ਮੂਲ > ਸੁਤ੍ਤਪਿਟਕ > ਖੁਦ੍ਦਕਨਿਕਾਯ

MMR Vol 0
VRI Vol 0
PTS Vol 0
THA Vol 0

Misc. Paragraph

ਖੁਦ੍ਦਕਨਿਕਾਯੇ

ਧਮ੍ਮਪਦਪਾਲ਼ਿ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਮਨੋਪੁਬ੍ਬਙ੍ਗਮਾ ¶ ¶ ¶ ¶ ਧਮ੍ਮਾ, ਮਨੋਸੇਟ੍ਠਾ ਮਨੋਮਯਾ;

ਮਨਸਾ ਚੇ ਪਦੁਟ੍ਠੇਨ, ਭਾਸਤਿ ਵਾ ਕਰੋਤਿ ਵਾ;

ਤਤੋ ਨਂ ਦੁਕ੍ਖਮਨ੍ਵੇਤਿ, ਚਕ੍ਕਂਵ ਵਹਤੋ ਪਦਂ.

ਮਨੋਪੁਬ੍ਬਙ੍ਗਮਾ ਧਮ੍ਮਾ, ਮਨੋਸੇਟ੍ਠਾ ਮਨੋਮਯਾ;

ਮਨਸਾ ਚੇ ਪਸਨ੍ਨੇਨ, ਭਾਸਤਿ ਵਾ ਕਰੋਤਿ ਵਾ;

ਤਤੋ ਨਂ ਸੁਖਮਨ੍ਵੇਤਿ, ਛਾਯਾਵ ਅਨਪਾਯਿਨੀ [ਅਨੁਪਾਯਿਨੀ (ਕ.)].

ਅਕ੍ਕੋਚ੍ਛਿ ¶ ਮਂ ਅਵਧਿ ਮਂ, ਅਜਿਨਿ [ਅਜਿਨੀ (?)] ਮਂ ਅਹਾਸਿ ਮੇ;

ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.

ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.

ਨ ¶ ¶ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;

ਅਵੇਰੇਨ ਚ ਸਮ੍ਮਨ੍ਤਿ, ਏਸ ਧਮ੍ਮੋ ਸਨਨ੍ਤਨੋ.

ਪਰੇ ¶ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;

ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.

ਸੁਭਾਨੁਪਸ੍ਸਿਂ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਅਸਂਵੁਤਂ;

ਭੋਜਨਮ੍ਹਿ ਚਾਮਤ੍ਤਞ੍ਞੁਂ, ਕੁਸੀਤਂ ਹੀਨਵੀਰਿਯਂ;

ਤਂ ਵੇ ਪਸਹਤਿ ਮਾਰੋ, ਵਾਤੋ ਰੁਕ੍ਖਂਵ ਦੁਬ੍ਬਲਂ.

ਅਸੁਭਾਨੁਪਸ੍ਸਿਂ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਸੁਸਂਵੁਤਂ;

ਭੋਜਨਮ੍ਹਿ ਚ ਮਤ੍ਤਞ੍ਞੁਂ, ਸਦ੍ਧਂ ਆਰਦ੍ਧਵੀਰਿਯਂ;

ਤਂ ਵੇ ਨਪ੍ਪਸਹਤਿ ਮਾਰੋ, ਵਾਤੋ ਸੇਲਂਵ ਪਬ੍ਬਤਂ.

ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਦਹਿਸ੍ਸਤਿ;

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤਿ.

ਅਸਾਰੇ ਸਾਰਮਤਿਨੋ, ਸਾਰੇ ਚਾਸਾਰਦਸ੍ਸਿਨੋ;

ਤੇ ਸਾਰਂ ਨਾਧਿਗਚ੍ਛਨ੍ਤਿ, ਮਿਚ੍ਛਾਸਙ੍ਕਪ੍ਪਗੋਚਰਾ.

ਸਾਰਞ੍ਚ ¶ ਸਾਰਤੋ ਞਤ੍ਵਾ, ਅਸਾਰਞ੍ਚ ਅਸਾਰਤੋ;

ਤੇ ਸਾਰਂ ਅਧਿਗਚ੍ਛਨ੍ਤਿ, ਸਮ੍ਮਾਸਙ੍ਕਪ੍ਪਗੋਚਰਾ.

ਯਥਾ ਅਗਾਰਂ ਦੁਚ੍ਛਨ੍ਨਂ, ਵੁਟ੍ਠੀ ਸਮਤਿਵਿਜ੍ਝਤਿ;

ਏਵਂ ਅਭਾਵਿਤਂ ਚਿਤ੍ਤਂ, ਰਾਗੋ ਸਮਤਿਵਿਜ੍ਝਤਿ.

ਯਥਾ ¶ ¶ ਅਗਾਰਂ ਸੁਛਨ੍ਨਂ, ਵੁਟ੍ਠੀ ਨ ਸਮਤਿਵਿਜ੍ਝਤਿ;

ਏਵਂ ਸੁਭਾਵਿਤਂ ਚਿਤ੍ਤਂ, ਰਾਗੋ ਨ ਸਮਤਿਵਿਜ੍ਝਤਿ.

ਇਧ ¶ ਸੋਚਤਿ ਪੇਚ੍ਚ ਸੋਚਤਿ, ਪਾਪਕਾਰੀ ਉਭਯਤ੍ਥ ਸੋਚਤਿ;

ਸੋ ਸੋਚਤਿ ਸੋ ਵਿਹਞ੍ਞਤਿ, ਦਿਸ੍ਵਾ ਕਮ੍ਮਕਿਲਿਟ੍ਠਮਤ੍ਤਨੋ.

ਇਧ ਮੋਦਤਿ ਪੇਚ੍ਚ ਮੋਦਤਿ, ਕਤਪੁਞ੍ਞੋ ਉਭਯਤ੍ਥ ਮੋਦਤਿ;

ਸੋ ਮੋਦਤਿ ਸੋ ਪਮੋਦਤਿ, ਦਿਸ੍ਵਾ ਕਮ੍ਮਵਿਸੁਦ੍ਧਿਮਤ੍ਤਨੋ.

ਇਧ ਤਪ੍ਪਤਿ ਪੇਚ੍ਚ ਤਪ੍ਪਤਿ, ਪਾਪਕਾਰੀ [ਪਾਪਕਾਰਿ (?)] ਉਭਯਤ੍ਥ ਤਪ੍ਪਤਿ;

‘‘ਪਾਪਂ ਮੇ ਕਤ’’ਨ੍ਤਿ ਤਪ੍ਪਤਿ, ਭਿਯ੍ਯੋ [ਭੀਯੋ (ਸੀ.)] ਤਪ੍ਪਤਿ ਦੁਗ੍ਗਤਿਂ ਗਤੋ.

ਇਧ ਨਨ੍ਦਤਿ ਪੇਚ੍ਚ ਨਨ੍ਦਤਿ, ਕਤਪੁਞ੍ਞੋ ਉਭਯਤ੍ਥ ਨਨ੍ਦਤਿ;

‘‘ਪੁਞ੍ਞਂ ਮੇ ਕਤ’’ਨ੍ਤਿ ਨਨ੍ਦਤਿ, ਭਿਯ੍ਯੋ ਨਨ੍ਦਤਿ ਸੁਗ੍ਗਤਿਂ ਗਤੋ.

ਬਹੁਮ੍ਪਿ ਚੇ ਸਂਹਿਤ [ਸਹਿਤਂ (ਸੀ. ਸ੍ਯਾ. ਕਂ. ਪੀ.)] ਭਾਸਮਾਨੋ, ਨ ਤਕ੍ਕਰੋ ਹੋਤਿ ਨਰੋ ਪਮਤ੍ਤੋ;

ਗੋਪੋਵ ¶ ਗਾਵੋ ਗਣਯਂ ਪਰੇਸਂ, ਨ ਭਾਗਵਾ ਸਾਮਞ੍ਞਸ੍ਸ ਹੋਤਿ.

ਅਪ੍ਪਮ੍ਪਿ ਚੇ ਸਂਹਿਤ ਭਾਸਮਾਨੋ, ਧਮ੍ਮਸ੍ਸ ਹੋਤਿ [ਹੋਤੀ (ਸੀ. ਪੀ.)] ਅਨੁਧਮ੍ਮਚਾਰੀ;

ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ, ਸਮ੍ਮਪ੍ਪਜਾਨੋ ਸੁਵਿਮੁਤ੍ਤਚਿਤ੍ਤੋ;

ਅਨੁਪਾਦਿਯਾਨੋ ਇਧ ਵਾ ਹੁਰਂ ਵਾ, ਸ ਭਾਗਵਾ ਸਾਮਞ੍ਞਸ੍ਸ ਹੋਤਿ.

ਅਪ੍ਪਮਾਦੋ ¶ ¶ ¶ ਅਮਤਪਦਂ [ਅਮਤਂ ਪਦਂ (ਕ.)], ਪਮਾਦੋ ਮਚ੍ਚੁਨੋ ਪਦਂ;

ਅਪ੍ਪਮਤ੍ਤਾ ਨ ਮੀਯਨ੍ਤਿ, ਯੇ ਪਮਤ੍ਤਾ ਯਥਾ ਮਤਾ.

ਏਵਂ [ਏਤਂ (ਸੀ. ਸ੍ਯਾ. ਕਂ. ਪੀ.)] ਵਿਸੇਸਤੋ ਞਤ੍ਵਾ, ਅਪ੍ਪਮਾਦਮ੍ਹਿ ਪਣ੍ਡਿਤਾ;

ਅਪ੍ਪਮਾਦੇ ਪਮੋਦਨ੍ਤਿ, ਅਰਿਯਾਨਂ ਗੋਚਰੇ ਰਤਾ.

ਤੇ ਝਾਯਿਨੋ ਸਾਤਤਿਕਾ, ਨਿਚ੍ਚਂ ਦਲ਼੍ਹਪਰਕ੍ਕਮਾ;

ਫੁਸਨ੍ਤਿ ਧੀਰਾ ਨਿਬ੍ਬਾਨਂ, ਯੋਗਕ੍ਖੇਮਂ ਅਨੁਤ੍ਤਰਂ.

ਉਟ੍ਠਾਨਵਤੋ ਸਤੀਮਤੋ [ਸਤਿਮਤੋ (ਸੀ. ਸ੍ਯਾ. ਕ.)], ਸੁਚਿਕਮ੍ਮਸ੍ਸ ਨਿਸਮ੍ਮਕਾਰਿਨੋ;

ਸਞ੍ਞਤਸ੍ਸ ਧਮ੍ਮਜੀਵਿਨੋ, ਅਪ੍ਪਮਤ੍ਤਸ੍ਸ [ਅਪਮਤ੍ਤਸ੍ਸ (?)] ਯਸੋਭਿਵਡ੍ਢਤਿ.

ਉਟ੍ਠਾਨੇਨਪ੍ਪਮਾਦੇਨ ¶ , ਸਂਯਮੇਨ ਦਮੇਨ ਚ;

ਦੀਪਂ ਕਯਿਰਾਥ ਮੇਧਾਵੀ, ਯਂ ਓਘੋ ਨਾਭਿਕੀਰਤਿ.

ਪਮਾਦਮਨੁਯੁਞ੍ਜਨ੍ਤਿ, ਬਾਲਾ ਦੁਮ੍ਮੇਧਿਨੋ ਜਨਾ;

ਅਪ੍ਪਮਾਦਞ੍ਚ ਮੇਧਾਵੀ, ਧਨਂ ਸੇਟ੍ਠਂਵ ਰਕ੍ਖਤਿ.

ਮਾ ਪਮਾਦਮਨੁਯੁਞ੍ਜੇਥ, ਮਾ ਕਾਮਰਤਿਸਨ੍ਥਵਂ [ਸਨ੍ਧਵਂ (ਕ)];

ਅਪ੍ਪਮਤ੍ਤੋ ਹਿ ਝਾਯਨ੍ਤੋ, ਪਪ੍ਪੋਤਿ ਵਿਪੁਲਂ ਸੁਖਂ.

ਪਮਾਦਂ ਅਪ੍ਪਮਾਦੇਨ, ਯਦਾ ਨੁਦਤਿ ਪਣ੍ਡਿਤੋ;

ਪਞ੍ਞਾਪਾਸਾਦਮਾਰੁਯ੍ਹ, ਅਸੋਕੋ ਸੋਕਿਨਿਂ ਪਜਂ;

ਪਬ੍ਬਤਟ੍ਠੋਵ ਭੂਮਟ੍ਠੇ [ਭੁਮ੍ਮਟ੍ਠੇ (ਸੀ. ਸ੍ਯਾ.)], ਧੀਰੋ ਬਾਲੇ ਅਵੇਕ੍ਖਤਿ.

ਅਪ੍ਪਮਤ੍ਤੋ ¶ ¶ ਪਮਤ੍ਤੇਸੁ, ਸੁਤ੍ਤੇਸੁ ਬਹੁਜਾਗਰੋ;

ਅਬਲਸ੍ਸਂਵ ¶ ਸੀਘਸ੍ਸੋ, ਹਿਤ੍ਵਾ ਯਾਤਿ ਸੁਮੇਧਸੋ.

ਅਪ੍ਪਮਾਦੇਨ ਮਘਵਾ, ਦੇਵਾਨਂ ਸੇਟ੍ਠਤਂ ਗਤੋ;

ਅਪ੍ਪਮਾਦਂ ਪਸਂਸਨ੍ਤਿ, ਪਮਾਦੋ ਗਰਹਿਤੋ ਸਦਾ.

ਅਪ੍ਪਮਾਦਰਤੋ ਭਿਕ੍ਖੁ, ਪਮਾਦੇ ਭਯਦਸ੍ਸਿ ਵਾ;

ਸਂਯੋਜਨਂ ਅਣੁਂ ਥੂਲਂ, ਡਹਂ ਅਗ੍ਗੀਵ ਗਚ੍ਛਤਿ.

ਅਪ੍ਪਮਾਦਰਤੋ ਭਿਕ੍ਖੁ, ਪਮਾਦੇ ਭਯਦਸ੍ਸਿ ਵਾ;

ਅਭਬ੍ਬੋ ਪਰਿਹਾਨਾਯ, ਨਿਬ੍ਬਾਨਸ੍ਸੇਵ ਸਨ੍ਤਿਕੇ.

ਅਪ੍ਪਮਾਦਵਗ੍ਗੋ ਦੁਤਿਯੋ ਨਿਟ੍ਠਿਤੋ.

ਫਨ੍ਦਨਂ ¶ ਚਪਲਂ ਚਿਤ੍ਤਂ, ਦੂਰਕ੍ਖਂ [ਦੁਰਕ੍ਖਂ (ਸਬ੍ਬਤ੍ਥ)] ਦੁਨ੍ਨਿਵਾਰਯਂ;

ਉਜੁਂ ਕਰੋਤਿ ਮੇਧਾਵੀ, ਉਸੁਕਾਰੋਵ ਤੇਜਨਂ.

ਵਾਰਿਜੋਵ ਥਲੇ ਖਿਤ੍ਤੋ, ਓਕਮੋਕਤਉਬ੍ਭਤੋ;

ਪਰਿਫਨ੍ਦਤਿਦਂ ਚਿਤ੍ਤਂ, ਮਾਰਧੇਯ੍ਯਂ ਪਹਾਤਵੇ.

ਦੁਨ੍ਨਿਗ੍ਗਹਸ੍ਸ ਲਹੁਨੋ, ਯਤ੍ਥਕਾਮਨਿਪਾਤਿਨੋ;

ਚਿਤ੍ਤਸ੍ਸ ਦਮਥੋ ਸਾਧੁ, ਚਿਤ੍ਤਂ ਦਨ੍ਤਂ ਸੁਖਾਵਹਂ.

ਸੁਦੁਦ੍ਦਸਂ ¶ ¶ ਸੁਨਿਪੁਣਂ, ਯਤ੍ਥਕਾਮਨਿਪਾਤਿਨਂ;

ਚਿਤ੍ਤਂ ਰਕ੍ਖੇਥ ਮੇਧਾਵੀ, ਚਿਤ੍ਤਂ ਗੁਤ੍ਤਂ ਸੁਖਾਵਹਂ.

ਦੂਰਙ੍ਗਮਂ ਏਕਚਰਂ [ਏਕਚਾਰਂ (ਕ.)], ਅਸਰੀਰਂ ਗੁਹਾਸਯਂ;

ਯੇ ¶ ਚਿਤ੍ਤਂ ਸਂਯਮੇਸ੍ਸਨ੍ਤਿ, ਮੋਕ੍ਖਨ੍ਤਿ ਮਾਰਬਨ੍ਧਨਾ.

ਅਨਵਟ੍ਠਿਤਚਿਤ੍ਤਸ੍ਸ, ਸਦ੍ਧਮ੍ਮਂ ਅਵਿਜਾਨਤੋ;

ਪਰਿਪ੍ਲਵਪਸਾਦਸ੍ਸ, ਪਞ੍ਞਾ ਨ ਪਰਿਪੂਰਤਿ.

ਅਨਵਸ੍ਸੁਤਚਿਤ੍ਤਸ੍ਸ, ਅਨਨ੍ਵਾਹਤਚੇਤਸੋ;

ਪੁਞ੍ਞਪਾਪਪਹੀਨਸ੍ਸ, ਨਤ੍ਥਿ ਜਾਗਰਤੋ ਭਯਂ.

