📜

ਤੇਲਕਟਾਹਗਾਥਾ ¶

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧.

ਲਂਕਿਸ੍ਸਰੋ ਜਯਤੁ ਵਾਰਣਰਾਜਗਾਮੀ

ਭੋਗਿਨ੍ਦਭੋਗ ਰੁਚਿਰਾਯਤ ਪੀਣ ਬਾਹੁ,

ਸਾਧੁਪਚਾਰਨਿਰਤੋ ਗੁਣਸਨ੍ਨਿਵਾਸੋ

ਧਮ੍ਮੇ ਠਿਤੋ ਵੀਗਤਕੋਧਮਦਾਵਲੇਪੋ;

੨.

ਯੋ ਸਬ੍ਬਲੋਕਮਹਿਤੋ ਕਰੁਣਾਧਿਵਾਸੋ

ਮੋਕ੍ਖਾਕਰੋ ਰਵਿਕੁਲਮ੍ਬਰ ਪੁਣ੍ਣ ਚਨ੍ਦੋ,

ਞੇਯ੍ਯੋਦਧਿਂ ਸੁਵਿਪੁਲਂ ਸਕਲਂ ਵਿਬੁਦ੍ਧੋ

ਲੋਕੁਤ੍ਤਮਂ ਨਮਥ ਤਂ ਸਿਰਸਾ ਮੁਨਿਨ੍ਦਂ;

੩.

ਸੋਪਾਨਮਾਲਮਮਲਂ ਤਿਦਸਾਲਯਸ੍ਸ

ਸਂਸਾਰ ਸਾਗਰਸਮੁਤ੍ਤਰਣਾਯ ਸੇਤੁਂ,

ਸਬ੍ਬਾਗਤੀਭਯ ਵਿਵਜ੍ਜਿਤ ਖੇਮ ਮਗ੍ਗਂ

ਧਮ੍ਮਂ ਨਮਸ੍ਸਥ ਸਦਾ ਮੁਨਿਨਾ ਪਣੀਤਂ;

੪. ¶

ਦੇਯ੍ਯਂ ਤਦਪ੍ਪਮਪਿ ਯਤ੍ਥ ਪਸਨ੍ਨ ਚਿਤ੍ਤਾ

ਦਤ੍ਵਾ ਨਰਾ ਫਲਮੁਲ਼ਾਰਤਰਂ ਲਭਨ੍ਤੇ,

ਤਂ ਸਬ੍ਬਦਾ ਦਸਬਲੇਨਪਿ ਸੁਪ੍ਪਸਤ੍ਥਂ

ਸਙ੍ਘਂ ਨਮਸ੍ਸਥ ਸਦਾਮਿਤਪੁਞ੍ਞਖੇਤ੍ਤਂ;

੫.

ਤੇਜੋ ਬਲੇਨ ਮਹਤਾ ਰਤਨਤ੍ਤਯਸ੍ਸ

ਲੋਕਤ੍ਤਯਂ ਸਮਧਿਗਚ੍ਛਤਿ ਯੇਨ ਮੋਕ੍ਖਂ,

ਰਕ੍ਖਾ ਨ ਚਤ੍ਥਿ ਚ ਸਮਾ ਰਤਨਤ੍ਤਯਸ੍ਸ

ਤਸ੍ਮਾ ਸਦਾ ਭਜਥ ਤਂ ਰਤਨਤ੍ਤਯਂ ਭੋ;

੬.

ਲਂਕਿਸ੍ਸਰੋ ਪਰਹਿਤੇਕਰਤੋ ਨਿਰਾਸੋ

ਰਤ੍ਤਿਮ੍ਪਿ ਜਾਗਰਰਤੋ ਕਰੁਣਾਧਿਵਾਸੋ,

ਲੋਕਂ ਵਿਬੋਧਯਤਿ ਲੋਕਹਿਤਾਯ ਕਾਮਂ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੭. ¶

ਸਤ੍ਤੋਪਕਾਰ ਨਿਰਤਾ ਕੁਸਲੇ ਸਹਾਯਾ

ਭੋ ਦੁਲ੍ਲਭਾ ਭੁਵਿ ਨਰਾ ਵਿਹਤਪ੍ਪਮਾਦਾ,

ਲਂਕਾਧਿਪਂ ਗੁਣਧਨਂ ਕੁਸਲੇ ਸਹਾਯਂ

ਆਗਮ੍ਮ ਸਂਚਰਥ ਧਮ੍ਮਮਲਂ ਪਮਾਦਂ;

੮.

ਧਮ੍ਮੋ ਤਿਲੋਕ ਸਰਣੋ ਪਰਮੋ ਰਸਾਨਂ

ਧਮ੍ਮੋ ਮਹਗ੍ਘਰਤਨੋ ਰਤਨੇਸੁ ਲੋਕੇ,

ਧਮ੍ਮੋ ਭਵੇ ਤਿਭਵਦੁਕ੍ਖ ਵਿਨਾਸਹੇਤੁ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੯.

ਨਿਦ੍ਦਂ ਵਿਨੋਦਯਥ ਭਾਵਯਥਪ੍ਪਮੇਯ੍ਯਂ

ਦੁਕ੍ਖਂ ਅਨਿਚ੍ਚਮ੍ਪਿ ਚੇਹ ਅਨਤ੍ਤਤਞ੍ਚ,

ਦੇਹੇ ਰਤਿਂ ਜਹਥ ਜ ਜਜ੍ਜਰਭਾਜਨਾਭੋ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੧੦. ¶

ਓਕਾਸ ਮਜ੍ਜ ਮਮ ਨਤ੍ਥਿ ਸੁਵੇ ਕਰਿਸ੍ਸਂ

ਧਮ੍ਮਂ ਇਤੀਹਲਸਤਾ ਕੁਸਲਪ੍ਪਯੋਗੇ,

ਨਾ’ਲਂ ਤਿਯਦ੍ਧਸੁ ਤਥਾ ਭੁਵਨਤ੍ਤਯੇ ਚ

ਕਾਮਂ ਨ ਚਤ੍ਥਿ ਮਨੁਜੋ ਮਰਣਾ ਪਮੁਤ੍ਤੋ;

੧੧.

ਖਿਤ੍ਤੋ ਯਥਾ ਨਭਸਿ ਕੇਨਚਿਦੇਵ ਲੇਡ੍ਡੁ

ਭੂਮਿਂ ਸਮਾਪਤ੍ਤਿ ਭਾਰਤਯਾ ਖਣੇਨ,

ਜਾਤਤ੍ਤਮੇਵ ਖਲੁ ਕਾਰਣਮੇਕਮਤ੍ਰ

ਲੋਕਂ ਸਦਾ ਨਨੁ ਧੁਵਂ ਮਰਣਾਯ ਗਨ੍ਤੁਂ;

੧੨.

ਕਾਮਂ ਨਰਸ੍ਸ ਪਤਤੋ ਗਿਰਿਮੁਦ੍ਧਨਾਤੋ

ਮਜ੍ਝੇ ਨ ਕਿਞ੍ਚਿ ਭਯਨਿਸ੍ਸਰਣਾਯ ਹੇਤੁ,

ਕਾਮਂ ਵਜਨ੍ਤਿ ਮਰਣਂ ਤਿਭਵੇਸੁ ਸਤ੍ਤਾ

ਭੋਗੇ ਰਤਿਂ ਪਜਹਥਾਪਿ ਚ ਜੀਵਿਤੇ ਚ;

੧੩. ¶

ਕਾਮਂ ਪਤਨ੍ਤਿ ਮਹਿਯਾ ਖਲੁ ਵਸ੍ਸਧਾਰਾ

ਵਿਜ੍ਜੁਲ੍ਲਤਾ ਵਿਤਤਮੇਘ ਮੁਖਾ ਪਮੁਤ੍ਤਾ,

ਏਵਂ ਨਰਾ ਮਰਣਭੀਮ ਪਪਾਤਮਜ੍ਝੇ

ਕਾਮਂ ਪਤਨ੍ਤਿ ਨਹਿ ਕੋਚਿ ਭਵੇਸੁ ਨਿਚ੍ਚੋ;

੧੪.

