📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਦੀਘਨਿਕਾਯੇ

ਪਾਥਿਕਵਗ੍ਗਟ੍ਠਕਥਾ

੧. ਪਾਥਿਕਸੁਤ੍ਤਵਣ੍ਣਨਾ

ਸੁਨਕ੍ਖਤ੍ਤਵਤ੍ਥੁਵਣ੍ਣਨਾ

੧. ਏਵਂ ਮੇ ਸੁਤਂ…ਪੇ… ਮਲ੍ਲੇਸੁ ਵਿਹਰਤੀਤਿ ਪਾਥਿਕਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਮਲ੍ਲੇਸੁ ਵਿਹਰਤੀਤਿ ਮਲ੍ਲਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹੀਸਦ੍ਦੇਨ ‘‘ਮਲ੍ਲਾ’’ਤਿ ਵੁਚ੍ਚਤਿ, ਤਸ੍ਮਿਂ ਮਲ੍ਲੇਸੁ ਜਨਪਦੇ. ‘‘ਅਨੁਪਿਯਂ ਨਾਮ ਮਲ੍ਲਾਨਂ ਨਿਗਮੋ’’ਤਿ ਅਨੁਪਿਯਨ੍ਤਿ ਏਵਂਨਾਮਕੋ ਮਲ੍ਲਾਨਂ ਜਨਪਦਸ੍ਸ ਏਕੋ ਨਿਗਮੋ, ਤਂ ਗੋਚਰਗਾਮਂ ਕਤ੍ਵਾ ਏਕਸ੍ਮਿਂ ਛਾਯੂਦਕਸਮ੍ਪਨ੍ਨੇ ਵਨਸਣ੍ਡੇ ਵਿਹਰਤੀਤਿ ਅਤ੍ਥੋ. ਅਨੋਪਿਯਨ੍ਤਿਪਿ ਪਾਠੋ. ਪਾਵਿਸੀਤਿ ਪਵਿਟ੍ਠੋ. ਭਗਵਾ ਪਨ ਨ ਤਾਵ ਪਵਿਟ੍ਠੋ, ਪਵਿਸਿਸ੍ਸਾਮੀਤਿ ਨਿਕ੍ਖਨ੍ਤਤ੍ਤਾ ਪਨ ਪਾਵਿਸੀਤਿ ਵੁਤ੍ਤੋ. ਯਥਾ ਕਿਂ, ਯਥਾ ‘‘ਗਾਮਂ ਗਮਿਸ੍ਸਾਮੀ’’ਤਿ ਨਿਕ੍ਖਨ੍ਤੋ ਪੁਰਿਸੋ ਤਂ ਗਾਮਂ ਅਪਤ੍ਤੋਪਿ ‘‘ਕੁਹਿਂ ਇਤ੍ਥਨ੍ਨਾਮੋ’’ਤਿ ਵੁਤ੍ਤੇ ‘‘ਗਾਮਂ ਗਤੋ’’ਤਿ ਵੁਚ੍ਚਤਿ, ਏਵਂ. ਏਤਦਹੋਸੀਤਿ ਗਾਮਸਮੀਪੇ ਠਤ੍ਵਾ ਸੂਰਿਯਂ ਓਲੋਕੇਨ੍ਤਸ੍ਸ ਏਤਦਹੋਸਿ. ਅਤਿਪ੍ਪਗੋ ਖੋਤਿ ਅਤਿਵਿਯ ਪਗੋ ਖੋ, ਨ ਤਾਵ ਕੁਲੇਸੁ ਯਾਗੁਭਤ੍ਤਂ ਨਿਟ੍ਠਿਤਨ੍ਤਿ. ਕਿਂ ਪਨ ਭਗਵਾ ਕਾਲਂ ਅਜਾਨਿਤ੍ਵਾ ਨਿਕ੍ਖਨ੍ਤੋਤਿ? ਨ ਅਜਾਨਿਤ੍ਵਾ. ਪਚ੍ਚੂਸਕਾਲੇਯੇਵ ਹਿ ਭਗਵਾ ਞਾਣਜਾਲਂ ਪਤ੍ਥਰਿਤ੍ਵਾ ਲੋਕਂ ਵੋਲੋਕੇਨ੍ਤੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠਂ ਭਗ੍ਗਵਗੋਤ੍ਤਂ ਛਨ੍ਨਪਰਿਬ੍ਬਾਜਕਂ ਦਿਸ੍ਵਾ ‘‘ਅਜ੍ਜਾਹਂ ਇਮਸ੍ਸ ਪਰਿਬ੍ਬਾਜਕਸ੍ਸ ਮਯਾ ਪੁਬ੍ਬੇ ਕਤਕਾਰਣਂ ਸਮਾਹਰਿਤ੍ਵਾ ਧਮ੍ਮਂ ਕਥੇਸ੍ਸਾਮਿ, ਸਾ ਧਮ੍ਮਕਥਾ ਅਸ੍ਸ ਮਯਿ ਪਸਾਦਪ੍ਪਟਿਲਾਭਵਸੇਨ ਸਫਲਾ ਭਵਿਸ੍ਸਤੀ’’ਤਿ ਞਤ੍ਵਾਵ ਪਰਿਬ੍ਬਾਜਕਾਰਾਮਂ ਪਵਿਸਿਤੁਕਾਮੋ ਅਤਿਪ੍ਪਗੋਵ ਨਿਕ੍ਖਮਿ. ਤਸ੍ਮਾ ਤਤ੍ਥ ਪਵਿਸਿਤੁਕਾਮਤਾਯ ਏਵਂ ਚਿਤ੍ਤਂ ਉਪ੍ਪਾਦੇਸਿ.

੨. ਏਤਦਵੋਚਾਤਿ ਭਗਵਨ੍ਤਂ ਦਿਸ੍ਵਾ ਮਾਨਥਦ੍ਧਤਂ ਅਕਤ੍ਵਾ ਸਤ੍ਥਾਰਂ ਪਚ੍ਚੁਗ੍ਗਨ੍ਤ੍ਵਾ ਏਤਂ ਏਤੁ ਖੋ, ਭਨ੍ਤੇਤਿਆਦਿਕਂ ਵਚਨਂ ਅਵੋਚ. ਇਮਂ ਪਰਿਯਾਯਨ੍ਤਿ ਇਮਂ ਵਾਰਂ, ਅਜ੍ਜ ਇਮਂ ਆਗਮਨਵਾਰਨ੍ਤਿ ਅਤ੍ਥੋ. ਕਿਂ ਪਨ ਭਗਵਾ ਪੁਬ੍ਬੇਪਿ ਤਤ੍ਥ ਗਤਪੁਬ੍ਬੋਤਿ? ਨ ਗਤਪੁਬ੍ਬੋ, ਲੋਕਸਮੁਦਾਚਾਰਵਸੇਨ ਪਨ ਏਵਮਾਹ. ਲੋਕਿਯਾ ਹਿ ਚਿਰਸ੍ਸਂ ਆਗਤਮ੍ਪਿ ਅਨਾਗਤਪੁਬ੍ਬਮ੍ਪਿ ਮਨਾਪਜਾਤਿਕਂ ਆਗਤਂ ਦਿਸ੍ਵਾ ‘‘ਕੁਤੋ ਭਵਂ ਆਗਤੋ, ਚਿਰਸ੍ਸਂ ਭਵਂ ਆਗਤੋ, ਕਥਂ ਤੇ ਇਧਾਗਮਨਮਗ੍ਗੋ ਞਾਤੋ, ਕਿਂ ਮਗ੍ਗਮੂਲ਼੍ਹੋਸੀ’’ਤਿਆਦੀਨਿ ਵਦਨ੍ਤਿ. ਤਸ੍ਮਾ ਅਯਮ੍ਪਿ ਲੋਕਸਮੁਦਾਚਾਰਵਸੇਨ ਏਵਮਾਹਾਤਿ ਵੇਦਿਤਬ੍ਬੋ. ਇਦਮਾਸਨਨ੍ਤਿ ਅਤ੍ਤਨੋ ਨਿਸਿਨ੍ਨਾਸਨਂ ਪਪ੍ਫੋਟੇਤ੍ਵਾ ਸਮ੍ਪਾਦੇਤ੍ਵਾ ਦਦਮਾਨੋ ਏਵਮਾਹ. ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋਤਿ ਸੁਨਕ੍ਖਤ੍ਤੋ ਨਾਮ ਲਿਚ੍ਛਵਿਰਾਜਪੁਤ੍ਤੋ. ਸੋ ਕਿਰ ਤਸ੍ਸ ਗਿਹਿਸਹਾਯੋ ਹੋਤਿ, ਕਾਲੇਨ ਕਾਲਂ ਤਸ੍ਸ ਸਨ੍ਤਿਕਂ ਗਚ੍ਛਤਿ. ਪਚ੍ਚਕ੍ਖਾਤੋਤਿ ‘‘ਪਚ੍ਚਕ੍ਖਾਮਿ ਦਾਨਾਹਂ, ਭਨ੍ਤੇ, ਭਗਵਨ੍ਤਂ ਨ ਦਾਨਾਹਂ, ਭਨ੍ਤੇ, ਭਗਵਨ੍ਤਂ ਉਦ੍ਦਿਸ੍ਸ ਵਿਹਰਿਸ੍ਸਾਮੀ’’ਤਿ ਏਵਂ ਪਟਿਅਕ੍ਖਾਤੋ ਨਿਸ੍ਸਟ੍ਠੋ ਪਰਿਚ੍ਚਤ੍ਤੋ.

੩. ਭਗਵਨ੍ਤਂ ਉਦ੍ਦਿਸ੍ਸਾਤਿ ਭਗਵਾ ਮੇ ਸਤ੍ਥਾ ‘‘ਭਗਵਤੋ ਅਹਂ ਓਵਾਦਂ ਪਟਿਕਰੋਮੀ’’ਤਿ ਏਵਂ ਅਪਦਿਸਿਤ੍ਵਾ. ਕੋ ਸਨ੍ਤੋ ਕਂ ਪਚ੍ਚਾਚਿਕ੍ਖਸੀਤਿ ਯਾਚਕੋ ਵਾ ਯਾਚਿਤਕਂ ਪਚ੍ਚਾਚਿਕ੍ਖੇਯ੍ਯ, ਯਾਚਿਤਕੋ ਵਾ ਯਾਚਕਂ. ਤ੍ਵਂ ਪਨ ਨੇਵ ਯਾਚਕੋ ਨ ਯਾਚਿਤਕੋ, ਏਵਂ ਸਨ੍ਤੇ, ਮੋਘਪੁਰਿਸ, ਕੋ ਸਨ੍ਤੋ ਕੋ ਸਮਾਨੋ ਕਂ ਪਚ੍ਚਾਚਿਕ੍ਖਸੀਤਿ ਦਸ੍ਸੇਤਿ. ਪਸ੍ਸ ਮੋਘਪੁਰਿਸਾਤਿ ਪਸ੍ਸ ਤੁਚ੍ਛਪੁਰਿਸ. ਯਾਵਞ੍ਚ ਤੇ ਇਦਂ ਅਪਰਦ੍ਧਨ੍ਤਿ ਯਤ੍ਤਕਂ ਇਦਂ ਤਵ ਅਪਰਦ੍ਧਂ, ਯਤ੍ਤਕੋ ਤੇ ਅਪਰਾਧੋ ਤਤ੍ਤਕੋ ਦੋਸੋਤਿ ਏਵਾਹਂ ਭਗ੍ਗਵ ਤਸ੍ਸ ਦੋਸਂ ਆਰੋਪੇਸਿਨ੍ਤਿ ਦਸ੍ਸੇਤਿ.

੪. ਉਤ੍ਤਰਿਮਨੁਸ੍ਸਧਮ੍ਮਾਤਿ ਪਞ੍ਚਸੀਲਦਸਸੀਲਸਙ੍ਖਾਤਾ ਮਨੁਸ੍ਸਧਮ੍ਮਾਉਤ੍ਤਰਿ. ਇਦ੍ਧਿਪਾਟਿਹਾਰਿਯਨ੍ਤਿ ਇਦ੍ਧਿਭੂਤਂ ਪਾਟਿਹਾਰਿਯਂ. ਕਤੇ ਵਾਤਿ ਕਤਮ੍ਹਿ ਵਾ. ਯਸ੍ਸਤ੍ਥਾਯਾਤਿ ਯਸ੍ਸ ਦੁਕ੍ਖਕ੍ਖਯਸ੍ਸ ਅਤ੍ਥਾਯ. ਸੋ ਨਿਯ੍ਯਾਤਿ ਤਕ੍ਕਰਸ੍ਸਾਤਿ ਸੋ ਧਮ੍ਮੋ ਤਕ੍ਕਰਸ੍ਸ ਯਥਾ ਮਯਾ ਧਮ੍ਮੋ ਦੇਸਿਤੋ, ਤਥਾ ਕਾਰਕਸ੍ਸ ਸਮ੍ਮਾ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਸਬ੍ਬਵਟ੍ਟਦੁਕ੍ਖਕ੍ਖਯਾਯ ਅਮਤਨਿਬ੍ਬਾਨਸਚ੍ਛਿਕਿਰਿਯਾਯ ਗਚ੍ਛਤਿ, ਨ ਗਚ੍ਛਤਿ, ਸਂਵਤ੍ਤਤਿ, ਨ ਸਂਵਤ੍ਤਤੀਤਿ ਪੁਚ੍ਛਤਿ. ਤਤ੍ਰ ਸੁਨਕ੍ਖਤ੍ਤਾਤਿ ਤਸ੍ਮਿਂ ਸੁਨਕ੍ਖਤ੍ਤ ਮਯਾ ਦੇਸਿਤੇ ਧਮ੍ਮੇ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯ ਸਂਵਤ੍ਤਮਾਨੇ ਕਿਂ ਉਤ੍ਤਰਿਮਨੁਸ੍ਸਧਮ੍ਮਾ ਇਦ੍ਧਿਪਾਟਿਹਾਰਿਯਂ ਕਤਂ ਕਰਿਸ੍ਸਤਿ, ਕੋ ਤੇਨ ਕਤੇਨ ਅਤ੍ਥੋ. ਤਸ੍ਮਿਞ੍ਹਿ ਕਤੇਪਿ ਅਕਤੇਪਿ ਮਮ ਸਾਸਨਸ੍ਸ ਪਰਿਹਾਨਿ ਨਤ੍ਥਿ, ਦੇਵਮਨੁਸ੍ਸਾਨਞ੍ਹਿ ਅਮਤਨਿਬ੍ਬਾਨਸਮ੍ਪਾਪਨਤ੍ਥਾਯ ਅਹਂ ਪਾਰਮਿਯੋ ਪੂਰੇਸਿਂ, ਨ ਪਾਟਿਹਾਰਿਯਕਰਣਤ੍ਥਾਯਾਤਿ ਪਾਟਿਹਾਰਿਯਸ੍ਸ ਨਿਰਤ੍ਥਕਤਂ ਦਸ੍ਸੇਤ੍ਵਾ ‘‘ਪਸ੍ਸ, ਮੋਘਪੁਰਿਸਾ’’ਤਿ ਦੁਤਿਯਂ ਦੋਸਂ ਆਰੋਪੇਸਿ.

੫. ਅਗ੍ਗਞ੍ਞਨ੍ਤਿ ਲੋਕਪਞ੍ਞਤ੍ਤਿਂ. ‘‘ਇਦਂ ਨਾਮ ਲੋਕਸ੍ਸ ਅਗ੍ਗ’’ਨ੍ਤਿ ਏਵਂ ਜਾਨਿਤਬ੍ਬਮ੍ਪਿ ਅਗ੍ਗਂ ਮਰਿਯਾਦਂ ਨ ਤਂ ਪਞ੍ਞਪੇਤੀਤਿ ਵਦਤਿ. ਸੇਸਮੇਤ੍ਥ ਅਨਨ੍ਤਰਵਾਦਾਨੁਸਾਰੇਨੇਵ ਵੇਦਿਤਬ੍ਬਂ.

੬. ਅਨੇਕਪਰਿਯਾਯੇਨ ਖੋਤਿ ਇਦਂ ਕਸ੍ਮਾ ਆਰਦ੍ਧਂ. ਸੁਨਕ੍ਖਤ੍ਤੋ ਕਿਰ ‘‘ਭਗਵਤੋ ਗੁਣਂ ਮਕ੍ਖੇਸ੍ਸਾਮਿ, ‘‘ਦੋਸਂ ਪਞ੍ਞਪੇਸ੍ਸਾਮੀ’’ਤਿ ਏਤ੍ਤਕਂ ਵਿਪ੍ਪਲਪਿਤ੍ਵਾ ਭਗਵਤੋ ਕਥਂ ਸੁਣਨ੍ਤੋ ਅਪ੍ਪਤਿਟ੍ਠੋ ਨਿਰਵੋ ਅਟ੍ਠਾਸਿ.

ਅਥ ਭਗਵਾ – ‘‘ਸੁਨਕ੍ਖਤ੍ਤ, ਏਵਂ ਤ੍ਵਂ ਮਕ੍ਖਿਭਾਵੇ ਠਿਤੋ ਸਯਮੇਵ ਗਰਹਂ ਪਾਪੁਣਿਸ੍ਸਸੀ’’ਤਿ ਮਕ੍ਖਿਭਾਵੇ ਆਦੀਨਵਦਸ੍ਸਨਤ੍ਥਂ ਅਨੇਕਪਰਿਯਾਯੇਨਾਤਿਆਦਿਮਾਹ. ਤਤ੍ਥ ਅਨੇਕਪਰਿਯਾਯੇਨਾਤਿ ਅਨੇਕਕਾਰਣੇਨ. ਵਜ੍ਜਿਗਾਮੇਤਿ ਵਜ੍ਜਿਰਾਜਾਨਂ ਗਾਮੇ, ਵੇਸਾਲੀਨਗਰੇ ਨੋ ਵਿਸਹੀਤਿ ਨਾਸਕ੍ਖਿ. ਸੋ ਅਵਿਸਹਨ੍ਤੋਤਿ ਸੋ ਸੁਨਕ੍ਖਤ੍ਤੋ ਯਸ੍ਸ ਪੁਬ੍ਬੇ ਤਿਣ੍ਣਂ ਰਤਨਾਨਂ ਵਣ੍ਣਂ ਕਥੇਨ੍ਤਸ੍ਸ ਮੁਖਂ ਨਪ੍ਪਹੋਤਿ, ਸੋ ਦਾਨਿ ਤੇਨੇਵ ਮੁਖੇਨ ਅਵਣ੍ਣਂ ਕਥੇਤਿ, ਅਦ੍ਧਾ ਅਵਿਸਹਨ੍ਤੋ ਅਸਕ੍ਕੋਨ੍ਤੋ ਬ੍ਰਹ੍ਮਚਰਿਯਂ ਚਰਿਤੁਂ ਅਤ੍ਤਨੋ ਬਾਲਤਾਯ ਅਵਣ੍ਣਂ ਕਥੇਤ੍ਵਾ ਹੀਨਾਯਾਵਤ੍ਤੋ. ਬੁਦ੍ਧੋ ਪਨ ਸੁਬੁਦ੍ਧੋਵ, ਧਮ੍ਮੋ ਸ੍ਵਾਕ੍ਖਾਤੋਵ, ਸਙ੍ਘੋ ਸੁਪ੍ਪਟਿਪਨ੍ਨੋਵ. ਏਵਂ ਤੀਣਿ ਰਤਨਾਨਿ ਥੋਮੇਨ੍ਤਾ ਮਨੁਸ੍ਸਾ ਤੁਯ੍ਹੇਵ ਦੋਸਂ ਦਸ੍ਸੇਸ੍ਸਨ੍ਤੀਤਿ. ਇਤਿ ਖੋ ਤੇਤਿ ਏਵਂ ਖੋ ਤੇ, ਸੁਨਕ੍ਖਤ੍ਤ, ਵਤ੍ਤਾਰੋ ਭਵਿਸ੍ਸਨ੍ਤਿ. ਤਤੋ ਏਵਂ ਦੋਸੇ ਉਪ੍ਪਨ੍ਨੇ ਸਤ੍ਥਾ ਅਤੀਤਾਨਾਗਤੇ ਅਪ੍ਪਟਿਹਤਞਾਣੋ, ਮਯ੍ਹਂ ਏਵਂ ਦੋਸੋ ਉਪ੍ਪਜ੍ਜਿਸ੍ਸਤੀਤਿ ਜਾਨਨ੍ਤੋਪਿ ਪੁਰੇਤਰਂ ਨ ਕਥੇਸੀਤਿ ਵਤ੍ਤੁਂ ਨ ਲਚ੍ਛਸੀਤਿ ਦਸ੍ਸੇਤਿ. ਅਪਕ੍ਕਮੇਵਾਤਿ ਅਪਕ੍ਕਮਿਯੇਵ, ਅਪਕ੍ਕਨ੍ਤੋ ਵਾ ਚੁਤੋਤਿ ਅਤ੍ਥੋ. ਯਥਾ ਤਂ ਆਪਾਯਿਕੋਤਿ ਯਥਾ ਅਪਾਯੇ ਨਿਬ੍ਬਤ੍ਤਨਾਰਹੋ ਸਤ੍ਤੋ ਅਪਕ੍ਕਮੇਯ੍ਯ, ਏਵਮੇਵ ਅਪਕ੍ਕਮੀਤਿ ਅਤ੍ਥੋ.

ਕੋਰਕ੍ਖਤ੍ਤਿਯਵਤ੍ਥੁਵਣ੍ਣਨਾ

੭. ਏਕਮਿਦਾਹਨ੍ਤਿ ਇਮਿਨਾ ਕਿਂ ਦਸ੍ਸੇਤਿ? ਇਦਂ ਸੁਤ੍ਤਂ ਦ੍ਵੀਹਿ ਪਦੇਹਿ ਆਬਦ੍ਧਂ ਇਦ੍ਧਿਪਾਟਿਹਾਰਿਯਂ ਨ ਕਰੋਤੀਤਿ ਚ ਅਗ੍ਗਞ੍ਞਂ ਨ ਪਞ੍ਞਪੇਤੀਤਿ ਚ. ਤਤ੍ਥ ‘‘ਅਗ੍ਗਞ੍ਞਂ ਨ ਪਞ੍ਞਪੇਤੀ’’ਤਿ ਇਦਂ ਪਦਂ ਸੁਤ੍ਤਪਰਿਯੋਸਾਨੇ ਦਸ੍ਸੇਸ੍ਸਤਿ. ‘‘ਪਾਟਿਹਾਰਿਯਂ ਨ ਕਰੋਤੀ’’ਤਿ ਇਮਸ੍ਸ ਪਨ ਪਦਸ੍ਸ ਅਨੁਸਨ੍ਧਿਦਸ੍ਸਨਵਸੇਨ ਅਯਂ ਦੇਸਨਾ ਆਰਦ੍ਧਾ.

ਤਤ੍ਥ ਏਕਮਿਦਾਹਨ੍ਤਿ ਏਕਸ੍ਮਿਂ ਅਹਂ. ਸਮਯਨ੍ਤਿ ਸਮਯੇ, ਏਕਸ੍ਮਿਂ ਕਾਲੇ ਅਹਨ੍ਤਿ ਅਤ੍ਥੋ. ਥੂਲੂਸੂਤਿ ਥੂਲੂ ਨਾਮ ਜਨਪਦੋ, ਤਤ੍ਥ ਵਿਹਰਾਮਿ. ਉਤ੍ਤਰਕਾ ਨਾਮਾਤਿ ਇਤ੍ਥਿਲਿਙ੍ਗਵਸੇਨ ਉਤ੍ਤਰਕਾਤਿ ਏਵਂਨਾਮਕੋ ਥੂਲੂਨਂ ਜਨਪਦਸ੍ਸ ਨਿਗਮੋ, ਤਂ ਨਿਗਮਂ ਗੋਚਰਗਾਮਂ ਕਤ੍ਵਾਤਿ ਅਤ੍ਥੋ. ਅਚੇਲੋਤਿ ਨਗ੍ਗੋ. ਕੋਰਕ੍ਖਤ੍ਤਿਯੋਤਿ ਅਨ੍ਤੋਵਙ੍ਕਪਾਦੋ ਖਤ੍ਤਿਯੋ. ਕੁਕ੍ਕੁਰਵਤਿਕੋਤਿ ਸਮਾਦਿਨ੍ਨਕੁਕ੍ਕੁਰਵਤੋ ਸੁਨਖੋ ਵਿਯ ਘਾਯਿਤ੍ਵਾ ਖਾਦਤਿ, ਉਦ੍ਧਨਨ੍ਤਰੇ ਨਿਪਜ੍ਜਤਿ, ਅਞ੍ਞਮ੍ਪਿ ਸੁਨਖਕਿਰਿਯਮੇਵ ਕਰੋਤਿ. ਚਤੁਕ੍ਕੁਣ੍ਡਿਕੋਤਿ ਚਤੁਸਙ੍ਘਟ੍ਟਿਤੋ ਦ੍ਵੇ ਜਾਣੂਨਿ ਦ੍ਵੇ ਚ ਕਪ੍ਪਰੇ ਭੂਮਿਯਂ ਠਪੇਤ੍ਵਾ ਵਿਚਰਤਿ. ਛਮਾਨਿਕਿਣ੍ਣਨ੍ਤਿ ਭੂਮਿਯਂ ਨਿਕਿਣ੍ਣਂ ਪਕ੍ਖਿਤ੍ਤਂ ਠਪਿਤਂ. ਭਕ੍ਖਸਨ੍ਤਿ ਭਕ੍ਖਂ ਯਂਕਿਞ੍ਚਿ ਖਾਦਨੀਯਂ ਭੋਜਨੀਯਂ. ਮੁਖੇਨੇਵਾਤਿ ਹਤ੍ਥੇਨ ਅਪਰਾਮਸਿਤ੍ਵਾ ਖਾਦਨੀਯਂ ਮੁਖੇਨੇਵ ਖਾਦਤਿ, ਭੋਜਨੀਯਮ੍ਪਿ ਮੁਖੇਨੇਵ ਭੁਞ੍ਜਤਿ. ਸਾਧੁਰੂਪੋਤਿ ਸੁਨ੍ਦਰਰੂਪੋ. ਅਯਂ ਸਮਣੋਤਿ ਅਯਂ ਅਰਹਤਂ ਸਮਣੋ ਏਕੋਤਿ. ਤਤ੍ਥ ਵਤਾਤਿ ਪਤ੍ਥਨਤ੍ਥੇ ਨਿਪਾਤੋ. ਏਵਂ ਕਿਰਸ੍ਸ ਪਤ੍ਥਨਾ ਅਹੋਸਿ ‘‘ਇਮਿਨਾ ਸਮਣੇਨ ਸਦਿਸੋ ਅਞ੍ਞੋ ਸਮਣੋ ਨਾਮ ਨਤ੍ਥਿ, ਅਯਞ੍ਹਿ ਅਪ੍ਪਿਚ੍ਛਤਾਯ ਵਤ੍ਥਂ ਨ ਨਿਵਾਸੇਤਿ, ‘ਏਸ ਪਪਞ੍ਚੋ’ਤਿ ਮਞ੍ਞਮਾਨੋ ਭਿਕ੍ਖਾਭਾਜਨਮ੍ਪਿ ਨ ਪਰਿਹਰਤਿ, ਛਮਾਨਿਕਿਣ੍ਣਮੇਵ ਖਾਦਤਿ, ਅਯਂ ਸਮਣੋ ਨਾਮ. ਮਯਂ ਪਨ ਕਿਂ ਸਮਣਾ’’ਤਿ? ਏਵਂ ਸਬ੍ਬਞ੍ਞੁਬੁਦ੍ਧਸ੍ਸ ਪਚ੍ਛਤੋ ਚਰਨ੍ਤੋਵ ਇਮਂ ਪਾਪਕਂ ਵਿਤਕ੍ਕਂ ਵਿਤਕ੍ਕੇਸਿ.

ਏਤਦਵੋਚਾਤਿ ਭਗਵਾ ਕਿਰ ਚਿਨ੍ਤੇਸਿ ‘‘ਅਯਂ ਸੁਨਕ੍ਖਤ੍ਤੋ ਪਾਪਜ੍ਝਾਸਯੋ, ਕਿਂ ਨੁ ਇਮਂ ਦਿਸ੍ਵਾ ਚਿਨ੍ਤੇਸੀ’’ਤਿ? ਅਥੇਵਂ ਚਿਨ੍ਤੇਨ੍ਤੋ ਤਸ੍ਸ ਅਜ੍ਝਾਸਯਂ ਵਿਦਿਤ੍ਵਾ ‘‘ਅਯਂ ਮੋਘਪੁਰਿਸੋ ਮਾਦਿਸਸ੍ਸ ਸਬ੍ਬਞ੍ਞੁਨੋ ਪਚ੍ਛਤੋ ਆਗਚ੍ਛਨ੍ਤੋ ਅਚੇਲਂ ਅਰਹਾਤਿ ਮਞ੍ਞਤਿ, ਇਧੇਵ ਦਾਨਾਯਂ ਬਾਲੋ ਨਿਗ੍ਗਹਂ ਅਰਹਤੀ’’ਤਿ ਅਨਿਵਤ੍ਤਿਤ੍ਵਾਵ ਏਤਂ ਤ੍ਵਮ੍ਪਿ ਨਾਮਾਤਿਆਦਿਵਚਨਮਵੋਚ. ਤਤ੍ਥ ਤ੍ਵਮ੍ਪਿ ਨਾਮਾਤਿ ਗਰਹਤ੍ਥੇ ਪਿਕਾਰੋ. ਗਰਹਨ੍ਤੋ ਹਿ ਨਂ ਭਗਵਾ ‘‘ਤ੍ਵਮ੍ਪਿ ਨਾਮਾ’’ਤਿ ਆਹ. ‘‘ਤ੍ਵਮ੍ਪਿ ਨਾਮ ਏਵਂ ਹੀਨਜ੍ਝਾਸਯੋ, ਅਹਂ ਸਮਣੋ ਸਕ੍ਯਪੁਤ੍ਤਿਯੋਤਿ ਏਵਂ ਪਟਿਜਾਨਿਸ੍ਸਸੀ’’ਤਿ ਅਯਞ੍ਹੇਤ੍ਥ ਅਧਿਪ੍ਪਾਯੋ. ਕਿਂ ਪਨ ਮਂ, ਭਨ੍ਤੇਤਿ ਮਯ੍ਹਂ, ਭਨ੍ਤੇ, ਕਿਂ ਗਾਰਯ੍ਹਂ ਦਿਸ੍ਵਾ ਭਗਵਾ ‘‘ਏਵਮਾਹਾ’’ਤਿ ਪੁਚ੍ਛਤਿ. ਅਥਸ੍ਸ ਭਗਵਾ ਆਚਿਕ੍ਖਨ੍ਤੋ ‘‘ਨਨੁ ਤੇ’’ਤਿਆਦਿਮਾਹ. ਮਚ੍ਛਰਾਯਤੀਤਿ ‘‘ਮਾ ਅਞ੍ਞਸ੍ਸ ਅਰਹਤ੍ਤਂ ਹੋਤੂ’’ਤਿ ਕਿਂ ਭਗਵਾ ਏਵਂ ਅਰਹਤ੍ਤਸ੍ਸ ਮਚ੍ਛਰਾਯਤੀਤਿ ਪੁਚ੍ਛਤਿ. ਨ ਖੋ ਅਹਨ੍ਤਿ ਅਹਂ, ਮੋਘਪੁਰਿਸ, ਸਦੇਵਕਸ੍ਸ ਲੋਕਸ੍ਸ ਅਰਹਤ੍ਤਪ੍ਪਟਿਲਾਭਮੇਵ ਪਚ੍ਚਾਸੀਸਾਮਿ, ਏਤਦਤ੍ਥਮੇਵ ਮੇ ਬਹੂਨਿ ਦੁਕ੍ਕਰਾਨਿ ਕਰੋਨ੍ਤੇਨ ਪਾਰਮਿਯੋ ਪੂਰਿਤਾ, ਨ ਖੋ ਅਹਂ, ਮੋਘਪੁਰਿਸ, ਅਰਹਤ੍ਤਸ੍ਸ ਮਚ੍ਛਰਾਯਾਮਿ. ਪਾਪਕਂ ਦਿਟ੍ਠਿਗਤਨ੍ਤਿ ਨ ਅਰਹਨ੍ਤਂ ਅਰਹਾਤਿ, ਅਰਹਨ੍ਤੇ ਚ ਅਨਰਹਨ੍ਤੋਤਿ ਏਵਂ ਤਸ੍ਸ ਦਿਟ੍ਠਿ ਉਪ੍ਪਨ੍ਨਾ. ਤਂ ਸਨ੍ਧਾਯ ‘‘ਪਾਪਕਂ ਦਿਟ੍ਠਿਗਤ’’ਨ੍ਤਿ ਆਹ. ਯਂ ਖੋ ਪਨਾਤਿ ਯਂ ਏਤਂ ਅਚੇਲਂ ਏਵਂ ਮਞ੍ਞਸਿ. ਸਤ੍ਤਮਂ ਦਿਵਸਨ੍ਤਿ ਸਤ੍ਤਮੇ ਦਿਵਸੇ. ਅਲਸਕੇਨਾਤਿ ਅਲਸਕਬ੍ਯਾਧਿਨਾ. ਕਾਲਙ੍ਕਰਿਸ੍ਸਤੀਤਿ ਉਦ੍ਧੁਮਾਤਉਦਰੋ ਮਰਿਸ੍ਸਤਿ.

ਕਾਲਕਞ੍ਚਿਕਾਤਿ ਤੇਸਂ ਅਸੁਰਾਨਂ ਨਾਮਂ. ਤੇਸਂ ਕਿਰ ਤਿਗਾਵੁਤੋ ਅਤ੍ਤਭਾਵੋ ਅਪ੍ਪਮਂਸਲੋਹਿਤੋ ਪੁਰਾਣਪਣ੍ਣਸਦਿਸੋ ਕਕ੍ਕਟਕਾਨਂ ਵਿਯ ਅਕ੍ਖੀਨਿ ਨਿਕ੍ਖਮਿਤ੍ਵਾ ਮਤ੍ਥਕੇ ਤਿਟ੍ਠਨ੍ਤਿ, ਮੁਖਂ ਸੂਚਿਪਾਸਕਸਦਿਸਂ ਮਤ੍ਥਕਸ੍ਮਿਂਯੇਵ ਹੋਤਿ, ਤੇਨ ਓਣਮਿਤ੍ਵਾ ਗੋਚਰਂ ਗਣ੍ਹਨ੍ਤਿ. ਬੀਰਣਤ੍ਥਮ੍ਬਕੇਤਿ ਬੀਰਣਤਿਣਤ੍ਥਮ੍ਬੋ ਤਸ੍ਮਿਂ ਸੁਸਾਨੇ ਅਤ੍ਥਿ, ਤਸ੍ਮਾ ਤਂ ਬੀਰਣਤ੍ਥਮ੍ਬਕਨ੍ਤਿ ਵੁਚ੍ਚਤਿ.

ਤੇਨੁਪਸਙ੍ਕਮੀਤਿ ਭਗਵਤਿ ਏਤ੍ਤਕਂ ਵਤ੍ਵਾ ਤਸ੍ਮਿਂ ਗਾਮੇ ਪਿਣ੍ਡਾਯ ਚਰਿਤ੍ਵਾ ਵਿਹਾਰਂ ਗਤੇ ਵਿਹਾਰਾ ਨਿਕ੍ਖਮਿਤ੍ਵਾ ਉਪਸਙ੍ਕਮਿ. ਯੇਨ ਤ੍ਵਨ੍ਤਿ ਯੇਨ ਕਾਰਣੇਨ ਤ੍ਵਂ. ਯਸ੍ਮਾਪਿ ਭਗਵਤਾ ਬ੍ਯਾਕਤੋ, ਤਸ੍ਮਾਤਿ ਅਤ੍ਥੋ. ਮਤ੍ਤਂ ਮਤ੍ਤਨ੍ਤਿ ਪਮਾਣਯੁਤ੍ਤਂ ਪਮਾਣਯੁਤ੍ਤਂ. ‘‘ਮਨ੍ਤਾ ਮਨ੍ਤਾ’’ਤਿਪਿ ਪਾਠੋ, ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਉਪਪਰਿਕ੍ਖਿਤ੍ਵਾਤਿ ਅਤ੍ਥੋ. ਯਥਾ ਸਮਣਸ੍ਸ ਗੋਤਮਸ੍ਸਾਤਿ ਯਥਾ ਸਮਣਸ੍ਸ ਗੋਤਮਸ੍ਸ ਮਿਚ੍ਛਾ ਵਚਨਂ ਅਸ੍ਸ, ਤਥਾ ਕਰੇਯ੍ਯਾਸੀਤਿ ਆਹ. ਏਵਂ ਵੁਤ੍ਤੇ ਅਚੇਲੋ ਸੁਨਖੋ ਵਿਯ ਉਦ੍ਧਨਟ੍ਠਾਨੇ ਨਿਪਨ੍ਨੋ ਸੀਸਂ ਉਕ੍ਖਿਪਿਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤੋ ਕਿਂ ਕਥੇਸਿ ‘‘ਸਮਣੋ ਨਾਮ ਗੋਤਮੋ ਅਮ੍ਹਾਕਂ ਵੇਰੀ ਵਿਸਭਾਗੋ, ਸਮਣਸ੍ਸ ਗੋਤਮਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਮਯਂ ਸੂਰਿਯੇ ਉਗ੍ਗਤੇ ਖਜ੍ਜੋਪਨਕਾ ਵਿਯ ਜਾਤਾ. ਸਮਣੋ ਗੋਤਮੋ ਅਮ੍ਹੇ, ਏਵਂ ਵਾਚਂ ਵਦੇਯ੍ਯ ਅਞ੍ਞਥਾ ਵਾ. ਵੇਰਿਨੋ ਪਨ ਕਥਾ ਨਾਮ ਤਚ੍ਛਾ ਨ ਹੋਤਿ, ਗਚ੍ਛ ਤ੍ਵਂ ਅਹਮੇਤ੍ਥ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ ਵਤ੍ਵਾ ਪੁਨਦੇਵ ਨਿਪਜ੍ਜਿ.

੮. ਏਕਦ੍ਵੀਹਿਕਾਯਾਤਿ ਏਕਂ ਦ੍ਵੇਤਿ ਵਤ੍ਵਾ ਗਣੇਸਿ. ਯਥਾ ਤਨ੍ਤਿ ਯਥਾ ਅਸਦ੍ਦਹਮਾਨੋ ਕੋਚਿ ਗਣੇਯ੍ਯ, ਏਵਂ ਗਣੇਸਿ. ਏਕਦਿਵਸਞ੍ਚ ਤਿਕ੍ਖਤ੍ਤੁਂ ਉਪਸਙ੍ਕਮਿਤ੍ਵਾ ਏਕੋ ਦਿਵਸੋ ਅਤੀਤੋ, ਦ੍ਵੇ ਦਿਵਸਾ ਅਤੀਤਾਤਿ ਆਰੋਚੇਸਿ. ਸਤ੍ਤਮਂ ਦਿਵਸਨ੍ਤਿ ਸੋ ਕਿਰ ਸੁਨਕ੍ਖਤ੍ਤਸ੍ਸ ਵਚਨਂ ਸੁਤ੍ਵਾ ਸਤ੍ਤਾਹਂ ਨਿਰਾਹਾਰੋਵ ਅਹੋਸਿ. ਅਥਸ੍ਸ ਸਤ੍ਤਮੇ ਦਿਵਸੇ ਏਕੋ ਉਪਟ੍ਠਾਕੋ ‘‘ਅਮ੍ਹਾਕਂ ਕੁਲੂਪਕਸਮਣਸ੍ਸ ਅਜ੍ਜ ਸਤ੍ਤਮੋ ਦਿਵਸੋ ਗੇਹਂ ਅਨਾਗਚ੍ਛਨ੍ਤਸ੍ਸ ਅਫਾਸੁ ਨੁ ਖੋ ਜਾਤ’’ਨ੍ਤਿ ਸੂਕਰਮਂਸਂ ਪਚਾਪੇਤ੍ਵਾ ਭਤ੍ਤਮਾਦਾਯ ਗਨ੍ਤ੍ਵਾ ਪੁਰਤੋ ਭੂਮਿਯਂ ਨਿਕ੍ਖਿਪਿ. ਅਚੇਲੋ ਦਿਸ੍ਵਾ ਚਿਨ੍ਤੇਸਿ ‘‘ਸਮਣਸ੍ਸ ਗੋਤਮਸ੍ਸ ਕਥਾ ਤਚ੍ਛਾ ਵਾ ਅਤਚ੍ਛਾ ਵਾ ਹੋਤੁ, ਆਹਾਰਂ ਪਨ ਖਾਦਿਤ੍ਵਾ ਸੁਹਿਤਸ੍ਸ ਮੇ ਮਰਣਮ੍ਪਿ ਸੁਮਰਣ’’ਨ੍ਤਿ ਦ੍ਵੇ ਹਤ੍ਥੇ ਜਣ੍ਣੁਕਾਨਿ ਚ ਭੂਮਿਯਂ ਠਪੇਤ੍ਵਾ ਕੁਚ੍ਛਿਪੂਰਂ ਭੁਞ੍ਜਿ. ਸੋ ਰਤ੍ਤਿਭਾਗੇ ਜੀਰਾਪੇਤੁਂ ਅਸਕ੍ਕੋਨ੍ਤੋ ਅਲਸਕੇਨ ਕਾਲਮਕਾਸਿ. ਸਚੇਪਿ ਹਿ ਸੋ ‘‘ਨ ਭੁਞ੍ਜੇਯ੍ਯ’’ਨ੍ਤਿ ਚਿਨ੍ਤੇਯ੍ਯ, ਤਥਾਪਿ ਤਂ ਦਿਵਸਂ ਭੁਞ੍ਜਿਤ੍ਵਾ ਅਲਸਕੇਨ ਕਾਲਂ ਕਰੇਯ੍ਯ. ਅਦ੍ਵੇਜ੍ਝਵਚਨਾ ਹਿ ਤਥਾਗਤਾਤਿ.

ਬੀਰਣਤ੍ਥਮ੍ਬਕੇਤਿ ਤਿਤ੍ਥਿਯਾ ਕਿਰ ‘‘ਕਾਲਙ੍ਕਤੋ ਕੋਰਕ੍ਖਤ੍ਤਿਯੋ’’ਤਿ ਸੁਤ੍ਵਾ ਦਿਵਸਾਨਿ ਗਣੇਤ੍ਵਾ ਇਦਂ ਤਾਵ ਸਚ੍ਚਂ ਜਾਤਂ, ਇਦਾਨਿ ਨਂ ਅਞ੍ਞਤ੍ਥ ਛਡ੍ਡੇਤ੍ਵਾ ‘‘ਮੁਸਾਵਾਦੇਨ ਸਮਣਂ ਗੋਤਮਂ ਨਿਗ੍ਗਣ੍ਹਿਸ੍ਸਾਮਾ’’ਤਿ ਗਨ੍ਤ੍ਵਾ ਤਸ੍ਸ ਸਰੀਰਂ ਵਲ੍ਲਿਯਾ ਬਨ੍ਧਿਤ੍ਵਾ ਆਕਡ੍ਢਨ੍ਤਾ ‘‘ਏਤ੍ਥ ਛਡ੍ਡੇਸ੍ਸਾਮ, ਏਤ੍ਥ ਛਡ੍ਡੇਸ੍ਸਾਮਾ’’ਤਿ ਗਚ੍ਛਨ੍ਤਿ. ਗਤਗਤਟ੍ਠਾਨਂ ਅਙ੍ਗਣਮੇਵ ਹੋਤਿ. ਤੇ ਕਡ੍ਢਮਾਨਾ ਬੀਰਣਤ੍ਥਮ੍ਬਕਸੁਸਾਨਂਯੇਵ ਗਨ੍ਤ੍ਵਾ ਸੁਸਾਨਭਾਵਂ ਞਤ੍ਵਾ ‘‘ਅਞ੍ਞਤ੍ਥ ਛਡ੍ਡੇਸ੍ਸਾਮਾ’’ਤਿ ਆਕਡ੍ਢਿਂਸੁ. ਅਥ ਨੇਸਂ ਵਲ੍ਲਿ ਛਿਜ੍ਜਿਤ੍ਥ, ਪਚ੍ਛਾ ਚਾਲੇਤੁਂ ਨਾਸਕ੍ਖਿਂਸੁ. ਤੇ ਤਤੋਵ ਪਕ੍ਕਨ੍ਤਾ. ਤੇਨ ਵੁਤ੍ਤਂ – ‘‘ਬੀਰਣਤ੍ਥਮ੍ਬਕੇ ਸੁਸਾਨੇ ਛਡ੍ਡੇਸੁ’’ਨ੍ਤਿ.

੯. ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਸੋ ਕਿਰ ਚਿਨ੍ਤੇਸਿ ‘‘ਅਵਸੇਸਂ ਤਾਵ ਸਮਣਸ੍ਸ ਗੋਤਮਸ੍ਸ ਵਚਨਂ ਸਮੇਤਿ, ਮਤਸ੍ਸ ਪਨ ਉਟ੍ਠਾਯ ਅਞ੍ਞੇਨ ਸਦ੍ਧਿਂ ਕਥਨਂ ਨਾਮ ਨਤ੍ਥਿ, ਹਨ੍ਦਾਹਂ ਗਨ੍ਤ੍ਵਾ ਪੁਚ੍ਛਾਮਿ. ਸਚੇ ਕਥੇਤਿ, ਸੁਨ੍ਦਰਂ. ਨੋ ਚੇ ਕਥੇਤਿ, ਸਮਣਂ ਗੋਤਮਂ ਮੁਸਾਵਾਦੇਨ ਨਿਗ੍ਗਣ੍ਹਿਸ੍ਸਾਮੀ’’ਤਿ ਇਮਿਨਾ ਕਾਰਣੇਨ ਉਪਸਙ੍ਕਮਿ. ਆਕੋਟੇਸੀਤਿ ਪਹਰਿ. ਜਾਨਾਮਿ ਆਵੁਸੋਤਿ ਮਤਸਰੀਰਂ ਉਟ੍ਠਹਿਤ੍ਵਾ ਕਥੇਤੁਂ ਸਮਤ੍ਥਂ ਨਾਮ ਨਤ੍ਥਿ, ਇਦਂ ਕਥਂ ਕਥੇਸੀਤਿ? ਬੁਦ੍ਧਾਨੁਭਾਵੇਨ. ਭਗਵਾ ਕਿਰ ਕੋਰਕ੍ਖਤ੍ਤਿਯਂ ਅਸੁਰਯੋਨਿਤੋ ਆਨੇਤ੍ਵਾ ਸਰੀਰੇ ਅਧਿਮੋਚੇਤ੍ਵਾ ਕਥਾਪੇਸਿ. ਤਮੇਵ ਵਾ ਸਰੀਰਂ ਕਥਾਪੇਸਿ, ਅਚਿਨ੍ਤੇਯ੍ਯੋ ਹਿ ਬੁਦ੍ਧਵਿਸਯੋ.

੧੦. ਤਥੇਵ ਤਂ ਵਿਪਾਕਨ੍ਤਿ ਤਸ੍ਸ ਵਚਨਸ੍ਸ ਵਿਪਾਕਂ ਤਥੇਵ, ਉਦਾਹੁ ਨੋਤਿ ਲਿਙ੍ਗਵਿਪਲ੍ਲਾਸੋ ਕਤੋ, ਤਥੇਵ ਸੋ ਵਿਪਾਕੋਤਿ ਅਤ੍ਥੋ. ਕੇਚਿ ਪਨ ‘‘ਵਿਪਕ੍ਕ’’ਨ੍ਤਿਪਿ ਪਠਨ੍ਤਿ, ਨਿਬ੍ਬਤ੍ਤਨ੍ਤਿ ਅਤ੍ਥੋ.

ਏਤ੍ਥ ਠਤ੍ਵਾ ਪਾਟਿਹਾਰਿਯਾਨਿ ਸਮਾਨੇਤਬ੍ਬਾਨਿ. ਸਬ੍ਬਾਨੇਵ ਹੇਤਾਨਿ ਪਞ੍ਚ ਪਾਟਿਹਾਰਿਯਾਨਿ ਹੋਨ੍ਤਿ. ‘‘ਸਤ੍ਤਮੇ ਦਿਵਸੇ ਮਰਿਸ੍ਸਤੀ’’ਤਿ ਵੁਤ੍ਤਂ, ਸੋ ਤਥੇਵ ਮਤੋ, ਇਦਂ ਪਠਮਂ ਪਾਟਿਹਾਰਿਯਂ. ‘‘ਅਲਸਕੇਨਾ’’ਤਿ ਵੁਤ੍ਤਂ, ਅਲਸਕੇਨੇਵ ਮਤੋ, ਇਦਂ ਦੁਤਿਯਂ. ‘‘ਕਾਲਕਞ੍ਚਿਕੇਸੁ ਨਿਬ੍ਬਤ੍ਤਿਸ੍ਸਤੀ’’ਤਿ ਵੁਤ੍ਤਂ, ਤਤ੍ਥੇਵ ਨਿਬ੍ਬਤ੍ਤੋ, ਇਦਂ ਤਤਿਯਂ. ‘‘ਬੀਰਣਤ੍ਥਮ੍ਬਕੇ ਸੁਸਾਨੇ ਛਡ੍ਡੇਸ੍ਸਨ੍ਤੀ’’ਤਿ ਵੁਤ੍ਤਂ, ਤਤ੍ਥੇਵ ਛਡ੍ਡਿਤੋ, ਇਦਂ ਚਤੁਤ੍ਥਂ. ‘‘ਨਿਬ੍ਬਤ੍ਤਟ੍ਠਾਨਤੋ ਆਗਨ੍ਤ੍ਵਾ ਸੁਨਕ੍ਖਤ੍ਤੇਨ ਸਦ੍ਧਿਂ ਕਥੇਸ੍ਸਤੀ’’ਤਿ ਵੁਤ੍ਤੋ, ਸੋ ਕਥੇਸਿਯੇਵ, ਇਦਂ ਪਞ੍ਚਮਂ ਪਾਟਿਹਾਰਿਯਂ.

ਅਚੇਲਕਲ਼ਾਰਮਟ੍ਟਕਵਤ੍ਥੁਵਣ੍ਣਨਾ

੧੧. ਕਲ਼ਾਰਮਟ੍ਟਕੋਤਿ ਨਿਕ੍ਖਨ੍ਤਦਨ੍ਤਮਤ੍ਤਕੋ. ਨਾਮਮੇਵ ਵਾ ਤਸ੍ਸੇਤਂ. ਲਾਭਗ੍ਗਪ੍ਪਤ੍ਤੋਤਿ ਲਾਭਗ੍ਗਂ ਪਤ੍ਤੋ, ਅਗ੍ਗਲਾਭਂ ਪਤ੍ਤੋਤਿ ਵੁਤ੍ਤਂ ਹੋਤਿ. ਯਸਗ੍ਗਪ੍ਪਤ੍ਤੋਤਿ ਯਸਗ੍ਗਂ ਅਗ੍ਗਪਰਿਵਾਰਂ ਪਤ੍ਤੋ. ਵਤਪਦਾਨੀਤਿ ਵਤਾਨਿਯੇਵ, ਵਤਕੋਟ੍ਠਾਸਾ ਵਾ. ਸਮਤ੍ਤਾਨੀਤਿ ਗਹਿਤਾਨਿ. ਸਮਾਦਿਨ੍ਨਾਨੀਤਿ ਤਸ੍ਸੇਵ ਵੇਵਚਨਂ. ਪੁਰਤ੍ਥਿਮੇਨ ਵੇਸਾਲਿਨ੍ਤਿ ਵੇਸਾਲਿਤੋ ਅਵਿਦੂਰੇ ਪੁਰਤ੍ਥਿਮਾਯ ਦਿਸਾਯ. ਚੇਤਿਯਨ੍ਤਿ ਯਕ੍ਖਚੇਤਿਯਟ੍ਠਾਨਂ. ਏਸ ਨਯੋ ਸਬ੍ਬਤ੍ਥ.

੧੨. ਯੇਨ ਅਚੇਲਕੋਤਿ ਭਗਵਤੋ ਵਤ੍ਤਂ ਕਤ੍ਵਾ ਯੇਨ ਅਚੇਲੋ ਕਲ਼ਾਰਮਟ੍ਟਕੋ ਤੇਨੁਪਸਙ੍ਕਮਿ. ਪਞ੍ਹਂ ਅਪੁਚ੍ਛੀਤਿ ਗਮ੍ਭੀਰਂ ਤਿਲਕ੍ਖਣਾਹਤਂ ਪਞ੍ਹਂ ਪੁਚ੍ਛਿ. ਨ ਸਮ੍ਪਾਯਾਸੀਤਿ ਨ ਸਮ੍ਮਾ ਞਾਣਗਤਿਯਾ ਪਾਯਾਸਿ, ਅਨ੍ਧੋ ਵਿਯ ਵਿਸਮਟ੍ਠਾਨੇ ਤਤ੍ਥ ਤਤ੍ਥੇਵ ਪਕ੍ਖਲਿ. ਨੇਵ ਆਦਿਂ, ਨ ਪਰਿਯੋਸਾਨਮਦ੍ਦਸ. ਅਥ ਵਾ ‘‘ਨ ਸਮ੍ਪਾਯਾਸੀ’’ਤਿ ਨ ਸਮ੍ਪਾਦੇਸਿ, ਸਮ੍ਪਾਦੇਤ੍ਵਾ ਕਥੇਤੁਂ ਨਾਸਕ੍ਖਿ. ਅਸਮ੍ਪਾਯਨ੍ਤੋਤਿ ਕਬਰਕ੍ਖੀਨਿ ਪਰਿਵਤ੍ਤੇਤ੍ਵਾ ਓਲੋਕੇਨ੍ਤੋ ‘‘ਅਸਿਕ੍ਖਿਤਕਸ੍ਸ ਸਨ੍ਤਿਕੇ ਵੁਟ੍ਠੋਸਿ, ਅਨੋਕਾਸੇਪਿ ਪਬ੍ਬਜਿਤੋ ਪਞ੍ਹਂ ਪੁਚ੍ਛਨ੍ਤੋ ਵਿਚਰਸਿ, ਅਪੇਹਿ ਮਾ ਏਤਸ੍ਮਿਂ ਠਾਨੇ ਅਟ੍ਠਾਸੀ’’ਤਿ ਵਦਨ੍ਤੋ. ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤ੍ਵਾਕਾਸੀਤਿ ਕੁਪ੍ਪਨਾਕਾਰਂ ਕੋਪਂ, ਦੁਸ੍ਸਨਾਕਾਰਂ ਦੋਸਂ, ਅਤੁਟ੍ਠਾਕਾਰਭੂਤਂ ਦੋਮਨਸ੍ਸਸਙ੍ਖਾਤਂ ਅਪ੍ਪਚ੍ਚਯਞ੍ਚ ਪਾਕਟਮਕਾਸਿ. ਆਸਾਦਿਮ੍ਹਸੇਤਿ ਆਸਾਦਿਯਿਮ੍ਹ ਘਟ੍ਟਯਿਮ੍ਹ. ਮਾ ਵਤ ਨੋ ਅਹੋਸੀਤਿ ਅਹੋ ਵਤ ਮੇ ਨ ਭਵੇਯ੍ਯ. ਮਂ ਵਤ ਨੋ ਅਹੋਸੀਤਿਪਿ ਪਾਠੋ. ਤਤ੍ਥ ਮਨ੍ਤਿ ਸਾਮਿਵਚਨਤ੍ਥੇ ਉਪਯੋਗਵਚਨਂ, ਅਹੋਸਿ ਵਤ ਨੁ ਮਮਾਤਿ ਅਤ੍ਥੋ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਖਮਥ ਮੇ, ਭਨ੍ਤੇ’’ਤਿ ਤਂ ਖਮਾਪੇਸਿ. ਸੋਪਿ ਇਤੋ ਪਟ੍ਠਾਯ ਅਞ੍ਞਂ ਕਿਞ੍ਚਿ ਪਞ੍ਹਂ ਨਾਮ ਨ ਪੁਚ੍ਛਿਸ੍ਸਸੀਤਿ. ਆਮ ਨ ਪੁਚ੍ਛਿਸ੍ਸਾਮੀਤਿ. ਯਦਿ ਏਵਂ ਗਚ੍ਛ, ਖਮਾਮਿ ਤੇਤਿ ਤਂ ਉਯ੍ਯੋਜੇਸਿ.

੧੪. ਪਰਿਹਿਤੋਤਿ ਪਰਿਦਹਿਤੋ ਨਿਵਤ੍ਥਵਤ੍ਥੋ. ਸਾਨੁਚਾਰਿਕੋਤਿ ਅਨੁਚਾਰਿਕਾ ਵੁਚ੍ਚਤਿ ਭਰਿਯਾ, ਸਹ ਅਨੁਚਾਰਿਕਾਯ ਸਾਨੁਚਾਰਿਕੋ, ਤਂ ਤਂ ਬ੍ਰਹ੍ਮਚਰਿਯਂ ਪਹਾਯ ਸਭਰਿਯੋਤਿ ਅਤ੍ਥੋ. ਓਦਨਕੁਮ੍ਮਾਸਨ੍ਤਿ ਸੁਰਾਮਂਸਤੋ ਅਤਿਰੇਕਂ ਓਦਨਮ੍ਪਿ ਕੁਮ੍ਮਾਸਮ੍ਪਿ ਭੁਞ੍ਜਮਾਨੋ. ਯਸਾ ਨਿਹੀਨੋਤਿ ਯਂ ਲਾਭਗ੍ਗਯਸਗ੍ਗਂ ਪਤ੍ਤੋ, ਤਤੋ ਪਰਿਹੀਨੋ ਹੁਤ੍ਵਾ. ‘‘ਕਤਂ ਹੋਤਿ ਉਤ੍ਤਰਿਮਨੁਸ੍ਸਧਮ੍ਮਾ ਇਦ੍ਧਿਪਾਟਿਹਾਰਿਯ’’ਨ੍ਤਿ ਇਧ ਸਤ੍ਤਵਤਪਦਾਤਿਕ੍ਕਮਵਸੇਨ ਸਤ੍ਤ ਪਾਟਿਹਾਰਿਯਾਨਿ ਵੇਦਿਤਬ੍ਬਾਨਿ.

ਅਚੇਲਪਾਥਿਕਪੁਤ੍ਤਵਤ੍ਥੁਵਣ੍ਣਨਾ

੧੫. ਪਾਥਿਕਪੁਤ੍ਤੋਤਿ ਪਾਥਿਕਸ੍ਸ ਪੁਤ੍ਤੋ. ਞਾਣਵਾਦੇਨਾਤਿ ਞਾਣਵਾਦੇਨ ਸਦ੍ਧਿਂ. ਉਪਡ੍ਢਪਥਨ੍ਤਿ ਯੋਜਨਂ ਚੇ, ਨੋ ਅਨ੍ਤਰੇ ਭਵੇਯ੍ਯ, ਗੋਤਮੋ ਅਡ੍ਢਯੋਜਨਂ, ਅਹਂ ਅਡ੍ਢਯੋਜਨਂ. ਏਸ ਨਯੋ ਅਡ੍ਢਯੋਜਨਾਦੀਸੁ. ਏਕਪਦਵਾਰਮ੍ਪਿ ਅਤਿਕ੍ਕਮ੍ਮ ਗਚ੍ਛਤੋ ਜਯੋ ਭਵਿਸ੍ਸਤਿ, ਅਨਾਗਚ੍ਛਤੋ ਪਰਾਜਯੋਤਿ. ਤੇ ਤਤ੍ਥਾਤਿ ਤੇ ਮਯਂ ਤਤ੍ਥ ਸਮਾਗਤਟ੍ਠਾਨੇ. ਤਦ੍ਦਿਗੁਣਂ ਤਦ੍ਦਿਗੁਣਾਹਨ੍ਤਿ ਤਤੋ ਤਤੋ ਦਿਗੁਣਂ ਦਿਗੁਣਂ ਅਹਂ ਕਰਿਸ੍ਸਾਮਿ, ਭਗਵਤਾ ਸਦ੍ਧਿਂ ਪਾਟਿਹਾਰਿਯਂ ਕਾਤੁਂ ਅਸਮਤ੍ਥਭਾਵਂ ਜਾਨਨ੍ਤੋਪਿ ‘‘ਉਤ੍ਤਮਪੁਰਿਸੇਨ ਸਦ੍ਧਿਂ ਪਟ੍ਠਪੇਤ੍ਵਾ ਅਸਕ੍ਕੁਣਨ੍ਤਸ੍ਸਾਪਿ ਪਾਸਂਸੋ ਹੋਤੀ’’ਤਿ ਞਤ੍ਵਾ ਏਵਮਾਹ. ਨਗਰਵਾਸਿਨੋਪਿ ਤਂ ਸੁਤ੍ਵਾ ‘‘ਅਸਮਤ੍ਥੋ ਨਾਮ ਏਵਂ ਨ ਗਜ੍ਜਤਿ, ਅਦ੍ਧਾ ਅਯਮ੍ਪਿ ਅਰਹਾ ਭਵਿਸ੍ਸਤੀ’’ਤਿ ਤਸ੍ਸ ਮਹਨ੍ਤਂ ਸਕ੍ਕਾਰਮਕਂਸੁ.

੧੬. ਯੇਨਾਹਂ ਤੇਨੁਪਸਙ੍ਕਮੀਤਿ ‘‘ਸੁਨਕ੍ਖਤ੍ਤੋ ਕਿਰ ਪਾਥਿਕਪੁਤ੍ਤੋ ਏਵਂ ਵਦਤੀ’’ਤਿ ਅਸ੍ਸੋਸਿ. ਅਥਸ੍ਸ ਹੀਨਜ੍ਝਾਸਯਤ੍ਤਾ ਹੀਨਦਸ੍ਸਨਾਯ ਚਿਤ੍ਤਂ ਉਦਪਾਦਿ.

ਸੋ ਭਗਵਤੋ ਵਤ੍ਤਂ ਕਤ੍ਵਾ ਭਗਵਤਿ ਗਨ੍ਧਕੁਟਿਂ ਪਵਿਟ੍ਠੇ ਪਾਥਿਕਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿ ‘‘ਤੁਮ੍ਹੇ ਕਿਰ ਏਵਰੂਪਿਂ ਕਥਂ ਕਥੇਥਾ’’ਤਿ? ‘‘ਆਮ, ਕਥੇਮਾ’’ਤਿ. ਯਦਿ ਏਵਂ ‘‘ਮਾ ਭਾਯਿਤ੍ਥ ਵਿਸ੍ਸਤ੍ਥਾ ਪੁਨਪ੍ਪੁਨਂ ਏਵਂ ਵਦਥ, ਅਹਂ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਕੋ, ਤਸ੍ਸ ਵਿਸਯਂ ਵਿਜਾਨਾਮਿ, ਤੁਮ੍ਹੇਹਿ ਸਦ੍ਧਿਂ ਪਾਟਿਹਾਰਿਯਂ ਕਾਤੁਂ ਨ ਸਕ੍ਖਿਸ੍ਸਤਿ, ਅਹਂ ਸਮਣਸ੍ਸ ਗੋਤਮਸ੍ਸ ਕਥੇਤ੍ਵਾ ਭਯਂ ਉਪ੍ਪਾਦੇਤ੍ਵਾ ਤਂ ਅਞ੍ਞਤੋ ਗਹੇਤ੍ਵਾ ਗਮਿਸ੍ਸਾਮਿ, ਤੁਮ੍ਹੇ ਮਾ ਭਾਯਿਤ੍ਥਾ’’ਤਿ ਤਂ ਅਸ੍ਸਾਸੇਤ੍ਵਾ ਭਗਵਤੋ ਸਨ੍ਤਿਕਂ ਗਤੋ. ਤੇਨ ਵੁਤ੍ਤਂ ‘‘ਯੇਨਾਹਂ ਤੇਨੁਪਸਙ੍ਕਮੀ’’ਤਿ. ਤਂ ਵਾਚਨ੍ਤਿਆਦੀਸੁ ‘‘ਅਹਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀਤਿ ਵਿਚਰਿਂ, ਅਭੂਤਂ ਮੇ ਕਥਿਤਂ ਨਾਹਂ ਬੁਦ੍ਧੋ’’ਤਿ ਵਦਨ੍ਤੋ ਤਂ ਵਾਚਂ ਪਜਹਤਿ ਨਾਮ. ਰਹੋ ਨਿਸੀਦਿਤ੍ਵਾ ਚਿਨ੍ਤਯਮਾਨੋ ‘‘ਅਹਂ ‘ਏਤ੍ਤਕਂ ਕਾਲਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀ’ਤਿ ਵਿਚਰਿਂ, ਇਤੋ ਦਾਨਿ ਪਟ੍ਠਾਯ ਨਾਹਂ ਬੁਦ੍ਧੋ’’ਤਿ ਚਿਨ੍ਤਯਨ੍ਤੋ ਤਂ ਚਿਤ੍ਤਂ ਪਜਹਤਿ ਨਾਮ. ‘‘ਅਹਂ ‘ਏਤ੍ਤਕਂ ਕਾਲਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀ’ਤਿ ਪਾਪਕਂ ਦਿਟ੍ਠਿਂ ਗਹੇਤ੍ਵਾ ਵਿਚਰਿਂ, ਇਤੋ ਦਾਨਿ ਪਟ੍ਠਾਯ ਇਮਂ ਦਿਟ੍ਠਿਂ ਪਜਹਾਮੀ’’ਤਿ ਪਜਹਨ੍ਤੋ ਤਂ ਦਿਟ੍ਠਿਂ ਪਟਿਨਿਸ੍ਸਜ੍ਜਤਿ ਨਾਮ. ਏਵਂ ਅਕਰੋਨ੍ਤੋ ਪਨ ਤਂ ਵਾਚਂ ਅਪ੍ਪਹਾਯ ਤਂ ਚਿਤ੍ਤਂ ਅਪ੍ਪਹਾਯ ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਿਤ੍ਵਾਤਿ ਵੁਚ੍ਚਤਿ. ਵਿਪਤੇਯ੍ਯਾਤਿ ਬਨ੍ਧਨਾ ਮੁਤ੍ਤਤਾਲਪਕ੍ਕਂ ਵਿਯ ਗੀਵਤੋ ਪਤੇਯ੍ਯ, ਸਤ੍ਤਧਾ ਵਾ ਪਨ ਫਲੇਯ੍ਯ.

੧੭. ਰਕ੍ਖਤੇਤਨ੍ਤਿ ਰਕ੍ਖਤੁ ਏਤਂ. ਏਕਂਸੇਨਾਤਿ ਨਿਪ੍ਪਰਿਯਾਯੇਨ. ਓਧਾਰਿਤਾਤਿ ਭਾਸਿਤਾ. ਅਚੇਲੋ ਚ, ਭਨ੍ਤੇ, ਪਾਥਿਕਪੁਤ੍ਤੋਤਿ ਏਵਂ ਏਕਂਸੇਨ ਭਗਵਤੋ ਵਾਚਾਯ ਓਧਾਰਿਤਾਯ ਸਚੇ ਅਚੇਲੋ ਪਾਥਿਕਪੁਤ੍ਤੋ. ਵਿਰੂਪਰੂਪੇਨਾਤਿ ਵਿਗਤਰੂਪੇਨ ਵਿਗਚ੍ਛਿਤਸਭਾਵੇਨ ਰੂਪੇਨ ਅਤ੍ਤਨੋ ਰੂਪਂ ਪਹਾਯ ਅਦਿਸ੍ਸਮਾਨੇਨ ਕਾਯੇਨ. ਸੀਹਬ੍ਯਗ੍ਘਾਦਿਵਸੇਨ ਵਾ ਵਿਵਿਧਰੂਪੇਨ ਸਮ੍ਮੁਖੀਭਾਵਂ ਆਗਚ੍ਛੇਯ੍ਯ. ਤਦਸ੍ਸ ਭਗਵਤੋ ਮੁਸਾਤਿ ਏਵਂ ਸਨ੍ਤੇ ਭਗਵਤੋ ਤਂ ਵਚਨਂ ਮੁਸਾ ਭਵੇਯ੍ਯਾਤਿ ਮੁਸਾਵਾਦੇਨ ਨਿਗ੍ਗਣ੍ਹਾਤਿ. ਠਪੇਤ੍ਵਾ ਕਿਰ ਏਤਂ ਨ ਅਞ੍ਞੇਨ ਭਗਵਾ ਮੁਸਾਵਾਦੇਨ ਨਿਗ੍ਗਹਿਤਪੁਬ੍ਬੋਤਿ.

੧੮. ਦ੍ਵਯਗਾਮਿਨੀਤਿ ਸਰੂਪੇਨ ਅਤ੍ਥਿਭਾਵਂ, ਅਤ੍ਥੇਨ ਨਤ੍ਥਿਭਾਵਨ੍ਤਿ ਏਵਂ ਦ੍ਵਯਗਾਮਿਨੀ. ਅਲਿਕਤੁਚ੍ਛਨਿਪ੍ਫਲਵਾਚਾਯ ਏਤਂ ਅਧਿਵਚਨਂ.

੧੯. ਅਜਿਤੋਪਿ ਨਾਮ ਲਿਚ੍ਛਵੀਨਂ ਸੇਨਾਪਤੀਤਿ ਸੋ ਕਿਰ ਭਗਵਤੋ ਉਪਟ੍ਠਾਕੋ ਅਹੋਸਿ, ਸੋ ਕਾਲਮਕਾਸਿ. ਅਥਸ੍ਸ ਸਰੀਰਕਿਚ੍ਚਂ ਕਤ੍ਵਾ ਮਨੁਸ੍ਸਾ ਪਾਥਿਕਪੁਤ੍ਤਂ ਪੁਚ੍ਛਿਂਸੁ ‘‘ਕੁਹਿਂ ਨਿਬ੍ਬਤ੍ਤੋ ਸੇਨਾਪਤੀ’’ਤਿ? ਸੋ ਆਹ – ‘‘ਮਹਾਨਿਰਯੇ ਨਿਬ੍ਬਤ੍ਤੋ’’ਤਿ. ਇਦਞ੍ਚ ਪਨ ਵਤ੍ਵਾ ਪੁਨ ਆਹ ‘‘ਤੁਮ੍ਹਾਕਂ ਸੇਨਾਪਤਿ ਮਮ ਸਨ੍ਤਿਕਂ ਆਗਮ੍ਮ ਅਹਂ ਤੁਮ੍ਹਾਕਂ ਵਚਨਮਕਤ੍ਵਾ ਸਮਣਸ੍ਸ ਗੋਤਮਸ੍ਸ ਵਾਦਂ ਪਤਿਟ੍ਠਪੇਤ੍ਵਾ ਨਿਰਯੇ ਨਿਬ੍ਬਤ੍ਤੋਮ੍ਹੀ’’ਤਿ ਪਰੋਦਿਤ੍ਥਾਤਿ. ਤੇਨੁਪਸਙ੍ਕਮਿ ਦਿਵਾਵਿਹਾਰਾਯਾਤਿ ਏਤ੍ਥ ‘‘ਪਾਟਿਹਾਰਿਯਕਰਣਤ੍ਥਾਯਾ’’ਤਿ ਕਸ੍ਮਾ ਨ ਵਦਤਿ? ਅਭਾਵਾ. ਸਮ੍ਮੁਖੀਭਾਵੋਪਿ ਹਿਸ੍ਸ ਤੇਨ ਸਦ੍ਧਿਂ ਨਤ੍ਥਿ, ਕੁਤੋ ਪਾਟਿਹਾਰਿਯਕਰਣਂ, ਤਸ੍ਮਾ ਤਥਾ ਅਵਤ੍ਵਾ ‘‘ਦਿਵਾਵਿਹਾਰਾਯਾ’’ਤਿ ਆਹ.

ਇਦ੍ਧਿਪਾਟਿਹਾਰਿਯਕਥਾਵਣ੍ਣਨਾ

੨੦. ਗਹਪਤਿਨੇਚਯਿਕਾਤਿ ਗਹਪਤਿ ਮਹਾਸਾਲਾ. ਤੇਸਞ੍ਹਿ ਮਹਾਧਨਧਞ੍ਞਨਿਚਯੋ, ਤਸ੍ਮਾ ‘‘ਨੇਚਯਿਕਾ’’ਤਿ ਵੁਚ੍ਚਨ੍ਤਿ. ਅਨੇਕਸਹਸ੍ਸਾਤਿ ਸਹਸ੍ਸੇਹਿਪਿ ਅਪਰਿਮਾਣਗਣਨਾ. ਏਵਂ ਮਹਤਿਂ ਕਿਰ ਪਰਿਸਂ ਠਪੇਤ੍ਵਾ ਸੁਨਕ੍ਖਤ੍ਤਂ ਅਞ੍ਞੋ ਸਨ੍ਨਿਪਾਤੇਤੁਂ ਸਮਤ੍ਥੋ ਨਤ੍ਥਿ. ਤੇਨੇਵ ਭਗਵਾ ਏਤ੍ਤਕਂ ਕਾਲਂ ਸੁਨਕ੍ਖਤ੍ਤਂ ਗਹੇਤ੍ਵਾ ਵਿਚਰਿ.

੨੧. ਭਯਨ੍ਤਿ ਚਿਤ੍ਤੁਤ੍ਰਾਸਭਯਂ. ਛਮ੍ਭਿਤਤ੍ਤਨ੍ਤਿ ਸਕਲਸਰੀਰਚਲਨਂ. ਲੋਮਹਂਸੋਤਿ ਲੋਮਾਨਂ ਉਦ੍ਧਗ੍ਗਭਾਵੋ. ਸੋ ਕਿਰ ਚਿਨ੍ਤੇਸਿ – ‘‘ਅਹਂ ਅਤਿਮਹਨ੍ਤਂ ਕਥਂ ਕਥੇਤ੍ਵਾ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਪਟਿਵਿਰੁਦ੍ਧੋ, ਮਯ੍ਹਂ ਖੋ ਪਨਬ੍ਭਨ੍ਤਰੇ ਅਰਹਤ੍ਤਂ ਵਾ ਪਾਟਿਹਾਰਿਯਕਰਣਹੇਤੁ ਵਾ ਨਤ੍ਥਿ, ਸਮਣੋ ਪਨ ਗੋਤਮੋ ਪਾਟਿਹਾਰਿਯਂ ਕਰਿਸ੍ਸਤਿ, ਅਥਸ੍ਸ ਪਾਟਿਹਾਰਿਯਂ ਦਿਸ੍ਵਾ ਮਹਾਜਨੋ ‘ਤ੍ਵਂ ਦਾਨਿ ਪਾਟਿਹਾਰਿਯਂ ਕਾਤੁਂ ਅਸਕ੍ਕੋਨ੍ਤੋ ਕਸ੍ਮਾ ਅਤ੍ਤਨੋ ਪਮਾਣਮਜਾਨਿਤ੍ਵਾ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਪਟਿਮਲ੍ਲੋ ਹੁਤ੍ਵਾ ਗਜ੍ਜਸੀ’ਤਿ ਕਟ੍ਠਲੇਡ੍ਡੁਦਣ੍ਡਾਦੀਹਿ ਵਿਹੇਠੇਸ੍ਸਤੀ’’ਤਿ. ਤੇਨਸ੍ਸ ਮਹਾਜਨਸਨ੍ਨਿਪਾਤਞ੍ਚੇਵ ਤੇਨ ਭਗਵਤੋ ਚ ਆਗਮਨਂ ਸੁਤ੍ਵਾ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ ਉਦਪਾਦਿ. ਸੋ ਤਤੋ ਦੁਕ੍ਖਾ ਮੁਚ੍ਚਿਤੁਕਾਮੋ ਤਿਨ੍ਦੁਕਖਾਣੁਕਪਰਿਬ੍ਬਾਜਕਾਰਾਮਂ ਅਗਮਾਸਿ. ਤਮਤ੍ਥਂ ਦਸ੍ਸੇਤੁਂ ਅਥ ਖੋ ਭਗਵਾਤਿਆਦਿਮਾਹ. ਤਤ੍ਥ ਉਪਸਙ੍ਕਮੀਤਿ ਨ ਕੇਵਲਂ ਉਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਨ ਦੂਰਂ ਅਡ੍ਢਯੋਜਨਨ੍ਤਰਂ ਪਰਿਬ੍ਬਾਜਕਾਰਾਮਂ ਪਵਿਟ੍ਠੋ. ਤਤ੍ਥਪਿ ਚਿਤ੍ਤਸ੍ਸਾਦਂ ਅਲਭਮਾਨੋ ਅਨ੍ਤਨ੍ਤੇਨ ਆਵਿਜ੍ਝਿਤ੍ਵਾ ਆਰਾਮਪਚ੍ਚਨ੍ਤੇ ਏਕਂ ਗਹਨਟ੍ਠਾਨਂ ਉਪਧਾਰੇਤ੍ਵਾ ਪਾਸਾਣਫਲਕੇ ਨਿਸੀਦਿ. ਅਥ ਭਗਵਾ ਚਿਨ੍ਤੇਸਿ – ‘‘ਸਚੇ ਅਯਂ ਬਾਲੋ ਕਸ੍ਸਚਿਦੇਵ ਕਥਂ ਗਹੇਤ੍ਵਾ ਇਧਾਗਚ੍ਛੇਯ੍ਯ, ਮਾ ਨਸ੍ਸਤੁ ਬਾਲੋ’’ਤਿ ‘‘ਨਿਸਿਨ੍ਨਪਾਸਾਣਫਲਕਂ ਤਸ੍ਸ ਸਰੀਰੇ ਅਲ੍ਲੀਨਂ ਹੋਤੂ’’ਤਿ ਅਧਿਟ੍ਠਾਸਿ. ਸਹ ਅਧਿਟ੍ਠਾਨਚਿਤ੍ਤੇਨ ਤਂ ਤਸ੍ਸ ਸਰੀਰੇ ਅਲ੍ਲੀਯਿ. ਸੋ ਮਹਾਅਦ੍ਦੁਬਨ੍ਧਨਬਦ੍ਧੋ ਵਿਯ ਛਿਨ੍ਨਪਾਦੋ ਵਿਯ ਚ ਅਹੋਸਿ.

ਅਸ੍ਸੋਸੀਤਿ ਇਤੋ ਚਿਤੋ ਚ ਪਾਥਿਕਪੁਤ੍ਤਂ ਪਰਿਯੇਸਮਾਨਾ ਪਰਿਸਾ ਤਸ੍ਸ ਅਨੁਪਦਂ ਗਨ੍ਤ੍ਵਾ ਨਿਸਿਨ੍ਨਟ੍ਠਾਨਂ ਞਤ੍ਵਾ ਆਗਤੇਨ ਅਞ੍ਞਤਰੇਨ ਪੁਰਿਸੇਨ ‘‘ਤੁਮ੍ਹੇ ਕਂ ਪਰਿਯੇਸਥਾ’’ਤਿ ਵੁਤ੍ਤੇ ਪਾਥਿਕਪੁਤ੍ਤਨ੍ਤਿ. ਸੋ ‘‘ਤਿਨ੍ਦੁਕਖਾਣੁਕਪਰਿਬ੍ਬਾਜਕਾਰਾਮੇ ਨਿਸਿਨ੍ਨੋ’’ਤਿ ਵੁਤ੍ਤਵਚਨੇਨ ਅਸ੍ਸੋਸਿ.

੨੨. ਸਂਸਪ੍ਪਤੀਤਿ ਓਸੀਦਤਿ. ਤਤ੍ਥੇਵ ਸਞ੍ਚਰਤਿ. ਪਾਵਲ਼ਾ ਵੁਚ੍ਚਤਿ ਆਨਿਸਦਟ੍ਠਿਕਾ.

੨੩. ਪਰਾਭੂਤਰੂਪੋਤਿ ਪਰਾਜਿਤਰੂਪੋ, ਵਿਨਟ੍ਠਰੂਪੋ ਵਾ.

੨੫. ਗੋਯੁਗੇਹੀਤਿ ਗੋਯੁਤ੍ਤੇਹਿ ਸਤਮਤ੍ਤੇਹਿ ਵਾ ਸਹਸ੍ਸਮਤ੍ਤੇਹਿ ਵਾ ਯੁਗੇਹਿ. ਆਵਿਞ੍ਛੇਯ੍ਯਾਮਾਤਿ ਆਕਡ੍ਢੇਯ੍ਯਾਮ. ਛਿਜ੍ਜੇਯ੍ਯੁਨ੍ਤਿ ਛਿਨ੍ਦੇਯ੍ਯੁਂ. ਪਾਥਿਕਪੁਤ੍ਤੋ ਵਾ ਬਨ੍ਧਟ੍ਠਾਨੇ ਛਿਜ੍ਜੇਯ੍ਯ.

੨੬. ਦਾਰੁਪਤ੍ਤਿਕਨ੍ਤੇਵਾਸੀਤਿ ਦਾਰੁਪਤ੍ਤਿਕਸ੍ਸ ਅਨ੍ਤੇਵਾਸੀ. ਤਸ੍ਸ ਕਿਰ ਏਤਦਹੋਸਿ ‘‘ਤਿਟ੍ਠਤੁ ਤਾਵ ਪਾਟਿਹਾਰਿਯਂ, ਸਮਣੋ ਗੋਤਮੋ ‘ਅਚੇਲੋ ਪਾਥਿਕਪੁਤ੍ਤੋ ਆਸਨਾਪਿ ਨ ਵੁਟ੍ਠਹਿਸ੍ਸਤੀ’ਤਿ ਆਹ. ਹਨ੍ਦਾਹਂ ਗਨ੍ਤ੍ਵਾ ਯੇਨ ਕੇਨਚਿ ਉਪਾਯੇਨ ਤਂ ਆਸਨਾ ਵੁਟ੍ਠਾਪੇਮਿ. ਏਤ੍ਤਾਵਤਾ ਚ ਸਮਣਸ੍ਸ ਗੋਤਮਸ੍ਸ ਪਰਾਜਯੋ ਭਵਿਸ੍ਸਤੀ’’ਤਿ. ਤਸ੍ਮਾ ਏਵਮਾਹ.

੨੭. ਸੀਹਸ੍ਸਾਤਿ ਚਤ੍ਤਾਰੋ ਸੀਹਾ ਤਿਣਸੀਹੋ ਚ ਕਾਲ਼ਸੀਹੋ ਚ ਪਣ੍ਡੁਸੀਹੋ ਚ ਕੇਸਰਸੀਹੋ ਚ. ਤੇਸਂ ਚਤੁਨ੍ਨਂ ਸੀਹਾਨਂ ਕੇਸਰਸੀਹੋ ਅਗ੍ਗਤਂ ਗਤੋ, ਸੋ ਇਧਾਧਿਪ੍ਪੇਤੋ. ਮਿਗਰਞ੍ਞੋਤਿ ਸਬ੍ਬਚਤੁਪ੍ਪਦਾਨਂ ਰਞ੍ਞੋ. ਆਸਯਨ੍ਤਿ ਨਿਵਾਸਂ. ਸੀਹਨਾਦਨ੍ਤਿ ਅਭੀਤਨਾਦਂ. ਗੋਚਰਾਯ ਪਕ੍ਕਮੇਯ੍ਯਨ੍ਤਿ ਆਹਾਰਤ੍ਥਾਯ ਪਕ੍ਕਮੇਯ੍ਯਂ. ਵਰਂ ਵਰਨ੍ਤਿ ਉਤ੍ਤਮੁਤ੍ਤਮਂ, ਥੂਲਂ ਥੂਲਨ੍ਤਿ ਅਤ੍ਥੋ. ਮੁਦੁਮਂਸਾਨੀਤਿ ਮੁਦੂਨਿ ਮਂਸਾਨਿ. ‘‘ਮਧੁਮਂਸਾਨੀ’’ਤਿਪਿ ਪਾਠੋ, ਮਧੁਰਮਂਸਾਨੀਤਿ ਅਤ੍ਥੋ. ਅਜ੍ਝੁਪੇਯ੍ਯਨ੍ਤਿ ਉਪਗਚ੍ਛੇਯ੍ਯਂ. ਸੀਹਨਾਦਂ ਨਦਿਤ੍ਵਾਤਿ ਯੇ ਦੁਬ੍ਬਲਾ ਪਾਣਾ, ਤੇ ਪਲਾਯਨ੍ਤੂਤਿ ਅਤ੍ਤਨੋ ਸੂਰਭਾਵਸਨ੍ਨਿਸ੍ਸਿਤੇਨ ਕਾਰੁਞ੍ਞੇਨ ਨਦਿਤ੍ਵਾ.

੨੮. ਵਿਘਾਸਸਂਵਡ੍ਢੋਤਿ ਵਿਘਾਸੇਨ ਸਂਵਡ੍ਢੋ, ਵਿਘਾਸਂ ਭਕ੍ਖਿਤਾ ਤਿਰਿਤ੍ਤਮਂਸਂ ਖਾਦਿਤ੍ਵਾ ਵਡ੍ਢਿਤੋ. ਦਿਤ੍ਤੋਤਿ ਦਪ੍ਪਿਤੋ ਥੂਲਸਰੀਰੋ. ਬਲਵਾਤਿ ਬਲਸਮ੍ਪਨ੍ਨੋ. ਏਤਦਹੋਸੀਤਿ ਕਸ੍ਮਾ ਅਹੋਸਿ? ਅਸ੍ਮਿਮਾਨਦੋਸੇਨ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਏਕਦਿਵਸਂ ਕਿਰ ਸੋ ਸੀਹੋ ਗੋਚਰਤੋ ਨਿਵਤ੍ਤਮਾਨੋ ਤਂ ਸਿਙ੍ਗਾਲਂ ਭਯੇਨ ਪਲਾਯਮਾਨਂ ਦਿਸ੍ਵਾ ਕਾਰੁਞ੍ਞਜਾਤੋ ਹੁਤ੍ਵਾ ‘‘ਵਯਸ, ਮਾ ਭਾਯਿ, ਤਿਟ੍ਠ ਕੋ ਨਾਮ ਤ੍ਵ’’ਨ੍ਤਿ ਆਹ. ਜਮ੍ਬੁਕੋ ਨਾਮਾਹਂ ਸਾਮੀਤਿ. ਵਯਸ, ਜਮ੍ਬੁਕ, ਇਤੋ ਪਟ੍ਠਾਯ ਮਂ ਉਪਟ੍ਠਾਤੁਂ ਸਕ੍ਖਿਸ੍ਸਸੀਤਿ. ਉਪਟ੍ਠਹਿਸ੍ਸਾਮੀਤਿ. ਸੋ ਤਤੋ ਪਟ੍ਠਾਯ ਉਪਟ੍ਠਾਤਿ. ਸੀਹੋ ਗੋਚਰਤੋ ਆਗਚ੍ਛਨ੍ਤੋ ਮਹਨ੍ਤਂ ਮਹਨ੍ਤਂ ਮਂਸਖਣ੍ਡਂ ਆਹਰਤਿ. ਸੋ ਤਂ ਖਾਦਿਤ੍ਵਾ ਅਵਿਦੂਰੇ ਪਾਸਾਣਪਿਟ੍ਠੇ ਵਸਤਿ. ਸੋ ਕਤਿਪਾਹਚ੍ਚਯੇਨੇਵ ਥੂਲਸਰੀਰੋ ਮਹਾਖਨ੍ਧੋ ਜਾਤੋ. ਅਥ ਨਂ ਸੀਹੋ ਅਵੋਚ – ‘‘ਵਯਸ, ਜਮ੍ਬੁਕ, ਮਮ ਵਿਜਮ੍ਭਨਕਾਲੇ ਅਵਿਦੂਰੇ ਠਤ੍ਵਾ ‘ਵਿਰੋਚ ਸਾਮੀ’ਤਿ ਵਤ੍ਤੁਂ ਸਕ੍ਖਿਸ੍ਸਸੀ’’ਤਿ. ਸਕ੍ਕੋਮਿ ਸਾਮੀਤਿ. ਸੋ ਤਸ੍ਸ ਵਿਜਮ੍ਭਨਕਾਲੇ ਤਥਾ ਕਰੋਤਿ. ਤੇਨ ਸੀਹਸ੍ਸ ਅਤਿਰੇਕੋ ਅਸ੍ਮਿਮਾਨੋ ਹੋਤਿ.

ਅਥੇਕਦਿਵਸਂ ਜਰਸਿਙ੍ਗਾਲੋ ਉਦਕਸੋਣ੍ਡਿਯਂ ਪਾਨੀਯਂ ਪਿਵਨ੍ਤੋ ਅਤ੍ਤਨੋ ਛਾਯਂ ਓਲੋਕੇਨ੍ਤੋ ਅਦ੍ਦਸ ਅਤ੍ਤਨੋ ਥੂਲਸਰੀਰਤਞ੍ਚੇਵ ਮਹਾਖਨ੍ਧਤਞ੍ਚ. ਦਿਸ੍ਵਾ ‘ਜਰਸਿਙ੍ਗਾਲੋਸ੍ਮੀ’ਤਿ ਮਨਂ ਅਕਤ੍ਵਾ ‘‘ਅਹਮ੍ਪਿ ਸੀਹੋ ਜਾਤੋ’’ਤਿ ਮਞ੍ਞਿ. ਤਤੋ ਅਤ੍ਤਨਾਵ ਅਤ੍ਤਾਨਂ ਏਤਦਵੋਚ – ‘‘ਵਯਸ, ਜਮ੍ਬੁਕ, ਯੁਤ੍ਤਂ ਨਾਮ ਤਵ ਇਮਿਨਾ ਅਤ੍ਤਭਾਵੇਨ ਪਰਸ੍ਸ ਉਚ੍ਛਿਟ੍ਠਮਂਸਂ ਖਾਦਿਤੁਂ, ਕਿਂ ਤ੍ਵਂ ਪੁਰਿਸੋ ਨ ਹੋਸਿ, ਸੀਹਸ੍ਸਾਪਿ ਚਤ੍ਤਾਰੋ ਪਾਦਾ ਦ੍ਵੇ ਦਾਠਾ ਦ੍ਵੇ ਕਣ੍ਣਾ ਏਕਂ ਨਙ੍ਗੁਟ੍ਠਂ, ਤਵਪਿ ਸਬ੍ਬਂ ਤਥੇਵ, ਕੇਵਲਂ ਤਵ ਕੇਸਰਭਾਰਮਤ੍ਤਮੇਵ ਨਤ੍ਥੀ’’ਤਿ. ਤਸ੍ਸੇਵਂ ਚਿਨ੍ਤਯਤੋ ਅਸ੍ਮਿਮਾਨੋ ਵਡ੍ਢਿ. ਅਥਸ੍ਸ ਤੇਨ ਅਸ੍ਮਿਮਾਨਦੋਸੇਨ ਏਤਂ ‘‘ਕੋ ਚਾਹ’’ਨ੍ਤਿਆਦਿ ਮਞ੍ਞਿਤਮਹੋਸਿ. ਤਤ੍ਥ ਕੋ ਚਾਹਨ੍ਤਿ ਅਹਂ ਕੋ, ਸੀਹੋ ਮਿਗਰਾਜਾ ਕੋ, ਨ ਮੇ ਞਾਤਿ, ਨ ਸਾਮਿਕੋ, ਕਿਮਹਂ ਤਸ੍ਸ ਨਿਪਚ੍ਚਕਾਰਂ ਕਰੋਮੀਤਿ ਅਧਿਪ੍ਪਾਯੋ. ਸਿਙ੍ਗਾਲਕਂਯੇਵਾਤਿ ਸਿਙ੍ਗਾਲਰਵਮੇਵ. ਭੇਰਣ੍ਡਕਂਯੇਵਾਤਿ ਅਪ੍ਪਿਯਅਮਨਾਪਸਦ੍ਦਮੇਵ. ਕੇ ਚ ਛਵੇ ਸਿਙ੍ਗਾਲੇਤਿ ਕੋ ਚ ਲਾਮਕੋ ਸਿਙ੍ਗਾਲੋ. ਕੇ ਪਨ ਸੀਹਨਾਦੇਤਿ ਕੋ ਪਨ ਸੀਹਨਾਦੋ ਸਿਙ੍ਗਾਲਸ੍ਸ ਚ ਸੀਹਨਾਦਸ੍ਸ ਚ ਕੋ ਸਮ੍ਬਨ੍ਧੋਤਿ ਅਧਿਪ੍ਪਾਯੋ. ਸੁਗਤਾਪਦਾਨੇਸੂਤਿ ਸੁਗਤਲਕ੍ਖਣੇਸੁ. ਸੁਗਤਸ੍ਸ ਸਾਸਨਸਮ੍ਭੂਤਾਸੁ ਤੀਸੁ ਸਿਕ੍ਖਾਸੁ. ਕਥਂ ਪਨੇਸ ਤਤ੍ਥ ਜੀਵਤਿ? ਏਤਸ੍ਸ ਹਿ ਚਤ੍ਤਾਰੋ ਪਚ੍ਚਯੇ ਦਦਮਾਨਾ ਸੀਲਾਦਿਗੁਣਸਮ੍ਪਨ੍ਨਾਨਂ ਸਮ੍ਬੁਦ੍ਧਾਨਂ ਦੇਮਾਤਿ ਦੇਨ੍ਤਿ, ਤੇਨ ਏਸ ਅਬੁਦ੍ਧੋ ਸਮਾਨੋ ਬੁਦ੍ਧਾਨਂ ਨਿਯਾਮਿਤਪਚ੍ਚਯੇ ਪਰਿਭੁਞ੍ਜਨ੍ਤੋ ਸੁਗਤਾਪਦਾਨੇਸੁ ਜੀਵਤਿ ਨਾਮ. ਸੁਗਤਾਤਿਰਿਤ੍ਤਾਨੀਤਿ ਤੇਸਂ ਕਿਰ ਭੋਜਨਾਨਿ ਦਦਮਾਨਾ ਬੁਦ੍ਧਾਨਞ੍ਚ ਬੁਦ੍ਧਸਾਵਕਾਨਞ੍ਚ ਦਤ੍ਵਾ ਪਚ੍ਛਾ ਅਵਸੇਸਂ ਸਾਯਨ੍ਹਸਮਯੇ ਦੇਨ੍ਤਿ. ਏਵਮੇਸ ਸੁਗਤਾਤਿਰਿਤ੍ਤਾਨਿ ਭੁਞ੍ਜਤਿ ਨਾਮ. ਤਥਾਗਤੇਤਿ ਤਥਾਗਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਆਸਾਦੇਤਬ੍ਬਂ ਘਟ੍ਟਯਿਤਬ੍ਬਂ. ਅਥ ਵਾ ‘‘ਤਥਾਗਤੇ’’ਤਿਆਦੀਨਿ ਉਪਯੋਗਬਹੁਵਚਨਾਨੇਵ. ਆਸਾਦੇਤਬ੍ਬਨ੍ਤਿ ਇਦਮ੍ਪਿ ਬਹੁਵਚਨਮੇਵ ਏਕਵਚਨਂ ਵਿਯ ਵੁਤ੍ਤਂ. ਆਸਾਦਨਾਤਿ ਅਹਂ ਬੁਦ੍ਧੇਨ ਸਦ੍ਧਿਂ ਪਾਟਿਹਾਰਿਯਂ ਕਰਿਸ੍ਸਾਮੀਤਿ ਘਟ੍ਟਨਾ.

੨੯. ਸਮੇਕ੍ਖਿਯਾਨਾਤਿ ਸਮੇਕ੍ਖਿਤ੍ਵਾ, ਮਞ੍ਞਿਤ੍ਵਾਤਿ ਅਤ੍ਥੋ. ਅਮਞ੍ਞੀਤਿ ਪੁਨ ਅਮਞ੍ਞਿਤ੍ਥ ਕੋਤ੍ਥੂਤਿ ਸਿਙ੍ਗਾਲੋ.

੩੦. ਅਤ੍ਤਾਨਂ ਵਿਘਾਸੇ ਸਮੇਕ੍ਖਿਯਾਤਿ ਸੋਣ੍ਡਿਯਂ ਉਚ੍ਛਿਟ੍ਠੋਦਕੇ ਥੂਲਂ ਅਤ੍ਤਭਾਵਂ ਦਿਸ੍ਵਾ. ਯਾਵ ਅਤ੍ਤਾਨਂ ਨ ਪਸ੍ਸਤੀਤਿ ਯਾਵ ਅਹਂ ਸੀਹਵਿਘਾਸਸਂਵਡ੍ਢਿਤਕੋ ਜਰਸਿਙ੍ਗਾਲੋਤਿ ਏਵਂ ਯਥਾਭੂਤਂ ਅਤ੍ਤਾਨਂ ਨ ਪਸ੍ਸਤਿ. ਬ੍ਯਗ੍ਘੋਤਿ ਮਞ੍ਞਤੀਤਿ ਸੀਹੋਹਮਸ੍ਮੀਤਿ ਮਞ੍ਞਤਿ, ਸੀਹੇਨ ਵਾ ਸਮਾਨਬਲੋ ਬ੍ਯਗ੍ਘੋਯੇਵ ਅਹਨ੍ਤਿ ਮਞ੍ਞਤਿ.

੩੧. ਭੁਤ੍ਵਾਨ ਭੇਕੇਤਿ ਆਵਾਟਮਣ੍ਡੂਕੇ ਖਾਦਿਤ੍ਵਾ. ਖਲਮੂਸਿਕਾਯੋਤਿ ਖਲੇਸੁ ਮੂਸਿਕਾਯੋ ਚ ਖਾਦਿਤ੍ਵਾ. ਕਟਸੀਸੁ ਖਿਤ੍ਤਾਨਿ ਚ ਕੋਣਪਾਨੀਤਿ ਸੁਸਾਨੇਸੁ ਛਡ੍ਡਿਤਕੁਣਪਾਨਿ ਚ ਖਾਦਿਤ੍ਵਾ. ਮਹਾਵਨੇਤਿ ਮਹਨ੍ਤੇ ਵਨਸ੍ਮਿਂ. ਸੁਞ੍ਞਵਨੇਤਿ ਤੁਚ੍ਛਵਨੇ. ਵਿਵਡ੍ਢੋਤਿ ਵਡ੍ਢਿਤੋ. ਤਥੇਵ ਸੋ ਸਿਙ੍ਗਾਲਕਂ ਅਨਦੀਤਿ ਏਵਂ ਸਂਵਡ੍ਢੋਪਿ ਮਿਗਰਾਜਾਹਮਸ੍ਮੀਤਿ ਮਞ੍ਞਿਤ੍ਵਾਪਿ ਯਥਾ ਪੁਬ੍ਬੇ ਦੁਬ੍ਬਲਸਿਙ੍ਗਾਲਕਾਲੇ, ਤਥੇਵ ਸੋ ਸਿਙ੍ਗਾਲਰਵਂਯੇਵ ਅਰਵੀਤਿ. ਇਮਾਯਪਿ ਗਾਥਾਯ ਭੇਕਾਦੀਨਿ ਭੁਤ੍ਵਾ ਵਡ੍ਢਿਤਸਿਙ੍ਗਾਲੋ ਵਿਯ ਲਾਭਸਕ੍ਕਾਰਗਿਦ੍ਧੋ ਤ੍ਵਨ੍ਤਿ ਪਾਥਿਕਪੁਤ੍ਤਮੇਵ ਘਟ੍ਟੇਸਿ.

ਨਾਗੇਹੀਤਿ ਹਤ੍ਥੀਹਿ. ਮਹਾਬਨ੍ਧਨਾਤਿ ਮਹਤਾ ਕਿਲੇਸਬਨ੍ਧਨਾ ਮੋਚੇਤ੍ਵਾ. ਮਹਾਵਿਦੁਗ੍ਗਾਤਿ ਮਹਾਵਿਦੁਗ੍ਗਂ ਨਾਮ ਚਤ੍ਤਾਰੋ ਓਘਾ. ਤਤੋ ਉਦ੍ਧਰਿਤ੍ਵਾ ਨਿਬ੍ਬਾਨਥਲੇ ਪਤਿਟ੍ਠਪੇਤ੍ਵਾ.

ਅਗ੍ਗਞ੍ਞਪਞ੍ਞਤ੍ਤਿਕਥਾਵਣ੍ਣਨਾ

੩੬. ਇਤਿ ‘‘ਭਗਵਾ ਏਤ੍ਤਕੇਨ ਕਥਾਮਗ੍ਗੇਨ ਪਾਟਿਹਾਰਿਯਂ ਨ ਕਰੋਤੀ’’ਤਿ ਪਦਸ੍ਸ ਅਨੁਸਨ੍ਧਿਂ ਦਸ੍ਸੇਤ੍ਵਾ ਇਦਾਨਿ ‘‘ਨ ਅਗ੍ਗਞ੍ਞਂ ਪਞ੍ਞਾਪੇਤੀ’’ਤਿ ਇਮਸ੍ਸ ਅਨੁਸਨ੍ਧਿਂ ਦਸ੍ਸੇਨ੍ਤੋ ਅਗ੍ਗਞ੍ਞਞ੍ਚਾਹਨ੍ਤਿ ਦੇਸਨਂ ਆਰਭਿ. ਤਤ੍ਥ ਅਗ੍ਗਞ੍ਞਞ੍ਚਾਹਨ੍ਤਿ ਅਹਂ, ਭਗ੍ਗਵ, ਅਗ੍ਗਞ੍ਞਞ੍ਚ ਪਜਾਨਾਮਿ ਲੋਕੁਪ੍ਪਤ੍ਤਿਚਰਿਯਵਂਸਞ੍ਚ. ਤਞ੍ਚ ਪਜਾਨਾਮੀਤਿ ਨ ਕੇਵਲਂ ਅਗ੍ਗਞ੍ਞਮੇਵ, ਤਞ੍ਚ ਅਗ੍ਗਞ੍ਞਂ ਪਜਾਨਾਮਿ. ਤਤੋ ਚ ਉਤ੍ਤਰਿਤਰਂ ਸੀਲਸਮਾਧਿਤੋ ਪਟ੍ਠਾਯ ਯਾਵ ਸਬ੍ਬਞ੍ਞੁਤਞ੍ਞਾਣਾ ਪਜਾਨਾਮਿ. ਤਞ੍ਚ ਪਜਾਨਂ ਨ ਪਰਾਮਸਾਮੀਤਿ ਤਞ੍ਚ ਪਜਾਨਨ੍ਤੋਪਿ ਅਹਂ ਇਦਂ ਨਾਮ ਪਜਾਨਾਮੀਤਿ ਤਣ੍ਹਾਦਿਟ੍ਠਿਮਾਨਵਸੇਨ ਨ ਪਰਾਮਸਾਮਿ. ਨਤ੍ਥਿ ਤਥਾਗਤਸ੍ਸ ਪਰਾਮਾਸੋਤਿ ਦੀਪੇਤਿ. ਪਚ੍ਚਤ੍ਤਞ੍ਞੇਵ ਨਿਬ੍ਬੁਤਿ ਵਿਦਿਤਾਤਿ ਅਤ੍ਤਨਾਯੇਵ ਅਤ੍ਤਨਿ ਕਿਲੇਸਨਿਬ੍ਬਾਨਂ ਵਿਦਿਤਂ. ਯਦਭਿਜਾਨਂ ਤਥਾਗਤੋਤਿ ਯਂ ਕਿਲੇਸਨਿਬ੍ਬਾਨਂ ਜਾਨਨ੍ਤੋ ਤਥਾਗਤੋ. ਨੋ ਅਨਯਂ ਆਪਜ੍ਜਤੀਤਿ ਅਵਿਦਿਤਨਿਬ੍ਬਾਨਾ ਤਿਤ੍ਥਿਯਾ ਵਿਯ ਅਨਯਂ ਦੁਕ੍ਖਂ ਬ੍ਯਸਨਂ ਨਾਪਜ੍ਜਤਿ.

੩੭. ਇਦਾਨਿ ਯਂ ਤਂ ਤਿਤ੍ਥਿਯਾ ਅਗ੍ਗਞ੍ਞਂ ਪਞ੍ਞਪੇਨ੍ਤਿ, ਤਂ ਦਸ੍ਸੇਨ੍ਤੋ ਸਨ੍ਤਿ ਭਗ੍ਗਵਾਤਿਆਦਿਮਾਹ. ਤਤ੍ਥ ਇਸ੍ਸਰਕੁਤ੍ਤਂ ਬ੍ਰਹ੍ਮਕੁਤ੍ਤਨ੍ਤਿ ਇਸ੍ਸਰਕਤਂ ਬ੍ਰਹ੍ਮਕਤਂ, ਇਸ੍ਸਰਨਿਮ੍ਮਿਤਂ ਬ੍ਰਹ੍ਮਨਿਮ੍ਮਿਤਨ੍ਤਿ ਅਤ੍ਥੋ. ਬ੍ਰਹ੍ਮਾ ਏਵ ਹਿ ਏਤ੍ਥ ਆਧਿਪਚ੍ਚਭਾਵੇਨ ਇਸ੍ਸਰੋਤਿ ਵੇਦਿਤਬ੍ਬੋ. ਆਚਰਿਯਕਨ੍ਤਿ ਆਚਰਿਯਭਾਵਂ ਆਚਰਿਯਵਾਦਂ. ਤਤ੍ਥ ਆਚਰਿਯਵਾਦੋ ਅਗ੍ਗਞ੍ਞਂ. ਅਗ੍ਗਞ੍ਞਂ ਪਨ ਏਤ੍ਥ ਦੇਸਿਤਨ੍ਤਿ ਕਤ੍ਵਾ ਸੋ ਅਗ੍ਗਞ੍ਞਂ ਤ੍ਵੇਵ ਵੁਤ੍ਤੋ. ਕਥਂ ਵਿਹਿਤਕਨ੍ਤਿ ਕੇਨ ਵਿਹਿਤਂ ਕਿਨ੍ਤਿ ਵਿਹਿਤਂ. ਸੇਸਂ ਬ੍ਰਹ੍ਮਜਾਲੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਂ.

੪੧. ਖਿਡ੍ਡਾਪਦੋਸਿਕਨ੍ਤਿ ਖਿਡ੍ਡਾਪਦੋਸਿਕਮੂਲਂ.

੪੭. ਅਸਤਾਤਿ ਅਵਿਜ੍ਜਮਾਨੇਨ, ਅਸਂਵਿਜ੍ਜਮਾਨਟ੍ਠੇਨਾਤਿ ਅਤ੍ਥੋ. ਤੁਚ੍ਛਾਤਿ ਤੁਚ੍ਛੇਨ ਅਨ੍ਤੋਸਾਰਵਿਰਹਿਤੇਨ. ਮੁਸਾਤਿ ਮੁਸਾਵਾਦੇਨ. ਅਭੂਤੇਨਾਤਿ ਭੂਤਤ੍ਥਵਿਰਹਿਤੇਨ. ਅਬ੍ਭਾਚਿਕ੍ਖਨ੍ਤੀਤਿ ਅਭਿਆਚਿਕ੍ਖਨ੍ਤਿ. ਵਿਪਰੀਤੋਤਿ ਵਿਪਰੀਤਸਞ੍ਞੋ ਵਿਪਰੀਤਚਿਤ੍ਤੋ. ਭਿਕ੍ਖਵੋ ਚਾਤਿ ਨ ਕੇਵਲਂ ਸਮਣੋ ਗੋਤਮੋਯੇਵ, ਯੇ ਚ ਅਸ੍ਸ ਅਨੁਸਿਟ੍ਠਿਂ ਕਰੋਨ੍ਤਿ, ਤੇ ਭਿਕ੍ਖੂ ਚ ਵਿਪਰੀਤਾ. ਅਥ ਯਂ ਸਨ੍ਧਾਯ ਵਿਪਰੀਤੋਤਿ ਵਦਨ੍ਤਿ, ਤਂ ਦਸ੍ਸੇਤੁਂ ਸਮਣੋ ਗੋਤਮੋਤਿਆਦਿ ਵੁਤ੍ਤਂ. ਸੁਭਂ ਵਿਮੋਕ੍ਖਨ੍ਤਿ ਵਣ੍ਣਕਸਿਣਂ. ਅਸੁਭਨ੍ਤ੍ਵੇਵਾਤਿ ਸੁਭਞ੍ਚ ਅਸੁਭਞ੍ਚ ਸਬ੍ਬਂ ਅਸੁਭਨ੍ਤਿ ਏਵਂ ਪਜਾਨਾਤਿ. ਸੁਭਨ੍ਤ੍ਵੇਵ ਤਸ੍ਮਿਂ ਸਮਯੇਤਿ ਸੁਭਨ੍ਤਿ ਏਵ ਚ ਤਸ੍ਮਿਂ ਸਮਯੇ ਪਜਾਨਾਤਿ, ਨ ਅਸੁਭਂ. ਭਿਕ੍ਖਵੋ ਚਾਤਿ ਯੇ ਤੇ ਏਵਂ ਵਦਨ੍ਤਿ, ਤੇਸਂ ਭਿਕ੍ਖਵੋ ਚ ਅਨ੍ਤੇਵਾਸਿਕਸਮਣਾ ਵਿਪਰੀਤਾ. ਪਹੋਤੀਤਿ ਸਮਤ੍ਥੋ ਪਟਿਬਲੋ.

੪੮. ਦੁਕ੍ਕਰਂ ਖੋਤਿ ਅਯਂ ਪਰਿਬ੍ਬਾਜਕੋ ਯਦਿਦਂ ‘‘ਏਵਂਪਸਨ੍ਨੋ ਅਹਂ, ਭਨ੍ਤੇ’’ਤਿਆਦਿਮਾਹ, ਤਂ ਸਾਠੇਯ੍ਯੇਨ ਕੋਹਞ੍ਞੇਨ ਆਹ. ਏਵਂ ਕਿਰਸ੍ਸ ਅਹੋਸਿ – ‘‘ਸਮਣੋ ਗੋਤਮੋ ਮਯ੍ਹਂ ਏਤ੍ਤਕਂ ਧਮ੍ਮਕਥਂ ਕਥੇਸਿ, ਤਮਹਂ ਸੁਤ੍ਵਾਪਿ ਪਬ੍ਬਜਿਤੁਂ ਨ ਸਕ੍ਕੋਮਿ, ਮਯਾ ਏਤਸ੍ਸ ਸਾਸਨਂ ਪਟਿਪਨ੍ਨਸਦਿਸੇਨ ਭਵਿਤੁਂ ਵਟ੍ਟਤੀ’’ਤਿ. ਤਤੋ ਸੋ ਸਾਠੇਯ੍ਯੇਨ ਕੋਹਞ੍ਞੇਨ ਏਵਮਾਹ. ਤੇਨਸ੍ਸ ਭਗਵਾ ਮਮ੍ਮਂ ਘਟ੍ਟੇਨ੍ਤੋ ਵਿਯ ‘‘ਦੁਕ੍ਕਰਂ ਖੋ ਏਤਂ, ਭਗ੍ਗਵ ਤਯਾ ਅਞ੍ਞਦਿਟ੍ਠਿਕੇਨਾ’’ਤਿਆਦਿਮਾਹ. ਤਂ ਪੋਟ੍ਠਪਾਦਸੁਤ੍ਤੇ ਵੁਤ੍ਤਤ੍ਥਮੇਵ. ਸਾਧੁਕਮਨੁਰਕ੍ਖਾਤਿ ਸੁਟ੍ਠੁ ਅਨੁਰਕ੍ਖ.

ਇਤਿ ਭਗਵਾ ਪਸਾਦਮਤ੍ਤਾਨੁਰਕ੍ਖਣੇ ਪਰਿਬ੍ਬਾਜਕਂ ਨਿਯੋਜੇਸਿ. ਸੋਪਿ ਏਵਂ ਮਹਨ੍ਤਂ ਸੁਤ੍ਤਨ੍ਤਂ ਸੁਤ੍ਵਾਪਿ ਨਾਸਕ੍ਖਿ ਕਿਲੇਸਕ੍ਖਯਂ ਕਾਤੁਂ. ਦੇਸਨਾ ਪਨਸ੍ਸ ਆਯਤਿਂ ਵਾਸਨਾਯ ਪਚ੍ਚਯੋ ਅਹੋਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਪਾਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਉਦੁਮ੍ਬਰਿਕਸੁਤ੍ਤਵਣ੍ਣਨਾ

ਨਿਗ੍ਰੋਧਪਰਿਬ੍ਬਾਜਕਵਤ੍ਥੁਵਣ੍ਣਨਾ

੪੯. ਏਵਂ ਮੇ ਸੁਤਨ੍ਤਿ ਉਦੁਮ੍ਬਰਿਕਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਪਰਿਬ੍ਬਾਜਕੋਤਿ ਛਨ੍ਨਪਰਿਬ੍ਬਾਜਕੋ. ਉਦੁਮ੍ਬਰਿਕਾਯ ਪਰਿਬ੍ਬਾਜਕਾਰਾਮੇਤਿ ਉਦੁਮ੍ਬਰਿਕਾਯ ਦੇਵਿਯਾ ਸਨ੍ਤਕੇ ਪਰਿਬ੍ਬਾਜਕਾਰਾਮੇ. ਸਨ੍ਧਾਨੋਤਿ ਤਸ੍ਸ ਨਾਮਂ. ਅਯਂ ਪਨ ਮਹਾਨੁਭਾਵੋ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਪਞ੍ਚਨ੍ਨਂ ਉਪਾਸਕਸਤਾਨਂ ਅਗ੍ਗਪੁਰਿਸੋ ਅਨਾਗਾਮੀ ਭਗਵਤਾ ਮਹਾਪਰਿਸਮਜ੍ਝੇ ਏਵਂ ਸਂਵਣ੍ਣਿਤੋ –

‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਨ੍ਧਾਨੋ ਗਹਪਤਿ ਤਥਾਗਤੇ ਨਿਟ੍ਠਙ੍ਗਤੋ ਸਦ੍ਧਮ੍ਮੇ ਇਰਿਯਤਿ. ਕਤਮੇਹਿ ਛਹਿ? ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਧਮ੍ਮੇ ਅਵੇਚ੍ਚਪ੍ਪਸਾਦੇਨ ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਅਰਿਯੇਨ ਸੀਲੇਨ ਅਰਿਯੇਨ ਞਾਣੇਨ ਅਰਿਯਾਯ ਵਿਮੁਤ੍ਤਿਯਾ. ਇਮੇਹਿ ਖੋ, ਭਿਕ੍ਖਵੇ, ਛਹਿ ਅਙ੍ਗੇਹਿ ਸਮਨ੍ਨਾਗਤੋ ਸਨ੍ਧਾਨੋ ਗਹਪਤਿ ਤਥਾਗਤੇ ਨਿਟ੍ਠਙ੍ਗਤੋ ਸਦ੍ਧਮ੍ਮੇ ਇਰਿਯਤੀ’’ਤਿ (ਅ. ਨਿ. ੬.੧੨੦-੧੩੯).

ਸੋ ਪਾਤੋਯੇਵ ਉਪੋਸਥਙ੍ਗਾਨਿ ਅਧਿਟ੍ਠਾਯ ਪੁਬ੍ਬਣ੍ਹਸਮਯੇ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ ਦਤ੍ਵਾ ਭਿਕ੍ਖੂਸੁ ਵਿਹਾਰਂ ਗਤੇਸੁ ਘਰੇ ਖੁਦ੍ਦਕਮਹਲ੍ਲਕਾਨਂ ਦਾਰਕਾਨਂ ਸਦ੍ਦੇਨ ਉਬ੍ਬਾਲ਼੍ਹੋ ਸਤ੍ਥੁ ਸਨ੍ਤਿਕੇ ‘‘ਧਮ੍ਮਂ ਸੋਸ੍ਸਾਮੀ’’ਤਿ ਨਿਕ੍ਖਨ੍ਤੋ. ਤੇਨ ਵੁਤ੍ਤਂ ਦਿਵਾ ਦਿਵਸ੍ਸ ਰਾਜਗਹਾ ਨਿਕ੍ਖਮੀਤਿ. ਤਤ੍ਥ ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਦਿਵਾ ਨਾਮ ਮਜ੍ਝਨ੍ਹਾਤਿਕ੍ਕਮੋ, ਤਸ੍ਮਿਂ ਦਿਵਸਸ੍ਸਾਪਿ ਦਿਵਾਭੂਤੇ ਅਤਿਕ੍ਕਨ੍ਤਮਤ੍ਤੇ ਮਜ੍ਝਨ੍ਹਿਕੇ ਨਿਕ੍ਖਮੀਤਿ ਅਤ੍ਥੋ. ਪਟਿਸਲ੍ਲੀਨੋਤਿ ਤਤੋ ਤਤੋ ਰੂਪਾਦਿਗੋਚਰਤੋ ਚਿਤ੍ਤਂ ਪਟਿਸਂਹਰਿਤ੍ਵਾ ਨਿਲੀਨੋ ਝਾਨਰਤਿਸੇਵਨਾਵਸੇਨ ਏਕੀਭਾਵਂ ਗਤੋ. ਮਨੋਭਾਵਨੀਯਾਨਨ੍ਤਿ ਮਨਵਡ੍ਢਕਾਨਂ. ਯੇ ਚ ਆਵਜ੍ਜਤੋ ਮਨਸਿਕਰੋਤੋ ਚਿਤ੍ਤਂ ਵਿਨੀਵਰਣਂ ਹੋਤਿ ਉਨ੍ਨਮਤਿ ਵਡ੍ਢਤਿ.

੫੦. ਉਨ੍ਨਾਦਿਨਿਯਾਤਿਆਦੀਨਿ ਪੋਟ੍ਠਪਾਦਸੁਤ੍ਤੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਾਨਿ.

੫੧. ਯਾਵਤਾਤਿ ਯਤ੍ਤਕਾ. ਅਯਂ ਤੇਸਂ ਅਞ੍ਞਤਰੋਤਿ ਅਯਂ ਤੇਸਂ ਅਬ੍ਭਨ੍ਤਰੋ ਏਕੋ ਸਾਵਕੋ, ਭਗਵਤੋ ਕਿਰ ਸਾਵਕਾ ਗਿਹਿਅਨਾਗਾਮਿਨੋਯੇਵ ਪਞ੍ਚਸਤਾ ਰਾਜਗਹੇ ਪਟਿਵਸਨ੍ਤਿ. ਯੇਸਂ ਏਕੇਕਸ੍ਸ ਪਞ੍ਚ ਪਞ੍ਚ ਉਪਾਸਕਸਤਾਨਿ ਪਰਿਵਾਰਾ, ਤੇ ਸਨ੍ਧਾਯ ‘‘ਅਯਂ ਤੇਸਂ ਅਞ੍ਞਤਰੋ’’ਤਿ ਆਹ. ਅਪ੍ਪੇਵ ਨਾਮਾਤਿ ਤਸ੍ਸ ਉਪਸਙ੍ਕਮਨਂ ਪਤ੍ਥਯਮਾਨੋ ਆਹ. ਪਤ੍ਥਨਾਕਾਰਣਂ ਪਨ ਪੋਟ੍ਠਪਾਦਸੁਤ੍ਤੇ ਵੁਤ੍ਤਮੇਵ.

੫੨. ਏਤਦਵੋਚਾਤਿ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇਯੇਵ ਤੇਸਂ ਕਥਾਯ ਸੁਤਤ੍ਤਾ ਏਤਂ ਅਞ੍ਞਥਾ ਖੋ ਇਮੇਤਿਆਦਿਵਚਨਂ ਅਵੋਚ. ਤਤ੍ਥ ਅਞ੍ਞਤਿਤ੍ਥਿਯਾਤਿ ਦਸ੍ਸਨੇਨਪਿ ਆਕਪ੍ਪੇਨਪਿ ਕੁਤ੍ਤੇਨਪਿ ਆਚਾਰੇਨਪਿ ਵਿਹਾਰੇਨਪਿ ਇਰਿਯਾਪਥੇਨਪਿ ਅਞ੍ਞੇ ਤਿਤ੍ਥਿਯਾਤਿ ਅਞ੍ਞਤਿਤ੍ਥਿਯਾ. ਸਙ੍ਗਮ੍ਮ ਸਮਾਗਮ੍ਮਾਤਿ ਸਙ੍ਗਨ੍ਤ੍ਵਾ ਸਮਾਗਨ੍ਤ੍ਵਾ ਰਾਸਿ ਹੁਤ੍ਵਾ ਨਿਸਿਨ੍ਨਟ੍ਠਾਨੇ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਵਨਪਤ੍ਥਾਨਿ ਗਾਮੂਪਚਾਰਤੋ ਮੁਤ੍ਤਾਨਿ ਦੂਰਸੇਨਾਸਨਾਨਿ. ਪਨ੍ਤਾਨੀਤਿ ਦੂਰਤਰਾਨਿ ਮਨੁਸ੍ਸੂਪਚਾਰਵਿਰਹਿਤਾਨਿ. ਅਪ੍ਪਸਦ੍ਦਾਨੀਤਿ ਵਿਹਾਰੂਪਚਾਰੇਨ ਗਚ੍ਛਤੋ ਅਦ੍ਧਿਕਜਨਸ੍ਸਪਿ ਸਦ੍ਦੇਨ ਮਨ੍ਦਸਦ੍ਦਾਨਿ. ਅਪ੍ਪਨਿਗ੍ਘੋਸਾਨੀਤਿ ਅਵਿਭਾਵਿਤਤ੍ਥੇਨ ਨਿਗ੍ਘੋਸੇਨ ਮਨ੍ਦਨਿਗ੍ਘੋਸਾਨਿ. ਵਿਜਨਵਾਤਾਨੀਤਿ ਅਨ੍ਤੋਸਞ੍ਚਾਰਿਨੋ ਜਨਸ੍ਸ ਵਾਤੇਨ ਵਿਗਤਵਾਤਾਨਿ. ਮਨੁਸ੍ਸਰਾਹਸ੍ਸੇਯ੍ਯਕਾਨੀਤਿ ਮਨੁਸ੍ਸਾਨਂ ਰਹਸ੍ਸਕਰਣਸ੍ਸ ਯੁਤ੍ਤਾਨਿ ਅਨੁਚ੍ਛਵਿਕਾਨਿ. ਪਟਿਸਲ੍ਲਾਨਸਾਰੁਪ੍ਪਾਨੀਤਿ ਏਕੀਭਾਵਸ੍ਸ ਅਨੁਰੂਪਾਨਿ. ਇਤਿ ਸਨ੍ਧਾਨੋ ਗਹਪਤਿ ‘‘ਅਹੋ ਮਮ ਸਤ੍ਥਾ ਯੋ ਏਵਰੂਪਾਨਿ ਸੇਨਾਸਨਾਨਿ ਪਟਿਸੇਵਤੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਉਤ੍ਤਮਙ੍ਗੇ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਇਮਂ ਉਦਾਨਂ ਉਦਾਨੇਨ੍ਤੋ ਨਿਸੀਦਿ.

੫੩. ਏਵਂ ਵੁਤ੍ਤੇਤਿ ਏਵਂ ਸਨ੍ਧਾਨੇਨ ਗਹਪਤਿਨਾ ਉਦਾਨਂ ਉਦਾਨੇਨ੍ਤੇਨ ਵੁਤ੍ਤੇ. ਨਿਗ੍ਰੋਧੋ ਪਰਿਬ੍ਬਾਜਕੋ ਅਯਂ ਗਹਪਤਿ ਮਮ ਸਨ੍ਤਿਕੇ ਨਿਸਿਨ੍ਨੋਪਿ ਅਤ੍ਤਨੋ ਸਤ੍ਥਾਰਂਯੇਵ ਥੋਮੇਤਿ ਉਕ੍ਕਂਸਤਿ, ਅਮ੍ਹੇ ਪਨ ਅਤ੍ਥੀਤਿਪਿ ਨ ਮਞ੍ਞਤਿ, ਏਤਸ੍ਮਿਂ ਉਪ੍ਪਨ੍ਨਕੋਪਂ ਸਮਣਸ੍ਸ ਗੋਤਮਸ੍ਸ ਉਪਰਿ ਪਾਤੇਸ੍ਸਾਮੀਤਿ ਸਨ੍ਧਾਨਂ ਗਹਪਤਿਂ ਏਤਦਵੋਚ.

ਯਗ੍ਘੇਤਿ ਚੋਦਨਤ੍ਥੇ ਨਿਪਾਤੋ. ਜਾਨੇਯ੍ਯਾਸੀਤਿ ਬੁਜ੍ਝੇਯ੍ਯਾਸਿ ਪਸ੍ਸੇਯ੍ਯਾਸਿ. ਕੇਨ ਸਮਣੋ ਗੋਤਮੋ ਸਦ੍ਧਿਂ ਸਲ੍ਲਪਤੀਤਿ ਕੇਨ ਕਾਰਣੇਨ ਕੇਨ ਪੁਗ੍ਗਲੇਨ ਸਦ੍ਧਿਂ ਸਮਣੋ ਗੋਤਮੋ ਸਲ੍ਲਪਤਿ ਵਦਤਿ ਭਾਸਤਿ. ਕਿਂ ਵੁਤ੍ਤਂ ਹੋਤਿ – ‘‘ਯਦਿ ਕਿਞ੍ਚਿ ਸਲ੍ਲਾਪਕਾਰਣਂ ਭਵੇਯ੍ਯ, ਯਦਿ ਵਾ ਕੋਚਿ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਸਲ੍ਲਾਪਤ੍ਥਿਕੋ ਗਚ੍ਛੇਯ੍ਯ, ਸਲ੍ਲਪੇਯ੍ਯ, ਨ ਪਨ ਕਾਰਣਂ ਅਤ੍ਥਿ, ਨ ਤਸ੍ਸ ਸਨ੍ਤਿਕਂ ਕੋਚਿ ਗਚ੍ਛਤਿ, ਸ੍ਵਾਯਂ ਕੇਨ ਸਮਣੋ ਗੋਤਮੋ ਸਦ੍ਧਿਂ ਸਲ੍ਲਪਤਿ, ਅਸਲ੍ਲਪਨ੍ਤੋ ਕਥਂ ਉਨ੍ਨਾਦੀ ਭਵਿਸ੍ਸਤੀ’’ਤਿ.

ਸਾਕਚ੍ਛਨ੍ਤਿ ਸਂਸਨ੍ਦਨਂ. ਪਞ੍ਞਾਵੇਯ੍ਯਤ੍ਤਿਯਨ੍ਤਿ ਉਤ੍ਤਰਪਚ੍ਚੁਤ੍ਤਰਨਯੇਨ ਞਾਣਬ੍ਯਤ੍ਤਭਾਵਂ. ਸੁਞ੍ਞਾਗਾਰਹਤਾਤਿ ਸੁਞ੍ਞਾਗਾਰੇਸੁ ਨਟ੍ਠਾ, ਸਮਣੇਨ ਹਿ ਗੋਤਮੇਨ ਬੋਧਿਮੂਲੇ ਅਪ੍ਪਮਤ੍ਤਿਕਾ ਪਞ੍ਞਾ ਅਧਿਗਤਾ, ਸਾਪਿਸ੍ਸ ਸੁਞ੍ਞਾਗਾਰੇਸੁ ਏਕਕਸ੍ਸ ਨਿਸੀਦਤੋ ਨਟ੍ਠਾ. ਯਦਿ ਪਨ ਮਯਂ ਵਿਯ ਗਣਸਙ੍ਗਣਿਕਂ ਕਤ੍ਵਾ ਨਿਸੀਦੇਯ੍ਯ, ਨਾਸ੍ਸ ਪਞ੍ਞਾ ਨਸ੍ਸੇਯ੍ਯਾਤਿ ਦਸ੍ਸੇਤਿ. ਅਪਰਿਸਾਵਚਰੋਤਿ ਅਵਿਸਾਰਦਤ੍ਤਾ ਪਰਿਸਂ ਓਤਰਿਤੁਂ ਨ ਸਕ੍ਕੋਤਿ. ਨਾਲਂ ਸਲ੍ਲਾਪਾਯਾਤਿ ਨ ਸਮਤ੍ਥੋ ਸਲ੍ਲਾਪਂ ਕਾਤੁਂ. ਅਨ੍ਤਮਨ੍ਤਾਨੇਵਾਤਿ ਕੋਚਿ ਮਂ ਪਞ੍ਹਂ ਪੁਚ੍ਛੇਯ੍ਯਾਤਿ ਪਞ੍ਹਾਭੀਤੋ ਅਨ੍ਤਮਨ੍ਤਾਨੇਵ ਪਨ੍ਤਸੇਨਾਸਨਾਨਿ ਸੇਵਤਿ. ਗੋਕਾਣਾਤਿ ਏਕਕ੍ਖਿਹਤਾ ਕਾਣਗਾਵੀ. ਸਾ ਕਿਰ ਪਰਿਯਨ੍ਤਚਾਰਿਨੀ ਹੋਤਿ, ਅਨ੍ਤਮਨ੍ਤਾਨੇਵ ਸੇਵਤਿ. ਸਾ ਕਿਰ ਕਾਣਕ੍ਖਿਭਾਵੇਨ ਵਨਨ੍ਤਾਭਿਮੁਖੀਪਿ ਨ ਸਕ੍ਕੋਤਿ ਭਵਿਤੁਂ. ਕਸ੍ਮਾ? ਯਸ੍ਮਾ ਪਤ੍ਤੇਨ ਵਾ ਸਾਖਾਯ ਵਾ ਕਣ੍ਟਕੇਨ ਵਾ ਪਹਾਰਸ੍ਸ ਭਾਯਤਿ. ਗੁਨ੍ਨਂ ਅਭਿਮੁਖੀਪਿ ਨ ਸਕ੍ਕੋਤਿ ਭਵਿਤੁਂ. ਕਸ੍ਮਾ? ਯਸ੍ਮਾ ਸਿਙ੍ਗੇਨ ਵਾ ਕਣ੍ਣੇਨ ਵਾ ਵਾਲੇਨ ਵਾ ਪਹਾਰਸ੍ਸ ਭਾਯਤਿ. ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਸਂਸਾਦੇਯ੍ਯਾਮਾਤਿ ਏਕਪਞ੍ਹਪੁਚ੍ਛਨੇਨੇਵ ਸਂਸਾਦਨਂ ਵਿਸਾਦਮਾਪਨ੍ਨਂ ਕਰੇਯ੍ਯਾਮ. ਤੁਚ੍ਛਕੁਮ੍ਭੀਵ ਨਨ੍ਤਿ ਰਿਤ੍ਤਘਟਂ ਵਿਯ ਨਂ. ਓਰੋਧੇਯ੍ਯਾਮਾਤਿ ਵਿਨਨ੍ਧੇਯ੍ਯਾਮ. ਪੂਰਿਤਘਟੋ ਹਿ ਇਤੋ ਚਿਤੋ ਚ ਪਰਿਵਤ੍ਤੇਤ੍ਵਾ ਨ ਸੁਵਿਨਨ੍ਧਨੀਯੋ ਹੋਤਿ. ਰਿਤ੍ਤਕੋ ਯਥਾਰੁਚਿ ਪਰਿਵਤ੍ਤੇਤ੍ਵਾ ਸਕ੍ਕਾ ਹੋਤਿ ਵਿਨਨ੍ਧਿਤੁਂ, ਏਵਮੇਵ ਹਤਪਞ੍ਞਤਾਯ ਰਿਤ੍ਤਕੁਮ੍ਭਿਸਦਿਸਂ ਸਮਣਂ ਗੋਤਮਂ ਵਾਦਵਿਨਨ੍ਧਨੇਨ ਸਮਨ੍ਤਾ ਵਿਨਨ੍ਧਿਸ੍ਸਾਮਾਤਿ ਵਦਤਿ.

ਇਤਿ ਪਰਿਬ੍ਬਾਜਕੋ ਸਤ੍ਥੁ ਸੁਵਣ੍ਣਵਣ੍ਣਂ ਨਲਾਟਮਣ੍ਡਲਂ ਅਪਸ੍ਸਨ੍ਤੋ ਦਸਬਲਸ੍ਸ ਪਰਮ੍ਮੁਖਾ ਅਤ੍ਤਨੋ ਬਲਂ ਦੀਪੇਨ੍ਤੋ ਅਸਮ੍ਭਿਨ੍ਨਂ ਖਤ੍ਤਿਯਕੁਮਾਰਂ ਜਾਤਿਯਾ ਘਟ੍ਟਯਨ੍ਤੋ ਚਣ੍ਡਾਲਪੁਤ੍ਤੋ ਵਿਯ ਅਸਮ੍ਭਿਨ੍ਨਕੇਸਰਸੀਹਂ ਮਿਗਰਾਜਾਨਂ ਥਾਮੇਨ ਘਟ੍ਟੇਨ੍ਤੋ ਜਰਸਿਙ੍ਗਾਲੋ ਵਿਯ ਚ ਨਾਨਪ੍ਪਕਾਰਂ ਤੁਚ੍ਛਗਜ੍ਜਿਤਂ ਗਜ੍ਜਿ. ਉਪਾਸਕੋਪਿ ਚਿਨ੍ਤੇਸਿ ‘‘ਅਯਂ ਪਰਿਬ੍ਬਾਜਕੋ ਅਤਿ ਵਿਯ ਗਜ੍ਜਤਿ, ਅਵੀਚਿਫੁਸਨਤ੍ਥਾਯ ਪਾਦਂ, ਭਵਗ੍ਗਗ੍ਗਹਣਤ੍ਥਾਯ ਹਤ੍ਥਂ ਪਸਾਰਯਨ੍ਤੋ ਵਿਯ ਨਿਰਤ੍ਥਕਂ ਵਾਯਮਤਿ. ਸਚੇ ਮੇ ਸਤ੍ਥਾ ਇਮਂ ਠਾਨਮਾਗਚ੍ਛੇਯ੍ਯ, ਇਮਸ੍ਸ ਪਰਿਬ੍ਬਾਜਕਸ੍ਸ ਯਾਵ ਭਵਗ੍ਗਾ ਉਸ੍ਸਿਤਂ ਮਾਨਦ੍ਧਜਂ ਠਾਨਸੋਵ ਓਪਾਤੇਯ੍ਯਾ’’ਤਿ.

੫੪. ਭਗਵਾਪਿ ਤੇਸਂ ਤਂ ਕਥਾਸਲ੍ਲਾਪਂ ਅਸ੍ਸੋਸਿਯੇਵ. ਤੇਨ ਵੁਤ੍ਤਂ ‘‘ਅਸ੍ਸੋਸਿ ਖੋ ਇਮਂ ਕਥਾਸਲ੍ਲਾਪ’’ਨ੍ਤਿ.

ਸੁਮਾਗਧਾਯਾਤਿ ਸੁਮਾਗਧਾ ਨਾਮ ਪੋਕ੍ਖਰਣੀ, ਯਸ੍ਸਾ ਤੀਰੇ ਨਿਸਿਨ੍ਨੋ ਅਞ੍ਞਤਰੋ ਪੁਰਿਸੋ ਪਦੁਮਨਾਲ਼ਨ੍ਤਰੇਹਿ ਅਸੁਰਭਵਨਂ ਪਵਿਸਨ੍ਤਂ ਅਸੁਰਸੇਨਂ ਅਦ੍ਦਸ. ਮੋਰਨਿਵਾਪੋਤਿ ਨਿਵਾਪੋ ਵੁਚ੍ਚਤਿ ਭਤ੍ਤਂ, ਯਤ੍ਥ ਮੋਰਾਨਂ ਅਭਯੇਨ ਸਦ੍ਧਿਂ ਨਿਵਾਪੋ ਦਿਨ੍ਨੋ, ਤਂ ਠਾਨਨ੍ਤਿ ਅਤ੍ਥੋ. ਅਬ੍ਭੋਕਾਸੇਤਿ ਅਙ੍ਗਣਟ੍ਠਾਨੇ. ਅਸ੍ਸਾਸਪਤ੍ਤਾਤਿ ਤੁਟ੍ਠਿਪਤ੍ਤਾ ਸੋਮਨਸ੍ਸਪਤ੍ਤਾ. ਅਜ੍ਝਾਸਯਨ੍ਤਿ ਉਤ੍ਤਮਨਿਸ੍ਸਯਭੂਤਂ. ਆਦਿਬ੍ਰਹ੍ਮਚਰਿਯਨ੍ਤਿ ਪੁਰਾਣਬ੍ਰਹ੍ਮਚਰਿਯਸਙ੍ਖਾਤਂ ਅਰਿਯਮਗ੍ਗਂ. ਇਦਂ ਵੁਤ੍ਤਂ ਹੋਤਿ – ‘‘ਕੋ ਨਾਮ ਸੋ, ਭਨ੍ਤੇ, ਧਮ੍ਮੋ ਯੇਨ ਭਗਵਤਾ ਸਾਵਕਾ ਵਿਨੀਤਾ ਅਜ੍ਝਾਸਯਾਦਿਬ੍ਰਹ੍ਮਚਰਿਯਭੂਤਂ ਅਰਿਯਮਗ੍ਗਂ ਪੂਰੇਤ੍ਵਾ ਅਰਹਤ੍ਤਾਧਿਗਮਵਸੇਨ ਅਸ੍ਸਾਸਪਤ੍ਤਾ ਪਟਿਜਾਨਨ੍ਤੀ’’ਤਿ.

ਤਪੋਜਿਗੁਚ੍ਛਾਵਾਦਵਣ੍ਣਨਾ

੫੫. ਵਿਪ੍ਪਕਤਾਤਿ ਮਮਾਗਮਨਪਚ੍ਚਯਾ ਅਨਿਟ੍ਠਿਤਾ, ਵ ਹੁਤ੍ਵਾ ਠਿਤਾ, ਕਥੇਹਿ, ਅਹਮੇਤਂ ਨਿਟ੍ਠਪੇਤ੍ਵਾ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਮੀਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ.

੫੬. ਦੁਜ੍ਜਾਨਂ ਖੋਤਿ ਭਗਵਾ ਪਰਿਬ੍ਬਾਜਕਸ੍ਸ ਵਚਨਂ ਸੁਤ੍ਵਾ ‘‘ਅਯਂ ਪਰਿਬ੍ਬਾਜਕੋ ਮਯਾ ਸਾਵਕਾਨਂ ਦੇਸੇਤਬ੍ਬਂ ਧਮ੍ਮਂ ਤੇਹਿ ਪੂਰੇਤਬ੍ਬਂ ਪਟਿਪਤ੍ਤਿਂ ਪੁਚ੍ਛਤਿ, ਸਚਸ੍ਸਾਹਂ ਆਦਿਤੋਵ ਤਂ ਕਥੇਸ੍ਸਾਮਿ, ਕਥਿਤਮ੍ਪਿ ਨਂ ਨ ਜਾਨਿਸ੍ਸਤਿ, ਅਯਂ ਪਨ ਵੀਰਿਯੇਨ ਪਾਪਜਿਗੁਚ੍ਛਨਵਾਦੋ, ਹਨ੍ਦਾਹਂ ਏਤਸ੍ਸੇਵ ਵਿਸਯੇ ਪਞ੍ਹਂ ਪੁਚ੍ਛਾਪੇਤ੍ਵਾ ਪੁਥੁਸਮਣਬ੍ਰਾਹ੍ਮਣਾਨਂ ਲਦ੍ਧਿਯਾ ਨਿਰਤ੍ਥਕਭਾਵਂ ਦਸ੍ਸੇਮਿ. ਅਥ ਪਚ੍ਛਾ ਇਮਂ ਪਞ੍ਹਂ ਬ੍ਯਾਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦੁਜ੍ਜਾਨਂ ਖੋ ਏਤਨ੍ਤਿਆਦਿਮਾਹ. ਤਤ੍ਥ ਸਕੇ ਆਚਰਿਯਕੇਤਿ ਅਤ੍ਤਨੋ ਆਚਰਿਯਵਾਦੇ. ਅਧਿਜੇਗੁਚ੍ਛੇਤਿ ਵੀਰਿਯੇਨ ਪਾਪਜਿਗੁਚ੍ਛਨਭਾਵੇ. ਕਥਂ ਸਨ੍ਤਾਤਿ ਕਥਂ ਭੂਤਾ. ਤਪੋਜਿਗੁਚ੍ਛਾਤਿ ਵੀਰਿਯੇਨ ਪਾਪਜਿਗੁਚ੍ਛਾ ਪਾਪਵਿਵਜ੍ਜਨਾ. ਪਰਿਪੁਣ੍ਣਾਤਿ ਪਰਿਸੁਦ੍ਧਾ. ਕਥਂ ਅਪਰਿਪੁਣ੍ਣਾਤਿ ਕਥਂ ਅਪਰਿਸੁਦ੍ਧਾ ਹੋਤੀਤਿ ਏਵਂ ਪੁਚ੍ਛਾਤਿ. ਯਤ੍ਰ ਹਿ ਨਾਮਾਤਿ ਯੋ ਨਾਮ.

੫੭. ਅਪ੍ਪਸਦ੍ਦੇ ਕਤ੍ਵਾਤਿ ਨਿਰਵੇ ਅਪ੍ਪਸਦ੍ਦੇ ਕਤ੍ਵਾ. ਸੋ ਕਿਰ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਏਕਂ ਪਞ੍ਹਮ੍ਪਿ ਨ ਕਥੇਤਿ, ਸਲ੍ਲਾਪਕਥਾਪਿਸ੍ਸ ਅਤਿਬਹੁਕਾ ਨਤ੍ਥਿ, ਇਮੇ ਪਨ ਆਦਿਤੋ ਪਟ੍ਠਾਯ ਸਮਣਂ ਗੋਤਮਂ ਅਨੁਵਤ੍ਤਨ੍ਤਿ ਚੇਵ ਪਸਂਸਨ੍ਤਿ ਚ, ਹਨ੍ਦਾਹਂ ਇਮੇ ਨਿਸ੍ਸਦ੍ਦੇ ਕਤ੍ਵਾ ਸਯਂ ਕਥੇਮੀ’’ਤਿ. ਸੋ ਤਥਾ ਅਕਾਸਿ. ਤੇਨ ਵੁਤ੍ਤਂ ‘‘ਅਪ੍ਪਸਦ੍ਦੇ ਕਤ੍ਵਾ’’ਤਿ. ‘‘ਤਪੋਜਿਗੁਚ੍ਛਵਾਦਾ’’ਤਿਆਦੀਸੁ ਤਪੋਜਿਗੁਚ੍ਛਂ ਵਦਾਮ, ਮਨਸਾਪਿ ਤਮੇਵ ਸਾਰਤੋ ਗਹੇਤ੍ਵਾ ਵਿਚਰਾਮ, ਕਾਯੇਨਪਿਮ੍ਹਾ ਤਮੇਵ ਅਲ੍ਲੀਨਾ, ਨਾਨਪ੍ਪਕਾਰਕਂ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ ਵਿਹਰਾਮਾਤਿ ਅਤ੍ਥੋ.

ਉਪਕ੍ਕਿਲੇਸਵਣ੍ਣਨਾ

੫੮. ਤਪਸ੍ਸੀਤਿ ਤਪਨਿਸ੍ਸਿਤਕੋ. ‘‘ਅਚੇਲਕੋ’’ਤਿਆਦੀਨਿ ਸੀਹਨਾਦੇ (ਦੀ. ਨਿ. ਅਟ੍ਠ. ੧.੩੯੩) ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਾਨਿ. ਤਪਂ ਸਮਾਦਿਯਤੀਤਿ ਅਚੇਲਕਭਾਵਾਦਿਕਂ ਤਪਂ ਸਮ੍ਮਾ ਆਦਿਯਤਿ, ਦਲ਼੍ਹਂ ਗਣ੍ਹਾਤਿ. ਅਤ੍ਤਮਨੋ ਹੋਤੀਤਿ ਕੋ ਅਞ੍ਞੋ ਮਯਾ ਸਦਿਸੋ ਇਮਸ੍ਮਿਂ ਤਪੇ ਅਤ੍ਥੀਤਿ ਤੁਟ੍ਠਮਨੋ ਹੋਤਿ. ਪਰਿਪੁਣ੍ਣਸਙ੍ਕਪ੍ਪੋਤਿ ਅਲਮੇਤ੍ਤਾਵਤਾਤਿ ਏਵਂ ਪਰਿਯੋਸਿਤਸਙ੍ਕਪ੍ਪੋ, ਇਦਞ੍ਚ ਤਿਤ੍ਥਿਯਾਨਂ ਵਸੇਨ ਆਗਤਂ. ਸਾਸਨਾਵਚਰੇਨਾਪਿ ਪਨ ਦੀਪੇਤਬ੍ਬਂ. ਏਕਚ੍ਚੋ ਹਿ ਧੁਤਙ੍ਗਂ ਸਮਾਦਿਯਤਿ, ਸੋ ਤੇਨੇਵ ਧੁਤਙ੍ਗੇਨ ਕੋ ਅਞ੍ਞੋ ਮਯਾ ਸਦਿਸੋ ਧੁਤਙ੍ਗਧਰੋਤਿ ਅਤ੍ਤਮਨੋ ਹੋਤਿ ਪਰਿਪੁਣ੍ਣਸਙ੍ਕਪ੍ਪੋ. ਤਪਸ੍ਸਿਨੋ ਉਪਕ੍ਕਿਲੇਸੋ ਹੋਤੀਤਿ ਦੁਵਿਧਸ੍ਸਾਪੇਤਸ੍ਸ ਤਪਸ੍ਸਿਨੋ ਅਯਂ ਉਪਕ੍ਕਿਲੇਸੋ ਹੋਤਿ. ਏਤ੍ਤਾਵਤਾਯਂ ਤਪੋ ਉਪਕ੍ਕਿਲੇਸੋ ਹੋਤੀਤਿ ਵਦਾਮਿ.

ਅਤ੍ਤਾਨੁਕ੍ਕਂਸੇਤੀਤਿ ‘‘ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਅਤ੍ਤਾਨਂ ਉਕ੍ਕਂਸਤਿ ਉਕ੍ਖਿਪਤਿ. ਪਰਂ ਵਮ੍ਭੇਤੀਤਿ ‘‘ਅਯਂ ਨ ਮਾਦਿਸੋ’’ਤਿ ਪਰਂ ਸਂਹਾਰੇਤਿ ਅਵਕ੍ਖਿਪਤਿ.

ਮਜ੍ਜਤੀਤਿ ਮਾਨਮਦਕਰਣੇਨ ਮਜ੍ਜਤਿ. ਮੁਚ੍ਛਤੀਤਿ ਮੁਚ੍ਛਿਤੋ ਹੋਤਿ ਗਧਿਤੋ ਅਜ੍ਝਾਪਨ੍ਨੋ. ਪਮਾਦਮਾਪਜ੍ਜਤੀਤਿ ਏਤਦੇਵ ਸਾਰਨ੍ਤਿ ਪਮਾਦਮਾਪਜ੍ਜਤਿ. ਸਾਸਨੇ ਪਬ੍ਬਜਿਤੋਪਿ ਧੁਤਙ੍ਗਸੁਦ੍ਧਿਕੋ ਹੋਤਿ, ਨ ਕਮ੍ਮਟ੍ਠਾਨਸੁਦ੍ਧਿਕੋ. ਧੁਤਙ੍ਗਮੇਵ ਅਰਹਤ੍ਤਂ ਵਿਯ ਸਾਰਤੋ ਪਚ੍ਚੇਤਿ.

੫੯. ਲਾਭਸਕ੍ਕਾਰਸਿਲੋਕਨ੍ਤਿ ਏਤ੍ਥ ਚਤ੍ਤਾਰੋ ਪਚ੍ਚਯਾ ਲਬ੍ਭਨ੍ਤੀਤਿ ਲਾਭਾ, ਤੇਯੇਵ ਸੁਟ੍ਠੁ ਕਤ੍ਵਾ ਪਟਿਸਙ੍ਖਰਿਤ੍ਵਾ ਲਦ੍ਧਾ ਸਕ੍ਕਾਰੋ, ਵਣ੍ਣਭਣਨਂ ਸਿਲੋਕੋ. ਅਭਿਨਿਬ੍ਬਤ੍ਤੇਤੀਤਿ ਅਚੇਲਕਾਦਿਭਾਵਂ ਤੇਰਸਧੁਤਙ੍ਗਸਮਾਦਾਨਂ ਵਾ ਨਿਸ੍ਸਾਯ ਮਹਾਲਾਭੋ ਉਪ੍ਪਜ੍ਜਤਿ, ਤਸ੍ਮਾ ‘‘ਅਭਿਨਿਬ੍ਬਤ੍ਤੇਤੀ’’ਤਿ ਵੁਤ੍ਤੋ. ਸੇਸਮੇਤ੍ਥ ਪੁਰਿਮਵਾਰਨਯੇਨੇਵ ਦੁਵਿਧਸ੍ਸਾਪਿ ਤਪਸ੍ਸਿਨੋ ਵਸੇਨ ਵੇਦਿਤਬ੍ਬਂ.

੬੦. ਵੋਦਾਸਂ ਆਪਜ੍ਜਤੀਤਿ ਦ੍ਵੇਭਾਗਂ ਆਪਜ੍ਜਤਿ, ਦ੍ਵੇ ਭਾਗੇ ਕਰੋਤਿ. ਖਮਤੀਤਿ ਰੁਚ੍ਚਤਿ. ਨਕ੍ਖਮਤੀਤਿ ਨ ਰੁਚ੍ਚਤਿ. ਸਾਪੇਕ੍ਖੋ ਪਜਹਤੀਤਿ ਸਤਣ੍ਹੋ ਪਜਹਤਿ. ਕਥਂ? ਪਾਤੋਵ ਖੀਰਭਤ੍ਤਂ ਭੁਤ੍ਤੋ ਹੋਤਿ. ਅਥਸ੍ਸ ਮਂਸਭੋਜਨਂ ਉਪਨੇਤਿ. ਤਸ੍ਸ ਏਵਂ ਹੋਤਿ ‘‘ਇਦਾਨਿ ਏਵਰੂਪਂ ਕਦਾ ਲਭਿਸ੍ਸਾਮ, ਸਚੇ ਜਾਨੇਯ੍ਯਾਮ, ਪਾਤੋਵ ਖੀਰਭਤ੍ਤਂ ਨ ਭੁਞ੍ਜੇਯ੍ਯਾਮ, ਕਿਂ ਮਯਾ ਸਕ੍ਕਾ ਕਾਤੁਂ, ਗਚ੍ਛ ਭੋ, ਤ੍ਵਮੇਵ ਭੁਞ੍ਜਾ’’ਤਿ ਜੀਵਿਤਂ ਪਰਿਚ੍ਚਜਨ੍ਤੋ ਵਿਯ ਸਾਪੇਕ੍ਖੋ ਪਜਹਤਿ. ਗਧਿਤੋਤਿ ਗੇਧਜਾਤੋ. ਮੁਚ੍ਛਿਤੋਤਿ ਬਲਵਤਣ੍ਹਾਯ ਮੁਚ੍ਛਿਤੋ ਸਂਮੁਟ੍ਠਸ੍ਸਤੀ ਹੁਤ੍ਵਾ. ਅਜ੍ਝਾਪਨ੍ਨੋਤਿ ਆਮਿਸੇ ਅਤਿਲਗ੍ਗੋ, ‘‘ਭੁਞ੍ਜਿਸ੍ਸਥ, ਆਵੁਸੋ’’ਤਿ ਧਮ੍ਮਨਿਮਨ੍ਤਨਮਤ੍ਤਮ੍ਪਿ ਅਕਤ੍ਵਾ ਮਹਨ੍ਤੇ ਮਹਨ੍ਤੇ ਕਬਲ਼ੇ ਕਰੋਤਿ. ਅਨਾਦੀਨਵਦਸ੍ਸਾਵੀਤਿਆਦੀਨਵਮਤ੍ਤਮ੍ਪਿ ਨ ਪਸ੍ਸਤਿ. ਅਨਿਸ੍ਸਰਣਪਞ੍ਞੋਤਿ ਇਧ ਮਤ੍ਤਞ੍ਞੁਤਾਨਿਸ੍ਸਰਣਪਚ੍ਚਵੇਕ੍ਖਣਪਰਿਭੋਗਮਤ੍ਤਮ੍ਪਿ ਨ ਕਰੋਤਿ. ਲਾਭਸਕ੍ਕਾਰਸਿਲੋਕਨਿਕਨ੍ਤਿਹੇਤੂਤਿ ਲਾਭਾਦੀਸੁ ਤਣ੍ਹਾਹੇਤੁ.

੬੧. ਸਂਭਕ੍ਖੇਤੀਤਿ ਸਂਖਾਦਤਿ. ਅਸਨਿਵਿਚਕ੍ਕਨ੍ਤਿ ਵਿਚਕ੍ਕਸਣ੍ਠਾਨਾ ਅਸਨਿਯੇਵ. ਇਦਂ ਵੁਤ੍ਤਂ ਹੋਤਿ ‘‘ਅਸਨਿਵਿਚਕ੍ਕਂ ਇਮਸ੍ਸ ਦਨ੍ਤਕੂਟਂ ਮੂਲਬੀਜਾਦੀਸੁ ਨ ਕਿਞ੍ਚਿ ਨ ਸਂਭੁਞ੍ਜਤਿ. ਅਥ ਚ ਪਨ ਨਂ ਸਮਣਪ੍ਪਵਾਦੇਨ ਸਮਣੋਤਿ ਸਞ੍ਜਾਨਨ੍ਤੀ’’ਤਿ. ਏਵਂ ਅਪਸਾਦੇਤਿ ਅਵਕ੍ਖਿਪਤਿ. ਇਦਂ ਤਿਤ੍ਥਿਯਵਸੇਨ ਆਗਤਂ. ਭਿਕ੍ਖੁਵਸੇਨ ਪਨੇਤ੍ਥ ਅਯਂ ਯੋਜਨਾ, ਅਤ੍ਤਨਾ ਧੁਤਙ੍ਗਧਰੋ ਹੋਤਿ, ਸੋ ਅਞ੍ਞਂ ਏਵਂ ਅਪਸਾਦੇਤਿ ‘‘ਕਿਂ ਸਮਣਾ ਨਾਮ ਇਮੇ ਸਮਣਮ੍ਹਾਤਿ ਵਦਨ੍ਤਿ, ਧੁਤਙ੍ਗਮਤ੍ਤਮ੍ਪਿ ਨਤ੍ਥਿ, ਉਦ੍ਦੇਸਭਤ੍ਤਾਦੀਨਿ ਪਰਿਯੇਸਨ੍ਤਾ ਪਚ੍ਚਯਬਾਹੁਲ੍ਲਿਕਾ ਵਿਚਰਨ੍ਤੀ’’ਤਿ. ਲੂਖਾਜੀਵਿਨ੍ਤਿ ਅਚੇਲਕਾਦਿਵਸੇਨ ਵਾ ਧੁਤਙ੍ਗਵਸੇਨ ਵਾ ਲੂਖਾਜੀਵਿਂ. ਇਸ੍ਸਾਮਚ੍ਛਰਿਯਨ੍ਤਿ ਪਰਸ੍ਸ ਸਕ੍ਕਾਰਾਦਿਸਮ੍ਪਤ੍ਤਿਖੀਯਨਲਕ੍ਖਣਂ ਇਸ੍ਸਂ, ਸਕ੍ਕਾਰਾਦਿਕਰਣਅਕ੍ਖਮਨਲਕ੍ਖਣਂ ਮਚ੍ਛਰਿਯਞ੍ਚ.

੬੨. ਆਪਾਥਕਨਿਸਾਦੀ ਹੋਤੀਤਿ ਮਨੁਸ੍ਸਾਨਂ ਆਪਾਥੇ ਦਸ੍ਸਨਟ੍ਠਾਨੇ ਨਿਸੀਦਤਿ. ਯਤ੍ਥ ਤੇ ਪਸ੍ਸਨ੍ਤਿ, ਤਤ੍ਥ ਠਿਤੋ ਵਗ੍ਗੁਲਿਵਤਂ ਚਰਤਿ, ਪਞ੍ਚਾਤਪਂ ਤਪ੍ਪਤਿ, ਏਕਪਾਦੇਨ ਤਿਟ੍ਠਤਿ, ਸੂਰਿਯਂ ਨਮਸ੍ਸਤਿ. ਸਾਸਨੇ ਪਬ੍ਬਜਿਤੋਪਿ ਸਮਾਦਿਨ੍ਨਧੁਤਙ੍ਗੋ ਸਬ੍ਬਰਤ੍ਤਿਂ ਸਯਿਤ੍ਵਾ ਮਨੁਸ੍ਸਾਨਂ ਚਕ੍ਖੁਪਥੇ ਤਪਂ ਕਰੋਤਿ, ਮਹਾਸਾਯਨ੍ਹੇਯੇਵ ਚੀਵਰਕੁਟਿਂ ਕਰੋਤਿ, ਸੂਰਿਯੇ ਉਗ੍ਗਤੇ ਪਟਿਸਂਹਰਤਿ, ਮਨੁਸ੍ਸਾਨਂ ਆਗਤਭਾਵਂ ਞਤ੍ਵਾ ਘਣ੍ਡਿਂ ਪਹਰਿਤ੍ਵਾ ਚੀਵਰਂ ਮਤ੍ਥਕੇ ਠਪੇਤ੍ਵਾ ਚਙ੍ਕਮਂ ਓਤਰਤਿ, ਸਮ੍ਮੁਞ੍ਜਨਿਂ ਗਹੇਤ੍ਵਾ ਵਿਹਾਰਙ੍ਗਣਂ ਸਮ੍ਮਜ੍ਜਤਿ.

ਅਤ੍ਤਾਨਨ੍ਤਿ ਅਤ੍ਤਨੋ ਗੁਣਂ ਅਦਸ੍ਸਯਮਾਨੋਤਿ ਏਤ੍ਥ ਅ-ਕਾਰੋ ਨਿਪਾਤਮਤ੍ਤਂ, ਦਸ੍ਸਯਮਾਨੋਤਿ ਅਤ੍ਥੋ. ਇਦਮ੍ਪਿ ਮੇ ਤਪਸ੍ਮਿਨ੍ਤਿ ਇਦਮ੍ਪਿ ਕਮ੍ਮਂ ਮਮੇਵ ਤਪਸ੍ਮਿਂ, ਪਚ੍ਚਤ੍ਤੇ ਵਾ ਭੁਮ੍ਮਂ, ਇਦਮ੍ਪਿ ਮਮ ਤਪੋਤਿ ਅਤ੍ਥੋ. ਸੋ ਹਿ ਅਸੁਕਸ੍ਮਿਂ ਠਾਨੇ ਅਚੇਲਕੋ ਅਤ੍ਥਿ ਮੁਤ੍ਤਾਚਾਰੋਤਿਆਦੀਨਿ ਸੁਤ੍ਵਾ ਅਮ੍ਹਾਕਂ ਏਸ ਤਪੋ, ਅਮ੍ਹਾਕਂ ਸੋ ਅਨ੍ਤੇਵਾਸਿਕੋਤਿਆਦੀਨਿ ਭਣਤਿ. ਅਸੁਕਸ੍ਮਿਂ ਵਾ ਪਨ ਠਾਨੇ ਪਂਸੁਕੂਲਿਕੋ ਭਿਕ੍ਖੁ ਅਤ੍ਥੀਤਿਆਦੀਨਿ ਸੁਤ੍ਵਾ ਅਮ੍ਹਾਕਂ ਏਸ ਤਪੋ, ਅਮ੍ਹਾਕਂ ਸੋ ਅਨ੍ਤੇਵਾਸਿਕੋਤਿਆਦੀਨਿ ਭਣਤਿ.

ਕਿਞ੍ਚਿਦੇਵਾਤਿ ਕਿਞ੍ਚਿ ਵਜ੍ਜਂ ਦਿਟ੍ਠਿਗਤਂ ਵਾ. ਪਟਿਚ੍ਛਨ੍ਨਂ ਸੇਵਤੀਤਿ ਯਥਾ ਅਞ੍ਞੇ ਨ ਜਾਨਨ੍ਤਿ, ਏਵਂ ਸੇਵਤਿ. ਅਕ੍ਖਮਮਾਨਂ ਆਹ ਖਮਤੀਤਿ ਅਰੁਚ੍ਚਮਾਨਂਯੇਵ ਰੁਚ੍ਚਤਿ ਮੇਤਿ ਵਦਤਿ. ਅਤ੍ਤਨਾ ਕਤਂ ਅਤਿਮਹਨ੍ਤਮ੍ਪਿ ਵਜ੍ਜਂ ਅਪ੍ਪਮਤ੍ਤਕਂ ਕਤ੍ਵਾ ਪਞ੍ਞਪੇਤਿ, ਪਰੇਨ ਕਤਂ ਦੁਕ੍ਕਟਮਤ੍ਤਂ ਵੀਤਿਕ੍ਕਮਮ੍ਪਿ ਪਾਰਾਜਿਕਸਦਿਸਂ ਕਤ੍ਵਾ ਦਸ੍ਸੇਤਿ. ਅਨੁਞ੍ਞੇਯ੍ਯਨ੍ਤਿ ਅਨੁਜਾਨਿਤਬ੍ਬਂ ਅਨੁਮੋਦਿਤਬ੍ਬਂ.

੬੩. ਕੋਧਨੋ ਹੋਤਿ ਉਪਨਾਹੀਤਿ ਕੁਜ੍ਝਨਲਕ੍ਖਣੇਨ ਕੋਧੇਨ, ਵੇਰਅਪ੍ਪਟਿਨਿਸ੍ਸਗ੍ਗਲਕ੍ਖਣੇਨ ਉਪਨਾਹੇਨ ਚ ਸਮਨ੍ਨਾਗਤੋ. ਮਕ੍ਖੀ ਹੋਤਿ ਪਲ਼ਾਸੀਤਿ ਪਰਗੁਣਮਕ੍ਖਨਲਕ੍ਖਣੇਨ ਮਕ੍ਖੇਨ, ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਚ ਸਮਨ੍ਨਾਗਤੋ.

ਇਸ੍ਸੁਕੀ ਹੋਤਿ ਮਚ੍ਛਰੀਤਿ ਪਰਸਕ੍ਕਾਰਾਦੀਸੁ ਉਸੂਯਨਲਕ੍ਖਣਾਯ ਇਸ੍ਸਾਯ, ਆਵਾਸਕੁਲਲਾਭਵਣ੍ਣਧਮ੍ਮੇਸੁ ਮਚ੍ਛਰਾਯਨਲਕ੍ਖਣੇਨ ਪਞ੍ਚਵਿਧਮਚ੍ਛੇਰੇਨ ਚ ਸਮਨ੍ਨਾਗਤੋ ਹੋਤਿ. ਸਠੋ ਹੋਤਿ ਮਾਯਾਵੀਤਿ ਕੇਰਾਟਿਕਲਕ੍ਖਣੇਨ ਸਾਠੇਯ੍ਯੇਨ, ਕਤਪ੍ਪਟਿਚ੍ਛਾਦਨਲਕ੍ਖਣਾਯ ਮਾਯਾਯ ਚ ਸਮਨ੍ਨਾਗਤੋ ਹੋਤਿ. ਥਦ੍ਧੋ ਹੋਤਿ ਅਤਿਮਾਨੀਤਿ ਨਿਸ੍ਸਿਨੇਹਨਿਕ੍ਕਰੁਣਥਦ੍ਧਲਕ੍ਖਣੇਨ ਥਮ੍ਭੇਨ, ਅਤਿਕ੍ਕਮਿਤ੍ਵਾ ਮਞ੍ਞਨਲਕ੍ਖਣੇਨ ਅਤਿਮਾਨੇਨ ਚ ਸਮਨ੍ਨਾਗਤੋ ਹੋਤਿ. ਪਾਪਿਚ੍ਛੋ ਹੋਤੀਤਿ ਅਸਨ੍ਤਸਮ੍ਭਾਵਨਪਤ੍ਥਨਲਕ੍ਖਣਾਯ ਪਾਪਿਚ੍ਛਤਾਯ ਸਮਨ੍ਨਾਗਤੋ ਹੋਤਿ. ਪਾਪਿਕਾਨਨ੍ਤਿ ਤਾਸਂਯੇਵ ਲਾਮਕਾਨਂ ਇਚ੍ਛਾਨਂ ਵਸਂ ਗਤੋ. ਮਿਚ੍ਛਾਦਿਟ੍ਠਿਕੋਤਿ ਨਤ੍ਥਿ ਦਿਨ੍ਨਨ੍ਤਿਆਦਿਨਯਪ੍ਪਵਤ੍ਤਾਯ ਅਯਾਥਾਵਦਿਟ੍ਠਿਯਾ ਉਪੇਤੋ. ਅਨ੍ਤਗ੍ਗਾਹਿਕਾਯਾਤਿ ਸਾਯੇਵ ਦਿਟ੍ਠਿ ਉਚ੍ਛੇਦਨ੍ਤਸ੍ਸ ਗਹਿਤਤ੍ਤਾ ‘‘ਅਨ੍ਤਗ੍ਗਾਹਿਕਾ’’ਤਿ ਵੁਚ੍ਚਤਿ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ. ਸਨ੍ਦਿਟ੍ਠਿਪਰਾਮਾਸੀਤਿਆਦੀਸੁ ਸਯਂ ਦਿਟ੍ਠਿ ਸਨ੍ਦਿਟ੍ਠਿ, ਸਨ੍ਦਿਟ੍ਠਿਮੇਵ ਪਰਾਮਸਤਿ ਗਹੇਤ੍ਵਾ ਵਦਤੀਤਿ ਸਨ੍ਦਿਟ੍ਠਿਪਰਾਮਾਸੀ. ਆਧਾਨਂ ਵੁਚ੍ਚਤਿ ਦਲ਼੍ਹਂ ਸੁਟ੍ਠੁ ਠਪਿਤਂ, ਤਥਾ ਕਤ੍ਵਾ ਗਣ੍ਹਾਤੀਤਿ ਆਧਾਨਗ੍ਗਾਹੀ. ਅਰਿਟ੍ਠੋ ਵਿਯ ਨ ਸਕ੍ਕਾ ਹੋਤਿ ਪਟਿਨਿਸ੍ਸਜ੍ਜਾਪੇਤੁਨ੍ਤਿ ਦੁਪ੍ਪਟਿਨਿਸ੍ਸਗ੍ਗੀ. ਯਦਿਮੇਤਿ ਯਦਿ ਇਮੇ.

ਪਰਿਸੁਦ੍ਧਪਪਟਿਕਪ੍ਪਤ੍ਤਕਥਾਵਣ੍ਣਨਾ

੬੪. ਇਧ, ਨਿਗ੍ਰੋਧ, ਤਪਸ੍ਸੀਤਿ ਏਵਂ ਭਗਵਾ ਅਞ੍ਞਤਿਤ੍ਥਿਯੇਹਿ ਗਹਿਤਲਦ੍ਧਿਂ ਤੇਸਂ ਰਕ੍ਖਿਤਂ ਤਪਂ ਸਬ੍ਬਮੇਵ ਸਂਕਿਲਿਟ੍ਠਨ੍ਤਿ ਉਪਕ੍ਕਿਲੇਸਪਾਲ਼ਿਂ ਦਸ੍ਸੇਤ੍ਵਾ ਇਦਾਨਿ ਪਰਿਸੁਦ੍ਧਪਾਲ਼ਿਦਸ੍ਸਨਤ੍ਥਂ ਦੇਸਨਮਾਰਭਨ੍ਤੋ ਇਧ, ਨਿਗ੍ਰੋਧਾਤਿਆਦਿਮਾਹ. ਤਤ੍ਥ ‘‘ਨ ਅਤ੍ਤਮਨੋ’’ਤਿਆਦੀਨਿ ਵੁਤ੍ਤਵਿਪਕ੍ਖਵਸੇਨੇਵ ਵੇਦਿਤਬ੍ਬਾਨਿ. ਸਬ੍ਬਵਾਰੇਸੁ ਚ ਲੂਖਤਪਸ੍ਸਿਨੋ ਚੇਵ ਧੁਤਙ੍ਗਧਰਸ੍ਸ ਚ ਵਸੇਨ ਯੋਜਨਾ ਵੇਦਿਤਬ੍ਬਾ. ਏਵਂ ਸੋ ਤਸ੍ਮਿਂ ਠਾਨੇ ਪਰਿਸੁਦ੍ਧੋ ਹੋਤੀਤਿ ਏਵਂ ਸੋ ਤੇਨ ਨ ਅਤ੍ਤਮਨਤਾ ਨ ਪਰਿਪੁਣ੍ਣਸਙ੍ਕਪ੍ਪਭਾਵਸਙ੍ਖਾਤੇਨ ਕਾਰਣੇਨ ਪਰਿਸੁਦ੍ਧੋ ਨਿਰੁਪਕ੍ਕਿਲੇਸੋ ਹੋਤਿ, ਉਤ੍ਤਰਿ ਵਾਯਮਮਾਨੋ ਕਮ੍ਮਟ੍ਠਾਨਸੁਦ੍ਧਿਕੋ ਹੁਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੬੯. ਅਦ੍ਧਾ ਖੋ, ਭਨ੍ਤੇਤਿ ਭਨ੍ਤੇ ਏਵਂ ਸਨ੍ਤੇ ਏਕਂਸੇਨੇਵ ਵੀਰਿਯੇਨ ਪਾਪਜਿਗੁਚ੍ਛਨਵਾਦੋ ਪਰਿਸੁਦ੍ਧੋ ਹੋਤੀਤਿ ਅਨੁਜਾਨਾਤਿ. ਇਤੋ ਪਰਞ੍ਚ ਅਗ੍ਗਭਾਵਂ ਵਾ ਸਾਰਭਾਵਂ ਵਾ ਅਜਾਨਨ੍ਤੋ ਅਗ੍ਗਪ੍ਪਤ੍ਤਾ ਸਾਰਪ੍ਪਤ੍ਤਾ ਚਾਤਿ ਆਹ. ਅਥਸ੍ਸ ਭਗਵਾ ਸਾਰਪ੍ਪਤ੍ਤਭਾਵਂ ਪਟਿਸੇਧੇਨ੍ਤੋ ਨ ਖੋ ਨਿਗ੍ਰੋਧਾਤਿਆਦਿਮਾਹ. ਪਪਟਿਕਪ੍ਪਤ੍ਤਾ ਹੋਤੀਤਿ ਸਾਰਵਤੋ ਰੁਕ੍ਖਸ੍ਸ ਸਾਰਂ ਫੇਗ੍ਗੁਂ ਤਚਞ੍ਚ ਅਤਿਕ੍ਕਮ੍ਮ ਬਹਿਪਪਟਿਕਸਦਿਸਾ ਹੋਤੀਤਿ ਦਸ੍ਸੇਤਿ.

ਪਰਿਸੁਦ੍ਧਤਚਪ੍ਪਤ੍ਤਾਦਿਕਥਾਵਣ੍ਣਨਾ

੭੦. ਅਗ੍ਗਂ ਪਾਪੇਤੂਤਿ ਦੇਸਨਾਵਸੇਨ ਅਗ੍ਗਂ ਪਾਪੇਤ੍ਵਾ ਦੇਸੇਤੁ, ਸਾਰਂ ਪਾਪੇਤ੍ਵਾ ਦੇਸੇਤੂਤਿ ਦਸਬਲਂ ਯਾਚਤਿ. ਚਾਤੁਯਾਮਸਂਵਰਸਂਵੁਤੋਤਿ ਚਤੁਬ੍ਬਿਧੇਨ ਸਂਵਰੇਨ ਪਿਹਿਤੋ. ਨ ਪਾਣਂ ਅਤਿਪਾਤੇਤੀਤਿ ਪਾਣਂ ਨ ਹਨਤਿ. ਨ ਭਾਵਿਤਮਾਸੀਸਤੀਤਿ ਭਾਵਿਤਂ ਨਾਮ ਤੇਸਂ ਸਞ੍ਞਾਯ ਪਞ੍ਚ ਕਾਮਗੁਣਾ, ਤੇ ਨ ਆਸੀਸਤਿ ਨ ਸੇਵਤੀਤਿ ਅਤ੍ਥੋ.

ਅਦੁਂ ਚਸ੍ਸ ਹੋਤੀਤਿ ਏਤਞ੍ਚਸ੍ਸ ਇਦਾਨਿ ਵੁਚ੍ਚਮਾਨਂ ‘‘ਸੋ ਅਭਿਹਰਤੀ’’ਤਿਆਦਿਲਕ੍ਖਣਂ. ਤਪਸ੍ਸਿਤਾਯਾਤਿ ਤਪਸ੍ਸਿਭਾਵੇਨ ਹੋਤਿ. ਤਤ੍ਥ ਸੋ ਅਭਿਹਰਤੀਤਿ ਸੋ ਤਂ ਸੀਲਂ ਅਭਿਹਰਤਿ, ਉਪਰੂਪਰਿ ਵਡ੍ਢੇਤਿ. ਸੀਲਂ ਮੇ ਪਰਿਪੁਣ੍ਣਂ, ਤਪੋ ਆਰਦ੍ਧੋ, ਅਲਮੇਤ੍ਤਾਵਤਾਤਿ ਨ ਵੀਰਿਯਂ ਵਿਸ੍ਸਜ੍ਜੇਤਿ. ਨੋ ਹੀਨਾਯਾਵਤ੍ਤਤੀਤਿ ਹੀਨਾਯ ਗਿਹਿਭਾਵਤ੍ਥਾਯ ਨ ਆਵਤ੍ਤਤਿ. ਸੀਲਤੋ ਉਤ੍ਤਰਿ ਵਿਸੇਸਾਧਿਗਮਤ੍ਥਾਯ ਵੀਰਿਯਂ ਕਰੋਤਿਯੇਵ, ਏਵਂ ਕਰੋਨ੍ਤੋ ਸੋ ਵਿਵਿਤ੍ਤਂ ਸੇਨਾਸਨਂ ਭਜਤਿ. ‘‘ਅਰਞ੍ਞ’’ਨ੍ਤਿਆਦੀਨਿ ਸਾਮਞ੍ਞਫਲੇ (ਦੀ. ਨਿ. ਅਟ੍ਠ. ੧.੨੧੬) ਵਿਤ੍ਥਾਰਿਤਾਨੇਵ. ‘‘ਮੇਤ੍ਤਾਸਹਗਤੇਨਾ’’ਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਣ੍ਣਿਤਾਨਿ. ਤਚਪ੍ਪਤ੍ਤਾਤਿ ਪਪਟਿਕਤੋ ਅਬ੍ਭਨ੍ਤਰਂ ਤਚਂ ਪਤ੍ਤਾ. ਫੇਗ੍ਗੁਪ੍ਪਤ੍ਤਾਤਿ ਤਚਤੋ ਅਬ੍ਭਨ੍ਤਰਂ ਫੇਗ੍ਗੁਂ ਪਤ੍ਤਾ, ਫੇਗ੍ਗੁਸਦਿਸਾ ਹੋਤੀਤਿ ਅਤ੍ਥੋ.

੭੪. ‘‘ਏਤ੍ਤਾਵਤਾ, ਖੋ ਨਿਗ੍ਰੋਧ, ਤਪੋਜਿਗੁਚ੍ਛਾ ਅਗ੍ਗਪ੍ਪਤ੍ਤਾ ਚ ਹੋਤਿ ਸਾਰਪ੍ਪਤ੍ਤਾ ਚਾ’’ਤਿ ਇਦਂ ਭਗਵਾ ਤਿਤ੍ਥਿਯਾਨਂ ਵਸੇਨਾਹ. ਤਿਤ੍ਥਿਯਾਨਞ੍ਹਿ ਲਾਭਸਕ੍ਕਾਰੋ ਰੁਕ੍ਖਸ੍ਸ ਸਾਖਾਪਲਾਸਸਦਿਸੋ. ਪਞ੍ਚਸੀਲਮਤ੍ਤਕਂ ਪਪਟਿਕਸਦਿਸਂ. ਅਟ੍ਠਸਮਾਪਤ੍ਤਿਮਤ੍ਤਂ ਤਚਸਦਿਸਂ. ਪੁਬ੍ਬੇਨਿਵਾਸਞਾਣਾਵਸਾਨਾ ਅਭਿਞ੍ਞਾ ਫੇਗ੍ਗੁਸਦਿਸਾ. ਦਿਬ੍ਬਚਕ੍ਖੁਂ ਪਨੇਤੇ ਅਰਹਤ੍ਤਨ੍ਤਿ ਗਹੇਤ੍ਵਾ ਵਿਚਰਨ੍ਤਿ. ਤੇਨ ਨੇਸਂ ਤਂ ਰੁਕ੍ਖਸ੍ਸ ਸਾਰਸਦਿਸਂ. ਸਾਸਨੇ ਪਨ ਲਾਭਸਕ੍ਕਾਰੋ ਸਾਖਾਪਲਾਸਸਦਿਸੋ. ਸੀਲਸਮ੍ਪਦਾ ਪਪਟਿਕਸਦਿਸਾ. ਝਾਨਸਮਾਪਤ੍ਤਿਯੋ ਤਚਸਦਿਸਾ. ਲੋਕਿਯਾਭਿਞ੍ਞਾ ਫੇਗ੍ਗੁਸਦਿਸਾ. ਮਗ੍ਗਫਲਂ ਸਾਰੋ. ਇਤਿ ਭਗਵਤਾ ਅਤ੍ਤਨੋ ਸਾਸਨਂ ਓਨਤਵਿਨਤਫਲਭਾਰਭਰਿਤਰੁਕ੍ਖੂਪਮਾਯ ਉਪਮਿਤਂ. ਸੋ ਦੇਸਨਾਕੁਸਲਤਾਯ ਤਤੋ ਤਚਸਾਰਸਮ੍ਪਤ੍ਤਿਤੋ ਮਮ ਸਾਸਨਂ ਉਤ੍ਤਰਿਤਰਞ੍ਚੇਵ ਪਣੀਤਤਰਞ੍ਚ, ਤਂ ਤੁਵਂ ਕਦਾ ਜਾਨਿਸ੍ਸਸੀਤਿ ਅਤ੍ਤਨੋਦੇਸਨਾਯ ਵਿਸੇਸਭਾਵਂ ਦਸ੍ਸੇਤੁਂ ‘‘ਇਤਿ ਖੋ ਨਿਗ੍ਰੋਧਾ’’ਤਿ ਦੇਸਨਂ ਆਰਭਿ. ਤੇ ਪਰਿਬ੍ਬਾਜਕਾਤਿ ਤੇ ਤਸ੍ਸ ਪਰਿਵਾਰਾ ਤਿਂਸਸਤਸਙ੍ਖ੍ਯਾ ਪਰਿਬ੍ਬਾਜਕਾ. ਏਤ੍ਥ ਮਯਂ ਅਨਸ੍ਸਾਮਾਤਿ ਏਤ੍ਥ ਅਚੇਲਕਪਾਲ਼ਿਆਦੀਸੁ, ਇਦਂ ਵੁਤ੍ਤਂ ਹੋਤਿ ‘‘ਅਮ੍ਹਾਕਂ ਅਚੇਲਕਪਾਲ਼ਿਮਤ੍ਤਮ੍ਪਿ ਨਤ੍ਥਿ, ਕੁਤੋ ਪਰਿਸੁਦ੍ਧਪਾਲ਼ਿ. ਅਮ੍ਹਾਕਂ ਪਰਿਸੁਦ੍ਧਪਾਲ਼ਿਮਤ੍ਤਮ੍ਪਿ ਨਤ੍ਥਿ, ਕੁਤੋ ਚਾਤੁਯਾਮਸਂਵਰਾਦੀਨਿ. ਚਾਤੁਯਾਮਸਂਵਰੋਪਿ ਨਤ੍ਥਿ, ਕੁਤੋ ਅਰਞ੍ਞਵਾਸਾਦੀਨਿ. ਅਰਞ੍ਞਵਾਸੋਪਿ ਨਤ੍ਥਿ, ਕੁਤੋ ਨੀਵਰਣਪ੍ਪਹਾਨਾਦੀਨਿ. ਨੀਵਰਣਪ੍ਪਹਾਨਮ੍ਪਿ ਨਤ੍ਥਿ, ਕੁਤੋ ਬ੍ਰਹ੍ਮਵਿਹਾਰਾਦੀਨਿ. ਬ੍ਰਹ੍ਮਵਿਹਾਰਮਤ੍ਤਮ੍ਪਿ ਨਤ੍ਥਿ, ਕੁਤੋ ਪੁਬ੍ਬੇਨਿਵਾਸਾਦੀਨਿ. ਪੁਬ੍ਬੇਨਿਵਾਸਞਾਣਮਤ੍ਤਮ੍ਪਿ ਨਤ੍ਥਿ, ਕੁਤੋ ਅਮ੍ਹਾਕਂ ਦਿਬ੍ਬਚਕ੍ਖੁ. ਏਤ੍ਥ ਮਯਂ ਸਆਚਰਿਯਕਾ ਨਟ੍ਠਾ’’ਤਿ. ਇਤੋ ਭਿਯ੍ਯੋ ਉਤ੍ਤਰਿਤਰਨ੍ਤਿ ਇਤੋ ਦਿਬ੍ਬਚਕ੍ਖੁਞਾਣਾਧਿਗਮਤੋ ਭਿਯ੍ਯੋ ਅਞ੍ਞਂ ਉਤ੍ਤਰਿਤਰਂ ਵਿਸੇਸਾਧਿਗਮਂ ਮਯਂ ਸੁਤਿਵਸੇਨਾਪਿ ਨ ਜਾਨਾਮਾਤਿ ਵਦਨ੍ਤਿ.

ਨਿਗ੍ਰੋਧਸ੍ਸਪਜ੍ਝਾਯਨਵਣ੍ਣਨਾ

੭੫. ਅਥ ਨਿਗ੍ਰੋਧਂ ਪਰਿਬ੍ਬਾਜਕਨ੍ਤਿ ਏਵਂ ਕਿਰਸ੍ਸ ਅਹੋਸਿ ‘‘ਇਮੇ ਪਰਿਬ੍ਬਾਜਕਾ ਇਦਾਨਿ ਭਗਵਤੋ ਭਾਸਿਤਂ ਸੁਸ੍ਸੂਸਨ੍ਤਿ, ਇਮਿਨਾ ਚ ਨਿਗ੍ਰੋਧੇਨ ਭਗਵਤੋ ਪਰਮ੍ਮੁਖਾ ਕਕ੍ਖਲ਼ਂ ਦੁਰਾਸਦਵਚਨਂ ਵੁਤ੍ਤਂ, ਇਦਾਨਿ ਅਯਮ੍ਪਿ ਸੋਤੁਕਾਮੋ ਜਾਤੋ, ਕਾਲੋ ਦਾਨਿ ਮੇ ਇਮਸ੍ਸ ਮਾਨਦ੍ਧਜਂ ਨਿਪਾਤੇਤ੍ਵਾ ਭਗਵਤੋ ਸਾਸਨਂ ਉਕ੍ਖਿਪਿਤੁ’’ਨ੍ਤਿ. ਅਥ ਨਿਗ੍ਰੋਧਂ ਪਰਿਬ੍ਬਾਜਕਂ ਏਤਦਵੋਚ. ਅਪਰਮ੍ਪਿਸ੍ਸ ਅਹੋਸਿ ‘‘ਅਯਂ ਮਯਿ ਅਕਥੇਨ੍ਤੇ ਸਤ੍ਥਾਰਂ ਨ ਖਮਾਪੇਸ੍ਸਤਿ, ਤਦਸ੍ਸ ਅਨਾਗਤੇ ਅਹਿਤਾਯ ਦੁਕ੍ਖਾਯ ਸਂਵਤ੍ਤਿਸ੍ਸਤਿ, ਮਯਾ ਪਨ ਕਥਿਤੇ ਖਮਾਪੇਸ੍ਸਤਿ, ਤਦਸ੍ਸ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਨਿਗ੍ਰੋਧਂ ਪਰਿਬ੍ਬਾਜਕਂ ਏਤਦਵੋਚ. ਅਪਰਿਸਾਵਚਰਂ ਪਨ ਨਂ ਕਰੋਥਾਤਿ ਏਤ੍ਥ ਪਨਾਤਿ ਨਿਪਾਤੋ, ਅਥ ਨਂ ਅਪਰਿਸਾਵਚਰਂ ਕਰੋਥਾਤਿ ਅਤ੍ਥੋ. ‘‘ਅਪਰਿਸਾਵਚਰੇਤ’’ਨ੍ਤਿਪਿ ਪਾਠੋ, ਅਪਰਿਸਾਵਚਰਂ ਵਾ ਏਤਂ ਕਰੋਥ, ਗੋਕਾਣਾਦੀਨਂ ਵਾ ਅਞ੍ਞਤਰਨ੍ਤਿ ਅਤ੍ਥੋ.

ਗੋਕਾਣਨ੍ਤਿ ਏਤ੍ਥਾਪਿ ਗੋਕਾਣਂ ਪਰਿਯਨ੍ਤਚਾਰਿਨਿਂ ਵਿਯ ਕਰੋਥਾਤਿ ਅਤ੍ਥੋ. ਤੁਣ੍ਹੀਭੂਤੋਤਿ ਤੁਣ੍ਹੀਭਾਵਂ ਉਪਗਤੋ. ਮਙ੍ਕੁਭੂਤੋਤਿ ਨਿਤ੍ਤੇਜਤਂ ਆਪਨ੍ਨੋ. ਪਤ੍ਤਕ੍ਖਨ੍ਧੋਤਿ ਓਨਤਗੀਵੋ. ਅਧੋਮੁਖੋਤਿ ਹੇਟ੍ਠਾਮੁਖੋ.

੭੬. ਬੁਦ੍ਧੋ ਸੋ ਭਗਵਾ ਬੋਧਾਯਾਤਿ ਸਯਂ ਬੁਦ੍ਧੋ ਸਤ੍ਤਾਨਮ੍ਪਿ ਚਤੁਸਚ੍ਚਬੋਧਤ੍ਥਾਯ ਧਮ੍ਮਂ ਦੇਸੇਤਿ. ਦਨ੍ਤੋਤਿ ਚਕ੍ਖੁਤੋਪਿ ਦਨ੍ਤੋ…ਪੇ… ਮਨਤੋਪਿ ਦਨ੍ਤੋ. ਦਮਥਾਯਾਤਿ ਅਞ੍ਞੇਸਮ੍ਪਿ ਦਮਨਤ੍ਥਾਯ ਏਵ, ਨ ਵਾਦਤ੍ਥਾਯ. ਸਨ੍ਤੋਤਿ ਰਾਗਸਨ੍ਤਤਾਯ ਸਨ੍ਤੋ, ਦੋਸਮੋਹਸਨ੍ਤਤਾਯ ਸਬ੍ਬ ਅਕੁਸਲਸਬ੍ਬਾਭਿਸਙ੍ਖਾਰਸਨ੍ਤਤਾਯ ਸਨ੍ਤੋ. ਸਮਥਾਯਾਤਿ ਮਹਾਜਨਸ੍ਸ ਰਾਗਾਦਿਸਮਨਤ੍ਥਾਯ ਧਮ੍ਮਂ ਦੇਸੇਤਿ. ਤਿਣ੍ਣੋਤਿ ਚਤ੍ਤਾਰੋ ਓਘੇ ਤਿਣ੍ਣੋ. ਤਰਣਾਯਾਤਿ ਮਹਾਜਨਸ੍ਸ ਓਘਨਿਤ੍ਥਰਣਤ੍ਥਾਯ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਪਰਿਨਿਬ੍ਬਾਨਾਯਾਤਿ ਮਹਾਜਨਸ੍ਸਾਪਿ ਸਬ੍ਬਕਿਲੇਸਪਰਿਨਿਬ੍ਬਾਨਤ੍ਥਾਯ ਧਮ੍ਮਂ ਦੇਸੇਤਿ.

ਬ੍ਰਹ੍ਮਚਰਿਯਪਰਿਯੋਸਾਨਾਦਿਵਣ੍ਣਨਾ

੭੭. ਅਚ੍ਚਯੋਤਿਆਦੀਨਿ ਸਾਮਞ੍ਞਫਲੇ (ਦੀ. ਨਿ. ਅਟ੍ਠ. ੧.੨੫੦) ਵੁਤ੍ਤਾਨਿ. ਉਜੁਜਾਤਿਕੋਤਿ ਕਾਯਵਙ੍ਕਾਦਿਵਿਰਹਿਤੋ ਉਜੁਸਭਾਵੋ. ਅਹਮਨੁਸਾਸਾਮੀਤਿ ਅਹਂ ਤਾਦਿਸਂ ਪੁਗ੍ਗਲਂ ਅਨੁਸਾਸਾਮਿ, ਧਮ੍ਮਂ ਅਸ੍ਸ ਦੇਸੇਮਿ. ਸਤ੍ਤਾਹਨ੍ਤਿ ਸਤ੍ਤਦਿਵਸਾਨਿ, ਇਦਂ ਸਬ੍ਬਮ੍ਪਿ ਭਗਵਾ ਦਨ੍ਧਪਞ੍ਞਂ ਪੁਗ੍ਗਲਂ ਸਨ੍ਧਾਯਾਹ ਅਸਠੋ ਪਨ ਅਮਾਯਾਵੀ ਉਜੁਜਾਤਿਕੋ ਤਂਮੁਹੁਤ੍ਤੇਨੇਵ ਅਰਹਤ੍ਤਂ ਪਤ੍ਤੁਂ ਸਕ੍ਖਿਸ੍ਸਤਿ. ਇਤਿ ਭਗਵਾ ‘‘ਅਸਠ’’ਨ੍ਤਿਆਦਿਵਚਨੇਨ ਸਠੋ ਹਿ ਵਙ੍ਕਵਙ੍ਕੋ, ਮਯਾਪਿ ਨ ਸਕ੍ਕਾ ਅਨੁਸਾਸਿਤੁਨ੍ਤਿ ਦੀਪੇਨ੍ਤੋ ਪਰਿਬ੍ਬਾਜਕਂ ਪਾਦੇਸੁ ਗਹੇਤ੍ਵਾ ਮਹਾਮੇਰੁਪਾਦਤਲੇ ਵਿਯ ਖਿਪਿਤ੍ਥ. ਕਸ੍ਮਾ? ਅਯਞ੍ਹਿ ਅਤਿਸਠੋ, ਕੁਟਿਲਚਿਤ੍ਤੋ ਸਤ੍ਥਰਿ ਏਵਂ ਕਥੇਨ੍ਤੇਪਿ ਬੁਦ੍ਧਧਮ੍ਮਸਙ੍ਘੇਸੁ ਨਾਧਿਮੁਚ੍ਚਤਿ, ਅਧਿਮੁਚ੍ਚਨਤ੍ਥਾਯ ਸੋਤਂ ਨ ਓਦਹਤਿ, ਕੋਹਞ੍ਞੇ ਠਿਤੋ ਸਤ੍ਥਾਰਂ ਖਮਾਪੇਤਿ. ਤਸ੍ਮਾ ਭਗਵਾ ਤਸ੍ਸਜ੍ਝਾਸਯਂ ਵਿਦਿਤ੍ਵਾ ‘‘ਏਤੁ ਵਿਞ੍ਞੂ ਪੁਰਿਸੋ ਅਸਠੋ’’ਤਿਆਦਿਮਾਹ. ਸਠਂ ਪਨਾਹਂ ਅਨੁਸਾਸਿਤੁਂ ਨ ਸਕ੍ਕੋਮੀਤਿ.

੭੮. ਅਨ੍ਤੇਵਾਸਿਕਮ੍ਯਤਾਤਿ ਅਨ੍ਤੇਵਾਸਿਕਮ੍ਯਤਾਯ, ਅਮ੍ਹੇ ਅਨ੍ਤੇਵਾਸਿਕੇ ਇਚ੍ਛਨ੍ਤੋ. ਏਵਮਾਹਾਤਿ ‘‘ਏਤੁ ਵਿਞ੍ਞੁਪੁਰਿਸੋ’’ਤਿਆਦਿਮਾਹ. ਯੋ ਏਵ ਵੋ ਆਚਰਿਯੋਤਿ ਯੋ ਏਵ ਤੁਮ੍ਹਾਕਂ ਪਕਤਿਯਾ ਆਚਰਿਯੋ. ਉਦ੍ਦੇਸਾ ਨੋ ਚਾਵੇਤੁਕਾਮੋਤਿ ਅਤ੍ਤਨੋ ਅਨੁਸਾਸਨਿਂ ਗਾਹਾਪੇਤ੍ਵਾ ਅਮ੍ਹੇ ਅਮ੍ਹਾਕਂ ਉਦ੍ਦੇਸਤੋ ਚਾਵੇਤੁਕਾਮੋ. ਸੋ ਏਵ ਵੋ ਉਦ੍ਦੇਸੋ ਹੋਤੂਤਿ ਯੋ ਤੁਮ੍ਹਾਕਂ ਪਕਤਿਯਾ ਉਦ੍ਦੇਸੋ, ਸੋ ਤੁਮ੍ਹਾਕਂਯੇਵ ਹੋਤੁ, ਨ ਮਯਂ ਤੁਮ੍ਹਾਕਂ ਉਦ੍ਦੇਸੇਨ ਅਤ੍ਥਿਕਾ. ਆਜੀਵਾਤਿ ਆਜੀਵਤੋ. ਅਕੁਸਲਸਙ੍ਖਾਤਾਤਿ ਅਕੁਸਲਾਤਿ ਕੋਟ੍ਠਾਸਂ ਪਤ੍ਤਾ. ਅਕੁਸਲਾ ਧਮ੍ਮਾਤਿ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਧਮ੍ਮਾ ਤਣ੍ਹਾਯੇਵ ਵਾ ਵਿਸੇਸੇਨ. ਸਾ ਹਿ ਪੁਨਬ੍ਭਵਕਰਣਤੋ ‘‘ਪੋਨੋਬ੍ਭਵਿਕਾ’’ਤਿ ਵੁਤ੍ਤਾ. ਸਦਰਥਾਤਿ ਕਿਲੇਸਦਰਥਸਮ੍ਪਯੁਤ੍ਤਾ. ਜਾਤਿਜਰਾਮਰਣਿਯਾਤਿ ਜਾਤਿਜਰਾਮਰਣਾਨਂ ਪਚ੍ਚਯਭੂਤਾ. ਸਂਕਿਲੇਸਿਕਾ ਧਮ੍ਮਾਤਿ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਾ. ਵੋਦਾਨਿਯਾਤਿ, ਸਮਥਵਿਪਸ੍ਸਨਾ ਧਮ੍ਮਾ. ਤੇ ਹਿ ਸਤ੍ਤੇ ਵੋਦਾਪੇਨ੍ਤਿ, ਤਸ੍ਮਾ ‘‘ਵੋਦਾਨਿਯਾ’’ਤਿ ਵੁਚ੍ਚਨ੍ਤਿ. ਪਞ੍ਞਾਪਾਰਿਪੂਰਿਨ੍ਤਿ ਮਗ੍ਗਪਞ੍ਞਾਪਾਰਿਪੂਰਿਂ. ਵੇਪੁਲ੍ਲਤ੍ਤਞ੍ਚਾਤਿ ਫਲਪਞ੍ਞਾਵੇਪੁਲ੍ਲਤਂ, ਉਭੋਪਿ ਵਾ ਏਤਾਨਿ ਅਞ੍ਞਮਞ੍ਞਵੇਵਚਨਾਨੇਵ. ਇਦਂ ਵੁਤ੍ਤਂ ਹੋਤਿ ‘‘ਤਤੋ ਤੁਮ੍ਹੇ ਮਗ੍ਗਪਞ੍ਞਞ੍ਚੇਵ ਫਲਪਞ੍ਞਞ੍ਚ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਥਾ’’ਤਿ. ਏਵਂ ਭਗਵਾ ਪਰਿਬ੍ਬਾਜਕੇ ਆਰਬ੍ਭ ਅਤ੍ਤਨੋ ਓਵਾਦਾਨੁਸਾਸਨਿਯਾ ਫਲਂ ਦਸ੍ਸੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ.

੭੯. ਯਥਾ ਤਂ ਮਾਰੇਨਾਤਿ ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤਾ ਨਿਸੀਦਨ੍ਤਿ ਏਵਮੇਵ ਤੁਣ੍ਹੀਭੂਤਾ…ਪੇ… ਅਪ੍ਪਟਿਭਾਨਾ ਨਿਸਿਨ੍ਨਾ.

ਮਾਰੋ ਕਿਰ ਸਤ੍ਥਾ ਅਤਿਵਿਯ ਗਜ੍ਜਨ੍ਤੋ ਬੁਦ੍ਧਬਲਂ ਦੀਪੇਤ੍ਵਾ ਇਮੇਸਂ ਪਰਿਬ੍ਬਾਜਕਾਨਂ ਧਮ੍ਮਂ ਦੇਸੇਤਿ, ਕਦਾਚਿ ਧਮ੍ਮਾਭਿਸਮਯੋ ਭਵੇਯ੍ਯ, ਹਨ੍ਦਾਹਂ ਪਰਿਯੁਟ੍ਠਾਮੀਤਿ ਸੋ ਤੇਸਂ ਚਿਤ੍ਤਾਨਿ ਪਰਿਯੁਟ੍ਠਾਸਿ. ਅਪ੍ਪਹੀਨਵਿਪਲ੍ਲਾਸਾਨਞ੍ਹਿ ਚਿਤ੍ਤਂ ਮਾਰਸ੍ਸ ਯਥਾਕਾਮਕਰਣੀਯਂ ਹੋਤਿ. ਤੇਪਿ ਮਾਰੇਨ ਪਰਿਯੁਟ੍ਠਿਤਚਿਤ੍ਤਾ ਥਦ੍ਧਙ੍ਗਪਚ੍ਚਙ੍ਗਾ ਵਿਯ ਤੁਣ੍ਹੀ ਅਪ੍ਪਟਿਭਾਨਾ ਨਿਸੀਦਿਂਸੁ. ਅਥ ਸਤ੍ਥਾ ਇਮੇ ਪਰਿਬ੍ਬਾਜਕਾ ਅਤਿਵਿਯ ਨਿਰਵਾ ਹੁਤ੍ਵਾ ਨਿਸਿਨ੍ਨਾ, ਕਿਂ ਨੁ ਖੋਤਿ ਆਵਜ੍ਜਨ੍ਤੋ ਮਾਰੇਨ ਪਰਿਯੁਟ੍ਠਿਤਭਾਵਂ ਅਞ੍ਞਾਸਿ. ਸਚੇ ਪਨ ਤੇਸਂ ਮਗ੍ਗਫਲੁਪ੍ਪਤ੍ਤਿਹੇਤੁ ਭਵੇਯ੍ਯ, ਮਾਰਂ ਪਟਿਬਾਹਿਤ੍ਵਾਪਿ ਭਗਵਾ ਧਮ੍ਮਂ ਦੇਸੇਯ੍ਯ, ਸੋ ਪਨ ਤੇਸਂ ਨਤ੍ਥਿ. ‘‘ਸਬ੍ਬੇਪਿ ਮੇ ਤੁਚ੍ਛਪੁਰਿਸਾ’’ਤਿ ਅਞ੍ਞਾਸਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਤੋ ਏਤਦਹੋਸਿ ਸਬ੍ਬੇਪਿ ਮੇ ਮੋਘਪੁਰਿਸਾ’’ਤਿਆਦਿ.

ਤਤ੍ਥ ਫੁਟ੍ਠਾ ਪਾਪਿਮਤਾਤਿ ਪਾਪਿਮਤਾ ਮਾਰੇਨ ਫੁਟ੍ਠਾ. ਯਤ੍ਰ ਹਿ ਨਾਮਾਤਿ ਯੇਸੁ ਨਾਮ. ਅਞ੍ਞਾਣਤ੍ਥਮ੍ਪੀਤਿ ਜਾਨਨਤ੍ਥਮ੍ਪਿ. ਕਿਂ ਕਰਿਸ੍ਸਤਿ ਸਤ੍ਤਾਹੋਤਿ ਸਮਣੇਨ ਗੋਤਮੇਨ ਪਰਿਚ੍ਛਿਨ੍ਨਸਤ੍ਤਾਹੋ ਅਮ੍ਹਾਕਂ ਕਿਂ ਕਰਿਸ੍ਸਤਿ. ਇਦਂ ਵੁਤ੍ਤਂ ਹੋਤਿ ‘‘ਸਮਣੇਨ ਗੋਤਮੇਨ ‘ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਤਿ ਸਤ੍ਤਾਹ’ਨ੍ਤਿ ਵੁਤ੍ਤਂ, ਸੋ ਸਤ੍ਤਾਹੋ ਅਮ੍ਹਾਕਂ ਕਿਂ ਅਪ੍ਫਾਸੁਕਂ ਕਰਿਸ੍ਸਤਿ. ਹਨ੍ਦ ਮਯਂ ਸਤ੍ਤਾਹਬ੍ਭਨ੍ਤਰੇ ਏਤਂ ਧਮ੍ਮਂ ਸਚ੍ਛਿਕਾਤੁਂ ਸਕ੍ਕਾ, ਨ ਸਕ੍ਕਾਤਿ ਅਞ੍ਞਾਣਤ੍ਥਮ੍ਪਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਵਾ ਜਾਨਾਮ ਤਾਵਸ੍ਸ ਧਮ੍ਮਨ੍ਤਿ ਏਕਦਿਵਸੇ ਏਕਵਾਰਂ ਅਞ੍ਞਾਣਤ੍ਥਮ੍ਪਿ ਏਤੇਸਂ ਚਿਤ੍ਤਂ ਨੁਪ੍ਪਨ੍ਨਂ, ਸਤ੍ਤਾਹੋ ਪਨ ਏਤੇਸਂ ਕੁਸੀਤਾਨਂ ਕਿਂ ਕਰਿਸ੍ਸਤਿ, ਕਿਂ ਸਕ੍ਖਿਸ੍ਸਨ੍ਤਿ ਤੇ ਸਤ੍ਤਾਹਂ ਪੂਰੇਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ. ਸੀਹਨਾਦਨ੍ਤਿ ਪਰਵਾਦਭਿਨ੍ਦਨਂ ਸਕਵਾਦਸਮੁਸ੍ਸਾਪਨਞ੍ਚ ਅਭੀਤਨਾਦਂ ਨਦਿਤ੍ਵਾ. ਪਚ੍ਚੁਪਟ੍ਠਾਸੀਤਿ ਪਤਿਟ੍ਠਿਤੋ. ਤਾਵਦੇਵਾਤਿ ਤਸ੍ਮਿਞ੍ਞੇਵ ਖਣੇ. ਰਾਜਗਹਂ ਪਾਵਿਸੀਤਿ ਰਾਜਗਹਮੇਵ ਪਵਿਟ੍ਠੋ. ਤੇਸਂ ਪਨ ਪਰਿਬ੍ਬਾਜਕਾਨਂ ਕਿਞ੍ਚਾਪਿ ਇਦਂ ਸੁਤ੍ਤਨ੍ਤਂ ਸੁਤ੍ਵਾ ਵਿਸੇਸੋ ਨ ਨਿਬ੍ਬਤ੍ਤੋ, ਆਯਤਿਂ ਪਨ ਨੇਸਂ ਵਾਸਨਾਯ ਪਚ੍ਚਯੋ ਭਵਿਸ੍ਸਤੀਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਉਦੁਮ੍ਬਰਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ

ਅਤ੍ਤਦੀਪਸਰਣਤਾਵਣ੍ਣਨਾ

੮੦. ਏਵਂ ਮੇ ਸੁਤਨ੍ਤਿ ਚਕ੍ਕਵਤ੍ਤਿਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਮਾਤੁਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਂ ਨਗਰਂ ਗੋਚਰਗਾਮਂ ਕਤ੍ਵਾ ਅਵਿਦੂਰੇ ਵਨਸਣ੍ਡੇ ਵਿਹਰਤਿ. ‘‘ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀ’’ਤਿ ਏਤ੍ਥ ਅਯਮਨੁਪੁਬ੍ਬਿਕਥਾ –

ਭਗਵਾ ਕਿਰ ਇਮਸ੍ਸ ਸੁਤ੍ਤਸ੍ਸ ਸਮੁਟ੍ਠਾਨਸਮਯੇ ਪਚ੍ਚੂਸਕਾਲੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਇਮਾਯ ਅਨਾਗਤਵਂਸਦੀਪਿਕਾਯ ਸੁਤ੍ਤਨ੍ਤਕਥਾਯ ਮਾਤੁਲਨਗਰਵਾਸੀਨਂ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯਂ ਦਿਸ੍ਵਾ ਪਾਤੋਵ ਵੀਸਤਿਭਿਕ੍ਖੁਸਹਸ੍ਸਪਰਿਵਾਰੋ ਮਾਤੁਲਨਗਰਂ ਸਮ੍ਪਤ੍ਤੋ. ਮਾਤੁਲਨਗਰਵਾਸਿਨੋ ਖਤ੍ਤਿਯਾ ‘‘ਭਗਵਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਮ੍ਮ ਦਸਬਲਂ ਨਿਮਨ੍ਤੇਤ੍ਵਾ ਮਹਾਸਕ੍ਕਾਰੇਨ ਨਗਰਂ ਪਵੇਸੇਤ੍ਵਾ ਨਿਸਜ੍ਜਟ੍ਠਾਨਂ ਸਂਵਿਧਾਯ ਭਗਵਨ੍ਤਂ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਂਸੁ. ਭਗਵਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਚਿਨ੍ਤੇਸਿ – ‘‘ਸਚਾਹਂ ਇਮਸ੍ਮਿਂ ਠਾਨੇ ਇਮੇਸਂ ਮਨੁਸ੍ਸਾਨਂ ਧਮ੍ਮਂ ਦੇਸੇਸ੍ਸਾਮਿ, ਅਯਂ ਪਦੇਸੋ ਸਮ੍ਬਾਧੋ, ਮਨੁਸ੍ਸਾਨਂ ਠਾਤੁਂ ਵਾ ਨਿਸੀਦਿਤੁਂ ਵਾ ਓਕਾਸੋ ਨ ਭਵਿਸ੍ਸਤਿ, ਮਹਤਾ ਖੋ ਪਨ ਸਮਾਗਮੇਨ ਭਵਿਤਬ੍ਬ’’ਨ੍ਤਿ.

ਅਥ ਰਾਜਕੁਲਾਨਂ ਭਤ੍ਤਾਨੁਮੋਦਨਂ ਅਕਤ੍ਵਾਵ ਪਤ੍ਤਂ ਗਹੇਤ੍ਵਾ ਨਗਰਤੋ ਨਿਕ੍ਖਮਿ. ਮਨੁਸ੍ਸਾ ਚਿਨ੍ਤਯਿਂਸੁ – ‘‘ਸਤ੍ਥਾ ਅਮ੍ਹਾਕਂ ਅਨੁਮੋਦਨਮ੍ਪਿ ਅਕਤ੍ਵਾ ਗਚ੍ਛਤਿ, ਅਦ੍ਧਾ ਭਤ੍ਤਗ੍ਗਂ ਅਮਨਾਪਂ ਅਹੋਸਿ, ਬੁਦ੍ਧਾਨਂ ਨਾਮ ਨ ਸਕ੍ਕਾ ਚਿਤ੍ਤਂ ਗਹੇਤੁਂ, ਬੁਦ੍ਧੇਹਿ ਸਦ੍ਧਿਂ ਵਿਸ੍ਸਾਸਕਰਣਂ ਨਾਮ ਸਮੁਸ੍ਸਿਤਫਣਂ ਆਸੀਵਿਸਂ ਗੀਵਾਯ ਗਹਣਸਦਿਸਂ ਹੋਤਿ; ਏਥ ਭੋ, ਤਥਾਗਤਂ ਖਮਾਪੇਸ੍ਸਾਮਾ’’ਤਿ. ਸਕਲਨਗਰਵਾਸਿਨੋ ਭਗਵਤਾ ਸਹੇਵ ਨਿਕ੍ਖਨ੍ਤਾ. ਭਗਵਾ ਗਚ੍ਛਨ੍ਤੋਵ ਮਗਧਕ੍ਖੇਤ੍ਤੇ ਠਿਤਂ ਸਾਖਾਵਿਟਪਸਮ੍ਪਨ੍ਨਂ ਸਨ੍ਦਚ੍ਛਾਯਂ ਕਰੀਸਮਤ੍ਤਭੂਮਿਪਤ੍ਥਟਂ ਏਕਂ ਮਾਤੁਲਰੁਕ੍ਖਂ ਦਿਸ੍ਵਾ ਇਮਸ੍ਮਿਂ ਰੁਕ੍ਖਮੂਲੇ ਨਿਸੀਦਿਤ੍ਵਾ ਧਮ੍ਮੇ ਦੇਸਿਯਮਾਨੇ ‘‘ਮਹਾਜਨਸ੍ਸ ਠਾਨਨਿਸਜ੍ਜਨੋਕਾਸੋ ਭਵਿਸ੍ਸਤੀ’’ਤਿ. ਨਿਵਤ੍ਤਿਤ੍ਵਾ ਮਗ੍ਗਾ ਓਕ੍ਕਮ੍ਮ ਰੁਕ੍ਖਮੂਲਂ ਉਪਸਙ੍ਕਮਿਤ੍ਵਾ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਂ ਓਲੋਕੇਸਿ. ਥੇਰੋ ਓਲੋਕਿਤਸਞ੍ਞਾਯ ਏਵ ‘‘ਸਤ੍ਥਾ ਨਿਸੀਦਿਤੁਕਾਮੋ’’ਤਿ ਞਤ੍ਵਾ ਸੁਗਤਮਹਾਚੀਵਰਂ ਪਞ੍ਞਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਅਥਸ੍ਸ ਪੁਰਤੋ ਮਨੁਸ੍ਸਾ ਨਿਸੀਦਿਂਸੁ. ਉਭੋਸੁ ਪਸ੍ਸੇਸੁ ਪਚ੍ਛਤੋ ਚ ਭਿਕ੍ਖੁਸਙ੍ਘੋ, ਆਕਾਸੇ ਦੇਵਤਾ ਅਟ੍ਠਂਸੁ, ਏਵਂ ਮਹਾਪਰਿਸਮਜ੍ਝਗਤੋ ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ.

ਤੇ ਭਿਕ੍ਖੂਤਿ ਤਤ੍ਰ ਉਪਵਿਟ੍ਠਾ ਧਮ੍ਮਪ੍ਪਟਿਗ੍ਗਾਹਕਾ ਭਿਕ੍ਖੂ. ਅਤ੍ਤਦੀਪਾਤਿ ਅਤ੍ਤਾਨਂ ਦੀਪਂ ਤਾਣਂ ਲੇਣਂ ਗਤਿਂ ਪਰਾਯਣਂ ਪਤਿਟ੍ਠਂ ਕਤ੍ਵਾ ਵਿਹਰਥਾਤਿ ਅਤ੍ਥੋ. ਅਤ੍ਤਸਰਣਾਤਿ ਇਦਂ ਤਸ੍ਸੇਵ ਵੇਵਚਨਂ. ਅਨਞ੍ਞਸਰਣਾਤਿ ਇਦਂ ਅਞ੍ਞਸਰਣਪਟਿਕ੍ਖੇਪਵਚਨਂ. ਨ ਹਿ ਅਞ੍ਞੋ ਅਞ੍ਞਸ੍ਸ ਸਰਣਂ ਹੋਤਿ, ਅਞ੍ਞਸ੍ਸ ਵਾਯਾਮੇਨ ਅਞ੍ਞਸ੍ਸ ਅਸੁਜ੍ਝਨਤੋ. ਵੁਤ੍ਤਮ੍ਪਿ ਚੇਤਂ ‘‘ਅਤ੍ਤਾ ਹਿ ਅਤ੍ਤਨੋ ਨਾਥੋ, ਕੋ ਹਿ ਨਾਥੋ ਪਰੋ ਸਿਯਾ’’ਤਿ (ਧ. ਪ. ੧੬੦). ਤੇਨਾਹ ‘‘ਅਨਞ੍ਞਸਰਣਾ’’ਤਿ. ਕੋ ਪਨੇਤ੍ਥ ਅਤ੍ਤਾ ਨਾਮ, ਲੋਕਿਯਲੋਕੁਤ੍ਤਰੋ ਧਮ੍ਮੋ. ਤੇਨਾਹ – ‘‘ਧਮ੍ਮਦੀਪਾ ਧਮ੍ਮਸਰਣਾ ਅਨਞ੍ਞਸਰਣਾ’’ਤਿ. ‘‘ਕਾਯੇ ਕਾਯਾਨੁਪਸ੍ਸੀ’’ਤਿਆਦੀਨਿ ਮਹਾਸਤਿਪਟ੍ਠਾਨੇ ਵਿਤ੍ਥਾਰਿਤਾਨਿ.

ਗੋਚਰੇਤਿ ਚਰਿਤੁਂ ਯੁਤ੍ਤਟ੍ਠਾਨੇ. ਸਕੇਤਿ ਅਤ੍ਤਨੋ ਸਨ੍ਤਕੇ. ਪੇਤ੍ਤਿਕੇ ਵਿਸਯੇਤਿ ਪਿਤਿਤੋ ਆਗਤਵਿਸਯੇ. ਚਰਤਨ੍ਤਿ ਚਰਨ੍ਤਾਨਂ. ‘‘ਚਰਨ੍ਤ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਨ ਲਚ੍ਛਤੀਤਿ ਨ ਲਭਿਸ੍ਸਤਿ ਨ ਪਸ੍ਸਿਸ੍ਸਤਿ. ਮਾਰੋਤਿ ਦੇਵਪੁਤ੍ਤਮਾਰੋਪਿ, ਮਚ੍ਚੁਮਾਰੋਪਿ, ਕਿਲੇਸਮਾਰੋਪਿ. ਓਤਾਰਨ੍ਤਿ ਰਨ੍ਧਂ ਛਿਦ੍ਦਂ ਵਿਵਰਂ. ਅਯਂ ਪਨਤ੍ਥੋ ਲੇਡ੍ਡੁਟ੍ਠਾਨਤੋ ਨਿਕ੍ਖਮ੍ਮ ਤੋਰਣੇ ਨਿਸੀਦਿਤ੍ਵਾ ਬਾਲਾਤਪਂ ਤਪਨ੍ਤਂ ਲਾਪਂ ਸਕੁਣਂ ਗਹੇਤ੍ਵਾ. ਪਕ੍ਖਨ੍ਦਸੇਨਸਕੁਣਵਤ੍ਥੁਨਾ ਦੀਪੇਤਬ੍ਬੋ. ਵੁਤ੍ਤਞ੍ਹੇਤਂ –

‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਕੁਣਗ੍ਘਿ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ ਅਗ੍ਗਹੇਸਿ. ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਸਕੁਣਗ੍ਘਿਯਾ ਹਰਿਯਮਾਨੋ ਏਵਂ ਪਰਿਦੇਵਸਿ ‘ਮਯਮੇਵਮ੍ਹ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ, ਯੇ ਮਯਂ ਅਗੋਚਰੇ ਚਰਿਮ੍ਹ ਪਰਵਿਸਯੇ, ਸਚੇਜ੍ਜ ਮਯਂ ਗੋਚਰੇ ਚਰੇਯ੍ਯਾਮ ਸਕੇ ਪੇਤ੍ਤਿਕੇ ਵਿਸਯੇ, ਨ ਮ੍ਯਾਯਂ ਸਕੁਣਗ੍ਘਿ ਅਲਂ ਅਭਵਿਸ੍ਸ ਯਦਿਦਂ ਯੁਦ੍ਧਾਯਾ’ਤਿ. ਕੋ ਪਨ ਤੇ ਲਾਪ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ? ਯਦਿਦਂ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਨ੍ਤਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਲਾਪਂ ਸਕੁਣਂ ਪਮੁਞ੍ਚਿ ਗਚ੍ਛ ਖੋ ਤ੍ਵਂ ਲਾਪ, ਤਤ੍ਰਪਿ ਗਨ੍ਤ੍ਵਾ ਨ ਮੋਕ੍ਖਸੀਤਿ.

ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਂ ਗਨ੍ਤ੍ਵਾ ਮਹਨ੍ਤਂ ਲੇਡ੍ਡੁਂ ਅਭਿਰੁਹਿਤ੍ਵਾ ਸਕੁਣਗ੍ਘਿਂ ਵਦਮਾਨੋ ਅਟ੍ਠਾਸਿ ‘‘ਏਹਿ ਖੋ ਦਾਨਿ ਮੇ ਸਕੁਣਗ੍ਘਿ, ਏਹਿ ਖੋ ਦਾਨਿ ਮੇ ਸਕੁਣਗ੍ਘੀ’’ਤਿ. ਅਥ ਖੋ ਸਾ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਉਭੋ ਪਕ੍ਖੇ ਸਨ੍ਨਯ੍ਹ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ. ਯਦਾ ਖੋ, ਭਿਕ੍ਖਵੇ, ਅਞ੍ਞਾਸਿ ਲਾਪੋ ਸਕੁਣੋ ਬਹੁਆਗਤਾ ਖੋ ਮ੍ਯਾਯਂ ਸਕੁਣਗ੍ਘੀਤਿ, ਅਥ ਖੋ ਤਸ੍ਸੇਵ ਲੇਡ੍ਡੁਸ੍ਸ ਅਨ੍ਤਰਂ ਪਚ੍ਚੁਪਾਦਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਤਤ੍ਥੇਵ ਉਰਂ ਪਚ੍ਚਤਾਲ਼ੇਸਿ. ਏਵਞ੍ਹਿ ਤਂ, ਭਿਕ੍ਖਵੇ, ਹੋਤਿ ਯੋ ਅਗੋਚਰੇ ਚਰਤਿ ਪਰਵਿਸਯੇ.

ਤਸ੍ਮਾਤਿਹ, ਭਿਕ੍ਖਵੇ, ਮਾ ਅਗੋਚਰੇ ਚਰਿਤ੍ਥ ਪਰਵਿਸਯੇ, ਅਗੋਚਰੇ, ਭਿਕ੍ਖਵੇ, ਚਰਤਂ ਪਰਵਿਸਯੇ ਲਚ੍ਛਤਿ ਮਾਰੋ ਓਤਾਰਂ, ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ, ਯਦਿਦਂ ਪਞ੍ਚ ਕਾਮਗੁਣਾ. ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਸੋਤਵਿਞ੍ਞੇਯ੍ਯਾ ਸਦ੍ਦਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਘਾਨਵਿਞ੍ਞੇਯ੍ਯਾ ਗਨ੍ਧਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਜਿਵ੍ਹਾਵਿਞ੍ਞੇਯ੍ਯਾ ਰਸਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ. ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ.

ਗੋਚਰੇ, ਭਿਕ੍ਖਵੇ, ਚਰਥ…ਪੇ… ਨ ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ, ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ. ਕਤਮੇ ਚਤ੍ਤਾਰੋ? ਇਧ ਭਿਕ੍ਖਵੇ, ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਵੇਦਨਾਸੁ ਵੇਦਨਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਚਿਤ੍ਤੇ ਚਿਤ੍ਤਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ – ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ (ਸਂ. ਨਿ. ੫.੩੭੧).

ਕੁਸਲਾਨਨ੍ਤਿ ਅਨਵਜ੍ਜਲਕ੍ਖਣਾਨਂ. ਸਮਾਦਾਨਹੇਤੂਤਿ ਸਮਾਦਾਯ ਵਤ੍ਤਨਹੇਤੁ. ਏਵਮਿਦਂ ਪੁਞ੍ਞਂ ਪਵਡ੍ਢਤੀਤਿ ਏਵਂ ਇਦਂ ਲੋਕਿਯਲੋਕੁਤ੍ਤਰਂ ਪੁਞ੍ਞਫਲਂ ਵਡ੍ਢਤਿ, ਪੁਞ੍ਞਫਲਨ੍ਤਿ ਚ ਉਪਰੂਪਰਿ ਪੁਞ੍ਞਮ੍ਪਿ ਪੁਞ੍ਞਵਿਪਾਕੋਪਿ ਵੇਦਿਤਬ੍ਬੋ.

ਦਲ਼੍ਹਨੇਮਿਚਕ੍ਕਵਤ੍ਤਿਰਾਜਕਥਾਵਣ੍ਣਨਾ

੮੧. ਤਤ੍ਥ ਦੁਵਿਧਂ ਕੁਸਲਂ ਵਟ੍ਟਗਾਮੀ ਚ ਵਿਵਟ੍ਟਗਾਮੀ ਚ. ਤਤ੍ਥ ਵਟ੍ਟਗਾਮਿਕੁਸਲਂ ਨਾਮ ਮਾਤਾਪਿਤੂਨਂ ਪੁਤ੍ਤਧੀਤਾਸੁ ਪੁਤ੍ਤਧੀਤਾਨਞ੍ਚ ਮਾਤਾਪਿਤੂਸੁ ਸਿਨੇਹਵਸੇਨ ਮੁਦੁਮਦ੍ਦਵਚਿਤ੍ਤਂ. ਵਿਵਟ੍ਟਗਾਮਿਕੁਸਲਂ ਨਾਮ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਭੇਦਾ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ. ਤੇਸੁ ਵਟ੍ਟਗਾਮਿਪੁਞ੍ਞਸ੍ਸ ਪਰਿਯੋਸਾਨਂ ਮਨੁਸ੍ਸਲੋਕੇ ਚਕ੍ਕਵਤ੍ਤਿਸਿਰੀਵਿਭਵੋ. ਵਿਵਟ੍ਟਗਾਮਿਕੁਸਲਸ੍ਸ ਮਗ੍ਗਫਲਨਿਬ੍ਬਾਨਸਮ੍ਪਤ੍ਤਿ. ਤਤ੍ਥ ਵਿਵਟ੍ਟਗਾਮਿਕੁਸਲਸ੍ਸ ਵਿਪਾਕਂ ਸੁਤ੍ਤਪਰਿਯੋਸਾਨੇ ਦਸ੍ਸੇਸ੍ਸਤਿ.

