾਨਂ ਤਿਪਿਟਕ ਭਿਕ੍ਖੁਨਂ ਦ੍ਵੇਘਟੇ ਅਗ੍ਗਮਹੇਸਿਯਾ ਅਸਣ੍ਧਿਮਿਤ੍ਤਾਯ ਚਤ੍ਤਾਰੋ ਘਟੇ ਅਤ੍ਤਨਾ ਪਰਿਭੁਞ੍ਜਿ. ਦੇਵਤਾ ਏਵ ਹਿਮਵਨ੍ਤੇ ਨਾਗਲਤਾ ਦਨ੍ਤਕਟ੍ਠ ਨਾਮ ਅਤ੍ਥਿ ਸਿਨਿਦ੍ਧਾ ਮੁਦੁਕਂ ਰਸਵਨ੍ਤਂ, ਤਂ ਦਿਵਸੇ ਦਿਵਸੇ ਆਭਿਰਨ੍ਤਿ ਯੇਨ ਰਞ੍ਞੋ ਚ ਅਗ੍ਗਮਹੇਸਿਯਾ ਚ ਸੋਲ਼ਸਨ੍ਨਂ ਨਾਟਕਸਹਸ੍ਸਾਨਂ ਸਟ੍ਠਿਮਤ੍ਤਾਨਂ ਭਿਕ੍ਖੁਸਹਸ੍ਸਾਨਂ ਦੇਵਸਿਕਂ ਦਨ੍ਤਪੋਣਕਿਚ੍ਚਂ ਨਿਪ੍ਫਜ੍ਜਿ.

ਦੇਵਸਿਕਮੇਵਸ੍ਸ ¶ ਦੇਵਤਾ ਅਗਦਾਮਲਕਂ ਅਗਦਹਰੀਟਕਂ ਸੁਵਣ੍ਣਵਣ੍ਣਞ੍ਚ ਗਣ੍ਧਸਮ੍ਪਨ੍ਨਂ ਅਮ੍ਬਪਕ੍ਕਂ ਆਹਰਨ੍ਤਿ ਤਥਾ ਛਦ੍ਦਨ੍ਤ ਦਹਤੋ ਪਞ੍ਚਵਣ੍ਣਂ ਨਿਵਾਸਨ ਪਾਰੁਪਣਂ, ਪੀਤਕਵਣ੍ਣਂ ਹਤ੍ਥਪੁਞ੍ਛਨਕ ਪਟ੍ਟਂਦਿਬ੍ਬਞ੍ਚਜਾਨਕਂ ਆਹਰਨ੍ਤਿ ਦੇਵਸਿਕਮੇਵ ਪਨਸ੍ਸ ਅਨੁਲੇਪਗਣ੍ਧਂ ਪਾਰੁਪਨਤ੍ਥਾਯ ਅਸੁਤ੍ਤਮਯਿਕਂ ਸੁਮਨਪੁਪ੍ਫਪਟਂ ਮਹਾਰਹਞ੍ਚ ਅਞ੍ਜਨਂ ਨਾਗਭਵਨਤੋ ਨਾਗਰਾਜਾਨੋ ਆਹਰਨ੍ਤਿ. ਛਦ੍ਦਨ੍ਤਦਹੇਯੇਵ ਉਟ੍ਠਿਤਸ੍ਸ ਸਾਲਿਨੋ ਨਵ ਚਾਹ ਸਹਸ੍ਸਾਨਿ ਦਿਵਸੇ ਦਿਵਸੇ ਸੁਵਾ ਆਹਰਨ੍ਤਿ. ਮੂਸਿਕਾ ਨਿਤ੍ਥੁਸ ਕਣੇ ਕਰੋਨ੍ਤਿ ਏਕੋਪਿ ਖਣ੍ਡਤਣ੍ਡੁਲੋ ਨ ਹੋਤਿ. ਰਞ੍ਞੋ ਸਬ੍ਬਟ੍ਠਾਨੇਸੁ ਅਯਮੇਵ ਤਣ੍ਡੁਲੋ ਪਰਿਭੋਗਂ ਗਚ੍ਛਤਿ. ਮਧੁਮਕ੍ਖਿਕਾ ਮਧੁਂ ਕਰੋਨ੍ਤਿ. ਕਮ੍ਮਾਰਸਾਲਾਸੁ ਅਚ੍ਛਾ ਕੂਟਂ ਪਹਰਨ੍ਤਿ. ਦੀਪਿਕਾ ਚਮ੍ਮਾਨਿ ਚਾਲੇਨ੍ਤਿ ਕਰਵੀਕ ਸਕੁਣਾ ਆਗਤ੍ਤ੍ਵਾ ਮਧੁਰਸ੍ਸਰਂ ਵਿਕੁਜੇਨ੍ਤਾ ਰਞ੍ਞੋ ਬਲਿਕਮ੍ਮਂ ਕਰੋਨ੍ਤਿ.

ਇਮਾਹਿ ਇਦ੍ਧੀਹਿ ਸਮਨ੍ਨਾਗਤੋ ਰਾਜਾਏਕ ਦਿਵਸਂ ਸੁਵਣ੍ਣ ਸਙ੍ਖਲਿਕ ਬਣ੍ਧਨਂ ਪੇਸੇਤ੍ਵਾ ਚਤੁਨ੍ਨਂ ਬੁਦ੍ਧਾਨਂ ਅਧਿਗਤ ਰੂਪਦਸ੍ਸਨਂ ਕਪ੍ਪਾਯੁਕਂ ਮਹਾਕਾਲ਼ ਨਾਗਰਾਜਾਨਂ ਆਨਯਿਤ੍ਵਾ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਅਨੇਕ ਸਤਵਣ੍ਣੇਹਿ ਜਲਜ ਥਲਜ ਪੁਪ੍ਫੇਹਿ ਸੁਵਣ੍ਣਪੁਪ੍ਫੇਹਿ ਚ ਪੂਜਂ ਕਤ੍ਵਾ ਸਬ੍ਬਾਲਙ੍ਕਾਰ ਪਤਿਮਣ੍ਡਿਤੇਹਿ ਚ ਸੋਲ਼ਸਹਿ ਨਾਟਕ ਸਹਸ੍ਸੇਹਿ ਸਮਨ੍ਤਤੋ ਪਰਿਕ੍ਖਿਪਿਤ੍ਵਾ ਅਨਨ੍ਤਞਾਣਸ੍ਸ ਤਾਵ ਮੇ ਸਦ੍ਧਮ੍ਮਵਰ ਚਕ੍ਕਵਤ੍ਤਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਰੂਪਂ ਇਮੇਸਂ ਅਕ੍ਖੀਨਂ ਆਪਾਥਂ ਕਰੋਹੀਤਿ ਨਿਬ੍ਬਤ੍ਤਾਸੀਤਿ ਅਨੁਬ੍ਯਞ੍ਜਨ ਪਤਿਮਣ੍ਡਿਤਂ ਦ੍ਵਤ੍ਤਿਂਸ ਮਹਾ ਪੁਰਿਸ ਲਕ੍ਖਣ ਸਸ੍ਸਿਰੀਕਤਾਯ ਵਿਕਸਿਤ ਕਮਲੁਪ੍ਫਲ ਪੁਣ੍ਡਰੀਕ ਪਤਿਮਣ੍ਡਿਤਮਿਵ ਸਲਿਲਤਲਂ ਤਾਰਾਗਣਰਂਸਿਜਾਲ ਵਿਸਰਵਿਪ੍ਫੁਤਸੋਭਾਸਮੁਜ੍ਜਲਮਿਵਗਗਨਤਲਂ ਨੀਲ-ਪੀਤ-ਲੋਹਿਤਾਦਿ ਭੇਦ ਵਿਚਿਤ੍ਤਵਣ੍ਣਰਂਸਿ ਵਿਨਦ੍ਧ ਬ੍ਯਾਮਪ੍ਪਭਾ ਪਰਿਕ੍ਖੇਪ ਵਿਲਾਸਿਤਾਯ ਸਞ੍ਝਪ੍ਪਭਾਨੁਰਾਗ ਇਣ੍ਦਧਨੁ ਵਿਜ੍ਜੁਲ੍ਲਤਾ ਪਰਿਕ੍ਖਿਤ੍ਤਮਿਵ ਕਨਕਗਿਰਿ ਸਿਖਰਂ ਨਾਨਾਵਿਰਾਗ ਵਿਮਲਕੇਤੁਮਾਲਾ ਸਮੁਜ੍ਜਲਿਤਚਾਰੁਮਤ੍ਥਕਸੋਭਂ ਨਯਨਰਸਾਯਨਮਿਵ ਬ੍ਰਹ੍ਮਦੇਵ-ਮਨੁਜ ਨਾਗ-ਯਕ੍ਖ ਗਣਾਨਂ ਬੁਦ੍ਧਰੂਪਂ ਪਸ੍ਸਨ੍ਤੋ ਸਤ੍ਤਦਿਵਸਂ ਅਕ੍ਖਿਪੂਜਂ ਨਾਮ ਅਕਾਸਿ

ਰਾਜਾ ਕਿਰ ਅਭਿਸੇਕਂ ਪਾਪੁਣਿਤ੍ਵਾ ਤੀਣਿਯੇਵ ਸਂਵਚ੍ਛਰਾਨਿ ਬਾਹਿਰਕ ਪਾਸਣ੍ਡਂ ਪਰਿਗਣ੍ਹਿ ਚਤੁਤ੍ਥੇ ਸਂਵਚ੍ਛਰੇ ਬੁਦ੍ਧਸਾਸਨੇ ਪਸੀਦਿਨਂ ਬ੍ਰਾਹ੍ਮਣ ਜਾਤਿਯ ਪਾਸਣ੍ਡਾਨਞ੍ਚ ਪਣ੍ਡਰਙ੍ਗ ਪਰਿਬ੍ਬਾਜਕਾਨਞ੍ਚ ਸਟ੍ਠਿਸਹਸ੍ਸਮਤ੍ਤਾਨਂ ਨਿਚ੍ਚਭਤ੍ਤਂ ਪਟ੍ਠਪੇਸਿ.

ਅਸੋਕੋ ਪਿਤਰਾ ਪਵਤ੍ਤਿਤਂ ਦਾਨਂ ਅਤ੍ਤਨੋ ਅਨ੍ਤੇਪੁਰੇ ਤਥੇਵ ਦਦਮਾਨੋ ਏਕਦਿਵਸਂ ਸੀਹਪਞ੍ਜਰੇ ਠਿਤੋ ਉਪਸਮ ਪਰਿਬਾਹਿਰੇਨ ਆਚਾਰੇਨ ¶ ਭੁਞ੍ਜਮਾਨੇ ਅਸਂਯਤਿਣ੍ਦ੍ਰਿਯੇ ਅਵਿਨਿਤ ਇਰਿਯਾਪਥੇ ਦਿਸ੍ਵਾ ਚਿਨ੍ਤੇਸਿ ਈਦਿਸਂ ਦਾਨਂ ਉਪਪਰਿਕ੍ਖਿਤ੍ਵਾ ਯੁਤ੍ਤਟ੍ਠਾਨੇ ਦਾਤੁਂ ਵਟ੍ਟਤਿਤਿ ਏਵਂ ਚਿਨ੍ਤੇਤ੍ਵਾ ਅਮਚ੍ਚੇ ਆਹ. ਗਚ੍ਛਥ ਭਣੇ ਅਤ੍ਤਨੋ ਅਤ੍ਤਨੋ ਸਾਧੁਸਮ੍ਮਤੇ ਸਮਣ ਬ੍ਰਾਹ੍ਮਣੇ ਅਨ੍ਤੇਪੁਰਂ ਅਤਿਹਰਥ, ਦਾਨਂ ਦਸ੍ਸਾਮਾਤਿ ਅਮਚ੍ਚਾ ਸਾਧੁ ਦੇਵਾਤਿ ਰਞ੍ਞੋ ਪਟਿਸ੍ਸੁਤ੍ਵਾ ਤੇ ਤੇ ਪਣ੍ਡਰਙ੍ਗ ਪਰਿਬ੍ਬਾਜਕਾਜੀਵਕ ਨਿਗਣ੍ਠਾਦਯੋ ਆਨੇਤ੍ਵਾ ਇਮੇ ਮਹਾਰਾਜ ਅਮ੍ਹਾਕਂ ਅਰਹਨ੍ਤੋਤਿ ਆਹਂਸੁ.

ਅਥ ਰਾਜਾ ਅਨ੍ਤੇਪੁਰੇ ਉਚ੍ਚਾਵਚਾਨਿ ਆਸਨਾਨਿ ਪਞ੍ਞਾਪੇਤ੍ਵ ਆਗਚ੍ਛਨ੍ਤੂਤਿ ਵਤ੍ਵਾ ਆਗਤਾਗਤੇ ਆਹ ਅਤ੍ਤਨੋ ਅਤ੍ਤਨੋ ਅਨੁਰੂਪੇ ਆਸਨੇ ਨਿਸੀਦਥਾਤਿ ਏਕਚ੍ਚੇ ਭਦ੍ਦਪੀਠਕੇ ਏਕਚ੍ਚੇ ਫਲਕਪੀਠਕੇਸੇ ਨਿਸੀਦਿਂਸੁ. ਤਂ ਦਿਸ੍ਵਾ ਰਾਜਾ ਨਤ੍ਥਿ ਏਤੇਸਂ ਅਨ੍ਤੇਸਾਰੋਤਿ ਞਤ੍ਵਾ ਤੇਸਂ ਅਨੁਰੂਪਂ ਖਾਦਨੀਯਂ ਭੋਜਨੀਯਂ ਦਤ੍ਵਾ ਉਯ੍ਯੋਜੇਸਿ.

ਏਵਂ ਗਚ੍ਛਨ੍ਤੇ ਕਾਲੇ ਏਕ ਦਿਵਸਂ ਸੀਹਪਞ੍ਜਰੇ ਠਿਤੋ ਅਦ੍ਦਸ ਨਿਗ੍ਰੋਧ ਸਾਮਣੇਰਂ ਰਾਜਙ੍ਗਣੇਨ ਗਚ੍ਛਨ੍ਤਂ ਦਨ੍ਤਂ ਗੁਤ੍ਤਂ ਸਨ੍ਤਿਨ੍ਦ੍ਰਿਯਂ ਇਰਿਯਾਪਥ ਸਮ੍ਪਨ੍ਨਂ. ਕੋ ਪਨਾਯਂ ਨਿਗ੍ਰੋਧੋ ਨਾਮ, ਬਿਣ੍ਦੁਸਾਰ ਰਞ੍ਞੋ ਜੇਟ੍ਠਪੁਤ੍ਤਸ੍ਸ ਸੁਮਨਰਾਜ ਕੁਮਾਰਸ੍ਸ ਪੁਤ੍ਤੋ. ਤਤ੍ਰਾਯਂ ਆਨੁਪੁਬ੍ਬੀ ਕਥਾ-ਬਿਣ੍ਦੁਸਾਰ ਰਞ੍ਞੋ ਕਿਰ ਦੁਬ੍ਬਲਕਾਲੇਯੇਵ ਅਸੋਕ ਕੁਮਾਰੋ ਅਤ੍ਤਨਾ ਲਦ੍ਧਂ ਉਜ੍ਜੇਨਿਰਜ੍ਜਂ ਪਹਾਯ ਆਗਨ੍ਤ੍ਵਾ ਸਬ੍ਬਂ ਨਗਰਂ ਅਤ੍ਤਨੋ ਹਤ੍ਥਗਤਂ ਕਤ੍ਵਾ ਸੁਮਨ ਰਾਜਕੁਮਾਰਂ ਅਗ੍ਗਹੇਸਿ.

ਤਂ ਦਿਵਸਮੇਵ ਸੁਮਨਸ੍ਸ ਰਾਜਕੁਮਾਰਸ੍ਸ ਸੁਮਨਾ ਨਾਮ ਦੇਵੀ ਪਰਿਪੁਣ੍ਣਗਬ੍ਭਾ ਅਹੋਸਿ. ਸਾ ਅਞ੍ਞਾਤਕਵੇਸੇਨ ਨਿਕ੍ਖਮਿਤ੍ਵਾ ਅਵਿਦੂਰੇ ਅਞ੍ਞਤਰਂ ਚਣ੍ਡਾਲਗਾਮਂ ਸਨ੍ਧਾਯ ਗਚ੍ਛਨ੍ਤਿ, ਜੇਟ੍ਠਕ ਚਣ੍ਡਾਲਸ੍ਸ ਗੇਹਤੋ ਅਵਿਦੂਰੇ ਏਕਸ੍ਮਿਂ ਨਿਗ੍ਰੋਧ ਰੁਕ੍ਖੇ ਅਧਿਵਤ੍ਥਾਯ ਦੇਵਤਾਯ ਇਤੋ ਸੁਮਨੇਤਿ ਵਹਨ੍ਤਿਯਾ ਸਦ੍ਦਂ ਸੁਤ੍ਵਾ ਤਸ੍ਸਾ ਸਮੀਪਂ ਗਤਾ ਦੇਵਤਾ ਅਤ੍ਤਨੋ ਆਨੁਭਾਵੇਨ ਏਕਂ ਸਾਲਂ ਨਿਮ੍ਮਿਣਿਤ੍ਵਾ ਏਤ੍ਥ ਵਸਾਹਿਤਿ ਪਦਾਸਿ. ਸਾ ਤਂ ਸਾਲਂ ਪਾਵਿਸਿ. ਗਤਦਿਵਸੇਯੇਵ ਪੁਤ੍ਤਂ ਵਿਜਾਯਿ.

ਸਾ ਤਸ੍ਸ ਨਿਗ੍ਰੋਧ ਦੇਵਤਾਯ ਪਰਿਗ੍ਗਹਿਤਤ੍ਤਾ ਨਿਗ੍ਰੋਧੋਤ੍ਵੇਵ ਨਾਮਂ ਅਕਾਸਿ. ਜੇਟ੍ਠਕ ਚਣ੍ਡਾਲੋ ਦਟ੍ਠਦਿਵਸਤੋਪ੍ਪਭੂਤਿ ਤਂ ਅਤ੍ਤਨੋ ਸਾਮਿਧੀਤਰਂ ਵਿਯ ਮਞ੍ਞਮਾਨੋ ਨਿਬਦ੍ਧਂ ਵਟ੍ਟਂ ਪਟ੍ਠਪੇਸਿ. ਰਾਜਧੀਤਾ ਤਤ੍ਥ ਸਤ੍ਤ ਵਸ੍ਸਾਨਿ ਵਸਿ. ਨਿਗ੍ਰੋਧਕੁਮਾਰੋਪਿ ਸਤ੍ਤਵਸ੍ਸਿਕੋ ਜਾਤੋ ਤਦਾ ਮਹਾਵਰੁਣਤ੍ਥੇਰੋ ਨਾਮ ਏਕੋ ਅਰਹਾ ਦਾਰਕਸ੍ਸ ਹੇਤੁਸਮ੍ਪਦਂ ਦਿਸ੍ਵਾ ਵਿਹਰਮਾਨੋ ਸਤ੍ਤਵਸ੍ਸਿਕੋਦਾਨਿ ਦਾਰਕੋ ਕਾਲੋ ਨਂ ਪਬ੍ਬਾਜੇਤੁਨ੍ਤਿ ਚਿਨ੍ਤੇਤ੍ਵਾ ਰਾਜਧੀਤਯਾ ਆਰੋਚਾਪੇਤ੍ਵਾ ਨਿਗ੍ਰੋਧਕੁਮਾਰਂ ਪਬ੍ਬਾਜੇਸਿ. ਕੁਮਾਰੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਸੋ ਏਕਦਿਵਸਂ ਪਾਤੋਵ ਸਰੀਰਂ ਪਟਿਜਗ੍ਗਿਤ੍ਵਾ ਆਚਰਿਯੁਪਜ੍ਝਾਨਂ ¶ ਵਤ੍ਤਂ ਕਤ੍ਵਾ ਪਤ੍ਤਚੀਵਰਮਾਦਾਯ ਮਾਤੁਉਪਾਸਿਕਾਯ ਗੇਹਦ੍ਵਾਰਂ ਗਚ੍ਛਾਮੀਤਿ ਨਿਕ੍ਖਮਿ ਮਾਤੁ ਨਿਵੇਸਨਟ੍ਠਾਨਞ੍ਚਸ੍ਸ ਦਕ੍ਖਿਣਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਨਗਰਮਜ੍ਝੇਨ ਗਨ੍ਤ੍ਵਾ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਗਨ੍ਤਬ੍ਬਂ ਹੋਤਿ ਤੇਨ ਚ ਸਮਯੇਨ ਅਸੋਕੋ ਧਮ੍ਮਰਾਜਾ ਪਾਚੀਨ ਦਿਸਾਭਿਮੁਖੋ ਸੀਹਪਞ੍ਜਰੇ ਚਙ੍ਕਮਤਿ.

ਤਂ ਖਣਂਯੇਵ ਸਿਗ੍ਰੋਧੋ ਸਾਮਣੇਰੋ ਰਾਜਙ੍ਗਣਂ ਪਾਪੁਣਿ ਸਨ੍ਤਿਨ੍ਦ੍ਰਿਯੋ ਸਨ੍ਤਮਾਨਸੋ ਯੁਗਮਤ੍ਤਂ ਪੇਕ੍ਖਮਾਨੋ. ਤੇਨ ਵੁਤ੍ਤਂ. ਏਕਦਿਵਸਂ ਸੀਹਪਞ੍ਜਰੇ ਠਿਤੋ ਅਦ੍ਦਸ ਨਿਗ੍ਰੋਧਸਾਮਣੇਰਂ ਰਾਜਙ੍ਗਣੇਨ ਗਚ੍ਛਨ੍ਤਂ ਦਨ੍ਤਂ ਗੁਤ੍ਤਂ ਸਨ੍ਤਿਨ੍ਦ੍ਰਿਯਂ ਇਰਿਯਾਪਥ ਸਮ੍ਪਨ੍ਨਨ੍ਤਿ. ਦਿਸ੍ਵਾ ਪਨਸ੍ਸ ਏਤਦਹੋਸਿ? ਅਯਂ ਜਨੋ ਸਬ੍ਬੋਪਿ ਵਿਕ੍ਖਿਤ੍ਤਚਿਤ੍ਤੋਹਨ੍ਤਮਗਪਟਿਭਾਗੋ, ਅਯਮ੍ਪਨ ਦਾਰਕੋ ਅਵਿਕ੍ਖਿਤ੍ਤਚਿਤ੍ਤੋ ਅਤਿਵਿਯਸ੍ਸ ਅਲੋਕਿਤ ਵਿਲੋਕਿਤਂ ਸਮ੍ਮਿਞ੍ਜਨ ਪਸਾਰਣਞ੍ਚ ਸੋਭਤਿ, ਅਦ੍ਧਾ ਏਤਸ੍ਸ ਅਬ੍ਭਨ੍ਤਰੇ ਲੋਕੁਤ੍ਤਰਧਮ੍ਮੋ ਭਵਿਸ੍ਸਤੀਤਿ ਰਞ੍ਞੋ ਸਹਦਸ੍ਸਨੇਨੇਵ ਸਾਮਣੇਰੇ ਚਿਤ੍ਤਂ ਪਸੀਦਿ. ਪੇਮਂ ਸਣ੍ਠਹਿ ਕਸ੍ਮਾ? ਪੁਬ੍ਬੇ ਕਿਰ ਪੁਞ੍ਞ ਕਰਣਕਾਲੇ ਏਸ ਰਞ੍ਞੋ ਜੇਟ੍ਠਭਾਤਾ ਵਾਣਿਜਕੋ ਅਹੋਸਿ.

ਅਥ ਰਾਜਾ ਸਞ੍ਜਾਤਪੇਮੋ ਸਬਹੁਮਾਨੋ ਸਾਮਣੇਰਂ ਪਕ੍ਕੋਸਥਾਤਿ ਅਮਚ੍ਚੇ ਪੇਸੇਸਿ ਅਤਿਚਿਰਾਯਤੀਤਿ ਪੁਨ ਦ੍ਵੇ ਤਯੋ ਪੇਸੇਸਿ ਤੁਰਿਤਂ ਆਗਚ੍ਛਤੂਤਿ ਸਾਮਰਣੇਰੋ ਅਤ੍ਤਨੋ ਪਕਤਿਯਾ ਏਵ ਅਗਮਾਸਿ ਰਾਜਾ ਪਤਿਰੂਪਾਸਨਂ ਞਤ੍ਵਾ ਨਿਸੀਦਥਾਤਿ ਆਹ. ਇਤੋ ਚਿਤੋ ਚ ਓਲੋਕੇਤ੍ਵਾ ਨਤ੍ਥਿਦਾਨਿ ਅਞ੍ਞੋ ਭਿਕ੍ਖੁਤਿ ਸਮੁਸ੍ਸਿਤ ਸੇਤਚ੍ਛਤ੍ਤਂ ਰਾਜਪਲ਼੍ਲਙ੍ਕਂ ਉਪਸਙ੍ਕਮਿਤ੍ਵਾ ਪਤ੍ਤਗਹਣਤ੍ਥਾਯ ਰਞ੍ਞੋ ਆਕਾਰਂ ਦਸ੍ਸੇਸਿ. ਰਾਜਾ ਤਂ ਪਲ੍ਲਙ੍ਕਂ ਸਮੀਪਂ ਗਚ੍ਛਨ੍ਤਂ ਦਿਸ੍ਵਾ ਏਵਂ ਚਿਨ੍ਤੇਸਿ. ਅਜ੍ਜੇਵਦਾਨਿ ਅਯਂ ਸਾਮਣੇਰੋ ਇਮਸ੍ਸ ਗੇਹਸ੍ਸ ਸਾਮਿਕੋ ਭਵਿਸ੍ਸਤਿ. ਸਾਮਣੇਰੋ ਰਞ੍ਞੋ ਹਤ੍ਥੇ ਪਤ੍ਤਂ ਦਤ੍ਵਾ ਪਲ੍ਲਙ੍ਕਂ ਅਭਰੁਹਿਤ੍ਵਾ ਨਿਸੀਦਿ.

ਰਾਜਾ ਅਤ੍ਤਨੋ ਅਤ੍ਥਾਯ ਸਮ੍ਪਾਦਿਤਂ ਸਬ੍ਬਂ ਯਾਗੁ-ਕਜ੍ਜਕ ਭਤ੍ਤ ਵਿਕਤਿਂ ਉਪਨਾਮੇਸਿ. ਸਾਮਣੇਰੋ ਅਤ੍ਤਨੋ ਯਾਪਨਮਤ੍ਤਮੇਵ ਸਮ੍ਪਟਿਚ੍ਛਿ. ਭਤ੍ਤਕਿਚ੍ਚਾਵਸਾਨੇ ਰਾਜਾ ਆਹ ਸਤ੍ਥਾਰਾ ਤੁਮ੍ਹਾਕਂ ਦਿਨ੍ਨੋਵਾਦਂ ਜਾਨਾਥਾਤਿ ਜਾਨਮਿ ਮਹਾਰਾਜ ਏਕਦੇਸੇਨਾਤਿ. ਤਾਤ, ਮਯ੍ਹਮ੍ਪਿ ਨਂ ਕਥੇਹੀਤਿ ਸਾਧੁ ਮਹਾਰਾਜਾਤਿ ਰਞ੍ਞੋ ਅਨੁਰੂਪਂ ਧਮ੍ਮਪਦੇ ਅਪ੍ਪਮਾਦ ਵਗ੍ਗਂ ਅਨੁਮੋਦਨਤ੍ਥਾਯ ਅਭਾਸਿ.

ਰਾਜਾ ਪਨ ਅਪ੍ਪਮਾਦੋ ਅਮਤਪਦਂ, ਪਮਾਦੋ ਮਚ੍ਚੁਨੋ ਪਦਨ੍ਤਿ ਸੁਤ੍ਵ ਚ, ਅਞ੍ਞਾਤਂ ਤਾਤ ਪਰਿਯੋਸਾਪੇਹੀਤਿ ਆਹ ਅਨੁਮੋਦਨਾਵਸਾਨੇ ਦ੍ਵਤ੍ਤਿਂਸ ਧੁਰਭਤ੍ਤਾਨਿ ਲਭਿਤ੍ਵਾ ਪੁਨ ਦਿਵਸੇ ਦ੍ਵਤ੍ਤਿਂਸ ਭਿਕ੍ਖੁ ਗਹੇਤ੍ਵਾ ਰਾਜਨ੍ਤੇਪੁਰਂ ਪਵਿਸਿਤ੍ਵਾ ਭਤ੍ਤਕਿਚ੍ਚਮਕਾਸਿ ਰਾਜਾ ਅਞ੍ਞੇਪਿ ਦ੍ਵਤ੍ਤਿਂਸ ਭਿਕ੍ਖੁ ਤੁਮ੍ਹੇਹਿ ਸਦ੍ਧਿਂਯੇਵ ਭਿਕ੍ਖਂ ਗਣ੍ਹਨ੍ਤੂਤਿ ਏਤੇਨੇਵ ਉਪਾਯੇਨ ਦਿਵਸੇ ਦਿਵਸੇ ਵਡ੍ਢਾਪੇਨ੍ਤੇ ਸਟ੍ਠਿ ¶ ਸਹਸ੍ਸਾਨਂ ਬ੍ਰਾਹ੍ਮਣ ਪਰਿਬ੍ਬਾਜਕਾਨਂ ਭਤ੍ਤਂ ਉਪਚ੍ਛਿਣ੍ਦਿਤ੍ਵਾ ਅਨ੍ਤੋ ਨਿਵੇਸਨੇ ਸਟ੍ਠਿਸਹਸ੍ਸਾਨਂ ਭਿਕ੍ਖੁਨਂ ਨਿਚ੍ਚਭਤ੍ਤਂ ਪਟ੍ਠਪੇਸਿ, ਨਿਗ੍ਰੋਧਤ੍ਥੇਰ ਗਤੇਨੇਵ ਪਸਾਦੇਨ, ਨਿਗ੍ਰੋਧਤ੍ਥੇਰੋਪਿ ਰਾਜਾਨਂ ਸਪਰਿਸਂ ਤੀਸੁ ਸਰਣੇਸੁ ਪਞ੍ਚਸੁ ਚ ਸੀਲੇਸੁ ਪਤਿਟ੍ਠਾਪੇਤ੍ਵਾ ਬੁਦ੍ਧਸਾਸਨੇ ਪੋਥੁਜ੍ਜਨਿਕੇਨ ਪਸਾਦੇਨ ਅਚਲਪ੍ਪਸਾਦਂ ਕਤ੍ਵਾ ਪਤਿਟ੍ਠਾਪੇਸਿ.

ਪੁਨ ਰਾਜ ਅਸੋਕਾਰਾਮਂ ਨਾਮ ਮਹਾਵਿਹਾਰਂ ਕਾਰਪੇਤ੍ਵਾ ਸਟ੍ਠਿਸਹਸ੍ਸਾਨਂ ਭਿਕ੍ਖੂਨਂ ਭਤ੍ਤਂ ਪਟ੍ਠਪੇਸਿ. ਸਕਲਜਮ੍ਬੁਦੀਪੇ ਚਤੁਰਾਸੀਤਿਯਾ ਨਗਰਸਹਸ੍ਸੇਸੁ ਚਤੁਰਾਸੀਤਿ ਵਿਹਾਰਸਹਸ੍ਸਾਨਿ ਕਾਰਾਪੇਸਿ. ਚਤੁਰਾਸੀਤਿ ਚੇਤਿਯਸਹਸ੍ਸ ਪਤਿਮਣ੍ਡਿਤਾਨਿ ਧਮ੍ਮੇਨੇਵ ਨੋ ਅਧਮ੍ਮੇਨ, ਏਕਦਿਵਸਂ ਕਿਰ ਰਾਜਾ ਅਸੋਕਾਰਾਮੇ ਮਹਾਦਾਨਂ ਦਤ੍ਵਾ ਸਟ੍ਠਿਸਹਸ੍ਸ ਸਙ੍ਖਸ੍ਸ ਭਿਕ੍ਖੁਸਙ੍ਘਸ੍ਸ ਮਜ੍ਝੇ ਨਿਸਜ੍ਜ ਸਙ੍ਘਂ ਚਤੂਹਿ ਪਵ੍ਚਯੇਹਿ ਪਵਾਰੇਤ੍ਵਾ ਇਮਂ ਪਞ੍ਹਂ ਪੁਚ੍ਛਿ ਭਨ੍ਤੇ ਭਗਵਤੋ ਦੇਸਿਤ ਧਮ੍ਮੋ ਨਾਮ ਕਿਤ੍ਤਕੋ ਹੋਤੀਤਿ. ਮਹਾਰਾਜ ਨਵ ਅਙ੍ਗਾਨਿ, ਖਣ੍ਦਤੋ ਚਤੁਰਾਸੀਤਿ ਧਮ੍ਮਕ੍ਖਣ੍ਧ ਸਹਸ੍ਸਾਨੀਤਿ.

ਰਾਜਾ ਧਮ੍ਮੇ ਪਸੀਦਿਤ੍ਵਾ ਏਕੇਕਂ ਧਮ੍ਮਕ੍ਖਣ੍ਧਂ ਏਕੇਕੇਨ ਵਿਹਾਰੇਨ ਪੂਜੇਸ੍ਸਾਮੀਤਿ ਏਕਦਿਵਸਮੇਵ ਛਨ੍ਨਵੁਤਿ ਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਅਮਚ੍ਚੇ ਆਣਾਪੇਸਿ. ਏਥ ਭਣੇ ਏਕੇਕਸ੍ਮਿਂ ਨਗਰੇ ਏਕਮੇਕਂ ਵਿਹਾਰਂ ਕਾਰੇਨ੍ਤਾ ਚਤੁਰਾਸੀਤਿਯਾ ਨਗਰਸਹਸ੍ਸੇਸੁ ਚਤੁਰਾਸੀਤਿ ਵਿਹਾਰਸਹਸ੍ਸਾਨਿ ਕਾਰਾਪੇਥਾਤਿ ਸਯਞ੍ਚ ਅਸੋਕਾਰਾਮੇ ਅਸੋਕ ਮਹਾਵਿਹਾਰਤ੍ਥਾਯ ਕਮ੍ਮਂ ਪਟ੍ਠਪੇਸਿ.

ਸਙ੍ਘੋ ਇਣ੍ਦਗੁਤ੍ਤਤ੍ਥੇਰਂ ਨਾਮ ਮਹਿਦ੍ਧਿਯਂ ਮਹਾਨੁਭਾਵਂ ਖੀਣਾਸਵਂ ਨਵਕਮ੍ਮਾਧਿਟ੍ਠਾਯਕਂ ਅਦਾਸਿ. ਥੇਰੋ ਯਂ ਯਂ ਨ ਨਿਟ੍ਠਾਤਿ ਤਂ ਤਂ ਅਤ੍ਤਨੋ ਆਨੁਭਾਵੇਨ ਨਿਟ੍ਠਾਪੇਸਿ. ਏਵਂ ਤੀਹਿ ਸਂਵਚ੍ਛਰੇਹਿ ਵਿਹਾਰਕਮ੍ਮਂ ਨਿਟ੍ਠਾਪੇਸਿ. ਏਕਦਿਵਸਮੇਵ ਸਬ੍ਬਨਗਰੇਹਿ ਪਣ੍ਣਾਨਿ ਆਗਮਿਂਸੁ ਅਮਚ੍ਚਾ ਰਞ੍ਞੋ ਆਰੋਚੇਸੁਂ. ਨਿਟ੍ਠਿਤਾਨਿ ਦੇਵ ਚਤੁਰਾਸੀਤਿ ਵਿਹਾਰਸਹਸ੍ਸਾਨੀਤਿ ਅਥ ਰਾਜਾ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਭਨ੍ਤੇ ਮਯਾ ਚਤੁਰਾਸੀਤਿ ਵਿਹਾਰਸਹਸ੍ਸਾਨਿ ਕਾਰਿਤਾਨਿ ਧਾਤੁਯੋਕੁਤੋ ਲਭਿਸ੍ਸਾਮੀਤਿ ਪੁਚ ਪੁਚ੍ਛਿ.

ਮਹਾਰਾਜ ਧਾਤੁਨਿਧਾਨਂ ਨਾਮ ਅਤ੍ਥੀਤਿ ਸੁਣੋਮ. ਨ ਪਨ ਪਞ੍ਞਾਯਤਿ ਅਸੁਕਾਟ੍ਠਾਨੇਤਿ ਰਾਜਾ ਰਾਜਗਹੇ ਚੇਤਿਯਂ ਭਿਣ੍ਦਾਪੇਤ੍ਵਾ ਧਾਤੁਂ ਅਪਸ੍ਸਨ੍ਤੋ ਪਟਿਪਾਕਤਿਯਂ ਕਾਰੇਤ੍ਵਾ ਭਿਕ੍ਖੁ-ਭਿਕ੍ਖੁਨਿਯੋ-ਉਪਾਸਕ-ਉਪਾਸਿਕਾਯੋਤਿ ਚਤਸ੍ਸੋ ਪਰਿਸਾ ਗਹੇਤ੍ਵਾ ਵੇਸਾਲਿਂ ਗਤੋ. ਤਤ੍ਰਾਪਿ ਅਲਭਿਤ੍ਵਾ ਕਪਿਲ਼ਵਤ੍ਥੁਂ, ਤਤ੍ਰਾਪਿ ਅਲਭਿਤ੍ਵਾ ਰਾਮਗਾਮਂ ਗਤੋ, ਰਾਮਗਾਮੇ ਨਾਗਾ ਚੇਤਿਯਂ ਭਿਣ੍ਦਿਤੁਂ ਨ ਅਦਂਸੁ. ਚੇਤਿਯੇ ਨਿਪਤਿਤ ਕੁਦ੍ਦਾਲੋ ਖਣ੍ਡਾਖਣ੍ਡਂ ਹੋਤਿ ਏਵਂ ਤਤ੍ਰਾਪਿ ਅਲਭਿਤ੍ਵਾ ਅਲ੍ਲਕਪ੍ਪਂ-ਪਾਵਂ-ਕੁਸਿਨਾਰਨ੍ਤਿ ਸਬ੍ਬਤ੍ਥ ਚੇਤਿਯਾਤਿ ਭਿਣ੍ਦਿਤ੍ਵਾ ਧਾਤੁਂ ਅਲਭਿਤ੍ਵਾ ਪਟਿਪਾਕਤਿਕਾਨਿ ¶ ਕਤ੍ਵਾ ਰਾਜਗਹਂ ਗਨ੍ਤ੍ਵਾ ਚਤਸ੍ਸੋ ਪਰਿਸਾ ਸਨ੍ਨਿਪਾਤੇਤ੍ਵਾ ਅਤ੍ਥਿ ਕੇਨਚਿ ਸੁਤਪੁਬ੍ਬਂ ਅਸੁਕਟ੍ਠਾਨੇ ਨਾਮ ਧਾਤੁ ਨਿਧਾਨਨ੍ਤਿ ਪੁਚ੍ਛਿ.

ਤਤ੍ਥੇਕੋ ਵਿਸਂਵਸ੍ਸ ਸਤਿਕੋ ਥੇਰੋ ਅਸੁਕਟ੍ਠਾਨੇ ਧਾਤੁਨਿਧਾਨਨ੍ਤਿ ਨ ਜਾਨਾਮਿ. ਮਯ੍ਹਂ ਪਨ ਪਿਤਾਮਹਤ੍ਥੇਰੋ ਮਯਿ ਸਤ੍ਤਵਸ੍ਸਿਕਕਾਲੇ ਮਾਲਾਚਙ੍ਗੋਟਕਂ ਗਾਹਾਪੇਤ੍ਵਾ ਏਹਿ ਸਾਮਣੇਰ, ਅਸੁਕ ਗਚ੍ਛਨ੍ਤਰੇ ਪਾਸਾਨਥੂਪੋ ਅਤ੍ਥਿ, ਤਤ੍ਥ ਗਚ੍ਛਾਮਾਤਿ ਗਨ੍ਤ੍ਵਾ ਪੂਜੇਤ੍ਵਾ ਇਮਂ ਠਾਨਂ ਉਪਧਾਰੇਤੁਂ ਵਟ੍ਟਤਿ ਸਾਮਣੇਰੋਤਿ ਆਹ. ਅਹਂ ਏਤ੍ਤਕਮੇਵ ਜਾਨਾਮਿ ਮਹਾਰਾਜਾਤਿ ਆਹ.

ਰਾਜਾ ਏਤਦੇਵ ਠਾਨਨ੍ਤਿ ਵਤ੍ਵਾ ਗਚ੍ਛੇ ਹਰਾਪੇਤ੍ਵਾ ਪਾਸਾਣਥੂਪਂ ਪਂਸੁਞ੍ਚ ਅਪਨੇਤ੍ਵਾ ਹੇਟ੍ਠਾ ਸੁਧਾਭੂਮਿਂ ਅਦ੍ਦਸ. ਤਤੋ ਸੁਧਞ੍ਚ ਇਟ੍ਠਕਾਯੋ ਚ ਹਰਾਪੇਤ੍ਵਾ ਅਨੁਪੁਬ੍ਬੇਨ ਪਰਿਵੇਣਾ ਓਰੁਯ੍ਹ ਸਤ੍ਤ ਰਤਨਵਾਲਿਕਂ ਅਸੀਤਿ ਹਤ੍ਥਾਨਿ ਚ ਕਟ੍ਠਰੂਪਾਨਿ ਸਮ੍ਪਰਿਵਤ੍ਤਨ੍ਤਾਨਿ ਅਦ੍ਦਸ. ਸੋ ਯਕ੍ਖ ਦਾਸਕੇ ਪਕ੍ਕੋਸਾਪੇਤ੍ਵਾ ਬਲਿਕਮ੍ਮਂ ਕਾਰੇਤ੍ਵਾਪਿ ਨੇਵ ਅਨ੍ਤਂ ਨ ਕੋਟਿਂ ਪਨ੍ਨਨ੍ਤੋ ਦੇਵਤਾ ਨਮਸ੍ਸਮਾਨੋ ਅਹਂ ਇਮਾ ਧਾਤੁਯੋ ਗਹੇਤ੍ਵਾ ਚਤੁਰਾਸੀਤਿਯਾ ਵਿਹਾਰਸਹਸ੍ਸੇਸੁ ਨਿਦਹਿਤ੍ਵਾ ਸਕ੍ਕਾਰਂ ਕਰੋਮਿ ਮਾ ਦੇਵਤਾ ਅਨ੍ਤਰਾਯਂ ਕਰੇਨ੍ਤੂਤਿ ਆਹ.

ਸਕ੍ਕੋ ਦੇਵਰਾਜਾ ਚਾਰਿਕਂ ਚਰਨ੍ਤੋ ਤਂ ਦਿਸ੍ਵਾ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ ਆਹ. ਤਾਤ, ਅਸੋਕੋ ਧਮ੍ਮਰਾਜਾ ਧਾਤੁਯੋ ਨੀਹਰਿਸ੍ਸਾਮੀਤਿ ਪਰਿਵੇਣਂ ਓਤਿਣ੍ਣੋ, ਗਨ੍ਤ੍ਵਾ ਕਟ੍ਠਰੂਪਾਨਿ ਹਾਰੇਹੀਤਿ ਸੋ ਪਞ੍ਚਚੂਲ਼ਗਾਮ ਦਾਰਕਵੇਸੇਨਾਗਨ੍ਤ੍ਵਾ ਰਞ੍ਞੋ ਪੁਰਤੋ ਧਨੁਕਹਤ੍ਥੋ ਠਤ੍ਵਾ ਹਾਰੇਮਿ ਮਹਾਰਾਜਾਤਿ ਆਹ. ਹਰ ਤਾਤਾਤਿ. ਸਰਂ ਗਹੇਤ੍ਵਾ ਸਨ੍ਧਿਮ੍ਹਿਯੇਵ ਵਿਜ੍ਝਿ, ਸਬ੍ਬਂ ਵਿਪ੍ਪਕਿਰੀਯਿਤ੍ਥ.

ਅਥ ਰਾਜਾ ਆਚਿਞ੍ਜਨੇ ਬਦ੍ਧ ਕੁਞ੍ਚਿਕ ਮੁਦ੍ਦਿਕਂ ਗਣ੍ਹਿ, ਮਣਿਕ੍ਖਣ੍ਧਂ ਪਸ੍ਸਿ, ਅਨਾਗਤੇ ਦਲ਼ਿਦ੍ਦਰਾਜਾਨੋ ਇਮਂ ਮਣਿਂ ਗਹੇਤ੍ਵਾ ਧਾਤੂਨਂ ਸਕ੍ਕਾਰਂ ਕਰੋਨ੍ਤੂਤਿ ਪਨ ਅਕ੍ਖਰਾਨਿ ਦਿਸ੍ਵਾ ਕੁਜ੍ਝਿਤ੍ਵਾ ਮਾਦਿਸਂ ਨਾਮ ਰਾਜਾਨਂ ਦਲ਼ਿਦ੍ਦਰਾਜਾਤਿ ਚਤ੍ਤੁ ਯੁਤ੍ਤਨ੍ਤਿ ਪੁਨਪ੍ਪੁਨ ਘਟੇਤ੍ਵਾ ਦ੍ਵਾਰਂ ਵਿਚਰਿਤ੍ਵਾ ਅਨ੍ਤੋਗੇਹਂ ਪਵਿਟ੍ਠੋ. ਅਟ੍ਠਾਰਸ ਵਸ੍ਸਾਧਿਕਾਨਂ ਦ੍ਵਿਨ੍ਨਂ ਵਸ੍ਸਸਤਾਨਂ ਉਪਰਿ ਆਰੋਪਿਤਦੀਪਾ ਤਥੇਵ ਪਜ੍ਜਲਨ੍ਤਿ ਨਿਲੁਪ੍ਪਲ ਪੁਪ੍ਫਾਨਿ ਤਂ ਖਣਂ ਆਹਰਿਤ੍ਵਾ ਆਰੋਪਿਤਾਨਿ ਵਿਯ, ਪੁਪ੍ਫਸਣ੍ਥਰੋ ਤਂ ਖਣਂ ਸਨ੍ਥਤੋ ਵਿਯ, ਗਣ੍ਧਾ ਤਂ ਮੁਹੁਤ੍ਤਂ ਪਿਂਸਿਤ੍ਵਾ ਠਪਿਤਾ ਵਿਯ.

ਰਾਜਾ ਸੁਵਣ੍ਣਪਟ੍ਟਂ ਗਹੇਤ੍ਵਾ ਅਨਾਗਤੇ ਪਿਯਦਾਸੋਨਾਮ ਕੁਮਾਰੋ ਛਤ੍ਤਂ ਉਸ੍ਸਾਪੇਤ੍ਵਾ ਅਸੋਕੋ ਨਾਮ ਧਮ੍ਮਰਾਜਾ ਭਵਿਸ੍ਸਤਿ ਸੋ ਇਮਾ ਧਾਤੁਯੋ ਗਹੇਤ੍ਵਾ ਵਿਤ੍ਥਾਰਿਕਾ ਕਰਿਸ੍ਸਤੀਤਿ ਵਾਚੇਤ੍ਵਾ ਦਿਟ੍ਠੋ’ਹਂ ਅਯ੍ਯੋਨ ਮਹਾਕਸ੍ਸਪਤ੍ਥੇਰੇਨਾਤਿ ਵਤ੍ਵਾ ਵਾਮਹਤ੍ਥਂ ਆਭੁਜਿਤ੍ਵਾ ਦਕ੍ਖਿਣਹਤ੍ਥੇਨ ਅਪ੍ਪੋਠੇਸਿ.

ਸੋ ਤਸ੍ਮਿਂ ਠਾਨੇ ਪਰਿਚਰਣਕ ਧਾਤੁਮਤ੍ਤਕਮੇਵ ਠਪੇਤ੍ਵਾ ਸੇਸਧਾਤੁਯੋ ਸਬ੍ਬਾ ਗਹੇਤ੍ਵਾ ਧਾਤੁਘਰਂ ਪੁਬ੍ਬੇ ਪਿਹਿਤਨਯੇਨੇਵ ਪਿਦਹਿਤ੍ਵਾ ¶ ਸਬ੍ਬਂ ਯਥਾ ਪਕਤਿਯਾਵ ਕਾਰੇਤ੍ਵਾ ਉਪਰਿ ਪਾਸਾਣਚੇਤਿਯਂ ਪਤਿਟ੍ਠਾਪੇਤ੍ਵਾ ਚਤੁਰਾਸੀਤਿਯਾ ਵਿਹਾਰਸਹਸ੍ਸੇਸੁਧਾਤੁਯੋ ਪਤਿਟ੍ਠਾਪੇਸਿ ਏਵਂ ਜਮ੍ਬੁਦੀਪਤਲੇ ਅਸੋਕੋ ਧਮ੍ਮਰਾਜਾ ਚਤੁਰਾਸਿਤਿ ਚੇਤਿਯ ਸਹਸ੍ਸਾਨਿ ਕਾਰਾਪੇਸਿ.

ਸਬ੍ਬੇ ਥੂਪਾ ਸਬ੍ਬਲੋਕੇਕਦੀਪਾ ਸਬ੍ਬੇਸਂ ਯੇ ਸਗ੍ਗਮੋਕ੍ਖਾਵਹਾ ਚ, ਹਿਤ੍ਵਾ ਸਬ੍ਬਂ ਕਿਚ੍ਚਮਞ੍ਞਂ ਜਨੇਨ ਵਣ੍ਦਯ੍ਯਾ ਤੇ ਸਬ੍ਬਥਾ ਸਬ੍ਬਕਾਲਨ੍ਤਿ.

ਚਤੁਰਾਸੀਤਿ ਸਹਸ੍ਸ ਥੂਪਕਥਾ

੧੨. ਏਵਂ ਅਸੋਕੋ ਧਮ੍ਮਰਾਜਾ ਚਤੁਰਾਸੀਤਿ ਵਿਹਾਰਸਹਸ੍ਸਮਹਂ ਕਤ੍ਵਾ ਮਹਾਥੇਰੋ ਵਨ੍ਦਿਤ੍ਵਾ ਪੁਚ੍ਛਿ ਦਾਯਾਦੋਮ੍ਹਿ ਭਨ੍ਤੇ ਬੁਦ੍ਧਸਾਸਨੇ’ਤਿ. ਕਿਸ੍ਸ ਦਾਯਾਦੋ ਤ੍ਵਂ ਮਹਾਰਾਜ, ਬਾਹਿਰਕੋ ਤ੍ਵਂ ਸਾਸਨਸ੍ਸਾਤਿ. ਭਨ੍ਤੇ ਛਨ੍ਨਵੁਤਿਕੋਟਿਧਨਂ ਵਿਸ੍ਸਜ੍ਜੇਤ੍ਵਾ ਚਤੁਰਾਸੀਤਿ ਵਿਹਾਰਸਹਸ੍ਸਾਨਿ ਸਚੇਤਿਯਾਨਿ ਕਾਰਾਪੇਤ੍ਵਾ ਅਹਂ ਨ ਦਾਯਾਦੋ, ਅਞ੍ਞੇ ਕੋ ਦਾਯਾਦੋਤਿ, ਪਚ੍ਚਯ ਦਾਯਕੋ ਨਾਮ ਤ੍ਵਂ ਮਹਾਰਾਜ, ਯੋ ਪਨ ਅਤ੍ਤਨੋ ਪੁਤ੍ਤਞ੍ਚ ਧੀਤਰਞ੍ਚ ਪਬ੍ਬਾਜੇਤਿ, ਅਯਂ ਸਾਸਨੇ ਦਾਯਾਦੋ ਨਾਮਾਤਿ.

ਏਵਂ ਵੁਤ੍ਤੇ ਅਸੋਕੋ ਰਾਜਾ ਸਾਸਨੇ ਦਾਯਾਦਭਾਵਂ ਪਤ੍ਥਯਮਾਨੋ ਅਵਿਦੂਰੇ ਠਿਤਂ ਮਹਿਣ੍ਦਕੁਮਾਰਂ ਦਿਸ੍ਵਾ ਸਕ੍ਖਿਸ੍ਸਸਿਤ੍ਵਂ ਤਾਤ ਪਬ੍ਬਜਿਤੁਨ੍ਤਿ ਆਹ. ਕੁਮਾਰੋ ਪਕਤਿਯਾ ਪਬ੍ਬਜਿਤੁਕਾਮੋ ਰਞ੍ਞੋ ਵਚਨਂ ਸੁਤ੍ਵਾ ਅਤਿਵਿਯ ਪਾਮੋਜ੍ਜਜਾਤੋ ਪਬ੍ਬ੍ਜਾਮਿ ਦੇਵ, ਮਂ ਪਬ੍ਬਾਜੇਤ੍ਵਾ ਸਾਸਨੇ ਦਾਯਾਦੋ ਹੋਥਾਤਿ ਆਹ ਤੇਨ ਚ ਸਮਯੇਨ ਰਾਜਧੀਤਾ ਸਙ੍ਘਮਿਤ੍ਤਾਪਿ ਤਸ੍ਮਿਂ ਠਾਨੇ ਠਿਤਾ ਹੋਤਿ ਤਂ ਦਿਸ੍ਵਾ ਆਹ-’ਤ੍ਵਮ੍ਪਿ ਅਮ੍ਮ ਪਬ੍ਬਜਿਤੁਂ ਸਕ੍ਖਿਸ੍ਸਸੀ’ਤਿ, ਸਾਧੁ ਤਾਤਾਤਿ ਸਮ੍ਪਟਿਚ੍ਛਿ. ਰਾਜਾ ਪੁਤ੍ਤ ਨ ਮਨਂ ਲਭਿਤ੍ਵਾ ਪਹਟ੍ਠਚਿਤ੍ਤੋ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਭਨ੍ਤੇ ਇਮੇ ਦਾਰਕੇ ਪਬ੍ਬਾਜੇਤ੍ਵਾ ਮਂ ਸਾਸਨੇ ਦਾਯਾਦਂ ਕਰੋਥਾਤਿ ਸਙ੍ਘੋ ਰਞ੍ਞੋ ਵਚਨਂ ਸਮ੍ਪਟਿਚ੍ਛਿਤ੍ਵਾ ਕੁਮਾਰਂ ਮੋਗ੍ਗਲਿਪੁਤ੍ਤ ਤਿਸ੍ਸਤ੍ਥੇਰੇਨ ਉਪਜ੍ਝਾਯੇਨ ਮਹਾਦੇਵਤ੍ਥੇਰੇਨ ਚ ਆਚਰਿਯੇਨ ਪਬ੍ਬਜ੍ਜਾਪੇਸਿ. ਮਜ੍ਝਨ੍ਤਿਕਤ੍ਥੇਰੇਨ ਆਚਰਿਯੇਨ ਉਪਸਮ੍ਪਾਦੇਸਿ ਉਪਸਮ੍ਪਦਾਮਾਲਕੇਯੇਵ ਸਹਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

ਸਙ੍ਘਮਿਤ੍ਤਾਯਪਿ ਰਾਜਧੀਤਾਯ ਆਚਰਿਯਾ ਆਯੁਪਾਲਤ੍ਥੇਰਿ ਨਾਮ, ਉਪਜ੍ਝਾਯਾ ਪਨ ਧਮ੍ਮਪਾਲਤ੍ਥੇਰੀ ਨਾਮ ਅਹੋਸਿ. ਅਥ ਮਹਿਣ੍ਦਤ੍ਥੇਰੋ ਉਪਸਮ੍ਪਨ੍ਨ ਕਾਲਤੋਪ੍ਪਭੂਤਿ ਅਤ੍ਤਨੋ ਉਪਜ੍ਝਾਯਸ੍ਸੇਵ ਸਨ੍ਤਿਕੇ ਧਮ੍ਮਞ੍ਚ ਵਿਨਯਞ੍ਚ ਪਰਿਯਾਪੁਣਨ੍ਤੋ ਦ੍ਵੇਪਿ ਸਙ੍ਗਿਤਿਯੋ ਆਰੁਲ਼੍ਹਂ ਤਿਪਿਟਕ ਸਙ੍ਗਹੀਤਂ ਸਾਟ੍ਠਕਥਂ ਥੇਰਵਾਦਂ ਤਿਣ੍ਣਂ ਵਸ੍ਸਾਨਂ ਅਬ੍ਭਨ੍ਤਰੇ ਉਗ੍ਗਹੇਤ੍ਵਾ ਅਤ੍ਤਨੋ ਉਪਜ੍ਝਾਯਸ੍ਸ ਅਨ੍ਤੇਵਾਸਿਕਾਨਂ ਸਹਸ੍ਸਮਤ੍ਤਾਨਂ ਭਿਕ੍ਖੂਨਂ ਪਾਮੋਕ੍ਖਂ ਅਹੋਸਿ.

ਤੇਨ ¶ ਖੋ ਪਨ ਸਮਯੇਨ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਕਤ੍ਥ ਨੁ ਖੋ ਅਨਾਗਤੇ ਸਾਸਨਂ ਸੁਪ੍ਪਤਿਟ੍ਠਿਤਂ ਗਵੇਯ੍ਯਾਤਿ ਉਪਪਰਿਕ੍ਖਨ੍ਤੋ ਪਚ੍ਚਨ੍ਤਿਮੇਸੁ ਜਨਪਦੇਸੁ ਸੁਪ੍ਪਤਿਟ੍ਠਿਤਂ ਭਵਿਸ੍ਸਤੀਤਿ ਞਤ੍ਵਾ ਤੇਸਂ ਤੇਸਂ ਭਿਕ੍ਖੂਨਂ ਭਾਰਂ ਕਤ੍ਵਾ ਤੇ ਤੇ ਭਿਕ੍ਖੁ ਤਤ੍ਥ ਤਤ੍ਥ ਪੇਸੇਸਿ.

ਮਜ੍ਝਨ੍ਤਿਕਤ੍ਥੇਰਂ ਕਸ੍ਮੀਰ ਗਣ੍ਧਾਰ ਰਟ੍ਠਂਪੇਸੇਸਿ ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਤਤ੍ਥ ਸਾਸਨਂ ਪਤਿਟ੍ਠਾਪੇਹੀਤਿ ਮਹਾਦੇਵਤ੍ਥੇਰਂ ਤਥੇਵ ਵਤ੍ਵਾ ਮਹਿਂਸਕਮਣ੍ਡਲਂ ਪੇਸੇਸਿ. ਰਕ੍ਖਿਤਤ੍ਥੇਰਂਵਨਵਾਸੀਂ, ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਅਪਰਨ੍ਤਕਂ, ਮਹਾਧਮ੍ਮਰਕ੍ਖਿਤਤ੍ਥੇਰਂ ਮਹਾਰਟ੍ਠਂ ਮਹਾਰਕ੍ਖਿਤਤ੍ਥੇਰਂ ਯੋਨਕ ਲੋਕਂ. ਮਜ੍ਝਿਮਤ੍ਥੇਰਂ ਹਿਮਵਨ੍ਤਦੇਸ ਭਾਗਂ, ਸੋਣਤ੍ਥੇਰਂ-ਉਤ੍ਤਰਤ੍ਥੇਰਞ੍ਚ ਸੁਵਣ੍ਣਭੂਮਿਂ. ਅਤ੍ਤਨੋ ਸਦ੍ਧਿਵਿਹਾਰਿਕਂ ਮਹਿਣ੍ਦਤ੍ਥੇਰਂ ਇਟ੍ਟਿਯਤ੍ਥੇਰੇਨ ਉਤ੍ਤਿਯਤ੍ਥੇਰੇਨ ਭਦ੍ਦਸਾਲਤ੍ਥੇਰੇਨ ਸਮ੍ਬਲਤ੍ਥੇਰੇਨ ਚ ਸਦ੍ਧਿਂ ਤਮ੍ਬਪਣ੍ਣਿਦੀਪਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਥਾਤਿ. ਸਬ੍ਬੇਪਿ ਤਂ ਤਂ ਦਿਸਾਭਾਗਂ ਗਚ੍ਛਨ੍ਤਾ ਅਤ੍ਤਪਞ੍ਚਮਾ ਅਗਮਿਂਸੁ ਸਬ੍ਬੇਪਿ ਥੇਰਾ ਗਤਗਤਟ੍ਠਾਨੇ ਮਨੁਸ੍ਸੇ ਪਸਾਦੇਤ੍ਵਾ ਸਾਸਨਂ ਪਤਿਟ੍ਠਾਪੇਸੁਂ.

ਮਹਿਣ੍ਦਤ੍ਥੇਰੋ ਪਨ ਤਮ੍ਬਪਣ੍ਣਿਦੀਪਂ ਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਹੀਤਿ ਉਪਜ੍ਝਾਯੇਨ ਭਿਕ੍ਖੁਸਙ੍ਘੇਨ ਚ ਅਜ੍ਝਿਟ੍ਠੋ ਕਾਲੋ ਨੁ ਖੋ ਮੇ ਤਮ੍ਬਪਣ੍ਣਿਦੀਪਂ ਗਨ੍ਤੁਂ ਨੋਤਿ ਉਪਧਾਰੇਨ੍ਤੋ ਮੁਟਸੀਵਰਞ੍ਞੋ ਮਹਲ੍ਲਕਭਾਵਂ ਚਿਨ੍ਤੇਸਿ. ਅਯਂ ਮਹਾਰਾਜਾ ਮਹਲ੍ਲਕੋ, ਨ ਸਕ੍ਕਾ ਇਮਂ ਗਣ੍ਹਿਤ੍ਵਾ ਸਾਸਨਂ ਪਗ੍ਗਹੇਤੁਂ, ਇਦਾਨਿ ਪਨਸ੍ਸ ਪੁਤ੍ਤੋ ਦੇਵਾਨਮ੍ਪਿਯਤਿਸ੍ਸੋ ਰਜ੍ਜਂ ਕਾਰੇਸ੍ਸਤਿ. ਤਂ ਗਣ੍ਹਿਤ੍ਵਾ ਸਕ੍ਕਾ ਭਵਿਸ੍ਸਤਿ ਸਾਸਨਂ ਪਗ੍ਗਹੇਤੁਂ, ਹਣ੍ਦ ਯਾਵ ਸੋ ਸਮਯੋ ਆਗਚ੍ਛਤਿ ਤਾਵ ਞਾਤਕੇ ਓਲੋਕੇਮ, ਪੁਨ’ਦਾਨਿ ਇਮਂ ਜਨਪਦਂ ਆਗਚ੍ਛੇਯ੍ਯਾਮ ਵਾ ਨ ਵਾਤਿ.

ਸੋ ਏਵਂ ਚਿਨ੍ਤੇਤ੍ਵਾ ਉਪਜ੍ਝਾਯਞ੍ਚ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਅਸੋਕਾਰਾਮਤੋ ਨਿਕ੍ਖਮ੍ਮ ਤੇਹਿ ਇਟ੍ਟਿਯਾਦੀਹਿ ਚਤੂਹਿ ਥੇਰੇਹਿ ਸਙ੍ਘਮਿਤ੍ਤਾਯ ਪੁਤ੍ਤੇਨ ਸੁਮਨਸਾਮਣੇਰੇਨ ਭਣ੍ਡੁਕੇਨਕ ਚ ਉਪਾਸਕੇਨ ਸਦ੍ਧਿਂ ਰਾਜਗਹਨਗਰ ਉਪਵਤ੍ਤਕੇ ਦਕ੍ਖਿਣ ਗਿਰਿਜਨਪਦੇ ਚਾਰਿਕਂ ਚਰਮਾਨੋ ਞਾਤਕੇ ਓਲੋਕੇਨ੍ਤੋ ਛ ਮਾਸੇ ਅਤਿਕ੍ਕਾਮੇਸਿ ਅਥਾਨੁਪੁਬ੍ਬੇਨ ਮਾਤੁਨਿਵੇਸਨਟ੍ਠਾਨਂ ਵੇਟਿਸ ਨਗਰਂ ਨਾਮ ਸਮ੍ਪਤ੍ਤੋ ਸਮ੍ਪਤ੍ਤਞ੍ਚ ਪਨ ਥੇਰਂ ਦਿਸ੍ਵਾ ਥੇਰਮਾਤਾ ਦੇਵੀ ਪਾਦੇ ਸਿਰਸਾ ਵਨ੍ਦਿਤ੍ਵਾ ਭਿਕ੍ਖਂ ਦਤ੍ਵਾ ਥੇਰਂ ਅਤ੍ਤਨਾ ਕਤਂ ਵੇਟਿਸਗਿਰਿ ਵਿਹਾਰਂ ਨਾਮ ਆਰੋਪੇਸਿ.

ਥੇਰੋ ਤਸ੍ਮਿਂ ਵਿਹਾਰੇ ਨਿਸਨ੍ਨੋ ਚਿਨ੍ਤੇਸਿ ਅਮ੍ਹਾਕਂ ਇਧ ਕਤ੍ਤਬ੍ਬ ਕਿਚ੍ਚਂ ਨਿਟ੍ਠਿਤਂ. ਸਮਯੋ ਨੁ ਖੋ ਇਦਾਨਿ ਲਙ੍ਕਾਦਿਪਂ ਗਨ੍ਤੁਨ੍ਤਿ. ਤਤੋ ਚਿਨ੍ਤੇਸਿ-ਅਨੁਭਵਤੁ ਤਾਵ ਮੇ ਪਿਤਰਾ ਪੇਸਿਤਂ ਅਭਿਸੇਕਂ ¶ ਦੇਵਾਨਮ੍ਪਿਯਤਿਸ੍ਸੋ ਰਤਨਤ੍ਤਯਗੁਣਞ੍ਚ ਸੁਣਾਤੁ, ਛਣਤ੍ਥਞ੍ਚ ਨਗਰਤੋ ਨਿਕ੍ਖਮਿਤ੍ਵਾ ਮਿਸ੍ਸਕਪਬ੍ਬਤਂ ਅਭਿਰੂਹਤੁ ਤਦਾ ਤਂ ਤਤ੍ਥ ਦਕ੍ਖਿਸ੍ਸਾਮਾਤਿ. ਅਥਾਪਰਂ ਏਕਮਾਸਂ ਤਤ੍ਥੇਵ ਵਾਸਂ ਕਪ੍ਪੇਸਿ.

