📜

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸਂਯੁਤ੍ਤਨਿਕਾਯੇ

ਖਨ੍ਧਵਗ੍ਗਟੀਕਾ

੧. ਖਨ੍ਧਸਂਯੁਤ੍ਤਂ

੧. ਨਕੁਲਪਿਤੁਵਗ੍ਗੋ

੧. ਨਕੁਲਪਿਤੁਸੁਤ੍ਤਵਣ੍ਣਨਾ

੧. ਭਗ੍ਗਾ ¶ ¶ ਨਾਮ ਜਾਨਪਦਿਨੋ ਰਾਜਕੁਮਾਰਾ. ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹੀਵਸੇਨ ‘‘ਭਗ੍ਗਾ’’ਤ੍ਵੇਵ ਵੁਚ੍ਚਤੀਤਿ ਕਤ੍ਵਾ ਵੁਤ੍ਤਂ ‘‘ਏਵਂਨਾਮਕੇ ਜਨਪਦੇ’’ਤਿ, ਏਵਂ ਬਹੁਵਚਨਵਸੇਨ ਲਦ੍ਧਨਾਮੇ’’ਤਿ ਅਤ੍ਥੋ. ਤਸ੍ਮਿਂ ਵਨਸਣ੍ਡੇਤਿ ਯੋ ਪਨ ਵਨਸਣ੍ਡੋ ਪੁਬ੍ਬੇ ਮਿਗਾਨਂ ਅਭਯਤ੍ਥਾਯ ਦਿਨ੍ਨੋ, ਤਸ੍ਮਿਂ ਵਨਸਣ੍ਡੇ. ਯਸ੍ਮਾ ਸੋ ਗਹਪਤਿ ਤਸ੍ਮਿਂ ਨਗਰੇ ‘‘ਨਕੁਲਪਿਤਾ’’ਤਿ ਪੁਤ੍ਤਸ੍ਸ ਵਸੇਨ ਪਞ੍ਞਾਯਿਤ੍ਥ, ਤਸ੍ਮਾ ਵੁਤ੍ਤਂ ‘‘ਨਕੁਲਪਿਤਾ’’ਤਿ ਨਕੁਲਸ੍ਸ ਨਾਮ ਦਾਰਕਸ੍ਸ ਪਿਤਾਤਿ ਅਤ੍ਥੋ. ਭਰਿਯਾਪਿਸ੍ਸ ‘‘ਨਕੁਲਮਾਤਾ’’ਤਿ ਪਞ੍ਞਾਯਿਤ੍ਥ.

ਜਰਾਜਿਣ੍ਣੋਤਿ ¶ ਜਰਾਵਸੇਨ ਜਿਣ੍ਣੋ, ਨ ਬ੍ਯਾਧਿਆਦੀਨਂ ਵਸੇਨ ਜਿਣ੍ਣੋ. ਵਯੋਵੁਡ੍ਢੋਤਿ ਜਿਣ੍ਣਤ੍ਤਾ ਏਵ ਵਯੋਵੁਡ੍ਢਿਪ੍ਪਤ੍ਤਿਯਾ ਵੁਡ੍ਢੋ, ਨ ਸੀਲਾਦਿਵੁਡ੍ਢਿਯਾ. ਜਾਤਿਯਾ ਮਹਨ੍ਤਤਾਯ ਚਿਰਰਤ੍ਤਤਾਯ ਜਾਤਿਮਹਲ੍ਲਕੋ. ਤਿਯਦ੍ਧਗਤੋਤਿ ਪਠਮੋ ਮਜ੍ਝਿਮੋ ਪਚ੍ਛਿਮੋਤਿ ਤਯੋ ਅਦ੍ਧੇ ਗਤੋ. ਤਤ੍ਥ ਪਠਮਂ ਦੁਤਿਯਞ੍ਚ ਅਤਿਕ੍ਕਨ੍ਤਤ੍ਤਾ ਪਚ੍ਛਿਮਂ ਉਪਗਤਤ੍ਤਾ ਵਯੋਅਨੁਪ੍ਪਤ੍ਤੋ. ਆਤੁਰਕਾਯੋਤਿ ਦੁਕ੍ਖਵੇਦਨਾਪਵਿਸਤਾਯ ਅਨਸ੍ਸਾਦਕਾਯੋ. ਗੇਲਞ੍ਞਂ ਪਨ ਦੁਕ੍ਖਗਤਿਕਨ੍ਤਿ ¶ ‘‘ਗਿਲਾਨਕਾਯੋ’’ਤਿ ਵੁਤ੍ਤਂ. ਤਥਾ ਹਿ ਸਚ੍ਚਵਿਭਙ੍ਗੇ (ਵਿਭ. ੧੯੦ ਆਦਯੋ) ਦੁਕ੍ਖਸਚ੍ਚਨਿਦ੍ਦੇਸੇ ਦੁਕ੍ਖਗ੍ਗਹਣੇਨੇਵ ਗਹਿਤਤ੍ਤਾ ਬ੍ਯਾਧਿ ਨ ਨਿਦ੍ਦਿਟ੍ਠੋ. ਨਿਚ੍ਚਪਗ੍ਘਰਣਟ੍ਠੇਨਾਤਿ ਸਬ੍ਬਦਾ ਅਸੁਚਿਪਗ੍ਘਰਣਭਾਵੇਨ. ਸੋ ਪਨਸ੍ਸ ਆਤੁਰਭਾਵੇਨਾਤਿ ਆਹ – ‘‘ਆਤੁਰਂਯੇਵ ਨਾਮਾ’’ਤਿ. ਵਿਸੇਸੇਨਾਤਿ ਅਧਿਕਭਾਵੇਨ. ਆਤੁਰਤੀਤਿ ਆਤੁਰੋ. ਸਙ੍ਗਾਮਪ੍ਪਤ੍ਤੋ ਸਨ੍ਤਤ੍ਤਕਾਯੋ. ਜਰਾਯ ਆਤੁਰਤਾ ਜਰਾਤੁਰਤਾ. ਕੁਸਲਪਕ੍ਖਵਡ੍ਢਨੇਨ ਮਨੋ ਭਾਵੇਨ੍ਤੀਤਿ ਮਨੋਭਾਵਨੀਯਾ. ਮਨਸਾ ਵਾ ਭਾਵਨੀਯਾ ਸਮ੍ਭਾਵਨੀਯਾਤਿ ਮਨੋਭਾਵਨੀਯਾ. ਅਨੁਸਾਸਤੂਤਿ ਅਨੁ ਅਨੁ ਸਾਸਤੂਤਿ ਅਯਮੇਤ੍ਥ ਅਤ੍ਥੋਤਿ ਆਹ – ‘‘ਪੁਨਪ੍ਪੁਨਂ ਸਾਸਤੂ’’ਤਿ. ਅਪਰਾਪਰਂ ਪਵਤ੍ਤਿਤਂ ਹਿਤਵਚਨਂ. ਅਨੋਤਿਣ੍ਣੇ ਵਤ੍ਥੁਸ੍ਮਿਂ ਯੋ ਏਵਂ ਕਰੋਤਿ, ਤਸ੍ਸ ਅਯਂ ਗੁਣੋ ਦੋਸੋਤਿ ਵਚਨਂ. ਤਨ੍ਤਿਵਸੇਨਾਤਿ ਤਨ੍ਤਿਸਨ੍ਨਿਸ੍ਸਯੇਨ ਅਯਂ ਅਨੁਸਾਸਨੀ ਨਾਮ. ਪਵੇਣੀਤਿ ਤਨ੍ਤਿਯਾ ਏਵ ਵੇਵਚਨਂ.

ਅਣ੍ਡਂ ਵਿਯ ਭੂਤੋਤਿ ਅਧਿਕੋਪਮਾ ਕਾਯਸ੍ਸ ਅਣ੍ਡਕੋਸਤੋ ਅਬਲਦੁਬ੍ਬਲਭਾਵਤੋ. ਤੇਨਾਹ ‘‘ਅਣ੍ਡਂ ਹੀ’’ਤਿਆਦਿ. ਬਾਲੋਯੇਵ ਤਾਦਿਸਤ੍ਤਭਾਵਸਮਙ੍ਗੀ ਮੁਹੁਤ੍ਤਮ੍ਪਿ ਆਰੋਗ੍ਯਂ ਪਟਿਜਾਨਨ੍ਤੋ.

ਵਿਪ੍ਪਸਨ੍ਨਾਨੀਤਿ ਪਕਤਿਮਾਕਾਰਂ ਅਤਿਕ੍ਕਮਿਤ੍ਵਾ ਵਿਸੇਸੇਨ ਪਸਨ੍ਨਾਨਿ. ਤੇਨਾਹ – ‘‘ਸੁਉ ਪਸਨ੍ਨਾਨੀ’’ਤਿ. ਪਸਨ੍ਨਚਿਤ੍ਤਸਮੁਟ੍ਠਿਤਰੂਪਸਮ੍ਪਦਾਹਿ ਤਾਹਿ ਤਸ੍ਸ ਮੁਖਵਣ੍ਣਸ੍ਸ ਪਾਰਿਸੁਦ੍ਧੀਤਿ ਆਹ – ‘‘ਪਰਿਸੁਦ੍ਧੋਤਿ ਨਿਦ੍ਦੋਸੋ’’ਤਿ. ਤੇਨੇਵਾਹ ‘‘ਨਿਰੁਪਕ੍ਕਿਲੇਸਤਾਯਾ’’ਤਿਆਦਿ. ਏਤੇਨੇਵਸ੍ਸਿਨ੍ਦ੍ਰਿਯਵਿਪ੍ਪਸਨ੍ਨਤਾਕਾਰਣਮ੍ਪਿ ਸਂਵਣ੍ਣਿਤਨ੍ਤਿ ਦਟ੍ਠਬ੍ਬਂ. ਏਸ ਮੁਖਵਣ੍ਣੋ. ਨਯਗ੍ਗਾਹਪਞ੍ਞਾ ਕਿਰੇਸਾਤਿ ਇਦਂ ਅਨਾਵਜ੍ਜਨਵਸੇਨੇਵ ਵੁਤ੍ਤਭਾਵਂ ਸਨ੍ਧਾਯਾਹ.

ਯਂ ਨੇਵ ਪੁਤ੍ਤਸ੍ਸਾਤਿਆਦਿ ‘‘ਓਵਦਤੁ ਨੋ, ਭਨ੍ਤੇ, ਭਗਵਾ ਯਥਾ ਮਯਂ ਪਰਲੋਕੇਪਿ ਅਞ੍ਞਮਞ੍ਞਂ ਸਮਾਗਚ੍ਛੇਯ੍ਯਾਮਾ’’ਤਿ ਵੁਤ੍ਤਵਚਨਂ ਸਨ੍ਧਾਯ ਵੁਤ੍ਤਮੇਵ. ਮਧੁਰਧਮ੍ਮਦੇਸਨਾਯੇਵ ਸਤ੍ਥੁ ਸਮ੍ਮੁਖਾ ਪਟਿਲਦ੍ਧਾ, ਤਸ੍ਸ ਅਤ੍ਤਨੋ ਪੇਮਗਾਰਵਗਹਿਤਤ੍ਤਾ ‘‘ਅਮਤਾਭਿਸੇਕੋ’’ਤਿ ਵੇਦਿਤਬ੍ਬੋ.

ਇਦਂ ਪਦਦ੍ਵਯਂ. ਆਰਕਤ੍ਤਾ ਕਿਲੇਸੇਹਿ ਮਗ੍ਗੇਨ ਸਮੁਚ੍ਛਿਨ੍ਨਤ੍ਤਾ. ਅਨਯੇਤਿ ਅਵਡ੍ਢਿਯਂ, ਅਨਤ੍ਥੇਤਿ ਅਤ੍ਥੋ. ਅਨਯੇ ਵਾ ਅਨੁਪਾਯੇ. ਨ ਇਰਿਯਨਤੋ ਅਵਤ੍ਤਨਤੋ. ਅਯੇਤਿ ਵਡ੍ਢਿਯਂ ਅਤ੍ਥੇ ਉਪਾਯੇ ਚ. ਅਰਣੀਯਤੋਤਿ ਪਯਿਰੁਪਾਸਿਤਬ੍ਬਤੋ. ਨਿਰੁਤ੍ਤਿਨਯੇਨ ਪਦਸਿਦ੍ਧਿ ਵੇਦਿਤਬ੍ਬਾ ਪੁਰਿਮੇਸੁ ਅਤ੍ਥਵਿਕਪ੍ਪੇਸੁ ¶ , ਪਚ੍ਛਿਮੇ ¶ ਪਨ ਸਦ੍ਦਸਤ੍ਥਵਸੇਨਪਿ. ਯਦਿਪਿ ਅਰਿਯਸਦ੍ਦੋ ‘‘ਯੇ ਹਿ ਵੋ ਅਰਿਯਾ ਪਰਿਸੁਦ੍ਧਕਾਯਕਮ੍ਮਨ੍ਤਾ’’ਤਿਆਦੀਸੁ (ਮ. ਨਿ. ੧.੩੫) ਵਿਸੁਦ੍ਧਾਸਯਪਯੋਗੇਸੁ ਪੁਥੁਜ੍ਜਨੇਸੁਪਿ ਵਟ੍ਟਤਿ, ਇਧ ਪਨ ਅਰਿਯਮਗ੍ਗਾਧਿਗਮੇਨ ਸਬ੍ਬਲੋਕੁਤ੍ਤਰਭਾਵੇਨ ਚ ਅਰਿਯਭਾਵੋ ਅਧਿਪ੍ਪੇਤੋਤਿ ਦਸ੍ਸੇਨ੍ਤੋ ਆਹ – ‘‘ਬੁਦ੍ਧਾ ਚਾ’’ਤਿਆਦਿ. ਤਤ੍ਥ ਪਚ੍ਚੇਕਬੁਦ੍ਧਾ ਤਥਾਗਤਸਾਵਕਾ ਚ ਸਪ੍ਪੁਰਿਸਾਤਿ ਇਦਂ ‘‘ਅਰਿਯਾ ਸਪ੍ਪੁਰਿਸਾ’’ਤਿ ਇਧ ਵੁਤ੍ਤਪਦਾਨਂ ਅਤ੍ਥਂ ਅਸਙ੍ਕਰਤੋ ਦਸ੍ਸੇਤੁਂ ਵੁਤ੍ਤਂ. ਯਸ੍ਮਾ ਪਨ ਨਿਪ੍ਪਰਿਯਾਯਤੋ ਅਰਿਯਸਪ੍ਪੁਰਿਸਭਾਵਾ ਅਭਿਨ੍ਨਸਭਾਵਾ, ਤਸ੍ਮਾ ‘‘ਸਬ੍ਬੇਵ ਵਾ’’ਤਿਆਦਿ ਵੁਤ੍ਤਂ.

ਏਤ੍ਤਾਵਤਾ ਹਿ ਬੁਦ੍ਧਸਾਵਕੋ ਵੁਤ੍ਤੋ, ਤਸ੍ਸ ਹਿ ਏਕਨ੍ਤੇਨ ਕਲ੍ਯਾਣਮਿਤ੍ਤੋ ਇਚ੍ਛਿਤਬ੍ਬੋ ਪਰਤੋ ਘੋਸਮਨ੍ਤਰੇਨ ਪਠਮਮਗ੍ਗਸ੍ਸ ਅਨੁਪ੍ਪਜ੍ਜਨਤੋ. ਵਿਸੇਸਤੋ ਚਸ੍ਸ ਭਗਵਾਵ ‘‘ਕਲ੍ਯਾਣਮਿਤ੍ਤੋ’’ਤਿ ਅਧਿਪ੍ਪੇਤੋ. ਵੁਤ੍ਤਞ੍ਹੇਤਂ ‘‘ਮਮਞ੍ਹਿ, ਆਨਨ੍ਦ, ਕਲ੍ਯਾਣਮਿਤ੍ਤਂ ਆਗਮ੍ਮ ਜਾਤਿਧਮ੍ਮਾ ਸਤ੍ਤਾ ਜਾਤਿਯਾ ਪਰਿਮੁਚ੍ਚਨ੍ਤੀ’’ਤਿਆਦਿ (ਸਂ. ਨਿ. ੧.੧੨੯; ੫.੨). ਸੋ ਏਵ ਚ ਅਵੇਚ੍ਚਪਸਾਦਾਧਿਗਮੇਨ ਦਲ਼੍ਹਭਤ੍ਤਿ ਨਾਮ. ਵੁਤ੍ਤਮ੍ਪਿ ਚੇਤਂ ‘‘ਯਂ ਮਯਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਂ ਮਮ ਸਾਵਕਾ ਜੀਵਿਤਹੇਤੁਪਿ ਨਾਤਿਕ੍ਕਮਨ੍ਤੀ’’ਤਿ (ਉਦਾ. ੪੫; ਚੂਲ਼ਵ. ੩੮੫). ਕਤਞ੍ਞੁਤਾਦੀਹਿ ਪਚ੍ਚੇਕਬੁਦ੍ਧਬੁਦ੍ਧਾਤਿ ਏਤ੍ਥ ਕਤਂ ਜਾਨਾਤੀਤਿ ਕਤਞ੍ਞੂ. ਕਤਂ ਵਿਦਿਤਂ ਪਾਕਟਂ ਕਰੋਤੀਤਿ ਕਤਵੇਦੀ. ਪਚ੍ਚੇਕਬੁਦ੍ਧਾ ਹਿ ਅਨੇਕੇਸੁਪਿ ਕਪ੍ਪਸਤਸਹਸ੍ਸੇਸੁ ਕਤਂ ਉਪਕਾਰਂ ਜਾਨਨ੍ਤਿ, ਕਤਞ੍ਚ ਪਾਕਟਂ ਕਰੋਨ੍ਤਿ ਸਤਿਜਨਨਆਮਿਸਪਟਿਗ੍ਗਹਣਾਦਿਨਾ. ਤਥਾ ਸਂਸਾਰਦੁਕ੍ਖਦੁਕ੍ਖਿਤਸ੍ਸ ਸਕ੍ਕਚ੍ਚਂ ਕਰੋਨ੍ਤਿ ਕਿਚ੍ਚਂ, ਯਂ ਅਤ੍ਤਨਾ ਕਾਤੁਂ ਸਕ੍ਕਾ. ਸਮ੍ਮਾਸਮ੍ਬੁਦ੍ਧੋ ਪਨ ਕਪ੍ਪਾਨਂ ਅਸਙ੍ਖ੍ਯੇਯ੍ਯਸਹਸ੍ਸੇਸੁਪਿ ਕਤਂ ਉਪਕਾਰਂ ਮਗ੍ਗਫਲਾਨਂ ਉਪਨਿਸ੍ਸਯਞ੍ਚ ਜਾਨਨ੍ਤਿ, ਪਾਕਟਞ੍ਚ ਕਰੋਨ੍ਤਿ. ਸੀਹੋ ਵਿਯ ਚ ਏਵਂ ਸਬ੍ਬਤ੍ਥ ਸਕ੍ਕਚ੍ਚਮੇਵ ਧਮ੍ਮਦੇਸਨਂ ਕਰੋਨ੍ਤੇਨ ਬੁਦ੍ਧਕਿਚ੍ਚਂ ਕਰੋਨ੍ਤਿ. ਯਾਯ ਪਟਿਪਤ੍ਤਿਯਾ ਅਰਿਯਾ ਦਿਟ੍ਠਾ ਨਾਮ ਹੋਨ੍ਤਿ, ਤਸ੍ਸਾ ਅਪ੍ਪਟਿਪਜ੍ਜਨਂ, ਤਤ੍ਥ ਚ ਆਦਰਾਭਾਵੋ ਅਰਿਯਾਨਂ ਅਦਸ੍ਸਨਸੀਲਤਾ, ਨ ਚ ਦਸ੍ਸਨੇ ਸਾਧੁਕਾਰਿਤਾਤਿ ਵੇਦਿਤਬ੍ਬਾ. ਚਕ੍ਖੁਨਾ ਅਦਸ੍ਸਾਵੀਤਿ ਏਤ੍ਥ ਚਕ੍ਖੁ ਨਾਮ ਨ ਮਂਸਚਕ੍ਖੁ ਏਵ, ਅਥ ਖੋ ਦਿਬ੍ਬਚਕ੍ਖੁਪੀਤਿ ਆਹ ‘‘ਦਿਬ੍ਬਚਕ੍ਖੁਨਾ ਵਾ’’ਤਿ. ਅਰਿਯਭਾਵੋਤਿ ਯੇਹਿ ਯੋਗਤੋ ‘‘ਅਰਿਯਾ’’ਤਿ ਵੁਚ੍ਚਨ੍ਤਿ, ਤੇ ਮਗ੍ਗਫਲਧਮ੍ਮਾ ਦਟ੍ਠਬ੍ਬਾ.

ਤਤ੍ਰਾਤਿ ਞਾਣਦਸ੍ਸਨਸ੍ਸੇਵ ਦਸ੍ਸਨਭਾਵੇ. ਵਤ੍ਥੂਤਿ ਅਧਿਪ੍ਪੇਤਤ੍ਥਞਾਪਨਕਾਰਣਂ. ਏਵਂ ਵੁਤ੍ਤੇਪੀਤਿ ਏਵਂ ਅਞ੍ਞਾਪਦੇਸੇਨ ਅਤ੍ਤੁਪਨਾਯਿਕਂ ਕਤ੍ਵਾ ¶ ਵੁਤ੍ਤੇਪਿ. ਧਮ੍ਮਨ੍ਤਿ ਲੋਕੁਤ੍ਤਰਧਮ੍ਮਂ, ਚਤੁਸਚ੍ਚਧਮ੍ਮਂ ਵਾ. ਅਰਿਯਕਰਧਮ੍ਮਾ ਅਨਿਚ੍ਚਾਨੁਪਸ੍ਸਨਾਦਯੋ, ਵਿਪਸ੍ਸਿਯਮਾਨਾ ਵਾ ਅਨਿਚ੍ਚਾਦਯੋ, ਚਤ੍ਤਾਰਿ ਵਾ ਅਰਿਯਸਚ੍ਚਾਨਿ.

ਅਵਿਨੀਤੋਤਿ ¶ ਨ ਵਿਨੀਤੋ ਅਧਿਸੀਲਸਿਕ੍ਖਾਦੀਨਂ ਵਸੇਨ ਨ ਸਿਕ੍ਖਿਤੋ. ਯੇਸਂ ਸਂਵਰਵਿਨਯਾਦੀਨਂ ਅਭਾਵੇਨ ਅਯਂ ‘‘ਅਵਿਨੀਤੋ’’ਤਿ ਵੁਚ੍ਚਤਿ, ਤੇ ਤਾਵ ਦਸ੍ਸੇਤੁਂ ‘‘ਦੁਵਿਧੋ ਵਿਨਯੋ ਨਾਮਾ’’ਤਿਆਦਿਮਾਹ. ਤਤ੍ਥ ਸੀਲਸਂਵਰੋਤਿ ਪਾਤਿਮੋਕ੍ਖਸਂਵਰੋ ਵੇਦਿਤਬ੍ਬੋ, ਸੋ ਚ ਅਤ੍ਥਤੋ ਕਾਯਿਕਵਾਚਸਿਕੋ ਅਵੀਤਿਕ੍ਕਮੋ. ਸਤਿਸਂਵਰੋਤਿ ਇਨ੍ਦ੍ਰਿਯਾਰਕ੍ਖਾ, ਸਾ ਚ ਤਥਾਪਵਤ੍ਤਾ ਸਤਿਯੇਵ. ਞਾਣਸਂਵਰੋਤਿ ‘‘ਸੋਤਾਨਂ ਸਂਵਰਂ ਬ੍ਰੂਮੀ’’ਤਿ (ਸੁ. ਨਿ. ੧੦੪੧) ਵਤ੍ਵਾ ‘‘ਪਞ੍ਞਾਯੇਤੇ ਪਿਧੀਯਰੇ’’ਤਿ (ਸੁ. ਨਿ. ੧੦੪੧) ਵਚਨਤੋ ਸੋਤਸਙ੍ਖਾਤਾਨਂ ਤਣ੍ਹਾਦਿਟ੍ਠਿਦੁਚ੍ਚਰਿਤਅਵਿਜ੍ਜਾਅਵਸਿਟ੍ਠਕਿਲੇਸਾਨਂ ਸਂਵਰੋ ਪਿਦਹਨਂ ਸਮੁਚ੍ਛੇਦਞਾਣਨ੍ਤਿ ਵੇਦਿਤਬ੍ਬਂ. ਖਨ੍ਤਿਸਂਵਰੋਤਿ ਅਧਿਵਾਸਨਾ, ਸਾ ਚ ਤਥਾਪਵਤ੍ਤਾ ਖਨ੍ਧਾ, ਅਦੋਸੋ ਵਾ, ‘‘ਪਞ੍ਞਾ’’ਤਿ ਕੇਚਿ ਵਦਨ੍ਤਿ. ਵੀਰਿਯਸਂਵਰੋ ਕਾਮਵਿਤਕ੍ਕਾਦੀਨਂ ਵਿਨੋਦਨਵਸੇਨ ਪਵਤ੍ਤਂ ਵੀਰਿਯਮੇਵ. ਤੇਨ ਤੇਨ ਅਙ੍ਗੇਨ ਤਸ੍ਸ ਤਸ੍ਸ ਅਙ੍ਗਸ੍ਸ ਪਹਾਨਂ ਤਦਙ੍ਗਪ੍ਪਹਾਨਂ. ਵਿਕ੍ਖਮ੍ਭਨਵਸੇਨ ਪਹਾਨਂ ਵਿਕ੍ਖਮ੍ਭਨਪ੍ਪਹਾਨਂ. ਸੇਸਪਦਤ੍ਤਯੇਪਿ ਏਸੇਵ ਨਯੋ.

ਇਮਿਨਾ ਪਾਤਿਮੋਕ੍ਖਸਂਵਰੇਨਾਤਿਆਦਿ ਸੀਲਸਂਵਰਾਦੀਨਂ ਵਿਵਰਣਂ. ਤਤ੍ਥ ਸਮੁਪੇਤੋਤਿ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨ ‘‘ਉਪਗਤੋ’’ਤਿਆਦਿਨਾ ਵਿਭਙ੍ਗੇ (ਵਿਭ. ੫੧੧) ਆਗਤਂ ਸਂਵਰਵਿਭਙ੍ਗਂ ਦਸ੍ਸੇਤਿ. ਕਾਯਦੁਚ੍ਚਰਿਤਾਦੀਨਨ੍ਤਿ ਦੁਸ੍ਸੀਲ੍ਯਸਙ੍ਖਾਤਾਨਂ ਕਾਯਵਚੀਦੁਚ੍ਚਰਿਤਾਦੀਨਂ ਮੁਟ੍ਠਸਚ੍ਚਸਙ੍ਖਾਤਸ੍ਸ ਪਮਾਦਸ੍ਸ, ਅਭਿਜ੍ਝਾਦੀਨਂ ਵਾ ਅਕ੍ਖਨ੍ਤਿਅਞ੍ਞਾਣਕੋਸਜ੍ਜਾਨਞ੍ਚ. ਸਂਵਰਣਤੋਤਿ ਪਿਦਹਨਤੋ, ਵਿਨਯਨਤੋਤਿ ਕਾਯਵਾਚਾਚਿਤ੍ਤਾਨਂ ਵਿਰੂਪਪਵਤ੍ਤਿਯਾ ਵਿਨਯਨਤੋ, ਕਾਯਦੁਚ੍ਚਰਿਤਾਦੀਨਂ ਵਾ ਅਪਨਯਨਤੋ, ਕਾਯਾਦੀਨਂ ਵਾ ਜਿਮ੍ਹਪਵਤ੍ਤਿਂ ਵਿਚ੍ਛਿਨ੍ਦਿਤ੍ਵਾ ਉਜੁਕਨਯਨਤੋਤਿ ਅਤ੍ਥੋ. ਪਚ੍ਚਯਸਮਵਾਯੇ ਉਪ੍ਪਜ੍ਜਨਾਰਹਾਨਂ ਕਾਯਦੁਚ੍ਚਰਿਤਾਦੀਨਂ ਤਥਾ ਤਥਾ ਅਨੁਪ੍ਪਾਦਨਮੇਵ ਸਂਵਰਣਂ ਵਿਨਯਨਞ੍ਚ ਵੇਦਿਤਬ੍ਬਂ.

ਯਂ ਪਹਾਨਨ੍ਤਿ ਸਮ੍ਬਨ੍ਧੋ. ‘‘ਨਾਮਰੂਪਪਰਿਚ੍ਛੇਦਾਦੀਸੁ ਵਿਪਸ੍ਸਨਾਞਾਣੇਸੂ’’ਤਿ ਕਸ੍ਮਾ ਵੁਤ੍ਤਂ? ਨਨੁ ਨਾਮਰੂਪਪਰਿਚ੍ਛੇਦਪਚ੍ਚਯਪਰਿਗ੍ਗਹਕਙ੍ਖਾਵਿਤਰਣਾਨਿ ਨ ਵਿਪਸ੍ਸਨਾਞਾਣਾਨਿ ਸਮ੍ਮਸਨਾਕਾਰੇਨ ਅਪ੍ਪਵਤ੍ਤਨਤੋ? ਸਚ੍ਚਮੇਤਂ, ਵਿਪਸ੍ਸਨਾਞਾਣਸ੍ਸ ਪਨ ਅਧਿਟ੍ਠਾਨਭਾਵਤੋ ਏਵਂ ਵੁਤ੍ਤਂ. ਨਾਮਰੂਪਮਤ੍ਤਮਿਦਂ, ‘‘ਨਤ੍ਥਿ ਏਤ੍ਥ ਅਤ੍ਤਾ ਵਾ ਅਤ੍ਤਨਿਯਂ ¶ ਵਾ’’ਤਿ ਏਵਂ ਪਵਤ੍ਤਞਾਣਂ ਨਾਮਰੂਪਵਵਤ੍ਥਾਨਂ. ਸਤਿ ਵਿਜ੍ਜਮਾਨੇ ਖਨ੍ਧਪਞ੍ਚਕਸਙ੍ਖਾਤੇ ਕਾਯੇ, ਸਯਂ ਵਾ ਸਤੀ ਤਸ੍ਮਿਂ ਕਾਯੇ ਦਿਟ੍ਠਿ ਸਕ੍ਕਾਯਦਿਟ੍ਠਿ, ਸਾ ਚ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿ ਏਵਂ ਪਵਤ੍ਤਾ ਅਤ੍ਤਦਿਟ੍ਠਿ. ਤਸ੍ਸ ਨਾਮਰੂਪਸ੍ਸ ਕਮ੍ਮਾਵਿਜ੍ਜਾਦਿਪਚ੍ਚਯਪਰਿਗ੍ਗਣ੍ਹਨਞਾਣਂ ਪਚ੍ਚਯਪਰਿਗ੍ਗਹੋ. ‘‘ਨਤ੍ਥਿ ਹੇਤੁ, ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿਆਦਿਨਯਪ੍ਪਵਤ੍ਤਾ ਅਹੇਤੁਦਿਟ੍ਠਿ. ‘‘ਇਸ੍ਸਰਪੁਰਿਸਪਜਾਪਤਿਪਕਤਿਅਣੁਕਾਲਾਦੀਹਿ ਲੋਕੋ ਪਵਤ੍ਤਤਿ ਨਿਵਤ੍ਤਤਿ ਚਾ’’ਤਿ ਤਥਾ ਤਥਾ ਪਵਤ੍ਤਾ ਦਿਟ੍ਠਿ ਵਿਸਮਹੇਤੁਦਿਟ੍ਠਿ. ਤਸ੍ਸੇਵਾਤਿ ਪਚ੍ਚਯਪਰਿਗ੍ਗਹਸ੍ਸੇਵ. ਕਙ੍ਖਾਵਿਤਰਣੇਨਾਤਿ ਯਥਾ ਏਤਰਹਿ ਨਾਮਰੂਪਸ੍ਸ ਕਮ੍ਮਾਦਿਪਚ੍ਚਯਤੋ ਉਪ੍ਪਤ੍ਤਿ, ਏਵਂ ਅਤੀਤੇ ਅਨਾਗਤੇਪੀਤਿ ਤੀਸੁ ਕਾਲੇਸੁ ਵਿਚਿਕਿਚ੍ਛਾਪਨਯਨਞਾਣੇਨ. ਕਥਂਕਥੀਭਾਵਸ੍ਸਾਤਿ ‘‘ਅਹੋਸਿਂ ਨੁ ਖੋ ਅਹਂ ¶ ਅਤੀਤਮਦ੍ਧਾਨ’’ਨ੍ਤਿਆਦਿਨਯਪਵਤ੍ਤਾਯ (ਮ. ਨਿ. ੧.੧੮; ਸਂ. ਨਿ. ੨.੨੦) ਸਂਸਯਪ੍ਪਵਤ੍ਤਿਯਾ. ਕਲਾਪਸਮ੍ਮਸਨੇਨਾਤਿ ‘‘ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨ’’ਨ੍ਤਿਆਦਿਨਾ (ਸਂ. ਨਿ. ੩.੪੮-੪੯) ਖਨ੍ਧਪਞ੍ਚਕਂ ਏਕਾਦਸਸੁ ਓਕਾਸੇਸੁ ਪਕ੍ਖਿਪਿਤ੍ਵਾ ਸਮ੍ਮਸਨਵਸੇਨ ਪਵਤ੍ਤੇਨ ਵਿਪਸ੍ਸਨਾਞਾਣੇਨ. ਅਹਂ ਮਮਾਤਿ ਗਾਹਸ੍ਸਾਤਿ ‘‘ਅਤ੍ਤਾ ਅਤ੍ਤਨਿਯ’’ਨ੍ਤਿ ਗਹਣਸ੍ਸ. ਮਗ੍ਗਾਮਗ੍ਗਵਵਤ੍ਥਾਨੇਨਾਤਿ ਮਗ੍ਗਾਮਗ੍ਗਞਾਣਵਿਸੁਦ੍ਧਿਯਾ. ਅਮਗ੍ਗੇ ਮਗ੍ਗਸਞ੍ਞਾਯਾਤਿ ਅਮਗ੍ਗੇ ਓਭਾਸਾਦਿਕੇ ‘‘ਮਗ੍ਗੋ’’ਤਿ ਉਪ੍ਪਨ੍ਨਸਞ੍ਞਾਯ. ਯਸ੍ਮਾ ਸਮ੍ਮਦੇਵ ਸਙ੍ਖਾਰਾਨਂ ਉਦਯਂ ਪਸ੍ਸਨ੍ਤੋ ‘‘ਏਵਮੇਤੇ ਸਙ੍ਖਾਰਾ ਅਨੁਰੂਪਕਾਰਣਤੋ ਉਪ੍ਪਜ੍ਜਨ੍ਤਿ, ਨ ਪਨ ਉਚ੍ਛਿਜ੍ਜਨ੍ਤੀ’’ਤਿ ਗਣ੍ਹਾਤਿ, ਤਸ੍ਮਾ ਵੁਤ੍ਤਂ ‘‘ਉਦਯਦਸ੍ਸਨੇਨ ਉਚ੍ਛੇਦਦਿਟ੍ਠਿਯਾ’’ਤਿ. ਯਸ੍ਮਾ ਪਨ ਸਙ੍ਖਾਰਾਨਂ ਵਯਂ ‘‘ਯਦਿਪਿਮੇ ਸਙ੍ਖਾਰਾ ਅਵਿਚ੍ਛਿਨ੍ਨਾ ਵਤ੍ਤਨ੍ਤਿ, ਉਪ੍ਪਨ੍ਨੁਪ੍ਪਨ੍ਨਾ ਪਨ ਅਪ੍ਪਟਿਸਨ੍ਧਿਕਾ ਨਿਰੁਜ੍ਝਨ੍ਤੇਵਾ’’ਤਿ ਪਸ੍ਸਤੋ ਕੁਤੋ ਸਸ੍ਸਤਗ੍ਗਾਹੋ. ਤਸ੍ਮਾ ਵੁਤ੍ਤਂ ‘‘ਵਯਦਸ੍ਸਨੇਨ ਸਸ੍ਸਤਦਿਟ੍ਠਿਯਾ’’ਤਿ. ਭਯਦਸ੍ਸਨੇਨਾਤਿ ਭਯਤੂਪਟ੍ਠਾਨਞਾਣੇਨ. ਸਭਯੇਤਿ ਸਬ੍ਬਭਯਾਨਂ ਆਕਰਭਾਵਤੋ ਸਕਲਦੁਕ੍ਖਵੂਪਸਮਸਙ੍ਖਾਤਸ੍ਸ ਪਰਮਸ੍ਸਾਸਸ੍ਸ ਪਟਿਪਕ੍ਖਭਾਵਤੋ ਚ ਸਭਯੇ ਖਨ੍ਧਪਞ੍ਚਕੇ. ਅਭਯਸਞ੍ਞਾਯਾਤਿ ‘‘ਅਭਯਂ ਖੇਮ’’ਨ੍ਤਿ ਉਪ੍ਪਨ੍ਨਸਞ੍ਞਾਯ. ਅਸ੍ਸਾਦਸਞ੍ਞਾ ਨਾਮ ਪਞ੍ਚੁਪਾਦਾਨਕ੍ਖਨ੍ਧੇਸੁ ਅਸ੍ਸਾਦਨਵਸੇਨ ਪਵਤ੍ਤਸਞ੍ਞਾ, ਯੋ ‘‘ਆਲਯਾਭਿਨਿਵੇਸੋ’’ਤਿਪਿ ਵੁਚ੍ਚਤਿ. ਅਭਿਰਤਿਸਞ੍ਞਾ ਤਤ੍ਥੇਵ ਅਭਿਰਮਣਵਸੇਨ ਪਵਤ੍ਤਸਞ੍ਞਾ, ਯਾ ‘‘ਨਨ੍ਦੀ’’ਤਿਪਿ ਵੁਚ੍ਚਤਿ. ਅਮੁਚ੍ਚਿਤੁਕਾਮਤਾ ਆਦਾਨਂ. ਅਨੁਪੇਕ੍ਖਾ ਸਙ੍ਖਾਰੇਹਿ ਅਨਿਬ੍ਬਿਨ੍ਦਨਂ, ਸਾਲਯਤਾਤਿ ਅਤ੍ਥੋ. ਧਮ੍ਮਟ੍ਠਿਤਿਯਂ ਪਟਿਚ੍ਚਸਮੁਪ੍ਪਾਦੇ. ਪਟਿਲੋਮਭਾਵੋ ਸਸ੍ਸਤੁਚ੍ਛੇਦਗ੍ਗਾਹੋ, ਪਚ੍ਚਯਾਕਾਰਪਟਿਚ੍ਛਾਦਕਮੋਹੋ ਵਾ. ਨਿਬ੍ਬਾਨੇ ¶ ਚ ਪਟਿਲੋਮਭਾਵੋ ਸਙ੍ਖਾਰੇਸੁ ਨਤਿ, ਨਿਬ੍ਬਾਨਪਟਿਚ੍ਛਾਦਕਮੋਹੋ ਵਾ. ਸਙ੍ਖਾਰਨਿਮਿਤ੍ਤਗ੍ਗਾਹੋਤਿ ਯਾਦਿਸਸ੍ਸ ਕਿਲੇਸਸ੍ਸ ਅਪ੍ਪਹੀਨਤਾ ਵਿਪਸ੍ਸਨਾ ਸਙ੍ਖਾਰਨਿਮਿਤ੍ਤਂ ਨ ਮੁਞ੍ਚਤਿ, ਸੋ ਕਿਲੇਸੋ, ਯੋ ‘‘ਸਂਯੋਗਾਭਿਨਿਵੇਸੋ’’ਤਿਪਿ ਵੁਚ੍ਚਤਿ, ਸਙ੍ਖਾਰਨਿਮਿਤ੍ਤਗ੍ਗਾਹਸ੍ਸ, ਅਤਿਕ੍ਕਮਨਮੇਵ ਵਾ ਪਹਾਨਂ.

ਪਵਤ੍ਤਿ ਏਵ ਪਵਤ੍ਤਿਭਾਵੋ, ਪਰਿਯੁਟ੍ਠਾਨਨ੍ਤਿ ਅਤ੍ਥੋ. ਨੀਵਰਣਾਦਿਧਮ੍ਮਾਨਨ੍ਤਿ ਆਦਿ-ਸਦ੍ਦੇਨ ਨੀਵਰਣਪਕ੍ਖਿਯਾ ਕਿਲੇਸਾ ਵਿਤਕ੍ਕਵਿਚਾਰਾਦਯੋ ਚ ਗਯ੍ਹਨ੍ਤਿ. ਚਤੁਨ੍ਨਂ ਅਰਿਯਮਗ੍ਗਾਨਂ ਭਾਵਿਤਤ੍ਤਾ ਅਚ੍ਚਨ੍ਤਂ ਅਪ੍ਪਵਤ੍ਤਿਭਾਵੇਨ ਯਂ ਪਹਾਨਨ੍ਤਿ ਸਮ੍ਬਨ੍ਧੋ. ਕੇਨ ਪਨ ਪਹਾਨਨ੍ਤਿ? ‘‘ਅਰਿਯਮਗ੍ਗੇਹੇਵਾ’’ਤਿ ਵਿਞ੍ਞਾਯਮਾਨੋਯਮਤ੍ਥੋ ਤੇਸਂ ਭਾਵਿਤਤ੍ਤਾ ਅਪ੍ਪਵਤ੍ਤਿਵਚਨਤੋ. ‘‘ਸਮੁਦਯਪਕ੍ਖਿਕਸ੍ਸਾ’’ਤਿ ਏਤ੍ਥ ਚਤ੍ਤਾਰੋਪਿ ਮਗ੍ਗਾ ਚਤੁਸਚ੍ਚਾਭਿਸਮਯਾਤਿ ਕਤ੍ਵਾ ਤੇਹਿ ਪਹਾਤਬ੍ਬੇਨ ਤੇਨ ਤੇਨ ਸਮੁਦਯਸਙ੍ਖਾਤੇਨ ਲੋਭੇਨ ਸਹ ਪਹਾਤਬ੍ਬਤ੍ਤਾ ਸਮੁਦਯਸਭਾਵਤ੍ਤਾ ਚ. ਸਚ੍ਚਵਿਭਙ੍ਗੇ ਚ ਸਬ੍ਬਕਿਲੇਸਾਨਂ ਸਮੁਦਯਭਾਵਸ੍ਸ ਵੁਤ੍ਤਤ੍ਤਾ ‘‘ਸਮੁਦਯਪਕ੍ਖਿਕਾ’’ਤਿ ਦਿਟ੍ਠਿਆਦਯੋ ਵੁਚ੍ਚਨ੍ਤਿ. ਪਟਿਪਸ੍ਸਦ੍ਧਤ੍ਤਂ ਵੂਪਸਨ੍ਤਤਾ.

ਸਙ੍ਖਤਨਿਸ੍ਸਟਤਾ ਸਙ੍ਖਾਰਸਭਾਵਾਭਾਵੋ. ਪਹੀਨਸਬ੍ਬਸਙ੍ਖਤਨ੍ਤਿ ਵਿਰਹਿਤਸਬ੍ਬਸਙ੍ਖਤਂ, ਵਿਸਙ੍ਖਾਰਨ੍ਤਿ ਅਤ੍ਥੋ. ਪਹਾਨਞ੍ਚ ਤਂ ਵਿਨਯੋ ਚਾਤਿ ਪਹਾਨਵਿਨਯੋ ਪੁਰਿਮੇਨ ਅਤ੍ਥੇਨ. ਦੁਤਿਯੇਨ ਪਨ ਪਹੀਯਤੀਤਿ ਪਹਾਨਂ, ਤਸ੍ਸ ਵਿਨਯੋਤਿ ਯੋਜੇਤਬ੍ਬੋ.

ਭਿਨ੍ਨਸਂਵਰਤ੍ਤਾਤਿ ¶ ਨਟ੍ਠਸਂਵਰਤ੍ਤਾ, ਸਂਵਰਾਭਾਵਤੋਤਿ ਅਤ੍ਥੋ. ਤੇਨ ਅਸਮਾਦਿਨ੍ਨਸਂਵਰੋਪਿ ਸਙ੍ਗਹਿਤੋਵ ਹੋਤਿ. ਸਮਾਦਾਨੇਨ ਹਿ ਸਮ੍ਪਾਦੇਤਬ੍ਬੋ ਸਂਵਰੋ, ਤਦਭਾਵੇ ਨ ਹੋਤੀਤਿ. ਅਰਿਯੇਤਿ ਅਰਿਯੋ. ਪਚ੍ਚਤ੍ਤਵਚਨਞ੍ਹੇਤਂ. ਏਸੇਸੇਤਿ ਏਸੋ ਏਸੋ, ਅਤ੍ਥਤੋ ਅਨਞ੍ਞੋਤਿ ਅਤ੍ਥੋ. ਤਜ੍ਜਾਤੇਤਿ ਅਤ੍ਥਤੋ ਤਂਸਭਾਵੋ, ਸਪ੍ਪੁਰਿਸੋ ਅਰਿਯਸਭਾਵੋ, ਅਰਿਯੋ ਚ ਸਪ੍ਪੁਰਿਸਭਾਵੋਤਿ ਅਤ੍ਥੋ.

ਸੋ ਅਹਨ੍ਤਿ ਅਤ੍ਤਨਾ ਪਰਿਕਪ੍ਪਿਤਂ ਅਤ੍ਤਾਨਂ ਦਿਟ੍ਠਿਗਤਿਕੋ ਵਦਤਿ. ‘‘ਅਹਂਬੁਦ੍ਧਿਨਿਬਨ੍ਧਨੋ ਅਤ੍ਤਾ’’ਤਿ ਹਿ ਅਤ੍ਤਵਾਦਿਨੋ ਲਦ੍ਧਿ. ਅਦ੍ਵਯਨ੍ਤਿ ਦ੍ਵਯਤਾਰਹਿਤਂ. ਅਭਿਨ੍ਨਂ ਵਣ੍ਣਮੇਵ ‘‘ਅਚ੍ਚੀ’’ਤਿ ਗਹੇਤ੍ਵਾ ‘‘ਅਚ੍ਚੀਤਿ ਵਣ੍ਣੋ ਏਵਾ’’ਤਿ ਤੇਸਂ ਏਕਤ੍ਤਂ ਪਸ੍ਸਨ੍ਤੋ ਵਿਯ ਯਥਾਪਰਿਕਪ੍ਪਿਤਂ ਅਤ੍ਤਾਨਂ ‘‘ਰੂਪ’’ਨ੍ਤਿ, ਯਥਾਦਿਟ੍ਠਂ ਵਾ ਰੂਪਂ, ‘‘ਅਤ੍ਤਾ’’ਤਿ ਗਹੇਤ੍ਵਾ ਤੇਸਂ ਏਕਤ੍ਤਂ ਪਸ੍ਸਨ੍ਤੋ ਦਟ੍ਠਬ੍ਬੋ. ਏਤ੍ਥ ਚ ‘‘ਰੂਪਂ ਅਤ੍ਤਾ’’ਤਿ ¶ ਇਮਿਸ੍ਸਾ ਪਵਤ੍ਤਿਯਾ ਅਭਾਵੇਪਿ ਰੂਪੇ ਅਤ੍ਤਗ੍ਗਹਣਂ ਪਵਤ੍ਤਮਾਨਂ ਅਚ੍ਚਿਯਂ ਵਣ੍ਣਗ੍ਗਹਣਂ ਵਿਯ ‘‘ਅਦ੍ਵਯਦਸ੍ਸਨ’’ਨ੍ਤਿ ਵੁਤ੍ਤਂ. ਉਪਮਾਯੋ ਚ ਅਨਞ੍ਞਤ੍ਤਾਦਿਗਹਣਨਿਦਸ੍ਸਨਵਸੇਨੇਵ ਵੁਤ੍ਤਾ, ਨ ਵਣ੍ਣਾਦੀਨਂ ਵਿਯ ਅਤ੍ਤਨੋ ਵਿਜ੍ਜਮਾਨਦਸ੍ਸਨਤ੍ਥਂ. ਨ ਹਿ ਅਤ੍ਤਨਿ ਸਾਮਿਭਾਵੇਨ ਰੂਪਞ੍ਚ ਸਕਿਞ੍ਚਨਭਾਵੇਨ ਸਮਨੁਪਸ੍ਸਤਿ. ਅਤ੍ਤਨਿ ਵਾ ਰੂਪਨ੍ਤਿ ਅਤ੍ਤਾਨਂ ਰੂਪਸ੍ਸ ਸਭਾਵਤੋ ਆਧਾਰਣਭਾਵੇਨ. ਰੂਪਸ੍ਮਿਂ ਵਾ ਅਤ੍ਤਾਨਨ੍ਤਿ ਰੂਪਸ੍ਸ ਅਤ੍ਤਨੋ ਆਧਾਰਣਭਾਵੇਨ ਦਿਟ੍ਠਿਪਸ੍ਸਨਾਯ ਪਸ੍ਸਤਿ. ਪਰਿਯੁਟ੍ਠਟ੍ਠਾਯੀਤਿ ਪਰਿਯੁਟ੍ਠਾਨਪ੍ਪਤ੍ਤਾਹਿ ਦਿਟ੍ਠਿਤਣ੍ਹਾਹਿ ‘‘ਰੂਪਂ ਅਤ੍ਤਾ, ਰੂਪਵਾ ਅਤ੍ਤਾ’’ਤਿਆਦਿਨਾ ਖਨ੍ਧਪਞ੍ਚਕਂ ਮਿਚ੍ਛਾ ਗਹੇਤ੍ਵਾ ਤਿਟ੍ਠਨਤੋ. ਤੇਨਾਹ ‘‘ਪਰਿਯੁਟ੍ਠਾਨਾਕਾਰੇਨਾ’’ਤਿਆਦਿ. ਏਸੇਵ ਨਯੋਤਿ ਯੋ ‘‘ਇਧੇਕਚ੍ਚੋ ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ ਰੂਪਕ੍ਖਨ੍ਧੇ ਵੁਤ੍ਤੋ ਸਂਵਣ੍ਣਨਾਨਯੋ, ਵੇਦਨਾਕ੍ਖਨ੍ਧਾਦੀਸੁਪਿ ਏਸੋ ਏਵ ਨਯੋ ਵੇਦਿਤਬ੍ਬੋ.

ਸੁਦ੍ਧਰੂਪਮੇਵਾਤਿ ਅਰੂਪੇਨ ਅਮਿਸ੍ਸਿਤਂ ਕੇਵਲਂ ਰੂਪਮੇਵ. ਅਰੂਪਨ੍ਤਿ ਸੁਦ੍ਧਅਰੂਪਂ ਰੂਪਸ੍ਸ ਅਗ੍ਗਹਿਤਤ੍ਤਾ. ਚਤੂਸੁ ਖਨ੍ਧੇਸੁ ਤਿਣ੍ਣਂ ਤਿਣ੍ਣਂ ਵਸੇਨਾਤਿ ਚਤੂਸੁ ਖਨ੍ਧੇਸੁ ਤਿਣ੍ਣਂ ਤਿਣ੍ਣਂ ਗਹਣਵਸੇਨ ਰੂਪਾਰੂਪਮਿਸ੍ਸਕੋ ਅਤ੍ਤਾ ਕਥਿਤੋ ਤਸ੍ਮਿਂ ਤਸ੍ਮਿਂ ਗਹਣੇ ਵੇਦਨਾਦਿਵਿਨਿਮੁਤ੍ਤਅਰੂਪਧਮ੍ਮੇ ਕਸਿਣਰੂਪੇਨ ਸਦ੍ਧਿਂ ਸਬ੍ਬਰੂਪਧਮ੍ਮੇ ਚ ਏਕਜ੍ਝਂ ਗਹਣਸਿਦ੍ਧਿਤੋ. ਪਞ੍ਚਸੁ ਠਾਨੇਸੁ ਉਚ੍ਛੇਦਦਿਟ੍ਠਿ ਕਥਿਤਾ, ਤੇ ਤੇ ਏਵ ਧਮ੍ਮੇ ‘‘ਅਤ੍ਤਾ’’ਤਿ ਗਹਣਤੋ ਤੇਸਞ੍ਚ ਉਚ੍ਛੇਦਭਾਵਤੋ. ਅਵਸੇਸੇਸੁ ਪਨ ਪਨ੍ਨਰਸਸੁ ਠਾਨੇਸੁ ਰੂਪਂ ‘‘ਅਤ੍ਤਾ’’ਤਿ ਗਹੇਤ੍ਵਾਪਿ ਦਿਟ੍ਠਿਗਤਿਕੋ ਤਤ੍ਥ ਨਿਚ੍ਚਸਞ੍ਞਂ ਨ ਵਿਸ੍ਸਜ੍ਜੇਤਿ ਕਸਿਣਰੂਪੇਨ ਤਂ ਮਿਸ੍ਸੇਤ੍ਵਾ ਤਸ੍ਸ ਚ ਉਪ੍ਪਾਦਾਦੀਨਂ ਅਦਸ੍ਸਨਤੋ, ਤਸ੍ਮਾਸ੍ਸ ਤਤ੍ਥਪਿ ਹੋਤਿਯੇਵ ਸਸ੍ਸਤਦਿਟ੍ਠਿ ਏਕਚ੍ਚਸਸ੍ਸਤਗਾਹਵਸੇਨਪਿ. ਮਗ੍ਗਾਵਰਣਾ ਵਿਪਰੀਤਦਸ੍ਸਨਤੋ. ਨ ਸਗ੍ਗਾਵਰਣਾ ਅਕਮ੍ਮਪਥਪ੍ਪਤ੍ਤਤਾਯ. ਅਕਿਰਿਯਾਹੇਤੁਕਨਤ੍ਥਿਕਦਿਟ੍ਠਿਯੋ ਏਵ ਹਿ ਕਮ੍ਮਪਥਦਿਟ੍ਠਿਯੋ.

ਕਾਯੋਤਿ ਰੂਪਕਾਯੋ. ਸੋ ਆਤੁਰੋਯੇਵ ਅਸਵਸਭਾਵਤੋ. ਰਾਗਦੋਸਮੋਹਾਨੁਗਤਨ੍ਤਿ ਅਪ੍ਪਹੀਨਰਾਗਦੋਸਮੋਹਸਨ੍ਤਾਨੇ ¶ ਪਵਤ੍ਤਂ. ਇਧਾਤਿ ਇਮਸ੍ਮਿਂ ਸੁਤ੍ਤੇ. ਦਸ੍ਸਿਤਂ ਆਤੁਰਭਾਵੇਨ. ਨਿਕ੍ਕਿਲੇਸਤਾਯਾਤਿ ਸਯਂ ਪਹੀਨਕਿਲੇਸਸਨ੍ਤਾਨਗਤਤਾਯ. ਸੇਖਾ ਨੇਵ ਆਤੁਰਚਿਤ੍ਤਾ ਪਹੀਨਕਿਲੇਸੇ ਉਪਾਦਾਯ, ਅਪ੍ਪਹੀਨੇ ਪਨ ਉਪਾਦਾਯ ਆਤੁਰਚਿਤ੍ਤਾ. ਅਨਾਤੁਰਚਿਤ੍ਤਤਂਯੇਵ ਭਜਨ੍ਤਿ ਵਟ੍ਟਾਨੁਸਾਰਿਮਹਾਜਨਸ੍ਸ ਵਿਯ ਤੇਸਂ ਚਿਤ੍ਤਸ੍ਸ ਕਿਲੇਸਵਸੇਨ ਆਤੁਰਤ੍ਤਾਭਾਵਤੋ.

ਨਕੁਲਪਿਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੇਵਦਹਸੁਤ੍ਤਵਣ੍ਣਨਾ

੨. ਦੇਵਾ ¶ ਵੁਚ੍ਚਨ੍ਤਿ ਰਾਜਾਨੋ ‘‘ਦਿਬ੍ਬਨ੍ਤਿ ਕਾਮਗੁਣੇਹਿ ਕੀਲ਼ਨ੍ਤਿ ਲਲ਼ਨ੍ਤਿ, ਅਤ੍ਤਨੋ ਵਾ ਪੁਞ੍ਞਾਨੁਭਾਵੇਨ ਜੋਤਨ੍ਤੀ’’ਤਿ ਕਤ੍ਵਾ. ਤੇਸਂ ਦਹੋਤਿ ਦੇਵਦਹੋ. ਸਯਂਜਾਤੋ ਵਾ ਸੋ ਹੋਤਿ, ਤਸ੍ਮਾਪਿ ‘‘ਦੇਵਦਹੋ’’ਤਿ ਵੁਤ੍ਤੋ. ਤਸ੍ਸ ਅਵਿਦੂਰੇ ਨਿਗਮੋ ‘‘ਦੇਵਦਹ’’ਨ੍ਤ੍ਵੇਵ ਸਙ੍ਖਂ ਗਤੋ ਯਥਾ ‘‘ਵਰਣਾਨਗਰਂ, ਗੋਧਾਗਾਮੋ’’ਤਿ. ਪਚ੍ਛਾਭੂਮਿਯਂ ਅਪਰਦਿਸਾਯਂ ਨਿਵਿਟ੍ਠਜਨਪਦੋ ਪਚ੍ਛਾਭੂਮਂ, ਤਂ ਗਨ੍ਤੁਕਾਮਾ ਪਚ੍ਛਾਭੂਮਗਮਿਕਾ. ਤੇ ਸਭਾਰੇਤਿ ਤੇ ਭਿਕ੍ਖੂ ਥੇਰਸ੍ਸ ਵਸੇਨ ਸਭਾਰੇ ਕਾਤੁਕਾਮਤਾਯ. ਯਦਿ ਥੇਰੋ ਤੇਸਂ ਭਾਰੋ, ਥੇਰਸ੍ਸਪਿ ਤੇ ਭਾਰਾ ਏਵਾਤਿ ‘‘ਤੇ ਸਭਾਰੇ ਕਾਤੁਕਾਮਤਾਯਾ’’ਤਿ ਵੁਤ੍ਤਂ. ਏਵਞ੍ਹਿ ਥੇਰੋ ਤੇ ਓਵਦਿਤਬ੍ਬੇ ਅਨੁਸਾਸਿਤਬ੍ਬੇ ਮਞ੍ਞਤੀਤਿ. ਇਦਾਨਿ ਤਮਤ੍ਥਂ ਵਿਵਰਨ੍ਤੋ ‘‘ਯੋ ਹੀ’’ਤਿਆਦਿਮਾਹ. ਅਯਂ ਨਿਬ੍ਭਾਰੋ ਨਾਮ ਕਞ੍ਚਿ ਪੁਗ੍ਗਲਂ ਅਤ੍ਤਨੋ ਭਾਰਂ ਕਤ੍ਵਾ ਅਵਤ੍ਤਨਤੋ.

ਚਤੁਬ੍ਬਿਧੇਨਾਤਿ ਧਾਤੁਕੋਸਲ੍ਲਂ ਆਯਤਨਕੋਸਲ੍ਲਂ ਪਟਿਚ੍ਚਸਮੁਪ੍ਪਾਦਕੋਸਲ੍ਲਂ ਠਾਨਾਟ੍ਠਾਨਕੋਸਲ੍ਲਨ੍ਤਿ ਏਵਂ ਚਤੁਬ੍ਬਿਧੇਨ.

ਤੇ ਮਹਲ੍ਲਕਾਬਾਧਿਕਾਤਿਦਹਰਪੁਗ੍ਗਲੇ ਗਣ੍ਹਿਤ੍ਵਾਵ ਗਚ੍ਛਤਿ. ਤੇ ਹਿ ਦਿਵਸਦ੍ਵਯੇਨ ਵੂਪਸਨ੍ਤਪਰਿਸ੍ਸਮਾ ਏਵ. ਹਤ੍ਥਿਵਾਨਰਤਿਤ੍ਤਿਰਪਟਿਬਦ੍ਧਂ ਵਤ੍ਥੁਂ ਕਥੇਤ੍ਵਾ. ‘‘ਏਲ਼ਕਾਲ਼ਗੁਮ੍ਬੇਤਿ ਕਾਲ਼ਤਿਣਗਚ੍ਛਮਣ੍ਡਪੇ’’ਤਿਪਿ ਵਦਨ੍ਤਿ.

ਵਿਵਿਧਂ ਨਾਨਾਭੂਤਂ ਰਜ੍ਜਂ ਵਿਰਜ੍ਜਂ, ਵਿਰਜ੍ਜਮੇਵ ਵੇਰਜ੍ਜਂ, ਤਤ੍ਥ ਗਤਂ, ਪਰਦੇਸਗਤਨ੍ਤਿ ਅਤ੍ਥੋ. ਤੇਨਾਹ ‘‘ਏਕਸ੍ਸਾ’’ਤਿਆਦਿ. ਚਿਤ੍ਤਸੁਦਤ੍ਤਾਦਯੋਤਿ ਚਿਤ੍ਤਗਹਪਤਿਅਨਾਥਪਿਣ੍ਡਿਕਾਦਯੋ. ਵੀਮਂਸਕਾਤਿ ਧਮ੍ਮਵਿਚਾਰਕਾ. ਕਿਨ੍ਤਿ ਕੀਦਿਸਂ. ਦਸ੍ਸਨਨ੍ਤਿ ਸਿਦ੍ਧਨ੍ਤਂ. ਆਚਿਕ੍ਖਤਿ ਕੀਦਿਸਨ੍ਤਿ ਅਧਿਪ੍ਪਾਯੋ. ਧਮ੍ਮਸ੍ਸਾਤਿ ਭਗਵਤਾ ਵੁਤ੍ਤਧਮ੍ਮਸ੍ਸ. ਅਨੁਧਮ੍ਮਨ੍ਤਿ ਅਨੁਕੂਲਂ ਅਵਿਰੁਜ੍ਝਨਧਮ੍ਮਂ. ਸੋ ਪਨ ਵੇਨੇਯ੍ਯਜ੍ਝਾਸਯਾਨੁਰੂਪਦੇਸਨਾਵਿਤ੍ਥਾਰੋਤਿ ਆਹ – ‘‘ਵੁਤ੍ਤਬ੍ਯਾਕਰਣਸ੍ਸ ਅਨੁਬ੍ਯਾਕਰਣ’’ਨ੍ਤਿ. ਧਾਰੇਤਿ ਅਤ੍ਤਨੋ ¶ ਫਲਨ੍ਤਿ ਧਮ੍ਮੋ, ਕਾਰਣਨ੍ਤਿ ਆਹ – ‘‘ਸਹਧਮ੍ਮਿਕੋਤਿ ਸਕਾਰਣੋ’’ਤਿ. ਇਮਿਨਾਪਿ ਪਾਠਨ੍ਤਰੇਨ ਵਾਦੋ ਏਵ ਦੀਪਿਤੋ, ਨ ਤੇਨ ਪਕਾਸਿਤਾ ਕਿਰਿਯਾ.

ਤਣ੍ਹਾਵਸੇਨੇਵ ਛਨ੍ਨਮ੍ਪਿ ਪਦਾਨਂ ਅਤ੍ਥੋ ਵੇਦਿਤਬ੍ਬੋ. ਯਸ੍ਮਾ ਰਾਗਾਦਯੋ ਤਣ੍ਹਾਯ ਏਵ ਅਵਤ੍ਥਾਵਿਸੇਸਾਤਿ. ਤੇਨਾਹ ‘‘ਤਣ੍ਹਾ ਹੀ’’ਤਿਆਦਿ. ਵਿਹਨਨ੍ਤਿ ਕਾਯਂ ਚਿਤ੍ਤਞ੍ਚਾਤਿ ਵਿਘਾਤੋ, ਦੁਕ੍ਖਨ੍ਤਿ ਆਹ – ‘‘ਅਵਿਘਾਤੋਤਿ ¶ ਨਿਦੁਕ੍ਖੋ’’ਤਿ. ਉਪਾਯਾਸੇਤਿ ਉਪਤਾਪੇਤੀਤਿ ਉਪਾਯਾਸੋ, ਉਪਤਾਪੋ. ਤਪ੍ਪਟਿਪਕ੍ਖੋ ਪਨ ਅਨੁਪਾਯਾਸੋ ਨਿਰੂਪਤਾਪੋ ਦਟ੍ਠਬ੍ਬੋ. ਸਬ੍ਬਤ੍ਥਾਤਿ ਸਬ੍ਬਵਾਰੇਸੁ.

ਦੇਵਦਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਹਾਲਿਦ੍ਦਿਕਾਨਿਸੁਤ੍ਤਵਣ੍ਣਨਾ

੩. ‘‘ਅਵਨ੍ਤਿਦਕ੍ਖਿਣਾਪਥੇ’’ਤਿ ਅਞ੍ਞੇਸੁ ਸੁਤ੍ਤਪਦੇਸੁ ਆਗਤਤ੍ਤਾ ਆਹ ‘‘ਅਵਨ੍ਤਿਦਕ੍ਖਿਣਾਪਥਸਙ੍ਖਾਤੇ’’ਤਿ. ਮਜ੍ਝਿਮਦੇਸਤੋ ਹਿ ਦਕ੍ਖਿਣਦਿਸਾਯ ਅਵਨ੍ਤਿਰਟ੍ਠਂ. ਪਵਤ੍ਤਯਿਤ੍ਥ ਏਤ੍ਥ ਲਦ੍ਧੀਤਿ ਪਵਤ੍ਤਂ, ਪਵਤ੍ਤਿਤਬ੍ਬਟ੍ਠਾਨਨ੍ਤਿ ਆਹ ‘‘ਲਦ੍ਧਿਪਵਤ੍ਤਟ੍ਠਾਨੇ’’ਤਿ. ਰੁਪ੍ਪਨਸਭਾਵੋ ਧਮ੍ਮੋਤਿ ਕਤ੍ਵਾ ਰੂਪਧਾਤੂਤਿ ਰੂਪਕ੍ਖਨ੍ਧੋ ਵੁਤ੍ਤੋ. ਰੂਪਧਾਤੁਮ੍ਹਿ ਆਰਮ੍ਮਣਪਚ੍ਚਯਭੂਤੇਨ ਰਾਗੇਨ ਸਹਜਾਤੇਨਪਿ ਅਸਹਜਾਤੇਨਪਿ ਉਪਨਿਸ੍ਸਯਭੂਤੇਨ ਅਪ੍ਪਹੀਨਭਾਵੇਨੇਵ ਵਿਨਿਬਦ੍ਧਂ ਪਟਿਬਦ੍ਧਂ ਕਮ੍ਮਵਿਞ੍ਞਾਣਂ. ਓਕਸਾਰੀਤਿ ਵੁਚ੍ਚਤਿ – ‘‘ਤਸ੍ਮਿਂ ਰੂਪਧਾਤੁਸਞ੍ਞਿਤੇ ਓਕੇ ਸਰਤਿ ਪਵਤ੍ਤਤੀ’’ਤਿ ਕਤ੍ਵਾ. ਅਵਤਿ ਏਤ੍ਥ ਗਚ੍ਛਤਿ ਪਵਤ੍ਤਤੀਤਿ ਓਕਂ, ਪਵਤ੍ਤਿਟ੍ਠਾਨਂ. ਤੇਨਾਹ – ‘‘ਗੇਹਸਾਰੀ ਆਲਯਸਾਰੀ’’ਤਿ.

ਉਗਚ੍ਛਤਿ ਵਾ ਏਤ੍ਥ ਵੇਦਨਾਦੀਹਿ ਸਦ੍ਧਿਂ ਸਮਵੇਤੀਤਿ ਓਕੋ, ਚਕ੍ਖੁਰੂਪਾਦਿ. ਪਚ੍ਚਯੋਤਿ ਆਰਮ੍ਮਣਾਦਿਵਸੇਨ ਪਚ੍ਚਯੋ. ਪਚ੍ਚਯੋ ਹੋਤੀਤਿ ਅਨਨ੍ਤਰਸਮਨਨ੍ਤਰਾਦਿਨਾ ਚੇਵ ਕਮ੍ਮੂਪਨਿਸ੍ਸਯਆਰਮ੍ਮਣਾਦਿਨਾ ਚ. ‘‘ਵਿਞ੍ਞਾਣਧਾਤੁ ਖੋ, ਗਹਪਤੀ’’ਤਿ ਏਵਂ ਵੁਤ੍ਤੇ ‘‘ਕਮ੍ਮਵਿਞ੍ਞਾਣਵਿਪਾਕਵਿਞ੍ਞਾਣੇਸੁ ਕਤਰਂ ਨੁ ਖੋ’’ਤਿ ਸਮ੍ਮੋਹੋ ਭਵੇਯ੍ਯ. ਤਸ੍ਸ ਸਮ੍ਮੋਹਸ੍ਸ ਵਿਘਾਤਤ੍ਥਂ ਅਪਗਮਨਤ੍ਥਂ. ਅਸਮ੍ਭਿਨ੍ਨਾਵਾਤਿ ਅਸਂਕਿਣ੍ਣਾਵ ਦੇਸਨਾ ਕਤਾ. ਆਰਮ੍ਮਣਵਸੇਨ ਚਤਸ੍ਸੋ ਅਭਿਸਙ੍ਖਾਰਵਿਞ੍ਞਾਣਟ੍ਠਿਤਿਯੋ ਵੁਤ੍ਤਾ – ‘‘ਰੂਪੁਪਯਂ ਵਾ, ਭਿਕ੍ਖਵੇ, ਵਿਞ੍ਞਾਣਂ ਤਿਟ੍ਠਮਾਨਂ ਤਿਟ੍ਠੇਯ੍ਯ, ਰੂਪਾਰਮ੍ਮਣ’’ਨ੍ਤਿਆਦਿਨਾ (ਸਂ. ਨਿ. ੩.੫੩). ਤਾ ਵਿਞ੍ਞਾਣਟ੍ਠਿਤਿਯੋ ਦਸ੍ਸੇਤੁਮ੍ਪਿ.

ਦਲ਼੍ਹਂ ਅਭਿਨਿਵੇਸਵਸੇਨ ਆਰਮ੍ਮਣਂ ਉਪੇਨ੍ਤੀਤਿ ਉਪਯਾ, ਤਣ੍ਹਾਦਿਟ੍ਠਿਯੋ. ਅਧਿਟ੍ਠਾਨਭੂਤਾਤਿ ਪਤਿਟ੍ਠਾਨਭੂਤਾ. ਅਭਿਨਿਵੇਸਭੂਤਾਤਿ ਤਂ ਤਂ ਆਰਮ੍ਮਣਂ ਅਭਿਨਿਵਿਸ੍ਸ ਅਜ੍ਝੋਸਾਯ ਪਵਤ੍ਤਿਯਾ ਕਾਰਣਭੂਤਾ. ਅਨੁਸਯਭੂਤਾਤਿ ਰਾਗਾਨੁਸਯਦਿਟ੍ਠਾਨੁਸਯਭੂਤਾ. ਉਪਰਿਮਕੋਟਿਯਾਤਿ ਪਹਾਨਸ੍ਸ ਉਪਰਿਮਕੋਟਿਯਾ ¶ . ਬੁਦ੍ਧਾਨਞ੍ਞੇਵ ਹਿ ਤੇ ਸਵਾਸਨਾ ਪਹੀਨਾ. ਪੁਬ੍ਬੇ ਅਗ੍ਗਹਿਤਂ ਵਿਞ੍ਞਾਣਂ ਅਗ੍ਗਹਿਤਮੇਵਾਤਿ ਕਤ੍ਵਾ ਕਸ੍ਮਾ ਇਧ ਦੇਸਨਾ ਕਤਾਤਿ ਚੋਦੇਤਿ – ‘‘ਇਧ ¶ ਵਿਞ੍ਞਾਣਂ ਕਸ੍ਮਾ ਗਹਿਤ’’ਨ੍ਤਿ. ਪੁਬ੍ਬੇ ‘‘ਵਿਞ੍ਞਾਣਧਾਤੁਰਾਗਵਿਨਿਬਨ੍ਧਞ੍ਚ ਵਿਞ੍ਞਾਣ’’ਨ੍ਤਿ ਵੁਚ੍ਚਮਾਨੇ ਯਥਾ ਯਥਾ ਸਮ੍ਮੋਹੋ ਸਿਯਾ ਪਚ੍ਚਯਪਚ੍ਚਯੁਪ੍ਪਨ੍ਨਵਿਭਾਗਸ੍ਸ ਦੁਕ੍ਕਰਤ੍ਤਾ, ਇਧ ਪਨ ਸਮ੍ਮੋਹਸ੍ਸ ਓਕਾਸੋਵ ਨਤ੍ਥਿ ਅਵਿਸੇਸੇਨ ਪਞ੍ਚਸੁ ਖਨ੍ਧੇਸੁ ਕਿਲੇਸਪ੍ਪਹਾਨਵਸੇਨਾਤਿ. ਤੇਨਾਹ ‘‘ਕਿਲੇਸਪ੍ਪਹਾਨਦਸ੍ਸਨਤ੍ਥ’’ਨ੍ਤਿਆਦਿ. ਕਮ੍ਮਵਿਞ੍ਞਾਣੇਨ ਓਕਂ ਅਸਰਨ੍ਤੇਨਾ’’ਤਿ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਅਸਰਨ੍ਤੇਨਾਤਿ ਅਨੁਪਗਚ੍ਛਨ੍ਤੇਨ.

ਪਚ੍ਚਯਟ੍ਠੇਨਾਤਿ ਆਰਮ੍ਮਣਾਦਿਪਚ੍ਚਯਭਾਵੇਨ. ਨਿਮਿਤ੍ਤਂ ਉਪ੍ਪਤ੍ਤਿਕਂ. ਆਰਮ੍ਮਣ…ਪੇ… ਨਿਕੇਤਨ੍ਤਿ ਆਰਮ੍ਮਣਕਰਣਸਙ੍ਖਾਤੇਨ ਨਿਵਾਸਟ੍ਠਾਨਭੂਤੇਨ ਰੂਪਮੇਵ ਨਿਕੇਤਨ੍ਤਿ ਰੂਪਨਿਮਿਤ੍ਤਨਿਕੇਤਂ.

ਛਨ੍ਦਰਾਗਸ੍ਸ ਬਲਵਦੁਬ੍ਬਲਤਾਯਾਤਿ ਅਜ੍ਝਤ੍ਤਖਨ੍ਧਪਞ੍ਚਕੇ ਛਨ੍ਦਰਾਗਸ੍ਸ ਬਲਵਭਾਵੇਨ ਤਂ ‘‘ਓਕੋ’’ਤਿ, ਬਹਿਦ੍ਧਾ ਛਸੁ ਆਰਮ੍ਮਣੇਸੁ ਤਸ੍ਸ ਦੁਬ੍ਬਲਤਾਯ ਤਾਨਿ ‘‘ਨਿਕੇਤ’’ਨ੍ਤਿ ਵੁਤ੍ਤਾਨਿ. ਇਦਾਨਿ ਯਥਾਵੁਤ੍ਤਮਤ੍ਥਂ ਪਾਕਟਂ ਕਤ੍ਵਾ ਦਸ੍ਸੇਤੁਂ ‘‘ਸਮਾਨੇਪਿ ਹੀ’’ਤਿਆਦਿ ਵੁਤ੍ਤਂ. ਓਕੋਤਿ ਵੁਚ੍ਚਤਿ ਗੇਹਮੇਵ ਰਤ੍ਤਿਟ੍ਠਾਨਭਾਵਤੋ. ਨਿਕੇਤਨ੍ਤਿ ਵੁਚ੍ਚਤਿ ਉਯ੍ਯਾਨਾਦਿ ਦਿਵਾਟ੍ਠਾਨਭਾਵਤੋ. ਤਤੋ ਦੁਬ੍ਬਲਤਰੋ ਹੋਤਿ ਛਨ੍ਦਰਾਗੋ.

ਗੇਹਸ੍ਸਿਤਸੁਖੇਨਾਤਿ ਗੇਹਨਿਸ੍ਸਿਤੇਨ ਚਿਤ੍ਤਸ੍ਸ ਸੁਖੇਨ ਸੁਖਿਤੋ ਸੁਖਪ੍ਪਤ੍ਤੋ ਹੋਤਿ. ਕਿਚ੍ਚਕਰਣੀਯੇਸੂਤਿ ਖੁਦ੍ਦਕੇਸੁ ਚੇਵ ਮਹਨ੍ਤੇਸੁ ਚ ਕਤ੍ਤਬ੍ਬਤ੍ਥੇਸੁ. ਸਯਨ੍ਤਿ ਅਤ੍ਤਨਾ. ਅਨ੍ਤੋਤਿ ਚਿਤ੍ਤਜ੍ਝਾਸਯੇ.

ਏਵਂਰੂਪੋਤਿ ਈਦਿਸਰੂਪੋ. ਵਣ੍ਣਸਦ੍ਦੋ ਵਿਯ ਰੂਪਸਦ੍ਦੋ ਰੂਪਾਯਤਨਸ੍ਸ ਵਿਯ ਸਣ੍ਠਾਨਸ੍ਸਪਿ ਵਾਚਕੋਤਿ ਅਧਿਪ੍ਪਾਯੇਨ ‘‘ਦੀਘਰਸ੍ਸ ਕਾਲ਼ੋਦਾਤਾਦੀਸੁ ਰੂਪੇਸੂ’’ਤਿ ਵੁਤ੍ਤਂ. ਸੁਖਾਦੀਸੂਤਿ ਸੋਮਨਸ੍ਸਾਦੀਸੁ. ਤਤ੍ਥ ਹਿ ‘‘ਅਭਿਣ੍ਹਂ ਸੋਮਨਸ੍ਸਿਤੋ ਭਵੇਯ੍ਯ’’ਨ੍ਤਿ ਪਤ੍ਥਨਾ ਸਿਯਾ. ਏਵਂਸਞ੍ਞੋ ਨਾਮਾਤਿ ਵਿਸਯਵਸੇਨ ਸਞ੍ਞਾਵਿਸੇਸਪਤ੍ਥਨਮਾਹ. ਏਵਂਵਿਞ੍ਞਾਣੋਤਿ ਪਨ ਇਧ ਵਿਸਯਮੁਖੇਨ ਵਿਞ੍ਞਾਣਵਿਸੇਸਪਤ੍ਥਨਂ ਵਦਤਿ – ‘‘ਏਵਂਨਿਪੁਣਰੂਪਦਸ੍ਸਨਸਮਤ੍ਥਂ, ਏਵਂਪਞ੍ਚਪਸਾਦਪਟਿਮਣ੍ਡਿਤਨਿਸ੍ਸਯਞ੍ਚ ਮੇ ਵਿਞ੍ਞਾਣਂ ਭਵੇਯ੍ਯਾ’’ਤਿ.

ਵਟ੍ਟਂ ਪੁਰਤੋ ਅਕੁਰੂਮਾਨੋਤਿ ਲੋਕੇ ਚਿਤ੍ਤਂ ਅਪਤ੍ਥੇਨ੍ਤੋ. ਅਸਿਲਿਟ੍ਠਂ ਪੁਬ੍ਬੇਨਾਪਰਂ ਅਸਮ੍ਬਦ੍ਧਂ. ਵਦਨ੍ਤਿ ਏਤੇਨਾਤਿ ਵਾਦੋ, ਦੋਸੋਤਿ ਆਹ – ‘‘ਤੁਯ੍ਹਂ ਦੋਸੋ’’ਤਿਆਦਿ. ਇਧੇਵ ਇਮਸ੍ਮਿਂਯੇਵ ਸਮਾਗਮੇ. ਨਿਬ੍ਬੇਠੇਹਿ ਦੋਸਤੋ ਅਤ੍ਤਾਨਂ ਮੋਚੇਹਿ.

ਹਾਲਿਦ੍ਦਿਕਾਨਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੁਤਿਯਹਾਲਿਦ੍ਦਿਕਾਨਿਸੁਤ੍ਤਵਣ੍ਣਨਾ

੪. ਚੂਲ਼ਛਕ੍ਕਪਞ੍ਹੇਤਿ ¶ ¶ ਮੂਲਪਣ੍ਣਾਸੇ ਚੂਲ਼ਤਣ੍ਹਾਸਙ੍ਖਯਸੁਤ੍ਤੇ (ਮ. ਨਿ. ੧.੩੯੦ ਆਦਯੋ). ਮਹਾਸਕ੍ਕਪਞ੍ਹੇਪੀਤਿ ਮਹਾਤਣ੍ਹਾਸਙ੍ਖਯਸੁਤ੍ਤੇਪਿ (ਮ. ਨਿ. ੧.੩੯੬ ਆਦਯੋ). ਏਤਨ੍ਤਿ ‘‘ਯੇ ਤੇ ਸਮਣਬ੍ਰਾਹ੍ਮਣਾ’’ਤਿਆਦਿਸੁਤ੍ਤਪਦਂ. ਤਣ੍ਹਾ ਸਮ੍ਮਦੇਵ ਖੀਯਤਿ ਏਤ੍ਥਾਤਿ ਤਣ੍ਹਾਸਙ੍ਖਯੋ, ਅਸਙ੍ਖਤਾ ਧਾਤੂਤਿ ਆਹ ‘‘ਤਣ੍ਹਾਸਙ੍ਖਯੇ ਨਿਬ੍ਬਾਨੇ’’ਤਿ. ਅਨ੍ਤਂ ਅਤਿਕ੍ਕਨ੍ਤਨਿਟ੍ਠਾਤਿ ਅਨ੍ਤਰਹਿਤਨਿਟ੍ਠਾ. ਤੇਨਾਹ ‘‘ਸਤਤਨਿਟ੍ਠਾ’’ਤਿ. ਸੇਸਪਦੇਸੂਤਿ ‘‘ਅਚ੍ਚਨ੍ਤਯੋਗਕ੍ਖੇਮਿਨੋ’’ਤਿਆਦੀਸੁ.

ਦੁਤਿਯਹਾਲਿਦ੍ਦਿਕਾਨਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਮਾਧਿਸੁਤ੍ਤਵਣ੍ਣਨਾ

੫. ਸਮਾਧੀਤਿ ਅਪ੍ਪਨਾਸਮਾਧਿ, ਉਪਚਾਰਸਮਾਧਿ ਵਾ. ਕਮ੍ਮਟ੍ਠਾਨਨ੍ਤਿ ਸਮਾਧਿਪਾਦਕਂ ਵਿਪਸ੍ਸਨਾਕਮ੍ਮਟ੍ਠਾਨਂ. ‘‘ਫਾਤਿਂ ਗਮਿਸ੍ਸਤੀ’’ਤਿ ਪਾਠੋ. ਪਤ੍ਥੇਤੀਤਿ ‘‘ਅਹੋ ਵਤ ਮੇ ਈਦਿਸਂ ਰੂਪਂ ਭਵੇਯ੍ਯਾ’’ਤਿ. ਅਭਿਵਦਤੀਤਿ ਤਣ੍ਹਾਦਿਟ੍ਠਿਵਸੇਨ ਅਭਿਨਿਵੇਸਂ ਵਦਤਿ. ਤੇਨਾਹ ‘‘ਤਾਯ ਅਭਿਨਨ੍ਦਨਾਯਾ’’ਤਿਆਦਿ. ‘‘ਅਹੋ ਪਿਯਂ ਇਟ੍ਠ’’ਨ੍ਤਿ ਵਚੀਭੇਦੇ ਅਸਤਿਪਿ ਤਥਾ ਲੋਭੁਪ੍ਪਾਦੇ ਸਤਿ ਅਭਿਵਦਤਿਯੇਵ ਨਾਮ. ਤੇਨਾਹ ‘‘ਵਾਚਂ ਅਭਿਨ੍ਦਨ੍ਤੋ’’ਤਿ. ‘‘ਮਮ ਇਦ’’ਨ੍ਤਿ ਅਤ੍ਤਨੋ ਪਰਿਣਾਮੇਤ੍ਵਾ ਅਨਞ੍ਞਗੋਚਰਂ ਵਿਯ ਕਤ੍ਵਾ ਗਣ੍ਹਨ੍ਤੋ ਅਜ੍ਝੋਸਾਯ ਤਿਟ੍ਠਤਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਗਿਲਿਤ੍ਵਾਤਿ ਪਰਿਨਿਟ੍ਠਪੇਤ੍ਵਾ ਗਣ੍ਹਾਤੀ’’ਤਿ. ‘‘ਅਭਿਨਨ੍ਦਤੀ’’ਤਿਆਦਯੋ ਪੁਬ੍ਬਭਾਗਵਸੇਨ ਵੁਤ੍ਤਾ, ‘‘ਉਪ੍ਪਜ੍ਜਤਿ ਨਨ੍ਦੀ’’ਤਿ ਦ੍ਵਾਰਪ੍ਪਤ੍ਤਵਸੇਨ. ਪਠਮੇਹਿ ਪਦੇਹਿ ਅਨੁਸਯੋ, ਪਚ੍ਛਿਮੇਨ ਪਰਿਯੁਟ੍ਠਾਨਨ੍ਤਿ ਕੇਚਿ ‘‘ਗਹਣਟ੍ਠੇਨ ਉਪਾਦਾਨ’’ਨ੍ਤਿ ਕਤ੍ਵਾ. ਨਾਭਿਨਨ੍ਦਤਿ ਨਾਭਿਵਦਤੀਤਿ ਏਤ੍ਥ ਹੇਟ੍ਠਾ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਨ ‘‘ਇਟ੍ਠਂ ਕਨ੍ਤ’’ਨ੍ਤਿ ਵਦਤੀਤਿ ‘‘ਇਟ੍ਠ’’ਨ੍ਤਿ ਨ ਵਦਤਿ, ‘‘ਕਨ੍ਤ’’ਨ੍ਤਿ ਨ ਵਦਤਿ. ਨਾਭਿਵਦਤਿਯੇਵ ਤਣ੍ਹਾਯ ਅਨੁਪਾਦਿਯਤ੍ਤਾ.

ਸਮਾਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪਟਿਸਲ੍ਲਾਣਸੁਤ੍ਤਵਣ੍ਣਨਾ

੬. ਞਤ੍ਵਾ ¶ ਆਹਾਤਿ ‘‘ਸਤਿ ਕਾਯਵਿਵੇਕੇ ਚਿਤ੍ਤਵਿਵੇਕੋ, ਤਸ੍ਮਿਂ ਸਤਿ ਉਪਧਿਵਿਵੇਕੋ ਚ ਇਮੇਸਂ ਲਦ੍ਧੁਂ ਵਟ੍ਟਤੀ’’ਤਿ ਞਤ੍ਵਾ ਆਹ.

ਪਟਿਸਲ੍ਲਾਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਉਪਾਦਾਪਰਿਤਸ੍ਸਨਾਸੁਤ੍ਤਵਣ੍ਣਨਾ

੭. ਗਹਣੇਨ ¶ ਉਪ੍ਪਨ੍ਨਂ ਪਰਿਤਸ੍ਸਨਨ੍ਤਿ ਖਨ੍ਧਪਞ੍ਚਕੇ ‘‘ਅਹਂ ਮਮਾ’’ਤਿ ਗਹਣੇਨ ਉਪ੍ਪਨ੍ਨਂ ਤਣ੍ਹਾਪਰਿਤਸ੍ਸਨਂ ਦਿਟ੍ਠਿਪਰਿਤਸ੍ਸਨਞ੍ਚ. ਅਪਰਿਤਸ੍ਸਨਨ੍ਤਿ ਪਰਿਤਸ੍ਸਨਾਭਾਵਂ, ਪਰਿਤਸ੍ਸਨਪਟਿਪਕ੍ਖਂ ਵਾ. ਅਹੁ ਵਤ ਮੇਤਂ ਬਲਯੋਬ੍ਬਨਾਦਿ. ਕਮ੍ਮਵਿਞ੍ਞਾਣਨ੍ਤਿ ਵਿਪਰਿਣਾਮਾਰਮ੍ਮਣਂ ਤਣ੍ਹਾਦਿਟ੍ਠਿਸਹਗਤਂ ਵਿਞ੍ਞਾਣਂ ਤਦਨੁਵਤ੍ਤਿ ਚ. ਅਨੁਪਰਿਵਤ੍ਤਿ ਨਾਮ ਤਂ ਆਰਮ੍ਮਣਂ ਕਤ੍ਵਾ ਪਵਤ੍ਤਿ. ਤੇਨਾਹ ‘‘ਵਿਪਰਿਣਾਮਾਰਮ੍ਮਣਚਿਤ੍ਤਤੋ’’ਤਿ. ਅਕੁਸਲਧਮ੍ਮਸਮੁਪ੍ਪਾਦਾਤਿ ਤਣ੍ਹਾਯ ਅਞ੍ਞਾਕੁਸਲਧਮ੍ਮਸਮੁਪ੍ਪਾਦਾ. ਪਰਿਯਾਦਿਯਿਤ੍ਵਾਤਿ ਖੇਪੇਤ੍ਵਾ, ਤਸ੍ਸ ਪਵਤ੍ਤਿਤੁਂ ਓਕਾਸਂ ਅਦਤ੍ਵਾ. ਸਉਤ੍ਤਾਸੋਤਿ ਤਣ੍ਹਾਦਿਟ੍ਠਿਵਸੇਨ ਸਉਤ੍ਤਾਸੋ. ਗਣ੍ਹਿਤ੍ਵਾਤਿ ਤਣ੍ਹਾਦਿਟ੍ਠਿਗ੍ਗਾਹੇਹਿ ਗਹੇਤ੍ਵਾ ਤੇਸਞ੍ਚੇਵ ਵਸੇਨ ਪਰਿਤਸ੍ਸਕੋ. ਰੂਪਭੇਦਾਨੁਪਰਿਵਤ੍ਤਿ ਚਿਤ੍ਤਂ ਨ ਹੋਤਿ. ਵਟ੍ਟਤੀਤਿ ਸਬ੍ਬਾਕਾਰੇਨ ਵਤ੍ਤੁਂ ਯੁਤ੍ਤਨ੍ਤਿ ਅਤ੍ਥੋ.

ਉਪਾਦਾਪਰਿਤਸ੍ਸਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਦੁਤਿਯਉਪਾਦਾਪਰਿਤਸ੍ਸਨਾਸੁਤ੍ਤਵਣ੍ਣਨਾ

੮. ਤਣ੍ਹਾਮਾਨਦਿਟ੍ਠਿਵਸੇਨ ਦੇਸਨਾ ਕਤਾ ‘‘ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ’’ਤਿ ਦੇਸਨਾਯ ਆਗਤਤ੍ਤਾ. ਚਤੂਸੁ ਸੁਤ੍ਤੇਸੂਤਿ ਪਞ੍ਚਮਾਦੀਸੁ ਚਤੂਸੁ ਸੁਤ੍ਤੇਸੁ. ਚਤੁਤ੍ਥੇ ਪਨ ਵਿਵਟ੍ਟਮੇਵ ਕਥਿਤਂ.

ਦੁਤਿਯਉਪਾਦਾਪਰਿਤਸ੍ਸਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਕਾਲਤ੍ਤਯਅਨਿਚ੍ਚਸੁਤ੍ਤਵਣ੍ਣਨਾ

੯. ਯਦਿ ¶ ਅਤੀਤਾਨਾਗਤਂ ਏਤਰਹਿ ਨਤ੍ਥਿਭਾਵਤੋ ਅਨਿਚ੍ਚਂ, ਪਚ੍ਚੁਪ੍ਪਨ੍ਨਮ੍ਪਿ ਤਦਾ ਨਤ੍ਥੀਤਿ ਕੋ ਪਨ ਵਾਦੋ ਤਸ੍ਸ ਅਨਿਚ੍ਚਤਾਯ, ਪਚ੍ਚੁਪ੍ਪਨ੍ਨਮ੍ਹਿ ਕਥਾਵ ਕਾ ਉਦਯਬ੍ਬਯਪਰਿਚ੍ਛਿਨ੍ਨਤ੍ਤਾ ਤਸ੍ਸ. ਵੁਤ੍ਤਞ੍ਹੇਤਂ ‘‘ਨਿਬ੍ਬਤ੍ਤਾ ਯੇ ਚ ਤਿਟ੍ਠਨ੍ਤਿ, ਆਰਗ੍ਗੇ ਸਾਸਪੂਪਮਾ’’ਤਿ (ਮਹਾਨਿ. ੧੦).

ਕਾਲਤ੍ਤਯਅਨਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦-੧੧. ਕਾਲਤ੍ਤਯਦੁਕ੍ਖਸੁਤ੍ਤਾਦਿਵਣ੍ਣਨਾ

੧੦-੧੧. ਤਥਾਰੂਪੇਨੇਵਾਤਿ ਯਥਾਰੂਪੇਨੇਵ ਪੁਗ੍ਗਲਜ੍ਝਾਸਯੇਨ ਨਵਮਂ ਸੁਤ੍ਤਂ ਕਥਿਤਂ, ਤਥਾਰੂਪੇਨੇਵਾਤਿ. ਤੇ ਕਿਰ ਭਿਕ੍ਖੂ ਅਤੀਤਾਨਾਗਤਂ ‘‘ਦੁਕ੍ਖ’’ਨ੍ਤਿ ਸਲ੍ਲਕ੍ਖੇਤ੍ਵਾ, ਤਥਾ ‘‘ਅਨਤ੍ਤਾ’’ਤਿ ¶ ਸਲ੍ਲਕ੍ਖੇਤ੍ਵਾ ਪਚ੍ਚੁਪ੍ਪਨ੍ਨੇ ਕਿਲਮਿਂਸੁ. ‘‘ਅਥ ਨੇਸ’’ਨ੍ਤਿਆਦਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨ ਵਤ੍ਤਬ੍ਬਂ.

ਕਾਲਤ੍ਤਯਦੁਕ੍ਖਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਕੁਲਪਿਤੁਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਅਨਿਚ੍ਚਵਗ੍ਗੋ

੧-੧੦. ਅਨਿਚ੍ਚਾਦਿਸੁਤ੍ਤਵਣ੍ਣਨਾ

੧੨-੨੧. ਪੁਚ੍ਛਾਵਸਿਕਂ ਆਨਨ੍ਦਤ੍ਥੇਰਸ੍ਸ ਪੁਚ੍ਛਾਵਸੇਨ ਦੇਸਿਤਤ੍ਤਾ.

ਅਨਿਚ੍ਚਾਦਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਅਨਿਚ੍ਚਵਗ੍ਗਵਣ੍ਣਨਾ ਨਿਟ੍ਠਿਤਾ.

੩. ਭਾਰਵਗ੍ਗੋ

੧. ਭਾਰਸੁਤ੍ਤਵਣ੍ਣਨਾ

੨੨. ਉਪਾਦਾਨਾਨਂ ਆਰਮ੍ਮਣਭੂਤਾ ਖਨ੍ਧਾ ਉਪਾਦਾਨਕ੍ਖਨ੍ਧਾ. ਪਰਿਹਾਰਭਾਰਿਯਟ੍ਠੇਨਾਤਿ ਪਰਿਹਾਰਸ੍ਸ ਭਾਰਿਯਭਾਵੇਨ ਗਰੁਤਰਭਾਵੇਨ. ਵੁਤ੍ਤਮੇਵ ਅਤ੍ਥਂ ¶ ਪਾਕਟਂ ਕਾਤੁਂ ‘‘ਏਤੇਸਞ੍ਹੀ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਏਤਾਨਿ ਠਾਨਗਮਨਾਦੀਨਿ ਰੂਪਾਰੂਪਧਮ੍ਮਾਨਂ ਪਙ੍ਗੁਲਜਚ੍ਚਨ੍ਧਾਨਂ ਵਿਯ ਅਞ੍ਞਮਞ੍ਞੂਪਸ੍ਸਯਵਸੇਨ ਇਜ੍ਝਨ੍ਤਿ, ਨ ਪਚ੍ਚੇਕਂ, ਤਸ੍ਮਾ ‘‘ਏਤੇਸ’’ਨ੍ਤਿ ਅਵਿਸੇਸਵਚਨਂ ਕਤਂ. ਪੁਗ੍ਗਲਨ੍ਤਿ ਖਨ੍ਧਸਨ੍ਤਾਨਂ ਵਦਤਿ. ਖਨ੍ਧਸਨ੍ਤਾਨੋ ਹਿ ਅਵਿਚ੍ਛੇਦੇਨ ਪਵਤ੍ਤਮਾਨੋ ਯਾਵ ਪਰਿਨਿਬ੍ਬਾਨਾ ਖਨ੍ਧਭਾਰਂ ਵਹਨ੍ਤੋ ਵਿਯ ਲੋਕੇ ਖਾਯਤਿ ਤਬ੍ਬਿਨਿਮੁਤ੍ਤਸ੍ਸ ਸਤ੍ਤਸ੍ਸ ਅਭਾਵਤੋ. ਤੇਨਾਹ ‘‘ਪੁਗ੍ਗਲੋ’’ਤਿਆਦਿ. ਭਾਰਹਾਰੋਤਿ ਜਾਤੋਤਿ ਭਾਰਹਾਰੋ ਨਾਮ ਜਾਤੋ.

ਪੁਨਬ੍ਭਵਕਰਣਂ ਪੁਨਬ੍ਭਵੋ, ਤਂ ਫਲਂ ਅਰਹਤਿ, ਤਤ੍ਥ ਨਿਯੁਤ੍ਤਾਤਿ ਵਾ ਪੋਨੋਭਵਿਕਾ. ਤਬ੍ਭਾਵਸਹਗਤਂ ¶ ਯਥਾ ‘‘ਸਨਿਦਸ੍ਸਨਾ ਧਮ੍ਮਾ’’ਤਿ, ਨ ਸਂਸਟ੍ਠਸਹਗਤਂ, ਨਾਪਿ ਆਰਮ੍ਮਣਸਹਗਤਂ. ‘‘ਤਤ੍ਰ ਤਤ੍ਰਾ’’ਤਿ ਯਂ ਯਂ ਉਪ੍ਪਤ੍ਤਿਟ੍ਠਾਨਂ, ਰੂਪਾਦਿਆਰਮ੍ਮਣਂ ਵਾ ਪਤ੍ਵਾ ਤਤ੍ਰਤਤ੍ਰਾਭਿਨਨ੍ਦਿਨੀ. ਤੇਨਾਹ ‘‘ਉਪਪਤ੍ਤਿਟ੍ਠਾਨੇ ਵਾ’’ਤਿਆਦਿ. ਪਞ੍ਚਕਾਮਗੁਣਿਕੋਤਿ ਪਞ੍ਚਕਾਮਗੁਣਾਰਮ੍ਮਣੋ. ਰੂਪਾਰੂਪੂਪਪਤ੍ਤਿਭਵੇ ਰਾਗੋ ਰੂਪਾਰੂਪਭਵਰਾਗੋ. ਝਾਨਨਿਕਨ੍ਤਿ ਝਾਨਸਙ੍ਖਾਤੇ ਕਮ੍ਮਭਵੇ ਰਾਗੋ. ਸਸ੍ਸਤਾਦਿਟ੍ਠੀਤਿ ਭਵਦਿਟ੍ਠਿ, ਤਂਸਹਗਤੋ ਰਾਗੋ. ਅਯਨ੍ਤਿ ਰਾਗੋ ਭਵਤਣ੍ਹਾ ਨਾਮ. ਉਚ੍ਛੇਦਦਿਟ੍ਠਿ ਵਿਭਵਦਿਟ੍ਠਿ ਨਾਮ, ਤਂਸਹਗਤੋ ਛਨ੍ਦਰਾਗੋ ਵਿਭਵਤਣ੍ਹਾ ਨਾਮ. ਏਸ ਪੁਗ੍ਗਲੋ ਖਨ੍ਧਭਾਰਂ ਆਦਿਯਤਿ ਤਣ੍ਹਾਵਸੇਨ ਪਟਿਸਨ੍ਧਿਗ੍ਗਹਣਤੋ. ‘‘ਅਸੇਸਮੇਤ੍ਥ ਤਣ੍ਹਾ ਵਿਰਜ੍ਜਤਿ ਪਲੁਜ੍ਜਤਿ ਨਿਰੁਜ੍ਝਤਿ ਪਹੀਯਤੀ’’ਤਿਆਦਿਨਾ ਸਬ੍ਬਪਦਾਨਿ ਨਿਬ੍ਬਾਨਵਸੇਨੇਵ ਵੇਦਿਤਬ੍ਬਾਨੀਤਿ ਆਹ ‘‘ਸਬ੍ਬਂ ਨਿਬ੍ਬਾਨਸ੍ਸੇਵ ਵੇਵਚਨ’’ਨ੍ਤਿ.

ਭਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਰਿਞ੍ਞਸੁਤ੍ਤਵਣ੍ਣਨਾ

੨੩. ਪਰਿਜਾਨਿਤਬ੍ਬੇਤਿ ਪਹਾਨਪਰਿਞ੍ਞਾਯ ਪਰਿਜਾਨਿਤਬ੍ਬੇ. ਤਥਾ ਪਰਿਜਾਨਨਞ੍ਚ ਤਤ੍ਥ ਛਨ੍ਦਰਾਗਪ੍ਪਹਾਨਂ, ਤੇਸਂ ਅਤਿਕ੍ਕਮੋਤਿ ਆਹ ‘‘ਸਮਤਿਕ੍ਕਮਿਤਬ੍ਬੇਤਿ ਅਤ੍ਥੋ’’ਤਿ. ਅਚ੍ਚਨ੍ਤਪਰਿਞ੍ਞਨ੍ਤਿ ਨਿਬ੍ਬਾਨਂ ਵਦਤਿ. ਤੇਨਾਹ ‘‘ਸਮਤਿਕ੍ਕਮਨ੍ਤਿ ਅਤ੍ਥੋ’’ਤਿ.

ਪਰਿਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਭਿਜਾਨਸੁਤ੍ਤਵਣ੍ਣਨਾ

੨੪. ਞਾਤਪਰਿਞ੍ਞਾ ¶ ਕਥਿਤਾ ‘‘ਅਭਿਵਿਸਿਟ੍ਠਾਯ ਪਞ੍ਞਾਯ ਜਾਨਨ’’ਨ੍ਤਿ ਕਤ੍ਵਾ. ਦੁਤਿਯਪਦੇਨਾਤਿ ‘‘ਪਰਿਜਾਨ’’ਨ੍ਤਿ ਪਦੇਨ. ਤਤਿਯਚਤੁਤ੍ਥੇਹੀਤਿ ‘‘ਵਿਰਾਜਯਂ ਪਜਹ’’ਨ੍ਤਿ ਪਦੇਹਿ.

ਅਭਿਜਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪-੯. ਛਨ੍ਦਰਾਗਸੁਤ੍ਤਾਦਿਵਣ੍ਣਨਾ

੨੫-੩੦. ਧਾਤੁਸਂਯੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ, ਕੇਵਲਞ੍ਹਿ ਏਤ੍ਥ ਖਨ੍ਧਵਸੇਨ ਦੇਸਨਾ ਆਗਤਾ, ਤਤ੍ਥ ਧਾਤੁਵਸੇਨਾਤਿ ਅਯਮੇਵ ਵਿਸੇਸੋ. ਚਤ੍ਤਾਰਿ ਸਚ੍ਚਾਨਿ ਕਥਿਤਾਨਿ ਅਸ੍ਸਾਦਾਦੀਨਵਨਿਸ੍ਸਰਣਵਸੇਨ ਦੇਸਨਾਯ ਪਵਤ੍ਤਤ੍ਤਾ.

ਛਨ੍ਦਰਾਗਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦. ਅਘਮੂਲਸੁਤ੍ਤਵਣ੍ਣਨਾ

੩੧. ਅਘਂ ¶ ਵੁਚ੍ਚਤਿ ਪਾਪਂ, ਅਘਨਿਮਿਤ੍ਤਤਾਯ ਅਘਂ ਦੁਕ੍ਖਂ. ਇਦਞ੍ਹਿ ਦੁਕ੍ਖਂ ਨਾਮ ਵਿਸੇਸਤੋ ਪਾਪਹੇਤੁਕਂ ਕਮ੍ਮਫਲਸਞ੍ਞਿਤਂ. ਤਥਾ ਵਟ੍ਟਦੁਕ੍ਖਂ ਅਵਿਜ੍ਜਾਤਣ੍ਹਾਮੂਲਕਤ੍ਤਾ. ਅਘਸ੍ਸ ਨਿਮਿਤ੍ਤਤਾਯ ਅਘਂ ਦੁਕ੍ਖਂ. ਵਟ੍ਟਾਨੁਸਾਰੀ ਮਹਾਜਨੋ ਹਿ ਦੁਕ੍ਖਾਭਿਭੂਤੋ ਤਸ੍ਸ ਪਤਿਕਾਰਂ ਮਞ੍ਞਮਾਨੋ ਤਂ ਤਂ ਕਰੋਤੀਤਿ.

ਅਘਮੂਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਪਭਙ੍ਗੁਸੁਤ੍ਤਵਣ੍ਣਨਾ

੩੨. ਪਭਿਜ੍ਜਨਸਭਾਵਨ੍ਤਿ ਖਣੇ ਖਣੇ ਪਭਙ੍ਗੁਸਭਾਵਂ.

ਪਭਙ੍ਗੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਭਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.

੪. ਨਤੁਮ੍ਹਾਕਂਵਗ੍ਗੋ

੧. ਨਤੁਮ੍ਹਾਕਂਸੁਤ੍ਤਵਣ੍ਣਨਾ

੩੩. ਛਨ੍ਦਰਾਗਪ੍ਪਹਾਨੇਨਾਤਿ ¶ ਤਪ੍ਪਟਿਬਦ੍ਧਸ੍ਸ ਛਨ੍ਦਰਾਗਸ੍ਸ ਪਜਹਨੇਨ. ਦਬ੍ਬਾਦਿ ਪਾਕਤਿਕਤਿਣਂ ਪਾਕਟਮੇਵਾਤਿ ਅਪਾਕਟਂ ਦਸ੍ਸੇਤੁਂ ਤਾਲਨਾਲ਼ਿਕੇਰਾਦਿ ਦਸ੍ਸਿਤਂ, ਤਿਣਕਟ੍ਠਾਨਂ ਵਾ ਭੇਦਦਸ੍ਸਨਤ੍ਥਂ. ਪਿਯਾਲੋ ਫਾਰੁਸਕਂ.

ਨਤੁਮ੍ਹਾਕਂਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ

੩੫. ਯਦਿ ਰੂਪਂ ਅਨੁਸੇਤੀਤਿ ਰੂਪਧਮ੍ਮੇ ਆਰਬ੍ਭ ਯਦਿ ਰਾਗਾਦਯੋ ਅਨੁਸਯਨਵਸੇਨ ਪਵਤ੍ਤਨ੍ਤਿ. ਤੇਨ ਸਙ੍ਖਂ ਗਚ੍ਛਤੀਤਿ ਤੇਨ ਰਾਗਾਦਿਨਾ ਤਂਸਮਙ੍ਗੀਪੁਗ੍ਗਲੋ ਸਙ੍ਖਾਤਬ੍ਬਤਂ ‘‘ਰਤ੍ਤੋ ਦੁਟ੍ਠੋ’’ਤਿਆਦਿਨਾ ਵੋਹਰਿਤਬ੍ਬਤਂ ਉਪਗਚ੍ਛਤੀਤਿ. ਤੇਨਾਹ ‘‘ਕਾਮਰਾਗਾਦੀਸੂ’’ਤਿਆਦਿ. ਅਭੂਤੇਨਾਤਿ ਅਜਾਤੇਨ ¶ ਅਨੁਸਯਵਸੇਨ ਅਪ੍ਪਵਤ੍ਤੇਨ. ਅਨੁਸਯਸੀਸੇਨ ਹੇਤ੍ਥ ਅਭਿਭਵਂ ਵਦਤਿ. ਯਤੋ ‘‘ਰਤ੍ਤੋ ਦੁਟ੍ਠੋ ਮੂਲ਼੍ਹੋਤਿ ਸਙ੍ਖਂ ਨ ਗਚ੍ਛਤੀ’’ਤਿ ਵੁਤ੍ਤਂ. ਨਿਪ੍ਪਰਿਯਾਯਤੋ ਹਿ ਮਗ੍ਗਵਜ੍ਝਕਿਲੇਸਾ ਅਨੁਸਯੋ.

ਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੁਤਿਯਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ

੩੬. ਤਂ ਅਨੁਸਯਿਤਂ ਰੂਪਨ੍ਤਿ ਤਂ ਰਾਗਾਦਿਨਾ ਅਨੁਸਯਿਤਂ ਰੂਪਂ ਮਰਨ੍ਤੇਨ ਅਨੁਸਯੇਨ ਅਨੁਮਰਤਿ. ਤੇਨ ਵੁਤ੍ਤਂ ‘‘ਨ ਹੀ’’ਤਿਆਦਿ. ਯੇਨ ਅਨੁਸਯੇਨ ਮਰਨ੍ਤੇਨ ਤਂ ਅਨੁਮਰਤਿ. ਤੇਨ ਸਙ੍ਖਂ ਗਚ੍ਛਤੀਤਿ ਤਥਾਭੂਤਤੋ ਤੇਨ ‘‘ਰਤ੍ਤੋ’’ਤਿਆਦਿਵੋਹਾਰਂ ਲਭਤਿ. ਯੇਨ ਅਨੁਸਯੇਨ ਕਾਰਣਭੂਤੇਨ ਅਨੁਮੀਯਤਿ, ਤੇਨ.

ਦੁਤਿਯਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੬. ਆਨਨ੍ਦਸੁਤ੍ਤਾਦਿਵਣ੍ਣਨਾ

੩੭-੩੮. ਠਿਤਿਯਾ ¶ ਠਿਤਿਕ੍ਖਣੇਨ ਸਹਿਤਂ ਠਿਤਂ. ਠਿਤਸ੍ਸ ਅਞ੍ਞਥਤ੍ਤਨ੍ਤਿ ਉਪ੍ਪਾਦਕ੍ਖਣਤੋ ਅਞ੍ਞਥਾਭਾਵੋ. ਪਞ੍ਞਾਯਤੀਤਿ ਉਪਲਬ੍ਭਤਿ. ਪਚ੍ਚਯਵਸੇਨ ਧਰਮਾਨਤ੍ਤਾ ਏਵ ਜੀਵਮਾਨਸ੍ਸ ਜੀਵਿਤਿਨ੍ਦ੍ਰਿਯਵਸੇਨ ਜਰਾ ਪਞ੍ਞਾਯਤਿ ਉਪ੍ਪਾਦਕ੍ਖਣਤੋ ਅਞ੍ਞਥਤ੍ਤਪ੍ਪਤ੍ਤਿਯਾ. ਵੁਤ੍ਤਮੇਵ ਅਤ੍ਥਂ ਪਾਕਟਤਰਂ ਕਾਤੁਂ ‘‘ਠਿਤੀ’’ਤਿਆਦਿ ਵੁਤ੍ਤਂ. ਜੀਵਿ…ਪੇ… ਨਾਮਂ. ਤਥਾ ਹਿ ਅਭਿਧਮ੍ਮੇ (ਧ. ਸ. ੧੯) ‘‘ਆਯੁ ਠਿਤੀ’’ਤਿ ਨਿਦ੍ਦਿਟ੍ਠਂ. ਅਞ੍ਞਥਤ੍ਤਨ੍ਤਿ ਜਰਾਯ ਨਾਮਨ੍ਤਿ ਸਮ੍ਬਨ੍ਧੋ.

ਤੀਣਿ ਲਕ੍ਖਣਾਨਿ ਹੋਨ੍ਤਿ ਸਙ੍ਖਤਸਭਾਵਲਕ੍ਖਣਤੋ. ਯੋ ਕੋਚਿ ਰੂਪਧਮ੍ਮੋ ਵਾ ਅਰੂਪਧਮ੍ਮੋ ਵਾ ਲੋਕਿਯੋ ਵਾ ਲੋਕੁਤ੍ਤਰੋ ਵਾ ਸਙ੍ਖਾਰੋ. ਸਙ੍ਖਾਰੋ, ਨ ਲਕ੍ਖਣਂ ਉਪ੍ਪਾਦਾਦਿਸਭਾਵਤ੍ਤਾ. ਲਕ੍ਖਣਂ, ਨ ਸਙ੍ਖਾਰੋ ਉਪ੍ਪਾਦਾਦਿਰਹਿਤਤ੍ਤਾ. ਨ ਚ…ਪੇ… ਸਕ੍ਕਾ ਸਙ੍ਖਾਰਧਮ੍ਮਤ੍ਤਾ ਲਕ੍ਖਣਸ੍ਸ. ਨਾਪਿ ਲਕ੍ਖਣਂ ਵਿਨਾ ਸਙ੍ਖਾਰੋ ਪਞ੍ਞਾਪੇਤੁਂ ਸਕ੍ਕਾ ਸਙ੍ਖਾਰਭਾਵੇਨ. ਤੇਨਾਹ ‘‘ਲਕ੍ਖਣੇਨਾ’’ਤਿਆਦਿ. ਇਦਾਨਿ ਯਥਾਵੁਤ੍ਤਮਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਯਥਾ’’ਤਿਆਦਿਮਾਹ. ਤਤ੍ਥ ਲਕ੍ਖਣਨ੍ਤਿ ਕਾਲ਼ਰਤ੍ਤਸਬਲਾਦਿਭਾਵਲਕ੍ਖਣਂ ਪਾਕਟਂ ਹੋਤਿ ‘‘ਅਯਂ ਅਸੁਕਸ੍ਸ ਗਾਵੀ’’ਤਿ.

ਏਵਂ ਸਙ੍ਖਾਰੋਪਿ ਪਞ੍ਞਾਯਤਿ ਸਭਾਵਤੋ ਉਪਧਾਰੇਨ੍ਤਸ੍ਸ ਉਪ੍ਪਾਦਲਕ੍ਖਣਮ੍ਪਿ ਉਪ੍ਪਾਦਾਵਤ੍ਥਾਤਿ ਕਤ੍ਵਾ. ਕਾਲਸਙ੍ਖਾਤੋਤਿ ਉਪ੍ਪਜ੍ਜਮਾਨਕਾਲਸਙ੍ਖਾਤੋ. ਤਸ੍ਸ ਸਙ੍ਖਾਰਸ੍ਸ. ਖਣੋਪੀਤਿ ਉਪ੍ਪਾਦਕ੍ਖਣੋਪਿ ਪਞ੍ਞਾਯਤਿ. ਉਪ੍ਪਾਦੋਪੀਤਿ ਉਪ੍ਪਾਦਲਕ੍ਖਣੋਪਿ. ਜਰਾਲਕ੍ਖਣਨ੍ਤਿ ਉਪ੍ਪਨ੍ਨਜੀਰਣਲਕ੍ਖਣਂ, ਤਂ ‘‘ਠਿਤਸ੍ਸ ¶ ਅਞ੍ਞਥਤ੍ਤ’’ਨ੍ਤਿ ਵੁਤ੍ਤਂ. ‘‘ਭਙ੍ਗਕ੍ਖਣੇ ਸਙ੍ਖਾਰੋਪਿ ਤਂਲਕ੍ਖਣਮ੍ਪਿ ਕਾਲਸਙ੍ਖਾਤੋ ਤਸ੍ਸ ਖਣੋਪਿ ਪਞ੍ਞਾਯਤੀ’’ਤਿ ਪਾਠੋ. ਕੇਚਿ ਪਨ ‘‘ਜਰਾਪੀ’’ਤਿ ਪਦਮ੍ਪੇਤ੍ਥ ਪਕ੍ਖਿਪਨ੍ਤਿ. ਏਵਞ੍ਚ ਵਦਨ੍ਤਿ ‘‘ਨ ਹਿ ਤਸ੍ਮਿਂ ਖਣੇ ਤਰੁਣੋ ਹੁਤ੍ਵਾ ਸਙ੍ਖਾਰੋ ਭਿਜ੍ਜਤਿ, ਅਥ ਖੋ ਜਿਯ੍ਯਮਾਨੋ ਮਹਲ੍ਲਕੋ ਵਿਯ ਜਿਣ੍ਣੋ ਏਵ ਹੁਤ੍ਵਾ ਭਿਜ੍ਜਤੀ’’ਤਿ, ਭਙ੍ਗੇਨੇਵ ਪਨ ਜਰਾ ਅਭਿਭੁਯ੍ਯਤਿ ਖਣਸ੍ਸ ਅਤਿਇਤ੍ਤਰਭਾਵਤੋ ਨ ਸਕ੍ਕਾ ਪਞ੍ਞਾਪੇਤੁਂ ਠਿਤਿਯਾਤਿ ਤੇਸਂ ਅਧਿਪ੍ਪਾਯੋ. ਤਾਨੀਤਿ ਅਰੂਪਧਮ੍ਮਾਨਂ ਤੀਣਿ ਲਕ੍ਖਣਾਨਿ. ਅਤ੍ਥਿਕ੍ਖਣਨ੍ਤਿ ਅਰੂਪਧਮ੍ਮਵਿਜ੍ਜਮਾਨਕ੍ਖਣਂ, ਉਪ੍ਪਾਦਕ੍ਖਣਨ੍ਤਿ ਅਧਿਪ੍ਪਾਯੋ. ਸਬ੍ਬਧਮ੍ਮਾਨਨ੍ਤਿ ਸਬ੍ਬੇਸਂ ਰੂਪਾਰੂਪਧਮ੍ਮਾਨਂ ਠਿਤਿਯਾ ਨ ਭਵਿਤਬ੍ਬਂ. ਤਸ੍ਸੇਵਾਤਿ ਤਸ੍ਸਾ ਏਵ ਠਿਤਿਯਾ. ਤਮਤ੍ਥਨ੍ਤਿ ਜਰਾਲਕ੍ਖਣਸ੍ਸ ਪਞ੍ਞਾਪੇਤੁਂ ਅਸਕ੍ਕੁਣੇਯ੍ਯਭਾਵਂ. ਅਞ੍ਞੇ ਪਨ ‘‘ਸਨ੍ਤਤਿਵਸੇਨ ਠਾਨਂ ਠਿਤੀ’’ਤਿ ਵਦਨ੍ਤਿ, ਤਯਿਦਂ ¶ ਅਕਾਰਣਂ ਅਟ੍ਠਾਨਂ. ਯਸ੍ਮਾ ਸੁਤ੍ਤੇ ‘‘ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤੀ’’ਤਿ ਉਪ੍ਪਾਦਵਯੇਹਿ ਨਿਬ੍ਬਿਸੇਸੇਨ ਠਿਤਿਯਾ ਜੋਤਿਤਤ੍ਤਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਅਪਿਚ ਯਥਾ ਧਮ੍ਮਸ੍ਸ ਉਪ੍ਪਾਦਾਵਤ੍ਥਾਯ ਭਿਨ੍ਨਾ ਭਙ੍ਗਾਵਤ੍ਥਾ ਇਚ੍ਛਿਤਾ, ਅਞ੍ਞਥਾ ਉਪ੍ਪਜ੍ਜਮਾਨਮੇਵ ਭਿਜ੍ਜਤੀਤਿ ਆਪਜ੍ਜਤਿ, ਏਵਂ ਭਙ੍ਗਾਵਤ੍ਥਾਯਪਿ ਭਿਨ੍ਨਾ ਭਙ੍ਗਾਭਿਮੁਖਾਵਤ੍ਥਾ ਇਚ੍ਛਿਤਬ੍ਬਾ. ਨ ਹਿ ਅਭਙ੍ਗਾਭਿਮੁਖੋ ਭਿਜ੍ਜਤਿ. ਨ ਚੇਤ੍ਥ ਸਕ੍ਕਾ ਉਪ੍ਪਾਦਾਭਿਮੁਖਾਵਤ੍ਥਂ ਪਰਿਕਪ੍ਪੇਤੁਂ ਤਦਾ ਤਸ੍ਸ ਅਲਦ੍ਧਤ੍ਤਲਾਭਤ੍ਤਾ. ਅਯਂ ਵਿਸੇਸੋਤਿ ਠਿਤਿਕ੍ਖਣੋ ਨਾਮ ਰੂਪਧਮ੍ਮਾਨਂਯੇਵ, ਨ ਅਰੂਪਧਮ੍ਮਾਨਨ੍ਤਿ ਅਯਂ ਈਦਿਸੋ ਵਿਸੇਸੋ. ਆਚਰਿਯਮਤਿ ਨਾਮ ਤਸ੍ਸੇਵ ਆਚਰਿਯਸ੍ਸ ਮਤਿ, ਸਾ ਸਬ੍ਬਦੁਬ੍ਬਲਾਤਿ ਆਹ ‘‘ਤਸ੍ਮਾ’’ਤਿਆਦਿ.

ਆਨਨ੍ਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭-੧੦. ਅਨੁਧਮ੍ਮਸੁਤ੍ਤਾਦਿਵਣ੍ਣਨਾ

੩੯-੪੨. ਅਪਾਯਦੁਕ੍ਖੇ ਸਕਲਸਂਸਾਰਦੁਕ੍ਖੇ ਚ ਪਤਿਤੁਂ ਅਦਤ੍ਵਾ ਧਾਰਣਟ੍ਠੇਨ ਧਮ੍ਮੋ, ਮਗ੍ਗਫਲਨਿਬ੍ਬਾਨਾਨਿ. ਤਦਨੁਲੋਮਿਕਾ ਚਸ੍ਸ ਪੁਬ੍ਬਭਾਗਪਟਿਪਦਾਤਿ ਆਹ ‘‘ਧਮ੍ਮਾਨੁਧਮ੍ਮਪਟਿਪਨ੍ਨਸ੍ਸਾ’’ਤਿਆਦਿ. ‘‘ਨਿਬ੍ਬਿਦਾਬਹੁਲੋ’’ਤਿ ਅਟ੍ਠਕਥਾਯਂ ਪਦੁਦ੍ਧਾਰੋ ਕਤੋ, ਪਾਲ਼ਿਯਂ ਪਨ ‘‘ਨਿਬ੍ਬਿਦਾਬਹੁਲਂ ਵਿਹਰੇਯ੍ਯਾ’’ਤਿ ਆਗਤਂ. ਉਕ੍ਕਣ੍ਠਨਬਹੁਲੋਤਿ ਸਬ੍ਬਭਵੇਸੁ ਉਕ੍ਕਣ੍ਠਨਬਹੁਲੋ. ਤੀਹਿ ਪਰਿਞ੍ਞਾਹੀਤਿ ਞਾਤਤੀਰਣਪ੍ਪਹਾਨਪਰਿਞ੍ਞਾਹਿ. ਪਰਿਜਾਨਾਤੀਤਿ ਤੇਭੂਮਕਧਮ੍ਮੇ ਪਰਿਚ੍ਛਿਜ੍ਜ ਜਾਨਾਤਿ, ਵਿਪਸ੍ਸਨਂ ਉਸ੍ਸੁਕ੍ਕਾਪੇਤਿ. ਪਰਿਮੁਚ੍ਚਤਿ ਸਬ੍ਬਸਂਕਿਲੇਸਤੋ ‘‘ਮਗ੍ਗੋ ਪਵਤ੍ਤਿਤੋ ਪਰਿਮੁਚ੍ਚਤੀ’’ਤਿ ਵੁਤ੍ਤਤ੍ਤਾ. ਤਥਾਤਿ ਇਮਿਨਾ ਇਤੋ ਪਰੇਸੁ ਤੀਸੁ ਮਗ੍ਗੋ ਹੋਤੀਤਿ ਦਸ੍ਸੇਤਿ. ਇਧਾਤਿ ਇਮਸ੍ਮਿਂ ਸੁਤ੍ਤੇ. ਅਨਿਯਮਿਤਾਤਿ ਅਗ੍ਗਹਿਤਾ. ਤੇਸੁ ਨਿਯਮਿਤਾ ‘‘ਅਨਿਚ੍ਚਾਨੁਪਸ੍ਸੀ’’ਤਿਆਦਿਵਚਨਤੋ. ਸਾਤਿ ਅਨੁਪਸ੍ਸਨਾ. ਤਤ੍ਥ ਨਿਯਮਿਤਵਸੇਨੇਵਾਤਿ ਇਦਂ ਲਕ੍ਖਣਵਚਨਂ ਯਥਾ ‘‘ਯਦਿ ਮੇ ਬ੍ਯਾਧਯੋ ਭਵੇਯ੍ਯੁਂ ¶ , ਦਾਤਬ੍ਬਮਿਦਮੋਸਧ’’ਨ੍ਤਿ. ਨ ਹਿ ਸਕ੍ਕਾ ਏਤਿਸ੍ਸਾ ਏਵ ਅਨੁਪਸ੍ਸਨਾਯ ਵਸੇਨ ਸਮ੍ਮਸਨਾਚਾਰਂ ਮਤ੍ਥਕਂ ਪਾਪੇਤੁਨ੍ਤਿ.

ਅਨੁਧਮ੍ਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਤੁਮ੍ਹਾਕਂਵਗ੍ਗਵਣ੍ਣਨਾ ਨਿਟ੍ਠਿਤਾ.

੫. ਅਤ੍ਤਦੀਪਵਗ੍ਗੋ

੧. ਅਤ੍ਤਦੀਪਸੁਤ੍ਤਵਣ੍ਣਨਾ

੪੩. ਦ੍ਵੀਹਿ ¶ ਭਾਗੇਹਿ ਆਪੋ ਏਤ੍ਥ ਗਤਾਤਿ ਦੀਪੋ, ਦੀਪੋ ਵਿਯਾਤਿ ਦੀਪੋ ਓਘੇਹਿ ਅਨਜ੍ਝੋਤ੍ਥਰਨੀਯਤਾਯ. ਯੋ ਪਰੋ ਨ ਹੋਤਿ, ਸੋ ਅਤ੍ਤਾ, ਇਧ ਪਨ ਧਮ੍ਮੋ ਅਧਿਪ੍ਪੇਤੋ. ਅਤ੍ਤਾ ਦੀਪੋ ਏਤੇਸਨ੍ਤਿ ਅਤ੍ਤਦੀਪਾ. ਪਟਿਸਰਣਤ੍ਥੋ ਦੀਪਟ੍ਠੋਤਿ ਆਹ – ‘‘ਅਤ੍ਤਸਰਣਾਤਿ ਇਦਂ ਤਸ੍ਸੇਵ ਵੇਵਚਨ’’ਨ੍ਤਿ. ਲੋਕਿਯਲੋਕੁਤ੍ਤਰੋ ਧਮ੍ਮੋ ਅਤ੍ਤਾ ਨਾਮ ਏਕਨ੍ਤਨਾਥਭਾਵਤੋ. ਪਠਮੇਨ ਪਦੇਨ ਵੁਤ੍ਤੋ ਏਵ ਅਤ੍ਥੋ ਦੁਤਿਯਪਦੇਨ ਵੁਚ੍ਚਤੀਤਿ ਵੁਤ੍ਤਂ ‘‘ਤੇਨੇਵਾਹਾ’’ਤਿਆਦਿ. ਯਵਤਿ ਏਤਸ੍ਮਾ ਫਲਂ ਪਸਵਤੀਤਿ ਯੋਨਿ, ਕਾਰਣਂ. ਕਿਂ ਪਭੁਤਿ ਉਪ੍ਪਤ੍ਤਿਟ੍ਠਾਨਂ ਏਤੇਸਨ੍ਤਿ ਕਿਂ ਪਭੁਤਿਕਾ. ਪਹਾਨਦਸ੍ਸਨਤ੍ਥਂ ਆਰਦ੍ਧਂ. ਤੇਨੇਵਾਹ ‘‘ਪੁਬ੍ਬੇ ਚੇਵ…ਪੇ… ਤੇ ਪਹੀਯਨ੍ਤੀ’’ਤਿ. ਨ ਪਰਿਤਸ੍ਸਤਿ ਤਣ੍ਹਾਪਰਿਤ੍ਤਾਸਸ੍ਸ ਅਭਾਵਤੋ. ਵਿਪਸ੍ਸਨਙ੍ਗੇਨਾਤਿ ਵਿਪਸ੍ਸਨਾਸਙ੍ਖਾਤੇਨ ਕਾਰਣੇਨ.

ਅਤ੍ਤਦੀਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਟਿਪਦਾਸੁਤ੍ਤਵਣ੍ਣਨਾ

੪੪. ਸਭਾਵਤੋਸਨ੍ਤੋ ਵਿਜ੍ਜਮਾਨੋ ਕਾਯੋ ਰੂਪਾਦਿਧਮ੍ਮਸਮੂਹੋਤਿ ਸਕ੍ਕਾਯੋਤਿ ਆਹ – ‘‘ਸਕ੍ਕਾਯੋ ਦੁਕ੍ਖ’’ਨ੍ਤਿ. ਦਿਟ੍ਠਿ ਏਵ ਸਮਨੁਪਸ੍ਸਨਾ, ਦਿਟ੍ਠਿਸਹਿਤਾ ਵਾ ਸਮਨੁਪਸ੍ਸਨਾ ਦਿਟ੍ਠਿਸਮਨੁਪਸ੍ਸਨਾ, ਦਿਟ੍ਠਿਮਞ੍ਞਨਾਯ ਸਦ੍ਧਿਂ ਇਤਰਮਞ੍ਞਨਾ. ਸਹ ਵਿਪਸ੍ਸਨਾਯ ਚਤੁਮਗ੍ਗਞਾਣਂ ਸਮਨੁਪਸ੍ਸਨਾ ‘‘ਚਤੁਨ੍ਨਂ ਅਰਿਯਸਚ੍ਚਾਨਂ ਸਮ੍ਮਦੇਵ ਅਨੁਰੂਪਤੋ ਪਸ੍ਸਨਾ’’ਤਿ ਕਤ੍ਵਾ.

ਪਟਿਪਦਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਨਿਚ੍ਚਸੁਤ੍ਤਵਣ੍ਣਨਾ

੪੫. ਵਿਰਾਗੋ ¶ ਨਾਮ ਮਗ੍ਗੋ, ਵਿਮੁਤ੍ਤਿਫਲਨ੍ਤਿ ਆਹ – ‘‘ਮਗ੍ਗਕ੍ਖਣੇ ਵਿਰਜ੍ਜਤਿ, ਫਲਕ੍ਖਣੇ ਵਿਮੁਚ੍ਚਤੀ’’ਤਿ. ਅਗ੍ਗਹੇਤ੍ਵਾਤਿ ਏਵਂ ਨਿਰੁਜ੍ਝਮਾਨੇਹਿ ਆਸਵੇਹਿ ‘‘ਅਹਂ ਮਮਾ’’ਤਿ ਕਞ੍ਚਿ ਧਮ੍ਮਂ ਅਨਾਦਿਯਿਤ੍ਵਾ. ‘‘ਚਿਤ੍ਤਂ ਵਿਰਤ੍ਤਂ, ਵਿਮੁਤ੍ਤਂ ਹੋਤੀ’’ਤਿ ਵੁਤ੍ਤਤ੍ਤਾ ¶ ਫਲਂ ਗਯ੍ਹਤਿ, ‘‘ਖੀਣਾ ਜਾਤੀ’’ਤਿਆਦਿਨਾ ਪਚ੍ਚਵੇਕ੍ਖਣਾਤਿ ਆਹ ‘‘ਸਹ ਫਲੇਨ ਪਚ੍ਚਵੇਕ੍ਖਣਦਸ੍ਸਨਤ੍ਥ’’ਨ੍ਤਿ. ਉਪਰਿ ਕਤ੍ਤਬ੍ਬਕਿਚ੍ਚਾਭਾਵੇਨ ਠਿਤਂ. ਤੇਨਾਹ ‘‘ਵਿਮੁਤ੍ਤਤ੍ਤਾ ਠਿਤ’’ਨ੍ਤਿ. ਯਂ ਪਤ੍ਤਬ੍ਬਂ, ਤਂ ਅਗ੍ਗਫਲਸ੍ਸ ਪਤ੍ਤਭਾਵੇਨ ਅਧਿਗਤਤ੍ਤਾ ਸਨ੍ਤੁਟ੍ਠਂ ਪਰਿਤੁਟ੍ਠਂ.

ਅਨਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੁਤਿਯਅਨਿਚ੍ਚਸੁਤ੍ਤਵਣ੍ਣਨਾ

੪੬. ਪੁਬ੍ਬਨ੍ਤਂ ਅਤੀਤਖਨ੍ਧਕੋਟ੍ਠਾਸਂ. ਅਨੁਗਤਾਤਿ ਸਸ੍ਸਤਾਦੀਨਿ ਕਪ੍ਪੇਤ੍ਵਾ ਗਹਣਵਸੇਨ ਅਨੁਗਤਾ. ਅਟ੍ਠਾਰਸ ਦਿਟ੍ਠਿਯੋਤਿ ਚਤਸ੍ਸੋ ਸਸ੍ਸਤਦਿਟ੍ਠਿਯੋ, ਚਤਸ੍ਸੋ ਏਕਚ੍ਚਸਸ੍ਸਤਦਿਟ੍ਠਿਯੋ, ਚਤਸ੍ਸੋ ਅਨ੍ਤਾਨਨ੍ਤਿਕਦਿਟ੍ਠਿਯੋ, ਚਤਸ੍ਸੋ ਅਮਰਾਵਿਕ੍ਖੇਪਦਿਟ੍ਠਿਯੋ, ਦ੍ਵੇ ਅਧਿਚ੍ਚਸਮੁਪ੍ਪਨ੍ਨਦਿਟ੍ਠਿਯੋਤਿ ਏਵਂ ਅਟ੍ਠਾਰਸ ਦਿਟ੍ਠਿਯੋ ਨ ਹੋਨ੍ਤਿ ਪਚ੍ਚਯਘਾਤੇਨ. ਅਪਰਨ੍ਤਨ੍ਤਿ ਅਨਾਗਤਂ ਖਨ੍ਧਕੋਟ੍ਠਾਸਂ ਸਸ੍ਸਤਾਦਿਭਾਵਂ ਕਪ੍ਪੇਤ੍ਵਾ ਗਹਣਵਸੇਨ ਅਨੁਗਤਾ. ਸੋਲ਼ਸ ਸਞ੍ਞੀਵਾਦਾ, ਅਟ੍ਠ ਅਸਞ੍ਞੀਵਾਦਾ, ਅਟ੍ਠ ਨੇਵਸਞ੍ਞੀਨਾਸਞ੍ਞੀਵਾਦਾ, ਸਤ੍ਤ ਉਚ੍ਛੇਦਵਾਦਾ, ਪਞ੍ਚ ਪਰਮਦਿਟ੍ਠਧਮ੍ਮਨਿਬ੍ਬਾਨਵਾਦਾਤਿ ਏਵਂ ਚਤੁਚਤ੍ਤਾਲੀਸ ਦਿਟ੍ਠਿਯੋ ਨ ਹੋਨ੍ਤਿ ਪਚ੍ਚਯਘਾਤੇਨ. ਸਸ੍ਸਤਦਿਟ੍ਠਿਥਾਮਸੋ ਚੇਵ ਸੀਲਬ੍ਬਤਦਿਟ੍ਠਿਪਰਾਮਾਸੋ ਚ ਨ ਹੋਤਿ ਪਚ੍ਚਯਘਾਤੇਨ. ਤੇਨਾਹ ‘‘ਏਤ੍ਤਾਵਤਾ ਪਠਮਮਗ੍ਗੋ ਦਸ੍ਸਿਤੋ’’ਤਿ ਅਨਵਸੇਸਦਿਟ੍ਠਿਪਹਾਨਕਿਤ੍ਤਨਤੋ. ਪਹੀਨਾ ਵਿਕ੍ਖਮ੍ਭਿਤਾ. ਇਦਂ ਪਨਾਤਿ ‘‘ਰੂਪਸ੍ਮਿ’’ਨ੍ਤਿਆਦਿ.

ਦੁਤਿਯਅਨਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਮਨੁਪਸ੍ਸਨਾਸੁਤ੍ਤਵਣ੍ਣਨਾ

੪੭. ਪਰਿਪੁਣ੍ਣਗਾਹਵਸੇਨਾਤਿ ਪਞ੍ਚਕ੍ਖਨ੍ਧੇ ਅਸੇਸੇਤ੍ਵਾ ਏਕਜ੍ਝਂ ‘‘ਅਤ੍ਤਾ’’ਤਿ ਗਹਣਵਸੇਨ. ਏਤੇਸਂ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਅਞ੍ਞਤਰਂ ‘‘ਅਤ੍ਤਾ’’ਤਿ ਸਮਨੁਪਸ੍ਸਨ੍ਤਿ. ਇਤੀਤਿ ਏਵਂ. ਯਸ੍ਸ ਪੁਗ੍ਗਲਸ੍ਸ ਅਯਂ ਅਤ੍ਤਦਿਟ੍ਠਿਸਙ੍ਖਾਤਾ ਸਮਨੁਪਸ੍ਸਨਾ ਅਤ੍ਥਿ ਪਟਿਪਕ੍ਖੇਨ ਅਵਿਹਤਤ੍ਤਾ ਸਂਵਿਜ੍ਜਤਿ. ਪਞ੍ਚਨ੍ਨਂ ਇਨ੍ਦ੍ਰਿਯਾਨਨ੍ਤਿ ਚਕ੍ਖਾਦੀਨਂ ਇਨ੍ਦ੍ਰਿਯਾਨਂ.

ਆਰਮ੍ਮਣਨ੍ਤਿ ¶ ਕਮ੍ਮਵਿਞ੍ਞਾਣਸ੍ਸ ਆਰਮ੍ਮਣਂ. ਮਾਨਵਸੇਨ ਚ ਦਿਟ੍ਠਿਵਸੇਨ ਚ ‘‘ਅਸ੍ਮੀ’’ਤਿ ਗਾਹੇ ਸਿਜ੍ਝਨ੍ਤੇ ਤਂਸਹਗਤਾ ਤਣ੍ਹਾਪਿ ਤਗ੍ਗਹਿਤਾਵ ਹੋਤੀਤਿ ¶ ਵੁਤ੍ਤਂ ‘‘ਤਣ੍ਹਾਮਾਨਦਿਟ੍ਠਿਵਸੇਨ ਅਸ੍ਮੀਤਿ ਏਵਮ੍ਪਿਸ੍ਸ ਹੋਤੀ’’ਤਿ. ਗਹੇਤ੍ਵਾਤਿ ਅਹਂਕਾਰਵਤ੍ਥੁਵਸੇਨ ਗਹੇਤ੍ਵਾ. ਅਯਂ ਅਹਮਸ੍ਮੀਤਿ ਅਯਂ ਚਕ੍ਖਾਦਿਕੋ, ਸੁਖਾਦਿਕੋ ਵਾ ਅਹਮਸ੍ਮਿ. ‘‘ਰੂਪੀ ਅਤ੍ਤਾ ਅਰੋਗੋ ਪਰਂ ਮਰਣਾ’’ਤਿ ਏਵਮਾਦਿਗਹਣਵਸੇਨ ਪਵਤ੍ਤਨਤੋ ਵੁਤ੍ਤਂ ‘‘ਰੂਪੀ ਭਵਿਸ੍ਸਨ੍ਤਿਆਦੀਨਿ ਸਬ੍ਬਾਨਿ ਸਸ੍ਸਤਮੇਵ ਭਜਨ੍ਤੀ’’ਤਿ. ਵਿਪਸ੍ਸਨਾਭਿਨਿਵੇਸਤੋ ਪੁਬ੍ਬੇ ਯਥੇਵਾਕਾਰਾਨਿ ਪਞ੍ਚਿਨ੍ਦ੍ਰਿਯਾਨਿ, ਅਥ ਵਿਪਸ੍ਸਨਾਭਿਨਿਵੇਸਤੋ ਪਰਂ ਤੇਨੇਵਾਕਾਰੇਨ ਠਿਤੇਸੁ ਚਕ੍ਖਾਦੀਸੁ ਇਨ੍ਦ੍ਰਿਯੇਸੁ ਅਵਿਜ੍ਜਾ ਪਹੀਯਤਿ ਵਿਪਸ੍ਸਨਂ ਵਡ੍ਢਏਤ੍ਵਾ ਮਗ੍ਗਸ੍ਸ ਉਪ੍ਪਾਦਨੇਨ, ਅਥ ਮਗ੍ਗਪਰਮ੍ਪਰਾਯ ਅਰਹਤ੍ਤਮਗ੍ਗਵਿਜ੍ਜਾ ਉਪ੍ਪਜ੍ਜਤਿ. ਤਣ੍ਹਾਮਾਨਦਿਟ੍ਠਿਯੋ ਕਮ੍ਮਸਮ੍ਭਾਰਭਾਵਤੋ. ਕਮ੍ਮਸ੍ਸ…ਪੇ… ਏਕੋ ਸਨ੍ਧੀਤਿ ਹੇਤੁਫਲਸਨ੍ਧਿ. ਪੁਨ ਏਕੋ ਸਨ੍ਧੀਤਿ ਫਲਹੇਤੁਸਨ੍ਧਿਮਾਹ. ਤਯੋ ਪਪਞ੍ਚਾ ਅਤੀਤੋ ਅਦ੍ਧਾ ਅਤੀਤਭਵਅਦ੍ਧਾਨਂ ਤੇਸਂ ਅਧਿਪ੍ਪੇਤਤ੍ਤਾ. ਅਨਾਗਤਸ੍ਸ ਪਚ੍ਚਯੋ ਦਸ੍ਸਿਤੋ ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ ਵਸੇਨ. ਸੁਤਵਤੋ ਪਨ ਅਰਿਯਸਾਵਕਸ੍ਸ ਵਸੇਨ ਵਟ੍ਟਸ੍ਸ ਵੂਪਸਮੋ ਦਸ੍ਸਿਤੋਤਿ.

ਸਮਨੁਪਸ੍ਸਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਖਨ੍ਧਸੁਤ੍ਤਵਣ੍ਣਨਾ

੪੮. ਤਥੇਵਾਤਿ ਆਰਮ੍ਮਣਭਾਵੇਨੇਵ. ਆਰਮ੍ਮਣਕਰਣਵਸੇਨ ਉਪਾਦਾਨੇਹਿ ਉਪਾਦਾਤਬ੍ਬਨ੍ਤਿ ਉਪਾਦਾਨਿਯਂ. ਇਧਾਪੀਤਿ ਉਪਾਦਾਨਕ੍ਖਨ੍ਧੇਸੁਪਿ. ਵਿਭਾਗਤ੍ਥੇ ਗਯ੍ਹਮਾਨੇ ਅਨਿਟ੍ਠਪ੍ਪਸਙ੍ਗੋਪਿ ਸਿਯਾ, ਅਭਿਧਮ੍ਮੇ ਚ ਰਾਸਟ੍ਠੋ ਏਵ ਆਗਤੋ, ‘‘ਤਦੇਕਜ੍ਝਂ ਅਭਿਸਂਯੁਹਿਤ੍ਵਾ’’ਤਿ ਵਚਨਤੋ ‘‘ਰਾਸਟ੍ਠੇਨ’’ਇਚ੍ਚੇਵ ਵੁਤ੍ਤਂ.

ਖਨ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭-੮. ਸੋਣਸੁਤ੍ਤਾਦਿਵਣ੍ਣਨਾ

੪੯-੫੦. ਵਿਸਿਟ੍ਠੋਤਿ ਪਧਾਨੋ. ਉਤ੍ਤਮੋਤਿ ਉਕ੍ਕਟ੍ਠੋ. ਅਞ੍ਞਂ ਕਿਂ ਭਵੇਯ੍ਯਾਤਿ ਅਞ੍ਞਂ ਕਿਂ ਕਾਰਣਂ ਭਵੇਯ੍ਯ ਤਥਾ ਸਮਨੁਪਸ੍ਸਨਾਯ ਅਞ੍ਞੇਸਂ ਅਵਿਜ੍ਜਮਾਨਤਾਯ ਵਚਨਪਰਿਟ੍ਠਿਤਿਪਭਿਨ੍ਨਤੋ. ਵਜਿਰਭੇਦਦੇਸਨਂ ਨਾਮ ਅਤ੍ਥਤੋ ਤੇਪਰਿਵਟ੍ਟਦੇਸਨਾ.

ਸੋਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯-੧੦. ਨਨ੍ਦਿਕ੍ਖਯਸੁਤ੍ਤਾਦਿਵਣ੍ਣਨਾ

੫੧-੫੨. ਨਵਮਦਸਮੇਸੂਤਿ ¶ ¶ ਸੁਤ੍ਤਦ੍ਵਯਂ ਸਹੇਵ ਉਦ੍ਧਟਂ, ਦ੍ਵੀਸੁਪਿ ਅਤ੍ਥਵਣ੍ਣਨਾਯ ਸਰਿਕ੍ਖਭਾਵਤੋ. ਨਨ੍ਦਨਟ੍ਠੇਨ ਨਨ੍ਦੀ, ਰਞ੍ਜਨਟ੍ਠੇਨ ਰਾਗੋ. ਸਤਿਪਿ ਸਦ੍ਦਤ੍ਥਤੋ ਭੇਦੇ ‘‘ਇਮੇਸਂ ਅਤ੍ਥਤੋ ਨਿਨ੍ਨਾਨਾਕਰਣਤਾਯਾ’’ਤਿ ਵਤ੍ਵਾਪਿ ਪਹਾਯਕਧਮ੍ਮਭੇਦੇਨ ਪਨ ਲਬ੍ਭਤੇਵ ਭੇਦਮਤ੍ਤਾਤਿ ਦਸ੍ਸੇਤੁਂ ‘‘ਨਿਬ੍ਬਿਦਾਨੁਪਸ੍ਸਨਾਯ ਵਾ’’ਤਿਆਦਿ ਵੁਤ੍ਤਂ. ਵਿਰਜ੍ਜਨ੍ਤੋ ਰਾਗਂ ਪਜਹਤੀਤਿ ਸਮ੍ਬਨ੍ਧੋ. ਏਤ੍ਤਾਵਤਾਤਿ ‘‘ਨਨ੍ਦਿਕ੍ਖਯਾ ਰਾਗਕ੍ਖਯੋ’’ਤਿ ਏਤ੍ਤਾਵਤਾ. ਵਿਪਸ੍ਸਨਂ ਨਿਟ੍ਠਪੇਤ੍ਵਾ ਵਿਪਸ੍ਸਨਾਕਿਚ੍ਚਸ੍ਸ ਪਰਿਯੋਸਾਨੇਨ. ਰਾਗਕ੍ਖਯਾਤਿ ਵੁਟ੍ਠਾਨਗਾਮਿਨਿਪਰਿਯੋਸਾਨਾਯ ਵਿਪਸ੍ਸਨਾਯ ਰਾਗਸ੍ਸ ਖੇਪਿਤਤ੍ਤਾ. ਅਨਨ੍ਤਰਂ ਉਪ੍ਪਨ੍ਨੇਨ ਅਰਿਯਮਗ੍ਗੇਨ ਸਮੁਚ੍ਛੇਦਵਸੇਨ ਨਨ੍ਦਿਕ੍ਖਯੋਤਿ. ਤੇਨਾਹ ‘‘ਇਧ ਮਗ੍ਗਂ ਦਸ੍ਸੇਤ੍ਵਾ’’ਤਿ. ਅਨਨ੍ਤਰਂ ਪਨ ਉਪ੍ਪਨ੍ਨੇਨ ਅਰਿਯਫਲੇਨ ਪਟਿਪਸ੍ਸਦ੍ਧਿਵਸੇਨ ਨਨ੍ਦਿਰਾਗਕ੍ਖਯਾ ਸਬ੍ਬਂ ਸਂਕਿਲੇਸਤੋ ਚਿਤ੍ਤਂ ਵਿਮੁਚ੍ਚਤੀਤਿ. ਤੇਨਾਹ ‘‘ਫਲਂ ਦਸ੍ਸਿਤ’’ਨ੍ਤਿ.

ਨਨ੍ਦਿਕ੍ਖਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਤ੍ਤਦੀਪਵਗ੍ਗਵਣ੍ਣਨਾ ਨਿਟ੍ਠਿਤਾ.

ਮੂਲਪਣ੍ਣਾਸਕੋ ਸਮਤ੍ਤੋ.

੬. ਉਪਯਵਗ੍ਗੋ

੧. ਉਪਯਸੁਤ੍ਤਵਣ੍ਣਨਾ

੫੩. ਉਪੇਤੀਤਿ ਉਪਯੋ. ਕਥਮੁਪੇਤਿ? ਤਣ੍ਹਾਮਾਨਾਦਿਵਸੇਨਾਤਿ ਆਹ ‘‘ਤਣ੍ਹਾਮਾਨਦਿਟ੍ਠਿਵਸੇਨਾ’’ਤਿ. ਕਥਮਿਦਂ ਲਬ੍ਭਤੀਤਿ? ‘‘ਅਵਿਮੁਤ੍ਤੋ’’ਤਿ ਵਚਨਤੋ. ਤਣ੍ਹਾਦਿਟ੍ਠਿਵਸੇਨ ਹਿ ਬਦ੍ਧੋ, ਕਿਂ ਉਪੇਤੀਤਿ ਆਹ ‘‘ਪਞ੍ਚਕ੍ਖਨ੍ਧੇ’’ਤਿ ਤਬ੍ਬਿਨਿਮੁਤ੍ਤਸ੍ਸ ਤਥਾ ਉਪੇਤਸ੍ਸ ਅਭਾਵਤੋ. ਕੋ ਪਨੁਪੇਤੀਤਿ? ਤਂਸਮਙ੍ਗੀਪੁਗ੍ਗਲੋ. ਤਣ੍ਹਾਦਿਟ੍ਠਿਵਸੇਨ ਉਪਗਮਸ੍ਸ ਵੁਤ੍ਤਤ੍ਤਾ ਵਿਞ੍ਞਾਣਨ੍ਤਿ ਅਕੁਸਲਕਮ੍ਮਵਿਞ੍ਞਾਣਮੇਵਾਤਿ ਵਦਨ੍ਤਿ. ਜਵਾਪੇਤ੍ਵਾਤਿ ਗਹਿਤਜਵਂ ਕਤ੍ਵਾ. ਯਥਾ ਪਟਿਸਨ੍ਧਿਂ ਆਕਡ੍ਢਿਤੁਂ ਸਮਤ੍ਥਂ, ਏਵਂ ਕਤ੍ਵਾ. ਤੇਨਾਹ ‘‘ਪਟਿਸਨ੍ਧੀ’’ਤਿਆਦਿ. ਅਗ੍ਗਹਣੇ ਕਾਰਣਂ ਵੁਤ੍ਤਮੇਵ ‘‘ਓਕਂ ਪਹਾਯ ਅਨਿਕੇਤਸਾਰੀ’’ਤਿ ਗਾਥਾਯ ਵਿਸ੍ਸਜ੍ਜਨੇ. ਕਮ੍ਮਨਿਮਿਤ੍ਤਾਦਿਵਸੇਨ ਪਟਿਸਨ੍ਧਿਯਾ ਪਚ੍ਚਯਭੂਤਂ ¶ ਆਰਮ੍ਮਣਂ ਪਟਿਸਨ੍ਧਿਜਨਕਸ੍ਸ ਕਮ੍ਮਸ੍ਸ ਵਸੇਨ ਵੋਚ੍ਛਿਜ੍ਜਤਿ. ਪਤਿਟ੍ਠਾ ਨ ਹੋਤਿ ਸਰਾਗਕਾਲੇ ਵਿਯ ਅਨੁਪਟ੍ਠਾਨਤੋ ¶ . ਅਪ੍ਪਤਿਟ੍ਠਿਤਂ ਵਿਞ੍ਞਾਣਂ ਵੁਤ੍ਤਪ੍ਪਕਾਰੇਨ. ਅਨਭਿਸਙ੍ਖਰਿਤ੍ਵਾਤਿ ਅਨੁਪ੍ਪਾਦੇਤ੍ਵਾ ਪਚ੍ਚਯਘਾਤੇਨ.

ਉਪਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਬੀਜਸੁਤ੍ਤਵਣ੍ਣਨਾ

੫੪. ਬੀਜਜਾਤਾਨੀਤਿ ਜਾਤ-ਸਦ੍ਦੋ ਪਦਪੂਰਣਮਤ੍ਤਨ੍ਤਿ ਆਹ ‘‘ਬੀਜਾਨੀ’’ਤਿ. ਵਚਨ੍ਤਿ ਸੇਤਵਚਂ. ਅਜ੍ਜੁਕਨ੍ਤਿ ਤਚ੍ਛਕਂ. ਫਣਿਜ੍ਜਕਂ ਤੁਲਸਿ. ਅਭਿਨ੍ਨਾਨੀਤਿ ਏਕਦੇਸੇਨਪਿ ਅਖਣ੍ਡਿਤਾਨਿ. ਬੀਜਤ੍ਥਾਯਾਤਿ ਬੀਜਕਿਚ੍ਚਾਯ. ਨ ਉਪਕਪ੍ਪਤੀਤਿ ਪਚ੍ਚਯੋ ਨ ਹੋਤੀਤਿ ਦਸ੍ਸੇਤਿ. ਨ ਪਾਪਿਤਾਨੀਤਿ ਪੂਤਿਤਂ ਨ ਉਪਗਤਾਨਿ. ਤਣ੍ਡੁਲਸਾਰਸ੍ਸ ਆਦਾਨਤੋ ਸਾਰਾਦਾਨਿ. ਆਰਮ੍ਮਣਗ੍ਗਹਣਵਸੇਨ ਵਿਞ੍ਞਾਣਂ ਤਿਟ੍ਠਤਿ ਏਤ੍ਥਾਤਿ ਵਿਞ੍ਞਾਣਟ੍ਠਿਤਿਯੋ. ਆਰਮ੍ਮਣਵਸੇਨਾਤਿ ਆਰਮ੍ਮਣਭਾਵਵਸੇਨ. ਸਿਨੇਹਨਟ੍ਠੇਨਾਤਿ ਤਣ੍ਹਾਯਨਵਸੇਨ ਸਿਨਿਦ੍ਧਤਾਪਾਦਨੇਨ, ਯਤੋ ‘‘ਨਨ੍ਦੂਪਸੇਚਨ’’ਨ੍ਤਿ ਵੁਤ੍ਤਂ. ਤਥਾ ਹਿ ਵਿਰੋਪਿਤਂ ਤਂ ਕਮ੍ਮਵਿਞ੍ਞਾਣਂ ਪਟਿਸਨ੍ਧਿਅਙ੍ਕੁਰੁਪ੍ਪਾਦਨਸਮਤ੍ਥਂ ਹੋਤਿ. ਸਪ੍ਪਚ੍ਚਯਨ੍ਤਿ ਅਵਿਜ੍ਜਾਅਯੋਨਿਸੋਨਮਨਸਿਕਾਰਾਦਿਪਚ੍ਚਯੇਹਿ ਸਪ੍ਪਚ੍ਚਯਂ. ਵਿਰੁਹਤਿ ਵਿਪਾਕਸਨ੍ਤਾਨੁਪ੍ਪਾਦਨਸਮਤ੍ਥੋ ਹੁਤ੍ਵਾ.

ਬੀਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਉਦਾਨਸੁਤ੍ਤਵਣ੍ਣਨਾ

੫੫. ਉਦਾਨਂ ਉਦਾਹਰੀਤਿ ਅਤ੍ਤਮਨਵਾਚਂ ਨਿਚ੍ਛਾਰੇਸਿ. ਏਸ ਵੁਤ੍ਤਪ੍ਪਕਾਰੋ ਉਦਾਹਾਰੋ. ਭੁਸੋ ਨਿਸ੍ਸਯੋ ਉਪਨਿਸ੍ਸਯੋ, ਦਾਨਮੇਵ ਉਪਨਿਸ੍ਸਯੋ ਦਾਨੂਪਨਿਸ੍ਸਯੋ. ਏਸ ਨਯੋ ਸੇਸੇਸੁਪਿ. ਤਤ੍ਥ ਦਾਨੂਪਨਿਸ੍ਸਯੋ ਅਨ੍ਨਾਦਿਵਤ੍ਥੂਸੁ ਬਲਵਾਤਿ ਬਲਵਭਾਵੇਨ ਹੋਤਿ, ਤਸ੍ਮਾ ਉਪਨਿਸ੍ਸਯਬਹੁਲੋ ਕਾਮਰਾਗਪ੍ਪਹਾਨੇਨੇਵ ਕਤਪਰਿਚਯਤ੍ਤਾ ਵਿਪਸ੍ਸਨਮਨੁਯੁਞ੍ਜਨ੍ਤੋ ਨ ਚਿਰਸ੍ਸੇਵ ਅਨਾਗਾਮਿਫਲਂ ਪਾਪੁਣਾਤਿ, ਤਥਾ ਸੁਵਿਸੁਦ੍ਧਸੀਲੂਪਨਿਸ੍ਸਯੋ ਕਾਮਦੋਸਜਿਗੁਚ੍ਛਨੇਨ. ਯਦਿ ਏਵਂ ਕਸ੍ਮਾ ਇਮੇ ਦ੍ਵੇ ਉਪਨਿਸ੍ਸਯਾ ਦੁਬ੍ਬਲਾਤਿ ਵੁਤ੍ਤਾ ¶ ? ਵਿਜ੍ਜੂਪਮਞ੍ਞਾਣਸ੍ਸੇਵ ਪਚ੍ਚਯਭਾਵਤੋ. ਸੋਪਿ ਭਾਵਨੂਪਨਿਸ੍ਸਯਸਹਾਯਲਾਭੇਨੇਵ, ਨ ਕੇਵਲਂ. ਭਾਵਨਾ ਪਨ ਪਟਿਵੇਧਸ੍ਸ ਵਿਸੇਸਹੇਤੁਭਾਵਤੋ ਬਲਵਾ ਉਪਨਿਸ੍ਸਯੋ. ਤਥਾ ਹਿ ਸਾ ਵਜਿਰੂਪਮਞਾਣਸ੍ਸ ਵਿਸੇਸਪਚ੍ਚਯੋ. ਤੇਨਾਹ ‘‘ਭਾਵਨੂਪਨਿਸ੍ਸਯੋ ਅਰਹਤ੍ਤਂ ਪਾਪੇਤੀ’’ਤਿ.

ਸੋਤਿ ਮਿਲਕਤ੍ਥੇਰੋ. ਵਿਹਾਰਨ੍ਤਿ ਵਸਨਟ੍ਠਾਨਂ. ਵਿਹਾਰਪਚ੍ਚਨ੍ਤੇ ਹਿ ਪਣ੍ਣਸਾਲਾਯ ਥੇਰੋ ਵਿਹਰਤਿ. ਉਪਟ੍ਠਾਤਿ ਏਕਲਕ੍ਖਣੇਨ. ਕੂਟਗੋਣੋ ਵਿਯ ਗਮਨਵੀਥਿਂ. ਤਤ੍ਥਾਤਿ ਅਲ੍ਲਕਟ੍ਠਰਾਸਿਮ੍ਹਿ. ਉਦਕਮਣਿਕਾਨਨ੍ਤਿ ਉਦਕਥੇਵਾਨਂ.

ਅਤ੍ਤਨਿਯੇਵ ¶ ਉਪਨੇਸਿ ਉਦਾਨਕਥਾਯ ਵੁਤ੍ਤਧਮ੍ਮਾਨਂ ਪਰਿਪੁਣ੍ਣਾਨਂ ਅਤ੍ਤਨਿ ਸਂਵਿਜ੍ਜਮਾਨਤ੍ਤਾ. ਤੇਨਾਹ ‘‘ਉਟ੍ਠਾਨਵਤਾ’’ਤਿਆਦਿ. ਅਯਞ੍ਹਿ ਮਿਲਕਤ੍ਥੇਰੋ ਸਿਕ੍ਖਾਯ ਗਾਰਵੋ ਸਪ੍ਪਤਿਸ੍ਸੋ ਵਤ੍ਤਪਟਿਵਤ੍ਤਂ ਪੂਰੇਨ੍ਤੋ ਵਿਸੁਦ੍ਧਸੀਲੋ ਹੁਤ੍ਵਾ ਠਿਤੋ, ਤਸ੍ਮਾ ‘‘ਦੁਬ੍ਬਲੂਪਨਿਸ੍ਸਯੇ’’ਤਿ ਵੁਤ੍ਤਂ. ਤੇਨਾਹ ਭਗਵਾ ਉਦਾਨੇਨ੍ਤੋ ‘‘ਨੋ ਚਸ੍ਸਂ…ਪੇ… ਸਞ੍ਞੋਜਨਾਨੀ’’ਤਿ.

ਸਚੇ ਅਹਂ ਨ ਭਵੇਯ੍ਯਨ੍ਤਿ ਯਦਿ ਅਹਂ ਨਾਮ ਕੋਚਿ ਨ ਭਵੇਯ੍ਯਂ ਤਾਦਿਸਸ੍ਸ ਅਹਂਸਦ੍ਦਵਚਨੀਯਸ੍ਸ ਕਸ੍ਸਚਿ ਅਤ੍ਥਸ੍ਸ ਅਭਾਵਤੋ. ਤਤੋ ਏਵ ਮਮ ਪਰਿਕ੍ਖਾਰੋਪਿ ਨ ਭਵੇਯ੍ਯਤਸ੍ਸ ਚ ਪਭਙ੍ਗੁਭਾਵੇਨ ਅਨਵਟ੍ਠਿਤਭਾਵਤੋ. ਏਵਂ ਅਤ੍ਤੁਦ੍ਦੇਸਿਕਭਾਵੇਨ ਪਦਦ੍ਵਯਸ੍ਸ ਅਤ੍ਥਂ ਵਤ੍ਵਾ ਇਦਾਨਿ ਕਮ੍ਮਫਲਵਸੇਨ ਵਤ੍ਤੁਂ ‘‘ਸਚੇ ਵਾ ਪਨਾ’’ਤਿਆਦਿ ਵੁਤ੍ਤਂ. ਅਤੀਤਪਚ੍ਚੁਪ੍ਪਨ੍ਨਵਸੇਨ ਸੁਞ੍ਞਤਂ ਦਸ੍ਸੇਤ੍ਵਾ ਇਦਾਨਿ ਪਚ੍ਚੁਪ੍ਪਨ੍ਨਾਨਾਗਤਵਸੇਨ ਤਂ ਦਸ੍ਸੇਨ੍ਤੋ ‘‘ਇਦਾਨਿ ਪਨਾ’’ਤਿਆਦਿ ਵੁਤ੍ਤਂ. ਏਵਂ ਅਧਿਮੁਚ੍ਚਨ੍ਤੋਤਿ ਏਦਿਸਂ ਅਧਿਮੁਤ੍ਤਿਂ ਪਵਤ੍ਤੇਨ੍ਤੋ. ਵਿਭਵਿਸ੍ਸਤੀਤਿ ਵਿਨਸ੍ਸਿਸ੍ਸਤਿ. ਵਿਭਵੋ ਹਿ ਵਿਨਾਸੋ. ਤੇਨਾਹ ‘‘ਭਿਜ੍ਜਿਸ੍ਸਤੀ’’ਤਿ. ਵਿਭਵਦਸ੍ਸਨਂ ਵਿਭਵੋਤਿ ਉਤ੍ਤਰਪਦਲੋਪੇਨ ਵੁਤ੍ਤਨ੍ਤਿ ਆਹ ‘‘ਵਿਭਵਦਸ੍ਸਨੇਨਾ’’ਤਿ. ਵਿਭਵਦਸ੍ਸਨਂ ਨਾਮ ਅਚ੍ਚਨ੍ਤਾਯ ਵਿਨਾਸਸ੍ਸ ਦਸ੍ਸਨਂ. ਤਨ੍ਤਿ ਅਰਿਯਮਗ੍ਗਂ. ਸਾਮਞ੍ਞਜੋਤਨਾ ਹੇਸਾ ਵਿਸੇਸਨਿਟ੍ਠਾ ਹੋਤੀਤਿ ਤਤਿਯਮਗ੍ਗਵਸੇਨ ਅਤ੍ਥੋ ਵੇਦਿਤਬ੍ਬੋ.

ਉਪਰਿ ਮਗ੍ਗਫਲਨ੍ਤਿ ਅਗ੍ਗਮਗ੍ਗਫਲਂ. ਨਤ੍ਥਿ ਏਤਿਸ੍ਸਾ ਜਾਤਿਯਾ ਅਨ੍ਤਰਨ੍ਤਿ ਅਨਨ੍ਤਰਾ, ਅਨਨ੍ਤਰਾ ਵਿਪਸ੍ਸਨਾ ਮਗ੍ਗਸ੍ਸ. ਗੋਤ੍ਰਭੂ ਪਨ ਅਨੁਲੋਮਵੀਥਿਪਰਿਯਾਪਨ੍ਨਤ੍ਤਾ ਵਿਪਸ੍ਸਨਾਗਤਿਕਂ ਵਾ ਸਿਯਾ, ਨਿਬ੍ਬਾਨਾਰਮ੍ਮਣਤ੍ਤਾ ਮਗ੍ਗਗਤਿਕਂ ਵਾਤਿ ਨ ਤੇਨ ਮਗ੍ਗੋ ਅਨ੍ਤਰਿਕੋ ਨਾਮ ਹੋਤਿ. ਤੇਨਾਹ ‘‘ਵਿਪਸ੍ਸਨਾ ਮਗ੍ਗਸ੍ਸ ਆਸਨ੍ਨਾਨਨ੍ਤਰਂ ਨਾਮਾ’’ਤਿ ¶ . ਫਲਂ ਪਨ ਨਿਬ੍ਬਾਨਾਰਮ੍ਮਣਤ੍ਤਾ ਕਿਲੇਸਾਨਂ ਪਜਹਨਵਸੇਨ ਪਵਤ੍ਤਨਤੋ ਲੋਕੁਤ੍ਤਰਭਾਵਤੋ ਚ ਕਮ੍ਮਮਗ੍ਗਗਤਿਕਮੇਵ, ਕੁਸਲਵਿਪਾਕਭਾਵੇਨ ਪਨ ਨੇਸਂ ਅਤ੍ਥੋ ਪਭੇਦੋਤਿ ਵਿਪਸ੍ਸਨਾਯ ਫਲਸ੍ਸ ਸਿਯਾ ਅਨਨ੍ਤਰਤਾਤਿ ਵੁਤ੍ਤਂ ‘‘ਫਲਸ੍ਸ ਦੂਰਾਨਨ੍ਤਰਂ ਨਾਮਾ’’ਤਿ. ‘‘ਆਸਵਾਨਂ ਖਯੋ’’ਤਿ ਪਨ ਅਗ੍ਗਮਗ੍ਗੇ ਵੁਚ੍ਚਮਾਨੇ ਵਿਪਸ੍ਸਨਾਨਂ ਆਸਨ੍ਨਤਾਯ ਵਤ੍ਤਬ੍ਬਮੇਵ ਨਤ੍ਥਿ. ਅਤਸਿਤਾਯੇਤਿ ਨ ਤਸਿਤਬ੍ਬੇ ਤਾਸਂ ਅਨਾਪਜ੍ਜਿਤਬ੍ਬੇ. ਤਾਸੋਤਿ ਤਾਸਹੇਤੁ ‘‘ਤਸਤਿ ਏਤਸ੍ਮਾ’’ਤਿ ਕਤ੍ਵਾ. ਸੋਤਿ ਅਸ੍ਸੁਤਵਾ ਪੁਥੁਜ੍ਜਨੋ. ਤਿਲਕ੍ਖਣਾਹਤਨ੍ਤਿ ਅਨਿਚ੍ਚਤਾਦਿਲਕ੍ਖਣਤ੍ਤਯਲਕ੍ਖਿਤਂ. ਮਨਮ੍ਹਿ ਨਟ੍ਠੋਤਿ ਈਸਕਂ ਨਟ੍ਠੋਮ੍ਹਿ, ਤਤੋ ਪਰਮ੍ਪਿ ਤਤ੍ਥੇਵ ਠਤ੍ਵਾ ਕਿਞ੍ਚਿ ਅਪੂਰਿਤਤ੍ਤਾ ਏਵ ਮੁਤ੍ਤੋਤਿ ਅਧਿਪ੍ਪਾਯੋ. ‘‘ਨ ਤਾਸੋ ਨਾਮ ਹੋਤੀ’’ਤਿ ਵਤ੍ਵਾ ਤਸ੍ਸ ਅਤਾਸਭਾਵਂ ਦਸ੍ਸੇਤੁਂ ‘‘ਨ ਹੀ’’ਤਿਆਦਿ ਵੁਤ੍ਤਂ. ਕਲ੍ਯਾਣਪੁਥੁਜ੍ਜਨੋ ਹਿ ਭਯਤੁਪਟ੍ਠਾਨਞਾਣੇਨ ‘‘ਸਭਯਾ ਸਙ੍ਖਾਰਾ’’ਤਿ ਵਿਪਸ੍ਸਨ੍ਤੋ ਨ ਉਤ੍ਤਸਤਿ.

ਉਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਉਪਾਦਾਨਪਰਿਪਵਤ੍ਤਸੁਤ੍ਤਵਣ੍ਣਨਾ

੫੬. ਚਤੁਨ੍ਨਂ ¶ ਪਰਿਵਟ੍ਟਨਵਸੇਨਾਤਿ ਪਚ੍ਚੇਕਕ੍ਖਨ੍ਧੇਸੁ ਚਤੁਨ੍ਨਂ ਅਰਿਯਸਚ੍ਚਾਨਂ ਪਰਿਵਟ੍ਟਨਵਸੇਨ. ਰੂਪਂ ਅਬ੍ਭਞ੍ਞਾਸਿਨ੍ਤਿ ਸਕਲਭੂਤੁਪਾਦਾਰੂਪਂ ਕੁਚ੍ਛਿਤਭਾਵਤੋ ਤਤ੍ਥ ਚ ਤੁਚ੍ਛਵਿਪਲ੍ਲਾਸਤਾਯ ‘‘ਦੁਕ੍ਖਸਚ੍ਚ’’ਨ੍ਤਿ ਅਭਿਵਿਸਿਟ੍ਠੇਨ ਞਾਣੇਨ ਅਞ੍ਞਾਸਿਂ ਪਟਿਵਿਜ੍ਝਿਂ. ਆਹਾਰਵਸੇਨ ਰੂਪਕਾਯਸ੍ਸ ਹਾਨਿਵੁਦ੍ਧਾਦੀਨਂ ਪਾਕਟਭਾਵਤੋ ਵਿਸੇਸਪਚ੍ਚਯਤੋ ਚ ਤਸ੍ਸ ‘‘ਆਹਾਰਸਮੁਦਯਾ’’ਤਿ ਵੁਤ੍ਤਂ. ਦੁਕ੍ਖਸਮੁਦਯਕਥਾ ਨਾਮ ਵਟ੍ਟਕਥਾਤਿ ‘‘ਸਚ੍ਛਨ੍ਦਰਾਗੋ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਛਨ੍ਦਰਾਗਗ੍ਗਹਣੇਨ ਚ ਉਪਾਦਾਨਕਮ੍ਮਾਵਿਜ੍ਜਾਪਿ ਗਹਿਤਾ ਏਵ. ਪਟਿਪਨ੍ਨਾ ਹੋਨ੍ਤੀਤਿ ਅਤ੍ਥੋ. ਵਤ੍ਤਮਾਨਕਾਲਪ੍ਪਯੋਗੋ ਹੇਸ ਯਥਾ ‘‘ਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤੀ’’ਤਿ. ਪਤਿਟ੍ਠਹਨ੍ਤੀਤਿ ਪਤਿਟ੍ਠਂ ਲਭਨ੍ਤਿ. ਕੇਵਲਿਨੋਤਿ ਇਧ ਵਿਮੁਤ੍ਤਿਗੁਣੇਨ ਪਾਰਿਪੂਰੀਤਿ ਆਹ ‘‘ਸਕਲਿਨੋ ਕਤਸਬ੍ਬਕਿਚ੍ਚਾ’’ਤਿ. ਯੇਨ ਤੇਤਿ ਯੇਨ ਅਵਸਿਟ੍ਠੇਨ ਤੇ ਅਸੇਕ੍ਖੇ ਪਞ੍ਞਾਪੇਨ੍ਤਾ ਪਞ੍ਞਾਪੇਯ੍ਯੁਂ, ਤਂ ਨੇਸਂ ਵਟ੍ਟਂ ਸੇਕ੍ਖਾਨਂ ਵਿਯ ਨਤ੍ਥਿ ਪਞ੍ਞਾਪਨਾਯ. ਵਟ੍ਟਨ੍ਤਿ ਕਾਰਣਂ ਵਟ੍ਟਨਟ੍ਠੇਨ ਫਲਸ੍ਸ ਪਵਤ੍ਤਨਟ੍ਠੇਨ. ਅਸੇਕ੍ਖਭੂਮਿਵਾਰੋਤਿ ਅਸੇਕ੍ਖਭੂਮਿਪ੍ਪਵਤ੍ਤਿ.

ਉਪਾਦਾਨਪਰਿਪਵਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਤ੍ਤਟ੍ਠਾਨਸੁਤ੍ਤਵਣ੍ਣਨਾ

੫੭. ਸਤ੍ਤਸੁ ¶ ਓਕਾਸੇਸੂਤਿ ਰੂਪਪਜਾਨਨਾਦੀਸੁ ਸਤ੍ਤਸੁ ਓਕਾਸੇਸੁ. ਵੁਸਿਤਵਾਸੋਤਿ ਵੁਸਿਤਅਰਿਯਵਾਸੋ. ਏਤ੍ਥਾਤਿ ਇਮਸ੍ਮਿਂ ਉਦ੍ਦੇਸੇ. ਸੇਸਂ ਨਾਮ ਇਧ ਵੁਤ੍ਤਾਵਸੇਸਂ. ਵੁਤ੍ਤਨਯੇਨਾਤਿ ਹੇਟ੍ਠਾ ਵੁਤ੍ਤਨਯੇਨ ਵੇਦਿਤਬ੍ਬਂ. ਉਸ੍ਸਦਨਨ੍ਦਿਯਨ੍ਤਿ ਉਸ੍ਸਨ੍ਨਗੁਣਵਤੋ ਤੋਸਨਂ ਸਮ੍ਮੋਦਾਪਨਂ. ਗੁਣਕਿਤ੍ਤਨੇਨ ਪਲੋਭਨੀਯਂ ਸੇਕ੍ਖਕਲ੍ਯਾਣਪੁਥੁਜ੍ਜਨਾਨਂ ਪਸਾਦੁਪ੍ਪਾਦਨੇਨ. ਇਦਾਨਿ ਵੁਤ੍ਤਮੇਵ ਅਤ੍ਥਂ ਪਾਕਟਂ ਕਾਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ.

ਏਤ੍ਤਾਵਤਾਤਿ ਪਞ੍ਚਨ੍ਨਂ ਖਨ੍ਧਾਨਂ ਵਸੇਨ ਸਤ੍ਤਸੁ ਠਾਨੇਸੁ ਕੋਸਲ੍ਲਦੀਪਨੇਨ ਏਤ੍ਤਕੇਨ ਦੇਸਨਾਕ੍ਕਮੇਨ. ਤਨ੍ਤਿ ਆਰਮ੍ਮਣਂ. ਧਾਤੁਆਦਿਮਤ੍ਤਮੇਵਾਤਿ ਧਾਤਾਯਤਨਪਟਿਚ੍ਚਸਮੁਪ੍ਪਾਦਮਤ੍ਤਮੇਵ. ਇਮੇਸੁ ਧਮ੍ਮੇਸੂਤਿ ਇਮੇਸੁ ਜਾਤਾਦੀਸੁ. ਕਮ੍ਮਂ ਕਤ੍ਵਾਤਿ ਸਮ੍ਮਸਨਕਮ੍ਮਂ ਨਿਟ੍ਠਪੇਤ੍ਵਾਤਿ ਅਤ੍ਥੋ. ਏਵਮੇਤ੍ਥ ਪਞ੍ਚਨ੍ਨਂ ਖਨ੍ਧਾਨਂ ਵਸੇਨ ਸਤ੍ਤਟ੍ਠਾਨਕੋਸਲ੍ਲਪਵਤ੍ਤਿਯਾ ਪਭੇਦੇਨ ਵਿਭਜਿਤ੍ਵਾ ‘‘ਤਿਵਿਧੂਪਪਰਿਕ੍ਖੀ’’ਤਿ ਦਸ੍ਸੇਤਿ ਧਮ੍ਮਰਾਜਾ.

ਸਤ੍ਤਟ੍ਠਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਮ੍ਮਾਸਮ੍ਬੁਦ੍ਧਸੁਤ੍ਤਵਣ੍ਣਨਾ

੫੮. ਅਧਿਕਂ ¶ ਸਵਿਸੇਸਂ ਪਯਸਤਿ ਪਯੁਞ੍ਜਤਿ ਏਤੇਨਾਤਿ ਅਧਿਪ੍ਪਯਾਸੋ, ਵਿਸਿਟ੍ਠਪਯੋਗੋ. ਤੇਨਾਹ ‘‘ਅਧਿਕਪਯੋਗੋ’’ਤਿ. ਇਮਞ੍ਹਿ ਮਗ੍ਗਨ੍ਤਿ ਅਟ੍ਠਙ੍ਗਿਕਂ ਅਰਿਯਮਗ੍ਗਮਾਹ. ਇਧਾਤਿ ਇਮਸ੍ਮਿਂ ਸੁਤ੍ਤੇ. ਅਵਤ੍ਤਮਾਨਟ੍ਠੇਨਾਤਿ ਬੁਦ੍ਧੁਪ੍ਪਾਦਤੋ ਪੁਬ੍ਬੇ ਨ ਵਤ੍ਤਮਾਨਭਾਵੇਨ. ਮਗ੍ਗਂ ਜਾਨਾਤੀਤਿ ਸਮੁਦਾਗਮਤੋ ਪਟ੍ਠਾਯ ਸਪੁਬ੍ਬਭਾਗਂ ਸਸਮ੍ਭਾਰਵਿਸਯਂ ਸਫਲਂ ਸਉਦ੍ਰਯਂ ਅਰਿਯਂ ਮਗ੍ਗਂ ਜਾਨਾਤਿ ਅਵਬੁਜ੍ਝਤੀਤਿ ਮਗ੍ਗਞ੍ਞੂ. ਵਿਦਿਤਨ੍ਤਿ ਅਞ੍ਞੇਸਮ੍ਪਿ ਞਾਤਂ ਪਟਿਲਦ੍ਧਂ ਹਤ੍ਥਤਲੇ ਆਮਲਕਂ ਵਿਯ ਪਾਕਟਂ ਅਕਾਸਿ, ਤਥਾ ਕਤ੍ਵਾ ਦੇਸੇਸਿ. ਅਮਗ੍ਗੇ ਪਰਿਵਜ੍ਜਨੇਨ ਮਗ੍ਗੇ ਪਟਿਪਤ੍ਤੀਤਿ ਤਸ੍ਸ ਮਗ੍ਗਕੁਸਲਤਾ ਵਿਯ ਅਮਗ੍ਗਕੁਸਲਤਾਪਿ ਇਚ੍ਛਿਤਬ੍ਬਾਤਿ ਆਹ ‘‘ਮਗ੍ਗੇ ਚ ਅਮਗ੍ਗੇ ਚ ਕੋਵਿਦੋ’’ਤਿ. ਅਹਂ ਪਠਮਂ ਗਤੋਤਿ ਅਹਂ ਪਠਮਮਗ੍ਗੇਨ ਸਮਨ੍ਨਾਗਤੋ.

ਸਮ੍ਮਾਸਮ੍ਬੁਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਅਨਤ੍ਤਲਕ੍ਖਣਸੁਤ੍ਤਵਣ੍ਣਨਾ

੫੯. ਪੁਰਾਣੁਪਟ੍ਠਾਕੇਤਿ ¶ ਪੁਬ੍ਬੇ ਪਧਾਨਪਦਹਨਕਾਲੇ ਉਪਟ੍ਠਾਕਭੂਤੇ. ‘‘ਅਵਸਵਤ੍ਤਨਟ੍ਠੇਨ ਅਸ੍ਸਾਮਿਕਟ੍ਠੇਨ ਸੁਞ੍ਞਤਟ੍ਠੇਨ ਅਤ੍ਤਪਟਿਕ੍ਖੇਪਟ੍ਠੇਨਾ’’ਤਿ ਏਵਂ ਪੁਬ੍ਬੇ ਵੁਤ੍ਤੇਹਿ. ਏਤ੍ਤਕੇਨ ਠਾਨੇਨਾਤਿ ‘‘ਰੂਪਂ, ਭਿਕ੍ਖਵੇ, ਅਨਤ੍ਤਾ’’ਤਿ ਆਰਭਿਤ੍ਵਾ ਯਾਵ ‘‘ਏਵਂ ਮੇ ਵਿਞ੍ਞਾਣਂ ਮਾ ਅਹੋਸੀ’’ਤਿ ਏਤ੍ਤਕੇਨ ਸੁਤ੍ਤਪਦੇਸੇਨ. ਅਕਥਿਤਸ੍ਸੇਵ ਕਥਨਂ ਉਤ੍ਤਰਂ, ਨ ਕਥਿਤਸ੍ਸਾਤਿ ਵੁਤ੍ਤਂ ‘‘ਤਾਨਿ ਦਸ੍ਸੇਤ੍ਵਾ’’ਤਿ. ਸਮੋਧਾਨੇਤ੍ਵਾਤਿ ਸਮ੍ਪਿਣ੍ਡਿਤ੍ਵਾ. ਵਿਤ੍ਥਾਰਕਥਾਤਿ ਵਿਤ੍ਥਾਰਤੋ ਅਟ੍ਠਕਥਾ. ਅਨਤ੍ਤਲਕ੍ਖਣਮੇਵਾਤਿ ਤਬ੍ਬਹੁਲਤਾਯ ਤਪ੍ਪਧਾਨਤਾਯ ਚ ਵੁਤ੍ਤਂ. ਅਨਿਚ੍ਚਤਾਦੀਨਮ੍ਪਿ ਹਿ ਤਤ੍ਥ ਤਂਦੀਪਨਤ੍ਥਮੇਵ ਵੁਤ੍ਤਤ੍ਤਾ ਤਦੇਵ ਜੇਟ੍ਠਂ ਪਧਾਨਂ ਤਥਾ ਵੇਨੇਯ੍ਯਜ੍ਝਾਸਯਤੋ.

ਅਨਤ੍ਤਲਕ੍ਖਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਮਹਾਲਿਸੁਤ੍ਤਵਣ੍ਣਨਾ

੬੦. ਏਕਨ੍ਤਦੁਕ੍ਖਨ੍ਤਿਆਦੀਨਿ ਪਦਾਨਿ ਵੁਤ੍ਤਨਯਾਨੇਵ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਯਥਾ ਸਰਾਗੋ ਹੇਤੁ ਪਚ੍ਚਯੋ ਸਂਕਿਲੇਸਾਯ, ਏਵਂ ਸਵਿਪਸ੍ਸਨੋ ਮਗ੍ਗੋ ਹੇਤੁ ਪਚ੍ਚਯੋ ਚ ਵਿਸੁਦ੍ਧਿਯਾਤਿ ਦਟ੍ਠਬ੍ਬਂ.

ਮਹਾਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਆਦਿਤ੍ਤਸੁਤ੍ਤਵਣ੍ਣਨਾ

੬੧. ਏਕਾਦਸਹੀਤਿ ¶ ਰਾਗਾਦੀਹਿ ਉਪਾਯਾਸਪਰਿਯੋਸਾਨੇਹਿ ਏਕਾਦਸਹਿ ਸਨ੍ਤਾਪਨਟ੍ਠੇਨ ਅਗ੍ਗੀਹਿ. ਦ੍ਵੀਸੂਤਿ ਅਟ੍ਠਮਨਵਮੇਸੁ. ਦੁਕ੍ਖਲਕ੍ਖਣਮੇਵਾਤਿ ਤਬ੍ਬਹੁਲਤਾਯ ਤਪ੍ਪਧਾਨਤਾਯ ਚ ਵੁਤ੍ਤਂ.

ਆਦਿਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਨਿਰੁਤ੍ਤਿਪਥਸੁਤ੍ਤਵਣ੍ਣਨਾ

੬੨. ਨਿਰੁਤ੍ਤਿਯੋਵ ਨਿਰੁਤ੍ਤਿਪਥਾਤਿ ਪਥ-ਸਦ੍ਦੇਨ ਪਦਵਡ੍ਢਨਮਾਹ ਯਥਾ ‘‘ਬੀਜਾਨਿਯੇਵ ਬੀਜਜਾਤਾਨੀ’’ਤਿ. ਨਿਰੁਤ੍ਤਿਵਸੇਨਾਤਿ ਨਿਬ੍ਬਚਨਵਸੇਨ. ਪਥਾ ਚ ਅਤ੍ਥਾਨੁਰੂਪਭਾਵਤੋ ¶ . ਤੀਣਿਪੀਤਿ ਨਿਰੁਤ੍ਤਿਅਧਿਵਚਨਪਞ੍ਞਤ੍ਤਿਪਥਪਦਾਨਿ. ਤਥਾ ਹਿ ‘‘ਫੁਸਤੀਤਿ ਫਸ੍ਸੋ’’ਤਿਆਦਿਨਾ ਨੀਹਰਿਤ੍ਵਾ ਵਚਨਂ ਨਿਰੁਤ੍ਤਿ, ‘‘ਸਿਰੀਵਡ੍ਢਕੋ ਧਨਵਡ੍ਢਕੋ’’ਤਿਆਦਿਨਾ ਵਚਨਮਤ੍ਤਮੇਵ ਅਧਿਕਾਰਂ ਕਤ੍ਵਾ ਪਵਤ੍ਤਂ ਅਧਿਵਚਨਂ, ‘‘ਤਕ੍ਕੋ ਵਿਤਕ੍ਕੋ’’ਤਿਆਦਿਨਾ ਤਂਤਂਪਕਾਰੇਨ ਞਾਪਨਤੋ ਪਞ੍ਞਤ੍ਤਿ. ਅਥ ਵਾ ਤਂਤਂਅਤ੍ਥਪ੍ਪਕਾਸਨੇਨ ਨਿਚ੍ਛਿਤਂ, ਨਿਯਤਂ ਵਾ ਵਚਨਂ ਨਿਰੁਤ੍ਤਿ. ਅਧਿ-ਸਦ੍ਦੋ ਉਪਰਿਭਾਗੇ, ਉਪਰਿ ਵਚਨਂ ਅਧਿਵਚਨਂ. ਕਸ੍ਸ ਉਪਰਿ? ਪਕਾਸੇਤਬ੍ਬਸ੍ਸ ਅਤ੍ਥਸ੍ਸਾਤਿ ਪਾਕਟੋਯਮਤ੍ਥੋ. ਅਧੀਨਂ ਵਚਨਂ ਅਧਿਵਚਨਂ. ਕੇਨ ਅਧੀਨਂ? ਅਤ੍ਥੇਨ. ਅਤ੍ਥਸ੍ਸ ਪਞ੍ਞਾਪਨਤ੍ਥੇਨ ਪਞ੍ਞਤ੍ਤੀਤਿ ਏਵਂ ਨਿਰੁਤ੍ਤਿਆਦਿਪਦਾਨਂ ਸਬ੍ਬਵਚਨੇਸੁ ਪਵਤ੍ਤਿ ਵੇਦਿਤਬ੍ਬਾ. ਅਞ੍ਞਥਾ ‘‘ਫੁਸਤੀਤਿ ਫਸ੍ਸੋ’’ਤਿਆਦਿਪ੍ਪਕਾਰੇਨ ਨਿਦ੍ਧਾਰਣਵਚਨਾਨਂਯੇਵ ਨਿਰੁਤ੍ਤਿਤਾ, ਸਿਰਿਵਡ੍ਢਕਧਨਵਡ੍ਢਕਪਕਾਰਾਨਮੇਵ ਅਭਿਲਾਪਨਂ ਅਧਿਵਚਨਤਾ. ‘‘ਤਕ੍ਕੋ ਵਿਤਕ੍ਕੋ’’ਤਿ ਏਵਂਪਕਾਰਾਨਮੇਵ ਏਕਮੇਵ ਅਤ੍ਥਂ ਤੇਨ ਤੇਨ ਪਕਾਰੇਨ ਞਾਪੇਨ੍ਤਾਨਂ ਵਚਨਾਨਂ ਪਞ੍ਞਤ੍ਤਿਤਾ ਚ ਆਪਜ੍ਜੇਯ੍ਯ. ਅਸਂਕਿਣ੍ਣਾਤਿ ਨ ਸਂਕਿਣ੍ਣਾ. ਤੇਨਾਹ ‘‘ਅਵਿਜਹਿਤਾ…ਪੇ… ਅਛਡ੍ਡਿਤਾ’’ਤਿ. ਨ ਸਂਕੀਯਨ੍ਤੀਤਿ ਨ ਸਂਕਿਰੀਯਨ੍ਤਿ, ਨ ਸਂਕੀਯਿਸ੍ਸਨ੍ਤਿ ਨ ਸਂਕਿਰੀਯਿਸ੍ਸਨ੍ਤੀਤਿ ਅਤ੍ਥੋ. ਅਪ੍ਪਟਿਕੁਟ੍ਠਾਤਿ ਨ ਪਟਿਕ੍ਖਿਤ੍ਤਾ. ਯਸ੍ਮਾ ਭਙ੍ਗਂ ਅਤਿਕ੍ਕਨ੍ਤਂ ਉਪ੍ਪਾਦਾਦਿ ਅਤਿਕ੍ਕਨ੍ਤਮੇਵ ਹੋਤਿ, ਤਸ੍ਮਾ ਵੁਤ੍ਤਂ ‘‘ਭਙ੍ਗਮੇਵਾ’’ਤਿ. ਯਸ੍ਮਾ ਦੇਸਨ੍ਤਰਂ ਸਙ੍ਕਨ੍ਤੋਪਿ ਅਤਿਕ੍ਕਨ੍ਤਨ੍ਤਿ ਵੁਚ੍ਚਤਿ, ਤਸ੍ਮਾ ਤਦਾਭਾਵਂ ਦਸ੍ਸੇਤੁਂ ‘‘ਦੇਸਨ੍ਤਰਂ ਅਸਙ੍ਕਮਿਤ੍ਵਾ’’ਤਿ ਵੁਤ੍ਤਂ. ਯਤ੍ਥ ਯਤ੍ਥ ਹਿ ਸਙ੍ਖਾਰਾ ਉਪ੍ਪਜ੍ਜਨ੍ਤਿ, ਤਤ੍ਥ ਤਤ੍ਥੇਵ ਭਿਜ੍ਜਨ੍ਤਿ ਨਿਰੁਜ੍ਝਨ੍ਤਿ ਵਿਪਰਿਣਮਨ੍ਤਿ ਵਿਨਾਸਂ ਆਪਜ੍ਜਨ੍ਤਿ. ਤੇਨਾਹ ‘‘ਵਿਪਰਿਣਤਨ੍ਤਿ…ਪੇ… ਨਟ੍ਠ’’ਨ੍ਤਿ. ਅਪਾਕਟੀਭੂਤਂ ਅਜਾਤਤ੍ਤਾ ਏਵ.

ਵਸਭਣਗੋਤ੍ਤਤਾਯ ਵਸ੍ਸਭਞ੍ਞਾ. ਮੂਲਦਿਟ੍ਠਿਗਤਿਕਾਤਿ ਮੂਲਭੂਤਾ ਦਿਟ੍ਠਿਗਤਿਕਾ, ਇਮਸ੍ਮਿਂ ਕਪ੍ਪੇ ਸਬ੍ਬਪਠਮਂ ਤਾਦਿਸਦਿਟ੍ਠਿਸਮੁਪ੍ਪਾਦਕਾ. ਪੁਨਪ੍ਪੁਨਂ ਆਵਜ੍ਜੇਨ੍ਤਸ੍ਸਾਤਿ ਅਹੇਤੁਵਾਦਪਟਿਸਂਯੁਤ੍ਤਗਨ੍ਥਂ ਉਗ੍ਗਹੇਤ੍ਵਾ ਪਰਿਯਾਪੁਣਿਤ੍ਵਾ ਤਦਤ੍ਥਂ ਵੀਮਂਸਨ੍ਤਸ੍ਸ ‘‘ਨਤ੍ਥਿ ਹੇਤੁ, ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਸਂਕਿਲੇਸਾਯਾ’’ਤਿਆਦਿਨਯਪ੍ਪਵਤ੍ਤਾਯ ¶ ਲਦ੍ਧਿਯਾ ਆਰਮ੍ਮਣੇ ਮਿਚ੍ਛਾਸਤਿ ਸਨ੍ਤਿਟ੍ਠਤਿ, ‘‘ਨਤ੍ਥਿ ਹੇਤੂ’’ਤਿਆਦਿਵਸੇਨ ਅਨੁਸ੍ਸਵੂਪਲਦ੍ਧੇ ਅਤ੍ਥੇ ਤਦਾਕਾਰਪਰਿਵਿਤਕ੍ਕਨੇਹਿ ਸਵਿਗ੍ਗਹੇ ਵਿਯ ਸਰੂਪਤੋ ਚਿਤ੍ਤਸ੍ਸ ਪਚ੍ਚੁਪਟ੍ਠਿਤੇ ਚਿਰਕਾਲਪਰਿਚਯੇਨ ‘‘ਏਵਮੇਤ’’ਨ੍ਤਿ ਨਿਜ੍ਝਾਨਕ੍ਖਮਭਾਵੂਪਗਮਨੇਨ ਨਿਜ੍ਝਾਨਕ੍ਖਨ੍ਤਿਯਾ ਤਥਾਗਹਿਤੇ ਪੁਨਪ੍ਪੁਨਂ ਤਥੇਵ ਆਸੇਵਨ੍ਤਸ੍ਸ ਬਹੁਲੀਕਰੋਨ੍ਤਸ੍ਸ ਮਿਚ੍ਛਾਵਿਤਕ੍ਕੇਨ ਸਮਾਦਿਯਮਾਨਾ ਮਿਚ੍ਛਾਵਾਯਾਮੂਪਤ੍ਥਮ੍ਭਿਤਾ ਅਤਂਸਭਾਵਂ ‘‘ਤਂਸਭਾਵ’’ਨ੍ਤਿ ¶ ਗਣ੍ਹਨ੍ਤੀ ਮਿਚ੍ਛਾਸਤੀਤਿ ਲਦ੍ਧਨਾਮਾ ਤਂਲਦ੍ਧਿਸਹਗਤਾ ਤਣ੍ਹਾ ਸਨ੍ਤਿਟ੍ਠਤਿ. ਯਥਾਸਕਂ ਵਿਤਕ੍ਕਾਦਿਪਚ੍ਚਯਲਾਭੇਨ ਤਸ੍ਮਿਂ ਆਰਮ੍ਮਣੇ ਅਧਿਟ੍ਠਿਤਤਾਯ ਅਨੇਕਗ੍ਗਤਂ ਪਹਾਯ ਚਿਤ੍ਤਂ ਏਕਗ੍ਗਤਂ ਅਪ੍ਪਿਤਂ ਵਿਯ ਹੋਤਿ ਮਿਚ੍ਛਾਸਮਾਧਿਨਾ. ਸੋਪਿ ਹਿ ਪਚ੍ਚਯਵਿਸੇਸੇਹਿ ਲਦ੍ਧਭਾਵਨਾਬਲੋ ਈਦਿਸੇ ਠਾਨੇ ਸਮਾਧਾਨਪਤਿਰੂਪਕਿਚ੍ਚਕਰੋ ਹੋਤਿਯੇਵ ਵਾਲਵਿਜ੍ਝਨਾਦੀਸੁ ਵਿਯਾਤਿ ਦਟ੍ਠਬ੍ਬਂ. ਤਥਾ ਹਿ ਅਨੇਕਕ੍ਖਤ੍ਤੁਂ ਤੇਨਾਕਾਰੇਨ ਪੁਬ੍ਬਭਾਗਿਯੇਸੁ ਜਵਨਵਾਰੇਸੁ ਪਵਤ੍ਤੇਸੁ ਸਬ੍ਬਪਚ੍ਛਿਮੇ ਜਵਨਵਾਰੇ ਸਤ੍ਤ ਜਵਨਾਨਿ ਜਵਨ੍ਤਿ. ਤਤ੍ਥ ਪਠਮੇ ਸਤੇਕਿਚ੍ਛੋ ਹੋਤਿ, ਤਥਾ ਦੁਤਿਯਾਦੀਸੁ. ਸਤ੍ਤਮੇ ਪਨ ਜਵਨੇ ਸਮ੍ਪਤ੍ਤੇ ਅਤੇਕਿਚ੍ਛੋ ਹੋਤਿ. ਤੇਨਾਹ ‘‘ਅਸ੍ਸਾਦੇਨ੍ਤਸ੍ਸਾ’’ਤਿਆਦਿ. ਇਮੇਸੁਪੀਤਿ ਦ੍ਵੀਸੁਪਿ ਠਾਨੇਸੁ.