ਇਧ ਪਨ ਵਟ੍ਟਗਾਮਿਕੁਸਲਸ੍ਸ ਵਿਪਾਕਦਸ੍ਸਨਤ੍ਥਂ, ਭਿਕ੍ਖਵੇ, ਯਦਾ ਪੁਤ੍ਤਧੀਤਰੋ ਮਾਤਾਪਿਤੂਨਂ ਓਵਾਦੇ ਨ ਅਟ੍ਠਂਸੁ, ਤਦਾ ਆਯੁਨਾਪਿ ਵਣ੍ਣੇਨਾਪਿ ਇਸ੍ਸਰਿਯੇਨਾਪਿ ਪਰਿਹਾਯਿਂਸੁ. ਯਦਾ ਪਨ ਅਟ੍ਠਂਸੁ, ਤਦਾ ਵਡ੍ਢਿਂਸੂਤਿ ਵਤ੍ਵਾ ਵਟ੍ਟਗਾਮਿਕੁਸਲਾਨੁਸਨ੍ਧਿਵਸੇਨ ‘‘ਭੂਤਪੁਬ੍ਬਂ, ਭਿਕ੍ਖਵੇ’’ਤਿ ਦੇਸਨਂ ਆਰਭਿ. ਤਤ੍ਥ ਚਕ੍ਕਵਤ੍ਤੀਤਿਆਦੀਨਿ ਮਹਾਪਦਾਨੇ (ਦੀ. ਨਿ. ਅਟ੍ਠ. ੨.੩੩) ਵਿਤ੍ਥਾਰਿਤਾਨੇਵ.

੮੨. ਓਸਕ੍ਕਿਤਨ੍ਤਿ ਈਸਕਮ੍ਪਿ ਅਵਸਕ੍ਕਿਤਂ. ਠਾਨਾ ਚੁਤਨ੍ਤਿ ਸਬ੍ਬਸੋ ਠਾਨਾ ਅਪਗਤਂ. ਤਂ ਕਿਰ ਚਕ੍ਕਰਤਨਂ ਅਨ੍ਤੇਪੁਰਦ੍ਵਾਰੇ ਅਕ੍ਖਾਹਤਂ ਵਿਯ ਵੇਹਾਸਂ ਅਟ੍ਠਾਸਿ. ਅਥਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਖਦਿਰਤ੍ਥਮ੍ਭੇ ਨਿਖਣਿਤ੍ਵਾ ਚਕ੍ਕਰਤਨਮਤ੍ਥਕੇ ਨੇਮਿਅਭਿਮੁਖਂ ਏਕਂ ਸੁਤ੍ਤਕਂ ਬਨ੍ਧਿਂਸੁ. ਅਧੋਭਾਗੇਪਿ ਨੇਮਿਅਭਿਮੁਖਂ ਏਕਂ ਬਨ੍ਧਿਂਸੁ. ਤੇਸੁ ਉਪਰਿਮਸੁਤ੍ਤਤੋ ਅਪ੍ਪਮਤ੍ਤਕਮ੍ਪਿ ਓਗਤਂ ਚਕ੍ਕਰਤਨਂ ਓਸਕ੍ਕਿਤਂ ਨਾਮ ਹੋਤਿ, ਹੇਟ੍ਠਾ ਸੁਤ੍ਤਸ੍ਸ ਠਾਨਂ ਉਪਰਿਮਕੋਟਿਯਾ ਅਤਿਕ੍ਕਨ੍ਤਗਤਂ ਠਾਨਾ ਚੁਤਂ ਨਾਮ ਹੋਤਿ, ਤਦੇਤਂ ਅਤਿਬਲਵਦੋਸੇ ਸਤਿ ਏਵਂ ਹੋਤਿ. ਸੁਤ੍ਤਮਤ੍ਤਮ੍ਪਿ ਏਕਙ੍ਗੁਲਦ੍ਵਙ੍ਗੁਲਮਤ੍ਤਂ ਵਾ ਭਟ੍ਠਂ ਠਾਨਾ ਚੁਤਮੇਵ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਓਸਕ੍ਕਿਤਂ ਠਾਨਾ ਚੁਤ’’ਨ੍ਤਿ.

ਅਥ ਮੇ ਆਰੋਚੇਯ੍ਯਾਸੀਤਿ ਤਾਤ, ਤ੍ਵਂ ਅਜ੍ਜ ਆਦਿਂ ਕਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਚਕ੍ਕਰਤਨਸ੍ਸ ਉਪਟ੍ਠਾਨਂ ਗਚ੍ਛ, ਏਵਂ ਗਚ੍ਛਨ੍ਤੋ ਯਦਾ ਚਕ੍ਕਰਤਨਂ ਈਸਕਮ੍ਪਿ ਓਸਕ੍ਕਿਤਂ ਠਾਨਾ ਚੁਤਂ ਪਸ੍ਸਸਿ, ਅਥ ਮਯ੍ਹਂ ਆਚਿਕ੍ਖੇਯ੍ਯਾਸਿ. ਜੀਵਿਤਞ੍ਹਿ ਮੇ ਤਵ ਹਤ੍ਥੇ ਨਿਕ੍ਖਿਤ੍ਤਨ੍ਤਿ. ਅਦ੍ਦਸਾਤਿ ਅਪ੍ਪਮਤ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਗਨ੍ਤ੍ਵਾ ਓਲੋਕੇਨ੍ਤੋ ਏਕਦਿਵਸਂ ਅਦ੍ਦਸ.

੮੩. ਅਥ ਖੋ, ਭਿਕ੍ਖਵੇਤਿ ਭਿਕ੍ਖਵੇ, ਅਥ ਰਾਜਾ ਦਲ਼੍ਹਨੇਮਿ ‘‘ਚਕ੍ਕਰਤਨਂ ਓਸਕ੍ਕਿਤ’’ਨ੍ਤਿ ਸੁਤ੍ਵਾ ਉਪ੍ਪਨ੍ਨਬਲਵਦੋਮਨਸ੍ਸੋ ‘‘ਨ ਦਾਨਿ ਮਯਾ ਚਿਰਂ ਜੀਵਿਤਬ੍ਬਂ ਭਵਿਸ੍ਸਤਿ, ਅਪ੍ਪਾਵਸੇਸਂ ਮੇ ਆਯੁ, ਨ ਮੇ ਦਾਨਿ ਕਾਮੇ ਪਰਿਭੁਞ੍ਜਨਕਾਲੋ, ਪਬ੍ਬਜ੍ਜਾਕਾਲੋ ਮੇ ਇਦਾਨੀ’’ਤਿ ਰੋਦਿਤ੍ਵਾ ਪਰਿਦੇਵਿਤ੍ਵਾ ਜੇਟ੍ਠਪੁਤ੍ਤਂ ਕੁਮਾਰਂ ਆਮਨ੍ਤਾਪੇਤ੍ਵਾ ਏਤਦਵੋਚ. ਸਮੁਦ੍ਦਪਰਿਯਨ੍ਤਨ੍ਤਿ ਪਰਿਕ੍ਖਿਤ੍ਤਏਕਸਮੁਦ੍ਦਪਰਿਯਨ੍ਤਮੇਵ. ਇਦਂ ਹਿਸ੍ਸ ਕੁਲਸਨ੍ਤਕਂ. ਚਕ੍ਕਵਾਲ਼ਪਰਿਯਨ੍ਤਂ ਪਨ ਪੁਞ੍ਞਿਦ੍ਧਿਵਸੇਨ ਨਿਬ੍ਬਤ੍ਤਂ, ਨ ਤਂ ਸਕ੍ਕਾ ਦਾਤੁਂ. ਕੁਲਸਨ੍ਤਕਂ ਪਨ ਨਿਯ੍ਯਾਤੇਨ੍ਤੋ ‘‘ਸਮੁਦ੍ਦਪਰਿਯਨ੍ਤ’’ਨ੍ਤਿ ਆਹ. ਕੇਸਮਸ੍ਸੁਨ੍ਤਿ ਤਾਪਸਪਬ੍ਬਜ੍ਜਂ ਪਬ੍ਬਜਨ੍ਤਾਪਿ ਹਿ ਪਠਮਂ ਕੇਸਮਸ੍ਸੁਂ ਓਹਾਰੇਨ੍ਤਿ. ਤਤੋ ਪਟ੍ਠਾਯ ਪਰੂਲ਼੍ਹਕੇਸੇ ਬਨ੍ਧਿਤ੍ਵਾ ਵਿਚਰਨ੍ਤਿ. ਤੇਨ ਵੁਤ੍ਤਂ – ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿ.

ਕਾਸਾਯਾਨੀਤਿ ਕਸਾਯਰਸਪੀਤਾਨਿ. ਆਦਿਤੋ ਏਵਂ ਕਤ੍ਵਾ ਪਚ੍ਛਾ ਵਕ੍ਕਲਾਨਿਪਿ ਧਾਰੇਨ੍ਤਿ. ਪਬ੍ਬਜੀਤਿ ਪਬ੍ਬਜਿਤੋ. ਪਬ੍ਬਜਿਤ੍ਵਾ ਚ ਅਤ੍ਤਨੋ ਮਙ੍ਗਲਵਨੁਯ੍ਯਾਨੇਯੇਵ ਵਸਿ. ਰਾਜਿਸਿਮ੍ਹੀਤਿ ਰਾਜਈਸਿਮ੍ਹਿ. ਬ੍ਰਾਹ੍ਮਣਪਬ੍ਬਜਿਤਾ ਹਿ ‘‘ਬ੍ਰਾਹ੍ਮਣਿਸਯੋ’’ਤਿ ਵੁਚ੍ਚਨ੍ਤਿ. ਸੇਤਚ੍ਛਤ੍ਤਂ ਪਨ ਪਹਾਯ ਰਾਜਪਬ੍ਬਜਿਤਾ ਰਾਜਿਸਯੋਤਿ. ਅਨ੍ਤਰਧਾਯੀਤਿ ਅਨ੍ਤਰਹਿਤਂ ਨਿਬ੍ਬੁਤਦੀਪਸਿਖਾ ਵਿਯ ਅਭਾਵਂ ਉਪਗਤਂ. ਪਟਿਸਂਵੇਦੇਸੀਤਿ ਕਨ੍ਦਨ੍ਤੋ ਪਰਿਦੇਵਨ੍ਤੋ ਜਾਨਾਪੇਸਿ. ਪੇਤ੍ਤਿਕਨ੍ਤਿ ਪਿਤਿਤੋ ਆਗਤਂ ਦਾਯਜ੍ਜਂ ਨ ਹੋਤਿ, ਨ ਸਕ੍ਕਾ ਕੁਸੀਤੇਨ ਹੀਨਵੀਰਿਯੇਨ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਨ੍ਤੇਨ ਪਾਪੁਣਿਤੁਂ. ਅਤ੍ਤਨੋ ਪਨ ਸੁਕਤਂ ਕਮ੍ਮਂ ਨਿਸ੍ਸਾਯ ਦਸਵਿਧਂ ਦ੍ਵਾਦਸਵਿਧਂ ਵਾ ਚਕ੍ਕਵਤ੍ਤਿਵਤ੍ਤਂ ਪੂਰੇਨ੍ਤੇਨੇਵੇਤਂ ਪਤ੍ਤਬ੍ਬਨ੍ਤਿ ਦੀਪੇਤਿ. ਅਥ ਨਂ ਵਤ੍ਤਪਟਿਪਤ੍ਤਿਯਂ ਚੋਦੇਨ੍ਤੋ ‘‘ਇਙ੍ਘ ਤ੍ਵ’’ਨ੍ਤਿਆਦਿਮਾਹ. ਤਤ੍ਥ ਅਰਿਯੇਤਿ ਨਿਦ੍ਦੋਸੇ. ਚਕ੍ਕਵਤ੍ਤਿਵਤ੍ਤੇਤਿ ਚਕ੍ਕਵਤ੍ਤੀਨਂ ਵਤ੍ਤੇ.

ਚਕ੍ਕਵਤ੍ਤਿਅਰਿਯਵਤ੍ਤਵਣ੍ਣਨਾ

੮੪. ਧਮ੍ਮਨ੍ਤਿ ਦਸਕੁਸਲਕਮ੍ਮਪਥਧਮ੍ਮਂ. ਨਿਸ੍ਸਾਯਾਤਿ ਤਦਧਿਟ੍ਠਾਨੇਨ ਚੇਤਸਾ ਤਮੇਵ ਨਿਸ੍ਸਯਂ ਕਤ੍ਵਾ. ਧਮ੍ਮਂ ਸਕ੍ਕਰੋਨ੍ਤੋਤਿ ਯਥਾ ਕਤੋ ਸੋ ਧਮ੍ਮੋ ਸੁਟ੍ਠੁ ਕਤੋ ਹੋਤਿ, ਏਵਮੇਤਂ ਕਰੋਨ੍ਤੋ. ਧਮ੍ਮਂ ਗਰੁਂ ਕਰੋਨ੍ਤੋਤਿ ਤਸ੍ਮਿਂ ਗਾਰਵੁਪ੍ਪਤ੍ਤਿਯਾ ਤਂ ਗਰੁਂ ਕਰੋਨ੍ਤੋ. ਧਮ੍ਮਂ ਮਾਨੇਨ੍ਤੋਤਿ ਤਮੇਵ ਧਮ੍ਮਂ ਪਿਯਞ੍ਚ ਭਾਵਨੀਯਞ੍ਚ ਕਤ੍ਵਾ ਵਿਹਰਨ੍ਤੋ. ਧਮ੍ਮਂ ਪੂਜੇਨ੍ਤੋਤਿ ਤਂ ਅਪਦਿਸਿਤ੍ਵਾ ਗਨ੍ਧਮਾਲਾਦਿਪੂਜਨੇਨਸ੍ਸ ਪੂਜਂ ਕਰੋਨ੍ਤੋ. ਧਮ੍ਮਂ ਅਪਚਯਮਾਨੋਤਿ ਤਸ੍ਸੇਵ ਧਮ੍ਮਸ੍ਸ ਅਞ੍ਜਲਿਕਰਣਾਦੀਹਿ ਨੀਚਵੁਤ੍ਤਿਤਂ ਕਰੋਨ੍ਤੋ. ਧਮ੍ਮਦ੍ਧਜੋ ਧਮ੍ਮਕੇਤੂਤਿ ਤਂ ਧਮ੍ਮਂ ਧਜਮਿਵ ਪੁਰਕ੍ਖਤ੍ਵਾ ਕੇਤੁਮਿਵ ਚ ਉਕ੍ਖਿਪਿਤ੍ਵਾ ਪਵਤ੍ਤਿਯਾ ਧਮ੍ਮਦ੍ਧਜੋ ਧਮ੍ਮਕੇਤੁ ਚ ਹੁਤ੍ਵਾਤਿ ਅਤ੍ਥੋ. ਧਮ੍ਮਾਧਿਪਤੇਯ੍ਯੋਤਿ ਧਮ੍ਮਾਧਿਪਤਿਭੂਤੋ ਆਗਤਭਾਵੇਨ ਧਮ੍ਮਵਸੇਨੇਵ ਸਬ੍ਬਕਿਰਿਯਾਨਂ ਕਰਣੇਨ ਧਮ੍ਮਾਧਿਪਤੇਯ੍ਯੋ ਹੁਤ੍ਵਾ. ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਸ੍ਸੂਤਿ ਧਮ੍ਮੋ ਅਸ੍ਸਾ ਅਤ੍ਥੀਤਿ ਧਮ੍ਮਿਕਾ, ਰਕ੍ਖਾ ਚ ਆਵਰਣਞ੍ਚ ਗੁਤ੍ਤਿ ਚ ਰਕ੍ਖਾਵਰਣਗੁਤ੍ਤਿ. ਤਤ੍ਥ ‘‘ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤੀ’’ਤਿ (ਸਂ. ਨਿ. ੫.੩੮੫) ਵਚਨਤੋ ਖਨ੍ਤਿਆਦਯੋ ਰਕ੍ਖਾ. ਵੁਤ੍ਤਞ੍ਹੇਤਂ ‘‘ਕਥਞ੍ਚ, ਭਿਕ੍ਖਵੇ, ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤਿ. ਖਨ੍ਤਿਯਾ ਅਵਿਹਿਂਸਾਯ ਮੇਤ੍ਤਚਿਤ੍ਤਤਾ ਅਨੁਦ੍ਦਯਤਾ’’ਤਿ (ਸਂ. ਨਿ. ੫.੩੮੫). ਨਿਵਾਸਨਪਾਰੁਪਨਗੇਹਾਦੀਨਂ ਨਿਵਾਰਣਾ ਆਵਰਣਂ, ਚੋਰਾਦਿਉਪਦ੍ਦਵਨਿਵਾਰਣਤ੍ਥਂ ਗੋਪਾਯਨਾ ਗੁਤ੍ਤਿ, ਤਂ ਸਬ੍ਬਮ੍ਪਿ ਸੁਟ੍ਠੁ ਸਂਵਿਦਹਸ੍ਸੁ ਪਵਤ੍ਤਯ ਠਪੇਹੀਤਿ ਅਤ੍ਥੋ. ਇਦਾਨਿ ਯਤ੍ਥ ਸਾ ਸਂਵਿਦਹਿਤਬ੍ਬਾ, ਤਂ ਦਸ੍ਸੇਨ੍ਤੋ ਅਨ੍ਤੋਜਨਸ੍ਮਿਨ੍ਤਿਆਦਿਮਾਹ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਅਨ੍ਤੋਜਨਸਙ੍ਖਾਤਂ ਤਵ ਪੁਤ੍ਤਦਾਰਂ ਸੀਲਸਂਵਰੇ ਪਤਿਟ੍ਠਪੇਹਿ, ਵਤ੍ਥਗਨ੍ਧਮਾਲਾਦੀਨਿ ਚਸ੍ਸ ਦੇਹਿ, ਸਬ੍ਬੋਪਦ੍ਦਵੇ ਚਸ੍ਸ ਨਿਵਾਰੇਹਿ. ਬਲਕਾਯਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਬਲਕਾਯੋ ਕਾਲਂ ਅਨਤਿਕ੍ਕਮਿਤ੍ਵਾ ਭਤ੍ਤਵੇਤਨਸਮ੍ਪਦਾਨੇਨਪਿ ਅਨੁਗ੍ਗਹੇਤਬ੍ਬੋ. ਅਭਿਸਿਤ੍ਤਖਤ੍ਤਿਯਾ ਭਦ੍ਰਸ੍ਸਾਜਾਨੇਯ੍ਯਾਦਿਰਤਨਸਮ੍ਪਦਾਨੇਨਪਿ ਉਪਸਙ੍ਗਣ੍ਹਿਤਬ੍ਬਾ. ਅਨੁਯਨ੍ਤਖਤ੍ਤਿਯਾ ਤੇਸਂ ਅਨੁਰੂਪਯਾਨਵਾਹਨਸਮ੍ਪਦਾਨੇਨਪਿ ਪਰਿਤੋਸੇਤਬ੍ਬਾ. ਬ੍ਰਾਹ੍ਮਣਾ ਅਨ੍ਨਪਾਨਵਤ੍ਥਾਦਿਨਾ ਦੇਯ੍ਯਧਮ੍ਮੇਨ. ਗਹਪਤਿਕਾ ਭਤ੍ਤਬੀਜਨਙ੍ਗਲਫਾਲਬਲਿਬਦ੍ਦਾਦਿਸਮ੍ਪਦਾਨੇਨ. ਤਥਾ ਨਿਗਮਵਾਸਿਨੋ ਨੇਗਮਾ, ਜਨਪਦਵਾਸਿਨੋ ਚ ਜਾਨਪਦਾ. ਸਮਿਤਪਾਪਬਾਹਿਤਪਾਪਾ ਸਮਣਬ੍ਰਾਹ੍ਮਣਾ ਸਮਣਪਰਿਕ੍ਖਾਰਸਮ੍ਪਦਾਨੇਨ ਸਕ੍ਕਾਤਬ੍ਬਾ. ਮਿਗਪਕ੍ਖਿਨੋ ਅਭਯਦਾਨੇਨ ਸਮਸ੍ਸਾਸੇਤਬ੍ਬਾ.

ਵਿਜਿਤੇਤਿ ਅਤ੍ਤਨੋ ਆਣਾਪਵਤ੍ਤਿਟ੍ਠਾਨੇ. ਅਧਮ੍ਮਕਾਰੋਤਿ ਅਧਮ੍ਮਕਿਰਿਯਾ. ਮਾ ਪਵਤ੍ਤਿਤ੍ਥਾਤਿ ਯਥਾ ਨਪ੍ਪਵਤ੍ਤਤਿ, ਤਥਾ ਨਂ ਪਟਿਪਾਦੇਹੀਤਿ ਅਤ੍ਥੋ. ਸਮਣਬ੍ਰਾਹ੍ਮਣਾਤਿ ਸਮਿਤਪਾਪਬਾਹਿਤਪਾਪਾ. ਮਦਪ੍ਪਮਾਦਾ ਪਟਿਵਿਰਤਾਤਿ ਨਵਵਿਧਾ ਮਾਨਮਦਾ, ਪਞ੍ਚਸੁ ਕਾਮਗੁਣੇਸੁ ਚਿਤ੍ਤਵੋਸ੍ਸਜ੍ਜਨਸਙ੍ਖਾਤਾ ਪਮਾਦਾ ਚ ਪਟਿਵਿਰਤਾ. ਖਨ੍ਤਿਸੋਰਚ੍ਚੇ ਨਿਵਿਟ੍ਠਾਤਿ ਅਧਿਵਾਸਨਖਨ੍ਤਿਯਞ੍ਚ ਸੁਰਤਭਾਵੇ ਚ ਪਤਿਟ੍ਠਿਤਾ. ਏਕਮਤ੍ਤਾਨਨ੍ਤਿ ਅਤ੍ਤਨੋ ਰਾਗਾਦੀਨਂ ਦਮਨਾਦੀਹਿ ਏਕਮਤ੍ਤਾਨਂ ਦਮੇਨ੍ਤਿ ਸਮੇਨ੍ਤਿ ਪਰਿਨਿਬ੍ਬਾਪੇਨ੍ਤੀਤਿ ਵੁਚ੍ਚਨ੍ਤਿ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ. ਅਭਿਨਿਵਜ੍ਜੇਯ੍ਯਾਸੀਤਿ ਗੂਥਂ ਵਿਯ ਵਿਸਂ ਵਿਯ ਅਗ੍ਗਿਂ ਵਿਯ ਚ ਸੁਟ੍ਠੁ ਵਜ੍ਜੇਯ੍ਯਾਸਿ. ਸਮਾਦਾਯਾਤਿ ਸੁਰਭਿਕੁਸੁਮਦਾਮਂ ਵਿਯ ਅਮਤਂ ਵਿਯ ਚ ਸਮ੍ਮਾ ਆਦਾਯ ਪਵਤ੍ਤੇਯ੍ਯਾਸਿ.

ਇਧ ਠਤ੍ਵਾ ਵਤ੍ਤਂ ਸਮਾਨੇਤਬ੍ਬਂ. ਅਨ੍ਤੋਜਨਸ੍ਮਿਂ ਬਲਕਾਯੇਪਿ ਏਕਂ, ਖਤ੍ਤਿਯੇਸੁ ਏਕਂ, ਅਨੁਯਨ੍ਤੇਸੁ ਏਕਂ, ਬ੍ਰਾਹ੍ਮਣਗਹਪਤਿਕੇਸੁ ਏਕਂ, ਨੇਗਮਜਾਨਪਦੇਸੁ ਏਕਂ, ਸਮਣਬ੍ਰਾਹ੍ਮਣੇਸੁ ਏਕਂ, ਮਿਗਪਕ੍ਖੀਸੁ ਏਕਂ, ਅਧਮ੍ਮਕਾਰਪ੍ਪਟਿਕ੍ਖੇਪੋ ਏਕਂ, ਅਧਨਾਨਂ ਧਨਾਨੁਪ੍ਪਦਾਨਂ ਏਕਂ ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਪੁਚ੍ਛਨਂ ਏਕਨ੍ਤਿ ਏਵਮੇਤਂ ਦਸਵਿਧਂ ਹੋਤਿ. ਗਹਪਤਿਕੇ ਪਨ ਪਕ੍ਖਿਜਾਤੇ ਚ ਵਿਸੁਂ ਕਤ੍ਵਾ ਗਣੇਨ੍ਤਸ੍ਸ ਦ੍ਵਾਦਸਵਿਧਂ ਹੋਤਿ. ਪੁਬ੍ਬੇ ਅਵੁਤ੍ਤਂ ਵਾ ਗਣੇਨ੍ਤੇਨ ਅਧਮ੍ਮਰਾਗਸ੍ਸ ਚ ਵਿਸਮਲੋਭਸ੍ਸ ਚ ਪਹਾਨਵਸੇਨ ਦ੍ਵਾਦਸਵਿਧਂ ਵੇਦਿਤਬ੍ਬਂ. ਇਦਂ ਖੋ ਤਾਤ ਤਨ੍ਤਿ ਇਦਂ ਦਸਵਿਧਂ ਦ੍ਵਾਦਸਵਿਧਞ੍ਚ ਅਰਿਯਚਕ੍ਕਵਤ੍ਤਿਵਤ੍ਤਂ ਨਾਮ. ਵਤ੍ਤਮਾਨਸ੍ਸਾਤਿ ਪੂਰੇਤ੍ਵਾ ਵਤ੍ਤਮਾਨਸ੍ਸ. ਤਦਹੁਪੋਸਥੇਤਿਆਦਿ ਮਹਾਸੁਦਸ੍ਸਨੇ ਵੁਤ੍ਤਂ.

੯੦. ਸਮਤੇਨਾਤਿ ਅਤ੍ਤਨੋ ਮਤਿਯਾ. ਸੁਦਨ੍ਤਿ ਨਿਪਾਤਮਤ੍ਤਂ. ਪਸਾਸਤੀਤਿ ਅਨੁਸਾਸਤਿ. ਇਦਂ ਵੁਤ੍ਤਂ ਹੋਤਿ – ਪੋਰਾਣਕਂ ਰਾਜਵਂਸਂ ਰਾਜਪਵੇਣਿਂ ਰਾਜਧਮ੍ਮਂ ਪਹਾਯ ਅਤ੍ਤਨੋ ਮਤਿਮਤ੍ਤੇ ਠਤ੍ਵਾ ਜਨਪਦਂ ਅਨੁਸਾਸਤੀਤਿ. ਏਵਮਯਂ ਮਘਦੇਵਵਂਸਸ੍ਸ ਕਲ਼ਾਰਜਨਕੋ ਵਿਯ ਦਲ਼੍ਹਨੇਮਿਵਂਸਸ੍ਸ ਉਪਚ੍ਛੇਦਕੋ ਅਨ੍ਤਿਮਪੁਰਿਸੋ ਹੁਤ੍ਵਾ ਉਪ੍ਪਨ੍ਨੋ. ਪੁਬ੍ਬੇਨਾਪਰਨ੍ਤਿ ਪੁਬ੍ਬਕਾਲੇਨ ਸਦਿਸਾ ਹੁਤ੍ਵਾ ਅਪਰਕਾਲਂ. ਜਨਪਦਾ ਨ ਪਬ੍ਬਨ੍ਤੀਤਿ ਨ ਵਡ੍ਢਨ੍ਤਿ. ਯਥਾ ਤਂ ਪੁਬ੍ਬਕਾਨਨ੍ਤਿ ਯਥਾ ਪੁਬ੍ਬਕਾਨਂ ਰਾਜੂਨਂ ਪੁਬ੍ਬੇ ਚ ਪਚ੍ਛਾ ਚ ਸਦਿਸਾਯੇਵ ਹੁਤ੍ਵਾ ਪਬ੍ਬਿਂਸੁ, ਤਥਾ ਨ ਪਬ੍ਬਨ੍ਤਿ. ਕਤ੍ਥਚਿ ਸੁਞ੍ਞਾ ਹੋਨ੍ਤਿ ਹਤਵਿਲੁਤ੍ਤਾ, ਤੇਲਮਧੁਫਾਣਿਤਾਦੀਸੁ ਚੇਵ ਯਾਗੁਭਤ੍ਤਾਦੀਸੁ ਚ ਓਜਾਪਿ ਪਰਿਹਾਯਿਤ੍ਥਾਤਿ ਅਤ੍ਥੋ.

ਅਮਚ੍ਚਾ ਪਾਰਿਸਜ੍ਜਾਤਿ ਅਮਚ੍ਚਾ ਚੇਵ ਪਰਿਸਾਵਚਰਾ ਚ. ਗਣਕਮਹਾਮਤ੍ਤਾਤਿ ਅਚ੍ਛਿਦ੍ਦਕਾਦਿਪਾਠਗਣਕਾ ਚੇਵ ਮਹਾਅਮਚ੍ਚਾ ਚ. ਅਨੀਕਟ੍ਠਾਤਿ ਹਤ੍ਥਿਆਚਰਿਯਾਦਯੋ. ਦੋਵਾਰਿਕਾਤਿ ਦ੍ਵਾਰਰਕ੍ਖਿਨੋ. ਮਨ੍ਤਸ੍ਸਾਜੀਵਿਨੋਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਂ ਨਿਸ੍ਸਯਂ ਕਤ੍ਵਾ ਯੇ ਜੀਵਨ੍ਤਿ ਪਣ੍ਡਿਤਾ ਮਹਾਮਤ੍ਤਾ, ਤੇਸਂ ਏਤਂ ਨਾਮਂ.

ਆਯੁਵਣ੍ਣਾਦਿਪਰਿਹਾਨਿਕਥਾਵਣ੍ਣਨਾ

੯੧. ਨੋ ਚ ਖੋ ਅਧਨਾਨਨ੍ਤਿ ਬਲਵਲੋਭਤ੍ਤਾ ਪਨ ਅਧਨਾਨਂ ਦਲਿਦ੍ਦਮਨੁਸ੍ਸਾਨਂ ਧਨਂ ਨਾਨੁਪ੍ਪਦਾਸਿ. ਨਾਨੁਪ੍ਪਦਿਯਮਾਨੇਤਿ ਅਨਨੁਪ੍ਪਦਿਯਮਾਨੇ, ਅਯਮੇਵ ਵਾ ਪਾਠੋ. ਦਾਲਿਦ੍ਦਿਯਨ੍ਤਿ ਦਲਿਦ੍ਦਭਾਵੋ. ਅਤ੍ਤਨਾ ਚ ਜੀਵਾਹੀਤਿ ਸਯਞ੍ਚ ਜੀਵਂ ਯਾਪੇਹੀਤਿ ਅਤ੍ਥੋ. ਉਦ੍ਧਗ੍ਗਿਕਨ੍ਤਿਆਦੀਸੁ ਉਪਰੂਪਰਿਭੂਮੀਸੁ ਫਲਦਾਨਵਸੇਨ ਉਦ੍ਧਮਗ੍ਗਮਸ੍ਸਾਤਿ ਉਦ੍ਧਗ੍ਗਿਕਾ. ਸਗ੍ਗਸ੍ਸ ਹਿਤਾ ਤਤ੍ਰੁਪਪਤ੍ਤਿਜਨਨਤੋਤਿ ਸੋਵਗ੍ਗਿਕਾ. ਨਿਬ੍ਬਤ੍ਤਟ੍ਠਾਨੇ ਸੁਖੋ ਵਿਪਾਕੋ ਅਸ੍ਸਾਤਿ ਸੁਖਵਿਪਾਕਾ. ਸੁਟ੍ਠੁ ਅਗ੍ਗਾਨਂ ਦਿਬ੍ਬਵਣ੍ਣਾਦੀਨਂ ਦਸਨ੍ਨਂ ਵਿਸੇਸਾਨਂ ਨਿਬ੍ਬਤ੍ਤਨਤੋ ਸਗ੍ਗਸਂਵਤ੍ਤਨਿਕਾ. ਏਵਰੂਪਂ ਦਕ੍ਖਿਣਂ ਦਾਨਂ ਪਤਿਟ੍ਠਪੇਤੀਤਿ ਅਤ੍ਥੋ.

੯੨. ਪਵਡ੍ਢਿਸ੍ਸਤੀਤਿ ਵਡ੍ਢਿਸ੍ਸਤਿ ਬਹੁਂ ਭਵਿਸ੍ਸਤਿ. ਸੁਨਿਸੇਧਂ ਨਿਸੇਧੇਯ੍ਯਨ੍ਤਿ ਸੁਟ੍ਠੁ ਨਿਸਿਦ੍ਧਂ ਨਿਸੇਧੇਯ੍ਯਂ. ਮੂਲਘਚ੍ਚਨ੍ਤਿ ਮੂਲਹਤਂ. ਖਰਸ੍ਸਰੇਨਾਤਿ ਫਰੁਸਸਦ੍ਦੇਨ. ਪਣਵੇਨਾਤਿ ਵਜ੍ਝਭੇਰਿਯਾ.

੯੩. ਸੀਸਾਨਿ ਨੇਸਂ ਛਿਨ੍ਦਿਸ੍ਸਾਮਾਤਿ ਯੇਸਂ ਅਨ੍ਤਮਸੋ ਮੂਲਕਮੁਟ੍ਠਿਮ੍ਪਿ ਹਰਿਸ੍ਸਾਮ, ਤੇਸਂ ਤਥੇਵ ਸੀਸਾਨਿ ਛਿਨ੍ਦਿਸ੍ਸਾਮ, ਯਥਾ ਕੋਚਿ ਹਟਭਾਵਮ੍ਪਿ ਨ ਜਾਨਿਸ੍ਸਤਿ, ਅਮ੍ਹਾਕਂ ਦਾਨਿ ਕਿਮੇਤ੍ਥ ਰਾਜਾਪਿ ਏਵਂ ਉਟ੍ਠਾਯ ਪਰਂ ਮਾਰੇਤੀਤਿ ਅਯਂ ਨੇਸਂ ਅਧਿਪ੍ਪਾਯੋ. ਉਪਕ੍ਕਮਿਂਸੂਤਿ ਆਰਭਿਂਸੁ. ਪਨ੍ਥਦੁਹਨਨ੍ਤਿ ਪਨ੍ਥਘਾਤਂ, ਪਨ੍ਥੇ ਠਤ੍ਵਾ ਚੋਰਕਮ੍ਮਂ.

੯੪. ਨ ਹਿ, ਦੇਵਾਤਿ ਸੋ ਕਿਰ ਚਿਨ੍ਤੇਸਿ – ‘‘ਅਯਂ ਰਾਜਾ ਸਚ੍ਚਂ ਦੇਵਾਤਿ ਮੁਖਪਟਿਞ੍ਞਾਯ ਦਿਨ੍ਨਾਯ ਮਾਰਾਪੇਤਿ, ਹਨ੍ਦਾਹਂ ਮੁਸਾਵਾਦਂ ਕਰੋਮੀ’’ਤਿ, ਮਰਣਭਯਾ ‘‘ਨ ਹਿ ਦੇਵਾ’’ਤਿ ਅਵੋਚ.

੯੬. ਏਕਿਦਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ, ਏਕੇ ਸਤ੍ਤਾਤਿ ਅਤ੍ਥੋ. ਚਾਰਿਤ੍ਤਨ੍ਤਿ ਮਿਚ੍ਛਾਚਾਰਂ. ਅਭਿਜ੍ਝਾਬ੍ਯਾਪਾਦਾਤਿ ਅਭਿਜ੍ਝਾ ਚ ਬ੍ਯਾਪਾਦੋ ਚ. ਮਿਚ੍ਛਾਦਿਟ੍ਠੀਤਿ ਨਤ੍ਥਿ ਦਿਨ੍ਨਨ੍ਤਿਆਦਿਕਾ ਅਨ੍ਤਗ੍ਗਾਹਿਕਾ ਪਚ੍ਚਨੀਕਦਿਟ੍ਠਿ.

੧੦੧. ਅਧਮ੍ਮਰਾਗੋਤਿ ਮਾਤਾ ਮਾਤੁਚ੍ਛਾ ਪਿਤੁਚ੍ਛਾ ਮਾਤੁਲਾਨੀਤਿਆਦਿਕੇ ਅਯੁਤ੍ਤਟ੍ਠਾਨੇ ਰਾਗੋ. ਵਿਸਮਲੋਭੋਤਿ ਪਰਿਭੋਗਯੁਤ੍ਤੇਸੁਪਿ ਠਾਨੇਸੁ ਅਤਿਬਲਵਲੋਭੋ. ਮਿਚ੍ਛਾਧਮ੍ਮੋਤਿ ਪੁਰਿਸਾਨਂ ਪੁਰਿਸੇਸੁ ਇਤ੍ਥੀਨਞ੍ਚ ਇਤ੍ਥੀਸੁ ਛਨ੍ਦਰਾਗੋ.

ਅਮਤ੍ਤੇਯ੍ਯਤਾਤਿਆਦੀਸੁ ਮਾਤੁ ਹਿਤੋ ਮਤ੍ਤੇਯ੍ਯੋ, ਤਸ੍ਸ ਭਾਵੋ ਮਤ੍ਤੇਯ੍ਯਤਾ, ਮਾਤਰਿ ਸਮ੍ਮਾ ਪਟਿਪਤ੍ਤਿਯਾ ਏਤਂ ਨਾਮਂ. ਤਸ੍ਸਾ ਅਭਾਵੋ ਚੇਵ ਤਪ੍ਪਟਿਪਕ੍ਖਤਾ ਚ ਅਮਤ੍ਤੇਯ੍ਯਤਾ. ਅਪੇਤ੍ਤੇਯ੍ਯਤਾਦੀਸੁਪਿ ਏਸੇਵ ਨਯੋ. ਨ ਕੁਲੇ ਜੇਟ੍ਠਾਪਚਾਯਿਤਾਤਿ ਕੁਲੇ ਜੇਟ੍ਠਾਨਂ ਅਪਚਿਤਿਯਾ ਨੀਚਵੁਤ੍ਤਿਯਾ ਅਕਰਣਭਾਵੋ.

ਦਸਵਸ੍ਸਾਯੁਕਸਮਯਵਣ੍ਣਨਾ

੧੦੩. ਯਂ ਇਮੇਸਨ੍ਤਿ ਯਸ੍ਮਿਂ ਸਮਯੇ ਇਮੇਸਂ. ਅਲਂਪਤੇਯ੍ਯਾਤਿ ਪਤਿਨੋ ਦਾਤੁਂ ਯੁਤ੍ਤਾ. ਇਮਾਨਿ ਰਸਾਨੀਤਿ ਇਮਾਨਿ ਲੋਕੇ ਅਗ੍ਗਰਸਾਨਿ. ਅਤਿਬ੍ਯਾਦਿਪ੍ਪਿਸ੍ਸਨ੍ਤੀਤਿ ਅਤਿਵਿਯ ਦਿਪ੍ਪਿਸ੍ਸਨ੍ਤਿ, ਅਯਮੇਵ ਵਾ ਪਾਠੋ. ਕੁਸਲਨ੍ਤਿਪਿ ਨ ਭਵਿਸ੍ਸਤੀਤਿ ਕੁਸਲਨ੍ਤਿ ਨਾਮਮ੍ਪਿ ਨ ਭਵਿਸ੍ਸਤਿ, ਪਞ੍ਞਤ੍ਤਿਮਤ੍ਤਮ੍ਪਿ ਨ ਪਞ੍ਞਾਯਿਸ੍ਸਤੀਤਿ ਅਤ੍ਥੋ. ਪੁਜ੍ਜਾ ਚ ਭਵਿਸ੍ਸਨ੍ਤਿ ਪਾਸਂਸਾ ਚਾਤਿ ਪੂਜਾਰਹਾ ਚ ਭਵਿਸ੍ਸਨ੍ਤਿ ਪਸਂਸਾਰਹਾ ਚ. ਤਦਾ ਕਿਰ ਮਨੁਸ੍ਸਾ ‘‘ਅਸੁਕੇਨ ਨਾਮ ਮਾਤਾ ਪਹਤਾ, ਪਿਤਾ ਪਹਤੋ, ਸਮਣਬ੍ਰਾਹ੍ਮਣਾ ਜੀਵਿਤਾ ਵੋਰੋਪਿਤਾ, ਕੁਲੇ ਜੇਟ੍ਠਾਨਂ ਅਤ੍ਥਿਭਾਵਮ੍ਪਿ ਨ ਜਾਨਾਤਿ, ਅਹੋ ਪੁਰਿਸੋ’’ਤਿ ਤਮੇਵ ਪੂਜੇਸ੍ਸਨ੍ਤਿ ਚੇਵ ਪਸਂਸਿਸ੍ਸਨ੍ਤਿ ਚ.

ਨ ਭਵਿਸ੍ਸਤਿ ਮਾਤਾਤਿ ਵਾਤਿ ਅਯਂ ਮਯ੍ਹਂ ਮਾਤਾਤਿ ਗਰੁਚਿਤ੍ਤਂ ਨ ਭਵਿਸ੍ਸਤਿ. ਗੇਹੇ ਮਾਤੁਗਾਮਂ ਵਿਯ ਨਾਨਾਵਿਧਂ ਅਸਬ੍ਭਿਕਥਂ ਕਥਯਮਾਨਾ ਅਗਾਰਵੁਪਚਾਰੇਨ ਉਪਸਙ੍ਕਮਿਸ੍ਸਨ੍ਤਿ. ਮਾਤੁਚ੍ਛਾਦੀਸੁਪਿ ਏਸੇਵ ਨਯੋ. ਏਤ੍ਥ ਚ ਮਾਤੁਚ੍ਛਾਤਿ ਮਾਤੁਭਗਿਨੀ. ਮਾਤੁਲਾਨੀਤਿ ਮਾਤੁਲਭਰਿਯਾ. ਆਚਰਿਯਭਰਿਯਾਤਿ ਸਿਪ੍ਪਾਯਤਨਾਨਿ ਸਿਕ੍ਖਾਪਕਸ੍ਸ ਆਚਰਿਯਸ੍ਸ ਭਰਿਯਾ. ਗਰੂਨਂ ਦਾਰਾਤਿ ਚੂਲ਼ਪਿਤੁਮਹਾਪਿਤੁਆਦੀਨਂ ਭਰਿਯਾ. ਸਮ੍ਭੇਦਨ੍ਤਿ ਮਿਸ੍ਸੀਭਾਵਂ, ਮਰਿਯਾਦਭੇਦਂ ਵਾ.

ਤਿਬ੍ਬੋ ਆਘਾਤੋ ਪਚ੍ਚੁਪਟ੍ਠਿਤੋ ਭਵਿਸ੍ਸਤੀਤਿ ਬਲਵਕੋਪੋ ਪੁਨਪ੍ਪੁਨਂ ਉਪ੍ਪਤ੍ਤਿਵਸੇਨ ਪਚ੍ਚੁਪਟ੍ਠਿਤੋ ਭਵਿਸ੍ਸਤਿ. ਅਪਰਾਨਿ ਦ੍ਵੇ ਏਤਸ੍ਸੇਵ ਵੇਵਚਨਾਨਿ. ਕੋਪੋ ਹਿ ਚਿਤ੍ਤਂ ਆਘਾਤੇਤੀਤਿ ਆਘਾਤੋ. ਅਤ੍ਤਨੋ ਚ ਪਰਸ੍ਸ ਚ ਹਿਤਸੁਖਂ ਬ੍ਯਾਪਾਦੇਤੀਤਿ ਬ੍ਯਾਪਾਦੋ. ਮਨੋਪਦੂਸਨਤੋ ਮਨੋਪਦੋਸੋਤਿ ਵੁਚ੍ਚਤਿ. ਤਿਬ੍ਬਂ ਵਧਕਚਿਤ੍ਤਨ੍ਤਿ ਪਿਯਮਾਨਸ੍ਸਾਪਿ ਪਰਂ ਮਾਰਣਤ੍ਥਾਯ ਵਧਕਚਿਤ੍ਤਂ. ਤਸ੍ਸ ਵਤ੍ਥੁਂ ਦਸ੍ਸੇਤੁਂ ਮਾਤੁਪਿ ਪੁਤ੍ਤਮ੍ਹੀਤਿਆਦਿ ਵੁਤ੍ਤਂ. ਮਾਗਵਿਕਸ੍ਸਾਤਿ ਮਿਗਲੁਦ੍ਦਕਸ੍ਸ.

੧੦੪. ਸਤ੍ਥਨ੍ਤਰਕਪ੍ਪੋਤਿ ਸਤ੍ਥੇਨ ਅਨ੍ਤਰਕਪ੍ਪੋ. ਸਂਵਟ੍ਟਕਪ੍ਪਂ ਅਪ੍ਪਤ੍ਵਾ ਅਨ੍ਤਰਾਵ ਲੋਕਵਿਨਾਸੋ. ਅਨ੍ਤਰਕਪ੍ਪੋ ਚ ਨਾਮੇਸ ਦੁਬ੍ਭਿਕ੍ਖਨ੍ਤਰਕਪ੍ਪੋ ਰੋਗਨ੍ਤਰਕਪ੍ਪੋ ਸਤ੍ਥਨ੍ਤਰਕਪ੍ਪੋਤਿ ਤਿਵਿਧੋ. ਤਤ੍ਥ ਲੋਭੁਸ੍ਸਦਾਯ ਪਜਾਯ ਦੁਬ੍ਭਿਕ੍ਖਨ੍ਤਰਕਪ੍ਪੋ ਹੋਤਿ. ਮੋਹੁਸ੍ਸਦਾਯ ਰੋਗਨ੍ਤਰਕਪ੍ਪੋ. ਦੋਸੁਸ੍ਸਦਾਯ ਸਤ੍ਥਨ੍ਤਰਕਪ੍ਪੋ. ਤਤ੍ਥ ਦੁਬ੍ਭਿਕ੍ਖਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਪੇਤ੍ਤਿਵਿਸਯੇ ਉਪਪਜ੍ਜਨ੍ਤਿ. ਕਸ੍ਮਾ? ਆਹਾਰਨਿਕਨ੍ਤਿਯਾ ਬਲਵਤ੍ਤਾ. ਰੋਗਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਸਗ੍ਗੇ ਨਿਬ੍ਬਤ੍ਤਨ੍ਤਿ ਕਸ੍ਮਾ? ਤੇਸਞ੍ਹਿ ‘‘ਅਹੋ ਵਤਞ੍ਞੇਸਂ ਸਤ੍ਤਾਨਂ ਏਵਰੂਪੋ ਰੋਗੋ ਨ ਭਵੇਯ੍ਯਾ’’ਤਿ ਮੇਤ੍ਤਚਿਤ੍ਤਂ ਉਪ੍ਪਜ੍ਜਤੀਤਿ. ਸਤ੍ਥਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਨਿਰਯੇ ਉਪਪਜ੍ਜਨ੍ਤਿ. ਕਸ੍ਮਾ? ਅਞ੍ਞਮਞ੍ਞਂ ਬਲਵਾਘਾਤਤਾਯ.

ਮਿਗਸਞ੍ਞਨ੍ਤਿ ‘‘ਅਯਂ ਮਿਗੋ, ਅਯਂ ਮਿਗੋ’’ਤਿ ਸਞ੍ਞਂ. ਤਿਣ੍ਹਾਨਿ ਸਤ੍ਥਾਨਿ ਹਤ੍ਥੇਸੁ ਪਾਤੁਭਵਿਸ੍ਸਨ੍ਤੀਤਿ ਤੇਸਂ ਕਿਰ ਹਤ੍ਥੇਨ ਫੁਟ੍ਠਮਤ੍ਤਂ ਯਂਕਿਞ੍ਚਿ ਅਨ੍ਤਮਸੋ ਤਿਣਪਣ੍ਣਂ ਉਪਾਦਾਯ ਆਵੁਧਮੇਵ ਭਵਿਸ੍ਸਤਿ. ਮਾ ਚ ਮਯਂ ਕਞ੍ਚੀਤਿ ਮਯਂ ਕਞ੍ਚਿ ਏਕਪੁਰਿਸਮ੍ਪਿ ਜੀਵਿਤਾ ਮਾ ਵੋਰੋਪਯਿਮ੍ਹ. ਮਾ ਚ ਅਮ੍ਹੇ ਕੋਚੀਤਿ ਅਮ੍ਹੇਪਿ ਕੋਚਿ ਏਕਪੁਰਿਸੋ ਜੀਵਿਤਾ ਮਾ ਵੋਰੋਪਯਿਤ੍ਥ. ਯਂਨੂਨ ਮਯਨ੍ਤਿ ਅਯਂ ਲੋਕਵਿਨਾਸੋ ਪਚ੍ਚੁਪਟ੍ਠਿਤੋ, ਨ ਸਕ੍ਕਾ ਦ੍ਵੀਹਿ ਏਕਟ੍ਠਾਨੇ ਠਿਤੇਹਿ ਜੀਵਿਤਂ ਲਦ੍ਧੁਨ੍ਤਿ ਮਞ੍ਞਮਾਨਾ ਏਵਂ ਚਿਨ੍ਤਯਿਂਸੁ. ਵਨਗਹਨਨ੍ਤਿ ਵਨਸਙ੍ਖਾਤੇਹਿ ਤਿਣਗੁਮ੍ਬਲਤਾਦੀਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਰੁਕ੍ਖਗਹਨਨ੍ਤਿ ਰੁਕ੍ਖੇਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਨਦੀਵਿਦੁਗ੍ਗਨ੍ਤਿ ਨਦੀਨਂ ਅਨ੍ਤਰਦੀਪਾਦੀਸੁ ਦੁਗ੍ਗਮਨਟ੍ਠਾਨਂ. ਪਬ੍ਬਤਵਿਸਮਨ੍ਤਿ ਪਬ੍ਬਤੇਹਿ ਵਿਸਮਂ, ਪਬ੍ਬਤੇਸੁਪਿ ਵਾ ਵਿਸਮਟ੍ਠਾਨਂ. ਸਭਾਗਾਯਿਸ੍ਸਨ੍ਤੀਤਿ ਯਥਾ ਅਹਂ ਜੀਵਾਮਿ ਦਿਟ੍ਠਾ ਭੋ ਸਤ੍ਤਾ, ਤ੍ਵਮ੍ਪਿ ਤਥਾ ਜੀਵਸੀਤਿ ਏਵਂ ਸਮ੍ਮੋਦਨਕਥਾਯ ਅਤ੍ਤਨਾ ਸਭਾਗੇ ਕਰਿਸ੍ਸਨ੍ਤਿ.

ਆਯੁਵਣ੍ਣਾਦਿਵਡ੍ਢਨਕਥਾਵਣ੍ਣਨਾ

੧੦੫. ਆਯਤਨ੍ਤਿ ਮਹਨ੍ਤਂ. ਪਾਣਾਤਿਪਾਤਾ ਵਿਰਮੇਯ੍ਯਾਮਾਤਿ ਪਾਣਾਤਿਪਾਤਤੋ ਓਸਕ੍ਕੇਯ੍ਯਾਮ. ਪਾਣਾਤਿਪਾਤਂ ਵਿਰਮੇਯ੍ਯਾਮਾਤਿਪਿ ਸਜ੍ਝਾਯਨ੍ਤਿ, ਤਤ੍ਥ ਪਾਣਾਤਿਪਾਤਂ ਪਜਹੇਯ੍ਯਾਮਾਤਿ ਅਤ੍ਥੋ. ਵੀਸਤਿਵਸ੍ਸਾਯੁਕਾਤਿ ਮਾਤਾਪਿਤਰੋ ਪਾਣਾਤਿਪਾਤਾ ਪਟਿਵਿਰਤਾ, ਪੁਤ੍ਤਾ ਕਸ੍ਮਾ ਵੀਸਤਿਵਸ੍ਸਾਯੁਕਾ ਅਹੇਸੁਨ੍ਤਿ ਖੇਤ੍ਤਵਿਸੁਦ੍ਧਿਯਾ. ਤੇਸਞ੍ਹਿ ਮਾਤਾਪਿਤਰੋ ਸੀਲਵਨ੍ਤੋ ਜਾਤਾ. ਇਤਿ ਸੀਲਗਬ੍ਭੇ ਵਡ੍ਢਿਤਤ੍ਤਾ ਇਮਾਯ ਖੇਤ੍ਤਵਿਸੁਦ੍ਧਿਯਾ ਦੀਘਾਯੁਕਾ ਅਹੇਸੁਂ. ਯੇ ਪਨੇਤ੍ਥ ਕਾਲਂ ਕਤ੍ਵਾ ਤਤ੍ਥੇਵ ਨਿਬ੍ਬਤ੍ਤਾ, ਤੇ ਅਤ੍ਤਨੋਵ ਸੀਲਸਮ੍ਪਤ੍ਤਿਯਾ ਦੀਘਾਯੁਕਾ ਅਹੇਸੁਂ.

ਅਸ੍ਸਾਮਾਤਿ ਭਵੇਯ੍ਯਾਮ. ਚਤ੍ਤਾਰੀਸਵਸ੍ਸਾਯੁਕਾਤਿਆਦਯੋ ਕੋਟ੍ਠਾਸਾ ਅਦਿਨ੍ਨਾਦਾਨਾਦੀਹਿ ਪਟਿਵਿਰਤਾਨਂ ਵਸੇਨ ਵੇਦਿਤਬ੍ਬਾ.

ਸਙ੍ਖਰਾਜਉਪ੍ਪਤ੍ਤਿਵਣ੍ਣਨਾ

੧੦੬. ਇਚ੍ਛਾਤਿ ਮਯ੍ਹਂ ਭਤ੍ਤਂ ਦੇਥਾਤਿ ਏਵਂ ਉਪ੍ਪਜ੍ਜਨਕਤਣ੍ਹਾ. ਅਨਸਨਨ੍ਤਿ ਨ ਅਸਨਂ ਅਵਿਪ੍ਫਾਰਿਕਭਾਵੋ ਕਾਯਾਲਸਿਯਂ, ਭਤ੍ਤਂ ਭੁਤ੍ਤਾਨਂ ਭਤ੍ਤਸਮ੍ਮਦਪਚ੍ਚਯਾ ਨਿਪਜ੍ਜਿਤੁਕਾਮਤਾਜਨਕੋ ਕਾਯਦੁਬ੍ਬਲਭਾਵੋਤਿ ਅਤ੍ਥੋ. ਜਰਾਤਿ ਪਾਕਟਜਰਾ. ਕੁਕ੍ਕੁਟਸਮ੍ਪਾਤਿਕਾਤਿ ਏਕਗਾਮਸ੍ਸ ਛਦਨਪਿਟ੍ਠਤੋ ਉਪ੍ਪਤਿਤ੍ਵਾ ਇਤਰਗਾਮਸ੍ਸ ਛਦਨਪਿਟ੍ਠੇ ਪਤਨਸਙ੍ਖਾਤੋ ਕੁਕ੍ਕੁਟਸਮ੍ਪਾਤੋ. ਏਤਾਸੁ ਅਤ੍ਥੀਤਿ ਕੁਕ੍ਕੁਟਸਮ੍ਪਾਤਿਕਾ. ‘‘ਕੁਕ੍ਕੁਟਸਮ੍ਪਾਦਿਕਾ’’ਤਿਪਿ ਪਾਠੋ, ਗਾਮਨ੍ਤਰਤੋ ਗਾਮਨ੍ਤਰਂ ਕੁਕ੍ਕੁਟਾਨਂ ਪਦਸਾ ਗਮਨਸਙ੍ਖਾਤੋ ਕੁਕ੍ਕੁਟਸਮ੍ਪਾਦੋ ਏਤਾਸੁ ਅਤ੍ਥੀਤਿ ਅਤ੍ਥੋ. ਉਭਯਮ੍ਪੇਤਂ ਘਨਨਿਵਾਸਤਂਯੇਵ ਦੀਪੇਤਿ. ਅਵੀਚਿ ਮਞ੍ਞੇ ਫੁਟੋ ਭਵਿਸ੍ਸਤੀਤਿ ਅਵੀਚਿਮਹਾਨਿਰਯੋ ਵਿਯ ਨਿਰਨ੍ਤਰਪੂਰਿਤੋ ਭਵਿਸ੍ਸਤਿ.

੧੦੭. ‘‘ਅਸੀਤਿਵਸ੍ਸਸਹਸ੍ਸਾਯੁਕੇਸੁ, ਭਿਕ੍ਖਵੇ, ਮਨੁਸ੍ਸੇਸੁ ਮੇਤ੍ਤੇਯ੍ਯੋ ਨਾਮ ਭਗਵਾ ਲੋਕੇ ਉਪ੍ਪਜ੍ਜਿਸ੍ਸਤੀ’’ਤਿ ਨ ਵਡ੍ਢਮਾਨਕਵਸੇਨ ਵੁਤ੍ਤਂ. ਨ ਹਿ ਬੁਦ੍ਧਾ ਵਡ੍ਢਮਾਨੇ ਆਯੁਮ੍ਹਿ ਨਿਬ੍ਬਤ੍ਤਨ੍ਤਿ, ਹਾਯਮਾਨੇ ਪਨ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਯਦਾ ਤਂ ਆਯੁ ਵਡ੍ਢਿਤ੍ਵਾ ਅਸਙ੍ਖੇਯ੍ਯਤਂ ਪਤ੍ਵਾ ਪੁਨ ਹਾਯਮਾਨਂ ਅਸੀਤਿਵਸ੍ਸਸਹਸ੍ਸਕਾਲੇ ਠਸ੍ਸਤਿ, ਤਦਾ ਉਪ੍ਪਜ੍ਜਿਸ੍ਸਤੀਤਿ ਅਤ੍ਥੋ. ਪਰਿਹਰਿਸ੍ਸਤੀਤਿ ਇਦਂ ਪਨ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਵਸੇਨ ਵੁਤ੍ਤਂ. ਯੂਪੋਤਿ ਪਾਸਾਦੋ. ਰਞ੍ਞਾ ਮਹਾਪਨਾਦੇਨ ਕਾਰਾਪਿਤੋਤਿ ਰਞ੍ਞਾ ਹੇਤੁਭੂਤੇਨ ਤਸ੍ਸਤ੍ਥਾਯ ਸਕ੍ਕੇਨ ਦੇਵਰਾਜੇਨ ਵਿਸ੍ਸਕਮ੍ਮਦੇਵਪੁਤ੍ਤਂ ਪੇਸੇਤ੍ਵਾ ਕਾਰਾਪਿਤੋ. ਪੁਬ੍ਬੇ ਕਿਰ ਦ੍ਵੇ ਪਿਤਾਪੁਤ੍ਤਾ ਨਲ਼ਕਾਰਾ ਪਚ੍ਚੇਕਬੁਦ੍ਧਸ੍ਸ ਨਲ਼ੇਹਿ ਚ ਉਦੁਮ੍ਬਰੇਹਿ ਚ ਪਣ੍ਣਸਾਲਂ ਕਾਰਾਪੇਤ੍ਵਾ ਤਂ ਤਤ੍ਥ ਵਾਸਾਪੇਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂਸੁ. ਤੇ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ. ਤੇਸੁ ਪਿਤਾ ਦੇਵਲੋਕੇਯੇਵ ਅਟ੍ਠਾਸਿ. ਪੁਤ੍ਤੋ ਦੇਵਲੋਕਾ ਚਵਿਤ੍ਵਾ ਸੁਰੁਚਿਸ੍ਸ ਰਞ੍ਞੋ ਦੇਵਿਯਾ ਸੁਮੇਧਾਯ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤੋ. ਮਹਾਪਨਾਦੋ ਨਾਮ ਕੁਮਾਰੋ ਅਹੋਸਿ. ਸੋ ਅਪਰਭਾਗੇ ਛਤ੍ਤਂ ਉਸ੍ਸਾਪੇਤ੍ਵਾ ਮਹਾਪਨਾਦੋ ਨਾਮ ਰਾਜਾ ਜਾਤੋ. ਅਥਸ੍ਸ ਪੁਞ੍ਞਾਨੁਭਾਵੇਨ ਸਕ੍ਕੋ ਦੇਵਰਾਜਾ ਵਿਸ੍ਸਕਮ੍ਮਦੇਵਪੁਤ੍ਤਂ ਰਞ੍ਞੋ ਪਾਸਾਦਂ ਕਰੋਹੀਤਿ ਪਹਿਣਿ ਸੋ ਤਸ੍ਸ ਪਾਸਾਦਂ ਨਿਮ੍ਮਿਨਿ ਪਞ੍ਚਵੀਸਤਿਯੋਜਨੁਬ੍ਬੇਧਂ ਸਤ੍ਤਰਤਨਮਯਂ ਸਤਭੂਮਕਂ. ਯਂ ਸਨ੍ਧਾਯ ਜਾਤਕੇ ਵੁਤ੍ਤਂ –

‘‘ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ;

ਤਿਰਿਯਂ ਸੋਲ਼ਸੁਬ੍ਬੇਧੋ, ਉਦ੍ਧਮਾਹੁ ਸਹਸ੍ਸਧਾ.

ਸਹਸ੍ਸਕਣ੍ਡੋ ਸਤਗੇਣ੍ਡੁ, ਧਜਾਲੁ ਹਰਿਤਾਮਯੋ;

ਅਨਚ੍ਚੁਂ ਤਤ੍ਥ ਗਨ੍ਧਬ੍ਬਾ, ਛ ਸਹਸ੍ਸਾਨਿ ਸਤ੍ਤਧਾ.

ਏਵਮੇਤਂ ਤਦਾ ਆਸਿ, ਯਥਾ ਭਾਸਸਿ ਭਦ੍ਦਜਿ;

ਸਕ੍ਕੋ ਅਹਂ ਤਦਾ ਆਸਿਂ, ਵੇਯ੍ਯਾਵਚ੍ਚਕਰੋ ਤਵਾ’’ਤਿ. (ਜਾ. ੫.੩.੪੨);

ਸੋ ਰਾਜਾ ਤਤ੍ਥ ਯਾਵਤਾਯੁਕਂ ਵਸਿਤ੍ਵਾ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਮਿਂ ਦੇਵਲੋਕੇ ਨਿਬ੍ਬਤ੍ਤੇ ਸੋ ਪਾਸਾਦੋ ਮਹਾਗਙ੍ਗਾਯ ਅਨੁਸੋਤਂ ਪਤਿ. ਤਸ੍ਸ ਧੁਰਸੋਪਾਨਸਮ੍ਮੁਖਟ੍ਠਾਨੇ ਪਯਾਗਪਤਿਟ੍ਠਾਨਂ ਨਾਮ ਨਗਰਂ ਮਾਪਿਤਂ. ਥੁਪਿਕਾਸਮ੍ਮੁਖਟ੍ਠਾਨੇ ਕੋਟਿਗਾਮੋ ਨਾਮ. ਅਪਰਭਾਗੇ ਅਮ੍ਹਾਕਂ ਭਗਵਤੋ ਕਾਲੇ ਸੋ ਨਲ਼ਕਾਰਦੇਵਪੁਤ੍ਤੋ ਦੇਵਲੋਕਤੋ ਚਵਿਤ੍ਵਾ ਮਨੁਸ੍ਸਪਥੇ ਭਦ੍ਦਜਿਸੇਟ੍ਠਿ ਨਾਮ ਹੁਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਨਾਵਾਯ ਗਙ੍ਗਾਤਰਣਦਿਵਸੇ ਭਿਕ੍ਖੁਸਙ੍ਘਸ੍ਸ ਤਂ ਪਾਸਾਦਂ ਦਸ੍ਸੇਤੀਤਿ ਵਤ੍ਥੁ ਵਿਤ੍ਥਾਰੇਤਬ੍ਬਂ. ਕਸ੍ਮਾ ਪਨੇਸ ਪਾਸਾਦੋ ਨ ਅਨ੍ਤਰਹਿਤੋਤਿ? ਇਤਰਸ੍ਸ ਆਨੁਭਾਵਾ. ਤੇਨ ਸਦ੍ਧਿਂ ਪੁਞ੍ਞਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਕੁਲਪੁਤ੍ਤੋ ਅਨਾਗਤੇ ਸਙ੍ਖੋ ਨਾਮ ਰਾਜਾ ਭਵਿਸ੍ਸਤਿ. ਤਸ੍ਸ ਪਰਿਭੋਗਤ੍ਥਾਯ ਸੋ ਪਾਸਾਦੋ ਉਟ੍ਠਹਿਸ੍ਸਤਿ, ਤਸ੍ਮਾ ਨ ਅਨ੍ਤਰਹਿਤੋਤਿ.

੧੦੮. ਉਸ੍ਸਾਪੇਤ੍ਵਾਤਿ ਤਂ ਪਾਸਾਦਂ ਉਟ੍ਠਾਪੇਤ੍ਵਾ. ਅਜ੍ਝਾਵਸਿਤ੍ਵਾਤਿ ਤਤ੍ਥ ਵਸਿਤ੍ਵਾ. ਤਂ ਦਤ੍ਵਾ ਵਿਸ੍ਸਜ੍ਜਿਤ੍ਵਾਤਿ ਤਂ ਪਾਸਾਦਂ ਦਾਨਵਸੇਨ ਦਤ੍ਵਾ ਨਿਰਪੇਕ੍ਖੋ ਪਰਿਚ੍ਚਾਗਵਸੇਨ ਚ ਵਿਸ੍ਸਜ੍ਜਿਤ੍ਵਾ. ਕਸ੍ਸ ਚ ਏਵਂ ਦਤ੍ਵਾਤਿ? ਸਮਣਾਦੀਨਂ. ਤੇਨਾਹ – ‘‘ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਦਾਨਂ ਦਤ੍ਵਾ’’ਤਿ. ਕਥਂ ਪਨ ਸੋ ਏਕਂ ਪਾਸਾਦਂ ਬਹੂਨਂ ਦਸ੍ਸਤੀਤਿ? ਏਵਂ ਕਿਰਸ੍ਸ ਚਿਤ੍ਤਂ ਉਪ੍ਪਜ੍ਜਿਸ੍ਸਤਿ ‘‘ਅਯਂ ਪਾਸਾਦੋ ਵਿਪ੍ਪਕਿਰਿਯਤੂ’’ਤਿ. ਸੋ ਖਣ੍ਡਖਣ੍ਡਸੋ ਵਿਪ੍ਪਕਿਰਿਸ੍ਸਤਿ. ਸੋ ਤਂ ਅਲਗ੍ਗਮਾਨੋਵ ਹੁਤ੍ਵਾ ‘‘ਯੋ ਯਤ੍ਤਕਂ ਇਚ੍ਛਤਿ, ਸੋ ਤਤ੍ਤਕਂ ਗਣ੍ਹਤੂ’’ਤਿ ਦਾਨਵਸੇਨ ਵਿਸ੍ਸਜ੍ਜਿਸ੍ਸਤਿ. ਤੇਨ ਵੁਤ੍ਤਂ – ‘‘ਦਾਨਂ ਦਤ੍ਵਾ ਮੇਤ੍ਤੇਯ੍ਯਸ੍ਸ ਭਗਵਤੋ…ਪੇ… ਵਿਹਰਿਸ੍ਸਤੀ’’ਤਿ. ਏਤ੍ਤਕੇਨ ਭਗਵਾ ਵਟ੍ਟਗਾਮਿਕੁਸਲਸ੍ਸ ਅਨੁਸਨ੍ਧਿਂ ਦਸ੍ਸੇਤਿ.

੧੦੯. ਇਦਾਨਿ ਵਿਵਟ੍ਟਗਾਮਿਕੁਸਲਸ੍ਸ ਅਨੁਸਨ੍ਧਿਂ ਦਸ੍ਸੇਨ੍ਤੋ ਪੁਨ ਅਤ੍ਤਦੀਪਾ, ਭਿਕ੍ਖਵੇ, ਵਿਹਰਥਾਤਿਆਦਿਮਾਹ.

ਭਿਕ੍ਖੁਨੋ ਆਯੁਵਣ੍ਣਾਦਿਵਡ੍ਢਨਕਥਾਵਣ੍ਣਨਾ

੧੧੦. ਇਦਂ ਖੋ, ਭਿਕ੍ਖਵੇ, ਭਿਕ੍ਖੁਨੋ ਆਯੁਸ੍ਮਿਨ੍ਤਿ ਭਿਕ੍ਖਵੇ ਯਂ ਵੋ ਅਹਂ ਆਯੁਨਾਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਤਤ੍ਥ ਇਦਂ ਭਿਕ੍ਖੁਨੋ ਆਯੁਸ੍ਮਿਂ ਇਦਂ ਆਯੁਕਾਰਣਨ੍ਤਿ ਅਤ੍ਥੋ. ਤਸ੍ਮਾ ਤੁਮ੍ਹੇਹਿ ਆਯੁਨਾ ਵਡ੍ਢਿਤੁਕਾਮੇਹਿ ਇਮੇ ਚਤ੍ਤਾਰੋ ਇਦ੍ਧਿਪਾਦਾ ਭਾਵੇਤਬ੍ਬਾਤਿ ਦਸ੍ਸੇਤਿ.

ਵਣ੍ਣਸ੍ਮਿਨ੍ਤਿ ਯਂ ਵੋ ਅਹਂ ਵਣ੍ਣੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਤਤ੍ਥ ਵਣ੍ਣਕਾਰਣਂ. ਸੀਲਵਤੋ ਹਿ ਅਵਿਪ੍ਪਟਿਸਾਰਾਦੀਨਂ ਵਸੇਨ ਸਰੀਰਵਣ੍ਣੋਪਿ ਕਿਤ੍ਤਿਵਸੇਨ ਗੁਣਵਣ੍ਣੋਪਿ ਵਡ੍ਢਤਿ. ਤਸ੍ਮਾ ਤੁਮ੍ਹੇਹਿ ਵਣ੍ਣੇਨ ਵਡ੍ਢਿਤੁਕਾਮੇਹਿ ਸੀਲਸਮ੍ਪਨ੍ਨੇਹਿ ਭਵਿਤਬ੍ਬਨ੍ਤਿ ਦਸ੍ਸੇਤਿ.

ਸੁਖਸ੍ਮਿਨ੍ਤਿ ਯਂ ਵੋ ਅਹਂ ਸੁਖੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਤਤ੍ਥ ਵਿਵੇਕਜਂ ਪੀਤਿਸੁਖਾਦਿਨਾਨਪ੍ਪਕਾਰਕਂ ਝਾਨਸੁਖਂ. ਤਸ੍ਮਾ ਤੁਮ੍ਹੇਹਿ ਸੁਖੇਨ ਵਡ੍ਢਿਤੁਕਾਮੇਹਿ ਇਮਾਨਿ ਚਤ੍ਤਾਰਿ ਝਾਨਾਨਿ ਭਾਵੇਤਬ੍ਬਾਨਿ.

ਭੋਗਸ੍ਮਿਨ੍ਤਿ ਯਂ ਵੋ ਅਹਂ ਭੋਗੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਅਯਂ ਸੋ ਅਪ੍ਪਮਾਣਾਨਂ ਸਤ੍ਤਾਨਂ ਅਪ੍ਪਟਿਕੂਲਤਾਵਹੋ ਸੁਖਸਯਨਾਦਿ ਏਕਾਦਸਾਨਿਸਂਸੋ ਸਬ੍ਬਦਿਸਾਵਿਪ੍ਫਾਰਿਤਬ੍ਰਹ੍ਮਵਿਹਾਰਭੋਗੋ. ਤਸ੍ਮਾ ਤੁਮ੍ਹੇਹਿ ਭੋਗੇਨ ਵਡ੍ਢਿਤੁਕਾਮੇਹਿ ਇਮੇ ਬ੍ਰਹ੍ਮਵਿਹਾਰਾ ਭਾਵੇਤਬ੍ਬਾ.

ਬਲਸ੍ਮਿਨ੍ਤਿ ਯਂ ਵੋ ਅਹਂ ਬਲੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਆਸਵਕ੍ਖਯਪਰਿਯੋਸਾਨੇ ਉਪ੍ਪਨ੍ਨਂ ਅਰਹਤ੍ਤਫਲਸਙ੍ਖਾਤਂ ਬਲਂ. ਤਸ੍ਮਾ ਤੁਮ੍ਹੇਹਿ ਬਲੇਨ ਵਡ੍ਢਿਤੁਕਾਮੇਹਿ ਅਰਹਤ੍ਤਪ੍ਪਤ੍ਤਿਯਾ ਯੋਗੋ ਕਰਣੀਯੋ.

ਯਥਯਿਦਂ, ਭਿਕ੍ਖਵੇ, ਮਾਰਬਲਨ੍ਤਿ ਯਥਾ ਇਦਂ ਦੇਵਪੁਤ੍ਤਮਾਰਮਚ੍ਚੁਮਾਰਕਿਲੇਸਮਾਰਾਨਂ ਬਲਂ ਦੁਪ੍ਪਸਹਂ ਦੁਰਭਿਸਮ੍ਭਵਂ, ਏਵਂ ਅਞ੍ਞਂ ਲੋਕੇ ਏਕਬਲਮ੍ਪਿ ਨ ਸਮਨੁਪਸ੍ਸਾਮਿ. ਤਮ੍ਪਿ ਬਲਂ ਇਦਮੇਵ ਅਰਹਤ੍ਤਫਲਂ ਪਸਹਤਿ ਅਭਿਭਵਤਿ ਅਜ੍ਝੋਤ੍ਥਰਤਿ. ਤਸ੍ਮਾ ਏਤ੍ਥੇਵ ਯੋਗੋ ਕਰਣੀਯੋਤਿ ਦਸ੍ਸੇਤਿ.

ਏਵਮਿਦਂ ਪੁਞ੍ਞਨ੍ਤਿ ਏਵਂ ਇਦਂ ਲੋਕੁਤ੍ਤਰਪੁਞ੍ਞਮ੍ਪਿ ਯਾਵ ਆਸਵਕ੍ਖਯਾ ਪਵਡ੍ਢਤੀਤਿ ਵਿਵਟ੍ਟਗਾਮਿਕੁਸਲਾਨੁਸਨ੍ਧਿਂ ਨਿਟ੍ਠਪੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ. ਸੁਤ੍ਤਪਰਿਯੋਸਾਨੇ ਵੀਸਤਿ ਭਿਕ੍ਖੁਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਅਗ੍ਗਞ੍ਞਸੁਤ੍ਤਵਣ੍ਣਨਾ

ਵਾਸੇਟ੍ਠਭਾਰਦ੍ਵਾਜਵਣ੍ਣਨਾ

੧੧੧. ਏਵਂ ਮੇ ਸੁਤਨ੍ਤਿ ਅਗ੍ਗਞ੍ਞਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇਤਿ ਏਤ੍ਥ ਅਯਂ ਅਨੁਪੁਬ੍ਬਿਕਥਾ. ਅਤੀਤੇ ਸਤਸਹਸ੍ਸਕਪ੍ਪਮਤ੍ਥਕੇ ਏਕਾ ਉਪਾਸਿਕਾ ਪਦੁਮੁਤ੍ਤਰਂ ਭਗਵਨ੍ਤਂ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਤਸਹਸ੍ਸਸ੍ਸ ਦਾਨਂ ਦਤ੍ਵਾ ਭਗਵਤੋ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਅਗ੍ਗੁਪਟ੍ਠਾਯਿਕਾ ਹੋਮੀ’’ਤਿ ਪਤ੍ਥਨਂ ਅਕਾਸਿ. ਸਾ ਕਪ੍ਪਸਤਸਹਸ੍ਸਂ ਦੇਵੇਸੁ ਚੇਵ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਭਦ੍ਦਿਯਨਗਰੇ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ ਧਨਞ੍ਚਯਸੇਟ੍ਠਿਨੋ ਗੇਹੇ ਸੁਮਨਦੇਵਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਜਾਤਕਾਲੇ ਤਸ੍ਸਾ ਵਿਸਾਖਾਤਿ ਨਾਮਂ ਅਕਂਸੁ. ਸਾ ਯਦਾ ਭਗਵਾ ਭਦ੍ਦਿਯਨਗਰਂ ਆਗਮਾਸਿ, ਤਦਾ ਪਞ੍ਚਦਾਸਿਸਤੇਹਿ ਸਦ੍ਧਿਂ ਭਗਵਤੋ ਪਚ੍ਚੁਗ੍ਗਮਨਂ ਕਤ੍ਵਾ ਪਠਮਦਸ੍ਸਨਮ੍ਹਿਯੇਵ ਸੋਤਾਪਨ੍ਨਾ ਅਹੋਸਿ.

ਅਪਰਭਾਗੇ ਸਾਵਤ੍ਥਿਯਂ ਮਿਗਾਰਸੇਟ੍ਠਿਪੁਤ੍ਤਸ੍ਸ ਪੁਣ੍ਣਵਡ੍ਢਨਕੁਮਾਰਸ੍ਸ ਗੇਹਂ ਗਤਾ. ਤਤ੍ਥ ਨਂ ਮਿਗਾਰਸੇਟ੍ਠਿ ਮਾਤੁਟ੍ਠਾਨੇ ਠਪੇਸਿ. ਤਸ੍ਮਾ ਮਿਗਾਰਮਾਤਾਤਿ ਵੁਚ੍ਚਤਿ. ਪਤਿਕੁਲਂ ਗਚ੍ਛਨ੍ਤਿਯਾ ਚਸ੍ਸਾ ਪਿਤਾ ਮਹਾਲਤਾਪਿਲ਼ਨ੍ਧਨਂ ਨਾਮ ਕਾਰਾਪੇਸਿ. ਤਸ੍ਮਿਂ ਪਿਲ਼ਨ੍ਧਨੇ ਚਤਸ੍ਸੋ ਵਜਿਰਨਾਲ਼ਿਯੋ ਉਪਯੋਗਂ ਅਗਮਂਸੁ, ਮੁਤ੍ਤਾਨਂ ਏਕਾਦਸ ਨਾਲ਼ਿਯੋ, ਪਵਾਲ਼ਸ੍ਸ ਦ੍ਵਾਵੀਸਤਿ ਨਾਲ਼ਿਯੋ, ਮਣੀਨਂ ਤੇਤ੍ਤਿਂਸ ਨਾਲ਼ਿਯੋ. ਇਤਿ ਏਤੇਹਿ ਚ ਅਞ੍ਞੇਹਿ ਚ ਸਤ੍ਤਹਿ ਰਤਨੇਹਿ ਨਿਟ੍ਠਾਨਂ ਅਗਮਾਸਿ. ਤਂ ਸੀਸੇ ਪਟਿਮੁਕ੍ਕਂ ਯਾਵ ਪਾਦਪਿਟ੍ਠਿਯਾ ਭਸ੍ਸਤਿ. ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰਯਮਾਨਾਵ ਨਂ ਇਤ੍ਥੀ ਧਾਰੇਤੁਂ ਸਕ੍ਕੋਤਿ. ਸਾ ਅਪਰਭਾਗੇ ਦਸਬਲਸ੍ਸ ਅਗ੍ਗੁਪਟ੍ਠਾਯਿਕਾ ਹੁਤ੍ਵਾ ਤਂ ਪਸਾਧਨਂ ਵਿਸ੍ਸਜ੍ਜੇਤ੍ਵਾ ਨਵਹਿ ਕੋਟੀਹਿ ਭਗਵਤੋ ਵਿਹਾਰਂ ਕਾਰਯਮਾਨਾ ਕਰੀਸਮਤ੍ਤੇ ਭੂਮਿਭਾਗੇ ਪਾਸਾਦਂ ਕਾਰੇਸਿ. ਤਸ੍ਸ ਉਪਰਿਭੂਮਿਯਂ ਪਞ੍ਚ ਗਬ੍ਭਸਤਾਨਿ ਹੋਨ੍ਤਿ, ਹੇਟ੍ਠਿਮਭੂਮਿਯਂ ਪਞ੍ਚਾਤਿ ਗਬ੍ਭਸਹਸ੍ਸਪ੍ਪਟਿਮਣ੍ਡਿਤੋ ਅਹੋਸਿ. ਸਾ ‘‘ਸੁਦ੍ਧਪਾਸਾਦੋਵ ਨ ਸੋਭਤੀ’’ਤਿ ਤਂ ਪਰਿਵਾਰੇਤ੍ਵਾ ਪਞ੍ਚ ਦੁਵਡ੍ਢਗੇਹਸਤਾਨਿ, ਪਞ੍ਚ ਚੂਲ਼ਪਾਸਾਦਸਤਾਨਿ, ਪਞ੍ਚ ਦੀਘਸਾਲਸਤਾਨਿ ਚ ਕਾਰਾਪੇਸਿ. ਵਿਹਾਰਮਹੋ ਚਤੂਹਿ ਮਾਸੇਹਿ ਨਿਟ੍ਠਾਨਂ ਅਗਮਾਸਿ.

ਮਾਤੁਗਾਮਤ੍ਤਭਾਵੇ ਠਿਤਾਯ ਵਿਸਾਖਾਯ ਵਿਯ ਅਞ੍ਞਿਸ੍ਸਾ ਬੁਦ੍ਧਸਾਸਨੇ ਧਨਪਰਿਚ੍ਚਾਗੋ ਨਾਮ ਨਤ੍ਥਿ, ਪੁਰਿਸਤ੍ਤਭਾਵੇ ਠਿਤਸ੍ਸ ਅਨਾਥਪਿਣ੍ਡਿਕਸ੍ਸ ਵਿਯ ਅਞ੍ਞਸ੍ਸਾਤਿ. ਸੋ ਹਿ ਚਤੁਪਣ੍ਣਾਸਕੋਟਿਯੋ ਵਿਸ੍ਸਜ੍ਜੇਤ੍ਵਾ ਸਾਵਤ੍ਥਿਯਾ ਦਕ੍ਖਿਣਭਾਗੇ ਅਨੁਰਾਧਪੁਰਸ੍ਸ ਮਹਾਵਿਹਾਰਸਦਿਸੇ ਠਾਨੇ ਜੇਤਵਨਮਹਾਵਿਹਾਰਂ ਨਾਮ ਕਾਰੇਸਿ. ਵਿਸਾਖਾ ਸਾਵਤ੍ਥਿਯਾ ਪਾਚੀਨਭਾਗੇ ਉਤ੍ਤਰਦੇਵਿਯਾ ਵਿਹਾਰਸਦਿਸੇ ਠਾਨੇ ਪੁਬ੍ਬਾਰਾਮਂ ਨਾਮ ਕਾਰੇਸਿ. ਭਗਵਾ ਇਮੇਸਂ ਦ੍ਵਿਨ੍ਨਂ ਕੁਲਾਨਂ ਅਨੁਕਮ੍ਪਾਯ ਸਾਵਤ੍ਥਿਂ ਨਿਸ੍ਸਾਯ ਵਿਹਰਨ੍ਤੋ ਇਮੇਸੁ ਦ੍ਵੀਸੁ ਵਿਹਾਰੇਸੁ ਨਿਬਦ੍ਧਵਾਸਂ ਵਸਿ. ਏਕਂ ਅਨ੍ਤੋਵਸ੍ਸਂ ਜੇਤਵਨੇ ਵਸਤਿ, ਏਕਂ ਪੁਬ੍ਬਾਰਾਮੇ. ਤਸ੍ਮਿਂ ਸਮਯੇ ਪਨ ਭਗਵਾ ਪੁਬ੍ਬਾਰਾਮੇ ਵਿਹਰਤਿ. ਤੇਨ ਵੁਤ੍ਤਂ ‘‘ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ’’ਤਿ.

ਵਾਸੇਟ੍ਠਭਾਰਦ੍ਵਾਜਾਤਿ ਵਾਸੇਟ੍ਠੋ ਚ ਸਾਮਣੇਰੋ ਭਾਰਦ੍ਵਾਜੋ ਚ. ਭਿਕ੍ਖੂਸੁ ਪਰਿਵਸਨ੍ਤੀਤਿ ਤੇ ਨੇਵ ਤਿਤ੍ਥਿਯਪਰਿਵਾਸਂ ਵਸਨ੍ਤਿ, ਨ ਆਪਤ੍ਤਿਪਰਿਵਾਸਂ. ਅਪਰਿਪੁਣ੍ਣਵਸ੍ਸਤ੍ਤਾ ਪਨ ਭਿਕ੍ਖੁਭਾਵਂ ਪਤ੍ਥਯਮਾਨਾ ਵਸਨ੍ਤਿ. ਤੇਨੇਵਾਹ ‘‘ਭਿਕ੍ਖੁਭਾਵਂ ਆਕਙ੍ਖਮਾਨਾ’’ਤਿ. ਉਭੋਪਿ ਹੇਤੇ ਉਦਿਚ੍ਚਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਾ, ਚਤ੍ਤਾਲੀਸ ਚਤ੍ਤਾਲੀਸ ਕੋਟਿਵਿਭਵਾ ਤਿਣ੍ਣਂ ਵੇਦਾਨਂ ਪਾਰਗੂ ਮਜ੍ਝਿਮਨਿਕਾਯੇ ਵਾਸੇਟ੍ਠਸੁਤ੍ਤਂ ਸੁਤ੍ਵਾ ਸਰਣਂ ਗਤਾ, ਤੇਵਿਜ੍ਜਸੁਤ੍ਤਂ ਸੁਤ੍ਵਾ ਪਬ੍ਬਜਿਤ੍ਵਾ ਇਮਸ੍ਮਿਂ ਕਾਲੇ ਭਿਕ੍ਖੁਭਾਵਂ ਆਕਙ੍ਖਮਾਨਾ ਪਰਿਵਸਨ੍ਤਿ. ਅਬ੍ਭੋਕਾਸੇ ਚਙ੍ਕਮਤੀਤਿ ਉਤ੍ਤਰਦਕ੍ਖਿਣੇਨ ਆਯਤਸ੍ਸ ਪਾਸਾਦਸ੍ਸ ਪੁਰਤ੍ਥਿਮਦਿਸਾਭਾਗੇ ਪਾਸਾਦਚ੍ਛਾਯਾਯਂ ਯਨ੍ਤਰਜ੍ਜੂਹਿ ਆਕਡ੍ਢਿਯਮਾਨਂ ਰਤਨਸਤੁਬ੍ਬੇਧਂ ਸੁਵਣ੍ਣਅਗ੍ਘਿਕਂ ਵਿਯ ਅਨਿਲਪਥੇ ਵਿਧਾਵਨ੍ਤੀਹਿ ਛਬ੍ਬਣ੍ਣਾਹਿ ਬੁਦ੍ਧਰਸ੍ਮੀਹਿ ਸੋਭਮਾਨੋ ਅਪਰਾਪਰਂ ਚਙ੍ਕਮਤਿ.

੧੧੩. ਅਨੁਚਙ੍ਕਮਿਂਸੂਤਿ ਅਞ੍ਜਲਿਂ ਪਗ੍ਗਯ੍ਹ ਓਨਤਸਰੀਰਾ ਹੁਤ੍ਵਾ ਅਨੁਵਤ੍ਤਮਾਨਾ ਚਙ੍ਕਮਿਂਸੁ. ਵਾਸੇਟ੍ਠਂ ਆਮਨ੍ਤੇਸੀਤਿ ਸੋ ਤੇਸਂ ਪਣ੍ਡਿਤਤਰੋ ਗਹੇਤਬ੍ਬਂ ਵਿਸ੍ਸਜ੍ਜੇਤਬ੍ਬਞ੍ਚ ਜਾਨਾਤਿ, ਤਸ੍ਮਾ ਤਂ ਆਮਨ੍ਤੇਸਿ. ਤੁਮ੍ਹੇ ਖ੍ਵਤ੍ਥਾਤਿ ਤੁਮ੍ਹੇ ਖੋ ਅਤ੍ਥ. ਬ੍ਰਾਹ੍ਮਣਜਚ੍ਚਾਤਿ, ਬ੍ਰਾਹ੍ਮਣਜਾਤਿਕਾ. ਬ੍ਰਾਹ੍ਮਣਕੁਲੀਨਾਤਿ ਬ੍ਰਾਹ੍ਮਣੇਸੁ ਕੁਲੀਨਾ ਕੁਲਸਮ੍ਪਨ੍ਨਾ. ਬ੍ਰਾਹ੍ਮਣਕੁਲਾਤਿ ਬ੍ਰਾਹ੍ਮਣਕੁਲਤੋ, ਭੋਗਾਦਿਸਮ੍ਪਨ੍ਨਂ ਬ੍ਰਾਹ੍ਮਣਕੁਲਂ ਪਹਾਯਾਤਿ ਅਤ੍ਥੋ. ਨ ਅਕ੍ਕੋਸਨ੍ਤੀਤਿ ਦਸਵਿਧੇਨ ਅਕ੍ਕੋਸਵਤ੍ਥੁਨਾ ਨ ਅਕ੍ਕੋਸਨ੍ਤਿ. ਨ ਪਰਿਭਾਸਨ੍ਤੀਤਿ ਨਾਨਾਵਿਧਾਯ ਪਰਿਭਵਕਥਾਯ ਨ ਪਰਿਭਾਸਨ੍ਤੀਤਿ ਅਤ੍ਥੋ. ਇਤਿ ਭਗਵਾ ‘‘ਬ੍ਰਾਹ੍ਮਣਾ ਇਮੇ ਸਾਮਣੇਰੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀ’’ਤਿ ਜਾਨਮਾਨੋਵ ਪੁਚ੍ਛਤਿ. ਕਸ੍ਮਾ? ਇਮੇ ਮਯਾ ਅਪੁਚ੍ਛਿਤਾ ਪਠਮਤਰਂ ਨ ਕਥੇਸ੍ਸਨ੍ਤਿ, ਅਕਥਿਤੇ ਕਥਾ ਨ ਸਮੁਟ੍ਠਾਤੀਤਿ ਕਥਾਸਮੁਟ੍ਠਾਪਨਤ੍ਥਾਯ. ਤਗ੍ਘਾਤਿ ਏਕਂਸਵਚਨੇ ਨਿਪਾਤੋ, ਏਕਂਸੇਨੇਵ ਨੋ, ਭਨ੍ਤੇ, ਬ੍ਰਾਹ੍ਮਣਾ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀਤਿ ਵੁਤ੍ਤਂ ਹੋਤਿ. ਅਤ੍ਤਰੂਪਾਯਾਤਿ ਅਤ੍ਤਨੋ ਅਨੁਰੂਪਾਯ. ਪਰਿਪੁਣ੍ਣਾਯਾਤਿ ਯਥਾਰੁਚਿ ਪਦਬ੍ਯਞ੍ਜਨਾਨਿ ਆਰੋਪੇਤ੍ਵਾ ਆਰੋਪੇਤ੍ਵਾ ਪਰਿਪੂਰਿਤਾਯ. ਨੋ ਅਪਰਿਪੁਣ੍ਣਾਯਾਤਿ ਅਨ੍ਤਰਾ ਅਟ੍ਠਪਿਤਾਯ ਨਿਰਨ੍ਤਰਂ ਪਵਤ੍ਤਾਯ.

ਕਸ੍ਮਾ ਪਨ ਬ੍ਰਾਹ੍ਮਣਾ ਇਮੇ ਸਾਮਣੇਰੇ ਅਕ੍ਕੋਸਨ੍ਤੀਤਿ? ਅਪ੍ਪਤਿਟ੍ਠਤਾਯ. ਇਮੇ ਹਿ ਸਾਮਣੇਰਾ ਅਗ੍ਗਬ੍ਰਾਹ੍ਮਣਾਨਂ ਪੁਤ੍ਤਾ ਤਿਣ੍ਣਂ ਵੇਦਾਨਂ ਪਾਰਗੂ ਜਮ੍ਬੁਦੀਪੇ ਬ੍ਰਾਹ੍ਮਣਾਨਂ ਅਨ੍ਤਰੇ ਪਾਕਟਾ ਸਮ੍ਭਾਵਿਤਾ ਤੇਸਂ ਪਬ੍ਬਜਿਤਤ੍ਤਾ ਅਞ੍ਞੇ ਬ੍ਰਾਹ੍ਮਣਪੁਤ੍ਤਾ ਪਬ੍ਬਜਿਂਸੁ. ਅਥ ਖੋ ਬ੍ਰਾਹ੍ਮਣਾ ‘‘ਅਪਤਿਟ੍ਠਾ ਮਯਂ ਜਾਤਾ’’ਤਿ ਇਮਾਯ ਅਪ੍ਪਤਿਟ੍ਠਤਾਯ ਗਾਮਦ੍ਵਾਰੇਪਿ ਅਨ੍ਤੋਗਾਮੇਪਿ ਤੇ ਦਿਸ੍ਵਾ ‘‘ਤੁਮ੍ਹੇਹਿ ਬ੍ਰਾਹ੍ਮਣਸਮਯੋ ਭਿਨ੍ਨੋ, ਮੁਣ੍ਡਸਮਣਕਸ੍ਸ ਪਚ੍ਛਤੋ ਪਚ੍ਛਤੋ ਰਸਗਿਦ੍ਧਾ ਹੁਤ੍ਵਾ ਵਿਚਰਥਾ’’ਤਿਆਦੀਨਿ ਚੇਵ ਪਾਲ਼ਿਯਂ ਆਗਤਾਨਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿਆਦੀਨਿ ਚ ਵਤ੍ਵਾ ਅਕ੍ਕੋਸਨ੍ਤਿ. ਸਾਮਣੇਰਾ ਤੇਸੁ ਅਕ੍ਕੋਸਨ੍ਤੇਸੁਪਿ ਕੋਪਂ ਵਾ ਆਘਾਤਂ ਵਾ ਅਕਤ੍ਵਾ ਕੇਵਲਂ ਭਗਵਤਾ ਪੁਟ੍ਠਾ ‘‘ਤਗ੍ਘ ਨੋ, ਭਨ੍ਤੇ, ਬ੍ਰਾਹ੍ਮਣਾ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀ’’ਤਿ ਆਰੋਚੇਸੁਂ. ਅਥ ਨੇ ਭਗਵਾ ਅਕ੍ਕੋਸਨਾਕਾਰਂ ਪੁਚ੍ਛਨ੍ਤੋ ਯਥਾ ਕਥਂ ਪਨ ਵੋਤਿ ਪੁਚ੍ਛਤਿ. ਤੇ ਆਚਿਕ੍ਖਨ੍ਤਾ ਬ੍ਰਾਹ੍ਮਣਾ ਭਨ੍ਤੇਤਿਆਦਿਮਾਹਂਸੁ.

ਤਤ੍ਥ ਸੇਟ੍ਠੋ ਵਣ੍ਣੋਤਿ ਜਾਤਿਗੋਤ੍ਤਾਦੀਨਂ ਪਞ੍ਞਾਪਨਟ੍ਠਾਨੇ ਬ੍ਰਾਹ੍ਮਣੋਵ ਸੇਟ੍ਠੋਤਿ ਦਸ੍ਸੇਨ੍ਤਿ. ਹੀਨਾ ਅਞ੍ਞੇ ਵਣ੍ਣਾਤਿ ਇਤਰੇ ਤਯੋ ਵਣ੍ਣਾ ਹੀਨਾ ਲਾਮਕਾਤਿ ਵਦਨ੍ਤਿ. ਸੁਕ੍ਕੋਤਿ ਪਣ੍ਡਰੋ. ਕਣ੍ਹੋਤਿ ਕਾਲ਼ਕੋ. ਸੁਜ੍ਝਨ੍ਤੀਤਿ ਜਾਤਿਗੋਤ੍ਤਾਦੀਨਂ ਪਞ੍ਞਾਪਨਟ੍ਠਾਨੇ ਸੁਜ੍ਝਨ੍ਤਿ. ਬ੍ਰਹ੍ਮੁਨੋ ਪੁਤ੍ਤਾਤਿ ਮਹਾਬ੍ਰਹ੍ਮੁਨੋ ਪੁਤ੍ਤਾ. ਓਰਸਾ ਮੁਖਤੋ ਜਾਤਾਤਿ ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਾ, ਉਰੇ ਕਤ੍ਵਾ ਸਂਵਡ੍ਢਿਤਾਤਿ ਵਾ ਓਰਸਾ. ਬ੍ਰਹ੍ਮਜਾਤਿ ਬ੍ਰਹ੍ਮਤੋ ਨਿਬ੍ਬਤ੍ਤਾ. ਬ੍ਰਹ੍ਮਨਿਮ੍ਮਿਤਾਤਿ ਬ੍ਰਹ੍ਮੁਨਾ ਨਿਮ੍ਮਿਤਾ. ਬ੍ਰਹ੍ਮਦਾਯਾਦਾਤਿ ਬ੍ਰਹ੍ਮੁਨੋ ਦਾਯਾਦਾ. ਹੀਨਮਤ੍ਥ ਵਣ੍ਣਂ ਅਜ੍ਝੁਪਗਤਾਤਿ ਹੀਨਂ ਵਣ੍ਣਂ ਅਜ੍ਝੁਪਗਤਾ ਅਤ੍ਥ. ਮੁਣ੍ਡਕੇ ਸਮਣਕੇਤਿ ਨਿਨ੍ਦਨ੍ਤਾ ਜਿਗੁਚ੍ਛਨ੍ਤਾ ਵਦਨ੍ਤਿ, ਨ ਮੁਣ੍ਡਕਮਤ੍ਤਞ੍ਚੇਵ ਸਮਣਮਤ੍ਤਞ੍ਚ ਸਨ੍ਧਾਯ. ਇਬ੍ਭੇਤਿ ਗਹਪਤਿਕੇ. ਕਣ੍ਹੇਤਿ ਕਾਲ਼ਕੇ. ਬਨ੍ਧੂਤਿ ਮਾਰਸ੍ਸ ਬਨ੍ਧੁਭੂਤੇ ਮਾਰਪਕ੍ਖਿਕੇ. ਪਾਦਾਪਚ੍ਚੇਤਿ ਮਹਾਬ੍ਰਹ੍ਮੁਨੋ ਪਾਦਾਨਂ ਅਪਚ੍ਚਭੂਤੇ ਪਾਦਤੋ ਜਾਤੇਤਿ ਅਧਿਪ੍ਪਾਯੋ.

੧੧੪. ‘‘ਤਗ੍ਘ ਵੋ, ਵਾਸੇਟ੍ਠ, ਬ੍ਰਾਹ੍ਮਣਾ ਪੋਰਾਣਂ ਅਸ੍ਸਰਨ੍ਤਾ ਏਵਮਾਹਂਸੂ’’ਤਿ ਏਤ੍ਥ ਵੋਤਿ ਨਿਪਾਤਮਤ੍ਤਂ, ਸਾਮਿਵਚਨਂ ਵਾ, ਤੁਮ੍ਹਾਕਂ ਬ੍ਰਾਹ੍ਮਣਾਤਿ ਅਤ੍ਥੋ. ਪੋਰਾਣਨ੍ਤਿ ਪੋਰਾਣਕਂ ਅਗ੍ਗਞ੍ਞਂ ਲੋਕੁਪ੍ਪਤ੍ਤਿਚਰਿਯਵਂਸਂ. ਅਸ੍ਸਰਨ੍ਤਾਤਿ ਅਸ੍ਸਰਮਾਨਾ. ਇਦਂ ਵੁਤ੍ਤਂ ਹੋਤਿ, ਏਕਂਸੇਨ ਵੋ, ਵਾਸੇਟ੍ਠ, ਬ੍ਰਾਹ੍ਮਣਾ ਪੋਰਾਣਂ ਲੋਕੁਪ੍ਪਤ੍ਤਿਂ ਅਨਨੁਸ੍ਸਰਨ੍ਤਾ ਅਜਾਨਨ੍ਤਾ ਏਵਂ ਵਦਨ੍ਤੀਤਿ. ‘‘ਦਿਸ੍ਸਨ੍ਤਿ ਖੋ ਪਨਾ’’ਤਿ ਏਵਮਾਦਿ ਤੇਸਂ ਲਦ੍ਧਿਭਿਨ੍ਦਨਤ੍ਥਾਯ ਵੁਤ੍ਤਂ. ਤਤ੍ਥ ਬ੍ਰਾਹ੍ਮਣਿਯੋਤਿ ਬ੍ਰਾਹ੍ਮਣਾਨਂ ਪੁਤ੍ਤਪ੍ਪਟਿਲਾਭਤ੍ਥਾਯ ਆਵਾਹਵਿਵਾਹਵਸੇਨ ਕੁਲਂ ਆਨੀਤਾ ਬ੍ਰਾਹ੍ਮਣਿਯੋ ਦਿਸ੍ਸਨ੍ਤਿ. ਤਾ ਖੋ ਪਨੇਤਾ ਅਪਰੇਨ ਸਮਯੇਨ ਉਤੁਨਿਯੋਪਿ ਹੋਨ੍ਤਿ, ਸਞ੍ਜਾਤਪੁਪ੍ਫਾਤਿ ਅਤ੍ਥੋ. ਗਬ੍ਭਿਨਿਯੋਤਿ ਸਞ੍ਜਾਤਗਬ੍ਭਾ. ਵਿਜਾਯਮਾਨਾਤਿ ਪੁਤ੍ਤਧੀਤਰੋ ਜਨਯਮਾਨਾ. ਪਾਯਮਾਨਾਤਿ ਦਾਰਕੇ ਥਞ੍ਞਂ ਪਾਯਨ੍ਤਿਯੋ. ਯੋਨਿਜਾਵ ਸਮਾਨਾਤਿ ਬ੍ਰਾਹ੍ਮਣੀਨਂ ਪਸ੍ਸਾਵਮਗ੍ਗੇਨ ਜਾਤਾ ਸਮਾਨਾ. ਏਵਮਾਹਂਸੂਤਿ ਏਵਂ ਵਦਨ੍ਤਿ. ਕਥਂ? ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’ਤਿ. ਯਦਿ ਪਨ ਨੇਸਂ ਤਂ ਸਚ੍ਚਵਚਨਂ ਸਿਯਾ, ਬ੍ਰਾਹ੍ਮਣੀਨਂ ਕੁਚ੍ਛਿ ਮਹਾਬ੍ਰਹ੍ਮਸ੍ਸ ਉਰੋ ਭਵੇਯ੍ਯ, ਬ੍ਰਾਹ੍ਮਣੀਨਂ ਪਸ੍ਸਾਵਮਗ੍ਗੋ ਮਹਾਬ੍ਰਹ੍ਮੁਨੋ ਮੁਖਂ ਭਵੇਯ੍ਯ, ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ. ਤੇਨਾਹ ‘‘ਤੇ ਚ ਬ੍ਰਹ੍ਮੂਨਞ੍ਚੇਵ ਅਬ੍ਭਾਚਿਕ੍ਖਨ੍ਤੀ’’ਤਿਆਦਿ.

ਚਤੁਵਣ੍ਣਸੁਦ੍ਧਿਵਣ੍ਣਨਾ

ਏਤ੍ਤਾਵਤਾ ‘‘ਮਯਂ ਮਹਾਬ੍ਰਹ੍ਮੁਨੋ ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਾਤਿ ਵਤ੍ਤੁਂ ਮਾ ਲਭਨ੍ਤੂ’’ਤਿ ਇਮਂ ਮੁਖਚ੍ਛੇਦਕਵਾਦਂ ਵਤ੍ਵਾ ਪੁਨ ਚਤ੍ਤਾਰੋਪਿ ਵਣ੍ਣਾ ਕੁਸਲੇ ਧਮ੍ਮੇ ਸਮਾਦਾਯ ਵਤ੍ਤਨ੍ਤਾਵ ਸੁਜ੍ਝਨ੍ਤੀਤਿ ਦਸ੍ਸਨਤ੍ਥਂ ਚਤ੍ਤਾਰੋਮੇ, ਵਾਸੇਟ੍ਠ, ਵਣ੍ਣਾਤਿਆਦਿਮਾਹ. ਅਕੁਸਲਸਙ੍ਖਾਤਾਤਿ ਅਕੁਸਲਾਤਿ ਸਙ੍ਖਾਤਾ ਅਕੁਸਲਕੋਟ੍ਠਾਸਭੂਤਾ ਵਾ. ਏਸ ਨਯੋ ਸਬ੍ਬਤ੍ਥ. ਨ ਅਲਮਰਿਯਾਤਿ ਅਰਿਯਭਾਵੇ ਅਸਮਤ੍ਥਾ. ਕਣ੍ਹਾਤਿ ਪਕਤਿਕਾਲ਼ਕਾ. ਕਣ੍ਹਵਿਪਾਕਾਤਿ ਵਿਪਾਕੋਪਿ ਨੇਸਂ ਕਣ੍ਹੋ ਦੁਕ੍ਖੋਤਿ ਅਤ੍ਥੋ. ਖਤ੍ਤਿਯੇਪਿ ਤੇਤਿ ਖਤ੍ਤਿਯਮ੍ਹਿਪਿ ਤੇ. ਏਕਚ੍ਚੇਤਿ ਏਕਸ੍ਮਿਂ. ਏਸ ਨਯੋ ਸਬ੍ਬਤ੍ਥ.

ਸੁਕ੍ਕਾਤਿ ਨਿਕ੍ਕਿਲੇਸਭਾਵੇਨ ਪਣ੍ਡਰਾ. ਸੁਕ੍ਕਵਿਪਾਕਾਤਿ ਵਿਪਾਕੋਪਿ ਨੇਸਂ ਸੁਕ੍ਕੋ ਸੁਖੋਤਿ ਅਤ੍ਥੋ.

੧੧੬. ਉਭਯਵੋਕਿਣ੍ਣੇਸੁ ਵਤ੍ਤਮਾਨੇਸੂਤਿ ਉਭਯੇਸੁ ਵੋਕਿਣ੍ਣੇਸੁ ਮਿਸ੍ਸੀਭੂਤੇਸੁ ਹੁਤ੍ਵਾ ਵਤ੍ਤਮਾਨੇਸੁ. ਕਤਮੇਸੁ ਉਭਯੇਸੂਤਿ? ਕਣ੍ਹਸੁਕ੍ਕੇਸੁ ਧਮ੍ਮੇਸੁ ਵਿਞ੍ਞੁਗਰਹਿਤੇਸੁ ਚੇਵ ਵਿਞ੍ਞੁਪ੍ਪਸਤ੍ਥੇਸੁ ਚ. ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੂਤਿ ਏਤ੍ਥ ਏਤੇਸੁ ਕਣ੍ਹਸੁਕ੍ਕਧਮ੍ਮੇਸੁ ਵਤ੍ਤਮਾਨਾਪਿ ਬ੍ਰਾਹ੍ਮਣਾ ਯਦੇਤਂ ਏਵਂ ਵਦਨ੍ਤਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿਆਦਿ. ਤਂ ਨੇਸਂ ਵਿਞ੍ਞੂ ਨਾਨੁਜਾਨਨ੍ਤੀਤਿ ਯੇ ਲੋਕੇ ਪਣ੍ਡਿਤਾ, ਤੇ ਨਾਨੁਮੋਦਨ੍ਤਿ, ਨ ਪਸਂਸਨ੍ਤੀਤਿ ਅਤ੍ਥੋ. ਤਂ ਕਿਸ੍ਸ ਹੇਤੁ? ਇਮੇਸਞ੍ਹਿ ਵਾਸੇਟ੍ਠਾਤਿਆਦਿਮ੍ਹਿ ਅਯਂ ਸਙ੍ਖੇਪਤ੍ਥੋ. ਯਂ ਵੁਤ੍ਤਂ ਨਾਨੁਜਾਨਨ੍ਤੀਤਿ, ਤਂ ਕਸ੍ਮਾਤਿ ਚੇ? ਯਸ੍ਮਾ ਇਮੇਸਂ ਚਤੁਨ੍ਨਂ ਵਣ੍ਣਾਨਂ ਯੋ ਭਿਕ੍ਖੁ ਅਰਹਂ…ਪੇ… ਸਮ੍ਮਦਞ੍ਞਾ ਵਿਮੁਤ੍ਤੋ, ਸੋ ਤੇਸਂ ਅਗ੍ਗਮਕ੍ਖਾਯਤਿ, ਤੇ ਚ ਨ ਏਵਰੂਪਾ. ਤਸ੍ਮਾ ਨੇਸਂ ਵਿਞ੍ਞੂ ਨਾਨੁਜਾਨਨ੍ਤਿ.

ਅਰਹਨ੍ਤਿਆਦਿਪਦੇਸੁ ਚੇਤ੍ਥ ਕਿਲੇਸਾਨਂ ਆਰਕਤ੍ਤਾਦੀਹਿ ਕਾਰਣੇਹਿ ਅਰਹਂ. ਆਸਵਾਨਂ ਖੀਣਤ੍ਤਾ ਖੀਣਾਸਵੋ. ਸਤ੍ਤ ਸੇਕ੍ਖਾ ਪੁਥੁਜ੍ਜਨਕਲ੍ਯਾਣਕਾ ਚ ਬ੍ਰਹ੍ਮਚਰਿਯਵਾਸਂ ਵਸਨ੍ਤਿ ਨਾਮ. ਅਯਂ ਪਨ ਵੁਤ੍ਥਵਾਸੋਤਿ ਵੁਸਿਤਵਾ. ਚਤੂਹਿ ਮਗ੍ਗੇਹਿ ਚਤੂਸੁ ਸਚ੍ਚੇਸੁ ਪਰਿਜਾਨਨਾਦਿਕਰਣੀਯਂ ਕਤਂ ਅਸ੍ਸਾਤਿ ਕਤਕਰਣੀਯੋ. ਕਿਲੇਸਭਾਰੋ ਚ ਖਨ੍ਧਭਾਰੋ ਚ ਓਹਿਤੋ ਅਸ੍ਸਾਤਿ ਓਹਿਤਭਾਰੋ. ਓਹਿਤੋਤਿ ਓਹਾਰਿਤੋ. ਸੁਨ੍ਦਰੋ ਅਤ੍ਥੋ, ਸਕੋ ਵਾ ਅਤ੍ਥੋ ਸਦਤ੍ਥੋ, ਅਨੁਪ੍ਪਤ੍ਤੋ ਸਦਤ੍ਥੋ ਏਤੇਨਾਤਿ ਅਨੁਪ੍ਪਤ੍ਤਸਦਤ੍ਥੋ. ਭਵਸਂਯੋਜਨਂ ਵੁਚ੍ਚਤਿ ਤਣ੍ਹਾ, ਸਾ ਪਰਿਕ੍ਖੀਣਾ ਅਸ੍ਸਾਤਿ ਪਰਿਕ੍ਖੀਣਭਵਸਂਯੋਜਨੋ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਹੇਤੁਨਾ ਕਾਰਣੇਨ ਜਾਨਿਤ੍ਵਾ ਵਿਮੁਤ੍ਤੋ. ਜਨੇਤਸ੍ਮਿਨ੍ਤਿ ਜਨੇ ਏਤਸ੍ਮਿਂ, ਇਮਸ੍ਮਿਂ ਲੋਕੇਤਿ ਅਤ੍ਥੋ. ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ ਇਧਤ੍ਤਭਾਵੇ ਚ ਪਰਤ੍ਤਭਾਵੇ.

੧੧੭. ਅਨਨ੍ਤਰਾਤਿ ਅਨ੍ਤਰਵਿਰਹਿਤਾ, ਅਤ੍ਤਨੋ ਕੁਲੇਨ ਸਦਿਸਾਤਿ ਅਤ੍ਥੋ. ਅਨੁਯੁਤ੍ਤਾਤਿ ਵਸਵਤ੍ਤਿਨੋ. ਨਿਪਚ੍ਚਕਾਰਨ੍ਤਿ ਮਹਲ੍ਲਕਤਰਾ ਨਿਪਚ੍ਚਕਾਰਂ ਦਸ੍ਸੇਨ੍ਤਿ. ਦਹਰਤਰਾ ਅਭਿਵਾਦਨਾਦੀਨਿ ਕਰੋਨ੍ਤਿ. ਤਤ੍ਥ ਸਾਮੀਚਿਕਮ੍ਮਨ੍ਤਿ ਤਂਤਂਵਤ੍ਤਕਰਣਾਦਿ ਅਨੁਚ੍ਛਵਿਕਕਮ੍ਮਂ.

੧੧੮. ਨਿਵਿਟ੍ਠਾਤਿ ਅਭਿਨਿਵਿਟ੍ਠਾ ਅਚਲਟ੍ਠਿਤਾ. ਕਸ੍ਸ ਪਨ ਏਵਰੂਪਾ ਸਦ੍ਧਾ ਹੋਤੀਤਿ? ਸੋਤਾਪਨ੍ਨਸ੍ਸ. ਸੋ ਹਿ ਨਿਵਿਟ੍ਠਸਦ੍ਧੋ ਅਸਿਨਾ ਸੀਸੇ ਛੇਜ੍ਜਮਾਨੇਪਿ ਬੁਦ੍ਧੋ ਅਬੁਦ੍ਧੋਤਿ ਵਾ, ਧਮ੍ਮੋ ਅਧਮ੍ਮੋਤਿ ਵਾ, ਸਙ੍ਘੋ ਅਸਙ੍ਘੋਤਿ ਵਾ ਨ ਵਦਤਿ. ਪਤਿਟ੍ਠਿਤਸਦ੍ਧੋ ਹੋਤਿ ਸੂਰਮ੍ਬਟ੍ਠੋ ਵਿਯ.

ਸੋ ਕਿਰ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸੋਤਾਪਨ੍ਨੋ ਹੁਤ੍ਵਾ ਗੇਹਂ ਅਗਮਾਸਿ. ਅਥ ਮਾਰੋ ਦ੍ਵਤ੍ਤਿਂਸਵਰਲਕ੍ਖਣਪ੍ਪਟਿਮਣ੍ਡਿਤਂ ਬੁਦ੍ਧਰੂਪਂ ਮਾਪੇਤ੍ਵਾ ਤਸ੍ਸ ਘਰਦ੍ਵਾਰੇ ਠਤ੍ਵਾ ‘‘ਸਤ੍ਥਾ ਆਗਤੋ’’ਤਿ ਸਾਸਨਂ ਪਹਿਣਿ. ਸੂਰਮ੍ਬਟ੍ਠੋ ਚਿਨ੍ਤੇਸਿ ‘‘ਅਹਂ ਇਦਾਨੇਵ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਆਗਤੋ, ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਉਪਸਙ੍ਕਮਿਤ੍ਵਾ ਸਤ੍ਥੁਸਞ੍ਞਾਯ ਵਨ੍ਦਿਤ੍ਵਾ ਅਟ੍ਠਾਸਿ. ਮਾਰੋ ਆਹ – ‘‘ਅਮ੍ਬਟ੍ਠ, ਯਂ ਤੇ ਮਯਾ ‘ਰੂਪਂ ਅਨਿਚ੍ਚਂ…ਪੇ… ਵਿਞ੍ਞਾਣਂ ਅਨਿਚ੍ਚਨ੍ਤਿ ਕਥਿਤਂ, ਤਂ ਦੁਕ੍ਕਥਿਤਂ. ਅਨੁਪਧਾਰੇਤ੍ਵਾਵ ਹਿ ਮਯਾ ਏਵਂ ਵੁਤ੍ਤਂ. ਤਸ੍ਮਾ ਤ੍ਵਂ ‘ਰੂਪਂ ਨਿਚ੍ਚਂ…ਪੇ… ਵਿਞ੍ਞਾਣਂ ਨਿਚ੍ਚ’ਨ੍ਤਿ ਗਣ੍ਹਾਹੀ’’ਤਿ. ਸੋ ਚਿਨ੍ਤੇਸਿ – ‘‘ਅਟ੍ਠਾਨਮੇਤਂ ਯਂ ਬੁਦ੍ਧਾ ਅਨੁਪਧਾਰੇਤ੍ਵਾ ਅਪਚ੍ਚਕ੍ਖਂ ਕਤ੍ਵਾ ਕਿਞ੍ਚਿ ਕਥੇਯ੍ਯੁਂ, ਅਦ੍ਧਾ ਅਯਂ ਮਯ੍ਹਂ ਵਿਚ੍ਛਿਨ੍ਦਜਨਨਤ੍ਥਂ ਮਾਰੋ ਆਗਤੋ’’ਤਿ. ਤਤੋ ਨਂ ‘‘ਤ੍ਵਂ ਮਾਰੋਸੀ’’ਤਿ ਆਹ. ਸੋ ਮੁਸਾਵਾਦਂ ਕਾਤੁਂ ਨਾਸਕ੍ਖਿ. ‘‘ਆਮ ਮਾਰੋਸ੍ਮੀ’’ਤਿ ਪਟਿਜਾਨਾਤਿ. ‘‘ਕਸ੍ਮਾ ਆਗਤੋਸੀ’’ਤਿ? ਤਵ ਸਦ੍ਧਾਚਾਲਨਤ੍ਥਨ੍ਤਿ ਆਹ. ‘‘ਕਣ੍ਹ ਪਾਪਿਮ, ਤ੍ਵਂ ਤਾਵ ਏਕੋ ਤਿਟ੍ਠ, ਤਾਦਿਸਾਨਂ ਮਾਰਾਨਂ ਸਤਮ੍ਪਿ ਸਹਸ੍ਸਮ੍ਪਿ ਸਤਸਹਸ੍ਸਮ੍ਪਿ ਮਮ ਸਦ੍ਧਂ ਚਾਲੇਤੁਂ ਅਸਮਤ੍ਥਂ, ਮਗ੍ਗੇਨ ਆਗਤਸਦ੍ਧਾ ਨਾਮ ਥਿਰਾ ਸਿਲਾਪਥਵਿਯਂ ਪਤਿਟ੍ਠਿਤਸਿਨੇਰੁ ਵਿਯ ਅਚਲਾ ਹੋਤਿ, ਕਿਂ ਤ੍ਵਂ ਏਤ੍ਥਾ’’ਤਿ ਅਚ੍ਛਰਂ ਪਹਰਿ. ਸੋ ਠਾਤੁਂ ਅਸਕ੍ਕੋਨ੍ਤੋ ਤਤ੍ਥੇਵ ਅਨ੍ਤਰਧਾਯਿ. ਏਵਰੂਪਂ ਸਦ੍ਧਂ ਸਨ੍ਧਾਯੇਤਂ ਵੁਤ੍ਤਂ ‘‘ਨਿਵਿਟ੍ਠਾ’’ਤਿ.

ਮੂਲਜਾਤਾ ਪਤਿਟ੍ਠਿਤਾਤਿ ਮਗ੍ਗਮੂਲਸ੍ਸ ਸਞ੍ਜਾਤਤ੍ਤਾ ਤੇਨ ਮਗ੍ਗਮੂਲੇਨ ਪਤਿਟ੍ਠਿਤਾ. ਦਲ਼੍ਹਾਤਿ ਥਿਰਾ. ਅਸਂਹਾਰਿਯਾਤਿ ਸੁਨਿਖਾਤਇਨ੍ਦਖੀਲੋ ਵਿਯ ਕੇਨਚਿ ਚਾਲੇਤੁਂ ਅਸਕ੍ਕੁਣੇਯ੍ਯਾ. ਤਸ੍ਸੇਤਂ ਕਲ੍ਲਂ ਵਚਨਾਯਾਤਿ ਤਸ੍ਸ ਅਰਿਯਸਾਵਕਸ੍ਸ ਯੁਤ੍ਤਮੇਤਂ ਵਤ੍ਤੁਂ. ਕਿਨ੍ਤਿ? ‘‘ਭਗਵਤੋਮ੍ਹਿ ਪੁਤ੍ਤੋ ਓਰਸੋ’’ਤਿ ਏਵਮਾਦਿ. ਸੋ ਹਿ ਭਗਵਨ੍ਤਂ ਨਿਸ੍ਸਾਯ ਅਰਿਯਭੂਮਿਯਂ ਜਾਤੋਤਿ ਭਗਵਤੋ ਪੁਤ੍ਤੋ. ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਧਮ੍ਮਘੋਸਵਸੇਨ ਮਗ੍ਗਫਲੇਸੁ ਪਤਿਟ੍ਠਿਤਤ੍ਤਾ ਓਰਸੋ ਮੁਖਤੋ ਜਾਤੋ. ਅਰਿਯਧਮ੍ਮਤੋ ਜਾਤਤ੍ਤਾ ਅਰਿਯਧਮ੍ਮੇਨ ਚ ਨਿਮ੍ਮਿਤਤ੍ਤਾ ਧਮ੍ਮਜੋ ਧਮ੍ਮਨਿਮ੍ਮਿਤੋ. ਨਵਲੋਕੁਤ੍ਤਰਧਮ੍ਮਦਾਯਜ੍ਜਂ ਅਰਹਤੀਤਿ ਧਮ੍ਮਦਾਯਾਦੋ. ਤਂ ਕਿਸ੍ਸ ਹੇਤੂਤਿ ਯਦੇਤਂ ‘‘ਭਗਵਤੋਮ੍ਹਿ ਪੁਤ੍ਤੋ’’ਤਿ ਵਤ੍ਵਾ ‘‘ਧਮ੍ਮਜੋ ਧਮ੍ਮਨਿਮ੍ਮਿਤੋ’’ਤਿ ਵੁਤ੍ਤਂ, ਤਂ ਕਸ੍ਮਾਤਿ ਚੇ? ਇਦਾਨਿਸ੍ਸ ਅਤ੍ਥਂ ਦਸ੍ਸੇਨ੍ਤੋ ਤਥਾਗਤਸ੍ਸ ਹੇਤਨ੍ਤਿਆਦਿਮਾਹ. ਤਤ੍ਥ ‘‘ਧਮ੍ਮਕਾਯੋ ਇਤਿਪੀ’’ਤਿ ਕਸ੍ਮਾ ਤਥਾਗਤੋ ‘‘ਧਮ੍ਮਕਾਯੋ’’ਤਿ ਵੁਤ੍ਤੋ? ਤਥਾਗਤੋ ਹਿ ਤੇਪਿਟਕਂ ਬੁਦ੍ਧਵਚਨਂ ਹਦਯੇਨ ਚਿਨ੍ਤੇਤ੍ਵਾ ਵਾਚਾਯ ਅਭਿਨੀਹਰਿ. ਤੇਨਸ੍ਸ ਕਾਯੋ ਧਮ੍ਮਮਯਤ੍ਤਾ ਧਮ੍ਮੋਵ. ਇਤਿ ਧਮ੍ਮੋ ਕਾਯੋ ਅਸ੍ਸਾਤਿ ਧਮ੍ਮਕਾਯੋ. ਧਮ੍ਮਕਾਯਤ੍ਤਾ ਏਵ ਬ੍ਰਹ੍ਮਕਾਯੋ. ਧਮ੍ਮੋ ਹਿ ਸੇਟ੍ਠਤ੍ਥੇਨ ਬ੍ਰਹ੍ਮਾਤਿ ਵੁਚ੍ਚਤਿ. ਧਮ੍ਮਭੂਤੋਤਿ ਧਮ੍ਮਸਭਾਵੋ. ਧਮ੍ਮਭੂਤਤ੍ਤਾ ਏਵ ਬ੍ਰਹ੍ਮਭੂਤੋ.

੧੧੯. ਏਤ੍ਤਾਵਤਾ ਭਗਵਾ ਸੇਟ੍ਠਚ੍ਛੇਦਕਵਾਦਂ ਦਸ੍ਸੇਤ੍ਵਾ ਇਦਾਨਿ ਅਪਰੇਨਪਿ ਨਯੇਨ ਸੇਟ੍ਠਚ੍ਛੇਦਕਵਾਦਮੇਵ ਦਸ੍ਸੇਤੁਂ ਹੋਤਿ ਖੋ ਸੋ, ਵਾਸੇਟ੍ਠ, ਸਮਯੋਤਿਆਦਿਮਾਹ. ਤਤ੍ਥ ਸਂਵਟ੍ਟਵਿਵਟ੍ਟਕਥਾ ਬ੍ਰਹ੍ਮਜਾਲੇ ਵਿਤ੍ਥਾਰਿਤਾਵ. ਇਤ੍ਥਤ੍ਤਂ ਆਗਚ੍ਛਨ੍ਤੀਤਿ ਇਤ੍ਥਭਾਵਂ ਮਨੁਸ੍ਸਤ੍ਤਂ ਆਗਚ੍ਛਨ੍ਤਿ. ਤੇਧ ਹੋਨ੍ਤਿ ਮਨੋਮਯਾਤਿ ਤੇ ਇਧ ਮਨੁਸ੍ਸਲੋਕੇ ਨਿਬ੍ਬਤ੍ਤਮਾਨਾਪਿ ਓਪਪਾਤਿਕਾ ਹੁਤ੍ਵਾ ਮਨੇਨੇਵ ਨਿਬ੍ਬਤ੍ਤਾਤਿ ਮਨੋਮਯਾ. ਬ੍ਰਹ੍ਮਲੋਕੇ ਵਿਯ ਇਧਾਪਿ ਨੇਸਂ ਪੀਤਿਯੇਵ ਆਹਾਰਕਿਚ੍ਚਂ ਸਾਧੇਤੀਤਿ ਪੀਤਿਭਕ੍ਖਾ. ਏਤੇਨੇਵ ਨਯੇਨ ਸਯਂਪਭਾਦੀਨਿਪਿ ਵੇਦਿਤਬ੍ਬਾਨੀਤਿ.

ਰਸਪਥਵਿਪਾਤੁਭਾਵਵਣ੍ਣਨਾ

੧੨੦. ਏਕੋਦਕੀਭੂਤਨ੍ਤਿ ਸਬ੍ਬਂ ਚਕ੍ਕਵਾਲ਼ਂ ਏਕੋਦਕਮੇਵ ਭੂਤਂ. ਅਨ੍ਧਕਾਰੋਤਿ ਤਮੋ. ਅਨ੍ਧਕਾਰਤਿਮਿਸਾਤਿ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਰਣਂ ਬਹਲਤਮਂ. ਸਮਤਨੀਤਿ ਪਤਿਟ੍ਠਹਿ ਸਮਨ੍ਤਤੋ ਪਤ੍ਥਰਿ. ਪਯਸੋ ਤਤ੍ਤਸ੍ਸਾਤਿ ਤਤ੍ਤਸ੍ਸ ਖੀਰਸ੍ਸ. ਵਣ੍ਣਸਮ੍ਪਨ੍ਨਾਤਿ ਵਣ੍ਣੇਨ ਸਮ੍ਪਨ੍ਨਾ. ਕਣਿਕਾਰਪੁਪ੍ਫਸਦਿਸੋ ਹਿਸ੍ਸਾ ਵਣ੍ਣੋ ਅਹੋਸਿ. ਗਨ੍ਧਸਮ੍ਪਨ੍ਨਾਤਿ ਗਨ੍ਧੇਨ ਸਮ੍ਪਨ੍ਨਾ ਦਿਬ੍ਬਗਨ੍ਧਂ ਵਾਯਤਿ. ਰਸਸਮ੍ਪਨ੍ਨਾਤਿ ਰਸੇਨ ਸਮ੍ਪਨ੍ਨਾ ਪਕ੍ਖਿਤ੍ਤਦਿਬ੍ਬੋਜਾ ਵਿਯ ਹੋਤਿ. ਖੁਦ੍ਦਮਧੁਨ੍ਤਿ ਖੁਦ੍ਦਕਮਕ੍ਖਿਕਾਹਿ ਕਤਮਧੁਂ. ਅਨੇਲ਼ਕਨ੍ਤਿ ਨਿਦ੍ਦੋਸਂ ਮਕ੍ਖਿਕਣ੍ਡਕਵਿਰਹਿਤਂ. ਲੋਲਜਾਤਿਕੋਤਿ ਲੋਲਸਭਾਵੋ. ਅਤੀਤਾਨਨ੍ਤਰੇਪਿ ਕਪ੍ਪੇ ਲੋਲੋਯੇਵ. ਅਮ੍ਭੋਤਿ ਅਚ੍ਛਰਿਯਜਾਤੋ ਆਹ. ਕਿਮੇਵਿਦਂ ਭਵਿਸ੍ਸਤੀਤਿ ਵਣ੍ਣੋਪਿਸ੍ਸਾ ਮਨਾਪੋ ਗਨ੍ਧੋਪਿ, ਰਸੋ ਪਨਸ੍ਸਾ ਕੀਦਿਸੋ ਭਵਿਸ੍ਸਤੀਤਿ ਅਤ੍ਥੋ. ਯੋ ਤਤ੍ਥ ਉਪ੍ਪਨ੍ਨਲੋਭੋ, ਸੋ ਰਸਪਥਵਿਂ ਅਙ੍ਗੁਲਿਯਾ ਸਾਯਿ, ਅਙ੍ਗੁਲਿਯਾ ਗਹੇਤ੍ਵਾ ਜਿਵ੍ਹਗ੍ਗੇ ਠਪੇਸਿ.

ਅਚ੍ਛਾਦੇਸੀਤਿ ਜਿਵ੍ਹਗ੍ਗੇ ਠਪਿਤਮਤ੍ਤਾ ਸਤ੍ਤ ਰਸਹਰਣੀਸਹਸ੍ਸਾਨਿ ਫਰਿਤ੍ਵਾ ਮਨਾਪਾ ਹੁਤ੍ਵਾ ਤਿਟ੍ਠਤਿ. ਤਣ੍ਹਾ ਚਸ੍ਸ ਓਕ੍ਕਮੀਤਿ ਤਤ੍ਥ ਚਸ੍ਸ ਤਣ੍ਹਾ ਉਪ੍ਪਜ੍ਜਿ.

ਚਨ੍ਦਿਮਸੂਰਿਯਾਦਿਪਾਤੁਭਾਵਵਣ੍ਣਨਾ

੧੨੧. ਆਲੁਪ੍ਪਕਾਰਕਂ ਉਪਕ੍ਕਮਿਂਸੁ ਪਰਿਭੁਞ੍ਜਿਤੁਨ੍ਤਿ ਆਲੋਪਂ ਕਤ੍ਵਾ ਪਿਣ੍ਡੇ ਪਿਣ੍ਡੇ ਛਿਨ੍ਦਿਤ੍ਵਾ ਪਰਿਭੁਞ੍ਜਿਤੁਂ ਆਰਭਿਂਸੁ. ਚਨ੍ਦਿਮਸੂਰਿਯਾਤਿ ਚਨ੍ਦਿਮਾ ਚ ਸੂਰਿਯੋ ਚ. ਪਾਤੁਰਹੇਸੁਨ੍ਤਿ ਪਾਤੁਭਵਿਂਸੁ.

ਕੋ ਪਨ ਤੇਸਂ ਪਠਮਂ ਪਾਤੁਭਵਿ, ਕੋ ਕਸ੍ਮਿਂ ਵਸਤਿ, ਕਸ੍ਸ ਕਿਂ ਪਮਾਣਂ, ਕੋ ਉਪਰਿ, ਕੋ ਸੀਘਂ ਗਚ੍ਛਤਿ, ਕਤਿ ਨੇਸਂ ਵੀਥਿਯੋ, ਕਥਂ ਚਰਨ੍ਤਿ, ਕਿਤ੍ਤਕੇ ਠਾਨੇ ਆਲੋਕਂ ਕਰੋਨ੍ਤੀਤਿ? ਉਭੋ ਏਕਤੋ ਪਾਤੁਭਵਨ੍ਤਿ. ਸੂਰਿਯੋ ਪਠਮਤਰਂ ਪਞ੍ਞਾਯਤਿ. ਤੇਸਞ੍ਹਿ ਸਤ੍ਤਾਨਂ ਸਯਂਪਭਾਯ ਅਨ੍ਤਰਹਿਤਾਯ ਅਨ੍ਧਕਾਰੋ ਅਹੋਸਿ. ਤੇ ਭੀਤਤਸਿਤਾ ‘‘ਭਦ੍ਦਕਂ ਵਤਸ੍ਸ ਸਚੇ ਆਲੋਕੋ ਪਾਤੁਭਵੇਯ੍ਯਾ’’ਤਿ ਚਿਨ੍ਤਯਿਂਸੁ. ਤਤੋ ਮਹਾਜਨਸ੍ਸ ਸੂਰਭਾਵਂ ਜਨਯਮਾਨਂ ਸੂਰਿਯਮਣ੍ਡਲਂ ਉਟ੍ਠਹਿ. ਤੇਨੇਵਸ੍ਸ ਸੂਰਿਯੋਤਿ ਨਾਮਂ ਅਹੋਸਿ. ਤਸ੍ਮਿਂ ਦਿਵਸਂ ਆਲੋਕਂ ਕਤ੍ਵਾ ਅਤ੍ਥਙ੍ਗਤੇ ਪੁਨ ਅਨ੍ਧਕਾਰੋ ਅਹੋਸਿ. ਤੇ ‘‘ਭਦ੍ਦਕਂ ਵਤਸ੍ਸ ਸਚੇ ਅਞ੍ਞੋ ਆਲੋਕੋ ਉਪ੍ਪਜ੍ਜੇਯ੍ਯਾ’’ਤਿ ਚਿਨ੍ਤਯਿਂਸੁ. ਅਥ ਨੇਸਂ ਛਨ੍ਦਂ ਞਤ੍ਵਾਵ ਚਨ੍ਦਮਣ੍ਡਲਂ ਉਟ੍ਠਹਿ. ਤੇਨੇਵਸ੍ਸ ਚਨ੍ਦੋਤਿ ਨਾਮਂ ਅਹੋਸਿ.

ਤੇਸੁ ਚਨ੍ਦੋ ਅਨ੍ਤੋਮਣਿਵਿਮਾਨੇ ਵਸਤਿ. ਤਂ ਬਹਿ ਰਜਤੇਨ ਪਰਿਕ੍ਖਿਤ੍ਤਂ. ਉਭਯਮ੍ਪਿ ਸੀਤਲਮੇਵ ਅਹੋਸਿ. ਸੂਰਿਯੋ ਅਨ੍ਤੋਕਨਕਵਿਮਾਨੇ ਵਸਤਿ. ਤਂ ਬਾਹਿਰਂ ਫਲਿਕਪਰਿਕ੍ਖਿਤ੍ਤਂ ਹੋਤਿ. ਉਭਯਮ੍ਪਿ ਉਣ੍ਹਮੇਵ.

ਪਮਾਣਤੋ ਚਨ੍ਦੋ ਉਜੁਕਂ ਏਕੂਨਪਞ੍ਞਾਸਯੋਜਨੋ. ਪਰਿਮਣ੍ਡਲਤੋ ਤੀਹਿ ਯੋਜਨੇਹਿ ਊਨਦਿਯਡ੍ਢਸਤਯੋਜਨੋ. ਸੂਰਿਯੋ ਉਜੁਕਂ ਪਞ੍ਞਾਸਯੋਜਨੋ, ਪਰਿਮਣ੍ਡਲਤੋ ਦਿਯਡ੍ਢਸਤਯੋਜਨੋ.

ਚਨ੍ਦੋ ਹੇਟ੍ਠਾ, ਸੂਰਿਯੋ ਉਪਰਿ, ਅਨ੍ਤਰਾ ਨੇਸਂ ਯੋਜਨਂ ਹੋਤਿ. ਚਨ੍ਦਸ੍ਸ ਹੇਟ੍ਠਿਮਨ੍ਤਤੋ ਸੂਰਿਯਸ੍ਸ ਉਪਰਿਮਨ੍ਤਤੋ ਯੋਜਨਸਤਂ ਹੋਤਿ.

ਚਨ੍ਦੋ ਉਜੁਕਂ ਸਣਿਕਂ ਗਚ੍ਛਤਿ, ਤਿਰਿਯਂ ਸੀਘਂ. ਦ੍ਵੀਸੁ ਪਸ੍ਸੇਸੁ ਨਕ੍ਖਤ੍ਤਤਾਰਕਾ ਗਚ੍ਛਨ੍ਤਿ. ਚਨ੍ਦੋ ਧੇਨੁ ਵਿਯ ਵਚ੍ਛਂ ਤਂ ਤਂ ਨਕ੍ਖਤ੍ਤਂ ਉਪਸਙ੍ਕਮਤਿ. ਨਕ੍ਖਤ੍ਤਾਨਿ ਪਨ ਅਤ੍ਤਨੋ ਠਾਨਂ ਨ ਵਿਜਹਨ੍ਤਿ. ਸੂਰਿਯਸ੍ਸ ਉਜੁਕਂ ਗਮਨਂ ਸੀਘਂ, ਤਿਰਿਯਂ ਗਮਨਂ ਦਨ੍ਧਂ. ਸੋ ਕਾਲ਼ਪਕ੍ਖਉਪੋਸਥਤੋ ਪਾਟਿਪਦਦਿਵਸੇ ਯੋਜਨਾਨਂ ਸਤਸਹਸ੍ਸਂ ਚਨ੍ਦਮਣ੍ਡਲਂ ਓਹਾਯ ਗਚ੍ਛਤਿ. ਅਥ ਚਨ੍ਦੋ ਲੇਖਾ ਵਿਯ ਪਞ੍ਞਾਯਤਿ. ਪਕ੍ਖਸ੍ਸ ਦੁਤਿਯਾਯ ਸਤਸਹਸ੍ਸਨ੍ਤਿ ਏਵਂ ਯਾਵ ਉਪੋਸਥਦਿਵਸਾ ਸਤਸਹਸ੍ਸਂ ਸਤਸਹਸ੍ਸਂ ਓਹਾਯ ਗਚ੍ਛਤਿ. ਅਥ ਚਨ੍ਦੋ ਅਨੁਕ੍ਕਮੇਨ ਵਡ੍ਢਿਤ੍ਵਾ ਉਪੋਸਥਦਿਵਸੇ ਪਰਿਪੁਣ੍ਣੋ ਹੋਤਿ. ਪੁਨ ਪਾਟਿਪਦਦਿਵਸੇ ਯੋਜਨਾਨਂ ਸਤਸਹਸ੍ਸਂ ਧਾਵਿਤ੍ਵਾ ਗਣ੍ਹਾਤਿ. ਦੁਤਿਯਾਯ ਸਤਸਹਸ੍ਸਨ੍ਤਿ ਏਵਂ ਯਾਵ ਉਪੋਸਥਦਿਵਸਾ ਸਤਸਹਸ੍ਸਂ ਸਤਸਹਸ੍ਸਂ ਧਾਵਿਤ੍ਵਾ ਗਣ੍ਹਾਤਿ. ਅਥ ਚਨ੍ਦੋ ਅਨੁਕ੍ਕਮੇਨ ਹਾਯਿਤ੍ਵਾ ਉਪੋਸਥਦਿਵਸੇ ਸਬ੍ਬਸੋ ਨ ਪਞ੍ਞਾਯਤਿ. ਚਨ੍ਦਂ ਹੇਟ੍ਠਾ ਕਤ੍ਵਾ ਸੂਰਿਯੋ ਉਪਰਿ ਹੋਤਿ. ਮਹਤਿਯਾ ਪਾਤਿਯਾ ਖੁਦ੍ਦਕਭਾਜਨਂ ਵਿਯ ਚਨ੍ਦਮਣ੍ਡਲਂ ਪਿਧੀਯਤਿ. ਮਜ੍ਝਨ੍ਹਿਕੇ ਗੇਹਚ੍ਛਾਯਾ ਵਿਯ ਚਨ੍ਦਸ੍ਸ ਛਾਯਾ ਨ ਪਞ੍ਞਾਯਤਿ. ਸੋ ਛਾਯਾਯ ਅਪਞ੍ਞਾਯਮਾਨਾਯ ਦੂਰੇ ਠਿਤਾਨਂ ਦਿਵਾ ਪਦੀਪੋ ਵਿਯ ਸਯਮ੍ਪਿ ਨ ਪਞ੍ਞਾਯਤਿ.

ਕਤਿ ਨੇਸਂ ਵੀਥਿਯੋਤਿ ਏਤ੍ਥ ਪਨ ਅਜਵੀਥਿ, ਨਾਗਵੀਥਿ, ਗੋਵੀਥੀਤਿ ਤਿਸ੍ਸੋ ਵੀਥਿਯੋ ਹੋਨ੍ਤਿ. ਤਤ੍ਥ ਅਜਾਨਂ ਉਦਕਂ ਪਟਿਕੂਲਂ ਹੋਤਿ, ਹਤ੍ਥਿਨਾਗਾਨਂ ਮਨਾਪਂ. ਗੁਨ੍ਨਂ ਸੀਤੁਣ੍ਹਸਮਤਾਯ ਫਾਸੁ ਹੋਤਿ. ਤਸ੍ਮਾ ਯਂ ਕਾਲਂ ਚਨ੍ਦਿਮਸੂਰਿਯਾ ਅਜਵੀਥਿਂ ਆਰੁਹਨ੍ਤਿ, ਤਦਾ ਦੇਵੋ ਏਕਬਿਨ੍ਦੁਮ੍ਪਿ ਨ ਵਸ੍ਸਤਿ. ਯਦਾ ਨਾਗਵੀਥਿਂ ਆਰੋਹਨ੍ਤਿ, ਤਦਾ ਭਿਨ੍ਨਂ ਵਿਯ ਨਭਂ ਪਗ੍ਘਰਤਿ. ਯਦਾ ਗੋਵੀਥਿਂ ਆਰੋਹਨ੍ਤਿ, ਤਦਾ ਉਤੁਸਮਤਾ ਸਮ੍ਪਜ੍ਜਤਿ. ਚਨ੍ਦਿਮਸੂਰਿਯਾ ਛਮਾਸੇ ਸਿਨੇਰੁਤੋ ਬਹਿ ਨਿਕ੍ਖਮਨ੍ਤਿ, ਛਮਾਸੇ ਅਨ੍ਤੋ ਵਿਚਰਨ੍ਤਿ. ਤੇ ਹਿ ਆਸਾਲ਼੍ਹਮਾਸੇ ਸਿਨੇਰੁਸਮੀਪੇਨ ਵਿਚਰਨ੍ਤਿ. ਤਤੋ ਪਰੇ ਦ੍ਵੇ ਮਾਸੇ ਨਿਕ੍ਖਮਿਤ੍ਵਾ ਬਹਿ ਵਿਚਰਨ੍ਤਾ ਪਠਮਕਤ੍ਤਿਕਮਾਸੇ ਮਜ੍ਝੇਨ ਗਚ੍ਛਨ੍ਤਿ. ਤਤੋ ਚਕ੍ਕਵਾਲ਼ਾਭਿਮੁਖਾ ਗਨ੍ਤ੍ਵਾ ਤਯੋ ਮਾਸੇ ਚਕ੍ਕਵਾਲ਼ਸਮੀਪੇਨ ਚਰਿਤ੍ਵਾ ਪੁਨ ਨਿਕ੍ਖਮਿਤ੍ਵਾ ਚਿਤ੍ਰਮਾਸੇ ਮਜ੍ਝੇਨ ਗਨ੍ਤ੍ਵਾ ਤਤੋ ਦ੍ਵੇ ਮਾਸੇ ਸਿਨੇਰੁਭਿਮੁਖਾ ਪਕ੍ਖਨ੍ਦਿਤ੍ਵਾ ਪੁਨ ਆਸਾਲ਼੍ਹੇ ਸਿਨੇਰੁਸਮੀਪੇਨ ਚਰਨ੍ਤਿ.

ਕਿਤ੍ਤਕੇ ਠਾਨੇ ਆਲੋਕਂ ਕਰੋਨ੍ਤੀਤਿ? ਏਕਪ੍ਪਹਾਰੇਨ ਤੀਸੁ ਦੀਪੇਸੁ ਆਲੋਕਂ ਕਰੋਨ੍ਤਿ. ਕਥਂ? ਇਮਸ੍ਮਿਞ੍ਹਿ ਦੀਪੇ ਸੂਰਿਯੁਗ੍ਗਮਨਕਾਲੋ ਪੁਬ੍ਬਵਿਦੇਹੇ ਮਜ੍ਝਨ੍ਹਿਕੋ ਹੋਤਿ, ਉਤ੍ਤਰਕੁਰੂਸੁ ਅਤ੍ਥਙ੍ਗਮਨਕਾਲੋ, ਅਪਰਗੋਯਾਨੇ ਮਜ੍ਝਿਮਯਾਮੋ. ਪੁਬ੍ਬਵਿਦੇਹਮ੍ਹਿ ਉਗ੍ਗਮਨਕਾਲੋ ਉਤ੍ਤਰਕੁਰੂਸੁ ਮਜ੍ਝਨ੍ਹਿਕੋ, ਅਪਰਗੋਯਾਨੇ ਅਤ੍ਥਙ੍ਗਮਨਕਾਲੋ, ਇਧ ਮਜ੍ਝਿਮਯਾਮੋ. ਉਤ੍ਤਰਕੁਰੂਸੁ ਉਗ੍ਗਮਨਕਾਲੋ ਅਪਰਗੋਯਾਨੇ ਮਜ੍ਝਨ੍ਹਿਕੋ, ਇਧ ਅਤ੍ਥਙ੍ਗਮਨਕਾਲੋ, ਪੁਬ੍ਬਵਿਦੇਹੇ ਮਜ੍ਝਿਮਯਾਮੋ. ਅਪਰਗੋਯਾਨਦੀਪੇ ਉਗ੍ਗਮਨਕਾਲੋ ਇਧ ਮਜ੍ਝਨ੍ਹਿਕੋ, ਪੁਬ੍ਬਵਿਦੇਹੇ ਅਤ੍ਥਙ੍ਗਮਨਕਾਲੋ, ਉਤ੍ਤਰਕੁਰੂਸੁ ਮਜ੍ਝਿਮਯਾਮੋਤਿ.

ਨਕ੍ਖਤ੍ਤਾਨਿ ਤਾਰਕਰੂਪਾਨੀਤਿ ਕਤ੍ਤਿਕਾਦਿਨਕ੍ਖਤ੍ਤਾਨਿ ਚੇਵ ਸੇਸਤਾਰਕਰੂਪਾਨਿ ਚ ਚਨ੍ਦਿਮਸੂਰਿਯੇਹਿ ਸਦ੍ਧਿਂਯੇਵ ਪਾਤੁਰਹੇਸੁਂ. ਰਤ੍ਤਿਨ੍ਦਿਵਾਤਿ ਤਤੋ ਸੂਰਿਯਤ੍ਥਙ੍ਗਮਨਤੋ ਯਾਵ ਅਰੁਣੁਗ੍ਗਮਨਾ ਰਤ੍ਤਿ, ਅਰੁਣੁਗ੍ਗਮਨਤੋ ਯਾਵ ਸੂਰਿਯਤ੍ਥਙ੍ਗਮਨਾ ਦਿਵਾਤਿ ਏਵਂ ਰਤ੍ਤਿਨ੍ਦਿਵਾ ਪਞ੍ਞਾਯਿਂਸੁ. ਅਥ ਪਞ੍ਚਦਸ ਰਤ੍ਤਿਯੋ ਅਡ੍ਢਮਾਸੋ, ਦ੍ਵੇ ਅਡ੍ਢਮਾਸਾ ਮਾਸੋਤਿ ਏਵਂ ਮਾਸਡ੍ਢਮਾਸਾ ਪਞ੍ਞਾਯਿਂਸੁ. ਅਥ ਚਤ੍ਤਾਰੋ ਮਾਸਾ ਉਤੁ, ਤਯੋ ਉਤੂ ਸਂਵਚ੍ਛਰੋਤਿ ਏਵਂ ਉਤੁਸਂਵਚ੍ਛਰਾ ਪਞ੍ਞਾਯਿਂਸੁ.

੧੨੨. ਵਣ੍ਣਵੇਵਣ੍ਣਤਾ ਚਾਤਿ ਵਣ੍ਣਸ੍ਸ ਵਿਵਣ੍ਣਭਾਵੋ. ਤੇਸਂ ਵਣ੍ਣਾਤਿਮਾਨਪਚ੍ਚਯਾਤਿ ਤੇਸਂ ਵਣ੍ਣਂ ਆਰਬ੍ਭ ਉਪ੍ਪਨ੍ਨਅਤਿਮਾਨਪਚ੍ਚਯਾ. ਮਾਨਾਤਿਮਾਨਜਾਤਿਕਾਨਨ੍ਤਿ ਪੁਨਪ੍ਪੁਨਂ ਉਪ੍ਪਜ੍ਜਮਾਨਾਤਿਮਾਨਸਭਾਵਾਨਂ. ਰਸਾਯ ਪਥਵਿਯਾਤਿ ਸਮ੍ਪਨ੍ਨਰਸਤ੍ਤਾ ਰਸਾਤਿ ਲਦ੍ਧਨਾਮਾਯ ਪਥਵਿਯਾ. ਅਨੁਤ੍ਥੁਨਿਂਸੂਤਿ ਅਨੁਭਾਸਿਂਸੁ. ਅਹੋ ਰਸਨ੍ਤਿ ਅਹੋ ਅਮ੍ਹਾਕਂ ਮਧੁਰਰਸਂ ਅਨ੍ਤਰਹਿਤਂ. ਅਗ੍ਗਞ੍ਞਂ ਅਕ੍ਖਰਨ੍ਤਿ ਲੋਕੁਪ੍ਪਤ੍ਤਿਵਂਸਕਥਂ. ਅਨੁਸਰਨ੍ਤੀਤਿ ਅਨੁਗਚ੍ਛਨ੍ਤਿ.

ਭੂਮਿਪਪ੍ਪਟਕਪਾਤੁਭਾਵਾਦਿਵਣ੍ਣਨਾ

੧੨੩. ਏਵਮੇਵ ਪਾਤੁਰਹੋਸੀਤਿ ਏਦਿਸੋ ਹੁਤ੍ਵਾ ਉਟ੍ਠਹਿ, ਅਨ੍ਤੋਵਾਪਿਯਂ ਉਦਕੇ ਛਿਨ੍ਨੇ ਸੁਕ੍ਖਕਲਲਪਟਲਂ ਵਿਯ ਚ ਉਟ੍ਠਹਿ.

੧੨੪. ਪਦਾਲਤਾਤਿ ਏਕਾ ਮਧੁਰਰਸਾ ਭਦ੍ਦਾਲਤਾ. ਕਲਮ੍ਬੁਕਾਤਿ ਨਾਲ਼ਿਕਾ. ਅਹੁ ਵਤ ਨੋਤਿ ਮਧੁਰਰਸਾ ਵਤ ਨੋ ਪਦਾਲਤਾ ਅਹੋਸਿ. ਅਹਾਯਿ ਵਤ ਨੋਤਿ ਸਾ ਨੋ ਏਤਰਹਿ ਅਨ੍ਤਰਹਿਤਾਤਿ.

੧੨੫. ਅਕਟ੍ਠਪਾਕੋਤਿ ਅਕਟ੍ਠੇਯੇਵ ਭੂਮਿਭਾਗੇ ਉਪ੍ਪਨ੍ਨੋ. ਅਕਣੋਤਿ ਨਿਕ੍ਕੁਣ੍ਡਕੋ. ਅਥੁਸੋਤਿ ਨਿਤ੍ਥੁਸੋ. ਸੁਗਨ੍ਧੋਤਿ ਦਿਬ੍ਬਗਨ੍ਧਂ ਵਾਯਤਿ. ਤਣ੍ਡੁਲਪ੍ਫਲੋਤਿ ਸੁਪਰਿਸੁਦ੍ਧਂ ਪਣ੍ਡਰਂ ਤਣ੍ਡੁਲਮੇਵ ਫਲਤਿ. ਪਕ੍ਕਂ ਪਟਿਵਿਰੂਲ਼੍ਹਨ੍ਤਿ ਸਾਯਂ ਗਹਿਤਟ੍ਠਾਨਂ ਪਾਤੋ ਪਕ੍ਕਂ ਹੋਤਿ, ਪੁਨ ਵਿਰੂਲ਼੍ਹਂ ਪਟਿਪਾਕਤਿਕਮੇਵ ਗਹਿਤਟ੍ਠਾਨਂ ਨ ਪਞ੍ਞਾਯਤਿ. ਨਾਪਦਾਨਂ ਪਞ੍ਞਾਯਤੀਤਿ ਅਲਾਯਿਤਂ ਹੁਤ੍ਵਾ ਅਨੂਨਮੇਵ ਪਞ੍ਞਾਯਤਿ.

ਇਤ੍ਥਿਪੁਰਿਸਲਿਙ੍ਗਾਦਿਪਾਤੁਭਾਵਵਣ੍ਣਨਾ

੧੨੬. ਇਤ੍ਥਿਯਾ ਚਾਤਿ ਯਾ ਪੁਬ੍ਬੇ ਮਨੁਸ੍ਸਕਾਲੇ ਇਤ੍ਥੀ, ਤਸ੍ਸ ਇਤ੍ਥਿਲਿਙ੍ਗਂ ਪਾਤੁਭਵਤਿ, ਪੁਬ੍ਬੇ ਪੁਰਿਸਸ੍ਸ ਪੁਰਿਸਲਿਙ੍ਗਂ. ਮਾਤੁਗਾਮੋ ਨਾਮ ਹਿ ਪੁਰਿਸਤ੍ਤਭਾਵਂ ਲਭਨ੍ਤੋ ਅਨੁਪੁਬ੍ਬੇਨ ਪੁਰਿਸਤ੍ਤਪਚ੍ਚਯੇ ਧਮ੍ਮੇ ਪੂਰੇਤ੍ਵਾ ਲਭਤਿ. ਪੁਰਿਸੋ ਇਤ੍ਥਤ੍ਤਭਾਵਂ ਲਭਨ੍ਤੋ ਕਾਮੇਸੁਮਿਚ੍ਛਾਚਾਰਂ ਨਿਸ੍ਸਾਯ ਲਭਤਿ. ਤਦਾ ਪਨ ਪਕਤਿਯਾ ਮਾਤੁਗਾਮਸ੍ਸ ਇਤ੍ਥਿਲਿਙ੍ਗਂ, ਪੁਰਿਸਸ੍ਸ ਪੁਰਿਸਲਿਙ੍ਗਂ ਪਾਤੁਰਹੋਸਿ. ਉਪਨਿਜ੍ਝਾਯਤਨ੍ਤਿ ਉਪਨਿਜ੍ਝਾਯਨ੍ਤਾਨਂ ਓਲੋਕੇਨ੍ਤਾਨਂ. ਪਰਿਲ਼ਾਹੋਤਿ ਰਾਗਪਰਿਲ਼ਾਹੋ. ਸੇਟ੍ਠਿਨ੍ਤਿ ਛਾਰਿਕਂ. ਨਿਬ੍ਬੁਯ੍ਹਮਾਨਾਯਾਤਿ ਨਿਯ੍ਯਮਾਨਾਯ.

੧੨੭. ਅਧਮ੍ਮਸਮ੍ਮਤਨ੍ਤਿ ਤਂ ਪਂਸੁਖਿਪਨਾਦਿ ਅਧਮ੍ਮੋਤਿ ਸਮ੍ਮਤਂ. ਤਦੇਤਰਹਿ ਧਮ੍ਮਸਮ੍ਮਤਨ੍ਤਿ ਤਂ ਇਦਾਨਿ ਧਮ੍ਮੋਤਿ ਸਮ੍ਮਤਂ, ਧਮ੍ਮੋਤਿ ਤਂ ਗਹੇਤ੍ਵਾ ਵਿਚਰਨ੍ਤਿ. ਤਥਾ ਹਿ ਏਕਚ੍ਚੇਸੁ ਜਾਨਪਦੇਸੁ ਕਲਹਂ ਕੁਰੁਮਾਨਾ ਇਤ੍ਥਿਯੋ ‘‘ਤ੍ਵਂ ਕਸ੍ਮਾ ਕਥੇਸਿ? ਯਾ ਗੋਮਯਪਿਣ੍ਡਮਤ੍ਤਮ੍ਪਿ ਨਾਲਤ੍ਥਾ’’ਤਿ ਵਦਨ੍ਤਿ. ਪਾਤਬ੍ਯਤਨ੍ਤਿ ਸੇਵਿਤਬ੍ਬਤਂ. ਸਨ੍ਨਿਧਿਕਾਰਕਨ੍ਤਿ ਸਨ੍ਨਿਧਿਂ ਕਤ੍ਵਾ. ਅਪਦਾਨਂ ਪਞ੍ਞਾਯਿਤ੍ਥਾਤਿ ਛਿਨ੍ਨਟ੍ਠਾਨਂ ਊਨਮੇਵ ਹੁਤ੍ਵਾ ਪਞ੍ਞਾਯਿਤ੍ਥ. ਸਣ੍ਡਸਣ੍ਡਾਤਿ ਏਕੇਕਸ੍ਮਿਂ ਠਾਨੇ ਕਲਾਪਬਨ੍ਧਾ ਵਿਯ ਗੁਮ੍ਬਗੁਮ੍ਬਾ ਹੁਤ੍ਵਾ.

੧੨੮. ਮਰਿਯਾਦਂ ਠਪੇਯ੍ਯਾਮਾਤਿ ਸੀਮਂ ਠਪੇਯ੍ਯਾਮ. ਯਤ੍ਰ ਹਿ ਨਾਮਾਤਿ ਯੋ ਹਿ ਨਾਮ. ਪਾਣਿਨਾ ਪਹਰਿਂਸੂਤਿ ਤਯੋ ਵਾਰੇ ਵਚਨਂ ਅਗਣ੍ਹਨ੍ਤਂ ਪਾਣਿਨਾ ਪਹਰਿਂਸੁ. ਤਦਗ੍ਗੇ ਖੋਤਿ ਤਂ ਅਗ੍ਗਂ ਕਤ੍ਵਾ.

ਮਹਾਸਮ੍ਮਤਰਾਜਵਣ੍ਣਨਾ

੧੩੦. ਖੀਯਿਤਬ੍ਬਂ ਖੀਯੇਯ੍ਯਾਤਿ ਪਕਾਸੇਤਬ੍ਬਂ ਪਕਾਸੇਯ੍ਯ ਖਿਪਿਤਬ੍ਬਂ ਖਿਪੇਯ੍ਯ, ਹਾਰੇਤਬ੍ਬਂ ਹਾਰੇਯ੍ਯਾਤਿ ਵੁਤ੍ਤਂ ਹੋਤਿ. ਯੋ ਨੇਸਂ ਸਤ੍ਤੋਤਿ ਯੋ ਤੇਸਂ ਸਤ੍ਤੋ. ਕੋ ਪਨ ਸੋਤਿ? ਅਮ੍ਹਾਕਂ ਬੋਧਿਸਤ੍ਤੋ. ਸਾਲੀਨਂ ਭਾਗਂ ਅਨੁਪਦਸ੍ਸਾਮਾਤਿ ਮਯਂ ਏਕੇਕਸ੍ਸ ਖੇਤ੍ਤਤੋ ਅਮ੍ਬਣਮ੍ਬਣਂ ਆਹਰਿਤ੍ਵਾ ਤੁਯ੍ਹਂ ਸਾਲਿਭਾਗਂ ਦਸ੍ਸਾਮ, ਤਯਾ ਕਿਞ੍ਚਿ ਕਮ੍ਮਂ ਨ ਕਾਤਬ੍ਬਂ, ਤ੍ਵਂ ਅਮ੍ਹਾਕਂ ਜੇਟ੍ਠਕਟ੍ਠਾਨੇ ਤਿਟ੍ਠਾਤਿ.

੧੩੧. ਅਕ੍ਖਰਂ ਉਪਨਿਬ੍ਬਤ੍ਤਨ੍ਤਿ ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ ਉਪ੍ਪਨ੍ਨੋ. ਖਤ੍ਤਿਯੋ ਖਤ੍ਤਿਯੋਤ੍ਵੇਵ ਦੁਤਿਯਂ ਅਕ੍ਖਰਨ੍ਤਿ ਨ ਕੇਵਲਂ ਅਕ੍ਖਰਮੇਵ, ਤੇ ਪਨਸ੍ਸ ਖੇਤ੍ਤਸਾਮਿਨੋ ਤੀਹਿ ਸਙ੍ਖੇਹਿ ਅਭਿਸੇਕਮ੍ਪਿ ਅਕਂਸੁ. ਰਞ੍ਜੇਤੀਤਿ ਸੁਖੇਤਿ ਪਿਨੇਤਿ. ਅਗ੍ਗਞ੍ਞੇਨਾਤਿ ਅਗ੍ਗਨ੍ਤਿ ਞਾਤੇਨ, ਅਗ੍ਗੇ ਵਾ ਞਾਤੇਨ ਲੋਕੁਪ੍ਪਤ੍ਤਿਸਮਯੇ ਉਪ੍ਪਨ੍ਨੇਨ ਅਭਿਨਿਬ੍ਬਤ੍ਤਿ ਅਹੋਸੀਤਿ.

ਬ੍ਰਾਹ੍ਮਣਮਣ੍ਡਲਾਦਿਵਣ੍ਣਨਾ

੧੩੨. ਵੀਤਙ੍ਗਾਰਾ ਵੀਤਧੂਮਾਤਿ ਪਚਿਤ੍ਵਾ ਖਾਦਿਤਬ੍ਬਾਭਾਵਤੋ ਵਿਗਤਧੂਮਙ੍ਗਾਰਾ. ਪਨ੍ਨਮੁਸਲਾਤਿ ਕੋਟ੍ਟੇਤ੍ਵਾ ਪਚਿਤਬ੍ਬਾਭਾਵਤੋ ਪਤਿਤਮੁਸਲਾ. ਘਾਸਮੇਸਮਾਨਾਤਿ ਭਿਕ੍ਖਾਚਰਿਯਵਸੇਨ ਯਾਗੁਭਤ੍ਤਂ ਪਰਿਯੇਸਨ੍ਤਾ. ਤਮੇਨਂ ਮਨੁਸ੍ਸਾ ਦਿਸ੍ਵਾਤਿ ਤੇ ਏਤੇ ਮਨੁਸ੍ਸਾ ਪਸ੍ਸਿਤ੍ਵਾ. ਅਨਭਿਸਮ੍ਭੁਣਮਾਨਾਤਿ ਅਸਹਮਾਨਾ ਅਸਕ੍ਕੋਨ੍ਤਾ. ਗਨ੍ਥੇ ਕਰੋਨ੍ਤਾਤਿ ਤਯੋ ਵੇਦੇ ਅਭਿਸਙ੍ਖਰੋਨ੍ਤਾ ਚੇਵ ਵਾਚੇਨ੍ਤਾ ਚ. ਅਚ੍ਛਨ੍ਤੀਤਿ ਵਸਨ੍ਤਿ, ‘‘ਅਚ੍ਛੇਨ੍ਤੀ’’ਤਿਪਿ ਪਾਠੋ. ਏਸੇਵਤ੍ਥੋ. ਹੀਨਸਮ੍ਮਤਨ੍ਤਿ ‘‘ਮਨ੍ਤੇ ਧਾਰੇਨ੍ਤਿ ਮਨ੍ਤੇ ਵਾਚੇਨ੍ਤੀ’’ਤਿ ਖੋ, ਵਾਸੇਟ੍ਠ, ਇਦਂ ਤੇਨ ਸਮਯੇਨ ਹੀਨਸਮ੍ਮਤਂ. ਤਦੇਤਰਹਿ ਸੇਟ੍ਠਸਮ੍ਮਤਨ੍ਤਿ ਤਂ ਇਦਾਨਿ ‘‘ਏਤ੍ਤਕੇ ਮਨ੍ਤੇ ਧਾਰੇਨ੍ਤਿ ਏਤ੍ਤਕੇ ਮਨ੍ਤੇ ਵਾਚੇਨ੍ਤੀ’’ਤਿ ਸੇਟ੍ਠਸਮ੍ਮਤਂ ਜਾਤਂ. ਬ੍ਰਾਹ੍ਮਣਮਣ੍ਡਲਸ੍ਸਾਤਿ ਬ੍ਰਾਹ੍ਮਣਗਣਸ੍ਸ.

੧੩੩. ਮੇਥੁਨਂ ਧਮ੍ਮਂ ਸਮਾਦਾਯਾਤਿ ਮੇਥੁਨਧਮ੍ਮਂ ਸਮਾਦਿਯਿਤ੍ਵਾ. ਵਿਸੁਕਮ੍ਮਨ੍ਤੇ ਪਯੋਜੇਸੁਨ੍ਤਿ ਗੋਰਕ੍ਖ ਵਾਣਿਜਕਮ੍ਮਾਦਿਕੇ ਵਿਸ੍ਸੁਤੇ ਉਗ੍ਗਤੇ ਕਮ੍ਮਨ੍ਤੇ ਪਯੋਜੇਸੁਂ.

੧੩੪. ਸੁਦ੍ਦਾ ਸੁਦ੍ਦਾਤਿ ਤੇਨ ਲੁਦ੍ਦਾਚਾਰਕਮ੍ਮਖੁਦ੍ਦਾਚਾਰਕਮ੍ਮੁਨਾ ਸੁਦ੍ਦਂ ਸੁਦ੍ਦਂ ਲਹੁਂ ਲਹੁਂ ਕੁਚ੍ਛਿਤਂ ਗਚ੍ਛਨ੍ਤਿ, ਵਿਨਸ੍ਸਨ੍ਤੀਤਿ ਅਤ੍ਥੋ. ਅਹੁ ਖੋਤਿ ਹੋਤਿ ਖੋ.

੧੩੫. ਸਕਂ ਧਮ੍ਮਂ ਗਰਹਮਾਨੋਤਿ ਨ ਸੇਤਚ੍ਛਤ੍ਤਂ ਉਸ੍ਸਾਪਨਮਤ੍ਤੇਨ ਸੁਜ੍ਝਿਤੁਂ ਸਕ੍ਕਾਤਿ ਏਵਂ ਅਤ੍ਤਨੋ ਖਤ੍ਤਿਯਧਮ੍ਮਂ ਨਿਨ੍ਦਮਾਨੋ. ਏਸ ਨਯੋ ਸਬ੍ਬਤ੍ਥ. ‘‘ਇਮੇਹਿ ਖੋ, ਵਾਸੇਟ੍ਠ, ਚਤੂਹਿ ਮਣ੍ਡਲੇਹੀ’’ਤਿ ਇਮਿਨਾ ਇਮਂ ਦਸ੍ਸੇਤਿ ‘‘ਸਮਣਮਣ੍ਡਲਂ ਨਾਮ ਵਿਸੁਂ ਨਤ੍ਥਿ, ਯਸ੍ਮਾ ਪਨ ਨ ਸਕ੍ਕਾ ਜਾਤਿਯਾ ਸੁਜ੍ਝਿਤੁਂ, ਅਤ੍ਤਨੋ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਵਿਸੁਦ੍ਧਿ ਹੋਤਿ. ਤਸ੍ਮਾ ਇਮੇਹਿ ਚਤੂਹਿ ਮਣ੍ਡਲੇਹਿ ਸਮਣਮਣ੍ਡਲਸ੍ਸ ਅਭਿਨਿਬ੍ਬਤ੍ਤਿ ਹੋਤਿ. ਇਮਾਨਿ ਮਣ੍ਡਲਾਨਿ ਸਮਣਮਣ੍ਡਲਂ ਅਨੁਵਤ੍ਤਨ੍ਤਿ, ਅਨੁਵਤ੍ਤਨ੍ਤਾਨਿ ਚ ਧਮ੍ਮੇਨੇਵ ਅਨੁਵਤ੍ਤਨ੍ਤਿ, ਨੋ ਅਧਮ੍ਮੇਨ. ਸਮਣਮਣ੍ਡਲਞ੍ਹਿ ਆਗਮ੍ਮ ਸਮ੍ਮਾਪਟਿਪਤ੍ਤਿਂ ਪੂਰੇਤ੍ਵਾ ਸੁਦ੍ਧਿਂ ਪਾਪੁਣਨ੍ਤੀ’’ਤਿ.

ਦੁਚ੍ਚਰਿਤਾਦਿਕਥਾਵਣ੍ਣਨਾ

੧੩੬. ਇਦਾਨਿ ਯਥਾਜਾਤਿਯਾ ਨ ਸਕ੍ਕਾ ਸੁਜ੍ਝਿਤੁਂ, ਸਮ੍ਮਾਪਟਿਪਤ੍ਤਿਯਾਵ ਸੁਜ੍ਝਨ੍ਤਿ, ਤਮਤ੍ਥਂ ਪਾਕਟਂ ਕਰੋਨ੍ਤੋ ਖਤ੍ਤਿਯੋਪਿ ਖੋ, ਵਾਸੇਟ੍ਠਾਤਿ ਦੇਸਨਂ ਆਰਭਿ. ਤਤ੍ਥ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਹੇਤੂਤਿ ਮਿਚ੍ਛਾਦਿਟ੍ਠਿਵਸੇਨ ਸਮਾਦਿਨ੍ਨਕਮ੍ਮਹੇਤੁ, ਮਿਚ੍ਛਾਦਿਟ੍ਠਿਕਮ੍ਮਸ੍ਸ ਵਾ ਸਮਾਦਾਨਹੇਤੁ.

੧੩੭. ਦ੍ਵਯਕਾਰੀਤਿ ਕਾਲੇਨ ਕੁਸਲਂ ਕਰੋਤਿ, ਕਾਲੇਨ ਅਕੁਸਲਨ੍ਤਿ ਏਵਂ ਉਭਯਕਾਰੀ. ਸੁਖਦੁਕ੍ਖਪ੍ਪਟਿਸਂਵੇਦੀ ਹੋਤੀਤਿ ਏਕਕ੍ਖਣੇ ਉਭਯਵਿਪਾਕਦਾਨਟ੍ਠਾਨਂ ਨਾਮ ਨਤ੍ਥਿ. ਯੇਨ ਪਨ ਅਕੁਸਲਂ ਬਹੁਂ ਕਤਂ ਹੋਤਿ, ਕੁਸਲਂ ਮਨ੍ਦਂ, ਸੋ ਤਂ ਕੁਸਲਂ ਨਿਸ੍ਸਾਯ ਖਤ੍ਤਿਯਕੁਲੇ ਵਾ ਬ੍ਰਾਹ੍ਮਣਕੁਲੇ ਵਾ ਨਿਬ੍ਬਤ੍ਤਤਿ. ਅਥ ਨਂ ਅਕੁਸਲਕਮ੍ਮਂ ਕਾਣਮ੍ਪਿ ਕਰੋਤਿ ਖੁਜ੍ਜਮ੍ਪਿ ਪੀਠਸਪ੍ਪਿਮ੍ਪਿ. ਸੋ ਰਜ੍ਜਸ੍ਸ ਵਾ ਅਨਰਹੋ ਹੋਤਿ, ਅਭਿਸਿਤ੍ਤਕਾਲੇ ਵਾ ਏਵਂਭੂਤੋ ਭੋਗੇ ਪਰਿਭੁਞ੍ਜਿਤੁਂ ਨ ਸਕ੍ਕੋਤਿ. ਅਪਰਸ੍ਸ ਮਰਣਕਾਲੇ ਦ੍ਵੇ ਬਲਵਮਲ੍ਲਾ ਵਿਯ ਤੇ ਦ੍ਵੇਪਿ ਕੁਸਲਾਕੁਸਲਕਮ੍ਮਾਨਿ ਉਪਟ੍ਠਹਨ੍ਤਿ. ਤੇਸੁ ਅਕੁਸਲਂ ਬਲਵਤਰਂ ਹੋਤਿ, ਤਂ ਕੁਸਲਂ ਪਟਿਬਾਹਿਤ੍ਵਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪੇਤਿ. ਕੁਸਲਕਮ੍ਮਮ੍ਪਿ ਪਵਤ੍ਤਿਵੇਦਨੀਯਂ ਹੋਤਿ. ਤਮੇਨਂ ਮਙ੍ਗਲਹਤ੍ਥਿਂ ਵਾ ਕਰੋਨ੍ਤਿ ਮਙ੍ਗਲਅਸ੍ਸਂ ਵਾ ਮਙ੍ਗਲਉਸਭਂ ਵਾ. ਸੋ ਸਮ੍ਪਤ੍ਤਿਂ ਅਨੁਭਵਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਸੁਖਦੁਕ੍ਖਪ੍ਪਟਿਸਂਵੇਦੀ ਹੋਤੀ’’ਤਿ.

ਬੋਧਿਪਕ੍ਖਿਯਭਾਵਨਾਵਣ੍ਣਨਾ

੧੩੮. ਸਤ੍ਤਨ੍ਨਂ ਬੋਧਿਪਕ੍ਖਿਯਾਨਨ੍ਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਆਦਿਕੋਟ੍ਠਾਸਵਸੇਨ ਸਤ੍ਤਨ੍ਨਂ, ਪਟਿਪਾਟਿਯਾ ਪਨ ਸਤ੍ਤਤਿਂਸਾਯ ਬੋਧਿਪਕ੍ਖਿਯਾਨਂ ਧਮ੍ਮਾਨਂ. ਭਾਵਨਮਨ੍ਵਾਯਾਤਿ ਭਾਵਨਂ ਅਨੁਗਨ੍ਤ੍ਵਾ, ਪਟਿਪਜ੍ਜਿਤ੍ਵਾਤਿ ਅਤ੍ਥੋ. ਪਰਿਨਿਬ੍ਬਾਯਤੀਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ. ਇਤਿ ਭਗਵਾ ਚਤ੍ਤਾਰੋ ਵਣ੍ਣੇ ਦਸ੍ਸੇਤ੍ਵਾ ਵਿਨਿਵਤ੍ਤੇਤ੍ਵਾ ਪਟਿਵਿਦ੍ਧਚਤੁਸਚ੍ਚਂ ਖੀਣਾਸਵਮੇਵ ਦੇਵਮਨੁਸ੍ਸੇਸੁ ਸੇਟ੍ਠਂ ਕਤ੍ਵਾ ਦਸ੍ਸੇਸਿ.

੧੪੦. ਇਦਾਨਿ ਤਮੇਵਤ੍ਥਂ ਲੋਕਸਮ੍ਮਤਸ੍ਸ ਬ੍ਰਹ੍ਮੁਨੋਪਿ ਵਚਨਦਸ੍ਸਨਾਨੁਸਾਰੇਨ ਦਲ਼੍ਹਂ ਕਤ੍ਵਾ ਦਸ੍ਸੇਨ੍ਤੋ ਇਮੇਸਞ੍ਹਿ ਵਾਸੇਟ੍ਠ ਚਤੁਨ੍ਨਂ ਵਣ੍ਣਾਨਨ੍ਤਿਆਦਿਮਾਹ. ‘‘ਬ੍ਰਹ੍ਮੁਨਾਪੇਸਾ’’ਤਿਆਦਿ ਅਮ੍ਬਟ੍ਠਸੁਤ੍ਤੇ ਵਿਤ੍ਥਾਰਿਤਂ. ਇਤਿ ਭਗਵਾ ਏਤ੍ਤਕੇਨ ਇਮਿਨਾ ਕਥਾਮਗ੍ਗੇਨ ਸੇਟ੍ਠਚ੍ਛੇਦਕਵਾਦਮੇਵ ਦਸ੍ਸੇਤ੍ਵਾ ਸੁਤ੍ਤਨ੍ਤਂ ਵਿਨਿਵਤ੍ਤੇਤ੍ਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ. ਅਤ੍ਤਮਨਾ ਵਾਸੇਟ੍ਠਭਾਰਦ੍ਵਾਜਾਤਿ ਵਾਸੇਟ੍ਠਭਾਰਦ੍ਵਾਜ ਸਾਮਣੇਰਾਪਿ ਹਿ ਸਕਮਨਾ ਤੁਟ੍ਠਮਨਾ ‘‘ਸਾਧੁ, ਸਾਧੂ’’ਤਿ ਭਗਵਤੋ ਭਾਸਿਤਂ ਅਭਿਨਨ੍ਦਿਂਸੁ. ਇਦਮੇਵ ਸੁਤ੍ਤਨ੍ਤਂ ਆਵਜ੍ਜਨ੍ਤਾ ਅਨੁਮਜ੍ਜਨ੍ਤਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਅਗ੍ਗਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਮ੍ਪਸਾਦਨੀਯਸੁਤ੍ਤਵਣ੍ਣਨਾ

ਸਾਰਿਪੁਤ੍ਤਸੀਹਨਾਦਵਣ੍ਣਨਾ

੧੪੧. ਏਵਂ ਮੇ ਸੁਤਨ੍ਤਿ ਸਮ੍ਪਸਾਦਨੀਯਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਨਾਲ਼ਨ੍ਦਾਯਨ੍ਤਿ ਨਾਲ਼ਨ੍ਦਾਤਿ ਏਵਂਨਾਮਕੇ ਨਗਰੇ, ਤਂ ਨਗਰਂ ਗੋਚਰਗਾਮਂ ਕਤ੍ਵਾ. ਪਾਵਾਰਿਕਮ੍ਬਵਨੇਤਿ ਦੁਸ੍ਸਪਾਵਾਰਿਕਸੇਟ੍ਠਿਨੋ ਅਮ੍ਬਵਨੇ. ਤਂ ਕਿਰ ਤਸ੍ਸ ਉਯ੍ਯਾਨਂ ਅਹੋਸਿ. ਸੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਭਗਵਤਿ ਪਸਨ੍ਨੋ ਤਸ੍ਮਿਂ ਉਯ੍ਯਾਨੇ ਕੁਟਿਲੇਣਮਣ੍ਡਪਾਦਿਪਟਿਮਣ੍ਡਿਤਂ ਭਗਵਤੋ ਵਿਹਾਰਂ ਕਤ੍ਵਾ ਨਿਯ੍ਯਾਤੇਸਿ. ਸੋ ਵਿਹਾਰੋ ਜੀਵਕਮ੍ਬਵਨਂ ਵਿਯ ‘‘ਪਾਵਾਰਿਕਮ੍ਬਵਨ’’ਨ੍ਤ੍ਵੇਵ ਸਙ੍ਖ੍ਯਂ ਗਤੋ, ਤਸ੍ਮਿਂ ਪਾਵਾਰਿਕਮ੍ਬਵਨੇ ਵਿਹਰਤੀਤਿ ਅਤ੍ਥੋ. ਭਗਵਨ੍ਤਂ ਏਤਦਵੋਚ – ‘‘ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ. ਕਸ੍ਮਾ ਏਵਂ ਅਵੋਚ? ਅਤ੍ਤਨੋ ਉਪ੍ਪਨ੍ਨਸੋਮਨਸ੍ਸਪਵੇਦਨਤ੍ਥਂ.

ਤਤ੍ਰਾਯਮਨੁਪੁਬ੍ਬਿਕਥਾ – ਥੇਰੋ ਕਿਰ ਤਂਦਿਵਸਂ ਕਾਲਸ੍ਸੇਵ ਸਰੀਰਪ੍ਪਟਿਜਗ੍ਗਨਂ ਕਤ੍ਵਾ ਸੁਨਿਵਤ੍ਥਨਿਵਾਸਨੋ ਪਤ੍ਤਚੀਵਰਮਾਦਾਯ ਪਾਸਾਦਿਕੇਹਿ ਅਭਿਕ੍ਕਨ੍ਤਾਦੀਹਿ ਦੇਵਮਨੁਸ੍ਸਾਨਂ ਪਸਾਦਂ ਆਵਹਨ੍ਤੋ ਨਾਲ਼ਨ੍ਦਵਾਸੀਨਂ ਹਿਤਸੁਖਮਨੁਬ੍ਰੂਹਯਨ੍ਤੋ ਪਿਣ੍ਡਾਯ ਪਵਿਸਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਵਤ੍ਤਂ ਦਸ੍ਸੇਤ੍ਵਾ ਸਤ੍ਥਰਿ ਗਨ੍ਧਕੁਟਿਂ ਪਵਿਟ੍ਠੇ ਸਤ੍ਥਾਰਂ ਵਨ੍ਦਿਤ੍ਵਾ ਅਤ੍ਤਨੋ ਦਿਵਾਟ੍ਠਾਨਂ ਅਗਮਾਸਿ. ਤਤ੍ਥ ਸਦ੍ਧਿਵਿਹਾਰਿਕਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਟਿਕ੍ਕਨ੍ਤੇਸੁ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚਮ੍ਮਕ੍ਖਣ੍ਡਂ ਪਞ੍ਞਪੇਤ੍ਵਾ ਉਦਕਤੁਮ੍ਬਤੋ ਉਦਕੇਨ ਹਤ੍ਥਪਾਦੇ ਸੀਤਲੇ ਕਤ੍ਵਾ ਤਿਸਨ੍ਧਿਪਲ੍ਲਙ੍ਕਂ ਆਭੁਜਿਤ੍ਵਾ ਕਾਲਪਰਿਚ੍ਛੇਦਂ ਕਤ੍ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਿ.

ਸੋ ਯਥਾਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਾਯ ਅਤ੍ਤਨੋ ਗੁਣੇ ਅਨੁਸ੍ਸਰਿਤੁਮਾਰਦ੍ਧੋ. ਅਥਸ੍ਸ ਗੁਣੇ ਅਨੁਸ੍ਸਰਤੋ ਸੀਲਂ ਆਪਾਥਮਾਗਤਂ. ਤਤੋ ਪਟਿਪਾਟਿਯਾਵ ਸਮਾਧਿ ਪਞ੍ਞਾ ਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਂ ਪਠਮਂ ਝਾਨਂ ਦੁਤਿਯਂ ਝਾਨਂ ਤਤਿਯਂ ਝਾਨਂ ਚਤੁਤ੍ਥਂ ਝਾਨਂ ਆਕਾਸਾਨਞ੍ਚਾਯਤਨਸਮਾਪਤ੍ਤਿ ਵਿਞ੍ਞਾਨਞ੍ਚਾਯਤਨਸਮਾਪਤ੍ਤਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿ ਵਿਪਸ੍ਸਨਾਞਾਣਂ ਮਨੋਮਯਿਦ੍ਧਿਞਾਣਂ ਇਦ੍ਧਿਵਿਧਞਾਣਂ ਦਿਬ੍ਬਸੋਤਞਾਣਂ ਚੇਤੋਪਰਿਯਞਾਣਂ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਦਿਬ੍ਬਚਕ੍ਖੁਞਾਣਂ…ਪੇ… ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਅਰਹਤ੍ਤਮਗ੍ਗੋ ਅਰਹਤ੍ਤਫਲਂ ਅਤ੍ਥਪਟਿਸਮ੍ਭਿਦਾ ਧਮ੍ਮਪਟਿਸਮ੍ਭਿਦਾ ਨਿਰੁਤ੍ਤਿਪਟਿਸਮ੍ਭਿਦਾ ਪਟਿਭਾਨਪਟਿਸਮ੍ਭਿਦਾ ਸਾਵਕਪਾਰਮੀਞਾਣਂ. ਇਤੋ ਪਟ੍ਠਾਯ ਕਪ੍ਪਸਤਸਹਸ੍ਸਾਧਿਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਉਪਰਿ ਅਨੋਮਦਸ੍ਸੀਬੁਦ੍ਧਸ੍ਸ ਪਾਦਮੂਲੇ ਕਤਂ ਅਭਿਨੀਹਾਰਂ ਆਦਿਂ ਕਤ੍ਵਾ ਅਤ੍ਤਨੋ ਗੁਣੇ ਅਨੁਸ੍ਸਰਤੋ ਯਾਵ ਨਿਸਿਨ੍ਨਪਲ੍ਲਙ੍ਕਾ ਗੁਣਾ ਉਪਟ੍ਠਹਿਂਸੁ.

ਏਵਂ ਥੇਰੋ ਅਤ੍ਤਨੋ ਗੁਣੇ ਅਨੁਸ੍ਸਰਮਾਨੋ ਗੁਣਾਨਂ ਪਮਾਣਂ ਵਾ ਪਰਿਚ੍ਛੇਦਂ ਵਾ ਦਟ੍ਠੁਂ ਨਾਸਕ੍ਖਿ. ਸੋ ਚਿਨ੍ਤੇਸਿ – ‘‘ਮਯ੍ਹਂ ਤਾਵ ਪਦੇਸਞਾਣੇ ਠਿਤਸ੍ਸ ਸਾਵਕਸ੍ਸ ਗੁਣਾਨਂ ਪਮਾਣਂ ਵਾ ਪਰਿਚ੍ਛੇਦੋ ਵਾ ਨਤ੍ਥਿ. ਅਹਂ ਪਨ ਯਂ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤੋ, ਕੀਦਿਸਾ ਨੁ ਖੋ ਤਸ੍ਸ ਗੁਣਾ’’ਤਿ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਂ ਆਰਦ੍ਧੋ. ਸੋ ਭਗਵਤੋ ਸੀਲਂ ਨਿਸ੍ਸਾਯ, ਸਮਾਧਿਂ ਪਞ੍ਞਂ ਵਿਮੁਤ੍ਤਿਂ ਵਿਮੁਤ੍ਤਿਞਾਣਦਸ੍ਸਨਂ ਨਿਸ੍ਸਾਯ, ਚਤ੍ਤਾਰੋ ਸਤਿਪਟ੍ਠਾਨੇ ਨਿਸ੍ਸਾਯ, ਚਤ੍ਤਾਰੋ ਸਮ੍ਮਪ੍ਪਧਾਨੇ ਚਤ੍ਤਾਰੋ ਇਦ੍ਧਿਪਾਦੇ ਚਤ੍ਤਾਰੋ ਮਗ੍ਗੇ ਚਤ੍ਤਾਰਿ ਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾ ਚਤੁਯੋਨਿਪਰਿਚ੍ਛੇਦਕਞਾਣਂ ਚਤ੍ਤਾਰੋ ਅਰਿਯਵਂਸੇ ਨਿਸ੍ਸਾਯ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਮਾਰਦ੍ਧੋ.

ਤਥਾ ਪਞ੍ਚ ਪਧਾਨਿਯਙ੍ਗਾਨਿ, ਪਞ੍ਚਙ੍ਗਿਕਂਸਮ੍ਮਾਸਮਾਧਿਂ, ਪਞ੍ਚਿਨ੍ਦ੍ਰਿਯਾਨਿ, ਪਞ੍ਚ ਬਲਾਨਿ, ਪਞ੍ਚ ਨਿਸ੍ਸਰਣਿਯਾ ਧਾਤੁਯੋ, ਪਞ੍ਚ ਵਿਮੁਤ੍ਤਾਯਤਨਾਨਿ, ਪਞ੍ਚ ਵਿਮੁਤ੍ਤਿਪਰਿਪਾਚਨਿਯਾ ਪਞ੍ਞਾ, ਛ ਸਾਰਣੀਯੇ ਧਮ੍ਮੇ, ਛ ਅਨੁਸ੍ਸਤਿਟ੍ਠਾਨਾਨਿ, ਛ ਗਾਰਵੇ, ਛ ਨਿਸ੍ਸਰਣਿਯਾ ਧਾਤੁਯੋ, ਛ ਸਤਤਵਿਹਾਰੇ, ਛ ਅਨੁਤ੍ਤਰਿਯਾਨਿ, ਛ ਨਿਬ੍ਬੇਧਭਾਗਿਯਾ ਪਞ੍ਞਾ, ਛ ਅਭਿਞ੍ਞਾ, ਛ ਅਸਾਧਾਰਣਞਾਣਾਨਿ, ਸਤ੍ਤ ਅਪਰਿਹਾਨਿਯੇ ਧਮ੍ਮੇ, ਸਤ੍ਤ ਅਰਿਯਧਨਾਨਿ, ਸਤ੍ਤ ਬੋਜ੍ਝਙ੍ਗੇ, ਸਤ੍ਤ ਸਪ੍ਪੁਰਿਸਧਮ੍ਮੇ, ਸਤ੍ਤ ਨਿਜ੍ਜਰਵਤ੍ਥੂਨਿ, ਸਤ੍ਤ ਪਞ੍ਞਾ, ਸਤ੍ਤ ਦਕ੍ਖਿਣੇਯ੍ਯਪੁਗ੍ਗਲੇ, ਸਤ੍ਤ ਖੀਣਾਸਵਬਲਾਨਿ, ਅਟ੍ਠ ਪਞ੍ਞਾਪਟਿਲਾਭਹੇਤੂ, ਅਟ੍ਠ ਸਮ੍ਮਤ੍ਤਾਨਿ, ਅਟ੍ਠ ਲੋਕਧਮ੍ਮਾਤਿਕ੍ਕਮੇ, ਅਟ੍ਠ ਆਰਮ੍ਭਵਤ੍ਥੂਨਿ, ਅਟ੍ਠ ਅਕ੍ਖਣਦੇਸਨਾ, ਅਟ੍ਠ ਮਹਾਪੁਰਿਸਵਿਤਕ੍ਕੇ, ਅਟ੍ਠ ਅਭਿਭਾਯਤਨਾਨਿ, ਅਟ੍ਠ ਵਿਮੋਕ੍ਖੇ, ਨਵ ਯੋਨਿਸੋਮਨਸਿਕਾਰਮੂਲਕੇ ਧਮ੍ਮੇ, ਨਵ ਪਾਰਿਸੁਦ੍ਧਿਪਧਾਨਿਯਙ੍ਗਾਨਿ, ਨਵ ਸਤ੍ਤਾਵਾਸਦੇਸਨਾ, ਨਵ ਆਘਾਤਪ੍ਪਟਿਵਿਨਯੇ, ਨਵ ਪਞ੍ਞਾ, ਨਵ ਨਾਨਤ੍ਤਾਨਿ, ਨਵ ਅਨੁਪੁਬ੍ਬਵਿਹਾਰੇ, ਦਸ ਨਾਥਕਰਣੇ ਧਮ੍ਮੇ, ਦਸ ਕਸਿਣਾਯਤਨਾਨਿ, ਦਸ ਕੁਸਲਕਮ੍ਮਪਥੇ, ਦਸ ਤਥਾਗਤਬਲਾਨਿ, ਦਸ ਸਮ੍ਮਤ੍ਤਾਨਿ, ਦਸ ਅਰਿਯਵਾਸੇ, ਦਸ ਅਸੇਕ੍ਖਧਮ੍ਮੇ, ਏਕਾਦਸ ਮੇਤ੍ਤਾਨਿਸਂਸੇ, ਦ੍ਵਾਦਸ ਧਮ੍ਮਚਕ੍ਕਾਕਾਰੇ, ਤੇਰਸ ਧੁਤਙ੍ਗਗੁਣੇ, ਚੁਦ੍ਦਸ ਬੁਦ੍ਧਞਾਣਾਨਿ, ਪਞ੍ਚਦਸ ਵਿਮੁਤ੍ਤਿਪਰਿਪਾਚਨਿਯੇ ਧਮ੍ਮੇ, ਸੋਲ਼ਸਵਿਧਂ ਆਨਾਪਾਨਸ੍ਸਤਿਂ, ਅਟ੍ਠਾਰਸ ਬੁਦ੍ਧਧਮ੍ਮੇ, ਏਕੂਨਵੀਸਤਿ ਪਚ੍ਚਵੇਕ੍ਖਣਞਾਣਾਨਿ, ਚਤੁਚਤ੍ਤਾਲੀਸ ਞਾਣਵਤ੍ਥੂਨਿ, ਪਰੋਪਣ੍ਣਾਸ ਕੁਸਲਧਮ੍ਮੇ, ਸਤ੍ਤਸਤ੍ਤਤਿ ਞਾਣਵਤ੍ਥੂਨਿ, ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਸਞ੍ਚਰਮਹਾਵਜਿਰਞਾਣਂ ਨਿਸ੍ਸਾਯ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਂ ਆਰਭਿ.

ਤਸ੍ਮਿਂਯੇਵ ਚ ਦਿਵਾਟ੍ਠਾਨੇ ਨਿਸਿਨ੍ਨੋਯੇਵ ਉਪਰਿ ‘‘ਅਪਰਂ ਪਨ, ਭਨ੍ਤੇ, ਏਤਦਾਨੁਤ੍ਤਰਿਯ’’ਨ੍ਤਿ ਆਗਮਿਸ੍ਸਨ੍ਤਿ ਸੋਲ਼ਸ ਅਪਰਮ੍ਪਰਿਯਧਮ੍ਮਾ, ਤੇਪਿ ਨਿਸ੍ਸਾਯ ਅਨੁਸ੍ਸਰਿਤੁਂ ਆਰਭਿ. ਸੋ ‘‘ਕੁਸਲਪਞ੍ਞਤ੍ਤਿਯਂ ਅਨੁਤ੍ਤਰੋ ਮਯ੍ਹਂ ਸਤ੍ਥਾ, ਆਯਤਨਪਞ੍ਞਤ੍ਤਿਯਂ ਅਨੁਤ੍ਤਰੋ, ਗਬ੍ਭਾਵਕ੍ਕਨ੍ਤਿਯਂ ਅਨੁਤ੍ਤਰੋ, ਆਦੇਸਨਾਵਿਧਾਸੁ ਅਨੁਤ੍ਤਰੋ, ਦਸ੍ਸਨਸਮਾਪਤ੍ਤਿਯਂ ਅਨੁਤ੍ਤਰੋ, ਪੁਗ੍ਗਲਪਞ੍ਞਤ੍ਤਿਯਂ ਅਨੁਤ੍ਤਰੋ, ਪਧਾਨੇ ਅਨੁਤ੍ਤਰੋ, ਪਟਿਪਦਾਸੁ ਅਨੁਤ੍ਤਰੋ, ਭਸ੍ਸਸਮਾਚਾਰੇ ਅਨੁਤ੍ਤਰੋ, ਪੁਰਿਸਸੀਲਸਮਾਚਾਰੇ ਅਨੁਤ੍ਤਰੋ, ਅਨੁਸਾਸਨੀਵਿਧਾਸੁ ਅਨੁਤ੍ਤਰੋ, ਪਰਪੁਗ੍ਗਲਵਿਮੁਤ੍ਤਿਞਾਣੇ ਅਨੁਤ੍ਤਰੋ, ਸਸ੍ਸਤਵਾਦੇਸੁ ਅਨੁਤ੍ਤਰੋ, ਪੁਬ੍ਬੇਨਿਵਾਸਞਾਣੇ ਅਨੁਤ੍ਤਰੋ, ਦਿਬ੍ਬਚਕ੍ਖੁਞਾਣੇ ਅਨੁਤ੍ਤਰੋ, ਇਦ੍ਧਿਵਿਧੇ ਅਨੁਤ੍ਤਰੋ, ਇਮਿਨਾ ਚ ਇਮਿਨਾ ਚ ਅਨੁਤ੍ਤਰੋ’’ਤਿ ਏਵਂ ਦਸਬਲਸ੍ਸ ਗੁਣੇ ਅਨੁਸ੍ਸਰਨ੍ਤੋ ਭਗਵਤੋ ਗੁਣਾਨਂ ਨੇਵ ਅਨ੍ਤਂ, ਨ ਪਮਾਣਂ ਪਸ੍ਸਿ. ਥੇਰੋ ਅਤ੍ਤਨੋਪਿ ਤਾਵ ਗੁਣਾਨਂ ਅਨ੍ਤਂ ਵਾ ਪਮਾਣਂ ਵਾ ਨਾਦ੍ਦਸ, ਭਗਵਤੋ ਗੁਣਾਨਂ ਕਿਂ ਪਸ੍ਸਿਸ੍ਸਤਿ? ਯਸ੍ਸ ਯਸ੍ਸ ਹਿ ਪਞ੍ਞਾ ਮਹਤੀ ਞਾਣਂ ਵਿਸਦਂ, ਸੋ ਸੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਲੋਕਿਯਮਹਾਜਨੋ ਉਕ੍ਕਾਸਿਤ੍ਵਾਪਿ ਖਿਪਿਤ੍ਵਾਪਿ ‘‘ਨਮੋ ਬੁਦ੍ਧਾਨ’’ਨ੍ਤਿ ਅਤ੍ਤਨੋ ਅਤ੍ਤਨੋ ਉਪਨਿਸ੍ਸਯੇ ਠਤ੍ਵਾ ਬੁਦ੍ਧਾਨਂ ਗੁਣੇ ਅਨੁਸ੍ਸਰਤਿ. ਸਬ੍ਬਲੋਕਿਯਮਹਾਜਨਤੋ ਏਕੋ ਸੋਤਾਪਨ੍ਨੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਸੋਤਾਪਨ੍ਨਾਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਸਕਦਾਗਾਮੀ. ਸਕਦਾਗਾਮੀਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਅਨਾਗਾਮੀ. ਅਨਾਗਾਮੀਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਅਰਹਾ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਅਵਸੇਸਅਰਹਨ੍ਤੇਹਿ ਅਸੀਤਿ ਮਹਾਥੇਰਾ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਨ੍ਤਿ. ਅਸੀਤਿਮਹਾਥੇਰੇਹਿ ਚਤ੍ਤਾਰੋ ਮਹਾਥੇਰਾ. ਚਤੂਹਿ ਮਹਾਥੇਰੇਹਿ ਦ੍ਵੇ ਅਗ੍ਗਸਾਵਕਾ. ਤੇਸੁਪਿ ਸਾਰਿਪੁਤ੍ਤਤ੍ਥੇਰੋ, ਸਾਰਿਪੁਤ੍ਤਤ੍ਥੇਰਤੋਪਿ ਏਕੋ ਪਚ੍ਚੇਕਬੁਦ੍ਧੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਸਚੇ ਪਨ ਸਕਲਚਕ੍ਕਵਾਲ਼ਗਬ੍ਭੇ ਸਙ੍ਘਾਟਿਕਣ੍ਣੇਨ ਸਙ੍ਘਾਟਿਕਣ੍ਣਂ ਪਹਰਿਯਮਾਨਾ ਨਿਸਿਨ੍ਨਾ ਪਚ੍ਚੇਕਬੁਦ੍ਧਾ ਬੁਦ੍ਧਗੁਣੇ ਅਨੁਸ੍ਸਰੇਯ੍ਯੁਂ, ਤੇਹਿ ਸਬ੍ਬੇਹਿਪਿ ਏਕੋ ਸਬ੍ਬਞ੍ਞੁਬੁਦ੍ਧੋਵ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ.

ਸੇਯ੍ਯਥਾਪਿ ਨਾਮ ਮਹਾਜਨੋ ‘‘ਮਹਾਸਮੁਦ੍ਦੋ ਗਮ੍ਭੀਰੋ ਉਤ੍ਤਾਨੋ’’ਤਿ ਜਾਨਨਤ੍ਥਂ ਯੋਤ੍ਤਾਨਿ ਵਟ੍ਟੇਯ੍ਯ, ਤਤ੍ਥ ਕੋਚਿ ਬ੍ਯਾਮਪ੍ਪਮਾਣਂ ਯੋਤ੍ਤਂ ਵਟ੍ਟੇਯ੍ਯ, ਕੋਚਿ ਦ੍ਵੇ ਬ੍ਯਾਮਂ, ਕੋਚਿ ਦਸਬ੍ਯਾਮਂ, ਕੋਚਿ ਵੀਸਤਿਬ੍ਯਾਮਂ, ਕੋਚਿ ਤਿਂਸਬ੍ਯਾਮਂ, ਕੋਚਿ ਚਤ੍ਤਾਲੀਸਬ੍ਯਾਮਂ, ਕੋਚਿ ਪਞ੍ਞਾਸਬ੍ਯਾਮਂ, ਕੋਚਿ ਸਤਬ੍ਯਾਮਂ, ਕੋਚਿ ਸਹਸ੍ਸਬ੍ਯਾਮਂ, ਕੋਚਿ ਚਤੁਰਾਸੀਤਿਬ੍ਯਾਮਸਹਸ੍ਸਂ. ਤੇ ਨਾਵਂ ਆਰੁਯ੍ਹ, ਸਮੁਦ੍ਦਮਜ੍ਝੇ ਉਗ੍ਗਤਪਬ੍ਬਤਾਦਿਮ੍ਹਿ ਵਾ ਠਤ੍ਵਾ ਅਤ੍ਤਨੋ ਅਤ੍ਤਨੋ ਯੋਤ੍ਤਂ ਓਤਾਰੇਯ੍ਯੁਂ, ਤੇਸੁ ਯਸ੍ਸ ਯੋਤ੍ਤਂ ਬ੍ਯਾਮਮਤ੍ਤਂ, ਸੋ ਬ੍ਯਾਮਮਤ੍ਤਟ੍ਠਾਨੇਯੇਵ ਉਦਕਂ ਜਾਨਾਤਿ…ਪੇ… ਯਸ੍ਸ ਚਤੁਰਾਸੀਤਿਬ੍ਯਾਮਸਹਸ੍ਸਂ, ਸੋ ਚਤੁਰਾਸੀਤਿਬ੍ਯਾਮਸਹਸ੍ਸਟ੍ਠਾਨੇਯੇਵ ਉਦਕਂ ਜਾਨਾਤਿ. ਪਰਤੋ ਉਦਕਂ ਏਤ੍ਤਕਨ੍ਤਿ ਨ ਜਾਨਾਤਿ. ਮਹਾਸਮੁਦ੍ਦੇ ਪਨ ਨ ਤਤ੍ਤਕਂਯੇਵ ਉਦਕਂ, ਅਥ ਖੋ ਅਨਨ੍ਤਮਪਰਿਮਾਣਂ. ਚਤੁਰਾਸੀਤਿਯੋਜਨਸਹਸ੍ਸਂ ਗਮ੍ਭੀਰੋ ਹਿ ਮਹਾਸਮੁਦ੍ਦੋ, ਏਵਮੇਵ ਏਕਬ੍ਯਾਮਯੋਤ੍ਤਤੋ ਪਟ੍ਠਾਯ ਨਵਬ੍ਯਾਮਯੋਤ੍ਤੇਨ ਞਾਤਉਦਕਂ ਵਿਯ ਲੋਕਿਯਮਹਾਜਨੇਨ ਦਿਟ੍ਠਬੁਦ੍ਧਗੁਣਾ ਵੇਦਿਤਬ੍ਬਾ. ਦਸਬ੍ਯਾਮਯੋਤ੍ਤੇਨ ਦਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਸੋਤਾਪਨ੍ਨੇਨ ਦਿਟ੍ਠਬੁਦ੍ਧਗੁਣਾ. ਵੀਸਤਿਬ੍ਯਾਮਯੋਤ੍ਤੇਨ ਵੀਸਤਿਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਸਕਦਾਗਾਮਿਨਾ ਦਿਟ੍ਠਬੁਦ੍ਧਗੁਣਾ. ਤਿਂਸਬ੍ਯਾਮਯੋਤ੍ਤੇਨ ਤਿਂਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਨਾਗਾਮਿਨਾ ਦਿਟ੍ਠਬੁਦ੍ਧਗੁਣਾ. ਚਤ੍ਤਾਲੀਸਬ੍ਯਾਮਯੋਤ੍ਤੇਨ ਚਤ੍ਤਾਲੀਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਰਹਤਾ ਦਿਟ੍ਠਬੁਦ੍ਧਗੁਣਾ. ਪਞ੍ਞਾਸਬ੍ਯਾਮਯੋਤ੍ਤੇਨ ਪਞ੍ਞਾਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਸੀਤਿਮਹਾਥੇਰੇਹਿ ਦਿਟ੍ਠਬੁਦ੍ਧਗੁਣਾ. ਸਤਬ੍ਯਾਮਯੋਤ੍ਤੇਨ ਸਤਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਚਤੂਹਿ ਮਹਾਥੇਰੇਹਿ ਦਿਟ੍ਠਬੁਦ੍ਧਗੁਣਾ. ਸਹਸ੍ਸਬ੍ਯਾਮਯੋਤ੍ਤੇਨ ਸਹਸ੍ਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਦਿਟ੍ਠਬੁਦ੍ਧਗੁਣਾ. ਚਤੁਰਾਸੀਤਿਬ੍ਯਾਮਸਹਸ੍ਸਯੋਤ੍ਤੇਨ ਚਤੁਰਾਸੀਤਿਬ੍ਯਾਮਸਹਸ੍ਸਟ੍ਠਾਨੇ ਞਾਤਉਦਕਂ ਵਿਯ ਧਮ੍ਮਸੇਨਾਪਤਿਨਾ ਸਾਰਿਪੁਤ੍ਤਤ੍ਥੇਰੇਨ ਦਿਟ੍ਠਬੁਦ੍ਧਗੁਣਾ. ਤਤ੍ਥ ਯਥਾ ਸੋ ਪੁਰਿਸੋ ਮਹਾਸਮੁਦ੍ਦੇ ਉਦਕਂ ਨਾਮ ਨ ਏਤ੍ਤਕਂਯੇਵ, ਅਨਨ੍ਤਮਪਰਿਮਾਣਨ੍ਤਿ ਗਣ੍ਹਾਤਿ, ਏਵਮੇਵ ਆਯਸ੍ਮਾ ਸਾਰਿਪੁਤ੍ਤੋ ਧਮ੍ਮਨ੍ਵਯੇਨ ਅਨ੍ਵਯਬੁਦ੍ਧਿਯਾ ਅਨੁਮਾਨੇਨ ਨਯਗ੍ਗਾਹੇਨ ਸਾਵਕਪਾਰਮੀਞਾਣੇ ਠਤ੍ਵਾ ਦਸਬਲਸ੍ਸ ਗੁਣੇ ਅਨੁਸ੍ਸਰਨ੍ਤੋ ‘‘ਬੁਦ੍ਧਗੁਣਾ ਅਨਨ੍ਤਾ ਅਪਰਿਮਾਣਾ’’ਤਿ ਸਦ੍ਦਹਿ.

ਥੇਰੇਨ ਹਿ ਦਿਟ੍ਠਬੁਦ੍ਧਗੁਣੇਹਿ ਧਮ੍ਮਨ੍ਵਯੇਨ ਗਹੇਤਬ੍ਬਬੁਦ੍ਧਗੁਣਾਯੇਵ ਬਹੁਤਰਾ. ਯਥਾ ਕਥਂ ਵਿਯ? ਯਥਾ ਇਤੋ ਨਵ ਇਤੋ ਨਵਾਤਿ ਅਟ੍ਠਾਰਸ ਯੋਜਨਾਨਿ ਅਵਤ੍ਥਰਿਤ੍ਵਾ ਗਚ੍ਛਨ੍ਤਿਯਾ ਚਨ੍ਦਭਾਗਾਯ ਮਹਾਨਦਿਯਾ ਪੁਰਿਸੋ ਸੂਚਿਪਾਸੇਨ ਉਦਕਂ ਗਣ੍ਹੇਯ੍ਯ, ਸੂਚਿਪਾਸੇਨ ਗਹਿਤਉਦਕਤੋ ਅਗ੍ਗਹਿਤਮੇਵ ਬਹੁ ਹੋਤਿ. ਯਥਾ ਵਾ ਪਨ ਪੁਰਿਸੋ ਮਹਾਪਥਵਿਤੋ ਅਙ੍ਗੁਲਿਯਾ ਪਂਸੁਂ ਗਣ੍ਹੇਯ੍ਯ, ਅਙ੍ਗੁਲਿਯਾ ਗਹਿਤਪਂਸੁਤੋ ਅਵਸੇਸਪਂਸੁਯੇਵ ਬਹੁ ਹੋਤਿ. ਯਥਾ ਵਾ ਪਨ ਪੁਰਿਸੋ ਮਹਾਸਮੁਦ੍ਦਾਭਿਮੁਖਿਂ ਅਙ੍ਗੁਲਿਂ ਕਰੇਯ੍ਯ, ਅਙ੍ਗੁਲਿਅਭਿਮੁਖਉਦਕਤੋ ਅਵਸੇਸਂ ਉਦਕਂਯੇਵ ਬਹੁ ਹੋਤਿ. ਯਥਾ ਚ ਪੁਰਿਸੋ ਆਕਾਸਾਭਿਮੁਖਿਂ ਅਙ੍ਗੁਲਿਂ ਕਰੇਯ੍ਯ, ਅਙ੍ਗੁਲਿਅਭਿਮੁਖਆਕਾਸਤੋ ਸੇਸਆਕਾਸਪ੍ਪਦੇਸੋਵ ਬਹੁ ਹੋਤਿ. ਏਵਂ ਥੇਰੇਨ ਦਿਟ੍ਠਬੁਦ੍ਧਗੁਣੇਹਿ ਅਦਿਟ੍ਠਾ ਗੁਣਾਵ ਬਹੂਤਿ ਵੇਦਿਤਬ੍ਬਾ. ਵੁਤ੍ਤਮ੍ਪਿ ਚੇਤਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ.

ਏਵਂ ਥੇਰਸ੍ਸ ਅਤ੍ਤਨੋ ਚ ਸਤ੍ਥੁ ਚ ਗੁਣੇ ਅਨੁਸ੍ਸਰਤੋ ਯਮਕਮਹਾਨਦੀਮਹੋਘੋ ਵਿਯ ਅਬ੍ਭਨ੍ਤਰੇ ਪੀਤਿਸੋਮਨਸ੍ਸਂ ਅਵਤ੍ਥਰਮਾਨਂ ਵਾਤੋ ਵਿਯ ਭਸ੍ਤਂ, ਉਬ੍ਭਿਜ੍ਜਿਤ੍ਵਾ ਉਗ੍ਗਤਉਦਕਂ ਵਿਯ ਮਹਾਰਹਦਂ ਸਕਲਸਰੀਰਂ ਪੂਰੇਤਿ. ਤਤੋ ਥੇਰਸ੍ਸ ‘‘ਸੁਪਤ੍ਥਿਤਾ ਵਤ ਮੇ ਪਤ੍ਥਨਾ, ਸੁਲਦ੍ਧਾ ਮੇ ਪਬ੍ਬਜ੍ਜਾ, ਯ੍ਵਾਹਂ ਏਵਂਵਿਧਸ੍ਸ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤੋ’’ਤਿ ਆਵਜ੍ਜਨ੍ਤਸ੍ਸ ਬਲਵਤਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ.

ਅਥ ਥੇਰੋ ‘‘ਕਸ੍ਸਾਹਂ ਇਮਂ ਪੀਤਿਸੋਮਨਸ੍ਸਂ ਆਰੋਚੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਅਞ੍ਞੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਮਮ ਇਮਂ ਪਸਾਦਂ ਅਨੁਚ੍ਛਵਿਕਂ ਕਤ੍ਵਾ ਪਟਿਗ੍ਗਹੇਤੁਂ ਨ ਸਕ੍ਖਿਸ੍ਸਤਿ, ਅਹਂ ਇਮਂ ਸੋਮਨਸ੍ਸਂ ਸਤ੍ਥੁਨੋਯੇਵ ਪਵੇਦੇਯ੍ਯਾਮਿ, ਸਤ੍ਥਾਵ ਮੇ ਪਟਿਗ੍ਗਣ੍ਹਿਤੁਂ ਸਕ੍ਖਿਸ੍ਸਤਿ, ਸੋ ਹਿ ਤਿਟ੍ਠਤੁ ਮਮ ਪੀਤਿਸੋਮਨਸ੍ਸਂ, ਮਾਦਿਸਸ੍ਸ ਸਮਣਸਤਸ੍ਸ ਵਾ ਸਮਣਸਹਸ੍ਸਸ੍ਸ ਵਾ ਸਮਣਸਤਸਹਸ੍ਸਸ੍ਸ ਵਾ ਸੋਮਨਸ੍ਸਂ ਪਵੇਦੇਨ੍ਤਸ੍ਸ ਸਬ੍ਬੇਸਂ ਮਨਂ ਗਣ੍ਹਨ੍ਤੋ ਪਟਿਗ੍ਗਹੇਤੁਂ ਸਕ੍ਕੋਤਿ. ਸੇਯ੍ਯਥਾਪਿ ਨਾਮ ਅਟ੍ਠਾਰਸ ਯੋਜਨਾਨਿ ਅਵਤ੍ਥਰਮਾਨਂ ਗਚ੍ਛਨ੍ਤਿਂ ਚਨ੍ਦਭਾਗਮਹਾਨਦਿਂ ਕੁਸੁਮ੍ਭਾ ਵਾ ਕਨ੍ਦਰਾ ਵਾ ਸਮ੍ਪਟਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਮਹਾਸਮੁਦ੍ਦੋਵ ਤਂ ਸਮ੍ਪਟਿਚ੍ਛਤਿ. ਮਹਾਸਮੁਦ੍ਦੋ ਹਿ ਤਿਟ੍ਠਤੁ ਚਨ੍ਦਭਾਗਾ, ਏਵਰੂਪਾਨਂ ਨਦੀਨਂ ਸਤਮ੍ਪਿ ਸਹਸ੍ਸਮ੍ਪਿ ਸਤਸਹਸ੍ਸਮ੍ਪਿ ਸਮ੍ਪਟਿਚ੍ਛਤਿ, ਨ ਚਸ੍ਸ ਤੇਨ ਊਨਤ੍ਤਂ ਵਾ ਪੂਰਤ੍ਤਂ ਵਾ ਪਞ੍ਞਾਯਤਿ, ਏਵਮੇਵ ਸਤ੍ਥਾ ਮਾਦਿਸਸ੍ਸ ਸਮਣਸਤਸ੍ਸ ਸਮਣਸਹਸ੍ਸਸ੍ਸ ਸਮਣਸਤਸਹਸ੍ਸਸ੍ਸ ਵਾ ਪੀਤਿਸੋਮਨਸ੍ਸਂ ਪਵੇਦੇਨ੍ਤਸ੍ਸ ਸਬ੍ਬੇਸਂ ਮਨਂ ਗਣ੍ਹਨ੍ਤੋ ਪਟਿਗ੍ਗਹੇਤੁਂ ਸਕ੍ਕੋਤਿ. ਸੇਸਾ ਸਮਣਬ੍ਰਾਹ੍ਮਣਾਦਯੋ ਚਨ੍ਦਭਾਗਂ ਕੁਸੁਮ੍ਭਕਨ੍ਦਰਾ ਵਿਯ ਮਮ ਸੋਮਨਸ੍ਸਂ ਸਮ੍ਪਟਿਚ੍ਛਿਤੁਂ ਨ ਸਕ੍ਕੋਨ੍ਤਿ. ਹਨ੍ਦਾਹਂ ਮਮ ਪੀਤਿਸੋਮਨਸ੍ਸਂ ਸਤ੍ਥੁਨੋਵ ਆਰੋਚੇਮੀਤਿ ਪਲ੍ਲਙ੍ਕਂ ਵਿਨਿਬ੍ਭੁਜਿਤ੍ਵਾ ਚਮ੍ਮਕ੍ਖਣ੍ਡਂ ਪਪ੍ਫੋਟੇਤ੍ਵਾ ਆਦਾਯ ਸਾਯਨ੍ਹਸਮਯੇ ਪੁਪ੍ਫਾਨਂ ਵਣ੍ਟਤੋ ਛਿਜ੍ਜਿਤ੍ਵਾ ਪਗ੍ਘਰਣਕਾਲੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਸੋਮਨਸ੍ਸਂ ਪਵੇਦੇਨ੍ਤੋ ਏਵਂਪਸਨ੍ਨੋ ਅਹਂ, ਭਨ੍ਤੇਤਿਆਦਿਮਾਹ. ਤਤ੍ਥ ਏਵਂਪਸਨ੍ਨੋਤਿ ਏਵਂ ਉਪ੍ਪਨ੍ਨਸਦ੍ਧੋ, ਏਵਂ ਸਦ੍ਦਹਾਮੀਤਿ ਅਤ੍ਥੋ. ਭਿਯ੍ਯੋਭਿਞ੍ਞਤਰੋਤਿ ਭਿਯ੍ਯਤਰੋ ਅਭਿਞ੍ਞਾਤੋ, ਭਿਯ੍ਯਤਰਾਭਿਞ੍ਞੋ ਵਾ, ਉਤ੍ਤਰਿਤਰਞਾਣੋਤਿ ਅਤ੍ਥੋ. ਸਮ੍ਬੋਧਿਯਨ੍ਤਿ ਸਬ੍ਬਞ੍ਞੁਤਞ੍ਞਾਣੇ ਅਰਹਤ੍ਤਮਗ੍ਗਞਾਣੇ ਵਾ, ਅਰਹਤ੍ਤਮਗ੍ਗੇਨੇਵ ਹਿ ਬੁਦ੍ਧਗੁਣਾ ਨਿਪ੍ਪਦੇਸਾ ਗਹਿਤਾ ਹੋਨ੍ਤਿ. ਦ੍ਵੇ ਹਿ ਅਗ੍ਗਸਾਵਕਾ ਅਰਹਤ੍ਤਮਗ੍ਗੇਨੇਵ ਸਾਵਕਪਾਰਮੀਞਾਣਂ ਪਟਿਲਭਨ੍ਤਿ. ਪਚ੍ਚੇਕਬੁਦ੍ਧਾ ਪਚ੍ਚੇਕਬੋਧਿਞਾਣਂ. ਬੁਦ੍ਧਾ ਸਬ੍ਬਞ੍ਞੁਤਞ੍ਞਾਣਞ੍ਚੇਵ ਸਕਲੇ ਚ ਬੁਦ੍ਧਗੁਣੇ. ਸਬ੍ਬਞ੍ਹਿ ਨੇਸਂ ਅਰਹਤ੍ਤਮਗ੍ਗੇਨੇਵ ਇਜ੍ਝਤਿ. ਤਸ੍ਮਾ ਅਰਹਤ੍ਤਮਗ੍ਗਞਾਣਂ ਸਮ੍ਬੋਧਿ ਨਾਮ ਹੋਤਿ. ਤੇਨ ਉਤ੍ਤਰਿਤਰੋ ਭਗਵਤਾ ਨਤ੍ਥਿ. ਤੇਨਾਹ ‘‘ਭਗਵਤਾ ਭਿਯ੍ਯੋਭਿਞ੍ਞਤਰੋ ਯਦਿਦਂ ਸਮ੍ਬੋਧਿਯ’’ਨ੍ਤਿ.

੧੪੨. ਉਲ਼ਾਰਾਤਿ ਸੇਟ੍ਠਾ. ਅਯਞ੍ਹਿ ਉਲ਼ਾਰਸਦ੍ਦੋ ‘‘ਉਲ਼ਾਰਾਨਿ ਖਾਦਨੀਯਾਨਿ ਖਾਦਨ੍ਤੀ’’ਤਿਆਦੀਸੁ (ਮ. ਨਿ. ੧.੩੬੬) ਮਧੁਰੇ ਆਗਚ੍ਛਤਿ. ‘‘ਉਲ਼ਾਰਾਯ ਖਲੁ ਭਵਂ, ਵਚ੍ਛਾਯਨੋ, ਸਮਣਂ ਗੋਤਮਂ ਪਸਂਸਾਯ ਪਸਂਸਤੀ’’ਤਿਆਦੀਸੁ (ਮ. ਨਿ. ੩.੨੮੦) ਸੇਟ੍ਠੇ. ‘‘ਅਪ੍ਪਮਾਣੋ ਉਲ਼ਾਰੋ ਓਭਾਸੋ’’ਤਿਆਦੀਸੁ (ਦੀ. ਨਿ. ੨.੩੨) ਵਿਪੁਲੇ. ਸ੍ਵਾਯਮਿਧ ਸੇਟ੍ਠੇ ਆਗਤੋ. ਤੇਨ ਵੁਤ੍ਤਂ – ‘‘ਉਲ਼ਾਰਾਤਿ ਸੇਟ੍ਠਾ’’ਤਿ. ਆਸਭੀਤਿ ਉਸਭਸ੍ਸ ਵਾਚਾਸਦਿਸੀ ਅਚਲਾ ਅਸਮ੍ਪਵੇਧੀ. ਏਕਂਸੋ ਗਹਿਤੋਤਿ ਅਨੁਸ੍ਸਵੇਨ ਵਾ ਆਚਰਿਯਪਰਮ੍ਪਰਾਯ ਵਾ ਇਤਿਕਿਰਾਯ ਵਾ ਪਿਟਕਸਮ੍ਪਦਾਨੇਨ ਵਾ ਆਕਾਰਪਰਿਵਿਤਕ੍ਕੇਨ ਵਾ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਵਾ ਤਕ੍ਕਹੇਤੁ ਵਾ ਨਯਹੇਤੁ ਵਾ ਅਕਥੇਤ੍ਵਾ ਪਚ੍ਚਕ੍ਖਤੋ ਞਾਣੇਨ ਪਟਿਵਿਜ੍ਝਿਤ੍ਵਾ ਵਿਯ ਏਕਂਸੋ ਗਹਿਤੋ, ਸਨ੍ਨਿਟ੍ਠਾਨਕਥਾਵ ਕਥਿਤਾਤਿ ਅਤ੍ਥੋ.

