📜

ਸਮਨ੍ਤਕੂਟਵਣ੍ਣਨਾ ¶

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧.

ਸਤਤਵਿਤਤ ਕਿਤ੍ਤਿਂ ਧਸ੍ਤਕਨ੍ਦਪ੍ਪਦਪ੍ਪਂ

ਤਿਭਵਹਿਤਵਿਧਾਨਂ ਸਬ੍ਬਲੋਕੇਕਕੇਤੁਂ,

ਅਮਿਤਮਤਿਮਨਗ੍ਘਂ ਸਨ੍ਤਿਦਂ ਮੇਰੁਸਾਰਂ

ਸੁਗਤਮਹਮੁਦਾਰਂ ਰੂਪਸਾਰਂ ਨਮਾਮਿ;

੨.

ਹਤਦੁਰਿਤਤੁਸਾਰਂ ਮੋਹਪਙ੍ਕੋਪਤਾਪਂ

ਮਨਕਮਲਵਿਕਾਸਂ ਜਨ੍ਤੁਨਂ ਸੇਸਕਾਨਂ,

ਕੁਮਤਿਕੁਮੁਦਨਾਸਂ ਬੁਦ੍ਧਪੁਬ੍ਬਾਚਲਗ੍ਗਾ

ਉਦਿਤਮਹਮੁਦਾਰਂ ਧਮ੍ਮਭਾਨੁਂ ਨਮਾਮਿ;

੩.

ਸਕਲਵਿਮਲਸੀਲਂ ਧੁਤਪਾਪਾਰਿਜਾਲਂ

ਸੁਰਨਰਮਹਨੀਯਂ ਪਾਹੁਨੇਯ੍ਯਾਹੁਨੇਯ੍ਯਂ,

ਉਜੁਪਥਪਟਿਪਨ੍ਨਂ ਪੁਞ੍ਞਖੇਤ੍ਤਂ ਜਨਾਨਂ

ਗਣਮਹਮਭਿਵਨ੍ਦੇ ਸਾਰਦਂ ਸਾਦਰੇਨ;

੪.

ਇਤਿ ਕਲ਼ਿਤ ਪਣਾਮਾ ਹਨ੍ਤ੍ਵ ਸਬ੍ਬੋਪਸਗ੍ਗੇ

ਸੁਗਤਵਿਮਲ ਪਾਦਮ੍ਭੋਜਸਮ੍ਪਾਤ ਪੂਤਂ,

ਸੁਮਨਸਿਖਰਿਰਾਜਂ ਵਣ੍ਣਯਿਸ੍ਸਂ ਸੁਰਾਨਂ

ਵਸਤਿ ਮਤੁਲਮੇਤਂ ਸਾਧੁਜਨ੍ਤੁ ਸੁਣਨ੍ਤੁ;

੫.

ਸਵਣਾ ਲਪਨਾ ਚੇਵ ਸਤਿਯਾ ਚਾਪਿ ਵਨ੍ਦਨਾ,

ਯਸ੍ਸ ਸਮ੍ਮਾ ਸੁਖੀ ਹੋਤੀ ਨਿਬ੍ਬਾਣਞ੍ਚਾਧਿਗਚ੍ਛਤਿ;

੬. ¶

ਤਸ੍ਮਾ ਸਪ੍ਪੁਰਿਸੇਹੇ’ਦਂ ਪਤ੍ਥੇਨ੍ਤੇਹਿ ਤਿਸਮ੍ਪਦਂ,

ਸਵਣੀਯਞ੍ਹਿ ਸਾਧੂਹਿ ਅਚਿਕ੍ਖਿਤ੍ਤੇਨ ਚੇਤਸਾ;

੭.

ਯੋ ਲੋਕਤਿਲਕੋ ਨਾਥੋ ਪੂਰੇਤ੍ਵਾ ਦਸ ਪਾਰਮੀ,

ਜਾਤੋਸਿ ਤੁਸਿਤੇ ਕਾਯੇ ਸਨ੍ਤੁਸਿਤੋ’ਤਿ ਵਿਸ੍ਸੁਤੋ;

੮.

ਆਰਾਧਿਤੋ ਸੁਰਾਦੀਹਿ ਕਾਲੋ ਮਾਰਿਸ ਤੇ ਅਯਂ,

ਤਿਣ੍ਣੋ ਤਾਰਯਿਮਂ ਲੋਕਂ ਬਹੂ ਅਪ੍ਪਰਜਕ੍ਖਕਾ;

੯.

ਏਤਦਤ੍ਥਾਯ ਤੇ ਵੀਰ ਪੂਰਿਤਾ ਦਸ ਪਾਰਮੀ,

ਬਾਹੁਂ ਪਿਤੁਸ੍ਸ ਪੁਤ੍ਤੋ’ਵ ਲੋਕੋ ਆਲਮ੍ਬਤੇ ਤੁਵਂ;

੧੦.

ਤੇਸਂ ਤਂ ਵਚਨਂ ਸੁਤ੍ਵਾ ਮਹਾਸਤ੍ਤੋ ਮਹਾਮਤੀ,

ਵਿਲੋਕਨੇ ਵਿਲੋਕੇਤ੍ਵਾ ਪਞ੍ਚਾਮਲ ਵਿਲੋਚਨੋ;

੧੧.

ਜਮ੍ਬੁਦੀਪਗ੍ਗਕਮਲੇ ਕਣ੍ਣਿਕਾ’ਵ ਮਨੋਰਮਾ,

ਪੁਰੀ ਕਪਿਲ਼ਵਤ੍ਥੂ’ਸਿ ਵਿਸਾਣਾ’ਵ ਸੁਧਾਸਿਨਂ;

੧੨.

ਸਿਙ੍ਗੀਨਿਕ੍ਖਮਯਾਭਾਸ ਤੁਙ੍ਗਸਿਙ੍ਗਸਮਙ੍ਗਿਤਾ,

ਮਣਿਸੀਹਪਞ੍ਜਰਾਕਿਣ੍ਣ ਪਾਸਾਦਾ ਯਤ੍ਥ ਭਾਸਰੇ;

੧੩.

ਸਘਨੇ ਗਗਨੇ ਨਿਚ੍ਚਂ ਸਤੇਰਤਸਤਾਨਿ’ਵ,

ਅਨਿਲੇਰਿਤਪਜ੍ਜੋਤ ਸੋਣ੍ਣਕੇਤੁ ਅਹੂ ਯਹਿਂ;

੧੪.

ਜਨਾਨਂ ਨੀਲਨੇਤ੍ਤੇਹਿ ਵਦਨੇਹਿ ਤੁ ਯਾ ਪੁਰੀ,

ਮਧੁਪਾਲਿਸਮੋਨਦ੍ਧ ਕਞ੍ਜਿਨੀ ਸਿਰਿਮਾਵਹੇ;

੧੫.

ਰਙ੍ਗਤੁਙ੍ਗਤੁਰਙ੍ਗੇਹਿ ਗਜ੍ਜਿਤੇਹਿ ਚ ਯਾ ਪੁਰੀ,

ਸਘੋਸੁਤ੍ਤੁਙ੍ਗਕਲ੍ਲੋਲ ਲੋਲਸਾਗਰਸਨ੍ਤਿਭਾ;

੧੬.

ਅਵ੍ਹਮਾਨਾ’ਵ ਦੇਵਾਨਂ ਪੁਰਲਖ੍ਯਾ ਭੁਜਾ ਇਵ,

ਮਨ੍ਦਾਨਿਲੇਰਿਤਾ ਤੁਙ੍ਗ ਨਾਨਾਰਾਗਦ੍ਧਜਾ ਯਹਿਂ;

੧੭.

ਨਾਨਾਵੇਸਧਰਾ ਯਸ੍ਮਿਂ ਨਾਨਾਭੂਸਣ ਭੂਸਿਤਾ,

ਨਾਨਾਸਮ੍ਪਤ੍ਤਿਸਂਯੁਤ੍ਤਾ ਨਾਨਾਵਿਜ੍ਜਾਸੁ ਪਾਰਗਾ;

੧੮. ¶

ਨਵਯੋਬ੍ਬਨ ਉਦ੍ਦਾਮਾ ਰੂਪੇਨ ਚ ਮਨੋਹਰਾ,

ਸਚ੍ਚੇਸੁ ਨਿਰਤਾ ਨਿਚ੍ਚਂ ਅਨਕ੍ਕੁਟ੍ਠਕੁਲਾ ਸਿਯੁਂ;

੧੯.

ਨਿਚ੍ਚਂ ਕੀਲ਼ਾ ਵਿਦਦ੍ਧਾਹਿ ਨਰਨਾਰੀਹਿ ਸੇਵਿਤਾ,

ਯਾ ਪੁਰੀ ਸਾਧੁਰੂਪਾ’ਸਿ ਮਧੁਰਾਲਾਪਿਨੀਹਿ ਚ;

੨੦.

ਤਸ੍ਮਿਂ ਸਦ੍ਧਾਦਯੋਪੇਤ ਓਕ੍ਕਾਕਕੁਲਕੇਤੁਕੋ,

ਸੁਦ੍ਧੋਦਨਵ੍ਹਯੋ ਆਸੀ ਵਿਸ੍ਸੁਤੋ ਭੁਵਨਤ੍ਤਯੇ;

੨੧.

ਯਸ੍ਸਙ੍ਘਿਕਮਲੇ ਸਬ੍ਬ ਭੁਭੁਜਾਨਂ ਮਹੀਤਲੇ,

ਕਿਰੀਟਮਣਿਹਿਙ੍ਗਾਲਿ ਕੀਲ਼ਨ੍ਤੀ’ਵ ਨਿਰਨ੍ਤਰਂ;

੨੨.

ਯਸ੍ਸ ਪਤ੍ਥਟਤੇਜੇਨ ਪੁਰਨੇਤਾਪਿ ਦਿਵਾਕਰੋ,

ਵਹਨੀਚ’ਮ੍ਬਰੇ ਲੀਲਂ ਓਸਧੀਪਤਿਨੋ ਦਿਵਾ;

੨੩.

ਯਸ੍ਸ ਦਾਨਪ੍ਪਵਾਹੋ ਤੁ ਨਾਨਾਯਾਚਕ ਜਨ੍ਤੁਨਂ,

ਮਨੋਦਧੀਸੁ ਵੇਲਨ੍ਤੇਤਿਕ੍ਕਮਨ੍ਤੋਵ ਸਤ੍ਤਤਂ;

੨੪.

ਮਤਿਯਾ ਸੁਰਮਨ੍ਤੀਵ ਧਨੇਨ ਧਨਦੋ ਵਿਯ,

ਰੂਪੇਨ ਕੁਸੁਮੇਸੁ’ਵ ਯੋ ਜੁਮ੍ਹਤਿ ਮਹੀਤਲੇ;

੨੫.

ਤਸ੍ਸਾਭਿਸਿਤ੍ਤਾ ਰਜ੍ਜੇਨ ਮਹਾਮਾਯਾਤਿ ਵਿਸ੍ਸੁਤਾ,

ਚਨ੍ਦਿਕਾ ਵਿਯ ਚਨ੍ਦਸ੍ਸ ਗਿਰਿਰਾਜਾ’ਵ ਕਪਾਲਿਤੋ;

੨੬.

ਲਕ੍ਖੀ’ਵ ਵਾਸੁਦੇਵਸ੍ਸ ਸੀਤਾ’ਵ ਰਾਮਰਾਜਿਨੋ,

ਮਹੇਸੀਸਿ ਵਰਾਰੋਹਾ ਸੁਨ੍ਦਰੀ ਸੁਨ੍ਦਰਾਧਰਾ;

੨੭.

ਤਸ੍ਸਾ ਕੁਚ੍ਛਿਕਰਣ੍ਡਮ੍ਹਿ ਅਨਗ੍ਘਰਤਨਂ ਵਿਯ,

ਖਤ੍ਤਿਂਸਾਹਿ ਨਿਮਿਤ੍ਤੇਹਿ ਵਿਮ੍ਹਾਪੇਨ੍ਤੋ ਸਦੇਵਕਂ;

੨੮.

ਸਿਤਮ੍ਬੁਜਕਰੋ ਸਨ੍ਤੋ ਸਿਤੇਭਚ੍ਛਾਪਕੋ ਵਿਯ,

ਕਤ੍ਵਾ ਪਦਕ੍ਖਿਣਂ ਮਾਤੁ ਪਟਿਸਨ੍ਧਿਮਗਣ੍ਹਿ ਸੋ;

੨੯.

ਦਸੇਕਾਦਸਮਾਸੇਨ ਤਸ੍ਸੇਵਂ ਆਸਿ ਚੇਤਨਾ,

ਪਸ੍ਸਿਤੁਂ ਸਕਞਾਤੀਨਂ ਗਨ੍ਤ੍ਵਾਨ ਨਗਰਂ ਤਦਾ;

੩੦. ¶

ਨਿਵੇਦੇਤ੍ਵਾ ਤਮਤ੍ਥਂ ਸਾ ਰਞ੍ਞੋ ਤੇਨ ਸੁਸਜ੍ਜਿਤੇ,

ਸਪਰਿਚ੍ਛਦਾ ਤਦਾ ਮਗ੍ਗੇ ਗਚ੍ਛਨ੍ਤਿ ਅਨ੍ਤਰਾਪਥੇ;

੩੧.

ਦੇਵਤਾਨਂ ਮਨੋਨਨ੍ਦਕਰ ਨਨ੍ਦਨ ਸਨ੍ਨਿਭਂ,

ਦਿਸ੍ਵਾਨ ਲੁਮ੍ਬਿਨਿਂ ਨਾਮ ਉਯ੍ਯਾਨਂ ਮਨਨਨ੍ਦਨਂ;

੩੨.

ਤਸ੍ਮਿਂ ਕੀਲ਼ਿਤੁਮੁਸ੍ਸਾਹਾ ਪਵਿਸਿਤ੍ਵਾਨ ਤਂ ਵਨਂ,

ਕੀਲ਼ਨ੍ਤਿ ਉਪਗਨ੍ਤ੍ਵਾਨ ਮਙ੍ਗਲਂ ਸਾਲਪਾਦਪਂ;

੩੩.

ਵਿਲੋਲ ਪਲ੍ਲਵਾਕਿਣ੍ਣਂ ਸੁਫੁਲ੍ਲਕੁਸੁਮੋਨਤਂ,

ਗਹੇਤ੍ਵਾ ਸਾਲਸਾਖਂ ਸਾ ਸੁਰਤ੍ਤਕਰ ਪਲ੍ਲਵਾ;

੩੪.

ਦੇਵੇਹਿ ਗਹਿਤਾ’ਰਕ੍ਖਾ ਮਹਮਾਨੇ ਸਦੇਵਕੇ,

ਜਨੇਸਿ ਤਨਯਂ ਮਾਯਾ ਤਤ੍ਰਟ੍ਠਾ ਲੋਕਲੋਚਨਂ;

੩੫.

ਬ੍ਰਹ੍ਮਾਨੋ ਲੋਕਪਾਲਾ ਚ ਮਨੁਸ੍ਸਾ ਕਮਤੋ ਤਦਾ,

ਸੋਣ੍ਣਜਾਲਾਜਿਨਾਦੀਹਿ ਗਣ੍ਹਿਂਸੁ ਜਨਨਨ੍ਦਨਂ;

੩੬.

ਮਹਿਂ ਪਤਿਟ੍ਠਿਤੋ ਧੀਰੋ ਪਸ੍ਸਿਤ੍ਵਾਨ ਤਤੋ ਦਿਸਾ,

ਉਤ੍ਤਰਾਭਿਮੁਖੋ ਸਤ੍ਤਪਦਂ ਗਣ੍ਤ੍ਵਾ’ਮ੍ਬੁਜੇ ਠਿਤੋ;

੩੭.

ਦਿਸਨ੍ਤਮਵਲੋਕੇਤ੍ਵਾ ਸੁਫੁਲ੍ਲਮ੍ਬੁਜਲੋਚਨੋ,

ਨਿਚ੍ਛਾਰੇਸਾਸਭਿਂ ਵਾਚਂ ਅਗ੍ਗੋ ਸੇਟ੍ਠੋ’ਤਿਆਦਿਨਾ;

੩੮.

ਬ੍ਰਹ੍ਮਾਮਰਨਰਾਦੀਹਿ ਪੂਜਿਤੋ ਚ ਨਮਸ੍ਸਿਤੋ,

ਕਮੇਨ ਅਭਿਵਡ੍ਢਨ੍ਤੋ ਜੁਣ੍ਹਪਕ੍ਖੇ ਸਸੀ ਯਥਾ;

੩੯.

ਬ੍ਰਹ੍ਮੂਨਂ ਛਤ੍ਤਛਾਯਾਯ ਮਨ੍ਦਾਰਕੁਸੁਮਨ੍ਤਰੇ,

ਸਾਨਨ੍ਦਾਮਨ੍ਦਦੇਵੇਹਿ ਧੁਤਚਾਮਰਮਜ੍ਝਗੋ;

੪੦.

ਦਿਬ੍ਬੇਹਿ ਰੂਪਸਦ੍ਦੇਹਿ ਗਨ੍ਧੇਹਿ ਚ ਰਸੇਹਿ ਚ,

ਫੋਟ੍ਠਬ੍ਬੇਹਿ ਚ ਦਿਬ੍ਬੇਹਿ ਮੋਦਮਾਨੋ ਅਨੇਕਧਾ;

੪੧.

ਦਿਬ੍ਬੇਹਿ ਰਮਣੀਯੇਹਿ ਨਚ੍ਚੇਹਿ ਵਾਦਿਤੇਹਿ ਚ,

ਪਦਾਨੇਕਸਹਸ੍ਸੇਹਿ ਥੂਯਮਾਨਗੁਣਾਕਰੋ;

੪੨. ¶

ਪਤ੍ਵਾ ਸੋਲ਼ਸਮਂ ਵਸ੍ਸਂ ਞਾਤਿਸਙ੍ਘਸ੍ਸ ਮਜ੍ਝਗੋ,

ਦਸ੍ਸੇਤ੍ਵਾ’ਸੇਸਸਿਪ੍ਪਂ ਤਂ ਲੋਕੇ ਵਿਜ੍ਜਤਿ ਯਂ ਤਦਾ;

੪੩.

ਞਾਤਿਸਙ੍ਘਂ ਪਮੋਦੇਨ੍ਤੋ ਦੇਵੇ ਚ ਮਨੁਜੇ’ਪਿ ਚ,

ਲਦ੍ਧਾ ਯਸੋਧਰਂ ਦੇਵਿਂ’ਨੁਕੂਲਂ ਜਾਤਿਜਾਤਿਯਂ;

੪੪.

ਸੋਣ੍ਣਦਪ੍ਪਣਸਙ੍ਕਾਸ ਸੋਮ੍ਮਾਨਨ ਵਿਭੁਸਿਤਂ,

ਨੀਲਨੀਰਜਸਙ੍ਕਾਸ ਵਿਸਾਲਾਯਤ ਲੋਚਨਂ;

੪੫.

ਸਿਙ੍ਗਾਰਮਨ੍ਦਿਰਦ੍ਵਾਰੇ ਧਜੋਪਮਭਮੁਦ੍ਵਯਂ,

ਹੇਮਕਾਹਲਸਙ੍ਕਾਸ ਨਾਸਿਕਂ ਰੂਪਲਕ੍ਖਿਯਾ

੪੬.

ਨੀਲਵੇਲ੍ਲਿਤਧਮ੍ਮਿਲ੍ਲ ਜਿਮੁਤੋਭਯ ਕੋਟਿਯਂ,

ਨਿਚ੍ਚਵਿਜ੍ਜੁਲ੍ਲਤਾਚਕ੍ਕ ਮਨੁਞ੍ਞਕਣ੍ਣਪਾਸਕਂ;

੪੭.

ਸਾਤਕੁਮ੍ਭਨਿਭਾਭਾਸ ਪਯੋਧਰਘਟਦ੍ਵਂ,

ਸੁਵਣ੍ਣਦ੍ਦਿਤਟਾਯਾਤ ਨਿਜ੍ਝਰਾਕਾਰਹਾਰਕਂ

੪੮.

ਦੇਹਦੇਵਦ੍ਦੁਮਾਲਮ੍ਬ ਪਾਰੋਹਾਭਭੁਜਦ੍ਵਯਂ,

ਅਙ੍ਗੁਲੀਪਲ੍ਲਵਨ੍ਤਮ੍ਬੁ ਬਿਨ੍ਦੁਚਾਰੁ ਨਖਾਵਲਿਂ;

੪੯.

ਦੇਹਮਾਲਾਲਿਮਾਲਾਭ ਰੋਮਰਾਜਿਵਿਰਾਜਿਤਂ,

ਰੂਪਣ੍ਣਵਤਰਙ੍ਗਾਹ ਵਲਿਤ੍ਤਯ ਵਿਚਿਤ੍ਤਕਂ;

੫੦.

ਸੋਣ੍ਣਰਮ੍ਭਾਸਮਾਵਟ੍ਟ ਪਿਣੋਰੁਦ੍ਵਯ ਸੁਨ੍ਦਰਂ,

ਸਨ੍ਨਿਰਕਲਿਕਾਕਾਰ ਚਾਰੁਜਙ੍ਘਾ ਵਿਭੂਸਿਤਂ;

੫੧.

ਪਚ੍ਚਕ੍ਖਰੂਪਲਕ੍ਖਿਞ੍ਚ ਲੀਲਾਨਿਚਯ ਸਨ੍ਨਿਭਂ,

ਗੁਣਾਨਮਾਕਰਂ ਸਾਧੁ ਵੇਲਂਵ ਰਤਿਸਾਗਰੇ;

੫੨.

ਕਨ੍ਤੋ ਵਸਨ੍ਤਰਾਜਾ’ਵ ਕਨ੍ਦਪ੍ਪੋ’ਵ ਸੁਰੂਪਵਾ,

ਸਸੀ’ਵ ਦਸ੍ਸਨੀਯੋ ਚ ਸੂਰਿਯੋ ਵਿਯ ਤੇਜਵਾ;

੫੩.

ਅਚਲਤ੍ਤੇਨ ਮੇਰੂਵ ਗਮ੍ਭੀਰੇਨਣ੍ਣਵੋ ਵਿਯ,

ਬ੍ਰਹ੍ਮਸ੍ਸਰੋ ਪਿਯਂਵਾਦੀ ਪਞ੍ਗ੍ਞਾਯ ਚ ਅਨੂਪਮੋ;

੫੪. ¶

ਵਸਨ੍ਤੋ ਸੋ ਮਹਾਵੀਰੋ ਪੁਰਸ੍ਮਿਂ ਕਪਿਲਵ੍ਹਯੇ,

ਦਿਸ੍ਵਾ ਨਿਮਿਤ੍ਤੇ ਚਤੁਰੋ ਉਯ੍ਯਾਨ ਗਮਨਞ੍ਜਸੇ;

੫੫.

ਪਬ੍ਬਜ੍ਜਾਭਿਰਤੋ ਨਾਥੋ ਗਨ੍ਤ੍ਵਾ ਉਯ੍ਯਾਨਭੂਮਿਯਂ,

ਸੁਫੁਲ੍ਲਚਮ੍ਪਕਾਸੋਕ ਨਾਗਾਦਾ’ਗੇਹਿ ਮਣ੍ਡਿਤਂ;

੫੬.

ਫੁਲ੍ਲਪਙ੍ਕਜ ਕਲ਼੍ਹਾਰ ਜਲਾਜਲਯ ਸਤਾਕੁਲਂ,

ਮਨ੍ਦਮਨ੍ਦਾਨਿਲਾਯਾਤ ਨਾਨਾਮੋਦੇਹਿ ਵਾਸਿਤਂ;

੫੭.

ਸਰਾ ਸਰਂ ਸਮਾਯਾਤ ਮਧੁਬ੍ਬਤ ਨਿਸੇਵਿਤਂ,

ਫਲਪੁਪ੍ਫਰਸੁਦ੍ਦਾਮ ਦ੍ਵਿਜ ਸਙ੍ਘ ਨਿਕੂਜਿਤਂ;

੫੮.

ਨਚ੍ਚਨ੍ਤ ਮਤ੍ਤਮੋਰਾਨਂ ਨਿਚ੍ਚਂ ਮਣ੍ਡਪਸਨ੍ਤਿਭਂ,

ਦਿਬ੍ਬਨ੍ਤ ਮਿਗਸਗ੍ਘਾਨਂ ਕੀਲ਼ਾਮਣ੍ਡਪ ਸਨ੍ਨਿਭਂ;

੫੯.

ਸਮੀਰ ਸਿਸਿਰੋਦਾਰ ਧਾਰਾਸੀਕਰ ਵਾਰਿਹਿ,

ਧਾਰਾਮਣ੍ਡਪ ਪਨ੍ਤੀਹਿ ਜਨਾਨਨ੍ਦਕਰਂ ਵਰਂ;

੬੦.

ਉਯ੍ਯਾਨਵਨਮਾਗਮ੍ਮ ਦੇਵਰਾਜਾਵ ਨਨ੍ਦਨਂ,

ਕੀਲ਼ਨ੍ਤੋ ਨਿਜਪੁਤ੍ਤਸ੍ਸ ਸੁਤ੍ਵਾਨ ਜਾਤਸਾਸਨਂ;

੬੧.

ਨਿਵਤ੍ਤੋ ਵਿਸ੍ਸਕਮ੍ਮੇਨ ਸਹਸ੍ਸਕ੍ਖੋਵ ਭੂਸਿਤੋ,

ਪੁਰਂ ਪਵਿਸਮਾਨੋਵ ਕਿਸਾ ਗੋਤਮਿ ਭਾਸਿਤਂ;

੬੨.

ਸੁਤ੍ਵਾਨ ਨਿਬ੍ਬੁਤਪਦਂ ਤਦਾ ਚਿਤ੍ਤਾਨੁਕੂਲਕਂ,

ਸਨ੍ਤੁਟ੍ਠੋ ਸਾਨੁਰਾਗੋ ਚ ਲਕ੍ਖਗ੍ਘਂ ਤਾਰਭਾਸੁਰਂ;

੬੩.

ਹਾਰਂ ਤਿਸ੍ਸਾਯ ਪੇਸੇਤ੍ਵਾ ਗਨ੍ਤ੍ਵਾਨ ਸਕਮਨ੍ਦਿਰਂ,

ਦੇਵਰਾਜਵਿਲਾਸੇਨ ਨਿਸੀਦਿ ਪਵਰਾਸਨੇ;

੬੪.

ਅਥਾਗਮ੍ਮ ਤਦਾ ਨੇਕਨਾਟਿਕਾ ਪਰਿਵਾਰਯੁਂ,

ਵਜ੍ਜਨ੍ਤਿ ਭੇਰਿਯੋ ਤਾਸੁ ਪਗ੍ਗਯ੍ਹ ਕਾਚਿ ਨਾਰਿਯੋ;

੬੫.

ਨਾਨਾਲਯਸਮਾਕਿਣ੍ਣਂ ਗੀਤਂ ਗਾਯਨ੍ਤਿ ਕਾਚਿ’ਪਿ,

ਧਮਨ੍ਤਿ ਸੁਸਿਰਂ ਕਾਚਿ ਕਾਚਿ ਵਾਦੇਨ੍ਤਿ ਤਨ੍ਤਿਯੋ;

੬੬. ¶

ਚਾਰੁ ਬਿਮ੍ਬਾਧਰਾਰਮ੍ਮ ਪਯੋਧਰਭਰਾ ਸੁਭਾ,

ਵਿਸਾਲਾਯਤ ਨੀਲਕ੍ਖਾ ਸੋਮਸੋਮ੍ਮਾਨਨਾ ਤਦਾ;

੬੭.

ਨਚ੍ਚਨ੍ਤਿ ਪੁਰਤੋ ਤਸ੍ਸ ਭੇਰਿਮਣ੍ਡਲ ਮਜ੍ਝਗਾ,

ਦੇਵਕਞ੍ਞਾਵ ਰਙ੍ਗਮ੍ਹੀ ਰਸਭਾਵਨਿਰਨ੍ਤਰਂ;

੬੮.

ਦਿਸ੍ਵਾਨ ਸੋ ਤਮਚ੍ਛਰਿਯਂ ਵਿਰਤ੍ਤੋ ਵਿਸਯੇ ਤਦਾ,

ਉਰਤ੍ਤਾਲ਼ਞ੍ਚ ਅਦ੍ਦਕ੍ਖਿ ਸਬ੍ਬਨ੍ਤਂ ਭੇਰਿਤਾਲ਼ਨਂ;

੬੯.

ਪਰਿਦੇਵਂ’ਚੁਪਟ੍ਠਾਸਿ ਗੀਤਂ ਸਂਸਾਰਸਾਗਰੇ,

ਵਾਯੁਵੇਗ ਵਿਕਾਰਂ’ਵ ਨਚ੍ਚਂ ਚਿਨ੍ਤੇਸਿ ਨਾਯਕੋ;

੭੦.

’ਕਦਾਹਂ ਘਰਮੋਸ੍ਸਜ੍ਜ ਪਬ੍ਬਜ੍ਜਾਸਿਰਿ ਮੁਬ੍ਬਹੇ?’

ਇਚ੍ਚੇਵਂ ਚਿਨ੍ਤਯਨ੍ਤੋ ਸੋ ਸੁਪਨ੍ਤੋਵ ਸਯੀ ਤਹਿਂ;

੭੧.

’ਯਂ ਨਿਸ੍ਸਾਯ ਮਯਂ ਏਤ੍ਥ ਨਚ੍ਚਗੀਤੇਸੁ ਵ੍ਯਾਵਟਾ,

ਸੋ’ਯਂ’ਦਾਨਿ ਸੁਪੀ’ ਅਮ੍ਹੇ ਕਸ੍ਸਦਾਨਿ ਕਰੋਮ ਤਂ?;

੭੨.

ਇਤਿ ਚਿਨ੍ਤਿਯ ਤੇ ਤਤ੍ਥ ਤੁਰਿਯੇਸੁ ਸਕੇ ਸਕੇ,

ਆਲਮ੍ਬਾ ਸਯਿਤਾ ਕਞ੍ਞਾ ਸੁਸਞ੍ਞਾਞ੍ਞਮਨਿਸ੍ਸਿਤਾ;

੭੩.

ਖਾਦਨ੍ਤਿ ਕਾਚਿ ਦਨ੍ਤਾਨਿ ਕਾਚਿ ਲਾਲਾ ਵਹਨ੍ਤਿਯੋ,

ਕਾਚਿ ਰੁਦਨ੍ਤਿਯੋ ਤਤ੍ਥ ਵਿਲਪਨ੍ਤਿ ਅਥਾ’ਪਰਾ;

੭੪.

ਕਾਕਚ੍ਛਨ੍ਤਿ’ਪਿ ਸੇਮ੍ਹਮ੍ਪਿ ਗਿਲਨ੍ਤਿ ਚ ਚਮਨ੍ਤਿ ਚ,

ਕਰੋਨ੍ਤਿ ਨਾਦਂ ਨਾਸਾਯ ਘਰੂ’ਤਿ ਚ ਖਿਪਨ੍ਤਿ ਚ;

੭੫.

ਮੁਤ੍ਤਯਨ੍ਤਿ ਤਦਾ ਕਾਚਿ ਰਹਸ੍ਸਂ ਵਿਚਰਨ੍ਤਿ ਚ,

ਦੁਗ੍ਗਨ੍ਧਂ ਵਾਤਿ ਤਂ ਠਾਨਂ ਸੁਸਾਨਂ ਆਮਕਂ ਯਥਾ;

੭੬.

ਪਬੁਦ੍ਧੋ ਅਡ੍ਢਰਤ੍ਤਮ੍ਹਿ ਗਤੇ ਤਤ੍ਥ ਨਿਸੀਦਿਯ,

ਅਦ੍ਦਕ੍ਖਿ ਤਾਸਂ ਨੇਕਾਨਿ ਵਿਕਾਰਾਨਿ ਤਹਿਂ ਤਦਾ;

੭੭.

ਤਸ੍ਸੇਵਂ ਪੇਕ੍ਖਮਾਨਸ੍ਸ ਭਵੇ ਸਂਵਿਗ੍ਗਚੇਤਸੋ,

ਆਦਿਤ੍ਤਂਵ ਉਪਟ੍ਠਾਸਿ ਮਨੇ ਖਲੁ ਭਵਤ੍ਤਯਂ;

੭੮. ¶

ਦਾਵਾਨਲ ਸਮਾਦਿਤ੍ਤ ਮਹਾਰਞ੍ਞਾਯਥਾ ਗਜੋ,

ਤਥੇਵਾਸਿ ਨਰਿਨ੍ਦਸ੍ਸ ਗੇਹਤੋ ਗਮਨੇ ਮਤੀ;

੭੯.

ਤਤੋ ਵੁਟ੍ਠਾਯ ਸਯਨਾ ਕਰੋਨ੍ਤੋ ਅਭਿਨਿਕ੍ਖਮਂ,

ਵਿਤਕ੍ਕੇਸਿ ਮਹਾਰਾਜਾ ਪਸ੍ਸਿਤੁਂ ਸਕਮਤ੍ਰਜਂ;

੮੦.

ਪਵਿਸਿਤ੍ਵਾ ਤਤੋ ਗਬ੍ਭਂ ਸਨਿਕਂ ਸਨ੍ਤਮਾਨਸੋ,

ਪਸ੍ਸਿਤ੍ਵਾ ਸਹ ਪੁਤ੍ਤੇਨ ਨਿਦ੍ਦਾਯਨ੍ਤਿਂ ਯਸੋਧਰਂ;

੮੧.

ਚਿਰਾਗਤਂ ਮਹਾਪੇਮਂ ਧਾਰਯਂ ਸਕਮਾਨਸੇ,

ਬੁਦ੍ਧੋ ਹੁਤ੍ਵਾਪਿ’ਮਂ ਸਕ੍ਕਾ ਪਸ੍ਸਿਤੁਂ ਇਤਿ ਚਿਨ੍ਤਿਯ;

੮੨.

ਗਤੋ ਨਾਥੋ ਤਤੋ ਠਾਨਾ ਬੋਧਿਯਾ ਬਦ੍ਧਮਾਨਸੋ

ਤਦਹੇਵਾਸਿ ਬੁਦ੍ਧੋਤਿ ਕਾਮੁਕੋ ਕੋ ਨ ਚਿਨ੍ਤਯੇ;

੮੩.

ਸਿਨੇਰੁ ਮੁਦ੍ਧਰਨ੍ਤੋਵ ਪਾਦੁਦ੍ਧਰਿਯ ਨਿਕ੍ਖਮਂ,

ਛਨ੍ਨਮਾਹੂਯ ਆਨੀਤਂ ਕਨ੍ਥਕਂ ਤੁਰਗਾਧਿਪਂ;

੮੪.

ਅਸ੍ਸਰਾਜਂ ਤਮਾਰੁਯ੍ਹ ਸਹ ਛਨ੍ਨੇਨ ਰਤ੍ਤਿਯਂ,

ਦੇਵੇਹਿ ਵਿਵਟਦ੍ਵਰਾ ਪਟਿਪਜ੍ਜਿ ਮਹਾਪਥਂ;

੮੫.

ਚਕ੍ਕਵਾਲ਼ੇਸੁ ਨੇਕੇਸੁ ਦੇਵਤਾ ਸੁਸਮਾਗਤਾ,

ਦੀਪਧੂਪਦ੍ਧਜੇਹੇ ਚ ਗਨ੍ਧਮਾਲੇਹਿ ਪੂਜਯੁਂ;

੮੬.

ਪੁਰਤੋ ਸਟ੍ਠੀਸਹਸ੍ਸਾਨਿ ਦਣ੍ਡਦੀਪਾਨਿ ਧਾਰਯੁਂ,

ਤਥਾ ਦਕ੍ਖਿਣਪਸ੍ਸਮ੍ਹਿ ਵਾਮਪਸ੍ਸੇ ਚ ਪਚ੍ਛਤੋ;

੮੭.

ਗਗਨਾ ਪੁਪ੍ਫਵਸ੍ਸਾਨਿ ਵਸ੍ਸਾਪੇਸੁਂ ਛ ਦੇਵਤਾ,

ਮਨ੍ਦਾਰਵਂ ਕੋਕਨਦਂ ਸੁਗਨ੍ਧਂ ਚਿਤ੍ਤਪਾਟ ਲਿਂ;

੮੮.

ਚਮ੍ਪਕਾ ਸੋਕ ਪੁਨ੍ਨਾਗ ਨਾਗਪੂਗਾਗ ਸਮ੍ਭਵਂ,

ਮਾਲਤੀਵਸ੍ਸਿਕੀਯਾਦੀ ਨਾਨਾਵਲ੍ਲੀਹਿ ਸਮ੍ਭਵਂ;

੮੯.

ਪਦੁਮੁਪ੍ਪਲ ਕਲਹਾਰ ਕੁਮੁਦਾਦ੍ਯਾਮ੍ਬੁ ਸਮ੍ਭਵਂ,

ਸੁਗਨ੍ਧਮਧੁ ਮਤ੍ਤਾਹਿ ਛਪ੍ਪਦਾਲੀਹਿ ਕੂਜਿਤਂ;

੯੦. ¶

ਪੁਪ੍ਫਵਸ੍ਸਂ ਪਵਸ੍ਸਿਤ੍ਥ ਤਿਂਸਯੋਜਨਮਞ੍ਜਸੇ,

ਪਸਤ੍ਤੋ ਤਤ੍ਥ ਤੁਰਗੋ ਦੁਕ੍ਖਤੋ ਅਗਮੀ ਤਦਾ;

੯੧.

ਏਵਂ ਪੂਜਾਵਿਧਾਨੇਹਿ ਗਨ੍ਤ੍ਵਾ’ਨੋਮਂ ਮਹਾਨਦਿਂ,

ਸਿਤਸੇਕਤ ਸਙ੍ਕਿਣ੍ਣਂ ਬਹੁਮੀਨਕੁਲਾਕੁਲਂ;

੯੨.

ਤੀਰਟ੍ਠੋ ਪਸ੍ਸਿ ਸੋ ਧੀਰੋ ਗਙ੍ਗਾਨਾਰਿਂ ਰਸਾਵਹਂ,

ਕਰੋਨ੍ਤਿਂ ਵੀਚਿਬਾਭਾਤਿ ਏਣੇਪੁਪ੍ਫੋਪਹਾਰਕਂ;

੯੩.

ਅਸ੍ਸੇਨ ਤਂ ਮਹਾਨੋਮਂ ਲਙ੍ਘਾਪੇਤ੍ਵਾ ਮਹਾਮਤੀ,

ਪਰਤੀਰੇ ਪਤਿਟ੍ਠਾਸਿ ਵਿਮਲੇ ਵਾਲੁਕਾ ਤਲੇ;

੯੪.

ਪਬ੍ਬਜਿਤੁਂ ਮਯੇਤ੍ਥੇਵ ਯੁਤ੍ਤਂ ਨੋ ਮੇ ਪਪਞ੍ਚਿਤੁਂ,

ਇਤਿ ਚਿਨ੍ਤਿਯ ਓਭਾਯ ਧਾਰਿਤਾਭਰਣਾਨਿ ਸੋ;

੯੫.

ਛਨ੍ਨਸ੍ਸ ਪਟਿਯਾਦੇਤ੍ਵਾ ਕਨ੍ਥਕਞ੍ਚ ਹਯਾਧਿਪਂ,

ਨਿਸਿਤਂ ਖਗ੍ਗਮੁਗ੍ਗਯ੍ਹ ਸਮੋਲਿਂ ਛਿਨ੍ਦਿ ਕੁਨ੍ਤਲਂ;

੯੬.

ਏਵਮਾਵਜ੍ਜਯਂ ਨਾਥੋ ਸਚੇ’ਹਂ ਸੁਗਤੋ ਭਵੇ,

ਤਿਟ੍ਠਤੁ ਗਗਨੇ ਗਨ੍ਤ੍ਵਾ ਇਤਿ ਉਕ੍ਖਿਪਿ ਚ’ਮ੍ਬਰਂ;

੯੭.

ਤਤੋ ਸਕ੍ਕੋ ਮਹਗ੍ਘੇਨ ਮਣਿਚਙ੍ਗੋਟਕੇਨ ਤਂ,

ਪਟਿਗ੍ਗਹੇਤ੍ਵਾ ਸਿਰਸਂ ਨੇਤ੍ਵਾ ਦੇਵਪੁਰਂ ਚਰਂ;

੯੮.

ਕਾਰੇਤ੍ਵਾ ਮਣਿਥੂਪਂ ਸੋ ਨੀਧੇਤ੍ਵਾ ਤਂ ਸਿਰੋਰੁਹਂ,

ਅਤ੍ਥਾਹਂ ਪਤਿਮਾਨੇਤਿ ਸਹਦੇਵੇਹਿ ਨੇਕਧਾ;

੯੯.

ਮਹਾਬ੍ਰਹ੍ਮੋਪਨੀਤਟ੍ਠਪਰਿਕ੍ਖਾਰਂ ਮਹਾਮਤੀ,

ਪਟਿਗ੍ਗਹੇਤ੍ਵਾ ਕਾਸਾਵਂ ਨਿਵਤ੍ਥੋ ਪਾਰੁਤੋ ਤਦਾ;

੧੦੦.

ਪੁਬ੍ਬੇ ਵਿਯਮ੍ਬਰਂ ਗਯ੍ਹ ਅਮ੍ਬਰੇ ਖਿਪਿ ਨਾਯਕੋ,

ਪਟਿਗ੍ਗਹੇਤ੍ਵਾ ਤਂ ਬ੍ਰਹ੍ਮਾ ਨੇਤ੍ਵਾ ਬ੍ਰਹ੍ਮਪੁਰਂ ਚਰਂ;

੧੦੧.

ਦ੍ਵਾਦਸਯੋਜਨੁਬ੍ਬੇਧਂ ਕਤ੍ਵਾ ਥੂਪਵਰਂ ਸੁਭਂ,

ਤਤ੍ਥ ਤਂ ਨਿਦਹਿਤ੍ਵਾਨ ਪਣਿਪਾਤੇਤਿ ਸਬ੍ਬਦਾ;

੧੦੨. ¶

ਸਮ੍ਪੁਣ੍ਣ ਮਨਸਙ੍ਕਪ੍ਪੋ ਪਬ੍ਬਜ੍ਜਾਸਿਰਿ ਮੁਬ੍ਬਹਂ,

ਛਾਦੇਨ੍ਤੋ ਕਾਮਲੇਨੇਵ ਮਰੁਂ ਚਙਕ੍ਕਮਿ ਨਾਯਕੋ;

੧੦੩.

ਤਤੋ ਅਮ੍ਬਵਨਂ ਗਨ੍ਤ੍ਵਾ ਵਿਨ੍ਦਨ੍ਤੋ ਪੀਤਿਜਂ ਸੁਖਂ,

ਵੀਤਿਨਾਮਯਿ ਸਤ੍ਤਾਹਂ ਰਮ੍ਮੇ ਪਾਦਪਮਣ੍ਡਪੇ;

੧੦੪.

ਤਤੋ ਰਾਜਗਹਂ ਗਨ੍ਤ੍ਵਾ ਪਾਰੁਪਿਤ੍ਵਾ ਚੀਵਰਂ,

ਗਹੇਤ੍ਵਾ ਮਣਿਵਣ੍ਣਂ ਸੋ ਪਤ੍ਤਂ ਕਰਤਲਮ੍ਬੁਜਾ;

੧੦੫.

ਬਤ੍ਤਿਂਸ ਲਕ੍ਖਣੂਪੇਤੋ ਅਨੁਬ੍ਯਞ੍ਜਨ ਮਣ੍ਡਿਤੋ,

ਬ੍ਰਹ੍ਮੁਜ੍ਜੁਗਤ੍ਤੋ ਭਗਵਾ ਪੁਰਸੇਟ੍ਠਮੁਪਾਗਮਿ;

੧੦੬.

ਵਿਸਿਖਨ੍ਤਰੇਨ ਗਚ੍ਛਨ੍ਤਂ ਲੋਕੇਕਨਯਨਂ ਜਨਾ,

ਦਿਸ੍ਵਾ ਏਵਂ ਵਿਚਿਨ੍ਤੇਸੁਂ ਨਾਯਂ ਯੋ ਸੋ ਜਨਾਧਿਪੋ;

੧੦੭.

ਕਾਮਂ ਪੁਰਵਧੁਸੋਮ੍ਮ ਵਤ੍ਤਸਮ੍ਬਨ੍ਧਕਾਰਣਾ,

ਚਨ੍ਦੋ’ਯਮਾਗਤੋ ਅਜ੍ਜ ਸਕਵੇਸੇਨ ਨੋ ਮਤਿ;

੧੦੮.

ਸੁਤ੍ਵਾਨ ਤਂ ਤਦਾ ਕੇਚਿ ਹਸਨ੍ਤਾ ਵਚਨਨ੍ਤਰਂ,

ਨਾਯਂ ਸਸੀ ਸਸਙੇਕਾ ਸੋ ਭਾਨੁਮੇਸੋ’ਤਿ ਨੋ ਮਤਿ;

੧੦੯.

ਬੋਧੇਤੁਮਾਗਤੋ ਕਾਮਂ ਪੋਰੀਨਂ ਵਦਨਮ੍ਬੁਜੇ,

ਸਕੀਯੇਨੇਵ ਰੂਪੇਨ ਵਿਮ੍ਹਯਂ ਪੋਰਿਮਾਨੁਸੇ;

੧੧੦.

ਕਿਂ ਭੋ ਉਮ੍ਮਤ੍ਤਕਾ ਅਤ੍ਥ ਏਵਂ ਮਾ ਵਦਥਾ’ਧੁਨਾ,

ਸਤਰਂਸੀ ਉਣ੍ਹਰਂਸੀ ਨ ਸੋ ਏਸੋ ਅਵਿਗ੍ਗਹੋ;

੧੧੧.

ਕਾਮੇਨਾਲਸਜਨ੍ਤੁਹਿ ਕੀਲ਼ਿਤੁਂ ਪੁਰਮਾਗਤੋ,

ਸਰੂਪੇਨ ਨ ਨੋ ਅਤ੍ਥਿ ਸਂਸਯੋ ਬਲੁ ਮਾਨਸੇ;

੧੧੨.

ਤੇਸਂ ਤਂ ਵਚਨਂ ਸੁਤ੍ਵਾ ਹਸਨ੍ਤਾ ਕੇਚਿ ਜਨ੍ਤੁਨੋ,

ਤੁਮ੍ਹੇ ਖਲੂ ਨ ਜਾਨਾਥ ਸਬਾਣੇ ਸਧਨੂ ਹਿ ਸੋ;

੧੧੩.

ਇਸ੍ਸਰੋ ਕਨ੍ਤਰੂਪੇਨ ਤੁਙ੍ਗਮਨ੍ਦਿਰਤਾ ਪੁਰਂ,

ਕੇਲਾਸੋ ਇਤਿ ਸਮ੍ਪਤ੍ਤੋ ਜਹਾਥ ਵਿਮਤਿਂ ਇਧ;

੧੧੪. ¶

ਤੇਸਮ੍ਪਿ ਵਚਨਂ ਸੁਤ੍ਵਾ ਹਸਨ੍ਤੇਕੇ ਜਨਾ ਤਦਾ,

ਨਾਯਂ ਹਰੋ ਤਿਨੇਤ੍ਤੋ ਸੋ ਕੇਸਵੇਸੋ ਇਧਾਗਤੋ;

੧੧੫.

ਵਿਚਿਣਨ੍ਤੋ ਸਿਰਿਂ ਅਜ੍ਜ ਪੁਰਸੇਟ੍ਠਮੁਪਾਗਤਂ,

ਵੇਸੇਨਞ੍ਞੇਨ ਮਞ੍ਞਾਮ ਏਤ੍ਥ ਨੋ ਨਤ੍ਥਿ ਸਂਸਯੋ;

੧੧੬.

ਪਹਰਿਤ੍ਵਾ ਕਰਂ ਕੇਚਿ ਸੁਤ੍ਵਾ ਤਂ ਵਚਨਂ ਨਰਾ,

ਹਸਨ੍ਤੇਵਂ ਤਦਾਵੋਚੁਂ ਵਾਸੁਦੇਵੋ ਨ ਵੇ ਅਯਂ;

੧੧੭.

ਕਾਮਂ ਸਰੋਜਨਾਭੋ ਸੋ ਵਾਮਨੋ ਕਣ੍ਹਵਿਗ੍ਗਹੋ,

ਅਯਮਞ੍ਞਤਰਚਣ੍ਣੇਨ ਆਗਤੋ ਪਾਕਸਾਸਨੋ;

੧੧੮.

