ਮੂਲ > ਸੁਤ੍ਤਪਿਟਕ > ਖੁਦ੍ਦਕਨਿਕਾਯ

੧. ਏਵਂ ¶ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਬਹੂ ¶ ਦੇਵਾ ਮਨੁਸ੍ਸਾ ਚ, ਮਙ੍ਗਲਾਨਿ ਅਚਿਨ੍ਤਯੁਂ;

ਆਕਙ੍ਖਮਾਨਾ ਸੋਤ੍ਥਾਨਂ, ਬ੍ਰੂਹਿ ਮਙ੍ਗਲਮੁਤ੍ਤਮਂ’’.

‘‘ਅਸੇਵਨਾ ਚ ਬਾਲਾਨਂ, ਪਣ੍ਡਿਤਾਨਞ੍ਚ ਸੇਵਨਾ;

ਪੂਜਾ ਚ ਪੂਜਨੇਯ੍ਯਾਨਂ [ਪੂਜਨੀਯਾਨਂ (ਸੀ. ਸ੍ਯਾ. ਕਂ. ਪੀ.)], ਏਤਂ ਮਙ੍ਗਲਮੁਤ੍ਤਮਂ.

‘‘ਪਤਿਰੂਪਦੇਸਵਾਸੋ ¶ ਚ, ਪੁਬ੍ਬੇ ਚ ਕਤਪੁਞ੍ਞਤਾ;

ਅਤ੍ਤਸਮ੍ਮਾਪਣਿਧਿ ¶ [ਅਤ੍ਥਸਮ੍ਮਾਪਣੀਧੀ (ਕਤ੍ਥਚਿ)] ਚ, ਏਤਂ ਮਙ੍ਗਲਮੁਤ੍ਤਮਂ.

‘‘ਬਾਹੁਸਚ੍ਚਞ੍ਚ ਸਿਪ੍ਪਞ੍ਚ, ਵਿਨਯੋ ਚ ਸੁਸਿਕ੍ਖਿਤੋ;

ਸੁਭਾਸਿਤਾ ਚ ਯਾ ਵਾਚਾ, ਏਤਂ ਮਙ੍ਗਲਮੁਤ੍ਤਮਂ.

‘‘ਮਾਤਾਪਿਤੁ ਉਪਟ੍ਠਾਨਂ, ਪੁਤ੍ਤਦਾਰਸ੍ਸ ਸਙ੍ਗਹੋ;

ਅਨਾਕੁਲਾ ਚ ਕਮ੍ਮਨ੍ਤਾ, ਏਤਂ ਮਙ੍ਗਲਮੁਤ੍ਤਮਂ.

‘‘ਦਾਨਞ੍ਚ ਧਮ੍ਮਚਰਿਯਾ ਚ, ਞਾਤਕਾਨਞ੍ਚ ਸਙ੍ਗਹੋ;

ਅਨਵਜ੍ਜਾਨਿ ਕਮ੍ਮਾਨਿ, ਏਤਂ ਮਙ੍ਗਲਮੁਤ੍ਤਮਂ.

‘‘ਆਰਤੀ ਵਿਰਤੀ ਪਾਪਾ, ਮਜ੍ਜਪਾਨਾ ਚ ਸਂਯਮੋ;

ਅਪ੍ਪਮਾਦੋ ਚ ਧਮ੍ਮੇਸੁ, ਏਤਂ ਮਙ੍ਗਲਮੁਤ੍ਤਮਂ.

‘‘ਗਾਰਵੋ ¶ ਚ ਨਿਵਾਤੋ ਚ, ਸਨ੍ਤੁਟ੍ਠਿ ਚ ਕਤਞ੍ਞੁਤਾ;

ਕਾਲੇਨ ਧਮ੍ਮਸ੍ਸਵਨਂ [ਧਮ੍ਮਸ੍ਸਾਵਣਂ (ਕ. ਸੀ.), ਧਮ੍ਮਸਵਨਂ (ਕ. ਸੀ.)], ਏਤਂ ਮਙ੍ਗਲਮੁਤ੍ਤਮਂ.

‘‘ਖਨ੍ਤੀ ਚ ਸੋਵਚਸ੍ਸਤਾ, ਸਮਣਾਨਞ੍ਚ ਦਸ੍ਸਨਂ;

ਕਾਲੇਨ ਧਮ੍ਮਸਾਕਚ੍ਛਾ, ਏਤਂ ਮਙ੍ਗਲਮੁਤ੍ਤਮਂ.