ਸੀਹਨਾਦੋਤਿ ਸੇਟ੍ਠਨਾਦੋ, ਨੇਵ ਦਨ੍ਧਾਯਨ੍ਤੇਨ ਨ ਗਗ੍ਗਰਾਯਨ੍ਤੇਨ ਸੀਹੇਨ ਵਿਯ ਉਤ੍ਤਮਨਾਦੋ ਨਦਿਤੋਤਿ ਅਤ੍ਥੋ. ਕਿਂ ਤੇ ਸਾਰਿਪੁਤ੍ਤਾਤਿ ਇਮਂ ਦੇਸਨਂ ਕਸ੍ਮਾ ਆਰਭੀਤਿ? ਅਨੁਯੋਗਦਾਪਨਤ੍ਥਂ. ਏਕਚ੍ਚੋ ਹਿ ਸੀਹਨਾਦਂ ਨਦਿਤ੍ਵਾ ਅਤ੍ਤਨੋ ਸੀਹਨਾਦੇ ਅਨੁਯੋਗਂ ਦਾਤੁਂ ਨ ਸਕ੍ਕੋਤਿ, ਨਿਘਂਸਨਂ ਨਕ੍ਖਮਤਿ, ਲੇਪੇ ਪਤਿਤਮਕ੍ਕਟੋ ਵਿਯ ਹੋਤਿ. ਯਥਾ ਧਮਮਾਨਂ ਅਪਰਿਸੁਦ੍ਧਲੋਹਂ ਝਾਯਿਤ੍ਵਾ ਝਾਮਅਙ੍ਗਾਰੋ ਹੋਤਿ, ਏਵਂ ਝਾਮਙ੍ਗਾਰੋ ਵਿਯ ਹੋਤਿ. ਏਕੋ ਸੀਹਨਾਦੇ ਅਨੁਯੋਗਂ ਦਾਪਿਯਮਾਨੋ ਦਾਤੁਂ ਸਕ੍ਕੋਤਿ, ਨਿਘਂਸਨਂ ਖਮਤਿ, ਧਮਮਾਨਂ ਨਿਦ੍ਦੋਸਜਾਤਰੂਪਂ ਵਿਯ ਅਧਿਕਤਰਂ ਸੋਭਤਿ, ਤਾਦਿਸੋ ਥੇਰੋ. ਤੇਨ ਨਂ ਭਗਵਾ ‘‘ਅਨੁਯੋਗਕ੍ਖਮੋ ਅਯ’’ਨ੍ਤਿ ਞਤ੍ਵਾ ਸੀਹਨਾਦੇ ਅਨੁਯੋਗਦਾਪਨਤ੍ਥਂ ਇਮਮ੍ਪਿ ਦੇਸਨਂ ਆਰਭਿ.

ਤਤ੍ਥ ਸਬ੍ਬੇ ਤੇਤਿ ਸਬ੍ਬੇ ਤੇ ਤਯਾ. ਏਵਂਸੀਲਾਤਿਆਦੀਸੁ ਲੋਕਿਯਲੋਕੁਤ੍ਤਰਵਸੇਨ ਸੀਲਾਦੀਨਿ ਪੁਚ੍ਛਤਿ. ਤੇਸਂ ਵਿਤ੍ਥਾਰਕਥਾ ਮਹਾਪਦਾਨੇ ਕਥਿਤਾਵ.

ਕਿਂ ਪਨ ਤੇ, ਸਾਰਿਪੁਤ੍ਤ, ਯੇ ਤੇ ਭਵਿਸ੍ਸਨ੍ਤੀਤਿ ਅਤੀਤਾ ਚ ਤਾਵ ਨਿਰੁਦ੍ਧਾ, ਅਪਣ੍ਣਤ੍ਤਿਕਭਾਵਂ ਗਤਾ ਦੀਪਸਿਖਾ ਵਿਯ ਨਿਬ੍ਬੁਤਾ, ਏਵਂ ਨਿਰੁਦ੍ਧੇ ਅਪਣ੍ਣਤ੍ਤਿਕਭਾਵਂ ਗਤੇ ਤ੍ਵਂ ਕਥਂ ਜਾਨਿਸ੍ਸਸਿ, ਅਨਾਗਤਬੁਦ੍ਧਾਨਂ ਪਨ ਗੁਣਾ ਕਿਨ੍ਤਿ ਤਯਾ ਅਤ੍ਤਨੋ ਚਿਤ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾਤਿ ਪੁਚ੍ਛਨ੍ਤੋ ਏਵਮਾਹ. ਕਿਂ ਪਨ ਤੇ, ਸਾਰਿਪੁਤ੍ਤ, ਅਹਂ ਏਤਰਹੀਤਿ ਅਨਾਗਤਾਪਿ ਬੁਦ੍ਧਾ ਅਜਾਤਾ ਅਨਿਬ੍ਬਤ੍ਤਾ ਅਨੁਪ੍ਪਨ੍ਨਾ, ਤੇਪਿ ਕਥਂ ਤ੍ਵਂ ਜਾਨਿਸ੍ਸਸਿ? ਤੇਸਞ੍ਹਿ ਜਾਨਨਂ ਅਪਦੇ ਆਕਾਸੇ ਪਦਦਸ੍ਸਨਂ ਵਿਯ ਹੋਤਿ. ਇਦਾਨਿ ਮਯਾ ਸਦ੍ਧਿਂ ਏਕਵਿਹਾਰੇ ਵਸਸਿ, ਏਕਤੋ ਭਿਕ੍ਖਾਯ ਚਰਸਿ, ਧਮ੍ਮਦੇਸਨਾਕਾਲੇ ਦਕ੍ਖਿਣਪਸ੍ਸੇ ਨਿਸੀਦਸਿ, ਕਿਂ ਪਨ ਮਯ੍ਹਂ ਗੁਣਾ ਅਤ੍ਤਨੋ ਚੇਤਸਾ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾ ਤਯਾਤਿ ਅਨੁਯੁਞ੍ਜਨ੍ਤੋ ਏਵਮਾਹ.

ਥੇਰੋ ਪਨ ਪੁਚ੍ਛਿਤੇ ਪੁਚ੍ਛਿਤੇ ‘‘ਨੋ ਹੇਤਂ, ਭਨ੍ਤੇ’’ਤਿ ਪਟਿਕ੍ਖਿਪਤਿ. ਥੇਰਸ੍ਸ ਚ ਵਿਦਿਤਮ੍ਪਿ ਅਤ੍ਥਿ ਅਵਿਦਿਤਮ੍ਪਿ ਅਤ੍ਥਿ, ਕਿਂ ਸੋ ਅਤ੍ਤਨੋ ਵਿਦਿਤਟ੍ਠਾਨੇ ਪਟਿਕ੍ਖੇਪਂ ਕਰੋਤਿ, ਅਵਿਦਿਤਟ੍ਠਾਨੇਤਿ? ਵਿਦਿਤਟ੍ਠਾਨੇ ਨ ਕਰੋਤਿ, ਅਵਿਦਿਤਟ੍ਠਾਨੇਯੇਵ ਕਰੋਤੀਤਿ. ਥੇਰੋ ਕਿਰ ਅਨੁਯੋਗੇ ਆਰਦ੍ਧੇਯੇਵ ਅਞ੍ਞਾਸਿ. ਨ ਅਯਂ ਅਨੁਯੋਗੋ ਸਾਵਕਪਾਰਮੀਞਾਣੇ, ਸਬ੍ਬਞ੍ਞੁਤਞ੍ਞਾਣੇ ਅਯਂ ਅਨੁਯੋਗੋਤਿ ਅਤ੍ਤਨੋ ਸਾਵਕਪਾਰਮੀਞਾਣੇ ਪਟਿਕ੍ਖੇਪਂ ਅਕਤ੍ਵਾ ਅਵਿਦਿਤਟ੍ਠਾਨੇ ਸਬ੍ਬਞ੍ਞੁਤਞ੍ਞਾਣੇ ਪਟਿਕ੍ਖੇਪਂ ਕਰੋਤਿ. ਤੇਨ ਇਦਮ੍ਪਿ ਦੀਪੇਤਿ ‘‘ਭਗਵਾ ਮਯ੍ਹਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਬੁਦ੍ਧਾਨਂ ਸੀਲਸਮਾਧਿਪਞ੍ਞਾਵਿਮੁਤ੍ਤਿਕਾਰਣਜਾਨਨਸਮਤ੍ਥਂ ਸਬ੍ਬਞ੍ਞੁਤਞ੍ਞਾਣਂ ਨਤ੍ਥੀ’’ਤਿ.

ਏਤ੍ਥਾਤਿ ਏਤੇਸੁ ਅਤੀਤਾਦਿਭੇਦੇਸੁ ਬੁਦ੍ਧੇਸੁ. ਅਥ ਕਿਞ੍ਚਰਹੀਤਿ ਅਥ ਕਸ੍ਮਾ ਏਵਂ ਞਾਣੇ ਅਸਤਿ ਤਯਾ ਏਵਂ ਕਥਿਤਨ੍ਤਿ ਵਦਤਿ.

੧੪੩. ਧਮ੍ਮਨ੍ਵਯੋਤਿ ਧਮ੍ਮਸ੍ਸ ਪਚ੍ਚਕ੍ਖਤੋ ਞਾਣਸ੍ਸ ਅਨੁਯੋਗਂ ਅਨੁਗਨ੍ਤ੍ਵਾ ਉਪ੍ਪਨ੍ਨਂ ਅਨੁਮਾਨਞਾਣਂ ਨਯਗ੍ਗਾਹੋ ਵਿਦਿਤੋ. ਸਾਵਕਪਾਰਮੀਞਾਣੇ ਠਤ੍ਵਾਵ ਇਮਿਨਾਵ ਆਕਾਰੇਨ ਜਾਨਾਮਿ ਭਗਵਾਤਿ ਵਦਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਅਪ੍ਪਮਾਣੋ ਅਪਰਿਯਨ੍ਤੋ. ਯਥਾ ਸਬ੍ਬਞ੍ਞੁਤਞ੍ਞਾਣਸ੍ਸ ਪਮਾਣਂ ਵਾ ਪਰਿਯਨ੍ਤੋ ਵਾ ਨਤ੍ਥਿ, ਏਵਂ ਧਮ੍ਮਸੇਨਾਪਤਿਨੋ ਨਯਗ੍ਗਾਹਸ੍ਸ. ਤੇਨ ਸੋ ‘‘ਇਮਿਨਾ ਏਵਂਵਿਧੋ, ਇਮਿਨਾ ਅਨੁਤ੍ਤਰੋ ਸਤ੍ਥਾ’’ਤਿ ਜਾਨਾਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਸਬ੍ਬਞ੍ਞੁਤਞ੍ਞਾਣਗਤਿਕੋ ਏਵ. ਇਦਾਨਿ ਤਂ ਨਯਗ੍ਗਾਹਂ ਪਾਕਟਂ ਕਾਤੁਂ ਉਪਮਾਯ ਦਸ੍ਸੇਨ੍ਤੋ ਸੇਯ੍ਯਥਾਪਿ, ਭਨ੍ਤੇਤਿਆਦਿਮਾਹ. ਤਤ੍ਥ ਯਸ੍ਮਾ ਮਜ੍ਝਿਮਪਦੇਸੇ ਨਗਰਸ੍ਸ ਉਦ੍ਧਾਪਪਾਕਾਰਾਦੀਨਿ ਥਿਰਾਨਿ ਵਾ ਹੋਨ੍ਤੁ, ਦੁਬ੍ਬਲਾਨਿ ਵਾ, ਸਬ੍ਬਸੋ ਵਾ ਪਨ ਮਾ ਹੋਨ੍ਤੁ, ਚੋਰਾਸਙ੍ਕਾ ਨ ਹੋਤਿ, ਤਸ੍ਮਾ ਤਂ ਅਗ੍ਗਹੇਤ੍ਵਾ ਪਚ੍ਚਨ੍ਤਿਮਨਗਰਨ੍ਤਿ ਆਹ. ਦਲ਼੍ਹੁਦ੍ਧਾਪਨ੍ਤਿ ਥਿਰਪਾਕਾਰਪਾਦਂ. ਦਲ਼੍ਹਪਾਕਾਰਤੋਰਣਨ੍ਤਿ ਥਿਰਪਾਕਾਰਞ੍ਚੇਵ ਥਿਰਪਿਟ੍ਠਸਙ੍ਘਾਟਞ੍ਚ. ਏਕਦ੍ਵਾਰਨ੍ਤਿ ਕਸ੍ਮਾ ਆਹ? ਬਹੁਦ੍ਵਾਰੇ ਹਿ ਨਗਰੇ ਬਹੂਹਿ ਪਣ੍ਡਿਤਦੋਵਾਰਿਕੇਹਿ ਭਵਿਤਬ੍ਬਂ. ਏਕਦ੍ਵਾਰੇ ਏਕੋਵ ਵਟ੍ਟਤਿ. ਥੇਰਸ੍ਸ ਚ ਪਞ੍ਞਾਯ ਸਦਿਸੋ ਅਞ੍ਞੋ ਨਤ੍ਥਿ. ਤਸ੍ਮਾ ਅਤ੍ਤਨੋ ਪਣ੍ਡਿਤਭਾਵਸ੍ਸ ਓਪਮ੍ਮਤ੍ਥਂ ਏਕਂਯੇਵ ਦੋਵਾਰਿਕਂ ਦਸ੍ਸੇਤੁਂ ਏਕਦ੍ਵਾਰ’’ਨ੍ਤਿ ਆਹ. ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ ਵਿਸਦਞਾਣੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਕਪਞ੍ਞਾਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤੋ. ਅਨੁਪਰਿਯਾਯਪਥਨ੍ਤਿ ਅਨੁਪਰਿਯਾਯਨਾਮਕਂ ਪਾਕਾਰਮਗ੍ਗਂ. ਪਾਕਾਰਸਨ੍ਧਿਨ੍ਤਿ ਦ੍ਵਿਨ੍ਨਂ ਇਟ੍ਠਕਾਨਂ ਅਪਗਤਟ੍ਠਾਨਂ. ਪਾਕਾਰਵਿਵਰਨ੍ਤਿ ਪਾਕਾਰਸ੍ਸ ਛਿਨ੍ਨਟ੍ਠਾਨਂ.

ਚੇਤਸੋ ਉਪਕ੍ਕਿਲੇਸੇਤਿ ਪਞ੍ਚ ਨੀਵਰਣਾਨਿ ਚਿਤ੍ਤਂ ਉਪਕ੍ਕਿਲੇਸੇਨ੍ਤਿ ਕਿਲਿਟ੍ਠਂ ਕਰੋਨ੍ਤਿ ਉਪਤਾਪੇਨ੍ਤਿ ਵਿਬਾਧੇਨ੍ਤਿ, ਤਸ੍ਮਾ ‘‘ਚੇਤਸੋ ਉਪਕ੍ਕਿਲੇਸਾ’’ਤਿ ਵੁਚ੍ਚਨ੍ਤਿ. ਪਞ੍ਞਾਯ ਦੁਬ੍ਬਲੀਕਰਣੇਤਿ ਨੀਵਰਣਾ ਉਪ੍ਪਜ੍ਜਮਾਨਾ ਅਨੁਪ੍ਪਨ੍ਨਾਯ ਪਞ੍ਞਾਯ ਉਪ੍ਪਜ੍ਜਿਤੁਂ ਨ ਦੇਨ੍ਤਿ, ਉਪ੍ਪਨ੍ਨਾਯ ਪਞ੍ਞਾਯ ਵਡ੍ਢਿਤੁਂ ਨ ਦੇਨ੍ਤਿ, ਤਸ੍ਮਾ ‘‘ਪਞ੍ਞਾਯ ਦੁਬ੍ਬਲੀਕਰਣਾ’’ਤਿ ਵੁਚ੍ਚਨ੍ਤਿ. ਸੁਪ੍ਪਤਿਟ੍ਠਿਤਚਿਤ੍ਤਾਤਿ ਚਤੂਸੁ ਸਤਿਪਟ੍ਠਾਨੇਸੁ ਸੁਟ੍ਠੁ ਠਪਿਤਚਿਤ੍ਤਾ ਹੁਤ੍ਵਾ. ਸਤ੍ਤ ਬੋਜ੍ਝਙ੍ਗੇ ਯਥਾਭੂਤਨ੍ਤਿ ਸਤ੍ਤ ਬੋਜ੍ਝਙ੍ਗੇ ਯਥਾਸਭਾਵੇਨ ਭਾਵੇਤ੍ਵਾ. ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਅਰਹਤ੍ਤਂ ਸਬ੍ਬਞ੍ਞੁਤਞ੍ਞਾਣਂ ਵਾ ਪਟਿਵਿਜ੍ਝਿਂਸੂਤਿ ਦਸ੍ਸੇਤਿ.

ਅਪਿਚੇਤ੍ਥ ਸਤਿਪਟ੍ਠਾਨਾਤਿ ਵਿਪਸ੍ਸਨਾ. ਸਮ੍ਬੋਜ੍ਝਙ੍ਗਾ ਮਗ੍ਗੋ. ਅਨੁਤ੍ਤਰਾਸਮ੍ਮਾਸਮ੍ਬੋਧਿ ਅਰਹਤ੍ਤਂ. ਸਤਿਪਟ੍ਠਾਨਾਤਿ ਵਾ ਮਗ੍ਗਾਤਿ ਵਾ ਬੋਜ੍ਝਙ੍ਗਮਿਸ੍ਸਕਾ. ਸਮ੍ਮਾਸਮ੍ਬੋਧਿ ਅਰਹਤ੍ਤਮੇਵ. ਦੀਘਭਾਣਕਮਹਾਸੀਵਤ੍ਥੇਰੋ ਪਨਾਹ ‘‘ਸਤਿਪਟ੍ਠਾਨੇ ਵਿਪਸ੍ਸਨਾਤਿ ਗਹੇਤ੍ਵਾ ਬੋਜ੍ਝਙ੍ਗੇ ਮਗ੍ਗੋ ਚ ਸਬ੍ਬਞ੍ਞੁਤਞ੍ਞਾਣਞ੍ਚਾਤਿ ਗਹਿਤੇ ਸੁਨ੍ਦਰੋ ਪਞ੍ਹੋ ਭਵੇਯ੍ਯ, ਨ ਪਨੇਵਂ ਗਹਿਤ’’ਨ੍ਤਿ. ਇਤਿ ਥੇਰੋ ਸਬ੍ਬਞ੍ਞੁਬੁਦ੍ਧਾਨਂ ਨੀਵਰਣਪ੍ਪਹਾਨੇ ਸਤਿਪਟ੍ਠਾਨਭਾਵਨਾਯ ਸਮ੍ਬੋਧਿਯਞ੍ਚ ਮਜ੍ਝੇ ਭਿਨ੍ਨਸੁਵਣ੍ਣਰਜਤਾਨਂ ਵਿਯ ਨਾਨਤ੍ਤਾਭਾਵਂ ਦਸ੍ਸੇਤਿ.

ਇਧ ਠਤ੍ਵਾ ਉਪਮਾ ਸਂਸਨ੍ਦੇਤਬ੍ਬਾ – ਆਯਸ੍ਮਾ ਹਿ ਸਾਰਿਪੁਤ੍ਤੋ ਪਚ੍ਚਨ੍ਤਨਗਰਂ ਦਸ੍ਸੇਸਿ, ਪਾਕਾਰਂ ਦਸ੍ਸੇਸਿ, ਪਰਿਯਾਯਪਥਂ ਦਸ੍ਸੇਸਿ, ਦ੍ਵਾਰਂ ਦਸ੍ਸੇਸਿ, ਪਣ੍ਡਿਤਦੋਵਾਰਿਕਂ ਦਸ੍ਸੇਸਿ, ਨਗਰਂ ਪਵੇਸਨਕਨਿਕ੍ਖਮਨਕੇ ਓਲ਼ਾਰਿਕੇ ਪਾਣੇ ਦਸ੍ਸੇਸਿ, ਪਣ੍ਡਿਤਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵਞ੍ਚ ਦਸ੍ਸੇਸਿ. ਤਤ੍ਥ ਕਿਂ ਕੇਨ ਸਦਿਸਨ੍ਤਿ ਚੇ. ਨਗਰਂ ਵਿਯ ਹਿ ਨਿਬ੍ਬਾਨਂ, ਪਾਕਾਰੋ ਵਿਯ ਸੀਲਂ, ਪਰਿਯਾਯਪਥੋ ਵਿਯ ਹਿਰੀ, ਦ੍ਵਾਰਂ ਵਿਯ ਅਰਿਯਮਗ੍ਗੋ, ਪਣ੍ਡਿਤਦੋਵਾਰਿਕੋ ਵਿਯ ਧਮ੍ਮਸੇਨਾਪਤਿ, ਨਗਰਪ੍ਪਵਿਸਨਕਨਿਕ੍ਖਮਨਕਓਲ਼ਾਰਿਕਪਾਣਾ ਵਿਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਬੁਦ੍ਧਾ, ਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵੋ ਵਿਯ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਅਤੀਤਾਨਾਗਤਪਚ੍ਚੁਪ੍ਪਨ੍ਨਬੁਦ੍ਧਾਨਂ ਸੀਲਸਮਥਾਦੀਹਿ ਪਾਕਟਭਾਵੋ. ਏਤ੍ਤਾਵਤਾ ਥੇਰੇਨ ਭਗਵਾ ਏਵਮਹਂ ਸਾਵਕਪਾਰਮੀਞਾਣੇ ਠਤ੍ਵਾ ਧਮ੍ਮਨ੍ਵਯੇਨ ਨਯਗ੍ਗਾਹੇਨ ਜਾਨਾਮੀਤਿ ਅਤ੍ਤਨੋ ਸੀਹਨਾਦਸ੍ਸ ਅਨੁਯੋਗੋ ਦਿਨ੍ਨੋ ਹੋਤਿ.

੧੪੪. ਇਧਾਹਂ, ਭਨ੍ਤੇ, ਯੇਨ ਭਗਵਾਤਿ ਇਮਂ ਦੇਸਨਂ ਕਸ੍ਮਾ ਆਰਭਿ? ਸਾਵਕਪਾਰਮੀਞਾਣਸ੍ਸ ਨਿਪ੍ਫਤ੍ਤਿਦਸ੍ਸਨਤ੍ਥਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ, ਭਗਵਾ ਅਹਂ ਸਾਵਕਪਾਰਮੀਞਾਣਂ ਪਟਿਲਭਨ੍ਤੋ ਪਞ੍ਚਨਵੁਤਿਪਾਸਣ੍ਡੇ ਨ ਅਞ੍ਞਂ ਏਕਮ੍ਪਿ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਸਾਵਕਪਾਰਮੀਞਾਣਮ੍ਪਿ ਪਟਿਲਭਿਂ, ਤੁਮ੍ਹੇਯੇਵ ਉਪਸਙ੍ਕਮਿਤ੍ਵਾ ਤੁਮ੍ਹੇ ਪਯਿਰੁਪਾਸਨ੍ਤੋ ਪਟਿਲਭਿਨ੍ਤਿ. ਤਤ੍ਥ ਇਧਾਤਿ ਨਿਪਾਤਮਤ੍ਤਂ. ਉਪਸਙ੍ਕਮਿਂ ਧਮ੍ਮਸਵਨਾਯਾਤਿ ਤੁਮ੍ਹੇ ਉਪਸਙ੍ਕਮਨ੍ਤੋ ਪਨਾਹਂ ਨ ਚੀਵਰਾਦਿਹੇਤੁ ਉਪਸਙ੍ਕਮਨ੍ਤੋ, ਧਮ੍ਮਸਵਨਤ੍ਥਾਯ ਉਪਸਙ੍ਕਮਨ੍ਤੋ. ਏਵਂ ਉਪਸਙ੍ਕਮਿਤ੍ਵਾ ਸਾਵਕਪਾਰਮੀਞਾਣਂ ਪਟਿਲਭਿਂ. ਕਦਾ ਪਨ ਥੇਰੋ ਧਮ੍ਮਸਵਨਤ੍ਥਾਯ ਉਪਸਙ੍ਕਮਨ੍ਤੋਤਿ. ਸੂਕਰਖਤਲੇਣੇ ਭਾਗਿਨੇਯ੍ਯਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤਨ੍ਤਕਥਨਦਿਵਸੇ (ਮ. ਨਿ. ੨.੨੦੫) ਉਪਸਙ੍ਕਮਨ੍ਤੋ, ਤਦਾਯੇਵ ਸਾਵਕਪਾਰਮੀਞਾਣਂ ਪਟਿਲਭੀਤਿ. ਤਂਦਿਵਸਞ੍ਹਿ ਥੇਰੋ ਤਾਲਵਣ੍ਟਂ ਗਹੇਤ੍ਵਾ ਭਗਵਨ੍ਤਂ ਬੀਜਮਾਨੋ ਠਿਤੋ ਤਂ ਦੇਸਨਂ ਸੁਤ੍ਵਾ ਤਤ੍ਥੇਵ ਸਾਵਕਪਾਰਮੀਞਾਣਂ ਹਤ੍ਥਗਤਂ ਅਕਾਸਿ. ਉਤ੍ਤਰੁਤ੍ਤਰਂ ਪਣੀਤਪਣੀਤਨ੍ਤਿ ਉਤ੍ਤਰੁਤ੍ਤਰਞ੍ਚੇਵ ਪਣੀਤਪਣੀਤਞ੍ਚ ਕਤ੍ਵਾ ਦੇਸੇਸਿ. ਕਣ੍ਹਸੁਕ੍ਕਸਪ੍ਪਟਿਭਾਗਨ੍ਤਿ ਕਣ੍ਹਞ੍ਚੇਵ ਸੁਕ੍ਕਞ੍ਚ. ਤਞ੍ਚ ਖੋ ਸਪ੍ਪਟਿਭਾਗਂ ਸਵਿਪਕ੍ਖਂ ਕਤ੍ਵਾ. ਕਣ੍ਹਂ ਪਟਿਬਾਹਿਤ੍ਵਾ ਸੁਕ੍ਕਂ, ਸੁਕ੍ਕਂ ਪਟਿਬਾਹਿਤ੍ਵਾ ਕਣ੍ਹਨ੍ਤਿ ਏਵਂ ਸਪ੍ਪਟਿਭਾਗਂ ਕਤ੍ਵਾ ਕਣ੍ਹਸੁਕ੍ਕਂ ਦੇਸੇਸਿ, ਕਣ੍ਹਂ ਦੇਸੇਨ੍ਤੋਪਿ ਚ ਸਉਸ੍ਸਾਹਂ ਸਵਿਪਾਕਂ ਦੇਸੇਸਿ, ਸੁਕ੍ਕਂ ਦੇਸੇਨ੍ਤੋਪਿ ਸਉਸ੍ਸਾਹਂ ਸਵਿਪਾਕਂ ਦੇਸੇਸਿ.

ਤਸ੍ਮਿਂ ਧਮ੍ਮੇ ਅਭਿਞ੍ਞਾ ਇਧੇਕਚ੍ਚਂ ਧਮ੍ਮਂ ਧਮ੍ਮੇਸੁ ਨਿਟ੍ਠਮਗਮਨ੍ਤਿ ਤਸ੍ਮਿਂ ਦੇਸਿਤੇ ਧਮ੍ਮੇ ਏਕਚ੍ਚਂ ਧਮ੍ਮਂ ਨਾਮ ਸਾਵਕਪਾਰਮੀਞਾਣਂ ਸਞ੍ਜਾਨਿਤ੍ਵਾ ਧਮ੍ਮੇਸੁ ਨਿਟ੍ਠਮਗਮਂ. ਕਤਮੇਸੁ ਧਮ੍ਮੇਸੂਤਿ? ਚਤੁਸਚ੍ਚਧਮ੍ਮੇਸੁ. ਏਤ੍ਥਾਯਂ ਥੇਰਸਲ੍ਲਾਪੋ, ਕਾਲ਼ਵਲ੍ਲਵਾਸੀ ਸੁਮਤ੍ਥੇਰੋ ਤਾਵ ਵਦਤਿ ‘‘ਚਤੁਸਚ੍ਚਧਮ੍ਮੇਸੁ ਇਦਾਨਿ ਨਿਟ੍ਠਗਮਨਕਾਰਣਂ ਨਤ੍ਥਿ. ਅਸ੍ਸਜਿਮਹਾਸਾਵਕਸ੍ਸ ਹਿ ਦਿਟ੍ਠਦਿਵਸੇਯੇਵ ਸੋ ਪਠਮਮਗ੍ਗੇਨ ਚਤੁਸਚ੍ਚਧਮ੍ਮੇਸੁ ਨਿਟ੍ਠਂ ਗਤੋ, ਅਪਰਭਾਗੇ ਸੂਕਰਖਤਲੇਣਦ੍ਵਾਰੇ ਉਪਰਿ ਤੀਹਿ ਮਗ੍ਗੇਹਿ ਚਤੁਸਚ੍ਚਧਮ੍ਮੇਸੁ ਨਿਟ੍ਠਂ ਗਤੋ, ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਬੁਦ੍ਧਗੁਣੇਸੁ ਨਿਟ੍ਠਂ ਗਤੋ’’ਤਿ. ਲੋਕਨ੍ਤਰਵਾਸੀ ਚੂਲ਼ਸੀਵਤ੍ਥੇਰੋ ਪਨ ‘‘ਸਬ੍ਬਂ ਤਥੇਵ ਵਤ੍ਵਾ ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਅਰਹਤ੍ਤੇ ਨਿਟ੍ਠਂ ਗਤੋ’’ਤਿ ਆਹ. ਦੀਘਭਾਣਕਤਿਪਿਟਕਮਹਾਸੀਵਤ੍ਥੇਰੋ ਪਨ ‘‘ਤਥੇਵ ਪੁਰਿਮਵਾਦਂ ਵਤ੍ਵਾ ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਸਾਵਕਪਾਰਮੀਞਾਣੇ ਨਿਟ੍ਠਂ ਗਤੋ’’ਤਿ ਵਤ੍ਵਾ ‘‘ਬੁਦ੍ਧਗੁਣਾ ਪਨ ਨਯਤੋ ਆਗਤਾ’’ਤਿ ਆਹ.

ਸਤ੍ਥਰਿ ਪਸੀਦਿਨ੍ਤਿ ਏਵਂ ਸਾਵਕਪਾਰਮੀਞਾਣਧਮ੍ਮੇਸੁ ਨਿਟ੍ਠਂ ਗਨ੍ਤ੍ਵਾ ਭਿਯ੍ਯੋਸੋਮਤ੍ਤਾਯ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ’’ਤਿ ਸਤ੍ਥਰਿ ਪਸੀਦਿਂ. ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋਤਿ ਸੁਟ੍ਠੁ ਅਕ੍ਖਾਤੋ ਸੁਕਥਿਤੋ ਨਿਯ੍ਯਾਨਿਕੋ ਮਗ੍ਗੋ ਫਲਤ੍ਥਾਯ ਨਿਯ੍ਯਾਤਿ ਰਾਗਦੋਸਮੋਹਨਿਮ੍ਮਦਨਸਮਤ੍ਥੋ.

ਸੁਪ੍ਪਟਿਪਨ੍ਨੋ ਸਙ੍ਘੋਤਿ ਬੁਦ੍ਧਸ੍ਸ ਭਗਵਤੋ ਸਾਵਕਸਙ੍ਘੋਪਿ ਵਙ੍ਕਾਦਿਦੋਸਵਿਰਹਿਤਂ ਸਮ੍ਮਾਪਟਿਪਦਂ ਪਟਿਪਨ੍ਨਤ੍ਤਾ ਸੁਪ੍ਪਟਿਪਨ੍ਨੋਤਿ ਪਸਨ੍ਨੋਮ੍ਹਿ ਭਗਵਤੀਤਿ ਦਸ੍ਸੇਤਿ.

ਕੁਸਲਧਮ੍ਮਦੇਸਨਾਵਣ੍ਣਨਾ

੧੪੫. ਇਦਾਨਿ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ਸਮਾਪਜ੍ਜਿਤੇ ਸੋਲ਼ਸ ਅਪਰਾਪਰਿਯਧਮ੍ਮੇ ਦਸ੍ਸੇਤੁਂ ਅਪਰਂ ਪਨ ਭਨ੍ਤੇ ਏਤਦਾਨੁਤ੍ਤਰਿਯਨ੍ਤਿ ਦੇਸਨਂ ਆਰਭਿ. ਤਤ੍ਥ ਅਨੁਤ੍ਤਰਿਯਨ੍ਤਿ ਅਨੁਤ੍ਤਰਭਾਵੋ. ਯਥਾ ਭਗਵਾ ਧਮ੍ਮਂ ਦੇਸੇਤੀਤਿ ਯਥਾ ਯੇਨਾਕਾਰੇਨ ਯਾਯ ਦੇਸਨਾਯ ਭਗਵਾ ਧਮ੍ਮਂ ਦੇਸੇਤਿ, ਸਾ ਤੁਮ੍ਹਾਕਂ ਦੇਸਨਾ ਅਨੁਤ੍ਤਰਾਤਿ ਵਦਤਿ. ਕੁਸਲੇਸੁ ਧਮ੍ਮੇਸੂਤਿ ਤਾਯ ਦੇਸਨਾਯ ਦੇਸਿਤੇਸੁ ਕੁਸਲੇਸੁ ਧਮ੍ਮੇਸੁਪਿ ਭਗਵਾਵ ਅਨੁਤ੍ਤਰੋਤਿ ਦੀਪੇਤਿ. ਯਾ ਵਾ ਸਾ ਦੇਸਨਾ, ਤਸ੍ਸਾ ਭੂਮਿਂ ਦਸ੍ਸੇਨ੍ਤੋਪਿ ‘‘ਕੁਸਲੇਸੁ ਧਮ੍ਮੇਸੂ’’ਤਿ ਆਹ. ਤਤ੍ਰਿਮੇ ਕੁਸਲਾ ਧਮ੍ਮਾਤਿ ਤਤ੍ਰ ਕੁਸਲੇਸੁ ਧਮ੍ਮੇਸੂਤਿ ਵੁਤ੍ਤਪਦੇ ਇਮੇ ਕੁਸਲਾ ਧਮ੍ਮਾ ਨਾਮਾਤਿ ਵੇਦਿਤਬ੍ਬਾ. ਤਤ੍ਥ ਆਰੋਗ੍ਯਟ੍ਠੇਨ, ਅਨਵਜ੍ਜਟ੍ਠੇਨ, ਕੋਸਲ੍ਲਸਮ੍ਭੂਤਟ੍ਠੇਨ, ਨਿਦ੍ਦਰਥਟ੍ਠੇਨ, ਸੁਖਵਿਪਾਕਟ੍ਠੇਨਾਤਿ ਪਞ੍ਚਧਾ ਕੁਸਲਂ ਵੇਦਿਤਬ੍ਬਂ. ਤੇਸੁ ਜਾਤਕਪਰਿਯਾਯਂ ਪਤ੍ਵਾ ਆਰੋਗ੍ਯਟ੍ਠੇਨ ਕੁਸਲਂ ਵਟ੍ਟਤਿ. ਸੁਤ੍ਤਨ੍ਤਪਰਿਯਾਯਂ ਪਤ੍ਵਾ ਅਨਵਜ੍ਜਟ੍ਠੇਨ. ਅਭਿਧਮ੍ਮਪਰਿਯਾਯਂ ਪਤ੍ਵਾ ਕੋਸਲ੍ਲਸਮ੍ਭੂਤਨਿਦ੍ਦਰਥਸੁਖਵਿਪਾਕਟ੍ਠੇਨ. ਇਮਸ੍ਮਿਂ ਪਨ ਠਾਨੇ ਬਾਹਿਤਿਕਸੁਤ੍ਤਨ੍ਤਪਰਿਯਾਯੇਨ (ਮ. ਨਿ. ੨.੩੫੮) ਅਨਵਜ੍ਜਟ੍ਠੇਨ ਕੁਸਲਂ ਦਟ੍ਠਬ੍ਬਂ.

ਚਤ੍ਤਾਰੋ ਸਤਿਪਟ੍ਠਾਨਾਤਿ ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨਂ, ਨਵਵਿਧੇਨ ਵੇਦਨਾਨੁਪਸ੍ਸਨਾਸਤਿਪਟ੍ਠਾਨਂ, ਸੋਲ਼ਸਵਿਧੇਨ ਚਿਤ੍ਤਾਨੁਪਸ੍ਸਨਾਸਤਿਪਟ੍ਠਾਨਂ, ਪਞ੍ਚਵਿਧੇਨ ਧਮ੍ਮਾਨੁਪਸ੍ਸਨਾਸਤਿਪਟ੍ਠਾਨਨ੍ਤਿ ਏਵਂ ਨਾਨਾਨਯੇਹਿ ਵਿਭਜਿਤ੍ਵਾ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾ ਚਤ੍ਤਾਰੋ ਸਤਿਪਟ੍ਠਾਨਾ ਦੇਸਿਤਾ. ਫਲਸਤਿਪਟ੍ਠਾਨਂ ਪਨ ਇਧ ਅਨਧਿਪ੍ਪੇਤਂ. ਚਤ੍ਤਾਰੋ ਸਮ੍ਮਪ੍ਪਧਾਨਾਤਿ ਪਗ੍ਗਹਟ੍ਠੇਨ ਏਕਲਕ੍ਖਣਾ, ਕਿਚ੍ਚਵਸੇਨ ਨਾਨਾਕਿਚ੍ਚਾ. ‘‘ਇਧ ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯਾ’’ਤਿਆਦਿਨਾ ਨਯੇਨ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਚਤ੍ਤਾਰੋ ਸਮ੍ਮਪ੍ਪਧਾਨਾ ਦੇਸਿਤਾ. ਚਤ੍ਤਾਰੋ ਇਦ੍ਧਿਪਾਦਾਤਿ ਇਜ੍ਝਨਟ੍ਠੇਨ ਏਕਸਙ੍ਗਹਾ, ਛਨ੍ਦਾਦਿਵਸੇਨ ਨਾਨਾਸਭਾਵਾ. ‘‘ਇਧ ਭਿਕ੍ਖੁ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤੀ’’ਤਿਆਦਿਨਾ ਨਯੇਨ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਚਤ੍ਤਾਰੋ ਇਦ੍ਧਿਪਾਦਾ ਦੇਸਿਤਾ.

ਪਞ੍ਚਿਨ੍ਦ੍ਰਿਯਾਨੀਤਿ ਆਧਿਪਤੇਯ੍ਯਟ੍ਠੇਨ ਏਕਲਕ੍ਖਣਾਨਿ, ਅਧਿਮੋਕ੍ਖਾਦਿਸਭਾਵਵਸੇਨ ਨਾਨਾਸਭਾਵਾਨਿ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਚ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨਿ ਦੇਸਿਤਾਨਿ. ਪਞ੍ਚ ਬਲਾਨੀਤਿ ਉਪਤ੍ਥਮ੍ਭਨਟ੍ਠੇਨ ਅਕਮ੍ਪਿਯਟ੍ਠੇਨ ਵਾ ਏਕਸਙ੍ਗਹਾਨਿ, ਸਲਕ੍ਖਣੇਨ ਨਾਨਾਸਭਾਵਾਨਿ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਸਦ੍ਧਾਦੀਨਿ ਪਞ੍ਚ ਬਲਾਨਿ ਦੇਸਿਤਾਨਿ. ਸਤ੍ਤ ਬੋਜ੍ਝਙ੍ਗਾਤਿ ਨਿਯ੍ਯਾਨਟ੍ਠੇਨ ਏਕਸਙ੍ਗਹਾ, ਉਪਟ੍ਠਾਨਾਦਿਨਾ ਸਲਕ੍ਖਣੇਨ ਨਾਨਾਸਭਾਵਾ. ਸਮਥਵਿਪਸ੍ਸਨਾ ਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕਾ ਸਤ੍ਤ ਬੋਜ੍ਝਙ੍ਗਾ ਦੇਸਿਤਾ.

ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋਤਿ ਹੇਤੁਟ੍ਠੇਨ ਏਕਸਙ੍ਗਹੋ, ਦਸ੍ਸਨਾਦਿਨਾ ਸਲਕ੍ਖਣੇਨ ਨਾਨਾਸਭਾਵੋ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕੋ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਦੇਸਿਤੋਤਿ ਅਤ੍ਥੋ.

ਇਧ, ਭਨ੍ਤੇ, ਭਿਕ੍ਖੁ ਆਸਵਾਨਂ ਖਯਾਤਿ ਇਦਂ ਕਿਮਤ੍ਥਂ ਆਰਦ੍ਧਂ? ਸਾਸਨਸ੍ਸ ਪਰਿਯੋਸਾਨਦਸ੍ਸਨਤ੍ਥਂ. ਸਾਸਨਸ੍ਸ ਹਿ ਨ ਕੇਵਲਂ ਮਗ੍ਗੇਨੇਵ ਪਰਿਯੋਸਾਨਂ ਹੋਤਿ, ਅਰਹਤ੍ਤਫਲੇਨ ਪਨ ਹੋਤਿ. ਤਸ੍ਮਾ ਤਂ ਦਸ੍ਸੇਤੁਂ ਇਦਮਾਰਦ੍ਧਨ੍ਤਿ ਵੇਦਿਤਬ੍ਬਂ. ਏਤਦਾਨੁਤ੍ਤਰਿਯਂ, ਭਨ੍ਤੇ, ਕੁਸਲੇਸੁ ਧਮ੍ਮੇਸੂਤਿ ਭਨ੍ਤੇ ਯਾ ਅਯਂ ਕੁਸਲੇਸੁ ਧਮ੍ਮੇਸੁ ਏਵਂਦੇਸਨਾ, ਏਤਦਾਨੁਤ੍ਤਰਿਯਂ. ਤਂ ਭਗਵਾਤਿ ਤਂ ਦੇਸਨਂ ਭਗਵਾ ਅਸੇਸਂ ਸਕਲਂ ਅਭਿਜਾਨਾਤਿ. ਤਂ ਭਗਵਤੋਤਿ ਤਂ ਦੇਸਨਂ ਭਗਵਤੋ ਅਸੇਸਂ ਅਭਿਜਾਨਤੋ. ਉਤ੍ਤਰਿ ਅਭਿਞ੍ਞੇਯ੍ਯਂ ਨਤ੍ਥੀਤਿ ਤਦੁਤ੍ਤਰਿ ਅਭਿਜਾਨਿਤਬ੍ਬਂ ਨਤ੍ਥਿ, ਅਯਂ ਨਾਮ ਇਤੋ ਅਞ੍ਞੋ ਧਮ੍ਮੋ ਵਾ ਪੁਗ੍ਗਲੋ ਵਾ ਯਂ ਭਗਵਾ ਨ ਜਾਨਾਤੀਤਿ ਇਦਂ ਨਤ੍ਥਿ. ਯਦਭਿਜਾਨਂ ਅਞ੍ਞੋ ਸਮਣੋ ਵਾਤਿ ਯਂ ਤੁਮ੍ਹੇਹਿ ਅਨਭਿਞ੍ਞਾਤਂ, ਤਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਭਿਜਾਨਨ੍ਤੋ ਭਗਵਤਾ ਭਿਯ੍ਯੋਭਿਞ੍ਞਤਰੋ ਅਸ੍ਸ, ਅਧਿਕਤਰਪਞ੍ਞੋ ਭਵੇਯ੍ਯ. ਯਦਿਦਂ ਕੁਸਲੇਸੁ ਧਮ੍ਮੇਸੂਤਿ ਏਤ੍ਥ ਯਦਿਦਨ੍ਤਿ ਨਿਪਾਤਮਤ੍ਤਂ, ਕੁਸਲੇਸੁ ਧਮ੍ਮੇਸੁ ਭਗਵਤਾ ਉਤ੍ਤਰਿਤਰੋ ਨਤ੍ਥੀਤਿ ਅਯਮੇਤ੍ਥਤ੍ਥੋ. ਇਤਿ ਭਗਵਾਵ ਕੁਸਲੇਸੁ ਧਮ੍ਮੇਸੁ ਅਨੁਤ੍ਤਰੋਤਿ ਦਸ੍ਸੇਨ੍ਤੋ ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ ਦੀਪੇਤਿ. ਇਤੋ ਪਰੇਸੁ ਅਪਰਂ ਪਨਾਤਿਆਦੀਸੁ ਵਿਸੇਸਮਤ੍ਤਮੇਵ ਵਣ੍ਣਯਿਸ੍ਸਾਮ. ਪੁਰਿਮਵਾਰਸਦਿਸਂ ਪਨ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਆਯਤਨਪਣ੍ਣਤ੍ਤਿਦੇਸਨਾਵਣ੍ਣਨਾ

੧੪੬. ਆਯਤਨਪਣ੍ਣਤ੍ਤੀਸੂਤਿ ਆਯਤਨਪਞ੍ਞਾਪਨਾਸੁ. ਇਦਾਨਿ ਤਾ ਆਯਤਨਪਞ੍ਞਤ੍ਤਿਯੋ ਦਸ੍ਸੇਨ੍ਤੋ ਛਯਿਮਾਨਿ, ਭਨ੍ਤੇਤਿਆਦਿਮਾਹ. ਆਯਤਨਕਥਾ ਪਨੇਸਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰੇਨ ਕਥਿਤਾ, ਤੇਨ ਨ ਤਂ ਵਿਤ੍ਥਾਰਯਿਸ੍ਸਾਮ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਸਾ ਵਿਤ੍ਥਾਰਤੋ ਵੇਦਿਤਬ੍ਬਾ.

ਏਤਦਾਨੁਤ੍ਤਰਿਯਂ, ਭਨ੍ਤੇ, ਆਯਤਨਪਣ੍ਣਤ੍ਤੀਸੂਤਿ ਯਾਯਂ ਆਯਤਨਪਣ੍ਣਤ੍ਤੀਸੁ ਅਜ੍ਝਤ੍ਤਿਕਬਾਹਿਰਵਵਤ੍ਥਾਨਾਦਿਵਸੇਨ ਏਵਂ ਦੇਸਨਾ, ਏਤਦਾਨੁਤ੍ਤਰਿਯਂ. ਸੇਸਂ ਵੁਤ੍ਤਨਯਮੇਵ.

ਗਬ੍ਭਾਵਕ੍ਕਨ੍ਤਿਦੇਸਨਾਵਣ੍ਣਨਾ

੧੪੭. ਗਬ੍ਭਾਵਕ੍ਕਨ੍ਤੀਸੂਤਿ ਗਬ੍ਭੋਕ੍ਕਮਨੇਸੁ. ਤਾ ਗਬ੍ਭਾਵਕ੍ਕਨ੍ਤਿਯੋ ਦਸ੍ਸੇਨ੍ਤੋ ਚਤਸ੍ਸੋ ਇਮਾ, ਭਨ੍ਤੇਤਿਆਦਿਮਾਹ. ਤਤ੍ਥ ਅਸਮ੍ਪਜਾਨੋਤਿ ਅਜਾਨਨ੍ਤੋ ਸਮ੍ਮੂਲ਼੍ਹੋ ਹੁਤ੍ਵਾ. ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਪਟਿਸਨ੍ਧਿਵਸੇਨ ਪਵਿਸਤਿ. ਠਾਤੀਤਿ ਵਸਤਿ. ਨਿਕ੍ਖਮਤੀਤਿ ਨਿਕ੍ਖਮਨ੍ਤੋਪਿ ਅਸਮ੍ਪਜਾਨੋ ਸਮ੍ਮੂਲ਼੍ਹੋਵ ਨਿਕ੍ਖਮਤਿ. ਅਯਂ ਪਠਮਾਤਿ ਅਯਂ ਪਕਤਿਲੋਕਿਯਮਨੁਸ੍ਸਾਨਂ ਪਠਮਾ ਗਬ੍ਭਾਵਕ੍ਕਨ੍ਤਿ.

ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਓਕ੍ਕਮਨ੍ਤੋ ਸਮ੍ਪਜਾਨੋ ਅਸਮ੍ਮੂਲ਼੍ਹੋ ਹੁਤ੍ਵਾ ਓਕ੍ਕਮਤਿ.

ਅਯਂ ਦੁਤਿਯਾਤਿ ਅਯਂ ਅਸੀਤਿਮਹਾਥੇਰਾਨਂ ਸਾਵਕਾਨਂ ਦੁਤਿਯਾ ਗਬ੍ਭਾਵਕ੍ਕਨ੍ਤਿ. ਤੇ ਹਿ ਪਵਿਸਨ੍ਤਾਵ ਜਾਨਨ੍ਤਿ, ਵਸਨ੍ਤਾ ਚ ਨਿਕ੍ਖਮਨ੍ਤਾ ਚ ਨ ਜਾਨਨ੍ਤਿ.

ਅਯਂ ਤਤਿਯਾਤਿ ਅਯਂ ਦ੍ਵਿਨ੍ਨਞ੍ਚ ਅਗ੍ਗਸਾਵਕਾਨਂ ਪਚ੍ਚੇਕਬੋਧਿਸਤ੍ਤਾਨਞ੍ਚ ਤਤਿਯਾ ਗਬ੍ਭਾਵਕ੍ਕਨ੍ਤਿ. ਤੇ ਕਿਰ ਕਮ੍ਮਜੇਹਿ ਵਾਤੇਹਿ ਅਧੋਸਿਰਾ ਉਦ੍ਧਂਪਾਦਾ ਅਨੇਕਸਤਪੋਰਿਸੇ ਪਪਾਤੇ ਵਿਯ ਯੋਨਿਮੁਖੇ ਖਿਤ੍ਤਾ ਤਾਲ਼ਚ੍ਛਿਗ੍ਗਲ਼ੇਨ ਹਤ੍ਥੀ ਵਿਯ ਸਮ੍ਬਾਧੇਨ ਯੋਨਿਮੁਖੇਨ ਨਿਕ੍ਖਮਮਾਨਾ ਅਨਨ੍ਤਂ ਦੁਕ੍ਖਂ ਪਾਪੁਣਨ੍ਤਿ. ਤੇਨ ਨੇਸਂ ‘‘ਮਯਂ ਨਿਕ੍ਖਮਮ੍ਹਾ’’ਤਿ ਸਮ੍ਪਜਾਨਤਾ ਨ ਹੋਤਿ. ਏਵਂ ਪੂਰਿਤਪਾਰਮੀਨਮ੍ਪਿ ਚ ਸਤ੍ਤਾਨਂ ਏਵਰੂਪੇ ਠਾਨੇ ਮਹਨ੍ਤਂ ਦੁਕ੍ਖਂ ਉਪ੍ਪਜ੍ਜਤੀਤਿ ਅਲਮੇਵ ਗਬ੍ਭਾਵਾਸੇ ਨਿਬ੍ਬਿਨ੍ਦਿਤੁਂ ਅਲਂ ਵਿਰਜ੍ਜਿਤੁਂ.

ਅਯਂ ਚਤੁਤ੍ਥਾਤਿ ਅਯਂ ਸਬ੍ਬਞ੍ਞੁਬੋਧਿਸਤ੍ਤਾਨਂ ਵਸੇਨ ਚਤੁਤ੍ਥਾ ਗਬ੍ਭਾਵਕ੍ਕਨ੍ਤਿ. ਸਬ੍ਬਞ੍ਞੁਬੋਧਿਸਤ੍ਤਾ ਹਿ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਨ੍ਤਾਪਿ ਜਾਨਨ੍ਤਿ, ਤਤ੍ਥ ਵਸਨ੍ਤਾਪਿ ਜਾਨਨ੍ਤਿ, ਨਿਕ੍ਖਮਨ੍ਤਾਪਿ ਜਾਨਨ੍ਤਿ, ਨਿਕ੍ਖਮਨਕਾਲੇਪਿ ਚ ਤੇ ਕਮ੍ਮਜਵਾਤਾ ਉਦ੍ਧਂਪਾਦੇ ਅਧੋਸਿਰੇ ਕਤ੍ਵਾ ਖਿਪਿਤੁਂ ਨ ਸਕ੍ਕੋਨ੍ਤਿ, ਦ੍ਵੇ ਹਤ੍ਥੇ ਪਸਾਰੇਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਠਿਤਕਾਵ ਨਿਕ੍ਖਮਨ੍ਤਿ. ਭਵਗ੍ਗਂ ਉਪਾਦਾਯ ਅਵੀਚਿਅਨ੍ਤਰੇ ਅਞ੍ਞੋ ਤੀਸੁ ਕਾਲੇਸੁ ਸਮ੍ਪਜਾਨੋ ਨਾਮ ਨਤ੍ਥਿ ਠਪੇਤ੍ਵਾ ਸਬ੍ਬਞ੍ਞੁਬੋਧਿਸਤ੍ਤੇ. ਤੇਨੇਵ ਨੇਸਂ ਮਾਤੁਕੁਚ੍ਛਿਂ ਓਕ੍ਕਮਨਕਾਲੇ ਚ ਨਿਕ੍ਖਮਨਕਾਲੇ ਚ ਦਸਸਹਸ੍ਸਿਲੋਕਧਾਤੁ ਕਮ੍ਪਤੀਤਿ. ਸੇਸਮੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਆਦੇਸਨਵਿਧਾਦੇਸਨਾਵਣ੍ਣਨਾ

੧੪੮. ਆਦੇਸਨਵਿਧਾਸੂਤਿ ਆਦੇਸਨਕੋਟ੍ਠਾਸੇਸੁ. ਇਦਾਨਿ ਤਾ ਆਦੇਸਨਵਿਧਾ ਦਸ੍ਸੇਨ੍ਤੋ ਚਤਸ੍ਸੋ ਇਮਾਤਿਆਦਿਮਾਹ. ਨਿਮਿਤ੍ਤੇਨ ਆਦਿਸਤੀਤਿ ਆਗਤਨਿਮਿਤ੍ਤੇਨ ਗਤਨਿਮਿਤ੍ਤੇਨ ਠਿਤਨਿਮਿਤ੍ਤੇਨ ਵਾ ਇਦਂ ਨਾਮ ਭਵਿਸ੍ਸਤੀਤਿ ਕਥੇਤਿ.

ਤਤ੍ਰਿਦਂ ਵਤ੍ਥੁ – ਏਕੋ ਰਾਜਾ ਤਿਸ੍ਸੋ ਮੁਤ੍ਤਾ ਗਹੇਤ੍ਵਾ ਪੁਰੋਹਿਤਂ ਪੁਚ੍ਛਿ ‘‘ਕਿਂ ਮੇ, ਆਚਰਿਯ, ਹਤ੍ਥੇ’’ਤਿ? ਸੋ ਇਤੋ ਚਿਤੋ ਚ ਓਲੋਕੇਸਿ. ਤੇਨ ਚ ਸਮਯੇਨ ਏਕਾ ਸਰਬੂ ‘‘ਮਕ੍ਖਿਕਂ ਗਹੇਸ੍ਸਾਮੀ’’ਤਿ ਪਕ੍ਖਨ੍ਦਿ, ਗਹਣਕਾਲੇ ਮਕ੍ਖਿਕਾ ਪਲਾਤਾ, ਸੋ ਮਕ੍ਖਿਕਾਯ ਮੁਤ੍ਤਤ੍ਤਾ ‘‘ਮੁਤ੍ਤਾ ਮਹਾਰਾਜਾ’’ਤਿ ਆਹ. ਮੁਤ੍ਤਾ ਤਾਵ ਹੋਤੁ, ਕਤਿ ਮੁਤ੍ਤਾਤਿ? ਸੋ ਪੁਨ ਨਿਮਿਤ੍ਤਂ ਓਲੋਕੇਸਿ. ਅਥ ਅਵਿਦੂਰੇ ਕੁਕ੍ਕੁਟੋ ਤਿਕ੍ਖਤ੍ਤੁਂ ਸਦ੍ਦਂ ਨਿਚ੍ਛਾਰੇਸਿ. ਬ੍ਰਾਹ੍ਮਣੋ ‘‘ਤਿਸ੍ਸੋ ਮਹਾਰਾਜਾ’’ਤਿ ਆਹ. ਏਵਂ ਏਕਚ੍ਚੋ ਆਗਤਨਿਮਿਤ੍ਤੇਨ ਕਥੇਤਿ. ਏਤੇਨੁਪਾਯੇਨ ਗਤਠਿਤਨਿ ਮਿਤ੍ਤੇਹਿਪਿ ਕਥਨਂ ਵੇਦਿਤਬ੍ਬਂ.

ਅਮਨੁਸ੍ਸਾਨਨ੍ਤਿ ਯਕ੍ਖਪਿਸਾਚਾਦੀਨਂ. ਦੇਵਤਾਨਨ੍ਤਿ ਚਾਤੁਮਹਾਰਾਜਿਕਾਦੀਨਂ. ਸਦ੍ਦਂ ਸੁਤ੍ਵਾਤਿ ਅਞ੍ਞਸ੍ਸ ਚਿਤ੍ਤਂ ਞਤ੍ਵਾ ਕਥੇਨ੍ਤਾਨਂ ਸਦ੍ਦਂ ਸੁਤ੍ਵਾ. ਵਿਤਕ੍ਕਵਿਪ੍ਫਾਰਸਦ੍ਦਨ੍ਤਿ ਵਿਤਕ੍ਕਵਿਪ੍ਫਾਰਵਸੇਨ ਉਪ੍ਪਨ੍ਨਂ ਵਿਪ੍ਪਲਪਨ੍ਤਾਨਂ ਸੁਤ੍ਤਪਮਤ੍ਤਾਦੀਨਂ ਸਦ੍ਦਂ. ਸੁਤ੍ਵਾਤਿ ਤਂ ਸਦ੍ਦਂ ਸੁਤ੍ਵਾ. ਯਂ ਵਿਤਕ੍ਕਯਤੋ ਤਸ੍ਸ ਸੋ ਸਦ੍ਦੋ ਉਪ੍ਪਨ੍ਨੋ, ਤਸ੍ਸ ਵਸੇਨ ‘‘ਏਵਮ੍ਪਿ ਤੇ ਮਨੋ’’ਤਿ ਆਦਿਸਤਿ. ਮਨੋਸਙ੍ਖਾਰਾ ਪਣਿਹਿਤਾਤਿ ਚਿਤ੍ਤਸਙ੍ਖਾਰਾ ਸੁਟ੍ਠਪਿਤਾ. ਵਿਤਕ੍ਕੇਸ੍ਸਤੀਤਿ ਵਿਤਕ੍ਕਯਿਸ੍ਸਤਿ ਪਵਤ੍ਤੇਸ੍ਸਤੀਤਿ ਪਜਾਨਾਤਿ. ਜਾਨਨ੍ਤੋ ਚ ਆਗਮਨੇਨ ਜਾਨਾਤਿ, ਪੁਬ੍ਬਭਾਗੇਨ ਜਾਨਾਤਿ, ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ. ਆਗਮਨੇਨ ਜਾਨਾਤਿ ਨਾਮ ਕਸਿਣਪਰਿਕਮ੍ਮਕਾਲੇਯੇਵ ਯੇਨਾਕਾਰੇਨ ਏਸ ਕਸਿਣਭਾਵਨਂ ਆਰਦ੍ਧੋ ਪਠਮਜ੍ਝਾਨਂ ਵਾ…ਪੇ… ਚਤੁਤ੍ਥਜ੍ਝਾਨਂ ਵਾ ਅਟ੍ਠਸਮਾਪਤ੍ਤਿਯੋ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ. ਪੁਬ੍ਬਭਾਗੇਨ ਜਾਨਾਤਿ ਨਾਮ ਸਮਥਵਿਪਸ੍ਸਨਾਯ ਆਰਦ੍ਧਾਯੇਵ ਜਾਨਾਤਿ, ਯੇਨਾਕਾਰੇਨ ਏਸ ਵਿਪਸ੍ਸਨਂ ਆਰਦ੍ਧੋ ਸੋਤਾਪਤ੍ਤਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਸਕਦਾਗਾਮਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਅਨਾਗਾਮਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਅਰਹਤ੍ਤਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ. ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ ਨਾਮ ਯੇਨਾਕਾਰੇਨ ਇਮਸ੍ਸ ਮਨੋਸਙ੍ਖਾਰਾ ਸੁਟ੍ਠਪਿਤਾ, ਇਮਸ੍ਸ ਨਾਮ ਚਿਤ੍ਤਸ੍ਸ ਅਨਨ੍ਤਰਾ ਇਮਂ ਨਾਮ ਵਿਤਕ੍ਕਂ ਵਿਤਕ੍ਕੇਸ੍ਸਤਿ. ਇਤੋ ਵੁਟ੍ਠਿਤਸ੍ਸ ਏਤਸ੍ਸ ਹਾਨਭਾਗਿਯੋ ਵਾ ਸਮਾਧਿ ਭਵਿਸ੍ਸਤਿ, ਠਿਤਿਭਾਗਿਯੋ ਵਾ ਵਿਸੇਸਭਾਗਿਯੋ ਵਾ ਨਿਬ੍ਬੇਧਭਾਗਿਯੋ ਵਾ ਅਭਿਞ੍ਞਾਯੋ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ.

ਤਤ੍ਥ ਪੁਥੁਜ੍ਜਨੋ ਚੇਤੋਪਰਿਯਞਾਣਲਾਭੀ ਪੁਥੁਜ੍ਜਨਾਨਂਯੇਵ ਚਿਤ੍ਤਂ ਜਾਨਾਤਿ, ਨ ਅਰਿਯਾਨਂ. ਅਰਿਯੇਸੁਪਿ ਹੇਟ੍ਠਿਮੋ ਹੇਟ੍ਠਿਮੋ ਉਪਰਿਮਸ੍ਸ ਉਪਰਿਮਸ੍ਸ ਚਿਤ੍ਤਂ ਨ ਜਾਨਾਤਿ, ਉਪਰਿਮੋ ਪਨ ਹੇਟ੍ਠਿਮਸ੍ਸ ਜਾਨਾਤਿ. ਏਤੇਸੁ ਚ ਸੋਤਾਪਨ੍ਨੋ ਸੋਤਾਪਤ੍ਤਿਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਸਕਦਾਗਾਮੀ, ਅਨਾਗਾਮੀ, ਅਰਹਾ, ਅਰਹਤ੍ਤਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਉਪਰਿਮੋ ਹੇਟ੍ਠਿਮਂ ਨ ਸਮਾਪਜ੍ਜਤਿ. ਤੇਸਞ੍ਹਿ ਹੇਟ੍ਠਿਮਾ ਹੇਟ੍ਠਿਮਾ ਸਮਾਪਤ੍ਤਿ ਤਤ੍ਰੁਪਪਤ੍ਤਿਯੇਵ ਹੋਤਿ. ਤਥੇਵ ਤਂ ਹੋਤੀਤਿ ਇਦਂ ਏਕਂਸੇਨ ਤਥੇਵ ਹੋਤਿ. ਚੇਤੋਪਰਿਯਞਾਣਵਸੇਨ ਞਾਤਞ੍ਹਿ ਅਞ੍ਞਥਾਭਾਵੀ ਨਾਮ ਨਤ੍ਥਿ. ਸੇਸਂ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਦਸ੍ਸਨਸਮਾਪਤ੍ਤਿਦੇਸਨਾਵਣ੍ਣਨਾ

੧੪੯. ਆਤਪ੍ਪਮਨ੍ਵਾਯਾਤਿਆਦਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਮੇਵ. ਅਯਂ ਪਨੇਤ੍ਥ ਸਙ੍ਖੇਪੋ, ਆਤਪ੍ਪਨ੍ਤਿ ਵੀਰਿਯਂ. ਤਦੇਵ ਪਦਹਿਤਬ੍ਬਤੋ ਪਧਾਨਂ. ਅਨੁਯੁਞ੍ਜਿਤਬ੍ਬਤੋ ਅਨੁਯੋਗੋ. ਅਪ੍ਪਮਾਦਨ੍ਤਿ ਸਤਿਅਵਿਪ੍ਪਵਾਸਂ. ਸਮ੍ਮਾਮਨਸਿਕਾਰਨ੍ਤਿ ਅਨਿਚ੍ਚੇ ਅਨਿਚ੍ਚਨ੍ਤਿਆਦਿਵਸੇਨ ਪਵਤ੍ਤਂ ਉਪਾਯਮਨਸਿਕਾਰਂ. ਚੇਤੋਸਮਾਧਿਨ੍ਤਿ ਪਠਮਜ੍ਝਾਨਸਮਾਧਿਂ. ਅਯਂ ਪਠਮਾ ਦਸ੍ਸਨਸਮਾਪਤ੍ਤੀਤਿ ਅਯਂ ਦ੍ਵਤ੍ਤਿਂ ਸਾਕਾਰਂ ਪਟਿਕੂਲਤੋ ਮਨਸਿਕਤ੍ਵਾ ਪਟਿਕੂਲਦਸ੍ਸਨਵਸੇਨ ਉਪ੍ਪਾਦਿਤਾ ਪਠਮਜ੍ਝਾਨਸਮਾਪਤ੍ਤਿ ਪਠਮਾ ਦਸ੍ਸਨਸਮਾਪਤ੍ਤਿ ਨਾਮ, ਸਚੇ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸੋਤਾਪਨ੍ਨੋ ਹੋਤਿ, ਅਯਂ ਨਿਪ੍ਪਰਿਯਾਯੇਨੇਵ ਪਠਮਾ ਦਸ੍ਸਨਸਮਾਪਤ੍ਤਿ.

ਅਤਿਕ੍ਕਮ੍ਮ ਚਾਤਿ ਅਤਿਕ੍ਕਮਿਤ੍ਵਾ ਚ. ਛਵਿਮਂਸਲੋਹਿਤਨ੍ਤਿ ਛਵਿਞ੍ਚ ਮਂਸਞ੍ਚ ਲੋਹਿਤਞ੍ਚ. ਅਟ੍ਠਿਂ ਪਚ੍ਚਵੇਕ੍ਖਤੀਤਿ ਅਟ੍ਠਿ ਅਟ੍ਠੀਤਿ ਪਚ੍ਚਵੇਕ੍ਖਤਿ. ਅਟ੍ਠਿ ਅਟ੍ਠੀਤਿ ਪਚ੍ਚਵੇਕ੍ਖਿਤ੍ਵਾ ਉਪ੍ਪਾਦਿਤਾ ਅਟ੍ਠਿਆਰਮ੍ਮਣਾ ਦਿਬ੍ਬਚਕ੍ਖੁਪਾਦਕਜ੍ਝਾਨਸਮਾਪਤ੍ਤਿ ਦੁਤਿਯਾ ਦਸ੍ਸਨਸਮਾਪਤ੍ਤਿ ਨਾਮ. ਸਚੇ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸਕਦਾਗਾਮਿਮਗ੍ਗਂ ਨਿਬ੍ਬਤ੍ਤੇਤਿ. ਅਯਂ ਨਿਪ੍ਪਰਿਯਾਯੇਨ ਦੁਤਿਯਾ ਦਸ੍ਸਨਸਮਾਪਤ੍ਤਿ. ਕਾਲ਼ਵਲ੍ਲਵਾਸੀ ਸੁਮਤ੍ਥੇਰੋ ਪਨ ‘‘ਯਾਵ ਤਤਿਯਮਗ੍ਗਾ ਵਟ੍ਟਤੀ’’ਤਿ ਆਹ.

ਵਿਞ੍ਞਾਣਸੋਤਨ੍ਤਿ ਵਿਞ੍ਞਾਣਮੇਵ. ਉਭਯਤੋ ਅਬ੍ਬੋਚ੍ਛਿਨ੍ਨਨ੍ਤਿ ਦ੍ਵੀਹਿਪਿ ਭਾਗੇਹਿ ਅਚ੍ਛਿਨ੍ਨਂ. ਇਧ ਲੋਕੇ ਪਤਿਟ੍ਠਿਤਞ੍ਚਾਤਿ ਛਨ੍ਦਰਾਗਵਸੇਨ ਇਮਸ੍ਮਿਞ੍ਚ ਲੋਕੇ ਪਤਿਟ੍ਠਿਤਂ. ਦੁਤਿਯਪਦੇਪਿ ਏਸੇਵ ਨਯੋ. ਕਮ੍ਮਂ ਵਾ ਕਮ੍ਮਤੋ ਉਪਗਚ੍ਛਨ੍ਤਂ ਇਧ ਲੋਕੇ ਪਤਿਟ੍ਠਿਤਂ ਨਾਮ. ਕਮ੍ਮਭਵਂ ਆਕਡ੍ਢਨ੍ਤਂ ਪਰਲੋਕੇ ਪਤਿਟ੍ਠਿਤਂ ਨਾਮ. ਇਮਿਨਾ ਕਿਂ ਕਥਿਤਂ? ਸੇਕ੍ਖਪੁਥੁਜ੍ਜਨਾਨਂ ਚੇਤੋਪਰਿਯਞਾਣਂ ਕਥਿਤਂ. ਸੇਕ੍ਖਪੁਥੁਜ੍ਜਨਾਨਞ੍ਹਿ ਚੇਤੋਪਰਿਯਞਾਣਂ ਤਤਿਯਾ ਦਸ੍ਸਨਸਮਾਪਤ੍ਤਿ ਨਾਮ.

ਇਧ ਲੋਕੇ ਅਪ੍ਪਤਿਟ੍ਠਿਤਞ੍ਚਾਤਿ ਨਿਚ੍ਛਨ੍ਦਰਾਗਤ੍ਤਾ ਇਧਲੋਕੇ ਚ ਅਪ੍ਪਤਿਟ੍ਠਿਤਂ. ਦੁਤਿਯਪਦੇਪਿ ਏਸੇਵ ਨਯੋ. ਕਮ੍ਮਂ ਵਾ ਕਮ੍ਮਤੋ ਨ ਉਪਗਚ੍ਛਨ੍ਤਂ ਇਧ ਲੋਕੇ ਅਪ੍ਪਤਿਟ੍ਠਿਤਂ ਨਾਮ. ਕਮ੍ਮਭਵਂ ਅਨਾਕਡ੍ਢਨ੍ਤਂ ਪਰਲੋਕੇ ਅਪ੍ਪਤਿਟ੍ਠਿਤਂ ਨਾਮ. ਇਮਿਨਾ ਕਿਂ ਕਥਿਤਂ? ਖੀਣਾਸਵਸ੍ਸ ਚੇਤੋਪਰਿਯਞਾਣਂ ਕਥਿਤਂ. ਖੀਣਾਸਵਸ੍ਸ ਹਿ ਚੇਤੋਪਰਿਯਞਾਣਂ ਚਤੁਤ੍ਥਾ ਦਸ੍ਸਨਸਮਾਪਤ੍ਤਿ ਨਾਮ.

ਅਪਿਚ ਦ੍ਵਤ੍ਤਿਂਸਾਕਾਰੇ ਆਰਦ੍ਧਵਿਪਸ੍ਸਨਾਪਿ ਪਠਮਾ ਦਸ੍ਸਨਸਮਾਪਤ੍ਤਿ. ਅਟ੍ਠਿਆਰਮ੍ਮਣੇ ਆਰਦ੍ਧਵਿਪਸ੍ਸਨਾ ਦੁਤਿਯਾ ਦਸ੍ਸਨਸਮਾਪਤ੍ਤਿ. ਸੇਕ੍ਖਪੁਥੁਜ੍ਜਨਾਨਂ ਚੇਤੋਪਰਿਯਞਾਣਂ ਖੀਣਾਸਵਸ੍ਸ ਚੇਤੋਪਰਿਯਞਾਣਨ੍ਤਿ ਇਦਂ ਪਦਦ੍ਵਯਂ ਨਿਚ੍ਚਲਮੇਵ. ਅਪਰੋ ਨਯੋ ਪਠਮਜ੍ਝਾਨਂ ਪਠਮਾ ਦਸ੍ਸਨਸਮਾਪਤ੍ਤਿ. ਦੁਤਿਯਜ੍ਝਾਨਂ ਦੁਤਿਯਾ. ਤਤਿਯਜ੍ਝਾਨਂ ਤਤਿਯਾ. ਚਤੁਤ੍ਥਜ੍ਝਾਨਂ ਚਤੁਤ੍ਥਾ ਦਸ੍ਸਨਸਮਾਪਤ੍ਤਿ. ਤਥਾ ਪਠਮਮਗ੍ਗੋ ਪਠਮਾ ਦਸ੍ਸਨਸਮਾਪਤ੍ਤਿ. ਦੁਤਿਯਮਗ੍ਗੋ ਦੁਤਿਯਾ. ਤਤਿਯਮਗ੍ਗੋ ਤਤਿਯਾ. ਚਤੁਤ੍ਥਮਗ੍ਗੋ ਚਤੁਤ੍ਥਾ ਦਸ੍ਸਨਸਮਾਪਤ੍ਤੀਤਿ. ਸੇਸਮੇਤ੍ਥ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪੁਗ੍ਗਲਪਣ੍ਣਤ੍ਤਿਦੇਸਨਾਵਣ੍ਣਨਾ

੧੫੦. ਪੁਗ੍ਗਲਪਣ੍ਣਤ੍ਤੀਸੂਤਿ ਲੋਕਵੋਹਾਰਵਸੇਨ ‘‘ਸਤ੍ਤੋ ਪੁਗ੍ਗਲੋ ਨਰੋ ਪੋਸੋ’’ਤਿ ਏਵਂ ਪਞ੍ਞਾਪੇਤਬ੍ਬਾਸੁ ਲੋਕਪਞ੍ਞਤ੍ਤੀਸੁ. ਬੁਦ੍ਧਾਨਞ੍ਹਿ ਦ੍ਵੇ ਕਥਾ ਸਮ੍ਮੁਤਿਕਥਾ, ਪਰਮਤ੍ਥਕਥਾਤਿ ਪੋਟ੍ਠਪਾਦਸੁਤ੍ਤੇ (ਦੀ. ਨਿ. ਅਟ੍ਠ. ੧.੪੩੯-੪੪੩) ਵਿਤ੍ਥਾਰਿਤਾ.

ਤਤ੍ਥ ਪੁਗ੍ਗਲਪਣ੍ਣਤ੍ਤੀਸੂਤਿ ਅਯਂ ਸਮ੍ਮੁਤਿਕਥਾ. ਇਦਾਨਿ ਯੇ ਪੁਗ੍ਗਲੇ ਪਞ੍ਞਪੇਨ੍ਤੋ ਪੁਗ੍ਗਲਪਣ੍ਣਤ੍ਤੀਸੁ ਭਗਵਾ ਅਨੁਤ੍ਤਰੋ ਹੋਤਿ, ਤੇ ਦਸ੍ਸੇਨ੍ਤੋ ਸਤ੍ਤਿਮੇ ਭਨ੍ਤੇ ਪੁਗ੍ਗਲਾ. ਉਭਤੋਭਾਗਵਿਮੁਤ੍ਤੋਤਿਆਦਿਮਾਹ. ਤਤ੍ਥ ਉਭਤੋਭਾਗਵਿਮੁਤ੍ਤੋਤਿ ਦ੍ਵੀਹਿ ਭਾਗੇਹਿ ਵਿਮੁਤ੍ਤੋ, ਅਰੂਪਸਮਾਪਤ੍ਤਿਯਾ ਰੂਪਕਾਯਤੋ ਵਿਮੁਤ੍ਤੋ, ਮਗ੍ਗੇਨ ਨਾਮਕਾਯਤੋ. ਸੋ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਪ੍ਪਤ੍ਤਾਨਂ, ਚਤੁਨ੍ਨਂ, ਨਿਰੋਧਾ ਵੁਟ੍ਠਾਯ ਅਰਹਤ੍ਤਪ੍ਪਤ੍ਤਅਨਾਗਾਮਿਨੋ ਚ ਵਸੇਨ ਪਞ੍ਚਵਿਧੋ ਹੋਤਿ.

ਪਾਲ਼ਿ ਪਨੇਤ੍ਥ ‘‘ਕਤਮੋ ਚ ਪੁਗ੍ਗਲੋ ਉਭਤੋਭਾਗਵਿਮੁਤ੍ਤੋ? ਇਧੇਕਚ੍ਚੋ ਪੁਗ੍ਗਲੋ ਅਟ੍ਠਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤੀ’’ਤਿ (ਧਾਤੁ. ੨੪) ਏਵਂ ਅਟ੍ਠਵਿਮੋਕ੍ਖਲਾਭਿਨੋ ਵਸੇਨ ਆਗਤਾ. ਪਞ੍ਞਾਯ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸੋ ਸੁਕ੍ਖਵਿਪਸ੍ਸਕੋ ਚ, ਚਤੂਹਿ ਝਾਨੇਹਿ ਵੁਟ੍ਠਾਯ ਅਰਹਤ੍ਤਂ ਪਤ੍ਤਾ ਚਤ੍ਤਾਰੋ ਚਾਤਿ ਇਮੇਸਂ ਵਸੇਨ ਪਞ੍ਚਵਿਧੋਵ ਹੋਤਿ.

ਪਾਲ਼ਿ ਪਨੇਤ੍ਥ ਅਟ੍ਠਵਿਮੋਕ੍ਖਪਟਿਕ੍ਖੇਪਵਸੇਨੇਵ ਆਗਤਾ. ਯਥਾਹ ‘‘ਨ ਹੇਵ ਖੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ. ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਪਞ੍ਞਾਵਿਮੁਤ੍ਤੋ’’ਤਿ (ਧਾਤੁ. ੨੫).

ਫੁਟ੍ਠਨ੍ਤਂ ਸਚ੍ਛਿ ਕਰੋਤੀਤਿ ਕਾਯਸਕ੍ਖਿ. ਸੋ ਝਾਨਫਸ੍ਸਂ ਪਠਮਂ ਫੁਸਤਿ, ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਰੋਤਿ, ਸੋ ਸੋਤਾਪਤ੍ਤਿਫਲਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਛਬ੍ਬਿਧੋ ਹੋਤੀਤਿ ਵੇਦਿਤਬ੍ਬੋ. ਤੇਨੇਵਾਹ ‘‘ਇਧੇਕਚ੍ਚੋ ਪੁਗ੍ਗਲੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਕਾਯਸਕ੍ਖੀ’’ਤਿ (ਧਾਤੁ. ੨੬).

ਦਿਟ੍ਠਨ੍ਤਂ ਪਤ੍ਤੋਤਿ ਦਿਟ੍ਠਿਪ੍ਪਤ੍ਤੋ. ਤਤ੍ਰਿਦਂ ਸਙ੍ਖੇਪਲਕ੍ਖਣਂ, ਦੁਕ੍ਖਾ ਸਙ੍ਖਾਰਾ ਸੁਖੋ ਨਿਰੋਧੋਤਿ ਞਾਤਂ ਹੋਤਿ ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਪਸ੍ਸਿਤਂ ਪਞ੍ਞਾਯਾਤਿ ਦਿਟ੍ਠਿਪ੍ਪਤ੍ਤੋ. ਵਿਤ੍ਥਾਰਤੋ ਪਨੇਸੋਪਿ ਕਾਯਸਕ੍ਖਿ ਵਿਯ ਛਬ੍ਬਿਧੋ ਹੋਤਿ. ਤੇਨੇਵਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ… ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਦਿਟ੍ਠਿਪ੍ਪਤ੍ਤੋ’’ਤਿ (ਧਾਤੁ. ੨੭).

ਸਦ੍ਧਾਯ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਸੋਪਿ ਵੁਤ੍ਤਨਯੇਨੇਵ ਛਬ੍ਬਿਧੋ ਹੋਤਿ. ਤੇਨੇਵਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਸਮੁਦਯੋਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਨਿਰੋਧੋਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ ਨੋ ਚ ਖੋ ਯਥਾ ਦਿਟ੍ਠਿਪ੍ਪਤ੍ਤਸ੍ਸ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਵਿਮੁਤ੍ਤੋ’’ਤਿ (ਧਾਤੁ. ੨੮). ਏਤੇਸੁ ਹਿ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਸਦ੍ਦਹਨ੍ਤਸ੍ਸ ਵਿਯ, ਓਕਪ੍ਪੇਨ੍ਤਸ੍ਸ ਵਿਯ, ਅਧਿਮੁਚ੍ਚਨ੍ਤਸ੍ਸ ਵਿਯ ਚ ਕਿਲੇਸਕ੍ਖਯੋ ਹੋਤਿ. ਦਿਟ੍ਠਿਪ੍ਪਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਕਿਲੇਸਚ੍ਛੇਦਕਂ ਞਾਣਂ ਅਦਨ੍ਧਂ ਤਿਖਿਣਂ ਸੂਰਂ ਹੁਤ੍ਵਾ ਵਹਤਿ. ਤਸ੍ਮਾ ਯਥਾ ਨਾਮ ਨਾਤਿਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਨ ਮਟ੍ਠਂ ਹੋਤਿ, ਅਸਿ ਨ ਸੀਘਂ ਵਹਤਿ, ਸਦ੍ਦੋ ਸੁਯ੍ਯਤਿ, ਬਲਵਤਰੋ ਵਾਯਾਮੋ ਕਾਤਬ੍ਬੋ ਹੋਤਿ, ਏਵਰੂਪਾ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ. ਯਥਾ ਪਨ ਅਤਿਨਿਸਿਤੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਹੋਤਿ, ਅਸਿ ਸੀਘਂ ਵਹਤਿ, ਸਦ੍ਦੋ ਨ ਸੁਯ੍ਯਤਿ, ਬਲਵਤਰਂ ਵਾਯਾਮਕਿਚ੍ਚਂ ਨ ਹੋਤਿ, ਏਵਰੂਪਾ ਪਞ੍ਞਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ ਵੇਦਿਤਬ੍ਬਾ.

ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਧਮ੍ਮੋਤਿ ਪਞ੍ਞਾ, ਪਞ੍ਞਾਪੁਬ੍ਬਙ੍ਗਮਂ ਮਗ੍ਗਂ ਭਾਵੇਤੀਤਿ ਅਤ੍ਥੋ. ਸਦ੍ਧਾਨੁਸਾਰਿਮ੍ਹਿਪਿ ਏਸੇਵ ਨਯੋ, ਉਭੋਪੇਤੇ ਸੋਤਾਪਤ੍ਤਿਮਗ੍ਗਟ੍ਠਾਯੇਵ. ਵੁਤ੍ਤਮ੍ਪਿ ਚੇਤਂ ‘‘ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਪਞ੍ਞਾਵਾਹਿਂ ਪਞ੍ਞਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਧਮ੍ਮਾਨੁਸਾਰੀ’’ਤਿ.

ਤਥਾ ‘‘ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਸਦ੍ਧਾਵਾਹਿਂ ਸਦ੍ਧਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਨੁਸਾਰੀ’’ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਸਾ ਉਭਤੋਭਾਗਵਿਮੁਤ੍ਤਾਦਿਕਥਾ ਵਿਸੁਦ੍ਧਿਮਗ੍ਗੇ ਪਞ੍ਞਾਭਾਵਨਾਧਿਕਾਰੇ ਵੁਤ੍ਤਾ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪਧਾਨਦੇਸਨਾਵਣ੍ਣਨਾ

੧੫੧. ਪਧਾਨੇਸੂਤਿ ਇਧ ਪਦਹਨਵਸੇਨ ‘‘ਸਤ੍ਤ ਬੋਜ੍ਝਙ੍ਗਾ ਪਧਾਨਾ’’ਤਿ ਵੁਤ੍ਤਾ. ਤੇਸਂ ਵਿਤ੍ਥਾਰਕਥਾ ਮਹਾਸਤਿਪਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪਟਿਪਦਾਦੇਸਨਾਵਣ੍ਣਨਾ

੧੫੨. ਦੁਕ੍ਖਪਟਿਪਦਾਦੀਸੁ ਅਯਂ ਵਿਤ੍ਥਾਰਨਯੋ – ‘‘ਤਤ੍ਥ ਕਤਮਾ ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ? ਦੁਕ੍ਖੇਨ ਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਦਨ੍ਧਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ? ਦੁਕ੍ਖੇਨ ਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਖਿਪ੍ਪਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ? ਅਕਿਚ੍ਛੇਨ ਅਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਦਨ੍ਧਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਸੁਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ? ਅਕਿਚ੍ਛੇਨ ਅਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਖਿਪ੍ਪਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਸੁਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ’’ਤਿ (ਵਿਭ. ੮੦੧). ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ ਵੁਤ੍ਤੋ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਭਸ੍ਸਸਮਾਚਾਰਾਦਿਵਣ੍ਣਨਾ

੧੫੩. ਨ ਚੇਵ ਮੁਸਾਵਾਦੂਪਸਞ੍ਹਿਤਨ੍ਤਿ ਭਸ੍ਸਸਮਾਚਾਰੇ ਠਿਤੋਪਿ ਕਥਾਮਗ੍ਗਂ ਅਨੁਪਚ੍ਛਿਨ੍ਦਿਤ੍ਵਾ ਕਥੇਨ੍ਤੋਪਿ ਇਧੇਕਚ੍ਚੋ ਭਿਕ੍ਖੁ ਨ ਚੇਵ ਮੁਸਾਵਾਦੂਪਸਞ੍ਹਿਤਂ ਭਾਸਤਿ. ਅਟ੍ਠ ਅਨਰਿਯਵੋਹਾਰੇ ਵਜ੍ਜੇਤ੍ਵਾ ਅਟ੍ਠ ਅਰਿਯਵੋਹਾਰਯੁਤ੍ਤਮੇਵ ਭਾਸਤਿ. ਨ ਚ ਵੇਭੂਤਿਯਨ੍ਤਿ ਭਸ੍ਸਸਮਾਚਾਰੇ ਠਿਤੋਪਿ ਭੇਦਕਰਵਾਚਂ ਨ ਭਾਸਤਿ. ਨ ਚ ਪੇਸੁਣਿਯਨ੍ਤਿ ਤਸ੍ਸਾਯੇਵੇਤਂ ਵੇਵਚਨਂ. ਵੇਭੂਤਿਯਵਾਚਾ ਹਿ ਪਿਯਭਾਵਸ੍ਸ ਸੁਞ੍ਞਕਰਣਤੋ ‘‘ਪੇਸੁਣਿਯ’’ਨ੍ਤਿ ਵੁਚ੍ਚਤਿ. ਨਾਮਮੇਵਸ੍ਸਾ ਏਤਨ੍ਤਿ ਮਹਾਸੀਵਤ੍ਥੇਰੋ ਅਵੋਚ. ਨ ਚ ਸਾਰਮ੍ਭਜਨ੍ਤਿ ਸਾਰਮ੍ਭਜਾ ਚ ਯਾ ਵਾਚਾ, ਤਞ੍ਚ ਨ ਭਾਸਤਿ. ‘‘ਤ੍ਵਂ ਦੁਸ੍ਸੀਲੋ’’ਤਿ ਵੁਤ੍ਤੇ, ‘‘ਤ੍ਵਂ ਦੁਸ੍ਸੀਲੋ ਤਵਾਚਰਿਯੋ ਦੁਸ੍ਸੀਲੋ’’ਤਿ ਵਾ, ‘‘ਤੁਯ੍ਹਂ ਆਪਤ੍ਤੀ’’ਤਿ ਵੁਤ੍ਤੇ, ‘‘ਅਹਂ ਪਿਣ੍ਡਾਯ ਚਰਿਤ੍ਵਾ ਪਾਟਲਿਪੁਤ੍ਤਂ ਗਤੋ’’ਤਿਆਦਿਨਾ ਨਯੇਨ ਬਹਿਦ੍ਧਾ ਵਿਕ੍ਖੇਪਕਥਾਪਵਤ੍ਤਂ ਵਾ ਕਰਣੁਤ੍ਤਰਿਯਵਾਚਂ ਨ ਭਾਸਤਿ. ਜਯਾਪੇਕ੍ਖੋਤਿ ਜਯਪੁਰੇਕ੍ਖਾਰੋ ਹੁਤ੍ਵਾ, ਯਥਾ ਹਤ੍ਥਕੋ ਸਕ੍ਯਪੁਤ੍ਤੋ ਤਿਤ੍ਥਿਯਾ ਨਾਮ ਧਮ੍ਮੇਨਪਿ ਅਧਮ੍ਮੇਨਪਿ ਜੇਤਬ੍ਬਾਤਿ ਸਚ੍ਚਾਲਿਕਂ ਯਂਕਿਞ੍ਚਿ ਭਾਸਤਿ, ਏਵਂ ਜਯਾਪੇਕ੍ਖੋ ਜਯਪੁਰੇਕ੍ਖਾਰੋ ਹੁਤ੍ਵਾ ਨ ਭਾਸਤੀਤਿ ਅਤ੍ਥੋ. ਮਨ੍ਤਾ ਮਨ੍ਤਾ ਚ ਵਾਚਂ ਭਾਸਤੀਤਿ ਏਤ੍ਥ ਮਨ੍ਤਾਤਿ ਵੁਚ੍ਚਤਿ ਪਞ੍ਞਾ, ਮਨ੍ਤਾਯ ਪਞ੍ਞਾਯ. ਪੁਨ ਮਨ੍ਤਾਤਿ ਉਪਪਰਿਕ੍ਖਿਤ੍ਵਾ. ਇਦਂ ਵੁਤ੍ਤਂ ਹੋਤਿ, ਭਸ੍ਸਸਮਾਚਾਰੇ ਠਿਤੋ ਦਿਵਸਭਾਗਮ੍ਪਿ ਕਥੇਨ੍ਤੋ ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਯੁਤ੍ਤਕਥਮੇਵ ਕਥੇਤੀਤਿ. ਨਿਧਾਨਵਤਿਨ੍ਤਿ ਹਦਯੇਪਿ ਨਿਦਹਿਤਬ੍ਬਯੁਤ੍ਤਂ. ਕਾਲੇਨਾਤਿ ਯੁਤ੍ਤਪਤ੍ਤਕਾਲੇਨ.

ਏਵਂ ਭਾਸਿਤਾ ਹਿ ਵਾਚਾ ਅਮੁਸਾ ਚੇਵ ਹੋਤਿ ਅਪਿਸੁਣਾ ਚ ਅਫਰੁਸਾ ਚ ਅਸਠਾ ਚ ਅਸਮ੍ਫਪ੍ਪਲਾਪਾ ਚ. ਏਵਰੂਪਾ ਚ ਅਯਂ ਵਾਚਾ ਚਤੁਸਚ੍ਚਨਿਸ੍ਸਿਤਾਤਿਪਿ ਸਿਕ੍ਖਤ੍ਤਯਨਿਸ੍ਸਿਤਾਤਿਪਿ ਦਸਕਥਾਵਤ੍ਥੁਨਿਸ੍ਸਿਤਾਤਿਪਿ ਤੇਰਸਧੁਤਙ੍ਗਨਿਸ੍ਸਿਤਾਤਿਪਿ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਨਿਸ੍ਸਿਤਾਤਿਪਿ ਮਗ੍ਗਨਿਸ੍ਸਿਤਾਤਿਪਿ ਵੁਚ੍ਚਤਿ. ਤੇਨਾਹ ਏਤਦਾਨੁਤ੍ਤਰਿਯਂ, ਭਨ੍ਤੇ, ਭਸ੍ਸਸਮਾਚਾਰੇਤਿ ਤਂ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਸਚ੍ਚੋ ਚਸ੍ਸ ਸਦ੍ਧੋ ਚਾਤਿ ਸੀਲਾਚਾਰੇ ਠਿਤੋ ਭਿਕ੍ਖੁ ਸਚ੍ਚੋ ਚ ਭਵੇਯ੍ਯ ਸਚ੍ਚਕਥੋ ਸਦ੍ਧੋ ਚ ਸਦ੍ਧਾਸਮ੍ਪਨ੍ਨੋ. ਨਨੁ ਹੇਟ੍ਠਾ ਸਚ੍ਚਂ ਕਥਿਤਮੇਵ, ਇਧ ਕਸ੍ਮਾ ਪੁਨ ਵੁਤ੍ਤਨ੍ਤਿ? ਹੇਟ੍ਠਾ ਵਾਚਾਸਚ੍ਚਂ ਕਥਿਤਂ. ਸੀਲਾਚਾਰੇ ਠਿਤੋ ਪਨ ਭਿਕ੍ਖੁ ਅਨ੍ਤਮਸੋ ਹਸਨਕਥਾਯਪਿ ਮੁਸਾਵਾਦਂ ਨ ਕਰੋਤੀਤਿ ਦਸ੍ਸੇਤੁਂ ਇਧ ਵੁਤ੍ਤਂ. ਇਦਾਨਿ ਸੋ ਧਮ੍ਮੇਨ ਸਮੇਨ ਜੀਵਿਤਂ ਕਪ੍ਪੇਤੀਤਿ ਦਸ੍ਸਨਤ੍ਥਂ ਨ ਚ ਕੁਹਕੋਤਿਆਦਿ ਵੁਤ੍ਤਂ. ਤਤ੍ਥ ‘‘ਕੁਹਕੋ’’ਤਿਆਦੀਨਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਾਨਿ.

ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ, ਭੋਜਨੇ ਮਤ੍ਤਞ੍ਞੂਤਿ ਛਸੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭੋਜਨੇਪਿ ਪਮਾਣਞ੍ਞੂ. ਸਮਕਾਰੀਤਿ ਸਮਚਾਰੀ, ਕਾਯੇਨ ਵਾਚਾਯ ਮਨਸਾ ਚ ਕਾਯਵਙ੍ਕਾਦੀਨਿ ਪਹਾਯ ਸਮਂ ਚਰਤੀਤਿ ਅਤ੍ਥੋ. ਜਾਗਰਿਯਾਨੁਯੋਗਮਨੁਯੁਤ੍ਤੋਤਿ ਰਤ੍ਤਿਨ੍ਦਿਵਂ ਛ ਕੋਟ੍ਠਾਸੇ ਕਤ੍ਵਾ ‘‘ਦਿਵਸਂ ਚਙ੍ਕਮੇਨ ਨਿਸਜ੍ਜਾਯਾ’’ਤਿ ਵੁਤ੍ਤਨਯੇਨੇਵ ਜਾਗਰਿਯਾਨੁਯੋਗਂ ਯੁਤ੍ਤਪ੍ਪਯੁਤ੍ਤੋ ਵਿਹਰਤਿ. ਅਤਨ੍ਦਿਤੋਤਿ ਨਿਤ੍ਤਨ੍ਦੀ ਕਾਯਾਲਸਿਯਵਿਰਹਿਤੋ. ਆਰਦ੍ਧਵੀਰਿਯੋਤਿ ਕਾਯਿਕਵੀਰਿਯੇਨਾਪਿ ਆਰਦ੍ਧਵੀਰਿਯੋ ਹੋਤਿ, ਗਣਸਙ੍ਗਣਿਕਂ ਵਿਨੋਦੇਤ੍ਵਾ ਚਤੂਸੁ ਇਰਿਯਾਪਥੇਸੁ ਅਟ੍ਠਆਰਬ੍ਭਵਤ੍ਥੁਵਸੇਨ ਏਕਵਿਹਾਰੀ. ਚੇਤਸਿਕਵੀਰਿਯੇਨਾਪਿ ਆਰਦ੍ਧਵੀਰਿਯੋ ਹੋਤਿ, ਕਿਲੇਸਸਙ੍ਗਣਿਕਂ ਪਹਾਯ ਵਿਨੋਦੇਤ੍ਵਾ ਅਟ੍ਠਸਮਾਪਤ੍ਤਿਵਸੇਨ ਏਕਵਿਹਾਰੀ. ਅਪਿ ਚ ਯਥਾ ਤਥਾ ਕਿਲੇਸੁਪ੍ਪਤ੍ਤਿਂ ਨਿਵਾਰੇਨ੍ਤੋ ਚੇਤਸਿਕਵੀਰਿਯੇਨ ਆਰਦ੍ਧਵੀਰਿਯੋ ਹੋਤਿ. ਝਾਯੀਤਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨਵਸੇਨ ਝਾਯੀ. ਸਤਿਮਾਤਿ ਚਿਰਕਤਾਦਿਅਨੁਸ੍ਸਰਣਸਮਤ੍ਥਾਯ ਸਤਿਯਾ ਸਮਨ੍ਨਾਗਤੋ.

ਕਲ੍ਯਾਣਪਟਿਭਾਨੋਤਿ ਵਾਕ੍ਕਰਣਸਮ੍ਪਨ੍ਨੋ ਚੇਵ ਹੋਤਿ ਪਟਿਭਾਨਸਮ੍ਪਨ੍ਨੋ ਚ. ਯੁਤ੍ਤਪਟਿਭਾਨੋ ਖੋ ਪਨ ਹੋਤਿ ਨੋ ਮੁਤ੍ਤਪਟਿਭਾਨੋ. ਸੀਲਸਮਾਚਾਰਸ੍ਮਿਞ੍ਹਿ ਠਿਤਭਿਕ੍ਖੁ ਮੁਤ੍ਤਪਟਿਭਾਨੋ ਨ ਹੋਤਿ, ਯੁਤ੍ਤਪਟਿਭਾਨੋ ਪਨ ਹੋਤਿ ਵਙ੍ਗੀਸਤ੍ਥੇਰੋ ਵਿਯ. ਗਤਿਮਾਤਿ ਗਮਨਸਮਤ੍ਥਾਯ ਪਞ੍ਞਾਯ ਸਮਨ੍ਨਾਗਤੋ. ਧਿਤਿਮਾਤਿ ਧਾਰਣਸਮਤ੍ਥਾਯ ਪਞ੍ਞਾਯ ਸਮਨ੍ਨਾਗਤੋ. ਮਤਿਮਾਤਿ ਏਤ੍ਥ ਪਨ ਮਤੀਤਿ ਪਞ੍ਞਾਯ ਨਾਮਮੇਵ, ਤਸ੍ਮਾ ਪਞ੍ਞਵਾਤਿ ਅਤ੍ਥੋ. ਇਤਿ ਤੀਹਿਪਿ ਇਮੇਹਿ ਪਦੇਹਿ ਪਞ੍ਞਾਵ ਕਥਿਤਾ. ਤਤ੍ਥ ਹੇਟ੍ਠਾ ਸਮਣਧਮ੍ਮਕਰਣਵੀਰਿਯਂ ਕਥਿਤਂ, ਇਧ ਬੁਦ੍ਧਵਚਨਗਣ੍ਹਨਵੀਰਿਯਂ. ਤਥਾ ਹੇਟ੍ਠਾ ਵਿਪਸ੍ਸਨਾਪਞ੍ਞਾ ਕਥਿਤਾ, ਇਧ ਬੁਦ੍ਧਵਚਨਗਣ੍ਹਨਪਞ੍ਞਾ. ਨ ਚ ਕਾਮੇਸੁ ਗਿਦ੍ਧੋਤਿ ਵਤ੍ਥੁਕਾਮਕਿਲੇਸਕਾਮੇਸੁ ਅਗਿਦ੍ਧੋ. ਸਤੋ ਚ ਨਿਪਕੋ ਚਾਤਿ ਅਭਿਕ੍ਕਨ੍ਤਪਟਿਕ੍ਕਨ੍ਤਾਦੀਸੁ ਸਤ੍ਤਸੁ ਠਾਨੇਸੁ ਸਤਿਯਾ ਚੇਵ ਞਾਣੇਨ ਚ ਸਮਨ੍ਨਾਗਤੋ ਚਰਤੀਤਿ ਅਤ੍ਥੋ. ਨੇਪਕ੍ਕਨ੍ਤਿ ਪਞ੍ਞਾ, ਤਾਯ ਸਮਨ੍ਨਾਗਤਤ੍ਤਾ ਨਿਪਕੋਤਿ ਵੁਤ੍ਤੋ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਅਨੁਸਾਸਨਵਿਧਾਦਿਵਣ੍ਣਨਾ

੧੫੪. ਪਚ੍ਚਤ੍ਤਂ ਯੋਨਿਸੋ ਮਨਸਿਕਾਰਾਤਿ ਅਤ੍ਤਨੋ ਉਪਾਯਮਨਸਿਕਾਰੇਨ. ਯਥਾਨੁਸਿਟ੍ਠਂ ਤਥਾ ਪਟਿਪਜ੍ਜਮਾਨੋਤਿ ਯਥਾ ਮਯਾ ਅਨੁਸਿਟ੍ਠਂ ਅਨੁਸਾਸਨੀ ਦਿਨ੍ਨਾ, ਤਥਾ ਪਟਿਪਜ੍ਜਮਾਨੋ. ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾਤਿਆਦਿ ਵੁਤ੍ਤਤ੍ਥਮੇਵ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੫. ਪਰਪੁਗ੍ਗਲਵਿਮੁਤ੍ਤਿਞਾਣੇਤਿ ਸੋਤਾਪਨ੍ਨਾਦੀਨਂ ਪਰਪੁਗ੍ਗਲਾਨਂ ਤੇਨ ਤੇਨ ਮਗ੍ਗੇਨ ਕਿਲੇਸਵਿਮੁਤ੍ਤਿਞਾਣੇ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੬. ਅਮੁਤ੍ਰਾਸਿਂ ਏਵਂਨਾਮੋਤਿ ਏਕੋ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੋ ਨਾਮਗੋਤ੍ਤਂ ਪਰਿਯਾਦਿਯਮਾਨੋ ਗਚ੍ਛਤਿ. ਏਕੋ ਸੁਦ੍ਧਖਨ੍ਧੇਯੇਵ ਅਨੁਸ੍ਸਰਤਿ, ਏਕੋ ਹਿ ਸਕ੍ਕੋਤਿ, ਏਕੋ ਨ ਸਕ੍ਕੋਤਿ. ਤਤ੍ਥ ਯੋ ਸਕ੍ਕੋਤਿ, ਤਸ੍ਸ ਵਸੇਨ ਅਗ੍ਗਹੇਤ੍ਵਾ ਅਸਕ੍ਕੋਨ੍ਤਸ੍ਸ ਵਸੇਨ ਗਹਿਤਂ. ਅਸਕ੍ਕੋਨ੍ਤੋ ਪਨ ਕਿਂ ਕਰੋਤਿ? ਸੁਦ੍ਧਖਨ੍ਧੇਯੇਵ ਅਨੁਸ੍ਸਰਨ੍ਤੋ ਗਨ੍ਤ੍ਵਾ ਅਨੇਕਜਾਤਿਸਤਸਹਸ੍ਸਮਤ੍ਥਕੇ ਠਤ੍ਵਾ ਨਾਮਗੋਤ੍ਤਂ ਪਰਿਯਾਦਿਯਮਾਨੋ ਓਤਰਤਿ. ਤਂ ਦਸ੍ਸੇਨ੍ਤੋ ਏਵਂਨਾਮੋਤਿਆਦਿਮਾਹ. ਸੋ ਏਵਮਾਹਾਤਿ ਸੋ ਦਿਟ੍ਠਿਗਤਿਕੋ ਏਵਮਾਹ. ਤਤ੍ਥ ਕਿਞ੍ਚਾਪਿ ਸਸ੍ਸਤੋਤਿ ਵਤ੍ਵਾ ‘‘ਤੇ ਚ ਸਤ੍ਤਾ ਸਂਸਰਨ੍ਤੀ’’ਤਿ ਵਦਨ੍ਤਸ੍ਸ ਵਚਨਂ ਪੁਬ੍ਬਾਪਰਵਿਰੁਦ੍ਧਂ ਹੋਤਿ. ਦਿਟ੍ਠਿਗਤਿਕਤ੍ਤਾ ਪਨੇਸ ਏਤਂ ਨ ਸਲ੍ਲਕ੍ਖੇਸਿ. ਦਿਟ੍ਠਿਗਤਿਕਸ੍ਸ ਹਿ ਠਾਨਂ ਵਾ ਨਿਯਮੋ ਵਾ ਨਤ੍ਥਿ. ਇਮਂ ਗਹੇਤ੍ਵਾ ਇਮਂ ਵਿਸ੍ਸਜ੍ਜੇਤਿ, ਇਮਂ ਵਿਸ੍ਸਜ੍ਜੇਤ੍ਵਾ ਇਮਂ ਗਣ੍ਹਾਤੀਤਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਮੇਵੇਤਂ. ਅਯਂ ਤਤਿਯੋ ਸਸ੍ਸਤਵਾਦੋਤਿ ਥੇਰੋ ਲਾਭਿਸ੍ਸੇਵ ਵਸੇਨ ਤਯੋ ਸਸ੍ਸਤਵਾਦੇ ਆਹ. ਭਗਵਤਾ ਪਨ ਤਕ੍ਕੀਵਾਦਮ੍ਪਿ ਗਹੇਤ੍ਵਾ ਬ੍ਰਹ੍ਮਜਾਲੇ ਚਤ੍ਤਾਰੋ ਵੁਤ੍ਤਾ. ਏਤੇਸਂ ਪਨ ਤਿਣ੍ਣਂ ਵਾਦਾਨਂ ਵਿਤ੍ਥਾਰਕਥਾ ਬ੍ਰਹ੍ਮਜਾਲੇ (ਦੀ. ਨਿ. ਅਟ੍ਠ. ੧.੩੦) ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.

੧੫੭. ਗਣਨਾਯ ਵਾਤਿ ਪਿਣ੍ਡਗਣਨਾਯ. ਸਙ੍ਖਾਨੇਨਾਤਿ ਅਚ੍ਛਿਦ੍ਦਕਵਸੇਨ ਮਨੋਗਣਨਾਯ. ਉਭਯਥਾਪਿ ਪਿਣ੍ਡਗਣਨਮੇਵ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ, ਵਸ੍ਸਾਨਂ ਸਤਵਸੇਨ ਸਹਸ੍ਸਵਸੇਨ ਸਤਸਹਸ੍ਸਵਸੇਨ ਕੋਟਿਵਸੇਨ ਪਿਣ੍ਡਂ ਕਤ੍ਵਾਪਿ ਏਤ੍ਤਕਾਨਿ ਵਸ੍ਸਸਤਾਨੀਤਿ ਵਾ ਏਤ੍ਤਕਾ ਵਸ੍ਸਕੋਟਿਯੋਤਿ ਵਾ ਏਵਂ ਸਙ੍ਖਾਤੁਂ ਨ ਸਕ੍ਕਾ. ਤੁਮ੍ਹੇ ਪਨ ਅਤ੍ਤਨੋ ਦਸਨ੍ਨਂ ਪਾਰਮੀਨਂ ਪੂਰਿਤਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ ਸੁਪ੍ਪਟਿਵਿਦ੍ਧਤ੍ਤਾ ਯਸ੍ਮਾ ਵੋ ਅਨਾਵਰਣਞਾਣਂ ਸੂਰਂ ਵਹਤਿ. ਤਸ੍ਮਾ ਦੇਸਨਾਞਾਣਕੁਸਲਤਂ ਪੁਰਕ੍ਖਤ੍ਵਾ ਵਸ੍ਸਗਣਨਾਯਪਿ ਪਰਿਯਨ੍ਤਿਕਂ ਕਤ੍ਵਾ ਕਪ੍ਪਗਣਨਾਯਪਿ ਪਰਿਚ੍ਛਿਨ੍ਦਿਤ੍ਵਾ ਏਤ੍ਤਕਨ੍ਤਿ ਦਸ੍ਸੇਥਾਤਿ ਦੀਪੇਤਿ. ਪਾਲ਼ਿਯਤ੍ਥੋ ਪਨੇਤ੍ਥ ਵੁਤ੍ਤਨਯੋਯੇਵ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੮. ਏਤਦਾਨੁਤ੍ਤਰਿਯਂ, ਭਨ੍ਤੇ, ਸਤ੍ਤਾਨਂ ਚੁਤੂਪਪਾਤਞਾਣੇਤਿ ਭਨ੍ਤੇ ਯਾਪਿ ਅਯਂ ਸਤ੍ਤਾਨਂ ਚੁਤਿਪਟਿਸਨ੍ਧਿਵਸੇਨ ਞਾਣਦੇਸਨਾ, ਸਾਪਿ ਤੁਮ੍ਹਾਕਂਯੇਵ ਅਨੁਤ੍ਤਰਾ. ਅਤੀਤਬੁਦ੍ਧਾਪਿ ਏਵਮੇਵ ਦੇਸੇਸੁਂ. ਅਨਾਗਤਾਪਿ ਏਵਮੇਵ ਦੇਸੇਸ੍ਸਨ੍ਤਿ. ਤੁਮ੍ਹੇ ਤੇਸਂ ਅਤੀਤਾਨਾਗਤਬੁਦ੍ਧਾਨਂ ਞਾਣੇਨ ਸਂਸਨ੍ਦਿਤ੍ਵਾਵ ਦੇਸਯਿਤ੍ਥ. ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ ਭਨ੍ਤੇ ਭਗਵਤੀ’’ਤਿ ਦੀਪੇਤਿ. ਪਾਲ਼ਿਯਤ੍ਥੋ ਪਨੇਤ੍ਥ ਵਿਤ੍ਥਾਰਿਤੋਯੇਵ.

੧੫੯. ਸਾਸਵਾ ਸਉਪਧਿਕਾਤਿ ਸਦੋਸਾ ਸਉਪਾਰਮ੍ਭਾ. ਨੋ ਅਰਿਯਾਤਿ ਵੁਚ੍ਚਤੀਤਿ ਅਰਿਯਿਦ੍ਧੀਤਿ ਨ ਵੁਚ੍ਚਤਿ. ਅਨਾਸਵਾ ਅਨੁਪਧਿਕਾਤਿ ਨਿਦ੍ਦੋਸਾ ਅਨੁਪਾਰਮ੍ਭਾ. ਅਰਿਯਾਤਿ ਵੁਚ੍ਚਤੀਤਿ ਅਰਿਯਿਦ੍ਧੀਤਿ ਵੁਚ੍ਚਤਿ. ਅਪ੍ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ ਕਥਂ ਅਪ੍ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ? ਪਟਿਕੂਲੇ ਸਤ੍ਤੇ ਮੇਤ੍ਤਂ ਫਰਤਿ, ਸਙ੍ਖਾਰੇ ਧਾਤੁਸਞ੍ਞਂ ਉਪਸਂਹਰਤਿ. ਯਥਾਹ ‘‘ਕਥਂ ਪਟਿਕੂਲੇ ਅਪ੍ਪਟਿਕੂਲਸਞ੍ਞੀ ਵਿਹਰਤਿ (ਪਟਿ. ਮ. ੩.੯੭)? ਅਨਿਟ੍ਠਸ੍ਮਿਂ ਵਤ੍ਥੁਸ੍ਮਿਂ ਮੇਤ੍ਤਾਯ ਵਾ ਫਰਤਿ, ਧਾਤੁਤੋ ਵਾ ਉਪਸਂਹਰਤੀ’’ਤਿ. ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ ਅਪ੍ਪਟਿਕੂਲੇ ਸਤ੍ਤੇ ਅਸੁਭਸਞ੍ਞਂ ਫਰਤਿ, ਸਙ੍ਖਾਰੇ ਅਨਿਚ੍ਚਸਞ੍ਞਂ ਉਪਸਂਹਰਤਿ. ਯਥਾਹ ‘‘ਕਥਂ ਅਪ੍ਪਟਿਕੂਲੇ ਪਟਿਕੂਲਸਞ੍ਞੀ ਵਿਹਰਤਿ? ਇਟ੍ਠਸ੍ਮਿਂ ਵਤ੍ਥੁਸ੍ਮਿਂ ਅਸੁਭਾਯ ਵਾ ਫਰਤਿ, ਅਨਿਚ੍ਚਤੋ ਵਾ ਉਪਸਂਹਰਤੀ’’ਤਿ. ਏਵਂ ਸੇਸਪਦੇਸੁਪਿ ਅਤ੍ਥੋ ਵੇਦਿਤਬ੍ਬੋ.

ਉਪੇਕ੍ਖਕੋ ਤਤ੍ਥ ਵਿਹਰਤੀਤਿ ਇਟ੍ਠੇ ਅਰਜ੍ਜਨ੍ਤੋ ਅਨਿਟ੍ਠੇ ਅਦੁਸ੍ਸਨ੍ਤੋ ਯਥਾ ਅਞ੍ਞੇ ਅਸਮਪੇਕ੍ਖਨੇਨ ਮੋਹਂ ਉਪ੍ਪਾਦੇਨ੍ਤਿ, ਏਵਂ ਅਨੁਪ੍ਪਾਦੇਨ੍ਤੋ ਛਸੁ ਆਰਮ੍ਮਣੇਸੁ ਛਲ਼ਙ੍ਗੁਪੇਕ੍ਖਾਯ ਉਪੇਕ੍ਖਕੋ ਵਿਹਰਤਿ. ਏਤਦਾਨੁਤ੍ਤਰਿਯਂ, ਭਨ੍ਤੇ, ਇਦ੍ਧਿਵਿਧਾਸੂਤਿ, ਭਨ੍ਤੇ, ਯਾ ਅਯਂ ਦ੍ਵੀਸੁ ਇਦ੍ਧੀਸੁ ਏਵਂਦੇਸਨਾ, ਏਤਦਾਨੁਤ੍ਤਰਿਯਂ. ਤਂ ਭਗਵਾਤਿ ਤਂ ਦੇਸਨਂ ਭਗਵਾ ਅਸੇਸਂ ਸਕਲਂ ਅਭਿਜਾਨਾਤਿ. ਤਂ ਭਗਵਤੋਤਿ ਤਂ ਦੇਸਨਂ ਭਗਵਤੋ ਅਸੇਸਂ ਅਭਿਜਾਨਤੋ. ਉਤ੍ਤਰਿ ਅਭਿਞ੍ਞੇਯ੍ਯਂ ਨਤ੍ਥੀਤਿ ਉਤ੍ਤਰਿ ਅਭਿਜਾਨਿਤਬ੍ਬਂ ਨਤ੍ਥਿ. ਅਯਂ ਨਾਮ ਇਤੋ ਅਞ੍ਞੋ ਧਮ੍ਮੋ ਵਾ ਪੁਗ੍ਗਲੋ ਵਾ ਯਂ ਭਗਵਾ ਨ ਜਾਨਾਤਿ ਇਦਂ ਨਤ੍ਥਿ. ਯਦਭਿਜਾਨਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾਤਿ ਯਂ ਤੁਮ੍ਹੇਹਿ ਅਨਭਿਞ੍ਞਾਤਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਭਿਜਾਨਨ੍ਤੋ ਭਗਵਤਾ ਭਿਯ੍ਯੋਭਿਞ੍ਞਤਰੋ ਅਸ੍ਸ, ਅਧਿਕਤਰਪਞ੍ਞੋ ਭਵੇਯ੍ਯ. ਯਦਿਦਂ ਇਦ੍ਧਿਵਿਧਾਸੂਤਿ ਏਤ੍ਥ ਯਦਿਦਨ੍ਤਿ ਨਿਪਾਤਮਤ੍ਤਂ. ਇਦ੍ਧਿਵਿਧਾਸੁ ਭਗਵਤਾ ਉਤ੍ਤਰਿਤਰੋ ਨਤ੍ਥਿ. ਅਤੀਤਬੁਦ੍ਧਾਪਿ ਹਿ ਇਮਾ ਦ੍ਵੇ ਇਦ੍ਧਿਯੋ ਦੇਸੇਸੁਂ, ਅਨਾਗਤਾਪਿ ਇਮਾਵ ਦੇਸੇਸ੍ਸਨ੍ਤਿ. ਤੁਮ੍ਹੇਪਿ ਤੇਸਂ ਞਾਣੇਨ ਸਂਸਨ੍ਦਿਤ੍ਵਾ ਇਮਾਵ ਦੇਸਯਿਤ੍ਥ. ਇਤਿ ਭਗਵਾ ਇਦ੍ਧਿਵਿਧਾਸੁ ਅਨੁਤ੍ਤਰੋਤਿ ਦਸ੍ਸੇਨ੍ਤੋ ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ ਦੀਪੇਤਿ. ਏਤ੍ਤਾਵਤਾ ਯੇ ਧਮ੍ਮਸੇਨਾਪਤਿ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ਸੋਲ਼ਸ ਅਪਰਮ੍ਪਰਿਯਧਮ੍ਮੇ ਸਮ੍ਮਸਿ, ਤੇਵ ਦਸ੍ਸਿਤਾ ਹੋਨ੍ਤਿ.

ਅਞ੍ਞਥਾਸਤ੍ਥੁਗੁਣਦਸ੍ਸਨਾਦਿਵਣ੍ਣਨਾ

੧੬੦. ਇਦਾਨਿ ਅਪਰੇਨਪਿ ਆਕਾਰੇਨ ਭਗਵਤੋ ਗੁਣੇ ਦਸ੍ਸੇਨ੍ਤੋ ਯਂ ਤਂ ਭਨ੍ਤੇਤਿਆਦਿਮਾਹ. ਤਤ੍ਥ ਸਦ੍ਧੇਨ ਕੁਲਪੁਤ੍ਤੇਨਾਤਿ ਸਦ੍ਧਾ ਕੁਲਪੁਤ੍ਤਾ ਨਾਮ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਬੋਧਿਸਤ੍ਤਾ. ਤਸ੍ਮਾ ਯਂ ਸਬ੍ਬਞ੍ਞੁਬੋਧਿਸਤ੍ਤੇਨ ਪਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਕਿਂ ਪਨ ਤੇਨ ਪਤ੍ਤਬ੍ਬਂ? ਨਵ ਲੋਕੁਤ੍ਤਰਧਮ੍ਮਾ. ਆਰਦ੍ਧਵੀਰਿਯੇਨਾਤਿਆਦੀਸੁ ‘‘ਵੀਰਿਯਂ ਥਾਮੋ’’ਤਿਆਦੀਨਿ ਸਬ੍ਬਾਨੇਵ ਵੀਰਿਯਵੇਵਚਨਾਨਿ. ਤਤ੍ਥ ਆਰਦ੍ਧਵੀਰਿਯੇਨਾਤਿ ਪਗ੍ਗਹਿਤਵੀਰਿਯੇਨ. ਥਾਮਵਤਾਤਿ ਥਾਮਸਮ੍ਪਨ੍ਨੇਨ ਥਿਰਵੀਰਿਯੇਨ. ਪੁਰਿਸਥਾਮੇਨਾਤਿ ਤੇਨ ਥਾਮਵਤਾ ਯਂ ਪੁਰਿਸਥਾਮੇਨ ਪਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਨਨ੍ਤਰਪਦਦ੍ਵਯੇਪਿ ਏਸੇਵ ਨਯੋ. ਪੁਰਿਸਧੋਰਯ੍ਹੇਨਾਤਿ ਯਾ ਅਸਮਧੁਰੇਹਿ ਬੁਦ੍ਧੇਹਿ ਵਹਿਤਬ੍ਬਾ ਧੁਰਾ, ਤਂ ਧੁਰਂ ਵਹਨਸਮਤ੍ਥੇਨ ਮਹਾਪੁਰਿਸੇਨ. ਅਨੁਪ੍ਪਤ੍ਤਂ ਤਂ ਭਗਵਤਾਤਿ ਤਂ ਸਬ੍ਬਂ ਅਤੀਤਾਨਾਗਤਬੁਦ੍ਧੇਹਿ ਪਤ੍ਤਬ੍ਬਂ, ਸਬ੍ਬਮੇਵ ਅਨੁਪ੍ਪਤ੍ਤਂ, ਭਗਵਤੋ ਏਕਗੁਣੋਪਿ ਊਨੋ ਨਤ੍ਥੀਤਿ ਦਸ੍ਸੇਤਿ. ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗਨ੍ਤਿ ਵਤ੍ਥੁਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗਂ. ਯਥਾ ਅਞ੍ਞੇ ਕੇਣਿਯਜਟਿਲਾਦਯੋ ਸਮਣਬ੍ਰਾਹ੍ਮਣਾ ‘‘ਕੋ ਜਾਨਾਤਿ ਪਰਲੋਕਂ. ਸੁਖੋ ਇਮਿਸ੍ਸਾ ਪਰਿਬ੍ਬਾਜਿਕਾਯ ਮੁਦੁਕਾਯ ਲੋਮਸਾਯ ਬਾਹਾਯ ਸਮ੍ਫਸ੍ਸੋ’’ਤਿ ਮੋਲ਼ਿਬਨ੍ਧਾਹਿ ਪਰਿਬ੍ਬਾਜਿਕਾਹਿ ਪਰਿਚਾਰੇਨ੍ਤਿ ਸਮ੍ਪਤ੍ਤਂ ਸਮ੍ਪਤ੍ਤਂ ਰੂਪਾਦਿਆਰਮ੍ਮਣਂ ਅਨੁਭਵਮਾਨਾ ਕਾਮਸੁਖਮਨੁਯੁਤ੍ਤਾ, ਨ ਏਵਮਨੁਯੁਤ੍ਤੋਤਿ ਦਸ੍ਸੇਤਿ.

ਹੀਨਨ੍ਤਿ ਲਾਮਕਂ. ਗਮ੍ਮਨ੍ਤਿ ਗਾਮਵਾਸੀਨਂ ਧਮ੍ਮਂ. ਪੋਥੁਜ੍ਜਨਿਕਨ੍ਤਿ ਪੁਥੁਜ੍ਜਨੇਹਿ ਸੇਵਿਤਬ੍ਬਂ. ਅਨਰਿਯਨ੍ਤਿ ਨ ਨਿਦ੍ਦੋਸਂ. ਨ ਵਾ ਅਰਿਯੇਹਿ ਸੇਵਿਤਬ੍ਬਂ. ਅਨਤ੍ਥਸਞ੍ਹਿਤਨ੍ਤਿ ਅਨਤ੍ਥਸਂਯੁਤ੍ਤਂ. ਅਤ੍ਤਕਿਲਮਥਾਨੁਯੋਗਨ੍ਤਿ ਅਤ੍ਤਨੋ ਆਤਾਪਨਪਰਿਤਾਪਨਾਨੁਯੋਗਂ. ਦੁਕ੍ਖਨ੍ਤਿ ਦੁਕ੍ਖਯੁਤ੍ਤਂ, ਦੁਕ੍ਖਮਂ ਵਾ. ਯਥਾ ਏਕੇ ਸਮਣਬ੍ਰਾਹ੍ਮਣਾ ਕਾਮਸੁਖਲ੍ਲਿਕਾਨੁਯੋਗਂ ਪਰਿਵਜ੍ਜੇਸ੍ਸਾਮਾਤਿ ਕਾਯਕਿਲਮਥਂ ਅਨੁਧਾਵਨ੍ਤਿ, ਤਤੋ ਮੁਞ੍ਚਿਸ੍ਸਾਮਾਤਿ ਕਾਮਸੁਖਂ ਅਨੁਧਾਵਨ੍ਤਿ, ਨ ਏਵਂ ਭਗਵਾ. ਭਗਵਾ ਪਨ ਉਭੋ ਏਤੇ ਅਨ੍ਤੇ ਵਜ੍ਜੇਤ੍ਵਾ ਯਾ ਸਾ ‘‘ਅਤ੍ਥਿ, ਭਿਕ੍ਖਵੇ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ ਚਕ੍ਖੁਕਰਣੀ’’ਤਿ ਏਵਂ ਵੁਤ੍ਤਾ ਸਮ੍ਮਾਪਟਿਪਤ੍ਤਿ, ਤਮੇਵ ਪਟਿਪਨ੍ਨੋ. ਤਸ੍ਮਾ ‘‘ਨ ਚ ਅਤ੍ਤਕਿਲਮਥਾਨੁਯੋਗ’’ਨ੍ਤਿਆਦਿਮਾਹ.

ਆਭਿਚੇਤਸਿਕਾਨਨ੍ਤਿ ਅਭਿਚੇਤਸਿਕਾਨਂ, ਕਾਮਾਵਚਰਚਿਤ੍ਤਾਨਿ ਅਤਿਕ੍ਕਮਿਤ੍ਵਾ ਠਿਤਾਨਨ੍ਤਿ ਅਤ੍ਥੋ. ਦਿਟ੍ਠਧਮ੍ਮਸੁਖਵਿਹਾਰਾਨਨ੍ਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਸੁਖਵਿਹਾਰਾਨਂ. ਪੋਟ੍ਠਪਾਦਸੁਤ੍ਤਨ੍ਤਸ੍ਮਿਞ੍ਹਿ ਸਪ੍ਪੀਤਿਕਦੁਤਿਯਜ੍ਝਾਨਫਲਸਮਾਪਤ੍ਤਿ ਕਥਿਤਾ (ਦੀ. ਨਿ. ੧.੪੩੨). ਪਾਸਾਦਿਕਸੁਤ੍ਤਨ੍ਤੇ ਸਹ ਮਗ੍ਗੇਨ ਵਿਪਸ੍ਸਨਾਪਾਦਕਜ੍ਝਾਨਂ. ਦਸੁਤ੍ਤਰਸੁਤ੍ਤਨ੍ਤੇ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿ. ਇਮਸ੍ਮਿਂ ਸਮ੍ਪਸਾਦਨੀਯੇ ਦਿਟ੍ਠਧਮ੍ਮਸੁਖਵਿਹਾਰਜ੍ਝਾਨਾਨਿ ਕਥਿਤਾਨਿ. ਨਿਕਾਮਲਾਭੀਤਿ ਯਥਾਕਾਮਲਾਭੀ. ਅਕਿਚ੍ਛਲਾਭੀਤਿ ਅਦੁਕ੍ਖਲਾਭੀ. ਅਕਸਿਰਲਾਭੀਤਿ ਵਿਪੁਲਲਾਭੀ.

ਅਨੁਯੋਗਦਾਨਪ੍ਪਕਾਰਵਣ੍ਣਨਾ

੧੬੧. ਏਕਿਸ੍ਸਾ ਲੋਕਧਾਤੁਯਾਤਿ ਦਸਸਹਸ੍ਸਿਲੋਕਧਾਤੁਯਾ. ਤੀਣਿ ਹਿ ਖੇਤ੍ਤਾਨਿ – ਜਾਤਿਖੇਤ੍ਤਂ ਆਣਾਖੇਤ੍ਤਂ ਵਿਸਯਖੇਤ੍ਤਂ. ਤਤ੍ਥ ਜਾਤਿਖੇਤ੍ਤਂ ਨਾਮ ਦਸਸਹਸ੍ਸੀ ਲੋਕਧਾਤੁ. ਸਾ ਹਿ ਤਥਾਗਤਸ੍ਸ ਮਾਤੁਕੁਚ੍ਛਿਂ ਓਕ੍ਕਮਨਕਾਲੇ ਨਿਕ੍ਖਮਨਕਾਲੇ ਸਮ੍ਬੋਧਿਕਾਲੇ ਧਮ੍ਮਚਕ੍ਕਪ੍ਪਵਤ੍ਤਨੇ ਆਯੁਸਙ੍ਖਾਰੋਸ੍ਸਜ੍ਜਨੇ ਪਰਿਨਿਬ੍ਬਾਨੇ ਚ ਕਮ੍ਪਤਿ. ਕੋਟਿਸਤਸਹਸ੍ਸਚਕ੍ਕਵਾਲ਼ਂ ਪਨ ਆਣਾਖੇਤ੍ਤਂ ਨਾਮ. ਆਟਾਨਾਟਿਯਮੋਰਪਰਿਤ੍ਤਧਜਗ੍ਗਪਰਿਤ੍ਤਰਤਨਪਰਿਤ੍ਤਾਦੀਨਞ੍ਹਿ ਏਤ੍ਥ ਆਣਾ ਵਤ੍ਤਤਿ. ਵਿਸਯਖੇਤ੍ਤਸ੍ਸ ਪਨ ਪਰਿਮਾਣਂ ਨਤ੍ਥਿ, ਬੁਦ੍ਧਾਨਞ੍ਹਿ ‘‘ਯਾਵਤਕਂ ਞਾਣਂ, ਤਾਵਤਕਂ ਞੇਯ੍ਯਂ, ਯਾਵਤਕਂ ਞੇਯ੍ਯਂ ਤਾਵਤਕਂ ਞਾਣਂ, ਞਾਣਪਰਿਯਨ੍ਤਿਕਂ ਞੇਯ੍ਯਂ, ਞੇਯ੍ਯਪਰਿਯਨ੍ਤਿਕਂ ਞਾਣ’’ਨ੍ਤਿ (ਮਹਾਨਿ. ੫੫) ਵਚਨਤੋ ਅਵਿਸਯੋ ਨਾਮ ਨਤ੍ਥਿ.

ਇਮੇਸੁ ਪਨ ਤੀਸੁ ਖੇਤ੍ਤੇਸੁ ਠਪੇਤ੍ਵਾ ਇਮਂ ਚਕ੍ਕਵਾਲ਼ਂ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਸੁਤ੍ਤਂ ਨਤ੍ਥਿ, ਨੁਪ੍ਪਞ੍ਜਨ੍ਤੀਤਿ ਪਨ ਅਤ੍ਥਿ. ਤੀਣਿ ਪਿਟਕਾਨਿ ਵਿਨਯਪਿਟਕਂ, ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਂ. ਤਿਸ੍ਸੋ ਸਙ੍ਗੀਤਿਯੋ ਮਹਾਕਸ੍ਸਪਤ੍ਥੇਰਸ੍ਸ ਸਙ੍ਗੀਤਿ, ਯਸਤ੍ਥੇਰਸ੍ਸ ਸਙ੍ਗੀਤਿ, ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਸਙ੍ਗੀਤੀਤਿ. ਇਮਾ ਤਿਸ੍ਸੋ ਸਙ੍ਗੀਤਿਯੋ ਆਰੁਲ਼੍ਹੇ ਤੇਪਿਟਕੇ ਬੁਦ੍ਧਵਚਨੇ ‘‘ਇਮਂ ਚਕ੍ਕਵਾਲ਼ਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਬੁਦ੍ਧਾ ਉਪ੍ਪਜ੍ਜਨ੍ਤੀ’’ਤਿ ਸੁਤ੍ਤਂ ਨਤ੍ਥਿ, ਨੁਪ੍ਪਜ੍ਜਨ੍ਤੀਤਿ ਪਨ ਅਤ੍ਥਿ.

ਅਪੁਬ੍ਬਂ ਅਚਰਿਮਨ੍ਤਿ ਅਪੁਰੇ ਅਪਚ੍ਛਾ ਏਕਤੋ ਨੁਪ੍ਪਜ੍ਜਨ੍ਤਿ, ਪੁਰੇ ਵਾ ਪਚ੍ਛਾ ਵਾ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ. ਤਤ੍ਥ ਬੋਧਿਪਲ੍ਲਙ੍ਕੇ ‘‘ਬੋਧਿਂ ਅਪਤ੍ਵਾ ਨ ਉਟ੍ਠਹਿਸ੍ਸਾਮੀ’’ਤਿ ਨਿਸਿਨ੍ਨਕਾਲਤੋ ਪਟ੍ਠਾਯ ਯਾਵ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਗ੍ਗਹਣਂ, ਤਾਵ ਪੁਬ੍ਬੇਤਿ ਨ ਵੇਦਿਤਬ੍ਬਂ. ਬੋਧਿਸਤ੍ਤਸ੍ਸ ਹਿ ਪਟਿਸਨ੍ਧਿਗ੍ਗਹਣੇ ਦਸਸਹਸ੍ਸਚਕ੍ਕਵਾਲ਼ਕਮ੍ਪਨੇਨੇਵ ਖੇਤ੍ਤਪਰਿਗ੍ਗਹੋ ਕਤੋ. ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿਪਿ ਨਿਵਾਰਿਤਾ ਹੋਤਿ. ਪਰਿਨਿਬ੍ਬਾਨਤੋ ਪਟ੍ਠਾਯ ਚ ਯਾਵ ਸਾਸਪਮਤ੍ਤਾਪਿ ਧਾਤੁਯੋ ਤਿਟ੍ਠਨ੍ਤਿ, ਤਾਵ ਪਚ੍ਛਾਤਿ ਨ ਵੇਦਿਤਬ੍ਬਂ. ਧਾਤੂਸੁ ਹਿ ਠਿਤਾਸੁ ਬੁਦ੍ਧਾਪਿ ਠਿਤਾਵ ਹੋਨ੍ਤਿ. ਤਸ੍ਮਾ ਏਤ੍ਥਨ੍ਤਰੇ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨਿਵਾਰਿਤਾਵ ਹੋਤਿ. ਧਾਤੁਪਰਿਨਿਬ੍ਬਾਨੇ ਪਨ ਜਾਤੇ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨ ਨਿਵਾਰਿਤਾ.

ਤਿਪਿਟਕਅਨ੍ਤਰਧਾਨਕਥਾ

ਤੀਣਿ ਅਨ੍ਤਰਧਾਨਾਨਿ ਨਾਮ ਪਰਿਯਤ੍ਤਿਅਨ੍ਤਰਧਾਨਂ, ਪਟਿਵੇਧਅਨ੍ਤਰਧਾਨਂ, ਪਟਿਪਤ੍ਤਿਅਨ੍ਤਰਧਾਨਨ੍ਤਿ. ਤਤ੍ਥ ਪਰਿਯਤ੍ਤੀਤਿ ਤੀਣਿ ਪਿਟਕਾਨਿ. ਪਟਿਵੇਧੋਤਿ ਸਚ੍ਚਪ੍ਪਟਿਵੇਧੋ. ਪਟਿਪਤ੍ਤੀਤਿ ਪਟਿਪਦਾ. ਤਤ੍ਥ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਏਕਸ੍ਮਿਞ੍ਹਿ ਕਾਲੇ ਪਟਿਵੇਧਕਰਾ ਭਿਕ੍ਖੂ ਬਹੂ ਹੋਨ੍ਤਿ, ਏਸ ਭਿਕ੍ਖੁ ਪੁਥੁਜ੍ਜਨੋਤਿ ਅਙ੍ਗੁਲਿਂ ਪਸਾਰੇਤ੍ਵਾ ਦਸ੍ਸੇਤਬ੍ਬੋ ਹੋਤਿ. ਇਮਸ੍ਮਿਂਯੇਵ ਦੀਪੇ ਏਕਵਾਰਂ ਪੁਥੁਜ੍ਜਨਭਿਕ੍ਖੁ ਨਾਮ ਨਾਹੋਸਿ. ਪਟਿਪਤ੍ਤਿਪੂਰਕਾਪਿ ਕਦਾਚਿ ਬਹੂ ਹੋਨ੍ਤਿ, ਕਦਾਚਿ ਅਪ੍ਪਾ. ਇਤਿ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਸਾਸਨਟ੍ਠਿਤਿਯਾ ਪਨ ਪਰਿਯਤ੍ਤਿ ਪਮਾਣਂ. ਪਣ੍ਡਿਤੋ ਹਿ ਤੇਪਿਟਕਂ ਸੁਤ੍ਵਾ ਦ੍ਵੇਪਿ ਪੂਰੇਤਿ.

ਯਥਾ ਅਮ੍ਹਾਕਂ ਬੋਧਿਸਤ੍ਤੋ ਆਲ਼ਾਰਸ੍ਸ ਸਨ੍ਤਿਕੇ ਪਞ੍ਚਾਭਿਞ੍ਞਾ ਸਤ੍ਤ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਰਿਕਮ੍ਮਂ ਪੁਚ੍ਛਿ, ਸੋ ਨ ਜਾਨਾਮੀਤਿ ਆਹ. ਤਤੋ ਉਦਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਧਿਗਤਵਿਸੇਸਂ ਸਂਸਨ੍ਦਿਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਪਰਿਕਮ੍ਮਂ ਪੁਚ੍ਛਿ, ਸੋ ਆਚਿਕ੍ਖਿ, ਤਸ੍ਸ ਵਚਨਸਮਨਨ੍ਤਰਮੇਵ ਮਹਾਸਤ੍ਤੋ ਤਂ ਝਾਨਂ ਸਮ੍ਪਾਦੇਸਿ, ਏਵਮੇਵ ਪਞ੍ਞਵਾ ਭਿਕ੍ਖੁ ਪਰਿਯਤ੍ਤਿਂ ਸੁਤ੍ਵਾ ਦ੍ਵੇਪਿ ਪੂਰੇਤਿ. ਤਸ੍ਮਾ ਪਰਿਯਤ੍ਤਿਯਾ ਠਿਤਾਯ ਸਾਸਨਂ ਠਿਤਂ ਹੋਤਿ. ਯਦਾ ਪਨ ਸਾ ਅਨ੍ਤਰਧਾਯਤਿ, ਤਦਾ ਪਠਮਂ ਅਭਿਧਮ੍ਮਪਿਟਕਂ ਨਸ੍ਸਤਿ. ਤਤ੍ਥ ਪਟ੍ਠਾਨਂ ਸਬ੍ਬਪਠਮਂ ਅਨ੍ਤਰਧਾਯਤਿ. ਅਨੁਕ੍ਕਮੇਨ ਪਚ੍ਛਾ ਧਮ੍ਮਸਙ੍ਗਹੋ, ਤਸ੍ਮਿਂ ਅਨ੍ਤਰਹਿਤੇ ਇਤਰੇਸੁ ਦ੍ਵੀਸੁ ਪਿਟਕੇਸੁ ਠਿਤੇਸੁਪਿ ਸਾਸਨਂ ਠਿਤਮੇਵ ਹੋਤਿ.

ਤਤ੍ਥ ਸੁਤ੍ਤਨ੍ਤਪਿਟਕੇ ਅਨ੍ਤਰਧਾਯਮਾਨੇ ਪਠਮਂ ਅਙ੍ਗੁਤ੍ਤਰਨਿਕਾਯੋ ਏਕਾਦਸਕਤੋ ਪਟ੍ਠਾਯ ਯਾਵ ਏਕਕਾ ਅਨ੍ਤਰਧਾਯਤਿ, ਤਦਨਨ੍ਤਰਂ ਸਂਯੁਤ੍ਤਨਿਕਾਯੋ ਚਕ੍ਕਪੇਯ੍ਯਾਲਤੋ ਪਟ੍ਠਾਯ ਯਾਵ ਓਘਤਰਣਾ ਅਨ੍ਤਰਧਾਯਤਿ. ਤਦਨਨ੍ਤਰਂ ਮਜ੍ਝਿਮਨਿਕਾਯੋ ਇਨ੍ਦ੍ਰਿਯਭਾਵਨਤੋ ਪਟ੍ਠਾਯ ਯਾਵ ਮੂਲਪਰਿਯਾਯਾ ਅਨ੍ਤਰਧਾਯਤਿ. ਤਦਨਨ੍ਤਰਂ ਦੀਘਨਿਕਾਯੋ ਦਸੁਤ੍ਤਰਤੋ ਪਟ੍ਠਾਯ ਯਾਵ ਬ੍ਰਹ੍ਮਜਾਲਾ ਅਨ੍ਤਰਧਾਯਤਿ. ਏਕਿਸ੍ਸਾਪਿ ਦ੍ਵਿਨ੍ਨਮ੍ਪਿ ਗਾਥਾਨਂ ਪੁਚ੍ਛਾ ਅਦ੍ਧਾਨਂ ਗਚ੍ਛਤਿ, ਸਾਸਨਂ ਧਾਰੇਤੁਂ ਨ ਸਕ੍ਕੋਤਿ, ਸਭਿਯਪੁਚ੍ਛਾ ਆਲ਼ਵਕਪੁਚ੍ਛਾ ਵਿਯ ਚ. ਏਤਾ ਕਿਰ ਕਸ੍ਸਪਬੁਦ੍ਧਕਾਲਿਕਾ ਅਨ੍ਤਰਾ ਸਾਸਨਂ ਧਾਰੇਤੁਂ ਨਾਸਕ੍ਖਿਂਸੁ.

ਦ੍ਵੀਸੁ ਪਨ ਪਿਟਕੇਸੁ ਅਨ੍ਤਰਹਿਤੇਸੁਪਿ ਵਿਨਯਪਿਟਕੇ ਠਿਤੇ ਸਾਸਨਂ ਤਿਟ੍ਠਤਿ. ਪਰਿਵਾਰਕ੍ਖਨ੍ਧਕੇਸੁ ਅਨ੍ਤਰਹਿਤੇਸੁ ਉਭਤੋਵਿਭਙ੍ਗੇ ਠਿਤੇ ਠਿਤਮੇਵ ਹੋਤਿ. ਉਭਤੋਵਿਭਙ੍ਗੇ ਅਨ੍ਤਰਹਿਤੇ ਮਾਤਿਕਾਯਪਿ ਠਿਤਾਯ ਠਿਤਮੇਵ ਹੋਤਿ. ਮਾਤਿਕਾਯ ਅਨ੍ਤਰਹਿਤਾਯ ਪਾਤਿਮੋਕ੍ਖਪਬ੍ਬਜ੍ਜਾਉਪਸਮ੍ਪਦਾਸੁ ਠਿਤਾਸੁ ਸਾਸਨਂ ਤਿਟ੍ਠਤਿ. ਲਿਙ੍ਗਂ ਅਦ੍ਧਾਨਂ ਗਚ੍ਛਤਿ. ਸੇਤਵਤ੍ਥਸਮਣਵਂਸੋ ਪਨ ਕਸ੍ਸਪਬੁਦ੍ਧਕਾਲਤੋ ਪਟ੍ਠਾਯ ਸਾਸਨਂ ਧਾਰੇਤੁਂ ਨਾਸਕ੍ਖਿ. ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ. ਛਲ਼ਭਿਞ੍ਞੇਹਿ ਵਸ੍ਸਸਹਸ੍ਸਂ. ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ. ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ. ਪਾਤਿਮੋਕ੍ਖੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ. ਪਚ੍ਛਿਮਕਸ੍ਸ ਪਨ ਸਚ੍ਚਪ੍ਪਟਿਵੇਧਤੋ ਪਚ੍ਛਿਮਕਸ੍ਸ ਸੀਲਭੇਦਤੋ ਪਟ੍ਠਾਯ ਸਾਸਨਂ ਓਸਕ੍ਕਿਤਂ ਨਾਮ ਹੋਤਿ. ਤਤੋ ਪਟ੍ਠਾਯ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨ ਨਿਵਾਰਿਤਾ.

ਸਾਸਨਅਨ੍ਤਰਹਿਤਵਣ੍ਣਨਾ

ਤੀਣਿ ਪਰਿਨਿਬ੍ਬਾਨਾਨਿ ਨਾਮ ਕਿਲੇਸਪਰਿਨਿਬ੍ਬਾਨਂ ਖਨ੍ਧਪਰਿਨਿਬ੍ਬਾਨਂ ਧਾਤੁਪਰਿਨਿਬ੍ਬਾਨਨ੍ਤਿ. ਤਤ੍ਥ ਕਿਲੇਸਪਰਿਨਿਬ੍ਬਾਨਂ ਬੋਧਿਪਲ੍ਲਙ੍ਕੇ ਅਹੋਸਿ. ਖਨ੍ਧਪਰਿਨਿਬ੍ਬਾਨਂ ਕੁਸਿਨਾਰਾਯਂ. ਧਾਤੁਪਰਿਨਿਬ੍ਬਾਨਂ ਅਨਾਗਤੇ ਭਵਿਸ੍ਸਤਿ. ਸਾਸਨਸ੍ਸ ਕਿਰ ਓਸਕ੍ਕਨਕਾਲੇ ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਧਾਤੁਯੋ ਸਨ੍ਨਿਪਤਿਤ੍ਵਾ ਮਹਾਚੇਤਿਯਂ ਗਮਿਸ੍ਸਨ੍ਤਿ. ਮਹਾਚੇਤਿਯਤੋ ਨਾਗਦੀਪੇ ਰਾਜਾਯਤਨਚੇਤਿਯਂ. ਤਤੋ ਮਹਾਬੋਧਿਪਲ੍ਲਙ੍ਕਂ ਗਮਿਸ੍ਸਨ੍ਤਿ. ਨਾਗਭਵਨਤੋਪਿ ਦੇਵਲੋਕਤੋਪਿ ਬ੍ਰਹ੍ਮਲੋਕਤੋਪਿ ਧਾਤੁਯੋ ਮਹਾਬੋਧਿਪਲ੍ਲਙ੍ਕਮੇਵ ਗਮਿਸ੍ਸਨ੍ਤਿ. ਸਾਸਪਮਤ੍ਤਾਪਿ ਧਾਤੁਯੋ ਨ ਅਨ੍ਤਰਾ ਨਸ੍ਸਿਸ੍ਸਨ੍ਤਿ. ਸਬ੍ਬਧਾਤੁਯੋ ਮਹਾਬੋਧਿਪਲ੍ਲਙ੍ਕੇ ਰਾਸਿਭੂਤਾ ਸੁਵਣ੍ਣਕ੍ਖਨ੍ਧੋ ਵਿਯ ਏਕਗ੍ਘਨਾ ਹੁਤ੍ਵਾ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਸ੍ਸਨ੍ਤਿ.

ਤਾ ਦਸਸਹਸ੍ਸਿਲੋਕਧਾਤੁਂ ਫਰਿਸ੍ਸਨ੍ਤਿ, ਤਤੋ ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਸਨ੍ਨਿਪਤਿਤ੍ਵਾ ‘‘ਅਜ੍ਜ ਸਤ੍ਥਾ ਪਰਿਨਿਬ੍ਬਾਤਿ, ਅਜ੍ਜ ਸਾਸਨਂ ਓਸਕ੍ਕਤਿ, ਪਚ੍ਛਿਮਦਸ੍ਸਨਂ ਦਾਨਿ ਇਦਂ ਅਮ੍ਹਾਕ’’ਨ੍ਤਿ ਦਸਬਲਸ੍ਸ ਪਰਿਨਿਬ੍ਬੁਤਦਿਵਸਤੋ ਮਹਨ੍ਤਤਰਂ ਕਾਰੁਞ੍ਞਂ ਕਰਿਸ੍ਸਨ੍ਤਿ. ਠਪੇਤ੍ਵਾ ਅਨਾਗਾਮਿਖੀਣਾਸਵੇ ਅਵਸੇਸਾ ਸਕਭਾਵੇਨ ਸਨ੍ਧਾਰੇਤੁਂ ਨ ਸਕ੍ਖਿਸ੍ਸਨ੍ਤਿ. ਧਾਤੂਸੁ ਤੇਜੋਧਾਤੁ ਉਟ੍ਠਹਿਤ੍ਵਾ ਯਾਵ ਬ੍ਰਹ੍ਮਲੋਕਾ ਉਗ੍ਗਚ੍ਛਿਸ੍ਸਤਿ. ਸਾਸਪਮਤ੍ਤਾਯਪਿ ਧਾਤੁਯਾ ਸਤਿ ਏਕਜਾਲਾ ਭਵਿਸ੍ਸਤਿ. ਧਾਤੂਸੁ ਪਰਿਯਾਦਾਨਂ ਗਤਾਸੁ ਉਪਚ੍ਛਿਜ੍ਜਿਸ੍ਸਤਿ. ਏਵਂ ਮਹਨ੍ਤਂ ਆਨੁਭਾਵਂ ਦਸ੍ਸੇਤ੍ਵਾ ਧਾਤੂਸੁ ਅਨ੍ਤਰਹਿਤਾਸੁ ਸਾਸਨਂ ਅਨ੍ਤਰਹਿਤਂ ਨਾਮ ਹੋਤਿ.

ਯਾਵ ਨ ਏਵਂ ਅਨ੍ਤਰਧਾਯਤਿ, ਤਾਵ ਅਚਰਿਮਂ ਨਾਮ ਹੋਤਿ. ਏਵਂ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤਿ. ਕਸ੍ਮਾ ਪਨ ਅਪੁਬ੍ਬਂ ਅਚਰਿਮਂ ਨੁਪ੍ਪਜ੍ਜਨ੍ਤੀਤਿ? ਅਨਚ੍ਛਰਿਯਤ੍ਤਾ. ਬੁਦ੍ਧਾ ਹਿ ਅਚ੍ਛਰਿਯਮਨੁਸ੍ਸਾ. ਯਥਾਹ – ‘‘ਏਕਪੁਗ੍ਗਲੋ, ਭਿਕ੍ਖਵੇ, ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਅਚ੍ਛਰਿਯਮਨੁਸ੍ਸੋ. ਕਤਮੋ ਏਕਪੁਗ੍ਗਲੋ? ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ (ਅ. ਨਿ. ੧.੧੭੨). ਯਦਿ ਚ ਦ੍ਵੇ ਵਾ ਚਤ੍ਤਾਰੋ ਵਾ ਅਟ੍ਠ ਵਾ ਸੋਲ਼ਸ ਵਾ ਏਕਤੋ ਉਪ੍ਪਜ੍ਜੇਯ੍ਯੁਂ, ਅਨਚ੍ਛਰਿਯਾ ਭਵੇਯ੍ਯੁਂ. ਏਕਸ੍ਮਿਞ੍ਹਿ ਵਿਹਾਰੇ ਦ੍ਵਿਨ੍ਨਂ ਚੇਤਿਯਾਨਮ੍ਪਿ ਲਾਭਸਕ੍ਕਾਰੋ ਉਲ਼ਾਰੋ ਨ ਹੋਤਿ. ਭਿਕ੍ਖੂਪਿ ਬਹੁਤਾਯ ਨ ਅਚ੍ਛਰਿਯਾ ਜਾਤਾ, ਏਵਂ ਬੁਦ੍ਧਾਪਿ ਭਵੇਯ੍ਯੁਂ, ਤਸ੍ਮਾ ਨੁਪ੍ਪਜ੍ਜਨ੍ਤਿ. ਦੇਸਨਾਯ ਚ ਵਿਸੇਸਾਭਾਵਤੋ. ਯਞ੍ਹਿ ਸਤਿਪਟ੍ਠਾਨਾਦਿਭੇਦਂ ਧਮ੍ਮਂ ਏਕੋ ਦੇਸੇਤਿ. ਅਞ੍ਞੇਨ ਉਪ੍ਪਜ੍ਜਿਤ੍ਵਾਪਿ ਸੋਵ ਦੇਸੇਤਬ੍ਬੋ ਸਿਯਾ, ਤਤੋ ਅਨਚ੍ਛਰਿਯੋ ਸਿਯਾ. ਏਕਸ੍ਮਿਂ ਪਨ ਧਮ੍ਮਂ ਦੇਸੇਨ੍ਤੇ ਦੇਸਨਾਪਿ ਅਚ੍ਛਰਿਯਾ ਹੋਤਿ, ਵਿਵਾਦਭਾਵਤੋ ਚ. ਬਹੂਸੁ ਹਿ ਬੁਦ੍ਧੇਸੁ ਉਪ੍ਪਨ੍ਨੇਸੁ ਬਹੂਨਂ ਆਚਰਿਯਾਨਂ ਅਨ੍ਤੇਵਾਸਿਕਾ ਵਿਯ ਅਮ੍ਹਾਕਂ ਬੁਦ੍ਧੋ ਪਾਸਾਦਿਕੋ, ਅਮ੍ਹਾਕਂ ਬੁਦ੍ਧੋ ਮਧੁਰਸ੍ਸਰੋ ਲਾਭੀ ਪੁਞ੍ਞਵਾਤਿ ਵਿਵਦੇਯ੍ਯੁਂ. ਤਸ੍ਮਾਪਿ ਏਵਂ ਨੁਪ੍ਪਜ੍ਜਨ੍ਤਿ. ਅਪਿ ਚੇਤਂ ਕਾਰਣਂ ਮਿਲਿਨ੍ਦਰਞ੍ਞਾਪਿ ਪੁਟ੍ਠੇਨ ਨਾਗਸੇਨਤ੍ਥੇਰੇਨ ਵਿਤ੍ਥਾਰਿਤਮੇਵ. ਵੁਤ੍ਤਞ੍ਹਿ ਤਤ੍ਥ –

ਭਨ੍ਤੇ, ਨਾਗਸੇਨ, ਭਾਸਿਤਮ੍ਪਿ ਹੇਤਂ ਭਗਵਤਾ ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤੀ’’ਤਿ. ਦੇਸਯਨ੍ਤਾ ਚ, ਭਨ੍ਤੇ ਨਾਗਸੇਨ, ਸਬ੍ਬੇਪਿ ਤਥਾਗਤਾ ਸਤ੍ਤਤਿਂਸ ਬੋਧਿਪਕ੍ਖਿਯੇ ਧਮ੍ਮੇ ਦੇਸੇਨ੍ਤਿ, ਕਥਯਮਾਨਾ ਚ ਚਤ੍ਤਾਰਿ ਅਰਿਯਸਚ੍ਚਾਨਿ ਕਥੇਨ੍ਤਿ, ਸਿਕ੍ਖਾਪੇਨ੍ਤਾ ਚ ਤੀਸੁ ਸਿਕ੍ਖਾਸੁ ਸਿਕ੍ਖਾਪੇਨ੍ਤਿ, ਅਨੁਸਾਸਮਾਨਾ ਚ ਅਪ੍ਪਮਾਦਪ੍ਪਟਿਪਤ੍ਤਿਯਂ ਅਨੁਸਾਸਨ੍ਤਿ. ਯਦਿ, ਭਨ੍ਤੇ ਨਾਗਸੇਨ, ਸਬ੍ਬੇਸਮ੍ਪਿ ਤਥਾਗਤਾਨਂ ਏਕਾ ਦੇਸਨਾ ਏਕਾ ਕਥਾ ਏਕਸਿਕ੍ਖਾ ਏਕਾਨੁਸਾਸਨੀ, ਕੇਨ ਕਾਰਣੇਨ ਦ੍ਵੇ ਤਥਾਗਤਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਏਕੇਨਪਿ ਤਾਵ ਬੁਦ੍ਧੁਪ੍ਪਾਦੇਨ ਅਯਂ ਲੋਕੋ ਓਭਾਸਜਾਤੋ, ਯਦਿ ਦੁਤਿਯੋ ਬੁਦ੍ਧੋ ਭਵੇਯ੍ਯ, ਦ੍ਵਿਨ੍ਨਂ ਪਭਾਯ ਅਯਂ ਲੋਕੋ ਭਿਯ੍ਯੋਸੋਮਤ੍ਤਾਯ ਓਭਾਸਜਾਤੋ ਭਵੇਯ੍ਯ, ਓਵਦਮਾਨਾ ਚ ਦ੍ਵੇ ਤਥਾਗਤਾ ਸੁਖਂ ਓਵਦੇਯ੍ਯੁਂ, ਅਨੁਸਾਸਮਾਨਾ ਚ ਸੁਖਂ ਅਨੁਸਾਸੇਯ੍ਯੁਂ, ਤਤ੍ਥ ਮੇ ਕਾਰਣਂ ਦੇਸੇਹਿ, ਯਥਾਹਂ ਨਿਸ੍ਸਂਸਯੋ ਭਵੇਯ੍ਯ’’ਨ੍ਤਿ.

ਅਯਂ, ਮਹਾਰਾਜ, ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ, ਏਕਸ੍ਸੇਵ ਤਥਾਗਤਸ੍ਸ ਗੁਣਂ ਧਾਰੇਤਿ, ਯਦਿ ਦੁਤਿਯੋ ਬੁਦ੍ਧੋ ਉਪ੍ਪਜ੍ਜੇਯ੍ਯ, ਨਾਯਂ ਦਸਸਹਸ੍ਸੀ ਲੋਕਧਾਤੁ ਧਾਰੇਯ੍ਯ, ਚਲੇਯ੍ਯ, ਕਮ੍ਪੇਯ੍ਯ, ਨਮੇਯ੍ਯ, ਓਣਮੇਯ੍ਯ, ਵਿਨਮੇਯ੍ਯ, ਵਿਕਿਰੇਯ੍ਯ, ਵਿਧਮੇਯ੍ਯ, ਵਿਦ੍ਧਂਸੇਯ੍ਯ, ਨ ਠਾਨਮੁਪਗਚ੍ਛੇਯ੍ਯ.

ਯਥਾ, ਮਹਾਰਾਜ, ਨਾਵਾ ਏਕਪੁਰਿਸਸਨ੍ਧਾਰਣੀ ਭਵੇਯ੍ਯ, ਏਕਪੁਰਿਸੇ ਅਭਿਰੂਲ਼੍ਹੇ ਸਾ ਨਾਵਾ ਸਮੁਪਾਦਿਕਾ ਭਵੇਯ੍ਯ, ਅਥ ਦੁਤਿਯੋ ਪੁਰਿਸੋ ਆਗਚ੍ਛੇਯ੍ਯ ਤਾਦਿਸੋ ਆਯੁਨਾ ਵਣ੍ਣੇਨ ਵਯੇਨ ਪਮਾਣੇਨ ਕਿਸਥੂਲੇਨ ਸਬ੍ਬਙ੍ਗਪਚ੍ਚਙ੍ਗੇਨ, ਸੋ ਤਂ ਨਾਵਂ ਅਭਿਰੂਹੇਯ੍ਯ, ਅਪਿ ਨੁ ਸਾ, ਮਹਾਰਾਜ, ਨਾਵਾ ਦ੍ਵਿਨ੍ਨਮ੍ਪਿ ਧਾਰੇਯ੍ਯਾਤਿ? ਨ ਹਿ, ਭਨ੍ਤੇ, ਚਲੇਯ੍ਯ, ਕਮ੍ਪੇਯ੍ਯ, ਨਮੇਯ੍ਯ, ਓਣਮੇਯ੍ਯ, ਵਿਨਮੇਯ੍ਯ, ਵਿਕਿਰੇਯ੍ਯ, ਵਿਧਮੇਯ੍ਯ, ਵਿਦ੍ਧਂਸੇਯ੍ਯ, ਨ ਠਾਨਮੁਪਗਚ੍ਛੇਯ੍ਯ ਓਸੀਦੇਯ੍ਯ ਉਦਕੇਤਿ. ਏਵਮੇਵ ਖੋ, ਮਹਾਰਾਜ, ਅਯਂ ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ, ਏਕਸ੍ਸੇਵ ਤਥਾਗਤਸ੍ਸ ਗੁਣਂ ਧਾਰੇਤਿ, ਯਦਿ ਦੁਤਿਯੋ ਬੁਦ੍ਧੋ ਉਪ੍ਪਜ੍ਜੇਯ੍ਯ, ਨਾਯਂ ਦਸਸਹਸ੍ਸੀ ਲੋਕਧਾਤੁ ਧਾਰੇਯ੍ਯ…ਪੇ… ਨ ਠਾਨਮੁਪਗਚ੍ਛੇਯ੍ਯ.

ਯਥਾ ਵਾ ਪਨ, ਮਹਾਰਾਜ, ਪੁਰਿਸੋ ਯਾਵਦਤ੍ਥਂ ਭੋਜਨਂ ਭੁਞ੍ਜੇਯ੍ਯ ਛਾਦੇਨ੍ਤਂ ਯਾਵ ਕਣ੍ਠਮਭਿਪੂਰਯਿਤ੍ਵਾ, ਸੋ ਧਾਤੋ ਪੀਣਿਤੋ ਪਰਿਪੁਣ੍ਣੋ ਨਿਰਨ੍ਤਰੋ ਤਨ੍ਦੀਕਤੋ ਅਨੋਣਮਿਤਦਣ੍ਡਜਾਤੋ ਪੁਨਦੇਵ ਤਾਵਤਕਂ ਭੋਜਨਂ ਭੁਞ੍ਜੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਪੁਰਿਸੋ ਸੁਖਿਤੋ ਭਵੇਯ੍ਯਾਤਿ? ਨ ਹਿ, ਭਨ੍ਤੇ, ਸਕਿਂ ਭੁਤ੍ਤੋਵ ਮਰੇਯ੍ਯਾਤਿ; ਏਵਮੇਵ ਖੋ, ਮਹਾਰਾਜ, ਅਯਂ ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ …ਪੇ… ਨ ਠਾਨਮੁਪਗਚ੍ਛੇਯ੍ਯਾਤਿ.

ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਅਤਿਧਮ੍ਮਭਾਰੇਨ ਪਥਵੀ ਚਲਤੀਤਿ? ਇਧ, ਮਹਾਰਾਜ, ਦ੍ਵੇ ਸਕਟਾ ਰਤਨਪੂਰਿਤਾ ਭਵੇਯ੍ਯੁਂ ਯਾਵ ਮੁਖਸਮਾ, ਏਕਸ੍ਮਾ ਸਕਟਤੋ ਰਤਨਂ ਗਹੇਤ੍ਵਾ ਏਕਸ੍ਮਿਂ ਸਕਟੇ ਆਕਿਰੇਯ੍ਯੁਂ, ਅਪਿ ਨੁ ਖੋ ਤਂ, ਮਹਾਰਾਜ, ਸਕਟਂ ਦ੍ਵਿਨ੍ਨਮ੍ਪਿ ਸਕਟਾਨਂ ਰਤਨਂ ਧਾਰੇਯ੍ਯਾਤਿ? ਨ ਹਿ, ਭਨ੍ਤੇ, ਨਾਭਿਪਿ ਤਸ੍ਸ ਫਲੇਯ੍ਯ, ਅਰਾਪਿ ਤਸ੍ਸ ਭਿਜ੍ਜੇਯ੍ਯੁਂ, ਨੇਮਿਪਿ ਤਸ੍ਸ ਓਪਤੇਯ੍ਯ, ਅਕ੍ਖੋਪਿ ਤਸ੍ਸ ਭਿਜ੍ਜੇਯ੍ਯਾਤਿ. ਕਿਂ ਨੁ ਖੋ, ਮਹਾਰਾਜ, ਅਤਿਰਤਨਭਾਰੇਨ ਸਕਟਂ ਭਿਜ੍ਜਤੀਤਿ? ਆਮ, ਭਨ੍ਤੇ,ਤਿ. ਏਵਮੇਵ ਖੋ, ਮਹਾਰਾਜ, ਅਤਿਧਮ੍ਮਭਾਰੇਨ ਪਥਵੀ ਚਲਤਿ.

ਅਪਿਚ, ਮਹਾਰਾਜ, ਇਮਂ ਕਾਰਣਂ ਬੁਦ੍ਧਬਲਪਰਿਦੀਪਨਾਯ ਓਸਾਰਿਤਂ ਅਞ੍ਞਮ੍ਪਿ ਤਤ੍ਥ ਅਤਿਰੂਪਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਯਦਿ, ਮਹਾਰਾਜ, ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ਤੇਸਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਬੁਦ੍ਧੋ ਅਮ੍ਹਾਕਂ ਬੁਦ੍ਧੋ’’ਤਿ, ਉਭਤੋ ਪਕ੍ਖਜਾਤਾ ਭਵੇਯ੍ਯੁਂ. ਯਥਾ, ਮਹਾਰਾਜ, ਦ੍ਵਿਨ੍ਨਂ ਬਲਵਾਮਚ੍ਚਾਨਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਅਮਚ੍ਚੋ ਅਮ੍ਹਾਕਂ ਅਮਚ੍ਚੋ’’ਤਿ, ਉਭਤੋ ਪਕ੍ਖਜਾਤਾ ਹੋਨ੍ਤਿ; ਏਵਮੇਵ ਖੋ, ਮਹਾਰਾਜ, ਯਦਿ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ਤੇਸਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਬੁਦ੍ਧੋ, ਅਮ੍ਹਾਕਂ ਬੁਦ੍ਧੋ’’ਤਿ, ਉਭਤੋ ਪਕ੍ਖਜਾਤਾ ਭਵੇਯ੍ਯੁਂ, ਇਦਂ ਤਾਵ, ਮਹਾਰਾਜ, ਏਕਂ ਕਾਰਣਂ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ.

ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਯਦਿ, ਮਹਾਰਾਜ, ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ‘‘ਅਗ੍ਗੋ ਬੁਦ੍ਧੋ’’ਤਿ ਯਂ ਵਚਨਂ, ਤਂ ਮਿਚ੍ਛਾ ਭਵੇਯ੍ਯ, ‘‘ਜੇਟ੍ਠੋ ਬੁਦ੍ਧੋ’’ਤਿ, ਸੇਟ੍ਠੋ ਬੁਦ੍ਧੋਤਿ, ਵਿਸਿਟ੍ਠੋ ਬੁਦ੍ਧੋਤਿ, ਉਤ੍ਤਮੋ ਬੁਦ੍ਧੋਤਿ, ਪਵਰੋ ਬੁਦ੍ਧੋਤਿ, ਅਸਮੋ ਬੁਦ੍ਧੋਤਿ, ਅਸਮਸਮੋ ਬੁਦ੍ਧੋਤਿ, ਅਪ੍ਪਟਿਮੋ ਬੁਦ੍ਧੋਤਿ, ਅਪ੍ਪਟਿਭਾਗੋ ਬੁਦ੍ਧੋਤਿ, ਅਪ੍ਪਟਿਪੁਗ੍ਗਲੋ ਬੁਦ੍ਧੋਤਿ ਯਂ ਵਚਨਂ, ਤਂ ਮਿਚ੍ਛਾ ਭਵੇਯ੍ਯ. ਇਮਮ੍ਪਿ ਖੋ ਤ੍ਵਂ, ਮਹਾਰਾਜ, ਕਾਰਣਂ ਅਤ੍ਥਤੋ ਸਮ੍ਪਟਿਚ੍ਛ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ.

ਅਪਿਚ ਖੋ, ਮਹਾਰਾਜ, ਬੁਦ੍ਧਾਨਂ ਭਗਵਨ੍ਤਾਨਂ ਸਭਾਵਪਕਤਿ ਏਸਾ, ਯਂ ਏਕੋਯੇਵ ਬੁਦ੍ਧੋ ਲੋਕੇ ਉਪ੍ਪਜ੍ਜਤਿ. ਕਸ੍ਮਾ ਕਾਰਣਾ? ਮਹਨ੍ਤਤਾਯ ਸਬ੍ਬਞ੍ਞੁਬੁਦ੍ਧਗੁਣਾਨਂ, ਯਂ ਅਞ੍ਞਮ੍ਪਿ, ਮਹਾਰਾਜ, ਮਹਨ੍ਤਂ ਹੋਤਿ, ਤਂ ਏਕਂਯੇਵ ਹੋਤਿ. ਪਥਵੀ, ਮਹਾਰਾਜ, ਮਹਨ੍ਤੀ, ਸਾ ਏਕਾਯੇਵ. ਸਾਗਰੋ ਮਹਨ੍ਤੋ, ਸੋ ਏਕੋਯੇਵ. ਸਿਨੇਰੁ ਗਿਰਿਰਾਜਾ ਮਹਨ੍ਤੋ, ਸੋ ਏਕੋਯੇਵ. ਆਕਾਸੋ ਮਹਨ੍ਤੋ, ਸੋ ਏਕੋਯੇਵ. ਸਕ੍ਕੋ ਮਹਨ੍ਤੋ, ਸੋ ਏਕੋਯੇਵ. ਮਾਰੋ ਮਹਨ੍ਤੋ, ਸੋ ਏਕੋਯੇਵ. ਮਹਾਬ੍ਰਹ੍ਮਾ ਮਹਨ੍ਤੋ, ਸੋ ਏਕੋਯੇਵ. ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਮਹਨ੍ਤੋ, ਸੋ ਏਕੋਯੇਵ ਲੋਕਸ੍ਮਿਂ. ਯਤ੍ਥ ਤੇ ਉਪ੍ਪਜ੍ਜਨ੍ਤਿ, ਤਤ੍ਥ ਅਞ੍ਞੇਸਂ ਓਕਾਸੋ ਨ ਹੋਤਿ. ਤਸ੍ਮਾ, ਮਹਾਰਾਜ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਏਕੋਯੇਵ ਲੋਕੇ ਉਪ੍ਪਜ੍ਜਤੀਤਿ. ਸੁਕਥਿਤੋ, ਭਨ੍ਤੇ ਨਾਗਸੇਨ, ਪਞ੍ਹੋ ਓਪਮ੍ਮੇਹਿ ਕਾਰਣੇਹੀਤਿ (ਮਿ. ਪ. ੫.੧.੧).

ਧਮ੍ਮਸ੍ਸ ਚਾਨੁਧਮ੍ਮਨ੍ਤਿ ਨਵਵਿਧਸ੍ਸ ਲੋਕੁਤ੍ਤਰਧਮ੍ਮਸ੍ਸ ਅਨੁਧਮ੍ਮਂ ਪੁਬ੍ਬਭਾਗਪ੍ਪਟਿਪਦਂ. ਸਹਧਮ੍ਮਿਕੋਤਿ ਸਕਾਰਣੋ. ਵਾਦਾਨੁਵਾਦੋਤਿ ਵਾਦੋਯੇਵ.

ਅਚ੍ਛਰਿਯਅਬ੍ਭੁਤਵਣ੍ਣਨਾ

੧੬੨. ਆਯਸ੍ਮਾ ਉਦਾਯੀਤਿ ਤਯੋ ਥੇਰਾ ਉਦਾਯੀ ਨਾਮ – ਲਾਲ਼ੁਦਾਯੀ, ਕਾਲ਼ੁਦਾਯੀ, ਮਹਾਉਦਾਯੀਤਿ. ਇਧ ਮਹਾਉਦਾਯੀ ਅਧਿਪ੍ਪੇਤੋ. ਤਸ੍ਸ ਕਿਰ ਇਮਂ ਸੁਤ੍ਤਂ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਸੁਣਨ੍ਤਸ੍ਸ ਅਬ੍ਭਨ੍ਤਰੇ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿਤ੍ਵਾ ਪਾਦਪਿਟ੍ਠਿਤੋ ਸੀਸਮਤ੍ਥਕਂ ਗਚ੍ਛਤਿ, ਸੀਸਮਤ੍ਥਕਤੋ ਪਾਦਪਿਟ੍ਠਿਂ ਆਗਚ੍ਛਤਿ, ਉਭਤੋ ਪਟ੍ਠਾਯ ਮਜ੍ਝਂ ਓਤਰਤਿ, ਮਜ੍ਝਤੋ ਪਟ੍ਠਾਯ ਉਭਤੋ ਗਚ੍ਛਤਿ. ਸੋ ਨਿਰਨ੍ਤਰਂ ਪੀਤਿਯਾ ਫੁਟਸਰੀਰੋ ਬਲਵਸੋਮਨਸ੍ਸੇਨ ਦਸਬਲਸ੍ਸ ਗੁਣਂ ਕਥੇਨ੍ਤੋ ਅਚ੍ਛਰਿਯਂ ਭਨ੍ਤੇਤਿਆਦਿਮਾਹ. ਅਪ੍ਪਿਚ੍ਛਤਾਤਿ ਨਿਤ੍ਤਣ੍ਹਤਾ. ਸਨ੍ਤੁਟ੍ਠਿਤਾਤਿ ਚਤੂਸੁ ਪਚ੍ਚਯੇਸੁ ਤੀਹਾਕਾਰੇਹਿ ਸਨ੍ਤੋਸੋ. ਸਲ੍ਲੇਖਤਾਤਿ ਸਬ੍ਬਕਿਲੇਸਾਨਂ ਸਲ੍ਲਿਖਿਤਭਾਵੋ. ਯਤ੍ਰ ਹਿ ਨਾਮਾਤਿ ਯੋ ਨਾਮ. ਨ ਅਤ੍ਤਾਨਂ ਪਾਤੁਕਰਿਸ੍ਸਤੀਤਿ ਅਤ੍ਤਨੋ ਗੁਣੇ ਨ ਆਵਿ ਕਰਿਸ੍ਸਤਿ. ਪਟਾਕਂ ਪਰਿਹਰੇਯ੍ਯੁਨ੍ਤਿ ‘‘ਕੋ ਅਮ੍ਹੇਹਿ ਸਦਿਸੋ ਅਤ੍ਥੀ’’ਤਿ ਵਦਨ੍ਤਾ ਪਟਾਕਂ ਉਕ੍ਖਿਪਿਤ੍ਵਾ ਨਾਲ਼ਨ੍ਦਂ ਵਿਚਰੇਯ੍ਯੁਂ.

ਪਸ੍ਸ ਖੋ ਤ੍ਵਂ, ਉਦਾਯਿ, ਤਥਾਗਤਸ੍ਸ ਅਪ੍ਪਿਚ੍ਛਤਾਤਿ ਪਸ੍ਸ ਉਦਾਯਿ ਯਾਦਿਸੀ ਤਥਾਗਤਸ੍ਸ ਅਪ੍ਪਿਚ੍ਛਤਾਤਿ ਥੇਰਸ੍ਸ ਵਚਨਂ ਸਮ੍ਪਟਿਚ੍ਛਨ੍ਤੋ ਆਹ. ਕਿਂ ਪਨ ਭਗਵਾ ਨੇਵ ਅਤ੍ਤਾਨਂ ਪਾਤੁਕਰੋਤਿ, ਨ ਅਤ੍ਤਨੋ ਗੁਣਂ ਕਥੇਤੀਤਿ ਚੇ? ਨ, ਨ ਕਥੇਤਿ. ਅਪ੍ਪਿਚ੍ਛਤਾਦੀਹਿ ਕਥੇਤਬ੍ਬਂ, ਚੀਵਰਾਦਿਹੇਤੁਂ ਨ ਕਥੇਤਿ. ਤੇਨੇਵਾਹ – ‘‘ਪਸ੍ਸ ਖੋ ਤ੍ਵਂ, ਉਦਾਯਿ, ਤਥਾਗਤਸ੍ਸ ਅਪ੍ਪਿਚ੍ਛਤਾ’’ਤਿਆਦਿ. ਬੁਜ੍ਝਨਕਸਤ੍ਤਂ ਪਨ ਆਗਮ੍ਮ ਵੇਨੇਯ੍ਯਵਸੇਨ ਕਥੇਤਿ. ਯਥਾਹ –

‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ’’ਤਿ. (ਮਹਾਵ. ੧੧);

ਏਵਂ ਤਥਾਗਤਸ੍ਸ ਗੁਣਦੀਪਿਕਾ ਬਹੂ ਗਾਥਾਪਿ ਸੁਤ੍ਤਨ੍ਤਾਪਿ ਵਿਤ੍ਥਾਰੇਤਬ੍ਬਾ.

੧੬੩. ਅਭਿਕ੍ਖਣਂ ਭਾਸੇਯ੍ਯਾਸੀਤਿ ਪੁਨਪ੍ਪੁਨਂ ਭਾਸੇਯ੍ਯਾਸਿ. ਪੁਬ੍ਬਣ੍ਹਸਮਯੇ ਮੇ ਕਥਿਤਨ੍ਤਿ ਮਾ ਮਜ੍ਝਨ੍ਹਿਕਾਦੀਸੁ ਨ ਕਥਯਿਤ੍ਥ. ਅਜ੍ਜ ਵਾ ਮੇ ਕਥਿਤਨ੍ਤਿ ਮਾ ਪਰਦਿਵਸਾਦੀਸੁ ਨ ਕਥਯਿਤ੍ਥਾਤਿ ਅਤ੍ਥੋ. ਪਵੇਦੇਸੀਤਿ ਕਥੇਸਿ. ਇਮਸ੍ਸ ਵੇਯ੍ਯਾਕਰਣਸ੍ਸਾਤਿ ਨਿਗ੍ਗਾਥਕਤ੍ਤਾ ਇਦਂ ਸੁਤ੍ਤਂ ‘‘ਵੇਯ੍ਯਾਕਰਣ’’ਨ੍ਤਿ ਵੁਤ੍ਤਂ. ਅਧਿਵਚਨਨ੍ਤਿ ਨਾਮਂ. ਇਦਂ ਪਨ ‘‘ਇਤਿ ਹਿਦ’’ਨ੍ਤਿ ਪਟ੍ਠਾਯ ਪਦਂ ਸਙ੍ਗੀਤਿਕਾਰੇਹਿ ਠਪਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਸਮ੍ਪਸਾਦਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪਾਸਾਦਿਕਸੁਤ੍ਤਵਣ੍ਣਨਾ

ਨਿਗਣ੍ਠਨਾਟਪੁਤ੍ਤਕਾਲਙ੍ਕਿਰਿਯਵਣ੍ਣਨਾ

੧੬੪. ਏਵਂ ਮੇ ਸੁਤਨ੍ਤਿ ਪਾਸਾਦਿਕਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਵੇਧਞ੍ਞਾ ਨਾਮ ਸਕ੍ਯਾਤਿ ਧਨੁਮ੍ਹਿ ਕਤਸਿਕ੍ਖਾ ਵੇਧਞ੍ਞਨਾਮਕਾ ਏਕੇ ਸਕ੍ਯਾ. ਤੇਸਂ ਅਮ੍ਬਵਨੇ ਪਾਸਾਦੇਤਿ ਤੇਸਂ ਅਮ੍ਬਵਨੇ ਸਿਪ੍ਪਂ ਉਗ੍ਗਣ੍ਹਤ੍ਥਾਯ ਕਤੋ ਦੀਘਪਾਸਾਦੋ ਅਤ੍ਥਿ, ਤਤ੍ਥ ਵਿਹਰਤਿ. ਅਧੁਨਾ ਕਾਲਙ੍ਕਤੋਤਿ ਸਮ੍ਪਤਿ ਕਾਲਙ੍ਕਤੋ. ਦ੍ਵੇਧਿਕਜਾਤਾਤਿ ਦ੍ਵੇਜ੍ਝਜਾਤਾ, ਦ੍ਵੇਭਾਗਾ ਜਾਤਾ. ਭਣ੍ਡਨਾਦੀਸੁ ਭਣ੍ਡਨਂ ਪੁਬ੍ਬਭਾਗਕਲਹੋ, ਤਂ ਦਣ੍ਡਾਦਾਨਾਦਿਵਸੇਨ ਪਣ੍ਣਤ੍ਤਿਵੀਤਿਕ੍ਕਮਵਸੇਨ ਚ ਵਡ੍ਢਿਤਂ ਕਲਹੋ. ‘‘ਨ ਤ੍ਵਂ ਇਮਂ ਧਮ੍ਮਵਿਨਯਂ ਆਜਾਨਾਸੀ’’ਤਿਆਦਿਨਾ ਨਯੇਨ ਵਿਰੁਦ੍ਧਵਚਨਂ ਵਿਵਾਦੋ. ਵਿਤੁਦਨ੍ਤਾਤਿ ਵਿਜ੍ਝਨ੍ਤਾ. ਸਹਿਤਂ ਮੇਤਿ ਮਮ ਵਚਨਂ ਅਤ੍ਥਸਞ੍ਹਿਤਂ. ਅਧਿਚਿਣ੍ਣਂ ਤੇ ਵਿਪਰਾਵਤ੍ਤਨ੍ਤਿ ਯਂ ਤਵ ਅਧਿਚਿਣ੍ਣਂ ਚਿਰਕਾਲਾਸੇਵਨਵਸੇਨ ਪਗੁਣਂ, ਤਂ ਮਮ ਵਾਦਂ ਆਗਮ੍ਮ ਨਿਵਤ੍ਤਂ. ਆਰੋਪਿਤੋ ਤੇ ਵਾਦੋਤਿ ਤੁਯ੍ਹਂ ਉਪਰਿ ਮਯਾ ਦੋਸੋ ਆਰੋਪਿਤੋ. ਚਰ ਵਾਦਪ੍ਪਮੋਕ੍ਖਾਯਾਤਿ ਭਤ੍ਤਪੁਟਂ ਆਦਾਯ ਤਂ ਤਂ ਉਪਸਙ੍ਕਮਿਤ੍ਵਾ ਵਾਦਪ੍ਪਮੋਕ੍ਖਤ੍ਥਾਯ ਉਤ੍ਤਰਿ ਪਰਿਯੇਸਮਾਨੋ ਵਿਚਰ. ਨਿਬ੍ਬੇਠੇਹਿ ਵਾਤਿ ਅਥ ਵਾ ਮਯਾ ਆਰੋਪਿਤਦੋਸਤੋ ਅਤ੍ਤਾਨਂ ਮੋਚੇਹਿ. ਸਚੇ ਪਹੋਸੀਤਿ ਸਚੇ ਸਕ੍ਕੋਸਿ. ਵਧੋਯੇਵਾਤਿ ਮਰਣਮੇਵ. ਨਾਟਪੁਤ੍ਤਿਯੇਸੂਤਿ ਨਾਟਪੁਤ੍ਤਸ੍ਸ ਅਨ੍ਤੇਵਾਸਿਕੇਸੁ. ਨਿਬ੍ਬਿਨ੍ਨਰੂਪਾਤਿ ਉਕ੍ਕਣ੍ਠਿਤਸਭਾਵਾ ਅਭਿਵਾਦਨਾਦੀਨਿਪਿ ਨ ਕਰੋਨ੍ਤਿ. ਵਿਰਤ੍ਤਰੂਪਾਤਿ ਵਿਗਤਪੇਮਾ. ਪਟਿਵਾਨਰੂਪਾਤਿ ਤੇਸਂ ਸਕ੍ਕਚ੍ਚਕਿਰਿਯਤੋ ਨਿਵਤ੍ਤਨਸਭਾਵਾ. ਯਥਾ ਤਨ੍ਤਿ ਯਥਾ ਦੁਰਕ੍ਖਾਤਾਦਿਸਭਾਵੇ ਧਮ੍ਮਵਿਨਯੇ ਨਿਬ੍ਬਿਨ੍ਨਵਿਰਤ੍ਤਪ੍ਪਟਿਵਾਨਰੂਪੇਹਿ ਭਵਿਤਬ੍ਬਂ, ਤਥੇਵ ਜਾਤਾਤਿ ਅਤ੍ਥੋ. ਦੁਰਕ੍ਖਾਤੇਤਿ ਦੁਕ੍ਕਥਿਤੇ. ਦੁਪ੍ਪਵੇਦਿਤੇਤਿ ਦੁਵਿਞ੍ਞਾਪਿਤੇ. ਅਨੁਪਸਮਸਂਵਤ੍ਤਨਿਕੇਤਿ ਰਾਗਾਦੀਨਂ ਉਪਸਮਂ ਕਾਤੁਂ ਅਸਮਤ੍ਥੇ. ਭਿਨ੍ਨਥੂਪੇਤਿ ਭਿਨ੍ਦਪ੍ਪਤਿਟ੍ਠੇ. ਏਤ੍ਥ ਹਿ ਨਾਟਪੁਤ੍ਤੋਵ ਨੇਸਂ ਪਤਿਟ੍ਠਟ੍ਠੇਨ ਥੂਪੋ. ਸੋ ਪਨ ਭਿਨ੍ਨੋ ਮਤੋ. ਤੇਨ ਵੁਤ੍ਤਂ ‘‘ਭਿਨ੍ਨਥੂਪੇ’’ਤਿ. ਅਪ੍ਪਟਿਸਰਣੇਤਿ ਤਸ੍ਸੇਵ ਅਭਾਵੇਨ ਪਟਿਸਰਣਵਿਰਹਿਤੇ.

ਨਨੁ ਚਾਯਂ ਨਾਟਪੁਤ੍ਤੋ ਨਾਲ਼ਨ੍ਦਵਾਸਿਕੋ, ਸੋ ਕਸ੍ਮਾ ਪਾਵਾਯਂ ਕਾਲਙ੍ਕਤੋਤਿ? ਸੋ ਕਿਰ ਉਪਾਲਿਨਾ ਗਹਪਤਿਨਾ ਪਟਿਵਿਦ੍ਧਸਚ੍ਚੇਨ ਦਸਹਿ ਗਾਥਾਹਿ ਭਾਸਿਤੇ ਬੁਦ੍ਧਗੁਣੇ ਸੁਤ੍ਵਾ ਉਣ੍ਹਂ ਲੋਹਿਤਂ ਛਡ੍ਡੇਸਿ. ਅਥ ਨਂ ਅਫਾਸੁਕਂ ਗਹੇਤ੍ਵਾ ਪਾਵਂ ਅਗਮਂਸੁ. ਸੋ ਤਤ੍ਥ ਕਾਲਮਕਾਸਿ. ਕਾਲਂ ਕੁਰੁਮਾਨੋ ਚ ਚਿਨ੍ਤੇਸਿ – ‘‘ਮਮ ਲਦ੍ਧਿ ਅਨਿਯ੍ਯਾਨਿਕਾ ਸਾਰਵਿਰਹਿਤਾ, ਮਯਂ ਤਾਵ ਨਟ੍ਠਾ, ਅਵਸੇਸਜਨੋਪਿ ਮਾ ਅਪਾਯਪੂਰਕੋ ਅਹੋਸਿ, ਸਚੇ ਪਨਾਹਂ ‘ਮਮ ਸਾਸਨਂ ਅਨਿਯ੍ਯਾਨਿਕ’ਨ੍ਤਿ ਵਕ੍ਖਾਮਿ, ਨ ਸਦ੍ਦਹਿਸ੍ਸਨ੍ਤਿ, ਯਂਨੂਨਾਹਂ ਦ੍ਵੇਪਿ ਜਨੇ ਨ ਏਕਨੀਹਾਰੇਨ ਉਗ੍ਗਣ੍ਹਾਪੇਯ੍ਯਂ, ਤੇ ਮਮਚ੍ਚਯੇਨ ਅਞ੍ਞਮਞ੍ਞਂ ਵਿਵਦਿਸ੍ਸਨ੍ਤਿ, ਸਤ੍ਥਾ ਤਂ ਵਿਵਾਦਂ ਪਟਿਚ੍ਚ ਏਕਂ ਧਮ੍ਮਕਥਂ ਕਥੇਸ੍ਸਤਿ, ਤਤੋ ਤੇ ਸਾਸਨਸ੍ਸ ਮਹਨ੍ਤਭਾਵਂ ਜਾਨਿਸ੍ਸਨ੍ਤੀ’’ਤਿ.

ਅਥ ਨਂ ਏਕੋ ਅਨ੍ਤੇਵਾਸਿਕੋ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ ਤੁਮ੍ਹੇ ਦੁਬ੍ਬਲਾ, ਮਯ੍ਹਮ੍ਪਿ ਇਮਸ੍ਮਿਂ ਧਮ੍ਮੇ ਸਾਰਂ ਆਚਿਕ੍ਖਥ, ਆਚਰਿਯਪ੍ਪਮਾਣ’’ਨ੍ਤਿ. ‘‘ਆਵੁਸੋ, ਤ੍ਵਂ ਮਮਚ੍ਚਯੇਨ ਸਸ੍ਸਤਨ੍ਤਿ ਗਣ੍ਹੇਯ੍ਯਾਸੀ’’ਤਿ. ਅਪਰੋਪਿ ਉਪਸਙ੍ਕਮਿ, ਤਂ ਉਚ੍ਛੇਦਂ ਗਣ੍ਹਾਪੇਸਿ. ਏਵਂ ਦ੍ਵੇਪਿ ਜਨੇ ਏਕਲਦ੍ਧਿਕੇ ਅਕਤ੍ਵਾ ਬਹੂ ਨਾਨਾਨੀਹਾਰੇਨ ਉਗ੍ਗਣ੍ਹਾਪੇਤ੍ਵਾ ਕਾਲਮਕਾਸਿ. ਤੇ ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਸਨ੍ਨਿਪਤਿਤ੍ਵਾ ਅਞ੍ਞਮਞ੍ਞਂ ਪੁਚ੍ਛਿਂਸੁ – ‘‘ਕਸ੍ਸਾਵੁਸੋ, ਆਚਰਿਯੋ ਸਾਰਂ ਆਚਿਕ੍ਖੀ’’ਤਿ? ਏਕੋ ਉਟ੍ਠਹਿਤ੍ਵਾ ਮਯ੍ਹਨ੍ਤਿ ਆਹ. ਕਿਂ ਆਚਿਕ੍ਖੀਤਿ? ਸਸ੍ਸਤਨ੍ਤਿ. ਅਪਰੋ ਤਂ ਪਟਿਬਾਹਿਤ੍ਵਾ ‘‘ਮਯ੍ਹਂ ਸਾਰਂ ਆਚਿਕ੍ਖੀ’’ਤਿ ਆਹ. ਏਵਂ ਸਬ੍ਬੇ ‘‘ਮਯ੍ਹਂ ਸਾਰਂ ਆਚਿਕ੍ਖਿ, ਅਹਂ ਜੇਟ੍ਠਕੋ’’ਤਿ ਅਞ੍ਞਮਞ੍ਞਂ ਵਿਵਾਦਂ ਵਡ੍ਢੇਤ੍ਵਾ ਅਕ੍ਕੋਸੇ ਚੇਵ ਪਰਿਭਾਸੇ ਚ ਹਤ੍ਥਪਾਦਪ੍ਪਹਾਰਾਦੀਨਿ ਚ ਪਵਤ੍ਤੇਤ੍ਵਾ ਏਕਮਗ੍ਗੇਨ ਦ੍ਵੇ ਅਗਚ੍ਛਨ੍ਤਾ ਨਾਨਾਦਿਸਾਸੁ ਪਕ੍ਕਮਿਂਸੁ.

੧੬੫. ਅਥ ਖੋ ਚੁਨ੍ਦੋ ਸਮਣੁਦ੍ਦੇਸੋਤਿ ਅਯਂ ਥੇਰੋ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਤਂ ਭਿਕ੍ਖੂ ਅਨੁਪਸਮ੍ਪਨ੍ਨਕਾਲੇ ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ ਸਮੁਦਾਚਰਿਤ੍ਵਾ ਥੇਰਕਾਲੇਪਿ ਤਥੇਵ ਸਮੁਦਾਚਰਿਂਸੁ. ਤੇਨ ਵੁਤ੍ਤਂ – ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ.

‘‘ਪਾਵਾਯਂ ਵਸ੍ਸਂਵੁਟ੍ਠੋ ਯੇਨ ਸਾਮਗਾਮੋ, ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀ’’ਤਿ ਕਸ੍ਮਾ ਉਪਸਙ੍ਕਮਿ? ਨਾਟਪੁਤ੍ਤੇ ਕਿਰ ਕਾਲਙ੍ਕਤੇ ਜਮ੍ਬੁਦੀਪੇ ਮਨੁਸ੍ਸਾ ਤਤ੍ਥ ਤਤ੍ਥ ਕਥਂ ਪਵਤ੍ਤਯਿਂਸੁ ‘‘ਨਿਗਣ੍ਠੋ ਨਾਟਪੁਤ੍ਤੋ ਏਕੋ ਸਤ੍ਥਾਤਿ ਪਞ੍ਞਾਯਿਤ੍ਥ, ਤਸ੍ਸ ਕਾਲਙ੍ਕਿਰਿਯਾਯ ਸਾਵਕਾਨਂ ਏਵਰੂਪੋ ਵਿਵਾਦੋ ਜਾਤੋ. ਸਮਣੋ ਪਨ ਗੋਤਮੋ ਜਮ੍ਬੁਦੀਪੇ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟੋ, ਸਾਵਕਾਪਿਸ੍ਸ ਪਾਕਟਾਯੇਵ. ਕੀਦਿਸੋ ਨੁ ਖੋ ਸਮਣੇ ਗੋਤਮੇ ਪਰਿਨਿਬ੍ਬੁਤੇ ਸਾਵਕਾਨਂ ਵਿਵਾਦੋ ਭਵਿਸ੍ਸਤੀ’’ਤਿ. ਥੇਰੋ ਤਂ ਕਥਂ ਸੁਤ੍ਵਾ ਚਿਨ੍ਤੇਸਿ – ‘‘ਇਮਂ ਕਥਂ ਗਹੇਤ੍ਵਾ ਦਸਬਲਸ੍ਸ ਆਰੋਚੇਸ੍ਸਾਮਿ, ਸਤ੍ਥਾ ਏਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਏਕਂ ਦੇਸਨਂ ਕਥੇਸ੍ਸਤੀ’’ਤਿ. ਸੋ ਨਿਕ੍ਖਮਿਤ੍ਵਾ ਯੇਨ ਸਾਮਗਾਮੋ, ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ.

ਸਾਮਗਾਮੋਤਿ ਸਾਮਾਕਾਨਂ ਉਸ੍ਸਨ੍ਨਤ੍ਤਾ ਤਸ੍ਸ ਗਾਮਸ੍ਸ ਨਾਮਂ. ਯੇਨਾਯਸ੍ਮਾ ਆਨਨ੍ਦੋਤਿ ਉਜੁਮੇਵ ਭਗਵਤੋ ਸਨ੍ਤਿਕਂ ਅਗਨ੍ਤ੍ਵਾ ਯੇਨਸ੍ਸ ਉਪਜ੍ਝਾਯੋ ਆਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ.

ਬੁਦ੍ਧਕਾਲੇ ਕਿਰ ਸਾਰਿਪੁਤ੍ਤਤ੍ਥੇਰੋ ਚ ਆਨਨ੍ਦਤ੍ਥੇਰੋ ਚ ਅਞ੍ਞਮਞ੍ਞਂ ਮਮਾਯਿਂਸੁ. ਸਾਰਿਪੁਤ੍ਤਤ੍ਥੇਰੋ ‘‘ਮਯਾ ਕਾਤਬ੍ਬਂ ਸਤ੍ਥੁ ਉਪਟ੍ਠਾਨਂ ਕਰੋਤੀ’’ਤਿ ਆਨਨ੍ਦਤ੍ਥੇਰਂ ਮਮਾਯਿ. ਆਨਨ੍ਦਤ੍ਥੇਰੋ ‘‘ਭਗਵਤੋ ਸਾਵਕਾਨਂ ਅਗ੍ਗੋ’’ਤਿ ਸਾਰਿਪੁਤ੍ਤਤ੍ਥੇਰਂ ਮਮਾਯਿ. ਕੁਲਦਾਰਕੇ ਚ ਪਬ੍ਬਾਜੇਤ੍ਵਾ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਪੇਸਿ. ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਅਕਾਸਿ. ਏਵਂ ਏਕਮੇਕੇਨ ਅਤ੍ਤਨੋ ਪਤ੍ਤਚੀਵਰਂ ਦਤ੍ਵਾ ਪਬ੍ਬਾਜੇਤ੍ਵਾ ਉਪਜ੍ਝਂ ਗਣ੍ਹਾਪਿਤਾਨਿ ਪਞ੍ਚ ਪਞ੍ਚ ਭਿਕ੍ਖੁਸਤਾਨਿ ਅਹੇਸੁਂ. ਆਯਸ੍ਮਾ ਆਨਨ੍ਦੋ ਪਣੀਤਾਨਿ ਚੀਵਰਾਦੀਨਿਪਿ ਲਭਿਤ੍ਵਾ ਥੇਰਸ੍ਸ ਅਦਾਸਿ.

ਧਮ੍ਮਰਤਨਪੂਜਾ

ਏਕੋ ਕਿਰ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਬੁਦ੍ਧਰਤਨਸ੍ਸ ਚ ਸਙ੍ਘਰਤਨਸ੍ਸ ਚ ਪੂਜਾ ਪਞ੍ਞਾਯਤਿ, ਕਥਂ ਨੁ ਖੋ ਧਮ੍ਮਰਤਨਂ ਪੂਜਿਤਂ ਹੋਤੀ’’ਤਿ? ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿ. ਭਗਵਾ ਆਹ – ‘‘ਸਚੇਪਿ ਬ੍ਰਾਹ੍ਮਣ ਧਮ੍ਮਰਤਨਂ ਪੂਜੇਤੁਕਾਮੋ, ਏਕਂ ਬਹੁਸ੍ਸੁਤਂ ਪੂਜੇਹੀ’’ਤਿ. ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾਤਿ. ਭਿਕ੍ਖੁਸਙ੍ਘਂ ਪੁਚ੍ਛਾਤਿ. ਸੋ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ‘‘ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾ’’ਤਿ ਆਹ. ਆਨਨ੍ਦਤ੍ਥੇਰੋ ਬ੍ਰਾਹ੍ਮਣਾਤਿ. ਬ੍ਰਾਹ੍ਮਣੋ ਥੇਰਂ ਸਹਸ੍ਸਗ੍ਘਨਿਕੇਨ ਤਿਚੀਵਰੇਨ ਪੂਜੇਸਿ. ਥੇਰੋ ਤਂ ਗਹੇਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਭਗਵਾ ‘‘ਕੁਤੋ, ਆਨਨ੍ਦ, ਲਦ੍ਧ’’ਨ੍ਤਿ ਆਹ? ਏਕੇਨ, ਭਨ੍ਤੇ, ਬ੍ਰਾਹ੍ਮਣੇਨ ਦਿਨ੍ਨਂ, ਇਦਂ ਪਨਾਹਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋਤਿ. ਦੇਹਿ, ਆਨਨ੍ਦਾਤਿ. ਚਾਰਿਕਂ ਪਕ੍ਕਨ੍ਤੋ ਭਨ੍ਤੇਤਿ. ਆਗਤਕਾਲੇ ਦੇਹੀਤਿ, ਸਿਕ੍ਖਾਪਦਂ ਭਨ੍ਤੇ, ਪਞ੍ਞਤ੍ਤਨ੍ਤਿ. ਕਦਾ ਪਨ ਸਾਰਿਪੁਤ੍ਤੋ ਆਗਮਿਸ੍ਸਤੀਤਿ? ਦਸਾਹਮਤ੍ਤੇਨ ਭਨ੍ਤੇਤਿ. ‘‘ਅਨੁਜਾਨਾਮਿ, ਆਨਨ੍ਦ, ਦਸਾਹਪਰਮਂ ਅਤਿਰੇਕਚੀਵਰਂ ਨਿਕ੍ਖਿਪਿਤੁ’’ਨ੍ਤਿ ਸਿਕ੍ਖਾਪਦਂ ਪਞ੍ਞਾਪੇਸਿ.

ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਯਂਕਿਞ੍ਚਿ ਮਨਾਪਂ ਲਭਤਿ, ਤਂ ਆਨਨ੍ਦਤ੍ਥੇਰਸ੍ਸ ਦੇਤਿ. ਸੋ ਇਮਮ੍ਪਿ ਅਤ੍ਤਨੋ ਕਨਿਟ੍ਠਭਾਤਿਕਂ ਥੇਰਸ੍ਸੇਵ ਸਦ੍ਧਿਵਿਹਾਰਿਕਂ ਅਦਾਸਿ. ਤੇਨ ਵੁਤ੍ਤਂ – ‘‘ਯੇਨਸ੍ਸ ਉਪਜ੍ਝਾਯੋ ਆਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀ’’ਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਉਪਜ੍ਝਾਯੋ ਮੇ ਮਹਾਪਞ੍ਞੋ, ਸੋ ਇਮਂ ਕਥਂ ਸਤ੍ਥੁ ਆਰੋਚੇਸ੍ਸਤਿ, ਅਥ ਸਤ੍ਥਾ ਤਦਨੁਰੂਪਂ ਧਮ੍ਮਂ ਦੇਸੇਸ੍ਸਤੀ’’ਤਿ. ਕਥਾਪਾਭਤਨ੍ਤਿ ਕਥਾਯ ਮੂਲਂ. ਮੂਲਞ੍ਹਿ ‘‘ਪਾਭਤ’’ਨ੍ਤਿ ਵੁਚ੍ਚਤਿ. ਯਥਾਹ –

‘‘ਅਪ੍ਪਕੇਨਾਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);

ਭਗਵਨ੍ਤਂ ਦਸ੍ਸਨਾਯਾਤਿ ਭਗਵਨ੍ਤਂ ਦਸ੍ਸਨਤ੍ਥਾਯ. ਕਿਂ ਪਨਾਨੇਨ ਭਗਵਾ ਨ ਦਿਟ੍ਠਪੁਬ੍ਬੋਤਿ? ਨੋ ਨ ਦਿਟ੍ਠਪੁਬ੍ਬੋ. ਅਯਞ੍ਹਿ ਆਯਸ੍ਮਾ ਦਿਵਾ ਨਵ ਵਾਰੇ, ਰਤ੍ਤਿਂ ਨਵ ਵਾਰੇਤਿ ਏਕਾਹਂ ਅਟ੍ਠਾਰਸ ਵਾਰੇ ਉਪਟ੍ਠਾਨਮੇਵ ਗਚ੍ਛਤਿ. ਦਿਵਸਸ੍ਸ ਪਨ ਸਤਵਾਰਂ ਵਾ ਸਹਸ੍ਸਵਾਰਂ ਵਾ ਗਨ੍ਤੁਕਾਮੋ ਸਮਾਨੋਪਿ ਨ ਅਕਾਰਣਾ ਗਚ੍ਛਤਿ, ਏਕਂ ਪਞ੍ਹੁਦ੍ਧਾਰਂ ਗਹੇਤ੍ਵਾਵ ਗਚ੍ਛਤਿ. ਸੋ ਤਂ ਦਿਵਸਂ ਤੇਨ ਕਥਾਪਾਭਤੇਨ ਗਨ੍ਤੁਕਾਮੋ ਏਵਮਾਹ.

ਅਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਵਣ੍ਣਨਾ

੧੬੬. ਏਵਞ੍ਹੇਤਂ, ਚੁਨ੍ਦ, ਹੋਤੀਤਿ ਭਗਵਾ ਆਨਨ੍ਦਤ੍ਥੇਰੇਨ ਆਰੋਚਿਤੇਪਿ ਯਸ੍ਮਾ ਨ ਆਨਨ੍ਦਤ੍ਥੇਰੋ ਇਮਿਸ੍ਸਾ ਕਥਾਯ ਸਾਮਿਕੋ, ਚੁਨ੍ਦਤ੍ਥੇਰੋ ਪਨ ਸਾਮਿਕੋ. ਸੋਵ ਤਸ੍ਸਾ ਆਦਿਮਜ੍ਝਪਰਿਯੋਸਾਨਂ ਜਾਨਾਤਿ. ਤਸ੍ਮਾ ਭਗਵਾ ਤੇਨ ਸਦ੍ਧਿਂ ਕਥੇਨ੍ਤੋ ‘‘ਏਵਞ੍ਹੇਤਂ, ਚੁਨ੍ਦ, ਹੋਤੀ’’ਤਿਆਦਿਮਾਹ. ਤਸ੍ਸਤ੍ਥੋ – ਚੁਨ੍ਦ ਏਵਞ੍ਹੇਤਂ ਹੋਤਿ ਦੁਰਕ੍ਖਾਤਾਦਿਸਭਾਵੇ ਧਮ੍ਮਵਿਨਯੇ ਸਾਵਕਾ ਦ੍ਵੇਧਿਕਜਾਤਾ ਭਣ੍ਡਨਾਦੀਨਿ ਕਤ੍ਵਾ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ.

ਇਦਾਨਿ ਯਸ੍ਮਾ ਅਨਿਯ੍ਯਾਨਿਕਸਾਸਨੇਨੇਵ ਨਿਯ੍ਯਾਨਿਕਸਾਸਨਂ ਪਾਕਟਂ ਹੋਤਿ, ਤਸ੍ਮਾ ਆਦਿਤੋ ਅਨਿਯ੍ਯਾਨਿਕਸਾਸਨਮੇਵ ਦਸ੍ਸੇਨ੍ਤੋ ਇਧ ਚੁਨ੍ਦ ਸਤ੍ਥਾ ਚ ਹੋਤਿ ਅਸਮ੍ਮਾਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਵੋਕ੍ਕਮ੍ਮ ਚ ਤਮ੍ਹਾ ਧਮ੍ਮਾ ਵਤ੍ਤਤੀਤਿ ਨ ਨਿਰਨ੍ਤਰਂ ਪੂਰੇਤਿ, ਓਕ੍ਕਮਿਤ੍ਵਾ ਓਕ੍ਕਮਿਤ੍ਵਾ ਅਨ੍ਤਰਨ੍ਤਰਂ ਕਤ੍ਵਾ ਵਤ੍ਤਤੀਤਿ ਅਤ੍ਥੋ. ਤਸ੍ਸ ਤੇ, ਆਵੁਸੋ, ਲਾਭਾਤਿ ਤਸ੍ਸ ਤੁਯ੍ਹਂ ਏਤੇ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਆਦਯੋ ਲਾਭਾ. ਸੁਲਦ੍ਧਨ੍ਤਿ ਮਨੁਸ੍ਸਤ੍ਤਮ੍ਪਿ ਤੇ ਸੁਲਦ੍ਧਂ. ਤਥਾ ਪਟਿਪਜ੍ਜਤੂਤਿ ਏਵਂ ਪਟਿਪਜ੍ਜਤੁ. ਯਥਾ ਤੇ ਸਤ੍ਥਾਰਾ ਧਮ੍ਮੋ ਦੇਸਿਤੋਤਿ ਯੇਨ ਤੇ ਆਕਾਰੇਨ ਸਤ੍ਥਾਰਾ ਧਮ੍ਮੋ ਕਥਿਤੋ. ਯੋ ਚ ਸਮਾਦਪੇਤੀਤਿ ਯੋ ਚ ਆਚਰਿਯੋ ਸਮਾਦਪੇਤਿ. ਯਞ੍ਚ ਸਮਾਦਪੇਤੀਤਿ ਯਂ ਅਨ੍ਤੇਵਾਸਿਂ ਸਮਾਦਪੇਤਿ. ਯੋ ਚ ਸਮਾਦਪਿਤੋਤਿ ਯੋ ਚ ਏਵਂ ਸਮਾਦਪਿਤੋ ਅਨ੍ਤੇਵਾਸਿਕੋ. ਯਥਾ ਆਚਰਿਯੇਨ ਸਮਾਦਪਿਤਂ, ਤਥਤ੍ਥਾਯ ਪਟਿਪਜ੍ਜਤਿ. ਸਬ੍ਬੇ ਤੇਤਿ ਤਯੋਪਿ ਤੇ. ਏਤ੍ਥ ਹਿ ਆਚਰਿਯੋ ਸਮਾਦਪਿਤਤ੍ਤਾ ਅਪੁਞ੍ਞਂ ਪਸਵਤਿ, ਸਮਾਦਿਨ੍ਨਨ੍ਤੇਵਾਸਿਕੋ ਸਮਾਦਿਨ੍ਨਤ੍ਤਾ, ਪਟਿਪਨ੍ਨਕੋ ਪਟਿਪਨ੍ਨਤ੍ਤਾ. ਤੇਨ ਵੁਤ੍ਤਂ – ‘‘ਸਬ੍ਬੇ ਤੇ ਬਹੁਂ ਅਪੁਞ੍ਞਂ ਪਸਵਨ੍ਤੀ’’ਤਿ. ਏਤੇਨੁਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੧੬੭. ਅਪਿਚੇਤ੍ਥ ਞਾਯਪ੍ਪਟਿਪਨ੍ਨੋਤਿ ਕਾਰਣਪ੍ਪਟਿਪਨ੍ਨੋ. ਞਾਯਮਾਰਾਧੇਸ੍ਸਤੀਤਿ ਕਾਰਣਂ ਨਿਪ੍ਫਾਦੇਸ੍ਸਤਿ. ਵੀਰਿਯਂ ਆਰਭਤੀਤਿ ਅਤ੍ਤਨੋ ਦੁਕ੍ਖਨਿਬ੍ਬਤ੍ਤਕਂ ਵੀਰਿਯਂ ਕਰੋਤਿ. ਵੁਤ੍ਤਞ੍ਹੇਤਂ ‘‘ਦੁਰਕ੍ਖਾਤੇ, ਭਿਕ੍ਖਵੇ, ਧਮ੍ਮਵਿਨਯੇ ਯੋ ਆਰਦ੍ਧਵੀਰਿਯੋ, ਸੋ ਦੁਕ੍ਖਂ ਵਿਹਰਤਿ. ਯੋ ਕੁਸੀਤੋ, ਸੋ ਸੁਖਂ ਵਿਹਰਤੀ’’ਤਿ (ਅ. ਨਿ. ੧.੩੧੮).

ਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਾਦਿਵਣ੍ਣਨਾ

੧੬੮. ਏਵਂ ਅਨਿਯ੍ਯਾਨਿਕਸਾਸਨਂ ਦਸ੍ਸੇਤ੍ਵਾ ਇਦਾਨਿ ਨਿਯ੍ਯਾਨਿਕਸਾਸਨਂ ਦਸ੍ਸੇਨ੍ਤੋ ਇਧ ਪਨ, ਚੁਨ੍ਦ, ਸਤ੍ਥਾ ਚ ਹੋਤਿ ਸਮ੍ਮਾਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਨਿਯ੍ਯਾਨਿਕੋਤਿ ਮਗ੍ਗਤ੍ਥਾਯ ਫਲਤ੍ਥਾਯ ਚ ਨਿਯ੍ਯਾਤਿ.

੧੬੯. ਵੀਰਿਯਂ ਆਰਭਤੀਤਿ ਅਤ੍ਤਨੋ ਸੁਖਨਿਪ੍ਫਾਦਕਂ ਵੀਰਿਯਂ ਆਰਭਤਿ. ਵੁਤ੍ਤਞ੍ਹੇਤਂ ‘‘ਸ੍ਵਾਕ੍ਖਾਤੇ, ਭਿਕ੍ਖਵੇ, ਧਮ੍ਮਵਿਨਯੇ ਯੋ ਕੁਸੀਤੋ, ਸੋ ਦੁਕ੍ਖਂ ਵਿਹਰਤਿ. ਯੋ ਆਰਦ੍ਧਵੀਰਿਯੋ, ਸੋ ਸੁਖਂ ਵਿਹਰਤੀ’’ਤਿ (ਅ. ਨਿ. ੧.੩੧੯).

੧੭੦. ਇਤਿ ਭਗਵਾ ਨਿਯ੍ਯਾਨਿਕਸਾਸਨੇ ਸਮ੍ਮਾਪਟਿਪਨ੍ਨਸ੍ਸ ਕੁਲਪੁਤ੍ਤਸ੍ਸ ਪਸਂਸਂ ਦਸ੍ਸੇਤ੍ਵਾ ਪੁਨ ਦੇਸਨਂ ਵਡ੍ਢੇਨ੍ਤੋ ਇਧ, ਚੁਨ੍ਦ, ਸਤ੍ਥਾ ਚ ਲੋਕੇ ਉਦਪਾਦੀਤਿਆਦਿਮਾਹ. ਤਤ੍ਥ ਅਵਿਞ੍ਞਾਪਿਤਤ੍ਥਾਤਿ ਅਬੋਧਿਤਤ੍ਥਾ. ਸਬ੍ਬਸਙ੍ਗਾਹਪਦਕਤਨ੍ਤਿ ਸਬ੍ਬਸਙ੍ਗਹਪਦੇਹਿ ਕਤਂ, ਸਬ੍ਬਸਙ੍ਗਾਹਿਕਂ ਕਤਂ ਨ ਹੋਤੀਤਿ ਅਤ੍ਥੋ. ‘‘ਸਬ੍ਬਸਙ੍ਗਾਹਪਦਗਤ’’ਨ੍ਤਿਪਿ ਪਾਠੋ, ਨ ਸਬ੍ਬਸਙ੍ਗਾਹਪਦੇਸੁ ਗਤਂ, ਨ ਏਕਸਙ੍ਗਹਜਾਤਨ੍ਤਿ ਅਤ੍ਥੋ. ਸਪ੍ਪਾਟਿਹੀਰਕਤਨ੍ਤਿ ਨਿਯ੍ਯਾਨਿਕਂ. ਯਾਵ ਦੇਵਮਨੁਸ੍ਸੇਹੀਤਿ ਦੇਵਲੋਕਤੋ ਯਾਵ ਮਨੁਸ੍ਸਲੋਕਾ ਸੁਪ੍ਪਕਾਸਿਤਂ. ਅਨੁਤਪ੍ਪੋ ਹੋਤੀਤਿ ਅਨੁਤਾਪਕਰੋ ਹੋਤਿ. ਸਤ੍ਥਾ ਚ ਨੋ ਲੋਕੇਤਿ ਇਦਂ ਤੇਸਂ ਅਨੁਤਾਪਕਾਰਦਸ੍ਸਨਤ੍ਥਂ ਵੁਤ੍ਤਂ. ਨਾਨੁਤਪ੍ਪੋ ਹੋਤੀਤਿ ਸਤ੍ਥਾਰਂ ਆਗਮ੍ਮ ਸਾਵਕੇਹਿ ਯਂ ਪਤ੍ਤਬ੍ਬਂ, ਤਸ੍ਸ ਪਤ੍ਤਤ੍ਤਾ ਅਨੁਤਾਪਕਰੋ ਨ ਹੋਤਿ.

੧੭੨. ਥੇਰੋਤਿ ਥਿਰੋ ਥੇਰਕਾਰਕੇਹਿ ਧਮ੍ਮੇਹਿ ਸਮਨ੍ਨਾਗਤੋ. ‘‘ਰਤ੍ਤਞ੍ਞੂ’’ਤਿਆਦੀਨਿ ਵੁਤ੍ਤਤ੍ਥਾਨੇਵ. ਏਤੇਹਿ ਚੇ ਪੀਤਿ ਏਤੇਹਿ ਹੇਟ੍ਠਾ ਵੁਤ੍ਤੇਹਿ.

੧੭੩. ਪਤ੍ਤਯੋਗਕ੍ਖੇਮਾਤਿ ਚਤੂਹਿ ਯੋਗੇਹਿ ਖੇਮਤ੍ਤਾ ਅਰਹਤ੍ਤਂ ਇਧ ਯੋਗਕ੍ਖੇਮਂ ਨਾਮ, ਤਂ ਪਤ੍ਤਾਤਿ ਅਤ੍ਥੋ. ਅਲਂ ਸਮਕ੍ਖਾਤੁਂ ਸਦ੍ਧਮ੍ਮਸ੍ਸਾਤਿ ਸਮ੍ਮੁਖਾ ਗਹਿਤਤ੍ਤਾ ਅਸ੍ਸ ਸਦ੍ਧਮ੍ਮਂ ਸਮ੍ਮਾ ਆਚਿਕ੍ਖਿਤੁਂ ਸਮਤ੍ਥਾ.

੧੭੪. ਬ੍ਰਹ੍ਮਚਾਰਿਨੋਤਿ ਬ੍ਰਹ੍ਮਚਰਿਯਵਾਸਂ ਵਸਮਾਨਾ ਅਰਿਯਸਾਵਕਾ. ਕਾਮਭੋਗਿਨੋਤਿ ਗਿਹਿਸੋਤਾਪਨ੍ਨਾ. ‘‘ਇਦ੍ਧਞ੍ਚੇਵਾ’’ਤਿਆਦੀਨਿ ਮਹਾਪਰਿਨਿਬ੍ਬਾਨੇ ਵਿਤ੍ਥਾਰਿਤਾਨੇਵ. ਲਾਭਗ੍ਗਯਸਗ੍ਗਪਤ੍ਤਨ੍ਤਿ ਲਾਭਗ੍ਗਞ੍ਚੇਵ ਯਸਗ੍ਗਞ੍ਚ ਪਤ੍ਤਂ.

੧੭੫. ਸਨ੍ਤਿ ਖੋ ਪਨ ਮੇ, ਚੁਨ੍ਦ, ਏਤਰਹਿ ਥੇਰਾ ਭਿਕ੍ਖੂ ਸਾਵਕਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਥੇਰਾ. ਭਿਕ੍ਖੁਨਿਯੋਤਿ ਖੇਮਾਥੇਰੀਉਪ੍ਪਲਵਣ੍ਣਥੇਰੀਆਦਯੋ. ਉਪਾਸਕਾ ਸਾਵਕਾ ਗਿਹੀ ਓਦਾਤਵਤ੍ਥਵਸਨਾ ਬ੍ਰਹ੍ਮਚਾਰਿਨੋਤਿ ਚਿਤ੍ਤਗਹਪਤਿਹਤ੍ਥਕਆਲ਼ਵਕਾਦਯੋ. ਕਾਮਭੋਗਿਨੋਤਿ ਚੂਲ਼ਅਨਾਥਪਿਣ੍ਡਿਕਮਹਾਅਨਾਥਪਿਣ੍ਡਿਕਾਦਯੋ. ਬ੍ਰਹ੍ਮਚਾਰਿਨਿਯੋਤਿ ਨਨ੍ਦਮਾਤਾਦਯੋ. ਕਾਮਭੋਗਿਨਿਯੋਤਿ ਖੁਜ੍ਜੁਤ੍ਤਰਾਦਯੋ.

੧੭੬. ਸਬ੍ਬਾਕਾਰਸਮ੍ਪਨ੍ਨਨ੍ਤਿ ਸਬ੍ਬਕਾਰਣਸਮ੍ਪਨ੍ਨਂ. ਇਦਮੇਵ ਤਨ੍ਤਿ ਇਦਮੇਵ ਬ੍ਰਹ੍ਮਚਰਿਯਂ, ਇਮਮੇਵ ਧਮ੍ਮਂ ਸਮ੍ਮਾ ਹੇਤੁਨਾ ਨਯੇਨ ਵਦਮਾਨੋ ਵਦੇਯ੍ਯ. ਉਦਕਾਸ੍ਸੁਦਨ੍ਤਿ ਉਦਕੋ ਸੁਦਂ. ਪਸ੍ਸਂ ਨ ਪਸ੍ਸਤੀਤਿ ਪਸ੍ਸਨ੍ਤੋ ਨ ਪਸ੍ਸਤਿ. ਸੋ ਕਿਰ ਇਮਂ ਪਞ੍ਹਂ ਮਹਾਜਨਂ ਪੁਚ੍ਛਿ. ਤੇਹਿ ‘‘ਨ ਜਾਨਾਮ, ਆਚਰਿਯ, ਕਥੇਹਿ ਨੋ’’ਤਿ ਵੁਤ੍ਤੋ ਸੋ ਆਹ – ‘‘ਗਮ੍ਭੀਰੋ ਅਯਂ ਪਞ੍ਹੋ ਆਹਾਰਸਪ੍ਪਾਯੇ ਸਤਿ ਥੋਕਂ ਚਿਨ੍ਤੇਤ੍ਵਾ ਸਕ੍ਕਾ ਕਥੇਤੁ’’ਨ੍ਤਿ. ਤਤੋ ਤੇਹਿ ਚਤ੍ਤਾਰੋ ਮਾਸੇ ਮਹਾਸਕ੍ਕਾਰੇ ਕਤੇ ਤਂ ਪਞ੍ਹਂ ਕਥੇਨ੍ਤੋ ਕਿਞ੍ਚ ਪਸ੍ਸਂ ਨ ਪਸ੍ਸਤੀਤਿਆਦਿਮਾਹ. ਤਤ੍ਥ ਸਾਧੁਨਿਸਿਤਸ੍ਸਾਤਿ ਸੁਟ੍ਠੁਨਿਸਿਤਸ੍ਸ ਤਿਖਿਣਸ੍ਸ, ਸੁਨਿਸਿਤਖੁਰਸ੍ਸ ਕਿਰ ਤਲਂ ਪਞ੍ਞਾਯਤਿ, ਧਾਰਾ ਨ ਪਞ੍ਞਾਯਤੀਤਿ ਅਯਮੇਤ੍ਥ ਅਤ੍ਥੋ.

ਸਙ੍ਗਾਯਿਤਬ੍ਬਧਮ੍ਮਾਦਿਵਣ੍ਣਨਾ

੧੭੭. ਸਙ੍ਗਮ੍ਮ ਸਮਾਗਮ੍ਮਾਤਿ ਸਙ੍ਗਨ੍ਤ੍ਵਾ ਸਮਾਗਨ੍ਤ੍ਵਾ. ਅਤ੍ਥੇਨ ਅਤ੍ਥਂ, ਬ੍ਯਞ੍ਜਨੇਨ ਬ੍ਯਞ੍ਜਨਨ੍ਤਿ ਅਤ੍ਥੇਨ ਸਹ ਅਤ੍ਥਂ, ਬ੍ਯਞ੍ਜਨੇਨਪਿ ਸਹ ਬ੍ਯਞ੍ਜਨਂ ਸਮਾਨੇਨ੍ਤੇਹੀਤਿ ਅਤ੍ਥੋ. ਸਙ੍ਗਾਯਿਤਬ੍ਬਨ੍ਤਿ ਵਾਚੇਤਬ੍ਬਂ ਸਜ੍ਝਾਯਿਤਬ੍ਬਂ. ਯਥਯਿਦਂ ਬ੍ਰਹ੍ਮਚਰਿਯਨ੍ਤਿ ਯਥਾ ਇਦਂ ਸਕਲਂ ਸਾਸਨਬ੍ਰਹ੍ਮਚਰਿਯਂ.