ਪੁਰਂ ਦੇਵਪੁਰਨ੍ਤੇਤਂ ਮਞ੍ਞਮਾਨੋ ਮਹਾਜੁਤਿਂ,

ਪਸ੍ਸਿਤੁਨ੍ਤਿ ਪਟਿਞ੍ਞਾਤੋ ਮਾ ਭੋਨ੍ਤੋ ਵਿਲਪਨ੍ਤੁ ਵੇ;

੧੧੯.

ਸੁਤ੍ਵਾ ਤੇਸਂ ਗਿਰਂ ਕੇਚਿ ਕੇਲ਼ਿਂ ਕਤ੍ਵਾਨ ਨੇਕਧਾ,

ਤੁਮ੍ਹੇ ਸਕ੍ਕਂ ਨ ਜਾਨਾਥ ਸੋ ਹਿ ਭੋ ਵਜਿਰਾਯੁਧੋ;

੧੨੦.

ਏਸੋ ਹਿ ਭੋ ਮਹਾਬ੍ਰਹ੍ਮਾ ਬ੍ਰਹ੍ਮਲੋਕਾ ਇਧਾਗਤੋ,

ਪਮਤ੍ਤਾ ਕਿਨ੍ਨੁ ਵੇਦਮ੍ਹੀ ਬ੍ਰਹ੍ਮਬਨ੍ਧੁ ਪੁਰੇ ਇਧ;

੧੨੧.

ਅਥੇਸਂ ਵਚਨਂ ਸੁਤ੍ਵਾ ਕੇਚਿ ਪਣ੍ਡਿਤਜਾਤਿਕਾ,

ਨੇਤੇ ਚਨ੍ਦਾਦਯੋ ਕਾਮਂ ਮਾ ਮੋਹਂ ਭੋ ਪਕਾਸਥ;

੧੨੨.

ਚਤੁਰਾਨਨੋ ਮਹਾਬ੍ਰਹ੍ਮਾ ਸੋਮਸੋਮ੍ਮਾਨਨੋ ਅਯਂ,

ਸਮਨ੍ਤਪੋਤ੍ਥਕੋ ਬ੍ਰਹ੍ਮਾ ਪਤ੍ਤਹਤ੍ਥੋ’ਯਮਬ੍ਭੁਤੋ;

੧੨੩.

ਕਾਮਂ ਪਾਰਮਿਤਾਪੁਣ੍ਣ ਪਸਤ੍ਥੋ ਪੁਰਿਸੋ ਅਯਂ,

ਨਿਚ੍ਚਂ ਵਨ੍ਦਥ ਪੂਜੇਥ ਥੋਮੇਥੇਤਂ ਮਹਾਜੁਤਿਂ;

੧੨੪.

ਏਵਂ ਵਦਨ੍ਤਾ ਸਬ੍ਬੇ ਤੇ ਨਾਗਰਾ ਪੁਰਿਸੁਤ੍ਤਮਂ,

ਗਨ੍ਧਪੁਪ੍ਫੇਹਿ ਪੁਜੇਨ੍ਤਾ ਨਮਸ੍ਸਨ੍ਤਾ ਤਮਨ੍ਵਗੁਂ;

੧੨੫.

ਨੇਤ੍ਤਾਰਿਤ੍ਤੇਹਿ ਪਾਜੇਨ੍ਤਾ ਮੁਨਿਨੋ ਰੂਪਸਾਗਰੇ,

ਜਨ੍ਤਵੋ ਮਨਨਾਵਾਯੋ ਪਾਰਂ ਪਸ੍ਸਿਂਸੁ ਨੋ ਤਦਾ;

੧੨੬. ¶

ਤਦਾ ਲੋਕੇਕਨਯਨੋ ਸਪਦਾਨੇਨ ਵੀਥਿਯਂ,

ਚਰਂ ਯਾਪਨਮਤ੍ਤਂਵ ਲਦ੍ਧਾਗਮ੍ਮ ਪੁਰਾ ਬਹਿ;

੧੨੭.

ਪਣ੍ਡਵਂ ਗਿਰਿਮਾਸਜ੍ਜ ਤਸ੍ਸਚ੍ਛਾਯਾਯ ਸੋ ਮੁਨਿ;

ਸਙ੍ਘਾਟਿਂ ਪਞ੍ਞਪੇਤ੍ਵਾਨ ਨਿਸਜ੍ਜ ਪੁਰਿਸਾਸਭੋ;

੧੨੮.

ਅਦਿਟ੍ਠਪੁਬ੍ਬਂ ਦਿਸ੍ਵਾਨ ਪਤ੍ਤੇ ਮਿਸ੍ਸਕਭੋਜਨਂ,

ਸਞ੍ਜਾਤਪਟਿਕੂਲੋ ਤਂ ਨੁਦਿਤ੍ਵਾ ਪਚ੍ਚਵੇਕ੍ਖਣਾ;

੧੨੯.

ਅਮਤਂ ਵਿਯ ਤਂ ਭੁਤ੍ਵਾ ਵਿਕ੍ਖਾਲੇਤ੍ਵਾ ਮੁਖਂ ਦਕਾ,

ਪਤ੍ਤੇ ਵਤ੍ਤਂ ਚਰਿਤ੍ਵਾਨ ਮੁਹੁਤ੍ਤਂ ਤਤ੍ਥ ਵਿਸ੍ਸਮਿ;

੧੩੦.

ਪਵਤ੍ਤਿਂ ਤਂ ਨਿਸਾਮੇਤ੍ਵਾ ਬਿਮ੍ਬਿਸਾਰੋ ਨਰਿਸ੍ਸਰੋ,

ਸੀਘਂ ਤਮੁਪਗਨ੍ਤ੍ਵਾਨ ਕਤਾਨੁਞ੍ਞੋ ਨਿਸੀਦਿਯ;

੧੩੧.

ਨਿਮਨ੍ਤਯਿਤ੍ਵਾ ਰਜ੍ਜੇਨ ਅਨਿਚ੍ਛਨ੍ਤੇ ਯਤਿਸ੍ਸਰੇ,

ਅਨੁਗ੍ਗਹਾਯ ਮੇ ਯੁਤ੍ਤਂ ਬੁਦ੍ਧਭੂਤੇਨਿਧਾਗਮਂ;

੧੩੨.

ਏਵਂ ਨਿਮਨ੍ਤਿਤੋ ਤੇਨਾਧਿਵਾਸੇਤ੍ਵਾ ਮਹਾਮਤੀ,

ਅਗਮਾਸੁਰੁਵੇਲਾਯ ਮਤੁਲੋਰੁ ਪਰਕ੍ਕਮੋ;

੧੩੩.

ਪਧਾਨਂ ਪਦਹਿਤ੍ਵਾਨ ਛਬ੍ਬਸ੍ਸਮਤਿਦੁਕ੍ਕਰਂ,

ਪਕਾਸੇਤ੍ਵਾਨ ਲੋਕਸ੍ਸ ਮੋਕ੍ਖਂ ਨਤ੍ਥਿਤਿ ਤੇਨ ਸੋ;

੧੩੪.

ਤਤੋਪ੍ਪਭੁਤਿ ਵਤ੍ਤਨ੍ਤੋ ਮਜ੍ਝਿਮਪ੍ਪਟਿ ਪਤ੍ਤਿਯਂ,

ਕਾਯਸ੍ਸਾਨੁਗ੍ਗਹਂ ਕਤ੍ਵਾ ਤਤੋ ਸਮ੍ਪਿਣਿਤਿ’ਨ੍ਦ੍ਰਿਯੋ;

੧੩੫.

ਮੂਲੇ’ਜਪਾਲਨਿਗ੍ਰੋਧਪਾਦਪਸ੍ਸ ਮਹਾਮੁਨਿ,

ਨਿਸੀਦਿ ਨਿਜਸੋਭਾਹਿ ਓਭਾਸੇਨ੍ਤੋ ਦਿਸੋਦਿਸਂ;

੧੩੬.

ਤਦਾ ਸੇਨਾਨਿ ਨਿਗਮੇ ਸੁਜਾਤਾ ਖੀਰ ਦਾਯਿਕਾ,

ਸਮ੍ਪੁਣ੍ਣਮਨਸਙ੍ਕਪ੍ਪਾ ਯਾਚਿਤ੍ਵਾ ਵਟਦੇਵਤਂ;

੧੩੭.

ਧੀਰਂ ਦੇਵੋਤਿ ਮਞ੍ਞਨ੍ਤਿ ਤੁਟ੍ਠਹਟ੍ਠਾ ਪਮੋਦਿਤਾ,

ਹੇਮਪਾਤਿਂ ਸਪਾਯਾਸਂ ਦਤ੍ਵਾਨ ਇਦਮ’ਬ੍ਰੁਵਿ;

੧੩੮. ¶

ਯਥਾ ਮਯ੍ਹਂ ਮਹਾਦੇਵ ਇਦ੍ਧਾ ਪਤ੍ਥਿਤ ਪਤ੍ਥਨਾ,

ਤਥੇਵ ਤਵ ਸਙ੍ਕਪ੍ਪੋ ਖਿਪ੍ਪਮੇਵ ਸਮਿਜ੍ਝਤੁ;

੧੩੯.

ਇਤਿ ਵਤ੍ਵਾਨ ਵਨ੍ਦਿਤ੍ਵਾ ਕਤ੍ਵਾ ਚ ਨਂ ਪਦਕ੍ਖਿਣਂ,

ਪਕ੍ਕਨ੍ਤਾਯ ਸੁਜਾਤਾਯ ਧੀਰੋ ਪਾਤਿਂ ਸਮਾਦਿਯ;

੧੪੦.

ਉਪਗਨ੍ਤ੍ਵਾਨਾਤਿਰਮ੍ਮਂ ਨਦਿਂ ਸੋ ਨੀਲਵਾਹਿਨਿਂ,

ਸੁਪ੍ਪਤਿਟ੍ਠਿਤਨਾਮਮ੍ਹਿ ਨਦੀਤਿਤ੍ਥੇ ਨਿਸੀਦਿਯ;

੧੪੧.

ਭੁਞ੍ਜਿਤ੍ਵਾ ਊਨਪਣ੍ਣਾਸ ਪਿਣ੍ਡਂ ਕਤ੍ਵਾਨ ਭੋਜਨਂ,

ਵਿਸ੍ਸਜ੍ਜੇਤ੍ਵਾ ਤਤੋ ਪਾਤਿਂ ਪਟਿਸੋਤਂ ਨਰਾਸਭੋ;

੧੪੨.

ਤਤੋ ਸਾਲਵਨੁਯ੍ਯਾਨੇ ਵਿਸ੍ਸਮਨ੍ਤੋ ਦਿਵਾਦਿਨੇ,

ਦਿਸ੍ਵਾਨ ਸੁਪਿਨੇ ਪਞ੍ਚ ਅਤ੍ਥਂ ਤੇਸਂ ਵਿਚਿਨ੍ਤਿਯ;

੧੪੩.

ਆਬੋਧਿਮੂਲਤੋ ਮਗ੍ਗੇ ਦੇਵੇਹਿ ਸਮਲਙ੍ਕਤੇ,

ਮਣਿਤੋਰਣਪਾਲੀਹਿ ਪੁਣ੍ਣਕੁਮ੍ਭਦ੍ਧਾਜਾਦਿਹਿ;

੧੪੪.

ਸਾਯਣ੍ਹਸਮਯੇ ਨਾਥੋ ਗਚ੍ਛਨ੍ਤੋ ਬੋਧਿ ਸਨ੍ਤਿਕਂ,

ਦਿਸ੍ਵਾਨ ਸੋਤ੍ਥਿਯਂ ਨਾਮ ਥੂਯਮਾਨਂ ਦਿਜੁਤ੍ਤਮਂ;

੧੪੫.

ਤੇਨ ਦਿਨ੍ਨਟ੍ਠ ਮੁਟ੍ਠਿਨ੍ਤੁ ਗਹੇਤ੍ਵਾ ਨੀਲਸਦ੍ਦਲਂ,

ਬੋਧਿਮੂਲਮੁਪਾਗਮ੍ਮ ਕਤ੍ਵਾਨ ਤਂ ਪਦਕ੍ਖਿਣਂ;

੧੪੬.

ਅਕਾਸਿ ਤੀਣਸਨ੍ਥਾਰਂ ਪਾਚੀਨਾਭਿਮੁਖਂ ਤਦਾ,

ਤਤੋ ਮਹਿਂ ਦ੍ਵਿਧਾ ਕਤ੍ਵਾ ਸਮੁਟ੍ਠਾਸਿ ਮਹਾਸਨਂ;

੧੪੭.

ਉਚ੍ਚਂ ਚੁਦ੍ਦਸਹਤ੍ਥੇਨ ਨਾਨਾ ਚਿਤ੍ਤ ਵਿਚਿਤ੍ਤਿਤਂ,

ਅਭਟ੍ਠਨਹਿਤ੍ਥ ਤਤ੍ਰਟ੍ਠੋ ਇਚ੍ਚੇਵਂ ਦਲ਼੍ਹਮਾਨਸੋ;

੧੪੮.

ਕਾਮਂ ਤਚੋ ਨਹਾਰੂ ਚ ਅਟ੍ਠਿ ਚ ਅਵਸਿਸ੍ਸਤੁ,

ਉਪਸੁਸ੍ਸਤੁ ਮੇ ਗਤ੍ਤੇ ਸਬ੍ਬਨ੍ਤਂ ਮਂਸਲੋਹਿਤਂ;

੧੪੯.

ਨ ਉਟ੍ਠਹਾਮਬੁਜ੍ਝਿਤ੍ਵਾ ਨ ਜਹੇ ਵੀਰਿਯਂ ਮਮ,

ਅਧਿਟ੍ਠਹਿਤ੍ਵਾ ਏਵਂ ਸੋ ਨਿਸੀਦਿ ਵਜਿਰਾਸਨੇ;

੧੫੦. ¶

ਅਨਤਿਕ੍ਕਮਂ ਠਪੇਤ੍ਵਾਨ ਚਰਣਂ ਚਰਣੁਪਰਿ,

ਕਮਲਂ ਕਮਲੇਨੇਵ ਮਣਿਬਨ੍ਧਂ ਵਿਧਾਯ ਸੋ;

੧੫੧.

ਬਾਲਾਸੋਕਦਲਾਸਤ੍ਤ ਪਰਂ ਵਾ’ਸੋਕਪਲ੍ਲਵਂ,

ਨਿਧਾਯ ਨਯਨਾਨਤ੍ਦ ਪਾਣਿਂ ਪਾਣਿਤਲੇ ਜਿਨੋ;

੧੫੨.

ਯਥਾ ਸਞ੍ਝਾਘਨਾਲੀਢ ਤੁਙ੍ਗਕਞ੍ਚਨ ਪਬ੍ਬਤੋ,

ਸੁਰਤ੍ਤਚੀਵਰਚ੍ਛਨ੍ਨ ਚਾਰਿਗਤ੍ਤ ਵਿਰਾਜਿਤੋ;

੧੫੩.

ਉਦਯਾਵਲਕੋਟਿਮ੍ਹਿ ਦਿਪ੍ਪਨ੍ਤੋਵ ਦਿਵਾਕਰੋ

ਕਨ੍ਧਰੋਪਰਿ ਦਿਪ੍ਪਨ੍ਤ ਮੁਖਮਣ੍ਡਲਮਣ੍ਡਿਤੋ;

੧੫੪.

ਯਥਾ ਚਾਮਿਕਰਬ੍ਯਮ੍ਹੇ ਸੁਨੀਲਂ ਸੀਹਪਞ੍ਜਰਂ,

ਅਸਮ੍ਪਕਮ੍ਪਪਮ੍ਹੇਹਿ ਪਿਹਿਤਦ੍ਧਸੁਲੋਚਨੋ;

੧੫੫.

ਨੀਲੁਪ੍ਪਲਕਲਾਪਂਚ ਜਨਨੇਤ੍ਤਾਲਿਪਾਤਨਂ,

ਸਜ੍ਝੁਦਣ੍ਡਸਮਾਬਦ੍ਧ ਬੋਧਿਕ੍ਖਨ੍ਧਮਫਸ੍ਸਿ ਸੋ;

੧੫੬.

ਨਿਸਿਨ੍ਨੋ ਬੋਧਿਤੋ ਛੇਜ੍ਜ ਪਵਾਲ਼ਤਰੁਣਙ੍ਕੁਰਾ,

ਪਤਮਾਨਾ ਸਮਨ੍ਤਾਸੁਂ ਤੇਜਂ ਵਿਯ ਕੁਬੁਦ੍ਧੀਨਂ;

੧੫੭.

ਦੇਵਾ ਤਤ੍ਥ ਸਮਾਗਞ੍ਜੁਂ ਖਿਪ੍ਪਂ ਦਸਸਹਸ੍ਸਿਯਂ,

ਕਮਲਾਸਨੋਰਗਾ ਚੇਵ ਸਿਦ੍ਧਵਿਜ੍ਜਾਧਰਾਦਯੋ

੧੫੮.

ਸਹਮ੍ਪਤਿ ਮਹਾਬ੍ਰਹ੍ਮਾ ਬ੍ਰਹ੍ਮਸੇਨਾਪੁਰਕ੍ਖਤੋ,

ਸਿਤਾਤਪਤ੍ਤਂ ਧਾਰੇਨ੍ਤੋ ਠੀਤੋ ਸਮ੍ਬੁਦ੍ਧ ਸਨ੍ਤਿਕੇ;

੧੫੯.

ਵੀਸਂ ਰਤਨ ਸਤਾਯਾਮਂ ਵਿਜਯੁਤ੍ਤਰ ਨਾਮਕਂ,

ਸਙ੍ਖਂ ਧਮੇਨ੍ਤੋ ਅਟ੍ਠਾਸਿ ਸਾਦਰੋ ਪਾਕਸਾਸਨੋ;

੧੬੦.

ਸੁਯਾਮੋ ਸਹ ਸੇਨਾਯ ਥੋਮਯਨ੍ਤੋ ਨਰਾਧਿਪਂ,

ਮਣਿਤਾਲਵਣ੍ਟਂ ਪਗ੍ਗਯ੍ਹ ਮਨ੍ਦਮਨ੍ਦੇਨ ਵੀਜਤਿ;

੧੬੧.

ਜਿਤਕਿਤ੍ਤਿ ਲਤਗ੍ਗਮ੍ਹਿ ਸਸ੍ਸ ਪੁਪ੍ਫਂਚ ਪੁਪ੍ਫੀਤਂ,

ਵਾਲ਼ਵਿਜਨਿਮੁਗ੍ਗਯ੍ਹ ਅਟ੍ਠਾ ਸਨ੍ਤੁਸਿਤੋ ਤਹਿਂ;

੧੬੨. ¶

ਬੇਲੁਵਂ ਵੀਣਮਾਦਾਯ ਗੀਤਂ ਨਾਨਾਲਯਾਨੁਗਂ,

ਪਞ੍ਚਸਿਖੋ ਠਿਤੋ ਤਤ੍ਥ ਗਾਯਮਾਨੋ ਅਨੇਕਧਾ;

੧੬੩.

ਮਹਾਕਾਲੋ’ਪਿ ਨਾਗਿਨ੍ਦੋ ਨਾਗਸਙ੍ਘਪੁਰਕ੍ਖਤੋ,

ਥੋਮੇਨ੍ਤੋ ਤਤ੍ਥ ਅਟ੍ਠਾਸਿ ਨਵਾਰਹਗੁਣਾਦਿਹਿ;

੧੬੪.

ਰਙ੍ਗਭੁਮਿਂ ਮਾਪਯਿਤ੍ਵਾ ਗਹੇਤ੍ਵਾਨ ਵਰਙ੍ਗਨਾ,

ਉਪਹਾਰਂ ਕਰੋਨ੍ਤਟ੍ਠਾ ਤਿਮ੍ਬਰੂ ਸੂਰਿਯਵਚ੍ਚਸਾ;

੧੬੫.

ਆਗਨ੍ਤ੍ਵਾ ਸਹ ਸੇਨਾਯ ਸਿਤਙ੍ਗੋ ਸਿਤਭੁਸਨੋ,

ਧਤਰਟ੍ਠੋ ਠਿਤੋ ਪੁਬ੍ਬੇ ਆਰਕ੍ਖਂ ਕੁਰੁਮਾਨਕੋ;

੧੬੬.

ਪੂਰੇਨ੍ਤੋ ਸਕਸੇਨਾਯ ਦਕ੍ਖਿਣਸ੍ਸਂ ਵਿਰੂਲ਼੍ਹਕੋ,

ਆਰਕ੍ਖਂ ਕੁਰੁਮਾਨਟ੍ਠਾ ਨੀਲਙ੍ਗੋ ਨੀਲਭੁਸਨੋ;

੧੬੭.

ਵਿਰੂਪਕ੍ਖੋ’ਪਿ ਅਟ੍ਠਾਸਿ ਪਾਲਯਂ ਪਚ੍ਛਿਮਂ ਦਿਸਂ,

ਰਤ੍ਤਙ੍ਗਾਭਰਣੋ ਵਮ੍ਮੀ ਨਿਜਸੇਨਾਪੁਰਕ੍ਖਤੋ;

੧੬੮.

ਉਤ੍ਤਰਸ੍ਸਂ ਸਸੇਨਾਯ ਆਰਕ੍ਖਂ ਕੁਰੁਮਾਨਕੋ,

ਸੋਣ੍ਣਵਣ੍ਣਙ੍ਗਾਭਰਣੋ ਅਟ੍ਠਾਸਿ ਨਰਵਾਹਨੋ;

੧੬੯.

ਕਿਮੇਤ੍ਥ ਬਹੁਲਾਪੇਨ ਜਾਤਿਕ੍ਖੇਤ੍ਤਮ੍ਹਿ ਦੇਵਤਾ,

ਨਾਗਤਾ ਨੇਵ ਵਾਹੇਸੁਂ ਸਬ੍ਬੇ ਏਤ੍ਥੇ’ਵ ਓਸਟਾ;

੧੭੦.

ਗਗਨਾਤੋਤਿਣ੍ਣਕੇਤੁ ਪਾਦੇਹਿ ਪਥਵੀਤਲੇ,

ਨਾਗਾਦਯੋ ਨ ਧੁਤਾਸੁਂ ਕੇਤੁਨਂ ਬਹੁ ਕਾ ਕਥਾ;

੧੭੧.

ਨ ਧੂਤਾ ਧਜਪਾਦੇਹਿ ਵਾਯੁਤੁਦ੍ਦਾਮਵੁਤ੍ਤਿਹਿ,

ਤਾਰਕਾ ਗਗਨੇ ਬ੍ਰੂਮੋ ਕਿਨ੍ਨੁ ਤਤ੍ਥ ਧਜਾਲੁਤਾ;

੧੭੨.

ਪੁਬ੍ਬਦਿਸਾ ਚਕ੍ਕਵਾਲ਼ ਸਿਲਾਯੁਗ੍ਗਤਕੇਤੁਨਂ,

ਪਾਦਾਨਿ ਪਰਭਾਗਾਦਿ ਚਕ੍ਕਵਾਲ਼ਸਿਲਨ੍ਵਗੁਂ;

੧੭੩.

ਚਕ੍ਕਵਾਲ਼ ਮਹਾਮੇਰੁ ਯੁਗਨ੍ਧਰ ਨਗਾਦਯੋ,

ਪੁਪ੍ਫਾਵਤਂਸਕਾ’ਵਾਸੁਂ ਨਾਨਾਵਣ੍ਣੇਹਿ ਸਙ੍ਖਤਾ;

੧੭੪. ¶

ਵਾਮਾਮਨ੍ਦਮਕਰਨ੍ਦ ਬਿਨ੍ਦੁਸਨ੍ਦੋਹ ਸੁਨ੍ਦਰਂ,

ਉਲ੍ਲੋਲ ਪਦੁਮਾਕਿਣ੍ਣ ਵਿਤਾਨਂ ਵਾਸਿ ਅਮ੍ਬਰਂ;

੧੭੫.

ਖਿਤ੍ਤਸੋਗਨ੍ਧਚੁਣ੍ਣਾਨਿ ਦੇਵਬ੍ਰਹ੍ਮਾਦਿਨਾ ਤਹਿਂ,

ਵਿਤਾਨਂ ਵਿਯ ਖਾਯਨ੍ਤਿ ਚਕ੍ਕਵਾਲ਼ਗ੍ਗਮਣ੍ਡਪੇ;

੧੭੬.

ਕਪ੍ਪੂਰਾਗਰੁਧੂਪੇਹੀ ਤਤ੍ਥ ਤਤ੍ਥੁਗ੍ਗਤੇਹਿ ਮਾ,

ਕਾਲਬ੍ਭਕੂਟਚ੍ਛਨ੍ਨੋਵ ਆਸਿ ਮਞ੍ਞਂ ਕਥੇਮੁ ਕਿਂ;

੧੭੭.

ਜਾਤਿਕ੍ਖੇਤ੍ਤੇਸੁ ਦੇਵੇਹਿ ਕਤਗ੍ਘਿਕੁਸੁਮਾਦਿਨਾ,

ਨੋਸੀਨਾ ਧਰਣੀ ਭਾਰਾ ਦਿਸੇਭਾਨਂ ਬਲਂ ਅਹੋ;

੧੭੮.

ਅਮ੍ਬਰਾਲਮ੍ਬਮਾਨਾਨੀ ਪੁਪ੍ਫਦਾਮਾਨਿ ਭੂਤਲਂ,

ਆਕਡ੍ਢਨਾਯ ਦੇਵੇਹਿ ਬਦ੍ਧਰਜ੍ਜੁਵ ਭਾਸਰੇ

੧੭੯.

ਅਞ੍ਞੋਞ੍ਞਕਰਮੁਗ੍ਗਯ੍ਹ ਗਗਨੇ ਸੁਰਸੁਤ੍ਦਰੀ,

ਪਰਿਬ੍ਭਮਨ੍ਤਾ ਗਾਯਨ੍ਤਿ ਤਤ੍ਥ ਤਤ੍ਥ ਮਨੋਰਮਂ;

੧੮੦.

ਉਭੋ ਭੁਜੇ ਵਿਕਾਸੇਤ੍ਵਾ ਮਣ੍ਡਿਤਂ ਸੁਰਸੁਤ੍ਦਰੀ,

ਭਮਨ੍ਤਿ ਭਨ੍ਤਭੇਣ੍ਡੁਵ ਤਤ੍ਥ ਤਤ੍ਥਮ੍ਬਰੇ ਯੁਗਾ;

੧੮੧.

ਨੀਲੁਪ੍ਪਲਕਲਾਪਾਦੀ ਗਹੇਤ੍ਵਾਨ ਸੁਰਙ੍ਗਨਾ,

ਠੀਤਾਸੁਂ ਪਰਿਵਾਰੇਤ੍ਵਾ ਪੂਜਮਾਨਾ ਨਰਿਸ੍ਸਰਂ;

੧੮੨.

ਰਤ੍ਨਪਲ੍ਲਵਕਲਹਾਰ ਕਮਲੁਪ੍ਪਲ ਸਙ੍ਗਤੇ,

ਸਨ੍ਨੀਰਕੁਸੁਮਾਕਿਣ੍ਣੇ ਪੁਣ੍ਣੇਸੋਗਨ੍ਧਵਾਰਿਹੀ;

੧੮੩.

ਕਞ੍ਚਨਾਦਿਘਟੇ ਗਯ੍ਹ ਅਮ੍ਬਰੇ ਸੁਰਸੁਨ੍ਦਰੀ,

ਕਤ੍ਵਾਨ ਸੁਗਤਂ ਮਜ੍ਝੇ ਪੂਜਯਿਂਸੁ ਸਮਨ੍ਤਤੋ

੧੮੪.

ਕਞ੍ਚਨਾਦਾਸਹਤ੍ਥਾ ਚ ਕਾਚੀ ਕਞ੍ਞਾ ਤਥਾ ਠਿਤਾ,

ਤਾਲਵਣ੍ਟੇ ਗਹੇਤ੍ਵਾਨ ਠੀਤਾਸੁਂ ਕਾਚਿ ਦੇਵਤਾ;

੧੮੫.

ਕਾਚਿ ਮਙ੍ਗਲ ਸਂਯੁਤ੍ਤ ਵਚਨਾ ਤਵ ਪਤ੍ਥਨਾ,

ਸਮਿਜ੍ਝਤੁਤਿ ਘੋਸੇਨ੍ਤੀ ਪਰਿਵਾਰੇਤ੍ਵਾ ਠਿਤਾ ਜਿਨਂ;

੧੮੬. ¶

ਸਿਰਿਵਚ੍ਛਾਦਿ ਪਗ੍ਗਯ੍ਹ ਅਟ੍ਠਮਙ੍ਗਲਮੁਤ੍ਤਮਂ,

ਠਿਤਾਸੁਂ ਗਗਨੇ ਨਾਰੀ ਪਰਿਵਾਰੇਤ੍ਵਾ ਮੁਨਿਸ੍ਸਰਂ;

੧੮੭.

ਨਚ੍ਚਨ੍ਤਿ ਕੇਚਿ ਕੀਲ਼ਨ੍ਤਿ ਸੇਲੇਨ੍ਤਿ ਚ ਲਲਨ੍ਤਿ ਚ,

ਵਾਦੇਨ੍ਤਿ ਕੇਚਿ ਗਾਯਨ੍ਤਿ ਵੇਲੁਕ੍ਖੇਪਂ ਕਰੋਨ੍ਤਿ ਚ;

੧੮੮.

ਨੇਕਪੁਪ੍ਫਗ੍ਘਿਪਨ੍ਤੀ ਚ ਤਥਾ ਦੀਪਗ੍ਘਿਪਨ੍ਤਿ ਚ,

ਮਣਿਚਾਮੀਕਰਾਸਜ੍ਝੁ ਅਗ੍ਘਿਕਾ ਪਨ੍ਤਿਯੋ ਤਥਾ;

੧੮੯.

ਆਬ੍ਰਹ੍ਮਭਵਨੁਗ੍ਗਮ੍ਮ ਚਕ੍ਕਵਾਲ਼ਸਮਨ੍ਤਤੋ,

ਤਿਟ੍ਠਨ੍ਤਿ ਜਲਮਾਨਾਯੋ ਬੁਦ੍ਧਸ੍ਸ ਮਙ੍ਗਲੁਸ੍ਸਵੇ;

੧੯੦.

ਸਤ੍ਤਰਤਨਸਮ੍ਭੁਤਾ ਨਾਨਾ ਤੋਰਣਪਨ੍ਤੀਯੋ,

ਹੇਮਰਮ੍ਭਾਮਯਾ ਚਾਪਿ ਤਥਾ ਦੁਸ੍ਸਮਯਾ ਸਿਯੁਂ;

੧੯੧.

ਨਾਨਾਵਣ੍ਣੇਹਿ ਨੇਕੇਹਿ ਛਤ੍ਤੇਹਿ ਚ ਨਿਰਨ੍ਤਰਂ,

ਚਕ੍ਕਵਾਲ਼ੋਦਰਂ ਆਸਿ ਸਰਂਚ ਕਮਲਾਕੁਲਂ;

੧੯੨.

ਤਤ੍ਥ ਤਤ੍ਥੁਜ੍ਜਲਾਨੇਕ ਯਨ੍ਤਦੀਪਾਵਲੀ ਮਹੀ,

ਤਾਰਕਾਜਾਲਕਾਕਿਣ੍ਣ ਗਗਨਙ੍ਗਨਸਨ੍ਤਿਭਾ;

੧੯੩.

ਧਜਨ੍ਤਰਿਤ ਛਤ੍ਤਾ’ਸੁਂ ਚਕ੍ਕਵਾਲ਼ਗਿਰੂਪਰਿ,

ਨਿਰਨ੍ਤਰਾ’ਸੁਂ ਤਤ੍ਥੇਵ ਘਟਦੀਪਾ ਚ ਤੋਰਣ;

੧੯੪.

ਨਾਨਾਤੁਰਿਯਨਾਦੇਹਿ ਨਾਨਾਸਙ੍ਗੀਤਿਤਾਹਿ ਚ,

ਸਾਧੁਵਾਦੇਹਿ ਨੇਕੇਹਿ ਚਕ੍ਕਵਾਲ਼ੋ ਫੁਟੋ ਅਹੂ;

੧੯੫.

ਅਹੋ ਮਹਨ੍ਤਤਾ ਤਸ੍ਸ ਬੁਦ੍ਧਸ੍ਸ ਕਤਮਙ੍ਗਲੇ,

ਪੂਜਾਵਿਸੇਸਂ ਤਂ ਕੋ ਹਿ ਮੁਖੇਨੇਕੇਨ ਭਾਸਤੀ;

੧੯੬.

ਚਤੁਮ੍ਮੁਖੋ ਸਹਸ੍ਸਕ੍ਖੋ ਦ੍ਵਿਸਹਸ੍ਸਨਯਨੋ ਫਣੀ,

ਦਸਕਣ੍ਠੋ’ਪਿ ਤਂ ਸਬ੍ਬਂ ਨੇਵ ਸਕ੍ਕੋਨ੍ਤਿ ਭਾਸਿਤੁਂ;

੧੯੭.

ਏਵਂ ਸੁਰਾਸੁਰਬ੍ਰਹ੍ਮ ਵੇਨਤੇਯ੍ਯੋਰਗਾਦਿਹਿ,

ਨਿਰਨ੍ਤਰਂ ਕਤਾਨੇਕ ਮਹਾਮਹ ਸਮਾਕੁਲੇ;

੧੯੮. ¶

ਤਸ੍ਮਿਨ੍ਤੁ ਵਾਸਰੇ ਮਾਰੋ ਪਸ੍ਸਿਤ੍ਵਾ ਭੁਵਨਂ ਇਦਂ,

ਆਮਨ੍ਤੇਤ੍ਵਾ ਸਾਨੁਵਰੇ ਆਹੇਵਂ ਸਕੁਤੂਹਲੋ;

੧੯੯.

ਸਬ੍ਬੇ ਦਿਬ੍ਬਵਿਮਾਨਾ ਭੋ ਸੁਞ੍ਞਾ ਦਿਸ੍ਸਨ੍ਤਿ ਛਡ੍ਡਿਤਾ,

ਪੁਰਪਾਲਮ੍ਪਹਾਪੇਤ੍ਵਾ ਕ੍ਵ ਗਤਾ’ਸੁਂ ਸਦੇਵਕਾ;

੨੦੦.

ਕਿਮ੍ਭੋ ਮਾਰ ਨ ਜਾਨਾਸਿ ਮਤ੍ਤੋ ਸੁਤ੍ਤੋ’ਸਿ ਅਜ੍ਜ ਕਿਂ,

ਸੁਦ੍ਧੋਦਨਿਯ ਸਿਦ੍ਧਤ੍ਥੋ ਮਾਯਾਯ ਤਨਯੋ ਅਯਂ;

੨੦੧.

ਪੁਰੇਤ੍ਵਾ ਪਾਰਮੀ ਸਬ੍ਬਾ ਕਤ੍ਵਾਨ ਅਭਿਨਿਕ੍ਖਮਂ,

ਬੋਧਿਮੁਲੇ ਨਿਸਿਨ੍ਨੋ ਸਿ ਅਜ੍ਜ ਬੁਦ੍ਧੋ ਭਵਾਮੀਤਿ;

੨੦੨.

ਤਸ੍ਸ ਪੂਜਾਵਿਧਾਨਤ੍ਥਂ ਦਸਸਹਸ੍ਸੀਸੁ ਦੇਵਤਾ,

ਸਮਾਗਤਾ ਹਟ੍ਠਤੁਟ੍ਠਾ ਕਰੋਨ੍ਤਜ੍ਜ ਮਹਾਮਹਂ;

੨੦੩.

ਕਿਨ੍ਨੁ ਤੇ ਬਧਿਰਂ ਸੋਤਂ ਕਿਨ੍ਨੁ ਪਰਿਹਾਯਿ ਲੋਚਨਂ,

ਧਜਗ੍ਗਾ ਤੇ ਨ ਦਿਸ੍ਸਨ੍ਤਿ ਉਲ੍ਲੋਲਂ ਤੇ ਨ ਸੂਯਤਿ;

੨੦੪.

ਤੇਸਂ ਤਂ ਵਚਨਂ ਸੁਤ੍ਵਾ ਅਨ੍ਤਕੋ ਖਲੁ ਪਾਪਿਮਾ,

ਦੁਕ੍ਖਿਤੋ ਦੁਮ੍ਮਨੋ ਤੇਸਂ ਸੋਚਨ੍ਤੋ ਇਦਮ੍ਬ੍ਰੁਵਿ;

੨੦੫.

ਅਹੋ ਵਤਾ’ਤਿਪਰਿਹਾਨਿ ਸਂਸਾਰਸ੍ਸ ਮਹਾ ਅਯਂ,

ਅਸਾਰੋ ਖਲੁ ਸਂਸਾਰੋ ਸਿਦ੍ਧਤ੍ਥੇ ਵਿਭਵਂ ਗਤੇ;

੨੦੬.

ਅਹੋ ਵਤਾ’ਤਿ ਨਟ੍ਠਮ੍ਹਾ ਤਿਵਟ੍ਟਂ ਪਰਿਪੁਰਿਤਂ,

ਹੋਤਿ ਭੋ ਦਹਨਾ ਦਡ੍ਢਵਨਂਵਾਤਿ ਅਲਕ੍ਖਿਕਂ;

੨੦੭.

ਨਿਰਾਲੋਕਂ ਤਿਲੋਕਂ ਭੋ ਅਸੁਰਂ ਵਾਸਰਂ ਯਥਾ,

ਪਰਿਮੋਸਰਤਨਂ ਹੋਤਿ ਰਜ੍ਜਂ ਵੇਦਂ ਜਗਤ੍ਤਯਂ;

੨੦੮.

ਮਮੇਸ ਵਿਸਯਂ ਹਿਤ੍ਵਾ ਯਾਤਿ ਸਿਦ੍ਧਤ੍ਥਦਾਰਕੋ,

ਤੇਨ ਯਾਤੇਨ ਮਗ੍ਗੇਨ ਨਿਕ੍ਖਮਨ੍ਤਿ ਬਹੁਜ੍ਜਨਾ;

੨੦੯.

ਭਵਨ੍ਤਂ ਨ ਕਰੋਤੇਸੋ ਯਾਵ ਸੁਦ੍ਧੋਦਨਤ੍ਰਜੋ,

ਏਥ ਗਚ੍ਛਾਮ ਸਿਦ੍ਧਤ੍ਥਮਸਿਦ੍ਧਤ੍ਥਂ ਕਰੋਮ ਭੋ;

੨੧੦.

ਮਾਪੇਥ ਭੇਰਵਂ ਵਣ੍ਣਂ ਬੀਭਚ੍ਛਂ ਦੁਦ੍ਦਸਂ ਖਰਂ,

ਸਦ੍ਦੇਨੇਵ ਪਲਾਪੇਥ ਤੂਲਭਟ੍ਟਂਵ ਵਾਯੁਨਾ;

੨੧੧. ¶

ਤਸ੍ਸ ਤਂ ਵਚਨਂ ਸੁਤ੍ਵਾ ਮਾਰਸੇਨਾ ਸਮਾਗਮੁਂ,

ਨਾਨਾਵੇਸਧਰਾ ਹੁਤ੍ਵਾ ਨਾਨਾਯੁਧ ਸਮਙ੍ਗਿਨੋ;

੨੧੨.

ਯੋਜਨਾਨਂ ਤਦਾ ਮਾਰੋ ਦਿਯਡ੍ਢਸਤਮੁਚ੍ਚਤੋ,

ਗਿਰਿਮੇਖਲਮਾਰੁਯ੍ਹ ਸੇਨਾਯ ਸਹਸਾ’ਗਮੀ;

੨੧੩.

ਦਿਸ੍ਵਾਨ ਦੁਰਤੋ ਏਤ੍ਤਂ ਦੇਵਾ ਮਾਰਂ ਸਵਾਹਿਨਿਂ,

ਭਯਟ੍ਟਾਪਗਮੁਂ ਖਿਪ੍ਪਂ ਧਾਵਮਾਨਾ ਦਿਸੋਦਿਸਂ;

੨੧੪.

ਸਂਖਿਪ੍ਪ ਖਿਪ੍ਪਂ ਸਚ੍ਛਤ੍ਤਂ ਬ੍ਰਹ੍ਮਾ ਧਾਵਿ ਪਰਮ੍ਮੁਖੋ,

ਕਤ੍ਵਾਨ ਪਿਟ੍ਠਿਯਂ ਸਙ੍ਖਂ ਸਕ੍ਕੋ ਧਾਵਿ ਵਿਸਙ੍ਕਿਤੋ;

੨੧੫.

ਮਹਾਕਾਲੋ’ਪਿ ਨਾਗਿਨ੍ਦੋ ਨਿਮੁਜ੍ਜ ਮਹਿਯਂ ਤਦਾ,

ਵਤ੍ਤਦਤ੍ਤਕਰੋ ਭੀਰੁ ਸਕੇ ਨਿਪਤਿ ਮਞ੍ਚਕੇ;

੨੧੬.

ਸਂ ਸਂ ਪੂਜਾਵਿਧਾਨਨ੍ਤੁ ਛਡ੍ਡੇਤ੍ਵਾਨ ਸਦੇਵਕਾ,

ਗਤਾਸੁਂ ਸੁਞ੍ਞਕਂ ਆਸਿ ਚਕ੍ਕਵਾਲ਼ਮਿਦਂ ਤਦਾ;

੨੧੭.

ਨਿਸ੍ਸਿਰੀਕਂ ਪਦੇਸਂ ਤਂ ਅਸੋਭਂ ਅਸਮਞ੍ਜਸਂ,

ਅਹੋਸਿ ਪਤਿਤਾਨੇਕ ਪੂਜਾਭਣ੍ਡਸਮਾਕੁਲਂ;

੨੧੮.

ਏਕੋਵ ਤਤ੍ਥ ਸੁਗਤੋ ਨਿਸੀਦਿ ਵਜਿਰਾਸਨੇ,

ਪਜ੍ਜਲਂ ਨਿਜਸਿਰਿਯਾ ਸੂਰਿਯੋਵ ਯੁਗਨ੍ਧਰੇ;

੨੧੯.

ਅਕਮ੍ਪੋ ਚ ਅਸਨ੍ਤ੍ਰਾਸੀ ਲੋਮਹਂਸ ਵਿਵਜ੍ਜਿਤੋ,

ਅਭੀਤੋ ਸੀਹਰਾਜਾਵ ਮਿਗਚ੍ਛਾਪਾਨਮਗ੍ਗਤੋ;

੨੨੦.

ਤਤੋ ਧਮ੍ਮਿਸ੍ਸਰਸ੍ਸਗ੍ਗੇ ਦੁਨ੍ਨਿਮਿਤ੍ਤਾਨਿ ਜਾਯਰੁਂ,

ਅਨ੍ਧਕਾਰਂ ਦਿਸਾ ਆਸੁਂ ਧੂਮਕੇਤੁ ਚ ਅਮ੍ਬਰੇ;

੨੨੧.

ਦਿਨਂ ਦੁਦ੍ਦਿਨਕਂ ਆਸਿ ਹਤਰਂਸਿ ਦਿਵਾਕਰੋ,

ਉਕ੍ਕਾਪਤੋ’ਪਿ ਪਞ੍ਞਾਯਿ ਦਿਸਾਡਾਹੋਪਪਜ੍ਜਥ;

੨੨੨.

ਅਘਨੇ ਗਗਨੇ ਆਸੁਂ ਇਨ੍ਦਚਾਪਵਿਰਜ੍ਜੁਤੀ,

ਅਨਲਾਸਨਿਯੋ’ਦਿਤ੍ਤਾ ਤਤ੍ਥ ਤਤ੍ਥ ਪਤਨ੍ਤੀ ਚ

੨੨੩.

ਕਾਕੋਲਸਙ੍ਘਾ ਵਸ੍ਸਿਂਸੁ ਉਣ੍ਣ ਸਕੁਣਕੋਸਿਯਾ,

ਚਰਿਂਸੁ ਅਮ੍ਬਰੇ’ਪੇਤਾ ਕਬਨ੍ਧਾ ਚ ਭਯਾਵਹਾ;

੨੨੪. ¶

ਸੇਨਂ ਸਂਵਿਦਹਿਤ੍ਵਾਨ ਤਤੋ ਮਾਰੋ ਅਭਿਦ੍ਦਵਿ,

ਆਗਨ੍ਤ੍ਵਾ ਚਕ੍ਕਵਾਲ਼ਮ੍ਹਿ ਠਿਤੋ ਜਿਨਮੁਦਿਕ੍ਖਿਯ;

੨੨੫.

ਏਕਕਸ੍ਸ ਮਨੁਸ੍ਸਸ੍ਸ ਸਨ੍ਤਿਕੋਪਗਮਂ ਮਮ,

ਨ ਯੁਤ੍ਤਞ੍ਹਿ ਗਜੋ ਯਾਤਿ ਗਜਂ ਨੋ ਯਾਤਿ ਕੋਤ੍ਥੁਕਂ;

੨੨੬.

ਨੇਤਂ ਗਰੁ ਪਲਾਪੇਤੁਂ ਕਾਲੋ ਇਤਿ ਵਿਚਿਨ੍ਤਿਯ,

ਮਾਪੇਸਿ ਕੁਪਿਤੋ ਖਿਪ੍ਪਂ ਕਪ੍ਪਨਿਲ ਸਮਾਨਿਲਂ;

੨੨੭.

ਖਿਪਨ੍ਤੋ ਗਗਨੇ ਖਿਪ੍ਪਂ ਉਦ੍ਧਰਿਤ੍ਵਾ ਵਨਸ੍ਪਤੀ,

ਕਤ੍ਵਾਨ ਵਨਮੁਮ੍ਮੂਲਂ ਵਿਦ੍ਧਂਸੇਨ੍ਤੋ ਅਸੇਸਕਂ;

੨੨੮.

ਚਾਲੇਤ੍ਵਾ ਤਾਲਸਾਲਾਦਿਂ ਲੁਞ੍ਚਿਤ੍ਵਾ ਗਗਨੇ ਖਿਪਂ,

ਪਾਤੇਨ੍ਤੋ ਚਕ੍ਕਵਾਲ਼ਨ੍ਤੇ ਵਾਜਿਸੀਹ ਗਜਾਦਯੋ;

੨੨੯.

ਪਹਰਿਤ੍ਵਾ ਵਿਵਤ੍ਤੇਤ੍ਵਾ ਗਿਰਿਕੂਟਾਨਿ ਉਕ੍ਖਿਪਂ,

ਭਮਯਨ੍ਤੋ ਨਭੋਮਜ੍ਝੇ ਧਾਵਤੇਵ ਤਤੋ ਤਤੋ;

੨੩੦.

ਸਿਲਾਹਿ ਸਿਲਾਸਙ੍ਘਟ੍ਟ ਮਹਾਨਾਦਂ ਪਵਤ੍ਤਯਂ,

ਪਾਤੇਨ੍ਤੋ ਦਹਨਞ੍ਚਾਪਿ ਧੂਮਮਮ੍ਬਰ ਮੁਕ੍ਖਿਪਂ;

੨੩੧.

ਭਮਯਨ੍ਤੋ ਗਹੇਤ੍ਵਾਨ ਅਮ੍ਬਰੇ ਛਦਨਿਟ੍ਠਿਕਾ,

ਪਾਸਾਦੇ ਪਰਿਵਤ੍ਤੇਤ੍ਵਾ ਪਹਰਨ੍ਤੋ ਨਗਾਦਿਸੁ;

੨੩੨.

ਖਨਨ੍ਤੋ ਪਥਵਿਂ ਪਂਸੁਂ ਗਹੇਤ੍ਵਾਮ੍ਬਰਮਣ੍ਡਲੇ,

ਬਨ੍ਧਨ੍ਤੋਵ ਪਰਂ ਭੁਮਿਂ ਭਿਨ੍ਦਨ੍ਤੋ ਤੁਙ੍ਗਪਬ੍ਬਤੇ;

੨੩੩.

ਭਯਾਨਕੇਨ ਸਦ੍ਦੇਨ ਉਪਗਮ੍ਮ ਮਹਾਮੁਨਿਂ,

ਚਾਲੇਤੁਂ ਨੇਵ ਸੋ ਸਕ੍ਖਿ ਅਂਸੁਮਤ੍ਤਮ੍ਪਿ ਚੀਵਰੇ;

੨੩੪.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਪਠਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੩੫.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਇਤਿ ਪਠਮੋ ਵਿਜਯੋ.

੨੩੬. ¶

ਦਿਸ੍ਵਾ ਨਮੁਚਿ ਧੀਰਸ੍ਸ ਮਾਲੁਤੇਨਾਨੁਪਦ੍ਦਵਂ,

ਦੁਕ੍ਖੀ ਚ ਦੁਮ੍ਮਨੋ ਆਸਿ ਕੋਧੇਨਾਤੁਰਮਾਨਸੋ;

੨੩੭.