ਵੇਲਾਤਟੇ ਪਟੁਤਰੋਰੁ ਤਰਂਗਮਾਲਾ

ਨਾਸਂ ਵਜਨ੍ਤਿ ਸਤਤਂ ਸਲਿਲਾਲਯਸ੍ਸ,

ਨਾਸਂ ਤਥਾ ਸਮੁਪਯਨ੍ਤਿ ਨਰਾਮਰਾਨਂ

ਪਾਣਾਨਿ ਦਾਰੁਣਤਰੇ ਮਰਣੋਦਧਿਮ੍ਹਿ;

੧੫.

ਰੁਦ੍ਧੋਪਿ ਸੋ ਰਥਵਰਸ੍ਸਗਜਾਧਿਪੇਹਿ

ਯੋਧੇਹਿ ਚਾਪਿ ਸਬਲੇਹਿ ਚ ਸਾਯੁਧੇਹਿ,

ਲੋਕਂ ਵਿਵਂਚਿਯ ਸਦਾ ਮਰਣੂਸਭੋ ਸੋ

ਕਾਮਂ ਨਿਹਨ੍ਤਿ ਭੁਵਨਤ੍ਤਯ ਸਾਲਿ ਦਣ੍ਡਂ;

੧੬. ¶

ਭੋ ਮਾਰੁਤੇਨ ਮਹਤਾ ਵਿਹਤੋ ਪਦੀਪੋ

ਖਿਪ੍ਪਂ ਵਿਨਾਸ ਮੁਖਮੇਤਿ ਮਹਪ੍ਪਭੋਪਿ,

ਲੋਕੇ ਤਥਾ ਮਰਣਚਣ੍ਡ ਸਮੀਰਣੇਨ

ਖਿਪ੍ਪਂ ਵਿਨਸ੍ਸਤਿ ਨਰਾਯੁਮਹਾ ਪਦੀਪੋ;

੧੭

ਰਾਮਜ੍ਜੁਨਪ੍ਪਭੂਤਿ ਭੂਪਤਿ ਪੁਂਗਵਾ ਚ

ਸੂਰਾ ਪੁਰੇ ਰਣਮੁਖੇ ਵਿਜਿਤਾਰਿ ਸਙ੍ਘਾ,

ਤੇਪੀਹ ਚਣ੍ਡ ਮਰਣੋਘ ਨਿਮੁਗ੍ਗਦੇਹਾ

ਨਾਸਂ ਗਤਾ ਜਗਤਿ ਕੇ ਮਰਣਾ ਪਮੁਤ੍ਤਾ?

੧੮.

ਲਕ੍ਖੀ ਚ ਸਾਗਰਪਟਾ ਸਧਰਾਧਰਾ ਚ

ਸਮ੍ਪਤ੍ਤਿਯੋ ਚ ਵਿਵਿਧਾ ਅਪਿ ਰੂਪਸੋਭਾ,

ਸਬ੍ਬਾ ਚ ਤਾ ਅਪਿ ਚ ਮਿਤ੍ਤਸੁਤਾ ਚ ਦਾਰਾ

ਕੇ ਚਾਪਿ ਕਂ ਅਨੁਗਤਾ ਮਰਣਂ ਵਜਨ੍ਤਂ?

੧੯. ¶

ਬ੍ਰਹ੍ਮਾਸੁਰਾਸੁਰਗਣਾ ਚ ਮਹਾਨੁਭਾਵਾ

ਗਨ੍ਧਬ੍ਬਕਿਨ੍ਨਰਮਹੋਰਗਰਕ੍ਖਸਾ ਚ,

ਤੇ ਚਾ ਪਰੇ ਚ ਮਰਣਗ੍ਗਿਸਿਖਾਯ ਸਬ੍ਬੇ

ਅਨ੍ਤੇ ਪਤਨ੍ਤਿ ਸਲਭਾ ਇਵ ਖੀਣਪੁਞ੍ਞਾ;

੨੦.

ਯੇ ਸਾਰਿਪੁਤ੍ਤਪਮੁਖਾ ਮੁਨਿਸਾਵਕਾ ਚ

ਸੁਦ੍ਧਾ ਸਦਾਸਵਨੁਦਾ ਪਰਮਿਦ੍ਧਿਪਤ੍ਤਾ,

ਤੇ ਚਾਪਿ ਮਚ੍ਚੁਵਲ਼ਭਾ ਮੁਖ ਸਨ੍ਨਿਮੁਗ੍ਗਾ

ਦੀਪਾਨਿਵਾਨਲਹਤਾ ਖਯਤਂ ਉਪੇਤਾ;

੨੧.

ਬੁਦ੍ਧਾਪਿ ਬੁਦ੍ਧਕਮਲਾਮਲਚਾਰੁਨੇਤ੍ਤਾ

ਬਤ੍ਤਿਂਸਲਕ੍ਖਣ ਵਿਰਾਜਿਤ ਰੂਪਸੋਭਾ,

ਸਬ੍ਬਾਸਚਕ੍ਖਯਕਰਾਪਿ ਚ ਲੋਕਨਾਥਾ

ਸਮ੍ਮਦ੍ਦਿਤਾ ਮਰਣਮਤ੍ਤਮਹਾਗਜੇਨ;

੨੨. ¶

ਰੋਗਾਤੁਰੇਸੁ ਕਰੁਣਾ ਨ ਜਰਾਤੁਰੇਸੁ

ਖਿਡ੍ਡਾਪਰੇਸੁ ਸੁਕੁਮਾਰਕੁਮਾਰਕੇਸੁ,

ਲੋਕਂ ਸਦਾ ਹਨਤਿ ਮਚ੍ਚੁ ਮਹਾਗਜਿਨ੍ਦੋ

ਦਵਾਨਲੋ ਵਨਮਿਵਾਵਰਤਂ ਅਸੇਸਂ;

੨੩.

ਆਪੁਣ੍ਣਤਾ ਨ ਸਲਿਲੇ ਨ ਜਲਾਸਯਸ੍ਸ

ਕਟ੍ਠਸ੍ਸ ਚਾਪਿ ਬਹੁਤਾ ਨ ਹੁਤਾਸਨਸ੍ਸ,

ਭੁਤ੍ਵਾਨ ਸੋ ਤਿਭੂਵਨਮ੍ਪਿ ਤਥਾ ਅਸੇਸਂ

ਭੋ ਨਿਦ੍ਦਯੋ ਨ ਖਲੁ ਪੀਤਿਮੁਪੇਤਿ ਮਚ੍ਚੁ;

੨੪.

ਭੋ ਮੋਹ ਮੋਹਿਤਤਯਾ ਵਿਵਸੋ ਅਧਞ੍ਞੋ

ਲੋਕੋ ਪਤਤ੍ਯਪਿਪਿ ਮਚ੍ਚੁਮੁਖੇ ਸੁਭੀਮੇ,

ਭੋਗੇ ਰਤਿਂ ਸਮੁਪਯਾਤਿ ਨਿਹੀਨਪਞ੍ਞੋ

ਦੋਲਾ ਤਰਙ੍ਗਚਪਲੇ ਸੁਪਿਨੋਪਮੇਯ੍ਯੇ;

੨੫. ¶

ਏਕੋਪਿ ਮਚ੍ਚੁਰਭਿਹਨ੍ਤੁਮਲਂ ਤਿਲੋਕਂ

ਕਿਂ ਨਿਦ੍ਦਯਾ ਅਪਿ ਜਰਾਮਰਣਾਨੁਯਾਯੀ,

ਕੋ ਵਾ ਕਰੇਯ੍ਯ ਵਿਭਸੁਵੇਸੁ ਚ ਜੀਵਿਤਾਸਂ

ਜਾਤੋ ਨਰੋ ਸੁਪਿਨ ਸਂਗਮ ਸਨ੍ਨਿਭੇਸੁ;

੨੬.

ਨਿਚ੍ਚਾਤੁਰਂ ਜਗਦਿਦਂ ਸਭਯਂ ਸਸੋਕਂ

ਦਿਸ੍ਵਾ ਚ ਕੋਧਮਦਮੋਹਜਰਾਭਿਭੂਤਂ,

ਉਬ੍ਬੇਗਮਤ੍ਤਮਪਿ ਯਸ੍ਸ ਨ ਵਿਜ੍ਜਤੀ ਚੇ

ਸੋ ਦਾਰੁਣੋਨ ਮਰਣਂ ਵਤ ਤਂ ਧਿਰਤ੍ਥੁ!