੧੭੮. ਤਤ੍ਰ ਚੇਤਿ ਤਤ੍ਰ ਸਙ੍ਘਮਜ੍ਝੇ, ਤਸ੍ਸ ਵਾ ਭਾਸਿਤੇ. ਅਤ੍ਥਞ੍ਚੇਵ ਮਿਚ੍ਛਾ ਗਣ੍ਹਾਤਿ, ਬ੍ਯਞ੍ਜਨਾਨਿ ਚ ਮਿਚ੍ਛਾ ਰੋਪੇਤੀਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਏਤ੍ਥ ਆਰਮ੍ਮਣਂ ‘‘ਸਤਿਪਟ੍ਠਾਨ’’ਨ੍ਤਿ ਅਤ੍ਥਂ ਗਣ੍ਹਾਤਿ. ‘‘ਸਤਿਪਟ੍ਠਾਨਾਨੀ’’ਤਿ ਬ੍ਯਞ੍ਜਨਂ ਰੋਪੇਤਿ. ਇਮਸ੍ਸ ਨੁ ਖੋ, ਆਵੁਸੋ, ਅਤ੍ਥਸ੍ਸਾਤਿ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ. ਅਤ੍ਥਸ੍ਸ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਕਿਂ ਨੁ ਖੋ ਇਮਾਨਿ ਬ੍ਯਞ੍ਜਨਾਨਿ, ਉਦਾਹੁ ਚਤ੍ਤਾਰਿ ਸਤਿਪਟ੍ਠਾਨਾਨੀ’’ਤਿ ਏਤਾਨਿ ਵਾ ਬ੍ਯਞ੍ਜਨਾਨਿ. ਕਤਮਾਨਿ ਓਪਾਯਿਕਤਰਾਨੀਤਿ ਇਮਸ੍ਸ ਅਤ੍ਥਸ੍ਸ ਕਤਮਾਨਿ ਬ੍ਯਞ੍ਜਨਾਨਿ ਉਪਪਨ੍ਨਤਰਾਨਿ ਅਲ੍ਲੀਨਤਰਾਨਿ. ਇਮੇਸਞ੍ਚ ਬ੍ਯਞ੍ਜਨਾਨਨ੍ਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਬ੍ਯਞ੍ਜਨਾਨਂ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ ਕਿਂ ਨੁ ਖੋ ਅਯਂ ਅਤ੍ਥੋ, ਉਦਾਹੁ ‘‘ਆਰਮ੍ਮਣਂ ਸਤਿਪਟ੍ਠਾਨ’’ਨ੍ਤਿ ਏਸੋ ਅਤ੍ਥੋਤਿ? ਇਮਸ੍ਸ ਖੋ, ਆਵੁਸੋ, ਅਤ੍ਥਸ੍ਸਾਤਿ ‘‘ਆਰਮ੍ਮਣਂ ਸਤਿਪਟ੍ਠਾਨ’’ਨ੍ਤਿ ਇਮਸ੍ਸ ਅਤ੍ਥਸ੍ਸ. ਯਾ ਚੇਵ ਏਤਾਨੀਤਿ ਯਾਨਿ ਚੇਵ ਏਤਾਨਿ ਮਯਾ ਵੁਤ੍ਤਾਨਿ. ਯਾ ਚੇਵ ਏਸੋਤਿ ਯੋ ਚੇਵ ਏਸ ਮਯਾ ਵੁਤ੍ਤੋ. ਸੋ ਨੇਵ ਉਸ੍ਸਾਦੇਤਬ੍ਬੋਤਿ ਤੁਮ੍ਹੇਹਿ ਤਾਵ ਸਮ੍ਮਾ ਅਤ੍ਥੇ ਚ ਸਮ੍ਮਾ ਬ੍ਯਞ੍ਜਨੇ ਚ ਠਾਤਬ੍ਬਂ. ਸੋ ਪਨ ਨੇਵ ਉਸ੍ਸਾਦੇਤਬ੍ਬੋ, ਨ ਅਪਸਾਦੇਤਬ੍ਬੋ. ਸਞ੍ਞਾਪੇਤਬ੍ਬੋਤਿ ਜਾਨਾਪੇਤਬ੍ਬੋ. ਤਸ੍ਸ ਚ ਅਤ੍ਥਸ੍ਸਾਤਿ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ ਅਤ੍ਥਸ੍ਸ ਚ. ਤੇਸਞ੍ਚ ਬ੍ਯਞ੍ਜਨਾਨਨ੍ਤਿ ‘‘ਸਤਿਪਟ੍ਠਾਨਾ’’ਤਿ ਬ੍ਯਞ੍ਜਨਾਨਂ. ਨਿਸਨ੍ਤਿਯਾਤਿ ਨਿਸਾਮਨਤ੍ਥਂ ਧਾਰਣਤ੍ਥਂ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੧੮੧. ਤਾਦਿਸਨ੍ਤਿ ਤੁਮ੍ਹਾਦਿਸਂ. ਅਤ੍ਥੁਪੇਤਨ੍ਤਿ ਅਤ੍ਥੇਨ ਉਪੇਤਂ ਅਤ੍ਥਸ੍ਸ ਵਿਞ੍ਞਾਤਾਰਂ. ਬ੍ਯਞ੍ਜਨੁਪੇਤਨ੍ਤਿ ਬ੍ਯਞ੍ਜਨੇਹਿ ਉਪੇਤਂ ਬ੍ਯਞ੍ਜਨਾਨਂ ਵਿਞ੍ਞਾਤਾਰਂ. ਏਵਂ ਏਤਂ ਭਿਕ੍ਖੁਂ ਪਸਂਸਥ. ਏਸੋ ਹਿ ਭਿਕ੍ਖੁ ਨ ਤੁਮ੍ਹਾਕਂ ਸਾਵਕੋ ਨਾਮ, ਬੁਦ੍ਧੋ ਨਾਮ ਏਸ ਚੁਨ੍ਦਾਤਿ. ਇਤਿ ਭਗਵਾ ਬਹੁਸ੍ਸੁਤਂ ਭਿਕ੍ਖੁਂ ਅਤ੍ਤਨੋ ਠਾਨੇ ਠਪੇਸਿ.

ਪਚ੍ਚਯਾਨੁਞ੍ਞਾਤਕਾਰਣਾਦਿਵਣ੍ਣਨਾ

੧੮੨. ਇਦਾਨਿ ਤਤੋਪਿ ਉਤ੍ਤਰਿਤਰਂ ਦੇਸਨਂ ਵਡ੍ਢੇਨ੍ਤੋ ਨ ਵੋ ਅਹਂ, ਚੁਨ੍ਦਾਤਿਆਦਿਮਾਹ. ਤਤ੍ਥ ਦਿਟ੍ਠਧਮ੍ਮਿਕਾ ਆਸਵਾ ਨਾਮ ਇਧਲੋਕੇ ਪਚ੍ਚਯਹੇਤੁ ਉਪ੍ਪਜ੍ਜਨਕਾ ਆਸਵਾ. ਸਮ੍ਪਰਾਯਿਕਾ ਆਸਵਾ ਨਾਮ ਪਰਲੋਕੇ ਭਣ੍ਡਨਹੇਤੁ ਉਪ੍ਪਜ੍ਜਨਕਾ ਆਸਵਾ. ਸਂਵਰਾਯਾਤਿ ਯਥਾ ਤੇ ਨ ਪਵਿਸਨ੍ਤਿ, ਏਵਂ ਪਿਦਹਨਾਯ. ਪਟਿਘਾਤਾਯਾਤਿ ਮੂਲਘਾਤੇਨ ਪਟਿਹਨਨਾਯ. ਅਲਂ ਵੋ ਤਂ ਯਾਵਦੇਵ ਸੀਤਸ੍ਸ ਪਟਿਘਾਤਾਯਾਤਿ ਤਂ ਤੁਮ੍ਹਾਕਂ ਸੀਤਸ੍ਸ ਪਟਿਘਾਤਾਯ ਸਮਤ੍ਥਂ. ਇਦਂ ਵੁਤ੍ਤਂ ਹੋਤਿ, ਯਂ ਵੋ ਮਯਾ ਚੀਵਰਂ ਅਨੁਞ੍ਞਾਤਂ, ਤਂ ਪਾਰੁਪਿਤ੍ਵਾ ਦਪ੍ਪਂ ਵਾ ਮਾਨਂ ਵਾ ਕੁਰੁਮਾਨਾ ਵਿਹਰਿਸ੍ਸਥਾਤਿ ਨ ਅਨੁਞ੍ਞਾਤਂ, ਤਂ ਪਨ ਪਾਰੁਪਿਤ੍ਵਾ ਸੀਤਪ੍ਪਟਿਘਾਤਾਦੀਨਿ ਕਤ੍ਵਾ ਸੁਖਂ ਸਮਣਧਮ੍ਮਂ ਯੋਨਿਸੋ ਮਨਸਿਕਾਰਂ ਕਰਿਸ੍ਸਥਾਤਿ ਅਨੁਞ੍ਞਾਤਂ. ਯਥਾ ਚ ਚੀਵਰਂ, ਏਵਂ ਪਿਣ੍ਡਪਾਤਾਦਯੋਪਿ. ਅਨੁਪਦਸਂਵਣ੍ਣਨਾ ਪਨੇਤ੍ਥ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਸੁਖਲ੍ਲਿਕਾਨੁਯੋਗਾਦਿਵਣ੍ਣਨਾ

੧੮੩. ਸੁਖਲ੍ਲਿਕਾਨੁਯੋਗਨ੍ਤਿ ਸੁਖਲ੍ਲਿਯਨਾਨੁਯੋਗਂ, ਸੁਖਸੇਵਨਾਧਿਮੁਤ੍ਤਨ੍ਤਿ ਅਤ੍ਥੋ. ਸੁਖੇਤੀਤਿ ਸੁਖਿਤਂ ਕਰੋਤਿ. ਪੀਣੇਤੀਤਿ ਪੀਣਿਤਂ ਥੂਲਂ ਕਰੋਤਿ.

੧੮੬. ਅਟ੍ਠਿਤਧਮ੍ਮਾਤਿ ਨਟ੍ਠਿਤਸਭਾਵਾ. ਜਿਵ੍ਹਾ ਨੋ ਅਤ੍ਥੀਤਿ ਯਂ ਯਂ ਇਚ੍ਛਨ੍ਤਿ, ਤਂ ਤਂ ਕਥੇਨ੍ਤਿ, ਕਦਾਚਿ ਮਗ੍ਗਂ ਕਥੇਨ੍ਤਿ, ਕਦਾਚਿ ਫਲਂ ਕਦਾਚਿ ਨਿਬ੍ਬਾਨਨ੍ਤਿ ਅਧਿਪ੍ਪਾਯੋ. ਜਾਨਤਾਤਿ ਸਬ੍ਬਞ੍ਞੁਤਞ੍ਞਾਣੇਨ ਜਾਨਨ੍ਤੇਨ. ਪਸ੍ਸਤਾਤਿ ਪਞ੍ਚਹਿ ਚਕ੍ਖੂਹਿ ਪਸ੍ਸਨ੍ਤੇਨ. ਗਮ੍ਭੀਰਨੇਮੋਤਿ ਗਮ੍ਭੀਰਭੂਮਿਂ ਅਨੁਪਵਿਟ੍ਠੋ. ਸੁਨਿਖਾਤੋਤਿ ਸੁਟ੍ਠੁ ਨਿਖਾਤੋ. ਏਵਮੇਵ ਖੋ, ਆਵੁਸੋਤਿ ਏਵਂ ਖੀਣਾਸਵੋ ਅਭਬ੍ਬੋ ਨਵ ਠਾਨਾਨਿ ਅਜ੍ਝਾਚਰਿਤੁਂ. ਤਸ੍ਮਿਂ ਅਨਜ੍ਝਾਚਾਰੋ ਅਚਲੋ ਅਸਮ੍ਪਵੇਧੀ. ਤਤ੍ਥ ਸਞ੍ਚਿਚ੍ਚ ਪਾਣਂ ਜੀਵਿਤਾ ਵੋਰੋਪਨਾਦੀਸੁ ਸੋਤਾਪਨ੍ਨਾਦਯੋਪਿ ਅਭਬ੍ਬਾ. ਸਨ੍ਨਿਧਿਕਾਰਕਂ ਕਾਮੇ ਪਰਿਭੁਞ੍ਜਿਤੁਨ੍ਤਿ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਸਨ੍ਨਿਧਿਂ ਕਤ੍ਵਾ ਪਰਿਭੁਞ੍ਜਿਤੁਂ. ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋਤਿ ਯਥਾ ਪੁਬ੍ਬੇ ਗਿਹਿਭੂਤੋ ਪਰਿਭੁਞ੍ਜਤਿ, ਏਵਂ ਪਰਿਭੁਞ੍ਜਿਤੁਂ ਅਭਬ੍ਬੋ.

ਪਞ੍ਹਬ੍ਯਾਕਰਣਵਣ੍ਣਨਾ

੧੮੭. ਅਗਾਰਮਜ੍ਝੇ ਵਸਨ੍ਤਾ ਹਿ ਸੋਤਾਪਨ੍ਨਾਦਯੋ ਯਾਵਜੀਵਂ ਗਿਹਿਬ੍ਯਞ੍ਜਨੇਨ ਤਿਟ੍ਠਨ੍ਤਿ. ਖੀਣਾਸਵੋ ਪਨ ਅਰਹਤ੍ਤਂ ਪਤ੍ਵਾਵ ਮਨੁਸ੍ਸਭੂਤੋ ਪਰਿਨਿਬ੍ਬਾਤਿ ਵਾ ਪਬ੍ਬਜਤਿ ਵਾ. ਚਾਤੁਮਹਾਰਾਜਿਕਾਦੀਸੁ ਕਾਮਾਵਚਰਦੇਵੇਸੁ ਮੁਹੁਤ੍ਤਮ੍ਪਿ ਨ ਤਿਟ੍ਠਤਿ. ਕਸ੍ਮਾ? ਵਿਵੇਕਟ੍ਠਾਨਸ੍ਸ ਅਭਾਵਾ. ਭੁਮ੍ਮਦੇਵਤ੍ਤਭਾਵੇ ਪਨ ਠਿਤੋ ਅਰਹਤ੍ਤਂ ਪਤ੍ਵਾਪਿ ਤਿਟ੍ਠਤਿ. ਤਸ੍ਸ ਵਸੇਨ ਅਯਂ ਪਞ੍ਹੋ ਆਗਤੋ. ਭਿਨ੍ਨਦੋਸਤ੍ਤਾ ਪਨਸ੍ਸ ਭਿਕ੍ਖੁਭਾਵੋ ਵੇਦਿਤਬ੍ਬੋ. ਅਤੀਰਕਨ੍ਤਿ ਅਤੀਰਂ ਅਪਰਿਚ੍ਛੇਦਂ ਮਹਨ੍ਤਂ. ਨੋ ਚ ਖੋ ਅਨਾਗਤਨ੍ਤਿ ਅਨਾਗਤਂ ਪਨ ਅਦ੍ਧਾਨਂ ਆਰਬ੍ਭ ਏਵਂ ਨ ਪਞ੍ਞਪੇਤਿ, ਅਤੀਤਮੇਵ ਮਞ੍ਞੇ ਸਮਣੋ ਗੋਤਮੋ ਜਾਨਾਤਿ, ਨ ਅਨਾਗਤਂ. ਤਥਾ ਹਿਸ੍ਸ ਅਤੀਤੇ ਅਡ੍ਢਛਟ੍ਠਸਤਜਾਤਕਾਨੁਸ੍ਸਰਣਂ ਪਞ੍ਞਾਯਤਿ. ਅਨਾਗਤੇ ਏਵਂ ਬਹੁਂ ਅਨੁਸ੍ਸਰਣਂ ਨ ਪਞ੍ਞਾਯਤੀਤਿ ਇਮਮਤ੍ਥਂ ਮਞ੍ਞਮਾਨਾ ਏਵਂ ਵਦੇਯ੍ਯੁਂ. ਤਯਿਦਂ ਕਿਂ ਸੂਤਿ ਅਨਾਗਤੇ ਅਪਞ੍ਞਾਪਨਂ ਕਿਂ ਨੁ ਖੋ? ਕਥਂਸੂਤਿ ਕੇਨ ਨੁ ਖੋ ਕਾਰਣੇਨ ਅਜਾਨਨ੍ਤੋਯੇਵ ਨੁ ਖੋ ਅਨਾਗਤਂ ਨਾਨੁਸ੍ਸਰਤਿ, ਅਨਨੁਸ੍ਸਰਿਤੁਕਾਮਤਾਯ ਨਾਨੁਸ੍ਸਰਤੀਤਿ. ਅਞ੍ਞਵਿਹਿਤਕੇਨ ਞਾਣਦਸ੍ਸਨੇਨਾਤਿ ਪਚ੍ਚਕ੍ਖਂ ਵਿਯ ਕਤ੍ਵਾ ਦਸ੍ਸਨਸਮਤ੍ਥਤਾਯ ਦਸ੍ਸਨਭੂਤੇਨ ਞਾਣੇਨ ਅਞ੍ਞਤ੍ਥਵਿਹਿਤਕੇਨ ਞਾਣੇਨ ਅਞ੍ਞਂ ਆਰਬ੍ਭ ਪਵਤ੍ਤੇਨ, ਅਞ੍ਞਵਿਹਿਤਕਂ ਅਞ੍ਞਂ ਆਰਬ੍ਭ ਪਵਤ੍ਤਮਾਨਂ ਞਾਣਦਸ੍ਸਨਂ ਸਙ੍ਗਾਹੇਤਬ੍ਬਂ ਪਞ੍ਞਾਪੇਤਬ੍ਬਂ ਮਞ੍ਞਨ੍ਤਿ. ਤੇ ਹਿ ਚਰਤੋ ਚ ਤਿਟ੍ਠਤੋ ਚ ਸੁਤ੍ਤਸ੍ਸ ਚ ਜਾਗਰਸ੍ਸ ਚ ਸਤਤਂ ਸਮਿਤਂ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਮਞ੍ਞਨ੍ਤਿ, ਤਾਦਿਸਞ੍ਚ ਞਾਣਂ ਨਾਮ ਨਤ੍ਥਿ. ਤਸ੍ਮਾ ਯਥਰਿਵ ਬਾਲਾ ਅਬ੍ਯਤ੍ਤਾ, ਏਵਂ ਮਞ੍ਞਨ੍ਤੀਤਿ ਵੇਦਿਤਬ੍ਬੋ.

ਸਤਾਨੁਸਾਰੀਤਿ ਪੁਬ੍ਬੇਨਿਵਾਸਾਨੁਸ੍ਸਤਿਸਮ੍ਪਯੁਤ੍ਤਕਂ. ਯਾਵਤਕਂ ਆਕਙ੍ਖਤੀਤਿ ਯਤ੍ਤਕਂ ਞਾਤੁਂ ਇਚ੍ਛਤਿ, ਤਤ੍ਤਕਂ ਜਾਨਿਸ੍ਸਾਮੀਤਿ ਞਾਣਂ ਪੇਸੇਸਿ. ਅਥਸ੍ਸ ਦੁਬ੍ਬਲਪਤ੍ਤਪੁਟੇ ਪਕ੍ਖਨ੍ਦਨਾਰਾਚੋ ਵਿਯ ਅਪ੍ਪਟਿਹਤਂ ਅਨਿਵਾਰਿਤਂ ਞਾਣਂ ਗਚ੍ਛਤਿ, ਤੇਨ ਯਾਵਤਕਂ ਆਕਙ੍ਖਤਿ ਤਾਵਤਕਂ ਅਨੁਸ੍ਸਰਤਿ. ਬੋਧਿਜਨ੍ਤਿ ਬੋਧਿਮੂਲੇ ਜਾਤਂ. ਞਾਣਂ ਉਪ੍ਪਜ੍ਜਤੀਤਿ ਚਤੁਮਗ੍ਗਞਾਣਂ ਉਪ੍ਪਜ੍ਜਤਿ. ਅਯਮਨ੍ਤਿਮਾ ਜਾਤੀਤਿ ਤੇਨ ਞਾਣੇਨ ਜਾਤਿਮੂਲਸ੍ਸ ਪਹੀਨਤ੍ਤਾ ਪੁਨ ਅਯਮਨ੍ਤਿਮਾ ਜਾਤਿ. ਨਤ੍ਥਿਦਾਨਿ ਪੁਨਬ੍ਭਵੋਤਿ ਅਪਰਮ੍ਪਿ ਞਾਣਂ ਉਪ੍ਪਜ੍ਜਤਿ. ਅਨਤ੍ਥਸਂਹਿਤਨ੍ਤਿ ਨ ਇਧਲੋਕਤ੍ਥਂ ਵਾ ਪਰਲੋਕਤ੍ਥਂ ਵਾ ਨਿਸ੍ਸਿਤਂ. ਨ ਤਂ ਤਥਾਗਤੋ ਬ੍ਯਾਕਰੋਤੀਤਿ ਤਂ ਭਾਰਤਯੁਦ੍ਧਸੀਤਾਹਰਣਸਦਿਸਂ ਅਨਿਯ੍ਯਾਨਿਕਕਥਂ ਤਥਾਗਤੋ ਨ ਕਥੇਤਿ. ਭੂਤਂ ਤਚ੍ਛਂ ਅਨਤ੍ਥਸਂਹਿਤਨ੍ਤਿ ਰਾਜਕਥਾਦਿਤਿਰਚ੍ਛਾਨਕਥਂ. ਕਾਲਞ੍ਞੂ ਤਥਾਗਤੋ ਹੋਤੀਤਿ ਕਾਲਂ ਜਾਨਾਤਿ. ਸਹੇਤੁਕਂ ਸਕਾਰਣਂ ਕਤ੍ਵਾ ਯੁਤ੍ਤਪਤ੍ਤਕਾਲੇਯੇਵ ਕਥੇਤਿ.

੧੮੮. ਤਸ੍ਮਾ ਤਥਾਗਤੋਤਿ ਵੁਚ੍ਚਤੀਤਿ ਯਥਾ ਯਥਾ ਗਦਿਤਬ੍ਬਂ, ਤਥਾ ਤਥੇਵ ਗਦਨਤੋ ਦਕਾਰਸ੍ਸ ਤਕਾਰਂ ਕਤ੍ਵਾ ਤਥਾਗਤੋਤਿ ਵੁਚ੍ਚਤੀਤਿ ਅਤ੍ਥੋ. ਦਿਟ੍ਠਨ੍ਤਿ ਰੂਪਾਯਤਨਂ. ਸੁਤਨ੍ਤਿ ਸਦ੍ਦਾਯਤਨਂ. ਮੁਤਨ੍ਤਿ ਮੁਤ੍ਵਾ ਪਤ੍ਵਾ ਗਹੇਤਬ੍ਬਤੋ ਗਨ੍ਧਾਯਤਨਂ ਰਸਾਯਤਨਂ ਫੋਟ੍ਠਬ੍ਬਾਯਤਨਂ. ਵਿਞ੍ਞਾਤਨ੍ਤਿ ਸੁਖਦੁਕ੍ਖਾਦਿਧਮ੍ਮਾਯਤਨਂ. ਪਤ੍ਤਨ੍ਤਿ ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ ਪਤ੍ਤਂ. ਪਰਿਯੇਸਿਤਨ੍ਤਿ ਪਤ੍ਤਂ ਵਾ ਅਪਤ੍ਤਂ ਵਾ ਪਰਿਯੇਸਿਤਂ. ਅਨੁਵਿਚਰਿਤਂ ਮਨਸਾਤਿ ਚਿਤ੍ਤੇਨ ਅਨੁਸਞ੍ਚਰਿਤਂ. ‘‘ਤਥਾਗਤੇਨ ਅਭਿਸਮ੍ਬੁਦ੍ਧ’’ਨ੍ਤਿ ਇਮਿਨਾ ਏਤਂ ਦਸ੍ਸੇਤਿ, ਯਞ੍ਹਿ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਨੀਲਂ ਪੀਤਕਨ੍ਤਿਆਦਿ ਰੂਪਾਰਮ੍ਮਣਂ ਚਕ੍ਖੁਦ੍ਵਾਰੇ ਆਪਾਥਮਾਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਰੂਪਾਰਮ੍ਮਣਂ ਦਿਸ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋਤਿਆਦਿ ਸਦ੍ਦਾਰਮ੍ਮਣਂ ਸੋਤਦ੍ਵਾਰੇ ਆਪਾਥਮਾਗਚ੍ਛਤਿ. ਮੂਲਗਨ੍ਧੋ ਤਚਗਨ੍ਧੋਤਿਆਦਿ ਗਨ੍ਧਾਰਮ੍ਮਣਂ ਘਾਨਦ੍ਵਾਰੇ ਆਪਾਥਮਾਗਚ੍ਛਤਿ. ਮੂਲਰਸੋ ਖਨ੍ਧਰਸੋਤਿਆਦਿ ਰਸਾਰਮ੍ਮਣਂ ਜਿਵ੍ਹਾਦ੍ਵਾਰੇ ਆਪਾਥਮਾਗਚ੍ਛਤਿ. ਕਕ੍ਖਲ਼ਂ ਮੁਦੁਕਨ੍ਤਿਆਦਿ ਪਥਵੀਧਾਤੁਤੇਜੋਧਾਤੁਵਾਯੋਧਾਤੁਭੇਦਂ ਫੋਟ੍ਠਬ੍ਬਾਰਮ੍ਮਣਂ ਕਾਯਦ੍ਵਾਰੇ ਆਪਾਥਮਾਗਚ੍ਛਤਿ. ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਫੋਟ੍ਠਬ੍ਬਾਰਮ੍ਮਣਂ ਫੁਸਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਸੁਖਦੁਕ੍ਖਾਦਿਭੇਦਂ ਧਮ੍ਮਾਰਮ੍ਮਣਂ ਮਨੋਦ੍ਵਾਰਸ੍ਸ ਆਪਾਥਮਾਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਦਂ ਨਾਮ ਧਮ੍ਮਾਰਮ੍ਮਣਂ ਵਿਜਾਨਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ.

ਯਞ੍ਹਿ, ਚੁਨ੍ਦ, ਇਮੇਸਂ ਸਤ੍ਤਾਨਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਤਤ੍ਥ ਤਥਾਗਤੇਨ ਅਦਿਟ੍ਠਂ ਵਾ ਅਸੁਤਂ ਵਾ ਅਮੁਤਂ ਵਾ ਅਵਿਞ੍ਞਾਤਂ ਵਾ ਨਤ੍ਥਿ. ਇਮਸ੍ਸ ਮਹਾਜਨਸ੍ਸ ਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ. ਅਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਅਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ. ਸਬ੍ਬਮ੍ਪਿ ਤਂ ਤਥਾਗਤਸ੍ਸ ਅਪ੍ਪਤ੍ਤਂ ਨਾਮ ਨਤ੍ਥਿ, ਞਾਣੇਨ ਅਸਚ੍ਛਿਕਤਂ ਨਾਮ. ‘‘ਤਸ੍ਮਾ ਤਥਾਗਤੋਤਿ ਵੁਚ੍ਚਤੀ’’ਤਿ. ਯਂ ਯਥਾ ਲੋਕੇਨ ਗਤਂ ਤਸ੍ਸ ਤਥੇਵ ਗਤਤ੍ਤਾ ‘‘ਤਥਾਗਤੋ’’ਤਿ ਵੁਚ੍ਚਤਿ. ਪਾਲ਼ਿਯਂ ਪਨ ਅਭਿਸਮ੍ਬੁਦ੍ਧਨ੍ਤਿ ਵੁਤ੍ਤਂ, ਤਂ ਗਤਸਦ੍ਦੇਨ ਏਕਤ੍ਥਂ. ਇਮਿਨਾ ਨਯੇਨ ਸਬ੍ਬਵਾਰੇਸੁ ‘‘ਤਥਾਗਤੋ’’ਤਿ ਨਿਗਮਨਸ੍ਸ ਅਤ੍ਥੋ ਵੇਦਿਤਬ੍ਬੋ, ਤਸ੍ਸ ਯੁਤ੍ਤਿ ਬ੍ਰਹ੍ਮਜਾਲੇ ਤਥਾਗਤਸਦ੍ਦਵਿਤ੍ਥਾਰੇ ਵੁਤ੍ਤਾਯੇਵ.

ਅਬ੍ਯਾਕਤਟ੍ਠਾਨਵਣ੍ਣਨਾ

੧੮੯. ਏਵਂ ਅਤ੍ਤਨੋ ਅਸਮਤਂ ਅਨੁਤ੍ਤਰਤਂ ਸਬ੍ਬਞ੍ਞੁਤਂ ਧਮ੍ਮਰਾਜਭਾਵਂ ਕਥੇਤ੍ਵਾ ਇਦਾਨਿ ‘‘ਪੁਥੁਸਮਣਬ੍ਰਾਹ੍ਮਣਾਨਂ ਲਦ੍ਧੀਸੁ ਮਯਾ ਅਞ੍ਞਾਤਂ ਅਦਿਟ੍ਠਂ ਨਾਮ ਨਤ੍ਥਿ, ਸਬ੍ਬਂ ਮਮ ਞਾਣਸ੍ਸ ਅਨ੍ਤੋਯੇਵ ਪਰਿਵਤ੍ਤਤੀ’’ਤਿ ਸੀਹਨਾਦਂ ਨਦਨ੍ਤੋ ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤੀਤਿਆਦਿਮਾਹ. ਤਤ੍ਥ ਤਥਾਗਤੋਤਿ ਸਤ੍ਤੋ. ਨ ਹੇਤਂ, ਆਵੁਸੋ, ਅਤ੍ਥਸਂਹਿਤਨ੍ਤਿ ਇਧਲੋਕਪਰਲੋਕਅਤ੍ਥਸਂਹਿਤਂ ਨ ਹੋਤਿ. ਨ ਚ ਧਮ੍ਮਸਂਹਿਤਨ੍ਤਿ ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਂ ਨ ਹੋਤਿ. ਨ ਆਦਿਬ੍ਰਹ੍ਮਚਰਿਯਕਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਸ੍ਸ ਸਕਲਸਾਸਨਬ੍ਰਹ੍ਮਚਰਿਯਸ੍ਸ ਆਦਿਭੂਤਂ ਨ ਹੋਤਿ.

੧੯੦. ਇਦਂ ਦੁਕ੍ਖਨ੍ਤਿ ਖੋਤਿਆਦੀਸੁ ਤਣ੍ਹਂ ਠਪੇਤ੍ਵਾ ਅਵਸੇਸਾ ਤੇਭੁਮ੍ਮਕਾ ਧਮ੍ਮਾ ਇਦਂ ਦੁਕ੍ਖਨ੍ਤਿ ਬ੍ਯਾਕਤਂ. ਤਸ੍ਸੇਵ ਦੁਕ੍ਖਸ੍ਸ ਪਭਾਵਿਕਾ ਜਨਿਕਾ ਤਣ੍ਹਾ ਦੁਕ੍ਖਸਮੁਦਯੋਤਿ ਬ੍ਯਾਕਤਂ. ਉਭਿਨ੍ਨਂ ਅਪ੍ਪਵਤ੍ਤਿ ਦੁਕ੍ਖਨਿਰੋਧੋਤਿ ਬ੍ਯਾਕਤਂ. ਦੁਕ੍ਖਪਰਿਜਾਨਨੋ ਸਮੁਦਯਪਜਹਨੋ ਨਿਰੋਧਸਚ੍ਛਿਕਰਣੋ ਅਰਿਯਮਗ੍ਗੋ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਬ੍ਯਾਕਤਂ. ‘‘ਏਤਞ੍ਹਿ, ਆਵੁਸੋ, ਅਤ੍ਥਸਂਹਿਤ’’ਨ੍ਤਿਆਦੀਸੁ ਏਤਂ ਇਧਲੋਕਪਰਲੋਕਅਤ੍ਥਨਿਸ੍ਸਿਤਂ ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਂ ਸਕਲਸਾਸਨਬ੍ਰਹ੍ਮਚਰਿਯਸ੍ਸ ਆਦਿ ਪਧਾਨਂ ਪੁਬ੍ਬਙ੍ਗਮਨ੍ਤਿ ਅਯਮਤ੍ਥੋ.

ਪੁਬ੍ਬਨ੍ਤਸਹਗਤਦਿਟ੍ਠਿਨਿਸ੍ਸਯਵਣ੍ਣਨਾ

੧੯੧. ਇਦਾਨਿ ਯਂ ਤਂ ਮਯਾ ਨ ਬ੍ਯਾਕਤਂ, ਤਂ ਅਜਾਨਨ੍ਤੇਨ ਨ ਬ੍ਯਾਕਤਨ੍ਤਿ ਮਾ ਏਵਂ ਸਞ੍ਞਮਕਂਸੁ. ਜਾਨਨ੍ਤੋਵ ਅਹਂ ਏਵਂ ‘‘ਏਤਸ੍ਮਿਂ ਬ੍ਯਾਕਤੇਪਿ ਅਤ੍ਥੋ ਨਤ੍ਥੀ’’ਤਿ ਨ ਬ੍ਯਾਕਰਿਂ. ਯਂ ਪਨ ਯਥਾ ਬ੍ਯਾਕਾਤਬ੍ਬਂ, ਤਂ ਮਯਾ ਬ੍ਯਾਕਤਮੇਵਾਤਿ ਸੀਹਨਾਦਂ ਨਦਨ੍ਤੋ ਪੁਨ ਯੇਪਿ ਤੇ, ਚੁਨ੍ਦਾਤਿਆਦਿਮਾਹ. ਤਤ੍ਥ ਦਿਟ੍ਠਿਯੋਵ ਦਿਟ੍ਠਿਨਿਸ੍ਸਯਾ, ਦਿਟ੍ਠਿਨਿਸ੍ਸਿਤਕਾ ਦਿਟ੍ਠਿਗਤਿਕਾਤਿ ਅਤ੍ਥੋ. ਇਦਮੇਵ ਸਚ੍ਚਨ੍ਤਿ ਇਦਮੇਵ ਦਸ੍ਸਨਂ ਸਚ੍ਚਂ. ਮੋਘਮਞ੍ਞਨ੍ਤਿ ਅਞ੍ਞੇਸਂ ਵਚਨਂ ਮੋਘਂ. ਅਸਯਂਕਾਰੋਤਿ ਅਸਯਂ ਕਤੋ.

੧੯੨. ਤਤ੍ਰਾਤਿ ਤੇਸੁ ਸਮਣਬ੍ਰਾਹ੍ਮਣੇਸੁ. ਅਤ੍ਥਿ ਨੁ ਖੋ ਇਦਂ ਆਵੁਸੋ ਵੁਚ੍ਚਤੀਤਿ, ਆਵੁਸੋ, ਯਂ ਤੁਮ੍ਹੇਹਿ ਸਸ੍ਸਤੋ ਅਤ੍ਤਾ ਚ ਲੋਕੋ ਚਾਤਿ ਵੁਚ੍ਚਤਿ, ਇਦਮਤ੍ਥਿ ਨੁ ਖੋ ਉਦਾਹੁ ਨਤ੍ਥੀਤਿ ਏਵਮਹਂ ਤੇ ਪੁਚ੍ਛਾਮੀਤਿ ਅਤ੍ਥੋ. ਯਞ੍ਚ ਖੋ ਤੇ ਏਵਮਾਹਂਸੂਤਿ ਯਂ ਪਨ ਤੇ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਵਦਨ੍ਤਿ, ਤਂ ਤੇਸਂ ਨਾਨੁਜਾਨਾਮਿ. ਪਞ੍ਞਤ੍ਤਿਯਾਤਿ ਦਿਟ੍ਠਿਪਞ੍ਞਤ੍ਤਿਯਾ. ਸਮਸਮਨ੍ਤਿ ਸਮੇਨ ਞਾਣੇਨ ਸਮਂ. ਯਦਿਦਂ ਅਧਿਪਞ੍ਞਤ੍ਤੀਤਿ ਯਾ ਅਯਂ ਅਧਿਪਞ੍ਞਤ੍ਤਿ ਨਾਮ. ਏਤ੍ਥ ਅਹਮੇਵ ਭਿਯ੍ਯੋ ਉਤ੍ਤਰਿਤਰੋ ਨ ਮਯਾ ਸਮੋ ਅਤ੍ਥਿ. ਤਤ੍ਥ ਯਞ੍ਚ ਵੁਤ੍ਤਂ ‘‘ਪਞ੍ਞਤ੍ਤਿਯਾਤਿ ਯਞ੍ਚ ਅਧਿਪਞ੍ਞਤ੍ਤੀ’’ਤਿ ਉਭਯਮੇਤਂ ਅਤ੍ਥਤੋ ਏਕਂ. ਭੇਦਤੋ ਹਿ ਪਞ੍ਞਤ੍ਤਿ ਅਧਿਪਞ੍ਞਤ੍ਤੀਤਿ ਦ੍ਵਯਂ ਹੋਤਿ. ਤਤ੍ਥ ਪਞ੍ਞਤ੍ਤਿ ਨਾਮ ਦਿਟ੍ਠਿਪਞ੍ਞਤ੍ਤਿ. ਅਧਿਪਞ੍ਞਤ੍ਤਿ ਨਾਮ ਖਨ੍ਧਪਞ੍ਞਤ੍ਤਿ ਧਾਤੁਪਞ੍ਞਤ੍ਤਿ ਆਯਤਨਪਞ੍ਞਤ੍ਤਿ ਇਨ੍ਦ੍ਰਿਯਪਞ੍ਞਤ੍ਤਿ ਸਚ੍ਚਪਞ੍ਞਤ੍ਤਿ ਪੁਗ੍ਗਲਪਞ੍ਞਤ੍ਤੀਤਿ ਏਵਂ ਵੁਤ੍ਤਾ ਛ ਪਞ੍ਞਤ੍ਤਿਯੋ. ਇਧ ਪਨ ਪਞ੍ਞਤ੍ਤਿਯਾਤਿ ਏਤ੍ਥਾਪਿ ਪਞ੍ਞਤ੍ਤਿ ਚੇਵ ਅਧਿਪਞ੍ਞਤ੍ਤਿ ਚ ਅਧਿਪ੍ਪੇਤਾ, ਅਧਿਪਞ੍ਞਤ੍ਤੀਤਿ ਏਤ੍ਥਾਪਿ. ਭਗਵਾ ਹਿ ਪਞ੍ਞਤ੍ਤਿਯਾਪਿ ਅਨੁਤ੍ਤਰੋ, ਅਧਿਪਞ੍ਞਤ੍ਤਿਯਾਪਿ ਅਨੁਤ੍ਤਰੋ. ਤੇਨਾਹ – ‘‘ਅਹਮੇਵ ਤਤ੍ਥ ਭਿਯ੍ਯੋ ਯਦਿਦਂ ਅਧਿਪਞ੍ਞਤ੍ਤੀ’’ਤਿ.

੧੯੬. ਪਹਾਨਾਯਾਤਿ ਪਜਹਨਤ੍ਥਂ. ਸਮਤਿਕ੍ਕਮਾਯਾਤਿ ਤਸ੍ਸੇਵ ਵੇਵਚਨਂ. ਦੇਸਿਤਾਤਿ ਕਥਿਤਾ. ਪਞ੍ਞਤ੍ਤਾਤਿ ਠਪਿਤਾ. ਸਤਿਪਟ੍ਠਾਨਭਾਵਨਾਯ ਹਿ ਘਨਵਿਨਿਬ੍ਭੋਗਂ ਕਤ੍ਵਾ ਸਬ੍ਬਧਮ੍ਮੇਸੁ ਯਾਥਾਵਤੋ ਦਿਟ੍ਠੇਸੁ ‘‘ਸੁਦ੍ਧਸਙ੍ਖਾਰਪੁਞ੍ਜੋਯਂ ਨਯਿਧ ਸਤ੍ਤੂਪਲਬ੍ਭਤੀ’’ਤਿ ਸਨ੍ਨਿਟ੍ਠਾਨਤੋ ਸਬ੍ਬਦਿਟ੍ਠਿਨਿਸ੍ਸਯਾਨਂ ਪਹਾਨਂ ਹੋਤੀਤਿ. ਤੇਨ ਵੁਤ੍ਤਂ. ਦਿਟ੍ਠਿਨਿਸ੍ਸਯਾਨਂ ਪਹਾਨਾਯ ਸਮਤਿਕ੍ਕਮਾਯ ਏਵਂ ਮਯਾ ਇਮੇ ਚਤ੍ਤਾਰੋ ਸਤਿਪਟ੍ਠਾਨਾ ਦੇਸਿਤਾ ਪਞ੍ਞਤ੍ਤਾ’’ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਪਾਸਾਦਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਲਕ੍ਖਣਸੁਤ੍ਤਵਣ੍ਣਨਾ

ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਣ੍ਣਨਾ

੧੯੯. ਏਵਂ ਮੇ ਸੁਤਨ੍ਤਿ ਲਕ੍ਖਣਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ. ਦ੍ਵਤ੍ਤਿਂਸਿਮਾਨੀਤਿ ਦ੍ਵਤ੍ਤਿਂਸ ਇਮਾਨਿ. ਮਹਾਪੁਰਿਸਲਕ੍ਖਣਾਨੀਤਿ ਮਹਾਪੁਰਿਸਬ੍ਯਞ੍ਜਨਾਨਿ ਮਹਾਪੁਰਿਸਨਿਮਿਤ੍ਤਾਨਿ ‘‘ਅਯਂ ਮਹਾਪੁਰਿਸੋ’’ਤਿ ਸਞ੍ਜਾਨਨਕਾਰਣਾਨਿ. ‘‘ਯੇਹਿ ਸਮਨ੍ਨਾਗਤਸ੍ਸ ਮਹਾਪੁਰਿਸਸ੍ਸਾ’’ਤਿਆਦਿ ਮਹਾਪਦਾਨੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਂ.

‘‘ਬਾਹਿਰਕਾਪਿ ਇਸਯੋ ਧਾਰੇਨ੍ਤਿ, ਨੋ ਚ ਖੋ ਜਾਨਨ੍ਤਿ ‘ਇਮਸ੍ਸ ਕਮ੍ਮਸ੍ਸ ਕਤਤ੍ਤਾ ਇਮਂ ਲਕ੍ਖਣਂ ਪਟਿਲਭਤੀ’ਤਿ’’ ਕਸ੍ਮਾ ਆਹ? ਅਟ੍ਠੁਪ੍ਪਤ੍ਤਿਯਾ ਅਨੁਰੂਪਤ੍ਤਾ. ਇਦਞ੍ਹਿ ਸੁਤ੍ਤਂ ਸਅਟ੍ਠੁਪ੍ਪਤ੍ਤਿਕਂ. ਸਾ ਪਨਸ੍ਸ ਅਟ੍ਠੁਪ੍ਪਤ੍ਤਿ ਕਤ੍ਥ ਸਮੁਟ੍ਠਿਤਾ? ਅਨ੍ਤੋਗਾਮੇ ਮਨੁਸ੍ਸਾਨਂ ਅਨ੍ਤਰੇ. ਤਦਾ ਕਿਰ ਸਾਵਤ੍ਥਿਵਾਸਿਨੋ ਅਤ੍ਤਨੋ ਅਤ੍ਤਨੋ ਗੇਹੇਸੁ ਚ ਗੇਹਦ੍ਵਾਰੇਸੁ ਚ ਸਨ੍ਥਾਗਾਰਾਦੀਸੁ ਚ ਨਿਸੀਦਿਤ੍ਵਾ ਕਥਂ ਸਮੁਟ੍ਠਾਪੇਸੁਂ – ‘‘ਭਗਵਤੋ ਅਸੀਤਿਅਨੁਬ੍ਯਞ੍ਜਨਾਨਿ ਬ੍ਯਾਮਪ੍ਪਭਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਹਿ ਚ ਭਗਵਤੋ ਕਾਯੋ, ਸਬ੍ਬਫਾਲਿਫੁਲ੍ਲੋ ਵਿਯ ਪਾਰਿਚ੍ਛਤ੍ਤਕੋ, ਵਿਕਸਿਤਮਿਵ ਕਮਲਵਨਂ, ਨਾਨਾਰਤਨਵਿਚਿਤ੍ਤਂ ਵਿਯ ਸੁਵਣ੍ਣਤੋਰਣਂ, ਤਾਰਾਮਰਿਚਿਵਿਰੋਚਮਿਵ ਗਗਨਤਲਂ, ਇਤੋ ਚਿਤੋ ਚ ਵਿਧਾਵਮਾਨਾ ਵਿਪ੍ਫਨ੍ਦਮਾਨਾ ਛਬ੍ਬਣ੍ਣਰਸ੍ਮਿਯੋ ਮੁਞ੍ਚਨ੍ਤੋ ਅਤਿਵਿਯ ਸੋਭਤਿ. ਭਗਵਤੋ ਚ ਇਮਿਨਾ ਨਾਮ ਕਮ੍ਮੇਨ ਇਦਂ ਲਕ੍ਖਣਂ ਨਿਬ੍ਬਤ੍ਤਨ੍ਤਿ ਕਥਿਤਂ ਨਤ੍ਥਿ, ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਪਨ ਕਟਚ੍ਛੁਭਤ੍ਤਮਤ੍ਤਂ ਵਾ ਪੁਬ੍ਬੇ ਦਿਨ੍ਨਪਚ੍ਚਯਾ ਏਵਂ ਉਪ੍ਪਜ੍ਜਤੀਤਿ ਭਗਵਤਾ ਵੁਤ੍ਤਂ. ਕਿਂ ਨੁ ਖੋ ਸਤ੍ਥਾ ਕਮ੍ਮਂ ਅਕਾਸਿ, ਯੇਨਸ੍ਸ ਇਮਾਨਿ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤੀ’’ਤਿ.

ਅਥਾਯਸ੍ਮਾ ਆਨਨ੍ਦੋ ਅਨ੍ਤੋਗਾਮੇ ਚਰਨ੍ਤੋ ਇਮਂ ਕਥਾਸਲ੍ਲਾਪਂ ਸੁਤ੍ਵਾ ਕਤਭਤ੍ਤਕਿਚ੍ਚੋ ਵਿਹਾਰਂ ਆਗਨ੍ਤ੍ਵਾ ਸਤ੍ਥੁ ਵਤ੍ਤਂ ਕਤ੍ਵਾ ਵਨ੍ਦਿਤ੍ਵਾ ਠਿਤੋ ‘‘ਮਯਾ, ਭਨ੍ਤੇ, ਅਨ੍ਤੋਗਾਮੇ ਏਕਾ ਕਥਾ ਸੁਤਾ’’ਤਿ ਆਹ. ਤਤੋ ਭਗਵਤਾ ‘‘ਕਿਂ ਤੇ, ਆਨਨ੍ਦ, ਸੁਤ’’ਨ੍ਤਿ ਵੁਤ੍ਤੇ ਸਬ੍ਬਂ ਆਰੋਚੇਸਿ. ਸਤ੍ਥਾ ਥੇਰਸ੍ਸ ਵਚਨਂ ਸੁਤ੍ਵਾ ਪਰਿਵਾਰੇਤ੍ਵਾ ਨਿਸਿਨ੍ਨੇ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਦ੍ਵਤ੍ਤਿਂਸਿਮਾਨਿ, ਭਿਕ੍ਖਵੇ, ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਾਨੀ’’ਤਿ ਪਟਿਪਾਟਿਯਾ ਲਕ੍ਖਣਾਨਿ ਦਸ੍ਸੇਤ੍ਵਾ ਯੇਨ ਕਮ੍ਮੇਨ ਯਂ ਨਿਬ੍ਬਤ੍ਤਂ, ਤਸ੍ਸ ਦਸ੍ਸਨਤ੍ਥਂ ਏਵਮਾਹ.

ਸੁਪ੍ਪਤਿਟ੍ਠਿਤਪਾਦਤਾਲਕ੍ਖਣਵਣ੍ਣਨਾ

੨੦੧. ਪੁਰਿਮਂ ਜਾਤਿਨ੍ਤਿਆਦੀਸੁ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਾ ਜਾਤਵਸੇਨ ‘‘ਜਾਤੀ’’ਤਿ ਵੁਤ੍ਤਾ. ਤਥਾ ਭਵਨਵਸੇਨ ‘‘ਭਵੋ’’ਤਿ, ਨਿਵੁਤ੍ਥਵਸੇਨ ਆਲਯਟ੍ਠੇਨ ਵਾ ‘‘ਨਿਕੇਤੋ’’ਤਿ. ਤਿਣ੍ਣਮ੍ਪਿ ਪਦਾਨਂ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਸਨ੍ਤਾਨੇ ਠਿਤੋਤਿ ਅਤ੍ਥੋ. ਇਦਾਨਿ ਯਸ੍ਮਾ ਤਂ ਖਨ੍ਧਸਨ੍ਤਾਨਂ ਦੇਵਲੋਕਾਦੀਸੁਪਿ ਵਤ੍ਤਤਿ. ਲਕ੍ਖਣਨਿਬ੍ਬਤ੍ਤਨਸਮਤ੍ਥਂ ਪਨ ਕੁਸਲਕਮ੍ਮਂ ਤਤ੍ਥ ਨ ਸੁਕਰਂ, ਮਨੁਸ੍ਸਭੂਤਸ੍ਸੇਵ ਸੁਕਰਂ. ਤਸ੍ਮਾ ਯਥਾਭੂਤੇਨ ਯਂ ਕਮ੍ਮਂ ਕਤਂ, ਤਂ ਦਸ੍ਸੇਨ੍ਤੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋਤਿ ਆਹ. ਅਕਾਰਣਂ ਵਾ ਏਤਂ. ਹਤ੍ਥਿਅਸ੍ਸਮਿਗਮਹਿਂਸਵਾਨਰਾਦਿਭੂਤੋਪਿ ਮਹਾਪੁਰਿਸੋ ਪਾਰਮਿਯੋ ਪੂਰੇਤਿਯੇਵ. ਯਸ੍ਮਾ ਪਨ ਏਵਰੂਪੇ ਅਤ੍ਤਭਾਵੇ ਠਿਤੇਨ ਕਤਕਮ੍ਮਂ ਨ ਸਕ੍ਕਾ ਸੁਖੇਨ ਦੀਪੇਤੁਂ, ਮਨੁਸ੍ਸਭਾਵੇ ਠਿਤੇਨ ਕਤਕਮ੍ਮਂ ਪਨ ਸਕ੍ਕਾ ਸੁਖੇਨ ਦੀਪੇਤੁਂ. ਤਸ੍ਮਾ ‘‘ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ’’ਤਿ ਆਹ.

ਦਲ਼੍ਹਸਮਾਦਾਨੋਤਿ ਥਿਰਗਹਣੋ. ਕੁਸਲੇਸੁ ਧਮ੍ਮੇਸੂਤਿ ਦਸਕੁਸਲਕਮ੍ਮਪਥੇਸੁ. ਅਵਤ੍ਥਿਤਸਮਾਦਾਨੋਤਿ ਨਿਚ੍ਚਲਗਹਣੋ ਅਨਿਵਤ੍ਤਿਤਗਹਣੋ. ਮਹਾਸਤ੍ਤਸ੍ਸ ਹਿ ਅਕੁਸਲਕਮ੍ਮਤੋ ਅਗ੍ਗਿਂ ਪਤ੍ਵਾ ਕੁਕ੍ਕੁਟਪਤ੍ਤਂ ਵਿਯ ਚਿਤ੍ਤਂ ਪਟਿਕੁਟਤਿ, ਕੁਸਲਂ ਪਤ੍ਵਾ ਵਿਤਾਨਂ ਵਿਯ ਪਸਾਰਿਯਤਿ. ਤਸ੍ਮਾ ਦਲ਼੍ਹਸਮਾਦਾਨੋ ਹੋਤਿ ਅਵਤ੍ਥਿਤਸਮਾਦਾਨੋ. ਨ ਸਕ੍ਕਾ ਕੇਨਚਿ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੁਸਲਸਮਾਦਾਨਂ ਵਿਸ੍ਸਜ੍ਜਾਪੇਤੁਂ.

ਤਤ੍ਰਿਮਾਨਿ ਵਤ੍ਥੂਨਿ – ਪੁਬ੍ਬੇ ਕਿਰ ਮਹਾਪੁਰਿਸੋ ਕਲਨ੍ਦਕਯੋਨਿਯਂ ਨਿਬ੍ਬਤ੍ਤਿ. ਅਥ ਦੇਵੇ ਵੁਟ੍ਠੇ ਓਘੋ ਆਗਨ੍ਤ੍ਵਾ ਕੁਲਾਵਕਂ ਗਹੇਤ੍ਵਾ ਸਮੁਦ੍ਦਮੇਵ ਪਵੇਸੇਸਿ. ਮਹਾਪੁਰਿਸੋ ‘‘ਪੁਤ੍ਤਕੇ ਨੀਹਰਿਸ੍ਸਾਮੀ’’ਤਿ ਨਙ੍ਗੁਟ੍ਠਂ ਤੇਮੇਤ੍ਵਾ ਤੇਮੇਤ੍ਵਾ ਸਮੁਦ੍ਦਤੋ ਉਦਕਂ ਬਹਿ ਖਿਪਿ. ਸਤ੍ਤਮੇ ਦਿਵਸੇ ਸਕ੍ਕੋ ਆਵਜ੍ਜਿਤ੍ਵਾ ਤਤ੍ਥ ਆਗਮ੍ਮ ‘‘ਕਿਂ ਕਰੋਸੀ’’ਤਿ ਪੁਚ੍ਛਿ? ਸੋ ਤਸ੍ਸ ਆਰੋਚੇਸਿ. ਸਕ੍ਕੋ ਮਹਾਸਮੁਦ੍ਦਤੋ ਉਦਕਸ੍ਸ ਦੁਨ੍ਨੀਹਰਣੀਯਭਾਵਂ ਕਥੇਸਿ. ਬੋਧਿਸਤ੍ਤੋ ਤਾਦਿਸੇਨ ਕੁਸੀਤੇਨ ਸਦ੍ਧਿਂ ਕਥੇਤੁਮ੍ਪਿ ਨ ਵਟ੍ਟਤਿ. ‘‘ਮਾ ਇਧ ਤਿਟ੍ਠਾ’’ਤਿ ਅਪਸਾਰੇਸਿ. ਸਕ੍ਕੋ ‘‘ਅਨੋਮਪੁਰਿਸੇਨ ਗਹਿਤਗਹਣਂ ਨ ਸਕ੍ਕਾ ਵਿਸ੍ਸਜ੍ਜਾਪੇਤੁ’’ਨ੍ਤਿ ਤੁਟ੍ਠੋ ਤਸ੍ਸ ਪੁਤ੍ਤਕੇ ਆਨੇਤ੍ਵਾ ਅਦਾਸਿ. ਮਹਾਜਨਕਕਾਲੇਪਿ ਮਹਾਸਮੁਦ੍ਦਂ ਤਰਮਾਨੋ ‘‘ਕਸ੍ਮਾ ਮਹਾਸਮੁਦ੍ਦਂ ਤਰਸੀ’’ਤਿ ਦੇਵਤਾਯ ਪੁਟ੍ਠੋ ‘‘ਪਾਰਂ ਗਨ੍ਤ੍ਵਾ ਕੁਲਸਨ੍ਤਕੇ ਰਟ੍ਠੇ ਰਜ੍ਜਂ ਗਹੇਤ੍ਵਾ ਦਾਨਂ ਦਾਤੁਂ ਤਰਾਮੀ’’ਤਿ ਆਹ. ਤਤੋ ਦੇਵਤਾਯ – ‘‘ਅਯਂ ਮਹਾਸਮੁਦ੍ਦੋ ਗਮ੍ਭੀਰੋ ਚੇਵ ਪੁਥੁਲੋ ਚ, ਕਦਾ ਨਂ ਤਰਿਸ੍ਸਤੀ’’ਤਿ ਵੁਤ੍ਤੇ ਸੋ ਆਹ ‘‘ਤਵੇਸੋ ਮਹਾਸਮੁਦ੍ਦਸਦਿਸੋ, ਮਯ੍ਹਂ ਪਨ ਅਜ੍ਝਾਸਯਂ ਆਗਮ੍ਮ ਖੁਦ੍ਦਕਮਾਤਿਕਾ ਵਿਯ ਖਾਯਤਿ. ਤ੍ਵਂਯੇਵ ਮਂ ਦਕ੍ਖਿਸ੍ਸਸਿ ਸਮੁਦ੍ਦਂ ਤਰਿਤ੍ਵਾ ਸਮੁਦ੍ਦਪਾਰਤੋ ਧਨਂ ਆਹਰਿਤ੍ਵਾ ਕੁਲਸਨ੍ਤਕਂ ਰਜ੍ਜਂ ਗਹੇਤ੍ਵਾ ਦਾਨਂ ਦਦਮਾਨ’’ਨ੍ਤਿ. ਦੇਵਤਾ ‘‘ਅਨੋਮਪੁਰਿਸੇਨ ਗਹਿਤਗਹਣਂ ਨ ਸਕ੍ਕਾ ਵਿਸ੍ਸਜ੍ਜਾਪੇਤੁ’’ਨ੍ਤਿ ਬੋਧਿਸਤ੍ਤਂ ਆਲਿਙ੍ਗੇਤ੍ਵਾ ਹਰਿਤ੍ਵਾ ਉਯ੍ਯਾਨੇ ਨਿਪਜ੍ਜਾਪੇਸਿ. ਸੋ ਛਤ੍ਤਂ ਉਸ੍ਸਾਪੇਤ੍ਵਾ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਪਰਿਚ੍ਚਾਗਂ ਕਤ੍ਵਾ ਅਪਰਭਾਗੇ ਨਿਕ੍ਖਮ੍ਮ ਪਬ੍ਬਜਿਤੋ. ਏਵਂ ਮਹਾਸਤ੍ਤੋ ਨ ਸਕ੍ਕਾ ਕੇਨਚਿ ਸਮਣੇਨ ਵਾ…ਪੇ… ਬ੍ਰਹ੍ਮੁਨਾ ਵਾ ਕੁਸਲਸਮਾਦਾਨਂ ਵਿਸ੍ਸਜ੍ਜਾਪੇਤੁਂ. ਤੇਨ ਵੁਤ੍ਤਂ – ‘‘ਦਲ਼੍ਹਸਮਾਦਾਨੋ ਅਹੋਸਿ ਕੁਸਲੇਸੁ ਧਮ੍ਮੇਸੁ ਅਵਤ੍ਥਿਤਸਮਾਦਾਨੋ’’ਤਿ.

ਇਦਾਨਿ ਯੇਸੁ ਕੁਸਲੇਸੁ ਧਮ੍ਮੇਸੁ ਅਵਤ੍ਥਿਤਸਮਾਦਾਨੋ ਅਹੋਸਿ, ਤੇ ਦਸ੍ਸੇਤੁਂ ਕਾਯਸੁਚਰਿਤੇਤਿਆਦਿਮਾਹ. ਦਾਨਸਂਵਿਭਾਗੇਤਿ ਏਤ੍ਥ ਚ ਦਾਨਮੇਵ ਦਿਯ੍ਯਨਵਸੇਨ ਦਾਨਂ, ਸਂਵਿਭਾਗਕਰਣਵਸੇਨ ਸਂਵਿਭਾਗੋ. ਸੀਲਸਮਾਦਾਨੇਤਿ ਪਞ੍ਚਸੀਲਦਸਸੀਲਚਤੁਪਾਰਿਸੁਦ੍ਧਿਸੀਲਪੂਰਣਕਾਲੇ. ਉਪੋਸਥੂਪਵਾਸੇਤਿ ਚਾਤੁਦ੍ਦਸਿਕਾਦਿਭੇਦਸ੍ਸ ਉਪੋਸਥਸ੍ਸ ਉਪਵਸਨਕਾਲੇ. ਮਤ੍ਤੇਯ੍ਯਤਾਯਾਤਿ ਮਾਤੁਕਾਤਬ੍ਬਵਤ੍ਤੇ. ਸੇਸਪਦੇਸੁਪਿ ਏਸੇਵ ਨਯੋ. ਅਞ੍ਞਤਰਞ੍ਞਤਰੇਸੁ ਚਾਤਿ ਅਞ੍ਞੇਸੁ ਚ ਏਵਰੂਪੇਸੁ. ਅਧਿਕੁਸਲੇਸੂਤਿ ਏਤ੍ਥ ਅਤ੍ਥਿ ਕੁਸਲਾ, ਅਤ੍ਥਿ ਅਧਿਕੁਸਲਾ. ਸਬ੍ਬੇਪਿ ਕਾਮਾਵਚਰਾ ਕੁਸਲਾ ਕੁਸਲਾ ਨਾਮ, ਰੂਪਾਵਚਰਾ ਅਧਿਕੁਸਲਾ. ਉਭੋਪਿ ਤੇ ਕੁਸਲਾ ਨਾਮ, ਅਰੂਪਾਵਚਰਾ ਅਧਿਕੁਸਲਾ. ਸਬ੍ਬੇਪਿ ਤੇ ਕੁਸਲਾ ਨਾਮ, ਸਾਵਕਪਾਰਮੀਪਟਿਲਾਭਪਚ੍ਚਯਾ ਕੁਸਲਾ ਅਧਿਕੁਸਲਾ ਨਾਮ. ਤੇਪਿ ਕੁਸਲਾ ਨਾਮ, ਪਚ੍ਚੇਕਬੋਧਿਪਟਿਲਾਭਪਚ੍ਚਯਾ ਕੁਸਲਾ ਅਧਿਕੁਸਲਾ. ਤੇਪਿ ਕੁਸਲਾ ਨਾਮ, ਸਬ੍ਬਞ੍ਞੁਤਞ੍ਞਾਣਪ੍ਪਟਿਲਾਭਪਚ੍ਚਯਾ ਪਨ ਕੁਸਲਾ ਇਧ ‘‘ਅਧਿਕੁਸਲਾ’’ਤਿ ਅਧਿਪ੍ਪੇਤਾ. ਤੇਸੁ ਅਧਿਕੁਸਲੇਸੁ ਧਮ੍ਮੇਸੁ ਦਲ਼੍ਹਸਮਾਦਾਨੋ ਅਹੋਸਿ ਅਵਤ੍ਥਿਤਸਮਾਦਾਨੋ.

ਕਟਤ੍ਤਾ ਉਪਚਿਤਤ੍ਤਾਤਿ ਏਤ੍ਥ ਸਕਿਮ੍ਪਿ ਕਤਂ ਕਤਮੇਵ, ਅਭਿਣ੍ਹਕਰਣੇਨ ਪਨ ਉਪਚਿਤਂ ਹੋਤਿ. ਉਸ੍ਸਨ੍ਨਤ੍ਤਾਤਿ ਪਿਣ੍ਡੀਕਤਂ ਰਾਸੀਕਤਂ ਕਮ੍ਮਂ ਉਸ੍ਸਨ੍ਨਨ੍ਤਿ ਵੁਚ੍ਚਤਿ. ਤਸ੍ਮਾ ‘‘ਉਸ੍ਸਨ੍ਨਤ੍ਤਾ’’ਤਿ ਵਦਨ੍ਤੋ ਮਯਾ ਕਤਕਮ੍ਮਸ੍ਸ ਚਕ੍ਕਵਾਲ਼ਂ ਅਤਿਸਮ੍ਬਾਧਂ, ਭਵਗ੍ਗਂ ਅਤਿਨੀਚਂ, ਏਵਂ ਮੇ ਉਸ੍ਸਨ੍ਨਂ ਕਮ੍ਮਨ੍ਤਿ ਦਸ੍ਸੇਤਿ. ਵਿਪੁਲਤ੍ਤਾਤਿ ਅਪ੍ਪਮਾਣਤ੍ਤਾ. ਇਮਿਨਾ ‘‘ਅਨਨ੍ਤਂ ਅਪਰਿਮਾਣਂ ਮਯਾ ਕਤਂ ਕਮ੍ਮ’’ਨ੍ਤਿ ਦਸ੍ਸੇਤਿ. ਅਧਿਗ੍ਗਣ੍ਹਾਤੀਤਿ ਅਧਿਭਵਤਿ, ਅਞ੍ਞੇਹਿ ਦੇਵੇਹਿ ਅਤਿਰੇਕਂ ਲਭਤੀਤਿ ਅਤ੍ਥੋ. ਪਟਿਲਭਤੀਤਿ ਅਧਿਗਚ੍ਛਤਿ.

ਸਬ੍ਬਾਵਨ੍ਤੇਹਿ ਪਾਦਤਲੇਹੀਤਿ ਇਦਂ ‘‘ਸਮਂ ਪਾਦਂ ਭੂਮਿਯਂ ਨਿਕ੍ਖਿਪਤੀ’’ਤਿ ਏਤਸ੍ਸ ਵਿਤ੍ਥਾਰਵਚਨਂ. ਤਤ੍ਥ ਸਬ੍ਬਾਵਨ੍ਤੇਹੀਤਿ ਸਬ੍ਬਪਦੇਸਵਨ੍ਤੇਹਿ, ਨ ਏਕੇਨ ਪਦੇਸੇਨ ਪਠਮਂ ਫੁਸਤਿ, ਨ ਏਕੇਨ ਪਚ੍ਛਾ, ਸਬ੍ਬੇਹੇਵ ਪਾਦਤਲੇਹਿ ਸਮਂ ਫੁਸਤਿ, ਸਮਂ ਉਦ੍ਧਰਤਿ. ਸਚੇਪਿ ਹਿ ਤਥਾਗਤੋ ‘‘ਅਨੇਕਸਤਪੋਰਿਸਂ ਨਰਕਂ ਅਕ੍ਕਮਿਸ੍ਸਾਮੀ’’ਤਿ ਪਾਦਂ ਅਭਿਨੀਹਰਤਿ. ਤਾਵਦੇਵ ਨਿਨ੍ਨਟ੍ਠਾਨਂ ਵਾਤਪੂਰਿਤਾ ਵਿਯ ਕਮ੍ਮਾਰਭਸ੍ਤਾ ਉਨ੍ਨਮਿਤ੍ਵਾ ਪਥਵਿਸਮਂ ਹੋਤਿ. ਉਨ੍ਨਤਟ੍ਠਾਨਮ੍ਪਿ ਅਨ੍ਤੋ ਪਵਿਸਤਿ. ‘‘ਦੂਰੇ ਅਕ੍ਕਮਿਸ੍ਸਾਮੀ’’ਤਿ ਅਭਿਨੀਹਰਨ੍ਤਸ੍ਸ ਸਿਨੇਰੁਪ੍ਪਮਾਣੋਪਿ ਪਬ੍ਬਤੋ ਸੁਸੇਦਿਤਵੇਤ੍ਤਙ੍ਕੁਰੋ ਵਿਯ ਓਨਮਿਤ੍ਵਾ ਪਾਦਸਮੀਪਂ ਆਗਚ੍ਛਤਿ. ਤਥਾ ਹਿਸ੍ਸ ਯਮਕਪਾਟਿਹਾਰਿਯਂ ਕਤ੍ਵਾ ‘‘ਯੁਗਨ੍ਧਰਪਬ੍ਬਤਂ ਅਕ੍ਕਮਿਸ੍ਸਾਮੀ’’ਤਿ ਪਾਦੇ ਅਭਿਨੀਹਟੇ ਪਬ੍ਬਤੋ ਓਨਮਿਤ੍ਵਾ ਪਾਦਸਮੀਪਂ ਆਗਤੋ. ਸੋਪਿ ਤਂ ਅਕ੍ਕਮਿਤ੍ਵਾ ਦੁਤਿਯਪਾਦੇਨ ਤਾਵਤਿਂਸਭਵਨਂ ਅਕ੍ਕਮਿ. ਨ ਹਿ ਚਕ੍ਕਲਕ੍ਖਣੇਨ ਪਤਿਟ੍ਠਾਤਬ੍ਬਟ੍ਠਾਨਂ ਵਿਸਮਂ ਭਵਿਤੁਂ ਸਕ੍ਕੋਤਿ. ਖਾਣੁ ਵਾ ਕਣ੍ਟਕੋ ਵਾ ਸਕ੍ਖਰਾ ਵਾ ਕਥਲਾ ਵਾ ਉਚ੍ਚਾਰਪਸ੍ਸਾਵਖੇਲ਼ਸਿਙ੍ਘਾਣਿਕਾਦੀਨਿ ਵਾ ਪੁਰਿਮਤਰਂ ਵਾ ਅਪਗਚ੍ਛਨ੍ਤਿ, ਤਤ੍ਥ ਤਤ੍ਥੇਵ ਵਾ ਪਥਵਿਂ ਪਵਿਸਨ੍ਤਿ. ਤਥਾਗਤਸ੍ਸ ਹਿ ਸੀਲਤੇਜੇਨ ਪੁਞ੍ਞਤੇਜੇਨ ਧਮ੍ਮਤੇਜੇਨ ਦਸਨ੍ਨਂ ਪਾਰਮੀਨਂ ਆਨੁਭਾਵੇਨ ਅਯਂ ਮਹਾਪਥਵੀ ਸਮ੍ਮਾ ਮੁਦੁਪੁਪ੍ਫਾਭਿਕਿਣ੍ਣਾ ਹੋਤਿ.

੨੦੨. ਸਾਗਰਪਰਿਯਨ੍ਤਨ੍ਤਿ ਸਾਗਰਸੀਮਂ. ਨ ਹਿ ਤਸ੍ਸ ਰਜ੍ਜਂ ਕਰੋਨ੍ਤਸ੍ਸ ਅਨ੍ਤਰਾ ਰੁਕ੍ਖੋ ਵਾ ਪਬ੍ਬਤੋ ਵਾ ਨਦੀ ਵਾ ਸੀਮਾ ਹੋਤਿ ਮਹਾਸਮੁਦ੍ਦੋਵ ਸੀਮਾ. ਤੇਨ ਵੁਤ੍ਤਂ ‘‘ਸਾਗਰਪਰਿਯਨ੍ਤ’’ਨ੍ਤਿ. ਅਖਿਲਮਨਿਮਿਤ੍ਤਮਕਣ੍ਟਕਨ੍ਤਿ ਨਿਚ੍ਚੋਰਂ. ਚੋਰਾ ਹਿ ਖਰਸਮ੍ਫਸ੍ਸਟ੍ਠੇਨ ਖਿਲਾ, ਉਪਦ੍ਦਵਪਚ੍ਚਯਟ੍ਠੇਨ ਨਿਮਿਤ੍ਤਾ, ਵਿਜ੍ਝਨਟ੍ਠੇਨ ਕਣ੍ਟਕਾਤਿ ਵੁਚ੍ਚਨ੍ਤਿ. ਇਦ੍ਧਨ੍ਤਿ ਸਮਿਦ੍ਧਂ. ਫੀਤਨ੍ਤਿ ਸਬ੍ਬਸਮ੍ਪਤ੍ਤਿਫਾਲਿਫੁਲ੍ਲਂ. ਖੇਮਨ੍ਤਿ ਨਿਬ੍ਭਯਂ. ਸਿਵਨ੍ਤਿ ਨਿਰੁਪਦ੍ਦਵਂ. ਨਿਰਬ੍ਬੁਦਨ੍ਤਿ ਅਬ੍ਬੁਦਵਿਰਹਿਤਂ, ਗੁਮ੍ਬਂ ਗੁਮ੍ਬਂ ਹੁਤ੍ਵਾ ਚਰਨ੍ਤੇਹਿ ਚੋਰੇਹਿ ਵਿਰਹਿਤਨ੍ਤਿ ਅਤ੍ਥੋ. ਅਕ੍ਖਮ੍ਭਿਯੋਤਿ ਅਵਿਕ੍ਖਮ੍ਭਨੀਯੋ. ਨ ਨਂ ਕੋਚਿ ਠਾਨਤੋ ਚਾਲੇਤੁਂ ਸਕ੍ਕੋਤਿ. ਪਚ੍ਚਤ੍ਥਿਕੇਨਾਤਿ ਪਟਿਪਕ੍ਖਂ ਇਚ੍ਛਨ੍ਤੇਨ. ਪਚ੍ਚਾਮਿਤ੍ਤੇਨਾਤਿ ਪਟਿਵਿਰੁਦ੍ਧੇਨ ਅਮਿਤ੍ਤੇਨ. ਉਭਯਮ੍ਪੇਤਂ ਸਪਤ੍ਤਵੇਵਚਨਂ. ਅਬ੍ਭਨ੍ਤਰੇਹੀਤਿ ਅਨ੍ਤੋ ਉਟ੍ਠਿਤੇਹਿ ਰਾਗਾਦੀਹਿ.

ਬਾਹਿਰੇਹੀਤਿ ਸਮਣਾਦੀਹਿ. ਤਥਾ ਹਿ ਨਂ ਬਾਹਿਰਾ ਦੇਵਦਤ੍ਤਕੋਕਾਲਿਕਾਦਯੋ ਸਮਣਾਪਿ ਸੋਣਦਣ੍ਡਕੂਟਦਣ੍ਡਾਦਯੋ ਬ੍ਰਾਹ੍ਮਣਾਪਿ ਸਕ੍ਕਸਦਿਸਾ ਦੇਵਤਾਪਿ ਸਤ੍ਤ ਵਸ੍ਸਾਨਿ ਅਨੁਬਨ੍ਧਮਾਨੋ ਮਾਰੋਪਿ ਬਕਾਦਯੋ ਬ੍ਰਹ੍ਮਾਨੋਪਿ ਵਿਕ੍ਖਮ੍ਭੇਤੁਂ ਨਾਸਕ੍ਖਿਂਸੁ.

ਏਤ੍ਤਾਵਤਾ ਭਗਵਤਾ ਕਮ੍ਮਞ੍ਚ ਕਮ੍ਮਸਰਿਕ੍ਖਕਞ੍ਚ ਲਕ੍ਖਣਞ੍ਚ ਲਕ੍ਖਣਾਨਿਸਂਸੋ ਚ ਵੁਤ੍ਤੋ ਹੋਤਿ. ਕਮ੍ਮਂ ਨਾਮ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਲ਼੍ਹਵੀਰਿਯੇਨ ਹੁਤ੍ਵਾ ਕਤਂ ਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਦਲ਼੍ਹੇਨ ਹੁਤ੍ਵਾ ਕਤਭਾਵਂ ਸਦੇਵਕੋ ਲੋਕੋ ਜਾਨਾਤੂਤਿ ਸੁਪ੍ਪਤਿਟ੍ਠਿਤਪਾਦਮਹਾਪੁਰਿਸਲਕ੍ਖਣਂ. ਲਕ੍ਖਣਂ ਨਾਮ ਸੁਪ੍ਪਤਿਟ੍ਠਿਤਪਾਦਤਾ. ਲਕ੍ਖਣਾਨਿਸਂਸੋ ਨਾਮ ਪਚ੍ਚਤ੍ਥਿਕੇਹਿ ਅਵਿਕ੍ਖਮ੍ਭਨੀਯਤਾ.

੨੦੩. ਤਤ੍ਥੇਤਂ ਵੁਚ੍ਚਤੀਤਿ ਤਤ੍ਥ ਵੁਤ੍ਤੇ ਕਮ੍ਮਾਦਿਭੇਦੇ ਅਪਰਮ੍ਪਿ ਇਦਂ ਵੁਚ੍ਚਤਿ, ਗਾਥਾਬਨ੍ਧਂ ਸਨ੍ਧਾਯ ਵੁਤ੍ਤਂ. ਏਤਾ ਪਨ ਗਾਥਾ ਪੋਰਾਣਕਤ੍ਥੇਰਾ ‘‘ਆਨਨ੍ਦਤ੍ਥੇਰੇਨ ਠਪਿਤਾ ਵਣ੍ਣਨਾਗਾਥਾ’’ਤਿ ਵਤ੍ਵਾ ਗਤਾ. ਅਪਰਭਾਗੇ ਥੇਰਾ ‘‘ਏਕਪਦਿਕੋ ਅਤ੍ਥੁਦ੍ਧਾਰੋ’’ਤਿ ਆਹਂਸੁ.

ਤਤ੍ਥ ਸਚ੍ਚੇਤਿ ਵਚੀਸਚ੍ਚੇ. ਧਮ੍ਮੇਤਿ ਦਸਕੁਸਲਕਮ੍ਮਪਥਧਮ੍ਮੇ. ਦਮੇਤਿ ਇਨ੍ਦ੍ਰਿਯਦਮਨੇ. ਸਂਯਮੇਤਿ ਸੀਲਸਂਯਮੇ. ‘‘ਸੋਚੇਯ੍ਯਸੀਲਾਲਯੁਪੋਸਥੇਸੁ ਚਾ’’ਤਿ ਏਤ੍ਥ ਕਾਯਸੋਚੇਯ੍ਯਾਦਿ ਤਿਵਿਧਂ ਸੋਚੇਯ੍ਯਂ. ਆਲਯਭੂਤਂ ਸੀਲਮੇਵ ਸੀਲਾਲਯੋ. ਉਪੋਸਥਕਮ੍ਮਂ ਉਪੋਸਥੋ. ਅਹਿਂਸਾਯਾਤਿ ਅਵਿਹਿਂਸਾਯ. ਸਮਤ੍ਤਮਾਚਰੀਤਿ ਸਕਲਂ ਅਚਰਿ.

ਅਨ੍ਵਭੀਤਿ ਅਨੁਭਵਿ. ਵੇਯ੍ਯਞ੍ਜਨਿਕਾਤਿ ਲਕ੍ਖਣਪਾਠਕਾ. ਪਰਾਭਿਭੂਤਿ ਪਰੇ ਅਭਿਭਵਨਸਮਤ੍ਥੋ. ਸਤ੍ਤੁਭੀਤਿ ਸਪਤ੍ਤੇਹਿ ਅਕ੍ਖਮ੍ਭਿਯੋ ਹੋਤਿ.

ਨ ਸੋ ਗਚ੍ਛਤਿ ਜਾਤੁ ਖਮ੍ਭਨਨ੍ਤਿ ਸੋ ਏਕਂਸੇਨੇਵ ਅਗ੍ਗਪੁਗ੍ਗਲੋ ਵਿਕ੍ਖਮ੍ਭੇਤਬ੍ਬਤਂ ਨ ਗਚ੍ਛਤਿ. ਏਸਾ ਹਿ ਤਸ੍ਸ ਧਮ੍ਮਤਾਤਿ ਤਸ੍ਸ ਹਿ ਏਸਾ ਧਮ੍ਮਤਾ ਅਯਂ ਸਭਾਵੋ.

ਪਾਦਤਲਚਕ੍ਕਲਕ੍ਖਣਵਣ੍ਣਨਾ

੨੦੪. ਉਬ੍ਬੇਗਉਤ੍ਤਾਸਭਯਨ੍ਤਿ ਉਬ੍ਬੇਗਭਯਞ੍ਚੇਵ ਉਤ੍ਤਾਸਭਯਞ੍ਚ. ਤਤ੍ਥ ਚੋਰਤੋ ਵਾ ਰਾਜਤੋ ਵਾ ਪਚ੍ਚਤ੍ਥਿਕਤੋ ਵਾ ਵਿਲੋਪਨਬਨ੍ਧਨਾਦਿਨਿਸ੍ਸਯਂ ਭਯਂ ਉਬ੍ਬੇਗੋ ਨਾਮ, ਤਂਮੁਹੁਤ੍ਤਿਕਂ ਚਣ੍ਡਹਤ੍ਥਿਅਸ੍ਸਾਦੀਨਿ ਵਾ ਅਹਿਯਕ੍ਖਾਦਯੋ ਵਾ ਪਟਿਚ੍ਚ ਲੋਮਹਂਸਨਕਰਂ ਭਯਂ ਉਤ੍ਤਾਸਭਯਂ ਨਾਮ. ਤਂ ਸਬ੍ਬਂ ਅਪਨੁਦਿਤਾ ਵੂਪਸਮੇਤਾ. ਸਂਵਿਧਾਤਾਤਿ ਸਂਵਿਦਹਿਤਾ. ਕਥਂ ਸਂਵਿਦਹਤਿ? ਅਟਵਿਯਂ ਸਾਸਙ੍ਕਟ੍ਠਾਨੇਸੁ ਦਾਨਸਾਲਂ ਕਾਰੇਤ੍ਵਾ ਤਤ੍ਥ ਆਗਤੇ ਭੋਜੇਤ੍ਵਾ ਮਨੁਸ੍ਸੇ ਦਤ੍ਵਾ ਅਤਿਵਾਹੇਤਿ, ਤਂ ਠਾਨਂ ਪਵਿਸਿਤੁਂ ਅਸਕ੍ਕੋਨ੍ਤਾਨਂ ਮਨੁਸ੍ਸੇ ਪੇਸੇਤ੍ਵਾ ਪਵੇਸੇਤਿ. ਨਗਰਾਦੀਸੁਪਿ ਤੇਸੁ ਤੇਸੁ ਠਾਨੇਸੁ ਆਰਕ੍ਖਂ ਠਪੇਤਿ, ਏਵਂ ਸਂਵਿਦਹਤਿ. ਸਪਰਿਵਾਰਞ੍ਚ ਦਾਨਂ ਅਦਾਸੀਤਿ ਅਨ੍ਨਂ ਪਾਨਨ੍ਤਿ ਦਸਵਿਧਂ ਦਾਨਵਤ੍ਥੁਂ.

ਤਤ੍ਥ ਅਨ੍ਨਨ੍ਤਿ ਯਾਗੁਭਤ੍ਤਂ. ਤਂ ਦਦਨ੍ਤੋ ਨ ਦ੍ਵਾਰੇ ਠਪੇਤ੍ਵਾ ਅਦਾਸਿ, ਅਥ ਖੋ ਅਨ੍ਤੋਨਿਵੇਸਨੇ ਹਰਿਤੁਪਲਿਤ੍ਤਟ੍ਠਾਨੇ ਲਾਜਾ ਚੇਵ ਪੁਪ੍ਫਾਨਿ ਚ ਵਿਕਿਰਿਤ੍ਵਾ ਆਸਨਂ ਪਞ੍ਞਪੇਤ੍ਵਾ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਧੂਮਾਦੀਹਿ ਸਕ੍ਕਾਰਂ ਕਤ੍ਵਾ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਯਾਗੁਂ ਅਦਾਸਿ. ਯਾਗੁਂ ਦੇਨ੍ਤੋ ਚ ਸਬ੍ਯਞ੍ਜਨਂ ਅਦਾਸਿ. ਯਾਗੁਪਾਨਾਵਸਾਨੇ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਨਾਨਪ੍ਪਕਾਰਕਂ ਅਨਨ੍ਤਂ ਖਜ੍ਜਕਂ ਦਤ੍ਵਾ ਪਰਿਯੋਸਾਨੇ ਅਨੇਕਸੂਪਂ ਅਨੇਕਬ੍ਯਞ੍ਜਨਂ ਪਣੀਤਭੋਜਨਂ ਅਦਾਸਿ. ਪਾਨਂ ਦੇਨ੍ਤੋ ਅਮ੍ਬਪਾਨਾਦਿਅਟ੍ਠਵਿਧਂ ਪਾਨਂ ਅਦਾਸਿ, ਤਮ੍ਪਿ ਯਾਗੁਭਤ੍ਤਂ ਦਤ੍ਵਾ. ਵਤ੍ਥਂ ਦੇਨ੍ਤੋ ਨ ਸੁਦ੍ਧਵਤ੍ਥਮੇਵ ਅਦਾਸਿ, ਏਕਪਟ੍ਟਦੁਪਟ੍ਟਾਦਿਪਹੋਨਕਂ ਪਨ ਦਤ੍ਵਾ ਸੁਚਿਮ੍ਪਿ ਅਦਾਸਿ, ਸੁਤ੍ਤਮ੍ਪਿ ਅਦਾਸਿ, ਸੁਤ੍ਤਂ ਵਟ੍ਟੇਸਿ, ਸੂਚਿਕਮ੍ਮਕਰਣਟ੍ਠਾਨੇ ਭਿਕ੍ਖੂਨਂ ਆਸਨਾਨਿ, ਯਾਗੁਭਤ੍ਤਂ, ਪਾਦਮਕ੍ਖਨਂ, ਪਿਟ੍ਠਿਮਕ੍ਖਨਂ, ਰਜਨਂ, ਪਣ੍ਡੁਪਲਾਸਂ, ਰਜਨਦੋਣਿਕਂ, ਅਨ੍ਤਮਸੋ ਚੀਵਰਰਜਨਕਂ ਕਪ੍ਪਿਯਕਾਰਕਮ੍ਪਿ ਅਦਾਸਿ.

ਯਾਨਨ੍ਤਿ ਉਪਾਹਨਂ. ਤਂ ਦਦਨ੍ਤੋਪਿ ਉਪਾਹਨਤ੍ਥਵਿਕਂ ਉਪਾਹਨਦਣ੍ਡਕਂ ਮਕ੍ਖਨਤੇਲਂ ਹੇਟ੍ਠਾ ਵੁਤ੍ਤਾਨਿ ਚ ਅਨ੍ਨਾਦੀਨਿ ਤਸ੍ਸੇਵ ਪਰਿਵਾਰਂ ਕਤ੍ਵਾ ਅਦਾਸਿ. ਮਾਲਂ ਦੇਨ੍ਤੋਪਿ ਨ ਸੁਦ੍ਧਮਾਲਮੇਵ ਅਦਾਸਿ, ਅਥ ਖੋ ਨਂ ਗਨ੍ਧੇਹਿ ਮਿਸ੍ਸੇਤ੍ਵਾ ਹੇਟ੍ਠਿਮਾਨਿ ਚਤ੍ਤਾਰਿ ਤਸ੍ਸੇਵ ਪਰਿਵਾਰਂ ਕਤ੍ਵਾ ਅਦਾਸਿ. ਬੋਧਿਚੇਤਿਯਆਸਨਪੋਤ੍ਥਕਾਦਿਪੂਜਨਤ੍ਥਾਯ ਚੇਵ ਚੇਤਿਯਘਰਧੂਪਨਤ੍ਥਾਯ ਚ ਗਨ੍ਧਂ ਦੇਨ੍ਤੋਪਿ ਨ ਸੁਦ੍ਧਗਨ੍ਧਮੇਵ ਅਦਾਸਿ, ਗਨ੍ਧਪਿਸਨਕਨਿਸਦਾਯ ਚੇਵ ਪਕ੍ਖਿਪਨਕਭਾਜਨੇਨ ਚ ਸਦ੍ਧਿਂ ਹੇਟ੍ਠਿਮਾਨਿ ਪਞ੍ਚ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਚੇਤਿਯਪੂਜਾਦੀਨਂ ਅਤ੍ਥਾਯ ਹਰਿਤਾਲਮਨੋਸਿਲਾਚੀਨਪਿਟ੍ਠਾਦਿਵਿਲੇਪਨਂ ਦੇਨ੍ਤੋਪਿ ਨ ਸੁਦ੍ਧਵਿਲੇਪਨਮੇਵ ਅਦਾਸਿ, ਵਿਲੇਪਨਭਾਜਨੇਨ ਸਦ੍ਧਿਂ ਹੇਟ੍ਠਿਮਾਨਿ ਛ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਸੇਯ੍ਯਾਤਿ ਮਞ੍ਚਪੀਠਂ. ਤਂ ਦੇਨ੍ਤੋਪਿ ਨ ਸੁਦ੍ਧਕਮੇਵ ਅਦਾਸਿ, ਕੋਜਵਕਮ੍ਬਲਪਚ੍ਚਤ੍ਥਰਣਮਞ੍ਚਪ੍ਪਟਿਪਾਦਕੇਹਿ ਸਦ੍ਧਿਂ ਅਨ੍ਤਮਸੋ ਮਙ੍ਗੁਲਸੋਧਨਦਣ੍ਡਕਂ ਹੇਟ੍ਠਿਮਾਨਿ ਚ ਸਤ੍ਤ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਆਵਸਥਂ ਦੇਨ੍ਤੋਪਿ ਨ ਗੇਹਮਤ੍ਤਮੇਵ ਅਦਾਸਿ, ਅਥ ਖੋ ਨਂ ਮਾਲਾਕਮ੍ਮਲਤਾਕਮ੍ਮਪਟਿਮਣ੍ਡਿਤਂ ਸੁਪਞ੍ਞਤ੍ਤਂ ਮਞ੍ਚਪੀਠਂ ਕਾਰੇਤ੍ਵਾ ਹੇਟ੍ਠਿਮਾਨਿ ਅਟ੍ਠ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਪਦੀਪੇਯ੍ਯਨ੍ਤਿ ਪਦੀਪਤੇਲਂ. ਤਂ ਦੇਨ੍ਤੋ ਚੇਤਿਯਙ੍ਗਣੇ ਬੋਧਿਯਙ੍ਗਣੇ ਧਮ੍ਮਸ੍ਸਵਨਗ੍ਗੇ ਵਸਨਗੇਹੇ ਪੋਤ੍ਥਕਵਾਚਨਟ੍ਠਾਨੇ ਇਮਿਨਾ ਦੀਪਂ ਜਾਲਾਪੇਥਾਤਿ ਨ ਸੁਦ੍ਧਤੇਲਮੇਵ ਅਦਾਸਿ, ਵਟ੍ਟਿ ਕਪਲ੍ਲਕਤੇਲਭਾਜਨਾਦੀਹਿ ਸਦ੍ਧਿਂ ਹੇਟ੍ਠਿਮਾਨਿ ਨਵ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਸੁਵਿਭਤ੍ਤਨ੍ਤਰਾਨੀਤਿ ਸੁਵਿਭਤ੍ਤਅਨ੍ਤਰਾਨਿ.

ਰਾਜਾਨੋਤਿ ਅਭਿਸਿਤ੍ਤਾ. ਭੋਗਿਯਾਤਿ ਭੋਜਕਾ ਕੁਮਾਰਾਤਿ ਰਾਜਕੁਮਾਰਾ. ਇਧ ਕਮ੍ਮਂ ਨਾਮ ਸਪਰਿਵਾਰਂ ਦਾਨਂ. ਕਮ੍ਮਸਰਿਕ੍ਖਕਂ ਨਾਮ ਸਪਰਿਵਾਰਂ ਕਤ੍ਵਾ ਦਾਨਂ ਅਦਾਸੀਤਿ ਇਮਿਨਾ ਕਾਰਣੇਨ ਸਦੇਵਕੋ ਲੋਕੋ ਜਾਨਾਤੂਤਿ ਨਿਬ੍ਬਤ੍ਤਂ ਚਕ੍ਕਲਕ੍ਖਣਂ. ਲਕ੍ਖਣਂ ਨਾਮ ਤਦੇਵ ਚਕ੍ਕਲਕ੍ਖਣਂ. ਆਨਿਸਂਸੋ ਮਹਾਪਰਿਵਾਰਤਾ.

੨੦੫. ਤਤ੍ਥੇਤਂ ਵੁਚ੍ਚਤੀਤਿ ਇਮਾ ਤਦਤ੍ਥਪਰਿਦੀਪਨਾ ਗਾਥਾ ਵੁਚ੍ਚਨ੍ਤਿ. ਦੁਵਿਧਾ ਹਿ ਗਾਥਾ ਹੋਨ੍ਤਿ – ਤਦਤ੍ਥਪਰਿਦੀਪਨਾ ਚ ਵਿਸੇਸਤ੍ਥਪਰਿਦੀਪਨਾ ਚ. ਤਤ੍ਥ ਪਾਲ਼ਿਆਗਤਮੇਵ ਅਤ੍ਥਂ ਪਰਿਦੀਪਨਾ ਤਦਤ੍ਥਪਰਿਦੀਪਨਾ ਨਾਮ. ਪਾਲ਼ਿਯਂ ਅਨਾਗਤਂ ਪਰਿਦੀਪਨਾ ਵਿਸੇਸਤ੍ਥਪਰਿਦੀਪਨਾ ਨਾਮ. ਇਮਾ ਪਨ ਤਦਤ੍ਥਪਰਿਦੀਪਨਾ. ਤਤ੍ਥ ਪੁਰੇਤਿ ਪੁਬ੍ਬੇ. ਪੁਰਤ੍ਥਾਤਿ ਤਸ੍ਸੇਵ ਵੇਵਚਨਂ. ਪੁਰਿਮਾਸੁ ਜਾਤੀਸੂਤਿ ਇਮਿਸ੍ਸਾ ਜਾਤਿਯਾ ਪੁਬ੍ਬੇਕਤਕਮ੍ਮਪਟਿਕ੍ਖੇਪਦੀਪਨਂ. ਉਬ੍ਬੇਗਉਤ੍ਤਾਸਭਯਾਪਨੂਦਨੋਤਿ ਉਬ੍ਬੇਗਭਯਸ੍ਸ ਚ ਉਤ੍ਤਾਸਭਯਸ੍ਸ ਚ ਅਪਨੂਦਨੋ. ਉਸ੍ਸੁਕੋਤਿ ਅਧਿਮੁਤ੍ਤੋ.

ਸਤਪੁਞ੍ਞਲਕ੍ਖਣਨ੍ਤਿ ਸਤੇਨ ਸਤੇਨ ਪੁਞ੍ਞਕਮ੍ਮੇਨ ਨਿਬ੍ਬਤ੍ਤਂ ਏਕੇਕਂ ਲਕ੍ਖਣਂ. ਏਵਂ ਸਨ੍ਤੇ ਯੋ ਕੋਚਿ ਬੁਦ੍ਧੋ ਭਵੇਯ੍ਯਾਤਿ ਨ ਰੋਚਯਿਂਸੁ, ਅਨਨ੍ਤੇਸੁ ਪਨ ਚਕ੍ਕਵਾਲ਼ੇਸੁ ਸਬ੍ਬੇ ਸਤ੍ਤਾ ਏਕੇਕਂ ਕਮ੍ਮਂ ਸਤਕ੍ਖਤ੍ਤੁਂ ਕਰੇਯ੍ਯੁਂ, ਏਤ੍ਤਕੇਹਿ ਜਨੇਹਿ ਕਤਂ ਕਮ੍ਮਂ ਬੋਧਿਸਤ੍ਤੋ ਏਕੋਵ ਏਕੇਕਂ ਸਤਗੁਣਂ ਕਤ੍ਵਾ ਨਿਬ੍ਬਤ੍ਤੋ. ਤਸ੍ਮਾ ‘‘ਸਤਪੁਞ੍ਞਲਕ੍ਖਣੋ’’ਤਿ ਇਮਮਤ੍ਥਂ ਰੋਚਯਿਂਸੁ. ਮਨੁਸ੍ਸਾਸੁਰਸਕ੍ਕਰਕ੍ਖਸਾਤਿ ਮਨੁਸ੍ਸਾ ਚ ਅਸੁਰਾ ਚ ਸਕ੍ਕਾ ਚ ਰਕ੍ਖਸਾ ਚ.

ਆਯਤਪਣ੍ਹਿਤਾਦਿਤਿਲਕ੍ਖਣਵਣ੍ਣਨਾ

੨੦੬. ਅਨ੍ਤਰਾਤਿ ਪਟਿਸਨ੍ਧਿਤੋ ਸਰਸਚੁਤਿਯਾ ਅਨ੍ਤਰੇ. ਇਧ ਕਮ੍ਮਂ ਨਾਮ ਪਾਣਾਤਿਪਾਤਾ ਵਿਰਤਿ. ਕਮ੍ਮਸਰਿਕ੍ਖਕਂ ਨਾਮ ਪਾਣਾਤਿਪਾਤਂ ਕਰੋਨ੍ਤੋ ਪਦਸਦ੍ਦਸਵਨਭਯਾ ਅਗ੍ਗਗ੍ਗਪਾਦੇਹਿ ਅਕ੍ਕਮਨ੍ਤਾ ਗਨ੍ਤ੍ਵਾ ਪਰਂ ਪਾਤੇਨ੍ਤਿ. ਅਥ ਤੇ ਇਮਿਨਾ ਕਾਰਣੇਨ ਤੇਸਂ ਤਂ ਕਮ੍ਮਂ ਜਨੋ ਜਾਨਾਤੂਤਿ ਅਨ੍ਤੋਵਙ੍ਕਪਾਦਾ ਵਾ ਬਹਿਵਙ੍ਕਪਾਦਾ ਵਾ ਉਕ੍ਕੁਟਿਕਪਾਦਾ ਵਾ ਅਗ੍ਗਕੋਣ੍ਡਾ ਵਾ ਪਣ੍ਹਿਕੋਣ੍ਡਾ ਵਾ ਭਵਨ੍ਤਿ. ਅਗ੍ਗਪਾਦੇਹਿ ਗਨ੍ਤ੍ਵਾ ਪਰਸ੍ਸ ਅਮਾਰਿਤਭਾਵਂ ਪਨ ਤਥਾਗਤਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਆਯਤਪਣ੍ਹਿ ਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਤਥਾ ਪਰਂ ਘਾਤੇਨ੍ਤਾ ਉਨ੍ਨਤਕਾਯੇਨ ਗਚ੍ਛਨ੍ਤਾ ਅਞ੍ਞੇ ਪਸ੍ਸਿਸ੍ਸਨ੍ਤੀਤਿ ਓਨਤਾ ਗਨ੍ਤ੍ਵਾ ਪਰਂ ਘਾਤੇਨ੍ਤਿ. ਅਥ ਤੇ ਏਵਮਿਮੇ ਗਨ੍ਤ੍ਵਾ ਪਰਂ ਘਾਤਯਿਂਸੂਤਿ ਨੇਸਂ ਤਂ ਕਮ੍ਮਂ ਇਮਿਨਾ ਕਾਰਣੇਨ ਪਰੋ ਜਾਨਾਤੂਤਿ ਖੁਜ੍ਜਾ ਵਾ ਵਾਮਨਾ ਵਾ ਪੀਠਸਪ੍ਪਿ ਵਾ ਭਵਨ੍ਤਿ. ਤਥਾਗਤਸ੍ਸ ਪਨ ਏਵਂ ਗਨ੍ਤ੍ਵਾ ਪਰੇਸਂ ਅਘਾਤਿਤਭਾਵਂ ਇਮਿਨਾ ਕਾਰਣੇਨ ਸਦੇਵਕੋ ਲੋਕੋ ਜਾਨਾਤੂਤਿ ਬ੍ਰਹ੍ਮੁਜੁਗਤ੍ਤਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਤਥਾ ਪਰਂ ਘਾਤੇਨ੍ਤਾ ਆਵੁਧਂ ਵਾ ਮੁਗ੍ਗਰਂ ਵਾ ਗਣ੍ਹਿਤ੍ਵਾ ਮੁਟ੍ਠਿਕਤਹਤ੍ਥਾ ਪਰਂ ਘਾਤੇਨ੍ਤਿ. ਤੇ ਏਵਂ ਤੇਸਂ ਪਰਸ੍ਸ ਘਾਤਿਤਭਾਵਂ ਇਮਿਨਾ ਕਾਰਣੇਨ ਜਨੋ ਜਾਨਾਤੂਤਿ ਰਸ੍ਸਙ੍ਗੁਲੀ ਵਾ ਰਸ੍ਸਹਤ੍ਥਾ ਵਾ ਵਙ੍ਕਙ੍ਗੁਲੀ ਵਾ ਫਣਹਤ੍ਥਕਾ ਵਾ ਭਵਨ੍ਤਿ. ਤਥਾਗਤਸ੍ਸ ਪਨ ਏਵਂ ਪਰੇਸਂ ਅਘਾਤਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਦੀਘਙ੍ਗੁਲਿਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਇਦਮੇਤ੍ਥ ਕਮ੍ਮਸਰਿਕ੍ਖਕਂ. ਇਦਮੇਵ ਪਨ ਲਕ੍ਖਣਤ੍ਤਯਂ ਲਕ੍ਖਣਂ ਨਾਮ. ਦੀਘਾਯੁਕਭਾਵੋ ਲਕ੍ਖਣਾਨਿਸਂਸੋ.

੨੦੭. ਮਰਣਵਧਭਯਤ੍ਤਨੋਤਿ ਏਤ੍ਥ ਮਰਣਸਙ੍ਖਾਤੋ ਵਧੋ ਮਰਣਵਧੋ, ਮਰਣਵਧਤੋ ਭਯਂ ਮਰਣਵਧਭਯਂ, ਤਂ ਅਤ੍ਤਨੋ ਜਾਨਿਤ੍ਵਾ. ਪਟਿਵਿਰਤੋ ਪਰਂਮਾਰਣਾਯਾਤਿ ਯਥਾ ਮਯ੍ਹਂ ਮਰਣਤੋ ਭਯਂ ਮਮ ਜੀਵਿਤਂ ਪਿਯਂ, ਏਵਂ ਪਰੇਸਮ੍ਪੀਤਿ ਞਤ੍ਵਾ ਪਰਂ ਮਾਰਣਤੋ ਪਟਿਵਿਰਤੋ ਅਹੋਸਿ. ਸੁਚਰਿਤੇਨਾਤਿ ਸੁਚਿਣ੍ਣੇਨ. ਸਗ੍ਗਮਗਮਾਤਿ ਸਗ੍ਗਂ ਗਤੋ.

ਚਵਿਯ ਪੁਨਰਿਧਾਗਤੋਤਿ ਚਵਿਤ੍ਵਾ ਪੁਨ ਇਧਾਗਤੋ. ਦੀਘਪਾਸਣ੍ਹਿਕੋਤਿ ਦੀਘਪਣ੍ਹਿਕੋ. ਬ੍ਰਹ੍ਮਾਵ ਸੁਜੂਤਿ ਬ੍ਰਹ੍ਮਾ ਵਿਯ ਸੁਟ੍ਠੁ ਉਜੁ.

ਸੁਭੁਜੋਤਿ ਸੁਨ੍ਦਰਭੁਜੋ. ਸੁਸੂਤਿ ਮਹਲ੍ਲਕਕਾਲੇਪਿ ਤਰੁਣਰੂਪੋ. ਸੁਸਣ੍ਠਿਤੋਤਿ ਸੁਸਣ੍ਠਾਨਸਮ੍ਪਨ੍ਨੋ. ਮੁਦੁਤਲੁਨਙ੍ਗੁਲਿਯਸ੍ਸਾਤਿ ਮੁਦੂ ਚ ਤਲੁਨਾ ਚ ਅਙ੍ਗੁਲਿਯੋ ਅਸ੍ਸ. ਤੀਭੀਤਿ ਤੀਹਿ. ਪੁਰਿਸਵਰਗ੍ਗਲਕ੍ਖਣੇਹੀਤਿ ਪੁਰਿਸਵਰਸ੍ਸ ਅਗ੍ਗਲਕ੍ਖਣੇਹਿ. ਚਿਰਯਪਨਾਯਾਤਿ ਚਿਰਂ ਯਾਪਨਾਯ, ਦੀਘਾਯੁਕਭਾਵਾਯ.

ਚਿਰਂ ਯਪੇਤੀਤਿ ਚਿਰਂ ਯਾਪੇਤਿ. ਚਿਰਤਰਂ ਪਬ੍ਬਜਤਿ ਯਦਿ ਤਤੋਤਿ ਤਤੋ ਚਿਰਤਰਂ ਯਾਪੇਤਿ, ਯਦਿ ਪਬ੍ਬਜਤੀਤਿ ਅਤ੍ਥੋ. ਯਾਪਯਤਿ ਚ ਵਸਿਦ੍ਧਿਭਾਵਨਾਯਾਤਿ ਵਸਿਪ੍ਪਤ੍ਤੋ ਹੁਤ੍ਵਾ ਇਦ੍ਧਿਭਾਵਨਾਯ ਯਾਪੇਤਿ.

ਸਤ੍ਤੁਸ੍ਸਦਤਾਲਕ੍ਖਣਵਣ੍ਣਨਾ

੨੦੮. ਰਸਿਤਾਨਨ੍ਤਿ ਰਸਸਮ੍ਪਨ੍ਨਾਨਂ. ‘‘ਖਾਦਨੀਯਾਨ’’ਨ੍ਤਿਆਦੀਸੁ ਖਾਦਨੀਯਾਨਿ ਨਾਮ ਪਿਟ੍ਠਖਜ੍ਜਕਾਦੀਨਿ. ਭੋਜਨੀਯਾਨੀਤਿ ਪਞ੍ਚ ਭੋਜਨਾਨਿ. ਸਾਯਨੀਯਾਨੀਤਿ ਸਾਯਿਤਬ੍ਬਾਨਿ ਸਪ੍ਪਿਨਵਨੀਤਾਦੀਨਿ. ਲੇਹਨੀਯਾਨੀਤਿ ਨਿਲ੍ਲੇਹਿਤਬ੍ਬਾਨਿ ਪਿਟ੍ਠਪਾਯਾਸਾਦੀਨਿ. ਪਾਨਾਨੀਤਿ ਅਟ੍ਠ ਪਾਨਕਾਨਿ.

ਇਧ ਕਮ੍ਮਂ ਨਾਮ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨਂ ਇਦਂ ਪਣੀਤਭੋਜਨਦਾਨਂ. ਕਮ੍ਮਸਰਿਕ੍ਖਕਂ ਨਾਮ ਲੂਖਭੋਜਨੇ ਕੁਚ੍ਛਿਗਤੇ ਲੋਹਿਤਂ ਸੁਸ੍ਸਤਿ, ਮਂਸਂ ਮਿਲਾਯਤਿ. ਤਸ੍ਮਾ ਲੂਖਦਾਯਕਾ ਸਤ੍ਤਾ ਇਮਿਨਾ ਕਾਰਣੇਨ ਨੇਸਂ ਲੂਖਭੋਜਨਸ੍ਸ ਦਿਨ੍ਨਭਾਵਂ ਜਨੋ ਜਾਨਾਤੂਤਿ ਅਪ੍ਪਮਂਸਾ ਅਪ੍ਪਲੋਹਿਤਾ ਮਨੁਸ੍ਸਪੇਤਾ ਵਿਯ ਦੁਲ੍ਲਭਨ੍ਨਪਾਨਾ ਭਵਨ੍ਤਿ. ਪਣੀਤਭੋਜਨੇ ਪਨ ਕੁਚ੍ਛਿਗਤੇ ਮਂਸਲੋਹਿਤਂ ਵਡ੍ਢਤਿ, ਪਰਿਪੁਣ੍ਣਕਾਯਾ ਪਾਸਾਦਿਕਾ ਅਭਿਰੂਪਦਸ੍ਸਨਾ ਹੋਨ੍ਤਿ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਪਣੀਤਭੋਜਨਦਾਯਕਤ੍ਤਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸਤ੍ਤੁਸ੍ਸਦਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਸਤ੍ਤੁਸ੍ਸਦਲਕ੍ਖਣਮੇਵ. ਪਣੀਤਲਾਭਿਤਾ ਆਨਿਸਂਸੋ.

੨੦੯. ਖਜ੍ਜਭੋਜ੍ਜਮਥਲੇਯ੍ਯਸਾਯਿਤਨ੍ਤਿ ਖਜ੍ਜਕਞ੍ਚ ਭੋਜਨਞ੍ਚ ਲੇਹਨੀਯਞ੍ਚ ਸਾਯਨੀਯਞ੍ਚ. ਉਤ੍ਤਮਗ੍ਗਰਸਦਾਯਕੋਤਿ ਉਤ੍ਤਮੋ ਅਗ੍ਗਰਸਦਾਯਕੋ, ਉਤ੍ਤਮਾਨਂ ਵਾ ਅਗ੍ਗਰਸਾਨਂ ਦਾਯਕੋ.

ਸਤ੍ਤ ਚੁਸ੍ਸਦੇਤਿ ਸਤ੍ਤ ਚ ਉਸ੍ਸਦੇ. ਤਦਤ੍ਥਜੋਤਕਨ੍ਤਿ ਖਜ੍ਜਭੋਜ੍ਜਾਦਿਜੋਤਕਂ, ਤੇਸਂ ਲਾਭਸਂਵਤ੍ਤਨਿਕਨ੍ਤਿ ਅਤ੍ਥੋ. ਪਬ੍ਬਜਮ੍ਪਿ ਚਾਤਿ ਪਬ੍ਬਜਮਾਨੋਪਿ ਚ. ਤਦਾਧਿਗਚ੍ਛਤੀਤਿ ਤਂ ਅਧਿਗਚ੍ਛਤਿ. ਲਾਭਿਰੁਤ੍ਤਮਨ੍ਤਿ ਲਾਭਿ ਉਤ੍ਤਮਂ.

ਕਰਚਰਣਾਦਿਲਕ੍ਖਣਵਣ੍ਣਨਾ

੨੧੦. ਦਾਨੇਨਾਤਿਆਦੀਸੁ ਏਕਚ੍ਚੋ ਦਾਨੇਨੇਵ ਸਙ੍ਗਣ੍ਹਿਤਬ੍ਬੋ ਹੋਤਿ, ਤਂ ਦਾਨੇਨ ਸਙ੍ਗਹੇਸਿ. ਪਬ੍ਬਜਿਤਾਨਂ ਪਬ੍ਬਜਿਤਪਰਿਕ੍ਖਾਰਂ, ਗਿਹੀਨਂ ਗਿਹਿਪਰਿਕ੍ਖਾਰਂ ਅਦਾਸਿ.

ਪੇਯ੍ਯਵਜ੍ਜੇਨਾਤਿ ਏਕਚ੍ਚੋ ਹਿ ‘‘ਅਯਂ ਦਾਤਬ੍ਬਂ ਨਾਮ ਦੇਤਿ, ਏਕੇਨ ਪਨ ਵਚਨੇਨ ਸਬ੍ਬਂ ਮਕ੍ਖੇਤ੍ਵਾ ਨਾਸੇਤਿ, ਕਿਂ ਏਤਸ੍ਸ ਦਾਨ’’ਨ੍ਤਿ ਵਤ੍ਤਾ ਹੋਤਿ. ਏਕਚ੍ਚੋ ‘‘ਅਯਂ ਕਿਞ੍ਚਾਪਿ ਦਾਨਂ ਨ ਦੇਤਿ, ਕਥੇਨ੍ਤੋ ਪਨ ਤੇਲੇਨ ਵਿਯ ਮਕ੍ਖੇਤਿ. ਏਸੋ ਦੇਤੁ ਵਾ ਮਾ ਵਾ, ਵਚਨਮੇਵ ਤਸ੍ਸ ਸਹਸ੍ਸਂ ਅਗ੍ਘਤੀ’’ਤਿ ਵਤ੍ਤਾ ਹੋਤਿ. ਏਵਰੂਪੋ ਪੁਗ੍ਗਲੋ ਦਾਨਂ ਨ ਪਚ੍ਚਾਸੀਸਤਿ, ਪਿਯਵਚਨਮੇਵ ਪਚ੍ਚਾਸੀਸਤਿ. ਤਂ ਪਿਯਵਚਨੇਨ ਸਙ੍ਗਹੇਸਿ.

ਅਤ੍ਥਚਰਿਯਾਯਾਤਿ ਅਤ੍ਥਸਂਵਡ੍ਢਨਕਥਾਯ. ਏਕਚ੍ਚੋ ਹਿ ਨੇਵ ਦਾਨਂ, ਨ ਪਿਯਵਚਨਂ ਪਚ੍ਚਾਸੀਸਤਿ. ਅਤ੍ਤਨੋ ਹਿਤਕਥਂ ਵਡ੍ਢਿਤਕਥਮੇਵ ਪਚ੍ਚਾਸੀਸਤਿ. ਏਵਰੂਪਂ ਪੁਗ੍ਗਲਂ ‘‘ਇਦਂ ਤੇ ਕਾਤਬ੍ਬਂ, ਇਦਂ ਤੇ ਨ ਕਾਤਬ੍ਬਂ. ਏਵਰੂਪੋ ਪੁਗ੍ਗਲੋ ਸੇਵਿਤਬ੍ਬੋ, ਏਵਰੂਪੋ ਪੁਗ੍ਗਲੋ ਨ ਸੇਵਿਤਬ੍ਬੋ’’ਤਿ ਏਵਂ ਅਤ੍ਥਚਰਿਯਾਯ ਸਙ੍ਗਹੇਸਿ.

ਸਮਾਨਤ੍ਤਤਾਯਾਤਿ ਸਮਾਨਸੁਖਦੁਕ੍ਖਭਾਵੇਨ. ਏਕਚ੍ਚੋ ਹਿ ਦਾਨਾਦੀਸੁ ਏਕਮ੍ਪਿ ਨ ਪਚ੍ਚਾਸੀਸਤਿ, ਏਕਾਸਨੇ ਨਿਸਜ੍ਜਂ, ਏਕਪਲ੍ਲਙ੍ਕੇ ਸਯਨਂ, ਏਕਤੋ ਭੋਜਨਨ੍ਤਿ ਏਵਂ ਸਮਾਨਸੁਖਦੁਕ੍ਖਤਂ ਪਚ੍ਚਾਸੀਸਤਿ. ਤਤ੍ਥ ਜਾਤਿਯਾ ਹੀਨੋ ਭੋਗੇਨ ਅਧਿਕੋ ਦੁਸ੍ਸਙ੍ਗਹੋ ਹੋਤਿ. ਨ ਹਿ ਸਕ੍ਕਾ ਤੇਨ ਸਦ੍ਧਿਂ ਏਕਪਰਿਭੋਗੋ ਕਾਤੁਂ, ਤਥਾ ਅਕਰਿਯਮਾਨੇ ਚ ਸੋ ਕੁਜ੍ਝਤਿ. ਭੋਗੇਨ ਹੀਨੋ ਜਾਤਿਯਾ ਅਧਿਕੋਪਿ ਦੁਸ੍ਸਙ੍ਗਹੋ ਹੋਤਿ. ਸੋ ਹਿ ‘‘ਅਹਂ ਜਾਤਿਮਾ’’ਤਿ ਭੋਗਸਮ੍ਪਨ੍ਨੇਨ ਸਦ੍ਧਿਂ ਏਕਪਰਿਭੋਗਂ ਨ ਇਚ੍ਛਤਿ, ਤਸ੍ਮਿਂ ਅਕਰਿਯਮਾਨੇ ਕੁਜ੍ਝਤਿ. ਉਭੋਹਿਪਿ ਹੀਨੋ ਪਨ ਸੁਸਙ੍ਗਹੋ ਹੋਤਿ. ਨ ਹਿ ਸੋ ਇਤਰੇਨ ਸਦ੍ਧਿਂ ਏਕਪਰਿਭੋਗਂ ਇਚ੍ਛਤਿ, ਨ ਅਕਰਿਯਮਾਨੇ ਚ ਕੁਜ੍ਝਤਿ. ਉਭੋਹਿ ਸਦਿਸੋਪਿ ਸੁਸਙ੍ਗਹੋਯੇਵ. ਭਿਕ੍ਖੂਸੁ ਦੁਸ੍ਸੀਲੋ ਦੁਸ੍ਸਙ੍ਗਹੋ ਹੋਤਿ. ਨ ਹਿ ਸਕ੍ਕਾ ਤੇਨ ਸਦ੍ਧਿਂ ਏਕਪਰਿਭੋਗੋ ਕਾਤੁਂ, ਤਥਾ ਅਕਰਿਯਮਾਨੇ ਚ ਕੁਜ੍ਝਤਿ. ਸੀਲਵਾ ਸੁਸਙ੍ਗਹੋ ਹੋਤਿ. ਸੀਲਵਾ ਹਿ ਅਦੀਯਮਾਨੇਪਿ ਅਕਰਿਯਮਾਨੇਪਿ ਨ ਕੁਜ੍ਝਤਿ. ਅਞ੍ਞਂ ਅਤ੍ਤਨਾ ਸਦ੍ਧਿਂ ਪਰਿਭੋਗਂ ਅਕਰੋਨ੍ਤਮ੍ਪਿ ਨ ਪਾਪਕੇਨ ਚਿਤ੍ਤੇਨ ਪਸ੍ਸਤਿ. ਪਰਿਭੋਗੋਪਿ ਤੇਨ ਸਦ੍ਧਿਂ ਸੁਕਰੋ ਹੋਤਿ. ਤਸ੍ਮਾ ਏਵਰੂਪਂ ਪੁਗ੍ਗਲਂ ਏਵਂ ਸਮਾਨਤ੍ਤਤਾਯ ਸਙ੍ਗਹੇਸਿ.

ਸੁਸਙ੍ਗਹਿਤਾਸ੍ਸ ਹੋਨ੍ਤੀਤਿ ਸੁਸਙ੍ਗਹਿਤਾ ਅਸ੍ਸ ਹੋਨ੍ਤਿ. ਦੇਤੁ ਵਾ ਮਾ ਵਾ ਦੇਤੁ, ਕਰੋਤੁ ਵਾ ਮਾ ਵਾ ਕਰੋਤੁ, ਸੁਸਙ੍ਗਹਿਤਾਵ ਹੋਨ੍ਤਿ, ਨ ਭਿਜ੍ਜਨ੍ਤਿ. ‘‘ਯਦਾਸ੍ਸ ਦਾਤਬ੍ਬਂ ਹੋਤਿ, ਤਦਾ ਦੇਤਿ. ਇਦਾਨਿ ਮਞ੍ਞੇ ਨਤ੍ਥਿ, ਤੇਨ ਨ ਦੇਤਿ. ਕਿਂ ਮਯਂ ਦਦਮਾਨਮੇਵ ਉਪਟ੍ਠਹਾਮ? ਅਦੇਨ੍ਤਂ ਅਕਰੋਨ੍ਤਂ ਨ ਉਪਟ੍ਠਹਾਮਾ’’ਤਿ ਏਵਂ ਚਿਨ੍ਤੇਨ੍ਤਿ.

ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਕਤਂ ਦਾਨਾਦਿਸਙ੍ਗਹਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਂ ਅਸਙ੍ਗਾਹਕੋ ਹੋਤਿ, ਸੋ ਇਮਿਨਾ ਕਾਰਣੇਨਸ੍ਸ ਅਸਙ੍ਗਾਹਕਭਾਵਂ ਜਨੋ ਜਾਨਾਤੂਤਿ ਥਦ੍ਧਹਤ੍ਥਪਾਦੋ ਚੇਵ ਹੋਤਿ, ਵਿਸਮਟ੍ਠਿਤਾਵਯਵਲਕ੍ਖਣੋ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਸਙ੍ਗਾਹਕਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਦ੍ਵੇ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਸੁਸਙ੍ਗਹਿਤਪਰਿਜਨਤਾ ਆਨਿਸਂਸੋ.

੨੧੧. ਕਰਿਯਾਤਿ ਕਰਿਤ੍ਵਾ. ਚਰਿਯਾਤਿ ਚਰਿਤ੍ਵਾ. ਅਨਵਮਤੇਨਾਤਿ ਅਨਵਞ੍ਞਾਤੇਨ. ‘‘ਅਨਪਮੋਦੇਨਾ’’ਤਿਪਿ ਪਾਠੋ, ਨ ਅਪ੍ਪਮੋਦੇਨ, ਨ ਦੀਨੇਨ ਨ ਗਬ੍ਭਿਤੇਨਾਤਿ ਅਤ੍ਥੋ.

ਚਵਿਯਾਤਿ ਚਵਿਤ੍ਵਾ. ਅਤਿਰੁਚਿਰ ਸੁਵਗ੍ਗੁ ਦਸ੍ਸਨੇਯ੍ਯਨ੍ਤਿ ਅਤਿਰੁਚਿਰਞ੍ਚ ਸੁਪਾਸਾਦਿਕਂ ਸੁਵਗ੍ਗੁ ਚ ਸੁਟ੍ਠੁ ਛੇਕਂ ਦਸ੍ਸਨੇਯ੍ਯਞ੍ਚ ਦਟ੍ਠਬ੍ਬਯੁਤ੍ਤਂ. ਸੁਸੁ ਕੁਮਾਰੋਤਿ ਸੁਟ੍ਠੁ ਸੁਕੁਮਾਰੋ.

ਪਰਿਜਨਸ੍ਸਵੋਤਿ ਪਰਿਜਨੋ ਅਸ੍ਸਵੋ ਵਚਨਕਰੋ. ਵਿਧੇਯ੍ਯੋਤਿ ਕਤ੍ਤਬ੍ਬਾਕਤ੍ਤਬ੍ਬੇਸੁ ਯਥਾਰੁਚਿ ਵਿਧਾਤਬ੍ਬੋ. ਮਹਿਮਨ੍ਤਿ ਮਹਿਂ ਇਮਂ. ਪਿਯਵਦੂ ਹਿਤਸੁਖਤਂ ਜਿਗੀਸਮਾਨੋਤਿ ਪਿਯਵਦੋ ਹੁਤ੍ਵਾ ਹਿਤਞ੍ਚ ਸੁਖਞ੍ਚ ਪਰਿਯੇਸਮਾਨੋ. ਵਚਨਪਟਿਕਰਸ੍ਸਾ ਭਿਪ੍ਪਸਨ੍ਨਾਤਿ ਵਚਨਪਟਿਕਰਾ ਅਸ੍ਸ ਅਭਿਪ੍ਪਸਨ੍ਨਾ. ਧਮ੍ਮਾਨੁਧਮ੍ਮਨ੍ਤਿ ਧਮ੍ਮਞ੍ਚ ਅਨੁਧਮ੍ਮਞ੍ਚ.

ਉਸ੍ਸਙ੍ਖਪਾਦਾਦਿਲਕ੍ਖਣਵਣ੍ਣਨਾ

੨੧੨. ਅਤ੍ਥੂਪਸਂਹਿਤਨ੍ਤਿ ਇਧਲੋਕਪਰਲੋਕਤ੍ਥਨਿਸ੍ਸਿਤਂ. ਧਮ੍ਮੂਪਸਂਹਿਤਨ੍ਤਿ ਦਸਕੁਸਲਕਮ੍ਮਪਥਨਿਸ੍ਸਿਤਂ. ਬਹੁਜਨਂ ਨਿਦਂਸੇਸੀਤਿ ਬਹੁਜਨਸ੍ਸ ਨਿਦਂਸਨਕਥਂ ਕਥੇਸਿ. ਪਾਣੀਨਨ੍ਤਿ ਸਤ੍ਤਾਨਂ. ‘‘ਅਗ੍ਗੋ’’ਤਿਆਦੀਨਿ ਸਬ੍ਬਾਨਿ ਅਞ੍ਞਮਞ੍ਞਵੇਵਚਨਾਨਿ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਭਾਸਿਤਾ ਉਦ੍ਧਙ੍ਗਮਨੀਯਾ ਅਤ੍ਥੂਪਸਂਹਿਤਾ ਵਾਚਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਰੂਪਂ ਉਗ੍ਗਤਵਾਚਂ ਨ ਭਾਸਤਿ, ਸੋ ਇਮਿਨਾ ਕਾਰਣੇਨ ਉਗ੍ਗਤਵਾਚਾਯ ਅਭਾਸਨਂ ਜਨੋ ਜਾਨਾਤੂਤਿ ਅਧੋਸਙ੍ਖਪਾਦੋ ਚ ਹੋਤਿ ਅਧੋਨਤਲੋਮੋ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਏਵਰੂਪਾਯ ਉਗ੍ਗਤਵਾਚਾਯ ਭਾਸਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਉਸ੍ਸਙ੍ਖਪਾਦਲਕ੍ਖਣਞ੍ਚ ਉਦ੍ਧਗ੍ਗਲੋਮਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਉਤ੍ਤਮਭਾਵੋ ਆਨਿਸਂਸੋ.

੨੧੩. ਏਰਯਨ੍ਤਿ ਭਣਨ੍ਤੋ. ਬਹੁਜਨਂ ਨਿਦਂਸਯੀਤਿ ਬਹੁਜਨਸ੍ਸ ਹਿਤਂ ਦਸ੍ਸੇਤਿ. ਧਮ੍ਮਯਾਗਨ੍ਤਿ ਧਮ੍ਮਦਾਨਯਞ੍ਞਂ.

ਉਬ੍ਭਮੁਪ੍ਪਤਿਤਲੋਮਵਾ ਸਸੋਤਿ ਸੋ ਏਸ ਉਦ੍ਧਗ੍ਗਤਲੋਮਵਾ ਹੋਤਿ. ਪਾਦਗਣ੍ਠਿਰਹੂਤਿ ਪਾਦਗੋਪ੍ਫਕਾ ਅਹੇਸੁਂ. ਸਾਧੁਸਣ੍ਠਿਤਾਤਿ ਸੁਟ੍ਠੁ ਸਣ੍ਠਿਤਾ. ਮਂਸਲੋਹਿਤਾਚਿਤਾਤਿ ਮਂਸੇਨ ਚ ਲੋਹਿਤੇਨ ਚ ਆਚਿਤਾ. ਤਚੋਤ੍ਥਤਾਤਿ ਤਚੇਨ ਪਰਿਯੋਨਦ੍ਧਾ ਨਿਗੁਲ਼੍ਹਾ. ਵਜਤੀਤਿ ਗਚ੍ਛਤਿ. ਅਨੋਮਨਿਕ੍ਕਮੋਤਿ ਅਨੋਮਵਿਹਾਰੀ ਸੇਟ੍ਠਵਿਹਾਰੀ.

ਏਣਿਜਙ੍ਘਲਕ੍ਖਣਵਣ੍ਣਨਾ

੨੧੪. ਸਿਪ੍ਪਂ ਵਾਤਿਆਦੀਸੁ ਸਿਪ੍ਪਂ ਨਾਮ ਦ੍ਵੇ ਸਿਪ੍ਪਾਨਿ – ਹੀਨਞ੍ਚ ਸਿਪ੍ਪਂ, ਉਕ੍ਕਟ੍ਠਞ੍ਚ ਸਿਪ੍ਪਂ. ਹੀਨਂ ਨਾਮ ਸਿਪ੍ਪਂ ਨਲ਼ਕਾਰਸਿਪ੍ਪਂ, ਕੁਮ੍ਭਕਾਰਸਿਪ੍ਪਂ ਪੇਸਕਾਰਸਿਪ੍ਪਂ ਨਹਾਪਿਤਸਿਪ੍ਪਂ. ਉਕ੍ਕਟ੍ਠਂ ਨਾਮ ਸਿਪ੍ਪਂ ਲੇਖਾ ਮੁਦ੍ਦਾ ਗਣਨਾ. ਵਿਜ੍ਜਾਤਿ ਅਹਿਵਿਜ੍ਜਾਦਿਅਨੇਕਵਿਧਾ. ਚਰਣਨ੍ਤਿ ਪਞ੍ਚਸੀਲਂ ਦਸਸੀਲਂ ਪਾਤਿਮੋਕ੍ਖਸਂਵਰਸੀਲਂ. ਕਮ੍ਮਨ੍ਤਿ ਕਮ੍ਮਸ੍ਸਕਤਾਜਾਨਨਪਞ੍ਞਾ. ਕਿਲਿਸ੍ਸੇਯ੍ਯੁਨ੍ਤਿ ਕਿਲਮੇਯ੍ਯੁਂ. ਅਨ੍ਤੇਵਾਸਿਕਵਤ੍ਤਂ ਨਾਮ ਦੁਕ੍ਖਂ, ਤਂ ਨੇਸਂ ਮਾ ਚਿਰਮਹੋਸੀਤਿ ਚਿਨ੍ਤੇਸਿ.

ਰਾਜਾਰਹਾਨੀਤਿ ਰਞ੍ਞੋ ਅਨੁਰੂਪਾਨਿ ਹਤ੍ਥਿਅਸ੍ਸਾਦੀਨਿ, ਤਾਨਿਯੇਵ ਰਞ੍ਞੋ ਸੇਨਾਯ ਅਙ੍ਗਭੂਤਤ੍ਤਾ ਰਾਜਙ੍ਗਾਨੀਤਿ ਵੁਚ੍ਚਨ੍ਤਿ. ਰਾਜੂਪਭੋਗਾਨੀਤਿ ਰਞ੍ਞੋ ਉਪਭੋਗਪਰਿਭੋਗਭਣ੍ਡਾਨਿ, ਤਾਨਿ ਚੇਵ ਸਤ੍ਤਰਤਨਾਨਿ ਚ. ਰਾਜਾਨੁਚ੍ਛਵਿਕਾਨੀਤਿ ਰਞ੍ਞੋ ਅਨੁਚ੍ਛਵਿਕਾਨਿ. ਤੇਸਂਯੇਵ ਸਬ੍ਬੇਸਂ ਇਦਂ ਗਹਣਂ. ਸਮਣਾਰਹਾਨੀਤਿ ਸਮਣਾਨਂ ਅਨੁਰੂਪਾਨਿ ਚੀਵਰਾਦੀਨਿ. ਸਮਣਙ੍ਗਾਨੀਤਿ ਸਮਣਾਨਂ ਕੋਟ੍ਠਾਸਭੂਤਾ ਚਤਸ੍ਸੋ ਪਰਿਸਾ. ਸਮਣੂਪਭੋਗਾਨੀਤਿ ਸਮਣਾਨਂ ਉਪਭੋਗਪਰਿਕ੍ਖਾਰਾ. ਸਮਣਾਨੁਚ੍ਛਵਿਕਾਨੀਤਿ ਤੇਸਂਯੇਵ ਅਧਿਵਚਨਂ.

ਇਧ ਪਨ ਕਮ੍ਮਂ ਨਾਮ ਦੀਘਰਤ੍ਤਂ ਸਕ੍ਕਚ੍ਚਂ ਸਿਪ੍ਪਾਦਿਵਾਚਨਂ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਂ ਸਕ੍ਕਚ੍ਚਂ ਸਿਪ੍ਪਂ ਅਵਾਚੇਨ੍ਤੋ ਅਨ੍ਤੇਵਾਸਿਕੇ ਉਕ੍ਕੁਟਿਕਾਸਨਜਙ੍ਘਪੇਸਨਿਕਾਦੀਹਿ ਕਿਲਮੇਤਿ, ਤਸ੍ਸ ਜਙ੍ਘਮਂਸਂ ਲਿਖਿਤ੍ਵਾ ਪਾਤਿਤਂ ਵਿਯ ਹੋਤਿ. ਤਥਾਗਤਸ੍ਸ ਪਨ ਸਕ੍ਕਚ੍ਚਂ ਵਾਚਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਅਨੁਪੁਬ੍ਬਉਗ੍ਗਤਵਟ੍ਟਿਤਂ ਏਣਿਜਙ੍ਘਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਨੁਚ੍ਛਵਿਕਲਾਭਿਤਾ ਆਨਿਸਂਸੋ.

੨੧੫. ਯਦੂਪਘਾਤਾਯਾਤਿ ਯਂ ਸਿਪ੍ਪਂ ਕਸ੍ਸਚਿ ਉਪਘਾਤਾਯ ਨ ਹੋਤਿ. ਕਿਲਿਸ੍ਸਤੀਤਿ ਕਿਲਮਿਸ੍ਸਤਿ. ਸੁਖੁਮਤ੍ਤਚੋਤ੍ਥਤਾਤਿ ਸੁਖੁਮਤ੍ਤਚੇਨ ਪਰਿਯੋਨਦ੍ਧਾ. ਕਿਂ ਪਨ ਅਞ੍ਞੇਨ ਕਮ੍ਮੇਨ ਅਞ੍ਞਂ ਲਕ੍ਖਣਂ ਨਿਬ੍ਬਤ੍ਤਤੀਤਿ? ਨ ਨਿਬ੍ਬਤ੍ਤਤਿ. ਯਂ ਪਨ ਨਿਬ੍ਬਤ੍ਤਤਿ, ਤਂ ਅਨੁਬ੍ਯਞ੍ਜਨਂ ਹੋਤਿ, ਤਸ੍ਮਾ ਇਧ ਵੁਤ੍ਤਂ.

ਸੁਖੁਮਚ੍ਛਵਿਲਕ੍ਖਣਵਣ੍ਣਨਾ

੨੧੬. ਸਮਣਂ ਵਾਤਿ ਸਮਿਤਪਾਪਟ੍ਠੇਨ ਸਮਣਂ. ਬ੍ਰਾਹ੍ਮਣਂ ਵਾਤਿ ਬਾਹਿਤਪਾਪਟ੍ਠੇਨ ਬ੍ਰਾਹ੍ਮਣਂ.

ਮਹਾਪਞ੍ਞੋਤਿਆਦੀਸੁ ਮਹਾਪਞ੍ਞਾਦੀਹਿ ਸਮਨ੍ਨਾਗਤੋ ਹੋਤੀਤਿ ਅਤ੍ਥੋ. ਤਤ੍ਰਿਦਂ ਮਹਾਪਞ੍ਞਾਦੀਨਂ ਨਾਨਤ੍ਤਂ.

ਤਤ੍ਥ ਕਤਮਾ ਮਹਾਪਞ੍ਞਾ? ਮਹਨ੍ਤੇ ਸੀਲਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ, ਮਹਨ੍ਤੇ ਸਮਾਧਿਕ੍ਖਨ੍ਧੇ ਪਞ੍ਞਾਕ੍ਖਨ੍ਧੇ ਵਿਮੁਤ੍ਤਿਕ੍ਖਨ੍ਧੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ. ਮਹਨ੍ਤਾਨਿ ਠਾਨਾਠਾਨਾਨਿ ਮਹਨ੍ਤਾ ਵਿਹਾਰਸਮਾਪਤ੍ਤਿਯੋ ਮਹਨ੍ਤਾਨਿ ਅਰਿਯਸਚ੍ਚਾਨਿ ਮਹਨ੍ਤੇ ਸਤਿਪਟ੍ਠਾਨੇ ਸਮ੍ਮਪ੍ਪਧਾਨੇ ਇਦ੍ਧਿਪਾਦੇ ਮਹਨ੍ਤਾਨਿ ਇਨ੍ਦ੍ਰਿਯਾਨਿ ਬਲਾਨਿ ਮਹਨ੍ਤੇ ਬੋਜ੍ਝਙ੍ਗੇ ਮਹਨ੍ਤੇ ਅਰਿਯਮਗ੍ਗੇ ਮਹਨ੍ਤਾਨਿ ਸਾਮਞ੍ਞਫਲਾਨਿ ਮਹਨ੍ਤਾ ਅਭਿਞ੍ਞਾਯੋ ਮਹਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ.

ਕਤਮਾ ਪੁਥੁਪਞ੍ਞਾ? ਪੁਥੁਨਾਨਾਖਨ੍ਧੇਸੁ ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ. ਪੁਥੁਨਾਨਾਧਾਤੂਸੁ ਪੁਥੁਨਾਨਾਆਯਤਨੇਸੁ ਪੁਥੁਨਾਨਾਪਟਿਚ੍ਚਸਮੁਪ੍ਪਾਦੇਸੁ ਪੁਥੁਨਾਨਾਸੁਞ੍ਞਤਮਨੁਪਲਬ੍ਭੇਸੁ ਪੁਥੁਨਾਨਾਅਤ੍ਥੇਸੁ ਧਮ੍ਮੇਸੁ ਨਿਰੁਤ੍ਤੀਸੁ ਪਟਿਭਾਨੇਸੁ. ਪੁਥੁਨਾਨਾਸੀਲਕ੍ਖਨ੍ਧੇਸੁ ਪੁਥੁਨਾਨਾਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਦਸ੍ਸਨਕ੍ਖਨ੍ਧੇਸੁ ਪੁਥੁਨਾਨਾਠਾਨਾਠਾਨੇਸੁ ਪੁਥੁਨਾਨਾਵਿਹਾਰਸਮਾਪਤ੍ਤੀਸੁ ਪੁਥੁਨਾਨਾਅਰਿਯਸਚ੍ਚੇਸੁ ਪੁਥੁਨਾਨਾਸਤਿਪਟ੍ਠਾਨੇਸੁ ਸਮ੍ਮਪ੍ਪਧਾਨੇਸੁ ਇਦ੍ਧਿਪਾਦੇਸੁ ਇਨ੍ਦ੍ਰਿਯੇਸੁ ਬਲੇਸੁ ਬੋਜ੍ਝਙ੍ਗੇਸੁ ਪੁਥੁਨਾਨਾਅਰਿਯਮਗ੍ਗੇਸੁ ਸਾਮਞ੍ਞਫਲੇਸੁ ਅਭਿਞ੍ਞਾਸੁ ਪੁਥੁਜ੍ਜਨਸਾਧਾਰਣੇ ਧਮ੍ਮੇ ਸਮਤਿਕ੍ਕਮ੍ਮ ਪਰਮਤ੍ਥੇ ਨਿਬ੍ਬਾਨੇ ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ.

ਕਤਮਾ ਹਾਸਪਞ੍ਞਾ? ਇਧੇਕਚ੍ਚੋ ਹਾਸਬਹੁਲੋ ਵੇਦਬਹੁਲੋ ਤੁਟ੍ਠਿਬਹੁਲੋ ਪਾਮੋਜ੍ਜਬਹੁਲੋ ਸੀਲਂ ਪਰਿਪੂਰੇਤਿ ਇਨ੍ਦ੍ਰਿਯਸਂਵਰਂ ਪਰਿਪੂਰੇਤਿ ਭੋਜਨੇ ਮਤ੍ਤਞ੍ਞੁਤਂ ਜਾਗਰਿਯਾਨੁਯੋਗਂ ਸੀਲਕ੍ਖਨ੍ਧਂ ਸਮਾਧਿਕ੍ਖਨ੍ਧਂ ਪਞ੍ਞਾਕ੍ਖਨ੍ਧਂ ਵਿਮੁਤ੍ਤਿਕ੍ਖਨ੍ਧਂ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਂ ਪਰਿਪੂਰੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ…ਪੇ… ਪਾਮੋਜ੍ਜਬਹੁਲੋ ਠਾਨਾਠਾਨਂ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਵਿਹਾਰਸਮਾਪਤ੍ਤਿਯੋ ਪਰਿਪੂਰੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਅਰਿਯਸਚ੍ਚਾਨਿ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਸਤਿਪਟ੍ਠਾਨੇ ਸਮ੍ਮਪ੍ਪਧਾਨੇ ਇਦ੍ਧਿਪਾਦੇ ਇਨ੍ਦ੍ਰਿਯਾਨਿ ਬਲਾਨਿ ਬੋਜ੍ਝਙ੍ਗੇ ਅਰਿਯਮਗ੍ਗਂ ਭਾਵੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ ਹਾਸਪਞ੍ਞਾ. ਅਭਿਞ੍ਞਾਯੋ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਵੇਦਤੁਟ੍ਠਿਪਾਮੋਜ੍ਜਬਹੁਲੋ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਤੀਤਿ ਹਾਸਪਞ੍ਞਾ.

ਕਤਮਾ ਜਵਨਪਞ੍ਞਾ? ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਯਂ ਦੂਰੇ ਸਨ੍ਤਿਕੇ ਵਾ, ਸਬ੍ਬਂ ਤਂ ਰੂਪਂ ਅਨਿਚ੍ਚਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਦੁਕ੍ਖਤੋ ਖਿਪ੍ਪਂ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਯਾ ਕਾਚਿ ਵੇਦਨਾ…ਪੇ… ਯਂਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ, ਸਬ੍ਬਂ ਤਂ ਵਿਞ੍ਞਾਣਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ ਦੁਕ੍ਖਂ ਭਯਟ੍ਠੇਨ ਅਨਤ੍ਤਾ ਅਸਾਰਕਟ੍ਠੇਨਾਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਰੂਪਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ…ਪੇ… ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ. ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਨ੍ਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ.

ਕਤਮਾ ਤਿਕ੍ਖਪਞ੍ਞਾ? ਖਿਪ੍ਪਂ ਕਿਲੇਸੇ ਛਿਨ੍ਦਤੀਤਿ ਤਿਕ੍ਖਪਞ੍ਞਾ. ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤਿ, ਉਪ੍ਪਨ੍ਨਂ ਬ੍ਯਾਪਾਦਵਿਤਕ੍ਕਂ, ਉਪ੍ਪਨ੍ਨਂ ਵਿਹਿਂਸਾਵਿਤਕ੍ਕਂ, ਉਪ੍ਪਨ੍ਨੁਪ੍ਪਨ੍ਨੇ ਪਾਪਕੇ ਅਕੁਸਲੇ ਧਮ੍ਮੇ ਉਪ੍ਪਨ੍ਨਂ ਰਾਗਂ ਦੋਸਂ ਮੋਹਂ ਕੋਧਂ ਉਪਨਾਹਂ ਮਕ੍ਖਂ ਪਲ਼ਾਸਂ ਇਸ੍ਸਂ ਮਚ੍ਛਰਿਯਂ ਮਾਯਂ ਸਾਠੇਯ੍ਯਂ ਥਮ੍ਭਂ ਸਾਰਮ੍ਭਂ ਮਾਨਂ ਅਤਿਮਾਨਂ ਮਦਂ ਪਮਾਦਂ ਸਬ੍ਬੇ ਕਿਲੇਸੇ ਸਬ੍ਬੇ ਦੁਚ੍ਚਰਿਤੇ ਸਬ੍ਬੇ ਅਭਿਸਙ੍ਖਾਰੇ ਸਬ੍ਬੇ ਭਵਗਾਮਿਕਮ੍ਮੇ ਨਾਧਿਵਾਸੇਤਿ ਪਜਹਤਿ ਵਿਨੋਦੇਤਿ ਬ੍ਯਨ੍ਤੀ ਕਰੋਤਿ ਅਨਭਾਵਂ ਗਮੇਤੀਤਿ ਤਿਕ੍ਖਪਞ੍ਞਾ. ਏਕਸ੍ਮਿਂ ਆਸਨੇ ਚਤ੍ਤਾਰੋ ਅਰਿਯਮਗ੍ਗਾ ਚਤ੍ਤਾਰਿ ਸਾਮਞ੍ਞਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾਯੋ ਛ ਅਭਿਞ੍ਞਾਯੋ ਅਧਿਗਤਾ ਹੋਨ੍ਤਿ ਸਚ੍ਛਿਕਤਾ ਫਸ੍ਸਿਤਾ ਪਞ੍ਞਾਯਾਤਿ ਤਿਕ੍ਖਪਞ੍ਞਾ.

ਕਤਮਾ ਨਿਬ੍ਬੇਧਿਕਪਞ੍ਞਾ? ਇਧੇਕਚ੍ਚੋ ਸਬ੍ਬਸਙ੍ਖਾਰੇਸੁ ਉਬ੍ਬੇਗਬਹੁਲੋ ਹੋਤਿ ਉਤ੍ਤਾਸਬਹੁਲੋ ਉਕ੍ਕਣ੍ਠਨਬਹੁਲੋ ਅਰਤਿਬਹੁਲੋ ਅਨਭਿਰਤਿਬਹੁਲੋ ਬਹਿਮੁਖੋ ਨ ਰਮਤਿ ਸਬ੍ਬਸਙ੍ਖਾਰੇਸੁ, ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਂ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾ. ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਦੋਸਕ੍ਖਨ੍ਧਂ ਮੋਹਕ੍ਖਨ੍ਧਂ ਕੋਧਂ ਉਪਨਾਹਂ…ਪੇ… ਸਬ੍ਬੇ ਭਵਗਾਮਿਕਮ੍ਮੇ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾਤਿ (ਪਟਿ. ਮ. ੩.੩).

੨੧੭. ਪਬ੍ਬਜਿਤਂ ਉਪਾਸਿਤਾਤਿ ਪਣ੍ਡਿਤਂ ਪਬ੍ਬਜਿਤਂ ਉਪਸਙ੍ਕਮਿਤ੍ਵਾ ਪਯਿਰੁਪਾਸਿਤਾ. ਅਤ੍ਥਨ੍ਤਰੋਤਿ ਯਥਾ ਏਕੇ ਰਨ੍ਧਗਵੇਸਿਨੋ ਉਪਾਰਮ੍ਭਚਿਤ੍ਤਤਾਯ ਦੋਸਂ ਅਬ੍ਭਨ੍ਤਰਂ ਕਰਿਤ੍ਵਾ ਨਿਸਾਮਯਨ੍ਤਿ, ਏਵਂ ਅਨਿਸਾਮੇਤ੍ਵਾ ਅਤ੍ਥਂ ਅਬ੍ਭਨ੍ਤਰਂ ਕਤ੍ਵਾ ਅਤ੍ਥਯੁਤ੍ਤਂ ਕਥਂ ਨਿਸਾਮਯਿ ਉਪਧਾਰਯਿ.

ਪਟਿਲਾਭਗਤੇਨਾਤਿ ਪਟਿਲਾਭਤ੍ਥਾਯ ਗਤੇਨ. ਉਪ੍ਪਾਦਨਿਮਿਤ੍ਤਕੋਵਿਦਾਤਿ ਉਪ੍ਪਾਦੇ ਚ ਨਿਮਿਤ੍ਤੇ ਚ ਛੇਕਾ. ਅਵੇਚ੍ਚ ਦਕ੍ਖਿਤੀਤਿ ਞਤ੍ਵਾ ਪਸ੍ਸਿਸ੍ਸਤਿ.

ਅਤ੍ਥਾਨੁਸਿਟ੍ਠੀਸੁ ਪਰਿਗ੍ਗਹੇਸੁ ਚਾਤਿ ਯੇ ਅਤ੍ਥਾਨੁਸਾਸਨੇਸੁ ਪਰਿਗ੍ਗਹਾ ਅਤ੍ਥਾਨਤ੍ਥਂ ਪਰਿਗ੍ਗਾਹਕਾਨਿ ਞਾਣਾਨਿ, ਤੇਸੂਤਿ ਅਤ੍ਥੋ.

ਸੁਵਣ੍ਣਵਣ੍ਣਲਕ੍ਖਣਵਣ੍ਣਨਾ

੨੧੮. ਅਕ੍ਕੋਧਨੋਤਿ ਨ ਅਨਾਗਾਮਿਮਗ੍ਗੇਨ ਕੋਧਸ੍ਸ ਪਹੀਨਤ੍ਤਾ, ਅਥ ਖੋ ਸਚੇਪਿ ਮੇ ਕੋਧੋ ਉਪ੍ਪਜ੍ਜੇਯ੍ਯ, ਖਿਪ੍ਪਮੇਵ ਨਂ ਪਟਿਵਿਨੋਦੇਯ੍ਯਨ੍ਤਿ ਏਵਂ ਅਕ੍ਕੋਧਵਸਿਕਤ੍ਤਾ. ਨਾਭਿਸਜ੍ਜੀਤਿ ਕੁਟਿਲਕਣ੍ਟਕੋ ਵਿਯ ਤਤ੍ਥ ਤਤ੍ਥ ਮਮ੍ਮਂ ਤੁਦਨ੍ਤੋ ਵਿਯ ਨ ਲਗ੍ਗਿ. ਨ ਕੁਪ੍ਪਿ ਨ ਬ੍ਯਾਪਜ੍ਜੀਤਿਆਦੀਸੁ ਪੁਬ੍ਬੁਪ੍ਪਤ੍ਤਿਕੋ ਕੋਪੋ. ਤਤੋ ਬਲਵਤਰੋ ਬ੍ਯਾਪਾਦੋ. ਤਤੋ ਬਲਵਤਰਾ ਪਤਿਤ੍ਥਿਯਨਾ. ਤਂ ਸਬ੍ਬਂ ਅਕਰੋਨ੍ਤੋ ਨ ਕੁਪ੍ਪਿ ਨ ਬ੍ਯਾਪਜ੍ਜਿ ਨ ਪਤਿਤ੍ਥਿਯਿ. ਅਪ੍ਪਚ੍ਚਯਨ੍ਤਿ ਦੋਮਨਸ੍ਸਂ. ਨ ਪਾਤ੍ਵਾਕਾਸੀਤਿ ਨ ਕਾਯਵਿਕਾਰੇਨ ਵਾ ਵਚੀਵਿਕਾਰੇਨ ਵਾ ਪਾਕਟਮਕਾਸਿ.

ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਕ੍ਕੋਧਨਤਾ ਚੇਵ ਸੁਖੁਮਤ੍ਥਰਣਾਦਿਦਾਨਞ੍ਚ. ਕਮ੍ਮਸਰਿਕ੍ਖਕਂ ਨਾਮ ਕੋਧਨਸ੍ਸ ਛਵਿਵਣ੍ਣੋ ਆਵਿਲੋ ਹੋਤਿ ਮੁਖਂ ਦੁਦ੍ਦਸਿਯਂ ਵਤ੍ਥਚ੍ਛਾਦਨਸਦਿਸਞ੍ਚ ਮਣ੍ਡਨਂ ਨਾਮ ਨਤ੍ਥਿ. ਤਸ੍ਮਾ ਯੋ ਕੋਧਨੋ ਚੇਵ ਵਤ੍ਥਚ੍ਛਾਦਨਾਨਞ੍ਚ ਅਦਾਤਾ, ਸੋ ਇਮਿਨਾ ਕਾਰਣੇਨਸ੍ਸ ਜਨੋ ਕੋਧਨਾਦਿਭਾਵਂ ਜਾਨਾਤੂਤਿ ਦੁਬ੍ਬਣ੍ਣੋ ਹੋਤਿ ਦੁਸ੍ਸਣ੍ਠਾਨੋ. ਅਕ੍ਕੋਧਨਸ੍ਸ ਪਨ ਮੁਖਂ ਵਿਰੋਚਤਿ, ਛਵਿਵਣ੍ਣੋ ਵਿਪ੍ਪਸੀਦਤਿ. ਸਤ੍ਤਾ ਹਿ ਚਤੂਹਿ ਕਾਰਣੇਹਿ ਪਾਸਾਦਿਕਾ ਹੋਨ੍ਤਿ ਆਮਿਸਦਾਨੇਨ ਵਾ ਵਤ੍ਥਦਾਨੇਨ ਵਾ ਸਮ੍ਮਜ੍ਜਨੇਨ ਵਾ ਅਕ੍ਕੋਧਨਤਾਯ ਵਾ. ਇਮਾਨਿ ਚਤ੍ਤਾਰਿਪਿ ਕਾਰਣਾਨਿ ਦੀਘਰਤ੍ਤਂ ਤਥਾਗਤੇਨ ਕਤਾਨੇਵ. ਤੇਨਸ੍ਸ ਇਮੇਸਂ ਕਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸੁਵਣ੍ਣਵਣ੍ਣਂ ਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਸੁਖੁਮਤ੍ਥਰਣਾਦਿਲਾਭਿਤਾ ਆਨਿਸਂਸੋ.

੨੧੯. ਅਭਿਵਿਸ੍ਸਜੀਤਿ ਅਭਿਵਿਸ੍ਸਜ੍ਜੇਸਿ. ਮਹਿਮਿਵ ਸੁਰੋ ਅਭਿਵਸ੍ਸਨ੍ਤਿ ਸੁਰੋ ਵੁਚ੍ਚਤਿ ਦੇਵੋ, ਮਹਾਪਥਵਿਂ ਅਭਿਵਸ੍ਸਨ੍ਤੋ ਦੇਵੋ ਵਿਯ.

ਸੁਰਵਰਤਰੋਰਿਵ ਇਨ੍ਦੋਤਿ ਸੁਰਾਨਂ ਵਰਤਰੋ ਇਨ੍ਦੋ ਵਿਯ.

ਅਪਬ੍ਬਜ੍ਜਮਿਚ੍ਛਨ੍ਤਿ ਅਪਬ੍ਬਜ੍ਜਂ ਗਿਹਿਭਾਵਂ ਇਚ੍ਛਨ੍ਤੋ. ਮਹਤਿਮਹਿਨ੍ਤਿ ਮਹਨ੍ਤਿਂ ਪਥਵਿਂ.

ਅਚ੍ਛਾਦਨਵਤ੍ਥਮੋਕ੍ਖਪਾਵੁਰਣਾਨਨ੍ਤਿ ਅਚ੍ਛਾਦਨਾਨਞ੍ਚੇਵ ਵਤ੍ਥਾਨਞ੍ਚ ਉਤ੍ਤਮਪਾਵੁਰਣਾਨਞ੍ਚ. ਪਨਾਸੋਤਿ ਵਿਨਾਸੋ.

ਕੋਸੋਹਿਤਵਤ੍ਥਗੁਯ੍ਹਲਕ੍ਖਣਵਣ੍ਣਨਾ

੨੨੦. ਮਾਤਰਮ੍ਪਿ ਪੁਤ੍ਤੇਨ ਸਮਾਨੇਤਾ ਅਹੋਸੀਤਿ ਇਮਂ ਕਮ੍ਮਂ ਰਜ੍ਜੇ ਪਤਿਟ੍ਠਿਤੇਨ ਸਕ੍ਕਾ ਕਾਤੁਂ. ਤਸ੍ਮਾ ਬੋਧਿਸਤ੍ਤੋਪਿ ਰਜ੍ਜਂ ਕਾਰਯਮਾਨੋ ਅਨ੍ਤੋਨਗਰੇ ਚਤੁਕ੍ਕਾਦੀਸੁ ਚਤੂਸੁ ਨਗਰਦ੍ਵਾਰੇਸੁ ਬਹਿਨਗਰੇ ਚਤੂਸੁ ਦਿਸਾਸੁ ਇਮਂ ਕਮ੍ਮਂ ਕਰੋਥਾਤਿ ਮਨੁਸ੍ਸੇ ਠਪੇਸਿ. ਤੇ ਮਾਤਰਂ ਕੁਹਿਂ ਮੇ ਪੁਤ੍ਤੋ ਪੁਤ੍ਤਂ ਨ ਪਸ੍ਸਾਮੀਤਿ ਵਿਲਪਨ੍ਤਿਂ ਪਰਿਯੇਸਮਾਨਂ ਦਿਸ੍ਵਾ ਏਹਿ, ਅਮ੍ਮ, ਪੁਤ੍ਤਂ ਦਕ੍ਖਸੀਤਿ ਤਂ ਆਦਾਯ ਗਨ੍ਤ੍ਵਾ ਨਹਾਪੇਤ੍ਵਾ ਭੋਜੇਤ੍ਵਾ ਪੁਤ੍ਤਮਸ੍ਸਾ ਪਰਿਯੇਸਿਤ੍ਵਾ ਦਸ੍ਸੇਨ੍ਤਿ. ਏਸ ਨਯੋ ਸਬ੍ਬਤ੍ਥ.

ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਞਾਤੀਨਂ ਸਮਙ੍ਗਿਭਾਵਕਰਣਂ. ਕਮ੍ਮਸਰਿਕ੍ਖਕਂ ਨਾਮ ਞਾਤਯੋ ਹਿ ਸਮਙ੍ਗੀਭੂਤਾ ਅਞ੍ਞਮਞ੍ਞਸ੍ਸ ਵਜ੍ਜਂ ਪਟਿਚ੍ਛਾਦੇਨ੍ਤਿ. ਕਿਞ੍ਚਾਪਿ ਹਿ ਤੇ ਕਲਹਕਾਲੇ ਕਲਹਂ ਕਰੋਨ੍ਤਿ, ਏਕਸ੍ਸ ਪਨ ਦੋਸੇ ਉਪ੍ਪਨ੍ਨੇ ਅਞ੍ਞਂ ਜਾਨਾਪੇਤੁਂ ਨ ਇਚ੍ਛਨ੍ਤਿ. ਅਯਂ ਨਾਮ ਏਤਸ੍ਸ ਦੋਸੋਤਿ ਵੁਤ੍ਤੇ ਸਬ੍ਬੇ ਉਟ੍ਠਹਿਤ੍ਵਾ ਕੇਨ ਦਿਟ੍ਠਂ ਕੇਨ ਸੁਤਂ, ਅਮ੍ਹਾਕਂ ਞਾਤੀਸੁ ਏਵਰੂਪਂ ਕਤ੍ਤਾ ਨਾਮ ਨਤ੍ਥੀਤਿ. ਤਥਾਗਤੇਨ ਚ ਤਂ ਞਾਤਿਸਙ੍ਗਹਂ ਕਰੋਨ੍ਤੇਨ ਦੀਘਰਤ੍ਤਂ ਇਦਂ ਵਜ੍ਜਪ੍ਪਟਿਚ੍ਛਾਦਨਕਮ੍ਮਂ ਨਾਮ ਕਤਂ ਹੋਤਿ. ਅਥਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਏਵਰੂਪਸ੍ਸ ਕਮ੍ਮਸ੍ਸ ਕਤਭਾਵਂ ਜਾਨਾਤੂਤਿ ਕੋਸੋਹਿਤਵਤ੍ਥਗੁਯ੍ਹਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਪਹੂਤਪੁਤ੍ਤਤਾ ਆਨਿਸਂਸੋ.

੨੨੧. ਵਤ੍ਥਛਾਦਿਯਨ੍ਤਿ ਵਤ੍ਥੇਨ ਛਾਦੇਤਬ੍ਬਂ ਵਤ੍ਥਗੁਯ੍ਹਂ.

ਅਮਿਤ੍ਤਤਾਪਨਾਤਿ ਅਮਿਤ੍ਤਾਨਂ ਪਤਾਪਨਾ. ਗਿਹਿਸ੍ਸ ਪੀਤਿਂ ਜਨਨਾਤਿ ਗਿਹਿਭੂਤਸ੍ਸ ਸਤੋ ਪੀਤਿਜਨਨਾ.

ਪਰਿਮਣ੍ਡਲਾਦਿਲਕ੍ਖਣਵਣ੍ਣਨਾ

੨੨੨. ਸਮਂ ਜਾਨਾਤੀਤਿ ‘‘ਅਯਂ ਤਾਰੁਕ੍ਖਸਮੋ ਅਯਂ ਪੋਕ੍ਖਰਸਾਤਿਸਮੋ’’ਤਿ ਏਵਂ ਤੇਨ ਤੇਨ ਸਮਂ ਜਾਨਾਤਿ. ਸਾਮਂ ਜਾਨਾਤੀਤਿ ਸਯਂ ਜਾਨਾਤਿ. ਪੁਰਿਸਂ ਜਾਨਾਤੀਤਿ ‘‘ਅਯਂ ਸੇਟ੍ਠਸਮ੍ਮਤੋ’’ਤਿ ਪੁਰਿਸਂ ਜਾਨਾਤਿ. ਪੁਰਿਸਵਿਸੇਸਂ ਜਾਨਾਤੀਤਿ ਮੁਗ੍ਗਂ ਮਾਸੇਨ ਸਮਂ ਅਕਤ੍ਵਾ ਗੁਣਵਿਸਿਟ੍ਠਸ੍ਸ ਵਿਸੇਸਂ ਜਾਨਾਤਿ. ਅਯਮਿਦਮਰਹਤੀਤਿ ਅਯਂ ਪੁਰਿਸੋ ਇਦਂ ਨਾਮ ਦਾਨਸਕ੍ਕਾਰਂ ਅਰਹਤਿ. ਪੁਰਿਸਵਿਸੇਸਕਰੋ ਅਹੋਸੀਤਿ ਪੁਰਿਸਵਿਸੇਸਂ ਞਤ੍ਵਾ ਕਾਰਕੋ ਅਹੋਸਿ. ਯੋ ਯਂ ਅਰਹਤਿ, ਤਸ੍ਸੇਵ ਤਂ ਅਦਾਸਿ. ਯੋ ਹਿ ਕਹਾਪਣਾਰਹਸ੍ਸ ਅਡ੍ਢਂ ਦੇਤਿ, ਸੋ ਪਰਸ੍ਸ ਅਡ੍ਢਂ ਨਾਸੇਤਿ. ਯੋ ਦ੍ਵੇ ਕਹਾਪਣੇ ਦੇਤਿ, ਸੋ ਅਤ੍ਤਨੋ ਕਹਾਪਣਂ ਨਾਸੇਤਿ. ਤਸ੍ਮਾ ਇਦਂ ਉਭਯਮ੍ਪਿ ਅਕਤ੍ਵਾ ਯੋ ਯਂ ਅਰਹਤਿ, ਤਸ੍ਸ ਤਦੇਵ ਅਦਾਸਿ. ਸਦ੍ਧਾਧਨਨ੍ਤਿਆਦੀਸੁ ਸਮ੍ਪਤ੍ਤਿਪਟਿਲਾਭਟ੍ਠੇਨ ਸਦ੍ਧਾਦੀਨਂ ਧਨਭਾਵੋ ਵੇਦਿਤਬ੍ਬੋ.

ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਪੁਰਿਸਵਿਸੇਸਂ ਞਤ੍ਵਾ ਕਤਂ ਸਮਸਙ੍ਗਹਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਤਦਸ੍ਸ ਕਮ੍ਮਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਦ੍ਵੇ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਧਨਸਮ੍ਪਤ੍ਤਿ ਆਨਿਸਂਸੋ.

੨੨੩. ਤੁਲਿਯਾਤਿ ਤੁਲਯਿਤ੍ਵਾ. ਪਟਿਵਿਚਯਾਤਿ ਪਟਿਵਿਚਿਨਿਤ੍ਵਾ. ਮਹਾਜਨਸਙ੍ਗਾਹਕਨ੍ਤਿ ਮਹਾਜਨਸਙ੍ਗਹਣਂ. ਸਮੇਕ੍ਖਮਾਨੋਤਿ ਸਮਂ ਪੇਕ੍ਖਮਾਨੋ. ਅਤਿਨਿਪੁਣਾ ਮਨੁਜਾਤਿ ਅਤਿਨਿਪੁਣਾ ਸੁਖੁਮਪਞ੍ਞਾ ਲਕ੍ਖਣਪਾਠਕਮਨੁਸ੍ਸਾ. ਬਹੁਵਿਵਿਧਾ ਗਿਹੀਨਂ ਅਰਹਾਨੀਤਿ ਬਹੂ ਵਿਵਿਧਾਨਿ ਗਿਹੀਨਂ ਅਨੁਚ੍ਛਵਿਕਾਨਿ ਪਟਿਲਭਤਿ. ਦਹਰੋ ਸੁਸੁ ਕੁਮਾਰੋ ‘‘ਅਯਂ ਦਹਰੋ ਕੁਮਾਰੋ ਪਟਿਲਭਿਸ੍ਸਤੀ’’ਤਿ ਬ੍ਯਾਕਂਸੁ ਮਹੀਪਤਿਸ੍ਸਾਤਿ ਰਞ੍ਞੋ.

ਸੀਹਪੁਬ੍ਬਦ੍ਧਕਾਯਾਦਿਲਕ੍ਖਣਵਣ੍ਣਨਾ

੨੨੪. ਯੋਗਕ੍ਖੇਮਕਾਮੋਤਿ ਯੋਗਤੋ ਖੇਮਕਾਮੋ. ਪਞ੍ਞਾਯਾਤਿ ਕਮ੍ਮਸ੍ਸਕਤਪਞ੍ਞਾਯ. ਇਧ ਕਮ੍ਮਂ ਨਾਮ ਮਹਾਜਨਸ੍ਸ ਅਤ੍ਥਕਾਮਤਾ. ਕਮ੍ਮਸਰਿਕ੍ਖਕਂ ਨਾਮ ਤਂ ਮਹਾਜਨਸ੍ਸ ਅਤ੍ਥਕਾਮਤਾਯ ਵਡ੍ਢਿਮੇਵ ਪਚ੍ਚਾਸੀਸਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਸਮਨ੍ਤਪਰਿਪੂਰਾਨਿ ਅਪਰਿਹੀਨਾਨਿ ਤੀਣਿ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਤ੍ਤਯਂ. ਧਨਾਦੀਹਿ ਚੇਵ ਸਦ੍ਧਾਦੀਹਿ ਚ ਅਪਰਿਹਾਨਿ ਆਨਿਸਂਸੋ.

੨੨੫. ਸਦ੍ਧਾਯਾਤਿ ਓਕਪ੍ਪਨਸਦ੍ਧਾਯ ਪਸਾਦਸਦ੍ਧਾਯ. ਸੀਲੇਨਾਤਿ ਪਞ੍ਚਸੀਲੇਨ ਦਸਸੀਲੇਨ. ਸੁਤੇਨਾਤਿ ਪਰਿਯਤ੍ਤਿਸਵਨੇਨ. ਬੁਦ੍ਧਿਯਾਤਿ ਏਤੇਸਂ ਬੁਦ੍ਧਿਯਾ, ‘‘ਕਿਨ੍ਤਿ ਏਤੇਹਿ ਵਡ੍ਢੇਯ੍ਯੁ’’ਨ੍ਤਿ ਏਵਂ ਚਿਨ੍ਤੇਸੀਤਿ ਅਤ੍ਥੋ. ਧਮ੍ਮੇਨਾਤਿ ਲੋਕਿਯਧਮ੍ਮੇਨ. ਬਹੂਹਿ ਸਾਧੂਹੀਤਿ ਅਞ੍ਞੇਹਿਪਿ ਬਹੂਹਿ ਉਤ੍ਤਮਗੁਣੇਹਿ. ਅਸਹਾਨਧਮ੍ਮਤਨ੍ਤਿ ਅਪਰਿਹੀਨਧਮ੍ਮਂ.

ਰਸਗ੍ਗਸਗ੍ਗਿਤਾਲਕ੍ਖਣਵਣ੍ਣਨਾ

੨੨੬. ਸਮਾਭਿਵਾਹਿਨਿਯੋਤਿ ਯਥਾ ਤਿਲਫਲਮਤ੍ਤਮ੍ਪਿ ਜਿਵ੍ਹਗ੍ਗੇ ਠਪਿਤਂ ਸਬ੍ਬਤ੍ਥ ਫਰਤਿ, ਏਵਂ ਸਮਾ ਹੁਤ੍ਵਾ ਵਹਨ੍ਤਿ. ਇਧ ਕਮ੍ਮਂ ਨਾਮ ਅਵਿਹੇਠਨਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਪਾਣਿਆਦੀਹਿ ਪਹਾਰਂ ਲਦ੍ਧਸ੍ਸ ਤਤ੍ਥ ਤਤ੍ਥ ਲੋਹਿਤਂ ਸਣ੍ਠਾਤਿ, ਗਣ੍ਠਿ ਗਣ੍ਠਿ ਹੁਤ੍ਵਾ ਅਨ੍ਤੋਵ ਪੁਬ੍ਬਂ ਗਣ੍ਹਾਤਿ, ਅਨ੍ਤੋਵ ਭਿਜ੍ਜਤਿ, ਏਵਂ ਸੋ ਬਹੁਰੋਗੋ ਹੋਤਿ. ਤਥਾਗਤੇਨ ਪਨ ਦੀਘਰਤ੍ਤਂ ਇਮਂ ਆਰੋਗ੍ਯਕਰਣਕਮ੍ਮਂ ਕਤਂ. ਤਦਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਆਰੋਗ੍ਯਕਰਂ ਰਸਗ੍ਗਸਗ੍ਗਿਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਪ੍ਪਾਬਾਧਤਾ ਆਨਿਸਂਸੋ.

੨੨੭. ਮਰਣਵਧੇਨਾਤਿ ‘‘ਏਤਂ ਮਾਰੇਥ ਏਤਂ ਘਾਤੇਥਾ’’ਤਿ ਏਵਂ ਆਣਤ੍ਤੇਨ ਮਰਣਵਧੇਨ. ਉਬ੍ਬਾਧਨਾਯਾਤਿ ਬਨ੍ਧਨਾਗਾਰਪ੍ਪਵੇਸਨੇਨ.

ਅਭਿਨੀਲਨੇਤ੍ਤਾਦਿਲਕ੍ਖਣਵਣ੍ਣਨਾ

੨੨੮. ਨ ਚ ਵਿਸਟਨ੍ਤਿ ਕਕ੍ਕਟਕੋ ਵਿਯ ਅਕ੍ਖੀਨਿ ਨੀਹਰਿਤ੍ਵਾ ਨ ਕੋਧਵਸੇਨ ਪੇਕ੍ਖਿਤਾ ਅਹੋਸਿ. ਨ ਚ ਵਿਸਾਚੀਤਿ ਵਙ੍ਕਕ੍ਖਿਕੋਟਿਯਾ ਪੇਕ੍ਖਿਤਾਪਿ ਨਾਹੋਸਿ. ਨ ਚ ਪਨ ਵਿਚੇਯ੍ਯ ਪੇਕ੍ਖਿਤਾਤਿ ਵਿਚੇਯ੍ਯ ਪੇਕ੍ਖਿਤਾ ਨਾਮ ਯੋ ਕੁਜ੍ਝਿਤ੍ਵਾ ਯਦਾ ਨਂ ਪਰੋ ਓਲੋਕੇਤਿ, ਤਦਾ ਨਿਮ੍ਮੀਲੇਤਿ ਨ ਓਲੋਕੇਤਿ, ਪੁਨ ਗਚ੍ਛਨ੍ਤਂ ਕੁਜ੍ਝਿਤ੍ਵਾ ਓਲੋਕੇਤਿ, ਏਵਰੂਪੋ ਨਾਹੋਸਿ. ‘‘ਵਿਨੇਯ੍ਯਪੇਕ੍ਖਿਤਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਉਜੁਂ ਤਥਾ ਪਸਟਮੁਜੁਮਨੋਤਿ ਉਜੁਮਨੋ ਹੁਤ੍ਵਾ ਉਜੁ ਪੇਕ੍ਖਿਤਾ ਹੋਤਿ, ਯਥਾ ਚ ਉਜੁਂ, ਤਥਾ ਪਸਟਂ ਵਿਪੁਲਂ ਵਿਤ੍ਥਤਂ ਪੇਕ੍ਖਿਤਾ ਹੋਤਿ. ਪਿਯਦਸ੍ਸਨੋਤਿ ਪਿਯਾਯਮਾਨੇਹਿ ਪਸ੍ਸਿਤਬ੍ਬੋ.

ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਮਹਾਜਨਸ੍ਸ ਪਿਯਚਕ੍ਖੁਨਾ ਓਲੋਕਨਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਕੁਜ੍ਝਿਤ੍ਵਾ ਓਲੋਕੇਨ੍ਤੋ ਕਾਣੋ ਵਿਯ ਕਾਕਕ੍ਖਿ ਵਿਯ ਹੋਤਿ, ਵਙ੍ਕਕ੍ਖਿ ਪਨ ਆਵਿਲਕ੍ਖਿ ਚ ਹੋਤਿਯੇਵ. ਪਸਨ੍ਨਚਿਤ੍ਤਸ੍ਸ ਪਨ ਓਲੋਕਯਤੋ ਅਕ੍ਖੀਨਂ ਪਞ੍ਚਵਣ੍ਣੋ ਪਸਾਦੋ ਪਞ੍ਞਾਯਤਿ. ਤਥਾਗਤੋ ਚ ਤਥਾ ਓਲੋਕੇਸਿ. ਅਥਸ੍ਸ ਤਂ ਦੀਘਰਤ੍ਤਂ ਪਿਯਚਕ੍ਖੁਨਾ ਓਲੋਕਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਨੇਤ੍ਤਸਮ੍ਪਤ੍ਤਿਕਰਾਨਿ ਦ੍ਵੇ ਮਹਾਪੁਰਿਸਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਪਿਯਦਸ੍ਸਨਤਾ ਆਨਿਸਂਸੋ. ਅਭਿਯੋਗਿਨੋਤਿ ਲਕ੍ਖਣਸਤ੍ਥੇ ਯੁਤ੍ਤਾ.

ਉਣ੍ਹੀਸਸੀਸਲਕ੍ਖਣਵਣ੍ਣਨਾ

੨੩੦. ਬਹੁਜਨਪੁਬ੍ਬਙ੍ਗਮੋ ਅਹੋਸੀਤਿ ਬਹੁਜਨਸ੍ਸ ਪੁਬ੍ਬਙ੍ਗਮੋ ਅਹੋਸਿ ਗਣਜੇਟ੍ਠਕੋ. ਤਸ੍ਸ ਦਿਟ੍ਠਾਨੁਗਤਿਂ ਅਞ੍ਞੇ ਆਪਜ੍ਜਿਂਸੁ. ਇਧ ਕਮ੍ਮਂ ਨਾਮ ਪੁਬ੍ਬਙ੍ਗਮਤਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਪੁਬ੍ਬਙ੍ਗਮੋ ਹੁਤ੍ਵਾ ਦਾਨਾਦੀਨਿ ਕੁਸਲਕਮ੍ਮਾਨਿ ਕਰੋਤਿ, ਸੋ ਅਮਙ੍ਕੁਭੂਤੋ ਸੀਸਂ ਉਕ੍ਖਿਪਿਤ੍ਵਾ ਪੀਤਿਪਾਮੋਜ੍ਜੇਨ ਪਰਿਪੁਣ੍ਣਸੀਸੋ ਵਿਚਰਤਿ, ਮਹਾਪੁਰਿਸੋ ਚ ਹੋਤਿ. ਤਥਾਗਤੋ ਚ ਤਥਾ ਅਕਾਸਿ. ਅਥਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਇਦਂ ਪੁਬ੍ਬਙ੍ਗਮਕਮ੍ਮਂ ਜਾਨਾਤੂਤਿ ਉਣ੍ਹੀਸਸੀਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਮਹਾਜਨਾਨੁਵਤ੍ਤਨਤਾ ਆਨਿਸਂਸੋ.

੨੩੧. ਬਹੁਜਨਂ ਹੇਸ੍ਸਤੀਤਿ ਬਹੁਜਨਸ੍ਸ ਭਵਿਸ੍ਸਤਿ. ਪਟਿਭੋਗਿਯਾਤਿ ਵੇਯ੍ਯਾਵਚ੍ਚਕਰਾ, ਏਤਸ੍ਸ ਬਹੂ ਵੇਯ੍ਯਾਵਚ੍ਚਕਰਾ ਭਵਿਸ੍ਸਨ੍ਤੀਤਿ ਅਤ੍ਥੋ. ਅਭਿਹਰਨ੍ਤਿ ਤਦਾਤਿ ਦਹਰਕਾਲੇਯੇਵ ਤਦਾ ਏਵਂ ਬ੍ਯਾਕਰੋਨ੍ਤਿ. ਪਟਿਹਾਰਕਨ੍ਤਿ ਵੇਯ੍ਯਾਵਚ੍ਚਕਰਭਾਵਂ. ਵਿਸਵੀਤਿ ਚਿਣ੍ਣਵਸੀ.

ਏਕੇਕਲੋਮਤਾਦਿਲਕ੍ਖਣਵਣ੍ਣਨਾ

੨੩੨. ਉਪਵਤ੍ਤਤੀਤਿ ਅਜ੍ਝਾਸਯਂ ਅਨੁਵਤ੍ਤਤਿ, ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਸਚ੍ਚਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਦੀਘਰਤ੍ਤਂ ਅਦ੍ਵੇਜ੍ਝਕਥਾਯ ਪਰਿਸੁਦ੍ਧਕਥਾਯ ਕਥਿਤਭਾਵਮਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਏਕੇਕਲੋਮਲਕ੍ਖਣਞ੍ਚ ਉਣ੍ਣਾਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਮਹਾਜਨਸ੍ਸ ਅਜ੍ਝਾਸਯਾਨੁਕੂਲੇਨ ਅਨੁਵਤ੍ਤਨਤਾ ਆਨਿਸਂਸੋ. ਏਕੇਕਲੋਮੂਪਚਿਤਙ੍ਗਵਾਤਿ ਏਕੇਕੇਹਿ ਲੋਮੇਹਿ ਉਪਚਿਤਸਰੀਰੋ.

ਚਤ੍ਤਾਲੀਸਾਦਿਲਕ੍ਖਣਵਣ੍ਣਨਾ

੨੩੪. ਅਭੇਜ੍ਜਪਰਿਸੋਤਿ ਅਭਿਨ੍ਦਿਤਬ੍ਬਪਰਿਸੋ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਪਿਸੁਣਵਾਚਾਯ ਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਪਿਸੁਣਵਾਚਸ੍ਸ ਕਿਰ ਸਮਗ੍ਗਭਾਵਂ ਭਿਨ੍ਦਨਤੋ ਦਨ੍ਤਾ ਅਪਰਿਪੁਣ੍ਣਾ ਚੇਵ ਹੋਨ੍ਤਿ ਵਿਰਲ਼ਾ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਅਪਿਸੁਣਵਾਚਤਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਦਂ ਲਕ੍ਖਣਦ੍ਵਯਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਅਭੇਜ੍ਜਪਰਿਸਤਾ ਆਨਿਸਂਸੋ. ਚਤੁਰੋ ਦਸਾਤਿ ਚਤ੍ਤਾਰੋ ਦਸ ਚਤ੍ਤਾਲੀਸਂ.

ਪਹੂਤਜਿਵ੍ਹਾਦਿਲਕ੍ਖਣਵਣ੍ਣਨਾ

੨੩੬. ਆਦੇਯ੍ਯਵਾਚੋ ਹੋਤੀਤਿ ਗਹੇਤਬ੍ਬਵਚਨੋ ਹੋਤਿ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਫਰੁਸਵਾਦਿਤਾ. ਕਮ੍ਮਸਰਿਕ੍ਖਕਂ ਨਾਮ ਯੇ ਫਰੁਸਵਾਚਾ ਹੋਨ੍ਤਿ, ਤੇ ਇਮਿਨਾ ਕਾਰਣੇਨ ਨੇਸਂ ਜਿਵ੍ਹਂ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਫਰੁਸਵਾਚਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਬਦ੍ਧਜਿਵ੍ਹਾ ਵਾ ਹੋਨ੍ਤਿ, ਗੂਲ਼੍ਹਜਿਵ੍ਹਾ ਵਾ ਦ੍ਵਿਜਿਵ੍ਹਾ ਵਾ ਮਮ੍ਮਨਾ ਵਾ. ਯੇ ਪਨ ਜਿਵ੍ਹਂ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਫਰੁਸਵਾਚਂ ਨ ਵਦਨ੍ਤਿ, ਤੇ ਬਦ੍ਧਜਿਵ੍ਹਾ ਗੂਲ਼੍ਹਜਿਵ੍ਹਾ ਦ੍ਵਿਜਿਵ੍ਹਾ ਨ ਹੋਨ੍ਤਿ. ਮੁਦੁ ਨੇਸਂ ਜਿਵ੍ਹਾ ਹੋਤਿ ਰਤ੍ਤਕਮ੍ਬਲਵਣ੍ਣਾ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਜਿਵ੍ਹਂ ਪਰਿਵਤ੍ਤੇਤ੍ਵਾ ਫਰੁਸਾਯ ਵਾਚਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਪਹੂਤਜਿਵ੍ਹਾਲਕ੍ਖਣਂ ਨਿਬ੍ਬਤ੍ਤਤਿ. ਫਰੁਸਵਾਚਂ ਕਥੇਨ੍ਤਾਨਞ੍ਚ ਸਦ੍ਦੋ ਭਿਜ੍ਜਤਿ. ਤੇ ਸਦ੍ਦਭੇਦਂ ਕਤ੍ਵਾ ਫਰੁਸਵਾਚਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਛਿਨ੍ਨਸ੍ਸਰਾ ਵਾ ਹੋਨ੍ਤਿ ਭਿਨ੍ਨਸ੍ਸਰਾ ਵਾ ਕਾਕਸ੍ਸਰਾ ਵਾ. ਯੇ ਪਨ ਸਰਭੇਦਕਰਂ ਫਰੁਸਵਾਚਂ ਨ ਕਥੇਨ੍ਤਿ, ਤੇਸਂ ਸਦ੍ਦੋ ਮਧੁਰੋ ਚ ਹੋਤਿ ਪੇਮਨੀਯੋ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਸਰਭੇਦਕਰਾਯ ਫਰੁਸਵਾਚਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਬ੍ਰਹ੍ਮਸ੍ਸਰਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਆਦੇਯ੍ਯਵਚਨਤਾ ਆਨਿਸਂਸੋ.

੨੩੭. ਉਬ੍ਬਾਧਿਕਨ੍ਤਿ ਅਕ੍ਕੋਸਯੁਤ੍ਤਤ੍ਤਾ ਆਬਾਧਕਰਿਂ ਬਹੁਜਨਪ੍ਪਮਦ੍ਦਨਨ੍ਤਿ ਬਹੁਜਨਾਨਂ ਪਮਦ੍ਦਨਿਂ ਅਬਾਲ਼੍ਹਂ ਗਿਰਂ ਸੋ ਨ ਭਣਿ ਫਰੁਸਨ੍ਤਿ ਏਤ੍ਥ ਅਕਾਰੋ ਪਰਤੋ ਭਣਿਸਦ੍ਦੇਨ ਯੋਜੇਤਬ੍ਬੋ. ਬਾਲ਼੍ਹਨ੍ਤਿ ਬਲਵਂ ਅਤਿਫਰੁਸਂ. ਬਾਲ਼੍ਹਂ ਗਿਰਂ ਸੋ ਨ ਅਭਣੀਤਿ ਅਯਮੇਤ੍ਥ ਅਤ੍ਥੋ. ਸੁਸਂਹਿਤਨ੍ਤਿ ਸੁਟ੍ਠੁ ਪੇਮਸਞ੍ਹਿਤਂ. ਸਖਿਲਨ੍ਤਿ ਮੁਦੁਕਂ. ਵਾਚਾਤਿ ਵਾਚਾਯੋ. ਕਣ੍ਣਸੁਖਾਤਿ ਕਣ੍ਣਸੁਖਾਯੋ. ‘‘ਕਣ੍ਣਸੁਖ’’ਨ੍ਤਿਪਿ ਪਾਠੋ, ਯਥਾ ਕਣ੍ਣਾਨਂ ਸੁਖਂ ਹੋਤਿ, ਏਵਂ ਏਰਯਤੀਤਿ ਅਤ੍ਥੋ. ਵੇਦਯਥਾਤਿ ਵੇਦਯਿਤ੍ਥ. ਬ੍ਰਹ੍ਮਸ੍ਸਰਤ੍ਤਨ੍ਤਿ ਬ੍ਰਹ੍ਮਸ੍ਸਰਤਂ. ਬਹੁਨੋ ਬਹੁਨ੍ਤਿ ਬਹੁਜਨਸ੍ਸ ਬਹੁਂ. ‘‘ਬਹੂਨਂ ਬਹੁਨ੍ਤਿ’’ਪਿ ਪਾਠੋ, ਬਹੁਜਨਾਨਂ ਬਹੁਨ੍ਤਿ ਅਤ੍ਥੋ.

ਸੀਹਹਨੁਲਕ੍ਖਣਵਣ੍ਣਨਾ

੨੩੮. ਅਪ੍ਪਧਂਸਿਕੋ ਹੋਤੀਤਿ ਗੁਣਤੋ ਵਾ ਠਾਨਤੋ ਵਾ ਪਧਂਸੇਤੁਂ ਚਾਵੇਤੁਂ ਅਸਕ੍ਕੁਣੇਯ੍ਯੋ. ਇਧ ਕਮ੍ਮਂ ਨਾਮ ਪਲਾਪਕਥਾਯ ਅਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਯੇ ਤਂ ਕਥੇਨ੍ਤਿ, ਤੇ ਇਮਿਨਾ ਕਾਰਣੇਨ ਨੇਸਂ ਹਨੁਕਂ ਚਾਲੇਤ੍ਵਾ ਚਾਲੇਤ੍ਵਾ ਪਲਾਪਕਥਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਅਨ੍ਤੋਪਵਿਟ੍ਠਹਨੁਕਾ ਵਾ ਵਙ੍ਕਹਨੁਕਾ ਵਾ ਪਬ੍ਭਾਰਹਨੁਕਾ ਵਾ ਹੋਨ੍ਤਿ. ਤਥਾਗਤੋ ਪਨ ਤਥਾ ਨ ਕਥੇਸਿ. ਤੇਨਸ੍ਸ ਹਨੁਕਂ ਚਾਲੇਤ੍ਵਾ ਚਾਲੇਤ੍ਵਾ ਦੀਘਰਤ੍ਤਂ ਪਲਾਪਕਥਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸੀਹਹਨੁਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਪ੍ਪਧਂਸਿਕਤਾ ਆਨਿਸਂਸੋ.

੨੩੯. ਅਵਿਕਿਣ੍ਣਵਚਨਬ੍ਯਪ੍ਪਥੋ ਚਾਤਿ ਅਵਿਕਿਣ੍ਣਵਚਨਾਨਂ ਵਿਯ ਪੁਰਿਮਬੋਧਿਸਤ੍ਤਾਨਂ ਵਚਨਪਥੋ ਅਸ੍ਸਾਤਿ ਅਵਿਕਿਣ੍ਣਵਚਨਬ੍ਯਪ੍ਪਥੋ. ਦ੍ਵਿਦੁਗਮਵਰਤਰਹਨੁਤ੍ਤਮਲਤ੍ਥਾਤਿ ਦ੍ਵੀਹਿ ਦ੍ਵੀਹਿ ਗਚ੍ਛਤੀਤਿ ਦ੍ਵਿਦੁਗਮੋ, ਦ੍ਵੀਹਿ ਦ੍ਵੀਹੀਤਿ ਚਤੂਹਿ, ਚਤੁਪ੍ਪਦਾਨਂ ਵਰਤਰਸ੍ਸ ਸੀਹਸ੍ਸੇਵ ਹਨੁਭਾਵਂ ਅਲਤ੍ਥਾਤਿ ਅਤ੍ਥੋ. ਮਨੁਜਾਧਿਪਤੀਤਿ ਮਨੁਜਾਨਂ ਅਧਿਪਤਿ. ਤਥਤ੍ਤੋਤਿ ਤਥਸਭਾਵੋ.

ਸਮਦਨ੍ਤਾਦਿਲਕ੍ਖਣਵਣ੍ਣਨਾ

੨੪੦. ਸੁਚਿਪਰਿਵਾਰੋਤਿ ਪਰਿਸੁਦ੍ਧਪਰਿਵਾਰੋ. ਇਧ ਕਮ੍ਮਂ ਨਾਮ ਸਮ੍ਮਾਜੀਵਤਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਵਿਸਮੇਨ ਸਂਕਿਲਿਟ੍ਠਾਜੀਵੇਨ ਜੀਵਿਤਂ ਕਪ੍ਪੇਤਿ, ਤਸ੍ਸ ਦਨ੍ਤਾਪਿ ਵਿਸਮਾ ਹੋਨ੍ਤਿ ਦਾਠਾਪਿ ਕਿਲਿਟ੍ਠਾ. ਤਥਾਗਤਸ੍ਸ ਪਨ ਸਮੇਨ ਸੁਦ੍ਧਾਜੀਵੇਨ ਜੀਵਿਤਂ ਕਪ੍ਪਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸਮਦਨ੍ਤਲਕ੍ਖਣਞ੍ਚ ਸੁਸੁਕ੍ਕਦਾਠਾਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਸੁਚਿਪਰਿਵਾਰਤਾ ਆਨਿਸਂਸੋ.

੨੪੧. ਅਵਸ੍ਸਜੀਤਿ ਪਹਾਸਿ ਤਿਦਿਵਪੁਰਵਰਸਮੋਤਿ ਤਿਦਿਵਪੁਰਵਰੇਨ ਸਕ੍ਕੇਨ ਸਮੋ. ਲਪਨਜਨ੍ਤਿ ਮੁਖਜਂ, ਦਨ੍ਤਨ੍ਤਿ ਅਤ੍ਥੋ. ਦਿਜਸਮਸੁਕ੍ਕਸੁਚਿਸੋਭਨਦਨ੍ਤੋਤਿ ਦ੍ਵੇ ਵਾਰੇ ਜਾਤਤ੍ਤਾ ਦਿਜਨਾਮਕਾ ਸੁਕ੍ਕਾ ਸੁਚਿ ਸੋਭਨਾ ਚ ਦਨ੍ਤਾ ਅਸ੍ਸਾਤਿ ਦਿਜਸਮਸੁਕ੍ਕਸੁਚਿਸੋਭਨਦਨ੍ਤੋ. ਨ ਚ ਜਨਪਦਤੁਦਨਨ੍ਤਿ ਯੋ ਤਸ੍ਸ ਚਕ੍ਕਵਾਲ਼ਪਰਿਚ੍ਛਿਨ੍ਨੋ ਜਨਪਦੋ, ਤਸ੍ਸ ਅਞ੍ਞੇਨ ਤੁਦਨਂ ਪੀਲ਼ਾ ਵਾ ਆਬਾਧੋ ਵਾ ਨਤ੍ਥਿ. ਹਿਤਮਪਿ ਚ ਬਹੁਜਨ ਸੁਖਞ੍ਚ ਚਰਨ੍ਤੀਤਿ ਬਹੁਜਨਾ ਸਮਾਨਸੁਖਦੁਕ੍ਖਾ ਹੁਤ੍ਵਾ ਤਸ੍ਮਿਂ ਜਨਪਦੇ ਅਞ੍ਞਮਞ੍ਞਸ੍ਸ ਹਿਤਞ੍ਚੇਵ ਸੁਖਞ੍ਚ ਚਰਨ੍ਤਿ. ਵਿਪਾਪੋਤਿ ਵਿਗਤਪਾਪੋ. ਵਿਗਤਦਰਥਕਿਲਮਥੋਤਿ ਵਿਗਤਕਾਯਿਕਦਰਥਕਿਲਮਥੋ. ਮਲਖਿਲਕਲਿਕਿਲੇਸੇ ਪਨੁਦੇਹੀਤਿ ਰਾਗਾਦਿਮਲਾਨਞ੍ਚੇਵ ਰਾਗਾਦਿਖਿਲਾਨਞ੍ਚ ਦੋਸਕਲੀਨਞ੍ਚ ਸਬ੍ਬਕਿਲੇਸਾਨਞ੍ਚ ਅਪਨੁਦੇਹਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਲਕ੍ਖਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਸਿਙ੍ਗਾਲਸੁਤ੍ਤਵਣ੍ਣਨਾ

ਨਿਦਾਨਵਣ੍ਣਨਾ

੨੪੨. ਏਵਂ ਮੇ ਸੁਤਨ੍ਤਿ ਸਿਙ੍ਗਾਲਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਵੇਲ਼ੁਵਨੇ ਕਲਨ੍ਦਕਨਿਵਾਪੇਤਿ ਵੇਲ਼ੁਵਨਨ੍ਤਿ ਤਸ੍ਸ ਉਯ੍ਯਾਨਸ੍ਸ ਨਾਮਂ. ਤਂ ਕਿਰ ਵੇਲ਼ੂਹਿ ਪਰਿਕ੍ਖਿਤ੍ਤਂ ਅਹੋਸਿ ਅਟ੍ਠਾਰਸਹਤ੍ਥੇਨ ਚ ਪਾਕਾਰੇਨ ਗੋਪੁਰਟ੍ਟਾਲਕਯੁਤ੍ਤਂ ਨੀਲੋਭਾਸਂ ਮਨੋਰਮਂ, ਤੇਨ ਵੇਲ਼ੁਵਨਨ੍ਤਿ ਵੁਚ੍ਚਤਿ. ਕਲਨ੍ਦਕਾਨਞ੍ਚੇਤ੍ਥ ਨਿਵਾਪਂ ਅਦਂਸੁ, ਤੇਨ ਕਲਨ੍ਦਕਨਿਵਾਪੋਤਿ ਵੁਚ੍ਚਤਿ.

ਪੁਬ੍ਬੇ ਕਿਰ ਅਞ੍ਞਤਰੋ ਰਾਜਾ ਤਤ੍ਥ ਉਯ੍ਯਾਨਕੀਲ਼ਨਤ੍ਥਂ ਆਗਤੋ ਸੁਰਾਮਦੇਨ ਮਤ੍ਤੋ ਦਿਵਾ ਨਿਦ੍ਦਂ ਓਕ੍ਕਮਿ. ਪਰਿਜਨੋਪਿਸ੍ਸ ‘‘ਸੁਤ੍ਤੋ ਰਾਜਾ’’ਤਿ ਪੁਪ੍ਫਫਲਾਦੀਹਿ ਪਲੋਭਿਯਮਾਨੋ ਇਤੋ ਚਿਤੋ ਚ ਪਕ੍ਕਾਮਿ. ਅਥ ਸੁਰਾਗਨ੍ਧੇਨ ਅਞ੍ਞਤਰਸ੍ਮਾ ਸੁਸਿਰਰੁਕ੍ਖਾ ਕਣ੍ਹਸਪ੍ਪੋ ਨਿਕ੍ਖਮਿਤ੍ਵਾ ਰਞ੍ਞੋ ਅਭਿਮੁਖੋ ਆਗਚ੍ਛਤਿ, ਤਂ ਦਿਸ੍ਵਾ ਰੁਕ੍ਖਦੇਵਤਾ ‘‘ਰਞ੍ਞੋ ਜੀਵਿਤਂ ਦਮ੍ਮੀ’’ਤਿ ਕਾਲ਼ਕਵੇਸੇਨ ਆਗਨ੍ਤ੍ਵਾ ਕਣ੍ਣਮੂਲੇ ਸਦ੍ਦਮਕਾਸਿ. ਰਾਜਾ ਪਟਿਬੁਜ੍ਝਿ. ਕਣ੍ਹਸਪ੍ਪੋ ਨਿਵਤ੍ਤੋ. ਸੋ ਤਂ ਦਿਸ੍ਵਾ ‘‘ਇਮਾਯ ਕਾਲ਼ਕਾਯ ਮਮ ਜੀਵਿਤਂ ਦਿਨ੍ਨ’’ਨ੍ਤਿ ਕਾਲ਼ਕਾਨਂ ਤਤ੍ਥ ਨਿਵਾਪਂ ਪਟ੍ਠਪੇਸਿ, ਅਭਯਘੋਸਞ੍ਚ ਘੋਸਾਪੇਸਿ. ਤਸ੍ਮਾ ਤਂ ਤਤੋ ਪਭੁਤਿ ‘‘ਕਲਨ੍ਦਕਨਿਵਾਪੋ’’ਤਿ ਸਙ੍ਖ੍ਯਂ ਗਤਂ. ਕਲਨ੍ਦਕਾਤਿ ਹਿ ਕਾਲ਼ਕਾਨਂ ਏਤਂ ਨਾਮਂ.

ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਭਗਵਾ ਰਾਜਗਹਂ ਗੋਚਰਗਾਮਂ ਕਤ੍ਵਾ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਵਿਹਰਤਿ, ਤੇਨ ਸਮਯੇਨ. ਸਿਙ੍ਗਾਲਕੋ ਗਹਪਤਿਪੁਤ੍ਤੋਤਿ ਸਿਙ੍ਗਾਲਕੋਤਿ ਤਸ੍ਸ ਨਾਮਂ. ਗਹਪਤਿਪੁਤ੍ਤੋਤਿ ਗਹਪਤਿਸ੍ਸ ਪੁਤ੍ਤੋ ਗਹਪਤਿਪੁਤ੍ਤੋ. ਤਸ੍ਸ ਕਿਰ ਪਿਤਾ ਗਹਪਤਿਮਹਾਸਾਲੋ, ਨਿਦਹਿਤ੍ਵਾ ਠਪਿਤਾ ਚਸ੍ਸ ਗੇਹੇ ਚਤ੍ਤਾਲੀਸ ਧਨਕੋਟਿਯੋ ਅਤ੍ਥਿ. ਸੋ ਭਗਵਤਿ ਨਿਟ੍ਠਙ੍ਗਤੋ ਉਪਾਸਕੋ ਸੋਤਾਪਨ੍ਨੋ, ਭਰਿਯਾਪਿਸ੍ਸ ਸੋਤਾਪਨ੍ਨਾਯੇਵ. ਪੁਤ੍ਤੋ ਪਨਸ੍ਸ ਅਸ੍ਸਦ੍ਧੋ ਅਪ੍ਪਸਨ੍ਨੋ. ਅਥ ਨਂ ਮਾਤਾਪਿਤਰੋ ਅਭਿਕ੍ਖਣਂ ਏਵਂ ਓਵਦਨ੍ਤਿ – ‘‘ਤਾਤ ਸਤ੍ਥਾਰਂ ਉਪਸਙ੍ਕਮ, ਧਮ੍ਮਸੇਨਾਪਤਿਂ ਮਹਾਮੋਗ੍ਗਲ੍ਲਾਨਂ ਮਹਾਕਸ੍ਸਪਂ ਅਸੀਤਿਮਹਾਸਾਵਕੇ ਉਪਸਙ੍ਕਮਾ’’ਤਿ. ਸੋ ਏਵਮਾਹ – ‘‘ਨਤ੍ਥਿ ਮਮ ਤੁਮ੍ਹਾਕਂ ਸਮਣਾਨਂ ਉਪਸਙ੍ਕਮਨਕਿਚ੍ਚਂ, ਸਮਣਾਨਂ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤਬ੍ਬਂ ਹੋਤਿ, ਓਨਮਿਤ੍ਵਾ ਵਨ੍ਦਨ੍ਤਸ੍ਸ ਪਿਟ੍ਠਿ ਰੁਜ੍ਜਤਿ, ਜਾਣੁਕਾਨਿ ਖਰਾਨਿ ਹੋਨ੍ਤਿ, ਭੂਮਿਯਂ ਨਿਸੀਦਿਤਬ੍ਬਂ ਹੋਤਿ, ਤਤ੍ਥ ਨਿਸਿਨ੍ਨਸ੍ਸ ਵਤ੍ਥਾਨਿ ਕਿਲਿਸ੍ਸਨ੍ਤਿ ਜੀਰਨ੍ਤਿ, ਸਮੀਪੇ ਨਿਸਿਨ੍ਨਕਾਲਤੋ ਪਟ੍ਠਾਯ ਕਥਾਸਲ੍ਲਾਪੋ ਹੋਤਿ, ਤਸ੍ਮਿਂ ਸਤਿ ਵਿਸ੍ਸਾਸੋ ਉਪ੍ਪਜ੍ਜਤਿ, ਤਤੋ ਨਿਮਨ੍ਤੇਤ੍ਵਾ ਚੀਵਰਪਿਣ੍ਡਪਾਤਾਦੀਨਿ ਦਾਤਬ੍ਬਾਨਿ ਹੋਨ੍ਤਿ. ਏਵਂ ਸਨ੍ਤੇ ਅਤ੍ਥੋ ਪਰਿਹਾਯਤਿ, ਨਤ੍ਥਿ ਮਯ੍ਹਂ ਤੁਮ੍ਹਾਕਂ ਸਮਣਾਨਂ ਉਪਸਙ੍ਕਮਨਕਿਚ੍ਚ’’ਨ੍ਤਿ. ਇਤਿ ਨਂ ਯਾਵਜੀਵਂ ਓਵਦਨ੍ਤਾਪਿ ਮਾਤਾਪਿਤਰੋ ਸਾਸਨੇ ਉਪਨੇਤੁਂ ਨਾਸਕ੍ਖਿਂਸੁ.

ਅਥਸ੍ਸ ਪਿਤਾ ਮਰਣਮਞ੍ਚੇ ਨਿਪਨ੍ਨੋ ‘‘ਮਮ ਪੁਤ੍ਤਸ੍ਸ ਓਵਾਦਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨ ਚਿਨ੍ਤੇਸਿ – ‘‘ਦਿਸਾ ਤਾਤ ਨਮਸ੍ਸਾਹੀ’’ਤਿ ਏਵਮਸ੍ਸ ਓਵਾਦਂ ਦਸ੍ਸਾਮਿ, ਸੋ ਅਤ੍ਥਂ ਅਜਾਨਨ੍ਤੋ ਦਿਸਾ ਨਮਸ੍ਸਿਸ੍ਸਤਿ, ਅਥ ਨਂ ਸਤ੍ਥਾ ਵਾ ਸਾਵਕਾ ਵਾ ਪਸ੍ਸਿਤ੍ਵਾ ‘‘ਕਿਂ ਕਰੋਸੀ’’ਤਿ ਪੁਚ੍ਛਿਸ੍ਸਨ੍ਤਿ. ਤਤੋ ‘‘ਮਯ੍ਹਂ ਪਿਤਾ ਦਿਸਾ ਨਮਸ੍ਸਨਂ ਕਰੋਹੀਤਿ ਮਂ ਓਵਦੀ’’ਤਿ ਵਕ੍ਖਤਿ. ਅਥਸ੍ਸ ਤੇ ‘‘ਨ ਤੁਯ੍ਹਂ ਪਿਤਾ ਏਤਾ ਦਿਸਾ ਨਮਸ੍ਸਾਪੇਤਿ, ਇਮਾ ਪਨ ਦਿਸਾ ਨਮਸ੍ਸਾਪੇਤੀ’’ਤਿ ਧਮ੍ਮਂ ਦੇਸੇਸ੍ਸਨ੍ਤਿ. ਸੋ ਬੁਦ੍ਧਸਾਸਨੇ ਗੁਣਂ ਞਤ੍ਵਾ ‘‘ਪੁਞ੍ਞਕਮ੍ਮਂ ਕਰਿਸ੍ਸਤੀ’’ਤਿ. ਅਥ ਨਂ ਆਮਨ੍ਤਾਪੇਤ੍ਵਾ ‘‘ਤਾਤ, ਪਾਤੋਵ ਉਟ੍ਠਾਯ ਛ ਦਿਸਾ ਨਮਸ੍ਸੇਯ੍ਯਾਸੀ’’ਤਿ ਆਹ. ਮਰਣਮਞ੍ਚੇ ਨਿਪਨ੍ਨਸ੍ਸ ਕਥਾ ਨਾਮ ਯਾਵਜੀਵਂ ਅਨੁਸ੍ਸਰਣੀਯਾ ਹੋਤਿ. ਤਸ੍ਮਾ ਸੋ ਗਹਪਤਿਪੁਤ੍ਤੋ ਤਂ ਪਿਤੁਵਚਨਂ ਅਨੁਸ੍ਸਰਨ੍ਤੋ ਤਥਾ ਅਕਾਸਿ. ਤਸ੍ਮਾ ‘‘ਕਾਲਸ੍ਸੇਵ ਉਟ੍ਠਾਯ ਰਾਜਗਹਾ ਨਿਕ੍ਖਮਿਤ੍ਵਾ’’ਤਿਆਦਿ ਵੁਤ੍ਤਂ.

੨੪੩. ਪੁਥੁਦਿਸਾਤਿ ਬਹੁਦਿਸਾ. ਇਦਾਨਿ ਤਾ ਦਸ੍ਸੇਨ੍ਤੋ ਪੁਰਤ੍ਥਿਮਂ ਦਿਸਨ੍ਤਿਆਦਿਮਾਹ. ਪਾਵਿਸੀਤਿ ਨ ਤਾਵ ਪਵਿਟ੍ਠੋ, ਪਵਿਸਿਸ੍ਸਾਮੀਤਿ ਨਿਕ੍ਖਨ੍ਤਤ੍ਤਾ ਪਨ ਅਨ੍ਤਰਾਮਗ੍ਗੇ ਵਤ੍ਤਮਾਨੋਪਿ ਏਵਂ ਵੁਚ੍ਚਤਿ. ਅਦ੍ਦਸਾ ਖੋ ਭਗਵਾਤਿ ਨ ਇਦਾਨੇਵ ਅਦ੍ਦਸ, ਪਚ੍ਚੂਸਸਮਯੇਪਿ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਏਤਂ ਦਿਸਾ ਨਮਸ੍ਸਮਾਨਂ ਦਿਸ੍ਵਾ ‘‘ਅਜ੍ਜ ਅਹਂ ਸਿਙ੍ਗਾਲਸ੍ਸ ਗਹਪਤਿਪੁਤ੍ਤਸ੍ਸ ਗਿਹਿਵਿਨਯਂ ਸਿਙ੍ਗਾਲਸੁਤ੍ਤਨ੍ਤਂ ਕਥੇਸ੍ਸਾਮਿ, ਮਹਾਜਨਸ੍ਸ ਸਾ ਕਥਾ ਸਫਲਾ ਭਵਿਸ੍ਸਤਿ, ਗਨ੍ਤਬ੍ਬਂ ਮਯਾ ਏਤ੍ਥਾ’’ਤਿ. ਤਸ੍ਮਾ ਪਾਤੋਵ ਨਿਕ੍ਖਮਿਤ੍ਵਾ ਰਾਜਗਹਂ ਪਿਣ੍ਡਾਯ ਪਾਵਿਸਿ, ਪਵਿਸਨ੍ਤੋ ਚ ਨਂ ਤਥੇਵ ਅਦ੍ਦਸ. ਤੇਨ ਵੁਤ੍ਤਂ – ‘‘ਅਦ੍ਦਸਾ ਖੋ ਭਗਵਾ’’ਤਿ. ਏਤਦਵੋਚਾਤਿ ਸੋ ਕਿਰ ਅਵਿਦੂਰੇ ਠਿਤਮ੍ਪਿ ਸਤ੍ਥਾਰਂ ਨ ਪਸ੍ਸਤਿ, ਦਿਸਾਯੇਵ ਨਮਸ੍ਸਤਿ. ਅਥਂ ਨਂ ਭਗਵਾ ਸੂਰਿਯਰਸ੍ਮਿਸਮ੍ਫਸ੍ਸੇਨ ਵਿਕਸਮਾਨਂ ਮਹਾਪਦੁਮਂ ਵਿਯ ਮੁਖਂ ਵਿਵਰਿਤ੍ਵਾ ‘‘ਕਿਂ ਨੁ ਖੋ ਤ੍ਵਂ, ਗਹਪਤਿਪੁਤ੍ਤਾ’’ਤਿਆਦਿਕਂ ਏਤਦਵੋਚ.

ਛਦਿਸਾਦਿਵਣ੍ਣਨਾ

੨੪੪. ਯਥਾ ਕਥਂ ਪਨ, ਭਨ੍ਤੇਤਿ ਸੋ ਕਿਰ ਤਂ ਭਗਵਤੋ ਵਚਨਂ ਸੁਤ੍ਵਾਵ ਚਿਨ੍ਤੇਸਿ ‘‘ਯਾ ਕਿਰ ਮਮ ਪਿਤਰਾ ਛ ਦਿਸਾ ਨਮਸ੍ਸਿਤਬ੍ਬਾ’’ਤਿ ਵੁਤ੍ਤਾ, ਨ ਕਿਰ ਤਾ ਏਤਾ, ਅਞ੍ਞਾ ਕਿਰ ਅਰਿਯਸਾਵਕੇਨ ਛ ਦਿਸਾ ਨਮਸ੍ਸਿਤਬ੍ਬਾ. ਹਨ੍ਦਾਹਂ ਅਰਿਯਸਾਵਕੇਨ ਨਮਸ੍ਸਿਤਬ੍ਬਾ ਦਿਸਾਯੇਵ ਪੁਚ੍ਛਿਤ੍ਵਾ ਨਮਸ੍ਸਾਮੀਤਿ. ਸੋ ਤਾ ਪੁਚ੍ਛਨ੍ਤੋ ਯਥਾ ਕਥਂ ਪਨ, ਭਨ੍ਤੇਤਿਆਦਿਮਾਹ. ਤਤ੍ਥ ਯਥਾਤਿ ਨਿਪਾਤਮਤ੍ਤਂ. ਕਥਂ ਪਨਾਤਿ ਇਦਮੇਵ ਪੁਚ੍ਛਾਪਦਂ. ਕਮ੍ਮਕਿਲੇਸਾਤਿ ਤੇਹਿ ਕਮ੍ਮੇਹਿ ਸਤ੍ਤਾ ਕਿਲਿਸ੍ਸਨ੍ਤਿ, ਤਸ੍ਮਾ ਕਮ੍ਮਕਿਲੇਸਾਤਿ ਵੁਚ੍ਚਨ੍ਤਿ. ਠਾਨੇਹੀਤਿ ਕਾਰਣੇਹਿ. ਅਪਾਯਮੁਖਾਨੀਤਿ ਵਿਨਾਸਮੁਖਾਨਿ. ਸੋਤਿ ਸੋ ਸੋਤਾਪਨ੍ਨੋ ਅਰਿਯਸਾਵਕੋ. ਚੁਦ੍ਦਸ ਪਾਪਕਾਪਗਤੋਤਿ ਏਤੇਹਿ ਚੁਦ੍ਦਸਹਿ ਪਾਪਕੇਹਿ ਲਾਮਕੇਹਿ ਅਪਗਤੋ. ਛਦ੍ਦਿਸਾਪਟਿਚ੍ਛਾਦੀਤਿ ਛ ਦਿਸਾ ਪਟਿਚ੍ਛਾਦੇਨ੍ਤੋ. ਉਭੋਲੋਕਵਿਜਯਾਯਾਤਿ ਉਭਿਨ੍ਨਂ ਇਧਲੋਕਪਰਲੋਕਾਨਂ ਵਿਜਿਨਨਤ੍ਥਾਯ. ਅਯਞ੍ਚੇਵ ਲੋਕੋ ਆਰਦ੍ਧੋ ਹੋਤੀਤਿ ਏਵਰੂਪਸ੍ਸ ਹਿ ਇਧ ਲੋਕੇ ਪਞ੍ਚ ਵੇਰਾਨਿ ਨ ਹੋਨ੍ਤਿ, ਤੇਨਸ੍ਸ ਅਯਞ੍ਚੇਵ ਲੋਕੋ ਆਰਦ੍ਧੋ ਹੋਤਿ ਪਰਿਤੋਸਿਤੋ ਚੇਵ ਨਿਪ੍ਫਾਦਿਤੋ ਚ. ਪਰਲੋਕੇਪਿ ਪਞ੍ਚ ਵੇਰਾਨਿ ਨ ਹੋਨ੍ਤਿ, ਤੇਨਸ੍ਸ ਪਰੋ ਚ ਲੋਕੋ ਆਰਾਧਿਤੋ ਹੋਤਿ. ਤਸ੍ਮਾ ਸੋ ਕਾਯਸ੍ਸ ਭੇਦਾ ਪਰਮ੍ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ.

੨੪੫. ਇਤਿ ਭਗਵਾ ਸਙ੍ਖੇਪੇਨ ਮਾਤਿਕਂ ਠਪੇਤ੍ਵਾ ਇਦਾਨਿ ਤਮੇਵ ਵਿਤ੍ਥਾਰੇਨ੍ਤੋ ਕਤਮਸ੍ਸ ਚਤ੍ਤਾਰੋ ਕਮ੍ਮਕਿਲੇਸਾਤਿਆਦਿਮਾਹ. ਕਮ੍ਮਕਿਲੇਸੋਤਿ ਕਮ੍ਮਞ੍ਚ ਤਂ ਕਿਲੇਸਸਮ੍ਪਯੁਤ੍ਤਤ੍ਤਾ ਕਿਲੇਸੋ ਚਾਤਿ ਕਮ੍ਮਕਿਲੇਸੋ. ਸਕਿਲੇਸੋਯੇਵ ਹਿ ਪਾਣਂ ਹਨਤਿ, ਨਿਕ੍ਕਿਲੇਸੋ ਨ ਹਨਤਿ, ਤਸ੍ਮਾ ਪਾਣਾਤਿਪਾਤੋ ‘‘ਕਮ੍ਮਕਿਲੇਸੋ’’ਤਿ ਵੁਤ੍ਤੋ. ਅਦਿਨ੍ਨਾਦਾਨਾਦੀਸੁਪਿ ਏਸੇਵ ਨਯੋ. ਅਥਾਪਰਨ੍ਤਿ ਅਪਰਮ੍ਪਿ ਏਤਦਤ੍ਥਪਰਿਦੀਪਕਮੇਵ ਗਾਥਾਬਨ੍ਧਂ ਅਵੋਚਾਤਿ ਅਤ੍ਥੋ.

ਚਤੁਠਾਨਾਦਿਵਣ੍ਣਨਾ

੨੪੬. ਪਾਪਕਮ੍ਮਂ ਕਰੋਤੀਤਿ ਇਦਂ ਭਗਵਾ ਯਸ੍ਮਾ ਕਾਰਕੇ ਦਸ੍ਸਿਤੇ ਅਕਾਰਕੋ ਪਾਕਟੋ ਹੋਤਿ, ਤਸ੍ਮਾ ‘‘ਪਾਪਕਮ੍ਮਂ ਨ ਕਰੋਤੀ’’ਤਿ ਮਾਤਿਕਂ ਠਪੇਤ੍ਵਾਪਿ ਦੇਸਨਾਕੁਸਲਤਾਯ ਪਠਮਤਰਂ ਕਾਰਕਂ ਦਸ੍ਸੇਨ੍ਤੋ ਆਹ. ਤਤ੍ਥ ਛਨ੍ਦਾਗਤਿਂ ਗਚ੍ਛਨ੍ਤੋਤਿ ਛਨ੍ਦੇਨ ਪੇਮੇਨ ਅਗਤਿਂ ਗਚ੍ਛਨ੍ਤੋ ਅਕਤ੍ਤਬ੍ਬਂ ਕਰੋਨ੍ਤੋ. ਪਰਪਦੇਸੁਪਿ ਏਸੇਵ ਨਯੋ. ਤਤ੍ਥ ਯੋ ‘‘ਅਯਂ ਮੇ ਮਿਤ੍ਤੋ ਵਾ ਸਮ੍ਭਤ੍ਤੋ ਵਾ ਸਨ੍ਦਿਟ੍ਠੋ ਵਾ ਞਾਤਕੋ ਵਾ ਲਞ੍ਜਂ ਵਾ ਪਨ ਮੇ ਦੇਤੀ’’ਤਿ ਛਨ੍ਦਵਸੇਨ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਛਨ੍ਦਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ‘‘ਅਯਂ ਮੇ ਵੇਰੀ’’ਤਿ ਪਕਤਿਵੇਰਵਸੇਨ ਤਙ੍ਖਣੁਪ੍ਪਨ੍ਨਕੋਧਵਸੇਨ ਵਾ ਸਾਮਿਕਂ ਅਸ੍ਸਾਮਿਕਂ ਕਰੋਤਿ, ਅਯਂ ਦੋਸਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ਮਨ੍ਦਤ੍ਤਾ ਮੋਮੂਹਤ੍ਤਾ ਯਂ ਵਾ ਤਂ ਵਾ ਵਤ੍ਵਾ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਮੋਹਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ‘‘ਅਯਂ ਰਾਜਵਲ੍ਲਭੋ ਵਾ ਵਿਸਮਨਿਸ੍ਸਿਤੋ ਵਾ ਅਨਤ੍ਥਮ੍ਪਿ ਮੇ ਕਰੇਯ੍ਯਾ’’ਤਿ ਭੀਤੋ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਭਯਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ਯਂਕਿਞ੍ਚਿ ਭਾਜੇਨ੍ਤੋ ‘‘ਅਯਂ ਮੇ ਸਨ੍ਦਿਟ੍ਠੋ ਵਾ ਸਮ੍ਭਤ੍ਤੋ ਵਾ’’ਤਿ ਪੇਮਵਸੇਨ ਅਤਿਰੇਕਂ ਦੇਤਿ, ‘‘ਅਯਂ ਮੇ ਵੇਰੀ’’ਤਿ ਦੋਸਵਸੇਨ ਊਨਕਂ ਦੇਤਿ, ਮੋਮੂਹਤ੍ਤਾ ਦਿਨ੍ਨਾਦਿਨ੍ਨਂ ਅਜਾਨਮਾਨੋ ਕਸ੍ਸਚਿ ਊਨਂ ਕਸ੍ਸਚਿ ਅਧਿਕਂ ਦੇਤਿ, ‘‘ਅਯਂ ਇਮਸ੍ਮਿਂ ਅਦਿਯ੍ਯਮਾਨੇ ਮਯ੍ਹਂ ਅਨਤ੍ਥਮ੍ਪਿ ਕਰੇਯ੍ਯਾ’’ਤਿ ਭੀਤੋ ਕਸ੍ਸਚਿ ਅਤਿਰੇਕਂ ਦੇਤਿ, ਸੋ ਚਤੁਬ੍ਬਿਧੋਪਿ ਯਥਾਨੁਕ੍ਕਮੇਨ ਛਨ੍ਦਾਗਤਿਆਦੀਨਿ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ.

ਅਰਿਯਸਾਵਕੋ ਪਨ ਜੀਵਿਤਕ੍ਖਯਂ ਪਾਪੁਣਨ੍ਤੋਪਿ ਛਨ੍ਦਾਗਤਿਆਦੀਨਿ ਨ ਗਚ੍ਛਤਿ. ਤੇਨ ਵੁਤ੍ਤਂ – ‘‘ਇਮੇਹਿ ਚਤੂਹਿ ਠਾਨੇਹਿ ਪਾਪਕਮ੍ਮਂ ਨ ਕਰੋਤੀ’’ਤਿ.

ਨਿਹੀਯਤਿ ਯਸੋ ਤਸ੍ਸਾਤਿ ਤਸ੍ਸ ਅਗਤਿਗਾਮਿਨੋ ਕਿਤ੍ਤਿਯਸੋਪਿ ਪਰਿਵਾਰਯਸੋਪਿ ਨਿਹੀਯਤਿ ਪਰਿਹਾਯਤਿ.

ਛਅਪਾਯਮੁਖਾਦਿਵਣ੍ਣਨਾ

੨੪੭. ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾਨੁਯੋਗੋਤਿ ਏਤ੍ਥ ਸੁਰਾਤਿ ਪਿਟ੍ਠਸੁਰਾ ਪੂਵਸੁਰਾ ਓਦਨਸੁਰਾ ਕਿਣ੍ਣਪਕ੍ਖਿਤ੍ਤਾ ਸਮ੍ਭਾਰਸਂਯੁਤ੍ਤਾਤਿ ਪਞ੍ਚ ਸੁਰਾ. ਮੇਰਯਨ੍ਤਿ ਪੁਪ੍ਫਾਸਵੋ ਫਲਾਸਵੋ ਮਧ੍ਵਾਸਵੋ ਗੁਲ਼ਾਸਵੋ ਸਮ੍ਭਾਰਸਂਯੁਤ੍ਤੋਤਿ ਪਞ੍ਚ ਆਸਵਾ. ਤਂ ਸਬ੍ਬਮ੍ਪਿ ਮਦਕਰਣਵਸੇਨ ਮਜ੍ਜਂ. ਪਮਾਦਟ੍ਠਾਨਨ੍ਤਿ ਪਮਾਦਕਾਰਣਂ. ਯਾਯ ਚੇਤਨਾਯ ਤਂ ਮਜ੍ਜਂ ਪਿਵਤਿ, ਤਸ੍ਸ ਏਤਂ ਅਧਿਵਚਨਂ. ਅਨੁਯੋਗੋਤਿ ਤਸ੍ਸ ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਸ੍ਸ ਅਨੁਅਨੁਯੋਗੋ ਪੁਨਪ੍ਪੁਨਂ ਕਰਣਂ. ਯਸ੍ਮਾ ਪਨੇਤਂ ਅਨੁਯੁਤ੍ਤਸ੍ਸ ਉਪ੍ਪਨ੍ਨਾ ਚੇਵ ਭੋਗਾ ਪਰਿਹਾਯਨ੍ਤਿ, ਅਨੁਪ੍ਪਨ੍ਨਾ ਚ ਨੁਪ੍ਪਜ੍ਜਨ੍ਤਿ, ਤਸ੍ਮਾ ‘‘ਭੋਗਾਨਂ ਅਪਾਯਮੁਖ’’ਨ੍ਤਿ ਵੁਤ੍ਤਂ. ਵਿਕਾਲਵਿਸਿਖਾਚਰਿਯਾਨੁਯੋਗੋਤਿ ਅਵੇਲਾਯ ਵਿਸਿਖਾਸੁ ਚਰਿਯਾਨੁਯੁਤ੍ਤਤਾ.

ਸਮਜ੍ਜਾਭਿਚਰਣਨ੍ਤਿ ਨਚ੍ਚਾਦਿਦਸ੍ਸਨਵਸੇਨ ਸਮਜ੍ਜਾਗਮਨਂ. ਆਲਸ੍ਯਾਨੁਯੋਗੋਤਿ ਕਾਯਾਲਸਿਯਤਾਯ ਯੁਤ੍ਤਪ੍ਪਯੁਤ੍ਤਤਾ.

ਸੁਰਾਮੇਰਯਸ੍ਸ ਛਆਦੀਨਵਾਦਿਵਣ੍ਣਨਾ

੨੪੮. ਏਵਂ ਛਨ੍ਨਂ ਅਪਾਯਮੁਖਾਨਂ ਮਾਤਿਕਂ ਠਪੇਤ੍ਵਾ ਇਦਾਨਿ ਤਾਨਿ ਵਿਭਜਨ੍ਤੋ ਛ ਖੋ ਮੇ, ਗਹਪਤਿਪੁਤ੍ਤ ਆਦੀਨਵਾਤਿਆਦਿਮਾਹ. ਤਤ੍ਥ ਸਨ੍ਦਿਟ੍ਠਿਕਾਤਿ ਸਾਮਂ ਪਸ੍ਸਿਤਬ੍ਬਾ, ਇਧਲੋਕਭਾਵਿਨੀ. ਧਨਜਾਨੀਤਿ ਧਨਹਾਨਿ. ਕਲਹਪ੍ਪਵਡ੍ਢਨੀਤਿ ਵਾਚਾਕਲਹਸ੍ਸ ਚੇਵ ਹਤ੍ਥਪਰਾਮਾਸਾਦਿਕਾਯਕਲਹਸ੍ਸ ਚ ਵਡ੍ਢਨੀ. ਰੋਗਾਨਂ ਆਯਤਨਨ੍ਤਿ ਤੇਸਂ ਤੇਸਂ ਅਕ੍ਖਿਰੋਗਾਦੀਨਂ ਖੇਤ੍ਤਂ. ਅਕਿਤ੍ਤਿਸਞ੍ਜਨਨੀਤਿ ਸੁਰਂ ਪਿਵਿਤ੍ਵਾ ਹਿ ਮਾਤਰਮ੍ਪਿ ਪਹਰਨ੍ਤਿ ਪਿਤਰਮ੍ਪਿ, ਅਞ੍ਞਂ ਬਹੁਮ੍ਪਿ ਅਵਤ੍ਤਬ੍ਬਂ ਵਦਨ੍ਤਿ, ਅਕਤ੍ਤਬ੍ਬਂ ਕਰੋਨ੍ਤਿ. ਤੇਨ ਗਰਹਮ੍ਪਿ ਦਣ੍ਡਮ੍ਪਿ ਹਤ੍ਥਪਾਦਾਦਿਛੇਦਮ੍ਪਿ ਪਾਪੁਣਨ੍ਤਿ, ਇਧਲੋਕੇਪਿ ਪਰਲੋਕੇਪਿ ਅਕਿਤ੍ਤਿਂ ਪਾਪੁਣਨ੍ਤਿ, ਇਤਿ ਤੇਸਂ ਸਾ ਸੁਰਾ ਅਕਿਤ੍ਤਿਸਞ੍ਜਨਨੀ ਨਾਮ ਹੋਤਿ. ਕੋਪੀਨਨਿਦਂਸਨੀਤਿ ਗੁਯ੍ਹਟ੍ਠਾਨਞ੍ਹਿ ਵਿਵਰਿਯਮਾਨਂ ਹਿਰਿਂ ਕੋਪੇਤਿ ਵਿਨਾਸੇਤਿ, ਤਸ੍ਮਾ ‘‘ਕੋਪੀਨ’’ਨ੍ਤਿ ਵੁਚ੍ਚਤਿ, ਸੁਰਾਮਦਮਤ੍ਤਾ ਚ ਤਂ ਤਂ ਅਙ੍ਗਂ ਵਿਵਰਿਤ੍ਵਾ ਵਿਚਰਨ੍ਤਿ, ਤੇਨ ਨੇਸਂ ਸਾ ਸੁਰਾ ਕੋਪੀਨਸ੍ਸ ਨਿਦਂਸਨਤੋ ‘‘ਕੋਪੀਨਨਿਦਂਸਨੀ’’ਤਿ ਵੁਚ੍ਚਤਿ. ਪਞ੍ਞਾਯ ਦੁਬ੍ਬਲਿਕਰਣੀਤਿ ਸਾਗਤਤ੍ਥੇਰਸ੍ਸ ਵਿਯ ਕਮ੍ਮਸ੍ਸਕਤਪਞ੍ਞਂ ਦੁਬ੍ਬਲਂ ਕਰੋਤਿ, ਤਸ੍ਮਾ ‘‘ਪਞ੍ਞਾਯ ਦੁਬ੍ਬਲਿਕਰਣੀ’’ਤਿ ਵੁਚ੍ਚਤਿ. ਮਗ੍ਗਪਞ੍ਞਂ ਪਨ ਦੁਬ੍ਬਲਂ ਕਾਤੁਂ ਨ ਸਕ੍ਕੋਤਿ. ਅਧਿਗਤਮਗ੍ਗਾਨਞ੍ਹਿ ਸਾ ਅਨ੍ਤੋਮੁਖਮੇਵ ਨ ਪਵਿਸਤਿ. ਛਟ੍ਠਂ ਪਦਨ੍ਤਿ ਛਟ੍ਠਂ ਕਾਰਣਂ.