ਹੋਤੁ ਦਾਨਿ ਮਹੋਘੇਨ ਪਵਾਹੇਮਿ ਇਮਂ ਯਤਿਂ,

ਮਾਪੇਤ੍ਵਾਨ ਮਹਾਮੇਘਂ ਸੋਚਨਾਯ ਅਲਂ ਮਮ;

੨੩੮.

ਇਤਿ ਚਿਨ੍ਤਿਯ ਸੋ ਮਾਰੋ ਮਹਾਮੇਘਮਮਾਪਯਿ,

ਦਿਸਾਸੁਮ੍ਪਿਹਿਤਾ ਸਬ੍ਬਾ ਅਨ੍ਧਕਾਰੋ ਅਵਤ੍ਥਰਿ;

੨੩੯.

ਉਪਰੂਪਰਿ ਗੁਣਾ ਹੁਤ੍ਵਾ ਸਹਸ੍ਸਾਨਿ ਸਤਾਨਿ’ਪਿ,

ਧਾਰਾਧਰਾ ਮਹਾਧਾਰਾ ਵਤ੍ਤਯਿਂਸੁ ਸਮਨ੍ਤਤੋ;

੨੪੦.

ਸੋਦਾਮਿਨੀਸਹਸ੍ਸੇਹਿ ਵਿਨਦ੍ਧਂਵ ਨਭਂ ਅਹੂ,

ਤਤ੍ਥ ਤਤ੍ਥ ਦਿਸਾਭਾਗੇ ਇਨ੍ਦਚਾਪਾ ਅਵਤ੍ਤਥ;

੨੪੧.

ਮਹਾਰਜਤਰਜ੍ਜੂਹਿ ਸਿਬ੍ਬਿਤਾਵ ਨਭਾਵਨੀ,

ਧਰਾਧਰੋਰੁਧਾਰਾਹਿ ਨਿਰਨ੍ਤਰਪਵਤ੍ਤਿਹਿ;

੨੪੨.

ਤਤ੍ਥ ਤਤ੍ਥ ਪਤਨ੍ਤਾਨਿ ਘੋਰਾਸਨਿਸਤਾ ਅਹੁਂ,

ਮਹਾਭੀਮ ਨਭੋ ਭੇਰਿਸ੍ਸਨਾ ਆਸੁਂ ਤਹਿਂ ਤਹਿਂ;

੨੪੩.

ਉਦ੍ਧਰਨ੍ਤੋ ਮਹਾਸੇਲੇ ਮਹੋਘੋ ਚ ਤਦੁਬ੍ਭਵੇ,

ਕੇਲਾਸ ਸਿਖਰਾਕਾਰ ਏਣੇਪੁਞ੍ਜੇ ਸਮੁਬ੍ਬਹਂ;

੨੪੪.

ਮਹਾਥੂਪਪ੍ਪਮਾਣਾਦਿ ਮਹਾਬੁਬ੍ਬੁਲਮੁਬ੍ਬਹਂ,

ਗਮ੍ਭੀਰੋ ਪੁਥੁਲੋ ਚਣ੍ਡੋ ਉਪਗਮ੍ਮ ਜਿਨਨ੍ਤਿਕਂ;

੨੪੫.

ਸਰੀਰੇ ਲੋਮਮਤ੍ਤਮ੍ਪਿ ਤੇਮੇਤੁਮਸਮਤ੍ਥਕੋ,

ਗਤੋ ਮਹੋਘੋ ਬੁਦ੍ਧਸ੍ਸ’ਭੋ’ਨੁਭਾਵਮਹਨ੍ਤਤਾ;

੨੪੬.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਦੁਤਿਯੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸੀ ਪਰਾਜਯੋ;

੨੪੭.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰ ਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਦੁਤਿਯੋ ਵਿਜਯੋ.

੨੪੮. ¶

ਤਤੋ ਮਾਰੋ ਅਸਕ੍ਕੋਨ੍ਤੋ ਵਸ੍ਸੋਘੇਨ ਉਪਦ੍ਦਵਂ,

ਕਾਤੁਂ ਤਸ੍ਸ ਉਸੂਯਾਦਿ ਕੋਪਾਕੁਲਮਨੋ ਤਦਾ;

੨੪੯.

ਭਵਤਜ੍ਜ ਕਿਮੇਤੇਨ ਮਾਰਣੇ ਤਸ੍ਸ ਕਿਂ ਗਰੁ,

ਇਦਾਨਙ੍ਗਾਰਵੁਟ੍ਠੀਹਿ ਝਾਪੇਮਿ ਸਹਸਾ ਇਮਂ;

੨੫੦.

ਇਤਿ ਚਿਨ੍ਤਿਯ ਸੋ ਮਾਰੋ ਮਾਪੇਤ੍ਵਾਙ੍ਗਾਰ ਵੁਟ੍ਠਿਯੋ,

ਪੇਸੇਸਿ ਨਭਸਾ ਤਸ੍ਸ ਸਮ੍ਬੁਦ੍ਧਸ੍ਸ ਉਪਨ੍ਤਿਕਂ;

੨੫੧.

ਮਹਾਪਬ੍ਬਤਸਙ੍ਕਾਸ ਜਲਿਤਙ੍ਗਾਰ ਰਾਸਯੋ,

ਧਾਵਿਂਸੁ ਨਹਸਾ ਤਤ੍ਥ ਅਚ੍ਚਿਮਨ੍ਤੋ ਮਹਬ੍ਭਯਾ;

੨੫੨.

ਚਿਚ੍ਚਿਟਾਯਨ ਸਦ੍ਦੇਹਿ ਪੂਰਯਨ੍ਤੋ ਦਿਸਨ੍ਤਰਂ,

ਧੂਪਾਯਨ੍ਤੋ ਫੁਲਿਙ੍ਗੇਹਿ ਮਾਰਸ੍ਸਾਪਿ ਭਯਾਵਹਾ;

੨੫੩.

ਉਜ੍ਜਾਲੇਨ੍ਤਾ ਮਹਾਰੁਕ੍ਖੇ ਪਬ੍ਬਤੇ’ਪਿ ਚ ਸਮ੍ਮੁਖੇ,

ਨਰਕੋਦਰੁਗ੍ਗਤਾ ਅਗ੍ਗੀ ਰਾਸੀਵਾਤਿ ਭਯਾਵਹਾ;

੨੫੪.

ਉਪਗਨ੍ਤ੍ਵਾ ਮੁਹੁਤ੍ਤੇਨ ਨਿਸਿਨ੍ਨਂ ਮੁਨਿਪੁਙ੍ਗਵਂ,

ਮਧੁਮਤ੍ਤਾਲਿਝਙ੍ਕਾਰ ਨਾਦਾਕੁਲਦਿਸਾਮੁਖਾ;

੨੫੫.

ਪਾਤੇਨ੍ਤਿ ਸਤਤਾਮਨ੍ਦ ਮਕਰਨ੍ਦਜ ਬਿਨ੍ਦਵੋ,

ਮਾਲਾਵਤਂਸਕਾ ਹੁਤ੍ਵਾ ਪਾਦਮੁਲੇ ਪਤਿਂਸੁ ਤਾ;

੨੫੬.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਤਤਿਯੇ ਮਾਰ ਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੫੭.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਤਤਿਯੋ ਵਿਜਯੋ.

੨੫੮.

ਤੇਨਾਨੁਪਦ੍ਦੁਤਂ ਬੁਦ੍ਧਂ ਪਸ੍ਸਿਤ੍ਵਾਨ ਪਜਾਪਤਿ,

ਦੁਕ੍ਖਿਤੋ ਦੁਮ੍ਮਨੋ ਹੁਤ੍ਵਾ ਏਵਂ ਚਿਨ੍ਤੇਸਿ ਦੁਮ੍ਮਤਿ;

੨੫੯.

ਪਾਸਾਣਵਸ੍ਸਂ ਮਾਪੇਤ੍ਵਾ ਚੁਣ੍ਣੇਤ੍ਵਾ ਪਨਿਮਂ ਯਤਿਂ,

ਵਿਦ੍ਧਂਸੇਮੀਤਿ ਚਿਨ੍ਤੇਤ੍ਵਾ ਮਾਪੇਸੂਪਲਵਸ੍ਸਕਂ;

੨੬੦. ¶

ਤਸ੍ਮਿਂ ਵਸ੍ਸੇ’ਤਿ ਬੀਭਚ੍ਛਾ ਧੂਮਾਯਨ੍ਤਾ ਸਜੋਤਿਕਾ,

ਜਲਿਤਙ੍ਗਾਰਸਙ੍ਕਾਸਾ ਪਾਸਾਣੁਚ੍ਚਾਵਚਾ ਬਹੂ;

੨੬੧.

ਕਰਾਨਞ੍ਞੋਞ੍ਞਸਙ੍ਘਟ੍ਟਾ ਮਹਨ੍ਤਂ ਭੇਰਵਂ ਰਵਂ,

ਦੁਦ੍ਦਿਨਂ ਧੂਮਜਾਲਾਹਿ ਕੁਰੁਮਾਨਾ ਸਮਨ੍ਤਤੋ;

੨੬੨.

ਸਤ੍ਥੂਪਗਨ੍ਤ੍ਵਾਭਿਮੁਖਂ ਸਨ੍ਤਮਾਲਾਗੁਲਾ ਵਿਯ,

ਪਤਿਂਸੁ ਸਿਰਿਪਾਦੇ ਤੇ ਅਮਨ੍ਦਾਮੋਦਵਾਹਿਨੋ;

੨੬੩.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਚਤੁਤ੍ਥੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੬੪.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਚਤੁਤ੍ਥੋ ਵਿਜਯੋ.

੨੬੫.

ਦਿਸ੍ਵਾਨਤ੍ਤਮਨੋ ਮਾਰੋ ਦਿਤ੍ਤੋ ਕੋਧਗ੍ਗਿਨਾ ਤਦਾ,

ਮਾਪੇਤ੍ਵਾ’ਯੁਧਵਸ੍ਸਂ ਸੋ ਪੇਸੇਸਿ ਤਦੁਪਨ੍ਤਿਕਂ;

੨੬੬.

ਨੇਤ੍ਤਿਂਸਚ੍ਛੂਰਿਕਾ ਸਤ੍ਤਿ ਹੇਣ੍ਡਿਵਾਲ ਗਦਾਦਯੋ,

ਤਿਣ੍ਗਧਾਰਾ ਪਜ੍ਜਲਿਤਾ ਅਚਿਰਜ੍ਜੁਤਿ ਸਨ੍ਨਿਭਾ;

੨੬੭.

ਯਥਾ ਪੁਪ੍ਫੋਪਹਾਰੋਪਗਨ੍ਤ੍ਵਾਨ ਗਗਨਙ੍ਗਨਾ,

ਏਵਂ ਸਮ੍ਬੁਦ੍ਧਪਾਦੇਸੁ ਪਤਿਂਸੁ ਪਰਿਵਤ੍ਤਿਤਾ;

੨੬੮.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਪਞ੍ਚਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੬੯.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਪਞ੍ਚਮੋ ਵਿਜਯੋ.

੨੭੦.

ਤਂ ਦਿਸ੍ਵਾ ਪਾਪਿਮਾ ਕੁਦ੍ਧੋ ਯਂ ਯਂ ਤਸ੍ਸ ਕਰੋਮ’ਹਂ,

ਤਂ ਤਂ’ਦਾਨੀ ਨ ਸਕ੍ਕੋਤਿ ਕਿਞ੍ਚਿ ਕਾਕੁਮੁ’ਪਕ੍ਕਮਂ;

੨੭੧. ¶

ਮਾਪੇਸਿ ਕੁਕ੍ਕੁਲਂ ਵਸ੍ਸਂ ਮਾਰਮੀਤ’ਧੁਨਾ ਮੁਨਿਂ,

ਸੋ’ਗਾ’ਕਾਸਾ ਸਮ੍ਪਦਿਤ੍ਤੋ ਧੂਮਾਯਨ੍ਤੋਵ ਪਜ੍ਜਲਂ;

੨੭੨.

ਜਿਨਸ੍ਸਾਭਿਮੁਖਂ ਗਨ੍ਤ੍ਵਾ ਕੁਕ੍ਕੁਲੋ ਪਰਿਵਤ੍ਤਿਯ,

ਚਨ੍ਦਨਸ੍ਸ ਸਿਤਬ੍ਭਸ੍ਸ ਧੂਲੀ ਹੁਤ੍ਵਾਨ ਪਗ੍ਘਰਿ;

੨੭੩.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਛਟ੍ਠੇ ਨਮੁਚਿ ਯੁਦ੍ਧਮ੍ਹਿ ਮਾਰਸ੍ਸਾਸੀ ਪਰਾਜਯੋ;

੨੭੪.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਛਟ੍ਠੋ ਵਿਜਯੋ.

੨੭੫.

ਤਤੋ ਦਿਸ੍ਵਾਨ ਤਂ ਕਣ੍ਹੋ ਕਣ੍ਹਸੇਨਾ ਪੁਰਕ੍ਖਤੋ,

ਸਙ੍ਕੁਦ੍ਧੋ ਪੇਸਯਿ ਤਤ੍ਥ ਵਸ੍ਸਂ ਸੋ ਸਿਕਤਾਮਯਂ;

੨੭੬.

ਖਦੀਰਙ੍ਗਾਰ ਸਙ੍ਕਾਸਾ ਵਾਲੁਕਾ ਗਗਨਾਗਤਾ,

ਭਸ੍ਸਨ੍ਤਾ ਜਿਨਪਾਦਨ੍ਤੇ ਵਾਸਚੁਣ੍ਣਤ੍ਤਮਾਗਤਾ;

੨੭੭.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਸਤ੍ਤਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੭੮.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰ ਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਸਤ੍ਤਮੋ ਵਿਜਯੋ.

੨੭੯.

ਤਮ੍ਪਿ ਦਿਸ੍ਵਾ ਅਸਜ੍ਜਨ੍ਤੋ ਅਹਿਰੀ ਕੋਪਕੇਤੁਕੋ,

ਮਾਪੇਤ੍ਵਾ ਪਲਿਪਨ੍ਦਾਨਿ ਤਤ੍ਥ ਓਸੀਦਯਾਮਿ ਤਂ;

੨੮੦.

ਇਤਿ ਚਿਨ੍ਤਿਯ ਮਾਪੇਤ੍ਵਾ ਪੇਸੇਸਿ ਪਲਿਪਂ ਘਨਂ,

ਧੂਪਾਯਨ੍ਤੋ ਪਜ੍ਜਲਨ੍ਤੋ ਗਨ੍ਤ੍ਵਾ ਸੋ ਨਭਸਾ ਲਹੁਂ;

੨੮੧.

ਸਮ੍ਬੁਦ੍ਧਸਿਰਿਪਾਦਮ੍ਹਿ ਸਮ੍ਪਤ੍ਤੋ ਨਿਬ੍ਬੁਤੋ ਤਤੋ,

ਨਾਨਾਸੁਗਨ੍ਧਸਮ੍ਭੁਤ ਗਨ੍ਧਕਦ੍ਦਮਤਂ ਗਤੋ;

੨੮੨. ¶

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਅਟ੍ਠਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੮੩.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

੨੮੪.

ਓਲੋਕੇਨ੍ਤੋ ਤਤੋ ਮਾਰੋ ਮਾਰਾਰਿਂ ਸਿਰਿਯੁਜ੍ਜਲਂ,

ਦਿਸ੍ਵਾ ਚਿਤ੍ਤਮ੍ਪਸਾਦੇਤੁਮਸਕ੍ਕੋਨ੍ਤੋ’ਤਿ ਕੋਪਵਾ;

੨੮੫.

ਅਜ੍ਜੇਤਮਨ੍ਧਕਾਰਸ੍ਮਿਂ ਪਕ੍ਖਿਪਿਤ੍ਵਾ ਪਮੋਹਿਤੁਂ,

ਮਯ੍ਹਂ ਭਾਰੋਤਿ ਚਿਨ੍ਤੇਤ੍ਵਾ ਮਾਪੇਸਿ ਤਿਮਿਰਂ ਘਨਂ;

੨੮੬.

ਲੋਕਨ੍ਤਰੇਸੁ ਸਮ੍ਭੁਤ ਤਿਮਿਸੋ’ਵ ਭਯਾਵਹੋ,

ਗਨ੍ਤ੍ਵਾਨ ਗਗਨਾ ਸੋ ਹਿ ਪਤ੍ਵਾਨ ਮੁਨਿਸਨ੍ਤਿਕਂ;

੨੮੭.

ਯਥਾ ਤਿਮਿਰਮਾਯਾਤਿ ਵਿਨਾਸਂ ਸੁਰਿਯੁਗ੍ਗਤੇ,

ਏਵਮਾਸਿ ਜਿਨਗ੍ਗਮ੍ਹਿ ਅਨ੍ਧਕਾਰੋ ਤਥਾਵਿਧੋ;

੨੮੮.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਨਵਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੮੯.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਨਵਮੋ ਵਿਜਯੋ.

੨੯੦.

ਏਵਂ ਨਵਹਿ ਵੁਟ੍ਠਿਹਿ ਕਤ੍ਵਾ ਮਾਰੋ ਮਹਾ ਭਵਂ,

ਨ ਤਸ੍ਸੋਪਦ੍ਦਵਂ ਦਿਸ੍ਵਾ ਦਿਤ੍ਤਕੋਪਾਨਲਾਕੁਲੋ;

੨੯੧.

ਗਹੇਤ੍ਵਾਨ ਤਤੋ ਖਿਪ੍ਪਂ ਠਪਿਤਂ ਅਤ੍ਤਗੁਤ੍ਤਿਯਾ,

ਚਕ੍ਕਾਯੁਧਂ ਮਹਾਤੇਜਂ ਕੁਪਿਤੋ ਖਿਪਿ ਵੇਗਸਾ;

੨੯੨.

ਧਾਰਾਧਰਂ ਤਮੁਗ੍ਗਯ੍ਹ ਕੁਦ੍ਧੋ ਪਹਰਤੇ ਯਦੀ,

ਕਲੀਰਂਵ ਅਸਜ੍ਜਨ੍ਤੋ ਵਿਖਣ੍ਡੇਤਿ ਪਜਾਪਤਿ;

੨੯੩.

ਤਥੇਵ ਸੋ ਮਹਿਂ ਕੁਦ੍ਧੋ ਮਾਰੋ ਖਿਪਤਿ ਵੇਗਵਾ,

ਨ ਭਵਨ੍ਤੋਸਧਾ ਪਾਣਾ ਵਿਸੁਸ੍ਸਨ੍ਤਿ ਸਰਾਦਯੋ;

੨੯੪. ¶

ਤਥੇਵ ਕੁਪਿਤੋ ਤੇਨ ਖਿਪਤੇ ਸੋ ਮਹਮ੍ਬੁਧਿਂ,

ਵਿਲਯਂ ਜਲਜਾ ਯਨ੍ਤਿ ਸੁਸ੍ਸਤੇ ਸੋ ਮਹਣ੍ਣਵੋ;

੨੯੫.

ਏਵਂ ਮਹਾਨੁਭਾਵੋ ਸੋ ਗਚ੍ਛਨ੍ਤੋ ਜਲਮ੍ਬਰੇ,

ਪਤ੍ਵਾਨ ਪਤਿਤੋ ਨਾਥਂ ਹੁਤ੍ਵਾਨ ਪੁਪ੍ਫਚੁਮ੍ਬਟਂ;

੨੯੬.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਦਸਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੨੯੭.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਦਸਮੋ ਵਿਜਯੋ.

੨੯੮.

ਇਤਿ ਕੋਪਗ੍ਗਿਨਾ ਦਿਤ੍ਤਮਨਂ ਮਾਰਂ ਤਦਾ ਜਿਨੋ,

ਕਰੁਣਾਜਲਸੇਕੇਨ ਨਿਬ੍ਬਾਪੇਨ੍ਤੋ ਨਿਸੀਦਿ ਸੋ;

੨੯੯.

ਏਵਂ ਕਤ੍ਵਾਪਿ ਸੋ ਕੁਦ੍ਧੋ ਅਲਦ੍ਧਵਿਜਯੋ ਤਦਾ,

ਆਮਨ੍ਤੇਸਿ ਸਕਂ ਸੇਨਂ ਪਲਯਾਨਲਭੇਰਵਂ;

੩੦੦.

ਏਥਾਸੁ ਵਤ’ਰੇ ਮਯ੍ਹਂ ਅਸ੍ਸਵਾ ਮਾਰਕਿਙ੍ਕਰਾ,

ਨਾਨਾਵੇਸਧਰਾ ਹੋਥ ਧਾਰੇਥ ਵਿਵਿਧਾਯੁਧੇ;

੩੦੧.

ਸਦ੍ਦੇਹੇਤਂ ਪਲਾਪੇਥ ਯਾਥ ਗਣ੍ਹਥ ਬਨ੍ਧਥ,

ਪਾਦੇ ਗਹੇਤ੍ਵਾ ਖਿਪਥ ਚਕ੍ਕਵਾਲ਼ਨ੍ਤਰਂ ਇਤੋ;

੩੦੨.

ਅਥਗਾ ਸਹ ਵਾਚਾਹਿ ਭਿਂਸਾ ਸਾ ਮਾਰਵਾਹਿਨੀ,

ਤੁਰਙ੍ਗ ਵ੍ਯਗ੍ਘ ਮਾਤਙ੍ਗ ਸੀਹਾਦਿਰੂਪ ਭਿਂਸਨਾ;

੩੦੩.

ਸਾ ਮਾਰਸ੍ਸੁਭਤੋ ਪਸ੍ਸੇ ਚਤੁਵੀਸਤਿਯੋਜਨੇ,

ਠਿਤਾ ਪਚ੍ਛਿਮਭਾਗਮ੍ਹੀ ਚਕ੍ਕਵਾਲ਼ਸਿਲਾਵਧਿਂ;

੩੦੪.

ਬਹਲਤ੍ਤੇਨ ਸਾ ਆਸਿ ਸਮ੍ਪੁਣ੍ਣ ਨਵਯੋਜਨਾ,

ਯਕ੍ਖ ਪੇਤ ਪਿਸਾਚਾਦਿ ਵੇਸੇਹਿ ਭਯਵਾਹਿਨੀ;

੩੦੫.

ਸਂਵਟ੍ਟ ਵਾਤਸਮ੍ਪਾਤ ਖੁਭੀਤਮ੍ਬੁਧਿਨੋ ਵਿਯ,

ਉਲ੍ਲੋਲ ਭਿਮਘੋਸੋ ਤੁ ਗਤੋ ਬ੍ਰਹ੍ਮਪੁਰਾਵਧਿਂ;

੩੦੬. ¶

ਦਨ੍ਤ ਸਙ੍ਘਟ੍ਟ ਸਞ੍ਜਾਤ ਜਾਲਾਮਾਲਾ ਸਮਾਕੁਲਾ,

ਤੇਸਂਗਾਰਾ’ਵ ਦਿਤ੍ਤਾਸੁਂ ਕੋਧੁਮ੍ਮੀਲਿਤ ਲੋਚਨਾ

੩੦੭.

ਵਹਨ੍ਤਿ ਧੂਮਕ੍ਖਨ੍ਧਾਨਿ ਮੁਖਕੋਟਰ ਕੋਟਿਹੀ,

ਨੀਹਟਾ ਨੀਹਟਾ ਜਿਵ੍ਹਾ ਸੁਭੀਮੋਰਗਤਂ ਗਤਾ;

੩੦੮.

ਉਦ੍ਧਰਿਤ੍ਵਾਨ ਤਾਲਾਦਿ ਕਰਿਤ੍ਵਾਨ ਸਰਾਸਨੇ,

ਭੁਜਙ੍ਗੇ ਚ ਗੁਣੇ ਕੇਚਿ ਗਾਲ਼੍ਹਮਾਕਡ੍ਢਯਨ੍ਤਿ ਚ;

੩੦੯.

ਪੁਣ੍ਡਰੀਕਚ੍ਛ ਸੀਹਾਦੀ ਖਿਪਨ੍ਤਾਭਿਮੁਖੇ ਤਦਾ,

ਧਾਵਨ੍ਤੇਕੇ ਸਮੁਗ੍ਗਯ੍ਹ ਪੁਰਤੋ ਦਿਤ੍ਤਪਬ੍ਬਤੇ;

੩੧੦.

ਭਯਾਨਕਾਤਿ ਨੇਕਾਨਿ ਸੀਸਾਨੇਕ ਕਲੇਬਰੇ,

ਮਾਪਯਿਤ੍ਵਾਨ ਪੁਰਤੋ ਧਾਵਨ੍ਤਿ ਕੇਚਿ ਕਿਙ੍ਕਰਾ;

੩੧੧.

ਸੀਸੇਨ ਸੀਹਸਙ੍ਕਾਸਾ ਗਤ੍ਤੇਨ ਮਨੁਜੋਪਮਾ,

ਬੁਦ੍ਧਸ੍ਸਾਭਿਮੁਖਂ ਕੇਚਿ ਧਾਵਨ੍ਤਿ ਮਾਰ ਕਿਙ੍ਕਰਾ;

੩੧੨.

ਕਣ੍ਠੀਰਵਾਕਾਰਦੇਹਾ ਮੁਖੇਨ ਖਲੁ ਰਕ੍ਖਸਾ,

ਹੁਤ੍ਵਾਨ ਅਭਿਧਾਵਨ੍ਤਿ ਕੇਚਿਮਾਰਸ੍ਸ ਕਿਙ੍ਕਰਾ;

੩੧੩.

ਦਣ੍ਡਮਾਨਵਕਾ ਸੀਸਭਾਗੇਨਾ’ਤਿਭਯਾਵਹਾ,

ਗਤ੍ਤੇਨ ਰਕ੍ਖਸਾ ਹੁਤ੍ਵਾ ਕੇਚਿ ਧਾਵਨ੍ਤਿ ਕਿਙਕਰਾ;

੩੧੪.

ਦੀਪਚ੍ਛੇਭ ਤੁਰਙ੍ਗਾਨਂ ਵ੍ਯਗ੍ਘ ਖਗ੍ਗਵਿਸਾਣਿਨਂ,

ਵਰਾਹ ਮਹਿਸਾਦੀਨਂ ਕਣ੍ਣਪਾਵੁਰ ਭੋਗਿਨਂ;

੩੧੫.

ਸੀਸਾਕਾਰ ਮਹਾਸੀਸੇ ਤਬ੍ਬਿਰੁਦ੍ਧੇ ਕਲੇਬਰੇ,

ਮਾਪੇਤ੍ਵਾ ਅਭਿਧਾਵਨ੍ਤਿ ਕੇਚਿ ਮਾਰਸ੍ਸ ਕਿਙ੍ਕਰਾ;

੩੧੬.

ਆਕਡ੍ਢੇਨ੍ਤਾ ਕਪੋਲਾਨਂ ਕਰਸਾਖਾਹਿ ਸਮ੍ਮੁਖੇ,

ਦਸ੍ਸਯਨ੍ਤਾ ਮਹਾਦਾਠਂ ਕੇਚੇਨ੍ਤਿ ਮਾਰਕਿਙ੍ਕਰਾ;

੩੧੭.

ਤਿਖਿਣਗ੍ਗਨਖਾ ਕੇਚਿ ਫਾਲਯਨ੍ਤਾ ਸਕੋਦਰੇ,

ਅਨ੍ਤੇ ਗਲੇ ਪਿਲਨ੍ਧਿਤ੍ਵਾ ਧਾਵਨ੍ਤਿ ਕਿਙ੍ਕਰਾਪਰੇ;

੩੧੮.

ਗਿਲਨ੍ਤਾ ਕੇਚਿ ਫਣਿਨੋ ਉਗ੍ਗਿਰਨ੍ਤਾ ਤਥੇਵ ਚ,

ਸੀਸ ਕਨ੍ਧਰ ਕਣ੍ਣਨ੍ਤ ਬਾਹੁ ਅਙ੍ਗੁਲਿ ਆਦਿਸੁ;

੩੧੯. ¶

ਸਕਲੇਸੁ ਸਰੀਰੇਸੁ ਵਿਸਧੂਮਗ੍ਗਿ ਸਙ੍ਕੁਲੇ,

ਧਾਰੇਨ੍ਤਾ’ਸਿਵਿਸੇ ਕੇਚਿ ਧਾਵਨ੍ਤ੍ਯਗ੍ਗੇ ਭਯਾਵਹਾ;

੩੨੦.

ਪਦਿਤ੍ਤਾਯੋਗੁਲੇ ਗਯ੍ਹ ਖਿਪਨ੍ਤੇਕੇ ਅਨੇਕਧਾ,

ਦਿਤ੍ਤਪਬ੍ਬਤਮੁਦ੍ਧਚ੍ਚ ਕੇਚਿ ਅਗ੍ਗਿਕਪਾਲਕੇ,

ਖਿਪਨ੍ਨਾ ਅਭਿਧਾਵਨ੍ਤਿ ਦਟ੍ਠੋਟ੍ਠਾ ਭੀਮਲੋਚਨਾ;

੩੨੧.

ਲਾਲਯਨ੍ਤਾ ਸਕਾ ਜਿਵ੍ਹਾ ਖਨ੍ਧੇ ਕਤ੍ਵਾਨ ਮੁਗ੍ਗਰੇ,

ਮਤ੍ਤਭੁਜਙ੍ਗ ਵੇਸੇਨ ਧਾਵਨ੍ਤਿ ਅਪਰੇ ਭਟਾ;

੩੨੨.

ਪਿਬਨ੍ਤਾ ਲੋਹਿਤਾਨੇਕੇ ਖਾਦਨ੍ਤਾ ਪਿਸਿਤੇ ਪਰੇ,

ਪਿਸਾਚਾਵ’ਚਰੁਂ ਕੇਚਿ ਮੁਨਿਰਾਜਸ੍ਸ ਅਗ੍ਗਤੋ;

੩੨੩.

ਉਲ੍ਲਙ੍ਘਨ੍ਤਾ ਚ ਸੇਲੇਨ੍ਤਾ ਧਾਵਨ੍ਤਾ ਜਲਿਤਾਯੁਧਾ,

ਭਿਮਵੇਸਧਰਾ ਯਕ੍ਖਾ ਕੇਚੇਨ੍ਤਿ ਭਕੁਟੀਮੁਖਾ;

੩੨੪.

ਪਣੁਣ੍ਣ ਸਰਵਸ੍ਸੇਹਿ ਕੁਨ੍ਤਤੋਮਰ ਵੁਟ੍ਠਿਹਿ,

ਭੇਣ੍ਡਿਵਾਲਾ’ਸਿਚਕ੍ਕੇਹਿ ਨਿਬ੍ਭਰਾਸਿ ਦਿਗਨ੍ਤਰਂ;

੩੨੫.

ਯਂ ਦਿਟ੍ਠ ਸੁਤ ਮਤ੍ਤੇਨ ਮਰਣਂ ਚਿਤ੍ਤ ਵਿਬ੍ਭਮਂ,

ਯਾਤਿ ਲੋਕੋ ਕਥਂ ਕੋ ਤਂ ਨਿਸ੍ਸੇਸਂ ਭਾਸਤੇ ਨਰੋ;

੩੨੬.

ਨੇਕਦਨ੍ਤਸਹਸ੍ਸੇਹਿ ਨਿਕ੍ਖਨ੍ਤਗ੍ਗਿਸਿਖਾਯੁਤਂ,

ਦਾਨਨਿਜ੍ਝਰਸਮ੍ਪਾਤਂ ਭੀਮਗਜ੍ਜਨਗਜ੍ਜਿਤਂ;

੩੨੭.

ਨੇਕਸਤ ਕਰਗ੍ਗੇਹਿ ਧਤਾਯੋਲਗੁਲ਼ਾਦਿਕਂ,

ਸਨ੍ਨਦ੍ਧਂ ਕਵਚਾਦੀਹਿ ਗਿਰਿਂਚ ਗਿਰਿਮੇਖਲਂ;

੩੨੮.

ਆਰੂਲ਼੍ਹੋ ਪਾਪਿਮਾ ਤਤ੍ਥ ਉਸ੍ਸਾਪੇਤ੍ਵਾ ਜਯਦ੍ਧਜਂ,

ਵਿਸਾਲਾਵਤ੍ਤ ਦਾਠਗ੍ਗੋ ਚਿਪਿਟਗ੍ਗ ਭਗ੍ਗ ਨਾਸਿਕੋ;

੩੨੯.

ਦਟ੍ਠੋਟ੍ਠ ਭੀਮਵਦਨੋ ਭਕੁਟੀ ਵਲਿ ਲਲਾਟਕੋ,

ਕੋਧਾਨਲੇਹਿ ਸਨ੍ਦਿਦ੍ਧ ਮਹਕ੍ਖੋ ਤਮ੍ਬਦਾਠੀਕੋ;

੩੩੦.

ਨੀਲਪਬ੍ਬਤ ਸਙ੍ਕਾਸ ਵਿਸਮਙ੍ਗੋ ਮਹੋਦਰੋ,

ਗੋਨਸੋਰਗ ਸਪ੍ਪਾਦਿ ਅਙ੍ਗੀਕਤ ਸੁਭਿਂਸਨੋ;

੩੩੧. ¶

ਸਹਸ੍ਸਬਾਹੁਂ ਮਾਪੇਤ੍ਵਾ ਛੂਰਿਕਾ ਯਟ੍ਠਿ ਸਤ੍ਤਿ ਚ,

ਕੋਦਣ੍ਡਚਣ੍ਡਬਾਣੇ ਚ ਚਕ੍ਕ ਕੁਨ੍ਤਗਦਾਦਿ ਚ;

੩੩੨.

ਸਙ੍ਕੁ ਵੇਤਾਲਿਕਾ ਫਰਸੁ ਪਾਸਮੁਗ੍ਗਰ ਅਙ੍ਕੁਸੇ,

ਗਹੇਤ੍ਵਾ ਕਣਯਞ੍ਚਾਥ ਤਿਸੂਲ ਵਜਿਰਾਯੁਧੇ;

੩੩੩.

ਪਰਿਵਤ੍ਤੇਸਿ ਆਕਾਸੇ ਤੇਸਮਞ੍ਞੋਞ੍ਞ ਘਟ੍ਟਨਾ,

ਉਗ੍ਗਤੇਹਿ ਫੁਲਿਙ੍ਗੇਹਿ ਧਾਵਨ੍ਤੇਹਿ ਸਮਨ੍ਤਤੋ;

੩੩੪.

ਅਗ੍ਗਿ ਚਕ੍ਕਪਰੀਤਂਚ ਕੁਰੁਮਾਨੋ ਨਿਜਂ ਤਨੁਂ,

ਆਵਹਨ੍ਤੋ ਭਯਂ ਬ੍ਰਹ੍ਮ ਸੁਰ ਸਿਦ੍ਧਾਦੀਨਂ ਤਦਾ,

ਸ ਮਾਰਸੇਨੋ ਸੋ ਮਾਰੋ ਭਗਵਨ੍ਤਮੁਪਾਗਮਿ;

੩੩੫.

ਉਦਯਾਵਲਕੂਟਮ੍ਹਿ ਭਾਸਨ੍ਤੋਵ ਪਭਾਕਰੋ,

ਸੁਪ੍ਪਤਿਟ੍ਠਿਤਮੇਰੂ’ਵ ਤਿਕੂਟਾਚਲ ਮੁਦ੍ਧਨਿ;

੩੩੬.

ਕਤ੍ਵਾਨ ਪਿਟ੍ਠਿਤੋ ਬੋਧਿਂ ਭੂਰੁਹਂ ਵਜਿਰਾਸਨੇ,

ਨਿਸਿਨ੍ਨੋ ਭਗਵਾ’ਤੀਵ ਨਿਚ੍ਚਲੋ ਅਤਿਰੋਚਤਿ;

੩੩੭.

ਅਕਮ੍ਪੋ ਸੋ ਮੁਨੀ ਏਵਮਗ੍ਗੇ’ਕਾਸਿ ਨਿਜਂ ਬਲਂ,

ਸਮ੍ਮਪ੍ਪਧਾਨਸਂਯੁਤ੍ਤੋ ਦਯਾਮੇਤ੍ਤੋ ਮਹੇਸਿਕੋ;

੩੩੮.

ਚਤੁਬੁਦ੍ਧਭੁਮਿਸਙ੍ਖਾਤ ਜਯਭੁਮਿਮੁਦਿਕ੍ਖਿਯ,

ਚਤੁਸ੍ਸਙ੍ਗਹਵਤ੍ਥੂਨਂ ਯੋਜੇਤ੍ਵਾ ਦ੍ਵਾਰਕੋਟ੍ਠਕੇ;

੩੩੯.

ਯੋਜੇਤ੍ਵਾਨ ਥਿਰਂ ਤਤ੍ਥ ਸਦ੍ਧਾਦਿਬਲਕੋਟ੍ਠਕੇ,

ਸਤਿਪਟ੍ਠਾਨਪਾਕਾਰੇ ਅਭੇਜ੍ਜਿਨ੍ਦ੍ਰਿਯ ਗੋਪੁਰੇ;

੩੪੦.

ਥਿਰਞਾਣਯੁਧਾਕਿਣ੍ਣੇ ਮੇਤ੍ਤਾ ਸਨ੍ਨਾਹ ਵਮ੍ਮਿਤੋ,

ਅਭੀਤ ਭਾਰਤੀ ਭੁਰਿ ਭੇਰਿਸਙ੍ਖ ਪੁਰਕ੍ਖਤੋ;

੩੪੧.

ਚਤੁਰਙ੍ਗਵਿਰਿਯੁਤ੍ਤੁਙ੍ਗ ਮਾਤਙ੍ਗਕ੍ਖਨ੍ਧਸਙ੍ਗਤੋ,

ਪੁਞ੍ਞਸਮ੍ਭਾਰਭਾਰੇਨ ਕਮ੍ਪਯਂ ਵਸੁਧਾਤਲਂ;

੩੪੨.

ਚਰਿਯਤ੍ਤਯ ਸਙ੍ਖਾਤ’ਮੁਸ੍ਸਾਪਿਤ ਜਯਦ੍ਧਜੋ,

ਏਵਂ ਵਿਧਾਯ ਮਾਰਾਰਿ ਮਾਰਸਙ੍ਗਾਮ ਮਣ੍ਡਲਂ;

੩੪੩.

ਦਾਨਾਦਯੋ ਮਹਾਯੋਧੇ ਆਹੂਯ ਸਹਜਾਤਕੇ,

ਸੁਣਾਥ ਭੋ ਗਿਰਂ ਮਯ੍ਹਂ ਭਵਤਜ੍ਜ ਮਹਾ ਭਵੋ;

੩੪੪. ¶

ਏਥ ਯਾਥ ਸਮਗ੍ਗਤ੍ਥ ਨ ਓਸ੍ਸਕ੍ਕਥ ਸੁਜ੍ਝਥ,

ਵਿਜੇਤੁਂ ਮਾਰਯੁਦ੍ਧਮ੍ਹੀ ਨ ਸਕ੍ਕਾ’ਸੇਸਜਨ੍ਤੁਹਿ;

੩੪੫.

ਅਜ੍ਜ ਗਚ੍ਛਤਿ ਨਿਟ੍ਠਾਨਂ ਸੋ ਭੋ ਪਾਰਮਿਤਾਭਟਾ,

ਸਹੁਸ੍ਸਾਹਾ ਮਮਗ੍ਗਮ੍ਹਿ ਦਸ੍ਸੇਥ ਵੀਰਿਯਂ ਸਕਂ;

੩੪੬.

ਅਥ ਦਾਨਭਟੋ ਆਹ ਅਪ੍ਫੋਟਂ ਦਿਗੁਣਂ ਭੁਜਂ,

ਪਸ੍ਸਦਾਨਿ ਮਹਾਵੀਰ ਬਲਂ ਮੇ ਮਾਰਧਂਸਨੇ;

੩੪੭.

ਪਰਮਤ੍ਥਪਾਰਮਿ ਯੋਧਂ ਤਥੇ’ਵ ਉਪਪਾਰਮਿਂ,

ਉਭੋ ਪਸ੍ਸੇ ਕਰਿਤ੍ਵਾਨ ਸਸੇਨੋ ਧਾਵਿ ਦਪ੍ਪਵਾ;

੩੪੮.

ਤਥੇਵ ਸੀਲਨਾਮਵ੍ਹੋ ਪਾਰਮੀਭਟ’ਮੁਤ੍ਤਮੋ,

ਨਿਕ੍ਖਮ੍ਮ ਸਹ ਸੇਨਾਯ ਮਾਰਸੇਨਮਭਿਦ੍ਦਵੀ;

੩੪੯.

ਤਥਾਨੇਕ੍ਖਮ੍ਮਨਾਮੋਪਿ ਸਨ੍ਨਦ੍ਧੋ’ਸਭਟੋ ਭਟੋ,

ਮਾਰਸੇਨਾਮਿਗੇ ਹਨ੍ਤੁਂ ਧਾਵਿ ਦੀਪੀ’ਵ ਸਾਹਸੋ;

੩੫੦.

ਪਞ੍ਞਾਯੋਧੋ’ਪਿ ਗਚ੍ਛਨ੍ਤੋ ਸਾਟੋਪੋ ਧਾਵਿ ਦਪ੍ਪਵਾ,

ਮਾਰਮੇਰੁਮਹਾ ਅਜ੍ਜ ਸਸੇਨੁਮ੍ਮੂਲਯਾਮਿਤਿ;

੩੫੧.

ਵੀਰਿਯਪਾਰਮਿਤਾ ਯੋਧੋ ਦਟ੍ਠੋਟ੍ਠੋ ਭੀਮਗਜ੍ਜਨੋ,

ਸੋਸੇਮਿ ਮਮ ਤੇਜੇਨ ਵਦਂ’ਗਾ ਮਾਰ ਸਾਗਰਂ;

੩੫੨.

ਖਨ੍ਤਿਸਚ੍ਚਵ੍ਹਯਾ ਚੇਵ ਤਤੋ’ਧਿਟ੍ਠਾਨਕੋ ਭਟੋ,

ਆਸੁ ਧਾਵਿਂਸੁ ਪਾਤੇਤੁਂ ਮਾਰਸ੍ਸ ਮਕਰਦ੍ਧਜਂ;

੩੫੩.

ਮੇਤ੍ਤਾਨਾਮੋ ਮਹਾਯੋਧੋ ਮਾਰੋ ਮਯ੍ਹਮਲਨ੍ਤਿ’ਗਾ,

ਉਪੇਕ੍ਖਕੋ’ਪੀ ਸੋ ਯੋਧੋ ਮਾਰਸੇਨਂ ਪਦਾਲਿਤੁਂ;

੩੫੪.

ਪੇਸੇਤ੍ਵੇਵਂ ਜਿਨੋ ਸੇਨਂ’ਸਰੀਰਂ ਦਲ਼੍ਹਵਿਕ੍ਕਮਂ,

ਨਿਸਿਦਿ ਤਸ੍ਸ ਤੇਜੇਨ ਨਿਰੁਸ੍ਸਾਹਾਸਿ ਸਾ ਚਮੂ;

੩੫੫.

ਅਹੋ ਭੋ ਵਿਮ੍ਹਯਂ ਦਾਨਿ ਸੁਣਾਥ ਮੁਨਿਨੋ ਮਮ,

ਜੇਤਿ ਏਕੋ ਨਿਸਿਨ੍ਨੋਵ ਸਮਾਰਂ ਮਾਰਵਾਹਿਨਿਂ;

੩੫੬.

ਕੋਪਾਨਲੇਨ ਸਨ੍ਦਿਤ੍ਤਂ ਦੁਟ੍ਠ ਰੁਟ੍ਠਂ ਪਜਾਪਤਿਂ,

ਅਦੁਟ੍ਠੋ ਜੇਤਿ ਸਮ੍ਬੁਦ੍ਧੋ ਆਨੁਭਾਵੋ ਹਿ ਤਾਦਿਸੋ;

੩੫੭. ¶

ਦਿਤ੍ਤਾਯੁਧੇ ਖਿਪਨ੍ਤੇ’ਪਿ ਵਿਜ੍ਝਨ੍ਤੇ ਵਸਵਤ੍ਤਿਨੀ,

ਨਿਰਾਯੁਧੋ’ਵ ਤਂ ਜੇਤਿ ਆਨੁਭਾਵੋ ਹਿ ਤਾਦਿਸੋ;

੩੫੮.

ਸਹਾਟੋਪਂ ਸਹਙਕਾਰਂ ਮਾਰਂ ਸਾਡਮ੍ਬਰਂ ਤਦਾ,

ਨਿਚ੍ਚਲੋ ਜੇਤਿ ਸਮ੍ਬੁਦ੍ਧੋ ਆਨੁਭਾਵੋ ਹਿ ਤਾਦਿਸੋ;

੩੫੯.

ਹਤ੍ਥਸ੍ਸ ਰਥਪਤ੍ਤੀਹਿ ਧਾਵਨ੍ਤਂ ਤਮਿਤੋਚਿਤੋ,

ਨਿਸਿਨ੍ਨੋਵ ਜਿਨੋ ਜੇਤਿ ਆਨੁਭਾਵੋ ਹਿ ਤਾਦਿਸੋ;

੩੬੦.

ਭਾਸਨ੍ਤਂ ਨੇਕਧਾ ਕਣ੍ਣ ਕਠੋਰ ਗਿਰਮਨ੍ਤਕਂ,

ਨਿਸ੍ਸਦ੍ਦੋ ਜੇਤਿ ਸਮ੍ਬੁਦ੍ਧੋ ਆਨੁਭਾਵੋ ਹਿ ਤਾਦਿਸੋ;

੩੬੧.

ਮਾਰੋਪਾਗਮ੍ਮ ਅਟ੍ਠਾਸਿ ਲਙ੍ਘਿਤੁਂ ਅਸਮਤ੍ਥਕੋ,

ਬੁਦ੍ਧਤੇਜਗ੍ਗਿ ਪਾਕਾਰਂ ਦਿਤ੍ਤਮਬ੍ਭੁਗ੍ਗਤਂ ਥਿਰਂ;

੩੬੨.

ਤਦਾਹ ਨਮੁਚਿ ਕੁਦ੍ਧੋ ਭੁਜਮੁਕ੍ਖਿਪ੍ਪ’ਮੀਦਿਸਂ,

ਖਿਪ੍ਪਂ ਸਿਦ੍ਧਤ੍ਥ ਹੇ ਗਚ੍ਛ ਸਨ੍ਤਕੇਦਂ ਮਮਾਸਨਂ;

੩੬੩.

ਨੋ ਚੇ ਗਚ੍ਛਸਿ ਤੇ ਹਦਯਂ ਫਾਲੇਮਿ ਨਖਸਤ੍ਤਿਹਿ,

ਵਿਚੁਣ੍ਣੇਮਿ ਤੁਵਂ ਪਾਦੇ ਗਹੇਤ੍ਵਾ ਪਥਵੀਤਲੇ;

੩੬੪.

ਪਸ੍ਸ ਮੇ ਮਹਤਿਂ ਸੇਨਂ ਪਸ੍ਸ ਆਯੁਧਸਞ੍ਚਯਂ,

ਤੇਨ ਤਂ ਅਭਿਮਦ੍ਦਾਮਿ ਤੁਵਟਂ ਗਚ੍ਛਿਦਂ ਮਮ;

੩੬੫.

ਅਥਸ੍ਸ ਵਚਨਂ ਸੁਤ੍ਵਾ ਜਿਨੋ’ਹ ਮਧੁਰਙ੍ਗਿਰੋ,

ਕਦਾ ਤੇ ਪੂਰਿਤਾ ਮਾਰ ਪਲ੍ਲਙ੍ਕਤ੍ਥਾਯ ਪਾਰਮੀ;

੩੬੬.

ਕਦਾ ਅਦਾਸਿ ਸੀਸਾਦੀ ਦਾਨਂ ਸੀਲਂ ਕਥਂ ਤਵ,

ਤਦਤ੍ਥਾਯ ਕਥਾਪੇਹਿ ਕੇ ਤੇ ਪਚ੍ਚਕ੍ਖਕਾਰਕਾ;

੩੬੭.

ਅਥਾ’ਹ ਫਰੁਸੋ ਮਾਰੋ ਨੇਤਂ ਗਰੁ ਮੁਨੇ ਮਮ,

ਅਯਂ ਸਾ ਪਰਿਸਾ ਸਬ੍ਬਾ ਤਸ੍ਸ ਪਚ੍ਚਕ੍ਖਕਾਰਕਂ;

੩੬੮.