ਕੁਮ੍ਭੂਪਮਂ ਕਾਯਮਿਮਂ ਵਿਦਿਤ੍ਵਾ, ਨਗਰੂਪਮਂ ਚਿਤ੍ਤਮਿਦਂ ਠਪੇਤ੍ਵਾ;

ਯੋਧੇਥ ਮਾਰਂ ਪਞ੍ਞਾਵੁਧੇਨ, ਜਿਤਞ੍ਚ ਰਕ੍ਖੇ ਅਨਿਵੇਸਨੋ ਸਿਯਾ.

ਅਚਿਰਂ ¶ ਵਤਯਂ ਕਾਯੋ, ਪਥਵਿਂ ਅਧਿਸੇਸ੍ਸਤਿ;

ਛੁਦ੍ਧੋ ਅਪੇਤਵਿਞ੍ਞਾਣੋ, ਨਿਰਤ੍ਥਂਵ ਕਲਿਙ੍ਗਰਂ.

ਦਿਸੋ ਦਿਸਂ ਯਂ ਤਂ ਕਯਿਰਾ, ਵੇਰੀ ਵਾ ਪਨ ਵੇਰਿਨਂ;

ਮਿਚ੍ਛਾਪਣਿਹਿਤਂ ਚਿਤ੍ਤਂ, ਪਾਪਿਯੋ [ਪਾਪਿਯਂ (?)] ਨਂ ਤਤੋ ਕਰੇ.

ਨ ਤਂ ਮਾਤਾ ਪਿਤਾ ਕਯਿਰਾ, ਅਞ੍ਞੇ ਵਾਪਿ ਚ ਞਾਤਕਾ;

ਸਮ੍ਮਾਪਣਿਹਿਤਂ ਚਿਤ੍ਤਂ, ਸੇਯ੍ਯਸੋ ਨਂ ਤਤੋ ਕਰੇ.

ਕੋ ¶ ¶ ¶ ਇਮਂ [ਕੋਮਂ (ਕ.)] ਪਥਵਿਂ ਵਿਚੇਸ੍ਸਤਿ [ਵਿਜੇਸ੍ਸਤਿ (ਸੀ. ਸ੍ਯਾ. ਪੀ.)], ਯਮਲੋਕਞ੍ਚ ਇਮਂ ਸਦੇਵਕਂ;

ਕੋ ਧਮ੍ਮਪਦਂ ਸੁਦੇਸਿਤਂ, ਕੁਸਲੋ ਪੁਪ੍ਫਮਿਵ ਪਚੇਸ੍ਸਤਿ [ਪੁਪ੍ਫਮਿਵਪ੍ਪਚੇਸ੍ਸਤਿ (ਕ.)].

ਸੇਖੋ ਪਥਵਿਂ ਵਿਚੇਸ੍ਸਤਿ, ਯਮਲੋਕਞ੍ਚ ਇਮਂ ਸਦੇਵਕਂ;

ਸੇਖੋ ਧਮ੍ਮਪਦਂ ਸੁਦੇਸਿਤਂ, ਕੁਸਲੋ ਪੁਪ੍ਫਮਿਵ ਪਚੇਸ੍ਸਤਿ.

ਫੇਣੂਪਮਂ ¶ ਕਾਯਮਿਮਂ ਵਿਦਿਤ੍ਵਾ, ਮਰੀਚਿਧਮ੍ਮਂ ਅਭਿਸਮ੍ਬੁਧਾਨੋ;

ਛੇਤ੍ਵਾਨ ਮਾਰਸ੍ਸ ਪਪੁਪ੍ਫਕਾਨਿ [ਸਪੁਪ੍ਫਕਾਨਿ (ਟੀਕਾ)], ਅਦਸ੍ਸਨਂ ਮਚ੍ਚੁਰਾਜਸ੍ਸ ਗਚ੍ਛੇ.

ਪੁਪ੍ਫਾਨਿ ਹੇਵ ਪਚਿਨਨ੍ਤਂ, ਬ੍ਯਾਸਤ੍ਤਮਨਸਂ [ਬ੍ਯਾਸਤ੍ਤਮਾਨਸਂ (ਕ.)] ਨਰਂ;

ਸੁਤ੍ਤਂ ਗਾਮਂ ਮਹੋਘੋਵ, ਮਚ੍ਚੁ ਆਦਾਯ ਗਚ੍ਛਤਿ.

ਪੁਪ੍ਫਾਨਿ ਹੇਵ ਪਚਿਨਨ੍ਤਂ, ਬ੍ਯਾਸਤ੍ਤਮਨਸਂ ਨਰਂ;

ਅਤਿਤ੍ਤਞ੍ਞੇਵ ਕਾਮੇਸੁ, ਅਨ੍ਤਕੋ ਕੁਰੁਤੇ ਵਸਂ.

ਯਥਾਪਿ ਭਮਰੋ ਪੁਪ੍ਫਂ, ਵਣ੍ਣਗਨ੍ਧਮਹੇਠਯਂ [ਵਣ੍ਣਗਨ੍ਧਮਪੋਠਯਂ (ਕ.)];

ਪਲੇਤਿ ਰਸਮਾਦਾਯ, ਏਵਂ ਗਾਮੇ ਮੁਨੀ ਚਰੇ.

ਨ ਪਰੇਸਂ ਵਿਲੋਮਾਨਿ, ਨ ਪਰੇਸਂ ਕਤਾਕਤਂ;

ਅਤ੍ਤਨੋਵ ਅਵੇਕ੍ਖੇਯ੍ਯ, ਕਤਾਨਿ ਅਕਤਾਨਿ ਚ.

ਯਥਾਪਿ ¶ ¶ ਰੁਚਿਰਂ ਪੁਪ੍ਫਂ, ਵਣ੍ਣਵਨ੍ਤਂ ਅਗਨ੍ਧਕਂ;

ਏਵਂ ਸੁਭਾਸਿਤਾ ਵਾਚਾ, ਅਫਲਾ ਹੋਤਿ ਅਕੁਬ੍ਬਤੋ.

ਯਥਾਪਿ ¶ ਰੁਚਿਰਂ ਪੁਪ੍ਫਂ, ਵਣ੍ਣਵਨ੍ਤਂ ਸੁਗਨ੍ਧਕਂ [ਸਗਨ੍ਧਕਂ (ਸੀ. ਸ੍ਯਾ. ਕਂ. ਪੀ.)];

ਏਵਂ ਸੁਭਾਸਿਤਾ ਵਾਚਾ, ਸਫਲਾ ਹੋਤਿ ਕੁਬ੍ਬਤੋ [ਸਕੁਬ੍ਬਤੋ (ਸੀ. ਪੀ.), ਪਕੁਬ੍ਬਤੋ (ਸੀ. ਅਟ੍ਠ.), ਸੁਕੁਬ੍ਬਤੋ (ਸ੍ਯਾ. ਕਂ.)].

ਯਥਾਪਿ ¶ ਪੁਪ੍ਫਰਾਸਿਮ੍ਹਾ, ਕਯਿਰਾ ਮਾਲਾਗੁਣੇ ਬਹੂ;

ਏਵਂ ਜਾਤੇਨ ਮਚ੍ਚੇਨ, ਕਤ੍ਤਬ੍ਬਂ ਕੁਸਲਂ ਬਹੁਂ.

ਨ ਪੁਪ੍ਫਗਨ੍ਧੋ ਪਟਿਵਾਤਮੇਤਿ, ਨ ਚਨ੍ਦਨਂ ਤਗਰਮਲ੍ਲਿਕਾ [ਤਗਰਮਲ੍ਲਿਕਾ (ਸੀ. ਸ੍ਯਾ. ਕਂ. ਪੀ.)];

ਸਤਞ੍ਚ ਗਨ੍ਧੋ ਪਟਿਵਾਤਮੇਤਿ, ਸਬ੍ਬਾ ਦਿਸਾ ਸਪ੍ਪੁਰਿਸੋ ਪਵਾਯਤਿ.

ਚਨ੍ਦਨਂ ਤਗਰਂ ਵਾਪਿ, ਉਪ੍ਪਲਂ ਅਥ ਵਸ੍ਸਿਕੀ;

ਏਤੇਸਂ ਗਨ੍ਧਜਾਤਾਨਂ, ਸੀਲਗਨ੍ਧੋ ਅਨੁਤ੍ਤਰੋ.

ਅਪ੍ਪਮਤ੍ਤੋ ਅਯਂ ਗਨ੍ਧੋ, ਯ੍ਵਾਯਂ ਤਗਰਚਨ੍ਦਨਂ [ਯਾਯਂ ਤਗਰਚਨ੍ਦਨੀ (ਸੀ. ਸ੍ਯਾ. ਕਂ. ਪੀ.)];

ਯੋ ਚ ਸੀਲਵਤਂ ਗਨ੍ਧੋ, ਵਾਤਿ ਦੇਵੇਸੁ ਉਤ੍ਤਮੋ.

ਤੇਸਂ ਸਮ੍ਪਨ੍ਨਸੀਲਾਨਂ, ਅਪ੍ਪਮਾਦਵਿਹਾਰਿਨਂ;

ਸਮ੍ਮਦਞ੍ਞਾ ਵਿਮੁਤ੍ਤਾਨਂ, ਮਾਰੋ ਮਗ੍ਗਂ ਨ ਵਿਨ੍ਦਤਿ.

ਯਥਾ ਸਙ੍ਕਾਰਠਾਨਸ੍ਮਿਂ [ਸਙ੍ਕਾਰਧਾਨਸ੍ਮਿਂ (ਸੀ. ਸ੍ਯਾ. ਕਂ. ਪੀ.)], ਉਜ੍ਝਿਤਸ੍ਮਿਂ ਮਹਾਪਥੇ;

ਪਦੁਮਂ ਤਤ੍ਥ ਜਾਯੇਥ, ਸੁਚਿਗਨ੍ਧਂ ਮਨੋਰਮਂ.

ਏਵਂ ¶ ਸਙ੍ਕਾਰਭੂਤੇਸੁ, ਅਨ੍ਧਭੂਤੇ [ਅਨ੍ਧੀਭੂਤੇ (ਕ.)] ਪੁਥੁਜ੍ਜਨੇ;

ਅਤਿਰੋਚਤਿ ਪਞ੍ਞਾਯ, ਸਮ੍ਮਾਸਮ੍ਬੁਦ੍ਧਸਾਵਕੋ.

ਦੀਘਾ ¶ ¶ ¶ ਜਾਗਰਤੋ ਰਤ੍ਤਿ, ਦੀਘਂ ਸਨ੍ਤਸ੍ਸ ਯੋਜਨਂ;

ਦੀਘੋ ਬਾਲਾਨਂ ਸਂਸਾਰੋ, ਸਦ੍ਧਮ੍ਮਂ ਅਵਿਜਾਨਤਂ.

ਚਰਞ੍ਚੇ ਨਾਧਿਗਚ੍ਛੇਯ੍ਯ, ਸੇਯ੍ਯਂ ਸਦਿਸਮਤ੍ਤਨੋ;

ਏਕਚਰਿਯਂ [ਏਕਚਰਿਯਂ (ਕ.)] ਦਲ਼੍ਹਂ ਕਯਿਰਾ, ਨਤ੍ਥਿ ਬਾਲੇ ਸਹਾਯਤਾ.

ਪੁਤ੍ਤਾ ਮਤ੍ਥਿ ਧਨਮ੍ਮਤ੍ਥਿ [ਪੁਤ੍ਤਮਤ੍ਥਿ ਧਨਮਤ੍ਥਿ (ਕ.)], ਇਤਿ ਬਾਲੋ ਵਿਹਞ੍ਞਤਿ;

ਅਤ੍ਤਾ ਹਿ [ਅਤ੍ਤਾਪਿ (?)] ਅਤ੍ਤਨੋ ਨਤ੍ਥਿ, ਕੁਤੋ ਪੁਤ੍ਤਾ ਕੁਤੋ ਧਨਂ.

ਯੋ ਬਾਲੋ ਮਞ੍ਞਤਿ ਬਾਲ੍ਯਂ, ਪਣ੍ਡਿਤੋ ਵਾਪਿ ਤੇਨ ਸੋ;

ਬਾਲੋ ਚ ਪਣ੍ਡਿਤਮਾਨੀ, ਸ ਵੇ ‘‘ਬਾਲੋ’’ਤਿ ਵੁਚ੍ਚਤਿ.

ਯਾਵਜੀਵਮ੍ਪਿ ਚੇ ਬਾਲੋ, ਪਣ੍ਡਿਤਂ ਪਯਿਰੁਪਾਸਤਿ;

ਨ ਸੋ ਧਮ੍ਮਂ ਵਿਜਾਨਾਤਿ, ਦਬ੍ਬੀ ਸੂਪਰਸਂ ਯਥਾ.

ਮੁਹੁਤ੍ਤਮਪਿ ¶ ਚੇ ਵਿਞ੍ਞੂ, ਪਣ੍ਡਿਤਂ ਪਯਿਰੁਪਾਸਤਿ;

ਖਿਪ੍ਪਂ ਧਮ੍ਮਂ ਵਿਜਾਨਾਤਿ, ਜਿਵ੍ਹਾ ਸੂਪਰਸਂ ਯਥਾ.

ਚਰਨ੍ਤਿ ਬਾਲਾ ਦੁਮ੍ਮੇਧਾ, ਅਮਿਤ੍ਤੇਨੇਵ ਅਤ੍ਤਨਾ;

ਕਰੋਨ੍ਤਾ ਪਾਪਕਂ ਕਮ੍ਮਂ, ਯਂ ਹੋਤਿ ਕਟੁਕਪ੍ਫਲਂ.

ਨ ¶ ਤਂ ਕਮ੍ਮਂ ਕਤਂ ਸਾਧੁ, ਯਂ ਕਤ੍ਵਾ ਅਨੁਤਪ੍ਪਤਿ;

ਯਸ੍ਸ ਅਸ੍ਸੁਮੁਖੋ ਰੋਦਂ, ਵਿਪਾਕਂ ਪਟਿਸੇਵਤਿ.

ਤਞ੍ਚ ¶ ਕਮ੍ਮਂ ਕਤਂ ਸਾਧੁ, ਯਂ ਕਤ੍ਵਾ ਨਾਨੁਤਪ੍ਪਤਿ;

ਯਸ੍ਸ ਪਤੀਤੋ ਸੁਮਨੋ, ਵਿਪਾਕਂ ਪਟਿਸੇਵਤਿ.

ਮਧੁਵਾ ¶ [ਮਧੁਂ ਵਾ (ਦੀ. ਨਿ. ਟੀਕਾ ੧)] ਮਞ੍ਞਤਿ ਬਾਲੋ, ਯਾਵ ਪਾਪਂ ਨ ਪਚ੍ਚਤਿ;

ਯਦਾ ਚ ਪਚ੍ਚਤਿ ਪਾਪਂ, ਬਾਲੋ [ਅਥ ਬਾਲੋ (ਸੀ. ਸ੍ਯਾ.) ਅਥ (?)] ਦੁਕ੍ਖਂ ਨਿਗਚ੍ਛਤਿ.

ਮਾਸੇ ਮਾਸੇ ਕੁਸਗ੍ਗੇਨ, ਬਾਲੋ ਭੁਞ੍ਜੇਯ੍ਯ ਭੋਜਨਂ;

ਨ ਸੋ ਸਙ੍ਖਾਤਧਮ੍ਮਾਨਂ [ਸਙ੍ਖਤਧਮ੍ਮਾਨਂ (ਸੀ. ਪੀ. ਕ.)], ਕਲਂ ਅਗ੍ਘਤਿ ਸੋਲ਼ਸਿਂ.

ਨ ਹਿ ਪਾਪਂ ਕਤਂ ਕਮ੍ਮਂ, ਸਜ੍ਜੁ ਖੀਰਂਵ ਮੁਚ੍ਚਤਿ;

ਡਹਨ੍ਤਂ ਬਾਲਮਨ੍ਵੇਤਿ, ਭਸ੍ਮਚ੍ਛਨ੍ਨੋਵ [ਭਸ੍ਮਾਛਨ੍ਨੋਵ (ਸੀ. ਪੀ. ਕ.)] ਪਾਵਕੋ.

ਯਾਵਦੇਵ ਅਨਤ੍ਥਾਯ, ਞਤ੍ਤਂ [ਞਾਤਂ (?)] ਬਾਲਸ੍ਸ ਜਾਯਤਿ;

ਹਨ੍ਤਿ ਬਾਲਸ੍ਸ ਸੁਕ੍ਕਂਸਂ, ਮੁਦ੍ਧਮਸ੍ਸ ਵਿਪਾਤਯਂ.

ਅਸਨ੍ਤਂ ¶ ਭਾਵਨਮਿਚ੍ਛੇਯ੍ਯ [ਅਸਨ੍ਤਂ ਭਾਵਮਿਚ੍ਛੇਯ੍ਯ (ਸ੍ਯਾ.), ਅਸਨ੍ਤਭਾਵਨਮਿਚ੍ਛੇਯ੍ਯ (ਕ.)], ਪੁਰੇਕ੍ਖਾਰਞ੍ਚ ਭਿਕ੍ਖੁਸੁ;

ਆਵਾਸੇਸੁ ਚ ਇਸ੍ਸਰਿਯਂ, ਪੂਜਾ ਪਰਕੁਲੇਸੁ ਚ.

ਮਮੇਵ ¶ ਕਤ ਮਞ੍ਞਨ੍ਤੁ, ਗਿਹੀਪਬ੍ਬਜਿਤਾ ਉਭੋ;

ਮਮੇਵਾਤਿਵਸਾ ਅਸ੍ਸੁ, ਕਿਚ੍ਚਾਕਿਚ੍ਚੇਸੁ ਕਿਸ੍ਮਿਚਿ;

ਇਤਿ ਬਾਲਸ੍ਸ ਸਙ੍ਕਪ੍ਪੋ, ਇਚ੍ਛਾ ਮਾਨੋ ਚ ਵਡ੍ਢਤਿ.

