📜

ਧਾਤੁਵਂਸੋ ¶

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਤਥਾਗਤਸ੍ਸਾਗਮਨਕਥਾ

ਸਮ੍ਬੁਦ੍ਧਮਤੁਲਂ ਸੁਦ੍ਧਂ ਧਮ੍ਮਂ ਸਙ੍ਘਂ ਅਨੁਤ੍ਤਰਂ,

ਨਮਸ੍ਸਿਤ੍ਵਾ ਪਵਕ੍ਖਾਮਿ ਧਾਤੁਵਂਸਪ੍ਪਕਾਸਨਂ;

ਤਿਕ੍ਖਤ੍ਤੁਮਗਮਾ ਨਾਥੋ ਲਙ੍ਕਾਦੀਪਂ ਮਨੋਰਮਂ,

ਸਤ੍ਤਾਨਂ ਹਿਤਮਿਚ੍ਛਨ੍ਤੋ ਸਾਸਨਸ੍ਸ ਚਿਰਟ੍ਠਿਤਿਂ.

ਤਤ੍ਥ ਤਿਕ੍ਖਤ੍ਤੁਮਗਮਾ ਨਾਥੋ’ਤਿ ਅਨਮਤਗ੍ਗੇ ਸਂਸਾਰਵਟ੍ਟੇ ਪਰਿਨਾਮੇਤ੍ਵਾ ਅਪ੍ਪਤਿਸਰਣਭਾਵਪ੍ਪਤ੍ਤਾਨਂ ਲੋਕਿਯਲੋਕੁਤ੍ਤਰਸੁਖਨਿਪ੍ਫਾਦਨਭਾਵੇਨ ਨਾਥੋ ਪਤਿਸਰਣ ਭੂਤੋ ਭਗਵਾ ਬੁਦ੍ਧਧਮ੍ਮਸਙ੍ਘਰਤਨਤ੍ਤਯਮਗ੍ਗਂ ਆਚਿਕ੍ਖਨ੍ਤੋ ਲਙ੍ਕਾਦੀਪਂ ਤਿਕ੍ਖਤ੍ਤੁਂ ਗਤੋ. ਤਤ੍ਥ ਪਠਮਗਮਨੇ ਤਾਵ ਬੋਧਿਮਣ੍ਡਂ ਆਰੁਯ੍ਹ ਪੁਰਤ੍ਥੀਮਾਭਿਮੁਖੋ ਨਿਸੀਦਿਤ੍ਵਾ ਸੂਰਿਯੇ ਅਨਤ੍ਥਮਿਤੇਯੇਵ ਮਾਰਬਲਂ ਵਿਧਮੇਤ੍ਵਾ, ਪਠਮਯਾਮੇ ਪੁਬ੍ਬੇਨਿਵਾਸਞਾਣਂ ਅਨੁਸ੍ਸਰਿਤ੍ਵਾ ਮਜ੍ਝਿਮਯਾਮੇ ਚੁਤੁਪਪਾਤਞਾਣਂ ਪਤ੍ਵਾ ਪਚ੍ਛਿਮਯਾਮਾਵਸਾਨੇ ਪਚ੍ਚਯਾਕਾਰੇ ਞਾਣਂ ਓਤਾਰੇਤ੍ਵਾ ਦਸਬਲਚਤੁਵੇਸਾਰਜ੍ਜਾਦਿ ਗੁਣਪਤਿਮਣ੍ਡਿਤਂ ਸਬ੍ਬਞ੍ਞੁਤਞਾਣਂ ਪਟਿਵਿਜ੍ਝਿਤ੍ਵਾ ਬੋਧਿਮਣ੍ਡਪ੍ਪਦੇਸੇ ਅਨੁਕ੍ਕਮੇਨ ਸਤ੍ਤਸਤ੍ਤਾਹਂ ਵੀਤਿਨਾਮੇਤ੍ਵਾ ਅਟ੍ਠਮੇ ਸਤ੍ਤਾਹੇ ਅਜਪਾਲਨਿਗ੍ਰੋਧਮੂਲੇ ਨਿਸਿਨ੍ਨੋ ਧਮ੍ਮਗਮ੍ਭਿਰਤਂ ਪਚ੍ਚਵੇਕ੍ਖਨੇਨ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਮਾਨੋ ਦਸਸਹਸ੍ਸ ਬ੍ਰਹ੍ਮਪਰਿਵਾਰੇਨ ਸਹਮ੍ਪਤਿਮਹਾਬ੍ਰਹ੍ਮੁਨਾ ਆਯਾਚਿਤਧਮ੍ਮਦੇਸਨੋ ਹੁਤ੍ਵਾ ¶ ਬੁਦ੍ਧਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਪਞ੍ਚਵਗ੍ਗਿਯਾਨਂ ਭਿਕ੍ਖੁਨਂ ਬਹੂਪਕਾਰਕਂ ਅਨੁਸ੍ਸਰਿਤ੍ਵਾ ਉਟ੍ਠਾਯਾਸਨਾ ਕਾਸੀਨਂ ਪੁਰਂ ਗਨ੍ਤ੍ਵਾ ਅਞ੍ਞਾਕੋਣਡਞ੍ਞਪ੍ਪਮੁਖੇ ਅਟ੍ਠਾਰਸ ਬ੍ਰਹ੍ਮਕੋਟਿਯੋ ਅਮਤਂ ਪਾਯੇਨ੍ਤੋ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਪਕ੍ਖਸ੍ਸ ਪਞ੍ਚਮਿਯਂ ਪਞ੍ਚਵਗ੍ਗਿਯੇ ਸਬ੍ਬੇਪਿ ਤੇ ਅਰਹਨ੍ਤੇ ਪਤਿਟ੍ਠਾਪੇਤ੍ਵਾ ਤਂ ਦਿਵਸਮੇਵ ਯਸਕੁਲਪੁਤ੍ਤਸ੍ਸ ਰਤ੍ਤਿਭਾਗੇ ਸੋਤਾਪਤ੍ਤਿਫਲਂ ਦਤ੍ਵਾ ਪੁਨਦਿਵਸੇ ਅਰਹਨ੍ਤਂ ਦਤ੍ਵਾ ਤਸ੍ਸ ਸਹਾਯਕੇ ਚਤੁਪਞ੍ਞਾਸਜਨੇ ਅਰਹਨ੍ਤਂ ਪਾਪੇਤ੍ਵਾ ਏਵਂ ਲੋਕੇ ਏਕਸਟ੍ਠਿਯਾ ਅਰਹਨ੍ਤੇਸੁ ਜਾਤੇਸੁ ਵੁਤ੍ਥਵਸ੍ਸੋ ਪਵਾਰੇਤ੍ਵਾ, ‘ਚਰਥ ਭਿਕ੍ਖਵੇ ਚਾਰਿਕ’ ਨ੍ਤਿ ਭਿਕ੍ਖੁ ਦਿਸਾਸੁ ਪੇਸੇਤ੍ਵਾ ਸਯਂ ਉਰੁਵੇਲਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਕਪ੍ਪਾਸਿਕਵਨਸਣ੍ਡੇ ਭਦ੍ਦਵਗ੍ਗਿਯੇ ਕੁਮਾਰੇ ਤਿਂਸਜਨੇ ਵਿਨੇਤ੍ਵਾ ਏਹਿਭਿਕ੍ਖੁਭਾਵੇਨ ਪਬ੍ਬਾਜੇਤ੍ਵਾ ਉਰੁਵੇਲਂ ਗਨ੍ਤ੍ਵਾ ਅਡ੍ਢੁਡ੍ਢਾਨਿ ਪਾਟਿਹਾਰਿਯਸਹਸ੍ਸਾਨਿ ਦਸ੍ਸੇਨ੍ਤੋ ਉਰੁਵੇਲਕਸ੍ਸਪਾਦਯੋ ਸਹਸ੍ਸਜਟਿਲਪਰਿਵਾਰੇ ਤੇਭਾਤਿਕਜਟਿਲੇ ਵਿਨੇਨ੍ਤੋ ਤਤ੍ਥੇਵ ਵਿਹਾਸਿ. ਅਪਰਭਾਗੇ ਅਙ੍ਗਮਗਧਰਟ੍ਠਵਾਸਿਨੋ ਉਰੁਵੇਲਕਸ੍ਸਪਸ੍ਸ ਮਹਾਯਞ੍ਞਂ ਉਪਟ੍ਠਾਪੇਸੁਂ. ਸੋ ਪਨ ਇਚ੍ਛਾਚਾਰਾਭਿਭੂਤੋ ਚਿਨ੍ਤੇਸਿ? ‘‘ਸਚਾਯਂ ਮਹਾਸਮਣੋ ਇਮਸ੍ਸ ਸਮਾਗਮਸ੍ਸ ਮਜ੍ਝੇ ਪਾਟਿਹਾਰਿਯਂ ਕਰੇਯ੍ਯ ਲਾਭਸਕ੍ਕਾਰੋ ਮੇ ਪਰਿਹਾਯਿਸ੍ਸਤਿ’’ਤਿ. ਤਸ੍ਸੇਵਂ ਪਵਤ੍ਤਅਜ੍ਝਾਸਯਂ ਞਤ੍ਵਾ ਪਾਤੋਵ ਉਤ੍ਤਰਕੁਰੁਤੋ ਭਿਕ੍ਖਂ ਆਹਰਿਤ੍ਵਾ ਅਨੋਤਤ੍ਤੇ ਆਹਾਰਂ ਪਰਿਭੁਞ੍ਜਿਤ੍ਵਾ ਸਾਯਨ੍ਹ ਸਮਯੇ ਫੁਸ੍ਸਪੁਣ੍ਣਮੀਉਪੋਸਥਦਿਵਸੇ ਲਙ੍ਕਾਦੀਪਸ੍ਸਤ੍ਥਾਯ ਲਙ੍ਕਾਦੀਪਮੁਪਾਗਮਿ.

ਤਸ੍ਸ ਪਨ ਦੀਪਸ੍ਸ ਮਹਾਗਙ੍ਗਾਯ ਦਕ੍ਖਿਣਪਸ੍ਸੇ ਆਯਾਮਤੋ ਤਿਯੋਜਨੇ ਪੁਥੁਲਤੋ ਏਕਯੋਜਨਪ੍ਪਮਾਣੇ ਮਹਾਨਾਗਵਨੁਯ੍ਯਾਨੇ ਯਕ੍ਖਸਮਾਗਮਸ੍ਸ ਮਜ੍ਝੇ ਤਸ੍ਸ ਉਪਰਿ ਮਹਿਯਙ੍ਗਣਥੂਪਸ੍ਸ ਪਤਿਟ੍ਠਾਨਟ੍ਠਾਨੇ ਆਕਾਸੇਯੇਵ ਠੀਤੋ ਵੁਟ੍ਠਿਵਾਤਨ੍ਧਕਾਰਂ ਦਸ੍ਸੇਤ੍ਵਾ ਤੇਸਂ ਭਯਂ ਉਪ੍ਪਾਦੇਸਿ. ਤੇ ਭਯੇਨ ਉਪਦ੍ਦੁਤਾ ‘‘ਕਸ੍ਸ ਨੁ ਖੋ ਇਮਂ ਕਮ੍ਮ’’ਨ੍ਤਿ ਇਤੋ ਚਿਤੋ ਓਲੋਕੇਨ੍ਤੋ ਅਦ੍ਦਸਂਸੁ ਭਗਵਨ੍ਤਂ ਆਕਾਸੇ ਨਿਸਿਨ੍ਨਂ. ਦਿਸ੍ਵਾਨ ਭਗਵਨ੍ਤਂ ਅਭਯਂ ਯਾਵਿਂਸੁ. ਤੇਸਂ ਭਗਵਾ ਆਹ?

‘‘ਸਚੇ ¶ ਤੁਮ੍ਹੇ ਅਭਯਂ ਇਚ੍ਛਥ ਮਯ੍ਹਂ ਨਿਸਜ੍ਜਟ੍ਠਾਨਸ੍ਸ ਓਕਾਸਂ ਦੇਥਾ’’ਤਿ. ਸਬ੍ਬੇਪਿ ਤੇ ਤਸ੍ਸ ਨਿਸਜ੍ਜਟ੍ਠਾਨਂ ਅਦਂਸੁ. ਭਗਵਾ ਨਿਸਜ੍ਜਾਯ ਓਕਾਸਂ ਗਹੇਤ੍ਵਾ ਤੇਸਂ ਭਯਂ ਵਿਨੋਦੇਤ੍ਵਾ ਤੇਹਿ ਦਿਨ੍ਨੇ ਭੁਮਿਭਾਗੇ ਚਮ੍ਮਖਣ੍ਡਂ ਪਤ੍ਥਰਿਤ੍ਵਾ ਨਿਸੀਦਿ. ਨਿਸਿਨ੍ਨੋਵ ਪਨ ਭਗਵਾ ਚਮ੍ਮਖਣ੍ਡਂ ਪਸਾਰੇਸਿ. ਤੇ ਯਕ੍ਖਾ ਭੀਤਤਸਿਤਾ ਅਞ੍ਞਤ੍ਥ ਗਨ੍ਤੁਂ ਅਸਹਮਾਨਾ ਸਮਨ੍ਤਤੋ ਸਾਗਰਤੀਰੇ ਰਾਸਿਭੂਤਾ ਅਹੇਸੁਂ. ਸਤ੍ਥਾ ਗਿਰਿਦੀਪਂ ਇਦ੍ਧਾਨੁਭਾਵੇਨ ਆਹਰਿਤ੍ਵਾ ਦਸ੍ਸੇਸਿ. ਤੇਸੁ ਤਤ੍ਥ ਪਤਿਟ੍ਠਿਤੇਸੁ ਪੁਨ ਯਥਾਟ੍ਠਾਨੇਵ ਠਪੇਤ੍ਵਾ ਪਤ੍ਥਰਿਤਚਮ੍ਮਖਣ੍ਡਮ੍ਪਿ ਸਂਖਿਪਿ. ਤਸ੍ਮਿਂ ਖਣੇ ਤਤੋ ਤਤੋ ਦੇਵਾ ਸਨ੍ਨਿਪਤਿਂਸੁ. ਤੇਸਂ ਸਮਾਗਮੇ ਧਮ੍ਮਂ ਦੇਸੇਸਿ. ਅਨੇਕੇਸਂ ਪਾਣਕੋਟੀਨਂ ਧਮ੍ਮਾਭਿਸਮਯੋ ਅਹੋਸਿ. ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਿਤਾ ਅਸਙ੍ਖੇਯ੍ਯਾ ਅਹੇਸੁਂ. ਸੁਮਨਕੂਟੇ ਪਨ ਮਹਾਸੁਮਨਦੇਵੋ ਸੋਤਾਪਤ੍ਤਿਫਲਂ ਪਤ੍ਵਾ ਅਤ੍ਤਨੋ ਪੂਜਨੀਯਂ ਭਗਵਨ੍ਤਂ ਯਾਚਿ. ਭਗਵਾ ਤੇਨ ਯਾਚਿਤੋ ਸੀਸਂ ਪਾਣਿਨਾ ਪਰਾਮਸਿਤ੍ਵਾ ਕੇਸਧਾਤੁਂਗਹੇਤ੍ਵਾ ਤਸ੍ਸ ਅਦਾਸਿ. ਦਤ੍ਵਾ ਚ ਪਨ ਲਙ੍ਕਾਦੀਪਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਪਰਿਤ੍ਤਂ ਕਤ੍ਵਾ ਆਰਕ੍ਖਂ ਸਂਵਿਧਾਯ ਪੁਨ ਉਰੁਵੇਲਮੇਵ ਆਗਤੋ. ਸੋ ਪਨ ਕੇਸਧਾਤੁਯੋ ਸੁਵਣ੍ਣਚਙ੍ਗੋਟਕੇਨਾਦਾਯ ਸਤ੍ਥੁ ਨਿਸਿਨ੍ਨਟ੍ਠਾਨੇ ਨਾਨਾਰਤਨੇਹਿ ਵਿਚਿਤ੍ਤਂ ਥੂਪਂ ਪਤਿਟ੍ਠਾਪੇਤ੍ਵਾ ਉਪਰਿ ਇਨ੍ਦਨੀਲਮਣਿਥੂਪਿਕਾਹਿ ਪਿਦਹਿਤ੍ਵਾ ਗਨ੍ਧਮਾਲਾਦੀਹਿ ਪੂਜੇਨ੍ਤੋ ਵਿਹਾਸਿ. ਪਰਿਨਿਬ੍ਬੁਤੇ ਪਨ ਭਗਵਤਿ ਸਾਰਿਪੁਤ੍ਤਸ੍ਸ ਅਨ੍ਤੇਵਾਸਿਕੋ ਸਰਭੂ ਨਾਮ ਥੇਰੋ ਖੀਣਾਸਵੋ ਚਿਤਕਤੋ ਇਦ੍ਧਿਯਾ ਤਥਾਗਤਸ੍ਸ ਗੀਵਟ੍ਠਿਂ ਆਦਾਯ ਤਸ੍ਮਿਂ ਇਨ੍ਦਨੀਲਮਣਿਥੂਪੇ ਪਤਿਟ੍ਠਾਪੇਤ੍ਵਾ ਮੇਘਵਣ੍ਣਪਾਸਾਣੇਹਿ ਦ੍ਵਾਦਸਹਤ੍ਥਂ ਥੂਪਂ ਕਾਰਾਪੇਤ੍ਵਾ ਗਤੋ. ਤਤੋ ਦੇਵਾਨਮ੍ਪਿਯਤਿਸ੍ਸਰਞ੍ਞੋ ਭਾਤਾ ਚੂਲ਼ਾਭਯੋ ਨਾਮ ਕੁਮਾਰੋ ਤਮਬ੍ਭੁਤਂ ਚੇਤਿਯਂ ਦਿਸ੍ਵਾ ਅਭਿਪ੍ਪਸਨ੍ਨੋ ਤਂ ਪਟਿਚ੍ਛਾਦੇਨ੍ਤੋ ਤਿਂਸਹਤ੍ਥਂ ਚੇਤਿਯਂ ਪਤਿਟ੍ਠਾਪੇਸਿ. ਪੁਨ ਦੁਟ੍ਠਗਾਮਣੀ ਅਭਯਮਹਾਰਾਜਾ ਤਂ ਪਟਿਚ੍ਛਾਦੇਤ੍ਵਾ ਅਸੀਤਿਹਤ੍ਥਂ ਕਞ੍ਚੁਕਚੇਤਿਯਂ ਕਾਰਾਪੇਸਿ. ਮਹਿਯਙ੍ਗਣ ¶ ਥੂਪਸ੍ਸ ਪਤਿਟ੍ਠਾਨਾਧਿਕਾਰੋ ਏਵਂ ਵਿਤ੍ਥਾਰਤੋ ਵੇਦਿਤਬ੍ਬੋ?

ਬੋਧਿਂ ਪਤ੍ਵਾਨ ਸਮ੍ਬੁਦ੍ਧੋ ਬੋਧਿਮੂਲੇ ਨਰਾਸਭੋ

ਨਿਸੀਦਿਤ੍ਵਾਨ ਸਤ੍ਤਾਹਂ ਪਾਟਿਹੀਰਂ ਤਤੋ ਅਕਾ.

ਤਤੋ ਪੁਬ੍ਬੁਤ੍ਤਰੇ ਠਤ੍ਵਾ ਪਲ੍ਲਙ੍ਕਾ ਈਸਕੇ ਜਿਨੋ

ਅਨਿਮਿਸੇਨ ਨੇਤ੍ਤੇਨ ਸਤ੍ਤਾਹਂ ਤਂ ਉਦਿਕ੍ਖਯਿ.

ਚਙ੍ਕਮਿਤ੍ਵਾਨ ਸਤ੍ਤਾਹਂ ਚਕ੍ਖਮੇ ਰਤਨਾਮਯੇ

ਵਿਚਿਨਿਤ੍ਵਾ ਜਿਨੋ ਧਮ੍ਮਂ ਵਰਂ ਸੋ ਰਤਨਾਘਰੇ.

ਅਜਪਾਲਮ੍ਹਿ ਸਤ੍ਤਾਹਂ ਅਨੁਭੋਸਿ ਸਮਾਧਿਜਂ

ਰਮ੍ਮੇ ਚ ਮੁਚਲਿਨ੍ਦਸ੍ਮਿਂ ਵਿਮੁਤ੍ਤਿਸੁਖਮੁਤ੍ਤਮਂ.

ਰਾਜਾਯਤਨਮੂਲਮ੍ਹਿ ਸਤ੍ਤਰਤ੍ਤਿਨ੍ਦਿਵਂ ਵਸੀ

ਦਨ੍ਤਪੋਨੋਦਕਂ ਸਕ੍ਕੋ ਅਦਾਸਿ ਸਤ੍ਥੁਨੋ ਤਦਾ.

ਚਤੁਹਿ ਲੋਕਪਾਲੇਹਿ ਸਿਲਾਪਤ੍ਤਂ ਸਮਾਹਟਂ ਚਤੁਕ੍ਕਮੇਕਕਂ ਕਤ੍ਵਾ ਅਧਿਟ੍ਠਾਨੇਨ ਨਾਯਕੋ.

ਵਾਣਿਜੇਹਿ ਤਦਾ ਦਿਨ੍ਨਂ ਮਨ੍ਥਞ੍ਚ ਮਧੁਪਿਣ੍ਡਿਕਂ

ਤਹਿਂ ਪਨ ਗਹੇਤ੍ਵਾਨ ਭਤ੍ਤਕਿਚ੍ਚਂ ਅਕਾ ਜਿਨੋ.

ਗਣ੍ਹਿਂਸੁ ਸਰਣਂ ਤਸ੍ਸ ਤਪੁਸ੍ਸਭਲ੍ਲਿਕਾ ਉਭੋ

ਸਰਣਂ ਅਗਮੁਂ ਤੇ ਤਂ ਸਤ੍ਥੁ ਦਿਨ੍ਨਸਿਰੋਰੁਹਾ.

ਗਨ੍ਤ੍ਵਾਨ ਤੇ ਸਕਂ ਰਟ੍ਠਂ ਥੂਪਂ ਕਤ੍ਵਾ ਮਨੋਰਮਂ

ਨਮਸ੍ਸਿਂਸੁ ਚ ਪੂਜੇਸੁਂ ਦ੍ਵੇਭਾਤਿਕੋਪਾਸਕਾ.

ਇਤਿ ਸੋ ਸਤ੍ਤਸਤ੍ਤਾਹਂ ਵੀਤਿਨਾਮੇਸਿ ਨਾਯਕੋ?

ਬ੍ਰਹ੍ਮੁਨਾ ਯਾਚਿਤੋ ਸਤ੍ਥਾ ਧਮ੍ਮਚਕ੍ਕਂ ਪਵਤ੍ਤਿਤੁਂ.

ਤਤੋ ਬਾਰਾਣਸਿਂ ਗਨ੍ਤ੍ਵਾ ਧਮ੍ਮਚਕ੍ਕਂ ਪਵਤ੍ਤਯਿ

ਕੋਣ੍ਡਞ੍ਞੋ ਦੇਸਿਤੇ ਧਮ੍ਮੇ ਸੋਤਾਪਤ੍ਤਿਫਲਂ ਲਭਿ.

ਬ੍ਰਹ੍ਮਾਨੋ’ਟ੍ਠਾਰਸਕੋਟੀ ਦੇਵਤਾ ਚ ਅਸਙ੍ਖਿਯਾ

ਸੋਤਾਪਤ੍ਤਿਫਲਂ ਪਤ੍ਤਾ ਧਮ੍ਮਚਕ੍ਕੇ ਪਵਤ੍ਤਿਤੇ.

ਪਤ੍ਤੋ ¶ ਪਾਟਿਪਦੇ ਵਪ੍ਪੋ ਭਦ੍ਦਿਯੋ ਦੁਤਿਯੇ ਫਲਂ,

ਤਤਿਯੇ ਚ ਮਹਾਨਾਮੋ ਅਸ੍ਸਜੀ ਚ ਚਤੁਤ੍ਥੀਯਂ.

ਤੇ ਸਬ੍ਬੇ ਸਨ੍ਨਿਪਾਤੇਤ੍ਵਾ ਪਞ੍ਚ’ਮੇ ਪਞ੍ਚਵਗ੍ਗਿਯੇ,

ਅਨਤ੍ਤਸੁਤ੍ਤਂ ਦੇਸੇਤ੍ਵਾ ਬੋਧਿਯਗ੍ਗ ਫਲੇਨ ਤੇ.

ਬੋਧਿਂ ਪਾਪੇਤ੍ਵਾ ਪਞ੍ਚਾਹੇ ਯਸਤ੍ਥੇਰਾਦਿਕੇ ਜਨੇ,

ਤਤੋ ਮਗ੍ਗਨ੍ਤਰੇ ਤਿਂਸਕੁਮਾਰੇ ਭਦ੍ਦਵਗ੍ਗਿਯੇ.

ਉਰੁਵੇਲਂ ਤਤੋ ਗਨ੍ਤ੍ਵਾ ਉਰੁਵੇਲਾਯ ਸਞ੍ਞਿਤਂ,

ਉਰੁਵੇਲੇਨਨੁਞ੍ਞਾਤੋ ਉਰੁਵੇਲਨਾਗਂ ਦਮਿ.

ਤਂ ਤਂ ਦਮੀ ਜਿਨੋ ਨਾਗਂ ਦਮਨੇਨ ਉਰਾਦਿਗਂ,

ਤਥਾਗਤਂ ਨਿਮਨ੍ਤਿਂਸੁ ਦਿਸ੍ਵਾ ਤੇ ਪਾਟਿਹਾਰਿਯਂ.

ਇਧੇਵ ਵਨਸਣ੍ਡਸ੍ਮਿਂ ਵਿਹਾਰੇਤ੍ਵਾ ਮਹਾਮੁਨੀ,

ਉਪਟ੍ਠਾਹਾਮਸੇ ਸਬ੍ਬੇ ਨਿਚ੍ਚਭਤ੍ਤੇਨ ਤਂ ਮਯਂ.

ਉਰੁਵੇਲਕਸ੍ਸਪਸ੍ਸ ਮਹਾਯਞ੍ਞੇ ਉਪਟ੍ਠਿਤੇ,

ਤਸ੍ਸ’ਤ੍ਤਨੋ ਨਾਗਮਨੇ ਇਚ੍ਛਾਚਾਰਂ ਵਿਜਾਨਿਯ.

ਉਤ੍ਤਰਕੁਰੁਤੋ ਭਿਕ੍ਖਂ ਹਰਿਤ੍ਵਾ ਦਿਪਦੁਤ੍ਤਮੋ,

ਅਨੋਤਤ੍ਤਦਹੇ ਭੁਤ੍ਵਾ ਸਾਯਨ੍ਹ ਸਮਯੇ ਸਯਂ.

ਬੋਧਿਤੋ ਨਵਮੇ ਮਾਸੇ ਫੁਸ੍ਸਪੁਣ੍ਣਮਿਯਂ ਜਿਨੋ,

ਲਙ੍ਕਾਦੀਪਂ ਵਿਸੋਧੇਤੁਂ ਲਙ੍ਕਾਦੀਪਮੁਪਾਗਮਿ.

ਯਕ੍ਖੇ ਦਮਿਤ੍ਵਾ ਸਮ੍ਬੁਦ੍ਧੋ ਧਾਤੁਂ ਦਤ੍ਵਾਨ ਨਾਯਕੋ,

ਗਨ੍ਤ੍ਵਾਨ ਉਰੁਵੇਲਂ ਸੋ ਵਸੀ ਤਤ੍ਥ ਵਨੇ ਜਿਨੋ.

ਪਠਮਗਮਨਕਥਾ ਸਮਤ੍ਤਾ.

ਦੁਤਿਯਗਮਨੇ ਪਨ ਬੋਧਿਤੋ ਪਞ੍ਚਮੇ ਵਸ੍ਸੇ ਜੇਤਵਨਮਹਾਵਿਹਾਰੇ ਵਸਨ੍ਤੋ ਚੂਲ਼ੋਦਰ’ਮਹੋਦਰਾਨਂ ਮਾਤੁਲਭਾਗਿਨੇਯ੍ਯਾਨਂ ਨਾਗਾਨਂ ਮਣਿਪਲ੍ਲਙ੍ਕਂ ਨਿਸ੍ਸਾਯ ਸਙ੍ਗਾਮਂ ਪਚ੍ਚੁਪਟ੍ਠਿਤਂ ਦਿਸ੍ਵਾ ਸਯਂ ਪਤ੍ਤਚੀਵਰਮਾਦਾਯ ਚਿਤ੍ਤਮਾਸਸ੍ਸ ਕਾਲ਼ਪਕ੍ਖੇ ਉਪੋਸਥਦਿਵਸੇ ¶ ਨਾਗਦੀਪਂ ਗਨ੍ਤ੍ਵਾ ਤੇਸਂ ਸਙ੍ਗਾਮਮਜ੍ਝੇ ਆਕਾਸੇ ਨਿਸਿਨ੍ਨੋ ਅਨ੍ਧਕਾਰਂ ਅਕਾਸਿ. ਤੇ ਅਨ੍ਧਕਾਰਾਭਿਭੂਤੇ ਸਮਸ੍ਸਾਸੇਤ੍ਵਾ ਆਲੋਕਂ ਦਸ੍ਸੇਤ੍ਵਾ ਅਤ੍ਤਨੋ ਸਰਣਭੂਤਾਨਂ ਤੇਸਂ ਸਾਮਗ੍ਗਿਕਰਣਤ੍ਥਂ ਫਲਭਰਿਤਰੁਕ੍ਖਂ ਚਾਲੇਨ੍ਤੋ ਵਿਯ ਧਮ੍ਮਂ ਦੇਸੇਸਿ. ਤੇ ਉਭੋਪਿ ਧਮ੍ਮੇ ਪਸੀਦਿਤ੍ਵਾ ਤਮ੍ਪਿ ਪਲ੍ਲਙ੍ਕਂ ਤਥਾਗਤਸ੍ਸ ਅਦਂਸੁ. ਭਗਵਾ ਪਲ੍ਲਙ੍ਕੇ ਨਿਸਿਨ੍ਨੋ ਦਿਬ੍ਬਨ੍ਨਪਾਨੇਹਿ ਸਨ੍ਤਪ੍ਪਿਤੋ ਭਤ੍ਤਾਨੁਮੋਦਨਂ ਕਤ੍ਵਾ ਅਸੀਤਿਕੋਟਿਯੋ ਨਾਗੇ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਤਸ੍ਮਿਂ ਸਮਾਗਮੇ ਮਹੋਦਰਸ੍ਸ ਮਾਤੁਲੋ ਮਣਿਅਕ੍ਖਿਕੋ ਨਾਮ ਨਾਗਰਾਜਾ ਭਗਵਨ੍ਤਂ ਪੁਨ ਕਲ੍ਯਾਣਿਦੇਸਮਾਗਮਨਤ੍ਥਂ. ਅਯਾਚਿ. ਭਗਵਾ ਪਨ ਤੁਣ੍ਹੀਭਾਵੇਨ ਅਧਿਵਾਸੇਤ੍ਵਾ ‘‘ਜੇਤਵਨਮੇਵ ਗਤੋ.

ਏਵਞ੍ਹਿ ਸੋ ਨਾਗਦੀਪਂ ਉਪੇਤੋ,

ਮਾਰਾਭਿਭੁ ਸਬ੍ਬਵਿਦੁ ਸੁਮੇਧੋ;

ਦਮੇਤ੍ਵ ਨਾਗੇ ਕਰੁਣਾਯੁਪੇਤੋ,

ਗਨ੍ਤ੍ਵਾ ਵਸੀ ਜੇਤਵਨੇ ਮੁਨਿਨ੍ਦੋ.

ਦੁਤਿਯਗਮਨਕਥਾ ਸਮਤ੍ਤਾ.

ਤਤਿਯਗਮਨੇ ਪਨ ਬੋਧਿਤੋ ਅਟ੍ਠਮੇ ਵਸ੍ਸੇ ਜੇਤਵਨਮਹਾਵਿਹਾਰੇ ਵਿਹਰਨ੍ਤੋ ਭਗਵਾ? ‘‘ਮਮ ਪਰਿਨਿਬ੍ਬਾਨਤੋ ਪਚ੍ਛਾ ਤਮ੍ਬਪਣ੍ਣਿਦੀਪੇ ਸਾਸਨਂ ਪਤਿਟ੍ਠਹਿਸ੍ਸਤਿ, ਸੋ ਦੀਪੋ ਬਹੁ ਭਿਕ੍ਖੁਭਿਕ੍ਖੁਨੀਉਪਾਸਕੋਪਾਸਿਕਾਦਿ ਅਰਿਯਗਣਸੇਵਿਤੋ ਕਾਸਾਵਪਜ੍ਜੋਤੋ ਭਵਿਸ੍ਸਤਿ, ਮਯ੍ਹਂ ਚਤੁਨ੍ਨਂ ਦਾਠਾਧਾਤੁਨਂ ਅਨ੍ਤਰੇ ਏਕਾ ਦਾਠਾ ਚ ਦਕ੍ਖਿਣਅਕ੍ਖਧਾਤੁ ਚ ਨਲਾਟਧਾਤੁ ਚ ਰਾਮਗਾਮਵਾਸੀਹਿ ਲਦ੍ਧੋ ਏਕਕੋਟ੍ਠਾਸੋ ਚ ਅਞ੍ਞੇ ਬਹੁਸਰੀਰਧਾਤੁ ਚ ਕੇਸਧਾਤੁਯੋ ਚ ਤਤ੍ਥੇਵ ਪਤਿਟ੍ਠਹਿਸ੍ਸਨ੍ਤਿ ਅਨੇਕਾਨਿ ਸਙ੍ਘਾਰਾਮਸਹਸ੍ਸਾਨਿ ਚ. ਬੁਦ੍ਧਧਮ੍ਮਸਙ੍ਘਰਤਨੇ ਪਤਿਟ੍ਠਿਤਸਦ੍ਧੋ ਮਹਾਜਨੋ ਭਵਿਸ੍ਸਤਿ. ਤਸ੍ਮਾ ਲਙ੍ਕਾਦੀਪਂ ਗਨ੍ਤ੍ਵਾ ਤਤ੍ਥ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਆਗਨ੍ਤੁਂ ਵਟ੍ਟਤੀ ‘‘ਤਿ ਚਿਨ੍ਤੇਤ੍ਵਾ ਆਨਨ੍ਦਤ੍ਥੇਰਂ ਆਮਨ੍ਤੇਸਿ? ‘‘ਆਨਨ੍ਦ ਚਤੁਪਟਿਸਮ੍ਭਿਦਪ੍ਪਤ੍ਤਾਨਂ ਪਞ੍ਚਸਤਮਹਾਖੀਣਾਸਵਾਨਂ ਭਿਕ੍ਖੂਨਂ ਪਟਿਵੇਦੇਸਿ. ਅਮ੍ਹੇਹਿ ਸਦ੍ਧਿਂ ਗਨ੍ਤਬ੍ਬ ‘‘ਨ੍ਤਿ. ਆਨਨ੍ਦਤ੍ਥੇਰੋ ਕਪਿਲਵਤ੍ਥੁਕੋਲ਼ਿਯ ਨਗਰਵਾਸੀਨਂ ਪਞ੍ਚਸਤਮਹਾਖੀਣਾਸਵਾਨਂ ਭਿਕ੍ਖੂਨਂ ਪਟਿਵੇਦੇਸਿ. ਤੇ ਪਟਿਵੇਦਿਤਾ ਪਞ੍ਚਸਤਖੀਣਾਸਵਾ ਪਤ੍ਤਚੀਵਰਧਾਰਾ ਹੁਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ¶ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਾ ਅਟ੍ਠਂਸੁ. ਸਤ੍ਥੁਨੋ ਪਨ ਸਲਲਾਯ ਨਾਮ ਗਨ੍ਧਕੁਟਿਯਾ ਅਵਿਦੂਰੇ ਰਤ੍ਤਸੇਤਨੀਲੁਪ੍ਪਲਕੁਮੁਦਪਦੁਮਪੁਣ੍ਡਰੀਕਸਤਪਤ੍ਤਸਹਸ੍ਸਪਤ੍ਤਜਲਜੇਹਿ ਸੋਗਨ੍ਧਿਕ ਨਾਨਾਪੁਪ੍ਫੇਹਿ ਸਞ੍ਚਨ੍ਨਾ,ਸੁਭਸੋਪਾਨਾ, ਪਸਾਦਿਤਸਮਤਿਤ੍ਤਿਕਕਾਕਪੇਯ੍ਯਸੁਰਮਣੀਯਸੀਤਲਮਧੁਰੋਦਕਾ ਸੁਫੁਲ੍ਲਪੁਪ੍ਫਫਲਧਾਰਿਤ ਨਾਨਾਵਿਧਵਿਚਿਤ੍ਤਸਾਲਸਲਲਚਮ੍ਪਕਾਸੋਕਰੁਕ੍ਖਾਨਾਗਰੁਕ੍ਖਾਦੀਹਿ ਸੁਸਜ੍ਜਿਤਭੂਮਿਪਦੇਸਾ ਅਚ੍ਚਨ੍ਤਰਮਣਿਯਾ ਪੋਕ੍ਖਰਣੀ ਅਤ੍ਥਿ. ਤਤ੍ਥ ਅਧਿਵਤ੍ਥੋ ਮਹਾਨੁਭਾਵੋ ਸੁਮਨੋਨਾਮ ਨਾਗਰਾਜਾ ਸੋਲ਼ਸਸਹਸ੍ਸਮਤ੍ਤਾਹਿ ਨਾਗਮਾਣਵਿਕਾਹਿ ਪਰਿਵੁਤੋ ਮਹਨ੍ਤਂ ਸਿਰਿਸਮ੍ਪਤ੍ਤਿਂ ਅਨੁਭਵਮਾਨੋ ਤਥਾਗਤਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਅਤ੍ਤਭਾਵਂ ਓਲੋਕੇਤ੍ਵਾ ਮਹਨ੍ਤਂ ਸੁਖਸੋਮਨਸ੍ਸਂ ਅਨੁਭਵਮਾਨੋ ਅਤ੍ਤਨੋ ਮਾਤਰਂ ਨਨ੍ਦਨਾਗਮਾਨਵਿਕਂ ਗਰੁਟ੍ਠਾਨੇ ਠਪੇਤ੍ਵਾ ਤਸ੍ਸਾ ਵੇਯ੍ਯਾਵਚ੍ਚਂ ਕੁਰੁਮਾਨੋ ਤਸ੍ਮਿਂਯੇਵ ਪੋਕ੍ਖਰਣਿਂ ਅਜ੍ਝਾਵਸਤਿ. ਸਤ੍ਥਾ ਪਨ ਅਤ੍ਤਨੋ ਗਮਨਂ ਸਂਵਿਧਾਨਾਨਨ੍ਤਰੇ ਸੁਮਨਂ ਨਾਗਰਾਜਾਨਂ ਅਵਿਦੁਰੇ ਠਿਤਂ ਆਮਨ੍ਤੇਤ੍ਵਾ ਸਪਰਿਵਾਰੋ ਆਗਚ੍ਛਾ ਹੀਤਿ ਆਹ. ਸੋ ਸਾਧੁਤਿ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਪਰਿਵਾਰੇ ਛਕੋਟਿਮਤ੍ਤੇ ਨਾਗੇ ਗਹੇਤ੍ਵਾ ਸੁਪੁਪ੍ਪੀਤਚਮ੍ਪਕਰੁਕ੍ਖਂ ਤਥਾਗਤਸ੍ਸ ਸੂਰਿਯਰਂਸਿਨਿਵਾਰਣਤ੍ਥਂ ਛਤ੍ਤਂ ਕਤ੍ਵਾ ਗਣ੍ਹਿ. ਅਥ ਭਗਵਾ ਰਵਿਰਸ੍ਮਿਪਤ੍ਥਟਸੁਵਣ੍ਣਪਬ੍ਬਤੋ ਵਿਯ ਵਿਰੋਚਮਾਨੋ ਅਤ੍ਤਨੋ ਪਤ੍ਤਚੀਵਰਮਾਦਾਯ ਆਕਾਸਂ ਅਬ੍ਭੂਗ੍ਗਞ੍ਛਿ. ਸਤ੍ਥਾਰਂ ਪਰਿਵਾਰੇਤ੍ਵਾ ਠੀਤਾ ਤੇ ਪਞ੍ਚਸਤਖੀਣਾਸਵਾਪਿ ਸਕਂ ਸਕਂ ਪਤ੍ਤਚੀਵਰਮਾਦਾਯ ਆਕਾਸਂ ਉਗ੍ਗਨ੍ਤ੍ਵਾ ਸਤ੍ਥਾਰਂ ਪਰਿਵਾਰਯਿਂਸੁ. ਸਤ੍ਥਾ ਪਞ੍ਚਸਤਖੀਣਾਸਵਪਰਿਵੁਤੋ ਵਿਸਾਖਪੁਣ੍ਣਮੁਪੋਸਥਦਿਵਸੇ ਕਲ੍ਯਾਣਿਯਂ ਗਨ੍ਤ੍ਵਾ ਮਹਾਰਹੇ ਮਣ੍ਡਪਮਜ੍ਝੇ ਪਞ੍ਞਤ੍ਤਵਰ ਬੁਦ੍ਧਾਸਨੇ ਪਞ੍ਚਸਤਖੀਣਾਸਵਪਰਿਵੁਤੋ ਹੁਤ੍ਵਾ ਨਿਸੀਦਿ.

ਅਥ ਮਣਿਅਕ੍ਖਿਕੋ ਨਾਮ ਨਾਗਰਾਜਾ ਬੁਦ੍ਧਪਮੁਖਂ ਭਿਕ੍ਖੁ ਸਙ੍ਘਂ ਅਨੇਕੇਹਿ ਦਿਬ੍ਬੇਹਿ ਖਜ੍ਜਭੋਜ੍ਜੇਹਿ ਸਨ੍ਤਪ੍ਪੇਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤਸ੍ਸ ਭਤ੍ਤਾਨੁਮੋਦਨਂ ਕਤ੍ਵਾ ਸੁਮਨਕੁਟੇ ਪਦਲਞ੍ਛਨਂ ਦਸ੍ਸੇਤ੍ਵਾ ਤਸ੍ਮਿਂ ਪਬ੍ਬਤਪਾਦੇ ਅਨੇਕਪਾਦਪਾਕਿਣ੍ਣਭੂਮਿਪ੍ਪਦੇਸੇ ਨਿਸਿਨ੍ਨੋ ਦਿਵਾਵਿਹਾਰਂ ਕਤ੍ਵਾ ਤਤੋ ਵੁਟ੍ਠਾਯ ਦੀਘਵਾਪਿਚੇਤਿਯਟ੍ਠਾਨੇ ਸਮਾਪਤ੍ਤਿਂ ਸਮਾਪਜ੍ਜਿ. ਮਹਾਪਥਵੀ ਉਦਕਪਰਿਯਨ੍ਤਂ ਕਤ੍ਵਾ ਸਤਵਾਰਂ ਸਹਸ੍ਸਵਾਰਂ ਸਙ੍ਕਮ੍ਪਿ. ਤਤ੍ਥ ਮਹਾਸੇਨਂ ਨਾਮ ਦੇਵਪੁਤ੍ਤਂ ਆਰਕ੍ਖਤ੍ਥਾਯ ਨਿਵਤ੍ਤੇਤ੍ਵਾ ਤਤੋ ¶ ਵੁਟ੍ਠਾਯ ਮਹਾਥੂਪਟ੍ਠਾਨੇ ਤਥੇਵ ਸਮਾਪਤ੍ਤਿਂ ਸਮਾਪਜ੍ਜਿ. ਮਹਾਪਥਵਿ ਤਥੇਵ ਕਮ੍ਪਿ. ਤਤ੍ਰਾਪਿ ਵਿਸਾਲਰੂਪ ਦੇਵਪੁਤ੍ਤਂ ਆਰਕ੍ਖਂ ਗਣ੍ਹਨਤ੍ਥਾਯ ਠਪੇਤ੍ਵਾ ਤਤੋ ਵੁਟ੍ਠਾਯ ਥੂਪਾਰਾਮ ਚੇਤਿਯਟ੍ਠਾਨੇ ਤਥੇਵ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿ. ਮਹਾਪਥਵੀ ਤਥੇਵ ਕਮ੍ਪਿ. ਤਤ੍ਥ ਚ ਪਥਵਿਪਾਲ ਦੇਵਪੁਤ੍ਤਂ ਆਰਕ੍ਖਤ੍ਥਾਯ. ਨਿਵਤ੍ਤੇਤ੍ਵਾ ਤਤੋ ਵੁਟ੍ਠਾਯ ਮਰਿਚਵਟ੍ਟਿਚੇਤਿਯਟ੍ਠਾਨਂ ਗਨ੍ਤ੍ਵਾ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸਮਾਪਤ੍ਤਿਂ ਅਪ੍ਪਯਿ. ਪਥਵਿ ਤਥੇਵ ਕਮ੍ਪਿ. ਤਸ੍ਮਿਂ ਠਾਨੇ ਇਨ੍ਦਕਦੇਵਪੁਤ੍ਤਂ ਆਰਕ੍ਖਂ ਗਣ੍ਹਨਤ੍ਥਾਯ ਠਪੇਸਿ. ਤਤੋ ਵੁਟ੍ਠਾਯ ਕਾਚਰਗਾਮਚੇਤਿਯਟ੍ਠਾਨੇ ਤਥੇਵ ਸਮਾਪਤ੍ਤਿਂ ਸਮਾਪਜ੍ਜਿ. ਪਥਵਿ ਤਥੇਵ ਕਮ੍ਪਿ. (ਤਸ੍ਮਿਂ ਠਾਨੇ ਮਹਾਘੋਸ ਦੇਵਪੁਤ੍ਤਂ ਆਰਕ੍ਖਂ ਗਣ੍ਹਨਤ੍ਥਾਯ ਨਿਯ੍ਯਾਦੇਸਿ) ਏਤਸ੍ਮਿਂ ਮਹਾਚੇਤਿਯਟ੍ਠਾਨੇ ਮਹਾਘੋਸਂ ਨਾਮ ਦੇਵਪੁਤ੍ਤਂ ਆਰਕ੍ਖਂ ਗਹਣਤ੍ਥਾਯ ਨਿਵਤ੍ਤੇਤ੍ਵਾ ਤਤੋ ਵੁਟ੍ਠਾਯ ਤਿਸ੍ਸਮਹਾਵਿਹਾਰਚੇਤਿਯਟ੍ਠਾਨੇ ਤਥੇਵ ਸਮਾਪਤ੍ਤਿਂ ਸਮਾਪਜ੍ਜਿ. ਪਥਵਿ ਤਥੇਵ ਕਮ੍ਪਿ. ਤਤ੍ਥ ਮਣਿਮੇਖਲਂ ਨਾਮ ਦੇਵਧੀਤਰਂ ਆਰਕ੍ਖਂ ਗਾਹਾਪੇਤ੍ਵਾ ਤਤੋ ਨਾਗਮਹਾਵਿਹਾਰਚੇਤਿਯਟ੍ਠਾਨੇ ਤਥੇਵ ਸਮਾਪਤ੍ਤਿਂ ਸਮਾਪਜ੍ਜਿ. ਪਥਵਿ ਤਥੇਵ ਕਮ੍ਪਿ. ਤਸ੍ਮਿਮ੍ਪਿ ਮਹਿਨ੍ਦਂ ਨਾਮ ਦੇਵਪੁਤ੍ਤਂ ਆਰਕ੍ਖਂ ਗਹਣਤ੍ਥਾਯ ਠਪੇਸਿ. ਤਤੋ ਵੁਟ੍ਠਾਯ ਮਹਾਗਙ੍ਗਾਯ ਦਕ੍ਖਿਣਦਿਸਾਭਾਗੇ ਸੇਰੁ ਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਮਤ੍ਥਕੇ ਅਤਿਮਨੋਰਮਂ ਉਦਕਬੁਬ੍ਬੁਲ਼ਕੇਲਾਸਕੂਟਪਟਿਭਾਗਂ ਚੇਤਿਯਂ ਪਤਿਟ੍ਠਹਿਸ੍ਸਤੀ’ਤਿ ਪਞ੍ਚਸਤਖੀਣਾਸਵੇਹਿ ਸਦ੍ਧਿਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿ. ਬਹਲਘਨਮਹਾਪਥਵਿ ਪਰਿਬ੍ਭਮਿਤਕੁਮ੍ਭਕਾਰਚਕ੍ਕਂ ਵਿਯ ਪਭਿਨ੍ਤਮਦਮਹਾ ਹਤ੍ਥਿਨਾਗਸ੍ਸ ਕੁਞ੍ਚਨਾਦਕਰਣਂ ਵਿਯ ਉਚ੍ਛੁਕੋਟ੍ਟਨ ਯਨ੍ਤ-ਮੁਖਸਦ੍ਦੋ ¶ ਵਿਯ (ਚ) ਸਤਵਾਰਂ ਸਹਸ੍ਸਵਾਰਂ ਨਦਮਾਨਾ ਸੋਮਨਸ੍ਸਪ੍ਪਤ੍ਤਾ ਵਿਯ ਸਕਲਲਙ੍ਕਾਦੀਪਂ ਉਨ੍ਨਾਦਂ ਕੁਰੁਮਾਨਾ ਸਂਕਮ੍ਪਿ. ਤਤੋ ਵੁਟ੍ਠਾਯ ਸੁਮਨਨਾਗਰਞ੍ਞੋ ਹਤ੍ਥੇਸੁ ਠਿਤ ਚਮ੍ਪਕਰੁਕ੍ਖਤੋ ਪੁਪ੍ਫਾਨਿ ਆਦਾਯ ਤਤ੍ਥ ਪੂਜੇਤ੍ਵਾ ਪੁਨਪ੍ਪੁਨਂ ਤਂ ਓਲੋਕੇਸਿ. ਸੋ ਸਤ੍ਥਾਰਂ ਵਨ੍ਦਿਤ੍ਵਾ ਮਯਾ ਭਨ੍ਤੇ ਕਿਂ ਕਤ੍ਤਬ੍ਬਨ੍ਤਿ ਪੁਚ੍ਛਿ. ਇਮਸ੍ਸ ਠਾਨਸ੍ਸ ਆਰਕ੍ਖਂ ਕਰੋਹੀਤਿ ਆਹ. ਸੋ ਤਂ ਸੁਤ੍ਵਾ ਭਨ੍ਤੇ ਤੁਮ੍ਹਾਕਂ ਗਨ੍ਧਕੁਟਿਂ ਮਮ ਆਰਕ੍ਖਂ ਕਰੋਨ੍ਤਸ੍ਸ ਰੂਪਸੋਭਗ੍ਗਪ੍ਪਤ੍ਤਂ ਅਸੀਤ੍ਯਾਨੁਬ੍ਯਞ੍ਜਨਬ੍ਯਾਮਪ੍ਪਭਾਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਿਚਿਤ੍ਤਂ ਦਸ੍ਸਨਾਨੁਤ੍ਤਰਿਯਭੂਤਂ ਪਸ੍ਸਨ੍ਤਸ੍ਸ ਮਨੋਸਿਲਾਤਲੇ ਸੀਹਨਾਦਂ ਨਦਨ੍ਤੋ ਤਰੁਣਸੀਹੋ ਵਿਯ ਗਜ੍ਜਨ੍ਤੋ ਪਾਵੁਸ੍ਸਕਮਹਾਮੇਘੋ ਵਿਯ ਆਕਾਸਗਙ੍ਗਂ ਓਤਰਨ੍ਤੋ ਵਿਯ ਰਤਨਦਾਮਂ ਗਨ੍ਥੇਨ੍ਤੋ ਵਿਯ ਚ ਅਟ੍ਠਙ੍ਗਸਮਨ੍ਨਾਗਤਂ ਸਵਨੀਯਸਰਂ ਵਿਸ੍ਸਜ੍ਜੇਤ੍ਵਾ ਬ੍ਰਮ੍ਹਘੋਸਂ ਨਿਚ੍ਛਾਰੇਨ੍ਤੋ ਨਾਨਾਨਯੇਹਿ ਵਿਚਿਤ੍ਤਕਥਂ ਕਥਯਮਾਨਾਨਂ ਸਵਨਾਨੁਰਿਤ੍ਤਯਭੂਤਂ ਸਂਸਾਰਣ੍ਣਵਨਿਮੁਗ੍ਗਾਨਂ ਤਾਰਣਸਮਤ੍ਥਂ ਮਧੁਰ ਧਮ੍ਮਦੇਸਨਂ ਸੁਣਨ੍ਤਸ੍ਸ, ਞਾਣਿਦ੍ਧਿਯਾ ਕੋਟਿਪ੍ਪਤ੍ਤੇ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਅਸੀਤਿਮਹਾਸਾਵਕੇ ਪਸ੍ਸਨ੍ਤਸ੍ਸ, ਤਤ੍ਥੇਵ ਮਯ੍ਹਂ ਵਸਨਂ ਰੁਚ੍ਚਤਿ. ਨ ਸਕ੍ਕੋਮਿ ਅਞ੍ਞਤ੍ਥ ਤੁਮ੍ਹੇਹਿ ਵਿਨਾ ਵਸਿਤੁਨ੍ਤਿ ਆਹ. ਭਗਵਾ ਤਸ੍ਸ ਕਥਂ ਸੁਤ੍ਵਾ ਨਗਰਾਜ, ਇਮਂ ਪਦੇਸਂ ਤਯਾ ਚਿਰਂ ਵਸਿਤਟ੍ਠਾਨਂ. ਕਕੁਸਨ੍ਧਸ੍ਸ ਭਗਵਤੋ ਧਾਤੁ ਇਮਸ੍ਮਿਂਯੇਵ ਠਾਨੇ ਪਤਿਟ੍ਠਿਤਾ, ਤ੍ਵਮੇਵ ਤਸ੍ਮਿਂ ਕਾਲੇ ਵਰਨਿਦ੍ਦੋ ਨਾਮ ਨਾਗਰਾਜਾ ਹੁਤ੍ਵਾ ਤਸ੍ਸਾ ਧਾਤੁਯਾ ਆਰਕ੍ਖਂ ਗਹੇਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਰੋਨ੍ਤੋ ਚਿਰਂ ਵਿਹਾਸਿ. ਪੁਨ ਕੋਣਾਗਮਨਸ੍ਸ ਭਗਵਤੋ ਧਾਤੁ ਇਮਸ੍ਮਿਂਯੇਵ ਠਾਨੇ ਪਤਿਟ੍ਠਿਤਾ ਤ੍ਵਮੇਵ ਤਸ੍ਮਿਂ ਕਾਲੇ ਜਯਸੇਨੋ ਨਾਮ ਦੇਵਪੁਤ੍ਤੋ ਹੁਤ੍ਵਾ ਤਸ੍ਸਾ ਧਾਤੁਯਾ ਆਰਕ੍ਖਂ ਗਹੇਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ਤਤ੍ਥੇਵ ਚਿਰਂ ਵਿਹਾਸਿ. ਪੁਨ ਕਸ੍ਸਪਸ੍ਸ ਭਗਵਤੋ ਧਾਤੁ ਇਮਸ੍ਮਿਂਯੇਵ ਠਾਨੇ ਪਤਿਟ੍ਠਿਤਾ. ਤ੍ਵਮੇਵ ਤਸ੍ਮਿਂ ਕਾਲੇ ਦੀਘਸਾਲੋ ਨਾਮ ਨਾਗਰਾਜਾ ਹੁਤ੍ਵਾ ਤਾਯ ਧਾਤੁਯਾ ਆਰਕ੍ਖਂ ਗਹੇਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਰੋਨ੍ਤੋ ਵਿਹਾਸਿ. ਮਯਿ ਪਨ ਪਰਿਨਿਬ੍ਬੁਤੇ ਕਾਕਵਣ੍ਣਤਿਸ੍ਸਮਹਾਰਾਜਾ ਮਯ੍ਹਂ ਨਲਾਟਧਾਤੁਂ ਇਮਸ੍ਮਿਂਯੇਵ ¶ ਠਾਨੇ ਪਤਿਟ੍ਠਾਪੇਸ੍ਸਤਿ, ਤਸ੍ਮਾ ਤ੍ਵਂ ਇਮਸ੍ਸ ਠਾਨਸ੍ਸ ਆਰਕ੍ਖਂ ਕਰੋਹੀਤਿ ਵਤ੍ਵਾ ਪਞ੍ਚਸੀਲੇਸੁ ਪਤਿਟ੍ਠਾਪੇਤ੍ਵਾ ਪਞ੍ਚਸਤਖੀਣਾਸਵੇਹਿ ਸਦ੍ਧਿਂ ਚੇਤਿਯਟ੍ਠਾਨਂ ਪਦਕ੍ਖਿਣਂ ਕਤ੍ਵਾ ਤ੍ਵਂ ਅਪ੍ਪਮਤ੍ਤੋ ਹੋਹੀਤਿ ਵਤ੍ਵਾ ਆਕਾਸਂ ਉਪ੍ਪਤਿਤ੍ਵਾ ਜੇਤਵਨਮੇਵ ਗਤੋ.