‘‘ਤਪੋ ਚ ਬ੍ਰਹ੍ਮਚਰਿਯਞ੍ਚ, ਅਰਿਯਸਚ੍ਚਾਨ ਦਸ੍ਸਨਂ;

ਨਿਬ੍ਬਾਨਸਚ੍ਛਿਕਿਰਿਯਾ ਚ, ਏਤਂ ਮਙ੍ਗਲਮੁਤ੍ਤਮਂ.

‘‘ਫੁਟ੍ਠਸ੍ਸ ਲੋਕਧਮ੍ਮੇਹਿ, ਚਿਤ੍ਤਂ ਯਸ੍ਸ ਨ ਕਮ੍ਪਤਿ;

ਅਸੋਕਂ ਵਿਰਜਂ ਖੇਮਂ, ਏਤਂ ਮਙ੍ਗਲਮੁਤ੍ਤਮਂ.

‘‘ਏਤਾਦਿਸਾਨਿ ਕਤ੍ਵਾਨ, ਸਬ੍ਬਤ੍ਥਮਪਰਾਜਿਤਾ;

ਸਬ੍ਬਤ੍ਥ ਸੋਤ੍ਥਿਂ ਗਚ੍ਛਨ੍ਤਿ, ਤਂ ਤੇਸਂ ਮਙ੍ਗਲਮੁਤ੍ਤਮ’’ਨ੍ਤਿ.

ਯਾਨੀਧ ¶ ਭੂਤਾਨਿ ਸਮਾਗਤਾਨਿ, ਭੁਮ੍ਮਾਨਿ [ਭੂਮਾਨਿ (ਕ.)] ਵਾ ਯਾਨਿ ਵ ਅਨ੍ਤਲਿਕ੍ਖੇ;

ਸਬ੍ਬੇਵ ਭੂਤਾ ਸੁਮਨਾ ਭਵਨ੍ਤੁ, ਅਥੋਪਿ ਸਕ੍ਕਚ੍ਚ ਸੁਣਨ੍ਤੁ ਭਾਸਿਤਂ.

ਤਸ੍ਮਾ ¶ ਹਿ ਭੂਤਾ ਨਿਸਾਮੇਥ ਸਬ੍ਬੇ, ਮੇਤ੍ਤਂ ਕਰੋਥ ਮਾਨੁਸਿਯਾ ਪਜਾਯ;

ਦਿਵਾ ਚ ਰਤ੍ਤੋ ਚ ਹਰਨ੍ਤਿ ਯੇ ਬਲਿਂ, ਤਸ੍ਮਾ ਹਿ ਨੇ ਰਕ੍ਖਥ ਅਪ੍ਪਮਤ੍ਤਾ.

ਯਂ ਕਿਞ੍ਚਿ ਵਿਤ੍ਤਂ ਇਧ ਵਾ ਹੁਰਂ ਵਾ, ਸਗ੍ਗੇਸੁ ¶ ਵਾ ਯਂ ਰਤਨਂ ਪਣੀਤਂ;

ਨ ਨੋ ਸਮਂ ਅਤ੍ਥਿ ਤਥਾਗਤੇਨ, ਇਦਮ੍ਪਿ ਬੁਦ੍ਧੇ ਰਤਨਂ ਪਣੀਤਂ;

ਖਯਂ ¶ ਵਿਰਾਗਂ ਅਮਤਂ ਪਣੀਤਂ, ਯਦਜ੍ਝਗਾ ਸਕ੍ਯਮੁਨੀ ਸਮਾਹਿਤੋ;

ਨ ਤੇਨ ਧਮ੍ਮੇਨ ਸਮਤ੍ਥਿ ਕਿਞ੍ਚਿ, ਇਦਮ੍ਪਿ ਧਮ੍ਮੇ ਰਤਨਂ ਪਣੀਤਂ;

ਯਂ ¶ ਬੁਦ੍ਧਸੇਟ੍ਠੋ ਪਰਿਵਣ੍ਣਯੀ ਸੁਚਿਂ, ਸਮਾਧਿਮਾਨਨ੍ਤਰਿਕਞ੍ਞਮਾਹੁ;

ਸਮਾਧਿਨਾ ਤੇਨ ਸਮੋ ਨ ਵਿਜ੍ਜਤਿ, ਇਦਮ੍ਪਿ ਧਮ੍ਮੇ ਰਤਨਂ ਪਣੀਤਂ;

ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ, ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ;

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਯੇ ਸੁਪ੍ਪਯੁਤ੍ਤਾ ਮਨਸਾ ਦਲ਼੍ਹੇਨ, ਨਿਕ੍ਕਾਮਿਨੋ ਗੋਤਮਸਾਸਨਮ੍ਹਿ;