੨੪੯. ਅਤ੍ਤਾਪਿਸ੍ਸ ਅਗੁਤ੍ਤੋ ਅਰਕ੍ਖਿਤੋ ਹੋਤੀਤਿ ਅਵੇਲਾਯ ਚਰਨ੍ਤੋ ਹਿ ਖਾਣੁਕਣ੍ਟਕਾਦੀਨਿਪਿ ਅਕ੍ਕਮਤਿ, ਅਹਿਨਾਪਿ ਯਕ੍ਖਾਦੀਹਿਪਿ ਸਮਾਗਚ੍ਛਤਿ, ਤਂ ਤਂ ਠਾਨਂ ਗਚ੍ਛਤੀਤਿ ਞਤ੍ਵਾ ਵੇਰਿਨੋਪਿ ਨਂ ਨਿਲੀਯਿਤ੍ਵਾ ਗਣ੍ਹਨ੍ਤਿ ਵਾ ਹਨਨ੍ਤਿ ਵਾ. ਏਵਂ ਅਤ੍ਤਾਪਿਸ੍ਸ ਅਗੁਤ੍ਤੋ ਹੋਤਿ ਅਰਕ੍ਖਿਤੋ. ਪੁਤ੍ਤਦਾਰਾਪਿ ‘‘ਅਮ੍ਹਾਕਂ ਪਿਤਾ ਅਮ੍ਹਾਕਂ ਸਾਮਿ ਰਤ੍ਤਿਂ ਵਿਚਰਤਿ, ਕਿਮਙ੍ਗਂ ਪਨ ਮਯ’’ਨ੍ਤਿ ਇਤਿਸ੍ਸ ਪੁਤ੍ਤਧੀਤਰੋਪਿ ਭਰਿਯਾਪਿ ਬਹਿ ਪਤ੍ਥਨਂ ਕਤ੍ਵਾ ਰਤ੍ਤਿਂ ਚਰਨ੍ਤਾ ਅਨਯਬ੍ਯਸਨਂ ਪਾਪੁਣਨ੍ਤਿ. ਏਵਂ ਪੁਤ੍ਤਦਾਰੋਪਿਸ੍ਸ ਅਗੁਤ੍ਤੋ ਅਰਕ੍ਖਿਤੋ ਹੋਤਿ. ਸਾਪਤੇਯ੍ਯਨ੍ਤਿ ਤਸ੍ਸ ਪੁਤ੍ਤਦਾਰਪਰਿਜਨਸ੍ਸ ਰਤ੍ਤਿਂ ਚਰਣਕਭਾਵਂ ਞਤ੍ਵਾ ਚੋਰਾ ਸੁਞ੍ਞਂ ਗੇਹਂ ਪਵਿਸਿਤ੍ਵਾ ਯਂ ਇਚ੍ਛਨ੍ਤਿ, ਤਂ ਹਰਨ੍ਤਿ. ਏਵਂ ਸਾਪਤੇਯ੍ਯਮ੍ਪਿਸ੍ਸ ਅਗੁਤ੍ਤਂ ਅਰਕ੍ਖਿਤਂ ਹੋਤਿ. ਸਙ੍ਕਿਯੋ ਚ ਹੋਤੀਤਿ ਅਞ੍ਞੇਹਿ ਕਤਪਾਪਕਮ੍ਮੇਸੁਪਿ ‘‘ਇਮਿਨਾ ਕਤਂ ਭਵਿਸ੍ਸਤੀ’’ਤਿ ਸਙ੍ਕਿਤਬ੍ਬੋ ਹੋਤਿ. ਯਸ੍ਸ ਯਸ੍ਸ ਘਰਦ੍ਵਾਰੇਨ ਯਾਤਿ, ਤਤ੍ਥ ਯਂ ਅਞ੍ਞੇਨ ਚੋਰਕਮ੍ਮਂ ਪਰਦਾਰਿਕਕਮ੍ਮਂ ਵਾ ਕਤਂ, ਤਂ ‘‘ਇਮਿਨਾ ਕਤ’’ਨ੍ਤਿ ਵੁਤ੍ਤੇ ਅਭੂਤਂ ਅਸਨ੍ਤਮ੍ਪਿ ਤਸ੍ਮਿਂ ਰੂਹਤਿ ਪਤਿਟ੍ਠਾਤਿ. ਬਹੂਨਞ੍ਚ ਦੁਕ੍ਖਧਮ੍ਮਾਨਨ੍ਤਿ ਏਤ੍ਤਕਂ ਦੁਕ੍ਖਂ, ਏਤ੍ਤਕਂ ਦੋਮਨਸ੍ਸਨ੍ਤਿ ਵਤ੍ਤੁਂ ਨ ਸਕ੍ਕਾ, ਅਞ੍ਞਸ੍ਮਿਂ ਪੁਗ੍ਗਲੇ ਅਸਤਿ ਸਬ੍ਬਂ ਵਿਕਾਲਚਾਰਿਮ੍ਹਿ ਆਹਰਿਤਬ੍ਬਂ ਹੋਤਿ, ਇਤਿ ਸੋ ਬਹੂਨਂ ਦੁਕ੍ਖਧਮ੍ਮਾਨਂ ਪੁਰਕ੍ਖਤੋ ਪੁਰੇਗਾਮੀ ਹੋਤਿ.

੨੫੦. ਕ੍ਵ ਨਚ੍ਚਨ੍ਤਿ ‘‘ਕਸ੍ਮਿਂ ਠਾਨੇ ਨਟਨਾਟਕਾਦਿਨਚ੍ਚਂ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ਯਸ੍ਮਿਂ ਗਾਮੇ ਵਾ ਨਿਗਮੇ ਵਾ ਤਂ ਅਤ੍ਥਿ, ਤਤ੍ਥ ਗਨ੍ਤਬ੍ਬਂ ਹੋਤਿ, ਤਸ੍ਸ ‘‘ਸ੍ਵੇ ਨਚ੍ਚਦਸ੍ਸਨਂ ਗਮਿਸ੍ਸਾਮੀ’’ਤਿ ਅਜ੍ਜ ਵਤ੍ਥਗਨ੍ਧਮਾਲਾਦੀਨਿ ਪਟਿਯਾਦੇਨ੍ਤਸ੍ਸੇਵ ਸਕਲਦਿਵਸਮ੍ਪਿ ਕਮ੍ਮਚ੍ਛੇਦੋ ਹੋਤਿ, ਨਚ੍ਚਦਸ੍ਸਨੇਨ ਏਕਾਹਮ੍ਪਿ ਦ੍ਵੀਹਮ੍ਪਿ ਤੀਹਮ੍ਪਿ ਤਤ੍ਥੇਵ ਹੋਤਿ, ਅਥ ਵੁਟ੍ਠਿਸਮ੍ਪਤ੍ਤਿਯਾਦੀਨਿ ਲਭਿਤ੍ਵਾਪਿ ਵਪ੍ਪਾਦਿਕਾਲੇ ਵਪ੍ਪਾਦੀਨਿ ਅਕਰੋਨ੍ਤਸ੍ਸ ਅਨੁਪ੍ਪਨ੍ਨਾ ਭੋਗਾ ਨੁਪ੍ਪਜ੍ਜਨ੍ਤਿ, ਤਸ੍ਸ ਬਹਿ ਗਤਭਾਵਂ ਞਤ੍ਵਾ ਅਨਾਰਕ੍ਖੇ ਗੇਹੇ ਚੋਰਾ ਯਂ ਇਚ੍ਛਨ੍ਤਿ, ਤਂ ਕਰੋਨ੍ਤਿ, ਤੇਨਸ੍ਸ ਉਪ੍ਪਨ੍ਨਾਪਿ ਭੋਗਾ ਵਿਨਸ੍ਸਨ੍ਤਿ. ਕ੍ਵ ਗੀਤਨ੍ਤਿਆਦੀਸੁਪਿ ਏਸੇਵ ਨਯੋ. ਤੇਸਂ ਨਾਨਾਕਰਣਂ ਬ੍ਰਹ੍ਮਜਾਲੇ ਵੁਤ੍ਤਮੇਵ.

੨੫੧. ਜਯਂ ਵੇਰਨ੍ਤਿ ‘‘ਜਿਤਂ ਮਯਾ’’ਤਿ ਪਰਿਸਮਜ੍ਝੇ ਪਰਸ੍ਸ ਸਾਟਕਂ ਵਾ ਵੇਠਨਂ ਵਾ ਗਣ੍ਹਾਤਿ, ਸੋ ‘‘ਪਰਿਸਮਜ੍ਝੇ ਮੇ ਅਵਮਾਨਂ ਕਰੋਸਿ, ਹੋਤੁ, ਸਿਕ੍ਖਾਪੇਸ੍ਸਾਮਿ ਨ’’ਨ੍ਤਿ ਤਤ੍ਥ ਵੇਰਂ ਬਨ੍ਧਤਿ, ਏਵਂ ਜਿਨਨ੍ਤੋ ਸਯਂ ਵੇਰਂ ਪਸਵਤਿ. ਜਿਨੋਤਿ ਅਞ੍ਞੇਨ ਜਿਤੋ ਸਮਾਨੋ ਯਂ ਤੇਨ ਤਸ੍ਸ ਵੇਠਨਂ ਵਾ ਸਾਟਕੋ ਵਾ ਅਞ੍ਞਂ ਵਾ ਪਨ ਹਿਰਞ੍ਞਸੁਵਣ੍ਣਾਦਿਵਿਤ੍ਤਂ ਗਹਿਤਂ, ਤਂ ਅਨੁਸੋਚਤਿ ‘‘ਅਹੋਸਿ ਵਤ ਮੇ, ਤਂ ਤਂ ਵਤ ਮੇ ਨਤ੍ਥੀ’’ਤਿ ਤਪ੍ਪਚ੍ਚਯਾ ਸੋਚਤਿ. ਏਵਂ ਸੋ ਜਿਨੋ ਵਿਤ੍ਤਂ ਅਨੁਸੋਚਤਿ. ਸਭਾਗਤਸ੍ਸ ਵਚਨਂ ਨ ਰੂਹਤੀਤਿ ਵਿਨਿਚ੍ਛਯਟ੍ਠਾਨੇ ਸਕ੍ਖਿਪੁਟ੍ਠਸ੍ਸ ਸਤੋ ਵਚਨਂ ਨ ਰੂਹਤਿ, ਨ ਪਤਿਟ੍ਠਾਤਿ, ‘‘ਅਯਂ ਅਕ੍ਖਸੋਣ੍ਡੋ ਜੂਤਕਰੋ, ਮਾ ਤਸ੍ਸ ਵਚਨਂ ਗਣ੍ਹਿਤ੍ਥਾ’’ਤਿ ਵਤ੍ਤਾਰੋ ਭਵਨ੍ਤਿ. ਮਿਤ੍ਤਾਮਚ੍ਚਾਨਂ ਪਰਿਭੂਤੋ ਹੋਤੀਤਿ ਤਞ੍ਹਿ ਮਿਤਾਮਚ੍ਚਾ ਏਵਂ ਵਦਨ੍ਤਿ – ‘‘ਸਮ੍ਮ, ਤ੍ਵਮ੍ਪਿ ਨਾਮ ਕੁਲਪੁਤ੍ਤੋ ਜੂਤਕਰੋ ਛਿਨ੍ਨਭਿਨ੍ਨਕੋ ਹੁਤ੍ਵਾ ਵਿਚਰਸਿ, ਨ ਤੇ ਇਦਂ ਜਾਤਿਗੋਤ੍ਤਾਨਂ ਅਨੁਰੂਪਂ, ਇਤੋ ਪਟ੍ਠਾਯ ਮਾ ਏਵਂ ਕਰੇਯ੍ਯਾਸੀ’’ਤਿ. ਸੋ ਏਵਂ ਵੁਤ੍ਤੋਪਿ ਤੇਸਂ ਵਚਨਂ ਨ ਕਰੋਤਿ. ਤਤੋ ਤੇਨ ਸਦ੍ਧਿਂ ਏਕਤੋ ਨ ਤਿਟ੍ਠਨ੍ਤਿ ਨ ਨਿਸੀਦਨ੍ਤਿ. ਤਸ੍ਸ ਕਾਰਣਾ ਸਕ੍ਖਿਪੁਟ੍ਠਾਪਿ ਨ ਕਥੇਨ੍ਤਿ. ਏਵਂ ਮਿਤ੍ਤਾਮਚ੍ਚਾਨਂ ਪਰਿਭੂਤੋ ਹੋਤਿ.

ਆਵਾਹਵਿਵਾਹਕਾਨਨ੍ਤਿ ਆਵਾਹਕਾ ਨਾਮ ਯੇ ਤਸ੍ਸ ਘਰਤੋ ਦਾਰਿਕਂ ਗਹੇਤੁਕਾਮਾ. ਵਿਵਾਹਕਾ ਨਾਮ ਯੇ ਤਸ੍ਸ ਗੇਹੇ ਦਾਰਿਕਂ ਦਾਤੁਕਾਮਾ. ਅਪਤ੍ਥਿਤੋ ਹੋਤੀਤਿ ਅਨਿਚ੍ਛਿਤੋ ਹੋਤਿ. ਨਾਲਂ ਦਾਰਭਰਣਾਯਾਤਿ ਦਾਰਭਰਣਾਯ ਨ ਸਮਤ੍ਥੋ. ਏਤਸ੍ਸ ਗੇਹੇ ਦਾਰਿਕਾ ਦਿਨ੍ਨਾਪਿ ਏਤਸ੍ਸ ਗੇਹਤੋ ਆਗਤਾਪਿ ਅਮ੍ਹੇਹਿ ਏਵ ਪੋਸਿਤਬ੍ਬਾ ਭਵਿਸ੍ਸਤਿਯੇਵ.

ਪਾਪਮਿਤ੍ਤਤਾਯ ਛਆਦੀਨਵਾਦਿਵਣ੍ਣਨਾ

੨੫੨. ਧੁਤ੍ਤਾਤਿ ਅਕ੍ਖਧੁਤ੍ਤਾ. ਸੋਣ੍ਡਾਤਿ ਇਤ੍ਥਿਸੋਣ੍ਡਾ ਭਤ੍ਤਸੋਣ੍ਡਾ ਪੂਵਸੋਣ੍ਡਾ ਮੂਲਕਸੋਣ੍ਡਾ. ਪਿਪਾਸਾਤਿ ਪਾਨਸੋਣ੍ਡਾ. ਨੇਕਤਿਕਾਤਿ ਪਤਿਰੂਪਕੇਨ ਵਞ੍ਚਨਕਾ. ਵਞ੍ਚਨਿਕਾਤਿ ਸਮ੍ਮੁਖਾਵਞ੍ਚਨਾਹਿ ਵਞ੍ਚਨਿਕਾ. ਸਾਹਸਿਕਾਤਿ ਏਕਾਗਾਰਿਕਾਦਿਸਾਹਸਿਕਕਮ੍ਮਕਾਰਿਨੋ. ਤ੍ਯਾਸ੍ਸ ਮਿਤ੍ਤਾ ਹੋਨ੍ਤੀਤਿ ਤੇ ਅਸ੍ਸ ਮਿਤ੍ਤਾ ਹੋਨ੍ਤਿ. ਅਞ੍ਞੇਹਿ ਸਪ੍ਪੁਰਿਸੇਹਿ ਸਦ੍ਧਿਂ ਨ ਰਮਤਿ ਗਨ੍ਧਮਾਲਾਦੀਹਿ ਅਲਙ੍ਕਰਿਤ੍ਵਾ ਵਰਸਯਨਂ ਆਰੋਪਿਤਸੂਕਰੋ ਗੂਥਕੂਪਮਿਵ, ਤੇ ਪਾਪਮਿਤ੍ਤੇਯੇਵ ਉਪਸਙ੍ਕਮਤਿ. ਤਸ੍ਮਾ ਦਿਟ੍ਠੇ ਚੇਵ ਧਮ੍ਮੇ ਸਮ੍ਪਰਾਯਞ੍ਚ ਬਹੁਂ ਅਨਤ੍ਥਂ ਨਿਗਚ੍ਛਤਿ.

੨੫੩. ਅਤਿਸੀਤਨ੍ਤਿ ਕਮ੍ਮਂ ਨ ਕਰੋਤੀਤਿ ਮਨੁਸ੍ਸੇਹਿ ਕਾਲਸ੍ਸੇਵ ਵੁਟ੍ਠਾਯ ‘‘ਏਥ ਭੋ ਕਮ੍ਮਨ੍ਤਂ ਗਚ੍ਛਾਮਾ’’ਤਿ ਵੁਤ੍ਤੋ ‘‘ਅਤਿਸੀਤਂ ਤਾਵ, ਅਟ੍ਠੀਨਿ ਭਿਜ੍ਜਨ੍ਤਿ ਵਿਯ, ਗਚ੍ਛਥ ਤੁਮ੍ਹੇ ਪਚ੍ਛਾ ਜਾਨਿਸ੍ਸਾਮੀ’’ਤਿ ਅਗ੍ਗਿਂ ਤਪਨ੍ਤੋ ਨਿਸੀਦਤਿ. ਤੇ ਗਨ੍ਤ੍ਵਾ ਕਮ੍ਮਂ ਕਰੋਨ੍ਤਿ. ਇਤਰਸ੍ਸ ਕਮ੍ਮਂ ਪਰਿਹਾਯਤਿ. ਅਤਿਉਣ੍ਹਨ੍ਤਿਆਦੀਸੁਪਿ ਏਸੇਵ ਨਯੋ.

ਹੋਤਿ ਪਾਨਸਖਾ ਨਾਮਾਤਿ ਏਕਚ੍ਚੋ ਪਾਨਟ੍ਠਾਨੇ ਸੁਰਾਗੇਹੇਯੇਵ ਸਹਾਯੋ ਹੋਤਿ. ‘‘ਪਨ੍ਨਸਖਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਸਮ੍ਮਿਯਸਮ੍ਮਿਯੋਤਿ ਸਮ੍ਮ ਸਮ੍ਮਾਤਿ ਵਦਨ੍ਤੋ ਸਮ੍ਮੁਖੇਯੇਵ ਸਹਾਯੋ ਹੋਤਿ, ਪਰਮ੍ਮੁਖੇ ਵੇਰੀਸਦਿਸੋ ਓਤਾਰਮੇਵ ਗਵੇਸਤਿ. ਅਤ੍ਥੇਸੁ ਜਾਤੇਸੂਤਿ ਤਥਾਰੂਪੇਸੁ ਕਿਚ੍ਚੇਸੁ ਸਮੁਪ੍ਪਨ੍ਨੇਸੁ. ਵੇਰਪ੍ਪਸਵੋਤਿ ਵੇਰਬਹੁਲਤਾ. ਅਨਤ੍ਥਤਾਤਿ ਅਨਤ੍ਥਕਾਰਿਤਾ. ਸੁਕਦਰਿਯਤਾਤਿ ਸੁਟ੍ਠੁ ਕਦਰਿਯਤਾ ਥਦ੍ਧਮਚ੍ਛਰਿਯਭਾਵੋ. ਉਦਕਮਿਵ ਇਣਂ ਵਿਗਾਹਤੀਤਿ ਪਾਸਾਣੋ ਉਦਕਂ ਵਿਯ ਸਂਸੀਦਨ੍ਤੋ ਇਣਂ ਵਿਗਾਹਤਿ.

ਰਤ੍ਤਿਨੁਟ੍ਠਾਨਦੇਸ੍ਸਿਨਾਤਿ ਰਤ੍ਤਿਂ ਅਨੁਟ੍ਠਾਨਸੀਲੇਨ. ਅਤਿਸਾਯਮਿਦਂ ਅਹੂਤਿ ਇਦਂ ਅਤਿਸਾਯਂ ਜਾਤਨ੍ਤਿ ਯੇ ਏਵਂ ਵਤ੍ਵਾ ਕਮ੍ਮਂ ਨ ਕਰੋਨ੍ਤਿ. ਇਤਿ ਵਿਸ੍ਸਟ੍ਠਕਮ੍ਮਨ੍ਤੇਤਿ ਏਵਂ ਵਤ੍ਵਾ ਪਰਿਚ੍ਚਤ੍ਤਕਮ੍ਮਨ੍ਤੇ. ਅਤ੍ਥਾ ਅਚ੍ਚੇਨ੍ਤਿ ਮਾਣਵੇਤਿ ਏਵਰੂਪੇ ਪੁਗ੍ਗਲੇ ਅਤ੍ਥਾ ਅਤਿਕ੍ਕਮਨ੍ਤਿ, ਤੇਸੁ ਨ ਤਿਟ੍ਠਨ੍ਤਿ.

ਤਿਣਾ ਭਿਯ੍ਯੋਤਿ ਤਿਣਤੋਪਿ ਉਤ੍ਤਰਿ. ਸੋ ਸੁਖਂ ਨ ਵਿਹਾਯਤੀਤਿ ਸੋ ਪੁਰਿਸੋ ਸੁਖਂ ਨ ਜਹਾਤਿ, ਸੁਖਸਮਙ੍ਗੀਯੇਵ ਹੋਤਿ. ਇਮਿਨਾ ਕਥਾਮਗ੍ਗੇਨ ਇਮਮਤ੍ਥਂ ਦਸ੍ਸੇਤਿ ‘‘ਗਿਹਿਭੂਤੇਨ ਸਤਾ ਏਤ੍ਤਕਂ ਕਮ੍ਮਂ ਨ ਕਾਤਬ੍ਬਂ, ਕਰੋਨ੍ਤਸ੍ਸ ਵਡ੍ਢਿ ਨਾਮ ਨਤ੍ਥਿ. ਇਧਲੋਕੇ ਪਰਲੋਕੇ ਗਰਹਮੇਵ ਪਾਪੁਣਾਤੀ’’ਤਿ.

ਮਿਤ੍ਤਪਤਿਰੂਪਕਾਦਿਵਣ੍ਣਨਾ

੨੫੪. ਇਦਾਨਿ ਯੋ ਏਵਂ ਕਰੋਤੋ ਅਨਤ੍ਥੋ ਉਪ੍ਪਜ੍ਜਤਿ, ਅਞ੍ਞਾਨਿ ਵਾ ਪਨ ਯਾਨਿ ਕਾਨਿਚਿ ਭਯਾਨਿ ਯੇਕੇਚਿ ਉਪਦ੍ਦਵਾ ਯੇਕੇਚਿ ਉਪਸਗ੍ਗਾ, ਸਬ੍ਬੇ ਤੇ ਬਾਲਂ ਨਿਸ੍ਸਾਯ ਉਪ੍ਪਜ੍ਜਨ੍ਤਿ. ਤਸ੍ਮਾ ‘‘ਏਵਰੂਪਾ ਬਾਲਾ ਨ ਸੇਵਿਤਬ੍ਬਾ’’ਤਿ ਬਾਲੇ ਮਿਤ੍ਤਪਤਿਰੂਪਕੇ ਅਮਿਤ੍ਤੇ ਦਸ੍ਸੇਤੁਂ ਚਤ੍ਤਾਰੋਮੇ, ਗਹਪਤਿਪੁਤ੍ਤ ਅਮਿਤ੍ਤਾਤਿਆਦਿਮਾਹ. ਤਤ੍ਥ ਅਞ੍ਞਦਤ੍ਥੁਹਰੋਤਿ ਸਯਂ ਤੁਚ੍ਛਹਤ੍ਥੋ ਆਗਨ੍ਤ੍ਵਾ ਏਕਂਸੇਨ ਯਂਕਿਞ੍ਚਿ ਹਰਤਿਯੇਵ. ਵਚੀਪਰਮੋਤਿ ਵਚਨਪਰਮੋ ਵਚਨਮਤ੍ਤੇਨੇਵ ਦਾਯਕੋ ਕਾਰਕੋ ਵਿਯ ਹੋਤਿ. ਅਨੁਪ੍ਪਿਯਭਾਣੀਤਿ ਅਨੁਪ੍ਪਿਯਂ ਭਣਤਿ. ਅਪਾਯਸਹਾਯੋਤਿ ਭੋਗਾਨਂ ਅਪਾਯੇਸੁ ਸਹਾਯੋ ਹੋਤਿ.

੨੫੫. ਏਵਂ ਚਤ੍ਤਾਰੋ ਅਮਿਤ੍ਤੇ ਦਸ੍ਸੇਤ੍ਵਾ ਪੁਨ ਤਤ੍ਥ ਏਕੇਕਂ ਚਤੂਹਿ ਕਾਰਣੇਹਿ ਵਿਭਜਨ੍ਤੋ ਚਤੂਹਿ ਖੋ, ਗਹਪਤਿਪੁਤ੍ਤਾਤਿਆਦਿਮਾਹ. ਤਤ੍ਥ ਅਞ੍ਞਦਤ੍ਥੁਹਰੋ ਹੋਤੀਤਿ ਏਕਂਸੇਨ ਹਾਰਕੋਯੇਵ ਹੋਤਿ. ਸਹਾਯਸ੍ਸ ਗੇਹਂ ਰਿਤ੍ਤਹਤ੍ਥੋ ਆਗਨ੍ਤ੍ਵਾ ਨਿਵਤ੍ਥਸਾਟਕਾਦੀਨਂ ਵਣ੍ਣਂ ਭਾਸਤਿ, ਸੋ ‘‘ਅਤਿਵਿਯ ਤ੍ਵਂ ਸਮ੍ਮ ਇਮਸ੍ਸ ਵਣ੍ਣਂ ਭਾਸਸੀ’’ਤਿ ਅਞ੍ਞਂ ਨਿਵਾਸੇਤ੍ਵਾ ਤਂ ਦੇਤਿ. ਅਪ੍ਪੇਨ ਬਹੁਮਿਚ੍ਛਤੀਤਿ ਯਂਕਿਞ੍ਚਿ ਅਪ੍ਪਕਂ ਦਤ੍ਵਾ ਤਸ੍ਸ ਸਨ੍ਤਿਕਾ ਬਹੁਂ ਪਤ੍ਥੇਤਿ. ਭਯਸ੍ਸ ਕਿਚ੍ਚਂ ਕਰੋਤੀਤਿ ਅਤ੍ਤਨੋ ਭਯੇ ਉਪ੍ਪਨ੍ਨੇ ਤਸ੍ਸ ਦਾਸੋ ਵਿਯ ਹੁਤ੍ਵਾ ਤਂ ਤਂ ਕਿਚ੍ਚਂ ਕਰੋਤਿ, ਅਯਂ ਸਬ੍ਬਦਾ ਨ ਕਰੋਤਿ, ਭਯੇ ਉਪ੍ਪਨ੍ਨੇ ਕਰੋਤਿ, ਨ ਪੇਮੇਨਾਤਿ ਅਮਿਤ੍ਤੋ ਨਾਮ ਜਾਤੋ. ਸੇਵਤਿ ਅਤ੍ਥਕਾਰਣਾਤਿ ਮਿਤ੍ਤਸਨ੍ਥਵਵਸੇਨ ਨ ਸੇਵਤਿ, ਅਤ੍ਤਨੋ ਅਤ੍ਥਮੇਵ ਪਚ੍ਚਾਸੀਸਨ੍ਤੋ ਸੇਵਤਿ.

੨੫੬. ਅਤੀਤੇਨ ਪਟਿਸਨ੍ਥਰਤੀਤਿ ਸਹਾਯੇ ਆਗਤੇ ‘‘ਹਿਯ੍ਯੋ ਵਾ ਪਰੇ ਵਾ ਨ ਆਗਤੋਸਿ, ਅਮ੍ਹਾਕਂ ਇਮਸ੍ਮਿਂ ਵਾਰੇ ਸਸ੍ਸਂ ਅਤਿਵਿਯ ਨਿਪ੍ਫਨ੍ਨਂ, ਬਹੂਨਿ ਸਾਲਿਯਵਬੀਜਾਦੀਨਿ ਠਪੇਤ੍ਵਾ ਮਗ੍ਗਂ ਓਲੋਕੇਨ੍ਤਾ ਨਿਸੀਦਿਮ੍ਹ, ਅਜ੍ਜ ਪਨ ਸਬ੍ਬਂ ਖੀਣ’’ਨ੍ਤਿ ਏਵਂ ਅਤੀਤੇਨ ਸਙ੍ਗਣ੍ਹਾਤਿ. ਅਨਾਗਤੇਨਾਤਿ ‘‘ਇਮਸ੍ਮਿਂ ਵਾਰੇ ਅਮ੍ਹਾਕਂ ਸਸ੍ਸਂ ਮਨਾਪਂ ਭਵਿਸ੍ਸਤਿ, ਫਲਭਾਰਭਰਿਤਾ ਸਾਲਿਆਦਯੋ, ਸਸ੍ਸਸਙ੍ਗਹੇ ਕਤੇ ਤੁਮ੍ਹਾਕਂ ਸਙ੍ਗਹਂ ਕਾਤੁਂ ਸਮਤ੍ਥਾ ਭਵਿਸ੍ਸਾਮਾ’’ਤਿ ਏਵਂ ਅਨਾਗਤੇਨ ਸਙ੍ਗਣ੍ਹਾਤਿ. ਨਿਰਤ੍ਥਕੇਨਾਤਿ ਹਤ੍ਥਿਕ੍ਖਨ੍ਧੇ ਵਾ ਅਸ੍ਸਪਿਟ੍ਠੇ ਵਾ ਨਿਸਿਨ੍ਨੋ ਸਹਾਯਂ ਦਿਸ੍ਵਾ ‘‘ਏਹਿ, ਭੋ, ਇਧ ਨਿਸੀਦਾ’’ਤਿ ਵਦਤਿ. ਮਨਾਪਂ ਸਾਟਕਂ ਨਿਵਾਸੇਤ੍ਵਾ ‘‘ਸਹਾਯਕਸ੍ਸ ਵਤ ਮੇ ਅਨੁਚ੍ਛਵਿਕੋ ਅਞ੍ਞੋ ਪਨ ਮਯ੍ਹਂ ਨਤ੍ਥੀ’’ਤਿ ਵਦਤਿ, ਏਵਂ ਨਿਰਤ੍ਥਕੇਨ ਸਙ੍ਗਣ੍ਹਾਤਿ ਨਾਮ. ਪਚ੍ਚੁਪ੍ਪਨ੍ਨੇਸੁ ਕਿਚ੍ਚੇਸੁ ਬ੍ਯਸਨਂ ਦਸ੍ਸੇਤੀਤਿ ‘‘ਸਕਟੇਨ ਮੇ ਅਤ੍ਥੋ’’ਤਿ ਵੁਤ੍ਤੇ ‘‘ਚਕ੍ਕਮਸ੍ਸ ਭਿਨ੍ਨਂ, ਅਕ੍ਖੋ ਛਿਨ੍ਨੋ’’ਤਿਆਦੀਨਿ ਵਦਤਿ.

੨੫੭. ਪਾਪਕਮ੍ਪਿਸ੍ਸ ਅਨੁਜਾਨਾਤੀਤਿ ਪਾਣਾਤਿਪਾਤਾਦੀਸੁ ਯਂਕਿਞ੍ਚਿ ਕਰੋਮਾਤਿ ਵੁਤ੍ਤੇ ‘‘ਸਾਧੁ ਸਮ੍ਮ ਕਰੋਮਾ’’ਤਿ ਅਨੁਜਾਨਾਤਿ. ਕਲ੍ਯਾਣੇਪਿ ਏਸੇਵ ਨਯੋ. ਸਹਾਯੋ ਹੋਤੀਤਿ ‘‘ਅਸੁਕਟ੍ਠਾਨੇ ਸੁਰਂ ਪਿਵਨ੍ਤਿ, ਏਹਿ ਤਤ੍ਥ ਗਚ੍ਛਾਮਾ’’ਤਿ ਵੁਤ੍ਤੇ ਸਾਧੂਤਿ ਗਚ੍ਛਤਿ. ਏਸ ਨਯੋ ਸਬ੍ਬਤ੍ਥ. ਇਤਿ ਵਿਞ੍ਞਾਯਾਤਿ ‘‘ਮਿਤ੍ਤਪਤਿਰੂਪਕਾ ਏਤੇ’’ਤਿ ਏਵਂ ਜਾਨਿਤ੍ਵਾ.

ਸੁਹਦਮਿਤ੍ਤਾਦਿਵਣ੍ਣਨਾ

੨੬੦. ਏਵਂ ਨ ਸੇਵਿਤਬ੍ਬੇ ਪਾਪਮਿਤ੍ਤੇ ਦਸ੍ਸੇਤ੍ਵਾ ਇਦਾਨਿ ਸੇਵਿਤਬ੍ਬੇ ਕਲ੍ਯਾਣਮਿਤ੍ਤੇ ਦਸ੍ਸੇਨ੍ਤੋ ਪੁਨ ਚਤ੍ਤਾਰੋਮੇ, ਗਹਪਤਿਪੁਤ੍ਤਾਤਿਆਦਿਮਾਹ. ਤਤ੍ਥ ਸੁਹਦਾਤਿ ਸੁਨ੍ਦਰਹਦਯਾ.

੨੬੧. ਪਮਤ੍ਤਂ ਰਕ੍ਖਤੀਤਿ ਮਜ੍ਜਂ ਪਿਵਿਤ੍ਵਾ ਗਾਮਮਜ੍ਝੇ ਵਾ ਗਾਮਦ੍ਵਾਰੇ ਵਾ ਮਗ੍ਗੇ ਵਾ ਨਿਪਨ੍ਨਂ ਦਿਸ੍ਵਾ ‘‘ਏਵਂਨਿਪਨ੍ਨਸ੍ਸ ਕੋਚਿਦੇਵ ਨਿਵਾਸਨਪਾਰੁਪਨਮ੍ਪਿ ਹਰੇਯ੍ਯਾ’’ਤਿ ਸਮੀਪੇ ਨਿਸੀਦਿਤ੍ਵਾ ਪਬੁਦ੍ਧਕਾਲੇ ਗਹੇਤ੍ਵਾ ਗਚ੍ਛਤਿ. ਪਮਤ੍ਤਸ੍ਸ ਸਾਪਤੇਯ੍ਯਨ੍ਤਿ ਸਹਾਯੋ ਬਹਿਗਤੋ ਵਾ ਹੋਤਿ ਸੁਰਂ ਪਿਵਿਤ੍ਵਾ ਵਾ ਪਮਤ੍ਤੋ, ਗੇਹਂ ਅਨਾਰਕ੍ਖਂ ‘‘ਕੋਚਿਦੇਵ ਯਂਕਿਞ੍ਚਿ ਹਰੇਯ੍ਯਾ’’ਤਿ ਗੇਹਂ ਪਵਿਸਿਤ੍ਵਾ ਤਸ੍ਸ ਧਨਂ ਰਕ੍ਖਤਿ. ਭੀਤਸ੍ਸਾਤਿ ਕਿਸ੍ਮਿਞ੍ਚਿਦੇਵ ਭਯੇ ਉਪ੍ਪਨ੍ਨੇ ‘‘ਮਾ ਭਾਯਿ, ਮਾਦਿਸੇ ਸਹਾਯੇ ਠਿਤੇ ਕਿਂ ਭਾਯਸੀ’’ਤਿ ਤਂ ਭਯਂ ਹਰਨ੍ਤੋ ਪਟਿਸਰਣਂ ਹੋਤਿ. ਤਦ੍ਦਿਗੁਣਂ ਭੋਗਨ੍ਤਿ ਕਿਚ੍ਚਕਰਣੀਯੇ ਉਪ੍ਪਨ੍ਨੇ ਸਹਾਯਂ ਅਤ੍ਤਨੋ ਸਨ੍ਤਿਕਂ ਆਗਤਂ ਦਿਸ੍ਵਾ ਵਦਤਿ ‘‘ਕਸ੍ਮਾ ਆਗਤੋਸੀ’’ਤਿ? ਰਾਜਕੁਲੇ ਕਮ੍ਮਂ ਅਤ੍ਥੀਤਿ. ਕਿਂ ਲਦ੍ਧੁਂ ਵਟ੍ਟਤੀਤਿ? ਏਕੋ ਕਹਾਪਣੋਤਿ. ‘‘ਨਗਰੇ ਕਮ੍ਮਂ ਨਾਮ ਨ ਏਕਕਹਾਪਣੇਨ ਨਿਪ੍ਫਜ੍ਜਤਿ, ਦ੍ਵੇ ਗਣ੍ਹਾਹੀ’’ਤਿ ਏਵਂ ਯਤ੍ਤਕਂ ਵਦਤਿ, ਤਤੋ ਦਿਗੁਣਂ ਦੇਤਿ.

੨੬੨. ਗੁਯ੍ਹਮਸ੍ਸ ਆਚਿਕ੍ਖਤੀਤਿ ਅਤ੍ਤਨੋ ਗੁਯ੍ਹਂ ਨਿਗੂਹਿਤੁਂ ਯੁਤ੍ਤਕਥਂ ਅਞ੍ਞਸ੍ਸ ਅਕਥੇਤ੍ਵਾ ਤਸ੍ਸੇਵ ਆਚਿਕ੍ਖਤਿ. ਗੁਯ੍ਹਮਸ੍ਸ ਪਰਿਗੂਹਤੀਤਿ ਤੇਨ ਕਥਿਤਂ ਗੁਯ੍ਹਂ ਯਥਾ ਅਞ੍ਞੋ ਨ ਜਾਨਾਤਿ, ਏਵਂ ਰਕ੍ਖਤਿ. ਆਪਦਾਸੁ ਨ ਵਿਜਹਤੀਤਿ ਉਪ੍ਪਨ੍ਨੇ ਭਯੇ ਨ ਪਰਿਚ੍ਚਜਤਿ. ਜੀਵਿਤਮ੍ਪਿਸ੍ਸ ਅਤ੍ਥਾਯਾਤਿ ਅਤ੍ਤਨੋ ਜੀਵਿਤਮ੍ਪਿ ਤਸ੍ਸ ਸਹਾਯਸ੍ਸ ਅਤ੍ਥਾਯ ਪਰਿਚ੍ਚਤ੍ਤਮੇਵ ਹੋਤਿ, ਅਤ੍ਤਨੋ ਜੀਵਿਤਂ ਅਗਣੇਤ੍ਵਾਪਿ ਤਸ੍ਸ ਕਮ੍ਮਂ ਕਰੋਤਿਯੇਵ.

੨੬੩. ਪਾਪਾ ਨਿਵਾਰੇਤੀਤਿ ਅਮ੍ਹੇਸੁ ਪਸ੍ਸਨ੍ਤੇਸੁ ਪਸ੍ਸਨ੍ਤੇਸੁ ਤ੍ਵਂ ਏਵਂ ਕਾਤੁਂ ਨ ਲਭਸਿ, ਪਞ੍ਚ ਵੇਰਾਨਿ ਦਸ ਅਕੁਸਲਕਮ੍ਮਪਥੇ ਮਾ ਕਰੋਹੀਤਿ ਨਿਵਾਰੇਤਿ. ਕਲ੍ਯਾਣੇ ਨਿਵੇਸੇਤੀਤਿ ਕਲ੍ਯਾਣਕਮ੍ਮੇ ਤੀਸੁ ਸਰਣੇਸੁ ਪਞ੍ਚਸੀਲੇਸੁ ਦਸਕੁਸਲਕਮ੍ਮਪਥੇਸੁ ਵਤ੍ਤਸ੍ਸੁ, ਦਾਨਂ ਦੇਹਿ ਪੁਞ੍ਞਂ ਕਰੋਹਿ ਧਮ੍ਮਂ ਸੁਣਾਹੀਤਿ ਏਵਂ ਕਲ੍ਯਾਣੇ ਨਿਯੋਜੇਤਿ. ਅਸ੍ਸੁਤਂ ਸਾਵੇਤੀਤਿ ਅਸ੍ਸੁਤਪੁਬ੍ਬਂ ਸੁਖੁਮਂ ਨਿਪੁਣਂ ਕਾਰਣਂ ਸਾਵੇਤਿ. ਸਗ੍ਗਸ੍ਸ ਮਗ੍ਗਨ੍ਤਿ ਇਦਂ ਕਮ੍ਮਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ ਏਵਂ ਸਗ੍ਗਸ੍ਸ ਮਗ੍ਗਂ ਆਚਿਕ੍ਖਤਿ.

੨੬੪. ਅਭਵੇਨਸ੍ਸ ਨ ਨਨ੍ਦਤੀਤਿ ਤਸ੍ਸ ਅਭਵੇਨ ਅਵੁਡ੍ਢਿਯਾ ਪੁਤ੍ਤਦਾਰਸ੍ਸ ਵਾ ਪਰਿਜਨਸ੍ਸ ਵਾ ਤਥਾਰੂਪਂ ਪਾਰਿਜੁਞ੍ਞਂ ਦਿਸ੍ਵਾ ਵਾ ਸੁਤ੍ਵਾ ਵਾ ਨ ਨਨ੍ਦਤਿ, ਅਨਤ੍ਤਮਨੋ ਹੋਤਿ. ਭਵੇਨਾਤਿ ਵੁਡ੍ਢਿਯਾ ਤਥਾਰੂਪਸ੍ਸ ਸਮ੍ਪਤ੍ਤਿਂ ਵਾ ਇਸ੍ਸਰਿਯਪ੍ਪਟਿਲਾਭਂ ਵਾ ਦਿਸ੍ਵਾ ਵਾ ਸੁਤ੍ਵਾ ਵਾ ਨਨ੍ਦਤਿ, ਅਤ੍ਤਮਨੋ ਹੋਤਿ. ਅਵਣ੍ਣਂ ਭਣਮਾਨਂ ਨਿਵਾਰੇਤੀਤਿ ‘‘ਅਸੁਕੋ ਵਿਰੂਪੋ ਨ ਪਾਸਾਦਿਕੋ ਦੁਜ੍ਜਾਤਿਕੋ ਦੁਸ੍ਸੀਲੋ’’ਤਿ ਵਾ ਵੁਤ੍ਤੇ ‘‘ਏਵਂ ਮਾ ਭਣਿ, ਰੂਪਵਾ ਚ ਸੋ ਪਾਸਾਦਿਕੋ ਚ ਸੁਜਾਤੋ ਚ ਸੀਲਸਮ੍ਪਨ੍ਨੋ ਚਾ’’ਤਿਆਦੀਹਿ ਵਚਨੇਹਿ ਪਰਂ ਅਤ੍ਤਨੋ ਸਹਾਯਸ੍ਸ ਅਵਣ੍ਣਂ ਭਣਮਾਨਂ ਨਿਵਾਰੇਤਿ. ਵਣ੍ਣਂ ਭਣਮਾਨਂ ਪਸਂਸਤੀਤਿ ‘‘ਅਸੁਕੋ ਰੂਪਵਾ ਪਾਸਾਦਿਕੋ ਸੁਜਾਤੋ ਸੀਲਸਮ੍ਪਨ੍ਨੋ’’ਤਿ ਵੁਤ੍ਤੇ ‘‘ਅਹੋ ਸੁਟ੍ਠੁ ਵਦਸਿ, ਸੁਭਾਸਿਤਂ ਤਯਾ, ਏਵਮੇਤਂ, ਏਸ ਪੁਰਿਸੋ ਰੂਪਵਾ ਪਾਸਾਦਿਕੋ ਸੁਜਾਤੋ ਸੀਲਸਮ੍ਪਨ੍ਨੋ’’ਤਿ ਏਵਂ ਅਤ੍ਤਨੋ ਸਹਾਯਕਸ੍ਸ ਪਰਂ ਵਣ੍ਣਂ ਭਣਮਾਨਂ ਪਸਂਸਤਿ.

੨੬੫. ਜਲਂ ਅਗ੍ਗੀਵ ਭਾਸਤੀਤਿ ਰਤ੍ਤਿਂ ਪਬ੍ਬਤਮਤ੍ਥਕੇ ਜਲਮਾਨੋ ਅਗ੍ਗਿ ਵਿਯ ਵਿਰੋਚਤਿ.

ਭੋਗੇ ਸਂਹਰਮਾਨਸ੍ਸਾਤਿ ਅਤ੍ਤਾਨਮ੍ਪਿ ਪਰਮ੍ਪਿ ਅਪੀਲ਼ੇਤ੍ਵਾ ਧਮ੍ਮੇਨ ਸਮੇਨ ਭੋਗੇ ਸਮ੍ਪਿਣ੍ਡੇਨ੍ਤਸ੍ਸ ਰਾਸਿਂ ਕਰੋਨ੍ਤਸ੍ਸ. ਭਮਰਸ੍ਸੇਵ ਇਰੀਯਤੋਤਿ ਯਥਾ ਭਮਰੋ ਪੁਪ੍ਫਾਨਂ ਵਣ੍ਣਗਨ੍ਧਂ ਅਪੋਥਯਂ ਤੁਣ੍ਡੇਨਪਿ ਪਕ੍ਖੇਹਿਪਿ ਰਸਂ ਆਹਰਿਤ੍ਵਾ ਅਨੁਪੁਬ੍ਬੇਨ ਚਕ੍ਕਪ੍ਪਮਾਣਂ ਮਧੁਪਟਲਂ ਕਰੋਤਿ, ਏਵਂ ਅਨੁਪੁਬ੍ਬੇਨ ਮਹਨ੍ਤਂ ਭੋਗਰਾਸਿਂ ਕਰੋਨ੍ਤਸ੍ਸ. ਭੋਗਾ ਸਨ੍ਨਿਚਯਂ ਯਨ੍ਤੀਤਿ ਤਸ੍ਸ ਭੋਗਾ ਨਿਚਯਂ ਗਚ੍ਛਨ੍ਤਿ. ਕਥਂ? ਅਨੁਪੁਬ੍ਬੇਨ ਉਪਚਿਕਾਹਿ ਸਂਵਡ੍ਢਿਯਮਾਨੋ ਵਮ੍ਮਿਕੋ ਵਿਯ. ਤੇਨਾਹ ‘‘ਵਮ੍ਮਿਕੋਵੁਪਚੀਯਤੀ’’ਤਿ. ਯਥਾ ਵਮ੍ਮਿਕੋ ਉਪਚਿਯਤਿ, ਏਵਂ ਨਿਚਯਂ ਯਨ੍ਤੀਤਿ ਅਤ੍ਥੋ.

ਸਮਾਹਤ੍ਵਾਤਿ ਸਮਾਹਰਿਤ੍ਵਾ. ਅਲਮਤ੍ਥੋਤਿ ਯੁਤ੍ਤਸਭਾਵੋ ਸਮਤ੍ਥੋ ਵਾ ਪਰਿਯਤ੍ਤਰੂਪੋ ਘਰਾਵਾਸਂ ਸਣ੍ਠਾਪੇਤੁਂ.

ਇਦਾਨਿ ਯਥਾ ਵਾ ਘਰਾਵਾਸੋ ਸਣ੍ਠਪੇਤਬ੍ਬੋ, ਤਥਾ ਓਵਦਨ੍ਤੋ ਚਤੁਧਾ ਵਿਭਜੇ ਭੋਗੇਤਿਆਦਿਮਾਹ. ਤਤ੍ਥ ਸ ਵੇ ਮਿਤ੍ਤਾਨਿ ਗਨ੍ਥਤੀਤਿ ਸੋ ਏਵਂ ਵਿਭਜਨ੍ਤੋ ਮਿਤ੍ਤਾਨਿ ਗਨ੍ਥਤਿ ਨਾਮ ਅਭੇਜ੍ਜਮਾਨਾਨਿ ਠਪੇਤਿ. ਯਸ੍ਸ ਹਿ ਭੋਗਾ ਸਨ੍ਤਿ, ਸੋ ਏਵ ਮਿਤ੍ਤੇ ਠਪੇਤੁਂ ਸਕ੍ਕੋਤਿ, ਨ ਇਤਰੋ.

ਏਕੇਨ ਭੋਗੇ ਭੁਞ੍ਜੇਯ੍ਯਾਤਿ ਏਕੇਨ ਕੋਟ੍ਠਾਸੇਨ ਭੋਗੇ ਭੁਞ੍ਜੇਯ੍ਯ. ਦ੍ਵੀਹਿ ਕਮ੍ਮਂ ਪਯੋਜਯੇਤਿ ਦ੍ਵੀਹਿ ਕੋਟ੍ਠਾਸੇਹਿ ਕਸਿਵਾਣਿਜ੍ਜਾਦਿਕਮ੍ਮਂ ਪਯੋਜੇਯ੍ਯ. ਚਤੁਤ੍ਥਞ੍ਚ ਨਿਧਾਪੇਯ੍ਯਾਤਿ ਚਤੁਤ੍ਥਂ ਕੋਟ੍ਠਾਸਂ ਨਿਧਾਪੇਤ੍ਵਾ ਠਪੇਯ੍ਯ. ਆਪਦਾਸੁ ਭਵਿਸ੍ਸਤੀਤਿ ਕੁਲਾਨਞ੍ਹਿ ਨ ਸਬ੍ਬਕਾਲਂ ਏਕਸਦਿਸਂ ਵਤ੍ਤਤਿ, ਕਦਾਚਿ ਰਾਜਾਦਿਵਸੇਨ ਆਪਦਾਪਿ ਉਪ੍ਪਜ੍ਜਨ੍ਤਿ, ਤਸ੍ਮਾ ਏਵਂ ਆਪਦਾਸੁ ਉਪ੍ਪਨ੍ਨਾਸੁ ਭਵਿਸ੍ਸਤੀਤਿ ‘‘ਏਕਂ ਕੋਟ੍ਠਾਸਂ ਨਿਧਾਪੇਯ੍ਯਾ’’ਤਿ ਆਹ. ਇਮੇਸੁ ਪਨ ਚਤੂਸੁ ਕੋਟ੍ਠਾਸੇਸੁ ਕਤਰਕੋਟ੍ਠਾਸਂ ਗਹੇਤ੍ਵਾ ਕੁਸਲਂ ਕਾਤਬ੍ਬਨ੍ਤਿ? ‘‘ਭੋਗੇ ਭੁਞ੍ਜੇਯ੍ਯਾ’’ਤਿ ਵੁਤ੍ਤਕੋਟ੍ਠਾਸਂ. ਤਤੋ ਗਣ੍ਹਿਤ੍ਵਾ ਭਿਕ੍ਖੂਨਮ੍ਪਿ ਕਪਣਦ੍ਧਿਕਾਦੀਨਮ੍ਪਿ ਦਾਤਬ੍ਬਂ, ਪੇਸਕਾਰਨ੍ਹਾਪਿਤਾਦੀਨਮ੍ਪਿ ਵੇਤਨਂ ਦਾਤਬ੍ਬਂ.

ਛਦ੍ਦਿਸਾਪਟਿਚ੍ਛਾਦਨਕਣ੍ਡਵਣ੍ਣਨਾ

੨੬੬. ਇਤਿ ਭਗਵਾ ਏਤ੍ਤਕੇਨ ਕਥਾਮਗ੍ਗੇਨ ਏਵਂ ਗਹਪਤਿਪੁਤ੍ਤਸ੍ਸ ਅਰਿਯਸਾਵਕੋ ਚਤੂਹਿ ਕਾਰਣੇਹਿ ਅਕੁਸਲਂ ਪਹਾਯ ਛਹਿ ਕਾਰਣੇਹਿ ਭੋਗਾਨਂ ਅਪਾਯਮੁਖਂ ਵਜ੍ਜੇਤ੍ਵਾ ਸੋਲ਼ਸ ਮਿਤ੍ਤਾਨਿ ਸੇਵਨ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਦਾਰਭਰਣਂ ਕਰੋਨ੍ਤੋ ਧਮ੍ਮਿਕੇਨ ਆਜੀਵੇਨ ਜੀਵਤਿ, ਦੇਵਮਨੁਸ੍ਸਾਨਞ੍ਚ ਅਨ੍ਤਰੇ ਅਗ੍ਗਿਕ੍ਖਨ੍ਧੋ ਵਿਯ ਵਿਰੋਚਤੀਤਿ ਵਜ੍ਜਨੀਯਧਮ੍ਮਵਜ੍ਜਨਤ੍ਥਂ ਸੇਵਿਤਬ੍ਬਧਮ੍ਮਸੇਵਨਤ੍ਥਞ੍ਚ ਓਵਾਦਂ ਦਤ੍ਵਾ ਇਦਾਨਿ ਨਮਸ੍ਸਿਤਬ੍ਬਾ ਛ ਦਿਸਾ ਦਸ੍ਸੇਨ੍ਤੋ ਕਥਞ੍ਚ ਗਹਪਤਿਪੁਤ੍ਤਾਤਿਆਦਿਮਾਹ.

ਤਤ੍ਥ ਛਦ੍ਦਿਸਾਪਟਿਚ੍ਛਾਦੀਤਿ ਯਥਾ ਛਹਿ ਦਿਸਾਹਿ ਆਗਮਨਭਯਂ ਨ ਆਗਚ੍ਛਤਿ, ਖੇਮਂ ਹੋਤਿ ਨਿਬ੍ਭਯਂ ਏਵਂ ਵਿਹਰਨ੍ਤੋ ‘‘ਛਦ੍ਦਿਸਾਪਟਿਚ੍ਛਾਦੀ’’ਤਿ ਵੁਚ੍ਚਤਿ. ‘‘ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਵੇਦਿਤਬ੍ਬਾ’’ਤਿਆਦੀਸੁ ਮਾਤਾਪਿਤਰੋ ਪੁਬ੍ਬੁਪਕਾਰਿਤਾਯ ਪੁਰਤ੍ਥਿਮਾ ਦਿਸਾਤਿ ਵੇਦਿਤਬ੍ਬਾ. ਆਚਰਿਯਾ ਦਕ੍ਖਿਣੇਯ੍ਯਤਾਯ ਦਕ੍ਖਿਣਾ ਦਿਸਾਤਿ. ਪੁਤ੍ਤਦਾਰਾ ਪਿਟ੍ਠਿਤੋ ਅਨੁਬਨ੍ਧਨਵਸੇਨ ਪਚ੍ਛਿਮਾ ਦਿਸਾਤਿ. ਮਿਤ੍ਤਾਮਚ੍ਚਾ ਯਸ੍ਮਾ ਸੋ ਮਿਤ੍ਤਾਮਚ੍ਚੇ ਨਿਸ੍ਸਾਯ ਤੇ ਤੇ ਦੁਕ੍ਖਵਿਸੇਸੇ ਉਤ੍ਤਰਤਿ, ਤਸ੍ਮਾ ਉਤ੍ਤਰਾ ਦਿਸਾਤਿ. ਦਾਸਕਮ੍ਮਕਰਾ ਪਾਦਮੂਲੇ ਪਤਿਟ੍ਠਾਨਵਸੇਨ ਹੇਟ੍ਠਿਮਾ ਦਿਸਾਤਿ. ਸਮਣਬ੍ਰਾਹ੍ਮਣਾ ਗੁਣੇਹਿ ਉਪਰਿ ਠਿਤਭਾਵੇਨ ਉਪਰਿਮਾ ਦਿਸਾਤਿ ਵੇਦਿਤਬ੍ਬਾ.

੨੬੭. ਭਤੋ ਨੇ ਭਰਿਸ੍ਸਾਮੀਤਿ ਅਹਂ ਮਾਤਾਪਿਤੂਹਿ ਥਞ੍ਞਂ ਪਾਯੇਤ੍ਵਾ ਹਤ੍ਥਪਾਦੇ ਵਡ੍ਢੇਤ੍ਵਾ ਮੁਖੇਨ ਸਿਙ੍ਘਾਣਿਕਂ ਅਪਨੇਤ੍ਵਾ ਨਹਾਪੇਤ੍ਵਾ ਮਣ੍ਡੇਤ੍ਵਾ ਭਤੋ ਭਰਿਤੋ ਜਗ੍ਗਿਤੋ, ਸ੍ਵਾਹਂ ਅਜ੍ਜ ਤੇ ਮਹਲ੍ਲਕੇ ਪਾਦਧੋਵਨਨ੍ਹਾਪਨਯਾਗੁਭਤ੍ਤਦਾਨਾਦੀਹਿ ਭਰਿਸ੍ਸਾਮਿ.

ਕਿਚ੍ਚਂ ਨੇਸਂ ਕਰਿਸ੍ਸਾਮੀਤਿ ਅਤ੍ਤਨੋ ਕਮ੍ਮਂ ਠਪੇਤ੍ਵਾ ਮਾਤਾਪਿਤੂਨਂ ਰਾਜਕੁਲਾਦੀਸੁ ਉਪ੍ਪਨ੍ਨਂ ਕਿਚ੍ਚਂ ਗਨ੍ਤ੍ਵਾ ਕਰਿਸ੍ਸਾਮਿ. ਕੁਲਵਂਸਂ ਸਣ੍ਠਪੇਸ੍ਸਾਮੀਤਿ ਮਾਤਾਪਿਤੂਨਂ ਸਨ੍ਤਕਂ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਾਦਿਂ ਅਵਿਨਾਸੇਤ੍ਵਾ ਰਕ੍ਖਨ੍ਤੋਪਿ ਕੁਲਵਂਸਂ ਸਣ੍ਠਪੇਤਿ ਨਾਮ. ਮਾਤਾਪਿਤਰੋ ਅਧਮ੍ਮਿਕਵਂਸਤੋ ਹਾਰੇਤ੍ਵਾ ਧਮ੍ਮਿਕਵਂਸੇ ਠਪੇਨ੍ਤੋਪਿ, ਕੁਲਵਂਸੇਨ ਆਗਤਾਨਿ ਸਲਾਕਭਤ੍ਤਾਦੀਨਿ ਅਨੁਪਚ੍ਛਿਨ੍ਦਿਤ੍ਵਾ ਪਵਤ੍ਤੇਨ੍ਤੋਪਿ ਕੁਲਵਂਸਂ ਸਣ੍ਠਪੇਤਿ ਨਾਮ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਕੁਲਵਂਸਂ ਸਣ੍ਠਪੇਸ੍ਸਾਮੀ’’ਤਿ.

ਦਾਯਜ੍ਜਂ ਪਟਿਪਜ੍ਜਾਮੀਤਿ ਮਾਤਾਪਿਤਰੋ ਅਤ੍ਤਨੋ ਓਵਾਦੇ ਅਵਤ੍ਤਮਾਨੇ ਮਿਚ੍ਛਾਪਟਿਪਨ੍ਨੇ ਦਾਰਕੇ ਵਿਨਿਚ੍ਛਯਂ ਪਤ੍ਵਾ ਅਪੁਤ੍ਤੇ ਕਰੋਨ੍ਤਿ, ਤੇ ਦਾਯਜ੍ਜਾਰਹਾ ਨ ਹੋਨ੍ਤਿ. ਓਵਾਦੇ ਵਤ੍ਤਮਾਨੇ ਪਨ ਕੁਲਸਨ੍ਤਕਸ੍ਸ ਸਾਮਿਕੇ ਕਰੋਨ੍ਤਿ, ਅਹਂ ਏਵਂ ਵਤ੍ਤਿਸ੍ਸਾਮੀਤਿ ਅਧਿਪ੍ਪਾਯੇਨ ‘‘ਦਾਯਜ੍ਜਂ ਪਟਿਪਜ੍ਜਾਮੀ’’ਤਿ ਵੁਤ੍ਤਂ.

ਦਕ੍ਖਿਣਂ ਅਨੁਪ੍ਪਦਸ੍ਸਾਮੀਤਿ ਤੇਸਂ ਪਤ੍ਤਿਦਾਨਂ ਕਤ੍ਵਾ ਤਤਿਯਦਿਵਸਤੋ ਪਟ੍ਠਾਯ ਦਾਨਂ ਅਨੁਪ੍ਪਦਸ੍ਸਾਮਿ. ਪਾਪਾ ਨਿਵਾਰੇਨ੍ਤੀਤਿ ਪਾਣਾਤਿਪਾਤਾਦੀਨਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਆਦੀਨਵਂ ਵਤ੍ਵਾ, ‘‘ਤਾਤ, ਮਾ ਏਵਰੂਪਂ ਕਰੀ’’ਤਿ ਨਿਵਾਰੇਨ੍ਤਿ, ਕਤਮ੍ਪਿ ਗਰਹਨ੍ਤਿ. ਕਲ੍ਯਾਣੇ ਨਿਵੇਸੇਨ੍ਤੀਤਿ ਅਨਾਥਪਿਣ੍ਡਿਕੋ ਵਿਯ ਲਞ੍ਜਂ ਦਤ੍ਵਾਪਿ ਸੀਲਸਮਾਦਾਨਾਦੀਸੁ ਨਿਵੇਸੇਨ੍ਤਿ. ਸਿਪ੍ਪਂ ਸਿਕ੍ਖਾਪੇਨ੍ਤੀਤਿ ਅਤ੍ਤਨੋ ਓਵਾਦੇ ਠਿਤਭਾਵਂ ਞਤ੍ਵਾ ਵਂਸਾਨੁਗਤਂ ਮੁਦ੍ਦਾਗਣਨਾਦਿਸਿਪ੍ਪਂ ਸਿਕ੍ਖਾਪੇਨ੍ਤਿ. ਪਤਿਰੂਪੇਨਾਤਿ ਕੁਲਸੀਲਰੂਪਾਦੀਹਿ ਅਨੁਰੂਪੇਨ.

ਸਮਯੇ ਦਾਯਜ੍ਜਂ ਨਿਯ੍ਯਾਦੇਨ੍ਤੀਤਿ ਸਮਯੇ ਧਨਂ ਦੇਨ੍ਤਿ. ਤਤ੍ਥ ਨਿਚ੍ਚਸਮਯੋ ਕਾਲਸਮਯੋਤਿ ਦ੍ਵੇ ਸਮਯਾ. ਨਿਚ੍ਚਸਮਯੇ ਦੇਨ੍ਤਿ ਨਾਮ ‘‘ਉਟ੍ਠਾਯ ਸਮੁਟ੍ਠਾਯ ਇਮਂ ਗਣ੍ਹਿਤਬ੍ਬਂ ਗਣ੍ਹ, ਅਯਂ ਤੇ ਪਰਿਬ੍ਬਯੋ ਹੋਤੁ, ਇਮਿਨਾ ਕੁਸਲਂ ਕਰੋਹੀ’’ਤਿ ਦੇਨ੍ਤਿ. ਕਾਲਸਮਯੇ ਦੇਨ੍ਤਿ ਨਾਮ ਸਿਖਾਠਪਨਆਵਾਹਵਿਵਾਹਾਦਿਸਮਯੇ ਦੇਨ੍ਤਿ. ਅਪਿਚ ਪਚ੍ਛਿਮੇ ਕਾਲੇ ਮਰਣਮਞ੍ਚੇ ਨਿਪਨ੍ਨਸ੍ਸ ‘‘ਇਮਿਨਾ ਕੁਸਲਂ ਕਰੋਹੀ’’ਤਿ ਦੇਨ੍ਤਾਪਿ ਸਮਯੇ ਦੇਨ੍ਤਿ ਨਾਮ. ਪਟਿਚ੍ਛਨ੍ਨਾ ਹੋਤੀਤਿ ਯਂ ਪੁਰਤ੍ਥਿਮਦਿਸਤੋ ਭਯਂ ਆਗਚ੍ਛੇਯ੍ਯ, ਯਥਾ ਤਂ ਨਾਗਚ੍ਛਤਿ, ਏਵਂ ਪਿਹਿਤਾ ਹੋਤਿ. ਸਚੇ ਹਿ ਪੁਤ੍ਤਾ ਵਿਪ੍ਪਟਿਪਨ੍ਨਾ, ਅਸ੍ਸੁ, ਮਾਤਾਪਿਤਰੋ ਦਹਰਕਾਲਤੋ ਪਟ੍ਠਾਯ ਜਗ੍ਗਨਾਦੀਹਿ ਸਮ੍ਮਾ ਪਟਿਪਨ੍ਨਾ, ਏਤੇ ਦਾਰਕਾ, ਮਾਤਾਪਿਤੂਨਂ ਅਪ੍ਪਤਿਰੂਪਾਤਿ ਏਤਂ ਭਯਂ ਆਗਚ੍ਛੇਯ੍ਯ. ਪੁਤ੍ਤਾ ਸਮ੍ਮਾ ਪਟਿਪਨ੍ਨਾ, ਮਾਤਾਪਿਤਰੋ ਵਿਪ੍ਪਟਿਪਨ੍ਨਾ, ਮਾਤਾਪਿਤਰੋ ਪੁਤ੍ਤਾਨਂ ਨਾਨੁਰੂਪਾਤਿ ਏਤਂ ਭਯਂ ਆਗਚ੍ਛੇਯ੍ਯ. ਉਭੋਸੁ ਵਿਪ੍ਪਟਿਪਨ੍ਨੇਸੁ ਦੁਵਿਧਮ੍ਪਿ ਤਂ ਭਯਂ ਹੋਤਿ. ਸਮ੍ਮਾ ਪਟਿਪਨ੍ਨੇਸੁ ਸਬ੍ਬਂ ਨ ਹੋਤਿ. ਤੇਨ ਵੁਤ੍ਤਂ – ‘‘ਪਟਿਚ੍ਛਨ੍ਨਾ ਹੋਤਿ ਖੇਮਾ ਅਪ੍ਪਟਿਭਯਾ’’ਤਿ.

ਏਵਞ੍ਚ ਪਨ ਵਤ੍ਵਾ ਭਗਵਾ ਸਿਙ੍ਗਾਲਕਂ ਏਤਦਵੋਚ – ‘‘ਨ ਖੋ ਤੇ, ਗਹਪਤਿਪੁਤ੍ਤ, ਪਿਤਾ ਲੋਕਸਮ੍ਮਤਂ ਪੁਰਤ੍ਥਿਮਂ ਦਿਸਂ ਨਮਸ੍ਸਾਪੇਤਿ. ਮਾਤਾਪਿਤਰੋ ਪਨ ਪੁਰਤ੍ਥਿਮਦਿਸਾਸਦਿਸੇ ਕਤ੍ਵਾ ਨਮਸ੍ਸਾਪੇਤਿ. ਅਯਞ੍ਹਿ ਤੇ ਪਿਤਰਾ ਪੁਰਤ੍ਥਿਮਾ ਦਿਸਾ ਅਕ੍ਖਾਤਾ, ਨੋ ਅਞ੍ਞਾ’’ਤਿ.

੨੬੮. ਉਟ੍ਠਾਨੇਨਾਤਿ ਆਸਨਾ ਉਟ੍ਠਾਨੇਨ. ਅਨ੍ਤੇਵਾਸਿਕੇਨ ਹਿ ਆਚਰਿਯਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਆਸਨਾ ਵੁਟ੍ਠਾਯ ਪਚ੍ਚੁਗ੍ਗਮਨਂ ਕਤ੍ਵਾ ਹਤ੍ਥਤੋ ਭਣ੍ਡਕਂ ਗਹੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਨਿਸੀਦਾਪੇਤ੍ਵਾ ਬੀਜਨਪਾਦਧੋਵਨਪਾਦਮਕ੍ਖਨਾਨਿ ਕਾਤਬ੍ਬਾਨਿ. ਤਂ ਸਨ੍ਧਾਯ ਵੁਤ੍ਤਂ ‘‘ਉਟ੍ਠਾਨੇਨਾ’’ਤਿ. ਉਪਟ੍ਠਾਨੇਨਾਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਉਪਟ੍ਠਾਨਗਮਨੇਨ. ਸਿਪ੍ਪੁਗ੍ਗਹਣਕਾਲੇ ਪਨ ਅਵਸ੍ਸਕਮੇਵ ਗਨ੍ਤਬ੍ਬਂ ਹੋਤਿ. ਸੁਸ੍ਸੂਸਾਯਾਤਿ ਸਦ੍ਦਹਿਤ੍ਵਾ ਸਵਨੇਨ. ਅਸਦ੍ਦਹਿਤ੍ਵਾ ਸੁਣਨ੍ਤੋ ਹਿ ਵਿਸੇਸਂ ਨਾਧਿਗਚ੍ਛਤਿ. ਪਾਰਿਚਰਿਯਾਯਾਤਿ ਅਵਸੇਸਖੁਦ੍ਦਕਪਾਰਿਚਰਿਯਾਯ. ਅਨ੍ਤੇਵਾਸਿਕੇਨ ਹਿ ਆਚਰਿਯਸ੍ਸ ਪਾਤੋਵ ਵੁਟ੍ਠਾਯ ਮੁਖੋਦਕਦਨ੍ਤਕਟ੍ਠਂ ਦਤ੍ਵਾ ਭਤ੍ਤਕਿਚ੍ਚਕਾਲੇਪਿ ਪਾਨੀਯਂ ਗਹੇਤ੍ਵਾ ਪਚ੍ਚੁਪਟ੍ਠਾਨਾਦੀਨਿ ਕਤ੍ਵਾ ਵਨ੍ਦਿਤ੍ਵਾ ਗਨ੍ਤਬ੍ਬਂ. ਕਿਲਿਟ੍ਠਵਤ੍ਥਾਦੀਨਿ ਧੋਵਿਤਬ੍ਬਾਨਿ, ਸਾਯਂ ਨਹਾਨੋਦਕਂ ਪਚ੍ਚੁਪਟ੍ਠਪੇਤਬ੍ਬਂ. ਅਫਾਸੁਕਾਲੇ ਉਪਟ੍ਠਾਤਬ੍ਬਂ. ਪਬ੍ਬਜਿਤੇਨਪਿ ਸਬ੍ਬਂ ਅਨ੍ਤੇਵਾਸਿਕਵਤ੍ਤਂ ਕਾਤਬ੍ਬਂ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਪਾਰਿਚਰਿਯਾਯਾ’’ਤਿ. ਸਕ੍ਕਚ੍ਚਂ ਸਿਪ੍ਪਪਟਿਗ੍ਗਹਣੇਨਾਤਿ ਸਕ੍ਕਚ੍ਚਂ ਪਟਿਗ੍ਗਹਣਂ ਨਾਮ ਥੋਕਂ ਗਹੇਤ੍ਵਾ ਬਹੁਵਾਰੇ ਸਜ੍ਝਾਯਕਰਣਂ, ਏਕਪਦਮ੍ਪਿ ਵਿਸੁਦ੍ਧਮੇਵ ਗਹੇਤਬ੍ਬਂ.

ਸੁਵਿਨੀਤਂ ਵਿਨੇਨ੍ਤੀਤਿ ‘‘ਏਵਂ ਤੇ ਨਿਸੀਦਿਤਬ੍ਬਂ, ਏਵਂ ਠਾਤਬ੍ਬਂ, ਏਵਂ ਖਾਦਿਤਬ੍ਬਂ, ਏਵਂ ਭੁਞ੍ਜਿਤਬ੍ਬਂ, ਪਾਪਮਿਤ੍ਤਾ ਵਜ੍ਜੇਤਬ੍ਬਾ, ਕਲ੍ਯਾਣਮਿਤ੍ਤਾ ਸੇਵਿਤਬ੍ਬਾ’’ਤਿ ਏਵਂ ਆਚਾਰਂ ਸਿਕ੍ਖਾਪੇਨ੍ਤਿ ਵਿਨੇਨ੍ਤਿ. ਸੁਗ੍ਗਹਿਤਂ ਗਾਹਾਪੇਨ੍ਤੀਤਿ ਯਥਾ ਸੁਗ੍ਗਹਿਤਂ ਗਣ੍ਹਾਤਿ, ਏਵਂ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਸੋਧੇਤ੍ਵਾ ਪਯੋਗਂ ਦਸ੍ਸੇਤ੍ਵਾ ਗਣ੍ਹਾਪੇਨ੍ਤਿ. ਮਿਤ੍ਤਾਮਚ੍ਚੇਸੁ ਪਟਿਯਾਦੇਨ੍ਤੀਤਿ ‘‘ਅਯਂ ਅਮ੍ਹਾਕਂ ਅਨ੍ਤੇਵਾਸਿਕੋ ਬ੍ਯਤ੍ਤੋ ਬਹੁਸ੍ਸੁਤੋ ਮਯਾ ਸਮਸਮੋ, ਏਤਂ ਸਲ੍ਲਕ੍ਖੇਯ੍ਯਾਥਾ’’ਤਿ ਏਵਂ ਗੁਣਂ ਕਥੇਤ੍ਵਾ ਮਿਤ੍ਤਾਮਚ੍ਚੇਸੁ ਪਤਿਟ੍ਠਪੇਨ੍ਤਿ.

ਦਿਸਾਸੁ ਪਰਿਤ੍ਤਾਣਂ ਕਰੋਨ੍ਤੀਤਿ ਸਿਪ੍ਪਸਿਕ੍ਖਾਪਨੇਨੇਵਸ੍ਸ ਸਬ੍ਬਦਿਸਾਸੁ ਰਕ੍ਖਂ ਕਰੋਨ੍ਤਿ. ਉਗ੍ਗਹਿਤਸਿਪ੍ਪੋ ਹਿ ਯਂ ਯਂ ਦਿਸਂ ਗਨ੍ਤ੍ਵਾ ਸਿਪ੍ਪਂ ਦਸ੍ਸੇਤਿ, ਤਤ੍ਥ ਤਤ੍ਥਸ੍ਸ ਲਾਭਸਕ੍ਕਾਰੋ ਉਪ੍ਪਜ੍ਜਤਿ. ਸੋ ਆਚਰਿਯੇਨ ਕਤੋ ਨਾਮ ਹੋਤਿ, ਗੁਣਂ ਕਥੇਨ੍ਤੋਪਿਸ੍ਸ ਮਹਾਜਨੋ ਆਚਰਿਯਪਾਦੇ ਧੋਵਿਤ੍ਵਾ ਵਸਿਤਅਨ੍ਤੇਵਾਸਿਕੋ ਵਤ ਅਯਨ੍ਤਿ ਪਠਮਂ ਆਚਰਿਯਸ੍ਸੇਵ ਗੁਣਂ ਕਥੇਨ੍ਤਿ, ਬ੍ਰਹ੍ਮਲੋਕਪ੍ਪਮਾਣੋਪਿਸ੍ਸ ਲਾਭੋ ਉਪ੍ਪਜ੍ਜਮਾਨੋ ਆਚਰਿਯਸਨ੍ਤਕੋਵ ਹੋਤਿ. ਅਪਿਚ ਯਂ ਵਿਜ੍ਜਂ ਪਰਿਜਪ੍ਪਿਤ੍ਵਾ ਗਚ੍ਛਨ੍ਤਂ ਅਟਵਿਯਂ ਚੋਰਾ ਨ ਪਸ੍ਸਨ੍ਤਿ, ਅਮਨੁਸ੍ਸਾ ਵਾ ਦੀਘਜਾਤਿਆਦਯੋ ਵਾ ਨ ਵਿਹੇਠੇਨ੍ਤਿ, ਤਂ ਸਿਕ੍ਖਾਪੇਨ੍ਤਾਪਿ ਦਿਸਾਸੁ ਪਰਿਤ੍ਤਾਣਂ ਕਰੋਨ੍ਤਿ. ਯਂ ਵਾ ਸੋ ਦਿਸਂ ਗਤੋ ਹੋਤਿ, ਤਤੋ ਕਙ੍ਖਂ ਉਪ੍ਪਾਦੇਤ੍ਵਾ ਅਤ੍ਤਨੋ ਸਨ੍ਤਿਕਂ ਆਗਤਮਨੁਸ੍ਸੇ ‘‘ਏਤਿਸ੍ਸਂ ਦਿਸਾਯਂ ਅਮ੍ਹਾਕਂ ਅਨ੍ਤੇਵਾਸਿਕੋ ਵਸਤਿ, ਤਸ੍ਸ ਚ ਮਯ੍ਹਞ੍ਚ ਇਮਸ੍ਮਿਂ ਸਿਪ੍ਪੇ ਨਾਨਾਕਰਣਂ ਨਤ੍ਥਿ, ਗਚ੍ਛਥ ਤਮੇਵ ਪੁਚ੍ਛਥਾ’’ਤਿ ਏਵਂ ਅਨ੍ਤੇਵਾਸਿਕਂ ਪਗ੍ਗਣ੍ਹਨ੍ਤਾਪਿ ਤਸ੍ਸ ਤਤ੍ਥ ਲਾਭਸਕ੍ਕਾਰੁਪ੍ਪਤ੍ਤਿਯਾ ਪਰਿਤ੍ਤਾਣਂ ਕਰੋਨ੍ਤਿ ਨਾਮ, ਪਤਿਟ੍ਠਂ ਕਰੋਨ੍ਤੀਤਿ ਅਤ੍ਥੋ. ਸੇਸਮੇਤ੍ਥ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੬੯. ਤਤਿਯਦਿਸਾਵਾਰੇ ਸਮ੍ਮਾਨਨਾਯਾਤਿ ਦੇਵਮਾਤੇ ਤਿਸ੍ਸਮਾਤੇਤਿ ਏਵਂ ਸਮ੍ਭਾਵਿਤਕਥਾਕਥਨੇਨ. ਅਨਵਮਾਨਨਾਯਾਤਿ ਯਥਾ ਦਾਸਕਮ੍ਮਕਰਾਦਯੋ ਪੋਥੇਤ੍ਵਾ ਵਿਹੇਠੇਤ੍ਵਾ ਕਥੇਨ੍ਤਿ, ਏਵਂ ਹੀਲ਼ੇਤ੍ਵਾ ਵਿਮਾਨੇਤ੍ਵਾ ਅਕਥਨੇਨ. ਅਨਤਿਚਰਿਯਾਯਾਤਿ ਤਂ ਅਤਿਕ੍ਕਮਿਤ੍ਵਾ ਬਹਿ ਅਞ੍ਞਾਯ ਇਤ੍ਥਿਯਾ ਸਦ੍ਧਿਂ ਪਰਿਚਰਨ੍ਤੋ ਤਂ ਅਤਿਚਰਤਿ ਨਾਮ, ਤਥਾ ਅਕਰਣੇਨ. ਇਸ੍ਸਰਿਯਵੋਸ੍ਸਗ੍ਗੇਨਾਤਿ ਇਤ੍ਥਿਯੋ ਹਿ ਮਹਾਲਤਾਸਦਿਸਮ੍ਪਿ ਆਭਰਣਂ ਲਭਿਤ੍ਵਾ ਭਤ੍ਤਂ ਵਿਚਾਰੇਤੁਂ ਅਲਭਮਾਨਾ ਕੁਜ੍ਝਨ੍ਤਿ, ਕਟਚ੍ਛੁਂ ਹਤ੍ਥੇ ਠਪੇਤ੍ਵਾ ਤਵ ਰੁਚਿਯਾ ਕਰੋਹੀਤਿ ਭਤ੍ਤਗੇਹੇ ਵਿਸ੍ਸਟ੍ਠੇ ਸਬ੍ਬਂ ਇਸ੍ਸਰਿਯਂ ਵਿਸ੍ਸਟ੍ਠਂ ਨਾਮ ਹੋਤਿ, ਏਵਂ ਕਰਣੇਨਾਤਿ ਅਤ੍ਥੋ. ਅਲਙ੍ਕਾਰਾਨੁਪ੍ਪਦਾਨੇਨਾਤਿ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਾਰਦਾਨੇਨ. ਸੁਸਂਵਿਹਿਤਕਮ੍ਮਨ੍ਤਾਤਿ ਯਾਗੁਭਤ੍ਤਪਚਨਕਾਲਾਦੀਨਿ ਅਨਤਿਕ੍ਕਮਿਤ੍ਵਾ ਤਸ੍ਸ ਤਸ੍ਸ ਸਾਧੁਕਂ ਕਰਣੇਨ ਸੁਟ੍ਠੁ ਸਂਵਿਹਿਤਕਮ੍ਮਨ੍ਤਾ. ਸਙ੍ਗਹਿਤਪਰਿਜਨਾਤਿ ਸਮ੍ਮਾਨਨਾਦੀਹਿ ਚੇਵ ਪਹੇਣਕਪੇਸਨਾਦੀਹਿ ਚ ਸਙ੍ਗਹਿਤਪਰਿਜਨਾ. ਇਧ ਪਰਿਜਨੋ ਨਾਮ ਸਾਮਿਕਸ੍ਸ ਚੇਵ ਅਤ੍ਤਨੋ ਚ ਞਾਤਿਜਨੋ. ਅਨਤਿਚਾਰਿਨੀਤਿ ਸਾਮਿਕਂ ਮੁਞ੍ਚਿਤ੍ਵਾ ਅਞ੍ਞਂ ਮਨਸਾਪਿ ਨ ਪਤ੍ਥੇਤਿ. ਸਮ੍ਭਤਨ੍ਤਿ ਕਸਿਵਾਣਿਜ੍ਜਾਦੀਨਿ ਕਤ੍ਵਾ ਆਭਤਧਨਂ. ਦਕ੍ਖਾ ਚ ਹੋਤੀਤਿ ਯਾਗੁਭਤ੍ਤਸਮ੍ਪਾਦਨਾਦੀਸੁ ਛੇਕਾ ਨਿਪੁਣਾ ਹੋਤਿ. ਅਨਲਸਾਤਿ ਨਿਕ੍ਕੋਸਜ੍ਜਾ. ਯਥਾ ਅਞ੍ਞਾ ਕੁਸੀਤਾ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨਾਵ ਹੋਨ੍ਤਿ ਠਿਤਟ੍ਠਾਨੇ ਠਿਤਾਵ, ਏਵਂ ਅਹੁਤ੍ਵਾ ਵਿਪ੍ਫਾਰਿਤੇਨ ਚਿਤ੍ਤੇਨ ਸਬ੍ਬਕਿਚ੍ਚਾਨਿ ਨਿਪ੍ਫਾਦੇਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੦. ਚਤੁਤ੍ਥਦਿਸਾਵਾਰੇ ਅਵਿਸਂਵਾਦਨਤਾਯਾਤਿ ਯਸ੍ਸ ਯਸ੍ਸ ਨਾਮਂ ਗਣ੍ਹਾਤਿ, ਤਂ ਤਂ ਅਵਿਸਂਵਾਦੇਤ੍ਵਾ ਇਦਮ੍ਪਿ ਅਮ੍ਹਾਕਂ ਗੇਹੇ ਅਤ੍ਥਿ, ਇਦਮ੍ਪਿ ਅਤ੍ਥਿ, ਗਹੇਤ੍ਵਾ ਗਚ੍ਛਾਹੀਤਿ ਏਵਂ ਅਵਿਸਂਵਾਦੇਤ੍ਵਾ ਦਾਨੇਨ. ਅਪਰਪਜਾ ਚਸ੍ਸ ਪਟਿਪੂਜੇਨ੍ਤੀਤਿ ਸਹਾਯਸ੍ਸ ਪੁਤ੍ਤਧੀਤਰੋ ਪਜਾ ਨਾਮ, ਤੇਸਂ ਪਨ ਪੁਤ੍ਤਧੀਤਰੋ ਚ ਨਤ੍ਤੁਪਨਤ੍ਤਕਾ ਚ ਅਪਰਪਜਾ ਨਾਮ. ਤੇ ਪਟਿਪੂਜੇਨ੍ਤਿ ਕੇਲ਼ਾਯਨ੍ਤਿ ਮਮਾਯਨ੍ਤਿ ਮਙ੍ਗਲਕਾਲਾਦੀਸੁ ਤੇਸਂ ਮਙ੍ਗਲਾਦੀਨਿ ਕਰੋਨ੍ਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਵੇਦਿਤਬ੍ਬਂ.

੨੭੧. ਯਥਾਬਲਂ ਕਮ੍ਮਨ੍ਤਸਂਵਿਧਾਨੇਨਾਤਿ ਦਹਰੇਹਿ ਕਾਤਬ੍ਬਂ ਮਹਲ੍ਲਕੇਹਿ, ਮਹਲ੍ਲਕੇਹਿ ਵਾ ਕਾਤਬ੍ਬਂ ਦਹਰੇਹਿ, ਇਤ੍ਥੀਹਿ ਕਾਤਬ੍ਬਂ ਪੁਰਿਸੇਹਿ, ਪੁਰਿਸੇਹਿ ਵਾ ਕਾਤਬ੍ਬਂ ਇਤ੍ਥੀਹਿ ਅਕਾਰੇਤ੍ਵਾ ਤਸ੍ਸ ਤਸ੍ਸ ਬਲਾਨੁਰੂਪੇਨੇਵ ਕਮ੍ਮਨ੍ਤਸਂਵਿਧਾਨੇਨ. ਭਤ੍ਤਵੇਤਨਾਨੁਪ੍ਪਦਾਨੇਨਾਤਿ ਅਯਂ ਖੁਦ੍ਦਕਪੁਤ੍ਤੋ, ਅਯਂ ਏਕਵਿਹਾਰੀਤਿ ਤਸ੍ਸ ਤਸ੍ਸ ਅਨੁਰੂਪਂ ਸਲ੍ਲਕ੍ਖੇਤ੍ਵਾ ਭਤ੍ਤਦਾਨੇਨ ਚੇਵ ਪਰਿਬ੍ਬਯਦਾਨੇਨ ਚ. ਗਿਲਾਨੁਪਟ੍ਠਾਨੇਨਾਤਿ ਅਫਾਸੁਕਕਾਲੇ ਕਮ੍ਮਂ ਅਕਾਰੇਤ੍ਵਾ ਸਪ੍ਪਾਯਭੇਸਜ੍ਜਾਦੀਨਿ ਦਤ੍ਵਾ ਪਟਿਜਗ੍ਗਨੇਨ. ਅਚ੍ਛਰਿਯਾਨਂ ਰਸਾਨਂ ਸਂਵਿਭਾਗੇਨਾਤਿ ਅਚ੍ਛਰਿਯੇ ਮਧੁਰਰਸੇ ਲਭਿਤ੍ਵਾ ਸਯਮੇਵ ਅਖਾਦਿਤ੍ਵਾ ਤੇਸਮ੍ਪਿ ਤਤੋ ਸਂਵਿਭਾਗਕਰਣੇਨ. ਸਮਯੇ ਵੋਸ੍ਸਗ੍ਗੇਨਾਤਿ ਨਿਚ੍ਚਸਮਯੇ ਚ ਕਾਲਸਮਯੇ ਚ ਵੋਸ੍ਸਜ੍ਜਨੇਨ. ਨਿਚ੍ਚਸਮਯੇ ਵੋਸ੍ਸਜ੍ਜਨਂ ਨਾਮ ਸਕਲਦਿਵਸਂ ਕਮ੍ਮਂ ਕਰੋਨ੍ਤਾ ਕਿਲਮਨ੍ਤਿ. ਤਸ੍ਮਾ ਯਥਾ ਨ ਕਿਲਮਨ੍ਤਿ, ਏਵਂ ਵੇਲਂ ਞਤ੍ਵਾ ਵਿਸ੍ਸਜ੍ਜਨਂ. ਕਾਲਸਮਯੇ ਵੋਸ੍ਸਗ੍ਗੋ ਨਾਮ ਛਣਨਕ੍ਖਤ੍ਤਕੀਲ਼ਾਦੀਸੁ ਅਲਙ੍ਕਾਰਭਣ੍ਡਖਾਦਨੀਯਭੋਜਨੀਯਾਦੀਨਿ ਦਤ੍ਵਾ ਵਿਸ੍ਸਜ੍ਜਨਂ. ਦਿਨ੍ਨਾਦਾਯਿਨੋਤਿ ਚੋਰਿਕਾਯ ਕਿਞ੍ਚਿ ਅਗਹੇਤ੍ਵਾ ਸਾਮਿਕੇਹਿ ਦਿਨ੍ਨਸ੍ਸੇਵ ਆਦਾਯਿਨੋ. ਸੁਕਤਕਮ੍ਮਕਰਾਤਿ ‘‘ਕਿਂ ਏਤਸ੍ਸ ਕਮ੍ਮੇਨ ਕਤੇਨ, ਨ ਮਯਂ ਕਿਞ੍ਚਿ ਲਭਾਮਾ’’ਤਿ ਅਨੁਜ੍ਝਾਯਿਤ੍ਵਾ ਤੁਟ੍ਠਹਦਯਾ ਯਥਾ ਤਂ ਕਮ੍ਮਂ ਸੁਕਤਂ ਹੋਤਿ, ਏਵਂ ਕਾਰਕਾ. ਕਿਤ੍ਤਿਵਣ੍ਣਹਰਾਤਿ ਪਰਿਸਮਜ੍ਝੇ ਕਥਾਯ ਸਮ੍ਪਤ੍ਤਾਯ ‘‘ਕੋ ਅਮ੍ਹਾਕਂ ਸਾਮਿਕੇਹਿ ਸਦਿਸੋ ਅਤ੍ਥਿ, ਮਯਂ ਅਤ੍ਤਨੋ ਦਾਸਭਾਵਮ੍ਪਿ ਨ ਜਾਨਾਮ, ਤੇਸਂ ਸਾਮਿਕਭਾਵਮ੍ਪਿ ਨ ਜਾਨਾਮ, ਏਵਂ ਨੋ ਅਨੁਕਮ੍ਪਨ੍ਤੀ’’ਤਿ ਗੁਣਕਥਾਹਾਰਕਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੨. ਮੇਤ੍ਤੇਨ ਕਾਯਕਮ੍ਮੇਨਾਤਿਆਦੀਸੁ ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਪੇਤ੍ਵਾ ਕਤਾਨਿ ਕਾਯਕਮ੍ਮਾਦੀਨਿ ਮੇਤ੍ਤਾਨਿ ਨਾਮ ਵੁਚ੍ਚਨ੍ਤਿ. ਤਤ੍ਥ ਭਿਕ੍ਖੂ ਨਿਮਨ੍ਤੇਸ੍ਸਾਮੀਤਿ ਵਿਹਾਰਗਮਨਂ, ਧਮਕਰਣਂ ਗਹੇਤ੍ਵਾ ਉਦਕਪਰਿਸ੍ਸਾਵਨਂ, ਪਿਟ੍ਠਿਪਰਿਕਮ੍ਮਪਾਦਪਰਿਕਮ੍ਮਾਦਿਕਰਣਞ੍ਚ ਮੇਤ੍ਤਂ ਕਾਯਕਮ੍ਮਂ ਨਾਮ. ਭਿਕ੍ਖੂ ਪਿਣ੍ਡਾਯ ਪਵਿਟ੍ਠੇ ਦਿਸ੍ਵਾ ‘‘ਸਕ੍ਕਚ੍ਚਂ ਯਾਗੁਂ ਦੇਥ, ਭਤ੍ਤਂ ਦੇਥਾ’’ਤਿਆਦਿਵਚਨਞ੍ਚੇਵ, ਸਾਧੁਕਾਰਂ ਦਤ੍ਵਾ ਧਮ੍ਮਸਵਨਞ੍ਚ ਸਕ੍ਕਚ੍ਚਂ ਪਟਿਸਨ੍ਥਾਰਕਰਣਾਦੀਨਿ ਚ ਮੇਤ੍ਤਂ ਵਚੀਕਮ੍ਮਂ ਨਾਮ. ‘‘ਅਮ੍ਹਾਕਂ ਕੁਲੂਪਕਤ੍ਥੇਰਾ ਅਵੇਰਾ ਹੋਨ੍ਤੁ ਅਬ੍ਯਾਪਜ੍ਜਾ’’ਤਿ ਏਵਂ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ. ਅਨਾਵਟਦ੍ਵਾਰਤਾਯਾਤਿ ਅਪਿਹਿਤਦ੍ਵਾਰਤਾਯ. ਤਤ੍ਥ ਸਬ੍ਬਦ੍ਵਾਰਾਨਿ ਵਿਵਰਿਤ੍ਵਾਪਿ ਸੀਲਵਨ੍ਤਾਨਂ ਅਦਾਯਕੋ ਅਕਾਰਕੋ ਪਿਹਿਤਦ੍ਵਾਰੋਯੇਵ. ਸਬ੍ਬਦ੍ਵਾਰਾਨਿ ਪਨ ਪਿਦਹਿਤ੍ਵਾਪਿ ਤੇਸਂ ਦਾਯਕੋ ਕਾਰਕੋ ਵਿਵਟਦ੍ਵਾਰੋਯੇਵ. ਇਤਿ ਸੀਲਵਨ੍ਤੇਸੁ ਗੇਹਦ੍ਵਾਰਂ ਆਗਤੇਸੁ ਸਨ੍ਤਂਯੇਵ ਨਤ੍ਥੀਤਿ ਅਵਤ੍ਵਾ ਦਾਤਬ੍ਬਂ. ਏਵਂ ਅਨਾਵਟਦ੍ਵਾਰਤਾ ਨਾਮ ਹੋਤਿ.

ਆਮਿਸਾਨੁਪ੍ਪਦਾਨੇਨਾਤਿ ਪੁਰੇਭਤ੍ਤਂ ਪਰਿਭੁਞ੍ਜਿਤਬ੍ਬਕਂ ਆਮਿਸਂ ਨਾਮ, ਤਸ੍ਮਾ ਸੀਲਵਨ੍ਤਾਨਂ ਯਾਗੁਭਤ੍ਤਸਮ੍ਪਦਾਨੇਨਾਤਿ ਅਤ੍ਥੋ. ਕਲ੍ਯਾਣੇਨ ਮਨਸਾ ਅਨੁਕਮ੍ਪਨ੍ਤੀਤਿ ‘‘ਸਬ੍ਬੇ ਸਤ੍ਤਾ ਸੁਖਿਤਾ ਹੋਨ੍ਤੁ ਅਵੇਰਾ ਅਰੋਗਾ ਅਬ੍ਯਾਪਜ੍ਜਾ’’ਤਿ ਏਵਂ ਹਿਤਫਰਣੇਨ. ਅਪਿਚ ਉਪਟ੍ਠਾਕਾਨਂ ਗੇਹਂ ਅਞ੍ਞੇ ਸੀਲਵਨ੍ਤੇ ਸਬ੍ਰਹ੍ਮਚਾਰੀ ਗਹੇਤ੍ਵਾ ਪਵਿਸਨ੍ਤਾਪਿ ਕਲ੍ਯਾਣੇਨ ਚੇਤਸਾ ਅਨੁਕਮ੍ਪਨ੍ਤਿ ਨਾਮ. ਸੁਤਂ ਪਰਿਯੋਦਾਪੇਨ੍ਤੀਤਿ ਯਂ ਤੇਸਂ ਪਕਤਿਯਾ ਸੁਤਂ ਅਤ੍ਥਿ, ਤਸ੍ਸ ਅਤ੍ਥਂ ਕਥੇਤ੍ਵਾ ਕਙ੍ਖਂ ਵਿਨੋਦੇਨ੍ਤਿ, ਤਥਤ੍ਤਾਯ ਵਾ ਪਟਿਪਜ੍ਜਾਪੇਨ੍ਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੩. ਅਲਮਤ੍ਤੋਤਿ ਪੁਤ੍ਤਦਾਰਭਰਣਂ ਕਤ੍ਵਾ ਅਗਾਰਂ ਅਜ੍ਝਾਵਸਨਸਮਤ੍ਥੋ. ਪਣ੍ਡਿਤੋਤਿ ਦਿਸਾਨਮਸ੍ਸਨਟ੍ਠਾਨੇ ਪਣ੍ਡਿਤੋ ਹੁਤ੍ਵਾ. ਸਣ੍ਹੋਤਿ ਸੁਖੁਮਤ੍ਥਦਸ੍ਸਨੇਨ ਸਣ੍ਹਵਾਚਾਭਣਨੇਨ ਵਾ ਸਣ੍ਹੋ ਹੁਤ੍ਵਾ. ਪਟਿਭਾਨਵਾਤਿ ਦਿਸਾਨਮਸ੍ਸਨਟ੍ਠਾਨੇ ਪਟਿਭਾਨਵਾ ਹੁਤ੍ਵਾ ਨਿਵਾਤਵੁਤ੍ਤੀਤਿ ਨੀਚਵੁਤ੍ਤਿ. ਅਤ੍ਥਦ੍ਧੋਤਿ ਥਮ੍ਭਰਹਿਤੋ. ਉਟ੍ਠਾਨਕੋਤਿ ਉਟ੍ਠਾਨਵੀਰਿਯਸਮ੍ਪਨ੍ਨੋ. ਅਨਲਸੋਤਿ ਨਿਕ੍ਕੋਸਜ੍ਜੋ. ਅਚ੍ਛਿਨ੍ਨਵੁਤ੍ਤੀਤਿ ਨਿਰਨ੍ਤਰਕਰਣਵਸੇਨ ਅਖਣ੍ਡਵੁਤ੍ਤਿ. ਮੇਧਾਵੀਤਿ ਠਾਨੁਪ੍ਪਤ੍ਤਿਯਾ ਪਞ੍ਞਾਯ ਸਮਨ੍ਨਾਗਤੋ.

ਸਙ੍ਗਾਹਕੋਤਿ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਕਰੋ. ਮਿਤ੍ਤਕਰੋਤਿ ਮਿਤ੍ਤਗਵੇਸਨੋ. ਵਦਞ੍ਞੂਤਿ ਪੁਬ੍ਬਕਾਰਿਨਾ, ਵੁਤ੍ਤਵਚਨਂ ਜਾਨਾਤਿ. ਸਹਾਯਕਸ੍ਸ ਘਰਂ ਗਤਕਾਲੇ ‘‘ਮਯ੍ਹਂ ਸਹਾਯਕਸ੍ਸ ਵੇਠਨਂ ਦੇਥ, ਸਾਟਕਂ ਦੇਥ, ਮਨੁਸ੍ਸਾਨਂ ਭਤ੍ਤਵੇਤਨਂ ਦੇਥਾ’’ਤਿ ਵੁਤ੍ਤਵਚਨਮਨੁਸ੍ਸਰਨ੍ਤੋ ਤਸ੍ਸ ਅਤ੍ਤਨੋ ਗੇਹਂ ਆਗਤਸ੍ਸ ਤਤ੍ਤਕਂ ਵਾ ਤਤੋ ਅਤਿਰੇਕਂ ਵਾ ਪਟਿਕਤ੍ਤਾਤਿ ਅਤ੍ਥੋ. ਅਪਿਚ ਸਹਾਯਕਸ੍ਸ ਘਰਂ ਗਨ੍ਤ੍ਵਾ ਇਮਂ ਨਾਮ ਗਣ੍ਹਿਸ੍ਸਾਮੀਤਿ ਆਗਤਂ ਸਹਾਯਕਂ ਲਜ੍ਜਾਯ ਗਣ੍ਹਿਤੁਂ ਅਸਕ੍ਕੋਨ੍ਤਂ ਅਨਿਚ੍ਛਾਰਿਤਮ੍ਪਿ ਤਸ੍ਸ ਵਾਚਂ ਞਤ੍ਵਾ ਯੇਨ ਅਤ੍ਥੇਨ ਸੋ ਆਗਤੋ, ਤਂ ਨਿਪ੍ਫਾਦੇਨ੍ਤੋ ਵਦਞ੍ਞੂ ਨਾਮ. ਯੇਨ ਯੇਨ ਵਾ ਪਨ ਸਹਾਯਕਸ੍ਸ ਊਨਂ ਹੋਤਿ, ਓਲੋਕੇਤ੍ਵਾ ਤਂ ਤਂ ਦੇਨ੍ਤੋਪਿ ਵਦਞ੍ਞੂਯੇਵ. ਨੇਤਾਤਿ ਤਂ ਤਂ ਅਤ੍ਥਂ ਦਸ੍ਸੇਨ੍ਤੋ ਪਞ੍ਞਾਯ ਨੇਤਾ. ਵਿਵਿਧਾਨਿ ਕਾਰਣਾਨਿ ਦਸ੍ਸੇਨ੍ਤੋ ਨੇਤੀਤਿ ਵਿਨੇਤਾ. ਪੁਨਪ੍ਪੁਨਂ ਨੇਤੀਤਿ ਅਨੁਨੇਤਾ.

ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਪੁਗ੍ਗਲੇ. ਰਥਸ੍ਸਾਣੀਵ ਯਾਯਤੋਤਿ ਯਥਾ ਆਣਿਯਾ ਸਤਿਯੇਵ ਰਥੋ ਯਾਤਿ, ਅਸਤਿ ਨ ਯਾਤਿ, ਏਵਂ ਇਮੇਸੁ ਸਙ੍ਗਹੇਸੁ ਸਤਿਯੇਵ ਲੋਕੋ ਵਤ੍ਤਤਿ, ਅਸਤਿ ਨ ਵਤ੍ਤਤਿ. ਤੇਨ ਵੁਤ੍ਤਂ – ‘‘ਏਤੇ ਖੋ ਸਙ੍ਗਹਾ ਲੋਕੇ, ਰਥਸ੍ਸਾਣੀਵ ਯਾਯਤੋ’’ਤਿ.

ਨ ਮਾਤਾ ਪੁਤ੍ਤਕਾਰਣਾਤਿ ਯਦਿ ਮਾਤਾ ਏਤੇ ਸਙ੍ਗਹੇ ਪੁਤ੍ਤਸ੍ਸ ਨ ਕਰੇਯ੍ਯ, ਪੁਤ੍ਤਕਾਰਣਾ ਮਾਨਂ ਵਾ ਪੂਜਂ ਵਾ ਨ ਲਭੇਯ੍ਯ.

ਸਙ੍ਗਹਾ ਏਤੇਤਿ ਉਪਯੋਗਵਚਨੇ ਪਚ੍ਚਤ੍ਤਂ. ‘‘ਸਙ੍ਗਹੇ ਏਤੇ’’ਤਿ ਵਾ ਪਾਠੋ. ਸਮ੍ਮਪੇਕ੍ਖਨ੍ਤੀਤਿ ਸਮ੍ਮਾ ਪੇਕ੍ਖਨ੍ਤਿ. ਪਾਸਂਸਾ ਚ ਭਵਨ੍ਤੀਤਿ ਪਸਂਸਨੀਯਾ ਚ ਭਵਨ੍ਤਿ.

੨੭੪. ਇਤਿ ਭਗਵਾ ਯਾ ਦਿਸਾ ਸਨ੍ਧਾਯ ਤੇ ਗਹਪਤਿਪੁਤ੍ਤ ਪਿਤਾ ਆਹ ‘‘ਦਿਸਾ ਨਮਸ੍ਸੇਯ੍ਯਾਸੀ’’ਤਿ, ਇਮਾ ਤਾ ਛ ਦਿਸਾ. ਯਦਿ ਤ੍ਵਂ ਪਿਤੁ ਵਚਨਂ ਕਰੋਸਿ, ਇਮਾ ਦਿਸਾ ਨਮਸ੍ਸਾਤਿ ਦਸ੍ਸੇਨ੍ਤੋ ਸਿਙ੍ਗਾਲਸ੍ਸ ਪੁਚ੍ਛਾਯ ਠਤ੍ਵਾ ਦੇਸਨਂ ਮਤ੍ਥਕਂ ਪਾਪੇਤ੍ਵਾ ਰਾਜਗਹਂ ਪਿਣ੍ਡਾਯ ਪਾਵਿਸਿ. ਸਿਙ੍ਗਾਲਕੋਪਿ ਸਰਣੇਸੁ ਪਤਿਟ੍ਠਾਯ ਚਤ੍ਤਾਲੀਸਕੋਟਿਧਨਂ ਬੁਦ੍ਧਸਾਸਨੇ ਵਿਕਿਰਿਤ੍ਵਾ ਪੁਞ੍ਞਕਮ੍ਮਂ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਇਮਸ੍ਮਿਞ੍ਚ ਪਨ ਸੁਤ੍ਤੇ ਯਂ ਗਿਹੀਹਿ ਕਤ੍ਤਬ੍ਬਂ ਕਮ੍ਮਂ ਨਾਮ, ਤਂ ਅਕਥਿਤਂ ਨਤ੍ਥਿ, ਗਿਹਿਵਿਨਯੋ ਨਾਮਾਯਂ ਸੁਤ੍ਤਨ੍ਤੋ. ਤਸ੍ਮਾ ਇਮਂ ਸੁਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਸ੍ਸ ਵੁਦ੍ਧਿਯੇਵ ਪਾਟਿਕਙ੍ਖਾ, ਨੋ ਪਰਿਹਾਨੀਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਸਿਙ੍ਗਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਆਟਾਨਾਟਿਯਸੁਤ੍ਤਵਣ੍ਣਨਾ

ਪਠਮਭਾਣਵਾਰਵਣ੍ਣਨਾ

੨੭੫. ਏਵਂ ਮੇ ਸੁਤਨ੍ਤਿ ਆਟਾਨਾਟਿਯਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਚਤੁਦ੍ਦਿਸਂ ਰਕ੍ਖਂ ਠਪੇਤ੍ਵਾਤਿ ਅਸੁਰਸੇਨਾਯ ਨਿਵਾਰਣਤ੍ਥਂ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਚਤੂਸੁ ਦਿਸਾਸੁ ਆਰਕ੍ਖਂ ਠਪੇਤ੍ਵਾ. ਗੁਮ੍ਬਂ ਠਪੇਤ੍ਵਾਤਿ ਬਲਗੁਮ੍ਬਂ ਠਪੇਤ੍ਵਾ. ਓਵਰਣਂ ਠਪੇਤ੍ਵਾਤਿ ਚਤੂਸੁ ਦਿਸਾਸੁ ਆਰਕ੍ਖਕੇ ਠਪੇਤ੍ਵਾ. ਏਵਂ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਆਰਕ੍ਖਂ ਸੁਸਂਵਿਹਿਤਂ ਕਤ੍ਵਾ ਆਟਾਨਾਟਨਗਰੇ ਨਿਸਿਨ੍ਨਾ ਸਤ੍ਤ ਬੁਦ੍ਧੇ ਆਰਬ੍ਭ ਇਮਂ ਪਰਿਤ੍ਤਂ ਬਨ੍ਧਿਤ੍ਵਾ ‘‘ਯੇ ਸਤ੍ਥੁ ਧਮ੍ਮਆਣਂ ਅਮ੍ਹਾਕਞ੍ਚ ਰਾਜਆਣਂ ਨ ਸੁਣਨ੍ਤਿ, ਤੇਸਂ ਇਦਞ੍ਚਿਦਞ੍ਚ ਕਰਿਸ੍ਸਾਮਾ’’ਤਿ ਸਾਵਨਂ ਕਤ੍ਵਾ ਅਤ੍ਤਨੋਪਿ ਚਤੂਸੁ ਦਿਸਾਸੁ ਮਹਤਿਯਾ ਚ ਯਕ੍ਖਸੇਨਾਯਾਤਿਆਦੀਹਿ ਚਤੂਹਿ ਸੇਨਾਹਿ ਆਰਕ੍ਖਂ ਸਂਵਿਦਹਿਤ੍ਵਾ ਅਭਿਕ੍ਕਨ੍ਤਾਯ ਰਤ੍ਤਿਯਾ…ਪੇ… ਏਕਮਨ੍ਤਂ ਨਿਸੀਦਿਂਸੁ.

ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਏਤ੍ਥ ਅਭਿਕ੍ਕਨ੍ਤਸਦ੍ਦੋ ਖਯਸੁਨ੍ਦਰਾਭਿਰੂਪਅਬ੍ਭਨੁਮੋਦਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਅਭਿਕ੍ਕਨ੍ਤਾ, ਭਨ੍ਤੇ ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ, ਚਿਰਨਿਸਿਨ੍ਨੋ ਭਿਕ੍ਖੁਸਙ੍ਘੋ ਉਦ੍ਦਿਸਤੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪਾਤਿਮੋਕ੍ਖ’’ਨ੍ਤਿ (ਅ. ਨਿ. ੮.੨੦) ਏਵਮਾਦੀਸੁ ਖਯੇ ਦਿਸ੍ਸਤਿ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਪਣੀਤਤਰੋ ਚਾ’’ਤਿ (ਅ. ਨਿ. ੪.੧੦੦) ਏਵਮਾਦੀਸੁ ਸੁਨ੍ਦਰੇ.

‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;

ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ. (ਵਿ. ਵ. ੮੫੭);

ਏਵਮਾਦੀਸੁ ਅਭਿਰੂਪੇ. ‘‘ਅਭਿਕ੍ਕਨ੍ਤਂ, ਭੋ ਗੋਤਮਾਤਿ (ਪਾਰਾ. ੧੫) ਏਵਮਾਦੀਸੁ ਅਬ੍ਭਨੁਮੋਦਨੇ. ਇਧ ਪਨ ਖਯੇ. ਤੇਨ ਅਭਿਕ੍ਕਨ੍ਤਾਯ ਰਤ੍ਤਿਯਾ, ਪਰਿਕ੍ਖੀਣਾਯ ਰਤ੍ਤਿਯਾਤਿ ਵੁਤ੍ਤਂ ਹੋਤਿ.

ਅਭਿਕ੍ਕਨ੍ਤਵਣ੍ਣਾਤਿ ਇਧ ਅਭਿਕ੍ਕਨ੍ਤਸਦ੍ਦੋ ਅਭਿਰੂਪੇ. ਵਣ੍ਣਸਦ੍ਦੋ ਪਨ ਛਵਿਥੁਤਿਕੁਲਵਗ੍ਗਕਾਰਣਸਣ੍ਠਾਨਪਮਾਣਰੂਪਾਯਤਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਸੁਵਣ੍ਣਵਣ੍ਣੋਸਿ ਭਗਵਾ’’ਤਿ (ਮ. ਨਿ. ੨.੩੯੯) ਏਵਮਾਦੀਸੁ ਛਵਿਯਂ. ‘‘ਕਦਾ ਸਞ੍ਞੂਲ਼੍ਹਾ ਪਨ ਤੇ, ਗਹਪਤਿ, ਇਮੇ ਸਮਣਸ੍ਸ ਗੋਤਮਸ੍ਸ ਵਣ੍ਣਾ’’ਤਿ (ਮ. ਨਿ. ੨.੭੭) ਏਵਮਾਦੀਸੁ ਥੁਤਿਯਂ. ‘‘ਚਤ੍ਤਾਰੋਮੇ, ਭੋ ਗੋਤਮ, ਵਣ੍ਣਾ’’ਤਿ (ਦੀ. ਨਿ. ੧.੨੬੬) ਏਵਮਾਦੀਸੁ ਕੁਲਵਗ੍ਗੇ. ‘‘ਅਥ ਕੇਨ ਨੁ ਵਣ੍ਣੇਨ ਗਨ੍ਧਥੇਨੋਤਿ ਵੁਚ੍ਚਤੀ’’ਤਿਆਦੀਸੁ (ਸਂ. ਨਿ. ੧.੨੩੪) ਕਾਰਣੇ. ‘‘ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ’’ਤਿ (ਸਂ. ਨਿ. ੧.੧੩੮) ਏਵਮਾਦੀਸੁ ਸਣ੍ਠਾਨੇ. ‘‘ਤਯੋ ਪਤ੍ਤਸ੍ਸ ਵਣ੍ਣਾ’’ਤਿ (ਪਾਰਾ. ੬੦੨) ਏਵਮਾਦੀਸੁ ਪਮਾਣੇ. ‘‘ਵਣ੍ਣੋ ਗਨ੍ਧੋ ਰਸੋ ਓਜਾ’’ਤਿ ਏਵਮਾਦੀਸੁ ਰੂਪਾਯਤਨੇ. ਸੋ ਇਧ ਛਵਿਯਂ ਦਟ੍ਠਬ੍ਬੋ. ਤੇਨ ‘‘ਅਭਿਕ੍ਕਨ੍ਤਵਣ੍ਣਾ ਅਭਿਰੂਪਚ੍ਛਵੀ’’ਤਿ ਵੁਤ੍ਤਂ ਹੋਤਿ.

ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲਸਦ੍ਦੋ ਅਨਵਸੇਸਯੇਭੁਯ੍ਯਅਬ੍ਯਾਮਿਸ੍ਸਾਨਤਿਰੇਕਦਲ਼੍ਹਤ੍ਥਵਿਸਂਯੋਗਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯ’’ਨ੍ਤਿ (ਪਾਰਾ. ੧) ਏਵਮਾਦੀਸੁ ਅਨਵਸੇਸਤਾ ਅਤ੍ਥੋ. ‘‘ਕੇਵਲਕਪ੍ਪਾ ਚ ਅਙ੍ਗਮਾਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਤੁਕਾਮਾ ਹੋਨ੍ਤੀ’’ਤਿ (ਮਹਾਵ. ੪੩) ਏਵਮਾਦੀਸੁ ਯੇਭੁਯ੍ਯਤਾ. ‘‘ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀ’’ਤਿ (ਮਹਾਵ. ੧) ਏਵਮਾਦੀਸੁ ਅਬ੍ਯਾਮਿਸ੍ਸਤਾ. ‘‘ਕੇਵਲਂ ਸਦ੍ਧਾਮਤ੍ਤਕਂ ਨੂਨ ਅਯਮਾਯਸ੍ਮਾ’’ਤਿ (ਅ. ਨਿ. ੬.੫੫) ਏਵਮਾਦੀਸੁ ਅਨਤਿਰੇਕਤਾ. ‘‘ਆਯਸ੍ਮਤੋ, ਭਨ੍ਤੇ, ਅਨੁਰੁਦ੍ਧਸ੍ਸ ਬਾਹਿਕੋ ਨਾਮ ਸਦ੍ਧਿਵਿਹਾਰਿਕੋ ਕੇਵਲਕਪ੍ਪਂ ਸਙ੍ਘਭੇਦਾਯ ਠਿਤੋ’’ਤਿ (ਅ. ਨਿ. ੪.੨੪੩) ਏਵਮਾਦੀਸੁ ਦਲ਼੍ਹਤ੍ਥਤਾ. ‘‘ਕੇਵਲੀ ਵੁਸਿਤਵਾ ਉਤ੍ਤਮਪੁਰਿਸੋਤਿ ਵੁਚ੍ਚਤੀ’’ਤਿ (ਅ. ਨਿ. ੧੦.੧੨) ਏਵਮਾਦੀਸੁ ਵਿਸਂਯੋਗੋ. ਇਧ ਪਨਸ੍ਸ ਅਨਵਸੇਸਤ੍ਥੋ ਅਧਿਪ੍ਪੇਤੋ.

ਕਪ੍ਪਸਦ੍ਦੋ ਪਨਾਯਂ ਅਭਿਸਦ੍ਦਹਨਵੋਹਾਰਕਾਲਪਞ੍ਞਤ੍ਤਿਛੇਦਨਵਿਕਪ੍ਪਲੇਸਸਮਨ੍ਤਭਾਵਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਓਕਪ੍ਪਨਿਯਮੇਤਂ ਭੋਤੋ ਗੋਤਮਸ੍ਸ. ਯਥਾ ਤਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ (ਮ. ਨਿ. ੧.੩੮੭) ਏਵਮਾਦੀਸੁ ਅਭਿਸਦ੍ਦਹਨਮਤ੍ਥੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁ’’ਨ੍ਤਿ (ਚੂਲ਼ਵ. ੨੫੦) ਏਵਮਾਦੀਸੁ ਵੋਹਾਰੋ. ‘‘ਯੇਨ ਸੁਦਂ ਨਿਚ੍ਚਕਪ੍ਪਂ ਵਿਹਰਾਮੀ’’ਤਿ (ਮ. ਨਿ. ੧.੩੮੭) ਏਵਮਾਦੀਸੁ ਕਾਲੋ. ‘‘ਇਚ੍ਚਾਯਸ੍ਮਾ ਕਪ੍ਪੋ’’ਤਿ (ਸੁ. ਨਿ. ੧੦੯੮) ਏਵਮਾਦੀਸੁ ਪਞ੍ਞਤ੍ਤਿ. ‘‘ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੂ’’ਤਿ (ਵਿ. ਵ. ੧੦੯੪) ਏਵਮਾਦੀਸੁ ਛੇਦਨਂ. ‘‘ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ’’ਤਿ (ਚੂਲ਼ਵ. ੪੪੬) ਏਵਮਾਦੀਸੁ ਵਿਕਪ੍ਪੋ, ਅਤ੍ਥਿ ਕਪ੍ਪੋ ਨਿਪਜ੍ਜਿਤੁ’’ਨ੍ਤਿ (ਅ. ਨਿ. ੮.੮੦) ਏਵਮਾਦੀਸੁ ਲੇਸੋ. ‘‘ਕੇਵਲਕਪ੍ਪਂ ਵੇਲ਼ੁਵਨਂ ਓਭਾਸੇਤ੍ਵਾ’’ਤਿ (ਸਂ. ਨਿ. ੧.੯੪) ਏਵਮਾਦੀਸੁ ਸਮਨ੍ਤਭਾਵੋ. ਇਧ ਪਨ ਸਮਨ੍ਤਭਾਵੋ ਅਤ੍ਥੋ ਅਧਿਪ੍ਪੇਤੋ. ਤਸ੍ਮਾ ‘‘ਕੇਵਲਕਪ੍ਪਂ ਗਿਜ੍ਝਕੂਟ’’ਨ੍ਤਿ ਏਤ੍ਥ ਅਨਵਸੇਸਂ ਸਮਨ੍ਤਤੋ ਗਿਜ੍ਝਕੂਟਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ.

ਓਭਾਸੇਤ੍ਵਾਤਿ ਵਤ੍ਥਮਾਲਾਲਙ੍ਕਾਰਸਰੀਰਸਮੁਟ੍ਠਿਤਾਯ ਆਭਾਯ ਫਰਿਤ੍ਵਾ, ਚਨ੍ਦਿਮਾ ਵਿਯ ਸੂਰਿਯੋ ਵਿਯ ਚ ਏਕੋਭਾਸਂ ਏਕਪਜ੍ਜੋਤਂ ਕਰਿਤ੍ਵਾਤਿ ਅਤ੍ਥੋ. ਏਕਮਨ੍ਤਂ ਨਿਸੀਦਿਂਸੂਤਿ ਦੇਵਤਾਨਂ ਦਸਬਲਸ੍ਸ ਸਨ੍ਤਿਕੇ ਨਿਸਿਨ੍ਨਟ੍ਠਾਨਂ ਨਾਮ ਨ ਬਹੁ, ਇਮਸ੍ਮਿਂ ਪਨ ਸੁਤ੍ਤੇ ਪਰਿਤ੍ਤਗਾਰਵਵਸੇਨ ਨਿਸੀਦਿਂਸੁ.

੨੭੬. ਵੇਸ੍ਸਵਣੋਤਿ ਕਿਞ੍ਚਾਪਿ ਚਤ੍ਤਾਰੋ ਮਹਾਰਾਜਾਨੋ ਆਗਤਾ, ਵੇਸ੍ਸਵਣੋ ਪਨ ਦਸਬਲਸ੍ਸ ਵਿਸ੍ਸਾਸਿਕੋ ਕਥਾਪਵਤ੍ਤਨੇ ਬ੍ਯਤ੍ਤੋ ਸੁਸਿਕ੍ਖਿਤੋ, ਤਸ੍ਮਾ ਵੇਸ੍ਸਵਣੋ ਮਹਾਰਾਜਾ ਭਗਵਨ੍ਤਂ ਏਤਦਵੋਚ. ਉਲ਼ਾਰਾਤਿ ਮਹੇਸਕ੍ਖਾਨੁਭਾਵਸਮ੍ਪਨ੍ਨਾ. ਪਾਣਾਤਿਪਾਤਾ ਵੇਰਮਣਿਯਾਤਿ ਪਾਣਾਤਿਪਾਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਆਦੀਨਵਂ ਦਸ੍ਸੇਤ੍ਵਾ ਤਤੋ ਵੇਰਮਣਿਯਾ ਧਮ੍ਮਂ ਦੇਸੇਤਿ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਸਨ੍ਤਿ ਉਲ਼ਾਰਾ ਯਕ੍ਖਾ ਨਿਵਾਸਿਨੋਤਿ ਤੇਸੁ ਸੇਨਾਸਨੇਸੁ ਸਨ੍ਤਿ ਉਲ਼ਾਰਾ ਯਕ੍ਖਾ ਨਿਬਦ੍ਧਵਾਸਿਨੋ. ਆਟਾਨਾਟਿਯਨ੍ਤਿ ਆਟਾਨਾਟਨਗਰੇ ਬਦ੍ਧਤ੍ਤਾ ਏਵਂਨਾਮਂ. ਕਿਂ ਪਨ ਭਗਵਤੋ ਅਪਚ੍ਚਕ੍ਖਧਮ੍ਮੋ ਨਾਮ ਅਤ੍ਥੀਤਿ, ਨਤ੍ਥਿ. ਅਥ ਕਸ੍ਮਾ ਵੇਸ੍ਸਵਣੋ ‘‘ਉਗ੍ਗਣ੍ਹਾਤੁ, ਭਨ੍ਤੇ, ਭਗਵਾ’’ਤਿਆਦਿਮਾਹ? ਓਕਾਸਕਰਣਤ੍ਥਂ. ਸੋ ਹਿ ਭਗਵਨ੍ਤਂ ਇਮਂ ਪਰਿਤ੍ਤਂ ਸਾਵੇਤੁਂ ਓਕਾਸਂ ਕਾਰੇਨ੍ਤੋ ਏਵਮਾਹ. ਸਤ੍ਥੁ ਕਥਿਤੇ ਇਮਂ ਪਰਿਤ੍ਤਂ ਗਰੁ ਭਵਿਸ੍ਸਤੀਤਿਪਿ ਆਹ. ਫਾਸੁਵਿਹਾਰਾਯਾਤਿ ਗਮਨਟ੍ਠਾਨਾਦੀਸੁ ਚਤੂਸੁ ਇਰਿਯਾਪਥੇਸੁ ਸੁਖਵਿਹਾਰਾਯ.

੨੭੭. ਚਕ੍ਖੁਮਨ੍ਤਸ੍ਸਾਤਿ ਨ ਵਿਪਸ੍ਸੀਯੇਵ ਚਕ੍ਖੁਮਾ, ਸਤ੍ਤਪਿ ਬੁਦ੍ਧਾ ਚਕ੍ਖੁਮਨ੍ਤੋ, ਤਸ੍ਮਾ ਏਕੇਕਸ੍ਸ ਬੁਦ੍ਧਸ੍ਸ ਏਤਾਨਿ ਸਤ੍ਤ ਸਤ੍ਤ ਨਾਮਾਨਿ ਹੋਨ੍ਤਿ. ਸਬ੍ਬੇਪਿ ਬੁਦ੍ਧਾ ਚਕ੍ਖੁਮਨ੍ਤੋ, ਸਬ੍ਬੇ ਸਬ੍ਬਭੂਤਾਨੁਕਮ੍ਪਿਨੋ, ਸਬ੍ਬੇ ਨ੍ਹਾਤਕਿਲੇਸਤ੍ਤਾ ਨ੍ਹਾਤਕਾ. ਸਬ੍ਬੇ ਮਾਰਸੇਨਾਪਮਦ੍ਦਿਨੋ, ਸਬ੍ਬੇ ਵੁਸਿਤਵਨ੍ਤੋ, ਸਬ੍ਬੇ ਵਿਮੁਤ੍ਤਾ, ਸਬ੍ਬੇ ਅਙ੍ਗਤੋ ਰਸ੍ਮੀਨਂ ਨਿਕ੍ਖਨ੍ਤਤ੍ਤਾ ਅਙ੍ਗੀਰਸਾ. ਨ ਕੇਵਲਞ੍ਚ ਬੁਦ੍ਧਾਨਂ ਏਤਾਨੇਵ ਸਤ੍ਤ ਨਾਮਾਨਿ ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ ਸਗੁਣੇਨ ਮਹੇਸਿਨੋਤਿ ਵੁਤ੍ਤਂ.

ਵੇਸ੍ਸਵਣੋ ਪਨ ਅਤ੍ਤਨੋ ਪਾਕਟਨਾਮਵਸੇਨ ਏਵਮਾਹ. ਤੇ ਜਨਾਤਿ ਇਧ ਖੀਣਾਸਵਾ ਜਨਾਤਿ ਅਧਿਪ੍ਪੇਤਾ. ਅਪਿਸੁਣਾਥਾਤਿ ਦੇਸਨਾਸੀਸਮਤ੍ਤਮੇਤਂ, ਅਮੁਸਾ ਅਪਿਸੁਣਾ ਅਫਰੁਸਾ ਮਨ੍ਤਭਾਣਿਨੋਤਿ ਅਤ੍ਥੋ. ਮਹਤ੍ਤਾਤਿ ਮਹਨ੍ਤਭਾਵਂ ਪਤ੍ਤਾ. ‘‘ਮਹਨ੍ਤਾ’’ਤਿਪਿ ਪਾਠੋ, ਮਹਨ੍ਤਾਤਿ ਅਤ੍ਥੋ. ਵੀਤਸਾਰਦਾਤਿ ਨਿਸ੍ਸਾਰਦਾ ਵਿਗਤਲੋਮਹਂਸਾ.

ਹਿਤਨ੍ਤਿ ਮੇਤ੍ਤਾਫਰਣੇਨ ਹਿਤਂ. ਯਂ ਨਮਸ੍ਸਨ੍ਤੀਤਿ ਏਤ੍ਥ ਯਨ੍ਤਿ ਨਿਪਾਤਮਤ੍ਤਂ. ਮਹਤ੍ਤਨ੍ਤਿ ਮਹਨ੍ਤਂ. ਅਯਮੇਵ ਵਾ ਪਾਠੋ, ਇਦਂ ਵੁਤ੍ਤਂ ਹੋਤਿ ‘‘ਯੇ ਚਾਪਿ ਲੋਕੇ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ ਯਥਾਭੂਤਂ ਵਿਪਸ੍ਸਿਸੁਂ, ਵਿਜ੍ਜਾਦਿਗੁਣਸਮ੍ਪਨ੍ਨਞ੍ਚ ਹਿਤਂ ਦੇਵਮਨੁਸ੍ਸਾਨਂ ਗੋਤਮਂ ਨਮਸ੍ਸਨ੍ਤਿ, ਤੇ ਜਨਾ ਅਪਿਸੁਣਾ, ਤੇਸਮ੍ਪਿ ਨਮਤ੍ਥੂ’’ਤਿ. ਅਟ੍ਠਕਥਾਯਂ ਪਨ ਤੇ ਜਨਾ ਅਪਿਸੁਣਾਤਿ ਤੇ ਬੁਦ੍ਧਾ ਅਪਿਸੁਣਾਤਿ ਏਵਂ ਪਠਮਗਾਥਾਯ ਬੁਦ੍ਧਾਨਂਯੇਵ ਵਣ੍ਣੋ ਕਥਿਤੋ, ਤਸ੍ਮਾ ਪਠਮਗਾਥਾ ਸਤ੍ਤਨ੍ਨਂ ਬੁਦ੍ਧਾਨਂ ਵਸੇਨ ਵੁਤ੍ਤਾ. ਦੁਤਿਯਗਾਥਾਯ ‘‘ਗੋਤਮ’’ਨ੍ਤਿ ਦੇਸਨਾਮੁਖਮਤ੍ਤਮੇਤਂ. ਅਯਮ੍ਪਿ ਹਿ ਸਤ੍ਤਨ੍ਨਂਯੇਵ ਵਸੇਨ ਵੁਤ੍ਤਾਤਿ ਵੇਦਿਤਬ੍ਬਾ. ਅਯਞ੍ਹੇਤ੍ਥ ਅਤ੍ਥੋ – ਲੋਕੇ ਪਣ੍ਡਿਤਾ ਦੇਵਮਨੁਸ੍ਸਾ ਯਂ ਨਮਸ੍ਸਨ੍ਤਿ ਗੋਤਮਂ, ਤਸ੍ਸ ਚ ਤਤੋ ਪੁਰਿਮਾਨਞ੍ਚ ਬੁਦ੍ਧਾਨਂ ਨਮਤ੍ਥੂਤਿ.

੨੭੮. ਯਤੋ ਉਗ੍ਗਚ੍ਛਤੀਤਿ ਯਤੋ ਠਾਨਤੋ ਉਦੇਤਿ. ਆਦਿਚ੍ਚੋਤਿ ਅਦਿਤਿਯਾ ਪੁਤ੍ਤੋ, ਵੇਵਚਨਮਤ੍ਤਂ ਵਾ ਏਤਂ ਸੂਰਿਯਸਦ੍ਦਸ੍ਸ. ਮਹਨ੍ਤਂ ਮਣ੍ਡਲਂ ਅਸ੍ਸਾਤਿ ਮਣ੍ਡਲੀਮਹਾ. ਯਸ੍ਸ ਚੁਗ੍ਗਚ੍ਛਮਾਨਸ੍ਸਾਤਿ ਯਮ੍ਹਿ ਉਗ੍ਗਚ੍ਛਮਾਨੇ. ਸਂਵਰੀਪਿ ਨਿਰੁਜ੍ਝਤੀਤਿ ਰਤ੍ਤਿ ਅਨ੍ਤਰਧਾਯਤਿ. ਯਸ੍ਸ ਚੁਗ੍ਗਤੇਤਿ ਯਸ੍ਮਿਂ ਉਗ੍ਗਤੇ.

ਰਹਦੋਤਿ ਉਦਕਰਹਦੋ. ਤਤ੍ਥਾਤਿ ਯਤੋ ਉਗ੍ਗਚ੍ਛਤਿ ਸੂਰਿਯੋ, ਤਸ੍ਮਿਂ ਠਾਨੇ. ਸਮੁਦ੍ਦੋਤਿ ਯੋ ਸੋ ਰਹਦੋਤਿ ਵੁਤ੍ਤੋ, ਸੋ ਨ ਅਞ੍ਞੋ, ਅਥ ਖੋ ਸਮੁਦ੍ਦੋ. ਸਰਿਤੋਦਕੋਤਿ ਵਿਸਟੋਦਕੋ, ਸਰਿਤਾ ਨਾਨਪ੍ਪਕਾਰਾ ਨਦਿਯੋ ਅਸ੍ਸ ਉਦਕੇ ਪਵਿਟ੍ਠਾਤਿ ਵਾ ਸਰਿਤੋਦਕੋ. ਏਵਂ ਤਂ ਤਤ੍ਥ ਜਾਨਨ੍ਤੀਤਿ ਤਂ ਰਹਦਂ ਤਤ੍ਥ ਏਵਂ ਜਾਨਨ੍ਤਿ. ਕਿਨ੍ਤਿ ਜਾਨਨ੍ਤਿ? ਸਮੁਦ੍ਦੋ ਸਰਿਤੋਦਕੋਤਿ ਏਵਂ ਜਾਨਨ੍ਤਿ.

ਇਤੋਤਿ ਸਿਨੇਰੁਤੋ ਵਾ ਤੇਸਂ ਨਿਸਿਨ੍ਨਟ੍ਠਾਨਤੋ ਵਾ. ਜਨੋਤਿ ਅਯਂ ਮਹਾਜਨੋ. ਏਕਨਾਮਾਤਿ ਇਨ੍ਦਨਾਮੇਨ ਏਕਨਾਮਾ. ਸਬ੍ਬੇਸਂ ਕਿਰ ਤੇਸਂ ਸਕ੍ਕਸ੍ਸ ਦੇਵਰਞ੍ਞੋ ਨਾਮਮੇਵ ਨਾਮਮਕਂਸੁ. ਅਸੀਤਿ ਦਸ ਏਕੋ ਚਾਤਿ ਏਕਨਵੁਤਿਜਨਾ. ਇਨ੍ਦਨਾਮਾਤਿ ਇਨ੍ਦੋਤਿ ਏਵਂਨਾਮਾ. ਬੁਦ੍ਧਂ ਆਦਿਚ੍ਚਬਨ੍ਧੁਨਨ੍ਤਿ ਕਿਲੇਸਨਿਦ੍ਦਾਪਗਮਨੇਨਾਪਿ ਬੁਦ੍ਧਂ. ਆਦਿਚ੍ਚੇਨ ਸਮਾਨਗੋਤ੍ਤਤਾਯਪਿ ਆਦਿਚ੍ਚਬਨ੍ਧੁਨਂ. ਕੁਸਲੇਨ ਸਮੇਕ੍ਖਸੀਤਿ ਅਨਵਜ੍ਜੇਨ ਨਿਪੁਣੇਨ ਵਾ ਸਬ੍ਬਞ੍ਞੁਤਞ੍ਞਾਣੇਨ ਮਹਾਜਨਂ ਓਲੋਕੇਸਿ. ਅਮਨੁਸ੍ਸਾਪਿ ਤਂ ਵਨ੍ਦਨ੍ਤੀਤਿ ਅਮਨੁਸ੍ਸਾਪਿ ਤਂ ‘‘ਸਬ੍ਬਞ੍ਞੁਤਞ੍ਞਾਣੇਨ ਮਹਾਜਨਂ ਓਲੋਕੇਸੀ’’ਤਿ ਵਤ੍ਵਾ ਵਨ੍ਦਨ੍ਤਿ. ਸੁਤਂ ਨੇਤਂ ਅਭਿਣ੍ਹਸੋਤਿ ਏਤਂ ਅਮ੍ਹੇਹਿ ਅਭਿਕ੍ਖਣਂ ਸੁਤਂ. ਜਿਨਂ ਵਨ੍ਦਥ ਗੋਤਮਂ, ਜਿਨਂ ਵਨ੍ਦਾਮ ਗੋਤਮਨ੍ਤਿ ਅਮ੍ਹੇਹਿ ਪੁਟ੍ਠਾ ਜਿਨਂ ਵਨ੍ਦਾਮ ਗੋਤਮਨ੍ਤਿ ਵਦਨ੍ਤਿ.

੨੭੯. ਯੇਨ ਪੇਤਾ ਪਵੁਚ੍ਚਨ੍ਤੀਤਿ ਪੇਤਾ ਨਾਮ ਕਾਲਙ੍ਕਤਾ, ਤੇ ਯੇਨ ਦਿਸਾਭਾਗੇਨ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ. ਪਿਸੁਣਾ ਪਿਟ੍ਠਿਮਂਸਿਕਾਤਿ ਪਿਸੁਣਾਵਾਚਾ ਚੇਵ ਪਿਟ੍ਠਿਮਂਸਂ ਖਾਦਨ੍ਤਾ ਵਿਯ ਪਰਮ੍ਮੁਖਾ ਗਰਹਕਾ ਚ. ਏਤੇ ਚ ਯੇਨ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ, ਸਬ੍ਬੇਪਿ ਹੇਤੇ ਦਕ੍ਖਿਣਦ੍ਵਾਰੇਨ ਨੀਹਰਿਤ੍ਵਾ ਦਕ੍ਖਿਣਤੋ ਨਗਰਸ੍ਸ ਡਯ੍ਹਨ੍ਤੁ ਵਾ ਛਿਜ੍ਜਨ੍ਤੁ ਵਾ ਹਞ੍ਞਨ੍ਤੁ ਵਾਤਿ ਏਵਂ ਵੁਚ੍ਚਨ੍ਤਿ. ਇਤੋ ਸਾ ਦਕ੍ਖਿਣਾ ਦਿਸਾਤਿ ਯੇਨ ਦਿਸਾਭਾਗੇਨ ਤੇ ਪੇਤਾ ਚ ਪਿਸੁਣਾਦਿਕਾ ਚ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ, ਇਤੋ ਸਾ ਦਕ੍ਖਿਣਾ ਦਿਸਾ. ਇਤੋਤਿ ਸਿਨੇਰੁਤੋ ਵਾ ਤੇਸਂ ਨਿਸਿਨ੍ਨਟ੍ਠਾਨਤੋ ਵਾ. ਕੁਮ੍ਭਣ੍ਡਾਨਨ੍ਤਿ ਤੇ ਕਿਰ ਦੇਵਾ ਮਹੋਦਰਾ ਹੋਨ੍ਤਿ, ਰਹਸ੍ਸਙ੍ਗਮ੍ਪਿ ਚ ਨੇਸਂ ਕੁਮ੍ਭੋ ਵਿਯ ਮਹਨ੍ਤਂ ਹੋਤਿ. ਤਸ੍ਮਾ ਕੁਮ੍ਭਣ੍ਡਾਤਿ ਵੁਚ੍ਚਨ੍ਤਿ.

੨੮੦. ਯਤ੍ਥ ਚੋਗ੍ਗਚ੍ਛਤਿ ਸੂਰਿਯੋਤਿ ਯਸ੍ਮਿਂ ਦਿਸਾਭਾਗੇ ਸੂਰਿਯੋ ਅਤ੍ਥਂ ਗਚ੍ਛਤਿ.

੨੮੧. ਯੇਨਾਤਿ ਯੇਨ ਦਿਸਾਭਾਗੇਨ. ਮਹਾਨੇਰੂਤਿ ਮਹਾਸਿਨੇਰੁ ਪਬ੍ਬਤਰਾਜਾ. ਸੁਦਸ੍ਸਨੋਤਿ ਸੋਵਣ੍ਣਮਯਤ੍ਤਾ ਸੁਨ੍ਦਰਦਸ੍ਸਨੋ. ਸਿਨੇਰੁਸ੍ਸ ਹਿ ਪਾਚੀਨਪਸ੍ਸਂ ਰਜਤਮਯਂ, ਦਕ੍ਖਿਣਪਸ੍ਸਂ ਮਣਿਮਯਂ, ਪਚ੍ਛਿਮਪਸ੍ਸਂ ਫਲਿਕਮਯਂ, ਉਤ੍ਤਰਪਸ੍ਸਂ ਸੋਵਣ੍ਣਮਯਂ, ਤਂ ਮਨੁਞ੍ਞਦਸ੍ਸਨਂ ਹੋਤਿ. ਤਸ੍ਮਾ ਯੇਨ ਦਿਸਾਭਾਗੇਨ ਸਿਨੇਰੁ ਸੁਦਸ੍ਸਨੋਤਿ ਅਯਮੇਤ੍ਥਤ੍ਥੋ. ਮਨੁਸ੍ਸਾ ਤਤ੍ਥ ਜਾਯਨ੍ਤੀਤਿ ਤਤ੍ਥ ਉਤ੍ਤਰਕੁਰੁਮ੍ਹਿ ਮਨੁਸ੍ਸਾ ਜਾਯਨ੍ਤਿ. ਅਮਮਾਤਿ ਵਤ੍ਥਾਭਰਣਪਾਨਭੋਜਨਾਦੀਸੁਪਿ ਮਮਤ੍ਤਵਿਰਹਿਤਾ. ਅਪਰਿਗ੍ਗਹਾਤਿ ਇਤ੍ਥਿਪਰਿਗ੍ਗਹੇਨ ਅਪਰਿਗ੍ਗਹਾ. ਤੇਸਂ ਕਿਰ ‘‘ਅਯਂ ਮਯ੍ਹਂ ਭਰਿਯਾ’’ਤਿ ਮਮਤ੍ਤਂ ਨ ਹੋਤਿ, ਮਾਤਰਂ ਵਾ ਭਗਿਨਿਂ ਵਾ ਦਿਸ੍ਵਾ ਛਨ੍ਦਰਾਗੋ ਨੁਪ੍ਪਜ੍ਜਤਿ.

ਨਪਿ ਨੀਯਨ੍ਤਿ ਨਙ੍ਗਲਾਤਿ ਨਙ੍ਗਲਾਨਿਪਿ ਤਤ੍ਥ ‘‘ਕਸਿਕਮ੍ਮਂ ਕਰਿਸ੍ਸਾਮਾ’’ਤਿ ਨ ਖੇਤ੍ਤਂ ਨੀਯਨ੍ਤਿ. ਅਕਟ੍ਠਪਾਕਿਮਨ੍ਤਿ ਅਕਟ੍ਠੇ ਭੂਮਿਭਾਗੇ ਅਰਞ੍ਞੇ ਸਯਮੇਵ ਜਾਤਂ. ਤਣ੍ਡੁਲਪ੍ਫਲਨ੍ਤਿ ਤਣ੍ਡੁਲਾਵ ਤਸ੍ਸ ਫਲਂ ਹੋਤਿ.

ਤੁਣ੍ਡਿਕੀਰੇ ਪਚਿਤ੍ਵਾਨਾਤਿ ਉਕ੍ਖਲਿਯਂ ਆਕਿਰਿਤ੍ਵਾ ਨਿਦ੍ਧੁਮਙ੍ਗਾਰੇਨ ਅਗ੍ਗਿਨਾ ਪਚਿਤ੍ਵਾ. ਤਤ੍ਥ ਕਿਰ ਜੋਤਿਕਪਾਸਾਣਾ ਨਾਮ ਹੋਨ੍ਤਿ. ਅਥ ਖੋ ਤੇ ਤਯੋ ਪਾਸਾਣੇ ਠਪੇਤ੍ਵਾ ਤਂ ਉਕ੍ਖਲਿਂ ਆਰੋਪੇਨ੍ਤਿ. ਪਾਸਾਣੇਹਿ ਤੇਜੋ ਸਮੁਟ੍ਠਹਿਤ੍ਵਾ ਤਂ ਪਚਤਿ. ਤਤੋ ਭੁਞ੍ਜਨ੍ਤਿ ਭੋਜਨਨ੍ਤਿ ਤਤੋ ਉਕ੍ਖਲਿਤੋ ਭੋਜਨਮੇਵ ਭੁਞ੍ਜਨ੍ਤਿ, ਅਞ੍ਞੋ ਸੂਪੋ ਵਾ ਬ੍ਯਞ੍ਜਨਂ ਵਾ ਨ ਹੋਤਿ, ਭੁਞ੍ਜਨ੍ਤਾਨਂ ਚਿਤ੍ਤਾਨੁਕੂਲੋਯੇਵਸ੍ਸ ਰਸੋ ਹੋਤਿ. ਤੇ ਤਂ ਠਾਨਂ ਸਮ੍ਪਤ੍ਤਾਨਂ ਦੇਨ੍ਤਿਯੇਵ, ਮਚ੍ਛਰਿਯਚਿਤ੍ਤਂ ਨਾਮ ਨ ਹੋਤਿ. ਬੁਦ੍ਧਪਚ੍ਚੇਕਬੁਦ੍ਧਾਦਯੋਪਿ ਮਹਿਦ੍ਧਿਕਾ ਤਤ੍ਥ ਗਨ੍ਤ੍ਵਾ ਪਿਣ੍ਡਪਾਤਂ ਗਣ੍ਹਨ੍ਤਿ.

ਗਾਵਿਂ ਏਕਖੁਰਂ ਕਤ੍ਵਾਤਿ ਗਾਵਿਂ ਗਹੇਤ੍ਵਾ ਏਕਖੁਰਂ ਵਾਹਨਮੇਵ ਕਤ੍ਵਾ. ਤਂ ਅਭਿਰੁਯ੍ਹ ਵੇਸ੍ਸਵਣਸ੍ਸ ਪਰਿਚਾਰਕਾ ਯਕ੍ਖਾ. ਅਨੁਯਨ੍ਤਿ ਦਿਸੋਦਿਸਨ੍ਤਿ ਤਾਯ ਤਾਯ ਦਿਸਾਯ ਚਰਨ੍ਤਿ. ਪਸੁਂ ਏਕਖੁਰਂ ਕਤ੍ਵਾਤਿ ਠਪੇਤ੍ਵਾ ਗਾਵਿਂ ਅਵਸੇਸਚਤੁਪ੍ਪਦਜਾਤਿਕਂ ਪਸੁਂ ਏਕਖੁਰਂ ਵਾਹਨਮੇਵ ਕਤ੍ਵਾ ਦਿਸੋਦਿਸਂ ਅਨੁਯਨ੍ਤਿ.

ਇਤ੍ਥਿਂ ਵਾ ਵਾਹਨਂ ਕਤ੍ਵਾਤਿ ਯੇਭੁਯ੍ਯੇਨ ਗਬ੍ਭਿਨਿਂ ਮਾਤੁਗਾਮਂ ਵਾਹਨਂ ਕਰਿਤ੍ਵਾ. ਤਸ੍ਸਾ ਪਿਟ੍ਠਿਯਾ ਨਿਸੀਦਿਤ੍ਵਾ ਚਰਨ੍ਤਿ. ਤਸ੍ਸਾ ਕਿਰ ਪਿਟ੍ਠਿ ਓਨਮਿਤੁਂ ਸਹਤਿ. ਇਤਰਾ ਪਨ ਇਤ੍ਥਿਯੋ ਯਾਨੇ ਯੋਜੇਨ੍ਤਿ. ਪੁਰਿਸਂ ਵਾਹਨਂ ਕਤ੍ਵਾਤਿ ਪੁਰਿਸੇ ਗਹੇਤ੍ਵਾ ਯਾਨੇ ਯੋਜੇਨ੍ਤਿ. ਗਣ੍ਹਨ੍ਤਾ ਚ ਸਮ੍ਮਾਦਿਟ੍ਠਿਕੇ ਗਹੇਤੁਂ ਨ ਸਕ੍ਕੋਨ੍ਤਿ. ਯੇਭੁਯ੍ਯੇਨ ਪਚ੍ਚਨ੍ਤਿਮਮਿਲਕ੍ਖੁਵਾਸਿਕੇ ਗਣ੍ਹਨ੍ਤਿ. ਅਞ੍ਞਤਰੋ ਕਿਰੇਤ੍ਥ ਜਾਨਪਦੋ ਏਕਸ੍ਸ ਥੇਰਸ੍ਸ ਸਮੀਪੇ ਨਿਸੀਦਿਤ੍ਵਾ ਨਿਦ੍ਦਾਯਤਿ, ਥੇਰੋ ‘‘ਉਪਾਸਕ ਅਤਿਵਿਯ ਨਿਦ੍ਦਾਯਸੀ’’ਤਿ ਪੁਚ੍ਛਿ. ‘‘ਅਜ੍ਜ, ਭਨ੍ਤੇ, ਸਬ੍ਬਰਤ੍ਤਿਂ ਵੇਸ੍ਸਵਣਦਾਸੇਹਿ ਕਿਲਮਿਤੋਮ੍ਹੀ’’ਤਿ ਆਹ.

ਕੁਮਾਰਿਂ ਵਾਹਨਂ ਕਤ੍ਵਾਤਿ ਕੁਮਾਰਿਯੋ ਗਹੇਤ੍ਵਾ ਏਕਖੁਰਂ ਵਾਹਨਂ ਕਤ੍ਵਾ ਰਥੇ ਯੋਜੇਨ੍ਤਿ. ਕੁਮਾਰਵਾਹਨੇਪਿ ਏਸੇਵ ਨਯੋ. ਪਚਾਰਾ ਤਸ੍ਸ ਰਾਜਿਨੋਤਿ ਤਸ੍ਸ ਰਞ੍ਞੋ ਪਰਿਚਾਰਿਕਾ. ਹਤ੍ਥਿਯਾਨਂ ਅਸ੍ਸਯਾਨਨ੍ਤਿ ਨ ਕੇਵਲਂ ਗੋਯਾਨਾਦੀਨਿਯੇਵ, ਹਤ੍ਥਿਅਸ੍ਸਯਾਨਾਦੀਨਿਪਿ ਅਭਿਰੁਹਿਤ੍ਵਾ ਵਿਚਰਨ੍ਤਿ. ਦਿਬ੍ਬਂ ਯਾਨਨ੍ਤਿ ਅਞ੍ਞਮ੍ਪਿ ਨੇਸਂ ਬਹੁਵਿਧਂ ਦਿਬ੍ਬਯਾਨਂ ਉਪਟ੍ਠਿਤਮੇਵ ਹੋਤਿ, ਏਤਾਨਿ ਤਾਵ ਨੇਸਂ ਉਪਕਪ੍ਪਨਯਾਨਾਨਿ. ਤੇ ਪਨ ਪਾਸਾਦੇ ਵਰਸਯਨਮ੍ਹਿ ਨਿਪਨ੍ਨਾਪਿ ਪੀਠਸਿਵਿਕਾਦੀਸੁ ਚ ਨਿਸਿਨ੍ਨਾਪਿ ਵਿਚਰਨ੍ਤਿ. ਤੇਨ ਵੁਤ੍ਤਂ ‘‘ਪਾਸਾਦਾ ਸਿਵਿਕਾ ਚੇਵਾ’’ਤਿ. ਮਹਾਰਾਜਸ੍ਸ ਯਸਸ੍ਸਿਨੋਤਿ ਏਵਂ ਆਨੁਭਾਵਸਮ੍ਪਨ੍ਨਸ੍ਸ ਯਸਸ੍ਸਿਨੋ ਮਹਾਰਾਜਸ੍ਸ ਏਤਾਨਿ ਯਾਨਾਨਿ ਨਿਬ੍ਬਤ੍ਤਨ੍ਤਿ.

ਤਸ੍ਸ ਚ ਨਗਰਾ ਅਹੁ ਅਨ੍ਤਲਿਕ੍ਖੇ ਸੁਮਾਪਿਤਾਤਿ ਤਸ੍ਸ ਰਞ੍ਞੋ ਆਕਾਸੇ ਸੁਟ੍ਠੁ ਮਾਪਿਤਾ ਏਤੇ ਆਟਾਨਾਟਾਦਿਕਾ ਨਗਰਾ ਅਹੇਸੁਂ, ਨਗਰਾਨਿ ਭਵਿਂਸੂਤਿ ਅਤ੍ਥੋ. ਏਕਞ੍ਹਿਸ੍ਸ ਨਗਰਂ ਆਟਾਨਾਟਾ ਨਾਮ ਆਸਿ, ਏਕਂ ਕੁਸਿਨਾਟਾ ਨਾਮ, ਏਕਂ ਪਰਕੁਸਿਨਾਟਾ ਨਾਮ, ਏਕਂ ਨਾਟਸੂਰਿਯਾ ਨਾਮ, ਏਕਂ ਪਰਕੁਸਿਟਨਾਟਾ ਨਾਮ.

ਉਤ੍ਤਰੇਨ ਕਸਿਵਨ੍ਤੋਤਿ ਤਸ੍ਮਿਂ ਠਤ੍ਵਾ ਉਜੁਂ ਉਤ੍ਤਰਦਿਸਾਯ ਕਸਿਵਨ੍ਤੋ ਨਾਮ ਅਞ੍ਞਂ ਨਗਰਂ. ਜਨੋਘਮਪਰੇਨ ਚਾਤਿ ਏਤਸ੍ਸ ਅਪਰਭਾਗੇ ਜਨੋਘਂ ਨਾਮ ਅਞ੍ਞਂ ਨਗਰਂ. ਨਵਨਵਤਿਯੋਤਿ ਅਞ੍ਞਮ੍ਪਿ ਨਵਨਵਤਿਯੋ ਨਾਮ ਏਕਂ ਨਗਰਂ. ਅਪਰਂ ਅਮ੍ਬਰਅਮ੍ਬਰਵਤਿਯੋ ਨਾਮ. ਆਲ਼ਕਮਨ੍ਦਾਤਿ ਅਪਰਮ੍ਪਿ ਆਲ਼ਕਮਨ੍ਦਾ ਨਾਮ ਰਾਜਧਾਨੀ.

ਤਸ੍ਮਾ ਕੁਵੇਰੋ ਮਹਾਰਾਜਾਤਿ ਅਯਂ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਕੁਵੇਰੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਉਚ੍ਛੁਵਪ੍ਪਂ ਕਾਰੇਤ੍ਵਾ ਸਤ੍ਤ ਯਨ੍ਤਾਨਿ ਯੋਜੇਸਿ. ਏਕਿਸ੍ਸਾਯ ਯਨ੍ਤਸਾਲਾਯ ਉਟ੍ਠਿਤਂ ਆਯਂ ਆਗਤਾਗਤਸ੍ਸ ਮਹਾਜਨਸ੍ਸ ਦਤ੍ਵਾ ਪੁਞ੍ਞਂ ਅਕਾਸਿ. ਅਵਸੇਸਸਾਲਾਹਿ ਤਤ੍ਥੇਵ ਬਹੁਤਰੋ ਆਯੋ ਉਟ੍ਠਾਸਿ, ਸੋ ਤੇਨ ਪਸੀਦਿਤ੍ਵਾ ਅਵਸੇਸਸਾਲਾਸੁਪਿ ਉਪ੍ਪਜ੍ਜਨਕਂ ਗਹੇਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਦਾਨਂ ਅਦਾਸਿ. ਸੋ ਕਾਲਂ ਕਤ੍ਵਾ ਚਾਤੁਮਹਾਰਾਜਿਕੇਸੁ ਕੁਵੇਰੋ ਨਾਮ ਦੇਵਪੁਤ੍ਤੋ ਜਾਤੋ. ਅਪਰਭਾਗੇ ਵਿਸਾਣਾਯ ਰਾਜਧਾਨਿਯਾ ਰਜ੍ਜਂ ਕਾਰੇਸਿ. ਤਤੋ ਪਟ੍ਠਾਯ ਵੇਸ੍ਸਵਣੋਤਿ ਵੁਚ੍ਚਤਿ.

ਪਚ੍ਚੇਸਨ੍ਤੋ ਪਕਾਸੇਨ੍ਤੀਤਿ ਪਟਿਏਸਨ੍ਤੋ ਵਿਸੁਂ ਵਿਸੁਂ ਅਤ੍ਥੇ ਉਪਪਰਿਕ੍ਖਮਾਨਾ ਅਨੁਸਾਸਮਾਨਾ ਅਞ੍ਞੇ ਦ੍ਵਾਦਸ ਯਕ੍ਖਰਟ੍ਠਿਕਾ ਪਕਾਸੇਨ੍ਤਿ. ਤੇ ਕਿਰ ਯਕ੍ਖਰਟ੍ਠਿਕਾ ਸਾਸਨਂ ਗਹੇਤ੍ਵਾ ਦ੍ਵਾਦਸਨ੍ਨਂ ਯਕ੍ਖਦੋਵਾਰਿਕਾਨਂ ਨਿਵੇਦੇਨ੍ਤਿ. ਯਕ੍ਖਦੋਵਾਰਿਕਾ ਤਂ ਸਾਸਨਂ ਮਹਾਰਾਜਸ੍ਸ ਨਿਵੇਦੇਨ੍ਤਿ. ਇਦਾਨਿ ਤੇਸਂ ਯਕ੍ਖਰਟ੍ਠਿਕਾਨਂ ਨਾਮਂ ਦਸ੍ਸੇਨ੍ਤੋ ਤਤੋਲਾਤਿਆਦਿਮਾਹ. ਤੇਸੁ ਕਿਰ ਏਕੋ ਤਤੋਲਾ ਨਾਮ, ਏਕੋ ਤਤ੍ਤਲਾ ਨਾਮ, ਏਕੋ ਤਤੋਤਲਾ ਨਾਮ, ਏਕੋ ਓਜਸਿ ਨਾਮ, ਏਕੋ ਤੇਜਸਿ ਨਾਮ, ਏਕੋ ਤਤੋਜਸੀ ਨਾਮ. ਸੂਰੋ ਰਾਜਾਤਿ ਏਕੋ ਸੂਰੋ ਨਾਮ, ਏਕੋ ਰਾਜਾ ਨਾਮ, ਏਕੋ ਸੂਰੋਰਾਜਾ ਨਾਮ, ਅਰਿਟ੍ਠੋ ਨੇਮੀਤਿ ਏਕੋ ਅਰਿਟ੍ਠੋ ਨਾਮ, ਏਕੋ ਨੇਮਿ ਨਾਮ, ਏਕੋ ਅਰਿਟ੍ਠਨੇਮਿ ਨਾਮ.

ਰਹਦੋਪਿ ਤਤ੍ਥ ਧਰਣੀ ਨਾਮਾਤਿ ਤਤ੍ਥ ਪਨੇਕੋ ਨਾਮੇਨ ਧਰਣੀ ਨਾਮ ਉਦਕਰਹਦੋ ਅਤ੍ਥਿ, ਪਣ੍ਣਾਸਯੋਜਨਾ ਮਹਾਪੋਕ੍ਖਰਣੀ ਅਤ੍ਥੀਤਿ ਵੁਤ੍ਤਂ ਹੋਤਿ. ਯਤੋ ਮੇਘਾ ਪਵਸ੍ਸਨ੍ਤੀਤਿ ਯਤੋ ਪੋਕ੍ਖਰਣਿਤੋ ਉਦਕਂ ਗਹੇਤ੍ਵਾ ਮੇਘਾ ਪਵਸ੍ਸਨ੍ਤਿ. ਵਸ੍ਸਾ ਯਤੋ ਪਤਾਯਨ੍ਤੀਤਿ ਯਤੋ ਵੁਟ੍ਠਿਯੋ ਅਵਤ੍ਥਰਮਾਨਾ ਨਿਗਚ੍ਛਨ੍ਤਿ. ਮੇਘੇਸੁ ਕਿਰ ਉਟ੍ਠਿਤੇਸੁ ਤਤੋ ਪੋਕ੍ਖਰਣਿਤੋ ਪੁਰਾਣਉਦਕਂ ਭਸ੍ਸਤਿ. ਉਪਰਿ ਮੇਘੋ ਉਟ੍ਠਹਿਤ੍ਵਾ ਤਂ ਪੋਕ੍ਖਰਣਿਂ ਨਵੋਦਕੇਨ ਪੂਰੇਤਿ. ਪੁਰਾਣੋਦਕਂ ਹੇਟ੍ਠਿਮਂ ਹੁਤ੍ਵਾ ਨਿਕ੍ਖਮਤਿ. ਪਰਿਪੁਣ੍ਣਾਯ ਪੋਕ੍ਖਰਣਿਯਾ ਵਲਾਹਕਾ ਵਿਗਚ੍ਛਨ੍ਤਿ. ਸਭਾਪੀਤਿ ਸਭਾ. ਤਸ੍ਸਾ ਕਿਰ ਪੋਕ੍ਖਰਣਿਯਾ ਤੀਰੇ ਸਾਲਵਤਿਯਾ ਨਾਮ ਲਤਾਯ ਪਰਿਕ੍ਖਿਤ੍ਤੋ ਦ੍ਵਾਦਸਯੋਜਨਿਕੋ ਰਤਨਮਣ੍ਡਪੋ ਅਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ.

ਪਯਿਰੁਪਾਸਨ੍ਤੀਤਿ ਨਿਸੀਦਨ੍ਤਿ. ਤਤ੍ਥ ਨਿਚ੍ਚਫਲਾ ਰੁਕ੍ਖਾਤਿ ਤਸ੍ਮਿਂ ਠਾਨੇ ਤਂ ਮਣ੍ਡਪਂ ਪਰਿਵਾਰੇਤ੍ਵਾ ਸਦਾ ਫਲਿਤਾ ਅਮ੍ਬਜਮ੍ਬੁਆਦਯੋ ਰੁਕ੍ਖਾ ਨਿਚ੍ਚਪੁਪ੍ਫਿਤਾ ਚ ਚਮ੍ਪਕਮਾਲਾਦਯੋਤਿ ਦਸ੍ਸੇਤਿ. ਨਾਨਾਦਿਜਗਣਾਯੁਤਾਤਿ ਵਿਵਿਧਪਕ੍ਖਿਸਙ੍ਘਸਮਾਕੁਲਾ. ਮਯੂਰਕੋਞ੍ਚਾਭਿਰੁਦਾਤਿ ਮਯੂਰੇਹਿ ਕੋਞ੍ਚਸਕੁਣੇਹਿ ਚ ਅਭਿਰੁਦਾ ਉਪਗੀਤਾ.

ਜੀਵਞ੍ਜੀਵਕਸਦ੍ਦੇਤ੍ਥਾਤਿ ‘‘ਜੀਵ ਜੀਵਾ’’ਤਿ ਏਵਂ ਵਿਰਵਨ੍ਤਾਨਂ ਜੀਵਞ੍ਜੀਵਕਸਕੁਣਾਨਮ੍ਪਿ ਏਤ੍ਥ ਸਦ੍ਦੋ ਅਤ੍ਥਿ. ਓਟ੍ਠਵਚਿਤ੍ਤਕਾਤਿ ‘‘ਉਟ੍ਠੇਹਿ, ਚਿਤ੍ਤ, ਉਟ੍ਠੇਹਿ ਚਿਤ੍ਤਾ’’ਤਿ ਏਵਂ ਵਸ੍ਸਮਾਨਾ ਉਟ੍ਠਵਚਿਤ੍ਤਕਸਕੁਣਾਪਿ ਤਤ੍ਥ ਵਿਚਰਨ੍ਤਿ. ਕੁਕ੍ਕੁਟਕਾਤਿ ਵਨਕੁਕ੍ਕੁਟਕਾ. ਕੁਲ਼ੀਰਕਾਤਿ ਸੁਵਣ੍ਣਕਕ੍ਕਟਕਾ. ਵਨੇਤਿ ਪਦੁਮਵਨੇ. ਪੋਕ੍ਖਰਸਾਤਕਾਤਿ ਪੋਕ੍ਖਰਸਾਤਕਾ ਨਾਮ ਸਕੁਣਾ.

ਸੁਕਸਾਲ਼ਿਕਸਦ੍ਦੇਤ੍ਥਾਤਿ ਸੁਕਾਨਞ੍ਚ ਸਾਲ਼ਿਕਾਨਞ੍ਚ ਸਦ੍ਦੋ ਏਤ੍ਥ. ਦਣ੍ਡਮਾਣਵਕਾਨਿ ਚਾਤਿ ਮਨੁਸ੍ਸਮੁਖਸਕੁਣਾ. ਤੇ ਕਿਰ ਦ੍ਵੀਹਿ ਹਤ੍ਥੇਹਿ ਸੁਵਣ੍ਣਦਣ੍ਡਂ ਗਹੇਤ੍ਵਾ ਏਕਂ ਪੋਕ੍ਖਰਪਤ੍ਤਂ ਅਕ੍ਕਮਿਤ੍ਵਾ ਅਨਨ੍ਤਰੇ ਪੋਕ੍ਖਰਪਤ੍ਤੇ ਸੁਵਣ੍ਣਦਣ੍ਡਂ ਨਿਕ੍ਖਿਪਨ੍ਤਾ ਵਿਚਰਨ੍ਤਿ. ਸੋਭਤਿ ਸਬ੍ਬਕਾਲਂ ਸਾਤਿ ਸਾ ਪੋਕ੍ਖਰਣੀ ਸਬ੍ਬਕਾਲਂ ਸੋਭਤਿ. ਕੁਵੇਰਨਲ਼ਿਨੀਤਿ ਕੁਵੇਰਸ੍ਸ ਨਲ਼ਿਨੀ ਪਦੁਮਸਰਭੂਤਾ, ਸਾ ਧਰਣੀ ਨਾਮ ਪੋਕ੍ਖਰਣੀ ਸਦਾ ਨਿਰਨ੍ਤਰਂ ਸੋਭਤਿ.

੨੮੨. ਯਸ੍ਸ ਕਸ੍ਸਚੀਤਿ ਇਦਂ ਵੇਸ੍ਸਵਣੋ ਆਟਾਨਾਟਿਯਂ ਰਕ੍ਖਂ ਨਿਟ੍ਠਪੇਤ੍ਵਾ ਤਸ੍ਸਾ ਪਰਿਕਮ੍ਮਂ ਦਸ੍ਸੇਨ੍ਤੋ ਆਹ. ਤਤ੍ਥ ਸੁਗ੍ਗਹਿਤਾਤਿ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਪਰਿਸੋਧੇਤ੍ਵਾ ਸੁਟ੍ਠੁ ਉਗ੍ਗਹਿਤਾ. ਸਮਤ੍ਤਾ ਪਰਿਯਾਪੁਤਾਤਿ ਪਦਬ੍ਯਞ੍ਜਨਾਨਿ ਅਹਾਪੇਤ੍ਵਾ ਪਰਿਪੁਣ੍ਣਂ ਉਗ੍ਗਹਿਤਾ. ਅਤ੍ਥਮ੍ਪਿ ਪਾਲ਼ਿਮ੍ਪਿ ਵਿਸਂਵਾਦੇਤ੍ਵਾ ਸਬ੍ਬਸੋ ਵਾ ਪਨ ਅਪ੍ਪਗੁਣਂ ਕਤ੍ਵਾ ਭਣਨ੍ਤਸ੍ਸ ਹਿ ਪਰਿਤ੍ਤਂ ਤੇਜਵਨ੍ਤਂ ਨ ਹੋਤਿ, ਸਬ੍ਬਸੋ ਪਗੁਣਂ ਕਤ੍ਵਾ ਭਣਨ੍ਤਸ੍ਸੇਵ ਤੇਜਵਨ੍ਤਂ ਹੋਤਿ. ਲਾਭਹੇਤੁ ਉਗ੍ਗਹੇਤ੍ਵਾ ਭਣਨ੍ਤਸ੍ਸਾਪਿ ਅਤ੍ਥਂ ਨ ਸਾਧੇਤਿ, ਨਿਸ੍ਸਰਣਪਕ੍ਖੇ ਠਤ੍ਵਾ ਮੇਤ੍ਤਂ ਪੁਰੇਚਾਰਿਕਂ ਕਤ੍ਵਾ ਭਣਨ੍ਤਸ੍ਸੇਵ ਅਤ੍ਥਾਯ ਹੋਤੀਤਿ ਦਸ੍ਸੇਤਿ. ਯਕ੍ਖਪਚਾਰੋਤਿ ਯਕ੍ਖਪਰਿਚਾਰਕੋ.

ਵਤ੍ਥੁਂ ਵਾਤਿ ਘਰਵਤ੍ਥੁਂ ਵਾ. ਵਾਸਂ ਵਾਤਿ ਤਤ੍ਥ ਨਿਬਦ੍ਧਵਾਸਂ ਵਾ. ਸਮਿਤਿਨ੍ਤਿ ਸਮਾਗਮਂ. ਅਨਾਵਯ੍ਹਨ੍ਤਿ ਨ ਆਵਾਹਯੁਤ੍ਤਂ. ਅਵਿਵਯ੍ਹਨ੍ਤਿ ਨ ਵਿਵਾਹਯੁਤ੍ਤਂ. ਤੇਨ ਸਹ ਆਵਾਹਵਿਵਾਹਂ ਨ ਕਰੇਯ੍ਯੁਨ੍ਤਿ ਅਤ੍ਥੋ. ਅਤ੍ਤਾਹਿਪਿ ਪਰਿਪੁਣ੍ਣਾਹੀਤਿ ‘‘ਕਲ਼ਾਰਕ੍ਖਿ ਕਲ਼ਾਰਦਨ੍ਤਾ’’ਤਿ ਏਵਂ ਏਤੇਸਂ ਅਤ੍ਤਭਾਵਂ ਉਪਨੇਤ੍ਵਾ ਵੁਤ੍ਤਾਹਿ ਪਰਿਪੁਣ੍ਣਬ੍ਯਞ੍ਜਨਾਹਿ ਪਰਿਭਾਸਾਹਿ ਪਰਿਭਾਸੇਯ੍ਯੁਂ ਯਕ੍ਖਅਕ੍ਕੋਸੇਹਿ ਨਾਮ ਅਕ੍ਕੋਸੇਯ੍ਯੁਨ੍ਤਿ ਅਤ੍ਥੋ. ਰਿਤ੍ਤਮ੍ਪਿਸ੍ਸ ਪਤ੍ਤਨ੍ਤਿ ਭਿਕ੍ਖੂਨਂ ਪਤ੍ਤਸਦਿਸਮੇਵ ਲੋਹਪਤ੍ਤਂ ਹੋਤਿ. ਤਂ ਸੀਸੇ ਨਿਕ੍ਕੁਜ੍ਜਿਤਂ ਯਾਵ ਗਲਵਾਟਕਾ ਭਸ੍ਸਤਿ. ਅਥ ਨਂ ਮਜ੍ਝੇ ਅਯੋਖੀਲੇਨ ਆਕੋਟੇਨ੍ਤਿ.

ਚਣ੍ਡਾਤਿ ਕੋਧਨਾ. ਰੁਦ੍ਧਾਤਿ ਵਿਰੁਦ੍ਧਾ. ਰਭਸਾਤਿ ਕਰਣੁਤ੍ਤਰਿਯਾ. ਨੇਵ ਮਹਾਰਾਜਾਨਂ ਆਦਿਯਨ੍ਤੀਤਿ ਵਚਨਂ ਨ ਗਣ੍ਹਨ੍ਤਿ, ਆਣਂ ਨ ਕਰੋਨ੍ਤਿ. ਮਹਾਰਾਜਾਨਂ ਪੁਰਿਸਕਾਨਨ੍ਤਿ ਅਟ੍ਠਵੀਸਤਿਯਕ੍ਖਸੇਨਾਪਤੀਨਂ. ਪੁਰਿਸਕਾਨਨ੍ਤਿ ਯਕ੍ਖਸੇਨਾਪਤੀਨਂ ਯੇ ਮਨਸ੍ਸਾ ਤੇਸਂ. ਅਵਰੁਦ੍ਧਾ ਨਾਮਾਤਿ ਪਚ੍ਚਾਮਿਤ੍ਤਾ ਵੇਰਿਨੋ. ਉਜ੍ਝਾਪੇਤਬ੍ਬਨ੍ਤਿ ਪਰਿਤ੍ਤਂ ਵਤ੍ਵਾ ਅਮਨੁਸ੍ਸੇ ਪਟਿਕ੍ਕਮਾਪੇਤੁਂ ਅਸਕ੍ਕੋਨ੍ਤੇਨ ਏਤੇਸਂ ਯਕ੍ਖਾਨਂ ਉਜ੍ਝਾਪੇਤਬ੍ਬਂ, ਏਤੇ ਜਾਨਾਪੇਤਬ੍ਬਾਤਿ ਅਤ੍ਥੋ.

ਪਰਿਤ੍ਤਪਰਿਕਮ੍ਮਕਥਾ

ਇਧ ਪਨ ਠਤ੍ਵਾ ਪਰਿਤ੍ਤਸ੍ਸ ਪਰਿਕਮ੍ਮਂ ਕਥੇਤਬ੍ਬਂ. ਪਠਮਮੇਵ ਹਿ ਆਟਾਨਾਟਿਯਸੁਤ੍ਤਂ ਨ ਭਣਿਤਬ੍ਬਂ, ਮੇਤ੍ਤਸੁਤ੍ਤਂ ਧਜਗ੍ਗਸੁਤ੍ਤਂ ਰਤਨਸੁਤ੍ਤਨ੍ਤਿ ਇਮਾਨਿ ਸਤ੍ਤਾਹਂ ਭਣਿਤਬ੍ਬਾਨਿ. ਸਚੇ ਮੁਞ੍ਚਤਿ, ਸੁਨ੍ਦਰਂ. ਨੋ ਚੇ ਮੁਞ੍ਚਤਿ, ਆਟਾਨਾਟਿਯਸੁਤ੍ਤਂ ਭਣਿਤਬ੍ਬਂ, ਤਂ ਭਣਨ੍ਤੇਨ ਭਿਕ੍ਖੁਨਾ ਪਿਟ੍ਠਂ ਵਾ ਮਂਸਂ ਵਾ ਨ ਖਾਦਿਤਬ੍ਬਂ, ਸੁਸਾਨੇ ਨ ਵਸਿਤਬ੍ਬਂ. ਕਸ੍ਮਾ? ਅਮਨੁਸ੍ਸਾ ਓਕਾਸਂ ਲਭਨ੍ਤਿ. ਪਰਿਤ੍ਤਕਰਣਟ੍ਠਾਨਂ ਹਰਿਤੁਪਲਿਤ੍ਤਂ ਕਾਰੇਤ੍ਵਾ ਤਤ੍ਥ ਪਰਿਸੁਦ੍ਧਂ ਆਸਨਂ ਪਞ੍ਞਪੇਤ੍ਵਾ ਨਿਸੀਦਿਤਬ੍ਬਂ.

ਪਰਿਤ੍ਤਕਾਰਕੋ ਭਿਕ੍ਖੁ ਵਿਹਾਰਤੋ ਘਰਂ ਨੇਨ੍ਤੇਹਿ ਫਲਕਾਵੁਧੇਹਿ ਪਰਿਵਾਰੇਤ੍ਵਾ ਨੇਤਬ੍ਬੋ. ਅਬ੍ਭੋਕਾਸੇ ਨਿਸੀਦਿਤ੍ਵਾ ਨ ਵਤ੍ਤਬ੍ਬਂ, ਦ੍ਵਾਰਵਾਤਪਾਨਾਨਿ ਪਿਦਹਿਤ੍ਵਾ ਨਿਸਿਨ੍ਨੇਨ ਆਵੁਧਹਤ੍ਥੇਹਿ ਸਂਪਰਿਵਾਰਿਤੇਨ ਮੇਤ੍ਤਚਿਤ੍ਤਂ ਪੁਰੇਚਾਰਿਕਂ ਕਤ੍ਵਾ ਵਤ੍ਤਬ੍ਬਂ. ਪਠਮਂ ਸਿਕ੍ਖਾਪਦਾਨਿ ਗਾਹਾਪੇਤ੍ਵਾ ਸੀਲੇ ਪਤਿਟ੍ਠਿਤਸ੍ਸ ਪਰਿਤ੍ਤਂ ਕਾਤਬ੍ਬਂ. ਏਵਮ੍ਪਿ ਮੋਚੇਤੁਂ ਅਸਕ੍ਕੋਨ੍ਤੇਨ ਵਿਹਾਰਂ ਆਨੇਤ੍ਵਾ ਚੇਤਿਯਙ੍ਗਣੇ ਨਿਪਜ੍ਜਾਪੇਤ੍ਵਾ ਆਸਨਪੂਜਂ ਕਾਰੇਤ੍ਵਾ ਦੀਪੇ ਜਾਲਾਪੇਤ੍ਵਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਮਙ੍ਗਲਕਥਾ ਵਤ੍ਤਬ੍ਬਾ. ਸਬ੍ਬਸਨ੍ਨਿਪਾਤੋ ਘੋਸੇਤਬ੍ਬੋ. ਵਿਹਾਰਸ੍ਸ ਉਪਵਨੇ ਜੇਟ੍ਠਕਰੁਕ੍ਖੋ ਨਾਮ ਹੋਤਿ, ਤਤ੍ਥ ਭਿਕ੍ਖੁਸਙ੍ਘੋ ਤੁਮ੍ਹਾਕਂ ਆਗਮਨਂ ਪਟਿਮਾਨੇਤੀਤਿ ਪਹਿਣਿਤਬ੍ਬਂ. ਸਬ੍ਬਸਨ੍ਨਿਪਾਤਟ੍ਠਾਨੇ ਅਨਾਗਨ੍ਤੁਂ ਨਾਮ ਨ ਲਬ੍ਭਤਿ. ਤਤੋ ਅਮਨੁਸ੍ਸਗਹਿਤਕੋ ‘‘ਤ੍ਵਂ ਕੋ ਨਾਮਾ’’ਤਿ ਪੁਚ੍ਛਿਤਬ੍ਬੋ. ਨਾਮੇ ਕਥਿਤੇ ਨਾਮੇਨੇਵ ਆਲਪਿਤਬ੍ਬੋ. ਇਤ੍ਥਨ੍ਨਾਮ ਤੁਯ੍ਹਂ ਮਾਲਾਗਨ੍ਧਾਦੀਸੁ ਪਤ੍ਤਿ ਆਸਨਪੂਜਾਯ ਪਤ੍ਤਿ ਪਿਣ੍ਡਪਾਤੇ ਪਤ੍ਤਿ, ਭਿਕ੍ਖੁਸਙ੍ਘੇਨ ਤੁਯ੍ਹਂ ਪਣ੍ਣਾਕਾਰਤ੍ਥਾਯ ਮਹਾਮਙ੍ਗਲਕਥਾ ਵੁਤ੍ਤਾ, ਭਿਕ੍ਖੁਸਙ੍ਘੇ ਗਾਰਵੇਨ ਏਤਂ ਮੁਞ੍ਚਾਹੀਤਿ ਮੋਚੇਤਬ੍ਬੋ. ਸਚੇ ਨ ਮੁਞ੍ਚਤਿ, ਦੇਵਤਾਨਂ ਆਰੋਚੇਤਬ੍ਬਂ ‘‘ਤੁਮ੍ਹੇ ਜਾਨਾਥ, ਅਯਂ ਅਮਨੁਸ੍ਸੋ ਅਮ੍ਹਾਕਂ ਵਚਨਂ ਨ ਕਰੋਤਿ, ਮਯਂ ਬੁਦ੍ਧਆਣਂ ਕਰਿਸ੍ਸਾਮਾ’’ਤਿ ਪਰਿਤ੍ਤਂ ਕਾਤਬ੍ਬਂ. ਏਤਂ ਤਾਵ ਗਿਹੀਨਂ ਪਰਿਕਮ੍ਮਂ. ਸਚੇ ਪਨ ਭਿਕ੍ਖੁ ਅਮਨੁਸ੍ਸੇਨ ਗਹਿਤੋ ਹੋਤਿ, ਆਸਨਾਨਿ ਧੋਵਿਤ੍ਵਾ ਸਬ੍ਬਸਨ੍ਨਿਪਾਤਂ ਘੋਸਾਪੇਤ੍ਵਾ ਗਨ੍ਧਮਾਲਾਦੀਸੁ ਪਤ੍ਤਿਂ ਦਤ੍ਵਾ ਪਰਿਤ੍ਤਂ ਭਣਿਤਬ੍ਬਂ. ਇਦਂ ਭਿਕ੍ਖੂਨਂ ਪਰਿਕਮ੍ਮਂ.

ਵਿਕ੍ਕਨ੍ਦਿਤਬ੍ਬਨ੍ਤਿ ਸਬ੍ਬਸਨ੍ਨਿਪਾਤਂ ਘੋਸਾਪੇਤ੍ਵਾ ਅਟ੍ਠਵੀਸਤਿ ਯਕ੍ਖਸੇਨਾਪਤਯੋ ਕਨ੍ਦਿਤਬ੍ਬਾ. ਵਿਰਵਿਤਬ੍ਬਨ੍ਤਿ ‘‘ਅਯਂ ਯਕ੍ਖੋ ਗਣ੍ਹਾਤੀ’’ਤਿਆਦੀਨਿ ਭਣਨ੍ਤੇਨ ਤੇਹਿ ਸਦ੍ਧਿਂ ਕਥੇਤਬ੍ਬਂ. ਤਤ੍ਥ ਗਣ੍ਹਾਤੀਤਿ ਸਰੀਰੇ ਅਧਿਮੁਚ੍ਚਤਿ. ਆਵਿਸਤੀਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਲਗ੍ਗਤਿ ਨ ਅਪੇਤੀਤਿ ਵੁਤ੍ਤਂ ਹੋਤਿ. ਹੇਠੇਤੀਤਿ ਉਪ੍ਪਨ੍ਨਂ ਰੋਗਂ ਵਡ੍ਢੇਨ੍ਤੋ ਬਾਧਤਿ. ਵਿਹੇਠੇਤੀਤਿ ਤਸ੍ਸੇਵ ਵੇਵਚਨਂ. ਹਿਂਸਤੀਤਿ ਅਪ੍ਪਮਂਸਲੋਹਿਤਂ ਕਰੋਨ੍ਤੋ ਦੁਕ੍ਖਾਪੇਤਿ. ਵਿਹਿਂਸਤੀਤਿ ਤਸ੍ਸੇਵ ਵੇਵਚਨਂ. ਨ ਮੁਞ੍ਚਤੀਤਿ ਅਪ੍ਪਮਾਦਗਾਹੋ ਹੁਤ੍ਵਾ ਮੁਞ੍ਚਿਤੁਂ ਨ ਇਚ੍ਛਤਿ, ਏਵਂ ਏਤੇਸਂ ਵਿਰਵਿਤਬ੍ਬਂ.

੨੮੩. ਇਦਾਨਿ ਯੇਸਂ ਏਵਂ ਵਿਰਵਿਤਬ੍ਬਂ, ਤੇ ਦਸ੍ਸੇਤੁਂ ਕਤਮੇਸਂ ਯਕ੍ਖਾਨਨ੍ਤਿਆਦਿਮਾਹ. ਤਤ੍ਥ ਇਨ੍ਦੋ ਸੋਮੋਤਿਆਦੀਨਿ ਤੇਸਂ ਨਾਮਾਨਿ. ਤੇਸੁ ਵੇਸ੍ਸਾਮਿਤ੍ਤੋਤਿ ਵੇਸ੍ਸਾਮਿਤ੍ਤਪਬ੍ਬਤਵਾਸੀ ਏਕੋ ਯਕ੍ਖੋ. ਯੁਗਨ੍ਧਰੋਪਿ ਯੁਗਨ੍ਧਰਪਬ੍ਬਤਵਾਸੀਯੇਵ. ਹਿਰਿ ਨੇਤ੍ਤਿ ਚ ਮਨ੍ਦਿਯੋਤਿ ਹਿਰਿ ਚ ਨੇਤ੍ਤਿ ਚ ਮਨ੍ਦਿਯੋ ਚ. ਮਣਿ ਮਾਣਿ ਵਰੋ ਦੀਘੋਤਿ ਮਣਿ ਚ ਮਾਣਿ ਚ ਵਰੋ ਚ ਦੀਘੋ ਚ. ਅਥੋ ਸੇਰੀਸਕੋ ਸਹਾਤਿ ਤੇਹਿ ਸਹ ਅਞ੍ਞੋ ਸੇਰੀਸਕੋ ਨਾਮ. ‘‘ਇਮੇਸਂ ਯਕ੍ਖਾਨਂ…ਪੇ… ਉਜ੍ਝਾਪੇਤਬ੍ਬ’’ਨ੍ਤਿ ਅਯਂ ਯਕ੍ਖੋ ਇਮਂ ਹੇਠੇਤਿ ਵਿਹੇਠੇਤਿ ਨ ਮੁਞ੍ਚਤੀਤਿ ਏਵਂ ਏਤੇਸਂ ਯਕ੍ਖਸੇਨਾਪਤੀਨਂ ਆਰੋਚੇਤਬ੍ਬਂ. ਤਤੋ ਤੇ ਭਿਕ੍ਖੁਸਙ੍ਘੋ ਅਤ੍ਤਨੋ ਧਮ੍ਮਆਣਂ ਕਰੋਤਿ, ਮਯਮ੍ਪਿ ਅਮ੍ਹਾਕਂ ਯਕ੍ਖਰਾਜਆਣਂ ਕਰੋਮਾਤਿ ਉਸ੍ਸੁਕ੍ਕਂ ਕਰਿਸ੍ਸਨ੍ਤਿ. ਏਵਂ ਅਮਨੁਸ੍ਸਾਨਂ ਓਕਾਸੋ ਨ ਭਵਿਸ੍ਸਤਿ, ਬੁਦ੍ਧਸਾਵਕਾਨਂ ਫਾਸੁਵਿਹਾਰੋ ਚ ਭਵਿਸ੍ਸਤੀਤਿ ਦਸ੍ਸੇਨ੍ਤੋ ‘‘ਅਯਂ ਖੋ ਸਾ, ਮਾਰਿਸ, ਆਟਾਨਾਟਿਯਾ ਰਕ੍ਖਾ’’ਤਿਆਦਿਮਾਹ. ਤਂ ਸਬ੍ਬਂ, ਤਤੋ ਪਰਞ੍ਚ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਆਟਾਨਾਟਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਸਙ੍ਗੀਤਿਸੁਤ੍ਤਵਣ੍ਣਨਾ

੨੯੬. ਏਵਂ ਮੇ ਸੁਤਨ੍ਤਿ ਸਙ੍ਗੀਤਿਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਚਾਰਿਕਂ ਚਰਮਾਨੋਤਿ ਨਿਬਦ੍ਧਚਾਰਿਕਂ ਚਰਮਾਨੋ. ਤਦਾ ਕਿਰ ਸਤ੍ਥਾ ਦਸਸਹਸ੍ਸਚਕ੍ਕਵਾਲ਼ੇ ਞਾਣਜਾਲਂ ਪਤ੍ਥਰਿਤ੍ਵਾ ਲੋਕਂ ਵੋਲੋਕਯਮਾਨੋ ਪਾਵਾਨਗਰਵਾਸਿਨੋ ਮਲ੍ਲਰਾਜਾਨੋ ਦਿਸ੍ਵਾ ਇਮੇ ਰਾਜਾਨੋ ਮਯ੍ਹਂ ਸਬ੍ਬਞ੍ਞੁਤਞ੍ਞਾਣਜਾਲਸ੍ਸ ਅਨ੍ਤੋ ਪਞ੍ਞਾਯਨ੍ਤਿ, ਕਿਂ ਨੁ ਖੋਤਿ ਆਵਜ੍ਜਨ੍ਤੋ ‘‘ਰਾਜਾਨੋ ਏਕਂ ਸਨ੍ਧਾਗਾਰਂ ਕਾਰੇਸੁਂ, ਮਯਿ ਗਤੇ ਮਙ੍ਗਲਂ ਭਣਾਪੇਸ੍ਸਨ੍ਤਿ, ਅਹਂ ਤੇਸਂ ਮਙ੍ਗਲਂ ਵਤ੍ਵਾ ਉਯ੍ਯੋਜੇਤ੍ਵਾ ‘ਭਿਕ੍ਖੁਸਙ੍ਘਸ੍ਸ ਧਮ੍ਮਕਥਂ ਕਥੇਹੀ’ਤਿ ਸਾਰਿਪੁਤ੍ਤਂ ਵਕ੍ਖਾਮਿ, ਸਾਰਿਪੁਤ੍ਤੋ ਤੀਹਿ ਪਿਟਕੇਹਿ ਸਮ੍ਮਸਿਤ੍ਵਾ ਚੁਦ੍ਦਸਪਞ੍ਹਾਧਿਕੇਨ ਪਞ੍ਹਸਹਸ੍ਸੇਨ ਪਟਿਮਣ੍ਡੇਤ੍ਵਾ ਭਿਕ੍ਖੁਸਙ੍ਘਸ੍ਸ ਸਙ੍ਗੀਤਿਸੁਤ੍ਤਂ ਨਾਮ ਕਥੇਸ੍ਸਤਿ, ਸੁਤ੍ਤਨ੍ਤਂ ਆਵਜ੍ਜੇਤ੍ਵਾ ਪਞ੍ਚ ਭਿਕ੍ਖੁਸਤਾਨਿ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਸ੍ਸਨ੍ਤੀ’’ਤਿ ਇਮਮਤ੍ਥਂ ਦਿਸ੍ਵਾ ਚਾਰਿਕਂ ਪਕ੍ਕਨ੍ਤੋ. ਤੇਨ ਵੁਤ੍ਤਂ – ‘‘ਮਲ੍ਲੇਸੁ ਚਾਰਿਕਂ ਚਰਮਾਨੋ’’ਤਿ.

ਉਬ੍ਭਤਕਨਵਸਨ੍ਧਾਗਾਰਵਣ੍ਣਨਾ

੨੯੭. ਉਬ੍ਭਤਕਨ੍ਤਿ ਤਸ੍ਸ ਨਾਮਂ, ਉਚ੍ਚਤ੍ਤਾ ਵਾ ਏਵਂ ਵੁਤ੍ਤਂ. ਸਨ੍ਧਾਗਾਰਨ੍ਤਿ ਨਗਰਮਜ੍ਝੇ ਸਨ੍ਧਾਗਾਰਸਾਲਾ. ਸਮਣੇਨ ਵਾਤਿ ਏਤ੍ਥ ਯਸ੍ਮਾ ਘਰਵਤ੍ਥੁਪਰਿਗ੍ਗਹਕਾਲੇਯੇਵ ਦੇਵਤਾ ਅਤ੍ਤਨੋ ਵਸਨਟ੍ਠਾਨਂ ਗਣ੍ਹਨ੍ਤਿ. ਤਸ੍ਮਾ ਦੇਵੇਨ ਵਾਤਿ ਅਵਤ੍ਵਾ ‘‘ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਕੇਨਚਿ ਵਾ ਮਨੁਸ੍ਸਭੂਤੇਨਾ’’ਤਿ ਵੁਤ੍ਤਂ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਭਗਵਤੋ ਆਗਮਨਂ ਸੁਤ੍ਵਾ ‘‘ਅਮ੍ਹੇਹਿ ਗਨ੍ਤ੍ਵਾਪਿ ਨ ਭਗਵਾ ਆਨੀਤੋ, ਦੂਤਂ ਪੇਸੇਤ੍ਵਾਪਿ ਨ ਪਕ੍ਕੋਸਾਪਿਤੋ, ਸਯਮੇਵ ਪਨ ਮਹਾਭਿਕ੍ਖੁਸਙ੍ਘਪਰਿਵਾਰੋ ਅਮ੍ਹਾਕਂ ਵਸਨਟ੍ਠਾਨਂ ਸਮ੍ਪਤ੍ਤੋ, ਅਮ੍ਹੇਹਿ ਚ ਸਨ੍ਧਾਗਾਰਸਾਲਾ ਕਾਰਿਤਾ, ਏਤ੍ਥ ਮਯਂ ਦਸਬਲਂ ਆਨੇਤ੍ਵਾ ਮਙ੍ਗਲਂ ਭਣਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿਂਸੁ.

੨੯੮. ਯੇਨ ਸਨ੍ਧਾਗਾਰਂ ਤੇਨੁਪਸਙ੍ਕਮਿਂਸੂਤਿ ਤਂ ਦਿਵਸਂ ਕਿਰ ਸਨ੍ਧਾਗਾਰੇ ਚਿਤ੍ਤਕਮ੍ਮਂ ਨਿਟ੍ਠਪੇਤ੍ਵਾ ਅਟ੍ਟਕਾ ਮੁਤ੍ਤਮਤ੍ਤਾ ਹੋਨ੍ਤਿ, ਬੁਦ੍ਧਾ ਚ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ, ਅਨ੍ਤੋਗਾਮੇ ਵਸੇਯ੍ਯੁਂ ਵਾ ਨੋ ਵਾ. ਤਸ੍ਮਾ ਭਗਵਤੋ ਮਨਂ ਜਾਨਿਤ੍ਵਾਵ ਪਟਿਜਗ੍ਗਿਸ੍ਸਾਮਾਤਿ ਚਿਨ੍ਤੇਤ੍ਵਾ ਤੇ ਭਗਵਨ੍ਤਂ ਉਪਸਙ੍ਕਮਿਂਸੁ. ਇਦਾਨਿ ਪਨ ਮਨਂ ਲਭਿਤ੍ਵਾ ਪਟਿਜਗ੍ਗਿਤੁਕਾਮਾ ਯੇਨ ਸਨ੍ਧਾਗਾਰਂ ਤੇਨੁਪਸਙ੍ਕਮਿਂਸੁ. ਸਬ੍ਬਸਨ੍ਥਰਿਨ੍ਤਿ ਯਥਾ ਸਬ੍ਬਂ ਸਨ੍ਥਤਂ ਹੋਤਿ, ਏਵਂ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਏਤ੍ਥ ਪਨ ਤੇ ਮਲ੍ਲਰਾਜਾਨੋ ਸਨ੍ਧਾਗਾਰਂ ਪਟਿਜਗ੍ਗਿਤ੍ਵਾ ਨਗਰਵੀਥਿਯੋਪਿ ਸਮ੍ਮਜ੍ਜਾਪੇਤ੍ਵਾ ਧਜੇ ਉਸ੍ਸਾਪੇਤ੍ਵਾ ਗੇਹਦ੍ਵਾਰੇਸੁ ਪੁਣ੍ਣਘਟੇ ਚ ਕਦਲਿਯੋ ਚ ਠਪਾਪੇਤ੍ਵਾ ਸਕਲਨਗਰਂ ਦੀਪਮਾਲਾਦੀਹਿ ਵਿਪ੍ਪਕਿਣ੍ਣਤਾਰਕਂ ਵਿਯ ਕਤ੍ਵਾ ਖੀਰਪਾਯਕੇ ਦਾਰਕੇ ਖੀਰਂ ਪਾਯ੍ਯੇਥ, ਦਹਰੇ ਕੁਮਾਰੇ ਲਹੁਂ ਲਹੁਂ ਭੋਜਾਪੇਤ੍ਵਾ ਸਯਾਪੇਥ, ਉਚ੍ਚਾਸਦ੍ਦਂ ਮਾ ਕਰਿਤ੍ਥ, ਅਜ੍ਜ ਏਕਰਤ੍ਤਿਂ ਸਤ੍ਥਾ ਅਨ੍ਤੋਗਾਮੇ ਵਸਿਸ੍ਸਤਿ, ਬੁਦ੍ਧਾ ਨਾਮ ਅਪ੍ਪਸਦ੍ਦਕਾਮਾ ਹੋਨ੍ਤੀਤਿ ਭੇਰਿਂ ਚਰਾਪੇਤ੍ਵਾ ਸਯਂ ਦਣ੍ਡਦੀਪਿਕਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ.

੨੯੯. ਭਗਵਨ੍ਤਂਯੇਵ ਪੁਰਕ੍ਖਤ੍ਵਾਤਿ ਭਗਵਨ੍ਤਂ ਪੁਰਤੋ ਕਤ੍ਵਾ. ਤਤ੍ਥ ਭਗਵਾ ਭਿਕ੍ਖੂਨਞ੍ਚੇਵ ਉਪਾਸਕਾਨਞ੍ਚ ਮਜ੍ਝੇ ਨਿਸਿਨ੍ਨੋ ਅਤਿਵਿਯ ਵਿਰੋਚਤਿ, ਸਮਨ੍ਤਪਾਸਾਦਿਕੋ ਸੁਵਣ੍ਣਵਣ੍ਣੋ ਅਭਿਰੂਪੋ ਦਸ੍ਸਨੀਯੋ. ਪੁਰਿਮਕਾਯਤੋ ਸੁਵਣ੍ਣਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਗਣ੍ਹਾਤਿ. ਪਚ੍ਛਿਮਕਾਯਤੋ. ਦਕ੍ਖਿਣਹਤ੍ਥਤੋ. ਵਾਮਹਤ੍ਥਤੋ ਸੁਵਣ੍ਣਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਗਣ੍ਹਾਤਿ. ਉਪਰਿ ਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਾਵਟ੍ਟੇਹਿ ਮੋਰਗੀਵਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਂ ਠਾਨਂ ਗਣ੍ਹਾਤਿ. ਹੇਟ੍ਠਾ ਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮਿ ਉਟ੍ਠਹਿਤ੍ਵਾ ਘਨਪਥਵਿਯਂ ਅਸੀਤਿਹਤ੍ਥਂ ਠਾਨਂ ਗਣ੍ਹਾਤਿ. ਏਵਂ ਸਮਨ੍ਤਾ ਅਸੀਤਿ ਹਤ੍ਥਮਤ੍ਤਂ ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਵਿਧਾਵਨ੍ਤਿ. ਸਬ੍ਬੇ ਦਿਸਾਭਾਗਾ ਸੁਵਣ੍ਣਚਮ੍ਪਕਪੁਪ੍ਫੇਹਿ ਵਿਕਿਰਿਯਮਾਨਾ ਵਿਯ ਸੁਵਣ੍ਣਘਟਤੋ ਨਿਕ੍ਖਨ੍ਤਸੁਵਣ੍ਣਰਸਧਾਰਾਹਿ ਸਿਞ੍ਚਮਾਨਾ ਵਿਯ ਪਸਾਰਿਤਸੁਵਣ੍ਣਪਟਪਰਿਕ੍ਖਿਤ੍ਤਾ ਵਿਯ ਵੇਰਮ੍ਭਵਾਤਸਮੁਟ੍ਠਿਤਕਿਂਸੁਕਕਣਿਕਾਰਪੁਪ੍ਫਚੁਣ੍ਣਸਮਾਕਿਣ੍ਣਾ ਵਿਯ ਚ ਵਿਪ੍ਪਕਾਸਨ੍ਤਿ.

ਭਗਵਤੋਪਿ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਦ੍ਵਤ੍ਤਿਂਸਵਰਲਕ੍ਖਣਸਮੁਜ੍ਜਲਂ ਸਰੀਰਂ ਸਮੁਗ੍ਗਤਤਾਰਕਂ ਵਿਯ ਗਗਨਤਲਂ, ਵਿਕਸਿਤਮਿਵ ਪਦੁਮਵਨਂ, ਸਬ੍ਬਪਾਲਿਫੁਲ੍ਲੋ ਵਿਯ ਯੋਜਨਸਤਿਕੋ ਪਾਰਿਚ੍ਛਤ੍ਤਕੋ ਪਟਿਪਾਟਿਯਾ ਠਪਿਤਾਨਂ ਦ੍ਵਤ੍ਤਿਂਸਚਨ੍ਦਾਨਂ ਦ੍ਵਤ੍ਤਿਂਸਸੂਰਿਯਾਨਂ ਦ੍ਵਤ੍ਤਿਂਸਚਕ੍ਕਵਤ੍ਤਿਰਾਜਾਨਂ ਦ੍ਵਤ੍ਤਿਂਸਦੇਵਰਾਜਾਨਂ ਦ੍ਵਤ੍ਤਿਂਸਮਹਾਬ੍ਰਹ੍ਮਾਨਂ ਸਿਰਿਯਾ ਸਿਰਿਂ ਅਭਿਭਵਮਾਨਂ ਵਿਯ ਵਿਰੋਚਤਿ. ਪਰਿਵਾਰੇਤ੍ਵਾ ਨਿਸਿਨ੍ਨਾ ਭਿਕ੍ਖੂਪਿ ਸਬ੍ਬੇਵ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਅਸਂਸਟ੍ਠਾ ਆਰਦ੍ਧਵੀਰਿਯਾ ਵਤ੍ਤਾਰੋ ਵਚਨਕ੍ਖਮਾ ਚੋਦਕਾ ਪਾਪਗਰਹਿਨੋ ਸੀਲਸਮ੍ਪਨ੍ਨਾ ਸਮਾਧਿਸਮ੍ਪਨ੍ਨਾ ਪਞ੍ਞਾਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ. ਤੇਹਿ ਪਰਿਵਾਰਿਤੋ ਭਗਵਾ ਰਤ੍ਤਕਮ੍ਬਲਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਕ੍ਖਨ੍ਧੋ, ਰਤ੍ਤਪਦੁਮਵਨਸਣ੍ਡਮਜ੍ਝਗਤਾ ਵਿਯ ਸੁਵਣ੍ਣਨਾਵਾ, ਪਵਾਲ਼ਵੇਦਿਕਾਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਪਾਸਾਦੋ ਵਿਰੋਚਿਤ੍ਥ.

ਅਸੀਤਿਮਹਾਥੇਰਾਪਿ ਨਂ ਮੇਘਵਣ੍ਣਂ ਪਂਸੁਕੂਲਂ ਪਾਰੁਪਿਤ੍ਵਾ ਮਣਿਵਮ੍ਮਵਮ੍ਮਿਤਾ ਵਿਯ ਮਹਾਨਾਗਾ ਪਰਿਵਾਰਯਿਂਸੁ ਵਨ੍ਤਰਾਗਾ ਭਿਨ੍ਨਕਿਲੇਸਾ ਵਿਜਟਿਤਜਟਾ ਛਿਨ੍ਨਬਨ੍ਧਨਾ ਕੁਲੇ ਵਾ ਗਣੇ ਵਾ ਅਲਗ੍ਗਾ. ਇਤਿ ਭਗਵਾ ਸਯਂ ਵੀਤਰਾਗੋ ਵੀਤਰਾਗੇਹਿ, ਵੀਤਦੋਸੋ ਵੀਤਦੋਸੇਹਿ, ਵੀਤਮੋਹੋ ਵੀਤਮੋਹੇਹਿ, ਨਿਤ੍ਤਣ੍ਹੋ ਨਿਤ੍ਤਣ੍ਹੇਹਿ, ਨਿਕ੍ਕਿਲੇਸੋ ਨਿਕ੍ਕਿਲੇਸੇਹਿ, ਸਯਂ ਬੁਦ੍ਧੋ ਬਹੁਸ੍ਸੁਤਬੁਦ੍ਧੇਹਿ ਪਰਿਵਾਰਿਤੋ ਪਤ੍ਤਪਰਿਵਾਰਿਤਂ ਵਿਯ ਕੇਸਰਂ, ਕੇਸਰਪਰਿਵਾਰਿਤਾ ਵਿਯ ਕਣ੍ਣਿਕਾ, ਅਟ੍ਠਨਾਗਸਹਸ੍ਸਪਰਿਵਾਰਿਤੋ ਵਿਯ ਛਦ੍ਦਨ੍ਤੋ ਨਾਗਰਾਜਾ, ਨਵੁਤਿਹਂਸਸਹਸ੍ਸਪਰਿਵਾਰਿਤੋ ਵਿਯ ਧਤਰਟ੍ਠੋ ਹਂਸਰਾਜਾ, ਸੇਨਙ੍ਗਪਰਿਵਾਰਿਤੋ ਵਿਯ ਚਕ੍ਕਵਤ੍ਤਿਰਾਜਾ, ਮਰੁਗਣਪਰਿਵਾਰਿਤੋ ਵਿਯ ਸਕ੍ਕੋ ਦੇਵਰਾਜਾ, ਬ੍ਰਹ੍ਮਗਣਪਰਿਵਾਰਿਤੋ ਵਿਯ ਹਾਰਿਤੋ ਮਹਾਬ੍ਰਹ੍ਮਾ, ਅਸਮੇਨ ਬੁਦ੍ਧਵੇਸੇਨ ਅਪਰਿਮਾਣੇਨ ਬੁਦ੍ਧਵਿਲਾਸੇਨ ਤਸ੍ਸਂ ਪਰਿਸਤਿ ਨਿਸਿਨ੍ਨੋ ਪਾਵੇਯ੍ਯਕੇ ਮਲ੍ਲੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਉਯ੍ਯੋਜੇਸਿ.

ਏਤ੍ਥ ਚ ਧਮ੍ਮਿਕਥਾ ਨਾਮ ਸਨ੍ਧਾਗਾਰਅਨੁਮੋਦਨਪ੍ਪਟਿਸਂਯੁਤ੍ਤਾ ਪਕਿਣ੍ਣਕਕਥਾ ਵੇਦਿਤਬ੍ਬਾ. ਤਦਾ ਹਿ ਭਗਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਪਥਵੋਜਂ ਆਕਡ੍ਢਨ੍ਤੋ ਵਿਯ ਮਹਾਜਮ੍ਬੁਂ ਮਤ੍ਥਕੇ ਗਹੇਤ੍ਵਾ ਚਾਲੇਨ੍ਤੋ ਵਿਯ ਯੋਜਨਿਯਮਧੁਗਣ੍ਡਂ ਚਕ੍ਕਯਨ੍ਤੇਨ ਪੀਲ਼ੇਤ੍ਵਾ ਮਧੁਪਾਨਂ ਪਾਯਮਾਨੋ ਵਿਯ ਚ ਪਾਵੇਯ੍ਯਕਾਨਂ ਮਲ੍ਲਾਨਂ ਹਿਤਸੁਖਾਵਹਂ ਪਕਿਣ੍ਣਕਕਥਂ ਕਥੇਸਿ.

੩੦੦. ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਂ ਯਂ ਦਿਸਂ ਅਨੁਵਿਲੋਕੇਤਿ, ਤਤ੍ਥ ਤਤ੍ਥ ਤੁਣ੍ਹੀਭੂਤਮੇਵ. ਅਨੁਵਿਲੋਕੇਤ੍ਵਾਤਿ ਮਂਸਚਕ੍ਖੁਨਾ ਦਿਬ੍ਬਚਕ੍ਖੁਨਾਤਿ ਦ੍ਵੀਹਿ ਚਕ੍ਖੂਹਿ ਤਤੋ ਤਤੋ ਵਿਲੋਕੇਤ੍ਵਾ. ਮਂਸਚਕ੍ਖੁਨਾ ਹਿ ਨੇਸਂ ਬਹਿਦ੍ਧਾ ਇਰਿਯਾਪਥਂ ਪਰਿਗ੍ਗਹੇਸਿ. ਤਤ੍ਥ ਏਕਭਿਕ੍ਖੁਸ੍ਸਾਪਿ ਨੇਵ ਹਤ੍ਥਕੁਕ੍ਕੁਚ੍ਚਂ ਨ ਪਾਦਕੁਕ੍ਕੁਚ੍ਚਂ ਅਹੋਸਿ, ਨ ਕੋਚਿ ਸੀਸਮੁਕ੍ਖਿਪਿ, ਨ ਕਥਂ ਕਥੇਸਿ, ਨ ਨਿਦ੍ਦਾਯਨ੍ਤੋ ਨਿਸੀਦਿ. ਸਬ੍ਬੇਪਿ ਤੀਹਿ ਸਿਕ੍ਖਾਹਿ ਸਿਕ੍ਖਿਤਾ ਨਿਵਾਤੇ ਪਦੀਪਸਿਖਾ ਵਿਯ ਨਿਚ੍ਚਲਾ ਨਿਸੀਦਿਂਸੁ. ਇਤਿ ਨੇਸਂ ਇਮਂ ਇਰਿਯਾਪਥਂ ਮਂਸਚਕ੍ਖੁਨਾ ਪਰਿਗ੍ਗਹੇਸਿ. ਆਲੋਕਂ ਪਨ ਵਡ੍ਢਯਿਤ੍ਵਾ ਦਿਬ੍ਬਚਕ੍ਖੁਨਾ ਹਦਯਰੂਪਂ ਦਿਸ੍ਵਾ ਅਬ੍ਭਨ੍ਤਰਗਤਂ ਸੀਲਂ ਓਲੋਕੇਸਿ. ਸੋ ਅਨੇਕਸਤਾਨਂ ਭਿਕ੍ਖੂਨਂ ਅਨ੍ਤੋਕੁਮ੍ਭਿਯਂ ਜਲਮਾਨਂ ਪਦੀਪਂ ਵਿਯ ਅਰਹਤ੍ਤੁਪਗਂ ਸੀਲਂ ਅਦ੍ਦਸ. ਆਰਦ੍ਧਵਿਪਸ੍ਸਕਾ ਹਿ ਤੇ ਭਿਕ੍ਖੂ. ਇਤਿ ਨੇਸਂ ਸੀਲਂ ਦਿਸ੍ਵਾ ‘‘ਇਮੇਪਿ ਭਿਕ੍ਖੂ ਮਯ੍ਹਂ ਅਨੁਚ੍ਛਵਿਕਾ, ਅਹਮ੍ਪਿ ਇਮੇਸਂ ਅਨੁਚ੍ਛਵਿਕੋ’’ਤਿ ਚਕ੍ਖੁਤਲੇਸੁ ਨਿਮਿਤ੍ਤਂ ਠਪੇਤ੍ਵਾ ਭਿਕ੍ਖੁਸਙ੍ਘਂ ਓਲੋਕੇਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਆਮਨ੍ਤੇਸਿ ‘‘ਪਿਟ੍ਠਿ ਮੇ ਆਗਿਲਾਯਤੀ’’ਤਿ. ਕਸ੍ਮਾ ਆਗਿਲਾਯਤਿ? ਭਗਵਤੋ ਹਿ ਛਬ੍ਬਸ੍ਸਾਨਿ ਮਹਾਪਧਾਨਂ ਪਦਹਨ੍ਤਸ੍ਸ ਮਹਨ੍ਤਂ ਕਾਯਦੁਕ੍ਖਂ ਅਹੋਸਿ. ਅਥਸ੍ਸ ਅਪਰਭਾਗੇ ਮਹਲ੍ਲਕਕਾਲੇ ਪਿਟ੍ਠਿਵਾਤੋ ਉਪ੍ਪਜ੍ਜਿ.

ਸਙ੍ਘਾਟਿਂ ਪਞ੍ਞਾਪੇਤ੍ਵਾਤਿ ਸਨ੍ਧਾਗਾਰਸ੍ਸ ਕਿਰ ਏਕਪਸ੍ਸੇ ਤੇ ਰਾਜਾਨੋ ਕਪ੍ਪਿਯਮਞ੍ਚਕਂ ਪਞ੍ਞਪੇਸੁਂ ‘‘ਅਪ੍ਪੇਵ ਨਾਮ ਸਤ੍ਥਾ ਨਿਪਜ੍ਜੇਯ੍ਯਾ’’ਤਿ. ਸਤ੍ਥਾਪਿ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਇਮੇਸਂ ਮਹਪ੍ਫਲਂ ਭਵਿਸ੍ਸਤੀਤਿ ਤਤ੍ਥ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਨਿਪਜ੍ਜਿ.

ਭਿਨ੍ਨਨਿਗਣ੍ਠਵਤ੍ਥੁਵਣ੍ਣਨਾ

੩੦੧. ਤਸ੍ਸ ਕਾਲਙ੍ਕਿਰਿਯਾਯਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਮੇਵ.

੩੦੨. ਆਮਨ੍ਤੇਸੀਤਿ ਭਣ੍ਡਨਾਦਿਵੂਪਸਮਕਰਂ ਸ੍ਵਾਖ੍ਯਾਤਂ ਧਮ੍ਮਂ ਦੇਸੇਤੁਕਾਮੋ ਆਮਨ੍ਤੇਸਿ.

ਏਕਕਵਣ੍ਣਨਾ

੩੦੩. ਤਤ੍ਥਾਤਿ ਤਸ੍ਮਿਂ ਧਮ੍ਮੇ. ਸਙ੍ਗਾਯਿਤਬ੍ਬਨ੍ਤਿ ਸਮਗ੍ਗੇਹਿ ਗਾਯਿਤਬ੍ਬਂ, ਏਕਵਚਨੇਹਿ ਅਵਿਰੁਦ੍ਧਵਚਨੇਹਿ ਭਣਿਤਬ੍ਬਂ. ਨ ਵਿਵਦਿਤਬ੍ਬਨ੍ਤਿ ਅਤ੍ਥੇ ਵਾ ਬ੍ਯਞ੍ਜਨੇ ਵਾ ਵਿਵਾਦੋ ਨ ਕਾਤਬ੍ਬੋ. ਏਕੋ ਧਮ੍ਮੋਤਿ ਏਕਕਦੁਕਤਿਕਾਦਿਵਸੇਨ ਬਹੁਧਾ ਸਾਮਗ੍ਗਿਰਸਂ ਦਸ੍ਸੇਤੁਕਾਮੋ ਪਠਮਂ ਤਾਵ ‘‘ਏਕੋ ਧਮ੍ਮੋ’’ਤਿ ਆਹ. ਸਬ੍ਬੇ ਸਤ੍ਤਾਤਿ ਕਾਮਭਵਾਦੀਸੁ ਸਞ੍ਞਾਭਵਾਦੀਸੁ ਏਕਵੋਕਾਰਭਵਾਦੀਸੁ ਚ ਸਬ੍ਬਭਵੇਸੁ ਸਬ੍ਬੇ ਸਤ੍ਤਾ. ਆਹਾਰਟ੍ਠਿਤਿਕਾਤਿ ਆਹਾਰਤੋ ਠਿਤਿ ਏਤੇਸਨ੍ਤਿ ਆਹਾਰਟ੍ਠਿਤਿਕਾ. ਇਤਿ ਸਬ੍ਬਸਤ੍ਤਾਨਂ ਠਿਤਿ ਹੇਤੁ ਆਹਾਰੋ ਨਾਮ ਏਕੋ ਧਮ੍ਮੋ ਅਮ੍ਹਾਕਂ ਸਤ੍ਥਾਰਾ ਯਾਥਾਵਤੋ ਞਤ੍ਵਾ ਸਮ੍ਮਦਕ੍ਖਾਤੋ ਆਵੁਸੋਤਿ ਦੀਪੇਤਿ.

ਨਨੁ ਚ ਏਵਂ ਸਨ੍ਤੇ ਯਂ ਵੁਤ੍ਤਂ ‘‘ਅਸਞ੍ਞਸਤ੍ਤਾ ਦੇਵਾ ਅਹੇਤੁਕਾ ਅਨਾਹਾਰਾ ਅਫਸ੍ਸਕਾ’’ਤਿਆਦਿ, (ਵਿਭ. ੧੦੧੭) ਤਂ ਵਚਨਂ ਵਿਰੁਜ੍ਝਤੀਤਿ, ਨ ਵਿਰੁਜ੍ਝਤਿ. ਤੇਸਞ੍ਹਿ ਝਾਨਂ ਆਹਾਰੋ ਹੋਤਿ. ਏਵਂ ਸਨ੍ਤੇਪਿ ‘‘ਚਤ੍ਤਾਰੋਮੇ, ਭਿਕ੍ਖਵੇ, ਆਹਾਰਾ ਭੂਤਾਨਂ ਵਾ ਸਤ੍ਤਾਨਂ ਠਿਤਿਯਾ ਸਮ੍ਭਵੇਸੀਨਂ ਵਾ ਅਨੁਗ੍ਗਹਾਯ. ਕਤਮੇ ਚਤ੍ਤਾਰੋ? ਕਬਲ਼ੀਕਾਰੋ ਆਹਾਰੋ ਓਲ਼ਾਰਿਕੋ ਵਾ ਸੁਖੁਮੋ ਵਾ, ਫਸ੍ਸੋ ਦੁਤਿਯੋ, ਮਨੋਸਞ੍ਚੇਤਨਾ ਤਤਿਯਾ, ਵਿਞ੍ਞਾਣਂ ਚਤੁਤ੍ਥ’’ਨ੍ਤਿ (ਸਂ. ਨਿ. ੨.੧੧) ਇਦਮ੍ਪਿ ਵਿਰੁਜ੍ਝਤੀਤਿ, ਇਦਮ੍ਪਿ ਨ ਵਿਰੁਜ੍ਝਤਿ. ਏਤਸ੍ਮਿਞ੍ਹਿ ਸੁਤ੍ਤੇ ਨਿਪ੍ਪਰਿਯਾਯੇਨ ਆਹਾਰਲਕ੍ਖਣਾਵ ਧਮ੍ਮਾ ਆਹਾਰਾਤਿ ਵੁਤ੍ਤਾ. ਇਧ ਪਨ ਪਰਿਯਾਯੇਨ ਪਚ੍ਚਯੋ ਆਹਾਰੋਤਿ ਵੁਤ੍ਤੋ. ਸਬ੍ਬਧਮ੍ਮਾਨਞ੍ਹਿ ਪਚ੍ਚਯੋ ਲਦ੍ਧੁਂ ਵਟ੍ਟਤਿ. ਸੋ ਚ ਯਂ ਯਂ ਫਲਂ ਜਨੇਤਿ, ਤਂ ਤਂ ਆਹਰਤਿ ਨਾਮ, ਤਸ੍ਮਾ ਆਹਾਰੋਤਿ ਵੁਚ੍ਚਤਿ. ਤੇਨੇਵਾਹ ‘‘ਅਵਿਜ੍ਜਮ੍ਪਾਹਂ, ਭਿਕ੍ਖਵੇ, ਸਾਹਾਰਂ ਵਦਾਮਿ, ਨੋ ਅਨਾਹਾਰਂ. ਕੋ ਚ, ਭਿਕ੍ਖਵੇ, ਅਵਿਜ੍ਜਾਯ ਆਹਾਰੋ? ਪਞ੍ਚਨੀਵਰਣਾਤਿਸ੍ਸ ਵਚਨੀਯਂ. ਪਞ੍ਚਨੀਵਰਣੇਪਾਹਂ, ਭਿਕ੍ਖਵੇ, ਸਾਹਾਰੇ ਵਦਾਮਿ, ਨੋ ਅਨਾਹਾਰੇ. ਕੋ ਚ, ਭਿਕ੍ਖਵੇ, ਪਞ੍ਚਨ੍ਨਂ ਨੀਵਰਣਾਨਂ ਆਹਾਰੋ? ਅਯੋਨਿਸੋਮਨਸਿਕਾਰੋਤਿਸ੍ਸ ਵਚਨੀਯ’’ਨ੍ਤਿ (ਅ. ਨਿ. ੧੦.੬੧). ਅਯਂ ਇਧ ਅਧਿਪ੍ਪੇਤੋ.

ਏਤਸ੍ਮਿਞ੍ਹਿ ਪਚ੍ਚਯਾਹਾਰੇ ਗਹਿਤੇ ਪਰਿਯਾਯਾਹਾਰੋਪਿ ਨਿਪ੍ਪਰਿਯਾਯਾਹਾਰੋਪਿ ਸਬ੍ਬੋ ਗਹਿਤੋਵ ਹੋਤਿ. ਤਤ੍ਥ ਅਸਞ੍ਞਭਵੇ ਪਚ੍ਚਯਾਹਾਰੋ ਲਬ੍ਭਤਿ. ਅਨੁਪ੍ਪਨ੍ਨੇ ਹਿ ਬੁਦ੍ਧੇ ਤਿਤ੍ਥਾਯਤਨੇ ਪਬ੍ਬਜਿਤਾ ਵਾਯੋਕਸਿਣੇ ਪਰਿਕਮ੍ਮਂ ਕਤ੍ਵਾ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਤਤੋ ਵੁਟ੍ਠਾਯ ਧੀ ਚਿਤ੍ਤਂ, ਧਿਬ੍ਬਤੇਤਂ ਚਿਤ੍ਤਂ ਚਿਤ੍ਤਸ੍ਸ ਨਾਮ ਅਭਾਵੋਯੇਵ ਸਾਧੁ, ਚਿਤ੍ਤਞ੍ਹਿ ਨਿਸ੍ਸਾਯੇਵ ਵਧਬਨ੍ਧਾਦਿਪਚ੍ਚਯਂ ਦੁਕ੍ਖਂ ਉਪ੍ਪਜ੍ਜਤਿ. ਚਿਤ੍ਤੇ ਅਸਤਿ ਨਤ੍ਥੇਤਨ੍ਤਿ ਖਨ੍ਤਿਂ ਰੁਚਿਂ ਉਪ੍ਪਾਦੇਤ੍ਵਾ ਅਪਰਿਹੀਨਜ੍ਝਾਨਾ ਕਾਲਙ੍ਕਤ੍ਵਾ ਅਸਞ੍ਞਭਵੇ ਨਿਬ੍ਬਤ੍ਤਨ੍ਤਿ. ਯੋ ਯਸ੍ਸ ਇਰਿਯਾਪਥੋ ਮਨੁਸ੍ਸਲੋਕੇ ਪਣਿਹਿਤੋ ਅਹੋਸਿ, ਸੋ ਤੇਨ ਇਰਿਯਾਪਥੇਨ ਨਿਬ੍ਬਤ੍ਤਿਤ੍ਵਾ ਪਞ੍ਚ ਕਪ੍ਪਸਤਾਨਿ ਠਿਤੋ ਵਾ ਨਿਸਿਨ੍ਨੋ ਵਾ ਨਿਪਨ੍ਨੋ ਵਾ ਹੋਤਿ. ਏਵਰੂਪਾਨਮ੍ਪਿ ਸਤ੍ਤਾਨਂ ਪਚ੍ਚਯਾਹਾਰੋ ਲਬ੍ਭਤਿ. ਤੇ ਹਿ ਯਂ ਝਾਨਂ ਭਾਵੇਤ੍ਵਾ ਨਿਬ੍ਬਤ੍ਤਾ, ਤਦੇਵ ਨੇਸਂ ਪਚ੍ਚਯੋ ਹੋਤਿ. ਯਥਾ ਜਿਯਾਵੇਗੇਨ ਖਿਤ੍ਤਸਰੋ ਯਾਵ ਜਿਯਾਵੇਗੋ ਅਤ੍ਥਿ, ਤਾਵ ਗਚ੍ਛਤਿ, ਏਵਂ ਯਾਵ ਝਾਨਪਚ੍ਚਯੋ ਅਤ੍ਥਿ, ਤਾਵ ਤਿਟ੍ਠਨ੍ਤਿ. ਤਸ੍ਮਿਂ ਨਿਟ੍ਠਿਤੇ ਖੀਣਵੇਗੋ ਸਰੋ ਵਿਯ ਪਤਨ੍ਤਿ. ਯੇ ਪਨ ਤੇ ਨੇਰਯਿਕਾ ਨੇਵ ਉਟ੍ਠਾਨਫਲੂਪਜੀਵੀ ਨ ਪੁਞ੍ਞਫਲੂਪਜੀਵੀਤਿ ਵੁਤ੍ਤਾ, ਤੇਸਂ ਕੋ ਆਹਾਰੋਤਿ? ਤੇਸਂ ਕਮ੍ਮਮੇਵ ਆਹਾਰੋ. ਕਿਂ ਪਞ੍ਚ ਆਹਾਰਾ ਅਤ੍ਥੀਤਿ ਚੇ. ਪਞ੍ਚ, ਨ ਪਞ੍ਚਾਤਿ ਇਦਂ ਨ ਵਤ੍ਤਬ੍ਬਂ. ਨਨੁ ਪਚ੍ਚਯੋ ਆਹਾਰੋਤਿ ਵੁਤ੍ਤਮੇਤਂ. ਤਸ੍ਮਾ ਯੇਨ ਕਮ੍ਮੇਨ ਤੇ ਨਿਰਯੇ ਨਿਬ੍ਬਤ੍ਤਾ, ਤਦੇਵ ਤੇਸਂ ਠਿਤਿਪਚ੍ਚਯਤ੍ਤਾ ਆਹਾਰੋ ਹੋਤਿ. ਯਂ ਸਨ੍ਧਾਯ ਇਦਂ ਵੁਤ੍ਤਂ ‘‘ਨ ਚ ਤਾਵ ਕਾਲਙ੍ਕਰੋਤਿ, ਯਾਵ ਨ ਤਂ ਪਾਪਕਮ੍ਮਂ ਬ੍ਯਨ੍ਤੀ ਹੋਤੀ’’ਤਿ (ਮ. ਨਿ. ੩.੨੫੦).