ਤਸ੍ਸ ਪਨ ਨਾਗਰਞ੍ਞੋ ਮਾਤਾ ਇਨ੍ਦਮਾਨਵਿਕਾ ਨਾਮ ਆਗਨ੍ਤ੍ਵਾ ਤਥਾਗਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ, ਭਨ੍ਤੇ ਮਮ ਪੁਤ੍ਤੋ ਸੁਮਨੋ ਨਾਮ ਨਾਗਰਾਜਾ ਕੁਹਿਨ੍ਤਿ ਆਹ. ਤਵ ਪੁਤ੍ਤੋ ਤਮ੍ਬਪਣ੍ਣਿਦੀਪੇ ਮਹਾਵਾਲੁਕਗਙ੍ਗਾਯ ਦਕ੍ਖਿਣਭਾਗੇ ਸੇਰੁ ਨਾਮ ਦਹਸ੍ਸ ਸਮੀਪੇ ਵਰਾਹ ਨਾਮ ਸੋਣ੍ਡਿਯਂ ਸਮਾਧਿ ਅਪ੍ਪਿਤਤ੍ਤਾ ਅਤ੍ਤਨੋ ਪਰਿਵਾਰੇ ਛਕੋਟਿਮਤ੍ਤੇ ਨਾਗੇ ਗਹੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਭਨ੍ਤੇ ਇਤੋ ਪਟ੍ਠਾਯ ਤੁਮ੍ਹਾਕਂ ਦਸ੍ਸਨਂ ਦੁਲ੍ਲਭਂ, ਖਮਥ ਮੇਤਿ ਅਚ੍ਚਯਂ ਦੇਸੇਤ੍ਵਾ ਮਹਤਿਂ ਨਾਗਸਮ੍ਪਤ੍ਤਿਂ ਗਹੇਤ੍ਵਾ ਪੁਤ੍ਤਸ੍ਸ ਸੁਮਨਨਾਗਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ਮਹਤਿਂ ਇਸ੍ਸਰਿਯਸਮ੍ਪਤ੍ਤਿਂ ਅਨੁਭਵਨ੍ਤਿ ਤਤ੍ਥੇਵ ਆਰਕ੍ਖਂ ਗਹੇਤ੍ਵਾ ਚਿਰਂ ਵਿਹਾਸਿ.

ਮਹਾਪਞ੍ਞੋ ਮਹਾਸਦ੍ਧੋ ਮਹਾਵੀਰੋ ਮਹਾਇਸਿ,

ਮਹਾਬਲੇਨ ਸਮ੍ਪਨ੍ਨੋ ਮਹਨ੍ਤਗੁਣਭੁਸਿਤੋ;

ਗਨ੍ਤ੍ਵਾਨ ਤਮ੍ਬਪਣ੍ਣਿਂ ਸੋ ਸਤ੍ਤਾਨੁਦ੍ਦਯਮਾਨਸੋ,

ਗਨ੍ਤ੍ਵਾ ਨਾਗਵਰਂ ਦੀਪਂ ਅਗਾ ਜੇਤਵਨਂ ਵਿਦੁ.

ਅਤਿਸਯਮਤਿਸਾਰੋ ਸਾਰਦਾਨਂ ਕਰੋਨ੍ਤੋ,

ਅਤਿਅਧਿਰਮਣਿਯੋ ਸਬ੍ਬਲੋਕੇਕਨੇਤ੍ਤੋ;

ਅਤਿਗੁਣਧਰਣੀਯੋ ਸਬ੍ਬਸਤ੍ਤੇ ਤਮਗ੍ਗਂ,

ਅਤਿਵਿਪੁਲਦਯੋ ਤਾਨੇਤੁਮਾਗਾ ਸੁਦੀਪਂ.

ਤਤਿਯਗਮਨਕਥਾ ਸਮਤ੍ਤਾ.

ਇਤਿ ਅਰਿਯਜਨਪਸਾਦਨਤ੍ਥਾਯ ਕਤੇ ਧਾਤੁਵਂਸੇ ਤਥਾਗਤਸ੍ਸ ਗਮਨਂ ਨਾਮ ਪਠਮੋ ਪਰਿਚ੍ਛੇਦੋ.

ਆਗਨ੍ਤ੍ਵਾ ਤਮ੍ਬਪਣ੍ਣਿਂ ਸੋ ਸਤ੍ਤਾਨੁਦ੍ਦਯਮਾਨਸੋ

ਪੁਨ ਗਨ੍ਤ੍ਵਾ ਨਾਗਦੀਪਂ ਅਗਾ ਜੇਤਵਨਂ ਵਰਂ

ਅਤਿਸਯਮਤਿਸਾਰੋ ਸਾਰਦਾਨੇਕ ਰਤ੍ਤੋ

ਅਤਿਧਿਤਿਰਮਣਿਯੋ ਸਬ੍ਬਲੋਕੇਕਨੇਤ੍ਤੋ

ਅਤਿਗੁਣਰਮਣੀਯਂ ਸਬ੍ਬਸਨ੍ਤੇਕਮਗ੍ਗਂ

ਅਤਿਵਿਪੁਲਦਯਤ੍ਤਾ ਲਙ੍ਕਮਾਗਾ ਸੁਦੀਪਂ

ਇਤਿ ਸੀਹਲ਼ਭਾਸਾਯ ਕਤੇ ਧਾਤੁਵਂਸੇ ਦਿਸ੍ਸਤੇ.

੨. ¶ ਪਰਿਨਿਬ੍ਬਾਨਕਥਾ

ਸਤ੍ਥਾ ਪਨ ਤਤੋ ਪਞ੍ਚਚਤ੍ਤਾਲੀਸਵਸ੍ਸਾਨਿ ਤਿਪਿਟਕਪਰਿਯਤ੍ਤਿਧਮ੍ਮਂ ਦੇਸੇਤ੍ਵਾ ਵੇਨੇਯ੍ਯਜਨੇ ਸਂਸਾਰਤੋ ਚਤੁਅਰਿਯਮਗ੍ਗਫਲਪਟਿਲਾਭਵਸੇਨ ਉਦ੍ਧਾਰੇਤ੍ਵਾ ਨਿਬ੍ਬਾਨੇ ਪਤਿਟ੍ਠਾਪੇਤ੍ਵਾ ਪਚ੍ਛਿਮੇ ਕਾਲੇ ਵੇਸਾਲਿਨਗਰਂ ਉਪਨਿਸ੍ਸਾਯ ਚਾਪਾਲਚੇਤਿਯਂ ਨਿਸ੍ਸਾਯ ਵਿਹਰਨ੍ਤੋ ਮਾਰੇਨ ਪਰਿਨਿਬ੍ਬਾਨਤ੍ਥਾਯ ਆਰਾਧਿਤੋ ਸਤੋ ਸਮ੍ਪਜਾਨੋ ਆਯੁਸਙ੍ਖਾਰੇ ਵਿਸ੍ਸਜ੍ਜੇਸਿ. ਤਸ੍ਸ ਵਿਸ੍ਸਟ੍ਠਭਾਵਂ ਆਨਨ੍ਦੋਯੇਵ ਅਞ੍ਞਾਸਿ. ਅਞ੍ਞੋ ਕੋਚਿਪਿ ਜਾਨਨ੍ਤੋ ਨਾਮ ਨਤ੍ਥਿ. ਤਸ੍ਮਾ ਭਿਕ੍ਖੁਸਙ੍ਘਮ੍ਪਿ ਜਾਨਾਪੇਸ੍ਸਾਮੀਤਿ ਜੇਤਵਨਮਹਾਵਿਹਾਰਂ ਗਨ੍ਤ੍ਵਾ ਸਬ੍ਬਂ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖਵੇ ਤਥਾਗਤਸ੍ਸ ਨ ਚਿਰਸ੍ਸੇਵ ਤਿਣ੍ਣਂ ਮਾਸਾਨਂ ਅਚ੍ਚਯੇਨ ਪਰਿਨਿਬ੍ਬਾਨਂ ਭਵਿਸ੍ਸਤਿ, ਤੁਮ੍ਹੇ ਸਤ੍ਤਤਿਂਸਬੋਧਿ ਪਕ੍ਖਿਯਧਮ੍ਮੇਸੁ ਸਮਗ੍ਗਾ ਹੁਤ੍ਵਾ ਏਕੀਭਾਵਾ ਹੋਥ, ਤੁਮ੍ਹੇ ਵਿਵਾਦਂ ਮਾ ਕਰੋਥ. ਅਪ੍ਪਮਾਦੇਨ ਤਿਸ੍ਸੋ ਸਿਕ੍ਖਾ ਸਮ੍ਪਾਦੇਥਾਤਿ ਵਤ੍ਵਾ ਪੁਨ ਦਿਵਸੇ ਵੇਸਾਲਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਾ ਪਟਿਕ੍ਕਮਿਤ੍ਵਾ ਭਣ੍ਡਗਾਮਂ ਗਤੋ. ਭਣ੍ਡਗਾਮਤੋ ਹਤ੍ਥਿਗਾਮਂ ਹਤ੍ਥਿਗਾਮਤੋ ਅਮ੍ਬਗਾਮਂ ਅਮ੍ਬਗਾਮਤੋ ਜਮ੍ਬੁਗਾਮਂ ਜਮ੍ਬੁਗਾਮਤੋ ਨਿਗ੍ਰੋਧਗਾਮਂ ਨਿਗ੍ਰੋਧਗਾਮਤੋ ਭੋਗਨਗਰਂ ਭੋਗਨਗਰਤੋ ਪਾਵਾਨਗਰਂ ਪਾਵਾਨਗਰਤੋ ਕੁਸਿਨਾਰਾਨਗਰਂ ਪਤ੍ਤੋ. ਤਤ੍ਥ ਯਮਕਸਾਲਾਨਮਨ੍ਤਰੇ ਠੀਤੋ ਆਨਨ੍ਦਤ੍ਥੇਰਂ ਆਮਨ੍ਤੇਤ੍ਵਾ ਉਨ੍ਤਰਸੀਸਕਂ ਕਤ੍ਵਾ ਮਞ੍ਚਕਂ ਪਞ੍ਞਾਪੇਹਿ ਕਿਲਨ੍ਤੋਸ੍ਮਿ ਆਨਨ੍ਦ ਨਿਪਜ੍ਜਿਸ੍ਸਾਮਿ’ਤਿ ਆਹ. ਤਂ ਸੁਤ੍ਵਾ ਆਨਨ੍ਦਤ੍ਥੇਰੋ ਉਤ੍ਤਰਸੀਸਕਂ ਕਤ੍ਵਾ ਮਞ੍ਚਕਂ ਪਞ੍ਞਾਪੇਤ੍ਵਾ ਚਤੁਗ੍ਗੁਣਂ ਸਙ੍ਘਾਟਿਂ ਅਤ੍ਥਰਿਤ੍ਵਾ ਪਞ੍ਚਚਤ੍ਤਾਲੀਸਵਸ੍ਸਾਨਿ ਅਸਯਿਤਬੁਦ੍ਧਸੇਯ੍ਯਂ ਸਯਨ੍ਤੋ ਦਕ੍ਖਿਣਪਸ੍ਸੇਨ ਸਤੋ ਸਮ੍ਪਜਾਨੋ ਅਨੁਟ੍ਠਾਨਸਞ੍ਞਂ ਮਨਸਿਕਰਿਤ੍ਵਾ ਸੀਹਸੇਯ੍ਯਂ ਕਪ੍ਪੇਸਿ.

ਅਤੀਤਮਦ੍ਧਾਨ ਭਵੇ ਚਰਨ੍ਤੋ,

ਅਨਨ੍ਤਸਤ੍ਤੇ ਕਰੁਣਾਯੁਪੇਤੋ;

ਕਤ੍ਵਾਨ ਪੁਞ੍ਞਾਨਿ ਅਨਪ੍ਪਕਾਨਿ,

ਪਤ੍ਤੋ ਸਿਵਂ ਲੋਕਹਿਤਾਯ ਨਾਥੋ.

ਏਵਂ ¶ ਹਿ ਸੋ ਦਸਬਲੋਪਿ ਵਿਹੀਨਥਾਮੋ,

ਯਮਸ੍ਸ ਸਾਲਾਨ ਨਿਪਜ੍ਜਿ ਮਜ੍ਝੇ;

ਕਤ੍ਵਾਨ ਸਞ੍ਞਞ੍ਹਿ ਅਨੁਟ੍ਠਹਾਨਂ,

ਸ ਇਦ੍ਧਿਮਾ ਮਾਰਮੁਖਂ ਪਵਿਟ੍ਠੋ.

ਤਸ੍ਮਿਂ ਖਣੇ ਸਮਕਸਾਲਾ ਸੁਪੁਪ੍ਫਿਤਾ ਅਹੇਸੁਂ. ਨ ਕੇਵਲਂ ਯਮਕਸਾਲਾਯੇਵ ਸੁਪੁਪ੍ਫੀਤਾ, ਅਥ ਖੋ ਦਸਸਹਸ੍ਸੀ ਲੋਕਧਾਤੁ ਚਕ੍ਕਵਾਲ਼ੇਸੁ ਸਾਲਰੁਕ੍ਖਾਪਿ ਪੁਪ੍ਫਿਤਾ. ਨ ਸਾਲਰੁਕ੍ਖਾਯੇਵ ਸੁਪੁਪ੍ਫਿਤਾ, ਅਥ ਖੋ ਯਂ ਕਿਞ੍ਚਿ ਪੁਪ੍ਫੁਪਗਫਲੂਪਗ ਰੁਕ੍ਖਜਾਤਂ ਸਬ੍ਬਮ੍ਪਿ ਪੁਪ੍ਫਞ੍ਚ ਫਲਞ੍ਚ ਗਣ੍ਹਿ. ਜਲੇਸੁ ਜਲਪਦੁਮਾਨਿ ਥਲੇਸੁ ਥਲਪਦੁਮਾਨਿ ਖਨ੍ਧੇਸੁ ਖਨ੍ਧਪਦੁਮਾਨਿ ਸਾਖਾਸੁ ਸਾਖਾਪਦੁਮਾਨਿ ਲਤਾਸੁ ਲਤਾਪਦੁਮਾਨਿ ਆਕਾਸੇ ਓਲਮ੍ਬਪਦੁਮਾਨਿ ਪਿਟ੍ਠਿਪਾਸਾਣੇ ਹਿਨ੍ਦਿਤ੍ਵਾ ਸਤਪਤ੍ਤਪਦੁਮਾਨਿ ਸੁਪੁਪ੍ਫਿਤਾਨਿ ਅਹੇਸੁਂ. ਪਥਵਿਤੋ ਯਾਵ ਬ੍ਰਹ੍ਮਲੋਕੋ ਤਾਵ ਦਸਸਹਸ੍ਸਿ ਚਕ੍ਕਵਾਲ਼ਾ ਏਕਮਾਲਾਗੁਣਾ ਵਿਯ ਅਹੇਸੁਂ. ਦੇਵਾ ਆਕਾਸਤੋ ਦਿਬ੍ਬਮਨ੍ਦਾਰਵਪਾਰਿਚ੍ਛਤ੍ਤਕਕੋਵਿਲ਼ਾਰਪੁਪ੍ਫਾਨਿ ਚ ਚਨ੍ਦਨਚੁਣ੍ਣਾਨਿ ਚ ਸਮਾਕਿਰਨ੍ਤਿ. ਦਿਬ੍ਬਤੁਰਿਯਸਙ੍ਗਿਤਿਯੋ ਚ ਅਨ੍ਤਲਿਕ੍ਖੇ ਪਵਤ੍ਤਨ੍ਤਿ. ਅਨੇਕਾਨਿ ਅਚ੍ਛਰਿਯਸਹਸ੍ਸਾਨਿ ਅਹੇਸੁਂ. ਏਵਂ ਪੂਜਾਵਿਸੇਸੇ ਪਵਤ੍ਤਮਾਨੇ ਪਠਮਯਾਮੇ ਸੁਭਦ੍ਦਪਰਿਬ੍ਬਾਜਕਂ ਵਿਨੇਤ੍ਵਾ ਮਜ੍ਝਿਮਯਾਮੇ ਦਸਸਹਸ੍ਸਿ ਲੋਕਧਾਤੁ ਦੇਵਤਾਨਂ ਅਨੁਸਾਸਿਤ੍ਵਾ ਪਚ੍ਛਿਮਯਾਮਾਵਸਾਨੇ ਪਠਮਜ੍ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਦੁਤਿਯਜ੍ਝਾਨਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿ. ਤਤੋ ਵੁਟ੍ਠਾਯ ਆਕਾਸਾਨਞ੍ਚਾਯਤਨਂ ਵਿਞ੍ਞਾਣਞ੍ਚਾਯਤਨਂ ਆਕਿਞ੍ਚਞ੍ਞਾਯਤਨਂ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿ. ਤਤੋ ਵੁਟ੍ਠਾਯ ਪਠਮਜ੍ਝਾਨਂ ਦੁਤਿਯਜ੍ਝਾਨਂ ਤਤਿਯਜ੍ਝਾਨਂ ਚਤੁਤ੍ਥਜ੍ਝਾਨਞ੍ਚ ਸਮਾਪਜ੍ਜਿ. ਤਤੋ ਵੁਟ੍ਠਾਯ ਏਤ੍ਥਨ੍ਤਰਤੋ ਅਨੁਪਾਦਿਸੇਸਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਮਹਾਮੋਹਤਮਂ ਹਨ੍ਤ੍ਵਾ ਸਤ੍ਤਾਨਂ ਹਦਯਸ੍ਸਿਤਂ,

ਰਵੀਵ ਜੋਤਮਾਨੋ ਸੋ ਲੋਕਸ੍ਸ ਅਨੁਕਮ੍ਪਕੋ;

ਵਸ੍ਸਾਨਿ ¶ ਪਞ੍ਚਤਾਲੀਸਂ ਕਤ੍ਵਾ ਸਤ੍ਤਹਿਤਂ ਬਹੁਂ,

ਅਧੁਨਾ ਅਗ੍ਗਿਕ੍ਖਨ੍ਧੋਵ ਪਰਿਨਿਬ੍ਬਾਯਿ ਸੋ ਜਿਨੋ.

ਏਵਂ ਪਨ ਭਗਵਤਿ ਪਰਿਨਿਬ੍ਬੁਤੇ ਵਿਸ੍ਸਕਮ੍ਮਦੇਵਪੁਤ੍ਤੋ ਤਥਾਗਤਸ੍ਸ ਸਰੀਰਪ੍ਪਮਾਣਂ ਵਰਦੋਣਿਂ ਰਤਨੇਹਿ ਮਾਪੇਤ੍ਵਾ ਵਿਸੁਦ੍ਧਕਪ੍ਪਾਸੇਹਿ ਤਥਾਗਤਸ੍ਸ ਸਰੀਰਂ ਵੇਠੇਤ੍ਵਾ ਰਤਨਦੋਣਿਯਂ ਪਕ੍ਖਿਪਿਤ੍ਵਾ ਗਨ੍ਧਤੇਲੇਹਿ ਪੂਰੇਤ੍ਵਾ ਅਪਰਾਯ ਦੋਣਿਯਾ ਪਿਦਹਿਤ੍ਵਾ ਸਬ੍ਬਗਨ੍ਧਦਾਰੁਚਿਤਕਂ ਕਤ੍ਵਾ ਯੇਭੁਯ੍ਯੇਨ ਦੇਵਤਾਯੋ ਲੋਹਿਤਚਨ੍ਦਨਘਟਿਕਾਯੋ ਆਦਾਯ ਚਿਤਕਾਯਂ ਪਕ੍ਖਿਪਿਤ੍ਵਾ ਅਗ੍ਗਿਂ ਗਾਹਾਪੇਤੁਂ ਨਾਸਕ੍ਖਿਂਸੁ. ਕਸ੍ਮਾ? ਮਹਾਕਸ੍ਸਪਤ੍ਥੇਰਸ੍ਸ ਅਨਾਗਤਤ੍ਤਾ. ਸੋ ਆਯਸ੍ਮਾ ਮਹਾਕਸ੍ਸਪਤ੍ਥੇਰੋ ਯੇਭੁਯ੍ਯੇਨ ਬਹੁਨ੍ਨਂ ਦੇਵਾਨਂ ਪਿਯੋ ਮਨਾਪੋ. ਥੇਰਸ੍ਸ ਹਿ ਦਾਨਂ ਦਤ੍ਵਾ ਸਗ੍ਗੇ ਨਿਬ੍ਬਤ੍ਤਾਨਂ ਪਮਾਣੋ ਨਾਮ ਨਤ੍ਥਿ. ਤਸ੍ਮਾ ਦੇਵਤਾ ਤਸ੍ਮਿਂ ਸਮਾਗਮੇ ਅਤ੍ਤਨੋ ਕੁਲੂਪਗਤ੍ਥੇਰਂ ਅਦਿਸ੍ਵਾ ਅਮ੍ਹਾਕਂ ਮਹਾਕਸ੍ਸਪਤ੍ਥੇਰੋ ਕੁਹਿਨ੍ਤਿ ਓਲੋਕੇਨ੍ਤੋ ਅਤ੍ਤਨੋ ਪਰਿਵਾਰੇਹਿ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਗ੍ਗਂ ਪਟਿਪਨ੍ਨੋਤਿ ਞਤ੍ਵਾ ਯਾਵ ਥੇਰੋ ਇਮਸ੍ਮਿਂ ਨ ਸਮ੍ਪਤ੍ਤੋ ਚਿਤਕਂ ਤਾਵ ਨ ਪਜ੍ਜਲਤੁਤਿ ਅਧਿਟ੍ਠਹਿਂਸੁ. ਤਸ੍ਮਿਂ ਕਾਲੇ ਥੇਰੋ ਯੇਭੁਯ੍ਯੇਨ ਤੇਰਸਧੁਤਙ੍ਗਧਰੇਹਿ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਆਗਨ੍ਤ੍ਵਾ ਚਿਤਕਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਪਾਦਪਸ੍ਸੇ ਠੀਤੋ, ਭਨ੍ਤੇ ਤੁਮ੍ਹਾਕਂ ਦਸ੍ਸਨਤ੍ਥਾਯ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਪਦੁਮੁਤ੍ਤਰਸਤ੍ਥੁਨੋ ਪਾਦਮੁਲੇ ਅਭਿਨੀਹਾਰਤੋ ਪਟ੍ਠਾਯ ਅਵਿਜਹਿਤ੍ਵਾ ਆਗਤੋ. ਇਦਾਨਿ ਮੇ ਅਵਸਾਨਦਸ੍ਸਨਨ੍ਤਿ ਪਾਦੇ ਗਹੇਤ੍ਵਾ ਵਨ੍ਦਿਤੁਂ ਅਧਿਟ੍ਠਾਸਿ.

ਮਹਾਕਸ੍ਸਪਥੇਰੋ ਸੋ ਭਿਕ੍ਖੁਸਙ੍ਘਪੁਰਕ੍ਖਤੋ;

ਏਕਂਸਂ ਚੀਵਰਂ ਕਤ੍ਵਾ ਪਗ੍ਗਹੇਤ੍ਵਾਨ ਅਞ੍ਜਲਿਂ.

ਪਦਕ੍ਖਿਣਞ੍ਚ ਤਿਕ੍ਖਤ੍ਤੁਂ ਕਤ੍ਵਾ ਠਤ੍ਵਾ ਪਦਨ੍ਤਿਕੇ;

ਪਤਿਟ੍ਠਹਨ੍ਤੁ ਸੀਸੇ ਮੇ ਜਿਨਪਾਦੇਤਿ’ਧਿਟ੍ਠਹਿ.

ਸਹਾਧਿਟ੍ਠਾਨਂ ਚਿਤਕਾ ਦੁਸ੍ਸਾਨਿ ਚ ਵਿਭਿਨ੍ਦਿਯ;

ਨਿਕ੍ਖਮਿਂਸੁ ਤਦਾ ਪਾਦਾ ਘਨਮੁਤ੍ਤੋਵ ਚਨ੍ਦਿਮਾ.

ਉਹੋ ਹਤ੍ਥੇਹਿ ਪਗ੍ਗਯ੍ਹ ਠਪੇਤ੍ਵਾ ਅਤ੍ਤਨੋ ਸਿਰੇ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ ਖਮਾਪੇਤ੍ਵਾ ਵਿਸਜ੍ਜਯੀ.

ਪੁਣ੍ਣਚਨ੍ਦੋ ਯਥਾ ਅਬ੍ਭਂ ਚਿਤਕਂ ਪਾਵਿਸਿ ਤਦਾ;

ਇਦਂ ਅਚ੍ਛੇਰਕਂ ਦਿਸ੍ਵਾ ਰਵਂ ਰਵਿ ਮਹਾਜਨੋ.

ਉਟ੍ਠਹਿਤ੍ਵਾਨ ਪਾਚੀਨਾ ਵਨ੍ਦੋ ਅਤ੍ਥਙ੍ਗਤੋ ਯਥਾ;

ਪਾਦੇ ਅਨ੍ਤਰਧਾਯਨ੍ਤੇ ਅਰੋਦਿਂਸੁ ਮਹਾਜਨਾ.

ਤਦਾ ਮਲ੍ਲਰਾਜਾਨੋ ਭਗਵਤੋ ਸਰੀਰਕਿਚ੍ਚਂ ਕਰਿਸ੍ਸਾਮਾਤਿ ਵਤ੍ਵਾ ਨਾਨਾਵਤ੍ਥਾਭਰਣਾਨਿ ਨਿਵਾਸੇਤ੍ਵਾ ਪਰਿਵਾਰਯਿਂਸੁ. ਤਤੋ ਰਾਜਾਨੋ ਮਨੁਸ੍ਸਾ ਚ ਅਗ੍ਗਿਂ ਦਾਤੁਂ ਆਰਹਿਂਸੁ. ਤਦਾ ਸਕ੍ਕੋ? ਮਯਿ ਪਨ ਪਰਿਨਿਬ੍ਬੁਤੇ ਸਕ੍ਕੋ ਦੇਵਰਾਜਾ ਮਣਿਜੋਤਿਰਸਂ ਪਸਾਰੇਤ੍ਵਾ ਨਿਕ੍ਖਨ੍ਤਅਗ੍ਗਿਨਾ ਮਮ ਸਰੀਰਕਿਚ੍ਚਂ ਕਰਿਸ੍ਸਤਿ. ਮਣਿਅਗ੍ਗਿਨੋ ਅਵਸਾਨੇ ਮਨੁਸ੍ਸਾ ਅਗ੍ਗਿਂ ਕਰਿਸ੍ਸਨ੍ਤਿਤਿ. ਏਵਂ ਬੁਦ੍ਧਵਚਨਂ ਪਰਿਭਾਵੇਤ੍ਵਾ ਨਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਭਗਵਤੋ ਸਰੀਰਕਿਚ੍ਚਂ ਕਤ੍ਵਾ ਸਮਨ੍ਤਤੋ ਉਟ੍ਠਹਤੁਤਿ ਅਧਿਟ੍ਠਹਿ.

ਤਸ੍ਮਿਂ ਖਣੇ ਸਯਮੇਵ ਚਿਤਕਂ ਅਗ੍ਗਿ ਗਣ੍ਹਿ. ਸਰੀਰਂ ਪਨ ਭਗਵਤੋ ਝਾਯਾਮਾਨਂ ਛਵਿਚਮ੍ਮਮਂਸਨਹਾਰੁਅਟ੍ਠਿਅਟ੍ਠਿਮਿਞ੍ਜਂ ਅਸੇਸੇਤ੍ਵਾ ਸੁਮਨਮਕੁਲ਼ਮੁਤ੍ਤਾਰਾਸਿਸਦਿਸਮੇਵ ਧਾਤੁਯੋ ਅਵਸੇਸਾ ਅਹੇਸੁਂ.

ਪਰਿਨਿਬ੍ਬੁਤਕਾਲੇਪਿ ਸਕਲਂ ਕਲੁਨਂ ਅਹੁ;

ਪਰਿਦੇਵੋ ਮਹਾ ਆਸਿ ਮਹੀ ਉਦ੍ਰਿਯਨਂ ਯਥਾ.

ਦੇਵਤਾਯਾਨੁਭਾਵੇਨ ਸਤ੍ਥੁਨੋ ਚਿਤਕੋ ਸਯਂ;

ਤਤੋ ਏਕਪ੍ਪਹਾਰੇਨ ਪਜ੍ਜਲਿਤ੍ਥ ਸਮਨ੍ਤਤੋ.

ਯਞ੍ਚ ਅਬ੍ਭਨ੍ਤਰਂ ਦੁਸ੍ਸਂ ਯਂ ਦੁਸ੍ਸਂ ਸਬ੍ਬਬਾਹਿਰਂ

ਦੁਸ੍ਸੇ ਦ੍ਵੇਵ ਨ ਝਾਯਿਂਸੁ ਤੇਸਂ ਦੁਸ੍ਸਾਨਮਨ੍ਤਰੇ;

ਯਥਾ ਨਿਰੁਦ੍ਧਤੇਲਸ੍ਸ ਨ ਮਸੀ ਨ ਚ ਛਾਰਿਕਾ;

ਏਵਮਸ੍ਸ ਨ ਦਿਸ੍ਸਤਿ ਬੁਦ੍ਧਗਤ੍ਤਸ੍ਸ ਝਾਯਤੋ.

ਸੁਮਨਮਕੁਲ਼ਸਭਾਵਾ ਚ ਧੋਤਮੁਤ੍ਤਾਭਮੇਵ ਚ;

ਸੁਵਣ੍ਣਵਣ੍ਣਸਂਕਾਸਾ ਅਵਸਿਸ੍ਸਂਸੁ ਧਾਤੁਯੋ.

ਦਾਠਾ ਚਤਸ੍ਸੋ ਉਣ੍ਹੀਸਂ ਅਕ੍ਖਕਾ ਦ੍ਵੇ ਚ ਸਤ੍ਤਿਮਾ;

ਨ ਵਿਕਿਣ੍ਣਾ ਤਤੋ ਸੇਸਾ ਵਿਪ੍ਪਕਿਣ੍ਣਾਵ ਧਾਤੁਯੋ.

ਅਹੋਸਿ ਤਨੁਕਾ ਧਾਤੁ ਸਾਸਪਬੀਜਮਤ੍ਤਿਕਾ;

ਧਾਤੁਯੋ ਮਜ੍ਝਿਮਾ ਮਜ੍ਝੇਭਿਨ੍ਨਤਣ੍ਡੁਲਮਤ੍ਤਿਕਾ.

ਧਾਤੁਯੋ ¶ ਮਹਤਿ ਮਜ੍ਝੇ ਭਿਨ੍ਨਮੁਗ੍ਗਪ੍ਪਮਾਣਿਕਾ;

ਧਾਤੁਵਣ੍ਣਾ ਤਯੋ ਆਸੁਂ ਬੁਦ੍ਧਾਧਿਟ੍ਠਾਨਤੇਜਸਾ.

ਸਾਰਿਪੁਤ੍ਤਸ੍ਸ ਥੇਰਸ੍ਸ ਸਿਸ੍ਸੋ ਸਰਭੁਨਾਮਕੋ;

ਆਦਾਯ ਜਿਨਗੀਵਟ੍ਠਿਂ ਚਿਤਕਾਤੋਵ ਧਾਤੁ ਸੋ.

ਸਦ੍ਧਿਂ ਸਿਸ੍ਸਸਹਸ੍ਸੇਨ ਚੇਤਿਯੇ ਮਹਿਯਙ੍ਗਣੇ;

ਠਪੇਤ੍ਵਾ ਚੇਤਿਯਂ ਕਤ੍ਵਾ ਕੁਸਿਨਾਰਮਗਾ ਮੁਨਿ.

ਛਲ਼ਭਿਞ੍ਞੋ ਵਸਿਪ੍ਪਤ੍ਤੋ ਖੇਮੋ ਕਾਰੁਣਿਕੋ ਮੁਨਿ;

ਸਹਸਾ ਚਿਤਕਾਤੋਵ ਵਾਮਦਾਠਂ ਸਮਗ੍ਗਹੀ.

ਆਕਾਸਤੋ ਪਤਿਤ੍ਵਾਪਿ ਨਿਕ੍ਖਮਿਤ੍ਵਾਪਿ ਸਾਲਤੋ;

ਸਮਨ੍ਤਤੋਮ੍ਬੁਮੁਗ੍ਗਨ੍ਤ੍ਵਾ ਨਿਬ੍ਬਾਪੇਸੁਂ ਜਲਾਨਲਂ.

ਮਲ੍ਲਰਾਜਗਣਾ ਸਬ੍ਬੇ ਸਬ੍ਬਗਨ੍ਧੋਦਕੇਨ ਤਂ;

ਚਿਤਕਂ ਲੋਕਨਾਥਸ੍ਸ ਨਿਬ੍ਬਾਪੇਸੁਂ ਮਹੇਸਿਨੋ.

ਏਵਂ ਪਨ ਸਬ੍ਬਲੋਕੇ ਕਰੁਣਾਧਿਕੋ ਸਮ੍ਮਾਸਮ੍ਬੁਦ੍ਧੋ ਵੇਸਾਖਪੁਣ੍ਣਮੁਪੋਸਥੇ ਅਙ੍ਗਾਰਦਿਵਸੇ ਪਰਿਨਿਬ੍ਬੁਤੋ. ਦੇਵਮਨੁਸ੍ਸਾਨਂ ਸਙ੍ਗਹਕਰਣਤ੍ਥਾਯ ਯਮਕਸਾਲਾਨਮਨ੍ਤਰੇ ਚਿਤਕਂ ਸਤ੍ਤਰਤ੍ਤਿਨ੍ਦਿਵਂ ਵਸੀ. ਤਤੋ ਵੀਸਂ ਹਤ੍ਥਸਤਿਕਸ੍ਸ ਉਪਰਿ ਸਤ੍ਤਰਤ੍ਤਿਨ੍ਦਿਵਂ ਵਸਿ. ਯਾਵ ਅਗ੍ਗਿਪਰਿਨਿਬ੍ਬਾਪਨਂ ਸਤ੍ਤਰਤ੍ਤਿਨ੍ਦਿਵਂ ਹੋਤਿ.

ਤਤੋ ਸਤ੍ਤਦਿਵਸਾਨਿ ਕੁਸਿਨਾਰਾਯਂ ਮਲ੍ਲਰਾਜਪੁਤ੍ਤੇਸੁ ਗਨ੍ਧੋਦਕੇਨ ਚਿਤਕਂ ਨਿਬ੍ਬਾਪਯਮਾਨੇਸੁ ਸਾਲਰੁਕ੍ਖਤੋ ਉਦਕਧਾਰਾ ਨਿਕ੍ਖਮਿਤ੍ਵਾ ਚਿਤਕਂ ਨਿਬ੍ਬਾਪਯਿਂਸੁ. ਤਤੋ ਦਸਬਲਸ੍ਸ ਧਾਤੁਯੋ ਸੁਵਣ੍ਣਚਙ੍ਗੋਟਕੇ ਪਕ੍ਖਿਪਿਤ੍ਵਾ ਅਤ੍ਤਨੋ ਨਗਰੇ ਸਨ੍ਥਾਗਾਰੇ ਠਪੇਤ੍ਵਾ ਸਤ੍ਤਿਪਞ੍ਜਰਂ ਕਤ੍ਵਾ ਧਨੁਪਾਕਾਰੇਹਿ ਪਰਿਕ੍ਖਿਪਾਪੇਤ੍ਵਾ ਸਤ੍ਤਾਹਂ ਨਚ੍ਚਗੀਤਵਾਦਿਤਗਨ੍ਧਮਾਲਾਦੀਹਿ ਮਲ੍ਲਰਾਜਪੁਤ੍ਤਾ ਸਕ੍ਕਾਰਂ ਕਰਿਂਸੁ.

ਤਤੋ ਤੇ ਮਲ੍ਲਰਾਜਾਨੋ ਰਮ੍ਮਂ ਦੇਵਸਭੋਪਮਂ;

ਸਬ੍ਬਥਾ ਮਣ੍ਡੁਯਿਤ੍ਵਾਨ ਸਨ੍ਥਾਗਾਰਂ ਤਤੋ ਪਨ.

ਮਗ੍ਗਂ ¶ ਅਲਙ੍ਕਰਿਤ੍ਵਾਨ ਯਾਵ ਮਕੁਟਚੇਤਿਯਾ;

ਹਤ੍ਥੀਕ੍ਖਨ੍ਧੇ ਠਪੇਤ੍ਵਾਨ ਹੇਮਦੋਣਿਂ ਸਧਾਤੁਕਂ.

ਗਨ੍ਧਾਦੀਹਿਪਿ ਪੂਜੇਤ੍ਵਾ ਕੀਲ਼ਨ੍ਤਾ ਸਾਧੁਕੀਲ਼ਿਤਂ;

ਪਵੇਸੇਤ੍ਵਾਨ ਨਗਰਂ ਸਨ੍ਥਾਗਾਰੇ ਮਨੋਰਮੇ.

ਦਸਭੂਮਸ੍ਮਿਂ ਪਲ੍ਲਙ੍ਕੇ ਠਪੇਤ੍ਵਾ ਜਿਨਧਾਤੁਯੋ;

ਉਸ੍ਸਯੁਂ ਤੇ ਤਦਾ ਛਤ੍ਤੇ ਸਨ੍ਥਾਗਾਰਸਮਨ੍ਤਤੋ.

ਹਤ੍ਥੀਹਿ ਪਰਿਕ੍ਖਿਪਾਪੇਸੁਂ ਤਤੋ ਅਸ੍ਸੇ ਤਤੋ ਰਥੇ,

ਅਞ੍ਞੋ’ਞ੍ਞਂ ਪਰਿਵਾਰੇਤ੍ਵਾ ਤਤੋ ਯੋਧੇ ਤਤੋ ਧਨੁ;

ਇਤਿ ਪਰਿਕ੍ਖਿਪਾਪੇਸੁਂ ਸਮਨ੍ਤਾ ਯੋਜਨਂ ਕਮਾ,

ਤਦਾ ਨਚ੍ਚੇਹਿ ਗੀਤੇਹਿ ਵਾਦਿਤੇਹਿ ਚ ਪੂਜਯੁਂ.)

ਪਰਿਨਿਬ੍ਬਾਨਕਥਾ ਸਮਤ੍ਤਾ.

ਤਤੋ ਭਗਵਤੋ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ਅਜਾਤਸਤ੍ਤੁ ਮਹਾਰਾਜਾ ਕੋਸਿਨਾਰਕਾਨਂ ਮਲ੍ਲਾਨਂ ਸਾਸਨਂ ਪੇਸੇਸਿ. ਅਹਮ੍ਪਿ ਖਤ੍ਤਿਯੋ ਭਗਵਾਪਿ ਖਤ੍ਤਿਯੋ ਸਤ੍ਥੁਨੋ ਸਰੀਰਧਾਤੁਨਂ ਥੂਪਞ੍ਚ ਮਹਞ੍ਚ ਕਰੋਮੀਤਿ. ਤੇਨੇਵ ਉਪਾਯੇਨ ਵੇਸਾਲਿਯਂ ਲਿਚ੍ਛਵਿਰਾਜਾਨੋ ਚ ਕਪਿਲਵਤ੍ਥੁਮ੍ਹਿ ਸਕ੍ਯਰਾਜਾਨੋ ਚ ਅਲ੍ਲਕਪ੍ਪਕੇ ਬੁਲਯੋ ਚ ਰਾਮਗਾਮਕੇ ਕੋਲ਼ਿਯਾ ਚ ਵੇਠਦੀਪਕੇ ਬ੍ਰਾਹ੍ਮਣੋ ਚ ਪਾਵਾਯਂ ਪਾਵੇਯ੍ਯਕਾ ਚ ਸਾਸਨਂ ਪੇਸੇਤ੍ਵਾ ਸਬ੍ਬੇ ਏਕਤੋ ਹੁਤ੍ਵਾ ਕੋਸਿਨਾਰਕੇਹਿ ਸਦ੍ਧਿਂ ਵਿਵਾਦਂ ਉਪ੍ਪਾਦੇਸੁਂ. ਤੇਸਂ ਪਨ ਆਚਰਿਯੋ ਦ੍ਰੋਣਬ੍ਰਾਹ੍ਮਣੋ ਨਾਮ. ਸੋ ਤੇਸਂ? ਮਾ ਭੋਨ੍ਤੋ ਵਿਗ੍ਗਹਵਿਵਾਦਂ ਕਰੋਥ, ਅਮ੍ਹਾਕਂ ਭਗਵਾ ਖਨ੍ਤਿਵਾਦੀਯੇਵਾਤਿ ਵਤ੍ਵਾ ਤਾਦਿਸਸ੍ਸ ਚ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨਸ੍ਸ ਸਰੀਰਭਾਗੇ ਕਲਹਂ ਕਾਤੁਂ ਅਯੁਤ੍ਤਨ੍ਤਿ ਆਹ.

(ਰਾਜਾ ਅਜਾਤਸਤ੍ਤੁ ਚ ਲਿਚ੍ਛਵੀ ਚ ਨਰਾਧਿਪਾ;

ਸਕ੍ਯਾ ਚ ਅਲ੍ਲਕਪ੍ਪਾ ਚ ਕੋਲ਼ਿਯਾਪਿ ਚ ਰਾਮਕੇ.

ਬ੍ਰਾਹ੍ਮਣੋ ਵੇਠਦੀਪੋ ਚ ਮਲ੍ਲਪਾਵੇਯ੍ਯਕਾਪਿ ਚ;

ਮਲ੍ਲਾ ਚ ਧਾਤੁ ਅਤ੍ਥਾਯ ਅਞ੍ਞਮਞ੍ਞਂ ਵਿਵਾਦਯੁਂ.

ਏਵਂ ¶ ਸਨ੍ਤੇ ਤਦਾ ਦੋਣੋ ਬ੍ਰਾਹ੍ਮਣੋ ਏਤਦਬ੍ਰਵੀ;

ਸੁਣਨ੍ਤੁ ਭੋਨ੍ਤੋ ਮੇ ਵਾਚਂ ਹਿਤਮਤ੍ਥੁਪਸਂਹਿਤਂ.

ਖਨ੍ਤਿਵਾਦੀ ਇਸਿਕਾਲੇ ਧਮ੍ਮਪਾਲਕੁਮਾਰਕੇ;

ਛਦ੍ਦਨ੍ਤੇ ਭੁਰਿਦਤ੍ਤੇ ਚ ਚਮ੍ਪੇਯ੍ਯੇ ਸਙ੍ਖਪਾਲਕੇ.

ਮਹਾਕਪਿਜਾਤਕਾਲੇ ਅਮ੍ਹਾਕਂ ਲੋਕਨਾਯਕੋ;

ਕੋਪਂ ਅਕਤ੍ਵਾ ਅਞ੍ਞੇਸੁ ਖਨ੍ਤਿਮੇਵ ਅਕਾ ਜਿਨੋ.

ਸਿਟ੍ਠਾਸਿਟ੍ਠੇ ਸੁਖੇ ਦੁਕ੍ਖੇ ਲਾਭਾਲਾਭੇ ਯਸਾਯਸੇ;

ਤਾਦੀ ਲਕ੍ਖਣਸਮ੍ਪਨ੍ਨੋ ਖਨ੍ਤਿਵਾਦੇਸੁ ਕਾ ਕਥਾ.

ਏਵਂ ਭਵਤਂ ਵਿਵਾਦੇ ਸਮ੍ਪਹਾਰੋ ਨ ਸਾਧੁਕੋ;

ਸਬ੍ਬੇਵ ਸਹਿਤਾ ਹੋਥ ਸਮਗ੍ਗਾ ਮੋਦਮਾਨਕਾ.

ਤਥਾਗਤਸ੍ਸ ਸਾਰੀਰਂ ਅਟ੍ਠਭਾਗਂ ਕਰੋਮਸੇ;

ਥੂਪਾ ਵਿਤ੍ਥਾਰਿਤਾ ਹੋਨ੍ਤੁ ਪਸਨ੍ਨਾ ਹਿ ਬਹੁਜ੍ਜਨਾ.

ਤੇਨ ਹਿ ਵਿਭਜੇਹਿ ਤ੍ਵਂ ਅਟ੍ਠਭਾਗਨ੍ਤੁ ਬ੍ਰਾਹ੍ਮਣ;

ਥੂਪਾ ਵਿਤ੍ਥਾਰਿਤਾ ਹੋਨ੍ਤੁ ਪਸਨ੍ਨਾ ਹਿ ਬਹੁਜ੍ਜਨਾ.

ਏਵਂ ਵੁਤ੍ਤੇ ਤਦਾ ਦੋਣੋ ਬ੍ਰਾਹ੍ਮਣੋ ਗਣਜੇਟ੍ਠਕੋ;

ਸੁਵਣ੍ਣਂ ਨਾਲ਼ਿਂ ਕਤ੍ਵਾਨ ਸਮਂ ਭਾਜੇਸਿ ਰਾਜੁਨਂ.

ਸੋਲ਼ਸਨਾਲ਼ਿਯੋ ਆਸੁਂ ਸਬ੍ਬਾ ਤਾ ਸੇਸਧਾਤੁਯੋ;

ਏਕੇਕਪੁਰਵਾਸੀਨਂ ਦ੍ਵੇ ਦ੍ਵੇ ਦੋਣੋ ਅਦਾ ਤਦਾ.

ਧਾਤੁਯੋ ਚ ਗਹੇਤ੍ਵਾਨ ਹਟ੍ਠਤੁਟ੍ਠਾ ਨਰਾਧਿਪਾ;

ਗਨ੍ਤ੍ਵਾ ਸਕੇ ਸਕੇ ਰਟ੍ਠੇ ਚੇਤਿਯਾਨਿ ਅਕਾਰਯੁਂ.

ਦੋਣੋ ਤੁਮ੍ਬਂ ਗਹੇਤ੍ਵਾਨ ਕਾਰੇਸਿ ਤੁਮ੍ਬਚੇਤਿਯਂ;

ਅਙ੍ਗਾਰਥੂਪਂ ਕਾਰੇਸੁਂ ਮੋਰਿਯਾ ਹਟ੍ਠਮਾਨਸਾ.

ਏਕਾ ਦਾਠਾ ਤਿਦਸਪੁਰੇ ਏਕਾ ਨਾਗਪੁਰੇ ਅਹੁ;

ਏਕਾ ਗਨ੍ਧਾਰਵਿਸਯੇ ਏਕਾ ਕਾਲਿਙ੍ਗਰਾਜਿਨੋ.)

ਤਤ੍ਥ ¶ ਦੋਣੋਤਿ? ਤਦਾ ਗਣਾਚਰਿਯੋ. ਸੋ ਧਾਤੁਯੋ ਵਿਭਜਨ੍ਤੋ ਏਕਂ ਦਕ੍ਖਿਣਦਾਠਾਧਾਤੁਂ ਗਹੇਤ੍ਵਾ ਵੇਠਨ੍ਤਰੇ ਠਪੇਸਿ. ਤਦਾ ਸਕ੍ਕੋ ਅਜ੍ਜ ਦਕ੍ਖਿਣਦਾਠਾਧਾਤੁਂ ਕੋ ਲਭਤੀਤਿ ਚਿਨ੍ਤੇਤ੍ਵਾ ਵੇਠਨ੍ਤਰੇ ਪਸ੍ਸਿ. ਸੋ ਰਤਨਚਙ੍ਗੋਟਕਂ ਗਹੇਤ੍ਵਾ ਅਦਿਸ੍ਸਮਾਨਕਾਯੇਨ ਗਨ੍ਤ੍ਵਾ ਧਾਤੁਂ ਗਹੇਤ੍ਵਾ ਤਾਵਤਿਂਸਭਵਨੇ ਚੂਲ਼ਾਮਣਿਚੇਤਿਯ ਏਕਯੋਜਨੁਬ੍ਬੇਧਂਯੇਵ ਮਹਨ੍ਤਂ ਥੂਪਂ ਕਤ੍ਵਾ ਠਪੇਸਿ. ਏਕਂ ਦਕ੍ਖਿਣਦਠਾਧਾਤੁਂ ਪਾਦਗ੍ਗਨ੍ਤਰੇ ਅਕ੍ਕਮਿਤ੍ਵਾ ਗਣ੍ਹਿ. ਏਤ੍ਤਾਵਤਾ ਤਾਵਤਿਂਸਭਵਨਦਨ੍ਤਧਾਤੁਕਥਾ ਪਰਿਪੁਣ੍ਣਾ ਵੇਦਿਤਬ੍ਬਾ.

ਤਦਾ ਜਯਸੇਨੋ ਨਾਮ ਨਾਗਰਾਜਾ ਭਗਵਤੋ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ਅਜ੍ਜ ਪਚ੍ਛਿਮਦਸ੍ਸਨਂ ਪਸ੍ਸਿਸ੍ਸਾਮੀਤਿ ਮਹਨ੍ਤਂ ਨਾਗਰਾਜਸਮ੍ਪਤ੍ਤਿਂ ਗਹੇਤ੍ਵਾ ਕੁਸਿਨਾਰਂ ਗਨ੍ਤ੍ਵਾ ਮਹਾਪੂਜਂ ਕਤ੍ਵਾ ਏਕਮਨ੍ਤਂ ਠਤ੍ਵਾ ਪਾਦਗ੍ਗਨ੍ਤਰੇ ਠਿਤਂ ਧਾਤੁਂ ਦਿਸ੍ਵਾ ਨਾਗੇਦ੍ਧਿਬਲੇਨ ਗਹੇਤ੍ਵਾ ਨਾਗਭਵਨਂ ਨੇਤ੍ਵਾ ਨਾਗਪੁਰਸ੍ਸ ਮਜ੍ਝੇ ਰਤਨਖਚਿਤੇ ਚੇਤਿਯੇ ਠਪੇਸਿ. ਤਂ ਤਮ੍ਬਪਣ੍ਣਿਯਂ ਕਾਕਵਣ੍ਣਤਿਸ੍ਸਰਾਜਕਾਲੇ ਮਹਾਦੇਵਤ੍ਥੇਰਸ੍ਸ ਸਿਸ੍ਸੋ ਮਹਿਨ੍ਦਤ੍ਥੇਰੋ ਨਾਮ ਨਾਗਭਵਨਂ ਗਨ੍ਤ੍ਵਾ ਦਕ੍ਖਿਣਦਾਠਂ ਗਹੇਤ੍ਵਾ ਤਮ੍ਬਪਣ੍ਣਿਯਂ ਸੇਰੁਨਗਰਂ ਹਰਿਤ੍ਵਾ ਗਿਰਿਅਭਯਸ੍ਸ ਸੇਰੁਨਗਰਪਬ੍ਬਤਨ੍ਤਰੇ ਚੇਤਿਯਂ ਕਾਰਾਪੇਤ੍ਵਾ ਠਪੇਸਿ.

ਏਤ੍ਤਾਵਤਾ ਨਾਗਭਵਨਦਨ੍ਤਧਾਤੁਕਥਾ ਪਰਿਪੁਣ੍ਣਾ ਵੇਦਿਤਬ੍ਬਾ.

ਤਤ੍ਰਾਯਂ ਗਨ੍ਧਾਰਵਾਸਿਨੋਤਿ? ਏਕਾ ਵਾਮਦਾਠਾ ਦੋਣੋ ਨਾਮ ਆਚਰਿਯੋ ਨਿਵਤ੍ਥ ਵਤ੍ਥਨ੍ਤਰੇ ਠਪੇਤ੍ਵਾ ਗਣ੍ਹਿ. ਤਦਾ ਏਕੋ ਗਨ੍ਧਾਰਵਾਸੀ ਪੁਬ੍ਬੇ ਲਦ੍ਧਬ੍ਯਾਕਰਣੋ ਕਤਾਭਿਨੀਹਾਰੋ ਵਤ੍ਥਨ੍ਤਰੇ ਠਤਪਿਦਨ੍ਤਧਾਤੁਂ ਦਿਸ੍ਵਾ ਕੁਸਲਚਿਤ੍ਤੇਨ ਤਤੋ ਦਨ੍ਤਧਾਤੁਂ ਗਹੇਤ੍ਵਾ ਗਨ੍ਧਾਰਵਾਸਿਕੇਹਿ ਸਦ੍ਧਿਂ ਅਤ੍ਤਨੋ ਰਟ੍ਠਂ ਗਨ੍ਤ੍ਵਾ ਚੇਤਿਯਵਨੇ ਠਪੇਸਿ.