ਅਞ੍ਞਾ ਹਿ ਲਾਭੂਪਨਿਸਾ, ਅਞ੍ਞਾ ਨਿਬ੍ਬਾਨਗਾਮਿਨੀ;

ਏਵਮੇਤਂ ਅਭਿਞ੍ਞਾਯ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;

ਸਕ੍ਕਾਰਂ ਨਾਭਿਨਨ੍ਦੇਯ੍ਯ, ਵਿਵੇਕਮਨੁਬ੍ਰੂਹਯੇ.

ਨਿਧੀਨਂਵ ¶ ¶ ਪਵਤ੍ਤਾਰਂ, ਯਂ ਪਸ੍ਸੇ ਵਜ੍ਜਦਸ੍ਸਿਨਂ;

ਨਿਗ੍ਗਯ੍ਹਵਾਦਿਂ ਮੇਧਾਵਿਂ, ਤਾਦਿਸਂ ਪਣ੍ਡਿਤਂ ਭਜੇ;

ਤਾਦਿਸਂ ਭਜਮਾਨਸ੍ਸ, ਸੇਯ੍ਯੋ ਹੋਤਿ ਨ ਪਾਪਿਯੋ.

ਓਵਦੇਯ੍ਯਾਨੁਸਾਸੇਯ੍ਯ, ਅਸਬ੍ਭਾ ਚ ਨਿਵਾਰਯੇ;

ਸਤਞ੍ਹਿ ਸੋ ਪਿਯੋ ਹੋਤਿ, ਅਸਤਂ ਹੋਤਿ ਅਪ੍ਪਿਯੋ.

ਨ ਭਜੇ ਪਾਪਕੇ ਮਿਤ੍ਤੇ, ਨ ਭਜੇ ਪੁਰਿਸਾਧਮੇ;

ਭਜੇਥ ਮਿਤ੍ਤੇ ਕਲ੍ਯਾਣੇ, ਭਜੇਥ ਪੁਰਿਸੁਤ੍ਤਮੇ.

ਧਮ੍ਮਪੀਤਿ ¶ ਸੁਖਂ ਸੇਤਿ, ਵਿਪ੍ਪਸਨ੍ਨੇਨ ਚੇਤਸਾ;

ਅਰਿਯਪ੍ਪਵੇਦਿਤੇ ਧਮ੍ਮੇ, ਸਦਾ ਰਮਤਿ ਪਣ੍ਡਿਤੋ.

ਉਦਕਞ੍ਹਿ ¶ ਨਯਨ੍ਤਿ ਨੇਤ੍ਤਿਕਾ, ਉਸੁਕਾਰਾ ਨਮਯਨ੍ਤਿ [ਦਮਯਨ੍ਤਿ (ਕ.)] ਤੇਜਨਂ;

ਦਾਰੁਂ ਨਮਯਨ੍ਤਿ ਤਚ੍ਛਕਾ, ਅਤ੍ਤਾਨਂ ਦਮਯਨ੍ਤਿ ਪਣ੍ਡਿਤਾ.

ਸੇਲੋ ਯਥਾ ਏਕਘਨੋ [ਏਕਗ੍ਘਨੋ (ਕ.)], ਵਾਤੇਨ ਨ ਸਮੀਰਤਿ;

ਏਵਂ ਨਿਨ੍ਦਾਪਸਂਸਾਸੁ, ਨ ਸਮਿਞ੍ਜਨ੍ਤਿ ਪਣ੍ਡਿਤਾ.

ਯਥਾਪਿ ਰਹਦੋ ਗਮ੍ਭੀਰੋ, ਵਿਪ੍ਪਸਨ੍ਨੋ ਅਨਾਵਿਲੋ;

ਏਵਂ ਧਮ੍ਮਾਨਿ ਸੁਤ੍ਵਾਨ, ਵਿਪ੍ਪਸੀਦਨ੍ਤਿ ਪਣ੍ਡਿਤਾ.

ਸਬ੍ਬਤ੍ਥ ਵੇ ਸਪ੍ਪੁਰਿਸਾ ਚਜਨ੍ਤਿ, ਨ ¶ ਕਾਮਕਾਮਾ ਲਪਯਨ੍ਤਿ ਸਨ੍ਤੋ;

ਸੁਖੇਨ ਫੁਟ੍ਠਾ ਅਥ ਵਾ ਦੁਖੇਨ, ਨ ਉਚ੍ਚਾਵਚਂ [ਨੋਚ੍ਚਾਵਚਂ (ਸੀ. ਅਟ੍ਠ.)] ਪਣ੍ਡਿਤਾ ਦਸ੍ਸਯਨ੍ਤਿ.

ਨ ¶ ਅਤ੍ਤਹੇਤੁ ਨ ਪਰਸ੍ਸ ਹੇਤੁ, ਨ ਪੁਤ੍ਤਮਿਚ੍ਛੇ ਨ ਧਨਂ ਨ ਰਟ੍ਠਂ;

ਨ ਇਚ੍ਛੇਯ੍ਯ [ਨਯਿਚ੍ਛੇ (ਪੀ.), ਨਿਚ੍ਛੇ (?)] ਅਧਮ੍ਮੇਨ ਸਮਿਦ੍ਧਿਮਤ੍ਤਨੋ, ਸ ਸੀਲਵਾ ਪਞ੍ਞਵਾ ਧਮ੍ਮਿਕੋ ਸਿਯਾ.

ਅਪ੍ਪਕਾ ਤੇ ਮਨੁਸ੍ਸੇਸੁ, ਯੇ ਜਨਾ ਪਾਰਗਾਮਿਨੋ;

ਅਥਾਯਂ ਇਤਰਾ ਪਜਾ, ਤੀਰਮੇਵਾਨੁਧਾਵਤਿ.

ਯੇ ¶ ਚ ਖੋ ਸਮ੍ਮਦਕ੍ਖਾਤੇ, ਧਮ੍ਮੇ ਧਮ੍ਮਾਨੁਵਤ੍ਤਿਨੋ;

ਤੇ ਜਨਾ ਪਾਰਮੇਸ੍ਸਨ੍ਤਿ, ਮਚ੍ਚੁਧੇਯ੍ਯਂ ਸੁਦੁਤ੍ਤਰਂ.

ਕਣ੍ਹਂ ¶ ਧਮ੍ਮਂ ਵਿਪ੍ਪਹਾਯ, ਸੁਕ੍ਕਂ ਭਾਵੇਥ ਪਣ੍ਡਿਤੋ;

ਓਕਾ ਅਨੋਕਮਾਗਮ੍ਮ, ਵਿਵੇਕੇ ਯਤ੍ਥ ਦੂਰਮਂ.

ਤਤ੍ਰਾਭਿਰਤਿਮਿਚ੍ਛੇਯ੍ਯ, ਹਿਤ੍ਵਾ ਕਾਮੇ ਅਕਿਞ੍ਚਨੋ;

ਪਰਿਯੋਦਪੇਯ੍ਯ [ਪਰਿਯੋਦਾਪੇਯ੍ਯ (?)] ਅਤ੍ਤਾਨਂ, ਚਿਤ੍ਤਕ੍ਲੇਸੇਹਿ ਪਣ੍ਡਿਤੋ.

ਯੇਸਂ ਸਮ੍ਬੋਧਿਯਙ੍ਗੇਸੁ, ਸਮ੍ਮਾ ਚਿਤ੍ਤਂ ਸੁਭਾਵਿਤਂ;

ਆਦਾਨਪਟਿਨਿਸ੍ਸਗ੍ਗੇ, ਅਨੁਪਾਦਾਯ ਯੇ ਰਤਾ;

ਖੀਣਾਸਵਾ ਜੁਤਿਮਨ੍ਤੋ, ਤੇ ਲੋਕੇ ਪਰਿਨਿਬ੍ਬੁਤਾ.

ਗਤਦ੍ਧਿਨੋ ¶ ਵਿਸੋਕਸ੍ਸ, ਵਿਪ੍ਪਮੁਤ੍ਤਸ੍ਸ ਸਬ੍ਬਧਿ;

ਸਬ੍ਬਗਨ੍ਥਪ੍ਪਹੀਨਸ੍ਸ, ਪਰਿਲ਼ਾਹੋ ਨ ਵਿਜ੍ਜਤਿ.

ਉਯ੍ਯੁਞ੍ਜਨ੍ਤਿ ¶ ਸਤੀਮਨ੍ਤੋ, ਨ ਨਿਕੇਤੇ ਰਮਨ੍ਤਿ ਤੇ;

ਹਂਸਾਵ ਪਲ੍ਲਲਂ ਹਿਤ੍ਵਾ, ਓਕਮੋਕਂ ਜਹਨ੍ਤਿ ਤੇ.

ਯੇਸਂ ¶ ਸਨ੍ਨਿਚਯੋ ਨਤ੍ਥਿ, ਯੇ ਪਰਿਞ੍ਞਾਤਭੋਜਨਾ;

ਸੁਞ੍ਞਤੋ ਅਨਿਮਿਤ੍ਤੋ ਚ, ਵਿਮੋਕ੍ਖੋ ਯੇਸਂ ਗੋਚਰੋ;

ਆਕਾਸੇ ਵ ਸਕੁਨ੍ਤਾਨਂ [ਸਕੁਣਾਨਂ (ਕ.)], ਗਤਿ ਤੇਸਂ ਦੁਰਨ੍ਨਯਾ.

ਯਸ੍ਸਾਸਵਾ ¶ ਪਰਿਕ੍ਖੀਣਾ, ਆਹਾਰੇ ਚ ਅਨਿਸ੍ਸਿਤੋ;

ਸੁਞ੍ਞਤੋ ਅਨਿਮਿਤ੍ਤੋ ਚ, ਵਿਮੋਕ੍ਖੋ ਯਸ੍ਸ ਗੋਚਰੋ;

ਆਕਾਸੇ ਵ ਸਕੁਨ੍ਤਾਨਂ, ਪਦਂ ਤਸ੍ਸ ਦੁਰਨ੍ਨਯਂ.

ਯਸ੍ਸਿਨ੍ਦ੍ਰਿਯਾਨਿ ਸਮਥਙ੍ਗਤਾਨਿ [ਸਮਥਂ ਗਤਾਨਿ (ਸੀ. ਪੀ.)], ਅਸ੍ਸਾ ਯਥਾ ਸਾਰਥਿਨਾ ਸੁਦਨ੍ਤਾ;

ਪਹੀਨਮਾਨਸ੍ਸ ਅਨਾਸਵਸ੍ਸ, ਦੇਵਾਪਿ ਤਸ੍ਸ ਪਿਹਯਨ੍ਤਿ ਤਾਦਿਨੋ.

ਪਥਵਿਸਮੋ ਨੋ ਵਿਰੁਜ੍ਝਤਿ, ਇਨ੍ਦਖਿਲੁਪਮੋ [ਇਨ੍ਦਖੀਲੂਪਮੋ (ਸੀ. ਸ੍ਯਾ. ਕ.)] ਤਾਦਿ ਸੁਬ੍ਬਤੋ;

ਰਹਦੋਵ ਅਪੇਤਕਦ੍ਦਮੋ, ਸਂਸਾਰਾ ਨ ਭਵਨ੍ਤਿ ਤਾਦਿਨੋ.

ਸਨ੍ਤਂ ¶ ਤਸ੍ਸ ਮਨਂ ਹੋਤਿ, ਸਨ੍ਤਾ ਵਾਚਾ ਚ ਕਮ੍ਮ ਚ;

ਸਮ੍ਮਦਞ੍ਞਾ ਵਿਮੁਤ੍ਤਸ੍ਸ, ਉਪਸਨ੍ਤਸ੍ਸ ਤਾਦਿਨੋ.

ਅਸ੍ਸਦ੍ਧੋ ਅਕਤਞ੍ਞੂ ਚ, ਸਨ੍ਧਿਚ੍ਛੇਦੋ ਚ ਯੋ ਨਰੋ;

ਹਤਾਵਕਾਸੋ ਵਨ੍ਤਾਸੋ, ਸ ਵੇ ਉਤ੍ਤਮਪੋਰਿਸੋ.

ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;

ਯਤ੍ਥ ਅਰਹਨ੍ਤੋ ਵਿਹਰਨ੍ਤਿ, ਤਂ ਭੂਮਿਰਾਮਣੇਯ੍ਯਕਂ.

ਰਮਣੀਯਾਨਿ ¶ ¶ ਅਰਞ੍ਞਾਨਿ, ਯਤ੍ਥ ਨ ਰਮਤੀ ਜਨੋ;

ਵੀਤਰਾਗਾ ਰਮਿਸ੍ਸਨ੍ਤਿ, ਨ ਤੇ ਕਾਮਗਵੇਸਿਨੋ.

ਸਹਸ੍ਸਮਪਿ ¶ ਚੇ ਵਾਚਾ, ਅਨਤ੍ਥਪਦਸਂਹਿਤਾ;

ਏਕਂ ਅਤ੍ਥਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤਿ.

ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤਿ.

ਯੋ ਚ ਗਾਥਾ ਸਤਂ ਭਾਸੇ, ਅਨਤ੍ਥਪਦਸਂਹਿਤਾ [ਅਨਤ੍ਥਪਦਸਞ੍ਹਿਤਂ (ਕ.) ਵਿਸੇਸਨਂ ਹੇਤਂ ਗਾਥਾਤਿਪਦਸ੍ਸ];

ਏਕਂ ਧਮ੍ਮਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤਿ.

ਯੋ ਸਹਸ੍ਸਂ ਸਹਸ੍ਸੇਨ, ਸਙ੍ਗਾਮੇ ਮਾਨੁਸੇ ਜਿਨੇ;

ਏਕਞ੍ਚ ਜੇਯ੍ਯਮਤ੍ਤਾਨਂ [ਅਤ੍ਤਾਨਂ (ਸੀ. ਪੀ.)], ਸ ਵੇ ਸਙ੍ਗਾਮਜੁਤ੍ਤਮੋ.

ਅਤ੍ਤਾ ¶ ਹਵੇ ਜਿਤਂ ਸੇਯ੍ਯੋ, ਯਾ ਚਾਯਂ ਇਤਰਾ ਪਜਾ;

ਅਤ੍ਤਦਨ੍ਤਸ੍ਸ ਪੋਸਸ੍ਸ, ਨਿਚ੍ਚਂ ਸਞ੍ਞਤਚਾਰਿਨੋ.

ਨੇਵ ਦੇਵੋ ਨ ਗਨ੍ਧਬ੍ਬੋ, ਨ ਮਾਰੋ ਸਹ ਬ੍ਰਹ੍ਮੁਨਾ;

ਜਿਤਂ ਅਪਜਿਤਂ ਕਯਿਰਾ, ਤਥਾਰੂਪਸ੍ਸ ਜਨ੍ਤੁਨੋ.

ਮਾਸੇ ¶ ¶ ਮਾਸੇ ਸਹਸ੍ਸੇਨ, ਯੋ ਯਜੇਥ ਸਤਂ ਸਮਂ;

ਏਕਞ੍ਚ ਭਾਵਿਤਤ੍ਤਾਨਂ, ਮੁਹੁਤ੍ਤਮਪਿ ਪੂਜਯੇ;

ਸਾਯੇਵ ਪੂਜਨਾ ਸੇਯ੍ਯੋ, ਯਞ੍ਚੇ ਵਸ੍ਸਸਤਂ ਹੁਤਂ.

ਯੋ ਚ ਵਸ੍ਸਸਤਂ ਜਨ੍ਤੁ, ਅਗ੍ਗਿਂ ਪਰਿਚਰੇ ਵਨੇ;

ਏਕਞ੍ਚ ਭਾਵਿਤਤ੍ਤਾਨਂ, ਮੁਹੁਤ੍ਤਮਪਿ ਪੂਜਯੇ;

ਸਾਯੇਵ ਪੂਜਨਾ ਸੇਯ੍ਯੋ, ਯਞ੍ਚੇ ਵਸ੍ਸਸਤਂ ਹੁਤਂ.

ਯਂ ¶ ਕਿਞ੍ਚਿ ਯਿਟ੍ਠਂ ਵ ਹੁਤਂ ਵ [ਯਿਟ੍ਠਞ੍ਚ ਹੁਤਞ੍ਚ (ਕ.)] ਲੋਕੇ, ਸਂਵਚ੍ਛਰਂ ਯਜੇਥ ਪੁਞ੍ਞਪੇਕ੍ਖੋ;

ਸਬ੍ਬਮ੍ਪਿ ਤਂ ਨ ਚਤੁਭਾਗਮੇਤਿ, ਅਭਿਵਾਦਨਾ ਉਜ੍ਜੁਗਤੇਸੁ ਸੇਯ੍ਯੋ.

ਅਭਿਵਾਦਨਸੀਲਿਸ੍ਸ, ਨਿਚ੍ਚਂ ਵੁਡ੍ਢਾਪਚਾਯਿਨੋ [ਵਦ੍ਧਾਪਚਾਯਿਨੋ (ਸੀ. ਪੀ.)];

ਚਤ੍ਤਾਰੋ ਧਮ੍ਮਾ ਵਡ੍ਢਨ੍ਤਿ, ਆਯੁ ਵਣ੍ਣੋ ਸੁਖਂ ਬਲਂ.

ਯੋ ਚ ਵਸ੍ਸਸਤਂ ਜੀਵੇ, ਦੁਸ੍ਸੀਲੋ ਅਸਮਾਹਿਤੋ;

ਏਕਾਹਂ ਜੀਵਿਤਂ ਸੇਯ੍ਯੋ, ਸੀਲਵਨ੍ਤਸ੍ਸ ਝਾਯਿਨੋ.