ਉਗ੍ਘੋਸੇਸਿ ਮਹਾਸੇਨਾ ਪਕ੍ਖੀ’ਹਨ੍ਤਿ ਵਿਸੁਂ ਵਿਸੁਂ,

ਭੁਮੁਦ੍ਰਿਯਨ ਮਤ੍ਤੋਵ ਤਤੋ ਕੋਲਾਹਲੋ ਅਹੁ;

੩੬੯.

ਅਥਾਹ ਮਾਰੋ ਸਮਣ ਅਹਂ ਸਕ੍ਖਿ ਕਥਾਪਯਿਂ,

ਤਵ ਕੋ ਸਕ੍ਖਿ ਯਜ੍ਜਤ੍ਥਿ ਕਥਾਪੇਹਿ ਲਹੁਂ ਮਮ;

੩੭੦. ¶

ਅਥਾਹ ਭਗਵਾ ਤਸ੍ਸ ਗਮ੍ਭੀਰਂ ਮਧੁਰਂ ਗਿਰਂ,

ਨਿਚ੍ਛਾਰੇਨ੍ਤਾ ਮਯੂਰਸ੍ਸ ਸੁਨਾਦਂ ਫਣਿਨੋ ਯਥਾ;

੩੭੧.

ਤਵੇਵ ਮੇ ਨ ਸਨ੍ਤੀਧ ਪਚ੍ਚਕ੍ਖਤ੍ਥਂ ਸਚੇਤਨਾ,

ਅਚੇਤਨਾਵ ਮੇਦਾਨਿ ਸਨ੍ਤਿ ਪਚ੍ਚਕ੍ਖਵਾਦਿਨੋ;

੩੭੨.

ਇਤਿ ਵਤ੍ਵਾਨ ਮਾਰਾਰਿ ਸਞ੍ਤ੍ਧਾ ਜਿਮੂਤ ਗਬ੍ਭਤੋ,

ਨਿਕ੍ਖਨ੍ਤ ਵਿਜ੍ਜੁਸਙ੍ਕਾਸਂ ਕਰਂ ਚਾਮੀਕਰਜ੍ਜੁਤਿਂ;

੩੭੩.

ਰਤ੍ਤ ਚੀਵਰਗਬ੍ਭਮ੍ਹਾ ਨੀਹਰਿਤ੍ਵਾ ਜਿਨੋ ਤਦਾ,

ਧਰਣ੍ਯਭਿਮੁਖਂ’ਕਾਸਿ ਉਦ੍ਦਿਸ੍ਸ ਭੁਮਿਕਾਮਿਨਿਂ;

੩੭੪.

ਦਾਨਮਾਨਾਦਿਕਮ੍ਮੇ ਮੇ ਕਮ੍ਪਨ੍ਤੀ ਜਾਤਿਜਾਤਿਯਂ,

ਕਿਮਜ੍ਜ ਨਿਸ੍ਸਣਾਸੀ’ਤਿ ਜਿਨੋ ਵਾਚਮੁਦਾਹਰੀ;

੩੭੫.

ਸਕ੍ਖਿ’ਹਨ੍ਤਿ ਵਦਨ੍ਤੀਵ ਤਤੋ ਭੁਮਿਵਰਙ੍ਗਨਾ,

ਸਲ਼ਿਲਾਵਨਿਪਰਿਯਨ੍ਤਾ ਗਜ੍ਜਨ੍ਤਿ ਨਚ੍ਚਿ ਤਾਵਦੇ;

੩੭੬.

ਮਹੀ ਸਾਗਰ ਊਮੀ’ਵ ਉਟ੍ਠਾਪੇਨ੍ਤਿ ਮਹੂਮਿਯੋ,

ਛਦ੍ਧਾ ਕਮ੍ਪਿ ਕੁਲਾਲਸ੍ਸ ਚਕ੍ਕਂਵਾਤਿ ਪਰਿਬ੍ਭਮਿ;

੩੭੭.

ਹਿਮਵਾ ਗਿਰਿਰਾਜਾ ਚ ਯੁਗਨ੍ਧਰ ਨਗਾਦਯੋ,

ਕੂਟਬਾਗਾ ਸਮੁਕ੍ਖਿਪ੍ਪ ਨਚ੍ਚਿਂਸੁ ਨਟਕਾ ਵਿਯ;

੩੭੮.

ਦਿਸ੍ਵਾ ਸੁਤ੍ਵਾ ਤਮਚ੍ਛੇਰਂ ਗਯੇਨੁਬ੍ਬਿਗ੍ਗ ਮਾਨਸਾ,

ਮਾਰਸੇਨਾ ਪਭਿਨ੍ਨਾਸਿ ਭਿਨ੍ਨਵੇਲੋਵ ਸਾਗਰੋ;

੩੭੯.

ਭਯੇਨਟ੍ਟਸ੍ਸਰਾ ਭਨ੍ਤਾ ਪਤਨ੍ਤਞ੍ਞੋਞ੍ਞ ਘਟ੍ਟਨਾ,

ਵਿਕਿਰਿਤ੍ਵਾ ਕਚੇ ਪਿਟ੍ਠੇ ਧਾਵਿਂਸੁ ਮਾਰਕਿਙ੍ਕਰਾ;

੩੮੦.

ਗਹਿਤਾਯੁਧਾਨਿ ਛਡ੍ਡੇਨ੍ਤਾ ਪਿਦਹਨ੍ਤਾਨਨਂ ਕਰਾ,

ਨਿਵਤ੍ਥਵਤ੍ਥਮਤ੍ਤੇ’ਪਿ ਧਾਵਿਂਸੁ ਅਨਪੇਕ੍ਖਕਾ;

੩੮੧.

ਅਙ੍ਗੁਲਿਯੋ ਮੁਖੇ ਕੇਚਿ ਪਕ੍ਖਿਪਨ੍ਤਿ ਰੁਦਨ੍ਤਿ ਚ,

ਕੇਚਿ ਵਨ੍ਦਨ੍ਤਿ ਯਾਵਨ੍ਤਿ ਅਭਯਂ ਸਾਮਿ ਦੇਹਿ ਨੋ;

੩੮੨.

ਸਿਦ੍ਧਤ੍ਥੋ’ਯਂ ਜਿਤੋ ਕਿਨ੍ਨੁ ਨਿਸ੍ਸਾਸਾ ਰੁਦ੍ਧਭਾਸਨਾ,

ਪਿਟ੍ਠਿਪਸ੍ਸਮੁਦਿਕ੍ਖਨ੍ਤਿ ਧਾਵਿਂਸੁ ਚਕਿਤਾ ਪਰੇ;

੩੮੩. ¶

ਗਿਰਿਮੇਖਲੋ’ਪਿ ਨਾਗਿਨ੍ਦੋ ਜਨ੍ਨੁਕੇਨ ਪਤੀ ਤਦਾ,

ਮਾਰੋ’ਪਿ ਪਤਿਤੋ ਖਿਪ੍ਪਂ ਧਾਵਿਤ੍ਵਾ’ਦਸ੍ਸਨਂ ਗਤੋ;

੩੮੪.

ਤਙ੍ਕਣੇ ਉਗ੍ਗਤੋ ਆਸਿ ਸਤ੍ਥੁ ਕਿਤ੍ਤਿ ਜਯਦ੍ਧਜੋ,

ਅਵਹੇਨ੍ਤੋਵ ਸੁਰਾਦੀਨਂ ਬ੍ਰਹ੍ਮਲੋਕਾਵਧਿਂ ਗਤੋ;

੩੮੫.

ਤਦਾਸਿ ਵਿਜਯੋ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਚਰਿਮੇ ਮਾਰਯੁਦ੍ਧਮ੍ਹਿ ਮਾਰਸ੍ਸਾਸਿ ਪਰਾਜਯੋ;

੩੮੬.

ਏਵਂ ਮਹਾਨੁਭਾਵੋਤਿ ਮਨ੍ਤ੍ਵਾਨ ਨਰਸਾਰਥਿਂ,

ਨਿਚ੍ਚਂ ਵਨ੍ਦਥ ਪੂਜੇਥ ਸੋ ਹਿ ਵੋ ਸਰਣਂ ਸਦਾ;

ਏਕਾਦਸਮੋ ਵਿਜਯੋ.

੩੮੭.

ਲਦ੍ਧਾਭਿਵਿਜਯੇ ਬੁਦ੍ਧੇ ਨਿਸਿਨ੍ਨੇ ਵਜਿਰਾਸਨੇ,

ਪਰਿਵਾਰਯੁਂ ਗਤਾਗਮ੍ਮ ਪੁਰੇ ਵਿਯ ਸੁਰਾਦਯੋ;

੩੮੮.

ਦੇਵਾ ਤੇ ਨਿਖਿਲਾ ਨੇਤ੍ਵਾ ਨਾਨਾਪੂਜਾਵਿਧਿਂ ਤਤੋ,

ਸਨ੍ਤੁਟ੍ਠਾ ਮੁਨਿਨੋ’ਕਾਸੁਂ ਮਹਨ੍ਤਂ ਜਯਮਙ੍ਗਲਂ;

੩੮੯.

ਸਮ੍ਪਤ੍ਤਾਥ ਨਿਸਾਕਨ੍ਤਾ ਮਾਨੇਤੁਂਚ ਮੁਨਿਸ੍ਸਰਂ,

ਪੁਬ੍ਬਾਪਰਮ੍ਬਰੇ ਲਗ੍ਗ ਸਸੀਣਕ੍ਕਣ੍ਣ ਭੁਸਣ;

੩੯੦.

ਸੁਨੀਲਾਕਾਸ ਧਮ੍ਮਿਲ੍ਲੇ ਧਤ੍ਤ ਤਾਰਾਲਿਮਾਲਿਕਾ,

ਵੀਜੇਨ੍ਤੀਵ ਦਿਸਾ ਬਾਹਾ ਫੁਲ੍ਲਚੂਤਕ ਚਾਮਰੇ;

੩੯੧.

ਮਲ੍ਲਿਕਾ ਮੁਕੁਲਾਸਤ੍ਤ ਸਮ੍ਮਤ੍ਤਾਲਿਗਣਾ ਤਦਾ,

ਧਮੇਨ੍ਤਾ ਵਿਯ ਸਙ੍ਖਾਨਿ ਕੂਜੇਨ੍ਤਿ ਮਧੁਰਂ ਗਿਰਂ;

੩੯੨.

ਸਾਮੋਦ ਮਕਰਨ੍ਦੇਹਿ ਮਨ੍ਦਮਨ੍ਦਾਨਿਲਾਗਤਾ,

ਸਜੁਣ੍ਹਾ ਜਿਨਬਿਮ੍ਬਮ੍ਹਿ ਉਤੁਂ ਗਾਹੇਨ੍ਤਿ ਸੀਤਲਂ;

੩੯੩.

ਅਵਿਜ੍ਜਾਦਿ ਮਹਾਮੂਲਂ ਤਿਵਟ੍ਟਤ੍ਥਿਰ ਖਨ੍ਧਕਂ,

ਸਂਸਾਰ ਵਿਸਰੁਕ੍ਖਂ ਸੋ ਆਰਦ੍ਧੁਮ੍ਮੁਲਿਤੁਂ ਤਦਾ;

੩੯੪.

ਭਾਵੇਨ੍ਤੋ ਪੁਰਿਮੇ ਯਾਮੇ ਸਰਨ੍ਤੋ ਖਨ੍ਧਸਨ੍ਤਤਿਂ,

ਪੁਬ੍ਬੇਨਿਵਾਸਾਨੁਸ੍ਸਤਿ ਞਾਣਂ ਲਦ੍ਧਾ ਨਰਿਸ੍ਸਰੋ;

੩੯੫. ¶

ਤਥਾ ਮਜ੍ਝਿਮ ਯਾਮਮ੍ਹਿ ਦਿਬ੍ਬਚਕ੍ਖੁ ਵਿਸੋਧਨਾ,

ਚੁਤੁਪਪਾਤ ਞਾਣਞ੍ਚ ਅਧਿਗਂਤ੍ਵਾਨ ਸਬ੍ਬਸੋ;

੩੯੬.

ਰਤ੍ਤਿਯਾ ਪਚ੍ਛਿਮੇ ਯਾਮੇ ਚਿਨ੍ਤਯਨ੍ਤੋ ਜਰਾਦਯੋ,

ਵਿਪਸ੍ਸਿਤ੍ਵਾ ਨਾਮਰੂਪੇ ਆਰੋਪੇਤ੍ਵਾ ਤਿਲਕ੍ਖਣਂ;

੩੯੭.

ਸਮ੍ਮਸਨ੍ਤੋ ਕਿਲੇਸੇਹਿ ਵਿਵੇਚੇਤ੍ਵਾ ਸਕਂ ਮਨਂ,

ਆਸਵਾਨਂ ਖਯੇ ਞਾਣਾ ਲਦ੍ਧਾ ਅਗ੍ਗਫਲਂ ਤਦਾ;

੩੯੮.

ਪਤ੍ਤੋ ਨਿਬ੍ਬਾਣਨਗਰਂ ਬੋਜ੍ਝਙ੍ਗ ਰਤਨਿਸ੍ਸਰੋ,

ਸਦ੍ਧਮ੍ਮਰਾਜਾ ਹੁਤ੍ਵਾਨ ਪੀਤਿਵਾਚਮੁਦਾਹਰੀ;

੩੯੯.

ਅਨੇਕਜਾਤਿ ਸਂਸਾਰਂ ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ,

ਗਹਕਾਰਕਂ ਗਵੇਸਨ੍ਤੋ ਦੁਕ੍ਖਾ ਜਾਤਿ ਪੁਨਪ੍ਪੁਨਂ;

੪੦੦.

ਗਹਕਾਰਕ ਦਿਟ੍ਠੋਸਿ ਪੁਨ ਗੇਹਂ ਨ ਕਾਹਸਿ,

ਸਬ੍ਬਾ ਤੇ ਫਾਸੁਕਾ ਭਗ੍ਗਾ ਗਹਕੂਟਂ ਵਿਸਙ੍ਖਿਤਂ,

ਵਿਸਙ੍ਖਾਰਗਤਂ ਚਿਤ੍ਤਂ ਤਣ੍ਹਾਨਂ ਖਯਮਜ੍ਝਗਾ;

੪੦੧.

ਇਚ੍ਚੇਵ ਮਗ੍ਗਮਤਦਾਨਵਿਧਿਪ੍ਪਵੀਣ,

ਕਾਰੁਞ੍ਞਪੁਞ੍ਞਹਦਯੇਨ ਮਹੋਦਯੇਨ,

ਪਤ੍ਵਾ ਭਵਣ੍ਣਵਮਪਾਰਮਨਨ੍ਤਦੁਕ੍ਖਂ,

ਯੇਨੋਚਿਤਾ ਪਰਮਪਾਰਮਿਤਾ ਜਿਨੇਨ;

੪੦੨.

ਯੋਚੇਵ ਸਬ੍ਬਵਿਭਵਂ ਪਣੁਦਿਤ੍ਵ ਰਜ੍ਜਂ

ਨਿਕ੍ਖਮ੍ਮ ਪਤ੍ਵ ਚਲਪਤ੍ਤਮਹੀਰੁਹਸ੍ਸ,

ਮੂਲੇ ਨਿਸਜ੍ਜ ਸਬਲਂ ਪਬਲਞ੍ਚ ਮਾਰਂ,

ਪਾਪਾਰਯੋ ਚ ਵਿਜਿਤੋ ਸ ਦਦਾਤੁ ਸਨ੍ਤਿਂ;

ਅਭਿਸਮ੍ਬੋਧਿ ਕਥਾ.

੪੦੩.

ਤਿਲੋਕਨਾਥੋ ਸੁਗਤੋ ਤਤੋ ਤਦਾ

ਉਦਾਨਵਾਚਂ ਸਮੁਦਾਹਰਿਤ੍ਵਾ,

ਪਲ੍ਲਙ੍ਕਮਾਭੁਜ੍ਜ ਦੁਮਿਨ੍ਦਮੂਲੇ

ਚਿਨ੍ਤੇਸਿ ਏਵਂ ਵਜਿਰਾਸਨਸ੍ਮਿਂ;

੪੦੪. ¶

ਦਾਨਾਦਯੋ ਪਾਰਮਿਤਾ ਚਿਨਿਤ੍ਵਾ

ਅਸਙ੍ਖਕਪ੍ਪਾਨਿ ਚ ਖੇਪਯਿਤ੍ਵਾ,

ਅਸ੍ਸੇਵ ਪਲ੍ਲਙ੍ਕਵਰਸ੍ਸ ਹੇਤੁ

ਸਨ੍ਧਾਵਿਤਂ ਤਂ ਭਜਿਤਂ ਵਯਜ੍ਜ;

੪੦੫.

ਯਾਵਸ੍ਸੁ ਪੁਣ੍ਣ ਮਮ ਚੇਤਨਾਯੋ

ਤਾਵੇਤ੍ਥ ਅਚ੍ਛਾਮਿ ਨ ਵੁਟ੍ਠਹਾਮਿ,

ਮਂਤ੍ਵਾਨ ਸੋ ਨੇਕਸਹਸ੍ਸਸਙ੍ਖਾ

ਜਿਨੋ ਸਮਾਪਤ੍ਤਿ ਵਲਞ੍ਜਿ ਤਤ੍ਥ;

੪੦੬.

ਦੇਵਾਤਿਦੇਵੋ ਤਿਭਵੇਕਨਾਥੋ

ਹਤਾਵਕਾਸੋ ਜਿਤਪਞ੍ਚਮਾਰੋ,

ਪਿਤਾਮਹਾਦੀਹਿ ਮਹੀਯਮਾਨੋ

ਖੇਪੇਸਿ ਸਤ੍ਥਾ ਦਿਵਸਾਨਿ ਸਤ੍ਤ;

ਇਤਿ ਪਠਮ ਸਤ੍ਤਾਹਂ.

੪੦੭.

ਯਸ੍ਮਾਸਨਂ ਨੇਵ ਜਹਾਤਿ ਤਸ੍ਮਾ

ਤਿਸਨ੍ਧਿਯੁਤ੍ਤੇਨ ਨਿਸੀਦਿਤੇਵ,

ਅਜ੍ਜਾਪਿ ਕਤ੍ਤਬ੍ਬਮਨੇਨ ਅਤ੍ਥਿ

ਦੇਵਾਨਮਿਚ੍ਛਾਸਿ ਮਨਮ੍ਹਿ ਕਙ੍ਖਾ;

੪੦੮.

ਤੇਸਂ ਮਨਂ ਸੋ ਮਨਸਾ ਵਿਦਿਤ੍ਵਾ

ਵਿਨੋਦਨਤ੍ਥਂ ਵਿਮਤਿਨ੍ਤੁ ਤੇਸਂ,

ਉਟ੍ਠਾਯ ਤਮ੍ਹਾ ਨਭਮੁਪ੍ਪਤਿਤ੍ਵਾ

ਦਸ੍ਸੇਸਿ ਤੇਸਂ ਮੁਨਿਪਾਟਿਹੇਰਂ;

੪੦੯.

ਵਿਨੋਦਯਿਤ੍ਵਾ ਸੁਗਤੋ ਤਦੇਵਂ

ਸੁਧਾਸਿਨਂ ਚੇਤਸਿ ਕਙ੍ਖਰਾਸਿਂ,

ਪਲ੍ਲਙ੍ਕਤੋ ਉਤ੍ਤਰਪੁਬ੍ਬਕਣ੍ਣਂ

ਆਕਾਸਤੋਰੁਯ੍ਹ ਜਲਂ ਰਵੀਵ;

੪੧੦.

ਜਿਨੋ ਦੁਮਿਨ੍ਦਸ੍ਸ ਚ ਆਸਨਸ੍ਸ

ਬਹੂਪਕਾਰਤ੍ਤਮਨੁਸ੍ਸਰਨ੍ਤੋ,

ਠਿਤੋ ਪਦਂ ਕਿਞ੍ਚਿ ਅਕੋਪਯਨ੍ਤੋ

ਇਤੋ ਚਿਤੋ ਲੋਕ ਨ ਮੁਜ੍ਜਹਨ੍ਤੋ;

੪੧੧. ¶

ਨੀਲਾਯਤਕ੍ਖਾਮਲਕਨ੍ਤਿਤੋਯ

ਧਾਰਾਨਿਪਾਤੇਨ ਦੁਮਿਨ੍ਦਰਾਜਂ,

ਨਿਸਿਞ੍ਚਮਾਨੋ ਦਿਵਸਾਨਿ ਸਤ੍ਤ

ਪੂਜੇਸਿ ਤਂ’ਨਿਮਿਸਲੋਚਨੇਹਿ;

੪੧੨.

ਅਜ੍ਜਾਪਿ ਤਸ੍ਮਿਂ ਧਰਣਿਪ੍ਪਦੇਸੇ

ਕਤਸ੍ਸ ਥੂਪਸ੍ਸ ਤਦੇਵ ਨਾਮਂ,

ਅਹੋਸਿ ਦੇਵਾ ਚ ਨਰੋ’ਰਗਾ ਚ

ਮਹੇਨ੍ਤਿ ਤੇ ਤੇਨ ਦਿਵਂ ਪਯਨ੍ਤਿ;

ਇਤਿ ਦੁਤਿਯ ਸਤ੍ਤਾਹਂ.

੪੧੩.

ਦੇਵਾ ਤਤੋ ਦੇਵਵਰਸ੍ਸ ਤਸ੍ਸ

ਸੁਚਙ੍ਕਮਂ’ਕਂਸੁ ਮਣੀਹਿ ਨਾਨਾ,

ਪਲ੍ਲਙ੍ਕਤੋ ਠਾਨਵਰਸ੍ਸ ਮਜ੍ਝੇ

ਪੁਬ੍ਬਾਪਰਾਸਾਯਨਮਨ੍ਤਰਾਲੇ;

੪੧੪.

ਨਰਿਨ੍ਦ ਨਾਗਿਨ੍ਦ ਸੁਰਿਨ੍ਦ ਪੂਜਿਤੋ

ਛਬ੍ਬਣ੍ਣਰਂਸੀਹਿ ਸਮੁਜ੍ਜਲਨ੍ਤੋ,

ਨੀਲਮ੍ਬਰੇ ਤਾਰਕਿਤੋ ਸਸੀ’ਵ

ਸੋ ਚਙ੍ਕਮੀ ਸਤ੍ਤ ਅਹਾਨਿ ਤਤ੍ਥ;

੪੧੫.

ਅਜ੍ਜਾਪਿ ਤਸ੍ਮਿਂ ਧਰਣਿਪ੍ਪਦੇਸੇ

ਕਤਸ੍ਸ ਥੂਪਸ੍ਸ ਤਦੇਵ ਨਾਮਂ,

ਅਹੋਸਿ ਦੇਵਾ ਚ ਨਰੋਰਗਾ ਚ

ਮਹੇਨ੍ਤਿ ਤੇ ਤੇਨ ਦਿਵਂ ਪਯਨ੍ਤਿ;

ਇਤਿ ਤਤਿਯ ਸਤ੍ਤਾਹਂ.

੪੧੬.

ਤਤੋ ਦੁਮਿਨ੍ਦਸ੍ਸ ਸੁਰਾਸੁਰਿਨ੍ਦਾ

ਮਹੀਤਲੇ ਪਚ੍ਛਿਮੋਤ੍ਤਰਾਯਂ,

ਮਾਪਿਂਸੁ ਨਾਨਾਰਤਨਾਲਯਗ੍ਗਂ

ਨਿਸਜ੍ਜ ਪਲ੍ਲਙ੍ਕਵਰੇ ਤਹਿਂ ਸੋ;

੪੧੭. ¶

ਸੁਦੁਦ੍ਦਸਾਗਾਧਮਪਾਰਪਾਰਂ

ਸਮਨ੍ਤਪਟ੍ਠਾਨਤਰਙ੍ਗਭਙ੍ਗਿਂ,

ਧਮ੍ਮੋਦਧਿਂ ਞਾਣਸੁਮੇਰੁਮਤ੍ਥਾ

ਸਾਲੋਲਯਂ ਖੇਪਯਹਾਨਿ ਸਤ੍ਤ;

੪੧੮.

ਅਜ੍ਜਾਪਿ ਤਸ੍ਮਿਂ ਧਰਣਿਪ੍ਪਦੇਸੇ

ਕਤਸ੍ਸ ਥੂਪਸ੍ਸ ਤਦੇਵ ਨਾਮਂ,

ਅਹੋਸਿ ਦੇਵਾ ਚ ਨਰੋਰਗਾ ਚ

ਮਹੇਨ੍ਤਿ ਤੇ ਤੇਨ ਦਿਵਂ ਪਯਨ੍ਤਿ;

ਇਤਿ ਚਤੁਤ੍ਥ ਸਤ੍ਤਾਹਂ.

੪੧੯.

ਤਤੋ ਜਿਨੋ ਗਨ੍ਤ੍ਵ’ਜਪਾਲਮੂਲੇ

ਵਿਮੁਤ੍ਤਿਜਂ ਸਾਦੁਫਲਂ’ਨੁਭੋਨ੍ਤੋ,

ਸਤ੍ਤਾਹਮਤ੍ਤਂ ਅਤਿਵਤ੍ਤਯੀ ਸੋ

ਦੇਵਾਤਿਦੇਵੋ ਕਰੁਣਾਗੁਣਗ੍ਗੋ;

੪੨੦.

ਤਦਾਗਤਾ ਮਾਰਵਧੂ ਮੁਨਿਤ੍ਦਂ

ਪਲੋਭਿਤੁਂ ਯਾ ਪਿਤੁਨੋ ਸਕਾਸਾ,

ਤਾਸਂ ਪਯੋਗਮ੍ਪਿਧ ਬਿਨ੍ਦੁਮਤ੍ਤਂ

ਕਥੀਯਤੇ ਤਂ ਸਮੁਪਾਗਤਤ੍ਤਾ;

੪੨੧.

ਤਦਾ ਸ ਮਾਰੋ ਸਮਰੇ ਜਿਨੇਨ

ਪਰਾਜਿਤੋ ਸੋਚਨਕੋ’ਪਗਂਤ੍ਵਾ,

ਪਜ੍ਝਾਯਮਾਨੋ’ਥ ਅਧੋਮੁਖੋ’ਚ

ਨਿਸੀਦਿ ਤੁਣ੍ਹੀ ਵਿਲਿਖਂ ਛਮਾਯਂ;

੪੨੨.

ਪਰਾਜਯਂ ਮਯ੍ਹ ਮਮੇਵ ਦੋਸੋ

ਨ ਤਸ੍ਸ ਕਸ੍ਮਾਹਮਯਂ’ਚ ਨਾਸਿਂ,

ਸੀਸਕ੍ਖਿਮਂਸਾਦਿ ਚ ਪੁਤ੍ਤਦਾਰੇ

ਨਾਦਨ੍ਤਿ ਏਵਂ ਮਨਸੀ ਕਰੋਨ੍ਤੋ;

੪੨੩.

ਪਵਤ੍ਤਿਮੇਤਂ ਮਕਰਦ੍ਧਜਸ੍ਸ

ਸੁਤ੍ਵਾਨ ਤਣ੍ਹਾ ਅਰਤੀ ਰਗਾ ਚ,

ਯਤ੍ਥਚ੍ਛਿ ਮਾਰੋ ਪਰਿਸੋਚਯਨ੍ਤੋ

ਤਤ੍ਥਾਗਮੁਂ ਤਾ ਚਕਿਤਾ ਖਣੇਨ;

੪੨੪. ¶

ਦਿਸ੍ਵਾਨ ਤਂ ਤਤ੍ਥ ਤਥਾ ਨਿਸਿਨ੍ਨਂ

ਨਿਸ੍ਸਾਸਰੁਦ੍ਧਂ ਗਿਰਮੁਗ੍ਗਿਰਨ੍ਤੀ,

ਤੁਸਾਰ ਬਿਨ੍ਦੁਨਿਵਹੇਹਿ’ਸਾਰ

ਪਙ੍ਕੇਰੁਹਾਕਾਰ ਵਿਸਾਲਨੇਤ੍ਤਾ;

੪੨੫.

ਹਾ ਤਾਤ ਹਾ ਤਾਤ ਕਿਮਾਸਿ ਤੇਦਂ

ਨਟ੍ਠਨ੍ਨੁ ਤੇ ਕਿਂ ਵਦ ਪਤ੍ਥਸੀ ਕਿਂ,

ਕੋ ਤੇ ਦਿਸੋ ਕੇਨ ਪਰਾਜਿਤੋ’ਸਿ

ਕਿਮਾਨਯਿਸ੍ਸਾਮ ਹਨਾਮ ਕਂ ਨੋ;

੪੨੬.

ਕਿਮ੍ਹੋਤਿਯੋਦਾਨਿ ਨ ਪਸ੍ਸਥੇਤਂ

ਸੁਦ੍ਧੋਦਨੀਯਂ ਤਤਕਿਤ੍ਤਿਘੋਸਂ,

ਮੁਖਮ੍ਹਿ ਮਯ੍ਹਂ ਮਸਿਮਕ੍ਖਯਨ੍ਤਂ

ਅਤਿਚ੍ਚ ਯਨ੍ਤਂ ਵਿਸਯਂ ਪਸਯ੍ਹ;

੪੨੭.

ਨ ਭਾਰਿਯਾ ਤਾਤ ਮਨੁਸ੍ਸਭੂਤਂ

ਕਤ੍ਤੁਂ ਵਸਂ ਕੋ ਵਸਮੇਤਿ ਨਾਮ੍ਹਂ,

ਤਂ ਰਾਗਪਾਸੇਨ ਗਜਂ’ਵ ਮਤ੍ਤਂ

ਸੁਬਨ੍ਧਕਂ ਬਨ੍ਧਿਯ ਆਨਯੇਮ;

੪੨੮.

ਨ ਰਾਗਪਾਸੇਨ ਹਿ ਆਨਨੀਯੋ

ਮਾਰਸ੍ਸ ਧੇਯ੍ਯਂ ਸਮਤਿਕ੍ਕਮੀਵ,

ਅਪੇਤਰਾਗੋ ਅਰਹਾ ਅਕਮ੍ਪੋ

ਸੋਵਾਮ ਤਸ੍ਮਾ ਸੁਭਗਾ ਤਨੁਜਾ;

੪੨੯.

ਸਚੇਤਨੋ ਸੋ ਹਿ ਮਨੁਸ੍ਸਭੁਤੋ

ਅਚੇਤਨਞ੍ਚੇ ਸਮੁਪਾਗਮਾਮ,

ਕਰੋਮ ਤਂ ਨੋ ਵਸਗਂ ਕਿਮੇਤ੍ਥ

ਚਿਤ੍ਤਂ ਬਲਂ ਪਸ੍ਸਥ ਨੋ ਖਣੇਨ;

੪੩੦.

ਰੂਪੇਨ ਨੇਤ੍ਤਂ ਸੁਮਨੋਹਰੇਨ

ਗਨ੍ਧੇਨ ਘਾਣਂ ਸਵਣਂ ਸਰੇਨ,

ਫਸ੍ਸੇਨ ਗਤ੍ਤਂ ਰਸਸਾ ਰਸਞ੍ਞਂ

ਮਨਞ੍ਚ ਪਾਸੇਨ ਚ ਕਾਮਜੇਨ

੪੩੧. ¶

ਸੁਬਾਹੁਪਾਸੇਨ ਚ ਤਸ੍ਸ ਗੀਵਂ

ਬਾਹੁਦ੍ਵਯਂ ਧਾਰਿਤਮਾਲਦਾਮਾ,

ਬਨ੍ਧਿਤ੍ਵਦਾਨੇਵ ਤਮਾ’ਨਯਾਮ

ਬਲਞ੍ਹਿ ਨੋ ਪਸ੍ਸਥ ਤਾਤ’ਦਾਨਿ;

੪੩੨.

ਵਤ੍ਵਾਨ ਏਵਂ ਵਚਨਂ ਪਿਤੁਸ੍ਸ

ਪਣਮ੍ਮ ਪਾਦਾਨਿ ਪਗਬ੍ਭਿਤਨ੍ਤਾ,

ਯਤ੍ਥਚ੍ਛਿ ਮਾਰਾਰਿ ਵਿਰੋਚਮਾਨੋ

ਤਤ੍ਥਾ’ਗਮੁਂ ਖਿਪ੍ਪਮੁਦਗ੍ਗਚਿਤ੍ਤਾ;

੪੩੩.

ਸਾਮੋਦਮਾਲਾਕੁਲਕੇਸਭਾਰ

ਪਯੋਧਰਾ ਕੁਙਕ੍ਕੁਮਹਾਰਿਹਾਰਾ,

ਬਿਮ੍ਬਾਧਰਾ ਚਾਰੁਸਭਾ ਪਭਾਸਾ

ਉਮ੍ਮਾਦਯਨ੍ਤੀ ਜਨਮਾਨਸਾਨਿ;

੪੩੪.

ਮੁਦ੍ਧੇਨ ਮਿਸ੍ਸਂ ਮਧੁਰੇ ਨਿਮੁਗ੍ਗਂ

ਸ੍ਨੇਹੇਨ ਤਿਨ੍ਤਂ ਰਸਤੋ’ਨੁਵਿਦ੍ਧਂ,

ਭਾਸਿਂਸੁ ਵਾਚਂ ਹਦਯਙ੍ਗਮਨ੍ਤਾ

ਵਿਲੋਕਨੇਨੇਵ ਧਿਤਿਂ ਹਰਨ੍ਤੀ;

੪੩੫.

ਵਸਨ੍ਤਕਨ੍ਤੋ ਨਵਯੋਬ੍ਬਨੋ’ਸਿ

ਸੁਵਣ੍ਣਵਣ੍ਣੋ ਹਦਯਙ੍ਗਮੋ’ਸਿ

ਏਕੋ ਨਿਸਿਨ੍ਨੋ’ਸਿ ਵਟਸ੍ਸ ਮੂਲੇ

ਸਿਮਨ੍ਤਿਨੀ ਸਾਮਿ ਕੁਹਿਨ੍ਨੁ ਤੁਯ੍ਹਂ;

੪੩੬.

ਤਰਙ੍ਗਹੀਨੋ’ਪਿ ਤਰਙ੍ਗਮਾਲੀ

ਸਸਙ੍ਕਹੀਨਾ ਰਜਨੀ ਚ ਸਾਮੀ,

ਹਂਸਾ’ਲਿਹੀਨਾ ਸਰਸੀ ਸੁਫੁਲ੍ਲਾ

ਨਾਭਾਤਿ ਕਨ੍ਤਾ ਵਿਰਤੋ ਧਵੋ’ਪਿ;

੪੩੭.

ਵਸਨ੍ਤਕਾਲੋ ਚ ਵਨਂ ਸੁਫੁਲ੍ਲਂ

ਨਿਸਾਕਰਾਭਾ ਭਮਰਾਲਿਗੀਤਂ,

ਸੁਗਨ੍ਧਮਨ੍ਦੋਪਗਤਾ ਸਮੀਰਾ

ਵਿਰੋਚਸਿ ਤ੍ਵਮ੍ਪਿ ਚ ਯੋਬ੍ਬਨੇਨ;

੪੩੮. ¶

ਮਯਮ੍ਪਿ ਚੇਤ੍ਥੇਵ ਸਮਾਗਤਮ੍ਹ

ਮਨੋ’ਨੁਕੂਲਾ ਚ ਮਨੁਞ੍ਞਰੂਪਾ,

ਕਰੋਤਿ ਕਿਂਤ੍ਵ’ਜ੍ਜ ਸਕਾਮਦਾਹੋ

ਕਾਮਾਕਰੋ’ਦਾਨਿ ਸਮਾਗਤੋ ਨੋ;

੪੩੯.

ਮਾ ਤੇਦਿਸਂ ਯੋਬ੍ਬਨਰੂਪਸਾਰਂ

ਸੁਵਿਗ੍ਗਹਂ ਛਾਦਯ ਚੀਵਰੇਨ,

ਤੇਨੇਵ ਨੋ ਨੇਤ੍ਤਮਨਮ੍ਹਿ ਸਾਮਿ

ਮਾ ਦੇਹਿ ਦਾਹਂ ਤਵ ਦਾਸਿਭੁਤੇ;

੪੪੦.

ਨਖਂਸੁ ਸੁਤ੍ਤੇ’ਰੁਣਪਾਨਿਪਾਦੇ

ਨੇਤ੍ਤਿਨ੍ਦਨੀਲਾਨਿ’ਵ ਆਵੁਣਨ੍ਤੋ,

ਤ੍ਵਮਚ੍ਛਿ ਨੋ ਸਾਮਿ ਮੁਖਮ੍ਬੁਜੇਸੁ

ਨ ਏਨ੍ਤਿ ਕਿਨ੍ਤੇ ਨਯਨਾਲਿਮਾਲਾ;

੪੪੧.

ਸੁਧਾਸਿਲਾਗੀਞ੍ਜਕ ਲੋਹਦਾਰੁ

ਜਾਤੇਹਿ ਤ੍ਵਂ ਧੀਰ ਨ ਨਿਮ੍ਮਿਤੋ’ਸਿ,

ਰੂਪੀ’ਸਿ ਸੋਮ੍ਮੋ’ਸਿ ਤਥਾਪਿ ਸਾਮਿ

ਕਿਂ ਕਾਮਰਾਗਂ ਮਨਸਾ ਨੁਦੇਸਿ;

੪੪੨.

ਅਯਞ੍ਚ ਬਾਲਾ ਚਤੁਰਾ ਰਤੀਸੁ

ਬਾਲੇਤਿ ਕਙ੍ਖਂ ਜਹ ਮਾਨਸਮ੍ਹਿ,

ਕਿਂ ਮਞ੍ਜਰੀ ਭਿਜ੍ਜਤਿ ਸਮ੍ਪਫੁਲ੍ਲਾ

ਮਤ੍ਤਾਲਿਰਾਜੇ ਪਰਿਚੁਮ੍ਬਮਾਨੇ;

੪੪੩.

ਅਯਞ੍ਚ ਰਾਮਾ ਰਮਣੀਯਰੂਪਾ

ਪੀਣੋਰੁਗਣ੍ਡਾ ਕੁਵਮਣ੍ਡਲਾ ਚ,

ਤਂ ਕਾਮਿਨਿਂ ਕਾਮਯ ਫੁਲ੍ਲਕਞ੍ਜੇ

ਹਂਸੋ ਯਥਾ ਕੇਸਰ ਸਮ੍ਪਗਿਦ੍ਧੋ;

੪੪੪.

ਚਿਨ੍ਤਾਮਣਿਂ ਭਦ੍ਦਘਟਞ੍ਚ ਕਪ੍ਪ

ਤਰੁਂ ਸਮਾਪਜ੍ਜ ਦਲ਼ਿਦ੍ਦਭਾਵਾ,

ਨਾਪੇਨ੍ਤਿ ਸਤ੍ਤਾ ਖਲੁ ਦੁਬ੍ਭਗਤ੍ਤਾ

ਤਥੇਵ ਨੋ’ਸੀ ਤਵ ਪਾਦਸੇਵਾ;

੪੪੫. ¶

ਏਵਞ੍ਹਿ ਤਾ ਰਞ੍ਜਨਮਞ੍ਜੁਭਾਸਾ

ਸਹਸ੍ਸਮੇਕਞ੍ਚ ਸਤਾਨਿ ਅਟ੍ਠ,

ਵੇਸਾਨਿ ਸਮ੍ਮਾ ਅਭਿਨਿਮ੍ਮਿਣਿਤ੍ਵਾ

ਪਲੋਭਯੁਨ੍ਤਂ ਬਹੂਧਾ ਮੁਨਿਨ੍ਦਂ;

ਤਤੋ ਤਣ੍ਹਾ?.

੪੪੬.

ਯਕ੍ਖੋਸਿ ਮਤ੍ਤੋਸਿ ਸਿਲਾਮਯੋਸਿ

ਅਚੇਤਨੋਸਾ’ਥ ਅਯੋਮਯੋਸਿ,

ਅਵੀਤਰਾਗਞ੍ਹਿ ਸਚੇਤਨਞ੍ਚੇ

ਅਨੇਨੁਪਾਯੇਨੁ’ਪਸਙ੍ਕਮਾਮ;

੪੪੭.

ਫਲੇਯ੍ਯ ਖੀਪ੍ਪਂ ਹਦਯਞ੍ਹਿ ਤਸ੍ਸ

ਉਣ੍ਹਂਵ ਰਤ੍ਤਂ ਮੁਖਤੁ’ਗ੍ਗਮੇਯ੍ਯ,

ਸਿਯਾਵ ਖਿਪ੍ਪਂ ਅਪਿ ਚਿਤ੍ਤਖੇਪਂ

ਉਮ੍ਮਾਦਭਾਵਂਚ ਸ ਪਾਪੁਣੇਯ੍ਯ;

੪੪੮.

ਯਥਾ ਪਲੁਤ੍ਤੋ ਹਰਿਤੋਪਲਮ੍ਹਿ

ਖਿਤ੍ਤੋ ਨਲ਼ੋ ਸੁਸ੍ਸਤਿ ਆਤਪੇਨ,

ਏਵਂ ਵਿਸੁਸ੍ਸੇਤਿ ਵਿਸਾਦਮੇਤਿ

ਸੋ ਮੁਚ੍ਛਤਿ ਮੁਯ੍ਹਤਿ ਦੁਕ੍ਖਮੇਤਿ;

੪੪੯.

ਸੋਕਾਵਕਿਣ੍ਣੇ ਨੁ ਵਨਮ੍ਹਿ ਝਾਯਸਿ

ਵਿਤ੍ਤਨ੍ਨੁ ਜਿਤੋ ਉਦ ਪਤ੍ਥਯਾਨੋ,

ਆਗੁਨ੍ਨੂ ਗਾਮਸ੍ਮਿਂ ਅਕਾਸਿ ਕਿਞ੍ਚਿ

ਜਨੇਨ ਕਸ੍ਮਾ ਨ ਕਰੋਸਿ ਸਕ੍ਖਿਂ;

ਸਤ੍ਥਾ?.

੪੫੦.

ਅਤ੍ਥਸ੍ਸ ਪਤ੍ਤਿਂ ਹਦਯਸ੍ਸ ਸਨ੍ਤਿਂ

ਛੇਤ੍ਵਾਨ ਸੇਨਂ ਪਿਯਸਾਤਰੂਪਂ

ਏਕੋ’ਹਂ ਝਾਯਂ ਸੁਖਮਨੁਬੋਧਿਂ

ਜਨੇਨ ਤਸ੍ਮਾ ਨ ਕਰੋਮ ਸਕ੍ਖਿਂ;

ਇਮਾ ¶ ਦ੍ਵੇ ਪਾਲਿਯਂ?.

੪੫੧.

ਪਲੁਟ੍ਠਗਤ੍ਤਂ ਦਹਨੇਨ ਮਕ੍ਕਟਿਂ

ਸੁਸਾਨਪੇਤਿਞ੍ਚ ਜਿਗੁਚ੍ਛਨੀਯਂ,

ਜੇਗੁਚ੍ਛਿਯਂ ਜਙ੍ਗਮ ਮੀਲ਼੍ਹਰਾਸਿਂ

ਦਿਸ੍ਵਾਨ ਕੋ ਤਂ ਵਰਯੇ ਸਪਞ੍ਞੋ;

ਅਥ ਅਰਤਿ?.

੪੫੨.

ਕਥਂ ਵਿਹਾਰੀ ਬਹੁਲੋ ਚ ਭਿਕ੍ਖੁ

ਪਞ੍ਚੋਘਤਿਣ੍ਣੇ ਅਤਰੀਧ ਛਟ੍ਠਂ,

ਕਥਂ ਝਾਯਿਂ ਬਹੁਲਂ ਕਾਮਸਞ੍ਞਾ

ਪਰਿਬਾਹਿਰਾ ਹੋਨ੍ਤਿ ਅਲਦ੍ਧ ਯੋ ਤਂ;

ਸਤ੍ਥਾ?.

੪੫੩.

ਪਸ੍ਸਦ੍ਧਕਾਯੋ ਸੁਵਿਮੁਤ੍ਤਚਿਤ੍ਤੋ

ਅਸਙ੍ਖਰਾਨੋ ਸਤਿਮਾ ਅਨੋਕੋ,

ਅਞ੍ਞਾਯ ਧਮ੍ਮਂ ਅਵਿਤਕ੍ਕ ਝਾਯੀ

ਨ ਕੁਪ੍ਪਤੀ ਨਸ੍ਸਰਤੀ ਨ ਥੀਨੋ;

੪੫੪.

ਏਵਂ ਵਿਹਾਰੀ ਬਹੁਲੋ ਚ ਭਿਕ੍ਖੁ

ਪਞ੍ਚੋਘਤਿਣ੍ਣੇ ਅਤਰੀਧ ਛਟ੍ਠਂ,

ਏਵਂ ਝਾਯਿਂ ਬਹੁਲਂ ਕਾਮਸਞ੍ਞਾ

ਪਰਿਬਾਹਿਰਾ ਹੋਨ੍ਤਿ ਅਲਦ੍ਧ ਯੋ ਤਂ;

ਅਥ ਰਗਾ?.

੪੫੫.

ਅਚ੍ਛੇਚ੍ਛਿ ਤਣ੍ਹਂ ਗਣਸਙ੍ਘਚਾਰੀ

ਅਦ੍ਧਾ ਤਰਿਸ੍ਸਨ੍ਤੀ ਬਹੂ ਚ ਸਦ੍ਧਾ,

ਬਹੁਂ ਵਤਾਯਂ ਜਨਤ’ਮਨੋਕੋ

ਅਚ੍ਛਿਜ੍ਜ ਨੇਸ੍ਸਤਿ ਮਚ੍ਚੁਰਾਜਸ੍ਸ ਪਾਰਂ;

ਸਤ੍ਥਾ? ¶ .

੪੫੬.

ਨਯਨ੍ਤਿ ਵੇ ਮਹਾਵੀਰਾ ਸਦ੍ਧਮ੍ਮੇਨ ਤਥਾਗਤਾ,

ਧਮ੍ਮੇਨ ਨਯਮਾਨਾਨਂ ਕਾ ਉਸੂਯਾ ਵਿਜਾਨਤਂ;

ਇਮਾ ਪਞ੍ਚ ਪਾਲਿਯਂ?.

੪੫੭.

ਸੁਤ੍ਵਾਨ ਤਂ ਧਮ੍ਮਵਰਂ ਜਿਨਸ੍ਸ

ਪਮਤ੍ਤਬਨ੍ਧੁਸ੍ਸ ਰਗਾਦਿਰਾਮਾ,

ਪਲੋਭਿਤੁਂ ਨੇ’ਵ ਸਮਤ੍ਥਕਾ ਤਂ

ਅਗਂਸੁ ਖਿਪ੍ਪਂ ਪਿਤੁਨੋ ਸਕਾਸਂ;

੪੫੮.

ਮਾਰੋ ਤਦਾਰਾ’ਵ ਸਮੇਕ੍ਖਮਾਨੋ

ਦਿਸ੍ਵਾਗਤਾ ਕੇਵਲਮੇਵ ਤਾਯੋ,

ਮਾ ਕਤ੍ਥ ਕਾਮਂ ਮਮ ਭਾਸਿਤਾਨਿ

ਕਾਮਤ੍ਥ ਪਾਤੁਂ ਮਿਗਤਣ੍ਹਿਕਾਪਂ;

੪੫੯.

ਬਾਲਾ ਕੁਮੁਦਨਾਲ਼ੇਹਿ ਪਬ੍ਬਤਂ ਅਭਿਮਨ੍ਥਥ,

ਗਿਰਿਂ ਨਖੇਨ ਖਣਥ ਅਯੋ ਦਨ੍ਤੇਹਿ ਖਾਦਥ;

੪੬੦.

ਸੇਲਂਵ ਸਿਰਸਿ ਊਹਚ੍ਚ ਪਾਤਾਲੇ ਗਾਧਮੇਸਥ,

ਖਾਨੁਂਵ ਉਰਸਾ’ਸਜ੍ਜ ਨਿਬ੍ਬਿਜ੍ਜਾਪੇਥ ਗੋਤਮਾ;

ਇਮਾ ਦ੍ਵੇ ਪਾਲਿਯਂ?.

੪੬੧.

ਵਤ੍ਵਾਨ ਏਵਂ ਵਿਮਨੋ ਸ ਮਾਰੋ

ਸਟੀਤੁਕੋ ਸਮ੍ਭਵਨਂ ਪਯਾਸਿ,

ਸਤ੍ਥਾਥ ਰਾਗਾ ਪਰਿਮੁਤ੍ਤਚਿਤ੍ਤੋ

ਜਹਾਸਿ ਤਸ੍ਮਿਂ ਦਿਵਸਾਨਿ ਸਤ੍ਤ;

੪੬੨.