ਮਾਸਾਤਿਕ੍ਕਮੇ ਸਕ੍ਕੋ ਦੇਵਾਨਮਿਨ੍ਦੋ ਮਹਿਣ੍ਦਤ੍ਥੇਰਂ ਉਪਸਙ੍ਕਮਿਤ੍ਵਾ ਏਤਦਵੋਚ.’ ਕਾਲਕਤੋ ਭਨ੍ਤੇ ਮੁਟਸੀਵਰਾਜਾ, ਇਦਾਨਿ ਦੇਵਾਨਮ੍ਪਿਯਤਿਸ੍ਸ ਰਾਜਾ ਰਜ੍ਜਂ ਕਾਰੇਤਿ. ਸਮ੍ਮਾਸਮ੍ਬੁਦ੍ਧੇਨ ਚ ਤੁਮ੍ਹੇ ਵ੍ਯਾਕਤਾ ਅਨਾਗਤੇ ਮਹਿਣ੍ਦੋ ਨਾਮ ਭਿਕ੍ਖੁ ਤਮ੍ਬਪਣ੍ਣਿਦੀਪਂ ਪਸਾਦੇਸ੍ਸਤੀ’ਤਿ. ਤਸ੍ਮਾ ਤਿਹ ਵੋ ਭਨ੍ਤੇ ਕਾਲੋ ਦੀਪਵਰਂ ਗਮਨਾਯ, ਅਹਮ੍ਪਿ ਵੋ ਸਹਾਯੋ ਭਵਿਸ੍ਸਾਮੀ.

ਥੇਰੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾਅਤ੍ਤਸਤ੍ਤਮੋ ਵੇਟਿਸ ਪਬ੍ਬਤਵਿਹਾਰਾ ਵੇਹਾਸਂ ਉਪ੍ਪਤਿਤ੍ਵ ਅਨੁਰਾਧਪੁਰਸ੍ਸ ਪੁਰਤ੍ਥਿਮਾਯ ਦਿਸਾਯ ਮਿਸ੍ਸਕਪਬ੍ਬਤੇ ਪਤਿਟ੍ਠਹਿ ਯਂ ਏਤਰਹਿ ਚੇਤਿਯਪਬ੍ਬਤੋਤਿਪਿ ਸਞ੍ਜਾਨਨ੍ਤਿ ਤਸ੍ਸਮਿਂ ਦਿਵਸੇ ਤਮ੍ਬਪਣ੍ਣਿਦਿਪੇ ਜੇਟ੍ਠਮੂਲ ਨਕ੍ਖਤ੍ਤਂ ਨਾਮ ਹੋਤਿ ਰਾਜਾ ਨਕ੍ਖਤ੍ਤਂ ਘੋਸਾਪੇਤ੍ਵਾ ਛਣਂ ਕਰੋਥਾਤਿ ਅਮਚ੍ਚੇ ਆਣਾਪੇਤ੍ਵਾ ਚਤ੍ਤਾਲੀਸ ਪੁਰਿਸ ਸਹਸ੍ਸਪਰਿਵਾਰੋ ਨਗਰਮ੍ਭਾ ਨਿਕ੍ਖਮਿਤ੍ਵਾ ਯੇਨ ਮਿਸ੍ਸਕਪਬ੍ਬਤੋ ਤੇਨ ਪਾਯਾਸਿ ਮਿਗਵਂ ਕੀਲ਼ਿਤੁਕਾਮੋ ਅਥ ਤਸ੍ਮਿਂ ਪਬ੍ਬਤੇ ਅਧਿਵਤ੍ਥਾ ਦੇਵਤਾ ਰਞ੍ਞੋ ਥੇਰੇ ਦਸ੍ਸੇਸ੍ਸਾਮੀਤਿ ਰੋਹਿਤ ਮਿਗਰੂਪਂ ਗਹੇਤ੍ਵਾ ਅਵਿਦੂਰੇ ਤਿਣਪਣ੍ਣਾਨਿ ਖਾਦਮਾਨਾ ਵਿਯ ਚਰਤਿ.

ਰਾਜਾ ਦਿਸ੍ਵਾ ਅਯੁਤ੍ਤਂ ਦਾਨਿ ਪਮਤ੍ਤਂ ਵਿਜ੍ਝਿਤੁਨ੍ਤਿ ਜੀਯਂ ਪੋਠੇਸਿ. ਮਗੋ ਅਮ੍ਬਤ੍ਥਲਮਗ੍ਗਂ ਗਹੇਤ੍ਵਾ ਪਲਾਯਿਤੁਂ ਆਰਭਿ ਰਾਜਾਪਿ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਣ੍ਧਨ੍ਤੋ ਅਮ੍ਬਤ੍ਥਲਮੇਵ ਆਰੁਹਿ. ਮਿਗੋ ਥੇਰਾਨਂ ਅਵਿਦੂਰੇ ਅਨ੍ਤਰਧਾਯਿ.

ਮਹਿਣ੍ਦਤ੍ਥੇਰੋ ਰਾਜਾਨਂ ਅਵਿਦੂਰੇ ਆਗਚ੍ਛਨ੍ਤਂ’ਮਮਂਯੇਵ ਰਾਜਾ ਪਸ੍ਸਤੁ, ਮਾ ਇਤਰੇ’ਤਿ ਅਧਿਟ੍ਠਹਿਤ੍ਵਾ’ਤਿਸ੍ਸ! ਤਿਸ੍ਸ! ਇਤੋ ਏਹੀ’ਤਿ ਆਹ. ਰਾਜਾ ਸੁਤ੍ਵਾ ਚਿਨ੍ਤੇਸਿ-ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਜਾਤੋ ਮਂ ਤਿਸ੍ਸੋਤਿ ਨਾਮਂ ਗਹੇਤ੍ਵਾ ਆਲਪਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਅਯਮ੍ਪਨ ਛਿਨ੍ਨਭਿਨ੍ਨਪਟਧਰੋ ਭਣ੍ਡੁਕਾਸਾਵ ਵਸਨੋ ਮਂ ਨਾਮੇਨ ਆਲਪਤਿ, ਕੋ ਨੁ ਖੋ ਅਯਂ ਭਵਿਸ੍ਸਤਿ ਮਨੁਸ੍ਸੋ ਵਾ ਅਮਨੁਸ੍ਸੋ ਵਾਤਿ. ਥੇਰੋ ਆਹ.

ਸਮਣਾ ਮਯਂ ਮਹਾਰਾਜ - ਧਮ੍ਮਰਾਜਸ੍ਸ ਸਾਵਕਾ,

ਤਵੇਵ ਅਨੁਕਮ੍ਪਾਯ - ਜਮ੍ਬੁਦੀਪਾ ਇਧਾਗਤਾਤਿ;

ਤੇਨ ਸਮਯੇਨ ਦੇਵਾਨਮ੍ਪਿਯਤਿਸ੍ਸ ਰਾਜਾ ਚ ਅਸੋਕਧਮ੍ਮਰਾਜਾ ਚ ਅਦਿਟ੍ਠ ਸਹਾਯਕਾ ਹੋਨ੍ਤਿ. ਦੇਵਾਨਮ੍ਪਿਯਤਿਸ੍ਸ ਰਞ੍ਞੇ ਚ ਪੁਞ੍ਞਾਨੁਭਾਵੇਨ ਛਾਤਪਬ੍ਬਤਪਾਦੇ ਏਕਸ੍ਮਿਂ ਵੇਲ਼ੁਗੁਮ੍ਬੇ ਤਿਸ੍ਸੋ ਵੇਲ਼ੁਯਟ੍ਠਿਯੋ ਨਿਬ੍ਬਤ੍ਤਿਂਸੁ ਏਕਾ ਲਤਾਯਟ੍ਠਿ ਨਾਮ, ਏਕਾ ਪੁਪ੍ਫਯਟ੍ਠਿ ਨਾਮ ਏਕਾ ਸਕੁਣਯਟ੍ਠਿ ਨਾਮ. ਤਾਸੁ ਲਤਾਯਟ੍ਠਿ ਸਯਂ ਰਜਤਵਣ੍ਣਾ ਹੋਤਿ ਤਂ ਅਲਙ੍ਕਰਿਤ੍ਵਾ ਉਪ੍ਪਨ੍ਨਲਤਾ ਕਞ੍ਚਨ ਵਣ੍ਣਾ ਖਾਯਤਿ ਪੁਪ੍ਫਯਟ੍ਠਿਯਂ ਪਨ ¶ ਨੀਲ-ਪੀਤ-ਲੋਹਿਤ-ਓਦਾਤ-ਕਾਲ਼ਵਣ੍ਣਾਨਿ ਪੁਪ੍ਫਾਨਿ ਸੁਚਿਭਤ੍ਤਵਣ੍ਟ ਪਤ੍ਤ ਕਿਞ੍ਜਕ੍ਖਾ ਹੁਤ੍ਵਾ ਖਾਯਨ੍ਤਿ ਸਕੁਣਯਟ੍ਠਿਯਂ ਹਂਸਕੁਕ੍ਕੁਟ-ਜੀਵਂਜੀਵਕਾਦਯੋ ਸਕੁਣਾ ਨਾਨਾਪ੍ਪਕਾਰਾਨਿ ਚ ਚਤੁਪ੍ਪਦਾਨਿ ਸਜੀਵਾਨਿ ਵਿਯ ਖਾਯਨ੍ਤਿ ਸਮੁਦ੍ਦਤੋਪਿਸ੍ਸ ਮੁਤ੍ਤਾ-ਮਣਿ-ਵੇਲ਼ੁਰਿਯਾਦਿ ਅਨੇਕਵਿਹਿਤਂ ਰਤਨਂ ਉਪ੍ਪਜ੍ਜਿ.

ਤਮ੍ਬਪਣ੍ਣਿਯਂ ਪਨ ਅਟ੍ਠਮੁਤ੍ਤਂ ਉਪ੍ਪਜ੍ਜਿਂਸੁ-ਭਯਮੁਤ੍ਤਾ ਗਜਮੁਤ੍ਤਾ ਰਥਮੁਤ੍ਤਾ ਆਮਲਕਮੁਤ੍ਤਾ ਚਲਯਮੁਤ੍ਤਾ ਅਙ੍ਗੁਲੀਵੇਠਕਮੁਤ੍ਤਾ ਕਕੁਧਫਲਮੁਤ੍ਤਾ ਪਾਕਤਿਕਮੁਤ੍ਤਾਤਿ ਸੋ ਤਾ ਚ ਯਟ੍ਠਿਯੋ ਤਾ ਚ ਮੁਤ੍ਤਾਯੋ ਅਞ੍ਞ੍ਚ ਬਹੁਂ ਰਤਨਂ ਅਸੋਕਸ੍ਸ ਧਮ੍ਮਰਞ੍ਞੋ ਪਣ੍ਣਾਕਾਰਤ੍ਥਾਯ ਪੇਸੇਸਿ. ਅਸੋਕੋਪਿ ਪਸੀਦਿਤ੍ਵਾ ਪਞ੍ਚ ਰਾਜਕਕੁਧਭਣ੍ਡਾਨਿਚੇਵ ਅਞ੍ਞੇ ਚ ਅਭਿਸੇਕਤ੍ਥਾਯ ਬਹੂਪਣ੍ਣਾਕਾਰੇ ਪਹਿਣਿ. ਨ ਕੇਵਲਞ੍ਚ ਏਤਂ ਆਮਿਸ ਪਣ੍ਣਾਕਾਰਂ, ਇਮਂ ਕਿਰ ਧਮ੍ਮ ਪਣ੍ਣਾਕਾਰਮ੍ਪਿ ਪੇਸੇਸਿ.

‘‘ਅਹਂ ਬੁਦ੍ਧਞ੍ਚ ਧਮ੍ਮਞ੍ਚ-ਸਙ੍ਘਞ੍ਚ ਸਰਣਂ ਗਤੋ,

ਉਪਾਸਕਤ੍ਤਂ ਵੇਦੇਸਿਂ-ਸਕ੍ਯਪੁਤ੍ਤਸ੍ਸ ਸਾਸਨੇ,

ਇਮੇਸੁ ਤੀਸੁ ਵਤ੍ਥੂਸੁ-ਉਨ੍ਨਮੇਸੁ ਨਰੁਤ੍ਤਮ,

ਚਿਤ੍ਤਂ ਪਸਾਦਯਿਤ੍ਵਾਨ-ਸਦ੍ਧਾਯ ਸਰਣਂ ਵਜਾ’ਤਿ;’’

ਰਾਜਾ ਅਵਿਰਸੁਤਂ ਸਾਸਨਪਵਤ੍ਤਿਂ ਅਨੁਸ੍ਸਰਮਾਨੋ ਥੇਰਸ੍ਸ ਤਂ ‘‘ਸਮਣਾਮਯਂ ਮਹਾਰਾਜ ਧਮ੍ਮਰਾਜਸ੍ਸ ਸਾਵਕਾ‘‘ਤਿ ਵਚਨਂ ਸੁਤ੍ਵਾ ਅਯ੍ਯਾ ਨੁ ਖੋ ਆਗਤਾਤਿ ਤਾਵਦੇਵ ਆਵੁਧਂ ਨਿਕ੍ਖਿਪਿਤ੍ਵਾ ਏਕਮਨ੍ਤਂ ਨਿਸੀਦਿ ਸਮ੍ਮੋਦਨੀਯਂ ਕਥਂ ਕਥਯਮਾਨੋ, ਸਮ੍ਮੋਦਨੀਯਕਥਂ ਕੁਰੁਮਾਨੇਯੇਵ ਤਸ੍ਮਿਂ ਤਾਨਿਪਿ ਚਤ੍ਤਾਲੀਸ ਪੁਰਿਸਸਹਸ੍ਸਾਨਿ ਆਗਨ੍ਤ੍ਵਾ ਤਂ ਪਰਿਵਾਰੇਸੁਂ. ਤਦਾ ਥੇਰੋ ਇਤਰੇਪਿ ਜਨੇ ਦਸ੍ਸੇਸਿ.

ਰਾਜਾ ਦਿਸ੍ਵਾ ਇਮੇ ਕਦਾ ਆਗਤਾਤਿ ਪੁਚ੍ਛਿ ਮਯਾ ਸਦ੍ਧਿਂਯੇਵ ਮਹਾ ਰਾਜਾਤਿ. ਇਦਾਨਿ ਪਨ ਜਮ੍ਬੁਦੀਪੇ ਅਞ੍ਞ੍ਞੋਪਿ ਏਵਰੂਪਾ ਸਮਣਾ ਸਨ੍ਤੀਤਿ. ਮਹਾਰਾਜ ਏਤਰਹਿ ਜਮ੍ਬੁਦੀਪੋ ਕਾਸਾਵ ਪਜ੍ਜੋਤੋ ਇਸਿਵਾਤਪਰਿਵਾਤੋ, ਤਸ੍ਮਿਂ-

‘‘ਤੇ ਵਿਜ੍ਜਾ ਇਦ੍ਧਿਪਤ੍ਤਾ ਚ ਚੇਤੋਪਰਿਯਾਯ ਕੋਚਿਦਾ,

ਖੀਣਾਸਾਵ ਅਰਹਨ੍ਤੋ-ਬਹੂ ਬੁਦ੍ਧਸ੍ਸ ਸਾਵਕਾਤਿ’’;

ਅਥ ਰਾਜਾ ਭਨ੍ਤੇ ਸ੍ਵੇ ਰਥਂ ਪੇਸੇਸ੍ਸਾਮਿ. ਤਂ ਅਭਿਰੂਹਿਤ੍ਵਾ ਆਗਚ੍ਛੇਯ੍ਯਾਥਾਤਿ ਵਤ੍ਵਾ ਪਕ੍ਕਾਕਮਿ ਥੇਰੋ ਅਚਿਰਪਕ੍ਕਨ੍ਤਸ੍ਸ ਰਞ੍ਞੋ ਸੁਮਣਸਾਮਣੇਰਂ ਆਮਨ੍ਤੇਸਿ ਏਹਿ ਤ੍ਵਂ ਸੁਮਨ ਧਮ੍ਮਸਵਨਕਾਲਂ ਘੋਸੇਹੀਤਿ ਸਾਮਣੇਰੋ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਹਿਤ੍ਵਾ ਸਮਾਹਿਤੇਨ ਚਿਤ੍ਤੇਨ ਸਕਲਤਮ੍ਬਪਣ੍ਣਿਦੀਪਂ ਸਾਚੇਨ੍ਤੋ ਧਮ੍ਮਸਵਨਕਾਲਂ ਘੋਸੇਸਿ.

ਸਾਮਣੇਰਸ੍ਸ ਸਦ੍ਦਂ ਸੁਤ੍ਵਾ ਭੁਮ੍ਮਾ ਦੇਵਤਾ ਸਦ੍ਦਮਨੁਸ੍ਸਾਵੇਸੁ, ਏਤੇਨੁਪਾਯੇਨ ਯਾਵ ਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਞ੍ਛਿ. ਤੇਨ ਸਦ੍ਦੇਨ ¶ ਮਹਾਦੇਵਤਾ ਸਨ੍ਨਿਪਾਤੋ ਅਹੋਸਿ ਥੇਰੋ ਮਹਨ੍ਤਂ ਦੇਵਤਾ ਸਨ੍ਤਿਪਾਤਂ ਦਿਸ੍ਵਾ ਸਮਚਿਤ੍ਤਸੁਤ੍ਤਨ੍ਤਂ ਕਥੇਸਿ. ਕਥਾ ਪਰਿਯੋਸਾਨੇ ਅਸਙ੍ਖੇਯ੍ਯਾਨਂ ਦੇਵਾਨਂ ਧਮ੍ਮਾਭਿਸਮਯੋ ਅਹੋਸਿ. ਬਹੂ ਨਾਗ ਸੁਪਣ੍ਣਾ ਚ ਸਰਣੇਸੁ ਪਤਿਟ੍ਠਹਿਂਸੁ. ਅਥ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਰਾਜਾ ਥੇਰਾਨਂ ਰਥਂ ਪੇਸੇਸਿ. ਥੇਰਾ ਨ ਮਯਂ ਰਥਂ ਆਰੁਹਾਮ. ਗਚ੍ਛ ਤ੍ਵਂ, ਪਚ੍ਛਾ ਮਯਂ ਆਗਚ੍ਛਿਸ੍ਸਾਮਾਤਿ ਵਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਅਨੁਰਾਧਪੁਰਸ੍ਸ ਪਚ੍ਛਿਮਦਿਸਾਯ ਪਠਮਕ ਚੇਤਿਯਟ੍ਠਾਨੇ ਓਤਰਿਂਸੁ.

ਰਾਜਾਪਿ ਸਾਰਥਿਂ ਪੇਸੇਤ੍ਵਾ ਅਨ੍ਤੋ ਨਿਵੇਸਨੇ ਮਣ੍ਡਪਂ ਪਟਿਯਾਦੇਤ੍ਵਾ ਚਿਨ੍ਤੇਸਿ’ ਨਿਸੀਦਿਸ੍ਸਨ੍ਤਿ ਨੁ ਖੋ ਅਯ੍ਯਾ ਆਸਨੇ ਨ ਨਿਸੀਦਿਸ੍ਸਨ੍ਤੀ‘‘ਤਿ. ਤਸ੍ਸੇਵਂ ਚਿਨ੍ਤਯਨ੍ਤਸ੍ਸੇਵ ਸਾਰਥਿ ਨਗਰਦ੍ਵਾਰਂ ਪਤ੍ਵਾ ਅਦ੍ਦਸ ਥੇਰੇ ਪਠਮਤਰਂ ਆਗਨ੍ਤ੍ਵਾ ਕਾਯਬਣ੍ਧਨਂ ਬਣ੍ਧਿਤ੍ਵਾ ਚੀਵਰਂ ਪਾਰੁਪਨ੍ਤੇ, ਦਿਸ੍ਵਾ ਅਤਿਵਿਯ ਪਸਨ੍ਨਮਾਨਸੋ ਹੁਤ੍ਵਾ ਆਗਨ੍ਤ੍ਵਾ ਰਞ੍ਞੋ ਆਰੋਚੇਸਿ ਆਗਤਾ ਦੇਵ ਥੇਰਾਤਿ.

ਰਾਜਾ ਰਥਂ ਆਰੁਲ਼੍ਹਾਤਿ ਪੁਚ੍ਛਿ ਨ ਆਰੂਲ਼੍ਹਾ ਦੇਵ, ਅਪਿ ਚ ਪਚ੍ਛਤੋ ਨਿਕ੍ਖਮਿਤ੍ਵਾ ਪਠਮਤਰਂ ਆਗਨ੍ਤ੍ਵਾ ਪਾਚੀਨਦ੍ਵਾਰੇ ਠਿਤਾਤਿ. ਰਾਜਾ ਰਥਂ ਨ ਆਰੁਭਿਂਸੂਤੀ ਸੁਤ੍ਵਾ ਤੇਨ ਹਿ ਭਣੇ ਭੁਮ੍ਮਤ੍ਥਰਣ ਸਙ੍ਖੇਪੇਨ ਆਸਨਾਨਿ ਪਞ੍ਞਾਪੇਥਾਤਿ ਵਤ੍ਵਾ ਪਟਿਪਥਾ ਆਗਮਾਸਿ ਅਮਚ੍ਚਾ ਪਥਵਿਯਂ ਤਟ੍ਟਿਕਂ ਪਞ੍ਞਾਪੇਤ੍ਵਾ ਉਪਰਿ ਕੋਜਵਕਾਦੀਨਿ ਵਿਚਿਤ੍ਤਤ੍ਥਰਣਾਨਿ ਪਞ੍ਞਾਪੇਸੁਂ ਰਾਜਾਪਿ ਗਨ੍ਤ੍ਵਾ ਥੇਰੇ ਵਨ੍ਦਿਤ੍ਵਾ ਮਹਿਣ੍ਦਤ੍ਥੇਰਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਮਹਤਿਯਾ ਪੂਜਾਯ ਚ ਸਕ੍ਕਾਰੇਨ ਚ ਥੇਰੇ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਅਨੁਲਾਦੇਵੀ ਪਮੁਖਾ ਪਞ੍ਚ ਇਤ੍ਥਿਸਤਾਨਿ ਥੇਰਾਨਂ ਅਭਿਵਾਦਨਂ ਪੂਜਾਸਕ੍ਕਾਰਞ੍ਚ ਕਾਰੋਨਤੂਤਿ ਪਕ੍ਕੋਸਾਪੇਤ੍ਵਾ ਏਕਮਨ੍ਤਂ ਨਿਸੀਦਿ. ਥੇਰੋ ਰਞ੍ਞੋ ਸਪਰਿਜਨਸ੍ਸ ਧਮ੍ਮਰਤਨਵਸ੍ਸਂ ਵਸ੍ਸੇਨ੍ਤੋ ਪੇਤਵਤ੍ਥੁਂ-ਵਿਮਾਨਵਤ੍ਥੁਂ-ਸਚ੍ਚਸਂਯੁਤ੍ਤਞ੍ਚ ਕਥੇਸਿ. ਤਂ ਸੁਤ੍ਵਾ ਤਾਨਿਪਿ ਪਞ੍ਚ ਇਤ੍ਥਿਸਤਾਨਿ ਸੋਤਾਪਤ੍ਤਿਫਲਂ ਸਚ੍ਛਿਕਰਿਂਸੁ.

ਤਦਾ ਨਾਗਰਾ ਥੇਰਾਨਂ ਗੁਣੇ ਸੁਤ੍ਵਾ ਥੇਰੇ ਦਟ੍ਠੁਂ ਨ ਲਭਾਮਾਤਿ ਉਪਕ੍ਕੋਸਨ੍ਤਿ ਅਥ ਰਾਜਾ ਇਧ ਓਕਾਸੋ ਨਤ੍ਥੀਤਿ ਚਿਨ੍ਤੇਤ੍ਵਾ,’ਗਚ੍ਛਥ ਭਣੇ ਹਤ੍ਥਿਸਾਲਂ ਪਟਿਜਗ੍ਗਿਤ੍ਵਾ ਵਾਲੁਕਂ ਓਕਿਰਿਤ੍ਵਾ ਪਞ੍ਚਵਣ੍ਣਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਵਿਤਾਨਂ ਬਣ੍ਧਿਤ੍ਵਾ ਮਙ੍ਗਲ ਹਤ੍ਥਿਟ੍ਠਾਨੇ ਥੇਰਾਨਂ ਆਸਨਾਨਿ ਪਞ੍ਞਾਪੇਥਾ’ਤਿ ਆਹ, ਅਮਚ੍ਚਾ ਤਥਾ ਅਕਂਸੁ.

ਥੇਰੋ ਤਤ੍ਥ ਗਨ੍ਤ੍ਵਾ ਨਿਸੀਦਿਤ੍ਵਾ ਦੇਵਦੂਤਸੁਤ੍ਤਨ੍ਤਂ ਕਥੇਸਿ ਕਥਾ ਪਰਿਯੋਸਾਨੇ ਪਾਣਸਹਸ੍ਸਂ ਸੋਤਾਪਤ੍ਤਿਫਲੇ ਪਤਿਟ੍ਠਹਿ ਤਥਾ ਹਤ੍ਥਿਸਾਲਾ ਸਮ੍ਬਾਧਾਤਿ ਦਕ੍ਖਿਣਦ੍ਵਾਰੇ ਨਣ੍ਦਨੁਯ੍ਯਾਨੇ ਆਸਨਂ ਪਞ੍ਞਾਪੇਸੁਂ. ਥੇਰੋ ਤਤ੍ਥ ਨਿਸੀਦਿਤ੍ਵਾ ਆਸਿਵਿਸੋਪਮ ਸੁਤ੍ਤਨ੍ਤਂ ਕਥੇਸਿ. ਤਮ੍ਪਿ ਸੁਤ੍ਵਾ ਪਾਣਸਹਸ੍ਸਂ ਸੋਤਾਪਤ੍ਤਿਫਲਂ ਪਟਿਲਭਿ ਏਵਂ ਆਗਤਦਿਵਸਤੋ ¶ ਦੁਤਿਯਦਿਵਸੇ ਅਡ੍ਢਤੇਯ੍ਯਾਨਂ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ.

ਥੇਰਸ੍ਸ ਨਣ੍ਦਨਵਨੇ ਆਗਤਾਗਤਾਹਿ ਕੁਲਿਤ੍ਥੀਹਿ ਕੁਲਸੁਣ੍ਹਾਹਿ ਕੁਲਕੁਮਾਰੀਹਿ ਸਦ੍ਧਿ ਸਮੋਦਮਾਨਸ੍ਸੇਵ ਸਾਯਣ੍ਹਸਮਯੋ ਜਾਤੋ, ਥੇਰੋ ਕਾਲਂ ਸਲ੍ਲਕ੍ਖੇਤ੍ਵਾ ਗਚ੍ਛਾਮਿ’ਦਾਨਿ ਮਿਸ੍ਸਕ ਪਬ੍ਬਤਨ੍ਤਿ ਉਟ੍ਠਹਿ. ਅਮਚ੍ਚਾ ਮਹਾਮੇਘਵਨੁਯ੍ਯਾਨੇ ਥੇਰੇ ਵਾਸੇਸੁਂ ਰਾਜਾਪਿ ਖੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਥੇਰਸ੍ਸ ਸਮੀਪਂ ਗਨ੍ਤ੍ਵਾ ਸੁਖਸਯਿਤਭਾਵਂ ਪੁਚ੍ਛਿਤ੍ਵਾ ਕਪ੍ਪਤਿ ਭਨ੍ਤੇ ਭਿਕ੍ਖੁਸਙ੍ਘਸ੍ਸ ਆਰਾਮੋਤਿ ਪੁਚ੍ਛਿ. ਥੇਰੋ ਕਪ੍ਪਤਿ ਮਹਾਰਾਜਾਤਿ ਆਹ.

ਰਾਜਾ ਤੁਟ੍ਠੋ ਸੁਵਣ੍ਣ ਭਿਂਕਾਰਂ ਗਹੇਤ੍ਵਾ ਥੇਰਸ੍ਸ ਹਤ੍ਥੇ ਉਦਕਂ ਪਾਤੇਤ੍ਵਾ ਮਹਾਮੇਘਵਨੁਯ੍ਯਾਨਂ ਅਦਾਸਿ ਥੇਰੋ ਪੁਨਦਿਵਸੇਪਿ ਰਾਜਗੇਹੇਯੇਵ ਭੁਞ੍ਜਿਤ੍ਵਾ ਨਣ੍ਦਨਵਨੇ ਅਨਮਤਗ੍ਗਿਯਾਨਿ ਕਥੇਸਿ. ਪੁਨ ਦਿਵਸੇ ਅਗ੍ਗਿਕ੍ਖਣ੍ਧੋਪਮ ਸੁਤ੍ਤਨ੍ਤਂ ਕਥੇਸਿ. ਏਤੇਨੇਵ ਉਪਾਯੇਨ ਸਤ੍ਤ ਦਿਵਸਾਨਿ ਕਥੇਸਿ ਅਡ੍ਢ ਨਚਮਾਨਂ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸਤ੍ਤਮੇ ਦਿਵਸੇ ਪਨ ਥੇਰੋ ਅਨ੍ਤੋਪੁਰੇ ਰਞ੍ਞੋ ਅਪ੍ਪਮਾਦ ਸੁਤ੍ਤਨ੍ਤਂ ਕਥਯਿਤ੍ਵਾ ਚੇਤਿਯਗਿਰਿਮੇਵ ਅਗਮਾਸਿ.

ਅਥ ਖੋ ਰਾਜਾ ਥੇਰੋ ਆਯਾਚਿਤੋ ਸਯਮੇਵਾਗਤੋ, ਤਸ੍ਮਾ ਤਸ੍ਸ ਅਨਾਪੁਚ੍ਛਾ ਗਮਨਮ੍ਪਿ ਭਵੇਯ੍ਯਾਤਿ ਚਿਨ੍ਤੇਤ੍ਵਾ ਰਥਂ ਅਭਿਰੂਹਿਤ੍ਵਾ, ਚੇਤਿਯਗਿਰਿਂ ਅਗਮਾਸਿ ਮਹਤਾ ਰਾਜਾਨੁਭਾਵੇਨ ਗਨ੍ਤ੍ਵਾ ਥੇਰਾਨਂ ਸਨ੍ਤਿਕਂ ਉਪਸਙ੍ਕਮਨ੍ਤੋ ਅਤਿਵਿਯ ਕਿਲਨ੍ਤਰੂਪੋ ਹੁਤ੍ਵਾ ਉਪਸਙ੍ਕਮਿ. ਤਤੋ ਨਂ ਥੇਰੋ ਆਹ ਕਸ੍ਮਾ ਤ੍ਵਂ ਮਹਾਰਾਜ ਏਵਂ ਕਿਲਮ ਮਾਨੋ ਆਗਤੋਤਿ. ਤੁਮ੍ਹੇ ਮਮ ਗਾਲ਼੍ਹਂ ਓਵਾਦਂ ਦਤ੍ਵਾ ਇਦਾਨਿ ਗਨ੍ਤੁਕਾਮਾ ਨੁਖੋਤਿ ਜਾਨਨਤ੍ਥਂ ਭਨ੍ਤੇਤਿ. ਨ ਮਯਂ ਮਹਾਰਾਜ ਗਨ੍ਤੁਕਾਮਾ, ਅਪਿ ਚ ਵਸ੍ਸੁਪਨਾਯਿਕ ਕਾਲੋਨਮਾਯਂ ਸਮਣੇਨ ਨਾਮ ਵਸ੍ਸੁਪਨਾਯਿਕਂ ਠਾਨਂ ਞਾਤੁਂ ਵਟ੍ਟਤੀਤਿ. ਰਾਜਾਪਿ ਖੋ ਤਂਖਣਂਯੇਵ ਕਰਣ੍ਡਕ ਚੇਤਿਯਙ੍ਗਣਂ ਪਰਿਕ੍ਖਿਪਿਤ੍ਵਾ ਅਟ੍ਠਸਟ੍ਠਿਯਾ ਲੇਣੇਸੁ ਕਮ੍ਮਂ ਪਟ੍ਠਪੇਤ੍ਵਾ ਨਗਰਮੇਵ ਅਗਮਾਸਿ.

ਤੇਪਿ ਥੇਰੋ ਮਹਾਜਨਂ ਓਵਦਮਾਨਾ ਚੇਤਿਯਗਿਰਿਮ੍ਹਿ ਵਸ੍ਸਂ ਵਸਿਂਸੁ. ਅਥਾਯਸ੍ਮਾ ਮਹਾਮਹਿਣ੍ਦੋ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਕਤ੍ਤਿਕਪੁਣ੍ਣਮਾਯਂ ਉਪੋਸਥਦਿਵਸੇ ਰਾਜਾਨਂ ਏਤਦਵੋਚ ਚਿਰਦਿਟ੍ਠੋ ਨੋ ਮਹਾਰਾਜ ਸਮ੍ਮਾਸਮ੍ਬੁਦ੍ਧੋ ਅਭਿਵਾਦਨ ਪਚ੍ਚੁਪਟ੍ਠਾਨ ਅਞ੍ਜਲਿ ਕਮ੍ਮ ਸਾਮੀਚਿ ਕਮ੍ਮ ਕਰਣਟ੍ਠਾਨਂ ਨਤ੍ਥਿ, ਤੇਨਮ੍ਹਂ ਉਕ੍ਕਣ੍ਠਿਤਾਤਿ ਤਨੁ ਭਨ੍ਤੇ ਤੁਮ੍ਹੇ ਅਵੋਚੁਤ੍ਥ ਪਰਿਨਿਬ੍ਬੁਤੋ ਸਮ੍ਮਾਸਮ੍ਬੁਦ੍ਧੋਤਿ ਕਿਞ੍ਚਾਪਿ ਮਹਾਰਾਜ ਪਰਿਨਿਬ੍ਬੁਤੋ, ਅਥਸ੍ਸ ਸਰੀਰਧਾਤੁਯੋ ਤਿਟ੍ਠਨ੍ਤੀਤਿ. ਅਞ੍ਞਾ ਤਮ੍ਭਨ੍ਤੇ ਥੂਪਂ ਪਤਿਟ੍ਠਾਪੇਮਿ ਭੂਮਿਭਾਗਂ ਵਿਚਿਨਥਾਤਿ. ਅਪਿ ਚ ਧਾਤੁਯੋ ਕੁਤੋ ਲਚ੍ਛਾਮੀਤਿ ਸੁਮਨੇਨ ਸਦ੍ਧਿਂ ਮਨ੍ਤੇਹਿ ਮਹਾਰਾਜਾਤਿ ਰਾਜਾ ਸੁਮਨਂ ਉਪਸਙ੍ਕਮਿਤ੍ਵਾ ਪੁਚ੍ਛਿ’ਕੁਤੋਦਾਨਿ ਭਨ੍ਤੇਧਾਤੁਯੋ ਲਚ੍ਛਾਮਾ’ਤਿ ਸੁਮਨੋ ¶ ਆਹ-ਅਪ੍ਪੋਸ੍ਸੁਕ੍ਕੋ ਤ੍ਵਂ ਮਹਾਰਾਜ, ਵੀਥਿਯੋ ਸੋਧਾਪੇਤ੍ਵਾ ਧਜ ਪਤਾਕ ਪੁਣ੍ਣਘਟਾਦੀਹਿ ਅਲਙ੍ਕਾਰਾਪੇਤ੍ਵਾ ਸਪਰਿਜ੍ਜਨੋ ਉਪੋਸਥਂ ਸਮਾਦਿਯਿਤ੍ਵਾ ਸਬ੍ਬਤਾਲਾਵਚਰੇ ਉਪਟ੍ਠਪੇਤ੍ਵਾ ਮਙ੍ਗਲਹਤ੍ਥਿਂ ਸਬ੍ਬਾਲਙ੍ਕਾਰੇਹਿ ਪਤਿਮਣ੍ਡਿਤਂ ਕਾਰੇਤ੍ਵਾ ਉਪਰਿ ਵਸ੍ਸ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਸਾਯਣ੍ਹਸਮਯੇ ਮਹਾਨਾਗਵਨੁਯ੍ਯਾਨਾਭਿਮੁਖੋ ਯਾ ਹਿ ਅਦ੍ਧਾ ਤਸ੍ਮਿਂ ਠਾਨੇ ਧਾਤੁਯੋ ਲਚ੍ਛਸਿਤਿ, ਰਾਜਾ ਸਾਧੂਤਿ ਸਮ੍ਪਟਿਚ੍ਛਿ. ਥੇਰੋ ਚੇਤਿਯਗਿਰਿਮੇਵ ਅਗਮਿਂਸੁ.

ਤਤ੍ਰਾਯਸ੍ਮਾ ਮਹਿਣ੍ਦਤ੍ਥੇਰੋ ਸੁਮਨ ਸਾਮਣੇਰਮਾਹ- ਗਚ੍ਛ ਤ੍ਵਂ ਸਾਮਣੇਰ ਜਮ੍ਬੁਦੀਪੇ ਅਯ੍ਯਕਂ ਅਸੋਕਧਮ੍ਮਰਾਜਾਨਂ ਉਪਸਙ੍ਕਮਿਤ੍ਵਾ ਮਮ ਵਚਨੇਨ ਏਵਂ ਵਦੇਹਿ’ਸਹਾਯੋ ਤੇ ਮਹਾਰਾਜ ਦੇਵਾਨਮ੍ਪਿਯ ਤਿਸ੍ਸੋ ਬੁਦ੍ਧਸਾਸਨੇ ਪਸਨ੍ਨੋ ਥੂਪਂ ਪਤਿਟ੍ਠਾਪੇਤੁਕਾਮੋ ਤੁਮ੍ਹਾਕਂ ਕਿਰ ਹਤ੍ਥੇ ਭਗਵਤੋ ਪਰਿਭੁਤ੍ਤਪਤ੍ਤੋ ਚੇਵਧਾਤੁ ਚ ਅਤ੍ਥਿ, ਤਮ੍ਮੇ ਦੇਥਾ’ਤਿ ਤਂ ਗਹੇਤ੍ਵਾ ਸਕ੍ਕਂ ਦੇਵਰਾਜਾਨਂ ਉਪਸਙ੍ਕਮਿਤ੍ਵਾ ਤੁਮ੍ਹਾਕਂ ਕਿਰ ਮਹਾਰਾਜ ਹਤ੍ਥੇ ਦ੍ਵੇ ਧਾਤੁਯੋ ਅਤ੍ਥਿ ਦਕ੍ਖਿਣਦਾਠਾ ਚ ਦਕ੍ਖਿਣਕ੍ਖਕਞ੍ਚ, ਤਤੋਤੁਮ੍ਹੇ ਦਕ੍ਖਿਣਦਾਠਂਪੂਜੇਥ, ਦਕ੍ਖਿਣਕ੍ਖਕਂ ਪਨ ਮਯ੍ਹਂ ਦੇਥਾਤਿ, ਏਵਞ੍ਚ ਨਂ ਵਦੇਹਿ ਕਸ੍ਮਾ ਤ੍ਵਂ ਮਹਾਰਾਜ ਅਮ੍ਹੇ ਤਮ੍ਬਪਣ੍ਣਿਦੀਪਂ ਪਹਿਣਿਤ੍ਵਾ ਪਮਜ੍ਜਿਤ੍ਥਾਤਿ.

ਸਾਧੁ ਭਨ੍ਤੇਤਿ ਖੋ ਸੁਮਨੋ ਥੇਰਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਾਵਦੇਵ ਪਤ੍ਤਚੀਵਰਮਾਦਾਯ ਵੇਹਾਸਮਬ੍ਭੁਗ੍ਗਨ੍ਤ੍ਵਾ ਪਾਟਲਿਪੁਤ੍ਤਦ੍ਵਾਰੇ ਓਰੁਯ੍ਹ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤਮਤ੍ਥਂ ਆਰੋਚੇਸਿ ਰਾਜਾ ਤੁਟ੍ਠੋ ਸਾਮਣੇਰਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਭੋਜੇਤ੍ਵਾ ਭਗਵਤੋ ਪਤ੍ਤਂ ਗਣ੍ਧੇਹਿ ਉਬ੍ਬਟ੍ਟੇਤ੍ਵਾ ਵਰਮੁਤ੍ਤਸਦਿਸਾਨਂ ਧਾਤੂਨਂ ਪੂਰੇਤ੍ਵਾ ਅਦਾਸਿ.

ਸੋ ਤੁਂ ਗਹੇਤ੍ਵਾ ਸਕ੍ਕਂ ਦੇਵਰਾਜਾਨਂ ਉਪਸਙ੍ਕਮਿ ਸਕ੍ਕੋ ਦੇਵਾਰਾਜਾ ਸਾਮਣੇਰਂ ਦਿਸ੍ਵਾ ਕਿਂ ਭਨ੍ਤੇ ਸੁਮਨ ਆਹਿਣ੍ਡਸੀਤਿ ਆਹ. ਤ੍ਵਂ ਮਹਾਰਾਜ ਅਮ੍ਹੇ ਤਮ੍ਬਪਣ੍ਣਿਦੀਪਂ ਪਹਿਣਿਤ੍ਵਾ ਕਸ੍ਮਾ ਪਮਜ੍ਜਸੀਤਿ, ਤਪ੍ਪਮਜ੍ਜਾਮਿ ਭਨ੍ਤੇ, ਵਦੇਹਿ ਕਿਂ ਕਰੋਮੀਤਿ. ਤੁਮ੍ਹਾਕਂ ਕਿਰ ਹਤ੍ਥੇ ਦ੍ਵੇ ਧਾਤੁਯੋ ਅਤ੍ਥਿ ਦਕ੍ਖਿਣਦਾਠਾ ਚ ਦਕ੍ਖਿਣਕ੍ਖਕਞ੍ਚ, ਤਤੋ ਤੁਮ੍ਹੇ ਦਕ੍ਖਿਣਦਾਠਂ ਪੂਜੇਥ ਦਕ੍ਖਿਣਕ੍ਖਕਂ ਪਨ ਮਯ੍ਹਂ ਦੇਥਾਤਿ. ਸਾਧੁ ਭਨ੍ਤੇਤਿ ਖੋ ਸਕ੍ਕੋ ਦੇਵਾਨਮਿਣ੍ਦੋ ਯੋਜਨਪ੍ਪਮਾਨਂ ਮਣਿਥੂਪਂ ਉਗ੍ਘਾਟੇਤ੍ਵਾ ਦਕ੍ਖਿਣਕ੍ਖਕਂ ਨੀਹਰਿਤ੍ਵਾ ਸੁਮਨਸ੍ਸ ਅਦਾਸਿ.

ਸੋ ਤਂ ਗਹੇਤ੍ਵਾ ਚੇਤਿਯਗਿਰਿਮ੍ਹਿਯੇਵ ਪਤਿਟ੍ਠਾਸਿ ਅਥ ਖੋ ਮਹਿਣ੍ਦਪਮੁਖਾ ਸਬ੍ਬੇ ਤੇ ਮਹਾਨਾਗਾ ਅਸੋਕਧਮ੍ਮਰਾਜੇਨ ਦਿਨ੍ਨ ਧਾਤੁਯੋ ਚੇਤਿਯਗਿਰਿਯਮ੍ਹਿਯੇਵ ਪਤਿਟ੍ਠਾਪੇਤ੍ਵਾ ਦਕ੍ਖਿਣਕ੍ਖਕਂ ਆਦਾਯ ਵਡ੍ਢਮਾਨਕਚ੍ਛਾਯਾਯ ਮਹਾਨਾਗ ਵਨੁਯ੍ਯਾਨਮਗਮਂਸੁ. ਰਾਜਾਪਿ ਖੋ ਸੁਮਨੇਨ ਵੁਤ੍ਤਪ੍ਪਕਾਰਂ ਪੂਜਾਸਕ੍ਕਾਰਂ ਕਤ੍ਵਾ ਹਤ੍ਥਿਕ੍ਖਣ੍ਧਵਰਗਤੋ ਸਾਯਂ ਮਙ੍ਗਲਹਤ੍ਥਿਮਤ੍ਥਕੇ ਸੇਤਚ੍ਛਤ੍ਤਂ ਧਾਰਯਮਾਨੋ ਮਹਾਨਾਗ ਵਨੁਯ੍ਯਾਨਂ ਸਮ੍ਪਾਪੁਣਿ.

ਅਥਸ੍ਸ ¶ ਏਤਦਹੋਸਿ- ਸਚੇ ਅਯਂ ਸਮ੍ਮਾਸਮ੍ਬੁਦ੍ਧਸ੍ਸ ਧਾਤੁ, ਛਤ੍ਤਂ ਅਪਨਮਤੁ, ਮਙ੍ਗਲਹਤ੍ਥਿ ਜਣ੍ਣੁਕੇਹਿ ਭੂਮਿਯਂ ਪਤਿਟ੍ਠਾਹਤੁ, ਧਾਤੁ ਚਙ੍ਗੋਟਕਂ ਮਯ੍ਹਂ ਮਤ੍ਥਕੇ ਪਤਿਟ੍ਠਹਤੂਤਿ ਸਹ ਰਞ੍ਞੋ ਚਿਤ੍ਤੁਪ੍ਪਾਦੇਨ ਛਤ੍ਤਂ ਅਪਨਮਿ ਹਤ੍ਥਿਜਣ੍ਣੁਕੇਹਿ ਪਤਿਟ੍ਠਹਿ ਧਾਤੁਚਙ੍ਗੋਟਕਂ ਰਞ੍ਞੋ ਮਤ੍ਥਕੇ ਪਤਿਟ੍ਠਹਿ ਰਾਜਾ ਅਮਤੇਨੇਵਾਭਿਸਿਤ੍ਤਗਤ੍ਤੋ ਪਰਮੇਨ ਪੀਤਿਪਾਮੋਜ੍ਜੇਨ ਸਮਨ੍ਨਾਗਤੋ ਹੁਤ੍ਵਾ ਪੁਚ੍ਛਿ ਧਾਤੁਂ ਭਨ੍ਤੇ ਕਿਂ ਕਰੋਮੀਤਿ. ਹਤ੍ਥਿਕੁਮ੍ਭਿਯੇਵ ਤਾਵ ਮਹਾਰਾਜ ਠਪੇਹੀਤਿ. ਰਾਜਾ ਧਾਤੁਵਙ੍ਗੋਟਕਂ ਹਤ੍ਥਿਕੁਮ੍ਭੇ ਠਪੇਸਿ. ਪਮੁਦਿਤੋ ਨਾਗੋ ਕੁਞ੍ਚਨਾਦਂ ਨਦਿ ਮਹਾਮੇਘੋ ਉਟ੍ਠਹਿਤ੍ਵਾ ਪੋਕ੍ਖਰਵਸ੍ਸਂ ਵਸਿਸਿ ਉਕਦਪਰਿਯਨ੍ਤਂ ਕਤ੍ਵਾ ਮਹਾਭੂਮਿਚਾਲੋ ਅਹੋਸਿ ਪਚ੍ਚਨ੍ਤੇਪਿ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਧਾਤੁਯੋ ਪਤਿਟ੍ਠਹਿਸ੍ਸਨ੍ਤੀਤਿ.

ਅਥ ਸੋ ਹਤ੍ਥਿਨਾਗੋ ਅਨੇਕ ਤਾਲਾਵਚਰਪਰਿਵੁਤੋ ਅਤਿਵਿਯ ਉਲ਼ਾਰੇਨ ਪੂਜਾਸਕ੍ਕਾਰੇਨ ਸਕ੍ਕਰਿਯਮਾਨੋ ਪਚ੍ਛਿਮਦਿਸਾਭਿਮੁਖੋ ਹੁਤ੍ਵਾ ਅਪਸਕ੍ਕਨ੍ਤੋ ਯਾਵ ਨਗਰਸ੍ਸ ਪੁਰਤ੍ਥਿਮ ਦ੍ਵਾਰਂ ਤਾਵ ਗਨ੍ਤ੍ਵਾ ਪੁਰਤ੍ਥਿਮੇਨ ਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਸਕਲਨਗਰੇ ਉਲ਼ਾਰਾਯ ਪੂਜਾਯ ਕਯਿਰਾਮਾਨਾਯ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਥੂਪਾਰਾਮਸ੍ਸ ਪਚ੍ਛਿਮਦਿਸਾਭਾਗੇ ਪਭੇਜਵਤ੍ਥੁ ਨਾਮ ਕਿਰ ਅਤ੍ਥਿ ਤਤ੍ਥ ਗਨ੍ਤ੍ਵਾ ਪੁਨ ਥੂਪਾਰਾਮਾਭਿਮੁਖੋ ਏਵ ਪਟਿਨਿਵਤ੍ਤਿ. ਸੋ ਚ ਪੁਰਿਮਕਾਨਂ ਤਿਣ੍ਣਂ ਸਮ੍ਮਾਸਮ੍ਬੁਦ੍ਧਾਨਂ ਧਮ੍ਮਕਰਕਂ ਕਾਯਬਣ੍ਧਨਂ ਉਦਕਸਾਟੀਕਂ ਪਤਿਟ੍ਠਾਪੇਤ੍ਵਾ ਕਤਚੇਤਿਯਟ੍ਠਾਨਂ ਹੋਤੀ. ਤਦੇਤਂ ਵਿਨਟ੍ਠੇਸੁਪਿ ਚੇਤਿਯੇਸੁ ਦੇਵਤਾਨੁਭਾਵੇਨ ਕਣ੍ਟਕ ਸਮਾਕਿਣ੍ਣਸਾਖਾਹਿ ਨਾਨਾਗਚ੍ਛੇਹਿ ਪਰਿਵੁਤਂ ਤਿਟ੍ਠਤਿ. ਮਾ ਨਂ ਕੋਚਿ ਉਚ੍ਚਿਟ੍ਠਾ ਸੁਵਿਮਲ ਕਚਵਰੇਹਿ ਸਨ੍ਦੁਸੇਸੀਤਿ.

ਅਥ ਤਸ੍ਸ ਹਤ੍ਥਿਨੋ ਪੁਰਤੋ ਗਨ੍ਤ੍ਵਾ ਰਾਜਪੁਰਿਸਾ ਸਬ੍ਬ ਗਚ੍ਛੇ ਛਿਣ੍ਦਿਤ੍ਵਾ ਭੂਮਿਂ ਸੋਧੇਤ੍ਵਾ ਤਂ ਹਤ੍ਥਤਲਸਦਿਸਂ ਅਕਂਸੁ. ਹਤ੍ਥਿਨਾਗੋ ਗਨ੍ਤ੍ਵਾ ਤਂ ਠਾਨਂ ਪੁਰਤੋ ਕਤ੍ਵਾ ਤਸ੍ਸ ਪਚ੍ਛਿਮਦਿਸਾਭਾਗੇ ਬੋਧਿਰੁਕ੍ਖਟ੍ਠਨੇ ਅਟ੍ਠਾਸਿ. ਅਥਸ੍ਸ ਮਤ੍ਥਕਤੋ ਧਾਤੁਂ ਓਰੋਪੇਤੁਂ ਆਰਭਿਂਸੁ ਨਾਗੋ ਓਰੋਪੇਤੁਂ ਨ ਦੇਤਿ. ਥੇਰਂ ਪੁਚ੍ਛਿ, ਕਸ੍ਮਾ ਭਨ੍ਤੇ ਨਾਗੋ ਧਾਤੁਂ ਓਰੋਪੇਤੁਂ ਨ ਦੇਤੀਤਿ

ਆਰੁਲ਼੍ਹਂ ਮਹਾਰਾਜ ਓਰੋਪੇਤੁਂ ਨ ਵਟ੍ਟਤਿਤਿ. ਤਸ੍ਮਿਞ੍ਚ ਕਾਲੇ ਅਭਯਵਾਪਿਯਾ ਉਦਕਂ ਜਿਨ੍ਨਂ ਹੋਤਿ ਸਮਨ੍ਤਾ ਭੂਮਿ ਫਲਿਤਾ ਸੁਉਦ੍ਧਰਾ ਮਤ੍ਤਿਕਪਿਣ੍ਡਾ. ਤਤੋ ਮਹਾਜਨੋ ਸੀਘਸੀਘਂ ਮਤ੍ਤਿਕਂ ਆਹਰਿਤ੍ਵਾ ਹਤ੍ਥਕੁਮ੍ਭਪ੍ਪਮਾਣਂ ਵਤ੍ਥੁਮਕਾਸਿ. ਤਾਵਦੇਵ ਥੂਪਕਰਣਤ੍ਥਂ ਇਟ੍ਠਿਕਾ ਕਾਤੁਂ ਆਰਭਿਂਸੁ. ਯਾਵ ਇਟ੍ਠਿਕਾ ਪਰਿਨਿਟ੍ਠਨ੍ਤਿ ਤਾਵ ਹਤ੍ਥਿਨਾਗੋ ਕਤਿਪਾਹਂ ਦਿਵਾ ਬੋਧਿਰੁਕ੍ਖਟ੍ਠਾਨੇ ਹਤ੍ਥਿਸਾਲਾਯਂ ਤਿਟ੍ਠਤਿ. ਰਤ੍ਤਿਯਂ ਥੂਪਪਤਿਟ੍ਠਾਨ ਭੂਮਿਯਂ ਪਰਿਯਾਯਤਿ.

ਅਥ ਵਤ੍ਥੁਂ ਵਿਨਾਪੇਤ੍ਵਾ ਰਾਜਾ ਥੇਰਂ ਪੁਚ੍ਛਿ, ਕੀਦਿਸੋ ਭਨ੍ਤੇ ਥੂਪੋ ਕਾਤਬ੍ਬੋਤਿ. ਵੀਹਿਰਾਸਿ ਸਦਿਸੋ ਮਹਾਰਾਜਾਤਿ, ਸਾਧੁ ਭਨ੍ਤੇਤਿ ਰਾਜਾ ਜਙ੍ਘਪ੍ਪਮਾਣਂ ¶ ਥੂਪਂ ਚਿਨਾਪੇਤ੍ਵਾ ਧਾਤੁਓਰੋਪਨਤ੍ਥਾਯ ਮਹਾਸਕ੍ਕਾਰਂ ਕਾਰੇਸਿ.

ਤਤੋ ਸਕਲਨਾਗਰਾ ਚ ਜਾਨਪਦਾ ਚ ਧਾਤੁਮ੍ਹ ਦਸ੍ਸਨਤ੍ਥਂ ਸਨ੍ਤਿਪਤਿਂਸੁ ਸਨ੍ਨਿਪਤਿਤੇ ਚ ਤਸ੍ਮਿਂ ਮਹਾਜਨੇ ਦਸਬਲਸ੍ਸ ਧਾਤੁ ਹਤ੍ਥਿਕੁਮ੍ਭਤੋ ਸਤ੍ਤਤਾਲਪ੍ਪਮਾਨਂ ਵੇਹਾਸਮਬ੍ਭੁਗ੍ਗਨ੍ਤ੍ਵਾ ਯਮਕਪਾਟਿਹਾਰਿਯਂ ਦਸ੍ਸੇਸਿ. ਤੇਹਿ ਤੇਹਿ ਧਾਤੁਪ੍ਪਦੇਸੇਹਿ ਛਬ੍ਬਣ੍ਣਰਂਸਿਯੋ ਉਦਕਧਰਾ ਚ ਅਗ੍ਗਿਕ੍ਖਣ੍ਧਾ ਚ ਪਵਤ੍ਤਨ੍ਤਿ. ਸਾਵਤ੍ਥਿਯਂ ਗਣ੍ਡਮ੍ਬਮੂਲੇ ਭਗਵਤਾ ਦਸ੍ਸਿਤ ਪਾਟਿਹਾਰਿਯ ਸਦਿਸਂ ਏਵ ਪਾਟਿਹਾਰਿਯਂ ਅਹੋਸਿ. ਤਞ੍ਚ ਖੋ ਨੇਵ ਥੇਰਾਨੁਭਾਵੇਨਨ ਦੇਵਤਾਨੁਭਾਵੇਨ, ਅਪਿ ਚ ਖੋ ਬੁਦ੍ਧਾਨਂਯੇਵ ਆਨੁਭਾਵੇਨ ਭਗਵਾ ਕਿਰ ਧਰਮਾਨੋਵ ਅਧਿਟ੍ਠਾਸਿ - ਤਮ੍ਬਪਣ੍ਣਿਦੀਪੇ ਅਨੁਰਾਧਪੁਰਸ੍ਸ ਦਕ੍ਖਿਣਦਿਸਾਭਾਗੇ ਪੁਰਿਮਕਾਨਂ ਤਿਣ੍ਣਂ ਬੁਦ੍ਧਾਨਂ ਚੇਤਿਯਟ੍ਠਾਨੇ ਮਮ ਦਕ੍ਖਿਣਕ੍ਖਕਧਾਤੁ ਪਤਿਟ੍ਠਾਨ ਦਿਵਸੇ ਯਮਕਪਾਟਿਹਾਰਿਯਂ ਹੋਤੂਤਿ.

ਏਵਂ ਅਚਿਨ੍ਤਿਯਾ ਬੁਦ੍ਧਾ-ਬੁਦ੍ਧਧਮ੍ਮਾ ਅਚਿਨ੍ਤਿਯਾ,

ਅਚਿਨ੍ਤਿਯੇਸੁ ਪਸਨ੍ਨਾਨਂ-ਵਿਪਾਕੋ ਹੋਤਿ ਅਚਿਨ੍ਤਿਯੋਤਿ;

ਧਾਤੁਸਰੀਰਤੋ ਨਿਕ੍ਖਨ੍ਤ ਉਦਕਫੁਸਿਤੇਹਿ ਸਕਲੇਹਿ ਤਮ੍ਬਪਣ੍ਣਿਦੀਪਤਲੇ ਨ ਕੋਚਿ ਅਫੁਟ੍ਠੋਕਾਸੋ ਨਾਮ ਅਹੋਸਿ. ਏਵਮਸ੍ਸ ਤਂ ਧਾਤੁ ਸਰੀਰਂ ਉਦਕਫੁਸਿਤੇਹਿ ਤਮ੍ਬਪਣ੍ਣਿਤ੍ਥਲਸ੍ਸ ਪਰਿਦਾਹਂ ਵੂਪਸਮੇਤ੍ਵਾ ਮਹਾਜਨਸ੍ਸ ਪਾਟਿਹਾਰਿਯਂ ਦਸ੍ਸੇਤ੍ਵਾ ਓਤਰਿਤ੍ਵਾ ਰਞ੍ਞੋ ਮਤ੍ਥਕੇ ਪਤਿਟ੍ਠਾਸਿ ਰਾਜਾ ਸਫਲਂ ਮਨੁਸ੍ਸਤ੍ਤਪਟਿਲਾਭਂ ਮਞ੍ਞਮਾਨੋ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਧਾਤੁਂ ਪਤਿਟ੍ਠਾਪੇਸਿ. ਸਹ ਧਾਤੁਪਤਿਟ੍ਠਾਨੇਨ ਮਹਾਭੂਮਿਚਾਲੋ ਅਹੋਸਿ ਨਿਟ੍ਠਿਤੇ ਪਨ ਥੂਪੇ ਰਾਜਾ ਚ ਰਾਜਾ ਭਾਤਿਕਾ ਚ ਦੇਵਿਯੋ ਚ ਦੇ-ਨਾਗ-ਯਕ੍ਖਾਨਂ ਵਿਮ੍ਭਯਕਰਂ ਪਚ੍ਚੇਕਂ ਥੂਪਮਕਂਸੁ.

ਏਵਂ ਜਿਨੋ ਧਾਤੁਸਰੀਰਕੇਨ

ਗਤੋਪਿ ਸਨ੍ਤਿਂ ਜਨਤਾਹਿਤਞ੍ਚ,

ਸੁਖਞ੍ਚ ਧਮ੍ਮਾ ਬਹੁਧਾ ਕਰੇਯ੍ਯ

ਠਿਤੋ ਹਿ ਨਾਥੋਨੁਕਰਂ ਕਰੇਯ੍ਯ;

ਸਾਧੁਜਨ ਮਨੋਪਸਾਦਨਤ੍ਥਾਯ ਕਤੇ ਥੂਪਵਂਸੇ ਥੂਪਾਰਾਮ ਕਥਾ,

੧੩. ਨਿਟ੍ਠਿਤਾਯ ਪਨ ਧਾਤੁਪੂਜਾਯ ਪਤਿਟ੍ਠਿਤੇ ਧਾਤੁਵਰੇ ਮਹਿਣ੍ਦਤ੍ਥੇਰੋ ਮਹਾਮੇਘਵਨੁਯ੍ਯਾਨਮੇਵ ਗਨ੍ਤ੍ਵਾਵਾਸਂ ਕਪ੍ਪੇਸਿ. ਤਸ੍ਮਿਂ ਖੋ ਪਨ ਸਮਯੇ ਅਨੁਲਾਦੇਵੀ ਪਬ੍ਬਜਿਤੁਕਾਮਾ ਹੁਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਤਸ੍ਸਾ ਵਚਨਂ ਸੁਤ੍ਵਾ ਥੇਰਂ ਏਤਦਵੋਚ? ਭਨ੍ਤੇ ਅਨੁਲਾਦੇਵੀ ਪਬ੍ਬਜਿਤੁਕਾਮਾ, ਪਬ੍ਬਾਜੇਥ ਨਨ੍ਤ ਨ ਮਹਾਰਾਜ ਅਮ੍ਹਾਕਂ ਮਾਤੁਗਾਮਂ ਪਬ੍ਬਾਜੇਤੁਂ ਕਪ੍ਪਤਿ. ਪਾਟਲਿਪੁਤ੍ਤੇ ਪਨ ਮਯ੍ਹਂ ਭਗਿਨਿ ਸਙ੍ਘਮਿਤ੍ਤਾ ਥੇਰੀ ਨਾਮ ਅਤ੍ਥਿ, ਤਂ ਪਕ੍ਕੋਸਾਪੇਹਿ ਮਹਾਰਾਜ, ਇਮਸ੍ਮਿਞ੍ਚ ਦੀਪੇ ਪੁਰਿਮਕਾਨਞ੍ਚ ¶ ਤਿਣ੍ਣਂ ਸਮ੍ਮਾਸਮ੍ਬੁਦ੍ਧਾਨਂ ਬੋਧਿ ਪਤਿਟ੍ਠਂਸਿ ਅਮ੍ਹਾਕਮ੍ਪਿ ਭਗਵਤੋ ਸਰਸ ਰਂਸਿਜਾਲ ਵਿਸ੍ਸਜ੍ਜਨਕੇਨ ਬੋਧਿਨਾ ਪਤਿਟ੍ਠਾਤਬ੍ਬਂ, ਤਸ੍ਮਾ ਸਾਸਨਂ ਪਹਿਣੇਯ੍ਯਸਿ ਯਥਾ ਸਙ੍ਘਮਿਤ੍ਤਾ ਬੋਧਿਂ ਗਹੇਤ੍ਵਾ ਆਗਚ੍ਛੇਯ੍ਯਾਤਿ.

ਰਾਜਾ ਥੇਰਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਨ੍ਤੋ ਅਰਿਟ੍ਠਂ ਨਾਮ ਅਤ੍ਤਨੋ ਭਾਗਿਨੇਯ੍ਯਂ ਆਹ ਸਕ੍ਖਿਸ੍ਸਸਿ ਤ੍ਵਂ ਤਾਤ ਪਾਟਲੀਪੁਤ੍ਤਂ ਗਨ੍ਤ੍ਵਾ ਮਹਾਬੋਧਿਨਾ ਸਦ੍ਧਿਂ ਅਯ੍ਯਂ ਸਙ੍ਘਮਿਤ੍ਤਤ੍ਥੇਰਿਂ ਆਨੇਤੁਨ੍ਤਿ ਸਕ੍ਖਿਸ੍ਸਾਮਿ ਦੇਵ ਸਚੇ ਮੇ ਪਬ੍ਬਜ੍ਜਂ ਅਨੁਜਾਨਿਸ੍ਸਸੀਤਿ.

ਗਚ੍ਛ ਤਾਤ ਥੇਰਿਂ ਆਨੇਤ੍ਵਾ ਪਬ੍ਬਜ੍ਜਾਹੀਤਿ. ਸੋ ਰਞ੍ਞੋ ਚ ਥੇਰਿਸ੍ਸ ਚ ਸਾਸਨਂ ਗਹੇਤ੍ਵਾ ਥੇਰਸ੍ਸ ਅਧਿਟ੍ਠਾਨਵਸੇਨ ਏਕਦਿਵਸੇ ਨ ਜਮ੍ਬੁਕੋਲਪਟ੍ਟਨਂ ਗਨ੍ਤ੍ਵਾ ਨਾਵਂ ਅਭਿਰੂਹਿਤ੍ਵ ਸਮੁਦ੍ਦਂ ਅਤਿਕ੍ਕਮਿਤ੍ਵਾ ਪਾਟਲੀਪੁਤ੍ਤਂ ਗਨ੍ਤ੍ਵਾ ਰਞ੍ਞੋ ਸਾਸਨਂ ਆਚਿਕ੍ਖਿ-ਪੁਤ੍ਤੋ ਤੇ ਦੇਵ ਮਹਿਣ੍ਦਥੇਰੋ ਏਵਮਾਹ. ਸਹਾਯਸ੍ਸ ਕਿਰ ਤੇ ਦੇਵਾਨਮ੍ਪਿਯਤਿਸ੍ਸਸ੍ਸ ਭਾਤੁਜਾਯਾ ਅਨੁਲਾਦੇਵੀ ਨਾਮ ਪਬ੍ਬਜਿਤੁਕਾਮਾ, ਤਂ ਪਬ੍ਬਾਜੇਤੁਂ ਅਯ੍ਯਂ ਸਙ੍ਘਮਿਤ੍ਤਤ੍ਥੇਰਿਂ ਪਹਿਣੇਯ੍ਯਾਥ, ਅਯ੍ਯਾਯ ਏਵ ਚ ਸਦ੍ਧਿਂ ਮਹਾਬੋਧਿਨ੍ਤਿ.

ਥੇਰਸ੍ਸ ਸਾਸਨਂ ਆਰੋਚੇਤ੍ਵਾ ਸਙ੍ਘਮਿਤ੍ਤਤ੍ਥੇਰਿਂ ਉਪਸਙ੍ਕਮਿਤ੍ਵਾ ਏਵਮਾਹ. ਅਯ੍ਯੇ ਤੁਮ੍ਹਾਕਂ ਭਾਤਾ ਮਹਿਣ੍ਦਤ੍ਥੇਰੋ ਮਂ ਤੁਮ੍ਹਾਕਂ ਸਨ੍ਤਿਕਂ ਪੇਸੇਸਿ ਦੇਵਾਨਮ੍ਪਿਯਤਿਸ੍ਸ ਰਞ੍ਞੋ ਭਾਤੁਜਾਯਾ ਅਨੁਲਾਦੇਵੀ ਨਾਮ ਪਞ੍ਚਹਿ ਕਞ੍ਞਾਸਤੇਹਿ ਪਞ੍ਚਹਿ ਚ ਅਨ੍ਤੇਪੁਰਿਸਾ ਸਤੇਹਿ ਸਦ੍ਧਿਂ ਪਬ੍ਬਜਿਤੁਕਾਮਾਤਿ, ਤਂ ਕਿਰ ਆਗਨ੍ਤ੍ਵਾ ਪਬ੍ਬਾਜੇਥਾਤਿ.

ਸਾ ਤਾਵ ਦੇਵ ਤੁਰਿਤ ਤੁਰਿਤਾ ਗਨ੍ਤ੍ਵਾ ਰਞ੍ਞਾ ਤ੍ैਮਤ੍ਥਂ ਆਰੋਚੇਤ੍ਵਾ ਗਚ੍ਛਾਮਹਂ ਮਹਾਰਾਜ ਤਮ੍ਬਪਣ੍ਣਿਦੀਪਨ੍ਤਿ ਆਹ.