ਪਚ੍ਚੁਪ੍ਪਨ੍ਨਂ ਵਾਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨ ‘‘ਯਦੇਤਂ ਅਨਾਗਤਂ ਨਾਮ, ਨਯਿਦਂ ਅਨਾਗਤ’’ਨ੍ਤਿਆਦਿਕਂ ਸਙ੍ਗਣ੍ਹਾਤਿ. ਤੇਪੀਤਿ ਤੇ ਵਸ੍ਸਭਞ੍ਞਾਪਿ ਨ ਮਞ੍ਞਿਂਸੁ ਲੋਕਸਮਞ੍ਞਾਯ ਅਨਤਿਕ੍ਕਮਨੀਯਤੋ. ਤੇਨਾਹ ‘‘ਅਤੀਤਂ ਪਨਾ’’ਤਿਆਦਿ. ਖਨ੍ਧਾਨਂ ਉਪਰਿ ਨਿਰੁਲ਼੍ਹਾ ਪਣ੍ਣਤ੍ਤਿ.

ਨਿਰੁਤ੍ਤਿਪਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਉਪਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੭. ਅਰਹਨ੍ਤਵਗ੍ਗੋ

੧. ਉਪਾਦਿਯਮਾਨਸੁਤ੍ਤਵਣ੍ਣਨਾ

੬੩. ਗਣ੍ਹਮਾਨੋਤਿ ‘‘ਏਤਂ ਮਮਾ’’ਤਿਆਦਿਨਾ ਗਣ੍ਹਮਾਨੋ. ਪਾਸੇਨਾਤਿ ਰਾਗਪਾਸੇਨ. ਤਞ੍ਹਿ ਮਾਰੋ ਮਾਰਪਾਸੋਤਿ ਮਞ੍ਞਤਿ. ਤੇਨਾਹ ‘‘ਅਨ੍ਤਲਿਕ੍ਖਚਰੋ ਪਾਸੋ, ਯ੍ਵਾਯਂ ਚਰਤਿ ਮਾਨਸੋ’’ਤਿ (ਸਂ. ਨਿ. ੧.੧੫੧; ਮਹਾਵ. ੩੩). ਮੁਤ੍ਤੋ ਨਾਮ ਹੋਤਿ ਅਨੁਪਾਦਿਯਤੋ ਸਬ੍ਬਸੋ ਖਨ੍ਧਸ੍ਸ ਅਭਾਵਤੋ.

ਉਪਾਦਿਯਮਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੬. ਮਞ੍ਞਮਾਨਸੁਤ੍ਤਾਦਿਵਣ੍ਣਨਾ

੬੪-੬੮. ‘‘ਏਤਂ ¶ ¶ ਮਮਾ’’ਤਿਆਦਿਨਾ. ਮਞ੍ਞਨਾ ਅਭਿਨਨ੍ਦਨਾ ਚ. ਤਣ੍ਹਾਛਨ੍ਦੋਤਿ ਤਣ੍ਹਾ ਏਵ ਛਨ੍ਦੋ. ਸਾ ਹਿ ਤਣ੍ਹਾਯਨਟ੍ਠੇਨ ਤਣ੍ਹਾ, ਛਨ੍ਦਿਕਤਟ੍ਠੇਨ ਛਨ੍ਦੋ. ਚਤੁਤ੍ਥਂ ਅਨਿਚ੍ਚਲਕ੍ਖਣਮੁਖੇਨ ਵੁਤ੍ਤਂ, ਪਞ੍ਚਮਂ ਦੁਕ੍ਖਲਕ੍ਖਣਮੁਖੇਨ, ਛਟ੍ਠਂ ਅਨਤ੍ਤਲਕ੍ਖਣਮੁਖੇਨ. ਸੇਸਂ ਤੀਸੁਪਿ ਸਦਿਸਮੇਵਾਤਿ ਵੁਤ੍ਤਂ ‘‘ਏਸੇਵ ਨਯੋ’’ਤਿ.

ਮਞ੍ਞਮਾਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਅਨਤ੍ਤਨਿਯਸੁਤ੍ਤਵਣ੍ਣਨਾ

੬੯. ਅਨਤ੍ਤਨਿਯਨ੍ਤਿ ਨ ਅਤ੍ਤਨਿਯਂ. ਤੇਨਾਹ ‘‘ਨ ਅਤ੍ਤਨੋ ਸਨ੍ਤਕ’’ਨ੍ਤਿ.

ਅਨਤ੍ਤਨਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮-੧੦. ਰਜਨੀਯਸਣ੍ਠਿਤਸੁਤ੍ਤਾਦਿਵਣ੍ਣਨਾ

੭੦-੭੨. ਰਜਨੀਯੇਨਾਤਿ ਰਜਨੀਯੇਨ ਰਾਗੁਪ੍ਪਾਦਕੇਨ. ਤੇਨਾਹ ‘‘ਰਾਗਸ੍ਸ ਪਚ੍ਚਯਭਾਵੇਨਾ’’ਤਿ. ਰਾਹੁਲਸਂਯੁਤ੍ਤੇ ਰਾਹੁਲਤ੍ਥੇਰਸ੍ਸ ਪੁਚ੍ਛਾਵਸੇਨ ਆਗਤਾ. ਇਧ ਰਾਧਤ੍ਥੇਰਸ੍ਸ ਸੁਰਾਧਤ੍ਥੇਰਸ੍ਸ ਚ ਪੁਚ੍ਛਾਵਸੇਨ, ਪਾਲ਼ਿ ਪਨ ਸਬ੍ਬਤ੍ਥ ਸਦਿਸਾ. ਤੇਨਾਹ ‘‘ਵੁਤ੍ਤਨਯੇਨੇਵ ਵੇਦਿਤਬ੍ਬਾਨੀ’’ਤਿ.

ਰਜਨੀਯਸਣ੍ਠਿਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਰਹਨ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.

੮. ਖਜ੍ਜਨੀਯਵਗ੍ਗੋ

੧-੩. ਅਸ੍ਸਾਦਸੁਤ੍ਤਾਦਿਵਣ੍ਣਨਾ

੭੩-੭੫. ਚਤੁਸਚ੍ਚਮੇਵ ਕਥਿਤਂ ਅਸ੍ਸਾਦਾਦੀਨਞ੍ਚੇਵ ਸਮੁਦਯਾਦੀਨਞ੍ਚ ਵਸੇਨ ਦੇਸਨਾਯ ਪਵਤ੍ਤਤ੍ਤਾ. ਯਸ੍ਮਾ ਅਸ੍ਸਾਦੋ ਸਮੁਦਯਸਚ੍ਚਂ, ਆਦੀਨਵੋ ਦੁਕ੍ਖਸਚ੍ਚਂ, ਨਿਸ੍ਸਰਣਂ ਮਗ੍ਗਸਚ੍ਚਂ ਨਿਰੋਧਸਚ੍ਚਞ੍ਚਾਤਿ ਵੁਤ੍ਤੋਵਾਯਮਤ੍ਥੋ; ਦੁਤਿਯੇ ਸਮੁਦਯਸ੍ਸਾਦੋ ¶ ਸਮੁਦਯਸਚ੍ਚਂ, ਆਦੀਨਵੋ ਦੁਕ੍ਖਸਚ੍ਚਂ, ਅਤ੍ਥਙ੍ਗਮੋ ¶ ਨਿਰੋਧਸਚ੍ਚਂ, ਨਿਸ੍ਸਰਣਂ ਮਗ੍ਗਸਚ੍ਚਨ੍ਤਿ ਵੁਤ੍ਤੋਵਾਯਮਤ੍ਥੋ; ਤਤਿਯਂ ਅਰਿਯਸਾਵਕਸ੍ਸੇਵ ਵਸੇਨ ਵੁਤ੍ਤਂ.

ਅਸ੍ਸਾਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੪. ਅਰਹਨ੍ਤਸੁਤ੍ਤਵਣ੍ਣਨਾ

੭੬. ਯਤ੍ਤਕਾ ਸਤ੍ਤਾਵਾਸਾਤਿ ਤਸ੍ਮਿਂ ਤਸ੍ਮਿਂ ਸਤ੍ਤਨਿਕਾਯੇ ਆਵਸਨਟ੍ਠੇਨ ਸਤ੍ਤਾ ਏਵ ਸਤ੍ਤਾਵਾਸਾ. ਤੇਨ ਯਤ੍ਤਕਾ ਸਤ੍ਤਾਵਾਸਾ, ਤੇਹਿ ਸਬ੍ਬੇਹਿਪਿ ਏਤੇ ਅਗ੍ਗਾ ਏਤੇ ਸੇਟ੍ਠਾ, ਯੇ ਇਮੇ ਅਰਹਨ੍ਤਾਤਿ ਦਸ੍ਸੇਤਿ. ਪੁਰਿਮਨਯੇਨੇਵਾਤਿ ਪੁਰਿਮਸ੍ਮਿਂ ਸਤ੍ਤਟ੍ਠਾਨਕੋਸਲ੍ਲਸੁਤ੍ਤੇ ਵੁਤ੍ਤਨਯੇਨ.

ਤਦਤ੍ਥਪਰਿਦੀਪਨਾਹੀਤਿ ‘‘ਪਞ੍ਚਕ੍ਖਨ੍ਧੇ ਪਰਿਞ੍ਞਾਯ. ਤਣ੍ਹਾ ਤੇਸਂ ਨ ਵਿਜ੍ਜਤਿ. ਅਸ੍ਮਿਮਾਨੋ ਸਮੁਚ੍ਛਿਨ੍ਨੋ’’ਤਿਆਦਿਨਾ ਤਸ੍ਸ ਯਥਾਨਿਦ੍ਦਿਟ੍ਠਸ੍ਸ ਸੁਤ੍ਤਸ੍ਸ ਅਤ੍ਥਦੀਪਨਾਹਿ ਚੇਵ ‘‘ਅਨੇਜਂ ਤੇ ਅਨੁਪ੍ਪਤ੍ਤਾ, ਚਿਤ੍ਤਂ ਤੇਸਂ ਅਨਾਵਿਲ’’ਨ੍ਤਿਆਦਿਨਾ ਵਿਸੇਸਤ੍ਥਪਰਿਦੀਪਨਾਹਿ ਚ. ਝਾਨਮਗ੍ਗਫਲਪਰਿਯਾਪਨ੍ਨਂ ਅਤਿਸਯਿਤਸੁਖਂ ਏਤੇਸਮਤ੍ਥੀਤਿ ਸੁਖਿਨੋਤਿ ਆਹ ‘‘ਝਾਨ…ਪੇ… ਸੁਖਿਤਾ’’ਤਿ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ਏਤ੍ਥ ਤੇਸਂ ਅਪਾਯਦੁਕ੍ਖਜਨਿਕਾ ਤਣ੍ਹਾ ਨ ਵਿਜ੍ਜਤੀਤਿ ਵੁਤ੍ਤਂ. ਵਟ੍ਟਮੂਲਿਕਾਯ ਤਣ੍ਹਾਯ ਅਭਾਵਾ ‘‘ਨਨ੍ਦੀ ਤੇਸਂ ਨ ਵਿਜ੍ਜਤੀ’’ਤਿ ਏਤ੍ਥ ਵੁਚ੍ਚਤੀਤਿ. ਇਮਸ੍ਸਪੀਤਿ ਪਿ-ਸਦ੍ਦੇਨ ਦੁਕ੍ਖਸ੍ਸਾਭਾਵੇਨਪੀਤਿ ਦੁਕ੍ਖਾਭਾਵੋ ਵਿਯ ਵਟ੍ਟਮੂਲਿਕਤਣ੍ਹਾਭਾਵੋ ਸਮ੍ਪਿਣ੍ਡੀਯਤੀਤਿ ਦਟ੍ਠਬ੍ਬਂ. ਤੇਨ ਹਿ ਤੇ ਅਨੁਪਾਦਿਸੇਸਨਿਬ੍ਬਾਨਪ੍ਪਤ੍ਤਿਯਾ ਅਚ੍ਚਨ੍ਤਸੁਖਿਤਾ ਏਵਾਤਿ ਵੁਚ੍ਚਨ੍ਤੀਤਿ. ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਯਪ੍ਪਵਤ੍ਤਿਯਾ ਨਵਵਿਧੋ. ਞਾਣੇਨਾਤਿ ਅਗ੍ਗਮਗ੍ਗਞ੍ਞਾਣੇਨ.

ਅਰਹਤ੍ਤਂ ਅਨੁਪ੍ਪਤ੍ਤਾ. ਅਲਿਤ੍ਤਾਤਿ ਅਮਕ੍ਖਿਤਾ. ਬ੍ਰਹ੍ਮਭੂਤਾਤਿ ਬ੍ਰਹ੍ਮਭਾਵਂ ਪਤ੍ਤਾ, ਬ੍ਰਹ੍ਮਤੋ ਵਾ ਅਰਿਯਮਗ੍ਗਞਾਣਤੋ ਭੂਤਾ ਅਰਿਯਾਯ ਜਾਤਿਯਾ ਜਾਤਾ. ਸਤ੍ਤ ਸਦ੍ਧਮ੍ਮਾ ਗੋਚਰੋ ਪਵਤ੍ਤਿਟ੍ਠਾਨਂ ਏਤੇਸਨ੍ਤਿ ਸਤ੍ਤਸਦ੍ਧਮ੍ਮਗੋਚਰਾ.

ਨਿਰਾਸਙ੍ਕਚਾਰੋ ਨਾਮ ਗਹਿਤੋ ਕੁਤੋਚਿਪਿ ਤੇਸਂ ਆਸਙ੍ਕਾਯ ਅਭਾਵਤੋ. ਸਮ੍ਮਾਦਿਟ੍ਠਿਆਦੀਹਿ ਦਸਹਿ ਅਙ੍ਗੇਹਿ ਸਮ੍ਮਾਵਿਮੁਤ੍ਤਿ-ਸਮ੍ਮਾਞਾਣਪਰਿਯੋਸਾਨੇਹਿ. ‘‘ਆਗੁਂ ਨ ਕਰੋਤੀ’’ਤਿਆਦੀਹਿ ਚਤੂਹਿ ਕਾਰਣੇਹਿ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ਇਦਮ੍ਪਿ ਤਣ੍ਹਾਪਹਾਨਸ੍ਸ ਬਹੂਪਕਾਰਤਾਦਸ੍ਸਨਂ. ਤੇਨਾਹ ‘‘ਦਾਸਕਾਰਿਕਾ ਤਣ੍ਹਾਪਿ ਤੇਸਂ ਨਤ੍ਥੀ’’ਤਿ.

ਨ ¶ ਵਿਕਮ੍ਪਨ੍ਤਿ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ.

ਉਦ੍ਧਂ ¶ ਤਿਰਿਯਂ ਅਪਾਚੀਨਨ੍ਤਿ ਏਤ੍ਥ ‘‘ਉਦ੍ਧਂ ਵੁਚ੍ਚਤੀ’’ਤਿਆਦਿਨਾ ਰੂਪਮੁਖੇਨ ਅਤ੍ਤਭਾਵਂ ਗਹੇਤ੍ਵਾ ਪਵਤ੍ਤੋ ਪਠਮਨਯੋ. ਕਾਲਤ੍ਤਯਵਸੇਨ ਧਮ੍ਮਪ੍ਪਵਤ੍ਤਿਂ ਗਹੇਤ੍ਵਾ ਪਵਤ੍ਤੋ ਦੁਤਿਯਨਯੋ. ਠਾਨਵਸੇਨ ਸਕਲਲੋਕਧਾਤੁਂ ਗਹੇਤ੍ਵਾ ਪਵਤ੍ਤੋ ਤਤਿਯਨਯੋ. ਬੁਦ੍ਧਾਤਿ ਚਤ੍ਤਾਰਿ ਸਚ੍ਚਾਨਿ ਬੁਦ੍ਧਵਨ੍ਤੋ.

ਸੀਹਨਾਦਸਮੋਧਾਨਨ੍ਤਿ ਸੀਹਨਾਦਾਨਂ ਸਂਕਲਨਂ. ਲੋਕੇ ਅਤ੍ਤਨੋ ਉਤ੍ਤਰਿਤਰਸ੍ਸਾਭਾਵਾ ਅਨੁਤ੍ਤਰਾ. ਉਤ੍ਤਰੋ ਤਾਵ ਤਿਟ੍ਠਤੁ ਪੁਰਿਸੋ, ਸਦਿਸੋਪਿ ਤਾਵ ਨਤ੍ਥੀਤਿ ਅਸਦਿਸਾ. ਸਕਲਮ੍ਪਿ ਭਵਂ ਉਤ੍ਤਰਿਤ੍ਵਾ ਭਵਪਿਟ੍ਠੇ ਠਤ੍ਵਾ ਵਿਮੁਤ੍ਤਿਸੁਖੇਨ ਸੁਖਿਤਤ੍ਤਾਦਿਵਸੇਨ ਏਕਵੀਸਤਿਯਾਕਾਰੇਹਿ ਸੀਹਨਾਦਂ ਨਦਨ੍ਤਿ.

ਅਰਹਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਅਰਹਨ੍ਤਸੁਤ੍ਤਵਣ੍ਣਨਾ

੭੭. ਸੁਦ੍ਧਿਕਮੇਵਾਤਿ ਸੁਦ੍ਧਸਂਖਿਤ੍ਤਬਨ੍ਧਮੇਵ ਕਤ੍ਵਾ.

ਦੁਤਿਯਅਰਹਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸੀਹਸੁਤ੍ਤਵਣ੍ਣਨਾ

੭੮. ਸੀਹੋਤਿ ਪਰਿਸ੍ਸਯਸਹਨਤੋ ਪਟਿਪਕ੍ਖਹਨਨਤੋ ਚ ‘‘ਸੀਹੋ’ਤਿ ਲਦ੍ਧਨਾਮੋ ਮਿਗਾਧਿਪਤਿ. ਚਤ੍ਤਾਰੋਤਿ ਚ ਸਮਾਨੇਪਿ ਸੀਹਜਾਤਿਕਭਾਵੇ ਵਣ੍ਣਵਿਸੇਸਾਦਿਸਿਦ੍ਧੇਨ ਵਿਸੇਸੇਨ ਚਤ੍ਤਾਰੋ ਸੀਹਾ. ਤੇ ਇਦਾਨਿ ਨਾਮਤੋ ਵਣ੍ਣਤੋ ਆਹਾਰਤੋ ਦਸ੍ਸੇਤ੍ਵਾ ਇਧਾਧਿਪ੍ਪੇਤਸੀਹਂ ਨਾਨਪ੍ਪਕਾਰਤੋ ਵਿਭਾਵੇਤੁਂ ‘‘ਤਿਣਸੀਹੋ’’ਤਿਆਦਿ ਆਰਦ੍ਧਂ. ਤਿਣਭਕ੍ਖੋ ਸੀਹੋ ਤਿਣਸੀਹੋ ਪੁਰਿਮਪਦੇ ਉਤ੍ਤਰਪਦਲੋਪੇਨ ਯਥਾ ‘‘ਸਾਕਪਤ੍ਥਿਵੋ’’ਤਿ. ਕਾਲ਼ਵਣ੍ਣਤਾਯ ਕਾਲ਼ਸੀਹੋ. ਤਥਾ ਪਣ੍ਡੁਸੀਹੋ. ਤੇਨਾਹ ‘‘ਕਾਲ਼ਸੀਹੋ ਕਾਲ਼ਗਾਵਿਸਦਿਸੋ, ਪਣ੍ਡੁਸੀਹੋ ਪਣ੍ਡੁਪਲਾਸਵਣ੍ਣਗਾਵਿਸਦਿਸੋ’’ਤਿ. ਰਤ੍ਤਕਮ੍ਬਲਸ੍ਸ ਵਿਯ ਕੇਸਰੋ ਕੇਸਰਕਲਾਪੋ ਏਤਸ੍ਸ ਅਤ੍ਥੀਤਿ ਕੇਸਰੀ. ਲਾਖਾਰਸਪਰਿਕਮ੍ਮਕਤੇਹਿ ਵਿਯ ਪਾਦਪਰਿਯਨ੍ਤੇਹੀਤਿ ਯੋਜਨਾ.

ਕਮ੍ਮਾਨੁਭਾਵਸਿਦ੍ਧਆਧਿਪਚ੍ਚਮਹੇਸਕ੍ਖਤਾਹਿ ¶ ਸਬ੍ਬਮਿਗਗਣਸ੍ਸ ਰਾਜਾ ਸੁਵਣ੍ਣਗੁਹਤੋ ਵਾਤਿਆਦਿ ‘‘ਸੀਹਸ੍ਸ ਵਿਹਾਰੋ ਕਿਰਿਯਾ ਏਵਂ ਹੋਤੀ’’ਤਿ ਕਤ੍ਵਾ ਵੁਤ੍ਤਂ.

ਸਮਂ ਪਤਿਟ੍ਠਾਪੇਤ੍ਵਾਤਿ ਸਬ੍ਬਭਾਗੇਹਿ ਸਮਮੇਵ ਭੂਮਿਯਂ ਪਤਿਟ੍ਠਾਪੇਤ੍ਵਾ. ਆਕਡ੍ਢਿਤ੍ਵਾਤਿ ਪੁਰਤੋ ਆਕਡ੍ਢਿਤ੍ਵਾ ¶ . ਅਭਿਹਰਿਤ੍ਵਾਤਿ ਅਭਿਮੁਖਂ ਹਰਿਤ੍ਵਾ. ਸਙ੍ਘਾਤਨ੍ਤਿ ਵਿਨਾਸਂ. ਵੀਸਤਿਯਟ੍ਠਿਕਂ ਠਾਨਂ ਉਸਭਂ.

ਸਮਸੀਹੋਤਿ ਸਮਜਾਤਿਕੋ ਸਮਭਾਗੋ ਚ ਸੀਹੋ. ਸਮਾਨੋਸ੍ਮੀਤਿ ਦੇਸਨਾਮਤ੍ਤਂ, ਸਮਪ੍ਪਭਾਵਤਾਯਪਿ ਨ ਭਾਯਤਿ. ਸਕ੍ਕਾਯਦਿਟ੍ਠਿਬਲਵਤਾਯਾਤਿ ‘‘ਕੇ ਅਞ੍ਞੇ ਅਮ੍ਹੇਹਿ ਉਤ੍ਤਰਿਤਰਾ, ਅਥ ਖੋ ਮਯਮੇਵ ਮਹਾਬਲਾ’’ਤਿ ਏਵਂ ਬਲਾਤਿਮਾਨਨਿਮਿਤ੍ਤਾਯ ਅਹਙ੍ਕਾਰਹੇਤੁਭੂਤਾਯ ਸਕ੍ਕਾਯਦਿਟ੍ਠਿਯਾ ਬਲਭਾਵੇਨ. ਸਕ੍ਕਾਯਦਿਟ੍ਠਿਪਹੀਨਤ੍ਤਾਤਿ ਸਕ੍ਕਾਯਦਿਟ੍ਠਿਯਾ ਪਹੀਨਤ੍ਤਾ ਨਿਰਹਙ੍ਕਾਰਤ੍ਤਾ ਅਤ੍ਤਸਿਨੇਹਸ੍ਸ ਸੁਟ੍ਠੁ ਸਮੁਗ੍ਘਾਟਿਤਤ੍ਤਾ ਨ ਭਾਯਤਿ.

ਤਥਾ ਤਥਾਤਿ ਸੀਹਸਦਿਸਤਾਦਿਨਾ ਤੇਨ ਤੇਨ ਪਕਾਰੇਨ ਅਤ੍ਤਾਨਂ ਕਥੇਸੀਤਿ ਵਤ੍ਵਾ ਤਮਤ੍ਥਂ ਵਿਵਰਿਤ੍ਵਾ ਦਸ੍ਸੇਤੁਂ ‘‘ਸੀਹੋਤਿ ਖੋ’’ਤਿਆਦਿ ਵੁਤ੍ਤਂ.

ਕਤਾਭਿਨੀਹਾਰਸ੍ਸ ਲੋਕਨਾਥਸ੍ਸ ਬੋਧਿਯਾ ਨਿਯਤਭਾਵਪ੍ਪਤ੍ਤਿਯਾ ਏਕਨ੍ਤਭਾਵੀਬੁਦ੍ਧਭਾਵੋਤਿ ਕਤ੍ਵਾ ‘‘ਤੀਸੁ ਪਾਸਾਦੇਸੁ ਨਿਵਾਸਕਾਲੋ, ਮਗਧਰਞ੍ਞੋ ਪਟਿਞ੍ਞਾਦਾਨਕਾਲੋ, ਪਾਯਾਸਸ੍ਸ ਪਰਿਭੁਤ੍ਤਕਾਲੋ’’ਤਿਆਦਿਨਾ ਅਭਿਸਮ੍ਬੋਧਿਤੋ ਪੁਰਿਮਾਵਤ੍ਥਾਪਿ ਸੀਹਸਦਿਸਂ ਕਤ੍ਵਾ ਦਸ੍ਸਿਤਾ. ਭਾਵਿਨਿ, ਭੂਤੋਪਚਾਰੋਪਿ ਹਿ ਲੋਕਵੋਹਾਰੋ. ਵਿਜ੍ਜਾਭਾਵਸਾਮਞ੍ਞਤੋ ਭੂਤਵਿਜ੍ਜਾ ਇਤਰਵਿਜ੍ਜਾਪਿ ਏਕਜ੍ਝਂ ਗਹੇਤ੍ਵਾ ਪਟਿਚ੍ਚਸਮੁਪ੍ਪਾਦਸਮ੍ਮਸਨਤੋ ਤਂ ਪੁਰੇਤਰਂ ਸਿਦ੍ਧਂ ਵਿਪਾਕਂ ਵਿਯ ਕਤ੍ਵਾ ਆਹ ‘‘ਤਿਸ੍ਸੋ ਵਿਜ੍ਜਾ ਵਿਸੋਧੇਤ੍ਵਾ’’ਤਿ. ਅਨੁਲੋਮਪਟਿਲੋਮਤੋ ਪਵਤ੍ਤਞਾਣਵਸੇਨ ‘‘ਯਮਕਞਾਣਮਨ੍ਥਨੇਨਾ’’ਤਿ ਵੁਤ੍ਤਂ.

ਤਤ੍ਥ ਵਿਹਰਨ੍ਤਸ੍ਸਾਤਿ ਅਜਪਾਲਨਿਗ੍ਰੋਧਮੂਲੇ ਵਿਹਰਨ੍ਤਸ੍ਸ. ਏਕਾਦਸਮੇ ਦਿਵਸੇਤਿ ਸਤ੍ਤਸਤ੍ਤਾਹਤੋ ਪਰਂ ਏਕਾਦਸਮੇ ਦਿਵਸੇ. ਅਚਲਪਲ੍ਲਙ੍ਕੇਤਿ ਇਸਿਪਤਨੇ ਧਮ੍ਮਚਕ੍ਕਪਵਤ੍ਤਨਤ੍ਥਂ ਨਿਸਿਨ੍ਨਪਲ੍ਲਙ੍ਕੇ. ਤਮ੍ਪਿ ਹਿ ਕੇਨਚਿ ਅਪ੍ਪਟਿਵਤ੍ਤਿਯਧਮ੍ਮਚਕ੍ਕਪਵਤ੍ਤਨਤ੍ਥਂ ¶ ਨਿਸਜ੍ਜਾਤਿ ਕਤ੍ਵਾ ਵਜਿਰਾਸਨਂ ਵਿਯ ਅਚਲਪਲ੍ਲਙ੍ਕਂ ਵੁਚ੍ਚਤਿ. ਇਮਸ੍ਮਿਞ੍ਚ ਪਨ ਪਦੇਤਿ ‘‘ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ’’ਤਿਆਦਿਨਯਪ੍ਪਵਤ੍ਤੇ ਇਮਸ੍ਮਿਂ ਸਦ੍ਧਮ੍ਮਕੋਟ੍ਠਾਸੇ. ਧਮ੍ਮਘੋਸੋ…ਪੇ… ਦਸਸਹਸ੍ਸਿਲੋਕਧਾਤੁਂ ਪਟਿਚ੍ਛਾਦੇਸਿ ‘‘ਸਬ੍ਬਤ੍ਥ ਠਿਤਾ ਸੁਣਨ੍ਤੂ’’ਤਿ ਅਧਿਟ੍ਠਾਨੇਨ. ਸੋਲ਼ਸਹਾਕਾਰੇਹੀਤਿ ‘‘ਦੁਕ੍ਖਪਰਿਞ੍ਞਾ, ਸਮੁਦਯਪ੍ਪਹਾਨਂ, ਨਿਰੋਧਸਚ੍ਛਿਕਿਰਿਯਾ, ਮਗ੍ਗਭਾਵਨਾ’’ਤਿ ਏਵਂ ਏਕੇਕਸ੍ਮਿਂ ਮਗ੍ਗੇ ਚਤ੍ਤਾਰਿ ਚਤ੍ਤਾਰਿ ਕਤ੍ਵਾ ਸੋਲ਼ਸਹਿ ਆਕਾਰੇਹਿ.

ਵੁਤ੍ਤੋਯੇਵ, ਨ ਇਧ ਵਤ੍ਤਬ੍ਬੋ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਧਿਪ੍ਪਾਯੋ. ਯਸ੍ਮਾ ਚ ਅਪਰੇਹਿਪਿ ਅਟ੍ਠਹਿ ਕਾਰਣੇਹਿ ਭਗਵਾ ਤਥਾਗਤੋਤਿ ਆਰਭਿਤ੍ਵਾ ਉਦਾਨਟ੍ਠਕਥਾਦੀਸੁਪਿ (ਉਦਾ. ਅਟ੍ਠ. ੧੮; ਇਤਿਵੁ. ੩੮) ਤਥਾਗਤਪਦਸ੍ਸ ਅਤ੍ਥੋ ਵੁਤ੍ਤੋ ਏਵ, ਤਸ੍ਮਾ ਤਤ੍ਥ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ ¶ . ਯਦਿਪਿ ਭਗਵਾ ਨ ਬੋਧਿਪਲ੍ਲਙ੍ਕੇ ਨਿਸਿਨ੍ਨਮਤ੍ਤੋਵ ਅਭਿਸਮ੍ਬੁਦ੍ਧੋ ਜਾਤੋ, ਤਥਾਪਿ ਤਾਯ ਨਿਸਜ੍ਜਾਯ ਨਿਸਿਨ੍ਨੋਵ ਪਨੁਜ੍ਜ ਸਬ੍ਬਪਰਿਸ੍ਸਯਂ ਅਭਿਸਮ੍ਬੁਦ੍ਧੋ ਜਾਤੋ. ਤਥਾ ਹਿ ਤਂ ‘‘ਅਪਰਾਜਿਤਪਲ੍ਲਙ੍ਕ’’ਨ੍ਤਿ ਵੁਚ੍ਚਤਿ. ਤਸ੍ਮਾ ‘‘ਯਾਵ ਬੋਧਿਪਲ੍ਲਙ੍ਕਾ ਵਾ’’ਤਿ ਵਤ੍ਵਾ ਤੇਨ ਅਪਰਿਤੁਸ੍ਸਨ੍ਤੋ ‘‘ਯਾਵ ਅਰਹਤ੍ਤਮਗ੍ਗਞਾਣਾ ਵਾ’’ਤਿ ਆਹ.

ਇਤਿ ਰੂਪਨ੍ਤਿ ਏਤ੍ਥ ਇਤਿ-ਸਦ੍ਦੋ ਨਿਦਸ੍ਸਨਤ੍ਥੋ. ਤੇਨ ਰੂਪਂ ਸਰੂਪਤੋ ਪਰਿਮਾਣਤੋ ਪਰਿਚ੍ਛੇਦਤੋ ਦਸ੍ਸਿਤਨ੍ਤਿ ਆਹ ‘‘ਇਦਂ ਰੁਪ’’ਨ੍ਤਿਆਦਿ. ‘‘ਇਦਂ ਰੂਪ’’ਨ੍ਤਿ ਹਿ ਇਮਿਨਾ ਭੂਤੁਪਾਦਾਯਭੇਦਰੂਪਂ ਸਰੂਪਤੋ ਦਸ੍ਸਿਤਂ. ਏਤ੍ਤਕਂ ਰੂਪਨ੍ਤਿ ਇਮਿਨਾ ਤਂ ਪਰਿਮਾਣਤੋ ਦਸ੍ਸਿਤਂ. ਤਸ੍ਸ ਚ ਪਰਿਮਾਣਸ੍ਸ ਏਕਨ੍ਤਭਾਵਦਸ੍ਸਨੇਨ ‘‘ਨ ਇਤੋ ਭਿਯ੍ਯੋ ਰੂਪਂ ਅਤ੍ਥੀ’’ਤਿ ਵੁਤ੍ਤਂ. ਸਭਾਵਤੋਤਿ ਸਲਕ੍ਖਣਤੋ. ਸਰਸਤੋਤਿ ਸਕਿਚ੍ਚਤੋ. ਪਰਿਯਨ੍ਤਤੋਤਿ ਪਰਿਮਾਣਪਰਿਯਨ੍ਤਤੋ. ਪਰਿਚ੍ਛੇਦਤੋਤਿ ਯਤ੍ਤਕੇ ਠਾਨੇ ਤਸ੍ਸ ਪਵਤ੍ਤਿ, ਤਸ੍ਸ ਪਰਿਚ੍ਛੇਦਨਤੋ. ਪਰਿਚ੍ਛਿਨ੍ਦਨਤੋਤਿ ਪਰਿਯੋਸਾਨਪ੍ਪਤ੍ਤਿਤੋ. ਤਂ ਸਬ੍ਬਂ ਦਸ੍ਸਿਤਂ ਹੋਤਿ ਯਥਾਵੁਤ੍ਤੇਨ ਵਿਭਾਗੇਨ. ਅਯਂ ਰੂਪਸ੍ਸ ਸਮੁਦਯੋ ਨਾਮਾਤਿ ਅਯਂ ਆਹਾਰਾਦਿ ਰੂਪਸ੍ਸ ਸਮੁਦਯੋ ਨਾਮ. ਤੇਨਾਹ ‘‘ਏਤ੍ਤਾਵਤਾ’’ਤਿਆਦਿ. ਅਤ੍ਥਙ੍ਗਮੋਤਿ ਨਿਰੋਧੋ. ‘‘ਆਹਾਰਸਮੁਦਯਾ ਆਹਾਰਨਿਰੋਧਾ’’ਤਿ ਚ ਅਸਾਧਾਰਣਮੇਵ ਗਹੇਤ੍ਵਾ ਸੇਸੇ ਆਦਿ-ਸਦ੍ਦੇਨ ਸਙ੍ਗਣ੍ਹਾਤਿ.

ਪਣ੍ਣਾਸਲਕ੍ਖਣਪਟਿਮਣ੍ਡਿਤਨ੍ਤਿ ¶ ਪਣ੍ਣਾਸਉਦਯਬ੍ਬਯਲਕ੍ਖਣਵਿਭੂਸਿਤਂ ਸਮੁਦਯਤ੍ਥਙ੍ਗਮਗਹਣਤੋ. ਖੀਣਾਸਵਤ੍ਤਾਤਿ ਅਨਵਸੇਸਂ ਸਾਵਸੇਸਞ੍ਚ ਆਸਵਾਨਂ ਪਰਿਕ੍ਖੀਣਤ੍ਤਾ. ਅਨਾਗਾਮੀਨਮ੍ਪਿ ਹਿ ਭਯਂ ਚਿਤ੍ਤੁਤ੍ਰਾਸੋ ਚ ਨ ਹੋਤੀਤਿ. ਞਾਣਸਂਵੇਗੋ ਭਯਤੂਪਟ੍ਠਾਨਞਾਣਂ. ਇਤਰੇਸਂ ਪਨ ਦੇਵਾਨਨ੍ਤਿ ਅਖੀਣਾਸਵੇ ਦੇਵੇ ਸਨ੍ਧਾਯ ਵਦਤਿ. ਭੋਤਿ ਧਮ੍ਮਾਲਪਨਮਤ੍ਤਨ੍ਤਿ ਵਾਚਸਿਕਂ ਤਥਾਲਪਨਮਤ੍ਤਂ.

ਚਕ੍ਕਨ੍ਤਿ ਸਤ੍ਥੁ ਆਣਾਚਕ੍ਕਂ, ਤਂ ਪਨ ਧਮ੍ਮਤੋ ਆਗਤਨ੍ਤਿ ਧਮ੍ਮਚਕ੍ਕਂ. ਤਤ੍ਥ ਅਰਿਯਸਾਵਕਾਨਂ ਪਟਿਵੇਧਧਮ੍ਮਤੋ ਆਗਤਨ੍ਤਿ ਧਮ੍ਮਚਕ੍ਕਂ. ਇਤਰੇਸਂ ਦੇਸਨਾਧਮ੍ਮਤੋ ਆਗਤਨ੍ਤਿ ਧਮ੍ਮਚਕ੍ਕਂ. ਦੁਵਿਧੇਪਿ ਞਾਣਂ ਪਧਾਨਨ੍ਤਿ ਞਾਣਸੀਸੇਨ ਵੁਤ੍ਤਂ ‘‘ਪਟਿਵੇਧਞਾਣਮ੍ਪਿ ਦੇਸਨਾਞਾਣਮ੍ਪੀ’’ਤਿ. ਇਦਾਨਿ ਤਂ ਞਾਣਦ੍ਵਯਂ ਸਰੂਪਤੋ ਦਸ੍ਸੇਤੁਂ ‘‘ਪਟਿਵੇਧਞਾਣਂ ਨਾਮਾ’’ਤਿਆਦਿ ਵੁਤ੍ਤਂ. ਯਸ੍ਮਾ ਚਸ੍ਸ ਞਾਣਸ੍ਸ ਸੁਪ੍ਪਟਿਵਿਦ੍ਧਤ੍ਤਾ ਭਗਵਾ ਤਾਨਿ ਸਟ੍ਠਿ ਨਯਸਹਸ੍ਸਾਨਿ ਵੇਨੇਯ੍ਯਾਨਂ ਦਸ੍ਸੇਤੁਂ ਸਮਤ੍ਥੋ ਅਹੋਸਿ, ਤਸ੍ਮਾ ਤਾਨਿ ਸਟ੍ਠਿ ਨਯਸਹਸ੍ਸਾਨਿ ਤੇਨ ਞਾਣੇਨ ਸਦ੍ਧਿਂਯੇਵ ਸਿਦ੍ਧਾਨੀਤਿ ਕਤ੍ਵਾ ਦਸ੍ਸੇਨ੍ਤੋ ‘‘ਸਟ੍ਠਿਯਾ ਚ ਨਯਸਹਸ੍ਸੇਹਿ ਪਟਿਵਿਜ੍ਝੀ’’ਤਿ ਆਹ. ਤਿਪਰਿਵਟ੍ਟਨ੍ਤਿ ਇਦਂ ਦੁਕ੍ਖਨ੍ਤਿ ਚ, ਪਰਿਞ੍ਞੇਯ੍ਯਨ੍ਤਿ ਚ, ਪਰਿਞ੍ਞਾਤਨ੍ਤਿ ਚ ਏਵਂ ਤਿਪਰਿਵਟ੍ਟਂ, ਤਂਯੇਵ ਦ੍ਵਾਦਸਾਕਾਰਂ. ਤਨ੍ਤਿ ਦੇਸਨਾਞਾਣਂ ਪਵਤ੍ਤੇਤਿ ਏਸ ਭਗਵਾ. ਅਪ੍ਪਟਿਪੁਗ੍ਗਲੋਤਿ ਪਤਿਨਿਧਿਭੂਤਪੁਗ੍ਗਲਰਹਿਤੋ. ਏਕਸਦਿਸਸ੍ਸਾਤਿ ਨਿਬ੍ਬਿਕਾਰਸ੍ਸ.

ਸੀਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਖਜ੍ਜਨੀਯਸੁਤ੍ਤਵਣ੍ਣਨਾ

੭੯. ਵਿਪਸ੍ਸਨਾਵਸੇਨਾਤਿ ¶ ਏਤਰਹਿ ਰੂਪਵੇਦਨਾਦਯੋ ਅਨੁਸ੍ਸਰਿਤ੍ਵਾ ‘‘ਪੁਬ੍ਬੇਪਾਹਂ ਏਵਂਵੇਦਨੋ ਅਹੋਸਿ’’ਨ੍ਤਿ ਅਤੀਤਾਨਂ ਰੂਪਵੇਦਨਾਦੀਨਂ ਪਚ੍ਚੁਪ੍ਪਨ੍ਨੇਹਿ ਵਿਸੇਸਾਭਾਵਦਸ੍ਸਨਾ ਵਿਪਸ੍ਸਨਾ, ਤਸ੍ਸਾ ਵਿਪਸ੍ਸਨਾਯ ਵਸੇਨ. ਯ੍ਵਾਯਂ ‘‘ਨ ਇਦਂ ਅਭਿਞ੍ਞਾਵਸੇਨਾ’’ਤਿ ਪਟਿਕ੍ਖੇਪੋ ਕਤੋ, ਤਸ੍ਸ ਕਾਰਣਂ ਦਸ੍ਸੇਨ੍ਤੋ ‘‘ਅਭਿਞ੍ਞਾਵਸੇਨ ਹੀ’’ਤਿਆਦਿਮਾਹ. ਖਨ੍ਧਪਟਿਬਦ੍ਧਾ ਨਾਮ ਗੋਤ੍ਤਵਣ੍ਣਹਾਰਾਦਯੋ. ਏਵਂ ਅਨੁਸ੍ਸਰਨ੍ਤੋਤਿ ਯਥਾਵੁਤ੍ਤਵਿਪਸ੍ਸਨਾਵਸੇਨ ਅਨੁਸ੍ਸਰਨ੍ਤੋ. ਸਭਾਵਧਮ੍ਮਾਨਂ ਏਵ ਅਨੁਸ੍ਸਰਣਸ੍ਸ ਵੁਤ੍ਤਤ੍ਤਾ ‘‘ਸੁਞ੍ਞਤਾਪਬ੍ਬ’’ਨ੍ਤਿ ਵੁਤ੍ਤਂ.

ਯਸ੍ਮਾ ¶ ਤੇ ਏਵ ਰੂਪਾਦਯੋ ਨੇਵ ਅਤ੍ਤਾ, ਨ ਅਤ੍ਤਨਿਯਾ ਅਸਾਰਾ ਅਨਿਸ੍ਸਰਾ, ਤਸ੍ਮਾ ਤਤੋ ਸੁਞ੍ਞਾ, ਤੇਸਂ ਭਾਵੋ ਸੁਞ੍ਞਤਾ, ਤਸ੍ਸਾ ਲਕ੍ਖਣਂ ਰੁਪ੍ਪਨਾਦਿਕਂ ਦਸ੍ਸੇਤੁਂ.

ਕਿਞ੍ਚਾਤਿ ਹੇਤੁਅਤ੍ਥਜੋਤਕੇ ਕਾਰਣੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਕਿਞ੍ਚਾਤਿ ਕਾਰਣਪੁਚ੍ਛਾ, ਕੇਨ ਕਾਰਣੇਨ ਰੂਪਂ ਵਦੇਥਾ’’ਤਿ. ਏਤਨ੍ਤਿ ਏਤਂ ਭੂਤੁਪਾਦਾਯਭੇਦਂ ਧਮ੍ਮਜਾਤਂ. ਕੇਨ ਕਾਰਣੇਨ ਰੂਪਂ ਨਾਮਾਤਿ ਕਿਂ ਕਾਰਣਂ ਨਿਸ੍ਸਾਯ ਰੂਪਨ੍ਤਿ ਵੁਚ੍ਚਤੀਤਿ ਅਤ੍ਥੋ. ਕਾਰਣੁਦ੍ਦੇਸੋਤਿ ਕਾਰਣਸ੍ਸ ਉਦ੍ਦਿਸਨਂ. ਰੁਪ੍ਪਤੀਤਿ ਏਤ੍ਥ ਰੂਪਂ ਨਾਮ ਸੀਤਾਦਿਵਿਰੋਧਿਪਚ੍ਚਯਸਨ੍ਨਿਪਾਤੇਨ ਵਿਸਦਿਸੁਪ੍ਪਤ੍ਤਿ. ਤੇਨਾਹ ‘‘ਸੀਤੇਨਪੀ’’ਤਿਆਦਿ. ਪਬ੍ਬਤਪਾਦੇਤਿ ਚਕ੍ਕਵਾਲ਼ਪਬ੍ਬਤਪਾਦੇ, ਸੋ ਪਨ ਤਤ੍ਥ ਅਚ੍ਚੁਗ੍ਗਤੋ ਪਾਕਾਰੋ ਵਿਯ ਠਿਤੋ. ਤਥਾ ਹਿ ਤਤ੍ਥ ਸਤ੍ਤਾ ਓਲਮ੍ਬਨ੍ਤਾ ਤਿਟ੍ਠਨ੍ਤਿ. ਹਤ੍ਥਪਾਸਾਗਤਾਤਿ ਹਤ੍ਥਪਾਸਂ ਆਗਤਾ ਉਪਾਗਤਾ. ਤਤ੍ਥਾਤਿ ਤਸ੍ਮਿਂ ਹਤ੍ਥਪਾਸਾਗਤੇ ਸਤ੍ਤੇ. ਛਿਜ੍ਜਿਤ੍ਵਾਤਿ ਮੁਚ੍ਛਾਪਤ੍ਤਿਯਾ ਮੁਚ੍ਚਿਤ੍ਵਾ, ਅਙ੍ਗਪਚ੍ਚਙ੍ਗਉਚ੍ਛੇਦਵਸੇਨ ਵਾ ਪਰਿਚ੍ਛਿਜ੍ਜਿਤ੍ਵਾ. ਅਚ੍ਚਨ੍ਤਖਾਰੇ ਉਦਕੇਤਿ ਆਤਪਸਨ੍ਤਾਪਾਭਾਵੇਨ ਅਤਿਸੀਤਭਾਵਮੇਵ ਸਨ੍ਧਾਯ ਅਚ੍ਚਨ੍ਤਖਾਰਤਾ ਵੁਤ੍ਤਾ ਸਿਯਾ. ਨ ਹਿ ਤਂ ਕਪ੍ਪਸਣ੍ਠਾਨਉਦਕਂ ਸਮ੍ਪਤ੍ਤਿਕਰਮਹਾਮੇਘਵੁਟ੍ਠਂ ਪਥਵੀਸਨ੍ਧਾਰਕਂ ਕਪ੍ਪਵਿਨਾਸਉਦਕਂ ਵਿਯ ਖਾਰਂ ਭਵਿਤੁਂ ਅਰਹਤਿ, ਤਥਾ ਸਤਿ ਪਥਵੀਪਿ ਵਿਲੀਯੇਯ੍ਯਾਤਿ. ਮਹਿਂਸਕਰਟ੍ਠਂ ਨਾਮ ਹਿਮਵਨ੍ਤਪਦੇਸੇ ਏਕਂ ਰਟ੍ਠਂ.

ਅਵੀਚਿਮਹਾਨਿਰਯੇਤਿ ਸਉਸ੍ਸਦਂ ਅਵੀਚਿਨਿਰਯਂ ਵੁਤ੍ਤਂ. ਗਙ੍ਗਾਪਿਟ੍ਠੇਤਿ ਗਙ੍ਗਾਤੀਰੇ.

ਸਰਨ੍ਤਾ ਗਚ੍ਛਨ੍ਤੀਤਿ ਸਰੀਸਪਪਦਸ੍ਸ ਅਤ੍ਥਂ ਵਦਤਿ. ਏਤਨ੍ਤਿ ਰੁਪ੍ਪਨਂ. ਯਥਾ ਕਠਿਨਤਾ ਪਥਵਿਯਾ ਪਚ੍ਚਤ੍ਤਲਕ੍ਖਣਂ, ਏਵਂ ਰੁਪ੍ਪਨਂ ਰੂਪਕ੍ਖਨ੍ਧਸ੍ਸ ਪਚ੍ਚਤ੍ਤਲਕ੍ਖਣਂ, ਸਭਾਵਭੂਤਲਕ੍ਖਣਨ੍ਤਿ ਅਤ੍ਥੋ.

ਪੁਰਿਮਸਦਿਸਨ੍ਤਿ ¶ ਪੁਰਿਮੇ ਰੂਪਕ੍ਖਨ੍ਧੇ ਵੁਤ੍ਤੇਨ ਸਦਿਸਂ. ਤਂ ‘‘ਕਿਨ੍ਤਿ ਕਾਰਣਪੁਚ੍ਛਾ’’ਤਿਆਦਿਨਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸੁਖਂ ਇਟ੍ਠਾਰਮ੍ਮਣਂ. ਸੁਖਾਦੀਨਂ ਵੇਦਨਾਨਂ. ਪਚ੍ਚਯਤੋਤਿ ਆਰਮ੍ਮਣਪਚ੍ਚਯਤੋ. ਅਯਮਤ੍ਥੋਤਿ ‘‘ਸੁਖਾਰਮ੍ਮਣਂ ਸੁਖਨ੍ਤਿ ਵੁਚ੍ਚਤੀ’’ਤਿ ਅਯਮਤ੍ਥੋ. ਉਤ੍ਤਰਪਦਲੋਪੇਨ ਹੇਸ ਨਿਦ੍ਦੇਸੋ. ਵੇਦਯਤੀਤਿ ਅਨੁਭਵਤਿ. ਵੇਦਯਿਤਲਕ੍ਖਣਾਤਿ ਅਨੁਭਵਨਲਕ੍ਖਣਾ.

ਨੀਲਪੁਪ੍ਫੇਤਿ ਨੀਲਵਣ੍ਣਪੁਪ੍ਫੇ. ਵਤ੍ਥੇ ਵਾਤਿ ਨੀਲਵਤ੍ਥੇ. ਵਾ-ਸਦ੍ਦੇਨ ਵਣ੍ਣਧਾਤੁਆਦਿਂ ਸਙ੍ਗਣ੍ਹਾਤਿ. ਅਪ੍ਪਨਂ ਵਾ ਝਾਨਂ ਵਾਪੇਨ੍ਤੋ. ਉਪ੍ਪਜ੍ਜਨਸਞ੍ਞਾਪੀਤਿ ਯਂ ¶ ਕਿਞ੍ਚਿ ਨੀਲਂ ਰੂਪਾਯਤਨਂ ਆਰਬ੍ਭ ਉਪ੍ਪਜ੍ਜਨਸਞ੍ਞਾਪਿ, ਯਾ ਪਕਿਣ੍ਣਕਸਞ੍ਞਾਤਿ ਵੁਚ੍ਚਤਿ.

ਰੂਪਤ੍ਤਾਯਾਤਿ ਰੂਪਭਾਵਾਯ. ਯਾਗੁਮੇਵਾਤਿ ਯਾਗੁਭਾਵਿਨਮੇਵ ਵਤ੍ਥੁਂ. ਯਾਗੁਤ੍ਤਾਯ ਯਾਗੁਭਾਵਾਯ. ਪਚਤਿ ਨਾਮ ਪੁਗ੍ਗਲੋ. ਏਵਨ੍ਤਿ ਯਥਾ ਯਾਗੁਆਦਿਵਤ੍ਥੁਂ ਪੁਰਿਸੋ ਯਾਗੁਆਦਿਅਤ੍ਥਾਯ ਪਚਤਿ ਨਿਪ੍ਫਾਦੇਤਿ, ਅਯਂ ਏਵਂ ਰੁਪ੍ਪਨਾਦਿਸਭਾਵੇ ਧਮ੍ਮਸਮੂਹੇ ਯਥਾਸਕਂ ਪਚ੍ਚਯੇਹਿ ਅਭਿਸਙ੍ਖਰਿਯਮਾਨੇ ਚੇਤਨਾਪਧਾਨੋ ਧਮ੍ਮਸਮੂਹੋ ਪਵਤ੍ਤਨਤ੍ਥਂ ਵਿਸੇਸਪਚ੍ਚਯੋ ਹੁਤ੍ਵਾ ਤੇ ਅਭਿਸਙ੍ਖਰੋਤਿ ਨਿਰੋਪੇਤਿ ਨਿਬ੍ਬਤ੍ਤੇਤਿ. ਤੇਨਾਹ ‘‘ਪਚ੍ਚਯੇਹੀ’’ਤਿਆਦਿ. ਰੂਪਮੇਵਾਤਿ ਰੂਪਸਭਾਵਮੇਵ, ਨ ਅਞ੍ਞਂ ਸਭਾਵਂ. ਅਭਿਸਙ੍ਖਰੋਤੀਤਿ ਇਤਰੇਹਿ ਪਚ੍ਚਯਧਮ੍ਮੇਹਿ ਅਧਿਕਂ ਸੁਟ੍ਠੁ ਪਚ੍ਚਯਤਂ ਕਰੋਤਿ. ‘‘ਉਪਗਚ੍ਛਤਿ ਯਾਪੇਤਿ ਆਯੂਹਤੀ’’ਤਿ ਤਸ੍ਸੇਵ ਵੇਵਚਨਾਨਿ. ਅਭਿਸਙ੍ਖਰਣਮੇਵ ਹਿ ਆਯੂਹਨਾਦੀਨਿ. ਨਿਬ੍ਬਤ੍ਤੇਤੀਤਿ ਤੇਸਂ ਧਮ੍ਮਾਨਂ ਰੁਪ੍ਪਨਾਦਿਭਾਵੇਨ ਨਿਬ੍ਬਤ੍ਤਿਯਾ ਪਚ੍ਚਯੋ ਹੋਤੀਤਿ ਅਤ੍ਥੋ. ਚੇਤਯਿਤਲਕ੍ਖਣਸ੍ਸ ਸਙ੍ਖਾਰਸ੍ਸਾਤਿ ਇਦਂ ਸਙ੍ਖਾਰਕ੍ਖਨ੍ਧਧਮ੍ਮਾਨਂ ਚੇਤਨਾਪਧਾਨਤ੍ਤਾ ਵੁਤ੍ਤਂ. ਤਥਾ ਹਿ ਭਗਵਾ ਸੁਤ੍ਤਨ੍ਤਭਾਜਨੀਯੇ ਸਙ੍ਖਾਰਕ੍ਖਨ੍ਧਂ ਵਿਭਜਨ੍ਤੇਨ ਚੇਤਨਾਵ ਵਿਭਤ੍ਤਾ.

ਵਾਤਿਙ੍ਗਣਂ ਬ੍ਰਹਤਿਫਲਂ. ਚਤੁਰਸ੍ਸਵਲ੍ਲੀਤਿ ਤਿਵੁਤਾਲਤਾ. ਅਖਾਰਿਕਨ੍ਤਿ ਖਾਰਰਸਰਹਿਤਂ, ਤਂ ਪਨ ਪਣ੍ਣਫਲਾਦਿ. ਯਤ੍ਥ ਲੋਣਰਸੋ ਅਧਿਕੋ, ਤਂ ਲੋਣਿਕਨ੍ਤਿ ਆਹ ‘‘ਲੋਣਯਾਗੂ’’ਤਿਆਦਿ. ਅਮ੍ਬਿਲਾਦਿਭੇਦਂ ਰਸਂ.

ਆਕਾਰਸਣ੍ਠਾਨਗਹਣਵਸੇਨਾਤਿ ਨੀਲਪੀਤਾਦਿਆਕਾਰਗਹਣਵਸੇਨ ਚੇਵ ਵਟ੍ਟਚਤੁਰਸ੍ਸਾਦਿਸਣ੍ਠਾਨਗਹਣਵਸੇਨ ਚ. ਵਿਨਾਪਿ ਆਕਾਰਸਣ੍ਠਾਨਾਤਿ ਆਕਾਰਸਣ੍ਠਾਨੇਹਿ ਵਿਨਾ, ਤੇ ਠਪੇਤ੍ਵਾਪਿ. ਪਚ੍ਚਤ੍ਤਭੇਦਗਹਣਵਸੇਨਾਤਿ ਤਸ੍ਸ ਤਸ੍ਸ ਆਰਮ੍ਮਣਸ੍ਸ ਪਭੇਦਗਹਣਵਸੇਨ. ਅਸਮ੍ਮੋਹਤੋਤਿ ਯਾਥਾਵਤੋ. ਵਿਸੇਸੋ ਵਿਸੇਸਤ੍ਥਦੀਪਨਤੋ, ਅਵਿਸੇਸੋ ਅਯਂ ਧਮ੍ਮੋ ਅਵਿਸੇਸਦੀਪਨਤੋ. ਤੇਨਾਹ ‘‘ਵਿਸੇਸੋ ਵੇਦਿਤਬ੍ਬੋ’’ਤਿ. ਜਾਨਨਞ੍ਹਿ ਅਵਿਸਿਟ੍ਠਂ, ਤਂ ਸਮਾਸਪਦਤੋ ਉਪਸਗ੍ਗਾ ਵਿਸੇਸੇਨ੍ਤਿ. ਤਥਾ ਹਿ ਸਞ੍ਜਾਨਨਪਦਂ ਪਚ੍ਚਭਿਞ੍ਞਾਣਨਿਮਿਤ੍ਤਂ ਆਕਾਰਗਹਣਮਤ੍ਤਂ ਬੋਧੇਤਿ, ਵਿਜਾਨਨਪਦਂ ਤਤੋ ਵਿਸਿਟ੍ਠਵਿਸਯਗਹਣਂ ¶ . ਪਜਾਨਨਪਦਂ ਪਨ ਤਤੋਪਿ ਵਿਸਿਟ੍ਠਤਰਂ ਪਕਾਰਤੋ ਅਵਬੋਧਂ ਬੋਧੇਤਿ. ਤੇਨਾਹ ‘‘ਤਸ੍ਸਾਪੀ’’ਤਿਆਦਿ. ਆਰਮ੍ਮਣਸਞ੍ਜਾਨਨਮਤ੍ਤਮੇਵਾਤਿ ਨੀਲਾਦਿਭੇਦਸ੍ਸ ਆਰਮ੍ਮਣਸ੍ਸ ¶ ਸਲ੍ਲਕ੍ਖਣਮਤ੍ਤਮੇਵ. ਅਵਧਾਰਣੇਨ ਲਕ੍ਖਣਪਟਿਵੇਧਤ੍ਤਂ ਨਿਵਤ੍ਤੇਤਿ. ਤੇਨਾਹ ‘‘ਅਨਿਚ੍ਚ’’ਨ੍ਤਿਆਦਿ. ਞਾਣਸਮ੍ਪਯੁਤ੍ਤਚਿਤ੍ਤੇਹਿ ਵਿਪਸ੍ਸਨ੍ਤਸ੍ਸ ਵਿਪਸ੍ਸਨਾਯ ਪਗੁਣਭਾਵੇ ਸਤਿ ਞਾਣਵਿਪ੍ਪਯੁਤ੍ਤੇਨ ਚਿਤ੍ਤੇਨਪਿ ਵਿਪਸ੍ਸਨਾ ਹੋਤਿਯੇਵਾਤਿ ਆਹ ‘‘ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਞ੍ਚ ਪਾਪੇਤੀ’’ਤਿ. ਪਟਿਵੇਧਨ੍ਤਿ ਚ ਉਪਲਦ੍ਧਿਮੇਵ ਵਦਤਿ, ਨ ਪਟਿਵਿਜ੍ਝਨਂ. ਤੇਨਾਹ ‘‘ਉਸ੍ਸਕ੍ਕਿਤ੍ਵਾ ਪਨਾ’’ਤਿਆਦਿ. ਉਸ੍ਸਕ੍ਕਿਤ੍ਵਾਤਿ ਉਸ੍ਸਕ੍ਕਾਪੇਤ੍ਵਾ ਮਗ੍ਗਪਾਤੁਭਾਵਮ੍ਪਿ ਪਾਪੇਤਿ ਅਸਮ੍ਮੋਹਸਭਾਵਤ੍ਤਾ. ਯਥਾ ਲਕ੍ਖਣਪਟਿਵੇਧਕਾਲੇ ਸਞ੍ਜਾਨਨਲਕ੍ਖਣਵਸੇਨ ਸਞ੍ਞਾਣਅਨੁਰੂਪਵਸੇਨੇਵ ਪਵਤ੍ਤਂ, ਏਵਂ ਵਿਞ੍ਞਾਣਵਿਜਾਨਨਵਸੇਨ ਵਾਯਂ ਅਨੁਰੂਪਵਸੇਨੇਵ ਪਵਤ੍ਤਤੀਤਿ ਦਟ੍ਠਬ੍ਬਂ.

ਇਦਾਨਿ ਤਮਤ੍ਥਂ ਹੇਰਞ੍ਞਿਕਾਦਿਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿਮਾਹ. ਹਿਰਞ੍ਞਂ ਵੁਚ੍ਚਤਿ ਕਹਾਪਣਂ, ਹਿਰਞ੍ਞਜਾਨਨੇ ਨਿਯੁਤ੍ਤੋ ਹੇਰਞ੍ਞਿਕੋ. ਲੋਕਵੋਹਾਰੇ ਅਜਾਤਾ ਅਸਞ੍ਜਾਤਾ ਬੁਦ੍ਧਿ ਏਤਸ੍ਸਾਤਿ ਅਜਾਤਬੁਦ੍ਧਿ, ਬਾਲਦਾਰਕੋ. ਵੋਹਾਰਕੁਸਲੋ ਗਾਮਵਾਸੀ ਪੁਰਿਸੋ ਗਾਮਿਕਪੁਰਿਸੋ. ਉਪਭੋਗਪਰਿਭੋਗਾਰਹਤ੍ਤਾ ਉਪਭੋਗਪਰਿਭੋਗਂ. ਤਮ੍ਬਕਂਸਮਯਤ੍ਤਾ ਕੂਟੋ. ਮਹਾਸਾਰਤ੍ਤਾ ਛੇਕੋ. ਅਡ੍ਢਸਾਰਤ੍ਤਾ ਕਰਟੋ. ਨਿਹੀਨਸਾਰਤ੍ਤਾ ਸਣ੍ਹੋ. ਏਤ੍ਥ ਚ ਯਥਾ ਹੇਰਞ੍ਞਿਕੋ ਕਹਾਪਣਂ ਚਿਤ੍ਤਾਦਿਭਾਵਤੋ ਉਦ੍ਧਂ ਕੂਟਾਦਿਭਾਵਂ ਰੂਪਦਸ੍ਸਨਾਦਿਵਸੇਨ ਉਪ੍ਪਤ੍ਤਿਟ੍ਠਾਨਤੋਪਿ ਜਾਨਨ੍ਤੋ ਅਨੇਕਾਕਾਰਤੋ ਜਾਨਾਤਿ, ਏਵਂ ਪਞ੍ਞਾ ਆਰਮ੍ਮਣਂ ਨਾਨਪ੍ਪਕਾਰਤੋ ਜਾਨਾਤਿ ਪਟਿਵਿਜ੍ਝਤਿ, ਤਾਯ ਸਦ੍ਧਿਂ ਪਵਤ੍ਤਮਾਨਵਿਞ੍ਞਾਣਮ੍ਪਿ ਯਥਾਵਿਸਯਂ ਆਰਮ੍ਮਣਂ ਜਾਨਾਤਿ.

ਏਵਂ ਸ੍ਵਾਯਂ ਨੇਸਂ ਜਾਨਨੇ ਵਿਸੇਸੋ ਅਞ੍ਞੇਸਂ ਅਵਿਸਯੋ, ਬੁਦ੍ਧਾਨਂ ਏਵ ਵਿਸਯੋਤਿ ਇਦਂ ਵਿਸੇਸਂ ਮਿਲਿਨ੍ਦਪਞ੍ਹੇਨ ਵਿਭਾਵੇਤੁਂ ‘‘ਤੇਨਾਹਾ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ.

ਅਤ੍ਤਸੁਞ੍ਞਾਨਂ ਸਭਾਵਧਮ੍ਮਾਨਂ ਧਮ੍ਮਮਤ੍ਤਤਾਯ ਕਥਿਤਤ੍ਤਾ ‘‘ਅਨਤ੍ਤਲਕ੍ਖਣਂ ਕਥੇਤ੍ਵਾ’’ਤਿ ਵੁਤ੍ਤਂ. ਹੇਟ੍ਠਿਮਮਗ੍ਗਾ ਚ ਯਦਿ ਅਧਿਗਤਾ, ਅਰਹਤ੍ਤਸ੍ਸ ਅਨਧਿਗਤਤ੍ਤਾ ‘‘ਏਕਦੇਸਮਤ੍ਤੇਨਾ’’ਤਿ ਵੁਤ੍ਤਂ, ਤਂ ਅਨਿਚ੍ਚਲਕ੍ਖਣਂ ਦਸ੍ਸੇਤੁਂ ਇਦਂ ਪਬ੍ਬਮਾਰਦ੍ਧਂ, ਇਤਰਾਨਿ ਦ੍ਵੇ ਲਕ੍ਖਣਾਨਿ ਤਸ੍ਸ ਪਰਿਹਾਰਭਾਵੇਨਾਤਿ ਅਧਿਪ੍ਪਾਯੋ.