ਭੋ ਭੋ ਨ ਪਸ੍ਸਥ ਜਰਾਸਿਧਰਞ੍ਹਿ ਮਚ੍ਚੁ

ਮਾਹਞ੍ਞਮਾਨਮਖਿਲਂ ਸਤਤਂ ਤਿਲੋਕਂ,

ਕਿਂ ਨਿਦ੍ਦਯਾ ਨਯਥ ਵੀਤਭਯਾ ਤਿਯਾਮਂ

ਧਮ੍ਮਂ ਸਦਾ’ਸਵਨੁਦਂ ਚਰਥ’ਪ੍ਪਮਤ੍ਤਾ;

੨੮. ¶

ਭਾਵੇਥ ਭੋ ਮਰਣਮਾਰਵਿਵਜ੍ਜਨਾਯ

ਲੋਕੇ ਸਦਾ ਮਰਣ ਸਞ੍ਞਮਿਮਂ ਯਤਤ੍ਤਾ,

ਏਵਞ੍ਹਿ ਭਾਵਨਰਤਸ੍ਸ ਨਰਸ੍ਸ ਤਸ੍ਸ

ਤਣ੍ਹਾ ਪਹੀਯਤਿ ਸਰੀਰਗਤਾ ਅਸੇਸਾ;

੨੯.

ਰੂਪਂ ਜਰਾ ਪਿਯਤਰਂ ਮਲਿਨੀਕਰੋਤਿ

ਸਬ੍ਬਂ ਬਲਂ ਹਰਤਿ ਅਤ੍ਤਨਿ ਘੋਰਰੋਗੋ,

ਨਾਨੂਪਭੋਗ ਪਰਿਰਕ੍ਖਿਤ ਮਤ੍ਤਭਾਵਂ

ਭੋ ਮਚ੍ਚੁ ਸਂਹਰਤਿ ਕਿਂ ਫਲਮਤ੍ਤਭਾਵੇ?

੩੦.

ਕਮ੍ਮਾਨਿਲਾਪਹਤਰੋਗਤਰਂਗਭਂਗੇ

ਸਂਸਾਰ ਸਾਗਰ ਮੁਖੇ ਵਿਤਤੇ ਵਿਪਨ੍ਨਾ,

ਮਾ ਮਾਪਮਾਦਮਕਰਿਤ੍ਥ ਕਰੋਥ ਮੋਕ੍ਖਂ

ਦੁਕ੍ਖੋਦਯੋ ਨਨੁ ਪਮਾਦਮਯਂ ਨਰਾਨਂ;

੩੧. ¶

ਭੋਗਾ ਚ ਮਿਤ੍ਤਸੁਤਪੋਰਿਸ ਬਨ੍ਧਵਾ ਚ

ਨਾਰੀ ਚ ਜੀਵਿਤਸਮਾ ਅਪਿ ਖੇਤ੍ਤਵਤ੍ਥੁ,

ਸਬ੍ਬਾਨਿ ਤਾਨਿ ਪਰਲੋਕਮਿਤੋ ਵਜਨ੍ਤਂ

ਨਾਨੁਬ੍ਬਜਨ੍ਤਿ ਕੁਸਲਾਕੁਸਲਂਵ ਲੋਕੇ;

੩੨.

ਭੋ ਵਿਜ੍ਜੁਚਂਚਲਤਰੇ ਭਵਸਾਗਰਮ੍ਹਿ

ਖਿਤ੍ਤਾ ਪੁਰਾ ਕਤਮਹਾਪਵਨੇਨ ਤੇਨ,

ਕਾਮਂ ਵਿਭਿਜ੍ਜਤਿ ਖਣੇਨ ਸਰੀਰਨਾਵਾ

ਹਤ੍ਥੇ ਕਰੋਥ ਪਰਮਂ ਗੁਣਹਤ੍ਥਸਾਰਂ;

੩੩.

ਨਿਚ੍ਚਂ ਵਿਭਿਜ੍ਜਤਿਹ ਆਮਕ ਭਾਜਨਂਵ

ਸਂਰਕ੍ਖਿਤੋਪਿ ਬਹੁਧਾ ਇਹ ਅਤ੍ਤਭਾਵੋ,

ਧਮ੍ਮਂ ਸਮਾਚਰਥ ਸਗ੍ਗਪਤਿਪ੍ਪਤਿਟ੍ਠਂ

ਧਮ੍ਮੋ ਸੁਚਿਣ੍ਣਮਿਹਮੇਵ ਫਲਂ ਦਦਾਤਿ;

੩੪. ¶

ਰਨ੍ਤ੍ਵਾ ਸਦਾ ਪਿਯਤਰੇ ਦਿਵਿ ਦੇਵਰਜ੍ਜੇ

ਨਮ੍ਹਾ ਚਵਨ੍ਤਿ ਵਿਬੁਧਾ ਅਪਿ ਖੀਣਪੁਞ੍ਞਾ,

ਸਬ੍ਬਂ ਸੁਖਂ ਦਿਵਿ ਭੁਵੀਹ ਵਿਯੋਗਨਿਟ੍ਠਂ

ਕੋ ਪਞ੍ਞਵਾ ਭਵਸੁਖੇਸੁ ਰਤਿਂ ਕਰੇਯ੍ਯ?

੩੫.

ਬੁਦ੍ਧੋ ਸਸਾਵਕਗਣੋ ਜਗਦੇਕਨਾਥੋ

ਤਾਰਾਵਲੀਪਰਿਵੁਤੋਪਿ ਚ ਪੁਣ੍ਣਚਨ੍ਦੋ,

ਇਨ੍ਦੋਪਿ ਦੇਵਮਕੁਟਂਕਿਤ ਪਾਦਕਞ੍ਜੋ

ਕੋ ਫੇਣਪਿਣ੍ਡ-ਨ-ਸਮੋ ਤਿਭਵੇਸੁ ਜਾਤੋ?

੩੬.

ਲੀਲਾਵਤਂਸਮਪਿ ਯੋਬ੍ਬਨ ਰੂਪਸੋਭਂ

ਅਤ੍ਤੂਪਮਂ ਪਿਯਜਨੇਨ ਚ ਸਮ੍ਪਯੋਗਂ,

ਦਿਸ੍ਵਾਪਿ ਵਿਜ੍ਜੁਚਪਲਂ ਕੁਰੁਤੇ ਪਮਾਦਂ

ਭੋ ਮੋਹਮੋਹਿਤਜਨੋ ਭਵਰਾਗਰਤ੍ਤੋ;

੩੭. ¶

ਪੁਤ੍ਤੋ ਪਿਤਾ ਭਵਤਿ ਮਾਤੁ ਪਤੀਹ ਪੁਤ੍ਤੋ

ਨਾਰੀ ਕਦਾਚਿ ਜਨਨੀ ਚ ਪਿਤਾ ਚ ਪੁਤ੍ਤੋ,

ਏਵਂ ਸਦਾ ਵਿਪਰਿਵਤ੍ਤਤਿ ਜੀਵਲੋਕੋ

ਚਿਤ੍ਤੇ ਸਦਾਤਿਚਪਲੇ ਖਲੁ ਜਾਤਿਰਙ੍ਗੇ;

੩੮.

ਰਨ੍ਤ੍ਵਾ ਪੁਰੇ ਵਿਵਿਧਫੁਲ੍ਲਲਤਾਕੁਲੇਹਿ

ਦੇਵਾਪਿ ਨਨ੍ਦਨਵਨੇ ਸੁਰਸੁਨ੍ਦਰੀਹਿ,

ਤੇ ਵੇ’ਕਦਾ ਵਿਤਤਕਣ੍ਟਕਸਂਕਟੇਸੁ

ਭੋ ਕੋਟਿਸਿਮ੍ਬਲਿਵਨੇਸੁ ਫੁਸਨ੍ਤਿ ਦੁਕ੍ਖਂ;

੩੯.