ਤੇ ਪਤ੍ਤਿਪਤ੍ਤਾ ਅਮਤਂ ਵਿਗਯ੍ਹ, ਲਦ੍ਧਾ ਮੁਧਾ ਨਿਬ੍ਬੁਤਿਂ [ਨਿਬ੍ਬੁਤਿ (ਕ.)] ਭੁਞ੍ਜਮਾਨਾ;

ਇਦਮ੍ਪਿ ¶ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਯਥਿਨ੍ਦਖੀਲੋ ਪਥਵਿਸ੍ਸਿਤੋ [ਪਠਵਿਸ੍ਸਿਤੋ (ਕ. ਸੀ.), ਪਥਵਿਂਸਿਤੋ (ਕ. ਸਿ. ਸ੍ਯਾ. ਕਂ. ਪੀ.)] ਸਿਯਾ, ਚਤੁਬ੍ਭਿ ਵਾਤੇਹਿ ਅਸਮ੍ਪਕਮ੍ਪਿਯੋ;

ਤਥੂਪਮਂ ਸਪ੍ਪੁਰਿਸਂ ਵਦਾਮਿ, ਯੋ ¶ ਅਰਿਯਸਚ੍ਚਾਨਿ ਅਵੇਚ੍ਚ ਪਸ੍ਸਤਿ;

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਯੇ ਅਰਿਯਸਚ੍ਚਾਨਿ ਵਿਭਾਵਯਨ੍ਤਿ, ਗਮ੍ਭੀਰਪਞ੍ਞੇਨ ਸੁਦੇਸਿਤਾਨਿ;

ਕਿਞ੍ਚਾਪਿ ਤੇ ਹੋਨ੍ਤਿ ਭੁਸਂ ਪਮਤ੍ਤਾ, ਨ ਤੇ ਭਵਂ ਅਟ੍ਠਮਮਾਦਿਯਨ੍ਤਿ;

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਸਹਾਵਸ੍ਸ ¶ ਦਸ੍ਸਨਸਮ੍ਪਦਾਯ [ਸਹਾਵਸਦ੍ਦਸ੍ਸਨਸਮ੍ਪਦਾਯ (ਕ.)], ਤਯਸ੍ਸੁ ਧਮ੍ਮਾ ਜਹਿਤਾ ਭਵਨ੍ਤਿ;

ਸਕ੍ਕਾਯਦਿਟ੍ਠੀ ਵਿਚਿਕਿਚ੍ਛਿਤਞ੍ਚ, ਸੀਲਬ੍ਬਤਂ ਵਾਪਿ ਯਦਤ੍ਥਿ ਕਿਞ੍ਚਿ.

ਚਤੂਹਪਾਯੇਹਿ ਚ ਵਿਪ੍ਪਮੁਤ੍ਤੋ, ਛਚ੍ਚਾਭਿਠਾਨਾਨਿ [ਛ ਚਾਭਿਠਾਨਾਨਿ (ਸੀ. ਸ੍ਯਾ.)] ਅਭਬ੍ਬ ਕਾਤੁਂ [ਅਭਬ੍ਬੋ ਕਾਤੁਂ (ਸੀ.)];

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਕਿਞ੍ਚਾਪਿ ¶ ਸੋ ਕਮ੍ਮ [ਕਮ੍ਮਂ (ਸੀ. ਸ੍ਯਾ. ਕਂ. ਪੀ.)] ਕਰੋਤਿ ਪਾਪਕਂ, ਕਾਯੇਨ ਵਾਚਾ ਉਦ ਚੇਤਸਾ ਵਾ;

ਅਭਬ੍ਬ [ਅਭਬ੍ਬੋ (ਬਹੂਸੁ)] ਸੋ ਤਸ੍ਸ ਪਟਿਚ੍ਛਦਾਯ [ਪਟਿਚ੍ਛਾਦਾਯ (ਸੀ.)], ਅਭਬ੍ਬਤਾ ¶ ਦਿਟ੍ਠਪਦਸ੍ਸ ਵੁਤ੍ਤਾ;

ਇਦਮ੍ਪਿ ¶ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਵਨਪ੍ਪਗੁਮ੍ਬੇ ਯਥ [ਯਥਾ (ਸੀ. ਸ੍ਯਾ.)] ਫੁਸ੍ਸਿਤਗ੍ਗੇ, ਗਿਮ੍ਹਾਨਮਾਸੇ ਪਠਮਸ੍ਮਿਂ [ਪਠਮਸ੍ਮਿ (?)] ਗਿਮ੍ਹੇ;