ਅਜ੍ਜਾਪਿ ਤਂ ਸਾਖਿਵਰਮ੍ਪਿਤੇਨ

’ਨੁਭੁਤਮਤ੍ਤੇਨ ਮਹੇਨ੍ਤਿ ਸਬ੍ਬੇ,

ਤੇਨੇਵ ਤੇ ਸਗ੍ਗਗਤਾ ਵਿਮਾਨੇ

ਮੋਦਨ੍ਤਿ ਕਾਮੇਹਿ ਅਨੂਪਮੇਹਿ;

ਇਤਿ ਪਞ੍ਚਮ ਸਤ੍ਤਾਹਂ.

੪੬੩. ¶

ਤਤੋ ਮੁਨਿਨ੍ਦੋ ਮੁਚਲਿਨ੍ਦਮੂਲੇ

ਨਿਸੀਦਿ ਗਨ੍ਤ੍ਵਾ ਪਵਰਾਸਨਮ੍ਹਿ,

ਯੁਗਨ੍ਧਰੇ ਬਾਲਰਵੀ’ਵ ਰਂਸਿ

ਜਾਲਾਹਿ ਲੋਕਂ ਪਰਿਪੂਰਯਨ੍ਤੋ;

੪੬੪.

ਅਥਾਨ ਮੇਘੋ ਜਲਦਾ ਸਤੇਹਿ

ਪਪੂਰਯਂ ਖਂ ਥਨਯਂ ਸਵਿਜ੍ਜੁ,

ਸਸੀਤਵਾਤੋ ਕਿਰਮਮ੍ਬੁਧਾਰਂ

ਵਿਰੋਚਮਾਨੋ ਵਿਸਕਣ੍ਠਿਕਾਹਿ;

੪੬੫.

ਅਮਨ੍ਦਨਣ੍ਦੋ ਮੁਚਲਿਨ੍ਦਭੋਗੀ

ਦਿਸ੍ਵਾ ਮੁਨਿਨ੍ਦਂ ਮੁਚਲਿਨ੍ਦਮੂਲੇ,

ਪਰਿਕ੍ਖਿਪਿਤ੍ਵਾਨ ਵਿਸਾਲਭੋਗਾ

ਛਾਦੇਤ੍ਵ ਸਮ੍ਮਾ ਸਫਣੋ ਫਣੇਨ;

੪੬੬.

ਅਜ੍ਝੇਸਿ ਸੋ ਤਸ੍ਸ ਅਨੁਗ੍ਗਹਾਯ

ਨਿਸੀਦਿ ਗਨ੍ਤ੍ਵਾ ਭੁਜਗਾ’ਸਨਮ੍ਹਿ,

ਸਤ੍ਥਾ ਤਦਾ ਰੂਪਿਯਮਨ੍ਦਿਰੇਵ

ਸਤ੍ਤਾਮਹਤ੍ਤਂ ਸੁਵਿਮੁਤ੍ਤਚਿਤ੍ਤੋ;

੪੬੭.

ਅਜ੍ਜਾਪਿ ਤਂ ਸਾਖਿਵਰਮ੍ਪਿ ਤੇਨ

’ਨੁਭੁਤਮਤ੍ਤੇਨ ਮਹੇਨ੍ਤਿ ਸਬ੍ਬੇ,

ਤੇਨੇਵ ਤੇ ਸਗ੍ਗਗਤਾ ਵਿਮਾਨੇ

ਮੋਦਨ੍ਤਿ ਕਾਮੇਹਿ ਅਨੂਪਮੇਹਿ;

ਇਤਿ ਛਟ੍ਠਮ ਸਤ੍ਤਾਹਂ.

੪੬੮.

ਤਤੋ’ਪਗਨ੍ਤ੍ਵਾ ਯਤਿਰਾਜ ਰਾਜਾ

ਨਿਸੀਦਿ ਰਾਜਾਯਤਨਸ੍ਸ ਮੂਲੇ,

ਵਿਮੁਤ੍ਤਿਜਂ ਪੀਤਿਸੁਖਂ’ਨੁਭੋਨ੍ਤੋ

ਸਤ੍ਤਾਹਮਤ੍ਤਂ ਕਰੁਣਾਗੁਣਗ੍ਗੋ;

੪੬੯.

ਅਜ੍ਜਾਪਿ ਤਂ ਸਾਖਿਵਰਮ੍ਪਿ ਤੇਨ

’ਨੁਭੁਤਮਤ੍ਤੇਨ ਮਹੇਨ੍ਤੀ ਸਬ੍ਬੇ,

ਤੇਨੇਵ ਤੇ ਸਗ੍ਗਗਤਾ ਵਿਮਾਨੇ

ਮੋਦਨ੍ਤਿ ਕਾਮੇਹਿ ਅਨੂਪਮੇਹਿ;

ਇਤਿ ਸਤ੍ਤਮ ਸਤ੍ਤਾਹਂ.

੪੭੦. ¶

ਆਹਾਰ ਕਿਚ੍ਚਾਦਿ ਵਿਵਜ੍ਜਿਤਸ੍ਸ

ਸੁਖਾਨੁਭੋਨ੍ਤਸ੍ਸ ਵਿਮੁਤ੍ਤਿਜਾਨਿ,

ਸਮ੍ਪੀਣਿਤਙ੍ਗਸ੍ਸ ਜਿਨਸ੍ਸ ਤਸ੍ਸ

ਇਚ੍ਚਚ੍ਚਗੁਂ ਸਤ੍ਤਦਿਨਾਨਿ ਸਤ੍ਤ;

੪੭੧.

ਦੇਵਾਨਮਿਨ੍ਦੇਨ ਤਤੋ’ਪਨੀਤ

ਮੁਖੋਦਕਾਦਿਮ੍ਪਰਿਭੁਞ੍ਜਿਯਾਨ,

ਨਿਸਿਨ੍ਨਮਤ੍ਤੇ ਯਤਿਰਾਜ ਰਾਜੇ

ਤਤ੍ਥਾ’ਗਮੁਂ ਦ੍ਵੇ ਵਾਣਿਜਾ ਖਣੇਨ;

੪੭੨.

ਉਸ੍ਸਾਹਿਤਾ ਦੇਵਵਰੇਨ ਸਮ੍ਮਾ

ਸਾਲੋਹਿਤਾ ਤਸ੍ਸ ਤਪੁਸ੍ਸ-ਭਲ੍ਲਿਕਾ,

ਮਨ੍ਥਞ੍ਚ ਸਾਦੁਂ ਮਧੁਪਿਣ੍ਡਿਕਞ੍ਚ

ਆਦਾਯ ਨਾਥਂ ਇਦਮਬ੍ਰੁਵੁਨ੍ਤੇ;

੪੭੩.

ਇਦਞ੍ਹਿ ਨੋ ਧੀਰ ਅਨੁਗ੍ਗਹਾਯ

ਪਟਿਗ੍ਗਹੇਤ੍ਵ ਪਰਿਭੁਞ੍ਜ ਦਾਨਂ,

ਹਿਤਾਯ ਤਂ ਹੋਤਿ ਸੁਖਾਯ ਚੇਵ

ਅਨਪ੍ਪਕਪ੍ਪੇਸੁ ਅਨਾਗਤੇਸੁ;

੪੭੪.

ਪਟਿਗ੍ਗਹੇਤ੍ਵਾ ਮੁਨਿ ਦੇਵਦਿਨ੍ਨ

ਪਤ੍ਤੇਨ ਪਚ੍ਚਗ੍ਘਸਿਲਾਮਯੇਨ,

ਭੁਤ੍ਵਾਨ ਤੇਸਂ ਅਨੁਮੋਦਨਤ੍ਥਂ

ਦੇਸੇਸਿ ਧਮ੍ਮਂ ਵਰਦਂ ਪਸਤ੍ਥਂ;

੪੭੫.

ਦ੍ਵੇ ਭਾਤਿਕਾ ਵਾਣੀਜਕਾ ਜਿਨਸ੍ਸ

ਧਮ੍ਮਂ ਸੁਣਿਤ੍ਵਾਨ ਪਸਨ੍ਨਚਿਤ੍ਤਾ,

ਦ੍ਵੇ ਵਾਚਿਕੋਪਾਸਕਤਂ ਗਤਾਸੁਂ

ਯਾਚਿਂਸੁ ਤੇ ਤਂ ਪੁਨ ਪੂਜਨੀਯਂ;

੪੭੬.

ਪਰਾਮਸਿਤ੍ਵਾਨ ਸਿਰਂ ਤਤੋ ਸੋ

ਅਦਾ ਜਿਨੋ ਕੁਨ੍ਤਲ ਧਾਤੁਮੁਟ੍ਠਿਂ,

ਤੇ ਤੇਨ ਤੁਟ੍ਠਾ ਸੁਮਨਾ ਪਤੀਤਾ

ਮਹਿਂਸੁ ਨੇਤ੍ਵਾ ਵਿਭਵਾਨੁਰੂਪਂ;

੪੭੭. ¶

ਸਤ੍ਥਾ’ਥ ਗਨ੍ਤ੍ਵਾ ਅਜਪਾਲਮੂਲੇ

ਸਹਸ੍ਸ ਰਂਸੀਵ ਯੁਗਨ੍ਧਰਮ੍ਹਿ,

ਨਿਸਜ੍ਜ ਲੋਕਂ ਅਨੁਲੋਕਯਨ੍ਤੋ

ਵਿਤਕ੍ਕਿ ਏਵਂ ਮਨਸਾ ਵਿਤਕ੍ਕਂ;

੪੭੮.

ਮਯਜ੍ਝਪਨ੍ਨੋ ਵਰਧਮ੍ਮਸਾਰੋ

ਸਸਸ੍ਸ ਸਿਨ੍ਧੂ’ਵ ਅਗਾਧਪਾਰੋ,

ਅਬੁਦ੍ਧਸਤ੍ਤੇਹਿ ਤਮਜ੍ਜ ਕਸ੍ਸ

ਪਕਾਸਯਿਸ੍ਸਞ੍ਹਿ ਜਲ਼ੋ ਹਿ ਲੋਕੋ;

੪੭੯.

ਦੇਸੇਮਿ ਚੇ ਧਮ੍ਮਵਰਂ ਪਣੀਤਂ

ਕਿਲਨ੍ਤਭਾਵੋਵ ਮਮਸ੍ਸ ਅਸ੍ਮਾ,

ਕਿਮਤ੍ਤਦੁਕ੍ਖੇ ਨਿਤਿ ਚਿਨ੍ਤਯਨ੍ਤੋ

ਨੁਯ੍ਯਾਮਮਾਕਾ ਮੁਨਿ ਦੇਸਨਮ੍ਹਿ;

੪੮੦.

ਸਹਮ੍ਪਤੀ ਨਾਮ ਤਤੋ ਵਿਧਾਤਾ

ਸਚੇਤਸਾ ਤਸ੍ਸ ਮਨਂ ਵਿਦਿਤ੍ਵਾ,

ਵਿਨਸ੍ਸਤੀਦਂ ਖਲੁ ਸਬ੍ਬਲੋਕਂ

ਅਦੇਸਿਤੇ ਤੇਨਿ’ਤਿ ਕਮ੍ਪਮਾਨੋ;

੪੮੧.

ਸਕਾਸਮਾਗਮ੍ਮ ਜਿਨਸ੍ਸ ਤਸ੍ਸ

ਸਗਾਰਵੋ ਬ੍ਰਹ੍ਮਗਣੇਨ ਤਤ੍ਥ,

ਨਿਹਚ੍ਚ ਜਾਨੁਂ ਪਥਵੀਤਲਮ੍ਹਿ

ਨਮਸ੍ਸਮਾਨੋ ਇਦਮਬ੍ਰੂਵੀ ਸੋ;

੪੮੨.

ਤ੍ਵਂ ਦੇਵਦੇਵੋ ਸ ਸੁਮੇਧਕਾਲੇ

ਪਲੋਕਿਤਂ ਲੋਕਮੁਦਿਕ੍ਖਮਾਨੋ,

ਵਿਹਾਯ ਦੀਪਙ੍ਕਰਪਾਦਮੂਲੇ

ਲਦ੍ਧਾ’ਮਤਂ ਤਂ ਕਰੁਣਾਗੁਣੇਨ;

੪੮੩.

ਪਵਿਸ੍ਸ ਸਂਸਾਰਵਨਂ ਵਿਦੁਗ੍ਗਂ

ਮਂਸਕ੍ਖਿਸੀਸਾਦਿਮ’ਦਾਸਿ ਦਾਨਂ,

ਵੇਦੇਸਿ ਦੁਕ੍ਖਂ ਅਮਿਤਂ ਅਸਯ੍ਹਂ

ਤਂ ਤੇ ਪਰਤ੍ਥਂ’ਵ ਨ ਅਤ੍ਤਹੇਤੁਂ;

੪੮੪. ¶

ਸਨ੍ਤੀਧ ਸਤ੍ਤਾ ਖਲੁ ਮਨ੍ਦਰਾਗਾ

ਞਾਤੁਂ ਸਮਤ੍ਥਾ ਸੁਗਤਸ੍ਸ ਧਮ੍ਮਂ,

ਆਰਾਧਿਤੋ ਮੇ ਕਰੁਣਾਗੁਣਗ੍ਗੋ

ਦੇਸੇਹਿ ਧਮ੍ਮਂ ਅਨੁਕਮ੍ਪਮਾਨੋ;

੪੮੫.

ਕਾਲੇ ਵਿਕਾਸਨ੍ਤਿ ਖਰਂਸੁ ਮਿਸ੍ਸਾ

ਥਲਮ੍ਬੁਜਾਤਾ ਕੁਸੁਮਾਨਿ ਨਾਨਾ,

ਤਥੇ’ਵ ਤੇ ਧਮ੍ਮਕਰਾਭਿਫੁਟ੍ਠਾ

ਵਿਕਾਸਮਾਯਨ੍ਤੀ ਜਨਾ ਅਨੇਕਾ

੪੮੬.

ਸਮ੍ਪਨ੍ਨ ਵਿਜ੍ਜਾਚਰਣੋ ਸਤੀਮਾ

ਜੁਤਿਨ੍ਧਰੋ ਅਨ੍ਤਿਮਦੇਹਧਾਰੀ,

ਪਟਿਗ੍ਗਹੇਤ੍ਵਾਸ੍ਸ ਨਿਮਨ੍ਤਣਂ ਸੋ

ਜਨੇਸਿ ਸਤ੍ਤੇ ਕਰੁਣਾ ਮਨਸ੍ਮਿਂ;

੪੮੭.

ਅਪਾਰੁਤਾ ਤੇਸਂ ਅਮਤਸ੍ਸ ਦ੍ਵਾਰਾ

ਯੇ ਸੋਤਵਨ੍ਤੋ ਪਮੁਞ੍ਚਨ੍ਤੁ ਸਦ੍ਧਂ,

ਵਿਹਿਂਸਸਞ੍ਞੀ ਪਗੁਣਂ ਨ ਭਾਸਿਂ

ਧਮ੍ਮਂ ਪਣੀਤਂ ਮਨੁਜੇਸੁ ਬ੍ਰਹ੍ਮੇ;

੪੮੮.

ਪਟਿਗ੍ਗਹੇਸੀਤਿ ਉਦਗ੍ਗਚਿਤ੍ਤੋ

ਅਜ੍ਝੇਸਨਂ ਮੇ ਚਤੁਰਾਣਨੋ ਸੋ,

ਨਤ੍ਵਾਨ ਨਾਥਂ ਸਹਪਾਰਿਸਜ੍ਜੋ

ਪਕ੍ਕਾਮਿ ਤਮ੍ਹਾ ਭਵਨਂ ਖਣੇਨ;

੪੮੯.

ਤਤੋ ਜਿਨੋ ਤੇਨ ਗਹਿਤਨੁਞ੍ਞੋ

ਦੇਸੇਮਿ ਕਸ੍ਸੇਤਿ ਉਦਿਕ੍ਖਮਾਨੋ,

ਆਲ਼ਾਰ-ਉਦ੍ਦੇ ਸਮੁਦਿਕ੍ਖ ਧੀਰੋ,

ਮਨ੍ਤ੍ਵਾਨ ਤੇਸਂ ਅਚਿਰਚ੍ਚੁਤਿਤ੍ਤਂ;

੪੯੦.

ਕਹਨ੍ਨੁਖੋ’ਹਂ ਵਰਧਮ੍ਮਚਕ੍ਕਂ

ਅਞ੍ਞੇਨ ਕੇਨਾਪਿ ਅਵਤ੍ਤਨੀਯਂ,

ਲੋਕਸ੍ਸ ਚਿਨ੍ਤਾਮਣਿਸਨ੍ਤਿਭਗ੍ਗਂ

ਪਵਤ੍ਤਯਿਸ੍ਸਨ੍ਤੀ ਵਿਚਿਨ੍ਤਯਨ੍ਤੋ;

੪੯੧. ¶

ਦਿਸ੍ਵਾਨ ਭਿਕ੍ਖੂ ਮੁਨਿ ਪਞ੍ਚਵਗ੍ਗੇ

ਆਦਾਯ ਪਤ੍ਤਞ੍ਚ ਤਿਚੀਵਰਞ੍ਚ,

ਬਾਰਾਣਸੀਯਂ ਮਿਗਦਾਯਮੇਨ੍ਤੋ

ਅਦ੍ਧਾਨਮਗ੍ਗਂ ਪਟਿਪਜ੍ਜਿ ਸਤ੍ਥਾ;

੪੯੨.

ਤਤ੍ਥਾਮਰਬ੍ਰਹ੍ਮਗਣੇਹਿ ਪੂਤ

ਪਥੇ ਫਣੀ ਪਕ੍ਖਿ ਚਤੁਪ੍ਪਦਾ ਚ,

ਆਰਞ੍ਞਦੇਵਾ ਤਰੁਪਬ੍ਬਤਾ ਚ

ਮਹਿਂਸੁ ਨੇਕੇਹਿ ਸੁਵਿਮ੍ਹਯੇਹਿ;

੪੯੩.

ਤਤੋਪਗਾ ਸੋ ਮਿਗਦਾਯਮਗ੍ਗੇ

ਦਿਸ੍ਵਾ ਯਤੀਸਂ ਯਤਯੋ’ਪਗਨ੍ਤ੍ਵਾ,

ਅਕਂਸੁ ਵਤ੍ਤਂ ਪਟਿਪਤ੍ਤਿਸਾਰਾ

ਪਵਤ੍ਤਯੀ ਤਤ੍ਥ ਸ ਧਮ੍ਮਚਕ੍ਕਂ;

੪੯੪.

ਅਞ੍ਞਾਦਿਕੋਣ੍ਡਞ੍ਞਵਸਿਪ੍ਪਧਾਨਾ

ਕੋਟੀਨਮਟ੍ਠਾਰਸ ਕਞ੍ਜਯੋਨੀ,

ਅਸੀਤਿਕੋਟੀ’ਪਿ ਸੁਧਾਸਿ ਸਙ੍ਘਾ

ਅਞ੍ਞਾਸੁਮਗ੍ਗਂ ਕਮਤੋ ਤਦਾ ਤੇ;

੪੯੫.

ਅਤਿਚ੍ਚਯਾਤਮ੍ਹਿ ਨਿਦਾਘਕਾਲੇ

ਵਸ੍ਸਾਨਕਾਲੇ ਸਮੁਪਾਗਤਸ੍ਮਿਂ,

ਤਤ੍ਥੇਵ ਵਸ੍ਸਂ ਉਪਗਮ੍ਮ ਧੀਰੋ

ਤੇਮਾਸਮਤ੍ਤਂ ਅਵਸੀ ਵਸੀਸੋ;

੪੯੬.

ਤਤੋ ਯਸਂ ਤਸ੍ਸ ਸਹਾਯਕੇਪਿ

ਪਤਿਟ੍ਠਪੇਤ੍ਵਾ ਅਰਹਤ੍ਤਮਗ੍ਗੇ,

ਭੁਤਿਂ ਜਨਾਨਂ ਅਨੁਬ੍ਰੂਹਯਨ੍ਤੋ

ਵਸ੍ਸਸ੍ਸ ਅਨ੍ਤਂ ਅਕਰੀ ਤਹਿਂ ਸੋ;

੪੯੭.

ਵਸ੍ਸਚ੍ਚਯੇ ਲੋਕਵਿਦੂ ਮੁਨਿਨ੍ਦੋ

ਆਮਨ੍ਤਯੀ ਤੇ ਯਤਯੋ ਸਪੁਤ੍ਤੇ,

ਤੇ’ਥਾਗਮੁਂ ਨਿਬ੍ਬਣਥਾ ਕਤਞ੍ਜਲੀ

’ਦਮਬ੍ਰੁਵਿ ਤੇਸਮ’ਨਨ੍ਤ ਪਞ੍ਞੋ;

੪੯੮. ¶

ਉਗ੍ਘੋਸਯਨ੍ਤਾ ਮਮ ਧਮ੍ਮਘੋਸਂ

ਸਮਾਹਨਨ੍ਤਾ ਮਮ ਧਮ੍ਮਭੇਰਿਂ,

ਸਾਧੁਂ ਧਮੇਨ੍ਤਾ ਮਮ ਧਮ੍ਮਸਙ੍ਖਂ

ਚਰਾਥ ਤੁਮ੍ਹੇ ਸਨਰਾਮਰਾਨਂ;

੪੯੯.

ਜਯਦ੍ਧਜਂ ਮੇ ਭੁਵਨੁਕ੍ਖਿਪਨ੍ਤਾ

ਉਸ੍ਸਾਪਯਨ੍ਤਾ ਮਮ ਧਮ੍ਮਕੇਤੁਂ,

ਅਥੁਕ੍ਖਿਪਨ੍ਤਾ ਮਮ ਧਮ੍ਮਕੁਨ੍ਤਂ

ਚਰਾਥ ਲੋਕੇਸੁ ਸਦੇਵਕੇਸੁ;

੫੦੦.

ਸੁਸਜ੍ਜਿਤਤ੍ਤਂ ਅਮਤਸ੍ਸ ਮਗ੍ਗਂ

ਸਕਣ੍ਟਕਤ੍ਤਂ ਨਰਕਾਯਨਸ੍ਸ,

ਮਾਰਾਨਨਸ੍ਮਿਂ ਮਸਿਮਕ੍ਖਿਤਤ੍ਤਂ

ਕਥੇਥ ਲੋਕਸ੍ਸ ਸਦੇਵਕਸ੍ਸ;

੫੦੧.

ਬੁਦ੍ਧਨ੍ਤਰਂ ਸੁਪ੍ਪਿਹਿਤਂ ਅਚਾਰਂ

ਪੁਰਸ੍ਸ ਮੋਕ੍ਖਸ੍ਸ ਵਿਸਾਲਦ੍ਵਾਰਂ,

ਅਵਾਪੁਰੀ ਨੋ ਭਗਵਾ’ਧੁਨਾ ਭੋ

ਯਥਜ੍ਜ ਸਬ੍ਬੇਤੀ ਨਿਵੇਦਯਵ੍ਹੋ;

੫੦੨.

ਉਪ੍ਪਨ੍ਨਭਾਵਂ ਭੁਵਨੇ ਮਮਜ੍ਜ

ਤਥੇਵ ਧਮ੍ਮਸ੍ਸ ਚ ਪਾਤੁਭਾਵਂ,

ਉਪ੍ਪਨ੍ਨਭਾਵਞ੍ਚ ਮਮੋਰਸਾਨਂ

ਪਕਾਸਯਨ੍ਤਾ ਜਗਤਿਂ ਚਰਾਥ;

੫੦੩.

ਵਨਮ੍ਹਿ ਪਨ੍ਤੇ ਗਿਰਿਗਬ੍ਭਰਾਯਂ

ਰੁਕ੍ਖਸ੍ਸ ਮੂਲੇ’ਪਿ ਚ ਸੁਞ੍ਞਾ’ਗਾਰੇ,

ਵਸਂ ਯਤਤ੍ਤਾ ਮਮ ਧਮ੍ਮਮਗ੍ਗਂ

ਦੇਸੇਥ ਲੋਕੇ ਸਨਰਾਮਰਾਨਂ;

੫੦੪.

ਵਤ੍ਵਾਨ ਏਵਂ ਯਤਯੋ ਦਿਸਾਸੁ

ਪੇਸੇਤ੍ਵ ਨਾਥੋ ਉਰੁਵੇਲਗਾਮੀ,

ਪਟਿਪਜ੍ਜਿ ਮਗ੍ਗਂ ਅਥ ਅਨ੍ਤਰਾਲੇ

ਕਪ੍ਪਾਸਿਕਵ੍ਹਂ ਵਿਪਿਨਂ ਪਵਿਸ੍ਸ;

੫੦੫. ¶

ਤਸ੍ਮਿਂ ਰਮਨ੍ਤੇ ਸਮਤਿਂਸਮਤ੍ਤੇ

ਰਾਜੋਰਸੇ ਸੋ ਪਵਰੋ ਵਿਨੇਤ੍ਵਾ,

ਦਤ੍ਵਾ’ਮਤਂ ਧਮ੍ਮਮਥੁਦ੍ਦਿਸਿਤ੍ਵਾ

ਅਗੋਰੁਵੇਲਂ ਗਜਰਾਜਗਾਮੀ;

੫੦੬.

ਤਤ੍ਥੋਰੁਵੇਲਾਧਿਕਕਸ੍ਸਪੋਤਿ

ਪਸਿਦ੍ਧਨਾਮਸ੍ਸ ਸਸਿਸ੍ਸਕਸ੍ਸ,

ਅਗ੍ਗਂ ਫਲਂ ਸੋ ਪਰਿਪਾਵਯਨ੍ਤੋ

ਵਸੀ ਵਸਨ੍ਤੇ ਵਸੀਨਂ ਵਰਿਟ੍ਠੋ;

੫੦੭.

ਤਦਾਹਰੁਂ ਨੇਗਮ ਨਾਗਰਾ ਚ

ਯਞ੍ਞਂ ਮਹਾਕਸ੍ਸਪ ਤਾਪਸਸ੍ਸ,

ਜਿਨੋ ਵਿਦਿਤ੍ਵਾਸ੍ਸ ਮਨਂ ਮਨੇਨ

ਵਸੀ ਵਿਸੁਂ ਤਸ੍ਸ ਪਸਾਦ ਹੇਤੁ;

ਕਥਂ?

੫੦੮.

ਗਨ੍ਤ੍ਵਾਨ ਉਤ੍ਤਰਕੁਰੁਂ ਭਗਵਾ ਤਦਾਨਿ

ਪਿਣ੍ਡਞ੍ਚਰਿਤ੍ਵ ਰਮਣੀਯ ਹਿਮਾਲਯਦ੍ਦਿਂ,

ਆਗਮ੍ਮ ਸਾਦੁਰਸ ਨੀਰ ਭਰਾਭਿਰਾਮੇ

’ਨੋਤਤ੍ਤਕੇ ਮੁਨਿਵਰੋ ਪਰਿਭੁਞ੍ਜਿਯਾਨ;

੫੦੯.

ਚਿਨ੍ਤੇਸਿ ਏਵਮਹਮਪ੍ਪਤਰਂਵ ਕਾਲਂ

ਠਸ੍ਸਾਮਿ ਸਾਸਨ ਮਮਞ੍ਹਿ ਅਨਾਗਤੇਸੁ,

ਲਙ੍ਕਾਤਲੇ ਭਵਤਿ ਤਤ੍ਥ ਇਦਾਨਿ ਯਕ੍ਖ

ਸਮ੍ਬਾਧਮਤ੍ਥਿ ਮਮ ਤਤ੍ਥ ਗਤੇਸੁ’ਦਾਨਿ;

੫੧੦.

ਸਬ੍ਬਾ’ਮਨੁਸ੍ਸਜ ਭਯਂ ਪਵਿਨਸ੍ਸਤੀ’ਤਿ

ਮਨ੍ਤ੍ਵਾ ਤਤੋ ਯਤਿਵਰੋ ਕਰੁਣਾਯ ਸਤ੍ਤੇ,

ਸਞ੍ਝਾਘਨੇਹਿ ਪਰਿਨਦ੍ਧ ਰਵੀਵ ਰਤ੍ਤ

ਨਿਗ੍ਰੋਧਪਕ੍ਕ ਸਦਿਸਂ ਚਰਪਂਸੁਕੂਲਂ;

੫੧੧.

ਧਾਰੇਤ੍ਵ ਸੇਲਮਯ ਸੁਨ੍ਦਰ ਪਤ੍ਤਹਤ੍ਥੋ

ਛਬ੍ਬਣ੍ਣਰਂਸਿ ਨਿਵਹਂ ਦਿਸਿ ਪੂਰਯਨ੍ਤੋ,

ਸਮ੍ਬੋਧਿਤੋ ਨਵਮ ਫੁਸ੍ਸਜ ਪੁਣ੍ਣਮਾਯਂ

ਲਙ੍ਕਾਤਲਂ ਵਿਜਯਿਤੁਂ ਨਭਸਾ’ਗਮਾਸਿ;

੫੧੨. ¶

ਬ੍ਰਹ੍ਮਾਸੁਰਾਮਰ ਫਣਿ ਗਰੁਲ਼ਾ ਚ ਸਿਦ੍ਧ

ਵਿਜ੍ਜਾਧਰਾਦਿ ਜਨਤਾ ਸਹਪਾਰਿਸਜ੍ਜਾ,

ਕੇਤਾ’ਤਪਤ੍ਤ ਘਟ ਦੀਪੁਰੁ ਤੋਰਣੇਹਿ

ਪੂਜਂ ਅਕਂਸੁ ਮਹਤਿਂ ਗਗਨਾਯਨਮ੍ਹਿ;

੫੧੩.

ਲਙ੍ਕਙ੍ਗਨਾ ਉਰਸਿ ਭਾਸੁਰ ਤਾਰ ਹਾਰ

ਸਙ੍ਕਾਸ ਸੀਤਲ ਮਨੋਹਰ ਨੀਰ ਪੂਰਾ,

ਤਸ੍ਮਿਂ ਮਹਾਦਿਪਦ ਵਾਲੁਕ ਨਾਮ ਗਙ੍ਗਾ

ਭੁਮਜ੍ਝਗਾਸਿ ਜਨ ਨੇਤ੍ਤ ਹਰਾਭਿਰਾਮਾ;

੫੧੪.

ਤਸ੍ਸਾਵਿਦੂਰ ਸੁਚਿ ਰਮ੍ਮਤਰੇ ਪਦੇਸੇ

ਆਯਾਮਤੋ ਮਿਤਤਿਯੋਜਨ ਵਿਤ੍ਥਤੇਨ,

ਚਤ੍ਤਾਰਿ ਗਾਵੁਤਮਿਤਂ ਨਯਨਾਭਿਰਾਮਂ

ਆਸਾਰ ਸੀਤਜਲ ਨਿਜ੍ਝਰ ਭੁਰਿਘੋਸਂ;

੫੧੫.

ਮਤ੍ਤਾਲਿਪਾਲਿ ਖਗ ਗੀਤਿਜ ਮਿਸ੍ਸਰਾਗਂ

ਸਮ੍ਮਤ੍ਤ ਚਿਤ੍ਤ ਮਿਗਸਙ੍ਘ ਨਿਸੇਵਿਤਂ ਤਂ,

ਨਚ੍ਚਨ੍ਤ ਨੇਕਸਿਖਿ ਸਙ੍ਗਤ ਪਾਦਪਿਣ੍ਡਂ

ਉਯ੍ਯਾਨਮਾਸਿ ਉਰੁਨਾਗਵਨਾਭਿਧਾਨਂ;

੫੧੬.

ਰਮ੍ਮੇ ਤਦਾ ਰਤਨਦੀਪਵਰਮ੍ਹਿ ਲਙ੍ਕਾ

ਲੋਕਾਭਿਧਾਨ ਹਰਿਕਣ੍ਡਕ ਯਕ੍ਖਦਾਸੇ,

ਓਦੁਮ੍ਬਰੇ ਸੁਮਨਕੂਟਕ ਤਣ੍ਡੁਲੇਯ੍ਯੇ

ਸੇਲੇਸੁ ਮਾਰਗਿਰਿ ਮਿਸ੍ਸਕਰਿਟ੍ਠਨਾਮੇ;

੫੧੭.

ਯੇ’ਞ੍ਞੇਪਿ ਸਨ੍ਤਿ ਗਿਰਯੋ ਵਨਰਾਮਣੇਯ੍ਯਾ

ਗਙ੍ਗਾ ਨਦੀ ਗਿਰਿਗੁਹਾ ਸਿਕਤਾਤਲਾ ਚ,

ਤਤ੍ਥਾਵਸਨ੍ਤਿ ਰਹਸਾ ਫਰੁਸਾਨਿਰੁਦ੍ਦਾ

ਪਾਣਾਤਿਪਾਤ ਨਿਰਤਾ ਸਠਕੂਟ ਯਕ੍ਖਾ;

੫੧੮.

ਸਙ੍ਗਮ੍ਮ ਤੇ ਮਹਤਿ ਨਾਗਵਨਮ੍ਹਿ ਤਮ੍ਹਿ

ਸਮ੍ਮਨ੍ਤਯਿਂਸੁ ਸਭਟਾ ਸਹ ਪਾਰਿਸਜ੍ਜਾ,

ਤ੍ਵਂ ਕੋ’ਸਿ ਰੇ! ਇਤਿ ਪਰੋ ਅਪਰਂ ਖਰੇਨ

ਤਿਕ੍ਖੇਨ ਵਾਦਕਣਯੇਨ ਅਰੁਨ੍ਤੁਦਨ੍ਤਾ;

੫੧੯. ¶

ਕੁਜ੍ਝਿਂਸੁ ਤੇ ਅਥਿਤਰੀਤਰ ਕਾਰਣੇਨ

ਵਾਕ੍ਯੇਨ ਯੁਦ੍ਧ ਪਰਿਰਦ੍ਧ ਪਗਬ੍ਭਿਤਤ੍ਤਾ,

ਸਙ੍ਖਾਭਿਤਾਪਗ ਪਤੀਵ’ਨਵਟ੍ਠਚਿਤ੍ਤਾ

ਸਾਰਮ੍ਭਗਬ੍ਬਿਤਮਨਾ ਪਰਿਰਾਵਯਨ੍ਤਿ;

੫੨੦.

ਤਸ੍ਮਿਂ ਖਣੇ’ਭਿਮਤਦੋ ਸੁਗਤੋ ਨਭਮ੍ਹਿ

ਆਗਮ੍ਮ ਤੇਸ’ਮਨੁਕਮ੍ਪਿਤ ਮਾਨਸੇਨ,

ਗੋਪਾਨਸੀ ਸਮ ਮਨੋਹਰ ਰਂਸਿਮਾਲਿ

ਤਤ੍ਥਚ੍ਛਿ ਖੇ ਗੁਣਮਣੀ ਮਣਿਕਣ੍ਣਿਕਾਵ;

੫੨੧.

ਤੇਸਂ ਜਿਨੋ ਕਲਹਵੂਪਸਮਾਯ ਹੇਤੁ

ਮਾਪੇਸਿ ਵੁਟ੍ਠਿ ਤਿਮਿਰਾ’ਨਿਲਸੀਤਭੀਤਿਂ,

ਤਤ੍ਥਾਸਿ ਗਜ੍ਜਿਤਘਨੋ ਸੁਰਚਾਪਖਿਤ੍ਤ

ਧਾਰਾਸਰੇਹਿ ਵਿਤੁਦਂ ਨਿਸਿਵਾਰ ਸਙ੍ਘਂ;

੫੨੨.

ਅਨ੍ਧਾਵ ਤੇ ਘਨਤਰੇ ਤਿਮਿਰੇ ਨਿਮੁਗ੍ਗਾ

ਮੁਲ਼੍ਹਾ ਦਿਸਞ੍ਚ ਵਿਦਿਸਂ ਨ ਵਿਦਿਂਸੁ ਭੀਤਾ,

ਚਣ੍ਡਾਨਿਲੁਦ੍ਧਟ ਮਹਾ ਗਿਰਿਕੂਟਰੁਕ੍ਖ

ਸਮ੍ਪਾਤ ਭੀਤ ਰੁਦਿਤਾ ਗਤਿਮੇਸਯਨ੍ਤਿ;

੫੨੩.

ਸੀਤੇਨ ਤੇ ਅਥ ਦਿਜੇ ਪਰਿਕੋਟਯਨ੍ਤਾ

ਅਞ੍ਞੋਞ੍ਞਗਤ੍ਤਮਵਲਮ੍ਬ ਪਰੋਦਯਿਂਸੁ,

ਰੂਪਾਨਿ ਨੇਕਭਯਦਾਨਿ ਚ ਘੋਸਣਾਨਿ

ਵਤ੍ਤਿਂਸੁ ਤੇਨ ਵਿਵਿਧਂ ਭਯਮਾਸਿ ਤੇਸਂ;

੫੨੪.

ਬੁਦ੍ਧਾਪਿ ਦੁਕ੍ਖਿਤਮਨਾ ਪਰਦੁਕ੍ਖਕੇਨ

ਕਸ੍ਮਾ ਕਰੋਨ੍ਤਿ ਅਨਯਂ’ਤਿ ਨ ਚਿਨ੍ਤਨੀਯਂ,

ਲੋਕੋ ਹਨਾਤਿ ਵਿਟਪਿ ਫਲਦਾਨ ਹੇਤੁ

ਸਤ੍ਥੇਨ ਸੋਮ ਰਿਪੁਗਾਹਕ ਵਾਸਰਮ੍ਹਿ;

੫੨੫.

ਸਤ੍ਥਾ ਤਤੋ ਤਮਨੁਦੋ ਸਭਯੇ ਸਸੋਕੇ

ਦਿਸ੍ਵਾਨ ਗੁਯ੍ਹਕ ਜਨੇ ਕਰੁਣਾਯਿਤਤ੍ਤੋ,

ਵੁਟ੍ਠਿਂ ਤਮਞ੍ਚ ਪਵਨਂ ਪਣੁਦਿਤ੍ਵ ਸਬ੍ਬਂ

ਦਸ੍ਸੇਸਿ ਅਤ੍ਤਮਖਿਲਂ ਦੁਮਣੀਵ ਖਮ੍ਹਿ;

੫੨੬. ¶

ਦਿਸ੍ਵਾਨ ਤੇ ਮੁਨਿਵਰ’ਞ੍ਜਲਿ ਪਙ੍ਕਜੇਹਿ

ਸਜ੍ਜੇਤ੍ਵ ਸੀਸ ਸਰਸੀ ਇਦਮ’ਬ੍ਰੁਵਿਂਸੁ,

ਯਾਚਾਮ ਨੋ’ਭਯਪਦਂ ਭਵਤੋ ਸਕਾਸਾ

ਦਾਸੇਸੁ ਧੀਰ ਕਰੁਣਂ ਕਰਣੀਯਮੇਵ;

੫੨੭.

ਏਵਂ ਤਦਾ’ਵਚ ਜਿਨੋ ਮਧੁਰਸ੍ਸਰੇਨ

ਆਮਨ੍ਤ ਤੇ ਨਿਸਿਚਰੇ’ਵਨਤੇ ਸਮੇਕ੍ਖ,

ਤੁਮ੍ਹੇ ਦਦਾਥ ਯਦਿ ਠਾਨਮਮੇਕਦੇਸਂ

ਸਬ੍ਬੇ ਅਪੇਨ੍ਤੀ ਘਨਵਾਤਜ ਸੀਤਦੁਕ੍ਖਾ;

੫੨੮.

ਯਜ੍ਜੇਵਮੀਤਿਮ’ਪਯਾਤਿ ਕਰੋਮ ਭੋ ਤਂ

ਗਣ੍ਹਾਹਿ ਧੀਰ ਯਦਿ ਇਚ੍ਛਸਿ ਸਬ੍ਬਦੀਪਂ,

ਵਤ੍ਵਾਨ ਤੇਹਿ ਪਰਿਦਿਨ੍ਨ ਛਮਾਯ ਮਗ੍ਗੋ

ਓਗਮ੍ਮ ਤਤ੍ਥ ਪੁਥੁ ਪਤ੍ਥਰਿ ਚਮ੍ਮ ਕਣ੍ਡਂ;

੫੨੯.

ਤਸ੍ਮਿਂ ਨਿਸਜ੍ਜ ਕਸਿਣਂ ਸਮਾਪਜ੍ਜ ਤੇਜੋ

ਜਾਲਾਕੁਲਂ ਜਲਿਤ ਮਗ੍ਗੀਮਮਾਪਯੀ ਸੋ,

ਸੋ ਧੂਮਕੇਤੁ ਗਗਨੁਗ੍ਗਤ ਤੁਙ੍ਗਸਿਙ੍ਗੋ

ਸਨ੍ਦਡ੍ਢਯਂ ਗਿਰਿਵਨਾਨੁ’ਰੁਘੋਸਯਨ੍ਤੋ;

੫੩੦.

ਰੁਕ੍ਖੇਹਿ ਰੁਕ੍ਖਵਨ ਪਬ੍ਬਤ ਲਙ੍ਘਨੇਨ

ਸਾਖਾਮਿਗੇ ਚ ਵਿਹਗੇ ਅਨੁਬਨ੍ਧਯਂ’ਵ,

ਵੇਸ੍ਸਾਨਰੋ ਵਨਮਰੂ ਮਿਗਸੂਕਰੇ’ਪਿ

ਸਨ੍ਧਾਵਿ ਗੁਯ੍ਹਕ ਜਨੇ ਇਤਿ ਚਿਨ੍ਤਯਨ੍ਤੋ;

੫੩੧.

ਦਿਸ੍ਵਾਨ ਤਤ੍ਥ ਪਚੁਰਾਤਨ ਵਿਪ੍ਫੁਲਿਙ੍ਗ

ਸਮ੍ਮਿਸ੍ਸ ਜਾਲ ਦਹਨਂ ਗੁਹਕਾ ਸਮੇਚ੍ਚ,

ਧਾਵੁਂ ਵਿਕਿਣ੍ਣਕਚ ਬਪ੍ਪਜਲ’ਦ੍ਦਨੇਤ੍ਤਾ

ਦਾਰਤ੍ਤਜੇਹਿ ਸਹਿਤਾ ਗਤਿਮੇਸਮਾਨਾ;

੫੩੨.

ਸਮ੍ਬੁਦ੍ਧਤੇਜ ਪਰਿਦਡ੍ਢ ਸਰੀਰਚਿਤ੍ਤਾ

ਆਹਚ੍ਚ ਸਾਗਰਤਟਂ ਪਰਿਧਾਵਮਾਨਾ,

ਤਸ੍ਮਿਮ੍ਪਿ ਤੇ ਪਵਿਸਿਤੁਂ ਸਰਣਂ ਨ ਲਦ੍ਧਾ

ਛਮ੍ਹਿ ਤਤੋ ਸਪਦਿ ਸਨ੍ਨਿਪਤਿਂਸੁ ਸਬ੍ਬੇ;

੫੩੩. ¶

ਦਿਸ੍ਵਾਨ ਤੇ ਮੁਨਿਵਰੋ ਸਹਯੇ ਸਸੋਕੇ

ਰਮ੍ਮਂ ਤਦਾ ਜਲਧਿਮਜ੍ਝਗਤਂ ਮਹਨ੍ਤਂ,

ਇਦ੍ਧੀਹਿ ਸੇਹਿ ਗਿਰਿਦੀਪਮਿ’ਧਾਨਯਿਤ੍ਵਾ

ਆਰੋਪਯਿਤ੍ਵ ਨਿਖਿਲੇ ਪੁਨ ਤਤ੍ਥ’ਕਾਸਿ;

੫੩੪.

ਕਤ੍ਵੇਵਮੇ’ਸਮਸਮੋ’ਪਸਮਨ੍ਤ’ਮੀਤਿਂ

ਤਤ੍ਥੇਵ ਭਾਸੁਰਤਰੋ ਭਗਵਾ ਨਿਸੀਦਿ,

ਬ੍ਰਹ੍ਮਾਮਰਾ’ਸੁਰਫਣੀ ਗਰੁਲ਼ਾਦਿ ਸਿਦ੍ਧਾ

ਸਙ੍ਗਮ੍ਮ’ਕਂਸੁ ਮਹਤਿਂ ਮਹਮ’ਗ੍ਗਰੂਪਂ;

੫੩੫.

ਦੇਸੇਸਿ ਸਂਸਦਿ ਜਿਨੋ ਸੁਤਿਸਾਧੁ ਧਮ੍ਮਂ

ਤਸ੍ਮਿਂ ਸਦਾਸਵਨੁਦਂ ਸਿਵਦਂ ਜਨਾਨਂ,

ਸੁਤ੍ਵਾਨ ਨੇਕਸਤਕੋਟਿ ਪਮਾਣ ਪਾਣਾ

ਲਦ੍ਧਾ ਤਦਾ ਸਮਭਵੁਂ ਚਰਧਮ੍ਮਚਕ੍ਖੁਂ;

੫੩੬.

ਤਸ੍ਮਿਂ ਦਿਨੇ ਸੁਮਨਕੂਟ ਵਰਾਧਿਵਾਸੋ

ਤੇਜਿਦ੍ਧਿਬੁਦ੍ਧਿਵਿਭਵੋ ਸੁਮਨਾਭਿਧਾਨੋ,

ਦੇਵੋ ਪਸਨ੍ਨਹਦਯੋ ਰਤਨਤ੍ਤਯਮ੍ਹਿ

ਸਮ੍ਪਾਪੁਣਿਤ੍ਥ ਪਠਮਂ ਫਲਮੁਤ੍ਤਮਂ ਸੋ;

੫੩੭.

ਉਟ੍ਠਾਯ ਤੁਟ੍ਠਵਦਨੋ ਕਤਪਞ੍ਜਲੀਕੋ

ਮੁਗ੍ਗੋ ਜਿਨਗ੍ਗ ਨਖਰਂਸਿ ਪਯੋਦਧਿਮ੍ਹਿ

ਵਨ੍ਦਿਤ੍ਵ ਏਵਮਵਚਾ’ਤੁਲ ਵੀਰ ਧੀਰ

ਲੋਕਗ੍ਗ ਪੁਗ੍ਗਲ ਵਰਂ ਦਦ ਸਾਮਿ ਧੀਸ;

੫੩੮.

ਦਾਸੋਸ੍ਮਿ ਤੇ ਚਰਣ ਪਙ੍ਕਜ ਪੂਜਕੋਹਂ

ਸਦ੍ਧਾਦਯਾਦਿ ਵਿਭਵੋ ਤਨਯੋ’ਹਮਸ੍ਮਿ,

ਤੁਮ੍ਹੇ ਵਿਨਾ ਖਣਲਵਂ ਵਸਿਤੁਂ ਨ ਇਚ੍ਛੇ

ਤਸ੍ਮਾ ਦਦਾਤੁ ਭਗਵਾ ਮਮ ਪੂਜਨੀਯਂ;

੫੩੯.

ਸੁਤ੍ਵਾਨ ਤਂ ਧਿਤਿਮਤੀ ਪਰਿਮਜ੍ਜ ਸੀਸਂ

ਸਂਸਤ੍ਤ ਛਪ੍ਪਦ ਸਰੋਰੁਹ ਸਨ੍ਨਿਭੇਨ,

ਹਤ੍ਥੇਨ ਨੀਲ ਸਕ ਕੁਨ੍ਤਲ ਧਾਤੁਮੁਟ੍ਠਿਂ

ਦਜ੍ਜਾਥ ਸੋ ਮਣਿਮਯੇਨ ਕਰਣ੍ਡਕੇਨ;

੫੪੦. ¶

ਪਗ੍ਗਯ੍ਹ ਬਾਹੁਯੁਗਲੇਨ ਠੀਤੋ ਨਮਿਤ੍ਵਾ

ਮੁਦ੍ਧਾ ਦਧਾਸਿ ਮਕੁਟਂ ਵਿਯ ਪੀਣਿਤਤ੍ਤੋ,

ਕਤ੍ਵਾ’ਥ ਸੋ ਵਰ ਮਹਂ ਤਿਦਿਵੇਹਿ ਸਦ੍ਧਿ

’ਮਪ੍ਪੇਤ੍ਵ ਧੀਰ ਫਰਿਭੁਤ੍ਤ ਵਸੁਨ੍ਧਰਾਯਂ;

੫੪੧.

ਸੋ’ਕਾਸਿ ਨੀਲਰਤਨੇਹਿ ਮਹਾਰਹੇਹਿ

ਉਬ੍ਬੇਧਤੋ ਰਤਨ ਸਤ੍ਤ ਪਮਾਣ ਥੂਪਂ,

ਨਾਥੇ ਧਰਨ੍ਤਸਮਯੇਵ ਪਤਿਟ੍ਠਹੀ ਸੋ

ਥੂਪੋ ਤਿਲੋਕਸੁਖਦੋ ਮਣਿ ਕਾਮਦੋ’ਵ;

੫੪੨.