ਏਤ੍ਤਾਵਤਾ ਵਾਮਦਨ੍ਤਧਾਤੁਕਥਾ ਪਰਿਪੁਣ੍ਣਾ ਵੇਦਿਤਬ੍ਬਾ.

ਤਤ੍ਥ ਅਧੋ ਵਾਮਦਨ੍ਤਧਾਤੁਂ ਸਾਰਿਪੁਤ੍ਤਤ੍ਥੇਰਸ੍ਸ ਸਿਸ੍ਸੋ ਖੇਮੋ ਨਾਮ ਮੁਨਿ ਜਾਲਚਿਤਕਤੋਵ ਉਪ੍ਪਤਿਤ੍ਵਾ ਵਾਮਦਾਠਂ ਗਹੇਤ੍ਵਾ ਕਾਲਿਙ੍ਗਪੁਰਂ ਨੇਤ੍ਵਾ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਸਮੀਪਂ ਗਨ੍ਤ੍ਵਾ ¶ ਦਨ੍ਤਧਾਤੁਂ ਦਸ੍ਸੇਤ੍ਵਾ? ਮਹਾਰਾਜ ਵਾਮਦਨ੍ਤਧਾਤੁਂ ਭਗਵਾ ਤਮੇਵ ਇਮਸ੍ਮਿਂ ਜਮ੍ਬੁਦੀਪੇ ਯਾਵ ਗੁਹਸੀਵਪਰਮ੍ਪਰਾ ਦੇਵਮਨੁਸ੍ਸਾਨਂ ਅਤ੍ਥਂ ਕਰਿਤ੍ਵਾ ਪਰਿਯੋਸਾਨੇ ਗੁਹਸੀਵਰਞ੍ਞੋ ਪਾਹੇਸ੍ਸਤੀਤਿ (ਨੀਯਾਦੇਤੁਂ) ਆਹਾਤਿ ਨੀਯ੍ਯਾਦੇਸਿ.

ਅਪਰਭਾਗੇ ਹੇਮਮਾਲਾ ਰਾਜਕਞ੍ਞਾ ਦਨ੍ਤਕੁਮਾਰੇਨ ਸਦ੍ਧਿਂ ਬ੍ਰਾਹ੍ਮਣਵੇਸਂ ਗਹੇਤ੍ਵਾ ਦਨ੍ਤਧਾਤੁਂ ਆਦਾਯ ਪਲਾਯਿਤ੍ਵਾ ਵਾਣਿਜੇ ਆਰੋਚੇਤ੍ਵਾ ਨਾਵਾ ਵੇਗੇਨ ਗਨ੍ਤ੍ਵਾ ਚੇਵ ਨਾਗਸੁਪਣ੍ਣੇਹਿ ਮਹਨ੍ਤਂ ਪੂਜਂ ਕਾਰੇਤ੍ਵਾ ਅਨੁਕ੍ਕਮੇਨਾਗਨ੍ਤ੍ਵਾ ਜਮ੍ਬੁਕੋਲ਼ਪਟ੍ਟਨਂ ਪਤ੍ਵਾ ਦਿਜਵਰਸ੍ਸ ਆਚਿਕ੍ਖਿਤਮਗ੍ਗੇਨ ਅਨੁਰਾਧਪੁਰਂ ਪਤ੍ਵਾ ਕਿਤ੍ਤਿਸ੍ਸਿਰਿਮੇਘਸ੍ਸ ਪਵਤ੍ਤਿਂ ਪੁਚ੍ਛਿਤ੍ਵਾ ਨਵਵਸ੍ਸਆਯੁਸਮਾਨੋ ਤੀਸੁ ਸਰਣੇਸੁ ਪਸਨ੍ਨਭਾਵਂ ਸੁਤ੍ਵਾ ਮੇਘਗਿਰਿ ਮਹਾਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ ਦਨ੍ਤਧਾਤੁਂ ਜਮ੍ਬੁਦੀਪਤੋ ਗਹੇਤ੍ਵਾ ਆਗਤਭਾਵਂ ਆਰੋਚੇਤ੍ਵਾ ਦਸ੍ਸੇਸਿ. ਦਿਸ੍ਵਾ ਚ ਪਨ ਪੀਤਿਯਾ ਫੁਟੋ ਉਭਿਨ੍ਨਮ੍ਪਿ ਸਙ੍ਗਹਂ ਕਤ੍ਵਾ ਮਹਾਵਿਹਾਰਂ ਅਲਙ੍ਕਾਰੇਤ੍ਵਾ ਜਿਨਦਨ੍ਤਧਾਤੁਂ ਠਪੇਤ੍ਵਾ ਏਕਂ ਭਿਕ੍ਖੁਂ ਪੇਸੇਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚਾਪੇਸਿ. ਤਂ ਸੁਤ੍ਵਾ ਰਾਜਾ ਪੀਤਿਪਾਮੋਜ੍ਜੋ ਚਕ੍ਕਵਤ੍ਤਿਸ੍ਸ ਸਿਰਿਸਮ੍ਪਤ੍ਤੋ ਦਲ਼ਿਦ੍ਦੋ ਵਿਯ ਤਸ੍ਸ ਪਾਟਿਹਾਰਿਯਂ ਦਿਸ੍ਵਾ ਵੀਮਂਸਿਤ੍ਵਾ ਨਿਕ੍ਕਙ੍ਖੋ ਹੁਤ੍ਵਾ ਸਕਲਲਙ੍ਕਾਦੀਪੇਨ ਪੂਜੇਸਿ. ਏਤੇਨ ਨਯੇਨ ਪੂਜਂ ਕਤ੍ਵਾ ਏਕਦਿਵਸੇਨੇਵ ਨਵਲਕ੍ਖਂ ਪੂਜੇਸਿ.

ਸੀਹਲ਼ਿਨ੍ਦੋ ਉਭਿਨ੍ਨਮ੍ਪਿ ਬਹੂਨਿ ਰਤਨਾਨਿ ਚ;

ਗਾਮੇ ਚ ਇਸ੍ਸਰੇ ਚੇਵ ਦਤ੍ਵਾਨ ਸਙ੍ਗਹਂ ਅਕਾ.

ਏਤ੍ਤਾਵਤਾ ਅਧੋਦਾਠਾਧਾਤੁਕਥਾ ਪਰਿਪੁਣ੍ਣਾ ਵੇਦਿਤਬ੍ਬਾ.

ਚਤ੍ਤਾਲੀਸ ਸਮਾ ਦਨ੍ਤਾ ਕੇਸਾ ਲੋਮਾ ਚ ਸਬ੍ਬਸੋ ਦੇਵਾ ਹਰਿਂਸੁ ਏਕੇਕਂ ਚਕ੍ਕਵਾਲ਼ਪਰਮ੍ਪਰਾ.

ਤਤ੍ਰ ਵਚਨੇ, ਚਤ੍ਤਾਲੀਸ ਸਮਾ ਦਨ੍ਤਾਤਿ? ਸੇਸਦਨ੍ਤਾ ਚ ਕੇਸਾ ਚ ਲੋਮਾ ਚ ਨਖਾ ਚ ਸਬ੍ਬਸੋਪਿ ਮਯਿ ਪਰਿਨਿਬ੍ਬੁਤ-ਕਾਲੇ ¶ ਮਾ ਡਯ੍ਹਨ੍ਤੁ ਲੁਞ੍ਚਿਤ੍ਵਾ ਆਕਾਸੇ ਪਤਿਟ੍ਠਨ੍ਤੁ ਏਕੇਕਚਕ੍ਕਵਾਲ਼ਞ੍ਚ ਏਕੇਕਕੇਸਲੋਮਨਖਦਨ੍ਤਧਾਤੁਪਰਮ੍ਪਰਾ ਨੇਤ੍ਵਾ ਚੇਤਿਯਂ ਕਾਰੇਤ੍ਵਾਨ ਦੇਵਮਨੁਸ੍ਸਾਨਂ ਅਤ੍ਥਂ ਕਰੋਤੁਤਿ ਅਧਿਟ੍ਠਹਿ. ਤਸ੍ਮਾ ਪਰਿਨਿਬ੍ਬੁਤਕਾਲਤੋ ਯਾਵ ਸਰੀਰਂ ਨ ਡਯ੍ਹਤਿ ਤਾਵ ਛਬ੍ਬਣ੍ਣਰਸ੍ਮਿਯੋ ਲੋਮਧਾਤੁ ਨ ਪਜਹਤਿ. ਦੋਣਬ੍ਰਾਹ੍ਮਣੋਪਿ ਧਾਤੁਵਿਭਜਨਾਵਸਾਨੇ ਵੇਠਨ੍ਤਰੇ ਚ ਨਿਵਾਸਨਨ੍ਤਰੇ ਚ ਪਾਦਗ੍ਗਨ੍ਤਰੇ ਚ ਧਾਤੁਨਂ ਵਿਨਟ੍ਠਭਾਵਂ ਞਤ੍ਵਾ ਪਥਵਿਯਂ ਉਤ੍ਤਾਨਕੋਯੇਵਜਾਤੋ. ਤਦਾ ਸਕ੍ਕੋ ਦੇਵਰਾਜਾ ਦਿਸ੍ਵਾ ਅਯਂ ਦੇਣਾਚਰਿਯੋ ਧਾਤੁ ਅਤ੍ਥਾਯ ਅਨੁਪਰਿਵਤ੍ਤੇਤ੍ਵਾ ਵਿਨਾਸਂ ਪਾਪੁਣੇਯ੍ਯ ਅਹਂ ਵੀਣਾਚਰਿਯਵੇਸਂ ਗਹੇਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸੋਕਂ ਵਿਨੋਦੇਸ੍ਸਾਮੀਤਿ ਸਕ੍ਕਰੂਪਂ ਜਹਿਤ੍ਵਾ ਵੀਣਾਚਰਿਯਵੇਸਂ ਗਹੇਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਕਮਨ੍ਤਂ ਠਿਤੋ ਦਿਬ੍ਬਗੀਤਂ ਗਾਯਿਤ੍ਵਾ ਵੀਣਂ ਵਾਦੇਨ੍ਤੋ ਨਾਨਪ੍ਪਕਾਰਂ ਉਦਾਨੇਸਿ. ਯਂ ਧਮ੍ਮਮੇਤਂ ਪੁਰਿਸਸ੍ਸ ਵਾਦਂ ਛਿਨ੍ਦਿਸ੍ਸਾਮੀਤਿ ਵਤ੍ਵਾ ਕਥਾਯ ਸੋਤੁਨਂ ਲੋਭਂ ਪਰਸ੍ਸ ਅਤ੍ਥਂ ਵਿਨਾਸੇਤ੍ਵਾ ਅਤਿਲੋਭੇਨ ਪੁਰਿਸੋ ਪਾਪਕੋ ਹੋਤੀਤਿ. ਹਂਸਰਾਜਜਾਤਕਂ ਦੀਪੇਤ੍ਵਾ ਯਂ ਲਦ੍ਧਂ ਤਂ ਸੁਲਦ੍ਧਨ੍ਤਿ ਆਹ. ਤਂ ਸੁਤ੍ਵਾ ਦੋਣੋ ਅਯਂ ਵੀਣਾਚਰਿਯੋ ਮਯ੍ਹਂ ਥੇਨਭਾਵਂ ਅਞ੍ਞਾਸੀਤਿ ਸੋਕਂ ਵਿਨੋਦੇਤ੍ਵਾ ਉਟ੍ਠਾਯ ਆਵਜ੍ਜਮਾਨੋ ਤੁਮ੍ਬਂ ਦਿਸ੍ਵਾ ਯੇਨ ਭਗਵਤੋ ਸਰੀਰਧਾਤੁਯੋ ਮਿਤਾ ਸੋਪਿ ਧਾਤੁਗਤਿਕੋਵ. ਇਦਂ ਥੂਪਂ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਤੁਮ੍ਬਂ ਗਹੇਤ੍ਵਾਨ ਚੇਤਿਯੇ ਠਪੇਸਿ. ਮੋਰਿਯਾ ਅਙ੍ਗਾਰਂ ਗਹੇਤ੍ਵਾ ਅਙ੍ਗਾਰਚੇਤਿਯਂ ਨਾਮ ਕਾਰੇਸੁਂ.

(ਨਗਰੇ ਕਪਿਲਵਤ੍ਥੁਮ੍ਹਿ ਸਮ੍ਮਾਦਿਟ੍ਠਿ ਬਹੁਜ੍ਜਨੋ;

ਤਤ੍ਥ ਸਾਰੀਰਿਕਂ ਥੂਪਂ ਅਕਾਸਿ ਰਤਨਾਮਯਂ.

ਨਗਰੇ ¶ ਅਲ੍ਲਕੇ ਰਮ੍ਮੇ ਬੁਦ੍ਧਧਾਤੁ ਪਤਿਟ੍ਠਿਯ;

ਸਿਲਾਯ ਮੁਗ੍ਗਵਣ੍ਣਾਯ ਥੂਪਂ ਸਧਾਤੁਕਂ ਅਕਾ.

ਜਨੋ ਪਾਵੇਯ੍ਯਰਟ੍ਠਸ੍ਮਿਂ ਪਤਿਟ੍ਠਿਯ ਸਾਰੀਰਿਕਂ;

ਸਿਲਾਯ ਮਣਿਵਣ੍ਣਾਯ ਪਾਵੇਯ੍ਯਂ ਚੇਤਿਯਂ ਅਕਾ.

ਚੀਵਰਂ ਪਤ੍ਤਦਣ੍ਡਞ੍ਚ ਮਧੁਰਾਯਂ ਅਪੂਜਯੁਂ;

ਨਿਵਾਸਨਂ ਕੁਸਘਰੇ ਪੂਜਯਿਂਸੁ ਮਹਾਜਨਾ.

ਪਚ੍ਚਤ੍ਥਰਣਂ ਕਪਿਲੇ ਉਣ੍ਣਲੋਮਞ੍ਚ ਕੋਸਲੇ;

ਪੂਜੇਸੁਂ ਪਾਟਲਿਪੁਤ੍ਤੇ ਕਰਕਂ ਕਾਯਬਨ੍ਧਨਂ.

ਨਿਸੀਦਨਂ ਅਵਨ੍ਤਿਸੁ ਚਮ੍ਪਾਯਂ’ਦਕਸਾਟਕਂ;

ਦੇਵਰਟ੍ਠੇ ਅਤ੍ਥਰਣਂ ਵਿਦੇਹੇ ਪਰਿਸ੍ਸਾਵਨਂ.

ਵਾਸਿ-ਸੂਚਿਘਰਞ੍ਚਾਪਿ ਇਨ੍ਦਪਤ੍ਥੇ ਅਪੂਜਯੁਂ;

ਪਾਸਾਣਕੇ ਪਦਂ ਸੇਟ੍ਠਂ ਭਣ੍ਡਸੇਸਂ ਪਰਨ੍ਤਕੇ.

ਮਹਿਂਸੁ ਮਨੁਜਾ ਧਾਤੁਂ ਅਟ੍ਠਦੋਣਮਿਤਂ ਤਦਾ;

ਧਾਤੁ ਵਿਤ੍ਥਾਰਿਤਾ ਆਸਿ ਲੋਕਨਾਥਸ੍ਸ ਸਤ੍ਥੁਨੋ).

ਤੇ ਪਨ ਰਾਜਾਨੋ ਹਿ ਅਤ੍ਤਨੋਲਦ੍ਧਧਾਤੁਂ ਗਹੇਤ੍ਵਾ ਸਕਸਕਨਗਰਂ ਗਨ੍ਤ੍ਵਾ ਚੇਤਿਯਂ ਕਾਰਾਪੇਤ੍ਵਾ ਮਹਨ੍ਤਂ ਪੂਜਾਵਿਧਾਨਂ ਕਰਿਂਸੁ. ਚਕ੍ਖੁਮਨ੍ਤਸ੍ਸ ਭਗਵਤੋ ਸਰੀਰਧਾਤੁ ਅਟ੍ਠਦੋਣਮਤ੍ਤਂ ਸੁਵਣ੍ਣਨਾਲ਼ਿਯਾ ਏਕਸਤਅਟ੍ਠਵੀਸਤਿਨਾਲ਼ਿਕਾ ਅਹੋਸਿ? ਸਤ੍ਥਾ ਪਨ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਮਾਤੁਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਵਿਸਾਖਨਕ੍ਖਤ੍ਤੇਨ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਮਹਾਭਿਨਿਕ੍ਖਮਨਂ ਨਿਕ੍ਖਮਿ. ਵਿਸਾਖਨਕ੍ਖਤ੍ਤੇਨ ਬੁਦ੍ਧੋ ਅਹੋਸਿ. ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਧਮ੍ਮਚਕ੍ਕਂ ਪਵਤ੍ਤੇਸਿ. ਤੇਨੇਵ ਯਮਕਪਾਟਿਹਾਰਿਯਂ ਅਕਾਸਿ. ਅਸ੍ਸਯੁਜਨਕ੍ਖਤ੍ਤੇਨ ਦੇਵੋਰੋਹਣਂ ਅਕਾਸਿ. ਵਿਸਾਖਨਕ੍ਖਤ੍ਤੇਨ ਪਰਿਨਿਬ੍ਬਾਯਿ. ਮਹਾਕਸ੍ਸਪਤ੍ਥੇਰਾ ਚ ਅਨੁਰੁਦ੍ਧਤ੍ਥੇਰੋ ਚ ਦ੍ਵੇ ਮਹਾਥੇਰਾ ਭਗਵਤੋ ਸਰੀਰਧਾਤੁਯੋ ਵਿਸ੍ਸਜ੍ਜਾਪੇਤ੍ਵਾ ਅਦਂਸੁ.

ਤੇਸਂ ¶ ਰਾਜੁਨਂ ਭਗਵਤੋ ਸਰੀਰਧਾਤੁਂ ਲਭਿਤ੍ਵਾ ਸਤ੍ਤਦਿਵਸਸਤ੍ਤਮਾਸਾਧਿਕਾਨਿ ਸਤ੍ਤਵਸ੍ਸਾਨਿ ਮਹਾਰਹਂ ਪੂਜਂ ਕਤ੍ਵਾ ਗਤਕਾਲੇ ਮਿਚ੍ਛਾਦਿਟ੍ਠਿਕਮਨੁਸ੍ਸਾ? ਸਮਣੋ ਗੋਤਮੋ ਪਰਿਨਿਬ੍ਬੁਤੋ. ਤਸ੍ਸ ਧਾਤੁ ਅਤ੍ਥਾਯ ਅਮ੍ਹਾਕਂ ਜੀਵਿਤਕਪ੍ਪਨਂ ਨਾਸੇਤ੍ਵਾ ਪੂਜਂ ਕਰੋਤੀ’ਤਿ ਸਮ੍ਮਾਸਮ੍ਬੁਦ੍ਧੇ ਪਦੁਸ੍ਸਨ੍ਤਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ਮਹਾਕਸ੍ਸਪਤ੍ਥੇਰਸ੍ਸ ਆਰੋਚੇਸਿ;’ਭਨ੍ਤੇ ਮਿਚ੍ਛਾਦਿਟ੍ਠਿਕਾ ਮਨੁਸ੍ਸਾ ਭਗਵਤਿ ਪਦੁਟ੍ਠਚਿਤ੍ਤੇਨ ਇਤੋ ਚੁਤਾ ਅਵੀਚਿਨਿਰਯਂ ਉਪ੍ਪਜ੍ਜਨ੍ਤਿ. ਬਹੁਤਰਾ ਅਨਾਗਤੇ ਮਿਚ੍ਛਾਦਿਟ੍ਠਿਕਾ ਮਾਤੁਪਿਤੁਘਾਤਕਾ ਰਾਜਾਨੋ ਭਵਿਸ੍ਸਨ੍ਤਿ. ਅਜ੍ਜੇਵ ਧਾਤੁਯੋ ਨਿਦਹਿਤੁਂ ਵਟ੍ਟਤੀ’ਤਿ ਥੇਰੋ ਵਿਚਾਰੇਤ੍ਵਾ ਅਦ੍ਦਸ.

ਅਨਨ੍ਤਮਤ੍ਥਂ ਧਰਮਾਨਕਾਲੇ ਕਤ੍ਵਾਨ ਸਤ੍ਤਾਨਮਲੀਨਚਿਤ੍ਤੋ ਸੇਸਾਨਮਤ੍ਥਾਯ ਸਰੀਰਧਾਤੁਂ ਠਪੇਤ੍ਵ ਸੋ ਮਚ੍ਚੁਮੁਖਂ ਉਪੇਤੋ. (ਕਤ੍ਵਾ ਯੋ ਬੋਧਿਞਾਣਂ ਵਿਵਿਧਬਲਵਰਂ ਬੁਜ੍ਝਿਤੁਂ ਪਾਰਮੀਯੋ ਵਤ੍ਵਾ ਸਙ੍ਖੇਯ੍ਯਪੁਣ੍ਣੇ ਅਪਰਿਮਿਤਭਵੇ ਉਤ੍ਤਰਿਤ੍ਵਾ ਸੁਮੁਤ੍ਤਂ. ਆਰੋਹਿਤ੍ਵਾਨ ਸੀਘਂ ਅਰਿਯਸਿਵਪਦਂ ਅਚ੍ਚੁਤਂ ਸੀਤਿਭਾਵਂ ਪਤ੍ਤੋ ਸੋ ਜਾਤਿਪਾਰਂ ਨਿਖਿਲਪਦਹਨਂ ਦੁਕ੍ਕਰਂ ਕਾਰਯਿਤ੍ਵਾ.

ਧਾਤ੍ਵਨ੍ਤਰਾਯਂ ਦਿਸ੍ਵਾਨ ਥੇਰੋ ਕਸ੍ਸਪਸਵ੍ਹਯੋ;

ਨਿਧਾਨਂ ਸਬ੍ਬਧਾਤੁਨਂ ਕਰੋਹੀਤ੍ਯਾਹ ਭੂਪਤਿਂ.

ਸਾਧੂਤਿ ਸੋ ਪਟਿਸ੍ਸੁਤ੍ਵਾ ਮਾਗਧੋ ਤੁਟ੍ਠਮਾਨਸੋ;

ਧਾਤੁਨਿਧਾਨਂ ਕਾਰੇਸਿ ਸਬ੍ਬਤ੍ਥ ਵਤ੍ਤਿਤਾਦਿਯ.

ਕਾਰਾਪੇਤ੍ਵਾਨ ਸੋ ਰਾਜਾ ਕਸ੍ਸਪਸ੍ਸ ਨਿਵੇਦਯੀ;

ਧਾਤੁਯੋ ਆਹਰੀ ਥੇਰੋ ਇਦਂ ਕਾਰਣਮਦ੍ਦਸ.

ਭੁਜਙ੍ਗਾ ¶ ਪਰਿਗਣ੍ਹਿਂਸੁ ਰਾਮਗਾਮਮ੍ਹਿ ਧਾਤੁਯੋ;

ਚੇਤਿਯੇ ਧਾਰਯਿਸ੍ਸਨ੍ਤਿ ਲਙ੍ਕਾਦੀਪੇ ਅਨਾਗਤੇ.

ਤਾ ਧਾਤੁਯੋ ਠਪੇਤ੍ਵਾਨ ਥੇਰੋ ਕਸ੍ਸਪਸਵ੍ਹਯੋ;

ਰਞ੍ਞੋ ਅਜਾਤਸਤ੍ਤੁਸ੍ਸ ਅਦਾਸਿ ਧਾਤੁਯੋ ਤਦਾ.

ਗੇਹੇ ਚੂਪਕਰਣਾਨਿ ਚਤੁਸਟ੍ਠਿਸਤਾਨਿ ਸੋ;

ਅਬ੍ਭਨ੍ਤਰੇ ਠਪੇਸਿ ਰਾਜਾ ਸਬ੍ਬਾ ਤਾ ਬੁਦ੍ਧਧਾਤੁਯੋ.

ਕਰਣ੍ਡਾਸੀਤਿ ਸਂਕਿਣ੍ਣਂ ਚੇਤਿਯਾਸੀਤਿਲਙ੍ਕਤਂ;

ਗੇਹੇ ਬਹੁਸਮਾਕਿਣ੍ਣਂ ਥੂਪਾਰਾਮਪ੍ਪਮਾਣਕਂ.

ਕਾਰੇਤ੍ਵਾ ਸਬ੍ਬਕਰਣਂ ਵਾਲਿਕਂ ਓਕਿਰੀ ਤਹਿਂ;

ਨਾਨਾਪੁਪ੍ਫਸਹਸ੍ਸਾਨਿ ਨਾਨਾ ਗਨ੍ਧਂ ਸਮਾਕਿਰਿ.

ਅਸੀਤਿਥੇਰਰੂਪਾਨਿ ਅਟ੍ਠਚਕ੍ਕਸਤਾਨਿ ਚ;

ਸੁਦ੍ਧੋਧਨਸ੍ਸ ਰੂਪਮ੍ਪਿ ਮਾਯਾਪਜਾਪਤਾਦਿਨਂ.

ਸਬ੍ਬਾਨਿ ਤਾਨਿ ਰੂਪਾਨਿ ਸੁਵਣ੍ਣਸ੍ਸੇਵ ਕਾਰਯਿ;

ਪਞ੍ਚ ਛਤ੍ਤਧਜਸਤੇ ਉਸ੍ਸਾਪੇਸਿ ਮਹੀਪਤੀ.

ਜਾਤਰੂਪਮਯੇ ਕੁਮ੍ਭੇ ਕੁਮ੍ਭੇ ਚ ਰਤਨਾਮਯੇ;

ਪਞ੍ਚ ਪਞ੍ਚ ਸਤੇਯੇਵ ਠਪਾਪੇਸਿ ਸਮਨ੍ਤਤੋ.

ਸੋਵਣ੍ਣਨਿਕ੍ਖਮਯੇਨ ਚ ਕਪਾਲੇ ਰਜਤਾਮਯੇ;

ਪੁਰੇਸਿ ਗਨ੍ਧਤੇਲਸ੍ਸ ਜਾਲਾਪੇਤ੍ਵਾ ਪਦੀਪਕੇ.

ਪਞ੍ਚ ਪਞ੍ਚ ਸਤੇਯੇਵ ਠਪਾਪੇਸਿ ਦਿਸਮ੍ਪਤਿ;

ਇਮੇ ਤਥੇਵ ਤਿਟ੍ਠਨ੍ਤ ਅਧਿਟ੍ਠਾਸਿ ਮਹਾਮੁਨਿ.

ਵਿਤ੍ਥਾਰਿਤਾ ਧਮ੍ਮਾਸੋਕੋ ਭਵਿਸ੍ਸਤਿ ਅਨਾਗਤੇ;

ਅਕ੍ਖਰੇ ਸੋਣ੍ਣਪਤ੍ਤਮ੍ਹਿ ਛਿਨ੍ਦਾਪੇਸਿ ਮਹਾਮਤੀ.

ਪਕਪ੍ਪਿਤ੍ਵਾ ਵਿਸੁਕਮ੍ਮਂ ਧਾਤੁਗਬ੍ਭਸਮਨ੍ਤਤੋ;

ਵਾਤਵੇਗੇਨ ਯਾਯਨ੍ਤਂ ਯਨ੍ਤਰੂਪਮਕਾਰਯੀ.

ਕਤ੍ਵਾ ਸਿਲਾਪਰਿਕ੍ਖੇਪਂ ਪਿਦਹਿਤ੍ਵਾ ਸਿਲਾਹਿ ਤਂ;

ਤਸ੍ਸੂਪਰਿ ਕਰੀ ਥੂਪਂ ਸਮਂ ਪਾਸਾਣਥੂਪਿਯਂ.)

ਧਾਤੁਨਿਧਾਨਕਥਾ ਸਮਤ੍ਤਾ.

ਇਤਿ ਅਰਿਯਜਨਪ੍ਪਸਾਦਨਤ੍ਥਾਯ ਕਤੇ ਧਾਤੁਵਂਸੇ ਤਥਾਗਤਸ੍ਸ ਪਰਿਨਿਬ੍ਬੁਤਾਧਿਕਾਰੋ ਨਾਮ ਦੁਤਿਯੋ ਪਰਿਚ੍ਛੇਦੋ.

੩. ¶ ਧਾਤੁਪਰਮ੍ਪਰਾਕਥਾ

ਧਾਤੁਸੁ ਪਨ ਵਿਭਜਿਤ੍ਵਾ ਦੀਯਮਾਨੇਸੁ ਸਤ੍ਥੁਨੋ ਨਲਾਟਧਾਤੁ ਕੋਸਿਨਾਰਕਾਨਂ ਮਲ੍ਲਾਨਂ ਲਦ੍ਧਕੋਟ੍ਠਾਸੇਯੇਵ ਅਹੋਸਿ. ਮਹਾਕਸ੍ਸਪਤ੍ਥੇਰੋ ਤੇ ਉਪਸਙ੍ਕਮਿਤ੍ਵਾ ਸਤ੍ਥੁਨੋ ਨਲਾਟਧਾਤੁ ਤੁਮ੍ਹਾਕਂ ਕੋਟ੍ਠਾਸੇ ਅਹੋਸਿ, ਤਂ ਗਹੇਤੁਂ ਆਗਤੋ, ਭਗਵਾ ਹਿ ਧਰਮਾਨੇਯੇਵ ਤਮ੍ਬਪਣ੍ਣਿਦੀਪਸ੍ਸ ਅਨੁਜਾਨਿ, ‘ਤਸ੍ਮਾ ਤਂ ਅਮ੍ਹਾਕਂ ਦੇਥਾ’ਤਿ. ਤਂ ਸੁਤ੍ਵਾ ਮਲ੍ਲਰਾਜਾਨੋ?’ਏਵਂ ਪਤਿਗਣ੍ਹਥ ਭਨ੍ਤੇ ਧਾਤੁ’ਤਿ ਮਹਾਕਸ੍ਸਪਤ੍ਥੇਰਸ੍ਸ ਅਦਂਸੁ. ਸੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਮਹਾਨਨ੍ਦਤ੍ਥੇਰਂ ਪਕ੍ਕੋਸਾਪੇਤ੍ਵਾ ਨਲਾਟਧਾਤੁਂ ਥੇਰਸ੍ਸ ਨਿਯ੍ਯਾਦੇਤ੍ਵਾ’ ਇਮਂ ਧਾਤੁਂ ਤਮ੍ਬਪਣ੍ਣਿ ਦੀਪੇ ਮਹਾਵਾਲੁਕਗਙ੍ਗਾਯ ਦਕ੍ਖਿਣਭਾਗੇ ਸੇਰੁਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਮਤ੍ਥਕੇ ਕਾਕਵਣ੍ਣਤਿਸ੍ਸੋ ਨਾਮ ਰਾਜਾ ਪਤਿਟ੍ਠਾਪੇਸ੍ਸਤਿ, ਚੇਤਿਯਂ ਸਙ੍ਘਾਰਾਮਂ ਕਾਰਾਪੇਸ੍ਸਤਿ, ਤ੍ਵਂ ਇਮਂ ਧਾਤੁਂ ਗਹੇਤ੍ਵਾ ਵੇਸਾਲਿਯਂ ਉਪਨਿਸ੍ਸਾਯ ਮਹਾਵਨਵਿਹਾਰੇ ਕੁਟਾਗਾਰਸਾਲਾਯਂ ਸਤ੍ਥੁਨੋ ਵਸਿਤਗਨ੍ਧਕੁਟਿਯਂ ਠਪੇਤ੍ਵਾ ਧਾਤੁਪੂਜਂ ਕਤ੍ਵਾ ਆਯੁਸਙ੍ਖਾਰੇ ਓਸ੍ਸਟ੍ਠੇ ਪਰਿਨਿਬ੍ਬਾਪਯਮਾਨੇ ਅਤ੍ਤਨੋ ਸਦ੍ਧਿਵਿਹਾਰਿਕਸ੍ਸ ਚਨ੍ਦਗੁਤ੍ਤਤ੍ਥੇਰਸ੍ਸ ਧਾਤੁਵਂਸਂ ਕਥੇਤ੍ਵਾ ਅਪ੍ਪਮਤ੍ਤੋ ਹੋਹੀ’ਤਿ ਵਤ੍ਵਾ ਧਾਤੁਂ ਥੇਰਸ੍ਸ ਦਤ੍ਵਾ ਅਨੁਪਾਦਿਸੇਸਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਸਾਵਕੋ ਸਤ੍ਥੁਕਪ੍ਪੋ ਸੋ ਪਭੀਨ੍ਨਪਟਿਸਮ੍ਭਿਦੋ;

ਗਹੇਤ੍ਵਾ ਮਾਨਯੀ ਧਾਤੁਂ ਮਹਾਨਨ੍ਦੋ ਮਹਾਵਨੇ.

ਤਸ੍ਸ ਥੇਰਸ੍ਸ ਸਦ੍ਧਿਵਿਹਾਰਿਕੋ ਚਨ੍ਦਗੁਤ੍ਤਤ੍ਥੇਰੋ ਧਾਤੁਂ ਗਹੇਤ੍ਵਾ ਆਕਾਸਂ ਉਗ੍ਗਨ੍ਤ੍ਵਾ ਸਾਵਤ੍ਥੀਯਂ ਜੇਤਵਨਮਹਾਵਿਹਾਰੇ ਦਸਬਲੇਨ ਵਸਿਤਗਨ੍ਧਕੁਟਿਯਂ ਠਪੇਤ੍ਵਾ ਧਾਤੁਪੂਜਂ ਕਤ੍ਵਾ ਚਿਰਂ ਵਿਹਾਸਿ. ਸੋਪਿ ਆਯੁਸਙ੍ਖਾਰੇ ਓਸ੍ਸਟ੍ਠੇ ਪਰਿਨਿਬ੍ਬਾਪਯਮਾਨੇ ਅਤ੍ਤਨੋ. ਸਦ੍ਧਿਵਿਹਾਰਿਕਂ ਭਦ੍ਦਸੇਨਤ੍ਥੇਰਂ ਪਕ੍ਕੋਸਾਪੇਤ੍ਵਾ ਧਾਤੁਂ ਥੇਰਸ੍ਸ ਨਿਯ੍ਯਾਦੇਤ੍ਵਾ ਧਾਤੁਵਂਸਂ ਕਥੇਤ੍ਵਾ ਅਨੁਸਾਸਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਚਨ੍ਦਗੁਤ੍ਤੋ ਮਹਾਪਞ੍ਞੋ ਛਲ਼ਭਿਞ੍ਞੋ ਵਿਸਾਰਦੋ;

ਰਮ੍ਮੇ ਜੇਤਵਨੇ ਧਾਤੁਂ ਠਪੇਤ੍ਵਾ ਵਨ੍ਦਨਂ ਅਕਾ.

ਤਸ੍ਸ ¶ ਸਿਸ੍ਸੋ ਭਦ੍ਦਸੇਨਤ੍ਥੇਰੋ ਧਾਤੁਂ ਗਹੇਤ੍ਵਾ ਆਕਾਸੇਨ ਗਨ੍ਤ੍ਵਾ ਧਮ੍ਮਚਕ੍ਕਪ੍ਪਵਤ੍ਤਨੇ ਇਸਿਪਤਨੇ ਮਹਾ ਵਿਹਾਰੇ ਸਤ੍ਥੁਨੋ ਵਸਿਤਗਨ੍ਧਕੁਟਿਯਂ ਠਪੇਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਚਿਰਂ ਵਿਹਾਸਿ. ਸੋ ਪਰਿਨਿਬ੍ਬਾਪਯਮਾਨੋ ਅਤ੍ਤਨੋ ਸਦ੍ਧਿਵਿਹਾਰਿਕਸ੍ਸ ਜਯਸੇਨਤ੍ਥੇਰਸ੍ਸ ਧਾਤੁਂ ਨਿਯ੍ਯਾਦੇਤ੍ਵਾ ਧਾਤੁਵਂਸਂ ਕਥੇਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਭਦ੍ਦਸੇਨੋ ਮਹਾਥੇਰੋ ਕਤਕਿਚ੍ਚੋ ਮਹਾਇਸਿ;

ਧਾਤੁਂ ਠਪੇਤ੍ਵਾ ਇਸਿਪਤਨੇ ਵਨ੍ਦਿਤ੍ਵਾ ਨਿਬ੍ਬੁਤਿਂ ਗਤੋ.

ਸੋ ਪਨ ਜਯਸੇਨਤ੍ਥੇਰੋ ਤਂ ਧਾਤੁਂ ਗਹੇਤ੍ਵਾ ਵੇਲੁਵਨਮਹਾਵਿਹਾਰੇ ਸਤ੍ਥੁਨੋ ਵਸਿਤਗਨ੍ਧਕੁਟਿਯਂ ਠਪੇਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਚਿਰਂ ਵਸਿਤ੍ਵਾ ਪਰਿਨਿਬ੍ਬਾਪਯਮਾਨੋ ਅਤ੍ਤਨੋ ਸਦ੍ਧਿਵਿਹਾਰਿਕਸ੍ਸ ਮਹਾਸਙ੍ਘਰਕ੍ਖਿਤਤ੍ਥੇਰਸ੍ਸ ਧਾਤੁਂ ਨਿਯ੍ਯਾਦੇਤ੍ਵਾ ਧਾਤੁਵਂਸਂ ਕਥੇਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਗਹੇਤ੍ਵਾਨ ਧਾਤੁਵਰਂ ਜਯਸੇਨੋ ਮਹਾਮੁਨਿ;

ਨਿਧਾਯ ਵੇਲੁਵਨੇ ਰਮ੍ਮੇ ਅਕਾ ਪੂਜਂ ਮਨੋਰਮਂ.

ਸੋ ਪਨਾਯਸ੍ਮਾ ਸਙ੍ਘਰਕ੍ਖਿਤਤ੍ਥੇਰੋ ਧਾਤੁਂ ਗਹੇਤ੍ਵਾ ਆਕਾਸੇਨ ਆਗਨ੍ਤ੍ਵਾ ਕੋਸਮ੍ਬਿਂ ਉਪਨਿਸ੍ਸਾਯ ਘੋਸਿਤ ਸੇਟ੍ਠਿਨਾ ਕਾਰਾਪਿਤੇ ਘੋਸਿਤਾਰਾਮੇ ਭਗਵਤੋ ਵਸਿਤਗਨ੍ਧਕੁਟਿਯਂ ਠਪੇਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ਚਿਰਂ ਵਿਹਾਸਿ. ਸੋ’ਪਿ ਪਰਿਨਿਬ੍ਬਾਪਯਮਾਨੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਮਹਾਦੇਵਤ੍ਥੇਰਂ ਪਕ੍ਕੋਸਾਪੇਤ੍ਵਾ ਧਾਤੁਵਂਸਂ ਕਥੇਤ੍ਵਾ ਅਪ੍ਪਮਤ੍ਤੋ ਹੋਹੀ’ਤਿ ਵਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਸਙ੍ਘਰਕ੍ਖਿਤਵ੍ਹਯੋ ਥੇਰੋ ਚਨ੍ਦੋ ਵਿਯ ਸੁਪਾਕਟੋ;

ਠਪੇਤ੍ਵਾ ਘੋਸਿਤਾਰਾਮੇ ਅਕਾ ਪੂਜਂ ਮਨੋਰਮਂ.

ਤਸ੍ਸ ਥੇਰਸ੍ਸ ਸਦ੍ਧਿਵਿਹਾਰਿਕੋ ਮਹਾਦੇਵਤ੍ਥੇਰੋ ਧਾਤੁਂ ਗਹੇਤ੍ਵਾ ਦੇਵਾਨਮ੍ਪਿਯਤਿਸ੍ਸਸ੍ਸ ਮਹਾਰਞ੍ਞੋ ਭਾਤੁ ਮਹਾਨਾਗਸ੍ਸ ਉਪਰਾਜਸ੍ਸ ਮਹਾਗਾਮੇ ਸੇਤਚ੍ਛਤ੍ਤਂ ਉਸ੍ਸਾਪਿਤਕਾਲੇ ਹਤ੍ਥੋਟ੍ਠ ਨਾਮਜਨਪਦੇ ਕੁਕ੍ਕੁਟਪਬ੍ਬਤਨ੍ਤਰੇ ਮਹਾਸਾਲਰੁਕ੍ਖਮੂਲੇ ਆਕਾਸਤੋ ਓਤਰਿਤ੍ਵਾ ਨਿਸੀਦਿ. ਤਸ੍ਮਿਂ ਸਮਯੇ ਮਹਾਕਾਲ਼ੋ ਨਾਮ ਉਪਾਸਕੋ ਅਤ੍ਤਨੋ ਪੁਤ੍ਤਦਾਰੇਹਿ ਸਦ੍ਧਿਂ ਮਾਲਾਗਨ੍ਧਵਿਲੇਪਨਂ ਧਜਪਤਾਕਾਦੀਨਿ ਗਾਹਾਪੇਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਮਹਨ੍ਤੇਹਿ ਪੂਜਾਵਿਧਾਨੇਹਿ ਧਾਤੁਂ ਪਰਿਹਰਿਤ੍ਵਾ ਚਿਰਂ ਵਸਿ. ਮਾਸਸ੍ਸ ਅਟ੍ਠ-ਉਪੋਸਥਦਿਵਸੇ ¶ ਧਾਤੁਤੋ ਛਬ੍ਬਣ੍ਣਰਂਸਿਯੋ ਉਗ੍ਗਚ੍ਛਿਂਸੁ. ਤਸ੍ਮਿਂ ਸਮਯੇ ਸੋ ਪਦੇਸੋ ਬੁਦ੍ਧਸ੍ਸ ਧਰਮਾਨਕਾਲੋ ਵਿਯ ਅਹੋਸਿ. ਜਨਪਦਵਾਸੀ ਮਨੁਸ੍ਸਾਪਿ ਥੇਰਸ੍ਸ ਸਨ੍ਤਿਕੇ ਸੀਲਾਨਿ ਗਣ੍ਹਨ੍ਤਿ, ਉਪੋਸਥਵਾਸਂ ਵਸਨ੍ਤਿ, ਦਾਨਂ ਦੇਨ੍ਤਿ, ਚੇਤਿਯਸ੍ਸ ਮਹਨ੍ਤਂ ਪੂਜਂ ਕਰੋਨ੍ਤੀ. ਤਤੋ ਅਪਰਭਾਗੇ ਉਪਰਾਜਾ ਮਹਾਗਾਮੇ ਵਿਹਰਨ੍ਤੋ ਭੇਰਿਂ ਚਰਾਪੇਸਿ? ਯੋ ਅਮ੍ਹਾਕਂ ਦਸਬਲਸ੍ਸ ਧਾਤੁਂ ਗਹੇਤ੍ਵਾ ਇਧਾਗਤੋ, ਤਸ੍ਸ ਮਹਨ੍ਤਂ ਸਮ੍ਪਤ੍ਤਿਂ ਦਸ੍ਸਾਮੀਤਿ. ਤਸ੍ਮਿਂ ਕਾਲੇ ਕੁਟੁਮ੍ਬਿਕੋ ਮਹਾਕਾਲ਼ੋ ਉਪਰਾਜਂ ਪਸ੍ਸਿਸ੍ਸਾਮੀਤਿ ਤਸ੍ਸ ਅਨੁਚ੍ਛਵਿਕਂ ਪਣ੍ਣਾਕਾਰਂ ਗਹੇਤ੍ਵਾ ਰਾਜਦ੍ਵਾਰੇ ਠਤ੍ਵਾ ਸਾਸਨਂ ਪਹਿਣਿ. ਉਪਰਾਜਾ ਤਂ ਪਕ੍ਕੋਸਾਪੇਸਿ. ਸੋ ਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤੋ ਤਂ ਪਣ੍ਣਾਕਾਰਂ ਰਾਜਪੁਰਿਸਾਨਂ ਪਟਿਚ੍ਛਾਪੇਸਿ. ਉਪਰਾਜਾ? ਮਾਤੁਲ ਮਹਾਕਾਲ਼, ਤੁਮ੍ਹਾਕਂ ਜਨਪਦੇ ਅਮ੍ਹਾਕਂ ਸਤ੍ਥੁਨੋ ਧਾਤੁ ਅਤ੍ਥੀ’ਤਿ ਆਹ. ਮਹਾਕਾਲ਼ੋ ਉਪ ਰਾਜਸ੍ਸ ਕਥਂ ਸੁਤ੍ਵਾ ਅਤ੍ਥਿ ਦੇਵ, ਮਯ੍ਹਂ ਕੁਲੁਪਗਤ੍ਥੇਰਸ੍ਸ ਸਨ੍ਤਿਕੇ ਆਦਾਸਮਣ੍ਡਲਪ੍ਪਮਾਣਂ ਸਤ੍ਥੁਨੋ ਨਲਾਟਧਾਤੁ ਛਬ੍ਬਣ੍ਣਰਂਸੀਹਿ ਆਕਾਸਪ੍ਪਦੇਸੇ ਸੂਰਿਯਸਹਸ੍ਸਚਨ੍ਦਸਹਸ੍ਸਾਨਂ ਉਟ੍ਠਿਤਕਾਲੋ ਵਿਯ ਓਭਾਸੇਤਿ. ਸੋ ਜਨਪਦੋ ਬੁਦ੍ਧਸ੍ਸ ਉਪ੍ਪਨ੍ਨਕਾਲੋ ਵਿਯ ਅਹੋਸੀਤਿ ਆਹ. ਤਸ੍ਸ ਕੁਟੁਮ੍ਬਿਕਸ੍ਸ ਕਥਂ ਸੁਣਨ੍ਤਸ੍ਸਏਵ ਰਞ੍ਞੋ ਸਕਲਸਰੀਰਂ ਪਞ੍ਚਵਣ੍ਣਾਯ ਪੀਤਿਯਾ ਪਰਿਪੁਣ੍ਣਂ ਅਹੋਸਿ. ਅਤਿਵਿਯ ਸੋਮਨਸ੍ਸਪ੍ਪਤ੍ਤੋ ਰਾਜਾ ਮਯ੍ਹਂ ਮਾਤੁਲਸ੍ਸ ਮਹਾਕਾਲ਼ਸ੍ਸ ਸਤਸਹਸ੍ਸਂ ਕਹਾਪਣਾਨਿ ਚ ਚਤੁਸਿਨ੍ਧਵਯੁਤ੍ਤਰਥਞ੍ਚ ਸੁਵਣ੍ਣਾਲਙ੍ਕਾਰੇਹਿ ਸੁਸਜ੍ਜਿਤਂ ਏਕਂ ਅਸ੍ਸਞ੍ਚ ਉਦਕਫਾਸੁਕਟ੍ਠਾਨਕੇ ਖੇਤ੍ਤਞ੍ਚ ਪਞ੍ਚਦਾਸੀਸਤਞ੍ਚ ਦੇਥਾ’ਤਿ ਵਤ੍ਵਾ ਅਞ੍ਞਞ੍ਚ ਪਸਾਦਂ ਦਾਪੇਸਿ. ਸੋ ਉਪਰਾਜਾ ਏਤ੍ਤਕਂ ਕੁਟੁਮ੍ਬਿਕਸ੍ਸ ਦਾਪੇਤ੍ਵਾ ਤਂ ਦਿਵਸਮੇਵ ਨਗਰੇ ਭੇਰਿਂ ਚਰਾਪੇਤ੍ਵਾ ਹਤ੍ਥਸ੍ਸਰਥਯਾਨਾਨਿ ਗਹੇਤ੍ਵਾ ਕੁਟੁਮ੍ਬਿਕਂ ਮਗ੍ਗਦੇਸਕਂ ਕਤ੍ਵਾ ਅਨੁਪੁਬ੍ਬੇਨ ਹਤ੍ਥੋਟ੍ਠਜਨਪਦਂ ਪਤ੍ਵਾ ਰਮਣੀਯੇ ਭੂਮਿਪ੍ਪਦੇਸੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਅਮਚ੍ਚਗਣਪਰਿਵੁਤੋ ਕੁਟੁਮ੍ਬਿਕਂ ਗਹੇਤ੍ਵਾ ਥੇਰਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸੇਸਾ ਅਮਚ੍ਚਾ ਕੁਟੁਮ੍ਬਿਕੋ ਚ ਥੇਰਂ ਵਨ੍ਦਿਤ੍ਵਾ ਏਕਮਨ੍ਤਂ ¶ ਅਟ੍ਠਂਸੁ. ਉਪਰਾਜਾ ਥੇਰਂ ਵਨ੍ਦਿਤ੍ਵਾ ਸਾਰਾਣੀਯਂ ਕਥਂ ਕਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਪਟਿਸਨ੍ਥਾਰਮਕਾਸਿ. ਮਹਾਦੇਵਤ੍ਥੇਰੋਪਿ ਸਮ੍ਮੋਦਨੀਯਂ ਕਥਂ ਕਤ੍ਵਾ ਕਿਸ੍ਸ ਤ੍ਵਂ ਮਹਾਰਾਜ ਇਧਾਗਤੋਸਿ ਆਗਤਕਾਰਣਂ ਮੇ ਆਰੋਚੇਹੀ’ਤਿ ਆਹ. ਭਨ੍ਤੇ ਤੁਮ੍ਹਾਕਂ. ਸਨ੍ਤਿਕੇ ਅਮ੍ਹਾਕਂ ਭਗਵਤੋ ਨਲਾਟਧਾਤੁ ਅਤ੍ਥੀ ਕਿਰ. ਤਂ ਵਨ੍ਦਿਸ੍ਸਾਮਿ’ਤਿ ਆਗਤੋਮ੍ਹੀ’ਤਿ ਆਹ. ਥੇਰੋ? ਭਦ੍ਦਕਂ ਮਹਾ ਰਾਜ ਤਯਾ ਕਤਨ੍ਤਿ ਵਤ੍ਵਾ ਧਾਤੁਘਰਦ੍ਵਾਰਂ ਵਿਵਰਿਤ੍ਵਾ ਮਹਾਰਾਜ ਬੁਦ੍ਧਸ੍ਸ ਨਲਾਟਧਾਤੁ ਅਤਿਦੁਲ੍ਲਭਾ’ਤਿ ਆਹ. ਰਾਜਾ ਸੋਲ਼ਸੇਹਿ ਗਨ੍ਧੋਦਕੇਹਿ ਨਹਾਯਿਤ੍ਵਾ ਸਬ੍ਬਾਲਙ੍ਕਾਰਪਤਿਮਣ੍ਡਿਤੋ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ. ਬੁਦ੍ਧਾਰਮ੍ਮਣਾਯ ਪੀਤਿਯਾ ਸਕਲਸਰੀਰਂ ਫੁਟਂ ਅਹੋਸਿ.

(ਰਾਜਾ ਪੀਤਿਵੇਗੇਨ ਇਮਾ ਗਾਥਾ ਆਹ;

ਨਮਾਮਿ ਵੀਰ ਪਾਦੇ ਤੇ ਚਕ੍ਕਙ੍ਕਿਤ ਤਲੇ ਸੁਭੇ;

ਵਨ੍ਦਿਤੇ ਨਰਦੇਵੇਹਿ ਅਮਤਂ ਦੇਹਿ ਵਨ੍ਦਿਤੇ.

ਲੋਕਨਾਥ ਤੁਵਂ ਏਕੋ ਸਰਣਂ ਸਬ੍ਬਪਾਣਿਨਂ;

ਲੋਕੇ ਤਯਾ ਸਮੋ ਨਤ੍ਥਿ ਤਾਰੇਹਿ ਜਨਤਂ ਬਹੁਂ.

ਮਹਣ੍ਣਵੇ ਮਯਂ ਭਨ੍ਤੇ ਨਿਮੁਗ੍ਗਾ ਦੀਘਸਮ੍ਭਵੇ;

ਅਪ੍ਪਤਿਸ੍ਸਾ ਅਪ੍ਪਤਿਟ੍ਠਾ ਸਂਸਰਾਮ ਚਿਰਂ ਤਹਿਂ.

ਏਤਰਹਿ ਤੁਮ੍ਹੇ ਆਪਜ੍ਜ ਪਤਿਟ੍ਠਂ ਅਧਿਗਚ੍ਛਰੇ;

ਤੁਮ੍ਹਾਕਂ ਵਨ੍ਦਨਂ ਕਤ੍ਵਾ ਉਤ੍ਤਿਣ੍ਣਮ੍ਹ ਭਵਣ੍ਣਵਾ’ਤਿ.)

ਤਸ੍ਮਿਂ ਖਣੇ ਧਾਤੁਤੋ ਰਸ੍ਮਿਯੋ ਨਿਕ੍ਖਮਿਂਸੁ. ਸਕਲ ਲਙ੍ਕਾਦੀਪਂ ਸੁਵਣ੍ਣਰਸਧਾਰਾਹਿ ਸਞ੍ਛਨ੍ਨਂ ਵਿਯ ਅਹੋਸਿ. ਮਹਨ੍ਤਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ. ਰਾਜਾ ਮਹਨ੍ਤਂ ਸੋਮਨਸ੍ਸਂ ਪਤ੍ਤੋ ਹੁਤ੍ਵਾ ਹਟ੍ਠਤੁਟ੍ਠੋ ਅਹੋਸਿ. ਸੋ ਧਾਤੁਘਰਤੋ ਨਿਕ੍ਖਮਿਤ੍ਵਾ ਥੇਰੇਨ ਸਦ੍ਧਿਂ ਅਲਙ੍ਕਤਮਣ੍ਡਪੇ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ (ਨਿਸਜ੍ਜਾਦੋਸੇ ਵਜ੍ਜੇਤ੍ਵਾ ਸੇਯ੍ਯਥਿਦਂ? ਅਤਿਦੁਰਚ੍ਚਾਸਨ੍ਤ-ਉਪਰਿਵਾਤ-ਉਨ੍ਨਤਪ੍ਪਦੇਸ-ਅਤਿਸਮ੍ਮੁਖ-ਅਤਿਪਚਛਾ’ਤਿ. ¶ ਅਤਿਦੂਰੇ ਨਿਸਿਨ੍ਨੋ ਸਚੇ ਕਥੇਤੁਕਾਮੋ ਉਚ੍ਚਾਸਦ੍ਦੇਨ ਕਥੇਤਬ੍ਬਂ ਹੋਤਿ. ਅਚ੍ਚਾਸਨ੍ਨੇ ਨਿਸਿਨ੍ਨੋ ਸਙ੍ਕਰਂ ਕਰੋਤਿ. ਉਪਰਿਵਾਤੇ ਨਿਸਿਨ੍ਨੋ ਸਰੀਰਗਨ੍ਧੋ ਵਾਯਤਿ. ਉਨ੍ਨਤਪ੍ਪਦੇਸੇ ਨਿਸਿਨ੍ਨੋ ਅਗਾਰਵਂ ਕਰੋਤਿ. ਅਤਿਸਮ੍ਮੁਖੇ ਨਿਸਿਨ੍ਨੋ ਚਕ੍ਖੁਨਾ ਚਕ੍ਖੁਂ ਪਹਰਿਤ੍ਵਾ ਦਟ੍ਠਬ੍ਬਂ ਹੋਤਿ. ਅਤਿਪਚ੍ਛਾ ਨਿਸਿਨ੍ਨੋ ਗੀਵਂ ਪਰਿਵਤ੍ਤੇਤ੍ਵਾ ਦਟ੍ਠਬ੍ਬਂ ਹੋਤਿ. ਇਤਿ ਨਿਸਜ੍ਜਾਦੋਸਂ ਵਜ੍ਜੇਤ੍ਵਾ ਨਿਸਿਨ੍ਨੋ). ਏਵਮਾਹ. ਭਨ੍ਤੇ ਇਮਂ ਧਾਤੁਂ ਮਯ੍ਹਂ ਦੇਥ. ਮਹਨ੍ਤਂ ਪੂਜਾਸਕ੍ਕਰਂ ਕਤ੍ਵਾ ਪਰਿਹਰਾਮੀਤਿ. ਭਦ੍ਦਕਂ ਮਹਾਰਾਜ ਇਮਾਯ ਧਾਤੁਯਾ ਸਮ੍ਮਾਸਮ੍ਬੁਦ੍ਧੋ ਧਰਮਾਨੋਯੇਵ ਵ੍ਯਾਕਰਣਂ ਅਕਾਸਿ. ਤੁਮ੍ਹਾਕਂ ਵਂਸੇ ਜਾਤੋ ਕਾਕਵਣ੍ਣਤਿਸ੍ਸੋ ਨਾਮ ਰਾਜਾ ਇਮਸ੍ਮਿਂ ਦੀਪੇ ਮਹਾਵਾਲੁਕਗਙ੍ਗਾਯ ਦਕ੍ਖਿਣਤੀਰੇ ਸੇਰੁ ਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਯਾ ਮਤ੍ਥਕੇ ਪਤਿਟ੍ਠਪੇਤ੍ਵਾ ਮਹਨ੍ਤਂ ਥੂਪਂ ਕਰਿਸ੍ਸਤੀ’ਤਿ ਵਤ੍ਵਾ ਸਤ੍ਥਾ ਤਤ੍ਥ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਪਞ੍ਚਸਤਖੀਣਾਸਵੇਹਿ ਸਦ੍ਧਿਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਗਤੋ. ਤਸ੍ਮਾ ਗਣ੍ਹਥ ਮਹਾਰਾਜਾ’ਤਿ ਵਤ੍ਵਾ ਧਾਤੁਂ ਅਦਾਸਿ.