ਤਥੂਪਮਂ ਧਮ੍ਮਵਰਂ ਅਦੇਸਯਿ [ਅਦੇਸਯੀ (ਸੀ.)], ਨਿਬ੍ਬਾਨਗਾਮਿਂ ਪਰਮਂ ਹਿਤਾਯ;

ਇਦਮ੍ਪਿ ਬੁਦ੍ਧੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਵਰੋ ਵਰਞ੍ਞੂ ਵਰਦੋ ਵਰਾਹਰੋ, ਅਨੁਤ੍ਤਰੋ ਧਮ੍ਮਵਰਂ ਅਦੇਸਯਿ;

ਇਦਮ੍ਪਿ ਬੁਦ੍ਧੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਖੀਣਂ ਪੁਰਾਣਂ ਨਵ ਨਤ੍ਥਿ ਸਮ੍ਭਵਂ, ਵਿਰਤ੍ਤਚਿਤ੍ਤਾਯਤਿਕੇ ਭਵਸ੍ਮਿਂ;

ਤੇ ਖੀਣਬੀਜਾ ਅਵਿਰੂਲ਼੍ਹਿਛਨ੍ਦਾ, ਨਿਬ੍ਬਨ੍ਤਿ ਧੀਰਾ ਯਥਾਯਂ [ਯਥਯਂ (ਕ.)] ਪਦੀਪੋ;

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ, ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੁ.

ਯਾਨੀਧ ਭੂਤਾਨਿ ਸਮਾਗਤਾਨਿ, ਭੁਮ੍ਮਾਨਿ ¶ ਵਾ ਯਾਨਿ ਵ ਅਨ੍ਤਲਿਕ੍ਖੇ;

ਤਥਾਗਤਂ ਦੇਵਮਨੁਸ੍ਸਪੂਜਿਤਂ, ਬੁਦ੍ਧਂ ਨਮਸ੍ਸਾਮ ਸੁਵਤ੍ਥਿ ਹੋਤੁ.

ਯਾਨੀਧ ਭੂਤਾਨਿ ਸਮਾਗਤਾਨਿ, ਭੁਮ੍ਮਾਨਿ ਵਾ ਯਾਨਿ ਵ ਅਨ੍ਤਲਿਕ੍ਖੇ;

ਤਥਾਗਤਂ ਦੇਵਮਨੁਸ੍ਸਪੂਜਿਤਂ, ਧਮ੍ਮਂ ¶ ਨਮਸ੍ਸਾਮ ਸੁਵਤ੍ਥਿ ਹੋਤੁ.

ਯਾਨੀਧ ¶ ਭੂਤਾਨਿ ਸਮਾਗਤਾਨਿ, ਭੁਮ੍ਮਾਨਿ ਵਾ ਯਾਨਿ ਵ ਅਨ੍ਤਲਿਕ੍ਖੇ;

ਤਥਾਗਤਂ ਦੇਵਮਨੁਸ੍ਸਪੂਜਿਤਂ, ਸਙ੍ਘਂ ਨਮਸ੍ਸਾਮ ਸੁਵਤ੍ਥਿ ਹੋਤੂਤਿ.

ਤਿਰੋਕੁਟ੍ਟੇਸੁ ¶ ਤਿਟ੍ਠਨ੍ਤਿ, ਸਨ੍ਧਿਸਿਙ੍ਘਾਟਕੇਸੁ ਚ;

ਦ੍ਵਾਰਬਾਹਾਸੁ ਤਿਟ੍ਠਨ੍ਤਿ, ਆਗਨ੍ਤ੍ਵਾਨ ਸਕਂ ਘਰਂ.

ਪਹੂਤੇ ਅਨ੍ਨਪਾਨਮ੍ਹਿ, ਖਜ੍ਜਭੋਜ੍ਜੇ ਉਪਟ੍ਠਿਤੇ;

ਨ ¶ ਤੇਸਂ ਕੋਚਿ ਸਰਤਿ, ਸਤ੍ਤਾਨਂ ਕਮ੍ਮਪਚ੍ਚਯਾ.

ਏਵਂ ਦਦਨ੍ਤਿ ਞਾਤੀਨਂ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਸੁਚਿਂ ਪਣੀਤਂ ਕਾਲੇਨ, ਕਪ੍ਪਿਯਂ ਪਾਨਭੋਜਨਂ;

ਇਦਂ ਵੋ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ.