ਭੁਤ੍ਵਾ ਸੁਧਨ੍ਨਮਪਿ ਕਞ੍ਚਨਭਾਜਨੇਸੁ

ਸਗ੍ਗੇ ਪੁਰੇ ਸੁਰਵਰਾ ਪਰਮਿਦ੍ਧਿਪਤ੍ਤਾ,

ਤੇ ਚਾਪਿ ਪਜ੍ਜਲਿਤਲੋਹਗੁਲਂ ਗਿਲਨ੍ਤਿ

ਕਾਮਂ ਕਦਾਚਿ ਨਰਕਾਲਯ ਵਾਸਭੂਤਾ;

੪੦. ¶

ਭੁਤ੍ਵਾ ਨਰਿਸ੍ਸਰਵਰਾ ਚ ਮਹਿਂ ਅਸੇਸਂ

ਦੇਵਾਧਿਪਾ ਚ ਦਿਵਿ ਦਿਬ੍ਬਸੁਖਂ ਸੁਰਮ੍ਮਂ,

ਵਾਸਂ ਕਦਾਚਿ ਖੁਰਸਞ੍ਚਿਤਭੂਤਲੇਸੁ

ਤੇ ਵਾ ਮਹਾਰਥਗਣਾਨੁਗਤਾ ਦਿਵੀਹ;

੪੧.

ਦੇਵਙ੍ਗਨਾ ਲਲਿਤਭਿਨ੍ਨਤਰਙ੍ਗਮਾਲੇ

ਰਙ੍ਗੇ ਮਹਿਸ੍ਸਰਜਟਾਮਕੁਟਾਨੁਯਾਤੇ,

ਰਨ੍ਤ੍ਵਾ ਪੁਰੇ ਸੁਰਵਰਾ ਪਮਦਾਸਹਾਯਾ

ਤੇ ਚਾਪਿ ਘੋਰਤਰਵੇਤਰਣਿਂ ਪਤਨ੍ਤਿ;

੪੨.

ਫੁਲ੍ਲਾਨਿ ਪਲ੍ਲਵਲਤਾਫਲਸਂਕੁਲਾਨਿ

ਰਮ੍ਮਾਨਿ ਨਨ੍ਦਨਵਨਾਨਿ ਮਨੋਰਮਾਨਿ,

ਦਿਬ੍ਬਚ੍ਛਰਾਲਲਿਤਪੁਣ੍ਣਦਰੀਮੁਖਾਨਿ

ਕੇਲਾਸਮੇਰੁਸਿਖਰਾਨਿ ਚ ਯਨ੍ਤਿ ਨਾਸਂ;

੪੩. ¶

ਦੋਲਾ’ਨਿਲਾ’ਨਲਤਰਂਗਸਮਾ ਹਿ ਭੋਗਾ

ਵਿਜ੍ਜੁਪ੍ਪਭਾਤਿਚਪਲਾਨਿ ਚ ਜੀਵਿਤਾਨਿ,

ਮਾਯਾਮਰੀਚਿਜਲਸੋਮਸਮਂ ਸਰੀਰਂ

ਕੋ ਜੀਵਿਤੇ ਚ ਵਿਭਵੇ ਚ ਕਰੇਯ੍ਯ ਰਾਗਂ?

੪੪.

ਕਿਂ ਦੁਕ੍ਖਮਤ੍ਥਿ ਨ ਭਵੇਸੁ ਚ ਦਾਰੁਣੇਸੁ

ਸਤ੍ਤੋਪਿ ਤਸ੍ਸ ਵਿਵਿਧਸ੍ਸ ਨ ਭਾਜਨੋ ਕੋ,

ਜਾਤੋ ਯਥਾ ਮਰਣਰੋਗਜਰਾਭਿਭੂਤੋ

ਕੋ ਸਜ੍ਜਨੋ ਭਵਰਤਿਂ ਪਿਹਯੇਯ੍ਯ’ਬਾਲੋ?

੪੫.

ਕੇ ਵਾਪਿ ਪਜ੍ਜਲਿਤਲੋਹਗੁਲਂ ਗਿਲਨ੍ਤਿ

ਸਕ੍ਕਾ ਕਥਞ੍ਚਿਦਪਿ ਪਾਣਿਤਲੇਨ ਭੀਮਂ,

ਦੁਕ੍ਖੋਦਯਂ ਅਸੁਚਿਨਿਸ੍ਸਵਨਂ ਅਨਨ੍ਤਂ

ਕੋ ਕਾਮਯੇਥ ਖਲੁ ਦੇਹਮਿਮਂ ਅਬਾਲੋ?

੪੬. ¶

ਲੋਕੇ ਨ ਮਚ੍ਚੁਸਮਮਤ੍ਥਿ ਭਯਂ ਨਰਾਨਂ

ਨ ਵ੍ਯਾਧਿਦੁਕ੍ਖਸਮਮਤ੍ਥਿ ਚ ਕਿਂਚਿ ਦੁਕ੍ਖਂ,

ਏਵਂ ਵਿਰੂਪਕਰਣਂ ਨ ਜਰਾਸਮਾਨਂ

ਮੋਹੇਨ ਭੋ ਰਤਿਮੁਪੇਤਿ ਤਥਾਪਿ ਦੇਹੇ;

੪੭.

ਨਿਸ੍ਸਾਰਤੋ ਨਲਕਲੀਕਦਲੀਸਮਾਨਂ

ਅਤ੍ਤਾਨਮੇਵ ਪਰਿਹਞ੍ਞਤਿ ਅਤ੍ਤਹੇਤੁ,

ਸਮ੍ਪੋਸਿਤੋਪਿ ਕੁਸਹਾਯ ਇਵਾਕਤਞ੍ਞੂ

ਕਾਯੋ ਨ ਯਸ੍ਸ ਅਨੁਗਚ੍ਛਤਿ ਕਾਲਕੇਰਾ;

੪੮.

ਤਂ ਫੇਣਪਿਣ੍ਡਸਦਿਸਂ ਵਿਸਸੂਲਕਪ੍ਪਂ

ਤੋਯਾ’ਨਿਲਾ’ਨਲਮਹੀਉਰਗਾਧਿਵਾਸਂ,

ਜਿਣ੍ਣਾਲਯਂਵ ਪਰਿਦੁਬ੍ਬਲਮਤ੍ਤਭਾਵਂ

ਦਿਸ੍ਵਾ ਨਰੋ ਕਥਮੁਪੇਤਿ ਰਤਿਂ ਸਪਞ੍ਞੋ?

੪੯. ¶

ਆਯੁਕ੍ਖਯਂ ਸਮੁਪਯਾਤਿ ਖਣੇ ਖਣੇਪਿ

ਅਨ੍ਵੇਤਿ ਮਚ੍ਚੁ ਹਨਨਾਯ ਜਰਾਸਿਪਾਣੀ,

ਕਾਲਂ ਤਥਾ ਨ ਪਰਿਵਤ੍ਤਤਿ ਤਂ ਅਤੀਤਂ

ਦੁਕ੍ਖਂ ਇਦਂ ਨਨੁ ਭਵੇਸੁ ਅਚਿਨ੍ਤਨੀਯਂ?

੫੦.

ਅਪ੍ਪਾਯੁਕਸ੍ਸ ਮਰਣਂ ਸੁਲਭਂ ਭਵੇਸੁ

ਦੀਘਾਯੁਕਸ੍ਸ ਚ ਜਰਾ ਵ੍ਯਸਨਂ ਚ’ਨੇਕਂ,

ਏਵਂ ਭਵੇ ਉਭਯਤੋਪਿ ਚ ਦੁਕ੍ਖਮੇਵ

ਧਮ੍ਮਂ ਸਮਾਚਰਥ ਦੁਕ੍ਖਵਿਨਾਸਨਾਯ;

੫੧.