ਯਸ੍ਮਾ ¶ ਪਨੇਤ੍ਥ ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ’’ਤਿਆਦਿਦੇਸਨਾਯ ਤੀਸੁ ਲਕ੍ਖਣੇਸੁ ਇਦਮੇਵ ਪਧਾਨਭਾਵੇਨ ਦਸ੍ਸਿਤਂ, ਇਦਂ ਅਪ੍ਪਧਾਨਭਾਵੇਨਾਤਿ ਨ ਸਕ੍ਕਾ ਵਤ੍ਤੁਂ, ਤਸ੍ਮਾ ‘‘ਤੀਣਿ ਲਕ੍ਖਣਾਨਿ ਸਮੋਧਾਨੇਤ੍ਵਾ ਦਸ੍ਸੇਤੁਮ੍ਪੀ’’ਤਿ ਵੁਤ੍ਤਂ. ਅਪਚਿਨਾਤੀਤਿ ਅਪਚਯਗਾਮਿਧਮ੍ਮੇ ਨਿਵਤ੍ਤੇਤਿ ਏਕਂਸਤੋ ਅਪਚਯਗਾਮਿਪਟਿਪਦਾਯ ¶ ਪਰਿਪੂਰਣਤੋ. ਤੇਨਾਹ ‘‘ਨੋ ਆਚਿਨਾਤੀ’’ਤਿਆਦਿ. ਵਟ੍ਟਂ ਵਿਨਾਸੇਤੀਤਿ ਵਿਧਮਤਿ ਅਦਸ੍ਸਨਂ ਗਮੇਤਿ. ਨੇਵ ਚਿਨਾਤੀਤਿ ਨ ਵਡ੍ਢੇਤਿ. ਤਦੇਵਾਤਿ ਤਂ ਵਟ੍ਟਂ ਏਵ. ਵਿਸ੍ਸਜ੍ਜੇਤੀਤਿ ਛਡ੍ਡੇਤਿ. ਵਿਕਿਰਤੀਤਿ ਵਿਦ੍ਧਂਸੇਤਿ. ਵਿਧੂਪੇਤੀਤਿ ਵਟ੍ਟਤ੍ਤਯਸਙ੍ਖਾਤਂ ਅਗ੍ਗਿਕ੍ਖਨ੍ਧਂ ਵਿਗਤਧੂਮਂ ਵਿਗਤਸਨ੍ਤਾਪਂ ਕਰੋਤੀਤਿ ਅਤ੍ਥੋਤਿ ਆਹ ‘‘ਨਿਬ੍ਬਾਪੇਤੀ’’ਤਿ.

ਏਵਂ ਪਸ੍ਸਨ੍ਤਿਆਦਿ ਅਨਾਗਾਮਿਫਲੇ ਠਿਤਸ੍ਸ ਅਰਿਯਸਾਵਕਸ੍ਸ ਅਗ੍ਗਮਗ੍ਗਫਲਾਧਿਗਮਾਯ ਦੇਸਨਾਤਿ ਅਧਿਪ੍ਪਾਯੇਨਾਹ ‘‘ਵਟ੍ਟਂ ਵਿਨਾਸੇਤ੍ਵਾ ਠਿਤਂ ਮਹਾਖੀਣਾਸਵਂ ਦਸ੍ਸੇਸ੍ਸਾਮੀ’’ਤਿ. ਖੀਣਾਸਵਸ੍ਸ ਅਨਾਗਤਭਾਵਦਸ੍ਸਨਂਯੇਵ, ਸਬ੍ਬਾ ਚਾਯਂ ਹੇਟ੍ਠਿਮਾ ਦੇਸਨਾ ਸੁਦ੍ਧਵਿਪਸ੍ਸਨਾਕਥਾ, ਸਹਪਠਮਮਗ੍ਗਾ ਵਾ ਸਹਵਿਜ੍ਜੂਪਮਧਮ੍ਮਾ ਵਾ ਵਿਪਸ੍ਸਨਾਕਥਾਤਿ ਦਸ੍ਸੇਨ੍ਤੋ ‘‘ਏਤ੍ਤਕੇਨ ਠਾਨੇਨਾ’’ਤਿਆਦਿਮਾਹ.

ਨਮਸ੍ਸਨ੍ਤਿਯੇਵ ਮਹਤਾ ਗਾਰਵਬਹੁਮਾਨੇਨ. ਤੇਨਾਹ ‘‘ਨਮੋ ਤੇ ਪੁਰਿਸਾਜਞ੍ਞਾ’’ਤਿਆਦਿ. ਤਤ੍ਥ ਨਿਦਸ੍ਸਨਂ ਦਸ੍ਸੇਨ੍ਤੋ ‘‘ਆਯਸ੍ਮਨ੍ਤਂ ਨੀਤਤ੍ਥੇਰਂ ਵਿਯਾ’’ਤਿ ਵਤ੍ਵਾ ਤਮਤ੍ਥਂ ਵਿਭਾਵੇਤੁਂ ‘‘ਥੇਰੋ’’ਤਿਆਦਿਮਾਹ. ਤਤ੍ਥ ਖੁਰਗ੍ਗੇਯੇਵਾਤਿ ਕੇਸੋਰੋਪਨਤ੍ਥਂ ਖੁਰਧਾਰਾਯ ਅਗ੍ਗੇ ਸੀਸੇ ਠਪਿਤੇ ਤਚਪਞ੍ਚਕਕਮ੍ਮਟ੍ਠਾਨਮੁਖੇਨ ਭਾਵਨਂ ਅਨੁਯੁਞ੍ਜਨ੍ਤੋ ਅਰਹਤ੍ਤਂ ਪਤ੍ਵਾ. ਬ੍ਰਹ੍ਮਵਿਮਾਨਾਤਿ ਬ੍ਰਹ੍ਮਾਨਂ ਨਿਵਾਸਭੂਤਾ ਵਿਮਾਨਾ.

ਖਜ੍ਜਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਪਿਣ੍ਡੋਲ੍ਯਸੁਤ੍ਤਵਣ੍ਣਨਾ

੮੦. ਅਪਕਰੀਯਤਿ ਏਤੇਨਾਤਿ ਅਪਕਰਣਂ, ਪਦਂ. ਅਪਕਰਣਂ ਪਕਰਣਂ ਕਾਰਣਨ੍ਤਿ ਅਤ੍ਥਤੋ ਏਕਂ. ਤੇਨਾਹ ‘‘ਕਿਸ੍ਮਿਞ੍ਚਿਦੇਵ ਕਾਰਣੇ’’ਤਿ. ਨੀਹਰਿਤ੍ਵਾਤਿ ਅਤ੍ਤਨੋ ਸਮੀਪਚਾਰਭਾਵਤੋ ਅਪਨੇਤ੍ਵਾ. ਤਥਾਕਰਣਞ੍ਚ ਏਵਮੇਤੇ ¶ ਏਤ੍ਤਕਮ੍ਪਿ ਅਪ੍ਪਟਿਰੂਪਂ ਅਕਤ੍ਵਾ ਆਯਤਿਂ ਸਮ੍ਮਾ ਪਟਿਪਜ੍ਜਿਸ੍ਸਨ੍ਤੀਤਿ. ਲਦ੍ਧਬਲਾਤਿ ਲਦ੍ਧਞਾਣਬਲਾ.

ਏਕਦ੍ਵੀਹਿਕਾਯਾਤਿ ਏਕੇਕਸ੍ਸ ਚੇਵ ਦ੍ਵਿਨ੍ਨਂ ਦ੍ਵਿਨ੍ਨਞ੍ਚ ਈਹਿਕਾ ਗਤਿ ਉਪਸਙ੍ਕਮਨਾ ਏਕਦ੍ਵੀਹਿਕਾ. ਤੇਨਾਹ ‘‘ਏਕੇਕੋ ਚੇਵ ਦ੍ਵੇ ਦ੍ਵੇ ਚ ਹੁਤ੍ਵਾ’’ਤਿ. ਪੁਥੁਜ੍ਜਨਾਨਂ ਸਮੁਦਿਤਾਨਂ ਨਾਮ ਕਿਰਿਯਾ ਤਾਦਿਸੀਪਿ ਸਿਯਾਤਿ ਵੁਤ੍ਤਂ ‘‘ਕੇਲ਼ਿਮ੍ਪਿ ਕਰੇਯ੍ਯੁ’’ਨ੍ਤਿ. ਪਰਿਕਪ੍ਪਨਵਸੇਨ ਸਮ੍ਮਾਸਮ੍ਬੁਦ੍ਧਂ ਉਦ੍ਦਿਸ੍ਸ ਪੇਸਲਾ ਭਿਕ੍ਖੂਪਿ ਏਵਂ ਕਰੋਨ੍ਤੀਤਿ.

ਯੁਗਨ੍ਧਰਪਬ੍ਬਤਾਦੀਨਂ ਅਨ੍ਤਰੇ ਸੀਦਨ੍ਤਰਂ ਸਮੁਦ੍ਦਂ ਨਾਮ. ਤਤ੍ਥ ਕਿਰ ਵਾਤੋ ਨ ਵਾਯਤਿ, ਪਤਿਤਂ ਯਂ ¶ ਕਿਞ੍ਚਿਪਿ ਸੀਦਨ੍ਤਰਨਦਿਯਂ ਵਿਲੀਯਨ੍ਤਾ ਸੀਦਨ੍ਤੇਵ, ਤਸ੍ਮਾ ਤਂ ਪਰਿਵਾਰੇਤ੍ਵਾ ਠਿਤਾ ਯੁਗਨ੍ਧਰਾਦਯੋਪਿ ਸੀਦਪਬ੍ਬਤਾ ਨਾਮ. ਤਂ ਸਨ੍ਧਾਯ ਵੁਤ੍ਤਂ ‘‘ਸੀਦਨ੍ਤਰੇ ਸਨ੍ਨਿਸਿਨ੍ਨਂ ਮਹਾਸਮੁਦ੍ਦਂ ਵਿਯਾ’’ਤਿ. ਆਹਾਰਹੇਤੂਤਿ ਆਮਿਸਹੇਤੁ ਸਪ੍ਪਿਤੇਲਾਦਿਨਿਮਿਤ੍ਤਂ, ਤੇਸਂ ਪਣਾਮਨਾ.

ਪਚ੍ਛਿਮਨ੍ਤਿ ਨਿਹੀਨਂ. ਤੇਨਾਹ ‘‘ਲਾਮਕ’’ਨ੍ਤਿ, ਲਾਮਕਨ੍ਤੋ ਇਧਾਧਿਪ੍ਪੇਤੋ –

‘‘ਮਿਗਾਨਂ ਕੋਟ੍ਠੁਕੋ ਅਨ੍ਤੋ, ਪਕ੍ਖੀਨਂ ਪਨ ਵਾਯਸੋ;

ਏਰਣ੍ਡੋ ਅਨ੍ਤੋ ਰੁਕ੍ਖਾਨਂ, ਤਯੋ ਅਨ੍ਤਾ ਸਮਾਗਤਾ’’ਤਿ. –

ਆਦੀਸੁ (ਜਾ. ੧.੩.੧੩੫) ਵਿਯ. ਉਲਤੀਤਿ ਅਭਿਚਰਤਿ. ਅਭਿਸਪਨ੍ਤਿ ਏਤੇਨਾਤਿ ਅਭਿਸਾਪੋ. ਅਭਿਸਾਪਵਤ੍ਥੁ ਪਿਣ੍ਡੋਲ੍ਯਂ. ਅਤ੍ਥੋ ਫਲਂ ਵਸੋ ਏਤਸ੍ਸਾਤਿ ਅਤ੍ਥਵਸਂ, ਕਾਰਣਂ, ਤਮ੍ਪਿ ਤੇਸੁ ਅਤ੍ਥਿ, ਤਤ੍ਥ ਨਿਯੁਤ੍ਤਾਤਿ ਅਤ੍ਥਵਸਿਕਾ.

ਅਨ੍ਤੋ ਹਦਯਸ੍ਸ ਅਬ੍ਭਨ੍ਤਰੇ ਅਨੁਪਵਿਟ੍ਠਾ ਸੋਕਵਤ੍ਥੂਹਿ.

ਅਭਿਜ੍ਝਾਯਿਤਾਤਿ ਅਭਿਜ੍ਝਾਯਨਸੀਲੋ. ਅਭਿਣ੍ਹਪ੍ਪਵਤ੍ਤਿਯਾ ਚੇਵ ਬਹੁਲਭਾਵੇਨ ਚ ਬਹੁਲਰਾਗੋ. ਪੂਤਿਭਾਵੇਨਾਤਿ ਕੁਥਿਤਭਾਵੇਨ. ਬ੍ਯਾਪਾਦੋ ਹਿ ਉਪ੍ਪਜ੍ਜਮਾਨੋ ਚਿਤ੍ਤਂ ਅਪਗਨ੍ਧਂ ਕਰੋਤਿ, ਨ ਸੁਚਿਮਨੁਞ੍ਞਭਾਵਂ. ਭਤ੍ਤਨਿਕ੍ਖਿਤ੍ਤਕਾਕੋ ਵਿਯਾਤਿ ਇਦਂ ਭਤ੍ਤਟ੍ਠਾਨਸ੍ਸ ਅਸਰਣੇਨ ਕਾਕਸ੍ਸ ਨਟ੍ਠਸਤਿਤਾ ਪਞ੍ਞਾਯਤੀਤਿ ਕਤ੍ਵਾ ਵੁਤ੍ਤਂ, ਨ ਭਤ੍ਤਨਿਕ੍ਖਿਤ੍ਤਤਾਯ. ਅਸਣ੍ਠਿਤੋਤਿ ਅਸਣ੍ਠਿਤਚਿਤ੍ਤੋ. ਕਟ੍ਠਤ੍ਥਨ੍ਤਿ ਕਟ੍ਠੇਨ ਕਤ੍ਤਬ੍ਬਕਿਚ੍ਚਂ.

ਪਾਪਵਿਤਕ੍ਕੇਹਿ ਕਤੋ, ਤਸ੍ਮਾ ਤੇ ਅਨਵਸੇਸਤੋ ਪਹਾਤਬ੍ਬਾਤਿ ਦਸ੍ਸਨਤ੍ਥਂ. ਦ੍ਵਿਨ੍ਨਂ ਵੁਤ੍ਤਤ੍ਤਾ ਏਕੋ ਪੁਬ੍ਬਭਾਗੋ, ਇਤਰੋ ਮਿਸ੍ਸਕੋਤਿ ਵਤ੍ਤੁਂ ਯੁਤ੍ਤਨ੍ਤਿ ¶ ਅਧਿਪ੍ਪਾਯੇਨ ‘‘ਏਤ੍ਥ ਚਾ’’ਤਿਆਦਿ ਵੁਤ੍ਤਂ. ਏਵਂ ਤਂ ਭਾਵੇਨ੍ਤਸ੍ਸ ਨਿਰੁਜ੍ਝਨ੍ਤਿ ਏਵਾਤਿ ਏਕੇਕਮਿਸ੍ਸਕਤਾਵਸੇਨ ਗਹੇਤਬ੍ਬਨ੍ਤਿ ਪੋਰਾਣਾ. ਉਪਰਿ ਤਿਪਰਿਵਟ੍ਟਦੇਸਨਾਯ ਅਨਿਮਿਤ੍ਤਸਮਾਧਿਯੇਵ ਦੀਪਿਤੋ. ਤੇਨਾਹ ‘‘ਯਾਵਞ੍ਚਿਦ’’ਨ੍ਤਿ. ਨਿਦ੍ਦੋਸੋਤਿ ਵੀਤਰਾਗਾਦਿਨਾ ਨਿਦ੍ਦੋਸੋ.

ਪਿਣ੍ਡੋਲ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਪਾਲਿਲੇਯ੍ਯਸੁਤ੍ਤਵਣ੍ਣਨਾ

੮੧. ਪਰਿਯਾਦਿਣ੍ਣਰੂਪਚਿਤ੍ਤਾਤਿ ¶ ਰਾਗਾਦੀਹਿ ਪਰਿਯਾਦਿਯਿਤ੍ਵਾ ਖੇਪੇਤ੍ਵਾ ਗਹਿਤਚਿਤ੍ਤਾ.

ਭਗਵਤੋ ਚਾਰੋ ਵਿਦਿਤੋ ਪਰਿਚਯਵਸੇਨ. ਸਤ੍ਥਾ ਪਰਿਭੋਗਂ ਕਰੋਤਿ ਅਨੁਗ੍ਗਣ੍ਹਨ੍ਤੋ ‘‘ਏਵਂ ਹਿਸ੍ਸ ਦੁਗ੍ਗਤਿਮੋਕ੍ਖੋ ਭਵਿਸ੍ਸਤੀ’’ਤਿ. ਅਞ੍ਞਤ੍ਰਾਤਿ ਵਿਨਾ.

ਨਾਗੇਨਾਤਿ ਬੁਦ੍ਧਨਾਗੇਨ ਅਙ੍ਕੁਸਰਹਿਤੇਨ. ਤਤੋ ਏਵ ਉਜੁਭੂਤੇਨ ਚਿਤ੍ਤੇਨ. ਈਸਾਦਨ੍ਤਸ੍ਸ ਨਙ੍ਗਲਸਦਿਸਦਨ੍ਤਸ੍ਸ ਹਤ੍ਥਿਨੋ ਏਵਂ ਚਿਤ੍ਤਂ ਸਮੇਤਿ. ਤਤ੍ਥ ਕਾਰਣਮਾਹ ‘‘ਯਦੇਕੋ ਰਮਤੀ ਵਨੇ’’ਤਿ. ਏਤੇਨ ਕਾਯਵਿਵੇਕੇਨ ਰਤਿਸਾਮਞ੍ਞਂ ਵਦਤਿ.

ਅਤ੍ਤਨੋ ਧਮ੍ਮਤਾਯਾਤਿ ਪਕਤਿਯਾ ਸਯਮੇਵ.

ਆਸਵਾਨਂ ਖਯੋਤਿ ਇਧ ਅਰਹਤ੍ਤਂ ਅਧਿਪ੍ਪੇਤਂ, ਤਂ ਪਨ ਅਗ੍ਗਮਗ੍ਗਾਨਨ੍ਤਰਮੇਵਾਤਿ ਆਹ ‘‘ਮਗ੍ਗਾਨਨ੍ਤਰਂ ਅਰਹਤ੍ਤਫਲ’’ਨ੍ਤਿ. ਵਿਚਯੋ ਦੇਸਨਾਪਞ੍ਞਾ ਅਧਿਪ੍ਪੇਤਾ, ਸਾ ਚ ਅਨੇਕਧਾ ਪਵਤ੍ਤਾ ਏਵਾਤਿ ਵੁਤ੍ਤਂ ‘‘ਵਿਚਯਸੋ’’ਤਿ, ਅਨੇਕਕ੍ਖਤ੍ਤੁਂ ਪਵਤ੍ਤਮਾਨਾਪਿ ਵਿਚਯੋ ਏਵਾਤਿ ਕਤ੍ਵਾ ‘‘ਵਿਚਯੇਨਾ’’ਤਿ ਅਤ੍ਥੋ ਵੁਤ੍ਤੋ. ਸਾਸਨਧਮ੍ਮੋਤਿ ਸੀਲਕ੍ਖਨ੍ਧਾਦਿਪਰਿਦੀਪਨੋ ਪਰਿਯਤ੍ਤਿਧਮ੍ਮੋ. ਪਰਿਵਿਤਕ੍ਕੋ ਉਦਪਾਦਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ, ਏਵਂ ਕੋਟ੍ਠਾਸਤੋ ਪਰਿਚ੍ਛਿਜ੍ਜ ਦੇਸਿਤੇ ਮਯਾ ਧਮ੍ਮੇ ਕਤਮਸ੍ਸ ਜਾਨਨਸ੍ਸ ਅਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਏਕਚ੍ਚਸ੍ਸ ਕਙ੍ਖਾ ਹੋਤਿਯੇਵਾਤਿ ਅਧਿਪ੍ਪਾਯੋ. ਦਿਟ੍ਠਿ ਏਵ ਸਮਨੁਪਸ੍ਸਨਾ ਦਿਟ੍ਠਿਸਮਨੁਪਸ੍ਸਨਾ. ਦਿਟ੍ਠਿਸਙ੍ਖਾਰੋਤਿ ਦਿਟ੍ਠਿਪਚ੍ਚਯੋ ਸਙ੍ਖਾਰੋ. ਤਤੋ ਏਵ ਤਣ੍ਹਾਪਚ੍ਚਯੋ ਹੋਤੀਤਿ ਵੁਤ੍ਤਂ ‘‘ਤਤੋਜੋ ਸੋ ਸਙ੍ਖਾਰੋ’’ਤਿ. ਤਤੋ ਤਣ੍ਹਾਤੋ ਸੋ ਸਙ੍ਖਾਰੋ ਜਾਤੋਤਿ ਚਤੂਸੁ ਏਸ ਦਿਟ੍ਠਿਸਙ੍ਖਾਰੋ ਦਿਟ੍ਠੂਪਨਿਸ੍ਸਯੋ ਸਙ੍ਖਾਰੋ ਜਾਯਤਿ. ਅਵਿਜ੍ਜਾਸਮ੍ਫਸ੍ਸੋਤਿ ¶ ਅਵਿਜ੍ਜਾਸਮ੍ਪਯੁਤ੍ਤਸਮ੍ਫਸ੍ਸੋ. ਏਵਮੇਤ੍ਥ ਭਗਵਾ ਸਲ਼ਾਯਤਨਨਾਮਰੂਪਵਿਞ੍ਞਾਣਾਨਿ ਸਙ੍ਖਾਰਪਕ੍ਖਿਕਾਨੇਵ ਕਤ੍ਵਾ ਦਸ੍ਸੇਤਿ.

ਏਤ੍ਤਕੇ ਠਾਨੇਤਿ ‘‘ਇਧ ਭਿਕ੍ਖਵੇ ਅਸ੍ਸੁਤਵਾ ਪੁਥੁਜ੍ਜਨੋ’’ਤਿਆਦਿਂ ਕਤ੍ਵਾ ਯਾਵ ‘‘ਨ ਮੇ ਭਵਿਸ੍ਸਤੀ’’ਤਿ ਏਤ੍ਤਕੇ ਠਾਨੇ. ਗਹਿਤਗਹਿਤਦਿਟ੍ਠਿਨ੍ਤਿ ਸਕ੍ਕਾਯਦਿਟ੍ਠਿਯਾ ‘‘ਸੋ ਅਤ੍ਤਾ, ਸੋ ਲੋਕੋ’’ਤਿਆਦਿਨਾ ਪਵਤ੍ਤਂ ਸਸ੍ਸਤਦਿਟ੍ਠਿਂ, ਨੋ ਚਸ੍ਸਂ, ਨੋ ਚ ਮੇ ਸਿਯਾ’’ਤਿਆਦਿਨਾ ਪਵਤ੍ਤਂ ਉਚ੍ਛੇਦਦਿਟ੍ਠਿਨ੍ਤਿ ਤਥਾ ਤਥਾ ਗਹਿਤਦਿਟ੍ਠਿਂ. ‘‘ਇਤਿ ਖੋ, ਭਿਕ੍ਖਵੇ, ਸੋਪਿ ਸਙ੍ਖਾਰੋ ਅਨਿਚ੍ਚੋ’’ਤਿਆਦਿਦੇਸਨਾਯ ਵਿਸ੍ਸਜ੍ਜਾਪੇਨ੍ਤੋ ਆਗਤੋ. ਤਤ੍ਥ ਤਤ੍ਥੇਵਾਸ੍ਸ ਉਪ੍ਪਨ੍ਨਦਿਟ੍ਠਿਵਿਵੇਚਨਤੋ ਇਮਿਸ੍ਸਾ ਦੇਸਨਾਯ ਪੁਗ੍ਗਲਜ੍ਝਾਸਯੇਨ ¶ ਪਵਤ੍ਤਿਤਤਾ ਵੇਦਿਤਬ੍ਬਾ, ਤੇਵੀਸਤਿਯਾ ਠਾਨੇਸੁ ਅਰਹਤ੍ਤਪਾਪਨੇਨ ਦੇਸਨਾਵਿਲਾਸੋ. ਤਤੋਜੋ ਸੋ ਸਙ੍ਖਾਰੋਤਿ ਤਤੋ ਵਿਚਿਕਿਚ੍ਛਾਯ ਪਚ੍ਚਯਭੂਤਤਣ੍ਹਾਤੋ ਜਾਤੋ ਵਿਚਿਕਿਚ੍ਛਾਯ ਸਮ੍ਪਯੁਤ੍ਤੋ ਸਙ੍ਖਾਰੋ. ਯਦਿ ਸਹਜਾਤਾਦਿਪਚ੍ਚਯਵਸੇਨ ਤਤੋ ਤਣ੍ਹਾਤੋ ਜਾਤੋਤਿ ਤਤੋਜੋ ਸਙ੍ਖਾਰੋਤਿ ਵੁਚ੍ਚੇਯ੍ਯ, ਇਦਮਯੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਤਣ੍ਹਾਸਮ੍ਪਯੁਤ੍ਤ…ਪੇ… ਜਾਯਤੀ’’ਤਿ ਚੋਦੇਤਿ. ਇਤਰੋ ਉਪਨਿਸ੍ਸਯਕੋਟਿ ਇਧਾਧਿਪ੍ਪੇਤਾਤਿ ਦਸ੍ਸੇਨ੍ਤੋ ‘‘ਅਪ੍ਪਹੀਨਤ੍ਤਾ’’ਤਿ ਵਤ੍ਵਾ ‘‘ਯਸ੍ਸ ਹੀ’’ਤਿਆਦਿਨਾ ਤਮਤ੍ਥਂ ਵਿਵਰਤਿ. ਨ ਹਿ ਤਣ੍ਹਾਯ ਵਿਚਿਕਿਚ੍ਛਾ ਸਮ੍ਭਵਤਿ. ਯਦਿ ਅਸਤਿ ਸਹਜਾਤਕੋਟਿਯਾ ਉਪਨਿਸ੍ਸਯਕੋਟਿਯਾ ਤਣ੍ਹਾਪਚ੍ਚਯਾ ਵਿਚਿਕਿਚ੍ਛਾਯ ਸਮ੍ਭਵੋ ਏਵ. ਦਿਟ੍ਠਿਯਾਪੀਤਿ ਦ੍ਵਾਸਟ੍ਠਿਦਿਟ੍ਠਿਯਾਪਿ. ਤੇਨਾਹ ‘‘ਚਤੂਸੁ ਹੀ’’ਤਿਆਦਿ. ਵੀਸਤਿ ਸਕ੍ਕਾਯਦਿਟ੍ਠਿਯੋ ਸਸ੍ਸਤਦਿਟ੍ਠਿਂ ਉਚ੍ਛੇਦਦਿਟ੍ਠਿਂ ਵਿਚਿਕਿਚ੍ਛਞ੍ਚ ਪਕ੍ਖਿਪਿਤ੍ਵਾ ਪਚ੍ਚੇਕਂ ਅਨਿਚ੍ਚਤਾਮੁਖੇਨ ਵਿਪਸ੍ਸਨਂ ਦਸ੍ਸੇਤ੍ਵਾ ਅਰਹਤ੍ਤਂ ਪਾਪੇਤ੍ਵਾ ਦੇਸਨਾ ਨਿਟ੍ਠਾਪਿਤਾਤਿ ਆਹ ‘‘ਤੇਵੀਸਤਿਯਾ ਠਾਨੇਸੂ’’ਤਿਆਦਿ.

ਪਾਲਿਲੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਪੁਣ੍ਣਮਸੁਤ੍ਤਵਣ੍ਣਨਾ

੮੨. ਦਿਸ੍ਸਤਿ ਅਪਦਿਸ੍ਸਤੀਤਿ ਦੇਸੋ, ਕਾਰਣਂ, ਤਞ੍ਚ ਖੋ ਞਾਪਕਂ ਦਟ੍ਠਬ੍ਬਂ. ਯਞ੍ਹਿ ਸੋ ਜਾਨਿਤੁਕਾਮੋ ਰੁਪ੍ਪਨਾਦਿਸਭਾਵਂ, ਪਠਮਂ ਪਨ ਸਰੂਪਂ ¶ ਪੁਚ੍ਛਿਤ੍ਵਾ ਪੁਨ ਤਸ੍ਸ ਵਿਸੇਸੋ ਪੁਚ੍ਛਿਤਬ੍ਬੋਤਿ ਪਠਮਂ ‘‘ਇਮੇ ਨੁ ਖੋ’’ਤਿਆਦਿਨਾ ਪੁਚ੍ਛਂ ਕਰੋਤਿ, ਇਧਾਪਿ ਚ ਸੋ ਵਿਸੇਸੋ ਏਵ ਤਸ੍ਸ ਭਿਕ੍ਖੁਨੋ ਅਨ੍ਤਨ੍ਤਿ ਦਸ੍ਸੇਤਿ. ਅਜਾਨਨ੍ਤੋ ਵਿਯ ਪੁਚ੍ਛਤਿ ਤੇਸਂ ਹੇਤੁਨ੍ਤਿ ਅਧਿਪ੍ਪਾਯੋ.

ਤਣ੍ਹਾਛਨ੍ਦਮੂਲਕਾ ਪਭਵਤ੍ਤਾ. ਪਞ੍ਚੁਪਾਦਾਨਕ੍ਖਨ੍ਧਾਤਿ ਏਤ੍ਥ ਵਿਸੇਸਤੋ ਤਣ੍ਹੁਪਾਦਾਨਸ੍ਸ ਗਹਣਂ ਇਤਰਸ੍ਸ ਤਗ੍ਗਹਣੇਨੇਵ ਗਹਿਤਂ ਤਦਵਿਨਾਭਾਵਤੋਤਿ ਛਨ੍ਦਰਾਗੋ ਏਵ ਉਦ੍ਧਟੋ. ਇਦਨ੍ਤਿ ਤਪ੍ਪਞ੍ਹਪਟਿਕ੍ਖਿਪਨਂ. ਯਦਿਪਿ ਖਨ੍ਧਾ ਉਪਾਦਾਨੇਹਿ ਅਸਹਜਾਤਾਪਿ ਹੋਨ੍ਤਿ ਉਪਾਦਾਨਸ੍ਸ ਅਨਾਰਮ੍ਮਣਭੂਤਾਪਿ, ਉਪਾਦਾਨਂ ਪਨ ਤੇਹਿ ਸਹਜਾਤਮੇਵ, ਤਦਾਰਮ੍ਮਣਞ੍ਚ ਹੋਤਿਯੇਵਾਤਿ ਦਸ੍ਸੇਤਿ. ਨ ਹਿ ਅਸਹਜਾਤਂ ਅਨਾਰਮ੍ਮਣਞ੍ਚ ਉਪਾਦਾਨਂ ਅਤ੍ਥੀਤਿ. ਇਦਾਨਿ ਤਮਤ੍ਥਂ ਵਿਵਰਿਤ੍ਵਾ ਦਸ੍ਸੇਤੁਂ ‘‘ਤਣ੍ਹਾਸਮ੍ਪਯੁਤ੍ਤਸ੍ਮਿ’’ਨ੍ਤਿਆਦਿ ਵੁਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ. ਆਰਮ੍ਮਣਤੋਤਿ ਆਰਮ੍ਮਣਕਰਣਤੋ. ‘‘ਏਵਂਰੂਪੋ ਸਿਯ’’ਨ੍ਤਿ ਏਵਂਪਵਤ੍ਤਸ੍ਸ ਛਨ੍ਦਰਾਗਸ੍ਸ ‘‘ਏਵਂਵੇਦਨੋ ਸਿਯ’’ਨ੍ਤਿ ਏਵਂਪਵਤ੍ਤਿਯਾ ਅਭਾਵਤੋ ਤਤ੍ਥ ਤਤ੍ਥੇਵ ਨਤਸਙ੍ਖਾਰਾ ਭਿਜ੍ਜਨ੍ਤਿ, ਤਸ੍ਮਾ ਰੂਪਵੇਦਨਾਰਮ੍ਮਣਾਨਂ ਛਨ੍ਦਰਾਗਾਦੀਨਂ ਅਭਾਵਤੋ ਅਤ੍ਥੇਵ ਛਨ੍ਦਰਾਗਵੇਮਤ੍ਤਤਾ. ਛਨ੍ਦਰਾਗਸ੍ਸ ਪਹਾਨਾਦਿਵਸੇਨ ਛਨ੍ਦਰਾਗਪਟਿਸਂਯੁਤ੍ਤਸ੍ਸ ਅਪੁਚ੍ਛਿਤਤ੍ਤਾ, ‘‘ਅਨੁਸਨ੍ਧਿ ਨ ਘਟਿਯਤੀ’’ਤਿ ਵੁਤ੍ਤਂ. ਕਿਞ੍ਚਾਪਿ ਨ ਘਟਿਯਤੀਤਿ ਅਞ੍ਞਸ੍ਸੇਵ ਪੁਚ੍ਛਿਤਤ੍ਤਾ, ਤਥਾਪਿ ਸਾਨੁਸਨ੍ਧਿਕਾਵ ਪੁਚ੍ਛਾ ¶ , ਤਤੋ ਏਵ ਸਾਨੁਸਨ੍ਧਿਕਂ ਵਿਸ੍ਸਜ੍ਜਨਂ. ਤਤ੍ਥ ਕਾਰਣਮਾਹ ‘‘ਤੇਸਂ ਤੇਸ’’ਨ੍ਤਿਆਦਿਨਾ. ਤੇਨ ਅਜ੍ਝਾਸਯਾਨੁਸਨ੍ਧਿਵਸੇਨ ਸਾਨੁਸਨ੍ਧਿਕਾਨੇਵ ਪੁਚ੍ਛਾਵਿਸ੍ਸਜ੍ਜਨਾਨੀਤਿ ਦਸ੍ਸੇਤਿ.

ਪੁਣ੍ਣਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਖਜ੍ਜਨੀਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੯. ਥੇਰਵਗ੍ਗੋ

੧. ਆਨਨ੍ਦਸੁਤ੍ਤਵਣ੍ਣਨਾ

੮੩. ਪਟਿਚ੍ਚਾਤਿ ਨਿਸ੍ਸਯਂ ਕਤ੍ਵਾ. ‘‘ਏਸੋਹਮਸ੍ਮੀ’’ਤਿ ਦਿਟ੍ਠਿਗ੍ਗਾਹੋ, ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨਗ੍ਗਾਹੋ ਚ ਤਣ੍ਹਾਵਸੇਨੇਵ ਹੋਨ੍ਤੀਤਿ ਤਣ੍ਹਾਪਿ ਤਥਾਪਵਤ੍ਤਿਯਾ ਪਚ੍ਚਯਭੂਤਾ ਤਥਾਪਵਤ੍ਤਿ ਏਵਾਤਿ ਵੁਤ੍ਤਂ ‘‘ਅਸ੍ਮੀਤਿ ਏਵਂ ਪਵਤ੍ਤਂ ¶ ਤਣ੍ਹਾਮਾਨਦਿਟ੍ਠਿਪਪਞ੍ਚਤ੍ਤਯਂ ਹੋਤੀ’’ਤਿ. ਦਹਰਸਦ੍ਦੋ ਬਾਲਦਾਰਕੇਪਿ ਪਵਤ੍ਤਤੀਤਿ ਤਤੋ ਵਿਸੇਸਨਤ੍ਥਂ ‘‘ਯੁਵਾ’’ਤਿ ਵੁਤ੍ਤਂ. ਯੁਵਾਪਿ ਏਕੋ ਅਮਣ੍ਡਨਸੀਲੋਤਿ ਤਤੋ ਵਿਸੇਸਨਤ੍ਥਂ ‘‘ਮਣ੍ਡਨਕਜਾਤਿਕੋ’’ਤਿ ਵੁਤ੍ਤਂ. ਤੇਨ ਮੁਖਨਿਮਿਤ੍ਤਪਚ੍ਚਵੇਕ੍ਖਣਸ੍ਸ ਸਬ੍ਭਾਵਂ ਦਸ੍ਸੇਤਿ. ਤਨ੍ਤਿ ਆਦਾਸਮਣ੍ਡਲਂ ਓਲੋਕਯਤੋ. ਪਰਮ੍ਮੁਖਂ ਹੁਤ੍ਵਾ ਪਞ੍ਞਾਯੇਯ੍ਯਾਤਿ ਯਦਿ ਪੁਰਤ੍ਥਿਮਦਿਸਾਭਿਮੁਖਂ ਹੁਤ੍ਵਾ ਠਿਤਂ, ਮੁਖਨਿਮਿਤ੍ਤਮ੍ਪਿ ਪੁਰਤ੍ਥਿਮਦਿਸਾਭਿਮੁਖਮੇਵ ਹੁਤ੍ਵਾ ਪਞ੍ਞਾਯੇਯ੍ਯਾਤਿ ਅਤ੍ਥੋ. ਯਦਿਪਿ ਪਰਸ੍ਸ ਸਦਿਸਸ੍ਸ ਮੁਖਂ ਭਵੇਯ੍ਯ, ਤਥਾਪਿ ਕਾਚਿ ਅਸਦਿਸਤਾ ਭਵੇਯ੍ਯਾਤਿ ਵੁਤ੍ਤਂ ‘‘ਵਣ੍ਣਾਦੀਹਿ ਅਸਦਿਸਂ ਹੁਤ੍ਵਾ ਪਞ੍ਞਾਯੇਯ੍ਯਾ’’ਤਿ. ਨਿਭਾਸਰੂਪਨ੍ਤਿ ਪਟਿਭਾਸਰੂਪਂ. ਨਿਭਾਸਰੂਪਂ ਤਾਵ ਕਂਸਾਦਿਮਯੇ ਪਭਸ੍ਸਰੇ ਮਣ੍ਡਲੇ ਪਞ੍ਞਾਯਤੁ, ਉਦਕੇ ਪਨ ਕਥਨ੍ਤਿ ‘‘ਕੇਨ ਕਾਰਣੇਨਾ’’ਤਿ ਪੁਚ੍ਛਤਿ. ਇਤਰੋ ‘‘ਮਹਾਭੂਤਾਨਂ ਵਿਸੁਦ੍ਧਤਾਯਾ’’ਤਿ ਵਦਨ੍ਤੋ ਤਤ੍ਥਾਪਿ ਯਥਾਲਦ੍ਧਪਭਸ੍ਸਰਭਾਵੇਨੇਵਾਤਿ ਦਸ੍ਸੇਤਿ. ਏਤ੍ਥ ਚ ਮਣ੍ਡਨਜਾਤਿਕੋ ਪੁਰਿਸੋ ਵਿਯ ਪੁਥੁਜ੍ਜਨੋ, ਆਦਾਸਤਲਾਦਯੋ ਵਿਯ ਪਞ੍ਚਕ੍ਖਨ੍ਧਾ, ਮੁਖਨਿਮਿਤ੍ਤਂ ਵਿਯ ‘‘ਅਸ੍ਮੀ’’ਤਿ ਗਹਣਂ, ਮੁਖਨਿਮਿਤ੍ਤਂ ਉਪਾਦਾਯ ਦਿਸ੍ਸਮਾਨਰੂਪਾਦਿ ਵਿਯ ‘‘ਅਸ੍ਮੀ’’ਤਿ ਸਤਿ ‘‘ਅਹਮਸ੍ਮੀ’’ਤਿ ‘‘ਪਰੋਸ੍ਮੀ’’ਤਿਆਦਯੋ ਗਾਹਵਿਸੇਸਾ. ਅਭਿਸਮੇਤੋਤਿ ਅਭਿਸਮਿਤੋ, ਅਯਮੇਵ ਵਾ ਪਾਠੋ.

ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਤਿਸ੍ਸਸੁਤ੍ਤਵਣ੍ਣਨਾ

੮੪. ਮਧੁਰਕਂ ¶ ਵੁਚ੍ਚਤਿ ਕਾਯੇ ਵਿਭਾਰਨ੍ਤਿ ਆਹ – ‘‘ਮਧੁਰਕਜਾਤੋ ਵਿਯਾਤਿ ਸਞ੍ਜਾਤਗਰੁਭਾਵੋ ਵਿਯਾ’’ਤਿ. ਗਰੁਭਾਵੇ ਸਤਿ ਲਹੁਤਾ ਅਨੋਕਾਸਾਵ, ਤਥਾ ਮੁਦੁਤਾ ਕਮ੍ਮਞ੍ਞਤਾ ਚਾਤਿ ਵੁਤ੍ਤਂ ‘‘ਅਕਮ੍ਮਞ੍ਞੋ’’ਤਿ. ‘‘ਕਾਯੇ’’ਤਿ ਆਨੇਤ੍ਵਾ ਵਤ੍ਤਬ੍ਬਂ. ਨ ਪਕ੍ਖਾਯਨ੍ਤੀਤਿ ਪਕਾਸਾ ਹੁਤ੍ਵਾ ਨ ਖਾਯਨ੍ਤਿ. ਤੇਨਾਹ ‘‘ਨ ਪਾਕਟਾ ਹੋਨ੍ਤੀ’’ਤਿ. ਉਪਟ੍ਠਹਨ੍ਤੀਤਿ ਉਪਤਿਟ੍ਠਨ੍ਤਿ. ਨ ਦਿਸ੍ਸਤੀਤਿ ਗਹਣਂ ਨ ਗਚ੍ਛਤਿ. ਮਹਾਵਿਚਿਕਿਚ੍ਛਾਤਿ ਅਟ੍ਠਵਤ੍ਥੁਕਾ ਸੋਲ਼ਸਵਤ੍ਥੁਕਾ ਚ ਵਿਮਤਿ. ਨ ਹਿ ਉਪ੍ਪਜ੍ਜਤਿ ਪਰਿਪਕ੍ਕਕੁਸਲਮੂਲਤ੍ਤਾ.

ਕਾਮਾਨਮੇਤਂ ਅਧਿਵਚਨਨ੍ਤਿ ਪਦਂ ਉਦ੍ਧਰਿਤ੍ਵਾ ਯੇਨ ਅਧਿਪ੍ਪਾਯੇਨ ਭਗਵਤਾ ਨਿਨ੍ਨਂ ਪਲ੍ਲਲਂ ਕਾਮਾਨਂ ਨਿਦਸ੍ਸਨਭਾਵੇਨ ਆਭਤਂ, ਤਂ ਅਧਿਪ੍ਪਾਯਂ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ.

ਤਿਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਯਮਕਸੁਤ੍ਤਵਣ੍ਣਨਾ

੮੫. ਦਿਟ੍ਠਿ ¶ ਏਵ ਦਿਟ੍ਠਿਗਤਂ ‘‘ਗੂਥਗਤਂ ਮੁਤ੍ਤਗਤ’’ਨ੍ਤਿ (ਮ. ਨਿ. ੨.੧੧੯; ਅ. ਨਿ. ੯.੧੧) ਯਥਾ. ਦਿਟ੍ਠਿਗਤਂ ਨਾਮ ਜਾਤਂ ਖਨ੍ਧਵਿਨਿਮੁਤ੍ਤਸ੍ਸ ਸਤ੍ਤਸ੍ਸ ਗਹਿਤਤ੍ਤਾ.

ਕੁਪਿਤੇਤਿ ਦਿਟ੍ਠਿਸਙ੍ਖਾਤਰੋਗੇਨ ਕੁਪਿਤੇ. ਪਗ੍ਗਯ੍ਹਾਤਿ ਤੇਸਂ ਭਿਕ੍ਖੂਨਂ ਸਨ੍ਤਿਕੇ ਵਿਯ ਥੇਰਸ੍ਸ ਸਾਰਿਪੁਤ੍ਤਸ੍ਸ ਸਮ੍ਮੁਖਾ ਅਤ੍ਤਨੋ ਲਦ੍ਧਿਂ ਪਗ੍ਗਯ੍ਹ ‘‘ਏਵਂ ਖ੍ਵਾਹ’’ਨ੍ਤਿ ਏਵਂ ਨਿਚ੍ਛਯੇਨ ਵਤ੍ਤੁਂ ਅਸਕ੍ਕੋਨ੍ਤੋ.

ਅਨੁਯੋਗਵਤ੍ਤਂ ਨਾਮ ਯੇਨ ਯੁਤ੍ਤੋ, ਤਸ੍ਸ ਅਤ੍ਤਨੋ ਗਾਹਂ ਨਿਜ੍ਝਾਨਕ੍ਖਨ੍ਤਿਯਾਵ ਯਾਥਾਵਤੋ ਪਵੇਦਨਂ. ਥੇਰਸ੍ਸ ਅਨੁਯੋਗੇ ਭੁਮ੍ਮਨ੍ਤਿ ‘‘ਤਂ ਕਿਂ ਮਞ੍ਞਸਿ, ਆਵੁਸੋ ਯਮਕਾ’’ਤਿਆਦਿਨਾ ਥੇਰੇਨ ਕਥਿਤਪੁਚ੍ਛਾਯ ਭੁਮ੍ਮਨਿਦ੍ਦੇਸੋ. ਸਚੇ ਤਂ ਆਵੁਸੋਤਿ ਇਦਨ੍ਤਿ ‘‘ਸਚੇ ਤਂ, ਆਵੁਸੋ’’ਤਿ ਏਵਮਾਦਿਕਂ ਇਦਂ ਵਚਨਂ. ਏਤਨ੍ਤਿ ਯਮਕਤ੍ਥੇਰਂ. ਅਞ੍ਞਨ੍ਤਿ ਅਰਹਤ੍ਤਂ. ਵਤ੍ਤਬ੍ਬਾਕਾਰੇਨ ਵਦਨ੍ਤੋ ਅਤ੍ਥਤੋ ਅਰਹਤ੍ਤਂ ਬ੍ਯਾਕਰੋਨ੍ਤੋ ਨਾਮ ਹੋਤੀਤਿ ਅਧਿਪ੍ਪਾਯੇਨ ਵਦਤਿ.

ਏਤਸ੍ਸ ਪਠਮਮਗ੍ਗਸ੍ਸਾਤਿ ਏਤਸ੍ਸ ਇਦਾਨਿਯੇਵ ਤਿਪਰਿਵਟ੍ਟਦੇਸਨਾਵਸਾਨੇ ਤਯਾ ਅਧਿਗਤਸ੍ਸ ਪਠਮਮਗ੍ਗਸ੍ਸ ¶ . ਚਤੂਹਿ ਯੋਗੇਹੀਤਿ ਅਤ੍ਤਤੋ ਪਿਯਤੋ ਉਦਾਸਿਨਤੋ ਵੇਰਿਤੋਤਿ ਚਤੂਹਿਪਿ ਉਪ੍ਪਜ੍ਜਨਅਨਤ੍ਥਯੋਗੇਹਿ.

ਉਪੇਤੀਤਿ ਤਣ੍ਹੁਪਯਦਿਟ੍ਠੁਪਯੇਹਿ ਉਪਾਦਿਯਤਿ ਤਣ੍ਹਾਦਿਟ੍ਠਿਵਤ੍ਥੁਂ ਪਪ੍ਪੋਤਿ. ਉਪਾਦਿਯਤੀਤਿ ਦਲ਼੍ਹਗ੍ਗਾਹਂ ਗਣ੍ਹਾਤਿ. ਅਧਿਤਿਟ੍ਠਤੀਤਿ ਅਭਿਨਿਵਿਸ੍ਸ ਤਿਟ੍ਠਤਿ. ਕਿਨ੍ਤਿ? ‘‘ਅਤ੍ਤਾ ਮੇ’’ਤਿ. ਪਚ੍ਚਤ੍ਥਿਕਾ ਮੇ ਏਤੇਤਿ ਏਤੇ ਰੂਪਵੇਦਨਾਦਯੋ ਪਞ੍ਚੁਪਾਦਾਨਕ੍ਖਨ੍ਧਾ ਮਯ੍ਹਂ ਪਚ੍ਚਤ੍ਥਿਕਾ ਅਨਤ੍ਥਾਵਹਤ੍ਤਾਤਿ ਵਿਪਸ੍ਸਨਾਞਾਣੇਨ ਞਤ੍ਵਾ. ਵਿਪਸ੍ਸਨਾਯ ਯੋਜੇਤ੍ਵਾਤਿ ਵਿਪਸ੍ਸਨਾਯ ਖਨ੍ਧੇ ਯੋਜੇਤ੍ਵਾ.

ਯਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਅਨੁਰਾਧਸੁਤ੍ਤਵਣ੍ਣਨਾ

੮੬. ਤਸ੍ਸੇਵ ਵਿਹਾਰਸ੍ਸਾਤਿ ਮਹਾਵਨੇ ਯਸ੍ਮਿਂ ਵਿਹਾਰੇ ਭਗਵਾ ਵਿਹਰਤਿ, ਤਸ੍ਸੇਵ ਵਿਹਾਰਸ੍ਸ. ਇਮੇਤਿ ਅਞ੍ਞਤਿਤ੍ਥਿਯਾ. ਯਸ੍ਮਾ ਅਯਂ ਥੇਰੋ ¶ ਠਪਨੀਯਂ ਪਞ੍ਹਂ ਠਪਨੀਯਭਾਵੇਨ ਨ ਠਪੇਸਿ, ਤਸ੍ਮਾ. ਅਞ੍ਞਤਿਤ੍ਥਿਯਾ…ਪੇ… ਏਤਦਵੋਚੁਂ. ਤੇਨਾਹ ‘‘ਏਕਦੇਸੇਨ ਸਾਸਨਸਮਯਂ ਜਾਨਨ੍ਤਾ’’ਤਿ.

ਗਹਿਤਮੇਵ ਹੋਤਿ ਤਤੋ ਪਗੇਵ ਸਿਦ੍ਧਤ੍ਤਾ. ਤੇਨਾਹ ‘‘ਤਸ੍ਸ ਮੂਲਤ੍ਤਾ’’ਤਿ. ਏਵਨ੍ਤਿ ‘‘ਦੁਕ੍ਖਞ੍ਚੇਵ ਪਞ੍ਞਪੇਮਿ, ਦੁਕ੍ਖਸ੍ਸ ਚ ਨਿਰੋਧ’’ਨ੍ਤਿ ਏਵਂ. ਵਟ੍ਟਵਿਵਟ੍ਟਮੇਵਾਤਿ ਪਞ੍ਚਨ੍ਨਂ ਪਨ ਖਨ੍ਧਾਨਂ ਸਮਨੁਪਸ੍ਸਨਾਯ ਵਸੇਨ ਵਟ੍ਟਂ, ‘‘ਏਵਂ ਪਸ੍ਸ’’ਨ੍ਤਿਆਦਿਨਾ ਵਿਵਟ੍ਟਂ ਕਥਿਤਮੇਵ.

ਅਨੁਰਾਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਵਕ੍ਕਲਿਸੁਤ੍ਤਵਣ੍ਣਨਾ

੮੭. ਨਗਰਮਜ੍ਝੇ ਮਹਾਆਬਾਧੋ ਉਪ੍ਪਜ੍ਜੀਤਿ ਨਗਰਮਜ੍ਝੇਨ ਆਗਚ੍ਛਨ੍ਤੋ ਕਮ੍ਮਸਮੁਟ੍ਠਾਨੋ ਮਹਨ੍ਤੋ ਆਬਾਧੋ ਉਪ੍ਪਜ੍ਜਤਿ. ਸਮਨ੍ਤਤੋ ਅਧੋਸੀਤਿ ਸਬ੍ਬਭਾਗੇਨ ਪਰਿਪ੍ਫਨ੍ਦਿ. ਇਰਿਯਾਪਥਂ ਯਾਪੇਤੁਨ੍ਤਿ ਸਯਨਨਿਸਜ੍ਜਾਦਿਭੇਦਂ ਇਰਿਯਾਪਥਂ ਪਵਤ੍ਤੇਤੁਂ. ਨਿਵਤ੍ਤਨ੍ਤੀਤਿ ਓਸਕ੍ਕਨ੍ਤਿ, ਪਰਿਹਾਯਨ੍ਤੀਤਿ ਅਤ੍ਥੋ. ਅਧਿਗਚ੍ਛਨ੍ਤੀਤਿ ਵਡ੍ਢਨ੍ਤਿ. ਸਤ੍ਥੁ ਗੁਣਸਰੀਰਂ ਨਾਮ ਨਵਵਿਧਲੋਕੁਤ੍ਤਰਧਮ੍ਮਾਧਿਗਮਮੂਲਨ੍ਤਿ ਕਤ੍ਵਾ ਵੁਤ੍ਤਂ ‘‘ਨਵਵਿਧੋ ਹਿ…ਪੇ… ਕਾਯੋ ਨਾਮਾ’’ਤਿ, ਯਥਾ ਸਤ੍ਤਾਨਂ ਕਾਯੋ ਪਟਿਸਨ੍ਧਿਮੂਲਕੋ.

ਕਾਲ਼ਸਿਲਾਯਂ ਕਤਵਿਹਾਰੋ ਕਾਲ਼ਸਿਲਾਵਿਹਾਰੋ. ਮਗ੍ਗਵਿਮੋਕ੍ਖਤ੍ਥਾਯਾਤਿ ਅਗ੍ਗਮਗ੍ਗਵਿਮੋਕ੍ਖਾਧਿਗਮਾਯ. ਦੇਵਤਾਤਿ ਸੁਦ੍ਧਾਵਾਸਦੇਵਤਾ. ਅਲਾਮਕਂ ਨਾਮ ਪੁਥੁਜ੍ਜਨਕਾਲਕਿਰਿਯਾਯ ਅਭਾਵਤੋ. ਤੇਨਾਹ ‘‘ਥੇਰੋ ਕਿਰਾ’’ਤਿਆਦਿ ¶ . ਏਕਂ ਦ੍ਵੇ ਞਾਣਾਨੀਤਿ ਏਕਂ ਦ੍ਵੇ ਪਚ੍ਚਵੇਕ੍ਖਣਞਾਣਾਨਿ ਸਭਾਵਤੋ ਅਵਸ੍ਸਂ ਉਪ੍ਪਜ੍ਜਨ੍ਤਿ, ਅਯਂ ਧਮ੍ਮਤਾ. ਮਗ੍ਗਫਲਨਿਬ੍ਬਾਨਪਚ੍ਚਵੇਕ੍ਖਣਾਨਿ ਤਂਤਂਮਗ੍ਗਵੁਟ੍ਠਾਨੇ ਉਪ੍ਪਜ੍ਜਨ੍ਤਿ ਏਵ. ਏਕਂ ਦ੍ਵੇਤਿ ਵਚਨਂ ਉਪ੍ਪਨ੍ਨਭਾਵਦਸ੍ਸਨਤ੍ਥਂ ਵੁਤ੍ਤਂ.

ਧੂਮਾਯਨਭਾਵੋ ਧੂਮਾਕਾਰਤਾ, ਤਥਾ ਤਿਮਿਰਾਯਨਭਾਵੋ.

ਵਕ੍ਕਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਸ੍ਸਜਿਸੁਤ੍ਤਵਣ੍ਣਨਾ

੮੮. ਪਸ੍ਸਮ੍ਭਿਤ੍ਵਾਤਿ ¶ ਨਿਰੋਧੇਤ੍ਵਾ. ਨੋ ਚ ਸ੍ਵਾਹਨ੍ਤਿ ਨੋ ਚ ਸੁ ਅਹਂ. ਪਰਿਹਾਯਿ ਕੁਪ੍ਪਧਮ੍ਮਤ੍ਤਾ. ਏਤਨ੍ਤਿ ਸਮਾਧਿਮਤ੍ਤਸਾਰਂ, ਸੀਲਮਤ੍ਤੇ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਕਥਂ ਹੋਤੀਤਿ ਕਥਂ ਅਭਿਨਨ੍ਦਨਾ ਹੋਤਿ. ਦੁਕ੍ਖਂ ਪਤ੍ਵਾਤਿ ਦੁਕ੍ਖੁਪ੍ਪਤ੍ਤਿਹੇਤੁ ਸੁਖਂ ਪਤ੍ਥੇਤਿ ‘‘ਏਵਂ ਮੇ ਦੁਕ੍ਖਪਰਿਲ਼ਾਹੋ ਨ ਭਵਿਸ੍ਸਤੀ’’ਤਿ. ਯਦਗ੍ਗੇਨਾਤਿ ਯੇਨ ਭਾਗੇਨ. ‘‘ਦੁਕ੍ਖਂ ਪਤ੍ਥੇਤਿਯੇਵਾ’’ਤਿ ਵਤ੍ਵਾ ਤਤ੍ਥ ਕਾਰਣਮਾਹ ‘‘ਸੁਖਵਿਪਰਿਣਾਮੇਨ ਹੀ’’ਤਿਆਦਿ. ਸੁਖਵਿਪਰਿਵਤ੍ਤੇ ਸੁਖਵਿਪਰਿਣਾਮਦੁਕ੍ਖਂ, ਤਸ੍ਮਾ ਸੁਖਂ ਅਭਿਨਨ੍ਦਨ੍ਤੋ ਅਤ੍ਥਤੋ ਦੁਕ੍ਖਂ ਅਭਿਨਨ੍ਦਤਿ ਨਾਮ.

ਅਸ੍ਸਜਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਖੇਮਕਸੁਤ੍ਤਵਣ੍ਣਨਾ

੮੯. ਅਤ੍ਤਨਿਯਨ੍ਤਿ ਦਿਟ੍ਠਿਗਤਿਕਪਰਿਕਪ੍ਪਿਤਸ੍ਸ ਅਤ੍ਤਨੋ ਸਨ੍ਤਕਂ. ਤੇਨਾਹ ‘‘ਅਤ੍ਤਨੋ ਪਰਿਕ੍ਖਾਰਜਾਤ’’ਨ੍ਤਿ. ਤਣ੍ਹਾਮਾਨੋ ਅਧਿਗਤੋ ਅਰਹਤ੍ਤਸ੍ਸ ਅਨਧਿਗਤਤ੍ਤਾ, ਨੋ ਦਿਟ੍ਠਿਮਾਨੋ ਅਧਿਗਤੋ, ਤਥਾ ਕਾਮਰਾਗਬ੍ਯਾਪਾਦਾਪਿ. ਅਨਾਗਾਮੀ ਕਿਰ ਖੇਮਕਤ੍ਥੇਰੋ, ‘‘ਸਕਦਾਗਾਮੀ’’ਤਿ ਕੇਚਿ ਵਦਨ੍ਤਿ. ਸਨ੍ਧਾਵਨਿਕਾਯਾਤਿ ਸਞ੍ਚਰਣੇਨ. ਤੇਨਾਹ ‘‘ਪੁਨਪ੍ਪੁਨਂ ਗਮਨਾਗਮਨੇਨਾ’’ਤਿ. ਚਤੁਕ੍ਖਤ੍ਤੁਂ ਗਮਨਾਗਮਨੇਨਾਤਿ ਚਤੁਕ੍ਖਤ੍ਤੁਂ ਗਮਨੇਨ ਚ ਆਗਮਨੇਨ ਚ. ਤੇਨਾਹ – ‘‘ਤਂ ਦਿਵਸਂ ਦ੍ਵਿਯੋਜਨਂ ਅਦ੍ਧਾਨਂ ਆਹਿਣ੍ਡੀ’’ਤਿ. ਞਤ੍ਵਾਤਿ ਅਜ੍ਝਾਸਯਂ ਞਤ੍ਵਾ. ਥੇਰੋਤਿ ਖੇਮਕਤ੍ਥੇਰੋ.

ਰੂਪਮੇਵ ਅਸ੍ਮੀਤਿ ਵਦਤੀਤਿ ਰੂਪਕ੍ਖਨ੍ਧਮੇਵ ‘‘ਅਸ੍ਮੀ’’ਤਿ ਗਾਹਸ੍ਸ ਵਤ੍ਥੁਂ ਕਤ੍ਵਾ ਵਦਤਿ. ਅਧਿਗਤੋ ਤਣ੍ਹਾਮਾਨੋ.

ਅਣੁਸਹਗਤੋਤਿ ¶ ਅਣੁਭਾਵਂ ਗਤੋ. ਤੇਨਾਹ ‘‘ਸੁਖੁਮੋ’’ਤਿ. ਤਯੋ ਖਾਰਾ ਵਿਯ ਤਿਸ੍ਸੋ ਅਨੁਪਸ੍ਸਨਾ ਚਿਤ੍ਤਸਂਕਿਲੇਸਸ੍ਸ ਵਿਸੋਧਨਤੋ. ਸੀਲਗਨ੍ਧਾਦੀਹਿ ਗੁਣਗਨ੍ਧੇਹਿ.

ਕਥੇਤੁਨ੍ਤਿ ਉਦ੍ਦੇਸਵਸੇਨ ਕਥੇਤੁਂ. ਪਕਾਸੇਤੁਨ੍ਤਿ ਨਿਦ੍ਦੇਸਵਸੇਨ ਤਮਤ੍ਥਂ ਪਕਾਸੇਤੁਂ. ਜਾਨਾਪੇਤੁਨ੍ਤਿ ਕਾਰਣਵਸੇਨ ਜਾਨਾਪੇਤੁਂ. ਪਤਿਟ੍ਠਾਪੇਤੁਨ੍ਤਿ ਕਥਾਪੇਤੁਂ. ਵਿਵਟਂ ਕਾਤੁਨ੍ਤਿ ਉਦਾਹਰਣਂ ਵਣ੍ਣੇਤ੍ਵਾ ਪਾਕਟਂ ਕਾਤੁਂ ¶ . ਸੁਵਿਭਤ੍ਤਂ ਕਾਤੁਨ੍ਤਿ ਅਨ੍ਵਯਤੋ ਬ੍ਯਤਿਰੇਕਤੋ ਸੁਟ੍ਠੁ, ਵਿਭਤ੍ਤਂ ਕਾਤੁਂ. ਉਤ੍ਤਾਨਕਂ ਕਾਤੁਨ੍ਤਿ ਉਪਨਯਨਿਗਮੇਹਿ ਤਮਤ੍ਥਂ ਵਿਭੂਤਂ ਕਾਤੁਂ. ਅਞ੍ਞੇਨ ਨੀਹਾਰੇਨਾਤਿ ਵਿਪਸ੍ਸਨਾਵਿਮੁਤ੍ਤੇਨ ਚਿਤ੍ਤਾਭਿਨੀਹਾਰੇਨ.

ਖੇਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਛਨ੍ਨਸੁਤ੍ਤਵਣ੍ਣਨਾ

੯੦. ਮਕ੍ਖੀਤਿ ਗੁਣਮਕ੍ਖਨਲਕ੍ਖਣੇਨ ਮਕ੍ਖੇਨ ਸਮਨ੍ਨਾਗਤੋ. ਪਲ਼ਾਸੀਤਿ ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਸਮਨ੍ਨਾਗਤੋ. ਏਤਂ ਅਵੋਚਾਤਿ ‘‘ਓਵਦਨ੍ਤੁ ਮਂ…ਪੇ… ਪਸ੍ਸੇਯ੍ਯ’’ਨ੍ਤਿ ਏਤਂ ਅਵੋਚ.

ਥੇਰਨ੍ਤਿ ਛਨ੍ਨਤ੍ਥੇਰਂ. ਅਤ੍ਤਨੋ ਦੁਗ੍ਗਹਣੇਨ ਕਞ੍ਚਿ ਉਪਾਰਮ੍ਭਮ੍ਪਿ ਕਰੇਯ੍ਯ. ਤੇਨ ਵੁਤ੍ਤਂ ‘‘ਏਵਂ ਕਿਰ ਨੇਸਂ ਅਹੋਸੀ’’ਤਿਆਦਿ. ਨਿਦ੍ਦੋਸਮੇਵਸ੍ਸ ਕਤ੍ਵਾਤਿ ਆਦਿਤੋ ਅਨੁਰੂਪਤ੍ਤਮੇਵ ਕਤ੍ਵਾ ਸਦ੍ਧਮ੍ਮਂ ਕਥੇਸ੍ਸਾਮਾਤਿ.