ਤੇਨ ਹਿ ਅਮ੍ਮ ਮਹਾਬੋਧਿਂ ਗਹੇਤ੍ਵਾ ਗਚ੍ਛਾਹੀਤਿ ਵਤ੍ਵਾ ਪਾਟਲੀਪੁਤ੍ਤਤੋ ਯਾਵ ਮਹਾਬੋਧਿ ਤਾਵ ਮਗ੍ਗਂ ਪਟਿਜਗ੍ਗਾਪੇਤ੍ਵਾ ਸਤ੍ਤਯੋਜਨਾਯਾਮਯ ਤਿਯੋਜਨ ਵਿਤ੍ਥਤਾਯ ਮਹਤਿਯਾ ਸੇਨਾਯ ਪਾਟਲਿਪੁਤ੍ਤਤੋ ਨਿਕ੍ਖਮਿਤ੍ਵਾ ਅਰਿਯਸਙ੍ਘਂ ਆਦਾਯ ਮਹਾਬੋਧਿਸਮੀਪਂ ਅਗਮਾਸਿ.

ਸੇਨਾਯ ਸਮੁਸ੍ਸਿਤ ਧਜਪਤਾਕਂ ਨਾਨਾਰਤਨ ਵਿਚਿਤ੍ਤਂ ਅਨੇਕਾਲਙ੍ਕਾਰ ਪਤਿਮਣ੍ਡਿਤਂ ਨਾਨਾਵਿਧ ਕੁਸੁਮ ਸਮਾਕਿਣ੍ਣਂ ਅਨੇਕ ਤੁਰਿਯ ਸਂਘ੍ਰਟ੍ਠਂ ਮਹਾਬੋਧਿਂ ਪਰਿਕ੍ਖਿਪਿ ਤਤੋ ਰਾਜਾ ਪੁਪ੍ਫ-ਗਣ੍ਧ-ਮਾਲਾਦੀਹਿ ਪੂਜੇਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਅਟ੍ਠਸੁ ਠਾਨੇਸੁ ਵਨ੍ਦਿਤ੍ਵਾ ਉਟ੍ਠਾਯ ਅਞ੍ਜਲਿਮ੍ਪਗ੍ਗਯ੍ਹ ਠਤ੍ਵਾ ਸਚ੍ਚਵਚਨਕਿਰਿਯਾਯ ਬੋਧਿਂ ਗਣ੍ਹਿਤੁਕਾਮੋ ਰਤਨਪੀਠਂ ਆਰੁਯ੍ਹ ਤੁਲਿਕਂ ਗਹੇਤ੍ਵਾ ਮਨੋਸਿਲਾਯ ਲੇਖਂ ਕਤ੍ਵਾ ਯਦਿ ਮਹਾਬੋਧਿਨਾ ਲਙ੍ਕਾਦੀਪੇ ਪਤਿਟ੍ਠਾਤਬ੍ਬਂ, ਯਦਿ ਚਾਹਂ ਬੁਦ੍ਧਸਾਸਨੇ ਨਿਬ੍ਬੇਮਤਿਕੋ ਭਵੇਯ੍ਯਂ, ਮਹਾਬੋਧਿ ਸਯਮੇਵ ਇਮਸ੍ਮਿਂ ਸੁਵਣ੍ਣਕਟਾਹੇ ਪਤਿਟ੍ਠਹਤੂਤਿ ਸਚ੍ਚਕਿਰਿਯਮਕਾਸਿ ਸਹ ਸਚ੍ਚਕਿਰਿਯਾਯ ¶ ਬੋਧਿਸਾਖਾ ਮਨੋਸਿਲਾਯ ਪਰਿਚ੍ਛਿਨ੍ਨਟ੍ਠਾਨੇਹਿ ਛਿਣ੍ਦਿਤ੍ਵਾ ਗਣ੍ਧ ਕਲਲ ਪੂਰਸ੍ਸ ਸੁਵਣ੍ਣਕਟਾਹਸ੍ਸ ਉਪਰਿ ਅਟ੍ਠਾਸਿ.

ਤਤੋ ਰਾਜਾ ਮਹਾਬੋਧਿਂ ਬੋਧਿਮਣ੍ਡਤੋ ਮਹਨ੍ਤੇਨ ਸਕ੍ਕਾਰੇਨ ਪਾਟਲੀਪੁਤ੍ਤਂ ਆਨੇਤ੍ਵਾ ਸਬ੍ਬਪਰਿਹਾਰਾਨਿ ਦਤ੍ਵਾ ਮਹਾਬੋਧਿਂ ਗਙ੍ਗਾਯ ਨਾਵਂ ਆਰੋਪੇਤ੍ਵਾ ਸਯਮ੍ਪਿ ਨਗਰਤੋ ਨਿਕ੍ਖਮਿਤ੍ਵਾ ਵਿਞ੍ਝਾਟਵਿਂ ਸਮਤਿਕ੍ਕਮ੍ਮ ਅਨੁਪੁਬ੍ਬੇਨ ਸਤ੍ਤਦਿਵਸੇਹਿ ਤਾਮਲਿਤ੍ਤਿਂ ਅਨੁਪ੍ਪਤ੍ਤੋ ਅਨ੍ਤਰਮਗ੍ਗੇ ਦੇਵ-ਨਾਗ-ਮਨੁਸ੍ਸਾ ਉਲ਼ਾਰਂ ਮਹਾਬੋਧਿ ਪੂਜਮਕਂਸੁ.

ਰਾਜਾਪਿ ਸਮੁਦ੍ਦਤੀਰੇ ਸਤ੍ਤਦਿਵਸਾਨਿ ਮਹਾਬੋਧਿਂ ਠਪੇਤ੍ਵਾ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਬੋਧਿਮ੍ਪਿ ਸਂਙ੍ਘਮਿਤ੍ਤਤ੍ਥੇਰਿਮ੍ਪਿ ਸਪਰਿਵਾਰਂ ਨਾਵਂ ਆਰੋਪੇਤ੍ਵਾ ਗਚ੍ਛਤਿ ਵਤਰੇ ਦਸਬਲਸ੍ਸ ਸਰਸ ਰਂਸਿਜਾਲਾ ਮੁਞ੍ਚਮਾਨੋ ਮਹਾਬੋਧਿ ਰੁਕ੍ਖੋਤਿ ਕਣ੍ਦਿਤ੍ਵਾ ਅਞ੍ਜਲਿਮ੍ਪਗ੍ਗਹੇਤ੍ਵਾ ਅਸ੍ਸੂਨਿ ਪਵਤ੍ਤਯਮਾਨੋ ਅਟ੍ਠਾਸਿ ਸਾਪਿ ਖੋ ਮਹਾਬੋਧਿ ਸਮਰੂਲ਼੍ਹਨਾਵਾ ਪਸ੍ਸਤੋ ਪਸ੍ਸਤੋ ਮਹਾਰਾਜਸ੍ਸ ਮਹਾਸਮੁਦ੍ਦਤਲਂ ਪਕ੍ਖਣ੍ਦਿ ਮਹਾਸਮੁਦ੍ਦੇਪਿ ਸਮਨ੍ਤਾ ਯੋਜਨਂ ਵੀਚਿ ਵੂਪਸਨ੍ਤਾ ਪਞ੍ਚਵਣ੍ਣਾਨਿ ਪਦੁਮਾਨਿ ਪੁਪ੍ਫਿਤਾਨਿ ਅਨ੍ਤਲਿਕ੍ਖੇ ਦਿਬ੍ਬਤੁਰਿਯਾਨਿ ਵਜ੍ਜਿਂਸੁ ਆਕਾਸੇ ਜਲ ਥਲ ਸਨ੍ਨਿਸ੍ਸਿਤਾਹਿ ਦੇਵਤਾਹਿ ਪਵਤ੍ਤਿਤਾ ਅਤਿਵਿਯ ਉਲ਼ਾਰ ਪੂਜਾ ਅਹੋਸਿ. ਏਵਂ ਮਹਤਿਯਾ ਪੂਜਾਯ ਸਾ ਨਾਵਾ ਜਮ੍ਬੁਕੋਲਪਟ੍ਟਨਂ ਪਾਵਿਸਿ.

ਦੇਵਾਨਮ੍ਪਿਯਤਿਸ੍ਸ ਮਹਾਰਾਜਾਪਿ ਉਤ੍ਤਰਦ੍ਵਾਰਤੋ ਪਟ੍ਠਾਯ ਯਾਵ ਜਮ੍ਬੁਕੋਲਪਟ੍ਟਨਾ ਮਗ੍ਗਂ ਸੋਧਾਪੇਤ੍ਵਾ ਅਲਙ੍ਕਾਰਾਪੇਤ੍ਵਾ ਨਗਰਤੋ ਨਿਕ੍ਖਮਨ ਦਿਵਸੇ ਉਤ੍ਤਰਦ੍ਵਾਰ ਸਮੀਪੇ ਸਦ੍ਦਸਾਲਾਵਤ੍ਥੁਸ੍ਮਿਂ ਠਿਤੋ ਤਾਯ ਵਿਭੂਤਿਯਾ ਮਹਾਸਮੁਦ੍ਦੇ ਆਗਚ੍ਛਨ੍ਤਂਯੇਵ ਮਹਾਬੋਧਿਂ ਥੇਰਸ੍ਸਾਨੁਭਾਵੇਨ ਦਿਸ੍ਵਾ ਤੁਟ੍ਠਮਾਨਸੋ ਨਿਕ੍ਖਮਿਤ੍ਵਾ ਸਬ੍ਬਂ ਮਗ੍ਗਂ ਪਞ੍ਚਵਣ੍ਣੇਹਿ ਪੁਪ੍ਫੇਹਿ ਓਕਿਰਨ੍ਤੋ ਅਨ੍ਤਰਨ੍ਤਰਾ ਪੁਪ੍ਫਅਗ੍ਘਿਯਾਨਿ ਠਪੇਨ੍ਤੋ ਏਕਾਹੇਨੇਵ ਜਮ੍ਬੁਕੋਲਪਟ੍ਟਨਂ ਗਨ੍ਤ੍ਵਾ ਸਬ੍ਬਤਾਲਾਵਚਰ ਪਰਿਵੁਤੋ ਪੁਪ੍ਫ ਧੂਪਗਣ੍ਧਾਦੀਹਿ ਪੂਜਯਮਾਨੋ ਗਲਪ੍ਪਮਂਨਂ ਉਦਕਂ ਓਰੁਯ੍ਹ ਆਗਤੋ ਵਤ ਰੇਦਸਬਲਸ੍ਸ ਸਰਸ ਰਂਸਿਜਾਲਂ ਵਿਸ੍ਸਜ੍ਜਨਕੋ ਬੋਧਿਰੁਕ੍ਖੋਤਿ ਪਸਨ੍ਨਚਿਤ੍ਤੋ ਮਹਾਬੋਧਿਂ ਉਕ੍ਖਿਪਿਤ੍ਵਾ ਉਤ੍ਤਮਙ੍ਗੇ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਮਹਾਬੋਧਿਂ ਪਰਿਵਾਰੇਤ੍ਵਾ ਆਗਤੇਹਿ ਸੋਲ਼ਸਹਿ ਜਾਤਿਸਮ੍ਪਨ੍ਨਕੁਲੇਹਿ ਸਦ੍ਧਿਂ ਸਮੁਦ੍ਦਤੋ ਪਚ੍ਚੁਤ੍ਤਰਿਤ੍ਵਾ ਸਮੁਦ੍ਦਤੀਰੇ ਬੋਧਿਂ ਠਪੇਤ੍ਵਾ ਤੀਣਿ ਦਿਵਸਾਨਿ ਸਕਲ ਤਮ੍ਬਪਣ੍ਣਿ ਰਜ੍ਜੇਨ ਪੂਜੇਸਿ.

ਅਥ ਚਤੁਤ੍ਥੇ ਦਿਵਸੇ ਮਹਾਬੋਧਿਂ ਆਦਾਯ ਉਲ਼ਾਰਂ ਪੂਜਂ ਕੁਰੁਮਾਨੋ ਅਨੁਪੁਬ੍ਬੇਨ ਅਨੁਰਾਧਪੁਰਂ ਸਮ੍ਪਤ੍ਤੇ ਅਨੁਰਾਧਪੁਰੇਪਿ ਮਹਾਸਕ੍ਕਾਰਂ ਕਤ੍ਵਾ ਚਾਤੁਦ੍ਦਸੀ ਦਿਵਸੇ ਵਡ੍ਢਮਾਨਕਚ੍ਛਾਯਾਯ ਮਹਾਬੋਧਿਂ ਉਤ੍ਤਰਦ੍ਵਾਰੇਨ ਪਵੇਸੇਤ੍ਵਾ ਨਗਰਮਜ੍ਝਨ ਅਤਿਹਰਿਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਦਕ੍ਖਿਣਦ੍ਵਾਰਤੋ ਪਞ੍ਚਧਨੁ ਸਤਿਕੇ ਠਾਨੇ ਯਤ੍ਥ ਅਮ੍ਹਾਕਂ ¶ ਸਮ੍ਮਾਸਮ੍ਬੁਦ੍ਧੋ ਨਿਰੋਧ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਪੁਰਿਮਕਾ ਚ ਤਯੋ ਸਮ੍ਮਾਸਮ੍ਬੁਦ੍ਧਾ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਂਸੁ. ਯਤ੍ਥ ਚ ਕਕੁਸਣ੍ਧਸ੍ਸ ਭਗਵਤੋ ਸਿਰੀਸਬੋਧਿ, ਕੋਨਾਗਮਨਸ੍ਸ ਭਗਵਤੋ ਉਦੁਮ੍ਬਰਬੋਧਿ, ਕਸ੍ਸਪਸ੍ਸ ਭਗਵਤੋ ਨਿਗ੍ਰੋਧਬੋਧਿ, ਪਤਿਟ੍ਠਾਪੇਸਿ -ਤਸ੍ਮਿਂ ਮਹਾਮੇਘਵਨੁਯ੍ਯਾਨਸ੍ਸ ਤਿਲਕਭੂਤੇ ਕਤਭੂਮਿ ਪਰਿਕਮ੍ਮੇ ਰਾਜਵਤ੍ਥੁਦ੍ਵਾਰਕੋਟ੍ਠਕਟ੍ਠਾਨੇ ਮਹਾਬੋਧਿਂ ਪਤਿਟ੍ਠਾਪੇਸਿ.

ਏਵਂ ਲਙ੍ਕਾਹਿਤਤ੍ਥਾਯ-ਸਾਸਨਸ੍ਸਚ ਵੁਦ੍ਧਿਯਾ,

ਮਹਾਮੇਘਵਨੇ ਰਮ੍ਮੇ-ਮਹਾਬੋਧਿ ਪਤਿਟ੍ਠਿਤੋਤਿ;

ਬੋਧਿ ਆਗਮਨਕਥਾ

੧੪. ਅਨੁਲਾਦੇਵੀ ਪਞ੍ਚਹਿ ਕਞ੍ਞਾਸਤੇਹਿ ਪਞ੍ਚਹਿ ਅਨ੍ਤੇਪੁਰਿਸਾ ਸਤੇਹੀਤਿ ਮਾਤੁਗਾਮਸਹਸ੍ਸੇਨ ਸਦ੍ਧਿਂ ਸਙ੍ਘਮਿਤ੍ਤਤ੍ਥੇਰਿਯਾ ਸਨ੍ਤਿਕੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਸਪਰਿਵਾਰਾ ਅਰਹਤ੍ਤੇ ਪਤਿਟ੍ਠਾਸਿ. ਅਰਿਟ੍ਠੋਪਿ ਖੋ ਰਞ੍ਞੋ ਭਾਗਿਨੇਯ੍ਯੋ ਪਞ੍ਚਹਿ ਪੁਰਿਸ ਸਤੇਹਿ ਸਦ੍ਧਿਂ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਸਪਰਿਵਾਰੋ ਨਚਿਰਸ੍ਸੇਵ ਅਰਹਤ੍ਤੇ ਪਤਿਟ੍ਠਾਸਿ. ਅਥੇਕਦਿਵਸਂ ਰਾਜਾ ਬੋਧਿਂ ਵਨ੍ਦਿਤ੍ਵਾ ਥੇਰੇਨ ਸਦ੍ਧਿਂ ਥੂਪਾਰਾਮਂ ਗਚ੍ਛਤਿ. ਤਸ੍ਸ ਲੋਹਪਾਸਾਦਟ੍ਠਾਨਂ ਸਮ੍ਪਤ੍ਤਸ੍ਸ ਪੁਰਿਸਾ ਪੁਪ੍ਫਾਨਿ ਆਹਰਿਂਸੁ ਰਾਜਾ ਥੇਰਸ੍ਸ ਪੁਪ੍ਫਾਨਿ ਅਦਾਸਿ. ਥੇਰੋ ਪੁਪ੍ਫੇਹਿ ਲੋਹਪਾਸਾਦਟ੍ਠਾਨਂ ਪੂਜੇਸਿ ਪੁਪ੍ਫੇਸੁ ਭੂਮਿਯਾ ਪਤਿਤ ਮਤ੍ਤੇਸੁ ਮਹਾਭੂਮਿਚਾਲੋ ਅਹੋਸਿ?

ਰਾਜਾ ਕਸ੍ਮਾ ਭਨ੍ਤੇ ਭੂਮਿ ਚਲਿਤਾਨਿ ਪੁਚ੍ਛਿ. ਇਮਸ੍ਮਿਂ ਮਹਾਰਾਜ ਓਕਾਸੇ ਅਨਾਗਤੇ ਸਙ੍ਘਸ੍ਸ ਉਪੋਸਥਾਗਾਰਂ ਭਵਿਸ੍ਸਤਿ. ਤਸ੍ਸੇਤਂ ਪੁਬ੍ਬਨਿਮਿਤ੍ਤਨ੍ਤਿ ਆਹ. ਪੁਨ ਤਸ੍ਸ ਮਹਾਚੇਤਿਯਟ੍ਠਾਨਂ ਸਮ੍ਪਤ੍ਤਸ੍ਸ ਚਮ੍ਪਕ ਪੁਪ੍ਫਾਨਿ ਅਭਿਹਰਿਂਸੁ. ਤਾਨਿਪਿ ਰਾਜਾ ਥੇਰਸ੍ਸ ਅਦਾਸਿ. ਥੇਰੋ ਮਹਾਚੇਤਿਯਟ੍ਠਾਨਂ ਪੁਪ੍ਫੇਹਿ ਪੂਜੇਤ੍ਵਾ ਵਨ੍ਦਿ ਤਾਵਦੇਵ ਮਹਾਪਥਵੀ ਸਂਕਮ੍ਪਿ. ਰਾਜਾ ਭਨ੍ਤੇ ਕਸ੍ਮਾ ਪਥਵੀ ਕਮ੍ਪਿਤ੍ਥਾਤਿ ਪੁਚ੍ਛਿ. ਮਹਾਰਾਜ ਇਮਸ੍ਮਿਂ ਠਾਨੇ ਅਨਾਗਤੇ ਬੁਦ੍ਧਸ੍ਸ ਭਗਵਤੋ ਅਸਦਿਸੋ ਮਹਾਥੂਪੋ ਭਵਿਸ੍ਸਤਿ. ਤਸ੍ਸੇਤਂ ਪੁਬ੍ਬਨਿਮਿਤ੍ਤਨ੍ਤਿ ਆਹ. ਅਹਮੇਵ ਕਰੋਮਿ ਭਨ੍ਤੇਤਿ. ਅਲਂ ਮਹਾਰਾਜ ਤੁਮ੍ਹਾਕਂ ਅਞ੍ਞਂ ਬਹੁਂ ਕਮ੍ਮਂ ਅਤ੍ਥਿ. ਤੁਮ੍ਹਾਕਂ ਪਨ ਨਨ੍ਤਾ ਦੁਟ੍ਠਗਾਮਣੀ ਅਭਯੋ ਨਾਮ ਕਾਰੇਸ੍ਸਤੀਤਿ.

ਅਥ ਰਾਜਾ ਸਚੇ ਭਨ੍ਤੇ ਮਯ੍ਹਂ ਨਨ੍ਤਾ ਕਰਿਸ੍ਸਤਿ. ਕਤਂਯੇਵ ਮਯਾਤਿ ਦ੍ਵਾਦਸਹਤ੍ਥਂ ਪਾਸਾਣਤ੍ਥਮ੍ਹਂ ਆਹਰਾਪੇਤ੍ਵਾ ਦੇਵਾਨਮ੍ਪਿਯਤਿਸ੍ਸ ਰਞ੍ਞੋ ਨਤ੍ਤਾ ਦੁਟ੍ਠਗਾਮਣਿ ਅਭਯੋ ਨਾਮ ਇਮਸ੍ਮਿਂ ਪਦੇਸੇ ਥੂਪਂ ਕਰੋਤੀਤਿ ਅਕ੍ਖਰਾਨਿ ਲਿਖਾਪੇਤ੍ਵਾ ਪਤਿਟ੍ਠਾਪੇਸੀਤਿ ਅਥ ਦੇਵਾਨਮ੍ਪਿਯਤਿਸ੍ਸਰਾਜਾ ਚੇਤਿਯਪਪ੍ਪਤੇ ਨਿਹਿਤਾ ਸਮ੍ਮਾਸਮ੍ਬੁਦ੍ਧ ਭੁਤ੍ਤ ਪਤ੍ਤ ਪੂਰੇਤ੍ਵਾ ਆਹਟਾ ਧਾਤੁਯੋਹਤ੍ਥਿਕ੍ਖਣ੍ਧੇਨ ਆਹਰਾਪੇਤ੍ਵਾ ਸਕਲਤਮ੍ਬਪਣ੍ਣਿਦੀਪੇ ¶ ਯੋਜਨੇ ਯੋਜਨੇ ਥੂਪਂ ਕਾਰੇਤ੍ਵਾ ਧਾਤੁਯੋ ਪਤਿਟ੍ਠਾਪੇਸਿ ਭਗਵਤੋ ਪਤ੍ਤਂ ਪਨ ਰਾਜ ਗੇਹੇਯਵ ਠਪੇਤ੍ਵਾ ਪੂਜਮਕਾਸੀਤਿ.

ਨਿਧਾਪੇਤ੍ਵਾਨ ਸਮ੍ਬੁਦ੍ਧ-ਧਾਤੁਯੋ ਪਤ੍ਤਮਤ੍ਤਕਾ,

ਕਾਰਾਪੇਸਿ ਮਹਾਰਾਜ-ਥੂਪੇ ਯੋਜਨ ਯੋਜਨੇਤਿ;

ਯੋਜਨਥੂਪ ਕਥਾ

ਅਥ ਰਾਜਾ ਅਞ੍ਞਾਨਿ ਚ ਬਹੂਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਚਤ੍ਤਾਲੀਸ ਵਸ੍ਸਾਨਿ ਰਜ੍ਜਂ ਕਾਰੇਸਿ. ਤਸ੍ਸ ਅਚ੍ਚਯੇਨ ਤਂ ਕਨਿਟ੍ਠੋ ਉਤ੍ਤਿਯ ਰਾਜਾ ਦਸਵਸ੍ਸਾਨਿ ਰਜ੍ਜਂ ਕਾਰੇਸਿ. ਤਸ੍ਸ ਅਚ੍ਚਯੇਨ ਤਂ ਕਨਿਟ੍ਠੋ ਮਹਾਸੀਵੋ ਦਸਵਸ੍ਸਾਨੇਵ ਰਜ੍ਜਂ ਕਾਰੇਸਿ ਤਸ੍ਸ ਅਚ੍ਚਯੇਨ ਤਸ੍ਸਾਪਿ ਕਨਿਟ੍ਠੋ ਸੂਰਤਿਸ੍ਸੋ ਦਸਵਸ੍ਸਾਨੇਵ ਰਜ੍ਜਂ ਕਾਰੇਸਿ ਤਤੋ ਅਸ੍ਸਨਾਵਿਕ ਪੁਤ੍ਤਾ ਦ੍ਵੇ ਦਮਿਲ਼ਾ ਸੂਰਤਿਸ੍ਸਂ ਗਹੇਤ੍ਵਾ ਦ੍ਵੇਵੀਸ ਵਸ੍ਸਾਨਿ ਧਮ੍ਮੇਨ ਰਜ੍ਜਂ ਕਾਰੇਸੁਂ. ਤੇ ਗਹੇਤ੍ਵਾ ਮੁਟਸੀਵਸ੍ਸ ਰਞ੍ਞੋ ਪੁਤ੍ਤੋ ਅਸੇਲੋ ਨਾਮ ਦਸਵਸ੍ਸਾਨਿ ਰਜ੍ਜਂ ਕਾਰੇਸਿ ਅਥ ਚੋਲ਼ਰਟ੍ਠਤੋ ਅਗਨ੍ਤ੍ਵਾ ਏਲ਼ਾਰੋ ਨਾਮ ਦਮਿਲੋ ਅਸੇਲ ਭੂਪਤਿਂ ਗਹੇਤ੍ਵਾ ਚਤੁਚਤ੍ਤਾਲੀਸ ਵਸ੍ਸਾਨਿ ਰਜ੍ਜਂ ਕਾਰੇਸਿ ਏਲ਼ਾਰਂ ਗਹੇਤ੍ਵਾ ਦੁਟ੍ਠਗਾਮਣਿ ਅਭਯੋ ਰਾਜਾ ਅਹੋਸਿ.

ਤਦਤ੍ਥਦੀਪਨਤ੍ਥਂ ਅਯਮਨੁਪੁਬ੍ਬਕਥਾ

੧੫. ਦੇਵਾਨਮ੍ਪਿਯਤਿਸ੍ਸ ਰਞ੍ਞੋ ਕਿਰ ਦੁਤਿਯਭਾਤਿਕੋ ਉਪਰਾਜਾ ਮਹਾਨਾਗੋ ਨਾਮ ਅਹੋਸਿ. ਅਥ ਰਞ੍ਞੋ ਦੇਵੀ ਅਤ੍ਤਨੋ ਪੁਤ੍ਤਸ੍ਸ ਰਜ੍ਜਂ ਇਚ੍ਛਨ੍ਤਿ ਤਰਚ੍ਛਨਾਵਾ ਵਾਪਿਂ ਕਰੋਨ੍ਤਸ੍ਸ ਉਪਰਾਜਸ੍ਸਵਿਸੇਨ ਅਮ੍ਬਂ ਯੋਜੇਤ੍ਵਾ ਅਮ੍ਬਮਤ੍ਥਕੇ ਠਪੇਤ੍ਵਾ ਪੇਸੇਸਿ ਦੇਵਿਯਿ ਪੁਤ੍ਤੇ, ਉਪਰਾਜੇਨ ਸਦ੍ਧਿਂ ਗਤੋ ਭਾਜਨੇ ਵਿਵਟੇ ਸਯਮੇਵ ਅਮਬਂ ਗਹੇਤ੍ਵਾ ਖਾਦਿਤ੍ਵਾ ਕਾਲਮਕਾਸਿ ਉਪਰਾਜਾ ਤਂ ਕਾਰਣਂ ਞਤ੍ਵਾ ਦੇਵਿਯਾ ਭੀਤੋ ਤਤੋਯੇਵ ਅਤ੍ਤਨੋ ਦੇਵਿਞ੍ਚ ਬਲਵਾਹਨਞ੍ਚ ਗਹੇਤ੍ਵਾ ਰੋਹਣਂ ਅਗਮਾਸਿ. ਤਸ੍ਸ ਅਗ੍ਗਮਹੇਸਿ ਅਨ੍ਤਰਾਮਗ੍ਗੇ ਯਟ੍ਟਾਲਵਿਹਾਰੇ ਨਾਮ ਪੁਤ੍ਤਂ ਵਿਜਾਯਿ ਤਸ੍ਸ ਤਿਸ੍ਸੋਤਿ ਭਾਤੁਨਾਮ’ਮਕਂਸਿ.

ਸੋ ਤਤੋ ਗਨ੍ਤ੍ਵਾ ਮਹਾਗਾਮੇ ਵਸਨ੍ਤੋ ਰੋਹਣੇ ਰਜ੍ਜਂ ਕਾਰੇਸਿ ਤਸ੍ਸ ਅਚ੍ਚਯੇਨ ਤਸ੍ਸ ਪੁਤ੍ਤੋ ਯਟ੍ਟਾਲਤਿਸ੍ਸੋ ਮਹਾਗਾਮੇਯੇਵ ਰਜ੍ਜਂ ਕਾਰੇਸਿ. ਤਸ੍ਸ ਅਚ੍ਚਯੇਨ ਤਸ੍ਸਾਪਿ ਪੁਤ੍ਤੋ ਗੋਠਾਭਯੋ ਨਾਮ ਤਤ੍ਥੇਵ ਰਜ੍ਜਂ ਕਾਰੇਸਿ. ਗੋਠਾਭਯਸ੍ਸ ਪੁਤ੍ਤੋ ਕਾਕਵਣ੍ਣਤਿਸ੍ਸੋ ਨਾਮ ਤਤ੍ਥੇਵ ਰਜ੍ਜਂ ਕਾਰੇਸਿ. ਕਾਕਵਣ੍ਣਤਿਸ੍ਸ ਰਞ੍ਞੋ ਕਿਰ ਕਲ੍ਯਾਣਿਤਿਸ੍ਸ ਰਞ੍ਞੋ ਧੀਤਾ ਵਿਹਾਰਮਹਾਦੇਵੀ ਨਾਮ ਅਗ੍ਗਮਹੇਸਿ ਅਹੋਸਿ ਸਾ ਰਞ੍ਞੋ ਪਿਯਾ ਅਹੋਸਿ ਮਨਾਪਾ. ਰਾਜਾ ਤਾਯ ਸਦ੍ਧਿਂ ਸਮਗ੍ਗਵਾਸਂ ਵਸਨ੍ਤੋ ਪੁਞ੍ਞਾਨਿ ਕਰੋਨ੍ਤੋ ਵਿਹਾਸਿ. ਅਥੇਕਦਿਵਸਂ ਦੇਵੀ ਰਾਜਗੇਹੇਯੇਵ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਾਯਣ੍ਹਸਮਯੇ ¶ ਗਣ੍ਧਮਾਲਾਦੀਨਿ ਗਾਹਾਪੇਤ੍ਵਾ ਧਮ੍ਮਂ ਸੋਤੁਂ ਵਿਹਾਰਂਗਤਾ, ਤਤ੍ਥ ਨਿਪਨ੍ਨਂ ਬਾਲ਼੍ਹਗਿਲਾਨਂ ਆਸਨ੍ਨਮਰਣਂ ਸੀਲਵਨ੍ਤਂ ਸਾਮਣੇਰਂ ਦਿਸ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਅਤ੍ਤਨੋ ਸਮ੍ਪਤ੍ਤਿਂ ਵਣ੍ਣੇਤ੍ਵਾ ਮਮ ਪੁਤ੍ਤਭਾਵਂ ਪਤ੍ਥੇਥ ਭਨ੍ਤੇਤਿ ਯਾਚਿ.

ਸੋ ਨ ਇਚ੍ਛਿ, ਯਾਪਿ ਪੁਨਪ੍ਪੁਨ ਯਾਚਿਯੇਵ. ਸਾਮਣੇਰੋਪਿ ਏਵਂ ਸਨ੍ਤੇ ਸਾਸਨਾਨੁਗ੍ਗਹਂ ਕਾਤੁਂ ਸਕ੍ਕਾਤਿਸਮ੍ਪਟਿਚ੍ਛਿਤ੍ਵਾ ਗਤਿਨਿਮਿਤ੍ਤਵਸੇਨ ਉਪਟ੍ਠਿਤਮ੍ਪਿ ਦੇਵਲੋਕਂ ਛਡ੍ਡੇਤ੍ਵਾ ਨਿਕਨ੍ਤਿਵਸੇਨ ਸੁਵਣ੍ਣ ਸਿਵਿਕਾਯ ਗਚ੍ਛਨ੍ਤਿਯਾ ਦੇਵਿਯਾ ਕੁਚ੍ਛਿਮ੍ਹਿ ਪਟਿਸਣ੍ਧਿਂ ਗਣ੍ਹਿ.

ਸਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ. ਤਸ੍ਸ ਗਾਮਣਿ ਅਭਯੋਤਿ ਨਾਮਂ ਕਰਿਂਸੁ. ਅਪਰਭਾਗੇ ਅਪਰਮ੍ਪਿ ਤਸ੍ਸ ਤਿਸ੍ਸੋਤਿ ਨਾਮਂ ਕਰਿਂਸੁ. ਗਾਮਣਿ ਕੁਮਾਰੋ ਕਮੇਨ ਵਡ੍ਢੇਨ੍ਤੋ ਸੋਲ਼ਸ ਵਸ੍ਸਿਕੋ ਹੁਤ੍ਵਾ ਹਤ੍ਥਸ੍ਸ ਥਰਾ ਸਿਪ੍ਪੇਸੁ ਕੋਵਿਦੋ ਤੇਜੋਬਲ ਪਰਕ੍ਕਮ ਸਮ੍ਪਨ੍ਨੋ ਅਹੋਸਿ. ਅਥ ਖੋ ਕਾਕਵਣ੍ਣਤਿਸ੍ਸ ਰਾਜਾ ਨਣ੍ਧਿਮਿਤ੍ਤੋ-ਸੁਰਨਿਮ੍ਮਲੋ-ਮਹਾਸੇਨੋ-ਗੋਠਯਿਮ੍ਬਰੋ-ਥੇਰਪੁਤ੍ਤਾਭ- ਯੋ-ਭਰਣੋ-ਵੇਲ਼ੁਸੁਮਨੋ-ਖਞ੍ਚਦੇਵੋ-ਫੁਸ੍ਸਦੇਵੋ-ਲਭਿਯ੍ਯਵਸਭੋਤਿ ਇਮੇ ਦਸਾਮਹਾਯੋਧੇ ਪੁਤ੍ਤਸ੍ਸ ਸਨ੍ਤਿਕੇ ਠਪੇਤ੍ਵਾ ਵਾਸੇਸਿ.

ਤੇਸਂ ਉਪ੍ਪਤ੍ਤਿਕਥਾ ਮਹਾਵਂਸਤੋ ਗਹੇਤਬ੍ਬਾ ਰਾਜਾ ਦਸਮਹਾਯੋਧਾਨਂ ਪੁਤ੍ਤਸ੍ਸ ਸਕ੍ਕਾਰਸਮਂਸਕ੍ਕਾਰਂ ਕਾਰੇਸਿ ਤਿਸ੍ਸਕੁਮਾਰਂ ਜਨਪਦ ਰਕ੍ਖਨਤ੍ਥਾਯ ਦੀਘਵਾਪਿਯਂ ਠਪੇਸਿ ਅਥੇਕਦਿਵਸਂ ਗਾਮਿਣੀ ਕੁਮਾਰੋ ਅਤ੍ਤਨੋ ਬਲਵਾਹਨ ਸਮ੍ਪਤ੍ਤਿਂ ਦਿਸ੍ਵਾ ਦਮਿਲ਼ੇਹਿ ਸਦ੍ਧਿਂ ਯੁਜ੍ਝਸ੍ਸਾਮੀਤਿ ਰਞ੍ਞੋ ਕਥਾਪੇਸਿ. ਰਾਜਾ ਪੁਤ੍ਤਂ ਅਨੁਰਕ੍ਖਨ੍ਤੋ ਅਲਂ ਓਰਗਙ੍ਗਨ੍ਤਿ ਨਿਵਾਰੇਸਿ. ਸੋ ਯਾਵ ਤਤਿਯਂ ਕਥਾਪੇਸਿ ਰਾਜਾ ਕੁਜ੍ਝਿਤ੍ਵਾ ਹੇਮਸਙ੍ਖਲਿਕਂ ਕਰੋਥ ਬਣ੍ਧਿਤ੍ਵਾ ਰਕ੍ਖਿਸ੍ਸਾਮੀਤਿ. ਅਭਯੋ ਪਿਤੁ ਰਞ੍ਞੋ ਕੁਜ੍ਝਿਤ੍ਵਾ ਪਲਾਯਿਤ੍ਵਾ ਮਲਯਂ ਅਗਮਾਸਿ ਤਤੋ ਪਟ੍ਠਾਯ ਪਿਤਰਿ ਦੁਟ੍ਠਤ੍ਤਾ ਦੁਟ੍ਠਗਾਮਣੀਤਿ ਪਞ੍ਞਾਤੋ ਰਾਜਾ ਪੁਤ੍ਤਾਨਂ ਕਲਹਟ੍ਠਾਨਂ ਆਗਮਨਤ੍ਥਾਯ ਯੋਧੇਹਿ ਸਪਥਂ ਕਾਰੇਸਿ.

ਅਥ ਕਾਕਵਣ੍ਣਤਿਸ੍ਸ ਰਾਜਾ ਚਤੁਸਟ੍ਠਿਵਿਹਾਰੇ ਕਾਰੇਤ੍ਵਾ ਚਤੁਸਟ੍ਠਿ ਸਂਵਚ੍ਛਰਾਨੇਵ ਠਤ੍ਵਾ ਕਾਲਮਕਾਸਿ ਤਿਸ੍ਸਕੁਮਾਰੋ ਪਿਤੁਕਾਲਕਤਭਾਵਂ ਸੁਤ੍ਵਾ ਦੀਘਵਾਪਿਤੋ ਆਗਨ੍ਤ੍ਵਾ ਪਿਤੁ ਸਰੀਰਕਿਚ੍ਚਂ ਕਾਰੇਤ੍ਵਾ ਮਾਤਰਂ - ਕਣ੍ਡੁਲ ਹਤ੍ਥਿਞ੍ਚ ਗਹੇਤ੍ਵਾ ਭਾਤੁ ਭਯਾ ਦੀਘਵਾਪਿਂ ਅਗਮਾਸਿ. ਅਮਚ੍ਚਾ ਸਨ੍ਨਿਪਤਿਤ੍ਵਾ ਤਂ ਪਵਤ੍ਤਿਂ ਵਤ੍ਵਾ ਦੁਟ੍ਠਗਾਮਣਿਤਿਸ੍ਸ ਸਨ੍ਤਿਕਂ ਪੇਸੇਸੁਂ. ਸੋ ਤਂ ਸਾਸਨਂ ਸੁਤ੍ਵਾ ਭੁਤ੍ਤਸਾਲਂ ਆਗਮ੍ਮ ਭਾਤੁ ਸਨ੍ਤਿਕਂ ਦੂਤੇ ਪੇਸੇਤ੍ਵਾ ਤਤੋ ਮਹਾਗਾਮਂ ਆਗਨ੍ਤ੍ਵਾ ਅਭਿਸੇਕਂ ਪਤ੍ਵਾ ਮਾਤਰਂ ਕਣ੍ਡੁਲਹਤ੍ਥਿਞ੍ਚ ਪੇਸੇਤੂਤਿ ਯਾਵ ਤਤਿਯਂ ਭਾਤੁ ਸਨ੍ਤਿਕਂ ਲੇਖਾ ਪੇਸੇਤ੍ਵਾ ਅਪੇਸਨ ਭਾਵਂ ਞਤ੍ਵਾ ਯੁਦ੍ਧਾਯ ਨਿਕ੍ਖਮਿ. ਕੁਮਾਰੋਪਿ ਯੁਦ੍ਧਸਜ੍ਜੋਹੁਤ੍ਵਾਨਿਕ੍ਖਮਿ. ਚੁਲ਼ਙ੍ਗਣਿਯ ਪਿਟ੍ਠਿਯਂ ਦ੍ਵਿਨ੍ਨਂ ਭਾਤੂਨਂ ਮਹਾਯੁਦ੍ਧਂ ਅਹੋਸਿ.

ਤੇ ¶ ਕਿਰ ਯੋਧਾ ਸਪਥਸ੍ਸ ਕਤਤ੍ਤਾ ਤੇਸਂ ਯੁਦ੍ਧੇ ਸਹਾਯਾ ਨ ਭਵਿਂਸੁ. ਤਦਾ ਰਞ੍ਞੋ ਅਨੇਕਸਹਸ੍ਸ ਮਨੁਸ੍ਸਾ ਮਰਿਂਸੁ. ਰਾਜਾ ਪਰਜ੍ਜਿਤ੍ਵਾ ਤਿਸ੍ਸਾਮਚ੍ਚਂ ਦਿਘਤੁਣਿਕਂ ਵਲ਼ਵਞ੍ਚ ਗਹੇਤ੍ਵਾ ਪਲਾਯਿ. ਕੁਮਾਰੋ ਪਚ੍ਛਤੋ ਪਚ੍ਛਤੋ ਅਨੁਬਣ੍ਧਿ. ਅਨ੍ਤਰੇ ਭਿਕ੍ਖੁ ਪਬ੍ਬਤਂ ਮਾਪੇਸੁਂ. ਤਂ ਦਿਸ੍ਵਾ ਕੁਮਾਰੋ ਭਿਕ੍ਖੁਸਙ੍ਘਸ੍ਸ ਕਮ੍ਮਨ੍ਤਿ ਞਤ੍ਵਾ ਨਿਵਤ੍ਤਿ ਰਾਜਾ ਪਲਾਯਿਤ੍ਵਾ ਕਪ੍ਪਣ੍ਦਕਰ ਨਦਿਯਾ ਜਲਮਾਲਤਿਤ੍ਥਂ ਨਾਮ ਗਨ੍ਤ੍ਵਂ ਛਾਤੋਮ੍ਹਿਤਿ ਆਹ. ਅਮਚ੍ਚੋ ਸੁਵਣ੍ਣਸਰਕੇ ਪਕ੍ਖਿਤ੍ਤਭਤ੍ਤਾ ਨਿਹਰਿਤ੍ਵਾ ਅਦਾਸਿ.

ਰਾਜਾ ਕਾਲਂ ਸਲ੍ਲਕ੍ਖੇਤ੍ਵਾ ਸਙ੍ਘਸ੍ਸ ਦਤ੍ਵਾ ਭੁਞ੍ਜਾਮਿਤਿ ਸਙ੍ਘਸ੍ਸ-ਅਮਚ੍ਚਸ੍ਸ-ਵਲ਼ਵਾਯ-ਅਤ੍ਤਨੋ ਚਾਤਿ ਚਤੁਭਾਗਂ ਕਤ੍ਵਾ ਕਾਲਾ ਘੋਸਾਪੇਸਿ ਤਦਾ ਪਿਯਙ੍ਗੁਦਿਪਤੋ ਕੁਟੁਮ੍ਬਿਯਤਿਸ੍ਸਤ੍ਥੇਰੋ ਨਾਮ ਆਗਨ੍ਤ੍ਵਾ ਪੁਰਤੋ ਅਟ੍ਠਾਸਿ. ਰਾਜਾ ਥੇਰਂ ਦਿਸ੍ਵਾ ਪਸਨ੍ਨਮਾਨਸੋ ਸਙ੍ਘਸ੍ਸ ਠਪਿਤਭਾਗਂ ਅਤ੍ਤਨੋ ਭਾਗਞ੍ਚ ਥੇਰਸ੍ਸ ਪਤ੍ਤੇ ਪਕ੍ਖਿਪਿਂ ਅਮਚ੍ਚੋਪਿ ਅਤ੍ਤਨੋ ਭਾਗਂ ਪਕ੍ਖਿਪਿ ਵਲ਼ਵਾਪਿ ਦਾਤੁਕਾਮਾ ਅਹੋਸਿ. ਤਸ੍ਸਾਭਿਪ੍ਪਾਯਂ ਞਤ੍ਵਾ ਅਮਚ੍ਚੋ ਤਸ੍ਸਾਪਿ ਭਾਗਂ ਪਤ੍ਤੇ ਪਕ੍ਖਿਪਿ.

ਇਤਿ ਸੋ ਰਾਜਾ ਥੇਰਸ੍ਸ ਪਰਿਪੁਣ੍ਣ ਭਤ੍ਤਪਤ੍ਤਂ ਅਦਾਸਿ. ਥੇਰੋ ਪਤ੍ਤਂ ਗਹੇਤ੍ਵਾ ਗਨ੍ਤ੍ਵਾ ਗੋਤਮਤ੍ਥੇਰਸ੍ਸ ਨਾਮ ਅਦਾਸਿ. ਸੋ ਪਞ੍ਚਸਤ ਭਿਕ੍ਖੁ ਭੋਜੇਤ੍ਵਾ ਪੁਨ ਤਤੋ ਲਦ੍ਧੇਹਿ ਭਾਗੇਹਿ ਪਤ੍ਤਪੂਰੇਤ੍ਵਾ ਆਕਾਸੇ ਖਿਪਿ ਪਤ੍ਤੋ ਗਨ੍ਤ੍ਵਾ ਰਞ੍ਞੋ ਪੁਰਤੋ ਅਟ੍ਠਾਸਿ ਤਿਸ੍ਸੋ ਪਤ੍ਤਂ ਗਹੇਤ੍ਵਾ ਰਾਜਾਨਂ ਭੋਜੇਤ੍ਵਾ ਤਤੋ ਸਯਂ ਭੁਞ੍ਜਿਤ੍ਵਾ ਵਲ਼ਵਂ ਭੋਜੇਸਿ. ਤਤੋ ਰਾਜਾ ਸਨ੍ਨਾਹਂ ਚੁਮ੍ਬਟਕਂ ਕਤ੍ਵਾ ਪਤ੍ਤਂ ਵਿਸ੍ਸਜ੍ਜੇਸਿ. ਤਤੋ ਗਨ੍ਤ੍ਵਾ ਥੇਰਸ੍ਸ ਹਤ੍ਥੇ ਪਤਿਟ੍ਠਾਸਿ, ਰਾਜਾ ਪੁਨ ਮਹਾਗਾਮਂ ਆਗਨ੍ਤ੍ਵਾ ਸੇਨਂ ਸਙ੍ਕਡ੍ਡਿਵੋ ਸਟ੍ਠਿਸਹਸ੍ਸਬਲਾ ਗਹੇਤ੍ਵਾ ਪੁਨ ਭਾਤਰਾ ਸਦ੍ਧਿਂ ਯੁਜ੍ਝਿ ਤਦਾ ਕੁਮਾਰਸ੍ਸ ਅਨੇਕ ਸਹਸ੍ਸਂ ਮਨੁਸ੍ਸਾ ਪਤਿਂਸੁ.

ਕੁਮਾਰੋ ਪਲਾਯਿਤ੍ਵਾ ਵਿਹਾਰਂ ਪਵਿਸਿਤ੍ਵਾ ਮਹਾਥੇਰਸ੍ਸ ਗੇਹਂ ਪਾਵਿਸਿ.

ਰਾਜਾ ਪਚ੍ਛਤੋ ਪਚ੍ਛਤੋ ਅਨੁਬਣ੍ਧਨ੍ਤੋ ਵਿਹਾਰਂ ਪਵਿਟ੍ਠਭਾਵਂ ਞਤ੍ਵਾ ਨਿਵਤ੍ਤਿ ਪਚ੍ਛਾ ਥੇਰਾ ਤੇ ਉਭੋ ਭਾਤਰੋ ਅਞ੍ਞਮਞ੍ਞਂ ਖਮਾਪੇਸੁਂ. ਤਦਾ ਰਾਜਾ ਸਸ੍ਸਕਮ੍ਮਾਨਿ ਕਾਰੇਤੁਂ ਤਿਸ੍ਸਕੁਮਾਰਂ ਦੀਘਵਾਪਿਮੇਵ ਪਹਿਣਿਤ੍ਵਾ ਸਯਮ੍ਪਿ ਭੇਰਂ ਚਰਾਪੇਤ੍ਵਾ ਸਸ੍ਸਕਮ੍ਮਾਨਿ ਕਾਰੇਸਿ. ਅਥ ਮਹਾਜਨਸ੍ਸ ਸਙ੍ਗਹਂਕਤ੍ਵਾ ਕੁਨ੍ਤੇ ਧਾਤੁਂ ਨਿਧਾਪੇਤ੍ਵਾ ਬਲਵਾਹਨ ਪਰਿਵੁਤੋ ਤਿਸ੍ਸਾਰਾਮਂ ਗਨ੍ਤ੍ਵਾ ਸਙ੍ਘਂ ਵਨ੍ਦਿਤ੍ਵਾ ਭਨ੍ਤੇ ਸਾਸਨਂ ਜੋਤੇਤੁਂ ਪਾਰਗਙ੍ਗਂ ਗਮਿਸ੍ਸਾਮਿ ਸਕ੍ਕਾਰੇਤੁਂ ਅਮ੍ਹੇਹਿ ਸਹਗਾਮਿਨੋ ਭਿਕ੍ਖੁ ਦੇਥਾਤਿ ਆਹ.

ਸਙ੍ਘੋ ਪਞ੍ਚਸਤਭਿਕ੍ਖੁ ਅਦਾਸਿ. ਰਾਜਾ ਭਿਕ੍ਖੁਸਙ੍ਘਂ ਗਹੇਤ੍ਵਾ ਕਣ੍ਡੁਲਹਤ੍ਥਿਮਾਰੁਯ੍ਹ ਯੋਧੇਹਿ ਪਰਿਵੁਤੋ ਮਹਤਾ ਬਲਕਾਯੇਨ ਯੁਦ੍ਧਾਯ ¶ ਨਿਕ੍ਖਮਿਤ੍ਵਾ ਮਹਿਯਙ੍ਗਣਂ ਆਗਨਨ੍ਤ੍ਵਾ ਤਤ੍ਥ ਦਮਿਲ਼ੇਹਿ ਸਦ੍ਧਿਂ ਯੁਜ੍ਝਨ੍ਤੋ ਮਹਿਯਙ੍ਗਣੇ ਕਞ੍ਚੁਕ ਥੂਪਂ ਕਾਰੇਸਿ. ਤਸ੍ਸ ਥੂਪਸ੍ਸ ਵਿਭਾਵਨਤ੍ਥਂ ਅਯਮਾਨੁਪੁਬ੍ਬਕਥਾ.

੧੬. ਭਗਵਾ ਕਿਰ ਬੋਧਿਤੇ ਨਵਮੇ ਮਾਸੇ ਇਮਂ ਦੀਪਮਾਗਨ੍ਤ੍ਵਾ ਗਙ੍ਗਾਤੀਰੇ ਤਿਯੋਜਨਾਯਤੇ ਯੋਜਨਵਿਤ੍ਥਤੇ ਮਹਾਨਾਗਵਨੁਯ੍ਯਾਨੇ ਯਕ੍ਖਸਮਾਗਮਂ ਆਗਨ੍ਤ੍ਵਾ ਤੇਸਂ ਯਕ੍ਖਾਨਂ ਉਪਰਿਭਾਗੇ ਮਹਿਯਙ੍ਗਣ ਥੂਪਸ੍ਸ ਠਾਨੇ ਵੇਹਾਸਯਂ ਠਿਤੋ ਵੁਟ੍ਠਿ ਵਾਤਨ੍ਧਕਾਰਾਦੀਹਿ ਯਕ੍ਖੇ ਸਨ੍ਤਾਸੇਤ੍ਵਾ ਤੇਹਿ ਅਭਯਂ ਯਾਚਿਤੋ ਤੁਮ੍ਹਾਕਂ ਅਭਯਂ ਦਸ੍ਸਾਮਿ ਤੁਮ੍ਹੇ ਸਮਗ੍ਗਾ ਮਯ੍ਹਂ ਨਿਸੀਦਨਟ੍ਠਾਨਂ ਦੇਥਾਤਿ ਆਹ.

ਯਕ੍ਖਾ, ਮਾਰਿਸ ਤੇ ਇਮਂ ਸਕਲਦੀਪਂ ਦੇਮਿ. ਅਭਯਂ ਨੋ ਦੇਹੀਤਿ ਆਹਂਸੁ. ਤਤੋ ਭਗਵਾ ਤੇਸਂ ਭਯਂ ਅਪਨੁਦਿਤ੍ਵਾ ਤੇਹਿ ਦਿਨ੍ਨਭਭੂਮਿਯਂ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਤਤ੍ਥ ਨਿਸਿਨ੍ਨੋ ਤੇਜੋਕਸਿਣਂ ਸਮਾਪਜ੍ਜਿਤ੍ਵਾ ਚਮ੍ਮਖਣ੍ਡਂ ਸਮਨ੍ਤਤੋ ਜਾਲੇਤ੍ਵਾ ਵਡ੍ਢੇਸਿ. ਤੇ ਚਮ੍ਮਖਣ੍ਡੇਨ ਅਭਿਭੂਨਾ ਸਮਨ੍ਤਤੋ ਸਾਗਰ ਪਰਿਯਨ੍ਤੇ ਰਾਸਿਭੂਤਾ ਅਹੇਸੁਂ ਭਗਵਾ ਇਦ੍ਧਿਬਲੇਨ ਗਿਰਿਦੀਪਂ ਨਾਮ ਇਧਾਨੇਤ੍ਵਾ ਤਤ੍ਥ ਯਕ੍ਖੇ ਪਵੇਸੇਤ੍ਵਾ ਦੀਪਂ ਯਥਾਟ੍ਠਾਨੇ ਠਪੇਤ੍ਵਾ ਚਮ੍ਮਖਣ੍ਡਂ ਸਙ੍ਖਿਪਿ ਤਦਾ ਦੇਵਤਾ ਸਮਾਗਮੋ ਅਹੋਸਿ. ਤਸ੍ਮਿਂ ਸਮਾਗਮੇ ਭਗਵਾ ਧਮ੍ਮਂ ਦੇਸੇਸਿ-ਤਦਾ.

‘‘ਨੇਕੇਸਂ ਪਾਣਕੋਟੀਨਂ-ਧਮ੍ਮਾਭਿਸਮਯੋ ਅਹੂ,

ਸਰਣੇਸੁ ਚ ਸੀਲੇਸੁ-ਠਿਤਾ ਆਸੁਂ ਅਸਙ੍ਖਿਯਾ;

ਸੋਤਾਪਤ੍ਤਿਫਲਂ ਪਤ੍ਵਾ-ਸੇਲੇ ਸੁਮਨਕੂਟਕੇ,

ਮਹਾਸੁਮਨ ਦੇਵਿਣ੍ਦੋ-ਪੂਜਿਯਂ ਯਾਚਿ ਪੂਛਿਯਂ;

ਸਿਰਂ ਪਰਾਮਸਿਤ੍ਵਾਨ-ਨਿਲਾਮਲਸਿਰੋਰੁਹੇ,

ਪਾਣਿਮਤ੍ਤੇ ਅਦਾ ਕੇਸੇ ਤਸ੍ਸ ਪਾਣਿਹਿਤੋ ਜਿਨੋ;

ਸੋ ਤਂ ਸੁਵਣ੍ਣਿਚਙ੍ਗੋਟਂ-ਚਰੇਨਾਦਾਯ ਸਤ੍ਥੁਨੋ, ਨਿਸਿਨ੍ਨਟ੍ਠਾਨ ਰਚਿਤੇ-ਨਾਨਾਰਤਨਸਞ੍ਚਯੇ.

ਉਚ੍ਚਤੋ ਸਤ੍ਤਰਤਨੇ-ਠਪੇਤ੍ਵਾਨ ਸਿਰੋਰੁਹੇ,

ਤਂ ਇਣ੍ਦਨੀਲ ਥੂਪੇਨ-ਪਿਦਹੇਸਿ ਨਮਸ੍ਸਿ ਚ’’;

ਪਰਿਨਿਬ੍ਬੁਤੇ ਪਨ ਭਗਵਤਿ ਧਮ੍ਮਸੇਨਾਪਤਿ ਸਾਰਿ ਪੁਤ੍ਤਤ੍ਥੇਰਸ੍ਸ ਅਨ੍ਤੇਵਾਸਿਕੋ ਸਰਭੂ ਨਾਮੇਕੋ ਥੇਰੋ ਚਿਤਕਤੋ ਗੀਵਟ੍ਠਿਧਾਤੁ ਗਹੇਤ੍ਵਾ ਭਿਕ੍ਖੁ ਸਙ੍ਘਪਰਿਵੁਤੋ ਆਗਨ੍ਤ੍ਵਾ ਤਸ੍ਮਿਂਯੇਵ ਚੇਤਿਯੇ ਪਤਿਟ੍ਠਾਪੇਤ੍ਵਾ ਮੇਘਵਣ੍ਣਪਾਸਾਣੇਹਿ ਛਾਦੇਤ੍ਵਾ ਦ੍ਵਾਦਸ ਹਤ੍ਥੁਬ੍ਬੇਧਂ ਥੂਪਂ ਕਾਰੇਤ੍ਵਾ ਪਕ੍ਕਾਮਿ. ਅਥ ਦੇਵਾਨਮ੍ਪਿਯਤਿਸ੍ਸ ਰਞ੍ਞੋ ਭਾਤਾ ਚੂਲ਼ਾਭਯੋ ਨਾਮ ਤਂ ਅਬ੍ਭੁਤਂ ਚੇਤਿਯਂ ਦਿਸ੍ਵਾ ਤਿਂਸਹਤ੍ਥੁਬ੍ਬੇਧਂ ਚੇਤਿਯਂ ਕਾਰੇਸਿ. ਇਦਾਨਿ ਦੁਟ੍ਠਗਾਮਣੀਪਿ ਅਭਯਰਾਜਾ ਮਹਿਯਙ੍ਗਣਂ ਆਗਨ੍ਤ੍ਵਾ ਤਤ੍ਥ ਦਮਿਲ਼ੇ ਮਦ੍ਦਨ੍ਤੋ ਅਸਿਤਿਹਤ੍ਥੁਬ੍ਬੇਧਂ ਕਞ੍ਚੁਕਚੇਤਿਯਂ ਕਾਰੇਤ੍ਵਾ ਪੂਜਮਕਾਸਿ.

ਏਵਮਚ੍ਚਾਯਿਕਂ ¶ ਕਮ੍ਮਂ-ਕਰੋਨ੍ਤਾਪਿ ਗੁਣਾਕਰਾ, ਕਰੋਨ੍ਤਿ ਪੁਞ੍ਞਂ ਸਪ੍ਪਞ੍ਞਾ-ਸਂਸਾਰਭਸ ਭੀਰੁਕਾਤਿ.

ਮਹਿਯਙ੍ਗਨ ਥੂਪਕਥਾ

੧੭. ਤਤੋ ਰਾਜਾ ਦਮਿਲ਼ੇਹਿ ਸਦ੍ਧਿਂ ਯੁਜ੍ਝਿਤ੍ਵਾ ਛਤ੍ਤਦਮਿਲ਼ਂ ਗਣ੍ਹਿਤ੍ਵਾ ਤਤ੍ਰ ਬਹੁ ਦਮਿਲ਼ੇ ਘਾਤੇਤ੍ਵਾ ਅਮ੍ਬਤਿਤ੍ਥਂ ਆਗਨ੍ਤ੍ਵਾ ਅਮ੍ਬਦਮਿਲ਼ਂ ਚਤੂਹਿ ਮਾਸੇਹਿ ਗਣ੍ਹਿ. ਤਤੋ ਓਰੁਯ੍ਹ ਮਹਬ੍ਬਲੇ ਸਤ੍ਤਦਮਿਲ਼ੇ ਏਕਾਹੇਨੇਵ ਗਣ੍ਹਿ ਤਤੋ ਅਨ੍ਤਰਸੋਬ੍ਭੇ ਮਹਾਕੋਟ੍ਠ ਦਮਿਲ਼ਂ-ਦੋਣਗਾਮੇ ਗਵਰ ਦਮਿਲ਼ਂ-ਹਾਲਕੋਲੇ ਮਹਿਸ੍ਸਰਿਯ ਦਮਿਲ਼ਂ-ਨਾਲ਼ਿਸੋਬ੍ਭੇ ਨਾਲ਼ਿਕ ਦਮਿਲ਼ਂ-ਦਿਘਾਭਸਗਲ੍ਲਮ੍ਹਿ ਦਿਘਾਭਯ ਦਮਿਲ਼ਂ ਗਣ੍ਹਿ. ਤਤੋ ਕਚ੍ਛਤਿਤ੍ਥੇ ਕਿਞ੍ਚਿਸੀਸ ਦਮਿਲ਼ਂ ਚਤੂਹਿ ਮਾਸੇਹਿ ਗਣ੍ਹਿ ਤਤੋ ਵੇਠ ਨਗਰੇ ਤਾਲ਼ ਦਮਿਲ਼ਂ, ਭਾਣਕਦਮਿਲ਼ਞ੍ਚ-ਵਹਿਟ੍ਠੇ ਵਹਿਟ੍ਠ ਦਮਿਲ਼ਂ=ਗਾਮਣਿਮ੍ਹਿ ਗਾਮਣਿ ਦਮਿਲ਼ਂ-ਕੁਮ੍ਬੁਗਾਮਮ੍ਹਿ ਕੁਮ੍ਬੁ ਦਮਿਲ਼ਂ-ਨਣ੍ਦਿਕ ਗਾਮਮ੍ਹਿ ਨਣ੍ਦਿਕ ਦਮਿਲ਼ਂ-ਖਾਣੁਗਾਮਮ੍ਹਿ ਖਾਣੁ ਦਮਿਲ਼ਂ-ਤਮ੍ਬੁਨ੍ਨਗਾਮਕੇ ਮਾਤੁਲ ਭਾਗਿਨੇਯ੍ਯੇ ਦ੍ਵੇ ਦਮਿਲ਼ੇ ਗਣ੍ਹਿ ਤਦਾ-

‘‘ਅਜਾਨਿਤ੍ਵਾ ਸਕਂ ਸੇਨਂ-ਘਾਤੇਨ੍ਤਿ ਸਜਨਾ ਇਤਿ,

ਸੁਤ੍ਵਾਨ ਸਚ੍ਚਕਿਰਿਯਂ-ਅਕਰਿ ਤਤ੍ਥ ਭੁਪਤਿ;

ਰਜ੍ਜਸੁਖਾਯ ਵਾਯਾਮੋ-ਨਾਯਂ ਮਮ ਕਦਾਪਿ ਚ,

ਸਮ੍ਬੁਦ੍ਧਸਾਸਨਸ੍ਸੇਵ-ਠਪਨਾਯ ਅਯਂ ਮਮ;

ਤੇਨ ਸਚ੍ਚੇਨ ਮੇ ਸੇਨਾ-ਕਾਯੋਪਗਤ ਭਣ੍ਡਕਂ,

ਜਾਲਵਣ੍ਣਂਵ ਹੋਤੂਤਿ-ਤਂ ਤਥੇਵ ਤਦਾ ਅਹੁ;’’

ਏਵਂ ਰਾਜਾ ਗਙ੍ਗਾਤੀਰੇ ਦਮਿਲ਼ੇ ਘਾਤੇਸਿ. ਘਾਤਿਤ ਸੋ ਸਬ੍ਬੇ ਆਗਨ੍ਤ੍ਵਾ ਵਿਜਿਤ ਨਗਰੇ ਪਵਿਸਿਂਸੁ. ਤਦਾ ਰਾਜਾ ਵਿਜਿਤ ਨਗਰਂ ਗਣ੍ਹਿਤੁਂ ਵੀਮਂਸਨਤ੍ਥਾਯ ਆਗਚ੍ਛਨ੍ਤਂ ਨਣ੍ਧਿਮਿਤ੍ਤਂ ਦਿਸ੍ਵਾ ਕਣ੍ਡੁਲਂ ਮੁਞ੍ਚੇਸਿ. ਕਣ੍ਡੁਲੋਪਿ ਤਂ ਗਣ੍ਹਿਤੁਂ ਆਗਞ੍ਛਿ ਤਦਾ ਨਣ੍ਧਿਮਿਤ੍ਤੋ ਹਤ੍ਥੇਤਹਿ ਉਭੋ ਦਨ੍ਤੇ ਬਾਲ਼੍ਹਂ ਗਹੇਤ੍ਵਾ ਪੀਲ਼ੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਸਿ. ਰਾਜਾ ਉਭੋ ਵਿਮਂਸੇਤ੍ਵਾ ਵਿਜਿਤਨਗਰਂ ਆਗਤੋ. ਤਤੋ ਦਕ੍ਖਿਣਦ੍ਵਾਰੇ ਯੋਧਾਨਂ ਮਹਾਸਙ੍ਗਾਮੋ ਅਹੋਸਿ ਪੁਰਤ੍ਥਿਮਦ੍ਵਾਰੇ ਵੇਲ਼ੁਸੁਮਨੋ ਅਸ੍ਸਂ ਆਰੁਯ੍ਹ ਬਹੂ ਦਮਿਲ਼ੇ ਘਾਤੇਸਿ ਦਮਿਲ਼ਾ ਅਨ੍ਤੋ ਪਿਵਿਸਿਤ੍ਵਾ ਦ੍ਵਾਰਂ ਥਕੇਸੁਂ. ਤਤੋ ਰਾਜਾ ਯੋਧੇ ਵਿਸ੍ਸਜ੍ਜੇਸਿ, ਕਣ੍ਡੁਲਹਤ੍ਥਿ ਨਣ੍ਧਿਮਿਤ੍ਤੋ ਸੁਰਨਿਮ੍ਮਲੋ ਚ ਦਕ੍ਖਿਣਦ੍ਵਾਰੇ ਕਮ੍ਮਂ ਕਰਿਂਸੁ ਮਹਾਸੋਣੋ ਗੋਠਯਿਮ੍ਬਰੋ ਥੇਰਪੁਤ੍ਤਾਭਯੋ ਚਾਤਿ ਇਮੇ ਤਯੋ ਇਤਰੇਸੁ ਤੀਸੁ ਦ੍ਵਾਰੇਸੁ ਕਮ੍ਮਂ ਕਰਿਂਸੁ.