ਰਾਜਾ ਧਾਤੁਂ ਗਹੇਤ੍ਵਾ ਚਤੁਰਸ੍ਸਪਲ੍ਲਙ੍ਕੇ ਧਾਤੁਕਰਣ੍ਡਕਂ ਨਿਦਹਿਤ੍ਵਾ ਕਰਣ੍ਡਕੇ ਧਾਤੁਂ ਪਤਿਟ੍ਠਾਪੇਤ੍ਵਾ ਤਂ ਕੁਮੁਦਪਤ੍ਤਸਨ੍ਨਿਹਮਙ੍ਗਲਸਿਨ੍ਧਵਯੁਤ੍ਤਰਥੇ ਠਪੇਤ੍ਵਾ ਸਮਨ੍ਤਾ ਆਰਕ੍ਖਂ ਸਂਵਿਦਹਿਤ੍ਵਾ (ਰਾਜਾ ਧਾਤੁਂ ਗਹੇਤ੍ਵਾ) ਪਞ੍ਚਙ੍ਗਤੁਰਿਯੇ ਪਗ੍ਗਣ੍ਹਾਪਯਮਾਨੋ ਪਚ੍ਛਾ ਆਗਚ੍ਛਤੁ’ਤਿ ਮਹਾਜਨਸ੍ਸ ਸਾਸਨਂ ਵਤ੍ਵਾ ਮਹਾਦੇਵਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ? ਤੁਮ੍ਹੇ ਭਨ੍ਤੇ, ਧਾਤੁਯਾ ਉਪਟ੍ਠਾਨਂ ਕਰੋਨ੍ਤੋ ਆਗਚ੍ਛਥਾ’ਤਿ ਆਹ. ਥੇਰੋ ਤਸ੍ਸ ਕਥਂ ਸੁਤ੍ਵਾ;’ਮਹਾਰਾਜ ਅਯਂ ਧਾਤੁ ਪਰਮ੍ਪਰਾ ਆਗਤਾ. ਅਹਂ ਭਗਵਤੋ ਧਮ੍ਮਭਣ੍ਡਾਗਾਰਿਕਆਨਨ੍ਦਤ੍ਥੇਰੋ ਵਿਯ ਇਮਂ ਧਾਤੁਂ ਪਰਿਹਰਿਸ੍ਸਾਮੀ’ਤਿ ਵਤ੍ਵਾ ਅਤ੍ਤਨੋ ਪਚ੍ਚਯਦਾਯਕਂ ਕੁਟੁਮ੍ਬਿਕਂ ਆਪੁਚ੍ਛਿਤ੍ਵਾ ਪਤ੍ਤਚੀਵਰਮਾਦਾਯ ਧਾਤੁਂ ਉਪਟ੍ਠਹਿਯਮਾਨੋ ਪਚ੍ਛਤੋ ਪਚ੍ਛਤੋ ਗਚ੍ਛਤਿ. ਰਾਜਾ ਧਾਤੁਂ ਗਹੇਤ੍ਵਾ ਅਨੁਪੁਬ੍ਬੇਨ ਮਹਾਗਾਮਂ ਪਤ੍ਤੋ ਮਹਾਸੇਨਗੁਤ੍ਤਂ ਪਕ੍ਕੋਸਾਪੇਤ੍ਵਾ ਨਗਰਂ ਅਲਙ੍ਕਰਾਪੇਹੀ’ਤਿ ਆਹ. ਸੋ ਨਗਰੇ ਭੇਰਿਂ ਚਰਾਪੇਤ੍ਵਾ ਅਟ੍ਠਾਰਸ ਵੀਥਿਯੋ ਸਮ੍ਮਜ੍ਜਨ੍ਤੁ, ਪੁਣ੍ਣਘਟੇ ਠਪੇਨ੍ਤੁ, ਧਜਪਤਾਕਾਦਯੋ ਉਸ੍ਸਾਪੇਨ੍ਤੁ, ਤੋਰਣਾਨਿ ਉਸ੍ਸਾਪੇਨ੍ਤੁ, ਪਞ੍ਚਵਣ੍ਣਾਨਿ ਪੁਪ੍ਫਾਨਿ ¶ ਓਕਿਰਨ੍ਤੁ, ਸਕਲਨਗਰਂ ਅਲਙ੍ਕਰੋਨ੍ਤੁ, ਗਨ੍ਧਮਾਲਾਦਯੋ ਗਹੇਤ੍ਵਾ ਸੁਦ੍ਧੁਤ੍ਤਰਾਸਙ੍ਗਾ ਹੁਤ੍ਵਾ ਸਕਲਨਾਗਰਾ ਪਟਿਪਥਂ ਆਗਚ੍ਛਨ੍ਤੁਤਿ ਆਣਾਪੇਸਿ. ਤਤੋ ਮਹਾਜਨੋ ਸਬ੍ਬਤੁਰਿਯਾਨਿ ਘੋਸਾਪਯਮਾਨੋ ਗਨ੍ਧਮਾਲਾਦਿਹਤ੍ਥੋ ਪਟਿਪਥਂ ਨਿਕ੍ਖਨ੍ਤੋ. ਦੇਵਮਨੁਸ੍ਸਾ ਭਿਕ੍ਖੁਭਿਕ੍ਖੁਨਿਯੋ ਉਪਾਸਕੋਪਾਸਿਕਾ ਅਪ੍ਪਮਾਣਾ ਅਹੇਸੁਂ. (ਗਨ੍ਧਮਾਲਾਦਿ ਪੁਣ੍ਣਘਟਸਮੁਸ੍ਸਿਤਧਜਾਕਿਣ੍ਣਾ) ਪਰਿਸਾ ਵੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤਯਿਂਸੁ. ਸੁਗਨ੍ਧਵਾਤਾਭਿਘਾਤਸਮੁਦ੍ਦਘੋਸੋ ਵਿਯ ਸਕਲਨਗਰਂ ਏਕਨਿਨ੍ਨਾਦਜਾਤਂ. ਸੋ ਰਾਜਾ ਨਗਰੇ ਬਨ੍ਧਨਾਗਾਰੇ ਸਬ੍ਬਸਤ੍ਤੇ ਬਨ੍ਧਨਾ ਮੁਞ੍ਚਨ੍ਤੁ, ਧਮ੍ਮੇਨ ਸਮੇਨ ਅਨੁਸਾਸਨ੍ਤੁਤਿ ਵਤ੍ਵਾ ਧਾਤੁਂ ਗਹੇਤ੍ਵਾ ਅਤ੍ਤਨੋ ਨਗਰਂ ਪਵੇਸੇਤ੍ਵਾ ਅਤ੍ਤਨੋ ਰਾਜਨਿਵੇਸਨਂ ਆਗਨ੍ਤ੍ਵਾ ਨਾਟਕੀਨਂ ਸਞ੍ਞਮਦਾਸਿ ਧਾਤੁਂ ਵਨ੍ਦਨ੍ਤੁਤਿ. ਨਾਟਕੀ ਨਾਨਾਭਰਣੇਹਿ ਪਤਿਮਣ੍ਡਿਤਾ ਰਾਜਗੇਹਤੋ ਨਿਕ੍ਖਮਿਤ੍ਵਾ ਧਾਤੁਂ ਵਨ੍ਦਿਤ੍ਵਾ ਅਤ੍ਤਨੋ ਅਤ੍ਤਨੋ ਹਤ੍ਥਗਤਾਨਿ ਤੁਰਿਯਭਣ੍ਡਾਨਿ ਸਾਧੁਕਂ ਪਗ੍ਗਣ੍ਹਿਤ੍ਵਾ ਮਹਨ੍ਤਂ ਪੂਜਮਕਂਸੁ.

ਤਤੋ ਵਡ੍ਢਕਿਂ ਪਕ੍ਕੋਸਾਪੇਤ੍ਵਾ ਰਾਜਨਿਵੇਸਨਤੋ ਨਾਤਿਦੂਰੇ ਨਾਚ੍ਚਾਸਨ੍ਤੇ ਸੁਭੁਮਿਤਲੇ ਧਾਤੁਘਰਂ ਕਾਰਾਪੇਤ੍ਵਾ ਮਾਲਾਕਮ੍ਮਲਤਾਕਮ੍ਮਾਦਿਂ ਪਤਿਟ੍ਠਾਪੇਤ੍ਵਾ ਧਾਤੁਘਰੇ ਵਿਚਿਤ੍ਤਮਣ੍ਡਪਂ ਕਾਰਾਪੇਤ੍ਵਾਨ ਸਤ੍ਤਰਤਨਮਯਂ ਧਾਤੁਕਰਣ੍ਡਕਂ ਕਾਰਾਪੇਤ੍ਵਾ ਧਾਤੁਕਰਣ੍ਡਕੇ ਧਾਤੁਂ ਠਪੇਤ੍ਵਾ ਰਤਨਪਲ੍ਲਙ੍ਕ ਮਤ੍ਥਕੇ ਧਾਤੁਂ ਠਪੇਤ੍ਵਾ ਉਪਰਿ ਵਿਚਿਤ੍ਤਵਿਤਾਨਂ ਬਨ੍ਧਿਤ੍ਵਾ ਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਹਨ੍ਤਂ ਧਾਤੁਪੂਜਂ ਅਕਾਸਿ. ਮਹਾਜਨਾ ਗਨ੍ਧਮਾਲਂ ਗਹੇਤ੍ਵਾ ਮਾਸਸ੍ਸ ਅਟ੍ਠੂਪੋਸਥਦਿਵਸੇ ਧਾਤੁਯਾ ਮਹਨ੍ਤਂ ਪੂਜਂ ਅਕਂਸੁ. ਧਾਤੁਤੋ ਰਂਸਿਯੋ ਸਮੁਗ੍ਗਚ੍ਛਨ੍ਤਿ. ਮਹਾਜਨਾ ਵਿਮ੍ਭਯਜਾਤਾ ਸਾਧੁਕਾਰਂ ਕਰੋਨ੍ਤਿ. ਸੋਮਨਸ੍ਸਭੂਤਾ ਸਕਲਨਗਰਵਾਸਿਨੋ ਬੁਦ੍ਧਾਰਮ੍ਮਣ ਪੀਤਿਂ ਗਹੇਤ੍ਵਾ ਦਿਵਸੇ ਦਿਵਸੇ ਧਾਤੁਯਾ ਮਹਨ੍ਤਂ ਪੂਜਂ ਕਰੋਨ੍ਤਾ ਵੀਤਿਨਾਮੇਨ੍ਤਿ. ਪਞ੍ਚਸੀਲਾਨਿ ਰਕ੍ਖਨ੍ਤਿ, ਬੁਦ੍ਧਮਾਮਕਾ ਧਮ੍ਮਮਾਮਕਾ ਸਙ੍ਘਮਾਮਕਾ ਹੁਤ੍ਵਾ ਸਰਣਾਨਿ ਗਚ੍ਛਨ੍ਤਿ. ਰਾਜਾ ਮਹਾਜਨਸ੍ਸ ਓਵਦਤਿ. ‘‘ਮੇਤ੍ਤਂ ਭਾਵੇਥ, ਕਰੁਣਂ ਮੁਦਿਤਂ ਉਪੇਕ੍ਖਂ ਭਾਵੇਥ, ਕੁਲੇ ਜੇਟ੍ਠਾਪਚਾਯਨਕਮ੍ਮਂ ਕਰੋਥਾ‘‘ਤਿ. ਓਵਦਿਤ੍ਵਾ ਭਿਕ੍ਖੁਸਙ੍ਘਸ੍ਸਪਿ ਚਤ੍ਤਾਰੋ ਪਚ੍ਚਯੇ ਗਙ੍ਗਾਯ ਮਹੋ-ਘਪ੍ਪਵਤ੍ਤਨਕਾਲੋ ¶ ਵਿਯ ਮਹਾਦਾਨਂ ਪਵਤ੍ਤੇਸਿ. ਮਾਤਾਪਿਤੁਟ੍ਠਾਨੇ ਠਤ੍ਵਾ ਭਿਕ੍ਖੁਸਙ੍ਘਂ ਸਙ੍ਗਣ੍ਹਿ. ਮਹਾਜਨਾ ਤਸ੍ਸ ਓਵਾਦੇ ਠਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਯੇਭੁਯ੍ਯੇਨ ਤਸ੍ਮਿਂ ਕਾਲੇ ਮਤਾ ਸਗ੍ਗਂ ਗਤਾ.

ਕਲ੍ਯਾਣਵਗ੍ਗਮ੍ਹਿ ਪਤਿਟ੍ਠਿਤਾ ਜਨਾ,

ਦਾਨਾਦਿ ਪੁਞ੍ਞਾਨਿ ਕਰਿਤ੍ਵ ਸਬ੍ਬਦਾ;

ਚੁਤਾ ਚੁਤਾ ਸਬ੍ਬਜਨਾ ਸੁਮਾਨਸਾ,

ਗਤਾ ਅਸੇਸਂ ਸੁਗਤਿਂ ਸੁਭੇ ਰਤਾ.

ਰਾਜਾ ਧਾਤੁਯਾ ਮਹਨ੍ਤਂ ਪੂਜਂ ਕਰੋਨ੍ਤੋ ਮਹਗਾਮੇ ਵਿਹਾਸਿ. ਤੇਨ ਪਤਿਟ੍ਠਾਪਿਤਵਿਹਾਰਾ ਕਥੇਤਬ੍ਬਾ? ਕਥਂ? ਲੇਨਵਿਹਾਰਂ ਚਨ੍ਦਗਿਰਿਵਿਹਾਰਂ ਕੋਟਿਪਬ੍ਬਤਵਿਹਾਰਂ ਨਗਰਙ੍ਗਣਵਿਹਾਰਂ ਸੇਲਕਾ ਵਿਹਾਰਂ ਤਲਾਕਾਵਿਹਾਰਨ੍ਤਿ ਏਵਮਾਦਯੋ ਵਿਹਾਰੇ ਪਤਿਟ੍ਠਾਪੇਤ੍ਵਾ ਤਿਪਿਟਕਮਹਾਅਰਿਟ੍ਠਤ੍ਥੇਰਸ੍ਸ ਦਕ੍ਖਿਣੋਦਕਂ ਦਤ੍ਵਾ ਮਹਾਵਿਹਾਰੇ ਨਿਯ੍ਯਾਦੇਸਿ. ਏਵਂ ਸੋ ਰਾਜਾ ਯਾਵਜੀਵਂ ਧਾਤੁਂ ਪਰਿਹਰਿਤ੍ਵਾ ਪਚ੍ਛਿਮੇ ਕਾਲੇ ਮਰਣਮਞ੍ਚੇ ਨਿਪਨ੍ਨੋ ਅਤ੍ਤਨੋ ਪੁਤ੍ਤਂ ਯਟਾਲਤਿਸ੍ਸ ਕੁਮਾਰਂ ਪਕ੍ਕੋਸਾਪੇਤ੍ਵਾ; ਤਾਤ ਤਿਸ੍ਸ, ਅਮ੍ਹੇਹਿ ਪਰਿਹਰਿਤ ਨਲਾਟਧਾਤੁ ਪੂਜੇਹੀ’ਤਿ ਧਾਤੁਵਂਸਂ ਕਥੇਤ੍ਵਾ ਪੁਤ੍ਤਂ ਅਨੁਸਾਸਿਤ੍ਵਾ ਕਾਲਂ ਕਤ੍ਵਾ ਸਗ੍ਗਪੁਰਂ ਗਤੋ.

ਰਾਜਾ ਮਹਾਨਾਗਵਰੋ ਯਸਸ੍ਸਿ,

ਕਤ੍ਵਾਪਿ ਰਜ੍ਜਂ ਮਤਿਮਾ ਸੁਸਦ੍ਧੋ;

ਮਾਨੇਤ੍ਵ ਸਙ੍ਘਂ ਚਤੁਪਚ੍ਚਯੇਹਿ,

ਅਗਾ ਅਸੋਕੋ ਵਰਦੇਵਲੋਕਂ;

ਤਸ੍ਸ ਪੁਤ੍ਤੋ ਯਟਾਲਤਿਸ੍ਸਕੁਮਾਰੋ ਪਿਤੁ ਅਚ੍ਚਯੇਨ ਪਿਤਰਾ ਵੁਤ੍ਤਨਿਯਾਮੇਨੇਵ ਧਾਤੁਯਾ ਮਹਨ੍ਤਂ ਪੂਜਂ ਕਾਰੇਸਿ. ਸੋ’ਪਿ ਦਿਵਸਸ੍ਸ ਤਯੋ ਵਾਰੇ ਧਾਤੁਪਟ੍ਠਾਨਂ ਕਰੋਨ੍ਤੋ ਰਜ੍ਜਂ ਕਾਰੇਤ੍ਵਾ ਚਿਰਂ ਵਿਹਾਸਿ. ਇਮਿਨਾ’ਪਿ ਪਤਿਟ੍ਠਾਪਿਤਵਿਹਾਰਾ ਕਥੇਤਬ੍ਬਾ; ਧਮ੍ਮਸਾਲਵਿਹਾਰਂ ਮਹਾਧਮ੍ਮਸਾਲਵਿਹਾਰਂ ਸੇਲਾਭਯਵਿਹਾਰਨ੍ਤਿ ਏਵਮਾਦਯੋ ¶ ਪਤਿਟ੍ਠਾਪੇਤ੍ਵਾ-ਤਿਪਿਟਕਮਹਾਅਰਿਟ੍ਠਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ ਤਿਪਿਟਕਮਹਾਅਭਯਤ੍ਥੇਰੋ ਉਪਰਾਜਸ੍ਸ ਮਹਾਨਾਗਸ੍ਸ ਅਯ੍ਯਕੋ. ਤਸ੍ਸ ਥੇਰਸ੍ਸ ਦਕ੍ਖਿਣੋਦਕਂ ਅਦਾਸਿ. ਸੋ’ਪਿ ਰਾਜਾ ਯਾਵਜੀਵਂ ਧਾਤੁਂ ਪਰਿਹਰਿਤ੍ਵਾ ਪਚ੍ਛਿਮੇ ਕਾਲੇ ਮਰਣਮਞ੍ਚੇ ਨਿਪਨ੍ਨੋ ਅਤ੍ਤਨੋ ਪੁਤ੍ਤਂ ਗੋਠਾਭਯਕੁਮਾਰਂ ਪਕ੍ਕੋਸਾਪੇਤ੍ਵਾ’ਧਾਤੁਯਾ ਮਹਨ੍ਤਂ ਪੂਜਂ ਕਰੋਨ੍ਤੋ ਅਪ੍ਪਮਤ੍ਤੋ ਹੋਹੀ’ਤਿ ਵਤ੍ਵਾ ਧਾਤੁਵਂਸਂ ਕਥੇਤ੍ਵਾ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ.

ਯਟ੍ਠਾਲਕੋ ਨਾਮ ਮਹਾਮਹੀਪਤਿ,

ਮਹਾਜਨਸ੍ਸਤ੍ਥਕਰੋ ਗੁਣਾਲਯੋ;

ਸੋ ਧਾਤੁਪੂਜਂ ਵਿਪੁਲਂ ਅਨੇਕਧਾ,

ਕਤ੍ਵਾ ਗਤੋ ਦੇਵਪੁਰਂ ਅਨਿਨ੍ਦਿਤੋ.

ਤਸ੍ਸ ਪੁਤ੍ਤੋ ਗੋਠਾਭਯਕੁਮਾਰੋ ਪਿਤੁ ਅਚ੍ਚਯੇਨ ਪਿਤਰਾ ਵੁਤ੍ਤਨਿਯਾਮੇਨੇਵ ਧਾਤੁਯਾ ਮਹਨ੍ਤਂ ਪੂਜਂ ਕਤ੍ਵਾ ਗੋਠਾਭਯ ਮਹਾਰਾਜਾ ਹੁਤ੍ਵਾ ਰਜ੍ਜਂ ਕਰੋਨ੍ਤੋ ਕਾਚਰਗਾਮੇ ਦਸਭਾਤਿਕੇ ਰਾਜਾਨੋ ਘਾਤੇਤ੍ਵਾ ਦਣ੍ਡਕਮ੍ਮਤ੍ਥਾਯ ਗੋਠਾਭਯਮਹਾਥੇਰਸ੍ਸ ਹਤ੍ਥੋਟ੍ਠਜਨਪਦੇ ਵਸਨ੍ਤਸ੍ਸ ਮਤ੍ਤਿਕਲੇਨਵਿਹਾਰਂ ਖੀਰਸਾਲ ਵਿਹਾਰਂ ਨਾਗਮਹਾਵਿਹਾਰਂ ਕੁਮ੍ਭਸੇਲਵਿਹਾਰਂ ਚੇਤਿਯਪਬ੍ਬਤਵਿਹਾਰਂ ਸਾਨੁਪਬ੍ਬਤਵਿਹਾਰਂ ਕਣਿਕਾਰ ਸੇਲਵਿਹਾਰਂ ਅਮ੍ਬਸੇਲ ਵਿਹਾਰਂ ਤਿਨ੍ਦੁਕਲੇਨ ਵਿਹਾਰਂ ਕਰਣ੍ਡਕਵਿਹਾਰਂ ਗੋਧਸਾਲਵਿਹਾਰਂ ਵਾਲੁਕਤਿਤ੍ਥਵਿਹਾਰਨ੍ਤਿ ਏਵਮਾਦਯੋ ਗਙ੍ਗਾਯ ਪਰਤੀਰੇ ਪਞ੍ਚਸਤਵਿਹਾਰੇ ਓਰਿਮਤੀਰੇ ਪਞ੍ਚਸਤਵਿਹਾਰੇ ਚਾ’ਤਿ ਵਿਹਾਰਸਹਸ੍ਸਂ ਕਾਰੇਤ੍ਵਾ ਅਤ੍ਤਨੋ ਸਦਿਸਨਾਮਸ੍ਸ ਗੋਠਾਭਯਤ੍ਥੇਰਸ੍ਸ ਦਕ੍ਖਿਣੋਦਕਂ ਦਤ੍ਵਾ ਅਦਾਸਿ. ਸੋ ਯਾਵਜੀਵਂ ਧਾਤੁਪੂਜਂ ਕਤ੍ਵਾ ਪਚ੍ਛਿਮੇ ਕਾਲੇ ਮਰਣਮਞ੍ਚੇ ਨਿਪਨ੍ਨੋ ਅਤ੍ਤਨੋ ਪੁਤ੍ਤਂ ਕਾਕਵਣ੍ਣਤਿਸ੍ਸ ਕੁਮਾਰਂ ਪਕ੍ਕੋਸਾਪੇਤ੍ਵਾ ਆਲਿਙ੍ਗਿਤ੍ਵਾ;’ਤਾਤ ਤਿਸ੍ਸ, ਅਯਂ ਨਲਾਟਧਾਤੁ ਅਮ੍ਹਾਕਂ ਪਰਮ੍ਪਰਾਯ ਆਗਤਾ. ਤ੍ਵਂ ਕਿਰ ਧਾਤੁਂ ਗਹੇਤ੍ਵਾ ਮਹਾਗਙ੍ਗਾਯ ਪਸ੍ਸੇ ਸੇਰੁ ਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਯਾ ਮਤ੍ਥਕੇ ਪਤਿਟ੍ਠਾਪੇਤ੍ਵਾ ਸਙ੍ਘਾਰਾਮਂ ਕਾਰਾਪੇਸ੍ਸਸੀ’ਤਿ ਸਤ੍ਥਾ ਜੀਵਮਾਨੋ ਵ੍ਯਾਕਰਣਮਕਾਸਿ. ਤਸ੍ਮਾ ਤ੍ਵਂ ਇਮਂ ਧਾਤੁਂ ਗਹੇਤ੍ਵਾ ਮਮਚ੍ਚਯੇਨ ਤਸ੍ਮਿਂ ਠਾਨੇ ਪਤਿਟ੍ਠਾਪੇਹੀ’ਤਿ ਪੁਤ੍ਤਂ ਅਨੁਸਾਸਿਤ੍ਵਾ ਕਾਲਕਿਰਿਯਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ.

ਗੋਠਾਭਯੋ ¶ ਨਾਮ ਮਹੀਪਤਿਸ੍ਸਰੋ,

ਮਹਾਜਨੇ ਤੋਸਯਿ ਅਪ੍ਪਮਤ੍ਤੋ;

ਸੋ ਧਾਤੁਪੂਜਂ ਵਿਪੁਲਂ ਕਰਿਤ੍ਵਾ,

ਅਗਾ ਅਸੋਕੋ ਵਰਦੇਵਲੋਕਂ.

ਮਹਾਨਨ੍ਦੋ ਮਹਾਪਞ੍ਞੋ ਚਨ੍ਦਗੁਤ੍ਤੋ ਬਹੁਸ੍ਸੁਤੋ;

ਭਦ੍ਦਸੇਨੋ ਮਹਾਥੇਰੋ ਭਦ੍ਦਧਮ੍ਮੇ ਵਿਸਾਰਦੋ.

ਜਯਸੇਨੋ ਚ ਸੋ ਵੀਰੋ ਥੇਰੋ ਸੋ ਸਙ੍ਘਰਕ੍ਖਿਤੋ;

ਦੇਵਤ੍ਥੇਰੋ ਚ ਮੇਧਾਵੀ ਰਕ੍ਖਕਾ ਧਾਤੁ ਭਦ੍ਦਕਾ.

ਉਪਰਾਜਾ ਮਹਾਨਾਗੋ ਯਟ੍ਠਾਲਕੋ ਮਹਾਬਲੋ;

ਗੋਠਾਭਯੋ ਮਹਾਪੁਞ੍ਞੋ ਕਾਕਵਣ੍ਣੋ ਚ ਵੀਰਿਯਵਾ.

ਏਤੇ ਥੇਰਾ ਚ ਰਾਜਾਨੋ ਪੁਞ੍ਞਵਨ੍ਤੋ ਸੁਮਾਨਸਾ;

ਧਾਤੁ ਪਰਮ੍ਪਰਾਨੀਤਾ ਧਾਤਾ ਧਾਤੁਸੁਕੋਵਿਦਾ.

ਕਸ੍ਸਪਾਦੀਨਥੇਰਾਨਂ ਪਰਮ੍ਪਰਾਯਮਾਗਤਾ;

ਮਹਾਨਾਗਾਦਿ ਹਤ੍ਥਤੋ ਯਾਵ ਤਿਸ੍ਸਮੁਪਾਗਤਾ.

ਇਤਿ ਅਰਿਯਜਨਪ੍ਪਸਾਦਨਤ੍ਥਾਯ ਕਤੇ ਧਾਤੁਵਂਸੇ

ਧਾਤੁਪਰਮ੍ਪਰਾ ਕਥਾ ਨਾਮ

ਤਤਿਯੋ ਪਰਿਚ੍ਛੇਦੋ.

੪. ¶ ਪਕਿਣ੍ਣਕਕਥਾ

ਤਤ੍ਰ ਠਤ੍ਵਾ ਰਞੇਞੋ ਉਪ੍ਪਤ੍ਤਿ ਕਥੇਤਬ੍ਬਾ. (ਸੋ ਪਨ) ਅਮ੍ਹਾਕਂ ਸਤ੍ਥੁਨੋ ਬੋਧਿਪ੍ਪਤ੍ਤਿਤੋ ਪੁਰੇਤਰਮੇਵ ਮਹਾਮਲਯ ਰਟ੍ਠੇ ਵਨਚਰਕਂ ਪਟਿਚ੍ਚ ਤਸ੍ਸ ਭਰਿਯਾਯ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਨਵਡ੍ਢਮਾਸਾਵਸਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿਤ੍ਵਾ ਕਮੇਨ ਵਡ੍ਢਨ੍ਤੋ ਵਿਞ੍ਞੁਭਾਵਂ ਪਾਪੁਣਿ. ਤਸ੍ਸ ਪਿਤਾ ਏਕਂ ਦਾਰਿਕਂ ਆਨੇਤ੍ਵਾ ਪੁਤ੍ਤਸ੍ਸ ਗੇਹੇ ਅਕਾਸਿ. ਅਪਰਭਾਗੇ ਤਸ੍ਸ ਪਿਤਾ ਕਾਲਮਕਾਸਿ. ਕੁਮਾਰੋ’ਚਰਕੋ’ਤਿ ਪਞ੍ਞਾਯਿ. ਸੋ ਤਤੋ ਪਟ੍ਠਾਯ ਪਚ੍ਚੇਕਬੁਦ੍ਧਂ ਉਪਟ੍ਠਹਿ. ਚਰਕੋ ਅਤ੍ਤਨੋ ਨਿਵਾਸਵਤ੍ਥੁਸ੍ਮਿਂ ਕਦਲਿਪਨਸਾਦੀਨਿ ਰੋਪੇਤ੍ਵਾ ਫਲਾਰਾਮਂ ਅਕਾਸਿ. ਤਤੋ ਅਪਰਭਾਗੇ ਤੇਨ ਰੋਪਿਤਪਨਸਰੁਕ੍ਖੋ ਮਹਨ੍ਤਂ ਚਾਟਿਪ੍ਪਮਾਣਂ ਪਨਸਫਲਂ ਗਣ੍ਹਿ. ਚਰਕੋ ਅਤ੍ਤਨੋ ਵਤ੍ਥੁਂ ਗਨ੍ਤ੍ਵਾ ਸਾਖਾਯ ਸੁਪਕ੍ਕਂ ਪਨਸਫਲਂ ਪਸ੍ਸਿਤ੍ਵਾ ਛਿਨ੍ਦਿਤ੍ਵਾ ਗੇਹਂ ਆਹਰਿਤ੍ਵਾ ਅਪਸ੍ਸਾਯਂ ਲੁਞ੍ਚਿਤ੍ਵਾ ਉਪਧਾਰੇਸਿ. ਤਤੋ ਸਮਨ੍ਤਾ ਚਤੁਮਧੁਰਂ ਵਿਯ ਯੂਸਂ ਓਤਰਿਤ੍ਵਾ ਅਪਸ੍ਸਯਂ ਅਪਨੀਤ ਆਵਾਟਂ ਪੂਰੇਤ੍ਵਾ ਅਟ੍ਠਾਸਿ. ਤਤੋ ਚਰਕੋ ਏਵਂ ਚਿਨ੍ਤੇਸਿ. ਇਮਂ ਪਨਸਫਲਂ ਅਮ੍ਹਾਕਂ ਪਚ੍ਚੇਕਬੁਦ੍ਧੇਨ ਵਿਨਾ ਅਞ੍ਞੇਸਂ ਨਾਨੁਚ੍ਛਵਿਕਨ੍ਤਿ. ਪਟਿਸਾਮੇਤ੍ਵਾ ਠਪੇਸਿ.

ਪੁਨਦਿਵਸੇ ਪਚ੍ਚੇਕਬੁਦ੍ਧੋ ਲੇਨਤੋ ਨਿਕ੍ਖਮਿਤ੍ਵਾ ਸਰੀਰਪਟਿਜਗ੍ਗਨਂ ਕਤ੍ਵਾ ਸੁਰਤ੍ਤਪਲ੍ਲਵਸਦਿਸਂ ਅਨ੍ਤਰਵਾਸਕਂ ਪਰਿਮਣ੍ਡਲਂ ਕਤ੍ਵਾ ਨਿਵਾਸੇਤ੍ਵਾ ਬਹਲਪਵਰਮਹਾਪਂਸੁਕੂਲਚੀਵਰਂ ਪਾਰੁਪਿਤ੍ਵਾ ਨੀਲਭਮਰਵਣ੍ਣਂ ਪਤ੍ਤਂ ਹਤ੍ਥੇਨ ਗਹੇਤ੍ਵਾ ਆਕਾਸੇਨ ਆਗਨ੍ਤ੍ਵਾ ਤਸ੍ਸ ਕੁਟਿਦ੍ਵਾਰੇ ਪਾਕਟੋ ਅਹੋਸਿ. ਚਰਕੋ ਕੁਟਿਤੋ ਨਿਕ੍ਖਮਿਤ੍ਵਾ ਤਂ ਵਨ੍ਦਿਤ੍ਵਾ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਗੇਹਂ ਪਵੇਸੇਤ੍ਵਾ ਪੀਠੇ ਨਿਸੀਦਾਪੇਤ੍ਵਾ ਅਤ੍ਤਨਾ ਠਪਿਤਟ੍ਠਾਨਤੋ ਪਨਸਫਲਂ ਗਹੇਤ੍ਵਾ ਯੂਸਂ ਪਤ੍ਤੇ ਪੂਰੇਤ੍ਵਾ ਪਟਿਗ੍ਗਹਾਪੇਸਿ. ਪਚ੍ਚੇਕਬੁਦ੍ਧੋ ¶ ਤਂ ਪਰਿਭੁਞ੍ਜਿਤ੍ਵਾ ਆਕਾਸਤੋ ਅਤ੍ਤਨੋ ਵਸਨਟ੍ਠਾਨਮੇਵ ਗਤੋ. ਅਥੇਕਦਿਵਸਂ ਚਰਕੋ ਪਰਦੇਸਾ ਗਚ੍ਛਨ੍ਤੋ ਭਰਿਯਂ ਪਕ੍ਕੋਸਾਪੇਤ੍ਵਾ;’ ਅਮ੍ਮ, ਅਯ੍ਯਸ੍ਸ ਅਪ੍ਪਮਤ੍ਤੋ ਹੁਤ੍ਵਾ ਦਾਨਂ ਦੇਹੀ’ਤਿ ਸਬ੍ਬੂਪਕਰਣਂ ਨਿਯ੍ਯਾਦੇਤ੍ਵਾ ਪਰਦੇਸਂ ਗਤੋ. ਪੁਨਦਿਵਸੇ ਪਚ੍ਚੇਕਬੁਦ੍ਧੋ ਲੇਨਤੋ ਨਿਕ੍ਖਮਿਤ੍ਵਾ ਚੀਵਰਂ ਪਾਰੁਪਿਤ੍ਵਾ ਪਤ੍ਤਮਾਦਾਯ ਆਕਾਸਤੋ ਆਗਨ੍ਤ੍ਵਾ ਕੁਟਿਦ੍ਵਾਰੇ ਓਤਰਿਤ੍ਵਾ ਅਟ੍ਠਾਸਿ. ਤਸ੍ਮਿਂ ਖਣੇ ਚਰਕਸ੍ਸ ਭਰਿਯਾ ਕੁਟਿਤੋ ਨਿਕ੍ਖਮਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਗੇਹੇ ਨਿਸੀਦਾਪੇਤ੍ਵਾ ਭਤ੍ਤਂ ਅਦਾਸਿ.

ਤੇਨ ਭਤ੍ਤਕਿਚ੍ਚੇ ਪਰਿਨਿਟ੍ਠਿਤੇ ਸਾ ਤਰੁਣਪਚ੍ਚੇਕਬੁਦ੍ਧਂ ਪਸ੍ਸਿਤ੍ਵਾ ਕਿਲੇਸਪਟਿਸਂਯੁਤ੍ਤਂ ਚਿਤ੍ਤਂ ਉਪ੍ਪਾਦੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਅਤ੍ਤਨੋ ਅਜ੍ਝਾਸਯਂ ਕਥੇਸਿ. ਪਚ੍ਚੇਕਬੁਦ੍ਧੋ ਤਸ੍ਸਾ ਕਥਂ ਸੁਤ੍ਵਾ ਜਿਗੁਚ੍ਛਮਾਨੋ ਉਪ੍ਪਤਿਤ੍ਵਾ ਆਕਾਸਤੋ ਅਤ੍ਤਨੋ ਵਸਨਟ੍ਠਾਨਮੇਵ ਗਤੋ. ਸਾ ਪਚ੍ਚੇਕਬੁਦ੍ਧਸ੍ਸ ਗਤਕਾਲੇ ਅਤ੍ਤਨੋ ਸਰੀਰਂ ਤੇਲੇਨ ਮਕ੍ਖੇਤ੍ਵਾ ਭਣ੍ਡਨਕਾ ਵਿਯ ਨਿਤ੍ਥੁਨਮਾਨਾ ਮਞ੍ਚੇ ਨਿਪਜ੍ਜਿ. ਚਰਕੋ ਪਰਦੇਸਤੋ ਆਗਨ੍ਤ੍ਵਾ ਭਰਿਯਂ ਨਿਪਜ੍ਜਮਾਨਂ ਏਵਮਾਹ?’ਭਦ੍ਦੇ, ਕਿਂ ਅਯ੍ਯਸ੍ਸ ਭਿਕ੍ਖਂ ਅਦਾਸੀ’ਤਿ. ਸਾ ਨਿਤ੍ਥੁਨਮਾਨਾ ਆਹ? ਮਾ ਪੁਚ੍ਛ ਤਵ ਅਯ੍ਯਸ੍ਸ ਕਮ੍ਮਨ੍ਤਿ. ਕਥੇਹਿ ਭਦ੍ਦੇ, ਕਿਂ ਤੇਨ ਕਮ੍ਮਂ ਕਤਨ੍ਤਿ. ਸੋ ਅਤ੍ਤਨਾ ਸਦ੍ਧਿਂ ਕਿਲੇਸਵਸ੍ਨੇ ਓਕਾਸਂ ਕਾਰਾਪੇਤੁਂ ਵਾਯਮਿਤ੍ਵਾ ਮਯਾ ਅਯੁਤ੍ਤਨ੍ਤਿ ਵੁਤ੍ਤੇ ਮਮ ਕੇਸੇ ਗਹੇਤ੍ਵਾ ਹਤ੍ਥਪਾਦੇਹਿ ਆਕੋਟੇਤ੍ਵਾ ਸਰੀਰਂ ਨਖੇਨ ਓਤ੍ਥਰਿਤ੍ਵਾ ਸੀਸੇ ਪਹਰਿਤ੍ਵਾ ਗਤੋ’ਤਿ ਵੁਤ੍ਤੇ ਚਰਕੋ ਤਂ ਸੁਤ੍ਵਾ ਅਸਹਨ੍ਤੋ (ਏਸੋ ਮਯਾ) ਏਵਰੂਪਸ੍ਸ ਅਸ੍ਸਮਣਕਮ੍ਮਸ੍ਸ ਪੋਸਿਤੋ’ਤਿ ਵਤ੍ਵਾ ਤਸ੍ਸਾ ਸੋਕਂ ਵਿਨੋਦੇਤ੍ਵਾ ਧਨੁਂ ਆਦਾਯ ਤਿਕ੍ਖਸਰਂ ਗਹੇਤ੍ਵਾ ਏਤਂ ਮਾਰੇਤ੍ਵਾ ਆਗਮਿਸ੍ਸਾਮੀ’ਤਿ ਵਤ੍ਵਾ ਵਸਨਟ੍ਠਾਨਂ ਅਗਮਾਸਿ.

ਤਸ੍ਮਿਂ ਸਮਯੇ ਪਚ੍ਚੇਕਬੁਦ੍ਧੋ ਨਹਾਨਤ੍ਥਾਯ ਗਤੋ. ਗਨ੍ਤ੍ਵਾ ਚ ਪਨ ਕਾਯਬਨ੍ਧਨਂ ਆਕਾਸੇ ਚੀਵਰਵਂਸਂ ਵਿਯ ਕਤ੍ਵਾ ਨਿਵਾਸਨਪਾਪੁਰਣਂ ਤਸ੍ਮਿਂ ਠਪੇਤ੍ਵਾ ਜਲਸਾਟਕਂ ਨਿਵਾਸੇਤ੍ਵਾ ਉਦਕਮਤ੍ਥਕਾ ਆਕਾਸੇ ਨਿਸੀਦਿਤ੍ਵਾ ਨਹਾਯਿਤੁਂ ਆਰਭਿ. ਚਰਕੋ ਪਚ੍ਚੇਕਬੁਦ੍ਧਸ੍ਸ ਗਰੁਗਾਰਵਕਾਰਣਂ ਪਸ੍ਸਨ੍ਤੋ ਗੁਮ੍ਬਨ੍ਤਰੇ ਨਿਲੀਨੋ ¶ ਅਟ੍ਠਾਸਿ. ਠਤ੍ਵਾ ਚ ਪਨ ਏਵਰੂਪਂ ਅਚ੍ਛਰਿਯਂ ਦਿਸ੍ਵਾ ਚਿਨ੍ਤੇਸਿ? ਅਯਞ੍ਚ ਏਵਰੂਪਂ ਨ ਕਰੋਤਿ, ਅਦ੍ਧਾ ਏਸਾ ਮੁਸਾਵਾਦਾ’ਤਿ. ਅਹਂ ਏਤਿਸ੍ਸਾ ਵਚਨਂ ਗਹੇਤ੍ਵਾ ਏਵਰੂਪਸ੍ਸ ਸਮਣਸ੍ਸ ਅਕਾਰਣੇ ਅਪਰਾਧਂ ਕਤਂ. ਏਸੋ ਤਾਦਿਸਂ ਨ ਕਰੋਤੀ’ਤਿ ਚਿਨ੍ਤੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਨਹਤ੍ਵਾ ਠੀਤਕਾਲੇ ਗਨ੍ਤ੍ਵਾ ਪਾਦੇਸੁ ਨਿਪਤਿਤ੍ਵਾ?’ਮਯ੍ਹਂ ਖਮਥ ਅਯ੍ਯਾ’ਤਿ ਆਹ. ਪਚ੍ਚੇਕ ਬੁਦ੍ਧੋ? ਕਿਂ ਕਥੇਸਿ ਉਪਾਸਕਾ’ਤਿ. ਸੋ ਅਤ੍ਤਨੋ ਮਾਤੁਗਾਮਸ੍ਸ ਕਥਿਤਂ ਆਚਿਕ੍ਖਿ. ਏਵਞ੍ਹਿ ਸਤਿ ਉਪਾਸਕ ਤੁਮ੍ਹਾਕਂ ਆਗਤਕਮ੍ਮਂ ਨਿਟ੍ਠਪੇਤ੍ਵਾ ਗਨ੍ਤੁਂ ਵਟ੍ਟਤੀ’ਤਿ ਆਹ. ਮਾ ਏਵਂ ਕਥੇਥ ਸਾਮਿ, ਅਹਂ ਅਞ੍ਞਾਣਭਾਵੇਨ ਤਸ੍ਸਾ ਵਚਨਂ ਗਹੇਤ੍ਵਾ ਤੁਮ੍ਹਾਕਂ ਅਕਾਰਣੇ ਦੁਬ੍ਭਿਤੁਂ ਆਗਤੋਮ੍ਹਿ’ਤਿ ਸਬ੍ਬਂ ਅਤ੍ਤਨਾ ਚਿਨ੍ਤਿਤਂ ਆਚਿਕ੍ਖਿ.

ਪਚ੍ਚੇਕਬੁਦ੍ਧੋ? ਆਮ ਉਪਾਸਕ, ਸਾ ਅਤ੍ਤਨਾ ਸਦ੍ਧਿਂ ਅਸਦ੍ਧਮ੍ਮਪਟਿਸਂਯੁਤ੍ਤਕਥਂ ਕਥੇਸੀ’ਤਿ ਆਹ. ਸੋ ਤਸ੍ਸਾ ਕੁਜ੍ਝਿਤ੍ਵਾ ਅਹਂ ਏਤਂ ਨਿਸ੍ਸਾਯ ਇਮਸ੍ਸ ਅਪਰਜ੍ਝਾਮਿ. ਗਨ੍ਤ੍ਵਾ ਤਂ ਮਾਰੇਸ੍ਸਾਮੀ’ਤਿ ਪਚ੍ਚੇਕਬੁਦ੍ਧਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਨਿਕ੍ਖਮਿ. ਪਚ੍ਚੇਕਬੁਦ੍ਧੋ ਤਂ ਨਿਵਤ੍ਤੇਤ੍ਵਾ ਮਾਤੁਗਾਮਂ ਮਾ ਮਾਰੇਹੀ’ਤਿ ਅਨੇਕਵਿਧਾਨਿ ਕਾਰਣਾਨਿ ਕਥੇਤ੍ਵਾ ਪਞ੍ਚਸੀਲੇ ਪਤਿਟ੍ਠਪੇਤ੍ਵਾ ਤਸ੍ਸ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ?

ਯੋ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ,

ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸ;

ਤਮੇਵ ਬਾਲਂ ਪਚ੍ਚੇਤਿ ਪਾਪਂ,

ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋ’ਤਿ;

ਚਰਕੋ ਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਤਚਿਤ੍ਤੋ ਹੁਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਗੇਹਂ ਗਨ੍ਤ੍ਵਾ ਤਾਯ ਸਦ੍ਧਿਂ ਸਮਗ੍ਗਵਾਸਂ ਵਸਿਤ੍ਵਾ ਤਤੋ ਪਟ੍ਠਾਯ ਯਾਵਜੀਵਂ ਪਚ੍ਚੇਕਬੁਦ੍ਧਸ੍ਸ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਦਯੋ ਪਰਿਕ੍ਖਾਰੇ ਚ ਦਤ੍ਵਾ ਪਟਿਜਗ੍ਗਿ. ਸੋ ਤਸ੍ਮਿਂਯੇਵ ਲੇਨੇ ਵਸਨ੍ਤੋ ਅਪਰਭਾਗੇ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਸਯਮ੍ਭੁਞਾਣੇਨ ¶ ਵਿਗਯ੍ਹ ਧਮ੍ਮਂ,

ਦੁਕ੍ਖਂ ਅਨਨ੍ਤਂ ਸਕਲਂ ਪਹਾਯ;

ਸਮਾਧਿਝਾਨਾਭਿਰਤੋ ਯਸਸ੍ਸਿ,

ਗਤੋ ਵਿਨਾਸਂ ਪਵਰੋ ਯਸਸ੍ਸਿ.

ਅਥ ਪਚ੍ਛਾ ਚਰਕੋ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ. ਤਤ੍ਥ ਚਿਰਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਦੇਵਲੋਕਤੋ ਚਵਿਤ੍ਵਾ ਇਮਸ੍ਮਿਂ ਦੀਪੇ ਮਲਯ ਰਟ੍ਠੇ ਅਮਰੁਪ੍ਪਲ ਲੇਨਸ੍ਸ ਆਸਨ੍ਨਟ੍ਠਾਨੇ ਉਪਚਰਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਨਵਮਾਸਡ੍ਢਪਰਿਯੋਸਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸ ਨਾਮਗਹਣਦਿਵਸੇ ਞਾਤਕਾ ਅਮਰੁਪ੍ਪਲ ਕੁਮਾਰੋਤਿ ਨਾਮਂ ਅਕਂਸੁ. ਸੋ ਪਨ ਅਪਰਭਾਗੇ ਵਡ੍ਢੇਨ੍ਤੋ ਦਾਰਕੇਹਿ ਸਦ੍ਧਿਂ ਕੀਲ਼ਨ੍ਤੋ ਪਤ੍ਤਪੁਟੇਨ ਵਾਲੁਕਭਤ੍ਤਂ ਪਚਿਤ੍ਵਾ, ਦਾਰਕਾ ਇਮੇ ਸਮਣਾਤਿ ਵਤ੍ਵਾ ਪਟਿਪਾਟਿਯਾ ਨਿਸੀਦਾਪੇਤ੍ਵਾ ਦਾਨਂ ਦਸ੍ਸਾਮੀ’ਤਿ ਵਤ੍ਵਾ ਕੀਲ਼ਾਦਾਨਂ ਦੇਤਿ. ਏਕਦਿਵਸਂ ਅਮਰੁਪ੍ਪਲ ਕੁਮਾਰੋ ਵਾਲੁਕਥੁਪਂ ਕਤ੍ਵਾ ਅਤ੍ਤਨੋ ਨਿਵਾਸਨਵਤ੍ਥਦੁਸ੍ਸਂ ਗਹੇਤ੍ਵਾ ਖੁਦ੍ਦਕਦਣ੍ਡਕੇ ਬਨ੍ਧਿਤ੍ਵਾ ਪਟਾਕਂ ਕਤ੍ਵਾ ਪੂਜਨਤ੍ਥਾਯ ਠਪੇਸਿ. ਅਮਰੁਪ੍ਪਲ ਲੇਨਵਾਸੀ ਮਲਿਯ ਦੇਵਤ੍ਥੇਰਂ ਨਿਸ੍ਸਾਯ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਇਮਸ੍ਮਿਂਯੇਵ ਦੀਪੇ ਮਹਾਗਾਮੇ ਗੋਠਾਭਯਮਹਾਰਾਜਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸੋ ਨਵਮਾਸਡ੍ਢਪਰਿਯੋਸਾਨੇ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸ ਨਾਮਗਹਣ ਦਿਵਸੇ’ਕਾਕਵਣ੍ਣਤਿਸ੍ਸੋ’ਤਿ ਨਾਮਂ ਅਕਂਸੁ. ਸੋ ਅਨੁਪੁਬ੍ਬੇਨ ਵਡ੍ਢਿਤ੍ਵਾ ਪਿਤੁ ਅਚ੍ਚਯੇਨ ਛਤ੍ਤਂ ਉਸ੍ਸਾਪੇਤ੍ਵਾ ਕਾਕਵਣ੍ਣਤਿਸ੍ਸਮਹਾਰਾਜਾ ਅਹੋਸਿ. ਤਸ੍ਸ ਛਤ੍ਤੇ ਉਸ੍ਸਾਪਿਤੇਯੇਵ ਸਕਲਰਟ੍ਠਂ ਸੁਭਿਕ੍ਖਂ ਅਹੋਸਿ. ਪਞ੍ਚ ਵਾ ਦ੍ਵਾਦਸ ਵਾ ਦਿਵਸੇ ਅਨਤਿਕ੍ਕਮਿਤ੍ਵਾ ਦੇਵੋ ਸਮ੍ਮਾ ਵਸ੍ਸਤਿ. ਵੇਸ੍ਸਨ੍ਤਰਬੋਧਿਸਤ੍ਤਸ੍ਸ ਦਾਨਗ੍ਗੇ ਯਾਚਕਾਨਂ ਹਤ੍ਥੇ ਭਿਕ੍ਖਾਭਾਜਨਂ ਵਿਯ ਤਸ੍ਮਿਂ ਕਾਲੇ ਵਾਪੀਪੋਕ੍ਖਰਣੀ-ਨਦੀ-ਕਨ੍ਦਰ-ਸੋਬ੍ਭ-ਜਾਤਸਰਾਦਯੋ ਵਸ੍ਸੋਦਕੇਨ ਪੂਰਿਤਾ ਅਹੇਸੁਂ. ਪਞ੍ਚਵਿਧਪਦੁਮਸਞ੍ਛਨ੍ਨਾ ਅਨੇਕਦਿਜਸਮਾਕਿਣ੍ਣਾ ਨਾਨਾਰੁਕ੍ਖੇਹਿ ਵਿਰੋਚਿਤਾ ਅਹੇਸੁਂ. ਨਾਨਾ ਸਸ੍ਸਾਨਿ ਸਮ੍ਪਜ੍ਜਿਂਸੁ, ਉਤ੍ਤਰਕੁਰੁ ਆਲਕਮਨ੍ਦਾ ਰਾਜਧਾਨਿਸਦਿਸਂਵ ਹਿਰਞ੍ਞਸੁਵਣ੍ਣਾਦਿ ਰਤਨਟ੍ਠਾਨਂ.