ਯੋ ਚ ਵਸ੍ਸਸਤਂ ਜੀਵੇ, ਦੁਪ੍ਪਞ੍ਞੋ ਅਸਮਾਹਿਤੋ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਞ੍ਞਵਨ੍ਤਸ੍ਸ ਝਾਯਿਨੋ.

ਯੋ ¶ ਚ ਵਸ੍ਸਸਤਂ ਜੀਵੇ, ਕੁਸੀਤੋ ਹੀਨਵੀਰਿਯੋ;

ਏਕਾਹਂ ਜੀਵਿਤਂ ਸੇਯ੍ਯੋ, ਵੀਰਿਯਮਾਰਭਤੋ ਦਲ਼੍ਹਂ.

ਯੋ ¶ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਉਦਯਬ੍ਬਯਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਉਦਯਬ੍ਬਯਂ.

ਯੋ ¶ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਅਮਤਂ ਪਦਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਅਮਤਂ ਪਦਂ.

ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਧਮ੍ਮਮੁਤ੍ਤਮਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਧਮ੍ਮਮੁਤ੍ਤਮਂ.

ਅਭਿਤ੍ਥਰੇਥ ¶ ਕਲ੍ਯਾਣੇ, ਪਾਪਾ ਚਿਤ੍ਤਂ ਨਿਵਾਰਯੇ;

ਦਨ੍ਧਞ੍ਹਿ ਕਰੋਤੋ ਪੁਞ੍ਞਂ, ਪਾਪਸ੍ਮਿਂ ਰਮਤੀ ਮਨੋ.

ਪਾਪਞ੍ਚੇ ਪੁਰਿਸੋ ਕਯਿਰਾ, ਨ ਨਂ [ਨ ਤਂ (ਸੀ. ਪੀ.)] ਕਯਿਰਾ ਪੁਨਪ੍ਪੁਨਂ;

ਨ ਤਮ੍ਹਿ ਛਨ੍ਦਂ ਕਯਿਰਾਥ, ਦੁਕ੍ਖੋ ਪਾਪਸ੍ਸ ਉਚ੍ਚਯੋ.

ਪੁਞ੍ਞਞ੍ਚੇ ਪੁਰਿਸੋ ਕਯਿਰਾ, ਕਯਿਰਾ ਨਂ [ਕਯਿਰਾਥੇਤਂ (ਸੀ. ਸ੍ਯਾ.), ਕਯਿਰਾਥੇਨਂ (ਪੀ.)] ਪੁਨਪ੍ਪੁਨਂ;

ਤਮ੍ਹਿ ਛਨ੍ਦਂ ਕਯਿਰਾਥ, ਸੁਖੋ ਪੁਞ੍ਞਸ੍ਸ ਉਚ੍ਚਯੋ.

ਪਾਪੋਪਿ ¶ ਪਸ੍ਸਤਿ ਭਦ੍ਰਂ, ਯਾਵ ਪਾਪਂ ਨ ਪਚ੍ਚਤਿ;

ਯਦਾ ਚ ਪਚ੍ਚਤਿ ਪਾਪਂ, ਅਥ ਪਾਪੋ ਪਾਪਾਨਿ [ਅਥ ਪਾਪਾਨਿ (?)] ਪਸ੍ਸਤਿ.

ਭਦ੍ਰੋਪਿ ¶ ¶ ਪਸ੍ਸਤਿ ਪਾਪਂ, ਯਾਵ ਭਦ੍ਰਂ ਨ ਪਚ੍ਚਤਿ;

ਯਦਾ ਚ ਪਚ੍ਚਤਿ ਭਦ੍ਰਂ, ਅਥ ਭਦ੍ਰੋ ਭਦ੍ਰਾਨਿ [ਅਥ ਭਦ੍ਰਾਨਿ (?)] ਪਸ੍ਸਤਿ.

ਮਾਵਮਞ੍ਞੇਥ [ਮਾਪ੍ਪਮਞ੍ਞੇਥ (ਸੀ. ਸ੍ਯਾ. ਪੀ.)] ਪਾਪਸ੍ਸ, ਨ ਮਨ੍ਤਂ [ਨ ਮਂ ਤਂ (ਸੀ. ਪੀ.), ਨ ਮਤ੍ਤਂ (ਸ੍ਯਾ.)] ਆਗਮਿਸ੍ਸਤਿ;

ਉਦਬਿਨ੍ਦੁਨਿਪਾਤੇਨ, ਉਦਕੁਮ੍ਭੋਪਿ ਪੂਰਤਿ;

ਬਾਲੋ ਪੂਰਤਿ [ਪੂਰਤਿ ਬਾਲੋ (ਸੀ. ਕ.), ਆਪੂਰਤਿ ਬਾਲੋ (ਸ੍ਯਾ.)] ਪਾਪਸ੍ਸ, ਥੋਕਂ ਥੋਕਮ੍ਪਿ [ਥੋਕ ਥੋਕਮ੍ਪਿ (ਸੀ. ਪੀ.)] ਆਚਿਨਂ.

ਮਾਵਮਞ੍ਞੇਥ ਪੁਞ੍ਞਸ੍ਸ, ਨ ਮਨ੍ਤਂ ਆਗਮਿਸ੍ਸਤਿ;

ਉਦਬਿਨ੍ਦੁਨਿਪਾਤੇਨ, ਉਦਕੁਮ੍ਭੋਪਿ ਪੂਰਤਿ;

ਧੀਰੋ ਪੂਰਤਿ ਪੁਞ੍ਞਸ੍ਸ, ਥੋਕਂ ਥੋਕਮ੍ਪਿ ਆਚਿਨਂ.

ਵਾਣਿਜੋਵ ਭਯਂ ਮਗ੍ਗਂ, ਅਪ੍ਪਸਤ੍ਥੋ ਮਹਦ੍ਧਨੋ;

ਵਿਸਂ ਜੀਵਿਤੁਕਾਮੋਵ, ਪਾਪਾਨਿ ਪਰਿਵਜ੍ਜਯੇ.

ਪਾਣਿਮ੍ਹਿ ¶ ਚੇ ਵਣੋ ਨਾਸ੍ਸ, ਹਰੇਯ੍ਯ ਪਾਣਿਨਾ ਵਿਸਂ;

ਨਾਬ੍ਬਣਂ ਵਿਸਮਨ੍ਵੇਤਿ, ਨਤ੍ਥਿ ਪਾਪਂ ਅਕੁਬ੍ਬਤੋ.

ਯੋ ¶ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ, ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸ;

ਤਮੇਵ ਬਾਲਂ ਪਚ੍ਚੇਤਿ ਪਾਪਂ, ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋ.

ਗਬ੍ਭਮੇਕੇ ਉਪ੍ਪਜ੍ਜਨ੍ਤਿ, ਨਿਰਯਂ ਪਾਪਕਮ੍ਮਿਨੋ;

ਸਗ੍ਗਂ ਸੁਗਤਿਨੋ ਯਨ੍ਤਿ, ਪਰਿਨਿਬ੍ਬਨ੍ਤਿ ਅਨਾਸਵਾ.

ਨ ¶ ਅਨ੍ਤਲਿਕ੍ਖੇ ਨ ਸਮੁਦ੍ਦਮਜ੍ਝੇ, ਨ ਪਬ੍ਬਤਾਨਂ ਵਿਵਰਂ ਪਵਿਸ੍ਸ [ਪਵਿਸਂ (ਸ੍ਯਾ.)];

ਨ ¶ ਵਿਜ੍ਜਤੀ [ਨ ਵਿਜ੍ਜਤਿ (ਕ. ਸੀ. ਪੀ. ਕ.)] ਸੋ ਜਗਤਿਪ੍ਪਦੇਸੋ, ਯਤ੍ਥਟ੍ਠਿਤੋ [ਯਤ੍ਰਟ੍ਠਿਤੋ (ਸ੍ਯਾ.)] ਮੁਚ੍ਚੇਯ੍ਯ ਪਾਪਕਮ੍ਮਾ.

ਨ ਅਨ੍ਤਲਿਕ੍ਖੇ ਨ ਸਮੁਦ੍ਦਮਜ੍ਝੇ, ਨ ਪਬ੍ਬਤਾਨਂ ਵਿਵਰਂ ਪਵਿਸ੍ਸ;

ਨ ਵਿਜ੍ਜਤੀ ਸੋ ਜਗਤਿਪ੍ਪਦੇਸੋ, ਯਤ੍ਥਟ੍ਠਿਤਂ [ਯਤ੍ਰਟ੍ਠਿਤਂ (ਸ੍ਯਾ.)] ਨਪ੍ਪਸਹੇਯ੍ਯ ਮਚ੍ਚੁ.

ਸਬ੍ਬੇ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇ ਭਾਯਨ੍ਤਿ ਮਚ੍ਚੁਨੋ;

ਅਤ੍ਤਾਨਂ ਉਪਮਂ ਕਤ੍ਵਾ, ਨ ਹਨੇਯ੍ਯ ਨ ਘਾਤਯੇ.

ਸਬ੍ਬੇ ¶ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇਸਂ ਜੀਵਿਤਂ ਪਿਯਂ;

ਅਤ੍ਤਾਨਂ ਉਪਮਂ ਕਤ੍ਵਾ, ਨ ਹਨੇਯ੍ਯ ਨ ਘਾਤਯੇ.

ਸੁਖਕਾਮਾਨਿ ¶ ਭੂਤਾਨਿ, ਯੋ ਦਣ੍ਡੇਨ ਵਿਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਨ ਲਭਤੇ ਸੁਖਂ.

ਸੁਖਕਾਮਾਨਿ ¶ ਭੂਤਾਨਿ, ਯੋ ਦਣ੍ਡੇਨ ਨ ਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਲਭਤੇ ਸੁਖਂ.

ਮਾਵੋਚ ਫਰੁਸਂ ਕਞ੍ਚਿ, ਵੁਤ੍ਤਾ ਪਟਿਵਦੇਯ੍ਯੁ ਤਂ [ਪਟਿਵਦੇਯ੍ਯੁਂ ਤਂ (ਕ.)];

ਦੁਕ੍ਖਾ ਹਿ ਸਾਰਮ੍ਭਕਥਾ, ਪਟਿਦਣ੍ਡਾ ਫੁਸੇਯ੍ਯੁ ਤਂ [ਫੁਸੇਯ੍ਯੁਂ ਤਂ (ਕ.)].

ਸਚੇ ¶ ਨੇਰੇਸਿ ਅਤ੍ਤਾਨਂ, ਕਂਸੋ ਉਪਹਤੋ ਯਥਾ;

ਏਸ ਪਤ੍ਤੋਸਿ ਨਿਬ੍ਬਾਨਂ, ਸਾਰਮ੍ਭੋ ਤੇ ਨ ਵਿਜ੍ਜਤਿ.

ਯਥਾ ਦਣ੍ਡੇਨ ਗੋਪਾਲੋ, ਗਾਵੋ ਪਾਜੇਤਿ ਗੋਚਰਂ;

ਏਵਂ ਜਰਾ ਚ ਮਚ੍ਚੁ ਚ, ਆਯੁਂ ਪਾਜੇਨ੍ਤਿ ਪਾਣਿਨਂ.

ਅਥ ਪਾਪਾਨਿ ਕਮ੍ਮਾਨਿ, ਕਰਂ ਬਾਲੋ ਨ ਬੁਜ੍ਝਤਿ;

ਸੇਹਿ ਕਮ੍ਮੇਹਿ ਦੁਮ੍ਮੇਧੋ, ਅਗ੍ਗਿਦਡ੍ਢੋਵ ਤਪ੍ਪਤਿ.

ਯੋ ਦਣ੍ਡੇਨ ਅਦਣ੍ਡੇਸੁ, ਅਪ੍ਪਦੁਟ੍ਠੇਸੁ ਦੁਸ੍ਸਤਿ;

ਦਸਨ੍ਨਮਞ੍ਞਤਰਂ ਠਾਨਂ, ਖਿਪ੍ਪਮੇਵ ਨਿਗਚ੍ਛਤਿ.

ਵੇਦਨਂ ¶ ਫਰੁਸਂ ਜਾਨਿਂ, ਸਰੀਰਸ੍ਸ ਚ ਭੇਦਨਂ [ਸਰੀਰਸ੍ਸ ਪਭੇਦਨਂ (ਸ੍ਯਾ.)];

ਗਰੁਕਂ ਵਾਪਿ ਆਬਾਧਂ, ਚਿਤ੍ਤਕ੍ਖੇਪਞ੍ਚ [ਚਿਤ੍ਤਕ੍ਖੇਪਂ ਵ (ਸੀ. ਸ੍ਯਾ. ਪੀ.)] ਪਾਪੁਣੇ.

ਰਾਜਤੋ ਵਾ ਉਪਸਗ੍ਗਂ [ਉਪਸ੍ਸਗ੍ਗਂ (ਸੀ. ਪੀ.)], ਅਬ੍ਭਕ੍ਖਾਨਞ੍ਚ [ਅਬ੍ਭਕ੍ਖਾਨਂ ਵ (ਸੀ. ਪੀ.)] ਦਾਰੁਣਂ;

ਪਰਿਕ੍ਖਯਞ੍ਚ [ਪਰਿਕ੍ਖਯਂ ਵ (ਸੀ. ਸ੍ਯਾ. ਪੀ.)] ਞਾਤੀਨਂ, ਭੋਗਾਨਞ੍ਚ [ਭੋਗਾਨਂ ਵ (ਸੀ. ਸ੍ਯਾ. ਪੀ.)] ਪਭਙ੍ਗੁਰਂ [ਪਭਙ੍ਗੁਨਂ (ਕ.)].

ਅਥ ਵਾਸ੍ਸ ਅਗਾਰਾਨਿ, ਅਗ੍ਗਿ ਡਹਤਿ [ਡਯ੍ਹਤਿ (ਕ.)] ਪਾਵਕੋ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤਿ [ਸੋ ਉਪਪਜ੍ਜਤਿ (ਸੀ. ਸ੍ਯਾ.)].

ਨ ¶ ¶ ਨਗ੍ਗਚਰਿਯਾ ਨ ਜਟਾ ਨ ਪਙ੍ਕਾ, ਨਾਨਾਸਕਾ ਥਣ੍ਡਿਲਸਾਯਿਕਾ ਵਾ;

ਰਜੋਜਲ੍ਲਂ ਉਕ੍ਕੁਟਿਕਪ੍ਪਧਾਨਂ, ਸੋਧੇਨ੍ਤਿ ਮਚ੍ਚਂ ਅਵਿਤਿਣ੍ਣਕਙ੍ਖਂ.

ਅਲਙ੍ਕਤੋ ਚੇਪਿ ਸਮਂ ਚਰੇਯ੍ਯ, ਸਨ੍ਤੋ ਦਨ੍ਤੋ ਨਿਯਤੋ ਬ੍ਰਹ੍ਮਚਾਰੀ;

ਸਬ੍ਬੇਸੁ ¶ ਭੂਤੇਸੁ ਨਿਧਾਯ ਦਣ੍ਡਂ, ਸੋ ਬ੍ਰਾਹ੍ਮਣੋ ਸੋ ਸਮਣੋ ਸ ਭਿਕ੍ਖੁ.

ਹਿਰੀਨਿਸੇਧੋ ਪੁਰਿਸੋ, ਕੋਚਿ ਲੋਕਸ੍ਮਿ ਵਿਜ੍ਜਤਿ;

ਯੋ ਨਿਦ੍ਦਂ [ਨਿਨ੍ਦਂ (ਸੀ. ਪੀ.) ਸਂ. ਨਿ. ੧.੧੮] ਅਪਬੋਧੇਤਿ [ਅਪਬੋਧਤਿ (ਸੀ. ਸ੍ਯਾ. ਪੀ.)], ਅਸ੍ਸੋ ਭਦ੍ਰੋ ਕਸਾਮਿਵ.

ਅਸ੍ਸੋ ¶ ਯਥਾ ਭਦ੍ਰੋ ਕਸਾਨਿਵਿਟ੍ਠੋ, ਆਤਾਪਿਨੋ ਸਂਵੇਗਿਨੋ ਭਵਾਥ;

ਸਦ੍ਧਾਯ ਸੀਲੇਨ ਚ ਵੀਰਿਯੇਨ ਚ, ਸਮਾਧਿਨਾ ਧਮ੍ਮਵਿਨਿਚ੍ਛਯੇਨ ਚ;

ਸਮ੍ਪਨ੍ਨਵਿਜ੍ਜਾਚਰਣਾ ਪਤਿਸ੍ਸਤਾ, ਜਹਿਸ੍ਸਥ [ਪਹਸ੍ਸਥ (ਸੀ. ਸ੍ਯਾ. ਪੀ.)] ਦੁਕ੍ਖਮਿਦਂ ਅਨਪ੍ਪਕਂ.

ਉਦਕਞ੍ਹਿ ਨਯਨ੍ਤਿ ਨੇਤ੍ਤਿਕਾ, ਉਸੁਕਾਰਾ ਨਮਯਨ੍ਤਿ ਤੇਜਨਂ;

ਦਾਰੁਂ ਨਮਯਨ੍ਤਿ ਤਚ੍ਛਕਾ, ਅਤ੍ਤਾਨਂ ਦਮਯਨ੍ਤਿ ਸੁਬ੍ਬਤਾ.