ਤਞ੍ਚ ਨਗਰਂ ਪਰਿਖਾਤ੍ਤਯ ਪਰਿਕ੍ਖਿਤ੍ਤਂ, ਦਲ਼੍ਹ ਪਾਕਾਰ ਗੋਪੁਰਂ, ਅਯੋ ਦ੍ਵਾਰਯੁਤ੍ਤਂ ਅਹੋਸਿ ਕਣ੍ਡੁਲੋ ਜਾਣੁਹਿ ਠਤ੍ਵਾ ਸਿਲਾ ਸੁਧਾ ਇਟ੍ਠਕਾ ਭਿਣ੍ਦਿਤ੍ਵਾ ਅਯੋਦ੍ਵਾਰਂ ਪਾਪੁਣਿ ਤਦਾ ਦਮਿਲ਼ਾ ਗੋਪੁਰੇ ਠਤ੍ਵਾ ਨਾਨਾਵੁਧਾਨਿ ¶ ਖਿਪਿਂਸੁ ਪਕ੍ਕ ਅਯੋਗੁਲ਼ੇ ਚੇਵਪਕ੍ਕਟ੍ਠਿਤ ਸਿਲੇਸਞ੍ਚ ਹਤ੍ਥਿਪਿਟ੍ਠਿਯਂ ਪਕ੍ਖਿਪਿਂਸੁ? ਤਦਾ ਕਣ੍ਡੁਲੋ ਵੇਦਨਟ੍ਟੋ ਉਦਕਟ੍ਠਾਨਂ ਗਨ੍ਤ੍ਵਾ ਉਦਕੇ ਓਗਾਹਿ. ਤਦਾ ਗੋਠਯਿਮ੍ਬਰੋ ਨ ਇਦਂ ਸੁਰਾਪਾਨਂ ਭਵਤਿ. ਅਯੋਦ੍ਵਾਰ ਵਿਘਾਟਨਂ ਨਾਮ, ਗਚ੍ਛ ਦ੍ਵਾਰਂ ਵਿਘਾਟੇਹੀਤਿ ਆਹ. ਤਂ ਸੁਤ੍ਵਾ ਜਾਤਾਭਿਮਾਤੋ ਕੁਞ੍ਚਨਾਦਂ ਕਤ੍ਵਾ ਉਦਨ ਉਗ੍ਗਮ੍ਮ ਥਲੇ ਅਟ੍ਠਾਸਿ ਅਥ ਹਤ੍ਥਿਵੇਜ੍ਜੋ ਸਿਲੇਸਂ ਧੋਵਿਤ੍ਵਾ ਓਸਧਂ ਅਕਾਸਿ. ਤਤੋ ਰਾਜਾ ਹਤ੍ਥਿਂ ਆਰੁਯ੍ਹ ਪਾਣਿਨਾ ਕੁਮ੍ਭੇ ਪਰਾਮਸਿਤ੍ਵਾ ਸਕਲ ਲਙ੍ਕਾਤਲੇ ਰਜ੍ਜਂ ਤਵ ਦਮ੍ਮੀਤਿ ਤੋਸੇਤ੍ਵਾ ਵਰਭੋਜਨਂ ਭੋਜੇਤ੍ਵਾ ਵਣਂ ਸਾਟਕੇਨ ਵੇਠੇਤ੍ਵਾ ਸੁਵਮ੍ਮੀਤਂ ਕਤ੍ਵਾ ਵਮ੍ਮਪਿਟ੍ਠਿਯਂ ਮਹਿਸਚਮ੍ਮਂ ਸਤ੍ਤਗੁਣਂ ਕਤ੍ਵਾ ਬਣ੍ਧਿਤ੍ਵਾ ਤਸ੍ਸੁਪਰਿ ਤੇਲਚਮ੍ਮਂ ਬਣ੍ਧਿਤ੍ਵਾ ਤਂ ਵਿਸ੍ਸਜ੍ਜੇਸਿ ਸੋ ਅਸਨਿ ਵਿਯਗਜ੍ਜਨ੍ਤੋ ਗਨ੍ਤ੍ਵਾ ਦਾਠਾਹਿ ਪਦਰਂ ਵਿਜ੍ਝਿਤ੍ਵਾ ਪਾਦੇਨ ਉਮ੍ਮਾਰਂ ਹਨਿ. ਦ੍ਵਾਰਂ ਬਾਹਾਹਿ ਸਦ੍ਧਿਂ ਅਯੋਦ੍ਵਾਰਂ ਮਹਾਸਦ੍ਦੇਨ ਭੂਮਿਯਂ ਪਤਿ. ਗੋਪੁਰੇ ਦਬ੍ਬਸਮ੍ਭਾਰਂ ਪਨ ਹਤ੍ਥਿਪਿਟ੍ਠਿਯਂ ਪਤਨ੍ਤਂ ਦਿਸ੍ਵਾ ਨਣ੍ਧਿਮਿਤ੍ਤੋ ਬਾਹਾਹਿ ਪਹਰਿਤ੍ਵਾ ਪਵਟ੍ਟੇਸਿ ਤਦਾ ਕਣ੍ਡੁਲੋ ਦਾਠਾਪੀਲ਼ਨਵੇਰਂ ਛਡ੍ਢੇਸਿ.

ਤਤੋ ਕਣ੍ਡੁਲੋ ਅਤ੍ਤਨੋ ਪਿਟ੍ਠਿਂ ਆਰੂਹਨਤ੍ਥਾਯ ਨਣ੍ਧਿਮਿਤ੍ਤਂ ਓਲੋਕੇਸਿ. ਸੋ ਤਯਾ ਕਤਮਗ੍ਗੇਨ ਨ ਪਵਿਸਿਸ੍ਸਾਮੀਤਿ ਅਟ੍ਠਾਰਸ ਹਤ੍ਥੁਬ੍ਬੇਧਂ ਪਾਕਾਰਂ ਬਾਹੁਨਾ ਪਹਰਿਤ੍ਵਾ ਅਟ੍ਠੁਸਹਪ੍ਪਮਾਣਂ ਪਾਕਾਰਪ੍ਪਦੇਸਂ ਪਾਤੇਤ੍ਵਾ ਸੁਰਨਿਮ੍ਮਲਂ ਓਲੋਕੇਸਿ ਸੋਪਿ ਤੇਨ ਕਤਮਗ੍ਗਂ ਅਨਿਚ੍ਛਨ੍ਤੋ ਪਾਕਾਰਂ ਲਡ੍ਡੀਤ੍ਵਾ ਨਗਰਬ੍ਭਨ੍ਤਰੇ ਪਤਿ ਗੋਠਯਿਮ੍ਬਰੋਪਿ - ਸੋਣੋਪਿ - ਥੇਰਪੁਤ੍ਤਾਭਯੋਪਿ ਏਕੇਕ ਦ੍ਵਾਰਂ ਭਿਣ੍ਦਿਤ੍ਵਾ ਪਵਿਸਿਂਸੁ-ਤਤੋ.

‘‘ਹਤ੍ਥਿ ਗਹੇਤ੍ਵਾ ਰਥਚਕ੍ਕਂ-ਮਿਤ੍ਤੋ ਸਕਟ ਪਞ੍ਜਰਂ,

ਨਾਲ਼ਿਕੇਰਤਰੁਂ ਗੋਠੋ-ਨਿਮ੍ਮਲੋ ਖਗ੍ਗਮੁਤ੍ਤਮਂ;

ਤਾਲਰੁਕ੍ਖਂ ਮਹਾਸੋਣੋ-ਥੇਰਪੁਤ੍ਤੋ ਮਹਾਗਦਂ,

ਵਿਸੁਂ ਵਿਸੁਂ ਵੀਥਿਗਤਾ-ਦਮਿਲ਼ੇ ਨਤ੍ਥ ਚੁਣ੍ਣਯੁਂ’’;

ਏਵਂ ਵਿਜਿਤਨਗਰਂ ਚਤੂਹਿ ਮਾਸੇਹਿ ਭਿਣ੍ਦਿਤ੍ਵਾ ਦਮਿਲ਼ੇ ਮਾਰੇਤ੍ਵਾ ਤਤੋ ਗਰਿਲੋਕਂ ਨਾਮ ਗਨ੍ਤ੍ਵਾ ਗਿਰਿਯ ਦਮਿਲ਼ਂ ਅਗ੍ਗਹੇਸਿ. ਤਤੋ ਮਹੇਲ ਨਗਰਂ ਗਨ੍ਤ੍ਵਾ ਚਤੂਹਿ ਮਾਸੇਹਿ ਮਹੇਲ ਰਾਜਾਨਂ ਗਣ੍ਹਿਂ ਤਤੋ ਰਾਜਾ ਅਨੁਰੁਧਪੁਰਂ ਗਚ੍ਛਨ੍ਤੋ ਪਰਿਤੋਕਾਸਪਬ੍ਬਤੇ ਨਾਮ ਖਣ੍ਧਾਵਾਰਂ ਨਿਵਾਸੇਤ੍ਵਾ ਤਤ੍ਥ ਤਲ਼ਾਕਂ ਕਾਰੇਤ੍ਵਾ ਜੇਟ੍ਠਮੂਲਮਾਸਮ੍ਹਿ ਉਦਕਕੀਲ਼ਂ ਕੀਲ਼ਿ. ਏਲ਼ਾਰੋਪਿ ਦੁਟ੍ਠਗਾਮਣਿਸ੍ਸ ਆਗਤਭਾਵਂ ਸੁਤ੍ਵਾ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਤ੍ਵਾ ਸ੍ਵੇ ਯੁਦ੍ਧਂ ਕਰਿਸ੍ਸਾਮਾਤਿ ਨਿਚ੍ਛਯਂ ਅਕਾਸਿ ਪੁਨਦਿਵਸੇ ਸਨ੍ਨਦ੍ਧੋ ਮਹਾਪਬ੍ਬਤ ਹਤ੍ਥਿਂ ਆਰੁਯ੍ਹ ਮਹਾ ਬਲਕਾਯ ਪਰਿਵੁਤੋ ਨਿਕ੍ਖਮਿ. ਗਾਮਣੀਪਿ ਮਾਤਰਾ ਸਦ੍ਧਿਂ ਮਨ੍ਤੇਤ੍ਵਾ ਦ੍ਵਤ੍ਤਿਂਸ ਬਲ ਕੋਟ੍ਠਕੇ ਕਾਰੇਤ੍ਵਾ ਛਤ੍ਤਧਰੇ ਰਾਜਰੂਪਕੇ ਤਤ੍ਥ ਤਤ੍ਥ ਠਪੇਸਿ. ਅਬ੍ਭਨ੍ਤਰ ਕੋਟ੍ਠਕੇ ਸਯਂ ਅਟ੍ਠਾਸਿ.

ਤਤੋ ¶ ਸਙ੍ਗਾਮੇ ਵਤ੍ਤਮਾਨੇ ਏਲ਼ਾਰ ਰਞ੍ਞੋ ਦੀਘਜਤ੍ਤੁ ਨਾਮ ਮਹਾ ਯੋਧੋ ਖਗ੍ਗਫਲਕਂ ਗਹੇਤ੍ਵਾ ਭੂਮਿਤੋ ਅਟ੍ਠਾਰਸ ਹਤ੍ਥਂ ਨਭਮੁਗ੍ਗਨ੍ਤ੍ਵਾ ਰਾਜਰੂਪਂ ਛਿਣ੍ਦਿਤ੍ਵਾ ਪਠਮਂ ਬਲ ਕੋਟ੍ਠਕਂ ਭਿਣ੍ਦਿ ਏਵਂ ਸੇਸੇਪਿ ਬਲਕੋਟ੍ਠਕੇ ਭਿਣ੍ਦਿਤ੍ਵਾ ਮਹਾਗਮਣਿਨਾ ਠਤਂ ਬਲਕੋਟ੍ਠਕਂ ਆਗਮਿ. ਤਦਾ ਸੁਰਨਿਮ੍ਮਲੋ ਰਞ੍ਞੋ ਪਰਿਗਚ੍ਛਨ੍ਤਂ ਦਿਸ੍ਵਾ ਅਤ੍ਤਨੋ ਨਾਮਂ ਸਾਵੇਤ੍ਵਾ ਤਂ ਅਕ੍ਕੋਸਿ ਤਂ ਸੁਤ੍ਵਾ ਦੀਘਜਨ੍ਤੁ ਪਠਮਂ ਇਮਂ ਮਾਰੇਮੀਤਿ ਕੁਜ੍ਝਿਤ੍ਵਾ ਆਕਸਮਬ੍ਭੁਗ੍ਗਨ੍ਤ੍ਵਾ ਅਤ੍ਤਨੋਪਰਿ ਓਤਰਨ੍ਤਂ ਦਿਸ੍ਵਾ ਸਰਨਿਮ੍ਮਲੋ ਅਤ੍ਤਨੋ ਫਲਕਂ ਉਪਨਾਮੇਸਿ. ਇਤਰੋਪਿ ਫਲਕੇਨ ਸਦ੍ਧਿਂ ਤਂ ਭਿਣ੍ਦਿਸ੍ਸ ਮੀਤਿ ਚਿਨ੍ਤੇਤ੍ਵਾ ਫਲਕਂ ਪਹਰਿ. ਇਤਰੋ ਫਲਕਂ ਮੁਞ੍ਚਿ, ਦੀਘਜਨ੍ਤੁ ਫਲਕਂ ਛਿਣ੍ਦਨ੍ਤੋ ਭੂਮਿਯਂ ਪਤਿ. ਸੁਰਨਿਮ੍ਮਲੋ ਤਂ ਸਤ੍ਤਿਯਾ ਪਹਰਿ, ਫੁਸ੍ਸਦੇਵੋ ਤਂ ਖਣੇ ਸਙ੍ਖਂ ਧਮਿ, ਅਸਨਿਸਦ੍ਦੋ ਵਿਯ ਅਹੋਸਿ ਉਮ੍ਮਾਦਪ੍ਪਤ੍ਤਾ ਵਿਯ ਮਨੁਸ੍ਸਾ ਅਹੇਸੁਂ. ਤਤੋ ਦਮਿਲ਼ ਸੇਨਾ ਭਿਜ੍ਜਿਤ੍ਥ, ਏਲ਼ਾਰੋ ਪਲਾਯਿਤ੍ਥ ਤਦਾਪਿ ਬਹੁ ਦਮਿਲ਼ੇ ਘਾਤੇਸੁਂ.

‘‘ਤਤ੍ਥ ਵਾਪਿਜਲਂ ਆਸਿ-ਹਤਾਨਂ ਲੋਹਿਤਾਵਿਲਂ,

ਤਸ੍ਮਾ ਕੁਲਤ੍ਥਵਾਪੀਤਿ-ਨਾਮਤੋ ਵਿਸ੍ਸੁਤਾ ਅਹੂ;

ਚਰਾਪੇਤ੍ਵਾ ਤਹਿਂ ਭੇਰਿਂ-ਦੁਟ੍ਠਗਾਮਿਣਿ ਭੂਪਤਿ,

ਨ ਹਨਿਸ੍ਸਤੁ ਏਲ਼ਾਰਂ-ਮਂ ਮੁਞ੍ਚਿਯ ਪਰੋ ਇਤਿ;

ਸਨ੍ਨਦ੍ਧੋ ਸਯਮਾਰੁਯ੍ਹ-ਸਨ੍ਨਦ੍ਧਂ ਕਣ੍ਡੁਲਂ ਕਰਿਂ,

ਏਲ਼ਾਰਂ ਅਨੁਬਣ੍ਧਨ੍ਤੋ-ਦਕ੍ਖਿਣਦ੍ਵਾਰ ਮਾਗਮਿ;

ਪੁਰੇ ਦਕ੍ਖਿਣਭਾਗਮ੍ਹਿ-ਉਭੋ ਯੁਜ੍ਝਿਂਸੁ ਭੂਮਿਪਾ,

ਤੋਮਰਂ ਖਿਪਿ ਏਲ਼ਾਰੋ-ਗਾਮਣਿ ਤਂ ਅਵਞ੍ਚਯਿ;

ਵਿਜ੍ਝਾਪੇਸਿ ਚ ਦਨ੍ਤੇਹਿ-ਤਂ ਹਤ੍ਥਿਂ ਸਕਹਤ੍ਥਿਨਾ,

ਤੋਮਰਂ ਖਿਪਿ ਏਲ਼ਾਰੋ-ਸਹਤ੍ਥਿ ਤਤ੍ਥ ਸੋ ਪਤਿ;

ਤਤੋ ਵਿਜਿਤ ਸਙ੍ਗਾਮੋ-ਸਯੋਗ੍ਗਬਲਵਾਹਨੋ,

ਲਙ੍ਕਾ ਏਕਾਤਪਤ੍ਤਂ ਸੋ-ਕਤ੍ਵਾਨ ਪਾਵਿਸਿ ਪੁਰਂ;’’

ਅਥ ਰਾਜਾ ਨਗਰੇ ਭੇਰਿਂ ਚਰਾਪੇਤ੍ਵਾ ਸਮਨ੍ਤਾ ਯੋਜਨਪ੍ਪਮਾਣੇ ਮਨੁਸ੍ਸੇ ਸਨ੍ਨਿਪਾਤੇਤ੍ਵਾ ਏਲ਼ਾਰ ਰਞ੍ਞੋ ਸਰੀਰਂ ਮਹਨ੍ਤਂ ਸਕ੍ਕਾਰਂ ਕਾਰੇਤ੍ਵਾ ਕੂਟਾਗਾਰੇਨ ਨੇਤ੍ਵਾ ਝਾਪੇਤ੍ਵਾ ਤਤ੍ਥ ਤੇਚਿਯਂ ਕਾਰੇਤ੍ਵਾ ਪਰਿਹਾਰਮਦਾਸਿ. ਅਜ੍ਜਪਿ ਰਾਜਾਨੋ ਤਂ ਪਦੇਸਮ੍ਪਤ੍ਵਾ ਭੇਰਿਂ ਨ ਵਾਦਾਪੇਨ੍ਤਿ. ਏਵਂ ਦੁਟ੍ਠਗਾਮਣਿ ਅਭਯ ਮਹਾਰਾਜਾ ਦ੍ਵਤ੍ਤਿਂਸ ਦਮਿਲ਼ ਰਾਜਾਨੋ ਮਾਰੇਤ੍ਵਾ ਲਙ੍ਕਾਦੀਪਂ ਏਕਚ੍ਛਤ੍ਤਮਕਾਸਿ.

ਯਦਾ ਦੁਟ੍ਠਗਾਮਣਿ ਵਿਜਿਤਂ ਨਗਰਂ ਗਣ੍ਹਿ ਤਦਾ ਦੀਘਜਨ੍ਤੁ ਯੋਧੋ ਏਲ਼ਾਰਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਭਾਗਿਨੇਯ੍ਯਸ੍ਸ ਭਲ੍ਲੁਕਸ੍ਸ ਯੋਧ ਭਾਵਂ ਆਚਿਕ੍ਖਿਤ੍ਵਾ ਇਧਾਗਮਨਤ੍ਥਾਯ ਤਸ੍ਸ ਸਨ੍ਤਿਕਂ ਪੇਸੇਸਿ. ਭਲ੍ਲੁਕੋਪਿ ਏਲ਼ਾਰਸ੍ਸ ਦਡ੍ਢਦਿਵਸਤੋ ਸਤ੍ਤਮੇ ਦਿਵਸੇ ਸਟ੍ਠਿਯਾ ਪੁਰਿਸ ¶ ਸਹਸ੍ਸੇਹਿ ਸਦ੍ਧਿਂ ਓਤਿਣ੍ਣੋ ਰਞ੍ਞੋ ਮਤਭਾਵਂ ਸੁਤ੍ਵਾਪਿ ਲਜ੍ਜਾਯ ਯੁਜ੍ਝਿਸ੍ਸਾਮੀਤਿ ਮਹਾਤਿਤ੍ਥਤੋ ਨਿਕ੍ਖਮਿਤ੍ਵਾ ਕੋਲਮ੍ਬਹਾਲਕੇ ਨਾਮ ਗਾਮੇ ਖਣ੍ਧਾਵਾਰਂ ਨਿਵੇਸੇਸਿ. ਰਾਜਾਪਿ ਤਸ੍ਸਾ’ਗਮਨਂ ਸੁਤ੍ਵਾ ਸਨ੍ਨਦ੍ਧੋ ਕਣ੍ਡੁਲਂ ਆਰੁਯ੍ਹ ਯੋਧਪਰਿਵੁਤੋ ਮਹਤਾ ਬਲਕਾਯੇਨ ਅਭਿਨਿਕ੍ਖਮਿ. ਫੁਸ੍ਸਦੇਵੋਪਿ ਪਞ੍ਚਾਵੁਧ ਸਨ੍ਨਦ੍ਧੋ ਰਞ੍ਞੋ ਪਚ੍ਛਿਮਾਸਨੇ ਨਿਸੀਦਿ. ਭਲ੍ਲੁਕੋਪਿ ਪਞ੍ਚਾਵੁਧ ਸਨ੍ਨਦ੍ਧੋ ਹਤ੍ਥਿਂ ਆਰੁਯ੍ਹ ਰਾਜਾਭਿਮੁਖੋ ਅਗਞ੍ਛਿ. ਤਦਾ ਕਣ੍ਡੁਲੋ ਤਸ੍ਸ ਵੇਗਮਣ੍ਦਿ ਭਾਵਤ੍ਥਂ ਸਨਿਕਂ ਸਨਿਕਂ ਪਚ੍ਚੋਸਕਕਿ ਸੇਨਾਪਿ ਹਤ੍ਥਿਨਾ ਸਦ੍ਧਿਂ ਤਥੇਵ ਪਚ੍ਚੋਸਕਕਿ.

ਰਾਜਾ ਫੁਸ੍ਸਦੇਵਂ ਆਹ ਅਯਂ ਹਤ੍ਥਿ ਪੁਬ੍ਬੇ ਅਟ੍ਠਵੀਸਤਿਯਾ ਯੁਦ੍ਧੇਸੁ ਅਪਚ੍ਚੋਸਕਕਿਤ੍ਵਾ ਇਦਾਨਿ ਕਸ੍ਮਾ ਪਨ ਪਚ੍ਚੋਸਕ੍ਕਤੀਤਿ. ਸੋ ਆਹਾਦੇਵ. ਅਮ੍ਹਾਕਮੇਵ ਜਯੋ ਅਯਂ ਗਜੋ ਜਯਭੂਮਿਂ ਅਵੇਕ੍ਖਨ੍ਤੋ ਪਚ੍ਚੋਸਕ੍ਕਤਿ ਜਯਭੂਮਿਂ ਪਤ੍ਵਾ ਠਸ੍ਸਤੀਤਿ? ਨਾਗੋਪਿ ਪਚ੍ਚੋਸਕਕਿਤ੍ਵ ਪੁਰ ਦੇਵਸ੍ਸ ਪਸ੍ਸੇ ਮਹਾਵਿਹਾਰ ਸੀਮਨ੍ਤੇ ਅਟ੍ਠਾਸਿ.

ਤਤੋ ਭਲ੍ਲੁਕੋ ਰਾਜਾਭਿਮੁਖਾ ਆਗਨ੍ਤ੍ਵਾ ਰਾਜਾਨਂ ਉਪ੍ਪਣ੍ਡੇਸਿ ਰਾਜਾਪਿ ਖਗ੍ਗਤਲੇਨ ਮੁਖਂ ਪਿਧਾਯ ਤਂ ਅਕ੍ਕੋਸਿ ਰਞ੍ਞੋ ਮੁਖੇ ਵਿਜ੍ਝਿਸ੍ਸਾਮੀਤਿ ਸਰਂ ਖਿਪਿ. ਸੋ ਖਗ੍ਗਤਲ ਮਾਗਚ੍ਚਭੂਮਿਯਂ ਪਤਿ, ਭਲ੍ਲੁਕੋ ਮੁਖੇ ਵਿਦ੍ਧੇਸ੍ਮਿਤਿ ਸਞ੍ਞਾਯ ਉਕ੍ਕੁਟ੍ਠਿ, ਅਕਾਸਿ ਤਦਾ ਰਞ੍ਞੋ ਪਚ੍ਛਿਮਾਸਨੇ ਨਿਸਿਨ੍ਨੋ ਫੁਸ੍ਸਦੇਵੋ ਰਞ੍ਞੋ ਕੁਣ੍ਡਲਂ ਘਟੇਨ੍ਤੋ ਤਸ੍ਸ ਮੁਖੇ ਕਣ੍ਡਂ ਪਾਤੇਸਿ ਰਞ੍ਞੋ ਪਾਦੇ ਕਤ੍ਵਾ ਪਤਮਾਨਸ੍ਸ ਜਾਣੁਮ੍ਹਿ ਅਪਰੇਨ ਕਣ੍ਡੇਨ ਵਿਜ੍ਝਿਤ੍ਵਾ ਰਞ੍ਞੋ ਸੀਸਂ ਕਤ੍ਵਾ ਪਾਤੇਸਿ. ਰਾਜਾ ਲਦ੍ਧਜਯੋ ਨਗਰਂ ਆਗਨ੍ਤ੍ਵਾ ਸਰਂ ਆਹਰਾਪੇਤ੍ਵਾ ਪੁਙ੍ਖੇਨ ਉਜੁਕਂ ਠਪਾਪੇਤ੍ਵਾ ਤਂ ਪਮਾਣਂ ਕਹਾਪਣਰਾਸਿਂ ਕਤ੍ਵਾ ਫੁਸ੍ਸਦੇਵਸ੍ਸ ਅਦਾਸਿ.

ਏਵਂ ਲਙ੍ਕਾਰਜ੍ਜਂ ਏਕਚ੍ਛਤ੍ਤਂ ਕਤ੍ਵਾ ਰਾਜਾ ਯੋਧਾਨਂ ਯਥਾਨੁਰੂਪਂ ਠਾਨਨ੍ਤਰਂ ਅਦਾਸਿ. ਥੇਰਪੁਤ੍ਤਾਭਯੋ ਪਨ ਦੀਯਮਾਨਂ ਟ੍ਠਾਨਨ੍ਤਰਂ ਨ ਗਣ੍ਹਿ ਕਸ੍ਮਾ ਨ ਗਣ੍ਹਸਿਤਿ ਪੁਚ੍ਛਿਨੋ ਯੁਦ੍ਧਂ ਅਤ੍ਥਿ ਮਹਾਰਾਜਾਤਿ ਆਹਂ. ਇਦਾਨਿ ਏਕਰਜ੍ਜੇ ਕਤੇ ਕਿਂ ਨਾਮ ਯੁਦ੍ਧਨ੍ਤਿ ਪੁਚ੍ਛਿਤੇ ਕਿਲੇਸ ਚੋਰੇਹਿ ਯੁਜ੍ਝਿਸ੍ਸ ਮੀਤਿ ਆਹ. ਰਾਜਾ ਪੁਨਪ੍ਪੁਨਂ ਨਿਵਾਰੇਸਿ ਸੋਪਿ ਪੁਨਪ੍ਪੁਨ ਯਾਚਿਤ੍ਵਾ ਰਾਜਾਨੁਞ੍ਞਾਯ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਅਰਹਤ੍ਤਂ ਪਤ੍ਵਾ ਪਞ੍ਚ ਖੀਣਾਸਵਸਤ ਪਰਿਵਾਰੋ ਅਹੋਸਿ.

ਤਤੋ ਰਾਜਾ ਅਤ੍ਤਨੋ ਪਾਸਾਦਤਲੇ ਸਿਰੀਸਯਨਗਤੋ ਮਹਤਿਂ ਸਮ੍ਪਤ੍ਤਿਂ ਓਲੋਕੇਤ੍ਵਾ ਅਕ੍ਖੋਭਿਣਿ ਸੇਨਾਘਾਤਂ ਅਨੁਸ੍ਸਰਿ. ਅਨੁਸ੍ਸਰਨ੍ਤਸ੍ਸ ਰਞ੍ਞੋ ਮਹਨ੍ਤਂ ਦੇਮਨਸ੍ਸਂ ਉਪ੍ਪਜ੍ਜਿ ਸਗ੍ਗ ਮਗ੍ਗਨ੍ਤਰਾਯੋ ਮੇ ਭਵੇਯ੍ਯਾਤਿ.

ਤਦਾ ਪਿਯਙ੍ਗੁਦੀਪੇ ਅਰਹਨ੍ਤੋ ਰਞ੍ਞੋ ਪਰਿਚਿਤਕ੍ਕਂ ਞਤ੍ਵਾ ਤਂ ਅਸ੍ਸਾਸੇਤੁਂ ਅਟ੍ਠ ਅਰਹਨ੍ਤੇ ਪੇਸ੍ਸੇ. ਤੇ ਆਗਨ੍ਤ੍ਵਾ ਆਗਤਭਾਵਾ ਨਿਵੇਦੇਤ੍ਵਾ ¶ ਪਾਸਾਦਤਲਂ ਅਭਿਰੁਹਿਂਸੁ ਰਾਜਾ ਥੇਰੇ ਵਨ੍ਦਿਤ੍ਵਾ ਆਸਨੇ ਨਿਸੀਦਾਪੇਤ੍ਵਾ ਆਗਤ ਕਾਰਣਂ ਪੁਚ੍ਛਿ. ਥੇਰਾਪਿ ਆਗਤ ਕਾਰਣਂ ਵਤ੍ਵਾ ਰਞ੍ਞੋ ਤੇਨ ਕਮ੍ਮੁਨਾ ਸਗ੍ਗ-ਮੋਕ੍ਖਨ੍ਤਰਾਯਭਾਵਂ ਬੋਧੇਤ੍ਵ ਪਕ੍ਕਮਿਂਸੁ ਰਾਜਾ ਤੇਸਂ ਵਚਨਂ ਸੁਤ੍ਵਾ ਅਸ੍ਸਾਸਂ ਪਟਿਲਭਿਤ੍ਵਾ ਵਨ੍ਦਿਤ੍ਵਾ (ਤੇ ਵਿਸ੍ਸਜ੍ਜੇਤ੍ਵਾ) ਸਿਰਿਸਯਨਗਤੋ ਪੁਨ ਚਿਨ੍ਤੇਸਿ.

ਮਾਤਿਪਿਤਰੋ ਖੋ ਪਨ ਮਾ ਚੋ ਕਦਾਚਿਪਿ ਵਿਨਾ ਸਙ੍ਘੇਨ ਆਹਾਰਂ ਭੁਞ੍ਜਥਾਤਿ ਅਮ੍ਹੇਹਿ ਸਪਥਂ ਕਾਰੇਸੁਂ ਭਿਕ੍ਖੁਸਙ੍ਘਸ੍ਸ ਅਦਤ੍ਵਾ ਭੁਤ੍ਤਂ ਅਤ੍ਥਿ ਨੁ ਖੋ ਨਤ੍ਥਿਤਿ ਚਿਨ੍ਤਯਨ੍ਤੋ ਸਤਿਸਮ੍ਮੋਸੇਨ ਸਙ੍ਘਸ੍ਸ ਅਦਤ੍ਵਾ ਪਾਤਰਾਸਕਾਲੇ ਪਰਿਭੁਤ੍ਤਂ ਏਕਂਯੇਵ ਮਰਿਚਵਟ੍ਟਿਂ ਅਦ੍ਦਸ. ਦਿਸ੍ਵਾ ਚ ਅਯੁਤ੍ਤਂ ਮਯਾ ਕਤਂ ਦਣ੍ਡਕਮ੍ਮਂ ਮੇ ਕਾਤਬ੍ਬਨ੍ਤੀ ਚਿਨ੍ਤੇਸਿ ਅਥ ਰਾਜਾ ਛਤ੍ਤਮਙ੍ਗਲ ਸਤ੍ਤਾਹੇ ਵੀਤਿਵਤ੍ਤੇ ਮਹਤਾ ਰਾਜਾਨੁਭਾਵੇਨ ਮਹਨ੍ਤੇਨ ਕੀਲ਼ਾਵਿਧਾਨੇਨ ਉਦਕਕੀਲ਼ਂ ਕੀਲ਼ਿਤੁਂ ਅਭਿਸਿਤ੍ਤਾਨਂ ਰਾਜੁਨਂ ਚਾਰਿਤ੍ਤਾਨੁ ਪਾਲਨਤ੍ਥਞ੍ਚ ਤਿਸ੍ਸਵਾਪਿਂ ਅਗਮਾਸਿ. ਰਞ੍ਞੋ ਸਬ੍ਬਂ ਪਰਿਚ੍ਛਦਂ ਉਪਾਹਨਛਤ੍ਤਾਨਿ ਚ ਮਰਿਚਵਟ੍ਟਿ ਵਿਹਾਰਟ੍ਠਾਨਮ੍ਹਿ ਠਪਯਿਂਸੁ.

ਤਤ੍ਰਾਪਿ ਥੂਪਟ੍ਠਾਨੇ ਰਾਜਪੁਰਿਸਾ ਰਞ੍ਞੋ ਸਧਾਤੁਕਂ ਕੁਨ੍ਤਂ ਉਜੁਕਂ ਠਪੇਸੁਂ. ਰਾਜਾ ਦਿਵਸਭਾਗਂ ਓਰੋਧ ਪਰਿਵੁਤੋ ਕੀਲ਼ਿਤ੍ਵਾ ਸਾਯਣ੍ਹੇ ਜਾਤੇ ਨਗਰਂ ਗਮਿਸ੍ਸਾਮ ਕੁਨ੍ਤਂ ਵਡ੍ਢੇਥਾਤਿ ਆਹ. ਰਾਜਪੁਰਿਸਾ ਕੁਨ੍ਤਂ ਗਣ੍ਹਨ੍ਤਾ ਚਾਲੇਤੁਂ ਨਾਸਕ੍ਖਿਂਸੁ ਰਾਜਸੇਨ, ਤਂ ਅਚ੍ਛਰਿਯਂ ਦਿਸ੍ਵਾ ਸਮਾਗਨ੍ਤ੍ਵਾ ਗਣ੍ਧਮਾਲਾਦੀਹਿ ਪੂਜੇਸਿ ਰਾਜਾਪਿ ਮਹਨ੍ਤਂ ਅਚ੍ਛਰਿਯਂ ਦਿਸ੍ਵਾ ਹਟ੍ਠਮਾਨਸੋ ਸਮਨ੍ਤਾ ਆਰਕ੍ਖਂ ਸਂਵਿਦਹਿਤ੍ਵਾ ਨਗਰਂ ਪਾਵਿਸਿ.

ਤਤੋ ਰਾਜਾ ਕੁਨ੍ਤਂ ਪਰਿਕ੍ਖਿਪਾਪੇਤ੍ਵਾ ਚੇਤਿਯਂ ਤਂ ਪਰਿਕ੍ਖਿਪਾਪੇਤ੍ਵਾ ਵਿਹਾਰਞ੍ਚ ਕਾਰੇਸਿ. ਵਿਹਾਰੋ ਤੀਹਿ ਸਂਵਚ੍ਛਰੇਹਿ ਨਿਟ੍ਠਾਸਿਂ ਰਾਜਾ ਵਿਹਾਰਮਹਤ੍ਥਾਯ ਸਙ੍ਘਂ ਸਨ੍ਨਿਪਾਤੇਸਿ ਭਿਕ੍ਖੂਨਂ ਸਤਸਹਸ੍ਸਾਨਿ ਭਿਕ੍ਖੁਨੀਨਂ ਨਵੁਤਿ ਸਹਸ੍ਸਾਨਿ ਸਨ੍ਨਿਪਤਿਂਸੁ ਤਸ੍ਮਿਂ ਸਮਾਗਮੇ ਰਾਜਾ ਸਙ੍ਘਂ ਵਨ੍ਦਿਤ੍ਵਾ ਏਵਮਾਹ ਭਨ੍ਤੇ ਵਿਸ੍ਸਰਿਤ੍ਵਾ ਵਿਨਾ ਸਙ੍ਘੇਨ ਮਰਿਚਵਟ੍ਟਿਕਂ ਪਰਿਭੁਞ੍ਜਿਂ ਤਦਤ੍ਥਂ ਦਣ੍ਡਕਮ੍ਮਂ ਮੇ ਹੋਤੂਤਿ-ਸਚੇਤਿਯਂ ਮਰਿਚਵਟ੍ਟਿਯਂ ਵਿਹਾਰਂ ਕਾਰੇਸਿਂ ਪਤਿਗਣ੍ਹਾਤੁ ਭਨ੍ਤੇ ਸਙ੍ਘੋ ਸਚੇਤਿਯਂ ਵਿਹਾਰਨ੍ਤਿ ਦਕ੍ਖਿਣੋਦਕਂ ਪਾਤੇਤ੍ਵਾ ਭਿਕ੍ਖੁਸਙ੍ਘਸ੍ਸ ਵਿਹਾਰਂ ਅਦਾਸਿ.

ਵਿਹਾਰਸ੍ਸ ਸਮਨ੍ਤਤੋ ਭਿਕ੍ਖੁਸਙ੍ਘਸ੍ਸ ਨਿਸੀਦਨਤ੍ਥਾਯ ਮਹਨ੍ਤਂ ਮਣ੍ਡਪਂ ਕਾਰੇਸਿ ਮਣ੍ਡਪ ਪਾਦਾ ਅਭਯਵਾਪਿਯਾ ਜਲੇ ਪਤਿਟ੍ਠਿਤਾ ਅਹੇਸੁਂ. ਸੇਸੋਕਾਸੇ ਕਥਾਚਨਤ੍ਥਿ. ਤਤ੍ਥ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਬ੍ਬਪਰਿਕ੍ਖਾਰਂ ਅਦਾਸਿ. ਤਤ੍ਥ ਸਙ੍ਘਤ੍ਥੇਰੇਨ ਲਦ੍ਧ ਪਰਿਕ੍ਖਾਰੋ ਸਤਸਹਸ੍ਸਗ੍ਘਨਕੋ ਅਹੋਸਿ.

ਏਵਂ- ¶

‘‘ਯੁਦ੍ਧੇ ਦਾਨੇ ਚ ਸੂਰੇਨ-ਸੂਰਿਨਾ ਰਤਨਤ੍ਤਮੇ,

ਪਸਨ੍ਨਾਮਲਚਿਤ੍ਤੇਨ-ਸਾਸਨੁਜ੍ਜੋਤਨਤ੍ਥਿਨਾ;

ਰਞ੍ਞਾ ਕਤਞ੍ਞੁਨਾ ਤੇਨ-ਥੂਪਕਾਰਾਪਨਾਦਿਤੋ,

ਵਿਹਾਰਮਹਨਨ੍ਤਾਨਿ - ਪੂਜੇਤੁਂ ਰਤਨਤ੍ਤਯਂ;

ਪਰਿਚ੍ਚਤ੍ਤਧਨਾਨੇਤ੍ਥ-ਅਨਗ੍ਘਾਨਿ ਵਿਮੁਞ੍ਚਿਯ,

ਸੇਸਾਨਿ ਹੋਨ੍ਤਿ ਏਕਾਯ-ਊਨਾ ਵਿਸਤਿਕੋਟਿਯੋ;’’

ਏਵਂ ਸਪਞ੍ਞੋ ਭਿਦੂਰੇ ਅਸਾਰੇ,

ਦੇਹੇ ਧਨੇ ਸਙ੍ਗਮਤਿਕ੍ਕਮਿਤ੍ਵਾ

ਕਤ੍ਵਾਨ ਪੁਞ੍ਞਂ ਸੁਖਸਾਦਨਤ੍ਥਂ,

ਸਾਰਂ ਗਹੇਤੁਂ ਸਤਤਂ ਯਤੇਯ੍ਯਾਤਿ;

ਮਰੀਚਵਟ੍ਟਿ ਵਿਹਾਰਕਥਾ

੧੮. ਤਤੋ ਰਾਜਾ ਚਿਨ੍ਤੇਸਿ ਮਹਾਮਹਿਣ੍ਦਤ੍ਥੇਰੋ ਕਿਰ ਮਮ ਅਯ੍ਯਕਸ੍ਸ ਦੇਵਾਨਮ੍ਪਿਯਤਿਸ੍ਸ ਰਞ੍ਞੋ ਏਵਮਾਹ. ਨਤ੍ਤਾ ਤੇ ਮਹਾਰਾਜ ਦੁਟ੍ਠਗਾਮਣਿ ਅਭਯੋ ਵਿਸਂ ਹਤ੍ਥਸਤਿਕਂ ਸੋਵਣ੍ਣਮਾਲਿਂ ਥੂਪਂ ਕਾਰੇਸ੍ਸਤਿ. ਸਙ੍ਘਸ੍ਸ ਚ ਉਪੋਸਥਾਗਾਰਭੂਤਂ ਨਵਭੂਮਕਂ ਲੋਹਪਾਸਾਦਂ ਕਾਰੇਸ੍ਸਤੀਤਿ ਚਿਨ੍ਤੇਤ੍ਵਾ ਚ ਪਨ ਓਲੋਕੇਨ੍ਤੋ ਰਾਜਗੇਹੇ ਕਰਣ੍ਡਕੇ ਠਪਿਤਂ ਸੁਵਣ੍ਣਪਟ੍ਟਲੇਖਂ ਦਿਸ੍ਵਾ ਤਂ ਵਾਚੇਸਿ. ਅਨਾਗਤੇ ਚਤ੍ਤਾਲੀਸਂ ਵਸ੍ਸਸਤਂ ਅਤਿਕ੍ਕਮ੍ਮ ਕਾਕਵਣ੍ਣਤਿਸ੍ਸਸ੍ਸ ਪੁਤ੍ਤੋ ਦੁਟ੍ਠਗਾਮਣਿ ਅਭਯੋ ਇਦਞ੍ਚਿਦਞ੍ਚ ਕਾਰੇਸ੍ਸਤੀਤਿ ਸੁਤ੍ਵਾ ਹਟ੍ਠੋ ਉਦਗ੍ਗੋ ਅਪ੍ਪੋਠੇਸਿ-ਅਯ੍ਯੇਨ ਕਿਰ ਵਤਮ੍ਹਿ ਦਿਟ੍ਠੋ ਮਹਾ ਮਹਿਣ੍ਦੇਨਾਤਿ.

ਤਤੋ ਪਾਤੋਵ ਮਹਾਮੇਘਵਨਂ ਗਨ੍ਤ੍ਵਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍ਵਾ ਏਤਦਵੋਚ? ਭਨ੍ਤੇ ਭਿਕ੍ਖੁਸਙ੍ਘਸ੍ਸ ਉਪੋਸਥਾਗਾਰਂ ਕਤ੍ਵਾ ਦੇਵਵਿਮਾਨ ਸਦਿਸਂ ਪਾਸਾਦਂ ਕਾਰੇਸ੍ਸਾਮਿ ਦੇਵਲੋਕਂ ਪੇਸੇਤ੍ਵਾ ਪਟੇ ਵਿਮਾਨਾਕਾਰਂ ਲਿਖਾਪੇਤ੍ਵਾ ਮੇ ਦੇਥਾਤਿ? ਸਙ੍ਘੋ ਅਟ੍ਠ ਖੀਣਾਸਵੇ ਪੇਸੇਸਿ. ਤੇ ਤਾਵਤਿਂਸਭਵਨਂ ਗਨ੍ਤ੍ਵਾ ਦ੍ਵਾਦਸਯੋਜਨੁਬ੍ਬੇਧਾ ਅਟ੍ਠਚਤ੍ਤਾਲੀਸ ਯੋਜਨ ਪਰਿਕ੍ਖੇਪਂ ਕੂਟਾਗਾਰਂ ਸਹਸ੍ਸ ਪਤਿਮਣ੍ਡਿਤਂ ਨਵਭੂਮਕਂ ਸਹਸ੍ਸਗਬ੍ਭਂ ਖੀਰਣ ਦੇਵਧੀਤਾਯ ਪੁਞ੍ਞਾਨੁਭਾਵਨਿਬ੍ਬਤ੍ਤਂ ਆਕਾਸਟ੍ਠਂ ਰਤਨਪਾਸਾਦਂ ਓਲੋਕੇਤ੍ਵਾ ਹਿਙ੍ਗੁਲਕੇਨ ਪਟੇ ਤਦਾਕਾਰਂ ਲਿਖਿਤ੍ਵਾ ਆਨੇਤ੍ਵਾ ਭਿਕ੍ਖੁਸਙ੍ਘਸ੍ਸ ਅਦਂਸੁ ਸਙ੍ਘੋ ਰਞ੍ਞੋ ਪਾਹੇਸਿ.

ਤਂ ਦਿਸ੍ਵਾ ਰਾਜਾ ਤੁਟ੍ਠਮਾਨਸੋ ਤਦਾ ਤਂ ਲੇਖਤੁਲ੍ਯਂ ਲੋਹਪਾਸਾਦਂ ਕਾਰੇਸਿ. ਕਮ੍ਮਨ੍ਤਾਰਮ੍ਭ ਕਾਲੇ ਪਨ ਚਤੁਸੁ ਦ੍ਵਾਰੇਸੁ ਅਟ੍ਠਸਤਸਹਸ੍ਸਾਨਿ ਹਿਰਞ੍ਞਾਨਿ ਠਪਾਪੇਸਿ ਤਦਾ ਚਤੁਸੁ ਦ੍ਵਾਰੇਸੁ ਸਹਸ੍ਸ ਸਹਸ੍ਸਂ ਵਤ੍ਥਪੁਟਾਨਿ ਚੇਵ ਗੁਲ਼-ਤੇਲ-ਸਕ੍ਖਰ-ਮਧੁਪੁਰਾ ਅਨੇਕਸਹਸ੍ਸਚਾਟਿਯੋ ਚ ¶ ਠਪਾਪੇਸਿ. ਪਾਸਾਦੇ ਅਮੂਲਕੇਨ ਕਮ੍ਮਂ ਨ ਕਾਤਬ੍ਬਨ੍ਤਿ ਭੇਰਿਂ ਚਾਰਪੇਤ੍ਵਾ ਅਮੂਲਕੇਨ ਕਤਕਮ੍ਮਂ ਅਗ੍ਘਾਪੇਤ੍ਵਾ ਕਾਰਕਾਨਂ ਮੂਲਂ ਦਾਪੇਸਿ. ਪਾਸਾਦੋ ਏਕੇਕੇਨ ਪਸ੍ਸੇਨ ਹਤ੍ਥਸਤ ਹਤ੍ਥਸਤਪ੍ਪਮਾਣੋ ਅਹੋਸਿ ਤਥਾ ਉਬ੍ਬੇਧਨ, ਨਵਭੂਮਾਯੋ ਚਸ੍ਸ ਅਹੇਸੁਂ ਏਕੇਕਿਸ੍ਸਾ ਭੂਮਿਯਾ ਸਤਂ ਸਤਂ ਕੂਟਾਗਾਰਾਨਿ, ਤਾਨਿ ਸਬ੍ਬਾਨਿਪਿ ਰਤਨਖਚਿਤਾਨਿ ਚੇਵ ਸੁਵਣ੍ਣ ਕਿਙ੍ਕਿਣਿਕਾਪਨ੍ਤਿ ਪਰਿਕ੍ਖਿਤ੍ਤਾਨਿ ਚ ਅਹੇਸੁਂ ਤੇਸਂ ਕੂਟਾਗਾਰਾਨਿ ਨਾਨਾਰਤਨ ਭੂਸਿਕਾ ਪਵਾਲ਼ ਵੇਦਿਕਾ ਚੇਵ, ਤਾਸਂ ਪਦੁਮਾਨਿ ਚ ਨਾਨਾਰਤਨ ਵਿਚਿਤ੍ਤਾਨੇਵ ਅਹੇਸੁਂ. ਤਥਾ ਸਹਸ੍ਸਗਬ੍ਭਾ ਚ ਨਾਨਾਰਤਨ ਖਚਿਤਾ ਸੀਯਪਞ੍ਜਰ ਵਿਭੂਸਿਤਾ ਚ. ਵੇਸ੍ਸਵਨਸ੍ਸ ਨਾਰਿਵਾਭਨਯਾਨਂ ਸੁਤ੍ਵਾ ਤਦਾਕਾਰਂ ਮਜ੍ਝੇ ਰਤਨ ਮਣ੍ਡਪਂ ਕਾਰੇਸਿ.

ਸੋ ਅਨੇਕੇਹਿ ਰਤਨਤ੍ਥਮ੍ਭੇਹਿ ਸੀਹਵ੍ਯਗ੍ਘਾਦਿ ਰੂਪੇਹਿ ਦੇਵਤਾ ਰੂਪੇਹਿ ਚ ਪਤਿਮਣ੍ਡਿਤੋ ਸਮਨ੍ਤਤੋ ਓਲਮ੍ਬਕ ਮੁਤ੍ਤਾ ਜਾਲੇਨ ਚ ਪਰਿਕ੍ਖਿਤ੍ਤੋ ਅਹੋਸਿ ਪਵਾਲ਼ਵੇਦਿਕਾ ਚਸ੍ਸ ਪੁਬ੍ਬੇ ਵੁਤ੍ਤਪ੍ਪਕਾਰਾਵ ਸਤ੍ਤਰਤਨ ਵਿਚਿਤ੍ਤਮਣ੍ਡਪ ਮਜ੍ਝੇ ਪਨ ਏਲ਼ਿਕਮਯ ਭੂਮਿਯਾ ਦਨ੍ਤਮਯ ਪਲ੍ਲਙ੍ਕੋ ਅਹੋਸਿ ਅਪਸ੍ਸੇਨਮ੍ਪਿ ਦਨ੍ਤਮਯਮੇਵ, ਸੋ ਸੁਵਣ੍ਣਸੂਰਿਯਮਣ੍ਡਲੇਹਿ ਰਜਤ ਚਣ੍ਦ ਮਣ੍ਡਲੇਹਿ ਮੁਤ੍ਤਾਮਯ ਤਾਰਕਾਹਿ ਚ ਵਿਚਿਤ੍ਤੋ ਤਤ੍ਥ ਤਤ੍ਥ ਯਥਾਰਹਂ ਨਾਨਾਰਤਨਮਯ ਪਦੁਮਾਨਿ ਚੇਵ ਪਸਾਦ ਜਨਕਾਨਿ ਚ ਜਾਤਕਾਨਿ ਅਨ੍ਤਰਨ੍ਤਰਾ ਸੁਵਣ੍ਣਲਤਾਯੋ ਚ ਕਾਰੇਸਿ. ਤਤ੍ਥ ਮਹਗ੍ਘਂ ਪਚ੍ਚਤ੍ਥਰਣਂ ਅਤ੍ਥਰਿਤ੍ਵਾ ਮਨੁਞ੍ਞਂ ਦਨ੍ਤ ਵਿਜਨਿਂ ਠਪੇਸਿ. ਪਵਾਲ਼ਮਯ ਪਾਦੁਕਾ ਕਾਰੇਸਿ. ਤਥਾ ਪਲ੍ਲਙ੍ਕਸ੍ਸੋਪਰਿ ਏਲ਼ਿਕਭੂਮਿਯਾ ਪਤਿਟ੍ਠਿਤਂ ਰਜਤਮਯਦਣ੍ਡਂ ਸੇਤਚ੍ਚਤ੍ਤਂ ਕਾਰੇਸਿ. ਤਤ੍ਥ ਸਤ੍ਤਰਤਨਮਯਾਨਿ ਅਟ੍ਠਮਙ੍ਗਲਾਨਿ ਅਨ੍ਤਰਨ੍ਤਰਾ ਚ ਮਣਿਮੁਤ੍ਤਾਮਯਾ ਚਤੁਪ੍ਪਾਦ ਪਨ੍ਤਿਯੋ ਚ ਕਾਰੇਸਿ. ਛਤ੍ਤਨ੍ਤੇ ਚਸ੍ਸ ਰਤਨਮਯ ਘਣ੍ਟਾਪਨ੍ਤਿਯੋ ਓਲਮ੍ਬਿਂਸੁ.

ਪਾਸਾਦੋ ਛਤ੍ਤਂ ਪਲ੍ਲਙ੍ਕੋ ਮਣ੍ਡਪੋ ਚਾਤਿ ਚਤ੍ਤਾਰੋ ਅਨਗ੍ਘਾ ਅਹੇਸੁਂ ਮਹਗ੍ਘਾਨਿ ਮਞ੍ਚਪੀਠਾਨਿ ਪਞ੍ਞਤ੍ਵੋ ਤਤ੍ਥ ਮਹਗ੍ਘਾਨਿ ਕਮ੍ਬਲਾਨਿ ਭੁਮ੍ਮਤ੍ਥਰਣਾਨਿ ਅਤ੍ਥਰਾਪੇਸਿ ਆਵਮਨ ਕੁਮ੍ਹਿ ਉਲ਼ੁਙ੍ਕੋ ਚ ਸੋਵਣ੍ਣਮਯਾਯੇਵ ਅਹੇਸੁਂ. ਸੇਸ ਪਰਿਭੋਗ ਭਣ੍ਡੇਸੁ ਵਤ੍ਤਬ੍ਬਮੇਵ ਨਤ੍ਥਿ ਦ੍ਵਾਰਕੋਟ੍ਠਕੋਪਿ ਮਨੋਹਰ ਪਾਕਾਰੇਨ ਪਰਿਕ੍ਖਿਤ੍ਤੋ. ਤਮ੍ਬਲੋਹਿਟ੍ਠਿਕਾਭਿ ਪਨ ਛਾਦਿਤਤ੍ਤਾ ਪਾਸਾਦਸ੍ਸ ਲੋਹਪਾਸਾਦੋਤਿ ਵੋਹਾਰੋ ਅਹੋਸਿ.

ਏਵਂ ਤਾਵਤਿਂਸਭਵਨੇ ਦੇਵਸਭਾ ਵਿਯ ਪਾਸਾਦਂ ਨਿਟ੍ਠਾਪੇਤ੍ਵਾ ਸਙ੍ਘਂ ਸਨ੍ਨਿਪਾਤੇਸਿ. ਮਰਿਚਵਟ੍ਟਿ ਵਿਹਾਰਮਗੇ ਵਿਯ ਸਙ੍ਘੋ ਸਨ੍ਨਿਪਤਿ. ਪਠਮਭੂਮਿਯਂ ਪੁਥੁਜ੍ਜਨਾਯੇਵ ਅਟ੍ਠਂਸੁ ਦੁਤਿਯਭੂਮਿਯਾ ਤੇਪਿਟਕਾ, ਤਤਿਯਾਦਿਸੁ ਤੀਸੁ ਭੂਮਿਸੁ ਕਮੇਨ ਸੋਤਾਪਨ੍ਨ - ਸਕਦਾਗਾਮਿ - ਅਨਾਗਾਮਿਨੋ, ਉਪਰਿ ਚਤੁਸੁ ਭੂਮਿਸੁ ਖੀਣਾਸਵਾਯੇਵ ਅਟ੍ਠਂਸੁ. ਏਵਂ ਸਙ੍ਘਂ ਸਨ੍ਨਿਪਾਤੇਤ੍ਵਾ ਸਙ੍ਘਸ੍ਸ ਪਾਸਾਦਂ ਦਤ੍ਵਾ ਮਰਿਚਵਟ੍ਟਿ ਵਿਹਾਰਮਹੇ ਵਿਯ ਸਤ੍ਤਾਹਂ ਮਹਾਦਾਨਮਦਾਸੀਤਿ.

‘‘ਪਾਸਾਦਹੇਤੁ ¶ ਚਤ੍ਤਾਨਿ-ਮਹਾਚਾਗੇਨ ਰਾਜਿਨਾ,

ਅਨਗ੍ਘਾਨਿ ਠਪੇਤ੍ਵਾਨ-ਅਹੇਸੁਂ ਤਿਂਸਕੋਟਿਯੋ;’’

ਪਹਾਯ ਗਮਨੀਯਨ੍ਤਂ-ਦਤ੍ਵਾਨ ਧਨਸਞ੍ਚਯਂ,

ਅਨੁਗਾਮਿਧਨਂ ਦਾਨਂ-ਏਵਂ ਕੁਬ੍ਬਨ੍ਤਿ ਪਣ੍ਡਿਤਾ;

੧੯. ਅਥੇਕਦਿਵਸਂ ਰਾਜਾ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਮਹਾਬੋਧਿ ਪੂਜਂ ਕਾਰੇਤ੍ਵਾ ਨਗਰਂ ਪਵਿਸਨ੍ਤੋ ਥੂਪਟ੍ਠਾਨੇ ਪਤਿਟ੍ਠਿਤਂ ਸਿਲਾਥੂਪਂ ਦਿਸ੍ਵਾ ਮਹਿਣ੍ਦਤ੍ਥੇਰੇਨ ਵੁਤ੍ਤਵਚਨਂ ਅਨੁਸ੍ਸਰਿਤ੍ਵਾ ਮਹਾਥੂਪਂ ਕਾਰੇਸ੍ਸਾਮੀਤਿ ਕਤਸਨ੍ਨਿਟ੍ਠਾਨੋ ਨਗਰਂ ਪਵਿਸਿਤ੍ਵਾ ਮਹਂਤਲਂ ਆਰੁਯ੍ਹ ਸੁਭੋਜਨਂ ਭੁਞ੍ਜਿਤ੍ਵਾ ਸਿਰਿਸਯਨਗਤੋ ਏਵਂ ਚਿਨ੍ਤੇਸਿ ਮਯਾ ਦਮਿਲ਼ੇ ਮਦ੍ਦਮਾਨੇਨ ਅਯਂ ਲੋਕੋ ਅਤਿਵਿਯ ਪੀਲ਼ਿਤੋ, ਕੇਨ ਨੁ ਖੋ ਉਪਾਯੇਨ ਲੋਕਸ੍ਸ ਪਿਲ਼ਨਂ ਅਕਤ੍ਵਾ ਧਮ੍ਮੇਨ ਸਮੇਨ ਮਹਾ ਚੇਤਿਯਸ੍ਸ ਅਨੁਚ੍ਛਵਿਕਂ ਇਟ੍ਠਕਾ ਉਪ੍ਪਾਦੇਸ੍ਸਾਮੀਤਿ ਤਂ ਚਿਨ੍ਤਿਤਂ ਛਤ੍ਤਂ ਅਧਿਵਤ੍ਥਾ ਦੇਵਤਾ ਜਾਨਿਤ੍ਵਾ ਰਾਜਾ ਏਵਂ ਚਿਨ੍ਤੇਸੀਤਿ ਉਗ੍ਘੋਸੇਸਿ.

ਪਰਮ੍ਪਰਾਯ ਦੇਵਲੋਕੇਪਿ ਕੋਲਾਹਲਮਹੋਸਿ ਤਂ ਞਤ੍ਵਾ ਸਕ੍ਕੋ ਦੇਵਰਾਜਂ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ’ਤਾਤ! ਵਿਸ੍ਸ ਕਮ੍ਮ! ਦੁਟ੍ਠਗਾਮਣਿ ਅਭਯ ਮਹਾਰਾਜਾ ਮਹਾ ਚੇਤਿਯਸ੍ਸ ਇਟ੍ਠਕਤ੍ਥਾਯ ਚਿਨ੍ਤੇਸਿ. ਤ੍ਵਂ ਗਨ੍ਤ੍ਵਾ ਉਤ੍ਤਰਪਸ੍ਸੇ ਨਗਰਤੋ ਯੋਜਨਪ੍ਪਮਾਣੇ ਠਾਨੇ ਗਮ੍ਭਿਰ ਨਦਿਯਾ ਤੀਰੇ ਇਟ੍ਠਕਾ ਮਾਪੇਤ੍ਵਾ ਏਹਿ’ਤਿ ਪੇਸੇਸਿ.

ਤਂ ਞਤ੍ਵਾ ਵਿਸ੍ਸਕਮ੍ਮ ਦੇਵਪੁਤ੍ਤੋ ਆਗਨ੍ਤ੍ਵਾ ਤਤ੍ਥੇਵ ਮਹਾਚੇਤਿਯਾਨੁਚ੍ਛਵਿਕਂ ਇਟ੍ਠਕਾ ਮਾਪੇਤ੍ਵਾ ਦੇਵਪੁਰਮੇਵ ਗਤੋ. ਪੁਨ ਦਿਵਸੇ ਏਕੋ ਸੁਨਖਲੁਦ੍ਦੋ ਸੁਨਖੇ ਗਹੇਤ੍ਵਾ ਅਰਞ੍ਞਂ ਗਨ੍ਤ੍ਵਾ ਤਤ੍ਥ ਤਤ੍ਥ ਵਿਚਰਨ੍ਤੋ ਤਂ ਠਾਨਂ ਪਤ੍ਵਾ ਇਟ੍ਠਕਾ ਅਦਿਸ੍ਵਾ ਚ ਨਿਕ੍ਖਮਿ. ਤਸ੍ਮਿਂ ਖਣੇ ਏਕਾ ਭੁਮ੍ਮਾ ਦੇਵਤਾ ਤਸ੍ਸ ਇਟ੍ਠਕਾ ਦਸ੍ਸੇਤੁਂ ਮਹਨ੍ਤਂ ਗੋਧਾਵਣ੍ਣਂ ਗਹੇਤ੍ਵਾ ਲੁਦ੍ਦਸ੍ਸ ਸੁਨਖਾਨਞ੍ਚ ਅਤ੍ਤਾਨਂ ਦਸ੍ਸੇਤ੍ਵਾ ਤੇਹਿ ਅਨੁਬਦ੍ਧੋ ਇਟ੍ਠਕਾਭਿਮੁਖਂ ਅਤ੍ਤ੍ਵਾ ਅਨ੍ਤਰਧਾਯਿ.

ਸੁਨਖਲੁਦ੍ਦੋ ਇਟ੍ਠਕਾ ਦਿਸ੍ਵਾ ਅਮ੍ਹਾਕਂ ਰਾਜਾ ਥੂਪਂ ਕਾਰੇਤੁਕਾਮੋ, ਮਹਨ੍ਤੋ ਵਤ ਨੋ ਪਣ੍ਣਾਕਾਰੋ ਲਦ੍ਧੋਤਿ ਹਟ੍ਠਮਾਨਸੋ ਪੁਨ ਦਿਵਸੇ ਪਾਤੋਚ ਆਗਨ੍ਤ੍ਵਾ ਅਤ੍ਤਨਾ ਦਿਟ੍ਠਂ ਇਟ੍ਠਕ ਪਣ੍ਣਾਕਾਰਂ ਰਞ੍ਞੋ ਨਿਵੇਦੇਸਿ. ਰਾਜਾ ਤਂ ਸਾਸਨਂ ਸੁਤ੍ਵਾ ਅਤ੍ਤਮਨੋ ਹੁਤ੍ਵਾ ਤਸ੍ਸ ਮਹਨ੍ਤਂ ਸਕ੍ਕਾਰਂ ਕਾਰੇਤ੍ਵਾ ਤਂਯੇਵ ਇਟ੍ਠਕ ਗੋਪਨਂ ਕਾਰੇਸਿ. ਤਤੋ ਰਾਜਾ ਅਹਮੇਵ ਇਟ੍ਠਕੋਲੋਕਨਤ੍ਥਾਯ ਗਚ੍ਛਾਮਿ - ਕੁਨ੍ਤਂ ਵਡ੍ਢੇਥਾਤਿ ਆਹ.

ਤਸ੍ਮਿਂਯੇਵ ਖਣੇ ਪੁਨ ਅਞ੍ਞਂ ਸਾਸਨਂ ਆਹਰਿਂਸੁ. ਨਗਰਤੋ ਤਿਯੋਜਨਮਤ੍ਥਕੇ ਠਾਨੇ ਪੁਬ੍ਬੁਤ੍ਤਰਕਣ੍ਣੇ ਆਚਾਰ ਵਿਟ੍ਠਿਗਾਮੇ ਤਿਯਾਮਰਤ੍ਤਿਂ ਅਭਿਪ੍ਪਵਟ੍ਟੇ ਦੇਵੇ ਸੋਲ਼ਸ ਕਰੀਸਪ੍ਪਮਾਣੇ ਪਦੇਸੇ ਸੁਵਣ੍ਣਬੀਜਾਨਿ ਉਟ੍ਠਹਿਂਸੁ. ਤਾਨਿ ਪਮਾਣਤੋ ਉਕ੍ਕਟ੍ਠਾਨਿ ਵਿਦਤ੍ਥਿਪ੍ਪਮਾਣਾਨਿ. ਓਮਕਾਨਿ ਅਟ੍ਠਙ੍ਗੁਲਪ੍ਪਮਾਣਾਨਿ ਅਹੇਸੁਂ, ਅਥ ਵਿਭਾਤਾਯ ਰਤ੍ਤਿਯਾ ¶ ਗਾਮਵਾਸਿਨੋ ਸੁਵਣ੍ਣਬਿਜਾਨਿ ਦਿਸ੍ਵਾ ਰਾਛਾ’ਰਹਂ ਵਤ ਭਣ੍ਡਂ ਉਪ੍ਪਨ੍ਨਨ੍ਤਿ ਸਮਨ੍ਤਤੋ ਆਰਕ੍ਖਾ ਸਂਵਿਦਹਿਤ੍ਵਾ ਸੁਵਣ੍ਣਬੀਜਾਨਿ ਪਾਤਿਯਂ ਪੂਰੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਦਸ੍ਸੇਸੁਂ ਰਾਜਾ ਤੇਸਮ੍ਪਿ ਯਥਾਰਹਂ ਸਕ੍ਕਾਰਂ ਕਾਰੇਤ੍ਵਾ ਤੇਯੇਵ ਸੁਵਣ੍ਣ ਗੋਪਕੇ ਅਕਾਸਿ.

ਅਥ ਤਸ੍ਮਿਂਯੇਵ ਖਣੇ ਅਞ੍ਞਂ ਸਾਸਨਂ ਆਹਰਿਂਸੁ. ਨਗਰਤੋ ਪਾਚੀਨਪਸ੍ਸੇ ਸਤ੍ਤਯੋਜਨ ਮਤ੍ਥਕੋ ਠਾਨੇ ਪਾਰਗਙ੍ਗਾਯ ਤਮ੍ਬਵਿਟ੍ਠਿ ਨਾਮ ਜਨਪਦੇ ਤਮ੍ਬਲੋਹਂ ਉਪ੍ਪਜ੍ਜਿ. ਗਾਮਿਕਾ ਪਾਤਿਂ ਪੂਰੇਤ੍ਵਾ ਤਮ੍ਬਲੋਹਂ ਗਹੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਦਸ੍ਸੇਸੁਂ ਰਾਜਾ ਯਥਾਨੁਰੂਪਂ ਸਕ੍ਕਾਰਂ ਤੇਸਮ੍ਪਿ ਕਾਰੇਤ੍ਵਾ ਤੇਯੇਵ ਗੋਪਕੇ ਅਕਾਸਿ.

ਤਦਨਨ੍ਤਰਂ ਅਞ੍ਞਂ ਸਾਸਨਂ ਆਹਰਿਂਸੁ. ਪੁਰਤੋ ਚਤੁਯੋਜਨਮਤ੍ਥਕੋ ਠਾਨੇ ਪੁਬ੍ਬਦਕ੍ਖਿਣ ਕਣ੍ਣੇ ਸੁਮਨਵਾਪਿਗਾਮੇ ਉਪ੍ਪਲਕੁਰੁਵਿਣ੍ਦ ਮਿਸ੍ਸਕਾ ਬਹੂ ਮਣਯੋ ਉਪ੍ਪਜ੍ਜਿਂਸੁ ਗਾਮਿਕਾ ਪਾਤਿਂ ਪੂਰੇਤ੍ਵਾ ਆਗਨ੍ਤ੍ਵਾ ਮਾਨਯੋ ਰਞ੍ਞੋ ਦਸ੍ਸੇਸੁਂ. ਰਾਜਾ ਤੇਸਮ੍ਪਿ ਸਕ੍ਕਾਰਂ ਕਾਰੇਤ੍ਵਾ ਤੇਯੇਵ ਗੋਪਕੇ ਅਕਾਸਿ.