ਪਚ੍ਛਾ ਤਿਲੋਕਸਰਣੇ ਪਰਿਨਿਬ੍ਬੁਤਮ੍ਹਿ

ਖੀਣਾ ਸਵੋ ਸਮਹਿਮੋ ਸਰਭੁ ਯਤਿਨ੍ਦੋ,

ਆਦਾਯ ਤਂ ਚਿਤਕਤੋ ਜਿਨਗੀਵਧਾਤੁਂ

ਤਸ੍ਮਿਂ ਨਿਧਾਯ’ਕਰਿ ਬਾਰਸ ਹਤ੍ਥਥੂਪਂ;

੫੪੩.

ਚੂਲ਼ਾਭਯਹ੍ਵਵਨਿਪੋ ਸਮਯੇ’ਪਰਸ੍ਮਿਂ

ਬਤ੍ਤਿਂਸ ਹਤ੍ਥਮ’ਕਰਿਯਤ੍ਥ ਵਰੋਰੁਥੂਪਂ,

ਦੁਟ੍ਠਾਦਿਗਾਮਣਿ ਨੁਪੋ ਦਮਿਲ਼ੇ ਹਨਨ੍ਤੋ

ਕਾਰੇਸਿ ਕਞ੍ਚੁਕਮਥੋ ਚਤੁਸਟ੍ਠਿਹਤ੍ਥਂ;

੫੪੪.

ਏਵਂ ਸ ਸੀਹਲਮਹਾਸਰਮਜਝਰੂਲ਼੍ਹਂ

ਸੇਤਮ੍ਬੁਜਂ’ਵ ਮਧੁਪਾਵਲਿ ਸੇਵਨੀਯਂ,

ਭੁਮਙ੍ਗਨਾ ਕਰਤਲੇ ਸਿਤਵਿਤ੍ਥਲੀਲੋ

ਥੂਪੋ ਦਦਾਤੁ ਮਸਮੋਪਸਮਂ ਜਨਾਨਂ;

੫੪੫.

ਲਙ੍ਕੋਪਸਗ੍ਗਮ’ਵਧੂਯ ਵਿਧਾਯ ਖੇਮਂ

ਲਙ੍ਕਂ ਨਿਜਾਯ ਵਰਕੁਨ੍ਤਲ ਧਾਤੁਯਾ ਤਂ,

ਕਤ੍ਵਾਨ ਭਾਸੁਰਤਰਂ ਮੁਨਿ ਮਙ੍ਗਲਾਯ

ਪਾਯਾਸਿ ਤਾਰਕ ਪਥੇ’ਨੁਰੁਵੇਲਮੇਵ;

੫੪੬.

ਤਸ੍ਮਿਂ ਵਿਧਾਯ ਬਹੁਵਿਮ੍ਹਿਤ ਪਾਟਿਹੇਰਂ

ਭੇਤ੍ਵਾ ਸਸਿਸ੍ਸਕਿ’ਸਿਨੋ ਪੁਨ ਦਿਟ੍ਠਿਜਾਲਂ,

ਦਤ੍ਵਾਨ ਨਿਬ੍ਬੁਤਿਪਦਂ ਸਹਸਿਸ੍ਸਕਸ੍ਸ

ਨਿਬ੍ਬਾਣ ਸੁਨ੍ਦਰ ਪੁਰਂ ਪਰਿਪੂਰਯਿਤ੍ਥ;

੫੪੭. ¶

ਤਮ੍ਹਾ ਵਿਕਾਸਿਤ ਕੁਸੇਸਯ ਕਾਨਨਾਭ

ਵੀਤਾਸਵੇਹਿ ਨਿਵੁਤੋ ਸੁਗਤੇਭਗਾਮੀ,

ਪਾਯਾਸਿ ਰਾਜਗਹ ਗਾਮੀ’ਮੁਦਾਰਮਗ੍ਗਂ

ਵੇਨੇਯ੍ਯ ਜਨ੍ਤੁ ਕਮਲਾਕਰ ਭਾਨੁਰੂਪੋ;

੫੪੮.

ਤਸ੍ਮਿਂ ਗਤੇ ਜਿਨਵਰੇ ਵਰ ਬਿਮ੍ਬਿਸਾਰੋ

ਪੂਜਂ ਅਕਾਸਿ ਮਹਤਿਂ ਸਹ ਦੇਵਤਾਹਿ,

ਤਸ੍ਮਿਞ੍ਹਿ ਸਂਸਦਿ ਲਭਿਂਸੁ ਅਨਪ੍ਪਪਾਣਾ

ਮਗ੍ਗੇ ਫਲੇ ਚ ਸਰਣੇ ਚ ਪਤਿਟ੍ਠਹਿਂਸੁ

੫੪੯.

ਰਾਜਾ ਤਤੋ ਵਿਪੁਲ ਵੇਲੁਵਨਾਭਿਰਾਮਂ

ਸਾਲਙ੍ਕਤਂ ਵਿਵਿਧ ਪਾਦਪ ਮਣ੍ਡਪੇਹਿ,

ਪਾਦਾਸਿ ਦਕ੍ਖਿਣਕਰੇ ਜਲਪਾਤਨੇਨ

ਕਤ੍ਵਾ ਧਰਾਧਰਧਰਂ ਹਿਮਵਞ੍ਚ ਕਮ੍ਪਂ;

੫੫੦.

ਤਸ੍ਮਿਂ ਸਮਨ੍ਤਨਯਨੋ ਨਯਨਾਭਿਰਾਮੋ

ਭੁਤਿਂ ਜਨਸ੍ਸ ਸਤਤਂ ਅਭਿਵਡ੍ਢਯਨ੍ਤੋ,

ਧਮ੍ਮਮ੍ਬੁ ਵੁਟ੍ਠਿ ਨਿਕਰਂ ਪਰਿਵਸ੍ਸਯਨ੍ਤੋ

ਵਸ੍ਸਂ ਵਸੀ ਅਦੁਤਿਯੋ ਦੁਤਿਯਮ੍ਹਿ ਵਸ੍ਸੇ;

੫੫੧.

ਦੇਵਿਨ੍ਦ ਮੋਲਿ ਸਮਲਙ੍ਕਤ ਪਾਦਪਿਟ੍ਠੋ

ਲੋਕਸ੍ਸ ਅਤ੍ਥਚਰਣੇ ਸਤਤਾਭਿਯੁਤ੍ਤੋ,

ਤਤ੍ਥੇਵ ਸੋ ਹਿ ਤਤਿਯੇ’ਪਿ ਚਤੁਤ੍ਥਵਸ੍ਸੇ

ਵਾਸਂ ਅਕਾਸਿ ਸੁਗਤੋ ਸਿਰਿਸਨ੍ਤਿਵਾਸੋ;

੫੫੨.

ਲੋਕਸ੍ਸ ਧਮ੍ਮ ਮ’ਮਲਂ ਸਤਤਂ ਵਹਨ੍ਤੋ

ਸਾਵਤ੍ਥਿਯਂ ਰੁਚਿਰ ਜੇਤਵਨੇ’ਭਿਰਾਮੇ,

ਵਾਸਂ ਅਕਾਸਿ ਸੁਖਦੋ ਮੁਨਿਪਞ੍ਚਮਸ੍ਮਿਂ

ਵੇਨੇਯ੍ਯ ਸਤ੍ਤਸਮਯਂ ਸਮੁਦਿਕ੍ਖਮਾਨੋ;

ਇਤਿ ਲਙ੍ਕਾਯ ਪਠਮਾ’ਗਮਨਂ.

੫੫੩.

ਅਥ ਭਗਵਤਿ ਤਸ੍ਮਿਂ ਜੇਤਨਾਮੇ ਵਨਸ੍ਮਿਂ

ਨਿਵਸਤਿ ਸਤਿਲਙ੍ਕਾ ਮਙ੍ਗਲਾ’ਵਾਸਰੂਪਾ,

ਉਪਵਨਮਿਵ ਨਾਕੇ ਨਨ੍ਦਨਂ ਦੇਵਤਾਨਂ

ਅਮਰ ਉਰਗਵਾਸਾ ਰਮ੍ਮਰੂਪਾ ਬਭੂਵ;

੫੫੪. ¶

ਤਹਿਮਤਿ ਰੁਚਿਰਸ੍ਮਿਂ ਵਡ੍ਢਮਾਨਾਦਿ ਸੇਲੇ

ਮਧੁਰ ਸਲਿਲਵਾਹੇ ਰਮ੍ਮਕਲ੍ਯਾਣਿਕਾਦੋ,

ਉਦਧਿ ਭੁਜਗਵਾਸੇ ਨਾਗਦੀਪਨ੍ਤਿਕੇ ਚ

ਮਹਤਿ ਮਹਿਮ ਯੁਤ੍ਤਾ ਨਾਗਸਙ੍ਘਾ ਵਸਨ੍ਤਿ;

੫੫੫.

ਪਚੁਰ ਮਹਿਮ ਯੁਤ੍ਤੋ ਵਡ੍ਢਮਾਨਾਚਲਸ੍ਮਿਂ

ਅਧਿਪਤਿ ਭੁਜਗਾਨਂ ਆਸਿ ਚੂਲੋਦਰਵ੍ਹੋ,

ਮਹੁਦਰ ਇਤਿ ਨਾਮੋ ਨਾਗਦੀਪੋਦਧਿਮ੍ਹਿ

ਨਿਵਸਤਿ ਅਥ ਤੇਸਂ ਪਬ੍ਬਤੇਯ੍ਯੋ’ਰਗਿਨ੍ਦੋ;

੫੫੬.

ਇਤਰ ਭੁਜਗ ਰਞ੍ਞੋ ਧੀਤਰਂ ਨਾਗਕਞ੍ਞਂ

ਪਿਯਤਰਮ’ਭਿਰੂਪਂ’ਕਾਸਿ ਦਾਰਂ ਤਦਾ ਹਿ,

ਅਥ ਚ ਦੁਹਿਤੁਯਾ ਸੋ ਦੀਯਮਾਨਂ ਦਦਨ੍ਤੋ

ਰੁਚਿਰ ਮਣੀਮਯਗ੍ਘਂ ਆਸਨਞ੍ਚਾਪਦਾਸਿ;

੫੫੭.

ਦੁਹਿਤਰਿ ਮਤਕਾਲੇ ਤੇ’ਥ ਪਲ੍ਲਙ੍ਕਹੇਤੁ

ਜਲਜ ਥਲਜ ਨਾਗਾ ਯੁਦ੍ਧਸਜ੍ਜਾ ਅਹੇਸੁਂ,

ਅਥ ਥਲਜ ਭੁਜਙ੍ਗਾ ਭਙ੍ਗਕਲ੍ਲੋਲਮਾਲਾ

ਸਦਿਸ ਲੂਲਿਤ ਚਿਤ੍ਤਾ ਗਬ੍ਬਿਤੇਵਂ ਰਵਨ੍ਤਿ;

੫੫੮.

ਕਿਮੁ’ਦਧਿਜ ਫਣੀਨਂ ਕਿਤ੍ਤਿ ਸਮ੍ਪਤ੍ਤਿਯਾ ਨੋ

ਅਪਿ ਯਸਪਰਿਵਾਰਾ ਕਿਂ ਬਲੇਨਿਦ੍ਧਿਯਾ ਕਿਂ,

ਅਹਮਹਮੀਤਿ ਗਬ੍ਬਾ ਕਿਂ ਕਿਮਿਸ੍ਸਾਯ ਤੇਸਂ

ਭਵਤਿ ਤਿਮਿਰ’ਰੀਨਂ ਭਾਨੁਮਗ੍ਗੁਨ੍ਨਤੀ ਕਾ;

੫੫੯.

ਅਥ ਜਲਜ’ਲਗਦ੍ਦਾ ਗਜ੍ਜਨਂ ਗਜ੍ਜਯਨ੍ਤਾ

ਭਯਜਨਕ ਪਗਬ੍ਭਾ ਫੋਟਯਨ੍ਤਾ ਭੂਜਾਨਂ,

ਅਹਮਹ ਪਭੂ ਰੇ!ਰੇ! ਪਬ੍ਬਤੇਯ੍ਯਾਨ’ਮੇਤਂ

ਪਟੁਤਰਡਸਿਤੋਟ੍ਠਾ ਕਕ੍ਖ’ਲ਼ੇਵਂ ਰਵਨ੍ਤਿ;

੫੬੦.

ਪਟੁਤਰ ਗਰੁਨਾਦਾ ਤਾਵ ਗਜ੍ਜਨ੍ਤਿ ਦਨ੍ਤੀ

ਨਯਨ ਪਥਮੁ’ਪੇਨ੍ਤੇ ਯਾਵ ਕਣ੍ਠਿਰਵਾਨਂ,

ਤਥਰਿਵ ਥਲਜਾਤਾ ਜੁਮ੍ਹਯਨ੍ਤਾ ਸਮਗ੍ਗਾ

ਨਯਨ ਪਥਗਤਾ ਨੋ ਸੁਞ੍ਞਦਪ੍ਪਾ ਭਵਨ੍ਤਿ;

੫੬੧. ¶

ਇਤਿ ਤਦੁਭਯਸੇਨਾ ਘਟ੍ਟਯਨ੍ਤਾ’ਞ੍ਞਮਞ੍ਞਂ

ਵਿਵਿਧ ਪਹਰਣ੍ਹੋ ਉਗ੍ਗਿਰਨ੍ਤੀ ਗਿਰਨ੍ਤਿ,

ਸਤਤ ਖੁਭਿਤ ਵੇਲਾ ਸਾਗਰੂਮੀਵ ਭਨ੍ਤਾ

ਲੁਲਿਤ ਲੁਲਿਤ ਚਿਤ੍ਤਾ ਯੁਦ੍ਧਨਿਨ੍ਨਾ ਠਿਤਾਸੁਂ;

੫੬੨.

ਅਥ ਤਦਹੁ ਮੁਨਿਨ੍ਦੋ ਯਾਮਿਨੀਯਾਮ’ਮਨ੍ਤੇ

ਪਤਿਨਿਯ ਮਤਿਜਾਲਂ ਲੋਕਮੋਲੋਕਯਨ੍ਤੋ,

ਸਮਰ ਵਸਗਤਾਨਂ ਭੋਗੀਨਂ ਭਾਵਿਭੁਤਿਂ

ਤਦੁਪਰਿ ਚ’ਭਿਵੁਦ੍ਧਿਂ ਪਸ੍ਸਿ ਲਙ੍ਕਾਤਲਸ੍ਸ;

੫੬੩.

ਅਥ ਮੁਨਿ ਮਧੁਮਾਸੇ’ਪੋਸਥੇ ਕਾਲਪਕ੍ਖੇ

ਕਤ ਨਿਖਿਲ ਵਿਧਾਨੋ ਗਯ੍ਹ ਸਙ੍ਘਾਟਿਕਾਦਿਂ,

ਅਨੁਗਤਿਕਮੁਦਿਕ੍ਖਂ ਪਞ੍ਚਨੇਤ੍ਤੋ ਸਮਨ੍ਤਾ

ਸੁਮਨ ਸੁਮਨ ਨਾਮਂ ਪਸ੍ਸਿ ਦੇਵਂ ਸਮਿਦ੍ਧਿਂ;

੫੬੪.

ਤਦਹੁ ਸੁਮਨਦੇਵੋ ਜੇਤਨਾਮੇ ਸੁਰਮ੍ਮੇ

ਅਧਿਵਸਤਿ ਵਿਹਾਰੇ ਦ੍ਵਾਰਕੋਟ੍ਠੋਪਕਟ੍ਠੇ,

ਠਿਤ ਵਿਟਪ ਸਮਿਦ੍ਧੇ ਖੀਰਿਕਾਪਾਦਪਸ੍ਮਿਂ

ਸੁਗਤ ਮਭਿਨਮਨ੍ਤੋ ਅਨ੍ਵਹਂ ਪੂਜਯਨ੍ਤੋ;

੫੬੫.

ਤਮਸਮ੍ਮੁਨਿ ਦਿਸ੍ਵਾ’ਮਨ੍ਤਯਿਤ੍ਵਾ’ਗਤੇ ਤਂ

ਇਦਮਵਚ ਮਯਾ ਭੋ ਸਦ੍ਧਿਮਾਗਚ੍ਛ ਲਙ੍ਕਂ,

ਸਹ ਤਵ ਭਵਨਮ੍ਹਾ ਪੁਬ੍ਬਵੁਤ੍ਥਪ੍ਪਦੇਸੇ

ਤਵ ਭਵਤਿ ਪਤਿਟ੍ਠਾ ਭੋਗਿਨਞ੍ਜਾ’ਭਿਵੁਦ੍ਧਿ;

੫੬੬.

ਅਥ ਮੁਨਿਵਚਨਂ ਸੋ ਮੁਦ੍ਧਨਾਮ’ਗ੍ਗਹੇਤ੍ਵਾ

ਸਮੁਦਿਤਹਦਯੋ ਤਂ ਰੁਕ੍ਖਮੁਦ੍ਧਚ੍ਚ ਮੂਲਾ,

ਸੁਗਤਮੁਪਰਿ ਕਤ੍ਵਾ ਧਾਰਯਨ੍ਤੋ ਸੁਫੁਲ੍ਲਂ

ਬਰਿਹਿ ਬਰਿਹਿ ਛਤ੍ਤਾਕਾਰਮਾਗਾ ਨਭਮ੍ਹੀ;

੫੬੭.

ਦਸਬਲ ਤਨੁਭਾ’ਭਿਸ੍ਸਙ੍ਗਮਾ ਸੋ ਦੁਮਨ੍ਦੋ

ਤਰਲ ਮਣੀਵ ਨਾਨਾ’ਭਾਹਿ ਸਮ੍ਭਾਵਨੀਯੋ,

ਵਿਲਸਿਤ ਇਵ ਸਬ੍ਬੇ ਰੁਕ੍ਖਸੇਲਾਦਯੋ’ਪਿ

ਅਪਗਤ ਸਕਵਣ੍ਣਾਵਣ੍ਣਵਨ੍ਤਾ ਵਿਰੇਜੁਂ;

੫੬੮. ¶

ਖਗ ਭੁਜਗ ਸੁਰਾਦਿ ਮਸ੍ਸਿਤਾ ਛਪ੍ਪਭਾਹਿ

ਨਿਜਪਤਿ ਨਿਜਜਾਯਾ ਸ੍ਵਞ੍ਞਮਞ੍ਞਾਸੁ ਮੁਯ੍ਹੁਂ,

ਅਸਿਤ ਗਗਨ ਮਜ੍ਝੇ ਸੋਭਮਾਨੋ ਮੁਨਿਨ੍ਦੋ

ਵਿਤਤ ਵਿਵਿਧ ਰਂਸੀ ਰਂਸਿਮਾਲੀਵ ਗਞ੍ਛਿ;

੫੬੯.

ਜਲਦ ਪਟਲ ਸਣ੍ਡੇ ਵਜ੍ਝਮੁਦ੍ਦਾਲ਼ਯਿਤ੍ਵਾ

ਬਹਿ ਵਿਲਸਿਤਕਾਯੋ ਸੋਮ੍ਮਦੋਸਾਕਰੋ,ਵ

ਕਤੁਪਰਿ ਤਰੁਛਾਯੋ ਜੋਤਮਾਨੋ ਸਮਾਨੋ

ਉਰਗ ਸਮਰਠਾਨਂ ਗਨ੍ਥ੍ਵਾ’ਕਾਸੇ ਨਿਸਜ੍ਜ;

੫੭੦.

ਘਨਤਰ ਤਿਮਿਰਂ ਸੋ ਇਦ੍ਧਿਯਾ ਸਙ੍ਘਰਿਤ੍ਵਾ

ਤਹਿਮਤਿਰਵ ਭੀਮਂ ਘੋਰਸਂਰਮ੍ਭਵਨ੍ਤਂ,

ਅਸਨਿ ਸਤ ਨਿਪਾਤਂ ਵਸ੍ਸਧਾਰਾ ਕਰਾਲਂ

ਉਰੁਤਰ ਤਤ ਮੇਘਂ ਮਾਪਯੀ ਸੀਤਵਾਤਂ;

੫੭੧.

ਇਤਿ ਤਿਭੁਵਨਨਾਥੋ ਦਪ੍ਪਿਤੇ ਨਾਗਸਙ੍ਘੇ

ਵਿਮਦ ਕਰਣ ਹੇਤੁ ਦਸ੍ਸਯੀ ਭੇਰਵਾਨੀ,

ਅਥ’ਪਗਤ ਪਗਬ੍ਭੇ ਤੇ ਵਿਦਿਤ੍ਵਾਨ ਸਤ੍ਥਾ

ਅਪਨੁਦਿ ਭਯਜਾਤਂ ਤਙ੍ਖਣਂਯੇਵ ਤਤ੍ਥ;

੫੭੨.

ਤਰੁਣ ਤਰਣਿਸੋਭਾ ਕੇਤੁਮਾਲਾਵਿਲਾਸਿਂ

ਸੁਭਰੁਚਿ ਮੁਖਵਨ੍ਦਂ ਲਕ੍ਖਣਾਕਿਣ੍ਣਗਤ੍ਤਂ,

ਤਿਭਵ ਵਿਭਵਦਾਯਿਂ ਤਂ ਵਿਦਿਤ੍ਵਾਨ ਨਾਗਾ

ਚੁਤਪਹਰਣ ਹਤ੍ਥਾ ਵਨ੍ਦਮਾਨਾ ਮਹਿਂਸੁ;

੫੭੩.

ਸਿਰਸੀ ਨਿਹਿਤਪਾਣੀ ਰਤ੍ਤਪਙ੍ਕੇਰੁਹੇਹਿ

ਵਿਕਚ ਵਦਨ ਨੇਤ੍ਤਾ’ਮਨ੍ਦ ਕਞ੍ਜੁਪ੍ਪਲੇਹਿ,

ਸਕ ਸਕ ਧਤ ਨਾਨਾਵਣ੍ਣ ਵਮ੍ਮਾਦਿਕੇਹਿ

ਵਿਵਿਧ ਕੁਸੁਮਵਤ੍ਥਾ’ਮਨ੍ਦ ਦੀਪਦ੍ਧਜੇਹਿ;

੫੭੪.

ਉਰਗ ਭਵਨਵਾਸਾ ਨਾਗਕਞ੍ਞਾ ਸਮੇਚ੍ਚ

ਕੁਚ ਕਲਸ ਸਹਸ੍ਸਂ ਧਾਰਯਨ੍ਤਿ ਸਲੀਲਂ,

ਲਲਿਤ ਕਣਕ ਵਲ੍ਲਿ ਲੀਲਮਾਧਤ੍ਤ ਗਤ੍ਤਾ

ਥੁਤਿ ਮੁਖਰ ਮੁਖਾ ਤਾ ਸਾਧੁ ਕੀਲ਼ਂ ਅਕਂਸੁ;

੫੭੫. ¶

ਅਥ ਮੁਨਿ ਉਰਗਾਨਂ ਵਿਗ੍ਗਹਂ ਤਂ ਸਮੇਤੁਂ

ਸੁਤਿਮਨ ਕਮਨੀਯਂ ਨਿਚ੍ਛਰਂ ਬ੍ਰਹ੍ਮਘੋਸਂ,

ਅਜਰਮਮਰ ਮਗ੍ਗਂ ਸੁਪ੍ਪਸਤ੍ਥਂ ਸੁਧਿਹਿ

ਵਰਮਤਿ ਵਰਧਮ੍ਮਂ ਦੇਸਯੀ ਨਂ ਫਣੀਨਂ;

੫੭੬.

ਨ ਭੋ ਭੋ ਸਂਸਾਰੇ ਖਲੁ ਭਵਤਿ ਸਾਰਂ ਲਵਮ੍ਪਿ

ਵਿਸੇਸਾ ਤਂ ਸੀਤਂ ਜਲਿਤ ਦਹਨੇ ਵਿਜ੍ਜਤਿ ਕਦਾ,

ਸਦਾ ਰਾਗਂ ਰੋਗਂ ਬ੍ਯਧਤਿ ਜਨਤਂ ਨੇਕਦੁਰਿਤਂ

ਤਥਾਪਾ’ਯੁਂ ਪਾਤੋ ਰਵਿਰਭਿਮੁਖੁਸ੍ਸਾਵ ਸਦਿਸਂ;

੫੭੭.

ਸਰੀਰੋ’ਯਂ ਬਤ੍ਤਿਂਸ ਵਿਧ ਕੁਣਪੋ ਸਾਰ ਰਹਿਤੋ

ਪਰਿਤ੍ਤਂ ਯੋਬ੍ਬਞ੍ਞਂ ਕੁਸੁਮ ਸਦਿਸਂ ਨਿਗ੍ਗਤਸਿਰਿ,

ਪਹਨ੍ਤ੍ਵਾ ਗਨ੍ਤਬ੍ਬਂ ਭਵਜ ਵਿਭਵਂ ਸਮ੍ਭਤਮਿਦਂ

ਅਥੇਵਂ ਸਨ੍ਤੇ ਭੋ ਵਰਯਤਿ ਭਵਂ ਕੋ ਨੁ ਹਿ ਬੁਧੋ;

੫੭੮.

ਪਲਾਸੀ ਮਕ੍ਖੀ ਕੋਧੂਪਹ ਮਤੋ ਮਾਨਵਿਭਵੋ

ਜਨੋ’ਤੀਤੋ’ਤੋ ਭੋ ਪਯਤਿ ਨਰਕਂ ਦਾਰੁਣਤਰਂ,

ਫਣੀ ਮਜ੍ਜਾਰੋ ਸਾ ਗੁਹਕ ਕਪਯੋ ਭੂਯ ਬਹੁਸੋ

ਵਧੇਨ੍ਤਞ੍ਞੋਞ੍ਞਂ ਤੇ ਨਨੁਭਵਮਿਦਂ ਦੁਕ੍ਖਮ’ਨਿਸਂ;

੫੭੯.

ਪੁਰੇ ਕਾਕੋ’ਲੁਕਾ ਅਥ ਵਨਭਵਾ ਫਨ੍ਦਨ ਇਸਾ

ਕਰਿਤ੍ਵਾ’ਟ੍ਠਾਨੇ’ਘਂ ਚਿਰਮਨੁਭਵੁਂ ਦੁਕ੍ਖਮਨਿਸਂ,

ਅਹੋ ਕਪ੍ਪਟ੍ਠਨ੍ਤਂ ਸਰਥ ਦੁਰਿਤਂ ਵੇਰਜਮਿਦਂ

ਨ ਹੇਤ੍ਥਸ੍ਸਾਦੋ ਭੋ’ਣੁਮਪਿ ਕਲਹੇ ਮੇਤ੍ਤਿਮ’ਮਤਂ;

੫੮੦.

ਬਲਂ ਬਾਲਾਨਂ ਭੋ ਸਕ ਸਕ ਵਧਾਯੇਵ ਭਵਤਿ

ਅਤੀਤੇਕਾ ਖੁਦ੍ਦਾ ਲਟੁਕਿਕਦਿਜਾ ਨਟ੍ਠਤਨਯਾ,

ਗਜਂ ਬਾਲਂ ਮਤ੍ਤਂ ਪਵਿਧਿ ਨ ਬਲਂ ਹੋਤਿ ਸਰਣਂ

ਅਥਟ੍ਠਾਨੇ ਕਿਂ ਭੋ ਕੁਰੁਥ ਵੀਰਿਯਂ ਭੁਤਿ ਹਨਨਂ;

੫੮੧.

ਨ ਦੁਕ੍ਖਂ ਤੇਸਂ ਯੇ ਵਿਗਤ ਕਲਹਾ ਏਕਮਨਸਾ

ਅਤੀਤੇ ਭੋ ਲਾਪਾ ਅਘਟਿਤ ਮਾਨਾ ਪੇਯ੍ਯਵਚਨਾ,

ਸੁਖਂ ਵਾਸਂ’ਕਾਸੁਂ ਯਦਹਨਿ ਭਵੁਂ ਤੇ’ਥ ਵਿਧੁਰਾ

ਵਸਂ ਵ੍ਯਾਧਸ੍ਸਾਗੁਂ ਤਦਹਨਿ ਅਹੋ!ਮੇਧਗ ਬਲਂ;

੫੮੨. ¶

ਇਤਿ ਤਿਖਿਣ ਸੁਧਿਮਾ ਕਤ੍ਤੁਮੇਤੇ ਸਮਗ੍ਗੇ

ਅਵਦਿ ਪਵਰ ਧਮ੍ਮਂ ਸਾਧੁ ਵਿਞ੍ਞੁਪ੍ਪਸਤ੍ਥਂ,

ਅਥ ਮੁਦਿਤਮਨਾ ਤੇ ਪੀਣਿਤਾ ਤਸ੍ਸ ਨਾਗਾ

ਮਣਿਮਯਮ’ਤੁਲਂ ਤਂ ਆਸਨਂ ਪੂਜਯਿਂਸੁ;

੫੮੩.

ਅਥ ਮੁਨਿ ਗਗਨਮ੍ਬੋਰੁਯ੍ਹ ਭੁਮਿਪ੍ਪਦੇਸਂ

ਤਰੁਣ ਰਵਿਵ ਤਸ੍ਮਿਂ ਆਸਨੇ ਆਸਿ ਭਾਸਂ,

ਅਥ ਭੁਜਗਗਣਾ ਤੇ ਦਿਬ੍ਬ ਖਜ੍ਜਾਦਿਕੇਹਿ

ਪਰਿਵਿਸਿਯ ਮੁਨਿਨ੍ਦਂ ਸਾਧੁ ਧਮ੍ਮਂ ਸੁਣਿਂਸੁ;

੫੮੪.

ਅਥ ਜਲ ਥਲਜਾਨਂ ਤਤ੍ਥ ਯੁਦ੍ਧਾ’ਗਤਾਨਂ

ਅਗਣਿਤ ਭੂਜਗਾਨਂ’ਸੀਤਿਕੋਟੀ ਭੁਜਙ੍ਗਾ,

ਵਿਮਲ ਸਰਣਸੀਲੇ ਸੁਪ੍ਪਤਿਟ੍ਠਾ ਸੁਤੁਟ੍ਠਾ

ਅਕਰੁ’ਮਤਿਮੁਲ਼ਾਰਂ ਸਤ੍ਥੁ ਪੂਜਾਵਿਧਾਨਂ;

੫੮੫.

ਅਥ ਮਹੁਦਰ ਰਞ੍ਗ੍ਞੋ ਮਾਤੁਲੋ ਨਾਗਰਾਜਾ

ਮਨਿਨਯਨਕਨਾਮੋ ਰਮ੍ਮਕਲ਼੍ਯਾਣਦੇਸਾ,

ਉਰਗ ਸਮਰ ਹੇਤੂ ਆਗਤੋ ਨਾਗਦੀਪਂ

ਸੁਗਤਵਰ ਸਰੀਰਂ ਦਿਸ੍ਵ ਨਤ੍ਵਾਲਪੇਵਂ;

੫੮੬.

ਯਦਿ ਸੁਗਤ! ਇਮਂ ਤ੍ਵਂ ਨਾਗਤੋ ਅਸ੍ਸ ਠਾਨਂ

ਮਯਮਪਗਤ ਪਾਣਾ ਹੋਮ ਝਤ੍ਵਾ’ਞ੍ਞਮਞ੍ਞਂ,

ਰੁਧਿਰਵਹ ਵਿਕਿਣ੍ਣੋ ਅਸ੍ਸ ਭੁਮਿਪ੍ਪਦੇਸੋ

ਪਸਮਿ ਦਹਨ ਦਿਤ੍ਤਂ ਅਮ੍ਬੁਦੇਨੇਵ ਤਂ ਤ੍ਵਂ;

੫੮੭.

ਮਮ ਭਗਵ! ਪੁਰਾਮੇ ਦਿਟ੍ਠਪੁਬ੍ਬਂ ਤਵੇਤਂ

ਰੁਚਿਰ ਸਿਰਿਸਰੀਰਂ ਰਂਸਿਜਾਲਾ’ਭਿਕਿਣ੍ਣਂ,

ਅਪਿ ਸੁਮਧੁਰ ਧਮ੍ਮਂ ਦੇਸਯਨ੍ਤੇ ਸੁਰਾਨਂ

ਦਸਬਲ ਸੁਤਪੁਬ੍ਬਂ ਆਨੁਭਾਵਞ੍ਚ ਤੁਯ੍ਹਂ;

੫੮੮.

ਅਹਮਸਮ ਪੁਰੇ ਤੇ ਵਿਸ੍ਸੁਤੋਯੇਵ ਦਾਸੋ

ਯਦਿ ਮਨਸਿ ਦਯਾ ਤੇ ਹੋਤਿ ਦਾਸੇ ਪੁਨਾ’ਪਿ,

ਪਵਰ ਰਤਨਦੀਪੇ ਹੋਤਿ ਕਲ਼੍ਯਾਣਿਗਙ੍ਗਾ

ਮਮ ਵਸਤਿ ਤਹਿਂ ਤਂ ਦਟ੍ਠੁਕਾਮੋ’ਭਿਯਾਚੇ;

੫੮੯. ¶

ਇਤਿ ਯਤਿਪਤਿ ਤਸ੍ਸਾ’ਰਾਧਨਂ ਪਗ੍ਗਹੇਤ੍ਵਾ

ਸਕ ਪਰਿਚਿਤ ਭੁਮ੍ਯਾ ਚੇਤਿਯਤ੍ਥਂ ਵਿਧਾਯ,

ਮਣਿਮਯ ਪਰਿਭੁਤ੍ਤਂ ਆਸਨਂ ਚਾ’ਪਿ ਤੇਸਂ

ਸ ਸੁਮਨ ਤਰੁ ਰਾਜਂ ਪੂਜਨਤ੍ਥਂ ਵਿਧਾਯ;

੫੯੦.

ਦਸਬਲ ਪਰਿਭੁਤ੍ਤਂ ਸਬ੍ਬਮੇਤਂ ਭੁਜਙ੍ਗਾ

ਮਣਿਰਿਵ ਰੁਚੀਦਂ ਤੇ ਧਾਤੁਯੋਯੇਵ ਤਸ੍ਮਾ,

ਮਹਥ ਨਮਥ ਨਿਚ੍ਚਂ ਮਂਵ ਸਗ੍ਗਾ’ਪਵਗ੍ਗਂ

ਦਦਤਿ ਇਤਿ ਚ ਵਤ੍ਵਾ ਓਵਦਿਤ੍ਵਾਨ ਸਤ੍ਥਾ;

੫੯੧.

ਨਭਤਲ’ਮੁ’ਪਗਨ੍ਤ੍ਵਾ ਦੇਵਨਾਗੇ ਮਹੇਨ੍ਤੇ

ਦਿਸਿ ਦਿਸਿ ਵਿਸਰਨ੍ਤੋ ਨੀਲਪੀਤਾਦਿ ਰਂਸਿ,

ਮਨ ਨਯਨ ਹਰਨ੍ਤੋ ਜਨ੍ਤੁਨਂ ਲੋਕਸਾਰੋ

ਅਗਮਿ ਰਵਿ’ਵ ਖਮ੍ਹਾ ਜੇਤਨਾਮਂ ਵਿਹਾਰਂ;

੫੯੨.

ਅਥ ਮਨੁਜਮਰਾਨਂ ਨਤ੍ਤਸਿਦ੍ਧਾਦਿਕਾਨਂ

ਸਤਤ’ਮਮਤ ਧਮ੍ਮਂ ਦੇਸਯਨ੍ਤੋ ਫਣੀਨਂ,

ਵਨਭਵਨ ਸੁਰਮ੍ਮੇ ਮਙ੍ਕੁਲਵ੍ਹੇ ਨਗਿਨ੍ਦੇ

ਅਕਰਿ ਮੁਨਿ ਨਿਵਾਸਂ ਛਟ੍ਠਮੇ ਹਾਯਨਮ੍ਹਿ;

੫੯੩.

ਸੁਰਪੁਰੁਪਵਨੇ’ਥੋ ਪਾਰਿਜਾਤਸ੍ਸ ਮੂਲੇ

ਅਰੁਣ ਮੁਦੁਸਿਲਾਯਂ ਭਾਸਮਾਨੋ ਮੁਨਿਨ੍ਦੋ

ਸੁਨਿਪੁਣ’ਮਭਿਧਮ੍ਮਂ ਦੇਸਯਨ੍ਤੋ ਸੁਰਾਨਂ

ਅਕਰਿ ਵਰਨਿਵਾਸਂ ਸਤ੍ਤਮੇ ਤਤ੍ਥ ਵਸ੍ਸੇ;

੫੯੪.

ਅਥ ਸੁਖਦ ਮੁਨਿਨ੍ਦੋ ਜੇਤਨਾਮੇ ਵਿਹਾਰੇ

ਅਵਸਿ ਵਿਮਲਪਞ੍ਞੋ ਅਟ੍ਠਮੇ ਸਾਰਦਸ੍ਮਿਂ,

ਅਜਰ’ਮਮਰ ਸਨ੍ਤਿਂ ਫਸਮਾਨੋ ਪਰੇਸਂ

ਵਿਵਿਧ ਨਯ ਵਿਚਿਤ੍ਤਂ ਦੇਸਨਂ ਦੇਸਯਨ੍ਤੋ;

ਇਤਿ ਲਙ੍ਕਾਯ ਦੁਤਿਯਾਗਮਨਂ.

੫੯੫.

ਏਵਂ ਜਿਨੋ ਜੇਤਵਨੇ ਵਸਨ੍ਤੋ

ਨੀਸ੍ਸਾਯ ਸਾਵਤ੍ਥਿਪੁਰਂ ਵਿਹਾਸਿ,

ਸਾ ਕਿਦਿਸੀ ਆਸਿ ਪੁਰੀ ਤਦਾਨੀ

ਤਂ ਕੀਦਿਸਂ ਜੇਤਵਨਂ ਵਿਹਾਰਂ;

੫੯੬. ¶

ਭੂਮਙ੍ਗਨਾਯਾਹਿਤ ਉਤ੍ਤਮਙ੍ਗੇ

ਭਾਸਨ੍ਤ ਨਾਨਾਰਤਨਾਭਿਰਾਮਾ,

ਵਿਸਾਲਮੋਲੀਵ ਵਿਸਾਲਭੋਗਾ

ਸਾ ਜਮ੍ਬੁਦੀਪਮ੍ਹੀ ਬਭੁਵ ਰਮ੍ਮਾ;

੫੯੭.

ਸਿਰੀਨਿਕੇਤੇ ਸਿਰਿਮਾਵਹਨ੍ਤੀ

ਵਿਰਾਜਤੇ ਯਾ ਵਸੁਧਾ ਤਲਸ੍ਮਿਂ,

ਸਾ ਦੇਵਰਾਜਸ੍ਸ’ਮਰਾਵਤੀ’ਵ

ਰਞ੍ਞੋ ਕੁਵੇਰਸ੍ਸ’ਲਕਾਵ ਰਮ੍ਮਾ;

੫੯੮.

ਸਾ ਪੁਞ੍ਞਪਞ੍ਞਾਲੁ ਜਨਾਧਿਵੁਤ੍ਥਾ

ਸੋਣ੍ਣਾਦਿ ਪੁਣ੍ਣਾਪਨਾਕਿਣ੍ਣਵੀਥੀ,

ਉਤ੍ਤੁਙ੍ਗ ਮਾਤਙ੍ਗ ਤੁਰਙ੍ਗ ਰਙ੍ਗਾ

ਸਾ ਰਾਜਤੇ ਕਞ੍ਚਨ ਮਨ੍ਦਿਰਾਲੀ;

੫੯੯.

ਰਰਾਜ ਸਾ ਭਾਸੁਰ ਰਾਜਪੁਤ੍ਤਾ

ਪੁਞ੍ਞਙ੍ਗਨਾਲਾਸ ਵਿਲਾਸਯਨ੍ਤੀ,

ਵੇਦਙ੍ਗਪਾਰਙ੍ਗਤ ਵਿਪ੍ਪਚਾਰਾ

ਦ੍ਵਿਪਞ੍ਚ ਸਦ੍ਦੇਹਿ ਚ ਨਿਚ੍ਚਘੋਸਾ;

੬੦੦.

ਅਨੇਕਸਿਪ੍ਪੀ ਸਤ ਸਮ੍ਪਕਿਣ੍ਣਾ

ਨਾਨਾਦਿਸਾਹਾ’ਗਤ ਸਤ੍ਥਵਾਹਾ,

ਪਹੁਤਖੀਣਾਸਵਪਾਦਪੂਤਾ

ਬਭਾਸ ਸਾ ਮਙ੍ਗਲ ਮਨ੍ਦਿਰਂ’ਵ;

੬੦੧.

ਭਵਨ੍ਤਰੇ ਯੋ ਚਰਿਯਂ ਚਰਨ੍ਤੋ

ਸੁਵੋ’ਪਨਿਸ੍ਸਾਯ ਵਸਂ ਗੁਣੇਨ,

ਯਞ੍ਞਙ੍ਗਸਾਖਿਂ ਮਤਸੀਨਪਤ੍ਤਂ

ਅਕਾ ਸਮਿਦ੍ਧਂ ਫਲਪਲ੍ਲਵੇਹਿ;

੬੦੨.

ਇਦਾਨਿ ਪਤ੍ਵਾਨ ਭਵਸ੍ਸ ਅਨ੍ਤਂ

ਨਿਸ੍ਸਾਯ ਯਂ ਸੋ ਵਸਤੇ ਮੁਨਿਨ੍ਦੋ,

ਤਸ੍ਸਾ ਗੁਣਂ ਕੋ ਹਿ ਅਸੇਸਯਿਤ੍ਵਾ

ਕਥੇਤਿ ਸਾ ਵਸ੍ਸੂ’ਪਮਾਯ ਤਸ੍ਸਾ;

੬੦੩. ¶

ਤਸ੍ਸੋਪਕਟ੍ਠੇ ਰਤਨਂਵ’ਨਗ੍ਘਂ

ਮਨੋਹਰੋ ਉਤ੍ਤਮਸਤ੍ਤਸੇਵਿ,

ਜਨਾਨਮਾਕਖਿਙਤਦੋ ਵਿਹਾਰੋ

ਬਭੁਵ ਜੇਤਾਦਿ ਵਨਵ੍ਹਯੇਨ;

੬੦੪.

ਸਮਫੁਲ੍ਲ ਪੁਪ੍ਫਰਸ ਮੋਦਿਤ ਛਪ੍ਪਦਾਲੀ

ਝਙ੍ਕਾਰ ਨਾਦ ਪਰਿਵਾਦਿਤ ਤਨ੍ਤਿਨਾਦਾ,

ਸਮ੍ਮਤ੍ਤ’ਨਨ੍ਤ ਦਿਜ ਕੁਜਿਤ ਗੀਤਵਨ੍ਤਾ

ਤਿਟ੍ਠਨ੍ਤਿ ਯਤ੍ਥ ਤਰਵੋ ਨਟਕਾਵ ਛੇਕਾ;

੬੦੫.

ਖੀਰਣ੍ਣਵਾਹਰਿਯ ਧੋਵਿਯ ਖੀਰਨੀਰਾ

ਸੋਸੇਤ੍ਵ ਸਜ੍ਝੁਮਲਯੇ ਸਸਿਕਨ੍ਤਿ ਮਸ੍ਸਂ

ਯਤ੍ਥੋਕਿਰਿਤ੍ਵ ਤਨਿਤਾ ਵਿਯ ਵਾਲੁਕਾਯੋ

ਸਾ ਮਾਲਕਾਵਲਿ ਬਭਾਸ ਪਯੋਦਧਿ’ਵ;

੬੦੬.

ਵਿਜ੍ਜੋਤਮਾਨ ਰਤਨਪ੍ਪਮੁਖਾਨਨਮ੍ਹਿ

ਸੋਪਾਨ ਮਾਲ ਪਦਗਣ੍ਠਿਦੁਜੇਹਿ ਹਾਸਂ,

ਕਤ੍ਵੇਵ ਦੇਵਭਵਨਾਨਮਹਂ ਵਿਰਾਗ

ਵਨ੍ਤੀ’ਤਿ ਗਨ੍ਧਕੁਟਿ ਯਤ੍ਥ ਪਹਾਸਯਿਤ੍ਥ;

੬੦੭.

ਕਮ੍ਮਾਰ ਗਗ੍ਗਰਿ ਮੁਖੋ’ਪਰਿ ਸਮ੍ਪਪੁਣ੍ਣਾ

ਅਙ੍ਗਾਰ ਕਨ੍ਤਰ ਵਿਨਿਗ੍ਗਤ ਜਾਲਕਾਵ,

ਸਮ੍ਬੁਦ੍ਧਦੇਹ ਪਰਿਨਿਗ੍ਗਤ ਰਂਸਿਮਾਲਾ

ਦਾਯਗ੍ਗ ਨਿਗ੍ਗਤ ਕਰਾ ਵਿਸਰਨ੍ਤਿ ਯਸ੍ਮਿਂ;

੬੦੮.

ਤੁਮ੍ਹੇ ਸਰਾਗ ਜਨਸਙ੍ਗਮਤੋ’ਤਿ ਗੀਤਾ

ਧਞ੍ਞਾ ਮਯਨ੍ਤੀ ਵਿਮਲੇਹੀ ਸਮਙ੍ਗਿਤਤ੍ਤਾ,

ਤੁਟ੍ਠਾਵ ਹਾਸ ਮਕਰਾ ਸੁਰਪਾਦਪਾਨਂ

ਰਾਜੇਨ੍ਤਿ ਯਤ੍ਥ ਯਤਿਨਿਸ੍ਸਿਤ ਪਾਦਪਿਨ੍ਦਾ;

੬੦੯.

ਪੁਨ੍ਨਾਗ ਨੀਪ ਵਕੁਲ’ਜ੍ਜੁਨ ਰਾਜਰੁਕ੍ਖ

ਨਾਗਾ’ਗ ਚੂਤ ਯੁਗਪਤ੍ਤਕ ਚਮ੍ਪਕਾਨਂ,

ਪੁਪ੍ਫਾਭਿਕਿਣ੍ਣ ਧਰਣੀ ਰਤਨੇਹਿ ਨਾਨਾ

ਪਚ੍ਛਨ੍ਨ ਦਿਬ੍ਬਭਵਨਂ ਵਿਯ ਭਾਤਿ ਯਤ੍ਥ;

੬੧੦. ¶

ਬ੍ਰਹ੍ਮਾਸੁਰਾਸੁਰ ਨਰੋਰਗ ਲਿਙ੍ਗਿਸਿਦ੍ਧ

ਵਿਜ੍ਜਾਧਰਾਦਿ ਜਨਤਾ ਕਤਵਨ੍ਦਨੇਹਿ,

ਤੇਹੇਵ ਘੁਟ੍ਠ ਥੁਤਿਮਙ੍ਗਲ ਗੀਤਿਕਾਹਿ

ਯਤ੍ਥੋਪਗਾਨ ਮਨਨੇਤ੍ਤਗਣਾ ਮੁਦੇਨ੍ਤਿ;

੬੧੧.

ਨਿਗ੍ਘੋਸਿਤਾਮਲ ਸੁਸੀਤਲ ਨਿਜ੍ਝਰੇਹਿ

ਸਮ੍ਮਤ੍ਤ ਨੇਕਦਿਜ ਘੁਟ੍ਠ ਜਲਾਸਯੇਹਿ,

ਕਿਞ੍ਜਕ੍ਖ ਪਤ੍ਤ ਪਰਿਕਿਣ੍ਣ ਸਿਲਾਤਲੇਹਿ

ਤੁਸ੍ਸਨ੍ਤਿ ਯਤ੍ਥ ਸਤਤਂ ਯਤੀਨਂ ਮਨਾਤਿ;

੬੧੨.

ਯੋ ਨੇਕ ਕਪ੍ਪ ਸਤ ਸਞ੍ਚਿਤ ਪੁਞ੍ਞਰਾਸਿ

ਹਿਤ੍ਵਾ’ਮਿਤਂ ਕਪਿਲਵਤ੍ਥੁ ਮਹਾਸਿਰਿਮ੍ਪਿ,

ਆਗਮ੍ਮ ਯਤ੍ਥ ਨੀਰਤੋ ਸੁਗਤੋ ਮਹੇਸਿ

ਕੋ ਤਤ੍ਥ ਭੁਤਿ ਮਤੁਲਂ ਕਥਿਕੋ ਕਥੇਤਿ;

੬੧੩.

ਤਸ੍ਮਿਂ ਜਿਨੋ ਵਸਤਿ ਜੇਤਵਨੇ ਵਿਹਾਰੇ

ਇਨ੍ਦੋ ਯਥਾ ਰੁਚਿਰ ਨਨ੍ਦਨ ਕਾਨਨਮ੍ਹਿ,

ਬ੍ਰਹ੍ਮਾ’ਵ ਬ੍ਰਹ੍ਮਭਵਨੇ ਸਪਿਤਾਮਹੇਹਿ

ਤਾਰਾਵਲੀ ਪਰਿਵੁਤੋ ਗਗਨੇ’ਵ ਵਨ੍ਦੋ;

੬੧੪.