ਦੁਕ੍ਖਗ੍ਗਿਨਾ ਸੁਮਹਤਾ ਪਰਿਪੀਲ਼ਿਤੇਸੁ

ਲੋਕਤ੍ਤਯਸ੍ਸ ਵਸਤੋ ਭਵਵਾਰਕੇਸੁ,

ਸਬ੍ਬਤ੍ਤਤਾ ਸੁਚਰਿਤਸ੍ਸ ਪਮਾਦਕਾਲੋ

ਭੋ ਭੋ ਨ ਹੋਤਿ ਪਰਮਂ ਕੁਸਲਂ ਚਿਣਾਥ;

੫੨. ¶

ਅਪ੍ਪਂ ਸੁਖਂ ਜਲਲਵਂ ਵਿਯ ਭੋ ਤਿਣਗ੍ਗੇ

ਦੁਕ੍ਖਨ੍ਤੁ ਸਾਗਰਜਲਂ ਵਿਯ ਸਬ੍ਬਲੋਕੇ,

ਸਂਕਪ੍ਪਨਾ ਤਦਪਿ ਹੋਤਿ ਸਭਾਵਤੋ ਹਿ

ਸਬ੍ਬਂ ਤਿਲੋਕਮਪਿ ਕੇਵਲਦੁਕ੍ਖਮੇਵ;

੫੩.

ਕਾਯੋ ਨ ਯਸ੍ਸ ਅਨੁਗਚ੍ਛਤਿ ਕਾਯਹੇਤੁ

ਬਾਲੋ ਅਨੇਕਵਿਧਮਾਚਰਤੀਹ ਦੁਕ੍ਖਂ,

ਕਾਯੋ ਸਦਾ ਕਲਿ ਮਲਾਕਲਿਲਞ੍ਹਿ ਲੋਕੇ

ਕਾਯੇ ਰਤੋ’ਨਵਰਤਂ ਵ੍ਯਸਨਂ ਪਰੇਤਿ

੫੪.

ਮੀਲ਼੍ਹਾਕਰਂ ਕਲਿਮਲਾਕਰਮਾਮਗਨ੍ਧਂ

ਸੂਲ਼ਾਸਿਸਲ੍ਲਵਿਸਪਨ੍ਨਗਰੋਗਭੂਤਂ,

ਦੇਹਂ ਵਿਪਸ੍ਸਥ ਜਰਾਮਰਣਾਧਿਵਾਸਂ

ਤੁਚ੍ਛਂ ਸਦਾ ਵਿਗਤਸਾਰਮਿਮਂ ਵਿਨਿਨ੍ਦ੍ਯਂ;

੫੫. ¶

ਦੁਕ੍ਖਂ ਅਨਿਚ੍ਚਮਸੁਭਂ ਵਤ ਅਤ੍ਤਭਾਵਂ

ਮਾ ਸਂਕਿਲੇਸਯ ਨ ਵਿਜ੍ਜਤਿ ਜਾਤੁ ਨਿਚ੍ਚੋ,

ਅਮ੍ਭੋ ਨ ਵਿਜ੍ਜਤਿ ਹਿ ਅਪ੍ਪਮਪੀਹ ਸਾਰਂ

ਸਾਰਂ ਸਮਾਚਰਥ ਧਮ੍ਮਮਲਂ ਪਮਾਦਂ;

੫੬.

ਮਾਯਾਮਰੀਚਿਕਦਲੀਨਲਫੇਣਪੁਞ੍ਜ-

ਗਂਗਾਤਰਙ੍ਗਜਲਬੁਬ੍ਬੁਲਸਨ੍ਨਿਭੇਸੁ,

ਖਨ੍ਧੇਸੁ ਪਞ੍ਚਸੁ ਛਲ਼ਾਯਤਨੇਸੁ ਤੇਸੁ

ਅਤ੍ਤਾ ਨ ਵਿਜ੍ਜਤਿ ਹਿ ਕੋ ਨ ਵਦੇਯ੍ਯ’ਬਾਲੋ?

੫੭.

ਵਞ੍ਝਾਸੁਤੋ ਸਸਵਿਸਾਣਮਯੇ ਰਥੇ ਤੁ,

ਧਾਵੇਯ੍ਯ ਚੇ ਚਿਰਤਰਂ ਸਧੁਰਂ ਗਹੇਤ੍ਵਾ,

ਦੀਪਚ੍ਚਿਮਾਲਮਿਵ ਤਂ ਖਣਭਙ੍ਗਭੂਤਂ

ਅਤ੍ਤਾਤਿ ਦੁਬ੍ਬਲਤਰਨ੍ਤੁ ਵਦੇਯ੍ਯ ਦੇਹਂ;

੫੮. ¶

ਬਾਲੋ ਯਥਾ ਸਲਿਲਬੁਬ੍ਬੁਲਭਾਜਨੇਨ

ਆਕਣ੍ਠਤੋ ਵਤ ਪਿਬੇਯ੍ਯ ਮਰੀਚਿਤੋਯਂ,

ਅਤ੍ਤਾਨਿ ਸਾਰਰਹਿਤਂ ਕਦਲੀਸਮਾਨਂ

ਮੋਹਾ ਭਣੇਯ੍ਯ ਖਲੁ ਦੇਹਮਿਮਂ ਅਨਤ੍ਤਂ;

੫੯.

ਯੋ’ਦੁਮ੍ਬਰਸ੍ਸ ਕੁਸੁਮੇਨ ਮਰੀਚਿਤੋਯਂ

ਵਾਸਂ ਯਦਿਚ੍ਛਤਿ ਸ ਖੇਦਮੁਪੇਤਿ ਬਾਲੋ,

ਅਤ੍ਤਾਨਮੇਵ ਪਰਿਹਞ੍ਞਤਿ ਅਤ੍ਤਹੇਤੁ

ਅਤ੍ਤਾ ਨ ਵਿਜ੍ਜਤਿ ਕਦਾਚਿਦਪੀਹ ਦੇਹੇ;

੬੦.

ਪੋਸੋ ਯਥਾ ਹਿ ਕਦਲੀ ਸੁਵਿਨਿਬ੍ਭੁਜਨ੍ਤੋ

ਸਾਰਂ ਤਦਪ੍ਪਮ੍ਪਿ ਨੋਪਲਭੇਯ੍ਯ ਕਾਮਂ,

ਖਨ੍ਧੇਸੁ ਪਂਚਸੁ ਛਲ਼ਾਯਤਨੇਸੁ ਤੇਸੁ

ਸੁਞ੍ਞੇਸੁ ਕਿਞ੍ਚਿਦਪਿ ਨੋਪਲਭੇਯ੍ਯ ਸਾਰਂ;

੬੧. ¶

ਸੁਤ੍ਤਂ ਵਿਨਾ ਨ ਪਟਭਾਵਮਿਹਤ੍ਥਿ ਕਿਂਚਿ

ਦੇਹਂ ਵਿਨਾ ਨ ਖਲੁ ਕੋਚਿ ਮਿਹਤ੍ਥਿ ਸਤ੍ਤੋ,

ਦੇਹੋ ਸਭਾਵਰਹਿਤੋ ਖਣਭਂਗਯੁਤ੍ਤੋ,

ਕੋ ਅਤ੍ਤਹੇਤੁ ਅਪਰੋ ਭੁਵਿ ਵਿਜ੍ਜਤੀਹ?

੬੨.

ਦਿਸ੍ਵਾ ਮਰੀਚਿਸਲਿਲਞ੍ਹਿ ਸੁਦੂਰਤੋ ਭੋ

ਬਾਲੋ ਮਿਗੋ ਸਮੁਪਧਾਵਤਿ ਤੋਯਸਞ੍ਞੀ,

ਏਵਂ ਸਭਾਵਰਹਿਤੇ ਵਿਪਰੀਤਸਿਦ੍ਧੇ

ਦੇਹੇ ਪਰੇਤਿ ਪਰਿਕਪ੍ਪਨਯਾ ਹਿ ਰਾਗਂ;

੬੩.