ਪਰਿਤਸ੍ਸਨਾ ਉਪਾਦਾਨਨ੍ਤਿ ਭਯਪਰਿਤਸ੍ਸਨਾ ਦਿਟ੍ਠੁਪਾਦਾਨਂ. ਅਨਤ੍ਤਨਿ ਸਤਿ ਅਨਤ੍ਤਕਤਾਨਿ ਕਮ੍ਮਾਨਿ ਕਮਤ੍ਤਾਨਂ ਫੁਸਿਸ੍ਸਨ੍ਤੀਤਿ ਭਯਪਰਿਤਸ੍ਸਨਾ ਚੇਵ ਦਿਟ੍ਠੁਪਾਦਾਨਞ੍ਚ ਉਪ੍ਪਜ੍ਜਤਿ. ਪਟਿਨਿਵਤ੍ਤਤੀਤਿ ਯਥਾਰਦ੍ਧਵਿਪਸ੍ਸਨਾਤੋ ਪਟਿਨਿਵਤ੍ਤਤਿ, ਨਾਸਕ੍ਖੀਤਿ ਅਤ੍ਥੋ. ਕਸ੍ਮਾ ਪਨੇਤਸ੍ਸ ਵਿਪਸ੍ਸਨਮਨੁਯੁਞ੍ਜਨ੍ਤਸ੍ਸ ਏਵਂ ਅਹੋਸੀਤਿ ਤਤ੍ਥ ਕਾਰਣਂ ਵਦਤਿ ‘‘ਅਯਂ ਕਿਰਾ’’ਤਿਆਦਿਨਾ. ਏਵਨ੍ਤਿ ‘‘ਕੋ ਨੁ ਖੋ ਮੇ ਅਤ੍ਤਾ’’ਤਿ ਏਵਂ ਨ ਹੋਤਿ. ਤਾਵਤਿਕਾ ਵਿਸ੍ਸਤ੍ਥੀਤਿ ‘‘ਮਯ੍ਹਂ ਧਮ੍ਮਂ ਦੇਸੇਤੂ’’ਤਿ ਵੁਤ੍ਤਵਿਸ੍ਸਾਸੋ ਅਤ੍ਥੀਤਿ ਅਤ੍ਥੋ. ਇਦਂ ਕਚ੍ਚਾਨਸਤ੍ਥਂ ਅਦ੍ਦਸਾਤਿ ਯੋਜਨਾ. ‘‘ਦ੍ਵਯਨਿਸ੍ਸਿਤੋ, ਕਚ੍ਚਾਨ, ਲੋਕੋ’’ਤਿਆਦਿ ਦਿਟ੍ਠਿਵਿਨਿਵੇਠਨਾ. ‘‘ਏਤੇ ਤੇ, ਕਚ੍ਚਾਨ, ਉਭੋ ਅਨ੍ਤੇ ਅਨੁਪਗਮ੍ਮਾ’’ਤਿਆਦਿ ਬੁਦ੍ਧਬਲਦੀਪਨਾ.

ਛਨ੍ਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯-੧੦. ਰਾਹੁਲਸੁਤ੍ਤਾਦਿਵਣ੍ਣਨਾ

੯੧-੯੨. ਏਤਾਨਿ ¶ ਸੁਤ੍ਤਾਨਿ. ਇਧਾਗਤਾਨੀਤਿ ਇਮਸ੍ਮਿਂ ਵਗ੍ਗੇ ਆਨੀਤਾਨਿ ਸਙ੍ਗੀਤਿਕਾਰੇਹੀਤਿ.

ਰਾਹੁਲਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਥੇਰਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੦. ਪੁਪ੍ਫਵਗ੍ਗੋ

੧. ਨਦੀਸੁਤ੍ਤਵਣ੍ਣਨਾ

੯੩. ਪਬ੍ਬਤੇਯ੍ਯਾਤਿ ¶ ਪਬ੍ਬਤਤੋ ਆਗਤਾ. ਤਤੋ ਏਵ ਓਹਾਰਿਨੀ. ਤੇਨਸ੍ਸਾ ਚਣ੍ਡਸੋਤਤਂ ਦਸ੍ਸੇਤਿ. ਦੂਰਂ ਗਚ੍ਛਤੀਤਿ ਦੂਰਙ੍ਗਮਾ. ਤੇਨਸ੍ਸਾ ਮਹੋਘਤਂ ਦਸ੍ਸੇਤਿ.

ਸੋਤੇਤਿ ਵਟ੍ਟਸੋਤੇ. ਚਤੂਹਿ ਗਾਹੇਹੀਤਿ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਯਪ੍ਪਵਤ੍ਤੇਹਿ ਚਤੂਹਿ ਗਾਹੇਹਿ. ਪਲੁਜ੍ਜਨਤ੍ਤਾਤਿ ਛਿਨ੍ਨਤ੍ਤਾ. ਸੋਕਾਦਿਬ੍ਯਸਨਪ੍ਪਤ੍ਤੀਤਿ ਸੋਕਾਦਿਅਨਤ੍ਥੁਪ੍ਪਤ੍ਤਿ.

ਨਦੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪੁਪ੍ਫਸੁਤ੍ਤਵਣ੍ਣਨਾ

੯੪. ਵਿਵਦਤੀਤਿ ਵਿਵਾਦਂ ਕਰੋਤਿ. ਵਦਨ੍ਤੋਤਿ ਅਯਥਾਸਭਾਵੇਨ ਵਦਨ੍ਤੋ. ਵਿਵਦਤਿ ਧਮ੍ਮਤਾਯ ਵਿਰੁਦ੍ਧਂ ਕਤ੍ਵਾ ਵਦਤਿ. ਲੋਕਧਮ੍ਮੋਤਿ ਲੁਜ੍ਜਨਸਭਾਵਧਮ੍ਮੋ. ਕੋ ਪਨ ਸੋਤਿ ਆਹ ‘‘ਖਨ੍ਧਪਞ੍ਚਕ’’ਨ੍ਤਿ. ਤੇਨਾਹ ‘‘ਤਂ ਹੀ’’ਤਿਆਦਿ. ਕਥਂ ਕਰੋਮੀਤਿ ਕੇਨ ਪਕਾਰੇਨਾਹਂ ਬਾਲਂ ਅਜਾਨਨ੍ਤਂ ਕਰੋਮਿ. ਤੇਨਾਹ ‘‘ਮਯ੍ਹਂ ਹੀ’’ਤਿਆਦਿ. ਤਥਾ ਚਾਹ ‘‘ਅਕ੍ਖਾਤੋ ਵੋ ਮਯਾ ਮਗ੍ਗੋ’’ਤਿਆਦਿ (ਧ. ਪ. ੨੭੫). ‘‘ਤਯੋ ਲੋਕਾ ਕਥਿਤਾ’’ਤਿ ਵਤ੍ਵਾ ਤਂ ਵਿਵਰਿਤੁਂ ‘‘ਨਾਹਂ, ਭਿਕ੍ਖਵੇ’’ਤਿਆਦਿਮਾਹ.

ਪੁਪ੍ਫਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਫੇਣਪਿਣ੍ਡੂਪਮਸੁਤ੍ਤਵਣ੍ਣਨਾ

੯੫. ਕੇਨਚਿ ¶ ਕਾਰਣੇਨ ਯੁਜ੍ਝਿਤ੍ਵਾ ਗਹੇਤੁਂ ਨ ਸਕ੍ਕਾਤਿ ਅਯੁਜ੍ਝਾ ਨਾਮ. ਨਿਵਤ੍ਤਨਟ੍ਠਾਨੇਤਿ ਉਦਕਪ੍ਪਵਾਹਸ੍ਸ ਨਿਵਤ੍ਤਿਤਟ੍ਠਾਨੇ.

ਅਨੁਸੋਤਾਗਮਨੇਤਿ ਅਨੁਸੋਤਂ ਆਗਮਨਹੇਤੁ, ‘‘ਅਨੁਸੋਤਾਗਮਨੇਨਾ’’ਤਿ ਵਾ ਪਾਠੋ. ਅਨੁਪੁਬ੍ਬੇਨ ਪਵਡ੍ਢਿਤ੍ਵਾਤਿ ਤਤ੍ਥ ਤਤ੍ਥ ਉਟ੍ਠਿਤਾਨਂ ਖੁਦ੍ਦਕਮਹਨ੍ਤਾਨਂ ¶ ਫੇਣਪਿਣ੍ਡਾਨਂ ਸਂਸਗ੍ਗੇਨ ਪਕਾਰਤੋ ਵੁਦ੍ਧਿਂ ਪਤ੍ਵਾ. ਆਵਹੇਯ੍ਯਾਤਿ ਆਨੇਤ੍ਵਾ ਵਹੇਯ੍ਯ. ਕਾਰਣੇਨ ਉਪਪਰਿਕ੍ਖੇਯ੍ਯਾਤਿ ਞਾਣੇਨ ਵੀਮਂਸੇਯ੍ਯ. ‘‘ਸਾਰੋ ਨਾਮ ਕਿਂ ਭਵੇਯ੍ਯਾ’’ਤਿ ਵਤ੍ਵਾ ਸਬ੍ਬਸੋ ਤਦਭਾਵਂ ਦਸ੍ਸੇਨ੍ਤੋ ‘‘ਵਿਲੀਯਿਤ੍ਵਾ ਵਿਦ੍ਧਂਸੇਯ੍ਯੇਵਾ’’ਤਿ ਆਹ. ਤੇਨ ਰੂਪਮ੍ਪਿ ਨਿਸ੍ਸਾਰਤਾਯ ਭਿਜ੍ਜਤੇਵਾਤਿ ਦਸ੍ਸੇਤਿ. ਯਥਾ ਹਿ ਅਨਿਚ੍ਚਤਾਯ ਅਸਾਰਤਾਸਿਦ੍ਧਿ, ਏਵਂ ਅਸਾਰਤਾਯਪਿ ਅਨਿਚ੍ਚਤਾਸਿਦ੍ਧੀਤਿ ਅਨਿਚ੍ਚਤਾਯ ਏਵ ਨਿਚ੍ਚਸਾਰਂ ਥਿਰਭਾਵਸਾਰਂ ਧੁਵਸਾਰਂ ਸਾਮੀਨਿਵਾਸੀਕਾਰਕਭੂਤਸ੍ਸ ਅਤ੍ਤਨੋ ਵਸੇ ਪਵਤ੍ਤਨਮ੍ਪੇਤ੍ਥ ਨਤ੍ਥੀਤਿ ਆਹ ‘‘ਰੂਪਮ੍ਪਿ…ਪੇ… ਨਿਸ੍ਸਾਰਮੇਵਾ’’ਤਿ. ਸੋਤਿ ਫੇਣਪਿਣ੍ਡੋ. ਗਹਿਤੋਪਿ ਉਪਾਯੇਨ ਤਮਤ੍ਥਂ ਨ ਸਾਧੇਤਿ ਅਨਰਹਤ੍ਤਾ. ਅਨੇਕਸਨ੍ਧਿਘਟਿਤੋ ਤਥਾ ਤਥਾ ਘਟਿਤੋ ਹੁਤ੍ਵਾ.

ਬ੍ਯਾਮਮਤ੍ਤਮ੍ਪਿ ਏਤਰਹਿ ਮਨੁਸ੍ਸਾਨਂ ਵਸੇਨ. ਅਵਸ੍ਸਮੇਵ ਭਿਜ੍ਜਤਿ ਤਰਙ੍ਗਬ੍ਭਾਹਤਂ ਹੁਤ੍ਵਾ.

ਤਸ੍ਮਿਂ ਤਸ੍ਮਿਂ ਉਦਕਬਿਨ੍ਦੁਮ੍ਹਿ ਪਤਿਤੇ. ਉਦਕਤਲਨ੍ਤਿ ਉਦਕਪਿਟ੍ਠਿਂ. ਅਞ੍ਞਤੋ ਪਤਨ੍ਤਂ ਉਦਕਬਿਨ੍ਦੁਂ. ਉਦਕਜਲ੍ਲਨ੍ਤਿ ਸਨ੍ਤਾਨਕਂ ਹੁਤ੍ਵਾ ਠਿਤਂ ਉਦਕਮਲਂ. ਤਞ੍ਹਿ ਸਂਕਡ੍ਢਿਤ੍ਵਾ ਤਤੋ ਉਦਕਂ ਪੁਟਂ ਕਰੋਤਿ, ਤਸ੍ਮਿਂ ਪੁਟੇ ਪੁਬ੍ਬੁਲ਼ਸਮਞ੍ਞਾ. ਵਤ੍ਥੁਨ੍ਤਿ ਚਕ੍ਖਾਦਿਵਤ੍ਥੁਂ. ਆਰਮ੍ਮਣਨ੍ਤਿ ਰੂਪਾਦਿਆਰਮ੍ਮਣਂ. ਕਿਲੇਸਜਲ੍ਲਨ੍ਤਿ ਪੁਰਿਮਸਿਦ੍ਧਂ, ਪਟਿਲਬ੍ਭਮਾਨਂ ਵਾ ਕਿਲੇਸਮਲਂ. ਫਸ੍ਸਸਙ੍ਘਟ੍ਟਨਨ੍ਤਿ ਫਸ੍ਸਸਮੋਧਾਨਂ. ਪੁਬ੍ਬੁਲ਼ਸਦਿਸਾ ਮੁਹੁਤ੍ਤਰਮਣੀਯਤਾਯ. ਯਸ੍ਮਾ ਘਮ੍ਮਕਾਲੇ ਸੂਰਿਯਾਤਪਸਨ੍ਤਾਪਾਭਿਨਿਬ੍ਬਤ੍ਤਰਸ੍ਮਿਜਾਲਨਿਪਾਤੇ ਤਾਦਿਸੇ ਭੂਮਿਪਦੇਸੇ ਇਤੋ ਚਿਤੋ ਸਮੁਗ੍ਗਤਵਾਤਵੇਗਸਮੁਦ੍ਧਟਵਿਰੁਲ਼੍ਹਸਙ੍ਖਾਤੇਸੁ ਪਰਿਬ੍ਭਮਨ੍ਤੇਸੁ ਅਣੁਪਰਮਾਣੁਤਜ੍ਜਾਰਿਪ੍ਪਕਾਰੇਸੁ ਭੂਤਸਙ੍ਘਾਤੇਸੁ ਮਰੀਚਿਸਮਞ੍ਞਾ, ਤਸ੍ਮਾ ਸਬ੍ਬਸੋ ਸਾਰਵਿਰਹਿਤਾਤਿ ਵੁਤ੍ਤਂ ‘‘ਸਞ੍ਞਾਪਿ ਅਸਾਰਕਟ੍ਠੇਨ ਮਰੀਚਿਸਦਿਸਾ’’ਤਿ. ਯਸ੍ਮਾ ਚ ਪਸ੍ਸਨ੍ਤਾਨਂ ਯੇਭੁਯ੍ਯੇਨ ਉਦਕਾਕਾਰੇਨ ਖਾਯਤਿ, ਤਸ੍ਮਾ ‘‘ਗਹੇਤ੍ਵਾ ਪਿਵਿਤੁਂ ਵਾ’’ਤਿਆਦਿ ਵੁਤ੍ਤਂ. ਨੀਲਾਦਿਅਨੁਭਵਨਤ੍ਥਾਯਾਤਿ ਨੀਲਾਦਿਆਰਮ੍ਮਣਸ੍ਸ ਅਨੁਭਵਨਤ੍ਥਾਯ. ਫਨ੍ਦਤੀਤਿ ਫਨ੍ਦਨਾਕਾਰਪ੍ਪਤ੍ਤਾ ਵਿਯ ਹੋਤਿ ਅਪ੍ਪਹੀਨਤਣ੍ਹਸ੍ਸ ਪੁਗ੍ਗਲਸ੍ਸ. ਵਿਪ੍ਪਲਮ੍ਭੇਤਿ ਅਪ੍ਪਹੀਨਵਿਪਲ੍ਲਾਸਂ ਪੁਗ੍ਗਲਂ. ਤੇਨਾਹ ‘‘ਇਦਂ ਨੀਲਕ’’ਨ੍ਤਿਆਦਿ. ਸਞ੍ਞਾਵਿਪਲ੍ਲਾਸਤੋ ਹਿ ਚਿਤ੍ਤਵਿਪਲ੍ਲਾਸੋ, ਤਤੋ ਦਿਟ੍ਠਿਵਿਪਲ੍ਲਾਸੋਤਿ. ਵਿਪ੍ਪਲਮ੍ਭਨੇਨਾਤਿ ਵਿਪ੍ਪਕਾਰਵਸੇਨੇਵ ਆਰਮ੍ਮਣਸ੍ਸ ਲਮ੍ਭਨੇਨ. ਵਿਪ੍ਪਕਾਰਵਸੇਨ ਹਿ ¶ ਏਤਂ ਲਮ੍ਭਨਂ, ਯਦਿਦਂ ਅਨੁਦਕਮੇਵ ਉਦਕਂ ਕਤ੍ਵਾ ਦਸ੍ਸਨਂ ਅਨਗਰਮੇਵ ਨਗਰਂ ਕਤ੍ਵਾ ਗਨ੍ਧਬ੍ਬਨਾਟਕਾਦਿਦਸ੍ਸਨਂ.

ਕੁਕ੍ਕੁਕਂ ¶ ਵੁਚ੍ਚਤਿ ਕਦਲਿਕ੍ਖਨ੍ਧਸ੍ਸ ਸਬ੍ਬਪਤ੍ਤਵਟ੍ਟੀਨਂ ਅਬ੍ਭਨ੍ਤਰੇ ਦਣ੍ਡਕਨ੍ਤਿ ਆਹ ‘‘ਅਕੁਕ੍ਕੁਕਜਾਤਨ੍ਤਿ ਅਨ੍ਤੋ ਅਸਞ੍ਜਾਤਘਨਦਣ੍ਡਕ’’ਨ੍ਤਿ. ਨ ਤਥਾ ਹੋਤੀਤਿ ਯਦਤ੍ਥਾਯ ਉਪਨੀਤਂ, ਤਦਤ੍ਥਾਯ ਨ ਹੋਤਿ. ਨਾਨਾਲਕ੍ਖਣੋਤਿ ਨਾਨਾਸਭਾਵੋ. ਸਙ੍ਖਾਰਕ੍ਖਨ੍ਧੋਵਾਤਿ ਏਕੋ ਸਙ੍ਖਾਰਕ੍ਖਨ੍ਧੋਤ੍ਵੇਵ ਵੁਚ੍ਚਤਿ.

ਅਸ੍ਸਾਤਿ ਪੁਰਿਸਸ੍ਸ. ਅਪਗਤਪਟਲਪਿਲ਼ਕਨ੍ਤਿ ਅਪਗਤਪਟਲਦੋਸਞ੍ਚੇਵ ਅਪਗਤਪਿਲ਼ਕਦੋਸਞ੍ਚ. ਅਸਾਰਭਾਵਦਸ੍ਸਨਸਮਤ੍ਥਨ੍ਤਿ ਅਸਾਰਸ੍ਸ ਅਸਾਰਭਾਵਦਸ੍ਸਨਸਮਤ੍ਥਂ. ਇਤ੍ਤਰਾਤਿ ਪਰਿਤ੍ਤਕਾਲਾ, ਨ ਚਿਰਟ੍ਠਿਤਿਕਾ. ਤੇਨਾਹ ‘‘ਲਹੁਪਚ੍ਚੁਪਟ੍ਠਾਨਾ’’ਤਿ. ਅਞ੍ਞਦੇਵ ਚ ਆਗਮਨਕਾਲੇ ਚਿਤ੍ਤਨ੍ਤਿ ਇਦਞ੍ਚ ਓਲ਼ਾਰਿਕਵਸੇਨੇਵ ਵੁਤ੍ਤਂ. ਤਥਾ ਹਿ ਏਕਚ੍ਛਰਕ੍ਖਣੇ ਅਨੇਕਕੋਟਿਸਤਸਹਸ੍ਸਸਙ੍ਖਾਨਿ ਚਿਤ੍ਤਾਨਿ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ. ਮਾਯਾਯ ਦਸ੍ਸਿਤਂ ਰੂਪਂ ਮਾਯਾਤਿ ਵੁਤ੍ਤਂ. ਯਂਕਿਞ੍ਚਿਦੇਵ ਕਪਾਲਿਟ੍ਠਕਪਾਸਾਣਵਾਲਿਕਾਦਿਂ. ਵਞ੍ਚੇਤੀਤਿ ਅਸੁਵਣ੍ਣਮੇਵ ਸੁਵਣ੍ਣਨ੍ਤਿ, ਅਮੁਤ੍ਤਮੇਵ ਮੁਤ੍ਤਾਤਿਆਦਿਨਾ ਵਞ੍ਚੇਤਿ. ਨਨੁ ਚ ਸਞ੍ਞਾਪਿ ਮਰੀਚਿ ਵਿਯ ਵਿਪ੍ਪਲਮ੍ਭੇਤਿ ਵਞ੍ਚੇਤਿ, ਇਦਮ੍ਪਿ ਵਿਞ੍ਞਾਣਂ ਮਾਯਾ ਵਿਯ ਵਞ੍ਚੇਤੀਤਿ ਕੋ ਇਮੇਸਂ ਵਿਸੇਸੋਤਿ? ਵਚਨਤ੍ਥੋ ਨੇਸਂ ਸਾਧਾਰਣੋ. ਤਥਾਪਿ ਸਞ੍ਞਾ ਅਨੁਦਕਂਯੇਵ ਉਦਕਂ ਕਤ੍ਵਾ ਗਾਹਾਪੇਨ੍ਤੀ, ਅਪੁਰਿਸਞ੍ਞੇਵ ਪੁਰਿਸਂ ਕਤ੍ਵਾ ਗਾਹਾਪੇਨ੍ਤੀ ਵਿਪ੍ਪਲਮ੍ਭਨਵਸੇਨ ਅਪ੍ਪਵਿਸਯਾ, ਵਿਞ੍ਞਾਣਂ ਪਨ ਯਂ ਕਿਞ੍ਚਿ ਅਤਂਸਭਾਵਂ ਤਂ ਕਤ੍ਵਾ ਦਸ੍ਸੇਨ੍ਤੀ ਮਾਯਾ ਵਿਯ ਮਹਾਵਿਸਯਾ. ਤੇਨਾਹ ‘‘ਯਂਕਿਞ੍ਚਿਦੇਵਾ’’ਤਿਆਦਿ. ਏਵਮ੍ਪੀਤਿ ਅਤਿਵਿਯ ਲਹੁਪਰਿਵਤ੍ਤਿਭਾਵੇਨਪਿ ਮਾਯਾਸਦਿਸਨ੍ਤਿ.

ਦੇਸਿਤਾਤਿ ਏਵਂ ਦੇਸਿਤਾ ਫੇਣਪਿਣ੍ਡਾਦਿਉਪਮਾਹਿ.

ਭੂਰਿ ਵੁਚ੍ਚਤਿ ਪਥਵੀ, ਸਣ੍ਹਟ੍ਠੇਨ ਵਿਪੁਲਟ੍ਠੇਨ ਚ ਭੂਰਿਸਦਿਸਪਞ੍ਞਤਾਯ ਭੂਰਿਪਞ੍ਞੋ. ਤੇਨਾਹ ‘‘ਸਣ੍ਹਪਞ੍ਞੇਨ ਚੇਵਾ’’ਤਿਆਦਿ. ਕਿਮਿਗਣਾਦੀਨਨ੍ਤਿ ਆਦਿ-ਸਦ੍ਦੇਨ ਅਨੇਕਗਿਜ੍ਝਾਦਿਕੇ ਸਙ੍ਗਣ੍ਹਾਤਿ. ਪਵੇਣੀਤਿ ਧਮ੍ਮਪਬਨ੍ਧੋ. ਬਾਲਲਾਪਿਨੀ ‘‘ਅਹਂ ਮਮਾ’’ਤਿਆਦਿਨਾ. ਸੇਸਧਾਤੁਯੋ ਗਹੇਤ੍ਵਾਵ ਭਿਜ੍ਜਤਿ ਏਕੁਪ੍ਪਾਦੇਕਨਿਰੋਧਤ੍ਤਾ, ਵਤ੍ਥੁਰੂਪਨਿਸ੍ਸਯਪਚ੍ਚਯਤ੍ਤਾ ‘‘ਅਯ’’ਨ੍ਤਿ ਨ ਵਿਸੁਂ ਗਹਿਤਂ. ਵਧਭਾਵਤੋਤਿ ਵਧਸ੍ਸ ਮਰਣਸ੍ਸ ਅਤ੍ਥਿਭਾਵਤੋ. ਸਰਣਨ੍ਤਿ ਪਟਿਸਰਣਂ.

ਫੇਣਪਿਣ੍ਡੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪-੬. ਗੋਮਯਪਿਣ੍ਡਸੁਤ੍ਤਾਦਿਵਣ੍ਣਨਾ

੯੬-੯੮. ਸਸ੍ਸਤਂ ¶ ¶ ਸਬ੍ਬਕਾਲਂ ਯਾਵ ਕਪ੍ਪਵੁਟ੍ਠਾਨਾ ਹੋਨ੍ਤੀਤਿ ਸਸ੍ਸਤਿਯੋ, ਸਿਨੇਰੁਆਦਯੋ. ਤਾਹਿ ਸਮਂ ਸਮਕਾਲਂ. ਅਨੇਨਾਤਿ ਭਗਵਤਾ. ਨਯਿਦਨ੍ਤਿ ਏਤ੍ਥ ਯ-ਕਾਰੋ ਪਦਸਨ੍ਧਿਕਰੋ, ਇਦਨ੍ਤਿ ਨਿਪਾਤਪਦਂ. ਤਂ ਪਨ ਯੇਨ ਯੇਨ ਸਮ੍ਬਨ੍ਧੀਯਤਿ, ਤਂ ਤਿਲਿਙ੍ਗੋਵ ਹੋਤੀਤਿ ‘‘ਅਯਂ ਮਗ੍ਗਬ੍ਰਹ੍ਮਚਰਿਯਵਾਸੋ’’ਤਿ ਵੁਤ੍ਤਂ. ‘‘ਨ ਪਞ੍ਞਾਯੇਯ੍ਯਾ’’ਤਿ ਵਤ੍ਵਾ ਤਮਤ੍ਥਂ ਵਿਵਰਿਤੁਂ ‘‘ਮਗ੍ਗੋ ਹੀ’’ਤਿਆਦਿ ਵੁਤ੍ਤਂ. ਵਿਵਟ੍ਟੇਨ੍ਤੋਤਿ ਵਿਨਿਵਟ੍ਟੇਨ੍ਤੋ ਅਪ੍ਪਵਤ੍ਤਿਂ ਕਰੋਨ੍ਤੋ.

ਰਾਜਧਾਨੀਤਿ ਰਞ੍ਞੋ ਨਿਵਾਸਨਗਰਂ. ਸੁਤ੍ਤਮਯਨ੍ਤਿ ਚਿਤ੍ਤਵਣ੍ਣਵਟ੍ਟਿਕਾਮਯਂ.

ਗੋਮਯਪਿਣ੍ਡਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ

੯੯. ਯਂ ਮਹਾਸਮੁਦ੍ਦੋਤਿ ਏਤ੍ਥ ਯਨ੍ਤਿ ਸਮਯਸ੍ਸ ਪਚ੍ਚਾਮਸਨਂ. ਭੁਮ੍ਮਤ੍ਥੇ ਚੇਤਂ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਯਸ੍ਮਿਂ ਸਮਯੇ’’ਤਿ. ਸੋ ਚ ਸਮਯੋ ਅਯਨ੍ਤਿ ਦਸ੍ਸੇਨ੍ਤੋ ‘‘ਪਞ੍ਚਮੇ ਸੂਰਿਯੇ ਉਟ੍ਠਿਤੇ’’ਤਿ ਆਹ. ਪਰਿਚ੍ਛੇਦਂ ਨ ਵਦਾਮਿ ਪਰਿਚ੍ਛੇਦਕਾਰਿਕਾਯ ਅਗ੍ਗਮਗ੍ਗਵਿਜ੍ਜਾਯ ਅਨਧਿਗਤਤ੍ਤਾ. ਸੁਨਖੋ ਵਿਯ ਵਟ੍ਟਨਿਸ੍ਸਿਤੋ ਬਾਲੋ ਅਸਵਸਭਾਵਤੋ. ਗਦ੍ਦੁਲੋ ਵਿਯ ਦਿਟ੍ਠਿਬਨ੍ਧੋ. ਸਕ੍ਕਾਯੋ ਤਸ੍ਸ ਅਸਵਸਭਾਵਤੋ. ਪੁਥੁਜ੍ਜਨਸ੍ਸ ਸਕ੍ਕਾਯਾਨੁਪਰਿਵਤ੍ਤਨਨ੍ਤਿ ‘‘ਸਨ੍ਤਾਨੇ ਸਤ੍ਤਵੋਹਾਰੋ’’ਤਿ ਤਂ ਤਤੋ ਅਞ੍ਞਂ ਕਤ੍ਵਾ ਭੇਦੇਨ ਨਿਦ੍ਦੇਸੋ.

ਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਦੁਤਿਯਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ

੧੦੦. ਦਿਟ੍ਠਿਗਦ੍ਦੁਲਨਿਸ੍ਸਿਤਾਯਾਤਿ ਸਹਜਾਤਾਦਿਪਚ੍ਚਯਵਸੇਨ ਦਿਟ੍ਠਿਗਦ੍ਦੁਲਨਿਸ੍ਸਿਤਾਯ ਨਿਸ੍ਸਾਯੇਵ ਪਵਤ੍ਤਤਿ ਤਤੋ ਅਤ੍ਤਾਨਂ ਵਿਵੇਚੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਚਿਤ੍ਤਸਂਕਿਲੇਸੇਨੇਵਾਤਿ ਦਸਵਿਧਕਿਲੇਸਵਤ੍ਥੁਵਸੇਨ ਚਿਤ੍ਤਸ੍ਸ ਸਂਕਿਲਿਟ੍ਠਭਾਵੇਨ. ਅਰਿਯਮਗ੍ਗਾਧਿਗਮਨੇਨ ਚਿਤ੍ਤਸ੍ਸ ਵੋਦਾਨਤ੍ਤਾ ਵੋਦਾਯਨ੍ਤਿ ਵਿਸੁਜ੍ਝਨ੍ਤਿ.

ਵਿਚਰਣਚਿਤ੍ਤਨ੍ਤਿ ¶ ਗਹੇਤ੍ਵਾ ਵਿਚਰਣਵਸੇਨ ਵਿਚਰਣਚਿਤ੍ਤਂ. ਸਙ੍ਖਾਨਾਮਾਤਿ ਏਵਂਨਾਮਕਾ. ਬ੍ਰਾਹ੍ਮਣਪਾਸਣ੍ਡਿਕਾਤਿ ਜਾਤਿਯਾ ਬ੍ਰਾਹ੍ਮਣਾ, ਛਨ੍ਨਵੁਤਿਯਾ ਪਾਸਣ੍ਡੇਸੁ ਤਂ ਸਙ੍ਖਾਸਞ੍ਞਿਤਂ ਪਾਸਣ੍ਡਂ ਪਗ੍ਗਯ੍ਹ ਵਿਚਰਣਕਾ. ਪਟਕੋਟ੍ਠਕਨ੍ਤਿ ਦੁਸ੍ਸਾਪਣਕਂ. ਦਸ੍ਸੇਨ੍ਤਾਤਿ ਯਥਾਗਤਿਕਮ੍ਮਵਿਪਾਕਚਿਤ੍ਤਤਂ ਦਸ੍ਸੇਨ੍ਤਾ ¶ . ਤਂ ਚਿਤ੍ਤਨ੍ਤਿ ਤਂ ਪਟਕੋਟ੍ਠਕਚਿਤ੍ਤਂ ਗਹੇਤ੍ਵਾ ਵਿਚਰਨ੍ਤਿ. ਚਿਨ੍ਤੇਤ੍ਵਾ ਕਤਤ੍ਤਾਤਿ ‘‘ਇਮਸ੍ਸ ਰੂਪਸ੍ਸ ਏਵਂ ਹਤ੍ਥਪਾਦਾ, ਏਵਂ ਮੁਖਂ ਲਿਖਿਤਬ੍ਬਂ, ਏਵਂ ਆਕਾਰਵਤ੍ਥਗ੍ਗਹਣਾਨਿ, ਏਵਂ ਕਿਰਿਯਾਵਿਸੇਸਾ, ਏਵਂ ਕਿਰਿਯਾਵਿਭਾਗਂ, ਸਤ੍ਤਵਿਸੇਸਾਨਂ ਵਿਭਾਗਂ ਕਾਤਬ੍ਬ’’ਨ੍ਤਿ ਤਸ੍ਸ ਉਬ੍ਬਤ੍ਤਨਖਿਪਨਪਵਤ੍ਤਨਾਦਿਪਯੋਜਨਞ੍ਚਾਤਿ ਸਬ੍ਬਮੇਤਂ ਤਥਾ ਚਿਨ੍ਤੇਤ੍ਵਾ ਕਤਤ੍ਤਾ ਚਿਤ੍ਤੇਨ ਮਨਸਾ ਚਿਨ੍ਤਿਤਂ ਨਾਮ. ਉਪਾਯਪਰਿਯੇਸਨਚਿਤ੍ਤਨ੍ਤਿ ‘‘ਹਤ੍ਥਪਾਦਾ ਏਵਂ ਲਿਖਿਤਬ੍ਬਾ’’ਤਿਆਦਿਨਾ ਯਥਾਵੁਤ੍ਤਉਪਾਯਸ੍ਸ ਚੇਵ ਪੁਬ੍ਬੇ ਪਵਤ੍ਤਸ੍ਸ ਭੂਮਿਪਰਿਕਮ੍ਮਵਣ੍ਣਧਾਤੁਸਮ੍ਮਾਯੋਜਨੁਪਾਯਸ੍ਸ ਚ ਵਸੇਨ ਪਵਤ੍ਤਂ ਚਿਤ੍ਤਂ. ਤਤੋਪਿ ਚਿਤ੍ਤਤਰਨ੍ਤਿ ਤਤੋ ਚਿਤ੍ਤਕਮ੍ਮਤੋਪਿ ਚਿਤ੍ਤਤਰਂ ਚਿਤ੍ਤਕਾਰੇਨ ਚਿਨ੍ਤਿਤਪ੍ਪਕਾਰਾਨਂ ਸਬ੍ਬੇਸਂਯੇਵ ਚਿਤ੍ਤਕਮ੍ਮੇ ਅਨਿਪ੍ਫਜ੍ਜਨਤੋ. ਕਮ੍ਮਚਿਤ੍ਤੇਨਾਤਿ ਕਮ੍ਮਵਿਞ੍ਞਾਣੇਨ. ਕਮ੍ਮਚਿਤ੍ਤੇਨਾਤਿ ਵਾ ਕਮ੍ਮਸ੍ਸ ਚਿਤ੍ਤਭਾਵੇਨ. ਸੋ ਕਮ੍ਮਸ੍ਸ ਵਿਚਿਤ੍ਤਭਾਵੋ ਤਣ੍ਹਾਵਸੇਨ ਜਾਯਤੀਤਿ ਵੇਦਿਤਬ੍ਬੋ. ਸ੍ਵਾਯਮਤ੍ਥੋ ਅਟ੍ਠਸਾਲਿਨੀਟੀਕਾਯਂ ਵਿਭਾਵਿਤੋ. ਏਵਂ ਚਿਤ੍ਤਾਤਿ ਏਵਂ ਚਿਤ੍ਤਰੂਪਵਿਸੇਸਾ. ਯੋਨਿਂ ਉਪਨੇਤੀਤਿ ਤਂ ਤਂ ਅਣ੍ਡਜਾਦਿਭੇਦਂ ਯੋਨਿਵਿਸੇਸਂ ਪਾਪੇਤਿ ਵਣ੍ਣਵਿਸੇਸੋ ਵਿਯ ਫਲਿਕਮਣਿਕਂ. ਨ ਹਿ ਵਿਸੇਸਾ ਹਿਤਵਿਚਿਤ੍ਤਸਾਮਤ੍ਥਿਯਕਮ੍ਮਂ ਯੋਨਿਂ ਉਪਨੇਤਿ, ਤਸ੍ਸ ਤਸ੍ਸ ਵਿਪਾਕੁਪ੍ਪਤ੍ਤਿਯਾ ਪਚ੍ਚਯੋ ਹੋਤਿ. ਯੋਨਿਮੂਲਕੋ ਤੇਸਂ ਚਿਤ੍ਤਭਾਵੋਤਿ ਯਂ ਯਂ ਯੋਨਿਂ ਕਮ੍ਮਂ ਸਤ੍ਤੇ ਉਪਨੇਤਿ, ਤਂਤਂਯੋਨਿਮੂਲਕੋ ਤੇਸਂ ਸਤ੍ਤਾਨਂ ਚਿਤ੍ਤਵਿਚਿਤ੍ਤਭਾਵੋ. ਤੇਨਾਹ ‘‘ਯੋਨਿਉਪਗਤਾ’’ਤਿਆਦਿ. ਸਦਿਸਚਿਤ੍ਤਾਵ ਸਦਿਸਚਿਤ੍ਤਭਾਵਾ ਏਵ. ਇਤੀਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਉਪ੍ਪਟਿਪਾਟਿਯਾ ਨਿਗਮਨਂ.

ਤਿਰਚ੍ਛਾਨਗਤਚਿਤ੍ਤਭਾਵਤੋ ਚਿਤ੍ਤਸ੍ਸੇਵ ਸਵਿਸੇਸਂ ਚਿਤ੍ਤਭਾਵਕਰਣਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਚਿਤ੍ਤਂ ਨਾਮੇਤਂ ਚਿਤ੍ਤਤਰਮੇਵ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਸਹਜਾਤਧਮ੍ਮਚਿਤ੍ਤਤਾਯਾਤਿ ਰਾਗਾਦਿਸਦ੍ਧਾਦਿਧਮ੍ਮਵਿਚਿਤ੍ਤਭਾਵੇਨ. ਭੂਮਿਚਿਤ੍ਤਤਾਯਾਤਿ ਅਧਿਟ੍ਠਾਨਚਿਤ੍ਤਤਾਯ. ਕਮ੍ਮਨਾਨਤ੍ਤਂ ਮੂਲਂ ਕਾਰਣਂ ਏਤੇਸਨ੍ਤਿ ਕਮ੍ਮਨਾਨਤ੍ਤਮੂਲਕਾ, ਤੇਸਂ. ਲਿਙ੍ਗਨਾਨਤ੍ਤਂ ਇਤ੍ਥਿਲਿਙ੍ਗਾਦਿਨਾਨਤ੍ਤਵਸੇਨ ਚੇਵ ਤਂਤਂਸਣ੍ਠਾਨਨਾਨਤ੍ਤਵਸੇਨ ਚ ਵੇਦਿਤਬ੍ਬਂ. ਸਞ੍ਞਾਨਾਨਤ੍ਤਂ ਇਤ੍ਥਿਪੁਰਿਸਦੇਵਮਨੁਸ੍ਸਾਦਿਸਞ੍ਞਾਨਾਨਤ੍ਤਵਸੇਨ ¶ . ਵੋਹਾਰਨਾਨਤ੍ਤਂ ਤਿਸ੍ਸੋਤਿਆਦਿਵੋਹਾਰਨਾਨਤ੍ਤਵਸੇਨ. ਚਿਤ੍ਤਾਨਂ ਵਿਚਿਤ੍ਤਾਨਂ. ਤਂਤਂਵੋਹਾਰਨਾਨਤ੍ਤਮ੍ਪਿ ਚਿਤ੍ਤੇਨੇਵ ਪਞ੍ਞਪੀਯਤਿ. ਰਙ੍ਗਜਾਤਰੂਪਸਮੁਟ੍ਠਾਪਨਾਦਿਨਾ ਵਤ੍ਥਂ ਰਞ੍ਜਯਤੀਤਿ ਰਜਕੋ, ਵਣ੍ਣਕਾਰੋ. ਪੁਥੁਜ੍ਜਨਸ੍ਸ ਅਤ੍ਤਭਾਵਸਞ੍ਞਿਤਰੂਪਸਮੁਟ੍ਠਾਪਨਤਾ ਨਿਯਤਾ ਏਕਨ੍ਤਿਕਾਤਿ ਪੁਥੁਜ੍ਜਨਗ੍ਗਹਣਂ. ‘‘ਅਭਿਰੂਪਂ ਰੂਪਂ ਸਮੁਟ੍ਠਾਪੇਤੀ’’ਤਿ ਆਨੇਤ੍ਵਾ ਸਮ੍ਬਨ੍ਧੋ.

ਦੁਤਿਯਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਵਾਸਿਜਟਸੁਤ੍ਤਵਣ੍ਣਨਾ

੧੦੧. ਅਤ੍ਥਸ੍ਸਾਤਿ ਹਿਤਸ੍ਸ. ਅਸਾਧਿਕਾ ‘‘ਭਾਵਨਾਨੁਯੋਗਂ ਅਨਨੁਯੁਤ੍ਤਸ੍ਸਾ’’ਤਿ ਅਨਨੁਯੁਤ੍ਤਸ੍ਸ ¶ ਵੁਤ੍ਤਤ੍ਤਾ. ਇਤਰਾਤਿ ਸੁਕ੍ਕਪਕ੍ਖਉਪਮਾ. ਸਾਧਿਕਾ ਭਾਵਨਾਯੋਗਸ੍ਸ ਅਨੁਯੁਤ੍ਤਤ੍ਤਾ. ਤਞ੍ਹਿ ਤਸ੍ਸ ਸਾਧਿਕਾ ਵੇਦਿਤਬ੍ਬਾ. ਸਮ੍ਭਾਵਨਤ੍ਥੇਤਿ ਪਰਮਤ੍ਥਸਮ੍ਭਾਵਨੇ. ਏਵਞ੍ਹਿ ਕਣ੍ਹਪਕ੍ਖੇਪਿ ਅਪਿਸਦ੍ਦਗ੍ਗਹਣਂ ਸਮਤ੍ਥਿਤਂ ਹੋਤਿ. ਸਮ੍ਭਾਵਨਤ੍ਥੇਤਿ ਵਾ ਪਰਿਕਪ੍ਪਨਤ੍ਥੇਤਿ ਅਤ੍ਥੋ. ਸਙ੍ਖਾਤਬ੍ਬੇ ਅਤ੍ਥੇ ਅਨਿਯਮਤੋ ਵੁਚ੍ਚਮਾਨੇ ਸਙ੍ਖਾਤੋ ਅਨਿਯਮਤ੍ਥੋ ਵਾਸਦ੍ਦੋ ਵਤ੍ਤਬ੍ਬੋਤਿ ‘‘ਅਟ੍ਠ ਵਾ’’ਤਿਆਦਿ ਵੁਤ੍ਤਂ. ਊਨਾਧਿਕਾਨੀਤਿ ਊਨਾਨਿਪਿ ਅਧਿਕਾਨਿਪਿ ਕਿਞ੍ਚਾਪਿ ਹੋਨ੍ਤਿ, ਏਕਂਸੋ ਪਨ ਗਹੇਤਬ੍ਬੋਤਿ ‘‘ਅਟ੍ਠ ਵਾ ਦਸ ਵਾ ਦ੍ਵਾਦਸ ਵਾ’’ਤਿ ਵੁਤ੍ਤਂ. ਏਵਂ ਵਚਨਂ ਸਨ੍ਧਾਯ ‘‘ਵਚਨਸਿਲਿਟ੍ਠਤਾਯਾ’’ਤਿਆਦਿ ਵੁਤ੍ਤਂ. ਪਾਦਨਖਸਿਖਾਹਿ ਅਕੋਪਨਵਸੇਨ ਸਮ੍ਮਾ ਅਧਿਸਯਿਤਾਨਿ. ਉਤੁਨ੍ਤਿ ਉਣ੍ਹਉਤੁਂ ਕਾਯੁਸ੍ਮਾਵਸੇਨ. ਤੇਨਾਹ ‘‘ਉਸ੍ਮੀਕਤਾਨੀ’’ਤਿ. ਭਾਵਿਤਾਨੀਤਿ ਕੁਕ੍ਕੁਟਵਾਸਨਾਯ ਵਾਸਿਤਾਨਿ. ਸਮ੍ਮਾਅਧਿਸਯਨਾਦਿਤਿਵਿਧਕਿਰਿਯਾਕਰਣੇਨ ਇਮਂ ਅਪ੍ਪਮਾਦਂ ਕਤ੍ਵਾ. ਸੋਤ੍ਥਿਨਾ ਅਭਿਨਿਬ੍ਭਿਜ੍ਜਿਤੁਨ੍ਤਿ ਅਨਨ੍ਤਰਾਯੇਨ ਤਤੋ ਨਿਕ੍ਖਮਿਤੁਂ. ਇਦਾਨਿ ਤਮਤ੍ਥਂ ਵਿਵਰਨ੍ਤੋ ‘‘ਤੇ ਹੀ’’ਤਿਆਦਿਮਾਹ. ਸਯਮ੍ਪੀਤਿ ਅਣ੍ਡਾਨਿ. ਪਰਿਣਾਮਨ੍ਤਿ ਪਰਿਪਕ੍ਕਂ ਬਹਿਨਿਕ੍ਖਮਨਯੋਗ੍ਗਤਂ.

ਤਨ੍ਤਿ ਓਪਮ੍ਮਸਮ੍ਪਟਿਪਾਦਨਂ. ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਅਤ੍ਥੇਨਾਤਿ ਉਪਮੇਯ੍ਯਤ੍ਥੇਨ. ਸਂਸਨ੍ਦਿਤ੍ਵਾ ਸਮ੍ਮਾ ਯੋਜੇਤ੍ਵਾ. ਸਮ੍ਪਯੁਤ੍ਤਧਮ੍ਮਵਸੇਨ ਞਾਣਸ੍ਸ ਤਿਕ੍ਖਾਦਿਭਾਵੋ ਵੇਦਿਤਬ੍ਬੋ. ਞਾਣਸ੍ਸ ਹਿ ਸਭਾਵਤੋ ਸਤਿਨੇਪਕ੍ਕਤੋ ਚ ਤਿਕ੍ਖਭਾਵੋ, ਸਮਾਧਿਵਸੇਨ ਸੂਰਭਾਵੋ, ਸਦ੍ਧਾਵਸੇਨ ਵਿਪ੍ਪਸਨ੍ਨਭਾਵੋ ¶ , ਵੀਰਿਯਵਸੇਨ ਪਰਿਣਾਮਭਾਵੋ. ਪਰਿਣਾਮਕਾਲੋਤਿ ਬਲਵਵਿਪਸ੍ਸਨਾਕਾਲੋ. ਵਡ੍ਢਿਤਕਾਲੋਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਕਾਲੋ. ਅਨੁਲੋਮਟ੍ਠਾਨਸ੍ਸ ਹਿ ਵਿਪਸ੍ਸਨਾ ਗਹਿਤਗਬ੍ਭਾ ਨਾਮ ਤਦਾ ਮਗ੍ਗਗਬ੍ਭਸ੍ਸ ਗਹਿਤਤ੍ਤਾ. ਤਜ੍ਜਾਤਿਕਨ੍ਤਿ ਤਸ੍ਸ ਵਿਪਸ੍ਸਨਾਨੁਯੋਗਸ੍ਸ ਅਨੁਰੂਪਂ. ਸਤ੍ਥਾਪਿ ਗਾਥਾਯ ਅਵਿਜ੍ਜਣ੍ਡਕੋਸਂ ਪਹਰਤਿ ਭਿਨ੍ਦਾਪੇਤਿ.

ਓਲਮ੍ਬਕਸਙ੍ਖਾਤਨ੍ਤਿ ਓਲਮ੍ਬਕਸੁਤ੍ਤਸਙ੍ਖਾਤਂ. ਪਲਨ੍ਤਿ ਤਸ੍ਸ ਸੁਤ੍ਤਸ੍ਸ ਨਾਮਂ. ਧਾਰੇਤ੍ਵਾਤਿ ਦਾਰੂਨਂ ਹੇਯ੍ਯਾਦਿਜਾਨਨਤ੍ਥਂ ਉਪਨੇਤ੍ਵਾ. ਦਾਰੂਨਂ ਗਣ੍ਡਂ ਹਰਤੀਤਿ ਪਲਗਣ੍ਡੋਤਿ ਏਤੇਨ ਪਲੇਨ ਗਣ੍ਡਹਾਰੋ ‘‘ਪਲਗਣ੍ਡੋ’’ਤਿ ਪਚ੍ਛਿਮਪਦੇ ਉਤ੍ਤਰਪਦਲੋਪੇਨ ਨਿਦ੍ਦੇਸੋਤਿ ਦਸ੍ਸੇਤਿ. ਗਹਣਟ੍ਠਾਨੇਤਿ ਹਤ੍ਥੇਨ ਗਹੇਤਬ੍ਬਟ੍ਠਾਨੇ. ਸਮ੍ਮਦੇਵ ਖੇਪੀਯਨ੍ਤਿ ਏਤੇਨ ਕਾਯਦੁਚ੍ਚਰਿਤਾਦੀਨੀਤਿ ਸਙ੍ਖੇਪੋ, ਤੇਨ. ਵਿਪਸ੍ਸਨਂ ਅਨੁਯੁਞ੍ਜਨ੍ਤਸ੍ਸ ਪੁਗ੍ਗਲਸ੍ਸੇਵ ਦਿਵਸੇ ਦਿਵਸੇ ਆਸਵਾਨਂ ਪਰਿਕ੍ਖਯੋ ਇਧ ‘‘ਵਿਪਸ੍ਸਨਾਯਾਨਿਸਂਸੋ’’ਤਿ ਅਧਿਪ੍ਪੇਤੋ. ਹੇਮਨ੍ਤਿਕੇਨ ਕਰਣਭੂਤੇਨ. ਭੁਮ੍ਮਤ੍ਥੇ ਵਾ ਏਤਂ ਕਰਣਵਚਨਂ, ਹੇਮਨ੍ਤਿਕੇਤਿ ਅਤ੍ਥੋ. ਪਟਿਪ੍ਪਸ੍ਸਮ੍ਭਨ੍ਤੀਤਿ ਪਟਿਪ੍ਪਸ੍ਸਦ੍ਧਫਲਾਨਿ ਹੋਨ੍ਤਿ. ਤੇਨਾਹ ‘‘ਪੂਤਿਕਾਨਿ ਭਵਨ੍ਤੀ’’ਤਿ.

ਮਹਾਸਮੁਦ੍ਦੋ ਵਿਯ ਸਾਸਨਂ ਸਭਾਵਗਮ੍ਭੀਰਭਾਵਤੋ. ਨਾਵਾ ਵਿਯ ਯੋਗਾਵਚਰੋ ਮਹੋਘੁਤ੍ਤਰਣਤੋ. ਪਰਿਯਾਦਾਨਂ ਵਿਯਾਤਿ ਪਰਿਤੋ ਅਪਰਿਪੂਰਣਂ ਵਿਯ. ਖਜ੍ਜਮਾਨਾਨਨ੍ਤਿ ਸਙ੍ਖਾਦਨ੍ਤੇਨ ਵਿਯ ਉਦਕੇਨ ਖੇਪਿਯਮਾਨਾਨਂ ¶ ਬਨ੍ਧਨਾਨਂ. ਤਨੁਭਾਵੋਤਿ ਪਰਿਯੁਟ੍ਠਾਨੁਪ੍ਪਤ੍ਤਿਯਾ ਅਸਮਤ੍ਥਤਾਯ ਦੁਬ੍ਬਲਭਾਵੋ. ਵਿਪਸ੍ਸਨਾਞਾਣਪੀਤਿਪਾਮੋਜ੍ਜੇਹੀਤਿ ਵਿਪਸ੍ਸਨਾਞਾਣਸਮੁਟ੍ਠਿਤੇਹਿ ਪੀਤਿਪਾਮੋਜ੍ਜੇਹਿ. ਓਕ੍ਖਾਯਮਾਨੇ ਪਕ੍ਖਾਯਮਾਨੇਤਿ ਵਿਵਿਧਪਟਿਪਤ੍ਤਿਯਾ ਉਕ੍ਖਾਯਮਾਨੇ ਪਟਿਸਙ੍ਖਾਨੁਪਸ੍ਸਨਾਯ ਪਕ੍ਖਾਯਮਾਨੇ. ਦੁਬ੍ਬਲਤਾ ਦੀਪਿਤਾ ‘‘ਅਪ੍ਪਕਸਿਰੇਨੇਵ ਸਂਯੋਜਨਾਨਿ ਪਟਿਪ੍ਪਸ੍ਸਮ੍ਭਨ੍ਤਿ, ਪੂਤਿਕਾਨਿ ਭਵਨ੍ਤੀ’’ਤਿ ਵੁਤ੍ਤਤ੍ਤਾ.

ਵਾਸਿਜਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਅਨਿਚ੍ਚਸਞ੍ਞਾਸੁਤ੍ਤਵਣ੍ਣਨਾ

੧੦੨. ਭਾਵੇਨ੍ਤਸ੍ਸਾਤਿ ਵਿਪਸ੍ਸਨਾਯ ਮਗ੍ਗਂ ਭਾਵੇਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਤੇਨਾਹ – ‘‘ਸਬ੍ਬਂ ਕਾਮਰਾਗਂ ਪਰਿਯਾਦਿਯਤੀ’’ਤਿਆਦਿ. ਸਨ੍ਤਾਨੇਤ੍ਵਾਤਿ ਕਸਨਟ੍ਠਾਨਂ ¶ ਸਬ੍ਬਸੋ ਵਿਤਨੇਤ੍ਵਾ ਪਤ੍ਥਰਿਤ੍ਵਾ. ਕਿਲੇਸਾਤਿ ਉਪਕ੍ਕਿਲੇਸਪ੍ਪਭੇਦਾ ਕਿਲੇਸਾ. ਅਨਿਚ੍ਚਸਞ੍ਞਾਞਾਣੇਨਾਤਿ ਅਨਿਚ੍ਚਸਞ੍ਞਾਸਹਗਤੇਨ ਞਾਣੇਨ.

ਲਾਯਨਨ੍ਤਿ ਲਾਯਨਂ ਵਿਯ ਨਯਨਂ ਵਿਯ ਨਿਚ੍ਛੋਟਨਂ ਵਿਯ ਚ ਅਨਿਚ੍ਚਸਞ੍ਞਾਞਾਣਂ. ਇਮਿਨਾ ਅਤ੍ਥੇਨਾਤਿ ਇਮਿਨਾ ਯਥਾਵੁਤ੍ਤੇਨ ਪਾਲ਼ਿਯਾ ਅਤ੍ਥੇਨ, ਉਪਮਾ ਸਂਸਨ੍ਦੇਤਬ੍ਬਾਤਿ ਏਤ੍ਥ ਪਬ੍ਬਜਲਾਯਕੋ ਵਿਯ ਯੋਗਾਵਚਰੋ. ਲਾਯਨਾਦਿਨਾ ਤਸ੍ਸ ਤਤ੍ਥ ਕਤਕਿਚ੍ਚਤਾਯ ਪਰਿਤੁਟ੍ਠਿ ਵਿਯ ਇਮਸ੍ਸ ਕਿਲੇਸੇ ਸਬ੍ਬਸੋ ਛਿਨ੍ਦਿਤ੍ਵਾ ਫਲਸਮਾਪਤ੍ਤਿਸੁਖੇਨ ਕਾਲਸ੍ਸ ਵੀਤਿਨਾਮਨਾ.

ਕੂਟਂ ਗਚ੍ਛਨ੍ਤੀਤਿ ਪਾਰਿਮਨ੍ਤੇਨ ਕੂਟਂ ਗਚ੍ਛਨ੍ਤਿ. ਕੂਟਂ ਪਵਿਸਨਭਾਵੇਨਾਤਿ ਕੂਟਚ੍ਛਿਦ੍ਦਂ ਅਗ੍ਗੇਨ ਪਵਿਸਨਵਸੇਨ. ਸਮੋਸਰਿਤ੍ਵਾਤਿ ਛਿਦ੍ਦੇ ਅਨੁਪਵਿਸਨਵਸੇਨ ਚ ਆਹਚ੍ਚ ਅਵਟ੍ਠਾਨੇਨ ਚ ਸਮੋਸਰਿਤ੍ਵਾ ਠਿਤਾ. ਕੂਟਂ ਵਿਯ ਅਨਿਚ੍ਚਸਞ੍ਞਾ ਅਨਿਚ੍ਚਾਨੁਪਸ੍ਸਨਾਵਸੇਨ ਅਵਟ੍ਠਾਨਸ੍ਸ ਮੂਲਭਾਵਤੋ. ਗੋਪਾਨਸਿਯੋ ਵਿਯ ਚਤੁਭੂਮਕਕੁਸਲਾ ਧਮ੍ਮਾ ਅਨਿਚ੍ਚਸਞ੍ਞਾਮੂਲਕਤ੍ਤਾ. ਕੂਟਂ ਅਗ੍ਗਂ ਸਬ੍ਬਗੋਪਾਨਸੀਨਂ ਤਥਾਅਧਿਟ੍ਠਾਨਸ੍ਸ ਪਧਾਨਕਾਰਣਤ੍ਤਾ. ਅਨਿਚ੍ਚਸਞ੍ਞਾ ਅਗ੍ਗਾਤਿ ਏਤ੍ਥਾਪਿ ਏਸੇਵ ਨਯੋ. ਅਨਿਚ੍ਚਸਞ੍ਞਾ ਲੋਕਿਯਾਤਿ ਇਦਂ ਅਨਿਚ੍ਚਸਞ੍ਞਾਨੁਪਸ੍ਸਨਂ ਸਨ੍ਧਾਯ ਵੁਤ੍ਤਂ. ਅਨਿਚ੍ਚਾਨੁਪਸ੍ਸਨਾਮੁਖੇਨ ਅਧਿਗਤਅਰਿਯਮਗ੍ਗੇ ਉਪ੍ਪਨ੍ਨਸਞ੍ਞਾ ਅਨਿਚ੍ਚਸਞ੍ਞਾਤਿ ਵਤ੍ਤਬ੍ਬਤਂ ਲਭਤੀਤਿ ‘‘ਅਨਿਚ੍ਚਸਞ੍ਞਾ, ਭਿਕ੍ਖਵੇ, ਭਾਵਿਤਾ ਬਹੁਲੀਕਤਾ ਸਬ੍ਬਂ ਕਾਮਰਾਗਂ ਪਰਿਯਾਦਿਯਤੀ’’ਤਿਆਦਿ ਵੁਤ੍ਤਂ. ਤਥਾ ਹਿ ਧਮ੍ਮਸਙ੍ਗਹੇ (ਧ. ਸ. ੩੫੭, ੩੬੦) ‘‘ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਸਞ੍ਞਂ ਭਾਵੇਤੀ’’ਤਿਆਦਿਨਾ ਸਞ੍ਞਾਪਿ ਉਦ੍ਧਟਾ. ਸਬ੍ਬਾਸੁ ਉਪਮਾਸੂਤਿ ਮੂਲਸਨ੍ਤਾਨਉਪਮਾਦੀਸੁ ਪਞ੍ਚਸੁ ਉਪਮਾਸੁ. ਪੁਰਿਮਾਹੀਤਿ ਕਸ੍ਸਕਪਬ੍ਬਜਲਾਯਨਅਮ੍ਬਪਿਣ੍ਡਿਉਪਮਾਹਿ ਅਨਿਚ੍ਚਸਞ੍ਞਾਯ ਕਿਚ੍ਚਂ ਵੁਤ੍ਤਂ ਮੂਲਸਨ੍ਤਾਨਕਪਦਾਲਨਪਬ੍ਬਜਲਾਯਨਵਣ੍ਟਚ੍ਛੇਦਨਪਦੇਸੇਨ ¶ ਅਨਿਚ੍ਚਸਞ੍ਞਾਯ ਪਟਿਪਕ੍ਖਪਚ੍ਛੇਦਨਸ੍ਸ ਦਸ੍ਸਿਤਤ੍ਤਾ. ਪਚ੍ਛਿਮਾਹਿ ਬਲਂ ਦਸ੍ਸਿਤਂ ਪਟਿਪਕ੍ਖਾਤਿਭਾਵਸ੍ਸ ਜੋਤਿਤਤ੍ਤਾ.

ਅਨਿਚ੍ਚਸਞ੍ਞਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪੁਪ੍ਫਵਗ੍ਗਵਣ੍ਣਨਾ ਨਿਟ੍ਠਿਤਾ.

ਮਜ੍ਝਿਮਪਣ੍ਣਾਸਕੋ ਸਮਤ੍ਤੋ.

੧੧. ਅਨ੍ਤਵਗ੍ਗੋ

੧. ਅਨ੍ਤਸੁਤ੍ਤਵਣ੍ਣਨਾ

੧੦੩. ਅਞ੍ਞਮਞ੍ਞਂ ¶ ਅਸਂਸਟ੍ਠਭਾਵੇਨ ਏਤਿ ਗਚ੍ਛਤੀਤਿ ਅਨ੍ਤੋ, ਭਾਗੋਤਿ ਆਹ ‘‘ਅਨ੍ਤਾਤਿ ਕੋਟ੍ਠਾਸਾ’’ਤਿ. ‘‘ਸਕ੍ਕਾਯਨਿਰੋਧਨ੍ਤੋ’’ਤਿ ਨਿਰੋਧਪਚ੍ਚਯਸ੍ਸ ਗਹਿਤਤ੍ਤਾ ਵੁਤ੍ਤਂ ‘‘ਚਤੁਸਚ੍ਚਵਸੇਨ ਪਞ੍ਚਕ੍ਖਨ੍ਧੇ ਯੋਜੇਤ੍ਵਾ’’ਤਿ. ਅਨ੍ਤੋਤਿ…ਪੇ… ਅਜ੍ਝਾਸਯਵਸੇਨ ਵੁਤ੍ਤਂ ਯਥਾਨੁਲੋਮਦੇਸਨਤ੍ਤਾ ਸੁਤ੍ਤਨ੍ਤਦੇਸਨਾਯ.

ਅਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੩. ਦੁਕ੍ਖਸੁਤ੍ਤਾਦਿਵਣ੍ਣਨਾ

੧੦੪-੧੦੫. ਦੁਤਿਯਮ੍ਪੀਤਿ ਅਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨ ਕੇਵਲਂ ਪਠਮਸੁਤ੍ਤਮੇਵ, ਅਥ ਖੋ ਦੁਤਿਯਮ੍ਪੀਤਿ.

ਤਤਿਯਮ੍ਪਿ ਤਥੇਵਾਤਿ ਇਮਿਨਾ ‘‘ਪਞ੍ਚਕ੍ਖਨ੍ਧੇ ਚਤੁਸਚ੍ਚਵਸੇਨ ਯੋਜੇਤ੍ਵਾ’’ਤਿ ਇਦਂ ਉਪਸਂਹਰਤਿ.

ਦੁਕ੍ਖਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੪. ਪਰਿਞ੍ਞੇਯ੍ਯਸੁਤ੍ਤਵਣ੍ਣਨਾ

੧੦੬. ਪਰਿਞ੍ਞੇਯ੍ਯੇਤਿ ਏਤ੍ਥ ਤਿਸ੍ਸੋ ਪਰਿਞ੍ਞਾ ਞਾਤਪਰਿਞ੍ਞਾ, ਤੀਰਣਪਰਿਞ੍ਞਾ, ਪਹਾਨਪਰਿਞ੍ਞਾਤਿ. ਤਾਸੁ ਞਾਤਪਰਿਞ੍ਞਾ ਯਾਵਦੇਵ ਤੀਰਣਪਰਿਞ੍ਞਤ੍ਥਾ. ਤੀਰਣਪਰਿਞ੍ਞਾ ਚ ਯਾਵਦੇਵ ਪਹਾਨਪਰਿਞ੍ਞਤ੍ਥਾਤਿ ¶ . ਤਤ੍ਥ ਉਕ੍ਕਟ੍ਠਾਯ ਪਰਿਞ੍ਞਾਯ ਕਿਚ੍ਚਦਸ੍ਸਨਵਸੇਨ ਅਤ੍ਥਂ ਦਸ੍ਸੇਨ੍ਤੋ ‘‘ਪਰਿਞ੍ਞੇਯ੍ਯੇਤਿ ਪਰਿਜਾਨਿਤਬ੍ਬੇ ਸਮਤਿਕ੍ਕਮਿਤਬ੍ਬੇ’’ਤਿ, ਪਹਾਤਬ੍ਬੇਤਿ ਅਤ੍ਥੋ. ਤੇਨਾਹ ਭਗਵਾ – ‘‘ਕਤਮਾ ਚ, ਭਿਕ੍ਖਵੇ, ਪਰਿਞ੍ਞਾ? ਰਾਗਕ੍ਖਯੋ, ਦੋਸਕ੍ਖਯੋ, ਮੋਹਕ੍ਖਯੋ’’ਤਿ, ਤਸ੍ਮਾ ਸਮਤਿਕ੍ਕਮਨ੍ਤਿ, ਸਮਤਿਕ੍ਕਨ੍ਤਂ ਪਹਾਨਸ੍ਸ ਉਪਾਯਂ. ਸਮਤਿਕ੍ਕਮਿਤ੍ਵਾ ਠਿਤਨ੍ਤਿ ਪਜਹਿਤ੍ਵਾ ਠਿਤਨ੍ਤਿ ਅਯਮੇਤ੍ਥ ਅਤ੍ਥੋ.

ਪਰਿਞ੍ਞੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੧੦. ਸਮਣਸੁਤ੍ਤਾਦਿਵਣ੍ਣਨਾ

੧੦੭-੧੧੨. ਚਤ੍ਤਾਰਿ ¶ ਸਚ੍ਚਾਨਿ ਕਥਿਤਾਨਿ ਅਸ੍ਸਾਦਾਦੀਨਂ ਸਮੁਦਯਾਦੀਨਞ੍ਚ ਦੇਸਿਤਤ੍ਤਾ.

ਕਿਲੇਸਪ੍ਪਹਾਨਂ ਕਥਿਤਂ ਰਾਗਪ੍ਪਹਾਨਸ੍ਸ ਜੋਤਿਤਤ੍ਤਾ.

ਸਮਣਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਨ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੨. ਧਮ੍ਮਕਥਿਕਵਗ੍ਗੋ

੧-੨. ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ

੧੧੩-੧੧੪. ਯਾਵਤਾਤਿ ਯਸ੍ਮਾ. ਇਮਾਯ…ਪੇ… ਸਮਨ੍ਨਾਗਤੋਤਿ ‘‘ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਨਪ੍ਪਜਾਨਾਤੀ’’ਤਿਆਦਿਨਾ ਨਯੇਨ ਵੁਤ੍ਤਾਯ ਚਤੂਸੁ ਅਰਿਯਸਚ੍ਚੇਸੁ ਅਞ੍ਞਾਣਸਭਾਵਾਯ ਅਵਿਜ੍ਜਾਯ ਸਮ੍ਮੋਹੇਨ ਸਮਨ੍ਨਾਗਤੋ. ਏਤ੍ਤਾਵਤਾਤਿ ਏਤ੍ਤਕੇਨ ਕਾਰਣੇਨ ਅਵਿਜ੍ਜਾਗਤੋ ਸਮਙ੍ਗੀਭੂਤੇਨ ਉਪਗਤੋ, ਅਵਿਜ੍ਜਾਯ ਵਾ ਉਪੇਤੋ ਨਾਮ ਹੋਤਿ.

ਦੁਤਿਯੇਪੀਤਿ ਵਿਜ੍ਜਾਸੁਤ੍ਤੇ. ‘‘ਵਿਜ੍ਜਾਵਸੇਨ ਦੇਸਨਾ’’ਤਿ ਅਯਮੇਵ ਵਿਸੇਸੋਤਿ ਆਹ ‘‘ਏਸੇਵ ਨਯੋ’’ਤਿ.

ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੩. ਧਮ੍ਮਕਥਿਕਸੁਤ੍ਤਵਣ੍ਣਨਾ

੧੧੫. ਪਠਮੇਨ ¶ ਧਮ੍ਮਕਥਿਕੋ ਕਥਿਤੋ ‘‘ਧਮ੍ਮਂ ਦੇਸੇਤੀ’’ਤਿ ਵੁਤ੍ਤਤ੍ਤਾ. ਦੁਤਿਯੇਨ ਸੇਖਭੂਮਿ ਕਥਿਤਾ ‘‘ਪਟਿਪਨ੍ਨੋ ਹੋਤੀ’’ਤਿ ਵੁਤ੍ਤਤ੍ਤਾ, ਤਤਿਯੇਨ ਅਸੇਖਭੂਮਿ ਕਥਿਤਾ ‘‘ਅਨੁਪਾਦਾਵਿਮੁਤ੍ਤੋ ਹੋਤੀ’’ਤਿ ਵੁਤ੍ਤਤ੍ਤਾ. ਧਮ੍ਮਕਥਿਕਂ ਪੁਚ੍ਛਿਤੇਨ ਭਗਵਤਾ. ਵਿਸੇਸੇਤ੍ਵਾਤਿ ਧਮ੍ਮਕਥਿਕਭਾਵਤੋ ਵਿਸੇਸੇਤ੍ਵਾ ਉਕ੍ਕਂਸੇਤ੍ਵਾ. ਦ੍ਵੇ ਭੂਮਿਯੋਤਿ ਸੇਕ੍ਖਾਸੇਕ੍ਖਭੂਮਿਯੋ.

ਧਮ੍ਮਕਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੁਤਿਯਧਮ੍ਮਕਥਿਕਸੁਤ੍ਤਵਣ੍ਣਨਾ

੧੧੬. ਤੀਣਿ ¶ ਵਿਸ੍ਸਜ੍ਜਨਾਨੀਤਿ ਯਥਾਪੁਚ੍ਛਂ ਤੀਣਿ ਵਿਸ੍ਸਜ੍ਜਨਾਨਿ.

ਦੁਤਿਯਧਮ੍ਮਕਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੯. ਬਨ੍ਧਨਸੁਤ੍ਤਾਦਿਵਣ੍ਣਨਾ

੧੧੭-੧੨੧. ਤੀਰਂ ਵੁਚ੍ਚਤਿ ਵਟ੍ਟਂ ਓਰਿਮਤੀਰਨ੍ਤਿ ਕਤ੍ਵਾ. ਤੇਨਾਹ ‘‘ਅਥਾਯਂ ਇਤਰਾ ਪਜਾ, ਤੀਰਮੇਵਾਨੁਧਾਵਤੀ’’ਤਿ (ਧ. ਪ. ੮੫). ਪਾਰਂ ਵੁਚ੍ਚਤਿ ਨਿਬ੍ਬਾਨਂ ਸਂਸਾਰਸ੍ਸ ਪਾਰਿਮਨ੍ਤਿ ਕਤ੍ਵਾ. ਬਦ੍ਧੋਤਿ ਅਨੁਸਯਪ੍ਪਹਾਨਸ੍ਸ ਅਕਤਤ੍ਤਾ ਕਿਲੇਸਬਨ੍ਧਨੇਨ ਬਦ੍ਧੋ, ਸੁਕ੍ਕਪਕ੍ਖੇਪਿ ਦਿਟ੍ਠਿਸਮਨੁਪਸ੍ਸਨਾਯ ਰੂਪਾਦਿਬਨ੍ਧਨਸ੍ਸ ਪਟਿਕ੍ਖੇਪਮਤ੍ਤਮੇਵ ਵੁਤ੍ਤਂ, ਨ ਵਿਮੋਕ੍ਖਨ੍ਤਿ ਅਧਿਪ੍ਪਾਯੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਂ ਕਥਿਤਨ੍ਤਿ ‘‘ਤੀਰਦਸ੍ਸੀ ਪਾਰਦਸ੍ਸੀ, ਪਰਿਮੁਤ੍ਤੋ ਸੋ ਦੁਕ੍ਖਸ੍ਮਾਤਿ ਵਦਾਮੀ’’ਤਿ ਆਗਤਤ੍ਤਾ ਵਟ੍ਟਵਿਵਟ੍ਟਂ ਕਥਿਕਨ੍ਤਿ ਵਤ੍ਤੁਂ ਸਕ੍ਕਾ.

ਛਟ੍ਠਾਦੀਨਿ ਉਤ੍ਤਾਨਤ੍ਥਾਨੇਵ ਹੇਟ੍ਠਾ ਵੁਤ੍ਤਨਯਤ੍ਤਾ.

ਬਨ੍ਧਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦. ਸੀਲਵਨ੍ਤਸੁਤ੍ਤਵਣ੍ਣਨਾ

੧੨੨. ਆਬਾਧਟ੍ਠੇਨਾਤਿ ਆਦਿਤੋ ਉਪ੍ਪਤ੍ਤਿਤੋ ਪਟ੍ਠਾਯ ਬਾਧਨਟ੍ਠੇਨ ਰੁਜਨਟ੍ਠੇਨ. ਅਨ੍ਤੋਦੋਸਟ੍ਠੇਨਾਤਿ ਅਬ੍ਭਨ੍ਤਰੇ ਏਵ ਦੁਸ੍ਸਨਟ੍ਠੇਨ ਕੁਪ੍ਪਨਟ੍ਠੇਨ. ਖਣਨਟ੍ਠੇਨਾਤਿ ਸਸਨਟ੍ਠੇਨ. ਦੁਕ੍ਖਟ੍ਠੇਨਾਤਿ ਦੁਕ੍ਖਮਤ੍ਤਾ ¶ ਦੁਕ੍ਖਭਾਵੇਨ. ਦੁਕ੍ਖਞ੍ਹਿ ਲੋਕੇ ‘‘ਅਘ’’ਨ੍ਤਿ ਵੁਚ੍ਚਤਿ ਅਤਿਵਿਯ ਹਨਨਤੋ. ਵਿਸਭਾਗਂ …ਪੇ… ਪਚ੍ਚਯਟ੍ਠੇਨਾਤਿ ਯਥਾਪਵਤ੍ਤਮਾਨਾਨਂ ਧਾਤਾਦੀਨਂ ਵਿਸਭਾਗਭੂਤਮਹਾਭੂਤਸਮੁਟ੍ਠਾਨਸ੍ਸ ਆਬਾਧਸ੍ਸ ਪਚ੍ਚਯਭਾਵੇਨ. ਅਸਕਟ੍ਠੇਨਾਤਿ ਅਨਤ੍ਤਨਿਯਤੋ. ਪਲੁਜ੍ਜਨਟ੍ਠੇਨਾਤਿ ਪਕਾਰਤੋ ਭਿਜ੍ਜਨਟ੍ਠੇਨ. ਸਤ੍ਤਸੁਞ੍ਞਤਟ੍ਠੇਨਾਤਿ ਸਤ੍ਤਸਙ੍ਖਾਤਅਤ੍ਤਸੁਞ੍ਞਤਟ੍ਠੇਨ. ਅਤ੍ਤਾਭਾਵੇਨਾਤਿ ਦਿਟ੍ਠਿਗਤਿਕਪਰਿਕਪ੍ਪਿਤਸ੍ਸ ਅਤ੍ਤਨੋ ਅਭਾਵੇਨ. ਸੁਞ੍ਞਤੋ ਅਨਤ੍ਤਤੋਤਿ ਏਤ੍ਥ ‘‘ਪਰਤੋ’’ਤਿ ਪਦਸ੍ਸ ਸਙ੍ਗਹੋ ਕਾਤਬ੍ਬੋ, ਤਸ੍ਮਾ ‘‘ਦ੍ਵੀਹਿ ਅਨਤ੍ਤਮਨਸਿਕਾਰੋ’’ਤਿ ਵਤ੍ਤਬ੍ਬਂ.

ਸੀਲਵਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਸੁਤਵਨ੍ਤਸੁਤ੍ਤਵਣ੍ਣਨਾ

੧੨੩. ਤਥਾ ¶ ਏਕਾਦਸਮੇਤਿ ਏਤ੍ਥ ਤਥਾ-ਸਦ੍ਦੇਨ ‘‘ਉਤ੍ਤਾਨਮੇਵਾ’’ਤਿ ਇਦਂ ਆਕਡ੍ਢਤਿ. ਇਧਾਤਿ ਏਕਾਦਸਮੇ. ਕਮ੍ਮਟ੍ਠਾਨਸ੍ਸ ਉਗ੍ਗਹਧਾਰਣਪਰਿਚਯਮਨਸਿਕਾਰਵਸੇਨ ਪਵਤ੍ਤਞਾਣਂ ਕਮ੍ਮਟ੍ਠਾਨਸੁਤਵਸੇਨ ਨਿਪ੍ਫਜ੍ਜਨਤੋ ‘‘ਸੁਤ’’ਨ੍ਤਿ ਵੁਤ੍ਤਂ.

ਸੁਤਵਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨-੧੩. ਕਪ੍ਪਸੁਤ੍ਤਾਦਿਵਣ੍ਣਨਾ

੧੨੪-੧੨੫. ਰਾਹੁਲੋਵਾਦਸਦਿਸਾਨੀਤਿ ਰਾਹੁਲੋਵਾਦਸੁਤ੍ਤੇ (ਮ. ਨਿ. ੨.੧੧੩ ਆਦਯੋ) ਆਗਤਸੁਤ੍ਤਸਦਿਸਾਨਿ.

ਕਪ੍ਪਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਧਮ੍ਮਕਥਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੩. ਅਵਿਜ੍ਜਾਵਗ੍ਗੋ

੧-੧੦. ਸਮੁਦਯਧਮ੍ਮਸੁਤ੍ਤਾਦਿਵਣ੍ਣਨਾ

੧੨੬-੧੩੫. ਇਮਸ੍ਮਿਨ੍ਤਿ ¶ ਅਵਿਜ੍ਜਾਵਗ੍ਗੇ. ਚਤੁਸਚ੍ਚਮੇਵ ਕਥਿਤਂ, ਤਸ੍ਮਾ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ ਅਧਿਪ੍ਪਾਯੋ.

ਸਮੁਦਯਧਮ੍ਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਵਿਜ੍ਜਾਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੪. ਕੁਕ੍ਕੁਲ਼ਵਗ੍ਗੋ

੧-੧੪. ਕੁਕ੍ਕੁਲ਼ਸੁਤ੍ਤਾਦਿਵਣ੍ਣਨਾ

੧੩੬-੧੪੯. ਅਨ੍ਤੋ ਅਗ੍ਗਿ ਮਹਨ੍ਤੋ ਛਾਰਿਕਰਾਸਿ, ਤਤ੍ਥ ਉਕ੍ਕੁਲ਼ਵਿਕੁਲਤੋ ਅਕ੍ਕਮਨ੍ਤਂ ਯਾਵ ਕੇਸਗ੍ਗਂ ਅਨੁਦਹਤਾਯ ਕੁਚ੍ਛਿਤਂ ਕੁਲ਼ਨ੍ਤਿ ਕੁਕ੍ਕੁਲ਼ਂ ¶ , ਰੂਪਵੇਦਨਾਦਿ ਪਨ ਤਤੋਪਿ ਕਞ੍ਚਿ ਕਾਲਂ ਅਨੁਦਹਨਤੋ ਮਹਾਪਰਿਲ਼ਾਹਨਟ੍ਠੇਨ ਚ ਕੁਕ੍ਕੁਲ਼ਂ ਵਿਯਾਤਿ ਕੁਕ੍ਕੁਲ਼ਂ. ਅਨਿਚ੍ਚਲਕ੍ਖਣਾਦੀਨੀਤਿ ਅਨਿਚ੍ਚਦੁਕ੍ਖਾਨਤ੍ਤਲਕ੍ਖਣਾਨਿ.

ਕੁਕ੍ਕੁਲ਼ਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਕੁਕ੍ਕੁਲ਼ਵਗ੍ਗਵਣ੍ਣਨਾ ਨਿਟ੍ਠਿਤਾ.

੧੫. ਦਿਟ੍ਠਿਵਗ੍ਗੋ

੧-੯. ਅਜ੍ਝਤ੍ਤਸੁਤ੍ਤਾਦਿਵਣ੍ਣਨਾ

੧੫੦-੧੫੮. ਪਚ੍ਚਯਂ ਕਤ੍ਵਾਤਿ ਅਭਿਨਿਵੇਸਪਚ੍ਚਯਂ ਕਤ੍ਵਾ. ਆਦਿਸਦ੍ਦੇਨ ਮਿਚ੍ਛਾਦਿਟ੍ਠਿਸਕ੍ਕਾਯਦਿਟ੍ਠਿਅਤ੍ਤਾਨੁਦਿਟ੍ਠਿ ਸਞ੍ਞੋਜਨਾਭਿਨਿਵੇਸ-ਵਿਨਿਬਨ੍ਧਅਜ੍ਝੋਸਾਨਾਨਿ ਸਙ੍ਗਣ੍ਹਾਤਿ. ਤਤ੍ਥ ਅਭਿਨਿਵੇਸਾ ਤਣ੍ਹਾਮਾਨਦਿਟ੍ਠਿਯੋ. ਵਿਨਿਬਨ੍ਧਾ ‘‘ਕਾਯੇ ਅਵੀਤਰਾਗੋ ਹੋਤੀ’’ਤਿਆਦਿਨਾ (ਦੀ. ਨਿ. ੩.੩੨੦; ਮ. ਨਿ. ੧.੧੮੬) ਆਗਤਚੇਤਸੋਵਿਨਿਬਨ੍ਧਾ ¶ . ਅਜ੍ਝੋਸਾਨਾਤਿ ਤਣ੍ਹਾਦਿਟ੍ਠਿਜ੍ਝੋਸਾਨਾਨਿ. ਸੇਸਾਨਿ ਸੁਵਿਞ੍ਞੇਯ੍ਯਾਨੇਵ.

ਅਜ੍ਝਤ੍ਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦.ਆਨਨ੍ਦਸੁਤ੍ਤਵਣ੍ਣਨਾ

੧੫੯. ਧਰਮਾਨਕਾਲੇਤਿ ਜੀਵਮਾਨਕਾਲੇ. ਪਹਾਨਂ ਅਪਸ੍ਸਨ੍ਤੋਤਿ ਥੇਰਸ੍ਸ ਕਿਰ ਭਗਵਤਿ ਪੇਮਂ ਅਧਿਮਤ੍ਤਂ. ਚਿਤ੍ਤਂ ਗਣ੍ਹਿਸ੍ਸਾਮੀਤਿ ਚਿਤ੍ਤਂ ਆਰਾਧੇਸ੍ਸਾਮਿ. ਗਨ੍ਤਬ੍ਬਂ ਹੋਤਿ, ਤਸ੍ਮਾ ਸਪਲਿਬੋਧੋ. ਚਿਤ੍ਤਂ ਸਮ੍ਪਹਂਸਮਾਨੋਤਿ ਚਿਤ੍ਤਸ੍ਸ ਵਿਬੋਧਨੋ. ਵਿਮੁਤ੍ਤਿ…ਪੇ… ਜਾਤੋ ਆਯਤਿਂ ਪਟਿਵੇਧਪਚ੍ਚਯਤ੍ਤਾ, ਨ ਪਨ ਤਦਾ ਵਿਸੇਸਾਵਹਭਾਵਾ ਨਿਬ੍ਬੇਧਭਾਗਿਯੋ.

ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਦਿਟ੍ਠਿਵਗ੍ਗਵਣ੍ਣਨਾ ਨਿਟ੍ਠਿਤਾ.

ਉਪਰਿਪਣ੍ਣਾਸਕੋ ਸਮਤ੍ਤੋ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਖਨ੍ਧਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੨. ਰਾਧਸਂਯੁਤ੍ਤਂ

੧. ਪਠਮਵਗ੍ਗੋ

੧. ਮਾਰਸੁਤ੍ਤਵਣ੍ਣਨਾ

੧੬੦. ਮਾਰਸਦ੍ਦੋਯਂ ¶ ¶ ਭਾਵਸਾਧਨੋਤਿ ਦਸ੍ਸੇਨ੍ਤੋ ‘‘ਮਾਰੋ ਵਾ ਅਸ੍ਸਾਤਿ ਮਰਣਂ ਵਾ ਭਵੇਯ੍ਯਾ’’ਤਿ ਆਹ. ਮਾਰੇਤਾਤਿ ਮਰਿਤਬ੍ਬੋ ਮਾਰਂ ਮਰਣਂ ਏਤਬ੍ਬੋਤਿ ਆਹ ‘‘ਮਾਰੇਤਬ੍ਬੋ’’ਤਿ. ਅਨੁਪਾਦਾਨਿਬ੍ਬਾਨਤ੍ਥਾਤਿ ਫਲਵਿਮੁਤ੍ਤਿਸਙ੍ਖਾਤਾ ਅਰਹਤੋ ਅਰਹਨ੍ਤਤਾ ਨਾਮ ਯਾਵਦੇਵ ਅਨੁਪਾਦਾਨਿਬ੍ਬਾਨਤ੍ਥਾ. ਨਿਬ੍ਬਾਨਬ੍ਭਨ੍ਤਰੇਤਿ ਅਨੁਪਾਦਾਨਿਬ੍ਬਾਨਾਧਿਗਮਸ੍ਸ ਅਬ੍ਭਨ੍ਤਰੇ ਤਤੋ ਓਰਮੇਵ ਇਦਂ ਮਗ੍ਗਂ ਬ੍ਰਹ੍ਮਚਰਿਯਂ ਵੁਸ੍ਸਤਿ, ਨ ਤਤੋ ਪਰਂ. ਅਸ੍ਸਾਤਿ ਬ੍ਰਹ੍ਮਚਰਿਯਸ੍ਸ.

ਮਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੧੦. ਸਤ੍ਤਸੁਤ੍ਤਾਦਿਵਣ੍ਣਨਾ

੧੬੧-੧੬੯. ਲਗ੍ਗਪੁਚ੍ਛਾਤਿ ਲਗ੍ਗਨਸ੍ਸ ਬਜ੍ਝਨਸ੍ਸ ਪੁਚ੍ਛਾ. ਯਦਿ ਰੂਪਾਦੀਸੁ ਸਤ੍ਤਤ੍ਤਾ ਸਤ੍ਤੋ, ਖੀਣਾਸਵਾ ਕਥਂ ਸਤ੍ਤਾਤਿ? ਸਤ੍ਤਭੂਤਪੁਬ੍ਬਾਤਿ ਕਤ੍ਵਾ. ਕੀਲ਼ਾਵਿਗਮਨ੍ਤਿ ਕੀਲ਼ਾਯ ਅਪਨਯਨਂ ਓਰਮਣਂ. ਯਨ੍ਤਰਜ੍ਜੁ ਵਿਯ ਭਵਪਬਨ੍ਧਸ੍ਸ ਨਯਨਤੋ ਭਵਰਜ੍ਜੂਤਿ ਤਣ੍ਹਾ ਵੁਤ੍ਤਾ.

ਸਤ੍ਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਵਗ੍ਗੋ

੧-੧੨. ਮਾਰਸੁਤ੍ਤਾਦਿਵਣ੍ਣਨਾ

੧੭੦-੧੮੧. ਰੂਪਾਦਿਵਿਨਿਮੁਤ੍ਤਂ ¶ ਮਰਣਂ ਨਾਮ ਨਤ੍ਥਿ ਰੂਪਾਦੀਨਂਯੇਵ ਵਿਭਵੇ ਮਰਣਸਮਞ੍ਞਾਤਿ. ਮਰਣਧਮ੍ਮੋ ਵਿਨਾਸਭਾਵੋ.

ਮਾਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੩-੪. ਆਯਾਚਨਵਗ੍ਗਾਦਿ

੧-੧੧. ਮਾਰਾਦਿਸੁਤ੍ਤਏਕਾਦਸਕਵਣ੍ਣਨਾ

੧੮੨-੨੦੫. ਸੁਖੁਮਂ ¶ ਕਾਰਣਂ ਉਪਟ੍ਠਾਤਿ, ਤੇਨੇਸ ਥੇਰੋ ਪਟਿਭਾਨੇਯ੍ਯਕਾਨਂ ਏਤਦਗ੍ਗੇ ਠਪਿਤੋ. ਵਿਮੁਤ੍ਤਿਪਰਿਪਾਚਨੀਯਧਮ੍ਮਵਸੇਨੇਵ, ਨ ਪਟਿਵੇਧਾਵਹਭਾਵੇਨ.

ਮਾਰਾਦਿਸੁਤ੍ਤਏਕਾਦਸਕਵਣ੍ਣਨਾ ਨਿਟ੍ਠਿਤਾ.

ਆਯਾਚਨਵਗ੍ਗਾਦਿਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਰਾਧਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੩. ਦਿਟ੍ਠਿਸਂਯੁਤ੍ਤਂ

੧. ਸੋਤਾਪਤ੍ਤਿਵਗ੍ਗੋ

੧. ਵਾਤਸੁਤ੍ਤਵਣ੍ਣਨਾ

੨੦੬. ਨ ¶ ¶ ਏਤੇ ਵਾਤਾਤਿ ਯੇ ਇਮੇ ਰੁਕ੍ਖਸਾਖਾਦਿਭਞ੍ਜਨਕਰਾ, ਏਤੇ ਸਤ੍ਤਕਾਯਤ੍ਤਾ ਵਾਤਾ ਨਾਮ ਨ ਹੋਨ੍ਤਿ. ਤੇ ਹਿ ਨਿਚ੍ਚਾ ਧੁਵਾ ਸਸ੍ਸਤਾ. ਤੇਨਾਹ ‘‘ਵਾਤੋ ਪਨਾ’’ਤਿਆਦਿ. ਤੇਨ ਸਤ੍ਤਸੁ ਕਾਯੇਸੁ ਚਤੁਤ੍ਥਂ ਕਾਯਮਾਹ. ਰੁਕ੍ਖਸਾਖਾਦਿਭਞ੍ਜਨਕੋ ਏਸੋ ਵਾਤਲੇਸੋ ਨਾਮ, ਵਾਤਸਦਿਸੋਤਿ ਅਤ੍ਥੋ. ਏਸਿਕਤ੍ਥਮ੍ਭੋ ਵਿਯਾਤਿ ਇਮਿਨਾ ਨਿਚ੍ਚਲਭਾਵਮੇਵ ਦਸ੍ਸੇਤਿ, ਪਬ੍ਬਤਕੂਟਂ ਵਿਯਾਤਿ ਇਮਿਨਾ ਪਨ ਸਸ੍ਸਤਿਸਮਂਵਾਪਿ. ਅਯਞ੍ਹਿ ਵਾਯੁ ਕਾਯਸ੍ਸ ਨਿਚ੍ਚਤਂ ਅਭਿਨਿਵਿਸ੍ਸ ਠਿਤੋ ‘‘ਮਾ ਚ ਅਨਿਚ੍ਚਤਾ ਪਰੋ ਹੋਤੂ’’ਤਿ ਨ ਵਾਤਾ ਵਾਯਨ੍ਤੀਤਿ ਬਾਧਤਿ. ਏਸ ਨਯੋ ਨਦਿਯੋ ਸਨ੍ਦਨ੍ਤੀਤਿਆਦੀਸੁ. ਉਦਕਂ ਪਨਾਤਿ ਦੁਤਿਯਂ ਕਾਯਂ ਸਨ੍ਧਾਯਾਹ. ਗਬ੍ਭੋ ਪਨ ਨ ਨਿਕ੍ਖਮਤਿ ਕੂਟਟ੍ਠਾਦਿਭਾਵੇਨੇਵ ਤਸ੍ਸ ਲਬ੍ਭਨਤੋ. ਨੇਵ ਤੇ ਉਦੇਨ੍ਤਿ ਯਥਾ ਵਾਤਾ, ਏਵਂ ਤਿਟ੍ਠਨਤੋ ਲੋਕਸ੍ਸ ਪਨ ਤਥਾ ਮਤਿਮਤ੍ਤਨ੍ਤਿ ਅਧਿਪ੍ਪਾਯੋ.

ਵਾਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੪. ਏਤਂਮਮਸੁਤ੍ਤਾਦਿਵਣ੍ਣਨਾ

੨੦੭-੨੦੯. ਦਿਟ੍ਠਂ ਰੂਪਾਯਤਨਂ ਚਕ੍ਖੁਨਾ ਦਟ੍ਠਬ੍ਬਤੋ. ਸੁਤਂ ਸਦ੍ਦਾਯਤਨਂ ਸੋਤੇਨ ਸੋਤਬ੍ਬਤੋ. ਮੁਤਂ ਗਨ੍ਧਾਯਤਨਾਦਿ ਤਿਵਿਧਂ ਸਮ੍ਪਤ੍ਤਗਾਹੀਹਿ ਘਾਨਾਦੀਹਿ ਪਤ੍ਵਾ ਗਹੇਤਬ੍ਬਤੋ. ਅਵਸੇਸਾਨਿ ਚਕ੍ਖਾਦੀਨਿ ਸਤ੍ਤਾਯਤਨਾਨਿ ਵਿਞ੍ਞਾਤਂ ਨਾਮ ਕੇਵਲਂ ਮਨੋਵਿਞ੍ਞਾਣੇਨ ਵਿਜਾਨਿਤਬ੍ਬਤੋ. ਪਤ੍ਤਨ੍ਤਿ ਅਨੁਪ੍ਪਤ੍ਤਂ, ਯਂ ਕਿਞ੍ਚਿ ਪਾਪੁਣਿਤਬ੍ਬਂ ਪਰਿਯੇਸਿਤ੍ਵਾ ਗਵੇਸਿਤ੍ਵਾ ਸਮ੍ਪਤ੍ਤਨ੍ਤਿ ਅਨੁਪ੍ਪਤ੍ਤਂ. ਪਰਿਯੇਸਿਤਨ੍ਤਿ ਪਰਿਯਿਟ੍ਠਂ. ਚਿਤ੍ਤੇਨ ਅਨੁਸਞ੍ਚਰਿਤਨ੍ਤਿ ਮਨਸਾ ਚਿਨ੍ਤਿਤਂ. ‘‘ਪਤ੍ਤਂ ਪਰਿਯੇਸਿਤ’’ਨ੍ਤਿ ਏਤਸ੍ਮਿਂ ਪਦਦ੍ਵਯੇ ਚਤੁਕ੍ਕਂ ਸਮ੍ਭਵਤੀਤਿ ਤਂ ਦਸ੍ਸੇਤ੍ਵਾ ਤਸ੍ਸ ਵਸੇਨ ਪਤ੍ਤਪਰਿਯੇਸਿਤਪਦਾਨਿ, ਤਤੋ ਮਨਸਾ ਅਨੁਵਿਚਰਿਤਞ੍ਚ ਨੀਹਰਿਤ੍ਵਾ ਦਸ੍ਸੇਤੁਂ ¶ ‘‘ਲੋਕਸ੍ਮਿਂ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਰਿਯੇਸਿਤ੍ਵਾ ਪਤ੍ਤਂ ਨਾਮ ਪਰਿਯੇਸਨਾਯ ¶ ਪਰਿਗ੍ਗਾਹਭਾਵਤੋ. ਪਰਿਯੇਸਿਤਂ ਨਾਮ ਕੇਵਲਂ ਪਰਿਯੇਸਿਤਮੇਵਾਤਿ ਕਤ੍ਵਾ ਪਰਿਯੇਸਿਤ੍ਵਾ ਪਤ੍ਤਸ੍ਸ ਮਨੁਸ੍ਸਾਨੁਵਿਚਰਿਤਸ੍ਸ ਵੁਤ੍ਤਤ੍ਤਾ. ਪਠਮਵਿਕਪ੍ਪੇ ਸਙ੍ਕਰੋ ਅਤ੍ਥੀਤਿ ਅਸਙ੍ਕਰਤੋ ਚ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਸਬ੍ਬਨ੍ਤਿ ਵਿਞ੍ਞਾਤਾਦਿ. ਤਞ੍ਹਿ ਮਨੋਵਿਞ੍ਞਾਣੇਨ ਗਹਿਤਤ੍ਤਾ ਮਨਸਾ ਅਨੁਵਿਚਰਿਤਂ ਨਾਮ ਨ ਦਿਟ੍ਠਂ ਸੁਤਂ ਮੁਤਂ.

ਏਤਂਮਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੫. ਨਤ੍ਥਿਦਿਨ੍ਨਸੁਤ੍ਤਵਣ੍ਣਨਾ

੨੧੦. ਦਿਨ੍ਨਨ੍ਤਿ ਦੇਯ੍ਯਧਮ੍ਮਸੀਸੇਨ ਦਾਨਂ ਵੁਤ੍ਤਨ੍ਤਿ ਆਹ ‘‘ਦਿਨ੍ਨਸ੍ਸ ਫਲਾਭਾਵਂ ਸਨ੍ਧਾਯਾ’’ਤਿ, ਦਿਨ੍ਨਂ ਪਨ ਅਨ੍ਨਾਦਿਵਤ੍ਥੁਂ ਕਥਂ ਪਟਿਕ੍ਖਿਪਨ੍ਤਿ. ਏਸ ਨਯੋ ‘‘ਯਿਟ੍ਠਂ ਹੁਤ’’ਨ੍ਤਿ ਏਤ੍ਥਾਪਿ. ਮਹਾਯਾਗੋਤਿ ਸਬ੍ਬਸਾਧਾਰਣਂ ਮਹਾਦਾਨਂ. ਪਹੇਣਕਸਕ੍ਕਾਰੋਤਿ ਪਾਹੁਨਕਾਨਂ ਕਾਤਬ੍ਬਸਕ੍ਕਾਰੋ. ਫਲਨ੍ਤਿ ਆਨਿਸਂਸਫਲਂ ਨਿਸ੍ਸਨ੍ਦਫਲਞ੍ਚ. ਵਿਪਾਕੋਤਿ ਸਦਿਸਫਲਂ. ਪਰਲੋਕੇ ਠਿਤਸ੍ਸ ਅਯਂ ਲੋਕੋ ਨਤ੍ਥੀਤਿ ਪਰਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਅਯਂ ਲੋਕੋ ਨ ਹੋਤਿ. ਇਧਲੋਕੇ ਠਿਤਸ੍ਸਪਿ ਪਰਲੋਕੋ ਨਤ੍ਥੀਤਿ ਇਧਲੋਕੇ ਠਿਤਸ੍ਸ ਕਮ੍ਮੁਨਾ ਲਦ੍ਧਬ੍ਬੋ ਪਰਲੋਕੋ ਨ ਹੋਤਿ. ਤਤ੍ਥ ਕਾਰਣਮਾਹ – ‘‘ਸਬ੍ਬੇ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤੀ’’ਤਿ. ਇਮੇ ਸਤ੍ਤਾ ਯਤ੍ਥ ਯਤ੍ਥ ਭਵੇ ਯੋਨਿਆਦੀਸੁ ਚ ਠਿਤਾ, ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨ੍ਤਿ ਨਿਰੁਦਯਵਿਨਾਸਵਸੇਨ ਨਸ੍ਸਨ੍ਤਿ. ਫਲਾਭਾਵਵਸੇਨਾਤਿ ਮਾਤਾਪਿਤੂਸੁ ਸਮ੍ਮਾਪਟਿਪਤ੍ਤਿਮਿਚ੍ਛਾਪਟਿਪਤ੍ਤੀਨਂ ਫਲਸ੍ਸ ਅਭਾਵਵਸੇਨ ‘‘ਨਤ੍ਥਿ ਮਾਤਾ, ਨਤ੍ਥਿ ਪਿਤਾ’’ਤਿ ਵਦਨ੍ਤਿ, ਨ ਮਾਤਾਪਿਤੂਨਂ, ਨਾਪਿ ਤੇਸੁ ਇਦਾਨਿ ਕਰਿਯਮਾਨਸਕ੍ਕਾਰਾਸਕ੍ਕਾਰਾਨਂ ਅਭਾਵਵਸੇਨ ਤੇਸਂ ਲੋਕਪਚ੍ਚਕ੍ਖਤ੍ਤਾ. ਪੁਬ੍ਬੁਲ਼ਕਸ੍ਸ ਵਿਯ ਇਮੇਸਂ ਸਤ੍ਤਾਨਂ ਉਪ੍ਪਾਦੋ ਨਾਮ ਕੇਵਲੋ, ਨ ਭਵਤੋ ਚਵਿਤ੍ਵਾ ਆਗਮਨਪੁਬ੍ਬਕੋਤਿ ਦਸ੍ਸਨਤ੍ਥਂ ‘‘ਨਤ੍ਥਿ ਸਤ੍ਤਾ ਓਪਪਾਤਿਕਾ’’ਤਿ ਵੁਤ੍ਤਨ੍ਤਿ ਆਹ – ‘‘ਚਵਿਤ੍ਵਾ ਉਪ੍ਪਜ੍ਜਨਕਸਤ੍ਤਾ ਨਾਮ ਨਤ੍ਥੀ’’ਤਿ. ਸਮਣੇਨ ਨਾਮ ਯਾਥਾਵਤੋ ਜਾਨਨ੍ਤੇਨ ਕਸ੍ਸਚਿ ਅਕਥੇਤ੍ਵਾ ਸਞ੍ਞਤੇਨ ਭਵਿਤਬ੍ਬਂ, ਅਞ੍ਞਥਾ ਆਹੋਪੁਰਿਸਿਕਾ ਨਾਮ ਸਿਯਾ. ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤਿ, ਤਥਾ ਚ ਅਤ੍ਤਨੋ ਸਮ੍ਪਾਦਨਸ੍ਸ ਕਸ੍ਸਚਿ ਅਵਸ੍ਸਯੋ ਏਵ ਨ ਸਿਯਾ ਤਤ੍ਥ ਤਤ੍ਥੇਵ ਉਚ੍ਛਿਜ੍ਜਨਤੋਤਿ ਆਹ ‘‘ਯੇ ਇਮਞ੍ਚ…ਪੇ… ਪਵੇਦੇਨ੍ਤੀ’’ਤਿ.

ਚਤੂਸੁ ¶ ਮਹਾਭੂਤੇਸੁ ਨਿਯੁਤ੍ਤੋਤਿ ਚਾਤੁਮਹਾਭੂਤਿਕੋ. ਯਥਾ ਪਨ ਮਤ੍ਤਿਕਾਯ ਨਿਬ੍ਬਤ੍ਤਂ ਭਾਜਨਂ ਮਤ੍ਤਿਕਾਮਯਂ, ਏਵਮਯਂ ਚਤੂਹਿ ਮਹਾਭੂਤੇਹਿ ਨਿਬ੍ਬਤ੍ਤੋਤਿ ਆਹ ‘‘ਚਤੁਮਹਾਭੂਤਮਯੋ’’ਤਿ. ਅਜ੍ਝਤ੍ਤਿਕਾ ਪਥਵੀਧਾਤੂਤਿ ਸਤ੍ਤਸਨ੍ਤਾਨਗਤਾ ਪਥਵੀਧਾਤੁ. ਬਾਹਿਰਂ ਪਥਵੀਧਾਤੁਨ੍ਤਿ ਬਹਿਦ੍ਧਾ ਮਹਾਪਥਵਿਂ. ਅਨੁਯਾਤੀਤਿ ਤਸ੍ਸ ਅਨੁਰੂਪਭਾਵੇਨ ਯਾਤਿ ਉਪੇਤਿ. ਉਪਗਚ੍ਛਤੀਤਿ ਪੁਬ੍ਬੇ ਬਾਹਿਰਪਥਵੀਕਾਯਤੋ ਤਦੇਕਦੇਸਭੂਤਾ ਪਥਵੀ ਆਗਨ੍ਤ੍ਵਾ ਅਜ੍ਝਤ੍ਤਿਕਭਾਵਪ੍ਪਤ੍ਤਿਯਾ ਸਤ੍ਤਭਾਵੇਨ ਸਣ੍ਠਿਤਾ ਇਦਾਨਿ ਘਟਾਦਿਪਥਵੀ ¶ ਵਿਯ ਤਮੇਵ ਬਾਹਿਰਪਥਵੀਕਾਯਂ ਉਪੇਤਿ ਉਪਗਚ੍ਛਤਿ, ਸਬ੍ਬਸੋ ਤੇਨ ਨਿਬ੍ਬਿਸੇਸਤਂ ਏਕੀਭਾਵਮੇਵ ਗਚ੍ਛਤੀਤਿ ਅਤ੍ਥੋ. ਆਪਾਦੀਸੁਪਿ ਏਸੇਵ ਨਯੋਤਿ ਏਤ੍ਥ ਪਜ੍ਜੁਨ੍ਨੇਨ ਮਹਾਸਮੁਦ੍ਦਤੋ ਗਹਿਤਆਪੋ ਵਿਯ ਵਸ੍ਸੋਦਕਭਾਵੇਨ ਪੁਨਪਿ ਮਹਾਸਮੁਦ੍ਦਂ, ਸੂਰਿਯਰਂਸਿਤੋ ਗਹਿਤਇਨ੍ਦਗ੍ਗਿਸਙ੍ਖਾਤਤੇਜੋ ਵਿਯ ਪੁਨਪਿ ਸੂਰਿਯਰਂਸਿਂ, ਮਹਾਵਾਯੁਖਨ੍ਧਤੋ ਨਿਗ੍ਗਤਮਹਾਵਾਯੋ ਵਿਯ ਤਮੇਵ ਵਾਯੁਖਨ੍ਧਂ ਉਪੇਤਿ ਉਪਗਚ੍ਛਤੀਤਿ ਦਿਟ੍ਠਿਗਤਿਕੋ ਸਯਮੇਵ ਅਤ੍ਤਨੋ ਵਾਦਂ ਭਿਨ੍ਦਤਿ. ਉਮ੍ਮਤ੍ਤਕਪਚ੍ਛਿਸਦਿਸਞ੍ਹਿ ਦਿਟ੍ਠਿਗਤਿਕਦਸ੍ਸਨਂ. ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ ਆਕਾਸਂ ਪਕ੍ਖਨ੍ਦਨ੍ਤਿ ਤੇਸਂ ਵਿਸਯਭਾਵਾ ਵਿਸਯਾਪੀਤਿ ਵਦਤਿ. ਵਿਸਯਿਗ੍ਗਹਣੇਨ ਹਿ ਵਿਸਯਾ ਗਹਿਤਾ ਏਵ ਹੋਨ੍ਤੀਤਿ. ਗੁਣਾਗੁਣਪਦਾਨੀਤਿ ਗੁਣਦੋਸਕੋਟ੍ਠਾਸਾ. ਸਰੀਰਮੇਵ ਪਦਾਨੀਤਿ ਅਧਿਪ੍ਪੇਤਂ ਸਰੀਰੇਨ ਤਂਤਂਕਿਰਿਯਾਯ ਪਜ੍ਜਿਤਬ੍ਬਤੋ. ਦਬ੍ਬਨ੍ਤਿ ਮੁਯ੍ਹਨ੍ਤੀਤਿ ਦਤ੍ਤੂ, ਮੂਲ਼੍ਹਪੁਗ੍ਗਲਾ. ਤੇਹਿ ਦਤ੍ਤੂਹਿ ਬਾਲਮਨੁਸ੍ਸੇਹਿ ਪਞ੍ਞਤ੍ਤਂ.

ਨਤ੍ਥਿਦਿਨ੍ਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਕਰੋਤੋਸੁਤ੍ਤਵਣ੍ਣਨਾ

੨੧੧. ਸਹਤ੍ਥਾ ਕਰੋਨ੍ਤਸ੍ਸਾਤਿ ਸਹਤ੍ਥੇਨ ਕਰੋਨ੍ਤਸ੍ਸ. ਨਿਸ੍ਸਗ੍ਗਿਯਥਾਵਰਾਦਯੋਪਿ ਇਧ ਸਹਤ੍ਥਕਰਣੇਨੇਵ ਸਙ੍ਗਹਿਤਾ. ਹਤ੍ਥਾਦੀਨੀਤਿ ਹਤ੍ਥਪਾਦਕਣ੍ਣਨਾਸਾਦੀਨਿ. ਪਚਨਂ ਦਹਨਂ ਵਿਬਾਧਨਨ੍ਤਿ ਆਹ ‘‘ਦਣ੍ਡੇਨ ਪੀਲ਼ੇਨ੍ਤਸ੍ਸਾ’’ਤਿ. ਪਪਞ੍ਚਸੂਦਨਿਯਂ ‘‘ਤਜ੍ਜੇਨ੍ਤਸ੍ਸ ਚਾ’’ਤਿ ਅਤ੍ਥੋ ਵੁਤ੍ਤੋ, ਇਧ ਪਨ ਸੁਮਙ੍ਗਲਵਿਲਾਸਿਨਿਯਂ ਵਿਯ ਤਜ੍ਜਨਂ ਪਰਿਭਾਸਨਂ ਦਣ੍ਡੇਨੇਵ ਸਙ੍ਗਹੇਤ੍ਵਾ ‘‘ਦਣ੍ਡੇਨ ਪੀਲ਼ੇਨ੍ਤਸ੍ਸ’’ਇਚ੍ਚੇਵ ਵੁਤ੍ਤਂ. ਸੋਕਂ ਸਯਂ ਕਰੋਨ੍ਤਸ੍ਸਾਤਿ ਪਰਸ੍ਸ ਸੋਕਕਾਰਣਂ ਸਯਂ ਕਰੋਨ੍ਤਸ੍ਸ, ਸੋਕਂ ਵਾ ਉਪ੍ਪਾਦੇਨ੍ਤਸ੍ਸ. ਪਰੇਹਿ ਅਤ੍ਤਨੋ ਵਚਨਕਰੇਹਿ. ਸਯਮ੍ਪਿ ਫਨ੍ਦਤੋਤਿ ਪਰਸ੍ਸ ਵਿਬਾਧਨਪ੍ਪਯੋਗੇਨ ¶ ਸਯਮ੍ਪਿ ਫਨ੍ਦਤੋ. ਅਤਿਪਾਤਯਤੋਤਿ ਪਦਂ ਸੁਦ੍ਧਕਤ੍ਤੁਅਤ੍ਥੇ ਹੇਤੁਕਤ੍ਤੁਅਤ੍ਥੇ ਚ ਵਤ੍ਤਤੀਤਿ ਆਹ – ‘‘ਹਨਨ੍ਤਸ੍ਸਪਿ ਹਨਾਪੇਨ੍ਤਸ੍ਸਪੀ’’ਤਿ. ਕਾਰਣਵਸੇਨਾਤਿ ਕਾਰਾਪਨਵਸੇਨ.

ਘਰਸ੍ਸ ਭਿਤ੍ਤਿ ਅਨ੍ਤੋ ਚ ਬਹਿ ਚ ਸਨ੍ਧਿਤਾ ਹੁਤ੍ਵਾ ਠਿਤਾਵ ਘਰਸਨ੍ਧਿ. ਕਿਞ੍ਚਿਪਿ ਅਸੇਸੇਤ੍ਵਾ ਨਿਰਵਸੇਸੋ ਲੋਪੋ ਨਿਲ੍ਲੋਪੋ. ਏਕਾਗਾਰੇ ਨਿਯੁਤ੍ਤੋ ਵਿਲੋਪੋ ਏਕਾਗਾਰਿਕੋ. ਪਰਿਤੋ ਸਬ੍ਬਸੋ ਪਨ੍ਥੇ ਹਨਨਂ ਪਰਿਪਨ੍ਥੋ. ਪਾਪਂ ਨ ਕਰੀਯਤਿ ਪੁਬ੍ਬੇ ਅਸਤੋ ਉਪ੍ਪਾਦੇਤੁਂ ਅਸਕ੍ਕੁਣੇਯ੍ਯਤ੍ਤਾ, ਤਸ੍ਮਾ ਨਤ੍ਥਿ ਪਾਪਂ. ਯਦਿ ਏਵਂ ਕਥਂ ਸਤ੍ਤਾ ਪਾਪੇ ਪਵਤ੍ਤਨ੍ਤੀਤਿ ਆਹ ‘‘ਸਤ੍ਤਾ ਪਨ ਕਰੋਮਾਤਿ ਏਵਂਸਞ੍ਞਿਨੋ ਹੋਨ੍ਤੀ’’ਤਿ ਏਵਂ ਕਿਰਸ੍ਸ ਹੋਤਿ ਇਮੇਸਞ੍ਹਿ ਸਤ੍ਤਾਨਂ ਹਿਂਸਾਦਿਕਿਰਿਯਾ ਨ ਅਤ੍ਤਾਨਂ ਫੁਸਤਿ ਤਸ੍ਸ ਨਿਚ੍ਚਤਾਯ ਨਿਬ੍ਬਿਕਾਰਤ੍ਤਾ, ਸਰੀਰਂ ਪਨ ਅਚੇਤਨਂ ਕਟ੍ਠਕਲਿਙ੍ਗਰੂਪਮਂ, ਤਸ੍ਮਿਂ ਵਿਕੋਪਿਤੇਪਿ ਨ ਕਿਞ੍ਚਿ ਪਾਪਨ੍ਤਿ. ਖੁਰਨੇਮਿਨਾਤਿ ਨਿਸਿਤਖੁਰਮਯਨੇਮਿਨਾ, ਖੁਰਸਦਿਸਨੇਮਿਨਾਤਿ ਅਤ੍ਥੋ.

ਗਙ੍ਗਾਯ ¶ ਦਕ੍ਖਿਣਾ ਦਿਸਾ ਅਪ੍ਪਤਿਰੂਪਦੇਸੋ, ਉਤ੍ਤਰਦਿਸਾ ਪਤਿਰੂਪਦੇਸੋਤਿ ਅਧਿਪ੍ਪਾਯੇਨ ‘‘ਦਕ੍ਖਿਣਞ੍ਚੇਪੀ’’ਤਿਆਦਿ ਵੁਤ੍ਤਨ੍ਤਿ ਆਹ ‘‘ਦਕ੍ਖਿਣਤੀਰੇ ਮਨੁਸ੍ਸਾ ਕਕ੍ਖਲ਼ਾ’’ਤਿਆਦਿ. ਮਹਾਯਾਗਨ੍ਤਿ ਮਹਾਵਿਜਿਤਯਞ੍ਞਸਦਿਸਂ ਮਹਾਯਾਗਂ. ਉਪੋਸਥਕਮ੍ਮੇਨਾਤਿ ਉਪੋਸਥਕਮ੍ਮੇਨ ਚ. ਚ-ਸਦ੍ਦੋ ਹੇਤ੍ਥ ਲੁਤ੍ਤਨਿਦ੍ਦਿਟ੍ਠੋ. ਦਮਸਦ੍ਦੋ ਹਿ ਇਨ੍ਦ੍ਰਿਯਸਂਵਰਸ੍ਸ ਉਪੋਸਥਸੀਲਸ੍ਸ ਚ ਵਾਚਕੋ ਇਧਾਧਿਪ੍ਪੇਤੋ. ਕੇਚਿ ਪਨ ‘‘ਉਪੋਸਥਕਮ੍ਮੇਨਾ’’ਤਿ ਇਦਂ ਇਨ੍ਦ੍ਰਿਯਦਮਨਸ੍ਸ ਵਿਸੇਸਨਂ, ਤਸ੍ਮਾ ‘‘ਉਪੋਸਥਕਮ੍ਮਭੂਤੇਨ ਇਨ੍ਦ੍ਰਿਯਦਮੇਨਾ’’ਤਿ ਅਤ੍ਥਂ ਵਦਨ੍ਤਿ. ਸੀਲਸਂਯਮੇਨਾਤਿ ਸੀਲਸਂਵਰੇਨ. ਸਚ੍ਚਵਚਨੇਨਾਤਿ ਸਚ੍ਚਵਾਚਾਯ. ਤਸ੍ਸਾ ਵਿਸੁਂ ਵਚਨਂ ਲੋਕੇ ਗਰੁਤਰਪੁਞ੍ਞਸਮ੍ਮਤਭਾਵਤੋ. ਯਥਾ ਹਿ ਪਾਪਧਮ੍ਮੇਸੁ ਮੁਸਾਵਾਦੋ ਗਰੁ, ਏਵਂ ਪੁਞ੍ਞਧਮ੍ਮੇਸੁ ਸਚ੍ਚਵਾਚਾ. ਤੇਨਾਹ ਭਗਵਾ – ‘‘ਏਕਂ ਧਮ੍ਮਂ ਅਤੀਤਸ੍ਸਾ’’ਤਿਆਦਿ (ਇਤਿਵੁ. ੨੫). ਪਵਤ੍ਤੀਤਿ ਯੋ ਕਰੋਤੀਤਿ ਵੁਚ੍ਚਤਿ, ਤਸ੍ਸ ਸਨ੍ਤਾਨੇ ਫਲਸ੍ਸ ਨਿਬ੍ਬਤ੍ਤਿਯਾ ਪਚ੍ਚਯਭਾਵੇਨ ਪਵਤ੍ਤਿ. ਸਬ੍ਬਥਾਤਿ ‘‘ਕਰੋਤੋ’’ਤਿਆਦਿਨਾ ਵੁਤ੍ਤੇਨ ਸਬ੍ਬਪ੍ਪਕਾਰੇਨ ਕਿਰਿਯਮੇਵ ਪਟਿਕ੍ਖਿਪਨ੍ਤਿ.

ਕਰੋਤੋਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਹੇਤੁਸੁਤ੍ਤਵਣ੍ਣਨਾ

੨੧੨. ਉਭਯੇਨਾਤਿ ¶ ਹੇਤੁਪਚ੍ਚਯਪਟਿਸੇਧਵਚਨੇਨ. ਸਂਕਿਲੇਸਪਚ੍ਚਯਨ੍ਤਿ ਸਂਕਿਲਿਸਨਸ੍ਸ ਮਲੀਨਭਾਵਸ੍ਸ ਕਾਰਣਂ. ਵਿਸੁਦ੍ਧਿਪਚ੍ਚਯਨ੍ਤਿ ਸਂਕਿਲੇਸਤੋ ਵਿਸੁਦ੍ਧਿਯਾ ਵੋਦਾਨਸ੍ਸ ਕਾਰਣਂ. ਨਤ੍ਥਿ ਬਲਨ੍ਤਿ ਸਤ੍ਤਾਨਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਨਿਬ੍ਬਾਨਸਮ੍ਪਤ੍ਤਿਆਵਹਂ ਬਲਂ ਨਾਮ ਕਿਞ੍ਚਿ ਨਤ੍ਥਿ. ਤੇਨਾਹ ‘‘ਯਮ੍ਹੀ’’ਤਿਆਦਿ. ਨਿਦਸ੍ਸਨਮਤ੍ਤਞ੍ਚੇਤਂ, ਸਂਕਿਲੇਸਿਕਮ੍ਪਿ ਚਾਯਂ ਪਟਿਕ੍ਖਿਪਤੇਵ. ਅਞ੍ਞਮਞ੍ਞਵੇਵਚਨਾਨੀਤਿ ਤਸ੍ਸਾ ਤਸ੍ਸਾ ਕਿਰਿਯਾਯ ਉਸ੍ਸਨ੍ਨਟ੍ਠੇਨ ਬਲਂ, ਸੂਰਵੀਰਭਾਵਾਵਹਟ੍ਠੇਨ ਵੀਰਿਯਂ, ਤਮੇਵ ਦਲ਼੍ਹਗ੍ਗਾਹਭਾਵਤੋ ਪੋਰਿਸਂ ਧੁਰਂ ਵਹਨ੍ਤੇਨ ਪਵਤ੍ਤੇਤਬ੍ਬਤੋ ਪੁਰਿਸਥਾਮੋ, ਪਰਂ ਪਰਂ ਠਾਨਂ ਅਕ੍ਕਮਨਪ੍ਪਵਤ੍ਤਿਯਾ ਪੁਰਿਸਪਰਕ੍ਕਮੋਤਿ ਵੁਤ੍ਤੋਤਿ ਵੇਦਿਤਬ੍ਬਂ.

ਸਤ੍ਵਯੋਗਤੋ, ਰੂਪਾਦੀਸੁ ਵਾ ਸਤ੍ਤਤਾਯ ਸਤ੍ਤਾ, ਪਾਣਨਤੋ ਅਸ੍ਸਾਸਨਪਸ੍ਸਾਸਨਵਸੇਨ ਪਵਤ੍ਤਿਯਾ ਪਾਣਾ, ਤੇ ਪਨ ਸੋ ਏਕਿਨ੍ਦ੍ਰਿਯਾਦਿਵਸੇਨ ਵਿਭਜਿਤ੍ਵਾ ਵਦਤੀਤਿ ਆਹ ‘‘ਏਕਿਨ੍ਦ੍ਰਿਯੋ’’ਤਿਆਦਿ. ਅਣ੍ਡਕੋਸਾਦੀਸੁ ਭਵਨਤੋ ਭੂਤਾਤਿ ਵੁਚ੍ਚਨ੍ਤੀਤਿ ਆਹ ‘‘ਅਣ੍ਡ…ਪੇ… ਵਦਨ੍ਤੀ’’ਤਿ. ਜੀਵਨਤੋ ਪਾਣਂ ਧਾਰੇਨ੍ਤਾ ਵਿਯ ਵਡ੍ਢਨਤੋ ਜੀਵਾਤਿ ਸਾਲਿਯਵਾਦਿਕੇ ਵਦਨ੍ਤਿ. ਨਤ੍ਥਿ ਏਤੇਸਂ ਸਂਕਿਲੇਸਵਿਸੁਦ੍ਧੀਸੁ ਵਸੋਤਿ ਅਵਸਾ. ਨਤ੍ਥਿ ਤੇਸਂ ਬਲਂ ਵੀਰਿਯਨ੍ਤਿ ਅਬਲਾ ਅਵੀਰਿਯਾ. ਨਿਯਤਤਾਤਿ ਅਚ੍ਛੇਜ੍ਜਸੁਤ੍ਤਾਵੁਤਾਭੇਜ੍ਜਮਣਿਨੋ ਵਿਯ ਨਿਯਤਪ੍ਪਵਤ੍ਤਿਤਾਯ ਗਤਿਜਾਤਿਬਨ੍ਧਾਪਵਗ੍ਗਵਸੇਨ ਨਿਯਮੋ. ਤਤ੍ਥ ਤਤ੍ਥ ਗਮਨਨ੍ਤਿ ਛਨ੍ਨਂ ਅਭਿਜਾਤੀਨਂ ਵਸੇਨ ਤਾਸੁ ਤਾਸੁ ਗਤੀਸੁ ਉਪਗਮਨਂ. ਸਮਵਾਯੇਨ ਸਮਾਗਮੋ ਸਙ੍ਗਤਿ. ਸਭਾਵੋਯੇਵਾਤਿ ਯਥਾ ਕਣ੍ਟਕਸ੍ਸ ਤਿਕ੍ਖਤਾ, ਕਪਿਤ੍ਥਫਲਾਨਂ ਪਰਿਮਣ੍ਡਲਤਾ ¶ , ਮਿਗਪਕ੍ਖੀਨਂ ਵਿਚਿਤ੍ਤਾਕਾਰਤਾ, ਏਵਂ ਸਬ੍ਬਸ੍ਸਪਿ ਲੋਕਸ੍ਸ ਹੇਤੁਪਚ੍ਚਯੇਹਿ ਵਿਨਾ ਤਥਾ ਤਥਾ ਪਰਿਣਾਮੋ, ਅਯਂ ਸਭਾਵੋ ਏਵ ਅਕਿਤ੍ਤਿਮੋ ਏਵ. ਤੇਨਾਹ ‘‘ਯੇਨ ਹੀ’’ਤਿਆਦਿ. ਛਲ਼ਭਿਜਾਤਿਯੋ ਪਰਤੋ ਵਿਤ੍ਥਾਰੀਯਨ੍ਤਿ. ਸੁਖਞ੍ਚ ਦੁਕ੍ਖਞ੍ਚ ਪਟਿਸਂਵੇਦੇਨ੍ਤੀਤਿ ਵਦਨ੍ਤਾ ਅਦੁਕ੍ਖਮਸੁਖਭੂਭਿਂ ਸਬ੍ਬੇਨ ਸਬ੍ਬਂ ਨ ਜਾਨਨ੍ਤੀਤਿ ਉਲ੍ਲਿਙ੍ਗੇਨ੍ਤੋ ‘‘ਅਞ੍ਞਾ ਸੁਖਦੁਕ੍ਖਭੂਮਿ ਨਤ੍ਥੀਤਿ ਦਸ੍ਸੇਨ੍ਤੀ’’ਤਿ ਆਹ.

ਹੇਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮-੧੦. ਮਹਾਦਿਟ੍ਠਿਸੁਤ੍ਤਾਦਿਵਣ੍ਣਨਾ

੨੧੩-੨੧੫. ਅਕਤਾਤਿ ¶ ਸਮੇਨ ਵਾ ਵਿਸਮੇਨ ਵਾ ਕੇਨਚਿ ਹੇਤੁਨਾ ਨ ਕਤਾ ਏਵ. ਕੇਨਚਿ ਕਤਂ ਕਰਣਂ ਵਿਧਾਨਂ ਨਤ੍ਥਿ ਏਤੇਸਨ੍ਤਿ ਅਕਤਵਿਧਾਨਾ. ਪਦਦ੍ਵਯੇਨਪਿ ਲੋਕੇ ਕੇਨਚਿ ਹੇਤੁਪਚ੍ਚਯੇਨ ਨੇਸਂ ਅਭਿਨਿਬ੍ਬਤ੍ਤਿਤਾਭਾਵਂ ਦਸ੍ਸੇਤਿ. ਇਦ੍ਧਿਯਾਪਿ ਨ ਨਿਮ੍ਮਿਤਾਤਿ ਕਸ੍ਸਚਿ ਇਦ੍ਧਿਮਤੋ ਦੇਵਸ੍ਸ ਬ੍ਰਹ੍ਮੁਨੋ ਵਾ ਇਦ੍ਧਿਯਾਪਿ ਨ ਨਿਮ੍ਮਿਤਾ. ਅਨਿਮ੍ਮਿਤਾਤਿ ਵਾ ਕਸ੍ਸਚਿ ਅਨਿਮ੍ਮਾਪਕਾ. ਅਜਨਕਾਤਿ ਏਤੇਨ ਪਥਵੀਕਾਯਾਦੀਨਂ ਰੂਪਾਦਿਜਨਕਭਾਵਂ ਪਟਿਕ੍ਖਿਪਤਿ. ਰੂਪਸਦ੍ਦਾਦਯੋ ਹਿ ਪਥਵੀਕਾਯਾਦੀਹਿ ਅਪ੍ਪਟਿਬਦ੍ਧਵੁਤ੍ਤਿਕਾਤਿ ਤਸ੍ਸ ਲਦ੍ਧਿ. ਯਥਾ ਪਬ੍ਬਤਕੂਟਂ ਕੇਨਚਿ ਅਨਿਬ੍ਬਤ੍ਤਿਤਂ ਕਸ੍ਸਚਿ ਚ ਅਨਿਬ੍ਬਤ੍ਤਕਂ, ਏਵਮੇਤੇਪੀਤਿ ਆਹ ‘‘ਕੂਟਟ੍ਠਾ’’ਤਿ. ਯਮਿਦਂ ‘‘ਬੀਜਾਦਿਤੋ ਅਙ੍ਕੁਰਾਦਿ ਜਾਯਤੀ’’ਤਿ ਵੁਚ੍ਚਤਿ, ਤਞ੍ਚ ਵਿਜ੍ਜਮਾਨਮੇਵ ਤਤੋ ਨਿਕ੍ਖਮਤਿ, ਨਾਵਿਜ੍ਜਮਾਨਂ, ਅਞ੍ਞਥਾ ਯਤੋ ਕੁਤੋਚਿ ਯਸ੍ਸ ਕਸ੍ਸਚਿ ਉਪ੍ਪਤ੍ਤਿ ਸਿਯਾਤਿ ਅਧਿਪ੍ਪਾਯੋ. ਠਿਤਾਤਿ ਨਿਬ੍ਬਿਕਾਰਭਾਵੇਨ ਠਿਤਾ. ਨ ਚਲਨ੍ਤੀਤਿ ਨ ਵਿਕਾਰਂ ਆਪਜ੍ਜਨ੍ਤਿ. ਵਿਕਾਰਾਭਾਵੇਨ ਹਿ ਤੇਸਂ ਸਤ੍ਤਨ੍ਨਂ ਕਾਯਾਨਂ ਏਸਿਕਟ੍ਠਾਯਿਟ੍ਠਿਤਤਾ. ਅਨਿਞ੍ਜਨਞ੍ਚ ਅਤ੍ਤਨੋ ਪਕਤਿਯਾ ਅਵਟ੍ਠਾਨਮੇਵ. ਤੇਨਾਹ ‘‘ਨ ਵਿਪਰਿਣਮਨ੍ਤੀ’’ਤਿ. ਅਵਿਪਰਿਣਾਮਧਮ੍ਮਤ੍ਤਾ ਏਵ ਚ ਨੇ ਅਞ੍ਞਮਞ੍ਞਂ ਨ ਬ੍ਯਾਬਾਧੇਨ੍ਤਿ. ਸਤਿ ਹਿ ਵਿਕਾਰਂ ਆਪਾਦੇਤਬ੍ਬਤਾਯ ਬ੍ਯਾਬਾਧਕਤਾਪਿ ਸਿਯਾ, ਤਥਾ ਅਨੁਗ੍ਗਹੇਤਬ੍ਬਤਾਯ ਅਨੁਗ੍ਗਾਹਕਤਾਤਿ ਤਦਭਾਵਂ ਦਸ੍ਸੇਤੁਂ ਪਾਲ਼ਿਯਂ ‘‘ਨਾਲ’’ਨ੍ਤਿਆਦਿ ਵੁਤ੍ਤਂ. ਪਥਵੀ ਏਵ ਕਾਯੇਕਦੇਸਤ੍ਤਾ ਪਥਵਿਕਾਯੋ. ਜੀਵਸਤ੍ਤਮਾਨਂ ਕਾਯਾਨਂ ਨਿਚ੍ਚਤਾਯ ਨਿਬ੍ਬਿਕਾਰਾਭਾਵਤੋ ਨ ਹਨ੍ਤਬ੍ਬਤਾ, ਨ ਘਾਟੇਤਬ੍ਬਤਾ ਚਾਤਿ ਨੇਵ ਕੋਚਿ ਹਨ੍ਤਾ ਘਾਤੇਤਾ ਵਾ. ਤੇਨਾਹ ‘‘ਸਤ੍ਤਨ੍ਨਨ੍ਤ੍ਵੇਵਾ’’ਤਿਆਦਿ. ਯਦਿ ਕੋਚਿ ਹਨ੍ਤਾ ਨਤ੍ਥਿ, ਕਥਂ ਸਤ੍ਥਪ੍ਪਹਾਰੋਤਿ ਆਹ ‘‘ਯਥਾ ਮੁਗ੍ਗਰਾਸਿਆਦੀਸੂ’’ਤਿਆਦਿ. ਕੇਵਲਂ ਸਞ੍ਞਾਮਤ੍ਤਮੇਵ ਹੋਤਿ, ਨ ਘਾਤਨਾਦਿ, ਪਰਮਤ੍ਥਤੋ ਸਤ੍ਤਨ੍ਨਨ੍ਤ੍ਵੇਵ ਕਾਯਾਨਂ ਅਵਿਕੋਪਨੀਯਭਾਵਤੋਤਿ ਅਧਿਪ੍ਪਾਯੋ.