ਤਦਨਨ੍ਤਰਂ ਅਞ੍ਞਮ੍ਪਿ ਸਾਸਨਂ ਆਹਰਿਂਸੁ. ਨਗਰਤੋ ਦਕ੍ਖਿਣ ਪਸ੍ਸੇ ਅਟ੍ਠਯੋਜਨ ਮਤ੍ਥਕੇ ਠਾਨੇ ਅਮ੍ਬਟ੍ਠਕੋਲ ਜਨਪਦੇ ਏਕਸ੍ਮਿਂ ਲੇਣੇ ਰਜਤਂ ਉਪ੍ਪਜ੍ਜਿ ਤਸ੍ਮਿਂ ਸਮਯੇ ਨਗਰਵਾਸਿਕੋ ਏਕੋ ਵਾਣਿਜੋ ਬਹੂਹਿ ਸਕਟੇਹਿ ਹਲ਼ਿਦ੍ਦਿ ਸਿਙ੍ਗਿਵੇਰਾਦੀਨਮਤ੍ਥਾਯ ਮਲਯਂ ਗਤੋ, ਲੇਣਸ੍ਸ ਅਵਿਦੂਰੇ ਸਕਟਾਨਿ ਮੁਞ੍ਚਿਤ੍ਵਾ ਪਤੋਦਦਾਰੁਂ ਪਰਿਯੇਸਨ੍ਤੋ ਤਂ ਪਬ੍ਬਤਂ ਅਭਿਰੂਲ਼੍ਹੋ ਏਕਂ ਪਣਸਯਟ੍ਠਿਂ ਅਦ੍ਦਸ.

ਤਸ੍ਸ ਮਹਨ੍ਤਂ ਚਾਟਿਪ੍ਪਮਾਣਂ ਏਕਮੇਵ ਪਣਸ ਫਲਂ ਨਰੁਣਯਟ੍ਠਿਂ ਨਾਮੇਤ੍ਵਾ ਹੇਟ੍ਠਾ ਪਾਸਾਣਪਿਟ੍ਠਿਯਂ ਅਟ੍ਠਾਸਿ. ਸੋ ਤਂ ਫਲਭਾਰੇਨ ਨਮਿਤਂ ਦਿਸ੍ਵਾ ਉਪਗਨ੍ਤ੍ਵਾ ਹਤ੍ਥੇਨ ਪਰਾਮਸਿਤ੍ਵਾ ਪਕ੍ਕਭਾਵਂ ਞਤ੍ਵਾ ਵਣ੍ਟਂ ਛਿਣ੍ਦਿ ਪਣਸਯਟ੍ਠਿ ਉਗ੍ਗਨ੍ਤ੍ਵਾ ਯਟਾਟ੍ਠਾਨਂ ਅਟ੍ਠਾਸਿ ਵਾਣਿਜੋ ਅਗ੍ਗਂ ਦਤ੍ਵਾ ਭੁਞ੍ਜਿਸ੍ਸਾਮੀਤਿ ਚਿਨ੍ਤੇਤ੍ਵਾ ਕਾਲਂ ਘੋਸੇਸਿ. ਤਦਾ ਚਤ੍ਤਾਰੋ ਖੀਣਾਸਵ ਆਗਨ੍ਤ੍ਵਾ ਤਸ੍ਸ ਪੁਰਤੋ ਪਾਤੁਰਹੇਸੁਂ. ਵਾਣਿਜੋ ਤੇ ਦਿਸ੍ਵਾ ਅਤ੍ਤਮਨੋ ਪਾਦੇ ਵਨ੍ਦਿਤ੍ਵਾ ਨਿਸੀਦਾਪੇਤ੍ਵਾ ਤਸ੍ਸ ਫਲਸ੍ਸ ਵਣ੍ਟਾਸਮਨ੍ਤਾ ਵਾਸਿਯਾ ਤਚ੍ਛੇਤ੍ਵਾ ਅਪਸ੍ਸਯਂ ਲੁਞ੍ਚਿਤ੍ਵਾ ਅਪਨਾਮੇਸਿ. ਸਮਨ੍ਤਤੋ ਯੁਸਂ ਓਤਰਿਤ੍ਵਾ ਅਪਸ੍ਸਯਾਨਿਤਂ ਆਵਾਟਂ ਪੂਰੇਸਿ ਵਾਣਿਜੋ ਮਨੋਸਿਲੋਦਕਵਣ੍ਣ ਪਣਸਯੁਸਂ ਪਤ੍ਤੇ ਪੂਰੇਤ੍ਵਾ ਅਦਾਸਿ. ਤੇ ਖੀਣਾਸਵਾ ਤਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸਮਬ੍ਭੁਗ੍ਗਨ੍ਤ੍ਵਾ ਪਕ੍ਕਮਿਂਸੁ.

ਸੋ ਪੁਨ ਕਾਲਂਘੋਸੇਸਿ ਅਞ੍ਞੇ ਚਤ੍ਤਰੋ ਖੀਣਾਸਵਾ ਆਗਮਿਂਸੁ. ਤੇਸਮ੍ਪਿ ਹਤ੍ਥਤੋ ਪਤ੍ਤੇ ਗਹੇਤ੍ਵਾ ਸੁਵਣ੍ਣਵਣ੍ਣੇਹਿ ਪਨ ਸਮਿਞ੍ਜੇਹਿ ਪੂਰੇਤ੍ਵਾ ਅਦਾਸਿ ਤੇਸੁ ਤਯੋ ਥੇਰਾ ਆਕਾਸੇਨ ਪਕ੍ਕਮਿਂਸੁ ਇਤਰੋ ਇਣ੍ਦਗੁਤ੍ਤਤ੍ਥੇਰੋ ਨਾਮ ਖੀਣਾਸਵੋ ਤਸ੍ਸ ਤਂ ਰਜਤਂ ¶ ਦਸ੍ਸੇਤੁਕਾਮੋ ਉਪਰਿ ਪਬ੍ਬਤਾ ਓਤਰਿਤ੍ਵਾ ਤਸ੍ਸ ਲੇਣਸ੍ਸ ਅਵਿਦੂਰੇ ਨਿਸੀਦਿਤ੍ਵਾ ਪਣਸ ਮਿਞ੍ਜਂ ਪਰਿਭੁਞ੍ਜਤਿ ਉਪਾਸਕੋ ਥੇਰਸ੍ਸ ਗਤਕਾਲੇ ਅਵਸੇਸ ਮਿਞ੍ਜਂ ਅਤ੍ਤਨਾਪਿ ਖਾਦਿਤ੍ਵਾ ਸੇਸਕਂ ਭਣ੍ਡਿਕਂ ਕਤ੍ਵਾ ਆਦਾਯ ਗਚ੍ਛਨ੍ਤੋ ਥੇਰਂ ਦਿਸ੍ਵਾ ਉਦਕਞ੍ਚ ਪਤ੍ਤਧੋਵਨਸਾਖਞ੍ਚ ਅਦਾਸਿ.

ਥੇਰੋਪਿ ਲੇਣਦ੍ਵਾਰੇਨ ਸਕਟ ਸਮੀਪਗਾਮਿ ਮਗ੍ਗਂ ਮਾਪੇਤ੍ਵਾ ਇਮਿਨਾ ਮਗ੍ਗੇਨ ਗਚ੍ਛ ਉਪਾਸਕਾਤਿ ਆਹ. ਸੋ ਥੇਰਂ ਵਨ੍ਦਿਤ੍ਵਾ ਤੇਨ ਮਗ੍ਗੇਨ ਗਚ੍ਛਨ੍ਤੋ ਲੇਣਦ੍ਵਾਰਂ ਪਤ੍ਵਾ ਸਮਨ੍ਤਾ ਲੇਣਂ ਓਲੋਕੇਨ੍ਤੋ ਤਂ ਰਜਤਰਾਸਿਂ ਦਿਸ੍ਵਾ ਰਜਤਪਿਣ੍ਡਂ ਗਹੇਤ੍ਵਾ ਚਾਸਿਯਾ ਛਿਣ੍ਦਿਤ੍ਵਾ ਰਜਤਭਾਵਂ ਞਤ੍ਵਾ ਮਹਨ੍ਤਂ ਸਜ੍ਝਪਿਣ੍ਡਂ ਗਹੇਤ੍ਵਾ ਸਕਟ ਸਨ੍ਤਿਕਂ ਗਨ੍ਤ੍ਵਾ ਤਿਣੋਦਕ ਸਮ੍ਪਨ੍ਨੇ ਠਾਨੇ ਸਕਟਾਨਿ ਨਿਵੇਸੇਤ੍ਵਾ ਲਹੁਂ ਅਨੁਰਾਧਪੁਰਂ ਗਨ੍ਤ੍ਵਾ ਰਞ੍ਞ੍ਞੋ ਦਸ੍ਸੇਤ੍ਵਾ ਤਮਤ੍ਥਂ ਨਿਵੇਦੇਸਿ ਰਾਜਾ ਤਸ੍ਸਾਪਿ ਯਥਾਰਹਂ ਸਕ੍ਕਾਰਂ ਕਾਰੇਸਿ.

ਤਦਨ੍ਤਰਂ ਅਞ੍ਞਮ੍ਪਿ ਸਾਸਨਂ ਆਹਰਿਂਸੁ ਨਗਰਤੋ ਪਚ੍ਛਿਮ ਦਿਸਾਭਾਗੇ ਪਞ੍ਚ ਯੋਜਨ ਮਤ੍ਥਕੇ ਠਾਨੇ ਉਰੁਵੇਲ ਪਬ੍ਬਤ ਮਹਾਮਲਕਮਤ੍ਤਾ ਪਚਾਲ਼ ਮਿਸ੍ਸਕਾ ਸਟ੍ਠਿ ਸਕਟਪ੍ਪਮਾਣਮੁਤ੍ਤਾ ਸਮੁਦ੍ਦਤੋ ਥਲਮੁਗ੍ਗਮਿਂਸੁ ਕੇਵਟ੍ਟਾ ਦਿਸ੍ਵਾ ਰਾਜਾਰਹਂ ਵਤ ਭਣ੍ਡਂ ਉਪ੍ਪਨ੍ਨਨ੍ਤਿ ਰਾਸਿਂ ਕਤ੍ਵਾ ਆਰਕ੍ਖਂ ਦਤ੍ਵਾ ਪਾਤਿਂ ਪੂਰੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਦਸ੍ਸੇਤ੍ਵਾ ਤਮਤ੍ਥਂ ਨਿਵੇਦੇਸੁਂ. ਰਾਜਾ ਤੇਸਮ੍ਪਿ ਯਥਾਰਹਂ ਸਕ੍ਕਾਰਂ ਕਾਰੇਸਿ.

ਪੁਨ ਅਞ੍ਞਂ ਸਾਸਨਂ ਆਹਰਿਂਸੁ ਨਗਰਤੋ ਪਚ੍ਛਿਮੁਤ੍ਤਰ ਕਣ੍ਣੇ ਸਤ੍ਤਯੋਜਨ ਮਤ੍ਥਕੇ ਠਾਨੇ ਪੇਲ਼ਿਵਾਪਿ ਗਾਮਸ੍ਸ ਵਾਪਿਯਾ ਓਤਿਣ੍ਣ ਕਣ੍ਦਰੇ ਪੁਲਿਨ ਪੁਟ੍ਠੇ ਨਿਸਦਪੋਤਪ੍ਪਮਾਣ ਦੀਘਤੋ ਵਿਦਤ੍ਥਿਚਤੁਰਙ੍ਗੁਲਾ ਉਮ੍ਮਾਪੁਪ੍ਫਵਣ੍ਣਾ ਚਤ੍ਤਾਰੋ ਮਹਾਮਣਿ ਉਪ੍ਪਜ੍ਜਿਂਸੁ. ਅਥੇਕੋ ਮਤ੍ਤੋ ਨਾਮ ਸੁਨਖਲੁਦ੍ਦੋ ਸੁਨਖੇ ਗਹੇਤ੍ਵਾ ਤਤ੍ਥ ਵਿਚਰਨ੍ਤੋ ਤਂ ਠਾਨਂ ਪਤ੍ਵਾ ਦਿਸ੍ਵਾ ਰਾਜਾਰਹਂ ਵਤ ਭਣ੍ਡਨ੍ਤਿ ਵਾਲਿਕਾਹਿ ਪਟਿਚ੍ਛਾਦੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਨਿਵੇਦੇਸਿ. ਰਾਜਾ ਤਸ੍ਸਾਪਿ ਯਥਾਰਹਂ ਸਕ੍ਕਾਰਂ ਕਾਰੇਸਿ. ਏਵਂ ਰਾਜਾ ਥੂਪਤ੍ਥਾਯ ਉਪ੍ਪਨ੍ਨਾਨਿ ਇਟ੍ਠਕਾਦੀਨਿ ਤਦਹੇਵ ਅਸ੍ਸੋਸਿ ਇਟ੍ਠਕ ਰਜਤਾਨਂ ਉਪ੍ਪਨ੍ਨਟ੍ਠਾਨਂ ਤੇਨੇਵ ਨਾਮਂ ਲਭਿ.

ਥੂਪਸਾਧਨ ਲਾਭਕਥਾ

੨੦. ਅਥ ਰਾਜਾ ਥੂਪਤ੍ਥਾਯ ਉਪ੍ਪਨ੍ਨਾਨਿ ਸੁਵਣ੍ਣਾਦੀਨਿ ਆਹਰਾਪੇਤ੍ਵਾ ਭਣ੍ਡਾਗਾਰੇਸੁ ਰਾਸਿਂ ਕਾਰੇਸਿ ਤਤੋ ਸਬ੍ਬਸਮ੍ਭਾਰੇ ਸਮਤ੍ਤੇ ਵਿਸਾਖ ਪੁਣ੍ਣਮੁਪੋਸਥਦਿਵਸੇ ਪਤ੍ਤ ਵਿਸਾਖ ਨਕ੍ਖਤ੍ਤੇ ਮਹਾਥੂਪਕਰਣਤ੍ਥਾਯ ਭੂਮਿਪਰਿਕਮ੍ਮਂ ਆਰਭਿ. ਰਾਜਾ ਥੁਪਟ੍ਠਾਨੇ ਪਤਿਟ੍ਠਾਪਿਤਂ ਸਿਲਾਥੂਪਂ ਹਰਾਪੇਤ੍ਵਾ ਥਿਰਭਾਵਤ੍ਥਾਯ ਸਮਨ੍ਤਤੋ ਹਤ੍ਥਿਪਾਕਾਰ ਪਰਿਯਨ੍ਤਂ ਗਮ੍ਭੀਰਤੋ ਸਤਰਤਨਪ੍ਪਮਾਣਂ ਭੂਮਿਂ ਖਨਾਪੇਤ੍ਵਾ ਪਂਸੁਂ ਅਪਨੇਤ੍ਵਾ ¶ ਯੋਧੇਹਿ ਗੁਲ਼ਪਾਸਾਣੇ ਅਤ੍ਥਰਾਪੇਤ੍ਵਾ ਕਮ੍ਮਾਰਕੂਟੇਹਿ ਆਹਨਾਪੇਤ੍ਵਾ ਚੁਣ੍ਣਵਿਚੁਣ੍ਣੇ ਕਾਰੇਸਿ.

ਤਤੋ ਚਮ੍ਮਵਿਨਦ੍ਧੇਹਿ ਪਾਦੇਹਿ ਮਹਾ ਹਤ੍ਥੀਹਿ ਮਦ੍ਦਾਪੇਤ੍ਵਾ ਪਾਸਾਣਕੋਟ੍ਟਿਮਸ੍ਸੁਪਰਿ ਨਵਨੀਤ ਮਤ੍ਤਿਕਂ ਅਤ੍ਥਰਾਪੇਸਿ. ਆਕਾਸ ਗਙ੍ਗਾਯਹਿ ਤਿਪਤਿਤਟ੍ਠਾਨੇ ਉਦਕਬਿਨ੍ਦੂਨਿ ਉਗ੍ਗਨ੍ਤ੍ਵਾ ਸਮਨ੍ਤਾ ਤਿਂਸ ਯੋਜਨਪ੍ਪਮਾਣਪਦੇਸੇ ਪਤਨ੍ਤਿ ਯਤ੍ਥ ਸਯਞ੍ਜਾਤਸਾਲੀ ਉਪ੍ਪਜ੍ਜਤ੍ਤਿ ਤਂ ਠਾਨਂ ਨਿਚ੍ਚਮੇਵ ਤਿਨ੍ਤਤ੍ਤਾ ਨਿਨ੍ਤਸੀਸਕੋਲ਼ਂ ਨਾਮ ਛਾਤਂ. ਤਤ੍ਥ ਮਤ੍ਤਿਕਾ ਸੁਖੁਮੁਤ੍ਤਾ ਨਵਨੀਤ ਮਤ੍ਤਿਕਾਤਿ ਵੁਚ੍ਚਤਿ.

ਤਂ ਤਤੋ ਖੀਣਸਵਾ ਸਾਮਣੇਰਾ ਆਹਰਨ੍ਤਿ ਤਾਯ ਸਬ੍ਬਤ੍ਥ ਮਤ੍ਤਿਕਾਕਿਚ੍ਚਨ੍ਤਿ ਞਾਤਬ੍ਬਂ. ਮਤ੍ਤਿਕੋਪਰਿ ਇਟ੍ਠਕਾ ਅਤ੍ਥਰਾਪੇਸਿ. ਇਟ੍ਠਕੋਪਰਿ ਖਰਸੁਕਮ੍ਮਂ, ਤਸ੍ਸੋਪਰਿਕੁਰੁਵਿਣ੍ਦਪਾਸਾਣਂ, ਤਸ੍ਸੋਪਰਿਅਯੋਜਾਲਂ, ਤਸ੍ਸੋਪਰਿ ਖੀਣਾਸਵ ਸਾਮਣੇਰੇਹਿ ਹਿਮਵਨ੍ਤਤੋ ਆਹਟਂ ਸੁਗਣ੍ਧਮਾਰੁਮ੍ਬਂ, ਤਸ੍ਸੋਪਰਿ ਖੀਰਪਾਸਾਣਂ, ਤਸ੍ਸੋਪਰਿ ਏਲ਼ਿਕਪਾਸਾਣਂ, ਤਸ੍ਸੋਪਰਿ ਸੀਲਂ ਅਤ੍ਥਰਾਪੇਸਿ. ਸਬ੍ਬਮਤ੍ਤਿਕਾਕਿਚ੍ਚੇ ਨਵਨੀਤਮਤ੍ਤਿਕਾ ਏਵ ਅਹੋਸਿ.

ਸਿਲਾਸਤ੍ਥਾਰੋਪਰਿ ਰਸੋਦਕ ਸਨ੍ਤਿਨ੍ਤੇਨ ਕਪਿਤ੍ਥ ਨਿਯ੍ਯਾਸੇਨ ਅਟ੍ਠਙ੍ਗੁਲਬਹਲਤਮ੍ਬਲੋਹਪਟ੍ਟਂ, ਤਸ੍ਸੋਪਰਿ ਤਿਲਤੇਲਯਨ੍ਤਿਨ੍ਤਾਯ ਮਨੋਸਿਲਾਯ ਸਤ੍ਤਙ੍ਗੁਲ ਬਹਲਂ ਰਜਤਪਟ੍ਟਂ ਅਤ੍ਥਰਾਪੇਸਿ ਏਵਂ ਰਾਜਾ ਸਬ੍ਬਾਕਾਰੇਨ ਭੂਮਿਪਰਿਕਮ੍ਮਂ ਕਾਰਾਪੇਤ੍ਵਾ ਆਸਾਲ਼ਹਿ ਸੁਕ੍ਕਪਕ੍ਖਸ੍ਸ ਚਾਤੁਦ੍ਦਸ ਦਿਵਸੇ ਭਿਕ੍ਖੁਸਙ੍ਘਾ ਸਨ੍ਨਿਪਾਤੇਤ੍ਵਾ ਏਵਮਾਹ. ਸ੍ਵੇ ਪੁਣ੍ਣਮੁਪੋਸਥਦਿਵਸੇ ਉਤ੍ਤਰਾਸਾਲ਼੍ਹ ਨਕ੍ਖਤ੍ਤੇਨ ਮਹਾਚੇਤਿਯੇ ਮਙ੍ਗਲਿਟ੍ਠਕਂ ਪਤਿਟ੍ਠਾਪੇਸ੍ਸਾਮਿ ਸ੍ਵੇ ਥੂਪੂਟ੍ਠਾਨੇ ਸਬ੍ਬੋ ਸਙ੍ਘੋ ਸਨ੍ਤਿਪਤਤੂਤਿ ਨਗਰੇ ਭੇਰਿਂ ਚਰਾਪੇਸਿ ਮਹਾਜਨੋ ਉਪੋਸਥਿਕੋ ਹੁਤ੍ਵਾ ਗਣ੍ਧਮਾਲਾਦੀਨਿ ਗਹੇਤ੍ਵਾ ਥੂਪਟ੍ਠਾਨੇ ਸਨ੍ਨਿਪਤਤੂਤਿ.

ਤਤੋ ਵਿਸਾਖਸਿਰਿ ਦੇਵਨਾਮਕੇ ਦ੍ਵੇ ਅਮਚ੍ਚੇ ਆਣਾਪੇਸਿ. ਤੁਮ੍ਹੇ ਗਨ੍ਤ੍ਵਾ ਮਹਾ ਚੇਤਿਯਟ੍ਠਾਨਂ ਅਲਙ੍ਕਰੋਥਾਤਿ. ਤੇ ਗਨ੍ਤ੍ਵਾ ਸਮਨ੍ਤਤੋ ਰਜਤਪਟ੍ਟਵਣ੍ਣਵਾਲੁਕਂ ਓਕੀਰਾਪੇਤ੍ਵਾ ਲਾਜਪਞ੍ਚਮਕਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਕਦਲਿਤੋਰਣਂ ਉਸ੍ਸਾਪੇਤ੍ਵਾ ਪੁਣ੍ਣਘਟੇ ਠਪਾਪੇਤ੍ਵਾ ਮਣਿਵਣ੍ਣੇ ਵੇਲ਼ੁਮ੍ਹਿ ਪਞ੍ਚਪਣ੍ਣਧਜਂ ਬਣ੍ਧਾਪੇਤ੍ਵਾ ਗਣ੍ਧਸਮ੍ਪਨ੍ਨਾਨਿ ਨਾਨਾਵਿਧ ਕੁਸੁਮਾਨਿਸਣ੍ਥਰਾਪੇਤ੍ਵਾ ਨਾਨਾਪ੍ਪਕਾਰੇਹਿ ਤਂ ਠਾਨਂ ਅਲਙ੍ਕਰਿਂਸੁ.

ਅਥ ਰਾਜਾ ਸਕਲਨਗਰਞ੍ਚ ਵਿਹਾਰਗਾਮਿ ਮਗ੍ਗਞ੍ਚ ਅਲਙ੍ਕਾਰਾਪੇਸਿ ਪਭਾਤਾਯ ਰਤ੍ਤਿਯਾ ਨਗਰੇ ਚਤੁਸੁ ਦ੍ਵਾਰੇਸੁ ਮਸ੍ਸੁ ਕਮ੍ਮਤ੍ਥਾਯ ਨਹਾਪਿਤੇ, ਨਹਾਪਨਤ੍ਥਾਯਨਹਾਪਨਕੇ, ਅਲਙ੍ਕਾਰਤ੍ਥਾਯ ਕਪ੍ਪਕੇਵ ਨਾਨਾਵਿਰਾਗ ਵਤ੍ਥ ਗਣ੍ਧਮਾਲਾਦੀਨਿ ਚ ਸੂਪਵ੍ਯਞ੍ਜਨ ਸਮ੍ਪਨ੍ਨਾਨਿ ਮਧੁਰਭਤ੍ਤਾਨਿ ਚ ਠਪਾਪੇਤ੍ਵਾ ਸਬ੍ਬੇ ਨਗਰਾ ਚ ਜਾਨਪਦਾ ਚ ਯਥਾਰੁਚਿਂ ਮਸ੍ਸੂਕਮ੍ਮਂ ਕਾਰੇਤ੍ਵਾ ਨਹਾਤ੍ਵਾ ਭੁਞ੍ਜਿਤ੍ਵਾ ਵਤ੍ਥਾਭਰਣਾਦੀਹਿ ਅਲਙ੍ਕਰਿਤ੍ਵਾ ਮਹਾਚੇਤਿਯਟ੍ਠਾਨਂ ਆਗਚ੍ਛਨ੍ਤੂਤਿ ਆਯੁਤ੍ਤਕੇਹਿ ਆਰੋਚਾਪੇਸਿ.

ਸਯਮ੍ਪਿ ¶ ਸਬ੍ਬਾਭਰਣ ਵਿਭੂਸਿਤੋ ਚਤ੍ਤਾਲੀਸ ਪੁਰਿਸ ਸਹਸ੍ਸੇਹਿ ਸਦ੍ਧਿਂ ਉਪੋਸਕੋ ਹੁਤ੍ਵਾ ਅਨੇਕੇਹਿ ਸੁਮਣ੍ਡਿਤ ਪਸਾਧਿਤੇਹਿ ਅਮਚ੍ਚੇਹਿ ਗਹਿਤਾਰਕ੍ਖੋ ਅਲਙ੍ਕਤਾਹਿ ਦੇਵਕਞ੍ਞ ਪਮਾਹਿ ਨਾਟਕਿਤ੍ਥਿਹਿ ਪਰਿਵੁਤੋ ਅਮਰਗਣ ਪਰਿਵੁਤੋ ਦੇਵਰਾਜਾ ਵਿਯ ਅਤ੍ਤਨੋ ਸਿਰਿਸਮ੍ਪਤ੍ਤਿਹਾ ਮਹਾਜਨਂ ਤੋਸਯਨ੍ਤੋ ਅਨੇਕੇਹਿ ਤੁਰਿਯ ਸਙ੍ਘੁਟ੍ਠੇਹਿ ਵਤ੍ਤਮਾਨੇਹਿ ਅਪਰਣ੍ਹੇ ਮਹਾਥੂਪਟ੍ਠਾਨਂ ਉਪਗਞ੍ਜਿ. ਮਹਾ ਚੇਤਿਯਟ੍ਠਾਨ ਮਙ੍ਗਲਤ੍ਥਾਯ ਪੁਟਬਦ੍ਧਾਨਿ ਵਤ੍ਥਾਨਿ ਅਟ੍ਠੁਤ੍ਤਰ ਸਹਸ੍ਸਂ ਠਪਾਪੇਸਿ. ਚਤੁਸੁ ਪਸ੍ਸੇਸੁ ਵਤ੍ਥਰਾਸਿਂ ਕਾਰੇਸਿ ਤੇਲ-ਮਧੁ-ਸਕ੍ਕਰ-ਫਾਣਿਤਾਦੀਨਿ ਚ ਠਪਾਪੇਸਿ.

ਅਥ ਨਾਨਾਦੇਸਤੋ ਬਹੂ ਭਿਕ੍ਖੂ ਆਗਮਿਂਸੁ ਰਾਜਗਹਾ ਸਮਨ੍ਤਾ ਇਣ੍ਦਿਗੁਤ੍ਤਤ੍ਥੇਰੋ ਨਾਮ ਅਸੀਤਿ ਭਿਕ੍ਖੁਸਹਸ੍ਸਾਨਿ ਗਹੇਤ੍ਵਾ ਆਕਾਸੇਨਾਗਞ੍ਛਿ ਤਥਾ ਬਾਰਾਣਸਿਯਂ ਇਸਿਪਤਨੇ ਮਹਾ ਵਿਹਾਰਤੋ ਧਮ੍ਮਸੇਨਤ੍ਥੇਰੋ ਨਾਮ ਦ੍ਵਾਦਸ ਭਿਕ੍ਖੁਸਹਸ੍ਸਾਨਿ. ਸਾਵਤ੍ਥਿਯਂ ਜੇਤਵਨ ਵਿਹਾਰਤੋ ਪਿਯਦਸ੍ਸਿ ਨਾਮ ਥੇਰੋ ਸਟ੍ਠਿ ਭਿਕ੍ਖੁ ਸਹਸ੍ਸਾਨਿ ਵੇਸਾਲਿਯਂ ਮਹਾ ਵਨਤੋ ਬੁਦ੍ਧਰਕ੍ਖਿਤਤ੍ਥੇਰੋ ਅਟ੍ਠਾਰਸ ਭਿਕ੍ਖੁ ਸਹਸ੍ਸਾਨਿ, ਕੋਸਮ੍ਬਿਯਂ ਘੋਸਿਤਾਰਾਮਤੋ ਮਹਾਧਮ੍ਮਰਕ੍ਖਿਤਤ੍ਥੇਰੋ ਤਿਂਸ ਭਿਕ੍ਖੁਸਹਸ੍ਸਾਨਿ. ਉਜ੍ਜੇਨਿਯਂ ਦਕ੍ਖਿਣਗਿਰਿ ਮਹਾ ਵਿਹਾਰਤੋ ਧਮ੍ਮਰਕ੍ਖਿਤਤ੍ਥੇਰੋ ਚਤ੍ਤਾਲੀਸ ਭਿਕ੍ਖੁਸਹਸ੍ਸਾਨਿ-ਪਾਟਲਿਪੁਤ੍ਤੇ ਅਸੋਕਾਰਾਮਤੋ ਮਿਤ੍ਤਿਣ੍ਣਤ੍ਥੇਰੋ ਭਿਕ੍ਖੂਨਂ ਸਤਸਹਸ੍ਸਾਨਿ ਸਟ੍ਠਿਞ੍ਚ ਸਹਸ੍ਸਾਨਿ ਗਣ੍ਧਾਰ ਰਟ੍ਠਤੋ ਅਤ੍ਤਿਨ੍ਨ ਥੇਰੋ ਨਾਮ ਭਿਕ੍ਖੂਨਂ ਦ੍ਵੇ ਸਤਸਹਸ੍ਸਾਨਿ ਅਸੀਤਿਞ੍ਚ ਸਹਸ੍ਸਾਨਿ. ਮਹਾਪਲ੍ਲਵ ਭੋਗਤੋ ਮਹਾਦੇਵਤ੍ਥੇਰੋ ਭਿਕ੍ਖੂਨਂ ਚਤ੍ਤਾਰਿ ਸਤਸਹਸ੍ਸਾਨਿ ਸਟ੍ਠਿਞ੍ਚ ਸਹਸ੍ਸਾਨਿ ਯੋਨਕਰਟ੍ਠੇ ਅਲਸਣ੍ਦਾ ਨਗਰਤੋ ਯੋਨਕ ਧਮ੍ਮਰਕ੍ਖਿਤਤ੍ਥੇਰੋ ਤਿਂਸ ਭਿਕ੍ਖੁ ਸਹਸ੍ਸਾਨਿ. ਵਿਞ੍ਝਾਟਵਿਵਤ੍ਤਨਿਯ ਸੇਨਾਸਨਤੋ ਉਤ੍ਤਰਤ੍ਥੇਰੋ ਅਸੀਤਿ ਭਿਕ੍ਖੁਸਹਸ੍ਸਾਨਿ. ਮਹਾਬੋਧਿਮਣ੍ਡ ਵਿਹਾਰਤੋ ਚਿਤ੍ਤਗੁਤ੍ਤਤ੍ਥੇਰੋ ਤਿਂਸ ਭਿਕ੍ਖੁਸਹਸ੍ਸਾਨਿ ਵਨਵਾਸਿਭੋਗਤੋ ਚਣ੍ਦਗੁਤ੍ਤਤ੍ਥੇਰੋ ਅਸੀਤਿ ਭਿਕ੍ਖੁਸਹਸ੍ਸਾਨਿ. ਕੇਲਾਸ ਮਹਾਵਿਹਾਰਤੋ ਸੁਰਿਭਗੁਤ੍ਤਤ੍ਥੇਰੋ ਛਨ੍ਨਵੁਤਿ ਸਹਸ੍ਸਾਨਿ ਗਹੇਤ੍ਵਾ ਆਕਾਸੇਨਾਗਞ੍ਛਿ.

‘‘ਭਿਕ੍ਖੂਨਂ ਦੀਪਵਾਸੀਨਂ-ਆਗਤਾਨਞ੍ਚ ਸਬ੍ਬਸੋ,

ਗਣਨਾਯ ਪਰਿਚ੍ਛੇਦੋ-ਪੋਰਾਣੇਹਿ ਨ ਭਾਸਿਤੋ;

ਸਮਾਗਤਾਨਂ ਭਿਕ੍ਖੂਨਂ-ਸਬ੍ਬੇਸਂ ਤਂ ਸਮਾਗਮੇ,

ਵੁਤ੍ਤਾ ਖੀਣਾਸਵਾਯੇਵ-ਤੇ ਛਨ੍ਨਵੁਤਿ ਕੋਟਿਯੋ;’’

ਅਥ ਸਙ੍ਘੋ ਪਰਿਕ੍ਖਿਤ੍ਤ ਪਵਾਲ਼ਵੇਦਿਕਾ ਵਿਯ ਮਜ੍ਝੇ ਰਞ੍ਞੋ ਓਕਾਸੇ ਠਪੇਤ੍ਵਾ ਅਞ੍ਞਮਞ੍ਞਂ ਅਘਟ੍ਟੇਤ੍ਵਾ ਅਟ੍ਠਾਸਿ. ਪਾਚਿਨਪਸ੍ਸੇ ਬੁਦ੍ਧਰਕ੍ਖਿਤਨਾਮਕੋ ਖੀਣਾਸਾਵਤ੍ਥੇਰੋ ਅਤ੍ਤਨਾਸਦਿਸਨਾਮਕੇ ਪਞ੍ਚਸਤਖੀਣਾਸਵੇ ਗਹੇਤ੍ਵਾ ਅਟ੍ਠਾਸਿ. ਤਥਾ ਦਕ੍ਖਿਣਪਸ੍ਸੇ ਪਚ੍ਛਿਮਪਸ੍ਸੇ ਉਤ੍ਤਰਪਸ੍ਸੇ ¶ ਚ ਧਮ੍ਮਰਕ੍ਖਿਤ - ਸਙ੍ਘਰਕ੍ਖਿਤ - ਆਨਣ੍ਦ ਨਾਮਕਾ ਖੀਣਾਸਵਤ੍ਥੇਰਾ ਅਤ੍ਤਨਾ ਸਦਿਸਨਾਮਕੇ ਪਞ੍ਚਪਞ੍ਚਸਤ ਖੀਣਾਸਵੇ ਗਹੇਤ੍ਵਾ ਅਟ੍ਠਂਸੁ ਪਿਯਦਸ੍ਸਿ ਨਾਮ ਖੀਣਾਸਵਤ੍ਥੇਰੋ ਮਹਾਭਿਕ੍ਖੁਸਙ੍ਘਂ ਗਹੇਤ੍ਵਾ ਪੁਬ੍ਬੁਤ੍ਤਰ ਕਣ੍ਣੇ ਅਟ੍ਠਾਸਿ.

ਰਾਜਾ ਕਿਰ ਸਙ੍ਘਮਜ੍ਝਂ ਪਵਿਸਨ੍ਤੋਯੇਵ ਸਚੇ ਮਯਾ ਕਯਿਰਮਾਨਂ ਚੇਤਿਯਕਮ੍ਮਂ ਅਨਨ੍ਤਰਾਯੇਨ ਨਿਟ੍ਠਂ ਗਚ੍ਛਤਿ ਪਾਚਿਨ-ਦਕ੍ਖਿਣ-ਪਚ੍ਛਿਮ-ਉਤ੍ਤਰਪਸ੍ਸੇਸੁ ਬੁਦ੍ਧਰਕ੍ਖਿਤ-ਚਮ੍ਮਰਕ੍ਖਿਤ-ਸਙ੍ਘਰਕ੍ਖਿਤ-ਆਨਣ੍ਦ ਨਾਮਕਾ ਥੇਰਾ ਅਤ੍ਤਨਾਸਦਿਸਨਾਮਕੇ ਪਞ੍ਚਪਞ੍ਚਸਤਭਿਕ੍ਖੁ ਗਹੇਤ੍ਵਾ ਤਿਟ੍ਠਨ੍ਤੁ ਪਿਯਦਸ੍ਸਿ ਨਾਮ ਥੇਰੋ ਪੁਬ੍ਬੁਤ੍ਤਰਕਣ੍ਣੇ ਭਿਕ੍ਖੁਸਙ੍ਘਂ ਗਹੇਤ੍ਵਾ ਤਿਟ੍ਠਤੂਤਿ ਚਿਨ੍ਤੇਸਿ. ਥੇਰਾਪਿ ਰਞ੍ਞੋ ਅਧਿਪ੍ਪਾਯਂ ਞਤ੍ਵਾ ਤਥਾ ਠਿਤਾਤਿ ਵਦਨ੍ਤੀ ਸਿਦ੍ਧਤ੍ਥੇਰੋ ਪਨ ਮਙ੍ਗਲੋ-ਸੁਮਨੋ-ਪਦੁਮੋ-ਸੀਵਲਿ-ਚਣ੍ਦਗੁਤ੍ਤੋ-ਸੂਰਿਯਗੁਤ੍ਤੋ-ਇਣ੍ਦਗੁ- ਤ੍ਤੋ-ਸਾਗਰੋ-ਚਿਤ੍ਤਸੇਨੋ -ਜਯਸੇਨੋ-ਅਚਲੋਤਿ ਇਮੇਹਿ ਏਕਾਦਸਹਿ ਥੇਰੇਹਿ ਪਰਿਵੁਤੋ ਪੁਣ੍ਣਘਟੇ ਪੂਰਤੋ ਕਤ੍ਵਾ ਪੁਰਤ੍ਥਾਭਿਮੁਖੋ ਅਟ੍ਠਾਸਿ.

ਅਥ ਰਾਜਾ ਤਥਾ ਠਿਤਂ ਭਿਕ੍ਖੁਸਙ੍ਘਂ ਦਿਸ੍ਵਾ ਪਸਨ੍ਨਚਿਤ੍ਤੋ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਪਦਕ੍ਖਿਣਂ ਕਤ੍ਵਾ ਚਤੂਸੁ ਠਾਨੇਸੁ ਵਨ੍ਦਿਤ੍ਵਾ ਪੁਣ੍ਣਸਟਟ੍ਠਾਨਂ ਪਵਿਸਿਤ੍ਵਾ ਸੁਯਣ੍ਣਖੀਲੇ ਪਟਿਮੁਕ੍ਕਂਰਜਤਮਯਂ ਪਰਿਬ੍ਭਮਨ ਦਣ੍ਡਂ ਵਿਜ੍ਜਮਾਨਮਾਤਾਪਿਤੂਨਂ ਉਭਤੋ ਸੁਜਾਤੇਨ ਸੁਮਣ੍ਡਿਤ ਪਸਾਧਿਤੇਨ ਅਭਿਮਙ੍ਗਲ ਸਮ੍ਮਤੇਨ ਅਮਚ੍ਚਪੁਤ੍ਤੇਨ ਗਾਹਾਪੇਤ੍ਵਾ ਮਹਨ੍ਤਂ ਚੇਤਿਯਾਵਟ੍ਟਂ ਕਾਰੇਤੁਂ ਆਰਭਿ. ਤਥਾ ਕਾਰੇਨ੍ਤਂ ਪਨ ਸਿਦ੍ਧਤ੍ਥਤ੍ਥੇਰੋ ਨਿਵਾਰੇਸਿ. ਏਵਂ ਕਿਰਸ੍ਸ ਅਹੋਸਿ - ਯਦਿ ਮਹਾਰਾਜਾ ਮਹਨ੍ਤਂ ਚੇਤਿਯਂ ਕਰੋਤਿ, ਅਨਿਟ੍ਠਿਤੇਯੇਵ ਮਰਿਸ੍ਸਤਿ ਅਨਾਗਤੇ ਦੁਪ੍ਪਰਿਹਰਿਯਞ੍ਚ ਭਵਿਸ੍ਸਤੀਤਿ. ਤਸ੍ਮਿਂ ਖਣੇ ਭਿਕ੍ਖੁਸਙ੍ਘੋ ਮਹਾ ਰਾਜ ਥੇਰੋ ਪਾਣ੍ਡਿਤੋ, ਥੇਰਸ੍ਸ ਵਚਨਂ ਕਾਤੁਂ ਵਟ੍ਟਤੀਤਿ ਆਹ.

ਰਾਜਾ ਭਿਕ੍ਖੁਸਙ੍ਘਸ੍ਸ ਅਧਿਪ੍ਪਾਯਂ ਞਤ੍ਵਾ ਥੇਰੋ ਕਰੋਤੀਤਿ ਮਞ੍ਞਮਾਨੋ ਕੀਦਿਸਂ ਭਨ੍ਤੇ ਪਮਾਣਂ ਕਰੋਮੀਤਿ ਆਹ. ਥੇਰੋ ਮਮ ਗਤਗਤਟ੍ਠਾਨਤੋ ਚੇਤਿਯਾਵਟ੍ਟਂ ਕਰੋਹੀਤਿ ਵਤ੍ਵਾ ਉਪਦਿਸਨ੍ਤੋ ਆਵਿਜ੍ਝਿਤ੍ਵਾ ਅਗਮਾਸਿ. ਰਾਜਾ ਥੇਰਸ੍ਸ ਵੁਤ੍ਤਨਯੇਨ ਚੇਤਿਯਾਵਟ੍ਟਂ ਕਾਰੇਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ਨਾਮਂ ਪੁਚ੍ਛਿਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਵਮ੍ਬਤ੍ਵਾ ਪਰਿਵਾਰੇਤ੍ਵਾ ਠਿਤੇ ਸੇਸ ਏਕਾਦਸ ਥੇਰੇ ਚ ਉਪਸਙ੍ਕਮਿਤ੍ਵਾ ਪੂਜੇਤ੍ਵਾ ਵਨ੍ਦਿਤ੍ਵਾ ਤੇਸਂ ਨਾਮਾਨਿ ਚ ਪੁਚ੍ਛਿਤ੍ਵਾ ਪਰਿਬ੍ਭਮਨ ਦਣ੍ਡਗਾਹਕਸ੍ਸ ਅਮਚ੍ਚ ਪੁਤ੍ਤਸ੍ਸ ਤਾਮ ਪੁਚ੍ਛਿ.

ਅਹਂ ਦੇਵ ਸੁਪ੍ਪਤਿਟ੍ਠਿਤ ਬ੍ਰਹ੍ਮਾ ਨਾਮਾਤਿ ਵੁਤ੍ਤੇ ਤਵ ਪਿਤਾ ਕਿਂ ਨਾਮੋਤਿ ਪੁਚ੍ਛਿਤ੍ਵਾਨ ਨਣ੍ਦਿਸੇਨੋ ਨਾਮਾਤਿ ਵੁਤ੍ਤੇ ਮਾਤੁਨਾਮਂ ਪੁਚ੍ਛਿ. ਸੁਮਨਾਦੇਵੀ ਨਾਮਾਤਿ ਵੁਤ੍ਤੇ ਸਬ੍ਬੇਸਂ ਨਾਮਾਨਿ ਅਭਿਮਙ੍ਗਲਸਮ੍ਮਤਾਨਿ, ਮਯਾ ਕਯਰਮਾਨਂ ਚੇਤਿਯਕਮ੍ਮਂ ਅਵਸ੍ਸਂ ਨਿਟ੍ਠਾਨਂ ਗਚ੍ਛਤਿਤਿ ਹਟ੍ਠੋ ਅਹੋਸਿ, ਤਤੋ ਰਾਜਾ ਮਜ੍ਝੇ ਅਟ੍ਠ ਸੁਵਣ੍ਣਘਟੇ ¶ ਰਜਤਘਟੇ ਚ ਠਪਾਪੇਤ੍ਵਾ ਤੇ ਪਰਿਵਾਰੇਤ੍ਵਾ ਅਟ੍ਠੁਤ੍ਤਰਸਯਸ੍ਸ ਪੁਣ੍ਣਘਟੇ ਠਪਾਪੇਸਿ.

ਅਥ ਅਟ੍ਠ ਸੁਵਣ੍ਣਿਟ੍ਠਕਾ ਠਪਾਪੇਸਿ. ਤਾਸੁ ਏਕੇਕਂ ਪਰਿਵਾਰੇਤ੍ਵਾ ਅਟ੍ਠੁਤ੍ਤਰਸਤ ਅਟ੍ਠੁਤ੍ਤਰਸਤ ਰਜਤਿਟ੍ਠਕਾਯੋ. ਅਟ੍ਠੁਤ੍ਤਰਸਤ ਅਟ੍ਠੁਤ੍ਤਰਸਤ ਵਤ੍ਥਾਨਿ ਚ ਠਪਾਪੇਸਿ. ਅਥ ਸੁਪ੍ਪਤਿਟ੍ਠਿਤ ਬ੍ਰਹ੍ਮਨਾਮੇਨ ਅਮਚ੍ਚਪੁਤ੍ਤੇਨ ਏਕਂ ਸੁਵਣ੍ਣਿਟ੍ਠਕਂ ਗਾਹਾਪੇਤ੍ਵਾ ਤੇਨ ਸਦਿਸ ਨਾਮੇਹਿ ਚ ਜੀਵਮਾਨਕ ਮਾਤਾਪਿਤੂਹਿ ਸਤ੍ਤਹਿ ਅਮਚ੍ਚਪੁਤ੍ਤੇਹਿ ਸੇਸ ਸਤ੍ਤਿਟ੍ਠਕਾਯੋ ਗਾਹਾਪੇਸਿ.

ਤਸ੍ਮਿਂ ਖਣੇ ਮਿਤ੍ਤਤ੍ਥੇਰੋ ਨਾਮ ਪੁਰਤ੍ਥਿਮ ਦਿਸਾਭਾਗੇ ਪਰਿਬ੍ਭਮਿਤ ਲੇਖਾਯ ਭੂਮਿਯਂ ਗਣ੍ਧਪਿਣ੍ਡਂ ਠਪੇਸਿ. ਜਯਸੇਨਤ੍ਥੇਰੋ ਨਾਮ ਉਦਕਂ ਆਸਿਞ੍ਚਿਤ੍ਵਾ ਸਨ੍ਤਿਨ੍ਤੇਤ੍ਵਾ ਸਮਂ ਅਕਾਸਿ. ਸੁਪ੍ਪਤਿਟ੍ਠਿਤਬ੍ਰਹ੍ਮਾ ਭਦ੍ਦ ਨਕ੍ਖਤ੍ਤੇਨ ਏਵਂ ਨਾਨਾਵਿਧ ਮਙ੍ਗਲਾਨਿਸਙ੍ਖਟਟ੍ਠਾਨੇ ਪਠਮਂ ਮਙ੍ਗਲਿਕਟ੍ਠਕਂ ਪਤਿਟ੍ਠਾਪੇਸਿ. ਸੁਮਨਤ੍ਥੇਰੋਨਾਮ ਜਾਤਿਸੁਮਨਪੁਪ੍ਫੇਹਿ ਤਂ ਪੂਜੇਸਿ. ਤਸ੍ਮਿਂ ਖਣੇ ਉਦਕਪਰਿਯਨ੍ਤਂ ਕਤ੍ਵਾ ਮਹਾਪਥਵਿ ਕਮ੍ਪੋ ਅਹੋਸਿ. ਏਤੇਨੇਵ ਨਯੇਨ ਸੇਸ ਸਤ੍ਤਿਟ੍ਠਕਾਯੋਪਿ ਪਤਿਟ੍ਠਾਪੇਸੁਂ.

ਤਤੋ ਰਾਜਾ ਰਜਤਿਟ੍ਠਕਾਯੋਪਿ ਪਤਿਟ੍ਠਾਪੇਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਮਙ੍ਗਲਵਿਧਾਨਂ ਨਿਟ੍ਠਾਪੇਤ੍ਵਾ ਸੁਵਣ੍ਣਪੇਲਾਯਪੁਪ੍ਫਾਨਿ ਗਾਹਾਪੇਤ੍ਵਾ ਪਾਚੀਨਪਸ੍ਸੇ ਭਿਕ੍ਖੁਸਙ੍ਘਸ੍ਸ ਪੁਰਤੋ ਠਿਤਂ ਮਹਾ ਬੁਦ੍ਧਰਕ੍ਖਿਤਤ੍ਥੇਰਂ ਉਪਸਙ੍ਕਮਿਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਵਨ੍ਦਿਤ੍ਵਾ ਥੇਰਸ੍ਸ ਪਰਿਵਾਰੇਤ੍ਵਾ ਠਿਤ ਭਿਕ੍ਖੂਨਞ੍ਚ ਨਾਮਾਨਿ ਪੁਚ੍ਛਿਤ੍ਵਾ ਤਤੋ ਦਕ੍ਖਿਣਪਸ੍ਸੇ ਠਿਤਂ ਮਹਾਧਮ੍ਮਰਕ੍ਖਿਤਤ੍ਥੇਰਂ ਪਚ੍ਛਿਮਪਸ੍ਸੇ ਠਿਤਂ ਮਹਾਸਙ੍ਘਰਕ੍ਖਿਤਤ੍ਥੇਰਂ ਉਤ੍ਤਰਪਸ੍ਸੇ ਠਿਤਂ ਆਨਣ੍ਦਤ੍ਥੇਰਞ੍ਚ ਉਪਸਙ੍ਕਮਿਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤਥੇਵ ਨਾਮਾਨਿ ਪੁਚ੍ਛਿਤ੍ਵਾ ਪੁਬ੍ਬੁਤ੍ਤਰ ਕਣ੍ਣਂ ਗਨ੍ਤ੍ਵਾ ਤਤ੍ਥ ਠਿਤਂ ਪਿਯਦਸ੍ਸਿ ਮਹਾਥੇਰਂ ਵਨ੍ਦਿਤ੍ਵਾ ਪੂਜੇਤ੍ਵਾ ਨਾਮਾਨਿ ਪੁਚ੍ਛਿਤ੍ਵਾ ਸਨ੍ਤਿਕੇ ਅਟ੍ਠਾਸਿ.

ਥੇਰੋ ਮਙ੍ਗਲਂ ਵਡ੍ਢੇਨ੍ਤੋ ਰਞ੍ਞੋ ਧਮ੍ਮਂ ਦੇਸੇਸਿ. ਮਙ੍ਗਲਪਰਿਯੋਸਾਨੇ ਸਮ੍ਪਤ੍ਤ ਗਿਹਿਪਰਿਸਾਸੁ ਚਤ੍ਤਾਲੀਸ ਸਹਸ੍ਸਾਨਿ ਅਰਹਨ੍ਤੋ ਪਤਿਟ੍ਠਹਿਂਸੁ. ਚਤ੍ਤਾਲੀਸ ਸਹਸ੍ਸਾਨਿ ਸੋਤਾਪਤ੍ਤਿਫਲੋ ਸਹਸ੍ਸਂ ਸਕਦਾਗਾਮਿਫਲੇ, ਸਹਸ੍ਸਂ ਅਨਾਗਾਮਿਫਲੇ, ਭਿਕ੍ਖੂਨਂ ਪਨ ਅਟ੍ਠਾਰਸਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਭਿਕ੍ਖੁਨੀਨਂ ਚਤੁਦ੍ਦਸ ਸਹਸ੍ਸਾਨੀਤਿ.

ਥੂਪਾਰਮ੍ਹ ਕਥਾ

੨੧. ਤਤੋ ਰਾਜਾ ਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਯਾਚ ਮਹਾਚੇਤਿਯਂ ਨਿਟ੍ਠਾਤਿਨਾਵ ਮੇ ਭਿਕ੍ਖੁਸਙ੍ਘੋ ਭਿਕ੍ਖਂ ਗਣ੍ਹਾਤੂਤਿ ਆਹ. ਭਿਕ੍ਖੂ ਨਾਧਿਵਾਸੇਸੁ, ਅਨੁਪੁਬ੍ਬੇਨ ਯਾਚਨ੍ਤੋ ਉਪਲ੍ਲਭਿਕ੍ਖੂਨਂ ਸਤ੍ਤਾਹਂ ਅਧਿਵਾਸਨਂ ਲਭਿਤ੍ਵਾ ਥੂਪਟ੍ਠਾਨਸ੍ਸ ਸਮਨ੍ਤਤੋ ਅਟ੍ਠਾਰਸਸੁ ਠਾਨੇਸੁ ਮਣ੍ਡਪੇ ਕਾਰਯਿਤ੍ਵਾ ¶ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਬ੍ਬੇਸਂਯੇਵ ਤੇਲ-ਮਧੁ-ਪਾਣਿਤਾਦਿ ਭੇਸਜ੍ਜਂ ਦਤ੍ਵਾ ਭਿਕ੍ਖੁਸਙ੍ਘਂ ਵਿਸ੍ਸਜ੍ਜੇਸਿ ਤਤੋ ਨਗਰੇ ਭੇਰਿਂਚਾਰਾਪੇਤ੍ਵਾ ਸਬ੍ਬੇ ਇਟ੍ਠਕ ਵਡ੍ਢਕਿ ਸਨ੍ਤਿਪਾਤੇਸਿ. ਤੇ ਪਞ੍ਚਸਤਮਤ੍ਤਾ ਅਹੇਸੁਂ.

ਤੇਸੁ ਏਕੋ ਅਹਂ ਰਞ੍ਞੋ ਚਿਤ੍ਤਂ ਆਰਾਧੇਤ੍ਵਾ ਮਹਾਚੇਤਿਯਂ ਕਾਤੁਂ ਸਕ੍ਕੋਮੀਤਿ ਰਾਜਾਨਂ ਪਸ੍ਸਿ ਰਾਜਾ ਕਥਂ ਕਰੋਸੀਤਿ ਪੁਚ੍ਛਿ. ਅਹਂ ਦੇਵ ਪੇਸਿਕਾਨਂ ਸਤਂ ਗਹੇਤ੍ਵਾ ਏਕਾਹਂ ਏਕਂ ਪਂਸੁਸਕਟਂ ਖੇਪੇਤ੍ਵਾ ਕਮ੍ਮਂ ਕਰੋਮੀਤਿ ਆਹ. ਰਾਜਾ ਏਵਂ ਸਤਿ ਪਂਸੁਰਾਸਿਕਂ ਭਵਿਸ੍ਸਤਿ. ਤਿਣਰੁਕ੍ਖਾਦੀਨਿ ਉਪ੍ਪਜ੍ਜਿਸ੍ਸਨ੍ਤਿ ਅਦ੍ਧਾਨਂ ਨਪ੍ਪਵਤ੍ਤਤੀਤਿ ਤਂ ਪਟਿਬਾਹਿ.

ਅਞ੍ਞੋ ਅਹਂ ਪੁਰਿਸਸਤਂ ਗਹੇਤ੍ਵਾ ਏਕਾਹਂ ਏਕਂ ਪਂਸੁਗੁਮ੍ਬਂ ਖੇਪੇਤ੍ਵਾ ਕਮ੍ਮਂ ਕਰੋਮੀਤਿ ਆਹ.

ਅਞ੍ਞੋ ਪਂਸੂਨਂ ਪਞ੍ਚਮ੍ਮਣਾਨਿ ਖੇਪੇਤ੍ਵਾ ਕਮ੍ਮਂ ਕਰੋਮੀਤਿ ਆਹ.

ਅਞ੍ਞੋ ਦ੍ਵੇ ਅਮ੍ਮਣਾਨਿ ਖੇਪੇਤ੍ਵਾ ਕਮ੍ਮਂ ਕਰੋਮੀਤਿ ਆਹ. ਤੇਪਿ ਰਾਜਾ ਪਟਿਬਾਹਿਯੇਵ.

ਅਥ ਅਞ੍ਞੋ ਪਣ੍ਡਿਤੋ ਇਟ੍ਠਕ ਵਡ੍ਢਕੀ ਅਹਂ ਦੇਵ ਉਦੁਕ੍ਖਲੇ ਕੋਟ੍ਟੇਤ੍ਵਾ ਸੁਪ੍ਪੇਹਿ ਵਟ੍ਟੇਤ੍ਵਾ ਨਿਸਦੇਪਿਂਸਿਤ੍ਵਾ ਪਂਸੂਨਂ ਏਕਮ੍ਮਣਂ ਏਕਾਹੇਨੇਵ ਖੇਪੇਤ੍ਵਾ ਪੇਸਿਕਾਨਂ ਸਤਂ ਗਹੇਤ੍ਵਾ ਕਮ੍ਮਂ ਕਰੋਮੀਤਿ ਆਹ.

ਰਾਜਾ ਏਵਂ ਸਤਿ ਮਹਾਚੇਤਿਯੇ ਤਿਣਾਦੀਨਿ ਨ ਭਵਿਸ੍ਸਨ੍ਤਿ ਚਿਰਟ੍ਠਿਤਿਕਞ੍ਚ ਭਵਿਸ੍ਸਤਿਤਿ ਸਮ੍ਪਟਿਚ੍ਛਿਤ੍ਵਾ ਪੁਨ ਪੁਚ੍ਛਿ-ਕਿਂ ਸਣ੍ਠਾਨਂ ਪਨ ਕਰਿਸ੍ਸਸੀਤਿ.

ਤਸ੍ਮਿਂ ਖਣੇ ਵਿਸ੍ਸਕਮ੍ਮ ਦੇਵਪੁਤ੍ਤੋ ਵਡ੍ਢਕਿਸ੍ਸ ਸਰੀਰੇ ਅਧਿਮੁਚ੍ਚਿ. ਵਡ੍ਢਕੀ ਸੁਵਣ੍ਣਪਾਤਿਂ ਪੂਰੇਤ੍ਵਾ ਉਦਕਮਾਹਰਾਪੇਤ੍ਵਾ ਪਾਣਿਨਾ ਉਦਕਂ ਗਹੇਤ੍ਵਾ ਉਦਕਪਿਟ੍ਠਿਯਂ ਆਹਨਿ. ਏਲ਼ਿਕਘਟ ਸਦਿਸਂ ਮਹਨ੍ਤਂ ਉਦਕਬੁਬ੍ਬੁਲਂ ਉਠ੍ਠਾਸਿ. ਦੇਵ ਈਦਿਸਂ ਕਰੋਮੀਤਿ ਆਹ.

ਰਾਜਾ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਸਹਸ੍ਸਗ੍ਘਨਕਂ ਸਾਟਕ ਯੁਗਲਂ, ਸਹਸ੍ਸਗ੍ਘਨਕਂਯੇਵ ਪੁਣ੍ਣਕਂ ਨਾਮ ਸੁਵਣ੍ਣਾਲਙ੍ਕਾਰਂ ਸਹਸ੍ਸਗ੍ਘਨਕਾ ਪਾਦੁਕਾ, ਦ੍ਵਾਦਸ ਕਹਾਪਨ ਸਹਸ੍ਸਾਨਿ ਚ ਦਤ੍ਵਾ ਅਨੁਰੂਪਟ੍ਠਾਨੇ ਗੇਹਞ੍ਚ ਖੇਤ੍ਤਞ੍ਚ ਦਾਪੇਸਿ.

ਤਤੋ ਰਾਜਾਰਤ੍ਤਿਭਾਗੇ ਚਿਨ੍ਤੇਸਿ ਕਥਂ ਨਾਮ ਮਨੁਸ੍ਸੇ ਅਪੀਲੇਤ੍ਵਾ ਇਟ੍ਠਕਾ ਆਹਰਾਪੇਯ੍ਯਨ੍ਤਿ ਦੇਵਤਾ ਰਞ੍ਞੋ ਚਿਤ੍ਤਂ ਞਤ੍ਵਾ ਚੇਤਿਯਸ੍ਸ ਚਤੁਸੁ ਦ੍ਵਾਰੇਸੁ ਏਕੇਕਦਿਵਸਪ੍ਪਹੋਣਕਂ ਕਤ੍ਵਾ ਤਸ੍ਸਾਯੇਵ ਰਤ੍ਤਿਯਾ ਇਟ੍ਠਕਾਰਾਸਿਂ ਅਕਂਸੁ ਵਿਹਾਤਾਯ ਰਤ੍ਤਿਯਾ ਮਨੁਸ੍ਸਾ ਦਿਸ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਤੁਸ੍ਸਿਤ੍ਵਾ ਵਡ੍ਢਕਿਂ ਕਮ੍ਮੇ ਪਟ੍ਠਪੇਸਿ. ਦੇਵਤਾ ਏਤੇਨੇਵ ਨਯੇਨ ਯਾਵ ਮਹਾਚੇਤਿਯਸ੍ਸ ਨਿਟ੍ਠਾਨਂ ਤਾਵ ਏਕੇਕਸ੍ਸ ¶ ਦਿਵਸਸ੍ਸ ਪਹੋਣਕਂ ਕਤ੍ਵਾ ਇਟ੍ਠਕਾ ਆਹਰਿਂਸੁ. ਸਕਲਦਿਵਸਭਾਗੇ ਕਮ੍ਮਂ ਕਤਟ੍ਠਾਨੇ ਮਤ੍ਤਿਕਾ ਇਟ੍ਠਕ ਚੁਣ੍ਣਂ ਵਾਪਿ ਨ ਪਞ੍ਞਾਯਤਿ. ਰਤ੍ਤਿਯਂ ਦੇਵਤਾ ਅਨ੍ਤਰਧਾਪੇਨ੍ਤਿ.

ਅਥ ਰਾਜਾ ਮਹਾਚੇਤਿਯੇਕਮ੍ਮਕਾਰਾਯਚਤੁਪਰਿਸਾਯਹਤ੍ਥ ਕਮ੍ਮਮੂਲਤ੍ਥਂਚਤੁਸੁ ਦ੍ਵਾਰੇਸੁ ਏਕੇਕਸ੍ਮਿਂ ਦ੍ਵਾਰੇ ਸੋਲ਼ਸ ਕਹਾਪਨ ਸਹਸ੍ਸਾਨਿ ਵਤ੍ਥਾਲਙ੍ਕਾਰ-ਗਨ੍ਧ-ਮਾਲ-ਤੇਲ-ਮਧੁ-ਫਾਣਿਤ-ਪਞ੍ਚਕਟੁਕ ਭੇਸਜ੍ਜਾਨਿ ਨਾਨਾਵਿਧ ਸੂਪਵ੍ਯਞ੍ਜਨ ਸਂਯੁਤ੍ਤਂ ਭਤ੍ਤਂ ਯਾਗੁਖਜ੍ਜਕਾਦੀਨਿ ਅਟ੍ਠਵਿਧ ਕਪ੍ਪਿਯਯ ਪਾਨਕਾਨਿ ਪਞ੍ਚਵਿਧ ਮੁਖਵਾਸ ਸਹਿਤ ਤਾਮ੍ਬੂਲਾਨਿ ਚ ਠਪਾਪੇਤ੍ਵਾ ਮਹਾਚੇਤਿਯੇ ਕਮ੍ਮਂ ਕਰੋਨ੍ਤਾਗਹਟ੍ਠਾ ਵਾ ਪਬ੍ਬਜਿਤਾ ਵਾ ਯਥਾਜ੍ਝਾਸਯਂ ਗਣ੍ਹਨ੍ਤੁ ਮੁਲਂ ਅਗਹੇਤ੍ਵਾ ਕਮ੍ਮਂ ਕਰੋਨ੍ਤਾਨਂ ਕਾਤੁਂ ਨ ਦੇਥਾਤਿ ਆਣਾਪੇਸਿ.

ਅਥੇਕੋ ਥੇਰੋ ਚੇਤਿਯਕਮ੍ਮੇ ਸਹਾਯ ਭਾਵਂ ਇਚ੍ਛਨ੍ਤੋ ਕਮ੍ਮਕਰਣਟ੍ਠਾਨੇ ਮਤ੍ਤਿਕਾ ਸਦਿਸਂ ਕਤ੍ਵਾ ਅਤ੍ਤਾਨਂ ਅਭਿਸਙ੍ਖਟਂ ਮਤ੍ਤਿਕਾ ਪਿਣ੍ਡਂ ਏਕੇਨ ਹਤ੍ਥੇਨ ਗਹੇਤ੍ਵਾ ਅਞ੍ਞੇਨ ਮਾਲਾ ਗਹੇਤ੍ਵਾ ਮਹਾਚੇਤਿਯਙ੍ਗਣਂ ਆਰੁਯ੍ਹ ਰਾਜਕਮ੍ਮਿਕੇ ਵਞ੍ਚੇਤ੍ਵਾ ਵਡ੍ਢਕਿਸ੍ਸ ਅਦਾਸਿ. ਸੋ ਗਣ੍ਹਨ੍ਤੋਵ ਪਕਤਿਮਤ੍ਤਿ ਕਾ ਨਾ ਭਵਤੀਤਿ ਞਤ੍ਵਾ ਥੇਰਸ੍ਸ ਮੁਖਂ ਓਲੋਕੇਸਿ ਤਸ੍ਸਾਕਾਰਂ ਞਤ੍ਵਾ ਤਤ੍ਥ ਕੋਲਾਹਲ ਮਹੋਸਿ ਅਨੁਕ੍ਕਮੇਨ ਰਾਜਾ ਸੁਤ੍ਵਾ ਆਗਨ੍ਤ੍ਵਾ ਵਡ੍ਢਕਿਂ ਪੁਚ੍ਛਿ-ਤੁਯ੍ਹਂ ਕਿਰ ਭਣੇ ਏਕੋ ਭਿਕ੍ਖੁ ਅਮੂਲਕ ਮਤ੍ਤਿਕਾਪਿਣ੍ਡਂ ਅਦਾਸੀਤਿ.

ਸੋ ਏਵਮਾਹ-ਯੇਭੁਯ੍ਯੇਨ ਅਯ੍ਯਾ ਏਕੇਨ ਹਤ੍ਥੇਨ ਪੁਪ੍ਫਂ ਏਕੇਨ ਮਤ੍ਤਿਕਾਪਿਣ੍ਡੇ ਗਹੇਤ੍ਵਾ ਆਹਰਿਤ੍ਵਾ ਦੇਨ੍ਤਿ ਤੇਨਾਹਂ ਅਜਾਨਿਤ੍ਵਾ ਕਮ੍ਮੇ ਉਪਨੇਸਿਂ ‘‘ਅਯਂ ਪਨ ਆਗਨ੍ਤੁਕੋ, ਅਯਂ ਨੇਵਾਸਿਕੋਤਿ ਏਤ੍ਤਕਂ ਜਾਨਾਮੀਤਿ.‘‘ਤੇਨ ਹਿ ਤਂ ਥੇਰਂ ਇਮਸ੍ਸ ਦਸ੍ਸੇਹੀਤਿ ਏਕਂ ਮਹਲ੍ਲਕ ਬਲਤ੍ਥਂ ਵਡ੍ਢਕਿਸ੍ਸ ਸਨ੍ਤਿਕੇ ਠਪੇਸਿ ਵਡ੍ਢਕੀ ਪੁਨ ਆਗਤਕਾਲੇ ਤਂ ਥੇਰਂ ਬਲਤ੍ਥਸ੍ਸ ਦਸ੍ਸੇਸਿ ਸੋ ਤਂ ਸਞ੍ਜਾਨਿਤ੍ਵਾ ਰਞ੍ਞੋ ਆਰੋਚੇਸਿ.