ਕੋ ¶ ¶ ਨੁ ਹਾਸੋ [ਕਿਨ੍ਨੁ ਹਾਸੋ (ਕ.)] ਕਿਮਾਨਨ੍ਦੋ, ਨਿਚ੍ਚਂ ਪਜ੍ਜਲਿਤੇ ਸਤਿ;

ਅਨ੍ਧਕਾਰੇਨ ਓਨਦ੍ਧਾ, ਪਦੀਪਂ ਨ ਗਵੇਸਥ.

ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;

ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤਿ.

ਪਰਿਜਿਣ੍ਣਮਿਦਂ ¶ ਰੂਪਂ, ਰੋਗਨੀਲ਼ਂ [ਰੋਗਨਿਡ੍ਢਂ (ਸੀ. ਪੀ.), ਰੋਗਨਿਦ੍ਧਂ (ਸ੍ਯਾ.)] ਪਭਙ੍ਗੁਰਂ;

ਭਿਜ੍ਜਤਿ ਪੂਤਿਸਨ੍ਦੇਹੋ, ਮਰਣਨ੍ਤਞ੍ਹਿ ਜੀਵਿਤਂ.

ਯਾਨਿਮਾਨਿ ¶ ਅਪਤ੍ਥਾਨਿ [ਯਾਨਿਮਾਨਿ ਅਪਤ੍ਥਾਨਿ (ਸੀ. ਸ੍ਯਾ. ਪੀ.), ਯਾਨਿਮਾਨਿ’ਪਵਿਦ੍ਧਾਨਿ (?)], ਅਲਾਬੂਨੇਵ [ਅਲਾਪੂਨੇਵ (ਸੀ. ਸ੍ਯਾ. ਪੀ.)] ਸਾਰਦੇ;

ਕਾਪੋਤਕਾਨਿ ਅਟ੍ਠੀਨਿ, ਤਾਨਿ ਦਿਸ੍ਵਾਨ ਕਾ ਰਤਿ.

ਅਟ੍ਠੀਨਂ ਨਗਰਂ ਕਤਂ, ਮਂਸਲੋਹਿਤਲੇਪਨਂ;

ਯਤ੍ਥ ਜਰਾ ਚ ਮਚ੍ਚੁ ਚ, ਮਾਨੋ ਮਕ੍ਖੋ ਚ ਓਹਿਤੋ.

ਜੀਰਨ੍ਤਿ ਵੇ ਰਾਜਰਥਾ ਸੁਚਿਤ੍ਤਾ, ਅਥੋ ਸਰੀਰਮ੍ਪਿ ਜਰਂ ਉਪੇਤਿ;

ਸਤਞ੍ਚ ਧਮ੍ਮੋ ਨ ਜਰਂ ਉਪੇਤਿ, ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤਿ.

ਅਪ੍ਪਸ੍ਸੁਤਾਯਂ ਪੁਰਿਸੋ, ਬਲਿਬਦ੍ਧੋਵ [ਬਲਿਵਦ੍ਦੋਵ (ਸੀ. ਸ੍ਯਾ. ਪੀ.)] ਜੀਰਤਿ;

ਮਂਸਾਨਿ ਤਸ੍ਸ ਵਡ੍ਢਨ੍ਤਿ, ਪਞ੍ਞਾ ਤਸ੍ਸ ਨ ਵਡ੍ਢਤਿ.

ਅਨੇਕਜਾਤਿਸਂਸਾਰਂ ¶ , ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਗਹਕਾਰਂ [ਗਹਕਾਰਕਂ (ਸੀ. ਸ੍ਯਾ. ਪੀ.)] ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ.

ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ;

ਸਬ੍ਬਾ ¶ ਤੇ ਫਾਸੁਕਾ ਭਗ੍ਗਾ, ਗਹਕੂਟਂ ਵਿਸਙ੍ਖਤਂ;

ਵਿਸਙ੍ਖਾਰਗਤਂ ਚਿਤ੍ਤਂ, ਤਣ੍ਹਾਨਂ ਖਯਮਜ੍ਝਗਾ.

ਅਚਰਿਤ੍ਵਾ ਬ੍ਰਹ੍ਮਚਰਿਯਂ, ਅਲਦ੍ਧਾ ਯੋਬ੍ਬਨੇ ਧਨਂ;

ਜਿਣ੍ਣਕੋਞ੍ਚਾਵ ਝਾਯਨ੍ਤਿ, ਖੀਣਮਚ੍ਛੇਵ ਪਲ੍ਲਲੇ.

ਅਚਰਿਤ੍ਵਾ ¶ ਬ੍ਰਹ੍ਮਚਰਿਯਂ, ਅਲਦ੍ਧਾ ਯੋਬ੍ਬਨੇ ਧਨਂ;

ਸੇਨ੍ਤਿ ਚਾਪਾਤਿਖੀਣਾਵ, ਪੁਰਾਣਾਨਿ ਅਨੁਤ੍ਥੁਨਂ.

ਅਤ੍ਤਾਨਞ੍ਚੇ ¶ ਪਿਯਂ ਜਞ੍ਞਾ, ਰਕ੍ਖੇਯ੍ਯ ਨਂ ਸੁਰਕ੍ਖਿਤਂ;

ਤਿਣ੍ਣਂ ਅਞ੍ਞਤਰਂ ਯਾਮਂ, ਪਟਿਜਗ੍ਗੇਯ੍ਯ ਪਣ੍ਡਿਤੋ.

ਅਤ੍ਤਾਨਮੇਵ ਪਠਮਂ, ਪਤਿਰੂਪੇ ਨਿਵੇਸਯੇ;

ਅਥਞ੍ਞਮਨੁਸਾਸੇਯ੍ਯ, ਨ ਕਿਲਿਸ੍ਸੇਯ੍ਯ ਪਣ੍ਡਿਤੋ.

ਅਤ੍ਤਾਨਂ ¶ ਚੇ ਤਥਾ ਕਯਿਰਾ, ਯਥਾਞ੍ਞਮਨੁਸਾਸਤਿ;

ਸੁਦਨ੍ਤੋ ਵਤ ਦਮੇਥ, ਅਤ੍ਤਾ ਹਿ ਕਿਰ ਦੁਦ੍ਦਮੋ.

ਅਤ੍ਤਾ ਹਿ ਅਤ੍ਤਨੋ ਨਾਥੋ, ਕੋ ਹਿ ਨਾਥੋ ਪਰੋ ਸਿਯਾ;

ਅਤ੍ਤਨਾ ਹਿ ਸੁਦਨ੍ਤੇਨ, ਨਾਥਂ ਲਭਤਿ ਦੁਲ੍ਲਭਂ.

ਅਤ੍ਤਨਾ ਹਿ ਕਤਂ ਪਾਪਂ, ਅਤ੍ਤਜਂ ਅਤ੍ਤਸਮ੍ਭਵਂ;

ਅਭਿਮਤ੍ਥਤਿ [ਅਭਿਮਨ੍ਤਤਿ (ਸੀ. ਪੀ.)] ਦੁਮ੍ਮੇਧਂ, ਵਜਿਰਂ ਵਸ੍ਮਮਯਂ [ਵਜਿਰਂਵ’ਮ੍ਹਮਯਂ (ਸ੍ਯਾ. ਕ.)] ਮਣਿਂ.

ਯਸ੍ਸ ¶ ਅਚ੍ਚਨ੍ਤਦੁਸ੍ਸੀਲ੍ਯਂ, ਮਾਲੁਵਾ ਸਾਲਮਿਵੋਤ੍ਥਤਂ;

ਕਰੋਤਿ ਸੋ ਤਥਤ੍ਤਾਨਂ, ਯਥਾ ਨਂ ਇਚ੍ਛਤੀ ਦਿਸੋ.

ਸੁਕਰਾਨਿ ¶ ਅਸਾਧੂਨਿ, ਅਤ੍ਤਨੋ ਅਹਿਤਾਨਿ ਚ;

ਯਂ ਵੇ ਹਿਤਞ੍ਚ ਸਾਧੁਞ੍ਚ, ਤਂ ਵੇ ਪਰਮਦੁਕ੍ਕਰਂ.

ਯੋ ਸਾਸਨਂ ਅਰਹਤਂ, ਅਰਿਯਾਨਂ ਧਮ੍ਮਜੀਵਿਨਂ;

ਪਟਿਕ੍ਕੋਸਤਿ ਦੁਮ੍ਮੇਧੋ, ਦਿਟ੍ਠਿਂ ਨਿਸ੍ਸਾਯ ਪਾਪਿਕਂ;

ਫਲਾਨਿ ਕਟ੍ਠਕਸ੍ਸੇਵ, ਅਤ੍ਤਘਾਤਾਯ [ਅਤ੍ਤਘਞ੍ਞਾਯ (ਸੀ. ਸ੍ਯਾ. ਪੀ.)] ਫਲ੍ਲਤਿ.

ਅਤ੍ਤਨਾ ¶ ਹਿ [ਅਤ੍ਤਨਾਵ (ਸੀ. ਸ੍ਯਾ. ਪੀ.)] ਕਤਂ ਪਾਪਂ, ਅਤ੍ਤਨਾ ਸਂਕਿਲਿਸ੍ਸਤਿ;

ਅਤ੍ਤਨਾ ਅਕਤਂ ਪਾਪਂ, ਅਤ੍ਤਨਾਵ ਵਿਸੁਜ੍ਝਤਿ;

ਸੁਦ੍ਧੀ ਅਸੁਦ੍ਧਿ ਪਚ੍ਚਤ੍ਤਂ, ਨਾਞ੍ਞੋ ਅਞ੍ਞਂ [ਨਾਞ੍ਞਮਞ੍ਞੋ(ਸੀ.)] ਵਿਸੋਧਯੇ.

ਅਤ੍ਤਦਤ੍ਥਂ ¶ ਪਰਤ੍ਥੇਨ, ਬਹੁਨਾਪਿ ਨ ਹਾਪਯੇ;

ਅਤ੍ਤਦਤ੍ਥਮਭਿਞ੍ਞਾਯ, ਸਦਤ੍ਥਪਸੁਤੋ ਸਿਯਾ.

ਹੀਨਂ ਧਮ੍ਮਂ ਨ ਸੇਵੇਯ੍ਯ, ਪਮਾਦੇਨ ਨ ਸਂਵਸੇ;

ਮਿਚ੍ਛਾਦਿਟ੍ਠਿਂ ਨ ਸੇਵੇਯ੍ਯ, ਨ ਸਿਯਾ ਲੋਕਵਡ੍ਢਨੋ.

ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯ, ਧਮ੍ਮਂ ਸੁਚਰਿਤਂ ਚਰੇ;

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

ਧਮ੍ਮਂ ¶ ¶ ਚਰੇ ਸੁਚਰਿਤਂ, ਨ ਨਂ ਦੁਚ੍ਚਰਿਤਂ ਚਰੇ;

ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

ਯਥਾ ਪੁਬ੍ਬੁਲ਼ਕਂ [ਪੁਬ੍ਬੁਲ਼ਕਂ (ਸੀ. ਪੀ.)] ਪਸ੍ਸੇ, ਯਥਾ ਪਸ੍ਸੇ ਮਰੀਚਿਕਂ;

ਏਵਂ ਲੋਕਂ ਅਵੇਕ੍ਖਨ੍ਤਂ, ਮਚ੍ਚੁਰਾਜਾ ਨ ਪਸ੍ਸਤਿ.

ਏਥ ਪਸ੍ਸਥਿਮਂ ਲੋਕਂ, ਚਿਤ੍ਤਂ ਰਾਜਰਥੂਪਮਂ;

ਯਤ੍ਥ ਬਾਲਾ ਵਿਸੀਦਨ੍ਤਿ, ਨਤ੍ਥਿ ਸਙ੍ਗੋ ਵਿਜਾਨਤਂ.

ਯੋ ¶ ¶ ਚ ਪੁਬ੍ਬੇ ਪਮਜ੍ਜਿਤ੍ਵਾ, ਪਚ੍ਛਾ ਸੋ ਨਪ੍ਪਮਜ੍ਜਤਿ;

ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ.

ਯਸ੍ਸ ਪਾਪਂ ਕਤਂ ਕਮ੍ਮਂ, ਕੁਸਲੇਨ ਪਿਧੀਯਤਿ [ਪਿਤੀਯਤਿ (ਸੀ. ਸ੍ਯਾ. ਪੀ.)];

ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ.

ਅਨ੍ਧਭੂਤੋ [ਅਨ੍ਧੀਭੂਤੋ (ਕ.)] ਅਯਂ ਲੋਕੋ, ਤਨੁਕੇਤ੍ਥ ਵਿਪਸ੍ਸਤਿ;

ਸਕੁਣੋ ਜਾਲਮੁਤ੍ਤੋਵ, ਅਪ੍ਪੋ ਸਗ੍ਗਾਯ ਗਚ੍ਛਤਿ.

ਹਂਸਾਦਿਚ੍ਚਪਥੇ ਯਨ੍ਤਿ, ਆਕਾਸੇ ਯਨ੍ਤਿ ਇਦ੍ਧਿਯਾ;

ਨੀਯਨ੍ਤਿ ਧੀਰਾ ਲੋਕਮ੍ਹਾ, ਜੇਤ੍ਵਾ ਮਾਰਂ ਸਵਾਹਿਨਿਂ [ਸਵਾਹਨਂ (ਸ੍ਯਾ. ਕ.)].

ਏਕਂ ਧਮ੍ਮਂ ਅਤੀਤਸ੍ਸ, ਮੁਸਾਵਾਦਿਸ੍ਸ ਜਨ੍ਤੁਨੋ;

ਵਿਤਿਣ੍ਣਪਰਲੋਕਸ੍ਸ, ਨਤ੍ਥਿ ਪਾਪਂ ਅਕਾਰਿਯਂ.

ਨ ¶ ਵੇ ਕਦਰਿਯਾ ਦੇਵਲੋਕਂ ਵਜਨ੍ਤਿ, ਬਾਲਾ ਹਵੇ ਨਪ੍ਪਸਂਸਨ੍ਤਿ ਦਾਨਂ;

ਧੀਰੋ ਚ ਦਾਨਂ ਅਨੁਮੋਦਮਾਨੋ, ਤੇਨੇਵ ¶ ਸੋ ਹੋਤਿ ਸੁਖੀ ਪਰਤ੍ਥ.

ਪਥਬ੍ਯਾ ਏਕਰਜ੍ਜੇਨ, ਸਗ੍ਗਸ੍ਸ ਗਮਨੇਨ ਵਾ;

ਸਬ੍ਬਲੋਕਾਧਿਪਚ੍ਚੇਨ, ਸੋਤਾਪਤ੍ਤਿਫਲਂ ਵਰਂ.

ਯਸ੍ਸ ¶ ¶ ਜਿਤਂ ਨਾਵਜੀਯਤਿ, ਜਿਤਂ ਯਸ੍ਸ [ਜਿਤਮਸ੍ਸ (ਸੀ. ਸ੍ਯਾ. ਪੀ.), ਜਿਤਂ ਮਸ੍ਸ (ਕ.)] ਨੋ ਯਾਤਿ ਕੋਚਿ ਲੋਕੇ;

ਤਂ ਬੁਦ੍ਧਮਨਨ੍ਤਗੋਚਰਂ, ਅਪਦਂ ਕੇਨ ਪਦੇਨ ਨੇਸ੍ਸਥ.

ਯਸ੍ਸ ਜਾਲਿਨੀ ਵਿਸਤ੍ਤਿਕਾ, ਤਣ੍ਹਾ ਨਤ੍ਥਿ ਕੁਹਿਞ੍ਚਿ ਨੇਤਵੇ;

ਤਂ ਬੁਦ੍ਧਮਨਨ੍ਤਗੋਚਰਂ, ਅਪਦਂ ਕੇਨ ਪਦੇਨ ਨੇਸ੍ਸਥ.

ਯੇ ਝਾਨਪਸੁਤਾ ਧੀਰਾ, ਨੇਕ੍ਖਮ੍ਮੂਪਸਮੇ ਰਤਾ;

ਦੇਵਾਪਿ ਤੇਸਂ ਪਿਹਯਨ੍ਤਿ, ਸਮ੍ਬੁਦ੍ਧਾਨਂ ਸਤੀਮਤਂ.

ਕਿਚ੍ਛੋ ¶ ਮਨੁਸ੍ਸਪਟਿਲਾਭੋ, ਕਿਚ੍ਛਂ ਮਚ੍ਚਾਨ ਜੀਵਿਤਂ;

ਕਿਚ੍ਛਂ ਸਦ੍ਧਮ੍ਮਸ੍ਸਵਨਂ, ਕਿਚ੍ਛੋ ਬੁਦ੍ਧਾਨਮੁਪ੍ਪਾਦੋ.

ਸਬ੍ਬਪਾਪਸ੍ਸ ਅਕਰਣਂ, ਕੁਸਲਸ੍ਸ ਉਪਸਮ੍ਪਦਾ [ਕੁਸਲਸ੍ਸੂਪਸਮ੍ਪਦਾ (ਸ੍ਯਾ.)];

ਸਚਿਤ੍ਤਪਰਿਯੋਦਪਨਂ ¶ [ਸਚਿਤ੍ਤਪਰਿਯੋਦਾਪਨਂ (?)], ਏਤਂ ਬੁਦ੍ਧਾਨ ਸਾਸਨਂ.

ਖਨ੍ਤੀ ਪਰਮਂ ਤਪੋ ਤਿਤਿਕ੍ਖਾ, ਨਿਬ੍ਬਾਨਂ [ਨਿਬ੍ਬਾਣਂ (ਕ. ਸੀ. ਪੀ.)] ਪਰਮਂ ਵਦਨ੍ਤਿ ਬੁਦ੍ਧਾ;

ਨ ਹਿ ਪਬ੍ਬਜਿਤੋ ਪਰੂਪਘਾਤੀ, ਨ [ਅਯਂ ਨਕਾਰੋ ਸੀ. ਸ੍ਯਾ. ਪੀ. ਪਾਤ੍ਥਕੇਸੁ ਨ ਦਿਸ੍ਸਤਿ] ਸਮਣੋ ਹੋਤਿ ਪਰਂ ਵਿਹੇਠਯਨ੍ਤੋ.