ਤੇ ਚ ਤਤ੍ਥ ਸਮਾਗਨ੍ਤ੍ਵਾ, ਞਾਤਿਪੇਤਾ ਸਮਾਗਤਾ;

ਪਹੂਤੇ ਅਨ੍ਨਪਾਨਮ੍ਹਿ, ਸਕ੍ਕਚ੍ਚਂ ਅਨੁਮੋਦਰੇ.

ਚਿਰਂ ਜੀਵਨ੍ਤੁ ਨੋ ਞਾਤੀ, ਯੇਸਂ ਹੇਤੁ ਲਭਾਮਸੇ;

ਅਮ੍ਹਾਕਞ੍ਚ ਕਤਾ ਪੂਜਾ, ਦਾਯਕਾ ਚ ਅਨਿਪ੍ਫਲਾ.

ਨ ਹਿ ਤਤ੍ਥ ਕਸਿ [ਕਸੀ (ਸੀ.)] ਅਤ੍ਥਿ, ਗੋਰਕ੍ਖੇਤ੍ਥ ਨ ਵਿਜ੍ਜਤਿ;

ਵਣਿਜ੍ਜਾ ਤਾਦਿਸੀ ਨਤ੍ਥਿ, ਹਿਰਞ੍ਞੇਨ ਕਯੋਕਯਂ [ਕਯਾਕ੍ਕਯਂ (ਸੀ.), ਕਯਾ ਕਯਂ (ਸ੍ਯਾ.)];

ਇਤੋ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਙ੍ਕਤਾ [ਕਾਲਕਤਾ (ਸੀ. ਸ੍ਯਾ. ਕਂ.)] ਤਹਿਂ.

ਉਨ੍ਨਮੇ ਉਦਕਂ ਵੁਟ੍ਠਂ, ਯਥਾ ਨਿਨ੍ਨਂ ਪਵਤ੍ਤਤਿ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

ਯਥਾ ਵਾਰਿਵਹਾ ਪੂਰਾ, ਪਰਿਪੂਰੇਨ੍ਤਿ ਸਾਗਰਂ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

ਅਦਾਸਿ ¶ ¶ ਮੇ ਅਕਾਸਿ ਮੇ, ਞਾਤਿਮਿਤ੍ਤਾ [ਞਾਤਿ ਮਿਤ੍ਤੋ (?)] ਸਖਾ ਚ ਮੇ;

ਪੇਤਾਨਂ ਦਕ੍ਖਿਣਂ ਦਜ੍ਜਾ, ਪੁਬ੍ਬੇ ਕਤਮਨੁਸ੍ਸਰਂ.

ਨ ਹਿ ਰੁਣ੍ਣਂ ਵਾ ਸੋਕੋ ਵਾ, ਯਾ ਚਞ੍ਞਾ ਪਰਿਦੇਵਨਾ;

ਨ ਤਂ ਪੇਤਾਨਮਤ੍ਥਾਯ, ਏਵਂ ਤਿਟ੍ਠਨ੍ਤਿ ਞਾਤਯੋ.

ਅਯਞ੍ਚ ਖੋ ਦਕ੍ਖਿਣਾ ਦਿਨ੍ਨਾ, ਸਙ੍ਘਮ੍ਹਿ ਸੁਪ੍ਪਤਿਟ੍ਠਿਤਾ;

ਦੀਘਰਤ੍ਤਂ ¶ ਹਿਤਾਯਸ੍ਸ, ਠਾਨਸੋ ਉਪਕਪ੍ਪਤਿ.

ਸੋ ਞਾਤਿਧਮ੍ਮੋ ਚ ਅਯਂ ਨਿਦਸ੍ਸਿਤੋ, ਪੇਤਾਨ ਪੂਜਾ ਚ ਕਤਾ ਉਲ਼ਾਰਾ;

ਬਲਞ੍ਚ ਭਿਕ੍ਖੂਨਮਨੁਪ੍ਪਦਿਨ੍ਨਂ [… ਮਨੁਪ੍ਪਦਿਨ੍ਨਵਾ (ਕ.)], ਤੁਮ੍ਹੇਹਿ ਪੁਞ੍ਞਂ ਪਸੁਤਂ ਅਨਪ੍ਪਕਨ੍ਤਿ.

ਨਿਧਿਂ ¶ ਨਿਧੇਤਿ ਪੁਰਿਸੋ, ਗਮ੍ਭੀਰੇ ਓਦਕਨ੍ਤਿਕੇ;

ਅਤ੍ਥੇ ਕਿਚ੍ਚੇ ਸਮੁਪ੍ਪਨ੍ਨੇ, ਅਤ੍ਥਾਯ ਮੇ ਭਵਿਸ੍ਸਤਿ.