ਸੋ ¶ ਰਾਜਾ ਸਦ੍ਧਾਯ ਸਮ੍ਪਨ੍ਨੋ ਮਹਾਭਿਕ੍ਖੁਸਙ੍ਘਸ੍ਸ ਚਤ੍ਤਾਰੋ ਪਚ੍ਚਯੇ ਅਨੂਨਂ ਕਤ੍ਵਾ ਦਾਪੇਸਿ. ਸਟ੍ਠਿਮਤ੍ਤਾਨਂ ਤਿਪਿਟਕਧਰਾਨਂ ਚਨ੍ਦਨਦੋਣਿਯਾ ਸਤਪਾਕਤੇਲਸ੍ਸ ਪੂਰਾਪੇਤ੍ਵਾ ਯਾਵਪਿਟ੍ਠਿਪਾਦਂ ਤਾਵ ਓਸੀਦਾਪੇਤ੍ਵਾ ਨਿਸਿਨ੍ਨਾਨਂ ਲਟ੍ਠਿਮ ਧੁਦਨ੍ਤਕਟ੍ਠਂ ਚਤੁਮਧੁਰਂ ਪਕ੍ਖਿਪਿਤ੍ਵਾ ਦਾਪੇਸਿ. ਉਚ੍ਛੁਕਣ੍ਡ-ਸਕ੍ਖਰਾ-ਨਾਲਿਕੇਰ-ਫਲਮੂਲਖਨ੍ਧਖਾਦਨਞ੍ਚ ਨਾਨਾਵਿਧਮਚ੍ਛਰਸੇਹਿ ਸੁਗਨ੍ਧਸਾਲਿਤਣ੍ਡੁਲੇਨ ਸਾਧਿਤਯਾਗੁਭਤ੍ਤਞ੍ਚ ਪਾਤੋਵ ਅਦਾਸਿ. ਅਨ੍ਤਰਾਭਤ੍ਤੇ ਅਟ੍ਠਾਰਸਵਿਧ-ਅਨ੍ਤਰਖਜ੍ਜਕਞ੍ਚ ਉਚ੍ਛੁਕਦਲਿਪਨਸਫਲਾਦਯੋ ਚ ਨਾਨਾਵਿਧੋਤ੍ਤਰਿਭਙ੍ਗੇਨ ਸਦ੍ਧਿਂ ਸੁਗਨ੍ਧਸਾਲਿਤਣ੍ਡੁਲਭਤ੍ਤਂ ਨਾਨਗ੍ਗਰਸਂ ਦਾਪੇਤ੍ਵਾ ਪਚ੍ਛਾਭਤ੍ਤਂ ਅਟ੍ਠਵਿਧਕਪ੍ਪੀਯਪਾਨਕੇ ਚ ਦਾਪੇਸਿ. ਅਞ੍ਞੇ ਸਮਣਪਰਿਕ੍ਖਾਰੇ ਚ ਦਾਪੇਸਿ. ਇਮਿਨਾ ਨਿਯਾਮੇਨੇਵ ਭਿਕ੍ਖੁਸਙ੍ਘਸ੍ਸ ਤਿਪਿਟਕਧਰਭਿਕ੍ਖੂਨਞ੍ਚ ਨਿਰਨ੍ਤਰਂ ਮਹਾ ਦਾਨਂ ਦਤ੍ਵਾ ਵਸਤਿ.

ਅਥਾਪਰੇਨ ਸਮਯੇਨ ਕਲ੍ਯਾਣਿਯਂ ਸਿਵੋ ਨਾਮ ਮਹਾਰਾਜਾ ਅਤ੍ਤਨੋ ਭਾਗਿਨੇਯ੍ਯਸ੍ਸ ਅਭਯਕੁਮਾਰਸ੍ਸ ਕਾਕਵਣ੍ਣਤਿਸ੍ਸ ਰਞ੍ਞੋ ਭਗਿਨਿਯਾ ਸੋਮਦੇਵਿਯਾ ਨਾਮ ਰਾਜਪੁਤ੍ਤਿਯਾ ਆਵਾਹਮਙ੍ਗਲਂ ਕਤ੍ਵਾ ਆਨੇਤ੍ਵਾ ਪਾਦਪਰਿਚਾਰਿਕਂ ਦਾਪੇਸਿ. ਦਤ੍ਵਾ ਚ ਪਨ ਅਭਯ ਕੁਮਾਰਂ ਗਿਰਿਨਗਰਮ੍ਹਿ ਨਿਸੀਦਾਪੇਸੀ. ਸੋ ਗਿਰਿਨਗਰੇ ਰਜ੍ਜਂ ਕਾਰਾਪੇਤ੍ਵਾ ਗਿਰਿਅਭਯੋ ਨਾਮ ਰਾਜਾ ਹੁਤ੍ਵਾ ਮਹਨ੍ਤਂ ਸਮ੍ਪਤ੍ਤਿਂ ਅਨੁਭਵਮਾਨੋ ਵਿਹਾਸਿ. ਤਤੋ ਅਪਰਭਾਗੇ ਕਾਕਵਣ੍ਣਤਿਸ੍ਸ ਮਹਾਰਾਜਾ ਮਹਾਗਾਮੇ ਵਿਹਰਨ੍ਤੋ ਅਞ੍ਞਤਰਸ੍ਸ ਭਿਕ੍ਖੁਸ੍ਸ ਗਤ੍ਤੇ ਮਙ੍ਕੁਨਾ ਦਟ੍ਠਟ੍ਠਾਨੇ ਗਣ੍ਡਂ ਉਟ੍ਠਿਤਂ ਦਿਸ੍ਵਾ ਕਿਮੇਤਂ ਅਯ੍ਯਾ’ਤਿ ਪੁਚ੍ਛਿ. ਮਙ੍ਕੁਨਾ ਦਟ੍ਠਟ੍ਠਾਨਂ ਮਹਾਰਾਜਾਤਿ. ਤਂ ਸੁਤ੍ਵਾ ਸਂਵੇਗਪ੍ਪਤ੍ਤੋ, ਭਨ੍ਤੇ ਮਙ੍ਕੁਨਾ ਕਿਸ੍ਮਿਂ ਨ ਭਵਨ੍ਤਿ’ਤਿ ਪੁਚ੍ਛਿ. ਪਟ੍ਟਸਾਟਕੇ ਨ ਭਵਨ੍ਤਿ’ਤਿ. ਇਮੇ ਪਨ ਭਦ੍ਦਨ੍ਤਾ ਪਟ੍ਟਸਾਟਕੇ ਕੁਤੋ ਲਭਨ੍ਤੀ’ਤਿ ਚਿਨ੍ਤੇਤ੍ਵਾ ਗਤੋ. ਤਂ ਦਿਵਸਮੇਵ ਪਾਨੀਯਮਾਲ਼ਕੇ ਨਿਸਿਨ੍ਨੋ ਤਿਪਿਟਕਤਿਸ੍ਸਤ੍ਥੇਰੋ ਨਾਮ ਰਞ੍ਞੋ ਬੁਦ੍ਧਸੀਹਨਾਦਸੁਤ੍ਤਂ ਨਾਮ ਕਥੇਸਿ. ਸੋ ਥੇਰੇ ਪਸਨ੍ਨੋ; ਉਤ੍ਤਰਾਸਙ੍ਗੇ ਦੀਯਮਾਨੇ’ਏਕਸਾਟਕੋ ਭਵਿਸ੍ਸਾਮਿ’ ਤਸ੍ਮਾ ਇਮਮੇਵ ਦਾਤੁਂ ਨ ਸਕ੍ਕਾ, ਕਥਂ ਕਰਿਸ੍ਸਾਮੀ’ਤਿ ਚਿਨ੍ਤੇਨ੍ਤੋ ਥੇਰੇਨ ਸਦ੍ਧਿਂ ਕਥਯਮਾਨੋ ਤਤ੍ਥ ਮਾਲ਼ਕੇਯੇਵ ਅਟ੍ਠਾਸਿ. ਤਸ੍ਮਿਂ ਖਣੇ ਏਕੋ ਕਾਕੋ ਅਮ੍ਬਸਾਖਨ੍ਤਰੇ ਨਿਸੀਦਿਤ੍ਵਾ

ਸਦ੍ਦਂ ¶ ਕਰੋਨ੍ਤੋ ਏਵਮਾਚਿਕ੍ਖਿ. ਅਯ੍ਯ ਕਾਕਵਣ੍ਣਤਿਸ੍ਸਮਹਾਰਾਜ, ਤੁਮ੍ਹਾਕਂ ਕਙ੍ਖਾ ਨਾਮ ਨਤ੍ਥੀ, ਪਸਾਦਕ੍ਖਣੇ ਧਮ੍ਮਕਥਿਕਸ੍ਸ ਉਤ੍ਤਰਾਸਙ੍ਗਂ ਦੇਹੀ’ਤਿ ਆਹ.

(ਕਾਕੋ ਸੋ ਕਾਕਵਣ੍ਣਸ੍ਸ ਵਦੇਤਿ ਵਚਨਕ੍ਖਮੋ,

ਪਸਾਦਜਾਤੋ ਥੇਰਸ੍ਸ ਤੁਵਂ ਸਦ੍ਧਮ੍ਮਦੇਸਨੇ;

ਦਦਾਹਿ ਉਤ੍ਤਰਾਸਙ੍ਗਂ ਮਹਾਥੇਰਸ੍ਸ ਭੂਮਿਪਾ’ਤਿ.)

ਮਹਾਰਾਜ, ਅਹਂ ਤੁਮ੍ਹਾਕਂ ਪਞ੍ਚਸਾਸਨਂ ਗਹੇਤ੍ਵਾ ਆਗਤੋ. ਵਿਹਾਰਦੇਵਿ ਪੁਤ੍ਤਂ ਵਿਜਾਯਿ. ਇਦਮੇਕਂ ਸਾਸਨਂ. ਏਕਾ ਕਰੇਣੁਕਾ ਸੁਵੀਰਹਤ੍ਥਿਪੋਤਕਂ ਤਿਤ੍ਥਸਰੇ ਵਿਜਾਯੀ. ਇਦਂ ਦੁਤਿਯਂ ਸਾਸਨਂ. ਗੋਠਸਮੁਦ੍ਦਮਜ੍ਝੇਨ ਸਤ੍ਤਮਤ੍ਤਾ ਨਾਵਾ ਪਟ੍ਟਨੇ ਪਚ੍ਚੁਟ੍ਠਿਤਾ, ਇਦਂ ਤਤਿਯਂ ਸਾਸਨਂ ਉਤ੍ਤਰ ਵਡ੍ਢਮਾਨਪਬ੍ਬਤਪਾਦੇ ਦ੍ਵਿਕਰੀਸਪ੍ਪਮਾਣੇ ਖੇਤ੍ਤੇ ਤਰੁਣਤਾਲਕ੍ਖਨ੍ਧਪ੍ਪਮਾਣਾ ਸੁਵਣ੍ਣਕ੍ਖਨ੍ਧਾ ਉਗ੍ਗਚ੍ਛਿਂਸੁ, ਇਦਂ ਚਤੁਤ੍ਥਂ ਸਾਸਨਂ. ਗਿਰਿਪਬ੍ਬਤਪਾਦੇ ਕੋਟ ਰਟ੍ਠਕ ਵਿਹਾਰੇ ਕੋਟਰਟ੍ਠਕੋ ਨਾਮ ਥੇਰੋ ਮਗ੍ਗੋਪਸਮਂ ਵਤ੍ਵਾ ਗਿਰਿਪਬ੍ਬਤਮਤ੍ਥਕੇ ਸਤ੍ਤਤਾਲਪ੍ਪਮਾਣਂ ਉਗ੍ਗਨ੍ਤ੍ਵਾ ਆਕਾਸੇ ਨਿਸਿਨ੍ਨੋ ਪਰਿਨਿਬ੍ਬਾਯਿ, ਇਦਂ ਪਞ੍ਚਮਂ ਸਾਸਨਂ.

(ਪੁਤ੍ਤੋ ਹਤ੍ਥੀ ਚ ਨਾਵਾ ਚ ਚਤੁਤ੍ਥਂ ਹੇਮਖਨ੍ਧਕਂ;

ਥੇਰਸ੍ਸ ਪਰਿਨਿਬ੍ਬਾਨਂ ਪਞ੍ਚਮਂ ਸਾਸਨਂ ਇਦਂ.

ਇਮਂ ਗਹੇਤ੍ਵਾਨ ਅਹਂ ਆਗਤੋ ਤਵ ਸਨ੍ਤਿਕਂ;

ਸਾਸਨਂ ਈਦਿਸਂ ਸੁਤ੍ਵਾ ਪੁਞ੍ਞਕਮ੍ਮੇ ਰਤੋ ਭਵ.

ਵਤ੍ਥਂ ਸਹਸਾ ਦਾਪੇਹਿ ਕਤੋ ਸਬ੍ਬਸਮਾਗਮੋ;

ਇਦਂ ਨਿਚ੍ਚਂ ਜਾਨਨ੍ਤੋ ਕਿਂ ਲਗ੍ਗੋ ਉਤ੍ਤਰਾਸਙ੍ਗੇ’ਤਿ.)

ਰਾਜਾ ਕਾਕਸ੍ਸ ਵਚਨਂ ਸੁਤ੍ਵਾ ਹਸਿ. ਥੇਰੋ? ਕਸ੍ਮਾ ਮਹਾਰਾਜ ਹਸੀ’ਤਿ ਪੁਚ੍ਛਿ. ਭਨ੍ਤੇ, ਏਤਸ੍ਮਿਂ ਅਮ੍ਬਸਾਖਨ੍ਤਰੇ ਨਿਸੀਦਿਤ੍ਵਾ ਸਦ੍ਦਂ ਕਰੋਨ੍ਤਸ੍ਸ ਕਾਕਸ੍ਸ ਕਥਂ ਸੁਤ੍ਵਾ ਹਸਿਨ੍ਤਿ ਸਬ੍ਬਂ ਆਰੋਚੇਸਿ. ਥੇਰੋ’ਪਿ ਰਞ੍ਞਾ ਪੁਰਿਮਤ੍ਤਭਾਵੇ ਕਤਕਮ੍ਮਂ ¶ ਪਸ੍ਸਿਤ੍ਵਾ ਹਸਿ. ਰਾਜਾ ਕਸ੍ਮਾ ਅਯ੍ਯੋ ਹਸੀ’ਤਿ ਪੁਚ੍ਛਿ. ਮਹਾਰਾਜ, ਤੁਮ੍ਹਾਕਂ ਅਨਨ੍ਤਰੇ ਅਤ੍ਤਭਾਵੇ ਮਲਯਰਟ੍ਠੇ ਅਮਰੁਪ੍ਪਲ ਨਾਮ ਕਾਲੇ ਕਤਕਮ੍ਮਂ ਪਸ੍ਸਿਤ੍ਵਾ ਹਸਿਤ੍ਤਿ. ਤੇਨ ਪੁਟ੍ਠੋ ਕਤਕੁਸਲਕਮ੍ਮਂ ਸਬ੍ਬਂ ਵਿਤ੍ਥਾਰੇਨ ਤਸ੍ਸ ਆਚਿਕ੍ਖਿ. ਰਾਜਾ ਸੋਮਨਸ੍ਸਪ੍ਪਤ੍ਤੋ ਅਤ੍ਤਨੋ ਉਤ੍ਤਰਾਸਙ੍ਗਂ ਦਤ੍ਵਾ ਥੇਰਂ ਵਨ੍ਦਿਤ੍ਵਾ ਗੇਹਂ ਗਤੋ. ਕੋਟਰਟ੍ਠਕਵਿਹਾਰਂ ਗਨ੍ਤ੍ਵਾ ਥੇਰਸ੍ਸ ਸਰੀਰਜ੍ਝਾਪਨਂ ਕਾਰਾਪੇਤ੍ਵਾ ਧਾਤੁਂ ਆਦਾਯ ਚੇਤਿਯਂ ਕਾਰਾਪੇਤ੍ਵਾ ਮਹਨ੍ਤਂ ਪੂਜਂ ਕਤ੍ਵਾ ਮਹਾਗਾਮਂ ਗਤੋ. ਸੁਵਣ੍ਣਂ ਆਹਰਾਪੇਤ੍ਵਾ ਰਾਜਙ੍ਗਣੇ ਠਪਾਪੇਸਿ. ਗੋਠਸਮੁਦ੍ਦਕੁਚ੍ਛਿਯਂ ਪਤ੍ਤ ਨਾਵਾਤੋ ਵਤ੍ਥਾਨਿ ਆਹਰਾਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਚੀਵਰਤ੍ਥਾਯ ਦਾਪੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਮਹਾਗਾਮਸਮੀਪੇ ਵਿਹਾਰਂ ਕਾਰਾਪੇਤ੍ਵਾ ਵਿਹਰਨ੍ਤੋ ਅਤ੍ਤਨੋ ਪੁਤ੍ਤਂ ਦੁਟ੍ਠਗਾਮਣਿਂ ਪਕ੍ਕੋਸਾਪੇਤ੍ਵਾ; ਤਾਤ, ਤ੍ਵਂ ਗਨ੍ਤ੍ਵਾ ਗਿਰਿਮ੍ਹਿ ਨਗਰੇ ਨਿਸੀਦਾ’ਤਿ ਵਤ੍ਵਾ ਅਮਚ੍ਚਞ੍ਚਸ੍ਸ ਪਿਤੁਟ੍ਠਾਨੇ ਠਪੇਤ੍ਵਾ ਗਿਰਿਨਗਰਂ ਪਾਹੇਸਿ. ਤਂ ਦਿਸ੍ਵਾ ਗਿਰਿਅਭਯ ਕੁਮਾਰੋ ਕੁਮਾਰੇਨ ਸਦ੍ਧਿਂ ਆਗਤਬਲ਼ਸ੍ਸ ਵਤ੍ਥਾਹਾਰਾਦੀਨਿ ਦਾਪੇਤ੍ਵਾ ਮਹਨ੍ਤਂ ਸਮ੍ਮਾਨਂ ਅਕਾਸਿ. ਰਾਜਕੁਮਾਰੋ ਗਿਰਿਪਬ੍ਬਤਪਾਦੇ ਵਿਹਾਸਿ.

ਤਤੋ ਅਪਰਭਾਗੇ ਜਾਤਿਂ ਨਿਸ੍ਸਾਯ ਖਤ੍ਤਿਯਾਨਂ ਵਿਵਾਦੋ ਅਹੋਸਿ. ਸੋ ਅਭਯਰਾਜਾ ਕਿਂ ਮੇਵਿਵਾਦੇਨਾ’ਤਿ ਅਤ੍ਤਨੋ ਭਰਿਯਾਯ ਸੋਮਦੇਵਿਯਾ ਸਦ੍ਧਿਂ ਬਲਵਾਹਨਂ ਗਹੇਤ੍ਵਾ ਅਨੁਕ੍ਕਮੇਨ ਗਚ੍ਛਨ੍ਤੋ ਸੇਰੁਨਗਰੇ ਰਜ੍ਜਂ ਕਾਰੇਨ੍ਤਂ ਅਤ੍ਤਸਹਾਯਂ ਸਿਵਰਾਜਂ ਸਨ੍ਧਾਯ ਤਸ੍ਸ ਸਨ੍ਤਿਕਂ ਆਗਞ੍ਜਿ. ਸੋ’ਪਿ ਸਿਵਰਾਜਾ ਗਿਰਿਅਭਯਰਞ੍ਞਾ ਸਦ੍ਧਿਂ ਆਗਤਬਲ਼ਸ੍ਸ ਮਹਨ੍ਤਂ ਸਕ੍ਕਾਰਂ ਕਾਰੇਤ੍ਵਾ ਅਹਤਵਤ੍ਥਤਿਲਤਣ੍ਡੁਲਾਦੀਨਿ ਆਹਰਾਪੇਤ੍ਵਾ ਦਾਪੇਸਿ. ਕਤਿਪਾਹਚ੍ਚਯੇ; ਸਮ੍ਮ, ਕਸ੍ਮਾ ਆਗਤੋਸਿ’ਤਿ ਪੁਚ੍ਛਿ. ਸੋ ਆਗਤਕਾਰਣਂ ਸਬ੍ਬਮਸ੍ਸ ਆਚਿਕ੍ਖਿ. ਭਦ੍ਦਕਂ ਸਮ੍ਮ, ਤੇ ਕਤਂ ਆਗਨ੍ਤਬ੍ਬਮੇਵ ਆਗਤੋ. ਅਹਂ ਤੇ ਕਤ੍ਤਬ੍ਬਂ ਜਾਨਿਸ੍ਸਾਮਿ. ਤ੍ਵਂ ਮਾ ਚਿਨ੍ਤਯੀ’ਤਿ ਵਤ੍ਵਾ ਤਸ੍ਸ ਵਸਨਤ੍ਥਾਯ ਨਗਰਭੂਮਿਂ ਗਵੇਸਨ੍ਤੋ ਸਰਕੋਟਿਯਂ ਅਤਿਰਮਣੀਯਭੂਮਿਂ ਪਸ੍ਸਿਤ੍ਵਾ ਤਸ੍ਮਿਂ ਭੂਮਿਭਾਗੇ ਸੋ ਨਗਰਂ ਮਾਪੇਤ੍ਵਾ ਦੇਵਿਯਾ ਏਕਸਦਿਸਨਾਮਂ ਕਰਿਸ੍ਸਾਮੀ’ਤਿ ਸੋਮਨਗਰਨ੍ਤਿ ਨਾਮਂ ਅਕਾਸਿ. ਤਂ ਨਗਰਂ ਸੁਸਮਿਦ੍ਧਂ ਸਮ੍ਪਨ੍ਨਧਨਧਞ੍ਞਾਦੀਹਿ ਉਪਕਰਣੇਹਿ ਦ੍ਵਾਰਟ੍ਟਾਲਕਗੋਪੁਰਪਰਿਖਾਪੋਕ੍ਖਰ-ਣਿਯਾਦੀਹਿ ¶ ਸਹਿਤਂ ਹਤ੍ਥਿਅਸ੍ਸਰਥਪਤ੍ਤਿਆਦੀਹਿ ਸਮਾਕੁਲਂ ਸਙ੍ਖਪਣਵਭੇਰਿਸਦ੍ਦਾਦੀਹਿ ਸਮਾਕਿਣ੍ਣਂ ਨਗਰਂ ਅਹੋਸਿ. ਸੋ ਅਭਯੋ ਚਿਰਂ ਸੋਮਨਗਰੇ ਮਹਨ੍ਤਂ ਇਸ੍ਸਰਿਯਂ ਅਨੁਭਵਨ੍ਤੋ ਵਿਹਾਸਿ.

ਅਥਾਪਰਸ੍ਮਿਂ ਕਾਲੇ ਸੋਮਦੇਵੀ ਰਞ੍ਞਾ ਸਦ੍ਧਿਂ ਕਥੇਸਿ; ਅਯ੍ਯ ਅਮ੍ਹਾਕਂ ਪਟਿਸਰਣਂ ਚੇਤਿਯਞ੍ਚ ਵਿਹਾਰਞ੍ਚ ਕਾਰੇਤੁਂ ਵਟ੍ਟਤੀ’ਤਿ. ਭਦ੍ਦਕਂ ਤੇ ਕਥਿਤਨ੍ਤਿ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਵਿਹਾਰਭੂਮਿਂ ਗਵੇਸਨ੍ਤੋ ਨਗਰਤੋ ਨਾਤਿਦੁਰੇ ਨਾਚ੍ਚਾਸਨ੍ਨੇ ਮਹਨ੍ਤਂ ਸਾਲਵਨਂ ਅਤ੍ਥਿ. ਤਂ ਪਸ੍ਸਿਤੁਂ ਗਤੋ. ਤਦਾ ਤਸ੍ਮਿਂ ਸਾਲਵਨੇ ਮਹਾਅਰਿਟ੍ਠਤ੍ਥੇਰਸ੍ਸ ਵਂਸੇ ਮਹਾਮਹਿਨ੍ਦਤ੍ਥੇਰੋ ਨਾਮ ਏਕੋ ਥੇਰੋ ਅਤ੍ਥਿ. ਸੋ ਸਟ੍ਠਿਮਤ੍ਤੇ ਭਿਕ੍ਖੂ ਗਹੇਤ੍ਵਾ ਵਿਹਰਤਿ. ਤਂ ਦਿਸ੍ਵਾ ਇਰਿਯਾਪਥੇ ਪਸਨ੍ਨੋ ਥੇਰਂ ਏਵਮਾਹ; ‘ਅਯ੍ਯ ਤੁਮ੍ਹਾਕਂ ਇਮਸ੍ਮਿਂ ਸਾਲਵਨੇ ਵਿਹਾਰਂ ਕਰਿਸ੍ਸਾਮਿ’ਤਿ. ਥੇਰੋ ਤਸ੍ਸ ਵਚਨਂ ਸੁਤ੍ਵਾ ਤੁਣ੍ਹੀਹਾਵੇਨ ਅਧਿਵਾਸੇਸਿ. ਰਾਜਾ ਸੋਮਨਸ੍ਸਪ੍ਪਤ੍ਤੋ ਥੇਰਂ ਵਨ੍ਦਿਤ੍ਵਾ ਨਗਰਮੇਵ ਗਨ੍ਤ੍ਵਾ ਸੋਮਦੇਵਿਂ ਆਮਨ੍ਤੇਤ੍ਵਾ; ਭਦ੍ਦੇਸੋਮਦੇਵਿ, ਅਮ੍ਹਾਕਂ ਮਨੋਰਥੋ ਮਤ੍ਥਕਂ ਪਤ੍ਤੋ. ਵਿਹਾਰਕਰਣਤ੍ਥਾਯ ਮਨਾਪੋ ਭੂਮਿਭਾਗੋ ਲਦ੍ਧੋ. ਤਤ੍ਥ ਚ ਮਹਿਨ੍ਦੋ ਨਾਮ ਥੇਰੋ ਸਮਣਾਨਂ ਸਟ੍ਠਿਮਤ੍ਤਂ ਗਹੇਤ੍ਵਾ ਵਿਹਰਤਿ. ਤਂ ਵਨ੍ਦਿਤ੍ਵਾ ਵਿਹਰਣਤ੍ਥਾਯ ਪਟਿਞ੍ਞਂ ਗਹੇਤ੍ਵਾ ਆਗਤੋ. ਤਤ੍ਥ ਵਿਹਾਰਂ ਕਰਿਸ੍ਸਾਮੀ’ਤਿ ਆਹ. ਸਾ ਤਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤਾ ਸਾਧੂ’ਤਿ ਸਮ੍ਪਟਿਚ੍ਛਿ. ਪੁਨਦਿਵਸੇ ਦੇਵਿਯਾ ਸਦ੍ਧਿਂ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਥੇਰੋ ਤੇਸਂ ਮਹਾਸਮਯਸੁਤ੍ਤਂ ਕਥੇਸਿ. ਤੇ ਉਭੋ’ਪਿ ਧਮ੍ਮਂ ਸੁਤ੍ਵਾ ਸੋਮਨਸ੍ਸਜਾਤਾ ਅਹੇਸੁਂ. ਅਥ ਰਾਜਾ ਅਯ੍ਯ ਧਾਤੁਂ ਕੁਤੋ ਲਭਿਸ੍ਸਾਮਾ’ਤਿ ਥੇਰਂ ਪੁਚ੍ਛਿ. ਮਾ ਚਿਨ੍ਤਯਿ ਮਹਾਰਾਜ, ਧਾਤੁਂ ਅਮ੍ਹੇ ਜਾਨਿਸ੍ਸਾਮਾ’ਤਿ ਆਚਿਕ੍ਖਿ.

ਸੋ ਤਤੋ ਪਟ੍ਠਾਯ ਵਿਹਾਰਭੁਮਿਂ ਸੋਧਾਪੇਤ੍ਵਾ ਖਾਣੁਕਣ੍ਟਕਾਦਯੋ ਨੀਹਰਿਤ੍ਵਾ ਭੇਰਿਤਲਮਿਵ ਰਮਣੀਯਂ ਸਮਂ ਕਾਰਾਪੇਤ੍ਵਾ ਇਟ੍ਠਕਵਡ੍ਢਕਿਂ ਪਕ੍ਕੋਸਾਪੇਤ੍ਵਾ ਇਟ੍ਠਚਿਤਂ ਕਾਰਾਪੇਤ੍ਵਾ ਚੇਤਿਯਕਮ੍ਮਂ ਪਟ੍ਠਪੇਸਿ. ਵਡ੍ਢਕੀ ਚੇਤਿਯਂ ਚਿਨਨ੍ਤੋ ਕਤਿਪਾਹੇਨ ਪੁਪ੍ਫਾਧਾਨਤ੍ਤਯਂ ਨਿਟ੍ਠਪੇਤ੍ਵਾ ਧਾਤੁਗਬ੍ਭੇ ਸਬ੍ਬਂ ਕਤ੍ਤਬ੍ਬਂ ਕਮ੍ਮਂ ਨਿਟ੍ਠਪੇਤ੍ਵਾ ਰਞ੍ਞੋ ਪਟਿਵੇਦੇਸਿ. ਰਾਜਾ, ਆਗਨ੍ਤ੍ਵਾ ਥੇਰਸ੍ਸ ਆਰੋਚੇਸਿ. ਨਿਟ੍ਠਾਪਿਤੋ ਅਯ੍ਯ ਧਾਤੁ ਗਬ੍ਭੋ’ਤਿ. ਥੇਰੋ ਰਞ੍ਞੋ ਵਚਨਂ ਸੁਤ੍ਵਾ ਅਤ੍ਤਨਾ ਪਰਿਹਰਿਤਂ ¶ ਤਥਾਗਤਸ੍ਸ ਦਕ੍ਖਿਣਦਾਠਾਧਾਤੁਂ ਤਸ੍ਸ ਅਦਾਸਿ. ਰਾਜਾ ਧਾਤੁਂ ਗਹੇਤ੍ਵਾ ਸੁਨਕ੍ਖਤ੍ਤੇਨ ਸੁਮੁਹੁਤ੍ਤੇਨ ਮਹਤਾ ਪਰਿਵਾਰੇਨ ਧਾਤੁਗਬ੍ਭੇ ਨਿਦਹਿਤ੍ਵਾ ਅਤਿਮਨੋਰਮਂ ਉਦਕਬੁਬ੍ਬੁਲ਼ਕੇਲਾਸਕੁਟਪਟਿਭਾਗਂ ਚੇਤਿਯਂ ਕਾਰਾਪੇਸਿ.

ਸਦ੍ਧਾਦਿਗੁਣਸਮ੍ਪਨ੍ਨੋ ਲੋਕਸਾਸਨਰਕ੍ਖਕੋ;

ਸਚੇਤਿਯਂ ਮਹਾਰਾਜਾ ਕਾਰਾਪੇਸਿ ਵਿਹਾਰਕਂ.

ਤਤੋ ਥੇਰਸ੍ਸ ਸਨ੍ਤਿਕੇ ਸਟ੍ਠਿਮਤ੍ਤਾਨਂ ਭਿਕ੍ਖੁਨਂ ਅਤ੍ਥਾਯ ਸਟ੍ਠਿਮਤ੍ਤਾਨਿ ਪਰਿਵੇਣਾਨਿ ਕਾਰਾਪੇਤ੍ਵਾ ਦ੍ਵਾਰਟ੍ਟਾਲਕਪਾਕਾਰੇਹਿ ਸੋਭਿਤਂ ਵਿਹਾਰਂ ਨਿਟ੍ਠਪੇਤ੍ਵਾ ਅਤ੍ਤਨੋ ਦੇਵਿਯਾ ਏਕਨਾਮਂ ਕਤ੍ਵਾ ਮਹਿਨ੍ਦਤ੍ਥੇਰਸ੍ਸ ਦਕ੍ਖਿਣੋਦਕਂ ਦਤ੍ਵਾ ਗਨ੍ਧਮਾਲਾਧੂਪਧਜੇਹਿ ਪੂਜਂ ਕਰੋਨ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਧਾਤੁਪਟ੍ਠਾਨਂ ਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕੁਰੁਮਾਨੋ ਗਿਰਿਅਭਯਰਾਜਾ ਮਹਨ੍ਤਂ ਸਮ੍ਪਤ੍ਤਿਂ ਅਨੁਭਵਮਾਨੋ ਸੋਮਨਗਰਂ ਪਟਿਵਸਤਿ.

(ਨਗਰੇ ਸੋਮਨਾਮਮ੍ਹਿ ਰਮਣੀਯੇ ਮਨੋਰਮੇ;

ਦੇਵਿਯਾ ਸਹ ਮੋਦਨ੍ਤੋ ਰਜ੍ਜਂ ਕਾਰੇਸਿ ਨਾਯਕੋ.)

ਤਤੋ ਵਿਹਾਰਦੇਵਿਯਾ ਭਾਤਾ ਚੁਲ੍ਲਪਿਣ੍ਡਪਾਤਿਯਤਿਸ੍ਸਤ੍ਥੇਰੋ ਨਾਮ ਏਕਦਿਵਸਂ ਕਾਕਵਣ੍ਣਤਿਸ੍ਸਮਹਾਰਞ੍ਞੋ ਆਯੁਸਙ੍ਖਾਰਮੋਲੋਕੇਨ੍ਤੋ ਨ ਚਿਰਪ੍ਪਵਤ੍ਤਨਭਾਵਂ ਞਤ੍ਵਾ ਪੁਨਦਿਵਸੇ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤੇਨ ਸਦ੍ਧਿਂ ਕਥੇਸਿ. ਮਹਾਰਾਜ ਤੁਮ੍ਹਾਕਂ ਨਲਾਟਧਾਤੁਯਾ ਸਤ੍ਥਾਰਾ ਬ੍ਯਾਕਰਣਂ ਦਿਨ੍ਨਂ;’ਮਹਾਵਾਲੁਕਗਙ੍ਗਾਯ ਦਕ੍ਖਿਣਭਾਗੇ ਸੇਰੁ ਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਯਾ ਮਤ੍ਥਕੇ ਅਨਾਗਤੇ ਕਾਕਵਣ੍ਣਤਿਸ੍ਸੋ ਨਾਮ ਮਹਾਰਾਜਾ ਮਯ੍ਹਂ ਨਲਾਟਧਾਤੁਂ ਪਤਿਟ੍ਠਪੇਸ੍ਸਤੀ’ਤਿ ਵਤ੍ਵਾ ਤਂ ਸਨ੍ਧਾਯ ਭਗਵਾ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਗਤੋ. ਤਸ੍ਸ ਵਚਨਂ ਮਨਸਿਕਰੋਹੀ’ਤਿ ਆਹ. ਤਸ੍ਸ ਕਥਂ ਸੁਤ੍ਵਾ ਅਮ੍ਹਾਕਂ ਕੁਸਲਸਮ੍ਪਤ੍ਤਿਂ ਅਵਿਨਾਸੇਤ੍ਵਾ ਅਯ੍ਯਸ੍ਸ ਵਚਨਮੁਦ੍ਦਿਸ੍ਸ ਚੇਤਿਯਂ ਕਾਰਾਪਨਤ੍ਥਾਯ ਗਨ੍ਤਬ੍ਬਨ੍ਤਿ ਮਨ੍ਤ੍ਵਾ ਭਦ੍ਦਕਂ ਅਯ੍ਯਾ’ਤਿ ਥੇਰਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਪੁਤ੍ਤਂ ਦੁਟ੍ਠਗਾਮਣਿਂ ਗਿਰਿਨਗਰਤੋ ਪਕ੍ਕੋਸਾਪੇਤ੍ਵਾ ਮਹਾਗਾਮੇ ਨਿਸੀਦਾਪੇਤ੍ਵਾ ਨਗਰੇ ਭੇਰਿਂ ਚਰਾਪੇਸਿ; ਅਹਂ ਮਹਾਵਾਲੁਕਾਯ ਗਙ੍ਗਾਯ ਸਮੀਪੇ ਸੇਰੁ ਨਾਮ ¶ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਯਾ ਮਤ੍ਥਕੇ ਚੇਤਿਯਂ ਕਾਰਾਪਨਤ੍ਥਾਯ ਗਮਿਸ੍ਸਾਮਿ, ਸਬ੍ਬਸੇਨਿਯੋ ਚ ਮਹਾ ਜਨੋ ਚ ਮਯਾ ਸਦ੍ਧਿਂ ਆਗਚ੍ਛਨ੍ਤੁ’ਤਿ ਵਤ੍ਵਾ ਰਾਜਾ ਚੁਲਪਿਣ੍ਡਪਾਤਿਯਤਿਸ੍ਸਤ੍ਥੇਰਸ੍ਸ ਤਿਸ੍ਸਮਹਾਵਿਹਾਰੇ ਸਾਗਲਤ੍ਥੇਰਸ੍ਸ ਚ ਸਨ੍ਤਿਕਂ ਗਨ੍ਤ੍ਵਾ ਭਨ੍ਤੇ ਤੁਮ੍ਹਾਕਂ ਪਰਿਵਾਰੇ ਪਞ੍ਚਸਤਮਤ੍ਤੇ ਭਿਕ੍ਖੁ ਗਹੇਤ੍ਵਾ ਧਾਤੁਂ ਉਪਟ੍ਠਹਨ੍ਤਾ ਮਯਾ ਸਦ੍ਧਿਂਯੇਵ ਆਗਚ੍ਛਥਾ’ਤਿ ਵਤ੍ਵਾ ਭਦ੍ਦਮਾਸੇ ਭਦ੍ਦਦਿਵਸੇ ਸੁਨਕ੍ਖਤ੍ਤੇ ਸੁਮੁਹੁਤ੍ਤੇ ਬਨ੍ਧਾਵਾਰਂ ਸਜ੍ਜੇਤ੍ਵਾ ਧਾਤੁਘਰਤੋ ਧਾਤੁਕਰਣ੍ਡਕਂ ਨੀਹਰਿਤ੍ਵਾ ਸੁਸਜ੍ਜਿਤਰਥੇ ਠਪੇਤ੍ਵਾ ਉਪਰਿ ਸੇਤਚ੍ਛਤ੍ਤਞ੍ਚ ਕਤ੍ਵਾ ਪੁਰਤੋ ਪੁਰਤੋ ਰਤਨਮਣਡਪੇ ਕਾਰਾਪੇਤ੍ਵਾ ਪੁਰੇਤਰਮਕਾਸਿ.

ਤਤੋ ਰਾਜਾ ਪੁਤ੍ਤਂ ਦੁਟ੍ਠਗਾਮਣਿਂ ਪਕ੍ਕੋਸਾਪੇਤ੍ਵਾ ਅਨੁਸਾਸਿਤ੍ਵਾ ਪੁਤ੍ਤਂ ਸਦ੍ਧਾਤਿਸ੍ਸਕੁਮਾਰਞ੍ਚ ਵਿਹਾਰਦੇਵਿਞ੍ਚ ਗਹੇਤ੍ਵਾ ਸੀਘਂ ਨਿਕ੍ਖਮਿ. ਚੂਲ਼ਪਿਣ੍ਡਪਾਤਿਯਤਿਸ੍ਸਤ੍ਥੇਰੋ ਚ ਅਤ੍ਤਨੋ ਪਰਿਵਾਰੇ ਪਞ੍ਚਸਤਭਿਕ੍ਖੂ ਗਹੇਤ੍ਵਾ ਧਾਤੁਂ ਉਪਟ੍ਠਹਨ੍ਤੋ ਪਚ੍ਛਤੋ ਆਗਞ੍ਛਿ. ਸਬ੍ਬਸੇਨਿਯੋ ਚ ਰਾਜਾ ਚ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਭਿਕ੍ਖੁ ਸਙ੍ਘੇਨ ਸਦ੍ਧਿਂ ਗਨ੍ਤ੍ਵਾ ਦੀਘਵਾਪਿਂ ਪਾਪੁਣਿਂਸੁ. ਤਸ੍ਮਿਂ ਸਦ੍ਧਾਤਿਸ੍ਸਕੁਮਾਰਂ ਨਿਸੀਦਾਪੇਤ੍ਵਾ ਅਨੁਕ੍ਕਮੇਨ ਆਗਨ੍ਤ੍ਵਾ ਸੁਮਨਮਾਲਾਪਿਟ੍ਠਿਯਂ ਖਨ੍ਧਵਾਰਂ ਬਨ੍ਧਿਤ੍ਵਾ ਨਿਸੀਦਿ. ਕਸ੍ਮਾ ਪਨ ਤਂ ਠਾਨਂ ਏਵਂ ਨਾਮਕਂ ਜਾਤਨ੍ਤਿ. ਸੁਮਨਨਾਗਰਾਜਾ ਸਤ੍ਤਦਿਵਸਾਨਿ ਨਾਗਸਮ੍ਪਤ੍ਤਿਂ ਅਭਿਰਮਮਾਨੋ (ਨਲਾਟਧਾਤੁਂ ਵਿਸ੍ਸਰਿ.) ਸਤ੍ਤਾਹਚ੍ਚਯੇਨ ਨਲਾਟਧਾਤੁਂ ਅਨੁਸ੍ਸਰਿਤ੍ਵਾ ਪਚ੍ਛਾ ਆਵਜ੍ਜਮਾਨੋ ਰਞ੍ਞੋ ਧਾਤੁਂ ਗਹੇਤ੍ਵਾ ਆਗਤਭਾਵਂ ਞਤ੍ਵਾ ਮਹਨ੍ਤਂ ਸੋਮਨਸ੍ਸਂ ਪਤ੍ਤੋ ਮਹਨ੍ਤਜ੍ਝਾਸਯੋ ਅਤ੍ਤਨੋ ਪਰਿਵਾਰੇ ਛਕੋਟਿਮਤ੍ਤੇ ਨਾਗੇ ਗਹੇਤ੍ਵਾ ਧਾਤੁਪਟਿਪਥਂ ਗਨ੍ਤ੍ਵਾ ਧਾਤੁਪਤਿਟ੍ਠਿਤਟ੍ਠਾਨੇਵ ਪਥਵਿਯਂ ਨਾਭਿਪ੍ਪਮਾਣਤੋ ਸੁਮਨਮਾਲਾਵਸ੍ਸਂ ਵਸ੍ਸੇਸਿ. ਤਸ੍ਮਾ ਤਂ ਠਾਨਂ ਸੁਮਨਮਾਲਾਪਿਟ੍ਠਿਤਿ ਜਾਤਂ. ਪੁਨਦਿਵਸੇ ਰਾਜਾ ਧਾਤੁਂ ਗਹੇਤ੍ਵਾ ਵਰਾਹ ¶ ਨਾਮ ਸੋਣ੍ਡਿਂ ਪਾਪੁਣਿ. ਸਮ੍ਪਤ੍ਤਾਯ ਧਾਤੁਯਾ ਤਸ੍ਮਿਂ ਠਾਨੇ ਸੁਮਨਨਾਗਰਾਜਾ ਰਥਚਕ੍ਕੇ ਯਾਵ ਨਾਭਿਂ ਤਾਵ ਓਸੀਦਾਪੇਤ੍ਵਾ ਅਪਰਿਵਤ੍ਤਨਂ ਅਕਾਸਿ. ਤਂ ਦਿਸ੍ਵਾ ਰਾਜਾ ਸਂਵੇਗਪ੍ਪਤ੍ਤੋ ਥੇਰਂ ਪੁਚ੍ਛਿ. ਮਾ ਭਾਯਿ ਮਹਾਰਾਜ, ਧਾਤੁ ਪਤਿਟ੍ਠਾਨਟ੍ਠਾਨਂ ਆਗਤੋ. ਇਮਸ੍ਮਿਂ ਠਾਨੇ ਪਤਿਟ੍ਠਹਿਸ੍ਸਤੀ’ਤਿ ਆਹ.

ਤਂ ਸੁਤ੍ਵਾ ਰਾਜਾ ਧਾਤੁਪਤਿਟ੍ਠਾਨ ਭੂਮਿਭਾਗਂ ਭਵਿਸ੍ਸਤੀ’ਤਿ ਚਿਨ੍ਤੇਤ੍ਵਾ ਤਤ੍ਥੇਵ ਸੇਨਂਨਿਵੇਸੇਤ੍ਵਾ ਇਦਂ ਠਾਨਂ ਸਮਨ੍ਤਤੋ ਸਕਣ੍ਟਕਂ ਵਨਂ ਨੀਹਰਾਪੇਤ੍ਵਾ ਭੂਮਿਭਾਗਂ ਅਤਿਰਮਣੀਯਂ ਭੇਰਿਤਲਮਿਵ ਸਮਂ ਕਾਰਾਪੇਤ੍ਵਾ ਸੇਨਿਯਪਾਮੋਕ੍ਖਂ ਆਮਨ੍ਤੇਤ੍ਵਾ ਤੁਮ੍ਹੇ ਧਾਤੁਂ ਠਪਨਤ੍ਥਾਯ ਪਠਮਂ ਧਾਤੁਘਰਂ ਕਾਰਾਪੇਤ੍ਵਾ ਧਾਤੁ ਗਬ੍ਭਂ ਪਤਿਟ੍ਠਾਪੇਤ੍ਵਾ ਨਿਵੇਦੇਸਿ. ਰਾਜਾ ਅਨ੍ਤੋ ਧਾਤੁਘਰੇ ਤਸ੍ਮਿਂ ਧਾਤੁਗਬ੍ਭੇ ਧਾਤੁਕਰਣ੍ਡਕਂ ਪਤਿਟ੍ਠਪੇਤ੍ਵਾ ਬਹਿ ਆਰਕ੍ਖਂ ਸਂਵਿਧਾਯ ਤਤ੍ਥ ਮਹਨ੍ਤਂ ਪੂਜਾਵਿਧਾਨਂ ਕਾਰਾਪੇਤ੍ਵਾ ਧਾਤੁਘਰਂ ਚਤੁਜਾਤਿਯਗਨ੍ਧੇਨ ਵਿਲਿਮ੍ਪਾਪੇਸਿ. ਤਦੁਪਾਦਾਯ ਤਂ ਗੇਹਂ ਗਨ੍ਧਮੂਲਂ ਨਾਮ ਜਾਤਂ. ਤਸ੍ਮਿਂ ਠਾਨੇ ਬਹੂ ਸਨ੍ਨਿਪਤਿਂਸੁ. ਤਤ੍ਥ ਮਹਿਨ੍ਦੋ ਨਾਮ ਥੇਰੋ ਆਗਨ੍ਤੁਕ ਭਿਕ੍ਖੂਨਂ ਵਤ੍ਤਪਟਿਵਤ੍ਤਂ ਅਕਾਸਿ. ਪੁਨਦਿਵਸੇ ਰਾਜਾ ਵਿਹਾਰਂ ਗਨ੍ਤ੍ਵਾ ਸੁਖੇਨ ਵਸਿਤ੍ਥ ਅਯ੍ਯਾ’ਤਿ ਪੁਚ੍ਛਿਤ੍ਵਾ ਸਬ੍ਬੇ ਭਿਕ੍ਖੁ ਨਿਮਨ੍ਤੇਤ੍ਵਾ ਰਾਜਗੇਹੇ ਨਿਸੀਦਾਪੇਤ੍ਵਾ ਯਾਗੁਭਤ੍ਤਂ ਸਕ੍ਕਚ੍ਚਂ ਦਤ੍ਵਾ ਪਚ੍ਛਾ ਭਤ੍ਤਂ ਅਨੁਮੋਦਨਂ ਸੁਤ੍ਵਾ ਨਿਸਿਨ੍ਨਕਾਲੇ ਥੇਰੋ ਓਵਦਨ੍ਤੋ ਮਹਾਰਾਜ, ਪਮਾਦੇਨ ਵਸਿਤੁਂ ਨ ਵਟ੍ਟਤਿ ਜੀਵਿਤਂ ਨਾਮ ਨ ਚਿਰਟ੍ਠਿਤਿਕਂ, ਧਾਤੁਪਤਿਟ੍ਠਾਪਨਂ ਪਪਞ੍ਚਂ ਅਕਤ੍ਵਾ ਕਾਰੇਹੀ’ਤਿ ਵਤ੍ਵਾ ਗਾਥਮਾਹ?

ਯਸ੍ਮਾ ਹਿ ਜੀਵਿਤਂ ਨਾਮ ਅਪ੍ਪਂ ਬੁਬ੍ਬੁਲਕੁਪਮਂ;

ਤਸ੍ਮਾ ਹਿ ਪਣ੍ਡਿਤੋ ਪੋਸੋ ਕਰੇਯ੍ਯ ਕੁਸਲਂ ਸਦਾ’ਤਿ.

ਇਮਿਨਾ ¶ ਨਯੇਨ ਧਮ੍ਮਂ ਕਥੇਤ੍ਵਾ ਚੂਲ਼ਪਿਣ੍ਡਪਾਤਿਯਤਿਸ੍ਸ ਤ੍ਥੇਰੋ ਚ ਸਾਗਲਤ੍ਥੇਰੋ ਚ ਮਹਿਨ੍ਦਤ੍ਥੇਰੋ ਚਾ’ਤਿ ਤਯੋ ਥੇਰਾ ਅਤ੍ਤਨੋ ਅਤ੍ਤਨੋ ਪਰਿਵਾਰੇ ਭਿਕ੍ਖੂ ਗਹੇਤ੍ਵਾ ਧਾਤੁ ਪਰਿਹਰਣਤ੍ਥਾਯ ਆਗਚ੍ਛਿਂਸੁ.

ਵਿਪੁਲਯਸੋ ਪਰਹਿਤਾਵਹਨ੍ਤੋ,

ਸੁਜਨਹਿਤੋ ਧਿਤਿਮਾ ਅਵੀਤਸਦ੍ਧੋ;

ਸੁਪਰਿਵੁਤੋ ਮਹਤਿਯਾ ਹਿ ਪਰਿਸਾ,

ਰਾਜਸੇਟ੍ਠੋ ਪਵਰਥੂਪਮਾਰਭੀ’ਤਿ.

ਇਤਿ ਅਰਿਯਜਨਪ੍ਪਸਾਦਨਤ੍ਥਾਯ ਕਤੇ ਧਾਤੁਵਂਸੇ

ਪਕਿਣ੍ਣਕੋ ਨਾਮ

ਚਤੁਤ੍ਥੋ ਪਰਿਚ੍ਛੇਦੋ.

੫. ¶ ਧਾਤੁਨਿਧਾਨਾਧਿਕਾਰੋ

ਤਤੋ ਵਿਮਂਸੇਤ੍ਵਾ ਭੁਮਿਭਾਗਂ ਗਹੇਤੁਂ ਵਟ੍ਟਤੀ’ਤਿ ਭੂਮਿ ਭਾਗਂ ਵੀਮਂਸੇਨ੍ਤੋ ਮਙ੍ਗਲਸਮ੍ਮਤੇ ਅਟ੍ਠ ਗੋਣੇ ਆਹਰਾਪੇਤ੍ਵਾ ਗਨ੍ਧੋਦਕੇਨ ਨਹਾਪੇਤ੍ਵਾ ਸਿਙ੍ਗੇਸੁ ਸੁਵਣ੍ਣਕਞ੍ਚੁਕਂ ਪਤਿਮੁਞ੍ਚਾਪੇਤ੍ਵਾ ਗਨ੍ਧਪਞ੍ਚਙ੍ਗੁਲਿਕਂ ਦਾਪੇਤ੍ਵਾ ਗੀਵਾਯ ਮਾਲਾਦਾਮਂ ਬਨ੍ਧਾਪੇਤ੍ਵਾ ਅਯੋਦਾਮੇਨ ਬਨ੍ਧਾਪੇਤ੍ਵਾ ਏਵਂ ਚਿਨ੍ਤੇਸਿ? ਯਦਿ ਪਨ ਭਗਵਤੋ ਨਲਾਟਧਾਤੁ ਯਸ੍ਮਿਂ ਠਾਨੇ ਪਤਿਟ੍ਠਹਿਤ੍ਵਾ ਲੋਕਤ੍ਥਚਰਿਯਂ ਕਰੋਨ੍ਤੀ ਪਞ੍ਚਵਸ੍ਸਸਹਸ੍ਸਾਨਿ ਸਾਸਨਂ ਪਤਿਟ੍ਠਹਿਸ੍ਸਤਿ ਤਸ੍ਮਿਂ ਠਾਨੇ ਗੋਣਾ ਸਯਮੇਵ ਅਯੋਦਾਮਤੋ ਮੁਞ੍ਚਿਤ੍ਵਾ ਥੁਪਟ੍ਠਾਨਂ ਸਮਨ੍ਤਤੋ ਵਿਚਰਿਤ੍ਵਾ ਚਤੁਸੁ ਦਿਸਾਸੁ ਸਯਨ੍ਤੁਤਿ ਅਧਿਟ੍ਠਹਿਤ੍ਵਾ ਪੁਰਿਸੇ ਆਣਾਪੇਸਿ. ਤੇ ਤਥੇਵ ਅਕਂਸੁ. ਤਤੋ ਵਿਭਾਤਾਯ ਰਤ੍ਤਿਯਾ ਰਾਜਾਗੋਣੇ ਗਾਹਾਪਨਤ੍ਥਾਯ ਆਯੁਤ੍ਤਕੇ ਆਣਾਪੇਸਿ. ਤੇ ਮਨੁਸ੍ਸਾ ਗਨ੍ਤ੍ਵਾ ਗੋਣੇ ਅਪਸ੍ਸਿਤ੍ਵਾ ਨ ਪਸ੍ਸਾਮ ਦੇਵਾ’ਤਿ ਰਞ੍ਞੋ ਆਰੋਚੇਸੁਂ. ਗਚ੍ਛ ਭਣੇ, ਗੋਣਾਨਂ ਗਤਟ੍ਠਾਨਂ ਓਲੋਕੇਥਾ’ਤਿ ਆਹ. ਤੇ ਗਵੇਸਮਾਨਾ ਬਨ੍ਧਨਟ੍ਠਾਨੇ ਅਦਿਸ੍ਵਾ ਪਦਾਨੁਪਦਂ ਗਨ੍ਤ੍ਵਾ ਥੂਪਕਰਣਟ੍ਠਾਨਂ ਸਮਨ੍ਤਾ ਵਿਚਰਿਤ੍ਵਾ ਚਤੁਸੁ ਦਿਸਾਸੁ ਸਯਿਤਗੋਣੇ ਦਿਸ੍ਵਾ ਸਯਿਤਟ੍ਠਾਨਤੋ ਨਙ੍ਗੁਟ੍ਠਾਦੀਨਿ ਮਦ੍ਦਨ੍ਤਾਪਿ ਉਟ੍ਠਾਪੇਤੁਂ ਅਸਕ੍ਕੋਨ੍ਤਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ; ਦੇਵ, ਗੋਣਾ ਨ ਉਟ੍ਠਹਨ੍ਤਿ, ਏਕਂ ਠਾਨਂ ਸਮਨ੍ਤਾ ਵਿਚਰਿਤ੍ਵਾ ਚਤੁਸੁ ਦਿਸਾਸੁ ਸਯਿਤਾ’ਤਿ. ਤਂ ਸੁਤ੍ਵਾ ਰਾਜਾ ਸੇਨਙ੍ਗਪਰਿਵੁਤੋ ਸਯਮੇਵ ਗਨ੍ਤ੍ਵਾ’ਪਿ ਗੋਣੇ ਉਟ੍ਠਾਪੇਤੁਂ ਅਸਕ੍ਕੋਨ੍ਤੋ ਰਾਜਾ ਏਵਂ ਅਧਿਟ੍ਠਾਸਿ; ਯਦਿ ਇਮਸ੍ਮਿਂ ਠਾਨੇ ਧਾਤੁ ਪਤਿਟ੍ਠਾਪੇਤਬ੍ਬਾ ਭਵੇਯ੍ਯ ਗੋਣਾ ਉਟ੍ਠਹਿਤ੍ਵਾ ਗਚ੍ਛਨ੍ਤੁ’ਤਿ. ਗੋਣਾ ਚਿਤ੍ਤਕ੍ਖਣੇਯੇਵ ਉਟ੍ਠਹਿਤ੍ਵਾ ਪਲਾਯਿਂਸੁ. ਰਾਜਾ ਤਂ ਅਚ੍ਛਰਿਯਂ ਦਿਸ੍ਵਾ ਪਸਨ੍ਨਮਨੋ ਹੁਤ੍ਵਾ ਪੁਨੇਕਦਿਵਸਂ ਵੁਤ੍ਤਨਿਯਾਮੇਨੇਵ ਅਸ੍ਸੇ ¶ ਅਲਙ੍ਕਾਰਾਪੇਤ੍ਵਾ ਅਯੋਦਾਮੇਨ ਬਨ੍ਧਾਪੇਤ੍ਵਾ ਠਪੇਸਿ. ਅਸ੍ਸਾਪਿ ਤੇ ਗੋਣਾ ਵਿਯ ਗਨ੍ਤ੍ਵਾ ਨਿਪਜ੍ਜਿਂਸੁ. ਰਾਜਾ ਗਨ੍ਤ੍ਵਾ ਤਥੇਵ ਅਧਿਟ੍ਠਹਿਤ੍ਵਾ ਅਸ੍ਸੇ ਉਟ੍ਠਾਪੇਸਿ. ਪੁਨੇਕਦਿਵਸਂ ਹਤ੍ਥੀਂ ਅਲਙ੍ਕਾਰਾਪੇਤ੍ਵਾ ਤਥੇਵ ਅਧਿਟ੍ਠਾਸਿ. ਸੋਪਿ ਬਨ੍ਧਦਾਮੇ ਛਿਨ੍ਦਿਤ੍ਵਾ ਪਚ੍ਛਿਮਯਾਮਸਮਨਨ੍ਤਰੇ ਗਨ੍ਤ੍ਵਾ ਚੇਤਿਯਕਰਣਟ੍ਠਾਨੇ ਨਿਪਜ੍ਜਿ. ਪਭਾਤਾਯ ਰਤ੍ਤਿਯਾ ਰਾਜਾ ਹਤ੍ਥੀਗੋਪਕੇ ਪਕ੍ਕੋਸਾਪੇਤ੍ਵਾ ਹਤ੍ਥਿਂ ਆਨੇਥਾ’ਤਿ ਆਹ. ਹਤ੍ਥਿਗੋਪਕਾ ਹਤ੍ਥਿਂ ਬਨ੍ਧਨਟ੍ਠਾਨੇ ਅਦਿਸ੍ਵਾ, ਹਤ੍ਥਿਂ ਬਨ੍ਧਨਟ੍ਠਾਨੇ ਨ ਪਸ੍ਸਾਮ ਦੇਵਾ’ਤਿ ਆਹਂਸੁ. ਤੇਨਹਿ ਭਣੇ, ਸੀਘਂ ਉਪਧਾਰੇਥਾ’ਤਿ ਵੁਤ੍ਤੇ ਹਤ੍ਥਿਗੋਪਕਾ ਪਦਾਨੁਪਦਂ ਗਵੇਸਮਾਨਾ ਚੇਤਿਯਟ੍ਠਾਨੇ ਨਿਪਨ੍ਨਂ ਹਤ੍ਥਿਂ ਦਿਸ੍ਵਾ ਆਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਤਂ ਸੁਤ੍ਵਾ ਰਾਜਾ ਹੇਟ੍ਠਾ ਵੁਤ੍ਤਪ੍ਪਕਾਰੇਨ ਪਟਿਪਜ੍ਜਿਤ੍ਵਾ ਹਤ੍ਥਿਂ ਪੁਰੇ ਕਤ੍ਵਾ ਆਗਚ੍ਛਿ.