ਰਾਜਾ ਤਸ੍ਸ ਸਞ੍ਞਂ ਅਦਾਸਿ. ਤੋ ਤ੍ਵਂ ਤਯੋ ਜਾਤਿਸੁਮਨ ਮਕੁਲਕੁਮ੍ਭੇ ਮਹਾਬੋਧਿ ਅਙ੍ਗਣੇ ਰਾਸਿਂ ਕਤ੍ਵਾ ਗਣ੍ਧਞ੍ਚ ਠਪੇਤ੍ਵਾ ਮਹਾਬੋਧਿ ਅਙ੍ਗਣਂ ਗਤ ਕਾਲੇ ਆਗਨ੍ਤੁਕਸ੍ਸ ਥੇਰਸ੍ਸ ਪੂਜਨਤ੍ਥਾਯ ਰਞ੍ਞੋ ਦਾਪਿਤਂ ਗਣ੍ਧਮਾਲਾਨ੍ਤਿ ਵਤ੍ਵਾ ਦੇਹੀਤਿ. ਬਲਤ੍ਥੋ ਰਞ੍ਞੋ ਵੁਤ੍ਤਨਯੇਨੇਵ ਤਸ੍ਸ ਬੋਧਿ ਅਙ੍ਗਣਂ ਗਤ ਕਾਲੇ ਤਂ ਗਣ੍ਧਮਾਲਂ ਅਦਾਸਿ.

ਸੋਪਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਸੇਲਸਣ੍ਥਰਂ ਧੋਵਿਤ੍ਵਾ ਗਣ੍ਧੇਨ ਪਰਿਭਣ੍ਡਂ ਕਤ੍ਵਾ ਸਿਲਾਸਨ੍ਥਰਂ ਕਤ੍ਵਾ ਪੁਪ੍ਫਂ ਪੂਜੇਤ੍ਵਾ ਚਤੁਸੁ ਠਾਨੇਸੁ ਵਨ੍ਦਿਤ੍ਵਾ ਪਾਚੀਨਦ੍ਵਾਰੇ ਅਞ੍ਜਲਿਂ ਪਗ੍ਗਯ੍ਹ ਪੀਤਿਂ ਉਪ੍ਪਾਦੇਤ੍ਵਾ ਪੁਪ੍ਫ ਪੂਜਂ ਓਲੋਕੇਨ੍ਤੋ ਅਟ੍ਠਾਸਿ.

ਬਲਤ੍ਥੋ ਤਸ੍ਮਿਂ ਕਾਲੇ ਤਂ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਵਮਾਹ. ਭਨ੍ਤੇ ਤੁਮ੍ਹਾਕਂ ਚੇਤਿਯਕਮ੍ਮੇ ਸਹਾਯਭਾਵਤ੍ਥਾਯ ਦਿਨ੍ਨਸ੍ਸ ਅਮੂਲਕ ¶ ਮਤ੍ਤਿਕਾਪਿਣ੍ਡਸ੍ਸ ਮੂਲਂ ਦਿਨ੍ਨਭਾਵਂ ਰਾਜਾ ਜਾਨਾਪੇਤਿ ਅਤ੍ਤਨੋ ਵਨ੍ਦਨੇਨ ਵਨ੍ਦਾਪੇਤੀਤਿ. ਤਂ ਸੁਤ੍ਵਾ ਥੇਰੋ ਅਨਤ੍ਤਮਨੋ ਅਹੋਸਿ. ਬਲਤ੍ਥੋ ਤਿਟ੍ਠਨ੍ਤੁ ਭਨ੍ਤੇ ਤਯੋ ਸੁਮਨ ਮਕੁਲ ਕੁਮ੍ਭਾਤਤ੍ਤਕਾਨੇਵ ਸੁਵਣ੍ਣਪੁਪ੍ਫਾਨਿਪਿ ਏਤਂ ਮਤ੍ਤਿਕਪਿਣ੍ਡਂ ਨਾਗ੍ਘਨ੍ਤਿ. ਚਿਤ੍ਤਂ ਪਸਾਦੇਥ ਭਨ੍ਤੇਤਿ ਪਕ੍ਕਾਮਿ.

ਤਦਾ ਕੋਟ੍ਠਿਵਾਲਜਨਪਦੇ ਪਿਯਙ੍ਗਲ੍ਲ ਵਿਹਾਰਵਾਸੀ ਏਕੋ ਥੇਰੋ ਇਟ੍ਠਕਵਡ੍ਢਕਿਸ੍ਸ ਞਾਤਕੋ ਅਹੋਸਿ. ਸੋ ਆਗਨ੍ਤ੍ਵਾ ਵਡ੍ਢਕਿਨਾ ਸਦ੍ਧਿਂ ਮਨ੍ਤੇਤ੍ਵਾ ਦੀਘ ਬਹਲ ਕਿਰਿਯਤੋ ਇਟ੍ਠਕਪ੍ਪਮਾਣਂ ਜਾਨਿਤ੍ਵਾ ਗਨ੍ਤ੍ਵਾ ਸਹਤ੍ਥੇਨੇਵ ਸਕ੍ਕਚ੍ਚਂ ਮਤ੍ਤਿਕਂ ਮਦ੍ਦਿਤ੍ਵਾ ਇਟ੍ਠਕਂ ਕਤ੍ਵਾ ਪਚਿਤ੍ਵਾ ਪਤ੍ਤਤ੍ਥਵਿਕਾਯ ਪਕ੍ਖਿਪਿਤ੍ਵਾ ਪਚ੍ਚਾਗਨ੍ਤ੍ਵਾ ਏਕੇਨ ਹਤ੍ਥੇਨ ਰਞ੍ਞੋ ਇਟ੍ਠਕਂ ਏਕੇਨ ਪੁਪ੍ਫਂ ਗਹੇਤ੍ਵਾ ਅਤ੍ਤਨੋ ਇਟ੍ਠਕਾਸ ਸਦ੍ਧਿਂ ਰਞ੍ਞੋ ਇਟ੍ਠਕਂ ਅਦਾਸਿ. ਵਡ੍ਢਕੀ ਗਹੇਤ੍ਵਾ ਕਮ੍ਮੇ ਉਪਨੇਸਿ.

ਥੇਰੋ ਸਞ੍ਜਾਤ ਪੀਤਿ ਸੋਮਨਸ੍ਸੋ ਮਹਾਚੇਤਿਯੇ ਕਮ੍ਮਂ ਕਰੋਨ੍ਤੋ ਇਟ੍ਠ ਕਸਾਲਪਰਿਵੇਣੇ ਵਸਤਿ ਤਸ੍ਸ ਤਂ ਕਮ੍ਮਂ ਪਾਕਟਂ ਅਹੋਸਿ. ਰਾਜਾ ਵਡ੍ਢਕਿਂ ਪੁਚ੍ਛਿ-ਭਣੇ ਏਕੇਨ ਕਿਰ ਅਯ੍ਯੇਨ ਅਮੂਲਿਕ ਇਟ੍ਠਕਾ ਦਿਨ੍ਨਾਤਿ. ਸਚ੍ਚਂ ਦੇਵ, ਏਕੇਨ ਅਯ੍ਯੇਨ ਦਿਨ੍ਨ ਇਟ੍ਠਕਾ ਅਮ੍ਹਾਕਂ ਇਟ੍ਠਕਾਯ ਸਦਿਸਾਤਿ ਕਮ੍ਮੇ ਉਪਨੇਸਿਨ੍ਤਿ ਆਹ. ਪੁਨ ਤਂ ਇਟ੍ਠਕਂ ਸਞ੍ਜਾਨਾਸੀਤਿ ਰਞ੍ਞਾ ਵੁਤ੍ਤੇ ਞਾਤਕਾਨੁਗ੍ਗਹੇਨ ਨ ਜਾਨਾਮੀਤਿ ਆਹ.

ਰਾਜਾ ਯਦਿ ਏਵਂ ਤਂ ਇਮਸ੍ਸ ਦਨ੍ਨੇਹੀਤਿ ਬਲਤ੍ਥਂ ਠਪੇਸਿ ਸੋ ਤਂ ਪੁਬ੍ਬੇ ਵਿਯ ਬਲਤ੍ਥਸ੍ਸ ਦਸ੍ਸੇਸਿ. ਬਲਤ੍ਥੋ ਪਰਿਵੇਣਂ ਗਨ੍ਤ੍ਵਾ ਸਨ੍ਤਿਕੇ ਨਿਸੀਦਿਤ੍ਵਾ ਪਟਿਸਣ੍ਥਾਰਂ ਕਤ੍ਵਾ ਭਨ੍ਤੇ ਤੁਮ੍ਹੇ ਆਗਨ੍ਤੁਕਾ ਨੇਵਾਸਿਕਾਤਿ ਪੁਚ੍ਛਿ. ਆਗਨ੍ਤੁਕੋਮ੍ਹੀ ਉਪਾਸਕਾਤਿ. ਕਤਰ ਰਟ੍ਠਵਾਸਿਕੋ ਭਨ੍ਤੇਤਿ ਕੋਟ੍ਠਿਵਾਲਜਨਪਦੇ ਪਿਯਙ੍ਗਲ੍ਲ ਵਿਹਾਰਵਾਸਿਮ੍ਹਿ ਉਪਾਸਕਾਤਿ ਇਧੇਵ ਵਸਥ ਗਚ੍ਛਥਾਤਿ. ਇਧ ਨ ਵਸਾਮ ਅਸੁਕਦਿਵਸੇ ਗਚ੍ਛਾਮਾਤਿ ਆਹ. ਬਲਤ੍ਥੋਪਿ ਅਹਮ੍ਪਿ ਤੁਮ੍ਹੇਹਿ ਸਦ੍ਧਿਂ ਆਗਮਿਸ੍ਸਾਮਿ. ਮਯ੍ਹਮ੍ਪਿ ਗਾਮੋ ਏਤਸ੍ਮਿਂਯੇਵ ਜਨਪਦੇ ਅਸੁਕ ਗਾਮੋ ਨਾਮਾਤਿ ਆਹ. ਥੇਰੋ ਸਾਧੂਤਿ ਸਮ੍ਪਟਿਚ੍ਛਿ. ਬਲਤ੍ਥੋ ਤਂ ਪਵਤ੍ਤਿਂ ਰਞ੍ਞੋ ਨਿਵੇਦੇਸਿ.

ਰਾਜਾ ਬਲਤ੍ਥਸ੍ਸ ਸਹਸ੍ਸਗ੍ਘਨਕਂ ਵਤ੍ਥਯੁਗਲਂ ਮਹਗ੍ਘਂ ਰਤ੍ਤਕਮ੍ਬਲਂ ਉਪਾਹਨਯੁਗਂ ਸੁਗਣ੍ਧਤੇਲਨਾਲ਼ਿਂ ਅਞ੍ਞ੍ਚ ਬਹੁਂ ਸਮਣਪਰਿਕ੍ਖਾਰਂ ਥੇਰਸ੍ਸ ਦੇਹੀਤਿ ਦਾਪੇਸਿ ਸੋਪਿ ਪਰਿਕ੍ਖਾਰਂ ਗਹੇਤ੍ਵਾ ਪਰਿਵੇਣਂ ਗਨ੍ਤ੍ਵਾ ਥੇਰੇਨ ਸਦ੍ਧਿਂ ਰਤ੍ਤਿਂ ਵਸਿਤ੍ਵਾ ਪਾਤੋ ਸਦ੍ਧਿਂਯੇਵ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਗਨ੍ਤ੍ਵਾ ਪਿਯਙ੍ਗਲ੍ਲ ਵਿਹਾਰਸ੍ਸ ਦਿਸ੍ਸਮਾਨੇ ਠਾਨੇ ਸੀਤਚ੍ਛਾਯਾਯ ਥੇਰਂ ਨਿਸੀਦਾਪੇਤ੍ਵਾ ਪਾਦੇ ਧੋਵਿਤ੍ਵਾ ਗਣ੍ਧਤੇਲੇਨ ਮਕ੍ਖੇਤ੍ਵਾ ਗੁਲ਼ੋਦਕਂ ਪਾਯੇਤ੍ਵਾ ਉਪਾਹਨਂ ਪਟਿਮੁਞ੍ਚਿਤ੍ਵਾ ਇਦਂ ਮੇ ਪਰਿਕ੍ਖਾਰਂ ਕੁਲੂਪਗਥੇਰਸ੍ਸਤ੍ਥਾਯ ਗਹਿਤਂ, ਇਦਾਨਿ ਤੁਮ੍ਹਾਕਂ ਦਮ੍ਮਿ, ਇਦਂ ਪਨ ਸਾਟਕਯੁਗਂ ਮਮ ਪੁਤ੍ਤਸ੍ਸ ਮਙ੍ਗਲਤ੍ਥਾਯ ਗਹਿਤਂ, ¶ ਤੁਮ੍ਹੇ ਚੀਵਰਂ ਕਤ੍ਵਾ ਪਾਰੁਪਥਾਤਿ ਵਤ੍ਵਾ ਥੇਰਸ੍ਸ ਪਾਦਮੂਲੇ ਠਪੇਸਿ.

ਥੇਰੋ ਸਾਟਕਯੁਗਂ ਪਤ੍ਤਤ੍ਥਵਿਕਾਯ ਪਕ੍ਖਿਪਿਤ੍ਵਾ ਸੇਸਪਰਿਕ੍ਖਾਰਂ ਭਣ੍ਡਿਕਂ ਕਤ੍ਵਾ ਉਪਾਹਨਂ ਆਰੁਯ੍ਹਂ ਕਤ੍ਤਯਟ੍ਠਿਂ ਗਹੇਤ੍ਵਾ ਮਗ੍ਗਂ ਪਟ੍ਪਜ੍ਜਿ. ਬਲਤ੍ਥੋ ਤੇਨ ਸਦ੍ਧਿਂ ਥੋਕਂ ਗਨ੍ਤ੍ਵਾ ‘‘ਤਿਟ੍ਠਥ ਭਨ੍ਤੇ, ਮਯ੍ਹਂ ਅਯਂ ਮਗ੍ਗੋ‘‘ਤਿ ਵਤ੍ਵਾ ਪੁਬ੍ਬੇ ਵੁਤ੍ਤਨਯੇਨੇਵ ਰਞ੍ਞੋ ਸਾਸਨਂ ਥੇਰਸ੍ਸ ਆਰੋਚੇਸਿ

ਥੇਰੋ ਤਂ ਸੁਤ੍ਵਾ ਮਹਨ੍ਤੇਨ ਪਰਕ੍ਕਮੇਨ ਕਤਕਮ੍ਮਂ ਅਕਤਂ ਵਿਯ ਜਾਤਨ੍ਤਿ ਦੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਅਸ੍ਸੁਧਾਰਂ ਪਵਤ੍ਤੇਤ੍ਵਾ’ਉਪਾਸਕ ਤਵ ਪਰਿਕ੍ਖਾਰਂ ਤ੍ਵਮੇਵ ਗਣ੍ਹਾਹੀ‘‘ਤਿ ਠਿਤਕੋਵ ਸਬ੍ਬਾਪਰਿਕ੍ਖਾਰਂ ਛਡ੍ਡੇਸਿ ਬਲਤ੍ਥੋ ਕਿਂ ਨਾਮ ਭਨ੍ਤੇ ਵਦਥ ਏਸ ਰਾਜਾ ਤੁਯ੍ਹਂ ਭਵਗ੍ਗਪ੍ਪਮਾਣਂ ਕਤ੍ਵਾ ਪਚ੍ਚਯਂ ਦੇਨ੍ਤੋਪਿ ਤਵ ਇਟ੍ਠਕਾਨੁਰੂਪਂ ਕਾਤੁਂ ਨ ਸਕ੍ਕੋਤਿ. ਕੇਵਲਂ ਪਨ ਮਹਾਚੇਤਿਯੇ ਕਮ੍ਮਂ ਅਞ੍ਞੇਸਂ ਅਪਤ੍ਤਕਂ ਕਤ੍ਵਾ ਕਰੋਮੀਤਿ ਅਧਿਪ੍ਪਾਯੇਨ ਏਵਂ ਕਾਰੇਤਿ ਤੁਮ੍ਹੇ ਪਨ ਭਨ੍ਤੇ ਅਤ੍ਤਨਾ ਲਦ੍ਧਪਰਿਕ੍ਖਾਰਂ ਗਹੇਤ੍ਵਾ ਚਿਤ੍ਤਂ ਪਸਾਦੇਥਾਤਿ ਵਤ੍ਵਾ ਥੇਰਂ ਸਞ੍ਞਾਪੇਤ੍ਵਾ ਪਕ੍ਕਾਮਿ. ਇਮਸ੍ਮਿਂ ਪਨ ਚੇਤਿਯੇ ਭਤਿਯਾ ਕਮ੍ਮਂ ਕਤ੍ਵਾ ਚਿਤ੍ਤਂ ਪਸਾਦੇਤ੍ਵਾ ਸਗ੍ਗੇ ਨਿਬ੍ਬਤ੍ਤ ਸਤ੍ਤਾਨਂ ਪਮਾਣਂ ਨਤ੍ਥਿ.

ਤਾਵਤਿਂਸ ਭਵਨੇ ਕਿਰ ਨਿਬ੍ਬਤ੍ਤ ਦੇਵਧੀਤਰੋ ਅਤ੍ਤਨੋ ਸਮ੍ਪਤ੍ਤਿਂ ਓਲੋਕੇਤ੍ਵਾ ਕੇਨ ਨੁ ਕੋ ਕਮ੍ਮੇਨ ਇਮਂ ਸਮ੍ਪਤ੍ਤਿਂ ਲਭਿਮ੍ਹਾਤਿ ਆਵਜ੍ਜਮਾਨਾ ਮਹਾਚੇਤਿਯੇ ਭਤਿਯਾ ਕਮ੍ਮਂ ਕਤ੍ਵਾ ਲਦ੍ਧਭਾਵਂ ਞਤ੍ਵਾ ਭਤਿਯਾ ਕਤਕਮ੍ਮਸ੍ਸਾਪਿ ਫਲਂ ਈਦਿਸਂ, ਅਤ੍ਤਨੋ ਸਨ੍ਤਕੇਨ ਕਮ੍ਮਫਲਂ ਸਦ੍ਦਹਿਤ੍ਵਾ ਕਤਕਮ੍ਮਸ੍ਸ ਫਲਂ ਕੀਦਿਸਂ ਭਵਿਸ੍ਸਤੀਤਿ ਚਿਨ੍ਤੇਤ੍ਵਾ ਦਿਬ੍ਬਗਣ੍ਧਮਾਲਂ ਆਦਾਯ ਰਤ੍ਤਿਭਾਗੇ ਆਗਨ੍ਤ੍ਵਾ ਪੂਜੇਤ੍ਵਾ ਚੇਤਿਯਂ ਵਨ੍ਦਨ੍ਤਿ.

ਤਸ੍ਮਿਂ ਖਣੇ ਭਾਤਿਵਙ੍ਕਵਾਸੀ ਮਹਾਸੀਵਤ੍ਥੇਰੋ ਨਾਮ ਚੇਤਿਯਂ ਵਨ੍ਦਨਤ੍ਥਾਯ ਗਤੋ, ਤਾ ਵਨ੍ਦਨ੍ਤਿਯੋ ਦਿਸ੍ਵਾ ਮਹਾਸਤ੍ਤਪਣ੍ਣਿਰੁਕ੍ਖਸਮੀਪੇ ਠਿਤੋ ਤਾਸਂ ਯਥਾਰੁਚਿਂ ਵਨ੍ਦਿਤ੍ਵਾ ਗਮਨਕਾਲੇ ਪੁਚ੍ਛਿ? ਤੁਮ੍ਹਾਕਂ ਸਰੀਰਾਲੋਕੇਨ ਸਕਲਤਮ੍ਬਪਣ੍ਣਿਦਿਪੋ ਏਕਾਲੋਕੋ, ਕਿਂ ਕਮ੍ਮਂ ਕਰਿਤ੍ਥਾਤਿ ਭਨ੍ਤੇ ਅਮ੍ਹਾਕਂ ਸਨ੍ਤਕੇ ਕਤਕਮ੍ਮਂ ਨਾਮ ਨਤ੍ਥਿ ਇਮਸ੍ਮਿਂ ਚੇਤਿਯੇ ਮਨਂ ਪਸਾਦੇਤ੍ਵਾ ਭਤਿਯਾ ਕਮ੍ਮਂ ਕਰਿਮ੍ਹਾਤਿ ਆਹਂਸੁ ਏਵਂ ਬੁਦ੍ਧਸਾਸਨੇ ਪਸਨ੍ਨਚਿਤ੍ਤੇਨ ਭਤਿਯਾ ਕਤਕਮ੍ਮਮ੍ਪਿ ਮਹਪ੍ਫਲਂ ਹੋਤਿ. ਤਸ੍ਮਾ-

‘‘ਚਿਤ੍ਤਪ੍ਪਸਾਦਮਤ੍ਤੇਨ-ਸੁਗਤੇ ਗਤਿ ਉਤ੍ਤਮਾ,

ਲਬ੍ਭਤੀਤਿ ਵਿਦਿਤ੍ਵਾਨ-ਥੂਪਪੂਜਂ ਕਰੇ ਬੁਦ੍ਧੋ’’ਤਿ;

ਏਵਂ ਰਾਜਾ ਚੇਤਿਯਕਮ੍ਮਂ ਕਾਰਾਪੇਨ੍ਤੋ ਪੁਪ੍ਫਧਾਨਤ੍ਤਯਂ ਨਿਟ੍ਠਾਪੇਸਿ. ਤਂ ਖੀਣਾਸਵ ਥਿਰਭਾਵਤ੍ਥਾਯ ਭੂਮਿਸਮਂ ਕਤ੍ਵਾ ਓਸੀਦਾਪੇਸੁਂ, ਏਵਂ ਨਵਵਾਰੇ ਚਿਤਂ ਚਿਤਂ ਓਸੀਦਾਪੇਸੁਂ. ਰਾਜਾ ਕਾਰਣਂ ਅਜਾਨਨ੍ਤੋ ਅਨਤ੍ਤਮਨੋ ¶ ਹੁਤ੍ਵਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਸਿ. ਅਸੀਤਿ ਭਿਕ੍ਖੁਸਹਸ੍ਸਾਨਿ ਸਨ੍ਨਿਪਤਿਂਸੁ ਰਾਜਾ ਭਿਕ੍ਖੁਸਙ੍ਘਂ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਵਨ੍ਦਿਤ੍ਵਾ ਪੁਚ੍ਛਿ’ਭਨ੍ਤੇ ਮਹਾਚੇਤਿਯੇ ਪੁਪ੍ਫਧਾਨਤ੍ਤਯਂ ਨਵਵਾਰੇ ਨ ਜਾਨਾਮੀ’ਤਿ ਭਿਕ੍ਖੁਸਙ੍ਘੋ ਆਹ ਮਹਾਰਾਜ ਤੁਯ੍ਹਂ ਕਮ੍ਮਸ੍ਸ ਵਾ ਜੀਵਿਤਸ੍ਸ ਵਾ ਅਨ੍ਤਰਾਯੋ ਨਤ੍ਥਿ. ਅਨਾਗਤੇ ਥਿਰਭਾਵਤ੍ਥਾਯ ਇਦ੍ਧਿਮਨ੍ਤੇਹਿ ਓਸੀਦਾਪਿਤਂ, ਇਤੋ ਪਟ੍ਠਾਯ ਨ ਓਸੀਦਾਪੇਸ੍ਸਨ੍ਤਿ. ਤ੍ਵਂ ਅਞ੍ਞਥਤ੍ਤਂ ਅਕਤ੍ਵਾ ਮਹਾਥੂਪਂ ਸਮਾਪੇਹੀਤਿ. ਤਂ ਸੁਤ੍ਵਾ ਹਟ੍ਠੋ ਰਾਜਾ ਥੂਪਕਮ੍ਮਂ ਕਾਰੇਸਿ.

ਦਸਪੁਪ੍ਫਧਾਨਾਨਿ ਦਸਹਿ ਇਟ੍ਠਕਾਕੋਟੀਹਿ ਨਿਟ੍ਠਨਂ ਗਮਿਂਸੁ ਪੁਨ ਪੁਪ੍ਫਧਾਨਤ੍ਤਯੇ ਨਿਟ੍ਠਿਤੇ ਭਿਕ੍ਖੁਸਙ੍ਘੋ ਉਤ੍ਤਰ-ਸੁਮਨ ਨਾਮਕੇ ਦ੍ਵੇ ਖੀਣਾਸਵ ਸਾਮਣੇਰੇ ਆਣਾਪੇਸਿ. ਤੁਮ੍ਹੇ ਸਮਚਤੁਰਸ੍ਸਂ ਅਟ੍ਠਰਤਨ ਬਹਲਂ ਏਕੇਕ ਪਸ੍ਸਤੋ ਅਸੀਤਿ ਅਸਿਤਿ ਹਤ੍ਥਪ੍ਪਮਾਣਂ ਛਮੇਦਕ ਵਣ੍ਣਪਾਸਾਣੇ ਆਹਰਥਾਤਿ. ਤੇ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਉਤ੍ਤਰਕੁਰੁਂ ਗਨ੍ਤ੍ਵਾ ਚੁਤ੍ਤਪ੍ਪਕਾਰਪ੍ਪਮਾਣੇ ਭਣ੍ਡਿਪੁਪ੍ਫਨਿਹੇਛ ਮੇਦਵਣ੍ਣਪਾਸਾਣੇ ਆਹਰਿਤ੍ਵਾ ਏਕਂ ਪਾਸਾਣਂ ਧਾਤੁਗਬ੍ਭਸ੍ਸ ਭੂਮਿਯਂ ਅਤ੍ਥਰਿਤ੍ਵਾ ਚਤ੍ਤਾਰੋ ਪਾਸਾਣੇ ਚਤੁਸੁ ਪਸ੍ਸੇਸੁ ਸਂਵਿਧਾਯ ਅਪਰਂ ਧਾਤੁਗਬ੍ਭਂ ਪਿਦਹਨਤ੍ਥਾਯ ਪਾਚੀਨ ਦਿਸਾਭਾਗੇ ਵਾਲੁਕ ਪਾਕਾਰ ਸਮੀਪੇ ਅਦਿਸ੍ਸਮਾਨਂ ਕਤ੍ਵਾ ਠਪੇਸੁਂ.

੨੨. ਤਤੋ ਰਾਜਾ ਧਾਤੁਗਬ੍ਭਸ੍ਸ ਮਜ੍ਝੇ ਸਬ੍ਬਰਤਨਮਯਂ ਸਬ੍ਬਾਕਾਰਸਮ੍ਪਨ੍ਨਂ ਮਨੋਹਰਂ ਬੋਧਿਰੁਕ੍ਖਂ ਕਾਰੇਸਿ ਸੋ ਹਿ ਇਣ੍ਦਨੀਲਮਣਿਭੂਮਿਯਂ ਪਤਿਟ੍ਠਿਤੋ, ਤਸ੍ਸਮੂਲਾਨਿ ਪਚਾਲ਼ਮਯਾਨਿ, ਖਣ੍ਧੋ ਸਿਰਿਵਚ੍ਛਾਦੀਹਿ ਅਟ੍ਠਮਙ੍ਗਲਿਕੇਹਿ ਪੁਪ੍ਫਪਨ੍ਤਿ ਲਤਾਪਨ੍ਤਿ ਚਤੁਪ੍ਪਦ ਹਂਸਪਨ੍ਤਿਹਿ ਚ ਵਿਚਿਤ੍ਤੋ ਅਟ੍ਠਾਰਸ ਹਤ੍ਥੁਬ੍ਬੇਧੋ ਰਜਤਮਯੋ ਅਹੋਸਿ.

ਪਞ੍ਚਮਹਾਸਾਖਾਪਿ ਅਟ੍ਠਾਰਸਹਤ੍ਥਾਚ, ਪਤ੍ਤਾਪਿ ਮਣਿਮਯਾਨਿ, ਪਣ੍ਡੁਪਤ੍ਤਾਨਿ, ਹੇਮਮਯਾਨਿ, ਫਲਾ ਪਵਾਲ਼ਮਯਾਨਿ. ਤਥਾ ਅਙ੍ਕੁਰੋਪਰਿ ਚੇਲਵਿਤਾਨਂ ਬਣ੍ਧਾਪੇਸਿ. ਤਸ੍ਸ ਅਨ੍ਤੇ ਸਮਨ੍ਨਤੋ ਮੁਤ੍ਤਮਯ ਕਿਙ੍ਕਿਣਿਕਜਾਲਂ ਓਲਮ੍ਬਤਿ. ਸ੍ਵਣ੍ਣਘਣ੍ਟਾਪਨ੍ਤਿ ਚ ਸੁਵਣ੍ਣਦਾਮਾਨਿ ਚ ਤਹਿਂ ਤਹਿਂ ਓਲਮ੍ਬਨ੍ਤਿ ਵਿਤਾਨਸ੍ਸ ਚਤੁਸੁ ਕਣ੍ਣੇਸੁ ਨਵਸਤਸਹਸ੍ਸਗ੍ਘਨਕੋ ਏਕੇਕੋ ਮੁਤ੍ਤਾਕਲਾਪੋ ਓਲਮ੍ਬਤਿ. ਤਤ੍ਥ ਯਥਾਨੁਰੂਪਂ ਨਾਨਾਰਤਨ ਕਤਾਨੇਵ ਚਣ੍ਦ-ਸੂਰਿਯ-ਤਾਰਕਾਰੂਪਾਨਿ ਪਦੁਮਾਨਿ ਚ ਅਪ੍ਪਿਤਾਨਿ ਅਹੇਸੁਂ. ਮਹਗ੍ਘਾਨਿ ਅਨੇਕਵਣ੍ਣਾਨਿ ਅਟ੍ਠੁਤ੍ਤਰ ਸਹਸ੍ਸਾਨਿ ਵਤ੍ਥਾਨਿ ਓਲਮ੍ਬਿਂਸੁ.

ਤਤੋ ਬੋਧਿਰੁਕ੍ਖਸ੍ਸ ਸਮਨ੍ਤਤੋ ਸਤ੍ਤ ਰਤਨਮਯ ਵੇਦਿਕਾ ਕਾਰੇਤ੍ਵਾ ਮਹਾਮਲਕ ਮੁਤ੍ਤਾ ਅਤ੍ਥਰਾਪੇਸਿ ਮੁਤ੍ਤਾ ਵੇਦਿਕਾਨਂ ਅਨ੍ਤਰੇ ਗਣ੍ਧੋਦਕ ਪੁਣ੍ਣ ਸਤ੍ਤਰਤਨਮਯ ਪੁਣ੍ਣਘਟ ਪਨ੍ਤਿਯੋ ਠਪਾਪੇਸਿ. ਤਾਸੁ ਸੁਵਣ੍ਣਘਟੇ ਪਵਾਲ਼ਮਯਾਨਿ ਪੁਪ੍ਫਾਨਿ ਅਹੇਸੁਂ. ਪਵਾਲ਼ਘਟੇ ਸੁਵਣ੍ਣਮਯਾਨਿ ਪੁਪ੍ਫਾਨਿ. ਮਣਿਘਟੇ ਰਜਤਮਯਾਨਿ ਪੁਪ੍ਫਾਨਿ ¶ ਰਜਤਘਟੇ ਮਣਿਮਯਾਨਿਪੁਪ੍ਫਾਤਿ. ਸਤ੍ਤਰਤਨਘਟੇ ਸਤ੍ਤਰਤਨਮਯਾਨਿ ਪੁਪ੍ਫਾਨਿ ਅਹੇਸੁਂ.

ਬੋਧਿਰੁਕ੍ਖਸ੍ਸ ਪਾਚੀਨ ਦਿਸਾਭਾਗੇ ਰਤਨਮਯੇ ਕੋਟਿਅਗ੍ਘਨਕੇ ਪਲ੍ਲਙ੍ਕੇ ਘਨਕੋਟ੍ਟਿਮ ਸੁਵਣ੍ਣਮਯਂ ਬੁਦ੍ਧਪਟਿਮਂ ਨਿਸੀਦਾਪੇਸਿ. ਤਸ੍ਸਾ ਪਟਿਮਾਯ ਵੀਸਤਿ ਨਖਾ ਅਕ੍ਖਿਨਂ ਸੇਤਟ੍ਠਾਨਾਨਿ ਚ ਫਲ਼ਕਮਯਾਨਿ. ਹਤ੍ਥਤਲ ਪਾਦਤਲ ਦਨ੍ਤਾਵਰਣਾਨਿ ਅਕ੍ਖੀਨਂ ਰਤ੍ਤਟ੍ਠਾਤਾਨਿ ਚ ਪਵਾਲ਼ਮਯਾਨਿ ਕੇਸ ਭਮੁਕਾਨਿ ਅਕ੍ਖਿਨਂ ਕਾਲ਼ਕਟ੍ਠਾਨਾਨਿ ਚ ਇਣ੍ਦਨੀਲ ਮਣਿਮਯਾਨਿ ਉਣ੍ਣਾਲੋਮਂ ਪਨਂ ਰਜਤਮਯਂ ਅਹੋਸਿ. ਤਤੋ ਸਹਮ੍ਪਤਿ ਮਹਾ ਬ੍ਰਹ੍ਮਾਨਂ ਰਜਤਚ੍ਛਤ੍ਤਂ ਧਾਰੇਤ੍ਵਾ ਠਿਨਂ ਕਾਰੇਸਿ. ਤਤਾ ਦ੍ਵੀਸੁ ਦੇਵਲੋਕੇਸੁ ਦੇਵਤਾਹਿ ਸਦ੍ਧਿਂ ਵਿਜਯੁਤ੍ਤਰਸਙ੍ਖਂ ਗਹੇਤ੍ਵਾ ਅਭਿਸੇਕਂ ਦਦਮਾਨਂ ਸਕ੍ਕਂ ਦੇਵਰਾਜਾਨਂ ਪਞ੍ਚਸਿਖ ਦੇਵਪੁਤ੍ਤਂ ਬੇਲ਼ੁਵ ਪਣ੍ਡੁ ਵੀਣਮਾਦਾਯ ਗਣ੍ਧਬ੍ਬਂ ਕੁਰੁਮਾਨਂ. ਮਹਾਕਾਲ਼ ਨਾਗਰਾਜਾਨਂ ਨਾਗਕਞ੍ਞਾਪਰਿਵੁਤਂ ਨਾਨਾਵਿਧੇਨਥੁਤਿਘੋਸੇਨ ਤਥਾਗਤਂ ਵਣ੍ਣੇਨ੍ਤਂ ਕਾਰੇਸਿ.

ਵਸਵਤ੍ਤਿਮਾਰਮ੍ਪਨ ਬਾਹੁਸਹਸ੍ਸਂ ਮਾਪੇਤ੍ਵਾ ਤਿਸੂਲ ਮੁਗ੍ਗਰਾਦਿ ਨਾਨਾਵੁਧਾਨਿ ਗਹੇਤ੍ਵਾ ਸਹਸ੍ਸਕੁਮ੍ਭਂ ਗਿਰਿਮੇਖਲ ਹਤ੍ਥਿਕ੍ਖਣ੍ਧ ਮਾਰੁਯ੍ਹ ਮਾਰਬਲਂ ਪਰਿਵਾਰੇਤ੍ਵਾ ਬੋਧਿਮਣ੍ਡਂ ਆਗਨ੍ਤ੍ਵਾ ਅਨੇਕ ਭਿਂਸਨਕਂ ਕੁਰੁਮਾਨਂ ਕਾਰੇਸਿ. ਸੇਸਾਸੁ ਦਿਸਾਸੁ ਪਾਚੀਨ ਦਿਸਾਭਾਗੇ ਪਲ੍ਲਙ੍ਕਸਦਿਸੇ ਕੋਟਿ ਕੋਟਿ ਅਗ੍ਘਨਕੇ ਤਯੋ ਪਲ੍ਲਙ੍ਕੇ ਅਤ੍ਥਰਾਪੇਤ੍ਵਾ ਦਨ੍ਤਮਯਂ ਦਣ੍ਡਂ ਪਵਾਲ਼ਵੀਜਨਿਂ ਠਪਾਪੇਸਿ. ਬੋਧਿਕ੍ਖਣ੍ਧਂ ਉਸ੍ਸੀਸਕੇ ਕਤ੍ਵਾ ਨਾਨਾਰਤਨਂ ਮਣ੍ਡਿਤਂ ਕੋਟਿਅਗ੍ਘਨਕਂ ਰਜਤ ਸਯਨਂ ਅਤ੍ਥਰਾਪੇਸਿ.

ਦਸਬਲਸ੍ਸ ਅਭਿਸਮ੍ਬੋਧਿਮ੍ਪਤ੍ਵਾ ਅਨਿਮਿਸੇਨ ਚਕ੍ਖੁਨਾ ਬੋਧਿਪਲ੍ਲਙ੍ਕਂ ਓਲੋਕਿਤਟ੍ਠਾਨਂ ਸਤ੍ਤਾਹਮੇਵ ਰਤਨਚਙ੍ਕਮੇ ਚਙ੍ਕਮਿਤਟ੍ਠਾਨਂ ਓਲੋਕਿਤਟ੍ਠਾਨਂ ਸਤ੍ਤਾਹਮੇਵ ਰਤਨਚਙ੍ਕਮੇ ਚਙ੍ਕਮਿਤਟ੍ਠਾਨਂ ਰਤਨਘਰਂ ਪਵਿਸਿਤ੍ਵਾ ਧਮ੍ਮਸਮ੍ਮਸਿਤਟ੍ਠਾਨਂ ਮੁਚਲਿਣ੍ਦਮੂਲਂ ਗਨ੍ਤ੍ਵਾ ਨਿਸਿਨ੍ਨਸ੍ਸ ਮੁਚਲਿਣ੍ਦੇਨ ਨਾਗੇਨ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿ ਫਣਂ ਕਤ੍ਵਾ ਠਿਤਟ੍ਠਾਨਂ, ਤਤੋ ਅਜਪਾਲ ਨਿਗ੍ਰੋਧ ਮੂਲਂ ਗਨ੍ਤ੍ਵਾ ਨਿਸਿਨ੍ਨਟ੍ਠਾਨਂ, ਤਤੋ ਰਾਜਾਯਤਨਂ ਭੋਜਨੇ ਉਪਨੀਤੇ ਚਤੁਮਹਾਰਾਜੇਹਿ ਉਪਨੀਤ ਪਤ੍ਤਪਟਿਗ੍ਗਹਣਂ ਕਾਰੇਸਿ.

ਤਤੋ ਬ੍ਰਹ੍ਮਾਯਾਚਨਂ ਧਮ੍ਮਚਕ੍ਕਪ੍ਪਵਤ੍ਤਨਂ ਸਸਪਬ੍ਬਜ੍ਜਂ, ਭਦ੍ਦਵਗ੍ਗਿਯ ਪਬ੍ਬਜ੍ਜਂ, ਤੇਭਾਤਿਕ ਜਟਿਲ ਦਮਨਂ, ਲਟ੍ਠਿਵਨੁਯ੍ਯਾਨੇ ਬਿਮ੍ਬਿਸਾਰੋਪਗਮਣਂ, ਰਾਜਗਹਪ੍ਪਵੇਸਨਂ, ਵੇਲ਼ੁਵਨ ਪਟਿਗ੍ਗਹਣਂ ਅਸੀਤਿ ਮਹਾਸਾਵਕੇ ਚ ਕਾਰੇਸਿ ਤਤੋ ਕਪਿਲਵਤ੍ਥੁਗਮਨਂ ਰਤਨਚਙ੍ਕਮੇ ਠਤਟ੍ਠਾਨਂ, ਰਾਹੁਲਪਬ੍ਬਜ੍ਜਂ, ਨਣ੍ਦ੍ਰਪਬ੍ਬਜ੍ਜਂ ਜੇਤਵਨਪਟਿਗ੍ਗਹਣਂ, ਗਣ੍ਡਮ੍ਬਮੂਲੇ ਯਮਕ ਪਾਟਿਹਾਰਿਕਂ ਦੇਵਲੋਕੇ.

‘‘ਨਿਸਿਨ੍ਨੇ’’ਤਿ ਕਤ੍ਥਚਿ.

ਅਭਿਧਮ੍ਮ ¶ ਦੇਸਨਾ ਦੇਵੋਰੋਹਣ ਪਾਟੀਹੀਰਂ ਥੇਰਪਞ੍ਹ ਸਮਾਗਮਞ੍ਚ ਕਾਰੇਸਿ.

ਤਥਾ ਮਹਾਸਮਯਸੁਤ੍ਤ-ਰਾਹੁਲੋਵਾਦ ਸੁਤ੍ਤ-ਮਙ੍ਗਸੁਤ੍ਤਪਾਰਾਯਨ ਸੁਤ੍ਤ ਸਮਾਗਮਂ ਧਨਪਾਲ-ਆਲ਼ਵਕ-ਅਙ੍ਗੁਲਿਮਾਲ-ਅਪਲਾਲ ਦਮਨਂ ਆਯੁਸਙ੍ਖਾਰ ਵੋਸ੍ਸਜ੍ਜਨਂ ਸੂਕਰਮਦ੍ਦਵ ਪਰਿਗ੍ਗਹਣਂ ਸਿਙ੍ਗਿਵਣ੍ਣ ਵਤ੍ਥਯੁਗ ਪਟਿਗ੍ਗਹਣਂ ਪਸਨ੍ਨੋਦਕਪਾਨਂ ਪਰਿਨਿਬ੍ਬਾਨਂ ਦੇਵਮਨੁਸ੍ਸ ਪਰਿਦੇਵਨਂ ਮਹਾਕਸ੍ਸਪਤ੍ਥੇਰਸ੍ਸਭਗਵਤੋਪਾਦਵਣ੍ਦਨਂ ਸਰੀਰ ਙਹਨਂ ਅਗ੍ਗਿਨਿਬ੍ਬਾਨਂ ਆਲ਼ਾਹਨਸਕ੍ਕਾਰਂ ਦੇਣੇਨ ਬ੍ਰਾਹ੍ਮਣੇਨ ਕਤਧਾਤੁ ਵਿਭਾਗਞ੍ਚ ਕਾਰੇਸਿ.

ਤਥਾ ਅਦ੍ਧਚ੍ਛਟ੍ਠਾਨਿ ਜਾਤਕਸਤਾਨਿ ਕਾਰੇਸਿ. ਵੇਸ੍ਸਨ੍ਤਰਜਾਤਕਂ ਪਨ ਕਾਰੇਨ੍ਤੋ ਸਞ੍ਜਯ ਮਹਾਰਾਜਂ ਫੁਸਤੀਦੇਵਿਂ ਮਦ੍ਦਿਦੇਵਿਂ ਜਾਲਿਯ ਕੁਮਾਰਂ ਕਣ੍ਹਾਜਿਨਞ੍ਚ ਕਾਰੇਸਿ. ਤਤੋ ਪਣ੍ਡਵ ਹਤ੍ਥਿਦਾਨਂ ਸਤ੍ਤ ਸਤਕ ਮਹਾਦਾਨਂ ਨਗਰ ਵਿਲੋਕਨਂ ਸਿਨ੍ਧਵਦਾਨਂ ਦੇਵਤਾਹਿ ਰੋਹਿਤਥ ਵਣ੍ਣੇਨ ਰਥਸ੍ਸ ਵਹਨਂ ਰਥਦਾਨਂ ਸਯਮੇਵੋਣਤ ਦੁਮਤੋ ਫਲਂ ਗਹੇਤ੍ਵਾ ਦਾਰਕਾਨਂ ਮਧੁਮਂਸ ਦਿਨ੍ਨ ਨੇਸਾਦਸ੍ਸ ਸੁਵਣ੍ਣ ਸੂਚਿਦਾਨਂ ਵਙ੍ਕਪਬ੍ਬਤਕੁਚ੍ਛਿਮ੍ਹਿ ਪਬ੍ਬਜ੍ਜਾਵੇਸੇਨ ਵਸਿਤਟ੍ਠਾਨਂ ਪੂਜਕਸ੍ਸ ਦਾਰਕਦਾਨਂ ਸਕ੍ਕਬ੍ਰਾਹ੍ਮਣਸ੍ਸ ਭਰਿਯਂਦਾਨਂ ਪੂਜਕਸ੍ਸ ਦੇਵਤਾਨੁਭਾਵੇਕ ਦਾਰਕੇ ਗਹੇਤ੍ਵਾ ਗਨ੍ਤ੍ਵਾ ਸਞ੍ਜਯ ਨਰਿਣ੍ਦਸ੍ਸ ਪੁਰਤੋ ਗਤਟ੍ਠਾਨਂ ਤਤੋ ਵਙ੍ਕਪਬ੍ਬਤਕੁਚ੍ਛਿਯਂ ਛਨ੍ਨਂ ਖਤ੍ਤਿਯਾਨਂ ਸਮਾਗਮਂ ਵੇਸ੍ਸਨ੍ਤਰਸ੍ਸ ਮਦ੍ਦਿਯਾ ਚ ਅਭਿਸੇਕਂ ਪਤ੍ਤਟ੍ਠਾਨਂ ਨਕਰਮ੍ਪਵਿਟ੍ਠੇ ਸਤ੍ਤਰਤਨਵਸ੍ਸਂ ਵਸ੍ਸਿਤਟ੍ਠਾਨਂ ਤਤੋ ਚਵਿਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਟ੍ਠਾਨਞ੍ਚ ਸਬ੍ਬਂ ਵਿਤ੍ਥਾਰੇਨ ਕਾਰੇਸਿ.

ਤਤੋ ਦਸ ਸਹਸ੍ਸ ਚਕ੍ਕਵਾਲ਼ਦੇਵਤਾਹਿ ਬੁਦ੍ਧ ਭਾਵਾਯ ਆਯਾਚਿਤਟ੍ਠਾਨਂ ਅਪੁਨਰਾਵਤ੍ਤਨਂ ਮਾਤੁਕੁਚ੍ਛਿਓਕ੍ਕਮਨਂ ਮਹਾਮਾਯਾਦੇਵਿਂ ਸੁਦ੍ਧੋਦਨ ਮਹਾਰਾਜਂ ਲੁਮ੍ਬਿਨੀਵਨੇ ਜਾਤਟ੍ਠਾਨਂ ਅਨ੍ਤਲਿਕ੍ਖਤੋ ਦ੍ਵਿਨ੍ਨਂ ਉਦਕਧਾਰਾਨਂ ਪਤਨਂ ਉਤ੍ਤਰਾਭਿਮੁਖਂ ਸਤ੍ਤਪਦਵੀਤਿਹਾਰ ਗਮਨਂ ਕਾਲ਼ਦੇਵਲ਼ਸ੍ਸ ਜਟਾਮਤ੍ਥਕੇ ਮਹਾਪੁਰਿਸਸ੍ਸ ਪਾਦਪਤਿਟ੍ਠਾਨ ਅਨਤਿਵਤ੍ਤਮਾਨਾਯ ਜਮ੍ਬੁਚ੍ਛਾਯਾਯ ਧਾਤੀਨਂ ਪਮਾਦਂ ਦਿਸ੍ਵਾ ਸਿਰਿਸਯਨੇ ਪਲ੍ਲਙ੍ਕੇ ਨਿਸੀਦਿਤ੍ਵਾ ਝਾਨਸਮਾਪਨ੍ਨਟ੍ਠਾਨਞ੍ਚ ਕਾਰੇਸਿ.

ਤਤੋ ਰਾਹੁਲ ਮਾਤਰਂ ਰਾਹੁਲ ਭਦ੍ਦਕਞ੍ਚ ਕਾਰੇਸਿ ਤਤੋ ਏਕੂਨ ਤਿਂਸਵਸ੍ਸਕਾਲੇ ਉਯ੍ਯਾਨੇ ਕੀਲ਼ਤਤ੍ਥਾਯ ਗਮਨ ਸਮਯੇ ਜਿਣ੍ਣ ਵ੍ਯਾਧਿਤ ਮਤ ਸਙ੍ਖ੍ਯਾਤੇ ਤਯੋ ਦੇਵਦੂਤੇ ਦਿਸ੍ਵਾ ਨਿਵਤ੍ਤਨਟ੍ਠਾਨਂ ਚਤੁਤ੍ਥਵਾਰੇ ਪਬ੍ਬਜਿਤਰੂਪਂ ਦਿਸ੍ਵਾ ਸਾਧੁਪਬ੍ਬਜ੍ਜਾਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਉਯ੍ਯਾਨਸਿਰਿਂ ਅਨੁਭਵਿਤ੍ਵਾ ਸਾਯਣ੍ਹ ਸਮਯੇ ਨਹਾਤ੍ਵਾ ਮਙ੍ਗਲ ਸਿਲਾਪਟ੍ਟੇ ਨਿਸਿਨ੍ਨਮਤ੍ਤ ਵਿਸ੍ਸਕਟ੍ਠਾਨਾ ਅਲਙ੍ਕਰਣਟ੍ਠਾਣਂ ਤਤੋ ਮਜ੍ਝਿਮਰਤ੍ਤਿਯਂ ਨਾਟਕਾਨਂ ਵਿਪ੍ਪਕਾਰਂ ਦਿਸ੍ਵਾ ਕਣ੍ਥਕ ਹਯ ਵਰਮਾਰੁਯ੍ਹ) ਮਹਾਭਿਨਿਕ੍ਖਮਣਂ ਨਿਕ੍ਖਮਿਤਟ੍ਠਾਨਂ ਦਸ ਸਹਸ੍ਸ) ਚਕ੍ਕਵਾਲ਼ ਦੇਵਤਾਹਿ ਕਤ ਪੂਜਾਵਿਧਿਂ ਕਣ੍ਥਕਨਿਵਤ੍ਤਨ ਚੇਤਿਯਟ੍ਠਾਨਂ ¶ ਅਨੋਮਾ ਨਦੀਤੀਰੇ ਪਬ੍ਬਜ੍ਜਂ ਰਾਜਗਹਪ੍ਪਵੇਸਨਂ ਪਣ੍ਡਵ ਪਬ੍ਬਤਚ੍ਛ ਯਾਯ ਰਞ੍ਞੋ ਬਿਮ੍ਬਿਸਾਰਮ੍ਮ ਰਜ੍ਜਕਰਣਤ੍ਥਾਯ ਆਯਾਚਨਂ ਸੁਜਾਤਾਯ ਦਿਨ੍ਨ ਖੀਰਪਾਯਾਸ ਪਟਿਗ੍ਗਹਣਂ ਨੇਰਞ੍ਜਰਾਯ ਨਦਿਯਾ ਤੀਰੇ ਪਾਯਾਸ ਪਰਿਭੋਗਂ ਨਦਿਯਾ ਪਾਤਿਵਿਸ੍ਸਟ੍ਠਂ ਪਾਟਿਹਾਰਿਯਂ ਸਾਲਵਨੇ ਦਿਵਾਵਿਹਾਰ ਗਤਟ੍ਠਾਨਂ ਸੋਤ੍ਥਿਯੇਨ ਦਿਨ੍ਨ ਕੁਸਤਿਣਪਟਿਗ੍ਗਹਣਂ ਬੋਧਿਮਣ੍ਡਂ ਆਰੁਯ੍ਹ ਨਿਸਿਨ੍ਨਟ੍ਠਾਨਞ੍ਚ ਸਬ੍ਬਂ ਵਿਤ੍ਥਾਰੇਨ ਕਾਰੇਸਿ.

ਤਤੋ ਮਹਿਣ੍ਦਤ੍ਥੇਰ ਪਮੁਖੇ ਸਤ੍ਤ ਸਹ ਆਗਤੇ ਚ ਕਾਰਾਪੇਸਿ. ਚਤੁਸੁ ਦਿਸਾਸੁ ਖਗ੍ਗਹਤ੍ਥੇ ਚਤ੍ਤਾਰੋ ਮਹਾਰਾਜਾਨੋ ਕਾਰੇਸਿ ਤਤੋ ਦ੍ਵਤ੍ਤਿਂਸ ਦੇਵਪੁਤ੍ਤੇ ਤਤੋ ਸੁਵਣ੍ਣ ਦਣ੍ਡ ਦੀਪਕਧਾਰਾ ਦ੍ਵਤ੍ਤਿਂਸ ਦੇਵਕੁਮਾਰਿਯੋ ਤਤੋ ਅਟ੍ਠਵੀਸਤਿ ਯਕ੍ਖਸੇਨਾਪਤਿਨੋ ਤਤੋ ਅਞ੍ਜਲਿਂ ਪਗ੍ਗਯ੍ਹ ਠਿਤ ਦੇਵਤਾਯੋ ਤਤੋ ਰਤਨਮਯ ਪੁਪ੍ਪਕਲਾਪੇ ਗਹੇਤ੍ਵਾ ਠਿਤ ਦੇਵਤਾਯੋ ਤਤੋ ਸੁਵਣ੍ਣਘਟੇ ਗਹੇਤ੍ਵਾ ਠਿਤਿ ਦੇਵਤਾਯੋ ਤਤੋ ਨਚ੍ਚਨਕ ਦੇਵਤਾਯੋ ਤਤੋ ਤੁਰਿਯਵਾਦਕ ਦੇਵਤਾਯੋ ਤਤੋ ਪਚ੍ਚੇਕ ਸਤਸਹਸ੍ਸਗ੍ਘਨਕੇ ਦਸਹਤ੍ਥਪ੍ਪਮਾਣੇ ਆਦਾਸੇ ਗਹੇਤ੍ਵਾ ਠਿਤ ਦੇਵਤਾਯੋ ਤਤੋ ਤਥੇਵ ਸਤਸਹਸ੍ਸਗ੍ਘਨਕ ਪੁਪ੍ਫ ਸਾਖਾਯੋ ਗਹੇਤ੍ਵਾ ਠਿਤਦੇਵਤਾਯੋ ਤਤੋ ਚਣ੍ਦਮਣ੍ਡਲੇ ਗਹੇਤ੍ਵਾ ਠਿਤਦੇਵਤਾਯੋ ਸੂਰਿਯਮਣ੍ਡਲੇ ਗਹੇਤ੍ਵਾ ਠਿਤਦੇਵਤਾਯੋ ਤਤੋ ਪਦੁਮਾਨਿ ਗਹੇਤ੍ਵਾ ਠਿਤ ਦੇਵਤਾਯੋ ਤਤੋ ਛਤ੍ਤਾਨਿ ਗਹੇਤ੍ਵਾ ਠਿਤਦੇਵਤਾਯੋ ਤਤੋ ਵਿਚਿਤ੍ਤਵੇਸਧਰੇ ਮਲ੍ਲਦੇਵਪੁਤ੍ਤੇ ਤਤੋ ਦੁਸ੍ਸਪੋਠਨ ਦੇਵਤਾਯੋ ਤਤੋ ਰਤਨਗ੍ਘਿਕੇ ਗਹੇਤ੍ਵਾ ਠਿਤਦੇਵਤਾਯੋ ਤਤੋ ਧਮ੍ਮਚਕ੍ਕਾਕਿ ਗਹੇਤ੍ਵਾ ਠਿਤਦੇਵਤਾਯੋ ਤਤੋ ਖਗ੍ਗਧਰਾ ਦੇਵਤਾਯੋ ਤਤੋ ਪਞ੍ਚਹਤ੍ਥਪ੍ਪਮਾਣ ਗਣ੍ਧਿਤੇਲਪੂਰਿਤਾ ਦੁਕੂਲਵਟ੍ਟਿਯਂ ਪਜ੍ਜਲਿਤ ਦੀਪਕਞ੍ਚਨਨ ਪਾਤਿਯੋ ਸੀਸੇਹਿ ਧਾਰੇਤ੍ਵਾ ਠਿਤਦੇਵਤਾਯੋ ਚ ਕਾਰਾਪੇਸਿ.

ਤਤੋ ਚਤੁਸੁਕਣ੍ਣੇਸੁਫਲ਼ਿਕਮਯਅਗ੍ਘਿਯ ਮਤ੍ਥਕੇ ਚਤ੍ਤਾਰੋਮਹਾਮਣ ਠਪਾਪੇਸਿ ਚਤੁਸੁ ਕਣ੍ਣੇਸੁ ਸੁਵਣ੍ਣ-ਮਣਿ-ਮੁਤ੍ਤ-ਵਜਿਰਾਨਂ ਚਤ੍ਤਾਰੋ ਰਾਸਿਯੋ ਕਾਰੇਸਿ ਤਤੋ ਮੇਘਵਣ੍ਣ ਪਾਸਾਣਭਿਤ੍ਤਿਯਂ ਵਿਜ੍ਜੁਲ੍ਲਤਾ ਕਾਰੇਸਿ ਤਤੋ ਰਤਨ ਲਤਾਯੋ ਤਤੋ ਚਾਲ਼ਵਿਜਤਿਯੋ ਤਤੋ ਨਿਲੁਪ੍ਪਲੇ ਗਹੇਤ੍ਵਾ ਠਿਤ ਨਾਗਮਣਵਿਕਾਯੋ ਕਾਰੇਸਿ.

ਰਾਜਾ ਏਕ੍ਤਿਕਾਨਿ ਰੂਪਕਾਨਿ ਘਨਕੋਟ੍ਟਿਮ ਸੁਵਣ੍ਣੇਹੇਵ ਕਾਰੇਸਿ. ਅਵਸੇਸਮ੍ਪਿ ਪੂਜਾਵਿਧਿਂ ਸਤ੍ਤਰਤਨੇਹੇਵ ਕਾਰੇਸੀਤਿ. ਏਤ੍ਥ ਚ ਵੁਤ੍ਤਪ੍ਪਕਾਰਮ੍ਪਨ ਪੂਜਨੀਯਭਣ੍ਡਂ ਅਨਨ੍ਤਮਪਰਿਮਾਣਂ ਹੋਤਿ ਤਥਾ ਹਿ ਅਮ੍ਬਪਾਸਾਨਵਾਸੀ ਚਿਤ੍ਤਗੁਤ੍ਤਤ੍ਥੇਰੋਨਾਮ ਹੇਟ੍ਠਾ ਲੋਹਪਾਸਾਦੇ ਸਨ੍ਨਿਪਤਿਤਾਨਂ ਦ੍ਵਾਦਸਨ੍ਨਂ ਭਿਕ੍ਖੁਸਹਸ੍ਸਾਨਂ ਧਮ੍ਮਂ ਕਥੇਨ੍ਤੋ ਰਥਵਿਨੀਤਸੁਤ੍ਤਂ ਆਰਭਿਤ੍ਵਾ ਮਹਾ ਧਾਤੁਨਿਧਾਨਂ ਵਣ੍ਣੇਨ੍ਤੋ ਏਕਚ੍ਚੇ ਨ ਸਦ੍ਦਹਿਸ੍ਸਨ੍ਤੀਤਿ ਮਞ੍ਞਮਾਨੋ ਓਸਕ੍ਕਿਤ੍ਵਾ ਕਥੇਸਿ. ਤਸ੍ਮਿਂ ਖਣੇ ਕੋਟਪਬ੍ਬਤਵਾਸੀ ਮਹਾਤਿਸ੍ਸਤ੍ਥੇਰੋ ¶ ਨਾਮ ਖੀਣਾਸਵੋ ਅਵਿਦੂਰੇ ਨਿਸੀਦਿਤ੍ਵਾ ਧਮ੍ਮਂ ਸੁਣਨ੍ਤੋ ਆਵੁਸੋ ਧਮ੍ਮਕਥਿਕ ਤਵ ਕਥਾਤੋ ਪਰਿਹੀਨਮ੍ਪਿ ਅਤ੍ਥਿ. ਅਪਚ੍ਚੋ ਸਕਕਿਤ੍ਵਾ ਵਿਤ੍ਥਾਰੇਨ ਕਥੇਹੀਤਿ ਆਹ. ਅਥ ਇਮਸ੍ਮਿਂਯੇਵ ਦੀਪੇ ਭਾਤਿਯ ਮਹਾਰਾਜਾ ਨਾਮ ਸਦ੍ਦੋ ਪਸਨ੍ਨੋ ਅਹੋਸਿ ਸੋ ਸਾਯਂ ਪਾਤਂ ਮਹਚੇਤਿਯਂ ਵਨ੍ਦਿਤ੍ਵਾਵ ਭੁਞ੍ਜਤਿ. ਏਕਦਿਵਸਂ ਵਿਨਿਚ੍ਛਯੇ ਨਿਸੀਦਿਤ੍ਵ ਦੁਬ੍ਬੀਨਿਚ੍ਛਿਤਂ ਅਟ੍ਟਂ ਵਿਨਿਚ੍ਛਿਨਨ੍ਤੋ ਅਤਿਸਾਯਂ ਵੁਟ੍ਠਿਤੋ ਥੂਪਵਣ੍ਦਨਂ ਵਿਸ੍ਸਰਿਤ੍ਵਾ ਭੋਜਨੇ ਉਪਨੀਤੇ ਹਤ੍ਥਂ ਓਤਾਰੇਤ੍ਵਾ ਮਨੁਸ੍ਸੇ ਪੁਚ੍ਛਿਅਜ੍ਜ ਮਯਾ ਅਯ੍ਯਕੋ ਵਨ੍ਦਿਤੋ ਨ ਵਨ੍ਦਿਤੋਤਿ. ਪੋਰਾਣਕ ਰਾਜਾਨੋ ਹਿ ਸਤ੍ਥਾਰਂ ਅਯ੍ਯਕੋਤਿ ਵਦਨ੍ਤਿ. ਮਨੁਸ੍ਸਾ ਨ ਵਨ੍ਦਿਤੋ ਦੇਵਾਤਿ ਆਹਂਸੁ.

ਤਸ੍ਮਿਂ ਖਣੇ ਰਾਜਾ ਹਤ੍ਥੇਨ ਗਹਿਤ ਭਤ੍ਤਪਿਣ੍ਡਂ ਪਾਤਿਯਂ ਪਾਤੇਤ੍ਵਾ ਉਟ੍ਠਾਯ ਦਕ੍ਖਿਣਦ੍ਵਾਰਂ ਵਿਵਰਾਪੇਤ੍ਵਾ ਆਗਨ੍ਤ੍ਵਾ ਪਾਚੀਨ ਦ੍ਵਾਰੇਨ ਮਹਾਚੇਤਿਯਙ੍ਗਣਂ ਆਰੁਯ੍ਹ ਵਨ੍ਦਨ੍ਤੋ ਅਨ੍ਤੋ ਧਾਤੁਗਬ੍ਭੇ ਖੀਣਾਸਵਾਨਂ ਧਮ੍ਮਂ ਓਸਾਰਣਸਦ੍ਦਂ ਸੁਤ੍ਵਾ ਦਕ੍ਖਿਣਦ੍ਵਾਰੇਤਿ ਮਞ੍ਞਮਾਨੋ ਤਤ੍ਥ ਗਨ੍ਤ੍ਵਾ ਅਦਿਸ੍ਵਾ ਏਤੇਨੇਵ ਨਯੇਨ ਇਤਰਾਨਿਪਿ ਦ੍ਵਾਰਾਨਿ ਗਨ੍ਤ੍ਵਾ ਤਤ੍ਥਾਪਿ ਅਦਿਸ੍ਵਾ ਅਯ੍ਯਾ ਧਮ੍ਮਂ ਓਸਾਰੇਨ੍ਤੋ ਵਿਚਰਨ੍ਤੀਤਿ ਮਞ੍ਞਮਾਨੋ ਓਲੋਕਨਤ੍ਥਾਯ ਚਤੁਸੁ ਦ੍ਵਾਰੇਸੁ ਮਨੁਸ੍ਸੇ ਠਪੇਤ੍ਵਾ ਸਯਂ ਪੁਨ ਵਿਚਰਿਤ੍ਵਾ ਅਪਸ੍ਸਨ੍ਤੋ ਮਨੁਸ੍ਸੇ ਪੁਚ੍ਛਿਤ੍ਵਾ ਬਹਿਦ੍ਧਾ ਨਤ੍ਥਿ ਭਾਵਂ ਞਤ੍ਵਾ ਅਨ੍ਤੋ ਧਾਤੁਗਬ੍ਭੇ ਭਵਿਸ੍ਸਤਿਤਿ ਸਨ੍ਨਿਟ੍ਠਾਨਂ ਕਤ੍ਵਾ ਪਾਚੀਨਦ੍ਵਾਰੇ ਆਸਨ੍ਨਤਰੇ ਮਹਾ ਚੇਤਿਯਾਭਿਮੁਖੋ ਹਤ੍ਥਪਾਦੇ ਪਸਾਰੇਤ੍ਵਾ ਜੀਵਿਤੁਂ ਪਰਿਚ੍ਚਜਿਤ੍ਵਾ ਦਲ਼੍ਹਸਮਾਦਾਨਂ ਕਤ੍ਵਾ ਨਿਪਜ੍ਜਿ. ਸਚੇ ਮਾ ਅਯ੍ਯਾ ਧਾਤੁਗਬ੍ਭਂ ਨ ਓਲੋਕਾਪੇਨ੍ਤਿ-ਸਤ੍ਤਾਹਂ ਨਿਰਾਹਾਰੋ ਹੁਤ੍ਵਾ ਸੁਸ੍ਸਮਾਨੋ ਭੂਸਮੁਟ੍ਠਿ ਵਿਯ ਵਿਪ੍ਪਕਿਰਿਯਮਾਨੋਪਿ ਨ ਉਟ੍ਠਹਿਸ੍ਸਾਮੀਤਿ. ਤਸ੍ਸ ਗੁਣਾਨੁਭਾਵੇਨ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ.