ਦੇਹੇ ਸਭਾਵਰਹਿਤੇ ਪਰਿਕਪ੍ਪਸਿਦ੍ਧੇ

ਅਤ੍ਤਾ ਨ ਵਿਜ੍ਜਤਿ ਹਿ ਵਿਜ੍ਜੁਮਿਵਨ੍ਤਲਿਕ੍ਖੇ,

ਭਾਵੇਥ ਭਾਵਨਰਤਾ ਵਿਗਤਪ੍ਪਮਾਦਾ

ਸਬ੍ਬਾਸਵਪ੍ਪਹਨਨਾਯ ਅਨਤ੍ਤਸਞ੍ਞਂ;

੬੪. ¶

ਲਾਲਾਕਰੀਸਰੁਧਿਰਸ੍ਸੁਵਸਾਨੁਲਿਤ੍ਤਂ

ਦੇਹਂ ਇਮਂ ਕਲਿਮਲਾਕਲਿਲਂ ਅਸਾਰਂ,

ਸਤ੍ਤਾ ਸਦਾ ਪਰਿਹਰਨ੍ਤਿ ਜਿਗੁਚ੍ਛਨੀਯਂ

ਨਾਨਾਸੁਚੀਹਿ ਪਰਿਪੁਣ੍ਣਘਟਂ ਯਥੇਵ;

੬੫.

ਣਹਾਤ੍ਵਾ ਜਲਞ੍ਹਿ ਸਕਲਂ ਚਤੁਸਾਗਰਸ੍ਸ

ਮੇਰੁਪ੍ਪਮਾਣਮਪਿ ਗਨ੍ਧਮਨੁਤ੍ਤਰਞ੍ਚ,

ਪਪ੍ਪੋਤਿ ਨੇਵ ਮਨੁਜੋ ਹਿ ਸੁਚਿਂ ਕਦਾਚਿ

ਕਿਂ ਭੋ ਵਿਪਸ੍ਸਥ ਗੁਣਂ ਕਿਮੁ ਅਤ੍ਤਭਾਵੇ?

੬੬.

ਦੇਹੋ ਸ ਏਵ ਵਿਵਿਧਾਸੁਚਿਸਨ੍ਨਿਧਾਨੋ

ਦੇਹੋ ਸ ਏਵ ਵਧਬਨ੍ਧਨਰੋਗਭੂਤੋ,

ਦੇਹੋ ਸ ਏਵ ਨਵਧਾ ਪਰਿਭਿਨ੍ਨਗਣ੍ਡੋ

ਦੇਹਂ ਵਿਨਾ ਭਯਕਰਂ ਨ ਸੁਸਾਨਮਤ੍ਥਿ;

੬੭. ¶

ਅਨ੍ਤੋਗਤਂ ਯਦਿਵ ਮੁਤ੍ਤਕਰੀਸਭਾਗੋ

ਦੇਹਾ ਬਹਿਂ ਅਤਿਚਰੇਯ੍ਯ ਵਿਨਿਕ੍ਖਮਿਤ੍ਵਾ,

ਮਾਤਾ ਪਿਤਾ ਵਿਕਰੁਣਾ ਚ ਵਿਨਟ੍ਠਪੇਮਾ

ਕਾਮਂ ਭਵੇਯ੍ਯੁ ਕਿਮੁ ਬਨ੍ਧੁਸੁਤਾ ਚ ਦਾਰਾ?

੬੮.

ਦੇਹਂ ਯਥਾ ਨਵਮੁਖਂ ਕਿਮਿਸਙ੍ਘਗੇਹਂ

ਮਂਸਟ੍ਠਿਸੇਦਰੁਧਿਰਾਕਲਿਲਂ ਵਿਗਨ੍ਧਂ,

ਪੋਸੇਨ੍ਤਿ ਯੇ ਵਿਵਿਧਪਾਪਮਿਹਾਚਰਿਤ੍ਵਾ

ਤੇ ਮੋਹਿਤਾ ਮਰਣਧਮ੍ਮਮਹੋ ਵਤੇਵਂ!

੬੯.

ਗਣ੍ਡੂਪਮੇ ਵਿਵਿਧਰੋਗ ਨਿਵਾਸਭੂਤੇ

ਕਾਯੇ ਸਦਾ ਰੁਧਿਰਮੁਤ੍ਤਕਰੀਸਪੁਣ੍ਣੇ,

ਯੋ ਏਤ੍ਥ ਨਨ੍ਦਤਿ ਨਰੋ ਸਸਿਗਾਲਭਕ੍ਖੇ

ਕਾਮਞ੍ਹਿ ਸੋਚਤਿ ਪਰਤ੍ਥ ਸ ਬਾਲਬੁਦ੍ਧਿ;

੭੦. ¶

ਭੋ ਫੇਣਪਿਣ੍ਡਸਦਿਸੋ ਵਿਯ ਸਾਰਹੀਨੋ

ਮੀਲ਼੍ਹਾਲਯੋ ਵਿਯ ਸਦਾ ਪਟਿਕੂਲਗਨ੍ਧੋ,

ਆਸੀਵਿਸਾਲਯਨਿਭੋ ਸਭਯੋ ਸਦੁਕ੍ਖੋ

ਦੇਹੋ ਸਦਾ ਸਵਤਿ ਲੋਣਘਟੋਵ ਭਿਨ੍ਨੋ;

੭੧.

ਜਾਤਂ ਯਥਾ ਨ ਕਮਲਂ ਭੁਵਿ ਨਿਨ੍ਦਨੀਯਂ

ਪਙ੍ਕੇਸੁ ਭੋ ਅਸੁਚਿਤੋਯ ਸਮਾਕੁਲੇਸੁ,

ਜਾਤਂ ਤਥਾ ਪਰਹਿਤਮ੍ਪਿ ਚ ਦੇਹਭੂਤਂ

ਤਂ ਨਿਨ੍ਦਨੀਯਮਿਹ ਜਾਤੁ ਨ ਹੋਤਿ ਲੋਕੇ;

੭੨.

ਦ੍ਵਤ੍ਤਿਂਸਭਾਗਪਰਿਪੂਰਤਰੋ ਵਿਸੇਸੋ

ਕਾਯੋ ਯਥਾ ਹਿ ਨਰਨਾਰਿ ਗਣਸ੍ਸ ਲੋਕੇ,

ਕਾਯੇਸੁ ਕਿਂ ਫਲਮਿਹਤ੍ਥਿ ਚ ਪਣ੍ਡਿਤਾਨਂ

ਕਾਮਂ ਤਦੇਵ ਨਨੁ ਹੋਤਿ ਪਰੋਪਕਾਰਂ;

੭੩. ¶

ਪੋਸੋਨ ਪਣ੍ਡਿਤਤਰੇਨ ਤਥਾਪਿ ਦੇਹੋ

ਸਬ੍ਬਤ੍ਤਨਾ ਚਿਰਤਰਂ ਪਰਿਪਾਲਨੀਯੋ,

ਧਮ੍ਮਂ ਚਰੇਯ੍ਯ ਸੁਚਿਰਂ ਖਲੁ ਜੀਵਮਾਨੋ

ਧਮ੍ਮੇ ਹਵੇ ਮਣਿਵਰੋ ਇਵ ਕਾਮਦੋ ਭੋ

੭੪.

ਖੀਰੇ ਯਥਾ ਸੁਪਰਿਭਾਵਿਤਮੋਸਧਮ੍ਹਿ

ਸ੍ਨੇਹੇਨ ਓਸਧਬਲਂ ਪਰਿਭਾਸਤੇਵ,

ਧਮ੍ਮੋ ਤਥਾ ਇਹ ਸਮਾਚਰਿਤੋ ਹਿ ਲੋਕੇ

ਛਾਯਾਵ ਯਾਤਿ ਪਰਲੋਕ ਮਿਤੋ ਵਜਨ੍ਤਂ;

੭੫.

ਕਾਯਸ੍ਸ ਭੋ ਵਿਰਚਿਤਸ੍ਸ ਯਥਾਨੁਕੂਲਂ

ਛਾਯਾ ਵਿਭਾਤਿ ਰੁਚਿਰਾਮਲਦਪ੍ਪਣੇ ਤੁ,

ਕਤ੍ਵਾ ਤਥੇਵ ਪਰਮਂ ਕੁਸਲਂ ਪਰਤ੍ਥ

ਸਮ੍ਭੂਸਿਤਾ ਇਵ ਭਵਨ੍ਤਿ ਫਲੇਨ ਤੇਨ;

੭੬. ¶

ਦੇਹੇ ਤਥਾ ਵਿਵਿਧਦੁਕ੍ਖ ਨਿਵਾਸਭੂਤੇ

ਮੋਹਾ ਪਮਾਦਵਸਗਾ ਸੁਖਸਞ੍ਞਮੂਲ਼੍ਹਾ,

ਤਿਕ੍ਖੇ ਯਥਾ ਖੁਰਮੁਖੇ ਮਧੁਲੇਹਮਾਨੋ

ਬਾਲ਼੍ਹਞ੍ਚ ਦੁਕ੍ਖਮਨੁਗਚ੍ਛਤਿ ਹੀਨਪਞ੍ਞੋ;

੭੭.