ਕਬਲ਼ੀਕਾਰਂ ਆਹਾਰਂ ਆਰਬ੍ਭ ਚੇਤ੍ਥ ਵਿਵਾਦੋ ਨ ਕਾਤਬ੍ਬੋ. ਮੁਖੇ ਉਪ੍ਪਨ੍ਨੋ ਖੇਲ਼ੋਪਿ ਹਿ ਤੇਸਂ ਆਹਾਰਕਿਚ੍ਚਂ ਸਾਧੇਤਿ. ਖੇਲ਼ੋਪਿ ਹਿ ਨਿਰਯੇ ਦੁਕ੍ਖਵੇਦਨਿਯੋ ਹੁਤ੍ਵਾ ਪਚ੍ਚਯੋ ਹੋਤਿ, ਸਗ੍ਗੇ ਸੁਖਵੇਦਨਿਯੋ. ਇਤਿ ਕਾਮਭਵੇ ਨਿਪ੍ਪਰਿਯਾਯੇਨ ਚਤ੍ਤਾਰੋ ਆਹਾਰਾ. ਰੂਪਾਰੂਪਭਵੇਸੁ ਠਪੇਤ੍ਵਾ ਅਸਞ੍ਞਂ ਸੇਸਾਨਂ ਤਯੋ. ਅਸਞ੍ਞਾਨਞ੍ਚੇਵ ਅਵਸੇਸਾਨਞ੍ਚ ਪਚ੍ਚਯਾਹਾਰੋਤਿ ਇਮਿਨਾ ਆਹਾਰੇਨ ‘‘ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ’’ਤਿ ਏਤਂ ਪਞ੍ਹਂ ਕਥੇਤ੍ਵਾ ‘‘ਅਯਂ ਖੋ ਆਵੁਸੋ’’ਤਿ ਏਵਂ ਨਿਯ੍ਯਾਤਨਮ੍ਪਿ ‘‘ਅਤ੍ਥਿ ਖੋ ਆਵੁਸੋ’’ਤਿ ਪੁਨ ਉਦ੍ਧਰਣਮ੍ਪਿ ਅਕਤ੍ਵਾ ‘‘ਸਬ੍ਬੇ ਸਤ੍ਤਾ ਸਙ੍ਖਾਰਟ੍ਠਿਤਿਕਾ’’ਤਿ ਦੁਤਿਯਪਞ੍ਹਂ ਵਿਸ੍ਸਜ੍ਜੇਸਿ.

ਕਸ੍ਮਾ ਪਨ ਨ ਨਿਯ੍ਯਾਤੇਸਿ ਨ ਉਦ੍ਧਰਿਤ੍ਥ? ਤਤ੍ਥ ਤਤ੍ਥ ਨਿਯ੍ਯਾਤਿਯਮਾਨੇਪਿ ਉਦ੍ਧਰਿਯਮਾਨੇਪਿ ਪਰਿਯਾਪੁਣਿਤੁਂ ਵਾਚੇਤੁਂ ਦੁਕ੍ਖਂ ਹੋਤਿ, ਤਸ੍ਮਾ ਦ੍ਵੇ ਏਕਾਬਦ੍ਧੇ ਕਤ੍ਵਾ ਵਿਸ੍ਸਜ੍ਜੇਸਿ. ਇਮਸ੍ਮਿਮ੍ਪਿ ਵਿਸ੍ਸਜ੍ਜਨੇ ਹੇਟ੍ਠਾ ਵੁਤ੍ਤਪਚ੍ਚਯੋਵ ਅਤ੍ਤਨੋ ਫਲਸ੍ਸ ਸਙ੍ਖਰਣਤੋ ਸਙ੍ਖਾਰੋਤਿ ਵੁਤ੍ਤੋ. ਇਤਿ ਹੇਟ੍ਠਾ ਆਹਾਰਪਚ੍ਚਯੋ ਕਥਿਤੋ, ਇਧ ਸਙ੍ਖਾਰਪਚ੍ਚਯੋਤਿ ਅਯਮੇਤ੍ਥ ਹੇਟ੍ਠਿਮਤੋ ਵਿਸੇਸੋ. ‘‘ਹੇਟ੍ਠਾ ਨਿਪ੍ਪਰਿਯਾਯਾਹਾਰੋ ਗਹਿਤੋ, ਇਧ ਪਰਿਯਾਯਾਹਾਰੋਤਿ ਏਵਂ ਗਹਿਤੇ ਵਿਸੇਸੋ ਪਾਕਟੋ ਭਵੇਯ੍ਯ, ਨੋ ਚ ਗਣ੍ਹਿਂਸੂ’ਤਿ ਮਹਾਸੀਵਤ੍ਥੇਰੋ ਆਹ. ਇਨ੍ਦ੍ਰਿਯਬਦ੍ਧਸ੍ਸਪਿ ਹਿ ਅਨਿਨ੍ਦ੍ਰਿਯਬਦ੍ਧਸ੍ਸਪਿ ਪਚ੍ਚਯੋ ਲਦ੍ਧੁਂ ਵਟ੍ਟਤਿ. ਵਿਨਾ ਪਚ੍ਚਯੇਨ ਧਮ੍ਮੋ ਨਾਮ ਨਤ੍ਥਿ. ਤਤ੍ਥ ਅਨਿਨ੍ਦ੍ਰਿਯਬਦ੍ਧਸ੍ਸ ਤਿਣਰੁਕ੍ਖਲਤਾਦਿਨੋ ਪਥਵੀਰਸੋ ਆਪੋਰਸੋ ਚ ਪਚ੍ਚਯੋ ਹੋਤਿ. ਦੇਵੇ ਅਵਸ੍ਸਨ੍ਤੇ ਹਿ ਤਿਣਾਦੀਨਿ ਮਿਲਾਯਨ੍ਤਿ, ਵਸ੍ਸਨ੍ਤੇ ਚ ਪਨ ਹਰਿਤਾਨਿ ਹੋਨ੍ਤਿ. ਇਤਿ ਤੇਸਂ ਪਥਵੀਰਸੋ ਆਪੋਰਸੋ ਚ ਪਚ੍ਚਯੋ ਹੋਤਿ. ਇਨ੍ਦ੍ਰਿਯਬਦ੍ਧਸ੍ਸ ਅਵਿਜ੍ਜਾ ਤਣ੍ਹਾ ਕਮ੍ਮਂ ਆਹਾਰੋਤਿ ਏਵਮਾਦਯੋ ਪਚ੍ਚਯਾ, ਇਤਿ ਹੇਟ੍ਠਾ ਪਚ੍ਚਯੋਯੇਵ ਆਹਾਰੋਤਿ ਕਥਿਤੋ, ਇਧ ਸਙ੍ਖਾਰੋਤਿ. ਅਯਮੇਵੇਤ੍ਥ ਵਿਸੇਸੋ.

ਅਯਂ ਖੋ, ਆਵੁਸੋਤਿ ਆਵੁਸੋ ਅਮ੍ਹਾਕਂ ਸਤ੍ਥਾਰਾ ਮਹਾਬੋਧਿਮਣ੍ਡੇ ਨਿਸੀਦਿਤ੍ਵਾ ਸਯਂ ਸਬ੍ਬਞ੍ਞੁਤਞ੍ਞਾਣੇਨ ਸਚ੍ਛਿਕਤ੍ਵਾ ਅਯਂ ਏਕਧਮ੍ਮੋ ਦੇਸਿਤੋ. ਤਤ੍ਥ ਏਕਧਮ੍ਮੇ ਤੁਮ੍ਹੇਹਿ ਸਬ੍ਬੇਹੇਵ ਸਙ੍ਗਾਯਿਤਬ੍ਬਂ ਨ ਵਿਵਦਿਤਬ੍ਬਂ. ਯਥਯਿਦਂ ਬ੍ਰਹ੍ਮਚਰਿਯਨ੍ਤਿ ਯਥਾ ਸਙ੍ਗਾਯਮਾਨਾਨਂ ਤੁਮ੍ਹਾਕਂ ਇਦਂ ਸਾਸਨਬ੍ਰਹ੍ਮਚਰਿਯਂ ਅਦ੍ਧਨਿਯਂ ਅਸ੍ਸ. ਏਕੇਨ ਹਿ ਭਿਕ੍ਖੁਨਾ ‘‘ਅਤ੍ਥਿ, ਖੋ ਆਵੁਸੋ, ਏਕੋ ਧਮ੍ਮੋ ਸਮ੍ਮਦਕ੍ਖਾਤੋ. ਕਤਮੋ ਏਕੋ ਧਮ੍ਮੋ? ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ. ਸਬ੍ਬੇ ਸਤ੍ਤਾ ਸਙ੍ਖਾਰਟ੍ਠਿਤਿਕਾ’’ਤਿ ਕਥਿਤੇ ਤਸ੍ਸ ਕਥਂ ਸੁਤ੍ਵਾ ਅਞ੍ਞੋ ਕਥੇਸ੍ਸਤਿ. ਤਸ੍ਸਪਿ ਅਞ੍ਞੋਤਿ ਏਵਂ ਪਰਮ੍ਪਰਕਥਾਨਿਯਮੇਨ ਇਦਂ ਬ੍ਰਹ੍ਮਚਰਿਯਂ ਚਿਰਂ ਤਿਟ੍ਠਮਾਨਂ ਸਦੇਵਕਸ੍ਸ ਲੋਕਸ੍ਸ ਅਤ੍ਥਾਯ ਹਿਤਾਯ ਭਵਿਸ੍ਸਤੀਤਿ ਏਕਕਵਸੇਨ ਧਮ੍ਮਸੇਨਾਪਤਿ ਸਾਰਿਪੁਤ੍ਤਤ੍ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਏਕਕਵਣ੍ਣਨਾ ਨਿਟ੍ਠਿਤਾ.

ਦੁਕਵਣ੍ਣਨਾ

੩੦੪. ਇਤਿ ਏਕਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਦੁਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਨਾਮਰੂਪਦੁਕੇ ਨਾਮਨ੍ਤਿ ਚਤ੍ਤਾਰੋ ਅਰੂਪਿਨੋ ਖਨ੍ਧਾ ਨਿਬ੍ਬਾਨਞ੍ਚ. ਤਤ੍ਥ ਚਤ੍ਤਾਰੋ ਖਨ੍ਧਾ ਨਾਮਨਟ੍ਠੇਨ ਨਾਮਂ. ਨਾਮਨਟ੍ਠੇਨਾਤਿ ਨਾਮਕਰਣਟ੍ਠੇਨ. ਯਥਾ ਹਿ ਮਹਾਜਨਸਮ੍ਮਤਤ੍ਤਾ ਮਹਾਸਮ੍ਮਤਸ੍ਸ ‘‘ਮਹਾਸਮ੍ਮਤੋ’’ਤਿ ਨਾਮਂ ਅਹੋਸਿ, ਯਥਾ ਮਾਤਾਪਿਤਰੋ ‘‘ਅਯਂ ਤਿਸ੍ਸੋ ਨਾਮ ਹੋਤੁ, ਫੁਸ੍ਸੋ ਨਾਮ ਹੋਤੂ’’ਤਿ ਏਵਂ ਪੁਤ੍ਤਸ੍ਸ ਕਿਤ੍ਤਿਮਨਾਮਂ ਕਰੋਨ੍ਤਿ, ਯਥਾ ਵਾ ‘‘ਧਮ੍ਮਕਥਿਕੋ ਵਿਨਯਧਰੋ’’ਤਿ ਗੁਣਤੋ ਨਾਮਂ ਆਗਚ੍ਛਤਿ, ਨ ਏਵਂ ਵੇਦਨਾਦੀਨਂ. ਵੇਦਨਾਦਯੋ ਹਿ ਮਹਾਪਥਵੀਆਦਯੋ ਵਿਯ ਅਤ੍ਤਨੋ ਨਾਮਂ ਕਰੋਨ੍ਤਾਵ ਉਪ੍ਪਜ੍ਜਨ੍ਤਿ. ਤੇਸੁ ਉਪ੍ਪਨ੍ਨੇਸੁ ਤੇਸਂ ਨਾਮਂ ਉਪ੍ਪਨ੍ਨਮੇਵ ਹੋਤਿ. ਨ ਹਿ ਵੇਦਨਂ ਉਪ੍ਪਨ੍ਨਂ ‘‘ਤ੍ਵਂ ਵੇਦਨਾ ਨਾਮ ਹੋਹੀ’’ਤਿ, ਕੋਚਿ ਭਣਤਿ, ਨ ਚਸ੍ਸਾ ਯੇਨ ਕੇਨਚਿ ਕਾਰਣੇਨ ਨਾਮਗ੍ਗਹਣਕਿਚ੍ਚਂ ਅਤ੍ਥਿ, ਯਥਾ ਪਥਵਿਯਾ ਉਪ੍ਪਨ੍ਨਾਯ ‘‘ਤ੍ਵਂ ਪਥਵੀ ਨਾਮ ਹੋਹੀ’’ਤਿ ਨਾਮਗ੍ਗਹਣਕਿਚ੍ਚਂ ਨਤ੍ਥਿ, ਚਕ੍ਕਵਾਲ਼ਸਿਨੇਰੁਮ੍ਹਿ ਚਨ੍ਦਿਮਸੂਰਿਯਨਕ੍ਖਤ੍ਤੇਸੁ ਉਪ੍ਪਨ੍ਨੇਸੁ ‘‘ਤ੍ਵਂ ਚਕ੍ਕਵਾਲ਼ਂ ਨਾਮ, ਤ੍ਵਂ ਨਕ੍ਖਤ੍ਤਂ ਨਾਮ ਹੋਹੀ’’ਤਿ ਨਾਮਗ੍ਗਹਣਕਿਚ੍ਚਂ ਨਤ੍ਥਿ, ਨਾਮਂ ਉਪ੍ਪਨ੍ਨਮੇਵ ਹੋਤਿ, ਓਪਪਾਤਿਕਾ ਪਞ੍ਞਤ੍ਤਿ ਨਿਪਤਤਿ, ਏਵਂ ਵੇਦਨਾਯ ਉਪ੍ਪਨ੍ਨਾਯ ‘‘ਤ੍ਵਂ ਵੇਦਨਾ ਨਾਮ ਹੋਹੀ’’ਤਿ ਨਾਮਗ੍ਗਹਣਕਿਚ੍ਚਂ ਨਤ੍ਥਿ, ਤਾਯ ਉਪ੍ਪਨ੍ਨਾਯ ਵੇਦਨਾਤਿ ਨਾਮਂ ਉਪ੍ਪਨ੍ਨਮੇਵ ਹੋਤਿ. ਸਞ੍ਞਾਦੀਸੁਪਿ ਏਸੇਵ ਨਯੋ ਅਤੀਤੇਪਿ ਹਿ ਵੇਦਨਾ ਵੇਦਨਾਯੇਵ. ਸਞ੍ਞਾ. ਸਙ੍ਖਾਰਾ. ਵਿਞ੍ਞਾਣਂ ਵਿਞ੍ਞਾਣਮੇਵ. ਅਨਾਗਤੇਪਿ. ਪਚ੍ਚੁਪ੍ਪਨ੍ਨੇਪਿ. ਨਿਬ੍ਬਾਨਂ ਪਨ ਸਦਾਪਿ ਨਿਬ੍ਬਾਨਮੇਵਾਤਿ. ਨਾਮਨਟ੍ਠੇਨ ਨਾਮਂ. ਨਮਨਟ੍ਠੇਨਾਪਿ ਚੇਤ੍ਥ ਚਤ੍ਤਾਰੋ ਖਨ੍ਧਾ ਨਾਮਂ. ਤੇ ਹਿ ਆਰਮ੍ਮਣਾਭਿਮੁਖਂ ਨਮਨ੍ਤਿ. ਨਾਮਨਟ੍ਠੇਨ ਸਬ੍ਬਮ੍ਪਿ ਨਾਮਂ. ਚਤ੍ਤਾਰੋ ਹਿ ਖਨ੍ਧਾ ਆਰਮ੍ਮਣੇ ਅਞ੍ਞਮਞ੍ਞਂ ਨਾਮੇਨ੍ਤਿ, ਨਿਬ੍ਬਾਨਂ ਆਰਮ੍ਮਣਾਧਿਪਤਿਪਚ੍ਚਯਤਾਯ ਅਤ੍ਤਨਿ ਅਨਵਜ੍ਜਧਮ੍ਮੇ ਨਾਮੇਤਿ.

ਰੂਪਨ੍ਤਿ ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯ ਰੂਪਂ, ਤਂ ਸਬ੍ਬਮ੍ਪਿ ਰੁਪ੍ਪਨਟ੍ਠੇਨ ਰੂਪਂ. ਤਸ੍ਸ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਅਵਿਜ੍ਜਾਤਿ ਦੁਕ੍ਖਾਦੀਸੁ ਅਞ੍ਞਾਣਂ. ਅਯਮ੍ਪਿ ਵਿਤ੍ਥਾਰਤੋ ਵਿਸੁਦ੍ਧਿਮਗ੍ਗੇ ਕਥਿਤਾਯੇਵ. ਭਵਤਣ੍ਹਾਤਿ ਭਵਪਤ੍ਥਨਾ. ਯਥਾਹ ‘‘ਤਤ੍ਥ ਕਤਮਾ ਭਵਤਣ੍ਹਾ? ਯੋ ਭਵੇਸੁ ਭਵਚ੍ਛਨ੍ਦੋ’’ਤਿਆਦਿ (ਧ. ਸ. ੧੩੧੯).

ਭਵਦਿਟ੍ਠੀਤਿ ਭਵੋ ਵੁਚ੍ਚਤਿ ਸਸ੍ਸਤਂ, ਸਸ੍ਸਤਵਸੇਨ ਉਪ੍ਪਜ੍ਜਨਕਦਿਟ੍ਠਿ. ਸਾ ‘‘ਤਤ੍ਥ ਕਤਮਾ ਭਵਦਿਟ੍ਠਿ? ‘ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’ਤਿ ਯਾ ਏਵਰੂਪਾ ਦਿਟ੍ਠਿ ਦਿਟ੍ਠਿਗਤ’’ਨ੍ਤਿਆਦਿਨਾ (ਧ. ਸ. ੧੩੨੦) ਨਯੇਨ ਅਭਿਧਮ੍ਮੇ ਵਿਤ੍ਥਾਰਿਤਾ. ਵਿਭਵਦਿਟ੍ਠੀਤਿ ਵਿਭਵੋ ਵੁਚ੍ਚਤਿ ਉਚ੍ਛੇਦਂ, ਉਚ੍ਛੇਦਵਸੇਨ ਉਪ੍ਪਜ੍ਜਨਕਦਿਟ੍ਠਿ. ਸਾਪਿ ‘‘ਤਤ੍ਥ ਕਤਮਾ ਵਿਭਵਦਿਟ੍ਠਿ? ‘ਨ ਭਵਿਸ੍ਸਤਿ ਅਤ੍ਤਾ ਚ ਲੋਕੋ ਚਾ’ਤਿ (ਧ. ਸ. ੨੮੫). ਯਾ ਏਵਰੂਪਾ ਦਿਟ੍ਠਿ ਦਿਟ੍ਠਿਗਤ’’ਨ੍ਤਿਆਦਿਨਾ (ਧ. ਸ. ੧੩੨੧) ਨਯੇਨ ਤਤ੍ਥੇਵ ਵਿਤ੍ਥਾਰਿਤਾ.

ਅਹਿਰਿਕਨ੍ਤਿ ‘‘ਯਂ ਨ ਹਿਰੀਯਤਿ ਹਿਰੀਯਿਤਬ੍ਬੇਨਾ’’ਤਿ (ਧ. ਸ. ੧੩੨੮) ਏਵਂ ਵਿਤ੍ਥਾਰਿਤਾ ਨਿਲ੍ਲਜ੍ਜਤਾ. ਅਨੋਤ੍ਤਪ੍ਪਨ੍ਤਿ ‘‘ਯਂ ਨ ਓਤ੍ਤਪ੍ਪਤਿ ਓਤ੍ਤਪ੍ਪਿਤਬ੍ਬੇਨਾ’’ਤਿ (ਧ. ਸ. ੧੩੨੯) ਏਵਂ ਵਿਤ੍ਥਾਰਿਤੋ ਅਭਾਯਨਕਆਕਾਰੋ.

ਹਿਰੀ ਚ ਓਤ੍ਤਪ੍ਪਞ੍ਚਾਤਿ ‘‘ਯਂ ਹਿਰੀਯਤਿ ਹਿਰੀਯਿਤਬ੍ਬੇਨ, ਓਤ੍ਤਪ੍ਪਤਿ ਓਤ੍ਤਪ੍ਪਿਤਬ੍ਬੇਨਾ’’ਤਿ (ਧ. ਸ. ੧੩੩੦-੩੧) ਏਵਂ ਵਿਤ੍ਥਾਰਿਤਾਨਿ ਹਿਰਿਓਤ੍ਤਪ੍ਪਾਨਿ. ਅਪਿ ਚੇਤ੍ਥ ਅਜ੍ਝਤ੍ਤਸਮੁਟ੍ਠਾਨਾ ਹਿਰੀ, ਬਹਿਦ੍ਧਾਸਮੁਟ੍ਠਾਨਂ ਓਤ੍ਤਪ੍ਪਂ. ਅਤ੍ਤਾਧਿਪਤੇਯ੍ਯਾ ਹਿਰੀ, ਲੋਕਾਧਿਪਤੇਯ੍ਯਂ ਓਤ੍ਤਪ੍ਪਂ. ਲਜ੍ਜਾਸਭਾਵਸਣ੍ਠਿਤਾ ਹਿਰੀ, ਭਯਸਭਾਵਸਣ੍ਠਿਤਂ ਓਤ੍ਤਪ੍ਪਂ. ਵਿਤ੍ਥਾਰਕਥਾ ਪਨੇਤ੍ਥ ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਵੁਤ੍ਤਾ.

ਦੋਵਚਸ੍ਸਤਾਤਿ ਦੁਕ੍ਖਂ ਵਚੋ ਏਤਸ੍ਮਿਂ ਵਿਪ੍ਪਟਿਕੂਲਗਾਹਿਮ੍ਹਿ ਵਿਪਚ੍ਚਨੀਕਸਾਤੇ ਅਨਾਦਰੇ ਪੁਗ੍ਗਲੇਤਿ ਦੁਬ੍ਬਚੋ, ਤਸ੍ਸ ਕਮ੍ਮਂ ਦੋਵਚਸ੍ਸਂ, ਤਸ੍ਸ ਭਾਵੋ ਦੋਵਚਸ੍ਸਤਾ. ਵਿਤ੍ਥਾਰਤੋ ਪਨੇਸਾ ‘‘ਤਤ੍ਥ ਕਤਮਾ ਦੋਵਚਸ੍ਸਤਾ? ਸਹਧਮ੍ਮਿਕੇ ਵੁਚ੍ਚਮਾਨੇ ਦੋਵਚਸ੍ਸਾਯ’’ਨ੍ਤਿ (ਧ. ਸ. ੧੩੩੨) ਅਭਿਧਮ੍ਮੇ ਆਗਤਾ. ਸਾ ਅਤ੍ਥਤੋ ਸਙ੍ਖਾਰਕ੍ਖਨ੍ਧੋ ਹੋਤਿ. ‘‘ਚਤੁਨ੍ਨਞ੍ਚ ਖਨ੍ਧਾਨਂ ਏਤੇਨਾਕਾਰੇਨ ਪਵਤ੍ਤਾਨਂ ਏਤਂ ਅਧਿਵਚਨ’’ਨ੍ਤਿ ਵਦਨ੍ਤਿ. ਪਾਪਮਿਤ੍ਤਤਾਤਿ ਪਾਪਾ ਅਸ੍ਸਦ੍ਧਾਦਯੋ ਪੁਗ੍ਗਲਾ ਏਤਸ੍ਸ ਮਿਤ੍ਤਾਤਿ ਪਾਪਮਿਤ੍ਤੋ, ਤਸ੍ਸ ਭਾਵੋ ਪਾਪਮਿਤ੍ਤਤਾ. ਵਿਤ੍ਥਾਰਤੋ ਪਨੇਸਾ – ‘‘ਤਤ੍ਥ ਕਤਮਾ ਪਾਪਮਿਤ੍ਤਤਾ? ਯੇ ਤੇ ਪੁਗ੍ਗਲਾ ਅਸ੍ਸਦ੍ਧਾ ਦੁਸ੍ਸੀਲਾ ਅਪ੍ਪਸ੍ਸੁਤਾ ਮਚ੍ਛਰਿਨੋ ਦੁਪ੍ਪਞ੍ਞਾ. ਯਾ ਤੇਸਂ ਸੇਵਨਾ ਨਿਸੇਵਨਾ ਸਂਸੇਵਨਾ ਭਜਨਾ ਸਂਭਜਨਾ ਭਤ੍ਤਿ ਸਂਭਤ੍ਤਿ ਤਂਸਮ੍ਪਵਙ੍ਕਤਾ’’ਤਿ (ਧ. ਸ. ੧੩੩੩) ਏਵਂ ਆਗਤਾ. ਸਾਪਿ ਅਤ੍ਥਤੋ ਦੋਵਚਸ੍ਸਤਾ ਵਿਯ ਦਟ੍ਠਬ੍ਬਾ.

ਸੋਵਚਸ੍ਸਤਾ ਚ ਕਲ੍ਯਾਣਮਿਤ੍ਤਤਾ ਚ ਵੁਤ੍ਤਪ੍ਪਟਿਪਕ੍ਖਨਯੇਨ ਵੇਦਿਤਬ੍ਬਾ. ਉਭੋਪਿ ਪਨੇਤਾ ਇਧ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ.

ਆਪਤ੍ਤਿਕੁਸਲਤਾਤਿ ‘‘ਪਞ੍ਚਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਿਯੋ, ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਿਯੋ. ਯਾ ਤਾਸਂ ਆਪਤ੍ਤੀਨਂ ਆਪਤ੍ਤਿਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੩੬) ਏਵਂ ਵੁਤ੍ਤੋ ਆਪਤ੍ਤਿਕੁਸਲਭਾਵੋ.

ਆਪਤ੍ਤਿਵੁਟ੍ਠਾਨਕੁਸਲਤਾਤਿ ‘‘ਯਾ ਤਾਹਿ ਆਪਤ੍ਤੀਹਿ ਵੁਟ੍ਠਾਨਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੩੭) ਏਵਂ ਵੁਤ੍ਤਾ ਸਹ ਕਮ੍ਮਵਾਚਾਯ ਆਪਤ੍ਤੀਹਿ ਵੁਟ੍ਠਾਨਪਰਿਚ੍ਛੇਦਜਾਨਨਾ ਪਞ੍ਞਾ.

ਸਮਾਪਤ੍ਤਿਕੁਸਲਤਾਤਿ ‘‘ਅਤ੍ਥਿ ਸਵਿਤਕ੍ਕਸਵਿਚਾਰਾ ਸਮਾਪਤ੍ਤਿ, ਅਤ੍ਥਿ ਅਵਿਤਕ੍ਕਵਿਚਾਰਮਤ੍ਤਾ ਸਮਾਪਤ੍ਤਿ, ਅਤ੍ਥਿ ਅਵਿਤਕ੍ਕਅਵਿਚਾਰਾ ਸਮਾਪਤ੍ਤਿ. ਯਾ ਤਾਸਂ ਸਮਾਪਤ੍ਤੀਨਂ ਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੩੮) ਏਵਂ ਵੁਤ੍ਤਾ ਸਹ ਪਰਿਕਮ੍ਮੇਨ ਅਪ੍ਪਨਾਪਰਿਚ੍ਛੇਦਜਾਨਨਾ ਪਞ੍ਞਾ. ਸਮਾਪਤ੍ਤਿਵੁਟ੍ਠਾਨਕੁਸਲਤਾਤਿ ‘‘ਯਾ ਤਾਹਿ ਸਮਾਪਤ੍ਤੀਹਿ ਵੁਟ੍ਠਾਨਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੩੯) ਏਵਂ ਵੁਤ੍ਤਾ ਯਥਾਪਰਿਚ੍ਛਿਨ੍ਨਸਮਯਵਸੇਨੇਵ ਸਮਾਪਤ੍ਤਿਤੋ ਵੁਟ੍ਠਾਨਸਮਤ੍ਥਾ ‘‘ਏਤ੍ਤਕਂ ਗਤੇ ਸੂਰਿਯੇ ਉਟ੍ਠਹਿਸ੍ਸਾਮੀ’’ਤਿ ਵੁਟ੍ਠਾਨਕਾਲਪਰਿਚ੍ਛੇਦਕਾ ਪਞ੍ਞਾ.

ਧਾਤੁਕੁਸਲਤਾਤਿ ‘‘ਅਟ੍ਠਾਰਸ ਧਾਤੁਯੋ ਚਕ੍ਖੁਧਾਤੁ…ਪੇ… ਮਨੋਵਿਞ੍ਞਾਣਧਾਤੁ. ਯਾ ਤਾਸਂ ਧਾਤੂਨਂ ਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੦) ਏਵਂ ਵੁਤ੍ਤਾ ਅਟ੍ਠਾਰਸਨ੍ਨਂ ਧਾਤੂਨਂ ਸਭਾਵਪਰਿਚ੍ਛੇਦਕਾ ਸਵਨਧਾਰਣਸਮ੍ਮਸਨਪਟਿਵੇਧਪਞ੍ਞਾ. ਮਨਸਿਕਾਰਕੁਸਲਤਾਤਿ ‘‘ਯਾ ਤਾਸਂ ਧਾਤੂਨਂ ਮਨਸਿਕਾਰਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੧) ਏਵਂ ਵੁਤ੍ਤਾ ਤਾਸਂਯੇਵ ਧਾਤੂਨਂ ਸਮ੍ਮਸਨਪਟਿਵੇਧਪਚ੍ਚਵੇਕ੍ਖਣਪਞ੍ਞਾ.

ਆਯਤਨਕੁਸਲਤਾਤਿ ‘‘ਦ੍ਵਾਦਸਾਯਤਨਾਨਿ ਚਕ੍ਖਾਯਤਨਂ…ਪੇ… ਧਮ੍ਮਾਯਤਨਂ. ਯਾ ਤੇਸਂ ਆਯਤਨਾਨਂ ਆਯਤਨਕੁਸਲਤਾ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੨) ਏਵਂ ਵੁਤ੍ਤਾ ਦ੍ਵਾਦਸਨ੍ਨਂ ਆਯਤਨਾਨਂ ਉਗ੍ਗਹਮਨਸਿਕਾਰਪਜਾਨਨਾ ਪਞ੍ਞਾ. ਅਪਿਚ ਧਾਤੁਕੁਸਲਤਾਪਿ ਉਗ੍ਗਹਮਨਸਿਕਾਰਸਵਨਸਮ੍ਮਸਨਪਟਿਵੇਧਪਚ੍ਚਵੇਕ੍ਖਣੇਸੁ ਵਤ੍ਤਤਿ ਮਨਸਿਕਾਰਕੁਸਲਤਾਪਿ ਆਯਤਨਕੁਸਲਤਾਪਿ. ਅਯਂ ਪਨੇਤ੍ਥ ਵਿਸੇਸੋ, ਸਵਨਉਗ੍ਗਹਪਚ੍ਚਵੇਕ੍ਖਣਾ ਲੋਕਿਯਾ, ਪਟਿਵੇਧੋ ਲੋਕੁਤ੍ਤਰੋ, ਸਮ੍ਮਸਨਮਨਸਿਕਾਰਾ ਲੋਕਿਯਲੋਕੁਤ੍ਤਰਮਿਸ੍ਸਕਾ. ਪਟਿਚ੍ਚਸਮੁਪ੍ਪਾਦਕੁਸਲਤਾਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ…ਪੇ… ਸਮੁਦਯੋ ਹੋਤੀਤਿ ਯਾ ਤਤ੍ਥ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੩) ਏਵਂ ਵੁਤ੍ਤਾ ਦ੍ਵਾਦਸਨ੍ਨਂ ਪਚ੍ਚਯਾਕਾਰਾਨਂ ਉਗ੍ਗਹਾਦਿਵਸੇਨ ਪਵਤ੍ਤਾ ਪਞ੍ਞਾ.

ਠਾਨਕੁਸਲਤਾਤਿ ‘‘ਯੇ ਯੇ ਧਮ੍ਮਾ ਯੇਸਂ ਯੇਸਂ ਧਮ੍ਮਾਨਂ ਹੇਤੁਪਚ੍ਚਯਾ ਉਪ੍ਪਾਦਾਯ ਤਂ ਤਂ ਠਾਨਨ੍ਤਿ ਯਾ ਤਤ੍ਥ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੪) ਏਵਂ ਵੁਤ੍ਤਾ ‘‘ਚਕ੍ਖੁਂ ਵਤ੍ਥੁਂ ਕਤ੍ਵਾ ਰੂਪਂ ਆਰਮ੍ਮਣਂ ਕਤ੍ਵਾ ਉਪ੍ਪਨ੍ਨਸ੍ਸ ਚਕ੍ਖੁਵਿਞ੍ਞਾਣਸ੍ਸ ਚਕ੍ਖੁਰੂਪਂ (ਧ. ਸ. ਅਟ੍ਠ. ੧੩੪੪) ਠਾਨਞ੍ਚੇਵ ਕਾਰਣਞ੍ਚਾ’’ਤਿ ਏਵਂ ਠਾਨਪਰਿਚ੍ਛਿਨ੍ਦਨਸਮਤ੍ਥਾ ਪਞ੍ਞਾ. ਅਟ੍ਠਾਨਕੁਸਲਤਾਤਿ ‘‘ਯੇ ਯੇ ਧਮ੍ਮਾ ਯੇਸਂ ਯੇਸਂ ਧਮ੍ਮਾਨਂ ਨ ਹੇਤੂ ਨ ਪਚ੍ਚਯਾ ਉਪ੍ਪਾਦਾਯ ਤਂ ਤਂ ਅਟ੍ਠਾਨਨ੍ਤਿ ਯਾ ਤਤ੍ਥ ਪਞ੍ਞਾ ਪਜਾਨਨਾ’’ਤਿ (ਧ. ਸ. ੧੩੪੫) ਏਵਂ ਵੁਤ੍ਤਾ ‘‘ਚਕ੍ਖੁਂ ਵਤ੍ਥੁਂ ਕਤ੍ਵਾ ਰੂਪਂ ਆਰਮ੍ਮਣਂ ਕਤ੍ਵਾ ਸੋਤਵਿਞ੍ਞਾਣਾਦੀਨਿ ਨੁਪ੍ਪਜ੍ਜਨ੍ਤਿ, ਤਸ੍ਮਾ ਤੇਸਂ ਚਕ੍ਖੁਰੂਪਂ ਨ ਠਾਨਂ ਨ ਕਾਰਣ’’ਨ੍ਤਿ ਏਵਂ ਅਟ੍ਠਾਨਪਰਿਚ੍ਛਿਨ੍ਦਨਸਮਤ੍ਥਾ ਪਞ੍ਞਾ ਅਪਿਚ ਏਤਸ੍ਮਿਂ ਦੁਕੇ ‘‘ਕਿਤ੍ਤਾਵਤਾ ਪਨ, ਭਨ੍ਤੇ, ਠਾਨਾਠਾਨਕੁਸਲੋ ਭਿਕ੍ਖੂਤਿ ਅਲਂ ਵਚਨਾਯਾਤਿ. ਇਧਾਨਨ੍ਦ, ਭਿਕ੍ਖੁ ਅਟ੍ਠਾਨਮੇਤਂ ਅਨਵਕਾਸੋ, ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯ, ਨੇਤਂ ਠਾਨਂ ਵਿਜ੍ਜਤੀਤਿ ਪਜਾਨਾਤਿ. ਠਾਨਞ੍ਚ ਖੋ ਏਤਂ ਵਿਜ੍ਜਤਿ, ਯਂ ਪੁਥੁਜ੍ਜਨੋ ਕਞ੍ਚਿ ਸਙ੍ਖਾਰਂ ਨਿਚ੍ਚਤੋ ਉਪਗਚ੍ਛੇਯ੍ਯਾ’’ਤਿ (ਮ. ਨਿ. ੩.੧੨੭) ਇਮਿਨਾਪਿ ਸੁਤ੍ਤੇਨ ਅਤ੍ਥੋ ਵੇਦਿਤਬ੍ਬੋ.

ਅਜ੍ਜਵਨ੍ਤਿ ਗੋਮੁਤ੍ਤਵਙ੍ਕਤਾ ਚਨ੍ਦਵਙ੍ਕਤਾ ਨਙ੍ਗਲਕੋਟਿਵਙ੍ਕਤਾਤਿ ਤਯੋ ਅਨਜ੍ਜਵਾ. ਏਕਚ੍ਚੋ ਹਿ ਭਿਕ੍ਖੁ ਪਠਮਵਯੇ ਏਕਵੀਸਤਿਯਾ ਅਨੇਸਨਾਸੁ ਛਸੁ ਚ ਅਗੋਚਰੇਸੁ ਚਰਤਿ, ਮਜ੍ਝਿਮਪਚ੍ਛਿਮਵਯੇਸੁ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ ਹੋਤਿ, ਅਯਂ ਗੋਮੁਤ੍ਤਵਙ੍ਕਤਾ ਨਾਮ. ਏਕੋ ਪਠਮਵਯੇਪਿ ਪਚ੍ਛਿਮਵਯੇਪਿ ਚਤੁਪਾਰਿਸੁਦ੍ਧਿਸੀਲਂ ਪੂਰੇਤਿ, ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ ਹੋਤਿ, ਮਜ੍ਝਿਮਵਯੇ ਪੁਰਿਮਸਦਿਸੋ, ਅਯਂ ਚਨ੍ਦਵਙ੍ਕਤਾ ਨਾਮ. ਏਕੋ ਪਠਮਵਯੇਪਿ ਮਜ੍ਝਿਮਵਯੇਪਿ ਚਤੁਪਾਰਿਸੁਦ੍ਧਿਸੀਲਂ ਪੂਰੇਤਿ, ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ ਹੋਤਿ, ਪਚ੍ਛਿਮਵਯੇ ਪੁਰਿਮਸਦਿਸੋ ਅਯਂ ਨਙ੍ਗਲਕੋਟਿਵਙ੍ਕਤਾ ਨਾਮ. ਏਕੋ ਸਬ੍ਬਮੇਤਂ ਵਙ੍ਕਤਂ ਪਹਾਯ ਤੀਸੁਪਿ ਵਯੇਸੁ ਪੇਸਲੋ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ ਹੋਤਿ. ਤਸ੍ਸ ਯੋ ਸੋ ਉਜੁਭਾਵੋ, ਇਦਂ ਅਜ੍ਜਵਂ ਨਾਮ. ਅਭਿਧਮ੍ਮੇਪਿ ਵੁਤ੍ਤਂ – ‘‘ਤਤ੍ਥ ਕਤਮੋ ਅਜ੍ਜਵੋ. ਯਾ ਅਜ੍ਜਵਤਾ ਅਜਿਮ੍ਹਤਾ ਅਵਙ੍ਕਤਾ ਅਕੁਟਿਲਤਾ, ਅਯਂ ਵੁਚ੍ਚਤਿ ਅਜ੍ਜਵੋ’’ਤਿ (ਧ. ਸ. ੧੩੪੬). ਲਜ੍ਜਵਨ੍ਤਿ ‘‘ਤਤ੍ਥ ਕਤਮੋ ਲਜ੍ਜਵੋ? ਯੋ ਹਿਰੀਯਤਿ ਹਿਰੀਯਿਤਬ੍ਬੇਨ ਹਿਰੀਯਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ. ਅਯਂ ਵੁਚ੍ਚਤਿ ਲਜ੍ਜਵੋ’’ਤਿ ਏਵਂ ਵੁਤ੍ਤੋ ਲਜ੍ਜੀਭਾਵੋ.

ਖਨ੍ਤੀਤਿ ‘‘ਤਤ੍ਥ ਕਤਮਾ ਖਨ੍ਤਿ? ਯਾ ਖਨ੍ਤਿ ਖਮਨਤਾ ਅਧਿਵਾਸਨਤਾ ਅਚਣ੍ਡਿਕ੍ਕਂ ਅਨਸ੍ਸੁਰੋਪੋ ਅਤ੍ਤਮਨਤਾ ਚਿਤ੍ਤਸ੍ਸਾ’’ਤਿ (ਧ. ਸ. ੧੩੪੮) ਏਵਂ ਵੁਤ੍ਤਾ ਅਧਿਵਾਸਨਖਨ੍ਤਿ. ਸੋਰਚ੍ਚਨ੍ਤਿ ‘‘ਤਤ੍ਥ ਕਤਮਂ ਸੋਰਚ੍ਚਂ? ਯੋ ਕਾਯਿਕੋ ਅਵੀਤਿਕ੍ਕਮੋ, ਵਾਚਸਿਕੋ ਅਵੀਤਿਕ੍ਕਮੋ, ਕਾਯਿਕਵਾਚਸਿਕੋ ਅਵੀਤਿਕ੍ਕਮੋ. ਇਦਂ ਵੁਚ੍ਚਤਿ ਸੋਰਚ੍ਚਂ. ਸਬ੍ਬੋਪਿ ਸੀਲਸਂਵਰੋ ਸੋਰਚ੍ਚ’’ਨ੍ਤਿ (ਧ. ਸ. ੧੩੪੯) ਏਵਂ ਵੁਤ੍ਤੋ ਸੁਰਤਭਾਵੋ.

ਸਾਖਲ੍ਯਨ੍ਤਿ ‘‘ਤਤ੍ਥ ਕਤਮਂ ਸਾਖਲ੍ਯਂ? ਯਾ ਸਾ ਵਾਚਾ ਅਣ੍ਡਕਾ ਕਕ੍ਕਸਾ ਪਰਕਟੁਕਾ ਪਰਾਭਿਸਜ੍ਜਨੀ ਕੋਧਸਾਮਨ੍ਤਾ ਅਸਮਾਧਿਸਂਵਤ੍ਤਨਿਕਾ, ਤਥਾਰੂਪਿਂ ਵਾਚਂ ਪਹਾਯ ਯਾ ਸਾ ਵਾਚਾ ਨੇਲ਼ਾ ਕਣ੍ਣਸੁਖਾ ਪੇਮਨੀਯਾ ਹਦਯਙ੍ਗਮਾ ਪੋਰੀ ਬਹੁਜਨਕਨ੍ਤਾ ਬਹੁਜਨਮਨਾਪਾ, ਤਥਾਰੂਪਿਂ ਵਾਚਂ ਭਾਸਿਤਾ ਹੋਤਿ. ਯਾ ਤਤ੍ਥ ਸਣ੍ਹਵਾਚਤਾ ਸਖਿਲਵਾਚਤਾ ਅਫਰੁਸਵਾਚਤਾ. ਇਦਂ ਵੁਚ੍ਚਤਿ ਸਾਖਲ੍ਯ’’ਨ੍ਤਿ (ਧ. ਸ. ੧੩੫੦) ਏਵਂ ਵੁਤ੍ਤੋ ਸਮ੍ਮੋਦਕਮੁਦੁਕਭਾਵੋ. ਪਟਿਸਨ੍ਥਾਰੋਤਿ ਅਯਂ ਲੋਕਸਨ੍ਨਿਵਾਸੋ ਆਮਿਸੇਨ ਧਮ੍ਮੇਨ ਚਾਤਿ ਦ੍ਵੀਹਿ ਛਿਦ੍ਦੋ, ਤਸ੍ਸ ਤਂ ਛਿਦ੍ਦਂ ਯਥਾ ਨ ਪਞ੍ਞਾਯਤਿ, ਏਵਂ ਪੀਠਸ੍ਸ ਵਿਯ ਪਚ੍ਚਤ੍ਥਰਣੇਨ ਆਮਿਸੇਨ ਧਮ੍ਮੇਨ ਚ ਪਟਿਸਨ੍ਥਰਣਂ. ਅਭਿਧਮ੍ਮੇਪਿ ਵੁਤ੍ਤਂ ‘‘ਤਤ੍ਥ ਕਤਮੋ ਪਟਿਸਨ੍ਥਾਰੋ? ਆਮਿਸਪਟਿਸਨ੍ਥਾਰੋ ਚ ਧਮ੍ਮਪਟਿਸਨ੍ਥਾਰੋ ਚ. ਇਧੇਕਚ੍ਚੋ ਪਟਿਸਨ੍ਥਾਰਕੋ ਹੋਤਿ ਆਮਿਸਪਟਿਸਨ੍ਥਾਰੇਨ ਵਾ ਧਮ੍ਮਪਟਿਸਨ੍ਥਾਰੇਨ ਵਾ. ਅਯਂ ਵੁਚ੍ਚਤਿ ਪਟਿਸਨ੍ਥਾਰੋ’’ਤਿ (ਧ. ਸ. ੧੩੫੧). ਏਤ੍ਥ ਚ ਆਮਿਸੇਨ ਸਙ੍ਗਹੋ ਆਮਿਸਪਟਿਸਨ੍ਥਾਰੋ ਨਾਮ. ਤਂ ਕਰੋਨ੍ਤੇਨ ਮਾਤਾਪਿਤੂਨਂ ਭਿਕ੍ਖੁਗਤਿਕਸ੍ਸ ਵੇਯ੍ਯਾਵਚ੍ਚਕਰਸ੍ਸ ਰਞ੍ਞੋ ਚੋਰਾਨਞ੍ਚ ਅਗ੍ਗਂ ਅਗ੍ਗਹੇਤ੍ਵਾਪਿ ਦਾਤੁਂ ਵਟ੍ਟਤਿ. ਆਮਸਿਤ੍ਵਾ ਦਿਨ੍ਨੇ ਹਿ ਰਾਜਾਨੋ ਚ ਚੋਰਾ ਚ ਅਨਤ੍ਥਮ੍ਪਿ ਕਰੋਨ੍ਤਿ ਜੀਵਿਤਕ੍ਖਯਮ੍ਪਿ ਪਾਪੇਨ੍ਤਿ, ਅਨਾਮਸਿਤ੍ਵਾ ਦਿਨ੍ਨੇ ਅਤ੍ਤਮਨਾ ਹੋਨ੍ਤਿ. ਚੋਰਨਾਗਵਤ੍ਥੁਆਦੀਨਿ ਚੇਤ੍ਥ ਵਤ੍ਥੂਨਿ ਕਥੇਤਬ੍ਬਾਨਿ. ਤਾਨਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯਂ (ਪਾਚਿ. ਅਟ੍ਠ. ੧੮੫-੭) ਵਿਤ੍ਥਾਰਿਤਾਨਿ. ਸਕ੍ਕਚ੍ਚਂ ਉਦ੍ਦੇਸਦਾਨਂ ਪਾਲ਼ਿਵਣ੍ਣਨਾ ਧਮ੍ਮਕਥਾਕਥਨਨ੍ਤਿ ਏਵਂ ਧਮ੍ਮੇਨ ਸਙ੍ਗਹੋ ਧਮ੍ਮਪਟਿਸਨ੍ਥਾਰੋ ਨਾਮ.

ਅਵਿਹਿਂਸਾਤਿ ਕਰੁਣਾਪਿ ਕਰੁਣਾਪੁਬ੍ਬਭਾਗੋਪਿ. ਵੁਤ੍ਤਮ੍ਪਿ ਚੇਤਂ – ‘‘ਤਤ੍ਥ ਕਤਮਾ ਅਵਿਹਿਂਸਾ? ਯਾ ਸਤ੍ਤੇਸੁ ਕਰੁਣਾ ਕਰੁਣਾਯਨਾ ਕਰੁਣਾਯਿਤਤ੍ਤਂ ਕਰੁਣਾਚੇਤੋਵਿਮੁਤ੍ਤਿ, ਅਯਂ ਵੁਚ੍ਚਤਿ ਅਵਿਹਿਂਸਾ’’ਤਿ. ਸੋਚੇਯ੍ਯਨ੍ਤਿ ਮੇਤ੍ਤਾਯ ਚ ਮੇਤ੍ਤਾਪੁਬ੍ਬਭਾਗਸ੍ਸ ਚ ਵਸੇਨ ਸੁਚਿਭਾਵੋ. ਵੁਤ੍ਤਮ੍ਪਿ ਚੇਤਂ – ‘‘ਤਤ੍ਥ ਕਤਮਂ ਸੋਚੇਯ੍ਯਂ? ਯਾ ਸਤ੍ਤੇਸੁ ਮੇਤ੍ਤਿ ਮੇਤ੍ਤਾਯਨਾ ਮੇਤ੍ਤਾਯਿਤਤ੍ਤਂ ਮੇਤ੍ਤਾਚੇਤੋਵਿਮੁਤ੍ਤਿ, ਇਦਂ ਵੁਚ੍ਚਤਿ ਸੋਚੇਯ੍ਯ’’ਨ੍ਤਿ.

ਮੁਟ੍ਠਸ੍ਸਚ੍ਚਨ੍ਤਿ ਸਤਿਵਿਪ੍ਪਵਾਸੋ, ਯਥਾਹ ‘‘ਤਤ੍ਥ ਕਤਮਂ ਮੁਟ੍ਠਸ੍ਸਚ੍ਚਂ? ਯਾ ਅਸਤਿ ਅਨਨੁਸ੍ਸਤਿ ਅਪ੍ਪਟਿਸ੍ਸਤਿ ਅਸ੍ਸਰਣਤਾ ਅਧਾਰਣਤਾ ਪਿਲਾਪਨਤਾ ਸਮ੍ਮੁਸ੍ਸਨਤਾ, ਇਦਂ ਵੁਚ੍ਚਤਿ ਮੁਟ੍ਠਸ੍ਸਚ੍ਚਂ’’ (ਧ. ਸ. ੧੩੫੬). ਅਸਮ੍ਪਜਞ੍ਞਨ੍ਤਿ, ‘‘ਤਤ੍ਥ ਕਤਮਂ ਅਸਮ੍ਪਜਞ੍ਞਂ? ਯਂ ਅਞ੍ਞਾਣਂ ਅਦਸ੍ਸਨਂ ਅਵਿਜ੍ਜਾਲਙ੍ਗੀ ਮੋਹੋ ਅਕੁਸਲਮੂਲ’’ਨ੍ਤਿ ਏਵਂ ਵੁਤ੍ਤਾ ਅਵਿਜ੍ਜਾਯੇਵ. ਸਤਿ ਸਤਿਯੇਵ. ਸਮ੍ਪਜਞ੍ਞਂ ਞਾਣਂ.

ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਤਾਤਿ ‘‘ਤਤ੍ਥ ਕਤਮਾ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਤਾ? ਇਧੇਕਚ੍ਚੋ ਚਕ੍ਖੁਨਾ ਰੂਪਂ ਦਿਸ੍ਵਾ ਨਿਮਿਤ੍ਤਗ੍ਗਾਹੀ ਹੋਤੀ’’ਤਿਆਦਿਨਾ (ਧ. ਸ. ੧੩੫੨) ਨਯੇਨ ਵਿਤ੍ਥਾਰਿਤੋ ਇਨ੍ਦ੍ਰਿਯਸਂਵਰਭੇਦੋ. ਭੋਜਨੇ ਅਮਤ੍ਤਞ੍ਞੁਤਾਤਿ ‘‘ਤਤ੍ਥ ਕਤਮਾ ਭੋਜਨੇ ਅਮਤ੍ਤਞ੍ਞੁਤਾ? ਇਧੇਕਚ੍ਚੋ ਅਪ੍ਪਟਿਸਙ੍ਖਾ ਅਯੋਨਿਸੋ ਆਹਾਰਂ ਆਹਾਰੇਤਿ ਦਵਾਯ ਮਦਾਯ ਮਣ੍ਡਨਾਯ ਵਿਭੂਸਨਾਯ. ਯਾ ਤਤ੍ਥ ਅਸਨ੍ਤੁਟ੍ਠਿਤਾ ਅਮਤ੍ਤਞ੍ਞੁਤਾ ਅਪ੍ਪਟਿਸਙ੍ਖਾ ਭੋਜਨੇ’’ਤਿ ਏਵਂ ਆਗਤੋ ਭੋਜਨੇ ਅਮਤ੍ਤਞ੍ਞੁਭਾਵੋ. ਅਨਨ੍ਤਰਦੁਕੋ ਵੁਤ੍ਤਪ੍ਪਟਿਪਕ੍ਖਨਯੇਨ ਵੇਦਿਤਬ੍ਬੋ.

ਪਟਿਸਙ੍ਖਾਨਬਲਨ੍ਤਿ ‘‘ਤਤ੍ਥ ਕਤਮਂ ਪਟਿਸਙ੍ਖਾਨਬਲਂ? ਯਾ ਪਞ੍ਞਾ ਪਜਾਨਨਾ’’ਤਿ ਏਵਂ ਵਿਤ੍ਥਾਰਿਤਂ ਅਪ੍ਪਟਿਸਙ੍ਖਾਯ ਅਕਮ੍ਪਨਞਾਣਂ. ਭਾਵਨਾਬਲਨ੍ਤਿ ਭਾਵੇਨ੍ਤਸ੍ਸ ਉਪ੍ਪਨ੍ਨਂ ਬਲਂ. ਅਤ੍ਥਤੋ ਵੀਰਿਯਸਮ੍ਬੋਜ੍ਝਙ੍ਗਸੀਸੇਨ ਸਤ੍ਤ ਬੋਜ੍ਝਙ੍ਗਾ ਹੋਨ੍ਤਿ. ਵੁਤ੍ਤਮ੍ਪਿ ਚੇਤਂ – ‘‘ਤਤ੍ਥ ਕਤਮਂ ਭਾਵਨਾਬਲਂ? ਯਾ ਕੁਸਲਾਨਂ ਧਮ੍ਮਾਨਂ ਆਸੇਵਨਾ ਭਾਵਨਾ ਬਹੁਲੀਕਮ੍ਮਂ, ਇਦਂ ਵੁਚ੍ਚਤਿ ਭਾਵਨਾਬਲਂ. ਸਤ੍ਤਬੋਜ੍ਝਙ੍ਗਾ ਭਾਵਨਾਬਲ’’ਨ੍ਤਿ.

ਸਤਿਬਲਨ੍ਤਿ ਅਸ੍ਸਤਿਯਾ ਅਕਮ੍ਪਨਵਸੇਨ ਸਤਿਯੇਵ. ਸਮਾਧਿਬਲਨ੍ਤਿ ਉਦ੍ਧਚ੍ਚੇ ਅਕਮ੍ਪਨਵਸੇਨ ਸਮਾਧਿਯੇਵ. ਸਮਥੋ ਸਮਾਧਿ. ਵਿਪਸ੍ਸਨਾ ਪਞ੍ਞਾ. ਸਮਥੋਵ ਤਂ ਆਕਾਰਂ ਗਹੇਤ੍ਵਾ ਪੁਨ ਪਵਤ੍ਤੇਤਬ੍ਬਸ੍ਸ ਸਮਥਸ੍ਸ ਨਿਮਿਤ੍ਤਵਸੇਨ ਸਮਥਨਿਮਿਤ੍ਤਂ ਪਗ੍ਗਾਹਨਿਮਿਤ੍ਤੇਪਿ ਏਸੇਵ ਨਯੋ. ਪਗ੍ਗਾਹੋ ਵੀਰਿਯਂ. ਅਵਿਕ੍ਖੇਪੋ ਏਕਗ੍ਗਤਾ. ਇਮੇਹਿ ਪਨ ਸਤਿ ਚ ਸਮ੍ਪਜਞ੍ਞਞ੍ਚ ਪਟਿਸਙ੍ਖਾਨਬਲਞ੍ਚ ਭਾਵਨਾਬਲਞ੍ਚ ਸਤਿਬਲਞ੍ਚ ਸਮਾਧਿਬਲਞ੍ਚ ਸਮਥੋ ਚ ਵਿਪ੍ਪਸ੍ਸਨਾ ਚ ਸਮਥਨਿਮਿਤ੍ਤਞ੍ਚ ਪਗ੍ਗਾਹਨਿਮਿਤ੍ਤਞ੍ਚ ਪਗ੍ਗਾਹੋ ਚ ਅਵਿਕ੍ਖੇਪੋ ਚਾਤਿ ਛਹਿ ਦੁਕੇਹਿ ਪਰਤੋ ਸੀਲਦਿਟ੍ਠਿਸਮ੍ਪਦਾਦੁਕੇਨ ਚ ਲੋਕਿਯਲੋਕੁਤ੍ਤਰਮਿਸ੍ਸਕਾ ਧਮ੍ਮਾ ਕਥਿਤਾ.

ਸੀਲਵਿਪਤ੍ਤੀਤਿ ‘‘ਤਤ੍ਥ ਕਤਮਾ ਸੀਲਵਿਪਤ੍ਤਿ? ਕਾਯਿਕੋ ਵੀਤਿਕ੍ਕਮੋ…ਪੇ… ਸਬ੍ਬਮ੍ਪਿ ਦੁਸ੍ਸੀਲ੍ਯਂ ਸੀਲਵਿਪਤ੍ਤੀ’’ਤਿ ਏਵਂ ਵੁਤ੍ਤੋ ਸੀਲਵਿਨਾਸਕੋ ਅਸਂਵਰੋ. ਦਿਟ੍ਠਿਵਿਪਤ੍ਤੀਤਿ ‘‘ਤਤ੍ਥ ਕਤਮਾ ਦਿਟ੍ਠਿਵਿਪਤ੍ਤਿ? ਨਤ੍ਥਿ ਦਿਨ੍ਨਂ ਨਤ੍ਥਿ ਯਿਟ੍ਠ’’ਨ੍ਤਿ ਏਵਂ ਆਗਤਾ ਸਮ੍ਮਾਦਿਟ੍ਠਿਵਿਨਾਸਿਕਾ ਮਿਚ੍ਛਾਦਿਟ੍ਠਿ.

ਸੀਲਸਮ੍ਪਦਾਤਿ ‘‘ਤਤ੍ਥ ਕਤਮਾ ਸੀਲਸਮ੍ਪਦਾ? ਕਾਯਿਕੋ ਅਵੀਤਿਕ੍ਕਮੋ’’ਤਿ ਏਵਂ ਪੁਬ੍ਬੇ ਵੁਤ੍ਤਸੋਰਚ੍ਚਮੇਵ ਸੀਲਸ੍ਸ ਸਮ੍ਪਾਦਨਤੋ ਪਰਿਪੂਰਣਤੋ ‘‘ਸੀਲਸਮ੍ਪਦਾ’’ਤਿ ਵੁਤ੍ਤਂ. ਏਤ੍ਥ ਚ ‘‘ਸਬ੍ਬੋਪਿ ਸੀਲਸਂਵਰੋ ਸੀਲਸਮ੍ਪਦਾ’’ਤਿ ਇਦਂ ਮਾਨਸਿਕਪਰਿਯਾਦਾਨਤ੍ਥਂ ਵੁਤ੍ਤਂ. ਦਿਟ੍ਠਿਸਮ੍ਪਦਾਤਿ ‘‘ਤਤ੍ਥ ਕਤਮਾ ਦਿਟ੍ਠਿਸਮ੍ਪਦਾ? ਅਤ੍ਥਿ ਦਿਨ੍ਨਂ ਅਤ੍ਥਿ ਯਿਟ੍ਠਂ…ਪੇ… ਸਚ੍ਛਿਕਤ੍ਵਾ ਪਵੇਦੇਨ੍ਤੀਤਿ ਯਾ ਏਵਰੂਪਾ ਪਞ੍ਞਾ ਪਜਾਨਨਾ’’ਤਿ ਏਵਂ ਆਗਤਂ ਦਿਟ੍ਠਿਪਾਰਿਪੂਰਿਭੂਤਂ ਞਾਣਂ.

ਸੀਲਵਿਸੁਦ੍ਧੀਤਿ ਵਿਸੁਦ੍ਧਿਂ ਪਾਪੇਤੁਂ ਸਮਤ੍ਥਂ ਸੀਲਂ. ਅਭਿਧਮ੍ਮੇ ਪਨਾਯਂ ‘‘ਤਤ੍ਥ ਕਤਮਾ ਸੀਲਵਿਸੁਦ੍ਧਿ? ਕਾਯਿਕੋ ਅਵੀਤਿਕ੍ਕਮੋ ਵਾਚਸਿਕੋ ਅਵੀਤਿਕ੍ਕਮੋ ਕਾਯਿਕਵਾਚਸਿਕੋ ਅਵੀਤਿਕ੍ਕਮੋ, ਅਯਂ ਵੁਚ੍ਚਤਿ ਸੀਲਵਿਸੁਦ੍ਧੀ’’ਤਿ ਏਵਂ ਵਿਭਤ੍ਤਾ. ਦਿਟ੍ਠਿਵਿਸੁਦ੍ਧੀਤਿ ਵਿਸੁਦ੍ਧਿਂ ਪਾਪੇਤੁਂ ਸਮਤ੍ਥਂ ਦਸ੍ਸਨਂ. ਅਭਿਧਮ੍ਮੇ ਪਨਾਯਂ ‘‘ਤਤ੍ਥ ਕਤਮਾ ਦਿਟ੍ਠਿਵਿਸੁਦ੍ਧਿ? ਕਮ੍ਮਸ੍ਸਕਤਞਾਣਂ ਸਚ੍ਚਾਨੁਲੋਮਿਕਞਾਣਂ ਮਗ੍ਗਸਮਙ੍ਗਿਸ੍ਸਞਾਣਂ ਫਲਸਮਙ੍ਗਿਸ੍ਸਞਾਣ’’ਨ੍ਤਿ ਏਵਂ ਵੁਤ੍ਤਾ. ਏਤ੍ਥ ਚ ਤਿਵਿਧਂ ਦੁਚ੍ਚਰਿਤਂ ਅਤ੍ਤਨਾ ਕਤਮ੍ਪਿ ਪਰੇਨ ਕਤਮ੍ਪਿ ਸਕਂ ਨਾਮ ਨ ਹੋਤਿ ਅਤ੍ਥਭਞ੍ਜਨਤੋ. ਸੁਚਰਿਤਂ ਸਕਂ ਨਾਮ ਅਤ੍ਥਜਨਨਤੋਤਿ ਏਵਂ ਜਾਨਨਂ ਕਮ੍ਮਸ੍ਸਕਤਞਾਣਂ ਨਾਮ. ਤਸ੍ਮਿਂ ਠਤ੍ਵਾ ਬਹੁਂ ਵਟ੍ਟਗਾਮਿਕਮ੍ਮਂ ਆਯੂਹਿਤ੍ਵਾ ਸੁਖਤੋ ਸੁਖੇਨੇਵ ਅਰਹਤ੍ਤਂ ਪਤ੍ਤਾ ਗਣਨਪਥਂ ਵੀਤਿਵਤ੍ਤਾ. ਵਿਪਸ੍ਸਨਾਞਾਣਂ ਪਨ ਵਚੀਸਚ੍ਚਞ੍ਚ ਅਨੁਲੋਮੇਤਿ, ਪਰਮਤ੍ਥਸਚ੍ਚਞ੍ਚ ਨ ਵਿਲੋਮੇਤੀਤਿ ਸਚ੍ਚਾਨੁਲੋਮਿਕਂ ਞਾਣਨ੍ਤਿ ਵੁਤ੍ਤਂ.

‘‘ਦਿਟ੍ਠਿਵਿਸੁਦ੍ਧਿ ਖੋ ਪਨ ਯਥਾਦਿਟ੍ਠਿਸ੍ਸ ਚ ਪਧਾਨ’’ਨ੍ਤਿ ਏਤ੍ਥ ਦਿਟ੍ਠਿਵਿਸੁਦ੍ਧੀਤਿ ਞਾਣਦਸ੍ਸਨਂ ਕਥਿਤਂ. ਯਥਾਦਿਟ੍ਠਿਸ੍ਸ ਚ ਪਧਾਨਨ੍ਤਿ ਤਂਸਮ੍ਪਯੁਤ੍ਤਮੇਵ ਵੀਰਿਯਂ. ਅਪਿ ਚ ਪੁਰਿਮਪਦੇਨ ਚਤੁਮਗ੍ਗਞਾਣਂ. ਪਚ੍ਛਿਮਪਦੇਨ ਤਂਸਮ੍ਪਯੁਤ੍ਤਂ ਵੀਰਿਯਂ. ਅਭਿਧਮ੍ਮੇ ਪਨ ‘‘ਦਿਟ੍ਠਿਵਿਸੁਦ੍ਧਿ ਖੋ ਪਨਾਤਿ ਯਾ ਪਞ੍ਞਾ ਪਜਾਨਨਾ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ. ਯਥਾਦਿਟ੍ਠਿਸ੍ਸ ਚ ਪਧਾਨਨ੍ਤਿ ਯੋ ਚੇਤਸਿਕੋ ਵੀਰਿਯਾਰਮ੍ਭੋ ਸਮ੍ਮਾਵਾਯਾਮੋ’’ਤਿ ਏਵਂ ਅਯਂ ਦੁਕੋ ਵਿਭਤ੍ਤੋ.

‘‘ਸਂਵੇਗੋ ਚ ਸਂਵੇਜਨੀਯੇਸੁ ਠਾਨੇਸੂ’’ਤਿ ਏਤ੍ਥ ‘‘ਸਂਵੇਗੋਤਿ ਜਾਤਿਭਯਂ ਜਰਾਭਯਂ ਬ੍ਯਾਧਿਭਯਂ ਮਰਣਭਯ’’ਨ੍ਤਿ ਏਵਂ ਜਾਤਿਆਦੀਨਿ ਭਯਤੋ ਦਸ੍ਸਨਞਾਣਂ. ਸਂਵੇਜਨੀਯਂ ਠਾਨਨ੍ਤਿ ਜਾਤਿਜਰਾਬ੍ਯਾਧਿਮਰਣਂ. ਏਤਾਨਿ ਹਿ ਚਤ੍ਤਾਰਿ ਜਾਤਿ ਦੁਕ੍ਖਾ, ਜਰਾ ਦੁਕ੍ਖਾ, ਬ੍ਯਾਧਿ ਦੁਕ੍ਖੋ, ਮਰਣਂ ਦੁਕ੍ਖਨ੍ਤਿ ਏਵਂ ਸਂਵੇਗੁਪ੍ਪਤ੍ਤਿਕਾਰਣਤ੍ਤਾ ਸਂਵੇਜਨੀਯਂ ਠਾਨਨ੍ਤਿ ਵੁਤ੍ਤਾਨਿ. ਸਂਵਿਗ੍ਗਸ੍ਸ ਚ ਯੋਨਿਸੋ ਪਧਾਨਨ੍ਤਿ ਏਵਂ ਸਂਵੇਗਜਾਤਸ੍ਸ ਉਪਾਯਪਧਾਨਂ. ‘‘ਇਧ ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤੀ’’ਤਿ ਏਵਂ ਆਗਤਵੀਰਿਯਸ੍ਸੇਤਂ ਅਧਿਵਚਨਂ.

ਅਸਨ੍ਤੁਟ੍ਠਿਤਾ ਚ ਕੁਸਲੇਸੁ ਧਮ੍ਮੇਸੂਤਿ ਯਾ ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਅਸਨ੍ਤੁਟ੍ਠਸ੍ਸ ਭਿਯ੍ਯੋਕਮ੍ਯਤਾ, ਤਾਯ ਹਿ ਸਮਙ੍ਗੀਭੂਤੋ ਪੁਗ੍ਗਲੋ ਸੀਲਂ ਪੂਰੇਤ੍ਵਾ ਝਾਨਂ ਉਪ੍ਪਾਦੇਤਿ. ਝਾਨਂ ਲਭਿਤ੍ਵਾ ਵਿਪਸ੍ਸਨਂ ਆਰਭਤਿ. ਆਰਦ੍ਧਵਿਪਸ੍ਸਕੋ ਅਰਹਤ੍ਤਂ ਅਗਹੇਤ੍ਵਾ ਅਨ੍ਤਰਾ ਵੋਸਾਨਂ ਨਾਪਜ੍ਜਤਿ. ਅਪ੍ਪਟਿਵਾਨਿਤਾ ਚ ਪਧਾਨਸ੍ਮਿਨ੍ਤਿ ‘‘ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਸਕ੍ਕਚ੍ਚਕਿਰਿਯਤਾ ਸਾਤਚ੍ਚਕਿਰਿਯਤਾ ਅਟ੍ਠਿਤਕਿਰਿਯਤਾ ਅਨੋਲੀਨਵੁਤ੍ਤਿਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਆਸੇਵਨਾ ਭਾਵਨਾ ਬਹੁਲੀਕਮ੍ਮ’’ਨ੍ਤਿ ਏਵਂ ਵੁਤ੍ਤਾ ਰਤ੍ਤਿਨ੍ਦਿਵਂ ਛ ਕੋਟ੍ਠਾਸੇ ਕਤ੍ਵਾ ਜਾਗਰਿਯਾਨੁਯੋਗਵਸੇਨ ਆਰਦ੍ਧੇ ਪਧਾਨਸ੍ਮਿਂ ਅਰਹਤ੍ਤਂ ਅਪਤ੍ਵਾ ਅਨਿਵਤ੍ਤਨਤਾ.

ਵਿਜ੍ਜਾਤਿ ਤਿਸ੍ਸੋ ਵਿਜ੍ਜਾ. ਵਿਮੁਤ੍ਤੀਤਿ ਦ੍ਵੇ ਵਿਮੁਤ੍ਤਿਯੋ, ਚਿਤ੍ਤਸ੍ਸ ਚ ਅਧਿਮੁਤ੍ਤਿ, ਨਿਬ੍ਬਾਨਞ੍ਚ. ਏਤ੍ਥ ਚ ਅਟ੍ਠ ਸਮਾਪਤ੍ਤਿਯੋ ਨੀਵਰਣਾਦੀਹਿ ਸੁਟ੍ਠੁ ਮੁਤ੍ਤਤ੍ਤਾ ਅਧਿਮੁਤ੍ਤਿ ਨਾਮ. ਨਿਬ੍ਬਾਨਂ ਸਬ੍ਬਸਙ੍ਖਤਤੋ ਮੁਤ੍ਤਤ੍ਤਾ ਵਿਮੁਤ੍ਤੀਤਿ ਵੇਦਿਤਬ੍ਬਂ.

ਖਯੇ ਞਾਣਨ੍ਤਿ ਕਿਲੇਸਕ੍ਖਯਕਰੇ ਅਰਿਯਮਗ੍ਗੇ ਞਾਣਂ. ਅਨੁਪ੍ਪਾਦੇ ਞਾਣਨ੍ਤਿ ਪਟਿਸਨ੍ਧਿਵਸੇਨ ਅਨੁਪ੍ਪਾਦਭੂਤੇ ਤਂਤਂਮਗ੍ਗਵਜ੍ਝਕਿਲੇਸਾਨਂ ਵਾ ਅਨੁਪ੍ਪਾਦਪਰਿਯੋਸਾਨੇ ਉਪ੍ਪਨ੍ਨੇ ਅਰਿਯਫਲੇ ਞਾਣਂ. ਤੇਨੇਵਾਹ ‘‘ਖਯੇ ਞਾਣਨ੍ਤਿ ਮਗ੍ਗਸਮਙ੍ਗਿਸ੍ਸ ਞਾਣਂ. ਅਨੁਪ੍ਪਾਦੇ ਞਾਣਨ੍ਤਿ ਫਲਸਮਙ੍ਗਿਸ੍ਸ ਞਾਣ’’ਨ੍ਤਿ. ਇਮੇ ਖੋ, ਆਵੁਸੋਤਿਆਦਿ ਏਕਕੇ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਪਞ੍ਚਤਿਂਸਾਯ ਦੁਕਾਨਂ ਵਸੇਨ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਦੁਕਵਣ੍ਣਨਾ ਨਿਟ੍ਠਿਤਾ.

ਤਿਕਵਣ੍ਣਨਾ

੩੦੫. ਇਤਿ ਦੁਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਤਿਕਵਸੇਨ ਦਸ੍ਸੇਤੁਂ ਪੁਨ ਆਰਭਿ. ਤਤ੍ਥ ਲੁਬ੍ਭਤੀਤਿ ਲੋਭੋ. ਅਕੁਸਲਞ੍ਚ ਤਂ ਮੂਲਞ੍ਚ, ਅਕੁਸਲਾਨਂ ਵਾ ਮੂਲਨ੍ਤਿ ਅਕੁਸਲਮੂਲਂ. ਦੁਸ੍ਸਤੀਤਿ ਦੋਸੋ. ਮੁਯ੍ਹਤੀਤਿ ਮੋਹੋ. ਤੇਸਂ ਪਟਿਪਕ੍ਖਨਯੇਨ ਅਲੋਭਾਦਯੋ ਵੇਦਿਤਬ੍ਬਾ.

ਦੁਟ੍ਠੁ ਚਰਿਤਾਨਿ, ਵਿਰੂਪਾਨਿ ਵਾ ਚਰਿਤਾਨੀਤਿ ਦੁਚ੍ਚਰਿਤਾਨਿ. ਕਾਯੇਨ ਦੁਚ੍ਚਰਿਤਂ, ਕਾਯਤੋ ਵਾ ਪਵਤ੍ਤਂ ਦੁਚ੍ਚਰਿਤਨ੍ਤਿ ਕਾਯਦੁਚ੍ਚਰਿਤਂ. ਸੇਸੇਸੁਪਿ ਏਸੇਵ ਨਯੋ. ਸੁਟ੍ਠੁ ਚਰਿਤਾਨਿ, ਸੁਨ੍ਦਰਾਨਿ ਵਾ ਚਰਿਤਾਨੀਤਿ ਸੁਚਰਿਤਾਨਿ. ਦ੍ਵੇਪਿ ਚੇਤੇ ਤਿਕਾ ਪਣ੍ਣਤ੍ਤਿਯਾ ਵਾ ਕਮ੍ਮਪਥੇਹਿ ਵਾ ਕਥੇਤਬ੍ਬਾ. ਪਞ੍ਞਤ੍ਤਿਯਾ ਤਾਵ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ ਵੀਤਿਕ੍ਕਮੋ ਕਾਯਦੁਚ੍ਚਰਿਤਂ. ਅਵੀਤਿਕ੍ਕਮੋ ਕਾਯਸੁਚਰਿਤਂ. ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ ਵੀਤਿਕ੍ਕਮੋ ਵਚੀਦੁਚ੍ਚਰਿਤਂ, ਅਵੀਤਿਕ੍ਕਮੋ ਵਚੀਸੁਚਰਿਤਂ. ਉਭਯਤ੍ਥ ਪਞ੍ਞਤ੍ਤਸ੍ਸ ਸਿਕ੍ਖਾਪਦਸ੍ਸ ਵੀਤਿਕ੍ਕਮੋਵ ਮਨੋਦੁਚ੍ਚਰਿਤਂ, ਅਵੀਤਿਕ੍ਕਮੋ ਮਨੋਸੁਚਰਿਤਂ. ਅਯਂ ਪਣ੍ਣਤ੍ਤਿਕਥਾ. ਪਾਣਾਤਿਪਾਤਾਦਯੋ ਪਨ ਤਿਸ੍ਸੋ ਚੇਤਨਾ ਕਾਯਦ੍ਵਾਰੇਪਿ ਵਚੀਦ੍ਵਾਰੇਪਿ ਉਪ੍ਪਨ੍ਨਾ ਕਾਯਦੁਚ੍ਚਰਿਤਂ. ਚਤਸ੍ਸੋ ਮੁਸਾਵਾਦਾਦਿਚੇਤਨਾ ਵਚੀਦੁਚ੍ਚਰਿਤਂ. ਅਭਿਜ੍ਝਾ ਬ੍ਯਾਪਾਦੋ ਮਿਚ੍ਛਾਦਿਟ੍ਠੀਤਿ ਤਯੋ ਚੇਤਨਾਸਮ੍ਪਯੁਤ੍ਤਧਮ੍ਮਾ ਮਨੋਦੁਚ੍ਚਰਿਤਂ. ਪਾਣਾਤਿਪਾਤਾਦੀਹਿ ਵਿਰਮਨ੍ਤਸ੍ਸ ਉਪ੍ਪਨ੍ਨਾ ਤਿਸ੍ਸੋ ਚੇਤਨਾਪਿ ਵਿਰਤਿਯੋਪਿ ਕਾਯਸੁਚਰਿਤਂ. ਮੁਸਾਵਾਦਾਦੀਹਿ ਵਿਰਮਨ੍ਤਸ੍ਸ ਚਤਸ੍ਸੋ ਚੇਤਨਾਪਿ ਵਿਰਤਿਯੋਪਿ ਵਚੀਸੁਚਰਿਤਂ. ਅਨਭਿਜ੍ਝਾ ਅਬ੍ਯਾਪਾਦੋ ਸਮ੍ਮਾਦਿਟ੍ਠੀਤਿ ਤਯੋ ਚੇਤਨਾਸਮ੍ਪਯੁਤ੍ਤਧਮ੍ਮਾ ਮਨੋਸੁਚਰਿਤਨ੍ਤਿ ਅਯਂ ਕਮ੍ਮਪਥਕਥਾ.

ਕਾਮਪਟਿਸਂਯੁਤ੍ਤੋ ਵਿਤਕ੍ਕੋ ਕਾਮਵਿਤਕ੍ਕੋ. ਬ੍ਯਾਪਾਦਪਟਿਸਂਯੁਤ੍ਤੋ ਵਿਤਕ੍ਕੋ ਬ੍ਯਾਪਾਦਵਿਤਕ੍ਕੋ. ਵਿਹਿਂਸਾਪਟਿਸਂਯੁਤ੍ਤੋ ਵਿਤਕ੍ਕੋ ਵਿਹਿਂਸਾਵਿਤਕ੍ਕੋ. ਤੇਸੁ ਦ੍ਵੇ ਸਤ੍ਤੇਸੁਪਿ ਸਙ੍ਖਾਰੇਸੁਪਿ ਉਪ੍ਪਜ੍ਜਨ੍ਤਿ. ਕਾਮਵਿਤਕ੍ਕੋ ਹਿ ਪਿਯੇ ਮਨਾਪੇ ਸਤ੍ਤੇ ਵਾ ਸਙ੍ਖਾਰੇ ਵਾ ਵਿਤਕ੍ਕੇਨ੍ਤਸ੍ਸ ਉਪ੍ਪਜ੍ਜਤਿ. ਬ੍ਯਾਪਾਦਵਿਤਕ੍ਕੋ ਅਪ੍ਪਿਯੇ ਅਮਨਾਪੇ ਸਤ੍ਤੇ ਵਾ ਸਙ੍ਖਾਰੇ ਵਾ ਕੁਜ੍ਝਿਤ੍ਵਾ ਓਲੋਕਨਕਾਲਤੋ ਪਟ੍ਠਾਯ ਯਾਵ ਵਿਨਾਸਨਾ ਉਪ੍ਪਜ੍ਜਤਿ. ਵਿਹਿਂਸਾਵਿਤਕ੍ਕੋ ਸਙ੍ਖਾਰੇਸੁ ਨੁਪ੍ਪਜ੍ਜਤਿ. ਸਙ੍ਖਾਰੋ ਹਿ ਦੁਕ੍ਖਾਪੇਤਬ੍ਬੋ ਨਾਮ ਨਤ੍ਥਿ. ਇਮੇ ਸਤ੍ਤਾ ਹਞ੍ਞਨ੍ਤੁ ਵਾ ਉਚ੍ਛਿਜ੍ਜਨ੍ਤੁ ਵਾ ਵਿਨਸ੍ਸਨ੍ਤੁ ਵਾ ਮਾ ਵਾ ਅਹੇਸੁਨ੍ਤਿ ਚਿਨ੍ਤਨਕਾਲੇ ਪਨ ਸਤ੍ਤੇਸੁ ਉਪ੍ਪਜ੍ਜਤਿ.

ਨੇਕ੍ਖਮ੍ਮਪਟਿਸਂਯੁਤ੍ਤੋ ਵਿਤਕ੍ਕੋ ਨੇਕ੍ਖਮ੍ਮਵਿਤਕ੍ਕੋ. ਸੋ ਅਸੁਭਪੁਬ੍ਬਭਾਗੇ ਕਾਮਾਵਚਰੋ ਹੋਤਿ. ਅਸੁਭਜ੍ਝਾਨੇ ਰੂਪਾਵਚਰੋ. ਤਂ ਝਾਨਂ ਪਾਦਕਂ ਕਤ੍ਵਾ ਉਪ੍ਪਨ੍ਨਮਗ੍ਗਫਲਕਾਲੇ ਲੋਕੁਤ੍ਤਰੋ. ਅਬ੍ਯਾਪਾਦਪਟਿਸਂਯੁਤ੍ਤੋ ਵਿਤਕ੍ਕੋ ਅਬ੍ਯਾਪਾਦਵਿਤਕ੍ਕੋ. ਸੋ ਮੇਤ੍ਤਾਪੁਬ੍ਬਭਾਗੇ ਕਾਮਾਵਚਰੋ ਹੋਤਿ. ਮੇਤ੍ਤਾਝਾਨੇ ਰੂਪਾਵਚਰੋ. ਤਂ ਝਾਨਂ ਪਾਦਕਂ ਕਤ੍ਵਾ ਉਪ੍ਪਨ੍ਨਮਗ੍ਗਫਲਕਾਲੇ ਲੋਕੁਤ੍ਤਰੋ. ਅਵਿਹਿਂਸਾਪਟਿਸਂਯੁਤ੍ਤੋ ਵਿਤਕ੍ਕੋ ਅਵਿਹਿਂਸਾਵਿਤਕ੍ਕੋ. ਸੋ ਕਰੁਣਾਪੁਬ੍ਬਭਾਗੇ ਕਾਮਾਵਚਰੋ. ਕਰੁਣਾਝਾਨੇ ਰੂਪਾਵਚਰੋ. ਤਂ ਝਾਨਂ ਪਾਦਕਂ ਕਤ੍ਵਾ ਉਪ੍ਪਨ੍ਨਮਗ੍ਗਫਲਕਾਲੇ ਲੋਕੁਤ੍ਤਰੋ. ਯਦਾ ਅਲੋਭੋ ਸੀਸਂ ਹੋਤਿ, ਤਦਾ ਇਤਰੇ ਦ੍ਵੇ ਤਦਨ੍ਵਾਯਿਕਾ ਭਵਨ੍ਤਿ. ਯਦਾ ਮੇਤ੍ਤਾ ਸੀਸਂ ਹੋਤਿ, ਤਦਾ ਇਤਰੇ ਦ੍ਵੇ ਤਦਨ੍ਵਾਯਿਕਾ ਭਵਨ੍ਤਿ. ਯਦਾ ਕਰੁਣਾ ਸੀਸਂ ਹੋਤਿ, ਤਦਾ ਇਤਰੇ ਦ੍ਵੇ ਤਦਨ੍ਵਾਯਿਕਾ ਭਵਨ੍ਤੀਤਿ. ਕਾਮਸਙ੍ਕਪ੍ਪਾਦਯੋ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਦੇਸਨਾਮਤ੍ਤਮੇਵ ਹੇਤਂ. ਅਤ੍ਥਤੋ ਪਨ ਕਾਮਵਿਤਕ੍ਕਾਦੀਨਞ੍ਚ ਕਾਮਸਙ੍ਕਪ੍ਪਾਦੀਨਞ੍ਚ ਨਾਨਾਕਰਣਂ ਨਤ੍ਥਿ.

ਕਾਮਪਟਿਸਂਯੁਤ੍ਤਾ ਸਞ੍ਞਾ ਕਾਮਸਞ੍ਞਾ. ਬ੍ਯਾਪਾਦਪਟਿਸਂਯੁਤ੍ਤਾ ਸਞ੍ਞਾ ਬ੍ਯਾਪਾਦਸਞ੍ਞਾ. ਵਿਹਿਂਸਾਪਟਿਸਂਯੁਤ੍ਤਾ ਸਞ੍ਞਾ ਵਿਹਿਂਸਾਸਞ੍ਞਾ. ਤਾਸਮ੍ਪਿ ਕਾਮਵਿਤਕ੍ਕਾਦੀਨਂ ਵਿਯ ਉਪ੍ਪਜ੍ਜਨਾਕਾਰੋ ਵੇਦਿਤਬ੍ਬੋ. ਤਂਸਮ੍ਪਯੁਤ੍ਤਾਯੇਵ ਹਿ ਏਤਾ. ਨੇਕ੍ਖਮ੍ਮਸਞ੍ਞਾਦਯੋਪਿ ਨੇਕ੍ਖਮ੍ਮਵਿਤਕ੍ਕਾਦਿਸਮ੍ਪਯੁਤ੍ਤਾਯੇਵ. ਤਸ੍ਮਾ ਤਾਸਮ੍ਪਿ ਤਥੇਵ ਕਾਮਾਵਚਰਾਦਿਭਾਵੋ ਵੇਦਿਤਬ੍ਬੋ.

ਕਾਮਧਾਤੁਆਦੀਸੁ ‘‘ਕਾਮਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ. ਅਯਂ ਵੁਚ੍ਚਤਿ ਕਾਮਧਾਤੁ. ਸਬ੍ਬੇਪਿ ਅਕੁਸਲਾ ਧਮ੍ਮਾ ਕਾਮਧਾਤੂ’’ਤਿ ਅਯਂ ਕਾਮਧਾਤੁ. ‘‘ਬ੍ਯਾਪਾਦਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ. ਅਯਂ ਵੁਚ੍ਚਤਿ ਬ੍ਯਾਪਾਦਧਾਤੁ. ਦਸਸੁ ਆਘਾਤਵਤ੍ਥੂਸੁ ਚਿਤ੍ਤਸ੍ਸ ਆਘਾਤੋ ਪਟਿਘਾਤੋ ਅਨਤ੍ਤਮਨਤਾ ਚਿਤ੍ਤਸ੍ਸਾ’’ਤਿ ਅਯਂ ਬ੍ਯਾਪਾਦਧਾਤੁ. ‘‘ਵਿਹਿਂਸਾ ਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ. ਅਯਂ ਵੁਚ੍ਚਤਿ ਵਿਹਿਂਸਾਧਾਤੁ. ਇਧੇਕਚ੍ਚੋ ਪਾਣਿਨਾ ਵਾ ਲੇਡ੍ਡੁਨਾ ਵਾ ਦਣ੍ਡੇਨ ਵਾ ਸਤ੍ਥੇਨ ਵਾ ਰਜ੍ਜੁਯਾ ਵਾ ਅਞ੍ਞਤਰਞ੍ਞਤਰੇਨ ਵਾ ਸਤ੍ਤੇ ਵਿਹੇਠੇਤੀ’’ਤਿ ਅਯਂ ਵਿਹਿਂਸਾਧਾਤੁ. ਤਤ੍ਥ ਦ੍ਵੇ ਕਥਾ ਸਬ੍ਬਸਙ੍ਗਾਹਿਕਾ ਚ ਅਸਮ੍ਭਿਨ੍ਨਾ ਚ. ਤਤ੍ਥ ਕਾਮਧਾਤੁਯਾ ਗਹਿਤਾਯ ਇਤਰਾ ਦ੍ਵੇ ਗਹਿਤਾਵ ਹੋਨ੍ਤਿ, ਤਤੋ ਪਨ ਨੀਹਰਿਤ੍ਵਾ ਅਯਂ ਬ੍ਯਾਪਾਦਧਾਤੁ ਅਯਂ ਵਿਹਿਂਸਾਧਾਤੂਤਿ ਦਸ੍ਸੇਤੀਤਿ ਅਯਂ ਸਬ੍ਬਸਙ੍ਗਾਹਿਕਕਥਾ ਨਾਮ. ਕਾਮਧਾਤੁਂ ਕਥੇਨ੍ਤੋ ਪਨ ਭਗਵਾ ਬ੍ਯਾਪਾਦਧਾਤੁਂ ਬ੍ਯਾਪਾਦਧਾਤੁਟ੍ਠਾਨੇ, ਵਿਹਿਂਸਾਧਾਤੁਂ ਵਿਹਿਂਸਾਧਾਤੁਟ੍ਠਾਨੇ ਠਪੇਤ੍ਵਾ ਅਵਸੇਸਂ ਕਾਮਧਾਤੁ ਨਾਮਾਤਿ ਕਥੇਸੀਤਿ ਅਯਂ ਅਸਮ੍ਭਿਨ੍ਨਕਥਾ ਨਾਮ.

ਨੇਕ੍ਖਮ੍ਮਧਾਤੁਆਦੀਸੁ ‘‘ਨੇਕ੍ਖਮ੍ਮਪਟਿਸਂਯੁਤ੍ਤੋ ਤਕ੍ਕੋ ਵਿਤਕ੍ਕੋ ਸਮ੍ਮਾਸਙ੍ਕਪ੍ਪੋ. ਅਯਂ ਵੁਚ੍ਚਤਿ ਨੇਕ੍ਖਮ੍ਮਧਾਤੁ. ਸਬ੍ਬੇਪਿ ਕੁਸਲਾ ਧਮ੍ਮਾ ਨੇਕ੍ਖਮ੍ਮਧਾਤੂ’’ਤਿ ਅਯਂ ਨੇਕ੍ਖਮ੍ਮਧਾਤੁ. ‘‘ਅਬ੍ਯਾਪਾਦਪਟਿਸਂਯੁਤ੍ਤੋ ਤਕ੍ਕੋ…ਪੇ… ਅਯਂ ਵੁਚ੍ਚਤਿ ਅਬ੍ਯਾਪਾਦਧਾਤੁ. ਯਾ ਸਤ੍ਤੇਸੁ ਮੇਤ੍ਤਿ…ਪੇ… ਮੇਤ੍ਤਾਚੇਤੋਵਿਮੁਤ੍ਤੀ’’ਤਿ ਅਯਂ ਅਬ੍ਯਾਪਾਦਧਾਤੁ. ‘‘ਅਵਿਹਿਂਸਾਪਟਿਸਂਯੁਤ੍ਤੋ ਤਕ੍ਕੋ…ਪੇ… ਅਯਂ ਵੁਚ੍ਚਤਿ ਅਵਿਹਿਂਸਾਧਾਤੁ. ਯਾ ਸਤ੍ਤੇਸੁ ਕਰੁਣਾ…ਪੇ… ਕਰੁਣਾਚੇਤੋਵਿਮੁਤ੍ਤੀ’’ਤਿ ਅਯਂ ਅਵਿਹਿਂਸਾਧਾਤੁ. ਇਧਾਪਿ ਵੁਤ੍ਤਨਯੇਨੇਵ ਦ੍ਵੇ ਕਥਾ ਵੇਦਿਤਬ੍ਬਾ.

ਅਪਰਾਪਿ ਤਿਸ੍ਸੋ ਧਾਤੁਯੋਤਿ ਅਞ੍ਞਾਪਿ ਸੁਞ੍ਞਤਟ੍ਠੇਨ ਤਿਸ੍ਸੋ ਧਾਤੁਯੋ. ਤਾਸੁ ‘‘ਤਤ੍ਥ ਕਤਮਾ ਕਾਮਧਾਤੁ? ਹੇਟ੍ਠਤੋ ਅਵੀਚਿਨਿਰਯਂ ਪਰਿਯਨ੍ਤਂ ਕਰਿਤ੍ਵਾ’’ਤਿ ਏਵਂ ਵਿਤ੍ਥਾਰਿਤੋ ਕਾਮਭਵੋ ਕਾਮਧਾਤੁ ਨਾਮ. ‘‘ਹੇਟ੍ਠਤੋ ਬ੍ਰਹ੍ਮਲੋਕਂ ਪਰਿਯਨ੍ਤਂ ਕਰਿਤ੍ਵਾ ਆਕਾਸਾਨਞ੍ਚਾਯਤਨੁਪਗੇ ਦੇਵੇ ਪਰਿਯਨ੍ਤਂ ਕਰਿਤ੍ਵਾ’’ਤਿ ਏਵਂ ਵਿਤ੍ਥਾਰਿਤਾ ਪਨ ਰੂਪਾਰੂਪਭਵਾ ਇਤਰਾ ਦ੍ਵੇ ਧਾਤੁਯੋ. ਧਾਤੁਯਾ ਆਗਤਟ੍ਠਾਨਮ੍ਹਿ ਹਿ ਭਵੇਨ ਪਰਿਚ੍ਛਿਨ੍ਦਿਤਬ੍ਬਾ. ਭਵਸ੍ਸ ਆਗਤਟ੍ਠਾਨੇ ਧਾਤੁਯਾ ਪਰਿਚ੍ਛਿਨ੍ਦਿਤਬ੍ਬਾ. ਇਧ ਭਵੇਨ ਪਰਿਚ੍ਛੇਦੋ ਕਥਿਤੋ. ਰੂਪਧਾਤੁਆਦੀਸੁ ਰੂਪਾਰੂਪਧਾਤੁਯੋ ਰੂਪਾਰੂਪਭਵਾਯੇਵ. ਨਿਰੋਧਧਾਤੁਯਾ ਨਿਬ੍ਬਾਨਂ ਕਥਿਤਂ.

ਹੀਨਾਦੀਸੁ ਹੀਨਾ ਧਾਤੂਤਿ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਾ. ਅਵਸੇਸਾ ਤੇਭੂਮਕਧਮ੍ਮਾ ਮਜ੍ਝਿਮਧਾਤੁ. ਨਵ ਲੋਕੁਤ੍ਤਰਧਮ੍ਮਾ ਪਣੀਤਧਾਤੁ.

ਕਾਮਤਣ੍ਹਾਤਿ ਪਞ੍ਚਕਾਮਗੁਣਿਕੋ ਰਾਗੋ. ਰੂਪਾਰੂਪਭਵੇਸੁ ਪਨ ਰਾਗੋ ਝਾਨਨਿਕਨ੍ਤਿਸਸ੍ਸਤਦਿਟ੍ਠਿਸਹਗਤੋ ਰਾਗੋ ਭਵਵਸੇਨ ਪਤ੍ਥਨਾ ਭਵਤਣ੍ਹਾ. ਉਚ੍ਛੇਦਦਿਟ੍ਠਿਸਹਗਤੋ ਰਾਗੋ ਵਿਭਵਤਣ੍ਹਾ. ਅਪਿਚ ਠਪੇਤ੍ਵਾ ਪਚ੍ਛਿਮਂ ਤਣ੍ਹਾਦ੍ਵਯਂ ਸੇਸਤਣ੍ਹਾ ਕਾਮਤਣ੍ਹਾ ਨਾਮ. ਯਥਾਹ ‘‘ਤਤ੍ਥ ਕਤਮਾ ਭਵਤਣ੍ਹਾ? ਭਵਦਿਟ੍ਠਿਸਹਗਤੋ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ. ਅਯਂ ਵੁਚ੍ਚਤਿ ਭਵਤਣ੍ਹਾ. ਤਤ੍ਥ ਕਤਮਾ ਵਿਭਵਤਣ੍ਹਾ? ਉਚ੍ਛੇਦਦਿਟ੍ਠਿਸਹਗਤੋ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ, ਅਯਂ ਵੁਚ੍ਚਤਿ ਵਿਭਵਤਣ੍ਹਾ. ਅਵਸੇਸਾ ਤਣ੍ਹਾ ਕਾਮਤਣ੍ਹਾ’’ਤਿ. ਪੁਨ ਕਾਮਤਣ੍ਹਾਦੀਸੁ ਪਞ੍ਚਕਾਮਗੁਣਿਕੋ ਰਾਗੋ ਕਾਮਤਣ੍ਹਾ. ਰੂਪਾਰੂਪਭਵੇਸੁ ਛਨ੍ਦਰਾਗੋ ਇਤਰਾ ਦ੍ਵੇ ਤਣ੍ਹਾ. ਅਭਿਧਮ੍ਮੇ ਪਨੇਤਾ ‘‘ਕਾਮਧਾਤੁਪਟਿਸਂਯੁਤ੍ਤੋ…ਪੇ… ਅਰੂਪਧਾਤੁਪਟਿਸਂਯੁਤ੍ਤੋ’’ਤਿ ਏਵਂ ਵਿਤ੍ਥਾਰਿਤਾ. ਇਮਿਨਾ ਵਾਰੇਨ ਕਿਂ ਦਸ੍ਸੇਤਿ? ਸਬ੍ਬੇਪਿ ਤੇਭੂਮਕਾ ਧਮ੍ਮਾ ਰਜਨੀਯਟ੍ਠੇਨ ਤਣ੍ਹਾਵਤ੍ਥੁਕਾਤਿ ਸਬ੍ਬਤਣ੍ਹਾ ਕਾਮਤਣ੍ਹਾਯ ਪਰਿਯਾਦਿਯਿਤ੍ਵਾ ਤਤੋ ਨੀਹਰਿਤ੍ਵਾ ਇਤਰਾ ਦ੍ਵੇ ਤਣ੍ਹਾ ਦਸ੍ਸੇਤਿ. ਰੂਪਤਣ੍ਹਾਦੀਸੁ ਰੂਪਭਵੇ ਛਨ੍ਦਰਾਗੋ ਰੂਪਤਣ੍ਹਾ. ਅਰੂਪਭਵੇ ਛਨ੍ਦਰਾਗੋ ਅਰੂਪਤਣ੍ਹਾ. ਉਚ੍ਛੇਦਦਿਟ੍ਠਿਸਹਗਤੋ ਰਾਗੋ ਨਿਰੋਧਤਣ੍ਹਾ.

ਸਂਯੋਜਨਤ੍ਤਿਕੇ ਵਟ੍ਟਸ੍ਮਿਂ ਸਂਯੋਜਯਨ੍ਤਿ ਬਨ੍ਧਨ੍ਤੀਤਿ ਸਂਯੋਜਨਾਨਿ. ਸਤਿ ਰੂਪਾਦਿਭੇਦੇ ਕਾਯੇ ਦਿਟ੍ਠਿ, ਵਿਜ੍ਜਮਾਨਾ ਵਾ ਕਾਯੇ ਦਿਟ੍ਠੀਤਿ ਸਕ੍ਕਾਯਦਿਟ੍ਠਿ. ਵਿਚਿਨਨ੍ਤੋ ਏਤਾਯ ਕਿਚ੍ਛਤਿ, ਨ ਸਕ੍ਕੋਤਿ ਸਨ੍ਨਿਟ੍ਠਾਨਂ ਕਾਤੁਨ੍ਤਿ ਵਿਚਿਕਿਚ੍ਛਾ. ਸੀਲਞ੍ਚ ਵਤਞ੍ਚ ਪਰਾਮਸਤੀਤਿ ਸੀਲਬ੍ਬਤਪਰਾਮਾਸੋ. ਅਤ੍ਥਤੋ ਪਨ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ ਨਯੇਨ ਆਗਤਾ ਵੀਸਤਿਵਤ੍ਥੁਕਾ ਦਿਟ੍ਠਿ ਸਕ੍ਕਾਯਦਿਟ੍ਠਿ ਨਾਮ. ‘‘ਸਤ੍ਥਰਿ ਕਙ੍ਖਤੀ’’ਤਿਆਦਿਨਾ ਨਯੇਨ ਆਗਤਾ ਅਟ੍ਠਵਤ੍ਥੁਕਾ ਵਿਮਤਿ ਵਿਚਿਕਿਚ੍ਛਾ ਨਾਮ. ‘‘ਇਧੇਕਚ੍ਚੋ ਸੀਲੇਨ ਸੁਦ੍ਧਿ ਵਤੇਨ ਸੁਦ੍ਧਿ ਸੀਲਬ੍ਬਤੇਨ ਸੁਦ੍ਧੀਤਿ ਸੀਲਂ ਪਰਾਮਸਤਿ, ਵਤਂ ਪਰਾਮਸਤਿ, ਸੀਲਬ੍ਬਤਂ ਪਰਾਮਸਤਿ. ਯਾ ਏਵਰੂਪਾ ਦਿਟ੍ਠਿ ਦਿਟ੍ਠਿਗਤ’’ਨ੍ਤਿਆਦਿਨਾ ਨਯੇਨ ਆਗਤੋ ਵਿਪਰਿਯੇਸਗ੍ਗਾਹੋ ਸੀਲਬ੍ਬਤਪਰਾਮਾਸੋ ਨਾਮ.

ਤਯੋ ਆਸਵਾਤਿ ਏਤ੍ਥ ਚਿਰਪਾਰਿਵਾਸਿਯਟ੍ਠੇਨ ਵਾ ਆਸਵਨਟ੍ਠੇਨ ਵਾ ਆਸਵਾ. ਤਤ੍ਥ ‘‘ਪੁਰਿਮਾ, ਭਿਕ੍ਖਵੇ, ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯ, ਇਤੋ ਪੁਬ੍ਬੇ ਅਵਿਜ੍ਜਾ ਨਾਹੋਸਿ, ਅਥ ਪਚ੍ਛਾ ਸਮਭਵੀ’’ਤਿ, ‘‘ਪੁਰਿਮਾ, ਭਿਕ੍ਖਵੇ, ਕੋਟਿ ਨ ਪਞ੍ਞਾਯਤਿ ਭਵਤਣ੍ਹਾਯ ਭਵਦਿਟ੍ਠਿਯਾ, ਇਤੋ ਪੁਬ੍ਬੇ ਭਵਦਿਟ੍ਠਿ ਨਾਹੋਸਿ, ਅਥ ਪਚ੍ਛਾ ਸਮਭਵੀ’’ਤਿ ਏਵਂ ਤਾਵ ਚਿਰਪਾਰਿਵਾਸਿਯਟ੍ਠੇਨ ਆਸਵਾ ਵੇਦਿਤਬ੍ਬਾ. ਚਕ੍ਖੁਤੋ ਰੂਪੇ ਸਵਤਿ ਆਸਵਤਿ ਸਨ੍ਦਤਿ ਪਵਤ੍ਤਤਿ. ਸੋਤਤੋ ਸਦ੍ਦੇ. ਘਾਨਤੋ ਗਨ੍ਧੇ. ਜਿਵ੍ਹਾਤੋ ਰਸੇ. ਕਾਯਤੋ ਫੋਟ੍ਠਬ੍ਬੇ. ਮਨਤੋ ਧਮ੍ਮੇ ਸਵਤਿ ਆਸਵਤਿ ਸਨ੍ਦਤਿ ਪਵਤ੍ਤਤੀਤਿ ਏਵਂ ਆਸਵਨਟ੍ਠੇਨ ਆਸਵਾਤਿ ਵੇਦਿਤਬ੍ਬਾ.

ਪਾਲ਼ਿਯਂ ਪਨ ਕਤ੍ਥਚਿ ਦ੍ਵੇ ਆਸਵਾ ਆਗਤਾ ‘‘ਦਿਟ੍ਠਧਮ੍ਮਿਕਾ ਚ ਆਸਵਾ ਸਮ੍ਪਰਾਯਿਕਾ ਚ ਆਸਵਾ’’ਤਿ, ਕਤ੍ਥਚਿ ‘‘ਤਯੋਮੇ, ਭਿਕ੍ਖਵੇ, ਆਸਵਾ. ਕਾਮਾਸਵੋ ਭਵਾਸਵੋ ਅਵਿਜ੍ਜਾਸਵੋ’’ਤਿ ਤਯੋ. ਅਭਿਧਮ੍ਮੇ ਤੇਯੇਵ ਦਿਟ੍ਠਾਸਵੇਨ ਸਦ੍ਧਿਂ ਚਤ੍ਤਾਰੋ. ਨਿਬ੍ਬੇਧਿਕਪਰਿਯਾਯੇ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਨਿਰਯਗਾਮਿਨਿਯਾ, ਅਤ੍ਥਿ ਆਸਵਾ ਤਿਰਚ੍ਛਾਨਯੋਨਿਗਾਮਿਨਿਯਾ, ਅਤ੍ਥਿ ਆਸਵਾ ਪੇਤ੍ਤਿਵਿਸਯਗਾਮਿਨਿਯਾ, ਅਤ੍ਥਿ ਆਸਵਾ ਮਨੁਸ੍ਸਲੋਕਗਾਮਿਨਿਯਾ ਅਤ੍ਥਿ ਆਸਵਾ ਦੇਵਲੋਕਗਾਮਿਨਿਯਾ’’ਤਿ ਏਵਂ ਪਞ੍ਚ. ਛਕ੍ਕਨਿਪਾਤੇ ਆਹੁਨੇਯ੍ਯਸੁਤ੍ਤੇ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਸਂਵਰਾ ਪਹਾਤਬ੍ਬਾ, ਅਤ੍ਥਿ ਆਸਵਾ ਪਟਿਸੇਵਨਾ ਪਹਾਤਬ੍ਬਾ, ਅਤ੍ਥਿ ਆਸਵਾ ਪਰਿਵਜ੍ਜਨਾ ਪਹਾਤਬ੍ਬਾ, ਅਤ੍ਥਿ ਆਸਵਾ ਅਧਿਵਾਸਨਾ ਪਹਾਤਬ੍ਬਾ, ਅਤ੍ਥਿ ਆਸਵਾ ਵਿਨੋਦਨਾ ਪਹਾਤਬ੍ਬਾ, ਅਤ੍ਥਿ ਆਸਵਾ ਭਾਵਨਾ ਪਹਾਤਬ੍ਬਾ’’ਤਿ ਏਵਂ ਛ. ਸਬ੍ਬਾਸਵਪਰਿਯਾਯੇ ਤੇਯੇਵ ਦਸ੍ਸਨਾਪਹਾਤਬ੍ਬੇਹਿ ਸਦ੍ਧਿਂ ਸਤ੍ਤ. ਇਮਸ੍ਮਿਂ ਪਨ ਸਙ੍ਗੀਤਿਸੁਤ੍ਤੇ ਤਯੋ. ਤਤ੍ਥ ‘‘ਯੋ ਕਾਮੇਸੁ ਕਾਮਚ੍ਛਨ੍ਦੋ’’ਤਿ ਏਵਂ ਵੁਤ੍ਤੋ ਪਞ੍ਚਕਾਮਗੁਣਿਕੋ ਰਾਗੋ ਕਾਮਾਸਵੋ ਨਾਮ. ‘‘ਯੋ ਭਵੇਸੁ ਭਵਚ੍ਛਨ੍ਦੋ’’ਤਿ ਏਵਂ ਵੁਤ੍ਤੋ ਸਸ੍ਸਤਦਿਟ੍ਠਿਸਹਗਤੋ ਰਾਗੋ, ਭਵਵਸੇਨ ਵਾ ਪਤ੍ਥਨਾ ਭਵਾਸਵੋ ਨਾਮ. ‘‘ਦੁਕ੍ਖੇ ਅਞ੍ਞਾਣ’’ਨ੍ਤਿਆਦਿਨਾ ਨਯੇਨ ਆਗਤਾ ਅਵਿਜ੍ਜਾ ਅਵਿਜ੍ਜਾਸਵੋ ਨਾਮਾਤਿ. ਕਾਮਭਵਾਦਯੋ ਕਾਮਧਾਤੁਆਦਿਵਸੇਨ ਵੁਤ੍ਤਾਯੇਵ.

ਕਾਮੇਸਨਾਦੀਸੁ ‘‘ਤਤ੍ਥ ਕਤਮਾ ਕਾਮੇਸਨਾ? ਯੋ ਕਾਮੇਸੁ ਕਾਮਚ੍ਛਨ੍ਦੋ ਕਾਮਜ੍ਝੋਸਾਨਂ, ਅਯਂ ਵੁਚ੍ਚਤਿ ਕਾਮੇਸਨਾ’’ਤਿ ਏਵਂ ਵੁਤ੍ਤੋ ਕਾਮਗਵੇਸਨਰਾਗੋ ਕਾਮੇਸਨਾ ਨਾਮ. ‘‘ਤਤ੍ਥ ਕਤਮਾ ਭਵੇਸਨਾ? ਯੋ ਭਵੇਸੁ ਭਵਚ੍ਛਨ੍ਦੋ ਭਵਜ੍ਝੋਸਾਨਂ, ਅਯਂ ਵੁਚ੍ਚਤਿ ਭਵੇਸਨਾ’’ਤਿ ਏਵਂ ਵੁਤ੍ਤੋ ਭਵਗਵੇਸਨਰਾਗੋ ਭਵੇਸਨਾ ਨਾਮ. ‘‘ਤਤ੍ਥ ਕਤਮਾ ਬ੍ਰਹ੍ਮਚਰਿਯੇਸਨਾ? ਸਸ੍ਸਤੋ ਲੋਕੋਤਿ ਵਾ…ਪੇ… ਨੇਵ ਹੋਤਿ ਨ ਨਹੋਤਿ ਤਥਾਗਤੋ ਪਰਮ੍ਮਰਣਾਤਿ ਵਾ, ਯਾ ਏਵਰੂਪਾ ਦਿਟ੍ਠਿ ਦਿਟ੍ਠਿਗਤਂ ਵਿਪਰਿਯੇਸਗ੍ਗਾਹੋ, ਅਯਂ ਵੁਚ੍ਚਤਿ ਬ੍ਰਹ੍ਮਚਰਿਯੇਸਨਾ’’ਤਿ ਏਵਂ ਵੁਤ੍ਤਾ ਦਿਟ੍ਠਿਗਤਿਕਸਮ੍ਮਤਸ੍ਸ ਬ੍ਰਹ੍ਮਚਰਿਯਸ੍ਸ ਗਵੇਸਨਦਿਟ੍ਠਿ ਬ੍ਰਹ੍ਮਚਰਿਯੇਸਨਾ ਨਾਮ. ਨ ਕੇਵਲਞ੍ਚ ਭਵਰਾਗਦਿਟ੍ਠਿਯੋਵ, ਤਦੇਕਟ੍ਠਂ ਕਮ੍ਮਮ੍ਪਿ ਏਸਨਾਯੇਵ. ਵੁਤ੍ਤਞ੍ਹੇਤਂ ‘‘ਤਤ੍ਥ ਕਤਮਾ ਕਾਮੇਸਨਾ? ਕਾਮਰਾਗੋ ਤਦੇਕਟ੍ਠਂ ਅਕੁਸਲਂ ਕਾਯਕਮ੍ਮਂ ਵਚੀਕਮ੍ਮਂ ਮਨੋਕਮ੍ਮਂ, ਅਯਂ ਵੁਚ੍ਚਤਿ ਕਾਮੇਸਨਾ. ਤਤ੍ਥ ਕਤਮਾ ਭਵੇਸਨਾ? ਭਵਰਾਗੋ ਤਦੇਕਟ੍ਠਂ ਅਕੁਸਲਂ ਕਾਯਕਮ੍ਮਂ ਵਚੀਕਮ੍ਮਂ ਮਨੋਕਮ੍ਮਂ, ਅਯਂ ਵੁਚ੍ਚਤਿ ਭਵੇਸਨਾ. ਤਤ੍ਥ ਕਤਮਾ ਬ੍ਰਹ੍ਮਚਰਿਯੇਸਨਾ? ਅਨ੍ਤਗ੍ਗਾਹਿਕਾ ਦਿਟ੍ਠਿ ਤਦੇਕਟ੍ਠਂ ਅਕੁਸਲਂ ਕਾਯਕਮ੍ਮਂ ਵਚੀਕਮ੍ਮਂ ਮਨੋਕਮ੍ਮਂ, ਅਯਂ ਵੁਚ੍ਚਤਿ ਬ੍ਰਹ੍ਮਚਰਿਯੇਸਨਾ’’ਤਿ.

ਵਿਧਾਸੁ ‘‘ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ, ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤੀ’’ਤਿਆਦੀਸੁ (ਸਂ. ਨਿ. ੧.੯੫) ਆਕਾਰਸਣ੍ਠਾਨਂ ਵਿਧਾ ਨਾਮ. ‘‘ਏਕਵਿਧੇਨ ਞਾਣਵਤ੍ਥੁ ਦੁਵਿਧੇਨ ਞਾਣਵਤ੍ਥੂ’’ਤਿਆਦੀਸੁ (ਵਿਭ. ੭੫੧) ਕੋਟ੍ਠਾਸੋ. ‘‘ਸੇਯ੍ਯੋਹਮਸ੍ਮੀਤਿ ਵਿਧਾ’’ਤਿਆਦੀਸੁ (ਵਿਭ. ੯੨੦) ਮਾਨੋ ਵਿਧਾ ਨਾਮ. ਇਧ ਸੋ ਅਧਿਪ੍ਪੇਤੋ. ਮਾਨੋ ਹਿ ਸੇਯ੍ਯਾਦਿਵਸੇਨ ਵਿਦਹਨਤੋ ਵਿਧਾਤਿ ਵੁਚ੍ਚਤਿ. ਸੇਯ੍ਯੋਹਮਸ੍ਮੀਤਿ ਇਮਿਨਾ ਸੇਯ੍ਯਸਦਿਸਹੀਨਾਨਂ ਵਸੇਨ ਤਯੋ ਮਾਨਾ ਵੁਤ੍ਤਾ. ਸਦਿਸਹੀਨੇਸੁਪਿ ਏਸੇਵ ਨਯੋ.

ਅਯਞ੍ਹਿ ਮਾਨੋ ਨਾਮ ਸੇਯ੍ਯਸ੍ਸ ਤਿਵਿਧੋ, ਸਦਿਸਸ੍ਸ ਤਿਵਿਧੋ, ਹੀਨਸ੍ਸ ਤਿਵਿਧੋਤਿ ਨਵਵਿਧੋ ਹੋਤਿ. ਤਤ੍ਥ ‘‘ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨੋ ਰਾਜੂਨਞ੍ਚੇਵ ਪਬ੍ਬਜਿਤਾਨਞ੍ਚ ਉਪ੍ਪਜ੍ਜਤਿ.

ਰਾਜਾ ਹਿ ਰਟ੍ਠੇਨ ਵਾ ਧਨਵਾਹਨੇਹਿ ਵਾ ‘‘ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ਸੀਲਧੁਤਙ੍ਗਾਦੀਹਿ ‘‘ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਏਤਂ ਮਾਨਂ ਕਰੋਤਿ. ‘‘ਸੇਯ੍ਯਸ੍ਸ ਸਦਿਸੋਹਮਸ੍ਮੀ’’ਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਰਾਜਾ ਹਿ ਰਟ੍ਠੇਨ ਵਾ ਧਨਵਾਹਨੇਹਿ ਵਾ ਅਞ੍ਞਰਾਜੂਹਿ ਸਦ੍ਧਿਂ ਮਯ੍ਹਂ ਕਿਂ ਨਾਨਾਕਰਣਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ਸੀਲਧੁਤਙ੍ਗਾਦੀਹਿਪਿ ਅਞ੍ਞੇਨ ਭਿਕ੍ਖੁਨਾ ਮਯ੍ਹਂ ਕਿਂ ਨਾਨਾਕਰਣਨ੍ਤਿ ਏਤਂ ਮਾਨਂ ਕਰੋਤਿ. ‘‘ਸੇਯ੍ਯਸ੍ਸ ਹੀਨੋਹਮਸ੍ਮੀ’’ਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਯਸ੍ਸ ਹਿ ਰਞ੍ਞੋ ਰਟ੍ਠਂ ਵਾ ਧਨਵਾਹਨਾਦੀਨਿ ਵਾ ਨਾਤਿਸਮ੍ਪਨ੍ਨਾਨਿ ਹੋਨ੍ਤਿ, ਸੋ ਮਯ੍ਹਂ ਰਾਜਾਤਿ ਵੋਹਾਰਮੁਖਮਤ੍ਤਮੇਵ, ਕਿਂ ਰਾਜਾ ਨਾਮ ਅਹਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ਅਪ੍ਪਲਾਭਸਕ੍ਕਾਰੋ ਅਹਂ ਧਮ੍ਮਕਥਿਕੋ ਬਹੁਸ੍ਸੁਤੋ ਮਹਾਥੇਰੋਤਿ ਕਥਾਮਤ੍ਤਕਮੇਵ, ਕਿਂ ਧਮ੍ਮਕਥਿਕੋ ਨਾਮਾਹਂ ਕਿਂ ਬਹੁਸ੍ਸੁਤੋ ਕਿਂ ਮਹਾਥੇਰੋ ਯਸ੍ਸ ਮੇ ਲਾਭਸਕ੍ਕਾਰੋ ਨਤ੍ਥੀਤਿ ਏਤਂ ਮਾਨਂ ਕਰੋਤਿ.

‘‘ਸਦਿਸਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨਾਦਯੋ ਅਮਚ੍ਚਾਦੀਨਂ ਉਪ੍ਪਜ੍ਜਨ੍ਤਿ. ਅਮਚ੍ਚੋ ਵਾ ਹਿ ਰਟ੍ਠਿਯੋ ਵਾ ਭੋਗਯਾਨਵਾਹਨਾਦੀਹਿ ਕੋ ਮਯਾ ਸਦਿਸੋ ਅਞ੍ਞੋ ਰਾਜਪੁਰਿਸੋ ਅਤ੍ਥੀਤਿ ਵਾ ਮਯ੍ਹਂ ਅਞ੍ਞੇਹਿ ਸਦ੍ਧਿਂ ਕਿਂ ਨਾਨਾਕਰਣਨ੍ਤਿ ਵਾ ਅਮਚ੍ਚੋਤਿ ਨਾਮਮੇਵ ਮਯ੍ਹਂ, ਘਾਸਚ੍ਛਾਦਨਮਤ੍ਤਮ੍ਪਿ ਮੇ ਨਤ੍ਥਿ, ਕਿਂ ਅਮਚ੍ਚੋ ਨਾਮਾਹਨ੍ਤਿ ਵਾ ਏਤੇ ਮਾਨੇ ਕਰੋਤਿ.

‘‘ਹੀਨਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨਾਦਯੋ ਦਾਸਾਦੀਨਂ ਉਪ੍ਪਜ੍ਜਨ੍ਤਿ. ਦਾਸੋ ਹਿ ਮਾਤਿਤੋ ਵਾ ਪਿਤਿਤੋ ਵਾ ਕੋ ਮਯਾ ਸਦਿਸੋ ਅਞ੍ਞੋ ਦਾਸੋ ਨਾਮ ਅਤ੍ਥਿ, ਅਞ੍ਞੇ ਜੀਵਿਤੁਂ ਅਸਕ੍ਕੋਨ੍ਤਾ ਕੁਚ੍ਛਿਹੇਤੁ ਦਾਸਾ ਜਾਤਾ, ਅਹਂ ਪਨ ਪਵੇਣੀਆਗਤਤ੍ਤਾ ਸੇਯ੍ਯੋਤਿ ਵਾ ਪਵੇਣੀਆਗਤਭਾਵੇਨ ਉਭਤੋਸੁਦ੍ਧਿਕਦਾਸਤ੍ਤੇਨ ਅਸੁਕਦਾਸੇਨ ਨਾਮ ਸਦ੍ਧਿਂ ਕਿਂ ਮਯ੍ਹਂ ਨਾਨਾਕਰਣਨ੍ਤਿ ਵਾ ਕੁਚ੍ਛਿਵਸੇਨਾਹਂ ਦਾਸਬ੍ਯ ਉਪਗਤੋ, ਮਾਤਾਪਿਤੁਕੋਟਿਯਾ ਪਨ ਮੇ ਦਾਸਟ੍ਠਾਨਂ ਨਤ੍ਥਿ, ਕਿਂ ਦਾਸੋ ਨਾਮ ਅਹਨ੍ਤਿ ਵਾ ਏਤੇ ਮਾਨੇ ਕਰੋਤਿ. ਯਥਾ ਚ ਦਾਸੋ, ਏਵਂ ਪੁਕ੍ਕੁਸਚਣ੍ਡਾਲਾਦਯੋਪਿ ਏਤੇ ਮਾਨੇ ਕਰੋਨ੍ਤਿਯੇਵ.

ਏਤ੍ਥ ਚ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ, ਚ ਸਦਿਸਸ੍ਸ ਸਦਿਸੋਹਮਸ੍ਮੀਤਿ ਚ ਹੀਨਸ੍ਸ ਹੀਨੋਹਮਸ੍ਮੀਤਿ ਚ ਇਮੇ ਤਯੋ ਮਾਨਾ ਯਾਥਾਵਮਾਨਾ ਨਾਮ ਅਰਹਤ੍ਤਮਗ੍ਗਵਜ੍ਝਾ. ਸੇਸਾ ਛ ਮਾਨਾ ਅਯਾਥਾਵਮਾਨਾ ਨਾਮ ਪਠਮਮਗ੍ਗਵਜ੍ਝਾ.

ਤਯੋ ਅਦ੍ਧਾਤਿ ਤਯੋ ਕਾਲਾ. ਅਤੀਤੋ ਅਦ੍ਧਾਤਿਆਦੀਸੁ ਦ੍ਵੇਪਰਿਯਾਯਾ ਸੁਤ੍ਤਨ੍ਤਪਰਿਯਾਯੋ ਚ ਅਭਿਧਮ੍ਮਪਰਿਯਾਯੋ ਚ. ਸੁਤ੍ਤਨ੍ਤਪਰਿਯਾਯੇਨ ਪਟਿਸਨ੍ਧਿਤੋ ਪੁਬ੍ਬੇ ਅਤੀਤੋ ਅਦ੍ਧਾ ਨਾਮ. ਚੁਤਿਤੋ ਪਚ੍ਛਾ ਅਨਾਗਤੋ ਅਦ੍ਧਾ ਨਾਮ. ਸਹ ਚੁਤਿਪਟਿਸਨ੍ਧੀਹਿ ਤਦਨ੍ਤਰਂ ਪਚ੍ਚੁਪ੍ਪਨ੍ਨੋ ਅਦ੍ਧਾ ਨਾਮ. ਅਭਿਧਮ੍ਮਪਰਿਯਾਯੇਨ ਤੀਸੁ ਖਣੇਸੁ ਭਙ੍ਗਤੋ ਉਦ੍ਧਂ ਅਤੀਤੋ ਅਦ੍ਧਾ ਨਾਮ. ਉਪ੍ਪਾਦਤੋ ਪੁਬ੍ਬੇ ਅਨਾਗਤੋ ਅਦ੍ਧਾ ਨਾਮ. ਖਣਤ੍ਤਯੇ ਪਚ੍ਚੁਪ੍ਪਨ੍ਨੋ ਅਦ੍ਧਾ ਨਾਮ. ਅਤੀਤਾਦਿਭੇਦੋ ਚ ਨਾਮ ਅਯਂ ਧਮ੍ਮਾਨਂ ਹੋਤਿ, ਨ ਕਾਲਸ੍ਸ. ਅਤੀਤਾਦਿਭੇਦੇ ਪਨ ਧਮ੍ਮੇ ਉਪਾਦਾਯ ਇਧ ਪਰਮਤ੍ਥਤੋ ਅਵਿਜ੍ਜਮਾਨੋਪਿ ਕਾਲੋ ਤੇਨੇਵ ਵੋਹਾਰੇਨ ਵੁਤ੍ਤੋਤਿ ਵੇਦਿਤਬ੍ਬੋ.

ਤਯੋ ਅਨ੍ਤਾਤਿ ਤਯੋ ਕੋਟ੍ਠਾਸਾ. ‘‘ਕਾਯਬਨ੍ਧਨਸ੍ਸ ਅਨ੍ਤੋ ਜੀਰਤੀ’’ਤਿਆਦੀਸੁ (ਚੂਲ਼ਵ. ੨੭੮) ਹਿ ਅਨ੍ਤੋਯੇਵ ਅਨ੍ਤੋ. ‘‘ਏਸੇਵਨ੍ਤੋ ਦੁਕ੍ਖਸ੍ਸਾ’’ਤਿਆਦੀਸੁ (ਸਂ. ਨਿ. ੨.੫੧) ਪਰਭਾਗੋ ਅਨ੍ਤੋ. ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨ’’ਨ੍ਤਿ (ਸਂ. ਨਿ. ੩.੮੦) ਏਤ੍ਥ ਲਾਮਕਭਾਵੋ ਅਨ੍ਤੋ. ‘‘ਸਕ੍ਕਾਯੋ ਖੋ, ਆਵੁਸੋ, ਪਠਮੋ ਅਨ੍ਤੋ’’ਤਿਆਦੀਸੁ (ਅ. ਨਿ. ੬.੬੧) ਕੋਟ੍ਠਾਸੋ ਅਨ੍ਤੋ. ਇਧ ਕੋਟ੍ਠਾਸੋ ਅਧਿਪ੍ਪੇਤੋ. ਸਕ੍ਕਾਯੋਤਿ ਪਞ੍ਚੁਪਾਦਾਨਕ੍ਖਨ੍ਧਾ. ਸਕ੍ਕਾਯਸਮੁਦਯੋਤਿ ਤੇਸਂ ਨਿਬ੍ਬਤ੍ਤਿਕਾ ਪੁਰਿਮਤਣ੍ਹਾ. ਸਕ੍ਕਾਯਨਿਰੋਧੋਤਿ ਉਭਿਨ੍ਨਂ ਅਪ੍ਪਵਤ੍ਤਿਭੂਤਂ ਨਿਬ੍ਬਾਨਂ. ਮਗ੍ਗੋ ਪਨ ਨਿਰੋਧਾਧਿਗਮਸ੍ਸ ਉਪਾਯਤ੍ਤਾ ਨਿਰੋਧੇ ਗਹਿਤੇ ਗਹਿਤੋਵਾਤਿ ਵੇਦਿਤਬ੍ਬੋ.

ਦੁਕ੍ਖਦੁਕ੍ਖਤਾਤਿ ਦੁਕ੍ਖਭੂਤਾ ਦੁਕ੍ਖਤਾ. ਦੁਕ੍ਖਵੇਦਨਾਯੇਤਂ ਨਾਮਂ. ਸਙ੍ਖਾਰਦੁਕ੍ਖਤਾਤਿ ਸਙ੍ਖਾਰਭਾਵੇਨ ਦੁਕ੍ਖਤਾ. ਅਦੁਕ੍ਖਮਸੁਖਾਵੇਦਨਾਯੇਤਂ ਨਾਮਂ. ਸਾ ਹਿ ਸਙ੍ਖਤਤ੍ਤਾ ਉਪ੍ਪਾਦਜਰਾਭਙ੍ਗਪੀਲ਼ਿਤਾ, ਤਸ੍ਮਾ ਅਞ੍ਞਦੁਕ੍ਖਸਭਾਵਵਿਰਹਤੋ ਸਙ੍ਖਾਰਦੁਕ੍ਖਤਾਤਿ ਵੁਤ੍ਤਾ. ਵਿਪਰਿਣਾਮਦੁਕ੍ਖਤਾਤਿ ਵਿਪਰਿਣਾਮੇ ਦੁਕ੍ਖਤਾ. ਸੁਖਵੇਦਨਾਯੇਤਂ ਨਾਮਂ. ਸੁਖਸ੍ਸ ਹਿ ਵਿਪਰਿਣਾਮੇ ਦੁਕ੍ਖਂ ਉਪ੍ਪਜ੍ਜਤਿ, ਤਸ੍ਮਾ ਸੁਖਂ ਵਿਪਰਿਣਾਮਦੁਕ੍ਖਤਾਤਿ ਵੁਤ੍ਤਂ. ਅਪਿਚ ਠਪੇਤ੍ਵਾ ਦੁਕ੍ਖਵੇਦਨਂ ਸੁਖਵੇਦਨਞ੍ਚ ਸਬ੍ਬੇਪਿ ਤੇਭੂਮਕਾ ਧਮ੍ਮਾ ‘‘ਸਬ੍ਬੇ ਸਙ੍ਖਾਰਾ ਦੁਕ੍ਖਾ’’ਤਿ ਵਚਨਤੋ ਸਙ੍ਖਾਰਦੁਕ੍ਖਤਾਤਿ ਵੇਦਿਤਬ੍ਬਾ.

ਮਿਚ੍ਛਤ੍ਤਨਿਯਤੋਤਿ ਮਿਚ੍ਛਾਸਭਾਵੋ ਹੁਤ੍ਵਾ ਨਿਯਤੋ. ਨਿਯਤਮਿਚ੍ਛਾਦਿਟ੍ਠਿਯਾ ਸਦ੍ਧਿਂ ਆਨਨ੍ਤਰਿਯਕਮ੍ਮਸ੍ਸੇਤਂ ਨਾਮਂ. ਸਮ੍ਮਾਸਭਾਵੇ ਨਿਯਤੋ ਸਮ੍ਮਤ੍ਤਨਿਯਤੋ. ਚਤੁਨ੍ਨਂ ਅਰਿਯਮਗ੍ਗਾਨਮੇਤਂ ਨਾਮਂ. ਨ ਨਿਯਤੋਤਿ ਅਨਿਯਤੋ. ਅਵਸੇਸਾਨਂ ਧਮ੍ਮਾਨਮੇਤਂ ਨਾਮਂ.

ਤਯੋ ਤਮਾਤਿ ‘‘ਤਮਨ੍ਧਕਾਰੋ ਸਮ੍ਮੋਹੋ ਅਵਿਜ੍ਜੋਘੋ ਮਹਾਭਯੋ’’ਤਿ ਵਚਨਤੋ ਅਵਿਜ੍ਜਾ ਤਮੋ ਨਾਮ. ਇਧ ਪਨ ਅਵਿਜ੍ਜਾਸੀਸੇਨ ਵਿਚਿਕਿਚ੍ਛਾ ਵੁਤ੍ਤਾ. ਆਰਬ੍ਭਾਤਿ ਆਗਮ੍ਮ. ਕਙ੍ਖਤੀਤਿ ਕਙ੍ਖਂ ਉਪ੍ਪਾਦੇਤਿ. ਵਿਚਿਕਿਚ੍ਛਤੀਤਿ ਵਿਚਿਨਨ੍ਤੋ ਕਿਚ੍ਛਂ ਆਪਜ੍ਜਤਿ, ਸਨ੍ਨਿਟ੍ਠਾਤੁਂ ਨ ਸਕ੍ਕੋਤਿ. ਨਾਧਿਮੁਚ੍ਛਤੀਤਿ ਤਤ੍ਥ ਅਧਿਮੁਚ੍ਛਿਤੁਂ ਨ ਸਕ੍ਕੋਤਿ. ਨ ਸਮ੍ਪਸੀਦਤੀਤਿ ਤਂ ਆਰਬ੍ਭ ਪਸਾਦਂ ਆਰੋਪੇਤੁਂ ਨ ਸਕ੍ਕੋਤਿ.

ਅਰਕ੍ਖੇਯ੍ਯਾਨੀਤਿ ਨ ਰਕ੍ਖਿਤਬ੍ਬਾਨਿ. ਤੀਸੁ ਦ੍ਵਾਰੇਸੁ ਪਚ੍ਚੇਕਂ ਰਕ੍ਖਣਕਿਚ੍ਚਂ ਨਤ੍ਥਿ, ਸਬ੍ਬਾਨਿ ਸਤਿਯਾ ਏਵ ਰਕ੍ਖਿਤਾਨੀਤਿ ਦੀਪੇਤਿ. ਨਤ੍ਥਿ ਤਥਾਗਤਸ੍ਸਾਤਿ. ‘‘ਇਦਂ ਨਾਮ ਮੇ ਸਹਸਾ ਉਪ੍ਪਨ੍ਨਂ ਕਾਯਦੁਚ੍ਚਰਿਤਂ, ਇਮਾਹਂ ਯਥਾ ਮੇ ਪਰੋ ਨ ਜਾਨਾਤਿ, ਤਥਾ ਰਕ੍ਖਾਮਿ, ਪਟਿਚ੍ਛਾਦੇਮੀ’’ਤਿ ਏਵਂ ਰਕ੍ਖਿਤਬ੍ਬਂ ਨਤ੍ਥਿ ਤਥਾਗਤਸ੍ਸ ਕਾਯਦੁਚ੍ਚਰਿਤਂ. ਸੇਸੇਸੁਪਿ ਏਸੇਵ ਨਯੋ. ਕਿਂ ਪਨ ਸੇਸਖੀਣਾਸਵਾਨਂ ਕਾਯਸਮਾਚਾਰਾਦਯੋ ਅਪਰਿਸੁਦ੍ਧਾਤਿ? ਨੋ ਅਪਰਿਸੁਦ੍ਧਾ. ਨ ਪਨ ਤਥਾਗਤਸ੍ਸ ਵਿਯ ਪਰਿਸੁਦ੍ਧਾ. ਅਪ੍ਪਸ੍ਸੁਤਖੀਣਾਸਵੋ ਹਿ ਕਿਞ੍ਚਾਪਿ ਲੋਕਵਜ੍ਜਂ ਨਾਪਜ੍ਜਤਿ, ਪਣ੍ਣਤ੍ਤਿਯਂ ਪਨ ਅਕੋਵਿਦਤ੍ਤਾ ਵਿਹਾਰਕਾਰਂ ਕੁਟਿਕਾਰਂ ਸਹਗਾਰਂ ਸਹਸੇਯ੍ਯਨ੍ਤਿ ਏਵਰੂਪਾ ਕਾਯਦ੍ਵਾਰੇ ਆਪਤ੍ਤਿਯੋ ਆਪਜ੍ਜਤਿ. ਸਞ੍ਚਰਿਤ੍ਤਂ ਪਦਸੋਧਮ੍ਮਂ ਉਤ੍ਤਰਿਛਪ੍ਪਞ੍ਚਵਾਚਂ ਭੂਤਾਰੋਚਨਨ੍ਤਿ ਏਵਰੂਪਾ ਵਚੀਦ੍ਵਾਰੇ ਆਪਤ੍ਤਿਯੋ ਆਪਜ੍ਜਤਿ. ਉਪਨਿਕ੍ਖਿਤ੍ਤਸਾਦਿਯਨਵਸੇਨ ਮਨੋਦ੍ਵਾਰੇ ਰੂਪਿਯਪ੍ਪਟਿਗ੍ਗਾਹਣਾਪਤ੍ਤਿਂ ਆਪਜ੍ਜਤਿ, ਧਮ੍ਮਸੇਨਾਪਤਿਸਦਿਸਸ੍ਸਾਪਿ ਹਿ ਖੀਣਾਸਵਸ੍ਸ ਮਨੋਦ੍ਵਾਰੇ ਸਉਪਾਰਮ੍ਭਵਸੇਨ ਮਨੋਦੁਚ੍ਚਰਿਤਂ ਉਪ੍ਪਜ੍ਜਤਿ ਏਵ.

ਚਾਤੁਮਵਤ੍ਥੁਸ੍ਮਿਞ੍ਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸਾਰਿਪੁਤ੍ਤਮੋਗ੍ਗਲ੍ਲਾਨਾਨਂ ਪਣਾਮਿਤਕਾਲੇ ਤੇਸਂ ਅਤ੍ਥਾਯ ਚਾਤੁਮੇਯ੍ਯਕੇਹਿ ਸਕ੍ਯੇਹਿ ਭਗਵਤਿ ਖਮਾਪਿਤੇ ਥੇਰੋ ਭਗਵਤਾ ‘‘ਕਿਨ੍ਤਿ ਤੇ ਸਾਰਿਪੁਤ੍ਤ ਅਹੋਸਿ ਮਯਾ ਭਿਕ੍ਖੁਸਙ੍ਘੇ ਪਣਾਮਿਤੇ’’ਤਿ ਪੁਟ੍ਠੋ ਅਹਂ ਪਰਿਸਾਯ ਅਬ੍ਯਤ੍ਤਭਾਵੇਨ ਸਤ੍ਥਾਰਾ ਪਣਾਮਿਤੋ. ਇਤੋ ਦਾਨਿ ਪਟ੍ਠਾਯ ਪਰਂ ਨ ਓਵਦਿਸ੍ਸਾਮੀਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਆਹ ‘‘ਏਵਂ ਖੋ ਮੇ, ਭਨ੍ਤੇ, ਅਹੋਸਿ ਭਗਵਤਾ ਭਿਕ੍ਖੁਸਙ੍ਘੋ ਪਣਾਮਿਤੋ, ਅਪ੍ਪੋਸ੍ਸੁਕ੍ਕੋ ਦਾਨਿ ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਂ ਅਨੁਯੁਤ੍ਤੋ ਵਿਹਰਿਸ੍ਸਤਿ, ਮਯਮ੍ਪਿ ਦਾਨਿ ਅਪ੍ਪੋਸ੍ਸੁਕ੍ਕਾ ਦਿਟ੍ਠਧਮ੍ਮਸੁਖਵਿਹਾਰਂ ਅਨੁਯੁਤ੍ਤਾ ਵਿਹਰਿਸ੍ਸਾਮਾ’’ਤਿ.

ਅਥਸ੍ਸ ਤਸ੍ਮਿਂ ਮਨੋਦੁਚ੍ਚਰਿਤੇ ਉਪਾਰਮ੍ਭਂ ਆਰੋਪੇਨ੍ਤੋ ਸਤ੍ਥਾ ਆਹ – ‘‘ਆਗਮੇਹਿ ਤ੍ਵਂ, ਸਾਰਿਪੁਤ੍ਤ ਨ ਖੋ ਤੇ, ਸਾਰਿਪੁਤ੍ਤ, ਪੁਨਪਿ ਏਵਰੂਪਂ ਚਿਤ੍ਤਂ ਉਪ੍ਪਾਦੇਤਬ੍ਬ’’ਨ੍ਤਿ. ਏਵਂ ਪਰਂ ਨ ਓਵਦਿਸ੍ਸਾਮਿ ਨਾਨੁਸਾਸਿਸ੍ਸਾਮੀਤਿ ਵਿਤਕ੍ਕਿਤਮਤ੍ਤਮ੍ਪਿ ਥੇਰਸ੍ਸ ਮਨੋਦੁਚ੍ਚਰਿਤਂ ਨਾਮ ਜਾਤਂ. ਭਗਵਤੋ ਪਨ ਏਤ੍ਤਕਂ ਨਾਮ ਨਤ੍ਥਿ, ਅਨਚ੍ਛਰਿਯਞ੍ਚੇਤਂ. ਸਬ੍ਬਞ੍ਞੁਤਂ ਪਤ੍ਤਸ੍ਸ ਦੁਚ੍ਚਰਿਤਂ ਨ ਭਵੇਯ੍ਯ. ਬੋਧਿਸਤ੍ਤਭੂਮਿਯਂ ਠਿਤਸ੍ਸ ਛਬ੍ਬਸ੍ਸਾਨਿ ਪਧਾਨਂ ਅਨੁਯੁਞ੍ਜਨ੍ਤਸ੍ਸਾਪਿ ਪਨਸ੍ਸ ਨਾਹੋਸਿ. ਉਦਰਚ੍ਛਵਿਯਾ ਪਿਟ੍ਠਿਕਣ੍ਟਕਂ ਅਲ੍ਲੀਨਾਯ ‘‘ਕਾਲਙ੍ਕਤੋ ਸਮਣੋ ਗੋਤਮੋ’’ਤਿ ਦੇਵਤਾਨਂ ਵਿਮਤਿਯਾ ਉਪ੍ਪਜ੍ਜਮਾਨਾਯਪਿ ‘‘ਸਿਦ੍ਧਤ੍ਥ ਕਸ੍ਮਾ ਕਿਲਮਸਿ? ਸਕ੍ਕਾ ਭੋਗੇ ਚ ਭੁਞ੍ਜਿਤੁਂ ਪੁਞ੍ਞਾਨਿ ਚ ਕਾਤੁ’’ਨ੍ਤਿ ਮਾਰੇਨ ਪਾਪਿਮਤਾ ਵੁਚ੍ਚਮਾਨਸ੍ਸ ‘‘ਭੋਗੇ ਭੁਞ੍ਜਿਸ੍ਸਾਮੀ’’ਤਿ ਵਿਤਕ੍ਕਮਤ੍ਤਮ੍ਪਿ ਨੁਪ੍ਪਜ੍ਜਤਿ. ਅਥ ਨਂ ਮਾਰੋ ਬੋਧਿਸਤ੍ਤਕਾਲੇ ਛਬ੍ਬਸ੍ਸਾਨਿ ਬੁਦ੍ਧਕਾਲੇ ਏਕਂ ਵਸ੍ਸਂ ਅਨੁਬਨ੍ਧਿਤ੍ਵਾ ਕਿਞ੍ਚਿ ਵਜ੍ਜਂ ਅਪਸ੍ਸਿਤ੍ਵਾ ਇਦਂ ਵਤ੍ਵਾ ਪਕ੍ਕਾਮਿ –

‘‘ਸਤ੍ਤਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮);

ਅਪਿਚ ਅਟ੍ਠਾਰਸਨ੍ਨਂ ਬੁਦ੍ਧਧਮ੍ਮਾਨਂ ਵਸੇਨਾਪਿ ਭਗਵਤੋ ਦੁਚ੍ਚਰਿਤਾਭਾਵੋ ਵੇਦਿਤਬ੍ਬੋ. ਅਟ੍ਠਾਰਸ ਬੁਦ੍ਧਧਮ੍ਮਾ ਨਾਮ ਨਤ੍ਥਿ ਤਥਾਗਤਸ੍ਸ ਕਾਯਦੁਚ੍ਚਰਿਤਂ, ਨਤ੍ਥਿ ਵਚੀਦੁਚ੍ਚਰਿਤਂ, ਨਤ੍ਥਿ ਮਨੋਦੁਚ੍ਚਰਿਤਂ, ਅਤੀਤੇ ਬੁਦ੍ਧਸ੍ਸ ਅਪ੍ਪਟਿਹਤਞਾਣਂ, ਅਨਾਗਤੇ, ਪਚ੍ਚੁਪ੍ਪਨ੍ਨੇ ਬੁਦ੍ਧਸ੍ਸ ਅਪ੍ਪਟਿਹਤਞਾਣਂ, ਸਬ੍ਬਂ ਕਾਯਕਮ੍ਮਂ ਬੁਦ੍ਧਸ੍ਸ ਭਗਵਤੋ ਞਾਣਾਨੁਪਰਿਵਤ੍ਤਿ, ਸਬ੍ਬਂ ਵਚੀਕਮ੍ਮਂ, ਸਬ੍ਬਂ ਮਨੋਕਮ੍ਮਂ ਬੁਦ੍ਧਸ੍ਸ ਭਗਵਤੋ ਞਾਣਾਨੁਪਰਿਵਤ੍ਤਿ, ਨਤ੍ਥਿ ਛਨ੍ਦਸ੍ਸ ਹਾਨਿ, ਨਤ੍ਥਿ ਵੀਰਿਯਸ੍ਸ ਹਾਨਿ, ਨਤ੍ਥਿ ਸਤਿਯਾ ਹਾਨਿ, ਨਤ੍ਥਿ ਦਵਾ, ਨਤ੍ਥਿ ਰਵਾ, ਨਤ੍ਥਿ ਚਲਿਤਂ ਨਤ੍ਥਿ ਸਹਸਾ, ਨਤ੍ਥਿ ਅਬ੍ਯਾਵਟੋ ਮਨੋ, ਨਤ੍ਥਿ ਅਕੁਸਲਚਿਤ੍ਤਨ੍ਤਿ.

ਕਿਞ੍ਚਨਾਤਿ ਪਲਿਬੋਧਾ. ਰਾਗੋ ਕਿਞ੍ਚਨਨ੍ਤਿ ਰਾਗੋ ਉਪ੍ਪਜ੍ਜਮਾਨੋ ਸਤ੍ਤੇ ਬਨ੍ਧਤਿ ਪਲਿਬੁਨ੍ਧਤਿ ਤਸ੍ਮਾ ਕਿਞ੍ਚਨਨ੍ਤਿ ਵੁਚ੍ਚਤਿ. ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ.

ਅਗ੍ਗੀਤਿ ਅਨੁਦਹਨਟ੍ਠੇਨ ਅਗ੍ਗਿ. ਰਾਗਗ੍ਗੀਤਿ ਰਾਗੋ ਉਪ੍ਪਜ੍ਜਮਾਨੋ ਸਤ੍ਤੇ ਅਨੁਦਹਤਿ ਝਾਪੇਤਿ, ਤਸ੍ਮਾ ਅਗ੍ਗੀਤਿ ਵੁਚ੍ਚਤਿ. ਇਤਰੇਸੁਪਿ ਏਸੇਵ ਨਯੋ. ਤਤ੍ਥ ਵਤ੍ਥੂਨਿ ਏਕਾ ਦਹਰਭਿਕ੍ਖੁਨੀ ਚਿਤ੍ਤਲਪਬ੍ਬਤਵਿਹਾਰੇ ਉਪੋਸਥਾਗਾਰਂ ਗਨ੍ਤ੍ਵਾ ਦ੍ਵਾਰਪਾਲਰੂਪਕਂ ਓਲੋਕਯਮਾਨਾ ਠਿਤਾ. ਅਥਸ੍ਸਾ ਅਨ੍ਤੋ ਰਾਗੋ ਉਪ੍ਪਨ੍ਨੋ. ਸਾ ਤੇਨੇਵ ਝਾਯਿਤ੍ਵਾ ਕਾਲਮਕਾਸਿ. ਭਿਕ੍ਖੁਨਿਯੋ ਗਚ੍ਛਮਾਨਾ ‘‘ਅਯਂ ਦਹਰਾ ਠਿਤਾ, ਪਕ੍ਕੋਸਥ, ਨ’’ਨ੍ਤਿ ਆਹਂਸੁ. ਏਕਾ ਗਨ੍ਤ੍ਵਾ ਕਸ੍ਮਾ ਠਿਤਾਸੀਤਿ ਹਤ੍ਥੇ ਗਣ੍ਹਿ. ਗਹਿਤਮਤ੍ਤਾ ਪਰਿਵਤ੍ਤਿਤ੍ਵਾ ਪਪਤਾ. ਇਦਂ ਤਾਵ ਰਾਗਸ੍ਸ ਅਨੁਦਹਨਤਾਯ ਵਤ੍ਥੁ. ਦੋਸਸ੍ਸ ਪਨ ਅਨੁਦਹਨਤਾਯ ਮਨੋਪਦੋਸਿਕਾ ਦੇਵਾ. ਮੋਹਸ੍ਸ ਅਨੁਦਹਨਤਾਯ ਖਿਡ੍ਡਾਪਦੋਸਿਕਾ ਦੇਵਾ ਦਟ੍ਠਬ੍ਬਾ. ਮੋਹਵਸੇਨ ਹਿ ਤਾਸਂ ਸਤਿਸਮ੍ਮੋਸੋ ਹੋਤਿ. ਤਸ੍ਮਾ ਖਿਡ੍ਡਾਵਸੇਨ ਆਹਾਰਕਾਲਂ ਅਤਿਵਤ੍ਤਿਤ੍ਵਾ ਕਾਲਙ੍ਕਰੋਨ੍ਤਿ.

ਆਹੁਨੇਯ੍ਯਗ੍ਗੀਤਿਆਦੀਸੁ ਆਹੁਨਂ ਵੁਚ੍ਚਤਿ ਸਕ੍ਕਾਰੋ, ਆਹੁਨਂ ਅਰਹਨ੍ਤੀਤਿ ਆਹੁਨੇਯ੍ਯਾ. ਮਾਤਾਪਿਤਰੋ ਹਿ ਪੁਤ੍ਤਾਨਂ ਬਹੂਪਕਾਰਤਾਯ ਆਹੁਨਂ ਅਰਹਨ੍ਤਿ. ਤੇਸੁ ਵਿਪ੍ਪਟਿਪਜ੍ਜਮਾਨਾ ਪੁਤ੍ਤਾ ਨਿਰਯਾਦੀਸੁ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਕਿਞ੍ਚਾਪਿ ਮਾਤਾਪਿਤਰੋ ਨਾਨੁਦਹਨ੍ਤਿ, ਅਨੁਦਹਨਸ੍ਸ ਪਨ ਪਚ੍ਚਯਾ ਹੋਨ੍ਤਿ. ਇਤਿ ਅਨੁਦਹਨਟ੍ਠੇਨ ਆਹੁਨੇਯ੍ਯਗ੍ਗੀਤਿ ਵੁਚ੍ਚਨ੍ਤਿ. ਸ੍ਵਾਯਮਤ੍ਥੋ ਮਿਤ੍ਤਵਿਨ੍ਦਕਵਤ੍ਥੁਨਾ ਦੀਪੇਤਬ੍ਬੋ –

ਮਿਤ੍ਤਵਿਨ੍ਦਕੋ ਹਿ ਮਾਤਰਾ ‘‘ਤਾਤ, ਅਜ੍ਜ ਉਪੋਸਥਿਕੋ ਹੁਤ੍ਵਾ ਵਿਹਾਰੇ ਸਬ੍ਬਰਤ੍ਤਿਂ ਧਮ੍ਮਸ੍ਸਵਨਂ ਸੁਣ, ਸਹਸ੍ਸਂ ਤੇ ਦਸ੍ਸਾਮੀ’’ਤਿ ਵੁਤ੍ਤੋ ਧਨਲੋਭੇਨ ਉਪੋਸਥਂ ਸਮਾਦਾਯ ਵਿਹਾਰਂ ਗਨ੍ਤ੍ਵਾ ਇਦਂ ਠਾਨਂ ਅਕੁਤੋਭਯਨ੍ਤਿ ਸਲ੍ਲਕ੍ਖੇਤ੍ਵਾ ਧਮ੍ਮਾਸਨਸ੍ਸ ਹੇਟ੍ਠਾ ਨਿਪਨ੍ਨੋ ਸਬ੍ਬਰਤ੍ਤਿਂ ਨਿਦ੍ਦਾਯਿਤ੍ਵਾ ਘਰਂ ਅਗਮਾਸਿ. ਮਾਤਾ ਪਾਤੋਵ ਯਾਗੁਂ ਪਚਿਤ੍ਵਾ ਉਪਨਾਮੇਸਿ. ਸੋ ਸਹਸ੍ਸਂ ਗਹੇਤ੍ਵਾਵ ਪਿਵਿ. ਅਥਸ੍ਸ ਏਤਦਹੋਸਿ – ‘‘ਧਨਂ ਸਂਹਰਿਸ੍ਸਾਮੀ’’ਤਿ. ਸੋ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿਤੁਕਾਮੋ ਅਹੋਸਿ. ਅਥ ਨਂ ਮਾਤਾ ‘‘ਤਾਤ, ਇਮਸ੍ਮਿਂ ਕੁਲੇ ਚਤ੍ਤਾਲੀਸਕੋਟਿਧਨਂ ਅਤ੍ਥਿ, ਅਲਂ ਗਮਨੇਨਾ’’ਤਿ ਨਿਵਾਰੇਸਿ. ਸੋ ਤਸ੍ਸਾ ਵਚਨਂ ਅਨਾਦਿਯਿਤ੍ਵਾ ਗਚ੍ਛਤਿ ਏਵ. ਮਾਤਾ ਪੁਰਤੋ ਅਟ੍ਠਾਸਿ. ਅਥ ਨਂ ਕੁਜ੍ਝਿਤ੍ਵਾ ‘‘ਅਯਂ ਮਯ੍ਹਂ ਪੁਰਤੋ ਤਿਟ੍ਠਤੀ’’ਤਿ ਪਾਦੇਨ ਪਹਰਿਤ੍ਵਾ ਪਤਿਤਂ ਅਨ੍ਤਰਂ ਕਤ੍ਵਾ ਅਗਮਾਸਿ.

ਮਾਤਾ ਉਟ੍ਠਹਿਤ੍ਵਾ ‘‘ਮਾਦਿਸਾਯ ਮਾਤਰਿ ਏਵਰੂਪਂ ਕਮ੍ਮਂ ਕਤ੍ਵਾ ਗਤਸ੍ਸ ਤੇ ਗਤਟ੍ਠਾਨੇ ਸੁਖਂ ਭਵਿਸ੍ਸਤੀਤਿ ਏਵਂਸਞ੍ਞੀ ਨਾਮ ਤ੍ਵਂ ਪੁਤ੍ਤਾ’’ਤਿ ਆਹ. ਤਸ੍ਸ ਨਾਵਂ ਆਰੁਯ੍ਹ ਗਚ੍ਛਤੋ ਸਤ੍ਤਮੇ ਦਿਵਸੇ ਨਾਵਾ ਅਟ੍ਠਾਸਿ. ਅਥ ਤੇ ਮਨੁਸ੍ਸਾ ‘‘ਅਦ੍ਧਾ ਏਤ੍ਥ ਪਾਪਪੁਰਿਸੋ ਅਤ੍ਥਿ ਸਲਾਕਂ ਦੇਥਾ’’ਤਿ ਆਹਂਸੁ. ਸਲਾਕਾ ਦਿਯ੍ਯਮਾਨਾ ਤਸ੍ਸੇਵ ਤਿਕ੍ਖਤ੍ਤੁਂ ਪਾਪੁਣਾਤਿ. ਤੇ ਤਸ੍ਸ ਉਲ਼ੁਮ੍ਪਂ ਦਤ੍ਵਾ ਤਂ ਸਮੁਦ੍ਦੇ ਪਕ੍ਖਿਪਿਂਸੁ. ਸੋ ਏਕਂ ਦੀਪਂ ਗਨ੍ਤ੍ਵਾ ਵਿਮਾਨਪੇਤੀਹਿ ਸਦ੍ਧਿਂ ਸਮ੍ਪਤ੍ਤਿਂ ਅਨੁਭਵਨ੍ਤੋ ਤਾਹਿ ‘‘ਪੁਰਤੋ ਪੁਰਤੋ ਮਾ ਅਗਮਾਸੀ’’ਤਿ ਵੁਚ੍ਚਮਾਨੋਪਿ ਤਦ੍ਦਿਗੁਣਂ ਤਦ੍ਦਿਗੁਣਂ ਸਮ੍ਪਤ੍ਤਿਂ ਪਸ੍ਸਨ੍ਤੋ ਅਨੁਪੁਬ੍ਬੇਨ ਖੁਰਚਕ੍ਕਧਰਂ ਏਕਂ ਅਦ੍ਦਸ. ਤਸ੍ਸ ਤਂ ਚਕ੍ਕਂ ਪਦੁਮਪੁਪ੍ਫਂ ਵਿਯ ਉਪਟ੍ਠਾਸਿ. ਸੋ ਤਂ ਆਹ – ‘‘ਅਮ੍ਭੋ, ਇਦਂ ਤਯਾ ਪਿਲ਼ਨ੍ਧਿਤਂ ਪਦੁਮਂ ਮਯ੍ਹਂ ਦੇਹੀ’’ਤਿ. ‘‘ਨ ਇਦਂ ਸਾਮਿ ਪਦੁਮਂ, ਖੁਰਚਕ੍ਕਂ ਏਤ’’ਨ੍ਤਿ. ਸੋ ‘‘ਵਞ੍ਚੇਸਿ ਮਂ, ਤ੍ਵਂ ਕਿਂ ਮਯਾ ਪਦੁਮਂ ਅਦਿਟ੍ਠਪੁਬ੍ਬ’’ਨ੍ਤਿ ਵਤ੍ਵਾ ਤ੍ਵਂ ਲੋਹਿਤਚਨ੍ਦਨਂ ਵਿਲਿਮ੍ਪਿਤ੍ਵਾ ਪਿਲ਼ਨ੍ਧਨਂ ਪਦੁਮਪੁਪ੍ਫਂ ਮਯ੍ਹਂ ਨ ਦਾਤੁਕਾਮੋਤਿ ਆਹ. ਸੋ ਚਿਨ੍ਤੇਸਿ ‘‘ਅਯਮ੍ਪਿ ਮਯਾ ਕਤਸਦਿਸਂ ਕਮ੍ਮਂ ਕਤ੍ਵਾ ਤਸ੍ਸ ਫਲਂ ਅਨੁਭਵਿਤੁਕਾਮੋ’’ਤਿ. ਅਥ ਨਂ ‘‘ਹਨ੍ਦ ਰੇ’’ਤਿ ਵਤ੍ਵਾ ਤਸ੍ਸ ਮਤ੍ਥਕੇ ਚਕ੍ਕਂ ਪਕ੍ਖਿਪਿ. ਤੇਨ ਵੁਤ੍ਤਂ –

‘‘ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਾਹਿਪਿ ਚ ਸੋਲ਼ਸ;

ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤ੍ਰਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ’’ਤਿ. (ਜਾ. ੧.੧.੧੦੪).

ਗਹਪਤੀਤਿ ਪਨ ਗੇਹਸਾਮਿਕੋ ਵੁਚ੍ਚਤਿ. ਸੋ ਮਾਤੁਗਾਮਸ੍ਸ ਸਯਨਵਤ੍ਥਾਲਙ੍ਕਾਰਾਦਿਅਨੁਪ੍ਪਦਾਨੇਨ ਬਹੂਪਕਾਰੋ. ਤਂ ਅਤਿਚਰਨ੍ਤੋ ਮਾਤੁਗਾਮੋ ਨਿਰਯਾਦੀਸੁ ਨਿਬ੍ਬਤ੍ਤਤਿ, ਤਸ੍ਮਾ ਸੋਪਿ ਪੁਰਿਮਨਯੇਨੇਵ ਅਨੁਦਹਨਟ੍ਠੇਨ ਗਹਪਤਗ੍ਗੀਤਿ ਵੁਤ੍ਤੋ.

ਤਤ੍ਥ ਵਤ੍ਥੁ – ਕਸ੍ਸਪਬੁਦ੍ਧਸ੍ਸ ਕਾਲੇ ਸੋਤਾਪਨ੍ਨਸ੍ਸ ਉਪਾਸਕਸ੍ਸ ਭਰਿਯਾ ਅਤਿਚਾਰਿਨੀ ਅਹੋਸਿ. ਸੋ ਤਂ ਪਚ੍ਚਕ੍ਖਤੋ ਦਿਸ੍ਵਾ ‘‘ਕਸ੍ਮਾ ਤ੍ਵਂ ਏਵਂ ਕਰੋਸੀ’’ਤਿ ਆਹ. ਸਾ ‘‘ਸਚਾਹਂ ਏਵਰੂਪਂ ਕਰੋਮਿ, ਅਯਂ ਮੇ ਸੁਨਖੋ ਵਿਲੁਪ੍ਪਮਾਨੋ ਖਾਦਤੂ’’ਤਿ ਵਤ੍ਵਾ ਕਾਲਙ੍ਕਤ੍ਵਾ ਕਣ੍ਣਮੁਣ੍ਡਕਦਹੇ ਵੇਮਾਨਿਕਪੇਤੀ ਹੁਤ੍ਵਾ ਨਿਬ੍ਬਤ੍ਤਾ. ਦਿਵਾ ਸਮ੍ਪਤ੍ਤਿਂ ਅਨੁਭਵਤਿ, ਰਤ੍ਤਿਂ ਦੁਕ੍ਖਂ. ਤਦਾ ਬਾਰਾਣਸੀਰਾਜਾ ਮਿਗਵਂ ਚਰਨ੍ਤੋ ਅਰਞ੍ਞਂ ਪਵਿਸਿਤ੍ਵਾ ਅਨੁਪੁਬ੍ਬੇਨ ਕਣ੍ਣਮੁਣ੍ਡਕਦਹਂ ਸਮ੍ਪਤ੍ਤੋ ਤਾਯ ਸਦ੍ਧਿਂ ਸਮ੍ਪਤ੍ਤਿਂ ਅਨੁਭਵਤਿ. ਸਾ ਤਂ ਵਞ੍ਚੇਤ੍ਵਾ ਰਤ੍ਤਿਂ ਦੁਕ੍ਖਂ ਅਨੁਭਵਤਿ. ਸੋ ਞਤ੍ਵਾ ‘‘ਕਤ੍ਥ ਨੁ ਖੋ ਗਚ੍ਛਤੀ’’ਤਿ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਅਵਿਦੂਰੇ ਠਿਤੋ ਕਣ੍ਣਮੁਣ੍ਡਕਦਹਤੋ ਨਿਕ੍ਖਮਿਤ੍ਵਾ ਤਂ ‘‘ਪਟਪਟ’’ਨ੍ਤਿ ਖਾਦਮਾਨਂ ਏਕਂ ਸੁਨਖਂ ਦਿਸ੍ਵਾ ਅਸਿਨਾ ਦ੍ਵਿਧਾ ਛਿਨ੍ਦਿ. ਦ੍ਵੇ ਅਹੇਸੁਂ. ਪੁਨ ਛਿਨ੍ਨੇ ਚਤ੍ਤਾਰੋ. ਪੁਨ ਛਿਨ੍ਨੇ ਅਟ੍ਠ. ਪੁਨ ਛਿਨ੍ਨੇ ਸੋਲ਼ਸ ਅਹੇਸੁਂ. ਸਾ ‘‘ਕਿਂ ਕਰੋਸਿ ਸਾਮੀ’’ਤਿ ਆਹ. ਸੋ ‘‘ਕਿਂ ਇਦ’’ਨ੍ਤਿ ਆਹ. ਸਾ ‘‘ਏਵਂ ਅਕਤ੍ਵਾ ਖੇਲ਼ਪਿਣ੍ਡਂ ਭੂਮਿਯਂ ਨਿਟ੍ਠੁਭਿਤ੍ਵਾ ਪਾਦੇਨ ਘਂਸਾਹੀ’’ਤਿ ਆਹ. ਸੋ ਤਥਾ ਅਕਾਸਿ. ਸੁਨਖਾ ਅਨ੍ਤਰਧਾਯਿਂਸੁ. ਤਂ ਦਿਵਸਂ ਤਸ੍ਸਾ ਕਮ੍ਮਂ ਖੀਣਂ. ਰਾਜਾ ਵਿਪ੍ਪਟਿਸਾਰੀ ਹੁਤ੍ਵਾ ਗਨ੍ਤੁਂ ਆਰਦ੍ਧੋ. ਸਾ ‘‘ਮਯ੍ਹਂ, ਸਾਮਿ, ਕਮ੍ਮਂ ਖੀਣਂ ਮਾ ਅਗਮਾ’’ਤਿ ਆਹ. ਰਾਜਾ ਅਸੁਤ੍ਵਾਵ ਗਤੋ.

ਦਕ੍ਖਿਣੇਯ੍ਯਗ੍ਗੀਤਿ ਏਤ੍ਥ ਪਨ ਦਕ੍ਖਿਣਾਤਿ ਚਤ੍ਤਾਰੋ ਪਚ੍ਚਯਾ, ਭਿਕ੍ਖੁਸਙ੍ਘੋ ਦਕ੍ਖਿਣੇਯ੍ਯੋ. ਸੋ ਗਿਹੀਨਂ ਤੀਸੁ ਸਰਣੇਸੁ ਪਞ੍ਚਸੁ ਸੀਲੇਸੁ ਦਸਸੁ ਸੀਲੇਸੁ ਮਾਤਾਪਿਤੁਉਪਟ੍ਠਾਨੇ ਧਮ੍ਮਿਕਸਮਣਬ੍ਰਾਹ੍ਮਣਉਪਟ੍ਠਾਨੇਤਿ ਏਵਮਾਦੀਸੁ ਕਲ੍ਯਾਣਧਮ੍ਮੇਸੁ ਨਿਯੋਜਨੇਨ ਬਹੂਪਕਾਰੋ, ਤਸ੍ਮਿਂ ਮਿਚ੍ਛਾਪਟਿਪਨ੍ਨਾ ਗਿਹੀ ਭਿਕ੍ਖੁਸਙ੍ਘਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਨਿਰਯਾਦੀਸੁ ਨਿਬ੍ਬਤ੍ਤਨ੍ਤਿ, ਤਸ੍ਮਾ ਸੋਪਿ ਪੁਰਿਮਨਯੇਨੇਵ ਅਨੁਦਹਨਟ੍ਠੇਨ ਦਕ੍ਖਿਣੇਯ੍ਯਗ੍ਗੀਤਿ ਵੁਤ੍ਤੋ. ਇਮਸ੍ਸ ਪਨਤ੍ਥਸ੍ਸ ਵਿਭਾਵਨਤ੍ਥਂ ਵਿਮਾਨਵਤ੍ਥੁਸ੍ਮਿਂ ਰੇਵਤੀਵਤ੍ਥੁ ਵਿਤ੍ਥਾਰੇਤਬ੍ਬਂ.

‘‘ਤਿਵਿਧੇਨ ਰੂਪਸਙ੍ਗਹੋ’’ਤਿ ਏਤ੍ਥ ਤਿਵਿਧੇਨਾਤਿ ਤੀਹਿ ਕੋਟ੍ਠਾਸੇਹਿ. ਸਙ੍ਗਹੋਤਿ ਜਾਤਿਸਞ੍ਜਾਤਿਕਿਰਿਯਗਣਨਵਸੇਨ ਚਤੁਬ੍ਬਿਧੋ ਸਙ੍ਗਹੋ. ਤਤ੍ਥ ਸਬ੍ਬੇ ਖਤ੍ਤਿਯਾ ਆਗਚ੍ਛਨ੍ਤੂਤਿਆਦਿਕੋ (ਮ. ਨਿ. ੧.੪੬੨) ਜਾਤਿਸਙ੍ਗਹੋ. ਸਬ੍ਬੇ ਕੋਸਲਕਾਤਿਆਦਿਕੋ ਸਞ੍ਜਾਤਿਸਙ੍ਗਹੋ. ਸਬ੍ਬੇ ਹਤ੍ਥਾਰੋਹਾਤਿਆਦਿਕੋ ਕਿਰਿਯਸਙ੍ਗਹੋ. ਚਕ੍ਖਾਯਤਨਂ ਕਤਮਂ ਖਨ੍ਧਗਣਨਂ ਗਚ੍ਛਤੀਤਿ? ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤੀਤਿ. ਹਞ੍ਚਿ ਚਕ੍ਖਾਯਤਨਂ ਰੂਪਕ੍ਖਨ੍ਧੇਨ ਸਙ੍ਗਹਿਤਨ੍ਤਿ ਅਯਂ ਗਣਨਸਙ੍ਗਹੋ, ਸੋ ਇਧ ਅਧਿਪ੍ਪੇਤੋ. ਤਸ੍ਮਾ ਤਿਵਿਧੇਨ ਰੂਪਸਙ੍ਗਹੋਤਿ ਤੀਹਿ ਕੋਟ੍ਠਾਸੇਹਿ ਰੂਪਗਣਨਾਤਿ ਅਤ੍ਥੋ.

ਸਨਿਦਸ੍ਸਨਾਦੀਸੁ ਅਤ੍ਤਾਨਂ ਆਰਬ੍ਭ ਪਵਤ੍ਤੇਨ ਚਕ੍ਖੁਵਿਞ੍ਞਾਣਸਙ੍ਖਾਤੇਨ ਸਹ ਨਿਦਸ੍ਸਨੇਨਾਤਿ ਸਨਿਦਸ੍ਸਨਂ. ਚਕ੍ਖੁਪਟਿਹਨਨਸਮਤ੍ਥਤੋ ਸਹ ਪਟਿਘੇਨਾਤਿ ਸਪ੍ਪਟਿਘਂ. ਤਂ ਅਤ੍ਥਤੋ ਰੂਪਾਯਤਨਮੇਵ. ਚਕ੍ਖੁਵਿਞ੍ਞਾਣਸਙ੍ਖਾਤਂ ਨਾਸ੍ਸ ਨਿਦਸ੍ਸਨਨ੍ਤਿ ਅਨਿਦਸ੍ਸਨਂ. ਸੋਤਾਦਿਪਟਿਹਨਨਸਮਤ੍ਥਤੋ ਸਹ ਪਟਿਘੇਨਾਤਿ ਸਪ੍ਪਟਿਘਂ. ਤਂ ਅਤ੍ਥਤੋ ਚਕ੍ਖਾਯਤਨਾਦੀਨਿ ਨਵ ਆਯਤਨਾਨਿ. ਵੁਤ੍ਤਪ੍ਪਕਾਰਂ ਨਾਸ੍ਸ ਨਿਦਸ੍ਸਨਨ੍ਤਿ ਅਨਿਦਸ੍ਸਨਂ. ਨਾਸ੍ਸ ਪਟਿਘੋਤਿ ਅਪ੍ਪਟਿਘਂ. ਤਂ ਅਤ੍ਥਤੋ ਠਪੇਤ੍ਵਾ ਦਸਾਯਤਨਾਨਿ ਅਵਸੇਸਂ ਸੁਖੁਮਰੂਪਂ.

ਤਯੋ ਸਙ੍ਖਾਰਾਤਿ ਸਹਜਾਤਧਮ੍ਮੇ ਚੇਵ ਸਮ੍ਪਰਾਯੇ ਫਲਧਮ੍ਮੇ ਚ ਸਙ੍ਖਰੋਨ੍ਤਿ ਰਾਸੀ ਕਰੋਨ੍ਤੀਤਿ ਸਙ੍ਖਾਰਾ. ਅਭਿਸਙ੍ਖਰੋਤੀਤਿ ਅਭਿਸਙ੍ਖਾਰੋ. ਪੁਞ੍ਞੋ ਅਭਿਸਙ੍ਖਾਰੋ ਪੁਞ੍ਞਾਭਿਸਙ੍ਖਾਰੋ.

‘‘ਤਤ੍ਥ ਕਤਮੋ ਪੁਞ੍ਞਾਭਿਸਙ੍ਖਾਰੋ? ਕੁਸਲਾ ਚੇਤਨਾ ਕਾਮਾਵਚਰਾ ਰੂਪਾਵਚਰਾ ਦਾਨਮਯਾ ਸੀਲਮਯਾ ਭਾਵਨਾਮਯਾ’’ਤਿ ਏਵਂ ਵੁਤ੍ਤਾਨਂ ਅਟ੍ਠਨ੍ਨਂ ਕਾਮਾਵਚਰਕੁਸਲਮਹਾਚਿਤ੍ਤਚੇਤਨਾਨਂ, ਪਞ੍ਚਨ੍ਨਂ ਰੂਪਾਵਚਰਕੁਸਲਚੇਤਨਾਨਞ੍ਚੇਤਂ ਅਧਿਵਚਨਂ. ਏਤ੍ਥ ਚ ਦਾਨਸੀਲਮਯਾ ਅਟ੍ਠੇਵ ਚੇਤਨਾ ਹੋਨ੍ਤਿ. ਭਾਵਨਾਮਯਾ ਤੇਰਸਾਪਿ. ਯਥਾ ਹਿ ਪਗੁਣਂ ਧਮ੍ਮਂ ਸਜ੍ਝਾਯਮਾਨੋ ਏਕਂ ਦ੍ਵੇ ਅਨੁਸਨ੍ਧਿਂ ਗਤੋਪਿ ਨ ਜਾਨਾਤਿ, ਪਚ੍ਛਾ ਆਵਜ੍ਜਨ੍ਤੋ ਜਾਨਾਤਿ, ਏਵਮੇਵ ਕਸਿਣਪਰਿਕਮ੍ਮਂ ਕਰੋਨ੍ਤਸ੍ਸ ਪਗੁਣਜ੍ਝਾਨਂ ਪਚ੍ਚਵੇਕ੍ਖਨ੍ਤਸ੍ਸ ਞਾਣਵਿਪ੍ਪਯੁਤ੍ਤਾਪਿ ਭਾਵਨਾ ਹੋਤਿ. ਤੇਨ ਵੁਤ੍ਤਂ ‘‘ਭਾਵਨਾਮਯਾ ਤੇਰਸਾਪੀ’’ਤਿ.

ਤਤ੍ਥ ਦਾਨਮਯਾਦੀਸੁ ‘‘ਦਾਨਂ ਆਰਬ੍ਭ ਦਾਨਮਧਿਕਿਚ੍ਚ ਯਾ ਉਪ੍ਪਜ੍ਜਤਿ ਚੇਤਨਾ ਸਞ੍ਚੇਤਨਾ ਚੇਤਯਿਤਤ੍ਤਂ, ਅਯਂ ਵੁਚ੍ਚਤਿ ਦਾਨਮਯੋ ਪੁਞ੍ਞਾਭਿਸਙ੍ਖਾਰੋ. ਸੀਲਂ ਆਰਬ੍ਭ, ਭਾਵਨਂ ਆਰਬ੍ਭ, ਭਾਵਨਮਧਿਕਿਚ੍ਚ ਯਾ ਉਪ੍ਪਜ੍ਜਤਿ ਚੇਤਨਾ ਸਞ੍ਚੇਤਨਾ ਚੇਤਯਿਤਤ੍ਤਂ, ਅਯਂ ਵੁਚ੍ਚਤਿ ਭਾਵਨਾਮਯੋ ਪੁਞ੍ਞਾਭਿਸਙ੍ਖਾਰੋ’’ਤਿ ਅਯਂ ਸਙ੍ਖੇਪਦੇਸਨਾ.

ਚੀਵਰਾਦੀਸੁ ਪਨ ਚਤੂਸੁ ਪਚ੍ਚਯੇਸੁ ਰੂਪਾਦੀਸੁ ਵਾ ਛਸੁ ਆਰਮ੍ਮਣੇਸੁ ਅਨ੍ਨਾਦੀਸੁ ਵਾ ਦਸਸੁ ਦਾਨਵਤ੍ਥੂਸੁ ਤਂ ਤਂ ਦੇਨ੍ਤਸ੍ਸ ਤੇਸਂ ਉਪ੍ਪਾਦਨਤੋ ਪਟ੍ਠਾਯ ਪੁਬ੍ਬਭਾਗੇ, ਪਰਿਚ੍ਚਾਗਕਾਲੇ, ਪਚ੍ਛਾ ਸੋਮਨਸ੍ਸਚਿਤ੍ਤੇਨ ਅਨੁਸ੍ਸਰਣੇ ਚਾਤਿ ਤੀਸੁ ਕਾਲੇਸੁ ਪਵਤ੍ਤਾ ਚੇਤਨਾ ਦਾਨਮਯਾ ਨਾਮ. ਸੀਲਪੂਰਣਤ੍ਥਾਯ ਪਨ ਪਬ੍ਬਜਿਸ੍ਸਾਮੀਤਿ ਵਿਹਾਰਂ ਗਚ੍ਛਨ੍ਤਸ੍ਸ, ਪਬ੍ਬਜਨ੍ਤਸ੍ਸ ਮਨੋਰਥਂ ਮਤ੍ਥਕਂ ਪਾਪੇਤ੍ਵਾ ਪਬ੍ਬਜਿਤੋ ਵਤਮ੍ਹਿ ਸਾਧੁ ਸਾਧੂਤਿ ਆਵਜ੍ਜਨ੍ਤਸ੍ਸ, ਪਾਤਿਮੋਕ੍ਖਂ ਸਂਵਰਨ੍ਤਸ੍ਸ, ਚੀਵਰਾਦਯੋ ਪਚ੍ਚਯੇ ਪਚ੍ਚਵੇਕ੍ਖਨ੍ਤਸ੍ਸ, ਆਪਾਥਗਤੇਸੁ ਰੂਪਾਦੀਸੁ ਚਕ੍ਖੁਦ੍ਵਾਰਾਦੀਨਿ ਸਂਵਰਨ੍ਤਸ੍ਸ, ਆਜੀਵਂ ਸੋਧੇਨ੍ਤਸ੍ਸ ਚ ਪਵਤ੍ਤਾ ਚੇਤਨਾ ਸੀਲਮਯਾ ਨਾਮ.

ਪਟਿਸਮ੍ਭਿਦਾਯਂ ਵੁਤ੍ਤੇਨ ਵਿਪਸ੍ਸਨਾਮਗ੍ਗੇਨ ‘‘ਚਕ੍ਖੁਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਭਾਵੇਨ੍ਤਸ੍ਸ…ਪੇ… ਮਨਂ. ਰੂਪੇ. ਧਮ੍ਮੇ. ਚਕ੍ਖੁਵਿਞ੍ਞਾਣਂ…ਪੇ… ਮਨੋਵਿਞ੍ਞਾਣਂ. ਚਕ੍ਖੁਸਮ੍ਫਸ੍ਸਂ…ਪੇ… ਮਨੋਸਮ੍ਫਸ੍ਸਂ. ਚਕ੍ਖੁਸਮ੍ਫਸ੍ਸਜਂ ਵੇਦਨਂ…ਪੇ… ਮਨੋਸਮ੍ਫਸ੍ਸਜਂ ਵੇਦਨਂ. ਰੂਪਸਞ੍ਞਂ, ਜਰਾਮਰਣਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਭਾਵੇਨ੍ਤਸ੍ਸ ਪਵਤ੍ਤਾ ਚੇਤਨਾ ਭਾਵਨਾਮਯਾ ਨਾਮਾ’’ਤਿ ਅਯਂ ਵਿਤ੍ਥਾਰਕਥਾ.

ਅਪੁਞ੍ਞੋ ਚ ਸੋ ਅਭਿਸਙ੍ਖਾਰੋ ਚਾਤਿ ਅਪੁਞ੍ਞਾਭਿਸਙ੍ਖਾਰੋ. ਦ੍ਵਾਦਸਅਕੁਸਲਚਿਤ੍ਤਸਮ੍ਪਯੁਤ੍ਤਾਨਂ ਚੇਤਨਾਨਂ ਏਤਂ ਅਧਿਵਚਨਂ. ਵੁਤ੍ਤਮ੍ਪਿ ਚੇਤਂ ‘‘ਤਤ੍ਥ ਕਤਮੋ ਅਪੁਞ੍ਞਾਭਿਸਙ੍ਖਾਰੋ? ਅਕੁਸਲਚੇਤਨਾ ਕਾਮਾਵਚਰਾ, ਅਯਂ ਵੁਚ੍ਚਤਿ ਅਪੁਞ੍ਞਾਭਿਸਙ੍ਖਾਰੋ’’ਤਿ. ਆਨੇਞ੍ਜਂ ਨਿਚ੍ਚਲਂ ਸਨ੍ਤਂ ਵਿਪਾਕਭੂਤਂ ਅਰੂਪਮੇਵ ਅਭਿਸਙ੍ਖਰੋਤੀਤਿ ਆਨੇਞ੍ਜਾਭਿਸਙ੍ਖਾਰੋ. ਚਤੁਨ੍ਨਂ ਅਰੂਪਾਵਚਰਕੁਸਲਚੇਤਨਾਨਂ ਏਤਂ ਅਧਿਵਚਨਂ. ਯਥਾਹ ‘‘ਤਤ੍ਥ ਕਤਮੋ ਆਨੇਞ੍ਜਾਭਿਸਙ੍ਖਾਰੋ? ਕੁਸਲਚੇਤਨਾ ਅਰੂਪਾਵਚਰਾ, ਅਯਂ ਵੁਚ੍ਚਤਿ ਆਨੇਞ੍ਜਾਭਿਸਙ੍ਖਾਰੋ’’ਤਿ.

ਪੁਗ੍ਗਲਤ੍ਤਿਕੇ ਸਤ੍ਤਵਿਧੋ ਪੁਰਿਸਪੁਗ੍ਗਲੋ, ਤਿਸ੍ਸੋ ਸਿਕ੍ਖਾ ਸਿਕ੍ਖਤੀਤਿ ਸੇਕ੍ਖੋ. ਖੀਣਾਸਵੋ ਸਿਕ੍ਖਿਤਸਿਕ੍ਖਤ੍ਤਾ ਪੁਨ ਨ ਸਿਕ੍ਖਿਸ੍ਸਤੀਤਿ ਅਸੇਕ੍ਖੋ. ਪੁਥੁਜ੍ਜਨੋ ਸਿਕ੍ਖਾਹਿ ਪਰਿਬਾਹਿਯਤ੍ਤਾ ਨੇਵਸੇਕ੍ਖੋ ਨਾਸੇਕ੍ਖੋ.

ਥੇਰਤ੍ਤਿਕੇ ਜਾਤਿਮਹਲ੍ਲਕੋ ਗਿਹੀ ਜਾਤਿਤ੍ਥੇਰੋ ਨਾਮ. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਥੇਰਕਰਣਾ ਧਮ੍ਮਾ. ਇਧ, ਭਿਕ੍ਖਵੇ, ਥੇਰੋ ਸੀਲਵਾ ਹੋਤਿ, ਬਹੁਸ੍ਸੁਤੋ ਹੋਤਿ, ਚਤੁਨ੍ਨਂ ਝਾਨਾਨਂ ਲਾਭੀ ਹੋਤਿ, ਆਸਵਾਨਂ ਖਯਾ ਬਹੁਸ੍ਸੁਤੋ ਹੋਤਿ, ਚਤੁਨ੍ਨਂ ਝਾਨਾਨਂ ਲਾਭੀ ਹੋਤਿ, ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਥੇਰਕਰਣਾ ਧਮ੍ਮਾ’’ਤਿ (ਅ. ਨਿ. ੪.੨੨). ਏਵਂ ਵੁਤ੍ਤੇਸੁ ਧਮ੍ਮੇਸੁ ਏਕੇਨ ਵਾ ਅਨੇਕੇਹਿ ਵਾ ਸਮਨ੍ਨਾਗਤੋ ਧਮ੍ਮਥੇਰੋ ਨਾਮ. ਅਞ੍ਞਤਰੋ ਥੇਰਨਾਮਕੋ ਭਿਕ੍ਖੂਤਿ ਏਵਂ ਥੇਰਨਾਮਕੋ ਵਾ, ਯਂ ਵਾ ਪਨ ਮਹਲ੍ਲਕਕਾਲੇ ਪਬ੍ਬਜਿਤਂ ਸਾਮਣੇਰਾਦਯੋ ਦਿਸ੍ਵਾ ਥੇਰੋ ਥੇਰੋਤਿ ਵਦਨ੍ਤਿ, ਅਯਂ ਸਮ੍ਮੁਤਿਥੇਰੋ ਨਾਮ.

ਪੁਞ੍ਞਕਿਰਿਯਵਤ੍ਥੂਸੁ ਦਾਨਮੇਵ ਦਾਨਮਯਂ. ਪੁਞ੍ਞਕਿਰਿਯਾ ਚ ਸਾ ਤੇਸਂ ਤੇਸਂ ਆਨਿਸਂਸਾਨਂ ਵਤ੍ਥੁ ਚਾਤਿ ਪੁਞ੍ਞਕਿਰਿਯਵਤ੍ਥੁ. ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ. ਅਤ੍ਥਤੋ ਪਨ ਪੁਬ੍ਬੇ ਵੁਤ੍ਤਦਾਨਮਯਚੇਤਨਾਦਿਵਸੇਨੇਵ ਸਦ੍ਧਿਂ ਪੁਬ੍ਬਭਾਗਅਪਰਭਾਗਚੇਤਨਾਹਿ ਇਮਾਨਿ ਤੀਣਿ ਪੁਞ੍ਞਕਿਰਿਯਵਤ੍ਥੂਨਿ ਵੇਦਿਤਬ੍ਬਾਨਿ. ਏਕਮੇਕਞ੍ਚੇਤ੍ਥ ਪੁਬ੍ਬਭਾਗਤੋ ਪਟ੍ਠਾਯ ਕਾਯੇਨ ਕਰੋਨ੍ਤਸ੍ਸ ਕਾਯਕਮ੍ਮਂ ਹੋਤਿ. ਤਦਤ੍ਥਂ ਵਾਚਂ ਨਿਚ੍ਛਾਰੇਨ੍ਤਸ੍ਸ ਵਚੀਕਮ੍ਮਂ. ਕਾਯਙ੍ਗਵਾਚਙ੍ਗਂ ਅਚੋਪੇਤ੍ਵਾ ਮਨਸਾ ਚਿਨ੍ਤੇਨ੍ਤਸ੍ਸ ਮਨੋਕਮ੍ਮਂ. ਅਨ੍ਨਾਦੀਨਿ ਦੇਨ੍ਤਸ੍ਸ ਚਾਪਿ ਅਨ੍ਨਦਾਨਾਦੀਨਿ ਦੇਮੀਤਿ ਵਾ ਦਾਨਪਾਰਮਿਂ ਆਵਜ੍ਜੇਤ੍ਵਾ ਵਾ ਦਾਨਕਾਲੇ ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ. ਵਤ੍ਤਸੀਸੇ ਠਤ੍ਵਾ ਦਦਤੋ ਸੀਲਮਯਂ. ਖਯਤੋ ਵਯਤੋ ਸਮ੍ਮਸਨਂ ਪਟ੍ਠਪੇਤ੍ਵਾ ਦਦਤੋ ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੁ ਹੋਤਿ.

ਅਪਰਾਨਿਪਿ ਸਤ੍ਤ ਪੁਞ੍ਞਕਿਰਿਯਵਤ੍ਥੂਨਿ ਅਪਚਿਤਿਸਹਗਤਂ ਪੁਞ੍ਞਕਿਰਿਯਵਤ੍ਥੁ, ਵੇਯ੍ਯਾਵਚ੍ਚਸਹਗਤਂ, ਪਤ੍ਤਾਨੁਪ੍ਪਦਾਨਂ, ਪਤ੍ਤਬ੍ਭਨੁਮੋਦਨਂ, ਦੇਸਨਾਮਯਂ, ਸਵਨਮਯਂ, ਦਿਟ੍ਠਿਜੁਗਤਂ ਪੁਞ੍ਞਕਿਰਿਯਵਤ੍ਥੂਤਿ. ਤਤ੍ਥ ਮਹਲ੍ਲਕਂ ਦਿਸ੍ਵਾ ਪਚ੍ਚੁਗ੍ਗਮਨਪਤ੍ਤਚੀਵਰਪ੍ਪਟਿਗ੍ਗਹਣਅਭਿਵਾਦਨਮਗ੍ਗਸਮ੍ਪਦਾਨਾਦਿਵਸੇਨ ਅਪਚਿਤਿਸਹਗਤਂ ਵੇਦਿਤਬ੍ਬਂ. ਵੁਡ੍ਢਤਰਾਨਂ ਵਤ੍ਤਪ੍ਪਟਿਪਤ੍ਤਿਕਰਣਵਸੇਨ, ਗਾਮਂ ਪਿਣ੍ਡਾਯ ਪਵਿਟ੍ਠਂ ਭਿਕ੍ਖੁਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਗਾਮੇ ਭਿਕ੍ਖਂ ਸਮਾਦਪੇਤ੍ਵਾ ਉਪਸਂਹਰਣਵਸੇਨ, ‘‘ਗਚ੍ਛ ਭਿਕ੍ਖੂਨਂ ਪਤ੍ਤਂ ਆਹਰਾ’’ਤਿ ਸੁਤ੍ਵਾ ਵੇਗੇਨ ਗਨ੍ਤ੍ਵਾ ਪਤ੍ਤਾਹਰਣਾਦਿਵਸੇਨ ਚ ਵੇਯ੍ਯਾਵਚ੍ਚਸਹਗਤਂ ਵੇਦਿਤਬ੍ਬਂ. ਚਤ੍ਤਾਰੋ ਪਚ੍ਚਯੇ ਦਤ੍ਵਾ ਸਬ੍ਬਸਤ੍ਤਾਨਂ ਪਤ੍ਤਿ ਹੋਤੂਤਿ ਪਵਤ੍ਤਨਵਸੇਨ ਪਤ੍ਤਾਨੁਪ੍ਪਦਾਨਂ ਵੇਦਿਤਬ੍ਬਂ. ਪਰੇਹਿ ਦਿਨ੍ਨਾਯ ਪਤ੍ਤਿਯਾ ਸਾਧੁ ਸੁਟ੍ਠੂਤਿ ਅਨੁਮੋਦਨਾਵਸੇਨ ਪਤ੍ਤਬ੍ਭਨੁਮੋਦਨਂ ਵੇਦਿਤਬ੍ਬਂ. ਏਕੋ ‘‘ਏਵਂ ਮਂ ‘ਧਮ੍ਮਕਥਿਕੋ’ਤਿ ਜਾਨਿਸ੍ਸਨ੍ਤੀ’’ਤਿ ਇਚ੍ਛਾਯ ਠਤ੍ਵਾ ਲਾਭਗਰੁਕੋ ਹੁਤ੍ਵਾ ਦੇਸੇਤਿ, ਤਂ ਨ ਮਹਪ੍ਫਲਂ. ਏਕੋ ਅਤ੍ਤਨੋ ਪਗੁਣਧਮ੍ਮਂ ਅਪਚ੍ਚਾਸੀਸਮਾਨੋ ਪਰੇਸਂ ਦੇਸੇਤਿ, ਇਦਂ ਦੇਸਨਾਮਯਂ ਪੁਞ੍ਞਕਿਰਿਯਵਤ੍ਥੁ ਨਾਮ. ਏਕੋ ਸੁਣਨ੍ਤੋ ‘‘ਇਤਿ ਮਂ ‘ਸਦ੍ਧੋ’ਤਿ ਜਾਨਿਸ੍ਸਨ੍ਤੀ’’ਤਿ ਸੁਣਾਤਿ, ਤਂ ਨ ਮਹਪ੍ਫਲਂ. ਏਕੋ ‘‘ਏਵਂ ਮੇ ਮਹਪ੍ਫਲਂ ਭਵਿਸ੍ਸਤੀ’’ਤਿ ਹਿਤਪ੍ਫਰਣੇਨ ਮੁਦੁਚਿਤ੍ਤੇਨ ਧਮ੍ਮਂ ਸੁਣਾਤਿ, ਇਦਂ ਸਵਨਮਯਂ ਪੁਞ੍ਞਕਿਰਿਯਵਤ੍ਥੁ. ਦਿਟ੍ਠਿਜੁਗਤਂ ਪਨ ਸਬ੍ਬੇਸਂ ਨਿਯਮਲਕ੍ਖਣਂ. ਯਂਕਿਞ੍ਚਿ ਪੁਞ੍ਞਂ ਕਰੋਨ੍ਤਸ੍ਸ ਹਿ ਦਿਟ੍ਠਿਯਾ ਉਜੁਭਾਵੇਨੇਵ ਮਹਪ੍ਫਲਂ ਹੋਤਿ.

ਇਤਿ ਇਮੇਸਂ ਸਤ੍ਤਨ੍ਨਂ ਪੁਞ੍ਞਕਿਰਿਯਵਤ੍ਥੂਨਂ ਪੁਰਿਮੇਹੇਵ ਤੀਹਿ ਸਙ੍ਗਹੋ ਵੇਦਿਤਬ੍ਬੋ. ਏਤ੍ਥ ਹਿ ਅਪਚਿਤਿਵੇਯ੍ਯਾਵਚ੍ਚਾਨਿ ਸੀਲਮਯੇ. ਪਤ੍ਤਿਦਾਨਪਤ੍ਤਬ੍ਭਨੁਮੋਦਨਾਨਿ ਦਾਨਮਯੇ. ਦੇਸਨਾਸਵਨਾਨਿ ਭਾਵਨਾਮਯੇ. ਦਿਟ੍ਠਿਜੁਗਤਂ ਤੀਸੁਪਿ ਸਙ੍ਗਹਂ ਗਚ੍ਛਤਿ.

ਚੋਦਨਾਵਤ੍ਥੂਨੀਤਿ ਚੋਦਨਾਕਾਰਣਾਨਿ. ਦਿਟ੍ਠੇਨਾਤਿ ਮਂਸਚਕ੍ਖੁਨਾ ਵਾ ਦਿਬ੍ਬਚਕ੍ਖੁਨਾ ਵਾ ਵੀਤਿਕ੍ਕਮਂ ਦਿਸ੍ਵਾ ਚੋਦੇਤਿ. ਸੁਤੇਨਾਤਿ ਪਕਤਿਸੋਤੇਨ ਵਾ ਦਿਬ੍ਬਸੋਤੇਨ ਵਾ ਪਰਸ੍ਸ ਸਦ੍ਦਂ ਸੁਤ੍ਵਾ ਚੋਦੇਤਿ. ਪਰਿਸਙ੍ਕਾਯ ਵਾਤਿ ਦਿਟ੍ਠਪਰਿਸਙ੍ਕਿਤੇਨ ਵਾ ਸੁਤਪਰਿਸਙ੍ਕਿਤੇਨ ਵਾ ਮੁਤਪਰਿਸਙ੍ਕਿਤੇਨ ਵਾ ਚੋਦੇਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਕਾਮੂਪਪਤ੍ਤਿਯੋਤਿ ਕਾਮੂਪਸੇਵਨਾ ਕਾਮਪ੍ਪਟਿਲਾਭਾ ਵਾ. ਪਚ੍ਚੁਪਟ੍ਠਿਤਕਾਮਾਤਿ ਨਿਬਦ੍ਧਕਾਮਾ ਨਿਬਦ੍ਧਾਰਮ੍ਮਣਾ. ਸੇਯ੍ਯਥਾਪਿ ਮਨੁਸ੍ਸਾਤਿ ਯਥਾ ਮਨੁਸ੍ਸਾ. ਮਨੁਸ੍ਸਾ ਹਿ ਨਿਬਦ੍ਧੇਯੇਵ ਵਤ੍ਥੁਸ੍ਮਿਂ ਵਸਂ ਵਤ੍ਤੇਨ੍ਤਿ. ਯਤ੍ਥ ਪਟਿਬਦ੍ਧਚਿਤ੍ਤਾ ਹੋਨ੍ਤਿ, ਸਤਮ੍ਪਿ ਸਹਸ੍ਸਮ੍ਪਿ ਦਤ੍ਵਾ ਮਾਤੁਗਾਮਂ ਆਨੇਤ੍ਵਾ ਨਿਬਦ੍ਧਭੋਗਂ ਭੁਞ੍ਜਨ੍ਤਿ. ਏਕਚ੍ਚੇ ਦੇਵਾ ਨਾਮ ਚਤੁਦੇਵਲੋਕਵਾਸਿਨੋ. ਤੇਪਿ ਨਿਬਦ੍ਧਵਤ੍ਥੁਸ੍ਮਿਂਯੇਵ ਵਸਂ ਵਤ੍ਤੇਨ੍ਤਿ. ਏਕਚ੍ਚੇ ਵਿਨਿਪਾਤਿਕਾ ਨਾਮ ਨੇਰਯਿਕੇ ਠਪੇਤ੍ਵਾ ਅਵਸੇਸਾ ਮਚ੍ਛਕਚ੍ਛਪਾਦਯੋਪਿ ਹਿ ਨਿਬਦ੍ਧਵਤ੍ਥੁਸ੍ਮਿਂਯੇਵ ਵਸਂ ਵਤ੍ਤੇਨ੍ਤਿ. ਮਚ੍ਛੋ ਅਤ੍ਤਨੋ ਮਚ੍ਛਿਯਾ ਕਚ੍ਛਪੋ ਕਚ੍ਛਪਿਯਾਤਿ. ਨਿਮ੍ਮਿਨਿਤ੍ਵਾ ਨਿਮ੍ਮਿਨਿਤ੍ਵਾਤਿ ਨੀਲਪੀਤਾਦਿਵਸੇਨ ਯਾਦਿਸਂ ਯਾਦਿਸਂ ਅਤ੍ਤਨੋ ਰੂਪਂ ਇਚ੍ਛਨ੍ਤਿ, ਤਾਦਿਸਂ ਤਾਦਿਸਂ ਨਿਮ੍ਮਿਨਿਤ੍ਵਾ ਆਯਸ੍ਮਤੋ ਅਨੁਰੁਦ੍ਧਸ੍ਸ ਪੁਰਤੋ ਮਨਾਪਕਾਯਿਕਾ ਦੇਵਤਾ ਵਿਯ. ਨਿਮ੍ਮਾਨਰਤੀਤਿ ਏਵਂ ਸਯਂ ਨਿਮ੍ਮਿਤੇ ਨਿਮ੍ਮਿਤੇ ਨਿਮ੍ਮਾਨੇ ਰਤਿ ਏਤੇਸਨ੍ਤਿ ਨਿਮ੍ਮਾਨਰਤੀ. ਪਰਨਿਮ੍ਮਿਤਕਾਮਾਤਿ ਪਰੇਹਿ ਨਿਮ੍ਮਿਤਕਾਮਾ. ਤੇਸਞ੍ਹਿ ਮਨਂ ਞਤ੍ਵਾ ਪਰੇ ਯਥਾਰੁਚਿਤਂ ਕਾਮਭੋਗਂ ਨਿਮ੍ਮਿਨਨ੍ਤਿ, ਤੇ ਤਤ੍ਥ ਵਸਂ ਵਤ੍ਤੇਨ੍ਤਿ. ਕਥਂ ਪਰਸ੍ਸ ਮਨਂ ਜਾਨਨ੍ਤੀਤਿ? ਪਕਤਿਸੇਵਨਵਸੇਨ. ਯਥਾ ਹਿ ਕੁਸਲੋ ਸੂਦੋ ਰਞ੍ਞੋ ਭੁਞ੍ਜਨ੍ਤਸ੍ਸ ਯਂ ਯਂ ਸੋ ਬਹੁਂ ਗਣ੍ਹਾਤਿ, ਤਂ ਤਂ ਤਸ੍ਸ ਰੁਚ੍ਚਤੀਤਿ ਜਾਨਾਤਿ, ਏਵਂ ਪਕਤਿਯਾ ਅਭਿਰੁਚਿਤਾਰਮ੍ਮਣਂ ਞਤ੍ਵਾ ਤਾਦਿਸਕਂਯੇਵ ਨਿਮ੍ਮਿਨਨ੍ਤਿ. ਤੇ ਤਤ੍ਥ ਵਸਂ ਵਤ੍ਤੇਨ੍ਤਿ, ਮੇਥੁਨਂ ਸੇਵਨ੍ਤਿ. ਕੇਚਿ ਪਨ ਥੇਰਾ ‘‘ਹਸਿਤਮਤ੍ਤੇਨ ਓਲੋਕਿਤਮਤ੍ਤੇਨ ਆਲਿਙ੍ਗਿਤਮਤ੍ਤੇਨ ਚ ਤੇਸਂ ਕਾਮਕਿਚ੍ਚਂ ਇਜ੍ਝਤੀ’’ਤਿ ਵਦਨ੍ਤਿ, ਤਂ ਅਟ੍ਠਕਥਾਯਂ ‘‘ਏਤਂ ਪਨ ਨਤ੍ਥੀ’’ਤਿ ਪਟਿਕ੍ਖਿਤ੍ਤਂ. ਨ ਹਿ ਕਾਯੇਨ ਅਫੁਸਨ੍ਤਸ੍ਸ ਫੋਟ੍ਠਬ੍ਬਂ ਕਾਮਕਿਚ੍ਚਂ ਸਾਧੇਤਿ. ਛਨ੍ਨਮ੍ਪਿ ਹਿ ਕਾਮਾਵਚਰਾਨਂ ਕਾਮਾ ਪਾਕਤਿਕਾ ਏਵ. ਵੁਤ੍ਤਮ੍ਪਿ ਚੇਤਂ –

‘‘ਛ ਏਤੇ ਕਾਮਾਵਚਰਾ, ਸਬ੍ਬਕਾਮਸਮਿਦ੍ਧਿਨੋ;

ਸਬ੍ਬੇਸਂ ਏਕਸਙ੍ਖਾਤਂ, ਆਯੁ ਭਵਤਿ ਕਿਤ੍ਤਕ’’ਨ੍ਤਿ. (ਵਿਭ. ੧੦੨੩);

ਸੁਖੂਪਪਤ੍ਤਿਯੋਤਿ ਸੁਖਪ੍ਪਟਿਲਾਭਾ. ਉਪ੍ਪਾਦੇਤ੍ਵਾ ਉਪ੍ਪਾਦੇਤ੍ਵਾ ਸੁਖਂ ਵਿਹਰਨ੍ਤੀਤਿ ਤੇ ਹੇਟ੍ਠਾ ਪਠਮਜ੍ਝਾਨਸੁਖਂ ਨਿਬ੍ਬਤ੍ਤੇਤ੍ਵਾ ਉਪਰਿ ਵਿਪਾਕਜ੍ਝਾਨਸੁਖਂ ਅਨੁਭਵਨ੍ਤੀਤਿ ਅਤ੍ਥੋ. ਸੁਖੇਨ ਅਭਿਸਨ੍ਨਾਤਿ ਦੁਤਿਯਜ੍ਝਾਨਸੁਖੇਨ ਤਿਨ੍ਤਾ. ਪਰਿਸਨ੍ਨਾਤਿ ਸਮਨ੍ਤਤੋ ਤਿਨ੍ਤਾ. ਪਰਿਪੂਰਾਤਿ ਪਰਿਪੁਣ੍ਣਾ. ਪਰਿਪ੍ਫੁਟਾਤਿ ਤਸ੍ਸੇਵ ਵੇਵਚਨਂ. ਇਦਮ੍ਪਿ ਵਿਪਾਕਜ੍ਝਾਨਸੁਖਮੇਵ ਸਨ੍ਧਾਯ ਵੁਤ੍ਤਂ. ਅਹੋਸੁਖਂ ਅਹੋਸੁਖਨ੍ਤਿ ਤੇਸਂ ਕਿਰ ਭਵਲੋਭੋ ਮਹਾ ਉਪ੍ਪਜ੍ਜਤਿ. ਤਸ੍ਮਾ ਕਦਾਚਿ ਕਰਹਚਿ ਏਵਂ ਉਦਾਨਂ ਉਦਾਨੇਨ੍ਤਿ. ਸਨ੍ਤਮੇਵਾਤਿ ਪਣੀਤਮੇਵ. ਤੁਸਿਤਾਤਿ ਤਤੋ ਉਤ੍ਤਰਿਂ ਸੁਖਸ੍ਸ ਅਪਤ੍ਥਨਤੋ ਸਨ੍ਤੁਟ੍ਠਾ ਹੁਤ੍ਵਾ. ਸੁਖਂ ਪਟਿਵੇਦੇਨ੍ਤੀਤਿ ਤਤਿਯਜ੍ਝਾਨਸੁਖਂ ਅਨੁਭਵਨ੍ਤਿ.

ਸੇਕ੍ਖਾ ਪਞ੍ਞਾਤਿ ਸਤ੍ਤ ਅਰਿਯਪਞ੍ਞਾ. ਅਰਹਤੋ ਪਞ੍ਞਾ ਅਸੇਕ੍ਖਾ. ਅਵਸੇਸਾ ਪਞ੍ਞਾ ਨੇਵਸੇਕ੍ਖਾਨਾਸੇਕ੍ਖਾ.

ਚਿਨ੍ਤਾਮਯਾਦੀਸੁ ਅਯਂ ਵਿਤ੍ਥਾਰੋ – ‘‘ਤਤ੍ਥ ਕਤਮਾ ਚਿਨ੍ਤਾਮਯਾ ਪਞ੍ਞਾ? ਯੋਗਵਿਹਿਤੇਸੁ ਵਾ ਕਮ੍ਮਾਯਤਨੇਸੁ ਯੋਗਵਿਹਿਤੇਸੁ ਵਾ ਸਿਪ੍ਪਾਯਤਨੇਸੁ ਯੋਗਵਿਹਿਤੇਸੁ ਵਾ ਵਿਜ੍ਜਾਟ੍ਠਾਨੇਸੁ ਕਮ੍ਮਸ੍ਸਕਤਂ ਵਾ ਸਚ੍ਚਾਨੁਲੋਮਿਕਂ ਵਾ ਰੂਪਂ ਅਨਿਚ੍ਚਨ੍ਤਿ ਵਾ…ਪੇ… ਵਿਞ੍ਞਾਣਂ ਅਨਿਚ੍ਚਨ੍ਤਿ ਵਾ ਯਂ ਏਵਰੂਪਂ ਅਨੁਲੋਮਿਕਂ ਖਨ੍ਤਿਂ ਦਿਟ੍ਠਿਂ ਰੁਚਿਂ ਮੁਤ੍ਤਿਂ ਪੇਕ੍ਖਂ ਧਮ੍ਮਨਿਜ੍ਝਾਨਕ੍ਖਨ੍ਤਿਂ ਪਰਤੋ ਅਸੁਤ੍ਵਾ ਪਟਿਲਭਤਿ, ਅਯਂ ਵੁਚ੍ਚਤਿ ਚਿਨ੍ਤਾਮਯਾ ਪਞ੍ਞਾ. ਤਤ੍ਥ ਕਤਮਾ ਸੁਤਮਯਾ ਪਞ੍ਞਾ? ਯੋਗਵਿਹਿਤੇਸੁ ਵਾ ਕਮ੍ਮਾਯਤਨੇਸੁ…ਪੇ… ਧਮ੍ਮਨਿਜ੍ਝਾਨਕ੍ਖਨ੍ਤਿਂ ਪਰਤੋ ਸੁਤ੍ਵਾ ਪਟਿਲਭਤਿ, ਅਯਂ ਵੁਚ੍ਚਤਿ ਸੁਤਮਯਾ ਪਞ੍ਞਾ. (ਤਤ੍ਥ ਕਤਮਾ ਭਾਵਨਾਮਯਾ ਪਞ੍ਞਾ?) ਸਬ੍ਬਾਪਿ ਸਮਾਪਨ੍ਨਸ੍ਸ ਪਞ੍ਞਾ ਭਾਵਨਾਮਯਾ ਪਞ੍ਞਾ’’ਤਿ (ਵਿਭ. ੭੬੮-੬੯).

ਸੁਤਾਵੁਧਨ੍ਤਿ ਸੁਤਮੇਵ ਆਵੁਧਂ. ਤਂ ਅਤ੍ਥਤੋ ਤੇਪਿਟਕਂ ਬੁਦ੍ਧਵਚਨਂ. ਤਞ੍ਹਿ ਨਿਸ੍ਸਾਯ ਭਿਕ੍ਖੁ ਪਞ੍ਞਾਵੁਧਂ ਨਿਸ੍ਸਾਯ ਸੂਰੋ ਯੋਧੋ ਅਵਿਕਮ੍ਪਮਾਨੋ ਮਹਾਕਨ੍ਤਾਰਂ ਵਿਯ ਸਂਸਾਰਕਨ੍ਤਾਰਂ ਅਤਿਕ੍ਕਮਤਿ ਅਵਿਹਞ੍ਞਮਾਨੋ. ਤੇਨੇਵ ਵੁਤ੍ਤਂ – ‘‘ਸੁਤਾਵੁਧੋ, ਭਿਕ੍ਖਵੇ, ਅਰਿਯਸਾਵਕੋ ਅਕੁਸਲਂ ਪਜਹਤਿ, ਕੁਸਲਂ ਭਾਵੇਤਿ, ਸਾਵਜ੍ਜਂ ਪਜਹਤਿ, ਅਨਵਜ੍ਜਂ ਭਾਵੇਤਿ, ਸੁਦ੍ਧਮਤ੍ਤਾਨਂ ਪਰਿਹਰਤੀ’’ਤਿ (ਅ. ਨਿ. ੭.੬੭).

ਪਵਿਵੇਕਾਵੁਧਨ੍ਤਿ ‘‘ਕਾਯਵਿਵੇਕੋ ਚਿਤ੍ਤਵਿਵੇਕੋ ਉਪਧਿਵਿਵੇਕੋ’’ਤਿ ਅਯਂ ਤਿਵਿਧੋਪਿ ਵਿਵੇਕੋਵ ਆਵੁਧਂ. ਤਸ੍ਸ ਨਾਨਾਕਰਣਂ ਕਾਯਵਿਵੇਕੋ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ. ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ. ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ. ਇਮਸ੍ਮਿਞ੍ਹਿ ਤਿਵਿਧੇ ਵਿਵੇਕੇ ਅਭਿਰਤੋ, ਨ ਕੁਤੋਚਿ ਭਾਯਤਿ. ਤਸ੍ਮਾ ਅਯਮ੍ਪਿ ਅਵਸ੍ਸਯਟ੍ਠੇਨ ਆਵੁਧਨ੍ਤਿ ਵੁਤ੍ਤੋ. ਲੋਕਿਯਲੋਕੁਤ੍ਤਰਪਞ੍ਞਾਵ ਆਵੁਧਂ ਪਞ੍ਞਾਵੁਧਂ. ਯਸ੍ਸ ਸਾ ਅਤ੍ਥਿ, ਸੋ ਨ ਕੁਤੋਚਿ ਭਾਯਤਿ, ਨ ਚਸ੍ਸ ਕੋਚਿ ਭਾਯਤਿ. ਤਸ੍ਮਾ ਸਾਪਿ ਅਵਸ੍ਸਯਟ੍ਠੇਨੇਵ ਆਵੁਧਨ੍ਤਿ ਵੁਤ੍ਤਾ.

ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਨ੍ਤਿ ਇਤੋ ਪੁਬ੍ਬੇ ਅਨਞ੍ਞਾਤਂ ਅਵਿਦਿਤਂ ਧਮ੍ਮਂ ਜਾਨਿਸ੍ਸਾਮੀਤਿ ਪਟਿਪਨ੍ਨਸ੍ਸ ਉਪ੍ਪਨ੍ਨਂ ਇਨ੍ਦ੍ਰਿਯਂ. ਸੋਤਾਪਤ੍ਤਿਮਗ੍ਗਞਾਣਸ੍ਸੇਤਂ ਅਧਿਵਚਨਂ. ਅਞ੍ਞਿਨ੍ਦ੍ਰਿਯਨ੍ਤਿ ਅਞ੍ਞਾਭੂਤਂ ਆਜਾਨਨਭੂਤਂ ਇਨ੍ਦ੍ਰਿਯਂ. ਸੋਤਾਪਤ੍ਤਿਫਲਤੋ ਪਟ੍ਠਾਯ ਛਸੁ ਠਾਨੇਸੁ ਞਾਣਸ੍ਸੇਤਂ ਅਧਿਵਚਨਂ. ਅਞ੍ਞਾਤਾਵਿਨ੍ਦ੍ਰਿਯਨ੍ਤਿ ਅਞ੍ਞਾਤਾਵੀਸੁ ਜਾਨਨਕਿਚ੍ਚਪਰਿਯੋਸਾਨਪ੍ਪਤ੍ਤੇਸੁ ਧਮ੍ਮੇਸੁ ਇਨ੍ਦ੍ਰਿਯਂ. ਅਰਹਤ੍ਤਫਲਞਾਣਸ੍ਸੇਤਂ ਅਧਿਵਚਨਂ.

ਮਂਸਚਕ੍ਖੁ ਚਕ੍ਖੁਪਸਾਦੋ. ਦਿਬ੍ਬਚਕ੍ਖੁ ਆਲੋਕਨਿਸ੍ਸਿਤਂ ਞਾਣਂ. ਪਞ੍ਞਾਚਕ੍ਖੁ ਲੋਕਿਯਲੋਕੁਤ੍ਤਰਪਞ੍ਞਾ.

ਅਧਿਸੀਲਸਿਕ੍ਖਾਦੀਸੁ ਅਧਿਸੀਲਞ੍ਚ ਤਂ ਸਿਕ੍ਖਿਤਬ੍ਬਤੋ ਸਿਕ੍ਖਾ ਚਾਤਿ ਅਧਿਸੀਲਸਿਕ੍ਖਾ. ਇਤਰਸ੍ਮਿਂ ਦ੍ਵਯੇਪਿ ਏਸੇਵ ਨਯੋ. ਤਤ੍ਥ ਸੀਲਂ ਅਧਿਸੀਲਂ, ਚਿਤ੍ਤਂ ਅਧਿਚਿਤ੍ਤਂ, ਪਞ੍ਞਾ ਅਧਿਪਞ੍ਞਾਤਿ ਅਯਂ ਪਭੇਦੋ ਵੇਦਿਤਬ੍ਬੋ –

ਸੀਲਂ ਨਾਮ ਪਞ੍ਚਸੀਲਦਸਸੀਲਾਨਿ, ਪਾਤਿਮੋਕ੍ਖਸਂਵਰੋ ਅਧਿਸੀਲਂ ਨਾਮ. ਅਟ੍ਠ ਸਮਾਪਤ੍ਤਿਯੋ ਚਿਤ੍ਤਂ, ਵਿਪਸ੍ਸਨਾਪਾਦਕਜ੍ਝਾਨਂ ਅਧਿਚਿਤ੍ਤਂ. ਕਮ੍ਮਸ੍ਸਕਤਞਾਣਂ ਪਞ੍ਞਾ, ਵਿਪਸ੍ਸਨਾਪਞ੍ਞਾ ਅਧਿਪਞ੍ਞਾ. ਅਨੁਪ੍ਪਨ੍ਨੇਪਿ ਹਿ ਬੁਦ੍ਧੁਪ੍ਪਾਦੇ ਪਵਤ੍ਤਤੀਤਿ ਪਞ੍ਚਸੀਲਦਸਸੀਲਾਨਿ ਸੀਲਮੇਵ, ਪਾਤਿਮੋਕ੍ਖਸਂਵਰਸੀਲਂ ਬੁਦ੍ਧੁਪ੍ਪਾਦੇਯੇਵ ਪਵਤ੍ਤਤੀਤਿ ਅਧਿਸੀਲਂ. ਚਿਤ੍ਤਪਞ੍ਞਾਸੁਪਿ ਏਸੇਵ ਨਯੋ. ਅਪਿਚ ਨਿਬ੍ਬਾਨਂ ਪਤ੍ਥਯਨ੍ਤੇਨ ਸਮਾਦਿਨ੍ਨਂ ਪਞ੍ਚਸੀਲਮ੍ਪਿ ਦਸਸੀਲਮ੍ਪਿ ਅਧਿਸੀਲਮੇਵ. ਸਮਾਪਨ੍ਨਾ ਅਟ੍ਠ ਸਮਾਪਤ੍ਤਿਯੋਪਿ ਅਧਿਚਿਤ੍ਤਮੇਵ. ਸਬ੍ਬਂ ਵਾ ਲੋਕਿਯਂ ਸੀਲਮੇਵ, ਲੋਕੁਤ੍ਤਰਂ ਅਧਿਸੀਲਂ. ਚਿਤ੍ਤਪਞ੍ਞਾਸੁਪਿ ਏਸੇਵ ਨਯੋ.

ਭਾਵਨਾਸੁ ਖੀਣਾਸਵਸ੍ਸ ਪਞ੍ਚਦ੍ਵਾਰਿਕਕਾਯੋ ਕਾਯਭਾਵਨਾ ਨਾਮ. ਅਟ੍ਠ ਸਮਾਪਤ੍ਤਿਯੋ ਚਿਤ੍ਤਭਾਵਨਾ ਨਾਮ. ਅਰਹਤ੍ਤਫਲਪਞ੍ਞਾ ਪਞ੍ਞਾਭਾਵਨਾ ਨਾਮ. ਖੀਣਾਸਵਸ੍ਸ ਹਿ ਏਕਨ੍ਤੇਨੇਵ ਪਞ੍ਚਦ੍ਵਾਰਿਕਕਾਯੋ ਸੁਭਾਵਿਤੋ ਹੋਤਿ. ਅਟ੍ਠ ਸਮਾਪਤ੍ਤਿਯੋ ਚਸ੍ਸ ਨ ਅਞ੍ਞੇਸਂ ਵਿਯ ਦੁਬ੍ਬਲਾ, ਤਸ੍ਸੇਵ ਚ ਪਞ੍ਞਾ ਭਾਵਿਤਾ ਨਾਮ ਹੋਤਿ ਪਞ੍ਞਾਵੇਪੁਲ੍ਲਪਤ੍ਤਿਯਾ. ਤਸ੍ਮਾ ਏਵਂ ਵੁਤ੍ਤਂ.

ਅਨੁਤ੍ਤਰਿਯੇਸੁ ਵਿਪਸ੍ਸਨਾ ਦਸ੍ਸਨਾਨੁਤ੍ਤਰਿਯਂ ਮਗ੍ਗੋ ਪਟਿਪਦਾਨੁਸ੍ਸਰਿਯਂ. ਫਲਂ ਵਿਮੁਤ੍ਤਾਨੁਤ੍ਤਰਿਯਂ. ਫਲਂ ਵਾ ਦਸ੍ਸਨਾਨੁਤ੍ਤਰਿਯਂ. ਮਗ੍ਗੋ ਪਟਿਪਦਾਨੁਤ੍ਤਰਿਯਂ. ਨਿਬ੍ਬਾਨਂ ਵਿਮੁਤ੍ਤਾਨੁਤ੍ਤਰਿਯਂ. ਨਿਬ੍ਬਾਨਂ ਵਾ ਦਸ੍ਸਨਾਨੁਤ੍ਤਰਿਯਂ, ਤਤੋ ਉਤ੍ਤਰਿਞ੍ਹਿ ਦਟ੍ਠਬ੍ਬਂ ਨਾਮ ਨਤ੍ਥਿ. ਮਗ੍ਗੋ ਪਟਿਪਦਾਨੁਤ੍ਤਰਿਯਂ. ਫਲਂ ਵਿਮੁਤ੍ਤਾਨੁਤ੍ਤਰਿਯਂ. ਅਨੁਤ੍ਤਰਿਯਨ੍ਤਿ ਉਤ੍ਤਮਂ ਜੇਟ੍ਠਕਂ.

ਸਮਾਧੀਸੁ ਪਠਮਜ੍ਝਾਨਸਮਾਧਿ ਸਵਿਤਕ੍ਕਸਵਿਚਾਰੋ. ਪਞ੍ਚਕਨਯੇਨ ਦੁਤਿਯਜ੍ਝਾਨਸਮਾਧਿ ਅਵਿਤਕ੍ਕਵਿਚਾਰਮਤ੍ਤੋ. ਸੇਸੋ ਅਵਿਤਕ੍ਕਅਵਿਚਾਰੋ.