ਅਨੂਪਵਾਦੋ ਅਨੂਪਘਾਤੋ [ਅਨੁਪਵਾਦੋ ਅਨੁਪਘਾਤੋ (ਸ੍ਯਾ. ਕ.)], ਪਾਤਿਮੋਕ੍ਖੇ ਚ ਸਂਵਰੋ;

ਮਤ੍ਤਞ੍ਞੁਤਾ ਚ ਭਤ੍ਤਸ੍ਮਿਂ, ਪਨ੍ਤਞ੍ਚ ਸਯਨਾਸਨਂ;

ਅਧਿਚਿਤ੍ਤੇ ਚ ਆਯੋਗੋ, ਏਤਂ ਬੁਦ੍ਧਾਨ ਸਾਸਨਂ.

ਨ ¶ ਕਹਾਪਣਵਸ੍ਸੇਨ, ਤਿਤ੍ਤਿ ਕਾਮੇਸੁ ਵਿਜ੍ਜਤਿ;

ਅਪ੍ਪਸ੍ਸਾਦਾ ਦੁਖਾ ਕਾਮਾ, ਇਤਿ ਵਿਞ੍ਞਾਯ ਪਣ੍ਡਿਤੋ.

ਅਪਿ ¶ ਦਿਬ੍ਬੇਸੁ ਕਾਮੇਸੁ, ਰਤਿਂ ਸੋ ਨਾਧਿਗਚ੍ਛਤਿ;

ਤਣ੍ਹਕ੍ਖਯਰਤੋ ਹੋਤਿ, ਸਮ੍ਮਾਸਮ੍ਬੁਦ੍ਧਸਾਵਕੋ.

ਬਹੁਂ ਵੇ ਸਰਣਂ ਯਨ੍ਤਿ, ਪਬ੍ਬਤਾਨਿ ਵਨਾਨਿ ਚ;

ਆਰਾਮਰੁਕ੍ਖਚੇਤ੍ਯਾਨਿ, ਮਨੁਸ੍ਸਾ ਭਯਤਜ੍ਜਿਤਾ.

ਨੇਤਂ ਖੋ ਸਰਣਂ ਖੇਮਂ, ਨੇਤਂ ਸਰਣਮੁਤ੍ਤਮਂ;

ਨੇਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤਿ.

ਯੋ ¶ ਚ ਬੁਦ੍ਧਞ੍ਚ ਧਮ੍ਮਞ੍ਚ, ਸਙ੍ਘਞ੍ਚ ਸਰਣਂ ਗਤੋ;

ਚਤ੍ਤਾਰਿ ਅਰਿਯਸਚ੍ਚਾਨਿ, ਸਮ੍ਮਪ੍ਪਞ੍ਞਾਯ ਪਸ੍ਸਤਿ.

ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

ਏਤਂ ¶ ਖੋ ਸਰਣਂ ਖੇਮਂ, ਏਤਂ ਸਰਣਮੁਤ੍ਤਮਂ;

ਏਤਂ ਸਰਣਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਤਿ.

ਦੁਲ੍ਲਭੋ ਪੁਰਿਸਾਜਞ੍ਞੋ, ਨ ਸੋ ਸਬ੍ਬਤ੍ਥ ਜਾਯਤਿ;

ਯਤ੍ਥ ਸੋ ਜਾਯਤਿ ਧੀਰੋ, ਤਂ ਕੁਲਂ ਸੁਖਮੇਧਤਿ.

ਸੁਖੋ ਬੁਦ੍ਧਾਨਮੁਪ੍ਪਾਦੋ, ਸੁਖਾ ਸਦ੍ਧਮ੍ਮਦੇਸਨਾ;

ਸੁਖਾ ਸਙ੍ਘਸ੍ਸ ਸਾਮਗ੍ਗੀ, ਸਮਗ੍ਗਾਨਂ ਤਪੋ ਸੁਖੋ.

ਪੂਜਾਰਹੇ ਪੂਜਯਤੋ, ਬੁਦ੍ਧੇ ਯਦਿ ਵ ਸਾਵਕੇ;

ਪਪਞ੍ਚਸਮਤਿਕ੍ਕਨ੍ਤੇ, ਤਿਣ੍ਣਸੋਕਪਰਿਦ੍ਦਵੇ.

ਤੇ ¶ ¶ ਤਾਦਿਸੇ ਪੂਜਯਤੋ, ਨਿਬ੍ਬੁਤੇ ਅਕੁਤੋਭਯੇ;

ਨ ਸਕ੍ਕਾ ਪੁਞ੍ਞਂ ਸਙ੍ਖਾਤੁਂ, ਇਮੇਤ੍ਤਮਪਿ ਕੇਨਚਿ.

ਬੁਦ੍ਧਵਗ੍ਗੋ ਚੁਦ੍ਦਸਮੋ ਨਿਟ੍ਠਿਤੋ.

ਸੁਸੁਖਂ ¶ ਵਤ ਜੀਵਾਮ, ਵੇਰਿਨੇਸੁ ਅਵੇਰਿਨੋ;

ਵੇਰਿਨੇਸੁ ਮਨੁਸ੍ਸੇਸੁ, ਵਿਹਰਾਮ ਅਵੇਰਿਨੋ.

ਸੁਸੁਖਂ ¶ ਵਤ ਜੀਵਾਮ, ਆਤੁਰੇਸੁ ਅਨਾਤੁਰਾ;

ਆਤੁਰੇਸੁ ਮਨੁਸ੍ਸੇਸੁ, ਵਿਹਰਾਮ ਅਨਾਤੁਰਾ.

ਸੁਸੁਖਂ ਵਤ ਜੀਵਾਮ, ਉਸ੍ਸੁਕੇਸੁ ਅਨੁਸ੍ਸੁਕਾ;

ਉਸ੍ਸੁਕੇਸੁ ¶ ਮਨਸ੍ਸੇਸੁ, ਵਿਹਰਾਮ ਅਨੁਸ੍ਸੁਕਾ.

ਸੁਸੁਖਂ ਵਤ ਜੀਵਾਮ, ਯੇਸਂ ਨੋ ਨਤ੍ਥਿ ਕਿਞ੍ਚਨਂ;

ਪੀਤਿਭਕ੍ਖਾ ਭਵਿਸ੍ਸਾਮ, ਦੇਵਾ ਆਭਸ੍ਸਰਾ ਯਥਾ.

ਜਯਂ ਵੇਰਂ ਪਸਵਤਿ, ਦੁਕ੍ਖਂ ਸੇਤਿ ਪਰਾਜਿਤੋ;

ਉਪਸਨ੍ਤੋ ਸੁਖਂ ਸੇਤਿ, ਹਿਤ੍ਵਾ ਜਯਪਰਾਜਯਂ.

ਨਤ੍ਥਿ ਰਾਗਸਮੋ ਅਗ੍ਗਿ, ਨਤ੍ਥਿ ਦੋਸਸਮੋ ਕਲਿ;

ਨਤ੍ਥਿ ਖਨ੍ਧਸਮਾ [ਖਨ੍ਧਾਦਿਸਾ (ਸੀ. ਸ੍ਯਾ. ਪੀ. ਰੂਪਸਿਦ੍ਧਿਯਾ ਸਮੇਤਿ)] ਦੁਕ੍ਖਾ, ਨਤ੍ਥਿ ਸਨ੍ਤਿਪਰਂ ਸੁਖਂ.

ਜਿਘਚ੍ਛਾਪਰਮਾ ¶ ਰੋਗਾ, ਸਙ੍ਖਾਰਪਰਮਾ [ਸਙ੍ਕਾਰਾ ਪਰਮਾ (ਬਹੂਸੁ)] ਦੁਖਾ;

ਏਤਂ ਞਤ੍ਵਾ ਯਥਾਭੂਤਂ, ਨਿਬ੍ਬਾਨਂ ਪਰਮਂ ਸੁਖਂ.

ਆਰੋਗ੍ਯਪਰਮਾ ਲਾਭਾ, ਸਨ੍ਤੁਟ੍ਠਿਪਰਮਂ ਧਨਂ;

ਵਿਸ੍ਸਾਸਪਰਮਾ ਞਾਤਿ [ਵਿਸ੍ਸਾਸਪਰਮੋ ਞਾਤਿ (ਕ. ਸੀ.), ਵਿਸ੍ਸਾਸਪਰਮਾ ਞਾਤੀ (ਸੀ. ਅਟ੍ਠ.), ਵਿਸ੍ਸਾਸਾ ਪਰਮਾ ਞਾਤਿ (ਕ.)], ਨਿਬ੍ਬਾਨਂ ਪਰਮਂ [ਨਿਬ੍ਬਾਣਪਰਮਂ (ਕ. ਸੀ.)] ਸੁਖਂ.

ਪਵਿਵੇਕਰਸਂ ¶ ਪਿਤ੍ਵਾ [ਪੀਤ੍ਵਾ (ਸੀ. ਸ੍ਯਾ. ਕਂ. ਪੀ.)], ਰਸਂ ਉਪਸਮਸ੍ਸ ਚ;

ਨਿਦ੍ਦਰੋ ਹੋਤਿ ਨਿਪ੍ਪਾਪੋ, ਧਮ੍ਮਪੀਤਿਰਸਂ ਪਿਵਂ.

ਸਾਹੁ ¶ ਦਸ੍ਸਨਮਰਿਯਾਨਂ, ਸਨ੍ਨਿਵਾਸੋ ਸਦਾ ਸੁਖੋ;

ਅਦਸ੍ਸਨੇਨ ਬਾਲਾਨਂ, ਨਿਚ੍ਚਮੇਵ ਸੁਖੀ ਸਿਯਾ.

ਬਾਲਸਙ੍ਗਤਚਾਰੀ [ਬਾਲਸਙ੍ਗਤਿਚਾਰੀ (ਕ.)] ਹਿ, ਦੀਘਮਦ੍ਧਾਨ ਸੋਚਤਿ;

ਦੁਕ੍ਖੋ ਬਾਲੇਹਿ ਸਂਵਾਸੋ, ਅਮਿਤ੍ਤੇਨੇਵ ਸਬ੍ਬਦਾ;

ਧੀਰੋ ਚ ਸੁਖਸਂਵਾਸੋ, ਞਾਤੀਨਂਵ ਸਮਾਗਮੋ.

ਧੀਰਞ੍ਚ ਪਞ੍ਞਞ੍ਚ ਬਹੁਸ੍ਸੁਤਞ੍ਚ, ਧੋਰਯ੍ਹਸੀਲਂ ¶ ਵਤਵਨ੍ਤਮਰਿਯਂ;

ਤਂ ਤਾਦਿਸਂ ਸਪ੍ਪੁਰਿਸਂ ਸੁਮੇਧਂ, ਭਜੇਥ ਨਕ੍ਖਤ੍ਤਪਥਂਵ ਚਨ੍ਦਿਮਾ [ਤਸ੍ਮਾ ਹਿ ਧੀਰਂ ਪਞ੍ਞਞ੍ਚ, ਬਹੁਸ੍ਸੁਤਞ੍ਚ ਧੋਰਯ੍ਹਂ; ਸੀਲਂ ਧੁਤਵਤਮਰਿਯਂ, ਤਂ ਤਾਦਿਸਂ ਸਪ੍ਪੁਰਿਸਂ; ਸੁਮੇਧਂ ਭਜੇਥ ਨਕ੍ਖਤ੍ਤਪਥਂਵ ਚਨ੍ਦਿਮਾ; (ਕ.)].

ਅਯੋਗੇ ¶ ਯੁਞ੍ਜਮਤ੍ਤਾਨਂ, ਯੋਗਸ੍ਮਿਞ੍ਚ ਅਯੋਜਯਂ;

ਅਤ੍ਥਂ ਹਿਤ੍ਵਾ ਪਿਯਗ੍ਗਾਹੀ, ਪਿਹੇਤਤ੍ਤਾਨੁਯੋਗਿਨਂ.

ਮਾ ¶ ਪਿਯੇਹਿ ਸਮਾਗਞ੍ਛਿ, ਅਪ੍ਪਿਯੇਹਿ ਕੁਦਾਚਨਂ;

ਪਿਯਾਨਂ ਅਦਸ੍ਸਨਂ ਦੁਕ੍ਖਂ, ਅਪ੍ਪਿਯਾਨਞ੍ਚ ਦਸ੍ਸਨਂ.

ਤਸ੍ਮਾ ਪਿਯਂ ਨ ਕਯਿਰਾਥ, ਪਿਯਾਪਾਯੋ ਹਿ ਪਾਪਕੋ;

ਗਨ੍ਥਾ ਤੇਸਂ ਨ ਵਿਜ੍ਜਨ੍ਤਿ, ਯੇਸਂ ਨਤ੍ਥਿ ਪਿਯਾਪ੍ਪਿਯਂ.

ਪਿਯਤੋ ਜਾਯਤੀ ਸੋਕੋ, ਪਿਯਤੋ ਜਾਯਤੀ [ਜਾਯਤੇ (ਕ.)] ਭਯਂ;

ਪਿਯਤੋ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯਂ.

ਪੇਮਤੋ ¶ ਜਾਯਤੀ ਸੋਕੋ, ਪੇਮਤੋ ਜਾਯਤੀ ਭਯਂ;

ਪੇਮਤੋ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯਂ.

ਰਤਿਯਾ ਜਾਯਤੀ ਸੋਕੋ, ਰਤਿਯਾ ਜਾਯਤੀ ਭਯਂ;

ਰਤਿਯਾ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯਂ.

ਕਾਮਤੋ ਜਾਯਤੀ ਸੋਕੋ, ਕਾਮਤੋ ਜਾਯਤੀ ਭਯਂ;

ਕਾਮਤੋ ¶ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯਂ.

ਤਣ੍ਹਾਯ ਜਾਯਤੀ [ਜਾਯਤੇ (ਕ.)] ਸੋਕੋ, ਤਣ੍ਹਾਯ ਜਾਯਤੀ ਭਯਂ;

ਤਣ੍ਹਾਯ ਵਿਪ੍ਪਮੁਤ੍ਤਸ੍ਸ, ਨਤ੍ਥਿ ਸੋਕੋ ਕੁਤੋ ਭਯਂ.

ਸੀਲਦਸ੍ਸਨਸਮ੍ਪਨ੍ਨਂ ¶ , ਧਮ੍ਮਟ੍ਠਂ ਸਚ੍ਚਵੇਦਿਨਂ;

ਅਤ੍ਤਨੋ ਕਮ੍ਮ ਕੁਬ੍ਬਾਨਂ, ਤਂ ਜਨੋ ਕੁਰੁਤੇ ਪਿਯਂ.

ਛਨ੍ਦਜਾਤੋ ਅਨਕ੍ਖਾਤੇ, ਮਨਸਾ ਚ ਫੁਟੋ ਸਿਯਾ;

ਕਾਮੇਸੁ ਚ ਅਪ੍ਪਟਿਬਦ੍ਧਚਿਤ੍ਤੋ [ਅਪ੍ਪਟਿਬਨ੍ਧਚਿਤ੍ਤੋ (ਕ.)], ਉਦ੍ਧਂਸੋਤੋਤਿ ਵੁਚ੍ਚਤਿ.

ਚਿਰਪ੍ਪਵਾਸਿਂ ਪੁਰਿਸਂ, ਦੂਰਤੋ ਸੋਤ੍ਥਿਮਾਗਤਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਅਭਿਨਨ੍ਦਨ੍ਤਿ ਆਗਤਂ.

ਤਥੇਵ ¶ ਕਤਪੁਞ੍ਞਮ੍ਪਿ, ਅਸ੍ਮਾ ਲੋਕਾ ਪਰਂ ਗਤਂ;

ਪੁਞ੍ਞਾਨਿ ਪਟਿਗਣ੍ਹਨ੍ਤਿ, ਪਿਯਂ ਞਾਤੀਵ ਆਗਤਂ.

ਕੋਧਂ ¶ ਜਹੇ ਵਿਪ੍ਪਜਹੇਯ੍ਯ ਮਾਨਂ, ਸਂਯੋਜਨਂ ਸਬ੍ਬਮਤਿਕ੍ਕਮੇਯ੍ਯ;

ਤਂ ਨਾਮਰੂਪਸ੍ਮਿਮਸਜ੍ਜਮਾਨਂ, ਅਕਿਞ੍ਚਨਂ ਨਾਨੁਪਤਨ੍ਤਿ ਦੁਕ੍ਖਾ.

ਯੋ ਵੇ ਉਪ੍ਪਤਿਤਂ ਕੋਧਂ, ਰਥਂ ਭਨ੍ਤਂਵ ਵਾਰਯੇ [ਧਾਰਯੇ (ਸੀ. ਸ੍ਯਾ. ਪੀ.)];

ਤਮਹਂ ¶ ਸਾਰਥਿਂ ਬ੍ਰੂਮਿ, ਰਸ੍ਮਿਗ੍ਗਾਹੋ ਇਤਰੋ ਜਨੋ.

ਅਕ੍ਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;

ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾਲਿਕਵਾਦਿਨਂ.