ਸਂਕਪ੍ਪਰਾਗਵਿਗਤੇ ਨਿਰਤਤ੍ਤਭਾਵੇ

ਦੁਕ੍ਖਂ ਸਦਾ ਸਮਧਿਗਚ੍ਛਤਿ ਅਪ੍ਪਪਞ੍ਞੋ,

ਮੂਲ਼੍ਹਸ੍ਸ ਚੇਵ ਸੁਖਸਞ੍ਞਮਿਹਤ੍ਥਿਲੋਕੇ

ਕਿਂਪਕ੍ਕਮੇਵ ਨਨੁ ਹੋਤਿ ਵਿਚਾਰਮਾਨੇ;

੭੮.

ਸਬ੍ਬੋਪਭੋਗ ਧਨਧਞ੍ਞਵਿਸੇਸਲਾਭੀ

ਰੂਪੇਨ ਭੋ ਸ ਮਕਰਦ੍ਧਜਸਨ੍ਨਿਭੋਪਿ,

ਯੋ ਯੋਬ੍ਬਨੇਪਿ ਮਰਣਂ ਲਭਤੇ ਅਕਾਮਂ

ਕਾਮਂ ਪਰਤ੍ਥਪਰਪਾਣਹਰੋ ਨਰੋ ਹਿ;

੭੯.

ਸੋ ਯਾਚਕੋ ਭਵਤਿ ਭਿਨ੍ਨਕਪਾਲਹਤ੍ਥੋ

ਮੁਣ੍ਡੋ ਧਿਗਕ੍ਖਰਸਤੇਹਿ ਚ ਤਜ੍ਜਯਨ੍ਤੋ,

ਭਿਕ੍ਖਂ ਸਦਾਰਿਭਵਨੇ ਸਕੁਚੇਲਵਾਸੋ

ਦੇਹੇ ਪਰਤ੍ਥਿ ਪਰਚਿਤ੍ਤਹਰੋ ਨਰੋ ਯੋ;

੮੦. ¶

ਇਤ੍ਥੀ ਨਮੁਞ੍ਚਤਿ ਸਦਾ ਪੁਨ ਇਤ੍ਥਿਭਾਵਾ

ਨਾਰੀ ਸਦਾ ਭਵਤਿ ਸੋ ਪੁਰਿਸੋ ਪਰਤ੍ਥ,

ਯੋ ਆਚਰੇਯ੍ਯ ਪਰਦਾਰਮਲਙ੍ਘਨੀਯਂ

ਘੋਰਞ੍ਚ ਵਿਨ੍ਦਤਿ ਸਦਾ ਵ੍ਯਸਨਞ੍ਚ ਨੇਕਂ;

੮੧.

ਦੀਨੋ ਵਿਗਨ੍ਧਵਦਨੋ ਚ ਜਲ਼ੋ ਅਪਞ੍ਞੋ

ਮੂਗੋ ਸਦਾ ਭਵਤਿ ਅਪ੍ਪਿਯਦਸ੍ਸਨੋ ਚ,

ਪਪ੍ਪੋਤਿ ਦੁਕ੍ਖਮਤੁਲਞ੍ਚ ਮਨੁਸ੍ਸਭੂਤੋ

ਵਾਚਂ ਮੁਸਾ ਭਣਤਿ ਯੋ ਹਿ ਅਪਞ੍ਞਸਤ੍ਤੋ;

੮੨.

ਉਮ੍ਮਤ੍ਤਕਾ ਵਿਗਤਲਜ੍ਜਗੁਣਾ ਭਵਨ੍ਤਿ

ਦੀਨਾ ਸਦਾ ਵ੍ਯਸਨਸੋਕਪਰਾਯਣਾ ਚ,

ਜਾਤਾ ਭਵੇਸੁ ਵਿਵਿਧੇਸੁ ਵਿਰੂਪਦੇਹਾ

ਪੀਤ੍ਵਾ ਹਲਾਹਲਵਿਸਂਵ ਸੁਰਂ ਵਿਪਞ੍ਞਾ;

੮੩.

ਪਾਪਾਨਿ ਯੇਨ ਇਹ ਆਚਰਿਤਾਨਿ ਯਾਨਿ

ਯੋ ਵਸ੍ਸਕੋਟਿਨਹੁਤਾਨਿ ਅਨਪ੍ਪਕਾਨਿ,

ਲਦ੍ਧਾਨ ਘੋਰਮਤੁਲਂ ਨਰਕੇਸੁ ਦੁਕ੍ਖਂ

ਪਪ੍ਪੋਤਿ ਚੇਤ੍ਥ ਵਿਵਿਧਵ੍ਯਸਨਞ੍ਚ ਨੇਕਂ;

੮੪. ¶

ਲੋਕਤ੍ਤਯੇਸੁ ਸਕਲੇਸੁ ਸਮਂ ਨ ਕਿਂਚਿ

ਲੋਕਸ੍ਸ ਸਨ੍ਤਿਕਰਣਂ ਰਤਨਤ੍ਤਯੇਨ,

ਤਂਤੇਜਸਾ ਸੁਮਹਤਾ ਜਿਤਸਬ੍ਬਪਾਪੋ

ਸੋਹਂ ਸਦਾਧਿਗਤਸਬ੍ਬਸੁਖੋ ਭਵੇਯ੍ਯਂ;

੮੫.

ਲੋਕਤ੍ਤਯੇਸੁ ਸਕਲੇਸੁ ਚ ਸਬ੍ਬਸਤ੍ਤਾ

ਮਿਤ੍ਤਾ ਚ ਮਜ੍ਝਰਿਪੁਬਨ੍ਧੁਜਨਾ ਚ ਸਬ੍ਬੇ,

ਤੇ ਸਬ੍ਬਦਾ ਵਿਗਤਰੋਗਭਯਾ ਵਿਸੋਕਾ

ਸਬ੍ਬਂ ਸੁਖਂ ਅਧਿਗਤਾ ਮੁਦਿਤਾ ਭਵਨ੍ਤੁ;

੮੬.

ਕਾਯੋ ਕਰੀਸਭਰਿਤੋ ਵਿਯ ਭਿਨ੍ਨਕੁਮ੍ਭੋ

ਕਾਯੋ ਸਦਾ ਕਲਿਮਲਵ੍ਯਸਨਾਧਿਵਾਸੋ,

ਕਾਯੇ ਵਿਹਞ੍ਞਤਿ ਚ ਸਬ੍ਬਸੁਖਨ੍ਤਿ ਲੋਕੋ

ਕਾਯੋ ਸਦਾ ਮਰਣਰੋਗਜਰਾਧਿਵਾਸੋ;

੮੭. ¶

ਸੋ ਯੋਬ੍ਬਨੋਤਿ ਥਵਿਰੋਤਿ ਚ ਬਾਲਕੋਤਿ

ਸਤ੍ਤੇ ਨ ਪੇਕ੍ਖਤਿ ਵਿਹਞ੍ਞਤਿਰੇਵ ਮਚ੍ਚੁ,

ਸੋਹਂ ਠਿਤੋਪਿ ਸਯਿਤੋਪਿ ਚ ਪਕ੍ਕਮਨ੍ਤੋ

ਗਚ੍ਛਾਮਿ ਮਚ੍ਚੁਵਦਨਂ ਨਿਯਤਂ ਤਥਾ ਹਿ;

੮੮.

ਏਵਂ ਯਥਾ ਵਿਹਿਤਦੋਸਮਿਦਂ ਸਰੀਰਂ

ਨਿਚ੍ਚਂਵ ਤਗ੍ਗਤਮਨਾ ਹਦਯੇ ਕਰੋਥ,

ਮੇਤ੍ਤਂ ਪਰਿਤ੍ਤਮਸੁਭਂ ਮਰਣਸ੍ਸਤਿਞ੍ਚ

ਭਾਵੇਥ ਭਾਵਨਰਤਾ ਸਤਤਂ ਯਤਤ੍ਤਾ;

੮੯.