ਰਾਜਤੋ ਵਾ ਦੁਰੁਤ੍ਤਸ੍ਸ, ਚੋਰਤੋ ਪੀਲ਼ਿਤਸ੍ਸ ਵਾ;

ਇਣਸ੍ਸ ਵਾ ਪਮੋਕ੍ਖਾਯ, ਦੁਬ੍ਭਿਕ੍ਖੇ ਆਪਦਾਸੁ ਵਾ;

ਏਤਦਤ੍ਥਾਯ ਲੋਕਸ੍ਮਿਂ, ਨਿਧਿ ਨਾਮ ਨਿਧੀਯਤਿ.

ਤਾਵਸ੍ਸੁਨਿਹਿਤੋ [ਤਾਵ ਸੁਨਿਹਿਤੋ (ਸੀ.)] ਸਨ੍ਤੋ, ਗਮ੍ਭੀਰੇ ਓਦਕਨ੍ਤਿਕੇ;

ਨ ਸਬ੍ਬੋ ਸਬ੍ਬਦਾ ਏਵ, ਤਸ੍ਸ ਤਂ ਉਪਕਪ੍ਪਤਿ.

ਨਿਧਿ ਵਾ ਠਾਨਾ ਚਵਤਿ, ਸਞ੍ਞਾ ਵਾਸ੍ਸ ਵਿਮੁਯ੍ਹਤਿ;

ਨਾਗਾ ਵਾ ਅਪਨਾਮੇਨ੍ਤਿ, ਯਕ੍ਖਾ ਵਾਪਿ ਹਰਨ੍ਤਿ ਨਂ.

ਅਪ੍ਪਿਯਾ ¶ ਵਾਪਿ ਦਾਯਾਦਾ, ਉਦ੍ਧਰਨ੍ਤਿ ਅਪਸ੍ਸਤੋ;

ਯਦਾ ਪੁਞ੍ਞਕ੍ਖਯੋ ਹੋਤਿ, ਸਬ੍ਬਮੇਤਂ ਵਿਨਸ੍ਸਤਿ.

ਯਸ੍ਸ ¶ ਦਾਨੇਨ ਸੀਲੇਨ, ਸਂਯਮੇਨ ਦਮੇਨ ਚ;

ਨਿਧੀ ਸੁਨਿਹਿਤੋ ਹੋਤਿ, ਇਤ੍ਥਿਯਾ ਪੁਰਿਸਸ੍ਸ ਵਾ.

ਚੇਤਿਯਮ੍ਹਿ ¶ ਚ ਸਙ੍ਘੇ ਵਾ, ਪੁਗ੍ਗਲੇ ਅਤਿਥੀਸੁ ਵਾ;

ਮਾਤਰਿ ਪਿਤਰਿ ਚਾਪਿ [ਵਾਪਿ (ਸ੍ਯਾ. ਕਂ.)], ਅਥੋ ਜੇਟ੍ਠਮ੍ਹਿ ਭਾਤਰਿ.

ਏਸੋ ਨਿਧਿ ਸੁਨਿਹਿਤੋ, ਅਜੇਯ੍ਯੋ ਅਨੁਗਾਮਿਕੋ;

ਪਹਾਯ ਗਮਨੀਯੇਸੁ, ਏਤਂ ਆਦਾਯ ਗਚ੍ਛਤਿ.

ਅਸਾਧਾਰਣਮਞ੍ਞੇਸਂ, ਅਚੋਰਾਹਰਣੋ ਨਿਧਿ;

ਕਯਿਰਾਥ ਧੀਰੋ ਪੁਞ੍ਞਾਨਿ, ਯੋ ਨਿਧਿ ਅਨੁਗਾਮਿਕੋ.

ਏਸ ਦੇਵਮਨੁਸ੍ਸਾਨਂ, ਸਬ੍ਬਕਾਮਦਦੋ ਨਿਧਿ;

ਯਂ ਯਦੇਵਾਭਿਪਤ੍ਥੇਨ੍ਤਿ, ਸਬ੍ਬਮੇਤੇਨ ਲਬ੍ਭਤਿ.