ਸਚ੍ਚਂ ਭਣੇ ਨ ਕੁਜ੍ਝੇਯ੍ਯ, ਦਜ੍ਜਾ ਅਪ੍ਪਮ੍ਪਿ [ਦਜ੍ਜਾ’ਪ੍ਪਸ੍ਮਿਮ੍ਪਿ (ਸੀ. ਪੀ.), ਦਜ੍ਜਾ ਅਪ੍ਪਸ੍ਮਿ (ਸ੍ਯਾ. ਕ.)] ਯਾਚਿਤੋ;

ਏਤੇਹਿ ਤੀਹਿ ਠਾਨੇਹਿ, ਗਚ੍ਛੇ ਦੇਵਾਨ ਸਨ੍ਤਿਕੇ.

ਅਹਿਂਸਕਾ ¶ ¶ ਯੇ ਮੁਨਯੋ [ਅਹਿਂਸਕਾਯਾ ਮੁਨਯੋ (ਕ.)], ਨਿਚ੍ਚਂ ਕਾਯੇਨ ਸਂਵੁਤਾ;

ਤੇ ਯਨ੍ਤਿ ਅਚ੍ਚੁਤਂ ਠਾਨਂ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ.

ਸਦਾ ਜਾਗਰਮਾਨਾਨਂ, ਅਹੋਰਤ੍ਤਾਨੁਸਿਕ੍ਖਿਨਂ;

ਨਿਬ੍ਬਾਨਂ ਅਧਿਮੁਤ੍ਤਾਨਂ, ਅਤ੍ਥਂ ਗਚ੍ਛਨ੍ਤਿ ਆਸਵਾ.

ਪੋਰਾਣਮੇਤਂ ¶ ਅਤੁਲ, ਨੇਤਂ ਅਜ੍ਜਤਨਾਮਿਵ;

ਨਿਨ੍ਦਨ੍ਤਿ ਤੁਣ੍ਹਿਮਾਸੀਨਂ, ਨਿਨ੍ਦਨ੍ਤਿ ਬਹੁਭਾਣਿਨਂ;

ਮਿਤਭਾਣਿਮ੍ਪਿ ਨਿਨ੍ਦਨ੍ਤਿ, ਨਤ੍ਥਿ ਲੋਕੇ ਅਨਿਨ੍ਦਿਤੋ.

ਨ ਚਾਹੁ ਨ ਚ ਭਵਿਸ੍ਸਤਿ, ਨ ਚੇਤਰਹਿ ਵਿਜ੍ਜਤਿ;

ਏਕਨ੍ਤਂ ਨਿਨ੍ਦਿਤੋ ਪੋਸੋ, ਏਕਨ੍ਤਂ ਵਾ ਪਸਂਸਿਤੋ.

ਯਂ ਚੇ ਵਿਞ੍ਞੂ ਪਸਂਸਨ੍ਤਿ, ਅਨੁਵਿਚ੍ਚ ਸੁਵੇ ਸੁਵੇ;

ਅਚ੍ਛਿਦ੍ਦਵੁਤ੍ਤਿਂ [ਅਚ੍ਛਿਨ੍ਨਵੁਤ੍ਤਿਂ (ਕ.)] ਮੇਧਾਵਿਂ, ਪਞ੍ਞਾਸੀਲਸਮਾਹਿਤਂ.

ਨਿਕ੍ਖਂ [ਨੇਕ੍ਖਂ (ਸੀ. ਸ੍ਯਾ. ਪੀ.)] ਜਮ੍ਬੋਨਦਸ੍ਸੇਵ, ਕੋ ਤਂ ਨਿਨ੍ਦਿਤੁਮਰਹਤਿ;

ਦੇਵਾਪਿ ਨਂ ਪਸਂਸਨ੍ਤਿ, ਬ੍ਰਹ੍ਮੁਨਾਪਿ ਪਸਂਸਿਤੋ.

ਕਾਯਪ੍ਪਕੋਪਂ ਰਕ੍ਖੇਯ੍ਯ, ਕਾਯੇਨ ਸਂਵੁਤੋ ਸਿਯਾ;

ਕਾਯਦੁਚ੍ਚਰਿਤਂ ਹਿਤ੍ਵਾ, ਕਾਯੇਨ ਸੁਚਰਿਤਂ ਚਰੇ.

ਵਚੀਪਕੋਪਂ ¶ ਰਕ੍ਖੇਯ੍ਯ, ਵਾਚਾਯ ਸਂਵੁਤੋ ਸਿਯਾ;

ਵਚੀਦੁਚ੍ਚਰਿਤਂ ਹਿਤ੍ਵਾ, ਵਾਚਾਯ ਸੁਚਰਿਤਂ ਚਰੇ.

ਮਨੋਪਕੋਪਂ ਰਕ੍ਖੇਯ੍ਯ, ਮਨਸਾ ਸਂਵੁਤੋ ਸਿਯਾ;

ਮਨੋਦੁਚ੍ਚਰਿਤਂ ਹਿਤ੍ਵਾ, ਮਨਸਾ ਸੁਚਰਿਤਂ ਚਰੇ.

ਕਾਯੇਨ ¶ ਸਂਵੁਤਾ ਧੀਰਾ, ਅਥੋ ਵਾਚਾਯ ਸਂਵੁਤਾ;

ਮਨਸਾ ਸਂਵੁਤਾ ਧੀਰਾ, ਤੇ ਵੇ ਸੁਪਰਿਸਂਵੁਤਾ.

ਪਣ੍ਡੁਪਲਾਸੋਵ ¶ ਦਾਨਿਸਿ, ਯਮਪੁਰਿਸਾਪਿ ਚ ਤੇ [ਤਂ (ਸੀ. ਸ੍ਯਾ. ਕਂ. ਪੀ.)] ਉਪਟ੍ਠਿਤਾ;

ਉਯ੍ਯੋਗਮੁਖੇ ਚ ਤਿਟ੍ਠਸਿ, ਪਾਥੇਯ੍ਯਮ੍ਪਿ ਚ ਤੇ ਨ ਵਿਜ੍ਜਤਿ.

ਸੋ ¶ ਕਰੋਹਿ ਦੀਪਮਤ੍ਤਨੋ, ਖਿਪ੍ਪਂ ਵਾਯਮ ਪਣ੍ਡਿਤੋ ਭਵ;

ਨਿਦ੍ਧਨ੍ਤਮਲੋ ਅਨਙ੍ਗਣੋ, ਦਿਬ੍ਬਂ ਅਰਿਯਭੂਮਿਂ ਉਪੇਹਿਸਿ [ਦਿਬ੍ਬਂ ਅਰਿਯਭੂਮਿਮੇਹਿਸਿ (ਸੀ. ਸ੍ਯਾ. ਪੀ.), ਦਿਬ੍ਬਮਰਿਯਭੂਮਿਂ ਉਪੇਹਿਸਿ (?)].

ਉਪਨੀਤਵਯੋ ਚ ਦਾਨਿਸਿ, ਸਮ੍ਪਯਾਤੋਸਿ ¶ ਯਮਸ੍ਸ ਸਨ੍ਤਿਕੇ;

ਵਾਸੋ [ਵਾਸੋਪਿ ਚ (ਬਹੂਸੁ)] ਤੇ ਨਤ੍ਥਿ ਅਨ੍ਤਰਾ, ਪਾਥੇਯ੍ਯਮ੍ਪਿ ਚ ਤੇ ਨ ਵਿਜ੍ਜਤਿ.

ਸੋ ਕਰੋਹਿ ਦੀਪਮਤ੍ਤਨੋ, ਖਿਪ੍ਪਂ ਵਾਯਮ ਪਣ੍ਡਿਤੋ ਭਵ;

ਨਿਦ੍ਧਨ੍ਤਮਲੋ ਅਨਙ੍ਗਣੋ, ਨ ਪੁਨਂ ਜਾਤਿਜਰਂ [ਨ ਪੁਨ ਜਾਤਿਜਰਂ (ਸੀ. ਸ੍ਯਾ.), ਨ ਪੁਨ ਜਾਤਿਜ੍ਜਰਂ (ਕ.)] ਉਪੇਹਿਸਿ.

ਅਨੁਪੁਬ੍ਬੇਨ ਮੇਧਾਵੀ, ਥੋਕਂ ਥੋਕਂ ਖਣੇ ਖਣੇ;

ਕਮ੍ਮਾਰੋ ਰਜਤਸ੍ਸੇਵ, ਨਿਦ੍ਧਮੇ ਮਲਮਤ੍ਤਨੋ.

ਅਯਸਾਵ ਮਲਂ ਸਮੁਟ੍ਠਿਤਂ [ਸਮੁਟ੍ਠਾਯ (ਕ.)], ਤਤੁਟ੍ਠਾਯ [ਤਦੁਟ੍ਠਾਯ (ਸੀ. ਸ੍ਯਾ. ਪੀ.)] ਤਮੇਵ ਖਾਦਤਿ;

ਏਵਂ ਅਤਿਧੋਨਚਾਰਿਨਂ, ਸਾਨਿ ਕਮ੍ਮਾਨਿ [ਸਕਕਮ੍ਮਾਨਿ (ਸੀ. ਪੀ.)] ਨਯਨ੍ਤਿ ਦੁਗ੍ਗਤਿਂ.

ਅਸਜ੍ਝਾਯਮਲਾ ¶ ¶ ਮਨ੍ਤਾ, ਅਨੁਟ੍ਠਾਨਮਲਾ ਘਰਾ;

ਮਲਂ ਵਣ੍ਣਸ੍ਸ ਕੋਸਜ੍ਜਂ, ਪਮਾਦੋ ਰਕ੍ਖਤੋ ਮਲਂ.

ਮਲਿਤ੍ਥਿਯਾ ਦੁਚ੍ਚਰਿਤਂ, ਮਚ੍ਛੇਰਂ ਦਦਤੋ ਮਲਂ;

ਮਲਾ ਵੇ ਪਾਪਕਾ ਧਮ੍ਮਾ, ਅਸ੍ਮਿਂ ਲੋਕੇ ਪਰਮ੍ਹਿ ਚ.

ਤਤੋ ਮਲਾ ਮਲਤਰਂ, ਅਵਿਜ੍ਜਾ ਪਰਮਂ ਮਲਂ;

ਏਤਂ ਮਲਂ ਪਹਨ੍ਤ੍ਵਾਨ, ਨਿਮ੍ਮਲਾ ਹੋਥ ਭਿਕ੍ਖਵੋ.

ਸੁਜੀਵਂ ¶ ਅਹਿਰਿਕੇਨ, ਕਾਕਸੂਰੇਨ ਧਂਸਿਨਾ;

ਪਕ੍ਖਨ੍ਦਿਨਾ ਪਗਬ੍ਭੇਨ, ਸਂਕਿਲਿਟ੍ਠੇਨ ਜੀਵਿਤਂ.

ਹਿਰੀਮਤਾ ¶ ਚ ਦੁਜ੍ਜੀਵਂ, ਨਿਚ੍ਚਂ ਸੁਚਿਗਵੇਸਿਨਾ;

ਅਲੀਨੇਨਾਪ੍ਪਗਬ੍ਭੇਨ, ਸੁਦ੍ਧਾਜੀਵੇਨ ਪਸ੍ਸਤਾ.

ਯੋ ਪਾਣਮਤਿਪਾਤੇਤਿ, ਮੁਸਾਵਾਦਞ੍ਚ ਭਾਸਤਿ;

ਲੋਕੇ ਅਦਿਨ੍ਨਮਾਦਿਯਤਿ, ਪਰਦਾਰਞ੍ਚ ਗਚ੍ਛਤਿ.

ਸੁਰਾਮੇਰਯਪਾਨਞ੍ਚ, ਯੋ ਨਰੋ ਅਨੁਯੁਞ੍ਜਤਿ;

ਇਧੇਵਮੇਸੋ ਲੋਕਸ੍ਮਿਂ, ਮੂਲਂ ਖਣਤਿ ਅਤ੍ਤਨੋ.

ਏਵਂ ਭੋ ਪੁਰਿਸ ਜਾਨਾਹਿ, ਪਾਪਧਮ੍ਮਾ ਅਸਞ੍ਞਤਾ;

ਮਾ ਤਂ ਲੋਭੋ ਅਧਮ੍ਮੋ ਚ, ਚਿਰਂ ਦੁਕ੍ਖਾਯ ਰਨ੍ਧਯੁਂ.

ਦਦਾਤਿ ਵੇ ਯਥਾਸਦ੍ਧਂ, ਯਥਾਪਸਾਦਨਂ [ਯਤ੍ਥ ਪਸਾਦਨਂ (ਕਤ੍ਥਚਿ)] ਜਨੋ;

ਤਤ੍ਥ ਯੋ ਮਙ੍ਕੁ ਭਵਤਿ [ਤਤ੍ਥ ਚੇ ਮਂਕੁ ਯੋ ਹੋਤਿ (ਸੀ.), ਤਤ੍ਥ ਯੋ ਮਙ੍ਕੁਤੋ ਹੋਤਿ (ਸ੍ਯਾ.)], ਪਰੇਸਂ ਪਾਨਭੋਜਨੇ;

ਨ ਸੋ ਦਿਵਾ ਵਾ ਰਤ੍ਤਿਂ ਵਾ, ਸਮਾਧਿਮਧਿਗਚ੍ਛਤਿ.

ਯਸ੍ਸ ¶ ¶ ਚੇਤਂ ਸਮੁਚ੍ਛਿਨ੍ਨਂ, ਮੂਲਘਚ੍ਚਂ [ਮੂਲਘਚ੍ਛਂ (ਕ.)] ਸਮੂਹਤਂ;

ਸ ਵੇ ਦਿਵਾ ਵਾ ਰਤ੍ਤਿਂ ਵਾ, ਸਮਾਧਿਮਧਿਗਚ੍ਛਤਿ.

ਨਤ੍ਥਿ ਰਾਗਸਮੋ ਅਗ੍ਗਿ, ਨਤ੍ਥਿ ਦੋਸਸਮੋ ਗਹੋ;

ਨਤ੍ਥਿ ਮੋਹਸਮਂ ਜਾਲਂ, ਨਤ੍ਥਿ ਤਣ੍ਹਾਸਮਾ ਨਦੀ.

ਸੁਦਸ੍ਸਂ ਵਜ੍ਜਮਞ੍ਞੇਸਂ, ਅਤ੍ਤਨੋ ਪਨ ਦੁਦ੍ਦਸਂ;

ਪਰੇਸਂ ਹਿ ਸੋ ਵਜ੍ਜਾਨਿ, ਓਪੁਨਾਤਿ [ਓਫੁਨਾਤਿ (ਕ.)] ਯਥਾ ਭੁਸਂ;

ਅਤ੍ਤਨੋ ਪਨ ਛਾਦੇਤਿ, ਕਲਿਂਵ ਕਿਤਵਾ ਸਠੋ.

ਪਰਵਜ੍ਜਾਨੁਪਸ੍ਸਿਸ੍ਸ ¶ , ¶ ਨਿਚ੍ਚਂ ਉਜ੍ਝਾਨਸਞ੍ਞਿਨੋ;

ਆਸਵਾ ਤਸ੍ਸ ਵਡ੍ਢਨ੍ਤਿ, ਆਰਾ ਸੋ ਆਸਵਕ੍ਖਯਾ.

ਆਕਾਸੇਵ ਪਦਂ ਨਤ੍ਥਿ, ਸਮਣੋ ਨਤ੍ਥਿ ਬਾਹਿਰੇ;

ਪਪਞ੍ਚਾਭਿਰਤਾ ਪਜਾ, ਨਿਪ੍ਪਪਞ੍ਚਾ ਤਥਾਗਤਾ.

ਆਕਾਸੇਵ ਪਦਂ ਨਤ੍ਥਿ, ਸਮਣੋ ਨਤ੍ਥਿ ਬਾਹਿਰੇ;

ਸਙ੍ਖਾਰਾ ਸਸ੍ਸਤਾ ਨਤ੍ਥਿ, ਨਤ੍ਥਿ ਬੁਦ੍ਧਾਨਮਿਞ੍ਜਿਤਂ.

ਨ ¶ ਤੇਨ ਹੋਤਿ ਧਮ੍ਮਟ੍ਠੋ, ਯੇਨਤ੍ਥਂ ਸਾਹਸਾ [ਸਹਸਾ (ਸੀ. ਸ੍ਯਾ. ਕ.)] ਨਯੇ;

ਯੋ ਚ ਅਤ੍ਥਂ ਅਨਤ੍ਥਞ੍ਚ, ਉਭੋ ਨਿਚ੍ਛੇਯ੍ਯ ਪਣ੍ਡਿਤੋ.

ਅਸਾਹਸੇਨ ¶ ਧਮ੍ਮੇਨ, ਸਮੇਨ ਨਯਤੀ ਪਰੇ;

ਧਮ੍ਮਸ੍ਸ ਗੁਤ੍ਤੋ ਮੇਧਾਵੀ, ‘‘ਧਮ੍ਮਟ੍ਠੋ’’ਤਿ ਪਵੁਚ੍ਚਤਿ.

ਨ ਤੇਨ ਪਣ੍ਡਿਤੋ ਹੋਤਿ, ਯਾਵਤਾ ਬਹੁ ਭਾਸਤਿ;

ਖੇਮੀ ਅਵੇਰੀ ਅਭਯੋ, ‘‘ਪਣ੍ਡਿਤੋ’’ਤਿ ਪਵੁਚ੍ਚਤਿ.

ਨ ਤਾਵਤਾ ਧਮ੍ਮਧਰੋ, ਯਾਵਤਾ ਬਹੁ ਭਾਸਤਿ;

ਯੋ ਚ ਅਪ੍ਪਮ੍ਪਿ ਸੁਤ੍ਵਾਨ, ਧਮ੍ਮਂ ਕਾਯੇਨ ਪਸ੍ਸਤਿ;

ਸ ਵੇ ਧਮ੍ਮਧਰੋ ਹੋਤਿ, ਯੋ ਧਮ੍ਮਂ ਨਪ੍ਪਮਜ੍ਜਤਿ.