ਪਮੁਖਯੋਨੀਨਨ੍ਤਿ ਮਨੁਸ੍ਸਤਿਰਚ੍ਛਾਨਾਦੀਸੁ ਖਤ੍ਤਿਯਬ੍ਰਾਹ੍ਮਣਾਦਿਸੀਹਬ੍ਯਗ੍ਘਾਦਿਵਸੇਨ ਪਧਾਨਯੋਨੀਨਂ. ਸਟ੍ਠਿਸਤਾਨਿ ਛਸਹਸ੍ਸਾਨਿ. ‘‘ਪਞ੍ਚ ਚ ਕਮ੍ਮੁਨੋ ਸਤਾਨੀ’’ਤਿ ਪਦਸ੍ਸ ਅਤ੍ਥਦਸ੍ਸਨਂ ‘‘ਪਞ੍ਚ ਕਮ੍ਮਸਤਾਨਿ ਚਾ’’ਤਿ ¶ . ਏਸੇਵ ਨਯੋਤਿ ਇਮਿਨਾ ‘‘ਕੇਵਲਂ ਤਕ੍ਕਮਤ੍ਤੇਨ ਨਿਰਤ੍ਥਕਦਿਟ੍ਠਿਂ ਦੀਪੇਤੀ’’ਤਿ ਇਮਮੇਵ ਅਤ੍ਥਂ ਅਤਿਦਿਸਤਿ. ਏਤ੍ਥ ਚ ਤਕ੍ਕਮਤ੍ਤਕੇਨਾਤਿ ਇਮਿਨਾ ਯਸ੍ਮਾ ਤਕ੍ਕਿਕਾ ਨਿਰਙ੍ਕੁਸਤਾਯ ਪਰਿਕਪ੍ਪਨਸ੍ਸ ਯਂ ਕਿਞ੍ਚਿ ਅਤ੍ਤਨੋ ਪਰਿਕਪ੍ਪਿਤਂ ਸਾਰਤੋ ¶ ਮਞ੍ਞਮਾਨਾ ਤਥੇਵ ਅਭਿਨਿਵਿਸ੍ਸ ਤਕ੍ਕਦਿਟ੍ਠਿਗਾਹਂ ਗਣ੍ਹਨ੍ਤਿ, ਤਸ੍ਮਾ ਨ ਤੇਸਂ ਦਿਟ੍ਠਿਵਤ੍ਥੂਸੁ ਵਿਞ੍ਞੂਹਿ ਵਿਚਾਰਣਾ ਕਾਤਬ੍ਬਾਤਿ ਦਸ੍ਸੇਤਿ. ਕੇਚੀਤਿ ਉਤ੍ਤਰਵਿਹਾਰਵਾਸਿਨੋ. ਤੇ ਹਿ ‘‘ਪਞ੍ਚ ਕਮ੍ਮਾਨੀਤਿ ਚਕ੍ਖੁਸੋਤਘਾਨਜਿਵ੍ਹਾਕਾਯਾ, ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ‘ਪਞ੍ਚ ਕਮ੍ਮਾਨੀਤਿ ਪਞ੍ਞਾਪੇਨ੍ਤੀ’’ਤਿ ਵਦਨ੍ਤਿ. ਕਮ੍ਮਨ੍ਤਿ ਲਦ੍ਧੀਤਿ ਓਲ਼ਾਰਿਕਭਾਵਤੋ ਪਰਿਪੁਣ੍ਣਕਮ੍ਮਨ੍ਤਿ ਲਦ੍ਧਿ. ਮਨੋਕਮ੍ਮਂ ਅਨੋਲ਼ਾਰਿਕਤ੍ਤਾ ਉਪਡ੍ਢਕਮ੍ਮਨ੍ਤਿ ਲਦ੍ਧੀਤਿ ਯੋਜਨਾ. ‘‘ਦ੍ਵਾਸਟ੍ਠਿਪਟਿਪਦਾ’’ਤਿ ਵਤ੍ਤਬ੍ਬੇ ਸਭਾਵਨਿਰੁਤ੍ਤਿਂ ਅਜਾਨਨ੍ਤਾ ‘‘ਦ੍ਵਟ੍ਠਿਪਟਿਪਦਾ’’ਤਿ ਵਦਨ੍ਤਿ. ਏਕਸ੍ਮਿਂ ਕਪ੍ਪੇਤਿ ਏਕਸ੍ਮਿਂ ਮਹਾਕਪ੍ਪੇ. ਤਤ੍ਥਾਪਿ ਚ ਵਿਵਟ੍ਟਟ੍ਠਾਯਿਸਞ੍ਞਿਤੇ ਏਕਸ੍ਮਿਂ ਅਸਙ੍ਖ੍ਯੇਯ੍ਯਕਪ੍ਪੇ.

ਉਰਬ੍ਭੇ ਹਨਨ੍ਤੀਤਿ ਓਰਬ੍ਭਿਕਾ. ਏਵਂ ਸੂਕਰਿਕਾਦਯੋ ਵੇਦਿਤਬ੍ਬਾ. ਲੁਦ੍ਦਾਤਿ ਅਞ੍ਞੇਪਿ ਯੇ ਕੇਚਿ ਮਾਗਵਿਕਨੇਸਾਦਾਦਯੋ, ਤੇ ਪਾਪਕਮ੍ਮਪਸੁਤਤਾਯ ਕਣ੍ਹਾਭਿਜਾਤੀਤਿ ਵਦਨ੍ਤਿ. ਭਿਕ੍ਖੂਤਿ ਬੁਦ੍ਧਸਾਸਨੇ ਭਿਕ੍ਖੂ. ਤੇ ਕਿਰ ‘‘ਸਚ੍ਛਨ੍ਦਰਾਗਾ ਪਰਿਭੁਞ੍ਜਨ੍ਤੀ’’ਤਿ ਅਧਿਪ੍ਪਾਯੇਨ ਚਤੂਸੁ ਪਚ੍ਚਯੇਸੁ ਕਣ੍ਟਕੇ ਪਕ੍ਖਿਪਿਤ੍ਵਾ ਖਾਦਨ੍ਤੀਤਿ ਵਦਨ੍ਤਿ. ਕਸ੍ਮਾਤਿ ਚੇ? ਯਸ੍ਮਾ ਤੇ ਪਣੀਤਪਣੀਤੇ ਪਚ੍ਚਯੇ ਪਟਿਸੇਵਨ੍ਤੀਤਿ ਤਸ੍ਸ ਮਿਚ੍ਛਾਗਾਹੋ. ਞਾਯਲਦ੍ਧੇਪਿ ਪਚ੍ਚਯੇ ਪਰਿਭੁਞ੍ਜਮਾਨਾ ਆਜੀਵਕਸਮਯਸ੍ਸ ਵਿਲੋਮਗਾਹਿਤਾਯ ਪਚ੍ਚਯੇਸੁ ਕਣ੍ਟਕੇ ਪਕ੍ਖਿਪਿਤ੍ਵਾ ਖਾਦਨ੍ਤਿ ਨਾਮਾਤਿ ਵਦਨ੍ਤੀਤਿ ਅਪਰੇ. ਏਕੇ ਪਬ੍ਬਜਿਤਾ, ਯੇ ਵਿਸੇਸਤੋ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ. ਤਥਾ ਹਿ ਤੇ ਕਣ੍ਟਕੇ ਵਤ੍ਤਨ੍ਤਾ ਵਿਯ ਹੋਨ੍ਤੀਤਿ ਕਣ੍ਟਕਵੁਤ੍ਤਿਕਾਤਿ ਵੁਤ੍ਤਾ. ਠਤ੍ਵਾ ਭੁਞ੍ਜਨਨਹਾਨਪਟਿਕ੍ਖੇਪਾਦਿਵਤਸਮਾਯੋਗੇਨ ਪਣ੍ਡਰਤਰਾ. ਅਚੇਲਕਸਾਵਕਾਤਿ ਆਜੀਵਕਸਾਵਕੇ ਵਦਤਿ. ਤੇ ਕਿਰ ਆਜੀਵਕਸਮਯੇ ਆਜੀਵਕਲਦ੍ਧਿਯਾ ਦਲ਼੍ਹਗਾਹਿਤਾਯ ਨਿਗਣ੍ਠੇਹਿਪਿ ਪਣ੍ਡਰਤਰਾ. ਨਨ੍ਦਾਦਯੋ ਕਿਰ ਤਥਾਰੂਪਂ ਆਜੀਵਕਪਟਿਪਤ੍ਤਿਂ ਉਕ੍ਕਂਸਂ ਪਾਪੇਤ੍ਵਾ ਠਿਤਾ, ਤਸ੍ਮਾ ਨਿਗਣ੍ਠੇਹਿ ਆਜੀਵਕਸਾਵਕੇਹਿ ਚ ਪਣ੍ਡਰਤਰਾ ਵੁਤ੍ਤਾ. ਪਰਮਸੁਕ੍ਕਾਭਿਜਾਤੀਤਿ ਅਯਂ ਤੇਸਂ ਲਦ੍ਧਿ.

ਪੁਰਿਸਭੂਮਿਯੋਤਿ ਪਧਾਨਪੁਗ੍ਗਲੇਨ ਨਿਦ੍ਦੇਸੋ. ਇਤ੍ਥੀਨਮ੍ਪੇਤਾ ਭੂਮਿਯੋ ਇਚ੍ਛਨ੍ਤੇਵ. ਭਿਕ੍ਖੁ ਚ ਪਨ੍ਨਕੋਤਿਆਦਿ ਤੇਸਂ ਪਾਲ਼ਿ ਏਵ. ਤਤ੍ਥ ਪਨ੍ਨਕੋਤਿ ਭਿਕ੍ਖਾਯ ਵਿਚਰਣਕੋ, ਤੇਸਂ ਵਾ ਪਟਿਪਤ੍ਤਿਯਾ ਪਟਿਪਨ੍ਨਕੋ. ਜਿਨੋਤਿ ਜਿਣ੍ਣੋ ਜਰਾਵਸੇਨ ਹੀਨਧਾਤੁਕੋ, ਅਤ੍ਤਨੋ ਵਾ ਪਟਿਪਤ੍ਤਿਯਾ ਪਟਿਪਕ੍ਖੇ ਜਿਨਿਤ੍ਵਾ ਠਿਤੋ. ਸੋ ਕਿਰ ਤਥਾਭੂਤੋ ਧਮ੍ਮਮ੍ਪਿ ਕਸ੍ਸਚਿ ਨ ਕਥੇਤਿ. ਤੇਨਾਹ ‘‘ਨ ਕਿਞ੍ਚਿ ਆਹਾ’’ਤਿ. ਨਿਟ੍ਠੁਹਨਾਦਿਵਿਪ੍ਪਕਾਰੇ ਕੇਨਚਿ ਕਤੇਪਿ ਖਮਨਵਸੇਨ ¶ ਨ ਕਿਞ੍ਚਿ ਵਦਤੀਤਿ ਵਦਨ੍ਤਿ. ਅਲਾਭਿਨ੍ਤਿ ‘‘ਸੋ ਨ ਕੁਮ੍ਭਿਮੁਖਾ ਪਟਿਗ੍ਗਣ੍ਹਾਤੀ’’ਤਿਆਦਿਨਾ (ਦੀ. ਨਿ. ੧.੩੯੪) ਨਯੇਨ ਵੁਤ੍ਤਅਲਾਭਹੇਤੁਸਮਾਯੋਗੇਨ ਅਲਾਭਿਂ. ਤਤੋ ਏਵ ਜਿਘਚ੍ਛਾਦੁਬ੍ਬਲ੍ਯਪਰੇਤਤਾਯ ਸਯਨਪਰਾਯਣਂ ਸਮਣਂ ਪਨ੍ਨਭੂਮੀਤਿ ਵਦਨ੍ਤਿ.

ਆਜੀਵਵੁਤ੍ਤਿਸਤਾਨੀਤਿ ¶ ਸਤ੍ਤਾਨਂ ਆਜੀਵਭੂਤਾਨਿ ਜੀਵਿਕਾਵੁਤ੍ਤਿਸਤਾਨਿ. ਪਸੁਗ੍ਗਹਣੇਨ ਏਲ਼ਕਜਾਤਿ ਗਹਿਤਾ, ਮਿਗਗ੍ਗਹਣੇਨ ਰੁਰੁਗਵਯਾਦਿਸਬ੍ਬਮਿਗਜਾਤਿ. ਬਹੂ ਦੇਵਾਤਿ ਚਾਤੁਮਹਾਰਾਜਿਕਾਦਿਬ੍ਰਹ੍ਮਕਾਯਿਕਾਦਿਵਸੇਨ ਤੇਸਂ ਅਨ੍ਤਰਭੇਦਵਸੇਨ ਬਹੂ ਦੇਵਾ. ਤਤ੍ਥ ਚਾਤੁਮਹਾਰਾਜਿਕਾਨਂ ਏਕਚ੍ਚੇ ਅਨ੍ਤਰਭੇਦਾ ਮਹਾਸਮਯਸੁਤ੍ਤਵਸੇਨ (ਦੀ. ਨਿ. ੨.੩੩੧ ਆਦਯੋ) ਦੀਪੇਤਬ੍ਬਾ. ਮਨੁਸ੍ਸਾਪਿ ਅਨਨ੍ਤਾਤਿ ਦੀਪਦੇਸਕੁਲਵਂਸਾਜੀਵਾਦਿਵਿਭਾਗੇਨ ਮਨੁਸ੍ਸਾਪਿ ਅਨਨ੍ਤਭੇਦਾ. ਪਿਸਾਚਾ ਏਵ ਪੇਸਾਚਾ, ਤੇ ਮਹਨ੍ਤਮਹਨ੍ਤਾ ਅਜਗਰਪੇਤਾਦਯੋ. ਛਦ੍ਦਨ੍ਤਦਹਮਨ੍ਦਾਕਿਨਿਯੋ ਕੁਲ਼ੀਰਮੁਚਲਿਨ੍ਦਨਾਮੇਨ ਵਦਨ੍ਤਿ.

ਪਵੁਟਾਤਿ ਸਬ੍ਬਗਣ੍ਠਿਕਾ. ਪਣ੍ਡਿਤੋਪਿ…ਪੇ… ਉਦ੍ਧਂ ਨ ਗਚ੍ਛਤਿ. ਕਸ੍ਮਾ? ਸਤ੍ਤਾਨਂ ਸਂਸਰਣਕਾਲਸ੍ਸ ਨਿਯਤਭਾਵਤੋ.

ਅਪਰਿਪਕ੍ਕਂ ਸਂਸਰਣਨਿਮਿਤ੍ਤਂ ਸੀਲਾਦਿਨਾ ਪਰਿਪਾਚੇਤਿ ਨਾਮ ਸੀਘਂਯੇਵ ਵਿਸੁਦ੍ਧਿਪ੍ਪਤ੍ਤਿਯਾ. ਪਰਿਪਕ੍ਕਂ ਕਮ੍ਮਂ ਫੁਸ੍ਸ ਫੁਸ੍ਸ ਪਤ੍ਵਾ ਪਤ੍ਵਾ ਕਾਲੇ ਪਰਿਪਕ੍ਕਭਾਵਾਪਾਦਨੇਨ ਬ੍ਯਨ੍ਤੀ ਕਰੋਤਿ ਨਾਮ. ਸੁਤ੍ਤਗੁਲ਼ੇਤਿ ਸੁਤ੍ਤਵਟ੍ਟਿਯਂ. ਨਿਬ੍ਬੇਠਿਯਮਾਨਮੇਵ ਪਲੇਤੀਤਿ ਉਪਮਾਯ ਸਤ੍ਤਾਨਂ ਸਂਸਾਰੋ ਅਨੁਕ੍ਕਮੇਨ ਖੀਯਤੇਵ, ਨ ਤਸ੍ਸ ਵਡ੍ਢੀਤਿ ਦਸ੍ਸੇਤਿ ਪਰਿਚ੍ਛਿਨ੍ਨਰੂਪਤ੍ਤਾ. ਨਿਬ੍ਬੇਠਿਯਮਾਨਮੇਵ ਸੁਤ੍ਤਗੁਲ਼ਂ ਗਚ੍ਛਤੀਤਿ ਵੁਚ੍ਚਤਿ. ਤਞ੍ਚ ਖੋ ਸੁਤ੍ਤਪਮਾਣੇਨ, ਸੁਤ੍ਤੇ ਪਨ ਅਸਤਿ ਕੁਤੋ ਗਚ੍ਛਤਿ ਸੁਤ੍ਤਗੁਲ਼ਂ. ਤੇਨਾਹ – ‘‘ਸੁਤ੍ਤੇ ਖੀਣੇ ਨ ਗਚ੍ਛਤੀ’’ਤਿ. ਤਤ੍ਥੇਵ ਤਿਟ੍ਠਤਿ ਸੁਤ੍ਤਪਰਿਯਨ੍ਤਨ੍ਤਿ ਅਧਿਪ੍ਪਾਯੋ. ਕਾਲਵਸੇਨਾਤਿ ਅਤ੍ਤਨਿ ਵੇਠੇਤ੍ਵਾ ਠਿਤਂ ਸੁਖਦੁਕ੍ਖਂ ਯਥਾਵੁਤ੍ਤਸ੍ਸ ਕਾਲਸ੍ਸ ਵਸੇਨ ਨਿਬ੍ਬੇਠਿਯਮਾਨੋ ਬਾਲੋ ਚ ਪਣ੍ਡਿਤੋ ਚ ਪਲੇਤਿ ਗਚ੍ਛਤਿ, ਨਾਤਿਕ੍ਕਮਤਿ ਸਂਸਾਰਂ.

ਮਹਾਦਿਟ੍ਠਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੧-੧੮. ਅਨ੍ਤਵਾਸੁਤ੍ਤਾਦਿਵਣ੍ਣਨਾ

੨੧੬-੨੨੩. ਏਕਤੋ ¶ ਵਡ੍ਢਿਤਨਿਮਿਤ੍ਤਨ੍ਤਿ ਏਕਪਸ੍ਸੇਨ ਵਡ੍ਢਿਤਂ ਕਸਿਣਨਿਮਿਤ੍ਤਂ. ਗਾਹੇਨਾਤਿ ਲਾਭੀ ਝਾਨਚਕ੍ਖੁਨਾ ਪਸ੍ਸਿਤ੍ਵਾ ਗਹਣੇਨ. ਤਕ੍ਕੇਨਾਤਿ ਨ ਲਾਭੀ ਤਕ੍ਕਮਤ੍ਤੇਨ. ਉਪ੍ਪਨ੍ਨਦਿਟ੍ਠੀਤਿ ‘‘ਲੋਕੋ’’ਤਿ ਉਪ੍ਪਨ੍ਨਦਿਟ੍ਠਿ. ਸਬ੍ਬਤੋ ਵਡ੍ਢਿਤਨ੍ਤਿ ਸਮਨ੍ਤਤੋ ਅਪ੍ਪਮਾਣਕਸਿਣਨਿਮਿਤ੍ਤਂ. ਏਕਮੇਵਾਤਿ ‘‘ਏਕਮੇਵ ਵਤ੍ਥੂ’’ਤਿ ਉਪ੍ਪਨ੍ਨਦਿਟ੍ਠਿ. ਅਟ੍ਠਾਰਸ ਵੇਯ੍ਯਾਕਰਣਾਨੀਤਿ ਵੇਯ੍ਯਾਕਰਣਲਕ੍ਖਣਪ੍ਪਤ੍ਤਾਨਿ ਅਟ੍ਠਾਰਸ ਸੁਤ੍ਤਾਨਿ. ਏਕਂ ਗਮਨਨ੍ਤਿ ਏਕਂ ਵੇਯ੍ਯਾਕਰਣਗਮਨਂ.

ਅਨ੍ਤਵਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਗਮਨਾਦਿਵਗ੍ਗਵਣ੍ਣਨਾ

੨੨੪-੩੦੧. ਦੁਕ੍ਖਵਸੇਨ ¶ ਵੁਤ੍ਤਨ੍ਤਿ ‘‘ਇਤਿ ਖੋ, ਭਿਕ੍ਖਵੇ, ਦੁਕ੍ਖੇ ਸਤਿ ਦੁਕ੍ਖਂ ਉਪਾਦਾਯਾ’’ਤਿਆਦਿਦੁਕ੍ਖਵਸੇਨ ਵੁਤ੍ਤਂ. ਤਾਦਿਸਮੇਵ ਦੁਤਿਯਂ ਵੇਯ੍ਯਾਕਰਣਗਮਨਂ. ਤੇਨਾਹ ‘‘ਤਤ੍ਰਾਪਿ ਅਟ੍ਠਾਰਸੇਵ ਵੇਯ੍ਯਾਕਰਣਾਨੀ’’ਤਿ. ਤੇਹੀਤਿ ‘‘ਰੂਪੀ ਅਤ੍ਤਾ ਹੋਤੀ’’ਤਿਆਦਿਨਯਪਵਤ੍ਤੇਹਿ ਵੇਯ੍ਯਾਕਰਣੇਹਿ ਸਦ੍ਧਿਂ. ਤਨ੍ਤਿ ਦੁਤਿਯਂ ਗਮਨਂ.

ਆਰਮ੍ਮਣਮੇਵਾਤਿ ਕਸਿਣਸਙ੍ਖਾਤਂ ਆਰਮ੍ਮਣਮੇਵ. ਤਕ੍ਕਿਸਦ੍ਦੇਨ ਸੁਦ੍ਧਤਕ੍ਕਿਕਾਨਂ ਗਹਣਂ ਦਟ੍ਠਬ੍ਬਂ.

ਅਨਿਚ੍ਚਦੁਕ੍ਖਵਸੇਨਾਤਿ ‘‘ਯਦਨਿਚ੍ਚਂ, ਤਂ ਦੁਕ੍ਖਂ, ਤਸ੍ਮਿਂ ਸਤਿ ਤਦੁਪਾਦਾਯ ਏਵਂ ਦਿਟ੍ਠਿ ਉਪ੍ਪਜ੍ਜਤੀ’’ਤਿ ਵੁਤ੍ਤਅਨਿਚ੍ਚਦੁਕ੍ਖਵਸੇਨਾਤਿ. ਤੇਹਿਯੇਵਾਤਿ ਦੁਤਿਯੇ ਪੇਯ੍ਯਾਲੇ ਵੁਤ੍ਤਪ੍ਪਕਾਰੇਹਿਯੇਵ. ਤਿਪਰਿਵਟ੍ਟਵਸੇਨਾਤਿ ਤੇਹਿਯੇਵ ਛਬ੍ਬੀਸਤਿਯਾ ਸੁਤ੍ਤੇਹਿ ਚਤੁਤ੍ਥਪੇਯ੍ਯਾਲੇ ਤਿਪਰਿਵਟ੍ਟਵਸੇਨ ਵੁਤ੍ਤੋਤਿ ਯੋਜਨਾ.

ਦੁਤਿਯਗਮਨਾਦਿਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਦਿਟ੍ਠਿਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੪. ਓਕ੍ਕਨ੍ਤਸਂਯੁਤ੍ਤਂ

੧-੧੦. ਚਕ੍ਖੁਸੁਤ੍ਤਾਦਿਵਣ੍ਣਨਾ

੩੦੨-੩੧੧. ਸਦ੍ਧਾਧਿਮੋਕ੍ਖਨ੍ਤਿ ¶ ¶ ਸਦ੍ਦਹਨਵਸੇਨ ਪਵਤ੍ਤਂ ਅਧਿਮੋਕ੍ਖਂ, ਨ ਸਨ੍ਨਿਟ੍ਠਾਨਮਤ੍ਤਵਸੇਨ ਪਵਤ੍ਤਂ ਅਧਿਮੋਕ੍ਖਂ. ਦਸ੍ਸਨਮ੍ਪਿ ਸਮ੍ਮਤ੍ਤਂ, ਤਂਸਿਜ੍ਝਾਨਵਸੇਨ ਪਵਤ੍ਤਨਿਯਾਮੋ ਸਮ੍ਮਤ੍ਤਨਿਯਾਮੋ, ਅਰਿਯਮਗ੍ਗੋ. ਅਨਨ੍ਤਰਾਯਤਂ ਦੀਪੇਤਿ ਕਪ੍ਪਵਿਨਾਸਪਟਿਭਾਗੇਨ ਪਵਤ੍ਤਤ੍ਤਾ. ਤਥਾ ਚਾਹ ‘‘ਤੇਨੇਵਾਹਾ’’ਤਿਆਦਿ. ਕਪ੍ਪਸੀਸੇਨ ਭਾਜਨਲੋਕਂ ਵਦਤਿ. ਸੋ ਹਿ ਉਡ੍ਡਯ੍ਹਤਿ, ਨ ਕਪ੍ਪੋ, ਉਡ੍ਡਯ੍ਹਨਵੇਲਾਤਿ ਝਾਯਨਵੇਲਾ. ਠਿਤੋ ਕਪ੍ਪੋ ਠਿਤਕਪ੍ਪੋ, ਸੋ ਅਸ੍ਸ ਅਤ੍ਥੀਤਿ ਠਿਤਕਪ੍ਪੀ, ਕਪ੍ਪਂ ਠਪੇਤੁਂ ਸਮਤ੍ਥੋਤਿ ਅਤ੍ਥੋ. ਓਲੋਕਨਨ੍ਤਿ ਸਚ੍ਚਾਭਿਸਮਯਸਙ੍ਖਾਤਂ ਦਸ੍ਸਨਂ. ਖਮਨ੍ਤਿ ਸਹਨ੍ਤਿ, ਞਾਯਨ੍ਤੀਤਿ ਅਤ੍ਥੋ.

ਚਕ੍ਖੁਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਓਕ੍ਕਨ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਉਪ੍ਪਾਦਸਂਯੁਤ੍ਤਵਣ੍ਣਨਾ

੩੧੨-੩੨੧. ਸਬ੍ਬਂ ¶ ਪਾਕਟਮੇਵ ਅਪੁਬ੍ਬਸ੍ਸ ਅਭਾਵਤੋ.

ਉਪ੍ਪਾਦਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਕਿਲੇਸਸਂਯੁਤ੍ਤਵਣ੍ਣਨਾ

੩੨੨-੩੩੧. ਏਸੋਤਿ ¶ ਚਕ੍ਖੁਸ੍ਮਿਂ ਛਨ੍ਦਰਾਗੋ. ਉਪੇਚ੍ਚ ਕਿਲੇਸੇਤੀਤਿ ਉਪਕ੍ਕਿਲੇਸੋ. ਚਿਤ੍ਤਸ੍ਸਾਤਿ ਸਾਮਞ੍ਞਵਚਨਂ ਅਨਿਚ੍ਛਨ੍ਤੋ ਚੋਦਕੋ ‘‘ਕਤਰਚਿਤ੍ਤਸ੍ਸਾ’’ਤਿ ਆਹ. ਇਤਰੋ ਕਾਮਂ ਉਪਤਾਪਨਮਲੀਨਭਾਵਕਰਣਵਸੇਨ ਉਪਕ੍ਕਿਲੇਸੋ ਲੋਕੁਤ੍ਤਰਸ੍ਸ ਨਤ੍ਥਿ, ਵਿਬਾਧਨਟ੍ਠੋ ਪਨ ਅਤ੍ਥੇਵ ਉਪ੍ਪਤ੍ਤਿਨਿਵਾਰਣਤੋਤਿ ਅਧਿਪ੍ਪਾਯੇਨਾਹ ‘‘ਚਤੁਭੂਮਕਚਿਤ੍ਤਸ੍ਸਾ’’ਤਿ. ਚੋਦਕੋ ‘‘ਤੇਭੂਮਕਾ’’ਤਿਆਦਿਨਾ ਅਤ੍ਤਨੋ ਅਧਿਪ੍ਪਾਯਂ ਵਿਵਰਤਿ, ਇਤਰੋ ‘‘ਉਪ੍ਪਤ੍ਤਿਨਿਵਾਰਣਤੋ’’ਤਿਆਦਿਨਾ. ਅਰਿਯਫਲਪਟਿਪ੍ਪਸ੍ਸਦ੍ਧਿਪਹਾਨਵਸੇਨ ਪਵਤ੍ਤਿਯਾ ¶ ਸਬ੍ਬਸਂਕਿਲੇਸਤੋ ਨਿਕ੍ਖਨ੍ਤਤ੍ਤਾ ਨੇਕ੍ਖਮ੍ਮਂ, ਮਗ੍ਗਨਿਬ੍ਬਾਨਾਨਂ ਪਨ ਨੇਕ੍ਖਮ੍ਮਭਾਵੋ ਉਕ੍ਕਂਸਤੋ ਗਹਿਤੋ ਏਵਾਤਿ ਆਹ ‘‘ਨੇਕ੍ਖਮ੍ਮਨਿਨ੍ਨਨ੍ਤਿ ਨਵਲੋਕੁਤ੍ਤਰਧਮ੍ਮਨਿਨ੍ਨ’’ਨ੍ਤਿ. ਅਭਿਜਾਨਿਤ੍ਵਾਤਿ ਅਭਿਮੁਖਭਾਵੇਨ ਜਾਨਿਤ੍ਵਾ. ਸਚ੍ਛਿਕਾਤਬ੍ਬੇਸੂਤਿ ਪਚ੍ਚਕ੍ਖਕਾਤਬ੍ਬੇਸੁ. ਛਲ਼ਭਿਞ੍ਞਾਧਮ੍ਮੇਸੂਤਿ ਅਰਿਯਮਗ੍ਗਸਮ੍ਪਯੁਤ੍ਤਧਮ੍ਮੇਸੁ.

ਕਿਲੇਸਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸਾਰਿਪੁਤ੍ਤਸਂਯੁਤ੍ਤਂ

੧-੯. ਵਿਵੇਕਜਸੁਤ੍ਤਾਦਿਵਣ੍ਣਨਾ

੩੩੨-੩੪੦. ਨ ¶ ਏਵਂ ਹੋਤੀਤਿ ਏਤ੍ਥ ‘‘ਅਹਂ ਸਮਾਪਜ੍ਜਾਮੀ’’ਤਿ ਵਾ, ‘‘ਅਹਂ ਸਮਾਪਨ੍ਨੋ’’ਤਿ ਵਾ ਮਾ ਹੋਤੁ ਤਦਾ ਤਾਦਿਸਾਭੋਗਾਭਾਵਤੋ. ‘‘ਅਹਂ ਵੁਟ੍ਠਿਤੋ’’ਤਿ ਪਨ ਕਸ੍ਮਾ ਨ ਹੋਤੀਤਿ? ਸਬ੍ਬਥਾਪਿ ਨ ਹੋਤ੍ਵੇਵ ਅਹਙ੍ਕਾਰਸ੍ਸ ਸਬ੍ਬਸੋ ਪਹੀਨਤ੍ਤਾ.

ਵਿਵੇਕਜਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦. ਸੂਚਿਮੁਖੀਸੁਤ੍ਤਵਣ੍ਣਨਾ

੩੪੧. ਤਸ੍ਮਿਂ ਵਚਨੇ ਪਟਿਕ੍ਖਿਤ੍ਤੇਤਿ – ‘‘ਅਧੋਮੁਖੋ ਭੁਞ੍ਜਸੀ’’ਤਿ ਪਰਿਬ੍ਬਾਜਿਕਾਯ ਵੁਤ੍ਤਵਚਨੇ – ‘‘ਨ ਖ੍ਵਾਹਂ ਭਗਿਨੀ’’ਤਿ ਪਟਿਕ੍ਖਿਤ੍ਤੇ. ਵਾਦਨ੍ਤਿ ਦੋਸਂ. ਉਬ੍ਭਮੁਖੋਤਿ ਉਪਰਿਮੁਖੋ. ਪੁਰਤ੍ਥਿਮਾਦਿਕਾ ਚਤਸ੍ਸੋ ਦਿਸਾ. ਦਕ੍ਖਿਣਪੁਰਤ੍ਥਿਮਾਦਿਕਾ ਚਤਸ੍ਸੋ ਵਿਦਿਸਾ.

ਆਰਾਮਆਰਾਮਵਤ੍ਥੁਆਦੀਸੁ ਭੂਮਿਪਰਿਕਮ੍ਮਬੀਜਾਭਿਸਙ੍ਖਰਣਾਦਿਪਟਿਸਂਯੁਤ੍ਤਾ ਵਿਜ੍ਜਾ ਵਤ੍ਥੁਵਿਜ੍ਜਾ, ਤਸ੍ਸਾ ਪਨ ਮਿਚ੍ਛਾਜੀਵਭਾਵਂ ਦਸ੍ਸੇਤੁਂ ‘‘ਤੇਸ’’ਨ੍ਤਿਆਦਿ ਵੁਤ੍ਤਂ. ਤੇਸਂ ਤੇਸਂ ਅਤ੍ਤਨੋ ਪਚ੍ਚਯਦਾਯਕਾਨਂ. ਤਤ੍ਥ ਤਤ੍ਥ ਗਮਨਨ੍ਤਿ ਤੇਸਂ ਸਾਸਨਹਰਣਵਸੇਨ ਤਂ ਤਂ ਗਾਮਨ੍ਤਰਦੇਸਨ੍ਤਰਂ. ਏਵਮਾਰੋਚੇਸੀਤਿ ਅਤ੍ਤੁਕ੍ਕਂਸਨਪਰਵਮ੍ਭਨਰਹਿਤਂ ਕਣ੍ਣਸੁਖਂ ਪੇਮਨੀਯਂ ਹਦਯਙ੍ਗਮਂ ਥੇਰਸ੍ਸ ਧਮ੍ਮਕਥਂ ¶ ਸੁਤ੍ਵਾ ਪਸਨ੍ਨਮਾਨਸਾ ਏਵਂ ‘‘ਧਮ੍ਮਿਕਂ ਸਮਣਾ ਸਕ੍ਯਪੁਤ੍ਤਿਯਾ’’ਤਿਆਦਿਨਾ ਸਾਸਨਸ੍ਸ ਗੁਣਸਂਕਿਤ੍ਤਨਵਾਚਂ ਕੁਲਾਨਂ ਆਰੋਚੇਸਿ.

ਸੂਚਿਮੁਖੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਿਪੁਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਨਾਗਸਂਯੁਤ੍ਤਂ

੧. ਸੁਦ੍ਧਿਕਸੁਤ੍ਤਵਣ੍ਣਨਾ

੩੪੨. ਅਣ੍ਡਜਾਤਿ ¶ ਅਣ੍ਡੇ ਜਾਤਾ. ਵਤ੍ਥਿਕੋਸੇਤਿ ਵਤ੍ਥਿਕੋਸਸਞ੍ਞਿਤੇ ਜਰਾਯੁਪੁਟੇ ਜਾਤਾ. ਸਂਸੇਦੇਤਿ ਸਂਸਿਨ੍ਨੇ ਕਿਲਿਨ੍ਨਟ੍ਠਾਨੇ ਉਪ੍ਪਨ੍ਨਾ. ਉਪਪਤਿਤ੍ਵਾ ਵਿਯਾਤਿ ਕੁਤੋਚਿਪਿ ਅਵਪਤਿਤ੍ਵਾ ਵਿਯ ਨਿਬ੍ਬਤ੍ਤਾ. ਪੁਗ੍ਗਲਾਨਨ੍ਤਿ ਤਥਾ ਵਿਨੇਤਬ੍ਬਪੁਗ੍ਗਲਾਨਂ.

ਸੁਦ੍ਧਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੫੦. ਪਣੀਤਤਰਸੁਤ੍ਤਾਦਿਵਣ੍ਣਨਾ

੩੪੩-੩੯੧. ਵਿਸ੍ਸਟ੍ਠਕਾਯਾਤਿ ‘‘ਯੇ ਚਮ੍ਮੇਨ ਵਾ ਰੁਧਿਰੇਨ ਵਾ ਅਟ੍ਠਿਨਾ ਵਾ ਅਤ੍ਥਿਕਾ, ਤੇ ਸਬ੍ਬਂ ਗਣ੍ਹਨ੍ਤੂ’’ਤਿ ਤਤ੍ਥ ਨਿਰਪੇਕ੍ਖਚਿਤ੍ਤਤਾਯ ਅਧਿਟ੍ਠਿਤਸੀਲਤਾਯ ਪਰਿਚ੍ਚਤ੍ਤਸਰੀਰਾ. ਦੁਵਿਧਕਾਰਿਨੋਤਿ ‘‘ਕਾਲੇਨ ਕੁਸਲਂ, ਕਾਲੇਨ ਅਕੁਸਲ’’ਨ੍ਤਿ ਏਵਂ ਕੁਸਲਾਕੁਸਲਕਾਰਿਨੋ. ਸਹ ਬ੍ਯਯਤਿ ਪਵਤ੍ਤਤੀਤਿ ਸਹਬ੍ਯੋ, ਸਹਚਾਰੋ. ਤਸ੍ਸ ਭਾਵੋ ਸਹਬ੍ਯਤਾ, ਤਂ ਸਹਬ੍ਯਤਂ. ਅਦਨੀਯਤੋ ਅਨ੍ਨਂ. ਖਾਦਨੀਯਤੋ ਖਜ੍ਜਂ. ਪਾਤਬ੍ਬਤੋ ਪਾਨਂ. ਨਿਵਸਨੀਯਤੋ ਵਤ੍ਥਂ. ਨਿਵਸਿਤਬ੍ਬਂ ਨਿਵਾਸਨਂ. ਪਰਿਵਰਿਤਬ੍ਬਂ ਪਾਵੁਰਣਂ. ਯਾਨ੍ਤਿ ਤੇਨਾਤਿ ਯਾਨਂ, ਉਪਾਹਨਾਦਿਯਾਨਾਨਿ. ਆਦਿਸਦ੍ਦੇਨ ਵਯ੍ਹਸਿਵਿਕਾਦੀਨਂ ਸਙ੍ਗਹੋ. ਛਤ੍ਤਮ੍ਪਿ ਪਰਿਸ੍ਸਯਾਤਪਦੁਕ੍ਖਪਰਿਰਕ੍ਖਣੇਨ ਮਗ੍ਗਗਮਨਸਾਧਨਨ੍ਤਿ ਕਤ੍ਵਾ ‘‘ਛਤ੍ਤੁਪਾਹਨ’’ਨ੍ਤਿਆਦਿ ਵੁਤ੍ਤਂ. ਤੇਨ ਵੁਤ੍ਤਂ ‘‘ਯਂ ਕਿਞ੍ਚਿ ਗਮਨਪਚ੍ਚਯ’’ਨ੍ਤਿ. ਪਤ੍ਥਨਂ ਕਤ੍ਵਾ…ਪੇ… ਤਤ੍ਥ ਨਿਬ੍ਬਤ੍ਤਨ੍ਤਿ ਚਮ੍ਪੇਯ੍ਯਨਾਗਰਾਜਾ ਵਿਯਾਤਿ ਦਟ੍ਠਬ੍ਬਂ.

ਪਣੀਤਤਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਾਗਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਸੁਪਣ੍ਣਸਂਯੁਤ੍ਤਵਣ੍ਣਨਾ

੩੯੨-੪੩੭. ਪਤ੍ਤਾਨਨ੍ਤਿ ¶ ¶ ਉਭੋਸੁ ਪਕ੍ਖੇਸੁ ਪਤ੍ਤਾਨਂ. ਵਣ੍ਣਵਨ੍ਤਤਾਯਾਤਿ ਅਤਿਸਯੇਨ ਵਿਚਿਤ੍ਤਵਣ੍ਣਤਾਯ. ਅਤਿਸਯਤ੍ਥੋ ਹਿ ਅਯਂ ਵਨ੍ਤ-ਸਦ੍ਦੋ. ਪੁਰਿਮਨਯੇਨਾਤਿ ਨਾਗਸਂਯੁਤ੍ਤੇ ਪਠਮਸੁਤ੍ਤੇ ਵੁਤ੍ਤਨਯੇਨ. ਉਦ੍ਧਰਨ੍ਤੀਤਿ ਸਮੁਦ੍ਦਤੋ ਉਦ੍ਧਰਨ੍ਤਿ, ਪਥਵਨ੍ਤਰਪਬ੍ਬਤਨ੍ਤਰਤੋ ਪਨ ਤੇਸਂ ਉਦ੍ਧਰਣਂ ਦੁਕ੍ਕਰਮੇਵ. ਪਣੀਤਤਰੇਤਿ ਬਲੇਨ ਪਣੀਤਤਰੇ, ਬਲਵਨ੍ਤੇਤਿ ਅਤ੍ਥੋ. ਅਨੁਦ੍ਧਰਣੀਯਨਾਗਾਤਿ ਆਨੁਭਾਵਮਹਨ੍ਤਤਾਯ ਚ ਵਸਨਟ੍ਠਾਨਵਿਦੁਗ੍ਗਤਾਯ ਚ ਉਦ੍ਧਰਿਤੁਂ ਅਸਕ੍ਕੁਣੇਯ੍ਯਾ ਨਾਗਾ. ਤੇ ‘‘ਸਤ੍ਤਵਿਧਾ’’ਤਿ ਵਤ੍ਵਾ ਸਰੂਪਤੋ ਵਸਨਟ੍ਠਾਨਤੋ ਚ ਦਸ੍ਸੇਨ੍ਤੋ ‘‘ਕਮ੍ਬਲਸ੍ਸਤਰਾ’’ਤਿਆਦਿਮਾਹ. ਤਤ੍ਥ ਕਮ੍ਬਲਸ੍ਸਤਰਾ ਧਤਰਟ੍ਠਾਤਿ ਇਮੇ ਜਾਤਿਵਸੇਨ ਵੁਤ੍ਤਾ. ਸਤ੍ਤਸੀਦਨ੍ਤਰਵਾਸਿਨੋਤਿ ਸਤ੍ਤਵਿਧਸੀਦਸਮੁਦ੍ਦਵਾਸਿਨੋ. ਪਥਵਿਟ੍ਠਕਾਤਿ ਪਥਵਨ੍ਤਰਵਾਸਿਨੋ, ਤਥਾ ਪਬ੍ਬਤਟ੍ਠਕਾ. ਤੇ ਚ ਵਿਮਾਨਵਾਸਿਨੋ. ਤੇ ਨਾਗੇ ਕੋਚਿ ਸੁਪਣ੍ਣੋ ਉਦ੍ਧਰਿਤੁਂ ਨ ਸਕ੍ਕੋਤੀਤਿ ਸਮ੍ਬਨ੍ਧੋ. ਸੇਸਨ੍ਤਿ ‘‘ਕਾਯੇਨ ਦ੍ਵਯਕਾਰਿਨੋ’’ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਸਬ੍ਬਂ ਨਾਗਸਂਯੁਤ੍ਤੇ ਵੁਤ੍ਤਨਯਮੇਵ, ਤਤ੍ਥ ਚ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋਤਿ ਅਧਿਪ੍ਪਾਯੋ.

ਸੁਪਣ੍ਣਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਗਨ੍ਧਬ੍ਬਕਾਯਸਂਯੁਤ੍ਤਵਣ੍ਣਨਾ

੪੩੮-੫੪੯. ਮੂਲਗਨ੍ਧਾਦਿਭੇਦਂ ¶ ਗਨ੍ਧਂ ਅਵਨ੍ਤਿ ਅਪਯੁਞ੍ਜਨ੍ਤੀਤਿ ਗਨ੍ਧਬ੍ਬਾ, ਤੇਸਂ ਕਾਯੋ ਸਮੂਹੋ ਗਨ੍ਧਬ੍ਬਕਾਯੋ, ਗਨ੍ਧਬ੍ਬਦੇਵਨਿਕਾਯੋ. ਚਾਤੁਮਹਾਰਾਜਿਕੇਸੁ ਏਕਿਯਾਵ ਤੇ ਦਟ੍ਠਬ੍ਬਾ, ਤਪ੍ਪਰਿਯਾਪਨ੍ਨਤਾਯ ਤਤ੍ਥ ਵਾ ਨਿਯੁਤ੍ਤਾਤਿ ਗਨ੍ਧਬ੍ਬਕਾਯਿਕਾ. ਤੇਸਂ ਤੇਸਂ ਰੁਕ੍ਖਗਚ੍ਛਲਤਾਨਂ ਮੂਲਂ ਪਟਿਚ੍ਚ ਪਵਤ੍ਤੋ ਗਨ੍ਧੋ ਮੂਲਗਨ੍ਧੋ, ਤਸ੍ਮਿਂ ਮੂਲਗਨ੍ਧੇ. ਅਧਿਵਤ੍ਥਾਤਿ ਮੂਲਗਨ੍ਧਂ ਅਧਿਟ੍ਠਾਯ, ਅਭਿਭੁਯ੍ਯ ਵਾ ਵਸਨ੍ਤਾ. ਏਸ ਨਯੋ ਸੇਸੇਸੁਪਿ. ਤਂ ਨਿਸ੍ਸਾਯਾਤਿ ਤਂ ਮੂਲਗਨ੍ਧਂ ਰੁਕ੍ਖਂ ਪਚ੍ਚਯਂ ਕਤ੍ਵਾ ਨਿਬ੍ਬਤ੍ਤਾ. ਨ ਕੇਵਲਂ ਤਤ੍ਥ ਗਨ੍ਧੋ ਏਵ, ਮੂਲਮੇਵ ਵਾ ਤੇਸਂ ਪਚ੍ਚਯੋਤਿ ਦਸ੍ਸੇਨ੍ਤੋ ‘‘ਸੋ ਹੀ’’ਤਿਆਦਿਮਾਹ. ਉਪਕਪ੍ਪਤੀਤਿ ਨਿਵਾਸਟ੍ਠਾਨਭਾਵੇਨ ਵਿਨਿਯੁਞ੍ਜਤਿ. ਗਨ੍ਧਗਨ੍ਧੇਤਿ ਗਨ੍ਧਾਨਂ ਗਨ੍ਧਸਮੁਦਾਯੇ. ਮੂਲਾਦਿਗਨ੍ਧਾਨਂ ਗਨ੍ਧੇਤਿ ਮੂਲਾਦਿਗਤਅਵਯਵਗਨ੍ਧਾਨਂ ਗਨ੍ਧੇ, ਤਿਮੂਲਾਦਿਗਤਸਮੁਦਾਯਭੂਤੇਤਿ ਅਤ੍ਥੋ. ਪੁਬ੍ਬੇ ਹਿ ‘‘ਮੂਲਗਨ੍ਧੇ’’ਤਿਆਦਿਨਾ ਰੁਕ੍ਖਾਨਂ ਅਵਯਵਗਨ੍ਧੋ ¶ ਗਹਿਤੋ, ਇਧ ਪਨ ਸਬ੍ਬਸੋ ਗਹਿਤਤ੍ਤਾ ਸਮੁਦਾਯਗਨ੍ਧੋ ਵੇਦਿਤਬ੍ਬੋ. ਤੇਨਾਹ ‘‘ਯਸ੍ਸ ਹਿ ਰੁਕ੍ਖਸ੍ਸਾ’’ਤਿਆਦਿ. ਸੋਤਿ ਸੋ ਸਬ੍ਬੋ ਮੂਲਾਦਿਗਤੋ ਗਨ੍ਧੋ ਗਨ੍ਧਸਮੁਦਾਯੋ ਇਧ ਗਨ੍ਧਗਨ੍ਧੋ ਨਾਮ. ਤਸ੍ਸ ਗਨ੍ਧਸ੍ਸ ਗਨ੍ਧੇਤਿ ਤਸ੍ਸ ਸਮੁਦਾਯਗਨ੍ਧਸ੍ਸ ਤਥਾਭੂਤੇ ਗਨ੍ਧੇ. ਸਰਿਕ੍ਖਂ ਸਦਿਸਂ ਪਟਿਦਾਨਂ ਏਤਿਸ੍ਸਾਤਿ ਸਰਿਕ੍ਖਦਾਨਂ, ਪਤ੍ਥਨਾ. ਯਥਾਧਿਪ੍ਪੇਤਫਲਾਨਿ ਸਰਿਕ੍ਖਦਾਨਤ੍ਤਾਵ ਅਧਿਪ੍ਪੇਤਫਲਂ ਦੇਨ੍ਤੁ, ਅਸਰਿਕ੍ਖਦਾਨਂ ਕਥਨ੍ਤਿ? ਤਮ੍ਪਿ ਦੇਤਿਯੇਵ ਪੁਞ੍ਞਸ੍ਸ ਸਬ੍ਬਕਾਮਦਦਤ੍ਤਾਤਿ ਆਹ ‘‘ਅਸਰਿਕ੍ਖਦਾਨਮ੍ਪੀ’’ਤਿਆਦਿ.

ਗਨ੍ਧਬ੍ਬਕਾਯਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਵਲਾਹਕਸਂਯੁਤ੍ਤਵਣ੍ਣਨਾ

੫੫੦-੬੦੬. ਲੋਕਂ ¶ ਵਾਲੇਨ੍ਤਾ ਸਂਵਰਨ੍ਤਾ ਛਾਦੇਨ੍ਤਾ ਅਹਨ੍ਤਿ ਪਰਿਯੇਸਨ੍ਤੀਤਿ ਵਲਾਹਾ, ਦੇਵਪੁਤ੍ਤਾ. ਤੇਸਂ ਸਮੂਹੋ ਵਲਾਹਕਦੇਵਕਾਯੋਤਿ ਆਹ ‘‘ਵਲਾਹਕਕਾਯਿਕਾ’’ਤਿਆਦਿ. ਸੀਤਕਰਣਵਲਾਹਕਾਤਿ ਸੀਤਹਰਣਵਲਾਹਕਾ. ਸੇਸਪਦੇਸੂਤਿ ਉਣ੍ਹਵਲਾਹਕਾਦਿਪਦੇਸੁ. ਏਸੇਵ ਨਯੋਤਿ ‘‘ਉਣ੍ਹਕਰਣਵਲਾਹਕਾ’’ਤਿਆਦਿਨਾ ਅਤ੍ਥੋ ਵੇਦਿਤਬ੍ਬੋ. ਚਿਤ੍ਤਟ੍ਠਪਨਨ੍ਤਿ ‘‘ਸੀਤਂ ਹੋਤੂ’’ਤਿ ਏਵਂ ਚਿਤ੍ਤਸ੍ਸ ਉਪ੍ਪਾਦਨਂ. ਵਸ੍ਸਾਨੇਤਿ ਵਸ੍ਸਕਾਲੇ. ਉਤੁਸਮੁਟ੍ਠਾਨਮੇਵਾਤਿ ਪਾਕਤਿਕਸੀਤਮੇਵਾਤਿ ਅਤ੍ਥੋ. ਉਣ੍ਹੇਪੀਤਿ ਉਣ੍ਹਕਾਲੇ. ਅਬ੍ਭਮਣ੍ਡਪੋਤਿ ਮਣ੍ਡਪਸਦਿਸਅਬ੍ਭਪਟਲਵਿਤਾਨਮਾਹ. ਅਬ੍ਭਂ ਉਪ੍ਪਜ੍ਜਤੀਤਿ ਤਹਂ ਤਹਂ ਪਟਲਂ ਉਟ੍ਠਹਤਿ. ਅਬ੍ਭੇਯੇਵਾਤਿ ਅਬ੍ਭਕਾਲੇ ਏਵ, ਵਸ੍ਸਾਨੇਤਿ ਅਤ੍ਥੋ. ਅਤਿਅਬ੍ਭਨ੍ਤਿ ਸਤਪਟਲਸਹਸ੍ਸਪਟਲਂ ਹੁਤ੍ਵਾ ਅਬ੍ਭੁਟ੍ਠਾਨਂ. ਚਿਤ੍ਤਵੇਸਾਖਮਾਸੇਸੂਤਿ ਵਸਨ੍ਤਕਾਲਂ ਸਨ੍ਧਾਯਾਹ. ਤਦਾ ਹਿ ਵਿਦ੍ਧੋ ਵਿਗਤਵਲਾਹਕੋ ਦੇਵੋ ਭਵਿਤੁਂ ਯੁਤ੍ਤੋ. ਉਤ੍ਤਰਦਕ੍ਖਿਣਾਦੀਤਿ ਆਦਿ-ਸਦ੍ਦੇਨ ਪਚ੍ਛਿਮਵਾਤਾਦਿਂ ਸਙ੍ਗਣ੍ਹਾਤਿ. ਪਕਤਿਵਾਤੋਤਿ ਪਕਤਿਯਾ ਸਭਾਵੇਨ ਵਾਯਨਕਵਾਤੋ. ਤਂ ਉਤੁਸਮੁਟ੍ਠਾਨਮੇਵਾਤਿ ਆਹਾਰੂਪਜੀਵੀਨਂ ਸਤ੍ਤਾਨਂ ਸਾਧਾਰਣਕਮ੍ਮੂਪਨਿਸ੍ਸਯਉਤੁਸਮੁਟ੍ਠਾਨਮੇਵ. ਏਸ ਨਯੋ ਉਤੁਸਮੁਟ੍ਠਾਨਸੀਤੁਣ੍ਹਵਾਤੇਸੁਪਿ. ਤਮ੍ਪਿ ਹਿ ਆਹਾਰੂਪਜੀਵੀਨਂ ਸਤ੍ਤਾਨਂ ਸਾਧਾਰਣਕਮ੍ਮੂਪਨਿਸ੍ਸਯਮੇਵਾਤਿ.

ਗੀਤਨ੍ਤਿ ਮੇਘਗੀਤਂ. ਸਚ੍ਚਕਿਰਿਯਾਯਾਤਿ ਤਾਦਿਸਾਨਂ ਪੁਰਿਸਵਿਸੇਸਾਨਂ ਸਚ੍ਚਾਧਿਟ੍ਠਾਨੇਨ. ਇਦ੍ਧਿਬਲੇਨਾਤਿ ਇਦ੍ਧਿਮਨ੍ਤਾਨਂ ਇਦ੍ਧਿਆਨੁਭਾਵੇਨ. ਵਿਨਾਸਮੇਘੇਨਾਤਿ ¶ ਕਪ੍ਪਵਿਨਾਸਕਮੇਘੇਨ. ਅਞ੍ਞੇਨਪਿ ਕਣ੍ਹਪਾਪਿਕਸਤ੍ਤਾਨਂ ਪਾਪਕਮ੍ਮਪਚ੍ਚਯਾ ਉਪ੍ਪਨ੍ਨਵਿਨਾਸਮੇਘੇਨ ਵੁਟ੍ਠੇਨ ਸੋ ਸੋ ਦੇਸੋ ਵਿਨਸ੍ਸਤੇਵ.

ਵਲਾਹਕਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਵਚ੍ਛਗੋਤ੍ਤਸਂਯੁਤ੍ਤਵਣ੍ਣਨਾ

੬੦੭-੬੬੧. ਅਞ੍ਞਾਣਾਤਿ ¶ ਅਞ੍ਞਾਣਹੇਤੁ, ਸਚ੍ਚਪਟਿਚ੍ਛਾਦਕਸਮ੍ਮੋਹਹੇਤੂਤਿ ਅਤ੍ਥੋ. ਅਟ੍ਠਕਥਾਯਂ ਪਨ ਇਮਮੇਵ ਅਤ੍ਥਂ ਹੇਤੁਅਤ੍ਥੇਨ ਕਰਣਵਚਨੇਨ ਦਸ੍ਸੇਤੁਂ ‘‘ਅਞ੍ਞਾਣੇਨਾ’’ਤਿ ਵੁਤ੍ਤਂ. ਸਬ੍ਬਾਨੀਤਿ ‘‘ਅਞ੍ਞਾਣਾ ਅਦਸ੍ਸਨਾ ਅਨਭਿਸਮਯਾ’’ਤਿਆਦੀਨਿ ਪਦਾਨਿ ਏਕਾਦਸਸੁ ਸੁਤ੍ਤੇਸੁ ਆਗਤਾਨਿ, ਪਞ੍ਚਪਞ੍ਞਾਸ ਵੇਯ੍ਯਾਕਰਣਾਨਿ ਵੁਤ੍ਤਾਨਿ ਸੁਤ੍ਤੇਸੁ ਪਞ੍ਚਨ੍ਨਂ ਖਨ੍ਧਾਨਂ ਵਸੇਨ ਵੇਯ੍ਯਾਕਰਣਸ੍ਸ ਆਗਤਤ੍ਤਾ.

ਵਚ੍ਛਗੋਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੩. ਝਾਨਸਂਯੁਤ੍ਤਂ

੧. ਸਮਾਧਿਮੂਲਕਸਮਾਪਤ੍ਤਿਸੁਤ੍ਤਵਣ੍ਣਨਾ

੬੬੨. ਸਮਾਧਿਕੁਸਲੋਤਿ ¶ ਸਮਾਧਿਸ੍ਮਿਂ ਕੁਸਲੋ. ਤਯਿਦਂ ਸਮਾਧਿਕੋਸਲ੍ਲਤ੍ਤਂ ਸਹ ਝਾਨਙ੍ਗਯੋਗੇਨ ਚਤੁਬ੍ਬਿਧੋ ਝਾਨਸਮਾਧਿ, ਤਸ੍ਮਾ ਤਂ ਤਂ ਵਿਭਾਗਂ ਜਾਨਨ੍ਤਸ੍ਸ ਸਿਦ੍ਧਂ ਹੋਤੀਤਿ ਆਹ – ‘‘ਪਠਮਂ ਝਾਨ’’ਨ੍ਤਿਆਦਿ. ਤਤ੍ਥ ਵਿਤਕ੍ਕਵਿਚਾਰਪੀਤਿਸੁਖੇਕਗ੍ਗਤਾਵਸੇਨ ਪਠਮਂ ਪਞ੍ਚਙ੍ਗਿਕਂ, ਪੀਤਿਸੁਖੇਕਗ੍ਗਤਾਵਸੇਨ ਦੁਤਿਯਂ ਤਿਵਙ੍ਗਿਕਂ, ਸੁਖੇਕਗ੍ਗਤਾਵਸੇਨ ਤਤਿਯਂ ਦੁਵਙ੍ਗਿਕਂ, ਉਪੇਕ੍ਖੇਕਗ੍ਗਤਾਵਸੇਨ ਚਤੁਤ੍ਥਂ ਦੁਵਙ੍ਗਿਕਮੇਵਾਤਿ ਏਵਂ ਤਸ੍ਮਿਂ ਤਸ੍ਮਿਂ ਝਾਨੇ ਤਂਤਂਅਙ੍ਗਾਨਂ ਵਵਤ੍ਥਾਨੇ ਕੁਸਲੋ. ਸਮਾਪਤ੍ਤਿਕੁਸਲੋਤਿ ਸਮਾਪਜ੍ਜਨੇ ਕੁਸਲੋ. ਹਾਸੇਤ੍ਵਾਤਿ ਤੋਸੇਤ੍ਵਾ. ਕਲ੍ਲਂ ਕਤ੍ਵਾਤਿ ਸਮਾਧਾਨਸ੍ਸ ਪਟਿਪਕ੍ਖਧਮ੍ਮਾਨਂ ਦੂਰੀਕਰਣੇਨ ਸਹਕਾਰੀਕਾਰਣਞ੍ਚ ਸਮਾਧਾਨੇਨ ਸਮਾਪਜ੍ਜਨੇ ਚਿਤ੍ਤਂ ਸਮਤ੍ਥਂ ਕਤ੍ਵਾ. ਸੇਸਪਦਾਨੀਤਿ ਸੇਸਾ ਤਯੋ ਕੋਟ੍ਠਾਸਾ. ਤਤਿਯਾਦੀਸੁ ਨਯੇਸੁ ਅਕੁਸਲੋਪਿ ਝਾਨਤ੍ਥਾਯ ਪਟਿਪਨ੍ਨਤ੍ਤਾ ‘‘ਝਾਯੀਤੇਵਾ’’ਤਿ ਵੁਤ੍ਤੋ.

ਸਮਾਧਿਮੂਲਕਸਮਾਪਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੫੫. ਸਮਾਧਿਮੂਲਕਠਿਤਿਸੁਤ੍ਤਾਦਿਵਣ੍ਣਨਾ

੬੬੩-੭੧੬. ਦੁਤਿਯਾਦਿਸੁਤ੍ਤੇਸੁ ¶ ਠਿਤਿਕੁਸਲੋਤਿ ਏਤ੍ਥ ਅਨ੍ਤੋਗਧਹੇਤੁਅਤ੍ਥੋ ਠਿਤਿ-ਸਦ੍ਦੋ, ਤਸ੍ਮਿਞ੍ਚ ਪਨ ਕੁਸਲੋਤਿ ਅਤ੍ਥੋਤਿ ਆਹ – ‘‘ਝਾਨਂ ਠਪੇਤੁਂ ਅਕੁਸਲੋ’’ਤਿ. ਸਤ੍ਤਟ੍ਠਅਚ੍ਛਰਾਮਤ੍ਤਨ੍ਤਿ ਸਤ੍ਤਟ੍ਠਅਚ੍ਛਰਾਮਤ੍ਤਂ ਖਣਂ ਝਾਨਂ ਠਪੇਤੁਂ ਨ ਸਕ੍ਕੋਤਿ ਅਧਿਟ੍ਠਾਨਵਸੀਭਾਵਸ੍ਸ ਅਨਿਪ੍ਫਾਦਿਤਤ੍ਤਾ. ਯਥਾਪਰਿਚ੍ਛੇਦੇਨ ਕਾਲੇਨ ਵੁਟ੍ਠਾਤੁਂ ਨ ਸਕ੍ਕੋਤਿ ਵੁਟ੍ਠਾਨਵਸੀਭਾਵਸ੍ਸ ਅਨਿਪ੍ਫਾਦਿਤਤ੍ਤਾ. ਕਲ੍ਲਂ ਜਾਤਂ ਅਸ੍ਸਾਤਿ ਕਲ੍ਲਿਤਂ, ਤਸ੍ਮਿਂ ਕਲ੍ਲਿਤੇ ਕਲ੍ਲਿਤਭਾਵੇਨ ਕਸਿਣਾਰਮ੍ਮਣੇਸੁ ‘‘ਇਦਂ ਨਾਮ ਅਸੁਕਸ੍ਸਾ’’ਤਿ ਵਿਸਯਵਸੇਨ ਸਮਾਪਜ੍ਜਿਤੁਂ ਅਸਕ੍ਕੋਨ੍ਤੋ ਨ ਸਮਾਧਿਸ੍ਮਿਂ ਆਰਮ੍ਮਣਕੁਸਲੋ. ਨ ਸਮਾਧਿਸ੍ਮਿਂ ਗੋਚਰਕੁਸਲੋਤਿ ਸਮਾਧਿਸ੍ਮਿਂ ਨਿਪ੍ਫਾਦਿਤਬ੍ਬੇ ਤਸ੍ਸ ਗੋਚਰੇ ਕਮ੍ਮਟ੍ਠਾਨਸਞ੍ਞਿਤੇ ਪਵਤ੍ਤਿਟ੍ਠਾਨੇ ਭਿਕ੍ਖਾਚਾਰਗੋਚਰੇ ਚ ਸਤਿਸਮ੍ਪਜਞ੍ਞਵਿਰਹਿਤੋ ਅਕੁਸਲੋ. ਕੇਚਿ ਪਨ ‘‘ਕਮ੍ਮਟ੍ਠਾਨਗੋਚਰੋ ਪਠਮਜ੍ਝਾਨਾਦਿਕਂ, ‘ਏਵਂ ਸਮਾਪਜ੍ਜਿਤਬ੍ਬਂ, ਏਵਂ ਬਹੁਲੀਕਾਤਬ੍ਬ’ਨ੍ਤਿ ਅਜਾਨਨ੍ਤੋ ਤਤ੍ਥ ਅਕੁਸਲੋ ਨਾਮਾ’’ਤਿ ਵਦਨ੍ਤਿ. ਕਮ੍ਮਟ੍ਠਾਨਂ ਅਭਿਨੀਹਰਿਤੁਨ੍ਤਿ ਕਮ੍ਮਟ੍ਠਾਨਂ ਵਿਸੇਸਭਾਗਿਯਤਾਯ ¶ ਅਭਿਨੀਹਰਿਤੁਂ ਅਕੁਸਲੋ. ਸਕ੍ਕਚ੍ਚਕਾਰੀਤਿ ਚਿਤ੍ਤੀਕਾਰੀ. ਸਾਤਚ੍ਚਕਾਰੀਤਿ ਨਿਯਤਕਾਰੀ. ਸਮਾਧਿਸ੍ਸ ਉਪਕਾਰਕਧਮ੍ਮਾਤਿ ਅਪ੍ਪਨਾਕੋਸਲ੍ਲਾ. ਸਮਾਪਤ੍ਤਿਆਦੀਹੀਤਿ ਆਦਿ-ਸਦ੍ਦੇਨ ਸਕ੍ਕਚ੍ਚਕਾਰਿਪਦਾਦੀਨਂਯੇਵ ਸਙ੍ਗਹੋ ਦਟ੍ਠਬ੍ਬੋ ਚਤੁਕ੍ਕਾਨਂ ਵੁਤ੍ਤਤ੍ਤਾ. ਤੇਨਾਹ ‘‘ਯੋਜੇਤ੍ਵਾ ਚਤੁਕ੍ਕਾ ਵੁਤ੍ਤਾ’’ਤਿ. ਲੋਕਿਯਜ੍ਝਾਨਵਸੇਨੇਵ ਕਥਿਤਂ ‘‘ਸਮਾਧਿਕੁਸਲੋ’’ਤਿਆਦਿਨਾ ਨਯੇਨ ਦੇਸਨਾਯ ਪਵਤ੍ਤਤ੍ਤਾ. ਨ ਹਿ ਲੋਕੁਤ੍ਤਰਧਮ੍ਮੇਸੁ ਅਕੋਸਲ੍ਲਂ ਨਾਮ ਲਬ੍ਭਤਿ. ਯਦਿ ਅਕੋਸਲ੍ਲਂ, ਨ ਕੁਸਲਸਦ੍ਦੇਨ ਵਿਸੇਸਿਤਬ੍ਬਤਾ ਸਿਯਾਤਿ.

ਸਮਾਧਿਮੂਲਕਠਿਤਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਝਾਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ ਖਨ੍ਧਵਗ੍ਗਵਣ੍ਣਨਾ.