ਏਵਂ ਤੀਹਿ ਵਿਮਂਸਨਾਹਿ ਵੀਮਂਸੇਤ੍ਵਾ ਭੁਮਿਗਹਿਤਭਾਵਂ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਉਪਟ੍ਠਹਮਾਨੋ ਆਰੋਚੇਸਿ. ਤਸ੍ਮਿਂ ਕਾਲੇ ਸੇਰੁਨਗਰੇ ਸਿਵਰਾਜਾ ਬਹੂ ਪਣ੍ਣਾਕਾਰੇ ਗਾਹਾਪੇਤ੍ਵਾ ਰਾਜਾਨਂ ਪਸ੍ਸਿਸ੍ਸਾਮਿ’ਤਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਰਾਜਾ ਤੇਨ ਸਦ੍ਧਿਂ ਸਮ੍ਮੋਦਨੀਯਂ ਕਥਂ ਕਤ੍ਵਾ ਨਿਸਿਨ੍ਨਕਾਲੇ ਲੋਣਨਗਰੇ ਮਹਾਨਾਗਰਾਜਾ’ਪਿ ਬਹੁਪਣ੍ਣਾਕਾਰਂ ਗਾਹਾਪੇਤ੍ਵਾ ਰਾਜਾਨਂ ਪਸ੍ਸਿਸ੍ਸਾਮਿ’ਤਿ ਆਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤੇਨ ਸਦ੍ਧਿਂ ਸਮ੍ਮੋਦਨੀਯਂ ਕਥਂ ਅਕਾਸਿ; ਇਮਸ੍ਮਿਂ ਠਾਨੇ ਦਸਬਲਧਾਤੁਂ ਪਤਿਟ੍ਠਾਪੇਸ੍ਸਾਮਿ, ਤੁਮ੍ਹੇ ਮਮ ਸਹਾਯਾ ਹੋਥਾ’ਤਿ ਤੇ ਗਹੇਤ੍ਵਾ ਗਨ੍ਤ੍ਵਾ ਧਾਤੁਂ ਵਨ੍ਦਥਾ’ਤਿ ਵਨ੍ਦਾਪੇਸਿ. ਤਸ੍ਮਿਂ ਖਣੇ ਧਾਤੁਤੋ ਛਬ੍ਬਣ੍ਣਰਂਸਿਯੋ ਉਗ੍ਗਚ੍ਛਿਂਸੁ. ਦੇਵਾ ਸਾਧੁਕਾਰਂ ਕਰੋਨ੍ਤਾ ਆਕਾਸਤੋ ਮਾਲਾਯੋ ਖਿਪਿਂਸੁ. ਰਾਜਾਨੋ ਸੋਮਨਸ੍ਸਪ੍ਪਤ੍ਤਾ ਅਮ੍ਹਾਕਂ ਲਙ੍ਕਾਯਂ ਦਸਬਲਸ੍ਸ ਨਲਾਟਧਾਤੁ ਅਮ੍ਹਾਕਂ ਰਟ੍ਠੇ ਪਤਿਟ੍ਠਹਿਸ੍ਸਤਿ. ਏਸਾ ਧਾਤੁ ਮਹਾ ਜਨਸ੍ਸ ਸਤ੍ਥੁਕਿਚ੍ਚਂ ਸਾਧੇਯ੍ਯਾਤਿ ਵਨ੍ਦਿਤ੍ਵਾ ਗਤਾ. ਰਾਜਾ ਤੇਸਂ ਗਤਕਾਲੇ ਗਿਰਿਅਭਯਂ ਪਕ੍ਕੋਸਾਪੇਤ੍ਵਾ ਤਾਤ, ਇਟ੍ਠਕਂ ਜਨਸ੍ਸ ਪੀਲ਼ਨਂ ਅਕਤ੍ਵਾ ਕਾਰਾਪੇਮਾ’ਤੀ ਆਹ. ਮਾ ਚਿਨ੍ਤਯਿਤ੍ਥ ਦੇਵ, ਅਹਂ ¶ ਇਟ੍ਠਕਂ ਕਾਰਾਪੇਸ੍ਸਾਮੀਤਿ. ਏਵਞ੍ਹਿ ਸਤਿ ਪਪਞ੍ਚੋ ਭਵਿਸ੍ਸਤੀ’ਤਿ ਆਹ. ਅਮ੍ਹਾਕਂ ਸਨ੍ਤਿਕੇ ਸੁਵਣ੍ਣਰਜਤਾਨਿ ਮਨ੍ਦਾਨਿ ਕੁਤੋ ਲਭਿਸ੍ਸਾਮਾ’ਤਿ ਵੁਤ੍ਤੇ ਗਿਰਿਅਭਯੋ ਏਵਮਾਹ; ਦੇਵ, ਸਤ੍ਥਾ ਮਹਾਪੁਞ੍ਞੋ ਮਹਨ੍ਤਂ ਪੂਜਾਸਕ੍ਕਾਰਸਮ੍ਮਾਨਂ ਲਭਿਸ੍ਸਤਿ. ਤ੍ਵਂ ਅਚਿਨ੍ਤੇਤ੍ਵਾ ਚੇਤਿਯਕਮ੍ਮਂ ਪਟ੍ਠਪੇਹੀ’ਤਿ ਆਹ.

ਸੋ ਤਸ੍ਸ ਤਂ ਅਚਿਨ੍ਤਨੀਯਂ ਕਥਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਧਾਤੁਂ ਵਨ੍ਦਿਤ੍ਵਾ ਨਗਰਂ ਗਨ੍ਤ੍ਵਾ ਭੁਤ੍ਤਸਾਯਮਾਸੋ ਸਯਨੇ ਨਿਪਨ੍ਨੋ ਨਿਦ੍ਦਂ ਓਕ੍ਕਮਿ. ਵਿਭਾਤਾਯ ਰਤ੍ਤਿਯਾ ਪਬੁਜ੍ਝਿਤ੍ਵਾ ਇਟ੍ਠਕਂ ਚਿਨ੍ਤਯਮਾਨਸ੍ਸ ਦੋਮਨਸ੍ਸਂ ਅਹੋਸਿ. ਤਸ੍ਮਿਂ ਕਾਲੇ ਸਕ੍ਕੋ ਦੇਵਰਾਜਾ ਵਿਸ੍ਸਕਮ੍ਮਂ ਦੇਵਪੁਤ੍ਤਂ ਆਮਨ੍ਤੇਤ੍ਵਾ; ਤਾਤ, ਵਿਸ੍ਸਕਮ੍ਮ, ਕਾਕਵਣ੍ਣਤਿਸ੍ਸਮਹਾਰਾਜਾ ਅਮ੍ਹਾਕਂ ਸਤ੍ਥੁਨੋ ਨਲਾਟ ਧਾਤੁਂ ਨਿਦਹਿਤ੍ਵਾ ਮਹਨ੍ਤਂ ਚੇਤਿਯਂ ਕਾਰਾਪੇਤੁਕਾਮੋ ਇਟ੍ਠਕਂ ਚਿਨ੍ਤਯਿ. ਤ੍ਵਂ ਗਨ੍ਤ੍ਵਾ ਫਾਸੁਕਟ੍ਠਾਨੇ ਇਟ੍ਠਕਂ ਮਾਪੇਹੀਤਿ ਆਹ. ਤਂ ਸੁਤ੍ਵਾ ਵਿਸ੍ਸਕਮ੍ਮਦੇਵਪੁਤ੍ਤੋ ਦੁਗ੍ਗਤਸ੍ਸ ਬ੍ਰਾਹ੍ਮਣਸ੍ਸ ਖੇਤ੍ਤੇ ਇਟ੍ਠਕਂ ਮਾਪੇਤ੍ਵਾ ਦੇਵਲੋਕਮੇਵ ਗਤੋ. ਤਸ੍ਮਿਂ ਖਣੇ ਖੇਤ੍ਤਸਾਮਿਕੋ ਦੁਗ੍ਗਤਬ੍ਰਾਹ੍ਮਣੋ ਪਾਤੋਵ ਅਤ੍ਤਨੋ ਖੇਤ੍ਤਂ ਓਲੋਕਨਤ੍ਥਾਯ ਗਤੋ ਇਤੋਵਿਤੋ ਓਲੋਕੇਨ੍ਤੋ ਇਟ੍ਠਕਰਾਸਿਂ ਦਿਸ੍ਵਾ ਚਿਨ੍ਤੇਸਿ; ਹੀਯੋ ਰਾਜਾ ਇਟ੍ਠਕਂ ਕਥਂ ਲਭਿਸ੍ਸਾਮੀਤਿ ਕਥੇਸਿ. ਮਹਨ੍ਤਂ ਵਤ ਪਣ੍ਣਾਕਾਰਂ ਮਯਾ ਲਦ੍ਧਨ੍ਤਿ ਤੁਟ੍ਠੋ ਦੇਵ੍ैਟ੍ਠਕਾਨਿ ਕਾਜੇਨ ਗਹੇਤ੍ਵਾ ਰਞ੍ਞੋ ਦਸ੍ਸਨਤ੍ਥਾਯ ਗਨ੍ਤ੍ਵਾ ਰਾਜਦ੍ਵਾਰੇ ਠਤ੍ਵਾ ਸਾਸਨਂ ਪਹਿਣਿ. ਤਂ ਪਕ੍ਕੋਸਾਪੇਤ੍ਵਾ ਕਸ੍ਮਾ ਪਾਤੋ’ਵ ਆਗਤੋਸੀ’ਤਿ ਪੁਚ੍ਛਿ. ਦੇਵ ਮਯ੍ਹਂ ਖੇਤ੍ਤੇ ਇਟ੍ਠਕਰਾਸਿਂ ਦਿਸ੍ਵਾ ਪਾਤੋ’ਵ ਇਟ੍ਠਕਾਨਿ ਗਹੇਤ੍ਵਾ ਆਗਤੋਮ੍ਹੀ’ਤਿ. ਈਦਿਸਾਨਿ ਇਟ੍ਠਕਾਨਿ ਚੇਤਿਯਸ੍ਸ ਅਨੁਚ੍ਛਵਿਕਾਨੀਤਿ ਦਸ੍ਸੇਸਿ. ਰਾਜਾ ਪਸ੍ਸਿਤ੍ਵਾ ਸੋਮਨਸ੍ਸਪ੍ਪਤ੍ਤੋ ਬ੍ਰਾਹ੍ਮਣਸ੍ਸ ਬਹੁਂ ਧਨਂ ਦਾਪੇਸਿ.

ਤਸ੍ਮਿਂ ¶ ਖਣੇ ਅਞ੍ਞਂ ਸਾਸਨਂ ਆਹਰਿ. ਮਦਨਪਟ੍ਟਨਦ੍ਵਾਰਤੋ ਚਤਸ੍ਸੋ ਰਜਤਨਾਵਾ ਸੁਵਣ੍ਣਭੁਮਿਤੋ ਚਤਸ੍ਸੋ ਸੁਵਣ੍ਣਨਾਵਾ ਉਕ੍ਕਮਿਂਸੂਤਿ ਪਟ੍ਟਨਮੁਖਦ੍ਵਾਰੇ ਵਿਹਰਨ੍ਤੋ ਆਰਕ੍ਖਕ ਜੇਟ੍ਠਕੋ ਧਮ੍ਮਪਾਲੋ ਨਾਮ ਆਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਤੁਟ੍ਠੋ ਸੁਵਣ੍ਣਰਜਤੇ ਆਹਰਾਪੇਸਿ.

(ਇਟ੍ਠਕਂ ਰਜਤਞ੍ਚੇਵ ਸੁਵਣ੍ਣਞ੍ਚ ਮਹਾਰਹਂ;

ਆਹਰਿਤ੍ਵਾਨ ਤਂ ਸਬ੍ਬਂ ਕਮ੍ਮਂ ਆਰਭਿ ਚੇਤਿਯੇ.

ਸਤ੍ਥੁ ਪੁਞ੍ਞਾਨੁਭਾਵੇਨ ਰਞ੍ਞੋ ਪੁਞ੍ਞਬਲੇਨ ਚ;

ਚਿਨ੍ਤਿਤਚਿਨ੍ਤਿਤਂ ਸਬ੍ਬਂ ਖਣੇਨੇਵ ਸਮਿਜ੍ਝਤਿ.)

ਤਤੋ ਰਾਜਾ ਚੂਲ਼ਪਿਣ੍ਡਪਾਤਿਯਤਿਸ੍ਸਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ? ਅਯ੍ਯ ਇਟ੍ਠਕਭੁਮਿਂ ਗਮਿਸ੍ਸਾਮੀਤਿ ਆਹ. ਥੇਰੋ ਸੁਤ੍ਵਾ ਤੁਟ੍ਠੋ ਅਤ੍ਤਨੋ ਪਰਿਵਾਰੇਹਿ ਪਞ੍ਚਸਤਭਿਕ੍ਖੂਹਿ ਸਦ੍ਧਿਂ ਇਟ੍ਠਕ ਭੂਮਿਂ ਗਤੋ. ਤਤੋ ਮਹਾਸਾਗਲਤ੍ਥੇਰੋ ਚ ਮਹਿਨ੍ਦਤ੍ਥੇਰੋ ਚ ਅਤ੍ਤਨੋ ਪਰਿਵਾਰੇਹਿ ਭਿਕ੍ਖੁਹਿ ਸਦ੍ਧਿਂ ਇਟ੍ਠਕਭੁਮਿਂ ਗਤਾ. ਸਿਵ ਨਗਰੇ ਰਾਜਾਪਿ ਇਟ੍ਠਕਭੁਮਿਂ ਗਤੋ. ਲੋਣਨਗਰੇ ਨਾਗਰਾਜਾਪਿ ਇਟ੍ਠਕਭੁਮਿਂ ਗਤੋ. ਸੋਮਨਗਰੇ ਗਿਰਿਅਭਯਰਾਜਾਪਿ ਅਤ੍ਤਨੋ ਸੇਨਙ੍ਗੇਹਿ ਪਰਿਵਾਰੇਤ੍ਵਾ ਇਟ੍ਠਕਭੁਮਿਂ ਗਤੋ. ਤੇਸਂ ਸਮਣ ਬ੍ਰਾਹ੍ਮਣਾਨਂ ਰਾਜਬਲ਼ਾਨਞ੍ਚ ਸਮ੍ਪਿਣ੍ਡਿਤਤ੍ਤਾ ਸੋ ਪਿਟ੍ਠਿਪਾਸਾਣੋ ਬਲਵਾਹਨੋ ਨਾਮ ਜਾਤੋ. ਤੇ ਸਬ੍ਬੇ ਇਟ੍ਠਕਭੁਮਿਂ ਸਮੋਸਰਿਂਸੁ. ਥੇਰੋ ਇਟ੍ਠਕਰਾਸਿਂ ਓਲੋਕੇਤ੍ਵਾ ਰਾਜਾਨਂ ਏਵਮਾਹ? ਮਹਾਰਾਜ, ਅਯਂ ਇਟ੍ਠਕਰਾਸਿ ਚੇਤਿਯੇ ਸਬ੍ਬਕਮ੍ਮਤ੍ਥਾਯ ਪਹੋਤੀ’ਤਿ. ਰਾਜਾ ਅਤ੍ਤਮਨੋ ਸੇਨਙ੍ਗਪਰਿਵੁਤੋ ਸਯਮੇਵ ਪਠਮਂ ਇਟ੍ਠਕਂ ਗਣ੍ਹਿ. ਤਂ ਦਿਸ੍ਵਾ ਸੇਸਰਾਜਾਨੋ ਚ ਅਮਚ੍ਚਾਦਯੋ ਚ ਪਰਿਸਾ ਚ ਸਬ੍ਬੇ ਭਿਕ੍ਖੁ ਚ ਇਟ੍ਠਕਾਨਿ ਗਣ੍ਹਿਂਸੁ ਤਸ੍ਮਿਂ ਕਾਲੇ ਭਾਰਂ ਉਕ੍ਖਿਪਿਤ੍ਵਾ ਗਮਨਂ ਪਪਞ੍ਚਂ ਭਵਿਸ੍ਸਤੀ’ਤਿ ਰਾਜਾ ਚਿਨ੍ਤੇਸਿ. ਥੇਰੋ ਤਸ੍ਸ ਚਿਤ੍ਤਂ ਜਾਨਿਤ੍ਵਾ ਏਵਮਾਹ? ਮਾ ਚਿਨ੍ਤਯਿਤ੍ਥ ਮਹਾਰਾਜ, ਇਟ੍ਠਕਾਨਿ ਗਹੇਤ੍ਵਾ ਗਚ੍ਛ. ਪਚ੍ਛਾ ਦੇਵਨਾਗਾਦਯੋ ਇਟ੍ਠਕਭੁਮਿਤੋ ਪਟ੍ਠਾਯ ਯਾਵ ਚੇਤਿਯਟ੍ਠਾਨਂ ਨਿਰਨ੍ਤਰਾ ਠਿਤਾ ਆਹਰਿਸ੍ਸਨ੍ਤੀ’ਤਿ. ਤੇ ਆਹਰਿਤ੍ਵਾ ਚੇਤਿਯਟ੍ਠਾਨੇ ਰਾਸਿਂ ਕਰੋਨ੍ਤਿ. ਤੇਨੇਵ ¶ ਨੀਯਾਮੇਨ ਯਾਵ ਚੇਤਿਯਸ੍ਸ ਨਿਟ੍ਠਙ੍ਗਮਾ ਤਾਵ ਦੇਵਨਾਗਸੁਪਣ੍ਣਾਦਯੋ ਨਿਰਨ੍ਤਰਂ ਠਤ੍ਵਾ ਇਟ੍ਠਕਾਨਿ ਆਹਰਿਤ੍ਵਾ ਚੇਤਿਯਕਰਣਟ੍ਠਾਨੇਵ ਚਤੁਸੁ ਦਿਸਾਸੁ ਰਾਸਿਂ ਅਕਂਸੁ.

ਤਤੋ ਰਾਜਾ ਸਬ੍ਬੇ ਇਟ੍ਠਕਵਡ੍ਢਕੀ ਰਾਸਿਂ ਕਾਰਾਪੇਤ੍ਵਾ ਤੇਸਂ ਵਡ੍ਢਕੀਨਂ ਅਨ੍ਤਰੇ ਜਯਸੇਨਂ ਨਾਮ ਇਟ੍ਠਕਵਡ੍ਢਕਿਂ ਪਰਿਗਣ੍ਹਿਤ੍ਵਾ ਤਸ੍ਸ ਪਨ ਸਤਸਹਸ੍ਸਗ੍ਘਨਕਾਨਿ ਦ੍ਵੇ ਸਾਟਕਾਨਿ ਕਹਾਪਣਸਤਸਹਸ੍ਸਾਨਿ ਚ ਸੁਵਣ੍ਣਕੁਣ੍ਡਲਾਦਯੋ ਆਭਰਣਾਨਿ ਚ ਦਾਪੇਸਿ. ਤਸ੍ਸ ਪਰਿਵਾਰਾਨਂ ਵਡ੍ਢਕੀਨਂ ਅਹਤਵਤ੍ਥਾਦੀਨਿ ਸਬ੍ਬੁਪਕਰਣਾਨਿ ਦਾਪੇਸਿ. ਅਨੇਕਵਿਧਂ ਮਹਨ੍ਤਂ ਸਮ੍ਮਾਨਂ ਕਾਰੇਤ੍ਵਾ ਥੇਰੇਨ ਸਦ੍ਧਿਂ ਮਨ੍ਤੇਨ੍ਤੋ; ਅਯ੍ਯ ਅਜ੍ਜ ਵਿਸਾਖਪੁਣ੍ਣਮੀ ਉਪੋਸਥਦਿਵਸੋ, ਤਸ੍ਮਾ ਨਲਾਟਧਾਤੁਯਾ ਮਙ੍ਗਲਂ ਕਰਿਤ੍ਵਾ ਚੇਤਿਯਟ੍ਠਾਨੇ ਇਟ੍ਠਕਂ ਪਤਿਟ੍ਠਾਪੇਤੁਂ ਵਟ੍ਟਤੀ’ਤਿ ਆਹ. ਤਂ ਸੁਤ੍ਵਾ ਥੇਰੋ; ਭਦ੍ਦਕਂ ਮਹਾਰਾਜ, ਬੁਦ੍ਧਸ੍ਸ ਭਗਵਤੋ ਜਾਤਦਿਵਸੋ’ਤਿ ਵਤ੍ਵਾ ਚੇਤਿਯਕਮ੍ਮਕਰਣਤ੍ਥਾਯ ਪਞ੍ਚ ਜਨੇ ਗਣ੍ਹਿ. ਤੇਸੁ ਏਕੋ ਵਰਦੇਵੋ ਨਾਮ, ਏਕੋ ਸਙ੍ਖੋ ਨਾਮ, ਏਕੋ ਵਿਜ੍ਜੋ ਨਾਮ, ਏਕੋ ਪੁਸ੍ਸਦੇਵੋ ਨਾਮ, ਏਕੋ ਮਹਾਦੇਵੋ ਨਾਮ. ਇਮੇਸਂ ਵਡ੍ਢਕੀਨਂ ਮਙ੍ਗਲਂ ਕਾਰਾਪੇਤ੍ਵਾ ਛਣਵੇਸਂ ਗਹੇਤ੍ਵਾ ਸਬ੍ਬਾਲਙ੍ਕਾਰੇਨ ਅਲਙ੍ਕਾਰਾਪੇਤ੍ਵਾ ਰਾਜਾ ਸਯਮ੍ਪਿ ਸਬ੍ਬਾਲਙ੍ਕਾਰੇਨ ਪਤਿਮਣ੍ਡਿਤੋ ਮਙ੍ਗਲਵਿਧਾਨਂ ਕਾਰਾਪੇਤ੍ਵਾ ਭਿਕ੍ਖੁਸਙ੍ਘਂ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਚਤੁਸੁ ਠਾਨੇਸੁ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਵਿਜਮ੍ਹੇਤ੍ਵਾ ਸੁਵਣ੍ਣਘਟ੍ਠਾਨਂ ਪਵਿਸਿਤ੍ਵਾ ਸੁਵਣ੍ਣਖਚਿਤਂ ਮਣਿਮੁਤ੍ਤਾਰਤਨਮਯਂ ਪਰਿਬ੍ਭਮਨਦਣ੍ਡਂ ਜੀਵਮਾਨਕਮਾਤਾਪਿਤਰੇਨ ਉਭਤੋਸੁਮਣ੍ਡਿਤਪਸਾਧਿਤੇਨ ਅਭਿਮਙ੍ਗਲਸਮ੍ਮਤੇਨ ਅਮਚ੍ਚਪੁਤ੍ਤੇਨ ਗਾਹਾਪੇਤ੍ਵਾ ਮਹਨ੍ਤਂ ਚੇਤਿਯਂ ਤਤ੍ਥ ਕਰੋਨ੍ਤੋ ਸਯਮ੍ਪਿ ਪਰਿਬ੍ਭਮਨਦਣ੍ਡਂ ਗਹੇਤ੍ਵਾ ਪਰਿਕਮ੍ਮਕਤਭੁਮਿਯਂ ਪਰਿਬ੍ਭਮਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਤੋ ਮਹਾਵਡ੍ਢਕੀ ਸੁਨਕ੍ਖਤ੍ਤੇਨ ਸੁਮੁਹੁਤ੍ਤੇਨ ਚੇਤਿਯਟ੍ਠਾਨੇ ਇਟ੍ਠਕਂ ਪਤਿਟ੍ਠਾਪੇਸਿ.

ਤਸ੍ਮਿਂ ¶ ਖਣੇ ਚਤੁਨਹੁਤਾਧਿਕ ਦ੍ਵਿਯੋਜਨ ਸਤਸਹਸ੍ਸਬਹੁਲਾ ਅਯਂ ਮਹਾਪਥਵੀ ਸਾਧੁਕਾਰਂ ਪਵਤ੍ਤੇਨ੍ਤੀ ਵਿਯ ਮਹਾਨਾਦਂ ਪਵਤ੍ਤੇਸਿ. ਦੇਵਮਨੁਸ੍ਸਾ ਦਿਵਸੇ ਦਿਵਸੇ ਪਹੋਨਕ-ਮਤ੍ਤਿਕਂ ਨਿਸਦੇਨ ਪਿਂਸਿਤ੍ਵਾ ਸੁਪ੍ਪੇਹਿ ਪਪ੍ਫੋਠੇਤ੍ਵਾ ਦੇਨ੍ਤਿ. ਏਵਂ ਕਰੋਨ੍ਤੋ ਕਤਿਪਯੇਨੇਵ ਦਿਵਸੇਨ ਪੁਪ੍ਫਾਧਾਨਤ੍ਤਯਂ ਚਿਨਿਤ੍ਵਾ ਮਹਾਭਿਕ੍ਖੁ ਸਙ੍ਘਸ੍ਸ ਨਿਵੇਦੇਸਿ. ਤਂ ਸੁਤ੍ਵਾ ਸਙ੍ਘੋ ਚੁਨ੍ਦੁਤ੍ਤਰਨਾਮਕੇ ਦ੍ਵੇ ਸਾਮਣੇਰੇ ਆਣਾਪੇਸਿ? ਤੁਮ੍ਹੇ ਹਿਮਵਨ੍ਤਂ ਗਨ੍ਤ੍ਵਾ ਮੇਦਵਣ੍ਣਪਾਸਾਣੇ ਆਹਰਥਾ’ਤਿ. ਤੇ ਪਨ ਸਾਮਣੇਰਾ ਜਾਤਿਯਾ ਸੋਲ਼ਸਵਸ੍ਸਿਕਾ ਛਲ਼ਭਿਞ੍ਞਾਪ੍ਪਭੇਦੇਨ ਪਟਿਸਮ੍ਭਿਦਪ੍ਪਤ੍ਤਾ. ਮਹਾਖੀਣਾਸਵਭਿਕ੍ਖੁਸਙ੍ਘਸ੍ਸ ਸਨ੍ਤਿਕਾ ਭਿਕ੍ਖੁਸਙ੍ਘਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਹਿਮਵਨ੍ਤਤੋ ਅਤ੍ਤਨੋ ਇਦ੍ਧਿਬਲੇਨ ਮੇਦਵਣ੍ਣਪਾਸਾਣੇ ਆਹਰਿਂਸੁ. ਏਤੇਸੁ ਏਕਂ ਪਾਸਾਣਂ ਧਾਤੁਗਬ੍ਭਸ੍ਸ ਭੁਮਿਯਂ ਪਤ੍ਥਰਿਤ੍ਵਾ ਚਤੁਸੁ ਪਸ੍ਸੇਸੁ ਚਤ੍ਤਾਰੋ ਪਾਸਾਣੇ ਪਤਿਟ੍ਠਾਪੇਤ੍ਵਾ ਅਪਰਂ ਧਾਤੁਗਬ੍ਭਂ ਪਿਦਹਿਤੁਂ ਅਦਸ੍ਸਨਂ ਕਤ੍ਵਾ ਠਪਯਿਂਸੁ.

ਤਦਾ ਰਾਜਾ ਧਾਤੁਗਬ੍ਭੇ ਕਮ੍ਮਂ ਨਿਟ੍ਠਪੇਨ੍ਤੋ ਨਵ ਕੋਟਿਪ੍ਪਮਾਣਂ ਸੁਵਣ੍ਣਂ ਆਹਰਾਪੇਤ੍ਵਾ ਸੁਵਣ੍ਣਕਾਰਾਨਂ ਦਤ੍ਵਾ ਧਾਤੁਗਬ੍ਭਸ੍ਸ ਇਟ੍ਠਕਾਨਿ ਕਰੋਥਾ’ਤਿ ਆਣਾਪੇਸਿ. ਤੇ ਸੁਵਣ੍ਣਕਾਰਾ ਦੀਘਤੋ ਰਤਨਪ੍ਪਮਾਣਂ ਪੁਥੁਲਤੋ ਵਿਦਤ੍ਥੀਪ੍ਪਮਾਣਂ ਬਹਲਤੋ ਚਤੁਰਙ੍ਗੁਲਪ੍ਪਮਾਣਂ ਇਟ੍ਠਕਂ ਕਤ੍ਵਾ ਧਾਤੁਗਬ੍ਭਂ ਚਿਨਿਂਸੁ. ਤਂ ਪਨ ਧਾਤੁਗਬ੍ਭਂ ਉਚ੍ਚਤੋ ਸੋਲ਼ਸਹਤ੍ਥਂ ਵਿਤ੍ਥਾਰਤੋਪਿ ਇਤੋਚਿਤੋ ਦਸਦਸਰਤਨਂ ਕਤ੍ਵਾ ਸੁਵਣ੍ਣਿਟ੍ਠਕੇਹੇਵ ਨਿਟ੍ਠਪੇਤ੍ਵਾ ਧਾਤੁਗਬ੍ਭਸ੍ਸ ਮਜ੍ਝੇ ਸਤ੍ਤਰਤਨਮਯਂ ਸਿਨੇਰੁਂ ਕਾਰਾਪੇਤ੍ਵਾ ਸਿਨੇਰੁਸ੍ਸ ਉਪਰਿ ਜਾਤਿਹਿਙ੍ਗੁਲਕੇਨ ਪਣ੍ਡੁਕਮ੍ਬਲਸਿਲਾਸਨਂ ਸਤ੍ਤਰਤਨੇਨ ਪਾਰਿਚ੍ਛਤ੍ਤਕਰੁਕ੍ਖਂ ਰਜਤਮਯਂ ਸੇਤਚ੍ਛਤ੍ਤਂ ਬ੍ਰਹ੍ਮੁਨਾ ਗਾਹਾਪੇਤ੍ਵਾ ਸਤ੍ਥੁਨੋ ਪਟਿਮਾਯ ਉਪਰਿ ਧਾਰਿਯਮਾਨਂ ਕਾਰੇਸਿ. ਸਿਨੇਰੁਪਾਦਮੂਲੇ ਗਨ੍ਧਕਲਲਪੂਰਿਤ ਨੀਲੁਪ੍ਪਲਵਿਭੁਸਿਤਸੁਵਣ੍ਣਮਯਅਟ੍ਠੁਤ੍ਤਰਸਤਘਟਪਨ੍ਤਿਯੋ ਠਪਾਪੇਸਿ. ਤਦਨਨ੍ਤਰਂ ਗਨ੍ਧਕਲਲਪੂਰਿਤਰਤ੍ਨਪਦੁਮਵਿਭੁਸਿਤਰਜਤਮਯਅਟ੍ਠੁਤ੍ਤਰ- ¶ ਸਤਘਟਪਨ੍ਤਿਯੋ ਠਪਾਪੇਸਿ. ਤਦਨਨ੍ਤਰਂ ਗਨ੍ਧਕਲਲਪੂਰਿਤ ਸੇਤੁਪ੍ਪਲਮਾਲਾਵਿਭੁਸਿਤਮਣਿਮਯਅਟ੍ਠੁਤ੍ਤਰਸਤਘਟਪਤ੍ਤਿਯੋ ਠਪਾਪੇਸਿ. ਤਦਨਨ੍ਤਰਂ ਗਨ੍ਧਕਲਲਪੂਰਿਤਸੇਤੁਪ੍ਪਲਵਿਭੁਸਿਤ-ਮਸਾਰਗਲ੍ਲਮਯ ਅਟ੍ਠੁਤ੍ਤਰਸਤਘਟਪਨ੍ਤਿਯੋ ਠਪਾਪੇਸਿ. ਤਦਨਨ੍ਤਰਂ ਗਨ੍ਧਕਲਲਪੂਰਿਤਚਮ੍ਪਕਪੁਪ੍ਫਵਿਭੁਸਿਤਲੋਹਿਤਙ੍ਕਮਯਅਟ੍ਠੁਤ੍ਤਰਸਤ ਘਟਪਤ੍ਤਿਯੋ ਠਪਾਪੇਸਿ. ਤਦਨਨ੍ਤਰਂ ਗਨ੍ਧਕਲਲਪੂਰਿਤਪਞ੍ਚੁਪ੍ਪਲਵਿਭੁਸਿਤਮਤ੍ਤਿਕਾਮਯਅਟ੍ਠੁਤ੍ਤਰਸਤਘਟਪਨ੍ਤਿਯੋ ਠਪਾਪੇਸਿ. ਤਾਸਂ ਘਟਪਨ੍ਤੀਨਂ ਅਨ੍ਤਰੇ ਗਨ੍ਧਕਲਲਪੂਰਿਤਸਤ੍ਤਰਤਨਮਯਸਰਾਵਕੇ ਠਪਾਪੇਸਿ. ਕਞ੍ਚਨਮਯ-ਸਤ੍ਤਰਤਨਮਯ-ਵਿਚਿਤ੍ਤਮਾਲਾਲਤਾਪੁਣ੍ਣਘਟਸਿਰਿਵਚ੍ਛਨਨ੍ਦਿਯਾਵਟ੍ਟਭਦ੍ਦਪੀਠਾਦਯੋ ਚ ਹਤ੍ਥਿਅਸ੍ਸਸੀਹਵ੍ਯਗ੍ਘੋਸਭਪਨ੍ਤਿਆਦਯੋ ਚ ਕਾਰੇਸਿ. ਦੇਵੋਰੋਹਣਂ ਯਮਕਪਾਟਿਹੀਰਾਦਯੋ ਧਨਪਾਲ-ਅਙ੍ਗੁਲਿਮਾਲ-ਆਲ਼ਵਕਦਮਨਾਦਯੋ, ਸਾਰਿਪੁਤ੍ਤ-ਮੋਗ੍ਗਲ੍ਲਾਨ-ਮਹਾਕਸ੍ਸਪਤ੍ਥੇਰਾਦਯੋ, ਅਸੀਤਿਮਹਾਸਾਵਕਰੂਪਾਦੀਨਿ ਚ ਕਾਰਾਪੇਸਿ. ਸਿਨੇਰੁਸ੍ਸ ਮਜ੍ਝਿਮਭਾਗੇ ਤਾਰਾਗਣਪਰਿਵਾਰਿਤਂ ਰਜਤਮਯਂ ਚਨ੍ਦਮਣ੍ਡਲਞ੍ਚ ਕਾਰਾਪੇਸਿ. ਰਂਸਿਜਾਲਵਿਭੁਸਿਤਂ ਕਨਕਮਯਂ ਸੂਰਿਯਮਣ੍ਡਲਞ੍ਚ ਕਾਰਾਪੇਸਿ.

ਤਤੋ ਸਿਨੇਰੁਸ੍ਸ ਮਤ੍ਥਕੇ ਪਾਰਿਚ੍ਛਤ੍ਤਕਮੁਲੇ ਪਣ੍ਡੁਕਮ੍ਬਲਸਿਲਾਸਨੇ ਅਮ੍ਹਾਕਂ ਸਤ੍ਥੁਨੋ ਪਟਿਮਂ ਘਨਕੋਟ੍ਟਿਮ ਰਤ੍ਤਸੁਵਣ੍ਣਮਯਂ ਕਾਰਾਪੇਤ੍ਵਾ ਮਾਤੁਦੇਵਪਾਮੋਕ੍ਖ ਦਸਸਹਸ੍ਸ ਚਕ੍ਕਵਾਲ਼ਦੇਵਤਾਨਂ ਸਤ੍ਤਪ੍ਪਕਰਣਂ ਅਭਿਧਮ੍ਮਂ ਦੇਸਨਾਕਾਰੇਨ ਨਿਸੀਦਾਪੇਸਿ. ਤਸ੍ਸ ਵੀਸਤਿਨਖਾ ਅਕ੍ਖਿਤਲਾਨਂ ਸੇਤਟ੍ਠਾਨਾਨਿ ਜਾਤਿਫਲਿਕਮਯਾਨਿ. ਅਙ੍ਗੁਲਿਯੋ ਸੁਵਣ੍ਣਮਯਾ ਹਤ੍ਥਪਾਦਤਲਾਨਿ ਚ ਦਨ੍ਤਾਵਰਣਾਨਿ ਚ ਅਕ੍ਖੀਨਂ ਰਤ੍ਤਟ੍ਠਾਨਾਨਿ ਚ ਜਾਤਿਪਵਾਲ਼ਮਯਾਨਿ, ਕੇਸਮਸ੍ਸੁਭਮੁਕਟ੍ਠਾਨਾਨਿ ਇਨ੍ਦਨੀਲਮਯਾਨਿ, ਸਮਚਤ੍ਤਾਲੀਸ ਦਨ੍ਤਾ ਵਜਿਰਮਯਾ ਅਹੇਸੁਂ. ਉਣ੍ਣਲੋਮਂ ਪਨ ਸੁਵਣ੍ਣ ਭਿਤ੍ਤਿਯਂ ਠਪਿਤਰਜਤਬੁਬ੍ਬੁਲ਼ਵਿਲਾਸਂ ਰਜਤਮਯਂ ਅਹੋਸਿ. ਭਗਵਤੋ ਅਨਵਲੋਕਿਤ ਮੁਦ੍ਧਨਿ ਮਤ੍ਥਕੇ ਸਤ੍ਤਰਤਨਮਯਂ ਵਿਚਿਤ੍ਤਕਿਂਕਿਣਿਜਾਲਂ ਪਰਿਕ੍ਖਿਪਾਪੇਸਿ. ਮਣ੍ਡਪਸ੍ਸ ਅਨ੍ਤੋ ਨਵਸਤਸਹਸ੍ਸਗ੍ਘਨਕਂ ਮੁਤ੍ਤਾਕਲਾਪਮੋਲਮ੍ਬਕਂ ਮਨੋਰਮਂ ਚੇਲਵਿਤਾਨਂ ਬਨ੍ਧਾਪੇਤ੍ਵਾ ਮਣ੍ਡਪਕੋਟਿਯਂ ਮੁਤ੍ਤਾਜਾਲਂ ਤਦਨਨ੍ਤਰਂ ਸਤ੍ਤ ਰਤਨਵਿਚਿਤ੍ਤਂ ਕਿਂਕਿਣਿਜਾਲਂ ਪਰਿਕ੍ਖਿਪਾਪੇਸਿ.

ਅਮ੍ਹਾਕਂ ¶ ਭਗਵਤੋ ਮਾਤੁਦੇਵਪੁਤ੍ਤਮ੍ਪਿ ਸਤ੍ਤਰਤਨੇਨ ਕਾਰਾਪੇਸਿ. ਤਥਾ ਏਰਾਵਣਵਿਸ੍ਸਕਮ੍ਮਦੇਵਪੁਤ੍ਤਾਦਯੋ ਚ ਸਪਰਿਵਾਰੋ ਸਕ੍ਕੋ ਦੇਵਰਾਜਾ ਚ ਚਤ੍ਤਾਰੋ ਮਹਾਰਾਜਾਨੋ ਚ ਪਞ੍ਚਸਿਖਦੇਵਪੁਤ੍ਤਾਦਯੋ ਗਨ੍ਧਬ੍ਬਦੇਵਪੁਤ੍ਤਾ ਚ ਸਹਮ੍ਪਤਿ ਮਹਾ ਬ੍ਰਹ੍ਮਾਦਯੋ ਮਹਾਬ੍ਰਹ੍ਮਨੋ ਚ ਕਾਰਾਪੇਸਿ. ਵੇਸ੍ਸਨ੍ਤਰਜਾਤਕਂ ਕਰੋਨ੍ਤੋ ਸਂਜਯਮਹਾਰਾਜਾ ਫੁਸਤੀਦੇਵੀ ਆਦਯੋ ਚ ਮਦ੍ਦੀਦੇਵੀ ਦ੍ਵੇ ਦਾਰਕੇ ਚ ਜੂਜਕਬ੍ਰਾਹ੍ਮਣਾਦਯੋ ਚ ਕਾਰਾਪੇਸਿ. ਵਿਧੁਰ-ਸੋਣਦਤ੍ਤ ਮਹਾਨਾਰਦਕਸ੍ਸਪ-ਸੁਤਸੋਮ-ਸੁਪ੍ਪਾਰਕ-ਸਙ੍ਖਪਾਲਜਾਤਕਾਦੀਨਿ ਚ, ਧਮ੍ਮਚਕ੍ਕਪ੍ਪਵਤ੍ਤਨ-ਮਹਾਸਮਯਸੁਤ੍ਤਾਦਿ ਦੇਸਨਾਕਾਰੋ ਚ, ਸੁਦ੍ਧੋਦਨਮਹਾਰਾਜਾ ਮਹਾਮਾਯਾ ਮਹਾਪਜਾਪਤੀ ਗੋਤਮੀ ਭਦ੍ਦਕਚ੍ਚਾਨਾ ਰਾਹੁਲਮਾਤਾਦੇਵੀ ਚ ਰਾਹੁਲਕੁਮਾਰੋ ਚ ਛਨ੍ਨਞ੍ਚ ਕਨ੍ਥਕਞ੍ਚ ਮਹਾਭਿਨਿਕ੍ਖਮਨਂ ਮਹਾਬੋਧਿਮਣ੍ਡਲਂ ਅਸੀਤਿਮਹਾਸਾਵਕਾ ਕੋਸਲਮਹਾਰਾਜਾ ਅਨਾਥਪਿਣ੍ਡਿਕਮਹਾਸੇਟ੍ਠਿ ਚੂਲ਼ਅਨਾਥਪਿਣ੍ਡਿਕ-ਵਿਸਾਖਾ ਸੁਪ੍ਪਵਾਸਾ ਚ ਪਚ੍ਛਾ ਚੂਲ਼ਪਿਣ੍ਡਪਾਤਿਯ ਤਿਸ੍ਸਤ੍ਥੇਰਞ੍ਚ ਅਤ੍ਤਾਨਞ੍ਚ ਕਾਰਾਪੇਤ੍ਵਾ ਤੇ ਸਬ੍ਬੇ ਧਾਤੁ ਗਬ੍ਭੇ ਪਤਿਟ੍ਠਾਪੇਸਿ.

ਧਾਤੁਗਬ੍ਭਵਣ੍ਣਣਾ ਸਮਤ੍ਤਾ.

ਏਵਂ ਧਾਤੁਗਬ੍ਭੇ ਪੂਜਾਵਿਧਾਨਂ ਸੁਵਿਭਤ੍ਤਂ ਸੁਮਨੋਰਮਂ ਕਾਰਾਪੇਤ੍ਵਾ ਥੇਰੇਨ ਸਦ੍ਧਿਂ ਕਥੇਸਿ? ਭਨ੍ਤੇ ਧਾਤੁਗਬ੍ਭੇ ਮਯਾ ਕਤ੍ਤਬ੍ਬਂ ਨਿਟ੍ਠਾਪਿਤਂ. ਸ੍ਵੇ ਰੋਹਿਣੀਨਕ੍ਖਤ੍ਤੇਨ ਧਾਤੁ ਨਿਧਾਨਂ ਕਰਿਸ੍ਸਾਮੀ. ਅਯ੍ਯਾ ਪਨ ਕੇਸਧਾਤੁਯੋ ਗਹੇਤ੍ਵਾ ਆਗਚ੍ਛਨ੍ਤੁਤਿ. ਤਿਸ੍ਸਤ੍ਥੇਰਸ੍ਸ ਭਾਰਮਕਾਸਿ. ਥੇਰੋ ਤਂ ਸੁਤ੍ਵਾ ਭਦ੍ਦਕਂ ਮਹਾਰਾਜ, ਕੇਸਧਾਤੁਯੋ ਵਿਚਿਨਿਤ੍ਵਾ ਆਹਰਾਪੇਸ੍ਸਾਮਾਤਿ ਵਤ੍ਵਾ ਅਤ੍ਤਨੋ ਸਦ੍ਧਿਵਿਹਾਰਿਕਂ ਸਿਵਤ੍ਥੇਰਂ ਪਕ੍ਕੋਸਾਪੇਤ੍ਵਾ ਆਵੁਸੋ ਭੂਮਿਨ੍ਧਰਨਾਗਵਿਮਾਨੇ ਜਯਸੇਨੋ ਨਾਮ ਨਾਗਰਾਜਾ ਵਸਤਿ. ਤਸ੍ਸ ਸਨ੍ਤਿਕੇ (ਕੇਸਧਾਤੁਯੋ ਸਨ੍ਤਿ.) ਤਪੁਸ੍ਸ ਭਲ੍ਲਿਕਾਨਂ ਦ੍ਵੇਭਾਤਿਕਵਾਣਿਜਾਨਂ ਪਰਿਚਰਣਕਾਲੇ ਤੇਸਂ ਪਮਾਦਂ ਞਤ੍ਵਾ ਨਾਗਰਾਜਾ ਦ੍ਵੇ ਕੇਸਧਾਤੁਯੋ ਗਹੇਤ੍ਵਾ ਨਾਗਭਵਨੇ ਠਪੇਸਿ. ਤ੍ਵਂ ਤਾ ਧਾਤੁਯੋ ਆਹਰਿਤ੍ਵਾ ਰਞ੍ਞੋ ਦੇਹੀਤਿ ਆਣਾਪੇਸਿ. ਥੇਰੋ ਤਂ ਵਚਨਂ ਸਮ੍ਪਟਿਚ੍ਛਿਤ੍ਵਾ ਗਤੋ.

ਤਤੋ ਰਾਜਾ ਅਤ੍ਤਨੋ ਭਗਿਨਿਯਾ ਸੋਮਦੇਵਿਯਾ ਚ ਭਾਗਿਨੇਯ੍ਯਸ੍ਸ ਗਿਰਿਅਭਯਰਞ੍ਞੋ ਚ ਸਾਸਨਂ ਪੇਸੇਸਿ? ਸ੍ਵੇ ਧਾਤੁਨਿਧਾਨਂਕਰਿਸ੍ਸਾਮ. ਤੁਮ੍ਹੇ ਸੇਨਙ੍ਗਂ ਗਹੇਤ੍ਵਾ ਆਗਚ੍ਛਥਾ’ਤਿ. ਲੋਣਨਗਰੇ ¶ ਮਹਾਨਾਗਰਞ੍ਞੋ ਚ ਸੇਰੁ ਨਗਰੇ ਸਿਵਰਞ੍ਞੋ ਚ ਤਥੇਵ ਸਾਸਨਂ ਪੇਸੇਤ੍ਵਾ ਸਯਮ੍ਪਿ ਅਤ੍ਤਨੋ ਵਿਜਿਤੇ ਯੇਨ ਮਯ੍ਹਂ ਹਤ੍ਥਤੋ ਅਨ੍ਤਮਸੋ ਏਕਕਰੀਸਮਤ੍ਤਮ੍ਪਿ ਲਦ੍ਧਂ ਤਦੁਪਾਦਾਯ ਸਬ੍ਬੇਪਿ ਤੁਮ੍ਹੇ ਸਦ੍ਧਿਂ ਪਰਿਵਾਰੇਨ ਆਗਚ੍ਛਥਾ’ਤਿ ਭੇਰਿਂ ਚਰਾਪੇਸਿ. ਤਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤਾ ਮਹਾਜਨਾ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਤਪਟਿਯਤ੍ਤਾ ਅਗਮਿਂਸੁ. ਰਾਜਾ ਪਭਾਤਾਯ ਰਤ੍ਤਿਯਾ ਸਬ੍ਬੇ ਸੇਨਿਯੋ ਗਨ੍ਧਮਾਲਾਧੂਪਧਜਾਦਯੋ ਗਹੇਤ੍ਵਾ ਧਾਤੁਨਿਧਾਨਂ ਆਗਚ੍ਛਨ੍ਤੁਤਿ ਵਤ੍ਵਾ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਿਵੀਵਰਤ੍ਥਾਯ ਮਹਗ੍ਘਵਤ੍ਥਾਦੀਨਿ ਦਤ੍ਵਾ ਸਯਮ੍ਪਿ ਸਬ੍ਬਾਲਙ੍ਕਾਰਪਤਿਮਣ੍ਡਿਤੋ ਨਾਨਗ੍ਗਰਸਭੋਜਨਂ ਭੁਞ੍ਜਿਤ੍ਵਾ ਉਪੋਸਥਂ ਅਧਿਟ੍ਠਾਯ ਮਣਿਕੁਣ੍ਡਲਮੇਖਲਾਨੂਪੁਰ ਵਲਯਾਦਿਵਿਚਿਤ੍ਤਸਬ੍ਬਾਲਙ੍ਕਾਰਵਿਭੂਸਿਤਾਹਿ ਕੋਸੇਯ੍ਯਾਦਿਸੁਖੁਮਨਾਨਾਵਿਧਵਿਚਿਤ੍ਤਵਤ੍ਥਨਿਵਤ੍ਥਾਹਿ ਨਚ੍ਚਗੀਤਵਾਦਿਤਤੁਰਿਯਭਣ੍ਡਗਹਿਤ ਹਤ੍ਥਾਹਿ ਦੇਵਚ੍ਛਰਾਪਟਿਭਾਗਨਾਟਕਿਤ੍ਥੀਹਿ ਪਰਿਵਾਰਿਤੋ ਵੁਤ੍ਤਪ੍ਪਕਾਰੇਹਿ ਸਦ੍ਧਿਂ ਚੇਤਿਯਟ੍ਠਾਨਂ ਗਨ੍ਤ੍ਵਾ ਮਹਾਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਅਟ੍ਠਾਸਿ.

ਤਤੋ ਸੋਮਨਗਰੇ ਗਿਰਿਅਭਯਰਾਜਾ’ਪਿ ਸਬ੍ਬੇ ਨਾਗਰਾ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਧਾਤੁਨਿਧਾਨਟ੍ਠਾਨਂ ਆਗਚ੍ਛਨ੍ਤੁਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਸਯਂ ਸਬ੍ਬਾਲਙ੍ਕਾਰਪਤਿਮਣ੍ਡਿਤੋ ਸੁਸਜ੍ਜਿਤਅਮਚ੍ਚਗਣਪਰਿਵਾਰਿਤੋ ਨਿਕ੍ਖਮਿ. ਸੋਮ ਦੇਵੀਪਿ ਸੀਸਂ ਨਹਾਤ੍ਵਾ ਅਹਤਵਤ੍ਥਨਿਵਤ੍ਥਾ ਸਬ੍ਬਾਲਙ੍ਕਾਰਪਤਿਮਣ੍ਡਿਤਾ ਦੇਵਚ੍ਛਰਾ ਵਿਯ ਅਤ੍ਤਨੋ ਪਰਿਵਾਰਾ ਪਞ੍ਚਸਤਕੁਮਾਰਿਯੋ ਨੀਲਵਤ੍ਥੇਹਿ ਪਰਿਦਹਾਪੇਤ੍ਵਾ ਤਥੇਵ ਅਲਙ੍ਕਾਰੇਤ੍ਵਾ ਪੁਣ੍ਣਘਟੇ ਗਾਹਾਪੇਤ੍ਵਾ ਤਾਸਂ ਅਨਨ੍ਤਰਾ ਪਞ੍ਚਸਤਕੁਮਾਰਿਯੋ ਪੀਤਵਤ੍ਥੇਹਿ ਪਰਿਦਹਾਪੇਤ੍ਵਾ ਤਥੇਵ ਅਲਙ੍ਕਾਰੇਤ੍ਵਾ ਪੂਜਾਭਣ੍ਡਾਨਿ ਗਾਹਾਪੇਤ੍ਵਾ, ਤਾਸਂ ਅਨਨ੍ਤਰਾ ਪਞ੍ਚਸਤ ਕੁਮਾਰਿਯੋ ਰਤ੍ਤਵਤ੍ਥੇਹਿ ਪਰਿਦਹਾਪੇਤ੍ਵਾ ਤਥੇਵ. ਅਲਙ੍ਕਾਰੇਤ੍ਵਾ ਵਿਚਿਤ੍ਰਪੁਪ੍ਫਪੂਰਿਤਮਞ੍ਜੁਸਾਯੋ ਗਾਹਾਪੇਤ੍ਵਾ ਤਾਸਂ ਅਨਨ੍ਤਰਾ ਪਞ੍ਚਸਤਕੁਮਾਰਿਯੋ ਸੇਤਵਤ੍ਥੇਹਿ ਪਰਿਦਹਾਪੇਤ੍ਵਾ ਤਥੇਵ ਅਲਙ੍ਕਾਰੇਤ੍ਵਾ ਧੂਮ ਕਟਚ੍ਛੁਕੇ ਗਾਹਾਪੇਤ੍ਵਾ ਏਵਂ ਪੂਜਾਵਿਧਾਨਂ ਸਂਵਿਦਹਿਤ੍ਵਾ ਪਰਿਵਾਰੇਨ ¶ ਚੇਤਿਙ੍ਗਣਂ ਗਨ੍ਤ੍ਵਾ ਮਹਾਭਿਕ੍ਖੁਸਙ੍ਘਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਗਨ੍ਧਮਾਲਾਦੀਹਿ ਪੂਜਂ ਕਤ੍ਵਾ ਅਤ੍ਤਨੋ ਸਾਮਿਨਾ ਗਿਰਿਅਭਯਰਾਜੇਨ ਸਦ੍ਧਿਂ ਏਕਪਸ੍ਸੇ ਠੀਤਾ.