ਨ ¶ ਤੇਨ ਥੇਰੋ ਸੋ ਹੋਤਿ [ਥੇਰੋ ਹੋਤਿ (ਸੀ. ਸ੍ਯਾ.)], ਯੇਨਸ੍ਸ ਪਲਿਤਂ ਸਿਰੋ;

ਪਰਿਪਕ੍ਕੋ ¶ ਵਯੋ ਤਸ੍ਸ, ‘‘ਮੋਘਜਿਣ੍ਣੋ’’ਤਿ ਵੁਚ੍ਚਤਿ.

ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਸ ਵੇ ਵਨ੍ਤਮਲੋ ਧੀਰੋ, ‘‘ਥੇਰੋ’’ ਇਤਿ [ਸੋ ਥੇਰੋਤਿ (ਸ੍ਯਾ. ਕ.)] ਪਵੁਚ੍ਚਤਿ.

ਨ ਵਾਕ੍ਕਰਣਮਤ੍ਤੇਨ, ਵਣ੍ਣਪੋਕ੍ਖਰਤਾਯ ਵਾ;

ਸਾਧੁਰੂਪੋ ਨਰੋ ਹੋਤਿ, ਇਸ੍ਸੁਕੀ ਮਚ੍ਛਰੀ ਸਠੋ.

ਯਸ੍ਸ ਚੇਤਂ ਸਮੁਚ੍ਛਿਨ੍ਨਂ, ਮੂਲਘਚ੍ਚਂ ਸਮੂਹਤਂ;

ਸ ਵਨ੍ਤਦੋਸੋ ਮੇਧਾਵੀ, ‘‘ਸਾਧੁਰੂਪੋ’’ਤਿ ਵੁਚ੍ਚਤਿ.

ਨ ਮੁਣ੍ਡਕੇਨ ਸਮਣੋ, ਅਬ੍ਬਤੋ ਅਲਿਕਂ ਭਣਂ;

ਇਚ੍ਛਾਲੋਭਸਮਾਪਨ੍ਨੋ, ਸਮਣੋ ਕਿਂ ਭਵਿਸ੍ਸਤਿ.

ਯੋ ¶ ਚ ਸਮੇਤਿ ਪਾਪਾਨਿ, ਅਣੁਂ ਥੂਲਾਨਿ ਸਬ੍ਬਸੋ;

ਸਮਿਤਤ੍ਤਾ ਹਿ ਪਾਪਾਨਂ, ‘‘ਸਮਣੋ’’ਤਿ ਪਵੁਚ੍ਚਤਿ.

ਨ ¶ ਤੇਨ ਭਿਕ੍ਖੁ ਸੋ ਹੋਤਿ, ਯਾਵਤਾ ਭਿਕ੍ਖਤੇ ਪਰੇ;

ਵਿਸ੍ਸਂ ਧਮ੍ਮਂ ਸਮਾਦਾਯ, ਭਿਕ੍ਖੁ ਹੋਤਿ ਨ ਤਾਵਤਾ.

ਯੋਧ ਪੁਞ੍ਞਞ੍ਚ ਪਾਪਞ੍ਚ, ਬਾਹੇਤ੍ਵਾ ਬ੍ਰਹ੍ਮਚਰਿਯਵਾ [ਬ੍ਰਹ੍ਮਚਰਿਯਂ (ਕ.)];

ਸਙ੍ਖਾਯ ਲੋਕੇ ਚਰਤਿ, ਸ ਵੇ ‘‘ਭਿਕ੍ਖੂ’’ਤਿ ਵੁਚ੍ਚਤਿ.

ਨ ਮੋਨੇਨ ਮੁਨੀ ਹੋਤਿ, ਮੂਲ਼੍ਹਰੂਪੋ ਅਵਿਦ੍ਦਸੁ;

ਯੋ ਚ ਤੁਲਂਵ ਪਗ੍ਗਯ੍ਹ, ਵਰਮਾਦਾਯ ਪਣ੍ਡਿਤੋ.

ਪਾਪਾਨਿ ¶ ਪਰਿਵਜ੍ਜੇਤਿ, ਸ ਮੁਨੀ ਤੇਨ ਸੋ ਮੁਨਿ;

ਯੋ ਮੁਨਾਤਿ ਉਭੋ ਲੋਕੇ, ‘‘ਮੁਨਿ’’ ਤੇਨ ਪਵੁਚ੍ਚਤਿ.

ਨ ਤੇਨ ਅਰਿਯੋ ਹੋਤਿ, ਯੇਨ ਪਾਣਾਨਿ ਹਿਂਸਤਿ;

ਅਹਿਂਸਾ ¶ ਸਬ੍ਬਪਾਣਾਨਂ, ‘‘ਅਰਿਯੋ’’ਤਿ ਪਵੁਚ੍ਚਤਿ.

ਨ ਸੀਲਬ੍ਬਤਮਤ੍ਤੇਨ, ਬਾਹੁਸਚ੍ਚੇਨ ਵਾ ਪਨ;

ਅਥ ਵਾ ਸਮਾਧਿਲਾਭੇਨ, ਵਿਵਿਤ੍ਤਸਯਨੇਨ ਵਾ.

ਫੁਸਾਮਿ ਨੇਕ੍ਖਮ੍ਮਸੁਖਂ, ਅਪੁਥੁਜ੍ਜਨਸੇਵਿਤਂ;

ਭਿਕ੍ਖੁ ਵਿਸ੍ਸਾਸਮਾਪਾਦਿ, ਅਪ੍ਪਤ੍ਤੋ ਆਸਵਕ੍ਖਯਂ.

ਧਮ੍ਮਟ੍ਠਵਗ੍ਗੋ ਏਕੂਨਵੀਸਤਿਮੋ ਨਿਟ੍ਠਿਤੋ.

ਮਗ੍ਗਾਨਟ੍ਠਙ੍ਗਿਕੋ ¶ ¶ ਸੇਟ੍ਠੋ, ਸਚ੍ਚਾਨਂ ਚਤੁਰੋ ਪਦਾ;

ਵਿਰਾਗੋ ਸੇਟ੍ਠੋ ਧਮ੍ਮਾਨਂ, ਦ੍ਵਿਪਦਾਨਞ੍ਚ ਚਕ੍ਖੁਮਾ.

ਏਸੇਵ [ਏਸੋਵ (ਸੀ. ਪੀ.)] ਮਗ੍ਗੋ ਨਤ੍ਥਞ੍ਞੋ, ਦਸ੍ਸਨਸ੍ਸ ਵਿਸੁਦ੍ਧਿਯਾ;

ਏਤਞ੍ਹਿ ਤੁਮ੍ਹੇ ਪਟਿਪਜ੍ਜਥ, ਮਾਰਸ੍ਸੇਤਂ ਪਮੋਹਨਂ.

ਏਤਞ੍ਹਿ ਤੁਮ੍ਹੇ ਪਟਿਪਨ੍ਨਾ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥ;

ਅਕ੍ਖਾਤੋ ਵੋ [ਅਕ੍ਖਾਤੋ ਵੇ (ਸੀ. ਪੀ.)] ਮਯਾ ਮਗ੍ਗੋ, ਅਞ੍ਞਾਯ ਸਲ੍ਲਕਨ੍ਤਨਂ [ਸਲ੍ਲਸਨ੍ਥਨਂ (ਸੀ. ਪੀ.), ਸਲ੍ਲਸਤ੍ਥਨਂ (ਸ੍ਯਾ.)].

ਤੁਮ੍ਹੇਹਿ ਕਿਚ੍ਚਮਾਤਪ੍ਪਂ, ਅਕ੍ਖਾਤਾਰੋ ਤਥਾਗਤਾ;

ਪਟਿਪਨ੍ਨਾ ਪਮੋਕ੍ਖਨ੍ਤਿ, ਝਾਯਿਨੋ ਮਾਰਬਨ੍ਧਨਾ.

‘‘ਸਬ੍ਬੇ ¶ ਸਙ੍ਖਾਰਾ ਅਨਿਚ੍ਚਾ’’ਤਿ, ਯਦਾ ਪਞ੍ਞਾਯ ਪਸ੍ਸਤਿ;

ਅਥ ¶ ਨਿਬ੍ਬਿਨ੍ਦਤਿ ਦੁਕ੍ਖੇ, ਏਸ ਮਗ੍ਗੋ ਵਿਸੁਦ੍ਧਿਯਾ.

‘‘ਸਬ੍ਬੇ ਸਙ੍ਖਾਰਾ ਦੁਕ੍ਖਾ’’ਤਿ, ਯਦਾ ਪਞ੍ਞਾਯ ਪਸ੍ਸਤਿ;

ਅਥ ਨਿਬ੍ਬਿਨ੍ਦਤਿ ਦੁਕ੍ਖੇ, ਏਸ ਮਗ੍ਗੋ ਵਿਸੁਦ੍ਧਿਯਾ.

‘‘ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ, ਯਦਾ ਪਞ੍ਞਾਯ ਪਸ੍ਸਤਿ;

ਅਥ ਨਿਬ੍ਬਿਨ੍ਦਤਿ ਦੁਕ੍ਖੇ, ਏਸ ਮਗ੍ਗੋ ਵਿਸੁਦ੍ਧਿਯਾ.

ਉਟ੍ਠਾਨਕਾਲਮ੍ਹਿ ਅਨੁਟ੍ਠਹਾਨੋ, ਯੁਵਾ ਬਲੀ ਆਲਸਿਯਂ ਉਪੇਤੋ;

ਸਂਸਨ੍ਨਸਙ੍ਕਪ੍ਪਮਨੋ [ਅਸਮ੍ਪਨ੍ਨਸਙ੍ਕਪ੍ਪਮਨੋ (ਕ.)] ਕੁਸੀਤੋ, ਪਞ੍ਞਾਯ ਮਗ੍ਗਂ ਅਲਸੋ ਨ ਵਿਨ੍ਦਤਿ.

ਵਾਚਾਨੁਰਕ੍ਖੀ ¶ ¶ ਮਨਸਾ ਸੁਸਂਵੁਤੋ, ਕਾਯੇਨ ਚ ਨਾਕੁਸਲਂ ਕਯਿਰਾ [ਅਕੁਸਲਂ ਨ ਕਯਿਰਾ (ਸੀ. ਸ੍ਯਾ. ਕਂ. ਪੀ.)];

ਏਤੇ ਤਯੋ ਕਮ੍ਮਪਥੇ ਵਿਸੋਧਯੇ, ਆਰਾਧਯੇ ਮਗ੍ਗਮਿਸਿਪ੍ਪਵੇਦਿਤਂ.

ਯੋਗਾ ਵੇ ਜਾਯਤੀ [ਜਾਯਤੇ (ਕਤ੍ਥਚਿ)] ਭੂਰਿ, ਅਯੋਗਾ ਭੂਰਿਸਙ੍ਖਯੋ;

ਏਤਂ ਦ੍ਵੇਧਾਪਥਂ ਞਤ੍ਵਾ, ਭਵਾਯ ਵਿਭਵਾਯ ਚ;

ਤਥਾਤ੍ਤਾਨਂ ਨਿਵੇਸੇਯ੍ਯ, ਯਥਾ ਭੂਰਿ ਪਵਡ੍ਢਤਿ.

ਵਨਂ ¶ ਛਿਨ੍ਦਥ ਮਾ ਰੁਕ੍ਖਂ, ਵਨਤੋ ਜਾਯਤੇ ਭਯਂ;

ਛੇਤ੍ਵਾ ਵਨਞ੍ਚ ਵਨਥਞ੍ਚ, ਨਿਬ੍ਬਨਾ ਹੋਥ ਭਿਕ੍ਖਵੋ.

ਯਾਵ ਹਿ ਵਨਥੋ ਨ ਛਿਜ੍ਜਤਿ, ਅਣੁਮਤ੍ਤੋਪਿ ਨਰਸ੍ਸ ਨਾਰਿਸੁ;

ਪਟਿਬਦ੍ਧਮਨੋਵ [ਪਟਿਬਨ੍ਧਮਨੋਵ (ਕ.)] ਤਾਵ ਸੋ, ਵਚ੍ਛੋ ਖੀਰਪਕੋਵ [ਖੀਰਪਾਨੋਵ (ਪੀ.)] ਮਾਤਰਿ.

ਉਚ੍ਛਿਨ੍ਦ ¶ ਸਿਨੇਹਮਤ੍ਤਨੋ ਕੁਮੁਦਂ ਸਾਰਦਿਕਂਵ [ਪਾਣਿਨਾ];

ਸਨ੍ਤਿਮਗ੍ਗਮੇਵ ਬ੍ਰੂਹਯ, ਨਿਬ੍ਬਾਨਂ ਸੁਗਤੇਨ ਦੇਸਿਤਂ.

ਇਧ ਵਸ੍ਸਂ ਵਸਿਸ੍ਸਾਮਿ, ਇਧ ਹੇਮਨ੍ਤਗਿਮ੍ਹਿਸੁ;

ਇਤਿ ਬਾਲੋ ਵਿਚਿਨ੍ਤੇਤਿ, ਅਨ੍ਤਰਾਯਂ ਨ ਬੁਜ੍ਝਤਿ.

ਤਂ ਪੁਤ੍ਤਪਸੁਸਮ੍ਮਤ੍ਤਂ, ਬ੍ਯਾਸਤ੍ਤਮਨਸਂ ਨਰਂ;

ਸੁਤ੍ਤਂ ਗਾਮਂ ਮਹੋਘੋਵ, ਮਚ੍ਚੁ ਆਦਾਯ ਗਚ੍ਛਤਿ.

ਨ ¶ ਸਨ੍ਤਿ ਪੁਤ੍ਤਾ ਤਾਣਾਯ, ਨ ਪਿਤਾ ਨਾਪਿ ਬਨ੍ਧਵਾ;

ਅਨ੍ਤਕੇਨਾਧਿਪਨ੍ਨਸ੍ਸ, ਨਤ੍ਥਿ ਞਾਤੀਸੁ ਤਾਣਤਾ.

ਏਤਮਤ੍ਥਵਸਂ ਞਤ੍ਵਾ, ਪਣ੍ਡਿਤੋ ਸੀਲਸਂਵੁਤੋ;

ਨਿਬ੍ਬਾਨਗਮਨਂ ਮਗ੍ਗਂ, ਖਿਪ੍ਪਮੇਵ ਵਿਸੋਧਯੇ.

ਮਤ੍ਤਾਸੁਖਪਰਿਚ੍ਚਾਗਾ ¶ ¶ , ਪਸ੍ਸੇ ਚੇ ਵਿਪੁਲਂ ਸੁਖਂ;

ਚਜੇ ਮਤ੍ਤਾਸੁਖਂ ਧੀਰੋ, ਸਮ੍ਪਸ੍ਸਂ ਵਿਪੁਲਂ ਸੁਖਂ.

ਪਰਦੁਕ੍ਖੂਪਧਾਨੇਨ, ਅਤ੍ਤਨੋ [ਯੋ ਅਤ੍ਤਨੋ (ਸ੍ਯਾ. ਪੀ. ਕ.)] ਸੁਖਮਿਚ੍ਛਤਿ;

ਵੇਰਸਂਸਗ੍ਗਸਂਸਟ੍ਠੋ, ਵੇਰਾ ਸੋ ਨ ਪਰਿਮੁਚ੍ਚਤਿ.

ਯਞ੍ਹਿ ¶ ਕਿਚ੍ਚਂ ਅਪਵਿਦ੍ਧਂ [ਤਦਪਵਿਦ੍ਧਂ (ਸੀ. ਸ੍ਯਾ.)], ਅਕਿਚ੍ਚਂ ਪਨ ਕਯਿਰਤਿ;

ਉਨ੍ਨਲ਼ਾਨਂ ਪਮਤ੍ਤਾਨਂ, ਤੇਸਂ ਵਡ੍ਢਨ੍ਤਿ ਆਸਵਾ.

ਯੇਸਞ੍ਚ ਸੁਸਮਾਰਦ੍ਧਾ, ਨਿਚ੍ਚਂ ਕਾਯਗਤਾ ਸਤਿ;

ਅਕਿਚ੍ਚਂ ਤੇ ਨ ਸੇਵਨ੍ਤਿ, ਕਿਚ੍ਚੇ ਸਾਤਚ੍ਚਕਾਰਿਨੋ;

ਸਤਾਨਂ ਸਮ੍ਪਜਾਨਾਨਂ, ਅਤ੍ਥਂ ਗਚ੍ਛਨ੍ਤਿ ਆਸਵਾ.

ਮਾਤਰਂ ¶ ਪਿਤਰਂ ਹਨ੍ਤ੍ਵਾ, ਰਾਜਾਨੋ ਦ੍ਵੇ ਚ ਖਤ੍ਤਿਯੇ;

ਰਟ੍ਠਂ ਸਾਨੁਚਰਂ ਹਨ੍ਤ੍ਵਾ, ਅਨੀਘੋ ਯਾਤਿ ਬ੍ਰਾਹ੍ਮਣੋ.

ਮਾਤਰਂ ਪਿਤਰਂ ਹਨ੍ਤ੍ਵਾ, ਰਾਜਾਨੋ ਦ੍ਵੇ ਚ ਸੋਤ੍ਥਿਯੇ;

ਵੇਯਗ੍ਘਪਞ੍ਚਮਂ ਹਨ੍ਤ੍ਵਾ, ਅਨੀਘੋ ਯਾਤਿ ਬ੍ਰਾਹ੍ਮਣੋ.