ਸਕ੍ਕੋ ਆਵਜ੍ਜਨ੍ਤੋ ਤਂ ਕਾਰਣਂ ਞਤ੍ਵਾ ਅਗਨ੍ਤ੍ਵਾ ਧਮ੍ਮਂ ਓਸਾਰੇਨ੍ਤਾਨਂ ਥੇਰਾਨਂ ਏਵਮਾਹ. ਅਯਂ ਭਨ੍ਤੇ ਰਾਜਾ ਧਮ੍ਮਿਕੋ ਬੁਦ੍ਧਸਾਸਨੇ ਪਸਨ੍ਨੋ ਇਮਸ੍ਮਿਂ ਠਾਨੇ ਸਜ੍ਝਾਯਨ ਸਦ੍ਦਂ ਸੁਤ੍ਵਾ ਧਾਤੁਗਬ੍ਭਂ ਅਪਸ੍ਸਿਤ੍ਵਾ ਨ ਉਟ੍ਠਹਿਸ੍ਸਾਮੀਤਿ ਦਲ਼੍ਹਸਮਾਦਾਨਂ ਕਤ੍ਵਾ ਨਿਪਨ੍ਨੋ ਸਚੇ ਧਾਤੁਗਬ੍ਭਂ ਨ ਪਸ੍ਸਤਿ ਤਤ੍ਥੇਵ ਮਰਿਸ੍ਸਤਿ. ਤਂ ਪਵੇਸੇਤ੍ਵਾ ਧਾਤੁ ਗਬ੍ਭਂ ਓਲੋਕਾਪੇਥਾਤਿ. ਥੇਰਾਪਿ ਤਸ੍ਸ ਅਨੁਕਮ੍ਪਾਯ ਧਾਤੁਗਬ੍ਭਂ ਦਸ੍ਸੇਤੁਂ ਏਕਂ ਥੇਰਂ ਆਣਾਪੇਸੁਂ ਰਾਜਾਨਂ ਆਨੇਤ੍ਵਾ ਧਾਤੁਗਬ੍ਭਾ ਓਲੋਕਾਪੇਤ੍ਵਾ ਪੇਸੇਹੀਤਿ. ਸੋ ਰਞ੍ਞੋ ਹਤ੍ਥੇ ਗਹੇਤ੍ਵਾ ਧਾਤੁਗਬ੍ਭਂ ਪਵੇਸੇਤ੍ਵਾ ਯਥਾਰੁਚਿਂ ਵਨ੍ਦਾਪੇਤ੍ਵਾ ਸਬ੍ਬਂ ਸਲ੍ਲਕ੍ਖਿਤਕਾਲੇ ਪੇਸੇਸਿ ਰਾਜਾ ਨਗਰਂ ਗਨ੍ਤ੍ਵਾ ਅਪਰੇਨ ਸਮਯੇਨ ਧਾਤੁਗਬ੍ਭੇ ਅਤ੍ਤਨਾ ਦਿਟ੍ਠਰੂਪਕੇਸੁ ਏਕਦੇਸਾਨਿ ਸੁਵਣ੍ਣਖਚਿਤਾਨਿ ਕਾਰੇਤ੍ਵਾ ਰਾਜਙ੍ਗਣੇ ਮਹਨ੍ਤਂ ਮਣ੍ਡਪਂ ਕਾਰੇਤ੍ਵਾ ਤਸ੍ਮਿਂ ਮਣ੍ਡਪੇ ¶ ਤਾਨਿ ਰੂਪਕਾਨਿ ਸਂਵਿਦਹਾਪੇਤ੍ਵਾ ਨਗਰੇ ਸਨ੍ਨਿਪਾਤੇਤ੍ਵਾ ਧਾਤੁਗਬ੍ਭੇ ਮਯਾ ਦਿਟ੍ਠਾਨਿ ਸੁਵਣ੍ਣਰੂਪਕਾਨਿ ਈਦਿਸਾਨਿ ਆਹ. ਤੇਸਂ ਰੂਪਕਾਨਂ ਨਿਯਾਮੇਨ ਕਤਤ੍ਤਾ ਨਿਯਾਮਕ ਰੂਪਕਾਨਿ ਨਾਮ ਜਾਤਾਨਿ.

ਰਾਜਾ ਸਂਵਚ੍ਛਰੇ ਸਂਵਚ੍ਛਰੇ ਤਾਨਿ ਰੂਪਕਾਨਿ ਨੀਹਰਾਪੇਤ੍ਵਾ ਨਾਗਰਾਨਂ ਦਸ੍ਸੇਸਿ ਪਠਮਂ ਦਸ੍ਸਿਤਕਾਲੇ ਨਾਗਰਾ ਪਸੀਦਿਤ੍ਵਾ ਏਕੇਕ ਕੁਲਤੋ ਏਕੇਕਂ ਦਾਰਕਂ ਨੀਹਰਿਤ੍ਵਾ ਪਬ੍ਬਾਜੇਸੁਂ. ਪੁਨ ਰਾਜਾ ਅਯ੍ਯਾ ਏਤਂ ਪਕਾਰਂ ਅਜਾਨਨਕਾ ਬਹੂ ਤੇਸਮ੍ਪਿ ਆਰੋਚੇਸ੍ਸਾਮੀਤਿ ਵਿਹਾਰਂ ਗਨ੍ਤ੍ਵਾ ਹੇਟ੍ਠਾ ਲੋਹਪਾਸਾਦੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍ਵਾ ਸਯਂ ਧਮ੍ਮਾਸਨਗਤੋ ਤਿਯਾਮ ਰਤ੍ਤਿਂ ਧਾਤੁਗਬ੍ਭੇ ਅਧਿਕਾਰਂ ਕਥੇਤ੍ਵਾ ਪਰਿਯੋਸਾਪੇਤੁਮਸਕ੍ਕਾਨ੍ਤੋਸੇਵ ਉਟ੍ਠਾਸਿ. ਤਤ੍ਥੇਕੋ ਭਿਕ੍ਖੁ ਰਾਜਾਨਂ ਪੁਚ੍ਛਿ-ਮਹਾਰਾਜ ਤ੍ਵਂ ਪਾਤਰਾਸਭਤ੍ਤਂ ਭੂਤ੍ਵਾ ਆਗਤੋਸਿ. ਤਿਯਾਮ ਰਤ੍ਤਿਂ ਵਣ੍ਣੇਨ੍ਤੋ ਧਾਤੁਗਬ੍ਭੇ ਪੂਜਾਵਿਧਿਮ੍ਪਿ ਪਰਿਯੋਸਾਪੇਤੁਂ ਨਾਸਕ੍ਖਿ ਅਞ੍ਞਮ੍ਪਿ ਬਹੁਂ ਅਤ੍ਥਿਤਿ.

ਰਾਜਾ ਕਿਂ ਕਥੇਤ ਭਨ੍ਤੇ, ਤੁਮ੍ਹਾਕਂ ਮਯਾ ਕਥਿਤਂ ਦਸਭਾਗੇਸੁ ਏਕਭਾਗਮ੍ਪਿ ਨਪ੍ਪਹੋਤਿ. ਅਹਮ੍ਪਨ ਮਯਾ ਸਲ੍ਲਕ੍ਖਿਤ ਮਤ੍ਤਮੇਵ ਕਥੇਸਿਂ. ਅਨਨ੍ਤਂ ਭਨ੍ਤੇ ਧਾਤੁਗਬ੍ਭੇ ਪੂਜਾਵਿਧਾਨਨ੍ਤਿ ਆਹ ਏਵਂ ਅਨਨ੍ਤਂ ਪੂਜਨੀਯਭਣ੍ਡਂ ਸਮਚਤੁਰਸ੍ਸੇ ਏਕੇਕ ਪਸ੍ਸਤੋ ਅਸੀਤਿ ਅਸੀਤਿ ਹਤ੍ਥਪ੍ਪਮਾਣੇ ਧਾਤੁਗਬ੍ਭੇ ਨਿਰਨ੍ਤਰਂ ਕਤ੍ਵਾ ਪੁਰੇਤੁਮ੍ਪਿ ਨ ਸੁਕਰਂ, ਪਗੇਵ ਯਥਾਰਹਂ ਸਂਵਿਧਾਤੁ ਤਿਟ੍ਠਤੁ ਤਾਵ ਧਾਤੁਗਬ੍ਭੋ ਯਾਵ ਮਹਾਚੇਤਿਯੇ ਵਾਲੁਕ ਪਾਕਾਰ ਪਰਿਚ੍ਛੇਦਾ ਨਿਰਨ੍ਤਰਂ ਪੁਰੇਤੁਮ੍ਪਿ ਨ ਸਕ੍ਕਾ. ਤਸ੍ਮਾ ਤਂ ਸਬ੍ਬਂ ਪੂਜਨੀਯਭਣ੍ਡਂ ਤਤ੍ਥ ਕਥਂ ਗਣ੍ਹੀਤਿ ਯਦੇਤ੍ਥ ਵਤ੍ਤਬ੍ਬਂ ਪੋਰਾਣੇਹਿ ਵੁਤ੍ਤਮੇਵ.

ਨਿਗ੍ਰੋ ਧਪਿਟ੍ਠਿ ਤੇਪਿਟਕ ਮਹਾਸੀਵਤ੍ਥੇਰੋ ਕਿਰ ਰਾਜਗੇਹੇ ਨਿਸਿਦਿਤ੍ਵਾ ਰਞ੍ਞੋ ਦਸਬਲ ਸੀਹਨਾਦਸੁਤਤਂ ਕਥੇਨ੍ਤੋ ਧਾਤੁਨਿਧਾਨਂ ਵਣ੍ਣੇਤ੍ਵਾ ਸੁਤ੍ਤਨ੍ਤਂ ਵਿਨਿਵਟ੍ਟੇਸਿ. ਰਾਜਾ ਥੇਰਸ੍ਸ ਏਵਮਾਹ-ਅਯਂ ਭਨ੍ਤੇ ਧਾਤੁਗਬ੍ਭਾ ਸਮਚਤੁਰਸ੍ਸੋ, ਏਕੇਕਪਸ੍ਸਤੋ ਅਸੀਤਿ ਅਸੀਤਿ ਹਤ੍ਥਪ੍ਪਮਾਣੇ ਏਤ੍ਤਕਾਨਿ ਪੂਜਨੀਯ ਭਣ੍ਡਾਨਿ ਏਤ੍ਥ ਟ੍ਠਿਤਾਨੀਤਿ ਕੋ ਸਦ੍ਦਹੇਸ੍ਸਤਿਤਿ. ਥੇਰੋ ਆਹ. ਇਣ੍ਦਸਾਲਗੁਹਾਕਿਤ੍ਤਕਪ੍ਪਮਾਣਾਤਿ ਤਯਾ ਸੁਤਪੁਬ੍ਬਾਤਿ. ਰਾਜਾ ਖੁਦ੍ਦਕ ਮਞ੍ਚਕਪ੍ਪਮਾਣਾ ਭਨ੍ਤੇਤਿ ਆਹ. ਤਤੋ ਥੇਰੋ ਆਹ, ਮਹਾਰਾਜ ਅਮ੍ਹਾਕਂ ਸਤ੍ਥਾਰਾ ਸਕ੍ਕਸਸ ਸਕ੍ਕ ਪਞ੍ਹਸੁਤ੍ਤਨ੍ਤਂ ਕਥਨਦਿਵਸੇ ਗੁਹਾਯ ਕਿਤ੍ਤਕਾ ਪਰਿਸਾ ਓਸਟਾਤਿ ਸੁਤਪੁਬ੍ਬਾਤਿ. ਰਾਜਾ ਦ੍ਵੀਸੁ ਭਨ੍ਤੇ ਦੇਵਲੋਕੇਸੁ ਦੇਵਤਾਤਿ ਆਹ. ਏਵਂ ਸਨ੍ਤੇ ਤਮ੍ਪਿ ਅਸਦ੍ਦਹੇਯ੍ਯਂ ਨੁ ਮਹਾਰਾਜਾਤਿ ਥੇਰੇਨ ਵੁਤ੍ਤੇ ਰਾਜਾ ਤਂ ਪਨ ਦੇਵਾਨਂ ਦੇਵਿਦ੍ਧਿਯਾ ਅਹੋਸਿ ਦੇਵਿਦ੍ਧਿ ਨਾਮ ਅਚਿਨ੍ਤੇਯ੍ਯਾ ਭਨ੍ਤੇਤਿ ਆਹ.

ਤਤੋ ਥੇਰੋ ਮਹਾਰਾਜ ਤਂ ਏਕਾਯਯੇਵ ਦੇਵਿਦ੍ਧਿਯਾ ਅਹੋਸਿ. ਇਦਂ ਪਨ ਰਞ੍ਞੋ ਰਾਜਿਦ੍ਧਿਯਾ ਦੇਵਾਨਂ ਦੇਵਿਦ੍ਧਿਯਾ ਅਰਿਯਾਨਂ ਅਰਿਯਿਦ੍ਧਿਯਾਤਿ ਇਮਾਹਿ ¶ ਤੀਹਿ ਇਦ੍ਧੀਹਿ ਜਾਤਨ੍ਤਿ ਅਵੋਚ. ਰਾਜਾ ਥੇਰਸ੍ਸ ਵਚਨਂ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਥੇਰਂ ਸੇਤਚ੍ਛਤ੍ਤੇਨ ਪੂਜੇਤ੍ਵਾ ਮਤ੍ਥਕੇ ਛਤ੍ਤਂ ਧਾਰੇਨ੍ਤੋ ਮਹਾ ਵਿਹਾਰਂ ਆਨੇਤ੍ਵਾ ਪੁਨ ਮਹਾਚੇਤਿਯਸ੍ਸ ਸਤ੍ਤਾਹਂ ਛਤ੍ਤਂ ਦਤ੍ਵਾ ਜਾਤਿ ਸੁਮਨਪੁਪ੍ਫ ਪੂਜਂ ਅਕਾਸੀਤਿ. ਏਤਸ੍ਸਤ੍ਥਸ੍ਸ ਸਾਧਨਤ੍ਥਮੇਵ ਅਞ੍ਞਾਨਿਪਿ ਬਹੂਨਿ ਵਤ੍ਥੂਨਿ ਦਸ੍ਸਿਤਾਨਿ ਤਾਨਿ ਕਿਨ੍ਤੇਹੀਤਿ ਅਮ੍ਹੇ ਉਪੇਕ੍ਖਿਤਾਨਿ ਏਤ੍ਥ ਚ ਰਾਜਾ ਮਹੇਸਕ੍ਖੋ ਮਹਾਨੁਭਾਵੋ ਪੂਰਿਤਪਾਰਮਿ ਕਤਾਭਿਨੀਹਾਰੋਤਿ ਤਸ੍ਸਵਸੇਨ ਰਾਜਿਦ੍ਧਿਵੇਦਿਤਬ੍ਬਾ ਸਕ੍ਕੇਨ ਆਣਤ੍ਤੇਨ ਵਿਸ੍ਸਕਮ੍ਮੁਨਾ ਦੇਵਪੁਤ੍ਤੇਨ ਆਦਿਤੋ ਪਟ੍ਠਾਯ ਆਵਿਸਿਤ੍ਵਾ ਕਤਤ੍ਤਾ ਤਸ੍ਸ ਵਸੇਨ ਦੇਵਿਦਧਿ ਵੇਦਿਤਬ੍ਬਾ, ਕਮ੍ਮਾਧਿਟ੍ਠਾਯਕ ਇਣ੍ਦਗੁਤ੍ਤਤ੍ਥੇਰੋ ਖੁਦ੍ਦਾਨੁਖੁਦ੍ਦਕਂ ਕਮ੍ਮਂ ਅਨੁਵਿਧਾਯਨ੍ਤੋ ਕਾਰੇਸਿ ਨ ਕੇਵਲਂਥੇਰੋਯੇਵ, ਸਬ੍ਬੇਪਿ ਅਰਿਯਾ ਅਤ੍ਤਨਾ ਅਤ੍ਤਨਾ ਕਤ੍ਤਬ੍ਬ ਕਿਚ੍ਚੇਸੁ ਉਸ੍ਸੁਕ੍ਕਮਾਪਨ੍ਨਾਯੇਵ ਅਹੇਸੁਨ੍ਤਿ ਇਮਾਹਿ ਤੀਹਿ ਇਦ੍ਧੀਹਿ ਕਤਨ੍ਤਿ ਵੇਦਿਤਬ੍ਬਂ.

ਵੁਤ੍ਤਞ੍ਹੇਤਂ ਮਹਾਵਂਸੋ.

ਇਣ੍ਦਗੁਤ੍ਤ ਮਹਾਥੇਰੋ-ਛਲ਼ਭਿਞ੍ਞੋ ਮਹਾਮਤਿ,

ਕਮ੍ਮਾਧਿਟ੍ਠਾਯਕੋ ਏਤ੍ਥ-ਸਬ੍ਬਂ ਸਂਵਿਦਹਿ ਇਮਂ;

ਸਬ੍ਬਂ ਰਾਜਿਦ੍ਧਿਯਾ ਏਤਂ ਦੇਵਤਾਨਞ੍ਚ ਇਦ੍ਧਿਯਾ;

ਇਦ੍ਧਿਯਾ ਅਰਿਯਾਨਞ੍ਚ-ਅਸਮ੍ਬਾਧਾ ਪਤਿਟ੍ਠਿਤ’’ਨ੍ਤਿ;

ਧਾਤੁਗਬ੍ਬ ਰੂਪਵਣ੍ਣਨਾਕਥਾ

੨੩. ਏਵਂ ਰਾਜਾ ਧਾਤੁਗਬ੍ਭੇ ਕਤ੍ਤਬ੍ਬ ਕਮ੍ਮਂ ਨਿਟ੍ਠਾਪੇਤ੍ਵਾ ਚਾਤੁਦ੍ਦਸਿ ਦਿਵਸੇ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਸਿ, ਸਨ੍ਨਿਪਤ੍ਤਿ ਭਿਕ੍ਖੂ ਤਿਂਸ ਸਹਸ੍ਸਾਨਿ ਅਹੇਸੁਂ ਰਾਜਾ ਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਏਵਮਾਹ. ਧਾਤੁਗਬ੍ਭੇ ਮਯਾ ਕਤ੍ਤਬ੍ਬਕਮ੍ਮਂ ਨਿਟ੍ਠਾਪਿਤਂ, ਸ੍ਵੇ ਆਸਾਲ਼ਭਿਮੁਪੋਸਥ ਦਿਵਸੇ ਉਤ੍ਤਰਸਾਲ਼੍ਹ ਨਕ੍ਖਤ੍ਤੇਨ ਧਾਤੁਨਿਧਾਨਂ ਭਵਿਸ੍ਸਤਿ ਧਾਤੁਯੋ ਜਨਾਥ ਭਨ੍ਤੇਤਿ ਭਿਕ੍ਖੁਸਙ੍ਘਸ੍ਸ ਭਾਰਂ ਕਤ੍ਵਾ ਨਗਰਮੇਵਾਗਞ੍ਜਿ.

ਅਥ ਭਿਕ੍ਖੁਸਙ੍ਘੋ ਧਾਤੁ ਆਹਰਣਕਂ ਭਿਕ੍ਖੁਂ ਗਵੇਸਨ੍ਤੋ ਪੂਜਾ ਪਰਿਵੇਣ ਵਾਸਿਕਂ ਸੋਲ਼ਸ ਵਸ੍ਸੁਦ੍ਦੇਸਿਕਂ ਛਲ਼ਭਿਞ੍ਞਂ ਸੋਣੁਤ੍ਤਰਂ ਨਾਮ ਸਾਮਣੇਰਂ ਦਿਸ੍ਵਾ ਤਂ ਪਕ੍ਕੋਸਾਪੇਤ੍ਵਾ ਆਵੁਸੋ ਸੋਣੁਤ੍ਤਰ ਰਾਜਾ ਧਾਤੁਗਬ੍ਭਂ ਨਿਟ੍ਠਾਪੇਤ੍ਵਾ ਧਾਤੁ ਆਭਰਣਂ ਭਿਕ੍ਖੁਸਙ੍ਘਸ੍ਸ ਭਾਰਮਕਾਸਿ. ਤਸ੍ਮਾ ਤਯਾ ਧਾਤੁਯੋ ਆਹਰਿਤਬ੍ਬਾਤਿ ਆਹਰਾਮਿ ਭਨ੍ਤੇ ਧਾਤੁਯੋ ਕੁਤੋ ਲਚ੍ਛਾਮੀਤਿ ਪੁਚ੍ਛਿ ਤਸ੍ਸ ਭਿਕ੍ਖੁਸਙ੍ਘੋ ਏਵਮਾਹ. ਆਵੁਸੋ ਸੋਣੁਤ੍ਤਰ ਤਤਾਗਤੋ ਮਰਣਮਞ੍ਚੇ ਨਿਪਨ੍ਨੋ ਸਕ੍ਕਂ ਦੇਵਰਾਜਾਨਂ ਆਮਨ੍ਤੇਤ੍ਵਾ ਮਯ੍ਹਂ ਅਟ੍ਠਦੋਣਪ੍ਪਮਾਣੇਸੁ ਸਾਰੀਰਿਕ ਧਾਤੁਸੁ ਏਕਂ ਦੋਣਂ ਕੋਲ਼ਿਯਰਾਜੁਹਿ ਸਕ੍ਕਤਂ, ਅਨਾਗਤੇ ਤਮ੍ਬਪਣ੍ਣਿ ਦੀਪੇ ਮਹਾਚੇਤਿਯੇ ਪਤਿਟ੍ਠਹਿਸ੍ਸਤੀਤਿ ਆਹ.

ਅਥ ¶ ਭਗਵਤਿ ਪਰਿਨਿਬ੍ਬੁਤੇ ਦੋਣ ਬ੍ਰਾਹ੍ਮਣੋ ਧਾਤੁਯੋ ਅਟ੍ਠ ਕੋਟ੍ਠਾਸੇ ਕਤ੍ਵਾ ਅਟ੍ਠਨ੍ਨਂ ਨਗਰਵਾਸੀਨਂ ਅਦਾਸਿ ਤੇ ਅਤ੍ਤਨੋ ਅਤ੍ਤਨੋ ਨਗਰੇ ਚੇਤਿਯਂ ਕਾਰੇਤ੍ਵਾ ਪਰਿਹਰਿਂਸੁ ਤੇਸੁ ਰਾਮਗਾਮੇ ਕੋਲ਼ਿਯੇਹਿ ਕਤਚੇਤਿਯੇ ਮਹੋਘੇਨ ਭਿਨ੍ਨੇ ਧਾਤੁਕਰਣ੍ਡਕੋ ਸਮੁਦ੍ਦਂ ਪਵਿਸਿਤ੍ਵਾ ਰਤਨਵਾਲੁਕਾ ਪਿਟ੍ਠੇ ਛਬ੍ਬਣ੍ਣਰਂਸਿ ਸਮਾਕਿਣ੍ਣੋ ਅਟ੍ਠਾਸਿ.

ਨਾਗਾ ਦਿਸ੍ਵਾ ਮਞ੍ਜੇਰਿਕ ਨਾਗ ਭਵਨਂ ਗਨ੍ਤ੍ਵਾ ਮਹਾਕਾਲ਼ ਨਾਗ ਰਞ੍ਞੋ ਆਰੋਚੇਸੁਂ ਸੋ ਦਸਕੋਟਿ ਨਾਗ ਸਹਸ੍ਸ ਪਰਿਵੁਤੋ ਆਗਨ੍ਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਸੁਵਣ੍ਣ-ਪਵਾਲ਼-ਮਿਣਿ-ਰਜਤਧਜੇ ਉਸ੍ਸਾਪੇਤ੍ਵਾ ਪਞ੍ਚਙ੍ਗਿਕ ਤੁਰਿਯ ਪਗ੍ਗਹੀਤ ਨਾਨਾਵਿਧ ਨਾਗ ਨਾਟਕਾਨਂ ਮਜ੍ਝਹਤੋ ਧਾਕੁਕਰਣ੍ਡਂ ਮਣਿਚਙ੍ਗੋਟਕੇ ਠਪੇਤ੍ਵਾ ਸੀਸੇਨਾਦਾਯ ਮਹਾਸਕ੍ਕਾਰ ਸਮ੍ਮਾਨਂ ਕਰੋਨ੍ਤੋ ਨਾਗਭਵਨਂ ਨੇਤ੍ਵਾ ਛਨ੍ਨਵੁਤਿ ਕੋਟਿਧਨੇ ਪੂਜੇਤ੍ਵਾ ਸਬ੍ਬਰਤਨੇਹਿ ਚੇਤਿਯਞ੍ਚ ਚੇਤਿਯਘਰਞ੍ਚ ਮਾਪੇਤ੍ਵਾ ਧਾਤੁਯੋ ਪਰਿਹਰਤਿ. ਮਹਾਕਸ੍ਸਪਤ੍ਥੇਰੋ ਅਜਾਤਸਤ੍ਤੁਨੋ ਧਾਤੁਨਿਧਾਨਂ ਕਰੋਨ੍ਤੋ ਰਾਮਗਾਮੇ ਧਾਤੁਯੋ ਠਪੇਤ੍ਵਾ ਸੇਸ ਧਾਤੁਯੋ ਆਹਰਿਤ੍ਵਾ ਅਦਾਸਿ ਰਾਜਾ ਰਾਮਗਾਮੇ ਧਾਤੁਯੋ ਕਸ੍ਮਾ ਨਾਹਟਾਤਿ ਪੁਚ੍ਛਿ.

ਥੇਰੋ ਮਹਾਰਾਜ ਤਾਸਂ ਅਨ੍ਤਰਾਯੋ ਨਤ੍ਥਿ ਅਨਾਗਤੇ ਤਮ੍ਬਪਣ੍ਣਿਦੀਪੇ ਮਹਾਚੇਤਿਯੇ ਪਤਿਟ੍ਠਹਿਸ੍ਸਨ੍ਤੀਤਿ ਆਹ. ਅਸੋਕੋ ਧਮ੍ਮਰਾਜਾਪਿ ਧਾਤੁਨਿਧਾਨਂ ਉਗ੍ਘਾਟੇਤ੍ਵਾ ਓਲੋਕੇਨ੍ਤੋ ਅਟ੍ਠਮਂ ਧਾਤੁਦੋਣਂ ਅਦਿਸ੍ਵਾ ਅਪਰਂ ਧਾਤੁਂ ਦੋਣਂ ਕਤ੍ਥ ਭਨ੍ਤੇਤਿ ਪੁਚ੍ਛਿ ਮਹਾਰਾਜ ਤਂ ਕੋਲ਼ਿਯੇਹਿ ਗਙ੍ਗਾਤੀਰੇ ਕਤ ਚੇਤਿਯੇ ਪਤਿਟ੍ਠਿਤਂ, ਮਹੋਘੇਨ ਚੇਤਿਯੇ ਭਿਨ੍ਨੇ ਮਹਾਸਮੁਦ੍ਦਂ ਪਾਵਿਸਿ.

ਤਂ ਨਾਗਾ ਦਿਸ੍ਵਾ ਅਤ੍ਤਨੋ ਨਾਗਭਵਨਂ ਨੇਤ੍ਵਾ ਪਰਿਹਰਨ੍ਤੀਤਿ ਖੀਣਾਸਵਾ ਆਹਂਸੁ ਰਾਜਾ ਨਾਗਭਵਨਂ ਨਾਮ ਮਮ ਆਣਾਪਵਤ੍ਤਨਟ੍ਠਾਨਂ, ਤਮ੍ਪਿ ਆਹਰਾਮਿ ਭਨ੍ਤੇਤਿ ਆਹ. ਮਹਾਰਾਜ ਤਾ ਧਾਤੁਯੋ ਅਨਾਗਤੇ ਤਮ੍ਬਪਣ੍ਣਿਦੀਪੇ ਮਹਾਚੇਤਿਯੇ ਪਤਿਟ੍ਠਹਿਸ੍ਸਨ੍ਤਿਤਿ ਨਿਵਾਰੇਸੁਂ. ਤਸ੍ਮਾ ਤ੍ਵਂ ਮਞ੍ਛੇਰਿਕ ਨਾਗ ਭਵਨਂ ਗਨ੍ਤ੍ਵਾ ਤਂ ਪਵਤ੍ਤਿਂ ਨਾਗ ਰਞ੍ਞੋ ਨਿਵੇਦੇਤ੍ਵਾ ਧਾਤੁਯੋ ਆਹਰ, ਸ੍ਵੇ ਧਾਤੁ ਨਿਧਾਨਂ ਭਵਿਸ੍ਸਤੀਤਿ. ਸੋਣੁਤ੍ਤਰੋ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਪਰਿਵੇਣਂ ਅਗਮਾਸਿ.

ਰਾਜਾਪਿ ਨਗਰਂ ਅਨ੍ਤ੍ਵਾ ਨਗਰੇ ਭੇਰਿਂ ਚਰਾਪੇਸਿ- ਸ੍ਵੇ ਧਾਤੁਨਿਧਾਨਂ ਭਵਿਸ੍ਸਤਿ ਨਾਗਰਾ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਰਿਤ੍ਵਾ ਗਣ੍ਧਮਾਲਾਦੀਨਿ ਗਹੇਤ੍ਵਾ ਮਹਾਚੇਤਿਯਙ੍ਗਣਂ ਓਤਰਨ੍ਤੁਤਿ. ਸਕ੍ਕੋਪਿ ਵਿਸ੍ਸਕਮ੍ਮਂ ਆਣਾਪੇਸਿ-ਸ੍ਵੇ ਮਹਾਚੇਤਿਯੇ ਧਾਤੁਨਿਧਾਨਂ ਭਵਿਸ੍ਸਤਿ. ਸਕਲ ਤਮ੍ਪਪਣ੍ਣਿਦੀਪਂ ਅਲਙ੍ਕਰੋਹੀਤਿ. ਸੋ ਪੁਨਦਿਵਸੇ ਏਕੂਨਯੋਜਨਸਤਿਕਂ ਤਮ੍ਬਪਣ੍ਣਿਦੀਪਂ ਕਸੀਣਮਣ੍ਡਲਂ ਵਿਯ ਸਮਂ ਕਤ੍ਵਾ ਰਜਤਪਟ੍ਟਸਦਿਸਂ ਵਾਲੁਕਾਕਿਣ੍ਣਂਪਞ੍ਚਵਣ੍ਣਪੁਪ੍ਫਸਮਾਕੂਲਂ ਕਤ੍ਵਾ ¶ ਸਮਨ੍ਤਤੋ ਪੁਣ੍ਣਘਟਪਨ੍ਤਿਯੋ ਠਪਾਪੇਤ੍ਵਾ ਸਾਣੀਹਿ ਪਰਿਕ੍ਖਿਪਿਤ੍ਵਾ ਉਪਰਿ ਚੇਲਵਿਤਾਨਂ ਬਣ੍ਧਿਤ੍ਵਾ ਪਥਵਿਤਲੇ ਥਲਪਦੁਮਾਨਿ ਆਕਾਸੇ ਓਲਮ੍ਬਕ ਪਦੁਮਾਨਿ ਦਸ੍ਸੇਤ੍ਵਾ ਅਲਙ੍ਕਤ ਦੇਵਸਭਂ ਵਿਯ ਸਜ੍ਜੇਸਿ. ਮਹਾਸਮੁਦ੍ਦਞ੍ਚ ਸਨ੍ਨਿਸਿਨ੍ਨਂ ਪਞ੍ਚਵਿਧ ਪਦੁਮਸਞ੍ਚਨ੍ਨਂ ਅਕਾਸਿ.

ਧਾਤੁ ਆਨੁਭਾਵੇਨ ਸਕਲ ਚਕ੍ਕਵਾਲ਼ਂ ਗਬ੍ਭੋਕ੍ਕਮਨਾਭਿਸਮ੍ਬੋਧਿਕਾਲਾਦਿਸੁ ਵਿਯ ਸਜ੍ਜਿਤਂ ਅਹੋਸਿ ਨਾਗਰਾਪ ਨਗਰ ਵੀਥਿਯੋ ਸਮ੍ਮਜ੍ਜਿਤ੍ਵਾ ਮੁਤ੍ਤਾਫਲ ਸਦਿਸਂ ਵਾਲੁਕਂ ਓਕਿਰਿਤ੍ਵਾ ਲਾਜਪਞ੍ਚਮਕ ਪੁਪ੍ਫਾਨਿ ਸਮੋਕਿਰਿਤ੍ਵਾ ਨਾਨਾਵਿਰਾਗ ਧਜਪਟਾਕਾਯੋ ਉਸ੍ਸਾਪੇਤ੍ਵਾ ਸੁਵਣ੍ਣਘਟ ਕਦਲਿਤੋਰਣ ਮਾਲਗਘਿਕਾਦੀਹਿ ਅਲਙ੍ਕਰਿਤ੍ਵਾ ਨਗਰਂ ਸਜ੍ਜੇਸੁ. ਰਾਜਾ ਨਗਰਸ੍ਸ ਚਤੁਸੁ ਦ੍ਵਾਰੇਸੁ ਅਨਾਥਾਨਂ ਮਨੁਸ੍ਸਾਨਂ ਪਰਿਭੋਤ੍ਥਾਯ ਨਾਨਾਪ੍ਪਕਾਰ ਖਾਦਨੀਯ ਭੋਜਨੀਯ ਗਣ੍ਧਮਾਲ ਵਤ੍ਥਾਭਰਣ ਪਞ੍ਚਵਿਧਿ ਮੁਧਵਾਸ ਸਹਿਤ ਤਾਮ੍ਬੁਲਾਨਿ ਚ ਠਪਾਪੇਸਿ.

ਅਥ ਰਾਜਾ ਸਬ੍ਬਾਭਰਣ ਵਿਭੂਸਿਤੋ ਕੁਮੁਦ ਪਨ੍ਨਵਣ੍ਣ ਚਤੁਸਿਣ੍ਧਵਯੁਤ੍ਤ ਰਥਵਰਮਾਰੁਯ੍ਹ ਅਲਙ੍ਕਤਂ ਕਣ੍ਡੁਲਂ ਹਤ੍ਥਿਂ ਪੁਰਤੋ ਕਤ੍ਵਾ ਸੁਵਣ੍ਣਚਙ੍ਗੋਟਕਂ ਸੀਸੇ ਕਤ੍ਵਾ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਅਟ੍ਠਾਸਿ. ਤਸ੍ਮਿਂ ਖਣੇ ਸਕ੍ਕਂ ਦੇਵਰਾਜਾਨਂ ਦੇਵਚ੍ਛਰਾ ਵਿਯ ਨਾਨਾਭਰਣਵਿਭੂਸਿਤਾ ਦੇਵਕਞ੍ਞੁਪਮਾ ਅਨੇਕ ਸਹਸ੍ਸ ਨਾਟਕਿਤ੍ਥਿਯੋ ਚੇਵ ਦਸਮਹਾਯੋਧਾ ਚ ਚਤੁਰਙ੍ਗਿਨੀ ਸੇਨਾ ਚ ਰਾਜਾਨਂ ਪਰਿਵਾਰੇਸੁਂ.

ਤਥਾ ਅਟ੍ਠੁਤ੍ਤਰ ਸਹਸ੍ਸ ਇਤ੍ਥਿਯੋ ਚ ਪੁਣ੍ਣਘਟੇ ਗਰਹਤ੍ਵਾ ਪਰਿਵਾਰੇਸੁਂ. ਅਟ੍ਠੁਤ੍ਤਰ ਸਹਸ੍ਸ ਅਟ੍ਠੁਤ੍ਤਰ ਸਰਸ੍ਸਪ੍ਪਮਾਣੇਯੇਵ ਪੁਰਿਸਾ ਚੇਵ ਇਤ੍ਥਿਯੋ ਚ ਪੁਪ੍ਫਸਮੁਗ੍ਗਾਨਿ ਦਣ੍ਡਦੀਪਿਕਾ ਨਾਨਾਵਣ੍ਣ ਧਜੇ ਚ ਗਹੇਤ੍ਵਾ ਪਰਿਵਾਰੇਸੁਂ. ਏਵਂ ਰਾਜਾ ਮਹਨ੍ਤੇਨ ਰਾਜਾਨੁਭਾਵੇਨ ਨਣ੍ਦਨਵਨਂ ਨਿਕ੍ਖਨ੍ਤ ਦੇਵਰਾਜਾ ਵਿਯ ਨਿਕ੍ਖਮਿ. ਤਦਾ ਨਾਨਾਵਿਧ ਤੁਰਿਯ ਘੋਸੇਹਿ ਚੇਵ ਹਤ੍ਥਸ੍ਸ ਰਥ ਸਦ੍ਦੇਹਿ ਚ ਮਹਾਪਥਵਿਭਿਜ੍ਜਨਾਕਾਰਪ੍ਪਤ੍ਤਾ ਵਿਯ ਅਹੋਸਿ.

ਤਸ੍ਮਿਂ ਖਣੇ ਸੋਣੁਤ੍ਤਰੋ ਅਤ੍ਤਨੋ ਪਰਿਵੇਣੇਯੇਵ ਨਿਸਿਨ੍ਨੋ ਤੁਰਿਯ ਘੋਸੇਨ ਰਞ੍ਞੋ ਨਿਕ੍ਖਨ੍ਤਭਾਵਂ ਞਤ੍ਵਾ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਅਧਿਟ੍ਠਯਾ ਪਥਵਿਯਂ ਨਿਮੁਜ੍ਜਿਤ੍ਵਾ ਮਞ੍ਜੇਰਿਕ ਨਾਗਭਵਨੇ ਮਹਾਕਾਲ਼ਾਨਾਗਰਞ੍ਞੋ ਪੁਰਤੋ ਪਾਤੁਰਹੋਸਿ. ਨਾਗਰਾਜਾ ਸੋਣੁਤ੍ਤਰਂ ਦਿਸ੍ਵਾ ਉਟ੍ਠਾਯਾਸਨਾ ਅਭਿਵਾਦੇਤ੍ਵਾ ਗਣ੍ਧੋਦਕੇਨ ਪਾਦੇ ਧੋਵਿਤ੍ਵਾ ਵਣ੍ਣ ਗਣ੍ਧ ਸਮ੍ਪਨ੍ਨ ਕੁਸੁਮੇਹਿ ਪੂਜੇਤ੍ਵਾ ਏਕਾਮਨ੍ਤਂ ਨਿਸੀਦਿਤ੍ਵਾ ਕੁਤੋ ਆਗਤਤ੍ਥ ਭਨ੍ਤੇਤਿ ਪੁਚ੍ਛਿ ਤਮ੍ਬਪਣ੍ਣਿ ਦੀਪਤੋ ਆਗਤਮ੍ਹਾਹਿ ਵੁਤ੍ਤੇ ਕਿਮਤ੍ਥਾਯਾਤਿ ਪੁਚ੍ਛਿ.

ਮਹਾਰਾਜ ਤਮ੍ਬਪਣ੍ਣਿਦੀਪੇ ਦੁਟ੍ਠਗਾਮਣਿ ਅਭਯ ਮਹਾਰਾਜਾ ਮਹਾ ਚੇਤਿਯਂ ਕਾਰੇਨ੍ਤੋ ਧਾਤੁਯੋ ਭਿਕ੍ਖੁਸਙ੍ਘਸ੍ਸ ਭਾਰਮਕਾਸਿ. ਮਹਾਵਿਹਾਰੇ ਤਿਂਸਮਤ੍ਤਾਨਿ ਭਿਕ੍ਖੁਸਹਸ੍ਸਾਨਿ ਸਨ੍ਨਿਪਤਿਤ੍ਵਾ ਮਹਾਥੂਪਤ੍ਥਾਯ ਠਪਿਤਧਾਤੁਯੋ ¶ ਮਹਾਕਾਲ਼ ਨਾਗ ਰਞ੍ਞੋ ਸਨ੍ਤਿਕੇ ਠਿਤਾ, ਤਸ੍ਸ ਤਂ ਪਵਤ੍ਤਿਂ ਕਥੇਤ੍ਵਾ ਧਾਤੁਯੋ ਆਹਰਾਤਿ ਮਂ ਪੇਸੇਸੁਂ, ਤਸ੍ਮਾ ਇਧਾਗਤੋਮ੍ਹੀਤਿ ਆਹ.

ਤਂ ਸੁਤ੍ਵਾ ਨਾਗਰਾਜਾ ਪਬ੍ਬਤੇਨ ਵਿਯ ਅਜ੍ਝੋਤ੍ਥਟੋ ਮਹਨ੍ਤੇਨ ਮਦਾਮਨਸ੍ਸੇਨ ਅਭਿਭੂਤੋ ਏਵਂ ਚਿਨ੍ਤੇਸਿ ਮਯਂ ਪਨ ਇਮਾ ਧਾਤੁਯੋ ਪੂਜੇਤ੍ਵਾ ਅਪਾਯਤੋ ਮੁਞ੍ਚਿਤ੍ਵਾ ਸਗ੍ਗੇ ਨਿਬ੍ਬਤ੍ਤਿਸ੍ਸਮਾਤਿ ਅਮਞ੍ਞਿਮ੍ਹ. ਅਯਂ ਪਨ ਭਿਕ੍ਖੁ ਮਹਿਦ੍ਧਿਕੋ ਮਹਾਨੁਭਾਵੋ, ਸਚੇ ਇਮਾ ਧਾਤੁਯੋ ਇਮਸ੍ਮਿਂ ਠਾਨੇ ਠਿਤੋ ਭਵੇਯ੍ਯੁਂ, ਅਮ੍ਹੇ ਅਭਿਭਵਿਤ੍ਵਾਪਿ ਗਣ੍ਹਿਤੁਂ ਸਕ੍ਕੁਣੇਯ੍ਯ. ਧਾਤੁਯੋ ਅਪਨੇਤੁਂ ਵਟ੍ਟਤੀਤਿ ਚਿਨ੍ਤੇਤ੍ਵਾ ਪਰਿਸਂ ਓਲੋਕੇਨ੍ਤੋ ਪਰਿਸ ਪਰਿਯਨ੍ਤੇ ਠਿਤਂ ਵਾਸੁਲਦਤ੍ਤਂ ਨਾਮ ਅਤ੍ਤਨੋ ਭਾਗਿਨੇਯ੍ਯਂ ਦਿਸ੍ਵਾ ਤਸ੍ਸ ਸਞ੍ਞਮਦਾਸਿ ਸੋ ਮਾਤੁਲਸ੍ਸ ਅਧਿਪ੍ਪਾਯਂ ਞਤ੍ਵਾ ਚੇਤਿਯਘਰਂ ਗਨ੍ਤ੍ਵਾ ਧਾਤੁਕਰਣ੍ਡਕਂ ਆਦਾਯ ਗਿਲਿਤ੍ਵਾ ਸਿਨੇਰੁਪਬ੍ਬਤ ਪਾਦਮੂਲਂ ਗਨ੍ਤ੍ਵਾ-

ਯੋਜਨਸਤਾਮਾਵਟ੍ਟਂ ਦੀਘਂ ਤਿਸਤ ਯੋਜਨਂ,

ਫਣਾਨੇਕਸਹਸ੍ਸਾਨਿ-ਮਾਪਿਸਿਤ੍ਵਾ ਮਹਿਦ੍ਧਿਕੋ,

ਸਿਨੇਰੁ ਪਾਦਮੂਲਮ੍ਹਿ-ਧੁਮਾਯਨ੍ਤੋ ਚ ਪਜ੍ਜਲਂ,

ਆਭੁਜਿਤ੍ਵਾਨ ਸੋ ਭੋਗੇ-ਨਿਪਜ੍ਜਿ ਵਾਲੁਕਾਤਲੇ;

‘‘ਅਨੇਕਾਨਿ ਸਹਸ੍ਸਾਨਿ-ਅਤ੍ਤਨਾ ਸਦਿਸੇ ਅਹਿ,

ਮਾਪਯਿਤ੍ਵਾ ਸਯਾਪੇਸਿ-ਸਮਨ੍ਤਾ ਪਰਿਵਾਰਿਤੇ,

ਬਹੂ ਦੇਵਾ ਚ ਨਾਗਾ ਚ-ਓਸਰਿਂਸੁ ਤਹਿਂ ਤਦਾ,

ਯੁਦ੍ਧਂ ਉਭਿਨ੍ਨਂ ਨਾਗਾਨਂ-ਸਸ੍ਸਿਸ੍ਸਾਮ ਮਯਂ ਇਤਿ;’’

ਤਤੋ ਨਾਗਰਾਜਾ ਭਾਗਿਨੇਯ੍ਯੇਨ ਧਾਤੁਯੋ ਅਪਨੀਤਭਾਵਂ ਞਤ੍ਵਾ ਏਵਮਾਹ- ਮਮ ਸਨ੍ਤਿਕੇ ਧਾਤੁਯੋ ਨਤ੍ਥਿ, ਤੁਮ੍ਹੇ ਇਧ ਪਪਞ੍ਚ ਅਕਤ੍ਵਾ ਸੀਘਂ ਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਤਂ ਪਵਤ੍ਤਿਂ ਆਰੋਚੇਥ ਭਿਕ੍ਖੁਸਙ੍ਘੋ ਅਞ੍ਞਤੋ ਧਾਤੁਂ ਪਰਿਯੇਸਿਸ੍ਸਤੀਤਿ ਸਾਮਣੇਰੋ ਆਦਿਤੇ ਪਟ੍ਠਾਯ ਧਾਤੁ ਆਗਮਨਂ ਵਤ੍ਵਾ ਧਾਤੁਯੋ ਤਵ ਸਨ੍ਤਿਕੇਯੇਵ, ਪਪਞ੍ਚਂ ਅਕਤ੍ਵਾ ਦੇਹੀਤਿ ਚੋਦੇਸਿ.

ਤਤੋ ਨਾਗਰਾਜਾ ਸਾਮਣੇਰੇਨ ਮੂਲਮ੍ਹਿ ਗਹਿਤਭਾਵਂ ਞਤ੍ਵਾ ਯੇਨ ਕੇਨਚਿ ਪਰਿਯਾਯੇਨ ਧਾਤੁਯੋ ਅਦਤ੍ਵਾਵ ਪੇਸਿਤੁਂ ਵਟ੍ਟਤੀਤਿ ਚਿਨ੍ਤੇਤ੍ਵਾ ਸਾਮਣੇਰਂ ਧਾਤੁਘਰਂ ਨੇਤ੍ਵਾ ਚੇਤਿਯਞ੍ਚ ਚੇਤਿਯਘਰਞ੍ਚ ਦਸ੍ਸੇਸਿ. ਤਂ ਪਨ ਚੇਤਿਯਞ੍ਚ ਚੇਤਿਯਘਰਞ੍ਚ ਸਬ੍ਬਰਤਨਮਯਮੇਵ ਅਹੋਸਿ.

ਵੁਤ੍ਤਞ੍ਹੇਤਂ ਮਹਾਵਂਸੇ

‘‘ਅਨੇਕਧਾ ਅਨੇਕੇਹਿ ਰਤਨੇਹਿ ਸੁਸਙ੍ਖਤਂ,

ਚੇਤਿਯਂ ਚੇਤਿਯਘਰਂ-ਪਸ੍ਸ ਭਿਕ੍ਖੁ ਸੁਨਿਮ੍ਮਿਤ’’ਨ੍ਤਿ;

ਦਸ੍ਸੇਤ੍ਵਾ ਚ ਪਨ ਚੇਤਿਯਘਰਤੋ ਓਰੁਯ੍ਹ ਅਦ੍ਧਚਣ੍ਦਕਪਾਸਾਣੇ ਪਵਾਲ਼ਪਦੁਮਮ੍ਹਿ ਠਤ੍ਵਾ ਇਮਸ੍ਸ ਚੇਤਿਯਸ੍ਸ ਚੇਤਿਯਘਰਸ੍ਸ ਚ ਅਗ੍ਘਂ ਕਰੋਹਿ ¶ ਭਨ੍ਤੇਤਿ ਆਹ ਸਾਮਣੇਰੋ ਨ ਸਕ੍ਕੋਮ ਮਹਾਰਾਜ ਅਗ੍ਘਂ ਕਾਤੁਂ, ਸਕਲੇਪਿ ਤਮ੍ਭਪਣ੍ਣਿਦੀਪੇ ਰਤਨਾਨਿ ਇਮਂ ਅਦ੍ਧਚਣ੍ਦਕ ਪਾਸਾਣਂ ਨਾਗ੍ਘਤੀਤਿ ਆਹ.

ਨਾਗਰਾਜਾ ਏਵਂ ਸਨ੍ਤੇ ਮਹਾਸਕ੍ਕਾਰਟ੍ਠਾਨਤੋ ਅਪ੍ਪਸਕ੍ਕਾਰਟ੍ਠਾਨਂ ਧਾਤੂਨਂ ਨਯਨਂ ਅਯੁਤ੍ਤਂ ਨਨੁ ਭਿਕ੍ਖੂਤਿ ਆਹ. ਸਾਮਣੇਰੋ ਏਵਮਾਹਮਹਾਰਾਜ ਬੁਦ੍ਧਾ ਨਾਮ ਧਮ੍ਮਗਰੁਕਾ, ਨ ਆਮਿਸ ਗਰੁਕਂ, ਤੁਮ੍ਹੇਸੁ ਚਕ੍ਕਵਾਲ਼ਪ੍ਪਮਾਣਂ ਰਤਨਘਰਂ ਮਾਪੇਤ੍ਵਾ ਸਬ੍ਬਰਤਨਸ੍ਸ ਪੂਰੇਤ੍ਵਾ ਧਾਤੁਯੋ ਪਰਿਹਰਨ੍ਤੇਸੁਪਿ ਏਕਨਾਗੋਪਿ ਧਮ੍ਮਾਭਿਸਮਯਂ ਕਾਤੁਂ ਸਮਤ੍ਥੋ ਨਾਮ ਨਤ੍ਥਿ ਯਸ੍ਮਾ-

‘‘ਸਚ੍ਚਾਭਿਸਮਯੋ ਨਾਗ-ਤੁਮ੍ਹਾਕਮ੍ਪਿ ਨ ਵਿਜ੍ਜਤਿ. ਸਚ੍ਚਾਭਿਸਮਯਟ੍ਠਾਨਂ-ਨੇਤੁਂ ਯੁਤ੍ਤਞ੍ਹਿ ਧਾਤੁਯੋ. ਸਂਸਾਰਦੁਕ੍ਖਮੋਕ੍ਖਾਯ-ਉਪ੍ਪਜ੍ਜਨ੍ਤ ਤਥਾਗਤਾ, ਬੁਦ੍ਧਸ੍ਸ ਵੇਤ੍ਥਾਦੀਪ੍ਪਾਯੋ-ਤੇਨ ਨੇਸ੍ਸਾਮਿ ਧਾਤੁਯੋ. ਧਾਤੁਨਿਧਾਨਂ ਅਜ੍ਜੇਵ-ਸੋ ਹਿ ਰਾਜਾ ਕਰਿਸ੍ਸਤਿ.

ਤਸ੍ਮਾ ਪਪਞ੍ਚਮਕਰਿਤ੍ਵਾ-ਲਹੁਂ ਮੇ ਦੇਹਿ ਧਾਤੁਯੇ’’ਤਿ-ਆਹ. ਏਵਂ ਵੁਤ੍ਤੇ ਨਾਗਰਾਜਾ ਅਪ੍ਪਟਿਹਾਨੋ ਯੁਤ੍ਵਾ ਅਤ੍ਤਨੋ ਭਾਗਿਨੇਯ੍ਯੇਨ ਧਾਤੁਯੋ ਗੋਪਿਤੋਤਿ ਮਞ੍ਞਮਾਨੋ ਏਵਮਾਹ. ਤੁਮ੍ਹੇ ਭਨ੍ਤੇ ਚੇਤਿਯੇ ਧਾਤੂਨਂ ਅਤ੍ਥਿਭਾਵਂ ਵਾ ਨਤ੍ਥਿਭਾਵਂ ਵਾ ਅਜਾਨਨ੍ਤਾ ਦੇਹਿ ਦੇਹੀਤਿ ਵਦਥ. ਅਹਂ ਨਤ੍ਥੀਤਿ ਵਦਾਮਿ. ਸਚੇ ਪਸ੍ਸਥ ਗਹੇਤ੍ਵਾ ਗਚ੍ਛਥਾਤਿ. ਗਣ੍ਹਾਮਿ ਮਹਾਰਾਜਾਤਿ, ਗਣ੍ਹ ਭਿਕ੍ਖੂਤਿ. ਗਣ੍ਹਾਮਿ ਮਹਾਰਾਜਾਤਿ, ਗਣ੍ਹ ਭਿਕ੍ਖੂਤਿ ਤਿਕ੍ਖਤ੍ਤੁਂ ਪਟਿਞ੍ਞਂ ਗਹੇਤ੍ਵਾ.

‘‘ਸੁਖੁਮਂ ਕਰਂ ਮਾਪਯਿਤ੍ਵਾ-ਥਿਕ੍ਖੂ ਤਤ੍ਰ ਠਿਤੋਚ ਸੋ,

ਭਾਗਿਨੇਯ੍ਯਸ੍ਸ ਵਦਨੇ-ਹਤ੍ਥਮ੍ਪਕ੍ਖਿਪ੍ਪ ਤਾਵਦੇ,

ਧਾਤੁਕਰਣ੍ਡਮਦਾਯ-ਤਿਟ੍ਠ ਨਾਗਾਤਿ ਭਾਸਿਹ,

ਨਿਮੁਜ੍ਜਿਤ੍ਵਾ ਪਥਵਿਯਂ-ਪਰਿਵੇਣਮ੍ਹਿ ਉਟ੍ਠਹਿ;’’

ਤਦਾ ਸਾਮਣੇਰਸ੍ਸ ਨਾਗੇਨ ਸਦ੍ਧਿਂ ਯੁਦ੍ਧਂ ਪਸ੍ਸਿਸ੍ਸਾਮਾਤਿ ਸਮਾਗਤਾ ਦੇਵ-ਨਾਗ ਪਰਿਸਾਪ ਭਿਕ੍ਖੁਨਾਗਸ੍ਸ ਵਿਜਯਂ ਦਿਸ੍ਵਾ ਹਟ੍ਠਾ ਪਮੋਦਿਤੋ ਧਾਤੁਯੋ ਪੂਜਯਨ੍ਤਾਵ ਤੇਨੇਵ ਸਹ ਆਗਮੁਂ, ਨਾਗਰਾਜਾ ਸਾਮਣੇਰਸ੍ਸ ਗਤ ਕਾਲੇ ਭਿਕ੍ਖੁਂ ਵਞ੍ਚੇਤ੍ਵਾ ਪੇਸਿਤੋਮ੍ਹੀਤਿ ਹਟ੍ਠਤੁਟ੍ਠੋ ਧਾਤੁਯੋ ਗਹੇਤ੍ਵਾ ਆਗਮਤ੍ਥਾਯ ਭਾਗਿਨੇਯ੍ਯਸ੍ਸ ਸਾਸਨਂ ਪੇਸੇਸਿ.

‘‘ਭਾਗਿਨੇਯ੍ਯੋ’ਥ ਕੁਚ੍ਛਿਮ੍ਹਿ-ਅਪਸ੍ਸਿਤ੍ਵਾ ਕਰਣ੍ਡਕਂ,

ਪਰਿਦੇਵਮਾਨੋ ਆਗਨ੍ਤ੍ਵਾ-ਮਾਤੁਲਸ੍ਸ ਨਿਵੇਦਯਿ;

ਤਦਾ ਸੋ ਨਾਗਰਾਜਾਪਿ-ਵਞ੍ਚਿਤਮ੍ਹ ਮਯਂ ਇਤਿ,

ਪਰਿਦੇਵਿ ਨਾਗਾ ਸਬ੍ਬੇਪਿ-ਪਰਿਦੇਵਿਂਸੁ ਪਿਣ੍ਡਿਤਾ;’’

ਤਤੋ ¶ ਨਾਗਭਵਨੇ ਸਬ੍ਬੇ ਨਾਗਾ ਸਮਾਗਨ੍ਤ੍ਵਾ ਕੇਸੇ ਮੁਞ੍ਚਿਤ੍ਵਾ ਉਭੋਹਿ ਹਤ੍ਥੇਹਿ ਹਦਯੇ ਗਹੇਤ੍ਵਾ ਨੀਲੁਪ੍ਪਲ ਸਦਿਸੇਹਿ ਨੇਤ੍ਤੇਹਿ ਵਿਲੀਨ ਸੋਕਮਿਵ ਅਸ੍ਸੁਧਾਰਂ ਪਵਤ੍ਤਯਮਾਨਾ-

‘‘ਪਰਿਦੇਵਮਾਨਾ ਆਗਨ੍ਤ੍ਵਾ-ਨਾਗਾ ਸਙ੍ਘਸ੍ਸ ਸਨ੍ਤਿਕੇ,

ਬਹੁਧਾ ਪਰਿਦੇਵਿਂਸ-ਧਾਤਾਹਰਣ ਦੁਕ੍ਖਿਤਾ’’ਤਿ;

ਪਰਿਦੇਵਿਤ੍ਵਾ ਚ ਭਿਕ੍ਖੁਸਙ੍ਘਸ੍ਸ ਏਵਮਾਹਂਸੁ- ਭਨ੍ਤੇ ਕਸ੍ਸਚਿ ਪੀਲ਼ਂ ਅਕਤ੍ਵਾ ਅਮ੍ਹਾਕਂ ਪੁਞ੍ਞਾਨੁਭਾਵੇਨ ਲਭਿਤ੍ਵਾ ਚੀਰਪਰਿਹਟ ਧਾਤੁਯੋ ਕਸ੍ਮਾ ਅਨਵਸੇਸਂ ਕਤ੍ਵਾ ਅਹਰਾਪੇਥ ਅਮ੍ਹਾਕਂ ਸਗ੍ਗਮੋਕ੍ਖਨ੍ਤਰਾਯਂ ਕਰੋਥਾਤਿ.

’ਤੇਸਂ ਸਙ੍ਘੋ’ਨੁਕਮ੍ਪਾਯ-ਥੋਕਂ ਧਾਤੁਮਦਾਪਯਿ,

ਤੇ ਤੇਨ ਤੁਟ੍ਠਾ ਗਨ੍ਤ੍ਵਾਨ-ਪੂਜਾਭਣ੍ਡਾਨਿ ਆਹਰੁਂ;

ਤਤੋ ਸਕ੍ਕੋ ਦੇਵਾਨਮਿਣ੍ਦੋ ਵਿਸ੍ਸਕਮ੍ਮਂ ਆਮਨ੍ਤੇਤ੍ਵਾ ਸਾਮਣੇਰਸ੍ਸ ਉਟ੍ਠਿਤਟ੍ਠਾਨੇ ਸਤ੍ਤਰਤਨਮਯਂ ਮਣ੍ਡਪਂ ਮਾਪੇਹੀਤਿ ਆਹ. ਸੋ ਤਸ੍ਮਿਯੇਵ ਖਣੇ ਮਣ੍ਡਪਂ ਮਾਪੇਸਿ ਅਥ ਸਕ੍ਕੋ ਦ੍ਵੀਸੁ ਦੇਵਲੋਕੇਸੁ ਦੇਵਪਰਿਸਾਯ ਪਰਿਵੁਤੋ ਸੁਵਣ੍ਣਚਙ੍ਗੋਟਕੇਨ ਸਦ੍ਧਿਂ ਰਤਨ ਪਲ੍ਲਙ੍ਕਮਾਦਾਯ ਆਗਨ੍ਤ੍ਵਾ ਤਸ੍ਮਿਂ ਮਣ੍ਡਪੇ ਪਤਿਟ੍ਠਾਪੇਤ੍ਵਾ ਸਾਮਣੇਰਸ੍ਸ ਹਤ੍ਥਤੋ ਧਾਤੁਕਰਣ੍ਡਕਂ ਗਹੇਤ੍ਵਾ ਤਸ੍ਮਿਂ ਪਲ੍ਲਙ੍ਕੇ ਪਤਿਟ੍ਠਾਪੇਸਿ. ਤਦਾ-

’ਬ੍ਰਹ੍ਮਾ ਛਤ੍ਤਮਧਾਰੇਸਿ-ਸਨ੍ਤੁਸਿਤੋ ਵਾਲਵਿਜਨਿਂ,

ਮਣਿਤਾਲਵਣ੍ਟਂ ਸੁਯਾਮੋ-ਸਕ੍ਕੋ ਸਙ੍ਖਨ੍ਤੁ ਸੋਦਕਂ;

ਚਤ੍ਤਾਰੋ ਤੁ ਮਹਾਰਾਜ-ਅਟ੍ਠਂਸੁ ਖਗ੍ਗਪਾਣਿਨੋ,

ਸਮੁਗ੍ਗਹਤ੍ਥਾ ਦ੍ਵਤ੍ਤਿਂਸਾ-ਦੇਵਪੁਤ੍ਤਾ ਮਹਿਦ੍ਧਿਕਾ;

ਪਾਰਿਚ੍ਛਤ੍ਤਕ ਪੁਪ੍ਫੇਹਿ ਪੂਜਯਨ੍ਤਾ ਤਹਿਂ ਠਿਤਾ,

ਕੁਮਾਰਿਯੋਪਿ ਦ੍ਵਤ੍ਤਿਂਸਾ-ਦਣ੍ਡਿਦੀਪਧਰਾ ਠਿਤਾ;

ਪਲਾਪੇਤ੍ਵਾ ਦੁਟ੍ਠਯਕ੍ਖੇ-ਯਕ੍ਖਸੇਨਾਪਤਿ ਪਨ

ਅਟ੍ਠਵੀਸਤਿ ਅਟ੍ਠਂਸੁ-ਆਰਕ੍ਖਂ ਕੁਰੁਮਾਨਕਾ;

ਵੀਣਂ ਵਾਦਯਮਾਨੋਵ-ਅਟ੍ਠਾ ਪਞ੍ਚਸਿਖੋ ਤਹਿਂ,

ਰਙ੍ਗਭੂਮਿਂ ਮਾਪਯਿਤ੍ਵਾ-ਤਿਮ੍ਬਰੂ ਤੁਰਿਯਘੋਸਵਾ;

ਅਨੇਕਾ ਦੇਵਪੁਤ੍ਤਾ ਚ-ਸਾਧੁਗੀਤਪ੍ਪਯੋਜਕਾ,

ਮਹਾਕਾਲੋ ਨਾਗਰਾਜਾ-ਥੂਯਮਾਨੋ ਅਨੇਕਧਾ;

ਦਿਬ੍ਬਤੁਰਿਯਾਨਿ ਵਜ੍ਜਨ੍ਤਿ-ਦਿਬ੍ਬਸਙ੍ਗਿਤਿ ਵਤ੍ਤਤਿ,

ਦਿਬ੍ਬਗਣ੍ਧਾ ਚ ਵਸ੍ਸਾਨਿ-ਵਸ੍ਸਾਪੇਨ੍ਤਿ ਚ ਦੇਵਤਾ;

ਤਦਾ ਇਣ੍ਦਗੁਤ੍ਤਤ੍ਥੇਰੋ ਮਾਰਸ੍ਸ ਪਟਿਬਾਹਨਤ੍ਥਾਯ ਚਕ੍ਕਵਾਲ਼ਪਰਿਯਨ੍ਤਂ ਕਤ੍ਵਾ ਆਕਾਸੇ ਲੋਹਛਤ੍ਤਂ ਮਾਪੇਸਿ. ਪਞ੍ਚਨਿਕਾਯਿਕ ਥੇਰਾ ¶ ਧਾਤੁਯੋ ਪਰਿਵਾਰੇਤ੍ਵਾ ਪਞ੍ਚਸੁ ਠਾਨੇਸੁ ਨਿਸੀਦਿਤ੍ਵਾ ਗਣਸਜ੍ਝਾਯਮਕਂਸੁ. ਤਸ੍ਮਿਂ ਕਾਲੇ ਰਾਜਾ ਤਂ ਠਨਂ ਆਗਨ੍ਤ੍ਵਾ ਸਿਸਤੋ ਸੁਵਣ੍ਣ ਚਙ੍ਗੋਟਕਂ ਓਤਾਰੇਤ੍ਵਾ ਧਾਤੁ ਚਙ੍ਗੋਟਕਂ ਅਤ੍ਤਨੋ ਚਙ੍ਗੋਟਕੇ ਠਪੇਤ੍ਵਾ ਪਲ੍ਲਙ੍ਕੇ ਪਤਿਟ੍ਠਾਪੇਤ੍ਵਾ ਗਣ੍ਧਮਾਲਾਦੀਹਿ ਪੂਜੇਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਿਰਸਿ ਅਞ੍ਜਲਿਂ ਪਗ੍ਗਯ੍ਹ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤੋ ਅਟ੍ਠਾਸਿ. ਤਸ੍ਮਿਂ ਖਣੇ ਧਾਤੁਮਤ੍ਥਕੇ ਸੇਤਚ੍ਛਤ੍ਤਂ ਦਿਸ੍ਸਤਿ ਛਤ੍ਤਗਾਹਕ ਬ੍ਰਹ੍ਮਾ ਨ ਦਿਸ੍ਸਤਿ. ਤਥਾ ਤਾਲਵਣ੍ਟ ਵਿਜਨਿ ਆਦਯੋ ਦਿਸ੍ਸਨ੍ਤਿ ਗਾਹਕਾ ਨ ਦਿਸ੍ਸਨ੍ਤਿ ਦਿਬ੍ਬਤੁਰਿਯਘੋਸ ਸਙ੍ਗਿਤਿਯੋ ਸੁਯ੍ਯਨ੍ਤਿ ਗਣ੍ਧਬ੍ਬ ਦੇਵਤਾ ਨ ਦਿਸ੍ਸਨ੍ਤਿ. ਰਾਜਾ ਏਤਂ ਅਚ੍ਛਰਿਯਂ ਦਿਸ੍ਵਾ ਇਣ੍ਦਗੁਤ੍ਤਤ੍ਥੇਰਂ ਏਵਮਾਹ-ਦੇਵਤਾ ਦਿਬ੍ਬਛਤ੍ਤੇਨ ਪੂਜੇਸੁਂ ਅਹਂ ਮਾਨੁਸ ਕਚ੍ਛਤ੍ਤੇਨ ਪੂਜੇਮਿ ਭਨ੍ਨੇਤਿ. ਥੇਰੋ ਯੁਤ੍ਤਂ ਮਹਾਰਾਜਾਤਿ ਆਹ. ਰਾਜਾ ਅਤ੍ਤਨੋ ਸੁਵਣ੍ਣਪਿਣ੍ਡਿਕੇ ਸੇਤਚ੍ਛਤ੍ਤੇਨ ਪੂਜੇਤ੍ਵਾ ਸੁਵਣ੍ਣਭਿਂਕਾਰਂ ਗਹੇਤ੍ਵਾ ਅਭਿਸੇਕੋਦਕਂ ਦਤ੍ਵਾ ਤਂ ਦਿਵਸਂ ਸਕਲਤਮ੍ਬਪਣ੍ਣਿ ਦੀਪੇ ਰਜ੍ਜਂ ਅਦਾਸਿ.