ਸੁਵਣ੍ਣਤਾ ਸੁਸਰਤਾ, ਸੁਸਣ੍ਠਾਨਾ ਸੁਰੂਪਤਾ [ਸੁਸਣ੍ਠਾਨਸੁਰੂਪਤਾ (ਸੀ.), ਸੁਸਣ੍ਠਾਨਂ ਸੁਰੂਪਤਾ (ਸ੍ਯਾ. ਕਂ.)];

ਆਧਿਪਚ੍ਚਪਰਿਵਾਰੋ, ਸਬ੍ਬਮੇਤੇਨ ਲਬ੍ਭਤਿ.

ਪਦੇਸਰਜ੍ਜਂ ਇਸ੍ਸਰਿਯਂ, ਚਕ੍ਕਵਤ੍ਤਿਸੁਖਂ ਪਿਯਂ;

ਦੇਵਰਜ੍ਜਮ੍ਪਿ ਦਿਬ੍ਬੇਸੁ, ਸਬ੍ਬਮੇਤੇਨ ਲਬ੍ਭਤਿ.

ਮਾਨੁਸ੍ਸਿਕਾ ਚ ਸਮ੍ਪਤ੍ਤਿ, ਦੇਵਲੋਕੇ ਚ ਯਾ ਰਤਿ;

ਯਾ ਚ ਨਿਬ੍ਬਾਨਸਮ੍ਪਤ੍ਤਿ, ਸਬ੍ਬਮੇਤੇਨ ਲਬ੍ਭਤਿ.

ਮਿਤ੍ਤਸਮ੍ਪਦਮਾਗਮ੍ਮ, ਯੋਨਿਸੋਵ [ਯੋਨਿਸੋ ਵੇ (ਸੀ.), ਯੋਨਿਸੋ ਚੇ (ਸ੍ਯਾ.), ਯੋਨਿਸੋ ਚ (?)] ਪਯੁਞ੍ਜਤੋ;

ਵਿਜ੍ਜਾ ਵਿਮੁਤ੍ਤਿ ਵਸੀਭਾਵੋ, ਸਬ੍ਬਮੇਤੇਨ ਲਬ੍ਭਤਿ.

ਪਟਿਸਮ੍ਭਿਦਾ ¶ ਵਿਮੋਕ੍ਖਾ ਚ, ਯਾ ਚ ਸਾਵਕਪਾਰਮੀ;

ਪਚ੍ਚੇਕਬੋਧਿ ਬੁਦ੍ਧਭੂਮਿ, ਸਬ੍ਬਮੇਤੇਨ ਲਬ੍ਭਤਿ.

ਏਵਂ ¶ ਮਹਤ੍ਥਿਕਾ ਏਸਾ, ਯਦਿਦਂ ਪੁਞ੍ਞਸਮ੍ਪਦਾ;

ਤਸ੍ਮਾ ਧੀਰਾ ਪਸਂਸਨ੍ਤਿ, ਪਣ੍ਡਿਤਾ ਕਤਪੁਞ੍ਞਤਨ੍ਤਿ.

ਕਰਣੀਯਮਤ੍ਥਕੁਸਲੇਨ ¶ , ਯਨ੍ਤਸਨ੍ਤਂ ਪਦਂ ਅਭਿਸਮੇਚ੍ਚ;

ਸਕ੍ਕੋ ਉਜੂ ਚ ਸੁਹੁਜੂ [ਸੂਜੂ (ਸੀ.)] ਚ, ਸੁਵਚੋ ਚਸ੍ਸ ਮੁਦੁ ਅਨਤਿਮਾਨੀ.

ਸਨ੍ਤੁਸ੍ਸਕੋ ¶ ਚ ਸੁਭਰੋ ਚ, ਅਪ੍ਪਕਿਚ੍ਚੋ ਚ ਸਲ੍ਲਹੁਕਵੁਤ੍ਤਿ;

ਸਨ੍ਤਿਨ੍ਦ੍ਰਿਯੋ ਚ ਨਿਪਕੋ ਚ, ਅਪ੍ਪਗਬ੍ਭੋ ਕੁਲੇਸ੍ਵਨਨੁਗਿਦ੍ਧੋ.

ਨ ਚ ਖੁਦ੍ਦਮਾਚਰੇ ਕਿਞ੍ਚਿ, ਯੇਨ ਵਿਞ੍ਞੂ ਪਰੇ ਉਪਵਦੇਯ੍ਯੁਂ;

ਸੁਖਿਨੋਵ ਖੇਮਿਨੋ ਹੋਨ੍ਤੁ, ਸਬ੍ਬਸਤ੍ਤਾ [ਸਬ੍ਬੇ ਸਤ੍ਤਾ (ਸੀ. ਸ੍ਯਾ.)] ਭਵਨ੍ਤੁ ਸੁਖਿਤਤ੍ਤਾ.