ਸੁਞ੍ਞਤਾਦੀਸੁ ਤਿਵਿਧਾ ਕਥਾ ਆਗਮਨਤੋ, ਸਗੁਣਤੋ, ਆਰਮ੍ਮਣਤੋਤਿ. ਆਗਮਨਤੋ ਨਾਮ ਏਕੋ ਭਿਕ੍ਖੁ ਅਨਤ੍ਤਤੋ ਅਭਿਨਿਵਿਸਿਤ੍ਵਾ ਅਨਤ੍ਤਤੋ ਦਿਸ੍ਵਾ ਅਨਤ੍ਤਤੋ ਵੁਟ੍ਠਾਤਿ, ਤਸ੍ਸ ਵਿਪਸ੍ਸਨਾ ਸੁਞ੍ਞਤਾ ਨਾਮ ਹੋਤਿ. ਕਸ੍ਮਾ? ਅਸੁਞ੍ਞਤਤ੍ਤਕਾਰਕਾਨਂ ਕਿਲੇਸਾਨਂ ਅਭਾਵਾ. ਵਿਪਸ੍ਸਨਾਗਮਨੇਨ ਮਗ੍ਗਸਮਾਧਿ ਸੁਞ੍ਞਤੋ ਨਾਮ ਹੋਤਿ. ਮਗ੍ਗਾਗਮਨੇਨ ਫਲਸਮਾਧਿ ਸੁਞ੍ਞਤੋ ਨਾਮ. ਅਪਰੋ ਅਨਿਚ੍ਚਤੋ ਅਭਿਨਿਵਿਸਿਤ੍ਵਾ ਅਨਿਚ੍ਚਤੋ ਦਿਸ੍ਵਾ ਅਨਿਚ੍ਚਤੋ ਵੁਟ੍ਠਾਤਿ. ਤਸ੍ਸ ਵਿਪਸ੍ਸਨਾ ਅਨਿਮਿਤ੍ਤਾ ਨਾਮ ਹੋਤਿ. ਕਸ੍ਮਾ? ਨਿਮਿਤ੍ਤਕਾਰਕਕਿਲੇਸਾਭਾਵਾ. ਵਿਪਸ੍ਸਨਾਗਮਨੇਨ ਮਗ੍ਗਸਮਾਧਿ ਅਨਿਮਿਤ੍ਤੋ ਨਾਮ ਹੋਤਿ. ਮਗ੍ਗਾਗਮਨੇਨ ਫਲਂ ਅਨਿਮਿਤ੍ਤਂ ਨਾਮ. ਅਪਰੋ ਦੁਕ੍ਖਤੋ ਅਭਿਨਿਵਿਸਿਤ੍ਵਾ ਦੁਕ੍ਖਤੋ ਦਿਸ੍ਵਾ ਦੁਕ੍ਖਤੋ ਵੁਟ੍ਠਾਤਿ, ਤਸ੍ਸ ਵਿਪਸ੍ਸਨਾ ਅਪ੍ਪਣਿਹਿਤਾ ਨਾਮ ਹੋਤਿ. ਕਸ੍ਮਾ? ਪਣਿਧਿਕਾਰਕਕਿਲੇਸਾਭਾਵਾ. ਵਿਪਸ੍ਸਨਾਗਮਨੇਨ ਮਗ੍ਗਸਮਾਧਿ ਅਪ੍ਪਣਿਹਿਤੋ ਨਾਮ. ਮਗ੍ਗਾਗਮਨੇਨ ਫਲਂ ਅਪ੍ਪਣਿਹਿਤਂ ਨਾਮਾਤਿ ਅਯਂ ਆਗਮਨਤੋ ਕਥਾ. ਮਗ੍ਗਸਮਾਧਿ ਪਨ ਰਾਗਾਦੀਹਿ ਸੁਞ੍ਞਤਤ੍ਤਾ ਸੁਞ੍ਞਤੋ, ਰਾਗਨਿਮਿਤ੍ਤਾਦੀਨਂ ਅਭਾਵਾ ਅਨਿਮਿਤ੍ਤੋ, ਰਾਗਪਣਿਧਿਆਦੀਨਂ ਅਭਾਵਾ ਅਪ੍ਪਣਿਹਿਤੋਤਿ ਅਯਂ ਸਗੁਣਤੋ ਕਥਾ. ਨਿਬ੍ਬਾਨਂ ਰਾਗਾਦੀਹਿ ਸੁਞ੍ਞਤਤ੍ਤਾ ਰਾਗਾਦਿਨਿਮਿਤ੍ਤਪਣਿਧੀਨਞ੍ਚ ਅਭਾਵਾ ਸੁਞ੍ਞਤਞ੍ਚੇਵ ਅਨਿਮਿਤ੍ਤਞ੍ਚ ਅਪ੍ਪਣਿਹਿਤਞ੍ਚ. ਤਦਾਰਮ੍ਮਣੋ ਮਗ੍ਗਸਮਾਧਿ ਸੁਞ੍ਞਤੋ ਅਨਿਮਿਤ੍ਤੋ ਅਪ੍ਪਣਿਹਿਤੋ. ਅਯਂ ਆਰਮ੍ਮਣਤੋ ਕਥਾ.

ਸੋਚੇਯ੍ਯਾਨੀਤਿ ਸੁਚਿਭਾਵਕਰਾ ਸੋਚੇਯ੍ਯਪ੍ਪਟਿਪਦਾ ਧਮ੍ਮਾ. ਵਿਤ੍ਥਾਰੋ ਪਨੇਤ੍ਥ ‘‘ਤਤ੍ਥ ਕਤਮਂ ਕਾਯਸੋਚੇਯ੍ਯਂ? ਪਾਣਾਤਿਪਾਤਾ ਵੇਰਮਣੀ’’ਤਿਆਦਿਨਾ ਨਯੇਨ ਵੁਤ੍ਤਾਨਂ ਤਿਣ੍ਣਂ ਸੁਚਰਿਤਾਨਂ ਵਸੇਨ ਵੇਦਿਤਬ੍ਬੋ.

ਮੋਨੇਯ੍ਯਾਨੀਤਿ ਮੁਨਿਭਾਵਕਰਾ ਮੋਨੇਯ੍ਯਪ੍ਪਟਿਪਦਾ ਧਮ੍ਮਾ. ਤੇਸਂ ਵਿਤ੍ਥਾਰੋ ‘‘ਤਤ੍ਥ ਕਤਮਂ ਕਾਯਮੋਨੇਯ੍ਯਂ? ਤਿਵਿਧਕਾਯਦੁਚ੍ਚਰਿਤਸ੍ਸ ਪਹਾਨਂ ਕਾਯਮੋਨੇਯ੍ਯਂ, ਤਿਵਿਧਂ ਕਾਯਸੁਚਰਿਤਂ ਕਾਯਮੋਨੇਯ੍ਯਂ, ਕਾਯਾਰਮ੍ਮਣੇ ਞਾਣਂ ਕਾਯਮੋਨੇਯ੍ਯਂ, ਕਾਯਪਰਿਞ੍ਞਾ ਕਾਯਮੋਨੇਯ੍ਯਂ, ਕਾਯਪਰਿਞ੍ਞਾਸਹਗਤੋ ਮਗ੍ਗੋ ਕਾਯਮੋਨੇਯ੍ਯਂ, ਕਾਯਸ੍ਮਿਂ ਛਨ੍ਦਰਾਗਪ੍ਪਹਾਨਂ ਕਾਯਮੋਨੇਯ੍ਯਂ, ਕਾਯਸਙ੍ਖਾਰਨਿਰੋਧਾ ਚਤੁਤ੍ਥਜ੍ਝਾਨਸਮਾਪਤ੍ਤਿ ਕਾਯਮੋਨੇਯ੍ਯਂ. ਤਤ੍ਥ ਕਤਮਂ ਵਚੀਮੋਨੇਯ੍ਯਂ? ਚਤੁਬ੍ਬਿਧਵਚੀਦੁਚ੍ਚਰਿਤਸ੍ਸ ਪਹਾਨਂ ਵਚੀਮੋਨੇਯ੍ਯਂ, ਚਤੁਬ੍ਬਿਧਂ ਵਚੀਸੁਚਰਿਤਂ ਵਚੀਮੋਨੇਯ੍ਯਂ, ਵਾਚਾਰਮ੍ਮਣੇ ਞਾਣਂ ਵਚੀਮੋਨੇਯ੍ਯਂ ਵਾਚਾਪਰਿਞ੍ਞਾ ਵਚੀਮੋਨੇਯ੍ਯਂ ਪਰਿਞ੍ਞਾਸਹਗਤੋ ਮਗ੍ਗੋ, ਵਾਚਾਯ ਛਨ੍ਦਰਾਗਪ੍ਪਹਾਨਂ, ਵਚੀਸਙ੍ਖਾਰਨਿਰੋਧਾ ਦੁਤਿਯਜ੍ਝਾਨਸਮਾਪਤ੍ਤਿ ਵਚੀਮੋਨੇਯ੍ਯਂ. ਤਤ੍ਥ ਕਤਮਂ ਮਨੋਮੋਨੇਯ੍ਯਂ? ਤਿਵਿਧਮਨੋਦੁਚ੍ਚਰਿਤਸ੍ਸ ਪਹਾਨਂ ਮਨੋਮੋਨੇਯ੍ਯਂ, ਤਿਵਿਧਂ ਮਨੋਸੁਚਰਿਤਂ ਮਨੋਮੋਨੇਯ੍ਯਂ, ਮਨਾਰਮ੍ਮਣੇ ਞਾਣਂ ਮਨੋਮੋਨੇਯ੍ਯਂ, ਮਨੋਪਰਿਞ੍ਞਾ ਮਨੋਮੋਨੇਯ੍ਯਂ. ਪਰਿਞ੍ਞਾਸਹਗਤੋ ਮਗ੍ਗੋ, ਮਨਸ੍ਮਿਂ ਛਨ੍ਦਰਾਗਪ੍ਪਹਾਨਂ, ਚਿਤ੍ਤਸਙ੍ਖਾਰਨਿਰੋਧਾ ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਮਨੋਮੋਨੇਯ੍ਯ’’ਨ੍ਤਿ (ਮਹਾਨਿ. ੧੪).

ਕੋਸਲ੍ਲੇਸੁ ਆਯੋਤਿ ਵੁਡ੍ਢਿ. ਅਪਾਯੋਤਿ ਅਵੁਡ੍ਢਿ. ਤਸ੍ਸ ਤਸ੍ਸ ਕਾਰਣਂ ਉਪਾਯੋ. ਤੇਸਂ ਪਜਾਨਨਾ ਕੋਸਲ੍ਲਂ. ਵਿਤ੍ਥਾਰੋ ਪਨ ਵਿਭਙ੍ਗੇ ਵੁਤ੍ਤੋਯੇਵ.

ਵੁਤ੍ਤਞ੍ਹੇਤਂ – ‘‘ਤਤ੍ਥ ਕਤਮਂ ਆਯਕੋਸਲ੍ਲਂ? ਇਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਨੁਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਅਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤਿ. ਇਮੇ ਵਾ ਪਨ ਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਸਂਵਤ੍ਤਨ੍ਤੀਤਿ, ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ. ਇਦਂ ਵੁਚ੍ਚਤਿ ਆਯਕੋਸਲ੍ਲਂ. ਤਤ੍ਥ ਕਤਮਂ ਅਪਾਯਕੋਸਲ੍ਲਂ? ਇਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਨ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤਿ. ਇਮੇ ਵਾ ਪਨ ਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਅਕੁਸਲਾ ਧਮ੍ਮਾ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਸਂਵਤ੍ਤਨ੍ਤੀਤਿ, ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ. ਇਦਂ ਵੁਚ੍ਚਤਿ ਅਪਾਯਕੋਸਲ੍ਲਂ. ਸਬ੍ਬਾਪਿ ਤਤ੍ਰੁਪਾਯਾ ਪਞ੍ਞਾ ਉਪਾਯਕੋਸਲ੍ਲ’’ਨ੍ਤਿ (ਵਿਭ. ੭੭੧). ਇਦਂ ਪਨ ਅਚ੍ਚਾਯਿਕਕਿਚ੍ਚੇ ਵਾ ਭਯੇ ਵਾ ਉਪ੍ਪਨ੍ਨੇ ਤਸ੍ਸ ਤਿਕਿਚ੍ਛਨਤ੍ਥਂ ਠਾਨੁਪ੍ਪਤ੍ਤਿਯਾ ਕਾਰਣਜਾਨਨਵਸੇਨੇਵ ਵੇਦਿਤਬ੍ਬਂ.

ਮਦਾਤਿ ਮਜ੍ਜਨਾਕਾਰਵਸੇਨ ਪਵਤ੍ਤਮਾਨਾ. ਤੇਸੁ ‘‘ਅਹਂ ਨਿਰੋਗੋ ਸਟ੍ਠਿ ਵਾ ਸਤ੍ਤਤਿ ਵਾ ਵਸ੍ਸਾਨਿ ਅਤਿਕ੍ਕਨ੍ਤਾਨਿ, ਨ ਮੇ ਹਰੀਤਕੀਖਣ੍ਡਮ੍ਪਿ ਖਾਦਿਤਪੁਬ੍ਬਂ, ਇਮੇ ਪਨਞ੍ਞੇ ਅਸੁਕਂ ਨਾਮ ਠਾਨਂ ਰੁਜ੍ਜਤਿ, ਭੇਸਜ੍ਜਂ ਖਾਦਾਮਾਤਿ ਵਿਚਰਨ੍ਤਿ, ਕੋ ਅਞ੍ਞੋ ਮਾਦਿਸੋ ਨਿਰੋਗੋ ਨਾਮਾ’’ਤਿ ਏਵਂ ਮਾਨਕਰਣਂ ਆਰੋਗ੍ਯਮਦੋ. ‘‘ਮਹਲ੍ਲਕਕਾਲੇ ਪੁਞ੍ਞਂ ਕਰਿਸ੍ਸਾਮ, ਦਹਰਮ੍ਹ ਤਾਵਾ’’ਤਿ ਯੋਬ੍ਬਨੇ ਠਤ੍ਵਾ ਮਾਨਕਰਣਂ ਯੋਬ੍ਬਨਮਦੋ. ‘‘ਚਿਰਂ ਜੀਵਿਂ, ਚਿਰਂ ਜੀਵਾਮਿ, ਚਿਰਂ ਜੀਵਿਸ੍ਸਾਮਿ; ਸੁਖਂ ਜੀਵਿਂ, ਸੁਖਂ ਜੀਵਾਮਿ, ਸੁਖਂ ਜੀਵਿਸ੍ਸਾਮੀ’’ਤਿ ਏਵਂ ਮਾਨਕਰਣਂ ਜੀਵਿਤਮਦੋ.

ਆਧਿਪਤੇਯ੍ਯੇਸੁ ਅਧਿਪਤਿਤੋ ਆਗਤਂ ਆਧਿਪਤੇਯ੍ਯਂ. ‘‘ਏਤ੍ਤਕੋਮ੍ਹਿ ਸੀਲੇਨ ਸਮਾਧਿਨਾ ਪਞ੍ਞਾਯ ਵਿਮੁਤ੍ਤਿਯਾ, ਨ ਮੇ ਏਤਂ ਪਤਿਰੂਪ’’ਨ੍ਤਿ ਏਵਂ ਅਤ੍ਤਾਨਂ ਅਧਿਪਤ੍ਤਿਂ ਜੇਟ੍ਠਕਂ ਕਤ੍ਵਾ ਪਾਪਸ੍ਸ ਅਕਰਣਂ ਅਤ੍ਤਾਧਿਪਤੇਯ੍ਯਂ ਨਾਮ. ਲੋਕਂ ਅਧਿਪਤਿਂ ਕਤ੍ਵਾ ਅਕਰਣਂ ਲੋਕਾਧਿਪਤੇਯ੍ਯਂ ਨਾਮ. ਲੋਕੁਤ੍ਤਰਧਮ੍ਮਂ ਅਧਿਪਤਿਂ ਕਤ੍ਵਾ ਅਕਰਣਂ ਧਮ੍ਮਾਧਿਪਤੇਯ੍ਯਂ ਨਾਮ.

ਕਥਾਵਤ੍ਥੂਨੀਤਿ ਕਥਾਕਾਰਣਾਨਿ. ਅਤੀਤਂ ਵਾ ਅਦ੍ਧਾਨਨ੍ਤਿ ਅਤੀਤਂ ਧਮ੍ਮਂ, ਅਤੀਤਕ੍ਖਨ੍ਧੇਤਿ ਅਤ੍ਥੋ. ਅਪਿਚ ‘‘ਯਂ, ਭਿਕ੍ਖਵੇ, ਰੂਪਂ ਅਤੀਤਂ ਨਿਰੁਦ੍ਧਂ ਵਿਪਰਿਣਤਂ, ‘ਅਹੋਸੀ’ਤਿ ਤਸ੍ਸ ਸਙ੍ਖਾ, ‘ਅਹੋਸੀ’ਤਿ ਤਸ੍ਸ ਪਞ੍ਞਤ੍ਤਿ ‘ਅਹੋਸੀ’ਤਿ ਤਸ੍ਸ ਸਮਞ੍ਞਾ, ਨ ਤਸ੍ਸ ਸਙ੍ਖਾ ‘ਅਤ੍ਥੀ’ਤਿ, ਨ ਤਸ੍ਸ ਸਙ੍ਖਾ ‘ਭਵਿਸ੍ਸਤੀ’ਤਿ (ਸਂ. ਨਿ. ੩.੬੨) ਏਵਂ ਆਗਤੇਨ ਨਿਰੁਤ੍ਤਿਪਥਸੁਤ੍ਤੇਨਪੇਤ੍ਥ ਅਤ੍ਥੋ ਦੀਪੇਤਬ੍ਬੋ.

ਵਿਜ੍ਜਾਤਿ ਤਮਵਿਜ੍ਝਨਟ੍ਠੇਨ ਵਿਜ੍ਜਾ. ਵਿਦਿਤਕਰਣਟ੍ਠੇਨਾਪਿ ਵਿਜ੍ਜਾ. ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਞ੍ਹਿ ਉਪ੍ਪਜ੍ਜਮਾਨਂ ਪੁਬ੍ਬੇਨਿਵਾਸਂ ਛਾਦੇਤ੍ਵਾ ਠਿਤਂ ਤਮਂ ਵਿਜ੍ਝਤਿ, ਪੁਬ੍ਬੇਨਿਵਾਸਞ੍ਚ ਵਿਦਿਤਂ ਕਰੋਤੀਤਿ ਵਿਜ੍ਜਾ. ਚੁਤੂਪਪਾਤਞਾਣਂ ਚੁਤਿਪਟਿਸਨ੍ਧਿਚ੍ਛਾਦਕਂ ਤਮਂ ਵਿਜ੍ਝਤਿ, ਤਞ੍ਚ ਵਿਦਿਤਂ ਕਰੋਤੀਤਿ ਵਿਜ੍ਜਾ. ਆਸਵਾਨਂ ਖਯੇ ਞਾਣਂ ਚਤੁਸਚ੍ਚਚ੍ਛਾਦਕਂ ਤਮਂ ਵਿਜ੍ਝਤਿ, ਚਤੁਸਚ੍ਚਧਮ੍ਮਞ੍ਚ ਵਿਦਿਤਂ ਕਰੋਤੀਤਿ ਵਿਜ੍ਜਾ.

ਵਿਹਾਰੇਸੁ ਅਟ੍ਠ ਸਮਾਪਤ੍ਤਿਯੋ ਦਿਬ੍ਬੋ ਵਿਹਾਰੋ. ਚਤਸ੍ਸੋ ਅਪ੍ਪਮਞ੍ਞਾ ਬ੍ਰਹ੍ਮਾ ਵਿਹਾਰੋ. ਫਲਸਮਾਪਤ੍ਤਿ ਅਰਿਯੋ ਵਿਹਾਰੋ.

ਪਾਟਿਹਾਰਿਯਾਨਿ ਕੇਵਟ੍ਟਸੁਤ੍ਤੇ ਵਿਤ੍ਥਾਰਿਤਾਨੇਵ.

‘‘ਇਮੇ ਖੋ, ਆਵੁਸੋ’’ਤਿਆਦੀਸੁ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਸਮਸਟ੍ਠਿਯਾ ਤਿਕਾਨਂ ਵਸੇਨ ਅਸੀਤਿਸਤਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਤਿਕਵਣ੍ਣਨਾ ਨਿਟ੍ਠਿਤਾ.

ਚਤੁਕ੍ਕਵਣ੍ਣਨਾ

੩੦੬. ਇਤਿ ਤਿਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਚਤੁਕ੍ਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ‘‘ਸਤਿਪਟ੍ਠਾਨਚਤੁਕ੍ਕਂ’’ ਪੁਬ੍ਬੇ ਵਿਤ੍ਥਾਰਿਤਮੇਵ.

ਸਮ੍ਮਪ੍ਪਧਾਨਚਤੁਕ੍ਕੇ ਛਨ੍ਦਂ ਜਨੇਤੀਤਿ ‘‘ਯੋ ਛਨ੍ਦੋ ਛਨ੍ਦਿਕਤਾ ਕਤ੍ਤੁਕਮ੍ਯਤਾ ਕੁਸਲੋ ਧਮ੍ਮਚ੍ਛਨ੍ਦੋ’’ਤਿ ਏਵਂ ਵੁਤ੍ਤਂ ਕਤ੍ਤੁਕਮ੍ਯਤਂ ਜਨੇਤਿ. ਵਾਯਮਤੀਤਿ ਵਾਯਾਮਂ ਕਰੋਤਿ. ਵੀਰਿਯਂ ਆਰਭਤੀਤਿ ਵੀਰਿਯਂ ਜਨੇਤਿ. ਚਿਤ੍ਤਂ ਪਗ੍ਗਣ੍ਹਾਤੀਤਿ ਚਿਤ੍ਤਂ ਉਪਤ੍ਥਮ੍ਭੇਤਿ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਸਮ੍ਮਪ੍ਪਧਾਨਵਿਭਙ੍ਗੇ ਆਗਤੋਯੇਵ.

ਇਦ੍ਧਿਪਾਦੇਸੁ ਛਨ੍ਦਂ ਨਿਸ੍ਸਾਯ ਪਵਤ੍ਤੋ ਸਮਾਧਿ ਛਨ੍ਦਸਮਾਧਿ. ਪਧਾਨਭੂਤਾ ਸਙ੍ਖਾਰਾ ਪਧਾਨਸਙ੍ਖਾਰਾ. ਸਮਨ੍ਨਾਗਤਨ੍ਤਿ ਤੇਹਿ ਧਮ੍ਮੇਹਿ ਉਪੇਤਂ. ਇਦ੍ਧਿਯਾ ਪਾਦਂ, ਇਦ੍ਧਿਭੂਤਂ ਵਾ ਪਾਦਨ੍ਤਿ ਇਦ੍ਧਿਪਾਦਂ. ਸੇਸੇਸੁਪਿ ਏਸੇਵ ਨਯੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਇਦ੍ਧਿਪਾਦਵਿਭਙ੍ਗੇ ਆਗਤੋ ਏਵ. ਵਿਸੁਦ੍ਧਿਮਗ੍ਗੇ ਪਨਸ੍ਸ ਅਤ੍ਥੋ ਦੀਪਿਤੋ. ਝਾਨਕਥਾਪਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਵ.

੩੦੭. ਦਿਟ੍ਠਧਮ੍ਮਸੁਖਵਿਹਾਰਾਯਾਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਸੁਖਵਿਹਾਰਤ੍ਥਾਯ. ਇਧ ਫਲਸਮਾਪਤ੍ਤਿਝਾਨਾਨਿ, ਖੀਣਾਸਵਸ੍ਸ ਅਪਰਭਾਗੇ ਨਿਬ੍ਬਤ੍ਤਿਤਝਾਨਾਨਿ ਚ ਕਥਿਤਾਨਿ.

ਆਲੋਕਸਞ੍ਞਂ ਮਨਸਿਕਰੋਤੀਤਿ ਦਿਵਾ ਵਾ ਰਤ੍ਤਿਂ ਵਾ ਸੂਰਿਯਚਨ੍ਦਪਜ੍ਜੋਤਮਣਿਆਦੀਨਂ ਆਲੋਕਂ ਆਲੋਕੋਤਿ ਮਨਸਿਕਰੋਤਿ. ਦਿਵਾਸਞ੍ਞਂ ਅਧਿਟ੍ਠਾਤੀਤਿ ਏਵਂ ਮਨਸਿ ਕਤ੍ਵਾ ਦਿਵਾਤਿਸਞ੍ਞਂ ਠਪੇਤਿ. ਯਥਾ ਦਿਵਾ ਤਥਾ ਰਤ੍ਤਿਨ੍ਤਿ ਯਥਾ ਦਿਵਾ ਦਿਟ੍ਠੋ ਆਲੋਕੋ, ਤਥੇਵ ਤਂ ਰਤ੍ਤਿਂ ਮਨਸਿਕਰੋਤਿ. ਯਥਾ ਰਤ੍ਤਿਂ ਤਥਾ ਦਿਵਾਤਿ ਯਥਾ ਰਤ੍ਤਿਂ ਆਲੋਕੋ ਦਿਟ੍ਠੋ, ਏਵਮੇਵ ਦਿਵਾ ਮਨਸਿਕਰੋਤਿ. ਇਤਿ ਵਿਵਟੇਨ ਚੇਤਸਾਤਿ ਏਵਂ ਅਪਿਹਿਤੇਨ ਚਿਤ੍ਤੇਨ. ਅਪਰਿਯੋਨਦ੍ਧੇਨਾਤਿ ਸਮਨ੍ਤਤੋ ਅਨਦ੍ਧੇਨ. ਸਪ੍ਪਭਾਸਨ੍ਤਿ ਸਓਭਾਸਂ. ਞਾਣਦਸ੍ਸਨਪਟਿਲਾਭਾਯਾਤਿ ਞਾਣਦਸ੍ਸਨਪਟਿਲਾਭਤ੍ਥਾਯ. ਇਮਿਨਾ ਕਿਂ ਕਥਿਤਂ? ਮਿਦ੍ਧਵਿਨੋਦਨਆਲੋਕੋ ਕਥਿਤੋ ਪਰਿਕਮ੍ਮਆਲੋਕੋ ਵਾ. ਇਮਿਨਾ ਕਿਂ ਕਥਿਤਂ ਹੋਤਿ? ਖੀਣਾਸਵਸ੍ਸ ਦਿਬ੍ਬਚਕ੍ਖੁਞਾਣਂ. ਤਸ੍ਮਿਂ ਵਾ ਆਗਤੇਪਿ ਅਨਾਗਤੇਪਿ ਪਾਦਕਜ੍ਝਾਨਸਮਾਪਤ੍ਤਿਮੇਵ ਸਨ੍ਧਾਯ ‘‘ਸਪ੍ਪਭਾਸਂ ਚਿਤ੍ਤਂ ਭਾਵੇਤੀ’’ਤਿ ਵੁਤ੍ਤਂ.

ਸਤਿਸਮ੍ਪਜਞ੍ਞਾਯਾਤਿ ਸਤ੍ਤਟ੍ਠਾਨਿਕਸ੍ਸ ਸਤਿਸਮ੍ਪਜਞ੍ਞਸ੍ਸ ਅਤ੍ਥਾਯ. ਵਿਦਿਤਾ ਵੇਦਨਾ ਉਪ੍ਪਜ੍ਜਨ੍ਤੀਤਿਆਦੀਸੁ ਖੀਣਾਸਵਸ੍ਸ ਵਤ੍ਥੁ ਵਿਦਿਤਂ ਹੋਤਿ ਆਰਮ੍ਮਣਂ ਵਿਦਿਤਂ ਵਤ੍ਥਾਰਮ੍ਮਣਂ ਵਿਦਿਤਂ. ਵਤ੍ਥਾਰਮ੍ਮਣਵਿਦਿਤਤਾਯ ਏਵਂ ਵੇਦਨਾ ਉਪ੍ਪਜ੍ਜਨ੍ਤਿ, ਏਵਂ ਤਿਟ੍ਠਨ੍ਤਿ, ਏਵਂ ਨਿਰੁਜ੍ਝਨ੍ਤਿ. ਨ ਕੇਵਲਞ੍ਚ ਵੇਦਨਾ ਏਵ ਇਧ ਵੁਤ੍ਤਾ ਸਞ੍ਞਾਦਯੋਪਿ, ਅਵੁਤ੍ਤਾ ਚੇਤਨਾਦਯੋਪਿ, ਵਿਦਿਤਾ ਚ ਉਪ੍ਪਜ੍ਜਨ੍ਤਿ ਚੇਵ ਤਿਟ੍ਠਨ੍ਤਿ ਚ ਨਿਰੁਜ੍ਝਨ੍ਤਿ ਚ. ਅਪਿ ਚ ਵੇਦਨਾਯ ਉਪ੍ਪਾਦੋ ਵਿਦਿਤੋ ਹੋਤਿ, ਉਪਟ੍ਠਾਨਂ ਵਿਦਿਤਂ ਹੋਤਿ. ਅਵਿਜ੍ਜਾਸਮੁਦਯਾ ਵੇਦਨਾਸਮੁਦਯੋ, ਤਣ੍ਹਾਸਮੁਦਯਾ ਕਮ੍ਮਸਮੁਦਯੋ, ਫਸ੍ਸਸਮੁਦਯਾ ਵੇਦਨਾਯਸਮੁਦਯੋ. ਨਿਬ੍ਬਤ੍ਤਿਲਕ੍ਖਣਂ ਪਸ੍ਸਨ੍ਤੋਪਿ ਵੇਦਨਾਕ੍ਖਨ੍ਧਸ੍ਸ ਸਮੁਦਯਂ ਪਸ੍ਸਤਿ. ਏਵਂ ਵੇਦਨਾਯ ਉਪ੍ਪਾਦੋ ਵਿਦਿਤੋ ਹੋਤਿ. ਕਥਂ ਵੇਦਨਾਯ ਉਪਟ੍ਠਾਨਂ ਵਿਦਿਤਂ ਹੋਤਿ? ਅਨਿਚ੍ਚਤੋ ਮਨਸਿਕਰੋਤੋ ਖਯਤੂਪਟ੍ਠਾਨਂ ਵਿਦਿਤਂ ਹੋਤਿ. ਦੁਕ੍ਖਤੋ ਮਨਸਿਕਰੋਤੋ ਭਯਤੂਪਟ੍ਠਾਨਂ ਵਿਦਿਤਂ ਹੋਤਿ. ਅਨਤ੍ਤਤੋ ਮਨਸਿਕਰੋਤੋ ਸੁਞ੍ਞਤੂਪਟ੍ਠਾਨਂ ਵਿਦਿਤਂ ਹੋਤਿ. ਏਵਂ ਵੇਦਨਾਯ ਉਪਟ੍ਠਾਨਂ ਵਿਦਿਤਂ ਹੋਤਿ, ਖਯਤੋ ਭਯਤੋ ਸੁਞ੍ਞਤੋ ਜਾਨਾਤਿ. ਕਥਂ ਵੇਦਨਾਯ ਅਤ੍ਥਙ੍ਗਮੋ ਵਿਦਿਤੋ ਹੋਤਿ? ਅਵਿਜ੍ਜਾਨਿਰੋਧਾ ਵੇਦਨਾਨਿਰੋਧੋ.…ਪੇ… ਏਵਂ ਵੇਦਨਾਯ ਅਤ੍ਥਙ੍ਗਮੋ ਵਿਦਿਤੋ ਹੋਤਿ. ਇਮਿਨਾਪਿ ਨਯੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਤਿ ਰੂਪਨ੍ਤਿਆਦਿ ਵੁਤ੍ਤਨਯਮੇਵ. ਅਯਂ ਆਵੁਸੋ ਸਮਾਧਿਭਾਵਨਾਤਿ ਅਯਂ ਆਸਵਾਨਂ ਖਯਞਾਣਸ੍ਸ ਪਾਦਕਜ੍ਝਾਨਸਮਾਧਿਭਾਵਨਾ.

੩੦੮. ਅਪ੍ਪਮਞ੍ਞਾਤਿ ਪਮਾਣਂ ਅਗਹੇਤ੍ਵਾ ਅਨਵਸੇਸਫਰਣਵਸੇਨ ਅਪ੍ਪਮਞ੍ਞਾਵ. ਅਨੁਪਦਵਣ੍ਣਨਾ ਪਨ ਭਾਵਨਾਸਮਾਧਿਵਿਧਾਨਞ੍ਚ ਏਤਾਸਂ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਮੇਵ. ਅਰੂਪਕਥਾਪਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਵ.

ਅਪਸ੍ਸੇਨਾਨੀਤਿ ਅਪਸ੍ਸਯਾਨਿ. ਸਙ੍ਖਾਯਾਤਿ ਞਾਣੇਨ ਞਤ੍ਵਾ. ਪਟਿਸੇਵਤੀਤਿ ਞਾਣੇਨ ਞਤ੍ਵਾ ਸੇਵਿਤਬ੍ਬਯੁਤ੍ਤਕਮੇਵ ਸੇਵਤਿ. ਤਸ੍ਸ ਚ ਵਿਤ੍ਥਾਰੋ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਰਿਭੁਞ੍ਜਤੀ’’ਤਿਆਦਿਨਾ ਨਯੇਨ ਵੇਦਿਤਬ੍ਬੋ. ਸਙ੍ਖਾਯੇਕਂ ਅਧਿਵਾਸੇਤੀਤਿ ਞਾਣੇਨ ਞਤ੍ਵਾ ਅਧਿਵਾਸੇਤਬ੍ਬਯੁਤ੍ਤਕਮੇਵ ਅਧਿਵਾਸੇਤਿ. ਵਿਤ੍ਥਾਰੋ ਪਨੇਤ੍ਥ ‘‘ਪਟਿਸਙ੍ਖਾ ਯੋਨਿਸੋ ਖਮੋ ਹੋਤਿ ਸੀਤਸ੍ਸਾ’’ਤਿਆਦਿਨਾ ਨਯੇਨ ਵੇਦਿਤਬ੍ਬੋ. ਪਰਿਵਜ੍ਜੇਤੀਤਿ ਞਾਣੇਨ ਞਤ੍ਵਾ ਪਰਿਵਜ੍ਜੇਤੁਂ ਯੁਤ੍ਤਮੇਵ ਪਰਿਵਜ੍ਜੇਤਿ. ਤਸ੍ਸ ਵਿਤ੍ਥਾਰੋ ‘‘ਪਟਿਸਙ੍ਖਾ ਯੋਨਿਸੋ ਚਣ੍ਡਂ ਹਤ੍ਥਿਂ ਪਰਿਵਜ੍ਜੇਤੀ’’ਤਿਆਦਿਨਾ ਨਯੇਨ ਵੇਦਿਤਬ੍ਬੋ. ਵਿਨੋਦੇਤੀਤਿ ਞਾਣੇਨ ਞਤ੍ਵਾ ਵਿਨੋਦੇਤਬ੍ਬਮੇਵ ਵਿਨੋਦੇਤਿ, ਨੁਦਤਿ ਨੀਹਰਤਿ ਅਨ੍ਤੋ ਪਵਿਸਿਤੁਂ ਨ ਦੇਤਿ. ਤਸ੍ਸ ਵਿਤ੍ਥਾਰੋ ‘‘ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀ’’ਤਿਆਦਿਨਾ ਨਯੇਨ ਵੇਦਿਤਬ੍ਬੋ.

ਅਰਿਯਵਂਸਚਤੁਕ੍ਕਵਣ੍ਣਨਾ

੩੦੯. ਅਰਿਯਵਂਸਾਤਿ ਅਰਿਯਾਨਂ ਵਂਸਾ. ਯਥਾ ਹਿ ਖਤ੍ਤਿਯਵਂਸੋ, ਬ੍ਰਾਹ੍ਮਣਵਂਸੋ, ਵੇਸ੍ਸਵਂਸੋ, ਸੁਦ੍ਦਵਂਸੋ, ਸਮਣਵਂਸੋ, ਕੁਲਵਂਸੋ, ਰਾਜਵਂਸੋ, ਏਵਂ ਅਯਮ੍ਪਿ ਅਟ੍ਠਮੋ ਅਰਿਯਵਂਸੋ ਅਰਿਯਤਨ੍ਤਿ ਅਰਿਯਪਵੇਣੀ ਨਾਮ ਹੋਤਿ. ਸੋ ਖੋ ਪਨਾਯਂ ਅਰਿਯਵਂਸੋ ਇਮੇਸਂ ਵਂਸਾਨਂ ਮੂਲਗਨ੍ਧਾਦੀਨਂ ਕਾਲ਼ਾਨੁਸਾਰਿਤਗਨ੍ਧਾਦਯੋ ਵਿਯ ਅਗ੍ਗਮਕ੍ਖਾਯਤਿ. ਕੇ ਪਨ ਤੇ ਅਰਿਯਾ ਯੇਸਂ ਏਤੇ ਵਂਸਾਤਿ? ਅਰਿਯਾ ਵੁਚ੍ਚਨ੍ਤਿ ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਤਥਾਗਤਸਾਵਕਾ ਚ, ਏਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਇਤੋ ਪੁਬ੍ਬੇ ਹਿ ਸਤਸਹਸ੍ਸਕਪ੍ਪਾਧਿਕਾਨਂ ਚਤੁਨ੍ਨਂ ਅਸਙ੍ਖ੍ਯੇਯ੍ਯਾਨਂ ਮਤ੍ਥਕੇ ਤਣ੍ਹਙ੍ਕਰੋ ਮੇਧਙ੍ਕਰੋ ਸਰਣਙ੍ਕਰੋ ਦੀਪਙ੍ਕਰੋਤਿ ਚਤ੍ਤਾਰੋ ਬੁਦ੍ਧਾ ਉਪ੍ਪਨ੍ਨਾ, ਤੇ ਅਰਿਯਾ, ਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਤੇਸਂ ਬੁਦ੍ਧਾਨਂ ਪਰਿਨਿਬ੍ਬਾਨਤੋ ਅਪਰਭਾਗੇ ਅਸਙ੍ਖ੍ਯੇਯ੍ਯਂ ਅਤਿਕ੍ਕਮਿਤ੍ਵਾ ਕੋਣ੍ਡਞ੍ਞੋ ਨਾਮ ਬੁਦ੍ਧੋ ਉਪ੍ਪਨ੍ਨੋ…ਪੇ… ਇਮਸ੍ਮਿਂ ਕਪ੍ਪੇ ਕਕੁਸਨ੍ਧੋ, ਕੋਣਾਗਮਨੋ, ਕਸ੍ਸਪੋ, ਅਮ੍ਹਾਕਂ ਭਗਵਾ ਗੋਤਮੋਤਿ ਚਤ੍ਤਾਰੋ ਬੁਦ੍ਧਾ ਉਪ੍ਪਨ੍ਨਾ. ਤੇਸਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਅਪਿਚ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਸਬ੍ਬਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਅਰਿਯਾਨਂ ਵਂਸਾਤਿ ਅਰਿਯਵਂਸਾ. ਤੇ ਖੋ ਪਨੇਤੇ ਅਗ੍ਗਞ੍ਞਾ ਅਗ੍ਗਾਤਿ ਜਾਨਿਤਬ੍ਬਾ. ਰਤ੍ਤਞ੍ਞਾ ਦੀਘਰਤ੍ਤਂ ਪਵਤ੍ਤਾਤਿ ਜਾਨਿਤਬ੍ਬਾ. ਵਂਸਞ੍ਞਾ ਵਂਸਾਤਿ ਜਾਨਿਤਬ੍ਬਾ.

ਪੋਰਾਣਾਤਿ ਨ ਅਧੁਨੁਪ੍ਪਤ੍ਤਿਕਾ. ਅਸਂਕਿਣ੍ਣਾ ਅਵਿਕਿਣ੍ਣਾ ਅਨਪਨੀਤਾ. ਅਸਂਕਿਣ੍ਣਪੁਬ੍ਬਾ ਅਤੀਤਬੁਦ੍ਧੇਹਿ ਨ ਸਂਕਿਣ੍ਣਪੁਬ੍ਬਾ. ‘‘ਕਿਂ ਇਮੇਹੀ’’ਤਿ ਨ ਅਪਨੀਤਪੁਬ੍ਬਾ? ਨ ਸਙ੍ਕੀਯਨ੍ਤੀਤਿ ਇਦਾਨਿਪਿ ਨ ਅਪਨੀਯਨ੍ਤਿ. ਨ ਸਙ੍ਕੀਯਿਸ੍ਸਨ੍ਤੀਤਿ ਅਨਾਗਤਬੁਦ੍ਧੇਹਿਪਿ ਨ ਅਪਨੀਯਿਸ੍ਸਨ੍ਤਿ, ਯੇ ਲੋਕੇ ਵਿਞ੍ਞੂ ਸਮਣਬ੍ਰਾਹ੍ਮਣਾ, ਤੇਹਿ ਅਪ੍ਪਟਿਕੁਟ੍ਠਾ, ਸਮਣੇਹਿ ਬ੍ਰਾਹ੍ਮਣੇਹਿ ਵਿਞ੍ਞੂਹਿ ਅਨਿਨ੍ਦਿਤਾ ਅਗਰਹਿਤਾ.

ਸਨ੍ਤੁਟ੍ਠੋ ਹੋਤੀਤਿ ਪਚ੍ਚਯਸਨ੍ਤੋਸਵਸੇਨ ਸਨ੍ਤੁਟ੍ਠੋ ਹੋਤਿ. ਇਤਰੀਤਰੇਨ ਚੀਵਰੇਨਾਤਿ ਥੂਲਸੁਖੁਮਲੂਖਪਣੀਤਥਿਰਜਿਣ੍ਣਾਨਂ ਯੇਨ ਕੇਨਚਿ. ਅਥ ਖੋ ਯਥਾਲਦ੍ਧਾਦੀਨਂ ਇਤਰੀਤਰੇਨ ਯੇਨ ਕੇਨਚਿ ਸਨ੍ਤੁਟ੍ਠੋ ਹੋਤੀਤਿ ਅਤ੍ਥੋ. ਚੀਵਰਸ੍ਮਿਞ੍ਹਿ ਤਯੋ ਸਨ੍ਤੋਸਾ – ਯਥਾਲਾਭਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋਸੋਤਿ. ਪਿਣ੍ਡਪਾਤਾਦੀਸੁਪਿ ਏਸੇਵ ਨਯੋ. ਤੇਸਂ ਵਿਤ੍ਥਾਰਕਥਾ ਸਾਮਞ੍ਞਫਲੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਇਮੇ ਤਯੋ ਸਨ੍ਤੋਸੇ ਸਨ੍ਧਾਯ ‘‘ਸਨ੍ਤੁਟ੍ਠੋ ਹੋਤਿ, ਇਤਰੀਤਰੇਨ ਯਥਾਲਦ੍ਧਾਦੀਸੁ ਯੇਨ ਕੇਨਚਿ ਚੀਵਰੇਨ ਸਨ੍ਤੁਟ੍ਠੋ ਹੋਤੀ’’ਤਿ ਵੁਤ੍ਤਂ.

ਏਤ੍ਥ ਚ ਚੀਵਰਂ ਜਾਨਿਤਬ੍ਬਂ, ਚੀਵਰਕ੍ਖੇਤ੍ਤਂ ਜਾਨਿਤਬ੍ਬਂ, ਪਂਸੁਕੂਲਂ ਜਾਨਿਤਬ੍ਬਂ, ਚੀਵਰਸਨ੍ਤੋਸੋ ਜਾਨਿਤਬ੍ਬੋ, ਚੀਵਰਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਜਾਨਿਤਬ੍ਬਾਨਿ. ਤਤ੍ਥ ਚੀਵਰਂ ਜਾਨਿਤਬ੍ਬਨ੍ਤਿ ਖੋਮਾਦੀਨਿ ਛ ਚੀਵਰਾਨਿ ਦੁਕੂਲਾਦੀਨਿ ਛ ਅਨੁਲੋਮਚੀਵਰਾਨਿ ਜਾਨਿਤਬ੍ਬਾਨਿ. ਇਮਾਨਿ ਦ੍ਵਾਦਸ ਕਪ੍ਪਿਯਚੀਵਰਾਨਿ. ਕੁਸਚੀਰਂ ਵਾਕਚੀਰਂ ਫਲਕਚੀਰਂ ਕੇਸਕਮ੍ਬਲਂ ਵਾਲ਼ਕਮ੍ਬਲਂ ਪੋਤ੍ਥਕੋ ਚਮ੍ਮਂ ਉਲੂਕਪਕ੍ਖਂ ਰੁਕ੍ਖਦੁਸ੍ਸਂ ਲਤਾਦੁਸ੍ਸਂ ਏਰਕਦੁਸ੍ਸਂ ਕਦਲਿਦੁਸ੍ਸਂ ਵੇਲ਼ੁਦੁਸ੍ਸਨ੍ਤਿ ਏਵਮਾਦੀਨਿ ਪਨ ਅਕਪ੍ਪਿਯਚੀਵਰਾਨਿ. ਚੀਵਰਕ੍ਖੇਤ੍ਤਨ੍ਤਿ ‘‘ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਅਤ੍ਤਨੋ ਵਾ ਧਨੇਨ ਪਂਸੁਕੂਲਂ ਵਾ’’ਤਿ ਏਵਂ ਉਪ੍ਪਜ੍ਜਨਤੋ ਛ ਖੇਤ੍ਤਾਨਿ, ਅਟ੍ਠਨ੍ਨਞ੍ਚ ਮਾਤਿਕਾਨਂ ਵਸੇਨ ਅਟ੍ਠ ਖੇਤ੍ਤਾਨਿ ਜਾਨਿਤਬ੍ਬਾਨਿ. ਪਂਸੁਕੂਲਨ੍ਤਿ ਸੋਸਾਨਿਕਂ, ਪਾਪਣਿਕਂ, ਰਥਿਯਂ ਸਙ੍ਕਾਰਕੂਟਕਂ, ਸੋਤ੍ਥਿਯਂ, ਸਿਨਾਨਂ, ਤਿਤ੍ਥਂ, ਗਤਪਚ੍ਚਾਗਤਂ, ਅਗ੍ਗਿਦਡ੍ਢਂ, ਗੋਖਾਯਿਤਂ ਉਪਚਿਕਖਾਯਿਤਂ, ਉਨ੍ਦੂਰਖਾਯਿਤਂ, ਅਨ੍ਤਚ੍ਛਿਨ੍ਨਂ, ਦਸਾਚ੍ਛਿਨ੍ਨਂ, ਧਜਾਹਟਂ, ਥੂਪਂ, ਸਮਣਚੀਵਰਂ, ਸਾਮੁਦ੍ਦਿਯਂ, ਆਭਿਸੇਕਿਯਂ, ਪਨ੍ਥਿਕਂ, ਵਾਤਾਹਟਂ, ਇਦ੍ਧਿਮਯਂ, ਦੇਵਦਤ੍ਤਿਯਨ੍ਤਿ ਤੇਵੀਸਤਿ ਪਂਸੁਕੂਲਾਨਿ ਵੇਦਿਤਬ੍ਬਾਨਿ.

ਏਤ੍ਥ ਚ ਸੋਤ੍ਥਿਯਨ੍ਤਿ ਗਬ੍ਭਮਲਹਰਣਂ. ਗਤਪਚ੍ਚਾਗਤਨ੍ਤਿ ਮਤਕਸਰੀਰਂ ਪਾਰੁਪਿਤ੍ਵਾ ਸੁਸਾਨਂ ਨੇਤ੍ਵਾ ਆਨੀਤਚੀਵਰਂ. ਧਜਾਹਟਨ੍ਤਿ ਧਜਂ ਉਸ੍ਸਾਪੇਤ੍ਵਾ ਤਤੋ ਆਨੀਤਂ. ਥੂਪਨ੍ਤਿ ਵਮ੍ਮਿਕੇ ਪੂਜਿਤਚੀਵਰਂ. ਸਾਮੁਦ੍ਦਿਯਨ੍ਤਿ ਸਮੁਦ੍ਦਵੀਚੀਹਿ ਥਲਂ ਪਾਪਿਤਂ. ਪਨ੍ਥਿਕਨ੍ਤਿ ਪਨ੍ਥਂ ਗਚ੍ਛਨ੍ਤੇਹਿ ਚੋਰਭਯੇਨ ਪਾਸਾਣੇਹਿ ਕੋਟ੍ਟੇਤ੍ਵਾ ਪਾਰੁਤਚੀਵਰਂ. ਇਦ੍ਧਿਮਯਨ੍ਤਿ ਏਹਿਭਿਕ੍ਖੁਚੀਵਰਂ. ਸੇਸਂ ਪਾਕਟਮੇਵ.

ਚੀਵਰਸਨ੍ਤੋਸੋਤਿ ਵੀਸਤਿ ਚੀਵਰਸਨ੍ਤੋਸਾ, ਵਿਤਕ੍ਕਸਨ੍ਤੋਸੋ, ਗਮਨਸਨ੍ਤੋਸੋ, ਪਰਿਯੇਸਨਸਨ੍ਤੋਸੋ, ਪਟਿਲਾਭਸਨ੍ਤੋਸੋ, ਮਤ੍ਤਪ੍ਪਟਿਗ੍ਗਹਣਸਨ੍ਤੋਸੋ, ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ, ਯਥਾਲਾਭਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋਸੋ, ਉਦਕਸਨ੍ਤੋਸੋ, ਧੋਵਨਸਨ੍ਤੋਸੋ, ਕਰਣਸਨ੍ਤੋਸੋ, ਪਰਿਮਾਣਸਨ੍ਤੋਸੋ, ਸੁਤ੍ਤਸਨ੍ਤੋਸੋ, ਸਿਬ੍ਬਨਸਨ੍ਤੋਸੋ, ਰਜਨਸਨ੍ਤੋਸੋ, ਕਪ੍ਪਸਨ੍ਤੋਸੋ, ਪਰਿਭੋਗਸਨ੍ਤੋਸੋ, ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ, ਵਿਸ੍ਸਜ੍ਜਨਸਨ੍ਤੋਸੋਤਿ.

ਤਤ੍ਥ ਸਾਦਕਭਿਕ੍ਖੁਨਾ ਤੇਮਾਸਂ ਨਿਬਦ੍ਧਵਾਸਂ ਵਸਿਤ੍ਵਾ ਏਕਮਾਸਮਤ੍ਤਂ ਵਿਤਕ੍ਕੇਤੁਂ ਵਟ੍ਟਤਿ. ਸੋ ਹਿ ਪਵਾਰੇਤ੍ਵਾ ਚੀਵਰਮਾਸੇ ਚੀਵਰਂ ਕਰੋਤਿ. ਪਂਸੁਕੂਲਿਕੋ ਅਡ੍ਢਮਾਸੇਨੇਵ ਕਰੋਤਿ. ਇਤਿ ਮਾਸਡ੍ਢਮਾਸਮਤ੍ਤਂ ਵਿਤਕ੍ਕਨਂ ਵਿਤਕ੍ਕਸਨ੍ਤੋਸੋ. ਵਿਤਕ੍ਕਸਨ੍ਤੋਸੇਨ ਪਨ ਸਨ੍ਤੁਟ੍ਠੇਨ ਭਿਕ੍ਖੁਨਾ ਪਾਚੀਨਕ੍ਖਣ੍ਡਰਾਜਿਵਾਸਿਕਪਂਸੁਕੂਲਿਕਤ੍ਥੇਰਸਦਿਸੇਨ ਭਵਿਤਬ੍ਬਂ.

ਥੇਰੋ ਕਿਰ ਚੇਤਿਯਪਬ੍ਬਤਵਿਹਾਰੇ ਚੇਤਿਯਂ ਵਨ੍ਦਿਸ੍ਸਾਮੀਤਿ ਆਗਤੋ ਚੇਤਿਯਂ ਵਨ੍ਦਿਤ੍ਵਾ ਚਿਨ੍ਤੇਸਿ ‘‘ਮਯ੍ਹਂ ਚੀਵਰਂ ਜਿਣ੍ਣਂ ਬਹੂਨਂ ਵਸਨਟ੍ਠਾਨੇ ਲਭਿਸ੍ਸਾਮੀ’’ਤਿ. ਸੋ ਮਹਾਵਿਹਾਰਂ ਗਨ੍ਤ੍ਵਾ ਸਙ੍ਘਤ੍ਥੇਰਂ ਦਿਸ੍ਵਾ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਤਤ੍ਥ ਵੁਤ੍ਥੋ ਪੁਨਦਿਵਸੇ ਚੀਵਰਂ ਆਦਾਯ ਆਗਨ੍ਤ੍ਵਾ ਥੇਰਂ ਵਨ੍ਦਿ. ਥੇਰੋ ਕਿਂ ਆਵੁਸੋਤਿ ਆਹ. ਗਾਮਦ੍ਵਾਰਂ, ਭਨ੍ਤੇ, ਗਮਿਸ੍ਸਾਮੀਤਿ. ਅਹਮ੍ਪਾਵੁਸੋ, ਗਮਿਸ੍ਸਾਮੀਤਿ. ਸਾਧੁ, ਭਨ੍ਤੇਤਿ ਗਚ੍ਛਨ੍ਤੋ ਮਹਾਬੋਧਿਦ੍ਵਾਰਕੋਟ੍ਠਕੇ ਠਤ੍ਵਾ ਪੁਞ੍ਞਵਨ੍ਤਾਨਂ ਵਸਨਟ੍ਠਾਨੇ ਮਨਾਪਂ ਲਭਿਸ੍ਸਾਮੀਤਿ ਚਿਨ੍ਤੇਤ੍ਵਾ ਅਪਰਿਸੁਦ੍ਧੋ ਮੇ ਵਿਤਕ੍ਕੋਤਿ ਤਤੋਵ ਪਟਿਨਿਵਤ੍ਤਿ. ਪੁਨਦਿਵਸੇ ਅਮ੍ਬਙ੍ਗਣਸਮੀਪਤੋ, ਪੁਨਦਿਵਸੇ ਮਹਾਚੇਤਿਯਸ੍ਸ ਉਤ੍ਤਰਦ੍ਵਾਰਤੋ, ਤਥੇਵ ਪਟਿਨਿਵਤ੍ਤਿਤ੍ਵਾ ਚਤੁਤ੍ਥਦਿਵਸੇ ਥੇਰਸ੍ਸ ਸਨ੍ਤਿਕਂ ਅਗਮਾਸਿ. ਥੇਰੋ ਇਮਸ੍ਸ ਭਿਕ੍ਖੁਨੋ ਵਿਤਕ੍ਕੋ ਨ ਪਰਿਸੁਦ੍ਧੋ ਭਵਿਸ੍ਸਤੀਤਿ ਚੀਵਰਂ ਗਹੇਤ੍ਵਾ ਤੇਨ ਸਦ੍ਧਿਂਯੇਵ ਪਞ੍ਹਂ ਪੁਚ੍ਛਮਾਨੋ ਗਾਮਂ ਪਾਵਿਸਿ. ਤਞ੍ਚ ਰਤ੍ਤਿਂ ਏਕੋ ਮਨੁਸ੍ਸੋ ਉਚ੍ਚਾਰਪਲਿਬੁਦ੍ਧੋ ਸਾਟਕੇਯੇਵ ਵਚ੍ਚਂ ਕਤ੍ਵਾ ਤਂ ਸਙ੍ਕਾਰਟ੍ਠਾਨੇ ਛਡ੍ਡੇਸਿ. ਪਂਸੁਕੂਲਿਕਤ੍ਥੇਰੋ ਤਂ ਨੀਲਮਕ੍ਖਿਕਾਹਿ ਸਮ੍ਪਰਿਕਿਣ੍ਣਂ ਦਿਸ੍ਵਾ ਅਞ੍ਜਲਿਂ ਪਗ੍ਗਹੇਸਿ. ਮਹਾਥੇਰੋ ‘‘ਕਿਂ, ਆਵੁਸੋ, ਸਙ੍ਕਾਰਟ੍ਠਾਨਸ੍ਸ ਅਞ੍ਜਲਿਂ ਪਗ੍ਗਣ੍ਹਾਸੀ’’ਤਿ? ‘‘ਨਾਹਂ, ਭਨ੍ਤੇ, ਸਙ੍ਕਾਰਟ੍ਠਾਨਸ੍ਸ ਅਞ੍ਜਲਿਂ ਪਗ੍ਗਣ੍ਹਾਮਿ, ਮਯ੍ਹਂ ਪਿਤੁ ਦਸਬਲਸ੍ਸ ਪਗ੍ਗਣ੍ਹਾਮਿ, ਪੁਣ੍ਣਦਾਸਿਯਾ ਸਰੀਰਂ ਪਾਰੁਪਿਤ੍ਵਾ ਛਡ੍ਡਿਤਂ ਪਂਸੁਕੂਲਂ ਤੁਮ੍ਬਮਤ੍ਤੇ ਪਾਣਕੇ ਵਿਧੁਨਿਤ੍ਵਾ ਸੁਸਾਨਤੋ ਗਣ੍ਹਨ੍ਤੇਨ ਦੁਕ੍ਕਰਂ ਕਤਂ, ਭਨ੍ਤੇ’’ਤਿ. ਮਹਾਥੇਰੋ ‘‘ਪਰਿਸੁਦ੍ਧੋ ਵਿਤਕ੍ਕੋ ਪਂਸੁਕੂਲਿਕਸ੍ਸਾ’’ਤਿ ਚਿਨ੍ਤੇਸਿ. ਪਂਸੁਕੂਲਿਕਤ੍ਥੇਰੋਪਿ ਤਸ੍ਮਿਂਯੇਵ ਠਾਨੇ ਠਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਤੀਣਿ ਫਲਾਨਿ ਪਤ੍ਤੋ ਤਂ ਸਾਟਕਂ ਗਹੇਤ੍ਵਾ ਚੀਵਰਂ ਕਤ੍ਵਾ ਪਾਰੁਪਿਤ੍ਵਾ ਪਾਚੀਨਕ੍ਖਣ੍ਡਰਾਜਿਂ ਗਨ੍ਤ੍ਵਾ ਅਗ੍ਗਫਲਂ ਅਰਹਤ੍ਤਂ ਪਾਪੁਣਿ.

ਚੀਵਰਤ੍ਥਾਯ ਗਚ੍ਛਨ੍ਤਸ੍ਸ ਪਨ ‘‘ਕਤ੍ਥ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਕਮ੍ਮਟ੍ਠਾਨਸੀਸੇਨੇਵ ਗਮਨਂ ਗਮਨਸਨ੍ਤੋਸੋ ਨਾਮ.

ਪਰਿਯੇਸਨ੍ਤਸ੍ਸ ਪਨ ਯੇਨ ਵਾ ਤੇਨ ਵਾ ਸਦ੍ਧਿਂ ਅਪਰਿਯੇਸਿਤ੍ਵਾ ਲਜ੍ਜਿਂ ਪੇਸਲਂ ਭਿਕ੍ਖੁਂ ਗਹੇਤ੍ਵਾ ਪਰਿਯੇਸਨਂ ਪਰਿਯੇਸਨਸਨ੍ਤੋਸੋ ਨਾਮ.

ਏਵਂ ਪਰਿਯੇਸਨ੍ਤਸ੍ਸ ਆਹਰਿਯਮਾਨਂ ਚੀਵਰਂ ਦੂਰਤੋ ਦਿਸ੍ਵਾ ‘‘ਏਤਂ ਮਨਾਪਂ ਭਵਿਸ੍ਸਤਿ, ਏਤਂ ਅਮਨਾਪ’’ਨ੍ਤਿ ਏਵਂ ਅਵਿਤਕ੍ਕੇਤ੍ਵਾ ਥੂਲਸੁਖੁਮਾਦੀਸੁ ਯਥਾਲਦ੍ਧੇਨੇਵ ਸਨ੍ਤੁਸ੍ਸਨਂ ਪਟਿਲਾਭਸਨ੍ਤੋਸੋ ਨਾਮ.

ਏਵਂ ਲਦ੍ਧਂ ਗਣ੍ਹਨ੍ਤਸ੍ਸਾਪਿ ‘‘ਏਤ੍ਤਕਂ ਦੁਪਟ੍ਟਸ੍ਸ ਭਵਿਸ੍ਸਤਿ, ਏਤ੍ਤਕਂ ਏਕਪਟ੍ਟਸ੍ਸਾ’’ਤਿ ਅਤ੍ਤਨੋ ਪਹੋਨਕਮਤ੍ਤੇਨੇਵ ਸਨ੍ਤੁਸ੍ਸਨਂ ਮਤ੍ਤਪ੍ਪਟਿਗ੍ਗਹਣਸਨ੍ਤੋਸੋ ਨਾਮ.

ਚੀਵਰਂ ਪਰਿਯੇਸਨ੍ਤਸ੍ਸ ਪਨ ‘‘ਅਸੁਕਸ੍ਸ ਘਰਦ੍ਵਾਰੇ ਮਨਾਪਂ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਦ੍ਵਾਰਪਟਿਪਾਟਿਯਾ ਚਰਣਂ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ ਨਾਮ.

ਲੂਖਪਣੀਤੇਸੁ ਯੇਨ ਕੇਨਚਿ ਯਾਪੇਤੁਂ ਸਕ੍ਕੋਨ੍ਤਸ੍ਸ ਯਥਾਲਦ੍ਧੇਨੇਵ ਯਾਪਨਂ ਯਥਾਲਾਭਸਨ੍ਤੋਸੋ ਨਾਮ.

ਅਤ੍ਤਨੋ ਥਾਮਂ ਜਾਨਿਤ੍ਵਾ ਯੇਨ ਯਾਪੇਤੁਂ ਸਕ੍ਕੋਤਿ, ਤੇਨ ਯਾਪਨਂ ਯਥਾਬਲਸਨ੍ਤੋਸੋ ਨਾਮ.

ਮਨਾਪਂ ਅਞ੍ਞਸ੍ਸ ਦਤ੍ਵਾ ਅਤ੍ਤਨੋ ਯੇਨ ਕੇਨਚਿ ਯਾਪਨਂ ਯਥਾਸਾਰੁਪ੍ਪਸਨ੍ਤੋਸੋ ਨਾਮ.

‘‘ਕਤ੍ਥ ਉਦਕਂ ਮਨਾਪਂ, ਕਤ੍ਥ ਅਮਨਾਪ’’ਨ੍ਤਿ ਅਵਿਚਾਰੇਤ੍ਵਾ ਯੇਨ ਕੇਨਚਿ ਧੋਵਨੁਪਗੇਨ ਉਦਕੇਨ ਧੋਵਨਂ ਉਦਕਸਨ੍ਤੋਸੋ ਨਾਮ. ਪਣ੍ਡੁਮਤ੍ਤਿਕਗੇਰੁਕਪੂਤਿਪਣ੍ਣਰਸਕਿਲਿਟ੍ਠਾਨਿ ਪਨ ਉਦਕਾਨਿ ਵਜ੍ਜੇਤੁਂ ਵਟ੍ਟਤਿ.

ਧੋਵਨ੍ਤਸ੍ਸ ਪਨ ਮੁਗ੍ਗਰਾਦੀਹਿ ਅਪਹਰਿਤ੍ਵਾ ਹਤ੍ਥੇਹਿ ਮਦ੍ਦਿਤ੍ਵਾ ਧੋਵਨਂ ਧੋਵਨਸਨ੍ਤੋਸੋ ਨਾਮ. ਤਥਾ ਅਸੁਜ੍ਝਨ੍ਤਂ ਪਣ੍ਣਾਨਿ ਪਕ੍ਖਿਪਿਤ੍ਵਾ ਤਾਪਿਤਉਦਕੇਨਾਪਿ ਧੋਵਿਤੁਂ ਵਟ੍ਟਤਿ.

ਏਵਂ ਧੋਵਿਤ੍ਵਾ ਕਰੋਨ੍ਤਸ੍ਸ ਇਦਂ ਥੂਲਂ, ਇਦਂ ਸੁਖੁਮਨ੍ਤਿ ਅਕੋਪੇਤ੍ਵਾ ਪਹੋਨਕਨੀਹਾਰੇਨੇਵ ਕਰਣਂ ਕਰਣਸਨ੍ਤੋਸੋ ਨਾਮ.

ਤਿਮਣ੍ਡਲਪ੍ਪਟਿਚ੍ਛਾਦਨਮਤ੍ਤਸ੍ਸੇਵ ਕਰਣਂ ਪਰਿਮਾਣਸਨ੍ਤੋਸੋ ਨਾਮ.

ਚੀਵਰਕਰਣਤ੍ਥਾਯ ਪਨ ਮਨਾਪਸੁਤ੍ਤਂ ਪਰਿਯੇਸਿਸ੍ਸਾਮੀਤਿ ਅਵਿਚਾਰੇਤ੍ਵਾ ਰਥਿਕਾਦੀਸੁ ਵਾ ਦੇਵਟ੍ਠਾਨੇ ਵਾ ਆਹਰਿਤ੍ਵਾ ਪਾਦਮੂਲੇ ਵਾ ਠਪਿਤਂ ਯਂਕਿਞ੍ਚਿਦੇਵ ਸੁਤ੍ਤਂ ਗਹੇਤ੍ਵਾ ਕਰਣਂ ਸੁਤ੍ਤਸਨ੍ਤੋਸੋ ਨਾਮ.

ਕੁਸਿਬਨ੍ਧਨਕਾਲੇ ਪਨ ਅਙ੍ਗੁਲਮਤ੍ਤੇ ਸਤ੍ਤਵਾਰੇ ਨ ਵਿਜ੍ਝਿਤਬ੍ਬਂ, ਏਵਂ ਕਰੋਨ੍ਤਸ੍ਸ ਹਿ ਯੋ ਭਿਕ੍ਖੁ ਸਹਾਯੋ ਨ ਹੋਤਿ, ਤਸ੍ਸ ਵਤ੍ਤਭੇਦੋਪਿ ਨਤ੍ਥਿ. ਤਿਵਙ੍ਗੁਲਮਤ੍ਤੇ ਪਨ ਸਤ੍ਤਵਾਰੇ ਵਿਜ੍ਝਿਤਬ੍ਬਂ, ਏਵਂ ਕਰੋਨ੍ਤਸ੍ਸ ਮਗ੍ਗਪਟਿਪਨ੍ਨੇਨਾਪਿ ਸਹਾਯੇਨ ਭਵਿਤਬ੍ਬਂ. ਯੋ ਨ ਹੋਤਿ, ਤਸ੍ਸ ਵਤ੍ਤਭੇਦੋ. ਅਯਂ ਸਿਬ੍ਬਨਸਨ੍ਤੋਸੋ ਨਾਮ.

ਰਜਨ੍ਤੇਨ ਪਨ ਕਾਲ਼ਕਚ੍ਛਕਾਦੀਨਿ ਪਰਿਯੇਸਨ੍ਤੇਨ ਨ ਰਜਿਤਬ੍ਬਂ. ਸੋਮਵਕ੍ਕਲਾਦੀਸੁ ਯਂ ਲਭਤਿ, ਤੇਨ ਰਜਿਤਬ੍ਬਂ. ਅਲਭਨ੍ਤੇਨ ਪਨ ਮਨੁਸ੍ਸੇਹਿ ਅਰਞ੍ਞੇ ਵਾਕਂ ਗਹੇਤ੍ਵਾ ਛਡ੍ਡਿਤਰਜਨਂ ਵਾ ਭਿਕ੍ਖੂਹਿ ਪਚਿਤ੍ਵਾ ਛਡ੍ਡਿਤਕਸਟਂ ਵਾ ਗਹੇਤ੍ਵਾ ਰਜਿਤਬ੍ਬਂ, ਅਯਂ ਰਜਨਸਨ੍ਤੋਸੋ ਨਾਮ.

ਨੀਲਕਦ੍ਦਮਕਾਲ਼ਸਾਮੇਸੁ ਯਂਕਿਞ੍ਚਿ ਗਹੇਤ੍ਵਾ ਹਤ੍ਥਿਪਿਟ੍ਠੇ ਨਿਸਿਨ੍ਨਸ੍ਸ ਪਞ੍ਞਾਯਮਾਨਕਪਕਰਣਂ ਕਪ੍ਪਸਨ੍ਤੋਸੋ ਨਾਮ.

ਹਿਰਿਕੋਪੀਨਪਟਿਚ੍ਛਾਦਨਮਤ੍ਤਵਸੇਨ ਪਰਿਭੁਞ੍ਜਨਂ ਪਰਿਭੋਗਸਨ੍ਤੋਸੋ ਨਾਮ.

ਦੁਸ੍ਸਂ ਪਨ ਲਭਿਤ੍ਵਾ ਸੁਤ੍ਤਂ ਵਾ ਸੂਚਿਂ ਵਾ ਕਾਰਕਂ ਵਾ ਅਲਭਨ੍ਤੇਨ ਠਪੇਤੁਂ ਵਟ੍ਟਤਿ, ਲਭਨ੍ਤੇਨ ਨ ਵਟ੍ਟਤਿ. ਕਤਮ੍ਪਿ ਸਚੇ ਅਨ੍ਤੇਵਾਸਿਕਾਦੀਨਂ ਦਾਤੁਕਾਮੋ ਹੋਤਿ, ਤੇ ਚ ਅਸਨ੍ਨਿਹਿਤਾ ਯਾਵ ਆਗਮਨਾ ਠਪੇਤੁਂ ਵਟ੍ਟਤਿ. ਆਗਤਮਤ੍ਤੇਸੁ ਦਾਤਬ੍ਬਂ. ਦਾਤੁਂ ਅਸਕ੍ਕੋਨ੍ਤੇਨ ਅਧਿਟ੍ਠਾਤਬ੍ਬਂ. ਅਞ੍ਞਸ੍ਮਿਂ ਚੀਵਰੇ ਸਤਿ ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤੁਂ ਵਟ੍ਟਤਿ. ਅਨਧਿਟ੍ਠਿਤਮੇਵ ਹਿ ਸਨ੍ਨਿਧਿ ਹੋਤਿ. ਅਧਿਟ੍ਠਿਤਂ ਨ ਹੋਤੀਤਿ ਮਹਾਸੀਵਤ੍ਥੇਰੋ ਆਹ. ਅਯਂ ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ ਨਾਮ.

ਵਿਸ੍ਸਜ੍ਜਨ੍ਤੇਨ ਪਨ ਨ ਮੁਖਂ ਓਲੋਕੇਤ੍ਵਾ ਦਾਤਬ੍ਬਂ. ਸਾਰਣੀਯਧਮ੍ਮੇ ਠਤ੍ਵਾ ਵਿਸ੍ਸਜ੍ਜਿਤਬ੍ਬਨ੍ਤਿ ਅਯਂ ਵਿਸ੍ਸਜ੍ਜਨਸਨ੍ਤੋਸੋ ਨਾਮ.

ਚੀਵਰਪਟਿਸਂਯੁਤ੍ਤਾਨਿ ਧੁਤਙ੍ਗਾਨਿ ਨਾਮ ਪਂਸੁਕੂਲਿਕਙ੍ਗਞ੍ਚੇਵ ਤੇਚੀਵਰਿਕਙ੍ਗਞ੍ਚ. ਤੇਸਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗਤੋ ਵੇਦਿਤਬ੍ਬਾ. ਇਤਿ ਚੀਵਰਸਨ੍ਤੋਸਮਹਾਅਰਿਯਵਂਸਂ ਪੂਰਯਮਾਨੋ ਭਿਕ੍ਖੁ ਇਮਾਨਿ ਦ੍ਵੇ ਧੁਤਙ੍ਗਾਨਿ ਗੋਪੇਤਿ. ਇਮਾਨਿ ਗੋਪੇਨ੍ਤੋ ਚੀਵਰਸਨ੍ਤੋਸਮਹਾਅਰਿਯਵਂਸੇਨ ਸਨ੍ਤੁਟ੍ਠੋ ਹੋਤਿ.

ਵਣ੍ਣਵਾਦੀਤਿ ਏਕੋ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਨ ਕਥੇਤਿ, ਏਕੋ ਨ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ, ਏਕੋ ਨੇਵ ਸਨ੍ਤੁਟ੍ਠੋ ਹੋਤਿ, ਨ ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ, ਏਕੋ ਸਨ੍ਤੁਟ੍ਠੋ ਚੇਵ ਹੋਤਿ, ਸਨ੍ਤੋਸਸ੍ਸ ਚ ਵਣ੍ਣਂ ਕਥੇਤਿ, ਤਂ ਦਸ੍ਸੇਤੁਂ ‘‘ਇਤਰੀਤਰਚੀਵਰਸਨ੍ਤੁਟ੍ਠਿਯਾ ਚ ਵਣ੍ਣਵਾਦੀ’’ਤਿ ਵੁਤ੍ਤਂ.

ਅਨੇਸਨਨ੍ਤਿ ਦੂਤੇਯ੍ਯਪਹਿਨਗਮਨਾਨੁਯੋਗਪ੍ਪਭੇਦਂ ਨਾਨਪ੍ਪਕਾਰਂ ਅਨੇਸਨਂ. ਅਪ੍ਪਤਿਰੂਪਨ੍ਤਿ ਅਯੁਤ੍ਤਂ. ਅਲਦ੍ਧਾ ਚਾਤਿ ਅਲਭਿਤ੍ਵਾ. ਯਥਾ ਏਕਚ੍ਚੋ ‘‘ਕਥਂ ਨੁ ਖੋ ਚੀਵਰਂ ਲਭਿਸ੍ਸਾਮੀ’’ਤਿ. ਪੁਞ੍ਞਵਨ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਏਕਤੋ ਹੁਤ੍ਵਾ ਕੋਹਞ੍ਞਂ ਕਰੋਨ੍ਤੋ ਉਤ੍ਤਸਤਿ ਪਰਿਤਸਤਿ, ਸਨ੍ਤੁਟ੍ਠੋ ਭਿਕ੍ਖੁ ਏਵਂ ਅਲਦ੍ਧਾ ਚੀਵਰਂ ਨ ਪਰਿਤਸਤਿ. ਲਦ੍ਧਾ ਚਾਤਿ ਧਮ੍ਮੇਨ ਸਮੇਨ ਲਭਿਤ੍ਵਾ. ਅਗਧਿਤੋਤਿ ਵਿਗਤਲੋਭਗਿਦ੍ਧੋ. ਅਮੁਚ੍ਛਿਤੋਤਿ ਅਧਿਮਤ੍ਤਤਣ੍ਹਾਯ ਮੁਚ੍ਛਂ ਅਨਾਪਨ੍ਨੋ. ਅਨਜ੍ਝਾਪਨ੍ਨੋਤਿ ਤਣ੍ਹਾਯ ਅਨੋਤ੍ਥਤੋ ਅਪਰਿਯੋਨਦ੍ਧੋ. ਆਦੀਨਵਦਸ੍ਸਾਵੀਤਿ ਅਨੇਸਨਾਪਤ੍ਤਿਯਞ੍ਚ ਗੇਧਿਤਪਰਿਭੋਗੇ ਚ ਆਦੀਨਵਂ ਪਸ੍ਸਮਾਨੋ. ਨਿਸ੍ਸਰਣਪਞ੍ਞੋਤਿ ‘‘ਯਾਵਦੇਵ ਸੀਤਸ੍ਸ ਪਟਿਘਾਤਾਯਾ’’ਤਿ ਵੁਤ੍ਤਂ ਨਿਸ੍ਸਰਣਮੇਵ ਪਜਾਨਨ੍ਤੋ.

ਇਤਰੀਤਰਚੀਵਰਸਨ੍ਤੁਟ੍ਠਿਯਾਤਿ ਯੇਨ ਕੇਨਚਿ ਚੀਵਰੇਨ ਸਨ੍ਤੁਟ੍ਠਿਯਾ. ਨੇਵਤ੍ਤਾਨੁਕ੍ਕਂਸੇਤੀਤਿ ‘‘ਅਹਂ ਪਂਸੁਕੂਲਿਕੋ ਮਯਾ ਉਪਸਮ੍ਪਦਮਾਲ਼ੇਯੇਵ ਪਂਸੁਕੂਲਿਕਙ੍ਗਂ ਗਹਿਤਂ, ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਅਤ੍ਤੁਕ੍ਕਂਸਨਂ ਨ ਕਰੋਤਿ. ਨ ਪਰਂ ਵਮ੍ਭੇਤੀਤਿ ‘‘ਇਮੇ ਪਨਞ੍ਞੇ ਭਿਕ੍ਖੂ ਨ ਪਂਸੁਕੂਲਿਕਾ’’ਤਿ ਵਾ ‘‘ਪਂਸੁਕੂਲਿਕਙ੍ਗਮਤ੍ਤਮ੍ਪਿ ਏਤੇਸਂ ਨਤ੍ਥੀ’’ਤਿ ਵਾ ਏਵਂ ਪਰਂ ਨ ਵਮ੍ਭੇਤਿ. ਯੋ ਹਿ ਤਤ੍ਥ ਦਕ੍ਖੋਤਿ ਯੋ ਤਸ੍ਮਿਂ ਚੀਵਰਸਨ੍ਤੋਸੇ, ਵਣ੍ਣਵਾਦਾਦੀਸੁ ਵਾ ਦਕ੍ਖੋ ਛੇਕੋ ਬ੍ਯਤ੍ਤੋ. ਅਨਲਸੋਤਿ ਸਾਤਚ੍ਚਕਿਰਿਯਾਯ ਆਲਸਿਯਵਿਰਹਿਤੋ. ਸਮ੍ਪਜਾਨੋ ਪਟਿਸ੍ਸਤੋਤਿ ਸਮ੍ਪਜਾਨਪਞ੍ਞਾਯ ਚੇਵ ਸਤਿਯਾ ਚ ਯੁਤ੍ਤੋ. ਅਰਿਯਵਂਸੇ ਠਿਤੋਤਿ ਅਰਿਯਵਂਸੇ ਪਤਿਟ੍ਠਿਤੋ.

ਇਤਰੀਤਰੇਨ ਪਿਣ੍ਡਪਾਤੇਨਾਤਿ ਯੇਨ ਕੇਨਚਿ ਪਿਣ੍ਡਪਾਤੇਨ. ਏਤ੍ਥਾਪਿ ਪਿਣ੍ਡਪਾਤੋ ਜਾਨਿਤਬ੍ਬੋ. ਪਿਣ੍ਡਪਾਤਕ੍ਖੇਤ੍ਤਂ ਜਾਨਿਤਬ੍ਬਂ, ਪਿਣ੍ਡਪਾਤਸਨ੍ਤੋਸੋ ਜਾਨਿਤਬ੍ਬੋ, ਪਿਣ੍ਡਪਾਤਪਟਿਸਂਯੁਤ੍ਤਂ ਧੁਤਙ੍ਗਂ ਜਾਨਿਤਬ੍ਬਂ. ਤਤ੍ਥ ਪਿਣ੍ਡਪਾਤੋਤਿ ‘‘ਓਦਨੋ, ਕੁਮ੍ਮਾਸੋ, ਸਤ੍ਤੁ, ਮਚ੍ਛੋ, ਮਂਸਂ, ਖੀਰਂ, ਦਧਿ, ਸਪ੍ਪਿ, ਨਵਨੀਤਂ, ਤੇਲਂ, ਮਧੁ, ਫਾਣਿਤਂ, ਯਾਗੁ, ਖਾਦਨੀਯਂ, ਸਾਯਨੀਯਂ, ਲੇਹਨੀਯ’’ਨ੍ਤਿ ਸੋਲ਼ਸ ਪਿਣ੍ਡਪਾਤਾ.

ਪਿਣ੍ਡਪਾਤਕ੍ਖੇਤ੍ਤਨ੍ਤਿ ਸਙ੍ਘਭਤ੍ਤਂ, ਉਦ੍ਦੇਸਭਤ੍ਤਂ, ਨਿਮਨ੍ਤਨਂ, ਸਲਾਕਭਤ੍ਤਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਂ, ਆਗਨ੍ਤੁਕਭਤ੍ਤਂ, ਗਮਿਕਭਤ੍ਤਂ, ਗਿਲਾਨਭਤ੍ਤਂ, ਗਿਲਾਨੁਪਟ੍ਠਾਕਭਤ੍ਤਂ, ਧੁਰਭਤ੍ਤਂ, ਕੁਟਿਭਤ੍ਤਂ, ਵਾਰਭਤ੍ਤਂ, ਵਿਹਾਰਭਤ੍ਤਨ੍ਤਿ ਪਨ੍ਨਰਸ ਪਿਣ੍ਡਪਾਤਕ੍ਖੇਤ੍ਤਾਨਿ.

ਪਿਣ੍ਡਪਾਤਸਨ੍ਤੋਸੋਤਿ ਪਿਣ੍ਡਪਾਤੇ ਵਿਤਕ੍ਕਸਨ੍ਤੋਸੋ, ਗਮਨਸਨ੍ਤੋਸੋ, ਪਰਿਯੇਸਨਸਨ੍ਤੋਸੋ ਪਟਿਲਾਭਸਨ੍ਤੋਸੋ, ਪਟਿਗ੍ਗਹਣਸਨ੍ਤੋਸੋ, ਮਤ੍ਤਪ੍ਪਟਿਗ੍ਗਹਣਸਨ੍ਤੋਸੋ, ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ, ਯਥਾਲਾਭਸਨ੍ਤੋਸੋ, ਯਥਾਬਲਸਨ੍ਤੋਸੋ, ਯਥਾਸਾਰੁਪ੍ਪਸਨ੍ਤੋਸੋ, ਉਪਕਾਰਸਨ੍ਤੋਸੋ, ਪਰਿਮਾਣਸਨ੍ਤੋਸੋ, ਪਰਿਭੋਗਸਨ੍ਤੋਸੋ, ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ, ਵਿਸ੍ਸਜ੍ਜਨਸਨ੍ਤੋਸੋਤਿ ਪਨ੍ਨਰਸ ਸਨ੍ਤੋਸਾ.

ਤਤ੍ਥ ਸਾਦਕੋ ਭਿਕ੍ਖੁ ਮੁਖਂ ਧੋਵਿਤ੍ਵਾ ਵਿਤਕ੍ਕੇਤਿ. ਪਿਣ੍ਡਪਾਤਿਕੇਨ ਪਨ ਗਣੇਨ ਸਦ੍ਧਿਂ ਚਰਤਾ ਸਾਯਂ ਥੇਰੂਪਟ੍ਠਾਨਕਾਲੇ ‘‘ਸ੍ਵੇ ਕਤ੍ਥ ਪਿਣ੍ਡਾਯ ਚਰਿਸ੍ਸਾਮਾਤਿ ਅਸੁਕਗਾਮੇ, ਭਨ੍ਤੇ’’ਤਿ, ਏਤ੍ਤਕਂ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਨ ਵਿਤਕ੍ਕੇਤਬ੍ਬਂ. ਏਕਚਾਰਿਕੇਨ ਵਿਤਕ੍ਕਮਾਲ਼ਕੇ ਠਤ੍ਵਾ ਵਿਤਕ੍ਕੇਤਬ੍ਬਂ. ਤਤੋ ਪਰਂ ਵਿਤਕ੍ਕੇਨ੍ਤੋ ਅਰਿਯਵਂਸਾ ਚੁਤੋ ਹੋਤਿ ਪਰਿਬਾਹਿਰੋ. ਅਯਂ ਵਿਤਕ੍ਕਸਨ੍ਤੋਸੋ ਨਾਮ.

ਪਿਣ੍ਡਾਯ ਪਵਿਸਨ੍ਤੇਨ ‘‘ਕੁਹਿਂ ਲਭਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਕਮ੍ਮਟ੍ਠਾਨਸੀਸੇਨ ਗਨ੍ਤਬ੍ਬਂ. ਅਯਂ ਗਮਨਸਨ੍ਤੋਸੋ ਨਾਮ.

ਪਰਿਯੇਸਨ੍ਤੇਨ ਯਂ ਵਾ ਤਂ ਵਾ ਅਗਹੇਤ੍ਵਾ ਲਜ੍ਜਿਂ ਪੇਸਲਮੇਵ ਗਹੇਤ੍ਵਾ ਪਰਿਯੇਸਿਤਬ੍ਬਂ. ਅਯਂ ਪਰਿਯੇਸਨਸਨ੍ਤੋਸੋ ਨਾਮ.

ਦੂਰਤੋਵ ਆਹਰਿਯਮਾਨਂ ਦਿਸ੍ਵਾ ‘‘ਏਤਂ ਮਨਾਪਂ, ਏਤਂ ਅਮਨਾਪ’’ਨ੍ਤਿ ਚਿਤ੍ਤਂ ਨ ਉਪ੍ਪਾਦੇਤਬ੍ਬਂ. ਅਯਂ ਪਟਿਲਾਭਸਨ੍ਤੋਸੋ ਨਾਮ.

‘‘ਇਮਂ ਮਨਾਪਂ ਗਣ੍ਹਿਸ੍ਸਾਮਿ, ਇਮਂ ਅਮਨਾਪਂ ਨ ਗਣ੍ਹਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ਯਂਕਿਞ੍ਚਿ ਯਾਪਨਮਤ੍ਤਂ ਗਹੇਤਬ੍ਬਮੇਵ, ਅਯਂ ਪਟਿਗ੍ਗਹਣਸਨ੍ਤੋਸੋ ਨਾਮ.

ਏਤ੍ਥ ਪਨ ਦੇਯ੍ਯਧਮ੍ਮੋ ਬਹੁ, ਦਾਯਕੋ ਅਪ੍ਪਂ ਦਾਤੁਕਾਮੋ, ਅਪ੍ਪਂ ਗਹੇਤਬ੍ਬਂ. ਦੇਯ੍ਯਧਮ੍ਮੋ ਬਹੁ, ਦਾਯਕੋਪਿ ਬਹੁਂ ਦਾਤੁਕਾਮੋ, ਪਮਾਣੇਨੇਵ ਗਹੇਤਬ੍ਬਂ. ਦੇਯ੍ਯਧਮ੍ਮੋ ਨ ਬਹੁ, ਦਾਯਕੋਪਿ ਅਪ੍ਪਂ ਦਾਤੁਕਾਮੋ, ਅਪ੍ਪਂ ਗਹੇਤਬ੍ਬਂ. ਦੇਯ੍ਯਧਮ੍ਮੋ ਨ ਬਹੁ, ਦਾਯਕੋ ਪਨ ਬਹੁਂ ਦਾਤੁਕਾਮੋ, ਪਮਾਣੇਨ ਗਹੇਤਬ੍ਬਂ. ਪਟਿਗ੍ਗਹਣਸ੍ਮਿਞ੍ਹਿ ਮਤ੍ਤਂ ਅਜਾਨਨ੍ਤੋ ਮਨੁਸ੍ਸਾਨਂ ਪਸਾਦਂ ਮਕ੍ਖੇਤਿ, ਸਦ੍ਧਾਦੇਯ੍ਯਂ ਵਿਨਿਪਾਤੇਤਿ, ਸਾਸਨਂ ਨ ਕਰੋਤਿ, ਵਿਜਾਤਮਾਤੁਯਾਪਿ ਚਿਤ੍ਤਂ ਗਹੇਤੁਂ ਨ ਸਕ੍ਕੋਤਿ. ਇਤਿ ਮਤ੍ਤਂ ਜਾਨਿਤ੍ਵਾਵ ਪਟਿਗ੍ਗਹੇਤਬ੍ਬਨ੍ਤਿ ਅਯਂ ਮਤ੍ਤਪ੍ਪਟਿਗ੍ਗਹਣਸਨ੍ਤੋਸੋ ਨਾਮ.

ਸਦ੍ਧਕੁਲਾਨਿਯੇਵ ਅਗਨ੍ਤ੍ਵਾ ਦ੍ਵਾਰਪ੍ਪਟਿਪਾਟਿਯਾ ਗਨ੍ਤਬ੍ਬਂ. ਅਯਂ ਲੋਲੁਪ੍ਪਵਿਵਜ੍ਜਨਸਨ੍ਤੋਸੋ ਨਾਮ. ਯਥਾਲਾਭਸਨ੍ਤੋਸਾਦਯੋ ਚੀਵਰੇ ਵੁਤ੍ਤਨਯਾ ਏਵ.

ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਅਨੁਪਾਲੇਸ੍ਸਾਮੀਤਿ ਏਵਂ ਉਪਕਾਰਂ ਞਤ੍ਵਾ ਪਰਿਭੁਞ੍ਜਨਂ ਉਪਕਾਰਸਨ੍ਤੋਸੋ ਨਾਮ.

ਪਤ੍ਤਂ ਪੂਰੇਤ੍ਵਾ ਆਨੀਤਂ ਨ ਪਟਿਗ੍ਗਹੇਤਬ੍ਬਂ, ਅਨੁਪਸਮ੍ਪਨ੍ਨੇ ਸਤਿ ਤੇਨ ਗਾਹਾਪੇਤਬ੍ਬਂ, ਅਸਤਿ ਹਰਾਪੇਤ੍ਵਾ ਪਟਿਗ੍ਗਹਣਮਤ੍ਤਂ ਗਹੇਤਬ੍ਬਂ. ਅਯਂ ਪਰਿਮਾਣਸਨ੍ਤੋਸੋ ਨਾਮ.

‘‘ਜਿਘਚ੍ਛਾਯ ਪਟਿਵਿਨੋਦਨਂ ਇਦਮੇਤ੍ਥ ਨਿਸ੍ਸਰਣ’’ਨ੍ਤਿ ਏਵਂ ਪਰਿਭੁਞ੍ਜਨਂ ਪਰਿਭੋਗਸਨ੍ਤੋਸੋ ਨਾਮ.

ਨਿਦਹਿਤ੍ਵਾ ਨ ਪਰਿਭੁਞ੍ਜਿਤਬ੍ਬਨ੍ਤਿ ਅਯਂ ਸਨ੍ਨਿਧਿਪਰਿਵਜ੍ਜਨਸਨ੍ਤੋਸੋ ਨਾਮ.

ਮੁਖਂ ਅਨੋਲੋਕੇਤ੍ਵਾ ਸਾਰਣੀਯਧਮ੍ਮੇ ਠਿਤੇਨ ਵਿਸ੍ਸਜ੍ਜੇਤਬ੍ਬਂ. ਅਯਂ ਵਿਸ੍ਸਜ੍ਜਨਸਨ੍ਤੋਸੋ ਨਾਮ.

ਪਿਣ੍ਡਪਾਤਪਟਿਸਂਯੁਤ੍ਤਾਨਿ ਪਨ ਪਞ੍ਚ ਧੁਤਙ੍ਗਾਨਿ – ਪਿਣ੍ਡਪਾਤਿਕਙ੍ਗਂ, ਸਪਦਾਨਚਾਰਿਕਙ੍ਗਂ, ਏਕਾਸਨਿਕਙ੍ਗਂ, ਪਤ੍ਤਪਿਣ੍ਡਿਕਙ੍ਗਂ, ਖਲੁਪਚ੍ਛਾਭਤ੍ਤਿਕਙ੍ਗਨ੍ਤਿ. ਤੇਸਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗੇ ਵੁਤ੍ਤਾ. ਇਤਿ ਪਿਣ੍ਡਪਾਤਸਨ੍ਤੋਸਮਹਾਅਰਿਯਵਂਸਂ ਪੂਰਯਮਾਨੋ ਭਿਕ੍ਖੁ ਇਮਾਨਿ ਪਞ੍ਚ ਧੁਤਙ੍ਗਾਨਿ ਗੋਪੇਤਿ. ਇਮਾਨਿ ਗੋਪੇਨ੍ਤੋ ਪਿਣ੍ਡਪਾਤਸਨ੍ਤੋਸਮਹਾਅਰਿਯਵਂਸੇਨ ਸਨ੍ਤੁਟ੍ਠੋ ਹੋਤਿ. ‘‘ਵਣ੍ਣਵਾਦੀ’’ਤਿਆਦੀਨਿ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ.

ਸੇਨਾਸਨੇਨਾਤਿ ਇਧ ਸੇਨਾਸਨਂ ਜਾਨਿਤਬ੍ਬਂ, ਸੇਨਾਸਨਕ੍ਖੇਤ੍ਤਂ ਜਾਨਿਤਬ੍ਬਂ, ਸੇਨਾਸਨਸਨ੍ਤੋਸੋ ਜਾਨਿਤਬ੍ਬੋ, ਸੇਨਾਸਨਪਟਿਸਂਯੁਤ੍ਤਂ ਧੁਤਙ੍ਗਂ ਜਾਨਿਤਬ੍ਬਂ. ਤਤ੍ਥ ਸੇਨਾਸਨਨ੍ਤਿ ਮਞ੍ਚੋ, ਪੀਠਂ, ਭਿਸਿ, ਬਿਮ੍ਬੋਹਨਂ, ਵਿਹਾਰੋ, ਅਡ੍ਢਯੋਗੋ, ਪਾਸਾਦੋ, ਹਮ੍ਮਿਯਂ, ਗੁਹਾ, ਲੇਣਂ, ਅਟ੍ਟੋ, ਮਾਲ਼ੋ, ਵੇਲ਼ੁਗੁਮ੍ਬੋ, ਰੁਕ੍ਖਮੂਲਂ, ਯਤ੍ਥ ਵਾ ਪਨ ਭਿਕ੍ਖੂ ਪਟਿਕ੍ਕਮਨ੍ਤੀਤਿ ਇਮਾਨਿ ਪਨ੍ਨਰਸ ਸੇਨਾਸਨਾਨਿ.

ਸੇਨਾਸਨਕ੍ਖੇਤ੍ਤਨ੍ਤਿ ‘‘ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਅਤ੍ਤਨੋ ਵਾ ਧਨੇਨ ਪਂਸੁਕੂਲਂ ਵਾ’’ਤਿ ਛ ਖੇਤ੍ਤਾਨਿ.

ਸੇਨਾਸਨਸਨ੍ਤੋਸੋਤਿ ਸੇਨਾਸਨੇ ਵਿਤਕ੍ਕਸਨ੍ਤੋਸਾਦਯੋ ਪਨ੍ਨਰਸ ਸਨ੍ਤੋਸਾ. ਤੇ ਪਿਣ੍ਡਪਾਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਨਾਸਨਪਟਿਸਂਯੁਤ੍ਤਾਨਿ ਪਨ ਪਞ੍ਚ ਧੁਤਙ੍ਗਾਨਿ – ਆਰਞ੍ਞਿਕਙ੍ਗਂ, ਰੁਕ੍ਖਮੂਲਿਕਙ੍ਗਂ, ਅਬ੍ਭੋਕਾਸਿਕਙ੍ਗਂ, ਸੋਸਾਨਿਕਙ੍ਗਂ, ਯਥਾਸਨ੍ਤਤਿਕਙ੍ਗਨ੍ਤਿ. ਤੇਸਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗੇ ਵੁਤ੍ਤਾ. ਇਤਿ ਸੇਨਾਸਨਸਨ੍ਤੋਸਮਹਾਅਰਿਯਵਂਸਂ ਪੂਰਯਮਾਨੋ ਭਿਕ੍ਖੁ ਇਮਾਨਿ ਪਞ੍ਚ ਧੁਤਙ੍ਗਾਨਿ ਗੋਪੇਤਿ. ਇਮਾਨਿ ਗੋਪੇਨ੍ਤੋ ਸੇਨਾਸਨਸਨ੍ਤੋਸਮਹਾਅਰਿਯਵਂਸੇਨ ਸਨ੍ਤੁਟ੍ਠੋ ਹੋਤਿ.

ਗਿਲਾਨਪਚ੍ਚਯੋ ਪਨ ਪਿਣ੍ਡਪਾਤੇਯੇਵ ਪਵਿਟ੍ਠੋ. ਤਤ੍ਥ ਯਥਾਲਾਭਯਥਾਬਲਯਥਾਸਾਰੁਪ੍ਪਸਨ੍ਤੋਸੇਨੇਵ ਸਨ੍ਤੁਸ੍ਸਿਤਬ੍ਬਂ. ਨੇਸਜ੍ਜਿਕਙ੍ਗਂ ਭਾਵਨਾਰਾਮਅਰਿਯਵਂਸਂ ਭਜਤਿ. ਵੁਤ੍ਤਮ੍ਪਿ ਚੇਤਂ –

‘‘ਪਞ੍ਚ ਸੇਨਾਸਨੇ ਵੁਤ੍ਤਾ, ਪਞ੍ਚ ਆਹਾਰਨਿਸ੍ਸਿਤਾ;

ਏਕੋ ਵੀਰਿਯਸਂਯੁਤ੍ਤੋ, ਦ੍ਵੇ ਚ ਚੀਵਰਨਿਸ੍ਸਿਤਾ’’ਤਿ.

ਇਤਿ ਆਯਸ੍ਮਾ ਧਮ੍ਮਸੇਨਾਪਤਿ ਸਾਰਿਪੁਤ੍ਤਤ੍ਥੇਰੋ ਪਥਵਿਂ ਪਤ੍ਥਰਮਾਨੋ ਵਿਯ ਸਾਗਰਕੁਚ੍ਛਿਂ ਪੂਰਯਮਾਨੋ ਵਿਯ ਆਕਾਸਂ ਵਿਤ੍ਥਾਰਯਮਾਨੋ ਵਿਯ ਚ ਪਠਮਂ ਚੀਵਰਸਨ੍ਤੋਸਂ ਅਰਿਯਵਂਸਂ ਕਥੇਤ੍ਵਾ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਸੂਰਿਯਂ ਉਲ੍ਲਙ੍ਘੇਨ੍ਤੋ ਵਿਯ ਚ ਦੁਤਿਯਂ ਪਿਣ੍ਡਪਾਤਸਨ੍ਤੋਸਂ ਕਥੇਤ੍ਵਾ ਸਿਨੇਰੁਂ ਉਕ੍ਖਿਪੇਨ੍ਤੋ ਵਿਯ ਤਤਿਯਂ ਸੇਨਾਸਨਸਨ੍ਤੋਸਂ ਅਰਿਯਵਂਸਂ ਕਥੇਤ੍ਵਾ ਇਦਾਨਿ ਸਹਸ੍ਸਨਯਪ੍ਪਟਿਮਣ੍ਡਿਤਂ ਚਤੁਤ੍ਥਂ ਭਾਵਨਾਰਾਮਂ ਅਰਿਯਵਂਸਂ ਕਥੇਤੁਂ ਪੁਨ ਚਪਰਂ ਆਵੁਸੋ ਭਿਕ੍ਖੁ ਪਹਾਨਾਰਾਮੋ ਹੋਤੀਤਿ ਦੇਸਨਂ ਆਰਭਿ.

ਤਤ੍ਥ ਆਰਮਨਂ ਆਰਾਮੋ, ਅਭਿਰਤੀਤਿ ਅਤ੍ਥੋ. ਪਞ੍ਚਵਿਧੇ ਪਹਾਨੇ ਆਰਾਮੋ ਅਸ੍ਸਾਤਿ ਪਹਾਨਾਰਾਮੋ. ਕਾਮਚ੍ਛਨ੍ਦਂ ਪਜਹਨ੍ਤੋ ਰਮਤਿ, ਨੇਕ੍ਖਮ੍ਮਂ ਭਾਵੇਨ੍ਤੋ ਰਮਤਿ, ਬ੍ਯਾਪਾਦਂ ਪਜਹਨ੍ਤੋ ਰਮਤਿ…ਪੇ… ਸਬ੍ਬਕਿਲੇਸੇ ਪਜਹਨ੍ਤੋ ਰਮਤਿ, ਅਰਹਤ੍ਤਮਗ੍ਗਂ ਭਾਵੇਨ੍ਤੋ ਰਮਤੀਤਿ ਏਵਂ ਪਹਾਨੇ ਰਤੋਤਿ ਪਹਾਨਰਤੋ. ਵੁਤ੍ਤਨਯੇਨੇਵ ਭਾਵਨਾਯ ਆਰਾਮੋ ਅਸ੍ਸਾਤਿ ਭਾਵਨਾਰਾਮੋ. ਭਾਵਨਾਯ ਰਤੋਤਿ ਭਾਵਨਾਰਤੋ.

ਇਮੇਸੁ ਪਨ ਚਤੂਸੁ ਅਰਿਯਵਂਸੇਸੁ ਪੁਰਿਮੇਹਿ ਤੀਹਿ ਤੇਰਸਨ੍ਨਂ ਧੁਤਙ੍ਗਾਨਂ ਚਤੁਪਚ੍ਚਯਸਨ੍ਤੋਸਸ੍ਸ ਚ ਵਸੇਨ ਸਕਲਂ ਵਿਨਯਪਿਟਕਂ ਕਥਿਤਂ ਹੋਤਿ. ਭਾਵਨਾਰਾਮੇਨ ਅਵਸੇਸਂ ਪਿਟਕਦ੍ਵਯਂ. ਇਮਂ ਪਨ ਭਾਵਨਾਰਾਮਤਂ ਅਰਿਯਵਂਸਂ ਕਥੇਨ੍ਤੇਨ ਭਿਕ੍ਖੁਨਾ ਪਟਿਸਮ੍ਭਿਦਾਮਗ੍ਗੇ ਨੇਕ੍ਖਮ੍ਮਪਾਲ਼ਿਯਾ ਕਥੇਤਬ੍ਬੋ. ਦੀਘਨਿਕਾਯੇ ਦਸੁਤ੍ਤਰਸੁਤ੍ਤਨ੍ਤਪਰਿਯਾਯੇਨ ਕਥੇਤਬ੍ਬੋ. ਮਜ੍ਝਿਮਨਿਕਾਯੇ ਸਤਿਪਟ੍ਠਾਨਸੁਤ੍ਤਨ੍ਤਪਰਿਯਾਯੇਨ ਕਥੇਤਬ੍ਬੋ. ਅਭਿਧਮ੍ਮੇ ਨਿਦ੍ਦੇਸਪਰਿਯਾਯੇਨ ਕਥੇਤਬ੍ਬੋ.

ਤਤ੍ਥ ਪਟਿਸਮ੍ਭਿਦਾਮਗ੍ਗੇ ਨੇਕ੍ਖਮ੍ਮਪਾਲ਼ਿਯਾਤਿ ਸੋ ਨੇਕ੍ਖਮ੍ਮਂ ਭਾਵੇਨ੍ਤੋ ਰਮਤਿ, ਕਾਮਚ੍ਛਨ੍ਦਂ ਪਜਹਨ੍ਤੋ ਰਮਤਿ. ਅਬ੍ਯਾਪਾਦਂ ਬ੍ਯਾਪਾਦਂ. ਆਲੋਕਸਞ੍ਞਂ, ਥਿਨਮਿਦ੍ਧਂ. ਅਵਿਕ੍ਖੇਪਂ ਉਦ੍ਧਚ੍ਚਂ. ਧਮ੍ਮਵਵਤ੍ਥਾਨਂ, ਵਿਚਿਕਿਚ੍ਛਂ. ਞਾਣਂ, ਅਵਿਜ੍ਜਂ. ਪਾਮੋਜ੍ਜਂ, ਅਰਤਿਂ. ਪਠਮਂ ਝਾਨਂ, ਪਞ੍ਚ ਨੀਵਰਣੇ. ਦੁਤਿਯਂ ਝਾਨਂ, ਵਿਤਕ੍ਕਵਿਚਾਰੇ. ਤਤਿਯਂ ਝਾਨਂ, ਪੀਤਿਂ. ਚਤੁਤ੍ਥਂ ਝਾਨਂ, ਸੁਖਦੁਕ੍ਖੇ. ਆਕਾਸਾਨਞ੍ਚਾਯਤਨਸਮਾਪਤ੍ਤਿਂ ਭਾਵੇਨ੍ਤੋ ਰਮਤਿ, ਰੂਪਸਞ੍ਞਂ ਪਟਿਘਸਞ੍ਞਂ ਨਾਨਤ੍ਤਸਞ੍ਞਂ ਪਜਹਨ੍ਤੋ ਰਮਤਿ. ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਭਾਵੇਨ੍ਤੋ ਰਮਤਿ, ਆਕਿਞ੍ਚਞ੍ਞਾਯਤਨਸਞ੍ਞਂ ਪਜਹਨ੍ਤੋ ਰਮਤਿ.

ਅਨਿਚ੍ਚਾਨੁਪਸ੍ਸਨਂ ਭਾਵੇਨ੍ਤੋ ਰਮਤਿ, ਨਿਚ੍ਚਸਞ੍ਞਂ ਪਜਹਨ੍ਤੋ ਰਮਤਿ. ਦੁਕ੍ਖਾਨੁਪਸ੍ਸਨਂ, ਸੁਖਸਞ੍ਞਂ. ਅਨਤ੍ਤਾਨੁਪਸ੍ਸਨਂ, ਅਤ੍ਤਸਞ੍ਞਂ. ਨਿਬ੍ਬਿਦਾਨੁਪਸ੍ਸਨਂ, ਨਨ੍ਦਿਂ. ਵਿਰਾਗਾਨੁਪਸ੍ਸਨਂ, ਰਾਗਂ. ਨਿਰੋਧਾਨੁਪਸ੍ਸਨਂ, ਸਮੁਦਯਂ. ਪਟਿਨਿਸ੍ਸਗ੍ਗਾਨੁਪਸ੍ਸਨਂ, ਆਦਾਨਂ. ਖਯਾਨੁਪਸ੍ਸਨਂ, ਘਨਸਞ੍ਞਂ. ਵਯਾਨੁਪਸ੍ਸਨਂ, ਆਯੂਹਨਂ. ਵਿਪਰਿਣਾਮਾਨੁਪਸ੍ਸਨਂ, ਧੁਵਸਞ੍ਞਂ. ਅਨਿਮਿਤ੍ਤਾਨੁਪਸ੍ਸਨਂ, ਨਿਮਿਤ੍ਤਂ. ਅਪਣਿਹਿਤਾਨੁਪਸ੍ਸਨਂ, ਪਣਿਧਿਂ. ਸੁਞ੍ਞਤਾਨੁਪਸ੍ਸਨਂ ਅਭਿਨਿਵੇਸਂ. ਅਧਿਪਞ੍ਞਾਧਮ੍ਮਵਿਪਸ੍ਸਨਂ, ਸਾਰਾਦਾਨਾਭਿਨਿਵੇਸਂ. ਯਥਾਭੂਤਞਾਣਦਸ੍ਸਨਂ, ਸਮ੍ਮੋਹਾਭਿਨਿਵੇਸਂ. ਆਦੀਨਵਾਨੁਪਸ੍ਸਨਂ, ਆਲਯਾਭਿਨਿਵੇਸਂ. ਪਟਿਸਙ੍ਖਾਨੁਪਸ੍ਸਨਂ, ਅਪ੍ਪਟਿਸਙ੍ਖਂ. ਵਿਵਟ੍ਟਾਨੁਪਸ੍ਸਨਂ, ਸਂਯੋਗਾਭਿਨਿਵੇਸਂ. ਸੋਤਾਪਤ੍ਤਿਮਗ੍ਗਂ, ਦਿਟ੍ਠੇਕਟ੍ਠੇ ਕਿਲੇਸੇ. ਸਕਦਾਗਾਮਿਮਗ੍ਗਂ, ਓਲ਼ਾਰਿਕੇ ਕਿਲੇਸੇ. ਅਨਾਗਾਮਿਮਗ੍ਗਂ, ਅਣੁਸਹਗਤੇ ਕਿਲੇਸੇ. ਅਰਹਤ੍ਤਮਗ੍ਗਂ ਭਾਵੇਨ੍ਤੋ ਰਮਤਿ, ਸਬ੍ਬਕਿਲੇਸੇ ਪਜਹਨ੍ਤੋ ਰਮਤੀਤਿ ਏਵਂ ਪਟਿਸਮ੍ਭਿਦਾਮਗ੍ਗੇ ਨੇਕ੍ਖਮ੍ਮਪਾਲ਼ਿਯਾ ਕਥੇਤਬ੍ਬੋ.

ਦੀਘਨਿਕਾਯੇ ਦਸੁਤ੍ਤਰਸੁਤ੍ਤਨ੍ਤਪਰਿਯਾਯੇਨਾਤਿ ਏਕਂ ਧਮ੍ਮਂ ਭਾਵੇਨ੍ਤੋ ਰਮਤਿ, ਏਕਂ ਧਮ੍ਮਂ ਪਜਹਨ੍ਤੋ ਰਮਤਿ…ਪੇ… ਦਸ ਧਮ੍ਮੇ ਭਾਵੇਨ੍ਤੋ ਰਮਤਿ, ਦਸ ਧਮ੍ਮੇ ਪਜਹਨ੍ਤੋ ਰਮਤਿ. ਕਤਮਂ ਏਕਂ ਧਮ੍ਮਂ ਭਾਵੇਨ੍ਤੋ ਰਮਤਿ? ਕਾਯਗਤਾਸਤਿਂ ਸਾਤਸਹਗਤਂ. ਇਮਂ ਏਕਂ ਧਮ੍ਮਂ ਭਾਵੇਨ੍ਤੋ ਰਮਤਿ. ਕਤਮਂ ਏਕਂ ਧਮ੍ਮਂ ਪਜਹਨ੍ਤੋ ਰਮਤਿ? ਅਸ੍ਮਿਮਾਨਂ. ਇਮਂ ਏਕਂ ਧਮ੍ਮਂ ਪਜਹਨ੍ਤੋ ਰਮਤਿ. ਕਤਮੇ ਦ੍ਵੇ ਧਮ੍ਮੇ…ਪੇ… ਕਤਮੇ ਦਸ ਧਮ੍ਮੇ ਭਾਵੇਨ੍ਤੋ ਰਮਤਿ? ਦਸ ਕਸਿਣਾਯਤਨਾਨਿ. ਇਮੇ ਦਸ ਧਮ੍ਮੇ ਭਾਵੇਨ੍ਤੋ ਰਮਤਿ. ਕਤਮੇ ਦਸ ਧਮ੍ਮੇ ਪਜਹਨ੍ਤੋ ਰਮਤਿ? ਦਸ ਮਿਚ੍ਛਤ੍ਤੇ. ਇਮੇ ਦਸ ਧਮ੍ਮੇ ਪਜਹਨ੍ਤੋ ਰਮਤਿ. ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਭਾਵਨਾਰਾਮੋ ਹੋਤੀਤਿ ਏਵਂ ਦੀਘਨਿਕਾਯੇ ਦਸੁਤ੍ਤਰਸੁਤ੍ਤਨ੍ਤਪਰਿਯਾਯੇਨ ਕਥੇਤਬ੍ਬੋ.

ਮਜ੍ਝਿਮਨਿਕਾਯੇ ਸਤਿਪਟ੍ਠਾਨਸੁਤ੍ਤਨ੍ਤਪਰਿਯਾਯੇਨਾਤਿ ਏਕਾਯਨੋ, ਭਿਕ੍ਖਵੇ, ਮਗ੍ਗੋ ਸਤ੍ਤਾਨਂ ਵਿਸੁਦ੍ਧਿਯਾ, ਸੋਕਪਰਿਦੇਵਾਨਂ ਸਮਤਿਕ੍ਕਮਾਯ, ਦੁਕ੍ਖਦੋਮਨਸ੍ਸਾਨਂ ਅਤ੍ਥਙ੍ਗਮਾਯ, ਞਾਯਸ੍ਸ ਅਧਿਗਮਾਯ, ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯ ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ. ਕਤਮੇ ਚਤ੍ਤਾਰੋ? ਇਧ, ਭਿਕ੍ਖਵੇ, ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ… ਵੇਦਨਾਸੁ ਵੇਦਨਾਨੁਪਸ੍ਸੀ… ਚਿਤ੍ਤੇ ਚਿਤ੍ਤਾਨੁਪਸ੍ਸੀ… ਧਮ੍ਮੇਸੁ ਧਮ੍ਮਾਨੁਪਸ੍ਸੀ… ‘ਅਤ੍ਥਿ ਧਮ੍ਮਾ’ਤਿ ਵਾ ਪਨਸ੍ਸ ਸਤਿ ਪਚ੍ਚੁਪਟ੍ਠਿਤਾ ਹੋਤਿ ਯਾਵਦੇਵ ਞਾਣਮਤ੍ਤਾਯ ਪਟਿਸ੍ਸਤਿਮਤ੍ਤਾਯ ਅਨਿਸ੍ਸਿਤੋ ਚ ਵਿਹਰਤਿ ਨ ਚ ਕਿਞ੍ਚਿ ਲੋਕੇ ਉਪਾਦਿਯਤਿ. ਏਵਮ੍ਪਿ, ਭਿਕ੍ਖਵੇ, ਭਿਕ੍ਖੁ ਭਾਵਨਾਰਾਮੋ ਹੋਤਿ ਭਾਵਨਾਰਤੋ, ਪਹਾਨਾਰਾਮੋ ਹੋਤਿ ਪਹਾਨਰਤੋ. ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਗਚ੍ਛਨ੍ਤੋ ਵਾ ਗਚ੍ਛਾਮੀਤਿ ਪਜਾਨਾਤਿ…ਪੇ… ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਸੇਯ੍ਯਥਾਪਿ ਪਸ੍ਸੇਯ੍ਯ ਸਰੀਰਂ ਸਿਵਥਿਕਾਯ ਛਡ੍ਡਿਤਂ…ਪੇ… ਪੂਤੀਨਿ ਚੁਣ੍ਣਕਜਾਤਾਨਿ. ਸੋ ਇਮਮੇਵ ਕਾਯਂ ਉਪਸਂਹਰਤਿ, ਅਯਮ੍ਪਿ ਖੋ ਕਾਯੋ ਏਵਂਧਮ੍ਮੋ ਏਵਂਭਾਵੀ ਏਵਂਅਨਤੀਤੋਤਿ. ਇਤਿ ਅਜ੍ਝਤ੍ਤਂ ਵਾ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ…ਪੇ… ਏਵਮ੍ਪਿ ਖੋ, ਭਿਕ੍ਖਵੇ, ਭਿਕ੍ਖੁ ਭਾਵਨਾਰਾਮੋ ਹੋਤੀਤਿ ਏਵਂ ਮਜ੍ਝਿਮਨਿਕਾਯੇ ਸਤਿਪਟ੍ਠਾਨਸੁਤ੍ਤਨ੍ਤਪਰਿਯਾਯੇਨ ਕਥੇਤਬ੍ਬੋ.

ਅਭਿਧਮ੍ਮੇ ਨਿਦ੍ਦੇਸਪਰਿਯਾਯੇਨਾਤਿ ਸਬ੍ਬੇਪਿ ਸਙ੍ਖਤੇ ਅਨਿਚ੍ਚਤੋ ਦੁਕ੍ਖਤੋ ਰੋਗਤੋ ਗਣ੍ਡਤੋ…ਪੇ… ਸਂਕਿਲੇਸਿਕਧਮ੍ਮਤੋ ਪਸ੍ਸਨ੍ਤੋ ਰਮਤਿ. ਅਯਂ, ਭਿਕ੍ਖਵੇ, ਭਿਕ੍ਖੁ ਭਾਵਨਾਰਾਮੋ ਹੋਤੀਤਿ ਏਵਂ ਨਿਦ੍ਦੇਸਪਰਿਯਾਯੇਨ ਕਥੇਤਬ੍ਬੋ.

ਨੇਵ ਅਤ੍ਤਾਨੁਕ੍ਕਂਸੇਤੀਤਿ ਅਜ੍ਜ ਮੇ ਸਟ੍ਠਿ ਵਾ ਸਤ੍ਤਤਿ ਵਾ ਵਸ੍ਸਾਨਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤਸ੍ਸ, ਕੋ ਮਯਾ ਸਦਿਸੋ ਅਤ੍ਥੀਤਿ ਏਵਂ ਅਤ੍ਤੁਕ੍ਕਂਸਨਂ ਨ ਕਰੋਤਿ. ਨ ਪਰਂ ਵਮ੍ਭੇਤੀਤਿ ਅਨਿਚ੍ਚਂ ਦੁਕ੍ਖਨ੍ਤਿ ਵਿਪਸ੍ਸਨਾਮਤ੍ਤਕਮ੍ਪਿ ਨਤ੍ਥਿ, ਕਿਂ ਇਮੇ ਵਿਸ੍ਸਟ੍ਠਕਮ੍ਮਟ੍ਠਾਨਾ ਚਰਨ੍ਤੀਤਿ ਏਵਂ ਪਰਂ ਵਮ੍ਭਨਂ ਨ ਕਰੋਤਿ. ਸੇਸਂ ਵੁਤ੍ਤਨਯਮੇਵ.

੩੧੦. ਪਧਾਨਾਨੀਤਿ ਉਤ੍ਤਮਵੀਰਿਯਾਨਿ. ਸਂਵਰਪਧਾਨਨ੍ਤਿ ਚਕ੍ਖਾਦੀਨਿ ਸਂਵਰਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਪਹਾਨਪਧਾਨਨ੍ਤਿ ਕਾਮਵਿਤਕ੍ਕਾਦਯੋ ਪਜਹਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਭਾਵਨਾਪਧਾਨਨ੍ਤਿ ਬੋਜ੍ਝਙ੍ਗੇ ਭਾਵੇਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਅਨੁਰਕ੍ਖਣਾਪਧਾਨਨ੍ਤਿ ਸਮਾਧਿਨਿਮਿਤ੍ਤਂ ਅਨੁਰਕ੍ਖਨ੍ਤਸ੍ਸ ਉਪ੍ਪਨ੍ਨਵੀਰਿਯਂ.

ਵਿਵੇਕਨਿਸ੍ਸਿਤਨ੍ਤਿਆਦੀਸੁ ਵਿਵੇਕੋ ਵਿਰਾਗੋ ਨਿਰੋਧੋਤਿ ਤੀਣਿਪਿ ਨਿਬ੍ਬਾਨਸ੍ਸ ਨਾਮਾਨਿ. ਨਿਬ੍ਬਾਨਞ੍ਹਿ ਉਪਧਿਵਿਵੇਕਤ੍ਤਾ ਵਿਵੇਕੋ. ਤਂ ਆਗਮ੍ਮ ਰਾਗਾਦਯੋ ਵਿਰਜ੍ਜਨ੍ਤੀਤਿ ਵਿਰਾਗੋ. ਨਿਰੁਜ੍ਝਨ੍ਤੀਤਿ ਨਿਰੋਧੋ. ਤਸ੍ਮਾ ‘‘ਵਿਵੇਕਨਿਸ੍ਸਿਤ’’ਨ੍ਤਿਆਦੀਸੁ ਆਰਮ੍ਮਣਵਸੇਨ ਅਧਿਗਨ੍ਤਬ੍ਬਵਸੇਨ ਵਾ ਨਿਬ੍ਬਾਨਨਿਸ੍ਸਿਤਨ੍ਤਿ ਅਤ੍ਥੋ. ਵੋਸ੍ਸਗ੍ਗਪਰਿਣਾਮਿਨ੍ਤਿ ਏਤ੍ਥ ਦ੍ਵੇ ਵੋਸ੍ਸਗ੍ਗਾ ਪਰਿਚ੍ਚਾਗਵੋਸ੍ਸਗ੍ਗੋ ਚ ਪਕ੍ਖਨ੍ਦਨਵੋਸ੍ਸਗ੍ਗੋ ਚ. ਤਤ੍ਥ ਵਿਪਸ੍ਸਨਾ ਤਦਙ੍ਗਵਸੇਨ ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ ਪਰਿਚ੍ਚਾਗਵੋਸ੍ਸਗ੍ਗੋ. ਮਗ੍ਗੋ ਆਰਮ੍ਮਣਵਸੇਨ ਨਿਬ੍ਬਾਨਂ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨਵੋਸ੍ਸਗ੍ਗੋ. ਤਸ੍ਮਾ ਵੋਸ੍ਸਗ੍ਗਪਰਿਣਾਮਿਨ੍ਤਿ ਯਥਾ ਭਾਵਿਯਮਾਨੋ ਸਤਿਸਮ੍ਬੋਜ੍ਝਙ੍ਗੋ ਵੋਸ੍ਸਗ੍ਗਤ੍ਥਾਯ ਪਰਿਣਮਤਿ, ਵਿਪਸ੍ਸਨਾਭਾਵਞ੍ਚ ਮਗ੍ਗਭਾਵਞ੍ਚ ਪਾਪੁਣਾਤਿ, ਏਵਂ ਭਾਵੇਤੀਤਿ ਅਯਮੇਤ੍ਥ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.

ਭਦ੍ਰਕਨ੍ਤਿ ਭਦ੍ਦਕਂ. ਸਮਾਧਿਨਿਮਿਤ੍ਤਂ ਵੁਚ੍ਚਤਿ ਅਟ੍ਠਿਕਸਞ੍ਞਾਦਿਵਸੇਨ ਅਧਿਗਤੋ ਸਮਾਧਿਯੇਵ. ਅਨੁਰਕ੍ਖਤੀਤਿ ਸਮਾਧਿਪਰਿਬਨ੍ਧਕਧਮ੍ਮੇ ਰਾਗਦੋਸਮੋਹੇ ਸੋਧੇਨ੍ਤੋ ਰਕ੍ਖਤਿ. ਏਤ੍ਥ ਚ ਅਟ੍ਠਿਕਸਞ੍ਞਾਦਿਕਾ ਪਞ੍ਚੇਵ ਸਞ੍ਞਾ ਵੁਤ੍ਤਾ. ਇਮਸ੍ਮਿਂ ਪਨ ਠਾਨੇ ਦਸਪਿ ਅਸੁਭਾਨਿ ਵਿਤ੍ਥਾਰੇਤ੍ਵਾ ਕਥੇਤਬ੍ਬਾਨਿ. ਤੇਸਂ ਵਿਤ੍ਥਾਰੋ ਵਿਸੁਦ੍ਧਿਮਗ੍ਗੇ ਵੁਤ੍ਤੋਯੇਵ.

ਧਮ੍ਮੇ ਞਾਣਨ੍ਤਿ ਏਕਪਟਿਵੇਧਵਸੇਨ ਚਤੁਸਚ੍ਚਧਮ੍ਮੇ ਞਾਣਂ ਚਤੁਸਚ੍ਚਬ੍ਭਨ੍ਤਰੇ ਨਿਰੋਧਸਚ੍ਚੇ ਧਮ੍ਮੇ ਞਾਣਞ੍ਚ. ਯਥਾਹ – ‘‘ਤਤ੍ਥ ਕਤਮਂ ਧਮ੍ਮੇ ਞਾਣਂ? ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਞਾਣ’’ਨ੍ਤਿ (ਵਿਭ. ੭੯੬). ਅਨ੍ਵਯੇ ਞਾਣਨ੍ਤਿ ਚਤ੍ਤਾਰਿ ਸਚ੍ਚਾਨਿ ਪਚ੍ਚਕ੍ਖਤੋ ਦਿਸ੍ਵਾ ਯਥਾ ਇਦਾਨਿ, ਏਵਂ ਅਤੀਤੇਪਿ ਅਨਾਗਤੇਪਿ ਇਮੇਵ ਪਞ੍ਚਕ੍ਖਨ੍ਧਾ ਦੁਕ੍ਖਸਚ੍ਚਂ, ਅਯਮੇਵ ਤਣ੍ਹਾ ਸਮੁਦਯਸਚ੍ਚਂ, ਅਯਮੇਵ ਨਿਰੋਧੋ ਨਿਰੋਧਸਚ੍ਚਂ, ਅਯਮੇਵ ਮਗ੍ਗੋ ਮਗ੍ਗਸਚ੍ਚਨ੍ਤਿ ਏਵਂ ਤਸ੍ਸ ਞਾਣਸ੍ਸ ਅਨੁਗਤਿਯਂ ਞਾਣਂ. ਤੇਨਾਹ – ‘‘ਸੋ ਇਮਿਨਾ ਧਮ੍ਮੇਨ ਞਾਤੇਨ ਦਿਟ੍ਠੇਨ ਪਤ੍ਤੇਨ ਵਿਦਿਤੇਨ ਪਰਿਯੋਗਾਲ਼੍ਹੇਨ ਅਤੀਤਾਨਾਗਤੇਨ ਨਯਂ ਨੇਤੀ’’ਤਿ. ਪਰਿਯੇ ਞਾਣਨ੍ਤਿ ਪਰੇਸਂ ਚਿਤ੍ਤਪਰਿਚ੍ਛੇਦੇ ਞਾਣਂ. ਯਥਾਹ – ‘‘ਤਤ੍ਥ ਕਤਮਂ ਪਰਿਯੇ ਞਾਣਂ? ਇਧ ਭਿਕ੍ਖੁ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਚੇਤਸਾ ਚੇਤੋ ਪਰਿਚ੍ਚ ਜਾਨਾਤੀ’’ਤਿ (ਵਿਭ. ੭੯੬) ਵਿਤ੍ਥਾਰੇਤਬ੍ਬਂ. ਠਪੇਤ੍ਵਾ ਪਨ ਇਮਾਨਿ ਤੀਣਿ ਞਾਣਾਨਿ ਅਵਸੇਸਂ ਸਮ੍ਮੁਤਿਞਾਣਂ ਨਾਮ. ਯਥਾਹ – ‘‘ਤਤ੍ਥ ਕਤਮਂ ਸਮ੍ਮੁਤਿਞਾਣਂ? ਠਪੇਤ੍ਵਾ ਧਮ੍ਮੇ ਞਾਣਂ ਠਪੇਤ੍ਵਾ ਅਨ੍ਵਯੇ ਞਾਣਂ ਠਪੇਤ੍ਵਾ ਪਰਿਚ੍ਛੇਦੇ ਞਾਣਂ ਅਵਸੇਸਂ ਸਮ੍ਮੁਤਿਞਾਣ’’ਨ੍ਤਿ (ਵਿਭ. ੭੯੬).

ਦੁਕ੍ਖੇ ਞਾਣਾਦੀਹਿ ਅਰਹਤ੍ਤਂ ਪਾਪੇਤ੍ਵਾ ਏਕਸ੍ਸ ਭਿਕ੍ਖੁਨੋ ਨਿਗ੍ਗਮਨਂ ਚਤੁਸਚ੍ਚਕਮ੍ਮਟ੍ਠਾਨਂ ਕਥਿਤਂ. ਤਤ੍ਥ ਦ੍ਵੇ ਸਚ੍ਚਾਨਿ ਵਟ੍ਟਂ, ਦ੍ਵੇ ਵਿਵਟ੍ਟਂ, ਵਟ੍ਟੇ ਅਭਿਨਿਵੇਸੋ ਹੋਤਿ, ਨੋ ਵਿਵਟ੍ਟੇ. ਦ੍ਵੀਸੁ ਸਚ੍ਚੇਸੁ ਆਚਰਿਯਸਨ੍ਤਿਕੇ ਪਰਿਯਤ੍ਤਿਂ ਉਗ੍ਗਹੇਤ੍ਵਾ ਕਮ੍ਮਂ ਕਰੋਤਿ, ਦ੍ਵੀਸੁ ਸਚ੍ਚੇਸੁ ‘‘ਨਿਰੋਧਸਚ੍ਚਂ ਨਾਮ ਇਟ੍ਠਂ ਕਨ੍ਤਂ ਮਨਾਪਂ, ਮਗ੍ਗਸਚ੍ਚਂ ਨਾਮ ਇਟ੍ਠਂ ਕਨ੍ਤਂ ਮਨਾਪ’’ਨ੍ਤਿ ਸਵਨਵਸੇਨ ਕਮ੍ਮਂ ਕਰੋਤਿ. ਦ੍ਵੀਸੁ ਸਚ੍ਚੇਸੁ ਉਗ੍ਗਹਪਰਿਪੁਚ੍ਛਾਸਵਨਧਾਰਣਸਮ੍ਮਸਨਪਟਿਵੇਧੋ ਵਟ੍ਟਤਿ, ਦ੍ਵੀਸੁ ਸਵਨਪਟਿਵੇਧੋ ਵਟ੍ਟਤਿ. ਤੀਣਿ ਕਿਚ੍ਚਵਸੇਨ ਪਟਿਵਿਜ੍ਝਤਿ, ਏਕਂ ਆਰਮ੍ਮਣਵਸੇਨ. ਦ੍ਵੇ ਸਚ੍ਚਾਨਿ ਦੁਦ੍ਦਸਤ੍ਤਾ ਗਮ੍ਭੀਰਾਨਿ, ਦ੍ਵੇ ਗਮ੍ਭੀਰਤ੍ਤਾ ਦੁਦ੍ਦਸਾਨਿ.

ਸੋਤਾਪਤ੍ਤਿਯਙ੍ਗਾਦਿਚਤੁਕ੍ਕਵਣ੍ਣਨਾ

੩੧੧. ਸੋਤਾਪਤ੍ਤਿਯਙ੍ਗਾਨੀਤਿ ਸੋਤਾਪਤ੍ਤਿਯਾ ਅਙ੍ਗਾਨਿ, ਸੋਤਾਪਤ੍ਤਿਮਗ੍ਗਸ੍ਸ ਪਟਿਲਾਭਕਾਰਣਾਨੀਤਿ ਅਤ੍ਥੋ. ਸਪ੍ਪੁਰਿਸਸਂਸੇਵੋਤਿ ਬੁਦ੍ਧਾਦੀਨਂ ਸਪ੍ਪੁਰਿਸਾਨਂ ਉਪਸਙ੍ਕਮਿਤ੍ਵਾ ਸੇਵਨਂ. ਸਦ੍ਧਮ੍ਮਸ੍ਸਵਨਨ੍ਤਿ ਸਪ੍ਪਾਯਸ੍ਸ ਤੇਪਿਟਕਧਮ੍ਮਸ੍ਸ ਸਵਨਂ. ਯੋਨਿਸੋਮਨਸਿਕਾਰੋਤਿ ਅਨਿਚ੍ਚਾਦਿਵਸੇਨ ਮਨਸਿਕਾਰੋ. ਧਮ੍ਮਾਨੁਧਮ੍ਮਪ੍ਪਟਿਪਤ੍ਤੀਤਿ ਲੋਕੁਤ੍ਤਰਧਮ੍ਮਸ੍ਸ ਅਨੁਧਮ੍ਮਭੂਤਾਯ ਪੁਬ੍ਬਭਾਗਪਟਿਪਤ੍ਤਿਯਾ ਪਟਿਪਜ੍ਜਨਂ.

ਅਵੇਚ੍ਚਪ੍ਪਸਾਦੇਨਾਤਿ ਅਚਲਪ੍ਪਸਾਦੇਨ. ‘‘ਇਤਿਪਿ ਸੋ ਭਗਵਾ’’ਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਨਿ. ਫਲਧਾਤੁਆਹਾਰਚਤੁਕ੍ਕਾਨਿ ਉਤ੍ਤਾਨਤ੍ਥਾਨੇਵ. ਅਪਿਚੇਤ੍ਥ ਲੂਖਪਣੀਤਵਤ੍ਥੁਵਸੇਨ ਓਲ਼ਾਰਿਕਸੁਖੁਮਤਾ ਵੇਦਿਤਬ੍ਬਾ.

ਵਿਞ੍ਞਾਣਟ੍ਠਿਤਿਯੋਤਿ ਵਿਞ੍ਞਾਣਂ ਏਤਾਸੁ ਤਿਟ੍ਠਤੀਤਿ ਵਿਞ੍ਞਾਣਟ੍ਠਿਤਿਯੋ. ਆਰਮ੍ਮਣਟ੍ਠਿਤਿਵਸੇਨੇਤਂ ਵੁਤ੍ਤਂ. ਰੂਪੂਪਾਯਨ੍ਤਿ ਰੂਪਂ ਉਪਗਤਂ ਹੁਤ੍ਵਾ. ਪਞ੍ਚਵੋਕਾਰਭਵਸ੍ਮਿਞ੍ਹਿ ਅਭਿਸਙ੍ਖਾਰਵਿਞ੍ਞਾਣਂ ਰੂਪਕ੍ਖਨ੍ਧਂ ਨਿਸ੍ਸਾਯ ਤਿਟ੍ਠਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਰੂਪਾਰਮ੍ਮਣਨ੍ਤਿ ਰੂਪਕ੍ਖਨ੍ਧਗੋਚਰਂ ਰੂਪਪਤਿਟ੍ਠਿਤਂ ਹੁਤ੍ਵਾ. ਨਨ੍ਦੂਪਸੇਚਨਨ੍ਤਿ ਲੋਭਸਹਗਤਂ ਸਮ੍ਪਯੁਤ੍ਤਨਨ੍ਦਿਯਾਵ ਉਪਸਿਤ੍ਤਂ ਹੁਤ੍ਵਾ. ਇਤਰਂ ਉਪਨਿਸ੍ਸਯਕੋਟਿਯਾ. ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਤੀਤਿ ਸਟ੍ਠਿਪਿ ਸਤ੍ਤਤਿਪਿ ਵਸ੍ਸਾਨਿ ਏਵਂ ਪਵਤ੍ਤਮਾਨਂ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਤਿ. ਵੇਦਨੂਪਾਯਾਦੀਸੁਪਿ ਏਸੇਵ ਨਯੋ. ਇਮੇਹਿ ਪਨ ਤੀਹਿ ਪਦੇਹਿ ਚਤੁਵੋਕਾਰਭਵੇ ਅਭਿਸਙ੍ਖਾਰਵਿਞ੍ਞਾਣਂ ਵੁਤ੍ਤਂ. ਤਸ੍ਸ ਯਾਵਤਾਯੁਕਂ ਪਵਤ੍ਤਨਵਸੇਨ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਨਾ ਵੇਦਿਤਬ੍ਬਾ. ਚਤੁਕ੍ਕਵਸੇਨ ਪਨ ਦੇਸਨਾਯ ਆਗਤਤ੍ਤਾ ਵਿਞ੍ਞਾਣੂਪਾਯਨ੍ਤਿ ਨ ਵੁਤ੍ਤਂ. ਏਵਂ ਵੁਚ੍ਚਮਾਨੇ ਚ ‘‘ਕਤਮਂ ਨੁ ਖੋ ਏਤ੍ਥ ਕਮ੍ਮਵਿਞ੍ਞਾਣਂ, ਕਤਮਂ ਵਿਪਾਕਵਿਞ੍ਞਾਣ’’ਨ੍ਤਿ ਸਮ੍ਮੋਹੋ ਭਵੇਯ੍ਯ, ਤਸ੍ਮਾਪਿ ਨ ਵੁਤ੍ਤਂ. ਅਗਤਿਗਮਨਾਨਿ ਵਿਤ੍ਥਾਰਿਤਾਨੇਵ.

ਚੀਵਰਹੇਤੂਤਿ ਤਤ੍ਥ ਮਨਾਪਂ ਚੀਵਰਂ ਲਭਿਸ੍ਸਾਮੀਤਿ ਚੀਵਰਕਾਰਣਾ ਉਪ੍ਪਜ੍ਜਤਿ. ਇਤਿ ਭਵਾਭਵਹੇਤੂਤਿ ਏਤ੍ਥ ਇਤੀਤਿ ਨਿਦਸ੍ਸਨਤ੍ਥੇ ਨਿਪਾਤੋ. ਯਥਾ ਚੀਵਰਾਦਿਹੇਤੁ, ਏਵਂ ਭਵਾਭਵਹੇਤੂਪੀਤਿ ਅਤ੍ਥੋ. ਭਵਾਭਵੋਤਿ ਚੇਤ੍ਥ ਪਣੀਤਪਣੀਤਤਰਾਨਿ ਤੇਲਮਧੁਫਾਣਿਤਾਦੀਨਿ ਅਧਿਪ੍ਪੇਤਾਨਿ. ਇਮੇਸਂ ਪਨ ਚਤੁਨ੍ਨਂ ਤਣ੍ਹੁਪ੍ਪਾਦਾਨਂ ਪਹਾਨਤ੍ਥਾਯ ਪਟਿਪਾਟਿਯਾਵ ਚਤ੍ਤਾਰੋ ਅਰਿਯਵਂਸਾ ਦੇਸਿਤਾਤਿ ਵੇਦਿਤਬ੍ਬਾ. ਪਟਿਪਦਾਚਤੁਕ੍ਕਂ ਹੇਟ੍ਠਾ ਵੁਤ੍ਤਮੇਵ. ਅਕ੍ਖਮਾਦੀਸੁ ਪਧਾਨਕਰਣਕਾਲੇ ਸੀਤਾਦੀਨਿ ਨ ਖਮਤੀਤਿ ਅਕ੍ਖਮਾ. ਖਮਤੀਤਿ ਖਮਾ. ਇਨ੍ਦ੍ਰਿਯਦਮਨਂ ਦਮਾ. ‘‘ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤੀ’’ਤਿਆਦਿਨਾ ਨਯੇਨ ਵਿਤਕ੍ਕਸਮਨਂ ਸਮਾ.

ਧਮ੍ਮਪਦਾਨੀਤਿ ਧਮ੍ਮਕੋਟ੍ਠਾਸਾਨਿ. ਅਨਭਿਜ੍ਝਾ ਧਮ੍ਮਪਦਂ ਨਾਮ ਅਲੋਭੋ ਵਾ ਅਲੋਭਸੀਸੇਨ ਅਧਿਗਤਜ੍ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨਾਨਿ ਵਾ. ਅਬ੍ਯਾਪਾਦੋ ਧਮ੍ਮਪਦਂ ਨਾਮ ਅਕੋਪੋ ਵਾ ਮੇਤ੍ਤਾਸੀਸੇਨ ਅਧਿਗਤਜ੍ਝਾਨਾਦੀਨਿ ਵਾ. ਸਮ੍ਮਾਸਤਿ ਧਮ੍ਮਪਦਂ ਨਾਮ ਸੁਪ੍ਪਟ੍ਠਿਤਸਤਿ ਵਾ ਸਤਿਸੀਸੇਨ ਅਧਿਗਤਜ੍ਝਾਨਾਦੀਨਿ ਵਾ. ਸਮ੍ਮਾਸਮਾਧਿ ਧਮ੍ਮਪਦਂ ਨਾਮ ਸਮਾਪਤ੍ਤਿ ਵਾ ਅਟ੍ਠਸਮਾਪਤ੍ਤਿਵਸੇਨ ਅਧਿਗਤਜ੍ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨਾਨਿ ਵਾ. ਦਸਾਸੁਭਵਸੇਨ ਵਾ ਅਧਿਗਤਜ੍ਝਾਨਾਦੀਨਿ ਅਨਭਿਜ੍ਝਾ ਧਮ੍ਮਪਦਂ. ਚਤੁਬ੍ਰਹ੍ਮਵਿਹਾਰਵਸੇਨ ਅਧਿਗਤਾਨਿ ਅਬ੍ਯਾਪਾਦੋ ਧਮ੍ਮਪਦਂ. ਦਸਾਨੁਸ੍ਸਤਿਆਹਾਰੇਪਟਿਕੂਲਸਞ੍ਞਾਵਸੇਨ ਅਧਿਗਤਾਨਿ ਸਮ੍ਮਾਸਤਿ ਧਮ੍ਮਪਦਂ. ਦਸਕਸਿਣਆਨਾਪਾਨਵਸੇਨ ਅਧਿਗਤਾਨਿ ਸਮ੍ਮਾਸਮਾਧਿ ਧਮ੍ਮਪਦਨ੍ਤਿ.

ਧਮ੍ਮਸਮਾਦਾਨੇਸੁ ਪਠਮਂ ਅਚੇਲਕਪਟਿਪਦਾ. ਦੁਤਿਯਂ ਤਿਬ੍ਬਕਿਲੇਸਸ੍ਸ ਅਰਹਤ੍ਤਂ ਗਹੇਤੁਂ ਅਸਕ੍ਕੋਨ੍ਤਸ੍ਸ ਅਸ੍ਸੁਮੁਖਸ੍ਸਾਪਿ ਰੁਦਤੋ ਪਰਿਸੁਦ੍ਧਬ੍ਰਹ੍ਮਚਰਿਯਚਰਣਂ. ਤਤਿਯਂ ਕਾਮੇਸੁ ਪਾਤਬ੍ਯਤਾ. ਚਤੁਤ੍ਥਂ ਚਤ੍ਤਾਰੋ ਪਚ੍ਚਯੇ ਅਲਭਮਾਨਸ੍ਸਾਪਿ ਝਾਨਵਿਪਸ੍ਸਨਾਵਸੇਨ ਸੁਖਸਮਙ੍ਗਿਨੋ ਸਾਸਨਬ੍ਰਹ੍ਮਚਰਿਯਂ.

ਧਮ੍ਮਕ੍ਖਨ੍ਧਾਤਿ ਏਤ੍ਥ ਗੁਣਟ੍ਠੋ ਖਨ੍ਧਟ੍ਠੋ. ਸੀਲਕ੍ਖਨ੍ਧੋਤਿ ਸੀਲਗੁਣੋ. ਏਤ੍ਥ ਚ ਫਲਸੀਲਂ ਅਧਿਪ੍ਪੇਤਂ. ਸੇਸਪਦੇਸੁਪਿ ਏਸੇਵ ਨਯੋ. ਇਤਿ ਚਤੂਸੁਪਿ ਠਾਨੇਸੁ ਫਲਮੇਵ ਵੁਤ੍ਤਂ.

ਬਲਾਨੀਤਿ ਉਪਤ੍ਥਮ੍ਭਨਟ੍ਠੇਨ ਅਕਮ੍ਪਿਯਟ੍ਠੇਨ ਚ ਬਲਾਨਿ. ਤੇਸਂ ਪਟਿਪਕ੍ਖੇਹਿ ਕੋਸਜ੍ਜਾਦੀਹਿ ਅਕਮ੍ਪਨਿਯਤਾ ਵੇਦਿਤਬ੍ਬਾ. ਸਬ੍ਬਾਨਿਪਿ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਾਨੇਵ ਕਥਿਤਾਨਿ.

ਅਧਿਟ੍ਠਾਨਾਨੀਤਿ ਏਤ੍ਥ ਅਧੀਤਿ ਉਪਸਗ੍ਗਮਤ੍ਤਂ. ਅਤ੍ਥਤੋ ਪਨ ਤੇਨ ਵਾ ਤਿਟ੍ਠਨ੍ਤਿ, ਤਤ੍ਥ ਵਾ ਤਿਟ੍ਠਨ੍ਤਿ, ਠਾਨਮੇਵ ਵਾ ਤਂਤਂਗੁਣਾਧਿਕਾਨਂ ਪੁਰਿਸਾਨਂ ਅਧਿਟ੍ਠਾਨਂ, ਪਞ੍ਞਾਵ ਅਧਿਟ੍ਠਾਨਂ ਪਞ੍ਞਾਧਿਟ੍ਠਾਨਂ. ਏਤ੍ਥ ਚ ਪਠਮੇਨ ਅਗ੍ਗਫਲਪਞ੍ਞਾ. ਦੁਤਿਯੇਨ ਵਚੀਸਚ੍ਚਂ. ਤਤਿਯੇਨ ਆਮਿਸਪਰਿਚ੍ਚਾਗੋ. ਚਤੁਤ੍ਥੇਨ ਕਿਲੇਸੂਪਸਮੋ ਕਥਿਤੋਤਿ ਵੇਦਿਤਬ੍ਬੋ. ਪਠਮੇਨ ਚ ਕਮ੍ਮਸ੍ਸਕਤਪਞ੍ਞਂ ਵਿਪਸ੍ਸਨਾਪਞ੍ਞਂ ਵਾ ਆਦਿਂ ਕਤ੍ਵਾ ਫਲਪਞ੍ਞਾ ਕਥਿਤਾ. ਦੁਤਿਯੇਨ ਵਚੀਸਚ੍ਚਂ ਆਦਿਂ ਕਤ੍ਵਾ ਪਰਮਤ੍ਥਸਚ੍ਚਂ ਨਿਬ੍ਬਾਨਂ. ਤਤਿਯੇਨ ਆਮਿਸਪਰਿਚ੍ਚਾਗਂ ਆਦਿਂ ਕਤ੍ਵਾ ਅਗ੍ਗਮਗ੍ਗੇਨ ਕਿਲੇਸਪਰਿਚ੍ਚਾਗੋ. ਚਤੁਤ੍ਥੇਨ ਸਮਾਪਤ੍ਤਿਵਿਕ੍ਖਮ੍ਭਿਤੇ ਕਿਲੇਸੇ ਆਦਿਂ ਕਤ੍ਵਾ ਅਗ੍ਗਮਗ੍ਗੇਨ ਕਿਲੇਸਵੂਪਸਮੋ. ਪਞ੍ਞਾਧਿਟ੍ਠਾਨੇਨ ਵਾ ਏਕੇਨ ਅਰਹਤ੍ਤਫਲਪਞ੍ਞਾ ਕਥਿਤਾ. ਸੇਸੇਹਿ ਪਰਮਤ੍ਥਸਚ੍ਚਂ. ਸਚ੍ਚਾਧਿਟ੍ਠਾਨੇਨ ਵਾ ਏਕੇਨ ਪਰਮਤ੍ਥਸਚ੍ਚਂ ਕਥਿਤਂ. ਸੇਸੇਹਿ ਅਰਹਤ੍ਤਪਞ੍ਞਾਤਿ ਮੂਸਿਕਾਭਯਤ੍ਥੇਰੋ ਆਹ.

ਪਞ੍ਹਬ੍ਯਾਕਰਣਾਦਿਚਤੁਕ੍ਕਵਣ੍ਣਨਾ

੩੧੨. ਪਞ੍ਹਬ੍ਯਾਕਰਣਾਨਿ ਮਹਾਪਦੇਸਕਥਾਯ ਵਿਤ੍ਥਾਰਿਤਾਨੇਵ.

ਕਣ੍ਹਨ੍ਤਿ ਕਾਲ਼ਕਂ ਦਸਅਕੁਸਲਕਮ੍ਮਪਥਕਮ੍ਮਂ. ਕਣ੍ਹਵਿਪਾਕਨ੍ਤਿ ਅਪਾਯੇ ਨਿਬ੍ਬਤ੍ਤਨਤੋ ਕਾਲ਼ਕਵਿਪਾਕਂ. ਸੁਕ੍ਕਨ੍ਤਿ ਪਣ੍ਡਰਂ ਕੁਸਲਕਮ੍ਮਪਥਕਮ੍ਮਂ. ਸੁਕ੍ਕਵਿਪਾਕਨ੍ਤਿ ਸਗ੍ਗੇ ਨਿਬ੍ਬਤ੍ਤਨਤੋ ਪਣ੍ਡਰਵਿਪਾਕਂ. ਕਣ੍ਹਸੁਕ੍ਕਨ੍ਤਿ ਮਿਸ੍ਸਕਕਮ੍ਮਂ. ਕਣ੍ਹਸੁਕ੍ਕਵਿਪਾਕਨ੍ਤਿ ਸੁਖਦੁਕ੍ਖਵਿਪਾਕਂ. ਮਿਸ੍ਸਕਕਮ੍ਮਞ੍ਹਿ ਕਤ੍ਵਾ ਅਕੁਸਲੇਨ ਤਿਰਚ੍ਛਾਨਯੋਨਿਯਂ ਮਙ੍ਗਲਹਤ੍ਥਿਟ੍ਠਾਨਾਦੀਸੁ ਉਪ੍ਪਨ੍ਨੋ ਕੁਸਲੇਨ ਪਵਤ੍ਤੇ ਸੁਖਂ ਵੇਦਯਤਿ. ਕੁਸਲੇਨ ਰਾਜਕੁਲੇਪਿ ਨਿਬ੍ਬਤ੍ਤੋ ਅਕੁਸਲੇਨ ਪਵਤ੍ਤੇ ਦੁਕ੍ਖਂ ਵੇਦਯਤਿ. ਅਕਣ੍ਹਅਸੁਕ੍ਕਨ੍ਤਿ ਕਮ੍ਮਕ੍ਖਯਕਰਂ ਚਤੁਮਗ੍ਗਞਾਣਂ ਅਧਿਪ੍ਪੇਤਂ. ਤਞ੍ਹਿ ਯਦਿ ਕਣ੍ਹਂ ਭਵੇਯ੍ਯ, ਕਣ੍ਹਵਿਪਾਕਂ ਦਦੇਯ੍ਯ. ਯਦਿ ਸੁਕ੍ਕਂ ਭਵੇਯ੍ਯ, ਸੁਕ੍ਕਵਿਪਾਕਂ ਦਦੇਯ੍ਯ. ਉਭਯਵਿਪਾਕਸ੍ਸ ਪਨ ਅਦਾਨਤੋ ਅਕਣ੍ਹਾਸੁਕ੍ਕਵਿਪਾਕਤ੍ਤਾ ਅਕਣ੍ਹਂ ਅਸੁਕ੍ਕਨ੍ਤਿ ਅਯਮੇਤ੍ਥ ਅਤ੍ਥੋ.

ਸਚ੍ਛਿਕਰਣੀਯਾਤਿ ਪਚ੍ਚਕ੍ਖਕਰਣੇਨ ਚੇਵ ਪਟਿਲਾਭੇਨ ਚ ਸਚ੍ਛਿਕਾਤਬ੍ਬਾ. ਚਕ੍ਖੁਨਾਤਿ ਦਿਬ੍ਬਚਕ੍ਖੁਨਾ. ਕਾਯੇਨਾਤਿ ਸਹਜਾਤਨਾਮਕਾਯੇਨ. ਪਞ੍ਞਾਯਾਤਿ ਅਰਹਤ੍ਤਫਲਞਾਣੇਨ.

ਓਘਾਤਿ ਵਟ੍ਟਸ੍ਮਿਂ ਸਤ੍ਤੇ ਓਹਨਨ੍ਤਿ ਓਸੀਦਾਪੇਨ੍ਤੀਤਿ ਓਘਾ. ਤਤ੍ਥ ਪਞ੍ਚਕਾਮਗੁਣਿਕੋ ਰਾਗੋ ਕਾਮੋਘੋ. ਰੂਪਾਰੂਪਭਵੇਸੁ ਛਨ੍ਦਰਾਗੋ ਭਵੋਘੋ. ਤਥਾ ਝਾਨਨਿਕਨ੍ਤਿ ਸਸ੍ਸਤਦਿਟ੍ਠਿਸਹਗਤੋ ਚ ਰਾਗੋ. ਦ੍ਵਾਸਟ੍ਠਿ ਦਿਟ੍ਠਿਯੋ ਦਿਟ੍ਠੋਘੋ.

ਵਟ੍ਟਸ੍ਮਿਂ ਯੋਜੇਨ੍ਤੀਤਿ ਯੋਗਾ. ਤੇ ਓਘਾ ਵਿਯ ਵੇਦਿਤਬ੍ਬਾ.

ਵਿਸਂਯੋਜੇਨ੍ਤੀਤਿ ਵਿਸਞ੍ਞੋਗਾ. ਤਤ੍ਥ ਅਸੁਭਜ੍ਝਾਨਂ ਕਾਮਯੋਗਵਿਸਂਯੋਗੋ. ਤਂ ਪਾਦਕਂ ਕਤ੍ਵਾ ਅਧਿਗਤੋ ਅਨਾਗਾਮਿਮਗ੍ਗੋ ਏਕਨ੍ਤੇਨੇਵ ਕਾਮਯੋਗਵਿਸਞ੍ਞੋਗੋ ਨਾਮ. ਅਰਹਤ੍ਤਮਗ੍ਗੋ ਭਵਯੋਗਵਿਸਞ੍ਞੋਗੋ ਨਾਮ. ਸੋਤਾਪਤ੍ਤਿਮਗ੍ਗੋ ਦਿਟ੍ਠਿਯੋਗਵਿਸਞ੍ਞੋਗੋ ਨਾਮ. ਅਰਹਤ੍ਤਮਗ੍ਗੋ ਅਵਿਜ੍ਜਾਯੋਗਵਿਸਞ੍ਞੋਗੋ ਨਾਮ.

ਗਨ੍ਥਨਵਸੇਨ ਗਨ੍ਥਾ. ਵਟ੍ਟਸ੍ਮਿਂ ਨਾਮਕਾਯਞ੍ਚੇਵ ਰੂਪਕਾਯਞ੍ਚ ਗਨ੍ਥਤਿ ਬਨ੍ਧਤਿ ਪਲਿਬੁਨ੍ਧਤੀਤਿ ਕਾਯਗਨ੍ਥੋ. ਇਦਂਸਚ੍ਚਾਭਿਨਿਵੇਸੋਤਿ ਇਦਮੇਵ ਸਚ੍ਚਂ, ਮੋਘਮਞ੍ਞਨ੍ਤਿ ਏਵਂ ਪਵਤ੍ਤੋ ਦਿਟ੍ਠਾਭਿਨਿਵੇਸੋ.

ਉਪਾਦਾਨਾਨੀਤਿ ਆਦਾਨਗ੍ਗਹਣਾਨਿ. ਕਾਮੋਤਿ ਰਾਗੋ, ਸੋਯੇਵ ਗਹਣਟ੍ਠੇਨ ਉਪਾਦਾਨਨ੍ਤਿ ਕਾਮੁਪਾਦਾਨਂ. ਦਿਟ੍ਠੀਤਿ ਮਿਚ੍ਛਾਦਿਟ੍ਠਿ, ਸਾਪਿ ਗਹਣਟ੍ਠੇਨ ਉਪਾਦਾਨਨ੍ਤਿ ਦਿਟ੍ਠੁਪਾਦਾਨਂ. ਇਮਿਨਾ ਸੁਦ੍ਧੀਤਿ ਏਵਂ ਸੀਲਵਤਾਨਂ ਗਹਣਂ ਸੀਲਬ੍ਬਤੁਪਾਦਾਨਂ. ਅਤ੍ਤਾਤਿ ਏਤੇਨ ਵਦਤਿ ਚੇਵ ਉਪਾਦਿਯਤਿ ਚਾਤਿ ਅਤ੍ਤਵਾਦੁਪਾਦਾਨਂ.

ਯੋਨਿਯੋਤਿ ਕੋਟ੍ਠਾਸਾ. ਅਣ੍ਡੇ ਜਾਤਾਤਿ ਅਣ੍ਡਜਾ. ਜਲਾਬੁਮ੍ਹਿ ਜਾਤਾਤਿ ਜਲਾਬੁਜਾ. ਸਂਸੇਦੇ ਜਾਤਾਤਿ ਸਂਸੇਦਜਾ. ਸਯਨਸ੍ਮਿਂ ਪੂਤਿਮਚ੍ਛਾਦੀਸੁ ਚ ਨਿਬ੍ਬਤ੍ਤਾਨਮੇਤਂ ਅਧਿਵਚਨਂ. ਵੇਗੇਨ ਆਗਨ੍ਤ੍ਵਾ ਉਪਪਤਿਤਾ ਵਿਯਾਤਿ ਓਪਪਾਤਿਕਾ. ਤਤ੍ਥ ਦੇਵਮਨੁਸ੍ਸੇਸੁ ਸਂਸੇਦਜਓਪਪਾਤਿਕਾਨਂ ਅਯਂ ਵਿਸੇਸੋ. ਸਂਸੇਦਜਾ ਮਨ੍ਦਾ ਦਹਰਾ ਹੁਤ੍ਵਾ ਨਿਬ੍ਬਤ੍ਤਨ੍ਤਿ. ਓਪਪਾਤਿਕਾ ਸੋਲ਼ਸਵਸ੍ਸੁਦ੍ਦੇਸਿਕਾ ਹੁਤ੍ਵਾ. ਮਨੁਸ੍ਸੇਸੁ ਹਿ ਭੁਮ੍ਮਦੇਵੇਸੁ ਚ ਇਮਾ ਚਤਸ੍ਸੋਪਿ ਯੋਨਿਯੋ ਲਬ੍ਭਨ੍ਤਿ. ਤਥਾ ਤਿਰਚ੍ਛਾਨੇਸੁ ਸੁਪਣ੍ਣਨਾਗਾਦੀਸੁ. ਵੁਤ੍ਤਞ੍ਹੇਤਂ – ‘‘ਤਤ੍ਥ, ਭਿਕ੍ਖਵੇ, ਅਣ੍ਡਜਾ ਸੁਪਣ੍ਣਾ ਅਣ੍ਡਜੇਵ ਨਾਗੇ ਹਰਨ੍ਤਿ, ਨ ਜਲਾਬੁਜੇ ਨ ਸਂਸੇਦਜੇ ਨ ਓਪਪਾਤਿਕੇ’’ਤਿ (ਸਂ. ਨਿ. ੩.੩੯੩). ਚਾਤੁਮਹਾਰਾਜਿਕਤੋ ਪਟ੍ਠਾਯ ਉਪਰਿਦੇਵਾ ਓਪਪਾਤਿਕਾਯੇਵ. ਤਥਾ ਨੇਰਯਿਕਾ. ਪੇਤੇਸੁ ਚਤਸ੍ਸੋਪਿ ਲਬ੍ਭਨ੍ਤਿ. ਗਬ੍ਭਾਵਕ੍ਕਨ੍ਤਿਯੋ ਸਮ੍ਪਸਾਦਨੀਯੇ ਕਥਿਤਾ ਏਵ.

ਅਤ੍ਤਭਾਵਪਟਿਲਾਭੇਸੁ ਪਠਮੋ ਖਿਡ੍ਡਾਪਦੋਸਿਕਵਸੇਨ ਵੇਦਿਤਬ੍ਬੋ. ਦੁਤਿਯੋ ਓਰਬ੍ਭਿਕਾਦੀਹਿ ਘਾਤਿਯਮਾਨਉਰਬ੍ਭਾਦਿਵਸੇਨ. ਤਤਿਯੋ ਮਨੋਪਦੋਸਿਕਾਵਸੇਨ. ਚਤੁਤ੍ਥੋ ਚਾਤੁਮਹਾਰਾਜਿਕੇ ਉਪਾਦਾਯ ਉਪਰਿਸੇਸਦੇਵਤਾਵਸੇਨ. ਤੇ ਹਿ ਦੇਵਾ ਨੇਵ ਅਤ੍ਤਸਞ੍ਚੇਤਨਾਯ ਮਰਨ੍ਤਿ, ਨ ਪਰਸਞ੍ਚੇਤਨਾਯ.

ਦਕ੍ਖਿਣਾਵਿਸੁਦ੍ਧਾਦਿਚਤੁਕ੍ਕਵਣ੍ਣਨਾ

੩੧੩. ਦਕ੍ਖਿਣਾਵਿਸੁਦ੍ਧਿਯੋਤਿ ਦਾਨਸਙ੍ਖਾਤਾ ਦਕ੍ਖਿਣਾ ਵਿਸੁਜ੍ਝਨ੍ਤਿ ਮਹਪ੍ਫਲਾ ਹੋਨ੍ਤਿ ਏਤਾਹੀਤਿ ਦਕ੍ਖਿਣਾਵਿਸੁਦ੍ਧਿਯੋ.

ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ ਯਤ੍ਥ ਦਾਯਕੋ ਸੀਲਵਾ ਹੋਤਿ, ਧਮ੍ਮੇਨੁਪ੍ਪਨ੍ਨਂ ਦੇਯ੍ਯਧਮ੍ਮਂ ਦੇਤਿ, ਪਟਿਗ੍ਗਾਹਕੋ ਦੁਸ੍ਸੀਲੋ. ਅਯਂ ਦਕ੍ਖਿਣਾ ਵੇਸ੍ਸਨ੍ਤਰਮਹਾਰਾਜਸ੍ਸ ਦਕ੍ਖਿਣਾਸਦਿਸਾ. ਪਟਿਗ੍ਗਾਹਕਤੋ ਵਿਸੁਜ੍ਝਤਿ, ਨੋ ਦਾਯਕਤੋਤਿ ਯਤ੍ਥ ਪਟਿਗ੍ਗਾਹਕੋ ਸੀਲਵਾ ਹੋਤਿ, ਦਾਯਕੋ ਦੁਸ੍ਸੀਲੋ, ਅਧਮ੍ਮੇਨੁਪ੍ਪਨ੍ਨਂ ਦੇਤਿ, ਅਯਂ ਦਕ੍ਖਿਣਾ ਚੋਰਘਾਤਕਸ੍ਸ ਦਕ੍ਖਿਣਾਸਦਿਸਾ. ਨੇਵ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ ਯਤ੍ਥ ਉਭੋਪਿ ਦੁਸ੍ਸੀਲਾ ਦੇਯ੍ਯਧਮ੍ਮੋਪਿ ਅਧਮ੍ਮੇਨ ਨਿਬ੍ਬਤ੍ਤੋ. ਵਿਪਰਿਯਾਯੇਨ ਚਤੁਤ੍ਥਾ ਵੇਦਿਤਬ੍ਬਾ.

ਸਙ੍ਗਹਵਤ੍ਥੂਨੀਤਿ ਸਙ੍ਗਹਕਾਰਣਾਨਿ. ਤਾਨਿ ਹੇਟ੍ਠਾ ਵਿਭਤ੍ਤਾਨੇਵ.

ਅਨਰਿਯਵੋਹਾਰਾਤਿ ਅਨਰਿਯਾਨਂ ਲਾਮਕਾਨਂ ਵੋਹਾਰਾ.

ਅਰਿਯਵੋਹਾਰਾਤਿ ਅਰਿਯਾਨਂ ਸਪ੍ਪੁਰਿਸਾਨਂ ਵੋਹਾਰਾ.

ਦਿਟ੍ਠਵਾਦਿਤਾਤਿ ਦਿਟ੍ਠਂ ਮਯਾਤਿ ਏਵਂ ਵਾਦਿਤਾ. ਏਤ੍ਥ ਚ ਤਂਤਂਸਮੁਟ੍ਠਾਪਕਚੇਤਨਾਵਸੇਨ ਅਤ੍ਥੋ ਵੇਦਿਤਬ੍ਬੋ.

ਅਤ੍ਤਨ੍ਤਪਾਦਿਚਤੁਕ੍ਕਵਣ੍ਣਨਾ

੩੧੪. ਅਤ੍ਤਨ੍ਤਪਾਦੀਸੁ ਪਠਮੋ ਅਚੇਲਕੋ. ਦੁਤਿਯੋ ਓਰਬ੍ਭਿਕਾਦੀਸੁ ਅਞ੍ਞਤਰੋ. ਤਤਿਯੋ ਯਞ੍ਞਯਾਜਕੋ. ਚਤੁਤ੍ਥੋ ਸਾਸਨੇ ਸਮ੍ਮਾਪਟਿਪਨ੍ਨੋ.

ਅਤ੍ਤਹਿਤਾਯ ਪਟਿਪਨ੍ਨਾਦੀਸੁ ਪਠਮੋ ਯੋ ਸਯਂ ਸੀਲਾਦਿਸਮ੍ਪਨ੍ਨੋ, ਪਰਂ ਸੀਲਾਦੀਸੁ ਨ ਸਮਾਦਪੇਤਿ ਆਯਸ੍ਮਾ ਵਕ੍ਕਲਿਤ੍ਥੇਰੋ ਵਿਯ. ਦੁਤਿਯੋ ਯੋ ਅਤ੍ਤਨਾ ਨ ਸੀਲਾਦਿਸਮ੍ਪਨ੍ਨੋ, ਪਰਂ ਸੀਲਾਦੀਸੁ ਸਮਾਦਪੇਤਿ ਆਯਸ੍ਮਾ ਉਪਨਨ੍ਦੋ ਵਿਯ. ਤਤਿਯੋ ਯੋ ਨੇਵਤ੍ਤਨਾ ਸੀਲਾਦਿਸਮ੍ਪਨ੍ਨੋ, ਪਰਂ ਸੀਲਾਦੀਸੁ ਨ ਸਮਾਦਪੇਤਿ ਦੇਵਦਤ੍ਤੋ ਵਿਯ. ਚਤੁਤ੍ਥੋ ਯੋ ਅਤ੍ਤਨਾ ਚ ਸੀਲਾਦਿਸਮ੍ਪਨ੍ਨੋ ਪਰਞ੍ਚ ਸੀਲਾਦੀਸੁ ਸਮਾਦਪੇਤਿ ਆਯਸ੍ਮਾ ਮਹਾਕਸ੍ਸਪੋ ਵਿਯ.

ਤਮਾਦੀਸੁ ਤਮੋਤਿ ਅਨ੍ਧਕਾਰਭੂਤੋ. ਤਮਪਰਾਯਣੋਤਿ ਤਮਮੇਵ ਪਰਂ ਅਯਨਂ ਗਤਿ ਅਸ੍ਸਾਤਿ ਤਮਪਰਾਯਣੋ. ਏਵਂ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਪਠਮੋ ਨੀਚੇ ਚਣ੍ਡਾਲਾਦਿਕੁਲੇ ਦੁਜ੍ਜੀਵਿਤੇ ਹੀਨਤ੍ਤਭਾਵੇ ਨਿਬ੍ਬਤ੍ਤਿਤ੍ਵਾ ਤੀਣਿ ਦੁਚ੍ਚਰਿਤਾਨਿ ਪਰਿਪੂਰੇਤਿ. ਦੁਤਿਯੋ ਤਥਾਵਿਧੋ ਹੁਤ੍ਵਾ ਤੀਣਿ ਸੁਚਰਿਤਾਨਿ ਪਰਿਪੂਰੇਤਿ. ਤਤਿਯੋ ਉਲ਼ਾਰੇ ਖਤ੍ਤਿਯਕੁਲੇ ਬਹੁਅਨ੍ਨਪਾਨੇ ਸਮ੍ਪਨ੍ਨਤ੍ਤਭਾਵੇ ਨਿਬ੍ਬਤ੍ਤਿਤ੍ਵਾ ਤੀਣਿ ਦੁਚ੍ਚਰਿਤਾਨਿ ਪਰਿਪੂਰੇਤਿ. ਚਤੁਤ੍ਥੋ ਤਾਦਿਸੋਵ ਹੁਤ੍ਵਾ ਤੀਣਿ ਸੁਚਰਿਤਾਨਿ ਪਰਿਪੂਰੇਤਿ.

ਸਮਣਮਚਲੋਤਿ ਸਮਣਅਚਲੋ. ਮ-ਕਾਰੋ ਪਦਸਨ੍ਧਿਮਤ੍ਤਂ. ਸੋ ਸੋਤਾਪਨ੍ਨੋ ਵੇਦਿਤਬ੍ਬੋ. ਸੋਤਾਪਨ੍ਨੋ ਹਿ ਚਤੂਹਿ ਵਾਤੇਹਿ ਇਨ੍ਦਖੀਲੋ ਵਿਯ ਪਰਪ੍ਪਵਾਦੇਹਿ ਅਕਮ੍ਪਿਯੋ. ਅਚਲਸਦ੍ਧਾਯ ਸਮਨ੍ਨਾਗਤੋਤਿ ਸਮਣਮਚਲੋ. ਵੁਤ੍ਤਮ੍ਪਿ ਚੇਤਂ – ‘‘ਕਤਮੋ ਚ ਪੁਗ੍ਗਲੋ ਸਮਣਮਚਲੋ? ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ’’ਤਿ (ਪੁ. ਪ. ੧੯੦) ਵਿਤ੍ਥਾਰੋ. ਰਾਗਦੋਸਾਨਂ ਪਨ ਤਨੁਭੂਤਤ੍ਤਾ ਸਕਦਾਗਾਮੀ ਸਮਣਪਦੁਮੋ ਨਾਮ. ਤੇਨਾਹ – ‘‘ਕਤਮੋ ਪਨ ਪੁਗ੍ਗਲੋ ਸਮਣਪਦੁਮੋ? ਇਧੇਕਚ੍ਚੋ ਪੁਗ੍ਗਲੋ ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਣਪਦੁਮੋ’’ਤਿ (ਪੁ. ਪ. ੧੯੦). ਰਾਗਦੋਸਾਨਂ ਅਭਾਵਾ ਖਿਪ੍ਪਮੇਵ ਪੁਪ੍ਫਿਸ੍ਸਤੀਤਿ ਅਨਾਗਾਮੀ ਸਮਣਪੁਣ੍ਡਰੀਕੋ ਨਾਮ. ਤੇਨਾਹ – ‘‘ਕਤਮੋ ਚ ਪੁਗ੍ਗਲੋ ਸਮਣਪੁਣ੍ਡਰੀਕੋ? ਇਧੇਕਚ੍ਚੋ ਪੁਗ੍ਗਲੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ…ਪੇ… ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਣਪੁਣ੍ਡਰੀਕੋ’’ਤਿ (ਪੁ. ਪ. ੧੯੦). ਅਰਹਾ ਪਨ ਸਬ੍ਬੇਸਮ੍ਪਿ ਗਨ੍ਥਕਾਰਕਿਲੇਸਾਨਂ ਅਭਾਵਾ ਸਮਣੇਸੁ ਸਮਣਸੁਖੁਮਾਲੋ ਨਾਮ. ਤੇਨਾਹ – ‘‘ਕਤਮੋ ਚ ਪੁਗ੍ਗਲੋ ਸਮਣੇਸੁ ਸਮਣਸੁਖੁਮਾਲੋ? ਇਧੇਕਚ੍ਚੋ ਆਸਵਾਨਂ ਖਯਾ…ਪੇ… ਉਪਸਮ੍ਪਜ੍ਜ ਵਿਹਰਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਣੇਸੁ ਸਮਣਸੁਖੁਮਾਲੋ’’ਤਿ.

‘‘ਇਮੇ ਖੋ, ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਸਮਪਞ੍ਞਾਸਾਯ ਚਤੁਕ੍ਕਾਨਂ ਵਸੇਨ ਦ੍ਵੇਪਞ੍ਹਸਤਾਨਿ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਚਤੁਕ੍ਕਵਣ੍ਣਨਾ ਨਿਟ੍ਠਿਤਾ.

ਪਞ੍ਚਕਵਣ੍ਣਨਾ

੩੧੫. ਇਤਿ ਚਤੁਕ੍ਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਪਞ੍ਚਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਪਞ੍ਚਸੁ ਖਨ੍ਧੇਸੁ ਰੂਪਕ੍ਖਨ੍ਧੋ ਲੋਕਿਯੋ. ਸੇਸਾ ਲੋਕਿਯਲੋਕੁਤ੍ਤਰਾ. ਉਪਾਦਾਨਕ੍ਖਨ੍ਧਾ ਲੋਕਿਯਾਵ. ਵਿਤ੍ਥਾਰਤੋ ਪਨ ਖਨ੍ਧਕਥਾ ਵਿਸੁਦ੍ਧਿਮਗ੍ਗੇ ਵੁਤ੍ਤਾ. ਕਾਮਗੁਣਾ ਹੇਟ੍ਠਾ ਵਿਤ੍ਥਾਰਿਤਾਵ.

ਸੁਕਤਦੁਕ੍ਕਟਾਦੀਹਿ ਗਨ੍ਤਬ੍ਬਾਤਿ ਗਤਿਯੋ. ਨਿਰਯੋਤਿ ਨਿਰਸ੍ਸਾਦੋ. ਸਹੋਕਾਸੇਨ ਖਨ੍ਧਾ ਕਥਿਤਾ. ਤਤੋ ਪਰੇਸੁ ਤੀਸੁ ਨਿਬ੍ਬਤ੍ਤਾ ਖਨ੍ਧਾਵ ਵੁਤ੍ਤਾ. ਚਤੁਤ੍ਥੇ ਓਕਾਸੋਪਿ.

ਆਵਾਸੇ ਮਚ੍ਛਰਿਯਂ ਆਵਾਸਮਚ੍ਛਰਿਯਂ. ਤੇਨ ਸਮਨ੍ਨਾਗਤੋ ਭਿਕ੍ਖੁ ਆਗਨ੍ਤੁਕਂ ਦਿਸ੍ਵਾ ‘‘ਏਤ੍ਥ ਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਪਰਿਕ੍ਖਾਰੋ ਠਪਿਤੋ’’ਤਿਆਦੀਨਿ ਵਤ੍ਵਾ ਸਙ੍ਘਿਕਮ੍ਪਿ ਆਵਾਸਂ ਨਿਵਾਰੇਤਿ. ਸੋ ਕਾਲਙ੍ਕਤ੍ਵਾ ਪੇਤੋ ਵਾ ਅਜਗਰੋ ਵਾ ਹੁਤ੍ਵਾ ਨਿਬ੍ਬਤ੍ਤਤਿ. ਕੁਲੇ ਮਚ੍ਛਰਿਯਂ ਕੁਲਮਚ੍ਛਰਿਯਂ. ਤੇਨ ਸਮਨ੍ਨਾਗਤੋ ਭਿਕ੍ਖੁ ਤੇਹਿ ਕਾਰਣੇਹਿ ਅਤ੍ਤਨੋ ਉਪਟ੍ਠਾਕਕੁਲੇ ਅਞ੍ਞੇਸਂ ਪਵੇਸਨਮ੍ਪਿ ਨਿਵਾਰੇਤਿ. ਲਾਭੇ ਮਚ੍ਛਰਿਯਂ ਲਾਭਮਚ੍ਛਰਿਯਂ. ਤੇਨ ਸਮਨ੍ਨਾਗਤੋ ਭਿਕ੍ਖੁ ਸਙ੍ਘਿਕਮ੍ਪਿ ਲਾਭਂ ਮਚ੍ਛਰਾਯਨ੍ਤੋ ਯਥਾ ਅਞ੍ਞੇ ਨ ਲਭਨ੍ਤਿ, ਏਵਂ ਕਰੋਤਿ. ਵਣ੍ਣੇ ਮਚ੍ਛਰਿਯਂ ਵਣ੍ਣਮਚ੍ਛਰਿਯਂ. ਵਣ੍ਣੋਤਿ ਚੇਤ੍ਥ ਸਰੀਰਵਣ੍ਣੋਪਿ ਗੁਣਵਣ੍ਣੋਪਿ ਵੇਦਿਤਬ੍ਬੋ. ਪਰਿਯਤ੍ਤਿਧਮ੍ਮੇ ਮਚ੍ਛਰਿਯਂ ਧਮ੍ਮਮਚ੍ਛਰਿਯਂ. ਤੇਨ ਸਮਨ੍ਨਾਗਤੋ ਭਿਕ੍ਖੁ ‘‘ਇਮਂ ਧਮ੍ਮਂ ਪਰਿਯਾਪੁਣਿਤ੍ਵਾ ਏਸੋ ਮਂ ਅਭਿਭਵਿਸ੍ਸਤੀ’’ਤਿ ਅਞ੍ਞਸ੍ਸ ਨ ਦੇਤਿ. ਯੋ ਪਨ ਧਮ੍ਮਾਨੁਗ੍ਗਹੇਨ ਵਾ ਪੁਗ੍ਗਲਾਨੁਗ੍ਗਹੇਨ ਵਾ ਨ ਦੇਤਿ, ਨ ਤਂ ਮਚ੍ਛਰਿਯਂ.

ਚਿਤ੍ਤਂ ਨਿਵਾਰੇਨ੍ਤਿ ਪਰਿਯੋਨਨ੍ਧਨ੍ਤੀਤਿ ਨੀਵਰਣਾਨਿ. ਕਾਮਚ੍ਛਨ੍ਦੋ ਨੀਵਰਣਪਤ੍ਤੋ ਅਰਹਤ੍ਤਮਗ੍ਗਵਜ੍ਝੋ. ਕਾਮਰਾਗਾਨੁਸਯੋ ਕਾਮਰਾਗਸਂਯੋਜਨਪਤ੍ਤੋ ਅਨਾਗਾਮਿਮਗ੍ਗਵਜ੍ਝੋ. ਥਿਨਂ ਚਿਤ੍ਤਗੇਲਞ੍ਞਂ. ਮਿਦ੍ਧਂ ਖਨ੍ਧਤ੍ਤਯਗੇਲਞ੍ਞਂ. ਉਭਯਮ੍ਪਿ ਅਰਹਤ੍ਤਮਗ੍ਗਵਜ੍ਝਂ. ਤਥਾ ਉਦ੍ਧਚ੍ਚਂ. ਕੁਕ੍ਕੁਚ੍ਚਂ ਅਨਾਗਾਮਿਮਗ੍ਗਵਜ੍ਝਂ. ਵਿਚਿਕਿਚ੍ਛਾ ਪਠਮਮਗ੍ਗਵਜ੍ਝਾ.

ਸਂਯੋਜਨਾਨੀਤਿ ਬਨ੍ਧਨਾਨਿ. ਤੇਹਿ ਪਨ ਬਦ੍ਧੇਸੁ ਪੁਗ੍ਗਲੇਸੁ ਰੂਪਾਰੂਪਭਵੇ ਨਿਬ੍ਬਤ੍ਤਾ ਸੋਤਾਪਨ੍ਨਸਕਦਾਗਾਮਿਨੋ ਅਨ੍ਤੋਬਦ੍ਧਾ ਬਹਿਸਯਿਤਾ ਨਾਮ. ਤੇਸਞ੍ਹਿ ਕਾਮਭਵੇ ਬਨ੍ਧਨਂ. ਕਾਮਭਵੇ ਅਨਾਗਾਮਿਨੋ ਬਹਿਬਦ੍ਧਾ ਅਨ੍ਤੋਸਯਿਤਾ ਨਾਮ. ਤੇਸਞ੍ਹਿ ਰੂਪਾਰੂਪਭਵੇ ਬਨ੍ਧਨਂ. ਕਾਮਭਵੇ ਸੋਤਾਪਨ੍ਨਸਕਦਾਗਾਮਿਨੋ ਅਨ੍ਤੋਬਦ੍ਧਾ ਅਨ੍ਤੋਸਯਿਤਾ ਨਾਮ. ਰੂਪਾਰੂਪਭਵੇ ਅਨਾਗਾਮਿਨੋ ਬਹਿਬਦ੍ਧਾ ਬਹਿਸਯਿਤਾ ਨਾਮ. ਖੀਣਾਸਵੋ ਸਬ੍ਬਤ੍ਥ ਅਬਨ੍ਧਨੋ.

ਸਿਕ੍ਖਿਤਬ੍ਬਂ ਪਦਂ ਸਿਕ੍ਖਾਪਦਂ, ਸਿਕ੍ਖਾਕੋਟ੍ਠਾਸੋਤਿ ਅਤ੍ਥੋ. ਸਿਕ੍ਖਾਯ ਵਾ ਪਦਂ ਸਿਕ੍ਖਾਪਦਂ, ਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾਯ ਅਧਿਗਮੁਪਾਯੋਤਿ ਅਤ੍ਥੋ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨ ਸਿਕ੍ਖਾਪਦਕਥਾ ਵਿਭਙ੍ਗਪ੍ਪਕਰਣੇ ਸਿਕ੍ਖਾਪਦਵਿਭਙ੍ਗੇ ਆਗਤਾ ਏਵ.

ਅਭਬ੍ਬਟ੍ਠਾਨਾਦਿਪਞ੍ਚਕਵਣ੍ਣਨਾ

੩੧੬. ‘‘ਅਭਬ੍ਬੋ, ਆਵੁਸੋ, ਖੀਣਾਸਵੋ ਭਿਕ੍ਖੁ ਸਞ੍ਚਿਚ੍ਚ ਪਾਣ’’ਨ੍ਤਿਆਦਿ ਦੇਸਨਾਸੀਸਮੇਵ, ਸੋਤਾਪਨ੍ਨਾਦਯੋਪਿ ਪਨ ਅਭਬ੍ਬਾ. ਪੁਥੁਜ੍ਜਨਖੀਣਾਸਵਾਨਂ ਨਿਨ੍ਦਾਪਸਂਸਤ੍ਥਮ੍ਪਿ ਏਵਂ ਵੁਤ੍ਤਂ. ਪੁਥੁਜ੍ਜਨੋ ਨਾਮ ਗਾਰਯ੍ਹੋ, ਮਾਤੁਘਾਤਾਦੀਨਿਪਿ ਕਰੋਤਿ. ਖੀਣਾਸਵੋ ਪਨ ਪਾਸਂਸੋ, ਕੁਨ੍ਥਕਿਪਿਲ੍ਲਿਕਘਾਤਾਦੀਨਿਪਿ ਨ ਕਰੋਤੀਤਿ.

ਬ੍ਯਸਨੇਸੁ ਵਿਯਸ੍ਸਤੀਤਿ ਬ੍ਯਸਨਂ, ਹਿਤਸੁਖਂ ਖਿਪਤਿ ਵਿਦ੍ਧਂਸੇਤੀਤਿ ਅਤ੍ਥੋ. ਞਾਤੀਨਂ ਬ੍ਯਸਨਂ ਞਾਤਿਬ੍ਯਸਨਂ, ਚੋਰਰੋਗਭਯਾਦੀਹਿ ਞਾਤਿਵਿਨਾਸੋਤਿ ਅਤ੍ਥੋ. ਭੋਗਾਨਂ ਬ੍ਯਸਨਂ ਭੋਗਬ੍ਯਸਨਂ, ਰਾਜਚੋਰਾਦਿਵਸੇਨ ਭੋਗਵਿਨਾਸੋਤਿ ਅਤ੍ਥੋ. ਰੋਗੋ ਏਵ ਬ੍ਯਸਨਂ ਰੋਗਬ੍ਯਸਨਂ. ਰੋਗੋ ਹਿ ਆਰੋਗ੍ਯਂ ਬ੍ਯਸਤਿ ਵਿਨਾਸੇਤੀਤਿ ਬ੍ਯਸਨਂ, ਸੀਲਸ੍ਸ ਬ੍ਯਸਨਂ ਸੀਲਬ੍ਯਸਨਂ. ਦੁਸ੍ਸੀਲ੍ਯਸ੍ਸੇਤਂ ਨਾਮਂ. ਸਮ੍ਮਾਦਿਟ੍ਠਿਂ ਵਿਨਾਸਯਮਾਨਾ ਉਪ੍ਪਨ੍ਨਾ ਦਿਟ੍ਠਿ ਏਵ ਬ੍ਯਸਨਂ ਦਿਟ੍ਠਿਬ੍ਯਸਨਂ. ਏਤ੍ਥ ਚ ਞਾਤਿਬ੍ਯਸਨਾਦੀਨਿ ਤੀਣਿ ਨੇਵ ਅਕੁਸਲਾਨਿ ਨ ਤਿਲਕ੍ਖਣਾਹਤਾਨਿ. ਸੀਲਦਿਟ੍ਠਿਬ੍ਯਸਨਦ੍ਵਯਂ ਅਕੁਸਲਂ ਤਿਲਕ੍ਖਣਾਹਤਂ. ਤੇਨੇਵ ‘‘ਨਾਵੁਸੋ, ਸਤ੍ਤਾ ਞਾਤਿਬ੍ਯਸਨਹੇਤੁ ਵਾ’’ਤਿਆਦਿਮਾਹ.

ਞਾਤਿਸਮ੍ਪਦਾਤਿ ਞਾਤੀਨਂ ਸਮ੍ਪਦਾ ਪਾਰਿਪੂਰੀ ਬਹੁਭਾਵੋ. ਭੋਗਸਮ੍ਪਦਾਯਪਿ ਏਸੇਵ ਨਯੋ. ਆਰੋਗ੍ਯਸ੍ਸ ਸਮ੍ਪਦਾ ਆਰੋਗ੍ਯਸਮ੍ਪਦਾ. ਪਾਰਿਪੂਰੀ ਦੀਘਰਤ੍ਤਂ ਅਰੋਗਤਾ. ਸੀਲਦਿਟ੍ਠਿਸਮ੍ਪਦਾਸੁਪਿ ਏਸੇਵ ਨਯੋ. ਇਧਾਪਿ ਞਾਤਿਸਮ੍ਪਦਾਦਯੋ ਨੋ ਕੁਸਲਾ, ਨ ਤਿਲਕ੍ਖਣਾਹਤਾ. ਸੀਲਦਿਟ੍ਠਿਸਮ੍ਪਦਾ ਕੁਸਲਾ, ਤਿਲਕ੍ਖਣਾਹਤਾ. ਤੇਨੇਵ ‘‘ਨਾਵੁਸੋ, ਸਤ੍ਤਾ ਞਾਤਿਸਮ੍ਪਦਾਹੇਤੁ ਵਾ’’ਤਿਆਦਿਮਾਹ.

ਸੀਲਵਿਪਤ੍ਤਿਸੀਲਸਮ੍ਪਤ੍ਤਿਕਥਾ ਮਹਾਪਰਿਨਿਬ੍ਬਾਨੇ ਵਿਤ੍ਥਾਰਿਤਾਵ.

ਚੋਦਕੇਨਾਤਿ ਵਤ੍ਥੁਸਂਸਨ੍ਦਸ੍ਸਨਾ, ਆਪਤ੍ਤਿਸਂਸਨ੍ਦਸ੍ਸਨਾ, ਸਂਵਾਸਪ੍ਪਟਿਕ੍ਖੇਪੋ, ਸਾਮੀਚਿਪ੍ਪਟਿਕ੍ਖੇਪੋਤਿ ਚਤੂਹਿ ਚੋਦਨਾਵਤ੍ਥੂਹਿ ਚੋਦਯਮਾਨੇਨ. ਕਾਲੇਨ ਵਕ੍ਖਾਮਿ ਨੋ ਅਕਾਲੇਨਾਤਿ ਏਤ੍ਥ ਚੁਦਿਤਕਸ੍ਸ ਕਾਲੋ ਕਥਿਤੋ, ਨ ਚੋਦਕਸ੍ਸ. ਪਰਂ ਚੋਦੇਨ੍ਤੇਨ ਹਿ ਪਰਿਸਮਜ੍ਝੇ ਵਾ ਉਪੋਸਥਪਵਾਰਣਗ੍ਗੇ ਵਾ ਆਸਨਸਾਲਾਭੋਜਨਸਾਲਾਦੀਸੁ ਵਾ ਨ ਚੋਦੇਤਬ੍ਬਂ. ਦਿਵਾਟ੍ਠਾਨੇ ਨਿਸਿਨ੍ਨਕਾਲੇ ‘‘ਕਰੋਤਾਯਸ੍ਮਾ ਓਕਾਸਂ, ਅਹਂ ਆਯਸ੍ਮਨ੍ਤਂ ਵਤ੍ਤੁਕਾਮੋ’’ਤਿ ਏਵਂ ਓਕਾਸਂ ਕਾਰੇਤ੍ਵਾ ਚੋਦੇਤਬ੍ਬਂ. ਪੁਗ੍ਗਲਂ ਪਨ ਉਪਪਰਿਕ੍ਖਿਤ੍ਵਾ ਯੋ ਲੋਲਪੁਗ੍ਗਲੋ ਅਭੂਤਂ ਵਤ੍ਵਾ ਭਿਕ੍ਖੂਨਂ ਅਯਸਂ ਆਰੋਪੇਤਿ, ਸੋ ਓਕਾਸਕਮ੍ਮਂ ਵਿਨਾਪਿ ਚੋਦੇਤਬ੍ਬੋ. ਭੂਤੇਨਾਤਿ ਤਚ੍ਛੇਨ ਸਭਾਵੇਨ. ਸਣ੍ਹੇਨਾਤਿ ਮਟ੍ਠੇਨ ਮੁਦੁਕੇਨ. ਅਤ੍ਥਸਞ੍ਹਿਤੇਨਾਤਿ ਅਤ੍ਥਕਾਮਤਾਯ ਹਿਤਕਾਮਤਾਯ ਉਪੇਤੇਨ.

ਪਧਾਨਿਯਙ੍ਗਪਞ੍ਚਕਵਣ੍ਣਨਾ

੩੧੭. ਪਧਾਨਿਯਙ੍ਗਾਨੀਤਿ ਪਧਾਨਂ ਵੁਚ੍ਚਤਿ ਪਦਹਨਂ, ਪਧਾਨਮਸ੍ਸ ਅਤ੍ਥੀਤਿ ਪਧਾਨਿਯੋ, ਪਧਾਨਿਯਸ੍ਸ ਭਿਕ੍ਖੁਨੋ ਅਙ੍ਗਾਨਿ ਪਧਾਨਿਯਙ੍ਗਾਨਿ. ਸਦ੍ਧੋਤਿ ਸਦ੍ਧਾਯ ਸਮਨ੍ਨਾਗਤੋ. ਸਦ੍ਧਾ ਪਨੇਸਾ ਆਗਮਨਸਦ੍ਧਾ, ਅਧਿਗਮਨਸਦ੍ਧਾ, ਓਕਪ੍ਪਨਸਦ੍ਧਾ, ਪਸਾਦਸਦ੍ਧਾਤਿ ਚਤੁਬ੍ਬਿਧਾ. ਤਤ੍ਥ ਸਬ੍ਬਞ੍ਞੁਬੋਧਿਸਤ੍ਤਾਨਂ ਸਦ੍ਧਾ ਅਭਿਨੀਹਾਰਤੋ ਆਗਤਤ੍ਤਾ ਆਗਮਨਸਦ੍ਧਾ ਨਾਮ. ਅਰਿਯਸਾਵਕਾਨਂ ਪਟਿਵੇਧੇਨ ਅਧਿਗਤਤ੍ਤਾ ਅਧਿਗਮਨਸਦ੍ਧਾ ਨਾਮ. ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਵੁਤ੍ਤੇ ਅਚਲਭਾਵੇਨ ਓਕਪ੍ਪਨਂ ਓਕਪ੍ਪਨਸਦ੍ਧਾ ਨਾਮ. ਪਸਾਦੁਪ੍ਪਤ੍ਤਿ ਪਸਾਦਸਦ੍ਧਾ ਨਾਮ. ਇਧ ਓਕਪ੍ਪਨਸਦ੍ਧਾ ਅਧਿਪ੍ਪੇਤਾ. ਬੋਧਿਨ੍ਤਿ ਚਤੁਤ੍ਥਮਗ੍ਗਞਾਣਂ. ਤਂ ਸੁਪ੍ਪਟਿਵਿਦ੍ਧਂ ਤਥਾਗਤੇਨਾਤਿ ਸਦ੍ਦਹਤਿ. ਦੇਸਨਾਸੀਸਮੇਵ ਚੇਤਂ, ਇਮਿਨਾ ਪਨ ਅਙ੍ਗੇਨ ਤੀਸੁਪਿ ਰਤਨੇਸੁ ਸਦ੍ਧਾ ਅਧਿਪ੍ਪੇਤਾ. ਯਸ੍ਸ ਹਿ ਬੁਦ੍ਧਾਦੀਸੁ ਪਸਾਦੋ ਬਲਵਾ, ਤਸ੍ਸ ਪਧਾਨਵੀਰਿਯਂ ਇਜ੍ਝਤਿ. ਅਪ੍ਪਾਬਾਧੋਤਿ ਅਰੋਗੋ. ਅਪ੍ਪਾਤਙ੍ਕੋਤਿ ਨਿਦ੍ਦੁਕ੍ਖੋ. ਸਮਵੇਪਾਕਿਨਿਯਾਤਿ ਸਮਵਿਪਾਚਨੀਯਾ. ਗਹਣਿਯਾਤਿ ਕਮ੍ਮਜਤੇਜੋਧਾਤੁਯਾ. ਨਾਤਿਸੀਤਾਯ ਨਾਚ੍ਚੁਣ੍ਹਾਯਾਤਿ ਅਤਿਸੀਤਗਹਣਿਕੋ ਸੀਤਭੀਰੂ ਹੋਤਿ, ਅਚ੍ਚੁਣ੍ਹਗਹਣਿਕੋ ਉਣ੍ਹਭੀਰੂ ਹੋਤਿ, ਤੇਸਂ ਪਧਾਨਂ ਨ ਇਜ੍ਝਤਿ. ਮਜ੍ਝਿਮਗਹਣਿਕਸ੍ਸ ਇਜ੍ਝਤਿ. ਤੇਨਾਹ – ‘‘ਮਜ੍ਝਿਮਾਯ ਪਧਾਨਕ੍ਖਮਾਯਾ’’ਤਿ. ਯਥਾਭੂਤਂ ਅਤ੍ਤਾਨਂ ਆਵਿਕਤ੍ਤਾਤਿ ਯਥਾਭੂਤਂ ਅਤ੍ਤਨੋ ਅਗੁਣਂ ਪਕਾਸੇਤਾ. ਉਦਯਤ੍ਥਗਾਮਿਨਿਯਾਤਿ ਉਦਯਞ੍ਚ ਅਤ੍ਥਙ੍ਗਮਞ੍ਚ ਗਨ੍ਤੁਂ ਪਰਿਚ੍ਛਿਨ੍ਦਿਤੁਂ ਸਮਤ੍ਥਾਯ, ਏਤੇਨ ਪਞ੍ਞਾਸਲਕ੍ਖਣਪਰਿਗ੍ਗਾਹਕਂ ਉਦਯਬ੍ਬਯਞਾਣਂ ਵੁਤ੍ਤਂ. ਅਰਿਯਾਯਾਤਿ ਪਰਿਸੁਦ੍ਧਾਯ. ਨਿਬ੍ਬੇਧਿਕਾਯਾਤਿ ਅਨਿਬ੍ਬਿਦ੍ਧਪੁਬ੍ਬੇ ਲੋਭਕ੍ਖਨ੍ਧਾਦਯੋ ਨਿਬ੍ਬਿਜ੍ਝਿਤੁਂ ਸਮਤ੍ਥਾਯ. ਸਮ੍ਮਾ ਦੁਕ੍ਖਕ੍ਖਯਗਾਮਿਨਿਯਾਤਿ ਤਦਙ੍ਗਵਸੇਨ ਕਿਲੇਸਾਨਂ ਪਹੀਨਤ੍ਤਾ ਯਂ ਯਂ ਦੁਕ੍ਖਂ ਖੀਯਤਿ, ਤਸ੍ਸ ਤਸ੍ਸ ਦੁਕ੍ਖਸ੍ਸ ਖਯਗਾਮਿਨਿਯਾ. ਇਤਿ ਸਬ੍ਬੇਹਿ ਇਮੇਹਿ ਪਦੇਹਿ ਵਿਪਸ੍ਸਨਾਪਞ੍ਞਾਵ ਕਥਿਤਾ. ਦੁਪ੍ਪਞ੍ਞਸ੍ਸ ਹਿ ਪਧਾਨਂ ਨ ਇਜ੍ਝਤਿ.

ਸੁਦ੍ਧਾਵਾਸਾਦਿਪਞ੍ਚਕਵਣ੍ਣਨਾ

੩੧੮. ਸੁਦ੍ਧਾਵਾਸਾਤਿ ਸੁਦ੍ਧਾ ਇਧ ਆਵਸਿਂਸੁ ਆਵਸਨ੍ਤਿ ਆਵਸਿਸ੍ਸਨ੍ਤਿ ਵਾਤਿ ਸੁਦ੍ਧਾਵਾਸਾ. ਸੁਦ੍ਧਾਤਿ ਕਿਲੇਸਮਲਰਹਿਤਾ ਅਨਾਗਾਮਿਖੀਣਾਸਵਾ. ਅਵਿਹਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਮਹਾਪਦਾਨੇ ਵੁਤ੍ਤਮੇਵ.

ਅਨਾਗਾਮੀਸੁ ਆਯੁਨੋ ਮਜ੍ਝਂ ਅਨਤਿਕ੍ਕਮਿਤ੍ਵਾ ਅਨ੍ਤਰਾਵ ਕਿਲੇਸਪਰਿਨਿਬ੍ਬਾਨਂ ਅਰਹਤ੍ਤਂ ਪਤ੍ਤੋ ਅਨ੍ਤਰਾਪਰਿਨਿਬ੍ਬਾਯੀ ਨਾਮ. ਮਜ੍ਝਂ ਉਪਹਚ੍ਚ ਅਤਿਕ੍ਕਮਿਤ੍ਵਾ ਪਤ੍ਤੋ ਉਪਹਚ੍ਚਪਰਿਨਿਬ੍ਬਾਯੀ ਨਾਮ. ਅਸਙ੍ਖਾਰੇਨ ਅਪ੍ਪਯੋਗੇਨ ਅਕਿਲਮਨ੍ਤੋ ਸੁਖੇਨ ਪਤ੍ਤੋ ਅਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਸਸਙ੍ਖਾਰੇਨ ਸਪ੍ਪਯੋਗੇਨ ਕਿਲਮਨ੍ਤੋ ਦੁਕ੍ਖੇਨ ਪਤ੍ਤੋ ਸਸਙ੍ਖਾਰਪਰਿਨਿਬ੍ਬਾਯੀ ਨਾਮ. ਇਮੇ ਚਤ੍ਤਾਰੋ ਪਞ੍ਚਸੁਪਿ ਸੁਦ੍ਧਾਵਾਸੇਸੁ ਲਬ੍ਭਨ੍ਤਿ. ਉਦ੍ਧਂਸੋਤੋਅਕਨਿਟ੍ਠਗਾਮੀਤਿ ਏਤ੍ਥ ਪਨ ਚਤੁਕ੍ਕਂ ਵੇਦਿਤਬ੍ਬਂ. ਯੋ ਹਿ ਅਵਿਹਾਤੋ ਪਟ੍ਠਾਯ ਚਤ੍ਤਾਰੋ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠਂ ਗਨ੍ਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਅਵਿਹਾਤੋ ਦੁਤਿਯਂ ਵਾ ਤਤਿਯਂ ਵਾ ਚਤੁਤ੍ਥਂ ਵਾ ਦੇਵਲੋਕਂ ਗਨ੍ਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮ. ਯੋ ਕਾਮਭਵਤੋ ਅਕਨਿਟ੍ਠੇਸੁ ਨਿਬ੍ਬਤ੍ਤਿਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਹੇਟ੍ਠਾ ਚਤੂਸੁ ਦੇਵਲੋਕੇਸੁ ਤਤ੍ਥ ਤਤ੍ਥੇਵ ਨਿਬ੍ਬਤ੍ਤਿਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀ ਨਾਮਾਤਿ.

ਚੇਤੋਖਿਲਪਞ੍ਚਕਵਣ੍ਣਨਾ

੩੧੯. ਚੇਤੋਖਿਲਾਤਿ ਚਿਤ੍ਤਸ੍ਸ ਥਦ੍ਧਭਾਵਾ. ਸਤ੍ਥਰਿ ਕਙ੍ਖਤੀਤਿ ਸਤ੍ਥੁ ਸਰੀਰੇ ਵਾ ਗੁਣੇ ਵਾ ਕਙ੍ਖਤਿ. ਸਰੀਰੇ ਕਙ੍ਖਮਾਨੋ ‘‘ਦ੍ਵਤ੍ਤਿਂਸਮਹਾਪੁਰਿਸਵਰਲਕ੍ਖਣਪਟਿਮਣ੍ਡਿਤਂ ਨਾਮ ਸਰੀਰਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਗੁਣੇ ਕਙ੍ਖਮਾਨੋ ‘‘ਅਤੀਤਾਨਾਗਤਪਚ੍ਚੁਪ੍ਪਨ੍ਨਜਾਨਨਸਮਤ੍ਥਂ ਸਬ੍ਬਞ੍ਞੁਤਞਾਣਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਆਤਪ੍ਪਾਯਾਤਿ ਵੀਰਿਯਕਰਣਤ੍ਥਾਯ. ਅਨੁਯੋਗਾਯਾਤਿ ਪੁਨਪ੍ਪੁਨਂ ਯੋਗਾਯ. ਸਾਤਚ੍ਚਾਯਾਤਿ ਸਤਤਕਿਰਿਯਾਯ. ਪਧਾਨਾਯਾਤਿ ਪਦਹਨਤ੍ਥਾਯ. ਅਯਂ ਪਠਮੋ ਚੇਤੋਖਿਲੋਤਿ ਅਯਂ ਸਤ੍ਥਰਿ ਵਿਚਿਕਿਚ੍ਛਾਸਙ੍ਖਾਤੋ ਪਠਮੋ ਚਿਤ੍ਤਸ੍ਸ ਥਦ੍ਧਭਾਵੋ. ਧਮ੍ਮੇਤਿ ਪਰਿਯਤ੍ਤਿਧਮ੍ਮੇ ਚ ਪਟਿਵੇਧਧਮ੍ਮੇ ਚ. ਪਰਿਯਤ੍ਤਿਧਮ੍ਮੇ ਕਙ੍ਖਮਾਨੋ ‘‘ਤੇਪਿਟਕਂ ਬੁਦ੍ਧਵਚਨਂ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀਤਿ ਵਦਨ੍ਤਿ, ਅਤ੍ਥਿ ਨੁ ਖੋ ਏਤਂ ਨਤ੍ਥੀ’’ਤਿ ਕਙ੍ਖਤਿ. ਪਟਿਵੇਧਧਮ੍ਮੇ ਕਙ੍ਖਮਾਨੋ ‘‘ਵਿਪਸ੍ਸਨਾਨਿਸ੍ਸਨ੍ਦੋ ਮਗ੍ਗੋ ਨਾਮ, ਮਗ੍ਗਨਿਸ੍ਸਨ੍ਦੋ ਫਲਂ ਨਾਮ, ਸਬ੍ਬਸਙ੍ਖਾਰਪਟਿਨਿਸ੍ਸਗ੍ਗੋ ਨਿਬ੍ਬਾਨਂ ਨਾਮਾਤਿ ਵਦਨ੍ਤਿ, ਤਂ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਸਙ੍ਘੇ ਕਙ੍ਖਤੀਤਿ ‘‘ਉਜੁਪ੍ਪਟਿਪਨ੍ਨੋਤਿਆਦੀਨਂ ਪਦਾਨਂ ਵਸੇਨ ਏਵਰੂਪਂ ਪਟਿਪਦਂ ਪਟਿਪਨ੍ਨੋ ਚਤ੍ਤਾਰੋ ਮਗ੍ਗਟ੍ਠਾ ਚਤ੍ਤਾਰੋ ਫਲਟ੍ਠਾਤਿ ਅਟ੍ਠਨ੍ਨਂ ਪੁਗ੍ਗਲਾਨਂ ਸਮੂਹਭੂਤੋ ਸਙ੍ਘੋ ਨਾਮ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਸਿਕ੍ਖਾਯ ਕਙ੍ਖਮਾਨੋ ‘‘ਅਧਿਸੀਲਸਿਕ੍ਖਾ ਨਾਮ, ਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾ ਨਾਮਾਤਿ ਵਦਨ੍ਤਿ, ਸਾ ਅਤ੍ਥਿ ਨੁ ਖੋ ਨਤ੍ਥੀ’’ਤਿ ਕਙ੍ਖਤਿ. ਅਯਂ ਪਞ੍ਚਮੋਤਿ ਅਯਂ ਸਬ੍ਰਹ੍ਮਚਾਰੀਸੁ ਕੋਪਸਙ੍ਖਾਤੋ ਪਞ੍ਚਮੋ ਚਿਤ੍ਤਸ੍ਸ ਥਦ੍ਧਭਾਵੋ ਕਚਵਰਭਾਵੋ ਖਾਣੁਕਭਾਵੋ.

ਚੇਤਸੋਵਿਨਿਬਨ੍ਧਾਦਿਪਞ੍ਚਕਵਣ੍ਣਨਾ

੩੨੦. ਚੇਤਸੋਵਿਨਿਬਨ੍ਧਾਤਿ ਚਿਤ੍ਤਂ ਬਨ੍ਧਿਤ੍ਵਾ ਮੁਟ੍ਠਿਯਂ ਕਤ੍ਵਾ ਵਿਯ ਗਣ੍ਹਨ੍ਤੀਤਿ ਚੇਤਸੋਵਿਨਿਬਨ੍ਧਾ. ਕਾਮੇਤਿ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ. ਕਾਯੇਤਿ ਅਤ੍ਤਨੋ ਕਾਯੇ. ਰੂਪੇਤਿ ਬਹਿਦ੍ਧਾਰੂਪੇ. ਯਾਵਦਤ੍ਥਨ੍ਤਿ ਯਤ੍ਤਕਂ ਇਚ੍ਛਤਿ, ਤਤ੍ਤਕਂ. ਉਦਰਾਵਦੇਹਕਨ੍ਤਿ ਉਦਰਪੂਰਂ. ਤਞ੍ਹਿ ਉਦਰਂ ਅਵਦੇਹਨਤੋ ‘‘ਉਦਰਾਵਦੇਹਕ’’ਨ੍ਤਿ ਵੁਚ੍ਚਤਿ. ਸੇਯ੍ਯਸੁਖਨ੍ਤਿ ਮਞ੍ਚਪੀਠਸੁਖਂ. ਪਸ੍ਸਸੁਖਨ੍ਤਿ ਯਥਾ ਸਮ੍ਪਰਿਵਤ੍ਤਕਂ ਸਯਨ੍ਤਸ੍ਸ ਦਕ੍ਖਿਣਪਸ੍ਸਵਾਮਪਸ੍ਸਾਨਂ ਸੁਖਂ ਹੋਤਿ, ਏਵਂ ਉਪ੍ਪਨ੍ਨਂ ਸੁਖਂ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਅਨੁਯੁਤ੍ਤੋਤਿ ਯੁਤ੍ਤਪ੍ਪਯੁਤ੍ਤੋ ਵਿਹਰਤਿ. ਪਣਿਧਾਯਾਤਿ ਪਤ੍ਥਯਿਤ੍ਵਾ. ਬ੍ਰਹ੍ਮਚਰਿਯੇਨਾਤਿ ਮੇਥੁਨਵਿਰਤਿਬ੍ਰਹ੍ਮਚਰਿਯੇਨ. ਦੇਵੋ ਵਾ ਭਵਿਸ੍ਸਾਮੀਤਿ ਮਹੇਸਕ੍ਖਦੇਵੋ ਵਾ ਭਵਿਸ੍ਸਾਮਿ. ਦੇਵਞ੍ਞਤਰੋ ਵਾਤਿ ਅਪ੍ਪੇਸਕ੍ਖਦੇਵੇਸੁ ਵਾ ਅਞ੍ਞਤਰੋ.

ਇਨ੍ਦ੍ਰਿਯੇਸੁ ਪਠਮਪਞ੍ਚਕੇ ਲੋਕਿਯਾਨੇਵ ਕਥਿਤਾਨਿ. ਦੁਤਿਯਪਞ੍ਚਕੇ ਪਠਮਦੁਤਿਯਚਤੁਤ੍ਥਾਨਿ ਲੋਕਿਯਾਨਿ, ਤਤਿਯਪਞ੍ਚਮਾਨਿ ਲੋਕਿਯਲੋਕੁਤ੍ਤਰਾਨਿ. ਤਤਿਯਪਞ੍ਚਕੇ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਾਨਿ.

ਨਿਸ੍ਸਰਣਿਯਪਞ੍ਚਕਵਣ੍ਣਨਾ

੩੨੧. ਨਿਸ੍ਸਰਣਿਯਾਤਿ ਨਿਸ੍ਸਟਾ ਵਿਸਞ੍ਞੁਤ੍ਤਾ. ਧਾਤੁਯੋਤਿ ਅਤ੍ਤਸੁਞ੍ਞਸਭਾਵਾ. ਕਾਮੇ ਮਨਸਿਕਰੋਤੋਤਿ ਕਾਮੇ ਮਨਸਿਕਰੋਨ੍ਤਸ੍ਸ, ਅਸੁਭਜ੍ਝਾਨਤੋ ਵੁਟ੍ਠਾਯ ਅਗਦਂ ਗਹੇਤ੍ਵਾ ਵਿਸਂ ਵੀਮਂਸਨ੍ਤੋ ਵਿਯ ਵੀਮਂਸਨਤ੍ਥਂ ਕਾਮਾਭਿਮੁਖਂ ਚਿਤ੍ਤਂ ਪੇਸੇਨ੍ਤਸ੍ਸਾਤਿ ਅਤ੍ਥੋ. ਨ ਪਕ੍ਖਨ੍ਦਤੀਤਿ ਨ ਪਵਿਸਤਿ. ਨ ਪਸੀਦਤੀਤਿ ਪਸਾਦਂ ਨਾਪਜ੍ਜਤਿ. ਨ ਸਨ੍ਤਿਟ੍ਠਤੀਤਿ ਨ ਪਤਿਟ੍ਠਤਿ. ਨ ਵਿਮੁਚ੍ਚਤੀਤਿ ਨਾਧਿਮੁਚ੍ਚਤਿ. ਯਥਾ ਪਨ ਕੁਕ੍ਕੁਟਪਤ੍ਤਂ ਵਾ ਨ੍ਹਾਰੁਦਦ੍ਦੁਲਂ ਵਾ ਅਗ੍ਗਿਮ੍ਹਿ ਪਕ੍ਖਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਤ੍ਤਤਿ ਨ ਸਮ੍ਪਸਾਰਿਯਤਿ; ਏਵਂ ਪਤਿਲੀਯਤਿ ਨ ਪਸਾਰਿਯਤਿ. ਨੇਕ੍ਖਮ੍ਮਂ ਖੋ ਪਨਾਤਿ ਇਧ ਨੇਕ੍ਖਮ੍ਮਂ ਨਾਮ ਦਸਸੁ ਅਸੁਭੇਸੁ ਪਠਮਜ੍ਝਾਨਂ, ਤਦਸ੍ਸ ਮਨਸਿਕਰੋਤੋ ਚਿਤ੍ਤਂ ਪਕ੍ਖਨ੍ਦਤਿ. ਤਸ੍ਸ ਤਂ ਚਿਤ੍ਤਨ੍ਤਿ ਤਸ੍ਸ ਤਂ ਅਸੁਭਜ੍ਝਾਨਚਿਤ੍ਤਂ. ਸੁਗਤਨ੍ਤਿ ਗੋਚਰੇ ਗਤਤ੍ਤਾ ਸੁਟ੍ਠੁ ਗਤਂ. ਸੁਭਾਵਿਤਨ੍ਤਿ ਅਹਾਨਭਾਗਿਯਤ੍ਤਾ ਸੁਟ੍ਠੁ ਭਾਵਿਤਂ. ਸੁਵੁਟ੍ਠਿਤਨ੍ਤਿ ਕਾਮਤੋ ਸੁਟ੍ਠੁ ਵੁਟ੍ਠਿਤਂ. ਸੁਵਿਮੁਤ੍ਤਨ੍ਤਿ ਕਾਮੇਹਿ ਸੁਟ੍ਠੁ ਵਿਮੁਤ੍ਤਂ. ਕਾਮਪਚ੍ਚਯਾ ਆਸਵਾ ਨਾਮ ਕਾਮਹੇਤੁਕਾ ਚਤ੍ਤਾਰੋ ਆਸਵਾ. ਵਿਘਾਤਾਤਿ ਦੁਕ੍ਖਾ. ਪਰਿਲ਼ਾਹਾਤਿ ਕਾਮਰਾਗਪਰਿਲ਼ਾਹਾ. ਨ ਸੋ ਤਂ ਵੇਦਨਂ ਵੇਦੇਤੀਤਿ ਸੋ ਤਂ ਕਾਮਵੇਦਨਂ ਵਿਘਾਤਪਰਿਲ਼ਾਹਵੇਦਨਞ੍ਚ ਨ ਵੇਦਯਤਿ. ਇਦਮਕ੍ਖਾਤਂ ਕਾਮਾਨਂ ਨਿਸ੍ਸਰਣਨ੍ਤਿ ਇਦਂ ਅਸੁਭਜ੍ਝਾਨਂ ਕਾਮੇਹਿ ਨਿਸ੍ਸਟਤ੍ਤਾ ਕਾਮਾਨਂ ਨਿਸ੍ਸਰਣਨ੍ਤਿ ਅਕ੍ਖਾਤਂ. ਯੋ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਤਤਿਯਂ ਮਗ੍ਗਂ ਪਤ੍ਵਾ ਅਨਾਗਾਮਿਫਲੇਨ ਨਿਬ੍ਬਾਨਂ ਦਿਸ੍ਵਾ ਪੁਨ ਕਾਮਾ ਨਾਮ ਨਤ੍ਥੀਤਿ ਜਾਨਾਤਿ, ਤਸ੍ਸ ਚਿਤ੍ਤਂ ਅਚ੍ਚਨ੍ਤਨਿਸ੍ਸਰਣਮੇਵ. ਸੇਸਪਦੇਸੁਪਿ ਏਸੇਵ ਨਯੋ.

ਅਯਂ ਪਨ ਵਿਸੇਸੋ, ਦੁਤਿਯਵਾਰੇ ਮੇਤ੍ਤਾਝਾਨਾਨਿ ਬ੍ਯਾਪਾਦਸ੍ਸ ਨਿਸ੍ਸਰਣਂ ਨਾਮ. ਤਤਿਯਵਾਰੇ ਕਰੁਣਾਝਾਨਾਨਿ ਵਿਹਿਂਸਾਯ ਨਿਸ੍ਸਰਣਂ ਨਾਮ. ਚਤੁਤ੍ਥਵਾਰੇ ਅਰੂਪਜ੍ਝਾਨਾਨਿ ਰੂਪਾਨਂ ਨਿਸ੍ਸਰਣਂ ਨਾਮ. ਅਚ੍ਚਨ੍ਤਨਿਸ੍ਸਰਣੇ ਚੇਤ੍ਥ ਅਰਹਤ੍ਤਫਲਂ ਯੋਜੇਤਬ੍ਬਂ.

ਪਞ੍ਚਮਵਾਰੇ ਸਕ੍ਕਾਯਂ ਮਨਸਿਕਰੋਤੋਤਿ ਸੁਦ੍ਧਸਙ੍ਖਾਰੇ ਪਰਿਗ੍ਗਣ੍ਹਿਤ੍ਵਾ ਅਰਹਤ੍ਤਂ ਪਤ੍ਤਸ੍ਸ ਸੁਕ੍ਖਵਿਪਸ੍ਸਕਸ੍ਸ ਫਲਸਮਾਪਤ੍ਤਿਤੋ ਵੁਟ੍ਠਾਯ ਵੀਮਂਸਨਤ੍ਥਂ ਪਞ੍ਚੁਪਾਦਾਨਕ੍ਖਨ੍ਧਾਭਿਮੁਖਂ ਚਿਤ੍ਤਂ ਪੇਸੇਨ੍ਤਸ੍ਸ. ਇਦਮਕ੍ਖਾਤਂ ਸਕ੍ਕਾਯਨਿਸ੍ਸਰਣਨ੍ਤਿ ਇਦਂ ਅਰਹਤ੍ਤਮਗ੍ਗੇਨ ਚ ਫਲੇਨ ਚ ਨਿਬ੍ਬਾਨਂ ਦਿਸ੍ਵਾ ਠਿਤਸ੍ਸ ਭਿਕ੍ਖੁਨੋ ਪੁਨ ਸਕ੍ਕਾਯੋ ਨਤ੍ਥੀਤਿ ਉਪ੍ਪਨ੍ਨਂ ਅਰਹਤ੍ਤਫਲਸਮਾਪਤ੍ਤਿਚਿਤ੍ਤਂ ਸਕ੍ਕਾਯਸ੍ਸ ਨਿਸ੍ਸਰਣਨ੍ਤਿ ਅਕ੍ਖਾਤਂ.

ਵਿਮੁਤ੍ਤਾਯਤਨਪਞ੍ਚਕਵਣ੍ਣਨਾ

੩੨੨. ਵਿਮੁਤ੍ਤਾਯਤਨਾਨੀਤਿ ਵਿਮੁਚ੍ਚਨਕਾਰਣਾਨਿ. ਅਤ੍ਥਪਟਿਸਂਵੇਦਿਨੋਤਿ ਪਾਲ਼ਿਅਤ੍ਥਂ ਜਾਨਨ੍ਤਸ੍ਸ. ਧਮ੍ਮਪਟਿਸਂਵੇਦਿਨੋਤਿ ਪਾਲ਼ਿਂ ਜਾਨਨ੍ਤਸ੍ਸ. ਪਾਮੋਜ੍ਜਨ੍ਤਿ ਤਰੁਣਪੀਤਿ. ਪੀਤੀਤਿ ਤੁਟ੍ਠਾਕਾਰਭੂਤਾ ਬਲਵਪੀਤਿ. ਕਾਯੋਤਿ ਨਾਮਕਾਯੋ ਪਟਿਪਸ੍ਸਮ੍ਭਤਿ. ਸੁਖਂ ਵੇਦਯਤੀਤਿ ਸੁਖਂ ਪਟਿਲਭਤਿ. ਚਿਤ੍ਤਂ ਸਮਾਧਿਯਤੀਤਿ ਅਰਹਤ੍ਤਫਲਸਮਾਧਿਨਾ ਸਮਾਧਿਯਤਿ. ਅਯਞ੍ਹਿ ਤਂ ਧਮ੍ਮਂ ਸੁਣਨ੍ਤੋ ਆਗਤਾਗਤਟ੍ਠਾਨੇ ਝਾਨਵਿਪਸ੍ਸਨਾਮਗ੍ਗਫਲਾਨਿ ਜਾਨਾਤਿ, ਤਸ੍ਸ ਏਵਂ ਜਾਨਤੋ ਪੀਤਿ ਉਪ੍ਪਜ੍ਜਤਿ. ਸੋ ਤਸ੍ਸਾ ਪੀਤਿਯਾ ਅਨ੍ਤਰਾ ਓਸਕ੍ਕਿਤੁਂ ਨ ਦੇਨ੍ਤੋ ਉਪਚਾਰਕਮ੍ਮਟ੍ਠਾਨਿਕੋ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਚਿਤ੍ਤਂ ਸਮਾਧਿਯਤੀ’’ਤਿ. ਸੇਸੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ, ਸਮਾਧਿਨਿਮਿਤ੍ਤਨ੍ਤਿ ਅਟ੍ਠਤਿਂਸਾਯ ਆਰਮ੍ਮਣੇਸੁ ਅਞ੍ਞਤਰੋ ਸਮਾਧਿਯੇਵ ਸਮਾਧਿਨਿਮਿਤ੍ਤਂ. ਸੁਗ੍ਗਹਿਤਂ ਹੋਤੀਤਿਆਦੀਸੁ ਆਚਰਿਯਸਨ੍ਤਿਕੇ ਕਮ੍ਮਟ੍ਠਾਨਂ ਉਗ੍ਗਣ੍ਹਨ੍ਤੇਨ ਸੁਟ੍ਠੁ ਗਹਿਤਂ ਹੋਤਿ. ਸੁਟ੍ਠੁ ਮਨਸਿਕਤਨ੍ਤਿ ਸੁਟ੍ਠੁ ਉਪਧਾਰਿਤਂ. ਸੁਪ੍ਪਟਿਵਿਦ੍ਧਂ ਪਞ੍ਞਾਯਾਤਿ ਪਞ੍ਞਾਯ ਸੁਟ੍ਠੁ ਪਚ੍ਚਕ੍ਖਂ ਕਤਂ. ਤਸ੍ਮਿਂ ਧਮ੍ਮੇਤਿ ਤਸ੍ਮਿਂ ਕਮ੍ਮਟ੍ਠਾਨਪਾਲ਼ਿਧਮ੍ਮੇ.

ਵਿਮੁਤ੍ਤਿਪਰਿਪਾਚਨੀਯਾਤਿ ਵਿਮੁਤ੍ਤਿ ਵੁਚ੍ਚਤਿ ਅਰਹਤ੍ਤਂ, ਤਂ ਪਰਿਪਾਚੇਨ੍ਤੀਤਿ ਵਿਮੁਤ੍ਤਿਪਰਿਪਾਚਨੀਯਾ. ਅਨਿਚ੍ਚਸਞ੍ਞਾਤਿ ਅਨਿਚ੍ਚਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਅਨਿਚ੍ਚੇ ਦੁਕ੍ਖਸਞ੍ਞਾਤਿ ਦੁਕ੍ਖਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਦੁਕ੍ਖੇ ਅਨਤ੍ਤਸਞ੍ਞਾਤਿ ਅਨਤ੍ਤਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਪਹਾਨਸਞ੍ਞਾਤਿ ਪਹਾਨਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ. ਵਿਰਾਗਸਞ੍ਞਾਤਿ ਵਿਰਾਗਾਨੁਪਸ੍ਸਨਾਞਾਣੇ ਉਪ੍ਪਨ੍ਨਸਞ੍ਞਾ.

‘‘ਇਮੇ ਖੋ ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਛਬ੍ਬੀਸਤਿਯਾ ਪਞ੍ਚਕਾਨਂ ਵਸੇਨ ਤਿਂਸਸਤਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਪਞ੍ਚਕਵਣ੍ਣਨਾ ਨਿਟ੍ਠਿਤਾ.

ਛਕ੍ਕਵਣ੍ਣਨਾ

੩੨੩. ਇਤਿ ਪਞ੍ਚਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਛਕ੍ਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਅਜ੍ਝਤ੍ਤਿਕਾਨੀਤਿ ਅਜ੍ਝਤ੍ਤਜ੍ਝਤ੍ਤਿਕਾਨਿ. ਬਾਹਿਰਾਨੀਤਿ ਤਤੋ ਅਜ੍ਝਤ੍ਤਜ੍ਝਤ੍ਤਤੋ ਬਹਿਭੂਤਾਨਿ. ਵਿਤ੍ਥਾਰਤੋ ਪਨ ਆਯਤਨਕਥਾ ਵਿਸੁਦ੍ਧਿਮਗ੍ਗੇ ਕਥਿਤਾਵ. ਵਿਞ੍ਞਾਣਕਾਯਾਤਿ ਵਿਞ੍ਞਾਣਸਮੂਹਾ. ਚਕ੍ਖੁਵਿਞ੍ਞਾਣਨ੍ਤਿ ਚਕ੍ਖੁਪਸਾਦਨਿਸ੍ਸਿਤਂ ਕੁਸਲਾਕੁਸਲਵਿਪਾਕਵਿਞ੍ਞਾਣਂ. ਏਸ ਨਯੋ ਸਬ੍ਬਤ੍ਥ. ਚਕ੍ਖੁਸਮ੍ਫਸ੍ਸੋਤਿ ਚਕ੍ਖੁਨਿਸ੍ਸਿਤੋ ਸਮ੍ਫਸ੍ਸੋ. ਸੋਤਸਮ੍ਫਸ੍ਸਾਦੀਸੁਪਿ ਏਸੇਵ ਨਯੋ. ਮਨੋਸਮ੍ਫਸ੍ਸੋਤਿ ਇਮੇ ਦਸ ਸਮ੍ਫਸ੍ਸੇ ਠਪੇਤ੍ਵਾ ਸੇਸੋ ਸਬ੍ਬੋ ਮਨੋਸਮ੍ਫਸ੍ਸੋ ਨਾਮ. ਵੇਦਨਾਛਕ੍ਕਮ੍ਪਿ ਏਤੇਨੇਵ ਨਯੇਨ ਵੇਦਿਤਬ੍ਬਂ. ਰੂਪਸਞ੍ਞਾਤਿ ਰੂਪਂ ਆਰਮ੍ਮਣਂ ਕਤ੍ਵਾ ਉਪ੍ਪਨ੍ਨਾ ਸਞ੍ਞਾ. ਏਤੇਨੁਪਾਯੇਨ ਸੇਸਾਪਿ ਵੇਦਿਤਬ੍ਬਾ. ਚੇਤਨਾਛਕ੍ਕੇਪਿ ਏਸੇਵ ਨਯੋ. ਤਥਾ ਤਣ੍ਹਾਛਕ੍ਕੇ.