ਤਤੋ ਸਬ੍ਬਤੁਰਿਯਾਨਿ ਪਗ੍ਗਣ੍ਹਿਂਸੁ, ਗਣ੍ਧਮਾਲਾਦੀਹਿ ਪੂਜੇਤ੍ਵ ਮਹਨ੍ਤਂ ਸਕ੍ਕਾਰਮਕਂਸੁ ਪੁਨ ਰਾਜਾ ਥੇਰਂ ਪੁਚ੍ਛਿ - ਅਮ੍ਹਾਕਂ ਸਤ੍ਥਾ ਦਿਬ੍ਬਮਾਨੁਸਕਾਨਿ ਦ੍ਵੇ ਛਤ੍ਤਾਨਿ ਧਾਰੇਸਿ ਭਨ੍ਤੇ. ਨ ਦ੍ਵੇ ਛਤ੍ਤਾਨਿ ਤੀਣਿ ਛਤ੍ਤਾਨਿ ਮਹਾਰਾਜਾਤਿ. ਅਞ੍ਞਂ ਛਤ੍ਤਂ ਨਪਸ੍ਸਾਮਿ ਭਨ੍ਨੇਤਿ. ਸੀਲਪਤਿਟ੍ਠਂ ਸਮਾਧਿਦਣ੍ਡਕਂ ਇਣ੍ਦ੍ਰਿਯਸਲਾਕਂ ਬਲਮਾਲਂ ਮਗ੍ਗਫਲਪਤ੍ਤ ਸਞ੍ਛਨ੍ਨਂ ਵਿਮੁਤ੍ਤਿਵਰਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਞਾਣਾਭਿਸੇਕਮ੍ਪਤ੍ਤੋ ਧਮ੍ਮਰਤਨ ਚਕ੍ਕਂ ਪਵਤ੍ਤੇਤ੍ਵਾ ਦਸਸਹਸ੍ਸ ਚਕ੍ਕਵਾਲ਼ੇਸੁ ਬੁਦ੍ਧਰਜ੍ਜਂ ਹਤ੍ਥਗਤਂ ਕਤ੍ਵਾ ਰਜ੍ਜਂ ਕਾਰੇਸੀਤਿ ਰਾਜਾ ਤੀਣਿਚ੍ਛਤ੍ਤ ਧਾਰਕਸ੍ਸ ਸਤ੍ਥੁਨੋ ਤਿਕ੍ਖਤ੍ਤੁਂ ਰਜ੍ਜਂ ਦਮ੍ਮੀਤਿ ਤਿਕ੍ਖਤ੍ਤੁਂ ਧਾਤੁਯੋ ਰਜ੍ਜੇਨ ਪੂਜੇਸਿ.

ਤਤੋ ਰਾਜਾ ਦੇਵਮਨੁਸ੍ਸੇਸੁ ਦਿਬ੍ਬਗਣ੍ਧਮਾਲਾਦੀਹਿ ਪੂਜੇਨ੍ਤੇਸੁ ਅਨੇਕੇਸੁ ਤੁਰਿਯਘੋਸ ਸਙ੍ਗਿਤੇਸੁ ਵਤ੍ਤਮਾਨੇਸੁ ਧਾਤੁਕਰਣ੍ਡਕਂ ਸੀਸੇਨਾਦਾਯ ਰਤਨਮਣ੍ਡਪਤੋ ਨਿਕ੍ਖਮਿਤ੍ਵਾ ਭਿਕ੍ਖੁਸਙ੍ਘ ਪਰਿਵੁਤੋ ਮਹਾਚੇਤਿਯਂ ਪਦਕ੍ਖਿਣਂ ਕਤ੍ਵਾ ਪਾਚੀਨਦ੍ਵਾਰੇਨਾਰੁਯ੍ਹ ਧਾਤੁਗਬ੍ਭਂ ਓਤਰਿ. ਤਤੋ ਮਹਾਚੇਤਿਯਂ ਪਰਿਵਾਰੇਤ੍ਵਾ ਛਨ੍ਨਵੁਤਿ ਕੋਟਿਪ੍ਪਮਾਣ ਅਰਹਨ੍ਤੋ ਅਟ੍ਠਂਸੁ.

ਰਾਜਾ ਸੀਸਤੋ ਧਾਤੁਕਰਣ੍ਡਕਂ ਓਤਾਰੇਤ੍ਵਾ ਮਹਾਰਹੇ ਸਯਨਪਿਟ੍ਠੇ ਠਪੇਸ੍ਸਾਮੀਤਿ ਚਿਨ੍ਤੇਸਿ ਤਸ੍ਮਿਂ ਖਣੇ ਧਾਤੁਕਰਣ੍ਡਕੋ ਰਞ੍ਞੋ ਸੀਸਤੋ ਸਤ੍ਤ ਤਾਲਪ੍ਪਮਾਣੇ ਠਾਨੇ ਗਨ੍ਤ੍ਵਾ ਸਯਮੇਵ ਵਿਚਰਿ ਧਾਤੁਯੋ ਆਕਾਸਮੁਗ੍ਗਨ੍ਤ੍ਵਾ ਦ੍ਵਤ੍ਤਿਂਸ ਮਹਾ ਪੁਰਿਸਲਕ੍ਖਣ ਅਸਿਤਿ ਅਨੁਬ੍ਯਞ੍ਜਨਾ ਬ੍ਯਾਮਪ੍ਪਭਾ ਪਤਿਮਣ੍ਡਿਤਂ ਕੇਤੁਮਾਲੋਪ ਸੋਭਿਤਂ ਨਿਲ-ਪੀਤ-ਲੋਹਿਤਾਦਿ ਭੇਦ ਵਿਚਿਤ੍ਰ ਰਂਸਿਜਾਲਾ ਸਮੁਜ੍ਜਲਂ ਬੁਦ੍ਧਵੇਸਂ ਗਹੇਤ੍ਵਾ ਗਣ੍ਡਮ੍ਬਮੂਲੇ ¶ ਯਮਕ ਪਾਟਿਹਾਰਿਯਂ ਸਦਿਸ ਯਮਕ ਪਾਟਿਹਾਰਿਯਂ ਅਕਂਸੁ. ਤਂ ਧਾਤੁਪਾਟਿਹਾਰਿਯਂ ਦਿਸ੍ਵਾ ਪਸੀਦਿਤ੍ਵਾ ਅਰਹਤ੍ਤਮ੍ਪਤ੍ਤਾ ਦੇਵਮਨੁਸ੍ਸਾ ਦ੍ਵਾਦਸਕੋਟਿਯੋ ਅਹੇਸੁਂ. ਸੇਸਫਲਤ੍ਤਯਂ ਪਤ੍ਤਾ ਗਣਨਪਥਮਤੀਤਾ ਅਹੇਸੁਂ. ਏਵਂ ਧਾਤੁਯੋ ਅਨੇਕਧਾ ਪਾਟਿਹਾਰਿਯਂ ਦਸ੍ਸੇਤ੍ਵਾ ਬੁਦ੍ਧਵੇਸਂ ਵਿਸ੍ਸਜ੍ਜੇਤ੍ਵਾ ਕਰਣ੍ਡਕਂ ਪਵਿਸਿਤ੍ਵਾ ਤੇਨ ਸਦ੍ਧਿਂ ਓਤਰਿਤ੍ਵਾ ਰਞ੍ਞੋ ਸੀਸੇ ਪਤਿਟ੍ਠਹਿਂਸੁ.

ਰਾਜਾ ਅਮਤੇਨ ਵਿਯ ਅਭਿਸਿਤ੍ਤੋ ਸਫਲਂ ਮਨੁਸ੍ਸਤ੍ਤ ਪਟਿਲਾਭਂ ਮਞ੍ਞਮਾਨੋ ਉਭੋਹਿ ਹਤ੍ਥੇਹਿ ਧਾਤੁਕਰਣ੍ਡਕਂ ਗਹੇਤ੍ਵਾ ਨਾਟਕ ਪਰਿਵੁਤੋ ਅਲਙ੍ਕਤ ਸਯਨ ਸਮੀਪਂ ਗਨ੍ਤ੍ਵਾ ਧਾਤੁਚਙ੍ਗੋਟਕਂ ਰਤਨਪਲ੍ਲਙ੍ਕੇ ਠਪੇਤ੍ਵਾ ਗਣ੍ਧਵਾਸਿਤੋਦਕੇਨ ਹਤ੍ਥੇ ਧੋਵਿਤ੍ਵਾ ਵਤੁਜਾਤਿਯ ਗਣ੍ਧੇਨ ਉਬ੍ਬਟ੍ਟੇਤ੍ਵਾ ਰਤਨਕਰਣ੍ਡਕਂ ਵਿਚਰਿਤ੍ਵਾ ਧਾਤੁਯੋ ਗਹੇਤ੍ਵਾ ਏਵਂ ਚਿਨ੍ਤੇਸਿ.

‘‘ਅਨਾਕੁਲਾ ਕੇਹਿਚਿਪਿ ਯਦਿ ਹੇਸ੍ਸਸ੍ਤਿ ਧਾਤੁਯੋ,

ਜਨਸ੍ਸ ਸਰਣਂ ਹੁਤ੍ਵਾ ਯਦਿ ਠਸ੍ਸਨ੍ਤਿ ਧਾਤੁਯੋ;

ਸਤ੍ਥੁਨਿਪਨ੍ਨਾ ਕਾਰੇਨ ਪਰਿਨਿਬ੍ਬਾਨ ਮਞ੍ਚਕੇ,

ਨਿਪਜ੍ਜਨ੍ਤੁ ਸੁਪਞ੍ਞਤ੍ਤੇ-ਸਯਨਮ੍ਹਿ ਮਹਾਰਹੇ’’ਤਿ;

ਏਵਂ ਚਿਨ੍ਤੇਤ੍ਵਾ ਪਨ ਵਰਸਯਨਪਿਟ੍ਠੇ ਧਾਤੁਯੋ ਠਪੇਸਿ ਤਸ੍ਮਿਂ ਖਣੇ ਧਾਤੁਯੋ ਰਞ੍ਞਾ ਚਿਨ੍ਤਿਤ ਨਿਯਾਮੇਨੇਵ ਮਹਾਰਹੇ ਸਯਨੇ ਬੁਦ੍ਧਵੇਸੇਨ ਸਯਿਂਸੁ.

‘‘ਆਸਾਲ਼ਹਿ ਸੁਕ੍ਕਪਕ੍ਖਸ੍ਸ ਪਨ੍ਨਰਸ ਉਪੋਸਥੇ,

ਉਤ੍ਤਰਾਸਾਲ਼੍ਹ ਨਕ੍ਖਤ੍ਤੇ ਏਵਂ ਧਾਤੁ ਪਤਿਟ੍ਠਿਤਾ;

ਸਹ ਧਾਤੁ ਪਤਿਟ੍ਠਾਨਾ ਅਕਮ੍ਪਿਤ੍ਥ ਮਹਾਮਹੀ, ਪਾਟਿਹੀਰਾਨਿ ਨੇਕਾਨਿ ਪਵਤ੍ਤਿਂਸੁ ਅਨੇਕਧਾ.’’

ਤਦਹਿ ਉਦਕਪਰਿਯਨ੍ਤਂ ਕਤ੍ਵਾ ਅਯਂ ਮਹਾਪਥਵੀ ਸਙ੍ਕਮ੍ਪਿ ਸਮ੍ਪਕਮ੍ਪਿ ਸਮ੍ਪਵੇਧਿ, ਮਹਾਸਮੁਦ੍ਦੋ ਸਙ੍ਖੂਭਿ, ਆਕਾਸੇ ਵਿਜ੍ਜੁਲ੍ਲਤਾ ਨਿਚ੍ਛਰਿਂਸੁ. ਖਣਿਕਵਸ੍ਸਂ ਵਸ੍ਸਿ, ਛ ਦੇਵਲੋਕਾ ਏਕਕੋਲਾਹਲ ਮਹੋਸਿ ਰਾਜਾ ਏਤਂ ਅਚ੍ਛਰਿਯਂ ਦਿਸ੍ਵਾ ਪਸਨ੍ਨੋ ਅਤ੍ਤਨੋ ਕਞ੍ਚਨ ਮਾਲਿਕ ਸੇਤਚ੍ਛਤ੍ਤੇਨ ਧਾਤੁਯੋ ਪੂਜੇਤ੍ਵਾ ਤਮ੍ਬਪਣ੍ਣਿਦਿਪੇ ਰਜ੍ਜਂ ਸਤ੍ਤਾਹਂ ਦਤ੍ਵਾ ਤਿਂਸ ਸਤਸਹਸ੍ਸਗ੍ਘਨਕਂ ਅਲਙ੍ਕਾਰ ਭਣ੍ਡਂ ਓਮੁਞ੍ਚਿਤ੍ਵਾ ਪੂਜੇਸਿ. ਤਥਾ ਸਬ੍ਬਾਪਿ ਨਾਟਕਿਤ੍ਥਿਯੋ ਅਮਚ੍ਚਾ ਸੇਸ ਮਹਾਜਨੋ ਦੇਵਾ ਚ ਸਬ੍ਬਾਭਰਣਾਨਿ ਪੂਜੇਸੁਂ ਤਸ੍ਮਾ-

ਤਿਟ੍ਠਨ੍ਤਂ ਸੁਗਤਂ ਤਿਲੋਕਮਹਿਤਂ ਯੋ ਪੂਜਯੇ ਸਾਦਰਂ,

ਯੋ ਵਾ ਸਾਸਪ ਬੀਜਮਤ੍ਤਮ੍ਪਿ ਤਂ ਧਾਤੁਂ ਨਰੋ ਪੂਜਯੇ;

ਤੇਸਂ ਪੁਞ੍ਞਫਲਂ ਸਮਾਨਮੀਤਿ ਤਂ ਚਿਤ੍ਤਪ੍ਪਸਾਦੇ ਸਮੇ,

ਞਤ੍ਵਾ ਤਂ ਪਰਿਨਿਬ੍ਬੁਤੇਪਿ ਸੁਗਤੇ ਧਾਤੁਂ ਬੁਧੋ ਪੂਜਯੇ’ਤਿ;

ਤਤੋ ¶ ਰਾਜਾ ਚੀਵਰਵਤ੍ਥਾਨਿ ਚੇਵ ਗੁਲ਼-ਸਪ੍ਪਿ ਆਦਿ ਭੇਸਜ੍ਜਾਨਿ ਚ ਸਙ੍ਘਸ੍ਸ ਦਤ੍ਵਾ ਸਬ੍ਬਰਤ੍ਤਿਂ ਗਣਸਜ੍ਝਾਯਂ ਕਾਰੇਸਿ ਪੁਨ ਦਿਵਸੇ ਨਗਰੇ ਭੇਰਿਂ ਚਰਾਪੇਸਿ ਮਹਾਜਨੋ ਇਮਂ ਸਤ੍ਤਾਹਂ ਗਣ੍ਧਮਾਲਾਦੀਨਿ ਆਦਿਯ ਗਨ੍ਤ੍ਵਾ ਧਾਤੁਯੋ ਵਨ੍ਦਤੂਤਿ ਇਣ੍ਦਗੁਤ੍ਤਤ੍ਥੇਰੋਪਿ ਸਕਲ ਤਮ੍ਬਪਣ੍ਣਿ ਦੀਪੇ ਮਨੁਸ੍ਸਾ ਧਾਤੁਯੋ ਵਨ੍ਦਿਤੁਕਾਮਾ, ਤਂ ਖਣਂਯੇਵ ਆਗਨ੍ਤ੍ਵਾ ਵਨ੍ਦਿਤ੍ਵਾ ਯਥਾਟ੍ਠਾਨਂ ਗਚ੍ਛਨ੍ਤੂਤਿ ਅਧਿਟ੍ਠਾਸਿ.

ਤੇ ਤਥੇਵ ਧਾਤੁਯੋ ਵਨ੍ਦਿਤ੍ਵਾ ਗਮਿਂਸੁ ਰਾਜਾ ਸਤ੍ਤਾਹਂ ਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਾਹਸ੍ਸ ਅਚ੍ਚਯੇਨ ਧਾਤੁਗਬ੍ਭੇ ਮਯਾ ਕਤ੍ਤਬ੍ਬਕਿਚ੍ਚਂ ਨਿਟ੍ਠਾਪਿਤਂ, ਧਾਤੁਗਬ੍ਭਂ ਪਿਦਹਥ ਭਨ੍ਤੇਤਿ ਸਙ੍ਘਸ੍ਸ ਆਰੋਚੇਸਿ. ਸਙ੍ਘੋ ਉਤ੍ਤਰਸੁਮਨ ਸਾਮਣੇਰੇ ਆਮਨ੍ਤੇਤ੍ਵਾ ਤੁਮ੍ਹੇਹਿ ਪੁਬ੍ਬੇ ਆਹਟ ਮੇਦਵਣ੍ਣ ਪਾਸਾਣੇਨ ਧਾਤੁ ਗਬ੍ਭਂ ਪਿਦਹਥਾਤਿ ਆਹ. ਤੇ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਧਾਤੁਗਬ੍ਭਂ ਪਿਦਹਿਂਸੁ.

ਤਤੋ ਖੀਣਾਸਵਾ ਧਾਤੁਗਬ੍ਭੇ ਗਣ੍ਧਾ ਮਾ ਸੁਸਨ੍ਤੁ ਮਾਲਾ ਮਾ ਮਿਲਾਯਨ੍ਤੁ. ਦੀਪਾ ਮਾ ਨਿਬ੍ਬਾਯਨ੍ਤੁ ਰਤਨਾਨਿ ਮਾ ਵਿਵਣ੍ਣਾਨਿ ਹੋਨ੍ਤੁ ਪੂਜਨੀਯਭਣ੍ਡਾਨਿ ਮਾ ਨਸ੍ਸਨ੍ਤੁ. ਮੇਦਵਣ੍ਣ ਪਾਸਾਣਾ ਸਨ੍ਧੀਯਨ੍ਤੁ, ਪਚ੍ਚਤ੍ਥਿਕਾਨਂ ਓਕਾਸੋ ਮਾ ਹੋਤੂਤਿ ਅਧਿਟ੍ਠਹਿਂਸੁ.

ਏਵਂ ਰਾਜਾ ਧਾਤੁ ਨਿਧਾਪੇਤ੍ਵਾ ਪੁਨ ਨਗਰੇ ਭੇਰਿਂ ਚਰਾਪੇਸਿ ਮਹਾ ਚੇਤਿਯੇ ਧਾਤੁਂ ਨਿਧਾਪੇਤ੍ਵਾ ਧਾਤੁਂ ਆਹਰਿਤ੍ਵਾ ਨਿਧਾਨਂ ਕਰੋਨ੍ਤੂਤਿ. ਮਹਾਜਨੋ ਅਤ੍ਤਨੋ ਅਤ੍ਤਨੋ ਬਲਾਨੁਰੂਪੇਨ ਸੁਵਣ੍ਣ ਰਜਤਾਦਿ ਕਰਣ੍ਡੇ ਕਾਰਾਪੇਤ੍ਵਾ ਤਤ੍ਥ ਧਾਤੁਯੋ ਪਤਿਟ੍ਠਾਪੇਤ੍ਵਾ ਧਾਤੁਨਿਧਾਨਸ੍ਸੁਪਰਿ ਮੇਦਵਣ੍ਣ ਪਾਸਾਣ ਪਿਟ੍ਠਿਯਂ ਨਿਦਹਿਂਸੁ. ਸਬ੍ਬੇਹਿ ਸਨ੍ਨਿਹਿਤ ਧਾਤੁਯੋ ਸਹਸ੍ਸਮਤ੍ਤਾ ਅਹੇਸੁਨ੍ਤਿ.

ਇਤਿ ਸਾਧੁਜਨ ਮਨੋਪਸਾਦਨਤ੍ਥਾਯ ਕਤੇ ਥੂਪਵਂਸੇ ਧਾਤੁਨਿਧਾਨ ਕਥਾ ਨਿਟ੍ਠਿਤਾ.

੨੪. ਤਤੋ ਰਾਜਾ ਤਂ ਸਬ੍ਬਂ ਪਿਦਹੇਤ੍ਵਾ ਚੇਤਿਯਂ ਕਰੋਨ੍ਤੋ ਉਦਰੇਨ ਸਦ੍ਧਿਂ ਚਤੁਰਸ੍ਸ ਕੋਟ੍ਠਕਂ ਨਿਟ੍ਠਾਪੇਸਿ ਅਥ ਛਤ੍ਤਕਮ੍ਮੇ ਸੁਧਾਕਮ੍ਮੇ ਚ ਅਨਿਟ੍ਠਿਤੇਯੇਵ ਮਾਰਣਨ੍ਤਿਕ ਰੋਗੇਨ ਗਿਲਾਨੋ ਹੁਤ੍ਵਾ ਦੀਘਵਾਪਿਤੋ ਕਨਿਟ੍ਠਭਾਤਰਂ ਪਕ੍ਕੋਸਾਪੇਤ੍ਵਾ ਚੇਤਿਯੇ ਅਨਿਟ੍ਠਿਤਂ ਛਤ੍ਤਕਮ੍ਮਂ ਸੁਧਾਕਮ੍ਮਞ੍ਚ ਸੀਘਂ ਨਿਟ੍ਠਾਪੇਤ੍ਵਾ ਮਂ ਤੋਸੇਹਿ ਤਾਤਾਤਿ ਆਹ. ਸੋ ਰਞ੍ਞੋ ਦੁਬ੍ਬਲਭਾਵਂ ਞਤ੍ਵਾ ਅਨ੍ਤਰੇ ਅਨਿਟ੍ਠਿਤਕਮ੍ਮਂ ਕਾਤੁਂ ਨ ਸਕ੍ਕਾਤਿ ਸੁਦ੍ਧਵਤ੍ਥੇਹਿ ਕਞ੍ਚੁਕਂ ਕਾਰੇਤ੍ਵਾ ਚੇਤਿਯੇ ਪਟਿਮੁਞ੍ਚਾਪੇਤ੍ਵਾ ਚਿਤ੍ਤਕਾਰੇਹਿ ਕਞ੍ਚੁਕ ਮਤ੍ਥਕੇ ਵੇਦਿਕਾ ਚ ਪੁਣ੍ਣਘਟ ਪਞ੍ਚਙ੍ਗੁਲਿ ਪਨ੍ਤਿਯੋ ਚ ਕਾਰਾਪੇਸਿ.

ਨਲ਼ਕਾਰੇਹਿ ਵੇਲ਼ੁਮਯ ਛਤ੍ਤਂ ਕਾਰੇਤ੍ਵਾ ਖਰਪਤ੍ਤਮਯੇ ਚਣ੍ਦਸੂਰਿਯਮਣ੍ਡਲੇ ਮੁਦ੍ਧਨਿ ਵੇਦਿਕਾ ਕਾਰੇਤ੍ਵਾ ਲਾਖਾਕੁਕੁਟ੍ਠਕੇਹਿ ਤਂ ਵਿਚਿਤ੍ਤਂ ਕਤ੍ਵਾ ਥੂਪਕਮ੍ਮਂ ਨਿਟ੍ਠਿਤਨ੍ਤਿ ਰਞ੍ਞੋ ਅਰੋਚੇਸਿ ਰਾਜਾ ਤੇਨ ਹਿ ਮਂ ¶ ਮਹਾਚੇਤਿਯਂ ਦਸ੍ਸੇਹੀਤਿ ਵਤ੍ਵਾ ਸਿਵਿਕਾਯ ਨਿਪਜ੍ਜਿਤ੍ਵਾ ਚੇਤਿਯਾ ਪਦਕ੍ਖਿਣਂ ਕਤ੍ਵਾ ਦਕ੍ਖਿਣਦ੍ਵਾਰੇ ਭੂਮਿਸਯਨਂ ਪਞ੍ਞਾਪੇਤ੍ਵਾ ਤਤ੍ਥ ਨਿਪਨ੍ਨੋ ਦਕ੍ਖਿਣੇਨ ਪਸ੍ਸੇਨ ਸਯਿਤ੍ਵਾ ਮਹਾਥੂਪਂ ਵਾਮਪਸ੍ਸੇਨ ਸਯਿਤ੍ਵਾ ਲੋਹਪਾਸਾਦਂ ਓਲੋਕੇਨ੍ਤੋ ਪਸਨ੍ਨ ਚਿਤ੍ਤੋ ਅਹੋਸਿ. ਤਦਾ ਰਞ੍ਞੋ ਸਾਸਨਸ੍ਸ ਬਹੂਪਕਾਰਭਾਵਂ ਸਲ੍ਲਕ੍ਖੇਤ੍ਵਾ ਗਿਲਾਨ ਪੁਚ੍ਛਨਤ੍ਥਾਯ ਤਤੋ ਤਤੋ ਆਗਤਾ ਭਿਕ੍ਖੁ ਛਨ੍ਨਵੁਤਿ ਕੋਟਿਯੋ ਰਾਜਾਨਂ ਪਰਿਵਾਰੇਤ੍ਵਾ ਅਟ੍ਠਂਸੁ. ਤਤੋ ਸਙ੍ਘੋ ਵਗ੍ਗ ਵਗ੍ਗਾ ਹੁਤ੍ਵਾ ਗਣਸਜ੍ਝਾਯਂ ਅਕਾਸਿ.

ਰਾਜਾ ਤਸ੍ਮਿਂ ਸਮਾਗਮੇ ਥੇਰਪੁਤ੍ਤਾਭਯਤ੍ਥੇਰਂ ਅਦਿਸ੍ਵਾ ਏਵਂ ਚਿਨ੍ਤੇਸਿ. ਸੋ ਮਯਿ ਦਮਿਲ਼ੇਹਿ ਸਦ੍ਧਿਂ ਅਟ੍ਠਵੀਸਤਿ ਮਹਾਯੁਦ੍ਧੇ ਕਯਿਰਮਾਸੇ ਅਪਚ੍ਚੋਸਕਕਿਤ੍ਵਾ ਇਦਾਨਿ ਮਰਣਯੁਦ੍ਧੇ ਵਤ੍ਤਮਾਣੇ ਮਯ੍ਹਂ ਪਰਾਜਯਂ ਦਿਸ੍ਵਾ ਮਞ੍ਞੇ ਨਾਗਚ੍ਛਤੀਤਿ. ਤਦਾ ਥੇਰੋ ਕਰਿਣ੍ਦ ਨਦੀ ਸੀਸੇ ਪਜ੍ਜਲਿਤ ਪਬ੍ਬਤੇ ਵਸਨ੍ਤੋ ਰਞ੍ਞੋ ਪਰਿਵਿਤਕ੍ਕਂ ਞਤ੍ਵਾ ਪਞ੍ਚਸਤ ਖੀਣਾਸਵ ਪਰਿਵੁਸੇਤਾ ਆਕਾਸੇਨਾਗਨ੍ਤ੍ਵਾ ਰਞ੍ਞੋ ਪੁਰਤੋ ਪਾਤੁਰਹੋਸਿ.

ਰਾਜਾ ਥੇਰਂ ਦਿਸ੍ਵਾ ਅਤ੍ਤਨੋ ਪੁਰਤੋ ਨਿਸੀਦਾਪੇਤ੍ਵਾ ਏਵਮਾਹ ਭਨ੍ਤੇ ਤੁਮ੍ਹੇਹਿ ਸਦ੍ਧਿਂ ਦਸਮਹਾ ਯੋਧੇ ਗਹੇਤ੍ਵਾ ਦਮਿਲ਼ੇਹਿ ਸਦ੍ਧਿ ਯੁਜ੍ਝਿਂ. ਇਦਾਨਿ ਏਕਕੋਵ ਮਚ੍ਚੂਨਾ ਸਦ੍ਧਿਂ ਯੁਜ੍ਝਿਤੁਂ ਆਰਭਿਂ. ਮਚ੍ਚੁ ਸਤ੍ਤੁਮ੍ਪਨ ਪਰਾਜੇਤੁਂ ਨ ਸਕ੍ਕੋਮੀਤਿ. ਤਤੋ-

ਥੇਰਪੁਤ੍ਤਾਭਯਤ੍ਥੇਰੋ ਮਾ ਭਾਯਿ ਮਨੁਜਾਧਿਪ,

ਕਿਲੇਸ ਸਤ੍ਤੁਂ ਅਜਿਨਿਤ੍ਵਾ ਅਜੇਯ੍ਯੋ ਮਚ੍ਚੂਸਤ੍ਤੁਕੋ;

ਇਤਿ ਵਤ੍ਵਾ ਏਵਂ ਅਨੁਸਾਸਿ. ਮਹਾਰਾਜ ਸਬ੍ਬੋਯੇਵ ਲੋਕ ਸਨ੍ਨਿਵਾਸੇ ਜਾਤਿਯਾ ਅਨੁਗਤੋ, ਜਰਾਯ ਅਨੁਸਟੋ, ਵ੍ਯਾਧਿਨਾ ਅਭਿਭੂਤੋ, ਮਰਣੇਨ ਅਬ੍ਭਾਹਤੋ. ਤੇਤਾਹ-

‘‘ਯਥਾਪਿ ਸੇਲਾ ਵਿਪੁਲਾ-ਨਹਂ ਆਹਚ੍ਚ ਪਬ੍ਬਤਾ,

ਸਮਨ੍ਤਾ ਅਨੁਪਰਿਯੇਯ੍ਯੁਂ-ਨਿਪ੍ਪੋਥੇਨ੍ਤਾ ਚਤੁਦ੍ਦਿਸਂ;

ਏਵਂ ਜਰਾ ਚ ਮਚ੍ਚੁ ਚ-ਅਧਿਵਤ੍ਤਨ੍ਤਿ ਪਾਣਿਨੋ,

ਖਤ੍ਤਿਯੋ ਬ੍ਰਾਹ੍ਮਣੇ ਵੇਸ੍ਸੇ ਸੁਦ੍ਦੇ ਚਣ੍ਡਾਲ ਪੁਕ੍ਕੁਸੇ,

ਨ ਕਿਞ੍ਚਿ ਪਰਿਵਜ੍ਜੇਤਿ-ਸਬ੍ਬਮੇਵਾਭਿਮਦ੍ਦਤਿ;

ਨ ਤਤ੍ਥ ਹਤ੍ਥਿਨਂ ਭੂਮਿ-ਨ ਰਥਾਨਂ ਨ ਪਤ੍ਤਿਯਾ,

ਨ ਚਾਪਿ ਮਨ੍ਤਯੁਦ੍ਧੇਨ-ਸਕ੍ਕਾ ਜੇਤੁਂ ਧਨੇਨ ਵਾ’’ਤਿ;

ਤਸ੍ਮਾ ਇਦਂ ਮਰਣਂ ਨਾਮ ਮਹਾਯਸਾਨਂ ਮਹਾਸਮ੍ਮਤਾਦੀਨਂ ਮਹਾ ਪੁਞ੍ਞਾਨਂ ਜੋਤਿਯਾਦੀਨਂ ਮਹਾਥਾਮਾਨਂ ਬਲਦੇਵਾਦੀਨਂ ਇਦ੍ਧਿਮਨ੍ਤਾਨਂ ਮਹਾਮੋਗ੍ਗਲ੍ਲਾਨਾਦੀਨਂ ਪਞ੍ਞਾਵਨ੍ਤਾਨਂ ਸਾਰਿਪੁਤ੍ਤਾਦੀਨਂ ਸਯਮ੍ਭੂਞਾਣੇਨ ਅਧਿਗਤ ਸਚ੍ਚਾਨਂ, ਪਚ੍ਚੇਕਬੁਦ੍ਧਾਨਂ ਸਬ੍ਬਗੁਣਸਮਨ੍ਨਾਗਤਾਨਂ ਸਮ੍ਮਾਸਮ੍ਬੁਦ੍ਧਾਨਮ੍ਪਿ ਉਪਰਿ ਨਿਰਾਸਙ੍ਕਮੇਵ ਪਤਤਿ ਕਿਮਙ੍ਗਪਨਞ੍ਞੇਸੁ ਸਤ੍ਤੇਸੁ.

ਤਸ੍ਮਾ- ¶

ਮਹਾਯਸਾ ਰਾਜਵਰਾ ਗਤਾ ਤੇ ਸਬ੍ਬੇ ਮਹਾਸਮ੍ਮਤ ਆਦਯੋਪਿ,

ਅਨਿਚ੍ਚਭਾਵਂ ਬਲਦੇਵ ਆਦਿ ਮਹਾਬਲਾ ਚੇਵ ਤਥਾ ਗਮਿਂਸੁ;

ਯੇ ਪੁਞ੍ਞਵਨ੍ਤਾਨਿ ਗਤਾ ਪਸਿਦ੍ਧਿਂ ਮਹਦ੍ਧਨਂ ਜੋਤਿਯਮੇਣ੍ਡਕਾਦੀ,

ਉਪਾਵਿਸਿਂ ਵਚ੍ਚੁਮੁਖਂ ਸਭੋਗਾ ਸਬ੍ਬੇਪਿ ਤੇ ਰਾਹੁਮੁਖਂ ਸਸੀਵ;

ਯੋ ਇਦ੍ਧਿਮਨ੍ਤੇਸੁ ਤਥਾਗਤਸ੍ਸ ਪੁਤ੍ਤੇਸੁਸੇਟ੍ਠੋ ਇਤਿ ਵਿਸ੍ਸੁਤੋਪਿ,

ਥੇਰੋ ਮਹਾਰਾਜਸਹੇਵ ਇਦ੍ਧਿਬਲੇਨ ਸੋ ਮਚ੍ਚੁਮੁਖਂ ਪਵਿਟ੍ਠੋ;

ਸਬ੍ਬੇਸੁ ਸਤ੍ਤੇਸੁ ਜਿਨਂ ਠਪੇਤ੍ਵਾ ਨੇਵਤ੍ਥਿ ਪਞ੍ਞਾਯ ਸਮੋਪਿ ਯੇਨ,

ਸੋ ਧਮ੍ਮਸੇਨਾਪਤਿ ਸਾਵਕੋਪਿ ਗਤੋ ਮਹਾਰਾਜ ਅਨਿਚ੍ਚਤਂ’ਚ;

ਸਯਮ੍ਭੂਞਾਣਸ੍ਸ ਬਲੇਨ ਸਨ੍ਤਿਂ ਗਤਾ ਮਹਾਰਾਜ ਸਯਮ੍ਭੂਨੋਪਿ,

ਸਬ੍ਬੇਪਿ ਤੇ ਞਾਣਬਲੂਪ ਪਨ੍ਨਾ ਅਨਿਚ੍ਚਤਂ ਨੇਵ ਅਤਿਕ੍ਕਮਿਂਸੁ;

ਤਿਲੋਕਨਾਥੋ ਪੁਰਿਸੁਤ੍ਤਮੋ ਸੋ ਅਨਿਚ੍ਚਭਾਵਂ ਸਮਤਿਕ੍ਕਮਿਤ੍ਵਾ,

ਨਾਸਕ੍ਖਿ ਗਨ੍ਤੁਂ ਸੁਗਤੋਪਿ ਰਾਜ ਅਞ੍ਞੇਸੁ ਸਤ੍ਤੇਸੁ ਕਥਾਵ ਨਤ੍ਥਿ;

ਤਸ੍ਮਾ ਮਹਾਰਾਜ ਭਵੇਸੁ ਸਤ੍ਤਾ ਸਬ੍ਬੇਪਿ ਨਾਸੁਂ ਮਰਣਾ ਵਿਮੁਤ੍ਤਾ,

ਸਬ੍ਬਮ੍ਪਿ ਸਙ੍ਖਾਰਗਤਂ ਅਨਿਚ੍ਚਂ ਦੂਕ੍ਖਂ ਅਨਤ੍ਤਾਤਿ ਵਿਚਿਨ੍ਤਯਸ੍ਸੁ;

‘‘ਦੁਤਿਯੇ ਅਤ੍ਤਭਾਵੇਪਿ ਧਮ੍ਮਚ੍ਛਣ੍ਦੋ ਮਹਾ ਹਿ ਤੇ,

ਉਪਟ੍ਠਿਤੇ ਦੇਵਲੋਕੇ ਹਿਤ੍ਵਾ ਦਿਬ੍ਬਸੁਖਂ ਤੁਵਂ;

ਇਧਾਗਮ੍ਮ ਬਹੁਂ ਪੁਞ੍ਞਂ ਅਕਾਸਿ ਚ ਅਨੇਕਧਾ,

ਕਰਣਮ੍ਪੇਕ ਰਜ੍ਜਸ੍ਸ ਸਾਸਨਜ੍ਜੋਤਨਾਯ ਤੇ;

ਮਹਾ ਰਾਜ ਕਤਂ ਪੁਞ੍ਞਂ ਯਾਵਜ੍ਜ ਦਿਵਸਾ ਤਯਾ,

ਸਬ੍ਬਂ ਅਨੁਸ੍ਸਰੇਥੇਵ ਸੁਖਂ ਸਜ੍ਜੁ ਭਵਿਸ੍ਸਤਿ;

ਤਂ ਸੁਤ੍ਵਾ ਤੁਟ੍ਠਮਾਨਸੋ ਰਾਜਾ ਭਨ੍ਤੇ ਤੁਮ੍ਹੇ ਮਚ੍ਚੁਯੁਦ੍ਧੇਪਿ ਅਪਸ੍ਸਯਾਤਿ ਵਤ੍ਵਾ ਲਦ੍ਧਸ੍ਸਾਸੋ ਪੁਞ੍ਞਪੋਤ੍ਥਕਂ ਵਾਚੇਤੁਂ ਆਣਾਪੇਸਿ ਲੇਖਕੋ ਪੁਞ੍ਞਪੋਤ੍ਥਕਂ ਏਵਂ ਵਾਚੇਸਿ.

‘‘ਏਕੂਨਸਤਵਿਹਾਰਾ ਮਹਾਰਾਜੇਨ ਕਾਰਿਤਾ,

ਏਕੂਨਸਤਕੋਟੀਹਿ ਵਿਹਾਰੋ ਮਰਿਚਟ੍ਟਿ ਚ;

ਉਤ੍ਤਮੋ ਲੋਹਪਾਸਾਦੋ ਤਿਂਸਕੋਟੀਹਿ ਕਾਰਿਤੋ,

ਮਹਾਥੂਪੇ ਅਨਗ੍ਘਾਨਿ ਕਾਰਿਤਾ ਚਤੁਵੀਸਤਿ;

ਮਹਾਥੂਪਮ੍ਹਿ ਸੇਸਾਨਿ ਕਰਿਤਾਨਿ ਸੁਬੁਦ੍ਧਿਨਾ,

ਕੋਟਿਸਹਸ੍ਸਂ ਅਗ੍ਘਨ੍ਤਿ ਮਹਾਰਾਜ ਤਯਾ ਪੁਨ;

ਕੋਲ਼ਮ੍ਬ ਨਾਮ ਮਲੇਯ ਅਕ੍ਖਕ੍ਖਾਯਿਕ ਛਾਤਕੇ,

ਕੁਣ੍ਡਲਾਨਿ ਮਹਗ੍ਘਾਨਿ ਦੁਵੇ ਦਤ੍ਵਾਨ ਗਣ੍ਹਿਯ;

ਖੀਣਾਸਵਾਨਂ ¶ ਪਞ੍ਚਨ੍ਨਂ ਮਹਾਥੇਰਾਨਮੁਤ੍ਤਮੋ,

ਦਿਨ੍ਨੋ ਪਸਨ੍ਨਚਿਤ੍ਤੇਨ ਕਙ੍ਗੁ ਅਮ੍ਬਿਲ ਪਿਣ੍ਡਕੋ;

ਚੂਲ਼ਙ੍ਗਣਿਯ ਯੁਦ੍ਧਮ੍ਹਿ ਪਰਜ੍ਝਿਤ੍ਵਾ ਪਲਾਯਤਾ,

ਕਾਲਂ ਘੋਸਾਪਯਿਤ੍ਵਾਨ ਆਗਤਸ੍ਸ ਵਿਹਾਯਸਾ;

ਖੀਣਾਸਵਸ੍ਸ ਯਤਿਨੋ ਅਤ੍ਤਾਨਮਨਪੇਕ੍ਖਿਯ,

ਦਿਨ੍ਨਂ ਸਰਕ ਭਤ੍ਤਨ੍ਤਿ ਪੁਞ੍ਞਪੋਤ੍ਥਂ ਅਵਾਚਯਿ;

੨੫. ਤਂ ਸੁਤ੍ਵਾ ਰਾਜਾ ਤੁਸ੍ਸਿਤ੍ਵਾ ਠਪੇਹਿ ਠਪੇਹਿ ਭਣੇਤਿ ਵਤ੍ਵਾ ਏਵਮਾਹ. ਮਰਿਚਵਟ੍ਟਿ ਵਿਹਾਰਮਹਸਤ੍ਤਾਹੇ ਥੂਪਾਰਮ੍ਹਸਤ੍ਤਾਹੇ ਚ ਚਾਤੁਦ੍ਦਿਸ ਉਭਤੋ ਸਙ੍ਘਸ੍ਸ ਮਹਾਰਹਂ ਮਹਾਦਾਨਂ ਪਵਤ੍ਤੇਸਿਂ. ਚਤੁਵੀਸਤਿ ਮਹਾਵਿਸਾਖਪੂਜਾ ਕਾਰੇਸਿਂ ਤਮ੍ਬਪਣ੍ਣਿਦੀਪੇ ਮਹਾਭਿਕ੍ਖੁਸਙ੍ਘਸ੍ਸ ਤਿਕ੍ਖਤ੍ਤੁਂ ਚੀਵਰਮਦਾਸਿਂ ਸਤ੍ਤ ਸਤ੍ਤ ਦੀਨਾਨਿ ਲਙ੍ਕਾ ਰਜ੍ਜਂ ਸਾਸਨਸ੍ਸ ਪਞ੍ਚਕ੍ਖਤ੍ਤੁਂ ਅਦਾਸਿਂ ਸਪ੍ਪਿ ਸਨ੍ਨਿਤ੍ਤ ਸੁਪਰਿਸੁਦ੍ਧ ਵਟ੍ਟਿਯਾ ਦ੍ਵਾਦਸਠਾਨੇਸੁ, ਸਤ੍ਤਂ ਦੀਪਸਹਸ੍ਸਂ ਜਾਲੇਸਿਂ ਅਟ੍ਠਾਰਸ੍ਸੁ ਠਾਨੇਸੁ ਗਿਲਾਨਾਨਂ ਵੇਜ੍ਜੇਹਿ ਭੇਸਜ੍ਜਞ੍ਚ ਭਤ੍ਤਞ੍ਚ ਨਿਚ੍ਚਂ ਦਾਪੇਸਿ. ਚਤੁਚਤ੍ਤਾਲੀਸ ਠਾਨੇਸੁ ਤੇਲੁਲ੍ਲੋਪਕਞ੍ਚ ਅਦਾਸਿਂ. ਤਤ੍ਤਕੇਸੁਯੇਵ ਠਾਨੇਸੁ ਘਤਪਕ੍ਕਜਾਲਪੂਵੇ ਭਤ੍ਤੇਨ ਸਦ੍ਧਿਂ ਨਿਚ੍ਚਂ ਦਾਪੇਸਿਂ.

ਮਾਸੇ ਮਾਸੇ ਅਟ੍ਠਸੁ ਉਪੋਸਥਦਿਵਸੇਸੁ ਲਙ੍ਕਾਦੀਪੇ ਸਬ੍ਬਵਿਹਾਰੇਸੁ ਦੀਪਤੇਲਂ ਦਾਪੇਸਿਂ. ਆਮਿਸ ਦਾਨਤੋ ਧਮ੍ਮਦਾਨਂ ਮਹਨ੍ਤਨ੍ਤਿ ਸੁਤ੍ਵਾ ਹੇਟ੍ਠਂ ਲੋਹਪਾਸਾਦੇ ਧਮ੍ਮਾਸਨੇ ਨਿਸੀਦਿਤ੍ਵਾ ਮਙ੍ਗਲ ਸੁਤ੍ਤਂ ਓਸਾਰੇਤੁਂ ਆਰਭਿਤ੍ਵਾਪਿ ਸਙ੍ਘ ਗਾਰਵੇਨ ਓਸਾਰੇਤੁਂ ਨਾਸਕ੍ਖਿਂ. ਤਤੋ ਪਟ੍ਠਾਯ ਧਮ੍ਮਦੇਸਕੇ ਸਕ੍ਕਰਿਤ੍ਵਾ ਸਬ੍ਬਵਿਹਾਰੇਸੁ ਧਮ੍ਮਕਥਂ ਕਥਾਪੇਸਿਂ ਏਕੇਕਸ੍ਸ ਧਮ੍ਮਕਥਿਕਸ੍ਸ ਨਾਲ਼ ਨਾਲ਼ਿਪ੍ਪਮਾਣਾਨਿ ਸਪ੍ਪਿਫਾਣਿਤ ਸਕ੍ਖਰਾਨਿ ਚਤੁਰਙ੍ਗੁਲ ਮੁਟ੍ਠਿਪ੍ਪਮਾਣਂ ਯਟ੍ਠਿਮਧੁਕਂ ਸਾਟਕਦ੍ਵਯਞ੍ਚ ਮਾਸਸ੍ਸ ਅਟ੍ਠਸੁ ਉਪੋਸਥ ਦਿਸੇਸੁ ਦਾਪੇਸਿਂ. ਏਤਂ ਸਬ੍ਬਮ੍ਪਿ ਇਸ੍ਸਰਿਯੇ ਠਤ੍ਵਾ ਦਿਨ੍ਨਤ੍ਤਾ ਮਮ ਚਿਤ੍ਤਂ ਸ ਆਰਾਧੇਤਿ. ਜੀਵਿਤਂ ਪਨ ਅਨਪੇਕ੍ਖਿਤ੍ਵਾ ਦੁਗ੍ਗਤੇਨ ਮਯਾ ਦਿਨ੍ਨਦਾਨਦ੍ਵਯਮੇਵ ਆਰਾਧੇਤੀਤਿ.

ਤਂ ਸੁਤ੍ਵਾ ਅਭਯਤ੍ਥੇਰੋ ਮਹਾਰਾਜ ਪਸਾਦਨੀਯਟ੍ਠਾਨੇਯੇਵ ਪਸਾਦਂ ਅਕਾਸਿ ਤਂ ਪਨ ਪਿਣ੍ਡਪਾਤਦ੍ਵਯਂ ਪਰਿਸ੍ਸ ਪੀਲ਼ਂ ਅਕਤ੍ਵਾ ਲਦ੍ਧ ਧਮ੍ਮਿਕ ਪਚ੍ਚਯਤ੍ਤਾ ਅਤ੍ਤਾਨਂ ਅਨਵਲੋਕੇਤ੍ਵਾ ਅਸਜ੍ਜਮਾਨੇਨ ਦਿਨ੍ਨਤ੍ਤਾ ਪਟਿਗ੍ਗਾਹਕਾਨਂ ਯਾਵਦਤ੍ਥਂ ਕਤ੍ਵਾ ਦਿਨ੍ਨਤ੍ਤਾ ਪੀਤਿਪਾਮੋਜ੍ਜਂਜਨਯਿਤ੍ਵਾ ਬਲਵ ਸਦ੍ਧਾਯ ਦਿਨ੍ਨਤ੍ਤਾ ਦੇਯ੍ਯਧਮ੍ਮਸ੍ਸ ਨਿਰਵਸੇਸਂ ਪਰਿਭੋਗਂ ਗਤਤ੍ਤਾਤਿ ਇਮੇਹਿ ਪਞ੍ਚਹਿ ਕਾਰਣੇਹਿ ਮਹਨ੍ਤਤ੍ਤਿ ਵਤ੍ਵਾ ਮਹਾਰਾਜ ਕਙ੍ਗੁ ਅਮ੍ਬਿਲਿ ਪਿਣ੍ਡਗਾਹਕਤ੍ਥੇਰੇਸੁ ਮਲਿਯਮਹਾਦੇਵਤ੍ਥੇਰੋ ਸਮਨ੍ਤਕੂਟੇ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਦਤ੍ਵਾ ਪਰਿਭੁਞ੍ਜਿ ਪਥਵਿ ਚਾਲਨਕ ਧਮ੍ਮਗੁਤ੍ਤਤ੍ਥੇਰੋ ਕਲ੍ਯਾਣੀਯ ਵਿਹਾਰੇ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਦਤ੍ਵਾ ਪਰਿਭੁਞ੍ਜਿ.

ਤਲਙ੍ਗਰਵਾਸੀ ¶ ਧਮ੍ਮਗੁਤ੍ਤਤ੍ਥੇਰੋਪਿ ਪਿਯਙ੍ਗੁਦੀਪੇ ਦ੍ਵਾਦਸਨ੍ਨਂ ਭਿਕ੍ਖੁਸਹਸ੍ਸਾਨਂ ਦਤ੍ਵਾ ਪਰਿਭੁਞ੍ਜਿ. ਮਙ੍ਗਣਵਾਸੀ ਚੁਲ਼ਤਿਸ੍ਸਤ੍ਥੇਰੋ ਕੇਲਾਸਕੂਟੇ ਵਿਹਾਰੇ ਸਟ੍ਠਿਸਹਸ੍ਸਾਨਂ ਭਿਕ੍ਖੂਨਂ ਦਤ੍ਵਾ ਪਰਿਭੁਞ੍ਜਿ ਮਹਾਭਗ੍ਗਤ੍ਥੇਰੋਪਿ ਉਕ੍ਕਾਨਗਰ ਵਿਹਾਰੇ ਸਤ੍ਤਸਤਾਨਂ ਭਿਕ੍ਖੂਨਂ ਦਤ੍ਵਾ ਪਰਿਭੁਞ੍ਜਿ ਸਰਕ ਭਤ੍ਤਗਾਹਕਤ੍ਥੇਰੋ ਪਨ ਪਿਯਙ੍ਗੁਦੀਪੇ ਦ੍ਵਾਦਸਨ੍ਨਂ ਭਿਕ੍ਖੁਸਹਸ੍ਸਾਨਂ ਦਤ੍ਵਾ ਪਰਿਭੋਗਮਕਾਸੀਤਿ ਵਤ੍ਵਾ ਰਞ੍ਞੋ ਚਿਤ੍ਤਂ ਹਾਸੇਸਿ.

ਰਾਜਾ ਚਿਤ੍ਤਂ ਪਸਾਦੇਤ੍ਵਾ ਏਵਮਾਹ-ਅਹਮ੍ਭਨ੍ਤੇ ਚਤੁਵੀਸਤਿ ਵਸ੍ਸਾਨਿ ਰਜ੍ਜਂ ਕਾਰੇਨ੍ਤੋ ਭਿਕ੍ਖੁਸਙ੍ਘਸ੍ਸ ਪਹੂਪਕਾਰੋ ਅਹੋਸਿਂ. ਕਾਯੋਪਿ ਮੇ ਸਙ੍ਘਸ੍ਸ ਉਪਕਾਰਕੋ ਹੋਤੁ ਸਙ੍ਘਦਾਸਸ੍ਸ ਮੇ ਸਰੀਰਂ ਮਹਾਚੇਤਿਯਸ੍ਸ ਦਸ੍ਸਨਟ੍ਠਾਨੇ ਸਙ੍ਘਸ੍ਸ ਕਮ੍ਮਮਾਲਕੇ ਝਾਪੇਥਾਤਿ. ਤਤੋ ਕਨਿਟ੍ਠਂ ਆਮਨ੍ਤੇਤ੍ਵਾ’ਤਾਤ! ਤਿਸ੍ਸ! ਮਹਾਥੂਪੇ ਅਨਿਟ੍ਠਿਤਂ ਕਮ੍ਮਂ ਸਾਧੁਕਂ ਨਿਟ੍ਠਾਪੇਸਿ. ਸਾਯਂ ਪਾਤੋ ਚ ਮਹਾਥੂਪੇ ਪੁਪ੍ਫਪੂਜਂ ਕਾਰੇਤ੍ਵਾ ਤਿਕ੍ਖਤ੍ਤੁਂ ਉਪਹਾਰਂ ਕਾਰੇਹਿ. ਮਯਾ ਠਪਿਤਂ ਦਾਨਵਟ੍ਟਂ ਸਬ੍ਬਂ ਅਪਰਿਹਾਪੇਤ੍ਵਾ ਸਙ੍ਘਸ੍ਸ ਕਤ੍ਤਬ੍ਬਕਿਚ੍ਚੇਸੁ ਸਦਾ ਅਪ੍ਪਮਤ੍ਤੋ ਹੋਹੀ’ਤਿ ਅਨੁਸਾਯਿਤ੍ਵਾ ਤੁਣ੍ਹਿ ਅਹੋਸਿ.

ਤਸ੍ਮਿਂ ਖਣੇ ਭਿਕ੍ਖੁ ਗਣਸਜ੍ਝਾਯਂ ਆਰਭਿਂਸੁ ਦੇਵਤਾ ਪਨ ਛਦੇਵ ਲੋਕਤੋ ਛ ਰਥੇ ਗਹੇਤ੍ਵਾ ਆਦਾਯ ਪਟਿਪਾਟਿਯਾ ਠਪੇਤ੍ਵਾ ਮਹਾਰਾਜ ਅਮ੍ਹਾਕਂ ਦੇਵਲੋਕੋ ਰਮਣੀਯੋ, ਅਮ੍ਹਾਕਂ ਦੇਵਲੋਕੋ ਰਮਣੀਯੋਤਿ ਵਤ੍ਵਾ ਅਤ੍ਤਨੋ ਅਤ੍ਤਨੋ ਦੇਵਲੋਕਂ ਆਗਮਨਤ੍ਥਾਯ ਯਾਚਿਂਸੁ ਰਾਜਾ ਤੇਸਂ ਵਚਨਂ ਸੁਤ੍ਵਾ ਯਾਵਾਹਂ ਧਮ੍ਮਂ ਸੁਣਾਮਿ- ਤਾਵ ਅਧਿਵਾਸੇਥਾਤਿ ਤੇ ਹਤ੍ਥਸਞ੍ਞਾਯ ਨਿਵਾਰੇਸਿ ਸਙ੍ਘੋ ਗਣਸਜ੍ਝਾਯਂ ਨਿਵਾਰੇਸੀਤਿ ਮਞ੍ਞਿਤ੍ਵਾ ਸਜ੍ਝਾਯਂ ਠਪਾਪੇਸਿ.

ਰਾਜਾ ਕਸ੍ਮਾ ਭਨ੍ਤੇ ਗਣਸਜ੍ਝਾਯਂ ਠਪੇਥਾਤਿ ਆਹ. ਮਹਾਰਾਜ ਤਯਾ ਹਤ੍ਥਸਞ੍ਞਾਯ ਨਿਵਾਰਿਤਤ੍ਤਾਤਿ. ਭਨ੍ਤੇ ਤੁਮ੍ਹਾਕਂ ਸਞ੍ਞਂ ਨਾਦਾਸਿਂ. ਦੇਵਤਾ ਛਦੇਵਲੋਕਤੋ ਛ ਰਥੇ ਆਨੇਤ੍ਵਾ ਅਤ੍ਤਨੋ ਅਤ੍ਤਨੋ ਦੇਵਲੋਕਂ ਗਨ੍ਤੁਂ ਯਾਚਨ੍ਤਿ ਤਸ੍ਮਾ ਤੇਸਂ ਯਾਵਾਹਂ ਧਮ੍ਮਂ ਸੁਣਾਮਿ ਤਾਵ ਆਗਮੇਥਾਤਿ ਸਞ੍ਞਂ ਅਦਾਸਿਨ੍ਤਿ ਤਂ ਸੁਤ੍ਵਾ ਕੇਚਿ ਅਯਂ ਰਾਜਾ ਮਰਣਭਯਭਿਤੋ ਵਿਪ੍ਪਲਪਤਿ, ਮਰਣਤੋ ਅਭਾਯਨਕ ਸਤ੍ਤੋ ਨਾਮ ਨਤ੍ਥੀਤਿ ਮਞ੍ਞਿਂਸੁ.

ਤਤੋ ਅਭਯਤ੍ਥੇਰੋ ਆਹ ਕਥਂ ਮਹਾਰਾਜ ਸਦ੍ਦਹਿਤੁਂ ਸਕ੍ਕਾ ਛ ਦੇਵਲੋਕਤੋ ਛ ਰਥਾ ਆਨੀਤਾਤਿ ਤਂ ਸੁਤ੍ਵਾ ਰਾਜਾ ਆਕਾਸੇ ਪੁਪ੍ਫਦਾਮਾਨਿ ਖਿਪਾਪੇਸਿ. ਤਾਨਿ ਗਨ੍ਤ੍ਵਾ ਵਿਸੁਂ ਰਥਧੁਰੇ ਓਲਮ੍ਬਿਂਸੁ ਮਹਾਜਨੋ ਆਕਾਸੇ ਓਲਮ੍ਬਨ੍ਤਾਨਿ ਪੁਪ੍ਫਦਾਮਾਨਿ ਦਿਸ੍ਵਾ ਨਿਕ੍ਕਙ੍ਖੋ ਅਹੋਸਿ.

ਤਤੋ ਰਾਜਾ ਥੇਰਂ ਪੁਚ੍ਛਿ-ਕਤਮੋ ਪਨ ਭਨ੍ਤੇ ਦੇਵਲੋਕੋ ਰਮਣੀਯੋਤਿ. ਤੁਸਿਤਭਵਨਂ ਪਨ ਮਹਾਰਾਜ ਰਮਣੀਯਂ, ਬੁਦ੍ਧਭਾਵਾਯ ਸਮਯਂ ਓਲੋਕੇਨ੍ਤੋ ਮੇਤ੍ਤੇਯ੍ਯੋ ਬੋਧਿਸਤ੍ਤੋਪਿ ਤਸ੍ਮਿਂਯੇਵ ਵਸਤੀਤਿ ਆਹ.

ਤਂ ¶ ਸੁਤ੍ਵਾ ਰਾਜਾ ਤਸ੍ਮਿਂ ਆਲਯਂ ਕਤ੍ਵਾ ਮਹਾਥੂਪਂ ਓਲੋਕੇਨ੍ਤੋ ਨਿਪਨ੍ਨੋਵ ਚਵਿਤ੍ਵਾ ਸੁਤ੍ਤਪ੍ਪਬੁਦ੍ਧੋ ਵਿਯ ਤੁਸਿਤ ਭਵਨਤੋ ਆਹਟ. ਰਥੇ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਕਤਪੁਞ੍ਞਸ੍ਸ ਥਲਂ ਮਹਾਜਨਸ੍ਸ ਪਾਕਟਂ ਕਾਤੁਂ ਰਥੇਯੇਵ ਠਤ੍ਵਾ ਦਿਬ੍ਬਾਭਰਣ ਵਿਭੂਸਿਤੋ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਤਿਕ੍ਖਤ੍ਤੁਂ ਮਹਾਥੂਪਂ ਪਦਕ੍ਖਿਣਂ ਕਤ੍ਵਾ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਤੁਸਿਤਭਵਨਂ ਅਗਮਾਸਿ.

ਏਵਂ ਅਸਾਰੇ ਨਿਚਯੇ ਧਨਾਨਂ ਅਨਿਚ੍ਚਸਙ੍ਘਂ ਸਤ੍ਤਂ ਸਪਞ੍ਞਾ,

ਕਤ੍ਵਨ ਚਾਗਂ ਰਤਨਤ੍ਤਯਮਹਿ ਆਦਾਯ ਸਾਰਂ ਸੁਗਤਿਂ ਵਜਨ੍ਤਿ;

ਰਞ੍ਞੋ ਨਾਟਕਤ੍ਥਿਯੋ ਮਤਭਾਵਂ ਞਤ੍ਵਾ ਯਤ੍ਥ ਠਿਤਾ ਮਕੁਲ਼ਂ ਮੋਚਯਿਂਸੁ ਤਤ੍ਥਂ ਠਾਨੇ ਕਤਸਾਲਾ ਮਕੁਲ਼ਮੁਤ੍ਤਸਾਲਾਨਾਮਜਾਤਾ. ਰਞ੍ਞੋ ਸਰੀਰਸ੍ਮਿਂ ਚਿਤਕਂ ਆਰੋਪਿਤੇ ਯਤ੍ਥ ਮਹਾਜਨੋ ਹਤ੍ਥੇ ਪਗ੍ਗਹੇਤ੍ਵਾ ਵਿਰਚਿ. ਤਤ੍ਥ ਕਤਸਾਲਾ ਵਿਰਚਿਤ੍ਥਸਾਲਾ ਨਾਮ ਜਾਤਾ. ਰਞ੍ਞੋ ਸਰੀਰਂ ਯਤ੍ਥ ਝਾਪੇਸੁਂ - ਸੋ ਸੀਮਾਮਾਲਕੋ ਰਾਜਮਾਲਕੋ ਨਾਮ ਜਾਤੋ. ਅਥ ਰਞ੍ਞੋ ਕਨਿਟ੍ਠਭਾਤਾ ਸਦ੍ਧਾਤਿਸ੍ਸਮਹਾਰਾਜਾ ਨਾਮ ਹੁਤ੍ਵਾ ਚੇਤਿਯੇ ਅਨਿਟ੍ਠਤਂ ਜਤ੍ਤਕਮ੍ਮਂ ਸੁਧਾਕਮ੍ਮਞ੍ਚ ਨਿਟ੍ਠਾਪੇਤ੍ਵਾ ਥੂਪਮਕਾਸੀਤਿ

ਇਤਿ ਸਾਧੁਜਨ ਮਨੋਪਸਾਦਨਤ੍ਥਾਯ ਕਤੇ ਥੂਪਵਂਸੇ ਮਹਾਚੇਤਿਯੇ ਕਤਾ ਨਿਟ੍ਠਿਤਾ.

੨੬. ਏਤਰਹਿ ਦੁਟ੍ਠਗਾਮਣਿ ਅਭਯ ਮਹਾਰਾਜਸ੍ਸ ਪਿਤਾ ਕਾਕਵਣ੍ਣਤਿਸ੍ਸ ਰਾਜਾ ਮੇਤ੍ਤੇਯ੍ਯਸ੍ਸ ਭਗਵਤੋ ਪਿਤਾ ਭਵਿਸ੍ਸਤਿ. ਵਿਹਾਰਮਹਾਦੇਵੀ ਮਾਤਾ ਭਵਿਸ੍ਸਤਿ. ਦੁਟ੍ਠਗਾਮਿਣਿ ਅਭਯੋ ਅਗ੍ਗਸਾਵਕੋ ਭਵਿਸ੍ਸਤਿ. ਕਨਿਟ੍ਠੋ ਦੁਤਿਯ ਸਾਵਕੋ ਭਵਿਸਸਤਿ. ਰਞ੍ਞੋ ਪਿਤੁਚ੍ਛਾ ਅਨੁਲ਼ਾਦੇਵੀ ਅਗ੍ਗਮਹੇਸੀ ਭਵਿਸ੍ਸਤਿ. ਰਞ੍ਞੋ ਪੁਤ੍ਤੋ ਸਾਲਿ ਰਾਜਕੁਮਾਰੋ ਪੁਤ੍ਤੋ ਭਵਿਸ੍ਸਤਿ. ਭਣ੍ਡਾਗਾਰਿਕ ਸਙ੍ਘਾਮਚ੍ਚੋ ਅਗ੍ਗੁਪਟ੍ਠਾਕੋ ਭਵਿਸ੍ਸਤਿ ਤਸ੍ਸਾਮਚ੍ਚਸ੍ਸ ਧੀਤਾ ਅਗ੍ਗੁਪਟ੍ਠਾਯਿਕਾ ਭਵਿਸ੍ਸਤੀਤਿ ਏਵਂ ਸਬ੍ਬੇਪਿ ਕਤਾਧਿਕਾਰਾ ਹੇਤੁ ਸਮ੍ਪਨ੍ਨਾ ਤਸ੍ਸ ਭਗਵਤੋ ਧਮ੍ਮਂ ਸੁਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿਸ੍ਸਨ੍ਤੀਤਿ.

ਏਤ੍ਤਾਵਤਾ ਚ

੨੭.

ਮਹਿਣ੍ਦਸੇਨ ਨਾਮਮ੍ਹਿ ਵਸਨ੍ਤੋ ਪਰਿਵੇਣਕੇ,

ਪਤ੍ਤਚੀਵਰਪਾਦੋ? ਯੋ ਪਿਟਕਤ੍ਤਯ ਪਾਰਗੋ;

ਸਦ੍ਧਾਸਿਲਗੁਣੁਪੇਤੋ ਸਬ੍ਬਸਤ੍ਤਹਿਤੇ ਰਤੋ,

ਤੇਨ ਸਾਧੁ ਸਮਜ੍ਝਿਟ੍ਠੋ ਯਮਹਂ ਕਾਤੁਮਾਰਭਿਂ;

ਸੋਦਾਨਿ ਨਿਟ੍ਠਂ ਸਮ੍ਪਤ੍ਤੋ ਥੂਪਵਂਸੋ ਅਨਾਕੁਲੋ,

ਪਰਿਪੁਣ੍ਣੋ ਸਙ੍ਖਥਾ ਸਾਧੁ ਪਣ੍ਡਿਤੇਹਿ ਪਸਂਸਿਤੋ;

ਯਂ ¶ ਪਤ੍ਤਂ ਕੁਸਲਂ ਕਮ੍ਮਂ ਕਰੋਨ੍ਤੇਨ ਇਮਂ ਮਯਂ,

ਤੇਨ ਏਤੇਨ ਪੁਞ੍ਞੇਨ ਸਤ੍ਤਾ ਗਚ੍ਛਨ੍ਤੁ ਨਿਬ੍ਬੁਤਿਂ;

ਅਨਨ੍ਤਰਾਯੇਨ ਯਥਾ ਚ ਸਿਦ੍ਧਿਂ

ਮੂਪਾਗਤੋ ਥੂਪਵਰਸ੍ਸ ਵਂਸੋ,

ਤਥੇਵ ਸਦ੍ਧਮ੍ਮਸਿਤਾ ਜਨਾਨਂ

ਮਨੋ ਰਥਾ ਸੀਘਮੁਪੇਨ੍ਤੁ ਸਿਦ੍ਧਿਂ;

ਪਰਿਸਮ੍ਭਿਦਾਮਗ੍ਗਸ੍ਸ ਯੇਨ ਲੀਲਤ੍ਥ ਦੀਪਨਿ

ਟੀਕਾ ਵਿਰਚਿਤਾ ਸਾਧੁ ਸਦ੍ਧਮ੍ਮੋਦਯ ਕਾਮਿਨਾ;

ਤਥਾ ਪਕਰਣੇ ਸਚ੍ਚਸਙ੍ਖੇਪੇ ਅਤ੍ਥਦੀਪਨਾ,

ਧੀਮਤਾ ਸੁਕਤਾ ਯੇਨ ਸੁਟ੍ਠੁ ਸੀਹਲ਼ ਭਾਸਤੋ

ਵਿਸੁਦ੍ਧਿਮਗ੍ਗ ਸਙ੍ਖੇਪੇ ਯੇਨ ਅਤ੍ਥਪ੍ਪਕਾਸਨਾ,

ਯੋਗੀ ਨਮੁਪਕਾਰਾਯ ਕਤਾ ਸੀਹਲ਼ਭਾਸਤੋ;

ਪਰਕ੍ਕਮ ਨਰਿਣ੍ਦਸ੍ਸ ਸਬ੍ਬਭੂਪਾਨ ਕੇਤੁਨੋ,

ਧਮ੍ਮਾਗਾਰੇ ਨਿਯੁਤ੍ਤੋ ਯੋ ਪਿਟਕਤ੍ਤਯ ਪਾਰਗੋ;

ਸਾਸਨਂ ਸੁਟ੍ਠਿਤਂ ਯਸ੍ਸ ਅਨ੍ਤੇਵਾਸਿਕ ਭਿਕ੍ਖੁਸੁ,

ਤੇਨ ਵਾਚਿਸ੍ਸਰਤ੍ਥੇਰ ਪਾਦੇਨ ਲਿਖਿਤੋ ਅਯਨ੍ਤਿ;

ਥੂਪਵਂਸੋ ਨਿਟ੍ਠਿਤੋ.