ਤਦਾਗਮ੍ਮ ਮਹਾਨਾਗੋ ਮਣਿ ਅਕ੍ਖਿਕਨਾਮਕੋ,

ਲਙ੍ਕਾਤੋ ਜਿਨਪਾਦਸ੍ਮਿਂ ਫਣਿਂ ਪਚ੍ਚੇਦ’ਮਬ੍ਰੁਵਿ;

੬੧੫.

ਸਮ੍ਬੁਦ੍ਧਾ ਧੀਰ ਲੋਕਸ੍ਮਿਂ ਲੋਕਸ੍ਸਤ੍ਥਾਭਿਵੁਦ੍ਧਿਯਾ,

ਜਾਯਨ੍ਤਿ ਸਾਮਿ ਤੁਮ੍ਹਾਕਂ ਦਯਾਯਨ੍ਤੋ’ਗਧਾ ਮਯਂ;

੬੧੬.

ਤੇਨ ਮੇ ਦਾਸਭੁਤਸ੍ਸ ਸਂਸਾਰਨ੍ਦੁਘਰਾ ਥਿਰਾ,

ਮੁਤ੍ਤਿਂ ਯਦਿਚ੍ਛਸੇ ਮਯ੍ਹਂ ਗਹਣੀਯਂ ਨਿਮਨ੍ਤਣਂ;

੬੧੭.

ਸੁਤ੍ਵਾਨ ਤਂ ਮਹਾਨਾਗੋ ਮਹਾਨਾਗ ਨਿਮਨ੍ਤਣਂ,

ਪਟਿਗ੍ਗਹੇਸਿ ਤਂ ਤੁਣ੍ਹੀਭਾਵੇਨ ਕਰੁਣਾਯ ਸੋ;

੬੧੮.

ਞਤ੍ਵਾ ਤਂ ਸੁਮਨੋ ਨਾਗੋ ਲਹੁਮਾਗਮ੍ਮ ਸੀਹਲਂ,

ਕਲ਼੍ਯਾਣਾਪਗਪਸ੍ਸਮ੍ਹਿ ਮਨੋਨਨ੍ਦਨ ਭੁਤਲੇ;

੬੧੯.

ਸਜ੍ਝੁ ਕਮ੍ਬੁਮਣਿ ਮੁਤ੍ਤ ਪਵਾਲ ਵਜਿਰਾਮਯੇ,

ਵਹਾਰਹੇ ਮਹਾਥੂਨੇ ਘਟਕਾਦਿਂ ਨਿਧਾਪਿਯ;

੬੨੦. ¶

ਦਤ੍ਵਾ ਤੁਲਾਦਯੋ ਸੇਸ ਮਨ੍ਦਿਰਙ੍ਗੇ ਤਥੇਵ ਚ,

ਵਿਟਙ੍ਕ ਵ੍ਯਾਲ ਸੀਹਾਦਿ ਪਨ੍ਤਿਯੋ’ਪਿ ਤਥੇਵਹਿ;

੬੨੧.

ਸਾਤਕੁਮ੍ਹਮਯਾ’ਨੇਕ ਚਿਤ੍ਤੇਹਿ ਸਾਧੁ ਚਿਤ੍ਤਿਤਂ,

ਨਿਮ੍ਮਾਯ ਗੋਪਾਨਸਿਯੋ ਪਕ੍ਖਪਾਸੇ ਚ ਕਣ੍ਣਿਕਂ;

੬੨੨.

ਸਿਙ੍ਗਿ ਨਿਕ੍ਖੇਨ ਸਿਙ੍ਗਞ੍ਚ ਛਦਨਿਨ੍ਦਮਣੀਹਿ ਚ,

ਸੋਣ੍ਣ ਕਿਙ੍ਕਿਣਿ ਮਾਲਾਯੋ ਕਣ੍ਣਮਾਲਾ ਚ ਮਾਪਿਯ;

੬੨੩.

ਚਿਤ੍ਤਵਿਤਾਨਂ ਬਨ੍ਧਿਤ੍ਵਾ ਮੁਤ੍ਤੋਲਮ੍ਬੇ ਤਹਿਂ ਤਹਿਂ,

ਕਤ੍ਵਾਨ ਗਨ੍ਧਦਾਮੇਹਿ ਪੁਪ੍ਫਦਾਮੇਹਿ ਸਙ੍ਕੁਲਂ;

੬੨੪.

ਇਨ੍ਦਨੀਲਮਯਂ ਭੁਮਿ ਮਜ੍ਝੇ’ਨਗ੍ਘ ਮਹਾਸਨਂ,

ਮਾਪੇਸਿ ਪਰਿਤੋ ਸੇਸ ਭਿਕ੍ਖੂਨਞ੍ਚ ਸੁਭਾਸਨੇ;

੬੨੫.

ਰਤਨੇਹੇ’ਵਾਪਸ੍ਸਯੇ ਵੇਦਿਕਾ ਏਲ਼ਿਕਾਮਯੇ,

ਮੁਤ੍ਤਾ ਵਾਲੁਕ ਸਙ੍ਕਿਣ੍ਣਂ ਮਾਲਕਞ੍ਚ ਮਨੋਰਮਂ;

੬੨੬.

ਸਤ੍ਤ ਰਤਨ ਸਮ੍ਭੁਤ ਤੋਰਣੂ’ਪਰਿ ਤੋਰਣੇ,

ਸਨ੍ਤੀਰ ਕੁਸੁਮਾ’ਕਿਣ੍ਣ ਹਾਟਕਾਦਿ ਘਟਾਕੁਲਂ;

੬੨੭.

ਨੇਕ ਰਾਗਦ੍ਧਜਾਕਿਣ੍ਣ ਵਿਤਾਨ ਸਮਲਙ੍ਕਤਂ,

ਦੀਪ ਧੂਪਾਲਿ ਸਙ੍ਕਿਣ੍ਣ ਗਨ੍ਧਪੁਪ੍ਫ ਸਮਾਕੁਲਂ;

੬੨੮.

ਏਵਮਾਦਿਹਿ ਨੇਕੇਹਿ ਵਣ੍ਣੇਹਿ ਸਮਲਙ੍ਕਤਂ,

ਮਾਪੇਤ੍ਵਾ ਮਣ੍ਡਪਂ ਸੇਟ੍ਠਂ ਦੇਵਮਣ੍ਡਪ ਸਨ੍ਤਿਭਂ;

੬੨੯.

ਸੀਤ ਵਾਲੁਕ ਸਞ੍ਛਨ੍ਨਂ ਮੁਦੁ ਪਾਦਪਟਤ੍ਥਤਂ,

ਮਾਪੇਤ੍ਵੇਵਂ ਮਹਾਮਗ੍ਗਂ ਸੁਰਞ੍ਜਸ ਸਮਞ੍ਜਸਂ;

੬੩੦.

ਸਞ੍ਚਿਨਿਤ੍ਵਾਨ ਤੇ ਨਾਗਾ ਖਜ੍ਜ ਭੋਜ੍ਜ ਫਲਾਫਲੇ,

ਦਿਬ੍ਬਨ੍ਨਪਾਨੇ ਪਚੁਰੇ ਪਟਿਮਗ੍ਗਂ ਗਮੁਂ ਤਦਾ;

੬੩੧.

ਤਤੋ ਕਾਰੁਣਿਕੋ ਨਾਥੋ ਬੋਧਿਤੋ ਅਟ੍ਠਮੇ ਸਮੇ,

ਵੇਸਾਖ ਪੁਣ੍ਣਮਾਸਿਮ੍ਹਿ ਸਨ੍ਨਿਪਾਤਿਯ ਸਾਵਕੇ;

੬੩੨.

ਏਥਜ੍ਜ ਭਿਕ੍ਖਵੋ ਲਙ੍ਕਂ ਨਾਗਾਨਂ’ਨੁਗ੍ਗਹਾਯ ਭੋ,

ਮਣਿਅਕ੍ਖਿਕੋ ਨਿਮਨ੍ਤੇਸਿ ਪਸਨ੍ਨੋ ਬੁਦ੍ਧਸਾਸਨੇ;

੬੩੩.

ਸੁਤ੍ਵਾਨ ਵਚਨਂ ਤਸ੍ਸ ਸਮ੍ਬੁਦ੍ਧਸ੍ਸ ਸਿਰੀਮਤੋ,

ਅਸ੍ਸਵਾ ਪੇਸਲਾ ਭਿਕ੍ਖੂ ਪਚ੍ਚਸ੍ਸੋਸੁਂ ਸਮਾਹਿਤਾ;

੬੩੪. ¶

ਸਾਰਿਪੁਤ੍ਤੋ ਤਤੋ ਥੇਰੋ ਪਞ੍ਞਾਯ’ਗ੍ਗ ਧੁਰਨ੍ਧਰੋ,

ਪਤ੍ਤਚੀਵਰਮਾ’ਦਾਯ ਅਗਮਾ ਜਿਨੁ’ਪਨ੍ਤਿਕਂ;

੬੩੫.

ਮੋਗ੍ਗਲ੍ਲਾਨੋ ਮਹਾਥੇਰੋ ਦੁਤਿਯੋ ਅਗ੍ਗਸਾਵਕੋ,

ਪਤ੍ਤਚੀਵਰਮਾਦਾਯ ਸੋਪਾਗ ਜਿਨ ਸਨ੍ਤਿਕਂ;

੬੩੬.

ਧੂਤਪਾਪੋ ਧੁਤਙ੍ਗਗ੍ਗੋ ਮਹਾਕਸ੍ਸਪ ਨਾਮਕੋ,

ਪਤ੍ਤਚੀਵਰਮਾਦਾਯ ਆਗਮਾ ਜਿਨਸਨ੍ਤਿਕਂ;

੬੩੭.

ਸਾਸਨੇ ਵਿਨਯਞ੍ਞ ਨਮਗ੍ਗੋ’ ਪਾਲਿਵ੍ਹਯੋ ਯਤ,

ਪਤ੍ਤਚੀਵਰਮਾਦਾਯ ਜਿਨਨ੍ਤਿਕਮੁ’ਪਾਗਮਿ;

੬੩੮.

ਦਿਬ੍ਬਚਕ੍ਖੂਨਮਗ੍ਗੋ ਯੋ ਰੁਦ੍ਧਪਾਪਾਰਿ ਦਪ੍ਪਕੋ,

ਥੇਰੋ’ਨੁਰੁਦ੍ਧੋ ਵਰਦੋ ਸੋਪਾਗ ਮੁਨਿਸਨ੍ਤਿਕਂ;

੬੩੯.

ਮਣਿਵ ਕਾਮਦੋ ਕਾਮਮੁ’ਪਵਾਨੋ’ਤਿ ਵਿਸ੍ਸੁਤੋ,

ਞਾਣੀ ਗਣੀ ਦਕ੍ਖਿਣੇਯ੍ਯੋ ਥੇਰੋਪਾਗ ਜਿਨਨ੍ਤਿਕਂ;

੬੪੦.

ਬਕ੍ਕੁਲੋ ਵਿਮਲੋ ਸੀਲ ਸਮਾਧਾਦਿ ਗੁਣਾਕਰੋ,

ਆਗਤੋ ਸਪਰਿਕ੍ਖਾਰੋ ਭਿਕ੍ਖੂਨਂ ਸਮਿਤਿਂ ਤਦਾ;

੬੪੧.

ਬੁਦ੍ਧਸਾਸਨ ਧੋਰਯ੍ਹੋ ਥੇਰੋ ਅਙ੍ਗੁਲਿਮਾਲਕੋ,

ਸਹਾ’ਗਨ੍ਤੁਂ ਮੁਨਿਨ੍ਦੇਨ ਸਨ੍ਨਦ੍ਧੋ ਸਹਸਾ ਗਤੋ;

੬੪੨.

ਸਾਸਨੋਦਯ ਸੇਲਗ੍ਗੇ ਸੂਰਿਯੋ ਵਿਯ ਭਾਤਿ ਯੋ,

ਸੋ’ਯਂ ਰਾਹੁਲਥੇਰੋ’ਪਿ ਲਹੁ’ਗਾ ਪਿਤੁ ਸਨ੍ਤਿਕਂ;

੬੪੩.

ਭਦ੍ਦਾਚਾਰੋ ਭਦ੍ਦਿਯਵ੍ਹੋ ਥੇਰੋ ਭਦ੍ਦਘਟੋ ਵਿਯ,

ਪਾਕਟੋ ਭੁਵਨੇ ਸੋ’ਪਿ ਗਤੋ ਸਮ੍ਬੁਦ੍ਧ ਸਨ੍ਤਿਕਂ;

੬੪੪.

ਦੇਵਦ੍ਦੁਮੋ’ਵ ਲੋਕਸ੍ਸ ਯੋ ਦਦਾਤਿ’ਚ੍ਛਿਤਿ’ਚ੍ਛਿਤਂ,

ਜਿਨੋਰਸੋਪਿ ਸੇਲਵ੍ਹੋ ਗਤੋ ਸਮ੍ਬੁਦ੍ਧਸਨ੍ਤਿਕਂ;

੬੪੫.

ਯਾਮਿਨੀ ਸਾਮਿਕੋ’ਵਾਤਿ ਭਾਤਿ ਯੋ ਸਾਸਨਮ੍ਬਰੇ,

ਮਹਾਨਾਮ ਮਹਾਥੇਰੋ ਸੋਪਾਗ ਮੁਨਿਸਨ੍ਤਿਕਂ;

੬੪੬.

ਮਨੋਸਿਲਾਤਲਗ੍ਗਮ੍ਹਿ ਜੁਮ੍ਹਮਾਨੋ’ਵ ਕੇਸਰੀ,

ਸੁਭੁਤਿਵ੍ਹ ਮਹਾਥੇਰੋ ਬੁਦ੍ਧੁਪਨ੍ਤਿਕ ਮਾਗਤੋ;

੬੪੭.

ਬੁਦ੍ਧਸਾਸਨ ਛਦ੍ਦਨ੍ਤ ਸਰਸੀ ਸਾਰਸੋ ਵਿਯ,

ਵਿਸ੍ਸੁਤੋ ਤਿਸ੍ਸਥੇਰੋ’ਪਿ ਗਤੋ ਭਿਕ੍ਖੁਸਮਾਗਮਂ;

੬੪੮. ¶

ਜਿਨਸਾਸਨ ਸਮ੍ਫੁਲ੍ਲਸਰਸੀਰੁਹ ਮਜ੍ਝਗੋ,

ਮਧੁਬ੍ਬਤ ਨਿਭੋ ਰਾਧਥੇਰੋ’ਪਿ ਸਹਸਾ ਗਤੋ;

੬੪੯.

ਭਗੁ ਦਬ੍ਬੋਪ’ਸੇਨੋ ਚ ਕੋਣ੍ਡਞ੍ਞ’ਸ੍ਸਜਿ ਸੀਵਲਿ,

ਏਤੇ ਜਿਨਤ੍ਰਜਾ ਥੇਰਾ ਗਤਾਸੁਂ ਮੁਨਿਸਨ੍ਤਿਕਂ;

੬੫੦.

ਕੁਮਾਰਕਸ੍ਸਪੋ ਪੁਣ੍ਣੋਸੋਣੋਸੋਭਿਤ ਰੇਵਤਾ,

ਥੇਰਾਪੇਤੇ ਅਭਿਞ੍ਞਾਤਾ ਗਤਾਸੁਂ ਸਤ੍ਥੁਸਨ੍ਤਿਕਂ;

੬੫੧.

ਵਙ੍ਗੀਸੋ ਸਾਗਤੋ ਨਨ੍ਦੋ ਭਾਰਦ੍ਵਾਜੋ ਗਵਮ੍ਪਤਿ,

ਪਤ੍ਤਚੀਵਰਮਾਦਾਯ ਗਤਾਸੁਂ ਜਿਨਸਨ੍ਤਿਕਂ;

੬੫੨.

ਏਵਮਾਦਿ ਮਹਾਨਾਗਾ ਪਞ੍ਚਸਤ ਜਿਨੋਰਸਾ,

ਸਮਾਗਞ੍ਛੁਂ ਸਹਾਗਨ੍ਤੁਂ ਮੁਨਿਨਾ ਲੋਕਸਾਮਿਨਂ;

੬੫੩.

ਤਤੋ ਸੋ ਜਗਦਾਨਨ੍ਦੋ ਕਰੁਣਾਯਾਭਿਰਾਧਿਤੋ,

ਮੇਰੁਂ ਪਰਿਕ੍ਖਿਪਨ੍ਤੋਵ ਅਨੇਕਜ੍ਜੁਤਿ ਵਿਜ੍ਜੁਯਾ;

੬੫੪.

ਨਿਵਾਸੇਤ੍ਵਾ ਸੁਦ੍ਧਰਂਸਿ ਵਿਸਰਨ੍ਤਰਵਾਸਕਂ,

ਤਸ੍ਸੂਪਰਿ ਜਿਨੋ ਰਤ੍ਤਂ ਬਨ੍ਧਿਤ੍ਵਾ ਕਾਯਬਨ੍ਧਂ;

੬੫੫.

ਅਚ੍ਚੁਗ੍ਗਤਂ ਮਹਾਥੂਪਂ ਚਾਰੁ ਚਾਮੀਕਰਜ੍ਜੁਤਿਂ,

ਪਟਿਚ੍ਛਾਦਯਮਾਨੋਵ ਰਤ੍ਤਕਮ੍ਬਲ ਕਞ੍ਚੁਨਾ;

੬੫੬.

ਵਣ੍ਣ ਨਿਗ੍ਰੋਧਪਕ੍ਕਂਵ ਸੁਰਤ੍ਤਂ ਪਂਸੁਕੁਲਿਕਂ,

ਸਙ੍ਘਾਟਿਯਾ ਕਰਿਤ੍ਵਾਨ ਸਗੁਣਂ ਉਤ੍ਤਰੀਯਕਂ;

੬੫੭.

ਹੁਤ੍ਵਾਨ ਸੁਪਟਿਚ੍ਛਨ੍ਤੋ ਪਾਰੁਪਿਤ੍ਵਾਨ ਸਾਧੁਕਂ,

ਪਤ੍ਤਤ੍ਥਾਯ ਪਸਾਰੇਸਿ ਜਾਲਾਕੁਲਕਰਞ੍ਜਿਨੋ;

੬੫੮.

ਲੋਕਨਾਥਪ੍ਪਭਾਵੇਨ ਤਤੋ ਪਤ੍ਤਮਧੁਬ੍ਬਤੋ,

ਪਾਣਿ ਸਰੋਰੁਹਸ੍ਸਨ੍ਤੋ ਸਮ੍ਪਤ੍ਤੋਸਿ ਤਮਗ੍ਗਹਿ;

੬੫੯.

ਤਤੋ ਸਸਿਸ੍ਸਕੋ ਨਾਥੋ ਉਗ੍ਗਨ੍ਤ੍ਵਾ ਗਗਨਙ੍ਗਨਂ,

ਨਾਨਾਵਣ੍ਣਮ੍ਬੁਦੇ ਤਤ੍ਥ ਮਦ੍ਦਨ੍ਤੋ ਗਨ੍ਤੁਮਾਰਹਭਿ;

੬੬੦.

ਤਤੋ ਸਮ੍ਬੁਦ੍ਧ ਦੇਹਸ੍ਮਾ ਨਿਕ੍ਖਨ੍ਤਾਸੁਂ ਛ ਰਂਸਿਯੋ,

ਹੇਮਕਣ੍ਣਿਕਤੋ ਯਾਤ ਮਣਿਗੋਪਾਨਸੀ ਯਥਾ;

੬੬੧.

ਬਾਣਿਨ੍ਦੀਵਰ ਪੁਪ੍ਫੇਹਿ ਮੇਵ’ਕਿਨ੍ਦਮਣਿਹਿ ਚ,

ਛਾਦੇਨ੍ਤਿ ਵਿਯ ਨਕ੍ਖਤ੍ਤਾ ਨੀਲਂ’ਸੁ ਮੁਨਿਦੇਹਤੋ;

੬੬੨. ¶

ਚਮ੍ਪਕੁਦ੍ਦਾਲਮਾਲਾਭੀ ਹੇਮਚੁਣ੍ਣਮ੍ਬਰੇਹਿ ਚ,

ਪੂਰਯਨ੍ਤਿ ਵਿਯਾਸਙ੍ਗ ਪੀਤਂਸੂ ਜਿਨਦੇਹਤੋ;

੬੬੩.

ਭਣ੍ਡੀਪੁਪ੍ਫਕਦਮ੍ਬੇਹਿ ਲੋਹਿਤਙ੍ਕਮਣਿਹਿ ਚ,

ਲੋਹਿਤਾਭਾ ਪਪੂਰੇਨ੍ਤਿ ਦਿਸਾ’ਗਾ ਮੁਨਿਦੇਹਤੋ;

੬੬੪.

ਹਾਰ ਮਲ੍ਲਿਕ ਮਾਲਾਹਿ ਸੋਮਂਸੁ ਫਲਿਕਾਦਿਹਿ,

ਪੂਰਯਨ੍ਤਿ ਵਿਯਾਸਙ੍ਗ ਓਦਾਤਾ ਮੁਨਿਦੇਹਤੋ;

੬੬੫.

ਪਿਞ੍ਜੁਮਞ੍ਜੇਟ੍ਠਰਾਸੀਹਿ ਪਦੁਮਾਭਮਣੀਹਿ ਚ,

ਦਿਸਂ ਛਾਦਯਮਾਨਾਗਾ ਮਞ੍ਜਿਟ੍ਠਾਭਾ ਜਿਨਙ੍ਗਤੋ;

੬੬੬.

ਨੇਕਿਨ੍ਦਚਾਪ ਕਿਣ੍ਣਂਵ ਦਿਵਸਂ ਰਤਨੁਤ੍ਥਤਂ,

ਚਿਤ੍ਤਪਟਂਵ ਮੁਞ੍ਚਨ੍ਤਂ ਮਿਸ੍ਸਾਭਾਗਾ ਜਿਨਙ੍ਗਤੋ;

੬੬੭.

ਗਿਰਿਕੂਟ ਕੂਟਾਗਾਰ ਮਤ੍ਤਾ ਛਬ੍ਬਣ੍ਣ ਰਂਸਿਯੋ,

ਆਵੇਲਵੇਲਾ ਧਾਵਨ੍ਤਿ ਦਿਪ੍ਪਮਾਨੇਤਰੇਤਰਾ;

੬੬੮.

ਗਚ੍ਛਮਾਨਾ’ਹਨਿਤ੍ਵਾਨ ਚਕ੍ਕਵਾਲ਼ ਸਿਲੁਚ੍ਚਯੇ,

ਉਗ੍ਗਨ੍ਤ੍ਵਾ ਪਰਤੋ ਯਨ੍ਤੀ ਨੀਰ ਨਿਜ੍ਝਰ ਸਨ੍ਨੀਭਾ;

੬੬੯.

ਸਮ੍ਮੁਖੇ ਸਮ੍ਮੁਖੇ ਤਾਯੋ ਰੁਕ੍ਖਪਬ੍ਬਤ ਆਦਯੋ,

ਕਾਰਯਨ੍ਤਾ ਸਕਂ ਵਣ੍ਣਂ ਧਾਵਨ੍ਤਾ’ਪਿ ਚ ਸਿਨ੍ਧਵੋ;

੬੭੦.

ਉਦ੍ਧਮੁਗ੍ਗਤਰਂਸੀਹਿ ਰਞ੍ਜਿਤਾ ਜਲਦਾ ਤਦਾ,

ਨਾਨਾਵਣ੍ਣੇ ਪੁਨੇਵਾਸਿ ਨੂਤਨੋ ਰਵਿਮਣ੍ਡਲੋ;

੬੭੧.

ਜਿਨਪ੍ਪਹਾ ਪਵਾਹੇਸੁ ਨਿਮੁਗ੍ਗਾ ਦੇਵਤਾ ਗਤਾ,

ਪੂਜੇਤੁਂਵ ਨਿਜਤ੍ਤੇਹਿ ਨਾਨਾਵਣ੍ਣਾ ਸਿਯੁਂ ਤਦਾ;

੬੭੨.

ਪਵਿਟ੍ਠਾ ਬੁਦ੍ਧਰਂਸੀਨਮਨ੍ਤਰਂ ਦੇਵਧੀਤਰੋ,

ਅਸਞ੍ਜਾਨੀਯ ਮੁਯ੍ਹਿਂਸੁ ਮੁਹੁਤ੍ਤਂ ਅਤ੍ਤਨੋ ਧਵਂ;

੬੭੩.

ਸੁਰਾ ਸੁਰੋਰਗ ਬ੍ਰਹ੍ਮ ਸਿਦ੍ਧ ਵਿਜ੍ਜਾਧਰਾਦਯੋ,

ਚਾਮਰਚ੍ਛਤ੍ਤਕੇਤੁਹਿ ਪੂਜਯਨ੍ਤਾ ਜਿਨਨ੍ਤ੍ਵਗੁਂ;

੬੭੪.

ਅਗ੍ਘਿਕਂ ਪਨ੍ਤਿਯੋ ਕੇਚਿ ਤੋਰਣੂਪਰਿ ਤੋਰਣੇ,

ਘਟਦੀਪਾਲਿਯੋ ਤਨ੍ਥ ਕਰੋਨ੍ਤਿ ਅਭਿਤੋ’ਭਿਤੋ;

੬੭੫.

ਪਾਦਪਟੇ ਪਤ੍ਥਰਨ੍ਤਿ ਵਿਤਤ੍ਵਨ੍ਤਿ ਵਿਤਾਨਕੇ,

ਤਤ੍ਥੂਪਰਿ ਅਨੇਕਾਨੀ ਕੁਸੁਮਾਨੋ’ਕਿਰਨ੍ਤਿ ਚ;

੬੭੬. ¶

ਕਤਮਂ ਦੇਵਲੋਕਨ੍ਨੁਯਾਤਿ ਲੋਕਗ੍ਗਨਾਯਕੋ,

ਯਾਤਿ ਕਿਂ ਬੁਹ੍ਮਲੋਕਨ੍ਨੁ ਅਮ੍ਹਾਕਂ ਭਵਨਨ੍ਨੁ ਖੋ;

੬੭੭.

ਕਤ੍ਥ ਨੁ ਖੋ ਦੇਵਦੇਵੋ ਕਸ੍ਸਨੁਗ੍ਗਹਬੁਦ੍ਧੀਯਾ,

ਯਾਤੀ’ਤਿ ਕਙ੍ਖਿਤਾ ਕੇਚਿ ਸਂਸਰਨ੍ਤਿ ਇਤੋਚਿਤੋ;

੬੭੮.

ਮਾਪੇਤ੍ਵਾ ਅਭਿਤੋ ਮਗ੍ਗੇ ਮਣ੍ਡਪੇ ਰਤਨਾਮਯੇ,

ਸਯਨਾਸਨਂ ਪਞ੍ਞਪੇਤ੍ਵਾ ਕਾਚਿ ਤਿਟ੍ਠਨ੍ਤਿ ਦੇਵਤਾ;

੬੭੯.

ਤਹਿਂ ਤਹਿਂ ਪਟ੍ਠਪੇਨ੍ਤਾ ਸੁਧਨ੍ਤ ਮਧੁਰੋਦਕਂ,

ਯਾਵਮਾਨਾ ਜਿਨਂ ਕੇਚਿ ਤਿਟ੍ਠਨ੍ਤਿ ਚ ਮਹਨ੍ਤਿ ਚ;

੬੮੦.

ਏਵਂ ਮਹਾਮਹੇ ਨਾਥੋ ਵਤ੍ਤਮਾਨੇ ਅਨੂਪਮੇ,

ਜਲਂ ਸਮ੍ਬੁਦ੍ਧਸਿਰਿਯਾ ਨੂਤਨੋ ਸੂਰਿਯੋ ਵਿਯ;

੬੮੧.

ਬ੍ਰਹ੍ਮਸੇਨਾਭਿਤੋ ਯਾਨ ਬ੍ਰਹ੍ਮਾਵਾਥ ਸਹਮ੍ਪਤਿ,

ਸੁਰਸੇਨਾਭਿਤੋ ਯਾਨ ਸਕ੍ਕੋਵ ਸਮਲਙ੍ਕਤੋ;

੬੮੨.

ਗਗਾਲਿਮਭਿਤੋ ਯਾਨ ਗਹਙ੍ਗਾ ਮਣਿ ਸਨ੍ਨਿਭੋ,

ਧਤਰਟ੍ਠਖਗਿਨ੍ਦੋਵ ਹਂਸਸੇਨਾਲਿ ਪੁਬ੍ਬਗੋ;

੬੮੩.

ਅਪੇਤ ਰਾਗਦੋਸੇਹਿ ਵੀਤਮੋਹੇਹਿ ਸਬ੍ਬਸੋ,

ਪਟਿਸਮ੍ਭਿਦਤ੍ਤ ਸਮ੍ਪਤ੍ਤ ਸਾਵਕੇਹਿ ਅਨੁਗ੍ਗਤੋ;

੬੮੪.

ਯੇਸਂ ਯੇਸਂ ਮਨਸ੍ਮਿਂ ਯਂ ਯਮਤ੍ਥਿ ਕਿਞ੍ਚਿ ਸਂਸਯਂ,

ਤੇਸਂ ਤਂ ਤਂ ਪਣੁਦੇਨ੍ਤੋ ਦੇਸਨਾਯ ਸੁਧਾਸਿਨਂ;

੬੮੫.

ਤਤ੍ਥ ਤਤ੍ਥਾਨੁਰੂਪੇਨ ਪਾਟਿਹਾਰਿਯ ਕਮ੍ਬੁਨਾ,

ਲੋਕਸ੍ਸ ਨਯਨਾਲੀ ਸੋ ਤੋਸਸ੍ਸੁਸੁ ਨਿਮੁਜ੍ਜਯਂ;

੬੮੬.

ਸਮ੍ਪਤ੍ਤੋ’ਲਙ੍ਕਤਂ ਲਙ੍ਕਮਥਾਗੁ ਫਣਿਨੋ ਤਦਾ,

ਪਟਿਮਗ੍ਗਂ ਕਰੋਨ੍ਤਾ ਤੇ ਤਤ੍ਥ ਤਤ੍ਥ ਮਹਾਮਹਂ;

੬੮੭.

ਉਰਗਾਨਮਨ੍ਤਰੇ ਦੇਵਾ ਬ੍ਰਹ੍ਮਾਸੁਂ ਤੇਸਮਨ੍ਤਰੇ,

ਏਵਂ ਸਮ੍ਮਿਸ੍ਸਕੋ ਲੋਕੇ ਬ੍ਰਹ੍ਮਲੋਕਾ ਪਪੂਰਯਿ;

੬੮੮.

ਯੇ ਪਸ੍ਸਨ੍ਤਿ ਜਿਨਂ ਤਤ੍ਥ ਸਸਿਸ੍ਸਂ ਸਿਰਿਯਾ ਜਲਂ,

ਸੁਲਦ੍ਧਾ ਤੇਹਿ ਨੇਤ੍ਤਾਨਿ ਤੇਸਮਕ੍ਖੀਨਿ ਲੋਚਨਾ;

੬੮੯.

ਯੇ ਸੁਣਨ੍ਤਿ ਤਦਾ ਧਮ੍ਮਂ ਧਮ੍ਮਿਸ੍ਸਰ ਪਭਾਵਿਤਂ,

ਸੁਲਦ੍ਧਾ ਤੇਹਿ ਸੋਤਾਨਿ ਤੇਸਂ ਸੋਤਾਨਿ ਸੋਤਕਾ;

੬੯੦. ¶

ਯੇ ਲਪਨ੍ਤਿ ਤਦਾ ਬੁਦ੍ਧਗੁਣਞ੍ਹਿ ਗੁਣਭੂਸਣਾ,

ਸੁਲਦ੍ਧਾ ਤੇਹਿ ਵੇ ਜਿਵ੍ਹਾ ਤੇਸਂ ਜਿਵ੍ਹਾ ਰਸਞ੍ਞਕਾ

੬੯੧.

ਯੇ ਵਨ੍ਦਨ੍ਤਿ ਜਿਨਂ ਯਨ੍ਤਂ ਸਸਙ੍ਘਂ ਗਗਨਙ੍ਗਨੇ,

ਸੁਲਦ੍ਧਾ ਤੇਹਿ ਹਤ੍ਥਾਨਿ ਤੇਸਂਯੇਵ ਭੁਜਾ ਭੁਜਾ;

੬੯੨.

ਤਦਾ ਤਥਾਗਤਂ ਦਿਸ੍ਵਾ ਯੇ ਸਨ੍ਤੁਟ੍ਠਾ ਤਥਾਗਤਂ,

ਤਥਾਗਤਾਨਂ ਸਬ੍ਬੇਸਂ ਯੋ ਤੋਸੋ ਹੋਤੁ ਸਬ੍ਬਦਾ;

੬੯੩.

ਗਤੋ ਕਲ੍ਯਾਣੀਯਂ ਨਾਥੋ ਮਹੇਨ੍ਤੇਵਂ ਸਦੇਵਕੇ,

ਤੇਸਂ ਪੂਜਾਵਿਧਾਨਂ ਕੋ ਮੁਖੇਨੇਕੇਨ ਭਾਸਤਿ;

੬੯੪.

ਤਤੋ ਗਙ੍ਗਾ ਮਨੁਞ੍ਞਞ੍ਹਿ ਸਮ੍ਪਤ੍ਤਂ ਤਂ ਸਪੁਤ੍ਤਕਂ,

ਤਰਙ੍ਗ ਮੁਦੁ ਬਾਹਾਹਿ ਗਹੇਤ੍ਵਾ ਚਰਣਮ੍ਬੁਜੇ;

੬੯੫.

ਪਾਦੇ ਪਕ੍ਖਾਲਯਿ ਸਮ੍ਮਾ ਫੇਣ ਪੁਪ੍ਫੁਪਹਾਰਿਕਾ,

ਤਤੋ ਤਤੋਤੁਂ ਗਣ੍ਹਿਤ੍ਵਾ ਅਕਾ ਦੇਹਸ੍ਸਨੁਗ੍ਗਹਂ;

੬੯੬.

ਤਤੋ ਸੋ ਯਾਚਿਤੋ ਸਤ੍ਥਾ ਨਾਗਸਙ੍ਘੇਹਿ ਵਨ੍ਦਿਯ,

ਅਗਮਾ ਮਣ੍ਡਪਂ ਰਮ੍ਮਂ ਮਨੋਨਨ੍ਦਨਮਾਵਹਂ;

੬੯੭.

ਗਨ੍ਤ੍ਵਾ ਮਣ੍ਡਪ ਮਜ੍ਝਮ੍ਹਿ ਬੁਦ੍ਧਾਰਹ ਮਹਾਸਨੇ,

ਨਿਸੀਦੋਭਾਸਯਂ ਆਸਾ ਰਵੀਵ ਉਦਯਾਵਲੇ;

੬੯੮.

ਤਤੋ ਭਿਕ੍ਖੁ ਨਿਸੀਦਿਂਸੁ ਪਤ੍ਤ ਪਤ੍ਤਾਸਨੇ ਤਦਾ,

ਬਭਾਸ ਮਣ੍ਡਪਂ’ਤੀਵ ਸਰਂਵ ਪਦੁਮਾਕੁਲਂ;

੬੯੯.

ਜਨਨੇਤ੍ਤਾਲਿਨੋ’ਗਮ੍ਮ ਵਸੀ ਸੋਮ੍ਮਮੁਖਮ੍ਬੁਜੇ,

ਪਤਨ੍ਤਾ ਕੁਸਲਾਮੋਦੇ ਗਣ੍ਹਨ੍ਤਾ ਤਿਤ੍ਤਿਨੋ ਗਤਾ;

੭੦੦.

ਤਥਾ ਸਭਿਕ੍ਖੁਕਾ ਨਾਗਾ ਮੁਨਿਨੋ ਰੂਪਸਾਗਰੇ,

ਨੇਤ੍ਤਿਨ੍ਦ ਮਣਿਨਾਵਾਹਿ ਪਾਰਂ ਗਨ੍ਤੁਂ ਨ ਤੇ ਪਭੁ;

੭੦੧.

ਤਤੋ ਸਸਙ੍ਘਂ ਸੁਗਤਂ ਸਜਨੋ ਮਣਿ ਅਕ੍ਖਿਕੋ,

ਸਕ੍ਕਚ੍ਚਂ ਸਕਹਤ੍ਥੇਹਿ ਅਨ੍ਨਪਾਨੇਨ ਤਪ੍ਪਯੀ;

੭੦੨.

ਅਥੋਨੀਤ ਪਤ੍ਤਪਾਣਿਮ’ਚ੍ਚਯਿਤ੍ਵਾ ਤਥਾਗਤਂ,

ਭਤ੍ਤਿਨਿਨ੍ਨੋ ਨਿਮਨ੍ਤੇਸਿ ਦੇਸਨਤ੍ਥਾਨੁਮੋਦਨਂ;

੭੦੩.

ਤਤੋ ਬ੍ਰਹ੍ਮਸ੍ਸਰੋ ਸਤ੍ਥਾ ਨਿਚ੍ਛਰਂ ਬ੍ਰਹ੍ਮਘੋਸਨਂ,

ਵਿਞ੍ਞਾਪੇਨ੍ਤੋ ਜਨੇ ਸਬ੍ਬੇ ਸਕਸਦ੍ਦੇਨ ਦੇਸਨਂ;

੭੦੪.

ਦੇਸੇਸ੍ਵੇਵਂ ਜਿਨੋ ਧਮ੍ਮ’ਮਨਿਲਾਸਨਕਾਦਿਨਂ,

ਪੀਤਿਪਾਮੋਜ੍ਜ ਜਨਨਂ ਨਿਬ੍ਬਾਣਾਮਤ’ਮਾਵਹਂ;

੭੦੫.

ਭੋ ਭੋ ਸੁਣਾਥ ਭੁਜਗਾ ਭਵਸਾਗਰਮ੍ਹਿ

ਪਾਪਾਰਿਨਕ੍ਕਮਕਰਾਕੁਲ ਦੁਗ੍ਗਮਮ੍ਹਿ,

ਮਗ੍ਗਾ ਜਨਾ ਖਲੁ ਲਭਨ੍ਤਿ ਕਦਾ ਪਤਿਟ੍ਠਂ,

ਓਹਾਯ ਬੁਦ੍ਧਥਿਰਸਾਰਤਰਿਂ ਵਿਸਾਲਂ;

੭੦੬.

ਲਦ੍ਧਾਨ ਦੁਲ੍ਲਭਤਰਂ ਮੁਨਿਪਾਤੁਭੂਤ

ਕਾਲਂ ਚਿਰੇਨ ਭੁਜਗਾ ਨ ਪਮਾਦਯਿਤ੍ਥ,

ਜਾਤੀ ਜਰਾ ਮਰਣ ਦੁਕ੍ਖ ਪਰਿਦ੍ਦਵਾ ਚ

ਸਂਸਾਰਿਕਸ੍ਸ ਨ ਤਤੋਪ’ਗਤਸ੍ਸ ਹੋਤਿ;

੭੦੭.

ਤਾਰੁਞ੍ਞਮਮ੍ਬੁਜਸਿਰਿਂਵ ਪਰਿਤ੍ਤਕਾਲਂ

ਪਾਣਂ ਤੁਸਾਰਲਵ’ਸਾਰਤਰਂ ਜਨਾਨਂ,

ਭੋਗਂ ਦਧਾਤਿ ਜਲਧਿਮ੍ਹਿ ਤਰਙ੍ਗਭਙ੍ਗਿਂ

ਨਿਚ੍ਚਂ ਮਨੋ ਦਹਤਿ ਸੋਕਸਿਖੀਭਿ ਨਾਨਾ;

੭੦੮.

ਕਤ੍ਵਾਨ ਰਾਗਮਿਸਯੋ’ਪਿ ਖਗਾ ਦੁਪਞ੍ਞਾ

ਥਿਰੂਪਿ ਨਾਰਿਕੁਸੁਮੇਸੁਪਿ ਰੂਪਗਿਦ੍ਧਾ,

ਪਤ੍ਤਾ’ਨਯਂ ਖਲੁ ਪੁਰੇ ਪਰਿਹੀਨ ਝਾਨਾ

ਰੂਪੇ ਨ ਰਜ੍ਜਥ ਤਤੋ ਖਲੁ ਸਾਧੁਪਞ੍ਞਾ;

੭੦੯.

ਸਦ੍ਦਾਨੁਰਾਗਮਨੁਗੋਪਿ ਪੁਰੇ ਸਿਖਣ੍ਡੀ

ਸੁਤ੍ਵਾਨ ਮੋਰਿ ਮਧੁਰਂ ਗਿਰਮਞ੍ਜਿਤਙ੍ਗੋ,

ਵ੍ਯਾਧਸ੍ਸ ਹਤ੍ਥਮਗਮਾਸਿ ਭਵੇਸੁ ਤਸ੍ਮਾ

ਨਤ੍ਥੇਵ ਸਦ੍ਦਸਮਦੁਕ੍ਖਕਰਂ ਜਨਾਨਂ;

੭੧੦.

ਓਹਾਯ ਨੇਕਕੁਸੁਮੇਸੁ ਪਰਾਗਰਾਗਂ

ਮਤ੍ਤੇਭਕੁਮ੍ਭ ਮਗਮਾ ਮਦਗਨ੍ਧਲੁਦ੍ਧੋ,

ਭਿਙ੍ਗੋ ਪਭਗ੍ਗ ਤਨੁਕੋ ਕਰਿਕਣ੍ਣਤਾਲਾ

ਨਤ੍ਥੇਵ ਗਨ੍ਧਸਦਿਸਂ ਤਿਭਵੇਸੁ ਪਾਸਂ;

੭੧੧.

ਗਮ੍ਭੀਰ ਨੀਰਧਿਭਵੋ ਪਵੁਰਾਸਨੋ’ਪਿ

ਮਿਚ੍ਛੋ ਗਿਲਿਤ੍ਵ ਬਲਿਸਂ ਰਸਗੇਧਹੇਤੁ,

ਪਪ੍ਪੋਤਿ ਦੁਕ੍ਖਮਤੁਲਂ ਨ ਰਸੇਸੁ ਸਾਤ

ਮਤ੍ਥਿਤਿ ਮਨ੍ਤ੍ਵ ਪਜਭਾਥ ਰਸੇਸੁ ਗੇਧਂ;

੭੧੨. ¶

ਭੋ ਬੁਹ੍ਮਲੋਕਾ’ਗਤ ਸੁਦ੍ਧਸਤ੍ਤੋ

ਬੁਦ੍ਧਤ੍ਤਮੇਵ ਨਿਯਤੋ ਅਪਿ ਬੋਧਿਸਤ੍ਤੋ,

ਥਿਸਙ੍ਗਮਾਯ ਪਰਿਹਾਯਿ ਸਰਜ੍ਜਤੋ’ਪਿ

ਤਸ੍ਮਾ ਹਿ ਫਸ੍ਸਸਦਿਸੋ ਅਨਯੋ ਨਵਤ੍ਥਿ;

੭੧੩.

ਭੇਰਣ੍ਡ ਪੇਲਕ ਕਪੁ’ਦ੍ਦਕ ਹੇਤੁਹੀਨ

ਸਤ੍ਤਾਪਿ ਦਾਨਰੁਚਿ ਦਾਨਮਣਿਪ੍ਪਭਾਵਾ,

ਪਤ੍ਤਾ’ਪਵਗ੍ਗ ਵਰਸਾਰਪੁਰਂ ਭੁਜਙ੍ਗਾ

ਕੋ ਨਪ੍ਪਦਾਤਿ ਧਨਿਕੋ ਸਿਵ’ਮੇਸਮਾਨੋ;

੭੧੪.

ਪਾਲੇਤ੍ਵ ਸੀਲਮ’ਮਲਂ ਵਿਸਕਣ੍ਠਿਕਾਪਿ

ਇਨ੍ਦਸ੍ਸ ਨਨ੍ਦਨਵਨੇ’ਸਿ ਪਿਯਾ ਮਹੇਸੀ,

ਤਸ੍ਮਾ ਪਸਤ੍ਥਵਿਭਵਂ ਯਦਿ ਪਤ੍ਥਯਵ੍ਹੋ

ਪਾਲੇਥ ਸੀਲਮ’ਮਲਂ ਖਲੁ ਜਿਵਿਤਂ’ਵ;

੭੧੫.

ਸਗ੍ਗੋ ਵਿਸਾਲ ਰਤਨਾਲਯ ਸਮ੍ਪਕਿਣ੍ਣੋ

ਸਾਨਨ੍ਦ’ਮਨ੍ਦ ਸੁਰਸੁਨ੍ਦਰਿ ਸੁਨ੍ਦਰੋ ਸੋ,

ਫੁਲ੍ਲਮ੍ਬੁਜਾਕਰ ਵਨਾਦਿਹਿ ਨਨ੍ਦਨੀਯੋ

ਤਤ੍ਥਾਮਰਾ ਵਿਯ’ਮਰਾ’ਵਿਰਤਂ ਰਮਨ੍ਤਿ;

੭੧੬.

ਤਮ੍ਹਾਪਿ ਭੋ ਰੁਚਿਰ ਬ੍ਰਹ੍ਮਨਿਕਾਯ ਭੁਤਿ

ਰਮ੍ਮਾ ਤਤੋਪਿ ਮਹਿਤਂ ਅਮਤਂ ਵਰਿਟ੍ਠਂ,

ਤਸ੍ਮਾਤ੍ਤਕਾਮ ਨਿਰਤਾ ਜਨਤਾ ਸਪਞ੍ਞਾ

ਤਣ੍ਹਕ੍ਖਯਾਯ ਸਤਤਂ ਵੀਰਿਯਂ ਕਰੋਥ;

੭੧੭.

ਏਵਂ ਸਦ੍ਧਮ੍ਮਮਗ੍ਗਂ ਵਰਮਤਿ ਸੁਗਤੋ ਦੇਸਯਿ ਪਨ੍ਨਗਾਨਂ

ਸੁਤ੍ਵਾ ਤੇ ਸਮ੍ਪਹਟ੍ਠਾ ਮਹਮਹਮਕਰੁਂ ਨਿਜ੍ਜਰਾਦੀਹਿ ਸਦ੍ਧਿਂ,

ਤੇਸਂ ਵੇ ਦੇਸਨਾਯਂ ਸੁਰਵਿਟਪਿ ਸਮਾ ਸਾਤ੍ਥਿਕਾ ਤਤ੍ਥ ਜਾਤਾ

ਸੋ ਨਾਥੋ ਤਞ੍ਚ ਧਮ੍ਮਂ ਭਗਵਤਿ ਤਨਯਾ ਤੇ ਚ ਵੋ ਪਾਲਯਨ੍ਤੁ

ਕਲ੍ਯਾਣਿ ਦੇਸਾਗਮਨਂ.

੭੧੮. ¶

ਨਗਾਧਿਰਾਜੇ ਸੁਮਨਾਭਿਧਾਨੇ

ਵਸਂ ਸੁਮੇਧੋ ਸੁਮਨਾਭਿਧਾਨੋ,

ਦੇਵੋ ਤਦਾ’ਗਮ੍ਮ ਸਪਾਰਿਸਜ੍ਜੋ

ਕਲ੍ਯਾਣਿਯਂ ਤਤ੍ਥ ਫਣੀਹਿ ਸਦ੍ਧਿਂ;

੭੧੯.

ਦਤ੍ਵਾ’ਪਵਗ੍ਗਸ੍ਸ ਨਿਦਾਨਦਾਨਂ

ਸੁਤ੍ਵਾਨ ਧਮ੍ਮਂ ਸੁਤਿਸੀਤਿਭੁਤਂ,

ਪਹਟ੍ਠਚਿਤ੍ਤੋ ਉਪਗਮ੍ਮ ਬੁਦ੍ਧਂ

ਨਤ੍ਵਾਹ ਏਵਂ ਕਤਪਞ੍ਜਲੀਕੋ;

੭੨੦.

ਨ ਵੇ ਫਣੀਨਂ ਨਪਿ ਮਾਨੁਸਾਨਂ

ਨਾਨਿਮ੍ਮਿਸਾਨਂ ਨ ਪਿਤਾਮਹਾਨਂ,

ਹਿਤਤ੍ਥ ਮੇਵਾਖਿਲ ਲੋਕਨਾਥਾ

ਜਾਯਨ੍ਤੀ ਲੋਕੇ ਕਰੁਣਾਗੁਣਗ੍ਗਾ;

੭੨੧.