ਯੇ ਕੇਚਿ ਪਾਣਭੂਤਤ੍ਥਿ, ਤਸਾ ਵਾ ਥਾਵਰਾ ਵਨਵਸੇਸਾ;

ਦੀਘਾ ਵਾ ਯੇਵ ਮਹਨ੍ਤਾ [ਮਹਨ੍ਤ (?)], ਮਜ੍ਝਿਮਾ ਰਸ੍ਸਕਾ ਅਣੁਕਥੂਲਾ.

ਦਿਟ੍ਠਾ ਵਾ ਯੇਵ ਅਦਿਟ੍ਠਾ [ਅਦਿਟ੍ਠ (?)], ਯੇ ਵ [ਯੇ ਚ (ਸੀ. ਸ੍ਯਾ. ਕਂ. ਪੀ.)] ਦੂਰੇ ਵਸਨ੍ਤਿ ਅਵਿਦੂਰੇ;

ਭੂਤਾ ਵ [ਵਾ (ਸ੍ਯਾ. ਕਂ. ਪੀ. ਕ.)] ਸਮ੍ਭਵੇਸੀ ਵ [ਵਾ (ਸੀ. ਸ੍ਯਾ. ਕਂ. ਪੀ.)], ਸਬ੍ਬਸਤ੍ਤਾ ਭਵਨ੍ਤੁ ਸੁਖਿਤਤ੍ਤਾ.

ਨ ਪਰੋ ਪਰਂ ਨਿਕੁਬ੍ਬੇਥ, ਨਾਤਿਮਞ੍ਞੇਥ ਕਤ੍ਥਚਿ ਨ ਕਞ੍ਚਿ [ਨਂ ਕਞ੍ਚਿ (ਸੀ. ਪੀ.), ਨਂ ਕਿਞ੍ਚਿ (ਸ੍ਯਾ.), ਨ ਕਿਞ੍ਚਿ (ਕ.)];

ਬ੍ਯਾਰੋਸਨਾ ਪਟਿਘਸਞ੍ਞਾ, ਨਾਞ੍ਞਮਞ੍ਞਸ੍ਸ ਦੁਕ੍ਖਮਿਚ੍ਛੇਯ੍ਯ.

ਮਾਤਾ ¶ ਯਥਾ ਨਿਯਂ ਪੁਤ੍ਤਮਾਯੁਸਾ ਏਕਪੁਤ੍ਤਮਨੁਰਕ੍ਖੇ;

ਏਵਮ੍ਪਿ ਸਬ੍ਬਭੂਤੇਸੁ, ਮਾਨਸਂ ਭਾਵਯੇ ਅਪਰਿਮਾਣਂ.

ਮੇਤ੍ਤਞ੍ਚ ¶ ਸਬ੍ਬਲੋਕਸ੍ਮਿ, ਮਾਨਸਂ ਭਾਵਯੇ ਅਪਰਿਮਾਣਂ;

ਉਦ੍ਧਂ ਅਧੋ ਚ ਤਿਰਿਯਞ੍ਚ, ਅਸਮ੍ਬਾਧਂ ਅਵੇਰਮਸਪਤ੍ਤਂ.

ਤਿਟ੍ਠਂ ਚਰਂ ਨਿਸਿਨ੍ਨੋ ਵ [ਵਾ (ਸੀ. ਸ੍ਯਾ. ਕਂ. ਪੀ.)], ਸਯਾਨੋ ਯਾਵਤਾਸ੍ਸ ਵਿਤਮਿਦ੍ਧੋ [ਵਿਗਤਮਿਦ੍ਧੋ (ਬਹੂਸੁ)];

ਏਤਂ ਸਤਿਂ ਅਧਿਟ੍ਠੇਯ੍ਯ, ਬ੍ਰਹ੍ਮਮੇਤਂ ਵਿਹਾਰਮਿਧਮਾਹੁ.

ਦਿਟ੍ਠਿਞ੍ਚ ¶ ਅਨੁਪਗ੍ਗਮ੍ਮ, ਸੀਲਵਾ ਦਸ੍ਸਨੇਨ ਸਮ੍ਪਨ੍ਨੋ;

ਕਾਮੇਸੁ ਵਿਨਯ [ਵਿਨੇਯ੍ਯ (ਸੀ.)] ਗੇਧਂ, ਨ ਹਿ ਜਾਤੁਗ੍ਗਬ੍ਭਸੇਯ੍ਯ ਪੁਨ ਰੇਤੀਤਿ.