ਅਗਾਰਵੋਤਿ ਗਾਰਵਵਿਰਹਿਤੋ. ਅਪ੍ਪਤਿਸ੍ਸੋਤਿ ਅਪ੍ਪਤਿਸ੍ਸਯੋ ਅਨੀਚਵੁਤ੍ਤਿ. ਏਤ੍ਥ ਪਨ ਯੋ ਭਿਕ੍ਖੁ ਸਤ੍ਥਰਿ ਧਰਮਾਨੇ ਤੀਸੁ ਕਾਲੇਸੁ ਉਪਟ੍ਠਾਨਂ ਨ ਯਾਤਿ. ਸਤ੍ਥਰਿ ਅਨੁਪਾਹਨੇ ਚਙ੍ਕਮਨ੍ਤੇ ਸਉਪਾਹਨੋ ਚਙ੍ਕਮਤਿ, ਨੀਚੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮਤਿ, ਹੇਟ੍ਠਾ ਵਸਨ੍ਤੇ ਉਪਰਿ ਵਸਤਿ, ਸਤ੍ਥੁਦਸ੍ਸਨਟ੍ਠਾਨੇ ਉਭੋ ਅਂਸੇ ਪਾਰੁਪਤਿ, ਛਤ੍ਤਂ ਧਾਰੇਤਿ, ਉਪਾਹਨਂ ਧਾਰੇਤਿ, ਨਹਾਯਤਿ, ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰੋਤਿ. ਪਰਿਨਿਬ੍ਬੁਤੇ ਪਨ ਚੇਤਿਯਂ ਵਨ੍ਦਿਤੁਂ ਨ ਗਚ੍ਛਤਿ, ਚੇਤਿਯਸ੍ਸ ਪਞ੍ਞਾਯਨਟ੍ਠਾਨੇ ਸਤ੍ਥੁਦਸ੍ਸਨਟ੍ਠਾਨੇ ਵੁਤ੍ਤਂ ਸਬ੍ਬਂ ਕਰੋਤਿ, ਅਯਂ ਸਤ੍ਥਰਿ ਅਗਾਰਵੋ ਨਾਮ. ਯੋ ਪਨ ਧਮ੍ਮਸ੍ਸਵਨੇ ਸਂਘੁਟ੍ਠੇ ਸਕ੍ਕਚ੍ਚਂ ਨ ਗਚ੍ਛਤਿ, ਸਕ੍ਕਚ੍ਚਂ ਧਮ੍ਮਂ ਨ ਸੁਣਾਤਿ, ਸਮੁਲ੍ਲਪਨ੍ਤੋ ਨਿਸੀਦਤਿ, ਸਕ੍ਕਚ੍ਚਂ ਨ ਗਣ੍ਹਾਤਿ, ਨ ਵਾਚੇਤਿ, ਅਯਂ ਧਮ੍ਮੇ ਅਗਾਰਵੋ ਨਾਮ. ਯੋ ਪਨ ਥੇਰੇਨ ਭਿਕ੍ਖੁਨਾ ਅਨਜ੍ਝਿਟ੍ਠੋ ਧਮ੍ਮਂ ਦੇਸੇਤਿ, ਨਿਸੀਦਤਿ, ਪਞ੍ਹਂ ਕਥੇਤਿ, ਵੁਡ੍ਢੇ ਭਿਕ੍ਖੂ ਘਟ੍ਟੇਨ੍ਤੋ ਗਚ੍ਛਤਿ, ਤਿਟ੍ਠਤਿ, ਨਿਸੀਦਤਿ, ਦੁਸ੍ਸਪਲ੍ਲਤ੍ਥਿਕਂ ਵਾ ਹਤ੍ਥਪਲ੍ਲਤ੍ਥਿਕਂ ਵਾ ਕਰੋਤਿ, ਸਙ੍ਘਮਜ੍ਝੇ ਉਭੋ ਅਂਸੇ ਪਾਰੁਪਤਿ, ਛਤ੍ਤੁਪਾਹਨਂ ਧਾਰੇਤਿ, ਅਯਂ ਸਙ੍ਘੇ ਅਗਾਰਵੋ ਨਾਮ. ਏਕਭਿਕ੍ਖੁਸ੍ਮਿਮ੍ਪਿ ਹਿ ਅਗਾਰਵੇ ਕਤੇ ਸਙ੍ਘੇ ਅਗਾਰਵੋ ਕਤੋਵ ਹੋਤਿ. ਤਿਸ੍ਸੋ ਸਿਕ੍ਖਾ ਪਨ ਅਪੂਰਯਮਾਨੋਵ ਸਿਕ੍ਖਾਯ ਅਗਾਰਵੋ ਨਾਮ. ਅਪ੍ਪਮਾਦਲਕ੍ਖਣਂ ਅਨਨੁਬ੍ਰੂਹਯਮਾਨੋ ਅਪ੍ਪਮਾਦੇ ਅਗਾਰਵੋ ਨਾਮ. ਦੁਵਿਧਮ੍ਪਿ ਪਟਿਸਨ੍ਥਾਰਂ ਅਕਰੋਨ੍ਤੋ ਪਟਿਸਨ੍ਥਾਰੇ ਅਗਾਰਵੋ ਨਾਮ. ਛ ਗਾਰਵਾ ਵੁਤ੍ਤਪ੍ਪਟਿਪਕ੍ਖਵਸੇਨ ਵੇਦਿਤਬ੍ਬਾ.

ਸੋਮਨਸ੍ਸੂਪਵਿਚਾਰਾਤਿ ਸੋਮਨਸ੍ਸਸਮ੍ਪਯੁਤ੍ਤਾ ਵਿਚਾਰਾ. ਸੋਮਨਸ੍ਸਟ੍ਠਾਨਿਯਨ੍ਤਿ ਸੋਮਨਸ੍ਸਕਾਰਣਭੂਤਂ. ਉਪਵਿਚਰਤੀਤਿ ਵਿਤਕ੍ਕੇਨ ਵਿਤਕ੍ਕੇਤ੍ਵਾ ਵਿਚਾਰੇਨ ਪਰਿਚ੍ਛਿਨ੍ਦਤਿ. ਏਸ ਨਯੋ ਸਬ੍ਬਤ੍ਥ. ਦੋਮਨਸ੍ਸੂਪਵਿਚਾਰਾਪਿ ਏਵਮੇਵ ਵੇਦਿਤਬ੍ਬਾ. ਤਥਾ ਉਪੇਕ੍ਖੂਪਵਿਚਾਰਾ. ਸਾਰਣੀਯਧਮ੍ਮਾ ਹੇਟ੍ਠਾ ਵਿਤ੍ਥਾਰਿਤਾ. ਦਿਟ੍ਠਿਸਾਮਞ੍ਞਗਤੋਤਿ ਇਮਿਨਾ ਪਨ ਪਦੇਨ ਕੋਸਮ੍ਬਕਸੁਤ੍ਤੇ ਪਠਮਮਗ੍ਗੋ ਕਥਿਤੋ. ਇਧ ਚਤ੍ਤਾਰੋਪਿ ਮਗ੍ਗਾ.

ਵਿਵਾਦਮੂਲਛਕ੍ਕਵਣ੍ਣਨਾ

੩੨੫. ਵਿਵਾਦਮੂਲਾਨੀਤਿ ਵਿਵਾਦਸ੍ਸ ਮੂਲਾਨਿ. ਕੋਧਨੋਤਿ ਕੁਜ੍ਝਨਲਕ੍ਖਣੇਨ ਕੋਧੇਨ ਸਮਨ੍ਨਾਗਤੋ. ਉਪਨਾਹੀਤਿ ਵੇਰਅਪ੍ਪਟਿਨਿਸ੍ਸਗ੍ਗਲਕ੍ਖਣੇਨ ਉਪਨਾਹੇਨ ਸਮਨ੍ਨਾਗਤੋ. ਅਹਿਤਾਯ ਦੁਕ੍ਖਾਯ ਦੇਵਮਨੁਸ੍ਸਾਨਨ੍ਤਿ ਦ੍ਵਿਨ੍ਨਂ ਭਿਕ੍ਖੂਨਂ ਵਿਵਾਦੋ ਕਥਂ ਦੇਵਮਨੁਸ੍ਸਾਨਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤਿ. ਕੋਸਮ੍ਬਕਕ੍ਖਨ੍ਧਕੇ ਵਿਯ ਦ੍ਵੀਸੁ ਭਿਕ੍ਖੂਸੁ ਵਿਵਾਦਂ ਆਪਨ੍ਨੇਸੁ ਤਸ੍ਮਿਂ ਵਿਹਾਰੇ ਤੇਸਂ ਅਨ੍ਤੇਵਾਸਿਕਾ ਵਿਵਦਨ੍ਤਿ. ਤੇਸਂ ਓਵਾਦਂ ਗਣ੍ਹਨ੍ਤੋ ਭਿਕ੍ਖੁਨਿਸਙ੍ਘੋ ਵਿਵਦਤਿ. ਤਤੋ ਤੇਸਂ ਉਪਟ੍ਠਾਕਾ ਵਿਵਦਨ੍ਤਿ. ਅਥ ਮਨੁਸ੍ਸਾਨਂ ਆਰਕ੍ਖਦੇਵਤਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਤਤ੍ਥ ਧਮ੍ਮਵਾਦੀਨਂ ਆਰਕ੍ਖਦੇਵਤਾ ਧਮ੍ਮਵਾਦਿਨਿਯੋ ਹੋਨ੍ਤਿ ਅਧਮ੍ਮਵਾਦੀਨਂ ਅਧਮ੍ਮਵਾਦਿਨਿਯੋ. ਤਤੋ ਆਰਕ੍ਖਦੇਵਤਾਨਂ ਮਿਤ੍ਤਾ ਭੁਮ੍ਮਾ ਦੇਵਤਾ ਭਿਜ੍ਜਨ੍ਤਿ. ਏਵਂ ਪਰਮ੍ਪਰਾ ਯਾਵ ਬ੍ਰਹ੍ਮਲੋਕਾ ਠਪੇਤ੍ਵਾ ਅਰਿਯਸਾਵਕੇ ਸਬ੍ਬੇ ਦੇਵਮਨੁਸ੍ਸਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਧਮ੍ਮਵਾਦੀਹਿ ਪਨ ਅਧਮ੍ਮਵਾਦਿਨੋਵ ਬਹੁਤਰਾ ਹੋਨ੍ਤਿ. ਤਤੋ ‘‘ਯਂ ਬਹੁਕੇਹਿ ਗਹਿਤਂ, ਤਂ ਤਚ੍ਛ’’ਨ੍ਤਿ ਧਮ੍ਮਂ ਵਿਸ੍ਸਜ੍ਜੇਤ੍ਵਾ ਬਹੁਤਰਾਵ ਅਧਮ੍ਮਂ ਗਣ੍ਹਨ੍ਤਿ. ਤੇ ਅਧਮ੍ਮਂ ਪੁਰਕ੍ਖਤ੍ਵਾ ਵਦਨ੍ਤਾ ਅਪਾਯੇਸੁ ਨਿਬ੍ਬਤ੍ਤਨ੍ਤਿ. ਏਵਂ ਦ੍ਵਿਨ੍ਨਂ ਭਿਕ੍ਖੂਨਂ ਵਿਵਾਦੋ ਦੇਵਮਨੁਸ੍ਸਾਨਂ ਅਹਿਤਾਯ ਦੁਕ੍ਖਾਯ ਹੋਤਿ.

ਅਜ੍ਝਤ੍ਤਂ ਵਾਤਿ ਤੁਮ੍ਹਾਕਂ ਅਬ੍ਭਨ੍ਤਰਪਰਿਸਾਯ. ਬਹਿਦ੍ਧਾ ਵਾਤਿ ਪਰੇਸਂ ਪਰਿਸਾਯ.

ਮਕ੍ਖੀਤਿ ਪਰੇਸਂ ਗੁਣਮਕ੍ਖਨਲਕ੍ਖਣੇਨ ਮਕ੍ਖੇਨ ਸਮਨ੍ਨਾਗਤੋ. ਪਲ਼ਾਸੀਤਿ ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਸਮਨ੍ਨਾਗਤੋ. ਇਸ੍ਸੁਕੀਤਿ ਪਰਸਕ੍ਕਾਰਾਦੀਨਿ ਇਸ੍ਸਾਯਨਲਕ੍ਖਣਾਯ ਇਸ੍ਸਾਯ ਸਮਨ੍ਨਾਗਤੋ. ਮਚ੍ਛਰੀਤਿ ਆਵਾਸਮਚ੍ਛਰਿਯਾਦੀਹਿ ਸਮਨ੍ਨਾਗਤੋ. ਸਠੋਤਿ ਕੇਰਾਟਿਕੋ. ਮਾਯਾਵੀਤਿ ਕਤਪਾਪਪਟਿਚ੍ਛਾਦਕੋ. ਪਾਪਿਚ੍ਛੋਤਿ ਅਸਨ੍ਤਸਮ੍ਭਾਵਨਿਚ੍ਛਕੋ ਦੁਸ੍ਸੀਲੋ. ਮਿਚ੍ਛਾਦਿਟ੍ਠੀਤਿ ਨਤ੍ਥਿਕਵਾਦੀ ਅਹੇਤੁਕਵਾਦੀ ਅਕਿਰਿਯਵਾਦੀ. ਸਨ੍ਦਿਟ੍ਠਿਪਰਾਮਾਸੀਤਿ ਸਯਂ ਦਿਟ੍ਠਿਮੇਵ ਪਰਾਮਸਤਿ. ਆਧਾਨਗ੍ਗਾਹੀਤਿ ਦਲ਼੍ਹਗ੍ਗਾਹੀ. ਦੁਪ੍ਪਟਿਨਿਸ੍ਸਗ੍ਗੀਤਿ ਨ ਸਕ੍ਕਾ ਹੋਤਿ ਗਹਿਤਂ ਵਿਸ੍ਸਜ੍ਜਾਪੇਤੁਂ.

ਪਥਵੀਧਾਤੂਤਿ ਪਤਿਟ੍ਠਾਧਾਤੁ. ਆਪੋਧਾਤੂਤਿ ਆਬਨ੍ਧਨਧਾਤੁ. ਤੇਜੋਧਾਤੂਤਿ ਪਰਿਪਾਚਨਧਾਤੁ. ਵਾਯੋਧਾਤੂਤਿ ਵਿਤ੍ਥਮ੍ਭਨਧਾਤੁ. ਆਕਾਸਧਾਤੂਤਿ ਅਸਮ੍ਫੁਟ੍ਠਧਾਤੁ. ਵਿਞ੍ਞਾਣਧਾਤੂਤਿ ਵਿਜਾਨਨਧਾਤੁ.

ਨਿਸ੍ਸਰਣਿਯਛਕ੍ਕਵਣ੍ਣਨਾ

੩੨੬. ਨਿਸ੍ਸਰਣਿਯਾ ਧਾਤੁਯੋਤਿ ਨਿਸ੍ਸਟਧਾਤੁਯੋਵ. ਪਰਿਯਾਦਾਯ ਤਿਟ੍ਠਤੀਤਿ ਪਰਿਯਾਦਿਯਿਤ੍ਵਾ ਹਾਪੇਤ੍ਵਾ ਤਿਟ੍ਠਤਿ. ‘ਮਾ ਹੇਵਨ੍ਤਿਸ੍ਸ ਵਚਨੀਯੋ’ਤਿ ਯਸ੍ਮਾ ਅਭੂਤਂ ਬ੍ਯਾਕਰਣਂ ਬ੍ਯਾਕਰੋਤਿ, ਤਸ੍ਮਾ ਮਾ ਏਵਂ ਭਣੀਤਿ ਵਤ੍ਤਬ੍ਬੋ. ਯਦਿਦਂ ਮੇਤ੍ਤਾਚੇਤੋਵਿਮੁਤ੍ਤੀਤਿ ਯਾ ਅਯਂ ਮੇਤ੍ਤਾਚੇਤੋਵਿਮੁਤ੍ਤਿ, ਇਦਂ ਨਿਸ੍ਸਰਣਂ ਬ੍ਯਾਪਾਦਸ੍ਸ, ਬ੍ਯਾਪਾਦਤੋ ਨਿਸ੍ਸਟਾਤਿ ਅਤ੍ਥੋ. ਯੋ ਪਨ ਮੇਤ੍ਤਾਯ ਤਿਕਚਤੁਕ੍ਕਜ੍ਝਾਨਤੋ ਵੁਟ੍ਠਿਤੋ ਸਙ੍ਖਾਰੇ ਸਮ੍ਮਸਿਤ੍ਵਾ ਤਤਿਯਮਗ੍ਗਂ ਪਤ੍ਵਾ ‘‘ਪੁਨ ਬ੍ਯਾਪਾਦੋ ਨਤ੍ਥੀ’’ਤਿ ਤਤਿਯਫਲੇਨ ਨਿਬ੍ਬਾਨਂ ਪਸ੍ਸਤਿ, ਤਸ੍ਸ ਚਿਤ੍ਤਂ ਅਚ੍ਚਨ੍ਤਂ ਨਿਸ੍ਸਰਣਂ ਬ੍ਯਾਪਾਦਸ੍ਸ. ਏਤੇਨੁਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਅਨਿਮਿਤ੍ਤਾ ਚੇਤੋਵਿਮੁਤ੍ਤੀਤਿ ਅਰਹਤ੍ਤਫਲਸਮਾਪਤ੍ਤਿ. ਸਾ ਹਿ ਰਾਗਨਿਮਿਤ੍ਤਾਦੀਨਞ੍ਚੇਵ ਰੂਪਨਿਮਿਤ੍ਤਾਦੀਨਞ੍ਚ ਨਿਚ੍ਚਨਿਮਿਤ੍ਤਾਦੀਨਞ੍ਚ ਅਭਾਵਾ ‘‘ਅਨਿਮਿਤ੍ਤਾ’’ਤਿ ਵੁਤ੍ਤਾ. ਨਿਮਿਤ੍ਤਾਨੁਸਾਰੀਤਿ ਵੁਤ੍ਤਪ੍ਪਭੇਦਂ ਨਿਮਿਤ੍ਤਂ ਅਨੁਸਰਤੀਤਿ ਨਿਮਿਤ੍ਤਾਨੁਸਾਰੀ.

ਅਸ੍ਮੀਤਿ ਅਸ੍ਮਿਮਾਨੋ. ਅਯਮਹਮਸ੍ਮੀਤਿ ਪਞ੍ਚਸੁ ਖਨ੍ਧੇਸੁ ਅਯਂ ਨਾਮ ਅਹਂ ਅਸ੍ਮੀਤਿ ਏਤ੍ਤਾਵਤਾ ਅਰਹਤ੍ਤਂ ਬ੍ਯਾਕਤਂ ਹੋਤਿ. ਵਿਚਿਕਿਚ੍ਛਾਕਥਂਕਥਾਸਲ੍ਲਨ੍ਤਿ ਵਿਚਿਕਿਚ੍ਛਾਭੂਤਂ ਕਥਂਕਥਾਸਲ੍ਲਂ. ‘ਮਾ ਹੇਵਨ੍ਤਿਸ੍ਸ ਵਚਨੀਯੋ’ਤਿ ਸਚੇ ਤੇ ਪਠਮਮਗ੍ਗਵਜ੍ਝਾ ਵਿਚਿਕਿਚ੍ਛਾ ਉਪ੍ਪਜ੍ਜਤਿ, ਅਰਹਤ੍ਤਬ੍ਯਾਕਰਣਂ ਮਿਚ੍ਛਾ ਹੋਤਿ, ਤਸ੍ਮਾ ਮਾ ਅਭੂਤਂ ਭਣੀਤਿ ਵਾਰੇਤਬ੍ਬੋ. ਅਸ੍ਮਿਮਾਨਸਮੁਗ੍ਘਾਤੋਤਿ ਅਰਹਤ੍ਤਮਗ੍ਗੋ. ਅਰਹਤ੍ਤਮਗ੍ਗਫਲਵਸੇਨ ਹਿ ਨਿਬ੍ਬਾਨੇ ਦਿਟ੍ਠੇ ਪੁਨ ਅਸ੍ਮਿਮਾਨੋ ਨਤ੍ਥੀਤਿ ਅਰਹਤ੍ਤਮਗ੍ਗੋ ਅਸ੍ਮਿਮਾਨਸਮੁਗ੍ਘਾਤੋਤਿ ਵੁਤ੍ਤੋ.

ਅਨੁਤ੍ਤਰਿਯਾਦਿਛਕ੍ਕਵਣ੍ਣਨਾ

੩੨੭. ਅਨੁਤ੍ਤਰਿਯਾਨੀਤਿ ਅਨੁਤ੍ਤਰਾਨਿ ਜੇਟ੍ਠਕਾਨਿ. ਦਸ੍ਸਨੇਸੁ ਅਨੁਤ੍ਤਰਿਯਂ ਦਸ੍ਸਨਾਨੁਤ੍ਤਰਿਯਂ. ਸੇਸਪਦੇਸੁਪਿ ਏਸੇਵ ਨਯੋ. ਤਤ੍ਥ ਹਤ੍ਥਿਰਤਨਾਦੀਨਂ ਦਸ੍ਸਨਂ ਨ ਦਸ੍ਸਨਾਨੁਤ੍ਤਰਿਯਂ, ਨਿਵਿਟ੍ਠਸਦ੍ਧਸ੍ਸ ਪਨ ਨਿਵਿਟ੍ਠਪੇਮਵਸੇਨ ਦਸਬਲਸ੍ਸ ਵਾ ਭਿਕ੍ਖੁਸਙ੍ਘਸ੍ਸ ਵਾ ਕਸਿਣਾਸੁਭਨਿਮਿਤ੍ਤਾਦੀਨਂ ਵਾ ਅਞ੍ਞਤਰਸ੍ਸ ਦਸ੍ਸਨਂ ਦਸ੍ਸਨਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਗੁਣਕਥਾਸਵਨਂ ਨ ਸਵਨਾਨੁਤ੍ਤਰਿਯਂ, ਨਿਵਿਟ੍ਠਸਦ੍ਧਸ੍ਸ ਪਨ ਨਿਵਿਟ੍ਠਪੇਮਵਸੇਨ ਤਿਣ੍ਣਂ ਵਾ ਰਤਨਾਨਂ ਗੁਣਕਥਾਸਵਨਂ ਤੇਪਿਟਕਬੁਦ੍ਧਵਚਨਸਵਨਂ ਵਾ ਸਵਨਾਨੁਤ੍ਤਰਿਯਂ ਨਾਮ. ਮਣਿਰਤਨਾਦਿਲਾਭੋ ਨ ਲਾਭਾਨੁਤ੍ਤਰਿਯਂ, ਸਤ੍ਤਵਿਧਅਰਿਯਧਨਲਾਭੋ ਪਨ ਲਾਭਾਨੁਤ੍ਤਰਿਯਂ ਨਾਮ. ਹਤ੍ਥਿਸਿਪ੍ਪਾਦਿਸਿਕ੍ਖਨਂ ਨ ਸਿਕ੍ਖਾਨੁਤ੍ਤਰਿਯਂ, ਸਿਕ੍ਖਤ੍ਤਯਪੂਰਣਂ ਪਨ ਸਿਕ੍ਖਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਪਾਰਿਚਰਿਯਾ ਨ ਪਾਰਿਚਰਿਯਾਨੁਤ੍ਤਰਿਯਂ, ਤਿਣ੍ਣਂ ਪਨ ਰਤਨਾਨਂ ਪਾਰਿਚਰਿਯਾ ਪਾਰਿਚਰਿਯਾਨੁਤ੍ਤਰਿਯਂ ਨਾਮ. ਖਤ੍ਤਿਯਾਦੀਨਂ ਗੁਣਾਨੁਸ੍ਸਰਣਂ ਨਾਨੁਸ੍ਸਤਾਨੁਤ੍ਤਰਿਯਂ, ਤਿਣ੍ਣਂ ਪਨ ਰਤਨਾਨਂ ਗੁਣਾਨੁਸ੍ਸਰਣਂ ਅਨੁਸ੍ਸਤਾਨੁਤ੍ਤਰਿਯਂ ਨਾਮ.

ਅਨੁਸ੍ਸਤਿਯੋਵ ਅਨੁਸ੍ਸਤਿਟ੍ਠਾਨਾਨਿ ਨਾਮ. ਬੁਦ੍ਧਾਨੁਸ੍ਸਤੀਤਿ ਬੁਦ੍ਧਸ੍ਸ ਗੁਣਾਨੁਸ੍ਸਰਣਂ. ਏਵਂ ਅਨੁਸ੍ਸਰਤੋ ਹਿ ਪੀਤਿ ਉਪ੍ਪਜ੍ਜਤਿ. ਸੋ ਤਂ ਪੀਤਿਂ ਖਯਤੋ ਵਯਤੋ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਉਪਚਾਰਕਮ੍ਮਟ੍ਠਾਨਂ ਨਾਮੇਤਂ ਗਿਹੀਨਮ੍ਪਿ ਲਬ੍ਭਤਿ, ਏਸ ਨਯੋ ਸਬ੍ਬਤ੍ਥ. ਵਿਤ੍ਥਾਰਕਥਾ ਪਨੇਤ੍ਥ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਸਤਤਵਿਹਾਰਛਕ੍ਕਵਣ੍ਣਨਾ

੩੨੮. ਸਤਤਵਿਹਾਰਾਤਿ ਖੀਣਾਸਵਸ੍ਸ ਨਿਚ੍ਚਵਿਹਾਰਾ. ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਚਕ੍ਖੁਦ੍ਵਾਰਾਰਮ੍ਮਣੇ ਆਪਾਥਗਤੇ ਤਂ ਰੂਪਂ ਚਕ੍ਖੁਵਿਞ੍ਞਾਣੇਨ ਦਿਸ੍ਵਾ ਜਵਨਕ੍ਖਣੇ ਇਟ੍ਠੇ ਅਰਜ੍ਜਨ੍ਤੋ ਨੇਵ ਸੁਮਨੋ ਹੋਤਿ, ਅਨਿਟ੍ਠੇ ਅਦੁਸ੍ਸਨ੍ਤੋ ਨ ਦੁਮ੍ਮਨੋ. ਅਸਮਪੇਕ੍ਖਨੇ ਮੋਹਂ ਅਨੁਪ੍ਪਾਦੇਨ੍ਤੋ ਉਪੇਕ੍ਖਕੋ ਵਿਹਰਤਿ ਮਜ੍ਝਤ੍ਤੋ, ਸਤਿਯਾ ਯੁਤ੍ਤਤ੍ਤਾ ਸਤੋ, ਸਮ੍ਪਜਞ੍ਞੇਨ ਯੁਤ੍ਤਤ੍ਤਾ ਸਮ੍ਪਜਾਨੋ. ਸੇਸਪਦੇਸੁਪਿ ਏਸੇਵ ਨਯੋ. ਇਤਿ ਛਸੁਪਿ ਦ੍ਵਾਰੇਸੁ ਉਪੇਕ੍ਖਕੋ ਵਿਹਰਤੀਤਿ ਇਮਿਨਾ ਛਲ਼ਙ੍ਗੁਪੇਕ੍ਖਾ ਕਥਿਤਾ. ਸਮ੍ਪਜਾਨੋਤਿ ਵਚਨਤੋ ਪਨ ਚਤ੍ਤਾਰਿ ਞਾਣਸਮ੍ਪਯੁਤ੍ਤਚਿਤ੍ਤਾਨਿ ਲਬ੍ਭਨ੍ਤਿ. ਸਤਤਵਿਹਾਰਾਤਿ ਵਚਨਤੋ ਅਟ੍ਠਪਿ ਮਹਾਚਿਤ੍ਤਾਨਿ ਲਬ੍ਭਨ੍ਤਿ ਅਰਜ੍ਜਨ੍ਤੋ ਅਦੁਸ੍ਸਨ੍ਤੋਤਿ ਵਚਨਤੋ ਦਸਪਿ ਚਿਤ੍ਤਾਨਿ ਲਬ੍ਭਨ੍ਤਿ. ਸੋਮਨਸ੍ਸਂ ਕਥਂ ਲਬ੍ਭਤੀਤਿ ਚੇ ਆਸੇਵਨਤੋ ਲਬ੍ਭਤਿ.

ਅਭਿਜਾਤਿਛਕ੍ਕਵਣ੍ਣਨਾ

੩੨੯. ਅਭਿਜਾਤਿਯੋਤਿ ਜਾਤਿਯੋ. ਕਣ੍ਹਾਭਿਜਾਤਿਕੋ ਸਮਾਨੋਤਿ ਕਣ੍ਹੇ ਨੀਚਕੁਲੇ ਜਾਤੋ ਹੁਤ੍ਵਾ. ਕਣ੍ਹਂ ਧਮ੍ਮਂ ਅਭਿਜਾਯਤੀਤਿ ਕਾਲ਼ਕਂ ਦਸਦੁਸ੍ਸੀਲ੍ਯਧਮ੍ਮਂ ਪਸਵਤਿ ਕਰੋਤਿ. ਸੋ ਤਂ ਅਭਿਜਾਯਿਤ੍ਵਾ ਨਿਰਯੇ ਨਿਬ੍ਬਤ੍ਤਤਿ. ਸੁਕ੍ਕਂ ਧਮ੍ਮਨ੍ਤਿ ਅਹਂ ਪੁਬ੍ਬੇਪਿ ਪੁਞ੍ਞਾਨਂ ਅਕਤਤ੍ਤਾ ਨੀਚਕੁਲੇ ਨਿਬ੍ਬਤ੍ਤੋ. ਇਦਾਨਿ ਪੁਞ੍ਞਂ ਕਰੋਮੀਤਿ ਪੁਞ੍ਞਸਙ੍ਖਾਤਂ ਪਣ੍ਡਰਂ ਧਮ੍ਮਂ ਅਭਿਜਾਯਤਿ. ਸੋ ਤੇਨ ਸਗ੍ਗੇ ਨਿਬ੍ਬਤ੍ਤਤਿ. ਅਕਣ੍ਹਂ ਅਸੁਕ੍ਕਂ ਨਿਬ੍ਬਾਨਨ੍ਤਿ ਨਿਬ੍ਬਾਨਞ੍ਹਿ ਸਚੇ ਕਣ੍ਹਂ ਭਵੇਯ੍ਯ, ਕਣ੍ਹਵਿਪਾਕਂ ਦਦੇਯ੍ਯ. ਸਚੇ ਸੁਕ੍ਕਂ, ਸੁਕ੍ਕਵਿਪਾਕਂ ਦਦੇਯ੍ਯ. ਦ੍ਵਿਨ੍ਨਮ੍ਪਿ ਅਪ੍ਪਦਾਨਤੋ ਪਨ ‘‘ਅਕਣ੍ਹਂ ਅਸੁਕ੍ਕ’’ਨ੍ਤਿ ਵੁਤ੍ਤਂ. ਨਿਬ੍ਬਾਨਞ੍ਚ ਨਾਮ ਇਮਸ੍ਮਿਂ ਅਤ੍ਥੇ ਅਰਹਤ੍ਤਂ ਅਧਿਪ੍ਪੇਤਂ. ਤਞ੍ਹਿ ਕਿਲੇਸਨਿਬ੍ਬਾਨਨ੍ਤੇ ਜਾਤਤ੍ਤਾ ਨਿਬ੍ਬਾਨਂ ਨਾਮ. ਤਂ ਏਸ ਅਭਿਜਾਯਤਿ ਪਸਵਤਿ ਕਰੋਤਿ. ਸੁਕ੍ਕਾਭਿਜਾਤਿਕੋ ਸਮਾਨੋਤਿ ਸੁਕ੍ਕੇ ਉਚ੍ਚਕੁਲੇ ਜਾਤੋ ਹੁਤ੍ਵਾ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਨਿਬ੍ਬੇਧਭਾਗਿਯਛਕ੍ਕਵਣ੍ਣਨਾ

ਨਿਬ੍ਬੇਧਭਾਗਿਯਾਤਿ ਨਿਬ੍ਬੇਧੋ ਵੁਚ੍ਚਤਿ ਨਿਬ੍ਬਾਨਂ, ਤਂ ਭਜਨ੍ਤਿ ਉਪਗਚ੍ਛਨ੍ਤੀਤਿ ਨਿਬ੍ਬੇਧਭਾਗਿਯਾ. ਅਨਿਚ੍ਚਸਞ੍ਞਾਦਯੋ ਪਞ੍ਚਕੇ ਵੁਤ੍ਤਾ. ਨਿਰੋਧਾਨੁਪਸ੍ਸਨਾਞਾਣੇ ਸਞ੍ਞਾ ਨਿਰੋਧਸਞ੍ਞਾ ਨਾਮ.

‘‘ਇਮੇ ਖੋ, ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਦ੍ਵਾਵੀਸਤਿਯਾ ਛਕ੍ਕਾਨਂ ਵਸੇਨ ਬਾਤ੍ਤਿਂਸਸਤਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਛਕ੍ਕਵਣ੍ਣਨਾ ਨਿਟ੍ਠਿਤਾ.

ਸਤ੍ਤਕਵਣ੍ਣਨਾ

੩੩੦. ਇਤਿ ਛਕ੍ਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਸਤ੍ਤਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ.

ਤਤ੍ਥ ਸਮ੍ਪਤ੍ਤਿਪਟਿਲਾਭਟ੍ਠੇਨ ਸਦ੍ਧਾਵ ਧਨਂ ਸਦ੍ਧਾਧਨਂ. ਏਸ ਨਯੋ ਸਬ੍ਬਤ੍ਥ. ਪਞ੍ਞਾਧਨਂ ਪਨੇਤ੍ਥ ਸਬ੍ਬਸੇਟ੍ਠਂ. ਪਞ੍ਞਾਯ ਹਿ ਠਤ੍ਵਾ ਤੀਣਿ ਸੁਚਰਿਤਾਨਿ ਪਞ੍ਚਸੀਲਾਨਿ ਦਸਸੀਲਾਨਿ ਪੂਰੇਤ੍ਵਾ ਸਗ੍ਗੂਪਗਾ ਹੋਨ੍ਤਿ, ਸਾਵਕਪਾਰਮੀਞਾਣਂ, ਪਚ੍ਚੇਕਬੋਧਿਞਾਣਂ, ਸਬ੍ਬਞ੍ਞੁਤਞ੍ਞਾਣਞ੍ਚ ਪਟਿਵਿਜ੍ਝਨ੍ਤਿ. ਇਮਾਸਂ ਸਮ੍ਪਤ੍ਤੀਨਂ ਪਟਿਲਾਭਕਾਰਣਤੋ ਪਞ੍ਞਾ ‘‘ਧਨ’’ਨ੍ਤਿ ਵੁਤ੍ਤਾ. ਸਤ੍ਤਪਿ ਚੇਤਾਨਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨੇਵ ਕਥਿਤਾਨਿ. ਬੋਜ੍ਝਙ੍ਗਕਥਾ ਕਥਿਤਾਵ.

ਸਮਾਧਿਪਰਿਕ੍ਖਾਰਾਤਿ ਸਮਾਧਿਪਰਿਵਾਰਾ. ਸਮ੍ਮਾਦਿਟ੍ਠਾਦੀਨਿ ਵੁਤ੍ਤਤ੍ਥਾਨੇਵ. ਇਮੇਪਿ ਸਤ੍ਤ ਪਰਿਕ੍ਖਾਰਾ ਲੋਕਿਯਲੋਕੁਤ੍ਤਰਾਵ ਕਥਿਤਾ.

ਅਸਤਂ ਧਮ੍ਮਾ ਅਸਨ੍ਤਾ ਵਾ ਧਮ੍ਮਾ ਲਾਮਕਾ ਧਮ੍ਮਾਤਿ ਅਸਦ੍ਧਮ੍ਮਾ. ਵਿਪਰਿਯਾਯੇਨ ਸਦ੍ਧਮ੍ਮਾ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਸਦ੍ਧਮ੍ਮੇਸੁ ਪਨ ਸਦ੍ਧਾਦਯੋ ਸਬ੍ਬੇਪਿ ਵਿਪਸ੍ਸਕਸ੍ਸੇਵ ਕਥਿਤਾ. ਤੇਸੁਪਿ ਪਞ੍ਞਾ ਲੋਕਿਯਲੋਕੁਤ੍ਤਰਾ. ਅਯਂ ਵਿਸੇਸੋ.

ਸਪ੍ਪੁਰਿਸਾਨਂ ਧਮ੍ਮਾਤਿ ਸਪ੍ਪੁਰਿਸਧਮ੍ਮਾ. ਤਤ੍ਥ ਸੁਤ੍ਤਗੇਯ੍ਯਾਦਿਕਂ ਧਮ੍ਮਂ ਜਾਨਾਤੀਤਿ ਧਮ੍ਮਞ੍ਞੂ. ਤਸ੍ਸ ਤਸ੍ਸੇਵ ਭਾਸਿਤਸ੍ਸ ਅਤ੍ਥਂ ਜਾਨਾਤੀਤਿ ਅਤ੍ਥਞ੍ਞੂ. ‘‘ਏਤ੍ਤਕੋਮ੍ਹਿ ਸੀਲੇਨ ਸਮਾਧਿਨਾ ਪਞ੍ਞਾਯਾ’’ਤਿ ਏਵਂ ਅਤ੍ਤਾਨਂ ਜਾਨਾਤੀਤਿ ਅਤ੍ਤਞ੍ਞੂ. ਪਟਿਗ੍ਗਹਣਪਰਿਭੋਗੇਸੁ ਮਤ੍ਤਂ ਜਾਨਾਤੀਤਿ ਮਤ੍ਤਞ੍ਞੂ. ਅਯਂ ਕਾਲੋ ਉਦ੍ਦੇਸਸ੍ਸ, ਅਯਂ ਕਾਲੋ ਪਰਿਪੁਚ੍ਛਾਯ, ਅਯਂ ਕਾਲੋ ਯੋਗਸ੍ਸ ਅਧਿਗਮਾਯਾਤਿ ਏਵਂ ਕਾਲਂ ਜਾਨਾਤੀਤਿ ਕਾਲਞ੍ਞੂ. ਏਤ੍ਥ ਚ ਪਞ੍ਚ ਵਸ੍ਸਾਨਿ ਉਦ੍ਦੇਸਸ੍ਸ ਕਾਲੋ. ਦਸ ਪਰਿਪੁਚ੍ਛਾਯ. ਇਦਂ ਅਤਿਸਮ੍ਬਾਧਂ. ਦਸ ਵਸ੍ਸਾਨਿ ਪਨ ਉਦ੍ਦੇਸਸ੍ਸ ਕਾਲੋ. ਵੀਸਤਿ ਪਰਿਪੁਚ੍ਛਾਯ. ਤਤੋ ਪਰਂ ਯੋਗੇ ਕਮ੍ਮਂ ਕਾਤਬ੍ਬਂ. ਅਟ੍ਠਵਿਧਂ ਪਰਿਸਂ ਜਾਨਾਤੀਤਿ ਪਰਿਸਞ੍ਞੂ. ਸੇਵਿਤਬ੍ਬਾਸੇਵਿਤਬ੍ਬਂ ਪੁਗ੍ਗਲਂ ਜਾਨਾਤੀਤਿ ਪੁਗ੍ਗਲਞ੍ਞੂ.

੩੩੧. ਨਿਦ੍ਦਸਵਤ੍ਥੂਨੀਤਿ ਨਿਦ੍ਦਸਾਦਿਵਤ੍ਥੂਨਿ. ਨਿਦ੍ਦਸੋ ਭਿਕ੍ਖੁ, ਨਿਬ੍ਬੀਸੋ, ਨਿਤ੍ਤਿਂਸੋ, ਨਿਚ੍ਚਤ੍ਤਾਲੀਸੋ, ਨਿਪ੍ਪਞ੍ਞਾਸੋ ਭਿਕ੍ਖੂਤਿ ਏਵਂ ਵਚਨਕਾਰਣਾਨਿ. ਅਯਂ ਕਿਰ ਪਞ੍ਹੋ ਤਿਤ੍ਥਿਯਸਮਯੇ ਉਪ੍ਪਨ੍ਨੋ. ਤਿਤ੍ਥਿਯਾ ਹਿ ਦਸਵਸ੍ਸਕਾਲੇ ਮਤਂ ਨਿਗਣ੍ਠਂ ਨਿਦ੍ਦਸੋਤਿ ਵਦਨ੍ਤਿ. ਸੋ ਕਿਰ ਪੁਨ ਦਸਵਸ੍ਸੋ ਨ ਹੋਤਿ. ਨ ਕੇਵਲਞ੍ਚ ਦਸਵਸ੍ਸੋਵ. ਨਵਵਸ੍ਸੋਪਿ…ਪੇ… ਏਕਵਸ੍ਸੋਪਿ ਨ ਹੋਤਿ. ਏਤੇਨੇਵ ਨਯੇਨ ਵੀਸਤਿਵਸ੍ਸਾਦਿਕਾਲੇਪਿ ਮਤਂ ਨਿਬ੍ਬੀਸੋ, ਨਿਤ੍ਤਿਂਸੋ, ਨਿਚ੍ਚਤ੍ਤਾਲੀਸੋ, ਨਿਪ੍ਪਞ੍ਞਾਸੋਤਿ ਵਦਨ੍ਤਿ. ਆਯਸ੍ਮਾ ਆਨਨ੍ਦੋ ਗਾਮੇ ਵਿਚਰਨ੍ਤੋ ਤਂ ਕਥਂ ਸੁਤ੍ਵਾ ਵਿਹਾਰਂ ਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਆਹ –

‘‘ਨ ਇਦਂ, ਆਨਨ੍ਦ, ਤਿਤ੍ਥਿਯਾਨਂ ਅਧਿਵਚਨਂ ਮਮ ਸਾਸਨੇ ਖੀਣਾਸਵਸ੍ਸੇਤਂ ਅਧਿਵਚਨਂ. ਖੀਣਾਸਵੋ ਹਿ ਦਸਵਸ੍ਸਕਾਲੇ ਪਰਿਨਿਬ੍ਬੁਤੋ ਪੁਨ ਦਸਵਸ੍ਸੋ ਨ ਹੋਤਿ. ਨ ਕੇਵਲਞ੍ਚ ਦਸਵਸ੍ਸੋਵ, ਨਵਵਸ੍ਸੋਪਿ…ਪੇ… ਏਕਵਸ੍ਸੋਪਿ. ਨ ਕੇਵਲਞ੍ਚ ਏਕਵਸ੍ਸੋਵ, ਦਸਮਾਸਿਕੋਪਿ…ਪੇ… ਏਕਮਾਸਿਕੋਪਿ. ਏਕਦਿਵਸਿਕੋਪਿ. ਏਕਮੁਹੁਤ੍ਤੋਪਿ ਨ ਹੋਤਿ ਏਵ. ਕਸ੍ਮਾ? ਪੁਨ ਪਟਿਸਨ੍ਧਿਯਾ ਅਭਾਵਾ. ਨਿਬ੍ਬੀਸਾਦੀਸੁਪਿ ਏਸੇਵ ਨਯੋ. ਇਤਿ ਭਗਵਾ ਮਮ ਸਾਸਨੇ ਖੀਣਾਸਵਸ੍ਸੇਤਂ ਅਧਿਵਚਨ’’ਨ੍ਤਿ –

ਵਤ੍ਵਾ ਯੇਹਿ ਕਾਰਣੇਹਿ ਸੋ ਨਿਦ੍ਦਸੋ ਹੋਤਿ, ਤਾਨਿ ਦਸ੍ਸੇਤੁਂ ਸਤ੍ਤ ਨਿਦ੍ਦਸਵਤ੍ਥੂਨਿ ਦੇਸੇਤਿ. ਥੇਰੋਪਿ ਤਮੇਵ ਦੇਸਨਂ ਉਦ੍ਧਰਿਤ੍ਵਾ ਸਤ੍ਤ ਨਿਦ੍ਦਸਵਤ੍ਥੂਨਿ ਇਧਾਵੁਸੋ, ਭਿਕ੍ਖੁ, ਸਿਕ੍ਖਾਸਮਾਦਾਨੇਤਿਆਦਿਮਾਹ. ਤਤ੍ਥ ਇਧਾਤਿ ਇਮਸ੍ਮਿਂ ਸਾਸਨੇ. ਸਿਕ੍ਖਾਸਮਾਦਾਨੇ ਤਿਬ੍ਬਚ੍ਛਨ੍ਦੋ ਹੋਤੀਤਿ ਸਿਕ੍ਖਤ੍ਤਯਪੂਰਣੇ ਬਹਲਚ੍ਛਨ੍ਦੋ ਹੋਤਿ. ਆਯਤਿਞ੍ਚ ਸਿਕ੍ਖਾਸਮਾਦਾਨੇ ਅਵਿਗਤਪੇਮੋਤਿ ਅਨਾਗਤੇ ਪੁਨਦਿਵਸਾਦੀਸੁਪਿ ਸਿਕ੍ਖਾਪੂਰਣੇ ਅਵਿਗਤਪੇਮੇਨ ਸਮਨ੍ਨਾਗਤੋ ਹੋਤਿ. ਧਮ੍ਮਨਿਸਨ੍ਤਿਯਾਤਿ ਧਮ੍ਮਨਿਸਾਮਨਾਯ. ਵਿਪਸ੍ਸਨਾਯੇਤਂ ਅਧਿਵਚਨਂ. ਇਚ੍ਛਾਵਿਨਯੇਤਿ ਤਣ੍ਹਾਵਿਨਯਨੇ. ਪਟਿਸਲ੍ਲਾਨੇਤਿ ਏਕੀਭਾਵੇ. ਵੀਰਿਯਾਰਮ੍ਭੇਤਿ ਕਾਯਿਕਚੇਤਸਿਕਸ੍ਸ ਵੀਰਿਯਸ੍ਸ ਪੂਰਣੇ. ਸਤਿਨੇਪਕ੍ਕੇਤਿ ਸਤਿਯਞ੍ਚੇਵ ਨੇਪਕ੍ਕਭਾਵੇ ਚ. ਦਿਟ੍ਠਿਪਟਿਵੇਧੇਤਿ ਮਗ੍ਗਦਸ੍ਸਨੇ. ਸੇਸਂ ਸਬ੍ਬਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਸਞ੍ਞਾਸੁ ਅਸੁਭਾਨੁਪਸ੍ਸਨਾਞਾਣੇ ਸਞ੍ਞਾ ਅਸੁਭਸਞ੍ਞਾ. ਆਦੀਨਵਾਨੁਪਸ੍ਸਨਾਞਾਣੇ ਸਞ੍ਞਾ ਆਦੀਨਵਸਞ੍ਞਾ ਨਾਮ. ਸੇਸਾ ਹੇਟ੍ਠਾ ਵੁਤ੍ਤਾ ਏਵ. ਬਲਸਤ੍ਤਕਵਿਞ੍ਞਾਣਟ੍ਠਿਤਿਸਤ੍ਤਕਪੁਗ੍ਗਲਸਤ੍ਤਕਾਨਿ ਵੁਤ੍ਤਨਯਾਨੇਵ. ਅਪ੍ਪਹੀਨਟ੍ਠੇਨ ਅਨੁਸਯਨ੍ਤੀਤਿ ਅਨੁਸਯਾ. ਥਾਮਗਤੋ ਕਾਮਰਾਗੋ ਕਾਮਰਾਗਾਨੁਸਯੋ. ਏਸ ਨਯੋ ਸਬ੍ਬਤ੍ਥ. ਸਂਯੋਜਨਸਤ੍ਤਕਂ ਉਤ੍ਤਾਨਤ੍ਥਮੇਵ.

ਅਧਿਕਰਣਸਮਥਸਤ੍ਤਕਵਣ੍ਣਨਾ

ਅਧਿਕਰਣਸਮਥੇਸੁ ਅਧਿਕਰਣਾਨਿ ਸਮੇਨ੍ਤਿ ਵੂਪਸਮੇਨ੍ਤੀਤਿ ਅਧਿਕਰਣਸਮਥਾ. ਉਪ੍ਪਨ੍ਨੁਪ੍ਪਨ੍ਨਾਨਨ੍ਤਿ ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਂ. ਅਧਿਕਰਣਾਨਨ੍ਤਿ ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਨ੍ਤਿ ਇਮੇਸਂ ਚਤੁਨ੍ਨਂ. ਸਮਥਾਯ ਵੂਪਸਮਾਯਾਤਿ ਸਮਥਤ੍ਥਞ੍ਚੇਵ ਵੂਪਸਮਨਤ੍ਥਞ੍ਚ. ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋਤਿ ਇਮੇ ਸਤ੍ਤ ਸਮਥਾ ਦਾਤਬ੍ਬਾ.

ਤਤ੍ਰਾਯਂ ਵਿਨਿਚ੍ਛਯਨਯੋ. ਅਧਿਕਰਣੇਸੁ ਤਾਵ ਧਮ੍ਮੋਤਿ ਵਾ ਅਧਮ੍ਮੋਤਿ ਵਾ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤਾਨਂ ਭਿਕ੍ਖੂਨਂ ਯੋ ਵਿਵਾਦੋ, ਇਦਂ ਵਿਵਾਦਾਧਿਕਰਣਂ ਨਾਮ. ਸੀਲਵਿਪਤ੍ਤਿਯਾ ਵਾ ਆਚਾਰਦਿਟ੍ਠਿਆਜੀਵਵਿਪਤ੍ਤਿਯਾ ਵਾ ਅਨੁਵਦਨ੍ਤਾਨਂ ਅਨੁਵਾਦੋ ਉਪਵਦਨਾ ਚੇਵ ਚੋਦਨਾ ਚ, ਇਦਂ ਅਨੁਵਾਦਾਧਿਕਰਣਂ ਨਾਮ. ਮਾਤਿਕਾਯ ਆਗਤਾ ਪਞ੍ਚ, ਵਿਭਙ੍ਗੇ ਦ੍ਵੇਤਿ ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ, ਇਦਂ ਆਪਤ੍ਤਾਧਿਕਰਣਂ ਨਾਮ. ਸਙ੍ਘਸ੍ਸ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ ਕਰਣਂ, ਇਦਂ ਕਿਚ੍ਚਾਧਿਕਰਣਂ ਨਾਮ.

ਤਤ੍ਥ ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ. ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਂ ਤਸ੍ਮਿਂਯੇਵ ਵਾ ਅਞ੍ਞਤ੍ਥ ਵੂਪਸਮੇਤੁਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ ਯਤ੍ਥ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤਿਤਂ ਤਤ੍ਥ ਸਙ੍ਘੇਨ ਵਾ ਸਙ੍ਘੇ ਵੂਪਸਮੇਤੁਂ ਅਸਕ੍ਕੋਨ੍ਤੇ ਤਤ੍ਥੇਵ ਉਬ੍ਬਾਹਿਕਾਯ ਸਮ੍ਮਤਪੁਗ੍ਗਲੇਹਿ ਵਾ ਵਿਨਿਚ੍ਛਿਤਂ ਸਮ੍ਮਤਿ. ਏਵਂ ਸਮ੍ਮਮਾਨੇ ਚ ਪਨੇਤਸ੍ਮਿਂ ਯਾ ਸਙ੍ਘਸਮ੍ਮੁਖਤਾ ਧਮ੍ਮਸਮ੍ਮੁਖਤਾ ਵਿਨਯਸਮ੍ਮੁਖਤਾ ਪੁਗ੍ਗਲਸਮ੍ਮੁਖਤਾ, ਅਯਂ ਸਮ੍ਮੁਖਾਵਿਨਯੋ ਨਾਮ.

ਤਤ੍ਥ ਚ ਕਾਰਕਸਙ੍ਘਸ੍ਸ ਸਙ੍ਘਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ ਸਙ੍ਘਸਮ੍ਮੁਖਤਾ. ਸਮੇਤਬ੍ਬਸ੍ਸ ਵਤ੍ਥੁਨੋ ਭੂਤਤਾ ਧਮ੍ਮਸਮ੍ਮੁਖਤਾ. ਯਥਾ ਤਂ ਸਮੇਤਬ੍ਬਂ, ਤਥੇਵ ਸਮ੍ਮਨਂ ਵਿਨਯਸਮ੍ਮੁਖਤਾ. ਯੋ ਚ ਵਿਵਦਤਿ, ਯੇਨ ਚ ਵਿਵਦਤਿ, ਤੇਸਂ ਉਭਿਨ੍ਨਂ ਅਤ੍ਥਪਚ੍ਚਤ੍ਥਿਕਾਨਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ. ਉਬ੍ਬਾਹਿਕਾਯ ਵੂਪਸਮੇ ਪਨੇਤ੍ਥ ਸਙ੍ਘਸਮ੍ਮੁਖਤਾ ਪਰਿਹਾਯਤਿ. ਏਵਂ ਤਾਵ ਸਮ੍ਮੁਖਾਵਿਨਯੇਨੇਵ ਸਮ੍ਮਤਿ.

ਸਚੇ ਪਨੇਵਮ੍ਪਿ ਨ ਸਮ੍ਮਤਿ, ਅਥ ਨਂ ਉਬ੍ਬਾਹਿਕਾਯ ਸਮ੍ਮਤਾ ਭਿਕ੍ਖੂ ‘‘ਨ ਮਯਂ ਸਕ੍ਕੋਮ ਵੂਪਸਮੇਤੁ’’ਨ੍ਤਿ ਸਙ੍ਘਸ੍ਸੇਵ ਨਿਯ੍ਯਾਤੇਨ੍ਤਿ, ਤਤੋ ਸਙ੍ਘੋ ਪਞ੍ਚਙ੍ਗਸਮਨ੍ਨਾਗਤਂ ਭਿਕ੍ਖੁਂ ਸਲਾਕਗ੍ਗਾਹਾਪਕਂ ਸਮ੍ਮਨ੍ਨਤਿ. ਤੇਨ ਗੁਲ਼੍ਹਕਵਿਵਟਕਸਕਣ੍ਣਜਪ੍ਪਕੇਸੁ ਤੀਸੁ ਸਲਾਕਗ੍ਗਾਹੇਸੁ ਅਞ੍ਞਤਰਵਸੇਨ ਸਲਾਕਂ ਗਾਹਾਪੇਤ੍ਵਾ ਸਨ੍ਨਿਪਤਿਤਪਰਿਸਾਯ ਧਮ੍ਮਵਾਦੀਨਂ ਯੇਭੁਯ੍ਯਤਾਯ ਯਥਾ ਤੇ ਧਮ੍ਮਵਾਦਿਨੋ ਵਦਨ੍ਤਿ, ਏਵਂ ਵੂਪਸਨ੍ਤਂ ਅਧਿਕਰਣਂ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ ਵੂਪਸਨ੍ਤਂ ਹੋਤਿ.

ਤਤ੍ਥ ਸਮ੍ਮੁਖਾਵਿਨਯੋ ਵੁਤ੍ਤਨਯੋ ਏਵ. ਯਂ ਪਨ ਯੇਭੁਯ੍ਯਸਿਕਾਕਮ੍ਮਸ੍ਸ ਕਰਣਂ, ਅਯਂ ਯੇਭੁਯ੍ਯਸਿਕਾ ਨਾਮ. ਏਵਂ ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ. ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ. ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯੋ ਚ ਅਨੁਵਦਤਿ, ਯਞ੍ਚ ਅਨੁਵਦਤਿ, ਤੇਸਂ ਵਚਨਂ ਸੁਤ੍ਵਾ ਸਚੇ ਕਾਚਿ ਆਪਤ੍ਤਿ ਨਤ੍ਥਿ, ਉਭੋ ਖਮਾਪੇਤ੍ਵਾ, ਸਚੇ ਅਤ੍ਥਿ, ਅਯਂ ਨਾਮੇਤ੍ਥ ਆਪਤ੍ਤੀਤਿ ਏਵਂ ਵਿਨਿਚ੍ਛਿਤਂ ਵੂਪਸਮ੍ਮਤਿ. ਤਤ੍ਥ ਸਮ੍ਮੁਖਾਵਿਨਯਲਕ੍ਖਣਂ ਵੁਤ੍ਤਨਯਮੇਵ. ਯਦਾ ਪਨ ਖੀਣਾਸਵਸ੍ਸ ਭਿਕ੍ਖੁਨੋ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸਿਤਸ੍ਸ ਸਤਿਵਿਨਯਂ ਯਾਚਮਾਨਸ੍ਸ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਸਤਿਵਿਨਯਂ ਦੇਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਵੂਪਸਨ੍ਤਂ ਹੋਤਿ. ਦਿਨ੍ਨੇ ਪਨ ਸਤਿਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਅਨੁਵਾਦੋ ਨ ਰੁਹਤਿ.

ਯਦਾ ਉਮ੍ਮਤ੍ਤਕੋ ਭਿਕ੍ਖੁ ਉਮ੍ਮਾਦਵਸੇਨ ਅਸ੍ਸਾਮਣਕੇ ਅਜ੍ਝਾਚਾਰੇ ‘‘ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿ’’ਨ੍ਤਿ ਭਿਕ੍ਖੂਹਿ ਚੋਦਿਯਮਾਨੋ ‘‘ਉਮ੍ਮਤ੍ਤਕੇਨ ਮੇ, ਆਵੁਸੋ, ਏਤਂ ਕਤਂ, ਨਾਹਂ ਤਂ ਸਰਾਮੀ’’ਤਿ ਭਣਨ੍ਤੋਪਿ ਭਿਕ੍ਖੂਹਿ ਚੋਦਿਯਮਾਨੋਵ ਪੁਨ ਅਚੋਦਨਤ੍ਥਾਯ ਅਮੂਲ਼੍ਹਵਿਨਯਂ ਯਾਚਤਿ, ਸਙ੍ਘੋ ਚਸ੍ਸ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਮੂਲ਼੍ਹਵਿਨਯਂ ਦੇਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਵੂਪਸਨ੍ਤਂ ਹੋਤਿ. ਦਿਨ੍ਨੇ ਪਨ ਅਮੂਲ਼੍ਹਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਤਪ੍ਪਚ੍ਚਯਾ ਅਨੁਵਾਦੋ ਨ ਰੁਹਤਿ.

ਯਦਾ ਪਨ ਪਾਰਾਜਿਕੇਨ ਵਾ ਪਾਰਾਜਿਕਸਾਮਨ੍ਤੇਨ ਵਾ ਚੋਦਿਯਮਾਨਸ੍ਸ ਅਞ੍ਞੇਨਞ੍ਞਂ ਪਟਿਚਰਤੋ ਪਾਪੁਸ੍ਸਨ੍ਨਤਾਯ ਪਾਪਿਯਸ੍ਸ ਪੁਗ੍ਗਲਸ੍ਸ ‘‘ਸਚਾਯਂ ਅਚ੍ਛਿਨ੍ਨਮੂਲੋ ਭਵਿਸ੍ਸਤਿ, ਸਮ੍ਮਾ ਵਤ੍ਤਿਤ੍ਵਾ ਓਸਾਰਣਂ ਲਭਿਸ੍ਸਤਿ. ਸਚੇ ਛਿਨ੍ਨਮੂਲੋ ਅਯਮੇਵਸ੍ਸ ਨਾਸਨਾ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਤਸ੍ਸਪਾਪਿਯਸਿਕਂ ਕਰੋਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ ਵੂਪਸਨ੍ਤਂ ਹੋਤੀਤਿ. ਏਵਂ ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ. ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਿਣਵਤ੍ਥਾਰਕੇਨ ਚ. ਤਸ੍ਸ ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ. ਯਦਾ ਪਨ ਏਕਸ੍ਸ ਵਾ ਭਿਕ੍ਖੁਨੋ ਸਨ੍ਤਿਕੇ ਸਙ੍ਘਗਣਮਜ੍ਝੇਸੁ ਵਾ ਭਿਕ੍ਖੁ ਲਹੁਕਂ ਆਪਤ੍ਤਿਂ ਦੇਸੇਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਵੂਪਸਮ੍ਮਤਿ.

ਤਤ੍ਥ ਸਮ੍ਮੁਖਾਵਿਨਯੇ ਤਾਵ ਯੋ ਚ ਦੇਸੇਤਿ, ਯਸ੍ਸ ਚ ਦੇਸੇਤਿ, ਤੇਸਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ. ਸੇਸਂ ਵੁਤ੍ਤਨਯਮੇਵ.

ਪੁਗ੍ਗਲਸ੍ਸ ਗਣਸ੍ਸ ਚ ਦੇਸਨਾਕਾਲੇ ਸਙ੍ਘਸਮ੍ਮੁਖਤਾ ਪਰਿਹਾਯਤਿ. ਯਾ ਪਨੇਤ੍ਥ ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋਤਿ ਚ ਆਮ, ਪਸ੍ਸਾਮੀਤਿ ਚ ਪਟਿਞ੍ਞਾ, ਤਾਯ ਪਟਿਞ੍ਞਾਯ ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਕਰਣਂ, ਤਂ ਪਟਿਞ੍ਞਾਤਕਰਣਂ ਨਾਮ. ਸਙ੍ਘਾਦਿਸੇਸੇ ਹਿ ਪਰਿਵਾਸਾਦਿਯਾਚਨਾ ਪਟਿਞ੍ਞਾ. ਪਰਿਵਾਸਾਦੀਨਂ ਦਾਨਂ ਪਟਿਞ੍ਞਾਤਕਰਣਂ ਨਾਮ. ਦ੍ਵੇ ਪਕ੍ਖਜਾਤਾ ਪਨ ਭਣ੍ਡਨਕਾਰਕਾ ਭਿਕ੍ਖੂ ਬਹੁਂ ਅਸ੍ਸਾਮਣਕਂ ਅਜ੍ਝਾਚਰਿਤ੍ਵਾ ਪੁਨ ਲਜ੍ਜਿਧਮ੍ਮੇ ਉਪ੍ਪਨ੍ਨੇ ਸਚੇ ਮਯਂ ਇਮਾਹਿ ਆਪਤ੍ਤੀਹਿ ਅਞ੍ਞਮਞ੍ਞਂ ਕਾਰੇਸ੍ਸਾਮ, ਸਿਯਾਪਿ ਤਂ ਅਧਿਕਰਣਂ ਕਕ੍ਖਲ਼ਤ੍ਤਾਯ ਸਂਵਤ੍ਤੇਯ੍ਯਾਤਿ ਅਞ੍ਞਮਞ੍ਞਂ ਆਪਤ੍ਤਿਯਾ ਕਾਰਾਪਨੇ ਦੋਸਂ ਦਿਸ੍ਵਾ ਯਦਾ ਤਿਣਵਤ੍ਥਾਰਕਕਮ੍ਮਂ ਕਰੋਨ੍ਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ ਸਮ੍ਮਤਿ.

ਤਤ੍ਥ ਹਿ ਯਤ੍ਤਕਾ ਹਤ੍ਥਪਾਸੂਪਗਤਾ ‘‘ਨ ਮੇਤਂ ਖਮਤੀ’’ਤਿ ਏਵਂ ਦਿਟ੍ਠਾਵਿਕਮ੍ਮਂ ਅਕਤ੍ਵਾ ਨਿਦ੍ਦਮ੍ਪਿ ਓਕ੍ਕਨ੍ਤਾ ਹੋਨ੍ਤਿ, ਸਬ੍ਬੇਸਂ ਠਪੇਤ੍ਵਾ ਥੁਲ੍ਲਵਜ੍ਜਞ੍ਚ ਗਿਹਿਪਟਿਸਂਯੁਤ੍ਤਞ੍ਚ ਸਬ੍ਬਾਪਤ੍ਤਿਯੋ ਵੁਟ੍ਠਹਨ੍ਤਿ, ਏਵਂ ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ. ਕਿਚ੍ਚਾਧਿਕਰਣਂ ਏਕੇਨ ਸਮਥੇਨ ਸਮ੍ਮਤਿ ਸਮ੍ਮੁਖਾਵਿਨਯੇਨੇਵ. ਇਮਾਨਿ ਚਤ੍ਤਾਰਿ ਅਧਿਕਰਣਾਨਿ ਯਥਾਨੁਰੂਪਂ ਇਮੇਹਿ ਸਤ੍ਤਹਿ ਸਮਥੇਹਿ ਸਮ੍ਮਨ੍ਤਿ. ਤੇਨ ਵੁਤ੍ਤਂ – ਉਪ੍ਪਨ੍ਨੁਪ੍ਪਨ੍ਨਾਨਂ ਅਧਿਕਰਣਾਨਂ ਸਮਥਾਯ ਵੂਪਸਮਾਯ ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋਤਿ. ਅਯਮੇਤ੍ਥ ਵਿਨਿਚ੍ਛਯਨਯੋ. ਵਿਤ੍ਥਾਰੋ ਪਨ ਸਮਥਕ੍ਖਨ੍ਧਕੇ ਆਗਤੋਯੇਵ. ਵਿਨਿਚ੍ਛਯੋਪਿਸ੍ਸ ਸਮਨ੍ਤਪਾਸਾਦਿਕਾਯਂ ਵੁਤ੍ਤੋ.

‘‘ਇਮੇ ਖੋ, ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਚੁਦ੍ਦਸਨ੍ਨਂ ਸਤ੍ਤਕਾਨਂ ਵਸੇਨ ਅਟ੍ਠਨਵੁਤਿ ਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਸਤ੍ਤਕਵਣ੍ਣਨਾ ਨਿਟ੍ਠਿਤਾ.

ਅਟ੍ਠਕਵਣ੍ਣਨਾ

੩੩੩. ਇਤਿ ਸਤ੍ਤਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਅਟ੍ਠਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਮਿਚ੍ਛਤ੍ਤਾਤਿ ਅਯਾਥਾਵਾ ਮਿਚ੍ਛਾਸਭਾਵਾ. ਸਮ੍ਮਤ੍ਤਾਤਿ ਯਾਥਾਵਾ ਸਮ੍ਮਾਸਭਾਵਾ.

੩੩੪. ਕੁਸੀਤਵਤ੍ਥੂਨੀਤਿ ਕੁਸੀਤਸ੍ਸ ਅਲਸਸ੍ਸ ਵਤ੍ਥੂਨਿ ਪਤਿਟ੍ਠਾ ਕੋਸਜ੍ਜਕਾਰਣਾਨੀਤਿ ਅਤ੍ਥੋ. ਕਮ੍ਮਂ ਕਤ੍ਤਬ੍ਬਂ ਹੋਤੀਤਿ ਚੀਵਰਵਿਚਾਰਣਾਦਿਕਮ੍ਮਂ ਕਾਤਬ੍ਬਂ ਹੋਤਿ. ਨ ਵੀਰਿਯਂ ਆਰਭਤੀਤਿ ਦੁਵਿਧਮ੍ਪਿ ਵੀਰਿਯਂ ਨਾਰਭਤਿ. ਅਪ੍ਪਤ੍ਤਸ੍ਸਾਤਿ ਝਾਨਵਿਪਸ੍ਸਨਾਮਗ੍ਗਫਲਧਮ੍ਮਸ੍ਸ ਅਪ੍ਪਤ੍ਤਸ੍ਸ ਪਤ੍ਤਿਯਾ. ਅਨਧਿਗਤਸ੍ਸਾਤਿ ਤਸ੍ਸੇਵ ਅਨਧਿਗਤਸ੍ਸ ਅਧਿਗਮਤ੍ਥਾਯ. ਅਸਚ੍ਛਿਕਤਸ੍ਸਾਤਿ ਤਸ੍ਸੇਵ ਅਪਚ੍ਚਕ੍ਖਕਤਸ੍ਸ ਸਚ੍ਛਿਕਰਣਤ੍ਥਾਯ. ਇਦਂ ਪਠਮਨ੍ਤਿ ਇਦਂ ਹਨ੍ਦਾਹਂ ਨਿਪਜ੍ਜਾਮੀਤਿ ਏਵਂ ਓਸੀਦਨਂ ਪਠਮਂ ਕੁਸੀਤਵਤ੍ਥੁ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ‘‘ਮਾਸਾਚਿਤਂ ਮਞ੍ਞੇ’’ਤਿ ਏਤ੍ਥ ਪਨ ਮਾਸਾਚਿਤਂ ਨਾਮ ਤਿਨ੍ਤਮਾਸੋ. ਯਥਾ ਤਿਨ੍ਤਮਾਸੋ ਗਰੁਕੋ ਹੋਤਿ, ਏਵਂ ਗਰੁਕੋਤਿ ਅਧਿਪ੍ਪਾਯੋ. ਗਿਲਾਨਾ ਵੁਟ੍ਠਿਤੋ ਹੋਤੀਤਿ ਗਿਲਾਨੋ ਹੁਤ੍ਵਾ ਪਚ੍ਛਾ ਵੁਟ੍ਠਿਤੋ ਹੋਤਿ.

੩੩੫. ਆਰਮ੍ਭਵਤ੍ਥੂਨੀਤਿ ਵੀਰਿਯਕਾਰਣਾਨਿ. ਤੇਸਮ੍ਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੩੩੬. ਦਾਨਵਤ੍ਥੂਨੀਤਿ ਦਾਨਕਾਰਣਾਨਿ. ਆਸਜ੍ਜ ਦਾਨਂ ਦੇਤੀਤਿ ਪਤ੍ਵਾ ਦਾਨਂ ਦੇਤਿ. ਆਗਤਂ ਦਿਸ੍ਵਾਵ ਮੁਹੁਤ੍ਤਂਯੇਵ ਨਿਸੀਦਾਪੇਤ੍ਵਾ ਸਕ੍ਕਾਰਂ ਕਤ੍ਵਾ ਦਾਨਂ ਦੇਤਿ, ਦਸ੍ਸਾਮਿ ਦਸ੍ਸਾਮੀਤਿ ਨ ਕਿਲਮੇਤਿ. ਇਤਿ ਏਤ੍ਥ ਆਸਾਦਨਂ ਦਾਨਕਾਰਣਂ ਨਾਮ ਹੋਤਿ. ਭਯਾ ਦਾਨਂ ਦੇਤੀਤਿਆਦੀਸੁਪਿ ਭਯਾਦੀਨਿ ਦਾਨਕਾਰਣਾਨੀਤਿ ਵੇਦਿਤਬ੍ਬਾਨਿ. ਤਤ੍ਥ ਭਯਂ ਨਾਮ ਅਯਂ ਅਦਾਯਕੋ ਅਕਾਰਕੋਤਿ ਗਰਹਾਭਯਂ ਵਾ ਅਪਾਯਭਯਂ ਵਾ. ਅਦਾਸਿ ਮੇਤਿ ਮਯ੍ਹਂ ਪੁਬ੍ਬੇ ਏਸ ਇਦਂ ਨਾਮ ਅਦਾਸੀਤਿ ਦੇਤਿ. ਦਸ੍ਸਤਿ ਮੇਤਿ ਅਨਾਗਤੇ ਇਦਂ ਨਾਮ ਦਸ੍ਸਤੀਤਿ ਦੇਤਿ. ਸਾਹੁ ਦਾਨਨ੍ਤਿ ਦਾਨਂ ਨਾਮ ਸਾਧੁ ਸੁਨ੍ਦਰਂ, ਬੁਦ੍ਧਾਦੀਹਿ ਪਣ੍ਡਿਤੇਹਿ ਪਸਤ੍ਥਨ੍ਤਿ ਦੇਤਿ. ਚਿਤ੍ਤਾਲਙ੍ਕਾਰਚਿਤ੍ਤਪਰਿਕ੍ਖਾਰਤ੍ਥਂ ਦਾਨਂ ਦੇਤੀਤਿ ਸਮਥਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰਤ੍ਥਞ੍ਚੇਵ ਪਰਿਵਾਰਤ੍ਥਞ੍ਚ ਦੇਤਿ. ਦਾਨਞ੍ਹਿ ਚਿਤ੍ਤਂ ਮੁਦੁਕਂ ਕਰੋਤਿ. ਯੇਨ ਲਦ੍ਧਂ ਹੋਤਿ, ਸੋਪਿ ਲਦ੍ਧਂ ਮੇਤਿ ਮੁਦੁਚਿਤ੍ਤੋ ਹੋਤਿ, ਯੇਨ ਦਿਨ੍ਨਂ, ਸੋਪਿ ਦਿਨ੍ਨਂ ਮਯਾਤਿ ਮੁਦੁਚਿਤ੍ਤੋ ਹੋਤਿ, ਇਤਿ ਉਭਿਨ੍ਨਮ੍ਪਿ ਚਿਤ੍ਤਂ ਮੁਦੁਕਂ ਕਰੋਤਿ, ਤੇਨੇਵ ‘‘ਅਦਨ੍ਤਦਮਨਂ ਦਾਨ’’ਨ੍ਤਿ ਵੁਚ੍ਚਤਿ. ਯਥਾਹ –

‘‘ਅਦਨ੍ਤਦਮਨਂ ਦਾਨਂ, ਅਦਾਨਂ ਦਨ੍ਤਦੂਸਕਂ;

ਦਾਨੇਨ ਪਿਯਵਾਚਾਯ, ਉਨ੍ਨਮਨ੍ਤਿ ਨਮਨ੍ਤਿ ਚਾ’’ਤਿ.

ਇਮੇਸੁ ਪਨ ਅਟ੍ਠਸੁ ਦਾਨੇਸੁ ਚਿਤ੍ਤਾਲਙ੍ਕਾਰਦਾਨਮੇਵ ਉਤ੍ਤਮਂ.

੩੩੭. ਦਾਨੂਪਪਤ੍ਤਿਯੋਤਿ ਦਾਨਪਚ੍ਚਯਾ ਉਪਪਤ੍ਤਿਯੋ. ਦਹਤੀਤਿ ਠਪੇਤਿ. ਅਧਿਟ੍ਠਾਤੀਤਿ ਤਸ੍ਸੇਵ ਵੇਵਚਨਂ. ਭਾਵੇਤੀਤਿ ਵਡ੍ਢੇਤਿ. ਹੀਨੇ ਵਿਮੁਤ੍ਤਨ੍ਤਿ ਹੀਨੇਸੁ ਪਞ੍ਚਕਾਮਗੁਣੇਸੁ ਵਿਮੁਤ੍ਤਂ. ਉਤ੍ਤਰਿ ਅਭਾਵਿਤਨ੍ਤਿ ਤਤੋ ਉਤ੍ਤਰਿ ਮਗ੍ਗਫਲਤ੍ਥਾਯ ਅਭਾਵਿਤਂ. ਤਤ੍ਰੂਪਪਤ੍ਤਿਯਾ ਸਂਵਤ੍ਤਤੀਤਿ ਯਂ ਪਤ੍ਥੇਤ੍ਵਾ ਕੁਸਲਂ ਕਤਂ, ਤਤ੍ਥ ਤਤ੍ਥ ਨਿਬ੍ਬਤ੍ਤਨਤ੍ਥਾਯ ਸਂਵਤ੍ਤਤਿ.

ਵੀਤਰਾਗਸ੍ਸਾਤਿ ਮਗ੍ਗੇਨ ਵਾ ਸਮੁਚ੍ਛਿਨ੍ਨਰਾਗਸ੍ਸ ਸਮਾਪਤ੍ਤਿਯਾ ਵਾ ਵਿਕ੍ਖਮ੍ਭਿਤਰਾਗਸ੍ਸ. ਦਾਨਮਤ੍ਤੇਨੇਵ ਹਿ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤੁਂ ਨ ਸਕ੍ਕਾ. ਦਾਨਂ ਪਨ ਸਮਾਧਿਵਿਪਸ੍ਸਨਾਚਿਤ੍ਤਸ੍ਸ ਅਲਙ੍ਕਾਰੋ ਪਰਿਵਾਰੋ ਹੋਤਿ. ਤਤੋ ਦਾਨੇਨ ਮੁਦੁਚਿਤ੍ਤੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ. ਤੇਨ ਵੁਤ੍ਤਂ ‘‘ਵੀਤਰਾਗਸ੍ਸ ਨੋ ਸਰਾਗਸ੍ਸਾ’’ਤਿ.

ਖਤ੍ਤਿਯਾਨਂ ਪਰਿਸਾ ਖਤ੍ਤਿਯਪਰਿਸਾ, ਸਮੂਹੋਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ.

ਲੋਕਸ੍ਸ ਧਮ੍ਮਾ ਲੋਕਧਮ੍ਮਾ. ਏਤੇਹਿ ਮੁਤ੍ਤੋ ਨਾਮ ਨਤ੍ਥਿ, ਬੁਦ੍ਧਾਨਮ੍ਪਿ ਹੋਨ੍ਤਿਯੇਵ. ਵੁਤ੍ਤਮ੍ਪਿ ਚੇਤਂ – ‘‘ਅਟ੍ਠਿਮੇ, ਭਿਕ੍ਖਵੇ, ਲੋਕਧਮ੍ਮਾ ਲੋਕਂ ਅਨੁਪਰਿਵਤ੍ਤਨ੍ਤਿ, ਲੋਕੋ ਚ ਅਟ੍ਠ ਲੋਕਧਮ੍ਮੇ ਅਨੁਪਰਿਵਤ੍ਤਤੀ’’ਤਿ (ਅ. ਨਿ. ੮.੫). ਲਾਭੋ ਅਲਾਭੋਤਿ ਲਾਭੇ ਆਗਤੇ ਅਲਾਭੋ ਆਗਤੋ ਏਵਾਤਿ ਵੇਦਿਤਬ੍ਬੋ. ਯਸਾਦੀਸੁਪਿ ਏਸੇਵ ਨਯੋ.

੩੩੮. ਅਭਿਭਾਯਤਨਵਿਮੋਕ੍ਖਕਥਾ ਹੇਟ੍ਠਾ ਕਥਿਤਾ ਏਵ.

‘‘ਇਮੇ ਖੋ, ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਏਕਾਦਸਨ੍ਨਂ ਅਟ੍ਠਕਾਨਂ ਵਸੇਨ ਅਟ੍ਠਾਸੀਤਿ ਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਅਟ੍ਠਕਵਣ੍ਣਨਾ ਨਿਟ੍ਠਿਤਾ.

ਨਵਕਵਣ੍ਣਨਾ

੩੪੦. ਇਤਿ ਅਟ੍ਠਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਨਵਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਆਘਾਤਵਤ੍ਥੂਨੀਤਿ ਆਘਾਤਕਾਰਣਾਨਿ. ਆਘਾਤਂ ਬਨ੍ਧਤੀਤਿ ਕੋਪਂ ਬਨ੍ਧਤਿ ਕਰੋਤਿ ਉਪ੍ਪਾਦੇਤਿ.

ਤਂ ਕੁਤੇਤ੍ਥ ਲਬ੍ਭਾਤਿ ਤਂ ਅਨਤ੍ਥਚਰਣਂ ਮਾ ਅਹੋਸੀਤਿ ਏਤਸ੍ਮਿਂ ਪੁਗ੍ਗਲੇ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਸਕ੍ਕਾ ਲਦ੍ਧੁਂ? ਪਰੋ ਨਾਮ ਪਰਸ੍ਸ ਅਤ੍ਤਨੋ ਚਿਤ੍ਤਰੁਚਿਯਾ ਅਨਤ੍ਥਂ ਕਰੋਤੀਤਿ ਏਵਂ ਚਿਨ੍ਤੇਤ੍ਵਾ ਆਘਾਤਂ ਪਟਿਵਿਨੋਦੇਤਿ. ਅਥ ਵਾ ਸਚਾਹਂ ਪਟਿਕੋਪਂ ਕਰੇਯ੍ਯਂ, ਤਂ ਕੋਪਕਰਣਂ ਏਤ੍ਥ ਪੁਗ੍ਗਲੇ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਲਦ੍ਧਬ੍ਬਨ੍ਤਿ ਅਤ੍ਥੋ. ਕੁਤੋ ਲਾਭਾਤਿਪਿ ਪਾਠੋ, ਸਚਾਹਂ ਏਤ੍ਥ ਕੋਪਂ ਕਰੇਯ੍ਯਂ, ਤਸ੍ਮਿਂ ਮੇ ਕੋਪਕਰਣੇ ਕੁਤੋ ਲਾਭਾ, ਲਾਭਾ ਨਾਮ ਕੇ ਸਿਯੁਨ੍ਤਿ ਅਤ੍ਥੋ. ਇਮਸ੍ਮਿਞ੍ਚ ਅਤ੍ਥੇ ਤਨ੍ਤਿ ਨਿਪਾਤਮਤ੍ਤਮੇਵ ਹੋਤਿ.

੩੪੧. ਸਤ੍ਤਾਵਾਸਾਤਿ ਸਤ੍ਤਾਨਂ ਆਵਾਸਾ, ਵਸਨਟ੍ਠਾਨਾਨੀਤਿ ਅਤ੍ਥੋ. ਤਤ੍ਥ ਸੁਦ੍ਧਾਵਾਸਾਪਿ ਸਤ੍ਤਾਵਾਸੋਵ, ਅਸਬ੍ਬਕਾਲਿਕਤ੍ਤਾ ਪਨ ਨ ਗਹਿਤਾ. ਸੁਦ੍ਧਾਵਾਸਾ ਹਿ ਬੁਦ੍ਧਾਨਂ ਖਨ੍ਧਾਵਾਰਸਦਿਸਾ. ਅਸਙ੍ਖ੍ਯੇਯ੍ਯਕਪ੍ਪੇ ਬੁਦ੍ਧੇਸੁ ਅਨਿਬ੍ਬਤ੍ਤਨ੍ਤੇਸੁ ਤਂ ਠਾਨਂ ਸੁਞ੍ਞਂ ਹੋਤੀਤਿ ਅਸਬ੍ਬਕਾਲਿਕਤ੍ਤਾ ਨ ਗਹਿਤਾ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.

੩੪੨. ਅਕ੍ਖਣੇਸੁ ਧਮ੍ਮੋ ਚ ਦੇਸਿਯਤੀਤਿ ਚਤੁਸਚ੍ਚਧਮ੍ਮੋ ਦੇਸਿਯਤਿ. ਓਪਸਮਿਕੋਤਿ ਕਿਲੇਸੂਪਸਮਕਰੋ. ਪਰਿਨਿਬ੍ਬਾਨਿਕੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਨਾਵਹੋ. ਸਮ੍ਬੋਧਗਾਮੀਤਿ ਚਤੁਮਗ੍ਗਞਾਣਪਟਿਵੇਧਗਾਮੀ. ਅਞ੍ਞਤਰਨ੍ਤਿ ਅਸਞ੍ਞਭਵਂ ਵਾ ਅਰੂਪਭਵਂ ਵਾ.

੩੪੩. ਅਨੁਪੁਬ੍ਬਵਿਹਾਰਾਤਿ ਅਨੁਪਟਿਪਾਟਿਯਾ ਸਮਾਪਜ੍ਜਿਤਬ੍ਬਵਿਹਾਰਾ.

੩੪੪. ਅਨੁਪੁਬ੍ਬਨਿਰੋਧਾਤਿ ਅਨੁਪਟਿਪਾਟਿਯਾ ਨਿਰੋਧਾ.

‘‘ਇਮੇ, ਖੋ ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਛਨ੍ਨਂ ਨਵਕਾਨਂ ਵਸੇਨ ਚਤੁਪਣ੍ਣਾਸ ਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਨਵਕਵਣ੍ਣਨਾ ਨਿਟ੍ਠਿਤਾ.

ਦਸਕਵਣ੍ਣਨਾ

੩੪੫. ਇਤਿ ਨਵਕਵਸੇਨ ਸਾਮਗ੍ਗਿਰਸਂ ਦਸ੍ਸੇਤ੍ਵਾ ਇਦਾਨਿ ਦਸਕਵਸੇਨ ਦਸ੍ਸੇਤੁਂ ਪੁਨ ਦੇਸਨਂ ਆਰਭਿ. ਤਤ੍ਥ ਨਾਥਕਰਣਾਤਿ ‘‘ਸਨਾਥਾ, ਭਿਕ੍ਖਵੇ, ਵਿਹਰਥ ਮਾ ਅਨਾਥਾ, ਦਸ ਇਮੇ, ਭਿਕ੍ਖਵੇ, ਧਮ੍ਮਾ ਨਾਥਕਰਣਾ’’ਤਿ (ਅ. ਨਿ. ੧੦.੧੮) ਏਵਂ ਅਕ੍ਖਾਤਾ ਅਤ੍ਤਨੋ ਪਤਿਟ੍ਠਾਕਰਾ ਧਮ੍ਮਾ.

ਕਲ੍ਯਾਣਮਿਤ੍ਤੋਤਿਆਦੀਸੁ ਸੀਲਾਦਿਗੁਣਸਮ੍ਪਨ੍ਨਾ ਕਲ੍ਯਾਣਾ ਅਸ੍ਸ ਮਿਤ੍ਤਾਤਿ ਕਲ੍ਯਾਣਮਿਤ੍ਤੋ. ਤੇ ਚਸ੍ਸ ਠਾਨਨਿਸਜ੍ਜਾਦੀਸੁ ਸਹ ਅਯਨਤੋ ਸਹਾਯਾਤਿ ਕਲ੍ਯਾਣਸਹਾਯੋ. ਚਿਤ੍ਤੇਨ ਚੇਵ ਕਾਯੇਨ ਚ ਕਲ੍ਯਾਣਮਿਤ੍ਤੇਸੁ ਏਵ ਸਮ੍ਪਵਙ੍ਕੋ ਓਨਤੋਤਿ ਕਲ੍ਯਾਣਸਮ੍ਪਵਙ੍ਕੋ. ਸੁਵਚੋ ਹੋਤੀਤਿ ਸੁਖੇਨ ਵਤ੍ਤਬ੍ਬੋ ਹੋਤਿ ਸੁਖੇਨ ਅਨੁਸਾਸਿਤਬ੍ਬੋ. ਖਮੋਤਿ ਗਾਲ਼੍ਹੇਨ ਫਰੁਸੇਨ ਕਕ੍ਖਲ਼ੇਨ ਵੁਚ੍ਚਮਾਨੋ ਖਮਤਿ, ਨ ਕੁਪ੍ਪਤਿ. ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਨ੍ਤਿ ਯਥਾ ਏਕਚ੍ਚੋ ਓਵਦਿਯਮਾਨੋ ਵਾਮਤੋ ਗਣ੍ਹਾਤਿ, ਪਟਿਪ੍ਫਰਤਿ ਵਾ ਅਸੁਣਨ੍ਤੋ ਵਾ ਗਚ੍ਛਤਿ, ਏਵਂ ਅਕਤ੍ਵਾ ‘‘ਓਵਦਥ, ਭਨ੍ਤੇ, ਅਨੁਸਾਸਥ, ਤੁਮ੍ਹੇਸੁ ਅਨੋਵਦਨ੍ਤੇਸੁ ਕੋ ਅਞ੍ਞੋ ਓਵਦਿਸ੍ਸਤੀ’’ਤਿ ਪਦਕ੍ਖਿਣਂ ਗਣ੍ਹਾਤਿ.

ਉਚ੍ਚਾਵਚਾਨੀਤਿ ਉਚ੍ਚਾਨਿ ਚ ਅਵਚਾਨਿ ਚ. ਕਿਂ ਕਰਣੀਯਾਨੀਤਿ ਕਿਂ ਕਰੋਮੀਤਿ ਏਵਂ ਵਤ੍ਵਾ ਕਤ੍ਤਬ੍ਬਕਮ੍ਮਾਨਿ. ਤਤ੍ਥ ਉਚ੍ਚਕਮ੍ਮਾਨਿ ਨਾਮ ਚੀਵਰਸ੍ਸ ਕਰਣਂ ਰਜਨਂ ਚੇਤਿਯੇ ਸੁਧਾਕਮ੍ਮਂ ਉਪੋਸਥਾਗਾਰਚੇਤਿਯਘਰਬੋਧਿਯਘਰੇਸੁ ਕਤ੍ਤਬ੍ਬਨ੍ਤਿ ਏਵਮਾਦਿ. ਅਵਚਕਮ੍ਮਂ ਨਾਮ ਪਾਦਧੋਵਨਮਕ੍ਖਨਾਦਿਖੁਦ੍ਦਕਕਮ੍ਮਂ. ਤਤ੍ਰੁਪਾਯਾਯਾਤਿ ਤਤ੍ਰੁਪਗਮਨੀਯਾ. ਅਲਂ ਕਾਤੁਨ੍ਤਿ ਕਾਤੁਂ ਸਮਤ੍ਥੋ ਹੋਤਿ. ਅਲਂ ਸਂਵਿਧਾਤੁਨ੍ਤਿ ਵਿਚਾਰੇਤੁਂ ਸਮਤ੍ਥੋ.

ਧਮ੍ਮੇ ਅਸ੍ਸ ਕਾਮੋ ਸਿਨੇਹੋਤਿ ਧਮ੍ਮਕਾਮੋ, ਤੇਪਿਟਕਂ ਬੁਦ੍ਧਵਚਨਂ ਪਿਯਾਯਤੀਤਿ ਅਤ੍ਥੋ. ਪਿਯਸਮੁਦਾਹਾਰੋਤਿ ਪਰਸ੍ਮਿਂ ਕਥੇਨ੍ਤੇ ਸਕ੍ਕਚ੍ਚਂ ਸੁਣਾਤਿ, ਸਯਞ੍ਚ ਪਰੇਸਂ ਦੇਸੇਤੁਕਾਮੋ ਹੋਤੀਤਿ ਅਤ੍ਥੋ. ‘‘ਅਭਿਧਮ੍ਮੇ ਅਭਿਵਿਨਯੇ’’ਤਿ ਏਤ੍ਥ ਧਮ੍ਮੋ ਅਭਿਧਮ੍ਮੋ, ਵਿਨਯੋ ਅਭਿਵਿਨਯੋਤਿ ਚਤੁਕ੍ਕਂ ਵੇਦਿਤਬ੍ਬਂ. ਤਤ੍ਥ ਧਮ੍ਮੋਤਿ ਸੁਤ੍ਤਨ੍ਤਪਿਟਕਂ. ਅਭਿਧਮ੍ਮੋਤਿ ਸਤ੍ਤ ਪਕਰਣਾਨਿ. ਵਿਨਯੋਤਿ ਉਭਤੋਵਿਭਙ੍ਗਾ. ਅਭਿਵਿਨਯੋਤਿ ਖਨ੍ਧਕਪਰਿਵਾਰਾ. ਅਥ ਵਾ ਸੁਤ੍ਤਨ੍ਤਪਿਟਕਮ੍ਪਿ ਅਭਿਧਮ੍ਮਪਿਟਕਮ੍ਪਿ ਧਮ੍ਮੋ ਏਵ. ਮਗ੍ਗਫਲਾਨਿ ਅਭਿਧਮ੍ਮੋ. ਸਕਲਂ ਵਿਨਯਪਿਟਕਂ ਵਿਨਯੋ. ਕਿਲੇਸਵੂਪਸਮਕਾਰਣਂ ਅਭਿਵਿਨਯੋ. ਇਤਿ ਸਬ੍ਬਸ੍ਮਿਮ੍ਪਿ ਏਤ੍ਥ ਧਮ੍ਮੇ ਅਭਿਧਮ੍ਮੇ ਵਿਨਯੇ ਅਭਿਵਿਨਯੇ ਚ. ਉਲ਼ਾਰਪਾਮੋਜ੍ਜੋਤਿ ਬਹੁਲਪਾਮੋਜ੍ਜੋ ਹੋਤੀਤਿ ਅਤ੍ਥੋ.

ਕੁਸਲੇਸੁ ਧਮ੍ਮੇਸੂਤਿ ਕਾਰਣਤ੍ਥੇ ਭੁਮ੍ਮਂ, ਚਤੁਭੂਮਕਕੁਸਲਧਮ੍ਮਕਾਰਣਾ, ਤੇਸਂ ਅਧਿਗਮਤ੍ਥਾਯ ਅਨਿਕ੍ਖਿਤ੍ਤਧੁਰੋ ਹੋਤੀਤਿ ਅਤ੍ਥੋ.

੩੪੬. ਕਸਿਣਦਸਕੇ ਸਕਲਟ੍ਠੇਨ ਕਸਿਣਾਨਿ. ਤਦਾਰਮ੍ਮਣਾਨਂ ਧਮ੍ਮਾਨਂ ਖੇਤ੍ਤਟ੍ਠੇਨ ਵਾ ਅਧਿਟ੍ਠਾਨਟ੍ਠੇਨ ਵਾ ਆਯਤਨਾਨਿ. ਉਦ੍ਧਨ੍ਤਿ ਉਪਰਿ ਗਗਨਤਲਾਭਿਮੁਖਂ. ਅਧੋਤਿ ਹੇਟ੍ਠਾ ਭੂਮਿਤਲਾਭਿਮੁਖਂ. ਤਿਰਿਯਨ੍ਤਿ ਖੇਤ੍ਤਮਣ੍ਡਲਮਿਵ ਸਮਨ੍ਤਾ ਪਰਿਚ੍ਛਿਨ੍ਦਿਤ੍ਵਾ. ਏਕਚ੍ਚੋ ਹਿ ਉਦ੍ਧਮੇਵ ਕਸਿਣਂ ਵਡ੍ਢੇਤਿ, ਏਕਚ੍ਚੋ ਅਧੋ, ਏਕਚ੍ਚੋ ਸਮਨ੍ਤਤੋ. ਤੇਨ ਤੇਨ ਵਾ ਕਾਰਣੇਨ ਏਵਂ ਪਸਾਰੇਤਿ ਆਲੋਕਮਿਵ ਰੂਪਦਸ੍ਸਨਕਾਮੋ. ਤੇਨ ਵੁਤ੍ਤਂ ‘‘ਪਥਵੀਕਸਿਣਮੇਕੋ ਸਞ੍ਜਾਨਾਤਿ ਉਦ੍ਧਂ ਅਧੋ ਤਿਰਿਯ’’ਨ੍ਤਿ. ਅਦ੍ਵਯਨ੍ਤਿ ਇਦਂ ਪਨ ਏਕਸ੍ਸ ਅਞ੍ਞਭਾਵਾਨੁਪਗਮਨਤ੍ਥਂ ਵੁਤ੍ਤਂ. ਯਥਾ ਹਿ ਉਦਕਂ ਪਵਿਟ੍ਠਸ੍ਸ ਸਬ੍ਬਦਿਸਾਸੁ ਉਦਕਮੇਵ ਹੋਤਿ, ਨ ਅਞ੍ਞਂ, ਏਵਮੇਵ ਪਥਵੀਕਸਿਣਂ ਪਥਵੀਕਸਿਣਮੇਵ ਹੋਤਿ, ਨਤ੍ਥਿ ਤਸ੍ਸ ਅਞ੍ਞੋ ਕਸਿਣਸਮ੍ਭੇਦੋਤਿ. ਏਸ ਨਯੋ ਸਬ੍ਬਤ੍ਥ. ਅਪ੍ਪਮਾਣਨ੍ਤਿ ਇਦਂ ਤਸ੍ਸ ਤਸ੍ਸ ਫਰਣਅਪ੍ਪਮਾਣਵਸੇਨ ਵੁਤ੍ਤਂ. ਤਞ੍ਹਿ ਚੇਤਸਾ ਫਰਨ੍ਤੋ ਸਕਲਮੇਵ ਫਰਤਿ, ਨ ‘‘ਅਯਮਸ੍ਸ ਆਦਿ, ਇਦਂ ਮਜ੍ਝ’’ਨ੍ਤਿ ਪਮਾਣਂ ਗਣ੍ਹਾਤੀਤਿ. ਵਿਞ੍ਞਾਣਕਸਿਣਨ੍ਤਿ ਚੇਤ੍ਥ ਕਸਿਣੁਗ੍ਘਾਟਿਮਾਕਾਸੇ ਪਵਤ੍ਤਵਿਞ੍ਞਾਣਂ. ਤਤ੍ਥ ਕਸਿਣਵਸੇਨ ਕਸਿਣੁਗ੍ਘਾਟਿਮਾਕਾਸੇ ਕਸਿਣੁਗ੍ਘਾਟਿਮਾਕਾਸਵਸੇਨ ਤਤ੍ਥ ਪਵਤ੍ਤਵਿਞ੍ਞਾਣੇ ਉਦ੍ਧਂ ਅਧੋ ਤਿਰਿਯਤਾ ਵੇਦਿਤਬ੍ਬਾ. ਅਯਮੇਤ੍ਥ ਸਙ੍ਖੇਪੋ. ਕਮ੍ਮਟ੍ਠਾਨਭਾਵਨਾਨਯੇਨ ਪਨੇਤਾਨਿ ਪਥਵੀਕਸਿਣਾਦੀਨਿ ਵਿਤ੍ਥਾਰਤੋ ਵਿਸੁਦ੍ਧਿਮਗ੍ਗੇ ਵੁਤ੍ਤਾਨੇਵ.

ਅਕੁਸਲਕਮ੍ਮਪਥਦਸਕਵਣ੍ਣਨਾ

੩੪੭. ਕਮ੍ਮਪਥੇਸੁ ਕਮ੍ਮਾਨੇਵ ਸੁਗਤਿਦੁਗ੍ਗਤੀਨਂ ਪਥਭੂਤਤ੍ਤਾ ਕਮ੍ਮਪਥਾ ਨਾਮ. ਤੇਸੁ ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਮੁਸਾਵਾਦਾਦਯੋ ਚ ਚਤ੍ਤਾਰੋ ਬ੍ਰਹ੍ਮਜਾਲੇ ਵਿਤ੍ਥਾਰਿਤਾ ਏਵ. ਕਾਮੇਸੁਮਿਚ੍ਛਾਚਾਰੋਤਿ ਏਤ੍ਥ ਪਨ ਕਾਮੇਸੂਤਿ ਮੇਥੁਨਸਮਾਚਾਰੇਸੁ ਮੇਥੁਨਵਤ੍ਥੂਸੁ ਵਾ. ਮਿਚ੍ਛਾਚਾਰੋਤਿ ਏਕਨ੍ਤਨਿਨ੍ਦਿਤੋ ਲਾਮਕਾਚਾਰੋ. ਲਕ੍ਖਣਤੋ ਪਨ ਅਸਦ੍ਧਮ੍ਮਾਧਿਪ੍ਪਾਯੇਨ ਕਾਯਦ੍ਵਾਰਪ੍ਪਵਤ੍ਤਾ ਅਗਮਨੀਯਟ੍ਠਾਨਵੀਤਿਕ੍ਕਮਚੇਤਨਾ ਕਾਮੇਸੁਮਿਚ੍ਛਾਚਾਰੋ.

ਤਤ੍ਥ ਅਗਮਨੀਯਟ੍ਠਾਨਂ ਨਾਮ ਪੁਰਿਸਾਨਂ ਤਾਵ ਮਾਤੁਰਕ੍ਖਿਤਾ, ਪਿਤੁਰਕ੍ਖਿਤਾ, ਮਾਤਾਪਿਤੁਰਕ੍ਖਿਤਾ, ਭਾਤੁਰਕ੍ਖਿਤਾ, ਭਗਿਨਿਰਕ੍ਖਿਤਾ, ਞਾਤਿਰਕ੍ਖਿਤਾ, ਗੋਤ੍ਤਰਕ੍ਖਿਤਾ, ਧਮ੍ਮਰਕ੍ਖਿਤਾ, ਸਾਰਕ੍ਖਾ, ਸਪਰਿਦਣ੍ਡਾਤਿ ਮਾਤੁਰਕ੍ਖਿਤਾਦਯੋ ਦਸ. ਧਨਕ੍ਕੀਤਾ, ਛਨ੍ਦਵਾਸਿਨੀ, ਭੋਗਵਾਸਿਨੀ, ਪਟਵਾਸਿਨੀ, ਓਦਪਤ੍ਤਕਿਨੀ, ਓਭਤਚੁਮ੍ਬਟਾ, ਦਾਸੀ ਚ ਭਰਿਯਾ ਚ, ਕਮ੍ਮਕਾਰੀ ਚ ਭਰਿਯਾ ਚ, ਧਜਾਹਟਾ, ਮੁਹੁਤ੍ਤਿਕਾਤਿ ਏਤਾ ਧਨਕ੍ਕੀਤਾਦਯੋ ਦਸਾਤਿ ਵੀਸਤਿ. ਇਤ੍ਥੀਸੁ ਪਨ ਦ੍ਵਿਨ੍ਨਂ ਸਾਰਕ੍ਖਸਪਰਿਦਣ੍ਡਾਨਂ ਦਸਨ੍ਨਞ੍ਚ ਧਨਕ੍ਕੀਤਾਦੀਨਨ੍ਤਿ ਦ੍ਵਾਦਸਨ੍ਨਂ ਇਤ੍ਥੀਨਂ ਅਞ੍ਞੇ ਪੁਰਿਸਾ. ਇਦਂ ਅਗਮਨੀਯਟ੍ਠਾਨਂ ਨਾਮ. ਸੋ ਪਨੇਸ ਮਿਚ੍ਛਾਚਾਰੋ ਸੀਲਾਦਿਗੁਣਰਹਿਤੇ ਅਗਮਨੀਯਟ੍ਠਾਨੇ ਅਪ੍ਪਸਾਵਜ੍ਜੋ. ਸੀਲਾਦਿਗੁਣਸਮ੍ਪਨ੍ਨੇ ਮਹਾਸਾਵਜ੍ਜੋ. ਤਸ੍ਸ ਚਤ੍ਤਾਰੋ ਸਮ੍ਭਾਰਾ ਅਗਮਨੀਯਵਤ੍ਥੁ, ਤਸ੍ਮਿਂ ਸੇਵਨਚਿਤ੍ਤਂ, ਸੇਵਨਪ੍ਪਯੋਗੋ, ਮਗ੍ਗੇਨਮਗ੍ਗਪ੍ਪਟਿਪਤ੍ਤਿਅਧਿਵਾਸਨਨ੍ਤਿ. ਏਕੋ ਪਯੋਗੋ ਸਾਹਤ੍ਥਿਕੋ ਏਵ.

ਅਭਿਜ੍ਝਾਯਤੀਤਿ ਅਭਿਜ੍ਝਾ, ਪਰਭਣ੍ਡਾਭਿਮੁਖੀ ਹੁਤ੍ਵਾ ਤਨ੍ਨਿਨ੍ਨਤਾਯ ਪਵਤ੍ਤਤੀਤਿ ਅਤ੍ਥੋ. ਸਾ ‘‘ਅਹੋ ਵਤ ਇਦਂ ਮਮਸ੍ਸਾ’’ਤਿ ਏਵਂ ਪਰਭਣ੍ਡਾਭਿਜ੍ਝਾਯਨਲਕ੍ਖਣਾ ਅਦਿਨ੍ਨਾਦਾਨਂ ਵਿਯ ਅਪ੍ਪਸਾਵਜ੍ਜਾ ਮਹਾਸਾਵਜ੍ਜਾ ਚ. ਤਸ੍ਸਾ ਦ੍ਵੇ ਸਮ੍ਭਾਰਾ ਪਰਭਣ੍ਡਂ, ਅਤ੍ਤਨੋ ਪਰਿਣਾਮਨਞ੍ਚ. ਪਰਭਣ੍ਡਵਤ੍ਥੁਕੇ ਹਿ ਲੋਭੇ ਉਪ੍ਪਨ੍ਨੇਪਿ ਨ ਤਾਵ ਕਮ੍ਮਪਥਭੇਦੋ ਹੋਤਿ, ਯਾਵ ‘‘ਅਹੋ ਵਤੀਦਂ ਮਮਸ੍ਸਾ’’ਤਿ ਅਤ੍ਤਨੋ ਨ ਪਰਿਣਾਮੇਤਿ.

ਹਿਤਸੁਖਂ ਬ੍ਯਾਪਾਦਯਤੀਤਿ ਬ੍ਯਾਪਾਦੋ. ਸੋ ਪਰਂ ਵਿਨਾਸਾਯ ਮਨੋਪਦੋਸਲਕ੍ਖਣੋ ਫਰੁਸਾਵਾਚਾ ਵਿਯ ਅਪ੍ਪਸਾਵਜ੍ਜੋ ਮਹਾਸਾਵਜ੍ਜੋ ਚ. ਤਸ੍ਸ ਦ੍ਵੇ ਸਮ੍ਭਾਰਾ ਪਰਸਤ੍ਤੋ ਚ, ਤਸ੍ਸ ਵਿਨਾਸਚਿਨ੍ਤਾ ਚ. ਪਰਸਤ੍ਤਵਤ੍ਥੁਕੇ ਹਿ ਕੋਧੇ ਉਪ੍ਪਨ੍ਨੇਪਿ ਨ ਤਾਵ ਕਮ੍ਮਪਥਭੇਦੋ ਹੋਤਿ, ਯਾਵ ‘‘ਅਹੋ ਵਤਾਯਂ ਉਚ੍ਛਿਜ੍ਝੇਯ੍ਯ ਵਿਨਸ੍ਸੇਯ੍ਯਾ’’ਤਿ ਤਸ੍ਸ ਵਿਨਾਸਂ ਨ ਚਿਨ੍ਤੇਤਿ.

ਯਥਾਭੁਚ੍ਚਗਹਣਾਭਾਵੇਨ ਮਿਚ੍ਛਾ ਪਸ੍ਸਤੀਤਿ ਮਿਚ੍ਛਾਦਿਟ੍ਠਿ. ਸਾ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ ਨਯੇਨ ਵਿਪਰੀਤਦਸ੍ਸਨਲਕ੍ਖਣਾ. ਸਮ੍ਫਪ੍ਪਲਾਪੋ ਵਿਯ ਅਪ੍ਪਸਾਵਜ੍ਜਾ ਮਹਾਸਾਵਜ੍ਜਾ ਚ. ਅਪਿਚ ਅਨਿਯਤਾ ਅਪ੍ਪਸਾਵਜ੍ਜਾ, ਨਿਯਤਾ ਮਹਾਸਾਵਜ੍ਜਾ. ਤਸ੍ਸਾ ਦ੍ਵੇ ਸਮ੍ਭਾਰਾ ਵਤ੍ਥੁਨੋ ਚ ਗਹਿਤਾਕਾਰਵਿਪਰੀਤਤਾ, ਯਥਾ ਚ ਤਂ ਗਣ੍ਹਾਤਿ, ਤਥਾਭਾਵੇਨ ਤਸ੍ਸੂਪਟ੍ਠਾਨਨ੍ਤਿ.

ਇਮੇਸਂ ਪਨ ਦਸਨ੍ਨਂ ਅਕੁਸਲਕਮ੍ਮਪਥਾਨਂ ਧਮ੍ਮਤੋ ਕੋਟ੍ਠਾਸਤੋ ਆਰਮ੍ਮਣਤੋ ਵੇਦਨਾਤੋ ਮੂਲਤੋਤਿ ਪਞ੍ਚਹਾਕਾਰੇਹਿ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਥ ਧਮ੍ਮਤੋਤਿ ਏਤੇਸੁ ਹਿ ਪਟਿਪਾਟਿਯਾ ਸਤ੍ਤ ਚੇਤਨਾਧਮ੍ਮਾਵ ਹੋਨ੍ਤਿ. ਅਭਿਜ੍ਝਾਦਯੋ ਤਯੋ ਚੇਤਨਾਸਮ੍ਪਯੁਤ੍ਤਾ.

ਕੋਟ੍ਠਾਸਤੋਤਿ ਪਟਿਪਾਟਿਯਾ ਸਤ੍ਤ, ਮਿਚ੍ਛਾਦਿਟ੍ਠਿ ਚਾਤਿ ਇਮੇ ਅਟ੍ਠ ਕਮ੍ਮਪਥਾ ਏਵ ਹੋਨ੍ਤਿ, ਨੋ ਮੂਲਾਨਿ. ਅਭਿਜ੍ਝਾਬ੍ਯਾਪਾਦਾ ਕਮ੍ਮਪਥਾ ਚੇਵ ਮੂਲਾਨਿ ਚ. ਅਭਿਜ੍ਝਾ ਹਿ ਮੂਲਂ ਪਤ੍ਵਾ ਲੋਭੋ ਅਕੁਸਲਮੂਲਂ ਹੋਤਿ. ਬ੍ਯਾਪਾਦੋ ਦੋਸੋ ਅਕੁਸਲਮੂਲਂ ਹੋਤਿ.

ਆਰਮ੍ਮਣਤੋਤਿ ਪਾਣਾਤਿਪਾਤੋ ਜੀਵਿਤਿਨ੍ਦ੍ਰਿਯਾਰਮ੍ਮਣਤੋ ਸਙ੍ਖਾਰਾਰਮ੍ਮਣੋ ਹੋਤਿ. ਅਦਿਨ੍ਨਾਦਾਨਂ ਸਤ੍ਤਾਰਮ੍ਮਣਂ ਵਾ ਸਙ੍ਖਾਰਾਰਮ੍ਮਣਂ ਵਾ, ਮਿਚ੍ਛਾਚਾਰੋ ਫੋਟ੍ਠਬ੍ਬਵਸੇਨ ਸਙ੍ਖਾਰਾਰਮ੍ਮਣੋ. ‘‘ਸਤ੍ਤਾਰਮ੍ਮਣੋ’’ਤਿਪਿ ਏਕੇ. ਮੁਸਾਵਾਦੋ ਸਤ੍ਤਾਰਮ੍ਮਣੋ ਵਾ ਸਙ੍ਖਾਰਾਰਮ੍ਮਣੋ ਵਾ, ਤਥਾ ਪਿਸੁਣਵਾਚਾ. ਫਰੁਸਵਾਚਾ ਸਤ੍ਤਾਰਮ੍ਮਣਾਵ. ਸਮ੍ਫਪ੍ਪਲਾਪੋ ਦਿਟ੍ਠਸੁਤਮੁਤਵਿਞ੍ਞਾਤਵਸੇਨ ਸਤ੍ਤਾਰਮ੍ਮਣੋ ਵਾ ਸਙ੍ਖਾਰਾਰਮ੍ਮਣੋ ਵਾ. ਤਥਾ ਅਭਿਜ੍ਝਾ. ਬ੍ਯਾਪਾਦੋ ਸਤ੍ਤਾਰਮ੍ਮਣੋਵ. ਮਿਚ੍ਛਾਦਿਟ੍ਠਿ ਤੇਭੂਮਕਧਮ੍ਮਵਸੇਨ ਸਙ੍ਖਾਰਾਰਮ੍ਮਣਾ.

ਵੇਦਨਾਤੋਤਿ ਪਾਣਾਤਿਪਾਤੋ ਦੁਕ੍ਖਵੇਦਨੋ ਹੋਤਿ. ਕਿਞ੍ਚਾਪਿ ਹਿ ਰਾਜਾਨੋ ਚੋਰਂ ਦਿਸ੍ਵਾ ਹਸਮਾਨਾਪਿ ‘‘ਗਚ੍ਛਥ ਨਂ ਘਾਤੇਥਾ’’ਤਿ ਵਦਨ੍ਤਿ, ਸਨ੍ਨਿਟ੍ਠਾਪਕਚੇਤਨਾ ਪਨ ਦੁਕ੍ਖਸਮ੍ਪਯੁਤ੍ਤਾਵ ਹੋਤਿ. ਅਦਿਨ੍ਨਾਦਾਨਂ ਤਿਵੇਦਨਂ. ਮਿਚ੍ਛਾਚਾਰੋ ਸੁਖਮਜ੍ਝਤ੍ਤਵਸੇਨ ਦ੍ਵਿਵੇਦਨੋ. ਸਨ੍ਨਿਟ੍ਠਾਪਕਚਿਤ੍ਤੇ ਪਨ ਮਜ੍ਝਤ੍ਤਵੇਦਨੋ ਨ ਹੋਤਿ. ਮੁਸਾਵਾਦੋ ਤਿਵੇਦਨੋ. ਤਥਾ ਪਿਸੁਣਵਾਚਾ. ਫਰੁਸਵਾਚਾ ਦੁਕ੍ਖਵੇਦਨਾ. ਸਮ੍ਫਪ੍ਪਲਾਪੋ ਤਿਵੇਦਨੋ. ਅਭਿਜ੍ਝਾ ਸੁਖਮਜ੍ਝਤ੍ਤਵਸੇਨ ਦ੍ਵਿਵੇਦਨਾ ਤਥਾ ਮਿਚ੍ਛਾਦਿਟ੍ਠਿ. ਬ੍ਯਾਪਾਦੋ ਦੁਕ੍ਖਵੇਦਨੋ.

ਮੂਲਤੋਤਿ ਪਾਣਾਤਿਪਾਤੋ ਦੋਸਮੋਹਵਸੇਨ ਦ੍ਵਿਮੂਲਕੋ ਹੋਤਿ. ਅਦਿਨ੍ਨਾਦਾਨਂ ਦੋਸਮੋਹਵਸੇਨ ਵਾ ਲੋਭਮੋਹਵਸੇਨ ਵਾ. ਮਿਚ੍ਛਾਚਾਰੋ ਲੋਭਮੋਹਵਸੇਨ. ਮੁਸਾਵਾਦੋ ਦੋਸਮੋਹਵਸੇਨ ਵਾ ਲੋਭਮੋਹਵਸੇਨ ਵਾ ਤਥਾ ਪਿਸੁਣਵਾਚਾ ਸਮ੍ਫਪ੍ਪਲਾਪੋ ਚ. ਫਰੁਸਵਾਚਾ ਦੋਸਮੋਹਵਸੇਨ. ਅਭਿਜ੍ਝਾ ਮੋਹਵਸੇਨ ਏਕਮੂਲਾ. ਤਥਾ ਬ੍ਯਾਪਾਦੋ. ਮਿਚ੍ਛਾਦਿਟ੍ਠਿ ਲੋਭਮੋਹਵਸੇਨ ਦ੍ਵਿਮੂਲਾਤਿ.

ਕੁਸਲਕਮ੍ਮਪਥਦਸਕਵਣ੍ਣਨਾ

ਪਾਣਾਤਿਪਾਤਾ ਵੇਰਮਣਿਆਦੀਨਿ ਸਮਾਦਾਨਸਮ੍ਪਤ੍ਤਸਮੁਚ੍ਛੇਦਵਿਰਤਿਵਸੇਨ ਵੇਦਿਤਬ੍ਬਾਨਿ.

ਧਮ੍ਮਤੋ ਪਨ ਏਤੇਸੁਪਿ ਪਟਿਪਾਟਿਯਾ ਸਤ੍ਤ ਚੇਤਨਾਪਿ ਵਤ੍ਤਨ੍ਤਿ ਵਿਰਤਿਯੋਪਿ. ਅਨ੍ਤੇ ਤਯੋ ਚੇਤਨਾਸਮ੍ਪਯੁਤ੍ਤਾਵ.

ਕੋਟ੍ਠਾਸਤੋਤਿ ਪਟਿਪਾਟਿਯਾ ਸਤ੍ਤ ਕਮ੍ਮਪਥਾ ਏਵ, ਨੋ ਮੂਲਾਨਿ. ਅਨ੍ਤੇ ਤਯੋ ਕਮ੍ਮਪਥਾ ਚੇਵ ਮੂਲਾਨਿ ਚ. ਅਨਭਿਜ੍ਝਾ ਹਿ ਮੂਲਂ ਪਤ੍ਵਾ ਅਲੋਭੋ ਕੁਸਲਮੂਲਂ ਹੋਤਿ. ਅਬ੍ਯਾਪਾਦੋ ਅਦੋਸੋ ਕੁਸਲਮੂਲਂ. ਸਮ੍ਮਾਦਿਟ੍ਠਿ ਅਮੋਹੋ ਕੁਸਲਮੂਲਂ.

ਆਰਮ੍ਮਣਤੋਤਿ ਪਾਣਾਤਿਪਾਤਾਦੀਨਂ ਆਰਮ੍ਮਣਾਨੇਵ ਏਤੇਸਂ ਆਰਮ੍ਮਣਾਨਿ. ਵੀਤਿਕ੍ਕਮਿਤਬ੍ਬਤੋਯੇਵ ਹਿ ਵੇਰਮਣੀ ਨਾਮ ਹੋਤਿ. ਯਥਾ ਪਨ ਨਿਬ੍ਬਾਨਾਰਮ੍ਮਣੋ ਅਰਿਯਮਗ੍ਗੋ ਕਿਲੇਸੇ ਪਜਹਤਿ, ਏਵਂ ਜੀਵਿਤਿਨ੍ਦ੍ਰਿਯਾਦਿਆਰਮ੍ਮਣਾਪੇਤੇ ਕਮ੍ਮਪਥਾ ਪਾਣਾਤਿਪਾਤਾਦੀਨਿ ਦੁਸ੍ਸੀਲ੍ਯਾਨਿ ਪਜਹਨ੍ਤੀਤਿ ਵੇਦਿਤਬ੍ਬਾ.

ਵੇਦਨਾਤੋਤਿ ਸਬ੍ਬੇ ਸੁਖਵੇਦਨਾ ਹੋਨ੍ਤਿ ਮਜ੍ਝਤ੍ਤਵੇਦਨਾ ਵਾ. ਕੁਸਲਂ ਪਤ੍ਵਾ ਹਿ ਦੁਕ੍ਖਵੇਦਨਾ ਨਾਮ ਨਤ੍ਥਿ.

ਮੂਲਤੋਤਿ ਪਟਿਪਾਟਿਯਾ ਸਤ੍ਤ ਞਾਣਸਮ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਅਲੋਭਅਦੋਸਅਮੋਹਵਸੇਨ ਤਿਮੂਲਾਨਿ ਹੋਨ੍ਤਿ, ਞਾਣਵਿਪ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਦ੍ਵਿਮੂਲਾਨਿ. ਅਨਭਿਜ੍ਝਾ ਞਾਣਸਮ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਦ੍ਵਿਮੂਲਾ, ਞਾਣਵਿਪ੍ਪਯੁਤ੍ਤਚਿਤ੍ਤੇਨ ਏਕਮੂਲਾ. ਅਲੋਭੋ ਪਨ ਅਤ੍ਤਨਾਵ ਅਤ੍ਤਨੋ ਮੂਲਂ ਨ ਹੋਤਿ. ਅਬ੍ਯਾਪਾਦੇਪਿ ਏਸੇਵ ਨਯੋ. ਸਮ੍ਮਾਦਿਟ੍ਠਿ ਅਲੋਭਾਦੋਸਵਸੇਨ ਦ੍ਵਿਮੂਲਾ ਏਵਾਤਿ.

ਅਰਿਯਵਾਸਦਸਕਵਣ੍ਣਨਾ

੩੪੮. ਅਰਿਯਵਾਸਾਤਿ ਅਰਿਯਾ ਏਵ ਵਸਿਂਸੁ ਵਸਨ੍ਤਿ ਵਸਿਸ੍ਸਨ੍ਤਿ ਏਤੇਸੂਤਿ ਅਰਿਯਵਾਸਾ. ਪਞ੍ਚਙ੍ਗਵਿਪ੍ਪਹੀਨੋਤਿ ਪਞ੍ਚਹਿ ਅਙ੍ਗੇਹਿ ਵਿਪ੍ਪਯੁਤ੍ਤੋਵ ਹੁਤ੍ਵਾ ਖੀਣਾਸਵੋ ਅਵਸਿ ਵਸਤਿ ਵਸਿਸ੍ਸਤੀਤਿ ਤਸ੍ਮਾ ਅਯਂ ਪਞ੍ਚਙ੍ਗਵਿਪ੍ਪਹੀਨਤਾ, ਅਰਿਯਸ੍ਸ ਵਾਸਤ੍ਤਾ ਅਰਿਯਵਾਸੋਤਿ ਵੁਤ੍ਤੋ. ਏਸ ਨਯੋ ਸਬ੍ਬਤ੍ਥ.

ਏਵਂ ਖੋ, ਆਵੁਸੋ, ਭਿਕ੍ਖੁ ਛਲ਼ਙ੍ਗਸਮਨ੍ਨਾਗਤੋ ਹੋਤੀਤਿ ਛਲ਼ਙ੍ਗੁਪੇਕ੍ਖਾਯ ਸਮਨ੍ਨਾਗਤੋ ਹੋਤਿ. ਛਲ਼ਙ੍ਗੁਪੇਕ੍ਖਾ ਨਾਮ ਕੇਤਿ? ਞਾਣਾਦਯੋ. ‘‘ਞਾਣ’’ਨ੍ਤਿ ਵੁਤ੍ਤੇ ਕਿਰਿਯਤੋ ਚਤ੍ਤਾਰਿ ਞਾਣਸਮ੍ਪਯੁਤ੍ਤਚਿਤ੍ਤਾਨਿ ਲਬ੍ਭਨ੍ਤਿ. ‘‘ਸਤਤਵਿਹਾਰੋ’’ਤਿ ਵੁਤ੍ਤੇ ਅਟ੍ਠ ਮਹਾਚਿਤ੍ਤਾਨਿ. ‘‘ਰਜ੍ਜਨਦੁਸ੍ਸਨਂ ਨਤ੍ਥੀ’’ਤਿ ਵੁਤ੍ਤੇ ਦਸ ਚਿਤ੍ਤਾਨਿ ਲਬ੍ਭਨ੍ਤਿ. ਸੋਮਨਸ੍ਸਂ ਆਸੇਵਨਵਸੇਨ ਲਬ੍ਭਤਿ.

ਸਤਾਰਕ੍ਖੇਨ ਚੇਤਸਾਤਿ ਖੀਣਾਸਵਸ੍ਸ ਹਿ ਤੀਸੁ ਦ੍ਵਾਰੇਸੁ ਸਬ੍ਬਕਾਲਂ ਸਤਿ ਆਰਕ੍ਖਕਿਚ੍ਚਂ ਸਾਧੇਤਿ. ਤੇਨੇਵਸ੍ਸ ‘‘ਚਰਤੋ ਚ ਤਿਟ੍ਠਤੋ ਚ ਸੁਤ੍ਤਸ੍ਸ ਚ ਜਾਗਰਸ੍ਸ ਚ ਸਤਤਂ ਸਮਿਤਂ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਹੋਤੀ’’ਤਿ ਵੁਚ੍ਚਤਿ.

ਪੁਥੁਸਮਣਬ੍ਰਾਹ੍ਮਣਾਨਨ੍ਤਿ ਬਹੂਨਂ ਸਮਣਬ੍ਰਾਹ੍ਮਣਾਨਂ. ਏਤ੍ਥ ਚ ਸਮਣਾਤਿ ਪਬ੍ਬਜ੍ਜੁਪਗਤਾ. ਬ੍ਰਾਹ੍ਮਣਾਤਿ ਭੋਵਾਦਿਨੋ. ਪੁਥੁਪਚ੍ਚੇਕਸਚ੍ਚਾਨੀਤਿ ਬਹੂਨਿ ਪਾਟੇਕ੍ਕਸਚ੍ਚਾਨਿ, ਇਦਮੇਵ ਦਸ੍ਸਨਂ ਸਚ੍ਚਂ, ਇਦਮੇਵ ਦਸ੍ਸਨਂ ਸਚ੍ਚਨ੍ਤਿ ਏਵਂ ਪਾਟਿਯੇਕ੍ਕਂ ਗਹਿਤਾਨਿ ਬਹੂਨਿ ਸਚ੍ਚਾਨੀਤਿ ਅਤ੍ਥੋ. ਨੁਨ੍ਨਾਨੀਤਿ ਨਿਹਤਾਨਿ. ਪਣੁਨ੍ਨਾਨੀਤਿ ਸੁਟ੍ਠੁ ਨਿਹਤਾਨਿ. ਚਤ੍ਤਾਨੀਤਿ ਵਿਸ੍ਸਟ੍ਠਾਨਿ. ਵਨ੍ਤਾਨੀਤਿ ਵਮਿਤਾਨਿ. ਮੁਤ੍ਤਾਨੀਤਿ ਛਿਨ੍ਨਬਨ੍ਧਨਾਨਿ ਕਤਾਨਿ. ਪਹੀਨਾਨੀਤਿ ਪਜਹਿਤਾਨਿ. ਪਟਿਨਿਸ੍ਸਟ੍ਠਾਨੀਤਿ ਯਥਾ ਨ ਪੁਨ ਚਿਤ੍ਤਂ ਆਰੁਹਨ੍ਤਿ, ਏਵਂ ਪਟਿਨਿਸ੍ਸਜ੍ਜਿਤਾਨਿ. ਸਬ੍ਬਾਨੇਵ ਤਾਨਿ ਗਹਿਤਗ੍ਗਹਣਸ੍ਸ ਵਿਸ੍ਸਟ੍ਠਭਾਵਵੇਵਚਨਾਨਿ.

ਸਮਵਯਸਟ੍ਠੇਸਨੋਤਿ ਏਤ੍ਥ ਅਵਯਾਤਿ ਅਨੂਨਾ. ਸਟ੍ਠਾਤਿ ਵਿਸ੍ਸਟ੍ਠਾ. ਸਮ੍ਮਾ ਅਵਯਾ ਸਟ੍ਠਾ ਏਸਨਾ ਅਸ੍ਸਾਤਿ ਸਮਵਯਸਟ੍ਠੇਸਨੋ. ਸਮ੍ਮਾ ਵਿਸ੍ਸਟ੍ਠਸਬ੍ਬਏਸਨੋਤਿ ਅਤ੍ਥੋ. ਰਾਗਾ ਚਿਤ੍ਤਂ ਵਿਮੁਤ੍ਤਨ੍ਤਿਆਦੀਹਿ ਮਗ੍ਗਸ੍ਸ ਕਿਚ੍ਚਨਿਪ੍ਫਤ੍ਤਿ ਕਥਿਤਾ.

ਰਾਗੋ ਮੇ ਪਹੀਨੋਤਿਆਦੀਹਿ ਪਚ੍ਚਵੇਕ੍ਖਣਾਯ ਫਲਂ ਕਥਿਤਂ.

ਅਸੇਕ੍ਖਧਮ੍ਮਦਸਕਵਣ੍ਣਨਾ

ਅਸੇਕ੍ਖਾ ਸਮ੍ਮਾਦਿਟ੍ਠੀਤਿਆਦਯੋ ਸਬ੍ਬੇਪਿ ਫਲਸਮ੍ਪਯੁਤ੍ਤਧਮ੍ਮਾ ਏਵ. ਏਤ੍ਥ ਚ ਸਮ੍ਮਾਦਿਟ੍ਠਿ, ਸਮ੍ਮਾਞਾਣਨ੍ਤਿ ਦ੍ਵੀਸੁ ਠਾਨੇਸੁ ਪਞ੍ਞਾਵ ਕਥਿਤਾ. ਸਮ੍ਮਾਵਿਮੁਤ੍ਤੀਤਿ ਇਮਿਨਾ ਪਦੇਨ ਵੁਤ੍ਤਾਵਸੇਸਾ. ਫਲਸਮਾਪਤ੍ਤਿਧਮ੍ਮਾ ਸਙ੍ਗਹਿਤਾਤਿ ਵੇਦਿਤਬ੍ਬਾ.

‘‘ਇਮੇ ਖੋ, ਆਵੁਸੋ’’ਤਿਆਦਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਤਿ ਛਨ੍ਨਂ ਦਸਕਾਨਂ ਵਸੇਨ ਸਮਸਟ੍ਠਿ ਪਞ੍ਹੇ ਕਥੇਨ੍ਤੋ ਥੇਰੋ ਸਾਮਗ੍ਗਿਰਸਂ ਦਸ੍ਸੇਸੀਤਿ.

ਦਸਕਵਣ੍ਣਨਾ ਨਿਟ੍ਠਿਤਾ.

ਪਞ੍ਹਸਮੋਧਾਨਵਣ੍ਣਨਾ

੩੪੯. ਇਧ ਪਨ ਠਤ੍ਵਾ ਪਞ੍ਹਾ ਸਮੋਧਾਨੇਤਬ੍ਬਾ. ਇਮਸ੍ਮਿਞ੍ਹਿ ਸੁਤ੍ਤੇ ਏਕਕਵਸੇਨ ਦ੍ਵੇ ਪਞ੍ਹਾ ਕਥਿਤਾ. ਦੁਕਵਸੇਨ ਸਤ੍ਤਤਿ. ਤਿਕਵਸੇਨ ਅਸੀਤਿਸਤਂ. ਚਤੁਕ੍ਕਵਸੇਨ ਦ੍ਵੇਸਤਾਨਿ. ਪਞ੍ਚਕਵਸੇਨ ਤਿਂਸਸਤਂ. ਛਕ੍ਕਵਸੇਨ ਬਾਤ੍ਤਿਂਸਸਤਂ. ਸਤ੍ਤਕਵਸੇਨ ਅਟ੍ਠਨਵੁਤਿ. ਅਟ੍ਠਕਵਸੇਨ ਅਟ੍ਠਾਸੀਤਿ. ਨਵਕਵਸੇਨ ਚਤੁਪਣ੍ਣਾਸ. ਦਸਕਵਸੇਨ ਸਮਸਟ੍ਠੀਤਿ ਏਵਂ ਸਹਸ੍ਸਂ ਚੁਦ੍ਦਸ ਪਞ੍ਹਾ ਕਥਿਤਾ.

ਇਮਞ੍ਹਿ ਸੁਤ੍ਤਨ੍ਤਂ ਠਪੇਤ੍ਵਾ ਤੇਪਿਟਕੇ ਬੁਦ੍ਧਵਚਨੇ ਅਞ੍ਞੋ ਸੁਤ੍ਤਨ੍ਤੋ ਏਵਂ ਬਹੁਪਞ੍ਹਪਟਿਮਣ੍ਡਿਤੋ ਨਤ੍ਥਿ. ਭਗਵਾ ਇਮਂ ਸੁਤ੍ਤਨ੍ਤਂ ਆਦਿਤੋ ਪਟ੍ਠਾਯ ਸਕਲਂ ਸੁਤ੍ਵਾ ਚਿਨ੍ਤੇਸਿ – ‘‘ਧਮ੍ਮਸੇਨਾਪਤਿ ਸਾਰਿਪੁਤ੍ਤੋ ਬੁਦ੍ਧਬਲਂ ਦੀਪੇਤ੍ਵਾ ਅਪ੍ਪਟਿਵਤ੍ਤਿਯਂ ਸੀਹਨਾਦਂ ਨਦਤਿ. ਸਾਵਕਭਾਸਿਤੋਤਿ ਵੁਤ੍ਤੇ ਓਕਪ੍ਪਨਾ ਨ ਹੋਤਿ, ਜਿਨਭਾਸਿਤੋਤਿ ਵੁਤ੍ਤੇ ਹੋਤਿ, ਤਸ੍ਮਾ ਜਿਨਭਾਸਿਤਂ ਕਤ੍ਵਾ ਦੇਵਮਨੁਸ੍ਸਾਨਂ ਓਕਪ੍ਪਨਂ ਇਮਸ੍ਮਿਂ ਸੁਤ੍ਤਨ੍ਤੇ ਉਪ੍ਪਾਦੇਸ੍ਸਾਮੀ’’ਤਿ. ਤਤੋ ਵੁਟ੍ਠਾਯ ਸਾਧੁਕਾਰਂ ਅਦਾਸਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਾ ਵੁਟ੍ਠਹਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਆਮਨ੍ਤੇਸਿ, ਸਾਧੁ, ਸਾਧੁ, ਸਾਰਿਪੁਤ੍ਤ, ਸਾਧੁ ਖੋ ਤ੍ਵਂ ਸਾਰਿਪੁਤ੍ਤ, ਭਿਕ੍ਖੂਨਂ ਸਙ੍ਗੀਤਿਪਰਿਯਾਯਂ ਅਭਾਸੀ’’ਤਿ.

ਤਤ੍ਥ ਸਙ੍ਗੀਤਿਪਰਿਯਾਯਨ੍ਤਿ ਸਾਮਗ੍ਗਿਯਾ ਕਾਰਣਂ. ਇਦਂ ਵੁਤ੍ਤਂ ਹੋਤਿ – ‘‘ਸਾਧੁ, ਖੋ ਤ੍ਵਂ, ਸਾਰਿਪੁਤ੍ਤ, ਮਮ ਸਬ੍ਬਞ੍ਞੁਤਞ੍ਞਾਣੇਨ ਸਂਸਨ੍ਦਿਤ੍ਵਾ ਭਿਕ੍ਖੂਨਂ ਸਾਮਗ੍ਗਿਰਸਂ ਅਭਾਸੀ’’ਤਿ. ਸਮਨੁਞ੍ਞੋ ਸਤ੍ਥਾ ਅਹੋਸੀਤਿ ਅਨੁਮੋਦਨੇਨ ਸਮਨੁਞ੍ਞੋ ਅਹੋਸਿ. ਏਤ੍ਤਕੇਨ ਅਯਂ ਸੁਤ੍ਤਨ੍ਤੋ ਜਿਨਭਾਸਿਤੋ ਨਾਮ ਜਾਤੋ. ਦੇਸਨਾਪਰਿਯੋਸਾਨੇ ਇਮਂ ਸੁਤ੍ਤਨ੍ਤਂ ਮਨਸਿਕਰੋਨ੍ਤਾ ਤੇ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਸਙ੍ਗੀਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਦਸੁਤ੍ਤਰਸੁਤ੍ਤਵਣ੍ਣਨਾ

੩੫੦. ਏਵਂ ਮੇ ਸੁਤਨ੍ਤਿ ਦਸੁਤ੍ਤਰਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ – ਆਵੁਸੋ ਭਿਕ੍ਖਵੇਤਿ ਸਾਵਕਾਨਂ ਆਲਪਨਮੇਤਂ. ਬੁਦ੍ਧਾ ਹਿ ਪਰਿਸਂ ਆਮਨ੍ਤਯਮਾਨਾ ‘ਭਿਕ੍ਖਵੇ’ਤਿ ਵਦਨ੍ਤਿ. ਸਾਵਕਾ ਸਤ੍ਥਾਰਂ ਉਚ੍ਚਟ੍ਠਾਨੇ ਠਪੇਸ੍ਸਾਮਾਤਿ ਸਤ੍ਥੁ ਆਲਪਨੇਨ ਅਨਾਲਪਿਤ੍ਵਾ ਆਵੁਸੋਤਿ ਆਲਪਨ੍ਤਿ. ਤੇ ਭਿਕ੍ਖੂਤਿ ਤੇ ਧਮ੍ਮਸੇਨਾਪਤਿਂ ਪਰਿਵਾਰੇਤ੍ਵਾ ਨਿਸਿਨ੍ਨਾ ਭਿਕ੍ਖੂ. ਕੇ ਪਨ ਤੇ ਭਿਕ੍ਖੂਤਿ? ਅਨਿਬਦ੍ਧਵਾਸਾ ਦਿਸਾਗਮਨੀਯਾ ਭਿਕ੍ਖੂ. ਬੁਦ੍ਧਕਾਲੇ ਦ੍ਵੇ ਵਾਰੇ ਭਿਕ੍ਖੂ ਸਨ੍ਨਿਪਤਨ੍ਤਿ – ਉਪਕਟ੍ਠਵਸ੍ਸੂਪਨਾਯਿਕਕਾਲੇ ਚ ਪਵਾਰਣਕਾਲੇ ਚ. ਉਪਕਟ੍ਠਵਸ੍ਸੂਪਨਾਯਿਕਾਯ ਦਸਪਿ ਵੀਸਤਿਪਿ ਤਿਂਸਮ੍ਪਿ ਚਤ੍ਤਾਲੀਸਮ੍ਪਿ ਪਞ੍ਞਾਸਮ੍ਪਿ ਭਿਕ੍ਖੂ ਵਗ੍ਗਾ ਵਗ੍ਗਾ ਕਮ੍ਮਟ੍ਠਾਨਤ੍ਥਾਯ ਆਗਚ੍ਛਨ੍ਤਿ. ਭਗਵਾ ਤੇਹਿ ਸਦ੍ਧਿਂ ਸਮ੍ਮੋਦਿਤ੍ਵਾ ਕਸ੍ਮਾ, ਭਿਕ੍ਖਵੇ, ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਵਿਚਰਥਾਤਿ ਪੁਚ੍ਛਤਿ. ਅਥ ਤੇ ‘‘ਭਗਵਾ ਕਮ੍ਮਟ੍ਠਾਨਤ੍ਥਂ ਆਗਤਮ੍ਹ, ਕਮ੍ਮਟ੍ਠਾਨਂ ਨੋ ਦੇਥਾ’’ਤਿ ਯਾਚਨ੍ਤਿ.

ਸਤ੍ਥਾ ਤੇਸਂ ਚਰਿਯਵਸੇਨ ਰਾਗਚਰਿਤਸ੍ਸ ਅਸੁਭਕਮ੍ਮਟ੍ਠਾਨਂ ਦੇਤਿ. ਦੋਸਚਰਿਤਸ੍ਸ ਮੇਤ੍ਤਾਕਮ੍ਮਟ੍ਠਾਨਂ, ਮੋਹਚਰਿਤਸ੍ਸ ਉਦ੍ਦੇਸੋ ਪਰਿਪੁਚ੍ਛਾ – ‘ਕਾਲੇਨ ਧਮ੍ਮਸ੍ਸਵਨਂ, ਕਾਲੇਨ ਧਮ੍ਮਸਾਕਚ੍ਛਾ, ਇਦਂ ਤੁਯ੍ਹਂ ਸਪ੍ਪਾਯ’ਨ੍ਤਿ ਆਚਿਕ੍ਖਤਿ. ਵਿਤਕ੍ਕਚਰਿਤਸ੍ਸ ਆਨਾਪਾਨਸ੍ਸਤਿਕਮ੍ਮਟ੍ਠਾਨਂ ਦੇਤਿ. ਸਦ੍ਧਾਚਰਿਤਸ੍ਸ ਪਸਾਦਨੀਯਸੁਤ੍ਤਨ੍ਤੇ ਬੁਦ੍ਧਸੁਬੋਧਿਂ ਧਮ੍ਮਸੁਧਮ੍ਮਤਂ ਸਙ੍ਘਸੁਪ੍ਪਟਿਪਤ੍ਤਿਞ੍ਚ ਪਕਾਸੇਤਿ. ਞਾਣਚਰਿਤਸ੍ਸ ਅਨਿਚ੍ਚਤਾਦਿਪਟਿਸਂਯੁਤ੍ਤੇ ਗਮ੍ਭੀਰੇ ਸੁਤ੍ਤਨ੍ਤੇ ਕਥੇਤਿ. ਤੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸਚੇ ਸਪ੍ਪਾਯਂ ਹੋਤਿ, ਤਤ੍ਥੇਵ ਵਸਨ੍ਤਿ. ਨੋ ਚੇ ਹੋਤਿ, ਸਪ੍ਪਾਯਂ ਸੇਨਾਸਨਂ ਪੁਚ੍ਛਿਤ੍ਵਾ ਗਚ੍ਛਨ੍ਤਿ. ਤੇ ਤਤ੍ਥ ਵਸਨ੍ਤਾ ਤੇਮਾਸਿਕਂ ਪਟਿਪਦਂ ਗਹੇਤ੍ਵਾ ਘਟੇਤ੍ਵਾ ਵਾਯਮਨ੍ਤਾ ਸੋਤਾਪਨ੍ਨਾਪਿ ਹੋਨ੍ਤਿ ਸਕਦਾਗਾਮਿਨੋਪਿ ਅਨਾਗਾਮਿਨੋਪਿ ਅਰਹਨ੍ਤੋਪਿ.

ਤਤੋ ਵੁਤ੍ਥਵਸ੍ਸਾ ਪਵਾਰੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ‘‘ਭਗਵਾ ਅਹਂ ਤੁਮ੍ਹਾਕਂ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸੋਤਾਪਤ੍ਤਿਫਲਂ ਪਤ੍ਤੋ…ਪੇ… ਅਹਂ ਅਗ੍ਗਫਲਂ ਅਰਹਤ੍ਤ’’ਨ੍ਤਿ ਪਟਿਲਦ੍ਧਗੁਣਂ ਆਰੋਚੇਨ੍ਤਿ. ਤਤ੍ਥ ਇਮੇ ਭਿਕ੍ਖੂ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਆਗਤਾ. ਏਵਂ ਆਗਨ੍ਤ੍ਵਾ ਗਚ੍ਛਨ੍ਤੇ ਪਨ ਭਿਕ੍ਖੂ ਭਗਵਾ ਅਗ੍ਗਸਾਵਕਾਨਂ ਸਨ੍ਤਿਕਂ ਪੇਸੇਤਿ, ਯਥਾਹ ‘‘ਅਪਲੋਕੇਥ ਪਨ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ’’ਤਿ. ਭਿਕ੍ਖੂ ਚ ਵਦਨ੍ਤਿ ‘‘ਕਿਂ ਨੁ ਖੋ ਮਯਂ, ਭਨ੍ਤੇ, ਅਪਲੋਕੇਮ ਸਾਰਿਪੁਤ੍ਤਮੋਗ੍ਗਲ੍ਲਾਨੇ’’ਤਿ (ਸਂ. ਨਿ. ੩.੨). ਅਥ ਨੇ ਭਗਵਾ ਤੇਸਂ ਦਸ੍ਸਨੇ ਉਯ੍ਯੋਜੇਸਿ. ‘‘ਸੇਵਥ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ; ਭਜਥ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ. ਪਣ੍ਡਿਤਾ ਭਿਕ੍ਖੂ ਅਨੁਗ੍ਗਾਹਕਾ ਸਬ੍ਰਹ੍ਮਚਾਰੀਨਂ. ਸੇਯ੍ਯਥਾਪਿ, ਭਿਕ੍ਖਵੇ, ਜਨੇਤਾ ਏਵਂ ਸਾਰਿਪੁਤ੍ਤੋ. ਸੇਯ੍ਯਥਾਪਿ ਜਾਤਸ੍ਸ ਆਪਾਦੇਤਾ ਏਵਂ ਮੋਗ੍ਗਲ੍ਲਾਨੋ. ਸਾਰਿਪੁਤ੍ਤੋ, ਭਿਕ੍ਖਵੇ, ਸੋਤਾਪਤ੍ਤਿਫਲੇ ਵਿਨੇਤਿ, ਮੋਗ੍ਗਲ੍ਲਾਨੋ ਉਤ੍ਤਮਤ੍ਥੇ’’ਤਿ (ਮ. ਨਿ. ੩.੩੭੧).

ਤਦਾਪਿ ਭਗਵਾ ਇਮੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਤੇਸਂ ਭਿਕ੍ਖੂਨਂ ਆਸਯਂ ਉਪਪਰਿਕ੍ਖਨ੍ਤੋ ‘‘ਇਮੇ ਭਿਕ੍ਖੂ ਸਾਵਕਵਿਨੇਯ੍ਯਾ’’ਤਿ ਅਦ੍ਦਸ. ਸਾਵਕਵਿਨੇਯ੍ਯਾ ਨਾਮ ਯੇ ਬੁਦ੍ਧਾਨਮ੍ਪਿ ਧਮ੍ਮਦੇਸਨਾਯ ਬੁਜ੍ਝਨ੍ਤਿ ਸਾਵਕਾਨਮ੍ਪਿ. ਬੁਦ੍ਧਵਿਨੇਯ੍ਯਾ ਪਨ ਸਾਵਕਾ ਬੋਧੇਤੁਂ ਨ ਸਕ੍ਕੋਨ੍ਤਿ. ਸਾਵਕਵਿਨੇਯ੍ਯਭਾਵਂ ਪਨ ਏਤੇਸਂ ਞਤ੍ਵਾ ਕਤਰਸ੍ਸ ਭਿਕ੍ਖੁਨੋ ਦੇਸਨਾਯ ਬੁਜ੍ਝਿਸ੍ਸਨ੍ਤੀਤਿ ਓਲੋਕੇਨ੍ਤੋ ਸਾਰਿਪੁਤ੍ਤਸ੍ਸਾਤਿ ਦਿਸ੍ਵਾ ਥੇਰਸ੍ਸ ਸਨ੍ਤਿਕਂ ਪੇਸੇਸਿ. ਥੇਰੋ ਤੇ ਭਿਕ੍ਖੂ ਪੁਚ੍ਛਿ ‘‘ਸਤ੍ਥੁ ਸਨ੍ਤਿਕਂ ਗਤਤ੍ਥ ਆਵੁਸੋ’’ਤਿ. ‘‘ਆਮ, ਗਤਮ੍ਹ ਸਤ੍ਥਾਰਾ ਪਨ ਅਮ੍ਹੇ ਤੁਮ੍ਹਾਕਂ ਸਨ੍ਤਿਕਂ ਪੇਸਿਤਾ’’ਤਿ. ਤਤੋ ਥੇਰੋ ‘‘ਇਮੇ ਭਿਕ੍ਖੂ ਮਯ੍ਹਂ ਦੇਸਨਾਯ ਬੁਜ੍ਝਿਸ੍ਸਨ੍ਤਿ, ਕੀਦਿਸੀ ਨੁ ਖੋ ਤੇਸਂ ਦੇਸਨਾ ਵਟ੍ਟਤੀ’’ਤਿ ਚਿਨ੍ਤੇਨ੍ਤੋ ‘‘ਇਮੇ ਭਿਕ੍ਖੂ ਸਮਗ੍ਗਾਰਾਮਾ, ਸਾਮਗ੍ਗਿਰਸਸ੍ਸ ਦੀਪਿਕਾ ਨੇਸਂ ਦੇਸਨਾ ਵਟ੍ਟਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਥਾਰੂਪਂ ਦੇਸਨਂ ਦੇਸੇਤੁਕਾਮੋ ਦਸੁਤ੍ਤਰਂ ਪਵਕ੍ਖਾਮੀਤਿਆਦਿਮਾਹ. ਤਤ੍ਥ ਦਸਧਾ ਮਾਤਿਕਂ ਠਪੇਤ੍ਵਾ ਵਿਭਤ੍ਤੋਤਿ ਦਸੁਤ੍ਤਰੋ, ਏਕਕਤੋ ਪਟ੍ਠਾਯ ਯਾਵ ਦਸਕਾ ਗਤੋਤਿਪਿ ਦਸੁਤ੍ਤਰੋ, ਏਕੇਕਸ੍ਮਿਂ ਪਬ੍ਬੇ ਦਸ ਦਸ ਪਞ੍ਹਾ ਵਿਸੇਸਿਤਾਤਿਪਿ ਦਸੁਤ੍ਤਰੋ, ਤਂ ਦਸੁਤ੍ਤਰਂ. ਪਵਕ੍ਖਾਮੀਤਿ ਕਥੇਸ੍ਸਾਮਿ. ਧਮ੍ਮਨ੍ਤਿ ਸੁਤ੍ਤਂ. ਨਿਬ੍ਬਾਨਪਤ੍ਤਿਯਾਤਿ ਨਿਬ੍ਬਾਨਪਟਿਲਾਭਤ੍ਥਾਯ. ਦੁਕ੍ਖਸ੍ਸਨ੍ਤਕਿਰਿਯਾਯਾਤਿ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਪਰਿਯਨ੍ਤਕਰਣਤ੍ਥਂ. ਸਬ੍ਬਗਨ੍ਥਪ੍ਪਮੋਚਨਨ੍ਤਿ ਅਭਿਜ੍ਝਾਕਾਯਗਨ੍ਥਾਦੀਨਂ ਸਬ੍ਬਗਨ੍ਥਾਨਂ ਪਮੋਚਨਂ.

ਇਤਿ ਥੇਰੋ ਦੇਸਨਂ ਉਚ੍ਚਂ ਕਰੋਨ੍ਤੋ ਭਿਕ੍ਖੂਨਂ ਤਤ੍ਥ ਪੇਮਂ ਜਨੇਨ੍ਤੋ ਏਵਮੇਤਂ ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਂ ਧਾਰੇਤਬ੍ਬਂ ਵਾਚੇਤਬ੍ਬਂ ਮਞ੍ਞਿਸ੍ਸਨ੍ਤੀਤਿ ਚਤੂਹਿ ਪਦੇਹਿ ਵਣ੍ਣਂ ਕਥੇਸਿ, ‘‘ਏਕਾਯਨੋ ਅਯਂ, ਭਿਕ੍ਖਵੇ, ਮਗ੍ਗੋ’’ਤਿਆਦਿਨਾ ਨਯੇਨ ਤੇਸਂ ਤੇਸਂ ਸੁਤ੍ਤਾਨਂ ਭਗਵਾ ਵਿਯ.

ਏਕਧਮ੍ਮਵਣ੍ਣਨਾ

੩੫੧. (ਕ) ਤਤ੍ਥ ਬਹੁਕਾਰੋਤਿ ਬਹੂਪਕਾਰੋ.

(ਖ) ਭਾਵੇਤਬ੍ਬੋਤਿ ਵਡ੍ਢੇਤਬ੍ਬੋ.

(ਗ) ਪਰਿਞ੍ਞੇਯ੍ਯੋਤਿ ਤੀਹਿ ਪਰਿਞ੍ਞਾਹਿ ਪਰਿਜਾਨਿਤਬ੍ਬੋ.

(ਘ) ਪਹਾਤਬ੍ਬੋਤਿ ਪਹਾਨਾਨੁਪਸ੍ਸਨਾਯ ਪਜਹਿਤਬ੍ਬੋ.

(ਙ) ਹਾਨਭਾਗਿਯੋਤਿ ਅਪਾਯਗਾਮਿਪਰਿਹਾਨਾਯ ਸਂਵਤ੍ਤਨਕੋ.

(ਚ) ਵਿਸੇਸਭਾਗਿਯੋਤਿ ਵਿਸੇਸਗਾਮਿਵਿਸੇਸਾਯ ਸਂਵਤ੍ਤਨਕੋ.

(ਛ) ਦੁਪ੍ਪਟਿਵਿਜ੍ਝੋਤਿ ਦੁਪ੍ਪਚ੍ਚਕ੍ਖਕਰੋ.

(ਜ) ਉਪ੍ਪਾਦੇਤਬ੍ਬੋਤਿ ਨਿਪ੍ਫਾਦੇਤਬ੍ਬੋ.

(ਝ) ਅਭਿਞ੍ਞੇਯ੍ਯੋਤਿ ਞਾਤਪਰਿਞ੍ਞਾਯ ਅਭਿਜਾਨਿਤਬ੍ਬੋ.

(ਞ) ਸਚ੍ਛਿਕਾਤਬ੍ਬੋਤਿ ਪਚ੍ਚਕ੍ਖਂ ਕਾਤਬ੍ਬੋ.

ਏਵਂ ਸਬ੍ਬਤ੍ਥ ਮਾਤਿਕਾਸੁ ਅਤ੍ਥੋ ਵੇਦਿਤਬ੍ਬੋ. ਇਤਿ ਆਯਸ੍ਮਾ ਸਾਰਿਪੁਤ੍ਤੋ ਯਥਾ ਨਾਮ ਦਕ੍ਖੋ ਵੇਲ਼ੁਕਾਰੋ ਸਮ੍ਮੁਖੀਭੂਤਂ ਵੇਲ਼ੁਂ ਛੇਤ੍ਵਾ ਨਿਗ੍ਗਣ੍ਠਿਂ ਕਤ੍ਵਾ ਦਸਧਾ ਖਣ੍ਡੇ ਕਤ੍ਵਾ ਏਕਮੇਕਂ ਖਣ੍ਡਂ ਹੀਰਂ ਹੀਰਂ ਕਰੋਨ੍ਤੋ ਫਾਲੇਤਿ, ਏਵਮੇਵ ਤੇਸਂ ਭਿਕ੍ਖੂਨਂ ਸਪ੍ਪਾਯਂ ਦੇਸਨਂ ਉਪਪਰਿਕ੍ਖਿਤ੍ਵਾ ਦਸਧਾ ਮਾਤਿਕਂ ਠਪੇਤ੍ਵਾ ਏਕੇਕਕੋਟ੍ਠਾਸੇ ਏਕੇਕਪਦਂ ਵਿਭਜਨ੍ਤੋ ‘‘ਕਤਮੋ ਏਕੋ ਧਮ੍ਮੋ ਬਹੁਕਾਰੋ, ਅਪ੍ਪਮਾਦੋ ਕੁਸਲੇਸੁ ਧਮ੍ਮੇਸੂਤਿ’’ਤਿਆਦਿਨਾ ਨਯੇਨ ਦੇਸਨਂ ਵਿਤ੍ਥਾਰੇਤੁਂ ਆਰਦ੍ਧੋ.

ਤਤ੍ਥ ਅਪ੍ਪਮਾਦੋ ਕੁਸਲੇਸੁ ਧਮ੍ਮੇਸੂਤਿ ਸਬ੍ਬਤ੍ਥਕਂ ਉਪਕਾਰਕਂ ਅਪ੍ਪਮਾਦਂ ਕਥੇਸਿ. ਅਯਞ੍ਹਿ ਅਪ੍ਪਮਾਦੋ ਨਾਮ ਸੀਲਪੂਰਣੇ, ਇਨ੍ਦ੍ਰਿਯਸਂਵਰੇ, ਭੋਜਨੇ ਮਤ੍ਤਞ੍ਞੁਤਾਯ, ਜਾਗਰਿਯਾਨੁਯੋਗੇ, ਸਤ੍ਤਸੁ ਸਦ੍ਧਮ੍ਮੇਸੁ, ਵਿਪਸ੍ਸਨਾਗਬ੍ਭਂ ਗਣ੍ਹਾਪਨੇ, ਅਤ੍ਥਪਟਿਸਮ੍ਭਿਦਾਦੀਸੁ, ਸੀਲਕ੍ਖਨ੍ਧਾਦਿਪਞ੍ਚਧਮ੍ਮਕ੍ਖਨ੍ਧੇਸੁ, ਠਾਨਾਟ੍ਠਾਨੇਸੁ, ਮਹਾਵਿਹਾਰਸਮਾਪਤ੍ਤਿਯਂ, ਅਰਿਯਸਚ੍ਚੇਸੁ, ਸਤਿਪਟ੍ਠਾਨਾਦੀਸੁ, ਬੋਧਿਪਕ੍ਖਿਯੇਸੁ, ਵਿਪਸ੍ਸਨਾਞਾਣਾਦੀਸੁ ਅਟ੍ਠਸੁ ਵਿਜ੍ਜਾਸੂਤਿ ਸਬ੍ਬੇਸੁ ਅਨਵਜ੍ਜਟ੍ਠੇਨ ਕੁਸਲੇਸੁ ਧਮ੍ਮੇਸੁ ਬਹੂਪਕਾਰੋ.

ਤੇਨੇਵ ਨਂ ਭਗਵਾ ‘‘ਯਾਵਤਾ, ਭਿਕ੍ਖਵੇ, ਸਤ੍ਤਾ ਅਪਦਾ ਵਾ…ਪੇ… ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤਿ. ਏਵਮੇਵ ਖੋ, ਭਿਕ੍ਖਵੇ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇਤੇ ਅਪ੍ਪਮਾਦਮੂਲਕਾ ਅਪ੍ਪਮਾਦਸਮੋਸਰਣਾ, ਅਪ੍ਪਮਾਦੋ ਤੇਸਂ ਧਮ੍ਮਾਨਂ ਅਗ੍ਗਮਕ੍ਖਾਯਤੀ’’ਤਿਆਦਿਨਾ (ਸਂ. ਨਿ. ੫.੧੩੯) ਨਯੇਨ ਹਤ੍ਥਿਪਦਾਦੀਹਿ ਓਪਮ੍ਮੇਹਿ ਓਪਮੇਨ੍ਤੋ ਸਂਯੁਤ੍ਤਨਿਕਾਯੇ ਅਪ੍ਪਮਾਦਵਗ੍ਗੇ ਨਾਨਪ੍ਪਕਾਰਂ ਥੋਮੇਤਿ. ਤਂ ਸਬ੍ਬਂ ਏਕਪਦੇਨੇਵ ਸਙ੍ਗਹੇਤ੍ਵਾ ਥੇਰੋ ਅਪ੍ਪਮਾਦੋ ਕੁਸਲੇਸੁ ਧਮ੍ਮੇਸੂਤਿ ਆਹ. ਧਮ੍ਮਪਦੇ ਅਪ੍ਪਮਾਦਵਗ੍ਗੇਨਾਪਿਸ੍ਸ ਬਹੂਪਕਾਰਤਾ ਦੀਪੇਤਬ੍ਬਾ. ਅਸੋਕਵਤ੍ਥੁਨਾਪਿ ਦੀਪੇਤਬ੍ਬਾ –

(ਕ) ਅਸੋਕਰਾਜਾ ਹਿ ਨਿਗ੍ਰੋਧਸਾਮਣੇਰਸ੍ਸ ‘‘ਅਪ੍ਪਮਾਦੋ ਅਮਤਪਦ’’ਨ੍ਤਿ ਗਾਥਂ ਸੁਤ੍ਵਾ ਏਵ ‘‘ਤਿਟ੍ਠ, ਤਾਤ, ਮਯ੍ਹਂ ਤਯਾ ਤੇਪਿਟਕਂ ਬੁਦ੍ਧਵਚਨਂ ਕਥਿਤ’’ਨ੍ਤਿ ਸਾਮਣੇਰੇ ਪਸੀਦਿਤ੍ਵਾ ਚਤੁਰਾਸੀਤਿਵਿਹਾਰਸਹਸ੍ਸਾਨਿ ਕਾਰੇਸਿ. ਇਤਿ ਥਾਮਸਮ੍ਪਨ੍ਨੇਨ ਭਿਕ੍ਖੁਨਾ ਅਪ੍ਪਮਾਦਸ੍ਸ ਬਹੂਪਕਾਰਤਾ ਤੀਹਿ ਪਿਟਕੇਹਿ ਦੀਪੇਤ੍ਵਾ ਕਥੇਤਬ੍ਬਾ. ਯਂਕਿਞ੍ਚਿ ਸੁਤ੍ਤਂ ਵਾ ਗਾਥਂ ਵਾ ਅਪ੍ਪਮਾਦਦੀਪਨਤ੍ਥਂ ਆਹਰਨ੍ਤੋ ‘‘ਅਟ੍ਠਾਨੇ ਠਤ੍ਵਾ ਆਹਰਸਿ, ਅਤਿਤ੍ਥੇਨ ਪਕ੍ਖਨ੍ਦੋ’’ਤਿ ਨ ਵਤ੍ਤਬ੍ਬੋ. ਧਮ੍ਮਕਥਿਕਸ੍ਸੇਵੇਤ੍ਥ ਥਾਮੋ ਚ ਬਲਞ੍ਚ ਪਮਾਣਂ.

(ਖ) ਕਾਯਗਤਾਸਤੀਤਿ ਆਨਾਪਾਨਂ ਚਤੁਇਰਿਯਾਪਥੋ ਸਤਿਸਮ੍ਪਜਞ੍ਞਂ ਦ੍ਵਤ੍ਤਿਂਸਾਕਾਰੋ ਚਤੁਧਾਤੁਵਵਤ੍ਥਾਨਂ ਦਸ ਅਸੁਭਾ ਨਵ ਸਿਵਥਿਕਾ ਚੁਣ੍ਣਿਕਮਨਸਿਕਾਰੋ ਕੇਸਾਦੀਸੁ ਚਤ੍ਤਾਰਿ ਰੂਪਜ੍ਝਾਨਾਨੀਤਿ ਏਤ੍ਥ ਉਪ੍ਪਨ੍ਨਸਤਿਯਾ ਏਤਂ ਅਧਿਵਚਨਂ. ਸਾਤਸਹਗਤਾਤਿ ਠਪੇਤ੍ਵਾ ਚਤੁਤ੍ਥਜ੍ਝਾਨਂ ਅਞ੍ਞਤ੍ਥ ਸਾਤਸਹਗਤਾ ਹੋਤਿ ਸੁਖਸਮ੍ਪਯੁਤ੍ਤਾ, ਤਂ ਸਨ੍ਧਾਯੇਤਂ ਵੁਤ੍ਤਂ.

(ਗ) ਸਾਸਵੋ ਉਪਾਦਾਨਿਯੋਤਿ ਆਸਵਾਨਞ੍ਚੇਵ ਉਪਾਦਾਨਾਨਞ੍ਚ ਪਚ੍ਚਯਭੂਤੋ. ਇਤਿ ਤੇਭੂਮਕਧਮ੍ਮਮੇਵ ਨਿਯਮੇਤਿ.

(ਘ) ਅਸ੍ਮਿਮਾਨੋਤਿ ਰੂਪਾਦੀਸੁ ਅਸ੍ਮੀਤਿ ਮਾਨੋ.

(ਙ) ਅਯੋਨਿਸੋ ਮਨਸਿਕਾਰੋਤਿ ਅਨਿਚ੍ਚੇ ਨਿਚ੍ਚਨ੍ਤਿਆਦਿਨਾ ਨਯੇਨ ਪਵਤ੍ਤੋ ਉਪ੍ਪਥਮਨਸਿਕਾਰੋ.

(ਚ) ਵਿਪਰਿਯਾਯੇਨ ਯੋਨਿਸੋ ਮਨਸਿਕਾਰੋ ਵੇਦਿਤਬ੍ਬੋ.

(ਛ) ਆਨਨ੍ਤਰਿਕੋ ਚੇਤੋਸਮਾਧੀਤਿ ਅਞ੍ਞਤ੍ਥ ਮਗ੍ਗਾਨਨ੍ਤਰਂ ਫਲਂ ਆਨਨ੍ਤਰਿਕੋ ਚੇਤੋਸਮਾਧਿ ਨਾਮ. ਇਧ ਪਨ ਵਿਪਸ੍ਸਨਾਨਨ੍ਤਰੋ ਮਗ੍ਗੋ ਵਿਪਸ੍ਸਨਾਯ ਵਾ ਅਨਨ੍ਤਰਤ੍ਤਾ ਅਤ੍ਤਨੋ ਵਾ ਅਨਨ੍ਤਰਂ ਫਲਦਾਯਕਤ੍ਤਾ ਆਨਨ੍ਤਰਿਕੋ ਚੇਤੋਸਮਾਧੀਤਿ ਅਧਿਪ੍ਪੇਤੋ.

(ਜ) ਅਕੁਪ੍ਪਂ ਞਾਣਨ੍ਤਿ ਅਞ੍ਞਤ੍ਥ ਫਲਪਞ੍ਞਾ ਅਕੁਪ੍ਪਞਾਣਂ ਨਾਮ. ਇਧ ਪਚ੍ਚਵੇਕ੍ਖਣਪਞ੍ਞਾ ਅਧਿਪ੍ਪੇਤਾ.

(ਝ) ਆਹਾਰਟ੍ਠਿਤਿਕਾਤਿ ਪਚ੍ਚਯਟ੍ਠਿਤਿਕਾ. ਅਯਂ ਏਕੋ ਧਮ੍ਮੋਤਿ ਯੇਨ ਪਚ੍ਚਯੇਨ ਤਿਟ੍ਠਨ੍ਤਿ, ਅਯਂ ਏਕੋ ਧਮ੍ਮੋ ਞਾਤਪਰਿਞ੍ਞਾਯ ਅਭਿਞ੍ਞੇਯ੍ਯੋ.

(ਞ) ਅਕੁਪ੍ਪਾ ਚੇਤੋਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ.

ਇਮਸ੍ਮਿਂ ਵਾਰੇ ਅਭਿਞ੍ਞਾਯ ਞਾਤਪਰਿਞ੍ਞਾ ਕਥਿਤਾ. ਪਰਿਞ੍ਞਾਯ ਤੀਰਣਪਰਿਞ੍ਞਾ. ਪਹਾਤਬ੍ਬਸਚ੍ਛਿਕਾਤਬ੍ਬੇਹਿ ਪਹਾਨਪਰਿਞ੍ਞਾ. ਦੁਪ੍ਪਟਿਵਿਜ੍ਝੋਤਿ ਏਤ੍ਥ ਪਨ ਮਗ੍ਗੋ ਕਥਿਤੋ. ਸਚ੍ਛਿਕਾਤਬ੍ਬੋਤਿ ਫਲਂ ਕਥਿਤਂ, ਮਗ੍ਗੋ ਏਕਸ੍ਮਿਂਯੇਵ ਪਦੇ ਲਬ੍ਭਤਿ. ਫਲਂ ਪਨ ਅਨੇਕੇਸੁਪਿ ਲਬ੍ਭਤਿਯੇਵ.

ਭੂਤਾਤਿ ਸਭਾਵਤੋ ਵਿਜ੍ਜਮਾਨਾ. ਤਚ੍ਛਾਤਿ ਯਾਥਾਵਾ. ਤਥਾਤਿ ਯਥਾ ਵੁਤ੍ਤਾ ਤਥਾਸਭਾਵਾ. ਅਵਿਤਥਾਤਿ ਯਥਾ ਵੁਤ੍ਤਾ ਨ ਤਥਾ ਨ ਹੋਨ੍ਤਿ. ਅਨਞ੍ਞਥਾਤਿ ਵੁਤ੍ਤਪ੍ਪਕਾਰਤੋ ਨ ਅਞ੍ਞਥਾ. ਸਮ੍ਮਾ ਤਥਾਗਤੇਨ ਅਭਿਸਮ੍ਬੁਦ੍ਧਾਤਿ ਤਥਾਗਤੇਨ ਬੋਧਿਪਲ੍ਲਙ੍ਕੇ ਨਿਸੀਦਿਤ੍ਵਾ ਹੇਤੁਨਾ ਕਾਰਣੇਨ ਸਯਮੇਵ ਅਭਿਸਮ੍ਬੁਦ੍ਧਾ ਞਾਤਾ ਵਿਦਿਤਾ ਸਚ੍ਛਿਕਤਾ. ਇਮਿਨਾ ਥੇਰੋ ‘‘ਇਮੇ ਧਮ੍ਮਾ ਤਥਾਗਤੇਨ ਅਭਿਸਮ੍ਬੁਦ੍ਧਾ, ਅਹਂ ਪਨ ਤੁਮ੍ਹਾਕਂ ਰਞ੍ਞੋ ਲੇਖਵਾਚਕਸਦਿਸੋ’’ਤਿ ਜਿਨਸੁਤ੍ਤਂ ਦਸ੍ਸੇਨ੍ਤੋ ਓਕਪ੍ਪਨਂ ਜਨੇਸਿ.

ਏਕਧਮ੍ਮਵਣ੍ਣਨਾ ਨਿਟ੍ਠਿਤਾ.

ਦ੍ਵੇਧਮ੍ਮਵਣ੍ਣਨਾ

੩੫੨. (ਕ) ਇਮੇ ਦ੍ਵੇ ਧਮ੍ਮਾ ਬਹੁਕਾਰਾਤਿ ਇਮੇ ਦ੍ਵੇ ਸਤਿਸਮ੍ਪਜਞ੍ਞਾ ਧਮ੍ਮਾ ਸੀਲਪੂਰਣਾਦੀਸੁ ਅਪ੍ਪਮਾਦੋ ਵਿਯ ਸਬ੍ਬਤ੍ਥ ਉਪਕਾਰਕਾ ਹਿਤਾਵਹਾ.

(ਖ) ਸਮਥੋ ਚ ਵਿਪਸ੍ਸਨਾ ਚਾਤਿ ਇਮੇ ਦ੍ਵੇ ਸਙ੍ਗੀਤਿਸੁਤ੍ਤੇ ਲੋਕਿਯਲੋਕੁਤ੍ਤਰਾ ਕਥਿਤਾ. ਇਮਸ੍ਮਿਂ ਦਸੁਤ੍ਤਰਸੁਤ੍ਤੇ ਪੁਬ੍ਬਭਾਗਾ ਕਥਿਤਾ.

(ਛ) ਸਤ੍ਤਾਨਂ ਸਂਕਿਲੇਸਾਯ ਸਤ੍ਤਾਨਂ ਵਿਸੁਦ੍ਧਿਯਾਤਿ ਅਯੋਨਿਸੋ ਮਨਸਿਕਾਰੋ ਹੇਤੁ ਚੇਵ ਪਚ੍ਚਯੋ ਚ ਸਤ੍ਤਾਨਂ ਸਂਕਿਲੇਸਾਯ, ਯੋਨਿਸੋ ਮਨਸਿਕਾਰੋ ਵਿਸੁਦ੍ਧਿਯਾ. ਤਥਾ ਦੋਵਚਸ੍ਸਤਾ ਪਾਪਮਿਤ੍ਤਤਾ ਸਂਕਿਲੇਸਾਯ; ਸੋਵਚਸ੍ਸਤਾ ਕਲ੍ਯਾਣਮਿਤ੍ਤਤਾ ਵਿਸੁਦ੍ਧਿਯਾ. ਤਥਾ ਤੀਣਿ ਅਕੁਸਲਮੂਲਾਨਿ; ਤੀਣਿ ਕੁਸਲਮੂਲਾਨਿ. ਚਤ੍ਤਾਰੋ ਯੋਗਾ ਚਤ੍ਤਾਰੋ ਵਿਸਂਯੋਗਾ. ਪਞ੍ਚ ਚੇਤੋਖਿਲਾ ਪਞ੍ਚਿਨ੍ਦ੍ਰਿਯਾਨਿ. ਛ ਅਗਾਰਵਾ ਛ ਗਾਰਵਾ. ਸਤ੍ਤ ਅਸਦ੍ਧਮ੍ਮਾ ਸਤ੍ਤ ਸਦ੍ਧਮ੍ਮਾ. ਅਟ੍ਠ ਕੁਸੀਤਵਤ੍ਥੂਨਿ ਅਟ੍ਠ ਆਰਮ੍ਭਵਤ੍ਥੂਨਿ. ਨਵ ਆਘਾਤਵਤ੍ਥੂਨਿ ਨਵ ਆਘਾਤਪ੍ਪਟਿਵਿਨਯਾ. ਦਸ ਅਕੁਸਲਕਮ੍ਮਪਥਾ ਦਸ ਕੁਸਲਕਮ੍ਮਪਥਾਤਿ ਏਵਂ ਪਭੇਦਾ ਇਮੇ ਦ੍ਵੇ ਧਮ੍ਮਾ ਦੁਪ੍ਪਟਿਵਿਜ੍ਝਾਤਿ ਵੇਦਿਤਬ੍ਬਾ.

(ਝ) ਸਙ੍ਖਤਾ ਧਾਤੂਤਿ ਪਚ੍ਚਯੇਹਿ ਕਤਾ ਪਞ੍ਚਕ੍ਖਨ੍ਧਾ. ਅਸਙ੍ਖਤਾ ਧਾਤੂਤਿ ਪਚ੍ਚਯੇਹਿ ਅਕਤਂ ਨਿਬ੍ਬਾਨਂ.

(ਞ) ਵਿਜ੍ਜਾ ਚ ਵਿਮੁਤ੍ਤਿ ਚਾਤਿ ਏਤ੍ਥ ਵਿਜ੍ਜਾਤਿ ਤਿਸ੍ਸੋ ਵਿਜ੍ਜਾ. ਵਿਮੁਤ੍ਤੀਤਿ ਅਰਹਤ੍ਤਫਲਂ.

ਇਮਸ੍ਮਿਂ ਵਾਰੇ ਅਭਿਞ੍ਞਾਦੀਨਿ ਏਕਕਸਦਿਸਾਨੇਵ, ਉਪ੍ਪਾਦੇਤਬ੍ਬਪਦੇ ਪਨ ਮਗ੍ਗੋ ਕਥਿਤੋ, ਸਚ੍ਛਿਕਾਤਬ੍ਬਪਦੇ ਫਲਂ.

ਦ੍ਵੇਧਮ੍ਮਵਣ੍ਣਨਾ ਨਿਟ੍ਠਿਤਾ.

ਤਯੋਧਮ੍ਮਵਣ੍ਣਨਾ

੩੫੩. (ਛ) ਕਾਮਾਨਮੇਤਂ ਨਿਸ੍ਸਰਣਂ ਯਦਿਦਂ ਨੇਕ੍ਖਮ੍ਮਨ੍ਤਿ ਏਤ੍ਥ ਨੇਕ੍ਖਮ੍ਮਨ੍ਤਿ ਅਨਾਗਾਮਿਮਗ੍ਗੋ ਅਧਿਪ੍ਪੇਤੋ. ਸੋ ਹਿ ਸਬ੍ਬਸੋ ਕਾਮਾਨਂ ਨਿਸ੍ਸਰਣਂ. ਰੂਪਾਨਂ ਨਿਸ੍ਸਰਣਂ ਯਦਿਦਂ ਆਰੁਪ੍ਪਨ੍ਤਿ ਏਤ੍ਥ ਆਰੁਪ੍ਪੇਪਿ ਅਰਹਤ੍ਤਮਗ੍ਗੋ. ਪੁਨ ਉਪ੍ਪਤ੍ਤਿਨਿਵਾਰਣਤੋ ਸਬ੍ਬਸੋ ਰੂਪਾਨਂ ਨਿਸ੍ਸਰਣਂ ਨਾਮ. ਨਿਰੋਧੋ ਤਸ੍ਸ ਨਿਸ੍ਸਰਣਨ੍ਤਿ ਇਧ ਅਰਹਤ੍ਤਫਲਂ ਨਿਰੋਧੋਤਿ ਅਧਿਪ੍ਪੇਤਂ. ਅਰਹਤ੍ਤਫਲੇਨ ਹਿ ਨਿਬ੍ਬਾਨੇ ਦਿਟ੍ਠੇ ਪੁਨ ਆਯਤਿਂ ਸਬ੍ਬਸਙ੍ਖਾਰਾ ਨ ਹੋਨ੍ਤੀਤਿ ਅਰਹਤ੍ਤਂ ਸਙ੍ਖਤਨਿਰੋਧਸ੍ਸ ਪਚ੍ਚਯਤ੍ਤਾ ਨਿਰੋਧੋਤਿ ਵੁਤ੍ਤਂ.

(ਜ) ਅਤੀਤਂਸੇ ਞਾਣਨ੍ਤਿ ਅਤੀਤਂਸਾਰਮ੍ਮਣਂ ਞਾਣਂ ਇਤਰੇਸੁਪਿ ਏਸੇਵ ਨਯੋ.

ਇਮਸ੍ਮਿਮ੍ਪਿ ਵਾਰੇ ਅਭਿਞ੍ਞਾਦਯੋ ਏਕਕਸਦਿਸਾਵ. ਦੁਪ੍ਪਟਿਵਿਜ੍ਝਪਦੇ ਪਨ ਮਗ੍ਗੋ ਕਥਿਤੋ, ਸਚ੍ਛਿਕਾਤਬ੍ਬੇ ਫਲਂ.

ਤਯੋਧਮ੍ਮਵਣ੍ਣਨਾ ਨਿਟ੍ਠਿਤਾ.

ਚਤ੍ਤਾਰੋਧਮ੍ਮਵਣ੍ਣਨਾ

੩੫੪. (ਕ) ਚਤ੍ਤਾਰਿ ਚਕ੍ਕਾਨੀਤਿ ਏਤ੍ਥ ਚਕ੍ਕਂ ਨਾਮ ਦਾਰੁਚਕ੍ਕਂ, ਰਤਨਚਕ੍ਕਂ, ਧਮ੍ਮਚਕ੍ਕਂ, ਇਰਿਯਾਪਥਚਕ੍ਕਂ, ਸਮ੍ਪਤ੍ਤਿਚਕ੍ਕਨ੍ਤਿ ਪਞ੍ਚਵਿਧਂ. ਤਤ੍ਥ ‘‘ਯਂ ਪਨਿਦਂ ਸਮ੍ਮ, ਰਥਕਾਰ, ਚਕ੍ਕਂ ਛਹਿ ਮਾਸੇਹਿ ਨਿਟ੍ਠਿਤਂ, ਛਾਰਤ੍ਤੂਨੇਹੀ’’ਤਿ (ਅ. ਨਿ. ੩.੧੫) ਇਦਂ ਦਾਰੁਚਕ੍ਕਂ. ‘‘ਪਿਤਰਾ ਪਵਤ੍ਤਿਤਂ ਚਕ੍ਕਂ ਅਨੁਪ੍ਪਵਤ੍ਤੇਤੀ’’ਤਿ (ਅ. ਨਿ. ੫.੧੩੨) ਇਦਂ ਰਤਨਚਕ੍ਕਂ. ‘‘ਪਵਤ੍ਤਿਤਂ ਚਕ੍ਕ’’ਨ੍ਤਿ (ਮ. ਨਿ. ੨.੩੯੯) ਇਦਂ ਧਮ੍ਮਚਕ੍ਕਂ. ‘‘ਚਤੁਚਕ੍ਕਂ ਨਵਦ੍ਵਾਰ’’ਨ੍ਤਿ (ਸਂ. ਨਿ. ੧.੨੯) ਇਦਂ ਇਰਿਯਾਪਥਚਕ੍ਕਂ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਚਕ੍ਕਾਨਿ, ਯੇਹਿ ਸਮਨ੍ਨਾਗਤਾਨਂ ਦੇਵਮਨੁਸ੍ਸਾਨਂ ਚਤੁਚਕ੍ਕਂ ਪਵਤ੍ਤਤੀ’’ਤਿ (ਅ. ਨਿ. ੪.੩੧) ਇਦਂ ਸਮ੍ਪਤ੍ਤਿਚਕ੍ਕਂ. ਇਧਾਪਿ ਏਤਦੇਵ ਅਧਿਪ੍ਪੇਤਂ.

ਪਤਿਰੂਪਦੇਸਵਾਸੋਤਿ ਯਤ੍ਥ ਚਤਸ੍ਸੋ ਪਰਿਸਾ ਸਨ੍ਦਿਸ੍ਸਨ੍ਤਿ, ਏਵਰੂਪੇ ਅਨੁਚ੍ਛਵਿਕੇ ਦੇਸੇ ਵਾਸੋ. ਸਪ੍ਪੁਰਿਸੂਪਨਿਸ੍ਸਯੋਤਿ ਬੁਦ੍ਧਾਦੀਨਂ ਸਪ੍ਪੁਰਿਸਾਨਂ ਅਵਸ੍ਸਯਨਂ ਸੇਵਨਂ ਭਜਨਂ. ਅਤ੍ਤਸਮ੍ਮਾਪਣਿਧੀਤਿ ਅਤ੍ਤਨੋ ਸਮ੍ਮਾ ਠਪਨਂ, ਸਚੇ ਪਨ ਪੁਬ੍ਬੇ ਅਸ੍ਸਦ੍ਧਾਦੀਹਿ ਸਮਨ੍ਨਾਗਤੋ ਹੋਤਿ, ਤਾਨਿ ਪਹਾਯ ਸਦ੍ਧਾਦੀਸੁ ਪਤਿਟ੍ਠਾਪਨਂ. ਪੁਬ੍ਬੇ ਚ ਕਤਪੁਞ੍ਞਤਾਤਿ ਪੁਬ੍ਬੇ ਉਪਚਿਤਕੁਸਲਤਾ. ਇਦਮੇਵੇਤ੍ਥ ਪਮਾਣਂ. ਯੇਨ ਹਿ ਞਾਣਸਮ੍ਪਯੁਤ੍ਤਚਿਤ੍ਤੇਨ ਕੁਸਲਂ ਕਤਂ ਹੋਤਿ, ਤਦੇਵ ਕੁਸਲਂ ਤਂ ਪੁਰਿਸਂ ਪਤਿਰੂਪਦੇਸੇ ਉਪਨੇਤਿ, ਸਪ੍ਪੁਰਿਸੇ ਭਜਾਪੇਸਿ. ਸੋ ਏਵ ਚ ਪੁਗ੍ਗਲੋ ਅਤ੍ਤਾਨਂ ਸਮ੍ਮਾ ਠਪੇਤਿ. ਚਤੂਸੁ ਆਹਾਰੇਸੁ ਪਠਮੋ ਲੋਕਿਯੋਵ. ਸੇਸਾ ਪਨ ਤਯੋ ਸਙ੍ਗੀਤਿਸੁਤ੍ਤੇ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ. ਇਧ ਪੁਬ੍ਬਭਾਗੇ ਲੋਕਿਯਾ.

(ਚ) ਕਾਮਯੋਗਵਿਸਂਯੋਗਾਦਯੋ ਅਨਾਗਾਮਿਮਗ੍ਗਾਦਿਵਸੇਨ ਵੇਦਿਤਬ੍ਬਾ.

(ਛ) ਹਾਨਭਾਗਿਯਾਦੀਸੁ ਪਠਮਸ੍ਸ ਝਾਨਸ੍ਸ ਲਾਭੀ ਕਾਮਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਯੋ ਸਮਾਧਿ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਯੋ ਸਮਾਧਿ. ਵਿਤਕ੍ਕਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਯੋ ਸਮਾਧਿ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤੋ ਨਿਬ੍ਬੇਧਭਾਗਿਯੋ ਸਮਾਧੀਤਿ ਇਮਿਨਾ ਨਯੇਨ ਸਬ੍ਬਸਮਾਪਤ੍ਤਿਯੋ ਵਿਤ੍ਥਾਰੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਵਿਸੁਦ੍ਧਿਮਗ੍ਗੇ ਪਨਸ੍ਸ ਵਿਨਿਚ੍ਛਯਕਥਾ ਕਥਿਤਾਵ.

ਇਮਸ੍ਮਿਮ੍ਪਿ ਵਾਰੇ ਅਭਿਞ੍ਞਾਦੀਨਿ ਏਕਕਸਦਿਸਾਨੇਵ. ਅਭਿਞ੍ਞਾਪਦੇ ਪਨੇਤ੍ਥ ਮਗ੍ਗੋ ਕਥਿਤੋ. ਸਚ੍ਛਿਕਾਤਬ੍ਬਪਦੇ ਫਲਂ.

ਚਤ੍ਤਾਰੋਧਮ੍ਮਵਣ੍ਣਨਾ ਨਿਟ੍ਠਿਤਾ.

ਪਞ੍ਚਧਮ੍ਮਵਣ੍ਣਨਾ

੩੫੫. (ਖ) ਪੀਤਿਫਰਣਤਾਦੀਸੁ ਪੀਤਿਂ ਫਰਮਾਨਾ ਉਪ੍ਪਜ੍ਜਤੀਤਿ ਦ੍ਵੀਸੁ ਝਾਨੇਸੁ ਪਞ੍ਞਾ ਪੀਤਿਫਰਣਤਾ ਨਾਮ. ਸੁਖਂ ਫਰਮਾਨਂ ਉਪ੍ਪਜ੍ਜਤੀਤਿ ਤੀਸੁ ਝਾਨੇਸੁ ਪਞ੍ਞਾ ਸੁਖਫਰਣਤਾ ਨਾਮ. ਪਰੇਸਂ ਚੇਤੋ ਫਰਮਾਨਾ ਉਪ੍ਪਜ੍ਜਤੀਤਿ ਚੇਤੋਪਰਿਯਪਞ੍ਞਾ ਚੇਤੋਫਰਣਤਾ ਨਾਮ. ਆਲੋਕਫਰਣੇ ਉਪ੍ਪਜ੍ਜਤੀਤਿ ਦਿਬ੍ਬਚਕ੍ਖੁਪਞ੍ਞਾ ਆਲੋਕਫਰਣਤਾ ਨਾਮ. ਪਚ੍ਚਵੇਕ੍ਖਣਞਾਣਂ ਪਚ੍ਚਵੇਕ੍ਖਣਨਿਮਿਤ੍ਤਂ ਨਾਮ. ਵੁਤ੍ਤਮ੍ਪਿ ਚੇਤਂ ‘‘ਦ੍ਵੀਸੁ ਝਾਨੇਸੁ ਪਞ੍ਞਾ ਪੀਤਿਫਰਣਤਾ, ਤੀਸੁ ਝਾਨੇਸੁ ਪਞ੍ਞਾ ਸੁਖਫਰਣਤਾ. ਪਰਚਿਤ੍ਤੇ ਪਞ੍ਞਾ ਚੇਤੋਫਰਣਤਾ, ਦਿਬ੍ਬਚਕ੍ਖੁ ਆਲੋਕਫਰਣਤਾ. ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਿਤਸ੍ਸ ਪਚ੍ਚਵੇਕ੍ਖਣਞਾਣਂ ਪਚ੍ਚਵੇਕ੍ਖਣਨਿਮਿਤ੍ਤ’’ਨ੍ਤਿ (ਵਿਭ. ੮੦੪).

ਤਤ੍ਥ ਪੀਤਿਫਰਣਤਾ ਸੁਖਫਰਣਤਾ ਦ੍ਵੇ ਪਾਦਾ ਵਿਯ. ਚੇਤੋਫਰਣਤਾ ਆਲੋਕਫਰਣਤਾ ਦ੍ਵੇ ਹਤ੍ਥਾ ਵਿਯ. ਅਭਿਞ੍ਞਾਪਾਦਕਜ੍ਝਾਨਂ ਮਜ੍ਝਿਮਕਾਯੋ ਵਿਯ. ਪਚ੍ਚਵੇਕ੍ਖਣਨਿਮਿਤ੍ਤਂ ਸੀਸਂ ਵਿਯ. ਇਤਿ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਪਞ੍ਚਙ੍ਗਿਕਂ ਸਮ੍ਮਾਸਮਾਧਿਂ ਅਙ੍ਗਪਚ੍ਚਙ੍ਗਸਮ੍ਪਨ੍ਨਂ ਪੁਰਿਸਂ ਕਤ੍ਵਾ ਦਸ੍ਸੇਸਿ.

(ਜ) ਅਯਂ ਸਮਾਧਿ ਪਚ੍ਚੁਪ੍ਪਨ੍ਨਸੁਖੋ ਚੇ ਵਾਤਿਆਦੀਸੁ ਅਰਹਤ੍ਤਫਲਸਮਾਧਿ ਅਧਿਪ੍ਪੇਤੋ. ਸੋ ਹਿ ਅਪ੍ਪਿਤਪ੍ਪਿਤਕ੍ਖਣੇ ਸੁਖਤ੍ਤਾ ਪਚ੍ਚੁਪ੍ਪਨ੍ਨਸੁਖੋ. ਪੁਰਿਮੋ ਪੁਰਿਮੋ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਸਮਾਧਿਸੁਖਸ੍ਸ ਪਚ੍ਚਯਤ੍ਤਾ ਆਯਤਿਂ ਸੁਖਵਿਪਾਕੋ.

ਕਿਲੇਸੇਹਿ ਆਰਕਤ੍ਤਾ ਅਰਿਯੋ. ਕਾਮਾਮਿਸਵਟ੍ਟਾਮਿਸਲੋਕਾਮਿਸਾਨਂ ਅਭਾਵਾ ਨਿਰਾਮਿਸੋ. ਬੁਦ੍ਧਾਦੀਹਿ ਮਹਾਪੁਰਿਸੇਹਿ ਸੇਵਿਤਤ੍ਤਾ ਅਕਾਪੁਰਿਸਸੇਵਿਤੋ. ਅਙ੍ਗਸਨ੍ਤਤਾਯ ਆਰਮ੍ਮਣਸਨ੍ਤਤਾਯ ਸਬ੍ਬਕਿਲੇਸਦਰਥਸਨ੍ਤਤਾਯ ਚ ਸਨ੍ਤੋ. ਅਤਪ੍ਪਨੀਯਟ੍ਠੇਨ ਪਣੀਤੋ. ਕਿਲੇਸਪਟਿਪ੍ਪਸ੍ਸਦ੍ਧਿਯਾ ਲਦ੍ਧਤ੍ਤਾ ਕਿਲੇਸਪਟਿਪ੍ਪਸ੍ਸਦ੍ਧਿਭਾਵਂ ਵਾ ਲਦ੍ਧਤ੍ਤਾ ਪਟਿਪ੍ਪਸ੍ਸਦ੍ਧਲਦ੍ਧੋ. ਪਟਿਪ੍ਪਸ੍ਸਦ੍ਧਂ ਪਟਿਪ੍ਪਸ੍ਸਦ੍ਧੀਤਿ ਹਿ ਇਦਂ ਅਤ੍ਥਤੋ ਏਕਂ. ਪਟਿਪ੍ਪਸ੍ਸਦ੍ਧਕਿਲੇਸੇਨ ਵਾ ਅਰਹਤਾ ਲਦ੍ਧਤ੍ਤਾ ਪਟਿਪ੍ਪਸ੍ਸਦ੍ਧਲਦ੍ਧੋ. ਏਕੋਦਿਭਾਵੇਨ ਅਧਿਗਤਤ੍ਤਾ ਏਕੋਦਿਭਾਵਮੇਵ ਵਾ ਅਧਿਗਤਤ੍ਤਾ ਏਕੋਦਿਭਾਵਾਧਿਗਤੋ. ਅਪ੍ਪਗੁਣਸਾਸਵਸਮਾਧਿ ਵਿਯ ਸਸਙ੍ਖਾਰੇਨ ਸਪ੍ਪਯੋਗੇਨ ਚਿਤ੍ਤੇਨ ਪਚ੍ਚਨੀਕਧਮ੍ਮੇ ਨਿਗ੍ਗਯ੍ਹ ਕਿਲੇਸੇ ਵਾਰੇਤ੍ਵਾ ਅਨਧਿਗਤਤ੍ਤਾ ਨਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋ. ਤਞ੍ਚ ਸਮਾਧਿਂ ਸਮਾਪਜ੍ਜਨ੍ਤੋ ਤਤੋ ਵਾ ਵੁਟ੍ਠਹਨ੍ਤੋ ਸਤਿਵੇਪੁਲ੍ਲਪਤ੍ਤਤ੍ਤਾ. ਸਤੋਵ ਸਮਾਪਜ੍ਜਤਿ ਸਤੋ ਵੁਟ੍ਠਹਤਿ. ਯਥਾਪਰਿਚ੍ਛਿਨ੍ਨਕਾਲਵਸੇਨ ਵਾ ਸਤੋ ਸਮਾਪਜ੍ਜਤਿ ਸਤੋ ਵੁਟ੍ਠਹਤਿ. ਤਸ੍ਮਾ ਯਦੇਤ੍ਥ ‘‘ਅਯਂ ਸਮਾਧਿ ਪਚ੍ਚੁਪ੍ਪਨ੍ਨਸੁਖੋ ਚੇਵ ਆਯਤਿਞ੍ਚ ਸੁਖਵਿਪਾਕੋ’’ਤਿ ਏਵਂ ਪਚ੍ਚਵੇਕ੍ਖਮਾਨਸ੍ਸ ਪਚ੍ਚਤ੍ਤਂਯੇਵ ਅਪਰਪ੍ਪਚ੍ਚਯਂ ਞਾਣਂ ਉਪ੍ਪਜ੍ਜਤਿ, ਤਂ ਏਕਮਙ੍ਗਂ. ਏਸ ਨਯੋ ਸੇਸੇਸੁਪਿ. ਏਵਮਿਮੇਹਿ ਪਞ੍ਚਹਿ ਪਚ੍ਚਵੇਕ੍ਖਣਞਾਣੇਹਿ ਅਯਂ ਸਮਾਧਿ ‘‘ਪਞ੍ਚਞਾਣਿਕੋ ਸਮ੍ਮਾਸਮਾਧੀ’’ਤਿ ਵੁਤ੍ਤੋ.

ਇਮਸ੍ਮਿਂ ਵਾਰੇ ਵਿਸੇਸਭਾਗਿਯਪਦੇ ਮਗ੍ਗੋ ਕਥਿਤੋ. ਸਚ੍ਛਿਕਾਤਬ੍ਬਪਦੇ ਫਲਂ. ਸੇਸਂ ਪੁਰਿਮਸਦਿਸਮੇਵ.

ਛਧਮ੍ਮਵਣ੍ਣਨਾ

੩੫੬. ਛਕ੍ਕੇਸੁ ਸਬ੍ਬਂ ਉਤ੍ਤਾਨਤ੍ਥਮੇਵ. ਦੁਪ੍ਪਟਿਵਿਜ੍ਝਪਦੇ ਪਨੇਤ੍ਥ ਮਗ੍ਗੋ ਕਥਿਤੋ. ਸੇਸਂ ਪੁਰਿਮਸਦਿਸਂ.

ਸਤ੍ਤਧਮ੍ਮਵਣ੍ਣਨਾ

੩੫੭. (ਞ) ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਾ ਹੋਨ੍ਤੀਤਿ ਹੇਤੁਨਾ ਨਯੇਨ ਵਿਪਸ੍ਸਨਾਞਾਣੇਨ ਸੁਦਿਟ੍ਠਾ ਹੋਨ੍ਤਿ. ਕਾਮਾਤਿ ਵਤ੍ਥੁਕਾਮਾ ਚ ਕਿਲੇਸਕਾਮਾ ਚ, ਦ੍ਵੇਪਿ ਸਪਰਿਲ਼ਾਹਟ੍ਠੇਨ ਅਙ੍ਗਾਰਕਾਸੁ ਵਿਯ ਸੁਦਿਟ੍ਠਾ ਹੋਨ੍ਤਿ. ਵਿਵੇਕਨਿਨ੍ਨਨ੍ਤਿ ਨਿਬ੍ਬਾਨਨਿਨ੍ਨਂ. ਪੋਣਂ ਪਬ੍ਭਾਰਨ੍ਤਿ ਨਿਨ੍ਨਸ੍ਸੇਤਂ ਵੇਵਚਨਂ. ਬ੍ਯਨ੍ਤੀਭੂਤਨ੍ਤਿ ਨਿਯਤਿਭੂਤਂ. ਨਿਤ੍ਤਣ੍ਹਨ੍ਤਿ ਅਤ੍ਥੋ. ਕੁਤੋ? ਸਬ੍ਬਸੋ ਆਸਵਟ੍ਠਾਨੀਯੇਹਿ ਧਮ੍ਮੇਹਿ ਤੇਭੂਮਕਧਮ੍ਮੇਹੀਤਿ ਅਤ੍ਥੋ. ਇਧ ਭਾਵੇਤਬ੍ਬਪਦੇ ਮਗ੍ਗੋ ਕਥਿਤੋ. ਸੇਸਂ ਪੁਰਿਮਸਦਿਸਮੇਵ.

ਅਟ੍ਠਧਮ੍ਮਵਣ੍ਣਨਾ

੩੫੮. (ਕ) ਆਦਿਬ੍ਰਹ੍ਮਚਰਿਯਿਕਾਯ ਪਞ੍ਞਾਯਾਤਿ ਸਿਕ੍ਖਤ੍ਤਯਸਙ੍ਗਹਸ੍ਸ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਯ ਪੁਬ੍ਬਭਾਗੇ ਤਰੁਣਸਮਥਵਿਪਸ੍ਸਨਾਪਞ੍ਞਾਯ. ਅਟ੍ਠਙ੍ਗਿਕਸ੍ਸ ਵਾ ਮਗ੍ਗਸ੍ਸ ਆਦਿਭੂਤਾਯ ਸਮ੍ਮਾਦਿਟ੍ਠਿਪਞ੍ਞਾਯ. ਤਿਬ੍ਬਨ੍ਤਿ ਬਲਵਂ. ਹਿਰੋਤ੍ਤਪ੍ਪਨ੍ਤਿ ਹਿਰੀ ਚ ਓਤ੍ਤਪ੍ਪਞ੍ਚ. ਪੇਮਨ੍ਤਿ ਗੇਹਸ੍ਸਿਤਪੇਮਂ. ਗਾਰਵੋਤਿ ਗਰੁਚਿਤ੍ਤਭਾਵੋ. ਗਰੁਭਾਵਨੀਯਞ੍ਹਿ ਉਪਨਿਸ੍ਸਾਯ ਵਿਹਰਤੋ ਕਿਲੇਸਾ ਨੁਪ੍ਪਜ੍ਜਨ੍ਤਿ ਓਵਾਦਾਨੁਸਾਸਨਿਂ ਲਭਤਿ. ਤਸ੍ਮਾ ਤਂ ਨਿਸ੍ਸਾਯ ਵਿਹਾਰੋ ਪਞ੍ਞਾਪਟਿਲਾਭਸ੍ਸ ਪਚ੍ਚਯੋ ਹੋਤਿ.

(ਛ) ਅਕ੍ਖਣੇਸੁ ਯਸ੍ਮਾ ਪੇਤਾ ਅਸੁਰਾਨਂ ਆਵਾਹਨਂ ਗਚ੍ਛਨ੍ਤਿ, ਵਿਵਾਹਨਂ ਗਚ੍ਛਨ੍ਤਿ, ਤਸ੍ਮਾ ਪੇਤ੍ਤਿਵਿਸਯੇਨੇਵ ਅਸੁਰਕਾਯੋ ਗਹਿਤੋਤਿ ਵੇਦਿਤਬ੍ਬੋ.

(ਜ) ਅਪ੍ਪਿਚ੍ਛਸ੍ਸਾਤਿ ਏਤ੍ਥ ਪਚ੍ਚਯਅਪ੍ਪਿਚ੍ਛੋ, ਅਧਿਗਮਅਪ੍ਪਿਚ੍ਛੋ, ਪਰਿਯਤ੍ਤਿਅਪ੍ਪਿਚ੍ਛੋ, ਧੁਤਙ੍ਗਅਪ੍ਪਿਚ੍ਛੋਤਿ ਚਤ੍ਤਾਰੋ ਅਪ੍ਪਿਚ੍ਛਾ. ਤਤ੍ਥ ਪਚ੍ਚਯਅਪ੍ਪਿਚ੍ਛੋ ਬਹੁਂ ਦੇਨ੍ਤੇ ਅਪ੍ਪਂ ਗਣ੍ਹਾਤਿ, ਅਪ੍ਪਂ ਦੇਨ੍ਤੇ ਅਪ੍ਪਤਰਂ ਵਾ ਗਣ੍ਹਾਤਿ, ਨ ਵਾ ਗਣ੍ਹਾਤਿ, ਨ ਅਨਵਸੇਸਗਾਹੀ ਹੋਤਿ. ਅਧਿਗਮਅਪ੍ਪਿਚ੍ਛੋ ਮਜ੍ਝਨ੍ਤਿਕਤ੍ਥੇਰੋ ਵਿਯ ਅਤ੍ਤਨੋ ਅਧਿਗਮਂ ਅਞ੍ਞੇਸਂ ਜਾਨਿਤੁਂ ਨ ਦੇਤਿ. ਪਰਿਯਤ੍ਤਿਅਪ੍ਪਿਚ੍ਛੋ ਤੇਪਿਟਕੋਪਿ ਸਮਾਨੋ ਨ ਬਹੁਸ੍ਸੁਤਭਾਵਂ ਜਾਨਾਪੇਤੁਕਾਮੋ ਹੋਤਿ ਸਾਕੇਤਤਿਸ੍ਸਤ੍ਥੇਰੋ ਵਿਯ. ਧੁਤਙ੍ਗਅਪ੍ਪਿਚ੍ਛੋ ਧੁਤਙ੍ਗਪਰਿਹਰਣਭਾਵਂ ਅਞ੍ਞੇਸਂ ਜਾਨਿਤੁਂ ਨ ਦੇਤਿ ਦ੍ਵੇਭਾਤਿਕਤ੍ਥੇਰੇਸੁ ਜੇਟ੍ਠਕਤ੍ਥੇਰੋ ਵਿਯ. ਵਤ੍ਥੁ ਵਿਸੁਦ੍ਧਿਮਗ੍ਗੇ ਕਥਿਤਂ. ਅਯਂ ਧਮ੍ਮੋਤਿ ਏਵਂ ਸਨ੍ਤਗੁਣਨਿਗੂਹਨੇਨ ਚ ਪਚ੍ਚਯਪਟਿਗ੍ਗਹਣੇ ਮਤ੍ਤਞ੍ਞੁਤਾਯ ਚ ਅਪ੍ਪਿਚ੍ਛਸ੍ਸ ਪੁਗ੍ਗਲਸ੍ਸ ਅਯਂ ਨਵਲੋਕੁਤ੍ਤਰਧਮ੍ਮੋ ਸਮ੍ਪਜ੍ਜਤਿ, ਨੋ ਮਹਿਚ੍ਛਸ੍ਸ. ਏਵਂ ਸਬ੍ਬਤ੍ਥ ਯੋਜੇਤਬ੍ਬਂ.

ਸਨ੍ਤੁਟ੍ਠਸ੍ਸਾਤਿ ਚਤੂਸੁ ਪਚ੍ਚਯੇਸੁ ਤੀਹਿ ਸਨ੍ਤੋਸੇਹਿ ਸਨ੍ਤੁਟ੍ਠਸ੍ਸ. ਪਵਿਵਿਤ੍ਤਸ੍ਸਾਤਿ ਕਾਯਚਿਤ੍ਤਉਪਧਿਵਿਵੇਕੇਹਿ ਵਿਵਿਤ੍ਤਸ੍ਸ. ਤਤ੍ਥ ਕਾਯਵਿਵੇਕੋ ਨਾਮ ਗਣਸਙ੍ਗਣਿਕਂ ਵਿਨੋਦੇਤ੍ਵਾ ਅਟ੍ਠਆਰਮ੍ਭਵਤ੍ਥੁਵਸੇਨ ਏਕੀਭਾਵੋ. ਏਕੀਭਾਵਮਤ੍ਤੇਨ ਪਨ ਕਮ੍ਮਂ ਨ ਨਿਪ੍ਫਜ੍ਜਤੀਤਿ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤਿ, ਅਯਂ ਚਿਤ੍ਤਵਿਵੇਕੋ ਨਾਮ. ਸਮਾਪਤ੍ਤਿਮਤ੍ਤੇਨੇਵ ਕਮ੍ਮਂ ਨ ਨਿਪ੍ਫਜ੍ਜਤੀਤਿ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇ ਸਮ੍ਮਸਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਾਤਿ, ਅਯਂ ਉਪਧਿਵਿਵੇਕੋ ਨਾਮ. ਤੇਨਾਹ ਭਗਵਾ – ‘‘ਕਾਯਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ. ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ. ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨ’’ਨ੍ਤਿ (ਮਹਾਨਿ. ੪੯).

ਸਙ੍ਗਣਿਕਾਰਾਮਸ੍ਸਾਤਿ ਗਣਸਙ੍ਗਣਿਕਾਯ ਚੇਵ ਕਿਲੇਸਸਙ੍ਗਣਿਕਾਯ ਚ ਰਤਸ੍ਸ. ਆਰਦ੍ਧਵੀਰਿਯਸ੍ਸਾਤਿ ਕਾਯਿਕਚੇਤਸਿਕਵੀਰਿਯਵਸੇਨ ਆਰਦ੍ਧਵੀਰਿਯਸ੍ਸ. ਉਪਟ੍ਠਿਤਸਤਿਸ੍ਸਾਤਿ ਚਤੁਸਤਿਪਟ੍ਠਾਨਵਸੇਨ ਉਪਟ੍ਠਿਤਸਤਿਸ੍ਸ. ਸਮਾਹਿਤਸ੍ਸਾਤਿ ਏਕਗ੍ਗਚਿਤ੍ਤਸ੍ਸ. ਪਞ੍ਞਵਤੋਤਿ ਕਮ੍ਮਸ੍ਸਕਤਪਞ੍ਞਾਯ ਪਞ੍ਞਵਤੋ. ਨਿਪ੍ਪਪਞ੍ਚਸ੍ਸਾਤਿ ਵਿਗਤਮਾਨਤਣ੍ਹਾਦਿਟ੍ਠਿਪਪਞ੍ਚਸ੍ਸ.

ਇਧ ਭਾਵੇਤਬ੍ਬਪਦੇ ਮਗ੍ਗੋ ਕਥਿਤੋ. ਸੇਸਂ ਪੁਰਿਮਸਦਿਸਮੇਵ.

ਨਵਧਮ੍ਮਵਣ੍ਣਨਾ

੩੫੯. (ਖ) ਸੀਲਵਿਸੁਦ੍ਧੀਤਿ ਵਿਸੁਦ੍ਧਿਂ ਪਾਪੇਤੁਂ ਸਮਤ੍ਥਂ ਚਤੁਪਾਰਿਸੁਦ੍ਧਿਸੀਲਂ. ਪਾਰਿਸੁਦ੍ਧਿਪਧਾਨਿਯਙ੍ਗਨ੍ਤਿ ਪਰਿਸੁਦ੍ਧਭਾਵਸ੍ਸ ਪਧਾਨਙ੍ਗਂ. ਚਿਤ੍ਤਵਿਸੁਦ੍ਧੀਤਿ ਵਿਪਸ੍ਸਨਾਯ ਪਦਟ੍ਠਾਨਭੂਤਾ ਅਟ੍ਠ ਪਗੁਣਸਮਾਪਤ੍ਤਿਯੋ. ਦਿਟ੍ਠਿਵਿਸੁਦ੍ਧੀਤਿ ਸਪਚ੍ਚਯਨਾਮਰੂਪਦਸ੍ਸਨਂ. ਕਙ੍ਖਾਵਿਤਰਣਵਿਸੁਦ੍ਧੀਤਿ ਪਚ੍ਚਯਾਕਾਰਞਾਣਂ. ਅਦ੍ਧਤ੍ਤਯੇਪਿ ਹਿ ਪਚ੍ਚਯਵਸੇਨੇਵ ਧਮ੍ਮਾ ਪਵਤ੍ਤਨ੍ਤੀਤਿ ਪਸ੍ਸਤੋ ਕਙ੍ਖਂ ਵਿਤਰਤਿ. ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧੀਤਿ ਓਭਾਸਾਦਯੋ ਨ ਮਗ੍ਗੋ, ਵੀਥਿਪ੍ਪਟਿਪਨ੍ਨਂ ਉਦਯਬ੍ਬਯਞਾਣਂ ਮਗ੍ਗੋਤਿ ਏਵਂ ਮਗ੍ਗਾਮਗ੍ਗੇ ਞਾਣਂ. ਪਟਿਪਦਾਞਾਣਦਸ੍ਸਨਵਿਸੁਦ੍ਧੀਤਿ ਰਥਵਿਨੀਤੇ ਵੁਟ੍ਠਾਨਗਾਮਿਨਿਵਿਪਸ੍ਸਨਾ ਕਥਿਤਾ, ਇਧ ਤਰੁਣਵਿਪਸ੍ਸਨਾ. ਞਾਣਦਸ੍ਸਨਵਿਸੁਦ੍ਧੀਤਿ ਰਥਵਿਨੀਤੇ ਮਗ੍ਗੋ ਕਥਿਤੋ, ਇਧ ਵੁਟ੍ਠਾਨਗਾਮਿਨਿਵਿਪਸ੍ਸਨਾ. ਏਤਾ ਪਨ ਸਤ੍ਤਪਿ ਵਿਸੁਦ੍ਧਿਯੋ ਵਿਤ੍ਥਾਰੇਨ ਵਿਸੁਦ੍ਧਿਮਗ੍ਗੇ ਕਥਿਤਾ. ਪਞ੍ਞਾਤਿ ਅਰਹਤ੍ਤਫਲਪਞ੍ਞਾ. ਵਿਮੁਤ੍ਤਿਪਿ ਅਰਹਤ੍ਤਫਲਵਿਮੁਤ੍ਤਿਯੇਵ.

(ਛ) ਧਾਤੁਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਫਸ੍ਸਨਾਨਤ੍ਤਨ੍ਤਿ ਚਕ੍ਖਾਦਿਧਾਤੁਨਾਨਤ੍ਤਂ ਪਟਿਚ੍ਚ ਚਕ੍ਖੁਸਮ੍ਫਸ੍ਸਾਦਿਨਾਨਤ੍ਤਂ ਉਪ੍ਪਜ੍ਜਤੀਤਿ ਅਤ੍ਥੋ. ਫਸ੍ਸਨਾਨਤ੍ਤਂ ਪਟਿਚ੍ਚਾਤਿ ਚਕ੍ਖੁਸਮ੍ਫਸ੍ਸਾਦਿਨਾਨਤ੍ਤਂ ਪਟਿਚ੍ਚ. ਵੇਦਨਾਨਾਨਤ੍ਤਨ੍ਤਿ ਚਕ੍ਖੁਸਮ੍ਫਸ੍ਸਜਾਦਿਵੇਦਨਾਨਾਨਤ੍ਤਂ. ਸਞ੍ਞਾਨਾਨਤ੍ਤਂ ਪਟਿਚ੍ਚਾਤਿ ਕਾਮਸਞ੍ਞਾਦਿਨਾਨਤ੍ਤਂ ਪਟਿਚ੍ਚ. ਸਙ੍ਕਪ੍ਪਨਾਨਤ੍ਤਨ੍ਤਿ ਕਾਮਸਙ੍ਕਪ੍ਪਾਦਿਨਾਨਤ੍ਤਂ. ਸਙ੍ਕਪ੍ਪਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਛਨ੍ਦਨਾਨਤ੍ਤਨ੍ਤਿ ਸਙ੍ਕਪ੍ਪਨਾਨਤ੍ਤਤਾਯ ਰੂਪੇ ਛਨ੍ਦੋ ਸਦ੍ਦੇ ਛਨ੍ਦੋਤਿ ਏਵਂ ਛਨ੍ਦਨਾਨਤ੍ਤਂ ਉਪ੍ਪਜ੍ਜਤਿ. ਪਰਿਲ਼ਾਹਨਾਨਤ੍ਤਨ੍ਤਿ ਛਨ੍ਦਨਾਨਤ੍ਤਤਾਯ ਰੂਪਪਰਿਲ਼ਾਹੋ ਸਦ੍ਦਪਰਿਲ਼ਾਹੋਤਿ ਏਵਂ ਪਰਿਲ਼ਾਹਨਾਨਤ੍ਤਂ ਉਪ੍ਪਜ੍ਜਤਿ. ਪਰਿਯੇਸਨਾਨਾਨਤ੍ਤਨ੍ਤਿ ਪਰਿਲ਼ਾਹਨਾਨਤ੍ਤਤਾਯ ਰੂਪਪਰਿਯੇਸਨਾਦਿਨਾਨਤ੍ਤਂ ਉਪ੍ਪਜ੍ਜਤਿ. ਲਾਭਨਾਨਤ੍ਤਨ੍ਤਿ ਪਰਿਯੇਸਨਾਨਾਨਤ੍ਤਤਾਯ ਰੂਪਪਟਿਲਾਭਾਦਿਨਾਨਤ੍ਤਂ ਉਪ੍ਪਜ੍ਜਤਿ.

(ਜ) ਸਞ੍ਞਾਸੁ ਮਰਣਸਞ੍ਞਾਤਿ ਮਰਣਾਨੁਪਸ੍ਸਨਾਞਾਣੇ ਸਞ੍ਞਾ. ਆਹਾਰੇਪਟਿਕੂਲਸਞ੍ਞਾਤਿ ਆਹਾਰਂ ਪਰਿਗ੍ਗਣ੍ਹਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਸਬ੍ਬਲੋਕੇਅਨਭਿਰਤਿਸਞ੍ਞਾਤਿ ਸਬ੍ਬਸ੍ਮਿਂ ਵਟ੍ਟੇ ਉਕ੍ਕਣ੍ਠਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਸੇਸਾ ਹੇਟ੍ਠਾ ਕਥਿਤਾ ਏਵ. ਇਧ ਬਹੁਕਾਰਪਦੇ ਮਗ੍ਗੋ ਕਥਿਤੋ. ਸੇਸਂ ਪੁਰਿਮਸਦਿਸਮੇਵ.

ਦਸਧਮ੍ਮਵਣ੍ਣਨਾ

੩੬੦. (ਝ) ਨਿਜ੍ਜਰਵਤ੍ਥੂਨੀਤਿ ਨਿਜ੍ਜਰਕਾਰਣਾਨਿ. ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਹੋਤੀਤਿ ਅਯਂ ਹੇਟ੍ਠਾ ਵਿਪਸ੍ਸਨਾਯਪਿ ਨਿਜ੍ਜਿਣ੍ਣਾ ਏਵ ਪਹੀਨਾ. ਕਸ੍ਮਾ ਪੁਨ ਗਹਿਤਾਤਿ ਅਸਮੁਚ੍ਛਿਨ੍ਨਤ੍ਤਾ. ਵਿਪਸ੍ਸਨਾਯ ਹਿ ਕਿਞ੍ਚਾਪਿ ਜਿਣ੍ਣਾ, ਨ ਪਨ ਸਮੁਚ੍ਛਿਨ੍ਨਾ, ਮਗ੍ਗੋ ਪਨ ਉਪ੍ਪਜ੍ਜਿਤ੍ਵਾ ਤਂ ਸਮੁਚ੍ਛਿਨ੍ਦਤਿ, ਨ ਪੁਨ ਵੁਟ੍ਠਾਤੁਂ ਦੇਤਿ. ਤਸ੍ਮਾ ਪੁਨ ਗਹਿਤਾ. ਏਵਂ ਸਬ੍ਬਪਦੇਸੁ ਨਯੋ ਨੇਤਬ੍ਬੋ.

ਏਤ੍ਥ ਚ ਸਮ੍ਮਾਦਿਟ੍ਠਿਪਚ੍ਚਯਾ ਚਤੁਸਟ੍ਠਿ ਧਮ੍ਮਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ. ਕਤਮੇ ਚਤੁਸਟ੍ਠਿ? ਸੋਤਾਪਤ੍ਤਿਮਗ੍ਗਕ੍ਖਣੇ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਪਰਿਪੂਰੇਤਿ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਪਰਿਪੂਰੇਤਿ, ਅਨੁਸ੍ਸਰਣਟ੍ਠੇਨ ਸਤਿਨ੍ਦ੍ਰਿਯਂ ਪਰਿਪੂਰੇਤਿ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਪਰਿਪੂਰੇਤਿ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਪਰਿਪੂਰੇਤਿ, ਵਿਜਾਨਨਟ੍ਠੇਨ ਮਨਿਨ੍ਦ੍ਰਿਯਂ, ਅਭਿਨਨ੍ਦਨਟ੍ਠੇਨ ਸੋਮਨਸ੍ਸਿਨ੍ਦ੍ਰਿਯਂ, ਪਵਤ੍ਤਸਨ੍ਤਤਿਅਧਿਪਤੇਯ੍ਯਟ੍ਠੇਨ ਜੀਵਿਤਿਨ੍ਦ੍ਰਿਯਂ ਪਰਿਪੂਰੇਤਿ…ਪੇ… ਅਰਹਤ੍ਤਫਲਕ੍ਖਣੇ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਪਵਤ੍ਤਸਨ੍ਤਤਿਅਧਿਪਤੇਯ੍ਯਟ੍ਠੇਨ ਜੀਵਿਤਿਨ੍ਦ੍ਰਿਯਂ ਪਰਿਪੂਰੇਤੀਤਿ ਏਵਂ ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਅਟ੍ਠ ਅਟ੍ਠ ਹੁਤ੍ਵਾ ਚਤੁਸਟ੍ਠਿ ਧਮ੍ਮਾ ਪਾਰਿਪੂਰਿਂ ਗਚ੍ਛਨ੍ਤਿ. ਇਧ ਅਭਿਞ੍ਞੇਯ੍ਯਪਦੇ ਮਗ੍ਗੋ ਕਥਿਤੋ. ਸੇਸਂ ਪੁਰਿਮਸਦਿਸਮੇਵ.

ਇਧ ਠਤ੍ਵਾ ਪਞ੍ਹਾ ਸਮੋਧਾਨੇਤਬ੍ਬਾ. ਦਸਕੇ ਸਤਂ ਪਞ੍ਹਾ ਕਥਿਤਾ. ਏਕਕੇ ਚ ਨਵਕੇ ਚ ਸਤਂ, ਦੁਕੇ ਚ ਅਟ੍ਠਕੇ ਚ ਸਤਂ, ਤਿਕੇ ਚ ਸਤ੍ਤਕੇ ਚ ਸਤਂ, ਚਤੁਕ੍ਕੇ ਚ ਛਕ੍ਕੇ ਚ ਸਤਂ, ਪਞ੍ਚਕੇ ਪਞ੍ਞਾਸਾਤਿ ਅਡ੍ਢਛਟ੍ਠਾਨਿ ਪਞ੍ਹਸਤਾਨਿ ਕਥਿਤਾਨਿ ਹੋਨ੍ਤਿ.

‘‘ਇਦਮਵੋਚ ਆਯਸ੍ਮਾ ਸਾਰਿਪੁਤ੍ਤੋ, ਅਤ੍ਤਮਨਾ ਤੇ ਭਿਕ੍ਖੂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਭਾਸਿਤਂ ਅਭਿਨਨ੍ਦੁ’’ਨ੍ਤਿ ਸਾਧੁ, ਸਾਧੂਤਿ ਅਭਿਨਨ੍ਦਨ੍ਤਾ ਸਿਰਸਾ ਸਮ੍ਪਟਿਚ੍ਛਿਂਸੁ. ਤਾਯ ਚ ਪਨ ਅਤ੍ਤਮਨਤਾਯ ਇਮਮੇਵ ਸੁਤ੍ਤਂ ਆਵਜ੍ਜਮਾਨਾ ਪਞ੍ਚਸਤਾਪਿ ਤੇ ਭਿਕ੍ਖੂ ਸਹ ਪਟਿਸਮ੍ਭਿਦਾਹਿ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਹਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਦਸੁਤ੍ਤਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਪਾਥਿਕਵਗ੍ਗਸ੍ਸ ਵਣ੍ਣਨਾਤਿ.

ਪਾਥਿਕਵਗ੍ਗਟ੍ਠਕਥਾ ਨਿਟ੍ਠਿਤਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਆਯਾਚਿਤੋ ਸੁਮਙ੍ਗਲ, ਪਰਿਵੇਣਨਿਵਾਸਿਨਾ ਥਿਰਗੁਣੇਨ;

ਦਾਠਾਨਾਗਸਙ੍ਘਤ੍ਥੇਰੇਨ, ਥੇਰਵਂਸਨ੍ਵਯੇਨ.

ਦੀਘਾਗਮਵਰਸ੍ਸ ਦਸਬਲ, ਗੁਣਗਣਪਰਿਦੀਪਨਸ੍ਸ ਅਟ੍ਠਕਥਂ;

ਯਂ ਆਰਭਿਂ ਸੁਮਙ੍ਗਲ, ਵਿਲਾਸਿਨਿਂ ਨਾਮ ਨਾਮੇਨ.

ਸਾ ਹਿ ਮਹਾਟ੍ਠਕਥਾਯ, ਸਾਰਮਾਦਾਯ ਨਿਟ੍ਠਿਤਾ;

ਏਸਾ ਏਕਾਸੀਤਿਪਮਾਣਾਯ, ਪਾਲ਼ਿਯਾ ਭਾਣਵਾਰੇਹਿ.

ਏਕੂਨਸਟ੍ਠਿਮਤ੍ਤੋ, ਵਿਸੁਦ੍ਧਿਮਗ੍ਗੋਪਿ ਭਾਣਵਾਰੇਹਿ;

ਅਤ੍ਥਪ੍ਪਕਾਸਨਤ੍ਥਾਯ, ਆਗਮਾਨਂ ਕਤੋ ਯਸ੍ਮਾ.

ਤਸ੍ਮਾ ਤੇਨ ਸਹਾ’ਯਂ, ਅਟ੍ਠਕਥਾ ਭਾਣਵਾਰਗਣਨਾਯ;

ਸੁਪਰਿਮਿਤਪਰਿਚ੍ਛਿਨ੍ਨਂ, ਚਤ੍ਤਾਲੀਸਸਤਂ ਹੋਤਿ.

ਸਬ੍ਬਂ ਚਤ੍ਤਾਲੀਸਾਧਿਕਸਤ, ਪਰਿਮਾਣਂ ਭਾਣਵਾਰਤੋ ਏਵਂ;

ਸਮਯਂ ਪਕਾਸਯਨ੍ਤਿਂ, ਮਹਾਵਿਹਾਰੇ ਨਿਵਾਸਿਨਂ.

ਮੂਲਕਟ੍ਠਕਥਾਸਾਰ, ਮਾਦਾਯ ਮਯਾ ਇਮਂ ਕਰੋਨ੍ਤੇਨ;

ਯਂ ਪੁਞ੍ਞਮੁਪਚਿਤਂ ਤੇਨ, ਹੋਤੁ ਸਬ੍ਬੋ ਸੁਖੀ ਲੋਕੋਤਿ.

ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁਸਾਸਨੇ ਅਪ੍ਪਟਿਹਤਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦੀਵਰੇਨ ਮਹਾਕਵਿਨਾ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਦਿਪ੍ਪਭੇਦਗੁਣਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਵਂਸਪ੍ਪਦੀਪਾਨਂ ਥੇਰਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾ ਅਯਂ ਸੁਮਙ੍ਗਲਵਿਲਾਸਿਨੀ ਨਾਮ ਦੀਘਨਿਕਾਯਟ੍ਠਕਥਾ –

ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;

ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਦਿਟ੍ਠਿਵਿਸੁਦ੍ਧਿਯਾ.

ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;

ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.

ਸੁਮਙ੍ਗਲਵਿਲਾਸਿਨੀ ਨਾਮ

ਦੀਘਨਿਕਾਯਟ੍ਠਕਥਾ ਨਿਟ੍ਠਿਤਾ.