ਅਨ੍ਤੋਗਧਾ ਨੂਨ ਮਯਮ੍ਪਿ ਤੁਯ੍ਹਂ

ਦਯਾਯ ਤਸ੍ਮਾ ਫਣੀਨਂ ਵਿਮੇਸਂ,

ਕਰੋਹਿ ਮਯ੍ਹਂ ਭਵਨਮ੍ਹਿ ਧੀਰ

ਪਾਦਂ’ਸੁਨਾ’ਤੀਵ ਪਵਿਤ੍ਤਰੂਪਂ;

੭੨੨.

ਯੋ’ਯਂ ਨਗੋ ਦਿਸ੍ਸਤਿ’ਤੋ ਪੁਰਤ੍ਥ

ਭੁਮਙ੍ਗਨਾ ਮੋਲਿਸਿਰਿਂ ਵਹਨ੍ਤੋ,

ਸਮਨ੍ਤਕੂਟੋਤਿ ਸਮਨ੍ਤਚਕ੍ਖੁ

ਜਾਨਾਤਿ ਲੋਕੋ ਵਸਤਿਂ ਮਮੇਤਂ;

੭੨੩.

ਯੋ ਨੀਲ ਨਾਨਾ ਵਨਰਾਜਿ ਰਾਜਿਤੋ

ਆਸਾਰ ਧਾਰਾ ਗਿਰਿ ਨਿਜ੍ਝਰਾਕੁਲੋ,

ਆਪੀਤ ਨੀਲਾਰੁਣ ਪਲ੍ਲਵਾਵਲੀ

ਜਿਮੂਤਕੂਟੋ ਵਿਯ ਭਾਤਿ ਉਗ੍ਗਤੋ;

੭੨੪.

ਯੋ ਸਿਨ੍ਧੁਵਾਰਿਂ ਉਰਸਾ ਪਭੇਜ੍ਜ

ਆਗਮ੍ਮ ਤੇ ਪਾਦਪਣਾਮ ਹੇਤੁ,

ਵਿਜ੍ਜੋਤਮਾਨੋ ਵਿਯਚਕ੍ਕਪਾਣਿ

ਮਹਾਤਿ ਤੁਙ੍ਗਗ੍ਗ ਧਰਾਧਰਿਨ੍ਦੋ;

੭੨੫. ¶

ਗਙ੍ਗਾਵਧੂ ਕੁਟਕਿਰੀਟਧਾਰੀ

ਸਾਮਨ੍ਤ ਸੇਲਿਨ੍ਦ ਚਮੂਪਤੀਕੋ,

ਯੋ’ਯਂ ਧਰਾਧਾਰ ਮਹਾਮਹੀਪੋ

ਰ ਰਾਜ ਲਙ੍ਕਾ ਨਗਰਙ੍ਗਣਮ੍ਹਿ;

੭੨੬.

ਪਾਰੋਹ ਦਨ੍ਤੋ ਚਿਤਕੂਟ ਕੁਮ੍ਭੋ

ਅਨੇਕ ਸੋਣ੍ਡਿਕ੍ਖ ਸਵਨ੍ਤਿ ਹਤ੍ਥੋ,

ਯੋ ਨਿਜ੍ਝਰਾਸਾਰ ਮਦਪ੍ਪਵਾਹੋ

ਗਜੋਰਿਵਾ’ਭਾਤਿ ਸੁਰਾਧਿਪਸ੍ਸ;

੭੨੭.

ਸਮ੍ਫੂਲ੍ਲ ਪੁਪ੍ਫਤ੍ਥਬਕਾ’ਨਪਤ੍ਤਾ

ਸਤ੍ਧਤ੍ਤ ਰਤ੍ਤਙ੍ਕੁਰਮੋਲਿਮਾਲਾ,

ਕਨ੍ਤਾਲਤਾ’ਲਿਙ੍ਗਿਤ ਖਨ੍ਧਦੇਹਾ

ਤਿਟ੍ਠਨ੍ਤਿ ਭੂਪਾਵ ਯਹਿਂ ਕੁਜਿਨ੍ਦਾ;

੭੨੮.

ਸਿਦ੍ਧਙ੍ਗਨਾ ਰਤ੍ਤਪਦਮ੍ਬੁਜਾਲੀ

ਸਮ੍ਹਿਨ੍ਨ ਹਤ੍ਥਾਭਰਣਾਲਿ ਯੁਤ੍ਤਾ,

ਕੇਕੀਕਲਾਪੁਪ੍ਪਲ ਮਾਲਮਾਲੀ

ਸਿਲਾਤਲਾਕਞ੍ਜ ਨਿਭਨ੍ਤਿ ਯਤ੍ਥ;

੭੨੯.

ਮਙ੍ਗੁਰ ਪਾਠੀਨ ਸਵਙ੍ਕ ਸਿਙ੍ਗੁ

ਰੋਹਿਚ੍ਚ ਮੁਞ੍ਜਾ?ਮਰ ਪਾਵੁਸੇਹਿ,

ਕੁਲੀਰਨਕ੍ਕਾਦ’ਨਿਮੇਸਕੇਹਿ

ਨਿਕੀਲ਼ੀਤਂ ਦਦ੍ਦਰ ਰਤ੍ਤਪੇਹਿ;

੭੩੦.

ਨਿਚ੍ਚਞ੍ਹਿ ਸਂਰਾਵ ਵਿਰਾਚਿਤਾਨਂ

ਬਲਾਕ ਕਾਦਮ੍ਬ ਕਦਮ੍ਬਕਾਨਂ,

ਆਪਾਨਸਾਲਾ ਵਿਯ ਸਾਰਸਾਨਂ

ਹਂਸਾਲਿਨਂ ਮਙ੍ਗਲ ਵਾਸਭੂਤਂ;

੭੩੧.

ਨਿਰਨ੍ਤਰਾਮੋਦ ਮੁਦਾਵਗੇਹਿ

ਸੁਫੁਲ੍ਲ ਕੋਕਾਸ’ਰਵਿਨ੍ਦਕੇਹਿ,

ਸੋਗਨ੍ਧਿ’ਕਿਨ੍ਦੀਵਰ ਕੇਰਵੇਹਿ

ਕਿਞ੍ਜਕ੍ਖ ਛਨ੍ਨਣ੍ਣਤਲੇਹਿ ਚਿਤ੍ਤਂ;

੭੩੨. ¶

ਸੀਤਚ੍ਛ ਸਾਤੋਦਕ ਸਮ੍ਪਪੁਣ੍ਣ

ਸਰੋਜਿਨੀ ਲਙ੍ਕਤ ਭੁਮਿਭਾਗੋ,

ਯੋ’ਯਂ ਪੁਰੇ ਭਾਤਿ ਮਨੁਞ੍ਞਰੂਪੋ

ਸਮਨ੍ਤਕੂਟੋ ਸ ਸਮਨ੍ਤਕੂਟੋ;

੭੩੩.

ਦਲਿਤ ਵਿਪਿਨਸਣ੍ਡਾ ਯਤ੍ਥ ਸੇਲੇ ਸਮਨ੍ਤਾ

ਸਮੁਪਗਤ ਜਨਾਨਂ ਚਿਤ੍ਤਮਾਮੋਦਯਨ੍ਤਿ,

ਮਧੁਕ ਵਟ ਕਰੇਰਿ ਬੋਧਿ ਜਮ੍ਬੀਰ ਭਲ੍ਲਿ

ਖਦਿਰ’ਭਯ ਕਦਮ੍ਬਾ ਫੁਲ੍ਲ ਸੇਲ੍ਲੂ ਪਲਾਸਾ;

੭੩੪.

ਪਣਸ’ਮਤ ਪਿਲਕ੍ਖਾ ਕਣ੍ਹਵਣ੍ਟ’ਕ੍ਖ ਚਿਞ੍ਚਾ

ਲਬੁਜ ਬਦਰਿ ਨੀਪਾ ਫਨ੍ਦਨਿ’ਨ੍ਦੀਵਰਾਵ

ਮਕੁਲ’ਸਨ ਪਿਯਾਲਾ ਗਦ੍ਦਭਣ੍ਡ’ਜ੍ਜੁਨਾ ਚ

ਕਮੁਕ ਸਲ੍ਲ ਤਿਨ੍ਦੁ’ਦੁਮ੍ਬਰਮ੍ਬਸ੍ਸ’ਕਣ੍ਣਾ;

੭੩੫.

ਪੁਨ੍ਨਾਗ ਚਮ੍ਪਕ ਦੁਮੁਪ੍ਪਲ ਦਾਡਿਮਾ ਚ

ਖਜ੍ਜੂਰਿ ਤਾਲ ਗਿਰਿਮਲ੍ਲਿਕ’ਸੋਕ ਤਾਲਾ,

ਹਿਨ੍ਤਾਲ ਨਾਗ ਨਿਵੁਲਾ ਯੁਗਪਤ੍ਤ’ਰਿਟ੍ਠ

ਸੇਤਮ੍ਬ ਏਰਵਤਕਾਪਿ ਚ ਕੇਤਕਾ ਚ

੭੩੬.

ਸਮਫੁਲ੍ਲਭਣ੍ਡਿ ਸੁਮਨ’ਜ੍ਜਕ ਯੂਥਿਕਾ ਚ

ਵਾਸਨ੍ਤਿ ਚਿਤ੍ਤਕ ਜਪਾ ਰਵਿਮਾਲਤੀ ਚ,

ਕੁਨ੍ਦਸ੍ਸ’ਮਾਰਕ ਕੁਰਣ੍ਡਕ ਬੀਜਪੂਰ

ਸੇਫਾਲਿਕਾ ਚ ਤਿਣਸੂਲ ਸਮੀਰਣਾ ਚ;

੭੩੭.

ਵੋਚੁ’ਚ੍ਜੁ ਕੀਚਕ ਹਲਿਦ੍ਦਿ ਵਿਲ਼ਙ੍ਗਿ ਬਿਮ੍ਬਿ

ਨੀਲੀ ਵਚਾ’ਤਿਵਿਸਾਲਾਬੁ ਚ ਨਾਗਵਲ੍ਲੀ,

ਵਲ੍ਲੀਹ ਸਾਰਦ’ਪਰਾਜਿਤਵਾਰੁ’ਸੀਰਾ

ਫਲਾਦਿ ਨੇਕ ਵਨਰਾਜਿ ਵਿਰਾਜਿਤੋ ਸੋ;

੭੩੮.

ਤਿਟ੍ਠਨ੍ਤਿ ਕੇਚਿ ਤਰਵੋ ਸੁਰਭਿਂ ਕਿਰਨ੍ਤਾ

ਤਤ੍ਥੇਵ ਕੇਚਿ ਫਲਿਤਾ ਮਧੁਰਪ੍ਫਲਾਨਿ,

ਅਨ੍ਦੋਲਿਤਾ ਫਲਿਤਪਲ੍ਲਵਿਤਾ ਲਤਾਯੋ

ਸਨ੍ਧਾਰਯਂ ਵਿਟਪ ਜਤ੍ਤੁਸੁ ਭਨ੍ਤਿ ਕੇਚਿ;

੭੩੯. ¶

ਸਾਮਨ੍ਤਗੇ ਜਨਗਣੇ ਸਤਤਂ ਦੁਮਿਨ੍ਦਾ

ਸਮ੍ਪੀਣਯਨ੍ਤਿ ਦਲਿਤਾ ਫਲਿਨੋ ਚ ਯਸ੍ਮਿਂ,

ਤੇ ਅਵ੍ਹਯਨ੍ਤਿ ਵਿਯ ਲੋਚਨ ਗੋਚਰੇਹਿ

ਵਾਤੇ’ਰਿਤੇਹਿ ਤਰੁਣਾਰੁਣ ਪਲ੍ਲਵੇਹਿ;

੭੪੦.

ਤਸ੍ਮਿਂ ਵਨੇ ਵਨਸੁਰਾ ਨਿਜਵਸੁਨ੍ਦਰੀਹਿ

ਰਮ੍ਮੇ ਸਿਲਾਤਲਦਹੇ ਸਿਕਤਾਤਲੇ ਚ,

ਨਚ੍ਚਨ੍ਤਿ ਤਨ੍ਤਿ ਤੁਰਿਯਾਨਿ ਚ ਵਾਦਯਨ੍ਤਿ

ਗਾਯਨ੍ਤਿ ਮਾਲਭਰਿਨੋ ਸਤਤਂ ਪਤੀਤਾ;

੭੪੧.

ਸਿਦ੍ਧਾ ਚ ਸਿਦ੍ਧਵਨਿਤਾ ਹਿ ਤਹਿਂ ਤਹਿਂ ਤੇ

ਦਿਬ੍ਬਨ੍ਤਿ ਪੁਪ੍ਫਫਲ ਪਤ੍ਤਰਸਾਹਿਨਨ੍ਦਿ,

ਅਚ੍ਛਨ੍ਤਿ ਤਤ੍ਥ ਗਿਰਿਪਾਦਪ ਰਾਮਣੇਯ੍ਯੇ

ਯੋਗੇਹਿ ਸਙ੍ਗਤ ਮਨਾ ਬਹਿਤਾਪਸਾਪਿ;

੭੪੨.

ਤਸ੍ਮਿਂ ਵਨੇ ਹਰਿਣ ਰੋਹਿਤ ਪੁਣ੍ਡਰੀਕ

ਗੋਕਣ੍ਣ ਸਲ੍ਲ ਸਸ ਜਮ੍ਬੁਕ ਸੂਕਰਾ ਚ,

ਸਾਖਾਮਿਗੇ’ਣਿਵਗ ਬਬ੍ਬੁ ਰੁਰੂ ਕੁਰੁਙ੍ਗ

ਗੋਧਾ’ਖੁ ਪਮ੍ਪਕ ਕਪੀ ਗਵਯਾ ਚ’ਨੇਕਾ;

੭੪੩.

ਤੇ ਵਗ੍ਗ ਵਗ੍ਗ ਚਰਿਨੋ ਹਯਮਾਰਕਾਦੀ

ਨਾਨਾ ਚਤੁਪ੍ਪਦਗਣਾ ਮੁਦਿਤਾ ਵਸਨ੍ਤਿ,

ਪਕ੍ਖੀਪਿ ਕੋਸਿਯ ਕਪੋਤਕ ਨੀਲਗੀਵ

ਧਙ੍ਕਾ’ਟ ਲਾਪ ਪਰਪੁਟ੍ਠ ਮਧੁਬ੍ਬਤਾਵ;

੭੪੪.

ਨਿਜ੍ਜਿਵ੍ਹ ਦਿਨ੍ਦਿਹ ਚਕੋਰਕ ਸਾਲ਼ਿਕਾ ਚ

ਚਕ੍ਕਵ੍ਹ ਕੀਰ ਕੁਰਰਾ ਕੁਲਲਾ ਚ ਕਙ੍ਕਾ,

ਚਿਤ੍ਰਚ੍ਛਦਾ ਮਧੁਰ ਕੂਜਕ ਨੇਕਪਕ੍ਖੀ

ਸਙ੍ਗਮ੍ਮ ਯਤ੍ਥ ਨਿਵਸਨ੍ਤਿ ਮਨੁਞ੍ਞਰੂਪਾ;

੭੪੫.

ਤੇਸਂ ਵਨਨ੍ਤਮਥ ਨਾਟਕਮਣ੍ਡਲਾ’ਚ

ਗੀਤਾਲਯਂ ਵਿਯ ਅਹੋਸਿ ਚ ਗਾਯਕਾਨਂ,

ਆਪਾਨਭੁਮਿ ਸਦਿਸਂ ਮਿਗਪਕ੍ਖਿਕਾਨਂ

ਨਿਚ੍ਚੁਸ੍ਸਵਂ ਰਤਿਕਰਂ ਨਯਨਾਭਿਰਾਮਂ;

੭੪੬. ¶

ਏਵਂ ਵਿਧੋ ਵਿਪਿਨਰਾਜਿ ਵਿਰਾਜਿਤੇਹਿ

ਕੂਟੇਹਿ ਨੇਕਸੁਰ ਸੁਨ੍ਦਰਿ ਮਣ੍ਡਿਤੇਹਿ,

ਅਤ੍ਯੁਚ੍ਚ ਨੀਲਸਿਖਿਗੀਵ ਸਮਾਨ ਵਣ੍ਣੋ

ਏਸੋ ਸਮਨ੍ਤਗਿਰਿ ਮੇ ਵਸਤੀ ਮੁਨਿਨ੍ਦ;

੭੪੭.

ਏਵਂ ਪਤੀਤ ਮਨਸੋ ਸੁਮਨਾਭਿਧਾਨੋ

ਵਤ੍ਵਾਨ ਨਤ੍ਵਮਸਮਂ ਗਮਨੋਪਯੁਤ੍ਤਂ,

ਕਾਸਾਥ ਸੋਪਿ ਮੁਨਿ ਤਸ੍ਸ ਵਚਂ ਪਟਿਚ੍ਚ

ਸਬ੍ਭਿਕ੍ਖੁ ਨਿਕ੍ਖਮਿ ਜਿਨੋ ਗਗਨਾਯਨਮ੍ਹਿ;

੭੪੮.

ਨਿਚ੍ਚੇਤਨਾਪਿ ਗਿਰਿਪਾਦਪ ਆਦਯੋਪਿ

ਨਾਗਾ ਸੁਪਣ੍ਣ ਮਿਗ ਪਕ੍ਖਿਕ ਹੇਤੁਕਾਪਿ,

ਵਿਜ੍ਜਾਧਰਾਮਰ’ਸੁਰਾ ਚਤੁਰਾਣਨਾਪਿ

ਸਙ੍ਗਮ੍ਮ’ਕਂਸੁ ਸੁਮਨਾ ਮਹਮਬ੍ਭੁਤਂ ਤੇ;

੭੪੯.

ਮੁਨਿਨ੍ਦੇ ਪਯਨ੍ਤੇ ਸਮਿਦ੍ਧਂ ਤਿਲੋਕਂ

ਗਿਰਿਨ੍ਦਾਭਿਨਨ੍ਦਾ ਦੁਮਿਨ੍ਦਾ ਪਬੁਦ੍ਧਾ,

ਮਿਗਿਨ੍ਦਾ ਸੁਤੁਟ੍ਠਾ ਖਗਿਨ੍ਦਾ ਸੁਘੁਟ੍ਠਾ

ਪਵੁਟ੍ਠੋ ਮਹਿਨ੍ਦੋ ਪਣਟ੍ਠੋ ਨਿਦਾਘੋ;

੭੫੦.

ਗਚ੍ਛਨ੍ਤੇ ਗਗਨਾਯਨੇਨ ਸੁਗਤੇ ਭਾਨੁ’ਸਿ ਸਨ੍ਤੋ ਤਦਾ

ਵਾਰੇਸੁਂ ਸੂਰਿਯਾਤਪਞ੍ਚ ਜਲਦਾ ਸਿਞ੍ਜਿਂਸੁ ਭੁਮ੍ਯਾ ਜਲਂ,

ਮਨ੍ਦਾਮਨ੍ਦ ਸੁਗਨ੍ਧ ਮੁਦ੍ਧ ਪਵਨੋ ਪਾਪੇਤਿ ਸਿਤਂ ਸੁਖਂ,

ਦੇਵਾਦਿ ਧਜ ਛਤ੍ਤ ਚਾਮਰਕਰਾ ਪੂਜੇਨ੍ਤਿ ਮਾਨੇਨ੍ਤਿ ਚ;

੭੫੧.

ਸਨ੍ਨੀਰ ਹਿਨ੍ਤਾਲ’ਗ ਸਿਨ੍ਦਿ ਪੂਗ

ਤਾਲਮ੍ਬਸਾਲਾਦਿ ਮਹੀਰੁਹਿਤ੍ਦਾ,

ਤਿਟ੍ਠਨ੍ਤਿ ਤੇ ਚਾਮਰਹਤ੍ਥਕਾ’ਵ

ਪੁਪ੍ਫੇਹਿ ਛਨ੍ਨੋ ਗਗਨਙ੍ਗਨੋਪਿ;

੭੫੨.

ਅਨੇਨ ਵਿਧਿਨਾ ਜਗਦੇਕ ਨਾਥੋ

ਪਵਤ੍ਤਮਾਨੇਸੁ ਮਹਾਮਹੇਸੁ,

ਦਿਸਞ੍ਚ ਵਿਦਿਸਂ ਪਰਿਪੂਰਯਨ੍ਤੋ

ਜਬ੍ਬਣ੍ਣਰਂਸੀਹਿ ਅਗਾ ਨਗਿਨ੍ਦਂ;

੭੫੩. ¶

ਤਸ੍ਮਿਂ ਸਮਨ੍ਤਨਗਮੁਦ੍ਧਨਿ ਲੋਕਨਾਥੋ

ਛਬ੍ਬਣ੍ਣਰਂਸਿ ਨਿਕਰਂ ਦਿਸਿ ਪਤ੍ਥਰਨ੍ਤੋ,

ਭਿਕ੍ਖੂਹਿ ਸੋ ਪਰਿਵੁਤੋ ਪਰਸਾਗਰਨ੍ਤਂ

ਓਲੋਕਯਂ ਠਿਤਿਮਕਾਸਿ ਅਅਨੋਮਵਣ੍ਣੋ;

੭੫੪.

ਲਙ੍ਕਾਵਧੂ ਸੁਮਨਕੂਟ ਕਿਰੀਟ ਕੂਟਂ

ਸਜ੍ਜੇਸਿ’ਨਗ੍ਘ ਜਨ ਰਾਜ ਮਣੀ ਮਹਨ੍ਤੋ,

ਇਚ੍ਛਤ੍ਥਦਂ ਸਿਵਦਮਪ੍ਪਟਿਮਂ ਤਿਲੋਕੇ

ਤਂ’ਦਾਨਿ ਭੋ ਭਜਥ ਸੇਵਥ ਸਬ੍ਬਕਾਲਂ;

੭੫੫.

ਕਾਸੁਂ ਤਦਾ ਸੁਰਵਰਾ ਸੁਰਸੁਨ੍ਦਰੀਹਿ

ਲਙ੍ਕਾਯ ਸੇਲਸਿਖਰੇਸੁ ਮਹਾਸਮਜ੍ਜਂ,

ਵਜ੍ਜਿਂਸੁ ਭੇਰਿ ਵਿਕਤੀ ਸਯਮੇਵ ਸਬ੍ਬਾ

ਭਸ੍ਸਿਂਸੁ ਦਿਬ੍ਬਕੁਸੁਮਾਭਰਣਾ ਨਭਮ੍ਹਾ;

੭੫੬.

ਲਙ੍ਕਮ੍ਬਰਂ ਨਿਖਿਲਮਾਸਿ ਚ ਛਤ੍ਤਛਤ੍ਤਂ

ਨਾਨਾ ਵਿਰਾਗ ਧਜ ਕੇਤੁ ਸਮਾਕੁਲਞ੍ਚ,

ਨਾਨਾਸੁਗਨ੍ਧ ਕੁਸੁਮਾਦਿ ਦਿਸਨ੍ਤਰਾਲਂ,

ਨਾਨਗ੍ਘਿਕਾਵਲਿ ਵਿਰਾਜਿਤ ਮਨ੍ਤਲ਼ਿਕ੍ਖਂ;

੭੫੭.

ਤਸ੍ਮਿਂ ਦਿਨੇ’ਸਿ ਰਤਨਂ ਮਣਿਤੋਰਣੇਹਿ

ਦੀਪਾਲਿ ਪੁਣ੍ਣਘਟਪਨ੍ਤੀਹਿ ਦਸ੍ਸਨੀਯਂ,

ਸਮ੍ਬੁਦ੍ਧ ਦੇਹਪਰਿਤੋਗਤ ਛਪ੍ਪਭਾਹਿ

ਰਤ੍ਤਂ ਨਭਾਵਨਿ ਚਰਾਚਰ ਸਬ੍ਬਦਬ੍ਬਂ;

੭੫੮.

ਮਾਲਾਵਤਂਸ ਸਮਕਾ ਗਿਰਯੋ ਸਮਨ੍ਤਾ

ਹੁਤ੍ਵਾ ਨਮਨ੍ਤਿ ਚ ਭਮਨ੍ਤਿ ਸਚੇਤਨਾ’ਵ,

ਸਬ੍ਬੇਪਿ ਤਤ੍ਥ ਤਰਵੋਚ ਲਤਾਦਯੋ ਚ

ਨਚ੍ਚਨ੍ਤਿ ਦਿਬ੍ਬਨਟਕਾ ਵਿਯ ਓਨਤਗ੍ਗਾ;

੭੫੯.

ਏਵਂ ਤਦਾ ਮਹਤ ਵਿਮ੍ਹਯ ਪਾਟਿਹੇਰੇ

ਬੁਦ੍ਧਾਨੁਭਾਵ ਜਨਿਤੇ ਇਧ ਵਤ੍ਤਮਾਨੇ,

ਤਤ੍ਵਾਨ ਧੀਰਚਰਣਂ ਸਮਨੋ ਸੁਧਾਸੀ

ਏਵਂ ਵਦੀ ਪਰਮ ਪਿਤਿਮਨੋ ਉਦਗ੍ਗੋ;

੭੬੦. ¶

ਯੇ ਤੇ ਮੁਦੁ ਕੋਮਲ ਰਤ੍ਤਪਾਦਾ

ਸੁਰਤ੍ਤ ਫੁਲ੍ਲਮ੍ਬੁਰੁਹੋਪਮਾਨਾ,

ਵਟ੍ਟਾਨੁਪੁਬ੍ਬਾਯਤ ਅਙ੍ਗੁਲਿਕਾ

ਸੁਤਮ੍ਬਤੁਙ੍ਗਗ੍ਗ ਨਖਾਵਲੀਕਾ;

੭੬੧.

ਸੁਵਣ੍ਣਕੁਮ੍ਮੁ’ਨ੍ਨਤ ਪਾਦਪਿਟ੍ਠਿ

ਨਿਗੁਲ਼੍ਹ ਗੋਪ੍ਫਾਯਤ ਪਣ੍ਹਿਭਾਗਾ

ਸਮਚ੍ਛਮਾਯਂ ਸਕਲਂ ਪਤਿਟ੍ਠਿਤਾ

ਨ ਲਿਮ੍ਪਤੇ ਸੁਚ੍ਛਵਿਤਾ ਰਜਾਦਿ;

੭੬੨.

ਸਮ੍ਮਤ੍ਤ ਹਤ੍ਥੋਸਭ ਹਂਸ ਸੀਹ

ਸਮਾਨ ਲੀਲਾਯ ਯਹਿਂ ਪਯਾਤਿ,

ਨਿਨ੍ਨੁਨ੍ਨਤਾ ਭੇਰਿਤਲਾ’ਵ ਭੁਮਿ

ਹੋਤਾਥ ਪੁਪ੍ਫਾਦਿ ਸੁਮਣ੍ਡਿਤਾ ਚ;

੭੬੩.

ਅਪੇਨ੍ਤਿ ਮਗ੍ਗਾ ਸਯਮੇਵ ਖਾਣੁ

ਸਕਣ੍ਟਮੂਲਾ ਕਠਲਾ ਚ ਸਬ੍ਬੇ,

ਗਮ੍ਭੀਰ ਨੀਰਾਪਗ ਪਙ੍ਕਦੁਗ੍ਗਾ

ਹਿਤ੍ਵਾ ਸਭਾਵਂ ਰਮਣੀਯਮੇਨ੍ਤਿ;

੭੬੪.

ਵਜਨ੍ਤਿ ਭੁਮਿਂ ਗਿਰਯੋ ਪੁਰਤ੍ਥ

ਪਸਾਰਿਤੇ ਪਾਦਵਰੇ ਜਿਨਸ੍ਸ,

ਨਿਬ੍ਬਾਤਿ ਅਗ੍ਗੀ ਨਰਕੋਦਰੇਪਿ

ਗਣ੍ਹਨ੍ਤਿ ਪਾਦੇ ਪਦੁਮਾਦਯੋ ਚ;

੭੬੫.

ਇਦਞ੍ਹਿ ਤੇ ਪਾਦਤਲੇ ਯਤੀਸ

ਸਨਾਭਿ ਨੇਮਿ ਘਟਿਕਾਵਲੀਹਿ,

ਸੁਸਣ੍ਠਿਤਂ ਚਾ’ਰਸਹਸ੍ਸਵਨ੍ਤਂ

ਸਨ੍ਦਿਸ੍ਸਤੇ ਚਕ੍ਕਵਰਂ ਮਹਨ੍ਤਂ;

੭੬੬.

ਤਮੇਵ ਚਕ੍ਕਂ ਪਰਿਵਾਰਯਿਤ੍ਵਾ

ਸਿਰਿਵਚ੍ਛ ਸੋਵਤ੍ਥਿ’ਵਤਂਸਕਾ ਚ,

ਪਾਸਾਦ ਭਦ੍ਰਾਸਨ ਪੁਣ੍ਣਪਾਤਿ

ਸਿਤਾਤਪਤ੍ਤਾਸਿ ਮਯੂਰਹਤ੍ਥਾ;

੭੬੭. ¶

ਨੀਲਾਦਿਭੇਦਾ ਕਮਲੁਪ੍ਪਲਾ ਚ

ਸਮੇਰੁ ਸਤ੍ਤਦ੍ਦਿ ਮਹਾਸਮੁਦ੍ਦਾ,

ਸਤ੍ਤਾਪਗਾ ਸਤ੍ਤ ਮਹਾਸਰਾ ਚ

ਹਿਮਾਲਯੋ ਚਕ੍ਕਵਾਲ਼ਦ੍ਦਿਕੋ ਚ;

੭੬੮.

ਚਨ੍ਦਕ੍ਕਤਾਰਾ ਚ ਛਦੇਵਲੋਕਾ

ਪਿਤਾਮਹਾਵਾਸ ਮਨੁਸ੍ਸਲੋਕਂ,

ਸੁਵਣ੍ਣ ਨਾਵਾ ਸਿਵਿਕਾ ਚ ਸਙ੍ਖਂ

ਕੇਲਾਸਸੇਲਂ ਧਜਤੋਰਣਾ ਚ;

੭੬੯.

ਚਿਨ੍ਤਾਮਣੁਣ੍ਹੀਸ ਸਵਚ੍ਛ ਧੇਨੂ

ਮੀਨਦ੍ਵਯਂ ਚਕ੍ਕਵਤ੍ਤਿ ਸਸੇਨੋ,

ਸੀਹ’ਸ੍ਸ ਮਾਤਙ੍ਗ ਵਿਯਗ੍ਘਰਾਜਾ

ਹਂਸੋਸਭੋ ਕਿਮ੍ਪੁਰਿਸੋ ਮਯੂਰੋ;

੭੭੦.

ਕੋਞ੍ਚਾ ਚ ਏਰਾਵਣ ਹਤ੍ਥਿਰਾਜਾ

ਸਚਕ੍ਕਵਾਕਾ ਮਕਰਾਦਯੋ ਚ,

ਨਾਨਾ ਮਹਾਮਙ੍ਗਲ ਲਕ੍ਖਣਾ ਤੇ

ਵਿਰੋਚਮਾਨਾ ਵਿਲਸਨ੍ਤਿ ਨਿਚ੍ਚਂ;

੭੭੧.

ਜਾਤਕ੍ਖਣੇ ਯਸ੍ਸ ਮਹਿਂ ਪਭੇਜ੍ਜ

ਵਿਸਾਲ ਸਤ੍ਤੁਦ੍ਦਯ ਪਙ੍ਕਜਾਨਿ,

ਪਟਿਗ੍ਗਹੇਸੁਂ ਚਰਣਾਨਿ ਯਾਨਿ

ਤੇ ਤਾਨਿਮਾਨਚ੍ਛਰਿਯਾਨਿ ਲੋਕੇ;

੭੭੨.

ਵਨ੍ਦਾਪਨਤ੍ਥਾਯੁ’ਪਨੀਤਕਾਲੇ

ਪਿਤੂਹਿ ਤੇ ਦੇਵਲ ਤਾਪਸਿਨ੍ਦਂ,

ਪਾਦਾਨਿ ਗਨ੍ਤ੍ਵਾਨ ਜਟਾਸੁ ਤਸ੍ਸ

ਆਸੁਂ ਤਵੇ’ਤਙ੍ਘਿਯੁਗਂ ਅਹੋ ਭੋ;

੭੭੩.

ਸੁਦ੍ਧੋਦਨਵ੍ਹਸ੍ਸ ਨਰਾਧਿਪਸ੍ਸ

ਸਨ੍ਤੋਸ ਤੋਯੇਹਿ ਪਪੂਰਿਤਸ੍ਸ,

ਸਿਰੋ ਵਿਸੁਦ੍ਧਮ੍ਬੁ ਰੁਹਾਕਰਸ੍ਸ

ਸਰੋਰੁ ਹਾਸੁਂ ਚਰਣਾਨਿ ਤੁਯ੍ਹਂ;

੭੭੪. ¶

ਯੇ ਚਙ੍ਕਮੇ ਚਙ੍ਕਮਣਾਵਸਾਨੇ

ਓਨਮ੍ਮ ਮੇਰੂਦਯ ਪਬ੍ਬਨਿਣ੍ਦਾ,

ਪਟਿਗ੍ਗਹੇਸੁਂ ਚਰਣਾਨਿ ਯਾਨਿ

ਤੇ ਤਾਨਿਮਾ’ਨਚ੍ਛਰਿਯਾਨਿ ਲੋਕੇ;

੭੭੫.

ਯਂ ਵਨ੍ਦਮਾਨੋ ਤਿਦਿਵਾਧਿਪੋ ਸੋ

ਯਸ੍ਸਾਨੁਭਾਵੇਨ ਗਤਾਯੁਕੋਪਿ,

ਸਕਿਯਠਾਨੇ’ਸਿਨਪੁਨਾਪਿ ਤੇ’ਵਂ

ਪਾਦਮ੍ਬੁਜਂ ਧੀਰ!ਮਹਾਨੁਭਾਵਂ;

੭੭੬.

ਦੇਹੀਨਮਗ੍ਗੋਪਿ ਨਿਸਾਕਰਾਰਿ

ਮਾਨੁਨ੍ਨਤੋ ਸੋ ਸਯਿਤਸ੍ਸ ਤੁਯ੍ਹਂ,

ਪਾਦਸ੍ਸ ਅਨ੍ਤਮ੍ਪਿ ਨ ਸਕ੍ਖਿ ਦਟ੍ਠੁਂ

ਅਚ੍ਛੇਰ ਰੂਪਂ ਇਦਮਙ੍ਘਿਕਞ੍ਜਂ;

੭੭੭.

ਗਙ੍ਗਾਯ ਗਙ੍ਗਾਪਤਿ ਸਨ੍ਨਿਧਾਨੇ

ਤੀਰੇ ਤਦਾ ਨਮ੍ਮਦ ਜਿਮ੍ਹਗਸ੍ਸ,

ਪਾਦਸ੍ਸ ਲਞ੍ਛਂ ਅਕਰੀ ਮੁਨਿਨ੍ਦ

ਮਯ੍ਹਂ’ਪਿ ਹੋਤਂ ਕਰੁਣਾ ਤਵੇਸਾ;

੭੭੮.

ਆਰਾਧਿਤੋ ਸਚ੍ਚਕ ਤਾਪਸੇਨ

ਅਕਾ ਤੁਵਂ ਸਚ੍ਚਕ ਬਦ੍ਧਸੇਲੇ,

ਪਾਦਸ੍ਸ ਲਞ੍ਛਂ ਜਗਤੋ ਹਿਤਾਯ

ਮਯ੍ਹਮ੍ਪਿ ਹੋਤਂ ਤਮਨੁਗ੍ਗਹਨ੍ਤੇ;

੭੭੯.

ਸੁਤ੍ਵਾਨ ਨਾਥੋ ਗਿਰਮੇਤਮਸ੍ਸ

ਪਸ੍ਸਂ ਮਹਾਭੁਤਿ’ਮਨਾਗਤੇਸੁ,

ਲੋਕਸ੍ਸ ਲੋਕੇਹਿ ਮਹੀਯ ਮਾਨੋ

ਅਕਾਸਿ ਵਾਮੇਨ ਪਦੇਨ ਲਞ੍ਛਂ;

੭੮੦.

ਸਮ੍ਬੋਧਿਤੋ ਅਟ੍ਠਮ ਸਾਰਦਸ੍ਮਿਂ

ਵੇਸਾਖਮਾਸੇ ਮੁਣਿ ਪੁਣ੍ਣਮਾਯਂ,

ਪਾਦਸ੍ਸ’ਭਿਞ੍ਞਾਣਮਕਾ’ਪਰਣ੍ਹੇ

ਸਦੇਵਕੇ ਸਸ੍ਸਮਣੇ ਮਹੇਨ੍ਤੇ;

੭੮੧. ¶

ਪਤਙਕ੍ਗਿਕਾ ਸਿਤ੍ਥਕ ਮਤ੍ਥਕਮ੍ਹਿ

ਯਥਙ੍ਕਿਤਾ ਖਤ੍ਤਿਯ ਮੁਦ੍ਦਿਕਾਯ,

ਆਸੇਵ’ਮੇਵਂ ਜਿਨਪਾਦਲਞ੍ਛਂ

ਸਮਨ੍ਤਕੂਟਮ੍ਹਿ ਨਮਸ੍ਸਨੀਯਂ;

੭੮੨.

ਅਕਾਲਮੇਘੋ ਚ ਤਤੋ ਪਵਸ੍ਸਿ

ਵਸ੍ਸਿਂਸੁ ਨਾਨਾਰਤਨਾਨਿ ਖਮ੍ਹਾ,

ਤਥਾ ਪਰਿਤੋ ਕੁਸੁਮਮ੍ਬਰਾਨਿ

ਸੁਵਣ੍ਣਚੁਣ੍ਣਾਨਿ ਜਿਨੇਕਵਣ੍ਣਾ;

੭੮੩.

ਤਤੋ’ਪਗਨ੍ਤ੍ਵਾ ਸੁਗਤੇਭਗਾਮੀ

ਤਸ੍ਮਿਂ ਨਿਤਮ੍ਬੇ ਗਿਰਿਗਬ੍ਭਰਾਯਂ,

ਦਿਵਾਵਿਹਾਰਾਯ ਨਿਸੀਦਿ ਯਤ੍ਥ

ਸੁਪਾਕਟਂ ਤਂ ਭਗਵਾਗੁਹਾ’ਤਿ;

੭੮੪.

ਤਤੋਰਹਨ੍ਤਾ ਸੁਗਤੋਰਸਾ ਤੇ

ਗਨ੍ਧਾਦਿਨਾ ਸਾਧੁ ਮਹੇਤ੍ਵ ਸਬ੍ਬੇ,

ਵਨ੍ਦਿਤ੍ਵ ਕਤ੍ਵਾਨ ਪਦਕ੍ਖਿਣਨ੍ਤਂ

ਤਹਂ ਤਹਂ’ਕਂਸੁ ਦਿਵਾਵਿਹਾਰਂ;

੭੮੫.

ਲਤਙ੍ਗਨਾਯੋ ਵਿਟਪੀਧਵਾਨ

ਮਾਲਮ੍ਬ ਸਾਖਾਪੁਥੁਲਂ’ਸਪਸ੍ਸੇ,

ਸੁਫੁਲ੍ਲ ਨਮਞ੍ਜੂਕਰ ਮਞ੍ਜਰੀਹਿ

ਨਮਸ੍ਸਮਾਨਾ’ਵ ਸਦੋਨਤਗ੍ਗਾ;

੭੮੬.

ਤਿਟ੍ਠਨ੍ਤਿ ਰੁਕ੍ਖਾ ਨਟਕਾ’ਵ ਤਤ੍ਥ

ਸੁਫੁਲ੍ਲ ਸਾਖਾਕਰ’ਮੁਕ੍ਖਿਪਿਤ੍ਵਾ,

ਨਮਸ੍ਸਮਾਨਾ ਵਿਯ ਓਨਤਗ੍ਗਾ

ਵਤ੍ਤਨ੍ਤਿ ਮਾਨਚ੍ਛਰਿਯਾਨਿ ਨਿਚ੍ਚਂ;

੭੮੭.

ਤਥੇਵ ਉਚ੍ਚਾਵਚ ਪਬ੍ਬਤਾ ਚ

ਨਮਸ੍ਸਮਾਨਾ ਵਿਯ ਪਾਦਲਞ੍ਛਂ,

ਤਿਟ੍ਠਨ੍ਤਿ ਨਿਨ੍ਨਗ੍ਗ ਸਿਖਾ ਸਮਨ੍ਤਾ

ਇਦਮ੍ਪਿ ਨਿਚ੍ਚਬਭੁਤਮੇਵ ਤਤ੍ਥ;

੭੮੮. ¶

ਤਸ੍ਮਿਂ ਨਗੇ ਪਾਦਵਰਙ੍ਕਿਤਸ੍ਮਿਂ

ਖਲਮਣ੍ਡਲੋਕਾਸ ਪਦੇਸਮਤ੍ਤੇ,

ਸਮੋਸਰਨ੍ਤੇ ਬਹੁਕੇ ਜਨੇਪਿ

ਹੋਤੇਵ ਓਕਾਸਮ,ਹੋ ਪਦਙ੍ਕਂ;

੭੮੯.

ਸਮੋਸਰਿਤ੍ਵਾਨ ਮਹੇਤ੍ਵ ਸਤ੍ਤੇ

ਨਿਕ੍ਖਨ੍ਤਮਤ੍ਤੇ ਜਲਦਾ ਸਮੇਚ੍ਚ,

ਸੋਧੇਨ੍ਤਿ ਮਾਲ’ਮ੍ਬੁਵਹੇਹਿ ਸਾਧੁ

ਇਦਮ੍ਪਿ ਨਿਚ੍ਚਬ੍ਭੁਤਮੇਵ ਤਤ੍ਥ;

੭੯੦.

ਪਾਦੇਨ ਫੁਟ੍ਠਸ੍ਸ ਸਿਲਾਤਲਸ੍ਸ

ਏਤਾਦਿਸਾਨਚ੍ਛਰਿਯਾਨਿ ਹੋਨ੍ਤਿ,

ਲੋਕੇਕਨਾਥਸ੍ਸ ਅਨਾਸਵਸ੍ਸ

ਮਹਬ੍ਭੁਤਂ ਕੋਨੁ ਕਥਂ ਭਣੇਯ੍ਯ;

੭੯੧.

ਦਿਵਾਵਿਹਾਰਂ ਭਗਵਾ ਸਸਙ੍ਘੋ

ਕਤ੍ਵਾਨ ਤਸ੍ਮਿਂ ਪਨ ਕਿਞ੍ਚਿਕਾਲਂ,

ਮਹੀਯਮਾਨੇਸੁ ਸਦੇਵਕੇਸੁ

ਤਤੋ ਗਤੋ ਰੋਹਣਮਮ੍ਬਰਮ੍ਹਾ;

੭੯੨.

ਤਸ੍ਮਿਂ ਸਸਙ੍ਘੋ ਮੁਨਿ ਦੀਘਵਾਪਿਯਂ

ਥੂਪਸ੍ਸ ਠਾਨੇ ਪਰਮਾਯ ਭੁਮਿਯਾ,

ਗਰੁਂ ਕਰੋਨ੍ਤੋ ਪਨ ਤਂ ਮਹੀਤਲਂ

ਨਿਰੋਧਭਾਵੇਨ ਨਿਸੀਦਿ ਸਤ੍ਰਜੋ;

੭੯੩.

ਤਤੋ’ਨੁਰਾਧਂ ਭਗਵਾ ਨਭਮ੍ਹਾ

ਗਨ੍ਤ੍ਵਾਨ ਬੋਧਿਟ੍ਠਿਤਭੁਮਿਯਾ ਚ,

ਠਾਨੇ ਮਹਾਮਙ੍ਗਲਚੇਤਿਯਸ੍ਸ

ਤਥੇਵ ਅਕ੍ਖਨ੍ਤਿਨਹਿਤਸ੍ਸ ਠਾਨੇ;

੭੯੪.

ਨਿਸੀਦਿ ਪਤ੍ਵਾਨ ਨਿਰਾਧਪੀਤਿਂ

ਸਸਾਵਕੋ ਪੇਕ੍ਖਮ’ਨਾਗਤਦ੍ਧਂ,

ਪਤਿਟ੍ਠਿਤਾ ਮੇ ਪਨ ਬੋਧਿਧਾਤੁ

ਕਰੋਨ੍ਤਿ ਲੋਕੇ’ਤਿ ਜਨਸ੍ਸ ਵੁਦ੍ਧਿਂ;

੭੯੫. ¶

ਵੁਟ੍ਠਾਯ ਤੁਟ੍ਠੋ ਭਗਵਾ ਨਿਰੋਧਾ

ਗਤੋ ਸਿਲਾਥੂਪਵਰਸ੍ਸ ਠਾਨਂ,

ਠਿਤੋ ਤਹਿਂ ਧਮ੍ਮਮਥੁਦ੍ਦਿਸਿਤ੍ਵਾ

ਗਤੋ ਨਭਾ ਜੇਤਵਨਂ ਸੁਰਮ੍ਮਂ;

੭੯੬.

ਏਵਂ ਸੋ ਧਮ੍ਮਰਾਜਾ ਜਨਹਿਤਵਿਹਿਤੋ ਵੀਤ ਦੋਸਾਰਿਵਗ੍ਗੋ

ਲਙ੍ਕਾਰਾਮਾਯ ਰਮ੍ਮੇ ਸੁਮਨਗਿਰਿਸਿਰੇ’ਕਾਸਿ ਯਂ ਪਾਦਲਞ੍ਛਂ

ਤਂ ਵੋ ਸਗ੍ਗਾ’ਪਵਗ੍ਗਂ ਦਦਤਿ ਮੁਨਿਸਮਂ ਚਿਤ੍ਤ ਮਤ੍ਤੇ ਪਸਨ੍ਨੇ

ਤਸ੍ਮਾ ਭੋ!ਭੋ! ਪਹਟ੍ਠਾ ਨਮਥ ਮਹਥ ਤਂ ਸਾਧੁ ਸਾਧੁਪ੍ਪਸਤ੍ਥਂ;

ਇਤਿ ਸਮਨ੍ਤਕੂਟ ਵਣ੍ਣਨਾ ਨਿਟ੍ਠਿਤਾ.

ਗ੍ਰਨ੍ਥ ਸਮਾਪ੍ਤਿਯ.

੧.

ਅਨਨ੍ਤਰਾ ਸਮਤ੍ਤਾਯਂ ਸੁਮਣਦ੍ਦਿਸੁ ਵਣ੍ਣਨਾ,

ਤਥੇਵ ਸਾਧੂ ਸਙ੍ਕਪ੍ਪਾ ਖਿਪ੍ਪਂ ਪਪ੍ਪੋਨ੍ਤੁ ਪਾਣਿਨਂ;

੨.

ਯੋ ਯਾਚਿਤੋ’ਰਞ੍ਞਵਾਸੀ ਗੁਣਾਧਾਰ ਸੁਧੀਮਤਾ,

ਰਾਹੁਲਤ੍ਥੇਰਨਾਮੇਨ ਵਿਸ੍ਸੁਤੇਨ ਮਹੀਤਲੇ;

੩.

ਭੁਵਨੋਦਰਮ੍ਹਿ ਪਞ੍ਞਾਤੋ ਰਵੀਵਮ੍ਬਰ ਮਣ੍ਡਲੇ,

ਅਰਞ੍ਞਰਤਨਾਨਨ੍ਦ ਮਹਾਥੇਰੋ ਮਹਾਗਣੀ;

੪.

ਜੀਵਿਤਂ ਵਿਯ ਯੋ ਸਤ੍ਥੁਸਾਸਨਸ੍ਸ ਮਹਾਕਵੀ,

ਸਾਰੋ ਸੁਪ੍ਪਟਿਪਤ੍ਤੀਸੁ ਸਤ੍ਥਸਾਗਰ ਪਾਰਗੋ;

੫.

ਤਸ੍ਸ ਸਿਸ੍ਸੋ’ਸਿ ਯੋ ਵਿਪ੍ਪਗਾਮ ਵਂਸੇਕ ਕੇਤੁਕੋ

ਞਾਤਾਗਮੋ’ਰਞ੍ਞਵਾਸੀ ਸੀਲਾਦਿ ਗੁਣਭੂਸਣੋ;

੬.

ਯੋ’ਕਾ ਸੀਹਲਭਾਸਾਯ ਸੀਹਲਂ ਸਦ੍ਦਲਕ੍ਖਣਂ,

ਤੇਨ ਵੇਦੇਹਥੇਰੇਨ ਕਤਾਯਮ੍ਪਿਯਸੀਲਿਨਾ;

ਸਿਦ੍ਧਿਰਤ੍ਥੁ.