ਲੋਣਨਗਰੇ ਮਹਾਨਾਗਰਾਜਾ’ਪਿ ਸਬ੍ਬਾਲਙ੍ਕਾਰੇਹਿ ਪਤਿਮਣ੍ਡਿਤੋ ਸਬ੍ਬਾਭਰਣੇਹਿ ਸੁਸਜ੍ਜੀਤਅਮਚ੍ਚਮਣ੍ਡਲਪਰਿਵੁਤੋ ਨਚ੍ਚਗੀਤਤੁਰੀਯਾਨਿ ਪਗ੍ਗਣ੍ਹਾਪਯਮਾਨੋ ਗਨ੍ਧਮਾਲਾ ਧੂਮਕਟਚ੍ਛੁ ਗਾਹਾਪੇਤ੍ਵਾ ਚੇਤਿਯਟ੍ਠਾਨਂ ਆਗਨ੍ਤ੍ਵਾ ਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ.

ਸੇਰੁਨਗਰੇ ਸਿਵਰਾਜਾ’ਪਿ ਅਤ੍ਤਾਨਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਪੂਜਾਵਿਧਾਨਂ ਗਾਹਾਪੇਤ੍ਵਾ ਚੇਤਿਯਟ੍ਠਾਨਂ ਆਗਨ੍ਤ੍ਵਾ ਮਹਾਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਰਾਜਪਰਿਸਾ ਅਤ੍ਤਨੋ ਵਿਭਵਾਨੁਰੂਪੇਨ ਵਤ੍ਥਾਲਙ੍ਕਾਰੇਹਿ ਚਨ੍ਦਨ ਮਾਲਾਦੀਹਿ ਚ ਸੋਭਮਾਨਾ ਨਲਾਟੇ ਮੁਤ੍ਤਾਕਲਾਪਮੋਲਮ੍ਬਕ ਵਿਚਿਤ੍ਤਸੁਵਣ੍ਣਪਟ੍ਟਾਨਿ ਬਨ੍ਧਿਤ੍ਵਾ ਹਤ੍ਥਾਭਰਣਾਦਿ ਅਨੇਕਾਭਰਣੇਹਿ ਦਿਬ੍ਬਪਰਿਸਾ ਵਿਯ ਸੁਮਣ੍ਡਿਤਪਸਾਧਿਤਾ ਵੇਸਾਨੁਰੂਪਾਨਿ ਵਿਵਿਧਾਵੁਧਾਨਿ ਗਹੇਤ੍ਵਾ ਏਕਪਸ੍ਸੇ ਠੀਤਾ. ਸੀਹਵ੍ਯਗ੍ਘਦੀਪਿਚਮ੍ਮੇਹਿ ਪਸਾਧਿਤਸੁਵਣ੍ਣਾਲਙ੍ਕਾਰਸੁਵਣ੍ਣਧਜਹੇਮਜਾਲਸਞ੍ਛਨ੍ਨੇ ਰਥ ਵਰੇ ਚ ਸਬ੍ਬਾਲਙ੍ਕਾਰਵਿਭੁਸਿਤਾ ਰਥਿਕਾ ਆਰੁਯ੍ਹ ਏਕਪਸ੍ਸੇ ਠੀਤਾ. ਬ੍ਰਾਹ੍ਮਣਪੁਤ੍ਤਾਦਯੋ ਮਣ੍ਡਿਤਚਮ੍ਮੇ ਪਾਰੁਪਿਤ੍ਵਾ ਉਪਸੋਭਯਮਾਨਾ ਏਕਪਸ੍ਸੇ ਠੀਤਾ. ਬਹੁ ਅਮਚ੍ਚਾ ਅਤ੍ਤਨੋ ਅਤ੍ਤਨੋ ਵੇਸਾਨੁਰੂਪੇਨ ਮਹਗ੍ਘਵਤ੍ਥਾਭਰਣਵਿਭੂਸਿਤਾ ਸਪਰਿਵਾਰਾ ਏਕਪਸ੍ਸੇ ਠੀਤਾ. ਗਨ੍ਧੋਦਕ ਪੂਰਿਤ ਦਕ੍ਖਿਣਾਵਤ੍ਤ ਸਙ੍ਖਂ ਗਹੇਤ੍ਵਾ ਉਪਵੀਤਸੁਤ੍ਤਂ ਏਕਂਸਂ ਕਰਿਤ੍ਵਾ ਬ੍ਰਾਹ੍ਮਣਵੇਠਨਂ ਵੇਠੇਤ੍ਵਾ ਪੁਰੋਹਿਤਬ੍ਰਾਹ੍ਮਣਾ ਮਹਨ੍ਤੇਨ ਪਰਿਵਾਰੇਨ ਪੂਜਾਵਿਧਾਨਂ ਗਾਹਾਪੇਤ੍ਵਾ ਚੇਤਿਯਟ੍ਠਾਨਂ ਆਗਨ੍ਤ੍ਵਾ ਮਹਾਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਜਯਘੋਸਂ ਸਾਵੇਨ੍ਤਾ ਏਵਮਾਹਂਸੁ?

ਖੇਮਂ ਸੁਭਿਕ੍ਖਂ ਭਵਤੁ ਨਿਚ੍ਚਂ ਜਨਪਦਂ ਸਿਵਂ;

ਸਸ੍ਸਾਨਿ ਸਮੁਪ੍ਪਜ੍ਜਨ੍ਤੁ ਰਞ੍ਞੋ ਏਵਂ ਜਯਾ ਸਿਯੁਂ.

ਅਵਸੇਸਾ ਮਹਾਜਨਾ ਏਵਮਾਹਂਸੁ? ਸਮੁਦ੍ਦਪਰਿਯਨ੍ਤਂ ¶ ਹਿ ਮਹਿਂ ਸਾਗਰਕੁਣ੍ਡਲਂ ਵਸੁਨ੍ਧਰਂ ਆਵਸਤੁ ਅਮਚ੍ਚਪਰਿਵਾਰਿਤੋ. ਏਵਂ ਵਤ੍ਵਾ? ਅਮ੍ਹਾਕਂ ਅਯ੍ਯੋ ਕਾਕਵਣ੍ਣਤਿਸ੍ਸੋ ਮਹਾ ਰਾਜਾ ਸਦੇਵਕੇ ਲੋਕੇ ਏਕਪੁਗ੍ਗਲਸ੍ਸ ਲੋਕਨਾਥਸ੍ਸਨਲਾਟਧਾਤੁਂ ਪਤਿਟ੍ਠਾਪੇਤੀ’ਤਿ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਸੁਮਣ੍ਡਿਤਪਸਾਧਿਤਾ. ਖੁਜ੍ਜਵਾਮਨਕਾਦਯੋ’ਪਿ ਸਬ੍ਬੇ ਜਨਾ ਪੂਜਾਭਣ੍ਡਾਨਿ ਗਹੇਤ੍ਵਾ ਸਾਧੁਕਾਰਂ ਦਦਮਾਨਾ ਅਟ੍ਠਂਸੁ. ਇਮਸ੍ਮਿਂ ਚੇਤਿਯਟ੍ਠਾਨੇ ਰਾਸੀਭੂਤਾ ਪਰਿਸਾ ਏਵਂ ਵੇਦਿਤਬ੍ਬਾ? ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ ਨੇਗਮਾ ਚ ਸਮਾਗਤਾ ਪੁਪ੍ਫਾਦਿਗਹਿਤਾ ਸਬ੍ਬੇ ਅਲਙ੍ਕਾਰਵਿਭੂਸਿਤਾ.

ਗਣਨਾ ਵੀਤਿਵਤ੍ਤਾ ਤੇ ਅਨੇਕੇ ਚ ਮਹਾਜਨਾ;

ਸਮੁਦ੍ਦੋ ਪਤ੍ਥਰਨ੍ਤੋਵ ਖਤ੍ਤਿਯਾ ਸਮੁਪਾਗਤਾ.

ਅਲਙ੍ਕਤੋ ਮਹਾਰਾਜਾ ਸਰਾਜਪਰਿਵਾਰਿਤੋ;

ਦੇਵਰਾਜਾ ਯਥਾ ਸਕ੍ਕੋ ਅਟ੍ਠਾਸਿ ਚੇਤਿਯਙ੍ਗਣੇ.

ਸਾਧੁਵਾਦੇਨ ਸਤ੍ਤਾਨਂ ਪਞ੍ਚਙ੍ਗਤੁਰਿਯੇਹਿ ਚ;

ਹਤ੍ਥਸ੍ਸਰਥਸਦ੍ਦੇਨ ਸਮਾਕਿਣ੍ਣਂ ਮਹੀਤਲਂ.

ਤਤੋ ਚੂਲ਼ਪਿਣ੍ਡਪਾਤਿਯਤਿਸ੍ਸਤ੍ਥੇਰੋ ਅਤ੍ਤਨੋ ਸਦ੍ਧਿਵਿਹਾਰੀਕੇ ਪਞ੍ਚਸਤ ਖੀਣਾਸਵੇ ਪਰਿਵਾਰੇਤ੍ਵਾ ਚੇਤਿਯਟ੍ਠਾਨਮੇਵ ਆਗਤੋ. ਮਹਾਸਾਗਲਤ੍ਥੇਰੋ’ਪਿ ਪਞ੍ਚਸਤ ਖੀਣਾਸਵੇ ਪਰਿਵਾਰੇਤ੍ਵਾ ਚੇਤਿਯਟ੍ਠਾਨਮੇਵ ਆਗਤੋ. ਮਹਿਨ੍ਦਤ੍ਥੇਰੋ’ਪਿ ਅਤ੍ਤਨੋ ਸਾਵਕੇ ਸਟ੍ਠਿਮਤ੍ਤੇ ਖਿਣਾਸਵੇ ਗਹੇਤ੍ਵਾ ਚੇਤਿਯਟ੍ਠਾਨਮੇਵ ਆਗਤੋ. ਇਤਿ ਇਮਿਨਾ ਨਿਯਾਮੇਨੇਵ ਏਕੋ ਦ੍ਵੇ ਤਯੋ ਚਤ੍ਤਾਰੋ ਪਞ੍ਚ ਖੀਣਾਸਵਾ ਆਗਚ੍ਛਨ੍ਤਾ ਸਤ੍ਤ ਸਹਸ੍ਸਮਤ੍ਤਾ ਅਹੇਸੁਂ. ਤਤੋ ਚੂਲ਼ਪਿਣ੍ਡਪਾਤਿਯਤਿਸ੍ਸਤ੍ਥੇਰੋ ਏਤ੍ਤਕੇ ਭਿਕ੍ਖੂ ਪਰਿਵਾਰੇਤ੍ਵਾ ਚੇਤਿਯਙ੍ਗਣੇ ਨਿਸੀਦੀ. ਤਤੋ ਰਾਜਾ ਆਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਥੇਰੇਨ ਸਦ੍ਧਿਂ ਕਥੇਸਿ? ¶ ਕੇਸਧਾਤੁ ਕੁਤੋ ਲਭਿਸ੍ਸਾਮ ਅਯ੍ਯਾ’ਤਿ. ਤਸ੍ਮਿਂ ਖਣੇ ਤਿਸ੍ਸਤ੍ਥੇਰੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਸਿਵਤ੍ਥੇਰਂ ਓਲੋਕੇਸਿ. ਸੋ ਓਲੋਕਿਤਕ੍ਖਣੇਯੇਵ ਨਿਸਿਨ੍ਨਟ੍ਠਾਨਤੋ ਉਟ੍ਠਾਯ ਚੀਵਰਂ ਪਾਰੁਪਿਤ੍ਵਾ ਮਹਾਭਿਕ੍ਖੁਸਙ੍ਘਂ ਵਨ੍ਦਿਤ੍ਵਾ ਛਲ਼ਭਿਞ੍ਞੋ ਮਹਾਖੀਣਾਸਵੋ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਪਥਵਿਯਂ ਨਿਮੁਜ੍ਜਿਤ੍ਵਾ ਭੁਮਿਨ੍ਧਰਨਾਗਵਿਮਾਨੇ ਪਾਤੁਰਹੋਸਿ.

(ਸੁਤ੍ਵਾਸ੍ਸ ਸਿਵਥੇਰੋ ਚ ਵਸਿਪ੍ਪਤ੍ਤੋ ਵਿਸਾਰਦੋ;

ਪਾਕਟੋ ਅਭਵਿ ਨਾਗਨਗਰਂ ਪੁਰਤੋ ਖਣੇ.)

ਤਸ੍ਮਿਂ ਖੋ ਪਨ ਸਮਯੇ ਜਯਸੇਨੋ ਨਾਗਰਾਜਾ ਅਤ੍ਤਨੋ ਭਾਗਿਨੇਯ੍ਯਂ ਦ੍ਵਿਕੋਟਿਮਤ੍ਤੇ ਨਾਗੇ ਪਰਿਵਾਰੇਤ੍ਵਾ ਮਹਾ ਯਸਂ ਅਨੁਭਵਮਾਨਂ ਨਿਸਿਨ੍ਨਂ ਇਙ੍ਗਿਤਸਞ੍ਞਂ ਦਤ੍ਵਾ ਥੇਰਂ ਦੁਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਚਿਨ੍ਤੇਸਿ? ਇਮਸ੍ਮਿਂ ਨਾਗਭਵਨੇ ਸਮਣੇਹਿ ਕਤ੍ਤਬ੍ਬਕਿਚ੍ਚਂ ਨਤ੍ਥੀ. ਨਿਸ੍ਸਂਸਯਂ ਕੇਸਧਾਤੁਂ ਨਿਸ੍ਸਾਯ ਆਗਤੋ ਭਵਿਸ੍ਸਤੀਤਿ ਉਟ੍ਠਾਯ ਧਾਤੁਘਰਂ ਪਵਿਸਿਤ੍ਵਾ ਧਾਤੁਕਰਣ੍ਡਕਂ ਗਿਲਿਤ੍ਵਾ ਕਿਞ੍ਚਿ ਅਜਾਨਨ੍ਤੋ ਵਿਯ ਨਿਸੀਦਿ. ਤਸ੍ਮਿਂ ਕਾਲੇ ਥੇਰੋ ਤਸ੍ਸ ਸਨ੍ਤਿਕਂ ਅਗਮਾਸਿ. ਨਾਗਰਾਜਾ ਪਚ੍ਚੁਗ੍ਗਨ੍ਤ੍ਵਾ ਪਟਿਸਨ੍ਥਾਰਂ ਕਰੋਨ੍ਤੋ ਥੇਰੇਨ ਸਦ੍ਧਿਂ ਕਥੇਸਿ. ਕਸ੍ਮਾ ਅਯ੍ਯੋ ਆਗਤੋ’ਤਿ ਵੁਤ੍ਤੇ ਏਵਮਾਹ? ਤਿਲੋਕਨਾਥਸ੍ਸ ਅਮ੍ਹਾਕਂ ਸਮ੍ਬੁਦ੍ਧਸ੍ਸ ਕੇਸਧਾਤੂਨਂ ਅਤ੍ਥਾਯ ਆਗਤੋ, ਤੁਯ੍ਹਂ ਸਨ੍ਤਿਕੇ ਠਪਿਤਕੇਸਧਾਤੁਯੋ ਪਪਞ੍ਚਂ ਅਕਤ੍ਵਾ ਮਯ੍ਹਂ ਦੇਹਿ, ਤੇਯੇਵ ਸਨ੍ਧਾਯ ਉਪਜ੍ਝਾਯੇਨ ਪੇਸਿਤੋਮ੍ਹੀ’ਤਿ ਵੁਤ੍ਤੇ ਅਮ੍ਹਾਕਂ ਸਮ੍ਮਾ ਸਮ੍ਬੁਦ੍ਧਸ੍ਸ ਕੇਸਧਾਤੁਯੋ ਮਮ ਸਨ੍ਤਿਕੇ ਨਤ੍ਥੀ’ਤਿ ਆਹ. ਥੇਰੋ ਧਾਤੁਕਰਣ੍ਡਕਂ ਗਿਲਿਤਭਾਵਂ ਞਤ੍ਵਾ ਗਣ੍ਹਾਮਿ ਮਹਾਰਾਜਾ ਕੇਸਧਾਤੁਯੋ’ਤਿ ਵੁਤ੍ਤੇ ਆਮ ਪਸ੍ਸਨ੍ਤੋ ਗਹੇਤ੍ਵਾ ਗਚ੍ਛਾਹੀਤਿ ਆਹ. ਏਵਂ ਤਯੋ ਵਾਰੇ ਪਟਿਞ੍ਞਂ ਗਹੇਤ੍ਵਾ ਤਥੇਵ ਠੀਤੋ?

ਇਦ੍ਧਿਯਾ ਮਾਪਯਿਤ੍ਵਾਨ ਤਤੋ ਸੋ ਸੁਖੁਮਂ ਕਰਂ,

ਪਵੇਸੇਤ੍ਵਾ ਮੁਖੇ ਤਸ੍ਸ ਗਣ੍ਹੀ ਧਾਤੁਕਰਣ੍ਡਕਂ;

ਨਾਗਾਲਯਾਭਿਨਿਕ੍ਖਮਿ ਤਿਟ੍ਠ ਨਾਗਾ’ਤਿ ਭਾਸਿਯ.

ਤਸ੍ਮਿਂ ¶ ਖਣੇ ਜਯਸੇਨੋ ਨਾਗਰਾਜਾ ਸਮਣਂ ਵਞ੍ਚੇਤ੍ਵਾ ਪੇਸਿਤੋਮ੍ਹੀ’ਤਿ ਵਤ੍ਵਾ ਤਸ੍ਸ ਗਤਕਾਲੇ ਧਾਤੁਕਰਣ੍ਡਕਂ ਓਲੋਕੇਤ੍ਵਾ ਧਾਤੁ ਅਪਸ੍ਸਿਤ੍ਵਾ ਸਮਣੇਨ ਨਾਸਿਤੋਮ੍ਹੀ’ਤਿ ਦ੍ਵੇ ਹਤ੍ਥੇ ਉਕ੍ਖਿਪਿਤ੍ਵਾ ਠਪੇਤ੍ਵਾ ਅਤ੍ਤਨੋ ਸਕਲਨਾਗਭਵਨਂ ਏਕ ਕੋਲਾਹਲਂ ਕਤ੍ਵਾ ਮਹਨ੍ਤੇਨ ਸਦ੍ਦੇਨ ਪਰਿਦੇਵਨ੍ਤੋ? ਅਮ੍ਹਾਕਂ ਚਕ੍ਖੁਨਿ ਉਪ੍ਪਾਟੇਤ੍ਵਾ ਗਤੋ ਵਿਯ ਸਦੇਵਕਸ੍ਸ ਲੋਕਸ੍ਸ ਪਤਿਟ੍ਠਾਨਭੂਤਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਕੇਸਧਾਤੁਯੋ ਅਪਾਯਦੁਕ੍ਖਤੋ ਅਮੁਞ੍ਚਨ੍ਤਾਨਂ ਅਮ੍ਹਾਕਂ ਅਭਿਭਵਿਤ੍ਵਾ ਧਾਤੁਯੋ ਗਹੇਤ੍ਵਾ ਗਤਸਮਣਂ ਅਨੁਬਨ੍ਧਿਤ੍ਵਾ ਗਣ੍ਹਿਸ੍ਸਾਮਾ’ਤਿ ਦ੍ਵੇਕੋਟਿਮਤ੍ਤੇ ਨਾਗੇ ਗਹੇਤ੍ਵਾ ਅਤ੍ਤਨੋ ਭਾਗਿਨੇਯ੍ਯੇਨ ਸਦ੍ਧਿਂ ਤਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿਤ੍ਵਾ ਆਕਾਸਂ ਉਗ੍ਗਚ੍ਛਿਂ (ਸੁ). ਤਸ੍ਮਿਂ ਖਣੇ ਪਨ ਸਿਵਤ੍ਥੇਰੋ ਅਕਾਸਤੋ ਓਤਰਿਤ੍ਵਾ ਪਥਵਿਯਂ ਪਾਵਿਸਿ. ਪੁਨ ਤੇਪਿ ਪਥਵਿਯਂ ਪਵਿਸਿਂਸੁ. ਏਵਂ ਥੇਰੋ ਤੇਹਿ ਸਦ੍ਧਿਂ ਉਮ੍ਮੁਜ੍ਜ ਨਿਮੁਜ੍ਜਂ ਕਰੋਨ੍ਤੋ ਪਾਟਿਹਾਰਿਯਂ ਦਸ੍ਸੇਤ੍ਵਾ ਸੇਰੁਨਗਰਸ੍ਸ ਨਾਤਿਦੂਰੇ ਪਿਟ੍ਠਿਪਾਸਾਣੇ ਉਗ੍ਗਞ੍ਜਿ. ਤਤ੍ਥੇਵ ਤੇ ਸਂਵੇਜੇਤ੍ਵਾ ਚੇਤਿਯਙ੍ਗਣੇ ਮਹਾਭਿਕ੍ਖੁਸਙ੍ਘਸ੍ਸ ਪੁਰਤੋ ਪਾਕਟੋ ਅਹੋਸਿ. ਨਾਗਾ ਤਂ ਗਹੇਤੁਂ ਅਸਕ੍ਕੋਨ੍ਤਾ ਮਹਨ੍ਤੇਨ ਸਦ੍ਦੇਨ ਰਵਂ ਪਤਿਰਵਂ ਦਤ੍ਵਾ. ਇਤੋ ਪਟ੍ਠਾਯ ਨਟ੍ਠਮ੍ਹਾ’ਤਿ ਤਸ੍ਮਿਂ ਪਿਟ੍ਠਿ ਪਾਸਾਣੇ ਸਬ੍ਬੇ ਸਮਾਗਮਂ ਕਤ੍ਵਾ ਮਹਾਸਦ੍ਦੇਨ ਪਰਿਦੇਵਿਂਸੁ? ਨਟ੍ਠਮ੍ਭਾ ਵਤ ਭੋ’ਤਿ. ਤਤੋ ਪਟ੍ਠਾਯ ਸੋ ਪਿਟ੍ਠਿਪਾਸਾਣੋ ਨਾਗਾਨਂ ਰਵਂ ਪਤਿਰਵਂ ਦਤ੍ਵਾ ਪਰਿਦੇਵਿਤਹਾਵੇਨ ਨਾਗਗਲ੍ਲਂ ਨਾਮ ਅਹੋਸਿ.

ਨਾਗੋ ਥੇਰਸ੍ਸ ਪਿਟ੍ਠਿਤੋਯੇਵ ਅਨੁਬਨ੍ਧਿਤ੍ਵਾ ਚੇਤਿਯਙ੍ਗਣਂ ਗਨ੍ਤ੍ਵਾ ਰਾਜਾਨਂ ਏਵਮਾਹ? ਦੇਵ, ਏਸੋ ਭਿਕ੍ਖੁ ਮਯਾ ਅਦਿਨ੍ਨਧਾਤੁ ਗਹੇਤ੍ਵਾ ਆਗਤੋ’ਤਿ. ਤਂ ਸੁਤ੍ਵਾ ਰਾਜਾ? ਸਚ੍ਚਂ ਕਿਰ ਅਯ੍ਯ ਨਾਗਸ੍ਸ ਵਚਨਨ੍ਤਿ ਵੁਤ੍ਤੇ ਨਹੇਵ ਮਹਾਰਾਜ, ਇਮਿਨਾ ਦਿਨ੍ਨਂ ਏਵ ਧਾਤੁਂ ਅਗ੍ਗਹੇਸਿਨ੍ਤਿ ਵੁਤ੍ਤੇ? ਨਾਗੋ ਤਵ ਸਕ੍ਖਿਂ ਦੇਹੀਤਿ ਆਹ. ਥੇਰੋ ਤਸ੍ਸ ਭਾਗਿਨ੍ਯੇਂ ਸਮਣੁਪ੍ਪਲ ਨਾਗਰਾਜਾਨਂ ਸਕ੍ਖਿਂ ਅਕਾਸਿ. ਰਾਜਾ ਤਸ੍ਸ ਭਾਗਿਨੇਯ੍ਯਸ੍ਸ ਸਬ੍ਬਵਚਨਂ ਸੁਤ੍ਵਾ ਸਦ੍ਦਹਿ. ਤਸ੍ਮਿਂ ਕਾਲੇ ਦੁਕ੍ਖਾਭਿਭੂਤੋ ਨਾਗਰਾਜਾ ਗਨ੍ਤ੍ਵਾ ਬਹਿ ਠੀਤੋ. ਤਤੋ ਪਟ੍ਠਾਯ ਸੋ ਨਾਗਰਾਜਾ ¶ ਬਹਿ ਹੁਤ੍ਵਾ ਨਿਸਿਨ੍ਨਤ੍ਤਾ ਬਹਿਨਾਗਰਾਜਾ ਨਾਮ ਅਹੋਸਿ. ਤਸ੍ਸ ਪਨ ਭਾਗਿਨੇਯ੍ਯਂ ਅਨ੍ਤੋ ਚੇਤਿਯਙ੍ਗਣੇ ਨਿਸੀਦਾਪੇਸਿ. ਇਮਸ੍ਸ ਪਨ ਚੇਤਿਯਸ੍ਸ ਆਰਕ੍ਖਂ ਗਹਿਤਨਾਗਾ ਕਥੇਤਬ੍ਬਾ. ਸੁਮਨਨਾਗਰਞ੍ਞੋ ਪਰਿਵਾਰਾ ਛਕੋਟਿਮਤ੍ਤਾ ਨਾਗਾ, ਜਯਸੇਨਸ੍ਸ ਪਰਿਵਾਰਾ ਕੋਟਿਸਤਮਤ੍ਤਾ ਨਾਗਾ, ਸਮਣੁਪ੍ਪਲਨਾਗਰਞ੍ਞੋ ਪਰਿਵਾਰਾ ਦ੍ਵਿਕੋਟਿਮਤ੍ਤਾ ਨਾਗਾ ਅਹੇਸੁਂ. ਸਬ੍ਬੇ ਧਾਤੁਯਾ ਆਰਕ੍ਖਂ ਗਣ੍ਹਿਂਸੁ. ਰਾਜਾ ਥੇਰਸ੍ਸ ਹਤ੍ਥਤੋ ਕੇਸਧਾਤੁਂ ਗਹੇਤ੍ਵਾ ਰਤਨਚਙੇਗਾਟਕੇ ਠਪੇਤ੍ਵਾ ਮਹਿਨ੍ਦਸ੍ਸ ਨਾਮ ਅਮਚ੍ਚਸ੍ਸ ਅਦਾਸਿ. ਤਸ੍ਮਿਂ ਸਮਾਗਮੇ ਤਿਪਿਟਕਮਹਾਫੁਸ੍ਸਦੇਵਤ੍ਥੇਰਸ੍ਸ ਸਦ੍ਧਿਵਿਹਾਰਿਕਾ ਪਟਿਸਮ੍ਭਿਦਪ੍ਪਤ੍ਤਾ ਚਤ੍ਤਾਰੋ ਸਾਮਣੇਰਾ ਅਹੇਸੁਂ. ਤੇਸੁ ਏਕੋ ਮਲਯ ਰਾਜਪੁਤ੍ਤੋ ਸੁਮਨਸਾਮਣੇਰੋ ਨਾਮ, ਏਕੋ ਸੇਰੁਨਗਰੇ ਸਿਵਰਾਜਭਾਗਿਨੇਯ੍ਯਸ੍ਸ ਪੁਤ੍ਤੋ ਉਤ੍ਤਰ ਸਾਮਣੇਰੋ ਨਾਮ. ਏਕੋ ਮਹਾਗਾਮੇ ਮਾਲਾਕਾਰਪੁਤ੍ਤੋ ਚੁਨ੍ਦ ਸਾਮਣੇਰੋ ਨਾਮ ਏਕੋ ਮਹਾਗਾਮੇ ਏਕਸ੍ਸ ਕੁਟੁਮ੍ਬਿਕਸ੍ਸ ਪੁਤ੍ਤੋ ਮਹਾਕਸ੍ਸਪਸਾਮਣੇਰੋ ਨਾਮ, ਇਮੇ ਚਤ੍ਤਾਰੋ ਸਾਮਣੇਰਾ ਅਜ੍ਜ ਕਾਕਵਣ੍ਣਤਿਸ੍ਸਮਹਾਰਾਜਾ ਮਹਾਚੇਤਿਯੇ ਧਾਤੁ ਨਿਧਾਨਂ ਕਰਿਸ੍ਸਤਿ, ਮਯਂ ਹਿਮਵਨ੍ਤਂ ਗਨ੍ਤ੍ਵਾ ਸੁਕੁਸੁਮਾਨਿ ਆਹਰਿਸ੍ਸਾਮਾਤਿ ਥੇਰਂ ਵਨ੍ਦਿਤ੍ਵਾ ਆਕਾਸਤੋ ਹਿਮਵਨ੍ਤਂ ਗਨ੍ਤ੍ਵਾ ਚਮ੍ਪਕਨਾਗਸਲਲਾਦਯੋ ਪੂਜਨੀਯਮਾਲਂ ਗਹੇਤ੍ਵਾ ਤਾਵਤਿਂਸਦੇਵ ਲੋਕਂ ਗਤਾ.

ਤਸ੍ਮਿਂ ਕਾਲੇ ਸਕ੍ਕੋ ਦੇਵਰਾਜਾ ਸਬ੍ਬਾਭਰਣਪਤਿਮਣ੍ਡਿਤੋ ਦ੍ਵਿਸੁ ਦੇਵਲੋਕੇਸੁ ਦੇਵਤਾਯੋ ਗਹੇਤ੍ਵਾ ਏਰਾਵਣਹਤ੍ਥੀਕ੍ਖਨ੍ਧਮਾਰੁਯ੍ਹ ਅਡ੍ਢਤੇਯ੍ਯਕੋਟਿਦੇਵਚ੍ਛਰਾਪਰਿਵਾਰਿਤੋ ਸੁਦਸ੍ਸਨਮਹਾ ਵੀਥਿਯਂ ਵਿਚਰਨ੍ਤੋ ਸਵਙ੍ਗੋਟਕੇ ਤੇ ਚਤ੍ਤਾਰੋ ਸਾਮਣੇਰੇ ਦੁਰਤੋਵ ਆਗਚ੍ਛਨ੍ਤੇ ਦਿਸ੍ਵਾ ਹਤ੍ਥੀਕ੍ਖਨ੍ਧਤੋ ਓਰੁਯ੍ਹ ਪਞ੍ਚ ਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤੇਸਂ ਹਤ੍ਥੇ ਮਾਲਾਚਙ੍ਗੋਟਕੇ ਦਿਸ੍ਵਾ? ਕਿਂ ਅਯ੍ਯਾ ਤੁਮ੍ਹਾਕਂ ਹਤ੍ਥੇ’ਤਿ ਪੁਚ੍ਛਿ. ਤਂ ਸੁਤ੍ਵਾ ਸਾਮਣੇਰਾ ਮਹਾਰਾਜ, ਕਿਂ ਤ੍ਵਂ ਨ ਜਾਨਾਸਿ. ਲਙ੍ਕਾਯਂ ਕਾਕਵਣ੍ਣਤਿਸ੍ਸ ਮਹਾਰਾਜਾ ਦਸਬਲਸ੍ਸ ਨਲਾਟਧਾਤੁਂ ਗਹੇਤ੍ਵਾ ਮਹਾਵਾਲੁਕਗਙਗਾਯ ਦਕ੍ਖਿਣਪਸ੍ਸੇ ਸੇਰੁ ਨਾਮ ਦਹਸ੍ਸ ਅਨ੍ਤੇ ਵਰਾਹ ਨਾਮ ਸੋਣ੍ਡਿਮਤ੍ਥਕੇ ਚੇਤਿਯਂ ਕਾਰਾਪੇਤੁਂ ਤੁਮ੍ਹਾਕਂ ਨਿਯੋਗੇਨ ਵਿਸ੍ਸਕਮ੍ਮਦੇਵਪੁਤ੍ਤੇਨ ਨਿਮ੍ਮਿਤ੍ैਟ੍ਠਕਾਨਿ ਗਹੇਤ੍ਵਾ ਚੇਤਿਯਂ ਕਾਰਾਪੇਤ੍ਵਾ ਅਜ੍ਜ ਧਾਤੁਨਿਧਾਨਂ ਕਰੋਤਿ. ਤਤ੍ਥ ਪੂਜਨਤ੍ਥਾਯ ਹਿਮਵਨ੍ਤਤੋ ਆਨੀਤਪੁਪ੍ਫਮਿਦਨ੍ਤਿ ਵਤ੍ਵਾ ਇਤੋਪਿ ਕੁਸੁਮਂ ਗਹੇਤੁਂ ਆਗਤਮ੍ਹਾ’ਤਿ ਵਦਿਂਸੁ. ਸਕ੍ਕੋ ਤੇਸਂ ਵਚਨਂ ਸੁਤ੍ਵਾ?

ਅਯ੍ਯ ¶ ਤੁਮ੍ਹਾਕਂ ਹਤ੍ਥੇ ਪੁਪ੍ਫਾਨਿ ਚੂਲ਼ਾਮਣਿਚੇਤਿਯੇ ਪੁਜੇਤ੍ਵਾ ਅਮ੍ਹਾਕਂ ਉਯ੍ਯਾਨਤੋ ਪੁਪ੍ਫਾਨਿ ਗਹੇਤ੍ਵਾ ਗਚ੍ਛਥਾਤਿ ਵਤ੍ਵਾ ਤੇਹਿ ਸਦ੍ਧਿਂ ਗਨ੍ਤ੍ਵਾ ਤੇਸਂ ਪੁਪ੍ਫੇਹਿ ਚੂਲ਼ਾਮਣਿਚੇਤਿਯਂ ਪੂਜੇਸਿ. ਤਤੋ ਪਪਞ੍ਚਂ ਨ ਭਵਿਤਬ੍ਬਨ੍ਤਿ ਸਕ੍ਕਸ੍ਸ ਨਿਵੇਦੇਸੁਂ. ਤਂ ਸੁਤ੍ਵਾ ਸਕ੍ਕੋ ਸਾਮਣੇਰਾਨਂ ਪਞ੍ਚਮਹਾਉਯ੍ਯਾਨਤੋ ਪਾਰਿਚ੍ਛਤ੍ਤ-ਕੋਵਿਲ਼ਾਰਾਦੀਨਿ ਪੁਪ੍ਫਾਨਿ ਚ ਚਨ੍ਦਨਚੁਣ੍ਣਞ੍ਚ ਗਹੇਤ੍ਵਾ ਦਾਪੇਸਿ. ਸਾਮਣੇਰਾ ਪੁਪ੍ਫਾਨਿ ਗਹੇਤ੍ਵਾ ਦੇਵਲੋਕਤੋ ਓਤਰਿਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਸੁਵਣ੍ਣਮਣਿਪਬ੍ਬਤੇ ਸਨ੍ਤਚ੍ਛਾਯਾਯ ਨਸੀਦਿਤ੍ਵਾ ਦਿਵਾਵਿਹਾਰਂ ਕਤ੍ਵਾ ਨਕ੍ਖਤ੍ਤਵੇਲਾਯ ਸਮ੍ਪਤ੍ਤਾਯ ਮਣੀ ਗਵੇਸਮਾਨਾ ਚਤ੍ਤਾਰੋ ਮਣਯੋ ਅਦ੍ਦਸਂਸੁ. ਤੇਸਂ ਏਕੋ ਇਨ੍ਦਨੀਲਮਣੀ, ਏਕੋ ਪਹਸ੍ਸਰਜੋਤਿਰਙ੍ਗ ਮਣੀ, ਏਕੋ ਵੇਲੁਰਿਯਮਣਿ, ਏਕੋ ਮਸਾਰਗਲ੍ਲਮਣਿ, ਚਤ੍ਤਾਰੋ ਮਣਯੋ ਚ ਦਿਬ੍ਬਪੁਪ੍ਫਾਨਿ ਚ ਗਹੇਤ੍ਵਾ ਥੇਰਾਨਂ ਦਸ੍ਸੇਸੁਂ. ਥੇਰੋ? ਮਹਾਰਾਜ, ਇਮੇ ਸਾਮਣੇਰਾ ਪਾਰਿਚ੍ਛਤ੍ਤਕਕੋਵਿਲ਼ਾਰਾਦੀਨਿ ਪੁਪ੍ਫਾਨਿ ਚ ਚਨ੍ਦਨਚੁਣ੍ਣਞ੍ਚ ਚਤ੍ਤਾਰੋ ਮਣਯੋ ਚ ਗਹੇਤ੍ਵਾ ਆਗਤਾ’ਤਿ ਰਞ੍ਞੋ ਆਰੋਚੇਸੁਂ.

ਰਾਜਾ ਤਂ ਸੁਤ੍ਵਾ ਸੋਮਨਸ੍ਸਜਾਤੋ ਸਾਮਣੇਰੇ ਪਞ੍ਚ ਪਤਿਟ੍ਠੀਤੇਨ ਵਨ੍ਦਿਤ੍ਵਾ ਤੇਸਮਾਹਤਮਣਯੋ ਗਹੇਤ੍ਵਾ ਮਹਾਨਨ੍ਦ ਨਾਮ ਅਮਚ੍ਚਸ੍ਸ ਦਤ੍ਵਾ ਥੇਰੇਹੀ ਸਦ੍ਧਿਂ ਮਹਨ੍ਤੇਨ ਪਰਿਵਾਰੇਨ ਚੇਤਿਯਙ੍ਗਣਂ ਗਨ੍ਤ੍ਵਾ ਮਣਿਕਰਣ੍ਡਕੇਨ ਧਾਤੁਂ ਗਹੇਤ੍ਵਾ ਅਤ੍ਤਨੋ ਸੀਸੇ ਧਾਤੁਂ ਠਪੇਤ੍ਵਾ ਉਪਰਿ ਸੇਤਚ੍ਛਤ੍ਤਂ ਕਾਰਾਪੇਤ੍ਵਾ ਚੇਤਿਯਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਪਾਚੀਨਦ੍ਵਾਰੇ ਠੀਤੋ? ਅਯਂ ਦਸਬਲਸ੍ਸ ਨਲਾਟਧਾਤੁ ਅਮ੍ਹੇਹਿ ਕਾਰਾਪਿਤਾਯ ਬੁਦ੍ਧਪਟਿਮਾਯ ਨਲਾਟੇ ਉਣ੍ਣਲੋਮਾਕਾਰਂ ਹੁਤ੍ਵਾ ਪਤਿਟ੍ਠਹਤੂਤਿ ਅਧਿਟ੍ਠਾਸਿ. ਤਸ੍ਸ ਚਿਨ੍ਤਿਤਕ੍ਖਣੇਯੇਵ ਧਾਤੁ ਕਰਣ੍ਡਤੋ ਨਭਮੁਗ੍ਗਨ੍ਤ੍ਵਾ ਆਕਾਸੇ ਸਤ੍ਤਤਾਲਪ੍ਪਮਾਣੇ ਠਤ੍ਵਾ ਛਬ੍ਬਣ੍ਣ ਰਂਸਿਯੋ ਵਿਸ੍ਸਜ੍ਜੇਸਿ. ਤਾ ਰਂਸਿਯੋ ਕੁਟੇਨ ਆਸਿਞ੍ਚਮਾਨਵਿਲੀਨ ਸੁਵਣ੍ਣਂ ਵਿਯ ਅਨ੍ਤਲਿਕ੍ਖਤੋ ਨਿਕ੍ਖਨ੍ਤਸੁਵਣ੍ਣਰਸਧਾਰਾ ਵਿਯ ਸਕਲਲਙ੍ਕਾਦੀਪਂ ¶ ਰਂਸਿਜਾਲੇਹਿ ਏਕੋਭਾਸਂ ਕਤ੍ਵਾ ਗਣ੍ਹਿਂਸੁ. ਤਸ੍ਮਿਂ ਕਾਲੇ ਯਮਕਪਾਟਿਹਾਰਿਯਸਦਿਸਂ ਪਾਟਿਹਾਰਿਯਂ ਅਹੋਸਿ. ਮਹਾਕਾਰੁਣਿਕਸ੍ਸ ਭਗਵਤੋ ਅਦਿਟ੍ਠਪੁਬ੍ਬਂ ਪਾਟਿਹਾਰਿਯਂ ਦਿਸ੍ਵਾ ਮਹਾਜਨਾ ਤਥਾਗਤਸ੍ਸ ਰੂਪਕਾਯਂ ਪਚ੍ਚਕ੍ਖਭੁਤਾ ਵਿਯ ਅਹੇਸੁਂ.

ਅਦਿਟ੍ਠਪੁਬ੍ਬਂ ਸਤ੍ਥੁਸ੍ਸ ਪਾਟਿਹੀਰਂ ਮਹਾਜਨਾ;

ਦਿਸ੍ਵਾ ਪੀਤਿਪਰਾ ਜਾਤਾ ਪਸਾਦਮਜ੍ਝਗੁਂ ਜਿਨੇ.

ਪੂਜੇਸੁਂ ਗਨ੍ਧਮਾਲਞ੍ਚ ਅਲਙ੍ਕਾਰਂ ਸਕਂ ਸਕਂ;

ਸਬ੍ਬੇ ਵਨ੍ਦਿਂਸੁ ਸਿਰਸਾ-ਚੇਤਿਯਂ ਈਦਿਸਂ ਵਰਂ.

ਤਸ੍ਮਿਂ ਸਮਾਗਮੇ ਏਕੋ ਪਣ੍ਡਿਤਪੁਰਿਸੋ ਜਿਨਂ ਥੋਮੇਨ੍ਤੋ ਏਵਮਾਹ?

ਨਿਬ੍ਬੁਤਸ੍ਸਾਪਿ ਬੁਦ੍ਧਸ੍ਸ ਯਸੋ ਭਵਤਿ ਈਦਿਸੋ;

ਠੀਤਸ੍ਸ ਲੋਕਨਾਥਸ੍ਸ ਕੀਦਿਸਾ ਆਸਿ ਸਮ੍ਪਦਾ.

ਅਨੁਭਾਵਮਿਦਂ ਸਬ੍ਬਂ ਪੁਞ੍ਞੇਨੇਵ ਮਹੇਸਿਨੋ;

ਕਰੇਯ੍ਯ ਞਤ੍ਵਾ ਪੁਞ੍ਞਂ ਤਂ ਪਤ੍ਥੇਨ੍ਤੋ ਬੋਧਿਮੁਤ੍ਤਮਂ.

ਤਸ੍ਮਿਂ ਕਾਲੇ ਨਾਨਾਰਤਨਵਿਚਿਤ੍ਤਂ ਅਨੇਕਾਲਙ੍ਕਾਰਪਤਿਮਣ੍ਡਿਤਂ ਮਹਾਰਹਂ ਸਮੁਸ੍ਸਿਤਧਜਪਤਾਕਂ ਨਾਨਾਵਿਧਕੁਸੁਮਸਮਾਕਿਣ੍ਣਂ ਅਨੇਕਪੂਜਾਵਿਧਾਨਂ ਗਹੇਤ੍ਵਾ ਮਨੁਸ੍ਸਾ ਛਣਵੇਸਂ ਗਣ੍ਹਿਂਸੁ. ਅਨੇਕਵਿਧਤੁਰਿਯਸਙ੍ਘੁਟ੍ਟਂ ਅਹੋਸਿ. ਤਸ੍ਮਿਂ ਖਣੇ ਦੇਵਤਾਯੋ ਪੁਪ੍ਫਵਸ੍ਸਂ ਵਸ੍ਸਾਪੇਨ੍ਤਿ. ਮਹਾਨੁਭਾਵਸਮ੍ਪਨ੍ਨਾ ਨਾਗਾ ਪੂਜਂ ਕਰੋਨ੍ਤਿ. ਏਵਂ ਸਬ੍ਬੇ ਦੇਵਾ ਨਾਗਾ ਮਨੁਸ੍ਸਾ ਸਾਧੁਕਾਰਂ ਦੇਨ੍ਤਿ, ਅਪ੍ਫੋਟੇਨ੍ਤਿ, ਵੇਲੁਕ੍ਖੇਪਂ ਕਰੋਨ੍ਤਿ, ਹਤ੍ਥੀਨੋ ਕੁਞ੍ਚਨਾਦਂ ਨਦਨ੍ਤਿ. ਅਸ੍ਸਾ ਤੁਟ੍ਠਿਰਵਂ ਰਵਨ੍ਤਿ, ਬਹਲਘਨ ਮਹਾਪਥਵੀ ਯਾਵ ਉਦਕਪਰਿਯਨ੍ਤਂ ਕਮ੍ਪਿ. ਦਿਸਾਸੁ ਵਿਜ੍ਜੁਲ੍ਲਤਾ ਨਿਚ੍ਛਰਿਂਸੁ. ਸਕਲਲਙ੍ਕਾਦੀਪੇ ਸੁਮਨਕੂਟਾਦਯੋ ਮਹਾਨਗਾ ਕੁਸੁਮਗਣਸਮਾਕਿਣ੍ਣਾ ਅਹੇਸੁਂ. ਸਬ੍ਬੇ ਜਲਾਸਯਾ ਪਞ੍ਚਵਿਧ ਪਦੁਮਸਞ੍ਛਨ੍ਤਾ, ਦੇਵਤਾਨਮਨ੍ਤਰੇ ਮਨੁਸ੍ਸਾ, ਮਨੁਸ੍ਸਾਨਂ ਅਨ੍ਤਰੇ ਯਕ੍ਖਨਾਗਸੁਪਣ੍ਣਾਦਯੋ ਚ ਅਹੇਸੁਂ. ਭਿਕ੍ਖੁਭਿਕ੍ਖੁਨੀਉਪਾਸਕ ਉਪਾਸਿਕਾ ਅਪਰਿਮਾਣਾ ਅਹੇਸੁਂ. ਮਹਨ੍ਤੇਨ ਸਾਧੁਕਾਰੇਨ ਮਹਾ ਨਿਗ੍ਘੋਸੇਨ ਸਕਲਲਙ੍ਕਾਦੀਪੇ ਤਿਬ੍ਬਵਾਤਾਭਿਹਤਸਮੁਦ੍ਦੋ ਵਿਯ ਏਕਨਿਨ੍ਨਾਦਂ ¶ ਏਕਨਿਗ੍ਘੋਸਂ ਅਹੋਸਿ. ਇਮਿਨਾ ਪੂਜਾਵਿਧਾਨੇਨ ਪਸਾਦਕਭੂਤਮਹਾਜਨਕਾਯਮਜ੍ਝੇ ਧਾਤੁ ਪਾਟਿਹਾਰਿਯਂ ਦਸ੍ਸੇਤ੍ਵਾ ਆਕਾਸਤੋ ਓਤਰਿਤ੍ਵਾ ਬੁਦ੍ਧਪਟਿਮਾਯ ਨਲਾਟੇ ਪੁਣ੍ਣਚਨ੍ਦਸਸ੍ਸਿਰੀਕਂ ਅਭਿਭਵਨ੍ਤਮਿਵ ਵਿਰੋਚਮਾਨਾ ਪਤਿਟ੍ਠਾਸਿ.

ਰਾਜਾ ਮਹਾਨਨ੍ਦਨਾਮਕਸ੍ਸ ਅਮਚ੍ਚਸ੍ਸ ਹਤ੍ਥਤੋ ਕੇਸਧਾਤੁਂ ਗਹੇਤ੍ਵਾ ਵਿਹਾਰਦੇਵਿਯਾ ਦਤ੍ਵਾ ਤ੍ਵਂ ਇਮਾ ਕੇਸਧਾਤੁਯੋ ਦਸਬਲਸ੍ਸ ਅਨਵਲੋਕਿਤ ਮਤ੍ਥਕੇ ਪਤਿਟ੍ਠਾਪੇਹੀ’ਤਿ ਆਹ. ਸਾ ਕੇਸਧਾਤੁਯੋ ਗਹੇਤ੍ਵਾ ਤਤ੍ਥੇਵ ਪਤਿਟ੍ਠਹਨ੍ਤੁ’ਤਿ ਅਧਿਟ੍ਠਾਨਂ ਅਕਾਸਿ. ਤਸ੍ਮਿਂ ਖਣੇ ਕੇਸਧਾਤੁਯੋ ਕਰਣ੍ਡਤੋ ਨਭਂ ਉਗ੍ਗਨ੍ਤ੍ਵਾ ਮਯੂਰਗੀਵਸਂਕਾਸਨੀਲਰਂਸਿਯੋ ਵਿਸ੍ਸਜ੍ਜੇਨ੍ਤੀ ਆਕਾਸਤੋ ਓਤਰਿਤ੍ਵਾ ਬੁਦ੍ਧਪਟਿਮਾਯ ਉਤ੍ਤਮਙ੍ਗੇ ਸਿਰਸ੍ਮਿਂ ਪਤਿਟ੍ਠਹਿਂਸੁ.

ਤਤੋ ਰਾਜਾ ਥੇਰੇਨ ਸਦ੍ਧਿਂ ਧਾਤੁਗਬ੍ਭਂ ਪਵਿਸਿਤ੍ਵਾ ਦਿਬ੍ਬਚਨ੍ਦਨਚੁਣ੍ਣਸਮਾਕਿਣ੍ਣਂ ਪਾਰਿਚ੍ਛਤ੍ਤਕਕੋਵਿਲ਼ਾਰਾਦਿ ਸੁਗਨ੍ਧਪੁਪ੍ਫਸਨ੍ਥਰਂ ਵਿਯੂਹਿਤ੍ਵਾ ਪਭਾਸਮੁਦਯਸਮਾਕਿਣ੍ਣੇ ਚਤ੍ਤਾਰੋ ਮਣਿ ਪਾਸਾਣੇ ਠਪੇਸਿ. ਤੇਸਂ ਆਲੋਕਾਭਿਭੂਤੋ ਧਾਤੁਗਬ੍ਭੋ ਅਤਿਵਿਯ ਵਿਰੋਚਿਤ੍ਥ. ਸਬ੍ਬਨਾਟਕਿਤ੍ਥੀਯੋ ਅਤ੍ਤਨੋ ਅਤ੍ਤਨੋ ਆਭਰਣਾਨਿ ਓਮੁਞ੍ਚਿਤ੍ਵਾ ਧਾਤੁਗਬ੍ਭੇਯੇਵ ਪੂਜੇਸੁਂ. ਤਤੋ ਰਾਜਾ ਧਾਤੁਨਿਧਾਨਂ ਕਤ੍ਵਾ ਬੁਦ੍ਧਰੂਪਸ੍ਸ ਪਾਦਤਲੇ ਸੀਸਂ ਠਪੇਤ੍ਵਾ ਨਿਪਨ੍ਨੋ ਏਵਂ ਪਰਿਦੇਵਿ; ਮਯ੍ਹਂ ਪਿਤੁਪਿਤਾਮਹਪਰਮ੍ਪਰਾਗਤਾਧਾਤੁ ਅਜ੍ਜ ਆਦਿਂ ਕਤ੍ਵਾ ਇਤੋ ਪਟ੍ਠਾਯ ਵਿਯੋਗਾ ਜਾਤਾ ਅਹਂ ਦਾਨਿ ਤੁਮ੍ਹਾਕਂ ਅਤਿਚਿਰਂ (ਠੀਤਾ) ਰਮਣੀਯਾ ਰੋਹਣਜਨਪਦਾ ਆਹਰਿਤ੍ਵਾ ਇਮਸ੍ਮਿਂ ਠਾਨੇ ਪਤਿਟ੍ਠਾਪੇਸਿਨ੍ਤਿ ਵਤ੍ਵਾ ਸਿਨੇਰੁ ਮੁਦ੍ਧਨਿ ¶ ਸਮੁਜ੍ਜਲਮਹਾਪਦੀਪੋ ਵਿਯ ਤੁਮ੍ਹੇ ਇਧੇਵ ਠੀਤਾ. ਇਦਾਨਿ ਨ ਗਮਿਸ੍ਸਾਮ ਮਯਂ ਖਮਥ ਭਗਵਾ’ਤਿ ਪਰਿਦੇਵਮਾਨੋ ਧਾਤੁ ਗਬ੍ਭੇਯੇਵ ਪਤਿਤ੍ਵਾ ਆਹ?

ਅਹੋ ਵਿਯੋਗਂ ਦੁਕ੍ਖਂ ਮੇ ਏਤਾ ਬਾਧੇਨ੍ਤਿ ਧਾਤੁਯੋ;

ਵਤ੍ਵਾ ਸੋ ਪਰਿਦੇਵਨ੍ਤੋ ਧਾਤੁਗਬ੍ਭੇ ਸਯੀ ਤਦਾ.

ਮਰਿਸ੍ਸਾਮਿ ਨੋ ਗਮਿਸ੍ਸਂ ਅਯ੍ਯਂ ਹਿਤ੍ਵਾ ਇਧੇਵ’ਹਂ;

ਦੁਲ੍ਲਭਂ ਦਸ੍ਸਨਂ ਤਸ੍ਸ ਸਂਸਾਰੇ ਚਰਤੋ ਮਮਾ’ਤਿ.