ਦਾਨਾਦਿ ਪੁਞ੍ਞਕਿਰਿਯਾਨਿ ਸੁਖੁਦ੍ਰਯਾਨਿ

ਕਤ੍ਵਾ ਚ ਤਮ੍ਫਲਮਸੇਸ ਮਿਹਪ੍ਪਮੇਯ੍ਯਂ,

ਦੇਯ੍ਯਂ ਸਦਾ ਪਰਹਿਤਾਯ ਸੁਖਾਯ ਚੇਵ

ਕਿਮ੍ਭੋ ਤਦੇਵ ਨਨੁ ਹਤ੍ਥਗਤਞ੍ਹਿ ਸਾਰਂ?

੯੦.

ਹੇਤੁਂ ਵਿਨਾ ਨ ਭਵਤੀ ਹਿ ਚ ਕਿਂਚਿ ਲੋਕੇ

ਸਦ੍ਦੋਵ ਪਾਣਿਤਲਘਟ੍ਟਨਹੇਤੁਜਾਤੋ,

ਏਵਞ੍ਚ ਹੇਤੁਫਲ ਭਾਵਵਿਭਾਗਭਿਨ੍ਨੋ

ਲੋਕੋ ਉਦੇਤਿ ਚ ਵਿਨਸ੍ਸਤਿ ਤਿਟ੍ਠਤੀ ਚ;

੯੧. ¶

ਕਮ੍ਮਸ੍ਸ ਕਾਰਣਾਮਯਞ੍ਹਿ ਯਥਾ ਅਵਿਜ੍ਜਾ

ਭੋ ਕਮ੍ਮਨਾ ਸਮਧਿਗਚ੍ਛਤਿ ਜਾਤਿਭੇਦਂ,

ਜਾਤਿਂ ਪਟਿਚ੍ਚ ਚ ਜਰਾਮਰਣਾਦਿਦੁਕ੍ਖਂ

ਸਤ੍ਤਾ ਸਦਾ ਪਟਿਲਭਨ੍ਤਿ ਅਨਾਦਿਕਾਲੇ;

੯੨.

ਕਮ੍ਮਂ ਯਥਾ ਨ ਭਵਤੀਹ ਚ ਮੋਹਨਾਸਾ

ਕਮ੍ਮਕ੍ਖਯਾਪਿ ਚ ਨ ਹੋਤਿ ਭਵੇਸੁ ਜਾਤਿ,

ਜਾਤਿਕ੍ਖਯਾ ਇਹ ਜਰਾਮਰਣਾਦਿਦੁਕ੍ਖਂ

ਸਬ੍ਬਕ੍ਖਯੋ ਭਵਤਿ ਦੀਪੇਵਾਨਿਲੇਨ;

੯੩.

ਯੋ ਪਸ੍ਸਤੀਹ ਸਤਤਂ ਮੁਨਿਧਮ੍ਮਕਾਯਂ

ਬੁਦ੍ਧਂ ਸ ਪਸ੍ਸਤਿ ਨਰੋ ਇਤਿ ਸੋ ਅਵੋਚ,

ਬੁਦ੍ਧਞ੍ਚ ਧਮ੍ਮਮਮਲਞ੍ਚ ਤਿਲੋਕਨਾਥਂ

ਸਮ੍ਪਸ੍ਸਿਤੁਂ ਵਿਚਿਨਥਾ’ਪਿ ਚ ਧਮ੍ਮਤਂ ਭੋ;

੯੪. ¶

ਸਲ੍ਲਂਵ ਭੋ ਸੁਨਿਸਿਤਂ ਹਦਯੇ ਨਿਮੁਗ੍ਗਂ

ਦੋਸਤ੍ਤਯਂ ਵਿਵਿਧਪਾਪਮਲੇਨ ਲਿਤ੍ਤਂ,

ਨਾਨਾਵਿਧਬ੍ਯਸਨਭਾਜਨਮਪ੍ਪਸਨ੍ਨਂ

ਪਞ੍ਞਾਮਯੇਨ ਬਲਿਸੇਨ ਨਿਰਾਕਰੋਥ;

੯੫.

ਨਾਕਮ੍ਪਯਨ੍ਤਿ ਸਕਲਾਪਿ ਚ ਲੋਕਧਮ੍ਮਾ

ਚਿਤ੍ਤਂ ਸਦਾਪਗਤਪਾਪਕਿਲੇਸਸਲ੍ਲਂ,

ਰੂਪਾਦਯੋ ਚ ਵਿਵਿਧਾ ਵਿਸਯਾ ਸਮਗ੍ਗਾ

ਫੁਟ੍ਠਂਵ ਮੇਰੁਸਿਖਰਂ ਮਹਤਾਨਿਲੇਨ;

੯੬.

ਸਂਸਾਰਦੁਕ੍ਖਮਗਣੇਯ੍ਯ ਯਥਾ ਮੁਨਿਨ੍ਦੋ

ਗਮ੍ਭਿਰਪਾਰਮਿਤ ਸਾਗਰਮੁਤ੍ਤਰਿਤ੍ਵਾ,

ਞੇਯ੍ਯਂ ਅਬੋਧਿ ਨਿਪੁਣਂ ਹਤਮੋਹਜਾਲੋ

ਤਸ੍ਮਾ ਸਦਾ ਪਰਹਿਤਂ ਪਰਮਂ ਚਿਣਾਥ;

੯੭.

ਓਹਾਯ ਸੋ’ਧਿਗਤਮੋਕ੍ਖਸੁਖਂ ਪਰੇਸਂ

ਅਤ੍ਥਾਯ ਸਂਚਰਿ ਭਵੇਸੁ ਮਹਬ੍ਭਯੇਸੁ,

ਏਵਂ ਸਦਾ ਪਰਹਿਤਂ ਪੁਰਤੋ ਕਰਿਤ੍ਵਾ

ਧਮ੍ਮੋ ਮਯਾਨੁਚਰਿਤੋ ਜਗਦਤ੍ਥਮੇਵ;

੯੮. ¶

ਲਦ੍ਧਾਨ ਦੁਲ੍ਲਭਤਰਞ੍ਚ ਮਨੁਸ੍ਸਯੋਨਿਂ

ਸਬ੍ਬਂ ਪਪਞ੍ਚਰਹਿਤਂ ਖਣਸਮ੍ਪਦਞ੍ਚ,

ਞਤ੍ਵਾਨ ਆਸਵਨੁਦੇਕਹਿਤਞ੍ਚ ਧਮ੍ਮਂ

ਕੋ ਪਞ੍ਞਵਾ ਅਨਵਰਂ ਨ ਭਜੇਯ੍ਯ ਧਮ੍ਮਂ?

੯੯.

ਲਦ੍ਧਾਨ ਬੁਦ੍ਧਸਮਯਂ ਅਤਿਦੁਲ੍ਲਭਂਚ

ਸਦ੍ਧਮ੍ਮ ਮਗ੍ਗਮਸਮਂ ਸਿਵਦਂ ਤਥੇਵ,

ਕਲ੍ਯਾਣਮਿਤ੍ਤਪਵਰੇ ਮਤਿਸਮ੍ਪਦਞ੍ਚ

ਕੋ ਬੁਦ੍ਧਿਮਾ ਅਨਵਰਂ ਨ ਭਜੇਯ੍ਯ ਧਮ੍ਮਂ?

੧੦੦.

ਏਵਮ੍ਪਿ ਦੁਲ੍ਲਭਤਰਂ ਵਿਭਵੇ ਸੁਲਦ੍ਧਾ

ਮਚ੍ਛੇਰਦੋਸ ਵਿਰਤਾ ਉਭਯਤ੍ਥਕਾਮਾ,

ਸਦ੍ਧਾਦਿਧਮ੍ਮਸਹਿਤਾ ਸਤਤਪ੍ਪਮਤ੍ਤਾ

ਭੋ! ਭੋ! ਕਰੋਥ ਅਮਤਾਧਿਗਮਾਯ ਪੁਞ੍ਞਂ;