ਵਤ੍ਵਾ ਪਰਿਦੇਵਨ੍ਤੋ ਨਿਪਜ੍ਜਿ. ਤਸ੍ਸ ਪਨ ਭਿਕ੍ਖੁਸਙ੍ਘਸ੍ਸ ਅਨ੍ਤਰੇ ਸਹਦੇਵੋ ਨਾਮ ਥੇਰੋ ਰਾਜਾਨਂ ਧਾਤੁਗਬ੍ਭੇ ਰੋਦਮਾਨਂ ਨਿਪਨ੍ਨਂ ਦਿਸ੍ਵਾ ਕਿਮਜ੍ਝਾਸਯੋ ਏਤਸ੍ਸਾ’ਤਿ ਚੇਤੋਪਰਿਯਞਾਣੇਨ ਸਮਨ੍ਤਾਹਰਿਤ੍ਵਾ ਇਧ ਨਿਪਨ੍ਨੋ ਮਰਿਸ੍ਸਾਮੀ’ਤਿ ਨਿਪਨ੍ਨਭਾਵਂ ਜਾਨਿਤ੍ਵਾ ਇਦ੍ਧਿਯਾ ਸਂਸਰਂ ਪਿਯਰੂਪਂ ਮਾਪੇਤ੍ਵਾ ਧਾਤੁਗਬ੍ਭਤੋ ਤਂ ਬਹਿ ਅਕਾਸਿ.

(ਇਦ੍ਧਿਯਾ ਸੋ ਵਸਿਪਤ੍ਤੋ ਛਲ਼ਭਿਞ੍ਞੋ ਵਿਸਾਰਦੋ;

ਤਂ ਖਣਞ੍ਞੇਵ ਸਪ੍ਪਞ੍ਞੋ ਰਾਜਾਨਂ ਤਂ ਬਹਿਂ ਅਕਾ.)

ਤਤੋ ਪਠਮਾਨੀਤਜੋਤਿਰਙ੍ਗ ਪਾਸਾਣਂ ਧਾਤੁਗਬ੍ਭਸ੍ਸ ਉਪਰਿ ਵਿਤਾਨਂ ਵਿਯ ਠਪੇਤ੍ਵਾ ਅਰਹਨ੍ਤਾ? ਧਾਤੁਗਬ੍ਭੋ ਸਮਨ੍ਤਤੋ ਚਤੁਰਸ੍ਸਮਞ੍ਚਂ ਵਿਯ ਏਕਘਨੋ ਹੋਤੁ. ਧਾਤੁ ਗਬ੍ਭੇ ਗਨ੍ਧਾ ਮਾ ਸੁਸ੍ਸਨ੍ਤੁ, ਪੁਪ੍ਫਾਨਿ ਮਾ ਮਿਲਾਯਨ੍ਤੁ, ਰਤਨਾਨਿ ਮਾ ਵਿਵਣ੍ਣਾ ਹੋਨ੍ਤੁ, ਪੂਜਨੀਯਭਣ੍ਡਾਨਿ ਮਾ ਨਸ੍ਸਨ੍ਤੁ, ਪਚ੍ਚਤ੍ਥਿਕਪਚ੍ਚਾਮਿਤ੍ਤਾਨਂ ਓਕਾਸੋ ਵਾ ਵਿਵਰੋ ਵਾ ਮਾ ਹੋਤੁ’ਤਿ ਅਧਿਟ੍ਠਹਿਂਸੁ. ਤਤੋ ਰਾਜਾ ਧਾਤੁਯੋ ਮਹਨ੍ਤਂ ਪੂਜਂ ਕਤ੍ਵਾ ਮਙ੍ਗਲਚੇਤਿਯੇ ਚਤੁਰਸ੍ਸਕੋਟ੍ਠਕਂ ਅਤਿਮਨੋਰਮਂ ਛਤ੍ਤਕਮ੍ਮਞ੍ਚ ਕੇਲਾਸਕੂਟਂ ਵਿਯ ਸੁਧਾਕਮ੍ਮਞ੍ਚ ਵਾਲੁਕਪਾਦਤੋ ਪਟ੍ਠਾਯ ਸਬ੍ਬਞ੍ਚ ਕਤ੍ਤਬ੍ਬਂ ਕਮ੍ਮਂ ਨਿਟ੍ਠਾਪੇਸਿ. ਸੋ ਪਨ ਸੇਤ ਨਿਮ੍ਮਲਚਨ੍ਦਰਂਸਿ ਵਿਯ ਉਦਕਬੁਬ੍ਬੁਲ਼ਕੇਲਾਸਕੂਟਪਟਿਭਾਗੋ ਛਤ੍ਤਧਰੋ ¶ ਅਚਲਪ੍ਪਤਿਟ੍ਠਿਤੋ ਸੁਜਨਪ੍ਪਸਾਦਕੋ ਅਞ੍ਞਤਿਤ੍ਥੀਯ ਮਦ੍ਦਨਕਰੋ ਮਙ੍ਗਲਥੂਪੋ ਵਿਰੋਚਿਤ੍ਥ.

ਵਿਲਾਸਮਾਨੋ ਅਟ੍ਠਾਸਿ ਤੋਸਯਨ੍ਤੋ ਮਹਾਜਨੇ;

ਮਙ੍ਗਲਕੇਲਾਸਥੂਪੋ ਅਚਲੋ ਸੁਪ੍ਪਤਿਟ੍ਠਿਤੋ.

ਸੁਜਨਪ੍ਪਸਾਦਨਕਰੋ ਤਿਤ੍ਥਿਯਦਿਟ੍ਠਿਮਦ੍ਦਨੋ;

ਭਵਿ ਸਦ੍ਧਾਕਰੋ ਸੇਟ੍ਠੋ ਸਬ੍ਬਜਨਪਸਾਦਕੋ.

ਚੇਤਿਯੋ ਪਵਰੋ ਲੋਕੇ ਮਹਾਜਨਨਿਸੇਵਿਤੋ;

ਧਜਪੁਪ੍ਫਸਮਾਕਿਣ੍ਣੋ ਸਦਾ ਪੂਜਾਰਹੋ ਭਵਿ.

ਬਹੂ ਜਨਾ ਸਮਾਗਮ੍ਮ ਨਾਨਾ ਦੇਸਾ ਸਮਾਗਤਾ;

ਪੂਜੇਸੁਂ ਤਂ ਮਹਾਥੂਪਂ ਸਬ੍ਬਦਾਪਿ ਅਤਨ੍ਦਿਤਾ.

ਈਦਿਸੋ ਪਤਿਰੂਪਵਾਸੋ ਸੋ ਦੇਸੋ ਦੁਲ੍ਲਭੋ ਭਵੇ;

ਅਪ੍ਪਮਤ੍ਤਾ ਸਦਾ ਸਨ੍ਤਾ ਵਿਨਾਥ ਕੁਸਲਂ ਬਹੁਨ੍ਤਿ.

ਰਾਜਾ ਕਪ੍ਪਾਸਿਕਸੁਖੁਮਵਤ੍ਥੇਨ ਮਹਾਰਹਂ ਚੇਤਿਯਂ ਵੇਠੇਤ੍ਵਾ, ਸਿਰਿਵਡ੍ਢਨਂ ਨਾਮ ਮਹਾਬੋਧਿਂ ਪਤਿਟ੍ਠਪੇਤ੍ਵਾ ਤਤ੍ਥ ਬੋਧਿਘਰਞ੍ਚ ਕਾਰਾਪੇਤ੍ਵਾ ਤਿਭੂਮਕਂ ਉਪੋਸਥਾਗਾਰਂ ਕਾਰਾਪੇਤ੍ਵਾ ਰਤ੍ਤਿਟ੍ਠਾਨ ਦਿਵਾਟ੍ਠਾਨਾਦੀਨਿ ਕਤ੍ਵਾ ਸਬ੍ਬਂ ਵਿਹਾਰੇ ਕਤ੍ਤਬ੍ਬਂ ਕਾਰੇਸਿ. ਏਤ੍ਤਕਂ ਕਾਰਾਪੇਤ੍ਵਾ ਵਿਹਾਰਂ ਦਕ੍ਖਿਣੋਦਕਂ ਦਸ੍ਸਾਮੀ’ਤਿ ਚਿਨ੍ਤੇਤ੍ਵਾ ਅਸੀਤਿਸਹਸ੍ਸਮਤ੍ਤਾਨਂ ਭਿਕ੍ਖੂਨਂ ਸਤ੍ਤਦਿਵਸਾਨਿ ਨਾਨਾਵਿਧ ਸੂਪਵ੍ਯਞ੍ਜਨੇਹਿ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਮਹਾਭਿਕ੍ਖੁ ਸਙ੍ਘਸ੍ਸ ਤਿਚੀਵਰਤ੍ਥਾਯ ਵਤ੍ਥਾਨਿ ਦਾਪੇਤ੍ਵਾ ਪਾਤੋਵ ਪਾਤਰਾਸਭਤ੍ਤਂ ਭੁਞ੍ਜਿਤ੍ਵਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠੀਤੋ ਏਵਮਾਹ? ਅਯ੍ਯਾ, ਚਾਤੁਦ੍ਦਸਿਕੇ ਮਹਾਭਿਕ੍ਖੁਸਙ੍ਘਸ੍ਸ ਦਕ੍ਖਿਣਂ ਦਾਤੁਮਿਚ੍ਛਾਮੀ’ਤਿ. ਸੋ ਪਨਾਯਸ੍ਮਾ ਏਵਮਾਹ; ਉਪਕਟ੍ਠ ਪੁਣ੍ਣਮਾਯਂ ਉਪੋਸਥਦਿਵਸੇ ਅਸ੍ਸਯੁਜਨਕ੍ਖਤ੍ਤੇਨ ਦਕ੍ਖਿਣਂ ਧਾਤੁਂ ਭਦ੍ਦਕਨ੍ਤਿ. ਸੋ ਥੇਰਸ੍ਸ ਵਚਨਂ ਸੁਤ੍ਵਾ ਪਞ੍ਚਪਤਿਟ੍ਠਿਤੇਨ ਥੇਰਂ ਵਨ੍ਦਿਤ੍ਵਾ ਸੋਮਨਗਰੇ ਅਤ੍ਤਨੋ ਭਗਿਨਿਂ ਦੇਵਿਂ ਕਥੇਸਿ? ਭਗਿਨਿ, ਦਸਬਲਸ੍ਸ ਨਲਾਟਧਾਤੁਂ ਨਿਦਹਿਤ੍ਵਾ ਮਙ੍ਗਲਮਹਾਚੇਤਿਯਾਨੁਰੂਪਂ ¶ ਪਾਸਾਦਂ ਅਲਙ੍ਕਤਦ੍ਵਾਰਟ੍ਟਾਲਕਤੋਰਣਂ ਸੇਤ ਵਤ੍ਥ ਅਨੇਕਧਜਸਮਾਕਿਣ੍ਣਂ ਵਿਹਾਰਞ੍ਚ ਕਾਰਾਪੇਤ੍ਵਾ ਦਕ੍ਖਿਣਂ ਦਸ੍ਸਾਮੀ’ਤਿ ਅਯ੍ਯਸ੍ਸ ਕਥੇਸਿਂ. ਸੋ ਪਨਾਯਸ੍ਮਾ; ਉਪਕਟ੍ਠ ਪੁਣ੍ਣਮਾਯ ਉਪੋਸਥਦਿਵਸੇ ਦਾਤੁਂ ਯੁਤ੍ਤਨ੍ਤਿ ਆਹਾ’ਤਿ. ਦੇਵ, ਕਿਂ ਕਥੇਸਿ, ਅਯ੍ਯਸ੍ਸ ਕਥੀਤਨਿਯਾਮੇਨੇਵ ਉਪਕਟ੍ਠ ਪੁਣ੍ਣਮਾਯ ਉਪੋਸਥਦਿਵਸੇ ਦਕ੍ਖਿਣਂ ਦੇਹੀ’ਤਿ ਆਹ. ਸੋ ਤਸ੍ਸਾ ਕਥਂ ਸੁਤ੍ਵਾ ਸੋਮਨਸ੍ਸਪਤ੍ਤੋ ਸਾਧੁ ਭਦ੍ਦੇ’ਤਿ ਸਮ੍ਪਟਿਚ੍ਛਿਤ੍ਵਾ ਸੋਮਨਗਰੇ ਵਿਹਰਨ੍ਤੋ, ਉਪਕਟ੍ਠ ਪੁਣ੍ਣਮਾਯ ਉਪੋਸਥੇ ਸਮ੍ਪਤ੍ਤੇਯੇਵ ਅਜ੍ਜੁਪੋਸਥੋ’ਤਿ ਞਤ੍ਵਾ ਗਿਰਿਅਭਯਂ ਪਕ੍ਕੋਸਾਪੇਤ੍ਵਾ, ਤਾਤ ਸ੍ਵੇ ਦਕ੍ਖਿਣਂ ਦਾਤਬ੍ਬਂ ਤ੍ਵਂ ਸੇਨਙ੍ਗਂ ਅਲਙ੍ਕਰਿਤ੍ਵਾ ਸ੍ਵੇ ਅਮ੍ਹੇਹਿ ਸਦ੍ਧਿਂ ਏਹੀ’ਤਿ ਵਤ੍ਵਾ ਸੇਰੁਨਗਰੇ ਸਿਵਰਞ੍ਞੋ ਲੋਣਨਗਰੇ ਮਹਾਨਾਗਰਞ੍ਞੋ ਪਣ੍ਣਂ ਪਹਿਣੀ. ਸ੍ਵੇ ਤੁਮ੍ਹਾਕਂ ਹਤ੍ਥਿਅਸ੍ਸਰਥਪਤ੍ਤਾਦੀਨਿ ਸੁਵਣ੍ਣਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਸ੍ਵੇ ਅਮ੍ਹੇਹਿ ਸਦ੍ਧਿਂ ਛਣ ਵੇਸਂ ਗਾਹਾਪੇਤ੍ਵਾ ਅਯ੍ਯਸ੍ਸ ਤਿਸ੍ਸਤ੍ਥੇਰਸ੍ਸ ਦਕ੍ਖਿਣਂ ਦੀਯਮਾਨਂ ਸਮੋਸਰਨ੍ਤੁਤਿ. ਤੇ ਪਨ ਰਾਜਾਨੋ ਸਾਸਨਂ ਸੁਤ੍ਵਾ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਹਤ੍ਥਿਅਸ੍ਸਰਥਪਤ੍ਤਾਦੀਨਿ ਅਲਙ੍ਕਰਿਤ੍ਵਾ ਗਨ੍ਧਪਞ੍ਚਙ੍ਗੁਲਿਕਂ ਦਤ੍ਵਾ ਸੁਵਣ੍ਣਮਾਲਾਦੀਨਿ ਪਿਲਨ੍ਧਾਪੇਤ੍ਵਾ ਮਹਾ ਗੋਣੇਪਿ ਤਥੇਵ ਅਲਙ੍ਕਰਿਤ੍ਵਾ ਸਿਙ੍ਗੇਸੁ ਸੁਵਣ੍ਣਕਞ੍ਚੁਕਂ (ਪਟਿ) ਮੁਞ੍ਚਾਪੇਤ੍ਵਾ ਅਮਚ੍ਚਗਹਪਤਿ-ਬ੍ਰਾਹ੍ਮਣਪੁਤ੍ਤ-ਅਜਗੋਪਕ-ਖੁਜ੍ਜਵਾਮਨਕ-ਸੇਨਾਪਤਿਆਦਯੋ ਚ ਵਿਚਿਤ੍ਤਵਤ੍ਥਾਨਿ ਨਿਵਾਸੇਤ੍ਵਾ ਨਾਨਾਵਿਧਵਿਲੇਪਨਾਨਿ ਵਿਲਿਮ੍ਪੇਤ੍ਵਾ ਆਗਨ੍ਤ੍ਵਾ ਰਞ੍ਞੋ ਦਸ੍ਸਯਿਂਸੁ. ਰਾਜਾਪਿ ਚਤੁਰਙ੍ਗਿਨਿਯਾ ਸੇਨਾਯ ਪਰਿਵੁਤੋ ਅਲਙ੍ਕਤਹਤ੍ਥਿਕ੍ਖਨ੍ਧਂ ਆਰੁਹਿ. ਸੇਸਰਾਜਾਨੋ ਚ ਅਤ੍ਤਨੋ ਅਤ੍ਤਨੋ ਸੇਨਙ੍ਗੇਹਿ ਪਰਿਵਾਰੇਤ੍ਵਾ ਹਤ੍ਥਿਕ੍ਖਨ੍ਧੇ ਨਿਸੀਦਿਤ੍ਵਾ ਰਾਜਾਨਂ ਮਜ੍ਝੇ ਕਤ੍ਵਾ ਵਾਮਦਕ੍ਖਿਣਪਸ੍ਸਤੋ ਨਮਸ੍ਸਮਾਨਾ ਨਿਕ੍ਖਮਿਂਸੁ. ਤਸ੍ਸ ਪਨ ਗਮਨਂ ਅਜਾਤਸਤ੍ਤੁਨੋ ਤਥਾਗਤਸ੍ਸ ਦਸ੍ਸਨਤ੍ਥਾਯ ਜੀਵਕਮ੍ਬਵਨਗਮਨਂ ਵਿਯ ਤਿਂਸਯੋਜਨਪ੍ਪਮਾਣਂ ਏਰਾਵਣਹਤ੍ਥਿਕ੍ਖਨ੍ਧਂ ਆਰੁਹਿਤ੍ਵਾ ਦ੍ਵੀਸੁ ਦੇਵਲੋਕੇਸੁ ਦੇਵੇਹਿ ਪਰਿਵਾਰੇਤ੍ਵਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਨਨ੍ਦਨਵਨਗਮਨਕਾਲੋ ਵਿਯ ਚ ਅਹੋਸਿ. ਸੋ ਵਡ੍ਢਮਾਸਕਚ੍ਛਾਯਾਯ ¶ ਸਮ੍ਪਤ੍ਤਾਯ ਸੋਮਨਗਰਤੋ ਨਿਕ੍ਖਮਿਤ੍ਵਾ ਸੇਰੁਦਹਸ੍ਸ ਅਨ੍ਤੇ ਨਾਨਾਵਿਧ ਅਲਙ੍ਕਤਪਟਿਯਤ੍ਤਨਾਟਕਿਤ੍ਥੀਨਂ ਪਞ੍ਚਙ੍ਗਿਕਤੁਰਿਯਂ ਪਗ੍ਗਣ੍ਹਾਪਯਮਾਨੋ ਅਟ੍ਠਾਸਿ.

ਮਹਾਪਥਵੀ ਭਿਜ੍ਜਮਾਨਾ ਵਿਯ ਪਬ੍ਬਤਾ ਪਰਿਵਤ੍ਤਮਾਨਾ ਵਿਯ ਮਹਾਸਮੁਦ੍ਦੋ (ਥਲਂ) ਅਵਤ੍ਥਰਿਤ੍ਵਾ ਭਿਜ੍ਜਮਾਨਕਾਲੋ ਵਿਯ ਚ ਅਹੋਸਿ. ਬ੍ਰਾਹ੍ਮਣਾ ਜਯਮੁਖਮਙ੍ਗਲਿਕਾ ਸੋਤ੍ਥਿ ਵਚਨਂ ਵਦਿਂਸੁ. ਸਬ੍ਬਾਲਙ੍ਕਾਰਪਤਿਮਣ੍ਡਿਤਾ ਨਾਟਕਿਤ੍ਥਿਯੋ ਪਞ੍ਚਙ੍ਗਿਕਤੁਰਿਯਂ ਪਵਤ੍ਤਯਿਂਸੁ. ਮਹਾਜਨੋ ਵੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤੇਸਿ. ਤਤੋ ਰਾਜਾ ਬਹੂ ਗਨ੍ਧਦੀਪਧੂਪਾਦਯੋ ਗਾਹਾਪੇਤ੍ਵਾ ਉਟ੍ਠਾਯ ਸੇਨਾਯ ਪਰਿਵੁਤੋ ਥੇਰਸ੍ਸ ਵਸਨਟ੍ਠਾਨਂ ਪਵਿਸਿਤ੍ਵਾ ਥੇਰਂ ਵਨ੍ਦਿਤ੍ਵਾ ਨਿਸਿਨ੍ਨੋ ਆਹ? ਅਯ੍ਯ ਰਾਜਾਨੋ ਚ ਸਮ੍ਪਿਣ੍ਡਿਤ੍ਵਾ ਦਕ੍ਖਿਣੋਦਕਸ੍ਸ ਦੀਯਮਾਨਸ੍ਸ ਕਾਲੋ’ਤਿ. ਥੇਰੋ ਤਸ੍ਸ ਕਥਂ ਸੁਤ੍ਵਾ ਭਦ੍ਦਕਂ ਮਹਾਰਾਜਾ’ਤਿ ਸਮ੍ਪਟਿਚ੍ਛਿ. ਤਸ੍ਮਿਂ ਦਕ੍ਖਿਣੋਦਕਸ੍ਸ ਦਾਨਦਿਵਸੇ ਨਾਨਾਵਿਧਵਿਚਿਤ੍ਤਮਣਿਦਣ੍ਡਕੇਸੁ ਨਾਨਾਵਿਧ ਧਜਪਤਾਕਾਦੀਨਿ ਬਨ੍ਧਾਪੇਤ੍ਵਾ ਸਮੁਸ੍ਸਿਤਾਨਿ ਅਹੇਸੁਂ. ਪੁਰਿਮਾਦੀ ਦਿਸਾਸੁ ਮਨੁਞ੍ਞਵਾਤਾ ਵਾਯਿਂਸੁ. ਤਥਾ ਮਹਾਰਂਸਿਜਾਲਸਮੁਜ੍ਜਲਿਤੋ ਸਹਸ੍ਸਰਂਸਿਭਾਕਰੋ ਅਤ੍ਥਙ੍ਗਤੋ ਅਹੋਸਿ. ਵਿਪ੍ਫੁਰਿਤਕਿਰਣਰਜਧੂਮਰਾਹੁਅਬ੍ਭਾਦੀਹਿ ਉਪਰੋਧੇਹਿ ਵਿਰਹਿਤੋ ਤਾਰਾਗਣਪਰਿਵੁਤੋ ਪੁਣ੍ਣਚਨ੍ਦੋ ਸਮੁਜ੍ਜਲਰਜਤਮਯਂ ਆਦਾਸਮਣ੍ਡਲਂ ਵਿਯ ਪਾਚੀਨਦਿਸਤੋ ਸਮੁਗ੍ਗਤੋ. ਤਸ੍ਮਿਂ ਖਣੇ ਦਣ੍ਡਦੀਪਿਕਾਦਯੋ ਸਮੁਜ੍ਜਲਾਪੇਸੁਂ. ਮਹਾਮਙ੍ਗਲਚੇਤਿਯਂ ਪਨ ਜਾਤਿਸੁਮਨਮਾਲਾਦਾਮੇਨ ਪਰਿਕ੍ਖਿਪਿਤ੍ਵਾ ਏਕਮਾਲਾਗੁਣਂ ਵਿਯ ਅਲਙ੍ਕਰਿ. ਯਥਾ ਤਾਰਾਗਣਪਰਿਵੁਤੋ ਪੁਣ੍ਣਚਨ੍ਦੋ ਤਥਾ ਪਦੀਪਮਾਲਾਲਙ੍ਕਤੋ ਮਹਾਚੇਤਿਯੋ ਅਤਿਵਿਯ ਵਿਰੋਚਤਿ. ਸਕਲ ਲਙ੍ਕਾਦੀਪੇ ਪਨ ਸਬ੍ਬੇ ਰੁਕ੍ਖਾਪਿ ਵਿਚਿਤ੍ਤਧਜੇਨ ਅਲਙ੍ਕਤਾ ਵਿਯ ਅਕਾਲਫਲਪਲ੍ਲਵੇਹਿ ਵਿਚਿਤ੍ਤਾ ਅਹੇਸੁਂ. ਮਹਾਸਮੁਦ੍ਦਲੋਣਸਾਗਰਾਦਯੋ’ਪਿ ਪਞ੍ਚਵਿਧਪਦੁਮਸਞ੍ਛਨ੍ਨਾ ਅਹੇਸੁਂ.

ਵਿਚਿਤ੍ਰਵਤ੍ਥਾਭਰਣੇਹਿ ਸਬ੍ਬੇ,

ਅਲਙ੍ਕਤਾ ਦੇਵਸਮਾਨਵਣ੍ਣਾ;

ਅਨੇਕਸਙ੍ਖ੍ਯਾ ਸੁਮਨਾ ਪਤੀਤਾ,

ਜਨਾ ਸਮਨ੍ਤਾ ਪਰਿਵਾਰਯਿਂਸੁ.

ਸਬ੍ਬੇਵ ¶ ਉਜ੍ਜਲਾਪੇਸੁਂ ਦਣ੍ਡਦੀਪਂ ਮਨੋਰਮਂ;

ਸਕਲਮ੍ਪਿ ਇਦਂ ਦੀਪਂ ਆਸਿ ਓਭਾਸਿਤਂ ਤਦਾ.

ਤਾਰਾਗਣਸਮਾਕਿਣ੍ਣੋ ਪੁਣ੍ਣਚਨ੍ਦੋਵ ਜੋਤਯੀ;

ਸਾਰਦੇ ਨਭਮਜ੍ਝਮ੍ਹਿ ਠਿਤੋ ਰੁਚਿਰਰਂਸਿਯਾ.

ਤਥਾ ਅਯਂ ਥੂਪਵਰੋ ਸੁਪ੍ਪਭਾਸੋ ਅਲਙ੍ਕਤੋ;

ਮਾਲਾਪਦੀਪਮਜ੍ਝਮ੍ਹਿ ਭਾਤਿ ਭੁਤਿਲਕੁਤ੍ਤਮੋ.

ਸਬ੍ਬੇ’ਪਿ ਪਾਦਪਾ ਅਸ੍ਸ ਲਙ੍ਕਾਦੀਪਸ੍ਸ ਸਬ੍ਬਸੋ;

ਧਜੇਹਿ’ਵ ਸਮਾਕਿਣ੍ਣਾ ਆਸੁਂ ਪੁਪ੍ਫਫਲਨ੍ਦਦਾ.

ਸਚੇਤਨਾ ਯਥਾ ਸਬ੍ਬੇ ਅਕਾ ਪੂਜਂ ਅਕਾ ਤਦਾ;

ਤਥਾ ਅਚੇਤਨਾ ਸਬ੍ਬੇ ਅਕਾ ਪੂਜਂ ਅਨਪ੍ਪਕਂ.

ਯੇਭੁਯ੍ਯੇਨ ਭੁਮਟ੍ਠੇ ਦੇਵੇ ਉਪਾਦਾਯ ਯਾਵ ਅਕਣਿਟ੍ਠਕਾ ਦੇਵਾ ਬ੍ਰਹ੍ਮਾ ਦਿਬ੍ਬਮਾਲਾਪਾਰਿਚ੍ਛਤ੍ਤਕਕੋਵਿਲ਼ਾਰਚਨ੍ਦਨਚੁਣ੍ਣਂ ਗਹੇਤ੍ਵਾ ਆਗਤਾਦੇਵਾਤਿ ਵਾ ਮਨੁਸ੍ਸਾਤਿ ਵਾ ਜਾਨਿਤੁਂ ਅਸਕ੍ਕੋਨ੍ਤਿ. ਉਕ੍ਕਟ੍ਠਮਹਾਸਮਾਗਮੋ ਅਹੋਸਿ. ਤਸ੍ਮਿਮ੍ਪਿ ਦਿਵਸੇ ਮਹਾਪਥਵਿ ਆਕਾਸਯੁਗਨ੍ਧਰਚਕ੍ਕਵਾਲ਼ਪਬ੍ਬਤੁਤ੍ਤਮਾਦਯੋ ਕਮ੍ਪਿਂਸੁ. ਤਂ ਦਿਸ੍ਵਾ ਰਾਜਾ ਅਤਿਵਿਯ ਸੋਮਨਸ੍ਸਪ੍ਪਤ੍ਤੋ ਥੇਰੇ ਚ ਅਵਸੇਸ ਮਹਾਮਤ੍ਤਾਦਯੋ ਸਨ੍ਨਿਪਾਤੇਤ੍ਵਾ ਨਾਟਕਾਦਯੋ ਚ ਗਹੇਤ੍ਵਾ, ਇਦਾਨੇਵਾਹਂ ਵਿਹਾਰਦਕ੍ਖਿਣਂ ਦਸ੍ਸਾਮਿ’ਤਿ ਚੇਤਿਯਙ੍ਗਣਂ ਅਗਮਾਸਿ. ਥੇਰੋਪਿ ਭਿਕ੍ਖੁਸਙ੍ਘਂ ਗਹੇਤ੍ਵਾ ਚੇਤਿਯਙ੍ਗਣੇ ਅਲਙ੍ਕਤਮਣ੍ਡਪੇ ਨਿਸੀਦਿ. ਰਾਜਾ ਵਾਸਿਤਗਨ੍ਧੋਦਕਸੁਵਣ੍ਣਭਿਙ੍ਕਾਰਂ ਗਹੇਤ੍ਵਾ ਉਦਕਂ ਥੇਰਸ੍ਸ ਹਤ੍ਥੇ ਆਸਿਞ੍ਚਿਤ੍ਵਾ ਦਕ੍ਖਿਣਂ ਅਦਾਸਿ. ਦਤ੍ਵਾ ਚ ਪਨ ਏਵਮਾਹ; ਅਯ੍ਯਾ ਏਸਾ ਧਾਤੁ ਮਯ੍ਹਂ ਪਿਤਾਮਹਵਂਸੇਨ ਆਗਤਾ. ਇਦਾਨਿ ਅਮ੍ਹਾਕਂ ਅਤਿਰੁਚਿਰਰਮਣਿਯਾ ਰੋਹਣਜਨਪਦਾ ਆਹਰਿਤ੍ਵਾ ਸੁਵਣ੍ਣੇਨ ਧਾਤੁਗਬ੍ਭਂ, ਸਤ੍ਤਰਤਨੇਨ ਧਾਤੁਮਣ੍ਡਪਂ ਕਾਰਾਪੇਤ੍ਵਾ ਤਸ੍ਮਿਂ ਸੁਵਣ੍ਣਮਯਂ ਬੁਦ੍ਧਪਟਿਮਂ ਨਿਸੀਦਾਪੇਤ੍ਵਾ ਅਮ੍ਹਾਕਂ ਦਸਬਲਸ੍ਸ ਨਲਾਟਧਾਤੁਂ ¶ ਨਿਦਹਿਤ੍ਵਾ ਅਯ੍ਯਸ੍ਸ ਚੀਵਰਾਦੀਨਮਤ੍ਥਾਯ ਇਦਾਨਿ ਸੋਲ਼ਸਗਾਮਵਰਾਨਿ ਦਸ੍ਸਾਮਿ’ਤਿ ਗਾਮਵਰਾਨਿ ਦਤ੍ਵਾ ਸਮਨ੍ਤਤੋ ਤਿਗਾਵੁਤਪ੍ਪਮਾਣੇ ਸੇਰੁਦਹੇ ਭੇਰਿਂ ਚਰਾਪੇਤ੍ਵਾ ਆਰਾਮਿਕਂ ਕਤ੍ਵਾ ਆਹ? ਭਨ੍ਤੇ, ਤੁਮ੍ਹਾਕਂ ਮਯਾ ਦਿਨ੍ਨਸੋਲ਼ਸਗਾਮਂ ਅਜ੍ਜੇਵ ਗਨ੍ਤਬ੍ਬਂ. ਗਨ੍ਤ੍ਵਾ ਚ ਪਨ ਅਜ੍ਜੇਵ ਪਰਿਗ੍ਗਹਂ ਕਰੋਥਾਤਿ ਵਤ੍ਵਾ ਤਤ੍ਥੇਵ ਵਾਸੁਪਗਤੋ ਪੁਨ ਦਿਵਸੇ ਸਮਾਗਨ੍ਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਸਤ੍ਤਮੇ ਦਿਵਸੇ ਮਹਾਭਿਕ੍ਖੁਸਙ੍ਘਸ੍ਸ ਤੀਚੀਵਰਪ੍ਪਹੋਨਕਸਾਟਕਂ ਪਣੀਤਂ ਭੋਜਨਂ ਦਤ੍ਵਾ ਥੇਰਸ੍ਸ ਸਨ੍ਤਿਕਂ ਆਗਤੋ, ਅਯ੍ਯ ਵਿਹਾਰੇ ਕਤ੍ਤਬ੍ਬਂ ਅਪਰਿਹਾਪੇਤ੍ਵਾ ਮਯਾ ਕਤਂ, ਗੇਹਂ ਗਮਿਸ੍ਸਾਮੀਤਿ (ਨਿਵੇਦੇਸਿ). ਥੇਰੋ ਤਸ੍ਸ ਕਥਂ ਸੁਤ੍ਵਾ ਸਾਧੁ ਮਹਾਰਾਜਾਤਿ ਸਮ੍ਪਟਿਚ੍ਛਿ.

ਸੋ ਪਨ ਚੇਤਿਯਸ੍ਸ ਪੂਜਨਤ੍ਥਾਯ ਪੁਪ੍ਫਾਰਾਮਂ ਕਾਰਾਪੇਤ੍ਵਾ ਮਾਲਾਕਾਰਾਨਂ ਪਰਿਬ੍ਬਯਂ ਦਾਪੇਸਿ. ਤਥਾ ਭੇਰਿਵਾਦਕਨਾਟਕਾਨਮ੍ਪਿ ਵਿਹਾਰਸੀਮਨ੍ਤੇ ਸੁਵਣ੍ਣਨਙ੍ਗਲੇਨ ਪਰਿਚ੍ਛਿਨ੍ਦਿਤ੍ਵਾ ਆਰਾਮਿਕਾਨਮ੍ਪਿ ਗਾਮਂ ਕਾਰਾਪੇਸਿ. ਭਿਕ੍ਖੁਸਙ੍ਘਸ੍ਸ ਵੇਯ੍ਯਾਵਚ੍ਚਤ੍ਥਾਯ ਅਤ੍ਤਨੋ ਸਨ੍ਤਿਕੇ ਪਞ੍ਚਸਤਅਮਚ੍ਚਧੀਤਰੋ ਤਤ੍ਤਕੇ ਅਮਚ੍ਚਪੁਤ੍ਤੇ ਦਾਸਦਾਸਿਯੋ ਚ ਦਤ੍ਵਾ ਪਰਿਬ੍ਬਯਤ੍ਥਾਯ ਤੇਸਂ ਤੇਸਂ ਪਞ੍ਚਸਤਸਹਸ੍ਸਕਹਾਪਣੇ ਚ ਦਾਪੇਸਿ. ਭਿਕ੍ਖੁਸਙ੍ਘਸ੍ਸ ਚ ਧਾਤੁਪੁਜਨਤ੍ਥਾਯ ਸੋਲ਼ਸਸਹਸ੍ਸਂ ਕਹਾਪਣਂ ਦਾਪੇਸਿ.

ਤਤੋ ਗਿਰਿਅਭਯਂ ਪਕ੍ਕੋਸਾਪੇਤ੍ਵਾ, ਤਾਤ ਤੁਮ੍ਹੇ ਇਧੇਵ ਨਿਚ੍ਚਂ ਵਸਥ. ਅਮ੍ਹਾਕਂ ਵਿਹਾਰੇ ਚ ਆਰਾਮਿਕੇਸੁ ਚ ਅਯ੍ਯੇਸੁ ਚ ਅਪ੍ਪਮਤ੍ਤੋ ਹੋਹੀਤਿ ਓਵਦਿਤ੍ਵਾ ਸਬ੍ਬਂ ਤਸ੍ਸ ਨਿਯ੍ਯਾਦੇਸਿ. ਥੇਰੋ ਤਸ੍ਸ ਏਵਮਾਹ? ਮਹਾਰਾਜ ਸਮਨ੍ਤਤੋ ਮਹਾਸੀਮਂ ਬਨ੍ਧਿਤਬ੍ਬਨ੍ਤਿ. ਬਨ੍ਧਥ ਭਨ੍ਤੇਤਿ ਵੁਤ੍ਤੇ? ਮਹਾਰਾਜ ਅਕਿਤ੍ਤਿਤੇਨ ਨਿਮਿਤ੍ਤੇਨ ਸੀਮਂ ਬਨ੍ਧਿਤੁਂ ਨਸਕ੍ਕਾ, ਵਿਹਾਰਸ੍ਸ ਪਾਚੀਨ ਪਚ੍ਛਿਮੁਤ੍ਤਰਦਕ੍ਖਿਣਤੋ ਮਹਾਸੀਮਂ ਬਨ੍ਧਨਾਯ ਨਿਮਿਤ੍ਤਂ ਸਲ੍ਲਕ੍ਖੇਤ੍ਵਾ ਦੇਹਿ, ਮਯਂ ਸੀਮਂ ਬਨ੍ਧਿਸ੍ਸਾਮਾਤਿ ਆਹ. ਰਾਜਾ ਤੁਟ੍ਠੋ ਸਤ੍ਤ ਅਮਚ੍ਚੇ ਸਬ੍ਬਾਲਙ੍ਕਾਰੇਨ ਅਲਙ੍ਕਰਿਤ੍ਵਾ ਸੀਮਾਨਿਮਿਤ੍ਤਂ ਕਿਤ੍ਤੇਤ੍ਵਾ ਆਗਮਨਤ੍ਥਂ ¶ ਪੇਸੇਸਿ. ਤੇ ਪਨ ਸਤ੍ਤ ਅਮਚ੍ਚਾ ਚਤੁਸੁ ਦਿਸਾਸੁ ਨਿਮਿਤ੍ਤਂ ਸਲ੍ਲਕ੍ਖੇਤ੍ਵਾ ਪਣ੍ਣੇ ਲਿਖਿਤ੍ਵਾ ਆਹਰਿਤ੍ਵਾ ਰਞ੍ਞੋ ਅਦਂਸੁ. ਰਾਜਾ ਏਕੇਕਂ ਸਤਕਹਾਪਣਂ ਦਤ੍ਵਾ ਚਤੁਸੁ ਦਿਸਾਸੁ ਆਰਕ੍ਖਂ ਦਾਪੇਤ੍ਵਾ ਸੀਮਂ ਬਨ੍ਧਨ੍ਤੂਤਿ ਮਹਾਭਿਕ੍ਖੁਸਙ੍ਘਸ੍ਸ ਨਿਵੇਦੇਸਿ. ਅਥ ਥੇਰੋ ਭਿਕ੍ਖੁਸਙ੍ਘਪਰਿਵੁਤੋ ਚੇਤਿਯਙ੍ਗਣੇ ਨਿਸੀਦਿਤ੍ਵਾ ਵਪ੍ਪਮਾਸਕਾਲ਼ਪਕ੍ਖਦ੍ਵਾਦਸਦਿਵਸੇ ਸੀਮਂ ਬਨ੍ਧਿਤ੍ਵਾ ਨਿਟ੍ਠਪੇਸਿ.

ਤਤ੍ਥ ਸੀਮਾਨਿਮਿਤ੍ਤਂ ਏਵਂ ਜਾਨਿਤਬ੍ਬਂ; ਪੁਰਿਮਾਯ ਦਿਸਾਯ ਸਿਗਾਲ ਪਾਸਾਣਂ ਗਤੋ. ਤਤੋ ਮਚ੍ਛਸੇਲਗਾਮਸ੍ਸ ਵਾਮ ਪਸ੍ਸੇਨ ਕੋਟਸੀਮਾ ਨਾਮ ਗਾਮਕ੍ਖੇਤ੍ਤਂ ਵਿਸ੍ਸਜ੍ਜੇਤ੍ਵਾ ਗਣਦ੍ਵਾਰਗਾਮਂ ਗਤੋ. ਚਿਤ੍ਤਵਾਪਿਯਾ ਉਤ੍ਤਰਵਾਨ ਕੋਟਿਤੋ ਵਰਗਾਮਕ੍ਖੇਤ੍ਤੇ ਪਿਟ੍ਠਿਪਾਸਾਣਂ ਗਤੋ. ਤਤੋ ਸਾਲਿਕਂ ਨਾਮ ਮਧੁਕਰੁਕ੍ਖੇ ਠੀਤਪਾਸਾਣਥੂਪਸ੍ਸ ਗਤੋ. ਤਤੋ ਵੁਤ੍ਤਿਕ ਨਾਮ ਵਾਪਿਯਾ ਦਕ੍ਖਿਣਵਾਨ ਕੋਟਿਤੋ ਕਣਿਕਾਰ ਸੇਲਸ੍ਸ ਗਤੋ. ਤਤੋ ਛਨ੍ਨਜ੍ਝਾਪਿਤਸੇਲਸ੍ਸ ਗਤੋ. ਤਤੋ ਕੁਕ੍ਕੁਟਸਿਵ ਨਾਮ ਉਪਾਸਕਸ੍ਸ ਮਧੁਕਰੁਕ੍ਖੇ ਠੀਤਂ ਥੂਪਂ ਗਤੋ. ਤਤੋ ਸੋਣ੍ਡਂ ਨਾਮ ਸੇਲਂ ਗਤੋ. ਤਤੋ ਸਬਰਂ ਨਾਮ ਪਾਸਾਣਂ ਗਤੋ. ਤਤੋ ਏਲਾਲਤਿਤ੍ਥਸ੍ਸ ਗਤੋ. ਤਤੋ ਸੋਬ੍ਭ ਮਜ੍ਝਿਮੇਨ ਗਨ੍ਤ੍ਵਾ ਅਸ੍ਸਬਨ੍ਧਨਂ ਨਾਮ ਠਾਨਂ ਗਤੋ. ਤਤੋ ਪਾਸਾਣਸ੍ਸ ਮਤ੍ਥਕੇ ਉਦਕ ਕਾਕਂ ਨਾਮ ਨਿਗ੍ਰੋਧਂ ਗਤੋ. ਸੋ ਰੁਕ੍ਖੋ ਉਦਕ ਕਾਕਾਨਂ ਵੁਸਿਤ ਭਾਵੇਨ ਏਵਂ ਨਾਮ ਜਾਤੋ. ਤਤੋ ਤਮ੍ਬਤਿਤ੍ਥਂ ਨਾਮ ਗਨ੍ਤਾ ਮਹਾਚਾਰਿਕਸ੍ਸਨਾਮ ਥੂਪਮਗ੍ਗਸ੍ਸ ਗਤੋ. ¶ ਤਤੋ ਅਸ੍ਸਮਣ੍ਡਲਪਿਟ੍ਠਿਂ ਗਤੋ. ਤਤੋ ਮਹਾ ਕਦਮ੍ਬ ਪਸ੍ਸੇ ਠੀਤਂ ਪਾਸਾਣਥੂਪਂ ਗਤੋ. ਤਤੋ ਮਹਾ ਰਾਜੁਵਾਪਿਯਾ ਉਤ੍ਤਰਕੋਟਿਯਾ ਠੀਤਂ ਮਹਾਨਿਗ੍ਰੋਧਰੁਕ੍ਖਂ ਗਤੋ. ਤਤੋ ਮਹਾਵਨਪਿਟ੍ਠਿਂ ਗਤੋ. ਤਤੋ ਲੋਣਸਾਗਰਸ੍ਸ ਅਨ੍ਤੇ ਰਜਤਸੇਲਂ ਗਤੋ. ਪੁਨ ਆਵਤ੍ਤਿਤ੍ਵਾ ਸਿਗਾਲ ਪਾਸਾਣੇਯੇਵ ਠੀਤੋ. ਇਮਂ ਏਤ੍ਤਕਂ ਪਦੇਸਂ ਸਮਨ੍ਤਤੋ ਪਰਿਚ੍ਛਿਨ੍ਦਾਪੇਤ੍ਵਾ ਰਾਜਾ ਅਦਾਸਿ. ਵਿਹਾਰਸ੍ਸ ਬਹੂ ਆਰਾਮਿਕੇ ਚ (ਤੇਸਂ) ਵਿਵਿਧਾਨਿ ਉਪਕਰਣਾਨਿ (ਚ) ਦਾਪੇਤ੍ਵਾ ਸਬ੍ਬੇ ਪਾਕਾਰਤੋਰਣਾਦਯੋ ਕਾਰਾਪੇਤ੍ਵਾ ਵਿਹਾਰਂ ਨਿਟ੍ਠਾਪੇਤ੍ਵਾ ਰੋਹਣਮੇਵ ਗਤੋ.

ਰਾਜਾ ਪਸਨ੍ਨਹਦਯੋ ਮਹਾਪੁਞ੍ਞੋ ਮਹਾਬਲੋ;

ਕਾਰੇਤ੍ਵਾ ਉਤ੍ਤਮਂ ਥੂਪਂ ਕਞ੍ਚਨਗ੍ਘੀਕ ਸੋਭਿਤਂ.

ਬਨ੍ਧਾਪੇਤ੍ਵਾ ਤਤੋ ਸੀਮਂ ਵਟ੍ਟਗਾਮਞ੍ਚ ਸੋਲ਼ਸ;

ਦਤ੍ਵਾ ਆਰਾਮਿਕਾਨਞ੍ਚ ਸਬ੍ਬੁਪਕਰਣਾਨਿ ਚ.

ਤਤੋ ਸੋ ਰੋਹਣਂ ਗਨ੍ਤ੍ਵਾ ਮਹਾਸੇਨਾਪੁਰਕ੍ਖਤੋ;

ਵਿਹਾਰਦੇਵਿਯਾ ਸਦ੍ਧਿਂ ਮੋਦਮਾਨੋ ਵਸੀ ਤਹਿਂ.

ਥੇਰੋ ਪਨ ਤਤ੍ਥੇਵ ਵਿਹਰਨ੍ਤੋ ਯੋ ਇਮਸ੍ਮਿਂ ਵਿਹਾਰੇ ਵਸਨ੍ਤੋ ਤਥਾਗਤਸ੍ਸ ਏਕਗਨ੍ਧਕੁਟਿਯਂ ਵੁਤ੍ਥੋ ਵਿਯ ਭਵਿਸ੍ਸਤੀਤਿ ਖ੍ਯਾਕਰਿਤ੍ਵਾ ਤਤੋ ਪਟ੍ਠਾਯ ਸੀਲਾਚਾਰਸਮਾਧਿਸਮਾਪਤ੍ਤਿਪਟਿਲਦ੍ਧਜਲ਼ਭਿਞ੍ਞਾਪਟਿਸਮ੍ਭਿਦਪ੍ਪਤ੍ਤੇਹਿ ਖੀਣਾਸਵੇਹਿ ਪਰਿਵਾਰੇਤ੍ਵਾ ਸਬ੍ਬ ਬੁਦ੍ਧਗੁਣਂ ਅਨੁਸ੍ਸਰਨ੍ਤੋ ਚਿਰਂ ਵਸਿਤ੍ਵਾ ਤਤ੍ਥੇਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਅਨੇਕਗੁਣਸਮ੍ਪਨ੍ਨੋ ¶ ਤਿਸ੍ਸਤ੍ਥੇਰੋ ਬਹੁਸ੍ਸੁਤੋ;

ਜਨਾਨਂ ਸਙ੍ਗਹਂਕਤ੍ਵਾ ਨਿਬ੍ਬੁਤੋ ਸੋ ਅਨਾਸਵੋ.

ਥੇਰਾਪਿ ਤੇ ਸੀਲਸਮਾਧਿਯੁਤ੍ਤਾ,

ਬਹੁਸ੍ਸੁਤਾ ਸਾਧੁਗੁਣਾਭਿਰਾਮਾ;

ਪਞ੍ਞਾਪਭਾਵਾਯੁਪ੍ਪਨ੍ਨਚਿਤ੍ਤਾ,

ਗੁਣਾਕਰਾ ਤਾਨਯੁਤਾ ਜਨਾਨਂ.

ਪਹੀਨਭਵਸਂਸਾਰਾ ਪਭਿਨ੍ਨਪਟਿਸਮ੍ਭਿਦਾ;

ਨਾਮਰੂਪਂ ਸਮਾਸਨ੍ਤੋ ਪੇਸਲਾ ਛਿਨ੍ਨਬਨ੍ਧਨਾ.

ਸਤ੍ਤਾਨਂ ਉਤ੍ਤਮਂ ਸਨ੍ਤਿਂ ਕਤ੍ਵਾ ਚ ਜਨਸਙ੍ਗਹਂ;

ਨਿਬ੍ਬੁਤਾ ਤੇ ਮਹਾਪਞ੍ਞਾ ਪਦੀਪੋਚ ਸੁਮਾਨਸਾ.

ਇਤਿ ਅਰਿਯਜਨਪ੍ਪਸਾਦਨਤ੍ਥਾਯ ਕਤੇ ਧਾਤੁਵਂਸੇ

ਧਾਤੁਨਿਧਾਨਾਧਿਕਾਰੋ ਨਾਮ

ਪਞ੍ਚਮੋ ਪਰਿਚ੍ਛੇਦੋ.

ਇਮਿਨਾ ¶ ਕਾਰਾਪਿਤਵਿਹਾਰਾ ਕਥੇਤਬ੍ਬਾ; ਵਿਹਾਰਦੇਵੀਮਹਾਵਿਹਾਰਂ, ਛਾਤਪਬ੍ਬਤ ਵਿਹਾਰਂ, ਸਮੁਦ੍ਦਵਿਹਾਰਂ, ਚਿਤ੍ਤਲਪਬ੍ਬਤਵਿਹਾਰਂ, ਭਦ੍ਦਪਾਸਾਣਦ੍ਵਾਰਵਿਹਾਰਂ, ਅਚ੍ਛਗਲ੍ਲ ਵਿਹਾਰਂ, ਕੋਲ਼ਮ੍ਬਤਿਸ੍ਸਪਬ੍ਬਤਵਿਹਾਰਂ, ਗਣਵਿਹਾਰਂ, ਕਾਲਕਵਿਹਾਰਂ, ਦੁਕ੍ਖਪਾਲਕ ਵਿਹਾਰਂ, ਉਚ੍ਚਙ੍ਗਣਵਿਹਾਰਂ, ਕੋਟਿਤਿਸ੍ਸਵਿਹਾਰਂ, ਤਸ੍ਸ ਪਨ ਏਕਨਾਮਂ ਕਤ੍ਵਾ ਕਾਰਾਪਿਤੇ ਮਹਾਗਾਮੇ ਤਿਸ੍ਸਮਹਾਵਿਹਾਰਾਦਿਂ ਕਤ੍ਵਾ ਏਕਸਤਅਟ੍ਠਵੀਸਵਿਹਾਰਾਨਿ ਕਤਾਨਿ ਅਹੇਸੁਂ.

ਅਟ੍ਠਵੀਸਏਕਸਤਵਿਹਾਰਞ੍ਚ ਮਹਾਰਹਂ;

ਵਿਹਾਰਦੇਵਿਯਾ ਸਦ੍ਧਿਂ ਕਾਰਾਪੇਸਿ ਮਹਾਯਸੋ.

ਤਤੋ ਪਟ੍ਠਾਯ ਰਾਜਾ ਮਹਾਦਾਨਂ ਦਤ੍ਵਾ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿ.

ਕਤ੍ਵਾਨਿ ਪੁਞ੍ਞਕਮ੍ਮਾਨਿ ਅਨੇਕਾਨਿ ਮਹਾਯਸੋ;

ਅਤ੍ਥਂ ਜਨਸ੍ਸ ਕਤ੍ਵਾਨ ਗਨ੍ਤ੍ਵਾਨ ਤੁਸਿਤਂ ਪੁਰਂ.

ਸੋ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਚੀਰਂ ਭੁਞ੍ਜਿਯ ਨਨ੍ਦਿਤੋ;

ਮਹਾਵੀਭਵਸਮ੍ਪਨ੍ਨੋ ਦੇਵਤਾਨਂ ਪੁਰਕ੍ਖਤੋ.

ਤਮ੍ਪਿ ਸਮ੍ਪਤ੍ਤਿਮੋਹਾਯ ਜੀਵਵਲੋਕੇ ਮਨੋਰਮੇ;

ਲੋਕੁਤ੍ਤਰਂ ਸਿਵਂ ਖੇਮਂ ਇਚ੍ਛਨ੍ਤੋ ਆਗਮਿਸ੍ਸਤਿ.

ਸੋ ਤਤੋ ਚੁਤੋ ਜਮ੍ਬੁਦੀਪੇ ਨਿਬ੍ਬਤ੍ਤਿਤ੍ਵਾ ਮੇਤ੍ਤੇਯ੍ਯ ਭਗਵਤੋ ਪਿਤਾ ਸੁਬ੍ਰਹ੍ਮਾ ਨਾਮ ਭਵਿਸ੍ਸਤਿ. ਵਿਹਾਰਦੇਵੀ ਤਸ੍ਸੇਵ ਮਾਤਾ ਬ੍ਰਹ੍ਮਵਤੀ ਨਾਮ ਬ੍ਰਾਹ੍ਮਣੀ ਭਵਿਸ੍ਸਤਿ. ਅਭਯਗਾਮਣੀਕੁਮਾਰੋ ਤਸ੍ਸੇਵ ਮੇਤ੍ਤੇਯ੍ਯਸ੍ਸ ਭਗਵਤੋ ਪਠਮਗ੍ਗਸਾਵਕੋ ਭਵਿਸ੍ਸਤਿ. ਕਨਿਟ੍ਠੋ ਸਦ੍ਧਾਤਿਸ੍ਸੋ ਦੁਤਿਯਗ੍ਗਸਾਵਕੋ ਭਵਿਸ੍ਸਤਿ.

ਏਤ੍ਤਾਵਤਾ ਨਲਾਟਧਾਤੁ ਸਂਵਣ੍ਣਨਾ ਸਮਤ੍ਤਾ.

ਧਾਤੁਵਂਸੋ ਸਮਤ੍ਤੋ.

ਅਨੇਨ ¶ ਪੁਞ੍ਞਕਮ੍ਮੇਨ ਸਂਸਰਨ੍ਤੋ ਭਵਾਭਵੇ;

ਸਬ੍ਬਤ੍ਥ ਪਣ੍ਡਿਤੋ ਹੋਮੀ ਸਾਰਿਪੁਤ੍ਤੋਵ ਪਞ੍ਞਵਾ.

ਅਰਿਮੇਦਸ੍ਸ ਬੁਦ੍ਧਸ੍ਸ ਪਬ੍ਬਜਿਤ੍ਵਾਨ ਸਾਸਨੇ;

ਨਿਬ੍ਬਾਨਂ ਪਾਪੁਣਿਤ੍ਵਾਨ ਮੁਞ੍ਚੇਮਿ ਭਵਬਨ੍ਧਨਾ.

ਅਨੇਨ ਮੇ ਸਬ੍ਬਭਵਾਭਵੇ’ਹਂ,

ਭਵੇਯ੍ਯਮੇਕਨ੍ਤਪਰਾਨੁਕਮ੍ਪੀ;

ਕੁਲੀ ਬਲੀ ਚੇਵ ਸਤੀ ਮਤੀ ਚ,

ਕਵੀਹਿਸਨ੍ਤੇਹਿ ਸਦਾ ਸਮਙ੍ਗੀ.

ਪਞ੍ਞਾਵਨ੍ਤਾਨਂ ਅਗ੍ਗੋ ਭਵਤੁ.